𑁩. 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀦𑀺𑀤𑁆𑀤𑁂𑀲𑁄

𑁩𑁮. 𑀇𑀤𑀸𑀦𑀺 𑀬𑀲𑁆𑀫𑀸 𑀏𑀯𑀁 𑀥𑀼𑀢𑀗𑁆𑀕𑀧𑀭𑀺𑀳𑀭𑀡𑀲𑀫𑁆𑀧𑀸𑀤𑀺𑀢𑁂𑀳𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀭𑀺𑀬𑁄𑀤𑀸𑀢𑁂 𑀇𑀫𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀲𑀻𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀲𑀫𑀸𑀥𑀺 𑀪𑀸𑀯𑁂𑀢𑀩𑁆𑀩𑁄. 𑀲𑁄 𑀘 𑀅𑀢𑀺𑀲𑀗𑁆𑀔𑁂𑀧𑀤𑁂𑀲𑀺𑀢𑀢𑁆𑀢𑀸 𑀯𑀺𑀜𑁆𑀜𑀸𑀢𑀼𑀫𑁆𑀧𑀺 𑀢𑀸𑀯 𑀦 𑀲𑀼𑀓𑀭𑁄, 𑀧𑀕𑁂𑀯 𑀪𑀸𑀯𑁂𑀢𑀼𑀁, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀢𑁆𑀣𑀸𑀭𑀜𑁆𑀘 𑀪𑀸𑀯𑀦𑀸𑀦𑀬𑀜𑁆𑀘 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑀳𑁄𑀢𑀺.

𑀓𑁄 𑀲𑀫𑀸𑀥𑀺? 𑀓𑁂𑀦𑀝𑁆𑀞𑁂𑀦 𑀲𑀫𑀸𑀥𑀺? 𑀓𑀸𑀦𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺? 𑀓𑀢𑀺𑀯𑀺𑀥𑁄 𑀲𑀫𑀸𑀥𑀺? 𑀓𑁄 𑀘𑀲𑁆𑀲 𑀲𑀁𑀓𑀺𑀮𑁂𑀲𑁄? 𑀓𑀺𑀁 𑀯𑁄𑀤𑀸𑀦𑀁? 𑀓𑀣𑀁 𑀪𑀸𑀯𑁂𑀢𑀩𑁆𑀩𑁄? 𑀲𑀫𑀸𑀥𑀺𑀪𑀸𑀯𑀦𑀸𑀬 𑀓𑁄 𑀆𑀦𑀺𑀲𑀁𑀲𑁄𑀢𑀺?

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀓𑁄 𑀲𑀫𑀸𑀥𑀻𑀢𑀺 𑀲𑀫𑀸𑀥𑀺 𑀩𑀳𑀼𑀯𑀺𑀥𑁄 𑀦𑀸𑀦𑀧𑁆𑀧𑀓𑀸𑀭𑀓𑁄. 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑀬𑀺𑀢𑀼𑀁 𑀆𑀭𑀩𑁆𑀪𑀫𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀅𑀥𑀺𑀧𑁆𑀧𑁂𑀢𑀜𑁆𑀘𑁂𑀯 𑀅𑀢𑁆𑀣𑀁 𑀦 𑀲𑀸𑀥𑁂𑀬𑁆𑀬, 𑀉𑀢𑁆𑀢𑀭𑀺 𑀘 𑀯𑀺𑀓𑁆𑀔𑁂𑀧𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀸𑀫, 𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺.

𑀓𑁂𑀦𑀝𑁆𑀞𑁂𑀦 𑀲𑀫𑀸𑀥𑀻𑀢𑀺 𑀲𑀫𑀸𑀥𑀸𑀦𑀝𑁆𑀞𑁂𑀦 𑀲𑀫𑀸𑀥𑀺. 𑀓𑀺𑀫𑀺𑀤𑀁 𑀲𑀫𑀸𑀥𑀸𑀦𑀁 𑀦𑀸𑀫? 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀫𑀁 𑀲𑀫𑁆𑀫𑀸 𑀘 𑀆𑀥𑀸𑀦𑀁, 𑀞𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀫𑀁 𑀲𑀫𑁆𑀫𑀸 𑀘 𑀅𑀯𑀺𑀓𑁆𑀔𑀺𑀧𑀫𑀸𑀦𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀸 𑀘 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀇𑀤𑀁 𑀲𑀫𑀸𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀦𑀲𑁆𑀲 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀲𑀫𑀸𑀥𑀺, 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑀭𑀲𑁄, 𑀅𑀯𑀺𑀓𑀫𑁆𑀧𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄. ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 𑀯𑀘𑀦𑀢𑁄 𑀧𑀦 𑀲𑀼𑀔𑀫𑀲𑁆𑀲 𑀧𑀤𑀝𑁆𑀞𑀸𑀦𑀁.

𑁩𑁯. 𑀓𑀢𑀺𑀯𑀺𑀥𑁄 𑀲𑀫𑀸𑀥𑀻𑀢𑀺 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁂𑀦 𑀢𑀸𑀯 𑀏𑀓𑀯𑀺𑀥𑁄. 𑀉𑀧𑀘𑀸𑀭𑀅𑀧𑁆𑀧𑀦𑀸𑀯𑀲𑁂𑀦 𑀤𑀼𑀯𑀺𑀥𑁄, 𑀢𑀣𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀲𑀧𑁆𑀧𑀻𑀢𑀺𑀓𑀦𑀺𑀧𑁆𑀧𑀻𑀢𑀺𑀓𑀯𑀲𑁂𑀦 𑀲𑀼𑀔𑀲𑀳𑀕𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀲𑁂𑀦 𑀘. 𑀢𑀺𑀯𑀺𑀥𑁄 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦, 𑀢𑀣𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀯𑀲𑁂𑀦 𑀧𑀻𑀢𑀺𑀲𑀳𑀕𑀢𑀸𑀤𑀺𑀯𑀲𑁂𑀦 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀯𑀲𑁂𑀦 𑀘. 𑀘𑀢𑀼𑀩𑁆𑀩𑀺𑀥𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀺𑀯𑀲𑁂𑀦, 𑀢𑀣𑀸 𑀧𑀭𑀺𑀢𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀘𑀢𑀼𑀛𑀸𑀦𑀗𑁆𑀕𑀯𑀲𑁂𑀦 𑀳𑀸𑀦𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀅𑀥𑀺𑀧𑀢𑀺𑀯𑀲𑁂𑀦 𑀘. 𑀧𑀜𑁆𑀘𑀯𑀺𑀥𑁄 𑀧𑀜𑁆𑀘𑀓𑀦𑀬𑁂 𑀧𑀜𑁆𑀘𑀛𑀸𑀦𑀗𑁆𑀕𑀯𑀲𑁂𑀦𑀸𑀢𑀺.

𑀲𑀫𑀸𑀥𑀺𑀏𑀓𑀓𑀤𑀼𑀓𑀯𑀡𑁆𑀡𑀦𑀸

𑀢𑀢𑁆𑀣 𑀏𑀓𑀯𑀺𑀥𑀓𑁄𑀝𑁆𑀞𑀸𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. 𑀤𑀼𑀯𑀺𑀥𑀓𑁄𑀝𑁆𑀞𑀸𑀲𑁂 𑀙𑀦𑁆𑀦𑀁 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀁 𑀫𑀭𑀡𑀲𑁆𑀲𑀢𑀺𑀬𑀸 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀬 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀲𑁆𑀲𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀮𑀤𑁆𑀥𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀬𑀸 𑀘 𑀅𑀧𑁆𑀧𑀦𑀸𑀲𑀫𑀸𑀥𑀻𑀦𑀁 𑀧𑀼𑀩𑁆𑀩𑀪𑀸𑀕𑁂 𑀏𑀓𑀕𑁆𑀕𑀢𑀸, 𑀅𑀬𑀁 𑀉𑀧𑀘𑀸𑀭𑀲𑀫𑀸𑀥𑀺. ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀆𑀤𑀺𑀯𑀘𑀦𑀢𑁄 𑀧𑀦 𑀬𑀸 𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑀸 𑀏𑀓𑀕𑁆𑀕𑀢𑀸, 𑀅𑀬𑀁 𑀅𑀧𑁆𑀧𑀦𑀸𑀲𑀫𑀸𑀥𑀻𑀢𑀺 𑀏𑀯𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀤𑀼𑀯𑀺𑀥𑁄.

𑀤𑀼𑀢𑀺𑀬𑀤𑀼𑀓𑁂 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀮𑁄𑀓𑀺𑀬𑁄 𑀲𑀫𑀸𑀥𑀺. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀕𑁆𑀕𑀢𑀸 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀻𑀢𑀺 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄.

𑀢𑀢𑀺𑀬𑀤𑀼𑀓𑁂 𑀘𑀢𑀼𑀓𑁆𑀓𑀦𑀬𑁂 𑀤𑁆𑀯𑀻𑀲𑀼 𑀧𑀜𑁆𑀘𑀓𑀦𑀬𑁂 𑀢𑀻𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸 𑀲𑀧𑁆𑀧𑀻𑀢𑀺𑀓𑁄 𑀲𑀫𑀸𑀥𑀺. 𑀅𑀯𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸 𑀦𑀺𑀧𑁆𑀧𑀻𑀢𑀺𑀓𑁄 𑀲𑀫𑀸𑀥𑀺. 𑀉𑀧𑀘𑀸𑀭𑀲𑀫𑀸𑀥𑀺 𑀧𑀦 𑀲𑀺𑀬𑀸 𑀲𑀧𑁆𑀧𑀻𑀢𑀺𑀓𑁄, 𑀲𑀺𑀬𑀸 𑀦𑀺𑀧𑁆𑀧𑀻𑀢𑀺𑀓𑁄𑀢𑀺 𑀏𑀯𑀁 𑀲𑀧𑁆𑀧𑀻𑀢𑀺𑀓𑀦𑀺𑀧𑁆𑀧𑀻𑀢𑀺𑀓𑀯𑀲𑁂𑀦 𑀤𑀼𑀯𑀺𑀥𑁄.

𑀘𑀢𑀼𑀢𑁆𑀣𑀤𑀼𑀓𑁂 𑀘𑀢𑀼𑀓𑁆𑀓𑀦𑀬𑁂 𑀢𑀻𑀲𑀼 𑀧𑀜𑁆𑀘𑀓𑀦𑀬𑁂 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸 𑀲𑀼𑀔𑀲𑀳𑀕𑀢𑁄 𑀲𑀫𑀸𑀥𑀺. 𑀅𑀯𑀲𑁂𑀲𑀲𑁆𑀫𑀺𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁄 𑀲𑀫𑀸𑀥𑀺. 𑀉𑀧𑀘𑀸𑀭𑀲𑀫𑀸𑀥𑀺 𑀧𑀦 𑀲𑀺𑀬𑀸 𑀲𑀼𑀔𑀲𑀳𑀕𑀢𑁄, 𑀲𑀺𑀬𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑁄𑀢𑀺 𑀏𑀯𑀁 𑀲𑀼𑀔𑀲𑀳𑀕𑀢𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀲𑁂𑀦 𑀤𑀼𑀯𑀺𑀥𑁄.

𑀲𑀫𑀸𑀥𑀺𑀢𑀺𑀓𑀯𑀡𑁆𑀡𑀦𑀸

𑀢𑀺𑀓𑁂𑀲𑀼 𑀧𑀞𑀫𑀢𑁆𑀢𑀺𑀓𑁂 𑀧𑀝𑀺𑀮𑀤𑁆𑀥𑀫𑀢𑁆𑀢𑁄 𑀳𑀻𑀦𑁄, 𑀦𑀸𑀢𑀺𑀲𑀼𑀪𑀸𑀯𑀺𑀢𑁄 𑀫𑀚𑁆𑀛𑀺𑀫𑁄, 𑀲𑀼𑀪𑀸𑀯𑀺𑀢𑁄 𑀯𑀲𑀺𑀧𑁆𑀧𑀢𑁆𑀢𑁄 𑀧𑀡𑀻𑀢𑁄𑀢𑀺 𑀏𑀯𑀁 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦 𑀢𑀺𑀯𑀺𑀥𑁄.

𑀤𑀼𑀢𑀺𑀬𑀢𑁆𑀢𑀺𑀓𑁂 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀲𑀤𑁆𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁄. 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄. 𑀬𑁄 𑀳𑀺 𑀯𑀺𑀢𑀓𑁆𑀓𑀫𑀢𑁆𑀢𑁂𑀬𑁂𑀯 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀯𑀺𑀘𑀸𑀭𑁂 𑀅𑀤𑀺𑀲𑁆𑀯𑀸 𑀓𑁂𑀯𑀮𑀁 𑀯𑀺𑀢𑀓𑁆𑀓𑀧𑁆𑀧𑀳𑀸𑀦𑀫𑀢𑁆𑀢𑀁 𑀆𑀓𑀗𑁆𑀔𑀫𑀸𑀦𑁄 𑀧𑀞𑀫𑀚𑁆𑀛𑀸𑀦𑀁 𑀅𑀢𑀺𑀓𑁆𑀓𑀫𑀢𑀺, 𑀲𑁄 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀲𑀫𑀸𑀥𑀺𑀁 𑀧𑀝𑀺𑀮𑀪𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀘𑀢𑀼𑀓𑁆𑀓𑀦𑀬𑁂 𑀧𑀦 𑀤𑀼𑀢𑀺𑀬𑀸𑀤𑀻𑀲𑀼 𑀧𑀜𑁆𑀘𑀓𑀦𑀬𑁂 𑀢𑀢𑀺𑀬𑀸𑀤𑀻𑀲𑀼 𑀢𑀻𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑁄 𑀲𑀫𑀸𑀥𑀻𑀢𑀺 𑀏𑀯𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄.

𑀢𑀢𑀺𑀬𑀢𑁆𑀢𑀺𑀓𑁂 𑀘𑀢𑀼𑀓𑁆𑀓𑀦𑀬𑁂 𑀆𑀤𑀺𑀢𑁄 𑀤𑁆𑀯𑀻𑀲𑀼 𑀧𑀜𑁆𑀘𑀓𑀦𑀬𑁂 𑀘 𑀢𑀻𑀲𑀼 𑀛𑀸𑀦𑁂𑀲𑀼 𑀏𑀓𑀕𑁆𑀕𑀢𑀸 𑀧𑀻𑀢𑀺𑀲𑀳𑀕𑀢𑁄 𑀲𑀫𑀸𑀥𑀺. 𑀢𑁂𑀲𑁆𑀯𑁂𑀯 𑀢𑀢𑀺𑀬𑁂 𑀘 𑀘𑀢𑀼𑀢𑁆𑀣𑁂 𑀘 𑀛𑀸𑀦𑁂 𑀏𑀓𑀕𑁆𑀕𑀢𑀸 𑀲𑀼𑀔𑀲𑀳𑀕𑀢𑁄 𑀲𑀫𑀸𑀥𑀺. 𑀅𑀯𑀲𑀸𑀦𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑁄. 𑀉𑀧𑀘𑀸𑀭𑀲𑀫𑀸𑀥𑀺 𑀧𑀦 𑀧𑀻𑀢𑀺𑀲𑀼𑀔𑀲𑀳𑀕𑀢𑁄 𑀯𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑁄 𑀯𑀸𑀢𑀺 𑀏𑀯𑀁 𑀧𑀻𑀢𑀺𑀲𑀳𑀕𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄.

𑀘𑀢𑀼𑀢𑁆𑀣𑀢𑁆𑀢𑀺𑀓𑁂 𑀉𑀧𑀘𑀸𑀭𑀪𑀽𑀫𑀺𑀬𑀁 𑀏𑀓𑀕𑁆𑀕𑀢𑀸 𑀧𑀭𑀺𑀢𑁆𑀢𑁄 𑀲𑀫𑀸𑀥𑀺. 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀓𑀼𑀲𑀮𑁂 𑀏𑀓𑀕𑁆𑀕𑀢𑀸 𑀫𑀳𑀕𑁆𑀕𑀢𑁄 𑀲𑀫𑀸𑀥𑀺. 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀏𑀓𑀕𑁆𑀕𑀢𑀸 𑀅𑀧𑁆𑀧𑀫𑀸𑀡𑁄 𑀲𑀫𑀸𑀥𑀻𑀢𑀺 𑀏𑀯𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀯𑀲𑁂𑀦 𑀢𑀺𑀯𑀺𑀥𑁄.

𑀲𑀫𑀸𑀥𑀺𑀘𑀢𑀼𑀓𑁆𑀓𑀯𑀡𑁆𑀡𑀦𑀸

𑀘𑀢𑀼𑀓𑁆𑀓𑁂𑀲𑀼 𑀧𑀞𑀫𑀘𑀢𑀼𑀓𑁆𑀓𑁂 𑀅𑀢𑁆𑀣𑀺 𑀲𑀫𑀸𑀥𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄, 𑀅𑀢𑁆𑀣𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄, 𑀅𑀢𑁆𑀣𑀺 𑀲𑀼𑀔𑀸𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄, 𑀅𑀢𑁆𑀣𑀺 𑀲𑀼𑀔𑀸𑀧𑀝𑀺𑀧𑀤𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄𑀢𑀺.

𑀢𑀢𑁆𑀣 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀉𑀧𑀘𑀸𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑀸 𑀲𑀫𑀸𑀥𑀺𑀪𑀸𑀯𑀦𑀸 𑀧𑀝𑀺𑀧𑀤𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀧𑀘𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀅𑀧𑁆𑀧𑀦𑀸, 𑀢𑀸𑀯 𑀧𑀯𑀢𑁆𑀢𑀸 𑀧𑀜𑁆𑀜𑀸 𑀅𑀪𑀺𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀧𑀝𑀺𑀧𑀤𑀸 𑀏𑀓𑀘𑁆𑀘𑀲𑁆𑀲 𑀤𑀼𑀓𑁆𑀔𑀸 𑀳𑁄𑀢𑀺, 𑀦𑀻𑀯𑀭𑀡𑀸𑀤𑀺𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀕𑀳𑀡𑀢𑀸𑀬 𑀓𑀺𑀘𑁆𑀙𑀸 𑀅𑀲𑀼𑀔𑀸𑀲𑁂𑀯𑀦𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑀲𑁆𑀲 𑀢𑀤𑀪𑀸𑀯𑁂𑀦 𑀲𑀼𑀔𑀸. 𑀅𑀪𑀺𑀜𑁆𑀜𑀸𑀧𑀺 𑀏𑀓𑀘𑁆𑀘𑀲𑁆𑀲 𑀤𑀦𑁆𑀥𑀸 𑀳𑁄𑀢𑀺 𑀫𑀦𑁆𑀤𑀸 𑀅𑀲𑀻𑀖𑀧𑁆𑀧𑀯𑀢𑁆𑀢𑀺. 𑀏𑀓𑀘𑁆𑀘𑀲𑁆𑀲 𑀔𑀺𑀧𑁆𑀧𑀸 𑀅𑀫𑀦𑁆𑀤𑀸 𑀲𑀻𑀖𑀧𑁆𑀧𑀯𑀢𑁆𑀢𑀺.

𑀢𑀢𑁆𑀣 𑀬𑀸𑀦𑀺 𑀧𑀭𑀢𑁄 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀸𑀦𑀺 𑀘 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀻𑀦𑀺 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀘 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀘 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀢𑁂𑀲𑀼 𑀬𑁄 𑀅𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀲𑀧𑁆𑀧𑀸𑀬𑀲𑁂𑀯𑀺𑀦𑁄 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸 𑀘 𑀅𑀪𑀺𑀜𑁆𑀜𑀸. 𑀬𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀅𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀲𑀧𑁆𑀧𑀸𑀬𑀲𑁂𑀯𑀻 𑀳𑁄𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀲𑀧𑁆𑀧𑀸𑀬𑀲𑁂𑀯𑀻, 𑀢𑀲𑁆𑀲 𑀯𑁄𑀫𑀺𑀲𑁆𑀲𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀸𑀤𑀺𑀓𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀅𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀸. 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸𑀦𑀺 𑀧𑀦 𑀅𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀸.

𑀅𑀧𑀺𑀘 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀯𑀲𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀺𑀓𑀸𑀭𑀯𑀲𑁂𑀦 𑀘𑀸𑀧𑀺 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀳𑀺 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀅𑀦𑀪𑀺𑀪𑀽𑀢𑀲𑁆𑀲 𑀲𑀼𑀔𑀸. 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀲𑁆𑀲 𑀘 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺. 𑀅𑀦𑀪𑀺𑀪𑀽𑀢𑀲𑁆𑀲 𑀔𑀺𑀧𑁆𑀧𑀸. 𑀬𑁄 𑀘 𑀲𑀫𑀣𑁂 𑀅𑀓𑀢𑀸𑀥𑀺𑀓𑀸𑀭𑁄, 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀓𑀢𑀸𑀥𑀺𑀓𑀸𑀭𑀲𑁆𑀲 𑀲𑀼𑀔𑀸. 𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀅𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀦𑁆𑀥𑀸 𑀅𑀪𑀺𑀜𑁆𑀜𑀸 𑀳𑁄𑀢𑀺, 𑀓𑀢𑀸𑀥𑀺𑀓𑀸𑀭𑀲𑁆𑀲 𑀔𑀺𑀧𑁆𑀧𑀸. 𑀓𑀺𑀮𑁂𑀲𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀘𑀸𑀧𑀺 𑀏𑀢𑀸𑀲𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀩𑁆𑀩𑀓𑀺𑀮𑁂𑀲𑀲𑁆𑀲 𑀳𑀺 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸, 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸. 𑀫𑀦𑁆𑀤𑀓𑀺𑀮𑁂𑀲𑀲𑁆𑀲 𑀘 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀦𑁆𑀥𑀸 𑀘 𑀅𑀪𑀺𑀜𑁆𑀜𑀸. 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀦 𑀔𑀺𑀧𑁆𑀧𑀸 𑀅𑀪𑀺𑀜𑁆𑀜𑀸𑀢𑀺.

𑀇𑀢𑀺 𑀇𑀫𑀸𑀲𑀼 𑀧𑀝𑀺𑀧𑀤𑀸𑀅𑀪𑀺𑀜𑁆𑀜𑀸𑀲𑀼 𑀬𑁄 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀬 𑀘 𑀅𑀪𑀺𑀜𑁆𑀜𑀸𑀬 𑀲𑀫𑀸𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀲𑁄 𑀲𑀫𑀸𑀥𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑁄 𑀤𑀦𑁆𑀥𑀸𑀪𑀺𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀲 𑀦𑀬𑁄 𑀲𑁂𑀲𑀢𑁆𑀢𑀬𑁂𑀧𑀻𑀢𑀺 𑀏𑀯𑀁 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀅𑀢𑁆𑀣𑀺 𑀲𑀫𑀸𑀥𑀺 𑀧𑀭𑀺𑀢𑁆𑀢𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄, 𑀅𑀢𑁆𑀣𑀺 𑀧𑀭𑀺𑀢𑁆𑀢𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑁄 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄, 𑀅𑀢𑁆𑀣𑀺 𑀅𑀧𑁆𑀧𑀫𑀸𑀡𑁄 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄𑀢𑀺. 𑀢𑀢𑁆𑀣 𑀬𑁄 𑀲𑀫𑀸𑀥𑀺 𑀅𑀧𑁆𑀧𑀕𑀼𑀡𑁄 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀧𑀭𑀺𑀢𑁆𑀢𑁄. 𑀬𑁄 𑀧𑀦 𑀅𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀅𑀬𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁄. 𑀬𑁄 𑀧𑀕𑀼𑀡𑁄 𑀲𑀼𑀪𑀸𑀯𑀺𑀢𑁄, 𑀉𑀧𑀭𑀺𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀬𑀁 𑀅𑀧𑁆𑀧𑀫𑀸𑀡𑁄. 𑀬𑁄 𑀘 𑀯𑀟𑁆𑀠𑀺𑀢𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄, 𑀅𑀬𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄. 𑀯𑀼𑀢𑁆𑀢𑀮𑀓𑁆𑀔𑀡𑀯𑁄𑀫𑀺𑀲𑁆𑀲𑀢𑀸𑀬 𑀧𑀦 𑀯𑁄𑀫𑀺𑀲𑁆𑀲𑀓𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀢𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀢𑀢𑀺𑀬𑀘𑀢𑀼𑀓𑁆𑀓𑁂 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀲𑀫𑀸𑀥𑀻𑀦𑀁 𑀯𑀲𑁂𑀦 𑀧𑀜𑁆𑀘𑀗𑁆𑀕𑀺𑀓𑀁 𑀧𑀞𑀫𑀁 𑀛𑀸𑀦𑀁, 𑀢𑀢𑁄 𑀯𑀽𑀧𑀲𑀦𑁆𑀢𑀯𑀺𑀢𑀓𑁆𑀓𑀯𑀺𑀘𑀸𑀭𑀁 𑀢𑀺𑀯𑀗𑁆𑀕𑀺𑀓𑀁 𑀤𑀼𑀢𑀺𑀬𑀁, 𑀢𑀢𑁄 𑀯𑀺𑀭𑀢𑁆𑀢𑀧𑀻𑀢𑀺𑀓𑀁 𑀤𑀼𑀯𑀗𑁆𑀕𑀺𑀓𑀁 𑀢𑀢𑀺𑀬𑀁, 𑀢𑀢𑁄 𑀧𑀳𑀻𑀦𑀲𑀼𑀔𑀁 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀳𑀺𑀢𑀲𑁆𑀲 𑀲𑀫𑀸𑀥𑀺𑀦𑁄 𑀯𑀲𑁂𑀦 𑀤𑀼𑀯𑀗𑁆𑀕𑀺𑀓𑀁 𑀘𑀢𑀼𑀢𑁆𑀣𑀁. 𑀇𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑀽𑀢𑀸 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻 𑀳𑁄𑀦𑁆𑀢𑀺. 𑀏𑀯𑀁 𑀘𑀢𑀼𑀛𑀸𑀦𑀗𑁆𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀅𑀢𑁆𑀣𑀺 𑀲𑀫𑀸𑀥𑀺 𑀳𑀸𑀦𑀪𑀸𑀕𑀺𑀬𑁄, 𑀅𑀢𑁆𑀣𑀺 𑀞𑀺𑀢𑀺𑀪𑀸𑀕𑀺𑀬𑁄, 𑀅𑀢𑁆𑀣𑀺 𑀯𑀺𑀲𑁂𑀲𑀪𑀸𑀕𑀺𑀬𑁄, 𑀅𑀢𑁆𑀣𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄. 𑀢𑀢𑁆𑀣 𑀧𑀘𑁆𑀘𑀦𑀻𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀳𑀸𑀦𑀪𑀸𑀕𑀺𑀬𑀢𑀸, 𑀢𑀤𑀦𑀼𑀥𑀫𑁆𑀫𑀢𑀸𑀬 𑀲𑀢𑀺𑀬𑀸 𑀲𑀡𑁆𑀞𑀸𑀦𑀯𑀲𑁂𑀦 𑀞𑀺𑀢𑀺𑀪𑀸𑀕𑀺𑀬𑀢𑀸, 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀯𑀲𑁂𑀦 𑀯𑀺𑀲𑁂𑀲𑀪𑀸𑀕𑀺𑀬𑀢𑀸, 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀳, ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀁 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁯𑁯). 𑀢𑀸𑀬 𑀧𑀦 𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑀸𑀥𑀻𑀧𑀺 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀳𑀸𑀦𑀪𑀸𑀕𑀺𑀬𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀧𑀜𑁆𑀘𑀫𑀘𑀢𑀼𑀓𑁆𑀓𑁂 𑀓𑀸𑀫𑀸𑀯𑀘𑀭𑁄 𑀲𑀫𑀸𑀥𑀺, 𑀭𑀽𑀧𑀸𑀯𑀘𑀭𑁄 𑀲𑀫𑀸𑀥𑀺, 𑀅𑀭𑀽𑀧𑀸𑀯𑀘𑀭𑁄 𑀲𑀫𑀸𑀥𑀺, 𑀅𑀧𑀭𑀺𑀬𑀸𑀧𑀦𑁆𑀦𑁄 𑀲𑀫𑀸𑀥𑀻𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀫𑀸𑀥𑀻. 𑀢𑀢𑁆𑀣 𑀲𑀩𑁆𑀩𑀸𑀧𑀺 𑀉𑀧𑀘𑀸𑀭𑁂𑀓𑀕𑁆𑀕𑀢𑀸 𑀓𑀸𑀫𑀸𑀯𑀘𑀭𑁄 𑀲𑀫𑀸𑀥𑀺. 𑀢𑀣𑀸 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀇𑀢𑀭𑁂 𑀢𑀬𑁄𑀢𑀺 𑀏𑀯𑀁 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀙𑀝𑁆𑀞𑀘𑀢𑀼𑀓𑁆𑀓𑁂 ‘‘𑀙𑀦𑁆𑀤𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀯𑀻𑀭𑀺𑀬𑀁 𑀘𑁂 𑀪𑀺𑀓𑁆𑀔𑀼…𑀧𑁂… 𑀘𑀺𑀢𑁆𑀢𑀁 𑀘𑁂 𑀪𑀺𑀓𑁆𑀔𑀼…𑀧𑁂… 𑀯𑀻𑀫𑀁𑀲𑀁 𑀘𑁂 𑀪𑀺𑀓𑁆𑀔𑀼 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀻𑀫𑀁𑀲𑀸𑀲𑀫𑀸𑀥𑀻’’𑀢𑀺 (𑀯𑀺𑀪. 𑁪𑁩𑁨; 𑀲𑀁. 𑀦𑀺. 𑁩.𑁮𑁨𑁫) 𑀏𑀯𑀁 𑀅𑀥𑀺𑀧𑀢𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄.

