𑁩. 𑀦𑀺𑀓𑁆𑀔𑁂𑀧𑀓𑀡𑁆𑀟𑀁

𑀢𑀺𑀓𑀦𑀺𑀓𑁆𑀔𑁂𑀧𑀁

𑁯𑁮𑁫. 𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸.

𑁯𑁮𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸.

𑁯𑁮𑁭. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸.

𑁯𑁮𑁮. 𑀓𑀢𑀫𑁂 𑀥𑀫𑁆𑀫𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸? 𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀲𑀼𑀔𑀁 𑀯𑁂𑀤𑀦𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁯𑁮𑁯. 𑀓𑀢𑀫𑁂 𑀥𑀫𑁆𑀫𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸? 𑀤𑀼𑀓𑁆𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁯𑁯𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸? 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸.

𑁯𑁯𑁧. 𑀓𑀢𑀫𑁂 𑀥𑀫𑁆𑀫𑀸 𑀯𑀺𑀧𑀸𑀓𑀸? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀯𑀺𑀧𑀸𑀓𑀸.

𑁯𑁯𑁨. 𑀓𑀢𑀫𑁂 𑀥𑀫𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸? 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸.

𑁯𑁯𑁩. 𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸? 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸, 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸.

𑁯𑁯𑁪. 𑀓𑀢𑀫𑁂 𑀥𑀫𑁆𑀫𑀸 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸? 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑀜𑁆𑀘 𑀭𑀽𑀧𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑁋 𑀇𑀫𑁂 𑀥𑀫𑁆𑀫𑀸 𑀉𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸.

𑁯𑁯𑁫. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸? 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸; 𑀬𑀜𑁆𑀘 𑀭𑀽𑀧𑀁 𑀦 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀡𑁆𑀡𑀼𑀧𑀸𑀤𑀸𑀦𑀺𑀬𑀸.

𑁯𑁯𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀡𑁆𑀡𑀅𑀦𑀼𑀧𑀸𑀤𑀸𑀦𑀺𑀬𑀸.

𑁯𑁯𑁭. 𑀓𑀢𑀫𑁂 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸.

𑁯𑁯𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸? 𑀲𑀸𑀲𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀭𑀽𑀧𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸.

𑁯𑁯𑁯. 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀲𑀁𑀓𑀺𑀮𑀺𑀝𑁆𑀞𑀅𑀲𑀁𑀓𑀺𑀮𑁂𑀲𑀺𑀓𑀸.

𑁧𑁦𑁦𑁦. 𑀓𑀢𑀫𑁂 𑀥𑀫𑁆𑀫𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸? 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸.

𑁧𑁦𑁦𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸? 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀪𑀽𑀫𑀺𑀬𑀁 𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀯𑀺𑀘𑀸𑀭𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸.

𑁧𑁦𑁦𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸? 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸.

𑁧𑁦𑁦𑁩. 𑀓𑀢𑀫𑁂 𑀥𑀫𑁆𑀫𑀸 𑀧𑀻𑀢𑀺𑀲𑀳𑀕𑀢𑀸? 𑀧𑀻𑀢𑀺𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀧𑀻𑀢𑀺𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀧𑀻𑀢𑀺𑀲𑀳𑀕𑀢𑀸.

𑁧𑁦𑁦𑁪. 𑀓𑀢𑀫𑁂 𑀥𑀫𑁆𑀫𑀸 𑀲𑀼𑀔𑀲𑀳𑀕𑀢𑀸? 𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀲𑀼𑀔𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀼𑀔𑀲𑀳𑀕𑀢𑀸.

𑁧𑁦𑁦𑁫. 𑀓𑀢𑀫𑁂 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸? 𑀉𑀧𑁂𑀓𑁆𑀔𑀸𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂, 𑀭𑀽𑀧𑀸𑀯𑀘𑀭𑁂, 𑀅𑀭𑀽𑀧𑀸𑀯𑀘𑀭𑁂, 𑀅𑀧𑀭𑀺𑀬𑀸𑀧𑀦𑁆𑀦𑁂, 𑀉𑀧𑁂𑀓𑁆𑀔𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸.

𑁧𑁦𑁦𑁬. 𑀓𑀢𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸? 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

𑁧𑁦𑁦𑁭. 𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀁. 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀜𑁆𑀜𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀲𑀜𑁆𑀜𑀁, 𑀲𑀜𑁆𑀜𑀸𑀬 𑀯𑀸 𑀅𑀢𑁆𑀢𑀸𑀦𑀁. 𑀲𑀗𑁆𑀔𑀸𑀭𑁂 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀗𑁆𑀔𑀸𑀭𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀲𑀗𑁆𑀔𑀸𑀭𑁂, 𑀲𑀗𑁆𑀔𑀸𑀭𑁂𑀲𑀼 𑀯𑀸 𑀅𑀢𑁆𑀢𑀸𑀦𑀁. 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 [𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀢𑀁 (𑀲𑀻.)] 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺.

𑁧𑁦𑁦𑁮. 𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀥𑀫𑁆𑀫𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀲𑀗𑁆𑀖𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀣𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸.

𑁧𑁦𑁦𑁯. 𑀢𑀢𑁆𑀣 𑀓𑀢𑀫𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄? 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 ‘𑀲𑀻𑀮𑁂𑀦 𑀲𑀼𑀤𑁆𑀥𑀺, 𑀯𑀢𑁂𑀦 𑀲𑀼𑀤𑁆𑀥𑀺, 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻’𑀢𑀺 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

𑁧𑁦𑁧𑁦. 𑀇𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸.

𑁧𑁦𑁧𑁧. 𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀅𑀯𑀲𑁂𑀲𑁄 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸.

𑁧𑁦𑁧𑁨. 𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸? 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸.

𑁧𑁦𑁧𑁩. 𑀓𑀢𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸? 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

𑁧𑁦𑁧𑁪. 𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺.

𑁧𑁦𑁧𑁫. 𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸.

𑁧𑁦𑁧𑁬. 𑀢𑀢𑁆𑀣 𑀓𑀢𑀫𑁄 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄.

𑁧𑁦𑁧𑁭. 𑀇𑀫𑀸𑀦𑀺 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸. 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑁋 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀢𑀤𑁂𑀓𑀝𑁆𑀞𑁄 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄 𑁋 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀽. 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸.

𑁧𑁦𑁧𑁮. 𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸? 𑀅𑀯𑀲𑁂𑀲𑁄 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄 𑁋 𑀇𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀽. 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸.

