𑁧𑁭. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸

𑁮𑁩𑁨. (𑁧)𑀚𑀸𑀢𑀺𑀫𑀤𑁄 (𑁨)𑀕𑁄𑀢𑁆𑀢𑀫𑀤𑁄 (𑁩)𑀆𑀭𑁄𑀕𑁆𑀬𑀫𑀤𑁄 (𑁪)𑀬𑁄𑀩𑁆𑀩𑀦𑀫𑀤𑁄 (𑁫)𑀚𑀻𑀯𑀺𑀢𑀫𑀤𑁄 (𑁬)𑀮𑀸𑀪𑀫𑀤𑁄 (𑁭)𑀲𑀓𑁆𑀓𑀸𑀭𑀫𑀤𑁄 (𑁮) 𑀕𑀭𑀼𑀓𑀸𑀭𑀫𑀤𑁄 (𑁯) 𑀧𑀼𑀭𑁂𑀓𑁆𑀔𑀸𑀭𑀫𑀤𑁄 (𑁧𑁦) 𑀧𑀭𑀺𑀯𑀸𑀭𑀫𑀤𑁄 (𑁧𑁧) 𑀪𑁄𑀕𑀫𑀤𑁄 (𑁧𑁨) 𑀯𑀡𑁆𑀡𑀫𑀤𑁄 (𑁧𑁩) 𑀲𑀼𑀢𑀫𑀤𑁄 (𑁧𑁪) 𑀧𑀝𑀺𑀪𑀸𑀦𑀫𑀤𑁄 (𑁧𑁫) 𑀭𑀢𑁆𑀢𑀜𑁆𑀜𑀼𑀫𑀤𑁄 (𑁧𑁬) 𑀧𑀺𑀡𑁆𑀟𑀧𑀸𑀢𑀺𑀓𑀫𑀤𑁄 (𑁧𑁭) 𑀅𑀦𑀯𑀜𑁆𑀜𑀸𑀢𑀫𑀤𑁄 (𑁧𑁮) 𑀇𑀭𑀺𑀬𑀸𑀧𑀣𑀫𑀤𑁄 (𑁧𑁯) 𑀇𑀤𑁆𑀥𑀺𑀫𑀤𑁄 (𑁨𑁦) 𑀬𑀲𑀫𑀤𑁄 (𑁨𑁧) 𑀲𑀻𑀮𑀫𑀤𑁄 (𑁨𑁨) 𑀛𑀸𑀦𑀫𑀤𑁄 (𑁨𑁩) 𑀲𑀺𑀧𑁆𑀧𑀫𑀤𑁄 (𑁨𑁪) 𑀆𑀭𑁄𑀳𑀫𑀤𑁄 (𑁨𑁫) 𑀧𑀭𑀺𑀡𑀸𑀳𑀫𑀤𑁄 (𑁨𑁬) 𑀲𑀡𑁆𑀞𑀸𑀦𑀫𑀤𑁄 (𑁨𑁭) 𑀧𑀸𑀭𑀺𑀧𑀽𑀭𑀺𑀫𑀤𑁄 (𑁨𑁮)𑀫𑀤𑁄 (𑁨𑁯) 𑀧𑀫𑀸𑀤𑁄 (𑁩𑁦) 𑀣𑀫𑁆𑀪𑁄 (𑁩𑁧) 𑀲𑀸𑀭𑀫𑁆𑀪𑁄 (𑁩𑁨) 𑀅𑀢𑁆𑀭𑀺𑀘𑁆𑀙𑀢𑀸 (𑁩𑁩)𑀫𑀳𑀺𑀘𑁆𑀙𑀢𑀸 (𑁩𑁪) 𑀧𑀸𑀧𑀺𑀘𑁆𑀙𑀢𑀸 (𑁩𑁫) 𑀲𑀺𑀗𑁆𑀕𑀁 (𑁩𑁬) 𑀢𑀺𑀦𑁆𑀢𑀺𑀡𑀁 (𑁩𑁭) 𑀘𑀸𑀧𑀮𑁆𑀬𑀁 (𑁩𑁮)𑀅𑀲𑀪𑀸𑀕𑀯𑀼𑀢𑁆𑀢𑀺 (𑁩𑁯) 𑀅𑀭𑀢𑀺 (𑁪𑁦) 𑀢𑀦𑁆𑀤𑀻 (𑁪𑁧) 𑀯𑀺𑀚𑀫𑁆𑀪𑀺𑀢𑀸 (𑁪𑁨) 𑀪𑀢𑁆𑀢𑀲𑀫𑁆𑀫𑀤𑁄 (𑁪𑁩) 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁 [𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 (𑀲𑁆𑀬𑀸.)] (𑁪𑁪) 𑀓𑀼𑀳𑀦𑀸 (𑁪𑁫) 𑀮𑀧𑀦𑀸 (𑁪𑁬) 𑀦𑁂𑀫𑀺𑀢𑁆𑀢𑀺𑀓𑀢𑀸 (𑁪𑁭)𑀦𑀺𑀧𑁆𑀧𑁂𑀲𑀺𑀓𑀢𑀸 (𑁪𑁮) 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸 [𑀦𑀺𑀚𑀺𑀕𑀺𑀁𑀲𑀦𑀢𑀸 (𑀲𑀻.), 𑀚𑀺𑀕𑀺𑀁𑀲𑀦𑀢𑀸 (𑀲𑁆𑀬𑀸.)] (𑁪𑁯) 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁦) 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁧) 𑀳𑀻𑀦𑁄 𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁨) 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁩) 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁪) 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁫) 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁬) 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁭) 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁮) 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁫𑁯) 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁬𑁦) 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄 (𑁬𑁧) 𑀫𑀸𑀦𑁄 (𑁬𑁨) 𑀅𑀢𑀺𑀫𑀸𑀦𑁄 (𑁬𑁩) 𑀫𑀸𑀦𑀸𑀢𑀺𑀫𑀸𑀦𑁄 (𑁬𑁪) 𑀑𑀫𑀸𑀦𑁄 (𑁬𑁫)𑀅𑀥𑀺𑀫𑀸𑀦𑁄 (𑁬𑁬) 𑀅𑀲𑁆𑀫𑀺𑀫𑀸𑀦𑁄 (𑁬𑁭) 𑀫𑀺𑀘𑁆𑀙𑀸𑀫𑀸𑀦𑁄 (𑁬𑁮) 𑀜𑀸𑀢𑀺𑀯𑀺𑀢𑀓𑁆𑀓𑁄 (𑁬𑁯)𑀚𑀦𑀧𑀤𑀯𑀺𑀢𑀓𑁆𑀓𑁄 (𑁭𑁦) 𑀅𑀫𑀭𑀯𑀺𑀢𑀓𑁆𑀓𑁄 (𑁭𑁧) 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 (𑁭𑁨) 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 (𑁭𑁩) 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄

𑀏𑀓𑀓𑀁.

𑁨. 𑀤𑀼𑀓𑀫𑀸𑀢𑀺𑀓𑀸

𑁮𑁩𑁩. (𑁧) 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 (𑁨) 𑀫𑀓𑁆𑀔𑁄 𑀘 𑀧𑀴𑀸𑀲𑁄 [𑀧𑀮𑀸𑀲𑁄 (𑀲𑀻. 𑀲𑁆𑀬𑀸.)] 𑀘 (𑁩) 𑀇𑀲𑁆𑀲𑀸 𑀘 𑀫𑀘𑁆𑀙𑀭𑀺𑀬𑀜𑁆𑀘 (𑁪) 𑀫𑀸𑀬𑀸 𑀘 𑀲𑀸𑀞𑁂𑀬𑁆𑀬𑀜𑁆𑀘 (𑁫) 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘 (𑁬) 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘 (𑁭) 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀘 (𑁮) 𑀅𑀦𑁆𑀢𑀯𑀸𑀤𑀺𑀝𑁆𑀞𑀺 𑀘 𑀅𑀦𑀦𑁆𑀢𑀯𑀸𑀤𑀺𑀝𑁆𑀞𑀺 𑀘 (𑁯) 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺 𑀘 (𑁧𑁦) 𑀅𑀳𑀺𑀭𑀺𑀓𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀜𑁆𑀘 (𑁧𑁧) 𑀤𑁄𑀯𑀘𑀲𑁆𑀲𑀢𑀸 𑀘 𑀧𑀸𑀧𑀫𑀺𑀢𑁆𑀢𑀢𑀸 𑀘 (𑁧𑁨) 𑀅𑀦𑀚𑁆𑀚𑀯𑁄 𑀘 𑀅𑀫𑀤𑁆𑀤𑀯𑁄 𑀘 (𑁧𑁩) 𑀅𑀓𑁆𑀔𑀦𑁆𑀢𑀺 𑀘 𑀅𑀲𑁄𑀭𑀘𑁆𑀘𑀜𑁆𑀘 (𑁧𑁪) 𑀅𑀲𑀸𑀔𑀮𑁆𑀬𑀜𑁆𑀘 𑀅𑀧𑁆𑀧𑀝𑀺𑀲𑀦𑁆𑀣𑀸𑀭𑁄 𑀘 (𑁧𑁫)𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀘 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸 𑀘 (𑁧𑁬) 𑀫𑀼𑀝𑁆𑀞𑀲𑁆𑀲𑀘𑁆𑀘𑀜𑁆𑀘 𑀅𑀲𑀫𑁆𑀧𑀚𑀜𑁆𑀜𑀜𑁆𑀘 (𑁧𑁭) 𑀲𑀻𑀮𑀯𑀺𑀧𑀢𑁆𑀢𑀺 𑀘 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺 𑀘 (𑁧𑁮) 𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑀜𑁆𑀘 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀜𑁆𑀘

𑀤𑀼𑀓𑀁.