𑀧𑀜𑁆𑀘𑀓𑁂 𑀬𑀁 𑀘𑀢𑀼𑀓𑁆𑀓𑀪𑁂𑀤𑁂 𑀯𑀼𑀢𑁆𑀢𑀁 𑀤𑀼𑀢𑀺𑀬𑀁 𑀛𑀸𑀦𑀁, 𑀢𑀁 𑀯𑀺𑀢𑀓𑁆𑀓𑀫𑀢𑁆𑀢𑀸𑀢𑀺𑀓𑁆𑀓𑀫𑁂𑀦 𑀤𑀼𑀢𑀺𑀬𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺𑀓𑁆𑀓𑀫𑁂𑀦 𑀢𑀢𑀺𑀬𑀦𑁆𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘 𑀛𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀅𑀗𑁆𑀕𑀪𑀽𑀢𑀸 𑀘 𑀧𑀜𑁆𑀘 𑀲𑀫𑀸𑀥𑀻𑀢𑀺 𑀏𑀯𑀁 𑀧𑀜𑁆𑀘𑀛𑀸𑀦𑀗𑁆𑀕𑀯𑀲𑁂𑀦 𑀧𑀜𑁆𑀘𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁦. 𑀓𑁄 𑀘𑀲𑁆𑀲 𑀲𑀁𑀓𑀺𑀮𑁂𑀲𑁄 𑀓𑀺𑀁 𑀯𑁄𑀤𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑁄 𑀥𑀫𑁆𑀫𑁄. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑁄 𑀥𑀫𑁆𑀫𑁄’’𑀢𑀺 (𑀯𑀺𑀪. 𑁮𑁨𑁮). 𑀢𑀢𑁆𑀣 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀁 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁯𑁯) 𑀇𑀫𑀺𑀦𑀸 𑀦𑀬𑁂𑀦 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁯𑁯) 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀲𑀧𑀮𑀺𑀩𑁄𑀥𑀯𑀡𑁆𑀡𑀦𑀸

𑁪𑁧. 𑀓𑀣𑀁 𑀪𑀸𑀯𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀧𑀦 𑀬𑁄 𑀢𑀸𑀯 𑀅𑀬𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄𑀢𑀺𑀆𑀤𑀻𑀲𑀼 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀸𑀯𑀦𑀸𑀦𑀬𑁄 𑀧𑀜𑁆𑀜𑀸𑀪𑀸𑀯𑀦𑀸𑀦𑀬𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀧𑀜𑁆𑀜𑀸𑀬 𑀳𑀺 𑀪𑀸𑀯𑀺𑀢𑀸𑀬 𑀲𑁄 𑀪𑀸𑀯𑀺𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄𑀢𑀺 𑀦 𑀓𑀺𑀜𑁆𑀘𑀺 𑀯𑀺𑀲𑀼𑀁 𑀯𑀤𑀸𑀫.

𑀬𑁄 𑀧𑀦𑀸𑀬𑀁 𑀮𑁄𑀓𑀺𑀬𑁄, 𑀲𑁄 𑀯𑀼𑀢𑁆𑀢𑀦𑀬𑁂𑀦 𑀲𑀻𑀮𑀸𑀦𑀺 𑀯𑀺𑀲𑁄𑀥𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀬𑁆𑀯𑀸𑀲𑁆𑀲 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀁 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀫𑀸𑀥𑀺𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀅𑀬𑀁 𑀧𑀦 𑀯𑀺𑀢𑁆𑀣𑀸𑀭𑁄, 𑀬𑀁 𑀢𑀸𑀯 𑀯𑀼𑀢𑁆𑀢𑀁 ‘‘𑀬𑁆𑀯𑀸𑀲𑁆𑀲 𑀤𑀲𑀲𑀼 𑀧𑀮𑀺𑀩𑁄𑀥𑁂𑀲𑀼 𑀧𑀮𑀺𑀩𑁄𑀥𑁄 𑀅𑀢𑁆𑀣𑀺, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸’’𑀢𑀺, 𑀏𑀢𑁆𑀣 𑁋

𑀆𑀯𑀸𑀲𑁄 𑀘 𑀓𑀼𑀮𑀁 𑀮𑀸𑀪𑁄, 𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄, 𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲𑀸𑀢𑀺. 𑁋

𑀇𑀫𑁂 𑀤𑀲 𑀧𑀮𑀺𑀩𑁄𑀥𑀸 𑀦𑀸𑀫. 𑀢𑀢𑁆𑀣 𑀆𑀯𑀸𑀲𑁄𑀬𑁂𑀯 𑀆𑀯𑀸𑀲𑀧𑀮𑀺𑀩𑁄𑀥𑁄. 𑀏𑀲 𑀦𑀬𑁄 𑀓𑀼𑀮𑀸𑀤𑀻𑀲𑀼.

𑀢𑀢𑁆𑀣 𑀆𑀯𑀸𑀲𑁄𑀢𑀺 𑀏𑀓𑁄𑀧𑀺 𑀑𑀯𑀭𑀓𑁄 𑀯𑀼𑀘𑁆𑀘𑀢𑀺 𑀏𑀓𑀫𑁆𑀧𑀺 𑀧𑀭𑀺𑀯𑁂𑀡𑀁 𑀲𑀓𑀮𑁄𑀧𑀺 𑀲𑀗𑁆𑀖𑀸𑀭𑀸𑀫𑁄. 𑀲𑁆𑀯𑀸𑀬𑀁 𑀦 𑀲𑀩𑁆𑀩𑀲𑁆𑀲𑁂𑀯 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀬𑁄 𑀧𑀦𑁂𑀢𑁆𑀣 𑀦𑀯𑀓𑀫𑁆𑀫𑀸𑀤𑀻𑀲𑀼 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀆𑀧𑀚𑁆𑀚𑀢𑀺, 𑀩𑀳𑀼𑀪𑀡𑁆𑀟𑀲𑀦𑁆𑀦𑀺𑀘𑀬𑁄 𑀯𑀸 𑀳𑁄𑀢𑀺, 𑀬𑁂𑀦 𑀓𑁂𑀦𑀘𑀺 𑀯𑀸 𑀓𑀸𑀭𑀡𑁂𑀦 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄, 𑀢𑀲𑁆𑀲𑁂𑀯 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀇𑀢𑀭𑀲𑁆𑀲.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀤𑁆𑀯𑁂 𑀓𑀺𑀭 𑀓𑀼𑀮𑀧𑀼𑀢𑁆𑀢𑀸 𑀅𑀦𑀼𑀭𑀸𑀥𑀧𑀼𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀣𑀽𑀧𑀸𑀭𑀸𑀫𑁂 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀼 𑀏𑀓𑁄 𑀤𑁆𑀯𑁂 𑀫𑀸𑀢𑀺𑀓𑀸 𑀧𑀕𑀼𑀡𑀸 𑀓𑀢𑁆𑀯𑀸 𑀧𑀜𑁆𑀘𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀧𑀯𑀸𑀭𑁂𑀢𑁆𑀯𑀸 𑀧𑀸𑀘𑀺𑀦𑀔𑀡𑁆𑀟𑀭𑀸𑀚𑀺𑀁 𑀦𑀸𑀫 𑀕𑀢𑁄. 𑀏𑀓𑁄 𑀢𑀢𑁆𑀣𑁂𑀯 𑀯𑀲𑀢𑀺. 𑀧𑀸𑀘𑀺𑀦𑀔𑀡𑁆𑀟𑀭𑀸𑀚𑀺𑀕𑀢𑁄 𑀢𑀢𑁆𑀣 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀣𑁂𑀭𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀫𑀺𑀤𑀁 𑀞𑀸𑀦𑀁, 𑀳𑀦𑁆𑀤 𑀦𑀁 𑀲𑀳𑀸𑀬𑀓𑀲𑁆𑀲𑀸𑀧𑀺 𑀆𑀭𑁄𑀘𑁂𑀫𑀻’’𑀢𑀺. 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀣𑀽𑀧𑀸𑀭𑀸𑀫𑀁 𑀧𑀸𑀯𑀺𑀲𑀺. 𑀧𑀯𑀺𑀲𑀦𑁆𑀢𑀁𑀬𑁂𑀯 𑀘 𑀦𑀁 𑀤𑀺𑀲𑁆𑀯𑀸 𑀲𑀫𑀸𑀦𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀁 𑀅𑀓𑀸𑀲𑀺. 𑀆𑀕𑀦𑁆𑀢𑀼𑀓𑀢𑁆𑀣𑁂𑀭𑁄 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀫𑁂 𑀲𑀳𑀸𑀬𑁄 𑀲𑀧𑁆𑀧𑀺𑀁 𑀯𑀸 𑀨𑀸𑀡𑀺𑀢𑀁 𑀯𑀸 𑀧𑀸𑀦𑀓𑀁 𑀯𑀸 𑀧𑁂𑀲𑁂𑀲𑁆𑀲𑀢𑀺. 𑀅𑀬𑀜𑁆𑀳𑀺 𑀇𑀫𑀲𑁆𑀫𑀺𑀁 𑀦𑀕𑀭𑁂 𑀘𑀺𑀭𑀦𑀺𑀯𑀸𑀲𑀻’’𑀢𑀺. 𑀲𑁄 𑀭𑀢𑁆𑀢𑀺𑀁 𑀅𑀮𑀤𑁆𑀥𑀸 𑀧𑀸𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀇𑀤𑀸𑀦𑀺 𑀉𑀧𑀝𑁆𑀞𑀸𑀓𑁂𑀳𑀺 𑀕𑀳𑀺𑀢𑀁 𑀬𑀸𑀕𑀼𑀔𑀚𑁆𑀚𑀓𑀁 𑀧𑁂𑀲𑁂𑀲𑁆𑀲𑀢𑀻’’𑀢𑀺. 𑀢𑀫𑁆𑀧𑀺 𑀅𑀤𑀺𑀲𑁆𑀯𑀸 ‘‘𑀧𑀳𑀺𑀡𑀦𑁆𑀢𑀸 𑀦𑀢𑁆𑀣𑀺, 𑀧𑀯𑀺𑀝𑁆𑀞𑀲𑁆𑀲 𑀫𑀜𑁆𑀜𑁂 𑀤𑀲𑁆𑀲𑀢𑀻’’𑀢𑀺 𑀧𑀸𑀢𑁄𑀯 𑀢𑁂𑀦 𑀲𑀤𑁆𑀥𑀺𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀢𑁂 𑀤𑁆𑀯𑁂 𑀏𑀓𑀁 𑀯𑀻𑀣𑀺𑀁 𑀘𑀭𑀺𑀢𑁆𑀯𑀸 𑀉𑀴𑀼𑀗𑁆𑀓𑀫𑀢𑁆𑀢𑀁 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀯𑀺𑀁𑀲𑀼. 𑀢𑀢𑁄 𑀆𑀕𑀦𑁆𑀢𑀼𑀓𑁄 𑀘𑀺𑀦𑁆𑀢𑁂𑀲𑀺 ‘‘𑀦𑀺𑀩𑀤𑁆𑀥𑀬𑀸𑀕𑀼 𑀫𑀜𑁆𑀜𑁂 𑀦𑀢𑁆𑀣𑀺, 𑀪𑀢𑁆𑀢𑀓𑀸𑀮𑁂 𑀇𑀤𑀸𑀦𑀺 𑀫𑀦𑀼𑀲𑁆𑀲𑀸 𑀧𑀡𑀻𑀢𑀁 𑀪𑀢𑁆𑀢𑀁 𑀤𑀲𑁆𑀲𑀦𑁆𑀢𑀻’’𑀢𑀺, 𑀢𑀢𑁄 𑀪𑀢𑁆𑀢𑀓𑀸𑀮𑁂𑀧𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀇𑀢𑀭𑁄 𑀆𑀳 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀲𑀩𑁆𑀩𑀓𑀸𑀮𑀁 𑀏𑀯𑀁 𑀬𑀸𑀧𑁂𑀣𑀸’’𑀢𑀺? 𑀆𑀫𑀸𑀯𑀼𑀲𑁄𑀢𑀺. 𑀪𑀦𑁆𑀢𑁂, 𑀧𑀸𑀘𑀺𑀦𑀔𑀡𑁆𑀟𑀭𑀸𑀚𑀺 𑀨𑀸𑀲𑀼𑀓𑀸, 𑀢𑀢𑁆𑀣 𑀕𑀘𑁆𑀙𑀸𑀫𑀸𑀢𑀺. 𑀣𑁂𑀭𑁄 𑀦𑀕𑀭𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀓𑀼𑀫𑁆𑀪𑀓𑀸𑀭𑀕𑀸𑀫𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀇𑀢𑀭𑁄 𑀆𑀳 𑁋 ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀇𑀫𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀢𑁆𑀣𑀸’’𑀢𑀺? 𑀦𑀦𑀼 𑀢𑁆𑀯𑀫𑀸𑀯𑀼𑀲𑁄, 𑀧𑀸𑀘𑀺𑀦𑀔𑀡𑁆𑀟𑀭𑀸𑀚𑀺𑀬𑀸 𑀯𑀡𑁆𑀡𑀁 𑀅𑀪𑀸𑀲𑀻𑀢𑀺? 𑀓𑀺𑀁 𑀧𑀦, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀲𑀺𑀢𑀝𑁆𑀞𑀸𑀦𑁂 𑀦 𑀓𑁄𑀘𑀺 𑀅𑀢𑀺𑀭𑁂𑀓𑀧𑀭𑀺𑀓𑁆𑀔𑀸𑀭𑁄 𑀅𑀢𑁆𑀣𑀻𑀢𑀺? 𑀆𑀫𑀸𑀯𑀼𑀲𑁄 𑀫𑀜𑁆𑀘𑀧𑀻𑀞𑀁 𑀲𑀗𑁆𑀖𑀺𑀓𑀁, 𑀢𑀁 𑀧𑀝𑀺𑀲𑀸𑀫𑀺𑀢𑀫𑁂𑀯, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺. 𑀫𑀬𑁆𑀳𑀁 𑀧𑀦, 𑀪𑀦𑁆𑀢𑁂, 𑀓𑀢𑁆𑀢𑀭𑀤𑀡𑁆𑀟𑁄 𑀢𑁂𑀮𑀦𑀸𑀴𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀸 𑀘 𑀢𑀢𑁆𑀣𑁂𑀯𑀸𑀢𑀺. 𑀢𑀬𑀸𑀯𑀼𑀲𑁄, 𑀏𑀓𑀤𑀺𑀯𑀲𑀁 𑀯𑀲𑀺𑀢𑁆𑀯𑀸 𑀏𑀢𑁆𑀢𑀓𑀁 𑀞𑀧𑀺𑀢𑀦𑁆𑀢𑀺? 𑀆𑀫, 𑀪𑀦𑁆𑀢𑁂. 𑀲𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀤𑀺𑀲𑀸𑀦𑀁, 𑀪𑀦𑁆𑀢𑁂, 𑀲𑀩𑁆𑀩𑀢𑁆𑀣 𑀅𑀭𑀜𑁆𑀜𑀯𑀸𑀲𑁄𑀬𑁂𑀯. 𑀣𑀽𑀧𑀸𑀭𑀸𑀫𑁄 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀥𑀸𑀢𑀼𑀦𑀺𑀥𑀸𑀦𑀝𑁆𑀞𑀸𑀦𑀁, 𑀮𑁄𑀳𑀧𑀸𑀲𑀸𑀤𑁂 𑀲𑀧𑁆𑀧𑀸𑀬𑀁 𑀥𑀫𑁆𑀫𑀲𑁆𑀲𑀯𑀦𑀁 𑀫𑀳𑀸𑀘𑁂𑀢𑀺𑀬𑀤𑀲𑁆𑀲𑀦𑀁 𑀣𑁂𑀭𑀤𑀲𑁆𑀲𑀦𑀜𑁆𑀘 𑀮𑀩𑁆𑀪𑀢𑀺, 𑀩𑀼𑀤𑁆𑀥𑀓𑀸𑀮𑁄 𑀯𑀺𑀬 𑀧𑀯𑀢𑁆𑀢𑀢𑀺. 𑀇𑀥𑁂𑀯 𑀢𑀼𑀫𑁆𑀳𑁂 𑀯𑀲𑀣𑀸’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀅𑀕𑀫𑀸𑀲𑀻𑀢𑀺. 𑀈𑀤𑀺𑀲𑀲𑁆𑀲 𑀆𑀯𑀸𑀲𑁄 𑀦 𑀧𑀮𑀺𑀩𑁄𑀥𑁄 𑀳𑁄𑀢𑀺.

𑀓𑀼𑀮𑀦𑁆𑀢𑀺 𑀜𑀸𑀢𑀺𑀓𑀼𑀮𑀁 𑀯𑀸 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸. 𑀏𑀓𑀘𑁆𑀘𑀲𑁆𑀲 𑀳𑀺 𑀉𑀧𑀝𑁆𑀞𑀸𑀓𑀓𑀼𑀮𑀫𑁆𑀧𑀺 ‘‘𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁮𑁮; 𑀲𑀁. 𑀦𑀺. 𑁪.𑁨𑁪𑁧) 𑀦𑀬𑁂𑀦 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀲𑁄 𑀓𑀼𑀮𑀫𑀸𑀦𑀼𑀲𑀓𑁂𑀳𑀺 𑀯𑀺𑀦𑀸 𑀥𑀫𑁆𑀫𑀲𑁆𑀲𑀯𑀦𑀸𑀬 𑀲𑀸𑀫𑀦𑁆𑀢𑀯𑀺𑀳𑀸𑀭𑀫𑁆𑀧𑀺 𑀦 𑀕𑀘𑁆𑀙𑀢𑀺. 𑀏𑀓𑀘𑁆𑀘𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀧𑀮𑀺𑀩𑁄𑀥𑀸 𑀦 𑀳𑁄𑀦𑁆𑀢𑀺, 𑀓𑁄𑀭𑀡𑁆𑀟𑀓𑀯𑀺𑀳𑀸𑀭𑀯𑀸𑀲𑀺𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀤𑀳𑀭𑀪𑀺𑀓𑁆𑀔𑀼𑀦𑁄 𑀯𑀺𑀬.

𑀲𑁄 𑀓𑀺𑀭 𑀉𑀤𑁆𑀤𑁂𑀲𑀢𑁆𑀣𑀁 𑀭𑁄𑀳𑀡𑀁 𑀅𑀕𑀫𑀸𑀲𑀺. 𑀣𑁂𑀭𑀪𑀕𑀺𑀦𑀻𑀧𑀺 𑀉𑀧𑀸𑀲𑀺𑀓𑀸 𑀲𑀤𑀸 𑀣𑁂𑀭𑀁 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀢𑀺. 𑀣𑁂𑀭𑁄 𑀏𑀓𑀤𑀺𑀯𑀲𑀁 𑀤𑀳𑀭𑀁 𑀆𑀦𑁂𑀲𑁆𑀲𑀸𑀫𑀻𑀢𑀺 𑀭𑁄𑀳𑀡𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀤𑀳𑀭𑁄𑀧𑀺 ‘‘𑀘𑀺𑀭𑀁 𑀫𑁂 𑀇𑀥 𑀯𑀼𑀢𑁆𑀣𑀁, 𑀉𑀧𑀚𑁆𑀛𑀸𑀬𑀁 𑀤𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀉𑀧𑀸𑀲𑀺𑀓𑀸𑀬 𑀘 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑁄𑀳𑀡𑀢𑁄 𑀦𑀺𑀓𑁆𑀔𑀫𑀺. 𑀢𑁂 𑀉𑀪𑁄𑀧𑀺 𑀕𑀗𑁆𑀕𑀸𑀢𑀻𑀭𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. 𑀲𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀓𑀢𑁆𑀯𑀸 ‘‘𑀓𑀼𑀳𑀺𑀁 𑀬𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄 𑀲𑀼𑀝𑁆𑀞𑀼 𑀢𑁂 𑀓𑀢𑀁, 𑀉𑀧𑀸𑀲𑀺𑀓𑀸𑀧𑀺 𑀲𑀤𑀸 𑀧𑀼𑀘𑁆𑀙𑀢𑀺, 𑀅𑀳𑀫𑁆𑀧𑀺 𑀏𑀢𑀤𑀢𑁆𑀣𑀫𑁂𑀯 𑀆𑀕𑀢𑁄, 𑀕𑀘𑁆𑀙 𑀢𑁆𑀯𑀁, 𑀅𑀳𑀁 𑀧𑀦 𑀇𑀥𑁂𑀯 𑀇𑀫𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂𑀬𑁂𑀯 𑀢𑀁 𑀯𑀺𑀳𑀸𑀭𑀁 𑀧𑀢𑁆𑀢𑁄. 𑀲𑁂𑀦𑀸𑀲𑀦𑀫𑁆𑀧𑀺𑀲𑁆𑀲 𑀧𑀺𑀢𑀭𑀸 𑀓𑀸𑀭𑀺𑀢𑀫𑁂𑀯 𑀧𑀢𑁆𑀢𑀁.

𑀅𑀣𑀲𑁆𑀲 𑀧𑀺𑀢𑀸 𑀤𑀼𑀢𑀺𑀬𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 ‘‘𑀓𑀲𑁆𑀲, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀆𑀕𑀦𑁆𑀢𑀼𑀓𑀲𑁆𑀲 𑀤𑀳𑀭𑀲𑁆𑀲𑀸’’𑀢𑀺 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑁂 𑀯𑀲𑁆𑀲𑀁 𑀉𑀧𑀕𑀢𑀲𑁆𑀲 𑀯𑀢𑁆𑀢𑀁 𑀅𑀢𑁆𑀣𑀻’’𑀢𑀺. 𑀓𑀺𑀁 𑀉𑀧𑀸𑀲𑀓𑀸𑀢𑀺? 𑀢𑁂𑀫𑀸𑀲𑀁 𑀅𑀫𑁆𑀳𑀸𑀓𑀁𑀬𑁂𑀯 𑀖𑀭𑁂 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀯𑀸𑀭𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀆𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀲𑁄 𑀢𑀼𑀡𑁆𑀳𑀺𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄𑀧𑀺 𑀖𑀭𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀯𑀸𑀲𑁂 𑀏𑀓𑁄 𑀆𑀕𑀦𑁆𑀢𑀼𑀓𑁄 𑀅𑀬𑁆𑀬𑁄 𑀉𑀧𑀕𑀢𑁄 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀩𑁆𑀩𑁄’’𑀢𑀺 𑀆𑀳. 𑀉𑀧𑀸𑀲𑀺𑀓𑀸 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀲𑀺. 𑀤𑀳𑀭𑁄𑀧𑀺 𑀪𑀢𑁆𑀢𑀓𑀸𑀮𑁂 𑀜𑀸𑀢𑀺𑀖𑀭𑀁 𑀅𑀕𑀫𑀸𑀲𑀺. 𑀦 𑀦𑀁 𑀓𑁄𑀘𑀺 𑀲𑀜𑁆𑀚𑀸𑀦𑀺.

𑀲𑁄 𑀢𑁂𑀫𑀸𑀲𑀫𑁆𑀧𑀺 𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀯𑀲𑁆𑀲𑀁𑀯𑀼𑀢𑁆𑀣𑁄 ‘‘𑀅𑀳𑀁 𑀕𑀘𑁆𑀙𑀸𑀫𑀻’’𑀢𑀺 𑀆𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀜𑀸𑀢𑀓𑀸 ‘‘𑀲𑁆𑀯𑁂, 𑀪𑀦𑁆𑀢𑁂, 𑀕𑀘𑁆𑀙𑀣𑀸’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀖𑀭𑁂𑀬𑁂𑀯 𑀪𑁄𑀚𑁂𑀢𑁆𑀯𑀸 𑀢𑁂𑀮𑀦𑀸𑀴𑀺𑀁 𑀧𑀽𑀭𑁂𑀢𑁆𑀯𑀸 𑀏𑀓𑀁 𑀕𑀼𑀴𑀧𑀺𑀡𑁆𑀟𑀁 𑀦𑀯𑀳𑀢𑁆𑀣𑀜𑁆𑀘 𑀲𑀸𑀝𑀓𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀪𑀦𑁆𑀢𑁂’’𑀢𑀺 𑀆𑀳𑀁𑀲𑀼. 𑀲𑁄 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀭𑁄𑀳𑀡𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺.

𑀉𑀧𑀚𑁆𑀛𑀸𑀬𑁄𑀧𑀺𑀲𑁆𑀲 𑀧𑀯𑀸𑀭𑁂𑀢𑁆𑀯𑀸 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑁄 𑀧𑀼𑀩𑁆𑀩𑁂 𑀤𑀺𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀢𑀁 𑀅𑀤𑁆𑀤𑀲. 𑀲𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀣𑁂𑀭𑀲𑁆𑀲 𑀯𑀢𑁆𑀢𑀁 𑀅𑀓𑀸𑀲𑀺. 𑀅𑀣 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 ‘‘𑀓𑀺𑀁, 𑀪𑀤𑁆𑀤𑀫𑀼𑀔, 𑀤𑀺𑀝𑁆𑀞𑀸 𑀢𑁂 𑀉𑀧𑀸𑀲𑀺𑀓𑀸’’𑀢𑀺? 𑀲𑁄 ‘‘𑀆𑀫, 𑀪𑀦𑁆𑀢𑁂’’𑀢𑀺 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀢𑁂𑀮𑁂𑀦 𑀣𑁂𑀭𑀲𑁆𑀲 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀕𑀼𑀴𑁂𑀦 𑀧𑀸𑀦𑀓𑀁 𑀓𑀢𑁆𑀯𑀸 𑀢𑀫𑁆𑀧𑀺 𑀲𑀸𑀝𑀓𑀁 𑀣𑁂𑀭𑀲𑁆𑀲𑁂𑀯 𑀤𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑁄𑀳𑀡𑀁𑀬𑁂𑀯 𑀲𑀧𑁆𑀧𑀸𑀬’’𑀦𑁆𑀢𑀺 𑀅𑀕𑀫𑀸𑀲𑀺. 𑀣𑁂𑀭𑁄𑀧𑀺 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀓𑁄𑀭𑀡𑁆𑀟𑀓𑀕𑀸𑀫𑀁 𑀧𑀸𑀯𑀺𑀲𑀺.

𑀉𑀧𑀸𑀲𑀺𑀓𑀸𑀧𑀺 ‘‘𑀫𑀬𑁆𑀳𑀁 𑀪𑀸𑀢𑀸 𑀫𑀫 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀆𑀕𑀘𑁆𑀙𑀢𑀻’’𑀢𑀺 𑀲𑀤𑀸 𑀫𑀕𑁆𑀕𑀁 𑀑𑀮𑁄𑀓𑀬𑀫𑀸𑀦𑀸𑀯 𑀢𑀺𑀝𑁆𑀞𑀢𑀺. 𑀲𑀸 𑀢𑀁 𑀏𑀓𑀓𑀫𑁂𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀢𑁄 𑀫𑁂 𑀫𑀜𑁆𑀜𑁂 𑀧𑀼𑀢𑁆𑀢𑁄, 𑀅𑀬𑀁 𑀣𑁂𑀭𑁄 𑀏𑀓𑀓𑁄𑀯 𑀆𑀕𑀘𑁆𑀙𑀢𑀻’’𑀢𑀺 𑀣𑁂𑀭𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀸 𑀭𑁄𑀤𑀺. 𑀣𑁂𑀭𑁄 ‘‘𑀦𑀽𑀦 𑀤𑀳𑀭𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀢𑁆𑀢𑀸𑀦𑀁 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀕𑀢𑁄’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀧𑀢𑁆𑀢𑀢𑁆𑀣𑀯𑀺𑀓𑀢𑁄 𑀢𑀁 𑀲𑀸𑀝𑀓𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀉𑀧𑀸𑀲𑀺𑀓𑀸 𑀧𑀲𑀻𑀤𑀺𑀢𑁆𑀯𑀸 𑀧𑀼𑀢𑁆𑀢𑁂𑀦 𑀕𑀢𑀤𑀺𑀲𑀸𑀪𑀺𑀫𑀼𑀔𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀆𑀳 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑀲𑀤𑀺𑀲𑀁 𑀯𑀢 𑀫𑀜𑁆𑀜𑁂 𑀪𑀺𑀓𑁆𑀔𑀼𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀪𑀕𑀯𑀸 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀁 (𑀫. 𑀦𑀺. 𑁧.𑁨𑁫𑁨 𑀆𑀤𑀬𑁄), 𑀦𑀸𑀮𑀓𑀧𑀝𑀺𑀧𑀤𑀁 (𑀲𑀼. 𑀦𑀺. 𑁬𑁮𑁪 𑀆𑀤𑀬𑁄), 𑀢𑀼𑀯𑀝𑁆𑀝𑀓𑀧𑀝𑀺𑀧𑀤𑀁 (𑀲𑀼. 𑀦𑀺. 𑁯𑁨𑁧 𑀆𑀤𑀬𑁄), 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀢𑀸𑀤𑀻𑀧𑀓𑀁 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀜𑁆𑀘 (𑀅. 𑀦𑀺. 𑁪.𑁨𑁮; 𑀤𑀻. 𑀦𑀺. 𑁩.𑁩𑁦𑁯) 𑀤𑁂𑀲𑁂𑀲𑀺. 𑀯𑀺𑀚𑀸𑀢𑀫𑀸𑀢𑀼𑀬𑀸 𑀦𑀸𑀫 𑀕𑁂𑀳𑁂 𑀢𑁂𑀫𑀸𑀲𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 ‘𑀅𑀳𑀁 𑀧𑀼𑀢𑁆𑀢𑁄 𑀢𑁆𑀯𑀁 𑀫𑀸𑀢𑀸’𑀢𑀺 𑀦 𑀯𑀓𑁆𑀔𑀢𑀺, 𑀅𑀳𑁄 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄’’𑀢𑀺. 𑀏𑀯𑀭𑀽𑀧𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀧𑀮𑀺𑀩𑁄𑀥𑀸 𑀦 𑀳𑁄𑀦𑁆𑀢𑀺, 𑀧𑀕𑁂𑀯 𑀅𑀜𑁆𑀜𑀁 𑀉𑀧𑀝𑁆𑀞𑀸𑀓𑀓𑀼𑀮’’𑀦𑁆𑀢𑀺.