𑁧𑁦𑁧𑁯. 𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸? 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀸.

𑁧𑁦𑁨𑁦. 𑀓𑀢𑀫𑁂 𑀥𑀫𑁆𑀫𑀸 𑀆𑀘𑀬𑀕𑀸𑀫𑀺𑀦𑁄? 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀆𑀘𑀬𑀕𑀸𑀫𑀺𑀦𑁄.

𑁧𑁦𑁨𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀧𑀘𑀬𑀕𑀸𑀫𑀺𑀦𑁄? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀧𑀘𑀬𑀕𑀸𑀫𑀺𑀦𑁄.

𑁧𑁦𑁨𑁨. 𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯 𑀆𑀘𑀬𑀕𑀸𑀫𑀺 𑀦 𑀅𑀧𑀘𑀬𑀕𑀸𑀫𑀺𑀦𑁄? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑁂 𑀘 𑀥𑀫𑁆𑀫𑀸 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁂𑀯 𑀆𑀘𑀬𑀕𑀸𑀫𑀺 𑀦 𑀅𑀧𑀘𑀬𑀕𑀸𑀫𑀺𑀦𑁄.

𑁧𑁦𑁨𑁩. 𑀓𑀢𑀫𑁂 𑀥𑀫𑁆𑀫𑀸 𑀲𑁂𑀓𑁆𑀔𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀳𑁂𑀝𑁆𑀞𑀺𑀫𑀸𑀦𑀺 𑀘 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑁂𑀓𑁆𑀔𑀸.

𑁧𑁦𑁨𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀲𑁂𑀓𑁆𑀔𑀸? 𑀉𑀧𑀭𑀺𑀝𑁆𑀞𑀺𑀫𑀁 [𑀉𑀧𑀭𑀺𑀫𑀁 (𑀲𑁆𑀬𑀸.)] 𑀅𑀭𑀳𑀢𑁆𑀢𑀨𑀮𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀲𑁂𑀓𑁆𑀔𑀸.

𑁧𑁦𑁨𑁫. 𑀓𑀢𑀫𑁂 𑀥𑀫𑁆𑀫𑀸 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸? 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁂𑀯𑀲𑁂𑀓𑁆𑀔𑀦𑀸𑀲𑁂𑀓𑁆𑀔𑀸.

𑁧𑁦𑁨𑁬. 𑀓𑀢𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸? 𑀲𑀩𑁆𑀩𑁂𑀯 𑀓𑀸𑀫𑀸𑀯𑀘𑀭𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸; 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸.

𑁧𑁦𑁨𑁭. 𑀓𑀢𑀫𑁂 𑀥𑀫𑁆𑀫𑀸 𑀫𑀳𑀕𑁆𑀕𑀢𑀸? 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀳𑀕𑁆𑀕𑀢𑀸.

𑁧𑁦𑁨𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸.

𑁧𑁦𑁨𑁯. 𑀓𑀢𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸? 𑀧𑀭𑀺𑀢𑁆𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸.

𑁧𑁦𑁩𑁦. 𑀓𑀢𑀫𑁂 𑀥𑀫𑁆𑀫𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸? 𑀫𑀳𑀕𑁆𑀕𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸.

𑁧𑁦𑁩𑁧. 𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸? 𑀅𑀧𑁆𑀧𑀫𑀸𑀡𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸.

𑁧𑁦𑁩𑁨. 𑀓𑀢𑀫𑁂 𑀥𑀫𑁆𑀫𑀸 𑀳𑀻𑀦𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄; 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀢𑀁𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀓𑀫𑁆𑀫𑀁, 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀓𑀫𑁆𑀫𑀁 𑁋 𑀇𑀫𑁂 𑀥𑀫𑁆𑀫𑀸 𑀳𑀻𑀦𑀸.

𑁧𑁦𑁩𑁩. 𑀓𑀢𑀫𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸? 𑀲𑀸𑀲𑀯𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸.

𑁧𑁦𑁩𑁪. 𑀓𑀢𑀫𑁂 𑀥𑀫𑁆𑀫𑀸 𑀧𑀡𑀻𑀢𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀧𑀡𑀻𑀢𑀸.

𑁧𑁦𑁩𑁫. 𑀓𑀢𑀫𑁂 𑀥𑀫𑁆𑀫𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸? 𑀧𑀜𑁆𑀘 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀓𑀸𑀦𑀺, 𑀬𑀸 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀺𑀬𑀢𑀸 𑁋 𑀇𑀫𑁂 𑀥𑀫𑁆𑀫𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸.

𑁧𑁦𑁩𑁬. 𑀓𑀢𑀫𑁂 𑀥𑀫𑁆𑀫𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑁋 𑀇𑀫𑁂 𑀥𑀫𑁆𑀫𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸.

𑁧𑁦𑁩𑁭. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀺𑀬𑀢𑀸? 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀺𑀬𑀢𑀸.

𑁧𑁦𑁩𑁮. 𑀓𑀢𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀭𑀫𑁆𑀫𑀡𑀸? 𑀅𑀭𑀺𑀬𑀫𑀕𑁆𑀕𑀁 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀭𑀫𑁆𑀫𑀡𑀸.

𑁧𑁦𑁩𑁯. 𑀓𑀢𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀼𑀓𑀸? 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀫𑀕𑁆𑀕𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀼𑀓𑀸. 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀞𑀧𑁂𑀢𑁆𑀯𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀼𑀓𑀸. 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀽. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀳𑁂𑀢𑀼𑀓𑀸.

𑁧𑁦𑁪𑁦. 𑀓𑀢𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄? 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄. 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀁 𑀫𑀕𑁆𑀕𑀁 𑀪𑀸𑀯𑀬𑀦𑁆𑀢𑀲𑁆𑀲 𑀯𑀻𑀫𑀁𑀲𑀁 𑀞𑀧𑁂𑀢𑁆𑀯𑀸; 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀥𑀺𑀧𑀢𑀺𑀦𑁄.