𑁩. 𑀢𑀺𑀓𑀫𑀸𑀢𑀺𑀓𑀸

𑁮𑁩𑁪. (𑁧) 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 (𑁨) 𑀢𑀬𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 (𑁩) 𑀢𑀺𑀲𑁆𑀲𑁄 𑀅𑀓𑀼𑀲𑀮𑀲𑀜𑁆𑀜𑀸 (𑁪) 𑀢𑀺𑀲𑁆𑀲𑁄 𑀅𑀓𑀼𑀲𑀮𑀥𑀸𑀢𑀼𑀬𑁄 (𑁫) 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 (𑁬) 𑀢𑀬𑁄 𑀆𑀲𑀯𑀸 (𑁭) 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 (𑁮) 𑀢𑀺𑀲𑁆𑀲𑁄 𑀢𑀡𑁆𑀳𑀸 (𑁯) 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸 (𑁧𑁦) 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀢𑀡𑁆𑀳𑀸 (𑁧𑁧) 𑀢𑀺𑀲𑁆𑀲𑁄 𑀏𑀲𑀦𑀸 (𑁧𑁨) 𑀢𑀺𑀲𑁆𑀲𑁄 𑀯𑀺𑀥𑀸 (𑁧𑁩) 𑀢𑀻𑀡𑀺 𑀪𑀬𑀸𑀦𑀺 (𑁧𑁪)𑀢𑀻𑀡𑀺 𑀢𑀫𑀸𑀦𑀺 (𑁧𑁫) 𑀢𑀻𑀡𑀺 𑀢𑀺𑀢𑁆𑀣𑀸𑀬𑀢𑀦𑀸𑀦𑀺 (𑁧𑁬) 𑀢𑀬𑁄 𑀓𑀺𑀜𑁆𑀘𑀦𑀸 (𑁧𑁭) 𑀢𑀻𑀡𑀺 𑀅𑀗𑁆𑀕𑀡𑀸𑀦𑀺 (𑁧𑁮) 𑀢𑀻𑀡𑀺 𑀫𑀮𑀸𑀦𑀺 (𑁧𑁯) 𑀢𑀻𑀡𑀺 𑀯𑀺𑀲𑀫𑀸𑀦𑀺 (𑁨𑁦) 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀯𑀺𑀲𑀫𑀸𑀦𑀺 (𑁨𑁧) 𑀢𑀬𑁄 𑀅𑀕𑁆𑀕𑀻 (𑁨𑁨) 𑀢𑀬𑁄 𑀓𑀲𑀸𑀯𑀸 (𑁨𑁩) 𑀅𑀧𑀭𑁂𑀧𑀺 𑀢𑀬𑁄 𑀓𑀲𑀸𑀯𑀸 (𑁨𑁪)𑀅𑀲𑁆𑀲𑀸𑀤𑀤𑀺𑀝𑁆𑀞𑀺, 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 (𑁨𑁫) 𑀅𑀭𑀢𑀺, 𑀯𑀺𑀳𑁂𑀲𑀸, 𑀅𑀥𑀫𑁆𑀫𑀘𑀭𑀺𑀬𑀸 (𑁨𑁬)𑀤𑁄𑀯𑀘𑀲𑁆𑀲𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸, 𑀦𑀸𑀦𑀢𑁆𑀢𑀲𑀜𑁆𑀜𑀸 (𑁨𑁭) 𑀉𑀤𑁆𑀥𑀘𑁆𑀘𑀁, 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄 (𑁨𑁮) 𑀅𑀲𑀦𑁆𑀢𑀼𑀝𑁆𑀞𑀺𑀢𑀸, 𑀅𑀲𑀫𑁆𑀧𑀚𑀜𑁆𑀜𑀢𑀸, 𑀫𑀳𑀺𑀘𑁆𑀙𑀢𑀸 (𑁨𑁯) 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁, 𑀧𑀫𑀸𑀤𑁄 (𑁩𑁦)𑀅𑀦𑀸𑀤𑀭𑀺𑀬𑀁, 𑀤𑁄𑀯𑀘𑀲𑁆𑀲𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸 (𑁩𑁧) 𑀅𑀲𑁆𑀲𑀤𑁆𑀥𑀺𑀬𑀁, 𑀅𑀯𑀤𑀜𑁆𑀜𑀼𑀢𑀸, 𑀓𑁄𑀲𑀚𑁆𑀚𑀁 (𑁩𑁨) 𑀉𑀤𑁆𑀥𑀘𑁆𑀘𑀁, 𑀅𑀲𑀁𑀯𑀭𑁄, 𑀤𑀼𑀲𑁆𑀲𑀻𑀮𑁆𑀬𑀁 (𑁩𑁩) 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀫𑁆𑀬𑀢𑀸, 𑀲𑀤𑁆𑀥𑀫𑁆𑀫𑀁 𑀅𑀲𑁄𑀢𑀼𑀓𑀫𑁆𑀬𑀢𑀸, 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀸 (𑁩𑁪) 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀅𑀲𑀫𑁆𑀧𑀚𑀜𑁆𑀜𑀁, 𑀘𑁂𑀢𑀲𑁄 𑀯𑀺𑀓𑁆𑀔𑁂𑀧𑁄 (𑁩𑁫)𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀓𑀼𑀫𑁆𑀫𑀕𑁆𑀕𑀲𑁂𑀯𑀦𑀸, 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁

𑀢𑀺𑀓𑀁.

𑁪. 𑀘𑀢𑀼𑀓𑁆𑀓𑀫𑀸𑀢𑀺𑀓𑀸

𑁮𑁩𑁫. (𑁧) 𑀘𑀢𑁆𑀢𑀸𑀭𑁄 𑀆𑀲𑀯𑀸 (𑁨) 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 (𑁩) 𑀘𑀢𑁆𑀢𑀸𑀭𑁄 𑀑𑀖𑀸 (𑁪) 𑀘𑀢𑁆𑀢𑀸𑀭𑁄 𑀬𑁄𑀕𑀸 (𑁫) 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 (𑁬) 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑁆𑀧𑀸𑀤𑀸 (𑁭) 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 (𑁮) 𑀘𑀢𑁆𑀢𑀸𑀭𑁄 𑀯𑀺𑀧𑀭𑀺𑀬𑀸𑀲𑀸 [𑀯𑀺𑀧𑀭𑀺𑀬𑁂𑀲𑀸 (𑀲𑀻. 𑀲𑁆𑀬𑀸. 𑀓.)] (𑁯) 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 (𑁧𑁦) 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 (𑁧𑁧) 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 (𑁧𑁨) 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 (𑁧𑁩)𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 (𑁧𑁪) 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 (𑁧𑁫) 𑀘𑀢𑀲𑁆𑀲𑁄 𑀤𑀺𑀝𑁆𑀞𑀺𑀬𑁄

𑀘𑀢𑀼𑀓𑁆𑀓𑀁.

𑁫. 𑀧𑀜𑁆𑀘𑀓𑀫𑀸𑀢𑀺𑀓𑀸

𑁮𑁩𑁬. (𑁧) 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 (𑁨) 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 (𑁩) 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 (𑁪) 𑀧𑀜𑁆𑀘 𑀲𑀗𑁆𑀕𑀸 (𑁫) 𑀧𑀜𑁆𑀘 𑀲𑀮𑁆𑀮𑀸 (𑁬) 𑀧𑀜𑁆𑀘 𑀘𑁂𑀢𑁄𑀔𑀺𑀮𑀸 (𑁭)𑀧𑀜𑁆𑀘 𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 [𑀘𑁂𑀢𑀲𑁄𑀯𑀺𑀦𑀺𑀩𑀤𑁆𑀥𑀸 (𑀓.)] (𑁮) 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 (𑁯) 𑀧𑀜𑁆𑀘 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀓𑀸𑀦𑀺 (𑁧𑁦) 𑀧𑀜𑁆𑀘 𑀤𑀺𑀝𑁆𑀞𑀺𑀬𑁄 (𑁧𑁧) 𑀧𑀜𑁆𑀘 𑀯𑁂𑀭𑀸 (𑁧𑁨) 𑀧𑀜𑁆𑀘 𑀩𑁆𑀬𑀲𑀦𑀸 (𑁧𑁩) 𑀧𑀜𑁆𑀘 𑀅𑀓𑁆𑀔𑀦𑁆𑀢𑀺𑀬𑀸 𑀆𑀤𑀻𑀦𑀯𑀸 (𑁧𑁪) 𑀧𑀜𑁆𑀘 𑀪𑀬𑀸𑀦𑀺 (𑁧𑁫) 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸

𑀧𑀜𑁆𑀘𑀓𑀁.

