𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁪. 𑀘𑀢𑀼𑀢𑁆𑀣𑀏𑀢𑀤𑀕𑁆𑀕𑀯𑀕𑁆𑀕𑁄

𑀆𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁯-𑁨𑁨𑁩. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀩𑀳𑀼𑀲𑁆𑀲𑀼𑀢𑀸𑀦𑀦𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑁂𑀧𑀺 𑀣𑁂𑀭𑀸 𑀩𑀳𑀼𑀲𑁆𑀲𑀼𑀢𑀸 𑀲𑀢𑀺𑀫𑀦𑁆𑀢𑀸 𑀕𑀢𑀺𑀫𑀦𑁆𑀢𑀸 𑀥𑀺𑀢𑀺𑀫𑀦𑁆𑀢𑀸 𑀉𑀧𑀝𑁆𑀞𑀸𑀓𑀸 𑀘 𑀅𑀢𑁆𑀣𑀺. 𑀅𑀬𑀁 𑀧𑀦𑀸𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑀁 𑀞𑀢𑁆𑀯𑀸 𑀕𑀡𑁆𑀳𑀺. 𑀢𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀇𑀫𑀲𑁆𑀲𑁂𑀯 𑀘 𑀣𑁂𑀭𑀲𑁆𑀲 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑁆𑀯𑀸 𑀥𑀸𑀭𑀡𑀓𑀲𑀢𑀺 𑀅𑀜𑁆𑀜𑁂𑀳𑀺 𑀣𑁂𑀭𑁂𑀳𑀺 𑀩𑀮𑀯𑀢𑀭𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀅𑀬𑀫𑁂𑀯 𑀘𑀸𑀬𑀲𑁆𑀫𑀸 𑀏𑀓𑀧𑀤𑁂 𑀞𑀢𑁆𑀯𑀸 𑀲𑀝𑁆𑀞𑀺 𑀧𑀤𑀲𑀳𑀲𑁆𑀲𑀸𑀦𑀺 𑀕𑀡𑁆𑀳𑀦𑁆𑀢𑁄 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀲𑀩𑁆𑀩𑀧𑀤𑀸𑀦𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀕𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑀲𑁆𑀲𑁂𑀯 𑀘𑀸𑀬𑀲𑁆𑀫𑀢𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀁 𑀲𑀚𑁆𑀛𑀸𑀬𑀦𑀯𑀻𑀭𑀺𑀬𑀜𑁆𑀘 𑀥𑀸𑀭𑀡𑀯𑀻𑀭𑀺𑀬𑀜𑁆𑀘 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀯𑀻𑀭𑀺𑀬𑀜𑁆𑀘 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀥𑀺𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀦𑁆𑀢𑁄 𑀘𑁂𑀲 𑀦 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀓𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦 𑀉𑀧𑀝𑁆𑀞𑀳𑀺, 𑀅𑀜𑁆𑀜𑁂 𑀳𑀺 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀦𑁆𑀢𑀸 𑀦 𑀘𑀺𑀭𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀦 𑀘 𑀩𑀼𑀤𑁆𑀥𑀸𑀦𑀁 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀅𑀬𑀁 𑀣𑁂𑀭𑁄 𑀧𑀦 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺. 𑀢𑀲𑁆𑀫𑀸 𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀇𑀢𑁄 𑀓𑀺𑀭 𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀓𑀧𑁆𑀧𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲 𑀳𑀁𑀲𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀦𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀫𑁂𑀥𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀧𑀼𑀢𑁆𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀧𑀣𑀯𑀺𑀬𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀤𑀁 𑀅𑀪𑀺𑀦𑀻𑀳𑀭𑀺. 𑀅𑀣 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀧𑀤𑀼𑀫𑀁 𑀉𑀝𑁆𑀞𑀸𑀲𑀺. 𑀢𑀤𑀼𑀧𑀸𑀤𑀸𑀬 𑀪𑀕𑀯𑀸 𑀧𑀤𑀼𑀫𑀼𑀢𑁆𑀢𑀭𑁄𑀢𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲 𑀤𑁂𑀯𑀮𑁄 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀳𑁂𑀲𑀼𑀁, 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀼𑀫𑀦𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄. 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀧𑀺𑀢𑀼 𑀲𑀗𑁆𑀕𑀳𑀁 𑀓𑀼𑀭𑀼𑀫𑀸𑀦𑁄 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀁𑀲𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀯𑀲𑀢𑀺.

𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀲𑀼𑀫𑀦𑀓𑀼𑀫𑀸𑀭𑁄 𑀦𑀸𑀫. 𑀢𑀲𑁆𑀲 𑀭𑀸𑀚𑀸 𑀳𑀁𑀲𑀯𑀢𑀺𑀢𑁄 𑀯𑀻𑀲𑀬𑁄𑀚𑀦𑀲𑀢𑁂 𑀪𑁄𑀕𑀕𑀸𑀫𑀁 𑀅𑀤𑀸𑀲𑀺. 𑀲𑁄 𑀓𑀤𑀸𑀘𑀺 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀧𑀺𑀢𑀭𑀜𑁆𑀘 𑀲𑀢𑁆𑀣𑀸𑀭𑀜𑁆𑀘 𑀧𑀲𑁆𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄 𑀲𑀼𑀫𑀦𑁄 𑀭𑀜𑁆𑀜𑁄 𑀧𑁂𑀲𑁂𑀲𑀺. 𑀭𑀸𑀚𑀸 ‘‘𑀢𑁆𑀯𑀁 𑀫𑀬𑀸 𑀢𑀢𑁆𑀣 𑀓𑀲𑁆𑀫𑀸 𑀞𑀧𑀺𑀢𑁄’’𑀢𑀺 𑀧𑀝𑀺𑀧𑁂𑀲𑁂𑀲𑀺. 𑀲𑁄 𑀘𑁄𑀭𑁂 𑀯𑀽𑀧𑀲𑀫𑁂𑀢𑁆𑀯𑀸 ‘‘𑀉𑀧𑀲𑀦𑁆𑀢𑁄, 𑀤𑁂𑀯, 𑀚𑀦𑀧𑀤𑁄’’𑀢𑀺 𑀭𑀜𑁆𑀜𑁄 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 ‘‘𑀲𑀻𑀖𑀁 𑀫𑀫 𑀧𑀼𑀢𑁆𑀢𑁄 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑀲𑁆𑀲 𑀲𑀳𑀲𑁆𑀲𑀫𑀢𑁆𑀢𑀸 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀺𑀢𑀸 𑀢𑀼𑀝𑁆𑀞𑁄 𑀲𑀘𑁂 𑀫𑁂 𑀯𑀭𑀁 𑀤𑁂𑀢𑀺, 𑀓𑀺𑀁 𑀕𑀡𑁆𑀳𑀸𑀫𑀻’’𑀢𑀺? 𑀅𑀣 𑀦𑀁 𑀏𑀓𑀘𑁆𑀘𑁂 ‘‘𑀳𑀢𑁆𑀣𑀺𑀁 𑀕𑀡𑁆𑀳𑀣, 𑀅𑀲𑁆𑀲𑀁 𑀕𑀡𑁆𑀳𑀣, 𑀚𑀦𑀧𑀤𑀁 𑀕𑀡𑁆𑀳𑀣, 𑀲𑀢𑁆𑀢 𑀭𑀢𑀦𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀅𑀧𑀭𑁂 ‘‘𑀢𑀼𑀫𑁆𑀳𑁂 𑀧𑀣𑀯𑀺𑀲𑁆𑀲𑀭𑀲𑁆𑀲 𑀧𑀼𑀢𑁆𑀢𑀸, 𑀦 𑀢𑀼𑀫𑁆𑀳𑀸𑀓𑀁 𑀥𑀦𑀁 𑀤𑀼𑀮𑁆𑀮𑀪𑀁, 𑀮𑀤𑁆𑀥𑀫𑁆𑀧𑀺 𑀘𑁂𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀧𑀼𑀜𑁆𑀜𑀫𑁂𑀯 𑀏𑀓𑀁 𑀆𑀤𑀸𑀬 𑀕𑀫𑀦𑀻𑀬𑀁. 𑀢𑀲𑁆𑀫𑀸 𑀤𑁂𑀯𑁂 𑀯𑀭𑀁 𑀤𑀤𑀫𑀸𑀦𑁂 𑀢𑁂𑀫𑀸𑀲𑀁 𑀧𑀤𑀼𑀫𑀼𑀢𑁆𑀢𑀭𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀯𑀭𑀁 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 ‘‘𑀢𑀼𑀫𑁆𑀳𑁂 𑀫𑀬𑁆𑀳𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸, 𑀦 𑀫𑁂𑀢𑀁 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀉𑀧𑁆𑀧𑀸𑀤𑀺𑀢𑀁, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀺𑀢𑀭𑀸 𑀆𑀮𑀺𑀗𑁆𑀕𑁂𑀢𑁆𑀯𑀸 𑀫𑀢𑁆𑀣𑀓𑁂 𑀘𑀼𑀫𑁆𑀩𑁂𑀢𑁆𑀯𑀸 ‘‘𑀯𑀭𑀁 𑀢𑁂 𑀧𑀼𑀢𑁆𑀢 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀇𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 𑀚𑀻𑀯𑀺𑀢𑀁 𑀅𑀯𑀜𑁆𑀛𑀁 𑀓𑀸𑀢𑀼𑀁, 𑀇𑀫𑀁 𑀫𑁂 𑀤𑁂𑀯 𑀯𑀭𑀁 𑀤𑁂𑀳𑀻’’𑀢𑀺 𑀆𑀳. 𑀦 𑀲𑀓𑁆𑀓𑀸, 𑀢𑀸𑀢, 𑀅𑀜𑁆𑀜𑀁 𑀯𑀭𑁂𑀳𑀻𑀢𑀺. 𑀤𑁂𑀯, 𑀔𑀢𑁆𑀢𑀺𑀬𑀸𑀦𑀁 𑀦𑀸𑀫 𑀤𑁆𑀯𑁂 𑀓𑀣𑀸 𑀦𑀢𑁆𑀣𑀺, 𑀏𑀢𑀤𑁂𑀯 𑀫𑁂 𑀯𑀭𑀁 𑀤𑁂𑀳𑀺, 𑀦 𑀫𑀫 𑀅𑀜𑁆𑀜𑁂𑀦 𑀅𑀢𑁆𑀣𑁄𑀢𑀺. 𑀢𑀸𑀢, 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀘𑀺𑀢𑁆𑀢𑀁 𑀤𑀼𑀚𑁆𑀚𑀸𑀦𑀁, 𑀲𑀘𑁂 𑀪𑀕𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺, 𑀫𑀬𑀸 𑀤𑀺𑀦𑁆𑀦𑁂𑀧𑀺 𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺? ‘‘𑀲𑀸𑀥𑀼, 𑀤𑁂𑀯, 𑀅𑀳𑀁 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄.

𑀢𑁂𑀦 𑀘 𑀲𑀫𑀬𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺, 𑀲𑁄 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀦𑀁 𑀆𑀳𑀁𑀲𑀼 𑁋 ‘‘𑀭𑀸𑀚𑀧𑀼𑀢𑁆𑀢, 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢𑀦𑁆𑀢𑀺. 𑀦 𑀫𑀬𑀁, 𑀭𑀸𑀚𑀧𑀼𑀢𑁆𑀢, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸𑀢𑀺. 𑀓𑁄 𑀧𑀦, 𑀪𑀦𑁆𑀢𑁂, 𑀮𑀪𑀢𑀻𑀢𑀺? 𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑀸𑀢𑀺. 𑀲𑁄 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀣𑁂𑀭𑁄’’𑀢𑀺? 𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑀼𑀁, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢’’𑀦𑁆𑀢𑀺 𑀆𑀳. 𑀣𑁂𑀭𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀭𑀸𑀚𑀓𑀼𑀫𑀸𑀭𑀲𑁆𑀲 𑀆𑀧𑁄𑀓𑀲𑀺𑀡𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀉𑀤𑀓𑀁 𑀅𑀥𑀺𑀝𑁆𑀞𑀸𑀬 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀢𑁆𑀣𑀼 𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀦𑀁 𑀪𑀕𑀯𑀸 ‘‘𑀲𑀼𑀫𑀦 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀆𑀳. 𑀭𑀸𑀚𑀧𑀼𑀢𑁆𑀢𑁄, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄𑀢𑀺. 𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀆𑀲𑀦𑀁 𑀧𑀜𑁆𑀜𑀸𑀧𑁂𑀳𑀻𑀢𑀺. 𑀧𑀼𑀦 𑀣𑁂𑀭𑁄 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀭𑀸𑀚𑀓𑀼𑀫𑀸𑀭𑀲𑁆𑀲 𑀩𑀼𑀤𑁆𑀥𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀩𑀳𑀺𑀧𑀭𑀺𑀯𑁂𑀡𑁂 𑀧𑀸𑀢𑀼𑀪𑀯𑀺𑀢𑁆𑀯𑀸 𑀧𑀭𑀺𑀯𑁂𑀡𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀭𑀸𑀚𑀓𑀼𑀫𑀸𑀭𑁄 𑀇𑀫𑀸𑀦𑀺 𑀤𑁆𑀯𑁂 𑀅𑀘𑁆𑀙𑀭𑀺𑀬𑀸𑀓𑀸𑀭𑀸𑀦𑀺 𑀤𑀺𑀲𑁆𑀯𑀸 ‘‘𑀫𑀳𑀦𑁆𑀢𑁄 𑀯𑀢𑀸𑀬𑀁 𑀪𑀺𑀓𑁆𑀔𑀽’’𑀢𑀺 𑀘𑀺𑀦𑁆𑀢𑁂𑀲𑀺.

𑀪𑀕𑀯𑀸𑀧𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀭𑀸𑀚𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺. ‘‘𑀓𑀤𑀸 𑀆𑀕𑀢𑁄𑀲𑀺 𑀭𑀸𑀚𑀧𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂𑀲𑀼, 𑀪𑀺𑀓𑁆𑀔𑀽 𑀧𑀦 ‘𑀦 𑀫𑀬𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸’𑀢𑀺 𑀫𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀳𑁂𑀲𑀼𑀁. 𑀣𑁂𑀭𑁄 𑀧𑀦 𑀏𑀓𑀯𑀘𑀦𑁂𑀦𑁂𑀯 𑀤𑀲𑁆𑀲𑁂𑀢𑀺, 𑀣𑁂𑀭𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀯𑀮𑁆𑀮𑀪𑁄 𑀫𑀜𑁆𑀜𑁂’’𑀢𑀺. 𑀆𑀫 𑀭𑀸𑀚𑀓𑀼𑀫𑀸𑀭, 𑀯𑀮𑁆𑀮𑀪𑁄 𑀏𑀲 𑀪𑀺𑀓𑁆𑀔𑀼 𑀫𑀬𑁆𑀳𑀁 𑀲𑀸𑀲𑀦𑁂𑀢𑀺. 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀓𑀺𑀁 𑀓𑀢𑁆𑀯𑀸 𑀯𑀮𑁆𑀮𑀪𑀸 𑀳𑁄𑀦𑁆𑀢𑀻𑀢𑀺? 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀓𑀼𑀫𑀸𑀭𑀸𑀢𑀺. 𑀪𑀕𑀯𑀸 𑀅𑀳𑀁 𑀣𑁂𑀭𑁄 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀳𑁄𑀢𑀼𑀓𑀸𑀫𑁄, 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀭𑀸𑀚𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀫𑀳𑀸𑀲𑀓𑁆𑀓𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀔𑀦𑁆𑀥𑀸𑀯𑀸𑀭𑀪𑀢𑁆𑀢𑀁 𑀦𑀸𑀫 𑀅𑀤𑀸𑀲𑀺.

𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, 𑀪𑀦𑁆𑀢𑁂, 𑀫𑀬𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀢𑁂𑀫𑀸𑀲𑀁 𑀅𑀦𑁆𑀢𑁄𑀯𑀲𑁆𑀲𑀁 𑀢𑀼𑀫𑁆𑀳𑀸𑀓𑀁 𑀧𑀝𑀺𑀚𑀕𑁆𑀕𑀦𑀯𑀭𑁄 𑀮𑀤𑁆𑀥𑁄, 𑀢𑁂𑀫𑀸𑀲𑀁 𑀫𑁂 𑀯𑀲𑁆𑀲𑀸𑀯𑀸𑀲𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀪𑀕𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄’’𑀢𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄, 𑀭𑀸𑀚𑀓𑀼𑀫𑀸𑀭, 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺 𑀯𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀫𑀺, 𑀫𑀬𑀸 𑀧𑁂𑀲𑀺𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀧𑀝𑀺𑀜𑁆𑀜𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑀺𑀦𑁆𑀦𑀸 𑀫𑁂, 𑀤𑁂𑀯, 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸, 𑀫𑀬𑀸 𑀧𑀳𑀺𑀢𑁂 𑀪𑀕𑀯𑀦𑁆𑀢𑀁 𑀧𑁂𑀲𑁂𑀬𑁆𑀬𑀣𑀸’’𑀢𑀺 𑀯𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀦𑁆𑀢𑁄 𑀯𑀻𑀲𑀬𑁄𑀚𑀦𑀲𑀢𑀁 𑀅𑀤𑁆𑀥𑀸𑀦𑀁 𑀕𑀢𑁄. 𑀕𑀦𑁆𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀦𑀕𑀭𑁂 𑀯𑀺𑀳𑀸𑀭𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑁄𑀪𑀦𑀦𑀸𑀫𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀉𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑁂𑀦 𑀓𑀺𑀡𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀲𑁂𑀲𑀪𑀺𑀓𑁆𑀔𑀽𑀦𑀜𑁆𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀢𑁆𑀣𑀸𑀬 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑁂 𑀓𑀸𑀭𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀜𑁆𑀘 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀦𑀺𑀝𑁆𑀞𑀺𑀢𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀳𑀺𑀡𑀣𑀸’’𑀢𑀺.

𑀭𑀸𑀚𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀢𑁆𑀯𑀸 ‘‘𑀪𑀕𑀯𑀸 𑀲𑀼𑀫𑀦𑀲𑁆𑀲 𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀢𑀼𑀫𑁆𑀳𑀸𑀓𑀁 𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀆𑀳. 𑀪𑀕𑀯𑀸 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑁂𑀲𑀼 𑀯𑀲𑀫𑀸𑀦𑁄 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑁋

‘‘𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁, 𑀲𑀢𑀲𑀳𑀲𑁆𑀲𑁂𑀦 𑀫𑀸𑀧𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁, 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑀻’’𑀢𑀺. 𑁋

𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀤𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀤𑀺𑀯𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂 𑀘 𑀅𑀫𑀘𑁆𑀘𑁂 𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀤𑀽𑀭𑀢𑁄𑀯 𑀆𑀕𑀢𑁄, 𑀩𑀼𑀤𑁆𑀥𑀸 𑀘 𑀦𑀸𑀫 𑀥𑀫𑁆𑀫𑀕𑀭𑀼𑀓𑀸 𑀦 𑀆𑀫𑀺𑀲𑀘𑀓𑁆𑀔𑀼𑀓𑀸. 𑀢𑀲𑁆𑀫𑀸 𑀅𑀳𑀁 𑀇𑀫𑀁 𑀢𑁂𑀫𑀸𑀲𑀁 𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑀲𑁆𑀲 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀢𑁂𑀫𑀸𑀲𑀁 𑀤𑀸𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺.

𑀲𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀪𑀸𑀕𑁂𑀬𑁂𑀯 𑀞𑀸𑀦𑁂 𑀯𑀲𑀦𑁆𑀢𑁄 𑀬𑀁 𑀣𑁂𑀭𑁄 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀭𑁄𑀢𑀺, 𑀢𑀁 𑀲𑀩𑁆𑀩𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀦𑁆𑀢𑀯𑀮𑁆𑀮𑀪𑁄 𑀏𑀲 𑀣𑁂𑀭𑁄, 𑀏𑀢𑀲𑁆𑀲𑁂𑀯 𑀫𑁂 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀧𑀸𑀤𑀫𑀽𑀮𑁂 𑀢𑀺𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀤𑁂𑀢𑀁 𑀫𑀬𑀸 𑀲𑀢𑁆𑀢𑀸𑀳𑀁 𑀔𑀦𑁆𑀥𑀸𑀯𑀸𑀭𑀤𑀸𑀦𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀁 𑀓𑀢𑀁, 𑀢𑀁 𑀦𑁂𑀯 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀩𑀼𑀤𑁆𑀥𑀲𑁆𑀲 𑀧𑀦 𑀉𑀧𑀝𑁆𑀞𑀸𑀓𑀪𑀸𑀯𑀁 𑀧𑀢𑁆𑀣𑁂𑀦𑁆𑀢𑁂𑀦 𑀓𑀢𑀁. 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀪𑀕𑀯𑀸 𑀅𑀦𑀸𑀕𑀢𑁂 𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀫𑀻’’𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀯𑀦𑁆𑀤𑀺. 𑀲𑀢𑁆𑀣𑀸 𑀢𑀲𑁆𑀲 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀓𑀼𑀫𑀸𑀭𑁄 𑀢𑀁 𑀲𑀼𑀢𑁆𑀯𑀸 ‘‘𑀩𑀼𑀤𑁆𑀥𑀸 𑀘 𑀦𑀸𑀫 𑀅𑀤𑁆𑀯𑁂𑀚𑁆𑀛𑀓𑀣𑀸 𑀳𑁄𑀦𑁆𑀢𑀻’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺.

𑀲𑁄 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀣𑁂𑀭𑀲𑁆𑀲 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀕𑀦𑁆𑀥𑀫𑀸𑀤𑀦𑀢𑁄 𑀆𑀓𑀸𑀲𑁂𑀦 𑀆𑀕𑀘𑁆𑀙𑀦𑁆𑀢𑁂 𑀅𑀝𑁆𑀞 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀤𑀺𑀲𑁆𑀯𑀸 𑀦𑀺𑀫𑀦𑁆𑀢𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀗𑁆𑀕𑀮𑀉𑀬𑁆𑀬𑀸𑀦𑁂 𑀢𑁂𑀲𑀁 𑀅𑀝𑁆𑀞 𑀧𑀡𑁆𑀡𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀦𑀺𑀲𑀻𑀤𑀦𑀢𑁆𑀣𑀸𑀬 𑀅𑀢𑁆𑀢𑀦𑁄 𑀦𑀺𑀯𑁂𑀲𑀦𑁂 𑀅𑀝𑁆𑀞 𑀲𑀩𑁆𑀩𑀭𑀢𑀦𑀫𑀬𑀸𑀦𑀺 𑀧𑀻𑀞𑀸𑀦𑀺 𑀘𑁂𑀯 𑀫𑀡𑀺𑀆𑀥𑀸𑀭𑀓𑁂 𑀘 𑀧𑀝𑀺𑀬𑀸𑀤𑁂𑀢𑁆𑀯𑀸 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀺.

𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀤𑀸𑀦𑀁 𑀤𑀤𑀫𑀸𑀦𑁄𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀣𑀲𑁆𑀲 𑀲𑀩𑁆𑀩𑁂𑀯 𑀜𑀸𑀢𑀓𑁂 𑀆𑀦𑀦𑁆𑀤𑀺𑀢𑁂 𑀧𑀫𑀼𑀤𑀺𑀢𑁂 𑀓𑀭𑁄𑀦𑁆𑀢𑁄 𑀚𑀸𑀢𑁄𑀢𑀺 𑀆𑀦𑀦𑁆𑀤𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁂 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀦𑁆𑀢𑁂 𑀪𑀕𑀯𑀢𑀺 𑀪𑀕𑀯𑀢𑁄 𑀧𑀭𑀺𑀯𑀸𑀭𑀢𑁆𑀣𑀁 𑀭𑀸𑀚𑀓𑀼𑀫𑀸𑀭𑁂𑀲𑀼 𑀧𑀩𑁆𑀩𑀚𑀦𑁆𑀢𑁂𑀲𑀼 𑀪𑀤𑁆𑀤𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀸 𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀦𑀸𑀕𑀲𑀫𑀸𑀮𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀦𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄, 𑀏𑀓𑀤𑀸 𑀲𑀸𑀕𑀢𑁄, 𑀏𑀓𑀤𑀸 𑀭𑀸𑀥𑁄, 𑀏𑀓𑀤𑀸 𑀫𑁂𑀖𑀺𑀬𑁄. 𑀢𑀢𑁆𑀣 𑀏𑀓𑀤𑀸 𑀪𑀕𑀯𑀸 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀢𑁄. 𑀣𑁂𑀭𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 ‘‘𑀪𑀕𑀯𑀸 𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀪𑀕𑀯𑀸 ‘‘𑀏𑀳𑀺 𑀪𑀺𑀓𑁆𑀔𑀼, 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀲𑁄 ‘‘𑀳𑀦𑁆𑀤 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀅𑀣 𑀦𑀁 𑀪𑀕𑀯𑀸 ‘‘𑀆𑀳𑀭 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀇𑀢𑀭𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀢𑁄 𑀘𑁄𑀭𑀸 𑀧𑀢𑁆𑀢𑀘𑀻𑀯𑀭𑀜𑁆𑀘𑁂𑀯 𑀳𑀭𑀺𑀁𑀲𑀼, 𑀲𑀻𑀲𑀜𑁆𑀘 𑀪𑀺𑀦𑁆𑀤𑀺𑀁𑀲𑀼. 𑀲𑁄 ‘‘𑀪𑀕𑀯𑀸 𑀇𑀤𑀸𑀦𑀺 𑀫𑁂 𑀧𑀝𑀺𑀲𑀭𑀡𑀁, 𑀦 𑀅𑀜𑁆𑀜𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀮𑁄𑀳𑀺𑀢𑁂𑀦 𑀕𑀮𑀦𑁆𑀢𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺. ‘‘𑀓𑀺𑀫𑀺𑀤𑀁 𑀪𑀺𑀓𑁆𑀔𑀽’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀪𑀕𑀯𑀸 ‘‘𑀫𑀸 𑀘𑀺𑀦𑁆𑀢𑁂𑀬𑀺 𑀪𑀺𑀓𑁆𑀔𑀼, 𑀏𑀢𑀲𑁆𑀲 𑀓𑀸𑀭𑀡𑀸𑀬𑁂𑀯 𑀢𑀁 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀲𑀫𑀲𑁆𑀲𑀸𑀲𑁂𑀲𑀺.