𑀮𑀸𑀪𑁄𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀢𑁂 𑀓𑀣𑀁 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺? 𑀧𑀼𑀜𑁆𑀜𑀯𑀦𑁆𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀕𑀢𑀕𑀢𑀝𑁆𑀞𑀸𑀦𑁂 𑀫𑀦𑀼𑀲𑁆𑀲𑀸 𑀫𑀳𑀸𑀧𑀭𑀺𑀯𑀸𑀭𑁂 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀲𑁄 𑀢𑁂𑀲𑀁 𑀅𑀦𑀼𑀫𑁄𑀤𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀑𑀓𑀸𑀲𑀁 𑀮𑀪𑀢𑀺. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀧𑀞𑀫𑀬𑀸𑀫𑁄, 𑀢𑀸𑀯 𑀫𑀦𑀼𑀲𑁆𑀲𑀲𑀁𑀲𑀕𑁆𑀕𑁄 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺. 𑀧𑀼𑀦 𑀩𑀮𑀯𑀧𑀘𑁆𑀘𑀽𑀲𑁂𑀬𑁂𑀯 𑀩𑀸𑀳𑀼𑀮𑁆𑀮𑀺𑀓𑀧𑀺𑀡𑁆𑀟𑀧𑀸𑀢𑀺𑀓𑀸 𑀆𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀅𑀲𑀼𑀓𑁄 𑀉𑀧𑀸𑀲𑀓𑁄 𑀉𑀧𑀸𑀲𑀺𑀓𑀸 𑀅𑀫𑀘𑁆𑀘𑁄 𑀅𑀫𑀘𑁆𑀘𑀥𑀻𑀢𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀓𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑁄 𑀕𑀡𑁆𑀳𑀸𑀯𑀼𑀲𑁄, 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀕𑀫𑀦𑀲𑀚𑁆𑀚𑁄𑀯 𑀳𑁄𑀢𑀻𑀢𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑁄, 𑀢𑀲𑁆𑀲𑁂𑀯 𑀢𑁂 𑀧𑀘𑁆𑀘𑀬𑀸 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺. 𑀢𑁂𑀦 𑀕𑀡𑀁 𑀧𑀳𑀸𑀬 𑀬𑀢𑁆𑀣 𑀦𑀁 𑀦 𑀚𑀸𑀦𑀦𑁆𑀢𑀺, 𑀢𑀢𑁆𑀣 𑀏𑀓𑀓𑁂𑀦 𑀘𑀭𑀺𑀢𑀩𑁆𑀩𑀁. 𑀏𑀯𑀁 𑀲𑁄 𑀧𑀮𑀺𑀩𑁄𑀥𑁄 𑀉𑀧𑀘𑁆𑀙𑀺𑀚𑁆𑀚𑀢𑀻𑀢𑀺.

𑀕𑀡𑁄𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑁄 𑀯𑀸 𑀆𑀪𑀺𑀥𑀫𑁆𑀫𑀺𑀓𑀕𑀡𑁄 𑀯𑀸, 𑀬𑁄 𑀢𑀲𑁆𑀲 𑀉𑀤𑁆𑀤𑁂𑀲𑀁 𑀯𑀸 𑀧𑀭𑀺𑀧𑀼𑀘𑁆𑀙𑀁 𑀯𑀸 𑀤𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀲𑁆𑀲 𑀑𑀓𑀸𑀲𑀁 𑀦 𑀮𑀪𑀢𑀺, 𑀢𑀲𑁆𑀲𑁂𑀯 𑀕𑀡𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀢𑁂𑀦 𑀲𑁄 𑀏𑀯𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼 𑀕𑀳𑀺𑀢𑀁 𑀳𑁄𑀢𑀺, 𑀅𑀧𑁆𑀧𑀁 𑀅𑀯𑀲𑀺𑀝𑁆𑀞𑀁, 𑀢𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀲𑀘𑁂 𑀅𑀧𑁆𑀧𑀁 𑀕𑀳𑀺𑀢𑀁, 𑀩𑀳𑀼 𑀅𑀯𑀲𑀺𑀝𑁆𑀞𑀁, 𑀬𑁄𑀚𑀦𑀢𑁄 𑀧𑀭𑀁 𑀅𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑁂 𑀅𑀜𑁆𑀜𑀁 𑀕𑀡𑀯𑀸𑀘𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑁂 𑀆𑀬𑀲𑁆𑀫𑀸 𑀉𑀤𑁆𑀤𑁂𑀲𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀮𑀪𑀫𑀸𑀦𑁂𑀦 ‘‘𑀫𑀬𑁆𑀳𑀫𑀸𑀯𑀼𑀲𑁄, 𑀏𑀓𑀁 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀢𑀼𑀫𑁆𑀳𑁂 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀸𑀦𑀺 𑀕𑀘𑁆𑀙𑀣𑀸’’𑀢𑀺 𑀕𑀡𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺.

𑀓𑀫𑁆𑀫𑀦𑁆𑀢𑀺 𑀦𑀯𑀓𑀫𑁆𑀫𑀁. 𑀢𑀁 𑀓𑀭𑁄𑀦𑁆𑀢𑁂𑀦 𑀯𑀟𑁆𑀠𑀓𑀻𑀆𑀤𑀻𑀳𑀺 𑀮𑀤𑁆𑀥𑀸𑀮𑀤𑁆𑀥𑀁 𑀚𑀸𑀦𑀺𑀢𑀩𑁆𑀩𑀁, 𑀓𑀢𑀸𑀓𑀢𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀤𑀸 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀲𑁄𑀧𑀺 𑀏𑀯𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀲𑀘𑁂 𑀅𑀧𑁆𑀧𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺 𑀦𑀺𑀝𑁆𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀩𑀳𑀼, 𑀲𑀗𑁆𑀖𑀺𑀓𑀜𑁆𑀘𑁂 𑀦𑀯𑀓𑀫𑁆𑀫𑀁, 𑀲𑀗𑁆𑀖𑀲𑁆𑀲 𑀯𑀸 𑀲𑀗𑁆𑀖𑀪𑀸𑀭𑀳𑀸𑀭𑀓𑀪𑀺𑀓𑁆𑀔𑀽𑀦𑀁 𑀯𑀸 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀜𑁆𑀘𑁂, 𑀅𑀢𑁆𑀢𑀦𑁄 𑀪𑀸𑀭𑀳𑀸𑀭𑀓𑀸𑀦𑀁 𑀦𑀺𑀬𑁆𑀬𑀸𑀤𑁂𑀢𑀩𑁆𑀩𑀁. 𑀢𑀸𑀤𑀺𑀲𑁂 𑀅𑀮𑀪𑀦𑁆𑀢𑁂𑀦 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀅𑀤𑁆𑀥𑀸𑀦𑀦𑁆𑀢𑀺 𑀫𑀕𑁆𑀕𑀕𑀫𑀦𑀁. 𑀬𑀲𑁆𑀲 𑀳𑀺 𑀓𑀢𑁆𑀣𑀘𑀺 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀘𑁆𑀘𑀬𑀚𑀸𑀢𑀁 𑀯𑀸 𑀓𑀺𑀜𑁆𑀘𑀺 𑀮𑀤𑁆𑀥𑀩𑁆𑀩𑀁 𑀳𑁄𑀢𑀺. 𑀲𑀘𑁂 𑀢𑀁 𑀅𑀮𑀪𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀅𑀥𑀺𑀯𑀸𑀲𑁂𑀢𑀼𑀁, 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀕𑀫𑀺𑀓𑀘𑀺𑀢𑁆𑀢𑀁 𑀦𑀸𑀫 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀦𑀻𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀕𑀦𑁆𑀢𑁆𑀯𑀸 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸𑀯 𑀲𑀫𑀡𑀥𑀫𑁆𑀫𑁂 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀜𑀸𑀢𑀻𑀢𑀺 𑀯𑀺𑀳𑀸𑀭𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀲𑀫𑀸𑀦𑀸𑀘𑀭𑀺𑀬𑀓𑀸, 𑀖𑀭𑁂 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸𑀢𑀺 𑀏𑀯𑀫𑀸𑀤𑀺𑀓𑀸. 𑀢𑁂 𑀕𑀺𑀮𑀸𑀦𑀸 𑀇𑀫𑀲𑁆𑀲 𑀧𑀮𑀺𑀩𑁄𑀥𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀧𑀮𑀺𑀩𑁄𑀥𑁄 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀁 𑀧𑀸𑀓𑀢𑀺𑀓𑀓𑀭𑀡𑁂𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀉𑀧𑀚𑁆𑀛𑀸𑀬𑁄 𑀢𑀸𑀯 𑀕𑀺𑀮𑀸𑀦𑁄 𑀲𑀘𑁂 𑀮𑀳𑀼𑀁 𑀦 𑀯𑀼𑀝𑁆𑀞𑀸𑀢𑀺, 𑀬𑀸𑀯𑀚𑀻𑀯𑀫𑁆𑀧𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑁄. 𑀢𑀣𑀸 𑀧𑀩𑁆𑀩𑀚𑁆𑀚𑀸𑀘𑀭𑀺𑀬𑁄 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀲𑀫𑁆𑀧𑀸𑀤𑀺𑀢𑀧𑀩𑁆𑀩𑀸𑀚𑀺𑀢𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸 𑀘. 𑀦𑀺𑀲𑁆𑀲𑀬𑀸𑀘𑀭𑀺𑀬𑀉𑀤𑁆𑀤𑁂𑀲𑀸𑀘𑀭𑀺𑀬𑀦𑀺𑀲𑁆𑀲𑀬𑀦𑁆𑀢𑁂𑀯𑀸𑀲𑀺𑀓𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀸𑀘𑀭𑀺𑀬𑀓𑀸 𑀧𑀦 𑀬𑀸𑀯 𑀦𑀺𑀲𑁆𑀲𑀬𑀉𑀤𑁆𑀤𑁂𑀲𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀸, 𑀢𑀸𑀯 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸. 𑀧𑀳𑁄𑀦𑁆𑀢𑁂𑀦 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸 𑀏𑀯. 𑀫𑀸𑀢𑀸𑀧𑀺𑀢𑀽𑀲𑀼 𑀉𑀧𑀚𑁆𑀛𑀸𑀬𑁂 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀳𑀺 𑀢𑁂 𑀭𑀚𑁆𑀚𑁂 𑀞𑀺𑀢𑀸 𑀳𑁄𑀦𑁆𑀢𑀺, 𑀧𑀼𑀢𑁆𑀢𑀢𑁄 𑀘 𑀉𑀧𑀝𑁆𑀞𑀸𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀓𑀸𑀢𑀩𑁆𑀩𑀫𑁂𑀯. 𑀅𑀣 𑀢𑁂𑀲𑀁 𑀪𑁂𑀲𑀚𑁆𑀚𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀲𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀫𑁂𑀯. 𑀪𑀸𑀢𑀼𑀪𑀕𑀺𑀦𑀻𑀦𑀁 𑀧𑀦 𑀢𑁂𑀲𑀁 𑀲𑀦𑁆𑀢𑀓𑀫𑁂𑀯 𑀬𑁄𑀚𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀢𑀸𑀯𑀓𑀸𑀮𑀺𑀓𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀮𑀪𑀦𑁆𑀢𑁂𑀦 𑀕𑀡𑁆𑀳𑀺𑀢𑀩𑁆𑀩𑀁. 𑀅𑀮𑀪𑀦𑁆𑀢𑁂𑀦 𑀦 𑀘𑁄𑀤𑁂𑀢𑀩𑁆𑀩𑀸. 𑀅𑀜𑁆𑀜𑀸𑀢𑀓𑀲𑁆𑀲 𑀪𑀕𑀺𑀦𑀺𑀲𑀸𑀫𑀺𑀓𑀲𑁆𑀲 𑀪𑁂𑀲𑀚𑁆𑀚𑀁 𑀦𑁂𑀯 𑀓𑀸𑀢𑀼𑀁 𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺. ‘‘𑀢𑀼𑀬𑁆𑀳𑀁 𑀲𑀸𑀫𑀺𑀓𑀲𑁆𑀲 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀦 𑀪𑀕𑀺𑀦𑀺𑀬𑀸 𑀤𑀸𑀢𑀩𑁆𑀩𑀁. 𑀪𑀸𑀢𑀼𑀚𑀸𑀬𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀁 𑀧𑀦 𑀧𑀼𑀢𑁆𑀢𑀸 𑀇𑀫𑀲𑁆𑀲 𑀜𑀸𑀢𑀓𑀸 𑀏𑀯𑀸𑀢𑀺 𑀢𑁂𑀲𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀆𑀩𑀸𑀥𑁄𑀢𑀺 𑀬𑁄𑀓𑁄𑀘𑀺 𑀭𑁄𑀕𑁄. 𑀲𑁄 𑀩𑀸𑀥𑀬𑀫𑀸𑀦𑁄 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀪𑁂𑀲𑀚𑁆𑀚𑀓𑀭𑀡𑁂𑀦 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀢𑀺𑀧𑀸𑀳𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀦 𑀯𑀽𑀧𑀲𑀫𑁆𑀫𑀢𑀺, 𑀦𑀸𑀳𑀁 𑀢𑀼𑀬𑁆𑀳𑀁 𑀤𑀸𑀲𑁄, 𑀦 𑀪𑀝𑀓𑁄, 𑀢𑀁𑀬𑁂𑀯 𑀳𑀺 𑀧𑁄𑀲𑁂𑀦𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀤𑀼𑀓𑁆𑀔𑀁 𑀧𑀢𑁆𑀢𑁄𑀢𑀺 𑀅𑀢𑁆𑀢𑀪𑀸𑀯𑀁 𑀕𑀭𑀳𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄𑀢𑀺.

𑀕𑀦𑁆𑀣𑁄𑀢𑀺 𑀧𑀭𑀺𑀬𑀢𑁆𑀢𑀺𑀳𑀭𑀡𑀁. 𑀢𑀁 𑀲𑀚𑁆𑀛𑀸𑀬𑀸𑀤𑀻𑀳𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑀲𑁆𑀲 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀇𑀢𑀭𑀲𑁆𑀲. 𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋

𑀫𑀚𑁆𑀛𑀺𑀫𑀪𑀸𑀡𑀓𑀤𑁂𑀯𑀢𑁆𑀣𑁂𑀭𑁄 𑀓𑀺𑀭 𑀫𑀮𑀬𑀯𑀸𑀲𑀺𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀺. 𑀣𑁂𑀭𑁄 𑀓𑀻𑀤𑀺𑀲𑁄𑀲𑀺, 𑀆𑀯𑀼𑀲𑁄, 𑀧𑀭𑀺𑀬𑀢𑁆𑀢𑀺𑀬𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀚𑁆𑀛𑀺𑀫𑁄 𑀫𑁂, 𑀪𑀦𑁆𑀢𑁂, 𑀧𑀕𑀼𑀡𑁄𑀢𑀺. 𑀆𑀯𑀼𑀲𑁄, 𑀫𑀚𑁆𑀛𑀺𑀫𑁄 𑀦𑀸𑀫𑁂𑀲𑁄 𑀤𑀼𑀧𑁆𑀧𑀭𑀺𑀳𑀸𑀭𑁄, 𑀫𑀽𑀮𑀧𑀡𑁆𑀡𑀸𑀲𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄 𑀆𑀕𑀘𑁆𑀙𑀢𑀺, 𑀢𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀉𑀧𑀭𑀺𑀧𑀡𑁆𑀡𑀸𑀲𑀓𑁄. 𑀓𑀼𑀢𑁄 𑀢𑀼𑀬𑁆𑀳𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺? 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀧𑀼𑀦 𑀦 𑀑𑀮𑁄𑀓𑁂𑀲𑁆𑀲𑀸𑀫𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀲𑀚𑁆𑀛𑀸𑀬𑀁 𑀅𑀓𑀢𑁆𑀯𑀸 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀚𑁆𑀛𑀸𑀬𑀢𑁆𑀣𑀸𑀬 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 ‘‘𑀯𑀻𑀲𑀢𑀺 𑀫𑁂, 𑀆𑀯𑀼𑀲𑁄, 𑀯𑀲𑁆𑀲𑀸𑀦𑀺 𑀧𑀭𑀺𑀬𑀢𑁆𑀢𑀺𑀁 𑀅𑀦𑁄𑀮𑁄𑀓𑁂𑀦𑁆𑀢𑀲𑁆𑀲, 𑀅𑀧𑀺𑀘 𑀔𑁄 𑀓𑀢𑀧𑀭𑀺𑀘𑀬𑁄 𑀅𑀳𑀫𑁂𑀢𑁆𑀣 𑀆𑀭𑀪𑀣𑀸’’𑀢𑀺 𑀯𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀏𑀓𑀩𑁆𑀬𑀜𑁆𑀚𑀦𑁂𑀧𑀺𑀲𑁆𑀲 𑀓𑀗𑁆𑀔𑀸 𑀦𑀸𑀳𑁄𑀲𑀺.

𑀓𑀭𑀼𑀴𑀺𑀬𑀕𑀺𑀭𑀺𑀯𑀸𑀲𑀻𑀦𑀸𑀕𑀢𑁆𑀣𑁂𑀭𑁄𑀧𑀺 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀦𑀺 𑀧𑀭𑀺𑀬𑀢𑁆𑀢𑀺𑀁 𑀙𑀟𑁆𑀟𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀸𑀢𑀼𑀓𑀣𑀁 𑀉𑀤𑁆𑀤𑀺𑀲𑀺. 𑀢𑁂𑀲𑀁 𑀕𑀸𑀫𑀯𑀸𑀲𑀺𑀓𑀢𑁆𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑁂𑀦𑁆𑀢𑀸𑀦𑀁 𑀏𑀓𑀧𑀜𑁆𑀳𑁄𑀧𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑁄 𑀦𑀸𑀳𑁄𑀲𑀺.

𑀫𑀳𑀸𑀯𑀺𑀳𑀸𑀭𑁂𑀧𑀺 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀦𑀸𑀫 𑀅𑀝𑁆𑀞𑀓𑀣𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸𑀯 𑀧𑀜𑁆𑀘𑀦𑀺𑀓𑀸𑀬𑀫𑀡𑁆𑀟𑀮𑁂 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀲𑀼𑀯𑀡𑁆𑀡𑀪𑁂𑀭𑀺𑀁 𑀧𑀳𑀭𑀸𑀧𑁂𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀢𑀫𑀸𑀘𑀭𑀺𑀬𑀸𑀦𑀁 𑀉𑀕𑁆𑀕𑀳𑁄, 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀕𑁆𑀕𑀳𑀜𑁆𑀜𑁂𑀯 𑀯𑀤𑀢𑀼, 𑀇𑀢𑀭𑀣𑀸 𑀯𑀢𑁆𑀢𑀼𑀁 𑀦 𑀤𑁂𑀫𑀸𑀢𑀺 𑀆𑀳. 𑀉𑀧𑀚𑁆𑀛𑀸𑀬𑁄𑀧𑀺 𑀦𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀫𑀸𑀕𑀢𑀁 𑀧𑀼𑀘𑁆𑀙𑀺 ‘‘𑀢𑁆𑀯𑀫𑀸𑀯𑀼𑀲𑁄, 𑀪𑁂𑀭𑀺𑀁 𑀧𑀳𑀭𑀸𑀧𑁂𑀲𑀻’’𑀢𑀺? 𑀆𑀫, 𑀪𑀦𑁆𑀢𑁂. 𑀓𑀺𑀁 𑀓𑀸𑀭𑀡𑀸𑀢𑀺? 𑀧𑀭𑀺𑀬𑀢𑁆𑀢𑀺𑀁, 𑀪𑀦𑁆𑀢𑁂, 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻𑀢𑀺. 𑀆𑀯𑀼𑀲𑁄 𑀅𑀪𑀬, 𑀆𑀘𑀭𑀺𑀬𑀸 𑀇𑀤𑀁 𑀧𑀤𑀁 𑀓𑀣𑀁 𑀯𑀤𑀦𑁆𑀢𑀻𑀢𑀺? 𑀏𑀯𑀁 𑀯𑀤𑀦𑁆𑀢𑀺, 𑀪𑀦𑁆𑀢𑁂𑀢𑀺. 𑀣𑁂𑀭𑁄 𑀳𑀼𑀦𑁆𑀢𑀺 𑀧𑀝𑀺𑀩𑀸𑀳𑀺. 𑀧𑀼𑀦 𑀲𑁄 𑀅𑀜𑁆𑀜𑁂𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀯𑀤𑀦𑁆𑀢𑀺 𑀪𑀦𑁆𑀢𑁂𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀳. 𑀣𑁂𑀭𑁄 𑀲𑀩𑁆𑀩𑀁 𑀳𑀼𑀦𑁆𑀢𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀢𑀬𑀸 𑀧𑀞𑀫𑀁 𑀓𑀣𑀺𑀢𑁄 𑀏𑀯 𑀆𑀘𑀭𑀺𑀬𑀫𑀕𑁆𑀕𑁄, 𑀆𑀘𑀭𑀺𑀬𑀫𑀼𑀔𑀢𑁄 𑀧𑀦 𑀅𑀦𑀼𑀕𑁆𑀕𑀳𑀺𑀢𑀢𑁆𑀢𑀸 ‘𑀏𑀯𑀁 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’𑀢𑀺 𑀲𑀡𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀕𑀘𑁆𑀙 𑀅𑀢𑁆𑀢𑀦𑁄 𑀆𑀘𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀡𑀸𑀳𑀻’’𑀢𑀺. 𑀓𑀼𑀳𑀺𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫𑀻𑀢𑀺? 𑀕𑀗𑁆𑀕𑀸𑀬 𑀧𑀭𑀢𑁄 𑀭𑁄𑀳𑀡𑀚𑀦𑀧𑀤𑁂 𑀢𑀼𑀮𑀸𑀥𑀸𑀭𑀧𑀩𑁆𑀩𑀢𑀯𑀺𑀳𑀸𑀭𑁂 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀓𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀦𑀸𑀫 𑀯𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀣𑁂𑀭𑁄 𑀓𑀲𑁆𑀫𑀸 𑀆𑀕𑀢𑁄𑀲𑀻𑀢𑀺 𑀧𑀼𑀘𑁆𑀙𑀺. 𑀥𑀫𑁆𑀫𑀁 𑀲𑁄𑀢𑀼𑀁, 𑀪𑀦𑁆𑀢𑁂𑀢𑀺. 𑀆𑀯𑀼𑀲𑁄 𑀅𑀪𑀬, 𑀤𑀻𑀖𑀫𑀚𑁆𑀛𑀺𑀫𑁂𑀲𑀼 𑀫𑀁 𑀓𑀸𑀮𑁂𑀦 𑀓𑀸𑀮𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀯𑀲𑁂𑀲𑀁 𑀧𑀦 𑀫𑁂 𑀢𑀺𑀁𑀲𑀫𑀢𑁆𑀢𑀸𑀦𑀺 𑀯𑀲𑁆𑀲𑀸𑀦𑀺 𑀦 𑀑𑀮𑁄𑀓𑀺𑀢𑀧𑀼𑀩𑁆𑀩𑀁. 𑀅𑀧𑀺𑀘 𑀢𑁆𑀯𑀁 𑀭𑀢𑁆𑀢𑀺𑀁 𑀫𑀫 𑀲𑀦𑁆𑀢𑀺𑀓𑁂 𑀧𑀭𑀺𑀯𑀢𑁆𑀢𑁂𑀳𑀺. 𑀅𑀳𑀁 𑀢𑁂 𑀤𑀺𑀯𑀸 𑀓𑀣𑀬𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀢𑀣𑀸 𑀅𑀓𑀸𑀲𑀺. 𑀧𑀭𑀺𑀯𑁂𑀡𑀤𑁆𑀯𑀸𑀭𑁂 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀕𑀸𑀫𑀯𑀸𑀲𑀺𑀦𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺. 𑀣𑁂𑀭𑁄 𑀭𑀢𑁆𑀢𑀺𑀁 𑀧𑀭𑀺𑀯𑀢𑁆𑀢𑀺. 𑀢𑀁 𑀤𑀺𑀯𑀸 𑀓𑀣𑀬𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀪𑀬𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀢𑀝𑁆𑀝𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀆𑀯𑀼𑀲𑁄, 𑀫𑀬𑁆𑀳𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀳𑀻’’𑀢𑀺 𑀆𑀳. 𑀪𑀦𑁆𑀢𑁂, 𑀓𑀺𑀁 𑀪𑀡𑀣, 𑀦𑀦𑀼 𑀫𑀬𑀸 𑀢𑀼𑀫𑁆𑀳𑀸𑀓𑀫𑁂𑀯 𑀲𑀦𑁆𑀢𑀺𑀓𑁂 𑀲𑀼𑀢𑀁? 𑀓𑀺𑀫𑀳𑀁 𑀢𑀼𑀫𑁆𑀳𑁂𑀳𑀺 𑀅𑀜𑁆𑀜𑀸𑀢𑀁 𑀓𑀣𑁂𑀲𑁆𑀲𑀸𑀫𑀻𑀢𑀺? 𑀢𑀢𑁄 𑀦𑀁 𑀣𑁂𑀭𑁄 𑀅𑀜𑁆𑀜𑁄 𑀏𑀲, 𑀆𑀯𑀼𑀲𑁄, 𑀕𑀢𑀓𑀲𑁆𑀲 𑀫𑀕𑁆𑀕𑁄 𑀦𑀸𑀫𑀸𑀢𑀺 𑀆𑀳. 𑀅𑀪𑀬𑀣𑁂𑀭𑁄 𑀓𑀺𑀭 𑀢𑀤𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺. 𑀅𑀣𑀲𑁆𑀲 𑀲𑁄 𑀓𑀫𑁆𑀫𑀝𑁆𑀞𑀸𑀦𑀁 𑀤𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑁂 𑀥𑀫𑁆𑀫𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀲𑁆𑀲𑁄𑀲𑀺. 𑀲𑀼𑀢𑁆𑀯𑀸 ‘‘𑀆𑀳𑀭𑀣𑀸𑀯𑀼𑀲𑁄, 𑀘𑀻𑀯𑀭’’𑀦𑁆𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀅𑀦𑀼𑀘𑁆𑀙𑀯𑀺𑀓𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀆𑀘𑀭𑀺𑀬𑁄 𑀦𑁄, 𑀆𑀯𑀼𑀲𑁄, 𑀉𑀚𑀼 𑀆𑀚𑀸𑀦𑀻𑀬𑁄. 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀢𑀝𑁆𑀝𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 ‘𑀫𑀬𑁆𑀳𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀳𑀻’𑀢𑀺 𑀆𑀳. 𑀅𑀦𑀼𑀘𑁆𑀙𑀯𑀺𑀓𑁄, 𑀆𑀯𑀼𑀲𑁄, 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁄’’𑀢𑀺. 𑀏𑀯𑀭𑀽𑀧𑀸𑀦𑀁 𑀕𑀦𑁆𑀣𑁄 𑀧𑀮𑀺𑀩𑁄𑀥𑁄 𑀦 𑀳𑁄𑀢𑀻𑀢𑀺.