𑁧𑁦𑁪𑁧. 𑀓𑀢𑀫𑁂 𑀥𑀫𑁆𑀫𑀸 𑀉𑀧𑁆𑀧𑀦𑁆𑀦𑀸? 𑀬𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸 𑀉𑀧𑁆𑀧𑀦𑁆𑀦𑀸 𑀲𑀫𑀼𑀧𑁆𑀧𑀦𑁆𑀦𑀸 𑀉𑀝𑁆𑀞𑀺𑀢𑀸 𑀲𑀫𑀼𑀝𑁆𑀞𑀺𑀢𑀸 𑀉𑀧𑁆𑀧𑀦𑁆𑀦𑀸 𑀉𑀧𑁆𑀧𑀦𑁆𑀦𑀁𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀁 [𑀭𑀽𑀧𑀸 (𑀩𑀳𑀽𑀲𑀼)], 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀦𑁆𑀦𑀸.

𑁧𑁦𑁪𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸? 𑀬𑁂 𑀥𑀫𑁆𑀫𑀸 𑀅𑀚𑀸𑀢𑀸 𑀅𑀪𑀽𑀢𑀸 𑀅𑀲𑀜𑁆𑀚𑀸𑀢𑀸 𑀅𑀦𑀺𑀩𑁆𑀩𑀢𑁆𑀢𑀸 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀸 𑀅𑀧𑀸𑀢𑀼𑀪𑀽𑀢𑀸 𑀅𑀦𑀼𑀧𑁆𑀧𑀦𑁆𑀦𑀸 𑀅𑀲𑀫𑀼𑀧𑁆𑀧𑀦𑁆𑀦𑀸 𑀅𑀦𑀼𑀝𑁆𑀞𑀺𑀢𑀸 𑀅𑀲𑀫𑀼𑀝𑁆𑀞𑀺𑀢𑀸 𑀅𑀦𑀼𑀧𑁆𑀧𑀦𑁆𑀦𑀸 𑀅𑀦𑀼𑀧𑁆𑀧𑀦𑁆𑀦𑀁𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑀸.

𑁧𑁦𑁪𑁩. 𑀓𑀢𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑀺𑀦𑁄? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸𑀦𑀁 𑀯𑀺𑀧𑀸𑀓𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑀜𑁆𑀘 𑀭𑀽𑀧𑀁 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑀺𑀦𑁄.

𑁧𑁦𑁪𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀢𑀻𑀢𑀸? 𑀬𑁂 𑀥𑀫𑁆𑀫𑀸 𑀅𑀢𑀻𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀕𑀢𑀸 𑀯𑀺𑀧𑀭𑀺𑀡𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀩𑁆𑀪𑀢𑁆𑀣𑀗𑁆𑀕𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀕𑀢𑀸 𑀅𑀢𑀻𑀢𑀸 𑀅𑀢𑀻𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀢𑀻𑀢𑀸.

𑁧𑁦𑁪𑁫. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀸𑀕𑀢𑀸? 𑀬𑁂 𑀥𑀫𑁆𑀫𑀸 𑀅𑀚𑀸𑀢𑀸 𑀅𑀪𑀽𑀢𑀸 𑀅𑀲𑀜𑁆𑀚𑀸𑀢𑀸 𑀅𑀦𑀺𑀩𑁆𑀩𑀢𑁆𑀢𑀸 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀸 𑀅𑀧𑀸𑀢𑀼𑀪𑀽𑀢𑀸 𑀅𑀦𑀼𑀧𑁆𑀧𑀦𑁆𑀦𑀸 𑀅𑀲𑀫𑀼𑀧𑁆𑀧𑀦𑁆𑀦𑀸 𑀅𑀦𑀼𑀝𑁆𑀞𑀺𑀢𑀸 𑀅𑀲𑀫𑀼𑀝𑁆𑀞𑀺𑀢𑀸 𑀅𑀦𑀸𑀕𑀢𑀸 𑀅𑀦𑀸𑀕𑀢𑀁𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀸𑀕𑀢𑀸.

𑁧𑁦𑁪𑁬. 𑀓𑀢𑀫𑁂 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸? 𑀬𑁂 𑀥𑀫𑁆𑀫𑀸 𑀚𑀸𑀢𑀸 𑀪𑀽𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸 𑀉𑀧𑁆𑀧𑀦𑁆𑀦𑀸 𑀲𑀫𑀼𑀧𑁆𑀧𑀦𑁆𑀦𑀸 𑀉𑀝𑁆𑀞𑀺𑀢𑀸 𑀲𑀫𑀼𑀝𑁆𑀞𑀺𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁂𑀦 𑀲𑀗𑁆𑀕𑀳𑀺𑀢𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸.

𑁧𑁦𑁪𑁭. 𑀓𑀢𑀫𑁂 𑀥𑀫𑁆𑀫𑀸 𑀅𑀢𑀻𑀢𑀸𑀭𑀫𑁆𑀫𑀡𑀸? 𑀅𑀢𑀻𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀢𑀻𑀢𑀸𑀭𑀫𑁆𑀫𑀡𑀸.

𑁧𑁦𑁪𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸? 𑀅𑀦𑀸𑀕𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀸𑀕𑀢𑀸𑀭𑀫𑁆𑀫𑀡𑀸.

𑁧𑁦𑁪𑁯. 𑀓𑀢𑀫𑁂 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸? 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸.

𑁧𑁦𑁫𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀸? 𑀬𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀦𑀺𑀬𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀉𑀧𑀸𑀤𑀺𑀡𑁆𑀡𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀸.

𑁧𑁦𑁫𑁧. 𑀓𑀢𑀫𑁂 𑀥𑀫𑁆𑀫𑀸 𑀩𑀳𑀺𑀤𑁆𑀥𑀸? 𑀬𑁂 𑀥𑀫𑁆𑀫𑀸 𑀢𑁂𑀲𑀁 𑀢𑁂𑀲𑀁 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀁 𑀦𑀺𑀬𑀢𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀉𑀧𑀸𑀤𑀺𑀡𑁆𑀡𑀸, 𑀭𑀽𑀧𑀁, 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑁋 𑀇𑀫𑁂 𑀥𑀫𑁆𑀫𑀸 𑀩𑀳𑀺𑀤𑁆𑀥𑀸.

𑁧𑁦𑁫𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸? 𑀢𑀤𑀼𑀪𑀬𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸.

𑁧𑁦𑁫𑁩. 𑀓𑀢𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸? 𑀅𑀚𑁆𑀛𑀢𑁆𑀢𑁂 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸.