𑀏𑀓𑀤𑀸 𑀧𑀦 𑀪𑀕𑀯𑀸 𑀫𑁂𑀖𑀺𑀬𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀘𑀻𑀦𑀯𑀁𑀲𑁂 𑀫𑀺𑀕𑀤𑀸𑀬𑁂 𑀚𑀦𑁆𑀢𑀼𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀸𑀧𑀺 𑀫𑁂𑀖𑀺𑀬𑁄 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀧𑀸𑀲𑀸𑀤𑀺𑀓𑀁 𑀅𑀫𑁆𑀩𑀯𑀦𑀁 𑀤𑀺𑀲𑁆𑀯𑀸 ‘‘𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀦𑁆𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑁄 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀫𑁆𑀧𑀺 𑀪𑀕𑀯𑀸 ‘‘𑀇𑀫𑀫𑁂𑀯 𑀢𑁂 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, ‘𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀫𑀬𑁆𑀳𑀁 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀬𑁂𑀯 𑀧𑀢𑁆𑀣𑀬𑀫𑀸𑀦𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑀬𑀺𑀁, 𑀦𑀦𑀼 𑀫𑀸𑀤𑀺𑀲𑁄 𑀫𑀳𑀸𑀧𑀜𑁆𑀜𑁄 𑀉𑀧𑀝𑁆𑀞𑀸𑀓𑁄 𑀦𑀸𑀫 𑀯𑀝𑁆𑀝𑀢𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀪𑀕𑀯𑀸 ‘‘𑀅𑀮𑀁, 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀢𑁆𑀯𑀁 𑀯𑀺𑀳𑀭𑀲𑀺, 𑀅𑀲𑀼𑀜𑁆𑀜𑀸 𑀯𑁂 𑀲𑀸 𑀤𑀺𑀲𑀸, 𑀢𑀯 𑀳𑀺 𑀑𑀯𑀸𑀤𑁄 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀲𑀤𑀺𑀲𑁄, 𑀢𑁂𑀦 𑀫𑁂 𑀢𑀬𑀸 𑀉𑀧𑀝𑁆𑀞𑀸𑀓𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂 𑀲𑀩𑁆𑀩𑁂 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀆𑀳𑀁𑀲𑀼 𑁋 ‘‘𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀢𑀺, 𑀢𑁆𑀯𑀫𑁆𑀧𑀺 𑀬𑀸𑀘𑀸𑀳𑀻’’𑀢𑀺. 𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀝𑁆𑀞𑀸𑀦𑀁 𑀦𑀸𑀫, 𑀆𑀯𑀼𑀲𑁄, 𑀓𑀻𑀤𑀺𑀲𑀁 𑀳𑁄𑀢𑀺, 𑀓𑀺𑀁 𑀫𑀁 𑀲𑀢𑁆𑀣𑀸 𑀦 𑀧𑀲𑁆𑀲𑀢𑀺? 𑀲𑀘𑁂 𑀲𑀢𑁆𑀣𑀸 𑀭𑁄𑀘𑀺𑀲𑁆𑀲𑀢𑀺, ‘‘𑀆𑀦𑀦𑁆𑀤𑁄 𑀫𑀁 𑀉𑀧𑀝𑁆𑀞𑀳𑀢𑀽’’𑀢𑀺 𑀯𑀓𑁆𑀔𑀢𑀻𑀢𑀺. 𑀅𑀣 𑀪𑀕𑀯𑀸 ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀅𑀜𑁆𑀜𑁂𑀳𑀺 𑀉𑀲𑁆𑀲𑀸𑀳𑁂𑀢𑀩𑁆𑀩𑁄, 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀪𑀺𑀓𑁆𑀔𑀽 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀲𑀩𑀮𑀁 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑀸 𑀘𑀢𑀲𑁆𑀲𑁄 𑀘 𑀆𑀬𑀸𑀘𑀦𑀸𑀢𑀺 𑀅𑀝𑁆𑀞 𑀯𑀭𑁂 𑀬𑀸𑀘𑀺.

𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑀸 𑀦𑀸𑀫 𑁋 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀦𑀺𑀫𑀦𑁆𑀢𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀤𑀻𑀦𑀯𑀁 𑀅𑀤𑁆𑀤𑀲𑀸’’𑀢𑀺 𑀯𑀼𑀢𑁆𑀢𑁂 𑀆𑀳 𑁋 ‘‘𑀲𑀘𑀸𑀳𑀁, 𑀪𑀦𑁆𑀢𑁂, 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀮𑀪𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀆𑀦𑀦𑁆𑀤𑁄 𑀤𑀲𑀩𑀮𑁂𑀦 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀢𑀺, 𑀏𑀓𑀢𑁄 𑀦𑀺𑀫𑀦𑁆𑀢𑀦𑀁 𑀕𑀘𑁆𑀙𑀢𑀺. 𑀏𑀢𑀁 𑀮𑀸𑀪𑀁 𑀮𑀪𑀦𑁆𑀢𑁄 𑀢𑀣𑀸𑀕𑀢𑀁 𑀉𑀧𑀝𑁆𑀞𑀸𑀢𑀺, 𑀓𑁄 𑀏𑀯𑀁 𑀉𑀧𑀝𑁆𑀞𑀳𑀢𑁄 𑀪𑀸𑀭𑁄’’’𑀢𑀺? 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀬𑀸𑀘𑀺.

𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀦𑀸𑀫 𑁋 ‘‘𑀲𑀘𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑀸𑀳𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑀁 𑀧𑀭𑀺𑀲𑀁 𑀆𑀕𑀢𑀓𑁆𑀔𑀡𑁂𑀬𑁂𑀯 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 𑀮𑀘𑁆𑀙𑀸𑀫𑀺, 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀘𑁆𑀙𑀸𑀫𑀺, 𑀢𑀣𑀸 𑀬𑀁 𑀪𑀕𑀯𑀸 𑀫𑀬𑁆𑀳𑀁 𑀧𑀭𑀫𑁆𑀫𑀼𑀔𑁂 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀓𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀁 𑀧𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑀆𑀳 𑁋 ‘‘𑀇𑀥, 𑀪𑀦𑁆𑀢𑁂, 𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑁄 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀫𑀁 𑀏𑀯𑀁 𑀯𑀤𑀦𑁆𑀢𑀺 ‘𑀲𑁆𑀯𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀺𑀓𑁆𑀔𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’𑀢𑀺. 𑀲𑀘𑁂 𑀪𑀕𑀯𑀸 𑀢𑀢𑁆𑀣 𑀦 𑀕𑀫𑀺𑀲𑁆𑀲𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀧𑀭𑀺𑀲𑀁 𑀤𑀲𑁆𑀲𑁂𑀢𑀼𑀁, 𑀓𑀗𑁆𑀔𑀜𑁆𑀘 𑀯𑀺𑀦𑁄𑀤𑁂𑀢𑀼𑀁 𑀑𑀓𑀸𑀲𑀁 𑀦 𑀮𑀘𑁆𑀙𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 ‘𑀓𑀺𑀁 𑀆𑀦𑀦𑁆𑀤𑁄 𑀤𑀲𑀩𑀮𑀁 𑀉𑀧𑀝𑁆𑀞𑀸𑀢𑀺. 𑀏𑀢𑁆𑀢𑀓𑀫𑁆𑀧𑀺𑀲𑁆𑀲 𑀪𑀕𑀯𑀸 𑀅𑀦𑀼𑀕𑁆𑀕𑀳𑀁 𑀦 𑀓𑀭𑁄𑀢𑀻’𑀢𑀺. 𑀪𑀕𑀯𑀢𑁄 𑀘 𑀧𑀭𑀫𑁆𑀫𑀼𑀔𑀸 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 ‘𑀅𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑀸𑀣𑀸, 𑀇𑀤𑀁 𑀲𑀼𑀢𑁆𑀢𑀁, 𑀇𑀤𑀁 𑀚𑀸𑀢𑀓𑀁 𑀓𑀢𑁆𑀣 𑀤𑁂𑀲𑀺𑀢’𑀦𑁆𑀢𑀺. 𑀲𑀘𑀸𑀳𑀁 𑀢𑀁 𑀦 𑀲𑀫𑁆𑀧𑀸𑀤𑀬𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀏𑀢𑁆𑀢𑀓𑀫𑁆𑀧𑀺, 𑀆𑀯𑀼𑀲𑁄, 𑀦 𑀚𑀸𑀦𑀸𑀲𑀺, 𑀓𑀲𑁆𑀫𑀸 𑀢𑁆𑀯𑀁 𑀙𑀸𑀬𑀸 𑀯𑀺𑀬 𑀪𑀕𑀯𑀦𑁆𑀢𑀁 𑀅𑀯𑀺𑀚𑀳𑀦𑁆𑀢𑁄 𑀤𑀻𑀖𑀭𑀢𑁆𑀢𑀁 𑀯𑀺𑀘𑀭𑀲𑀻’𑀢𑀺. 𑀢𑁂𑀦𑀸𑀳𑀁 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀧𑀼𑀦 𑀓𑀣𑀦𑀁 𑀇𑀘𑁆𑀙𑀸𑀫𑀻’’𑀢𑀺. 𑀇𑀫𑀸 𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀬𑀸𑀘𑀺. 𑀪𑀕𑀯𑀸𑀧𑀺𑀲𑁆𑀲 𑀅𑀤𑀸𑀲𑀺.

𑀏𑀯𑀁 𑀇𑀫𑁂 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀲𑁆𑀲 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀁 𑀧𑀸𑀧𑀼𑀡𑀺. 𑀲𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀩𑀮𑀲𑁆𑀲 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦 𑀳𑀢𑁆𑀣𑀧𑀸𑀤𑀧𑀭𑀺𑀓𑀫𑁆𑀫𑁂𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑁂𑀦 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀦𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀺𑀘𑁆𑀘𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 ‘‘𑀇𑀫𑀸𑀬 𑀦𑀸𑀫 𑀯𑁂𑀮𑀸𑀬 𑀲𑀢𑁆𑀣𑀼 𑀇𑀫𑀁 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀇𑀤𑀁 𑀦𑀸𑀫 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀤𑀺𑀯𑀲𑀪𑀸𑀕𑀁 𑀲𑀦𑁆𑀢𑀺𑀓𑀸𑀯𑀘𑀭𑁄 𑀳𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀤𑀡𑁆𑀟𑀤𑀻𑀧𑀺𑀓𑀁 𑀕𑀳𑁂𑀢𑁆𑀯𑀸 𑀏𑀓𑀭𑀢𑁆𑀢𑀺𑀁 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 𑀦𑀯 𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀺. 𑀏𑀯𑀜𑁆𑀳𑀺𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑁂 𑀫𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑁂𑀬𑁆𑀬, 𑀤𑀲𑀩𑀮𑁂 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀭𑀢𑁆𑀢𑀺𑀁 𑀤𑀡𑁆𑀟𑀤𑀻𑀧𑀺𑀓𑀁 𑀳𑀢𑁆𑀣𑁂𑀦 𑀦 𑀫𑀼𑀜𑁆𑀘𑀢𑀺. 𑀇𑀤𑀫𑁂𑀢𑁆𑀢𑀓𑀁 𑀯𑀢𑁆𑀣𑀼. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀩𑀳𑀼𑀲𑁆𑀲𑀼𑀢𑀸𑀦𑀁 𑀲𑀢𑀺𑀫𑀦𑁆𑀢𑀸𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀥𑀺𑀢𑀺𑀫𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁪. 𑀤𑀼𑀢𑀺𑀬𑁂 𑀫𑀳𑀸𑀧𑀭𑀺𑀲𑀸𑀦𑀦𑁆𑀢𑀺 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀣𑁂𑀭𑀸𑀦𑀁 𑀓𑀜𑁆𑀘𑀺 𑀓𑀸𑀮𑀁 𑀧𑀭𑀺𑀯𑀸𑀭𑁄 𑀫𑀳𑀸 𑀳𑁄𑀢𑀺 𑀓𑀜𑁆𑀘𑀺 𑀓𑀸𑀮𑀁 𑀅𑀧𑁆𑀧𑁄, 𑀇𑀫𑀲𑁆𑀲 𑀧𑀦 𑀣𑁂𑀭𑀲𑁆𑀲 𑀤𑁆𑀯𑀻𑀳𑀺 𑀪𑀸𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀁 𑀲𑀫𑀡𑀲𑀳𑀲𑁆𑀲𑀁 𑀦𑀺𑀩𑀤𑁆𑀥𑀧𑀭𑀺𑀯𑀸𑀭𑁄𑀯 𑀅𑀳𑁄𑀲𑀺. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀏𑀓𑁂𑀓𑀁 𑀧𑀩𑁆𑀩𑀸𑀚𑁂𑀦𑁆𑀢𑁂 𑀤𑁆𑀯𑁂 𑀲𑀫𑀡𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀤𑁆𑀯𑁂 𑀧𑀩𑁆𑀩𑀸𑀚𑁂𑀦𑁆𑀢𑁂 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀓𑀲𑁆𑀲𑀧𑁄𑀢𑀺 𑀧𑀦𑀲𑁆𑀲 𑀕𑁄𑀢𑁆𑀢𑀁. 𑀉𑀭𑀼𑀯𑁂𑀮𑀸𑀬𑀁 𑀧𑀩𑁆𑀩𑀚𑀺𑀢𑀢𑁆𑀢𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑀸𑀧𑀺 𑀅𑀦𑀸𑀕𑀢𑁂 𑀏𑀯𑀭𑀽𑀧𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀁 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀅𑀦𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀅𑀦𑀸𑀕𑀢𑁂 𑀕𑁄𑀢𑀫𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁄𑀧𑀺 𑀓𑀼𑀮𑀧𑀼𑀢𑁆𑀢𑁄 𑀬𑀸𑀯𑀚𑀻𑀯𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀢𑁄 𑀤𑁆𑀯𑁂𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀨𑀼𑀲𑁆𑀲𑀩𑀼𑀤𑁆𑀥𑀲𑁆𑀲 𑀯𑁂𑀫𑀸𑀢𑀺𑀓𑀓𑀦𑀺𑀝𑁆𑀞𑀪𑀸𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀧𑀺𑀢𑀸 𑀫𑀳𑀺𑀦𑁆𑀤𑀭𑀸𑀚𑀸 𑀦𑀸𑀫. 𑀅𑀧𑀭𑁂 𑀧𑀦𑀲𑁆𑀲 𑀤𑁆𑀯𑁂 𑀓𑀦𑀺𑀝𑁆𑀞𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀏𑀯𑀁 𑀢𑁂 𑀢𑀬𑁄 𑀪𑀸𑀢𑀭𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀸𑀦𑀦𑁆𑀢𑀭𑀁 𑀮𑀪𑀺𑀁𑀲𑀼. 𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀼𑀧𑀺𑀢𑀁 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀯𑀭𑀁 𑀮𑀪𑀺𑀢𑁆𑀯𑀸 ‘‘𑀢𑁂𑀫𑀸𑀲𑀁 𑀤𑀲𑀩𑀮𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀯𑀭𑀁 𑀕𑀡𑁆𑀳𑀺𑀁𑀲𑀼. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑁂𑀳𑀺 𑀤𑀲𑀩𑀮𑀁 𑀧𑀝𑀺𑀚𑀕𑁆𑀕𑀦𑁆𑀢𑁂𑀳𑀺 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀓𑀁 𑀅𑀫𑀘𑁆𑀘𑀁 𑀉𑀧𑁆𑀧𑀸𑀤𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀆𑀬𑀯𑀬𑀚𑀸𑀦𑀦𑀓𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀯𑁂𑀲𑀓𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀢𑁂𑀫𑀸𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀭𑀓𑁆𑀔𑀺𑀁𑀲𑀼. 𑀢𑁂 𑀢𑀬𑁄 𑀅𑀫𑀘𑁆𑀘𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀩𑀺𑀫𑁆𑀩𑀺𑀲𑀸𑀭𑀯𑀺𑀲𑀸𑀔𑀭𑀝𑁆𑀞𑀧𑀸𑀮𑀸 𑀚𑀸𑀢𑀸.

𑀢𑁂 𑀧𑀦 𑀭𑀸𑀚𑀓𑀼𑀫𑀸𑀭𑀸 𑀯𑀼𑀢𑁆𑀣𑀯𑀲𑁆𑀲𑁂 𑀤𑀲𑀩𑀮𑁂 𑀲𑀳𑀢𑁆𑀣𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑁆𑀭𑀸𑀳𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑁄𑀢𑁆𑀢𑀯𑀲𑁂𑀦 𑀢𑀬𑁄𑀧𑀺 𑀚𑀦𑀸 𑀓𑀲𑁆𑀲𑀧𑀸 𑀏𑀯 𑀦𑀸𑀫 𑀚𑀸𑀢𑀸. 𑀢𑁂 𑀯𑀬𑀧𑁆𑀧𑀢𑁆𑀢𑀸 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀁𑀲𑀼. 𑀢𑁂𑀲𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀧𑀜𑁆𑀘 𑀫𑀸𑀡𑀯𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑁄 𑀅𑀳𑁄𑀲𑀺, 𑀫𑀚𑁆𑀛𑀺𑀫𑀲𑁆𑀲 𑀢𑀻𑀡𑀺, 𑀓𑀦𑀺𑀝𑁆𑀞𑀲𑁆𑀲 𑀤𑁆𑀯𑁂. 𑀢𑁂 𑀅𑀢𑁆𑀢𑀦𑁄 𑀕𑀦𑁆𑀣𑁂 𑀲𑀸𑀭𑀁 𑀑𑀮𑁄𑀓𑁂𑀦𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯 𑀧𑀲𑁆𑀲𑀺𑀁𑀲𑀼, 𑀦 𑀲𑀫𑁆𑀧𑀭𑀸𑀬𑀺𑀓𑀁. 𑀅𑀣 𑀦𑁂𑀲𑀁 𑀚𑁂𑀝𑁆𑀞𑀪𑀸𑀢𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀲𑀤𑁆𑀥𑀺𑀁 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄, 𑀫𑀳𑀸𑀕𑀗𑁆𑀕𑀸𑀦𑀤𑀻𑀯𑀗𑁆𑀓𑁂 𑀧𑀩𑁆𑀩𑀚𑀺𑀢𑁄 𑀦𑀤𑀻𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄, 𑀕𑀬𑀸𑀲𑀻𑀲𑁂 𑀧𑀩𑁆𑀩𑀚𑀺𑀢𑁄 𑀕𑀬𑀸𑀓𑀲𑁆𑀲𑀧𑁄 𑀦𑀸𑀫 𑀚𑀸𑀢𑁄.

𑀏𑀯𑀁 𑀢𑁂𑀲𑀼 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁂𑀲𑀼 𑀩𑀳𑀽𑀦𑀁 𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀅𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀣𑁂𑀭𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀲𑀤𑀸𑀭𑀓𑀧𑁆𑀧𑀫𑀼𑀔𑁂 𑀧𑀜𑁆𑀘𑀧𑀜𑁆𑀜𑀸𑀲 𑀲𑀳𑀸𑀬𑀓𑁂𑀧𑀺 𑀯𑀺𑀦𑁂𑀢𑁆𑀯𑀸 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓’’𑀦𑁆𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀘𑀸𑀭𑀺𑀓𑀁 𑀧𑁂𑀲𑁂𑀢𑁆𑀯𑀸 𑀪𑀤𑁆𑀤𑀯𑀕𑁆𑀕𑀺𑀬𑁂 𑀯𑀺𑀦𑁂𑀢𑁆𑀯𑀸 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀳𑁂𑀢𑀼𑀁 𑀤𑀺𑀲𑁆𑀯𑀸 ‘‘𑀫𑀬𑀺 𑀕𑀢𑁂 𑀢𑀬𑁄 𑀪𑀸𑀢𑀺𑀓𑀸 𑀲𑀧𑀭𑀺𑀯𑀸𑀭𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀏𑀓𑀓𑁄 𑀅𑀤𑀼𑀢𑀺𑀬𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀲𑀦𑀢𑁆𑀣𑀸𑀬 𑀅𑀕𑁆𑀬𑀸𑀕𑀸𑀭𑀁 𑀬𑀸𑀘𑀺𑀢𑁆𑀯𑀸 𑀢𑀢𑁆𑀣 𑀓𑀢𑀁 𑀦𑀸𑀕𑀤𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀲𑀳𑀲𑁆𑀲𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀁 𑀲𑀧𑀭𑀺𑀯𑀸𑀭𑀁 𑀯𑀺𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑀇𑀢𑀭𑁂𑀧𑀺 𑀤𑁆𑀯𑁂 𑀪𑀸𑀢𑀭𑁄 𑀲𑀧𑀭𑀺𑀯𑀸𑀭𑀸 𑀆𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼, 𑀲𑀩𑁆𑀩𑁂𑀧𑀺 𑀏𑀳𑀺𑀪𑀺𑀓𑁆𑀔𑀽 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀅𑀳𑁂𑀲𑀼𑀁.