𑀇𑀤𑁆𑀥𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀸 𑀇𑀤𑁆𑀥𑀺. 𑀲𑀸 𑀳𑀺 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄 𑀯𑀺𑀬 𑀢𑀭𑀼𑀡𑀲𑀲𑁆𑀲𑀁 𑀯𑀺𑀬 𑀘 𑀤𑀼𑀧𑁆𑀧𑀭𑀺𑀳𑀸𑀭𑀸 𑀳𑁄𑀢𑀺. 𑀅𑀧𑁆𑀧𑀫𑀢𑁆𑀢𑀓𑁂𑀦𑁂𑀯 𑀪𑀺𑀚𑁆𑀚𑀢𑀺. 𑀲𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀧𑀮𑀺𑀩𑁄𑀥𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀲, 𑀲𑀫𑀸𑀥𑀺𑀁 𑀧𑀢𑁆𑀯𑀸 𑀧𑀢𑁆𑀢𑀩𑁆𑀩𑀢𑁄. 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀢𑁆𑀣𑀺𑀓𑁂𑀦 𑀇𑀤𑁆𑀥𑀺𑀧𑀮𑀺𑀩𑁄𑀥𑁄 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀇𑀢𑀭𑁂𑀦 𑀅𑀯𑀲𑁂𑀲𑀸𑀢𑀺 𑀅𑀬𑀁 𑀢𑀸𑀯 𑀧𑀮𑀺𑀩𑁄𑀥𑀓𑀣𑀸𑀬 𑀯𑀺𑀢𑁆𑀣𑀸𑀭𑁄.

𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀯𑀡𑁆𑀡𑀦𑀸

𑁪𑁨. 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀤𑀼𑀯𑀺𑀥𑀁 𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀜𑁆𑀘. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀪𑀺𑀓𑁆𑀔𑀼𑀲𑀗𑁆𑀖𑀸𑀤𑀻𑀲𑀼 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀘. 𑀅𑀲𑀼𑀪𑀲𑀜𑁆𑀜𑀸𑀢𑀺𑀧𑀺 𑀏𑀓𑁂.

𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀞𑀫𑀁 𑀢𑀸𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀅𑀩𑁆𑀬𑀸𑀧𑀚𑁆𑀚𑀸𑀢𑀺 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸. 𑀢𑀢𑁄 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼. 𑀢𑀢𑁄 𑀕𑁄𑀘𑀭𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑀚𑀦𑁂. 𑀢𑀢𑁄 𑀢𑀢𑁆𑀣 𑀫𑀦𑀼𑀲𑁆𑀲𑁂 𑀉𑀧𑀸𑀤𑀸𑀬 𑀲𑀩𑁆𑀩𑀲𑀢𑁆𑀢𑁂𑀲𑀼. 𑀲𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀫𑁂𑀢𑁆𑀢𑀸𑀬 𑀲𑀳𑀯𑀸𑀲𑀻𑀦𑀁 𑀫𑀼𑀤𑀼𑀘𑀺𑀢𑁆𑀢𑀢𑀁 𑀚𑀦𑁂𑀢𑀺. 𑀅𑀣𑀲𑁆𑀲 𑀢𑁂 𑀲𑀼𑀔𑀲𑀁𑀯𑀸𑀲𑀸 𑀳𑁄𑀦𑁆𑀢𑀺. 𑀲𑀻𑀫𑀝𑁆𑀞𑀓𑀤𑁂𑀯𑀢𑀸𑀲𑀼 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀸𑀳𑀺 𑀤𑁂𑀯𑀢𑀸𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀲𑀁𑀯𑀺𑀳𑀺𑀢𑀭𑀓𑁆𑀔𑁄 𑀳𑁄𑀢𑀺. 𑀕𑁄𑀘𑀭𑀕𑀸𑀫𑀫𑁆𑀳𑀺 𑀇𑀲𑁆𑀲𑀭𑀚𑀦𑁂 𑀫𑁂𑀢𑁆𑀢𑀸𑀬 𑀫𑀼𑀤𑀼𑀓𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀳𑀺 𑀇𑀲𑁆𑀲𑀭𑁂𑀳𑀺 𑀥𑀫𑁆𑀫𑀺𑀓𑀸𑀬 𑀭𑀓𑁆𑀔𑀸𑀬 𑀲𑀼𑀭𑀓𑁆𑀔𑀺𑀢𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑁂𑀲𑀼 𑀫𑁂𑀢𑁆𑀢𑀸𑀬 𑀧𑀲𑀸𑀤𑀺𑀢𑀘𑀺𑀢𑁆𑀢𑁂𑀳𑀺 𑀢𑁂𑀳𑀺 𑀅𑀧𑀭𑀺𑀪𑀽𑀢𑁄 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑁄 𑀳𑁄𑀢𑀺. 𑀫𑀭𑀡𑀲𑁆𑀲𑀢𑀺𑀬𑀸 𑀧𑀦 𑀅𑀯𑀲𑁆𑀲𑀁 𑀫𑀬𑀸 𑀫𑀭𑀺𑀢𑀩𑁆𑀩𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑁂𑀲𑀦𑀁 𑀧𑀳𑀸𑀬 𑀉𑀧𑀭𑀽𑀧𑀭𑀺 𑀯𑀟𑁆𑀠𑀫𑀸𑀦𑀲𑀁𑀯𑁂𑀕𑁄 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀓𑁄 𑀳𑁄𑀢𑀺. 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑀘𑀺𑀢𑁆𑀢𑀲𑁆𑀲 𑀧𑀦𑀲𑁆𑀲 𑀤𑀺𑀩𑁆𑀩𑀸𑀦𑀺𑀧𑀺 𑀆𑀭𑀫𑁆𑀫𑀡𑀸𑀦𑀺 𑀮𑁄𑀪𑀯𑀲𑁂𑀦 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀺𑀬𑀦𑁆𑀢𑀺.

𑀏𑀯𑀁 𑀩𑀳𑀽𑀧𑀓𑀸𑀭𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀢𑁆𑀣𑀬𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀲𑁆𑀲 𑀬𑁄𑀕𑀸𑀦𑀼𑀬𑁄𑀕𑀓𑀫𑁆𑀫𑀲𑁆𑀲 𑀞𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀘𑀢𑁆𑀢𑀸𑀮𑀻𑀲𑀸𑀬 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑀁 𑀬𑀲𑁆𑀲 𑀘𑀭𑀺𑀬𑀸𑀦𑀼𑀓𑀽𑀮𑀁, 𑀢𑀁 𑀢𑀲𑁆𑀲 𑀦𑀺𑀘𑁆𑀘𑀁 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸 𑀉𑀧𑀭𑀺𑀫𑀲𑁆𑀲 𑀘 𑀉𑀧𑀭𑀺𑀫𑀲𑁆𑀲 𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀇𑀫𑀁 𑀤𑀼𑀯𑀺𑀥𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀬𑁄 𑀤𑁂𑀢𑀺, 𑀅𑀬𑀁 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑁄 𑀦𑀸𑀫. 𑀢𑀁 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁.

𑀓𑀮𑁆𑀬𑀸𑀡𑀫𑀺𑀢𑁆𑀢𑀦𑁆𑀢𑀺 𑁋

𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄𑀢𑀺. (𑀅. 𑀦𑀺. 𑁭.𑁩𑁭);

𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀏𑀓𑀦𑁆𑀢𑁂𑀦 𑀳𑀺𑀢𑁂𑀲𑀺𑀁 𑀯𑀼𑀤𑁆𑀥𑀺𑀧𑀓𑁆𑀔𑁂 𑀞𑀺𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁.

‘‘𑀫𑀫𑀁 𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁧.𑁧𑁨𑁯; 𑁫.𑁨) 𑀆𑀤𑀺𑀯𑀘𑀦𑀢𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀕𑀳𑀺𑀢𑀁 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀢𑀲𑁆𑀫𑀺𑀁 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑁂𑀲𑀼 𑀬𑁄 𑀥𑀭𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀺𑀁 𑀅𑀲𑀢𑀺 𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲𑁂𑀯 𑀯𑀲𑁂𑀦 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑁂𑀢𑀩𑁆𑀩𑀁.

𑀓𑀺𑀁 𑀧𑀦 𑀔𑀻𑀡𑀸𑀲𑀯𑁄 𑀅𑀳𑀁 𑀔𑀻𑀡𑀸𑀲𑀯𑁄𑀢𑀺 𑀅𑀢𑁆𑀢𑀸𑀦𑀁 𑀧𑀓𑀸𑀲𑁂𑀢𑀻𑀢𑀺? 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀓𑀸𑀭𑀓𑀪𑀸𑀯𑀁 𑀳𑀺 𑀚𑀸𑀦𑀺𑀢𑁆𑀯𑀸 𑀧𑀓𑀸𑀲𑁂𑀢𑀺. 𑀦𑀦𑀼 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑁄 𑀆𑀭𑀤𑁆𑀥𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 ‘‘𑀓𑀫𑁆𑀫𑀝𑁆𑀞𑀸𑀦𑀓𑀸𑀭𑀓𑁄 𑀅𑀬’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸 𑀆𑀓𑀸𑀲𑁂 𑀘𑀫𑁆𑀫𑀔𑀡𑁆𑀟𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀻𑀢𑀺.

𑀢𑀲𑁆𑀫𑀸 𑀲𑀘𑁂 𑀔𑀻𑀡𑀸𑀲𑀯𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀮𑀪𑀢𑀺, 𑀅𑀦𑀸𑀕𑀸𑀫𑀺𑀲𑀓𑀤𑀸𑀕𑀸𑀫𑀺𑀲𑁄𑀢𑀸𑀧𑀦𑁆𑀦𑀛𑀸𑀦𑀮𑀸𑀪𑀻𑀧𑀼𑀣𑀼𑀚𑁆𑀚𑀦𑀢𑀺𑀧𑀺𑀝𑀓𑀥𑀭𑀤𑁆𑀯𑀺𑀧𑀺𑀝𑀓𑀥𑀭𑀏𑀓𑀧𑀺𑀝𑀓𑀥𑀭𑁂𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀲𑀦𑁆𑀢𑀺𑀓𑁂. 𑀏𑀓𑀧𑀺𑀝𑀓𑀥𑀭𑁂𑀧𑀺 𑀅𑀲𑀢𑀺 𑀬𑀲𑁆𑀲 𑀏𑀓𑀲𑀗𑁆𑀕𑀻𑀢𑀺𑀧𑀺 𑀅𑀝𑁆𑀞𑀓𑀣𑀸𑀬 𑀲𑀤𑁆𑀥𑀺𑀁 𑀧𑀕𑀼𑀡𑀸, 𑀅𑀬𑀜𑁆𑀘 𑀮𑀚𑁆𑀚𑀻 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑁂𑀢𑀩𑁆𑀩𑀁. 𑀏𑀯𑀭𑀽𑀧𑁄 𑀳𑀺 𑀢𑀦𑁆𑀢𑀺𑀥𑀭𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀧𑀯𑁂𑀡𑀻𑀧𑀸𑀮𑀓𑁄 𑀆𑀘𑀭𑀺𑀬𑁄 𑀆𑀘𑀭𑀺𑀬𑀫𑀢𑀺𑀓𑁄𑀯 𑀳𑁄𑀢𑀺, 𑀦 𑀅𑀢𑁆𑀢𑀦𑁄𑀫𑀢𑀺𑀓𑁄 𑀳𑁄𑀢𑀺. 𑀢𑁂𑀦𑁂𑀯 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 ‘‘𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀆𑀳𑀁𑀲𑀼.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀔𑀻𑀡𑀸𑀲𑀯𑀸𑀤𑀬𑁄 𑀘𑁂𑀢𑁆𑀣 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀆𑀘𑀺𑀓𑁆𑀔𑀦𑁆𑀢𑀺. 𑀩𑀳𑀼𑀲𑁆𑀲𑀼𑀢𑁄 𑀧𑀦 𑀢𑀁 𑀢𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀦𑀁 𑀯𑀺𑀲𑁄𑀥𑀺𑀢𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀲𑀼𑀢𑁆𑀢𑀜𑁆𑀘 𑀓𑀸𑀭𑀡𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀬𑁄𑀚𑁂𑀢𑁆𑀯𑀸 𑀕𑀳𑀦𑀝𑁆𑀞𑀸𑀦𑁂 𑀕𑀘𑁆𑀙𑀦𑁆𑀢𑁄 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀫𑀳𑀸𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑀁 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑀩𑁆𑀩𑀁.

𑀲𑀘𑁂 𑀧𑀦𑁂𑀢𑀁 𑀏𑀓𑀯𑀺𑀳𑀸𑀭𑁂𑀬𑁂𑀯 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀮𑀪𑀢𑀺, 𑀬𑀢𑁆𑀣 𑀲𑁄 𑀯𑀲𑀢𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀦𑁆𑀢𑁂𑀦 𑀘 𑀦 𑀥𑁄𑀢𑀫𑀓𑁆𑀔𑀺𑀢𑁂𑀳𑀺 𑀧𑀸𑀤𑁂𑀳𑀺 𑀉𑀧𑀸𑀳𑀦𑀸 𑀆𑀭𑀽𑀳𑀺𑀢𑁆𑀯𑀸 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑁂𑀮𑀦𑀸𑀴𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀧𑀭𑀺𑀯𑀼𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀕𑀫𑀺𑀓𑀯𑀢𑁆𑀢𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑀁 𑀬𑀁 𑀯𑀺𑀳𑀸𑀭𑀁 𑀧𑀯𑀺𑀲𑀢𑀺 𑀲𑀩𑁆𑀩𑀢𑁆𑀣 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑁂𑀦 𑀲𑀮𑁆𑀮𑀳𑀼𑀓𑀧𑀭𑀺𑀓𑁆𑀔𑀸𑀭𑁂𑀦 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀦𑀸 𑀳𑀼𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀢𑀁 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀤𑀦𑁆𑀢𑀓𑀝𑁆𑀞𑀁 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀁, 𑀦 𑀘 ‘‘𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑁂𑀢𑁆𑀯𑀸 𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀻𑀦𑀺 𑀓𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀁 𑀧𑀭𑀺𑀯𑁂𑀡𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀲𑀘𑁂 𑀳𑀺𑀲𑁆𑀲 𑀢𑀢𑁆𑀭 𑀆𑀘𑀭𑀺𑀬𑀲𑁆𑀲 𑀯𑀺𑀲𑀪𑀸𑀕𑀸 𑀪𑀺𑀓𑁆𑀔𑀽 𑀪𑀯𑁂𑀬𑁆𑀬𑀼𑀁, 𑀢𑁂 𑀆𑀕𑀫𑀦𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀅𑀯𑀡𑁆𑀡𑀁 𑀧𑀓𑀸𑀲𑁂𑀢𑁆𑀯𑀸 ‘‘𑀦𑀝𑁆𑀞𑁄𑀲𑀺, 𑀲𑀘𑁂 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀬𑁂𑀦 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀲𑁆𑀫𑀸 𑀆𑀘𑀭𑀺𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀚𑀼𑀓𑀁 𑀢𑀢𑁆𑀣𑁂𑀯 𑀕𑀦𑁆𑀢𑀩𑁆𑀩𑀁.

𑀲𑀘𑁂 𑀆𑀘𑀭𑀺𑀬𑁄 𑀤𑀳𑀭𑀢𑀭𑁄 𑀳𑁄𑀢𑀺, 𑀧𑀢𑁆𑀢𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀸𑀤𑀻𑀦𑀺 𑀦 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀼𑀟𑁆𑀠𑀢𑀭𑁄 𑀳𑁄𑀢𑀺, 𑀕𑀦𑁆𑀢𑁆𑀯𑀸 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀞𑀸𑀢𑀩𑁆𑀩𑀁. ‘‘𑀦𑀺𑀓𑁆𑀔𑀺𑀧𑀸𑀯𑀼𑀲𑁄, 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. ‘‘𑀧𑀸𑀦𑀻𑀬𑀁 𑀧𑀺𑀯𑀸’’𑀢𑀺 𑀯𑀼𑀢𑁆𑀢𑁂𑀦 𑀲𑀘𑁂 𑀇𑀘𑁆𑀙𑀢𑀺 𑀧𑀸𑀢𑀩𑁆𑀩𑀁. ‘‘𑀧𑀸𑀤𑁂 𑀥𑁄𑀯𑀸𑀳𑀻’’𑀢𑀺 𑀯𑀼𑀢𑁆𑀢𑁂𑀦 𑀦 𑀢𑀸𑀯 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸. 𑀲𑀘𑁂 𑀳𑀺 𑀆𑀘𑀭𑀺𑀬𑁂𑀦 𑀆𑀪𑀢𑀁 𑀉𑀤𑀓𑀁 𑀪𑀯𑁂𑀬𑁆𑀬, 𑀦 𑀲𑀸𑀭𑀼𑀧𑁆𑀧𑀁 𑀲𑀺𑀬𑀸. ‘‘𑀥𑁄𑀯𑀸𑀳𑀸𑀯𑀼𑀲𑁄, 𑀦 𑀫𑀬𑀸 𑀆𑀪𑀢𑀁, 𑀅𑀜𑁆𑀜𑁂𑀳𑀺 𑀆𑀪𑀢’’𑀦𑁆𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀬𑀢𑁆𑀣 𑀆𑀘𑀭𑀺𑀬𑁄 𑀦 𑀧𑀲𑁆𑀲𑀢𑀺, 𑀏𑀯𑀭𑀽𑀧𑁂 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀑𑀓𑀸𑀲𑁂, 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀸𑀭𑀲𑁆𑀲𑀸𑀧𑀺 𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸.

𑀲𑀘𑁂 𑀆𑀘𑀭𑀺𑀬𑁄 𑀢𑁂𑀮𑀦𑀸𑀴𑀺𑀁 𑀆𑀳𑀭𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀦 𑀕𑀡𑁆𑀳𑁂𑀬𑁆𑀬, ‘‘𑀅𑀬𑀁 𑀪𑀺𑀓𑁆𑀔𑀼 𑀇𑀢𑁄 𑀏𑀯 𑀧𑀝𑁆𑀞𑀸𑀬 𑀲𑀫𑁆𑀪𑁄𑀕𑀁 𑀓𑁄𑀧𑁂𑀢𑀻’’𑀢𑀺 𑀆𑀘𑀭𑀺𑀬𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬. 𑀕𑀳𑁂𑀢𑁆𑀯𑀸 𑀧𑀦 𑀦 𑀆𑀤𑀺𑀢𑁄𑀯 𑀧𑀸𑀤𑀸 𑀫𑀓𑁆𑀔𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀢𑀁 𑀆𑀘𑀭𑀺𑀬𑀲𑁆𑀲 𑀕𑀢𑁆𑀢𑀩𑁆𑀪𑀜𑁆𑀚𑀦𑀢𑁂𑀮𑀁 𑀪𑀯𑁂𑀬𑁆𑀬, 𑀦 𑀲𑀸𑀭𑀼𑀧𑁆𑀧𑀁 𑀲𑀺𑀬𑀸. 𑀢𑀲𑁆𑀫𑀸 𑀲𑀻𑀲𑀁 𑀫𑀓𑁆𑀔𑁂𑀢𑁆𑀯𑀸 𑀔𑀦𑁆𑀥𑀸𑀤𑀻𑀦𑀺 𑀫𑀓𑁆𑀔𑁂𑀢𑀩𑁆𑀩𑀸𑀦𑀺. ‘‘𑀲𑀩𑁆𑀩𑀧𑀸𑀭𑀺𑀳𑀸𑀭𑀺𑀬𑀢𑁂𑀮𑀫𑀺𑀤𑀁, 𑀆𑀯𑀼𑀲𑁄, 𑀧𑀸𑀤𑁂𑀧𑀺 𑀫𑀓𑁆𑀔𑁂𑀳𑀻’’𑀢𑀺 𑀯𑀼𑀢𑁆𑀢𑁂𑀦 𑀧𑀦 𑀣𑁄𑀓𑀁 𑀲𑀻𑀲𑁂 𑀓𑀢𑁆𑀯𑀸 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 ‘‘𑀇𑀫𑀁 𑀢𑁂𑀮𑀦𑀸𑀴𑀺𑀁 𑀞𑀧𑁂𑀫𑀺, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀆𑀘𑀭𑀺𑀬𑁂 𑀕𑀡𑁆𑀳𑀦𑁆𑀢𑁂 𑀤𑀸𑀢𑀩𑁆𑀩𑀸.

𑀆𑀕𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀫𑁂, 𑀪𑀦𑁆𑀢𑁂, 𑀓𑀣𑁂𑀣 𑀇𑀘𑁆𑀘𑁂𑀯𑀁 𑀦 𑀯𑀢𑁆𑀢𑀩𑁆𑀩𑀁. 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺𑀉𑀧𑀝𑁆𑀞𑀸𑀓𑁄 𑀅𑀢𑁆𑀣𑀺, 𑀢𑀁 𑀬𑀸𑀘𑀺𑀢𑁆𑀯𑀸 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀲𑀘𑁂 𑀬𑀸𑀘𑀺𑀢𑁄𑀧𑀺 𑀦 𑀤𑁂𑀢𑀺, 𑀑𑀓𑀸𑀲𑁂 𑀮𑀤𑁆𑀥𑁂𑀬𑁂𑀯 𑀓𑀸𑀢𑀩𑁆𑀩𑀁. 𑀓𑀭𑁄𑀦𑁆𑀢𑁂𑀦 𑀔𑀼𑀤𑁆𑀤𑀓𑀫𑀚𑁆𑀛𑀺𑀫𑀫𑀳𑀦𑁆𑀢𑀸𑀦𑀺 𑀢𑀻𑀡𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀉𑀧𑀦𑀸𑀫𑁂𑀢𑀩𑁆𑀩𑀸𑀦𑀺. 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀤𑀼𑀯𑀺𑀥𑀁 𑀫𑀼𑀔𑀥𑁄𑀯𑀦𑀉𑀤𑀓𑀜𑁆𑀘 𑀦𑁆𑀳𑀸𑀦𑁄𑀤𑀓𑀜𑁆𑀘 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀢𑀢𑁄 𑀬𑀁 𑀆𑀘𑀭𑀺𑀬𑁄 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀸𑀤𑀺𑀲𑀫𑁂𑀯 𑀦𑀺𑀘𑁆𑀘𑀁 𑀉𑀧𑀦𑀸𑀫𑁂𑀢𑀩𑁆𑀩𑀁. 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀬𑀣𑀸𑀮𑀤𑁆𑀥𑀁 𑀉𑀧𑀦𑀸𑀫𑁂𑀢𑀩𑁆𑀩𑀁. 𑀓𑀺𑀁 𑀩𑀳𑀼𑀦𑀸 𑀯𑀼𑀢𑁆𑀢𑁂𑀦? 𑀬𑀁 𑀢𑀁 𑀪𑀕𑀯𑀢𑀸 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸 𑀯𑀢𑁆𑀢𑀦𑀸, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸’’𑀢𑀺 (𑀫𑀳𑀸𑀯. 𑁭𑁮) 𑀆𑀤𑀺𑀓𑀁 𑀔𑀦𑁆𑀥𑀓𑁂 𑀲𑀫𑁆𑀫𑀸𑀯𑀢𑁆𑀢𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀓𑀸𑀢𑀩𑁆𑀩𑀁.

𑀏𑀯𑀁 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀕𑀭𑀼𑀁 𑀆𑀭𑀸𑀥𑀬𑀫𑀸𑀦𑁂𑀦 𑀲𑀸𑀬𑀁 𑀯𑀦𑁆𑀤𑀺𑀢𑁆𑀯𑀸 𑀬𑀸𑀳𑀻𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀬𑀤𑀸 𑀲𑁄 𑀓𑀺𑀲𑁆𑀲𑀸𑀕𑀢𑁄𑀲𑀻𑀢𑀺 𑀧𑀼𑀘𑁆𑀙𑀢𑀺, 𑀢𑀤𑀸 𑀆𑀕𑀫𑀦𑀓𑀸𑀭𑀡𑀁 𑀓𑀣𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀦𑁂𑀯 𑀧𑀼𑀘𑁆𑀙𑀢𑀺, 𑀯𑀢𑁆𑀢𑀁 𑀧𑀦 𑀲𑀸𑀤𑀺𑀬𑀢𑀺, 𑀤𑀲𑀸𑀳𑁂 𑀯𑀸 𑀧𑀓𑁆𑀔𑁂 𑀯𑀸 𑀯𑀻𑀢𑀺𑀯𑀢𑁆𑀢𑁂 𑀏𑀓𑀤𑀺𑀯𑀲𑀁 𑀯𑀺𑀲𑁆𑀲𑀚𑁆𑀚𑀺𑀢𑁂𑀦𑀸𑀧𑀺 𑀅𑀕𑀦𑁆𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀆𑀕𑀫𑀦𑀓𑀸𑀭𑀡𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀓𑀸𑀮𑁂 𑀯𑀸 𑀕𑀦𑁆𑀢𑁆𑀯𑀸 𑀓𑀺𑀫𑀢𑁆𑀣𑀫𑀸𑀕𑀢𑁄𑀲𑀻𑀢𑀺 𑀧𑀼𑀝𑁆𑀞𑁂𑀦 𑀆𑀭𑁄𑀘𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀧𑀸𑀢𑁄𑀯 𑀆𑀕𑀘𑁆𑀙𑀸𑀢𑀺 𑀯𑀤𑀢𑀺, 𑀧𑀸𑀢𑁄𑀯 𑀕𑀦𑁆𑀢𑀩𑁆𑀩𑀁.

𑀲𑀘𑁂 𑀧𑀦𑀲𑁆𑀲 𑀢𑀸𑀬 𑀯𑁂𑀮𑀸𑀬 𑀧𑀺𑀢𑁆𑀢𑀸𑀩𑀸𑀥𑁂𑀦 𑀯𑀸 𑀓𑀼𑀘𑁆𑀙𑀺 𑀧𑀭𑀺𑀟𑀬𑁆𑀳𑀢𑀺, 𑀅𑀕𑁆𑀕𑀺𑀫𑀦𑁆𑀤𑀢𑀸𑀬 𑀯𑀸 𑀪𑀢𑁆𑀢𑀁 𑀦 𑀚𑀻𑀭𑀢𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀭𑁄𑀕𑁄 𑀩𑀸𑀥𑀢𑀺, 𑀢𑀁 𑀬𑀣𑀸𑀪𑀽𑀢𑀁 𑀆𑀯𑀺𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀧𑁆𑀧𑀸𑀬𑀯𑁂𑀮𑀁 𑀆𑀭𑁄𑀘𑁂𑀢𑁆𑀯𑀸 𑀢𑀸𑀬 𑀯𑁂𑀮𑀸𑀬 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁. 𑀅𑀲𑀧𑁆𑀧𑀸𑀬𑀯𑁂𑀮𑀸𑀬 𑀳𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀓𑁆𑀓𑀸 𑀳𑁄𑀢𑀺 𑀫𑀦𑀲𑀺𑀓𑀸𑀢𑀼𑀦𑁆𑀢𑀺. 𑀅𑀬𑀁 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀏𑀢𑁆𑀣 𑀯𑀺𑀢𑁆𑀣𑀸𑀭𑁄.

