(𑁭) 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺

𑁯𑁧𑁫. 𑀢𑀢𑁆𑀣 𑀓𑀢𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺? 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

(𑀓) 𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑁋 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺’’.

(𑀔) 𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀥𑀫𑁆𑀫𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀲𑀗𑁆𑀖𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀣𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀯𑀺𑀘𑀺𑀓𑀺𑀘𑁆𑀙𑀸’’.

(𑀕) 𑀢𑀢𑁆𑀣 𑀓𑀢𑀫𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄? ‘‘𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀺 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑁋 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁…𑀧𑁂… 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄’’. 𑀇𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺.