𑁭. 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑁄

(𑁧) 𑀲𑀢𑁆𑀢𑀸𑀦𑀼𑀲𑀬𑀸

𑁯𑁪𑁯. 𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢𑀸𑀦𑀼𑀲𑀬𑀸? 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀫𑀸𑀦𑀸𑀦𑀼𑀲𑀬𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄, 𑀪𑀯𑀭𑀸𑀕𑀸𑀦𑀼𑀲𑀬𑁄, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑁋 𑀇𑀫𑁂 𑀲𑀢𑁆𑀢 𑀅𑀦𑀼𑀲𑀬𑀸.

(𑁨) 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺? 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑁋 𑀇𑀫𑀸𑀦𑀺 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺.

(𑁩) 𑀲𑀢𑁆𑀢 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀲𑀢𑁆𑀢 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺? 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁, 𑀧𑀝𑀺𑀖𑀧𑀭𑀺𑀬𑀼𑀝𑁆𑀞𑀸𑀦𑀁, 𑀫𑀸𑀦𑀧𑀭𑀺𑀬𑀼𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀸𑀦𑀁, 𑀪𑀯𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑁋 𑀇𑀫𑀸𑀦𑀺 𑀲𑀢𑁆𑀢 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺.

(𑁪) 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸

𑁯𑁫𑁦. 𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸? 𑀅𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀳𑁄𑀢𑀺, 𑀓𑀼𑀲𑀻𑀢𑁄 𑀳𑁄𑀢𑀺, 𑀫𑀼𑀝𑁆𑀞𑀲𑁆𑀲𑀢𑀻 𑀳𑁄𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀳𑁄𑀢𑀺 𑁋 𑀇𑀫𑁂 𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸.

(𑁫) 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺

𑀢𑀢𑁆𑀣 𑀓𑀢𑀫𑀸𑀦𑀺 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺? 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄 𑁋 𑀇𑀫𑀸𑀦𑀺 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺.

(𑁬) 𑀲𑀢𑁆𑀢 𑀫𑀸𑀦𑀸

𑀢𑀢𑁆𑀣 𑀓𑀢𑀫𑁂 𑀲𑀢𑁆𑀢 𑀫𑀸𑀦𑀸? 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀸𑀦𑀸𑀢𑀺𑀫𑀸𑀦𑁄, 𑀑𑀫𑀸𑀦𑁄, 𑀅𑀥𑀺𑀫𑀸𑀦𑁄, 𑀅𑀲𑁆𑀫𑀺𑀫𑀸𑀦𑁄, 𑀫𑀺𑀘𑁆𑀙𑀸𑀫𑀸𑀦𑁄 𑁋 𑀇𑀫𑁂 𑀲𑀢𑁆𑀢 𑀫𑀸𑀦𑀸.

(𑁭) 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄

𑁯𑁫𑁧. (𑀓) 𑀢𑀢𑁆𑀣 𑀓𑀢𑀫𑀸 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄? 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁𑀯𑀸𑀤𑀻 𑀳𑁄𑀢𑀺 𑀏𑀯𑀁𑀤𑀺𑀝𑁆𑀞𑀺 𑁋 ‘‘𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑁄 (𑀲𑀻. 𑀲𑁆𑀬𑀸.)] 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀔) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄 𑀪𑁄 𑀅𑀜𑁆𑀜𑁄 𑀅𑀢𑁆𑀢𑀸 𑀤𑀺𑀩𑁆𑀩𑁄 𑀭𑀽𑀧𑀻 𑀓𑀸𑀫𑀸𑀯𑀘𑀭𑁄 𑀓𑀩𑀴𑀻𑀓𑀸𑀭𑀪𑀓𑁆𑀔𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀕) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀖) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀦𑁆𑀢𑁄 𑀆𑀓𑀸𑀲𑁄𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀗) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀘) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

(𑀙) 𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄 𑀧𑀦 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺. ‘𑀦𑁂𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀸𑀫𑀺. 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀇𑀫𑀸 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄.

𑀲𑀢𑁆𑀢𑀓𑀁.