𑀭𑀽𑀧𑀯𑀺𑀪𑀢𑁆𑀢𑀺

𑀏𑀓𑀓𑀦𑀺𑀤𑁆𑀤𑁂𑀲𑁄

𑁫𑁯𑁪. 𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼𑀫𑁂𑀯, 𑀅𑀳𑁂𑀢𑀼𑀓𑀫𑁂𑀯, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀫𑁂𑀯, 𑀲𑀧𑁆𑀧𑀘𑁆𑀘𑀬𑀫𑁂𑀯, 𑀲𑀗𑁆𑀔𑀢𑀫𑁂𑀯, 𑀭𑀽𑀧𑀫𑁂𑀯, 𑀮𑁄𑀓𑀺𑀬𑀫𑁂𑀯, 𑀲𑀸𑀲𑀯𑀫𑁂𑀯, 𑀲𑀁𑀬𑁄𑀚𑀦𑀺𑀬𑀫𑁂𑀯, 𑀕𑀦𑁆𑀣𑀦𑀺𑀬𑀫𑁂𑀯, 𑀑𑀖𑀦𑀺𑀬𑀫𑁂𑀯, 𑀬𑁄𑀕𑀦𑀺𑀬𑀫𑁂𑀯, 𑀦𑀻𑀯𑀭𑀡𑀺𑀬𑀫𑁂𑀯, 𑀧𑀭𑀸𑀫𑀝𑁆𑀞𑀫𑁂𑀯, 𑀉𑀧𑀸𑀤𑀸𑀦𑀺𑀬𑀫𑁂𑀯, 𑀲𑀁𑀓𑀺𑀮𑁂𑀲𑀺𑀓𑀫𑁂𑀯, 𑀅𑀩𑁆𑀬𑀸𑀓𑀢𑀫𑁂𑀯, 𑀅𑀦𑀸𑀭𑀫𑁆𑀫𑀡𑀫𑁂𑀯, 𑀅𑀘𑁂𑀢𑀲𑀺𑀓𑀫𑁂𑀯, 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀫𑁂𑀯, 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀫𑁂𑀯, 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀫𑁂𑀯, 𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯, 𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀫𑁂𑀯, 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀫𑁂𑀯, 𑀦 𑀧𑀻𑀢𑀺𑀲𑀳𑀕𑀢𑀫𑁂𑀯, 𑀦 𑀲𑀼𑀔𑀲𑀳𑀕𑀢𑀫𑁂𑀯, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀫𑁂𑀯, 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀫𑁂𑀯, 𑀦𑁂𑀯 𑀆𑀘𑀬𑀕𑀸𑀫𑀺 𑀦 𑀅𑀧𑀘𑀬𑀕𑀸𑀫𑀺𑀫𑁂𑀯, 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀫𑁂𑀯, 𑀧𑀭𑀺𑀢𑁆𑀢𑀫𑁂𑀯, 𑀓𑀸𑀫𑀸𑀯𑀘𑀭𑀫𑁂𑀯, 𑀦 𑀭𑀽𑀧𑀸𑀯𑀘𑀭𑀫𑁂𑀯, 𑀦 𑀅𑀭𑀽𑀧𑀸𑀯𑀘𑀭𑀫𑁂𑀯, 𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀦𑁄 𑀅𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀅𑀦𑀺𑀬𑀢𑀫𑁂𑀯, 𑀅𑀦𑀺𑀬𑁆𑀬𑀸𑀦𑀺𑀓𑀫𑁂𑀯, 𑀉𑀧𑁆𑀧𑀦𑁆𑀦𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀫𑁂𑀯, 𑀅𑀦𑀺𑀘𑁆𑀘𑀫𑁂𑀯, 𑀚𑀭𑀸𑀪𑀺𑀪𑀽𑀢𑀫𑁂𑀯.

𑀏𑀯𑀁 𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄.

𑀏𑀓𑀓𑀦𑀺𑀤𑁆𑀤𑁂𑀲𑁄.

𑀤𑀼𑀓𑀦𑀺𑀤𑁆𑀤𑁂𑀲𑁄

𑀉𑀧𑀸𑀤𑀸𑀪𑀸𑀚𑀦𑀻𑀬𑀁

𑁫𑁯𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸? 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀭𑀽𑀧𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀆𑀓𑀸𑀲𑀥𑀸𑀢𑀼, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸, 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺, 𑀭𑀽𑀧𑀲𑁆𑀲 𑀚𑀭𑀢𑀸, 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄.

𑁫𑁯𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 [𑀘𑀓𑁆𑀔𑀼𑀁 (𑀲𑀻. 𑀲𑁆𑀬𑀸.)] 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀘𑀓𑁆𑀔𑀼𑀦𑀸 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀲𑁆𑀲𑀺 𑀯𑀸 𑀧𑀲𑁆𑀲𑀢𑀺 𑀯𑀸 𑀧𑀲𑁆𑀲𑀺𑀲𑁆𑀲𑀢𑀺 𑀯𑀸 𑀧𑀲𑁆𑀲𑁂 𑀯𑀸, 𑀘𑀓𑁆𑀔𑀼𑀁 𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀁 𑀧𑁂𑀢𑀁 𑀘𑀓𑁆𑀔𑀼𑀥𑀸𑀢𑀼 𑀧𑁂𑀲𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀦𑁂𑀢𑁆𑀢𑀁 𑀧𑁂𑀢𑀁 𑀦𑀬𑀦𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁.

𑁫𑁯𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀘𑀓𑁆𑀔𑀼𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀘𑀓𑁆𑀔𑀼𑀁 𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀁 𑀧𑁂𑀢𑀁 𑀘𑀓𑁆𑀔𑀼𑀥𑀸𑀢𑀼 𑀧𑁂𑀲𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀦𑁂𑀢𑁆𑀢𑀁 𑀧𑁂𑀢𑀁 𑀦𑀬𑀦𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁.

𑁫𑁯𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀘𑀓𑁆𑀔𑀼 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀭𑀽𑀧𑀫𑁆𑀳𑀺 𑀲𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀘𑀓𑁆𑀔𑀼𑀁 𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀁 𑀧𑁂𑀢𑀁 𑀘𑀓𑁆𑀔𑀼𑀥𑀸𑀢𑀼 𑀧𑁂𑀲𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀦𑁂𑀢𑁆𑀢𑀁 𑀧𑁂𑀢𑀁 𑀦𑀬𑀦𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁.

𑁫𑁯𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀭𑀽𑀧𑀸𑀭𑀫𑁆𑀫𑀡𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀭𑀽𑀧𑀸𑀭𑀫𑁆𑀫𑀡𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀘𑀓𑁆𑀔𑀼𑀁 𑀧𑁂𑀢𑀁 𑀘𑀓𑁆𑀔𑀸𑀬𑀢𑀦𑀁 𑀧𑁂𑀢𑀁 𑀘𑀓𑁆𑀔𑀼𑀥𑀸𑀢𑀼 𑀧𑁂𑀲𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀦𑁂𑀢𑁆𑀢𑀁 𑀧𑁂𑀢𑀁 𑀦𑀬𑀦𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁.

𑁬𑁦𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁? 𑀬𑀁 𑀲𑁄𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀲𑁄𑀢𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀲𑀤𑁆𑀤𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑀼𑀡𑀺 𑀯𑀸 𑀲𑀼𑀡𑀸𑀢𑀺 𑀯𑀸 𑀲𑀼𑀡𑀺𑀲𑁆𑀲𑀢𑀺 𑀯𑀸 𑀲𑀼𑀡𑁂 𑀯𑀸, 𑀲𑁄𑀢𑀁 𑀧𑁂𑀢𑀁 𑀲𑁄𑀢𑀸𑀬𑀢𑀦𑀁 𑀧𑁂𑀢𑀁 𑀲𑁄𑀢𑀥𑀸𑀢𑀼 𑀧𑁂𑀲𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁.

𑁬𑁦𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁? 𑀬𑀁 𑀲𑁄𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀲𑁄𑀢𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀲𑀤𑁆𑀤𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀲𑁄𑀢𑀁 𑀧𑁂𑀢𑀁 𑀲𑁄𑀢𑀸𑀬𑀢𑀦𑀁 𑀧𑁂𑀢𑀁 𑀲𑁄𑀢𑀥𑀸𑀢𑀼 𑀧𑁂𑀲𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁.

𑁬𑁦𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁? 𑀬𑀁 𑀲𑁄𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀲𑁄𑀢𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑀤𑁆𑀤𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀲𑁄𑀢𑀁 𑀧𑁂𑀢𑀁 𑀲𑁄𑀢𑀸𑀬𑀢𑀦𑀁 𑀧𑁂𑀢𑀁 𑀲𑁄𑀢𑀥𑀸𑀢𑀼 𑀧𑁂𑀲𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁.

𑁬𑁦𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁? 𑀬𑀁 𑀲𑁄𑀢𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑀤𑁆𑀤𑀁 𑀆𑀭𑀩𑁆𑀪 𑀲𑁄𑀢𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑀤𑁆𑀤𑀁 𑀆𑀭𑀩𑁆𑀪 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑀤𑁆𑀤𑀸𑀭𑀫𑁆𑀫𑀡𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑀤𑁆𑀤𑀸𑀭𑀫𑁆𑀫𑀡𑀸 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀲𑁄𑀢𑀁 𑀧𑁂𑀢𑀁 𑀲𑁄𑀢𑀸𑀬𑀢𑀦𑀁 𑀧𑁂𑀢𑀁 𑀲𑁄𑀢𑀥𑀸𑀢𑀼 𑀧𑁂𑀲𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁.

𑁬𑁦𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁? 𑀬𑀁 𑀖𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀖𑀸𑀦𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀕𑀦𑁆𑀥𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀖𑀸𑀬𑀺 𑀯𑀸 𑀖𑀸𑀬𑀢𑀺 𑀯𑀸 𑀖𑀸𑀬𑀺𑀲𑁆𑀲𑀢𑀺 𑀯𑀸 𑀖𑀸𑀬𑁂 𑀯𑀸, 𑀖𑀸𑀦𑀁 𑀧𑁂𑀢𑀁 𑀖𑀸𑀦𑀸𑀬𑀢𑀦𑀁 𑀧𑁂𑀢𑀁 𑀖𑀸𑀦𑀥𑀸𑀢𑀼 𑀧𑁂𑀲𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁.

𑁬𑁦𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁? 𑀬𑀁 𑀖𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀖𑀸𑀦𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀕𑀦𑁆𑀥𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀖𑀸𑀦𑀁 𑀧𑁂𑀢𑀁 𑀖𑀸𑀦𑀸𑀬𑀢𑀦𑀁 𑀧𑁂𑀢𑀁 𑀖𑀸𑀦𑀥𑀸𑀢𑀼 𑀧𑁂𑀲𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁.

𑁬𑁦𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁? 𑀬𑀁 𑀖𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀖𑀸𑀦𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀕𑀦𑁆𑀥𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀖𑀸𑀦𑀁 𑀧𑁂𑀢𑀁 𑀖𑀸𑀦𑀸𑀬𑀢𑀦𑀁 𑀧𑁂𑀢𑀁 𑀖𑀸𑀦𑀥𑀸𑀢𑀼 𑀧𑁂𑀲𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁.

𑁬𑁦𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁? 𑀬𑀁 𑀖𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀕𑀦𑁆𑀥𑀁 𑀆𑀭𑀩𑁆𑀪 𑀖𑀸𑀦𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀕𑀦𑁆𑀥𑀁 𑀆𑀭𑀩𑁆𑀪 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀕𑀦𑁆𑀥𑀸𑀭𑀫𑁆𑀫𑀡𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀕𑀦𑁆𑀥𑀸𑀭𑀫𑁆𑀫𑀡𑀸 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀖𑀸𑀦𑀁 𑀧𑁂𑀢𑀁 𑀖𑀸𑀦𑀸𑀬𑀢𑀦𑀁 𑀧𑁂𑀢𑀁 𑀖𑀸𑀦𑀥𑀸𑀢𑀼 𑀧𑁂𑀲𑀸 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀖𑀸𑀦𑀸𑀬𑀢𑀦𑀁.

𑁬𑁦𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁? 𑀬𑀸 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀸𑀬 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀭𑀲𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑀸𑀬𑀺 𑀯𑀸 𑀲𑀸𑀬𑀢𑀺 𑀯𑀸 𑀲𑀸𑀬𑀺𑀲𑁆𑀲𑀢𑀺 𑀯𑀸 𑀲𑀸𑀬𑁂 𑀯𑀸, 𑀚𑀺𑀯𑁆𑀳𑀸 𑀧𑁂𑀲𑀸 𑀚𑀺𑀯𑁆𑀳𑀸𑀬𑀢𑀦𑀁 𑀧𑁂𑀢𑀁 𑀚𑀺𑀯𑁆𑀳𑀸𑀥𑀸𑀢𑀼 𑀧𑁂𑀲𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁.

𑁬𑁦𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁? 𑀬𑀸 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀸𑀬 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀭𑀲𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀚𑀺𑀯𑁆𑀳𑀸 𑀧𑁂𑀲𑀸 𑀚𑀺𑀯𑁆𑀳𑀸𑀬𑀢𑀦𑀁 𑀧𑁂𑀢𑀁 𑀚𑀺𑀯𑁆𑀳𑀸𑀥𑀸𑀢𑀼 𑀧𑁂𑀲𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁.

𑁬𑁧𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁? 𑀬𑀸 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀸 𑀚𑀺𑀯𑁆𑀳𑀸 𑀅𑀦𑀺𑀤𑀲𑁆𑀲𑀦𑀸 𑀲𑀧𑁆𑀧𑀝𑀺𑀖𑀸 𑀭𑀲𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀚𑀺𑀯𑁆𑀳𑀸 𑀧𑁂𑀲𑀸 𑀚𑀺𑀯𑁆𑀳𑀸𑀬𑀢𑀦𑀁 𑀧𑁂𑀢𑀁 𑀚𑀺𑀯𑁆𑀳𑀸𑀥𑀸𑀢𑀼 𑀧𑁂𑀲𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁.

𑁬𑁧𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁? 𑀬𑀸 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀭𑀲𑀁 𑀆𑀭𑀩𑁆𑀪 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀭𑀲𑀁 𑀆𑀭𑀩𑁆𑀪 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀭𑀲𑀸𑀭𑀫𑁆𑀫𑀡𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀭𑀲𑀸𑀭𑀫𑁆𑀫𑀡𑀸 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀚𑀺𑀯𑁆𑀳𑀸 𑀧𑁂𑀲𑀸 𑀚𑀺𑀯𑁆𑀳𑀸𑀬𑀢𑀦𑀁 𑀧𑁂𑀢𑀁 𑀚𑀺𑀯𑁆𑀳𑀸𑀥𑀸𑀢𑀼 𑀧𑁂𑀲𑀸 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀺𑀯𑁆𑀳𑀸𑀬𑀢𑀦𑀁.

𑁬𑁧𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁂𑀦 𑀓𑀸𑀬𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀁 𑀨𑀼𑀲𑀺 𑀯𑀸 𑀨𑀼𑀲𑀢𑀺 𑀯𑀸 𑀨𑀼𑀲𑀺𑀲𑁆𑀲𑀢𑀺 𑀯𑀸 𑀨𑀼𑀲𑁂 𑀯𑀸, 𑀓𑀸𑀬𑁄 𑀧𑁂𑀲𑁄 𑀓𑀸𑀬𑀸𑀬𑀢𑀦𑀁 𑀧𑁂𑀢𑀁 𑀓𑀸𑀬𑀥𑀸𑀢𑀼 𑀧𑁂𑀲𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁.