𑁬. 𑀙𑀓𑁆𑀓𑀫𑀸𑀢𑀺𑀓𑀸

𑁮𑁩𑁭. (𑁧) 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺 (𑁨) 𑀙 𑀙𑀦𑁆𑀤𑀭𑀸𑀕𑀸 (𑁩) 𑀙 𑀯𑀺𑀭𑁄𑀥𑀯𑀢𑁆𑀣𑀽𑀦𑀺 (𑁪) 𑀙 𑀢𑀡𑁆𑀳𑀸𑀓𑀸𑀬𑀸 (𑁫) 𑀙 𑀅𑀕𑀸𑀭𑀯𑀸 (𑁬) 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 (𑁭) 𑀅𑀧𑀭𑁂𑀧𑀺 𑀙 𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 (𑁮) 𑀙 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸 (𑁯) 𑀙 𑀤𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸 (𑁧𑁦) 𑀙 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸 (𑁧𑁧) 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 (𑁧𑁨) 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 (𑁧𑁩) 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸 (𑁧𑁪) 𑀙 𑀤𑀺𑀝𑁆𑀞𑀺𑀬𑁄

𑀙𑀓𑁆𑀓𑀁.

𑁭. 𑀲𑀢𑁆𑀢𑀓𑀫𑀸𑀢𑀺𑀓𑀸

𑁮𑁩𑁮. (𑁧) 𑀲𑀢𑁆𑀢 𑀅𑀦𑀼𑀲𑀬𑀸 (𑁨) 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 (𑁩) 𑀲𑀢𑁆𑀢 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺 (𑁪)𑀲𑀢𑁆𑀢 𑀅𑀲𑀤𑁆𑀥𑀫𑁆𑀫𑀸 (𑁫) 𑀲𑀢𑁆𑀢 𑀤𑀼𑀘𑁆𑀘𑀭𑀺𑀢𑀸𑀦𑀺 (𑁬) 𑀲𑀢𑁆𑀢 𑀫𑀸𑀦𑀸 (𑁭) 𑀲𑀢𑁆𑀢 𑀤𑀺𑀝𑁆𑀞𑀺𑀬𑁄

𑀲𑀢𑁆𑀢𑀓𑀁.

𑁮. 𑀅𑀝𑁆𑀞𑀓𑀫𑀸𑀢𑀺𑀓𑀸

𑁮𑁩𑁯. (𑁧) 𑀅𑀝𑁆𑀞 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 (𑁨) 𑀅𑀝𑁆𑀞 𑀓𑀼𑀲𑀻𑀢𑀯𑀢𑁆𑀣𑀽𑀦𑀺 (𑁩) 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀝𑀺𑀖𑀸𑀢𑁄 (𑁪) 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑀸 (𑁫) 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸 (𑁬) 𑀅𑀝𑁆𑀞 𑀧𑀼𑀭𑀺𑀲𑀤𑁄𑀲𑀸 (𑁭) 𑀅𑀝𑁆𑀞 𑀅𑀲𑀜𑁆𑀜𑀺𑀯𑀸𑀤𑀸 (𑁮) 𑀅𑀝𑁆𑀞 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀯𑀸𑀤𑀸

𑀅𑀝𑁆𑀞𑀓𑀁.

𑁯. 𑀦𑀯𑀓𑀫𑀸𑀢𑀺𑀓𑀸

𑁮𑁪𑁦. (𑁧) 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺 (𑁨) 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺 (𑁩) 𑀦𑀯𑀯𑀺𑀥𑀸 𑀫𑀸𑀦𑀸 (𑁪)𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 (𑁫) 𑀦𑀯 𑀇𑀜𑁆𑀚𑀺𑀢𑀸𑀦𑀺 (𑁬) 𑀦𑀯 𑀫𑀜𑁆𑀜𑀺𑀢𑀸𑀦𑀺 (𑁭) 𑀦𑀯 𑀨𑀦𑁆𑀤𑀺𑀢𑀸𑀦𑀺 (𑁮) 𑀦𑀯 𑀧𑀧𑀜𑁆𑀘𑀺𑀢𑀸𑀦𑀺 (𑁯) 𑀦𑀯 𑀲𑀗𑁆𑀔𑀢𑀸𑀦𑀺

𑀦𑀯𑀓𑀁.

𑁧𑁦. 𑀤𑀲𑀓𑀫𑀸𑀢𑀺𑀓𑀸

𑁮𑁪𑁧. (𑁧) 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺 (𑁨) 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺 (𑁩) 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 (𑁪) 𑀤𑀲 𑀲𑀁𑀬𑁄𑀚𑀦𑀸𑀦𑀺 (𑁫) 𑀤𑀲 𑀫𑀺𑀘𑁆𑀙𑀢𑁆𑀢𑀸 (𑁬) 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 (𑁭) 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺

𑀤𑀲𑀓𑀁.

𑁮𑁪𑁨. 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬, 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺, 𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀜𑁆𑀜𑀽𑀳𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞 𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀢𑀁 𑀳𑁄𑀢𑀺. 𑀬𑀸𑀦𑀺 𑀘 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑁂𑀬𑁆𑀬𑀸𑀓𑀭𑀡𑁂 𑀯𑀼𑀢𑁆𑀢𑀸𑀦𑀺 𑀪𑀕𑀯𑀢𑀸.

𑀫𑀸𑀢𑀺𑀓𑀸.

𑁧. 𑀏𑀓𑀓𑀦𑀺𑀤𑁆𑀤𑁂𑀲𑁄

(𑁧) 𑀚𑀸𑀢𑀺𑀫𑀤𑁄

𑁮𑁪𑁩. 𑀢𑀢𑁆𑀣 𑀓𑀢𑀫𑁄 𑀚𑀸𑀢𑀺𑀫𑀤𑁄? 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀫𑀤𑁄 𑀫𑀚𑁆𑀚𑀦𑀸 𑀫𑀚𑁆𑀚𑀺𑀢𑀢𑁆𑀢𑀁 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 [𑀉𑀡𑁆𑀡𑀢𑀺 𑀉𑀡𑁆𑀡𑀸𑀫𑁄 (𑀲𑁆𑀬𑀸. 𑀓.) 𑀥. 𑀲. 𑁧𑁧𑁨𑁧] 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀚𑀸𑀢𑀺𑀫𑀤𑁄’’.

(𑁨-𑁨𑁭) 𑀕𑁄𑀢𑁆𑀢𑀫𑀤𑀸𑀤𑀻

𑁮𑁪𑁪. 𑀢𑀢𑁆𑀣 𑀓𑀢𑀫𑁄 𑀕𑁄𑀢𑁆𑀢𑀫𑀤𑁄? 𑀕𑁄𑀢𑁆𑀢𑀁 𑀧𑀝𑀺𑀘𑁆𑀘…𑀧𑁂… 𑀆𑀭𑁄𑀕𑁆𑀬𑀁 𑀧𑀝𑀺𑀘𑁆𑀘…𑀧𑁂… 𑀬𑁄𑀩𑁆𑀩𑀦𑀁 𑀧𑀝𑀺𑀘𑁆𑀘…𑀧𑁂… 𑀚𑀻𑀯𑀺𑀢𑀁 𑀧𑀝𑀺𑀘𑁆𑀘…𑀧𑁂… 𑀮𑀸𑀪𑀁 𑀧𑀝𑀺𑀘𑁆𑀘…𑀧𑁂… 𑀲𑀓𑁆𑀓𑀸𑀭𑀁 𑀧𑀝𑀺𑀘𑁆𑀘…𑀧𑁂… 𑀕𑀭𑀼𑀓𑀸𑀭𑀁 𑀧𑀝𑀺𑀘𑁆𑀘…𑀧𑁂… 𑀧𑀼𑀭𑁂𑀓𑁆𑀔𑀸𑀭𑀁 𑀧𑀝𑀺𑀘𑁆𑀘…𑀧𑁂… 𑀧𑀭𑀺𑀯𑀸𑀭𑀁 𑀧𑀝𑀺𑀘𑁆𑀘…𑀧𑁂… 𑀪𑁄𑀕𑀁 𑀧𑀝𑀺𑀘𑁆𑀘…𑀧𑁂… 𑀯𑀡𑁆𑀡𑀁 𑀧𑀝𑀺𑀘𑁆𑀘…𑀧𑁂… 𑀲𑀼𑀢𑀁 𑀧𑀝𑀺𑀘𑁆𑀘…𑀧𑁂… 𑀧𑀝𑀺𑀪𑀸𑀦𑀁 𑀧𑀝𑀺𑀘𑁆𑀘…𑀧𑁂… 𑀭𑀢𑁆𑀢𑀜𑁆𑀜𑀼𑀢𑀁 𑀧𑀝𑀺𑀘𑁆𑀘…𑀧𑁂… 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀁 𑀧𑀝𑀺𑀘𑁆𑀘…𑀧𑁂… 𑀅𑀦𑀯𑀜𑁆𑀜𑀸𑀢𑀁 𑀧𑀝𑀺𑀘𑁆𑀘…𑀧𑁂… 𑀇𑀭𑀺𑀬𑀸𑀧𑀣𑀁 𑀧𑀝𑀺𑀘𑁆𑀘…𑀧𑁂… 𑀇𑀤𑁆𑀥𑀺𑀁 𑀧𑀝𑀺𑀘𑁆𑀘…𑀧𑁂… 𑀬𑀲𑀁 𑀧𑀝𑀺𑀘𑁆𑀘…𑀧𑁂… 𑀲𑀻𑀮𑀁 𑀧𑀝𑀺𑀘𑁆𑀘…𑀧𑁂… 𑀛𑀸𑀦𑀁 𑀧𑀝𑀺𑀘𑁆𑀘…𑀧𑁂… 𑀲𑀺𑀧𑁆𑀧𑀁 𑀧𑀝𑀺𑀘𑁆𑀘…𑀧𑁂… 𑀆𑀭𑁄𑀳𑀁 𑀧𑀝𑀺𑀘𑁆𑀘…𑀧𑁂… 𑀧𑀭𑀺𑀡𑀸𑀳𑀁 𑀧𑀝𑀺𑀘𑁆𑀘…𑀧𑁂… 𑀲𑀡𑁆𑀞𑀸𑀦𑀁 𑀧𑀝𑀺𑀘𑁆𑀘…𑀧𑁂… 𑀧𑀸𑀭𑀺𑀧𑀽𑀭𑀺𑀁 𑀧𑀝𑀺𑀘𑁆𑀘 𑀫𑀤𑁄 𑀫𑀚𑁆𑀚𑀦𑀸 𑀫𑀚𑁆𑀚𑀺𑀢𑀢𑁆𑀢𑀁 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀸𑀭𑀺𑀧𑀽𑀭𑀺𑀫𑀤𑁄’’.

