𑁯. 𑀦𑀯𑀓𑀦𑀺𑀤𑁆𑀤𑁂𑀲𑁄

(𑁧) 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺

𑁯𑁬𑁦. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺? ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺; ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺; ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺; ‘‘𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺’’…𑀧𑁂… 𑀅𑀦𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺; 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺. 𑀇𑀫𑀸𑀦𑀺 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺.

(𑁨) 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺

𑁯𑁬𑁧. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺? 𑀓𑁄𑀥𑁄, 𑀫𑀓𑁆𑀔𑁄, 𑀇𑀲𑁆𑀲𑀸, 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀸, 𑀲𑀸𑀞𑁂𑀬𑁆𑀬𑀁, 𑀫𑀼𑀲𑀸𑀯𑀸𑀤𑁄, 𑀧𑀸𑀧𑀺𑀘𑁆𑀙𑀢𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑁋 𑀇𑀫𑀸𑀦𑀺 𑀦𑀯 𑀧𑀼𑀭𑀺𑀲𑀫𑀮𑀸𑀦𑀺.

(𑁩) 𑀦𑀯𑀯𑀺𑀥𑀸 𑀫𑀸𑀦𑀸

𑁯𑁬𑁨. 𑀢𑀢𑁆𑀣 𑀓𑀢𑀫𑁂 𑀦𑀯𑀯𑀺𑀥𑀸 𑀫𑀸𑀦𑀸? ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑁂𑀬𑁆𑀬𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑁂𑀬𑁆𑀬𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀲𑀤𑀺𑀲𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑀲𑁆𑀲 𑀲𑀤𑀺𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄, ‘‘𑀳𑀻𑀦𑀲𑁆𑀲 𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑁄 𑁋 𑀇𑀫𑁂 𑀦𑀯𑀯𑀺𑀥𑀸 𑀫𑀸𑀦𑀸.

(𑁪) 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸

𑁯𑁬𑁩. 𑀢𑀢𑁆𑀣 𑀓𑀢𑀫𑁂 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸? 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦-𑀲𑀢𑁆𑀣𑀸𑀤𑀸𑀦-𑀓𑀮𑀳-𑀯𑀺𑀕𑁆𑀕𑀳𑀯𑀺𑀯𑀸𑀤-𑀢𑀼𑀯𑀁𑀢𑀼𑀯𑀁-𑀧𑁂𑀲𑀼𑀜𑁆𑀜-𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺 𑁋 𑀇𑀫𑁂 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸.

(𑁫) 𑀦𑀯 𑀇𑀜𑁆𑀚𑀺𑀢𑀸𑀦𑀺

𑁯𑁬𑁪. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀇𑀜𑁆𑀚𑀺𑀢𑀸𑀦𑀺? ‘‘𑀅𑀲𑁆𑀫𑀻’’𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀅𑀳𑀫𑀲𑁆𑀫𑀻’’𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀇𑀜𑁆𑀚𑀺𑀢𑀫𑁂𑀢𑀁 ‘‘𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀅𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁, ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀇𑀜𑁆𑀚𑀺𑀢𑀫𑁂𑀢𑀁 𑁋 𑀇𑀫𑀸𑀦𑀺 𑀦𑀯 𑀇𑀜𑁆𑀚𑀺𑀢𑀸𑀦𑀺.

(𑁬-𑁯) 𑀦𑀯 𑀫𑀜𑁆𑀜𑀺𑀢𑀸𑀤𑀻𑀦𑀺

𑁯𑁬𑁫. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀫𑀜𑁆𑀜𑀺𑀢𑀸𑀦𑀺… 𑀦𑀯 𑀨𑀦𑁆𑀤𑀺𑀢𑀸𑀦𑀺… 𑀦𑀯 𑀧𑀧𑀜𑁆𑀘𑀺𑀢𑀸𑀦𑀺… 𑀦𑀯 𑀲𑀗𑁆𑀔𑀢𑀸𑀦𑀺? ‘‘𑀅𑀲𑁆𑀫𑀻’’𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀅𑀳𑀫𑀲𑁆𑀫𑀻’’𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀅𑀭𑀽𑀧𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀅𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁, ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲’’𑀦𑁆𑀢𑀺 𑀲𑀗𑁆𑀔𑀢𑀫𑁂𑀢𑀁 𑁋 𑀇𑀫𑀸𑀦𑀺 𑀦𑀯 𑀲𑀗𑁆𑀔𑀢𑀸𑀦𑀺.

𑀦𑀯𑀓𑀁.