𑀘𑀭𑀺𑀬𑀸𑀯𑀡𑁆𑀡𑀦𑀸

𑁪𑁩. 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀦𑁆𑀢𑀺 𑀏𑀢𑁆𑀣 𑀘𑀭𑀺𑀬𑀸𑀢𑀺 𑀙 𑀘𑀭𑀺𑀬𑀸 𑀭𑀸𑀕𑀘𑀭𑀺𑀬𑀸, 𑀤𑁄𑀲𑀘𑀭𑀺𑀬𑀸, 𑀫𑁄𑀳𑀘𑀭𑀺𑀬𑀸, 𑀲𑀤𑁆𑀥𑀸𑀘𑀭𑀺𑀬𑀸, 𑀩𑀼𑀤𑁆𑀥𑀺𑀘𑀭𑀺𑀬𑀸, 𑀯𑀺𑀢𑀓𑁆𑀓𑀘𑀭𑀺𑀬𑀸𑀢𑀺. 𑀓𑁂𑀘𑀺 𑀧𑀦 𑀭𑀸𑀕𑀸𑀤𑀻𑀦𑀁 𑀲𑀁𑀲𑀕𑁆𑀕𑀲𑀦𑁆𑀦𑀺𑀧𑀸𑀢𑀯𑀲𑁂𑀦 𑀅𑀧𑀭𑀸𑀧𑀺 𑀘𑀢𑀲𑁆𑀲𑁄, 𑀢𑀣𑀸 𑀲𑀤𑁆𑀥𑀸𑀤𑀻𑀦𑀦𑁆𑀢𑀺 𑀇𑀫𑀸𑀳𑀺 𑀅𑀝𑁆𑀞𑀳𑀺 𑀲𑀤𑁆𑀥𑀺𑀁 𑀘𑀼𑀤𑁆𑀤𑀲 𑀇𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀦 𑀪𑁂𑀤𑁂 𑀯𑀼𑀘𑁆𑀘𑀫𑀸𑀦𑁂 𑀭𑀸𑀕𑀸𑀤𑀻𑀦𑀁 𑀲𑀤𑁆𑀥𑀸𑀤𑀻𑀳𑀺𑀧𑀺 𑀲𑀁𑀲𑀕𑁆𑀕𑀁 𑀓𑀢𑁆𑀯𑀸 𑀅𑀦𑁂𑀓𑀸 𑀘𑀭𑀺𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀗𑁆𑀔𑁂𑀧𑁂𑀦 𑀙𑀴𑁂𑀯 𑀘𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀭𑀺𑀬𑀸, 𑀧𑀓𑀢𑀺, 𑀉𑀲𑁆𑀲𑀦𑁆𑀦𑀢𑀸𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀸𑀲𑀁 𑀯𑀲𑁂𑀦 𑀙𑀴𑁂𑀯 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺 𑀭𑀸𑀕𑀘𑀭𑀺𑀢𑁄, 𑀤𑁄𑀲𑀘𑀭𑀺𑀢𑁄, 𑀫𑁄𑀳𑀘𑀭𑀺𑀢𑁄, 𑀲𑀤𑁆𑀥𑀸𑀘𑀭𑀺𑀢𑁄, 𑀩𑀼𑀤𑁆𑀥𑀺𑀘𑀭𑀺𑀢𑁄, 𑀯𑀺𑀢𑀓𑁆𑀓𑀘𑀭𑀺𑀢𑁄𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀭𑀸𑀕𑀘𑀭𑀺𑀢𑀲𑁆𑀲 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀲𑀫𑀬𑁂 𑀲𑀤𑁆𑀥𑀸 𑀩𑀮𑀯𑀢𑀻 𑀳𑁄𑀢𑀺, 𑀭𑀸𑀕𑀲𑁆𑀲 𑀆𑀲𑀦𑁆𑀦𑀕𑀼𑀡𑀢𑁆𑀢𑀸. 𑀬𑀣𑀸 𑀳𑀺 𑀅𑀓𑀼𑀲𑀮𑀧𑀓𑁆𑀔𑁂 𑀭𑀸𑀕𑁄 𑀲𑀺𑀦𑀺𑀤𑁆𑀥𑁄 𑀦𑀸𑀢𑀺𑀮𑀽𑀔𑁄, 𑀏𑀯𑀁 𑀓𑀼𑀲𑀮𑀧𑀓𑁆𑀔𑁂 𑀲𑀤𑁆𑀥𑀸. 𑀬𑀣𑀸 𑀭𑀸𑀕𑁄 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀬𑁂𑀲𑀢𑀺, 𑀏𑀯𑀁 𑀲𑀤𑁆𑀥𑀸 𑀲𑀻𑀮𑀸𑀤𑀺𑀕𑀼𑀡𑁂. 𑀬𑀣𑀸 𑀭𑀸𑀕𑁄 𑀅𑀳𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀏𑀯𑀁 𑀲𑀤𑁆𑀥𑀸 𑀳𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀢𑀲𑁆𑀫𑀸 𑀭𑀸𑀕𑀘𑀭𑀺𑀢𑀲𑁆𑀲 𑀲𑀤𑁆𑀥𑀸𑀘𑀭𑀺𑀢𑁄 𑀲𑀪𑀸𑀕𑁄.

𑀬𑀲𑁆𑀫𑀸 𑀧𑀦 𑀤𑁄𑀲𑀘𑀭𑀺𑀢𑀲𑁆𑀲 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀲𑀫𑀬𑁂 𑀧𑀜𑁆𑀜𑀸 𑀩𑀮𑀯𑀢𑀻 𑀳𑁄𑀢𑀺, 𑀤𑁄𑀲𑀲𑁆𑀲 𑀆𑀲𑀦𑁆𑀦𑀕𑀼𑀡𑀢𑁆𑀢𑀸. 𑀬𑀣𑀸 𑀳𑀺 𑀅𑀓𑀼𑀲𑀮𑀧𑀓𑁆𑀔𑁂 𑀤𑁄𑀲𑁄 𑀦𑀺𑀲𑁆𑀲𑀺𑀦𑁂𑀳𑁄 𑀦 𑀆𑀭𑀫𑁆𑀫𑀡𑀁 𑀅𑀮𑁆𑀮𑀻𑀬𑀢𑀺, 𑀏𑀯𑀁 𑀓𑀼𑀲𑀮𑀧𑀓𑁆𑀔𑁂 𑀧𑀜𑁆𑀜𑀸. 𑀬𑀣𑀸 𑀘 𑀤𑁄𑀲𑁄 𑀅𑀪𑀽𑀢𑀫𑁆𑀧𑀺 𑀤𑁄𑀲𑀫𑁂𑀯 𑀧𑀭𑀺𑀬𑁂𑀲𑀢𑀺, 𑀏𑀯𑀁 𑀧𑀜𑁆𑀜𑀸 𑀪𑀽𑀢𑀁 𑀤𑁄𑀲𑀫𑁂𑀯. 𑀬𑀣𑀸 𑀤𑁄𑀲𑁄 𑀲𑀢𑁆𑀢𑀧𑀭𑀺𑀯𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀧𑀜𑁆𑀜𑀸 𑀲𑀗𑁆𑀔𑀸𑀭𑀧𑀭𑀺𑀯𑀚𑁆𑀚𑀦𑀸𑀓𑀸𑀭𑁂𑀦, 𑀢𑀲𑁆𑀫𑀸 𑀤𑁄𑀲𑀘𑀭𑀺𑀢𑀲𑁆𑀲 𑀩𑀼𑀤𑁆𑀥𑀺𑀘𑀭𑀺𑀢𑁄 𑀲𑀪𑀸𑀕𑁄.

𑀬𑀲𑁆𑀫𑀸 𑀧𑀦 𑀫𑁄𑀳𑀘𑀭𑀺𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀯𑀸𑀬𑀫𑀫𑀸𑀦𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀦𑁆𑀢𑀭𑀸𑀬𑀓𑀭𑀸 𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑁄𑀳𑀲𑁆𑀲 𑀆𑀲𑀦𑁆𑀦𑀮𑀓𑁆𑀔𑀡𑀢𑁆𑀢𑀸. 𑀬𑀣𑀸 𑀳𑀺 𑀫𑁄𑀳𑁄 𑀧𑀭𑀺𑀩𑁆𑀬𑀸𑀓𑀼𑀮𑀢𑀸𑀬 𑀅𑀦𑀯𑀝𑁆𑀞𑀺𑀢𑁄, 𑀏𑀯𑀁 𑀯𑀺𑀢𑀓𑁆𑀓𑁄 𑀦𑀸𑀦𑀧𑁆𑀧𑀓𑀸𑀭𑀯𑀺𑀢𑀓𑁆𑀓𑀦𑀢𑀸𑀬. 𑀬𑀣𑀸 𑀘 𑀫𑁄𑀳𑁄 𑀅𑀧𑀭𑀺𑀬𑁄𑀕𑀸𑀳𑀡𑀢𑀸𑀬 𑀘𑀜𑁆𑀘𑀮𑁄. 𑀢𑀣𑀸 𑀯𑀺𑀢𑀓𑁆𑀓𑁄 𑀮𑀳𑀼𑀧𑀭𑀺𑀓𑀧𑁆𑀧𑀦𑀢𑀸𑀬, 𑀢𑀲𑁆𑀫𑀸 𑀫𑁄𑀳𑀘𑀭𑀺𑀢𑀲𑁆𑀲 𑀯𑀺𑀢𑀓𑁆𑀓𑀘𑀭𑀺𑀢𑁄 𑀲𑀪𑀸𑀕𑁄𑀢𑀺.

𑀅𑀧𑀭𑁂 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀢𑀢𑁆𑀣 𑀢𑀡𑁆𑀳𑀸 𑀭𑀸𑀕𑁄𑀬𑁂𑀯, 𑀫𑀸𑀦𑁄 𑀘 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑀤𑀼𑀪𑀬𑀁 𑀭𑀸𑀕𑀘𑀭𑀺𑀬𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀫𑁄𑀳𑀦𑀺𑀤𑀸𑀦𑀢𑁆𑀢𑀸 𑀘 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀘𑀭𑀺𑀬𑀸 𑀫𑁄𑀳𑀘𑀭𑀺𑀬𑀫𑁂𑀯 𑀅𑀦𑀼𑀧𑀢𑀢𑀺.

𑁪𑁪. 𑀢𑀸 𑀧𑀦𑁂𑀢𑀸 𑀘𑀭𑀺𑀬𑀸 𑀓𑀺𑀦𑁆𑀦𑀺𑀤𑀸𑀦𑀸? 𑀓𑀣𑀜𑁆𑀘 𑀚𑀸𑀦𑀺𑀢𑀩𑁆𑀩𑀁 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀧𑀼𑀕𑁆𑀕𑀮𑁄 𑀤𑁄𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀘𑀭𑀺𑀢𑁄’’𑀢𑀺? 𑀓𑀺𑀁 𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀁 𑀲𑀧𑁆𑀧𑀸𑀬𑀦𑁆𑀢𑀺?

𑀢𑀢𑁆𑀭 𑀧𑀼𑀭𑀺𑀫𑀸 𑀢𑀸𑀯 𑀢𑀺𑀲𑁆𑀲𑁄 𑀘𑀭𑀺𑀬𑀸 𑀧𑀼𑀩𑁆𑀩𑀸𑀘𑀺𑀡𑁆𑀡𑀦𑀺𑀤𑀸𑀦𑀸, 𑀥𑀸𑀢𑀼𑀤𑁄𑀲𑀦𑀺𑀤𑀸𑀦𑀸 𑀘𑀸𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀇𑀝𑁆𑀞𑀧𑁆𑀧𑀬𑁄𑀕𑀲𑀼𑀪𑀓𑀫𑁆𑀫𑀩𑀳𑀼𑀮𑁄 𑀭𑀸𑀕𑀘𑀭𑀺𑀢𑁄 𑀳𑁄𑀢𑀺, 𑀲𑀕𑁆𑀕𑀸 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄. 𑀧𑀼𑀩𑁆𑀩𑁂 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑁂𑀭𑀓𑀫𑁆𑀫𑀩𑀳𑀼𑀮𑁄 𑀤𑁄𑀲𑀘𑀭𑀺𑀢𑁄 𑀳𑁄𑀢𑀺, 𑀦𑀺𑀭𑀬𑀦𑀸𑀕𑀬𑁄𑀦𑀻𑀳𑀺 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄. 𑀧𑀼𑀩𑁆𑀩𑁂 𑀫𑀚𑁆𑀚𑀧𑀸𑀦𑀩𑀳𑀼𑀮𑁄 𑀲𑀼𑀢𑀧𑀭𑀺𑀧𑀼𑀘𑁆𑀙𑀸𑀯𑀺𑀳𑀻𑀦𑁄 𑀘 𑀫𑁄𑀳𑀘𑀭𑀺𑀢𑁄 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀯𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑁄𑀢𑀺 𑀏𑀯𑀁 𑀧𑀼𑀩𑁆𑀩𑀸𑀘𑀺𑀡𑁆𑀡𑀦𑀺𑀤𑀸𑀦𑀸𑀢𑀺 𑀯𑀤𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀦 𑀥𑀸𑀢𑀽𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀧𑀼𑀕𑁆𑀕𑀮𑁄 𑀫𑁄𑀳𑀘𑀭𑀺𑀢𑁄 𑀳𑁄𑀢𑀺 𑀧𑀣𑀯𑀻𑀥𑀸𑀢𑀼𑀬𑀸 𑀘 𑀆𑀧𑁄𑀥𑀸𑀢𑀼𑀬𑀸 𑀘. 𑀇𑀢𑀭𑀸𑀲𑀁 𑀤𑁆𑀯𑀺𑀦𑁆𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀤𑁄𑀲𑀘𑀭𑀺𑀢𑁄. 𑀲𑀩𑁆𑀩𑀸𑀲𑀁 𑀲𑀫𑀢𑁆𑀢𑀸 𑀧𑀦 𑀭𑀸𑀕𑀘𑀭𑀺𑀢𑁄𑀢𑀺. 𑀤𑁄𑀲𑁂𑀲𑀼 𑀘 𑀲𑁂𑀫𑁆𑀳𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄 𑀳𑁄𑀢𑀺. 𑀯𑀸𑀢𑀸𑀥𑀺𑀓𑁄 𑀫𑁄𑀳𑀘𑀭𑀺𑀢𑁄. 𑀲𑁂𑀫𑁆𑀳𑀸𑀥𑀺𑀓𑁄 𑀯𑀸 𑀫𑁄𑀳𑀘𑀭𑀺𑀢𑁄. 𑀯𑀸𑀢𑀸𑀥𑀺𑀓𑁄 𑀭𑀸𑀕𑀘𑀭𑀺𑀢𑁄𑀢𑀺 𑀏𑀯𑀁 𑀥𑀸𑀢𑀼𑀤𑁄𑀲𑀦𑀺𑀤𑀸𑀦𑀸𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀣 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀇𑀝𑁆𑀞𑀧𑁆𑀧𑀬𑁄𑀕𑀲𑀼𑀪𑀓𑀫𑁆𑀫𑀩𑀳𑀼𑀮𑀸𑀧𑀺 𑀲𑀕𑁆𑀕𑀸 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸𑀧𑀺 𑀘 𑀦 𑀲𑀩𑁆𑀩𑁂 𑀭𑀸𑀕𑀘𑀭𑀺𑀢𑀸𑀬𑁂𑀯 𑀳𑁄𑀦𑁆𑀢𑀺, 𑀦 𑀇𑀢𑀭𑁂 𑀯𑀸 𑀤𑁄𑀲𑀫𑁄𑀳𑀘𑀭𑀺𑀢𑀸. 𑀏𑀯𑀁 𑀥𑀸𑀢𑀽𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦 𑀉𑀲𑁆𑀲𑀤𑀦𑀺𑀬𑀫𑁄 𑀦𑀸𑀫 𑀦𑀢𑁆𑀣𑀺. 𑀤𑁄𑀲𑀦𑀺𑀬𑀫𑁂 𑀘 𑀭𑀸𑀕𑀫𑁄𑀳𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀘 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀫𑁂𑀯. 𑀲𑀤𑁆𑀥𑀸𑀘𑀭𑀺𑀬𑀸𑀤𑀻𑀲𑀼 𑀘 𑀏𑀓𑀺𑀲𑁆𑀲𑀸𑀧𑀺 𑀦𑀺𑀤𑀸𑀦𑀁 𑀦 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀯𑀘𑀦𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑀸𑀦𑀼𑀲𑀸𑀭𑁂𑀦 𑀯𑀺𑀦𑀺𑀘𑁆𑀙𑀬𑁄, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀉𑀲𑁆𑀲𑀤𑀓𑀺𑀢𑁆𑀢𑀦𑁂 (𑀥. 𑀲. 𑀅𑀝𑁆𑀞. 𑁪𑁯𑁮) ‘‘𑀇𑀫𑁂 𑀲𑀢𑁆𑀢𑀸 𑀧𑀼𑀩𑁆𑀩𑀳𑁂𑀢𑀼𑀦𑀺𑀬𑀸𑀫𑁂𑀦 𑀮𑁄𑀪𑀼𑀲𑁆𑀲𑀤𑀸 𑀤𑁄𑀲𑀼𑀲𑁆𑀲𑀤𑀸 𑀫𑁄𑀳𑀼𑀲𑁆𑀲𑀤𑀸 𑀅𑀮𑁄𑀪𑀼𑀲𑁆𑀲𑀤𑀸 𑀅𑀤𑁄𑀲𑀼𑀲𑁆𑀲𑀤𑀸 𑀅𑀫𑁄𑀳𑀼𑀲𑁆𑀲𑀤𑀸 𑀘 𑀳𑁄𑀦𑁆𑀢𑀺.

𑀬𑀲𑁆𑀲 𑀳𑀺 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑁄 𑀩𑀮𑀯𑀸 𑀳𑁄𑀢𑀺 𑀅𑀮𑁄𑀪𑁄 𑀫𑀦𑁆𑀤𑁄, 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸, 𑀢𑀲𑁆𑀲 𑀫𑀦𑁆𑀤𑁄 𑀅𑀮𑁄𑀪𑁄 𑀮𑁄𑀪𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀤𑁄𑀲𑀸𑀫𑁄𑀳𑀸 𑀧𑀦 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑁂 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀮𑀼𑀤𑁆𑀥𑁄 𑀳𑁄𑀢𑀺 𑀲𑀼𑀔𑀲𑀻𑀮𑁄 𑀅𑀓𑁆𑀓𑁄𑀥𑀦𑁄 𑀧𑀜𑁆𑀜𑀯𑀸 𑀯𑀚𑀺𑀭𑀽𑀧𑀫𑀜𑀸𑀡𑁄.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀤𑁄𑀲𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀅𑀮𑁄𑀪𑀸𑀤𑁄𑀲𑀸 𑀫𑀦𑁆𑀤𑀸, 𑀅𑀫𑁄𑀳𑁄 𑀩𑀮𑀯𑀸 𑀫𑁄𑀳𑁄 𑀫𑀦𑁆𑀤𑁄, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘. 𑀧𑀜𑁆𑀜𑀯𑀸 𑀧𑀦 𑀳𑁄𑀢𑀺 𑀯𑀚𑀺𑀭𑀽𑀧𑀫𑀜𑀸𑀡𑁄 𑀤𑀢𑁆𑀢𑀸𑀪𑀬𑀢𑁆𑀣𑁂𑀭𑁄 𑀯𑀺𑀬.

𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀦𑁆𑀥𑁄 𑀘, 𑀲𑀻𑀮𑀓𑁄 𑀧𑀦 𑀳𑁄𑀢𑀺 𑀅𑀓𑁆𑀓𑁄𑀥𑀦𑁄 (𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀺𑀬).

𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀅𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀅𑀧𑁆𑀧𑀓𑀺𑀮𑁂𑀲𑁄 𑀳𑁄𑀢𑀺 𑀤𑀺𑀩𑁆𑀩𑀸𑀭𑀫𑁆𑀫𑀡𑀫𑁆𑀧𑀺 𑀤𑀺𑀲𑁆𑀯𑀸 𑀦𑀺𑀘𑁆𑀘𑀮𑁄, 𑀤𑀼𑀝𑁆𑀞𑁄 𑀧𑀦 𑀳𑁄𑀢𑀺 𑀤𑀦𑁆𑀥𑀧𑀜𑁆𑀜𑁄 𑀘.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀅𑀤𑀼𑀝𑁆𑀞𑁄 𑀲𑀻𑀮𑀓𑁄 𑀘, 𑀤𑀦𑁆𑀥𑁄 𑀧𑀦 𑀳𑁄𑀢𑀺.

𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀧𑀜𑁆𑀜𑀯𑀸 𑀘, 𑀤𑀼𑀝𑁆𑀞𑁄 𑀘 𑀧𑀦 𑀳𑁄𑀢𑀺 𑀓𑁄𑀥𑀦𑁄.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺 𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀺𑀬 𑀅𑀮𑀼𑀤𑁆𑀥𑁄 𑀅𑀤𑀼𑀝𑁆𑀞𑁄 𑀧𑀜𑁆𑀜𑀯𑀸 𑀘 𑀳𑁄𑀢𑀻’’𑀢𑀺.

𑀏𑀢𑁆𑀣 𑀘 𑀬𑁄 𑀮𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑁄, 𑀅𑀬𑀁 𑀭𑀸𑀕𑀘𑀭𑀺𑀢𑁄. 𑀤𑀼𑀝𑁆𑀞𑀤𑀦𑁆𑀥𑀸 𑀤𑁄𑀲𑀫𑁄𑀳𑀘𑀭𑀺𑀢𑀸. 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀘𑀭𑀺𑀢𑁄. 𑀅𑀮𑀼𑀤𑁆𑀥𑀅𑀤𑀼𑀝𑁆𑀞𑀸 𑀧𑀲𑀦𑁆𑀦𑀧𑀓𑀢𑀺𑀢𑀸𑀬 𑀲𑀤𑁆𑀥𑀸𑀘𑀭𑀺𑀢𑀸. 𑀬𑀣𑀸 𑀯𑀸 𑀅𑀫𑁄𑀳𑀧𑀭𑀺𑀯𑀸𑀭𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑁄 𑀩𑀼𑀤𑁆𑀥𑀺𑀘𑀭𑀺𑀢𑁄, 𑀏𑀯𑀁 𑀩𑀮𑀯𑀲𑀤𑁆𑀥𑀸𑀧𑀭𑀺𑀯𑀸𑀭𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑁄 𑀲𑀤𑁆𑀥𑀸𑀘𑀭𑀺𑀢𑁄. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀧𑀭𑀺𑀯𑀸𑀭𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑁄 𑀯𑀺𑀢𑀓𑁆𑀓𑀘𑀭𑀺𑀢𑁄. 𑀮𑁄𑀪𑀸𑀤𑀺𑀦𑀸 𑀯𑁄𑀫𑀺𑀲𑁆𑀲𑀧𑀭𑀺𑀯𑀸𑀭𑁂𑀦 𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑁄 𑀯𑁄𑀫𑀺𑀲𑁆𑀲𑀘𑀭𑀺𑀢𑁄𑀢𑀺. 𑀏𑀯𑀁 𑀮𑁄𑀪𑀸𑀤𑀻𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑀧𑀭𑀺𑀯𑀸𑀭𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀁 𑀘𑀭𑀺𑀬𑀸𑀦𑀁 𑀦𑀺𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁫. 𑀬𑀁 𑀧𑀦 𑀯𑀼𑀢𑁆𑀢𑀁 𑀓𑀣𑀜𑁆𑀘 𑀚𑀸𑀦𑀺𑀢𑀩𑁆𑀩𑀁 𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄𑀢𑀺𑀆𑀤𑀺. 𑀢𑀢𑁆𑀭𑀸𑀬𑀁 𑀦𑀬𑁄.

𑀇𑀭𑀺𑀬𑀸𑀧𑀣𑀢𑁄 𑀓𑀺𑀘𑁆𑀘𑀸, 𑀪𑁄𑀚𑀦𑀸 𑀤𑀲𑁆𑀲𑀦𑀸𑀤𑀺𑀢𑁄;

𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀢𑁄 𑀘𑁂𑀯, 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂𑀢𑀺.

𑀢𑀢𑁆𑀣 𑀇𑀭𑀺𑀬𑀸𑀧𑀣𑀢𑁄𑀢𑀺 𑀭𑀸𑀕𑀘𑀭𑀺𑀢𑁄 𑀳𑀺 𑀧𑀓𑀢𑀺𑀕𑀫𑀦𑁂𑀦 𑀕𑀘𑁆𑀙𑀦𑁆𑀢𑁄 𑀘𑀸𑀢𑀼𑀭𑀺𑀬𑁂𑀦 𑀕𑀘𑁆𑀙𑀢𑀺, 𑀲𑀡𑀺𑀓𑀁 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀫𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀫𑀁 𑀉𑀤𑁆𑀥𑀭𑀢𑀺, 𑀉𑀓𑁆𑀓𑀼𑀝𑀺𑀓𑀜𑁆𑀘𑀲𑁆𑀲 𑀧𑀤𑀁 𑀳𑁄𑀢𑀺. 𑀤𑁄𑀲𑀘𑀭𑀺𑀢𑁄 𑀧𑀸𑀤𑀕𑁆𑀕𑁂𑀳𑀺 𑀔𑀡𑀦𑁆𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑀳𑀲𑀸 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀳𑀲𑀸 𑀉𑀤𑁆𑀥𑀭𑀢𑀺, 𑀅𑀦𑀼𑀓𑀟𑁆𑀠𑀺𑀢𑀜𑁆𑀘𑀲𑁆𑀲 𑀧𑀤𑀁 𑀳𑁄𑀢𑀺. 𑀫𑁄𑀳𑀘𑀭𑀺𑀢𑁄 𑀧𑀭𑀺𑀩𑁆𑀬𑀸𑀓𑀼𑀮𑀸𑀬 𑀕𑀢𑀺𑀬𑀸 𑀕𑀘𑁆𑀙𑀢𑀺, 𑀙𑀫𑁆𑀪𑀺𑀢𑁄 𑀯𑀺𑀬 𑀧𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀙𑀫𑁆𑀪𑀺𑀢𑁄 𑀯𑀺𑀬 𑀉𑀤𑁆𑀥𑀭𑀢𑀺, 𑀲𑀳𑀲𑀸𑀦𑀼𑀧𑀻𑀴𑀺𑀢𑀜𑁆𑀘𑀲𑁆𑀲 𑀧𑀤𑀁 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀁 𑁋

‘‘𑀭𑀢𑁆𑀢𑀲𑁆𑀲 𑀳𑀺 𑀉𑀓𑁆𑀓𑀼𑀝𑀺𑀓𑀁 𑀧𑀤𑀁 𑀪𑀯𑁂,

𑀤𑀼𑀝𑁆𑀞𑀲𑁆𑀲 𑀳𑁄𑀢𑀺 𑀅𑀦𑀼𑀓𑀟𑁆𑀠𑀺𑀢𑀁 𑀧𑀤𑀁;

𑀫𑀽𑀴𑁆𑀳𑀲𑁆𑀲 𑀳𑁄𑀢𑀺 𑀲𑀳𑀲𑀸𑀦𑀼𑀧𑀻𑀴𑀺𑀢𑀁,

𑀯𑀺𑀯𑀝𑁆𑀝𑀘𑁆𑀙𑀤𑀲𑁆𑀲 𑀇𑀤𑀫𑀻𑀤𑀺𑀲𑀁 𑀧𑀤’’𑀦𑁆𑀢𑀺.

𑀞𑀸𑀦𑀫𑁆𑀧𑀺 𑀭𑀸𑀕𑀘𑀭𑀺𑀢𑀲𑁆𑀲 𑀧𑀸𑀲𑀸𑀤𑀺𑀓𑀁 𑀳𑁄𑀢𑀺 𑀫𑀥𑀼𑀭𑀸𑀓𑀸𑀭𑀁, 𑀤𑁄𑀲𑀘𑀭𑀺𑀢𑀲𑁆𑀲 𑀣𑀤𑁆𑀥𑀸𑀓𑀸𑀭𑀁, 𑀫𑁄𑀳𑀘𑀭𑀺𑀢𑀲𑁆𑀲 𑀆𑀓𑀼𑀮𑀸𑀓𑀸𑀭𑀁. 𑀦𑀺𑀲𑀚𑁆𑀚𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀭𑀸𑀕𑀘𑀭𑀺𑀢𑁄 𑀘 𑀅𑀢𑀭𑀫𑀸𑀦𑁄 𑀲𑀫𑀁 𑀲𑁂𑀬𑁆𑀬𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑀡𑀺𑀓𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀲𑀫𑁄𑀥𑀸𑀬 𑀧𑀸𑀲𑀸𑀤𑀺𑀓𑁂𑀦 𑀆𑀓𑀸𑀭𑁂𑀦 𑀲𑀬𑀢𑀺, 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑁄 𑀘 𑀲𑀻𑀖𑀁 𑀅𑀯𑀼𑀝𑁆𑀞𑀸𑀬 𑀲𑀗𑁆𑀓𑀺𑀢𑁄 𑀯𑀺𑀬 𑀲𑀡𑀺𑀓𑀁 𑀧𑀝𑀺𑀯𑀘𑀦𑀁 𑀤𑁂𑀢𑀺. 𑀤𑁄𑀲𑀘𑀭𑀺𑀢𑁄 𑀢𑀭𑀫𑀸𑀦𑁄 𑀬𑀣𑀸 𑀯𑀸 𑀢𑀣𑀸 𑀯𑀸 𑀲𑁂𑀬𑁆𑀬𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀓𑀸𑀬𑁄 𑀪𑀸𑀓𑀼𑀝𑀺𑀁 𑀓𑀢𑁆𑀯𑀸 𑀲𑀬𑀢𑀺, 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑁄 𑀘 𑀲𑀻𑀖𑀁 𑀯𑀼𑀝𑁆𑀞𑀸𑀬 𑀓𑀼𑀧𑀺𑀢𑁄 𑀯𑀺𑀬 𑀧𑀝𑀺𑀯𑀘𑀦𑀁 𑀤𑁂𑀢𑀺. 𑀫𑁄𑀳𑀘𑀭𑀺𑀢𑁄 𑀤𑀼𑀲𑁆𑀲𑀡𑁆𑀞𑀸𑀦𑀁 𑀲𑁂𑀬𑁆𑀬𑀁 𑀧𑀜𑁆𑀜𑀧𑁂𑀢𑁆𑀯𑀸 𑀯𑀺𑀓𑁆𑀔𑀺𑀢𑁆𑀢𑀓𑀸𑀬𑁄 𑀩𑀳𑀼𑀮𑀁 𑀅𑀥𑁄𑀫𑀼𑀔𑁄 𑀲𑀬𑀢𑀺, 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑁄 𑀘 𑀳𑀼𑀗𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀤𑀦𑁆𑀥𑀁 𑀯𑀼𑀝𑁆𑀞𑀸𑀢𑀺. 𑀲𑀤𑁆𑀥𑀸𑀘𑀭𑀺𑀢𑀸𑀤𑀬𑁄 𑀧𑀦 𑀬𑀲𑁆𑀫𑀸 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀕𑀸, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀢𑀸𑀤𑀺𑀲𑁄𑀯 𑀇𑀭𑀺𑀬𑀸𑀧𑀣𑁄 𑀳𑁄𑀢𑀻𑀢𑀺. 𑀏𑀯𑀁 𑀢𑀸𑀯 𑀇𑀭𑀺𑀬𑀸𑀧𑀣𑀢𑁄 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂.

