𑁧𑁩. 𑀦𑁂𑀲𑀚𑁆𑀚𑀺𑀓𑀗𑁆𑀕𑀓𑀣𑀸

𑁩𑁬. 𑀦𑁂𑀲𑀚𑁆𑀚𑀺𑀓𑀗𑁆𑀕𑀫𑁆𑀧𑀺 ‘‘𑀲𑁂𑀬𑁆𑀬𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀦𑁂𑀲𑀚𑁆𑀚𑀺𑀓𑁂𑀦 𑀭𑀢𑁆𑀢𑀺𑀬𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀏𑀓𑀁 𑀬𑀸𑀫𑀁 𑀉𑀝𑁆𑀞𑀸𑀬 𑀘𑀗𑁆𑀓𑀫𑀺𑀢𑀩𑁆𑀩𑀁. 𑀇𑀭𑀺𑀬𑀸𑀧𑀣𑁂𑀲𑀼 𑀳𑀺 𑀦𑀺𑀧𑀚𑁆𑀚𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺. 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀲𑁆𑀲 𑀦𑁂𑀯 𑀅𑀧𑀲𑁆𑀲𑁂𑀦𑀁, 𑀦 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸, 𑀦 𑀆𑀬𑁄𑀕𑀧𑀝𑁆𑀝𑁄 𑀯𑀝𑁆𑀝𑀢𑀺. 𑀫𑀚𑁆𑀛𑀺𑀫𑀲𑁆𑀲 𑀇𑀫𑁂𑀲𑀼 𑀢𑀻𑀲𑀼 𑀬𑀁𑀓𑀺𑀜𑁆𑀘𑀺 𑀯𑀝𑁆𑀝𑀢𑀺. 𑀫𑀼𑀤𑀼𑀓𑀲𑁆𑀲 𑀅𑀧𑀲𑁆𑀲𑁂𑀦𑀫𑁆𑀧𑀺 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸𑀧𑀺 𑀆𑀬𑁄𑀕𑀧𑀝𑁆𑀝𑁄𑀧𑀺 𑀩𑀺𑀩𑁆𑀩𑁄𑀳𑀦𑀫𑁆𑀧𑀺 𑀧𑀜𑁆𑀘𑀗𑁆𑀕𑁄𑀧𑀺 𑀲𑀢𑁆𑀢𑀗𑁆𑀕𑁄𑀧𑀺 𑀯𑀝𑁆𑀝𑀢𑀺. 𑀧𑀜𑁆𑀘𑀗𑁆𑀕𑁄 𑀧𑀦 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦 𑀲𑀤𑁆𑀥𑀺𑀁 𑀓𑀢𑁄. 𑀲𑀢𑁆𑀢𑀗𑁆𑀕𑁄 𑀦𑀸𑀫 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦 𑀘 𑀉𑀪𑀢𑁄𑀧𑀲𑁆𑀲𑁂𑀲𑀼 𑀅𑀧𑀲𑁆𑀲𑀬𑁂𑀳𑀺 𑀘 𑀲𑀤𑁆𑀥𑀺𑀁 𑀓𑀢𑁄. 𑀢𑀁 𑀓𑀺𑀭 𑀫𑀺𑀴𑀸𑀪𑀬𑀢𑁆𑀣𑁂𑀭𑀲𑁆𑀲 𑀅𑀓𑀁𑀲𑀼. 𑀣𑁂𑀭𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀲𑁂𑀬𑁆𑀬𑀁 𑀓𑀧𑁆𑀧𑀺𑀢𑀫𑀢𑁆𑀢𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, ‘‘𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀯𑀼𑀢𑁆𑀢𑀲𑁆𑀲 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑀲𑁆𑀲 𑀉𑀧𑀘𑁆𑀙𑁂𑀤𑀦𑀁, 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑀧𑁆𑀧𑀸𑀬𑀢𑀸, 𑀧𑀸𑀲𑀸𑀤𑀺𑀓𑀇𑀭𑀺𑀬𑀸𑀧𑀣𑀢𑀸, 𑀯𑀻𑀭𑀺𑀬𑀸𑀭𑀫𑁆𑀪𑀸𑀦𑀼𑀓𑀽𑀮𑀢𑀸, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀦𑁆𑀢𑀺.