𑁧𑁦𑁫𑁪. 𑀓𑀢𑀫𑁂 𑀥𑀫𑁆𑀫𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸? 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑁧𑁦𑁫𑁫. 𑀓𑀢𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸? 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀥𑀫𑁆𑀫𑁂 𑀆𑀭𑀩𑁆𑀪 𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑁋 𑀇𑀫𑁂 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸.

𑁧𑁦𑁫𑁬. 𑀓𑀢𑀫𑁂 𑀥𑀫𑁆𑀫𑀸 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸? 𑀭𑀽𑀧𑀸𑀬𑀢𑀦𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸.

𑁧𑁦𑁫𑁭. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸? 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀸𑀬𑀢𑀦𑀁, 𑀖𑀸𑀦𑀸𑀬𑀢𑀦𑀁, 𑀚𑀺𑀯𑁆𑀳𑀸𑀬𑀢𑀦𑀁, 𑀓𑀸𑀬𑀸𑀬𑀢𑀦𑀁, 𑀲𑀤𑁆𑀤𑀸𑀬𑀢𑀦𑀁, 𑀕𑀦𑁆𑀥𑀸𑀬𑀢𑀦𑀁, 𑀭𑀲𑀸𑀬𑀢𑀦𑀁, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀸.

𑁧𑁦𑁫𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁; 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀅𑀧𑁆𑀧𑀝𑀺𑀖𑀸.

𑀢𑀺𑀓𑀁.

𑀤𑀼𑀓𑀦𑀺𑀓𑁆𑀔𑁂𑀧𑀁

𑀳𑁂𑀢𑀼𑀕𑁄𑀘𑁆𑀙𑀓𑀁

𑁧𑁦𑁫𑁯. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽, 𑀦𑀯 𑀓𑀸𑀫𑀸𑀯𑀘𑀭𑀳𑁂𑀢𑀽 𑀙 𑀭𑀽𑀧𑀸𑀯𑀘𑀭𑀳𑁂𑀢𑀽, 𑀙 𑀅𑀭𑀽𑀧𑀸𑀯𑀘𑀭𑀳𑁂𑀢𑀽, 𑀙 𑀅𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽.

𑁧𑁦𑁬𑁦. 𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽? 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄.

𑁧𑁦𑁬𑁧. 𑀢𑀢𑁆𑀣 𑀓𑀢𑀫𑁄 𑀅𑀮𑁄𑀪𑁄? 𑀬𑁄 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢𑀁 𑀅𑀲𑀸𑀭𑀸𑀕𑁄 𑀅𑀲𑀸𑀭𑀚𑁆𑀚𑀦𑀸 𑀅𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀦𑀪𑀺𑀚𑁆𑀛𑀸 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀮𑁄𑀪𑁄.

𑁧𑁦𑁬𑁨. 𑀢𑀢𑁆𑀣 𑀓𑀢𑀫𑁄 𑀅𑀤𑁄𑀲𑁄? 𑀬𑁄 𑀅𑀤𑁄𑀲𑁄 𑀅𑀤𑀼𑀲𑁆𑀲𑀦𑀸 𑀅𑀤𑀼𑀲𑁆𑀲𑀺𑀢𑀢𑁆𑀢𑀁 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀅𑀦𑀼𑀤𑁆𑀤𑀸 𑀅𑀦𑀼𑀤𑁆𑀤𑀸𑀬𑀦𑀸 𑀅𑀦𑀼𑀤𑀸𑀬𑀺𑀢𑀢𑁆𑀢𑀁 𑀳𑀺𑀢𑁂𑀲𑀺𑀢𑀸 𑀅𑀦𑀼𑀓𑀫𑁆𑀧𑀸 𑀅𑀩𑁆𑀬𑀸𑀧𑀸𑀤𑁄 𑀅𑀩𑁆𑀬𑀸𑀧𑀚𑁆𑀚𑁄 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀤𑁄𑀲𑁄.

𑁧𑁦𑁬𑁩. 𑀢𑀢𑁆𑀣 𑀓𑀢𑀫𑁄 𑀅𑀫𑁄𑀳𑁄? 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁, 𑀬𑀸 𑀏𑀯𑀭𑀽𑀧𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀫𑁄𑀳𑁄.

𑀇𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽.

𑁧𑁦𑁬𑁪. 𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽? 𑀮𑁄𑀪𑁄, 𑀤𑁄𑀲𑁄, 𑀫𑁄𑀳𑁄.