𑀲𑀢𑁆𑀣𑀸 𑀢𑀁 𑀲𑀫𑀡𑀲𑀳𑀲𑁆𑀲𑀁 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 ‘‘𑀓𑀣𑀁𑀭𑀽𑀧𑀸 𑀦𑀼 𑀔𑁄 𑀏𑀢𑁂𑀲𑀁 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀇𑀫𑁂 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀸 𑀯𑀺𑀘𑀭𑀺𑀁𑀲𑀼, 𑀇𑀫𑁂𑀲𑀁 𑀢𑀬𑁄 𑀪𑀯𑁂 𑀆𑀤𑀺𑀢𑁆𑀢𑀸𑀕𑀸𑀭𑀲𑀤𑀺𑀲𑁂 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀁 (𑀫𑀳𑀸𑀯. 𑁫𑁪) 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀲𑀢𑁆𑀣𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀧𑀼𑀩𑁆𑀩𑁂 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀤𑀺𑀦𑁆𑀦𑀧𑀝𑀺𑀜𑁆𑀜𑀢𑁆𑀢𑀸 𑀭𑀸𑀚𑀕𑀳𑀦𑀕𑀭𑁂 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀭𑀸𑀚𑀸 𑀤𑀲𑀩𑀮𑀲𑁆𑀲 𑀆𑀕𑀢𑀪𑀸𑀯𑀁 𑀲𑀼𑀢𑁆𑀯𑀸 𑀤𑁆𑀯𑀸𑀤𑀲𑀦𑀳𑀼𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀲𑀩𑁆𑀩𑀸𑀯𑀦𑁆𑀢𑀁 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀫𑀳𑀸𑀚𑀦𑀁 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀇𑀫𑁂 𑀫𑀬𑁆𑀳𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀯𑀸 𑀫𑀳𑀦𑁆𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺, 𑀲𑀯𑀺𑀢𑀓𑁆𑀓𑀸 𑀘 𑀦𑀸𑀫 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀓𑀲𑁆𑀲𑀧, 𑀢𑀼𑀬𑁆𑀳𑀁 𑀉𑀧𑀝𑁆𑀞𑀸𑀓𑀸𑀦𑀁 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀸’’𑀢𑀺 𑀣𑁂𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀢𑁆𑀣𑀸𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑀸𑀮𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀺, 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂, 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺 𑀯𑀢𑁆𑀯𑀸 𑀑𑀭𑀼𑀬𑁆𑀳 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀫𑁂 𑀯𑀸𑀭𑁂 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀫𑀳𑀸𑀚𑀦𑁄 ‘‘𑀅𑀬𑀁 𑀮𑁄𑀓𑁂 𑀫𑀳𑀸𑀲𑀫𑀡𑁄’’𑀢𑀺 𑀲𑀢𑁆𑀣𑀭𑀺 𑀦𑀺𑀩𑁆𑀩𑀺𑀢𑀓𑁆𑀓𑁄 𑀚𑀸𑀢𑁄, 𑀅𑀣𑀲𑁆𑀲 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀭𑀸𑀚𑀸 𑀏𑀓𑀸𑀤𑀲𑀦𑀳𑀼𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄, 𑀏𑀓𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺. 𑀢𑁂𑀧𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀧𑀭𑀺𑀯𑀸𑀭𑀸 𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀆𑀲𑁂𑀯𑀦𑀯𑀲𑁂𑀦 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀩𑀳𑀺 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀁𑀬𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀺𑀁𑀲𑀼. 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀏𑀓𑁂𑀓𑀁 𑀦𑀺𑀲𑁆𑀲𑀺𑀢𑀓𑀁 𑀕𑀡𑁆𑀳𑀦𑁆𑀢𑁂 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺, 𑀤𑁆𑀯𑁂 𑀤𑁆𑀯𑁂 𑀕𑀡𑁆𑀳𑀦𑁆𑀢𑁂 𑀢𑀻𑀡𑀺 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀢𑁆𑀢𑀓𑀸 𑀢𑁂𑀲𑀁 𑀦𑀺𑀲𑁆𑀲𑀺𑀢𑀓𑀸, 𑀢𑀢𑁆𑀢𑀓𑁂 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀇𑀤𑀫𑁂𑀢𑁆𑀣 𑀯𑀢𑁆𑀣𑀼. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 𑀣𑁂𑀭𑀁 𑀫𑀳𑀸𑀧𑀭𑀺𑀲𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁫. 𑀢𑀢𑀺𑀬𑁂 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀦𑁆𑀢𑀺 𑀓𑀼𑀮𑀁 𑀧𑀲𑀸𑀤𑁂𑀦𑁆𑀢𑀸𑀦𑀁. 𑀅𑀬𑀁 𑀳𑀺 𑀣𑁂𑀭𑁄 𑀅𑀤𑀺𑀝𑁆𑀞𑀩𑀼𑀤𑁆𑀥𑀤𑀲𑁆𑀲𑀦𑀁𑀬𑁂𑀯 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀦𑀺𑀯𑁂𑀲𑀦𑀁 𑀧𑀲𑀸𑀤𑁂𑀲𑀺, 𑀢𑀲𑁆𑀫𑀸 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀅𑀫𑀘𑁆𑀘𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀚𑀸𑀢𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀚𑀸𑀢𑁄𑀢𑀺 𑀢𑀁𑀤𑀺𑀯𑀲𑀁𑀬𑁂𑀯 𑀢𑀁 𑀤𑀼𑀓𑀽𑀮𑀘𑀼𑀫𑁆𑀩𑀼𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀢𑁆𑀣𑀸𑀬 𑀦𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀩𑁄𑀥𑀺𑀭𑀼𑀓𑁆𑀔𑁄 𑀭𑀸𑀳𑀼𑀮𑀫𑀸𑀢𑀸 𑀘𑀢𑀲𑁆𑀲𑁄 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀆𑀭𑁄𑀳𑀦𑀺𑀬𑀳𑀢𑁆𑀣𑀻 𑀓𑀡𑁆𑀟𑀓𑁄 𑀙𑀦𑁆𑀦𑁄 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑁂 𑀲𑀢𑁆𑀢 𑀏𑀓𑀤𑀺𑀯𑀲𑁂 𑀚𑀸𑀢𑀢𑁆𑀢𑀸 𑀲𑀳𑀚𑀸𑀢𑀸 𑀦𑀸𑀫 𑀅𑀳𑁂𑀲𑀼𑀁. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀲𑀓𑀮𑀦𑀕𑀭𑀲𑁆𑀲 𑀉𑀤𑀕𑁆𑀕𑀘𑀺𑀢𑁆𑀢𑀤𑀺𑀯𑀲𑁂 𑀚𑀸𑀢𑁄𑀢𑀺 𑀉𑀤𑀸𑀬𑀻𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀣𑁄𑀓𑀁 𑀓𑀸𑀴𑀥𑀸𑀢𑀼𑀓𑀢𑁆𑀢𑀸 𑀧𑀦 𑀓𑀸𑀴𑀼𑀤𑀸𑀬𑀻 𑀦𑀸𑀫 𑀚𑀸𑀢𑁄. 𑀲𑁄 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀦𑁆𑀢𑁄 𑀯𑀼𑀤𑁆𑀥𑀺𑀁 𑀅𑀕𑀫𑀸𑀲𑀺.

𑀅𑀧𑀭𑀪𑀸𑀕𑁂 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀲𑀺𑀤𑁆𑀥𑀢𑁆𑀣𑀓𑀼𑀫𑀸𑀭𑁄 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑁂𑀴𑀼𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀏𑀓𑀁 𑀅𑀫𑀘𑁆𑀘𑀁 ‘‘𑀧𑀼𑀢𑁆𑀢𑀁 𑀫𑁂 𑀇𑀥 𑀆𑀦𑁂𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀲𑁄 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦’’𑀦𑁆𑀢𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀬𑀣𑀸𑀞𑀺𑀢𑁄𑀯 𑀲𑀤𑁆𑀥𑀺𑀁 𑀧𑀼𑀭𑀺𑀲𑀲𑀳𑀲𑁆𑀲𑁂𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑁂𑀲𑀁 𑀲𑀢𑁆𑀣𑀸 ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺, 𑀲𑀩𑁆𑀩𑁂 𑀢𑀁𑀔𑀡𑀁𑀬𑁂𑀯 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀅𑀳𑁂𑀲𑀼𑀁. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀅𑀭𑀺𑀬𑀸 𑀦𑀸𑀫 𑀫𑀚𑁆𑀛𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀭𑀜𑁆𑀜𑀸 𑀧𑀳𑀺𑀢𑀲𑀸𑀲𑀦𑀁 𑀤𑀲𑀩𑀮𑀲𑁆𑀲 𑀦 𑀓𑀣𑁂𑀲𑀺. 𑀭𑀸𑀚𑀸 ‘‘𑀦𑁂𑀯 𑀕𑀢𑁄 𑀆𑀕𑀘𑁆𑀙𑀢𑀺, 𑀦 𑀲𑀸𑀲𑀦𑀁 𑀲𑀼𑀬𑁆𑀬𑀢𑀻’’𑀢𑀺 ‘‘𑀏𑀳𑀺, 𑀢𑀸𑀢, 𑀢𑁆𑀯𑀁 𑀕𑀘𑁆𑀙𑀸’’𑀢𑀺 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀜𑁆𑀜𑀁 𑀅𑀫𑀘𑁆𑀘𑀁 𑀧𑁂𑀲𑁂𑀲𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀏𑀯𑀁 𑀦𑀯𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀦𑀯 𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀲𑀺. 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀅𑀣 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁆𑀢𑀓𑀸 𑀚𑀦𑀸 𑀫𑀬𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀤𑀲𑀩𑀮𑀲𑁆𑀲 𑀇𑀥𑀸𑀕𑀫𑀦𑀢𑁆𑀣𑀸𑀬 𑀦 𑀓𑀺𑀜𑁆𑀘𑀺 𑀓𑀣𑀬𑀺𑀁𑀲𑀼, 𑀅𑀜𑁆𑀜𑁂 𑀕𑀦𑁆𑀢𑁆𑀯𑀸𑀧𑀺 𑀤𑀲𑀩𑀮𑀁 𑀆𑀦𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀫𑀬𑁆𑀳𑀁 𑀔𑁄 𑀧𑀦 𑀧𑀼𑀢𑁆𑀢𑁄 𑀉𑀤𑀸𑀬𑀻 𑀤𑀲𑀩𑀮𑁂𑀦 𑀲𑀤𑁆𑀥𑀺𑀁 𑀏𑀓𑀯𑀬𑁄 𑀲𑀳𑀧𑀁𑀲𑀼𑀓𑀻𑀴𑀺𑀓𑁄, 𑀫𑀬𑀺 𑀘𑀲𑁆𑀲 𑀲𑀺𑀦𑁂𑀳𑁄 𑀅𑀢𑁆𑀣𑀻’’𑀢𑀺 𑀓𑀸𑀴𑀼𑀤𑀸𑀬𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀧𑀼𑀭𑀺𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀆𑀦𑁂𑀳𑀻’’𑀢𑀺 𑀆𑀳. 𑀧𑀞𑀫𑀁 𑀕𑀢𑀧𑀼𑀭𑀺𑀲𑀸 𑀯𑀺𑀬 𑀧𑀩𑁆𑀩𑀚𑀺𑀢𑀼𑀁 𑀮𑀪𑀦𑁆𑀢𑁄 𑀆𑀦𑁂𑀲𑁆𑀲𑀸𑀫𑀺, 𑀤𑁂𑀯𑀸𑀢𑀺. 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀫𑀫 𑀧𑀼𑀢𑁆𑀢𑀁 𑀤𑀲𑁆𑀲𑁂𑀳𑀻𑀢𑀺. ‘‘𑀲𑀸𑀥𑀼, 𑀤𑁂𑀯𑀸’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀤𑀸𑀬 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀯𑁂𑀮𑀸𑀬 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂 𑀧𑀢𑀺𑀝𑁆𑀞𑀸𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀢𑀸𑀯 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀁 𑀕𑀦𑁆𑀢𑀼𑀁 𑀏𑀲 𑀓𑀸𑀮𑁄, 𑀯𑀲𑀦𑁆𑀢𑀲𑀫𑀬𑁂 𑀲𑀼𑀧𑀼𑀧𑁆𑀨𑀺𑀢𑁂𑀲𑀼 𑀯𑀦𑀲𑀡𑁆𑀟𑁂𑀲𑀼 𑀳𑀭𑀺𑀢𑀢𑀺𑀡𑀲𑀜𑁆𑀙𑀦𑁆𑀦𑀸𑀬 𑀧𑀣𑀯𑀺𑀬𑀸 𑀏𑀲 𑀓𑀸𑀮𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁄 𑀢𑀲𑁆𑀲 𑀓𑀸𑀮𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑁋

‘‘𑀦𑀸𑀢𑀺𑀲𑀻𑀢𑀁 𑀦𑀸𑀢𑀺𑀉𑀡𑁆𑀳𑀁, 𑀦𑀸𑀢𑀺𑀤𑀼𑀩𑁆𑀪𑀺𑀓𑁆𑀔𑀙𑀸𑀢𑀓𑀁;

𑀲𑀤𑁆𑀤𑀮𑀸 𑀳𑀭𑀺𑀢𑀸 𑀪𑀽𑀫𑀺, 𑀏𑀲 𑀓𑀸𑀮𑁄 𑀫𑀳𑀸𑀫𑀼𑀦𑀻’’𑀢𑀺. 𑁋

𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 𑀤𑀲𑀩𑀮𑀲𑁆𑀲 𑀓𑀼𑀮𑀦𑀕𑀭𑀁 𑀕𑀫𑀦𑀢𑁆𑀣𑀸𑀬 𑀕𑀫𑀦𑀯𑀡𑁆𑀡𑀁 𑀯𑀡𑁆𑀡𑁂𑀲𑀺. 𑀲𑀢𑁆𑀣𑀸 ‘‘𑀉𑀤𑀸𑀬𑀻 𑀕𑀫𑀦𑀯𑀡𑁆𑀡𑀁 𑀓𑀣𑁂𑀢𑀺, 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀁 𑀕𑀦𑁆𑀢𑀼𑀁 𑀏𑀲 𑀓𑀸𑀮𑁄’’𑀢𑀺 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀅𑀢𑀼𑀭𑀺𑀢𑀕𑀫𑀦𑁂𑀦 𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀺.

𑀉𑀤𑀸𑀬𑀺𑀢𑁆𑀣𑁂𑀭𑁄 𑀲𑀢𑁆𑀣𑀼 𑀦𑀺𑀓𑁆𑀔𑀦𑁆𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀲𑀜𑁆𑀜𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂 𑀧𑀸𑀢𑀼𑀭𑀳𑁄𑀲𑀺. 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀸𑀤𑀺𑀢𑀲𑁆𑀲 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁄 𑀉𑀝𑁆𑀞𑀸𑀬 𑀕𑀫𑀦𑀸𑀓𑀧𑁆𑀧𑀁 𑀤𑀲𑁆𑀲𑁂𑀲𑀺. 𑀦𑀺𑀲𑀻𑀤𑀺𑀢𑁆𑀯𑀸𑀯 𑀪𑀼𑀜𑁆𑀚, 𑀢𑀸𑀢𑀸𑀢𑀺. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸𑀢𑀺. 𑀓𑀳𑀁 𑀧𑀦, 𑀢𑀸𑀢, 𑀲𑀢𑁆𑀣𑀸𑀢𑀺? 𑀯𑀻𑀲𑀢𑀺𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀘𑀸𑀭𑀺𑀓𑀁 𑀦𑀺𑀓𑁆𑀔𑀦𑁆𑀢𑁄, 𑀫𑀳𑀸𑀭𑀸𑀚𑀸𑀢𑀺. 𑀢𑀼𑀫𑁆𑀳𑁂 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀯 𑀫𑀫 𑀧𑀼𑀢𑁆𑀢𑁄 𑀇𑀫𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀢𑀸𑀯𑀲𑁆𑀲 𑀇𑀢𑁄𑀯 𑀧𑀺𑀡𑁆𑀟𑀧𑀸𑀢𑀁 𑀳𑀭𑀣𑀸𑀢𑀺. 𑀣𑁂𑀭𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀳𑀭𑀺𑀢𑀩𑁆𑀩𑀁 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀅𑀤𑀲𑁆𑀲𑀦𑁂𑀦𑁂𑀯 𑀲𑀓𑀮𑀭𑀸𑀚𑀦𑀺𑀯𑁂𑀲𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑀁 𑀮𑀪𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀜𑁂𑀯 𑀧𑀢𑁆𑀢𑀁 𑀆𑀓𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀲𑀢𑁆𑀣𑀼 𑀳𑀢𑁆𑀣𑁂 𑀞𑀧𑁂𑀲𑀺, 𑀲𑀢𑁆𑀣𑀸 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺. 𑀣𑁂𑀭𑁄 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀬𑁄𑀚𑀦𑀧𑀭𑀫𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀭𑀸𑀚𑀕𑁂𑀳𑀢𑁄 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀏𑀯𑀁 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 ‘‘𑀫𑀬𑁆𑀳𑀁 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀲𑀓𑀮𑀦𑀺𑀯𑁂𑀲𑀦𑀁 𑀧𑀲𑀸𑀤𑁂𑀲𑀻’’𑀢𑀺 𑀣𑁂𑀭𑀁 𑀓𑀼𑀮𑀧𑁆𑀧𑀲𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀩𑀸𑀓𑀼𑀮𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁬. 𑀘𑀢𑀼𑀢𑁆𑀣𑁂 𑀅𑀧𑁆𑀧𑀸𑀩𑀸𑀥𑀸𑀦𑀦𑁆𑀢𑀺 𑀦𑀺𑀭𑀸𑀩𑀸𑀥𑀸𑀦𑀁. 𑀩𑀸𑀓𑀼𑀮𑁄𑀢𑀺 𑀤𑁆𑀯𑀻𑀲𑀼 𑀓𑀼𑀮𑁂𑀲𑀼 𑀯𑀟𑁆𑀠𑀺𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄 𑀣𑁂𑀭𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀁 𑀓𑀺𑀭 𑀅𑀢𑀻𑀢𑁂 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀢𑁆𑀣𑀓𑁂 𑀅𑀦𑁄𑀫𑀤𑀲𑁆𑀲𑀺𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀯𑀬𑀁 𑀆𑀕𑀫𑁆𑀫 𑀉𑀕𑁆𑀕𑀳𑀺𑀢𑀯𑁂𑀤𑁄 𑀯𑁂𑀤𑀢𑁆𑀢𑀬𑁂 𑀲𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀁 𑀕𑀯𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀢𑀧𑀸𑀤𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸-𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀳𑀼𑀢𑁆𑀯𑀸 𑀛𑀸𑀦𑀓𑀻𑀴𑀺𑀢𑀸𑀬 𑀯𑀻𑀢𑀺𑀦𑀸𑀫𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀦𑁄𑀫𑀤𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀭𑀺𑀬𑀕𑀡𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀘𑀭𑀢𑀺. 𑀢𑀸𑀧𑀲𑁄 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀻’’𑀢𑀺 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄, 𑀅𑀢𑁆𑀢𑀦𑁄 𑀞𑀸𑀦𑀁 𑀧𑀦 𑀯𑀺𑀚𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀼 𑀤𑀲𑁆𑀲𑀦𑀸𑀬 𑀘𑁂𑀯 𑀕𑀘𑁆𑀙𑀢𑀺, 𑀥𑀫𑁆𑀫𑀜𑁆𑀘 𑀲𑀼𑀡𑀸𑀢𑀺.

𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀉𑀤𑀭𑀯𑀸𑀢𑁄 𑀉𑀧𑁆𑀧𑀚𑁆𑀚𑀺. 𑀢𑀸𑀧𑀲𑁄 𑀲𑀢𑁆𑀣𑀼 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄 ‘‘𑀲𑀢𑁆𑀣𑀸 𑀕𑀺𑀮𑀸𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀓𑁄, 𑀪𑀦𑁆𑀢𑁂, 𑀆𑀩𑀸𑀥𑁄’’𑀢𑀺. ‘‘𑀉𑀤𑀭𑀯𑀸𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀓𑀸𑀮𑁄 𑀫𑀬𑁆𑀳𑀁 𑀧𑀼𑀜𑁆𑀜𑀁 𑀓𑀸𑀢𑀼’’𑀦𑁆𑀢𑀺 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀇𑀤𑀁 𑀪𑁂𑀲𑀚𑁆𑀚𑀁 𑀲𑀢𑁆𑀣𑀼 𑀉𑀧𑀦𑁂𑀣𑀸’’𑀢𑀺 𑀉𑀧𑀝𑁆𑀞𑀸𑀓𑀢𑁆𑀣𑁂𑀭𑀲𑁆𑀲 𑀅𑀤𑀸𑀲𑀺. 𑀲𑀳 𑀪𑁂𑀲𑀚𑁆𑀚𑀲𑁆𑀲 𑀉𑀧𑀬𑁄𑀕𑁂𑀦 𑀉𑀤𑀭𑀯𑀸𑀢𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀲𑁄 𑀲𑀢𑁆𑀣𑀼 𑀨𑀸𑀲𑀼𑀓𑀓𑀸𑀮𑁂 𑀕𑀦𑁆𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀬𑀤𑀺𑀤𑀁 𑀫𑀫 𑀪𑁂𑀲𑀚𑁆𑀚𑁂𑀦 𑀢𑀣𑀸𑀕𑀢𑀲𑁆𑀲 𑀨𑀸𑀲𑀼𑀓𑀁 𑀚𑀸𑀢𑀁, 𑀢𑀲𑁆𑀲 𑀫𑁂 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀪𑀯𑁂 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀺 𑀲𑀭𑀻𑀭𑁂 𑀩𑁆𑀬𑀸𑀥𑀺 𑀦𑀸𑀫 𑀫𑀸 𑀳𑁄𑀢𑀽’’𑀢𑀺. 𑀇𑀤𑀫𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀓𑀮𑁆𑀬𑀸𑀡𑀓𑀫𑁆𑀫𑀁.

𑀲𑁄 𑀢𑀢𑁄 𑀘𑀼𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀸𑀩𑀸𑀥𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀯𑀺𑀧𑀲𑁆𑀲𑀻𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑁂 𑀯𑀲𑀢𑀺.

𑀯𑀺𑀧𑀲𑁆𑀲𑀻𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀧𑀺𑀢𑀼 𑀫𑀳𑀸𑀭𑀸𑀚𑀲𑁆𑀲 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀢𑀺. 𑀅𑀣𑀸𑀬𑀁 𑀢𑀸𑀧𑀲𑁄 𑀤𑀲𑀩𑀮𑀲𑁆𑀲 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀲𑀺, 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀁 𑀚𑀳𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀓𑀸𑀮𑁂𑀦 𑀓𑀸𑀮𑀁 𑀧𑀦 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺.

𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀜𑁆𑀘𑁂𑀯 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀘 𑀳𑀺𑀫𑀯𑀢𑀺 𑀧𑀼𑀧𑁆𑀨𑀺𑀢𑀸𑀦𑀁 𑀯𑀺𑀲𑀭𑀼𑀓𑁆𑀔𑀸𑀦𑀁 𑀯𑀸𑀢𑀲𑀫𑁆𑀨𑀲𑁆𑀲𑁂𑀦 𑀲𑁂𑀲𑀪𑀺𑀓𑁆𑀔𑀽𑀦𑀁 𑀫𑀢𑁆𑀣𑀓𑀭𑁄𑀕𑁄 𑀦𑀸𑀫 𑀉𑀤𑀧𑀸𑀤𑀺. 𑀢𑀸𑀧𑀲𑁄 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄 𑀪𑀺𑀓𑁆𑀔𑀽 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀦𑁆𑀦𑁂 𑀤𑀺𑀲𑁆𑀯𑀸 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀨𑀸𑀲𑀼𑀓’’𑀦𑁆𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽𑀦𑀁 𑀢𑀺𑀡𑀧𑀼𑀧𑁆𑀨𑀓𑀭𑁄𑀕𑁄, 𑀆𑀯𑀼𑀲𑁄𑀢𑀺. 𑀢𑀸𑀧𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀸𑀮𑁄 𑀫𑀬𑁆𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀸𑀬𑀯𑁂𑀬𑁆𑀬𑀸𑀯𑀢𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀸𑀦𑀸𑀯𑀺𑀥𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀩𑁆𑀩𑀪𑀺𑀓𑁆𑀔𑀽𑀦𑀁 𑀭𑁄𑀕𑁄 𑀢𑀁𑀔𑀡𑀁𑀬𑁂𑀯 𑀯𑀽𑀧𑀲𑀦𑁆𑀢𑁄.

𑀲𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀖𑀭𑀸𑀯𑀸𑀲𑀁 𑀯𑀲𑀦𑁆𑀢𑁄 ‘‘𑀫𑀬𑁆𑀳𑀁 𑀯𑀲𑀦𑀕𑁂𑀳𑀁 𑀤𑀼𑀩𑁆𑀩𑀮𑀁, 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁 𑀆𑀳𑀭𑀺𑀢𑁆𑀯𑀸 𑀕𑁂𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀟𑁆𑀠𑀓𑀻𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀁 𑀚𑀺𑀡𑁆𑀡𑀁 𑀫𑀳𑀸𑀯𑀺𑀳𑀸𑀭𑀁 𑀤𑀺𑀲𑁆𑀯𑀸 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀫𑀬𑁆𑀳𑀁 𑀕𑁂𑀳𑀓𑀫𑁆𑀫𑀁, 𑀦 𑀢𑀁 𑀫𑀬𑀸 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀢𑀺, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀧𑀦 𑀲𑀤𑁆𑀥𑀺𑀁 𑀕𑀫𑀦𑀓𑀫𑁆𑀫𑀫𑁂𑀯 𑀧𑀼𑀭𑁂𑀢𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂𑀳𑁂𑀯 𑀯𑀟𑁆𑀠𑀓𑀻𑀳𑀺 𑀤𑀩𑁆𑀩𑀲𑀫𑁆𑀪𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁄𑀲𑀣𑀸𑀕𑀸𑀭𑀁 𑀓𑀸𑀭𑁂𑀲𑀺, 𑀪𑁄𑀚𑀦𑀲𑀸𑀮𑀁 𑀅𑀕𑁆𑀕𑀺𑀲𑀸𑀮𑀁 𑀤𑀻𑀖𑀘𑀗𑁆𑀓𑀫𑀁 𑀚𑀦𑁆𑀢𑀸𑀖𑀭𑀁 𑀓𑀧𑁆𑀧𑀺𑀬𑀓𑀼𑀝𑀺𑀁 𑀯𑀘𑁆𑀘𑀓𑀼𑀝𑀺𑀁 𑀆𑀭𑁄𑀕𑁆𑀬𑀲𑀸𑀮𑀁 𑀓𑀸𑀭𑁂𑀲𑀺, 𑀬𑀁𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀪𑁂𑀲𑀚𑁆𑀚𑀁 𑀦𑀸𑀫 𑀲𑀩𑁆𑀩𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀞𑀧𑁂𑀲𑀺.

𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀓𑁄𑀲𑀫𑁆𑀩𑀺𑀬𑀁 𑀲𑁂𑀝𑁆𑀞𑀺𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀁 𑀲𑁂𑀝𑁆𑀞𑀺𑀓𑀼𑀮𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑀸𑀭𑀓𑁄 𑀧𑀼𑀜𑁆𑀜𑀯𑀸 𑀓𑀢𑀸𑀥𑀺𑀓𑀸𑀭𑁄, 𑀬𑀢𑁆𑀢𑀓𑀁 𑀓𑀸𑀮𑀁 𑀅𑀭𑁄𑀕𑁄 𑀤𑀻𑀖𑀸𑀬𑀼𑀓𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀢𑁆𑀢𑀓𑀁 𑀅𑀫𑁆𑀳𑀸𑀓𑀁 𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄 𑀪𑀯𑀺𑀲𑁆𑀲𑀢𑀺. 𑀚𑀸𑀢𑀤𑀺𑀯𑀲𑁂𑀬𑁂𑀯 𑀫𑀳𑀸𑀬𑀫𑀼𑀦𑀸𑀬 𑀦𑁆𑀳𑀸𑀢𑀤𑀸𑀭𑀓𑀸 𑀦𑀺𑀭𑁄𑀕𑀸 𑀳𑁄𑀦𑁆𑀢𑀻’’𑀢𑀺 𑀦𑁆𑀳𑀸𑀧𑀦𑀢𑁆𑀣𑀸𑀬 𑀦𑀁 𑀧𑁂𑀲𑁂𑀲𑀺. ‘‘𑀧𑀜𑁆𑀘𑀫𑁂 𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀦𑀤𑀻𑀓𑀻𑀴𑀦𑀢𑁆𑀣𑀸𑀬 𑀦𑀁 𑀧𑁂𑀲𑁂𑀲𑀻’’𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸. 𑀢𑀢𑁆𑀣 𑀥𑀸𑀢𑀺𑀬𑀸 𑀤𑀸𑀭𑀓𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀓𑀻𑀴𑀸𑀧𑁂𑀦𑁆𑀢𑀺𑀬𑀸 𑀏𑀓𑁄 𑀫𑀘𑁆𑀙𑁄 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀪𑀓𑁆𑀔𑁄 𑀫𑁂 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀉𑀧𑀕𑀢𑁄. 𑀥𑀸𑀢𑀻 𑀤𑀸𑀭𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸, 𑀫𑀘𑁆𑀙𑁄 𑀢𑀁 𑀕𑀺𑀮𑀺. 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀤𑀼𑀓𑁆𑀔𑀁 𑀦 𑀧𑀸𑀧𑀼𑀡𑀺, 𑀲𑀬𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀯𑀺𑀬 𑀅𑀳𑁄𑀲𑀺. 𑀫𑀘𑁆𑀙𑁄 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦 𑀢𑀢𑁆𑀢𑀨𑀸𑀮𑀁 𑀕𑀺𑀮𑀺𑀢𑁆𑀯𑀸 𑀟𑀬𑁆𑀳𑀫𑀸𑀦𑁄 𑀯𑀺𑀬 𑀯𑁂𑀕𑁂𑀦 𑀢𑀺𑀁𑀲𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀯𑀸𑀲𑀺𑀦𑁄 𑀫𑀘𑁆𑀙𑀩𑀦𑁆𑀥𑀲𑁆𑀲 𑀚𑀸𑀮𑀁 𑀧𑀸𑀯𑀺𑀲𑀺. 𑀫𑀳𑀸𑀫𑀘𑁆𑀙𑀸 𑀦𑀸𑀫 𑀚𑀸𑀮𑁂𑀦 𑀩𑀤𑁆𑀥𑀸 𑀫𑀸𑀭𑀺𑀬𑀫𑀸𑀦𑀸𑀯 𑀫𑀭𑀦𑁆𑀢𑀺, 𑀅𑀬𑀁 𑀧𑀦 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦 𑀚𑀸𑀮𑀢𑁄 𑀦𑀻𑀳𑀝𑀫𑀢𑁆𑀢𑁄𑀯 𑀫𑀢𑁄. 𑀫𑀘𑁆𑀙𑀩𑀦𑁆𑀥𑀸 𑀘 𑀫𑀳𑀸𑀫𑀘𑁆𑀙𑀁 𑀮𑀪𑀺𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀺, 𑀢𑀁 𑀧𑀦 𑀤𑀸𑀭𑀓𑀲𑁆𑀲 𑀆𑀦𑀼𑀪𑀸𑀯𑁂𑀦 𑀅𑀨𑀸𑀮𑁂𑀢𑁆𑀯𑀸 𑀲𑀓𑀮𑀫𑁂𑀯 𑀓𑀸𑀚𑁂𑀦 𑀳𑀭𑀺𑀢𑁆𑀯𑀸 ‘‘𑀲𑀳𑀲𑁆𑀲𑁂𑀦 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀸 𑀦𑀕𑀭𑁂 𑀯𑀺𑀘𑀭𑀺𑀁𑀲𑀼, 𑀓𑁄𑀘𑀺 𑀦 𑀕𑀡𑁆𑀳𑀸𑀢𑀺.

𑀢𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀅𑀧𑀼𑀢𑁆𑀢𑀓𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀁 𑀲𑁂𑀝𑁆𑀞𑀺𑀓𑀼𑀮𑀁 𑀅𑀢𑁆𑀣𑀺. 𑀢𑀲𑁆𑀲 𑀤𑁆𑀯𑀸𑀭𑀫𑀽𑀮𑀁 𑀧𑀢𑁆𑀯𑀸 ‘‘𑀓𑀺𑀁 𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑀸 ‘‘𑀓𑀳𑀸𑀧𑀡’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀳𑀺 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀕𑀳𑀺𑀢𑁄. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑀘𑁆𑀙𑁂 𑀦 𑀓𑁂𑀴𑀸𑀬𑀢𑀺, 𑀢𑀁𑀤𑀺𑀯𑀲𑀁 𑀧𑀦 𑀫𑀘𑁆𑀙𑀁 𑀨𑀮𑀓𑁂 𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀨𑀸𑀮𑁂𑀲𑀺. 𑀫𑀘𑁆𑀙𑀜𑁆𑀘 𑀦𑀸𑀫 𑀓𑀼𑀘𑁆𑀙𑀺𑀢𑁄 𑀨𑀸𑀮𑁂𑀦𑁆𑀢𑀺, 𑀲𑀸 𑀧𑀦 𑀧𑀺𑀝𑁆𑀞𑀺𑀢𑁄 𑀨𑀸𑀮𑁂𑀦𑁆𑀢𑀻 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀫𑁂 𑀧𑀼𑀢𑁆𑀢𑁄 𑀮𑀤𑁆𑀥𑁄’’𑀢𑀺 𑀦𑀸𑀤𑀁 𑀦𑀤𑀺𑀢𑁆𑀯𑀸 𑀤𑀸𑀭𑀓𑀁 𑀆𑀤𑀸𑀬 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺 𑀢𑀸𑀯𑀤𑁂𑀯 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀤𑀸𑀭𑀓𑀫𑀸𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀫𑁂, 𑀤𑁂𑀯, 𑀤𑀸𑀭𑀓𑁄 𑀮𑀤𑁆𑀥𑁄, 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. 𑀧𑀼𑀜𑁆𑀜𑀯𑀸 𑀏𑀲, 𑀬𑁄 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀆𑀭𑁄𑀕𑁄 𑀯𑀲𑀺, 𑀧𑁄𑀲𑁂𑀳𑀺 𑀦𑀦𑁆𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀇𑀢𑀭𑀁 𑀓𑀼𑀮𑀁 ‘‘𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑀁 𑀮𑀪𑀻’’𑀢𑀺. 𑀢𑁂 𑀢𑀢𑁆𑀣 𑀅𑀕𑀫𑀁𑀲𑀼. 𑀅𑀣𑀲𑁆𑀲 𑀫𑀸𑀢𑀸 𑀤𑀸𑀭𑀓𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀻𑀴𑀸𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀫𑀦𑀸𑀧𑁄 𑀯𑀢𑀸𑀬𑀁 𑀤𑀸𑀭𑀓𑁄’’𑀢𑀺 𑀕𑀳𑁂𑀢𑁆𑀯𑀸 𑀧𑀓𑀢𑀺𑀁 𑀆𑀘𑀺𑀓𑁆𑀔𑀺. 𑀇𑀢𑀭𑀸 ‘‘𑀫𑀬𑁆𑀳𑀁 𑀧𑀼𑀢𑁆𑀢𑁄’’𑀢𑀺 𑀆𑀳. 𑀓𑀳𑀁 𑀢𑁂 𑀮𑀤𑁆𑀥𑁄𑀢𑀺. 𑀫𑀘𑁆𑀙𑀓𑀼𑀘𑁆𑀙𑀺𑀬𑀦𑁆𑀢𑀺. 𑀦 𑀢𑀼𑀬𑁆𑀳𑀁 𑀧𑀼𑀢𑁆𑀢𑁄, 𑀫𑀬𑁆𑀳𑀁 𑀧𑀼𑀢𑁆𑀢𑁄𑀢𑀺. 𑀓𑀳𑀁 𑀢𑁂 𑀮𑀤𑁆𑀥𑁄𑀢𑀺. 𑀫𑀬𑀸 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑁄, 𑀅𑀣 𑀦𑀁 𑀦𑀤𑀺𑀬𑀸 𑀓𑀻𑀴𑀸𑀧𑀺𑀬𑀫𑀸𑀦𑀁 𑀫𑀘𑁆𑀙𑁄 𑀕𑀺𑀮𑀻𑀢𑀺. 𑀢𑀼𑀬𑁆𑀳𑀁 𑀧𑀼𑀢𑁆𑀢𑁄 𑀅𑀜𑁆𑀜𑁂𑀦 𑀫𑀘𑁆𑀙𑁂𑀦 𑀕𑀺𑀮𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀧𑀦 𑀫𑀬𑀸 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀮𑀤𑁆𑀥𑁄𑀢𑀺 𑀉𑀪𑁄𑀧𑀺 𑀭𑀸𑀚𑀓𑀼𑀮𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀆𑀳 𑁋 ‘‘𑀅𑀬𑀁 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑀢𑁆𑀢𑀸 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀫𑀘𑁆𑀙𑀁 𑀕𑀡𑁆𑀳𑀦𑁆𑀢𑀸𑀧𑀺 𑀯𑀓𑁆𑀓𑀬𑀓𑀦𑀸𑀤𑀻𑀦𑀺 𑀩𑀳𑀺 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀮𑀤𑁆𑀥𑀢𑁆𑀢𑀸 𑀅𑀬𑀫𑁆𑀧𑀺 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀤𑀸𑀭𑀓𑁄 𑀉𑀪𑀺𑀦𑁆𑀦𑀫𑁆𑀧𑀺 𑀓𑀼𑀮𑀸𑀦𑀁 𑀤𑀸𑀬𑀸𑀤𑁄 𑀳𑁄𑀢𑀽’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂𑀧𑀺 𑀓𑀼𑀮𑀸𑀦𑀺 𑀅𑀢𑀺𑀯𑀺𑀬 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀲 𑀤𑁆𑀯𑀻𑀳𑀺 𑀓𑀼𑀮𑁂𑀳𑀺 𑀯𑀟𑁆𑀠𑀺𑀢𑀢𑁆𑀢𑀸 𑀩𑀸𑀓𑀼𑀮𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼.

𑀢𑀲𑁆𑀲 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀤𑁆𑀯𑀻𑀲𑀼𑀧𑀺 𑀦𑀕𑀭𑁂𑀲𑀼 𑀢𑀬𑁄 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀲𑀼𑀁. 𑀏𑀓𑁂𑀓𑀲𑁆𑀫𑀺𑀁 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀢𑀺. 𑀏𑀓𑀲𑁆𑀫𑀺𑀁 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀼𑀢𑁆𑀣𑀲𑁆𑀲 𑀲𑀗𑁆𑀖𑀸𑀝𑀦𑀸𑀯𑀸𑀲𑀼 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀦𑀁 𑀲𑀤𑁆𑀥𑀺𑀁 𑀦𑀸𑀝𑀓𑁂𑀳𑀺 𑀆𑀭𑁄𑀧𑁂𑀦𑁆𑀢𑀺. 𑀲𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀇𑀢𑀭𑀁 𑀦𑀕𑀭𑀁 𑀕𑀘𑁆𑀙𑀢𑀺. 𑀢𑀁𑀦𑀕𑀭𑀯𑀸𑀲𑀻𑀦𑀺 𑀦𑀸𑀝𑀓𑀸𑀦𑀺 ‘‘𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀉𑀧𑀟𑁆𑀠𑀫𑀕𑁆𑀕𑀁 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑁆𑀯𑀻𑀳𑀺 𑀫𑀸𑀲𑁂𑀳𑀺 𑀅𑀢𑁆𑀢𑀦𑁄 𑀦𑀕𑀭𑀁 𑀦𑁂𑀦𑁆𑀢𑀺, 𑀇𑀢𑀭𑀸𑀦𑀺 𑀦𑀸𑀝𑀓𑀸𑀦𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑀼𑀦 𑀇𑀢𑀭𑀁 𑀦𑀕𑀭𑀁 𑀕𑀘𑁆𑀙𑀢𑀺. 𑀏𑀯𑀫𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀅𑀲𑀻𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀅𑀦𑀼𑀓𑁆𑀓𑀫𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀓𑁄𑀲𑀫𑁆𑀩𑀺𑀁 𑀧𑀸𑀧𑀼𑀡𑀺, 𑀩𑀸𑀭𑀸𑀡𑀲𑀺𑀦𑁆𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸. 𑀩𑀸𑀓𑀼𑀮𑁄 𑀲𑁂𑀝𑁆𑀞𑀺𑀧𑀺 𑀔𑁄 ‘‘𑀤𑀲𑀩𑀮𑁄 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀩𑀳𑀼𑀁 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺. 𑀲𑁄 𑀲𑀢𑁆𑀢𑀸𑀳𑀫𑁂𑀯 𑀧𑀼𑀣𑀼𑀚𑁆𑀚𑀦𑁄 𑀳𑀼𑀢𑁆𑀯𑀸 𑀅𑀝𑁆𑀞𑀫𑁂 𑀅𑀭𑀼𑀡𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀤𑁆𑀯𑀻𑀲𑀼 𑀦𑀕𑀭𑁂𑀲𑀼 𑀕𑀺𑀳𑀺𑀓𑀸𑀮𑁂 𑀧𑀭𑀺𑀘𑀸𑀭𑀺𑀓𑀫𑀸𑀢𑀼𑀕𑀸𑀫𑀸 𑀅𑀢𑁆𑀢𑀦𑁄 𑀓𑀼𑀮𑀖𑀭𑀸𑀦𑀺 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀲𑀫𑀸𑀦𑀸 𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀧𑀳𑀺𑀡𑀺𑀁𑀲𑀼. 𑀣𑁂𑀭𑁄 𑀏𑀓𑀁 𑀅𑀤𑁆𑀥𑀫𑀸𑀲𑀁 𑀓𑁄𑀲𑀫𑁆𑀩𑀺𑀯𑀸𑀲𑀺𑀓𑁂𑀳𑀺 𑀧𑀳𑀺𑀢𑀁 𑀘𑀻𑀯𑀭𑀁 𑀪𑀼𑀜𑁆𑀚𑀢𑀺, 𑀏𑀓𑀁 𑀅𑀤𑁆𑀥𑀫𑀸𑀲𑀁 𑀩𑀸𑀭𑀸𑀡𑀲𑀺𑀯𑀸𑀲𑀺𑀓𑁂𑀳𑀻𑀢𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀤𑁆𑀯𑀻𑀲𑀼𑀧𑀺 𑀦𑀕𑀭𑁂𑀲𑀼 𑀬𑀁 𑀬𑀁 𑀉𑀢𑁆𑀢𑀫𑀁, 𑀢𑀁 𑀢𑀁 𑀣𑁂𑀭𑀲𑁆𑀲𑁂𑀯 𑀆𑀳𑀭𑀺𑀬𑀢𑀺. 𑀣𑁂𑀭𑀲𑁆𑀲 𑀅𑀲𑀻𑀢𑀺 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀲𑁆𑀲 𑀤𑁆𑀯𑀻𑀳𑀗𑁆𑀕𑀼𑀮𑁂𑀳𑀺 𑀕𑀦𑁆𑀥𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀧𑀲𑀺𑀗𑁆𑀖𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀦 𑀓𑁄𑀘𑀺 𑀆𑀩𑀸𑀥𑁄 𑀦𑀸𑀫 𑀅𑀳𑁄𑀲𑀺. 𑀆𑀲𑀻𑀢𑀺𑀫𑁂 𑀯𑀲𑁆𑀲𑁂 𑀲𑀼𑀔𑁂𑀦𑁂𑀯 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁄. 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀆𑀩𑀸𑀥𑁄 𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀯𑁂𑀓𑀮𑁆𑀮𑀁 𑀯𑀸 𑀦𑀸𑀳𑁄𑀲𑀺. 𑀲𑁄 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂𑀧𑀺 𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑀓𑀲𑁆𑀲 𑀅𑀘𑁂𑀮𑀓𑀲𑁆𑀲𑀧𑀲𑁆𑀲 𑀅𑀢𑁆𑀢𑀦𑁄 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀤𑀻𑀧𑀦𑀯𑀲𑁂𑀦𑁂𑀯 𑀲𑀓𑀮𑀁 𑀩𑀸𑀓𑀼𑀮𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁨𑁦𑁯 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀯𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀲𑀫𑀼𑀝𑁆𑀞𑀺𑀢𑀸. 𑀲𑀢𑁆𑀣𑀸 𑀧𑀦 𑀣𑁂𑀭𑀲𑁆𑀲 𑀥𑀭𑀫𑀸𑀦𑀓𑀸𑀮𑁂𑀬𑁂𑀯 𑀣𑁂𑀭𑁂 𑀬𑀣𑀸 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑁄 𑀩𑀸𑀓𑀼𑀮𑀢𑁆𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀧𑁆𑀧𑀸𑀩𑀸𑀥𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑁄𑀪𑀺𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁭. 𑀧𑀜𑁆𑀘𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁 𑀅𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀸𑀦𑀁 𑀲𑁄𑀪𑀺𑀢𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀓𑀺𑀭 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀫𑀸𑀦𑁄 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀅𑀲𑀜𑁆𑀜𑀺𑀪𑀯𑁂 𑀅𑀘𑀺𑀢𑁆𑀢𑀓𑀧𑀝𑀺𑀲𑀦𑁆𑀥𑀺𑀁 𑀦𑀬𑀢𑁄 𑀅𑀕𑁆𑀕𑀳𑁂𑀲𑀺 𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬. 𑀢𑀲𑁆𑀫𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑁄𑀪𑀺𑀢𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀲𑁄 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀬𑀸𑀯 𑀅𑀲𑀜𑁆𑀜𑀺𑀪𑀯𑁂 𑀅𑀘𑀺𑀢𑁆𑀢𑀓𑀧𑀝𑀺𑀲𑀦𑁆𑀥𑀺, 𑀢𑀸𑀯 𑀧𑀝𑀺𑀲𑀦𑁆𑀥𑀺𑀁 𑀅𑀤𑁆𑀤𑀲. 𑀢𑀢𑁄 𑀧𑀭𑀁 𑀅𑀦𑁆𑀢𑀭𑁂 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀧𑀯𑀢𑁆𑀢𑀺𑀁 𑀅𑀤𑀺𑀲𑁆𑀯𑀸 𑀅𑀯𑀲𑀸𑀦𑁂 𑀘𑀼𑀢𑀺𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺 𑀆𑀯𑀚𑁆𑀚𑀫𑀸𑀦𑁄 𑀦𑀬𑀯𑀲𑁂𑀦 ‘‘𑀅𑀲𑀜𑁆𑀜𑀺𑀪𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 𑀇𑀫𑀁 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀉𑀧𑀸𑀮𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁮. 𑀙𑀝𑁆𑀞𑁂 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻𑀢𑀺 𑀯𑀺𑀦𑀬𑀥𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑀸𑀮𑀺𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀣𑁂𑀭𑁄 𑀓𑀺𑀭 𑀢𑀣𑀸𑀕𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀣𑀸𑀕𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀯𑀺𑀦𑀬𑀧𑀺𑀝𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀁, 𑀅𑀚𑁆𑀚𑀼𑀓𑀯𑀢𑁆𑀣𑀼𑀁, (𑀧𑀸𑀭𑀸. 𑁧𑁫𑁮) 𑀓𑀼𑀫𑀸𑀭𑀓𑀲𑁆𑀲𑀧𑀯𑀢𑁆𑀣𑀼𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀓𑀣𑁂𑀲𑀺. 𑀢𑀲𑁆𑀫𑀸 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑁂𑀲 𑀳𑀁𑀲𑀯𑀢𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑁄 𑀏𑀓𑀤𑀺𑀯𑀲𑀁 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀧𑁆𑀧𑀓𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀉𑀧𑀸𑀮𑀺𑀤𑀸𑀭𑀓𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀯𑀬𑀧𑁆𑀧𑀢𑁆𑀢𑁄 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑀲𑀸𑀥𑀓𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑁂 𑀅𑀦𑀼𑀧𑀺𑀬𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑁂 𑀧𑀩𑁆𑀩𑀚𑁆𑀚𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑁂𑀳𑀺 𑀢𑁂𑀢𑀺 𑀙𑀳𑀺 𑀔𑀢𑁆𑀢𑀺𑀬𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺. 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀧𑀸𑀴𑀺𑀬𑀁 (𑀘𑀽𑀴𑀯. 𑁩𑁩𑁦) 𑀆𑀕𑀢𑀫𑁂𑀯.

𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄 𑀲𑀢𑁆𑀣𑀸𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀭𑀜𑁆𑀜𑀯𑀸𑀲𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺 𑀆𑀳. 𑀪𑀺𑀓𑁆𑀔𑀼 𑀢𑀯 𑀅𑀭𑀜𑁆𑀜𑁂 𑀯𑀲𑀦𑁆𑀢𑀲𑁆𑀲 𑀏𑀓𑀫𑁂𑀯 𑀥𑀼𑀭𑀁 𑀯𑀟𑁆𑀠𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀥𑀼𑀭𑀜𑁆𑀘 𑀕𑀦𑁆𑀣𑀥𑀼𑀭𑀜𑁆𑀘 𑀧𑀭𑀺𑀧𑀽𑀭𑁂𑀲𑁆𑀲𑀢𑀻𑀢𑀺. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣 𑀦𑀁 𑀲𑀢𑁆𑀣𑀸 𑀲𑀬𑀫𑁂𑀯 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀯𑀺𑀦𑀺𑀘𑁆𑀙𑀺𑀦𑀺. 𑀲𑀢𑁆𑀣𑀸 𑀏𑀓𑁂𑀓𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀺𑀢𑁂 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀢𑀬𑁄𑀧𑀺 𑀯𑀺𑀦𑀺𑀘𑁆𑀙𑀬𑁂 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀦𑀦𑁆𑀤𑀓𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁯. 𑀲𑀢𑁆𑀢𑀫𑁂 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀬𑀤𑀺𑀤𑀁 𑀦𑀦𑁆𑀤𑀓𑁄𑀢𑀺 𑀅𑀬𑀁 𑀳𑀺 𑀣𑁂𑀭𑁄 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀏𑀓𑀲𑀫𑁄𑀥𑀸𑀦𑁂 𑀧𑀜𑁆𑀘 𑀪𑀺𑀓𑁆𑀔𑀼𑀦𑀻𑀲𑀢𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀜𑁆𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀘 𑀘𑀺𑀡𑁆𑀡𑀯𑀲𑀻 𑀅𑀳𑁄𑀲𑀺. 𑀲𑁄 𑀘𑀢𑀽𑀲𑀼 𑀧𑀭𑀺𑀲𑀸𑀲𑀼 𑀲𑀫𑁆𑀧𑀢𑁆𑀢𑀸𑀲𑀼 ‘‘𑀲𑀩𑁆𑀩𑁂𑀲𑀁𑀬𑁂𑀯 𑀫𑀦𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀥𑀫𑁆𑀫𑀓𑀣𑀺𑀓𑀦𑀦𑁆𑀤𑀓𑁄 𑀦𑀸𑀫 𑀚𑀸𑀢𑁄. 𑀢𑀣𑀸𑀕𑀢𑁄𑀧𑀺 𑀔𑁄 𑀭𑁄𑀳𑀺𑀡𑀻𑀦𑀤𑀻𑀢𑀻𑀭𑁂 𑀘𑀼𑀫𑁆𑀩𑀝𑀓𑀓𑀮𑀳𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀸𑀓𑀺𑀬𑀓𑀼𑀫𑀸𑀭𑀲𑀢𑀸𑀦𑀁 𑀅𑀦𑀪𑀺𑀭𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀢𑁂 𑀪𑀺𑀓𑁆𑀔𑀽 𑀆𑀤𑀸𑀬 𑀓𑀼𑀡𑀸𑀮𑀤𑀳𑀁 𑀕𑀦𑁆𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀓𑀣𑀸𑀬 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀦𑁂𑀲𑀁 𑀲𑀁𑀯𑀺𑀕𑁆𑀕𑀪𑀸𑀯𑀁 𑀜𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀣𑀁 𑀓𑀣𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀓𑀣𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺. 𑀢𑁂𑀲𑀁 𑀣𑁂𑀭𑀸𑀦𑀁 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 ‘‘𑀅𑀫𑁆𑀳𑁂 𑀤𑀸𑀦𑀺 𑀇𑀥 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀸𑀯 𑀏𑀓𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀣𑁂𑀭𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀁𑀲𑀼. 𑀅𑀢𑀻𑀢𑀸𑀦𑀦𑁆𑀢𑀭𑀸𑀬 𑀧𑀦 𑀚𑀸𑀢𑀺𑀬𑀸 𑀲𑀩𑁆𑀩𑀸𑀯 𑀢𑀸 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲 𑀭𑀸𑀚𑀧𑀼𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁂𑀲𑀼𑀁.