𑀆𑀪𑀼𑀚𑀺𑀢𑁆𑀯𑀸𑀦 𑀧𑀮𑁆𑀮𑀗𑁆𑀓𑀁, 𑀧𑀡𑀺𑀥𑀸𑀬 𑀉𑀚𑀼𑀁 𑀢𑀦𑀼𑀁;

𑀦𑀺𑀲𑀻𑀤𑀦𑁆𑀢𑁄 𑀯𑀺𑀓𑀫𑁆𑀧𑁂𑀢𑀺, 𑀫𑀸𑀭𑀲𑁆𑀲 𑀳𑀤𑀬𑀁 𑀬𑀢𑀺.

𑀲𑁂𑀬𑁆𑀬𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁, 𑀳𑀺𑀢𑁆𑀯𑀸 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀦𑀺𑀲𑀚𑁆𑀚𑀸𑀪𑀺𑀭𑀢𑁄 𑀪𑀺𑀓𑁆𑀔𑀼, 𑀲𑁄𑀪𑀬𑀦𑁆𑀢𑁄 𑀢𑀧𑁄𑀯𑀦𑀁.

𑀦𑀺𑀭𑀸𑀫𑀺𑀲𑀁 𑀧𑀻𑀢𑀺𑀲𑀼𑀔𑀁, 𑀬𑀲𑁆𑀫𑀸 𑀲𑀫𑀥𑀺𑀕𑀘𑁆𑀙𑀢𑀺;

𑀢𑀲𑁆𑀫𑀸 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬, 𑀥𑀻𑀭𑁄 𑀦𑁂𑀲𑀚𑁆𑀚𑀺𑀓𑀁 𑀯𑀢𑀦𑁆𑀢𑀺.

𑀅𑀬𑀁 𑀦𑁂𑀲𑀚𑁆𑀚𑀺𑀓𑀗𑁆𑀕𑁂 𑀲𑀫𑀸𑀤𑀸𑀦 𑀯𑀺𑀥𑀸𑀦𑀧𑁆𑀧𑀪𑁂𑀤 𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑀥𑀼𑀢𑀗𑁆𑀕𑀧𑀓𑀺𑀡𑁆𑀡𑀓𑀓𑀣𑀸

𑁩𑁭. 𑀇𑀤𑀸𑀦𑀺 𑁋

𑀓𑀼𑀲𑀮𑀢𑁆𑀢𑀺𑀓𑀢𑁄 𑀘𑁂𑀯, 𑀥𑀼𑀢𑀸𑀤𑀻𑀦𑀁 𑀯𑀺𑀪𑀸𑀕𑀢𑁄;

𑀲𑀫𑀸𑀲𑀩𑁆𑀬𑀸𑀲𑀢𑁄 𑀘𑀸𑀧𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺. 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀲𑁂𑀦 𑀯𑀡𑁆𑀡𑀦𑀸 𑀳𑁄𑀢𑀺.

𑀢𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀢𑁄𑀢𑀺 𑀲𑀩𑁆𑀩𑀸𑀦𑁂𑀯 𑀳𑀺 𑀥𑀼𑀢𑀗𑁆𑀕𑀸𑀦𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀔𑀻𑀡𑀸𑀲𑀯𑀸𑀦𑀁 𑀯𑀲𑁂𑀦 𑀲𑀺𑀬𑀸 𑀓𑀼𑀲𑀮𑀸𑀦𑀺, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸𑀦𑀺, 𑀦𑀢𑁆𑀣𑀺 𑀥𑀼𑀢𑀗𑁆𑀕𑀁 𑀅𑀓𑀼𑀲𑀮𑀦𑁆𑀢𑀺.