𑁬𑁧𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀓𑀸𑀬𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀨𑁄𑀝𑁆𑀞𑀩𑁆𑀩𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀓𑀸𑀬𑁄 𑀧𑁂𑀲𑁄 𑀓𑀸𑀬𑀸𑀬𑀢𑀦𑀁 𑀧𑁂𑀢𑀁 𑀓𑀸𑀬𑀥𑀸𑀢𑀼 𑀧𑁂𑀲𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁.

𑁬𑁧𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁄 𑀓𑀸𑀬𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀨𑁄𑀝𑁆𑀞𑀩𑁆𑀩𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀓𑀸𑀬𑁄 𑀧𑁂𑀲𑁄 𑀓𑀸𑀬𑀸𑀬𑀢𑀦𑀁 𑀧𑁂𑀢𑀁 𑀓𑀸𑀬𑀥𑀸𑀢𑀼 𑀧𑁂𑀲𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁.

𑁬𑁧𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀨𑁄𑀝𑁆𑀞𑀩𑁆𑀩𑀁 𑀆𑀭𑀩𑁆𑀪 𑀓𑀸𑀬𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀨𑁄𑀝𑁆𑀞𑀩𑁆𑀩𑀁 𑀆𑀭𑀩𑁆𑀪 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀓𑀸𑀬𑁄 𑀧𑁂𑀲𑁄 𑀓𑀸𑀬𑀸𑀬𑀢𑀦𑀁 𑀧𑁂𑀢𑀁 𑀓𑀸𑀬𑀥𑀸𑀢𑀼 𑀧𑁂𑀲𑀸 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀧𑁂𑀢𑀁 𑀮𑁄𑀓𑁄 𑀧𑁂𑀲𑁄 𑀤𑁆𑀯𑀸𑀭𑀸 𑀧𑁂𑀲𑀸 𑀲𑀫𑀼𑀤𑁆𑀤𑁄 𑀧𑁂𑀲𑁄 𑀧𑀡𑁆𑀟𑀭𑀁 𑀧𑁂𑀢𑀁 𑀔𑁂𑀢𑁆𑀢𑀁 𑀧𑁂𑀢𑀁 𑀯𑀢𑁆𑀣𑀼𑀁 𑀧𑁂𑀢𑀁 𑀑𑀭𑀺𑀫𑀁 𑀢𑀻𑀭𑀁 𑀧𑁂𑀢𑀁 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁.

𑁬𑁧𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀓𑀸𑀴𑀓𑀁 𑀫𑀜𑁆𑀚𑀺𑀝𑁆𑀞𑀓𑀁 [𑀫𑀜𑁆𑀚𑁂𑀝𑁆𑀞𑀓𑀁 (𑀲𑀻. 𑀲𑁆𑀬𑀸.)] 𑀳𑀭𑀺 𑀳𑀭𑀺𑀯𑀡𑁆𑀡𑀁 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀁 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀁𑀲𑀁 [𑀘𑀢𑀼𑀭𑀲𑁆𑀲𑀁 (𑀲𑀻. 𑀓.)] 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀁 𑀙𑀸𑀬𑀸 𑀆𑀢𑀧𑁄 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 [𑀲𑀼𑀭𑀺𑀬𑀫𑀡𑁆𑀟𑀮𑀲𑁆𑀲 (𑀲𑀻. 𑀲𑁆𑀬𑀸.)] 𑀯𑀡𑁆𑀡𑀦𑀺𑀪𑀸 𑀢𑀸𑀭𑀓𑀭𑀽𑀧𑀸𑀦𑀁 𑀯𑀡𑁆𑀡𑀦𑀺𑀪𑀸 𑀆𑀤𑀸𑀲𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀲𑁆𑀲 𑀯𑀡𑁆𑀡𑀦𑀺𑀪𑀸 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀯𑀡𑁆𑀡𑀦𑀺𑀪𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁, 𑀬𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀘𑀓𑁆𑀔𑀼𑀦𑀸 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀧𑀲𑁆𑀲𑀺 𑀯𑀸 𑀧𑀲𑁆𑀲𑀢𑀺 𑀯𑀸 𑀧𑀲𑁆𑀲𑀺𑀲𑁆𑀲𑀢𑀺 𑀯𑀸 𑀧𑀲𑁆𑀲𑁂 𑀯𑀸, 𑀭𑀽𑀧𑀁 𑀧𑁂𑀢𑀁 𑀭𑀽𑀧𑀸𑀬𑀢𑀦𑀁 𑀧𑁂𑀢𑀁 𑀭𑀽𑀧𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁.

𑁬𑁧𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀓𑀸𑀴𑀓𑀁 𑀫𑀜𑁆𑀚𑀺𑀝𑁆𑀞𑀓𑀁 𑀳𑀭𑀺 𑀳𑀭𑀺𑀯𑀡𑁆𑀡𑀁 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀁 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀁𑀲𑀁 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀁 𑀙𑀸𑀬𑀸 𑀆𑀢𑀧𑁄 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀢𑀸𑀭𑀓𑀭𑀽𑀧𑀸𑀦𑀁 𑀯𑀡𑁆𑀡𑀦𑀺𑀪𑀸 𑀆𑀤𑀸𑀲𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀲𑁆𑀲 𑀯𑀡𑁆𑀡𑀦𑀺𑀪𑀸 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀯𑀡𑁆𑀡𑀦𑀺𑀪𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁, 𑀬𑀫𑁆𑀳𑀺 𑀭𑀽𑀧𑀫𑁆𑀳𑀺 𑀲𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀘𑀓𑁆𑀔𑀼𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀭𑀽𑀧𑀁 𑀧𑁂𑀢𑀁 𑀭𑀽𑀧𑀸𑀬𑀢𑀦𑀁 𑀧𑁂𑀢𑀁 𑀭𑀽𑀧𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁.

𑁬𑁧𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀓𑀸𑀴𑀓𑀁 𑀫𑀜𑁆𑀚𑀺𑀝𑁆𑀞𑀓𑀁 𑀳𑀭𑀺 𑀳𑀭𑀺𑀯𑀡𑁆𑀡𑀁 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀁 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀁𑀲𑀁 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀁 𑀙𑀸𑀬𑀸 𑀆𑀢𑀧𑁄 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀢𑀸𑀭𑀓𑀭𑀽𑀧𑀸𑀦𑀁 𑀯𑀡𑁆𑀡𑀦𑀺𑀪𑀸 𑀆𑀤𑀸𑀲𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀲𑁆𑀲 𑀯𑀡𑁆𑀡𑀦𑀺𑀪𑀸 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀯𑀡𑁆𑀡𑀦𑀺𑀪𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁, 𑀬𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀘𑀓𑁆𑀔𑀼𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀭𑀽𑀧𑀁 𑀧𑁂𑀢𑀁 𑀭𑀽𑀧𑀸𑀬𑀢𑀦𑀁 𑀧𑁂𑀢𑀁 𑀭𑀽𑀧𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁.