𑀢𑁂𑀦 𑀲𑀫𑀬𑁂𑀦 𑀲𑀢𑁆𑀣𑀸 ‘‘𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀽’’𑀢𑀺 𑀆𑀳. 𑀣𑁂𑀭𑁄 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀢𑀸𑀲𑀁 𑀧𑀼𑀭𑀺𑀫𑀪𑀯𑁂 𑀅𑀢𑁆𑀢𑀦𑁄 𑀧𑀸𑀤𑀧𑀭𑀺𑀘𑀸𑀭𑀺𑀓𑀪𑀸𑀯𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀉𑀧𑀫𑀸𑀬𑁄 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑀬𑀫𑀸𑀦𑀁 𑀤𑀺𑀲𑁆𑀯𑀸 𑀅𑀜𑁆𑀜𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻 𑀪𑀺𑀓𑁆𑀔𑀼 𑀇𑀫𑀁 𑀓𑀸𑀭𑀡𑀁 𑀑𑀮𑁄𑀓𑁂𑀢𑁆𑀯𑀸 ‘𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀬𑀸𑀯𑀚𑁆𑀚𑀤𑀺𑀯𑀲𑀸 𑀑𑀭𑁄𑀥𑁂 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑁄𑀪𑀢𑀸𑀬𑀫𑀸𑀬𑀲𑁆𑀫𑀸 𑀑𑀭𑁄𑀥𑀧𑀭𑀺𑀯𑀼𑀢𑁄’𑀢𑀺 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀸 𑀲𑀬𑀁 𑀅𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑁂𑀲𑁂𑀲𑀺. 𑀢𑀸 𑀧𑀦 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀣𑁂𑀭𑀲𑁆𑀲𑁂𑀯 𑀑𑀯𑀸𑀤𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀪𑀕𑀯𑀸 ‘‘𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀅𑀜𑁆𑀜𑀁 𑀅𑀧𑁂𑀲𑁂𑀢𑁆𑀯𑀸 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀁 𑀑𑀯𑀤𑀸𑀳𑀻’’𑀢𑀺 𑀣𑁂𑀭𑀁 𑀆𑀳. 𑀲𑁄 𑀲𑀢𑁆𑀣𑀼 𑀓𑀣𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀘𑀸𑀢𑀼𑀤𑁆𑀤𑀲𑁂 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀤𑀢𑁆𑀯𑀸 𑀲𑀩𑁆𑀩𑀸𑀯 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀴𑀸𑀬𑀢𑀦𑀧𑀝𑀺𑀫𑀡𑁆𑀟𑀺𑀢𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀢𑀫𑀦𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 ‘‘𑀓𑀲𑁆𑀫𑀺𑀁 𑀦𑀼 𑀔𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀇𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀭𑀺𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑁂𑀬𑁆𑀬𑀼’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀧𑀼𑀦 ‘‘𑀢𑀁𑀬𑁂𑀯 𑀦𑀦𑁆𑀤𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸𑀧𑀺 𑀏𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑀧𑀼𑀦𑀤𑀺𑀯𑀲𑁂𑀧𑀺 𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀢𑀸 𑀧𑀼𑀦𑀤𑀺𑀯𑀲𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀩𑁆𑀩𑀸𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀢𑀁𑀤𑀺𑀯𑀲𑀁 𑀪𑀕𑀯𑀸 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀥𑀫𑁆𑀫𑀤𑁂𑀲𑀦𑀸𑀬 𑀲𑀨𑀮𑀪𑀸𑀯𑀁 𑀜𑀢𑁆𑀯𑀸 ‘‘𑀳𑀺𑀬𑁆𑀬𑁄 𑀦𑀦𑁆𑀤𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀘𑀸𑀢𑀼𑀤𑁆𑀤𑀲𑀺𑀬𑀁 𑀘𑀦𑁆𑀤𑀲𑀤𑀺𑀲𑀻 𑀅𑀳𑁄𑀲𑀺, 𑀅𑀚𑁆𑀚 𑀧𑀦𑁆𑀦𑀭𑀲𑀺𑀬𑀁 𑀘𑀦𑁆𑀤𑀲𑀤𑀺𑀲𑀻’’𑀢𑀺 𑀯𑀢𑁆𑀯𑀸 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀢𑀤𑁂𑀯 𑀘 𑀓𑀸𑀭𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀣𑁂𑀭𑀁 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁦. 𑀅𑀝𑁆𑀞𑀫𑁂 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀦𑁆𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀸𑀦𑀁 𑀦𑀦𑁆𑀤𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀢𑁆𑀣𑀼𑀲𑀸𑀯𑀓𑀸 𑀅𑀕𑀼𑀢𑁆𑀢𑀤𑁆𑀯𑀸𑀭𑀸 𑀦𑀸𑀫 𑀦𑀢𑁆𑀣𑀺, 𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀤𑀲𑀲𑀼 𑀤𑀺𑀲𑀸𑀲𑀼 𑀬𑀁 𑀬𑀁 𑀤𑀺𑀲𑀁 𑀑𑀮𑁄𑀓𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀢𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀢𑀺. 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀻𑀦𑀕𑀭𑁂 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑁂 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀦𑀸𑀫𑀕𑁆𑀕𑀳𑀡𑀤𑀺𑀯𑀲𑁂 𑀜𑀸𑀢𑀺𑀲𑀗𑁆𑀖𑀁 𑀦𑀦𑁆𑀤𑀬𑀦𑁆𑀢𑁄 𑀢𑁄𑀲𑁂𑀦𑁆𑀢𑁄 𑀚𑀸𑀢𑁄𑀢𑀺 𑀦𑀦𑁆𑀤𑀓𑀼𑀫𑀸𑀭𑁄𑀢𑁂𑀯 𑀦𑀸𑀫𑀁 𑀅𑀓𑀁𑀲𑀼.

𑀫𑀳𑀸𑀲𑀢𑁆𑀢𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀮𑁄𑀓𑀸𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀭𑀸𑀚𑀕𑀳𑀢𑁄 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀧𑀺𑀢𑀭𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀧𑀺𑀢𑀼 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀭𑀸𑀳𑀼𑀮𑀫𑀸𑀢𑀸𑀬 𑀑𑀯𑀸𑀤𑀁 𑀤𑀢𑁆𑀯𑀸 𑀲𑁂𑀲𑀚𑀦𑀲𑁆𑀲𑀧𑀺 𑀥𑀫𑁆𑀫𑀁 𑀓𑀣𑁂𑀲𑀺. 𑀧𑀼𑀦𑀤𑀺𑀯𑀲𑁂 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀕𑁂𑀳𑀧𑀯𑁂𑀲𑀦𑀆𑀯𑀸𑀳𑀫𑀗𑁆𑀕𑀮𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀢𑀲𑁆𑀲 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀧𑀢𑁆𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑀼𑀁 𑀯𑀺𑀳𑀸𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀦𑀦𑁆𑀤𑀓𑀼𑀫𑀸𑀭𑀁 𑀅𑀪𑀺𑀲𑁂𑀓𑀫𑀗𑁆𑀕𑀮𑀁 𑀦 𑀢𑀣𑀸 𑀧𑀻𑀴𑁂𑀲𑀺, 𑀧𑀢𑁆𑀢𑀁 𑀆𑀤𑀸𑀬 𑀕𑀫𑀦𑀓𑀸𑀮𑁂 𑀧𑀦 𑀚𑀦𑀧𑀤𑀓𑀮𑁆𑀬𑀸𑀡𑀻 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 ‘‘𑀢𑀼𑀯𑀝𑀁 𑀔𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺 𑀬𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀕𑁂𑀳𑀲𑀺𑀢𑀙𑀦𑁆𑀤𑀭𑀸𑀕𑀯𑀲𑁂𑀦 𑀑𑀮𑁄𑀓𑁂𑀦𑁆𑀢𑁄 𑀧𑀦𑁂𑀲 𑀲𑀢𑁆𑀣𑀭𑀺 𑀕𑀸𑀭𑀯𑁂𑀦 𑀬𑀣𑀸𑀭𑀼𑀘𑀺𑀬𑀸 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀢𑁂𑀦𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀧𑁄 𑀅𑀳𑁄𑀲𑀺. 𑀅𑀣 𑀦𑀁 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀯𑀢𑁆𑀢𑁂𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀯𑀢𑁆𑀢𑁂𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀫𑁂𑀯 𑀲𑀢𑁆𑀣𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀧𑀩𑁆𑀩𑀚𑀺𑀢𑁄𑀧𑀺 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀦 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀯𑀼𑀢𑁆𑀢𑀯𑀘𑀦𑀫𑁂𑀯 𑀲𑀭𑀢𑀺. 𑀅𑀣𑀲𑁆𑀲 𑀲𑀸 𑀆𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀺𑀢𑀸 𑀯𑀺𑀬 𑀅𑀳𑁄𑀲𑀺. 𑀲𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀣𑁄𑀓𑀁 𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀕𑀼𑀫𑁆𑀩𑀁 𑀯𑀸 𑀕𑀘𑁆𑀙𑀁 𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀤𑀲𑀩𑀮𑁄 𑀧𑀼𑀭𑀢𑁄 𑀞𑀺𑀢𑀓𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀺𑀬 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀧𑀯𑀺𑀲𑀢𑀺.

𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀦𑁆𑀤𑁄 𑀅𑀢𑀺𑀯𑀺𑀬 𑀧𑀫𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀦𑀪𑀺𑀭𑀢𑀺𑀁 𑀯𑀽𑀧𑀲𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀢𑀲𑁆𑀲 𑀘𑀺𑀢𑁆𑀢𑀦𑀺𑀩𑁆𑀩𑀸𑀧𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀏𑀳𑀺, 𑀦𑀦𑁆𑀤, 𑀤𑁂𑀯𑀘𑀸𑀭𑀺𑀓𑀁 𑀕𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺. 𑀪𑀕𑀯𑀸 𑀓𑀣𑀸𑀳𑀁 𑀇𑀤𑁆𑀥𑀺𑀫𑀦𑁆𑀢𑁂𑀳𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀢𑁆𑀯𑀁 𑀓𑁂𑀯𑀮𑀁 𑀕𑀫𑀦𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀳𑀺, 𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀲𑀻𑀢𑀺. 𑀲𑁄 𑀤𑀲𑀩𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑀣𑀸𑀕𑀢𑁂𑀦𑁂𑀯 𑀲𑀤𑁆𑀥𑀺𑀁 𑀤𑁂𑀯𑀘𑀸𑀭𑀺𑀓𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀑𑀮𑁄𑀓𑁂𑀢𑁆𑀯𑀸 𑀧𑀜𑁆𑀘 𑀅𑀘𑁆𑀙𑀭𑀸𑀲𑀢𑀸𑀦𑀺 𑀅𑀤𑁆𑀤𑀲. 𑀲𑀢𑁆𑀣𑀸 𑀦𑀦𑁆𑀤𑀢𑁆𑀣𑁂𑀭𑀁 𑀲𑀼𑀪𑀦𑀺𑀫𑀺𑀢𑁆𑀢𑀯𑀲𑁂𑀦 𑀢𑀸 𑀑𑀮𑁄𑀓𑁂𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀦𑀦𑁆𑀤, 𑀇𑀫𑀸 𑀦𑀼 𑀔𑁄 𑀅𑀘𑁆𑀙𑀭𑀸 𑀫𑀦𑀸𑀧𑀸, 𑀅𑀣 𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀚𑀦𑀧𑀤𑀓𑀮𑁆𑀬𑀸𑀡𑀻 𑀇𑀫𑀸 𑀅𑀘𑁆𑀙𑀭𑀸 𑀉𑀧𑀦𑀺𑀥𑀸𑀬 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀓𑀸 𑀫𑀓𑁆𑀓𑀝𑀻 𑀯𑀺𑀬 𑀔𑀸𑀬𑀢𑀻𑀢𑀺. 𑀦𑀦𑁆𑀤, 𑀏𑀯𑀭𑀽𑀧𑀸 𑀅𑀘𑁆𑀙𑀭𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀦 𑀤𑀼𑀮𑁆𑀮𑀪𑀸𑀢𑀺. 𑀲𑀘𑁂 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀧𑀸𑀝𑀺𑀪𑁄𑀕𑁄 𑀳𑁄𑀢𑀺, 𑀅𑀳𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀯𑀺𑀲𑁆𑀲𑀢𑁆𑀣𑁄 𑀢𑁆𑀯𑀁, 𑀦𑀦𑁆𑀤, 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀺. 𑀲𑀘𑁂 𑀢𑁂 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀓𑀸𑀮𑀓𑀺𑀭𑀺𑀬𑀸 𑀪𑀯𑀺𑀲𑁆𑀲𑀢𑀺, 𑀅𑀳𑀁 𑀏𑀢𑀸𑀲𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀸𑀝𑀺𑀪𑁄𑀕𑁄𑀢𑀺. 𑀇𑀢𑀺 𑀲𑀢𑁆𑀣𑀸 𑀬𑀣𑀸𑀭𑀼𑀘𑀺𑀬𑀸 𑀤𑁂𑀯𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀧𑀘𑁆𑀘𑀸𑀕𑀜𑁆𑀙𑀺.

𑀢𑀢𑁄 𑀧𑀝𑁆𑀞𑀸𑀬 𑀦𑀦𑁆𑀤𑀢𑁆𑀣𑁂𑀭𑁄 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺. 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺 𑁋 ‘‘𑀢𑀼𑀫𑁆𑀳𑁂 𑀦𑀦𑁆𑀤𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 ‘𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀤𑀲𑀩𑀮𑀁 𑀧𑀸𑀝𑀺𑀪𑁄𑀕𑀁 𑀓𑀢𑁆𑀯𑀸 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀻’𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀣𑁂𑀦𑁆𑀢𑀸 𑀯𑀺𑀘𑀭𑀣𑀸’’𑀢𑀺. 𑀢𑁂 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀪𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀉𑀧𑀓𑁆𑀓𑀺𑀢𑀓𑁄 𑀓𑀺𑀭𑀸𑀬𑀲𑁆𑀫𑀸 𑀦𑀦𑁆𑀤𑁄, 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀪𑀕𑀯𑀸 𑀓𑀺𑀭𑀲𑁆𑀲 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀻𑀦’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀯𑀦𑀽𑀧𑀘𑀸𑀭𑁂 𑀓𑀣𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀦𑀦𑁆𑀤𑀢𑁆𑀣𑁂𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀦 𑀅𑀜𑁆𑀜𑀁 𑀓𑀣𑁂𑀦𑁆𑀢𑀺, 𑀫𑀁 𑀆𑀭𑀩𑁆𑀪 𑀓𑀣𑁂𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀫𑀫 𑀓𑀫𑁆𑀫’’𑀦𑁆𑀢𑀺 𑀧𑀝𑀺𑀲𑀗𑁆𑀔𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑀢𑁆𑀢𑀓𑁆𑀔𑀡𑁂𑀬𑁂𑀯 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀲𑀬𑀫𑁆𑀧𑀺 𑀪𑀕𑀯𑀸 𑀅𑀜𑁆𑀜𑀸𑀲𑀺𑀬𑁂𑀯. 𑀧𑀼𑀦𑀤𑀺𑀯𑀲𑁂 𑀦𑀦𑁆𑀤𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀧𑀸𑀝𑀺𑀪𑁄𑀕𑁄 𑀧𑀜𑁆𑀘𑀦𑁆𑀦𑀁 𑀅𑀘𑁆𑀙𑀭𑀸𑀲𑀢𑀸𑀦𑀁 𑀧𑀝𑀺𑀮𑀸𑀪𑀸𑀬 𑀓𑀓𑀼𑀝𑀧𑀸𑀤𑀻𑀦𑀁, 𑀫𑀼𑀜𑁆𑀘𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀏𑀢𑀲𑁆𑀫𑀸 𑀧𑀝𑀺𑀲𑁆𑀲𑀯𑀸’’𑀢𑀺. 𑀏𑀯𑀁 𑀯𑀢𑁆𑀣𑀼 (𑀉𑀤𑀸. 𑁨𑁨) 𑀲𑀫𑀼𑀝𑁆𑀞𑀺𑀢𑀁. 𑀲𑀢𑁆𑀣𑀸 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 𑀣𑁂𑀭𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁧. 𑀦𑀯𑀫𑁂 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀤𑀦𑁆𑀢𑀸𑀦𑀁 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀓𑀺𑀭 𑀣𑁂𑀭𑁄 𑀏𑀓𑀲𑀫𑁄𑀥𑀸𑀦𑀲𑁆𑀫𑀺𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀩𑀸𑀭𑀸𑀡𑀲𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀲𑀳𑀲𑁆𑀲𑀲𑁆𑀲 𑀕𑀡𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀕𑀩𑁆𑀪𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀸𑀧𑀭𑀺𑀯𑁂𑀡𑀁 𑀓𑀸𑀭𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀚𑀦𑀸 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀓𑀧𑁆𑀧𑀺𑀦𑀉𑀧𑀸𑀲𑀓𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀲𑀧𑀼𑀢𑁆𑀢𑀤𑀸𑀭𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀁𑀲𑀼.

𑀅𑀣 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀅𑀬𑀁 𑀓𑀧𑁆𑀧𑀺𑀦𑁄 𑀧𑀘𑁆𑀘𑀦𑁆𑀢𑀤𑁂𑀲𑁂 𑀓𑀼𑀓𑁆𑀓𑀼𑀝𑀯𑀢𑀻𑀦𑀕𑀭𑁂 𑀭𑀸𑀚𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀲𑁂𑀲𑀧𑀼𑀭𑀺𑀲𑀸 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀅𑀫𑀘𑁆𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀼 𑀓𑀧𑁆𑀧𑀺𑀦𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸 𑀦𑀸𑀫 𑀚𑀸𑀢𑁄. 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀓𑀫𑁆𑀫𑀓𑀭𑀡𑀓𑀸𑀮𑁂 𑀢𑀲𑁆𑀲 𑀖𑀭𑀲𑀸𑀫𑀺𑀦𑀻 𑀇𑀢𑁆𑀣𑀻 𑀲𑀫𑀸𑀦𑀚𑀸𑀢𑀺𑀓𑁂 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀓𑀧𑁆𑀧𑀺𑀦𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀚𑀸𑀢𑀸, 𑀅𑀦𑁄𑀚𑀸𑀧𑀼𑀧𑁆𑀨𑀲𑀤𑀺𑀲𑀯𑀡𑁆𑀡𑀢𑀸𑀬 𑀧𑀦𑀲𑁆𑀲𑀸 𑀅𑀦𑁄𑀚𑀸𑀤𑁂𑀯𑀻𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀫𑀳𑀸𑀓𑀧𑁆𑀧𑀺𑀦𑀭𑀸𑀚𑀸𑀧𑀺 𑀲𑀼𑀢𑀯𑀺𑀢𑁆𑀢𑀓𑁄 𑀅𑀳𑁄𑀲𑀺. 𑀲𑁄 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀲𑀻𑀖𑀁 𑀤𑀽𑀢𑁂 𑀧𑁂𑀲𑁂𑀲𑀺 𑁋 ‘‘𑀬𑀢𑁆𑀣 𑀩𑀳𑀼𑀲𑁆𑀲𑀼𑀢𑁂 𑀲𑀼𑀢𑀥𑀭𑁂 𑀧𑀲𑁆𑀲𑀣, 𑀢𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀣𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀉𑀧𑀦𑀺𑀲𑁆𑀲𑀸𑀬 𑀧𑀝𑀺𑀯𑀲𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀺𑀦𑁄 𑀯𑀸𑀡𑀺𑀚𑀸 𑀲𑀸𑀯𑀢𑁆𑀣𑀺𑀬𑀁 𑀉𑀝𑁆𑀞𑀸𑀦𑀓𑀪𑀡𑁆𑀟𑀁 𑀕𑀳𑁂𑀢𑁆𑀯𑀸, 𑀢𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸, 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸, ‘‘𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸, 𑀭𑀸𑀚𑀓𑀼𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀭𑀸𑀚𑀸 𑀉𑀬𑁆𑀬𑀸𑀦𑀁 𑀕𑀢𑁄’’𑀢𑀺 𑀲𑀼𑀢𑁆𑀯𑀸, 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸, 𑀤𑁆𑀯𑀸𑀭𑁂 𑀞𑀺𑀢𑀸 𑀧𑀝𑀺𑀳𑀸𑀭𑀓𑀲𑁆𑀲 𑀆𑀭𑁄𑀘𑀬𑀺𑀁𑀲𑀼. 𑀅𑀣 𑀭𑀜𑁆𑀜𑁄 𑀦𑀺𑀯𑁂𑀤𑀺, 𑀢𑁂 𑀭𑀸𑀚𑀸 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀢𑀺𑀢𑀧𑀡𑁆𑀡𑀸𑀓𑀸𑀭𑁂 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂, ‘‘𑀢𑀸𑀢𑀸, 𑀓𑀼𑀢𑁄 𑀆𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. 𑀲𑀸𑀯𑀢𑁆𑀣𑀺𑀢𑁄, 𑀤𑁂𑀯𑀸𑀢𑀺. 𑀓𑀘𑁆𑀘𑀺 𑀯𑁄 𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀁, 𑀥𑀫𑁆𑀫𑀺𑀓𑁄 𑀭𑀸𑀚𑀸𑀢𑀺? 𑀆𑀫, 𑀤𑁂𑀯𑀸𑀢𑀺. 𑀅𑀢𑁆𑀣𑀺 𑀧𑀦 𑀢𑀼𑀫𑁆𑀳𑀸𑀓𑀁 𑀤𑁂𑀲𑁂 𑀓𑀺𑀜𑁆𑀘𑀺 𑀲𑀸𑀲𑀦𑀦𑁆𑀢𑀺? 𑀅𑀢𑁆𑀣𑀺 𑀤𑁂𑀯, 𑀦 𑀧𑀦 𑀲𑀓𑁆𑀓𑀸 𑀉𑀘𑁆𑀙𑀺𑀝𑁆𑀞𑀫𑀼𑀔𑁂𑀳𑀺 𑀓𑀣𑁂𑀢𑀼𑀦𑁆𑀢𑀺. 𑀭𑀸𑀚𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀉𑀤𑀓𑀁 𑀤𑀸𑀧𑁂𑀲𑀺. 𑀢𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀤𑀲𑀩𑀮𑀸𑀪𑀺𑀫𑀼𑀔𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸, ‘‘𑀤𑁂𑀯, 𑀅𑀫𑁆𑀳𑀸𑀓𑀁 𑀤𑁂𑀲𑁂 𑀩𑀼𑀤𑁆𑀥𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀆𑀳𑀁𑀲𑀼. 𑀭𑀜𑁆𑀜𑁄 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑁂 𑀲𑀼𑀢𑀫𑀢𑁆𑀢𑁂𑀬𑁂𑀯 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀢𑀢𑁄 ‘‘𑀩𑀼𑀤𑁆𑀥𑁄𑀢𑀺, 𑀢𑀸𑀢𑀸, 𑀯𑀤𑀣𑀸’’𑀢𑀺 𑀆𑀳. 𑀩𑀼𑀤𑁆𑀥𑁄𑀢𑀺, 𑀤𑁂𑀯, 𑀯𑀤𑀸𑀫𑀸𑀢𑀺. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀤𑀸𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑁄𑀢𑀺𑀧𑀤𑀁 𑀅𑀧𑀭𑀺𑀫𑀸𑀡𑀁, 𑀦𑀸𑀲𑁆𑀲 𑀲𑀓𑁆𑀓𑀸 𑀧𑀭𑀺𑀫𑀸𑀡𑀁 𑀓𑀸𑀢𑀼’’𑀦𑁆𑀢𑀺 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂 𑀧𑀲𑀦𑁆𑀦𑁄 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀅𑀧𑀭𑀁 𑀓𑀺𑀁 𑀲𑀸𑀲𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁂𑀯 𑀥𑀫𑁆𑀫𑀭𑀢𑀦𑀁 𑀦𑀸𑀫 𑀉𑀧𑁆𑀧𑀦𑁆𑀦𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑀼𑀦 ‘‘𑀅𑀜𑁆𑀜𑀁 𑀓𑀺𑀁 𑀲𑀸𑀲𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀲𑀗𑁆𑀖𑀭𑀢𑀦𑀁 𑀤𑁂𑀯 𑀉𑀧𑁆𑀧𑀦𑁆𑀦𑀦𑁆𑀢𑀺. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑀢𑀣𑁂𑀯 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀅𑀧𑀭𑀫𑁆𑀧𑀺 𑀲𑀢𑀲𑀳𑀲𑁆𑀲𑀁 𑀤𑀢𑁆𑀯𑀸 𑀤𑀺𑀦𑁆𑀦𑀪𑀸𑀯𑀁 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸, ‘‘𑀢𑀸𑀢𑀸, 𑀤𑁂𑀯𑀺𑀬𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣𑀸’’𑀢𑀺 𑀧𑁂𑀲𑁂𑀲𑀺. 𑀢𑁂𑀲𑀼 𑀕𑀢𑁂𑀲𑀼 𑀅𑀫𑀘𑁆𑀘𑁂 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸, 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀤𑁂𑀯 𑀢𑀼𑀫𑁆𑀳𑁂 𑀓𑀺𑀁 𑀓𑀢𑁆𑀢𑀼𑀓𑀸𑀫𑀸𑀢𑀺? 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺. 𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀖𑀭𑀁 𑀯𑀸 𑀓𑀼𑀝𑀼𑀫𑁆𑀩𑀁 𑀯𑀸 𑀅𑀦𑀧𑀮𑁄𑀓𑁂𑀢𑁆𑀯𑀸 𑀬𑁂 𑀅𑀲𑁆𑀲𑁂 𑀆𑀭𑀼𑀬𑁆𑀳 𑀕𑀢𑀸 𑀢𑁂𑀳𑁂𑀯 𑀦𑀺𑀓𑁆𑀔𑀫𑀺𑀁𑀲𑀼.