𑀬𑁄 𑀧𑀦 𑀯𑀤𑁂𑀬𑁆𑀬 ‘‘𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀆𑀭𑀜𑁆𑀜𑀺𑀓𑁄 𑀳𑁄𑀢𑀻𑀢𑀺 𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁫.𑁧𑁮𑁧; 𑀧𑀭𑀺. 𑁩𑁨𑁫) 𑀅𑀓𑀼𑀲𑀮𑀫𑁆𑀧𑀺 𑀥𑀼𑀢𑀗𑁆𑀕’’𑀦𑁆𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 𑀦 𑀫𑀬𑀁 ‘‘𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀅𑀭𑀜𑁆𑀜𑁂 𑀦 𑀯𑀲𑀢𑀻’’𑀢𑀺 𑀯𑀤𑀸𑀫. 𑀬𑀲𑁆𑀲 𑀳𑀺 𑀅𑀭𑀜𑁆𑀜𑁂 𑀦𑀺𑀯𑀸𑀲𑁄, 𑀲𑁄 𑀆𑀭𑀜𑁆𑀜𑀺𑀓𑁄. 𑀲𑁄 𑀘 𑀧𑀸𑀧𑀺𑀘𑁆𑀙𑁄 𑀯𑀸 𑀪𑀯𑁂𑀬𑁆𑀬 𑀅𑀧𑁆𑀧𑀺𑀘𑁆𑀙𑁄 𑀯𑀸. 𑀇𑀫𑀸𑀦𑀺 𑀧𑀦 𑀢𑁂𑀦 𑀢𑁂𑀦 𑀲𑀫𑀸𑀤𑀸𑀦𑁂𑀦 𑀥𑀼𑀢𑀓𑀺𑀮𑁂𑀲𑀢𑁆𑀢𑀸 𑀥𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀺, 𑀓𑀺𑀮𑁂𑀲𑀥𑀼𑀦𑀦𑀢𑁄 𑀯𑀸 𑀥𑀼𑀢𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀜𑀸𑀡𑀁 𑀅𑀗𑁆𑀕𑀫𑁂𑀢𑁂𑀲𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀺. 𑀅𑀣 𑀯𑀸 𑀥𑀼𑀢𑀸𑀦𑀺 𑀘 𑀢𑀸𑀦𑀺 𑀧𑀝𑀺𑀧𑀓𑁆𑀔𑀦𑀺𑀤𑁆𑀥𑀼𑀦𑀦𑀢𑁄 𑀅𑀗𑁆𑀕𑀸𑀦𑀺 𑀘 𑀧𑀝𑀺𑀧𑀢𑁆𑀢𑀺𑀬𑀸𑀢𑀺𑀧𑀺 𑀥𑀼𑀢𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀦 𑀘 𑀅𑀓𑀼𑀲𑀮𑁂𑀦 𑀓𑁄𑀘𑀺 𑀥𑀼𑀢𑁄 𑀦𑀸𑀫 𑀳𑁄𑀢𑀺, 𑀬𑀲𑁆𑀲𑁂𑀢𑀸𑀦𑀺 𑀅𑀗𑁆𑀕𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀦 𑀘 𑀅𑀓𑀼𑀲𑀮𑀁 𑀓𑀺𑀜𑁆𑀘𑀺 𑀥𑀼𑀦𑀸𑀢𑀺, 𑀬𑁂𑀲𑀁 𑀢𑀁 𑀅𑀗𑁆𑀕𑀦𑁆𑀢𑀺𑀓𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁. 𑀦𑀸𑀧𑀺 𑀅𑀓𑀼𑀲𑀮𑀁 𑀘𑀻𑀯𑀭𑀮𑁄𑀮𑀼𑀧𑁆𑀧𑀸𑀤𑀻𑀦𑀺 𑀘𑁂𑀯 𑀦𑀺𑀤𑁆𑀥𑀼𑀦𑀸𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀘 𑀅𑀗𑁆𑀕𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑀺𑀤𑀁 ‘‘𑀦𑀢𑁆𑀣𑀺 𑀅𑀓𑀼𑀲𑀮𑀁 𑀥𑀼𑀢𑀗𑁆𑀕’’𑀦𑁆𑀢𑀺.