𑁧𑁦𑁬𑁫. 𑀢𑀢𑁆𑀣 𑀓𑀢𑀫𑁄 𑀮𑁄𑀪𑁄? 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀻𑀭𑀸𑀕𑁄 [𑀦𑀦𑁆𑀤𑀺𑀭𑀸𑀕𑁄 (𑀲𑀻.)] 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀅𑀚𑁆𑀛𑁄𑀲𑀸𑀦𑀁 𑀕𑁂𑀥𑁄 𑀧𑀮𑀺𑀕𑁂𑀥𑁄 𑀲𑀗𑁆𑀕𑁄 𑀧𑀗𑁆𑀓𑁄 𑀏𑀚𑀸 𑀫𑀸𑀬𑀸 𑀚𑀦𑀺𑀓𑀸 𑀲𑀜𑁆𑀚𑀦𑀦𑀻 𑀲𑀺𑀩𑁆𑀩𑀺𑀦𑀻 [𑀲𑀺𑀩𑁆𑀩𑀦𑀻 (𑀲𑀻.)] 𑀚𑀸𑀮𑀺𑀦𑀻 𑀲𑀭𑀺𑀢𑀸 𑀯𑀺𑀲𑀢𑁆𑀢𑀺𑀓𑀸 𑀲𑀼𑀢𑁆𑀢𑀁 𑀯𑀺𑀲𑀝𑀸 𑀆𑀬𑀽𑀳𑀺𑀦𑀻 [𑀆𑀬𑀽𑀳𑀦𑀻 (𑀲𑀻. 𑀲𑁆𑀬𑀸.)] 𑀤𑀼𑀢𑀺𑀬𑀸 𑀧𑀡𑀺𑀥𑀺 𑀪𑀯𑀦𑁂𑀢𑁆𑀢𑀺 𑀯𑀦𑀁 𑀯𑀦𑀣𑁄 𑀲𑀦𑁆𑀣𑀯𑁄 𑀲𑀺𑀦𑁂𑀳𑁄 𑀅𑀧𑁂𑀓𑁆𑀔𑀸 𑀧𑀝𑀺𑀩𑀦𑁆𑀥𑀼 𑀆𑀲𑀸 𑀆𑀲𑀺𑀲𑀦𑀸 𑀆𑀲𑀺𑀲𑀺𑀢𑀢𑁆𑀢𑀁 [𑀆𑀲𑀺𑀁𑀲𑀦𑀸 𑀆𑀲𑀺𑀁𑀲𑀺𑀢𑀢𑁆𑀢𑀁 (𑀲𑀻. 𑀲𑁆𑀬𑀸.)] 𑀭𑀽𑀧𑀸𑀲𑀸 𑀲𑀤𑁆𑀤𑀸𑀲𑀸 𑀕𑀦𑁆𑀥𑀸𑀲𑀸 𑀭𑀲𑀸𑀲𑀸 𑀨𑁄𑀝𑁆𑀞𑀩𑁆𑀩𑀸𑀲𑀸 𑀮𑀸𑀪𑀸𑀲𑀸 𑀥𑀦𑀸𑀲𑀸 𑀧𑀼𑀢𑁆𑀢𑀸𑀲𑀸 𑀚𑀻𑀯𑀺𑀢𑀸𑀲𑀸 𑀚𑀧𑁆𑀧𑀸 𑀧𑀚𑀧𑁆𑀧𑀸 𑀅𑀪𑀺𑀚𑀧𑁆𑀧𑀸 𑀚𑀧𑁆𑀧𑀸 𑀚𑀧𑁆𑀧𑀦𑀸 𑀚𑀧𑁆𑀧𑀺𑀢𑀢𑁆𑀢𑀁 𑀮𑁄𑀮𑀼𑀧𑁆𑀧𑀁 𑀮𑁄𑀮𑀼𑀧𑁆𑀧𑀸𑀬𑀦𑀸 𑀮𑁄𑀮𑀼𑀧𑁆𑀧𑀸𑀬𑀺𑀢𑀢𑁆𑀢𑀁 𑀧𑀼𑀘𑁆𑀙𑀜𑁆𑀚𑀺𑀓𑀢𑀸 [𑀧𑀼𑀜𑁆𑀘𑀺𑀓𑀢𑀸 (𑀲𑁆𑀬𑀸.) 𑀧𑀼𑀘𑁆𑀙𑀺𑀓𑀢𑀸 (𑀲𑀻.)] 𑀲𑀸𑀥𑀼𑀓𑀫𑁆𑀬𑀢𑀸 𑀅𑀥𑀫𑁆𑀫𑀭𑀸𑀕𑁄 𑀯𑀺𑀲𑀫𑀮𑁄𑀪𑁄 𑀦𑀺𑀓𑀦𑁆𑀢𑀺 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸 𑀧𑀺𑀳𑀦𑀸 𑀲𑀫𑁆𑀧𑀢𑁆𑀣𑀦𑀸 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸 𑀦𑀺𑀭𑁄𑀥𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸 𑀑𑀖𑁄 𑀬𑁄𑀕𑁄 𑀕𑀦𑁆𑀣𑁄 𑀉𑀧𑀸𑀤𑀸𑀦𑀁 𑀆𑀯𑀭𑀡𑀁 𑀦𑀻𑀯𑀭𑀡𑀁 𑀙𑀸𑀤𑀦𑀁 𑀩𑀦𑁆𑀥𑀦𑀁 𑀉𑀧𑀓𑁆𑀓𑀺𑀮𑁂𑀲𑁄 𑀅𑀦𑀼𑀲𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀮𑀢𑀸 𑀯𑁂𑀯𑀺𑀘𑁆𑀙𑀁 𑀤𑀼𑀓𑁆𑀔𑀫𑀽𑀮𑀁 𑀤𑀼𑀓𑁆𑀔𑀦𑀺𑀤𑀸𑀦𑀁 𑀤𑀼𑀓𑁆𑀔𑀧𑁆𑀧𑀪𑀯𑁄 𑀫𑀸𑀭𑀧𑀸𑀲𑁄 𑀫𑀸𑀭𑀩𑀴𑀺𑀲𑀁 𑀫𑀸𑀭𑀯𑀺𑀲𑀬𑁄 𑀢𑀡𑁆𑀳𑀸𑀦𑀤𑀻 𑀢𑀡𑁆𑀳𑀸𑀚𑀸𑀮𑀁 𑀢𑀡𑁆𑀳𑀸𑀕𑀤𑁆𑀤𑀼𑀮𑀁 𑀢𑀡𑁆𑀳𑀸𑀲𑀫𑀼𑀤𑁆𑀤𑁄 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀪𑁄.

𑁧𑁦𑁬𑁬. 𑀢𑀢𑁆𑀣 𑀓𑀢𑀫𑁄 𑀤𑁄𑀲𑁄? 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀺. 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄.

𑁧𑁦𑁬𑁭. 𑀢𑀢𑁆𑀣 𑀓𑀢𑀫𑁄 𑀫𑁄𑀳𑁄? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁, 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀁𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀫𑁄𑀳𑁄.

𑀇𑀫𑁂 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽.

𑁧𑁦𑁬𑁮. 𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽? 𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀢𑁄 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑁋 𑀇𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽.

𑁧𑁦𑁬𑁯. 𑀢𑀢𑁆𑀣 𑀓𑀢𑀫𑁂 𑀦𑀯 𑀓𑀸𑀫𑀸𑀯𑀘𑀭𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽 𑁋 𑀇𑀫𑁂 𑀦𑀯 𑀓𑀸𑀫𑀸𑀯𑀘𑀭𑀳𑁂𑀢𑀽.

𑁧𑁦𑁭𑁦. 𑀢𑀢𑁆𑀣 𑀓𑀢𑀫𑁂 𑀙 𑀭𑀽𑀧𑀸𑀯𑀘𑀭𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽 𑁋 𑀇𑀫𑁂 𑀙 𑀭𑀽𑀧𑀸𑀯𑀘𑀭𑀳𑁂𑀢𑀽.

𑁧𑁦𑁭𑁧. 𑀢𑀢𑁆𑀣 𑀓𑀢𑀫𑁂 𑀙 𑀅𑀭𑀽𑀧𑀸𑀯𑀘𑀭𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽 𑁋 𑀇𑀫𑁂 𑀙 𑀅𑀭𑀽𑀧𑀸𑀯𑀘𑀭𑀳𑁂𑀢𑀽.

