𑁧𑁦. 𑀤𑀲𑀓𑀦𑀺𑀤𑁆𑀤𑁂𑀲𑁄

(𑁧) 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺

𑁯𑁬𑁬. 𑀢𑀢𑁆𑀣 𑀓𑀢𑀫𑀸𑀦𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺? 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄, 𑀫𑀸𑀦𑁄, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀣𑀺𑀦𑀁, 𑀉𑀤𑁆𑀥𑀘𑁆𑀘𑀁, 𑀅𑀳𑀺𑀭𑀺𑀓𑀁, 𑀅𑀦𑁄𑀢𑁆𑀢𑀧𑁆𑀧𑀁 𑁋 𑀇𑀫𑀸𑀦𑀺 𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀺.

(𑁨) 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺

𑁯𑁬𑁭. 𑀢𑀢𑁆𑀣 𑀓𑀢𑀫𑀸𑀦𑀺 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺? ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, ‘‘𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻’’𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, ‘‘𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺’’…𑀧𑁂… 𑀅𑀦𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀺 𑁋 𑀇𑀫𑀸𑀦𑀺 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀺.

(𑁩) 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸

𑁯𑁬𑁮. 𑀢𑀢𑁆𑀣 𑀓𑀢𑀫𑁂 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸? 𑀧𑀸𑀡𑀸𑀢𑀺𑀧𑀸𑀢𑁄, 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄, 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀅𑀪𑀺𑀚𑁆𑀛𑀸, 𑀩𑁆𑀬𑀸𑀧𑀸𑀤𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑁋 𑀇𑀫𑁂 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸.

(𑁪) 𑀤𑀲 𑀲𑀁𑀬𑁄𑀚𑀦𑀸𑀦𑀺

𑁯𑁬𑁯. 𑀢𑀢𑁆𑀣 𑀓𑀢𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺? 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀇𑀲𑁆𑀲𑀸𑀲𑀁𑀬𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑁋 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺.

(𑁫) 𑀤𑀲 𑀫𑀺𑀘𑁆𑀙𑀢𑁆𑀢𑀸

𑁯𑁭𑁦. 𑀢𑀢𑁆𑀣 𑀓𑀢𑀫𑁂 𑀤𑀲 𑀫𑀺𑀘𑁆𑀙𑀢𑁆𑀢𑀸? 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀫𑀺𑀘𑁆𑀙𑀸𑀯𑀸𑀘𑀸, 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄, 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀫𑀺𑀘𑁆𑀙𑀸𑀯𑀸𑀬𑀸𑀫𑁄, 𑀫𑀺𑀘𑁆𑀙𑀸𑀲𑀢𑀺, 𑀫𑀺𑀘𑁆𑀙𑀸𑀲𑀫𑀸𑀥𑀺, 𑀫𑀺𑀘𑁆𑀙𑀸𑀜𑀸𑀡𑀁, 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑁋 𑀇𑀫𑁂 𑀤𑀲 𑀫𑀺𑀘𑁆𑀙𑀢𑁆𑀢𑀸.

(𑁬) 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺

𑁯𑁭𑁧. 𑀢𑀢𑁆𑀣 𑀓𑀢𑀫𑀸 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺? 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 [𑀲𑀫𑀕𑁆𑀕𑀢𑀸 (𑀓.)] 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑁋 𑀅𑀬𑀁 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

(𑁭) 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺

𑁯𑁭𑁨. 𑀢𑀢𑁆𑀣 𑀓𑀢𑀫𑀸 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺? 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸 𑁋 𑀅𑀬𑀁 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺.

𑀤𑀲𑀓𑀁.