‘‘𑀬𑁂𑀲𑀫𑁆𑀧𑀺 𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀁 𑀥𑀼𑀢𑀗𑁆𑀕𑀁, 𑀢𑁂𑀲𑀁 𑀅𑀢𑁆𑀣𑀢𑁄 𑀥𑀼𑀢𑀗𑁆𑀕𑀫𑁂𑀯 𑀦𑀢𑁆𑀣𑀺. 𑀅𑀲𑀦𑁆𑀢𑀁 𑀓𑀲𑁆𑀲 𑀥𑀼𑀦𑀦𑀢𑁄 𑀥𑀼𑀢𑀗𑁆𑀕𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺 𑀯𑀘𑀦𑀯𑀺𑀭𑁄𑀥𑁄𑀧𑀺 𑀘 𑀦𑁂𑀲𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀅𑀬𑀁 𑀢𑀸𑀯 𑀓𑀼𑀲𑀮𑀢𑁆𑀢𑀺𑀓𑀢𑁄 𑀯𑀡𑁆𑀡𑀦𑀸.

𑀥𑀼𑀢𑀸𑀤𑀻𑀦𑀁 𑀯𑀺𑀪𑀸𑀕𑀢𑁄𑀢𑀺 𑀥𑀼𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀼𑀢𑀯𑀸𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀼𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀲𑁆𑀲 𑀥𑀼𑀢𑀗𑁆𑀕𑀲𑁂𑀯𑀦𑀸 𑀲𑀧𑁆𑀧𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀥𑀼𑀢𑁄𑀢𑀺 𑀥𑀼𑀢𑀓𑀺𑀮𑁂𑀲𑁄 𑀯𑀸 𑀧𑀼𑀕𑁆𑀕𑀮𑁄 𑀓𑀺𑀮𑁂𑀲𑀥𑀼𑀦𑀦𑁄 𑀯𑀸 𑀥𑀫𑁆𑀫𑁄.

𑀥𑀼𑀢𑀯𑀸𑀤𑁄𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀣𑀺 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄, 𑀅𑀢𑁆𑀣𑀺 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘.

𑀢𑀢𑁆𑀣 𑀬𑁄 𑀥𑀼𑀢𑀗𑁆𑀕𑁂𑀦 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂 𑀥𑀼𑀦𑀺, 𑀧𑀭𑀁 𑀧𑀦 𑀥𑀼𑀢𑀗𑁆𑀕𑁂𑀦 𑀦 𑀑𑀯𑀤𑀢𑀺, 𑀦𑀸𑀦𑀼𑀲𑀸𑀲𑀢𑀺 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄. 𑀬𑀣𑀸𑀳, ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀧𑀦 𑀦 𑀥𑀼𑀢𑀗𑁆𑀕𑁂𑀦 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂 𑀥𑀼𑀦𑀺, 𑀓𑁂𑀯𑀮𑀁 𑀅𑀜𑁆𑀜𑁂 𑀥𑀼𑀢𑀗𑁆𑀕𑁂𑀦 𑀑𑀯𑀤𑀢𑀺 𑀅𑀦𑀼𑀲𑀸𑀲𑀢𑀺 𑀉𑀧𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬, 𑀅𑀬𑀁 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄. 𑀬𑀣𑀸𑀳, ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀦 𑀥𑀼𑀢𑁄 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀉𑀪𑀬𑀯𑀺𑀧𑀦𑁆𑀦𑁄 𑀮𑀸𑀴𑀼𑀤𑀸𑀬𑀻 𑀯𑀺𑀬, 𑀅𑀬𑀁 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄. 𑀬𑀣𑀸𑀳, ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀮𑀸𑀴𑀼𑀤𑀸𑀬𑀻 𑀦𑁂𑀯 𑀥𑀼𑀢𑁄 𑀦 𑀥𑀼𑀢𑀯𑀸𑀤𑁄’’𑀢𑀺. 𑀬𑁄 𑀧𑀦 𑀉𑀪𑀬𑀲𑀫𑁆𑀧𑀦𑁆𑀦𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀯𑀺𑀬, 𑀅𑀬𑀁 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘. 𑀬𑀣𑀸𑀳, ‘‘𑀢𑀬𑀺𑀤𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀥𑀼𑀢𑁄 𑀘𑁂𑀯 𑀥𑀼𑀢𑀯𑀸𑀤𑁄 𑀘𑀸𑀢𑀺.