𑀯𑀸𑀡𑀺𑀚𑀸 𑀅𑀦𑁄𑀚𑀸𑀤𑁂𑀯𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀁 𑀤𑀲𑁆𑀲𑁂𑀲𑀼𑀁. 𑀲𑀸 𑀢𑀁 𑀯𑀸𑀘𑁂𑀢𑁆𑀯𑀸 ‘‘𑀭𑀜𑁆𑀜𑀸 𑀢𑀼𑀫𑁆𑀳𑀸𑀓𑀁 𑀩𑀳𑀽 𑀓𑀳𑀸𑀧𑀡𑀸 𑀤𑀺𑀦𑁆𑀦𑀸, 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀓𑀢𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. 𑀧𑀺𑀬𑀲𑀸𑀲𑀦𑀁, 𑀤𑁂𑀯𑀺, 𑀆𑀦𑀻𑀢𑀦𑁆𑀢𑀺. 𑀅𑀫𑁆𑀳𑁂𑀧𑀺 𑀲𑀓𑁆𑀓𑀸, 𑀢𑀸𑀢𑀸, 𑀲𑀼𑀡𑀸𑀧𑁂𑀢𑀼𑀦𑁆𑀢𑀺? 𑀲𑀓𑁆𑀓𑀸, 𑀤𑁂𑀯𑀺, 𑀉𑀘𑁆𑀙𑀺𑀝𑁆𑀞𑀫𑀼𑀔𑁂𑀳𑀺 𑀧𑀦 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀲𑀸 𑀲𑀼𑀯𑀡𑁆𑀡𑀪𑀺𑀗𑁆𑀕𑀸𑀭𑁂𑀦 𑀉𑀤𑀓𑀁 𑀤𑀸𑀧𑁂𑀲𑀺. 𑀢𑁂 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀺𑀢𑀦𑀺𑀬𑀸𑀫𑁂𑀦𑁂𑀯 𑀆𑀭𑁄𑀘𑁂𑀲𑀼𑀁. 𑀲𑀸𑀧𑀺 𑀢𑀁 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀸𑀫𑁄𑀚𑁆𑀚𑀸 𑀢𑁂𑀦𑁂𑀯 𑀦𑀬𑁂𑀦 𑀏𑀓𑁂𑀓𑀲𑁆𑀫𑀺𑀁 𑀧𑀤𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀝𑀺𑀜𑁆𑀜𑀸𑀕𑀡𑀦𑀸𑀬 𑀢𑀻𑀡𑀺 𑀢𑀻𑀡𑀺 𑀓𑀢𑁆𑀯𑀸 𑀦𑀯 𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺. 𑀯𑀸𑀡𑀺𑀚𑀸 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀤𑀲 𑀲𑀢𑀲𑀳𑀲𑁆𑀲𑀸𑀦𑀺 𑀮𑀪𑀺𑀁𑀲𑀼. 𑀅𑀣 𑀦𑁂 ‘‘𑀭𑀸𑀚𑀸 𑀓𑀳𑀁, 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀺. 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑁄, 𑀤𑁂𑀯𑀻𑀢𑀺. ‘‘𑀢𑁂𑀦 𑀳𑀺, 𑀢𑀸𑀢𑀸, 𑀢𑀼𑀫𑁆𑀳𑁂 𑀕𑀘𑁆𑀙𑀣𑀸’’𑀢𑀺 𑀢𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀢𑀸𑀦𑀁 𑀅𑀫𑀘𑁆𑀘𑀸𑀦𑀁 𑀫𑀸𑀢𑀼𑀕𑀸𑀫𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀲𑀸𑀫𑀺𑀓𑀸𑀦𑀁 𑀕𑀢𑀝𑁆𑀞𑀸𑀦𑀁 𑀚𑀸𑀦𑀸𑀣 𑀅𑀫𑁆𑀫𑀸’’𑀢𑀺 𑀧𑀼𑀘𑁆𑀙𑀺. 𑀚𑀸𑀦𑀸𑀫, 𑀅𑀬𑁆𑀬𑁂, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀓𑀻𑀴𑀁 𑀕𑀢𑀸𑀢𑀺. 𑀆𑀫, 𑀅𑀫𑁆𑀫𑀸 𑀕𑀢𑀸, 𑀢𑀢𑁆𑀣 𑀧𑀦 𑀕𑀦𑁆𑀢𑁆𑀯𑀸 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄, 𑀲𑀗𑁆𑀖𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀕𑀢𑀸, 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸𑀢𑀺? 𑀢𑀼𑀫𑁆𑀳𑁂 𑀧𑀦, 𑀅𑀬𑁆𑀬𑁂, 𑀓𑀺𑀁 𑀓𑀢𑁆𑀢𑀼𑀓𑀸𑀫𑀸𑀢𑀺? ‘‘𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀦 𑀢𑁂𑀳𑀺 𑀯𑀦𑁆𑀢𑀯𑀫𑀦𑀁 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀬𑁆𑀬𑀦𑁆𑀢𑀺. ‘‘𑀬𑀤𑀺 𑀏𑀯𑀁, 𑀫𑀬𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑀸𑀧𑀺 𑀭𑀣𑁂 𑀬𑁄𑀚𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀭𑀸𑀚𑀸𑀧𑀺 𑀅𑀫𑀘𑁆𑀘𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀕𑀗𑁆𑀕𑀸𑀢𑀻𑀭𑀁 𑀧𑀸𑀧𑀼𑀡𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀕𑀗𑁆𑀕𑀸 𑀧𑀽𑀭𑀸 𑀳𑁄𑀢𑀺. 𑀅𑀣 𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀕𑀗𑁆𑀕𑀸 𑀧𑀽𑀭𑀸 𑀳𑁄𑀢𑀺 𑀘𑀡𑁆𑀟𑀫𑀘𑁆𑀙𑀸𑀓𑀺𑀡𑁆𑀡𑀸, 𑀅𑀫𑁆𑀳𑁂𑀳𑀺 𑀘 𑀲𑀤𑁆𑀥𑀺𑀁 𑀆𑀕𑀢𑀸 𑀤𑀸𑀲𑀸 𑀯𑀸 𑀫𑀦𑀼𑀲𑁆𑀲𑀸 𑀯𑀸 𑀦𑀢𑁆𑀣𑀺, 𑀬𑁂 𑀦𑁄 𑀦𑀸𑀯𑀁 𑀯𑀸 𑀉𑀴𑀼𑀫𑁆𑀧𑀁 𑀯𑀸 𑀓𑀢𑁆𑀯𑀸 𑀤𑀤𑁂𑀬𑁆𑀬𑀼𑀁. 𑀏𑀢𑀲𑁆𑀲 𑀧𑀦 𑀲𑀢𑁆𑀣𑀼 𑀕𑀼𑀡𑀸 𑀦𑀸𑀫 𑀳𑁂𑀝𑁆𑀞𑀸 𑀅𑀯𑀻𑀘𑀺𑀢𑁄 𑀉𑀧𑀭𑀺 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀝𑀸. 𑀲𑀘𑁂 𑀏𑀲 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀇𑀫𑁂𑀲𑀁 𑀅𑀲𑁆𑀲𑀸𑀦𑀁 𑀔𑀼𑀭𑀧𑀺𑀝𑁆𑀞𑀸𑀦𑀺 𑀫𑀸 𑀢𑁂𑀫𑁂𑀦𑁆𑀢𑀽’’𑀢𑀺 𑀉𑀤𑀓𑀧𑀺𑀝𑁆𑀞𑁂𑀦 𑀅𑀲𑁆𑀲𑁂 𑀧𑀓𑁆𑀔𑀦𑁆𑀤𑀸𑀧𑁂𑀲𑀼𑀁. 𑀏𑀓𑀲𑁆𑀲 𑀅𑀲𑁆𑀲𑀲𑁆𑀲𑀸𑀧𑀺 𑀔𑀼𑀭𑀧𑀺𑀝𑁆𑀞𑀫𑀢𑁆𑀢𑀁 𑀦 𑀢𑁂𑀫𑀺, 𑀭𑀸𑀚𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀧𑀭𑀢𑀻𑀭𑀁 𑀧𑀢𑁆𑀯𑀸 𑀧𑀭𑀢𑁄 𑀅𑀜𑁆𑀜𑀁 𑀫𑀳𑀸𑀦𑀤𑀺𑀁 𑀧𑀸𑀧𑀼𑀡𑀺𑀁𑀲𑀼. ‘‘𑀤𑀼𑀢𑀺𑀬𑀸 𑀓𑀺𑀦𑁆𑀦𑀫𑀸’’𑀢𑀺 𑀧𑀼𑀘𑁆𑀙𑀺. 𑀦𑀻𑀮𑀯𑀸𑀳𑀺𑀦𑀻 𑀦𑀸𑀫 𑀕𑀫𑁆𑀪𑀻𑀭𑀢𑁄𑀧𑀺 𑀧𑀼𑀣𑀼𑀮𑀢𑁄𑀧𑀺 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑀸 𑀤𑁂𑀯𑀸𑀢𑀺. 𑀢𑀢𑁆𑀣 𑀅𑀜𑁆𑀜𑀸 𑀲𑀘𑁆𑀘𑀓𑀺𑀭𑀺𑀬𑀸 𑀦𑀢𑁆𑀣𑀺, 𑀢𑀸𑀬 𑀏𑀯 𑀲𑀘𑁆𑀘𑀓𑀺𑀭𑀺𑀬𑀸𑀬 𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀦𑀤𑀺𑀁 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀅𑀣 𑀢𑀢𑀺𑀬𑀁 𑀘𑀦𑁆𑀤𑀪𑀸𑀕𑀁 𑀦𑀸𑀫 𑀫𑀳𑀸𑀦𑀤𑀺𑀁 𑀧𑀢𑁆𑀯𑀸 𑀢𑀫𑁆𑀧𑀺 𑀢𑀸𑀬 𑀏𑀯 𑀲𑀘𑁆𑀘𑀓𑀺𑀭𑀺𑀬𑀸𑀬 𑀅𑀢𑀺𑀓𑁆𑀓𑀫𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀢𑀁𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚 𑀫𑀳𑀸𑀓𑀧𑁆𑀧𑀺𑀦𑁄 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀧𑀳𑀸𑀬 𑀅𑀫𑀘𑁆𑀘𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀫𑀬𑀸 𑀢𑁂𑀲𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀘𑀦𑁆𑀤𑀪𑀸𑀕𑀸𑀬 𑀢𑀻𑀭𑁂 𑀢𑁂𑀲𑀁 𑀉𑀢𑁆𑀢𑀭𑀡𑀢𑀺𑀢𑁆𑀣𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀢𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀦𑁆𑀢𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀦𑁆𑀢𑀺𑀬𑁄 𑀑𑀮𑁄𑀓𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀓𑀁 𑀫𑀼𑀔𑀁 𑀤𑀺𑀲𑁆𑀯𑀸 ‘‘𑀬𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀫𑀬𑀁 𑀧𑀩𑁆𑀩𑀚𑀺𑀢𑀸, 𑀅𑀤𑁆𑀥𑀸 𑀲𑁄 𑀏𑀲𑁄’’𑀢𑀺 𑀤𑀲𑁆𑀲𑀦𑁂𑀦𑁂𑀯 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀡𑀫𑀺𑀢𑁆𑀯𑀸 𑀯𑀦𑁆𑀤𑀫𑀸𑀦𑀸 𑀆𑀕𑀫𑁆𑀫 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀁𑀲𑀼. 𑀭𑀸𑀚𑀸 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦. 𑀲𑀢𑁆𑀣𑀸 𑀢𑁂𑀲𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀣𑀸𑀭𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀲𑀢𑁆𑀣𑀸 ‘‘𑀧𑀼𑀩𑁆𑀩𑁂 𑀇𑀫𑁂 𑀘𑀻𑀯𑀭𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸𑀯 𑀆𑀕𑀢𑀸’’𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀏𑀣 𑀪𑀺𑀓𑁆𑀔𑀯𑁄, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀆𑀳. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀅𑀳𑁄𑀲𑀺, 𑀯𑀲𑁆𑀲𑀲𑀝𑁆𑀞𑀺𑀓𑀢𑁆𑀣𑁂𑀭𑀸 𑀯𑀺𑀬 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀅𑀦𑁄𑀚𑀸𑀧𑀺 𑀤𑁂𑀯𑀻 𑀭𑀣𑀲𑀳𑀲𑁆𑀲𑀧𑀭𑀺𑀯𑀸𑀭𑀸 𑀕𑀗𑁆𑀕𑀸𑀢𑀻𑀭𑀁 𑀧𑀢𑁆𑀯𑀸 𑀭𑀜𑁆𑀜𑁄 𑀅𑀢𑁆𑀣𑀸𑀬 𑀆𑀪𑀢𑀁 𑀦𑀸𑀯𑀁 𑀯𑀸 𑀉𑀴𑀼𑀫𑁆𑀧𑀁 𑀯𑀸 𑀅𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀧𑀦 𑀲𑀢𑁆𑀣𑀸 𑀦 𑀓𑁂𑀯𑀮𑀁 𑀢𑁂𑀲𑀁𑀬𑁂𑀯 𑀅𑀢𑁆𑀣𑀸𑀬 𑀦𑀺𑀩𑁆𑀩𑀢𑁆𑀢𑁄, 𑀲𑀘𑁂 𑀲𑁄 𑀲𑀢𑁆𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀭𑀣𑀸 𑀫𑀸 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀁𑀲𑀽’’𑀢𑀺 𑀉𑀤𑀓𑀧𑀺𑀝𑁆𑀞𑁂𑀦 𑀭𑀣𑁂 𑀧𑀓𑁆𑀔𑀦𑁆𑀤𑀸𑀧𑁂𑀲𑀺. 𑀭𑀣𑀸𑀦𑀁 𑀦𑁂𑀫𑀺𑀯𑀝𑁆𑀝𑀺𑀫𑀢𑁆𑀢𑀫𑁆𑀧𑀺 𑀦 𑀢𑁂𑀫𑀺. 𑀤𑀼𑀢𑀺𑀬𑀦𑀤𑀺𑀫𑁆𑀧𑀺 𑀢𑀢𑀺𑀬𑀦𑀤𑀺𑀫𑁆𑀧𑀺 𑀢𑁂𑀦𑁂𑀯 𑀲𑀘𑁆𑀘𑀓𑀸𑀭𑁂𑀦 𑀉𑀢𑁆𑀢𑀭𑀺. 𑀉𑀢𑁆𑀢𑀭𑀫𑀸𑀦𑀸 𑀏𑀯 𑀘 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀲𑀢𑁆𑀣𑀸𑀭𑀁 𑀅𑀤𑁆𑀤𑀲. 𑀲𑀢𑁆𑀣𑀸𑀧𑀺 ‘‘𑀇𑀫𑀸𑀲𑀁 𑀅𑀢𑁆𑀢𑀦𑁄 𑀲𑀸𑀫𑀺𑀓𑁂 𑀧𑀲𑁆𑀲𑀦𑁆𑀢𑀻𑀦𑀁 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬, 𑀥𑀫𑁆𑀫𑀁 𑀲𑁄𑀢𑀼𑀁 𑀘 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺. 𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀅𑀓𑀸𑀲𑀺. 𑀢𑀸 𑀲𑀩𑁆𑀩𑀸𑀧𑀺 𑀢𑀺𑀢𑁆𑀣𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀸𑀲𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀺𑀁𑀲𑀼. 𑀲𑀢𑁆𑀣𑀸 ‘‘𑀉𑀧𑁆𑀧𑀮𑀯𑀡𑁆𑀡𑀸 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑀻 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀤𑀸𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀢𑀸, 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀚𑁂𑀢𑀯𑀦𑀁 𑀅𑀕𑀫𑀸𑀲𑀺.

𑀅𑀣𑀸𑀬𑀁 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀜𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀅𑀪𑀺𑀡𑁆𑀳𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀪𑀺𑀓𑁆𑀔𑀽 𑀓𑀣𑀁 𑀉𑀧𑁆𑀧𑀸𑀤𑁂𑀲𑀼𑀁 ‘‘𑀓𑀧𑁆𑀧𑀺𑀦𑀢𑁆𑀣𑁂𑀭𑁄 𑀭𑀚𑁆𑀚𑀲𑀼𑀔𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀢𑀻’’𑀢𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀪𑀕𑀯𑀸 ‘‘𑀫𑀫 𑀧𑀼𑀢𑁆𑀢𑁄 𑀫𑀕𑁆𑀕𑀲𑀼𑀔𑀁 𑀨𑀮𑀲𑀼𑀔𑀁 𑀆𑀭𑀩𑁆𑀪 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀯𑀢𑁆𑀯𑀸 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀥𑀫𑁆𑀫𑀧𑀻𑀢𑀺 𑀲𑀼𑀔𑀁 𑀲𑁂𑀢𑀺, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑁂, 𑀲𑀤𑀸 𑀭𑀫𑀢𑀺 𑀧𑀡𑁆𑀟𑀺𑀢𑁄’’𑀢𑀺. (𑀥. 𑀧. 𑁭𑁯);

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀆𑀫𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀓𑀘𑁆𑀘𑀺 𑀯𑁄, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀦 𑀪𑀕𑀯𑀸 𑀤𑁂𑀲𑁂𑀢𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀓𑀲𑁆𑀲𑀘𑀺 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻𑀢𑀺. 𑀲𑀢𑁆𑀣𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀓𑀧𑁆𑀧𑀺𑀦, 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀑𑀯𑀸𑀤𑀫𑀢𑁆𑀢𑀫𑁆𑀧𑀺 𑀦 𑀤𑁂𑀲𑀻’’𑀢𑀺? 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀩𑁆𑀭𑀸𑀳𑁆𑀫𑀡, 𑀫𑀸 𑀏𑀯𑀁 𑀓𑀭𑀺, 𑀅𑀚𑁆𑀚 𑀧𑀝𑁆𑀞𑀸𑀬 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀳𑀻𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀣𑁂𑀭𑁄 𑀲𑀢𑁆𑀣𑀼 𑀓𑀣𑀁 𑀲𑀺𑀭𑀯𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀲𑀫𑁄𑀥𑀸𑀦𑁂𑀬𑁂𑀯 𑀲𑀫𑀡𑀲𑀳𑀲𑁆𑀲𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀸𑀧𑁂𑀲𑀺. 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀧𑀝𑀺𑀧𑀸𑀝𑀺𑀬𑀸 𑀣𑁂𑀭𑁂 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀁 𑀪𑀺𑀓𑁆𑀔𑀼𑀑𑀯𑀸𑀤𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀲𑀸𑀕𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁨. 𑀤𑀲𑀫𑁂 𑀢𑁂𑀚𑁄𑀥𑀸𑀢𑀼𑀓𑀼𑀲𑀮𑀸𑀦𑀦𑁆𑀢𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀓𑀼𑀲𑀮𑀸𑀦𑀁 𑀲𑀸𑀕𑀢𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀣𑁂𑀭𑁄 𑀢𑁂𑀚𑁄𑀥𑀸𑀢𑀼𑀲𑀫𑀸𑀧𑀢𑁆𑀢𑀺𑀬𑀸 𑀅𑀫𑁆𑀩𑀢𑀺𑀢𑁆𑀣𑀦𑀸𑀕𑀲𑁆𑀲 𑀢𑁂𑀚𑀲𑀸 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀁 𑀦𑀸𑀕𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀅𑀓𑀸𑀲𑀺. 𑀢𑀲𑁆𑀫𑀸 𑀢𑁂𑀚𑁄𑀥𑀸𑀢𑀼𑀓𑀼𑀲𑀮𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀢𑁂𑀚𑁄𑀥𑀸𑀢𑀼𑀓𑀼𑀲𑀮𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀸𑀕𑀢𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁆𑀣 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀺.

𑀅𑀣𑁂𑀓𑀤𑀺𑀯𑀲𑀁 𑀲𑀢𑁆𑀣𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀓𑁄𑀲𑀫𑁆𑀩𑀺𑀦𑀕𑀭𑀲𑀫𑀻𑀧𑀁 𑀅𑀕𑀫𑀸𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀦𑀤𑀻𑀢𑀺𑀢𑁆𑀣𑁂 𑀧𑁄𑀭𑀸𑀡𑀓𑀦𑀸𑀯𑀺𑀓𑀲𑁆𑀲 𑀩𑀳𑀽 𑀆𑀕𑀦𑁆𑀢𑀼𑀓𑀕𑀫𑀺𑀓𑀸 𑀯𑁂𑀭𑀺𑀦𑁄 𑀳𑀼𑀢𑁆𑀯𑀸 𑀢𑀁 𑀧𑁄𑀣𑁂𑀢𑁆𑀯𑀸 𑀫𑀸𑀭𑀬𑀺𑀁𑀲𑀼. 𑀲𑁄 𑀯𑀺𑀭𑀼𑀤𑁆𑀥𑁂𑀦 𑀘𑀺𑀢𑁆𑀢𑁂𑀦 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀢𑀺𑀢𑁆𑀣𑁂 𑀫𑀳𑀸𑀦𑀼𑀪𑀸𑀯𑁄 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀯𑀺𑀭𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸 𑀅𑀓𑀸𑀮𑁂𑀬𑁂𑀯 𑀯𑀲𑁆𑀲𑀸𑀧𑁂𑀢𑀺, 𑀓𑀸𑀮𑁂 𑀧𑀦 𑀦 𑀯𑀲𑁆𑀲𑀸𑀧𑁂𑀢𑀺, 𑀲𑀲𑁆𑀲𑀸𑀦𑀺 𑀦 𑀲𑀫𑁆𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀘 𑀢𑀲𑁆𑀲 𑀯𑀽𑀧𑀲𑀫𑀦𑀢𑁆𑀣𑀁 𑀅𑀦𑀼𑀲𑀁𑀯𑀘𑁆𑀙𑀭𑀁 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀯𑀲𑀦𑀢𑁆𑀣𑀸𑀬 𑀘𑀲𑁆𑀲 𑀏𑀓𑀁 𑀕𑁂𑀳𑀁 𑀅𑀓𑀁𑀲𑀼. 𑀲𑀢𑁆𑀣𑀸𑀧𑀺 𑀢𑁂𑀦𑁂𑀯 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 ‘‘𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀭𑀢𑁆𑀢𑀺𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀕𑀫𑀸𑀲𑀺.

𑀅𑀣𑀸𑀬𑀁 𑀣𑁂𑀭𑁄 ‘‘𑀘𑀡𑁆𑀟𑁄 𑀓𑀺𑀭𑁂𑀢𑁆𑀣 𑀦𑀸𑀕𑀭𑀸𑀚𑀸’’𑀢𑀺 𑀲𑀼𑀢𑁆𑀯𑀸 ‘‘𑀇𑀫𑀁 𑀦𑀸𑀕𑀭𑀸𑀚𑀸𑀦𑀁 𑀤𑀫𑁂𑀢𑁆𑀯𑀸 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀯𑀲𑀦𑀝𑁆𑀞𑀸𑀦𑀁 𑀧𑀭𑀺𑀬𑀸𑀤𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀦𑀸𑀕𑀭𑀸𑀚𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀸𑀕𑁄 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑁄𑀦𑀸𑀫𑀸𑀬𑀁 𑀫𑀼𑀡𑁆𑀟𑀓𑁄 𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀥𑀽𑀧𑀸𑀬𑀺, 𑀣𑁂𑀭𑁄 𑀉𑀢𑁆𑀢𑀭𑀺𑀢𑀭𑀁 𑀥𑀽𑀧𑀸𑀬𑀺. 𑀦𑀸𑀕𑁄, 𑀧𑀚𑁆𑀚𑀮𑀺, 𑀣𑁂𑀭𑁄𑀧𑀺 𑀉𑀢𑁆𑀢𑀭𑀺𑀢𑀭𑀁 𑀧𑀚𑁆𑀚𑀮𑀺𑀢𑁆𑀯𑀸 𑀢𑀲𑁆𑀲 𑀢𑁂𑀚𑀁 𑀧𑀭𑀺𑀬𑀸𑀤𑀺𑀬𑀺. 𑀲𑁄 ‘‘𑀫𑀳𑀦𑁆𑀢𑁄 𑀯𑀢𑀸𑀬𑀁 𑀪𑀺𑀓𑁆𑀔𑀽’’𑀢𑀺 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀫𑀬𑁆𑀳𑀁 𑀲𑀭𑀡𑀕𑀫𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀤𑀲𑀩𑀮𑀲𑁆𑀲 𑀲𑀭𑀡𑀁 𑀕𑀘𑁆𑀙𑀸𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀲𑀭𑀡𑀕𑀢𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀦 𑀓𑀜𑁆𑀘𑀺 𑀯𑀺𑀳𑁂𑀞𑁂𑀢𑀺, 𑀤𑁂𑀯𑀫𑁆𑀧𑀺 𑀲𑀫𑁆𑀫𑀸 𑀯𑀲𑁆𑀲𑀸𑀧𑁂𑀢𑀺, 𑀲𑀲𑁆𑀲𑀸𑀦𑀺 𑀲𑀫𑁆𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀺.