𑁬𑁧𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁 𑀓𑀸𑀴𑀓𑀁 𑀫𑀜𑁆𑀚𑀺𑀝𑁆𑀞𑀓𑀁 𑀳𑀭𑀺 𑀳𑀭𑀺𑀯𑀡𑁆𑀡𑀁 𑀅𑀫𑁆𑀩𑀗𑁆𑀓𑀼𑀭𑀯𑀡𑁆𑀡𑀁 𑀤𑀻𑀖𑀁 𑀭𑀲𑁆𑀲𑀁 𑀅𑀡𑀼𑀁 𑀣𑀽𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀁𑀲𑀁 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀁 𑀙𑀸𑀬𑀸 𑀆𑀢𑀧𑁄 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀲𑀽𑀭𑀺𑀬𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀢𑀸𑀭𑀓𑀭𑀽𑀧𑀸𑀦𑀁 𑀯𑀡𑁆𑀡𑀦𑀺𑀪𑀸 𑀆𑀤𑀸𑀲𑀫𑀡𑁆𑀟𑀮𑀲𑁆𑀲 𑀯𑀡𑁆𑀡𑀦𑀺𑀪𑀸 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀲𑁆𑀲 𑀯𑀡𑁆𑀡𑀦𑀺𑀪𑀸 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀯𑀡𑁆𑀡𑀦𑀺𑀪𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁, 𑀬𑀁 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀽𑀧𑀁 𑀆𑀭𑀩𑁆𑀪 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀽𑀧𑀸𑀭𑀫𑁆𑀫𑀡𑁄 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀽𑀧𑀸𑀭𑀫𑁆𑀫𑀡𑀸 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀭𑀽𑀧𑀁 𑀧𑁂𑀢𑀁 𑀭𑀽𑀧𑀸𑀬𑀢𑀦𑀁 𑀧𑁂𑀢𑀁 𑀭𑀽𑀧𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁.

𑁬𑁨𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁? 𑀬𑁄 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄 𑀲𑀫𑁆𑀫𑀲𑀤𑁆𑀤𑁄 𑀧𑀸𑀡𑀺𑀲𑀤𑁆𑀤𑁄 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄 𑀅𑀫𑀦𑀼𑀲𑁆𑀲𑀲𑀤𑁆𑀤𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀲𑀤𑁆𑀤𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀲𑁄𑀢𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀲𑀼𑀡𑀺 𑀯𑀸 𑀲𑀼𑀡𑀸𑀢𑀺 𑀯𑀸 𑀲𑀼𑀡𑀺𑀲𑁆𑀲𑀢𑀺 𑀯𑀸 𑀲𑀼𑀡𑁂 𑀯𑀸, 𑀲𑀤𑁆𑀤𑁄 𑀧𑁂𑀲𑁄 𑀲𑀤𑁆𑀤𑀸𑀬𑀢𑀦𑀁 𑀧𑁂𑀢𑀁 𑀲𑀤𑁆𑀤𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁.

𑁬𑁨𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁? 𑀬𑁄 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄 𑀲𑀫𑁆𑀫𑀲𑀤𑁆𑀤𑁄 𑀧𑀸𑀡𑀺𑀲𑀤𑁆𑀤𑁄 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄 𑀅𑀫𑀦𑀼𑀲𑁆𑀲𑀲𑀤𑁆𑀤𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀲𑀤𑁆𑀤𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀲𑁄𑀢𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀲𑀤𑁆𑀤𑁄 𑀧𑁂𑀲𑁄 𑀲𑀤𑁆𑀤𑀸𑀬𑀢𑀦𑀁 𑀧𑁂𑀢𑀁 𑀲𑀤𑁆𑀤𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁.

𑁬𑁨𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁? 𑀬𑁄 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄 𑀲𑀫𑁆𑀫𑀲𑀤𑁆𑀤𑁄 𑀧𑀸𑀡𑀺𑀲𑀤𑁆𑀤𑁄 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄 𑀅𑀫𑀦𑀼𑀲𑁆𑀲𑀲𑀤𑁆𑀤𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁄 𑀲𑀤𑁆𑀤𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀲𑁄𑀢𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀲𑀤𑁆𑀤𑁄 𑀧𑁂𑀲𑁄 𑀲𑀤𑁆𑀤𑀸𑀬𑀢𑀦𑀁 𑀧𑁂𑀢𑀁 𑀲𑀤𑁆𑀤𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁.

𑁬𑁨𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁? 𑀬𑁄 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀲𑀗𑁆𑀔𑀲𑀤𑁆𑀤𑁄 𑀧𑀡𑀯𑀲𑀤𑁆𑀤𑁄 𑀕𑀻𑀢𑀲𑀤𑁆𑀤𑁄 𑀯𑀸𑀤𑀺𑀢𑀲𑀤𑁆𑀤𑁄 𑀲𑀫𑁆𑀫𑀲𑀤𑁆𑀤𑁄 𑀧𑀸𑀡𑀺𑀲𑀤𑁆𑀤𑁄 𑀲𑀢𑁆𑀢𑀸𑀦𑀁 𑀦𑀺𑀕𑁆𑀖𑁄𑀲𑀲𑀤𑁆𑀤𑁄 𑀥𑀸𑀢𑀽𑀦𑀁 𑀲𑀦𑁆𑀦𑀺𑀖𑀸𑀢𑀲𑀤𑁆𑀤𑁄 𑀯𑀸𑀢𑀲𑀤𑁆𑀤𑁄 𑀉𑀤𑀓𑀲𑀤𑁆𑀤𑁄 𑀫𑀦𑀼𑀲𑁆𑀲𑀲𑀤𑁆𑀤𑁄 𑀅𑀫𑀦𑀼𑀲𑁆𑀲𑀲𑀤𑁆𑀤𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀲𑀤𑁆𑀤𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑁄𑀢𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑀤𑁆𑀤𑀁 𑀆𑀭𑀩𑁆𑀪 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑀤𑁆𑀤𑀸𑀭𑀫𑁆𑀫𑀡𑁄 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑁄𑀢𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀲𑀤𑁆𑀤𑀸𑀭𑀫𑁆𑀫𑀡𑀸 𑀲𑁄𑀢𑀁 𑀦𑀺𑀲𑁆𑀲𑀸𑀬 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀲𑀤𑁆𑀤𑁄 𑀧𑁂𑀲𑁄 𑀲𑀤𑁆𑀤𑀸𑀬𑀢𑀦𑀁 𑀧𑁂𑀢𑀁 𑀲𑀤𑁆𑀤𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁.

𑁬𑁨𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁? 𑀬𑁄 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀆𑀫𑀓𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 𑀲𑀼𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀕𑀦𑁆𑀥𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀖𑀸𑀦𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀖𑀸𑀬𑀺 𑀯𑀸 𑀖𑀸𑀬𑀢𑀺 𑀯𑀸 𑀖𑀸𑀬𑀺𑀲𑁆𑀲𑀢𑀺 𑀯𑀸 𑀖𑀸𑀬𑁂 𑀯𑀸, 𑀕𑀦𑁆𑀥𑁄 𑀧𑁂𑀲𑁄 𑀕𑀦𑁆𑀥𑀸𑀬𑀢𑀦𑀁 𑀧𑁂𑀢𑀁 𑀕𑀦𑁆𑀥𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁.

𑁬𑁨𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁? 𑀬𑁄 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀆𑀫𑀓𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 𑀲𑀼𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀕𑀦𑁆𑀥𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀖𑀸𑀦𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀕𑀦𑁆𑀥𑁄 𑀧𑁂𑀲𑁄 𑀕𑀦𑁆𑀥𑀸𑀬𑀢𑀦𑀁 𑀧𑁂𑀢𑀁 𑀕𑀦𑁆𑀥𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁.

𑁬𑁨𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁? 𑀬𑁄 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀆𑀫𑀓𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 𑀲𑀼𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁄 𑀕𑀦𑁆𑀥𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀖𑀸𑀦𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀕𑀦𑁆𑀥𑁄 𑀧𑁂𑀲𑁄 𑀕𑀦𑁆𑀥𑀸𑀬𑀢𑀦𑀁 𑀧𑁂𑀢𑀁 𑀕𑀦𑁆𑀥𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁.