𑁧𑁦𑁭𑁨. 𑀢𑀢𑁆𑀣 𑀓𑀢𑀫𑁂 𑀙 𑀅𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽? 𑀢𑀬𑁄 𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽 𑁋 𑀇𑀫𑁂 𑀙 𑀅𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽.

𑁧𑁦𑁭𑁩. 𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽? 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄.

𑁧𑁦𑁭𑁪. 𑀢𑀢𑁆𑀣 𑀓𑀢𑀫𑁄 𑀅𑀮𑁄𑀪𑁄? 𑀬𑁄 𑀅𑀮𑁄𑀪𑁄 𑀅𑀮𑀼𑀩𑁆𑀪𑀦𑀸 𑀅𑀮𑀼𑀩𑁆𑀪𑀺𑀢𑀢𑁆𑀢𑀁 𑀅𑀲𑀸𑀭𑀸𑀕𑁄 𑀅𑀲𑀸𑀭𑀚𑁆𑀚𑀦𑀸 𑀅𑀲𑀸𑀭𑀚𑁆𑀚𑀺𑀢𑀢𑁆𑀢𑀁 𑀅𑀦𑀪𑀺𑀚𑁆𑀛𑀸 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀮𑁄𑀪𑁄.

𑁧𑁦𑁭𑁫. 𑀢𑀢𑁆𑀣 𑀓𑀢𑀫𑁄 𑀅𑀤𑁄𑀲𑁄? 𑀬𑁄 𑀅𑀤𑁄𑀲𑁄 𑀅𑀤𑀼𑀲𑁆𑀲𑀦𑀸 𑀅𑀤𑀼𑀲𑁆𑀲𑀺𑀢𑀢𑁆𑀢𑀁…𑀧𑁂… 𑀅𑀩𑁆𑀬𑀸𑀧𑀸𑀤𑁄 𑀅𑀩𑁆𑀬𑀸𑀧𑀚𑁆𑀚𑁄 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀤𑁄𑀲𑁄.

𑁧𑁦𑁭𑁬. 𑀢𑀢𑁆𑀣 𑀓𑀢𑀫𑁄 𑀅𑀫𑁄𑀳𑁄? 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁, 𑀬𑀸 𑀏𑀯𑀭𑀽𑀧𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀫𑁄𑀳𑁄.

𑀇𑀫𑁂 𑀢𑀬𑁄 𑀓𑀼𑀲𑀮𑀳𑁂𑀢𑀽.

𑁧𑁦𑁭𑁭. 𑀢𑀢𑁆𑀣 𑀓𑀢𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽? 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀢𑁄 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑁋 𑀇𑀫𑁂 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽. 𑀇𑀫𑁂 𑀙 𑀅𑀧𑀭𑀺𑀬𑀸𑀧𑀦𑁆𑀦𑀳𑁂𑀢𑀽 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀽.

𑁧𑁦𑁭𑁮. 𑀓𑀢𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽? 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸; 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽.

𑁧𑁦𑁭𑁯. 𑀓𑀢𑀫𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸.

𑁧𑁦𑁮𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸.

𑁧𑁦𑁮𑁧. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸.

𑁧𑁦𑁮𑁨. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸.

𑁧𑁦𑁮𑁩. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘? 𑀮𑁄𑀪𑁄 𑀫𑁄𑀳𑁂𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘, 𑀫𑁄𑀳𑁄 𑀮𑁄𑀪𑁂𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘, 𑀤𑁄𑀲𑁄 𑀫𑁄𑀳𑁂𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘, 𑀫𑁄𑀳𑁄 𑀤𑁄𑀲𑁂𑀦 𑀳𑁂𑀢𑀼 𑀘𑁂𑀯 𑀲𑀳𑁂𑀢𑀼𑀓𑁄 𑀘; 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀽 𑀘𑁂𑀯 𑀲𑀳𑁂𑀢𑀼𑀓𑀸 𑀘.

𑁧𑁦𑁮𑁪. 𑀓𑀢𑀫𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸 𑀘𑁂𑀯 𑀦 𑀘 𑀳𑁂𑀢𑀽.

𑁧𑁦𑁮𑁫. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘? 𑀮𑁄𑀪𑁄 𑀫𑁄𑀳𑁂𑀦 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀫𑁄𑀳𑁄 𑀮𑁄𑀪𑁂𑀦 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀤𑁄𑀲𑁄 𑀫𑁄𑀳𑁂𑀦 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀫𑁄𑀳𑁄 𑀤𑁄𑀲𑁂𑀦 𑀳𑁂𑀢𑀼 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑁄 𑀘; 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀽 𑀘𑁂𑀯 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘.

𑁧𑁦𑁮𑁬. 𑀓𑀢𑀫𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦 𑀘 𑀳𑁂𑀢𑀽? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦 𑀘 𑀳𑁂𑀢𑀽.

𑁧𑁦𑁮𑁭. 𑀓𑀢𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀲𑀳𑁂𑀢𑀼𑀓𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀲𑀳𑁂𑀢𑀼𑀓𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀲𑀳𑁂𑀢𑀼𑀓𑀸.

𑁧𑁦𑁮𑁮. 𑀓𑀢𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀅𑀳𑁂𑀢𑀼𑀓𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀅𑀳𑁂𑀢𑀼𑀓𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦 𑀳𑁂𑀢𑀽 𑀅𑀳𑁂𑀢𑀼𑀓𑀸.

𑀘𑀽𑀴𑀦𑁆𑀢𑀭𑀤𑀼𑀓𑀁

𑁧𑁦𑁮𑁯. 𑀓𑀢𑀫𑁂 𑀥𑀫𑁆𑀫𑀸 𑀲𑀧𑁆𑀧𑀘𑁆𑀘𑀬𑀸? 𑀧𑀜𑁆𑀘𑀓𑁆𑀔𑀦𑁆𑀥𑀸 𑁋 𑀭𑀽𑀧𑀓𑁆𑀔𑀦𑁆𑀥𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀧𑁆𑀧𑀘𑁆𑀘𑀬𑀸.

𑁧𑁦𑁯𑁦. 𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸? 𑀅𑀲𑀗𑁆𑀔𑀢𑀸 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀘𑁆𑀘𑀬𑀸.