𑀓𑀺𑀘𑁆𑀘𑀸𑀢𑀺 𑀲𑀫𑁆𑀫𑀚𑁆𑀚𑀦𑀸𑀤𑀻𑀲𑀼 𑀘 𑀓𑀺𑀘𑁆𑀘𑁂𑀲𑀼 𑀭𑀸𑀕𑀘𑀭𑀺𑀢𑁄 𑀲𑀸𑀥𑀼𑀓𑀁 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀅𑀢𑀭𑀫𑀸𑀦𑁄 𑀯𑀸𑀮𑀺𑀓𑀁 𑀅𑀯𑀺𑀧𑁆𑀧𑀓𑀺𑀭𑀦𑁆𑀢𑁄 𑀲𑀺𑀦𑁆𑀤𑀼𑀯𑀸𑀭𑀓𑀼𑀲𑀼𑀫𑀲𑀦𑁆𑀣𑀭𑀫𑀺𑀯 𑀲𑀦𑁆𑀣𑀭𑀦𑁆𑀢𑁄 𑀲𑀼𑀤𑁆𑀥𑀁 𑀲𑀫𑀁 𑀲𑀫𑁆𑀫𑀚𑁆𑀚𑀢𑀺. 𑀤𑁄𑀲𑀘𑀭𑀺𑀢𑁄 𑀕𑀸𑀴𑁆𑀳𑀁 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀉𑀪𑀢𑁄 𑀯𑀸𑀮𑀺𑀓𑀁 𑀉𑀲𑁆𑀲𑀸𑀭𑁂𑀦𑁆𑀢𑁄 𑀔𑀭𑁂𑀦 𑀲𑀤𑁆𑀤𑁂𑀦 𑀅𑀲𑀼𑀤𑁆𑀥𑀁 𑀯𑀺𑀲𑀫𑀁 𑀲𑀫𑁆𑀫𑀚𑁆𑀚𑀢𑀺. 𑀫𑁄𑀳𑀘𑀭𑀺𑀢𑁄 𑀲𑀺𑀣𑀺𑀮𑀁 𑀲𑀫𑁆𑀫𑀚𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀆𑀴𑁄𑀮𑀬𑀫𑀸𑀦𑁄 𑀅𑀲𑀼𑀤𑁆𑀥𑀁 𑀯𑀺𑀲𑀫𑀁 𑀲𑀫𑁆𑀫𑀚𑁆𑀚𑀢𑀺.

𑀬𑀣𑀸 𑀲𑀫𑁆𑀫𑀚𑁆𑀚𑀦𑁂, 𑀏𑀯𑀁 𑀘𑀻𑀯𑀭𑀥𑁄𑀯𑀦𑀭𑀚𑀦𑀸𑀤𑀻𑀲𑀼𑀧𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀦𑀺𑀧𑀼𑀡𑀫𑀥𑀼𑀭𑀲𑀫𑀲𑀓𑁆𑀓𑀘𑁆𑀘𑀓𑀸𑀭𑀻 𑀭𑀸𑀕𑀘𑀭𑀺𑀢𑁄. 𑀕𑀸𑀴𑁆𑀳𑀣𑀤𑁆𑀥𑀯𑀺𑀲𑀫𑀓𑀸𑀭𑀻 𑀤𑁄𑀲𑀘𑀭𑀺𑀢𑁄. 𑀅𑀦𑀺𑀧𑀼𑀡𑀩𑁆𑀬𑀸𑀓𑀼𑀮𑀯𑀺𑀲𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀭𑀻 𑀫𑁄𑀳𑀘𑀭𑀺𑀢𑁄. 𑀘𑀻𑀯𑀭𑀥𑀸𑀭𑀡𑀫𑁆𑀧𑀺 𑀘 𑀭𑀸𑀕𑀘𑀭𑀺𑀢𑀲𑁆𑀲 𑀦𑀸𑀢𑀺𑀕𑀸𑀴𑁆𑀳𑀁 𑀦𑀸𑀢𑀺𑀲𑀺𑀣𑀺𑀮𑀁 𑀳𑁄𑀢𑀺 𑀧𑀸𑀲𑀸𑀤𑀺𑀓𑀁 𑀧𑀭𑀺𑀫𑀡𑁆𑀟𑀮𑀁. 𑀤𑁄𑀲𑀘𑀭𑀺𑀢𑀲𑁆𑀲 𑀅𑀢𑀺𑀕𑀸𑀴𑁆𑀳𑀁 𑀅𑀧𑀭𑀺𑀫𑀡𑁆𑀟𑀮𑀁. 𑀫𑁄𑀳𑀘𑀭𑀺𑀢𑀲𑁆𑀲 𑀲𑀺𑀣𑀺𑀮𑀁 𑀧𑀭𑀺𑀩𑁆𑀬𑀸𑀓𑀼𑀮𑀁. 𑀲𑀤𑁆𑀥𑀸𑀘𑀭𑀺𑀢𑀸𑀤𑀬𑁄 𑀢𑁂𑀲𑀁𑀬𑁂𑀯𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀲𑀪𑀸𑀕𑀢𑁆𑀢𑀸𑀢𑀺. 𑀏𑀯𑀁 𑀓𑀺𑀘𑁆𑀘𑀢𑁄 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂.

𑀪𑁄𑀚𑀦𑀸𑀢𑀺 𑀭𑀸𑀕𑀘𑀭𑀺𑀢𑁄 𑀲𑀺𑀦𑀺𑀤𑁆𑀥𑀫𑀥𑀼𑀭𑀪𑁄𑀚𑀦𑀧𑁆𑀧𑀺𑀬𑁄 𑀳𑁄𑀢𑀺, 𑀪𑀼𑀜𑁆𑀚𑀫𑀸𑀦𑁄 𑀘 𑀦𑀸𑀢𑀺𑀫𑀳𑀦𑁆𑀢𑀁 𑀧𑀭𑀺𑀫𑀡𑁆𑀟𑀮𑀁 𑀆𑀮𑁄𑀧𑀁 𑀓𑀢𑁆𑀯𑀸 𑀭𑀲𑀧𑀝𑀺𑀲𑀁𑀯𑁂𑀤𑀻 𑀅𑀢𑀭𑀫𑀸𑀦𑁄 𑀪𑀼𑀜𑁆𑀚𑀢𑀺, 𑀓𑀺𑀜𑁆𑀘𑀺𑀤𑁂𑀯 𑀘 𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀢𑀺. 𑀤𑁄𑀲𑀘𑀭𑀺𑀢𑁄 𑀮𑀽𑀔𑀅𑀫𑁆𑀩𑀺𑀮𑀪𑁄𑀚𑀦𑀧𑁆𑀧𑀺𑀬𑁄 𑀳𑁄𑀢𑀺, 𑀪𑀼𑀜𑁆𑀚𑀫𑀸𑀦𑁄 𑀘 𑀫𑀼𑀔𑀧𑀽𑀭𑀓𑀁 𑀆𑀮𑁄𑀧𑀁 𑀓𑀢𑁆𑀯𑀸 𑀅𑀭𑀲𑀧𑀝𑀺𑀲𑀁𑀯𑁂𑀤𑀻 𑀢𑀭𑀫𑀸𑀦𑁄 𑀪𑀼𑀜𑁆𑀚𑀢𑀺, 𑀓𑀺𑀜𑁆𑀘𑀺𑀤𑁂𑀯 𑀘 𑀅𑀲𑀸𑀤𑀼𑀁 𑀮𑀪𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀢𑀺. 𑀫𑁄𑀳𑀘𑀭𑀺𑀢𑁄 𑀅𑀦𑀺𑀬𑀢𑀭𑀼𑀘𑀺𑀓𑁄 𑀳𑁄𑀢𑀺, 𑀪𑀼𑀜𑁆𑀚𑀫𑀸𑀦𑁄 𑀘 𑀅𑀧𑀭𑀺𑀫𑀡𑁆𑀟𑀮𑀁 𑀧𑀭𑀺𑀢𑁆𑀢𑀁 𑀆𑀮𑁄𑀧𑀁 𑀓𑀢𑁆𑀯𑀸 𑀪𑀸𑀚𑀦𑁂 𑀙𑀟𑁆𑀟𑁂𑀦𑁆𑀢𑁄 𑀫𑀼𑀔𑀁 𑀫𑀓𑁆𑀔𑁂𑀦𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀢𑀁 𑀢𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀪𑀼𑀜𑁆𑀚𑀢𑀺. 𑀲𑀤𑁆𑀥𑀸𑀘𑀭𑀺𑀢𑀸𑀤𑀬𑁄𑀧𑀺 𑀢𑁂𑀲𑀁𑀬𑁂𑀯𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀁𑀲𑀪𑀸𑀕𑀢𑁆𑀢𑀸𑀢𑀺. 𑀏𑀯𑀁 𑀪𑁄𑀚𑀦𑀢𑁄 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂.

𑀤𑀲𑁆𑀲𑀦𑀸𑀤𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑁄 𑀈𑀲𑀓𑀫𑁆𑀧𑀺 𑀫𑀦𑁄𑀭𑀫𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀬𑀚𑀸𑀢𑁄 𑀯𑀺𑀬 𑀘𑀺𑀭𑀁 𑀑𑀮𑁄𑀓𑁂𑀢𑀺, 𑀧𑀭𑀺𑀢𑁆𑀢𑁂𑀧𑀺 𑀕𑀼𑀡𑁂 𑀲𑀚𑁆𑀚𑀢𑀺, 𑀪𑀽𑀢𑀫𑁆𑀧𑀺 𑀤𑁄𑀲𑀁 𑀦 𑀕𑀡𑁆𑀳𑀸𑀢𑀺, 𑀧𑀓𑁆𑀓𑀫𑀦𑁆𑀢𑁄𑀧𑀺 𑀅𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀲𑀸𑀧𑁂𑀓𑁆𑀔𑁄 𑀧𑀓𑁆𑀓𑀫𑀢𑀺. 𑀤𑁄𑀲𑀘𑀭𑀺𑀢𑁄 𑀈𑀲𑀓𑀫𑁆𑀧𑀺 𑀅𑀫𑀦𑁄𑀭𑀫𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀓𑀺𑀮𑀦𑁆𑀢𑀭𑀽𑀧𑁄 𑀯𑀺𑀬 𑀦 𑀘𑀺𑀭𑀁 𑀑𑀮𑁄𑀓𑁂𑀢𑀺, 𑀧𑀭𑀺𑀢𑁆𑀢𑁂𑀧𑀺 𑀤𑁄𑀲𑁂 𑀧𑀝𑀺𑀳𑀜𑁆𑀜𑀢𑀺, 𑀪𑀽𑀢𑀫𑁆𑀧𑀺 𑀕𑀼𑀡𑀁 𑀦 𑀕𑀡𑁆𑀳𑀸𑀢𑀺, 𑀧𑀓𑁆𑀓𑀫𑀦𑁆𑀢𑁄𑀧𑀺 𑀫𑀼𑀜𑁆𑀘𑀺𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸 𑀅𑀦𑀧𑁂𑀓𑁆𑀔𑁄 𑀧𑀓𑁆𑀓𑀫𑀢𑀺. 𑀫𑁄𑀳𑀘𑀭𑀺𑀢𑁄 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀭𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, 𑀧𑀭𑀁 𑀦𑀺𑀦𑁆𑀤𑀦𑁆𑀢𑀁 𑀲𑀼𑀢𑁆𑀯𑀸 𑀦𑀺𑀦𑁆𑀤𑀢𑀺, 𑀧𑀲𑀁𑀲𑀦𑁆𑀢𑀁 𑀲𑀼𑀢𑁆𑀯𑀸 𑀧𑀲𑀁𑀲𑀢𑀺, 𑀲𑀬𑀁 𑀧𑀦 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄𑀯 𑀳𑁄𑀢𑀺. 𑀏𑀲 𑀦𑀬𑁄 𑀲𑀤𑁆𑀤𑀲𑀯𑀦𑀸𑀤𑀻𑀲𑀼𑀧𑀺. 𑀲𑀤𑁆𑀥𑀸𑀘𑀭𑀺𑀢𑀸𑀤𑀬𑁄 𑀧𑀦 𑀢𑁂𑀲𑀁𑀬𑁂𑀯𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀁𑀲𑀪𑀸𑀕𑀢𑁆𑀢𑀸𑀢𑀺. 𑀏𑀯𑀁 𑀤𑀲𑁆𑀲𑀦𑀸𑀤𑀺𑀢𑁄 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂.

𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀢𑁄 𑀘𑁂𑀯𑀸𑀢𑀺 𑀭𑀸𑀕𑀘𑀭𑀺𑀢𑀲𑁆𑀲 𑀘 𑀫𑀸𑀬𑀸, 𑀲𑀸𑀞𑁂𑀬𑁆𑀬𑀁, 𑀫𑀸𑀦𑁄, 𑀧𑀸𑀧𑀺𑀘𑁆𑀙𑀢𑀸, 𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸, 𑀲𑀺𑀗𑁆𑀕𑀁, 𑀘𑀸𑀧𑀮𑁆𑀬𑀦𑁆𑀢𑀺 𑀏𑀯𑀫𑀸𑀤𑀬𑁄 𑀥𑀫𑁆𑀫𑀸 𑀩𑀳𑀼𑀮𑀁 𑀧𑀯𑀢𑁆𑀢𑀦𑁆𑀢𑀺. 𑀤𑁄𑀲𑀘𑀭𑀺𑀢𑀲𑁆𑀲 𑀓𑁄𑀥𑁄, 𑀉𑀧𑀦𑀸𑀳𑁄, 𑀫𑀓𑁆𑀔𑁄, 𑀧𑀴𑀸𑀲𑁄, 𑀇𑀲𑁆𑀲𑀸, 𑀫𑀘𑁆𑀙𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀫𑁄𑀳𑀘𑀭𑀺𑀢𑀲𑁆𑀲 𑀣𑀺𑀦𑀁, 𑀫𑀺𑀤𑁆𑀥𑀁, 𑀉𑀤𑁆𑀥𑀘𑁆𑀘𑀁, 𑀓𑀼𑀓𑁆𑀓𑀼𑀘𑁆𑀘𑀁, 𑀯𑀺𑀘𑀺𑀓𑀺𑀘𑁆𑀙𑀸, 𑀆𑀥𑀸𑀦𑀕𑁆𑀕𑀸𑀳𑀺𑀢𑀸, 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀢𑀸𑀢𑀺 𑀏𑀯𑀫𑀸𑀤𑀬𑁄. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀫𑀼𑀢𑁆𑀢𑀘𑀸𑀕𑀢𑀸, 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀓𑀸𑀫𑀢𑀸, 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀢𑀸, 𑀧𑀸𑀫𑁄𑀚𑁆𑀚𑀩𑀳𑀼𑀮𑀢𑀸, 𑀅𑀲𑀞𑀢𑀸, 𑀅𑀫𑀸𑀬𑀸𑀯𑀺𑀢𑀸, 𑀧𑀲𑀸𑀤𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀧𑀲𑀸𑀤𑁄𑀢𑀺 𑀏𑀯𑀫𑀸𑀤𑀬𑁄. 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀲𑁄𑀯𑀘𑀲𑁆𑀲𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀪𑁄𑀚𑀦𑁂𑀫𑀢𑁆𑀢𑀜𑁆𑀜𑀼𑀢𑀸, 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀲𑀁𑀯𑁂𑀕𑁄, 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄 𑀧𑀥𑀸𑀦𑀦𑁆𑀢𑀺 𑀏𑀯𑀫𑀸𑀤𑀬𑁄. 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀪𑀲𑁆𑀲𑀩𑀳𑀼𑀮𑀢𑀸, 𑀕𑀡𑀸𑀭𑀸𑀫𑀢𑀸, 𑀓𑀼𑀲𑀮𑀸𑀦𑀼𑀬𑁄𑀕𑁂 𑀅𑀭𑀢𑀺, 𑀅𑀦𑀯𑀝𑁆𑀞𑀺𑀢𑀓𑀺𑀘𑁆𑀘𑀢𑀸, 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸, 𑀤𑀺𑀯𑀸 𑀧𑀚𑁆𑀚𑀮𑀦𑀸, 𑀳𑀼𑀭𑀸𑀳𑀼𑀭𑀁 𑀥𑀸𑀯𑀦𑀸𑀢𑀺 𑀏𑀯𑀫𑀸𑀤𑀬𑁄 𑀥𑀫𑁆𑀫𑀸 𑀩𑀳𑀼𑀮𑀁 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀯𑀁 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀢𑁄 𑀘𑀭𑀺𑀬𑀸𑀬𑁄 𑀯𑀺𑀪𑀸𑀯𑀬𑁂.

𑀬𑀲𑁆𑀫𑀸 𑀧𑀦 𑀇𑀤𑀁 𑀘𑀭𑀺𑀬𑀸𑀯𑀺𑀪𑀸𑀯𑀦𑀯𑀺𑀥𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀦𑁂𑀯 𑀧𑀸𑀴𑀺𑀬𑀁 𑀦 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁, 𑀓𑁂𑀯𑀮𑀁 𑀆𑀘𑀭𑀺𑀬𑀫𑀢𑀸𑀦𑀼𑀲𑀸𑀭𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀭𑀸𑀕𑀘𑀭𑀺𑀢𑀲𑁆𑀲 𑀳𑀺 𑀯𑀼𑀢𑁆𑀢𑀸𑀦𑀺 𑀇𑀭𑀺𑀬𑀸𑀧𑀣𑀸𑀤𑀻𑀦𑀺 𑀤𑁄𑀲𑀘𑀭𑀺𑀢𑀸𑀤𑀬𑁄𑀧𑀺 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀲𑀁𑀲𑀝𑁆𑀞𑀘𑀭𑀺𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀏𑀓𑀲𑁆𑀲𑁂𑀯 𑀪𑀺𑀦𑁆𑀦𑀮𑀓𑁆𑀔𑀡𑀸 𑀇𑀭𑀺𑀬𑀸𑀧𑀣𑀸𑀤𑀬𑁄 𑀦 𑀉𑀧𑀧𑀚𑁆𑀚𑀦𑁆𑀢𑀺. 𑀬𑀁 𑀧𑀦𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑀘𑀭𑀺𑀬𑀸𑀯𑀺𑀪𑀸𑀯𑀦𑀯𑀺𑀥𑀸𑀦𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀮𑀸𑀪𑀻 𑀆𑀘𑀭𑀺𑀬𑁄 𑀘𑀭𑀺𑀬𑀁 𑀜𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀢𑀺, 𑀇𑀢𑀭𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺. 𑀢𑀲𑁆𑀫𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀯𑀸 𑀢𑀁 𑀯𑀸 𑀧𑀼𑀕𑁆𑀕𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀁. 𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑀘𑀭𑀺𑀢𑁄𑀢𑀺.

𑁪𑁬. 𑀓𑀺𑀁 𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀁 𑀲𑀧𑁆𑀧𑀸𑀬𑀦𑁆𑀢𑀺 𑀏𑀢𑁆𑀣 𑀧𑀦 𑀲𑁂𑀦𑀸𑀲𑀦𑀁 𑀢𑀸𑀯 𑀭𑀸𑀕𑀘𑀭𑀺𑀢𑀲𑁆𑀲 𑀅𑀥𑁄𑀢𑀯𑁂𑀤𑀺𑀓𑀁 𑀪𑀽𑀫𑀝𑁆𑀞𑀓𑀁 𑀅𑀓𑀢𑀧𑀩𑁆𑀪𑀸𑀭𑀓𑀁 𑀢𑀺𑀡𑀓𑀼𑀝𑀺𑀓𑀁 𑀧𑀡𑁆𑀡𑀲𑀸𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀭𑀚𑁄𑀓𑀺𑀡𑁆𑀡𑀁 𑀚𑀢𑀼𑀓𑀸𑀪𑀭𑀺𑀢𑀁 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀁 𑀅𑀢𑀺𑀉𑀘𑁆𑀘𑀁 𑀯𑀸 𑀅𑀢𑀺𑀦𑀻𑀘𑀁 𑀯𑀸 𑀉𑀚𑁆𑀚𑀗𑁆𑀕𑀮𑀁 𑀲𑀸𑀲𑀗𑁆𑀓𑀁 𑀅𑀲𑀼𑀘𑀺𑀯𑀺𑀲𑀫𑀫𑀕𑁆𑀕𑀁, 𑀬𑀢𑁆𑀣 𑀫𑀜𑁆𑀘𑀧𑀻𑀞𑀫𑁆𑀧𑀺 𑀫𑀗𑁆𑀓𑀼𑀡𑀪𑀭𑀺𑀢𑀁 𑀤𑀼𑀭𑀽𑀧𑀁 𑀤𑀼𑀩𑁆𑀩𑀡𑁆𑀡𑀁, 𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀚𑀺𑀕𑀼𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀁 𑀲𑀧𑁆𑀧𑀸𑀬𑀁. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀅𑀦𑁆𑀢𑀘𑁆𑀙𑀺𑀦𑁆𑀦𑀁 𑀑𑀮𑀫𑁆𑀩𑀯𑀺𑀮𑀫𑁆𑀩𑀲𑀼𑀢𑁆𑀢𑀓𑀸𑀓𑀺𑀡𑁆𑀡𑀁 𑀚𑀸𑀮𑀧𑀽𑀯𑀲𑀤𑀺𑀲𑀁 𑀲𑀸𑀡𑀺 𑀯𑀺𑀬 𑀔𑀭𑀲𑀫𑁆𑀨𑀲𑁆𑀲𑀁 𑀓𑀺𑀮𑀺𑀝𑁆𑀞𑀁 𑀪𑀸𑀭𑀺𑀓𑀁 𑀓𑀺𑀘𑁆𑀙𑀧𑀭𑀺𑀳𑀭𑀡𑀁 𑀲𑀧𑁆𑀧𑀸𑀬𑀁. 𑀧𑀢𑁆𑀢𑁄𑀧𑀺 𑀤𑀼𑀩𑁆𑀩𑀡𑁆𑀡𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀯𑀸 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄 𑀅𑀬𑁄𑀧𑀢𑁆𑀢𑁄 𑀯𑀸 𑀕𑀭𑀼𑀓𑁄 𑀤𑀼𑀲𑁆𑀲𑀡𑁆𑀞𑀸𑀦𑁄 𑀲𑀻𑀲𑀓𑀧𑀸𑀮𑀫𑀺𑀯 𑀚𑁂𑀕𑀼𑀘𑁆𑀙𑁄 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁄𑀧𑀺 𑀅𑀫𑀦𑀸𑀧𑁄 𑀅𑀦𑀸𑀲𑀦𑁆𑀦𑀕𑀸𑀫𑁄 𑀯𑀺𑀲𑀫𑁄 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁄𑀧𑀺 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀅𑀧𑀲𑁆𑀲𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺, 𑀬𑀢𑁆𑀣 𑀏𑀓𑀓𑀼𑀮𑁂𑀧𑀺 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 ‘‘𑀏𑀳𑀺, 𑀪𑀦𑁆𑀢𑁂’’𑀢𑀺 𑀆𑀲𑀦𑀲𑀸𑀮𑀁 𑀧𑀯𑁂𑀲𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀕𑀸𑀯𑀻 𑀯𑀺𑀬 𑀯𑀚𑁂 𑀧𑀯𑁂𑀲𑁂𑀢𑁆𑀯𑀸 𑀅𑀦𑀧𑀮𑁄𑀓𑁂𑀦𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀢𑀸𑀤𑀺𑀲𑁄 𑀯𑀝𑁆𑀝𑀢𑀺. 𑀧𑀭𑀺𑀯𑀺𑀲𑀓𑀫𑀦𑀼𑀲𑁆𑀲𑀸𑀧𑀺 𑀤𑀸𑀲𑀸 𑀯𑀸 𑀓𑀫𑁆𑀫𑀓𑀭𑀸 𑀯𑀸 𑀤𑀼𑀩𑁆𑀩𑀡𑁆𑀡𑀸 𑀤𑀼𑀤𑁆𑀤𑀲𑀺𑀓𑀸 𑀓𑀺𑀮𑀺𑀝𑁆𑀞𑀯𑀲𑀦𑀸 𑀤𑀼𑀕𑁆𑀕𑀦𑁆𑀥𑀸 𑀚𑁂𑀕𑀼𑀘𑁆𑀙𑀸, 𑀬𑁂 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀬𑀸𑀕𑀼𑀪𑀢𑁆𑀢𑀁 𑀙𑀟𑁆𑀟𑁂𑀦𑁆𑀢𑀸 𑀯𑀺𑀬 𑀧𑀭𑀺𑀯𑀺𑀲𑀦𑁆𑀢𑀺, 𑀢𑀸𑀤𑀺𑀲𑀸 𑀲𑀧𑁆𑀧𑀸𑀬𑀸. 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀫𑁆𑀧𑀺 𑀮𑀽𑀔𑀁 𑀤𑀼𑀩𑁆𑀩𑀡𑁆𑀡𑀁 𑀲𑀸𑀫𑀸𑀓𑀓𑀼𑀤𑁆𑀭𑀽𑀲𑀓𑀓𑀡𑀸𑀚𑀓𑀸𑀤𑀺𑀫𑀬𑀁 𑀧𑀽𑀢𑀺𑀢𑀓𑁆𑀓𑀁 𑀩𑀺𑀮𑀗𑁆𑀕𑀁 𑀚𑀺𑀡𑁆𑀡𑀲𑀸𑀓𑀲𑀽𑀧𑁂𑀬𑁆𑀬𑀁 𑀬𑀁𑀓𑀺𑀜𑁆𑀘𑀺𑀤𑁂𑀯 𑀓𑁂𑀯𑀮𑀁 𑀉𑀤𑀭𑀧𑀽𑀭𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀇𑀭𑀺𑀬𑀸𑀧𑀣𑁄𑀧𑀺𑀲𑁆𑀲 𑀞𑀸𑀦𑀁 𑀯𑀸 𑀘𑀗𑁆𑀓𑀫𑁄 𑀯𑀸 𑀯𑀝𑁆𑀝𑀢𑀺. 𑀆𑀭𑀫𑁆𑀫𑀡𑀁 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀦𑁆𑀢𑀺 𑀇𑀤𑀁 𑀭𑀸𑀕𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁.