(𑁨𑁮) 𑀫𑀤𑁄

𑁮𑁪𑁫. 𑀢𑀢𑁆𑀣 𑀓𑀢𑀫𑁄 𑀫𑀤𑁄? 𑀬𑁄 𑀫𑀤𑁄 𑀫𑀚𑁆𑀚𑀦𑀸 𑀫𑀚𑁆𑀚𑀺𑀢𑀢𑁆𑀢𑀁 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀤𑁄’’.

(𑁨𑁯) 𑀧𑀫𑀸𑀤𑁄

𑁮𑁪𑁬. 𑀢𑀢𑁆𑀣 𑀓𑀢𑀫𑁄 𑀧𑀫𑀸𑀤𑁄? 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀯𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂 𑀯𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂 𑀯𑀸 𑀧𑀜𑁆𑀘𑀲𑀼 𑀯𑀸 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀑𑀮𑀻𑀦𑀯𑀼𑀢𑁆𑀢𑀺𑀢𑀸 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫𑀁 𑀅𑀦𑀥𑀺𑀝𑁆𑀞𑀸𑀦𑀁 𑀅𑀦𑀦𑀼𑀬𑁄𑀕𑁄 𑀧𑀫𑀸𑀤𑁄, 𑀬𑁄 𑀏𑀯𑀭𑀽𑀧𑁄 𑀧𑀫𑀸𑀤𑁄 𑀧𑀫𑀚𑁆𑀚𑀦𑀸 𑀧𑀫𑀚𑁆𑀚𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀫𑀸𑀤𑁄’’.

(𑁩𑁦) 𑀣𑀫𑁆𑀪𑁄

𑁮𑁪𑁭. 𑀢𑀢𑁆𑀣 𑀓𑀢𑀫𑁄 𑀣𑀫𑁆𑀪𑁄? 𑀬𑁄 𑀣𑀫𑁆𑀪𑁄 𑀣𑀫𑁆𑀪𑀦𑀸 𑀣𑀫𑁆𑀪𑀺𑀢𑀢𑁆𑀢𑀁 𑀓𑀓𑁆𑀔𑀴𑀺𑀬𑀁 𑀨𑀸𑀭𑀼𑀲𑀺𑀬𑀁 𑀉𑀚𑀼𑀘𑀺𑀢𑁆𑀢𑀢𑀸 𑀅𑀫𑀼𑀤𑀼𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀣𑀫𑁆𑀪𑁄’’.

(𑁩𑁧) 𑀲𑀸𑀭𑀫𑁆𑀪𑁄

𑁮𑁪𑁮. 𑀢𑀢𑁆𑀣 𑀓𑀢𑀫𑁄 𑀲𑀸𑀭𑀫𑁆𑀪𑁄? 𑀬𑁄 𑀲𑀸𑀭𑀫𑁆𑀪𑁄 𑀧𑀝𑀺𑀲𑀸𑀭𑀫𑁆𑀪𑁄 𑀲𑀸𑀭𑀫𑁆𑀪𑀦𑀸 𑀧𑀝𑀺𑀲𑀸𑀭𑀫𑁆𑀪𑀦𑀸 𑀧𑀝𑀺𑀲𑀸𑀭𑀫𑁆𑀪𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀸𑀭𑀫𑁆𑀪𑁄’’.

(𑁩𑁨) 𑀅𑀢𑁆𑀭𑀺𑀘𑁆𑀙𑀢𑀸

𑁮𑁪𑁯. 𑀢𑀢𑁆𑀣 𑀓𑀢𑀫𑀸 𑀅𑀢𑁆𑀭𑀺𑀘𑁆𑀙𑀢𑀸? 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺 𑀧𑀜𑁆𑀘𑀳𑀺 𑀯𑀸 𑀓𑀸𑀫𑀕𑀼𑀡𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀬𑀸 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀇𑀘𑁆𑀙𑀸𑀕𑀢𑀸 𑀅𑀢𑁆𑀭𑀺𑀘𑁆𑀙𑀢𑀸 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀢𑁆𑀭𑀺𑀘𑁆𑀙𑀢𑀸’’.

(𑁩𑁩) 𑀫𑀳𑀺𑀘𑁆𑀙𑀢𑀸

𑁮𑁫𑁦. 𑀢𑀢𑁆𑀣 𑀓𑀢𑀫𑀸 𑀫𑀳𑀺𑀘𑁆𑀙𑀢𑀸? 𑀇𑀢𑀭𑀻𑀢𑀭𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺 𑀧𑀜𑁆𑀘𑀳𑀺 𑀯𑀸 𑀓𑀸𑀫𑀕𑀼𑀡𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀬𑀸 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀇𑀘𑁆𑀙𑀸𑀕𑀢𑀸 𑀫𑀳𑀺𑀘𑁆𑀙𑀢𑀸 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀳𑀺𑀘𑁆𑀙𑀢𑀸’’.

(𑁩𑁪) 𑀧𑀸𑀧𑀺𑀘𑁆𑀙𑀢𑀸

𑁮𑁫𑁧. 𑀢𑀢𑁆𑀣 𑀓𑀢𑀫𑀸 𑀧𑀸𑀧𑀺𑀘𑁆𑀙𑀢𑀸? 𑀇𑀥𑁂𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 ‘‘𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀤𑀼𑀲𑁆𑀲𑀻𑀮𑁄 𑀲𑀫𑀸𑀦𑁄 ‘‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀅𑀧𑁆𑀧𑀲𑁆𑀲𑀼𑀢𑁄 𑀲𑀫𑀸𑀦𑁄 ‘‘𑀩𑀳𑀼𑀲𑁆𑀲𑀼𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀫𑀸𑀦𑁄 ‘‘𑀧𑀯𑀺𑀯𑀺𑀢𑁆𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀓𑀼𑀲𑀻𑀢𑁄 𑀲𑀫𑀸𑀦𑁄 ‘‘𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀫𑀼𑀝𑁆𑀞𑀲𑁆𑀲𑀢𑀻 𑀲𑀫𑀸𑀦𑁄 ‘‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀅𑀲𑀫𑀸𑀳𑀺𑀢𑁄 𑀲𑀫𑀸𑀦𑁄 ‘‘𑀲𑀫𑀸𑀳𑀺𑀢𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀤𑀼𑀧𑁆𑀧𑀜𑁆𑀜𑁄 𑀲𑀫𑀸𑀦𑁄 ‘‘𑀧𑀜𑁆𑀜𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺, 𑀅𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 ‘‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀇𑀘𑁆𑀙𑀢𑀺 𑁋 𑀬𑀸 𑀏𑀯𑀭𑀽𑀧𑀸 𑀇𑀘𑁆𑀙𑀸 𑀇𑀘𑁆𑀙𑀸𑀕𑀢𑀸 𑀧𑀸𑀧𑀺𑀘𑁆𑀙𑀢𑀸 𑀭𑀸𑀕𑁄 𑀲𑀸𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀸𑀧𑀺𑀘𑁆𑀙𑀢𑀸’’.