𑁧𑁦𑁯𑁧. 𑀓𑀢𑀫𑁂 𑀥𑀫𑁆𑀫𑀸 𑀲𑀗𑁆𑀔𑀢𑀸? 𑀬𑁂𑀯 𑀢𑁂 𑀥𑀫𑁆𑀫𑀸 𑀲𑀧𑁆𑀧𑀘𑁆𑀘𑀬𑀸, 𑀢𑁂𑀯 𑀢𑁂 𑀥𑀫𑁆𑀫𑀸 𑀲𑀗𑁆𑀔𑀢𑀸.

𑁧𑁦𑁯𑁨. 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸? 𑀬𑁄 𑀏𑀯 𑀲𑁄 𑀥𑀫𑁆𑀫𑁄 𑀅𑀧𑁆𑀧𑀘𑁆𑀘𑀬𑁄, 𑀲𑁄 𑀏𑀯 𑀲𑁄 𑀥𑀫𑁆𑀫𑁄 𑀅𑀲𑀗𑁆𑀔𑀢𑁄.

𑁧𑁦𑁯𑁩. 𑀓𑀢𑀫𑁂 𑀥𑀫𑁆𑀫𑀸 𑀲𑀦𑀺𑀤𑀲𑁆𑀲𑀦𑀸? 𑀭𑀽𑀧𑀸𑀬𑀢𑀦𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀦𑀺𑀤𑀲𑁆𑀲𑀦𑀸.

𑁧𑁦𑁯𑁪. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀸? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀺𑀤𑀲𑁆𑀲𑀦𑀸.

𑁧𑁦𑁯𑁫. 𑀓𑀢𑀫𑁂 𑀥𑀫𑁆𑀫𑀸 𑀲𑀧𑁆𑀧𑀝𑀺𑀖𑀸? 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑁋 𑀇𑀫𑁂 𑀥𑀫𑁆𑀫𑀸 𑀲𑀧𑁆𑀧𑀝𑀺𑀖𑀸.

𑁧𑁦𑁯𑁬. 𑀓𑀢𑀫𑁂 𑀥𑀫𑁆𑀫𑀸 𑀅𑀧𑁆𑀧𑀝𑀺𑀖𑀸? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀬𑀜𑁆𑀘 𑀭𑀽𑀧𑀁 𑀅𑀦𑀺𑀤𑀲𑁆𑀲𑀦𑀁 𑀅𑀧𑁆𑀧𑀝𑀺𑀖𑀁 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀧𑁆𑀧𑀝𑀺𑀖𑀸.

𑁧𑁦𑁯𑁭. 𑀓𑀢𑀫𑁂 𑀥𑀫𑁆𑀫𑀸 𑀭𑀽𑀧𑀺𑀦𑁄? 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁 𑁋 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀺𑀦𑁄.

𑁧𑁦𑁯𑁮. 𑀓𑀢𑀫𑁂 𑀥𑀫𑁆𑀫𑀸 𑀅𑀭𑀽𑀧𑀺𑀦𑁄? 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀭𑀽𑀧𑀺𑀦𑁄.

𑁧𑁦𑁯𑁯. 𑀓𑀢𑀫𑁂 𑀥𑀫𑁆𑀫𑀸 𑀮𑁄𑀓𑀺𑀬𑀸? 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀮𑁄𑀓𑀺𑀬𑀸.

𑁧𑁧𑁦𑁦. 𑀓𑀢𑀫𑁂 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸.

𑁧𑁧𑁦𑁧. 𑀓𑀢𑀫𑁂 𑀥𑀫𑁆𑀫𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸? 𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸; 𑀬𑁂 𑀯𑀸 𑀧𑀦 𑀢𑁂 𑀥𑀫𑁆𑀫𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸. 𑀇𑀫𑁂 𑀥𑀫𑁆𑀫𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀸 𑀓𑁂𑀦𑀘𑀺 𑀦 𑀯𑀺𑀜𑁆𑀜𑁂𑀬𑁆𑀬𑀸.

𑀆𑀲𑀯𑀕𑁄𑀘𑁆𑀙𑀓𑀁

𑁧𑁧𑁦𑁨. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀸? 𑀘𑀢𑁆𑀢𑀸𑀭𑁄 𑀆𑀲𑀯𑀸 𑁋 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄.

𑁧𑁧𑁦𑁩. 𑀢𑀢𑁆𑀣 𑀓𑀢𑀫𑁄 𑀓𑀸𑀫𑀸𑀲𑀯𑁄? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀸𑀲𑀯𑁄.

𑁧𑁧𑁦𑁪. 𑀢𑀢𑁆𑀣 𑀓𑀢𑀫𑁄 𑀪𑀯𑀸𑀲𑀯𑁄? 𑀬𑁄 𑀪𑀯𑁂𑀲𑀼 𑀪𑀯𑀙𑀦𑁆𑀤𑁄 [𑀪𑀯𑀘𑁆𑀙𑀦𑁆𑀤𑁄 (𑀲𑀻. 𑀲𑁆𑀬𑀸.)] 𑀪𑀯𑀭𑀸𑀕𑁄 𑀪𑀯𑀦𑀦𑁆𑀤𑀻 𑀪𑀯𑀢𑀡𑁆𑀳𑀸 𑀪𑀯𑀲𑀺𑀦𑁂𑀳𑁄 𑀪𑀯𑀧𑀭𑀺𑀴𑀸𑀳𑁄 𑀪𑀯𑀫𑀼𑀘𑁆𑀙𑀸 𑀪𑀯𑀚𑁆𑀛𑁄𑀲𑀸𑀦𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀯𑀸𑀲𑀯𑁄.

𑁧𑁧𑁦𑁫. 𑀢𑀢𑁆𑀣 𑀓𑀢𑀫𑁄 𑀤𑀺𑀝𑁆𑀞𑀸𑀲𑀯𑁄? 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸; 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀸𑀲𑀯𑁄. 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄.