𑀤𑁄𑀲𑀘𑀭𑀺𑀢𑀲𑁆𑀲 𑀲𑁂𑀦𑀸𑀲𑀦𑀁 𑀦𑀸𑀢𑀺𑀉𑀘𑁆𑀘𑀁 𑀦𑀸𑀢𑀺𑀦𑀻𑀘𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀣𑀫𑁆𑀪𑀲𑁄𑀧𑀸𑀦𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀦𑀸𑀦𑀸𑀯𑀺𑀥𑀘𑀺𑀢𑁆𑀢𑀓𑀫𑁆𑀫𑀲𑀫𑀼𑀚𑁆𑀚𑀮𑀲𑀫𑀲𑀺𑀦𑀺𑀤𑁆𑀥𑀫𑀼𑀤𑀼𑀪𑀽𑀫𑀺𑀢𑀮𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀫𑀺𑀯 𑀓𑀼𑀲𑀼𑀫𑀤𑀸𑀫𑀯𑀺𑀘𑀺𑀢𑁆𑀭𑀯𑀡𑁆𑀡𑀘𑁂𑀮𑀯𑀺𑀢𑀸𑀦𑀲𑀫𑀮𑀗𑁆𑀓𑀢𑀁 𑀲𑀼𑀧𑀜𑁆𑀜𑀢𑁆𑀢𑀲𑀼𑀘𑀺𑀫𑀦𑁄𑀭𑀫𑀢𑁆𑀣𑀭𑀡𑀫𑀜𑁆𑀘𑀧𑀻𑀞𑀁 𑀢𑀢𑁆𑀣 𑀢𑀢𑁆𑀣 𑀯𑀸𑀲𑀢𑁆𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀓𑀼𑀲𑀼𑀫𑀯𑀸𑀲𑀕𑀦𑁆𑀥𑀲𑀼𑀕𑀦𑁆𑀥𑀁 𑀬𑀁 𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀚𑀦𑀬𑀢𑀺, 𑀏𑀯𑀭𑀽𑀧𑀁 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀧𑀦 𑀲𑁂𑀦𑀸𑀲𑀦𑀲𑁆𑀲 𑀫𑀕𑁆𑀕𑁄𑀧𑀺 𑀲𑀩𑁆𑀩𑀧𑀭𑀺𑀲𑁆𑀲𑀬𑀯𑀺𑀫𑀼𑀢𑁆𑀢𑁄 𑀲𑀼𑀘𑀺𑀲𑀫𑀢𑀮𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄𑀯 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑁄𑀧𑁂𑀢𑁆𑀣 𑀓𑀻𑀝𑀫𑀗𑁆𑀓𑀼𑀡𑀤𑀻𑀖𑀚𑀸𑀢𑀺𑀫𑀽𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀦𑀸𑀢𑀺𑀩𑀳𑀼𑀓𑁄, 𑀏𑀓𑀫𑀜𑁆𑀘𑀧𑀻𑀞𑀫𑀢𑁆𑀢𑀫𑁂𑀯 𑀯𑀝𑁆𑀝𑀢𑀺. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑁆𑀧𑀺𑀲𑁆𑀲 𑀘𑀻𑀦𑀧𑀝𑁆𑀝𑀲𑁄𑀫𑀸𑀭𑀧𑀝𑁆𑀝𑀓𑁄𑀲𑁂𑀬𑁆𑀬𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀔𑁄𑀫𑀸𑀤𑀻𑀦𑀁 𑀬𑀁 𑀬𑀁 𑀧𑀡𑀻𑀢𑀁, 𑀢𑁂𑀦 𑀢𑁂𑀦 𑀏𑀓𑀧𑀝𑁆𑀝𑀁 𑀯𑀸 𑀤𑀼𑀧𑀝𑁆𑀝𑀁 𑀯𑀸 𑀲𑀮𑁆𑀮𑀳𑀼𑀓𑀁 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀲𑀼𑀭𑀢𑁆𑀢𑀁 𑀲𑀼𑀤𑁆𑀥𑀯𑀡𑁆𑀡𑀁 𑀯𑀝𑁆𑀝𑀢𑀺. 𑀧𑀢𑁆𑀢𑁄 𑀉𑀤𑀓𑀧𑀼𑀧𑁆𑀨𑀼𑀴𑀫𑀺𑀯 𑀲𑀼𑀲𑀡𑁆𑀞𑀸𑀦𑁄 𑀫𑀡𑀺 𑀯𑀺𑀬 𑀲𑀼𑀫𑀝𑁆𑀞𑁄 𑀦𑀺𑀫𑁆𑀫𑀮𑁄 𑀲𑀫𑀡𑀲𑀸𑀭𑀼𑀧𑁆𑀧𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑁄 𑀅𑀬𑁄𑀫𑀬𑁄 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁄 𑀧𑀭𑀺𑀲𑁆𑀲𑀬𑀯𑀺𑀫𑀼𑀢𑁆𑀢𑁄 𑀲𑀫𑁄 𑀫𑀦𑀸𑀧𑁄 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀕𑀸𑀫𑁄 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁄𑀧𑀺 𑀬𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀇𑀤𑀸𑀦𑀺 𑀅𑀬𑁆𑀬𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁂 𑀧𑀤𑁂𑀲𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀖𑀭𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀳𑀢𑁆𑀣𑀸 𑀧𑀭𑀺𑀯𑀺𑀲𑀦𑁆𑀢𑀺, 𑀢𑀸𑀤𑀺𑀲𑁄 𑀯𑀝𑁆𑀝𑀢𑀺. 𑀧𑀭𑀺𑀯𑁂𑀲𑀓𑀸 𑀧𑀦𑀲𑁆𑀲 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀥𑀽𑀧𑀯𑀸𑀲𑀓𑀼𑀲𑀼𑀫𑀕𑀦𑁆𑀥𑀲𑀼𑀭𑀪𑀺𑀦𑁄 𑀦𑀸𑀦𑀸𑀯𑀺𑀭𑀸𑀕𑀲𑀼𑀘𑀺𑀫𑀦𑀼𑀜𑁆𑀜𑀯𑀢𑁆𑀣𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄, 𑀢𑀸𑀤𑀺𑀲𑀸 𑀲𑀧𑁆𑀧𑀸𑀬𑀸. 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀫𑁆𑀧𑀺 𑀯𑀡𑁆𑀡𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀑𑀚𑀯𑀦𑁆𑀢𑀁 𑀫𑀦𑁄𑀭𑀫𑀁 𑀲𑀩𑁆𑀩𑀸𑀓𑀸𑀭𑀧𑀡𑀻𑀢𑀁 𑀬𑀸𑀯𑀤𑀢𑁆𑀣𑀁 𑀯𑀝𑁆𑀝𑀢𑀺. 𑀇𑀭𑀺𑀬𑀸𑀧𑀣𑁄𑀧𑀺𑀲𑁆𑀲 𑀲𑁂𑀬𑁆𑀬𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀯𑀝𑁆𑀝𑀢𑀺, 𑀆𑀭𑀫𑁆𑀫𑀡𑀁 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀬𑀁𑀓𑀺𑀜𑁆𑀘𑀺 𑀲𑀼𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀦𑁆𑀢𑀺 𑀇𑀤𑀁 𑀤𑁄𑀲𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁.

𑀫𑁄𑀳𑀘𑀭𑀺𑀢𑀲𑁆𑀲 𑀲𑁂𑀦𑀸𑀲𑀦𑀁 𑀤𑀺𑀲𑀸𑀫𑀼𑀔𑀁 𑀅𑀲𑀫𑁆𑀩𑀸𑀥𑀁 𑀯𑀝𑁆𑀝𑀢𑀺, 𑀬𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀯𑀝𑀸 𑀤𑀺𑀲𑀸 𑀔𑀸𑀬𑀦𑁆𑀢𑀺, 𑀇𑀭𑀺𑀬𑀸𑀧𑀣𑁂𑀲𑀼 𑀘𑀗𑁆𑀓𑀫𑁄 𑀯𑀝𑁆𑀝𑀢𑀺. 𑀆𑀭𑀫𑁆𑀫𑀡𑀁 𑀧𑀦𑀲𑁆𑀲 𑀧𑀭𑀺𑀢𑁆𑀢𑀁 𑀲𑀼𑀧𑁆𑀧𑀫𑀢𑁆𑀢𑀁 𑀲𑀭𑀸𑀯𑀫𑀢𑁆𑀢𑀁 𑀯𑀸 (𑀔𑀼𑀤𑁆𑀤𑀓𑀁) 𑀦 𑀯𑀝𑁆𑀝𑀢𑀺. 𑀲𑀫𑁆𑀩𑀸𑀥𑀲𑁆𑀫𑀺𑀜𑁆𑀳𑀺 𑀑𑀓𑀸𑀲𑁂 𑀘𑀺𑀢𑁆𑀢𑀁 𑀪𑀺𑀬𑁆𑀬𑁄 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀺𑀧𑀼𑀮𑀁 𑀫𑀳𑀸𑀓𑀲𑀺𑀡𑀁 𑀯𑀝𑁆𑀝𑀢𑀺. 𑀲𑁂𑀲𑀁 𑀤𑁄𑀲𑀘𑀭𑀺𑀢𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀇𑀤𑀁 𑀫𑁄𑀳𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁.

𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀲𑀩𑁆𑀩𑀫𑁆𑀧𑀺 𑀤𑁄𑀲𑀘𑀭𑀺𑀢𑀫𑁆𑀳𑀺 𑀯𑀼𑀢𑁆𑀢𑀯𑀺𑀥𑀸𑀦𑀁 𑀲𑀧𑁆𑀧𑀸𑀬𑀁. 𑀆𑀭𑀫𑁆𑀫𑀡𑁂𑀲𑀼 𑀘𑀲𑁆𑀲 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀫𑁆𑀧𑀺 𑀯𑀝𑁆𑀝𑀢𑀺.

𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀲𑁂𑀦𑀸𑀲𑀦𑀸𑀤𑀻𑀲𑀼 𑀇𑀤𑀁 𑀦𑀸𑀫 𑀅𑀲𑀧𑁆𑀧𑀸𑀬𑀦𑁆𑀢𑀺 𑀦𑀢𑁆𑀣𑀺.

𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀲𑁂𑀦𑀸𑀲𑀦𑀁 𑀯𑀺𑀯𑀝𑀁 𑀤𑀺𑀲𑀸𑀫𑀼𑀔𑀁 𑀬𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀆𑀭𑀸𑀫𑀯𑀦𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓𑀸𑀦𑀺 𑀕𑀸𑀫𑀦𑀺𑀕𑀫𑀚𑀦𑀧𑀤𑀧𑀝𑀺𑀧𑀸𑀝𑀺𑀬𑁄 𑀦𑀻𑀮𑁄𑀪𑀸𑀲𑀸 𑀘 𑀧𑀩𑁆𑀩𑀢𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺, 𑀢𑀜𑁆𑀳𑀺 𑀯𑀺𑀢𑀓𑁆𑀓𑀯𑀺𑀥𑀸𑀯𑀦𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀫𑁆𑀪𑀻𑀭𑁂 𑀤𑀭𑀻𑀫𑀼𑀔𑁂 𑀯𑀦𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀳𑀢𑁆𑀣𑀺𑀓𑀼𑀘𑁆𑀙𑀺𑀧𑀩𑁆𑀪𑀸𑀭𑀫𑀳𑀺𑀦𑁆𑀤𑀕𑀼𑀳𑀸𑀲𑀤𑀺𑀲𑁂 𑀲𑁂𑀦𑀸𑀲𑀦𑁂 𑀯𑀲𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀫𑁆𑀧𑀺𑀲𑁆𑀲 𑀯𑀺𑀧𑀼𑀮𑀁 𑀦 𑀯𑀝𑁆𑀝𑀢𑀺. 𑀢𑀸𑀤𑀺𑀲𑀜𑁆𑀳𑀺 𑀯𑀺𑀢𑀓𑁆𑀓𑀯𑀲𑁂𑀦 𑀲𑀦𑁆𑀥𑀸𑀯𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀭𑀺𑀢𑁆𑀢𑀁 𑀧𑀦 𑀯𑀝𑁆𑀝𑀢𑀺.

𑀲𑁂𑀲𑀁 𑀭𑀸𑀕𑀘𑀭𑀺𑀢𑀲𑁆𑀲 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 𑀇𑀤𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁. 𑀅𑀬𑀁 𑀅𑀢𑁆𑀢𑀦𑁄 𑀘𑀭𑀺𑀬𑀸𑀦𑀼𑀓𑀽𑀮𑀦𑁆𑀢𑀺 𑀏𑀢𑁆𑀣 𑀆𑀕𑀢𑀘𑀭𑀺𑀬𑀸𑀦𑀁 𑀧𑀪𑁂𑀤𑀦𑀺𑀤𑀸𑀦𑀯𑀺𑀪𑀸𑀯𑀦𑀲𑀧𑁆𑀧𑀸𑀬𑀧𑀭𑀺𑀘𑁆𑀙𑁂𑀤𑀢𑁄 𑀯𑀺𑀢𑁆𑀣𑀸𑀭𑁄. 𑀦 𑀘 𑀢𑀸𑀯 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀆𑀯𑀺𑀓𑀢𑀁. 𑀢𑀜𑁆𑀳𑀺 𑀅𑀦𑀦𑁆𑀢𑀭𑀲𑁆𑀲 𑀫𑀸𑀢𑀺𑀓𑀸𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑁂 𑀲𑀬𑀫𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁪𑁭. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀲𑀗𑁆𑀔𑀸𑀢𑀦𑀺𑀤𑁆𑀤𑁂𑀲𑀢𑁄, 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀢𑁄, 𑀛𑀸𑀦𑀧𑁆𑀧𑀪𑁂𑀤𑀢𑁄, 𑀲𑀫𑀢𑀺𑀓𑁆𑀓𑀫𑀢𑁄, 𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄, 𑀆𑀭𑀫𑁆𑀫𑀡𑀢𑁄, 𑀪𑀽𑀫𑀺𑀢𑁄, 𑀕𑀳𑀡𑀢𑁄, 𑀧𑀘𑁆𑀘𑀬𑀢𑁄, 𑀘𑀭𑀺𑀬𑀸𑀦𑀼𑀓𑀽𑀮𑀢𑁄𑀢𑀺 𑀇𑀫𑁂𑀳𑀺 𑀢𑀸𑀯 𑀤𑀲𑀳𑀸𑀓𑀸𑀭𑁂𑀳𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀗𑁆𑀔𑀸𑀢𑀦𑀺𑀤𑁆𑀤𑁂𑀲𑀢𑁄𑀢𑀺 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀽𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀢𑁆𑀭𑀺𑀫𑀸𑀦𑀺 𑀘𑀢𑁆𑀢𑀸𑀮𑀻𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀤𑀲 𑀓𑀲𑀺𑀡𑀸, 𑀤𑀲 𑀅𑀲𑀼𑀪𑀸, 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀏𑀓𑀸 𑀲𑀜𑁆𑀜𑀸, 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺.

𑀢𑀢𑁆𑀣 𑀧𑀣𑀯𑀻𑀓𑀲𑀺𑀡𑀁, 𑀆𑀧𑁄𑀓𑀲𑀺𑀡𑀁, 𑀢𑁂𑀚𑁄𑀓𑀲𑀺𑀡𑀁, 𑀯𑀸𑀬𑁄𑀓𑀲𑀺𑀡𑀁, 𑀦𑀻𑀮𑀓𑀲𑀺𑀡𑀁, 𑀧𑀻𑀢𑀓𑀲𑀺𑀡𑀁, 𑀮𑁄𑀳𑀺𑀢𑀓𑀲𑀺𑀡𑀁, 𑀑𑀤𑀸𑀢𑀓𑀲𑀺𑀡𑀁, 𑀆𑀮𑁄𑀓𑀓𑀲𑀺𑀡𑀁, 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀦𑁆𑀢𑀺 𑀇𑀫𑁂 𑀤𑀲 𑀓𑀲𑀺𑀡𑀸.

𑀉𑀤𑁆𑀥𑀼𑀫𑀸𑀢𑀓𑀁, 𑀯𑀺𑀦𑀻𑀮𑀓𑀁, 𑀯𑀺𑀧𑀼𑀩𑁆𑀩𑀓𑀁, 𑀯𑀺𑀘𑁆𑀙𑀺𑀤𑁆𑀤𑀓𑀁, 𑀯𑀺𑀓𑁆𑀔𑀸𑀬𑀺𑀢𑀓𑀁, 𑀯𑀺𑀓𑁆𑀔𑀺𑀢𑁆𑀢𑀓𑀁, 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁, 𑀮𑁄𑀳𑀺𑀢𑀓𑀁, 𑀧𑀼𑀴𑀼𑀯𑀓𑀁, 𑀅𑀝𑁆𑀞𑀺𑀓𑀦𑁆𑀢𑀺 𑀇𑀫𑁂 𑀤𑀲 𑀅𑀲𑀼𑀪𑀸.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺, 𑀲𑀻𑀮𑀸𑀦𑀼𑀲𑁆𑀲𑀢𑀺, 𑀘𑀸𑀕𑀸𑀦𑀼𑀲𑁆𑀲𑀢𑀺, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀫𑀭𑀡𑀸𑀦𑀼𑀲𑁆𑀲𑀢𑀺, 𑀓𑀸𑀬𑀕𑀢𑀸𑀲𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀻𑀢𑀺 𑀇𑀫𑀸 𑀤𑀲 𑀅𑀦𑀼𑀲𑁆𑀲𑀢𑀺𑀬𑁄.

𑀫𑁂𑀢𑁆𑀢𑀸, 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 𑀏𑀓𑀸 𑀲𑀜𑁆𑀜𑀸. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀯𑀁 𑀲𑀗𑁆𑀔𑀸𑀢𑀦𑀺𑀤𑁆𑀤𑁂𑀲𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀢𑁄𑀢𑀺 𑀞𑀧𑁂𑀢𑁆𑀯𑀸 𑀓𑀸𑀬𑀕𑀢𑀸𑀲𑀢𑀺𑀜𑁆𑀘 𑀆𑀦𑀸𑀧𑀸𑀦𑀲𑁆𑀲𑀢𑀺𑀜𑁆𑀘 𑀅𑀯𑀲𑁂𑀲𑀸 𑀅𑀝𑁆𑀞 𑀅𑀦𑀼𑀲𑁆𑀲𑀢𑀺𑀬𑁄, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀇𑀫𑀸𑀦𑁂𑀯 𑀳𑁂𑀢𑁆𑀣 𑀤𑀲𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀉𑀧𑀘𑀸𑀭𑀯𑀳𑀸𑀦𑀺. 𑀲𑁂𑀲𑀸𑀦𑀺 𑀅𑀧𑁆𑀧𑀦𑀸𑀯𑀳𑀸𑀦𑀺. 𑀏𑀯𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀢𑁄.

𑀛𑀸𑀦𑀧𑁆𑀧𑀪𑁂𑀤𑀢𑁄𑀢𑀺 𑀅𑀧𑁆𑀧𑀦𑀸𑀯𑀳𑁂𑀲𑀼 𑀘𑁂𑀢𑁆𑀣 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀸 𑀲𑀤𑁆𑀥𑀺𑀁 𑀤𑀲 𑀓𑀲𑀺𑀡𑀸 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸 𑀳𑁄𑀦𑁆𑀢𑀺. 𑀓𑀸𑀬𑀕𑀢𑀸𑀲𑀢𑀺𑀬𑀸 𑀲𑀤𑁆𑀥𑀺𑀁 𑀤𑀲 𑀅𑀲𑀼𑀪𑀸 𑀧𑀞𑀫𑀚𑁆𑀛𑀸𑀦𑀺𑀓𑀸. 𑀧𑀼𑀭𑀺𑀫𑀸 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀢𑀺𑀓𑀚𑁆𑀛𑀸𑀦𑀺𑀓𑀸. 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀘𑀢𑁆𑀢𑀸𑀭𑁄 𑀘 𑀆𑀭𑀼𑀧𑁆𑀧𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀢𑀺 𑀏𑀯𑀁 𑀛𑀸𑀦𑀧𑁆𑀧𑀪𑁂𑀤𑀢𑁄.

𑀲𑀫𑀢𑀺𑀓𑁆𑀓𑀫𑀢𑁄𑀢𑀺 𑀤𑁆𑀯𑁂 𑀲𑀫𑀢𑀺𑀓𑁆𑀓𑀫𑀸 𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑁄 𑀘 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄 𑀘. 𑀢𑀢𑁆𑀣 𑀲𑀩𑁆𑀩𑁂𑀲𑀼𑀧𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀗𑁆𑀕𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀲𑁆𑀯𑁂𑀯𑀸𑀭𑀫𑁆𑀫𑀡𑁂𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁 𑀧𑀢𑁆𑀢𑀩𑁆𑀩𑀢𑁄. 𑀢𑀣𑀸 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑁂. 𑀲𑁄𑀧𑀺 𑀳𑀺 𑀫𑁂𑀢𑁆𑀢𑀸𑀤𑀻𑀦𑀁𑀬𑁂𑀯 𑀆𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑀩𑁆𑀩𑁄𑀢𑀺. 𑀘𑀢𑀽𑀲𑀼 𑀧𑀦 𑀆𑀭𑀼𑀧𑁆𑀧𑁂𑀲𑀼 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀲𑀼 𑀳𑀺 𑀦𑀯𑀲𑀼 𑀓𑀲𑀺𑀡𑁂𑀲𑀼 𑀅𑀜𑁆𑀜𑀢𑀭𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀧𑀢𑁆𑀢𑀩𑁆𑀩𑀁. 𑀆𑀓𑀸𑀲𑀸𑀤𑀻𑀦𑀺 𑀘 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀦𑀺. 𑀲𑁂𑀲𑁂𑀲𑀼 𑀲𑀫𑀢𑀺𑀓𑁆𑀓𑀫𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀲𑀫𑀢𑀺𑀓𑁆𑀓𑀫𑀢𑁄.

𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄𑀢𑀺 𑀇𑀫𑁂𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀤𑀲 𑀓𑀲𑀺𑀡𑀸𑀦𑁂𑀯 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀬𑀢𑁆𑀢𑀓𑀜𑁆𑀳𑀺 𑀑𑀓𑀸𑀲𑀁 𑀓𑀲𑀺𑀡𑁂𑀦 𑀨𑀭𑀢𑀺, 𑀢𑀤𑀩𑁆𑀪𑀦𑁆𑀢𑀭𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀤𑁆𑀤𑀁 𑀲𑁄𑀢𑀼𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀧𑀲𑁆𑀲𑀺𑀢𑀼𑀁 𑀧𑀭𑀲𑀢𑁆𑀢𑀸𑀦𑀜𑁆𑀘 𑀘𑁂𑀢𑀲𑀸 𑀘𑀺𑀢𑁆𑀢𑀫𑀜𑁆𑀜𑀸𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀓𑀸𑀬𑀕𑀢𑀸𑀲𑀢𑀺 𑀧𑀦 𑀅𑀲𑀼𑀪𑀸𑀦𑀺 𑀘 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀓𑀲𑁆𑀫𑀸? 𑀑𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀆𑀦𑀺𑀲𑀁𑀲𑀸𑀪𑀸𑀯𑀸 𑀘. 𑀲𑀸 𑀘 𑀦𑁂𑀲𑀁 𑀑𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑀸 𑀪𑀸𑀯𑀦𑀸𑀦𑀬𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀢𑁂𑀲𑀼 𑀧𑀦 𑀯𑀟𑁆𑀠𑀺𑀢𑁂𑀲𑀼 𑀓𑀼𑀡𑀧𑀭𑀸𑀲𑀺𑀬𑁂𑀯 𑀯𑀟𑁆𑀠𑀢𑀺, 𑀦 𑀓𑁄𑀘𑀺 𑀆𑀦𑀺𑀲𑀁𑀲𑁄 𑀅𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀲𑁄𑀧𑀸𑀓𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑁂, ‘‘𑀯𑀺𑀪𑀽𑀢𑀸 𑀪𑀕𑀯𑀸 𑀭𑀽𑀧𑀲𑀜𑁆𑀜𑀸 𑀅𑀯𑀺𑀪𑀽𑀢𑀸 𑀅𑀝𑁆𑀞𑀺𑀓𑀲𑀜𑁆𑀜𑀸’’𑀢𑀺. 𑀢𑀢𑁆𑀭 𑀳𑀺 𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀯𑀲𑁂𑀦 𑀭𑀽𑀧𑀲𑀜𑁆𑀜𑀸 𑀯𑀺𑀪𑀽𑀢𑀸𑀢𑀺 𑀯𑀼𑀢𑁆𑀢𑀸. 𑀅𑀝𑁆𑀞𑀺𑀓𑀲𑀜𑁆𑀜𑀸 𑀅𑀯𑀟𑁆𑀠𑀦𑀯𑀲𑁂𑀦 𑀅𑀯𑀺𑀪𑀽𑀢𑀸𑀢𑀺 𑀯𑀼𑀢𑁆𑀢𑀸.

𑀬𑀁 𑀧𑀦𑁂𑀢𑀁 ‘‘𑀓𑁂𑀯𑀮𑀁 𑀅𑀝𑁆𑀞𑀺𑀲𑀜𑁆𑀜𑀸𑀬, 𑀅𑀨𑀭𑀻 𑀧𑀣𑀯𑀺𑀁 𑀇𑀫’’𑀦𑁆𑀢𑀺 (𑀣𑁂𑀭𑀕𑀸. 𑁧𑁮) 𑀯𑀼𑀢𑁆𑀢𑀁, 𑀢𑀁 𑀮𑀸𑀪𑀺𑀲𑁆𑀲 𑀲𑀢𑁄 𑀉𑀧𑀝𑁆𑀞𑀸𑀦𑀸𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀣𑁂𑀯 𑀳𑀺 𑀥𑀫𑁆𑀫𑀸𑀲𑁄𑀓𑀓𑀸𑀮𑁂 𑀓𑀭𑀯𑀻𑀓𑀲𑀓𑀼𑀡𑁄 𑀲𑀫𑀦𑁆𑀢𑀸 𑀆𑀤𑀸𑀲𑀪𑀺𑀢𑁆𑀢𑀻𑀲𑀼 𑀅𑀢𑁆𑀢𑀦𑁄 𑀙𑀸𑀬𑀁 𑀤𑀺𑀲𑁆𑀯𑀸 𑀲𑀩𑁆𑀩𑀤𑀺𑀲𑀸𑀲𑀼 𑀓𑀭𑀯𑀻𑀓𑀲𑀜𑁆𑀜𑀻 𑀳𑀼𑀢𑁆𑀯𑀸 𑀫𑀥𑀼𑀭𑀁 𑀕𑀺𑀭𑀁 𑀦𑀺𑀘𑁆𑀙𑀸𑀭𑁂𑀲𑀺, 𑀏𑀯𑀁 𑀣𑁂𑀭𑁄𑀧𑀺 𑀅𑀝𑁆𑀞𑀺𑀓𑀲𑀜𑁆𑀜𑀸𑀬 𑀮𑀸𑀪𑀺𑀢𑁆𑀢𑀸 𑀲𑀩𑁆𑀩𑀤𑀺𑀲𑀸𑀲𑀼 𑀉𑀧𑀝𑁆𑀞𑀺𑀢𑀁 𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀓𑁂𑀯𑀮𑀸𑀧𑀺 𑀧𑀣𑀯𑀻 𑀅𑀝𑁆𑀞𑀺𑀓𑀪𑀭𑀺𑀢𑀸𑀢𑀺 𑀘𑀺𑀦𑁆𑀢𑁂𑀲𑀻𑀢𑀺.

𑀬𑀤𑀺 𑀏𑀯𑀁 𑀬𑀸 𑀅𑀲𑀼𑀪𑀚𑁆𑀛𑀸𑀦𑀸𑀦𑀁 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸, 𑀲𑀸 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀲𑀸 𑀘 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀼𑀫𑀸𑀢𑀓𑁂 𑀯𑀸 𑀅𑀝𑁆𑀞𑀺𑀓𑁂 𑀯𑀸 𑀫𑀳𑀦𑁆𑀢𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀏𑀓𑀘𑁆𑀘𑁄 𑀅𑀧𑁆𑀧𑀓𑁂. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀛𑀸𑀦𑀁 𑀳𑁄𑀢𑀺. 𑀏𑀓𑀘𑁆𑀘𑀲𑁆𑀲 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀦𑁆𑀢𑀺. 𑀬𑁄 𑀯𑀸 𑀏𑀢𑀁 𑀯𑀟𑁆𑀠𑀦𑁂 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀯𑀟𑁆𑀠𑁂𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀦𑀺𑀲𑀁𑀲𑀸𑀪𑀸𑀯𑀸 𑀧𑀦 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀻𑀢𑀺.

𑀬𑀣𑀸 𑀘 𑀏𑀢𑀸𑀦𑀺, 𑀏𑀯𑀁 𑀲𑁂𑀲𑀸𑀦𑀺𑀧𑀺 𑀦 𑀯𑀟𑁆𑀠𑁂𑀢𑀩𑁆𑀩𑀸𑀦𑀺. 𑀓𑀲𑁆𑀫𑀸? 𑀢𑁂𑀲𑀼 𑀳𑀺 𑀆𑀦𑀸𑀧𑀸𑀦𑀦𑀺𑀫𑀺𑀢𑁆𑀢𑀁 𑀢𑀸𑀯 𑀯𑀟𑁆𑀠𑀬𑀢𑁄 𑀯𑀸𑀢𑀭𑀸𑀲𑀺𑀬𑁂𑀯 𑀯𑀟𑁆𑀠𑀢𑀺, 𑀑𑀓𑀸𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀇𑀢𑀺 𑀲𑀸𑀤𑀻𑀦𑀯𑀢𑁆𑀢𑀸 𑀑𑀓𑀸𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀲𑀢𑁆𑀢𑀸𑀭𑀫𑁆𑀫𑀡𑀸, 𑀢𑁂𑀲𑀁 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀬𑀢𑁄 𑀲𑀢𑁆𑀢𑀭𑀸𑀲𑀺𑀬𑁂𑀯 𑀯𑀟𑁆𑀠𑁂𑀬𑁆𑀬, 𑀦 𑀘 𑀢𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀫𑁆𑀧𑀺 𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑁧.𑁫𑁫𑁬) 𑀆𑀤𑀺, 𑀢𑀁 𑀧𑀭𑀺𑀕𑁆𑀕𑀳𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀏𑀓𑀸𑀯𑀸𑀲𑀤𑁆𑀯𑀺𑀆𑀯𑀸𑀲𑀸𑀤𑀺𑀦𑀸 𑀳𑀺 𑀅𑀦𑀼𑀓𑁆𑀓𑀫𑁂𑀦 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀲𑀢𑁆𑀢𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑁄 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑁄. 𑀦 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀦𑁆𑀢𑁄. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁂𑀯 𑀘𑁂𑀢𑁆𑀣 𑀦𑀢𑁆𑀣𑀺. 𑀬𑀤𑀬𑀁 𑀯𑀟𑁆𑀠𑁂𑀬𑁆𑀬, 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸𑀧𑁂𑀢𑁆𑀣 𑀧𑀭𑀺𑀕𑁆𑀕𑀳𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀼𑀧𑁆𑀧𑀸𑀭𑀫𑁆𑀫𑀡𑁂𑀲𑀼𑀧𑀺 𑀆𑀓𑀸𑀲𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀢𑁆𑀢𑀸. 𑀢𑀜𑁆𑀳𑀺 𑀓𑀲𑀺𑀡𑀸𑀧𑀕𑀫𑀯𑀲𑁂𑀦𑁂𑀯 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀢𑀢𑁄 𑀧𑀭𑀁 𑀯𑀟𑁆𑀠𑀬𑀢𑁄𑀧𑀺 𑀦 𑀓𑀺𑀜𑁆𑀘𑀺 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀲𑀪𑀸𑀯𑀥𑀫𑁆𑀫𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀸 𑀲𑀪𑀸𑀯𑀥𑀫𑁆𑀫𑀁 𑀯𑀟𑁆𑀠𑁂𑀢𑀼𑀁. 𑀯𑀺𑀜𑁆𑀜𑀸𑀡𑀸𑀧𑀕𑀫𑁄 𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑀫𑀢𑁆𑀢𑀢𑁆𑀢𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀁 𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀬𑁂𑀯 𑀦 𑀯𑀟𑁆𑀠𑁂𑀢𑀩𑁆𑀩𑀁. 𑀲𑁂𑀲𑀸𑀦𑀺 𑀅𑀦𑀺𑀫𑀺𑀢𑁆𑀢𑀢𑁆𑀢𑀸. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀜𑁆𑀳𑀺 𑀯𑀟𑁆𑀠𑁂𑀢𑀩𑁆𑀩𑀁 𑀦𑀸𑀫 𑀪𑀯𑁂𑀬𑁆𑀬. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀜𑁆𑀘 𑀦𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀯𑀟𑁆𑀠𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀯𑀟𑁆𑀠𑀦𑀸𑀯𑀟𑁆𑀠𑀦𑀢𑁄.