(𑁩𑁫) 𑀲𑀺𑀗𑁆𑀕𑀁

𑁮𑁫𑁨. 𑀢𑀢𑁆𑀣 𑀓𑀢𑀫𑀁 𑀲𑀺𑀗𑁆𑀕𑀁? 𑀬𑀁 𑀲𑀺𑀗𑁆𑀕𑀁 𑀲𑀺𑀗𑁆𑀕𑀸𑀭𑀢𑀸 𑀘𑀸𑀢𑀼𑀭𑀢𑀸 𑀘𑀸𑀢𑀼𑀭𑀺𑀬𑀁 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀺𑀗𑁆𑀕𑀁’’.

(𑁩𑁬) 𑀢𑀺𑀦𑁆𑀢𑀺𑀡𑀁

𑁮𑁫𑁩. 𑀢𑀢𑁆𑀣 𑀓𑀢𑀫𑀁 𑀢𑀺𑀦𑁆𑀢𑀺𑀡𑀁? 𑀬𑀁 𑀢𑀺𑀦𑁆𑀢𑀺𑀡𑀁 𑀢𑀺𑀦𑁆𑀢𑀺𑀡𑀸𑀬𑀦𑀸 𑀢𑀺𑀦𑁆𑀢𑀺𑀡𑀸𑀬𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 𑀲𑀸𑀥𑀼𑀓𑀫𑁆𑀬𑀢𑀸 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀢𑀺𑀦𑁆𑀢𑀺𑀡𑀁’’.

(𑁩𑁭) 𑀘𑀸𑀧𑀮𑁆𑀬𑀁

𑁮𑁫𑁪. 𑀢𑀢𑁆𑀣 𑀓𑀢𑀫𑀁 𑀘𑀸𑀧𑀮𑁆𑀬𑀁? 𑀘𑀻𑀯𑀭𑀫𑀡𑁆𑀟𑀦𑀸 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲 𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑀦𑀸 𑀯𑀺𑀪𑀽𑀲𑀦𑀸 𑀓𑁂𑀴𑀦𑀸 𑀧𑀭𑀺𑀓𑁂𑀴𑀦𑀸 𑀕𑀺𑀤𑁆𑀥𑀺𑀓𑀢𑀸 𑀕𑀺𑀤𑁆𑀥𑀺𑀓𑀢𑁆𑀢𑀁 𑀘𑀧𑀮𑀢𑀸 𑀘𑀸𑀧𑀮𑁆𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑀸𑀧𑀮𑁆𑀬𑀁’’.

(𑁩𑁮) 𑀅𑀲𑀪𑀸𑀕𑀯𑀼𑀢𑁆𑀢𑀺

𑁮𑁫𑁫. 𑀢𑀢𑁆𑀣 𑀓𑀢𑀫𑀁 𑀅𑀲𑀪𑀸𑀕𑀯𑀼𑀢𑁆𑀢𑀺? 𑀫𑀸𑀢𑀭𑀺 𑀯𑀸 𑀧𑀺𑀢𑀭𑀺 𑀯𑀸 𑀚𑁂𑀝𑁆𑀞𑁂 𑀯𑀸 𑀪𑀸𑀢𑀭𑀺 𑀯𑀸 𑀆𑀘𑀭𑀺𑀬𑁂𑀲𑀼 𑀯𑀸 𑀉𑀧𑀚𑁆𑀛𑀸𑀬𑁂 𑀯𑀸 𑀩𑀼𑀤𑁆𑀥𑁂 𑀯𑀸 𑀲𑀸𑀯𑀓𑁂𑀲𑀼 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀕𑀭𑀼𑀝𑁆𑀞𑀸𑀦𑀺𑀬𑁂𑀲𑀼 𑀯𑀺𑀧𑁆𑀧𑀝𑀺𑀓𑀽𑀮𑀕𑁆𑀕𑀸𑀳𑀺𑀢𑀸 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑀢𑀸 𑀅𑀦𑀸𑀤𑀭𑀺𑀬𑀁 𑀅𑀦𑀸𑀤𑀭𑀺𑀬𑀢𑀸 𑀅𑀕𑀸𑀭𑀯𑀢𑀸 𑀅𑀧𑁆𑀧𑀢𑀺𑀲𑁆𑀲𑀯𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀪𑀸𑀕𑀯𑀼𑀢𑁆𑀢𑀺’’.

(𑁩𑁯) 𑀅𑀭𑀢𑀺

𑁮𑁫𑁬. 𑀢𑀢𑁆𑀣 𑀓𑀢𑀫𑀸 𑀅𑀭𑀢𑀺? 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀡𑀸 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀭𑀢𑀺’’.

(𑁪𑁦) 𑀢𑀦𑁆𑀤𑀻

𑁮𑁫𑁭. 𑀢𑀢𑁆𑀣 𑀓𑀢𑀫𑀸 𑀢𑀦𑁆𑀤𑀻? 𑀬𑀸 𑀢𑀦𑁆𑀤𑀻 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀫𑀦𑀓𑀢𑀸 𑀆𑀮𑀲𑁆𑀬𑀁 𑀆𑀮𑀲𑁆𑀬𑀸𑀬𑀦𑀸 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀢𑀦𑁆𑀤𑀻’’.

(𑁪𑁧) 𑀯𑀺𑀚𑀫𑁆𑀪𑀺𑀢𑀸

𑁮𑁫𑁮. 𑀢𑀢𑁆𑀣 𑀓𑀢𑀫𑀸 𑀯𑀺𑀚𑀫𑁆𑀪𑀺𑀢𑀸? 𑀬𑀸 𑀓𑀸𑀬𑀲𑁆𑀲 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸 𑀆𑀦𑀫𑀦𑀸 𑀯𑀺𑀦𑀫𑀦𑀸 𑀲𑀦𑁆𑀦𑀫𑀦𑀸 𑀧𑀡𑀫𑀦𑀸 𑀩𑁆𑀬𑀸𑀥𑀺𑀬𑀓𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑀺𑀚𑀫𑁆𑀪𑀺𑀢𑀸’’.

(𑁪𑁨) 𑀪𑀢𑁆𑀢𑀲𑀫𑁆𑀫𑀤𑁄

𑁮𑁫𑁯. 𑀢𑀢𑁆𑀣 𑀓𑀢𑀫𑁄 𑀪𑀢𑁆𑀢𑀲𑀫𑁆𑀫𑀤𑁄? 𑀬𑀸 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀓𑀺𑀮𑀫𑀣𑁄 𑀪𑀢𑁆𑀢𑀧𑀭𑀺𑀴𑀸𑀳𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀪𑀢𑁆𑀢𑀲𑀫𑁆𑀫𑀤𑁄’’.

(𑁪𑁩) 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁

𑁮𑁬𑁦. 𑀢𑀢𑁆𑀣 𑀓𑀢𑀫𑀁 𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸 𑀮𑀻𑀦𑀁 𑀮𑀻𑀬𑀦𑀸 𑀮𑀻𑀬𑀺𑀢𑀢𑁆𑀢𑀁 𑀣𑀺𑀦𑀁 𑀣𑀻𑀬𑀦𑀸 𑀣𑀻𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀁’’.

(𑁪𑁪) 𑀓𑀼𑀳𑀦𑀸

𑁮𑁬𑁧. 𑀢𑀢𑁆𑀣 𑀓𑀢𑀫𑀸 𑀓𑀼𑀳𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑁂𑀦 [𑀧𑀘𑁆𑀘𑀬𑀧𑀝𑀺𑀲𑁂𑀥𑀦𑀲𑀗𑁆𑀔𑀸𑀢𑁂𑀦 (𑀲𑀻.)] 𑀯𑀸 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑁂𑀦 𑀯𑀸 𑀇𑀭𑀺𑀬𑀸𑀧𑀣𑀲𑁆𑀲 𑀯𑀸 𑀅𑀞𑀧𑀦𑀸 [𑀆𑀞𑀧𑀦𑀸 (𑀓.)] 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀢𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑀼𑀳𑀦𑀸’’.

(𑁪𑁫) 𑀮𑀧𑀦𑀸

𑁮𑁬𑁨. 𑀢𑀢𑁆𑀣 𑀓𑀢𑀫𑀸 𑀮𑀧𑀦𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀸 𑀧𑀭𑁂𑀲𑀁 𑀆𑀮𑀧𑀦𑀸 𑀮𑀧𑀦𑀸 𑀲𑀮𑁆𑀮𑀧𑀦𑀸 𑀉𑀮𑁆𑀮𑀧𑀦𑀸 𑀲𑀫𑀼𑀮𑁆𑀮𑀧𑀦𑀸 𑀉𑀦𑁆𑀦𑀳𑀦𑀸 𑀲𑀫𑀼𑀦𑁆𑀦𑀳𑀦𑀸 𑀉𑀓𑁆𑀓𑀸𑀘𑀦𑀸 𑀲𑀫𑀼𑀓𑁆𑀓𑀸𑀘𑀦𑀸 𑀅𑀦𑀼𑀧𑁆𑀧𑀺𑀬𑀪𑀸𑀡𑀺𑀢𑀸 𑀘𑀸𑀝𑀼𑀓𑀫𑁆𑀬𑀢𑀸 𑀫𑀼𑀕𑁆𑀕𑀲𑀽𑀧𑁆𑀬𑀢𑀸 𑀧𑀸𑀭𑀺𑀪𑀝𑀬𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀮𑀧𑀦𑀸’’.