𑀥𑀼𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸, 𑀲𑀦𑁆𑀢𑀼𑀝𑁆𑀞𑀺𑀢𑀸, 𑀲𑀮𑁆𑀮𑁂𑀔𑀢𑀸, 𑀧𑀯𑀺𑀯𑁂𑀓𑀢𑀸, 𑀇𑀤𑀫𑀢𑁆𑀣𑀺𑀢𑀸𑀢𑀺 𑀇𑀫𑁂 𑀥𑀼𑀢𑀗𑁆𑀕𑀘𑁂𑀢𑀦𑀸𑀬 𑀧𑀭𑀺𑀯𑀸𑀭𑀓𑀸 𑀧𑀜𑁆𑀘 𑀥𑀫𑁆𑀫𑀸 ‘‘𑀅𑀧𑁆𑀧𑀺𑀘𑁆𑀙𑀢𑀁𑀬𑁂𑀯 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁫.𑁧𑁮𑁧; 𑀧𑀭𑀺. 𑁩𑁨𑁫) 𑀥𑀼𑀢𑀥𑀫𑁆𑀫𑀸 𑀦𑀸𑀫, 𑀢𑀢𑁆𑀣 𑀅𑀧𑁆𑀧𑀺𑀘𑁆𑀙𑀢𑀸 𑀘 𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀅𑀮𑁄𑀪𑁄. 𑀲𑀮𑁆𑀮𑁂𑀔𑀢𑀸 𑀘 𑀧𑀯𑀺𑀯𑁂𑀓𑀢𑀸 𑀘 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀢𑀦𑁆𑀢𑀺 𑀅𑀮𑁄𑀪𑁂 𑀘 𑀅𑀫𑁄𑀳𑁂 𑀘. 𑀇𑀤𑀫𑀢𑁆𑀣𑀺𑀢𑀸 𑀜𑀸𑀡𑀫𑁂𑀯. 𑀢𑀢𑁆𑀣 𑀘 𑀅𑀮𑁄𑀪𑁂𑀦 𑀧𑀝𑀺𑀓𑁆𑀔𑁂𑀧𑀯𑀢𑁆𑀣𑀽𑀲𑀼 𑀮𑁄𑀪𑀁, 𑀅𑀫𑁄𑀳𑁂𑀦 𑀢𑁂𑀲𑁆𑀯𑁂𑀯 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀓𑀁 𑀫𑁄𑀳𑀁 𑀥𑀼𑀦𑀸𑀢𑀺. 𑀅𑀮𑁄𑀪𑁂𑀦 𑀘 𑀅𑀦𑀼𑀜𑁆𑀜𑀸𑀢𑀸𑀦𑀁 𑀧𑀝𑀺𑀲𑁂𑀯𑀦𑀫𑀼𑀔𑁂𑀦 𑀧𑀯𑀢𑁆𑀢𑀁 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀁, 𑀅𑀫𑁄𑀳𑁂𑀦 𑀥𑀼𑀢𑀗𑁆𑀕𑁂𑀲𑀼 𑀅𑀢𑀺𑀲𑀮𑁆𑀮𑁂𑀔𑀫𑀼𑀔𑁂𑀦 𑀧𑀯𑀢𑁆𑀢𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀥𑀼𑀦𑀸𑀢𑀺. 𑀢𑀲𑁆𑀫𑀸 𑀇𑀫𑁂 𑀥𑀫𑁆𑀫𑀸 𑀥𑀼𑀢𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁…𑀧𑁂… 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺. 𑀢𑀸𑀦𑀺 𑀅𑀢𑁆𑀣𑀢𑁄 𑀮𑀓𑁆𑀔𑀡𑀸𑀤𑀻𑀳𑀺 𑀘 𑀯𑀼𑀢𑁆𑀢𑀸𑀦𑁂𑀯.