𑀆𑀭𑀫𑁆𑀫𑀡𑀢𑁄𑀢𑀺 𑀇𑀫𑁂𑀲𑀼 𑀘 𑀘𑀢𑁆𑀢𑀸𑀮𑀻𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀤𑀲𑀓𑀲𑀺𑀡𑀸, 𑀤𑀲𑀅𑀲𑀼𑀪𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀓𑀸𑀬𑀕𑀢𑀸𑀲𑀢𑀻𑀢𑀺 𑀇𑀫𑀸𑀦𑀺 𑀤𑁆𑀯𑀸𑀯𑀻𑀲𑀢𑀺𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀲𑁂𑀲𑀸𑀦𑀺 𑀦 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀢𑀣𑀸 𑀤𑀲𑀲𑀼 𑀅𑀦𑀼𑀲𑁆𑀲𑀢𑀻𑀲𑀼 𑀞𑀧𑁂𑀢𑁆𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀜𑁆𑀘 𑀓𑀸𑀬𑀕𑀢𑀸𑀲𑀢𑀺𑀜𑁆𑀘 𑀅𑀯𑀲𑁂𑀲𑀸 𑀅𑀝𑁆𑀞 𑀅𑀦𑀼𑀲𑁆𑀲𑀢𑀺𑀬𑁄, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀺. 𑀤𑀲 𑀓𑀲𑀺𑀡𑀸, 𑀤𑀲 𑀅𑀲𑀼𑀪𑀸, 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀓𑀸𑀬𑀕𑀢𑀸𑀲𑀢𑀻𑀢𑀺 𑀇𑀫𑀸𑀦𑀺 𑀤𑁆𑀯𑀸𑀯𑀻𑀲𑀢𑀺 𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀲𑁂𑀲𑀸𑀦𑀺 𑀙 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀦𑀺. 𑀢𑀣𑀸 𑀯𑀺𑀧𑀼𑀩𑁆𑀩𑀓𑀁, 𑀮𑁄𑀳𑀺𑀢𑀓𑀁, 𑀧𑀼𑀴𑀼𑀯𑀓𑀁, 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀆𑀧𑁄𑀓𑀲𑀺𑀡𑀁, 𑀢𑁂𑀚𑁄𑀓𑀲𑀺𑀡𑀁, 𑀯𑀸𑀬𑁄𑀓𑀲𑀺𑀡𑀁, 𑀬𑀜𑁆𑀘 𑀆𑀮𑁄𑀓𑀓𑀲𑀺𑀡𑁂 𑀲𑀽𑀭𑀺𑀬𑀸𑀤𑀻𑀦𑀁 𑀑𑀪𑀸𑀲𑀫𑀡𑁆𑀟𑀮𑀸𑀭𑀫𑁆𑀫𑀡𑀦𑁆𑀢𑀺 𑀇𑀫𑀸𑀦𑀺 𑀅𑀝𑁆𑀞 𑀘𑀮𑀺𑀢𑀸𑀭𑀫𑁆𑀫𑀡𑀸𑀦𑀺, 𑀢𑀸𑀦𑀺 𑀘 𑀔𑁄 𑀧𑀼𑀩𑁆𑀩𑀪𑀸𑀕𑁂, 𑀧𑀝𑀺𑀪𑀸𑀕𑀁 𑀧𑀦 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀲𑁂𑀲𑀸𑀦𑀺 𑀦 𑀘𑀮𑀺𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀏𑀯𑀁 𑀆𑀭𑀫𑁆𑀫𑀡𑀢𑁄.

𑀪𑀽𑀫𑀺𑀢𑁄𑀢𑀺 𑀏𑀢𑁆𑀣 𑀘 𑀤𑀲 𑀅𑀲𑀼𑀪𑀸, 𑀓𑀸𑀬𑀕𑀢𑀸𑀲𑀢𑀺, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀤𑁂𑀯𑁂𑀲𑀼 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀢𑀸𑀦𑀺 𑀤𑁆𑀯𑀸𑀤𑀲, 𑀆𑀦𑀸𑀧𑀸𑀦𑀲𑁆𑀲𑀢𑀺 𑀘𑀸𑀢𑀺 𑀇𑀫𑀸𑀦𑀺 𑀢𑁂𑀭𑀲 𑀩𑁆𑀭𑀳𑁆𑀫𑀮𑁄𑀓𑁂 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀅𑀭𑀽𑀧𑀪𑀯𑁂 𑀧𑀦 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑁂 𑀅𑀜𑁆𑀜𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀲𑀩𑁆𑀩𑀸𑀦𑀺𑀧𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀪𑀽𑀫𑀺𑀢𑁄.

𑀕𑀳𑀡𑀢𑁄𑀢𑀺 𑀤𑀺𑀝𑁆𑀞𑀨𑀼𑀝𑁆𑀞𑀲𑀼𑀢𑀕𑁆𑀕𑀳𑀡𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭 𑀞𑀧𑁂𑀢𑁆𑀯𑀸 𑀯𑀸𑀬𑁄𑀓𑀲𑀺𑀡𑀁 𑀲𑁂𑀲𑀸 𑀦𑀯 𑀓𑀲𑀺𑀡𑀸, 𑀤𑀲 𑀅𑀲𑀼𑀪𑀸𑀢𑀺 𑀇𑀫𑀸𑀦𑀺 𑀏𑀓𑀽𑀦𑀯𑀻𑀲𑀢𑀺 𑀤𑀺𑀝𑁆𑀞𑁂𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀧𑀼𑀩𑁆𑀩𑀪𑀸𑀕𑁂 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀦𑁂𑀲𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀕𑀢𑀸𑀲𑀢𑀺𑀬𑀁 𑀢𑀘𑀧𑀜𑁆𑀘𑀓𑀁 𑀤𑀺𑀝𑁆𑀞𑁂𑀦, 𑀲𑁂𑀲𑀁 𑀲𑀼𑀢𑁂𑀦𑀸𑀢𑀺 𑀏𑀯𑀁 𑀢𑀲𑁆𑀲𑀸 𑀆𑀭𑀫𑁆𑀫𑀡𑀁 𑀤𑀺𑀝𑁆𑀞𑀲𑀼𑀢𑁂𑀦 𑀕𑀳𑁂𑀢𑀩𑁆𑀩𑀁. 𑀆𑀦𑀸𑀧𑀸𑀦𑀲𑁆𑀲𑀢𑀺 𑀨𑀼𑀝𑁆𑀞𑁂𑀦, 𑀯𑀸𑀬𑁄𑀓𑀲𑀺𑀡𑀁 𑀤𑀺𑀝𑁆𑀞𑀨𑀼𑀝𑁆𑀞𑁂𑀦, 𑀲𑁂𑀲𑀸𑀦𑀺 𑀅𑀝𑁆𑀞𑀸𑀭𑀲 𑀲𑀼𑀢𑁂𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸𑀢𑀺 𑀇𑀫𑀸𑀦𑀺 𑀘𑁂𑀢𑁆𑀣 𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀲𑁂𑀲𑀸𑀦𑀺 𑀧𑀜𑁆𑀘𑀢𑀺𑀁𑀲 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀕𑀳𑀡𑀢𑁄.

𑀧𑀘𑁆𑀘𑀬𑀢𑁄𑀢𑀺 𑀇𑀫𑁂𑀲𑀼 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀞𑀧𑁂𑀢𑁆𑀯𑀸 𑀆𑀓𑀸𑀲𑀓𑀲𑀺𑀡𑀁 𑀲𑁂𑀲𑀸 𑀦𑀯 𑀓𑀲𑀺𑀡𑀸 𑀆𑀭𑀼𑀧𑁆𑀧𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀤𑀲 𑀓𑀲𑀺𑀡𑀸 𑀅𑀪𑀺𑀜𑁆𑀜𑀸𑀦𑀁, 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑁆𑀲, 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀆𑀭𑀼𑀧𑁆𑀧𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸, 𑀲𑀩𑁆𑀩𑀸𑀦𑀺𑀧𑀺 𑀲𑀼𑀔𑀯𑀺𑀳𑀸𑀭𑀯𑀺𑀧𑀲𑁆𑀲𑀦𑀸𑀪𑀯𑀲𑀫𑁆𑀧𑀢𑁆𑀢𑀻𑀦𑀦𑁆𑀢𑀺 𑀏𑀯𑀁 𑀧𑀘𑁆𑀘𑀬𑀢𑁄.

𑀘𑀭𑀺𑀬𑀸𑀦𑀼𑀓𑀽𑀮𑀢𑁄𑀢𑀺 𑀘𑀭𑀺𑀬𑀸𑀦𑀁 𑀅𑀦𑀼𑀓𑀽𑀮𑀢𑁄𑀧𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀕𑀘𑀭𑀺𑀢𑀲𑁆𑀲 𑀢𑀸𑀯 𑀏𑀢𑁆𑀣 𑀤𑀲 𑀅𑀲𑀼𑀪𑀸, 𑀓𑀸𑀬𑀕𑀢𑀸𑀲𑀢𑀻𑀢𑀺 𑀏𑀓𑀸𑀤𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀅𑀦𑀼𑀓𑀽𑀮𑀸𑀦𑀺. 𑀤𑁄𑀲𑀘𑀭𑀺𑀢𑀲𑁆𑀲 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑀺 𑀯𑀡𑁆𑀡𑀓𑀲𑀺𑀡𑀸𑀦𑀻𑀢𑀺 𑀅𑀝𑁆𑀞. 𑀫𑁄𑀳𑀘𑀭𑀺𑀢𑀲𑁆𑀲, 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀘 𑀏𑀓𑀁 𑀆𑀦𑀸𑀧𑀸𑀦𑀲𑁆𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑁂𑀯. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀧𑀼𑀭𑀺𑀫𑀸 𑀙 𑀅𑀦𑀼𑀲𑁆𑀲𑀢𑀺𑀬𑁄. 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲 𑀫𑀭𑀡𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀘𑀢𑁆𑀢𑀸𑀭𑀺. 𑀲𑁂𑀲𑀓𑀲𑀺𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀘 𑀆𑀭𑀼𑀧𑁆𑀧𑀸 𑀲𑀩𑁆𑀩𑀘𑀭𑀺𑀢𑀸𑀦𑀁 𑀅𑀦𑀼𑀓𑀽𑀮𑀸𑀦𑀺. 𑀓𑀲𑀺𑀡𑁂𑀲𑀼 𑀘 𑀬𑀁𑀓𑀺𑀜𑁆𑀘𑀺 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀲𑁆𑀲𑀸𑀢𑀺.

𑀏𑀯𑀫𑁂𑀢𑁆𑀣 𑀘𑀭𑀺𑀬𑀸𑀦𑀼𑀓𑀽𑀮𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀩𑁆𑀩𑀜𑁆𑀘𑁂𑀢𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀘 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀘 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀻𑀦𑀁 𑀧𑀦 𑀅𑀯𑀺𑀓𑁆𑀔𑀫𑁆𑀪𑀺𑀓𑀸 𑀲𑀤𑁆𑀥𑀸𑀤𑀻𑀦𑀁 𑀯𑀸 𑀅𑀦𑀼𑀧𑀓𑀸𑀭𑀸 𑀓𑀼𑀲𑀮𑀪𑀸𑀯𑀦𑀸 𑀦𑀸𑀫 𑀦𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑁂𑀖𑀺𑀬𑀲𑀼𑀢𑁆𑀢𑁂 𑁋

‘‘𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸. 𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬. 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬. 𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬𑀸’’𑀢𑀺.

𑀭𑀸𑀳𑀼𑀮𑀲𑀼𑀢𑁆𑀢𑁂𑀧𑀺 ‘‘𑀫𑁂𑀢𑁆𑀢𑀁, 𑀭𑀸𑀳𑀼𑀮, 𑀪𑀸𑀯𑀦𑀁 𑀪𑀸𑀯𑁂𑀳𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁨𑁦) 𑀦𑀬𑁂𑀦 𑀏𑀓𑀲𑁆𑀲𑁂𑀯 𑀲𑀢𑁆𑀢 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀯𑀘𑀦𑀫𑀢𑁆𑀢𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀢𑀺 𑀅𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀓𑀣𑀸 𑀯𑀺𑀦𑀺𑀘𑁆𑀙𑀬𑁄.

𑁪𑁮. 𑀕𑀳𑁂𑀢𑁆𑀯𑀸𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀅𑀬𑀫𑀢𑁆𑀣𑀤𑀻𑀧𑀦𑀸. ‘‘𑀢𑁂𑀦 𑀬𑁄𑀕𑀺𑀦𑀸 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀸 𑀪𑀕𑀯𑀢𑁄 𑀆𑀘𑀭𑀺𑀬𑀲𑁆𑀲 𑀯𑀸 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦 𑀲𑀫𑁆𑀧𑀦𑁆𑀦𑀸𑀥𑀺𑀫𑀼𑀢𑁆𑀢𑀺𑀦𑀸 𑀘 𑀳𑀼𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀺𑀢𑀩𑁆𑀩𑀁.

𑀢𑀢𑁆𑀭 ‘‘𑀇𑀫𑀸𑀳𑀁 𑀪𑀕𑀯𑀸 𑀅𑀢𑁆𑀢𑀪𑀸𑀯𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑁆𑀘𑀚𑀸𑀫𑀻’’𑀢𑀺 𑀏𑀯𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀸 𑀦𑀺𑀬𑁆𑀬𑀸𑀢𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀦𑁆𑀢𑁄 𑀪𑁂𑀭𑀯𑀸𑀭𑀫𑁆𑀫𑀡𑁂 𑀆𑀧𑀸𑀣𑀫𑀸𑀕𑀢𑁂 𑀲𑀦𑁆𑀣𑀫𑁆𑀪𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀕𑀸𑀫𑀦𑁆𑀢𑀁 𑀑𑀲𑀭𑀺𑀢𑁆𑀯𑀸 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀳𑀼𑀢𑁆𑀯𑀸 𑀅𑀦𑁂𑀲𑀦𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑁂𑀬𑁆𑀬. 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀪𑀸𑀯𑀲𑁆𑀲 𑀧𑀦𑀲𑁆𑀲 𑀪𑁂𑀭𑀯𑀸𑀭𑀫𑁆𑀫𑀡𑁂 𑀆𑀧𑀸𑀣𑀫𑀸𑀕𑀢𑁂𑀧𑀺 𑀪𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺. ‘‘𑀦𑀦𑀼 𑀢𑀬𑀸, 𑀧𑀡𑁆𑀟𑀺𑀢, 𑀧𑀼𑀭𑀺𑀫𑀫𑁂𑀯 𑀅𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀦𑀺𑀬𑁆𑀬𑀸𑀢𑀺𑀢𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀦𑀲𑁆𑀲 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀉𑀢𑁆𑀢𑀫𑀁 𑀓𑀸𑀲𑀺𑀓𑀯𑀢𑁆𑀣𑀁 𑀪𑀯𑁂𑀬𑁆𑀬, 𑀢𑀲𑁆𑀲 𑀢𑀲𑁆𑀫𑀺𑀁 𑀫𑀽𑀲𑀺𑀓𑀸𑀬 𑀯𑀸 𑀓𑀻𑀝𑁂𑀳𑀺 𑀯𑀸 𑀔𑀸𑀤𑀺𑀢𑁂 𑀉𑀧𑁆𑀧𑀚𑁆𑀚𑁂𑀬𑁆𑀬 𑀤𑁄𑀫𑀦𑀲𑁆𑀲𑀁. 𑀲𑀘𑁂 𑀧𑀦 𑀢𑀁 𑀅𑀘𑀻𑀯𑀭𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬, 𑀅𑀣𑀲𑁆𑀲 𑀢𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸𑀧𑀺 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀆𑀘𑀭𑀺𑀬𑀲𑁆𑀲 𑀦𑀺𑀬𑁆𑀬𑀸𑀢𑁂𑀦𑁆𑀢𑁂𑀦𑀸𑀧𑀺 ‘‘𑀇𑀫𑀸𑀳𑀁, 𑀪𑀦𑁆𑀢𑁂, 𑀅𑀢𑁆𑀢𑀪𑀸𑀯𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀘𑁆𑀘𑀚𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀅𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀪𑀸𑀯𑁄 𑀳𑀺 𑀅𑀢𑀚𑁆𑀚𑀦𑀻𑀬𑁄 𑀯𑀸 𑀳𑁄𑀢𑀺, 𑀤𑀼𑀩𑁆𑀩𑀘𑁄 𑀯𑀸 𑀅𑀦𑁄𑀯𑀸𑀤𑀓𑀭𑁄, 𑀬𑁂𑀦𑀓𑀸𑀫𑀁𑀕𑀫𑁄 𑀯𑀸 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸𑀯 𑀬𑀢𑁆𑀣𑀺𑀘𑁆𑀙𑀢𑀺, 𑀢𑀢𑁆𑀣 𑀕𑀦𑁆𑀢𑀸, 𑀢𑀫𑁂𑀦𑀁 𑀆𑀘𑀭𑀺𑀬𑁄 𑀆𑀫𑀺𑀲𑁂𑀦 𑀯𑀸 𑀥𑀫𑁆𑀫𑁂𑀦 𑀯𑀸 𑀦 𑀲𑀗𑁆𑀕𑀡𑁆𑀳𑀸𑀢𑀺, 𑀕𑀽𑀴𑁆𑀳𑀁 𑀕𑀦𑁆𑀣𑀁 𑀦 𑀲𑀺𑀓𑁆𑀔𑀸𑀧𑁂𑀢𑀺. 𑀲𑁄 𑀇𑀫𑀁 𑀤𑀼𑀯𑀺𑀥𑀁 𑀲𑀗𑁆𑀕𑀳𑀁 𑀅𑀮𑀪𑀦𑁆𑀢𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀺, 𑀦𑀘𑀺𑀭𑀲𑁆𑀲𑁂𑀯 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸 𑀕𑀺𑀳𑀺𑀪𑀸𑀯𑀁 𑀯𑀸 𑀧𑀸𑀧𑀼𑀡𑀸𑀢𑀺. 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀪𑀸𑀯𑁄 𑀧𑀦 𑀦𑁂𑀯 𑀅𑀢𑀚𑁆𑀚𑀦𑀻𑀬𑁄 𑀳𑁄𑀢𑀺, 𑀦 𑀬𑁂𑀦𑀓𑀸𑀫𑀁𑀕𑀫𑁄, 𑀲𑀼𑀯𑀘𑁄 𑀆𑀘𑀭𑀺𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀲𑁄 𑀆𑀘𑀭𑀺𑀬𑀢𑁄 𑀤𑀼𑀯𑀺𑀥𑀁 𑀲𑀗𑁆𑀕𑀳𑀁 𑀮𑀪𑀦𑁆𑀢𑁄 𑀲𑀸𑀲𑀦𑁂 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬.

𑀣𑁂𑀭𑀲𑁆𑀲 𑀓𑀺𑀭 𑀲𑀦𑁆𑀢𑀺𑀓𑀁 𑀢𑀬𑁄 𑀪𑀺𑀓𑁆𑀔𑀽 𑀆𑀕𑀫𑀁𑀲𑀼. 𑀢𑁂𑀲𑀼 𑀏𑀓𑁄 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀧𑀢𑀺𑀢𑀼𑀁 𑀉𑀲𑁆𑀲𑀳𑁂𑀬𑁆𑀬𑀦𑁆𑀢𑀺 𑀆𑀳. 𑀤𑀼𑀢𑀺𑀬𑁄 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀧𑀡𑁆𑀳𑀺𑀢𑁄 𑀧𑀝𑁆𑀞𑀸𑀬 𑀧𑀸𑀲𑀸𑀡𑀧𑀺𑀝𑁆𑀞𑁂 𑀖𑀁𑀲𑁂𑀦𑁆𑀢𑁄 𑀦𑀺𑀭𑀯𑀲𑁂𑀲𑀁 𑀔𑁂𑀧𑁂𑀢𑀼𑀁 𑀉𑀲𑁆𑀲𑀳𑁂𑀬𑁆𑀬𑀦𑁆𑀢𑀺 𑀆𑀳. 𑀢𑀢𑀺𑀬𑁄 ‘‘𑀅𑀳𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀫𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁 𑀓𑀸𑀢𑀼𑀁 𑀉𑀲𑁆𑀲𑀳𑁂𑀬𑁆𑀬𑀦𑁆𑀢𑀺 𑀆𑀳. 𑀣𑁂𑀭𑁄 𑀪𑀩𑁆𑀩𑀸𑀯𑀢𑀺𑀫𑁂 𑀪𑀺𑀓𑁆𑀔𑀽𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀢𑁂 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀢𑀬𑁄𑀧𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺 𑀅𑀬𑀫𑀸𑀦𑀺𑀲𑀁𑀲𑁄 𑀅𑀢𑁆𑀢𑀦𑀺𑀬𑁆𑀬𑀸𑀢𑀦𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀲𑁆𑀲 𑀯𑀸 𑀪𑀕𑀯𑀢𑁄 𑀆𑀘𑀭𑀺𑀬𑀲𑁆𑀲 𑀯𑀸 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸’’𑀢𑀺.

𑁪𑁯. 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦 𑀲𑀫𑁆𑀧𑀦𑁆𑀦𑀸𑀥𑀺𑀫𑀼𑀢𑁆𑀢𑀺𑀦𑀸 𑀘 𑀳𑀼𑀢𑁆𑀯𑀸𑀢𑀺 𑀏𑀢𑁆𑀣 𑀧𑀦 𑀢𑁂𑀦 𑀬𑁄𑀕𑀺𑀦𑀸 𑀅𑀮𑁄𑀪𑀸𑀤𑀻𑀦𑀁 𑀯𑀲𑁂𑀦 𑀙𑀳𑀸𑀓𑀸𑀭𑁂𑀳𑀺 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁄 𑀳𑀺 𑀢𑀺𑀲𑁆𑀲𑀦𑁆𑀦𑀁 𑀩𑁄𑀥𑀻𑀦𑀁 𑀅𑀜𑁆𑀜𑀢𑀭𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸𑀳, ‘‘𑀙 𑀅𑀚𑁆𑀛𑀸𑀲𑀬𑀸 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀮𑁄𑀪𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀮𑁄𑀪𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀤𑁄𑀲𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀤𑁄𑀲𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀅𑀫𑁄𑀳𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀫𑁄𑀳𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀖𑀭𑀸𑀯𑀸𑀲𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀗𑁆𑀕𑀡𑀺𑀓𑀸𑀬 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀩𑁆𑀩𑀪𑀯𑀕𑀢𑀻𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄’’𑀢𑀺. 𑀬𑁂 𑀳𑀺 𑀓𑁂𑀘𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀙𑀳𑀸𑀓𑀸𑀭𑁂𑀳𑀺 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀢𑁆𑀢𑀩𑁆𑀩𑀁 𑀯𑀺𑀲𑁂𑀲𑀁 𑀧𑀢𑁆𑀢𑀸. 𑀢𑀲𑁆𑀫𑀸 𑀇𑀫𑁂𑀳𑀺 𑀙𑀳𑀸𑀓𑀸𑀭𑁂𑀳𑀺 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀧𑀦 𑀅𑀥𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀲𑀫𑀸𑀥𑀸𑀥𑀺𑀫𑀼𑀢𑁆𑀢𑁂𑀦 𑀲𑀫𑀸𑀥𑀺𑀕𑀭𑀼𑀓𑁂𑀦 𑀲𑀫𑀸𑀥𑀺𑀧𑀩𑁆𑀪𑀸𑀭𑁂𑀦, 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑁂𑀦 𑀦𑀺𑀩𑁆𑀩𑀸𑀦𑀕𑀭𑀼𑀓𑁂𑀦 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑁂𑀦 𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁫𑁦. 𑀏𑀯𑀁 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀦𑁄 𑀧𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀢𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀺𑀦𑀸 𑀆𑀘𑀭𑀺𑀬𑁂𑀦 𑀘𑀺𑀢𑁆𑀢𑀸𑀘𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 𑀘𑀭𑀺𑀬𑀸 𑀚𑀸𑀦𑀺𑀢𑀩𑁆𑀩𑀸. 𑀇𑀢𑀭𑁂𑀦 𑀓𑀺𑀁 𑀘𑀭𑀺𑀢𑁄𑀲𑀺? 𑀓𑁂 𑀯𑀸 𑀢𑁂 𑀥𑀫𑁆𑀫𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺? 𑀓𑀺𑀁 𑀯𑀸 𑀢𑁂 𑀫𑀦𑀲𑀺𑀓𑀭𑁄𑀢𑁄 𑀨𑀸𑀲𑀼 𑀳𑁄𑀢𑀺? 𑀓𑀢𑀭𑀲𑁆𑀫𑀺𑀁 𑀯𑀸 𑀢𑁂 𑀓𑀫𑁆𑀫𑀝𑁆𑀞𑀸𑀦𑁂 𑀘𑀺𑀢𑁆𑀢𑀁 𑀦𑀫𑀢𑀻𑀢𑀺 𑀏𑀯𑀫𑀸𑀤𑀻𑀳𑀺 𑀦𑀬𑁂𑀳𑀺 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸. 𑀏𑀯𑀁 𑀜𑀢𑁆𑀯𑀸 𑀘𑀭𑀺𑀬𑀸𑀦𑀼𑀓𑀽𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁.

𑀓𑀣𑁂𑀦𑁆𑀢𑁂𑀦 𑀘 𑀢𑀺𑀯𑀺𑀥𑁂𑀦 𑀓𑀣𑁂𑀢𑀩𑁆𑀩𑀁. 𑀧𑀓𑀢𑀺𑀬𑀸 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀏𑀓𑀁 𑀤𑁆𑀯𑁂 𑀦𑀺𑀲𑀚𑁆𑀚𑀸𑀦𑀺 𑀲𑀚𑁆𑀛𑀸𑀬𑀁 𑀓𑀸𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑀲𑁆𑀲 𑀆𑀕𑀢𑀸𑀕𑀢𑀓𑁆𑀔𑀡𑁂 𑀓𑀣𑁂𑀢𑀩𑁆𑀩𑀁. 𑀉𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀓𑀸𑀫𑀲𑁆𑀲 𑀦𑀸𑀢𑀺𑀲𑀁𑀔𑀺𑀢𑁆𑀢𑀁 𑀦𑀸𑀢𑀺𑀯𑀺𑀢𑁆𑀣𑀸𑀭𑀺𑀓𑀁 𑀓𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀢𑀢𑁆𑀣 𑀧𑀣𑀯𑀻𑀓𑀲𑀺𑀡𑀁 𑀢𑀸𑀯 𑀓𑀣𑁂𑀦𑁆𑀢𑁂𑀦 𑀘𑀢𑁆𑀢𑀸𑀭𑁄 𑀓𑀲𑀺𑀡𑀤𑁄𑀲𑀸, 𑀓𑀲𑀺𑀡𑀓𑀭𑀡𑀁, 𑀓𑀢𑀲𑁆𑀲 𑀪𑀸𑀯𑀦𑀸𑀦𑀬𑁄, 𑀤𑀼𑀯𑀺𑀥𑀁 𑀦𑀺𑀫𑀺𑀢𑁆𑀢𑀁, 𑀤𑀼𑀯𑀺𑀥𑁄 𑀲𑀫𑀸𑀥𑀺, 𑀲𑀢𑁆𑀢𑀯𑀺𑀥𑀁 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁, 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁, 𑀯𑀻𑀭𑀺𑀬𑀲𑀫𑀢𑀸, 𑀅𑀧𑁆𑀧𑀦𑀸𑀯𑀺𑀥𑀸𑀦𑀦𑁆𑀢𑀺 𑀇𑀫𑁂 𑀦𑀯 𑀆𑀓𑀸𑀭𑀸 𑀓𑀣𑁂𑀢𑀩𑁆𑀩𑀸. 𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀧𑀺 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀭𑀽𑀧𑀁 𑀓𑀣𑁂𑀢𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀢𑁂𑀲𑀁 𑀪𑀸𑀯𑀦𑀸𑀯𑀺𑀥𑀸𑀦𑁂 𑀆𑀯𑀺𑀪𑀯𑀺𑀲𑁆𑀲𑀢𑀺.