(𑁪𑁬) 𑀦𑁂𑀫𑀺𑀢𑁆𑀢𑀺𑀓𑀢𑀸

𑁮𑁬𑁩. 𑀢𑀢𑁆𑀣 𑀓𑀢𑀫𑀸 𑀦𑁂𑀫𑀺𑀢𑁆𑀢𑀺𑀓𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀁 𑀧𑀭𑁂𑀲𑀁 𑀦𑀺𑀫𑀺𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀑𑀪𑀸𑀲𑁄 𑀑𑀪𑀸𑀲𑀓𑀫𑁆𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀸 𑀧𑀭𑀺𑀓𑀣𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀦𑁂𑀫𑀺𑀢𑁆𑀢𑀺𑀓𑀢𑀸’’.

(𑁪𑁭) 𑀦𑀺𑀧𑁆𑀧𑁂𑀲𑀺𑀓𑀢𑀸

𑁮𑁬𑁪. 𑀢𑀢𑁆𑀣 𑀓𑀢𑀫𑀸 𑀦𑀺𑀧𑁆𑀧𑁂𑀲𑀺𑀓𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀧𑀺𑀘𑁆𑀙𑀲𑁆𑀲 𑀇𑀘𑁆𑀙𑀸𑀧𑀓𑀢𑀲𑁆𑀲 𑀬𑀸 𑀧𑀭𑁂𑀲𑀁 𑀅𑀓𑁆𑀓𑁄𑀲𑀦𑀸 𑀯𑀫𑁆𑀪𑀦𑀸 𑀕𑀭𑀳𑀡𑀸 𑀉𑀓𑁆𑀔𑁂𑀧𑀦𑀸 𑀲𑀫𑀼𑀓𑁆𑀔𑁂𑀧𑀦𑀸 𑀔𑀺𑀧𑀦𑀸 𑀲𑀗𑁆𑀔𑀺𑀧𑀦𑀸 𑀧𑀸𑀧𑀦𑀸 𑀲𑀫𑁆𑀧𑀸𑀧𑀦𑀸 𑀅𑀯𑀡𑁆𑀡𑀳𑀸𑀭𑀺𑀓𑀸 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀦𑀺𑀧𑁆𑀧𑁂𑀲𑀺𑀓𑀢𑀸’’.

(𑁪𑁮) 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸

𑁮𑁬𑁫. 𑀢𑀢𑁆𑀣 𑀓𑀢𑀫𑀸 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀇𑀢𑁄 𑀮𑀤𑁆𑀥𑀁 𑀆𑀫𑀺𑀲𑀁 𑀅𑀫𑀼𑀢𑁆𑀭 𑀳𑀭𑀢𑀺 𑀅𑀫𑀼𑀢𑁆𑀭 𑀯𑀸 𑀮𑀤𑁆𑀥𑀁 𑀆𑀫𑀺𑀲𑀁 𑀇𑀥 𑀆𑀳𑀭𑀢𑀺, 𑀬𑀸 𑀏𑀯𑀭𑀽𑀧𑀸 𑀆𑀫𑀺𑀲𑀲𑁆𑀲 𑀏𑀝𑁆𑀞𑀺 𑀕𑀯𑁂𑀝𑁆𑀞𑀺 𑀧𑀭𑀺𑀬𑁂𑀝𑁆𑀞𑀺 𑀏𑀲𑀦𑀸 𑀕𑀯𑁂𑀲𑀦𑀸 𑀧𑀭𑀺𑀬𑁂𑀲𑀦𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸’’.

(𑁪𑁯) 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁬𑁬. 𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 [𑀯𑀺𑀚𑁆𑀚𑀝𑁆𑀞𑀸𑀦𑁂𑀦 (𑀲𑁆𑀬𑀸.)] 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁦) 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁬𑁭. 𑀢𑀢𑁆𑀣 𑀓𑀢𑀫𑁄 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁧) 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁬𑁮. 𑀢𑀢𑁆𑀣 𑀓𑀢𑀫𑁄 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀑𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀬𑁄 𑀏𑀯𑀭𑀽𑀧𑁄 𑀑𑀫𑀸𑀦𑁄 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀁 𑀳𑀻𑀴𑀦𑀸 𑀑𑀳𑀻𑀴𑀦𑀸 𑀑𑀳𑀻𑀴𑀺𑀢𑀢𑁆𑀢𑀁 𑀅𑀢𑁆𑀢𑀼𑀜𑁆𑀜𑀸 𑀅𑀢𑁆𑀢𑀯𑀜𑁆𑀜𑀸 𑀅𑀢𑁆𑀢𑀧𑀭𑀺𑀪𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁨) 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁬𑁯. 𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑁂𑀬𑁆𑀬𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑁂𑀬𑁆𑀬𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁩) 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁦. 𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑁂𑀬𑁆𑀬𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁪) 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁧. 𑀢𑀢𑁆𑀣 𑀓𑀢𑀫𑁄 𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑁂𑀬𑁆𑀬𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀳𑀻𑀦𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀑𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀑𑀫𑀸𑀦𑁄 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀁 𑀳𑀻𑀴𑀦𑀸 𑀑𑀳𑀻𑀴𑀦𑀸 𑀑𑀳𑀻𑀴𑀺𑀢𑀢𑁆𑀢𑀁 𑀅𑀢𑁆𑀢𑀼𑀜𑁆𑀜𑀸 𑀅𑀢𑁆𑀢𑀯𑀜𑁆𑀜𑀸 𑀅𑀢𑁆𑀢𑀧𑀭𑀺𑀪𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁫) 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁨. 𑀢𑀢𑁆𑀣 𑀓𑀢𑀫𑁄 𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑀤𑀺𑀲𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑁂𑀬𑁆𑀬𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁…𑀧𑁂… 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁬) 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁩. 𑀢𑀢𑁆𑀣 𑀓𑀢𑀫𑁄 𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑀤𑀺𑀲𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁭) 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁪. 𑀢𑀢𑁆𑀣 𑀓𑀢𑀫𑁄 𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀲𑀤𑀺𑀲𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀳𑀻𑀦𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀑𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀑𑀫𑀸𑀦𑁄 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀁 𑀳𑀻𑀴𑀦𑀸 𑀑𑀳𑀻𑀴𑀦𑀸 𑀑𑀳𑀻𑀴𑀺𑀢𑀢𑁆𑀢𑀁 𑀅𑀢𑁆𑀢𑀼𑀜𑁆𑀜𑀸 𑀅𑀢𑁆𑀢𑀯𑀜𑁆𑀜𑀸 𑀅𑀢𑁆𑀢𑀧𑀭𑀺𑀪𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁮) 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁫. 𑀢𑀢𑁆𑀣 𑀓𑀢𑀫𑁄 𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀳𑀻𑀦𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑁂𑀬𑁆𑀬𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁫𑁯) 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁬. 𑀢𑀢𑁆𑀣 𑀓𑀢𑀫𑁄 𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀳𑀻𑀦𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁬𑁦) 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄

𑁮𑁭𑁭. 𑀢𑀢𑁆𑀣 𑀓𑀢𑀫𑁄 𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀳𑀻𑀦𑁄 𑀳𑁄𑀢𑀺 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺; 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀑𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀑𑀫𑀸𑀦𑁄 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀁 𑀳𑀻𑀴𑀦𑀸 𑀑𑀳𑀻𑀴𑀦𑀸 𑀑𑀳𑀻𑀴𑀺𑀢𑀢𑁆𑀢𑀁 𑀅𑀢𑁆𑀢𑀼𑀜𑁆𑀜𑀸 𑀅𑀢𑁆𑀢𑀯𑀜𑁆𑀜𑀸 𑀅𑀢𑁆𑀢𑀧𑀭𑀺𑀪𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄’’.

(𑁬𑁧) 𑀫𑀸𑀦𑁄

𑁮𑁭𑁮. 𑀢𑀢𑁆𑀣 𑀓𑀢𑀫𑁄 𑀫𑀸𑀦𑁄? 𑀬𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀸𑀦𑁄’’.

(𑁬𑁨) 𑀅𑀢𑀺𑀫𑀸𑀦𑁄

𑁮𑁭𑁯. 𑀢𑀢𑁆𑀣 𑀓𑀢𑀫𑁄 𑀅𑀢𑀺𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀭𑁂𑀳𑀺 𑀅𑀢𑁆𑀢𑀸𑀦𑀁 𑀅𑀢𑀺𑀫𑀜𑁆𑀜𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀢𑀺𑀫𑀸𑀦𑁄’’.