𑀓𑁄𑀲𑀫𑁆𑀩𑀺𑀯𑀸𑀲𑀺𑀦𑁄 ‘‘𑀅𑀬𑁆𑀬𑁂𑀦 𑀓𑀺𑀭 𑀲𑀸𑀕𑀢𑁂𑀦 𑀅𑀫𑁆𑀩𑀢𑀺𑀢𑁆𑀣𑀓𑀦𑀸𑀕𑁄 𑀤𑀫𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀢𑁆𑀣𑀼 𑀆𑀕𑀫𑀦𑀁 𑀉𑀤𑀺𑀓𑁆𑀔𑀫𑀸𑀦𑀸 𑀤𑀲𑀩𑀮𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀲𑀚𑁆𑀚𑀬𑀺𑀁𑀲𑀼. 𑀢𑁂 𑀤𑀲𑀩𑀮𑀲𑁆𑀲 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀯𑀘𑀦𑁂𑀦 𑀲𑀩𑁆𑀩𑀕𑁂𑀳𑁂𑀲𑀼 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀸𑀕𑀢𑀢𑁆𑀣𑁂𑀭𑀲𑁆𑀲 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀕𑁂𑀳𑁂 𑀕𑁂𑀳𑁂 𑀣𑁄𑀓𑀁 𑀣𑁄𑀓𑀁 𑀅𑀤𑀁𑀲𑀼. 𑀣𑁂𑀭𑁄 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀫𑀦𑀼𑀲𑁆𑀲𑁂𑀳𑀺 𑀬𑀸𑀘𑀺𑀬𑀫𑀸𑀦𑁄 𑀕𑁂𑀳𑁂 𑀕𑁂𑀳𑁂 𑀣𑁄𑀓𑀁 𑀣𑁄𑀓𑀁 𑀧𑀺𑀯𑀺𑀢𑁆𑀯𑀸 𑀅𑀯𑀺𑀤𑀽𑀭𑀁 𑀕𑀦𑁆𑀢𑁆𑀯𑀸𑀯 𑀅𑀦𑀸𑀳𑀸𑀭𑀺𑀓𑀪𑀸𑀯𑁂𑀦 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺.

𑀲𑀢𑁆𑀣𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺. 𑀲𑁄 𑀧𑀼𑀦𑀤𑀺𑀯𑀲𑁂 𑀲𑀢𑀺𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀓𑀸𑀭𑀡𑀁 𑀲𑀼𑀢𑁆𑀯𑀸 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀤𑀲𑀩𑀮𑀁 𑀔𑀫𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀏𑀯𑀁 𑀯𑀢𑁆𑀣𑀼 𑀯𑀺𑀦𑀬𑁂 𑀲𑀫𑀼𑀝𑁆𑀞𑀺𑀢𑀁. 𑀢𑀁 𑀢𑀢𑁆𑀣 𑀆𑀕𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀣𑁂𑀭𑁂 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀲𑀸𑀕𑀢𑀢𑁆𑀣𑁂𑀭𑀁 𑀢𑁂𑀚𑁄𑀥𑀸𑀢𑀼𑀓𑀼𑀲𑀮𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀭𑀸𑀥𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁩. 𑀏𑀓𑀸𑀤𑀲𑀫𑁂 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀦𑁆𑀢𑀺 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀪𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀦𑀁 𑀧𑀝𑀺𑀪𑀸𑀦𑀚𑀦𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀸𑀥𑀢𑁆𑀣𑁂𑀭𑁄 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀣𑁂𑀭𑀲𑁆𑀲 𑀳𑀺 𑀤𑀺𑀝𑁆𑀞𑀺𑀲𑀫𑀼𑀤𑀸𑀘𑀸𑀭𑀜𑁆𑀘 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀜𑁆𑀘 𑀆𑀕𑀫𑁆𑀫 𑀤𑀲𑀩𑀮𑀲𑁆𑀲 𑀦𑀯𑀦𑀯𑀸 𑀥𑀫𑁆𑀫𑀤𑁂𑀲𑀦𑀸 𑀧𑀝𑀺𑀪𑀸𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀢𑀣𑀸𑀕𑀢𑀁 𑀧𑀭𑀺𑀘𑀭𑀺𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀭𑀸𑀥𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼.

𑀲𑁄 𑀫𑀳𑀮𑁆𑀮𑀓𑀓𑀸𑀮𑁂 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀦 𑀅𑀩𑀳𑀼𑀫𑀢𑁄 ‘‘𑀧𑀩𑁆𑀩𑀚𑀺𑀢𑁆𑀯𑀸 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑁂 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. ‘‘𑀚𑀺𑀡𑁆𑀡𑁄 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀦 𑀓𑁄𑀘𑀺 𑀧𑀩𑁆𑀩𑀸𑀚𑁂𑀢𑀼𑀁 𑀇𑀘𑁆𑀙𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀓𑀸𑀫𑁄 ‘‘𑀓𑀺𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀢𑁆𑀢𑀤𑀸𑀭𑀸 𑀢𑀁 𑀧𑀝𑀺𑀚𑀕𑁆𑀕𑀦𑁆𑀢𑀻’’𑀢𑀺? 𑀓𑀼𑀢𑁄, 𑀪𑁄 𑀕𑁄𑀢𑀫, 𑀧𑀝𑀺𑀚𑀕𑁆𑀕𑀦𑀁, 𑀫𑀳𑀮𑁆𑀮𑀓𑁄𑀢𑀺 𑀫𑀁 𑀩𑀳𑀺 𑀦𑀻𑀳𑀭𑀺𑀁𑀲𑀼. 𑀓𑀺𑀁 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀧𑀩𑁆𑀩𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺? 𑀓𑁄 𑀫𑀁, 𑀪𑁄 𑀕𑁄𑀢𑀫, 𑀧𑀩𑁆𑀩𑀸𑀚𑁂𑀲𑁆𑀲𑀢𑀺, 𑀫𑀳𑀮𑁆𑀮𑀓𑀪𑀸𑀯𑁂𑀦 𑀫𑀁 𑀦 𑀓𑁄𑀘𑀺 𑀇𑀘𑁆𑀙𑀢𑀻𑀢𑀺. 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀣𑁂𑀭𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀭𑀸𑀥𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀇𑀫𑀁 𑀩𑁆𑀭𑀸𑀳𑁆𑀫𑀡𑀁 𑀲𑀸𑀤𑀭𑁂𑀦 𑀧𑀩𑁆𑀩𑀚𑀸𑀧𑁂𑀲𑀺, 𑀦 𑀔𑁄 𑀫𑁂 𑀏𑀢𑀁 𑀅𑀦𑀸𑀤𑀭𑁂𑀦 𑀧𑀭𑀺𑀳𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀭𑀸𑀥𑀢𑁆𑀣𑁂𑀭𑀁 𑀆𑀤𑀸𑀬 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀲𑁆𑀲 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑀢𑁆𑀢𑀸 𑀓𑀺𑀘𑁆𑀙𑀮𑀸𑀪𑀺𑀲𑁆𑀲 𑀣𑁂𑀭𑁄 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀆𑀯𑀸𑀲𑀁 𑀤𑁂𑀢𑀺, 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀫𑁆𑀧𑀺 𑀢𑀲𑁆𑀲𑁂𑀯 𑀤𑀢𑁆𑀯𑀸 𑀲𑀬𑀁 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀭𑀸𑀥𑀢𑁆𑀣𑁂𑀭𑁄 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀜𑁆𑀘 𑀪𑁄𑀚𑀦𑀲𑀧𑁆𑀧𑀸𑀬𑀜𑁆𑀘 𑀮𑀪𑀺𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀅𑀣 𑀦𑀁 𑀣𑁂𑀭𑁄 𑀕𑀳𑁂𑀢𑁆𑀯𑀸 𑀤𑀲𑀩𑀮𑀁 𑀧𑀲𑁆𑀲𑀺𑀢𑀼𑀁 𑀆𑀕𑀢𑁄. 𑀲𑀢𑁆𑀣𑀸 𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀺 𑁋 ‘‘𑀬𑁄 𑀢𑁂 𑀫𑀬𑀸, 𑀲𑀸𑀭𑀺𑀧𑀼𑀢𑁆𑀢, 𑀦𑀺𑀲𑁆𑀲𑀺𑀢𑀓𑁄 𑀤𑀺𑀦𑁆𑀦𑁄, 𑀓𑀻𑀤𑀺𑀲𑀁 𑀢𑀲𑁆𑀲, 𑀦 𑀉𑀓𑁆𑀓𑀡𑁆𑀞𑀢𑀻’’𑀢𑀺? 𑀪𑀦𑁆𑀢𑁂, 𑀲𑀸𑀲𑀦𑁂 𑀅𑀪𑀺𑀭𑀫𑀺𑀢𑀪𑀺𑀓𑁆𑀔𑀼 𑀦𑀸𑀫 𑀏𑀯𑀭𑀽𑀧𑁄 𑀪𑀯𑁂𑀬𑁆𑀬𑀸𑀢𑀺. 𑀅𑀣𑀸𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻’’𑀢𑀺 𑀲𑀗𑁆𑀖𑀫𑀚𑁆𑀛𑁂 𑀓𑀣𑀸 𑀉𑀤𑀧𑀸𑀤𑀺. 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀇𑀤𑀸𑀦𑀺 𑀓𑀢𑀜𑁆𑀜𑀽𑀓𑀢𑀯𑁂𑀤𑀺𑀢𑀸, 𑀲𑁄 𑀅𑀢𑀻𑀢𑁂 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁄𑀧𑀺 𑀓𑀢𑀜𑁆𑀜𑀽𑀓𑀢𑀯𑁂𑀤𑀻𑀬𑁂𑀯 𑀅𑀳𑁄𑀲𑀻’’𑀢𑀺. 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀸𑀢𑀺?

𑀅𑀢𑀻𑀢𑁂, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀧𑀸𑀤𑀫𑁆𑀳𑀺 𑀧𑀜𑁆𑀘𑀲𑀢𑀫𑀢𑁆𑀢𑀸 𑀯𑀟𑁆𑀠𑀓𑀺𑀧𑀼𑀭𑀺𑀲𑀸 𑀫𑀳𑀸𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀙𑀺𑀦𑁆𑀤𑀺𑀢𑁆𑀯𑀸 𑀫𑀳𑀸𑀉𑀴𑀼𑀫𑁆𑀧𑀁 𑀩𑀦𑁆𑀥𑀺𑀢𑁆𑀯𑀸 𑀦𑀤𑀺𑀬𑀸 𑀑𑀢𑀸𑀭𑁂𑀦𑁆𑀢𑀺. 𑀅𑀣𑁂𑀓𑁄 𑀳𑀢𑁆𑀣𑀺𑀦𑀸𑀕𑁄 𑀏𑀓𑀲𑁆𑀫𑀺𑀁 𑀯𑀺𑀲𑀫𑀝𑁆𑀞𑀸𑀦𑁂 𑀲𑁄𑀡𑁆𑀟𑀸𑀬 𑀲𑀸𑀔𑀁 𑀕𑀡𑁆𑀳𑀦𑁆𑀢𑁄 𑀲𑀸𑀔𑀸𑀪𑀗𑁆𑀕𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀔𑀺𑀡𑀔𑀸𑀡𑀼𑀓𑁂 𑀧𑀸𑀤𑁂𑀦 𑀅𑀯𑀢𑁆𑀣𑀸𑀲𑀺, 𑀧𑀸𑀤𑁄 𑀯𑀺𑀤𑁆𑀥𑁄, 𑀤𑀼𑀓𑁆𑀔𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀕𑀫𑀦𑀁 𑀅𑀪𑀺𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀦𑀺𑀧𑀚𑁆𑀚𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀢𑁂 𑀯𑀟𑁆𑀠𑀓𑀻 𑀅𑀢𑁆𑀢𑀦𑁄 𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀦𑀺𑀲𑁆𑀲𑀸𑀬𑀸𑀳𑀁 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀅𑀦𑀼𑀧𑀤𑀁 𑀅𑀕𑀫𑀸𑀲𑀺. 𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀧𑀮𑀸𑀬𑀦𑁆𑀢𑀺. 𑀲𑁄 𑀢𑁂𑀲𑀁 𑀧𑀮𑀸𑀬𑀦𑀪𑀸𑀯𑀁 𑀜𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀧𑀼𑀦 𑀞𑀺𑀢𑀓𑀸𑀮𑁂 𑀅𑀦𑀼𑀩𑀦𑁆𑀥𑀺.

𑀯𑀟𑁆𑀠𑀓𑀺𑀚𑁂𑀝𑁆𑀞𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀳𑀢𑁆𑀣𑀺 𑀅𑀫𑁆𑀳𑁂𑀲𑀼 𑀢𑀺𑀝𑁆𑀞𑀦𑁆𑀢𑁂𑀲𑀼 𑀅𑀦𑀼𑀩𑀦𑁆𑀥𑀢𑀺, 𑀧𑀮𑀸𑀬𑀦𑁆𑀢𑁂𑀲𑀼 𑀢𑀺𑀝𑁆𑀞𑀢𑀺, 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀓𑀸𑀭𑀡’’𑀦𑁆𑀢𑀺. 𑀲𑀩𑁆𑀩𑁂 𑀢𑀁 𑀢𑀁 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀢𑀲𑁆𑀲 𑀆𑀕𑀫𑀦𑀁 𑀧𑀝𑀺𑀫𑀸𑀦𑁂𑀦𑁆𑀢𑀸 𑀦𑀺𑀲𑀻𑀤𑀺𑀁𑀲𑀼. 𑀲𑁄 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀤𑀸 𑀯𑀟𑁆𑀠𑀓𑀻𑀦𑀁 𑀲𑀜𑁆𑀜𑀸 𑀉𑀤𑀧𑀸𑀤𑀺 𑁋 ‘‘𑀕𑀺𑀮𑀸𑀦𑀪𑀸𑀯𑁂𑀦, 𑀪𑁄, 𑀏𑀲 𑀆𑀕𑀘𑁆𑀙𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀸𑀤𑁂 𑀧𑀯𑀺𑀝𑁆𑀞𑀔𑀸𑀡𑀼𑀓𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀲 𑀆𑀕𑀢𑁄’’𑀢𑀺 𑀢𑀺𑀔𑀺𑀡𑀯𑀸𑀲𑀺𑀬𑀸 𑀔𑀸𑀡𑀼𑀓𑀓𑁄𑀝𑀺𑀬𑀁 𑀑𑀥𑀺𑀁 𑀤𑀢𑁆𑀯𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀺𑀢𑁆𑀯𑀸 𑀦𑀻𑀳𑀭𑀺𑀁𑀲𑀼. 𑀅𑀣𑀲𑁆𑀲 𑀯𑀡𑀫𑀼𑀔𑀁 𑀧𑀻𑀴𑁂𑀢𑁆𑀯𑀸 𑀧𑀼𑀩𑁆𑀩𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀓𑀲𑀸𑀯𑁄𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀸𑀦𑀦𑀪𑁂𑀲𑀚𑁆𑀚𑀁 𑀫𑀓𑁆𑀔𑁂𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀨𑀸𑀲𑀼𑀓𑀁 𑀅𑀓𑀁𑀲𑀼.

𑀳𑀢𑁆𑀣𑀺𑀦𑀸𑀕𑁄 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀬𑁆𑀳𑀁 𑀩𑀳𑀼𑀧𑀓𑀸𑀭𑀸, 𑀇𑀫𑁂 𑀫𑀬𑀸 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀤𑁆𑀥𑀁, 𑀫𑀬𑀸 𑀇𑀫𑁂𑀲𑀁 𑀓𑀢𑀜𑁆𑀜𑀼𑀦𑀸 𑀓𑀢𑀯𑁂𑀤𑀺𑀦𑀸 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑁂𑀢𑀁 𑀕𑀦𑁆𑀥𑀳𑀢𑁆𑀣𑀺𑀧𑁄𑀢𑀓𑀁 𑀆𑀦𑁂𑀲𑀺. 𑀯𑀟𑁆𑀠𑀓𑀺𑀦𑁄 𑀳𑀢𑁆𑀣𑀺𑀧𑁄𑀢𑀓𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀳𑀢𑁆𑀣𑀻 𑀧𑀼𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀅𑀢𑀺𑀯𑀺𑀬 𑀢𑀼𑀝𑁆𑀞𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀳𑀢𑁆𑀣𑀺𑀦𑀸𑀕𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀺 𑀢𑀺𑀝𑁆𑀞𑀦𑁆𑀢𑁂 ‘𑀓𑀺𑀁 𑀦𑀼 𑀔𑁄 𑀅𑀬𑀁 𑀆𑀕𑀢𑁄’𑀢𑀺 𑀫𑀫 𑀆𑀕𑀢𑀓𑀸𑀭𑀡𑀁 𑀦 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀞𑀺𑀢𑀝𑁆𑀞𑀸𑀦𑀢𑁄 𑀧𑀓𑁆𑀓𑀸𑀫𑀺. 𑀳𑀢𑁆𑀣𑀺𑀧𑁄𑀢𑀓𑁄 𑀧𑀺𑀢𑀼 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀧𑀸𑀬𑀸𑀲𑀺. 𑀳𑀢𑁆𑀣𑀺𑀦𑀸𑀕𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀦𑀺𑀯𑀢𑁆𑀢𑀦𑀢𑁆𑀣𑀸𑀬 𑀲𑀤𑁆𑀤𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀧𑀺𑀢𑀼 𑀓𑀣𑀁 𑀲𑀼𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀟𑁆𑀠𑀓𑀻𑀦𑀁 𑀲𑀦𑁆𑀢𑀺𑀓𑀁 𑀕𑀢𑁄. 𑀯𑀟𑁆𑀠𑀓𑀺𑀦𑁄 ‘‘𑀇𑀫𑀁 𑀳𑀢𑁆𑀣𑀺𑀧𑁄𑀢𑀓𑀁 𑀅𑀫𑁆𑀳𑀸𑀓𑀁 𑀤𑀸𑀢𑀼𑀁 𑀆𑀕𑀢𑁄 𑀪𑀯𑀺𑀲𑁆𑀲𑀢𑀺 𑀏𑀲𑁄’’𑀢𑀺 𑀜𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀢𑀬𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀺𑀢𑀼 𑀲𑀦𑁆𑀢𑀺𑀓𑀁𑀬𑁂𑀯 𑀕𑀘𑁆𑀙𑀸’’𑀢𑀺 𑀧𑀳𑀺𑀡𑀺𑀁𑀲𑀼. 𑀳𑀢𑁆𑀣𑀺𑀦𑀸𑀕𑁄 𑀬𑀸𑀯𑀢𑀢𑀺𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀫𑁆𑀧𑀺 𑀧𑀼𑀦 𑀯𑀟𑁆𑀠𑀓𑀻𑀦𑀁𑀬𑁂𑀯 𑀲𑀫𑀻𑀧𑀁 𑀧𑁂𑀲𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀯𑀟𑁆𑀠𑀓𑀺𑀦𑁄 𑀳𑀢𑁆𑀣𑀺𑀧𑁄𑀢𑀓𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑀺. 𑀪𑁄𑀚𑀦𑀓𑀸𑀮𑁂 𑀏𑀓𑁂𑀓𑀁 𑀪𑀢𑁆𑀢𑀧𑀺𑀡𑁆𑀟𑀁 𑀤𑁂𑀦𑁆𑀢𑀺, 𑀪𑀢𑁆𑀢𑀁 𑀢𑀲𑁆𑀲 𑀬𑀸𑀯𑀤𑀢𑁆𑀣𑀁 𑀅𑀳𑁄𑀲𑀺. 𑀲𑁄 𑀯𑀟𑁆𑀠𑀓𑀻𑀳𑀺 𑀅𑀦𑁆𑀢𑁄𑀕𑀳𑀦𑁂 𑀓𑁄𑀝𑁆𑀝𑀺𑀢𑀁 𑀤𑀩𑁆𑀩𑀲𑀫𑁆𑀪𑀸𑀭𑀁 𑀆𑀳𑀭𑀺𑀢𑁆𑀯𑀸 𑀅𑀗𑁆𑀕𑀡𑀝𑁆𑀞𑀸𑀦𑁂 𑀭𑀸𑀲𑀺𑀁 𑀓𑀭𑁄𑀢𑀺. 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀅𑀜𑁆𑀜𑀫𑁆𑀧𑀺 𑀉𑀧𑀓𑀸𑀭𑀓𑀫𑁆𑀫𑀁 𑀓𑀭𑁄𑀢𑀺.

𑀲𑀢𑁆𑀣𑀸 𑀇𑀫𑀁 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀧𑀼𑀩𑁆𑀩𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀓𑀢𑀜𑁆𑀜𑀽𑀓𑀢𑀯𑁂𑀤𑀺𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀳𑀺 𑀢𑀤𑀸 𑀫𑀳𑀸𑀳𑀢𑁆𑀣𑀻 𑀅𑀳𑁄𑀲𑀺, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀢𑁄 𑀑𑀲𑁆𑀲𑀝𑁆𑀞𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀳𑀢𑁆𑀣𑀺𑀧𑁄𑀢𑀓𑁄 𑀅𑀳𑁄𑀲𑀺. 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁 𑀧𑀦 𑀧𑀢𑁆𑀯𑀸 𑀲𑀓𑀮𑀁 𑀭𑀸𑀥𑀲𑀁𑀬𑀼𑀢𑁆𑀢𑀁, 𑀥𑀫𑁆𑀫𑀧𑀤𑁂 𑀘 𑁋

‘‘𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄’’𑀢𑀺. (𑀥. 𑀧. 𑁭𑁬) 𑁋

𑀕𑀸𑀣𑀸 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫. 𑀅𑀧𑀭𑀪𑀸𑀕𑁂 𑀧𑀦 𑀲𑀢𑁆𑀣𑀸 𑀧𑀝𑀺𑀧𑀸𑀝𑀺𑀬𑀸 𑀣𑁂𑀭𑁂 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀭𑀸𑀥𑀢𑁆𑀣𑁂𑀭𑀁 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀫𑁄𑀖𑀭𑀸𑀚𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁪. 𑀤𑁆𑀯𑀸𑀤𑀲𑀫𑁂 𑀮𑀽𑀔𑀘𑀻𑀯𑀭𑀥𑀭𑀸𑀦𑀦𑁆𑀢𑀺 𑀮𑀽𑀔𑀘𑀻𑀯𑀭𑀁 𑀥𑀸𑀭𑁂𑀦𑁆𑀢𑀸𑀦𑀁 𑀫𑁄𑀖𑀭𑀸𑀚𑀸 𑀅𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀳𑀺 𑀣𑁂𑀭𑁄 𑀲𑀢𑁆𑀣𑀮𑀽𑀔𑀁 𑀲𑀼𑀢𑁆𑀢𑀮𑀽𑀔𑀁 𑀭𑀚𑀦𑀮𑀽𑀔𑀦𑁆𑀢𑀺 𑀢𑀺𑀯𑀺𑀥𑁂𑀦𑀧𑀺 𑀮𑀽𑀔𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑀁𑀲𑀼𑀓𑀽𑀮𑀁 𑀥𑀸𑀭𑁂𑀲𑀺. 𑀢𑀲𑁆𑀫𑀸 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄.

𑀢𑀲𑁆𑀲 𑀧𑀜𑁆𑀳𑀓𑀫𑁆𑀫𑁂 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀬𑀫𑁆𑀧𑀺 𑀳𑀺 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀓𑀸𑀮𑁂 𑀳𑀁𑀲𑀯𑀢𑀺𑀬𑀁 𑀓𑀼𑀮𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑀢𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑁄 𑀲𑀢𑁆𑀣𑀸𑀭𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀓𑀼𑀲𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀓𑀝𑁆𑀞𑀯𑀸𑀳𑀦𑀦𑀕𑀭𑁂 𑀅𑀫𑀘𑁆𑀘𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀅𑀧𑀭𑀪𑀸𑀕𑁂 𑀯𑀬𑀧𑁆𑀧𑀢𑁆𑀢𑁄 𑀓𑀝𑁆𑀞𑀯𑀸𑀳𑀦𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀦𑁆𑀢𑁄 𑀅𑀫𑀘𑁆𑀘𑀝𑁆𑀞𑀸𑀦𑀁 𑀮𑀪𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀓𑀲𑁆𑀲𑀧𑀤𑀲𑀩𑀮𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀓𑀝𑁆𑀞𑀯𑀸𑀳𑀦𑀭𑀸𑀚𑀸 ‘‘𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀇𑀫𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀉𑀪𑁄𑀳𑀺 𑀅𑀫𑁆𑀳𑁂𑀳𑀺 𑀢𑀼𑀘𑁆𑀙𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑁆𑀯𑀁 𑀢𑀸𑀯 𑀫𑀚𑁆𑀛𑀺𑀫𑀤𑁂𑀲𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑀲𑀩𑀮𑀁 𑀇𑀫𑀁 𑀦𑀕𑀭𑀁 𑀆𑀦𑁂𑀳𑀻’’𑀢𑀺 𑀧𑀼𑀭𑀺𑀲𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀧𑁂𑀲𑁂𑀲𑀺. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀢𑀢𑁆𑀣𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀢𑁂𑀦 𑀲𑀤𑁆𑀥𑀺𑀁 𑀕𑀢𑀧𑀼𑀭𑀺𑀲𑀸 𑀧𑀦 𑀲𑀩𑁆𑀩𑁂𑀧𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀆𑀕𑀢𑀸.