𑁬𑁨𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁? 𑀬𑁄 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀆𑀫𑀓𑀕𑀦𑁆𑀥𑁄 𑀯𑀺𑀲𑁆𑀲𑀕𑀦𑁆𑀥𑁄 𑀲𑀼𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀕𑀦𑁆𑀥𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀕𑀦𑁆𑀥𑀁 𑀆𑀭𑀩𑁆𑀪 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀖𑀸𑀦𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀕𑀦𑁆𑀥𑀁 𑀆𑀭𑀩𑁆𑀪 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀕𑀦𑁆𑀥𑀸𑀭𑀫𑁆𑀫𑀡𑁄 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀖𑀸𑀦𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀕𑀦𑁆𑀥𑀸𑀭𑀫𑁆𑀫𑀡𑀸 𑀖𑀸𑀦𑀁 𑀦𑀺𑀲𑁆𑀲𑀸𑀬 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀕𑀦𑁆𑀥𑁄 𑀧𑁂𑀲𑁄 𑀕𑀦𑁆𑀥𑀸𑀬𑀢𑀦𑀁 𑀧𑁂𑀢𑀁 𑀕𑀦𑁆𑀥𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀕𑀦𑁆𑀥𑀸𑀬𑀢𑀦𑀁.

𑁬𑁨𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁? 𑀬𑁄 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀮𑀁 [𑀮𑀧𑀺𑀮𑀓𑀁 (𑀲𑀻.)] 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀭𑀲𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀲𑀸𑀬𑀺 𑀯𑀸 𑀲𑀸𑀬𑀢𑀺 𑀯𑀸 𑀲𑀸𑀬𑀺𑀲𑁆𑀲𑀢𑀺 𑀯𑀸 𑀲𑀸𑀬𑁂 𑀯𑀸, 𑀭𑀲𑁄 𑀧𑁂𑀲𑁄 𑀭𑀲𑀸𑀬𑀢𑀦𑀁 𑀧𑁂𑀢𑀁 𑀭𑀲𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁.

𑁬𑁨𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁? 𑀬𑁄 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀮𑀁 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀫𑁆𑀳𑀺 𑀭𑀲𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀚𑀺𑀯𑁆𑀳𑀸 𑀅𑀦𑀺𑀤𑀲𑁆𑀲𑀦𑀸 𑀲𑀧𑁆𑀧𑀝𑀺𑀖𑀸 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀭𑀲𑁄 𑀧𑁂𑀲𑁄 𑀭𑀲𑀸𑀬𑀢𑀦𑀁 𑀧𑁂𑀢𑀁 𑀭𑀲𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁.

𑁬𑁩𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁? 𑀬𑁄 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀮𑀁 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑁄 𑀭𑀲𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀚𑀺𑀯𑁆𑀳𑀸𑀬 𑀅𑀦𑀺𑀤𑀲𑁆𑀲𑀦𑀸𑀬 𑀲𑀧𑁆𑀧𑀝𑀺𑀖𑀸𑀬 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀭𑀲𑁄 𑀧𑁂𑀲𑁄 𑀭𑀲𑀸𑀬𑀢𑀦𑀁 𑀧𑁂𑀢𑀁 𑀭𑀲𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁.

𑁬𑁩𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁? 𑀬𑁄 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄 𑀢𑀘𑀭𑀲𑁄 𑀧𑀢𑁆𑀢𑀭𑀲𑁄 𑀧𑀼𑀧𑁆𑀨𑀭𑀲𑁄 𑀨𑀮𑀭𑀲𑁄 𑀅𑀫𑁆𑀩𑀺𑀮𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀓𑀝𑀼𑀓𑀁 𑀮𑁄𑀡𑀺𑀓𑀁 𑀔𑀸𑀭𑀺𑀓𑀁 𑀮𑀫𑁆𑀩𑀺𑀮𑀁 𑀓𑀲𑀸𑀯𑁄 𑀲𑀸𑀤𑀼 𑀅𑀲𑀸𑀤𑀼, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀅𑀢𑁆𑀣𑀺 𑀭𑀲𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄, 𑀬𑀁 𑀭𑀲𑀁 𑀆𑀭𑀩𑁆𑀪 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀲𑀁 𑀆𑀭𑀩𑁆𑀪 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀲𑀸𑀭𑀫𑁆𑀫𑀡𑁄 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀭𑀲𑀸𑀭𑀫𑁆𑀫𑀡𑀸 𑀚𑀺𑀯𑁆𑀳𑀁 𑀦𑀺𑀲𑁆𑀲𑀸𑀬 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀭𑀲𑁄 𑀧𑁂𑀲𑁄 𑀭𑀲𑀸𑀬𑀢𑀦𑀁 𑀧𑁂𑀢𑀁 𑀭𑀲𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀲𑀸𑀬𑀢𑀦𑀁.

𑁬𑁩𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑁄 𑀇𑀢𑁆𑀣𑀢𑁆𑀢𑀁 𑀇𑀢𑁆𑀣𑀺𑀪𑀸𑀯𑁄 [𑀇𑀢𑁆𑀣𑀺𑀢𑁆𑀢𑀁 𑀇𑀢𑁆𑀣𑀻𑀪𑀸𑀯𑁄 (𑀲𑁆𑀬𑀸.)] 𑁋 𑀇𑀤𑀁 𑀢𑀁 𑀭𑀽𑀧𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁.

𑁬𑁩𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑁄 𑀧𑀼𑀭𑀺𑀲𑀢𑁆𑀢𑀁 𑀧𑀼𑀭𑀺𑀲𑀪𑀸𑀯𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑁬𑁩𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀢𑁂𑀲𑀁 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑁬𑁩𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀆𑀮𑁄𑀓𑁂𑀦𑁆𑀢𑀲𑁆𑀲 𑀯𑀸 𑀯𑀺𑀮𑁄𑀓𑁂𑀦𑁆𑀢𑀲𑁆𑀲 𑀯𑀸 𑀲𑀫𑀺𑀜𑁆𑀚𑁂𑀦𑁆𑀢𑀲𑁆𑀲 𑀯𑀸 𑀧𑀲𑀸𑀭𑁂𑀦𑁆𑀢𑀲𑁆𑀲 𑀯𑀸 𑀓𑀸𑀬𑀲𑁆𑀲 𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀺𑀢𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺.

𑁬𑁩𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄 𑀉𑀤𑀻𑀭𑀡𑀁 𑀖𑁄𑀲𑁄 𑀖𑁄𑀲𑀓𑀫𑁆𑀫𑀁 𑀯𑀸𑀘𑀸 𑀯𑀘𑀻𑀪𑁂𑀤𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀸𑀘𑀸. 𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺.

𑁬𑁩𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀆𑀓𑀸𑀲𑀥𑀸𑀢𑀼? 𑀬𑁄 𑀆𑀓𑀸𑀲𑁄 𑀆𑀓𑀸𑀲𑀕𑀢𑀁 𑀅𑀖𑀁 𑀅𑀖𑀕𑀢𑀁 𑀯𑀺𑀯𑀭𑁄 𑀯𑀺𑀯𑀭𑀕𑀢𑀁 𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀆𑀓𑀸𑀲𑀥𑀸𑀢𑀼.

𑁬𑁩𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀮𑀳𑀼𑀢𑀸? 𑀬𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀮𑀳𑀼𑀧𑀭𑀺𑀡𑀸𑀫𑀢𑀸 𑀅𑀤𑀦𑁆𑀥𑀦𑀢𑀸 𑀅𑀯𑀺𑀢𑁆𑀣𑀦𑀢𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀮𑀳𑀼𑀢𑀸.

𑁬𑁩𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸? 𑀬𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀫𑀤𑁆𑀤𑀯𑀢𑀸 𑀅𑀓𑀓𑁆𑀔𑀴𑀢𑀸 𑀅𑀓𑀣𑀺𑀦𑀢𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸.