(𑁬𑁩) 𑀫𑀸𑀦𑀸𑀢𑀺𑀫𑀸𑀦𑁄

𑁮𑁮𑁦. 𑀢𑀢𑁆𑀣 𑀓𑀢𑀫𑁄 𑀫𑀸𑀦𑀸𑀢𑀺𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀧𑀼𑀩𑁆𑀩𑀓𑀸𑀮𑀁 𑀧𑀭𑁂𑀳𑀺 𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀤𑀳𑀢𑀺, 𑀅𑀧𑀭𑀓𑀸𑀮𑀁 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀁 𑀤𑀳𑀢𑀺. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀸𑀦𑀸𑀢𑀺𑀫𑀸𑀦𑁄’’.

(𑁬𑁪) 𑀑𑀫𑀸𑀦𑁄

𑁮𑁮𑁧. 𑀢𑀢𑁆𑀣 𑀓𑀢𑀫𑁄 𑀑𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀑𑀫𑀸𑀦𑀁 𑀚𑀧𑁆𑀧𑁂𑀢𑀺. 𑀬𑁄 𑀏𑀯𑀭𑀽𑀧𑁄 𑀑𑀫𑀸𑀦𑁄 𑀑𑀫𑀜𑁆𑀜𑀦𑀸 𑀑𑀫𑀜𑁆𑀜𑀺𑀢𑀢𑁆𑀢𑀁 𑀳𑀻𑀴𑀦𑀸 𑀑𑀳𑀻𑀴𑀦𑀸 𑀑𑀳𑀻𑀴𑀺𑀢𑀢𑁆𑀢𑀁 𑀅𑀢𑁆𑀢𑀼𑀜𑁆𑀜𑀸 𑀅𑀢𑁆𑀢𑀯𑀜𑁆𑀜𑀸 𑀅𑀢𑁆𑀢𑀧𑀭𑀺𑀪𑀯𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀑𑀫𑀸𑀦𑁄’’.

(𑁬𑁫) 𑀅𑀥𑀺𑀫𑀸𑀦𑁄

𑁮𑁮𑁨. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀫𑀸𑀦𑁄? 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸, 𑀅𑀓𑀢𑁂 𑀓𑀢𑀲𑀜𑁆𑀜𑀺𑀢𑀸, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀢𑀸, 𑀅𑀲𑀘𑁆𑀙𑀺𑀓𑀢𑁂 𑀲𑀘𑁆𑀙𑀺𑀓𑀢𑀲𑀜𑁆𑀜𑀺𑀢𑀸, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀥𑀺𑀫𑀸𑀦𑁄’’.

(𑁬𑁬) 𑀅𑀲𑁆𑀫𑀺𑀫𑀸𑀦𑁄

𑁮𑁮𑁩. 𑀢𑀢𑁆𑀣 𑀓𑀢𑀫𑁄 𑀅𑀲𑁆𑀫𑀺𑀫𑀸𑀦𑁄? 𑀭𑀽𑀧𑀁 𑀅𑀲𑁆𑀫𑀻𑀢𑀺 𑀫𑀸𑀦𑁄, 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄, 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄, 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀲𑀗𑁆𑀔𑀸𑀭𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀲𑁆𑀫𑀻𑀢𑀺 𑀫𑀸𑀦𑁄, 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄, 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑁆𑀫𑀺𑀫𑀸𑀦𑁄’’.

(𑁬𑁭) 𑀫𑀺𑀘𑁆𑀙𑀸𑀫𑀸𑀦𑁄

𑁮𑁮𑁪. 𑀢𑀢𑁆𑀣 𑀓𑀢𑀫𑁄 𑀫𑀺𑀘𑁆𑀙𑀸𑀫𑀸𑀦𑁄? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀓𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀧𑀸𑀧𑀓𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀧𑀸𑀧𑀓𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀧𑀸𑀧𑀓𑁂𑀦 𑀯𑀸 𑀲𑀼𑀢𑁂𑀦 𑀧𑀸𑀧𑀓𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀧𑀸𑀧𑀓𑁂𑀦 𑀯𑀸 𑀲𑀻𑀮𑁂𑀦 𑀧𑀸𑀧𑀓𑁂𑀦 𑀯𑀸 𑀯𑀢𑁂𑀦 𑀧𑀸𑀧𑀓𑁂𑀦 𑀯𑀸 𑀲𑀻𑀮𑀩𑁆𑀩𑀢𑁂𑀦 𑀧𑀸𑀧𑀺𑀓𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀫𑀸𑀦𑀁 𑀚𑀧𑁆𑀧𑁂𑀢𑀺, 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀸𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀺𑀘𑁆𑀙𑀸𑀫𑀸𑀦𑁄’’.

(𑁬𑁮) 𑀜𑀸𑀢𑀺𑀯𑀺𑀢𑀓𑁆𑀓𑁄

𑁮𑁮𑁫. 𑀢𑀢𑁆𑀣 𑀓𑀢𑀫𑁄 𑀜𑀸𑀢𑀺𑀯𑀺𑀢𑀓𑁆𑀓𑁄? 𑀜𑀸𑀢𑀓𑁂 𑀆𑀭𑀩𑁆𑀪 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀜𑀸𑀢𑀺𑀯𑀺𑀢𑀓𑁆𑀓𑁄’’.

(𑁬𑁯) 𑀚𑀦𑀧𑀤𑀯𑀺𑀢𑀓𑁆𑀓𑁄

𑁮𑁮𑁬. 𑀢𑀢𑁆𑀣 𑀓𑀢𑀫𑁄 𑀚𑀦𑀧𑀤𑀯𑀺𑀢𑀓𑁆𑀓𑁄? 𑀚𑀦𑀧𑀤𑀁 𑀆𑀭𑀩𑁆𑀪 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀚𑀦𑀧𑀤𑀯𑀺𑀢𑀓𑁆𑀓𑁄’’.

(𑁭𑁦) 𑀅𑀫𑀭𑀯𑀺𑀢𑀓𑁆𑀓𑁄

𑁮𑁮𑁭. 𑀢𑀢𑁆𑀣 𑀓𑀢𑀫𑁄 𑀅𑀫𑀭𑀯𑀺𑀢𑀓𑁆𑀓𑁄? 𑀤𑀼𑀓𑁆𑀓𑀭𑀓𑀸𑀭𑀺𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀤𑀺𑀝𑁆𑀞𑀺𑀕𑀢𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀸 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀫𑀭𑀯𑀺𑀢𑀓𑁆𑀓𑁄’’.

(𑁭𑁧) 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄

𑁮𑁮𑁮. 𑀢𑀢𑁆𑀣 𑀓𑀢𑀫𑁄 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄? 𑀇𑀥𑁂𑀓𑀘𑁆𑀘𑁄 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻, 𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄, 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀼 𑀅𑀢𑁆𑀢𑀦𑀸 𑀯𑀸 𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀬𑁄 𑀢𑀢𑁆𑀣 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄’’.

(𑁭𑁨) 𑀮𑀸𑀪𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄

𑁮𑁮𑁯. 𑀢𑀢𑁆𑀣 𑀓𑀢𑀫𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄? 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀆𑀭𑀩𑁆𑀪 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄’’.

(𑁭𑁩) 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄

𑁮𑁯𑁦. 𑀢𑀢𑁆𑀣 𑀓𑀢𑀫𑁄 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄? 𑀇𑀥𑁂𑀓𑀘𑁆𑀘𑁄 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀢𑁆𑀣𑀼𑀦𑀸 𑀫𑀸 𑀫𑀁 𑀧𑀭𑁂 𑀅𑀯𑀚𑀸𑀦𑀺𑀁𑀲𑀽𑀢𑀺. 𑀬𑁄 𑀢𑀢𑁆𑀣 𑀕𑁂𑀳𑀲𑀺𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄’’.

𑀏𑀓𑀓𑀁.

𑁨. 𑀤𑀼𑀓𑀦𑀺𑀤𑁆𑀤𑁂𑀲𑁄

(𑁧) 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘

𑁮𑁯𑁧. (𑀓) 𑀢𑀢𑁆𑀣 𑀓𑀢𑀫𑁄 𑀓𑁄𑀥𑁄? 𑀬𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀓𑁄𑀥𑁄’’.

(𑀔) 𑀢𑀢𑁆𑀣 𑀓𑀢𑀫𑁄 𑀉𑀧𑀦𑀸𑀳𑁄? 𑀧𑀼𑀩𑁆𑀩𑀓𑀸𑀮𑀁 𑀓𑁄𑀥𑁄, 𑀅𑀧𑀭𑀓𑀸𑀮𑀁 𑀉𑀧𑀦𑀸𑀳𑁄. 𑀬𑁄 𑀏𑀯𑀭𑀽𑀧𑁄 𑀉𑀧𑀦𑀸𑀳𑁄 𑀉𑀧𑀦𑀬𑁆𑀳𑀦𑀸 𑀉𑀧𑀦𑀬𑁆𑀳𑀺𑀢𑀢𑁆𑀢𑀁 𑀅𑀝𑁆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀅𑀦𑀼𑀲𑀁𑀲𑀦𑁆𑀤𑀦𑀸 𑀅𑀦𑀼𑀧𑁆𑀧𑀩𑀦𑁆𑀥𑀦𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑁄𑀥𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀉𑀧𑀦𑀸𑀳𑁄’’.