𑀅𑀬𑀁 𑀣𑁂𑀭𑁄 𑀧𑀭𑀺𑀧𑀼𑀡𑁆𑀡𑀲𑀻𑀮𑁄 𑀓𑀸𑀮𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀫𑁄𑀖𑀭𑀸𑀚𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀓𑀝𑁆𑀞𑀯𑀸𑀳𑀦𑀭𑀸𑀚𑀸𑀧𑀺 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀧𑀭𑀺𑀯𑀸𑀭𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁄𑀳𑀺𑀢𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀩𑀸𑀯𑀭𑀺𑀫𑀸𑀡𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀬𑁄 𑀯𑁂𑀤𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑁄𑀴𑀲𑀦𑁆𑀦𑀁 𑀫𑀸𑀡𑀯𑀓𑀲𑀳𑀲𑁆𑀲𑀸𑀦𑀁 𑀲𑀺𑀧𑁆𑀧𑀁 𑀯𑀸𑀘𑁂𑀦𑁆𑀢𑁄 𑀘𑀭𑀢𑀺. 𑀅𑀣𑀲𑁆𑀲 𑀧𑀲𑁂𑀦𑀤𑀺𑀓𑁄𑀲𑀮𑀭𑀜𑁆𑀜𑁄 𑀓𑀸𑀮𑁂 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀅𑀤𑀁𑀲𑀼. 𑀢𑀤𑀸 𑀅𑀬𑀫𑁆𑀧𑀺 𑀫𑁄𑀖𑀭𑀸𑀚𑀫𑀸𑀡𑀯𑁄 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀕𑀡𑁆𑀳𑀸𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑁄 𑀭𑀳𑁄𑀕𑀢𑁄 𑀅𑀢𑁆𑀢𑀦𑁄 𑀲𑀺𑀧𑁆𑀧𑁂 𑀲𑀸𑀭𑀁 𑀑𑀮𑁄𑀓𑁂𑀦𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑀁 𑀲𑀸𑀭𑀁 𑀅𑀤𑀺𑀲𑁆𑀯𑀸 ‘‘𑀏𑀓𑀁 𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑁆𑀧𑀭𑀸𑀬𑀺𑀓𑀁 𑀕𑀯𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀓𑁄𑀲𑀮𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀧𑁂𑀲𑀺. 𑀲𑁄 𑀢𑁂𑀦 𑀅𑀦𑀼𑀜𑁆𑀜𑀸𑀢𑁄 𑀲𑁄𑀴𑀲𑀳𑀺 𑀫𑀸𑀡𑀯𑀓𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀩𑁆𑀩𑀚𑁆𑀚𑀢𑁆𑀣𑀸𑀬 𑀦𑀺𑀓𑁆𑀔𑀫𑀺. 𑀓𑁄𑀲𑀮𑀭𑀸𑀚𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀏𑀓𑀁 𑀅𑀫𑀘𑁆𑀘𑀁 𑀓𑀳𑀸𑀧𑀡𑀲𑀳𑀲𑁆𑀲𑀁 𑀤𑀢𑁆𑀯𑀸 𑀧𑁂𑀲𑁂𑀲𑀺 𑁋 ‘‘𑀬𑀲𑁆𑀫𑀺𑀁 𑀞𑀸𑀦𑁂 𑀆𑀘𑀭𑀺𑀬𑁄 𑀧𑀩𑁆𑀩𑀚𑀢𑀺, 𑀢𑀢𑁆𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺. 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑁄 𑀨𑀸𑀲𑀼𑀓𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀢𑁄 𑀧𑀝𑀺𑀓𑁆𑀓𑀫𑁆𑀫 𑀅𑀲𑁆𑀲𑀓𑀭𑀜𑁆𑀜𑁄 𑀘 𑀫𑀼𑀴𑁆𑀳𑀓𑀭𑀜𑁆𑀜𑁄 𑀘 𑀲𑀻𑀫𑀦𑁆𑀢𑀭𑁂 𑀕𑁄𑀥𑀸𑀯𑀭𑀺𑀢𑀻𑀭𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀓𑀸𑀭𑁂𑀲𑀺.

𑀅𑀣𑁂𑀓𑁄 𑀧𑀼𑀭𑀺𑀲𑁄 𑀚𑀝𑀺𑀮𑀸𑀦𑀁 𑀤𑀲𑁆𑀲𑀦𑀸𑀬 𑀕𑀢𑁄 𑀢𑁂𑀲𑀁 𑀲𑀦𑁆𑀢𑀓𑁂 𑀪𑀽𑀫𑀺𑀝𑁆𑀞𑀸𑀦𑁂 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀢𑁂𑀦 𑀓𑀢𑀁 𑀤𑀺𑀲𑁆𑀯𑀸 𑀅𑀧𑀭𑀁 𑀓𑀼𑀮𑀲𑀢𑀁 𑀕𑁂𑀳𑀲𑀢𑀁 𑀓𑀸𑀭𑁂𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀫𑀬𑀁 𑀅𑀬𑁆𑀬𑀸𑀦𑀁 𑀲𑀦𑁆𑀢𑀓𑁂 𑀪𑀽𑀫𑀺𑀪𑀸𑀕𑁂 𑀯𑀲𑀸𑀫, 𑀫𑀼𑀥𑀸 𑀯𑀲𑀺𑀢𑀼𑀁 𑀦 𑀓𑀸𑀭𑀡𑀁, 𑀲𑀼𑀔𑀯𑀸𑀲𑀁 𑀯𑁄 𑀤𑀲𑁆𑀲𑀸𑀫𑀸’’𑀢𑀺 𑀏𑀓𑁂𑀓𑁄 𑀏𑀓𑁂𑀓𑀁 𑀓𑀳𑀸𑀧𑀡𑀁 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀩𑁆𑀩𑁂𑀳𑀺𑀧𑀺 𑀆𑀪𑀢𑀓𑀳𑀸𑀧𑀡𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁. 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑁄 ‘‘𑀓𑀺𑀫𑀢𑁆𑀣𑀁 𑀏𑀢𑁂 𑀆𑀪𑀢𑀸’’𑀢𑀺 𑀆𑀳. 𑀲𑀼𑀔𑀯𑀸𑀲𑀤𑀸𑀦𑀢𑁆𑀣𑀸𑀬, 𑀪𑀦𑁆𑀢𑁂𑀢𑀺. 𑀲𑀘𑀸𑀳𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦 𑀅𑀢𑁆𑀣𑀺𑀓𑁄 𑀅𑀲𑁆𑀲𑀁, 𑀅𑀳𑀁 𑀫𑀳𑀦𑁆𑀢𑀁 𑀥𑀦𑀭𑀸𑀲𑀺𑀁 𑀧𑀳𑀸𑀬 𑀦 𑀧𑀩𑁆𑀩𑀚𑁂𑀬𑁆𑀬𑀁. 𑀢𑀼𑀫𑁆𑀳𑀸𑀓𑀁 𑀓𑀳𑀸𑀧𑀡𑁂 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀣𑀸𑀢𑀺. 𑀅𑀫𑁆𑀳𑁂𑀳𑀺 𑀅𑀬𑁆𑀬𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀁 𑀦 𑀧𑀼𑀦 𑀕𑀡𑁆𑀳𑀸𑀫, 𑀅𑀦𑀼𑀲𑀁𑀯𑀘𑁆𑀙𑀭𑀁 𑀧𑀦 𑀏𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀆𑀳𑀭𑀺𑀲𑁆𑀲𑀸𑀫, 𑀇𑀫𑁂 𑀕𑀳𑁂𑀢𑁆𑀯𑀸 𑀅𑀬𑁆𑀬𑁄 𑀤𑀸𑀦𑀁 𑀤𑁂𑀢𑀽𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀥𑀺𑀯𑀸𑀲𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀤𑀸𑀦𑀫𑀼𑀔𑁂 𑀦𑀺𑀬𑁆𑀬𑀸𑀢𑁂𑀲𑀺. 𑀢𑀲𑁆𑀲 𑀅𑀧𑀭𑀸𑀧𑀭𑀁 𑀤𑀸𑀬𑀓𑀪𑀸𑀯𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀜𑁆𑀜𑀸𑀬𑀺𑀢𑁆𑀣.

𑀢𑀢𑁄 𑀓𑀸𑀮𑀺𑀗𑁆𑀕𑀭𑀝𑁆𑀞𑁂 𑀤𑀼𑀦𑁆𑀦𑀺𑀯𑀺𑀝𑁆𑀞𑁂 𑀦𑀸𑀫 𑀕𑀸𑀫𑁂 𑀚𑀽𑀚𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀁𑀲𑁂 𑀚𑀸𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀻 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑀁 𑀘𑁄𑀤𑁂𑀢𑀺 𑁋 ‘‘𑀩𑀸𑀯𑀭𑀻, 𑀓𑀺𑀭 𑀤𑀸𑀦𑀁 𑀤𑁂𑀢𑀺, 𑀕𑀦𑁆𑀢𑁆𑀯𑀸 𑀢𑀢𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀆𑀳𑀭𑀸’’𑀢𑀺. 𑀲𑁄 𑀢𑀸𑀬 𑀘𑁄𑀤𑀺𑀬𑀫𑀸𑀦𑁄 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀩𑀸𑀯𑀭𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀫𑀸𑀦𑁄 𑀩𑀸𑀯𑀭𑀺𑀫𑁆𑀳𑀺 𑀤𑀸𑀦𑀁 𑀤𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀸𑀦𑀁 𑀅𑀦𑀼𑀲𑁆𑀲𑀭𑀫𑀸𑀦𑁂 𑀕𑀢𑁄. 𑀕𑀦𑁆𑀢𑁆𑀯𑀸 𑀘 ‘‘𑀤𑀸𑀦𑀁 𑀫𑁂, 𑀩𑁆𑀭𑀸𑀳𑁆𑀫𑀡, 𑀤𑁂𑀳𑀺, 𑀤𑀸𑀦𑀁 𑀫𑁂, 𑀩𑁆𑀭𑀸𑀳𑁆𑀫𑀡, 𑀤𑁂𑀳𑀻’’𑀢𑀺 𑀆𑀳. 𑀅𑀓𑀸𑀮𑁂 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀆𑀕𑀢𑁄, 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀫𑁂 𑀤𑀺𑀦𑁆𑀦𑀁, 𑀇𑀤𑀸𑀦𑀺 𑀓𑀳𑀸𑀧𑀡𑀁 𑀦𑀢𑁆𑀣𑀻𑀢𑀺. 𑀦 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀩𑀳𑀽𑀳𑀺 𑀓𑀳𑀸𑀧𑀡𑁂𑀳𑀺 𑀅𑀢𑁆𑀣𑁄, 𑀢𑀯 𑀏𑀢𑁆𑀢𑀓𑀁 𑀤𑀸𑀦𑀁 𑀤𑀤𑀦𑁆𑀢𑀲𑁆𑀲 𑀦 𑀲𑀓𑁆𑀓𑀸 𑀓𑀳𑀸𑀧𑀡𑁂𑀳𑀺 𑀯𑀺𑀦𑀸 𑀪𑀯𑀺𑀢𑀼𑀁, 𑀫𑀬𑁆𑀳𑀁 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀤𑁂𑀳𑀻𑀢𑀺. 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀘𑀧𑀺 𑀲𑀢𑀸𑀦𑀺 𑀦𑀢𑁆𑀣𑀺, 𑀧𑀼𑀦 𑀤𑀸𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀮𑀪𑀺𑀲𑁆𑀲𑀲𑀻𑀢𑀺. 𑀓𑀺𑀁 𑀧𑀦𑀸𑀳𑀁 𑀢𑀯 𑀤𑀸𑀦𑀓𑀸𑀮𑁂 𑀆𑀕𑀫𑀺𑀲𑁆𑀲𑀸𑀫𑀻𑀢𑀺? 𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀯𑀸𑀮𑀼𑀓𑀁 𑀣𑀽𑀧𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀭𑀢𑁆𑀢𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀫𑀦𑁆𑀢𑀁 𑀚𑀧𑁆𑀧𑁂𑀦𑁆𑀢𑁄 𑀯𑀺𑀬 𑀑𑀝𑁆𑀞𑁂 𑀘𑀸𑀮𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 ‘‘𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸’’𑀢𑀺 𑀯𑀤𑀢𑀺.

𑀩𑀸𑀯𑀭𑀺𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀳𑀸𑀢𑀧𑁄 𑀢𑀧𑀘𑀸𑀭𑀁 𑀕𑀡𑁆𑀳𑀺𑀢𑁆𑀯𑀸 𑀘𑀭𑀡𑀩𑁆𑀭𑀸𑀳𑁆𑀫𑀡𑀓𑁄 𑀫𑀬𑁆𑀳𑀁 𑀲𑀢𑁆𑀢𑀤𑀺𑀯𑀲𑀫𑀢𑁆𑀣𑀓𑁂 ‘𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀸𑀮𑀢𑀽’𑀢𑀺 𑀯𑀤𑀢𑀺, 𑀫𑀬𑁆𑀳𑀜𑁆𑀘 𑀇𑀫𑀲𑁆𑀲 𑀤𑀸𑀢𑀩𑁆𑀩𑀸𑀦𑀺 𑀧𑀜𑁆𑀘 𑀓𑀳𑀸𑀧𑀡𑀲𑀢𑀸𑀦𑀺 𑀦𑀢𑁆𑀣𑀺, 𑀏𑀓𑀁𑀲𑁂𑀦 𑀫𑀁 𑀏𑀲 𑀖𑀸𑀢𑁂𑀲𑁆𑀲𑀢𑀻’’𑀢𑀺. 𑀏𑀯𑀁 𑀢𑀲𑁆𑀫𑀺𑀁 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑁂 𑀦𑀺𑀧𑀦𑁆𑀦𑁂 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑀢𑁆𑀢𑀪𑀸𑀯𑁂 𑀩𑀸𑀯𑀭𑀺𑀲𑁆𑀲 𑀫𑀸𑀢𑀸 𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀧𑀼𑀢𑁆𑀢𑀲𑁆𑀲 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀏𑀲 𑀫𑀼𑀤𑁆𑀥𑀁 𑀯𑀸 𑀫𑀼𑀤𑁆𑀥𑀨𑀸𑀮𑀦𑀁 𑀯𑀸 𑀦 𑀚𑀸𑀦𑀸𑀢𑀺, 𑀢𑁆𑀯𑀫𑁆𑀧𑀺 𑀮𑁄𑀓𑁂 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀦 𑀚𑀸𑀦𑀸𑀲𑀺. 𑀲𑀘𑁂 𑀢𑁂 𑀲𑀁𑀲𑀬𑁄 𑀅𑀢𑁆𑀣𑀺, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙, 𑀲𑁄 𑀢𑁂 𑀏𑀢𑀁 𑀓𑀸𑀭𑀡𑀁 𑀓𑀣𑁂𑀲𑁆𑀲𑀢𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀢𑀸𑀬 𑀓𑀣𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑁆𑀲𑀸𑀲𑀁 𑀮𑀪𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀲𑀩𑁆𑀩𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀓𑁆𑀓𑁄𑀲𑀺𑀢𑁆𑀯𑀸, ‘‘𑀢𑀸𑀢𑀸, 𑀩𑀼𑀤𑁆𑀥𑁄 𑀓𑀺𑀭 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀢𑀼𑀫𑁆𑀳𑁂 𑀲𑀻𑀖𑀁 𑀕𑀦𑁆𑀢𑁆𑀯𑀸 ‘𑀩𑀼𑀤𑁆𑀥𑁄 𑀯𑀸 𑀦𑁄 𑀯𑀸’𑀢𑀺 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀣, 𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀺. 𑀅𑀧𑀺𑀘 𑀔𑁄 𑀧𑀦 𑀫𑀬𑁆𑀳𑀁 𑀫𑀳𑀮𑁆𑀮𑀓𑀪𑀸𑀯𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀤𑀼𑀚𑁆𑀚𑀸𑀦𑁄, 𑀢𑀼𑀫𑁆𑀳𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀦𑀺𑀬𑀸𑀫𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀣𑀸’’𑀢𑀺 𑀫𑀼𑀤𑁆𑀥𑀨𑀸𑀮𑀦𑀧𑀜𑁆𑀳𑀁 𑀦𑀸𑀫 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀤𑀸𑀲𑀺.

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑁂 𑀇𑀫𑁂 𑀫𑀸𑀡𑀯𑀸 𑀧𑀡𑁆𑀟𑀺𑀢𑀸, 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀫𑀢𑁆𑀣𑀓𑀁 𑀧𑀢𑁆𑀢𑁂 𑀧𑀼𑀦 𑀫𑀬𑁆𑀳𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺. 𑀅𑀣 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀅𑀚𑀺𑀢𑀫𑀸𑀡𑀯𑀲𑁆𑀲 𑀦𑀸𑀫 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀢𑁆𑀯𑀁 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑀼𑀁 𑀅𑀭𑀳𑀲𑀺, 𑀢𑀬𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺. 𑀅𑀣 𑀢𑁂 𑀲𑁄𑀴𑀲𑀲𑀳𑀲𑁆𑀲𑀚𑀝𑀺𑀮𑀸 𑀅𑀚𑀺𑀢𑀫𑀸𑀡𑀯𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀲𑁄𑀴𑀲𑀳𑀺 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 ‘‘𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀕𑀢𑀕𑀢𑀝𑁆𑀞𑀸𑀦𑁂, ‘‘𑀅𑀬𑁆𑀬𑀸, 𑀓𑀳𑀁 𑀕𑀘𑁆𑀙𑀣, 𑀓𑀳𑀁 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀕𑀘𑁆𑀙𑀸𑀫𑀸’’𑀢𑀺 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀁 𑀲𑀁𑀓𑀟𑁆𑀠𑀦𑁆𑀢𑀸 𑀅𑀦𑁂𑀓𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀕𑀢𑀸. 𑀲𑀢𑁆𑀣𑀸 ‘‘𑀢𑁂𑀲𑀁 𑀆𑀕𑀫𑀦𑀤𑀺𑀯𑀲𑁂 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀇𑀫𑀺𑀲𑁆𑀲𑀸 𑀧𑀭𑀺𑀲𑀸𑀬 𑀅𑀦𑀼𑀘𑁆𑀙𑀯𑀺𑀓𑀝𑁆𑀞𑀸𑀦’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀧𑀸𑀲𑀸𑀡𑀘𑁂𑀢𑀺𑀬𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀻𑀤𑀺. 𑀲𑁄 𑀅𑀚𑀺𑀢𑀫𑀸𑀡𑀯𑁄𑀧𑀺 𑀲𑀧𑀭𑀺𑀲𑁄 𑀢𑀁 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀆𑀭𑀼𑀬𑁆𑀳 𑀲𑀢𑁆𑀣𑀼 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀧𑀼𑀭𑀺𑀲𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂𑀦 𑀧𑀳𑀺𑀢𑁂 𑀧𑀜𑁆𑀳𑁂 𑀫𑀦𑀲𑀸 𑀧𑀼𑀘𑁆𑀙𑀦𑁆𑀢𑁄𑀯 𑀕𑀢𑁄.

𑀢𑀁𑀤𑀺𑀯𑀲𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀫𑁆𑀧𑀢𑁆𑀢𑀧𑀭𑀺𑀲𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸 𑀅𑀳𑁄𑀲𑀺. 𑀢𑁂𑀲𑀁 𑀲𑁄𑀴𑀲𑀦𑁆𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑁆𑀢𑀭𑁂 𑀫𑁄𑀖𑀭𑀸𑀚𑀫𑀸𑀡𑀯𑁄 ‘‘𑀅𑀳𑀁 𑀲𑀩𑁆𑀩𑁂𑀳𑀺 𑀧𑀡𑁆𑀟𑀺𑀢𑀢𑀭𑁄’’𑀢𑀺 𑀫𑀸𑀦𑀢𑁆𑀣𑀤𑁆𑀥𑁄, 𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀅𑀚𑀺𑀢𑀫𑀸𑀡𑀯𑁄 𑀲𑀩𑁆𑀩𑁂𑀲𑀁 𑀚𑁂𑀝𑁆𑀞𑀓𑁄, 𑀏𑀢𑀲𑁆𑀲 𑀧𑀞𑀫𑀢𑀭𑀁 𑀫𑀫 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀮𑀚𑁆𑀚𑀸𑀬𑀦𑁆𑀢𑁄 𑀧𑀞𑀫𑀢𑀭𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀧𑀼𑀘𑁆𑀙𑀺𑀢𑁂 𑀤𑀼𑀢𑀺𑀬𑁄 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀫𑀸𑀦𑀢𑁆𑀣𑀤𑁆𑀥𑁄 𑀫𑁄𑀖𑀭𑀸𑀚𑀫𑀸𑀡𑀯𑀸, 𑀦 𑀢𑀸𑀯𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀅𑀲𑁆𑀲 𑀫𑀸𑀦𑀁 𑀦𑀺𑀯𑀸𑀭𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀢𑀺𑀝𑁆𑀞 𑀢𑁆𑀯𑀁, 𑀫𑁄𑀖𑀭𑀸𑀚, 𑀅𑀜𑁆𑀜𑁂 𑀢𑀸𑀯 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑀽’’𑀢𑀺. 𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀧𑀲𑀸𑀤𑀁 𑀮𑀪𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑀸 𑀧𑀡𑁆𑀟𑀺𑀢𑀢𑀭𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀺𑀘𑀭𑀸𑀫𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀅𑀚𑀸𑀦𑀺𑀢𑁆𑀯𑀸 𑀦 𑀓𑀣𑁂𑀦𑁆𑀢𑀺. 𑀲𑀢𑁆𑀣𑀸𑀭𑀸 𑀫𑀫 𑀧𑀼𑀘𑁆𑀙𑀸𑀬 𑀤𑁄𑀲𑁄 𑀤𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀲𑁄 𑀅𑀝𑁆𑀞𑀳𑀺 𑀚𑀦𑁂𑀳𑀺 𑀧𑀝𑀺𑀧𑀸𑀝𑀺𑀬𑀸 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀯𑀫𑁄 𑀳𑀼𑀢𑁆𑀯𑀸 𑀧𑀼𑀦 𑀉𑀝𑁆𑀞𑀸𑀲𑀺. 𑀧𑀼𑀦𑀧𑀺 𑀦𑀁 𑀲𑀢𑁆𑀣𑀸 𑀅𑀧𑀲𑀸𑀤𑁂𑀲𑀺.

𑀲𑁄 𑀧𑀼𑀦𑀧𑀺 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 ‘‘𑀲𑀗𑁆𑀖𑀦𑀯𑀓𑁄 𑀤𑀸𑀦𑀺 𑀪𑀯𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀤𑀲𑀫𑁄 𑀳𑀼𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀣 𑀲𑀢𑁆𑀣𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀪𑀸𑀯𑀁 𑀜𑀢𑁆𑀯𑀸 𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀚𑀝𑀺𑀮𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀲𑁂𑀲𑀸𑀦𑀺𑀧𑀺 𑀧𑀦𑁆𑀦𑀭𑀲 𑀚𑀝𑀺𑀮𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑀩𑁆𑀩𑁂𑀧𑀺 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀸 𑀏𑀳𑀺𑀪𑀺𑀓𑁆𑀔𑀽𑀯 𑀅𑀳𑁂𑀲𑀼𑀁. 𑀲𑁂𑀲𑀚𑀦𑀸 𑀧𑀦 𑀦 𑀓𑀣𑀺𑀬𑀦𑁆𑀢𑀺. 𑀅𑀬𑀁 𑀫𑁄𑀖𑀭𑀸𑀚𑀢𑁆𑀣𑁂𑀭𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀻𑀳𑀺 𑀮𑀽𑀔𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺. 𑀏𑀯𑀁 𑀧𑀸𑀭𑀸𑀬𑀦𑁂 (𑀲𑀼. 𑀦𑀺. 𑁯𑁮𑁨 𑀆𑀤𑀬𑁄) 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁. 𑀲𑀢𑁆𑀣𑀸 𑀧𑀦 𑀅𑀧𑀭𑀪𑀸𑀕𑁂 𑀚𑁂𑀢𑀯𑀦𑁂 𑀦𑀺𑀲𑀺𑀦𑁆𑀦𑁄 𑀣𑁂𑀭𑁂 𑀧𑀝𑀺𑀧𑀸𑀝𑀺𑀬𑀸 𑀞𑀸𑀦𑀦𑁆𑀢𑀭𑁂𑀲𑀼 𑀞𑀧𑁂𑀦𑁆𑀢𑁄 𑀫𑁄𑀖𑀭𑀸𑀚𑀢𑁆𑀣𑁂𑀭𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀦𑁆𑀢𑁄 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀮𑀽𑀔𑀘𑀻𑀯𑀭𑀥𑀭𑀸𑀦𑀁 𑀬𑀤𑀺𑀤𑀁 𑀫𑁄𑀖𑀭𑀸𑀚𑀸’’𑀢𑀺 𑀆𑀳.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸.

𑀏𑀓𑀘𑀢𑁆𑀢𑀸𑀮𑀻𑀲𑀲𑀼𑀢𑁆𑀢𑀫𑀢𑁆𑀢𑀸𑀬 𑀣𑁂𑀭𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.