𑁬𑁪𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸? 𑀬𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀓𑀫𑁆𑀫𑀜𑁆𑀜𑀢𑁆𑀢𑀁 𑀓𑀫𑁆𑀫𑀜𑁆𑀜𑀪𑀸𑀯𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸.

𑁬𑁪𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀉𑀧𑀘𑀬𑁄? 𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄, 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀉𑀧𑀘𑀬𑁄.

𑁬𑁪𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺? 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺.

𑁬𑁪𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀚𑀭𑀢𑀸? 𑀬𑀸 𑀭𑀽𑀧𑀲𑁆𑀲 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀚𑀭𑀢𑀸.

𑁬𑁪𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸? 𑀬𑁄 𑀭𑀽𑀧𑀲𑁆𑀲 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 𑀅𑀦𑁆𑀢𑀭𑀥𑀸𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸.

𑁬𑁪𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄? 𑀑𑀤𑀦𑁄 𑀓𑀼𑀫𑁆𑀫𑀸𑀲𑁄 𑀲𑀢𑁆𑀢𑀼 𑀫𑀘𑁆𑀙𑁄 𑀫𑀁𑀲𑀁 𑀔𑀻𑀭𑀁 𑀤𑀥𑀺 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀬𑀫𑁆𑀳𑀺 𑀬𑀫𑁆𑀳𑀺 𑀚𑀦𑀧𑀤𑁂 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀫𑀼𑀔𑀸𑀲𑀺𑀬𑀁 𑀤𑀦𑁆𑀢𑀯𑀺𑀔𑀸𑀤𑀦𑀁 𑀕𑀮𑀚𑁆𑀛𑁄𑀳𑀭𑀡𑀻𑀬𑀁 𑀓𑀼𑀘𑁆𑀙𑀺𑀯𑀺𑀢𑁆𑀣𑀫𑁆𑀪𑀦𑀁, 𑀬𑀸𑀬 𑀑𑀚𑀸𑀬 𑀲𑀢𑁆𑀢𑀸 𑀬𑀸𑀧𑁂𑀦𑁆𑀢𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄.

𑀇𑀤𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸.

𑀉𑀧𑀸𑀤𑀸𑀪𑀸𑀚𑀦𑀻𑀬𑀁.

𑀭𑀽𑀧𑀓𑀡𑁆𑀟𑁂 𑀧𑀞𑀫𑀪𑀸𑀡𑀯𑀸𑀭𑁄.

𑁬𑁪𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀦𑁄 𑀉𑀧𑀸𑀤𑀸? 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀆𑀧𑁄𑀥𑀸𑀢𑀼.

𑁬𑁪𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀕𑀭𑀼𑀓𑀁 𑀮𑀳𑀼𑀓𑀁, 𑀬𑀁 𑀨𑁄𑀝𑁆𑀞𑀩𑁆𑀩𑀁 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀓𑀸𑀬𑁂𑀦 𑀅𑀦𑀺𑀤𑀲𑁆𑀲𑀦𑁂𑀦 𑀲𑀧𑁆𑀧𑀝𑀺𑀖𑁂𑀦 𑀨𑀼𑀲𑀺 𑀯𑀸 𑀨𑀼𑀲𑀢𑀺 𑀯𑀸 𑀨𑀼𑀲𑀺𑀲𑁆𑀲𑀢𑀺 𑀯𑀸 𑀨𑀼𑀲𑁂 𑀯𑀸 𑀨𑁄𑀝𑁆𑀞𑀩𑁆𑀩𑁄 𑀧𑁂𑀲𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑁂𑀢𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁬𑁪𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀕𑀭𑀼𑀓𑀁 𑀮𑀳𑀼𑀓𑀁, 𑀬𑀫𑁆𑀳𑀺 𑀨𑁄𑀝𑁆𑀞𑀩𑁆𑀩𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀓𑀸𑀬𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀨𑁄𑀝𑁆𑀞𑀩𑁆𑀩𑁄 𑀧𑁂𑀲𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑁂𑀢𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁬𑁪𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀕𑀭𑀼𑀓𑀁 𑀮𑀳𑀼𑀓𑀁, 𑀬𑁄 𑀨𑁄𑀝𑁆𑀞𑀩𑁆𑀩𑁄 𑀅𑀦𑀺𑀤𑀲𑁆𑀲𑀦𑁄 𑀲𑀧𑁆𑀧𑀝𑀺𑀖𑁄 𑀓𑀸𑀬𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸 𑀧𑀝𑀺𑀳𑀜𑁆𑀜𑀢𑀺 𑀯𑀸 𑀧𑀝𑀺𑀳𑀜𑁆𑀜𑀺𑀲𑁆𑀲𑀢𑀺 𑀯𑀸 𑀧𑀝𑀺𑀳𑀜𑁆𑀜𑁂 𑀯𑀸, 𑀨𑁄𑀝𑁆𑀞𑀩𑁆𑀩𑁄 𑀧𑁂𑀲𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑁂𑀢𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁬𑁫𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀓𑀓𑁆𑀔𑀴𑀁 𑀫𑀼𑀤𑀼𑀓𑀁 𑀲𑀡𑁆𑀳𑀁 𑀨𑀭𑀼𑀲𑀁 𑀲𑀼𑀔𑀲𑀫𑁆𑀨𑀲𑁆𑀲𑀁 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀕𑀭𑀼𑀓𑀁 𑀮𑀳𑀼𑀓𑀁, 𑀬𑀁 𑀨𑁄𑀝𑁆𑀞𑀩𑁆𑀩𑀁 𑀆𑀭𑀩𑁆𑀪 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀨𑁄𑀝𑁆𑀞𑀩𑁆𑀩𑀁 𑀆𑀭𑀩𑁆𑀪 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁄 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸…𑀧𑁂… 𑀬𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀸 𑀓𑀸𑀬𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸…𑀧𑁂… 𑀘𑁂𑀢𑀦𑀸…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂 𑀯𑀸, 𑀨𑁄𑀝𑁆𑀞𑀩𑁆𑀩𑁄 𑀧𑁂𑀲𑁄 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀧𑁂𑀢𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁬𑁫𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀆𑀧𑁄𑀥𑀸𑀢𑀼? 𑀬𑀁 𑀆𑀧𑁄 𑀆𑀧𑁄𑀕𑀢𑀁 𑀲𑀺𑀦𑁂𑀳𑁄 𑀲𑀺𑀦𑁂𑀳𑀕𑀢𑀁 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲 𑁋 𑀇𑀤𑀁 𑀢𑀁 𑀭𑀽𑀧𑀁 𑀆𑀧𑁄𑀥𑀸𑀢𑀼.

𑀇𑀤𑀁 𑀢𑀁 𑀭𑀽𑀧𑀁 𑀦𑁄 𑀉𑀧𑀸𑀤𑀸.

𑁬𑁫𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀡𑁆𑀡𑀁? 𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀡𑁆𑀡𑀁.

𑁬𑁫𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀅𑀦𑀼𑀧𑀸𑀤𑀺𑀡𑁆𑀡𑀁? 𑀲𑀤𑁆𑀤𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀭𑀽𑀧𑀲𑁆𑀲 𑀚𑀭𑀢𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀅𑀦𑀼𑀧𑀸𑀤𑀺𑀡𑁆𑀡𑀁.

𑁬𑁫𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀁.

𑁬𑁫𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀁? 𑀲𑀤𑁆𑀤𑀸𑀬𑀢𑀦𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀭𑀽𑀧𑀲𑁆𑀲 𑀚𑀭𑀢𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸, 𑀭𑀽𑀧𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀁.

𑁬𑁫𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁? 𑀭𑀽𑀧𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁.

𑁬𑁫𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁.