𑀓𑀲𑁆𑀲 𑀥𑀼𑀢𑀗𑁆𑀕𑀲𑁂𑀯𑀦𑀸 𑀲𑀧𑁆𑀧𑀸𑀬𑀸𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀘𑁂𑀯 𑀫𑁄𑀳𑀘𑀭𑀺𑀢𑀲𑁆𑀲 𑀘. 𑀓𑀲𑁆𑀫𑀸? 𑀥𑀼𑀢𑀗𑁆𑀕𑀲𑁂𑀯𑀦𑀸 𑀳𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀸 𑀘𑁂𑀯 𑀲𑀮𑁆𑀮𑁂𑀔𑀯𑀺𑀳𑀸𑀭𑁄 𑀘. 𑀤𑀼𑀓𑁆𑀔𑀸𑀧𑀝𑀺𑀧𑀤𑀜𑁆𑀘 𑀦𑀺𑀲𑁆𑀲𑀸𑀬 𑀭𑀸𑀕𑁄 𑀯𑀽𑀧𑀲𑀫𑁆𑀫𑀢𑀺. 𑀲𑀮𑁆𑀮𑁂𑀔𑀁 𑀦𑀺𑀲𑁆𑀲𑀸𑀬 𑀅𑀧𑁆𑀧𑀫𑀢𑁆𑀢𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀺. 𑀆𑀭𑀜𑁆𑀜𑀺𑀓𑀗𑁆𑀕𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀧𑀝𑀺𑀲𑁂𑀯𑀦𑀸 𑀯𑀸 𑀏𑀢𑁆𑀣 𑀤𑁄𑀲𑀘𑀭𑀺𑀢𑀲𑁆𑀲𑀸𑀧𑀺 𑀲𑀧𑁆𑀧𑀸𑀬𑀸. 𑀢𑀢𑁆𑀣 𑀳𑀺𑀲𑁆𑀲 𑀅𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑀲𑁆𑀲 𑀯𑀺𑀳𑀭𑀢𑁄 𑀤𑁄𑀲𑁄𑀧𑀺 𑀯𑀽𑀧𑀲𑀫𑁆𑀫𑀢𑀻𑀢𑀺 𑀅𑀬𑀁 𑀥𑀼𑀢𑀸𑀤𑀻𑀦𑀁 𑀯𑀺𑀪𑀸𑀕𑀢𑁄 𑀯𑀡𑁆𑀡𑀦𑀸.

𑀲𑀫𑀸𑀲𑀩𑁆𑀬𑀸𑀲𑀢𑁄𑀢𑀺 𑀇𑀫𑀸𑀦𑀺 𑀧𑀦 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀲𑀢𑁄 𑀢𑀻𑀡𑀺 𑀲𑀻𑀲𑀗𑁆𑀕𑀸𑀦𑀺, 𑀧𑀜𑁆𑀘 𑀅𑀲𑀫𑁆𑀪𑀺𑀦𑁆𑀦𑀗𑁆𑀕𑀸𑀦𑀻𑀢𑀺 𑀅𑀝𑁆𑀞𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀏𑀓𑀸𑀲𑀦𑀺𑀓𑀗𑁆𑀕𑀁, 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀻𑀲𑀗𑁆𑀕𑀸𑀦𑀺. 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀜𑁆𑀳𑀺 𑀭𑀓𑁆𑀔𑀦𑁆𑀢𑁄 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀫𑁆𑀧𑀺 𑀭𑀓𑁆𑀔𑀺𑀲𑁆𑀲𑀢𑀺. 𑀏𑀓𑀸𑀲𑀦𑀺𑀓𑀗𑁆𑀕𑀜𑁆𑀘 𑀭𑀓𑁆𑀔𑀢𑁄 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀸𑀦𑀺𑀧𑀺 𑀲𑀼𑀭𑀓𑁆𑀔𑀦𑀻𑀬𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁 𑀭𑀓𑁆𑀔𑀦𑁆𑀢𑀲𑁆𑀲 𑀓𑀺𑀁 𑀅𑀢𑁆𑀣𑀺 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑁂𑀲𑀼 𑀭𑀓𑁆𑀔𑀺𑀢𑀩𑁆𑀩𑀁 𑀦𑀸𑀫. 𑀇𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀻𑀲𑀗𑁆𑀕𑀸𑀦𑀺, 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀁, 𑀲𑁄𑀲𑀸𑀦𑀺𑀓𑀗𑁆𑀕𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀅𑀲𑀫𑁆𑀪𑀺𑀦𑁆𑀦𑀗𑁆𑀕𑀸𑀦𑀺 𑀘𑀸𑀢𑀺 𑀅𑀝𑁆𑀞𑁂𑀯 𑀳𑁄𑀦𑁆𑀢𑀺.