(𑁨) 𑀫𑀓𑁆𑀔𑁄 𑀘 𑀧𑀴𑀸𑀲𑁄 𑀘

𑁮𑁯𑁨. (𑀓) 𑀢𑀢𑁆𑀣 𑀓𑀢𑀫𑁄 𑀫𑀓𑁆𑀔𑁄? 𑀬𑁄 𑀫𑀓𑁆𑀔𑁄 𑀫𑀓𑁆𑀔𑀸𑀬𑀦𑀸 𑀫𑀓𑁆𑀔𑀸𑀬𑀺𑀢𑀢𑁆𑀢𑀁 [𑀫𑀓𑁆𑀔𑀺𑀬𑀦𑀸 𑀫𑀓𑁆𑀔𑀺𑀬𑀺𑀢𑀢𑁆𑀢𑀁 (𑀲𑀻. 𑀓.)] 𑀦𑀺𑀝𑁆𑀞𑀼𑀭𑀺𑀬𑀁 𑀦𑀺𑀝𑁆𑀞𑀼𑀭𑀺𑀬𑀓𑀫𑁆𑀫𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀓𑁆𑀔𑁄’’.

(𑀔) 𑀢𑀢𑁆𑀣 𑀓𑀢𑀫𑁄 𑀧𑀴𑀸𑀲𑁄? 𑀬𑁄 𑀧𑀴𑀸𑀲𑁄 𑀧𑀴𑀸𑀲𑀸𑀬𑀦𑀸 [𑀧𑀮𑀸𑀲𑀸𑀬𑀦𑀸 𑀧𑀮𑀸𑀲𑀸𑀬𑀺𑀢𑀢𑁆𑀢𑀁 (𑀲𑁆𑀬𑀸.)] 𑀧𑀴𑀸𑀲𑀸𑀳𑀸𑀭𑁄 𑀯𑀺𑀯𑀸𑀤𑀝𑁆𑀞𑀸𑀦𑀁 𑀬𑀼𑀕𑀕𑁆𑀕𑀸𑀳𑁄 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀧𑀴𑀸𑀲𑁄’’.

(𑁩) 𑀇𑀲𑁆𑀲𑀸 𑀘 𑀫𑀘𑁆𑀙𑀭𑀺𑀬𑀜𑁆𑀘

𑁮𑁯𑁩. (𑀓) 𑀢𑀢𑁆𑀣 𑀓𑀢𑀫𑀸 𑀇𑀲𑁆𑀲𑀸? 𑀬𑀸 𑀧𑀭𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀸𑀲𑀼 𑀇𑀲𑁆𑀲𑀸 𑀇𑀲𑁆𑀲𑀸𑀬𑀦𑀸 𑀇𑀲𑁆𑀲𑀸𑀬𑀺𑀢𑀢𑁆𑀢𑀁 𑀉𑀲𑀽𑀬𑀸 𑀉𑀲𑀽𑀬𑀦𑀸 𑀉𑀲𑀽𑀬𑀺𑀢𑀢𑁆𑀢𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀇𑀲𑁆𑀲𑀸’’.

(𑀔) 𑀢𑀢𑁆𑀣 𑀓𑀢𑀫𑀁 𑀫𑀘𑁆𑀙𑀭𑀺𑀬𑀁? 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑁂𑀭𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 [𑀧𑀕𑁆𑀕𑀳𑀺𑀢𑀢𑁆𑀢𑀁 (𑀲𑀻. 𑀓.) 𑀥. 𑀲. 𑁧𑁧𑁨𑁭] 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀫𑀘𑁆𑀙𑀭𑀺𑀬𑀁’’.

(𑁪) 𑀫𑀸𑀬𑀸 𑀘 𑀲𑀸𑀞𑁂𑀬𑁆𑀬𑀜𑁆𑀘

𑁮𑁯𑁪. (𑀓) 𑀢𑀢𑁆𑀣 𑀓𑀢𑀫𑀸 𑀫𑀸𑀬𑀸? 𑀇𑀥𑁂𑀓𑀘𑁆𑀘𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼𑀁 𑀧𑀸𑀧𑀺𑀓𑀁 𑀇𑀘𑁆𑀙𑀁 𑀧𑀡𑀺𑀤𑀳𑀢𑀺. ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀇𑀘𑁆𑀙𑀢𑀺. ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀲𑀗𑁆𑀓𑀧𑁆𑀧𑁂𑀢𑀺. ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀯𑀸𑀘𑀁 𑀪𑀸𑀲𑀢𑀺. ‘‘𑀫𑀸 𑀫𑀁 𑀚𑀜𑁆𑀜𑀸’’𑀢𑀺 𑀓𑀸𑀬𑁂𑀦 𑀧𑀭𑀓𑁆𑀓𑀫𑀢𑀺. 𑀬𑀸 𑀏𑀯𑀭𑀽𑀧𑀸 𑀫𑀸𑀬𑀸 𑀫𑀸𑀬𑀸𑀯𑀺𑀢𑀸 𑀅𑀘𑁆𑀘𑀸𑀲𑀭𑀸 𑀯𑀜𑁆𑀘𑀦𑀸 𑀦𑀺𑀓𑀢𑀺 𑀯𑀺𑀓𑀺𑀭𑀡𑀸 𑀧𑀭𑀺𑀳𑀭𑀡𑀸 𑀕𑀽𑀳𑀦𑀸 𑀧𑀭𑀺𑀕𑀽𑀳𑀦𑀸 𑀙𑀸𑀤𑀦𑀸 𑀧𑀝𑀺𑀘𑁆𑀙𑀸𑀤𑀦𑀸 𑀅𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀁 𑀅𑀦𑀸𑀯𑀺𑀓𑀫𑁆𑀫𑀁 𑀯𑁄𑀘𑁆𑀙𑀸𑀤𑀦𑀸 𑀧𑀸𑀧𑀓𑀺𑀭𑀺𑀬𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀫𑀸𑀬𑀸’’.

(𑀔) 𑀢𑀢𑁆𑀣 𑀓𑀢𑀫𑀁 𑀲𑀸𑀞𑁂𑀬𑁆𑀬𑀁? 𑀇𑀥𑁂𑀓𑀘𑁆𑀘𑁄 𑀲𑀞𑁄 𑀳𑁄𑀢𑀺 𑀧𑀭𑀺𑀲𑀞𑁄. 𑀬𑀁 𑀢𑀢𑁆𑀣 𑀲𑀞𑀁 𑀲𑀞𑀢𑀸 𑀲𑀸𑀞𑁂𑀬𑁆𑀬𑀁 𑀓𑀓𑁆𑀓𑀭𑀢𑀸 𑀓𑀓𑁆𑀓𑀭𑀺𑀬𑀁 [𑀓𑀓𑁆𑀔𑀴𑀢𑀸 𑀓𑀓𑁆𑀔𑀴𑀺𑀬𑀁 (𑀲𑁆𑀬𑀸.)] 𑀧𑀭𑀺𑀓𑁆𑀔𑀢𑁆𑀢𑀢𑀸 𑀧𑀸𑀭𑀺𑀓𑁆𑀔𑀢𑁆𑀢𑀺𑀬𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 ‘‘𑀲𑀸𑀞𑁂𑀬𑁆𑀬𑀁’’.

(𑁫) 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘

𑁮𑁯𑁫. (𑀓) 𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀯𑀺𑀚𑁆𑀚𑀸’’.

(𑀔) 𑀢𑀢𑁆𑀣 𑀓𑀢𑀫𑀸 𑀪𑀯𑀢𑀡𑁆𑀳𑀸? 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄 𑀪𑀯𑀭𑀸𑀕𑁄 𑀪𑀯𑀦𑀦𑁆𑀤𑀻 𑀪𑀯𑀢𑀡𑁆𑀳𑀸 𑀪𑀯𑀲𑀺𑀦𑁂𑀳𑁄 𑀪𑀯𑀧𑀭𑀺𑀴𑀸𑀳𑁄 𑀪𑀯𑀫𑀼𑀘𑁆𑀙𑀸 𑀪𑀯𑀚𑁆𑀛𑁄𑀲𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀪𑀯𑀢𑀡𑁆𑀳𑀸’’.

(𑁬) 𑀪𑀯𑀤𑀺𑀝𑁆𑀞𑀺 𑀘 𑀯𑀺𑀪𑀯𑀤𑀺𑀝𑁆𑀞𑀺 𑀘

𑁮𑁯𑁬. (𑀓) 𑀢𑀢𑁆𑀣 𑀓𑀢𑀫𑀸 𑀪𑀯𑀤𑀺𑀝𑁆𑀞𑀺? ‘‘𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑁋 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀪𑀯𑀤𑀺𑀝𑁆𑀞𑀺’’.

(𑀔) 𑀢𑀢𑁆𑀣 𑀓𑀢𑀫𑀸 𑀯𑀺𑀪𑀯𑀤𑀺𑀝𑁆𑀞𑀺? ‘‘𑀦 𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑁋 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀪𑀯𑀤𑀺𑀝𑁆𑀞𑀺.