𑁧𑁧𑁦𑁬. 𑀢𑀢𑁆𑀣 𑀓𑀢𑀫𑁄 𑀅𑀯𑀺𑀚𑁆𑀚𑀸𑀲𑀯𑁄? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀅𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀅𑀜𑁆𑀜𑀸𑀡𑀁, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀁ः 𑀬𑀁 𑀏𑀯𑀭𑀽𑀧𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀦𑀪𑀺𑀲𑀫𑀬𑁄 𑀅𑀦𑀦𑀼𑀩𑁄𑀥𑁄 𑀅𑀲𑀫𑁆𑀩𑁄𑀥𑁄 𑀅𑀧𑁆𑀧𑀝𑀺𑀯𑁂𑀥𑁄 𑀅𑀲𑀁𑀕𑀸𑀳𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀅𑀲𑀫𑀧𑁂𑀓𑁆𑀔𑀦𑀸 𑀅𑀧𑀘𑁆𑀘𑀯𑁂𑀓𑁆𑀔𑀡𑀸 𑀅𑀧𑀘𑁆𑀘𑀓𑁆𑀔𑀓𑀫𑁆𑀫𑀁 𑀤𑀼𑀫𑁆𑀫𑁂𑀚𑁆𑀛𑀁 𑀩𑀸𑀮𑁆𑀬𑀁 𑀅𑀲𑀫𑁆𑀧𑀚𑀜𑁆𑀜𑀁 𑀫𑁄𑀳𑁄 𑀧𑀫𑁄𑀳𑁄 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸 𑀅𑀯𑀺𑀚𑁆𑀚𑁄𑀖𑁄 𑀅𑀯𑀺𑀚𑁆𑀚𑀸𑀬𑁄𑀕𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸𑀲𑀯𑁄.

𑀇𑀫𑁂 𑀥𑀫𑁆𑀫𑀸 𑀆𑀲𑀯𑀸.

𑁧𑁧𑁦𑁭. 𑀓𑀢𑀫𑁂 𑀥𑀫𑁆𑀫𑀸 𑀦𑁄 𑀆𑀲𑀯𑀸? 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀦𑁄 𑀆𑀲𑀯𑀸.

𑁧𑁧𑁦𑁮. 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀲𑀯𑀸? 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀸𑀲𑀯𑀸.

𑁧𑁧𑁦𑁯. 𑀓𑀢𑀫𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸.

𑁧𑁧𑁧𑁦. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸.

𑁧𑁧𑁧𑁧. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄; 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸.

𑁧𑁧𑁧𑁨. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘? 𑀢𑁂𑀬𑁂𑀯 𑀆𑀲𑀯𑀸 𑀆𑀲𑀯𑀸 𑀘𑁂𑀯 𑀲𑀸𑀲𑀯𑀸 𑀘.

𑁧𑁧𑁧𑁩. 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀸𑀲𑀯𑀸, 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸; 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀲𑀸𑀲𑀯𑀸 𑀘𑁂𑀯 𑀦𑁄 𑀘 𑀆𑀲𑀯𑀸.

𑁧𑁧𑁧𑁪. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘? 𑀓𑀸𑀫𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀅𑀯𑀺𑀚𑁆𑀚𑀸𑀲𑀯𑁄 𑀓𑀸𑀫𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀅𑀯𑀺𑀚𑁆𑀚𑀸𑀲𑀯𑁄 𑀪𑀯𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘, 𑀅𑀯𑀺𑀚𑁆𑀚𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁂𑀦 𑀆𑀲𑀯𑁄 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀘 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀸 𑀘𑁂𑀯 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘.

𑁧𑁧𑁧𑁫. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀸, 𑀢𑁂 𑀥𑀫𑁆𑀫𑁂 𑀞𑀧𑁂𑀢𑁆𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀘𑁂𑀯 𑀦𑁄 𑀘 𑀆𑀲𑀯𑀸.

𑁧𑁧𑁧𑁬. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸? 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀭𑀽𑀧𑀸𑀯𑀘𑀭𑀸, 𑀅𑀭𑀽𑀧𑀸𑀯𑀘𑀭𑀸, 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀲𑀸𑀲𑀯𑀸.

𑁧𑁧𑁧𑁭. 𑀓𑀢𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸? 𑀅𑀧𑀭𑀺𑀬𑀸𑀧𑀦𑁆𑀦𑀸 𑀫𑀕𑁆𑀕𑀸 𑀘, 𑀫𑀕𑁆𑀕𑀨𑀮𑀸𑀦𑀺 𑀘, 𑀅𑀲𑀗𑁆𑀔𑀢𑀸 𑀘 𑀥𑀸𑀢𑀼 𑁋 𑀇𑀫𑁂 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀦𑀸𑀲𑀯𑀸.

𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀧𑀞𑀫𑀪𑀸𑀡𑀯𑀸𑀭𑁄.

𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀁

𑁧𑁧𑁧𑁮. 𑀓𑀢𑀫𑁂 𑀥𑀫𑁆𑀫𑀸 𑀲𑀁𑀬𑁄𑀚𑀦𑀸? 𑀤𑀲 𑀲𑀁𑀬𑁄𑀚𑀦𑀸𑀦𑀺 𑁋 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀇𑀲𑁆𑀲𑀸𑀲𑀁𑀬𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁.

𑁧𑁧𑁧𑁯. 𑀢𑀢𑁆𑀣 𑀓𑀢𑀫𑀁 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑀺𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁.

𑁧𑁧𑁨𑁦. 𑀢𑀢𑁆𑀣 𑀓𑀢𑀫𑀁 𑀧𑀝𑀺𑀖𑀲𑀁𑀬𑁄𑀚𑀦𑀁? 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺…𑀧𑁂… 𑀅𑀢𑁆𑀣𑀁 𑀘𑀭𑀢𑀺…𑀧𑁂… 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀆𑀖𑀸𑀢𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀺. 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀝𑀺𑀖𑀲𑀁𑀬𑁄𑀚𑀦𑀁.

𑁧𑁧𑁨𑁧. 𑀢𑀢𑁆𑀣 𑀓𑀢𑀫𑀁 𑀫𑀸𑀦𑀲𑀁𑀬𑁄𑀚𑀦𑀁? 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑁄. 𑀬𑁄 𑀏𑀯𑀭𑀽𑀧𑁄 𑀫𑀸𑀦𑁄 𑀫𑀜𑁆𑀜𑀦𑀸 𑀫𑀜𑁆𑀜𑀺𑀢𑀢𑁆𑀢𑀁 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 [𑀉𑀡𑁆𑀡𑀢𑀺 𑀉𑀡𑁆𑀡𑀸𑀫𑁄 (𑀲𑁆𑀬𑀸.)] 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀸𑀦𑀲𑀁𑀬𑁄𑀚𑀦𑀁.