𑀧𑀼𑀦 𑀤𑁆𑀯𑁂 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺, 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺, 𑀧𑀜𑁆𑀘 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺, 𑀏𑀓𑀁 𑀯𑀻𑀭𑀺𑀬𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀯𑀻𑀭𑀺𑀬𑀧𑀝𑀺𑀲𑀁𑀬𑀼𑀢𑁆𑀢𑀁. 𑀇𑀢𑀭𑀸𑀦𑀺 𑀧𑀸𑀓𑀝𑀸𑀦𑁂𑀯.

𑀧𑀼𑀦 𑀲𑀩𑁆𑀩𑀸𑀦𑁂𑀯 𑀦𑀺𑀲𑁆𑀲𑀬𑀯𑀲𑁂𑀦 𑀤𑁆𑀯𑁂 𑀳𑁄𑀦𑁆𑀢𑀺 𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀸𑀦𑀺 𑀤𑁆𑀯𑀸𑀤𑀲, 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀁 𑀏𑀓𑀦𑁆𑀢𑀺. 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀯𑀲𑁂𑀦𑀧𑀺 𑀤𑁆𑀯𑁂𑀬𑁂𑀯 𑀳𑁄𑀦𑁆𑀢𑀺. 𑀬𑀲𑁆𑀲 𑀳𑀺 𑀥𑀼𑀢𑀗𑁆𑀕𑀁 𑀲𑁂𑀯𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑀢𑀺, 𑀢𑁂𑀦 𑀲𑁂𑀯𑀺𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀲𑁂𑀯𑀢𑁄 𑀳𑀸𑀬𑀢𑀺, 𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸𑀦𑀺. 𑀬𑀲𑁆𑀲 𑀧𑀦 𑀲𑁂𑀯𑀢𑁄𑀧𑀺 𑀅𑀲𑁂𑀯𑀢𑁄𑀧𑀺 𑀯𑀟𑁆𑀠𑀢𑁂𑀯, 𑀦 𑀳𑀸𑀬𑀢𑀺, 𑀢𑁂𑀦𑀸𑀧𑀺 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑁂𑀦 𑀲𑁂𑀯𑀺𑀢𑀩𑁆𑀩𑀸𑀦𑀺. 𑀬𑀲𑁆𑀲𑀸𑀧𑀺 𑀲𑁂𑀯𑀢𑁄𑀧𑀺 𑀅𑀲𑁂𑀯𑀢𑁄𑀧𑀺 𑀦 𑀯𑀟𑁆𑀠𑀢𑀺, 𑀢𑁂𑀦𑀸𑀧𑀺 𑀲𑁂𑀯𑀺𑀢𑀩𑁆𑀩𑀸𑀦𑀺𑀬𑁂𑀯 𑀆𑀬𑀢𑀺𑀁 𑀯𑀸𑀲𑀦𑀢𑁆𑀣𑀸𑀬𑀸𑀢𑀺.

𑀏𑀯𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀯𑀲𑁂𑀦 𑀤𑀼𑀯𑀺𑀥𑀸𑀦𑀺𑀧𑀺 𑀲𑀩𑁆𑀩𑀸𑀦𑁂𑀯 𑀘𑁂𑀢𑀦𑀸𑀯𑀲𑁂𑀦 𑀏𑀓𑀯𑀺𑀥𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀫𑁂𑀯 𑀳𑀺 𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀦𑀘𑁂𑀢𑀦𑀸𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀬𑀸 𑀘𑁂𑀢𑀦𑀸, 𑀢𑀁 𑀥𑀼𑀢𑀗𑁆𑀕𑀦𑁆𑀢𑀺 𑀯𑀤𑀦𑁆𑀢𑀻’’𑀢𑀺.