𑁬𑁫𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀧𑁆𑀧𑀝𑀺𑀖𑀁? 𑀘𑀓𑁆𑀔𑀸𑀬𑀢𑀦𑀁 𑀲𑁄𑀢𑀸𑀬𑀢𑀦𑀁 𑀖𑀸𑀦𑀸𑀬𑀢𑀦𑀁 𑀚𑀺𑀯𑁆𑀳𑀸𑀬𑀢𑀦𑀁 𑀓𑀸𑀬𑀸𑀬𑀢𑀦𑀁 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀧𑁆𑀧𑀝𑀺𑀖𑀁.

𑁬𑁫𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀅𑀧𑁆𑀧𑀝𑀺𑀖𑀁? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀅𑀧𑁆𑀧𑀝𑀺𑀖𑀁.

𑁬𑁬𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀁? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀇𑀦𑁆𑀤𑁆𑀭𑀺𑀬𑀁.

𑁬𑁬𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀇𑀦𑁆𑀤𑁆𑀭𑀺𑀬𑀁? 𑀭𑀽𑀧𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀇𑀦𑁆𑀤𑁆𑀭𑀺𑀬𑀁.

𑁬𑁬𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀫𑀳𑀸𑀪𑀽𑀢𑀁? 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀧𑁄𑀥𑀸𑀢𑀼 𑁋 𑀇𑀤𑀁 𑀢𑀁 𑀭𑀽𑀧𑀁 𑀫𑀳𑀸𑀪𑀽𑀢𑀁.

𑁬𑁬𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀫𑀳𑀸𑀪𑀽𑀢𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀫𑀳𑀸𑀪𑀽𑀢𑀁.

𑁬𑁬𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀯𑀺𑀜𑁆𑀜𑀢𑁆𑀢𑀺? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀯𑀺𑀜𑁆𑀜𑀢𑁆𑀢𑀺.

𑁬𑁬𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀯𑀺𑀜𑁆𑀜𑀢𑁆𑀢𑀺? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀯𑀺𑀜𑁆𑀜𑀢𑁆𑀢𑀺.

𑁬𑁬𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀘𑀺𑀢𑁆𑀢𑀚𑀁 𑀘𑀺𑀢𑁆𑀢𑀳𑁂𑀢𑀼𑀓𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁.

𑁬𑁬𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀭𑀽𑀧𑀲𑁆𑀲 𑀚𑀭𑀢𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀢𑁆𑀣𑀺 𑀭𑀽𑀧𑀁 𑀦 𑀘𑀺𑀢𑁆𑀢𑀚𑀁 𑀦 𑀘𑀺𑀢𑁆𑀢𑀳𑁂𑀢𑀼𑀓𑀁 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀸𑀬𑀢𑀦𑀁 𑀲𑀤𑁆𑀤𑀸𑀬𑀢𑀦𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀭𑀽𑀧𑀲𑁆𑀲 𑀉𑀧𑀘𑀬𑁄 𑀭𑀽𑀧𑀲𑁆𑀲 𑀲𑀦𑁆𑀢𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁.

𑁬𑁬𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀲𑀳𑀪𑀼? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀲𑀳𑀪𑀼.

𑁬𑁬𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀲𑀳𑀪𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀲𑀳𑀪𑀼.

𑁬𑁭𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺? 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺.

𑁬𑁭𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺.

𑁬𑁭𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀅𑀚𑁆𑀛𑀢𑁆𑀢𑀺𑀓𑀁.

𑁬𑁭𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀩𑀸𑀳𑀺𑀭𑀁? 𑀭𑀽𑀧𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀩𑀸𑀳𑀺𑀭𑀁.

𑁬𑁭𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀑𑀴𑀸𑀭𑀺𑀓𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀑𑀴𑀸𑀭𑀺𑀓𑀁.

𑁬𑁭𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀼𑀔𑀼𑀫𑀁? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀼𑀔𑀼𑀫𑀁.

𑁬𑁭𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀤𑀽𑀭𑁂? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀤𑀽𑀭𑁂.

𑁬𑁭𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀦𑁆𑀢𑀺𑀓𑁂? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀲𑀦𑁆𑀢𑀺𑀓𑁂.

𑁬𑁭𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀼? 𑀘𑀓𑁆𑀔𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀼.

𑁬𑁭𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀼? 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀼.

𑁬𑁮𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀘𑁂𑀢𑀦𑀸𑀬 …𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼? 𑀘𑀓𑁆𑀔𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼.

𑁬𑁮𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀼? 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀼.

𑁬𑁮𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀲𑀫𑁆𑀨𑀲𑁆𑀲𑀲𑁆𑀲…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑀲𑁆𑀲…𑀧𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀲𑁆𑀲…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀼? 𑀓𑀸𑀬𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀯𑀢𑁆𑀣𑀼.

𑁬𑁮𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀦 𑀯𑀢𑁆𑀣𑀼.

𑁬𑁮𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀘𑁂𑀢𑀦𑀸𑀬…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼? 𑀓𑀸𑀬𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼.

𑁬𑁮𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀦 𑀯𑀢𑁆𑀣𑀼.

𑁬𑁮𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁? 𑀭𑀽𑀧𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁.

𑁬𑁮𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀆𑀭𑀫𑁆𑀫𑀡𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦 𑀆𑀭𑀫𑁆𑀫𑀡𑀁.

𑁬𑁮𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀘𑁂𑀢𑀦𑀸𑀬…𑀧𑁂… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁? 𑀭𑀽𑀧𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁.

𑁬𑁮𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀆𑀭𑀫𑁆𑀫𑀡𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀆𑀭𑀫𑁆𑀫𑀡𑀁.

𑁬𑁯𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀲𑀫𑁆𑀨𑀲𑁆𑀲𑀲𑁆𑀲…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑀲𑁆𑀲 …𑀧𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀲𑁆𑀲…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁? 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁.

𑁬𑁯𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀦 𑀆𑀭𑀫𑁆𑀫𑀡𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀲𑁆𑀲 𑀦 𑀆𑀭𑀫𑁆𑀫𑀡𑀁.

𑁬𑁯𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀸𑀬 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀘𑁂𑀢𑀦𑀸𑀬…𑀧𑁂… 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁? 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁.

𑁬𑁯𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀦 𑀆𑀭𑀫𑁆𑀫𑀡𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀦 𑀆𑀭𑀫𑁆𑀫𑀡𑀁.

𑁬𑁯𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀸𑀬𑀢𑀦𑀁.

𑁬𑁯𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀸𑀬𑀢𑀦𑀁? 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀸𑀬𑀢𑀦𑀁.

𑁬𑁯𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀸𑀬𑀢𑀦𑀁…𑀧𑁂… 𑀖𑀸𑀦𑀸𑀬𑀢𑀦𑀁…𑀧𑁂… 𑀚𑀺𑀯𑁆𑀳𑀸𑀬𑀢𑀦𑀁…𑀧𑁂… 𑀓𑀸𑀬𑀸𑀬𑀢𑀦𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀸𑀬𑀢𑀦𑀁.

𑁬𑁯𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀸𑀬𑀢𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀸𑀬𑀢𑀦𑀁.

𑁬𑁯𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁? 𑀬𑀁 𑀭𑀽𑀧𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀡𑁆𑀡𑀦𑀺𑀪𑀸…𑀧𑁂… 𑀭𑀽𑀧𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁.

𑁬𑁯𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀭𑀽𑀧𑀸𑀬𑀢𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀭𑀽𑀧𑀸𑀬𑀢𑀦𑀁.

𑁭𑁦𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀸𑀬𑀢𑀦𑀁…𑀧𑁂… 𑀕𑀦𑁆𑀥𑀸𑀬𑀢𑀦𑀁 …𑀧𑁂… 𑀭𑀲𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀧𑀣𑀯𑀻𑀥𑀸𑀢𑀼…𑀧𑁂… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀧𑁂𑀲𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁭𑁦𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁.

𑁭𑁦𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀥𑀸𑀢𑀼.

𑁭𑁦𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀼𑀥𑀸𑀢𑀼? 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀼𑀥𑀸𑀢𑀼.

