𑁬. 𑀙𑀓𑁆𑀓𑀦𑀺𑀤𑁆𑀤𑁂𑀲𑁄

(𑁧) 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺

𑁯𑁪𑁪. 𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺? 𑀓𑁄𑀥𑁄, 𑀫𑀓𑁆𑀔𑁄, 𑀇𑀲𑁆𑀲𑀸, 𑀲𑀸𑀞𑁂𑀬𑁆𑀬𑀁, 𑀧𑀸𑀧𑀺𑀘𑁆𑀙𑀢𑀸, 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸 𑁋 𑀇𑀫𑀸𑀦𑀺 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺.

(𑁨) 𑀙 𑀙𑀦𑁆𑀤𑀭𑀸𑀕𑀸

𑀢𑀢𑁆𑀣 𑀓𑀢𑀫𑁂 𑀙 𑀙𑀦𑁆𑀤𑀭𑀸𑀕𑀸? 𑀙𑀦𑁆𑀤𑀭𑀸𑀕𑀸 𑀕𑁂𑀳𑀲𑀺𑀢𑀸 𑀥𑀫𑁆𑀫𑀸. 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀕𑁂𑀳𑀲𑀺𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄, 𑀫𑀦𑀸𑀧𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀕𑁂𑀳𑀲𑀺𑀢𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀇𑀫𑁂 𑀙 𑀙𑀦𑁆𑀤𑀭𑀸𑀕𑀸.

(𑁩) 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺? 𑀅𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲, 𑀅𑀫𑀦𑀸𑀧𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀫𑀸𑀦𑀺 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺.

(𑁪) 𑀙 𑀢𑀡𑁆𑀳𑀸𑀓𑀸𑀬𑀸

𑀢𑀢𑁆𑀣 𑀓𑀢𑀫𑁂 𑀙 𑀢𑀡𑁆𑀳𑀸𑀓𑀸𑀬𑀸? 𑀭𑀽𑀧𑀢𑀡𑁆𑀳𑀸, 𑀲𑀤𑁆𑀤𑀢𑀡𑁆𑀳𑀸, 𑀕𑀦𑁆𑀥𑀢𑀡𑁆𑀳𑀸, 𑀭𑀲𑀢𑀡𑁆𑀳𑀸, 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸, 𑀥𑀫𑁆𑀫𑀢𑀡𑁆𑀳𑀸 𑁋 𑀇𑀫𑁂 𑀙 𑀢𑀡𑁆𑀳𑀸𑀓𑀸𑀬𑀸.

(𑁫) 𑀙 𑀅𑀕𑀸𑀭𑀯𑀸

𑁯𑁪𑁫. 𑀢𑀢𑁆𑀣 𑀓𑀢𑀫𑁂 𑀙 𑀅𑀕𑀸𑀭𑀯𑀸? 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀅𑀧𑁆𑀧𑀫𑀸𑀤𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀧𑀝𑀺𑀲𑀦𑁆𑀣𑀸𑀭𑁂 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄 𑁋 𑀇𑀫𑁂 𑀙 𑀅𑀕𑀸𑀭𑀯𑀸.

(𑁬) 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸

𑀢𑀢𑁆𑀣 𑀓𑀢𑀫𑁂 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀲𑀁𑀲𑀕𑁆𑀕𑀸𑀭𑀸𑀫𑀢𑀸, 𑀧𑀧𑀜𑁆𑀘𑀸𑀭𑀸𑀫𑀢𑀸 𑁋 𑀇𑀫𑁂 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸.

(𑁭) 𑀅𑀧𑀭𑁂𑀧𑀺 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸

𑁯𑁪𑁬. 𑀢𑀢𑁆𑀣 𑀓𑀢𑀫𑁂 𑀅𑀧𑀭𑁂𑀧𑀺 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀤𑁄𑀯𑀘𑀲𑁆𑀲𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸 𑁋 𑀇𑀫𑁂 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸.