𑀩𑁆𑀬𑀸𑀲𑀢𑁄 𑀧𑀦 𑀪𑀺𑀓𑁆𑀔𑀽𑀦𑀁 𑀢𑁂𑀭𑀲, 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞, 𑀲𑀸𑀫𑀡𑁂𑀭𑀸𑀦𑀁 𑀤𑁆𑀯𑀸𑀤𑀲, 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀁 𑀲𑀢𑁆𑀢, 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀤𑁆𑀯𑁂𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀲𑀘𑁂 𑀧𑀦 𑀅𑀩𑁆𑀪𑁄𑀓𑀸𑀲𑁂 𑀆𑀭𑀜𑁆𑀜𑀺𑀓𑀗𑁆𑀕𑀲𑀫𑁆𑀧𑀦𑁆𑀦𑀁 𑀲𑀼𑀲𑀸𑀦𑀁 𑀳𑁄𑀢𑀺, 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀏𑀓𑀧𑁆𑀧𑀳𑀸𑀭𑁂𑀦 𑀲𑀩𑁆𑀩𑀥𑀼𑀢𑀗𑁆𑀕𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀧𑀦 𑀆𑀭𑀜𑁆𑀜𑀺𑀓𑀗𑁆𑀕𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀜𑁆𑀘 𑀤𑁆𑀯𑁂𑀧𑀺 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺, 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁, 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁, 𑀲𑁄𑀲𑀸𑀦𑀺𑀓𑀗𑁆𑀕𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀤𑀼𑀧𑁆𑀧𑀭𑀺𑀳𑀸𑀭𑀸𑀦𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀳𑀺 𑀤𑀼𑀢𑀺𑀬𑀺𑀓𑀁 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀭𑀽𑀧𑁂 𑀘 𑀞𑀸𑀦𑁂 𑀲𑀫𑀸𑀦𑀘𑁆𑀙𑀦𑁆𑀤𑀸 𑀤𑀼𑀢𑀺𑀬𑀺𑀓𑀸 𑀤𑀼𑀮𑁆𑀮𑀪𑀸. 𑀲𑀘𑁂𑀧𑀺 𑀮𑀪𑁂𑀬𑁆𑀬 𑀲𑀁𑀲𑀝𑁆𑀞𑀯𑀺𑀳𑀸𑀭𑀢𑁄 𑀦 𑀫𑀼𑀘𑁆𑀘𑁂𑀬𑁆𑀬. 𑀏𑀯𑀁 𑀲𑀢𑀺 𑀬𑀲𑁆𑀲𑀢𑁆𑀣𑀸𑀬 𑀥𑀼𑀢𑀗𑁆𑀕𑀁 𑀲𑁂𑀯𑁂𑀬𑁆𑀬, 𑀲𑁆𑀯𑁂𑀯𑀲𑁆𑀲𑀸 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬. 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀜𑁆𑀘 𑀳𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞𑁂𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀦 𑀞𑀧𑁂𑀢𑁆𑀯𑀸 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀲𑁂𑀲𑀸𑀦𑀺 𑀤𑁆𑀯𑀸𑀤𑀲 𑀲𑀸𑀫𑀡𑁂𑀭𑀸𑀦𑀁, 𑀲𑀢𑁆𑀢 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀻𑀦𑀁 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀦𑀁 𑀧𑀦 𑀏𑀓𑀸𑀲𑀦𑀺𑀓𑀗𑁆𑀕𑀁, 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀧𑀢𑀺𑀭𑀽𑀧𑀸𑀦𑀺 𑀘𑁂𑀯 𑀲𑀓𑁆𑀓𑀸 𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀤𑁆𑀯𑁂 𑀥𑀼𑀢𑀗𑁆𑀕𑀸𑀦𑀻𑀢𑀺 𑀏𑀯𑀁 𑀩𑁆𑀬𑀸𑀲𑀢𑁄 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀲𑀫𑀸𑀲𑀩𑁆𑀬𑀸𑀲𑀢𑁄 𑀯𑀡𑁆𑀡𑀦𑀸.

𑀏𑀢𑁆𑀢𑀸𑀯𑀢𑀸 𑀘 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀫𑀼𑀔𑁂𑀦 𑀤𑁂𑀲𑀺𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀬𑁂𑀳𑀺 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀲𑀻𑀮𑀲𑁆𑀲 𑀯𑁄𑀤𑀸𑀦𑀁 𑀳𑁄𑀢𑀺, 𑀢𑁂𑀲𑀁 𑀲𑀫𑁆𑀧𑀸𑀤𑀦𑀢𑁆𑀣𑀁 𑀲𑀫𑀸𑀤𑀸𑀢𑀩𑁆𑀩𑀥𑀼𑀢𑀗𑁆𑀕𑀓𑀣𑀸 𑀪𑀸𑀲𑀺𑀢𑀸 𑀳𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁄 𑀦𑀸𑀫 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.