𑁭𑁦𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀥𑀸𑀢𑀼…𑀧𑁂… 𑀖𑀸𑀦𑀥𑀸𑀢𑀼…𑀧𑁂… 𑀚𑀺𑀯𑁆𑀳𑀸𑀥𑀸𑀢𑀼…𑀧𑁂… 𑀓𑀸𑀬𑀥𑀸𑀢𑀼? 𑀓𑀸𑀬𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀥𑀸𑀢𑀼.

𑁭𑁦𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀥𑀸𑀢𑀼.

𑁭𑁦𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀥𑀸𑀢𑀼? 𑀭𑀽𑀧𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀥𑀸𑀢𑀼.

𑁭𑁦𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀭𑀽𑀧𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀭𑀽𑀧𑀥𑀸𑀢𑀼.

𑁭𑁦𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑀤𑁆𑀤𑀥𑀸𑀢𑀼…𑀧𑁂… 𑀕𑀦𑁆𑀥𑀥𑀸𑀢𑀼…𑀧𑁂… 𑀭𑀲𑀥𑀸𑀢𑀼…𑀧𑁂… 𑀨𑁄𑀝𑁆𑀞𑀩𑁆𑀩𑀥𑀸𑀢𑀼? 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼.

𑁭𑁦𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀨𑁄𑀝𑁆𑀞𑀩𑁆𑀩𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀨𑁄𑀝𑁆𑀞𑀩𑁆𑀩𑀥𑀸𑀢𑀼.

𑁭𑁧𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁? 𑀬𑀁 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁.

𑁭𑁧𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁? 𑀲𑁄𑀢𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁.

𑁭𑁧𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀲𑁄𑀢𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀖𑀸𑀦𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄…𑀧𑁂… 𑀲𑀼𑀜𑁆𑀜𑁄 𑀕𑀸𑀫𑁄 𑀧𑁂𑀲𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀁.

𑁭𑁧𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀺𑀦𑁆𑀤𑁆𑀭𑀺𑀬𑀁.

𑁭𑁧𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀁 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑁄 𑀇𑀢𑁆𑀣𑀢𑁆𑀢𑀁 𑀇𑀢𑁆𑀣𑀺𑀪𑀸𑀯𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁.

𑁭𑁧𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁.

𑁭𑁧𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁? 𑀬𑀁 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑁄 𑀧𑀼𑀭𑀺𑀲𑀢𑁆𑀢𑀁 𑀧𑀼𑀭𑀺𑀲𑀪𑀸𑀯𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑁭𑁧𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁.

𑁭𑁧𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀬𑁄 𑀢𑁂𑀲𑀁 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑁭𑁧𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁.

𑁭𑁨𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑀲𑁆𑀲 𑀯𑀸 𑀆𑀮𑁄𑀓𑁂𑀦𑁆𑀢𑀲𑁆𑀲 𑀯𑀸 𑀯𑀺𑀮𑁄𑀓𑁂𑀦𑁆𑀢𑀲𑁆𑀲 𑀯𑀸 𑀲𑀫𑀺𑀜𑁆𑀚𑁂𑀦𑁆𑀢𑀲𑁆𑀲 𑀯𑀸 𑀧𑀲𑀸𑀭𑁂𑀦𑁆𑀢𑀲𑁆𑀲 𑀯𑀸 𑀓𑀸𑀬𑀲𑁆𑀲 𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀦𑀸 𑀲𑀦𑁆𑀣𑀫𑁆𑀪𑀺𑀢𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺.

𑁭𑁨𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺.

𑁭𑁨𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺? 𑀬𑀸 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀯𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲 𑀯𑀸 𑀯𑀸𑀘𑀸 𑀕𑀺𑀭𑀸 𑀩𑁆𑀬𑀧𑁆𑀧𑀣𑁄 𑀉𑀤𑀻𑀭𑀡𑀁 𑀖𑁄𑀲𑁄 𑀖𑁄𑀲𑀓𑀫𑁆𑀫𑀁 𑀯𑀸𑀘𑀸 𑀯𑀘𑀻𑀪𑁂𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀸𑀘𑀸. 𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁 𑁋 𑀇𑀤𑀁 𑀢𑀁 𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺.

𑁭𑁨𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺.

𑁭𑁨𑁪. 𑀓𑀢𑀫𑀁 𑀢𑀁 𑀭𑀽𑀧𑀁 𑀆𑀓𑀸𑀲𑀥𑀸𑀢𑀼? 𑀬𑁄 𑀆𑀓𑀸𑀲𑁄 𑀆𑀓𑀸𑀲𑀕𑀢𑀁 𑀅𑀖𑀁 𑀅𑀖𑀕𑀢𑀁 𑀯𑀺𑀯𑀭𑁄 𑀯𑀺𑀯𑀭𑀕𑀢𑀁 𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑁋 𑀇𑀤𑀁 𑀢𑀁 𑀭𑀽𑀧𑀁 𑀆𑀓𑀸𑀲𑀥𑀸𑀢𑀼.

𑁭𑁨𑁫. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀆𑀓𑀸𑀲𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁 …𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀆𑀓𑀸𑀲𑀥𑀸𑀢𑀼.

𑁭𑁨𑁬. 𑀓𑀢𑀫𑀁 𑀢𑀁 𑀭𑀽𑀧𑀁 𑀆𑀧𑁄𑀥𑀸𑀢𑀼? 𑀬𑀁 𑀆𑀧𑁄 𑀆𑀧𑁄𑀕𑀢𑀁 𑀲𑀺𑀦𑁂𑀳𑁄 𑀲𑀺𑀦𑁂𑀳𑀕𑀢𑀁 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲 𑁋 𑀇𑀤𑀁 𑀢𑀁 𑀭𑀽𑀧𑀁 𑀆𑀧𑁄𑀥𑀸𑀢𑀼.

𑁭𑁨𑁭. 𑀓𑀢𑀫𑀁 𑀢𑀁 𑀭𑀽𑀧𑀁 𑀦 𑀆𑀧𑁄𑀥𑀸𑀢𑀼? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀦 𑀆𑀧𑁄𑀥𑀸𑀢𑀼.

𑁭𑁨𑁮. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀮𑀳𑀼𑀢𑀸? 𑀬𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀮𑀳𑀼𑀧𑀭𑀺𑀡𑀸𑀫𑀢𑀸 𑀅𑀤𑀦𑁆𑀥𑀦𑀢𑀸 𑀅𑀯𑀺𑀢𑁆𑀣𑀦𑀢𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀮𑀳𑀼𑀢𑀸.

𑁭𑁨𑁯. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀮𑀳𑀼𑀢𑀸? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀮𑀳𑀼𑀢𑀸.

𑁭𑁩𑁦. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸? 𑀬𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸 𑀫𑀤𑁆𑀤𑀯𑀢𑀸 𑀅𑀓𑀓𑁆𑀔𑀴𑀢𑀸 𑀅𑀓𑀣𑀺𑀦𑀢𑀸 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸.

𑁭𑁩𑁧. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀫𑀼𑀤𑀼𑀢𑀸? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀫𑀼𑀤𑀼𑀢𑀸.

𑁭𑁩𑁨. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸? 𑀬𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸 𑀓𑀫𑁆𑀫𑀜𑁆𑀜𑀢𑁆𑀢𑀁 𑀓𑀫𑁆𑀫𑀜𑁆𑀜𑀪𑀸𑀯𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸.

𑁭𑁩𑁩. 𑀓𑀢𑀫𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀓𑀫𑁆𑀫𑀜𑁆𑀜𑀢𑀸? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑁋 𑀇𑀤𑀁 𑀢𑀁 𑀭𑀽𑀧𑀁 𑀭𑀽𑀧𑀲𑁆𑀲 𑀦 𑀓𑀫𑁆𑀫𑀜𑁆𑀜𑀢𑀸.