(𑁮) 𑀙 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸

𑀢𑀢𑁆𑀣 𑀓𑀢𑀫𑁂 𑀙 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸? 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺 𑁋 𑀇𑀫𑁂 𑀙 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸.

(𑁯) 𑀙 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸

𑀢𑀢𑁆𑀣 𑀓𑀢𑀫𑁂 𑀙 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸? 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸 …𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀤𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺 𑁋 𑀇𑀫𑁂 𑀙 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸.

(𑁧𑁦) 𑀙 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸

𑀢𑀢𑁆𑀣 𑀓𑀢𑀫𑁂 𑀙 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸? 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑀁 𑀥𑀫𑁆𑀫𑀁 𑀉𑀧𑀯𑀺𑀘𑀭𑀢𑀺 𑁋 𑀇𑀫𑁂 𑀙 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸.

(𑁧𑁧) 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺

𑁯𑁪𑁭. 𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺? 𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸, 𑀫𑀦𑀸𑀧𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀲𑀸𑀢𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀲𑀸𑀢𑀁 𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀲𑀸𑀢𑀸 𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺.

(𑁧𑁨) 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀅𑀫𑀦𑀸𑀧𑀺𑀬𑁂𑀲𑀼 𑀭𑀽𑀧𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀫𑀦𑀸𑀧𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀅𑀫𑀦𑀸𑀧𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀲𑀸𑀢𑀁 𑀤𑀼𑀓𑁆𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑁋 𑀇𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺.

(𑁧𑁩) 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸

𑀢𑀢𑁆𑀣 𑀓𑀢𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸? 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀭𑀽𑀧𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀲𑀤𑁆𑀤𑁂𑀲𑀼…𑀧𑁂… 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀕𑀦𑁆𑀥𑁂𑀲𑀼…𑀧𑁂… 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀭𑀲𑁂𑀲𑀼…𑀧𑁂… 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀨𑁄𑀝𑁆𑀞𑀩𑁆𑀩𑁂𑀲𑀼…𑀧𑁂… 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀕𑁂𑀳𑀲𑀺𑀢𑀁 𑀘𑁂𑀢𑀲𑀺𑀓𑀁 𑀦𑁂𑀯 𑀲𑀸𑀢𑀁 𑀦𑀸𑀲𑀸𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀬𑀺𑀢𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸.

(𑁧𑁪) 𑀙 𑀤𑀺𑀝𑁆𑀞𑀺𑀬𑁄

𑁯𑁪𑁮. 𑀢𑀢𑁆𑀣 𑀓𑀢𑀫𑀸 𑀙 𑀤𑀺𑀝𑁆𑀞𑀺𑀬𑁄? ‘‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀅𑀢𑁆𑀢𑀦𑀸 𑀯𑀸 𑀅𑀦𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, ‘‘𑀅𑀦𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀣 𑀯𑀸 𑀧𑀦𑀲𑁆𑀲 𑀏𑀯𑀁𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘‘𑀲𑁄 𑀫𑁂 𑀅𑀬𑀁 𑀅𑀢𑁆𑀢𑀸 𑀯𑀤𑁄 𑀯𑁂𑀤𑁂𑀬𑁆𑀬𑁄 𑀢𑀢𑁆𑀭 𑀢𑀢𑁆𑀭 𑀤𑀻𑀖𑀭𑀢𑁆𑀢𑀁 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀦 𑀲𑁄 𑀚𑀸𑀢𑁄 𑀦𑀸𑀳𑁄𑀲𑀺, 𑀦 𑀲𑁄 𑀚𑀸𑀢𑁄 𑀦 𑀪𑀯𑀺𑀲𑁆𑀲𑀢𑀺, 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 𑀯𑀸 𑀧𑀦𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀸 𑀙 𑀤𑀺𑀝𑁆𑀞𑀺𑀬𑁄.

𑀙𑀓𑁆𑀓𑀁.