𑁪. 𑀧𑀣𑀯𑀻𑀓𑀲𑀺𑀡𑀦𑀺𑀤𑁆𑀤𑁂𑀲𑁄

𑁫𑁧. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀣 𑀬𑀲𑁆𑀲 𑀢𑀸𑀯𑀸𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀢𑁄 𑀨𑀸𑀲𑀼 𑀳𑁄𑀢𑀺, 𑀢𑁂𑀦 𑀢𑀢𑁆𑀣𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀲𑁄𑀥𑁂𑀦𑁆𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀨𑀸𑀲𑀼 𑀦 𑀳𑁄𑀢𑀺, 𑀬𑁄 𑀅𑀜𑁆𑀜𑁄 𑀕𑀸𑀯𑀼𑀢𑁂 𑀯𑀸 𑀅𑀟𑁆𑀠𑀬𑁄𑀚𑀦𑁂 𑀯𑀸 𑀬𑁄𑀚𑀦𑀫𑀢𑁆𑀢𑁂𑀧𑀺 𑀯𑀸 𑀲𑀧𑁆𑀧𑀸𑀬𑁄 𑀯𑀺𑀳𑀸𑀭𑁄 𑀳𑁄𑀢𑀺, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀲𑀦𑁆𑀤𑁂𑀳𑁂 𑀯𑀸 𑀲𑀢𑀺𑀲𑀫𑁆𑀫𑁄𑀲𑁂 𑀯𑀸 𑀚𑀸𑀢𑁂 𑀓𑀸𑀮𑀲𑁆𑀲𑁂𑀯 𑀯𑀺𑀳𑀸𑀭𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂𑀬𑁂𑀯 𑀆𑀘𑀭𑀺𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁𑀤𑀺𑀯𑀲𑀫𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀅𑀓𑀺𑀮𑀫𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀬𑁄 𑀧𑀦 𑀬𑁄𑀚𑀦𑀧𑁆𑀧𑀫𑀸𑀡𑁂𑀧𑀺 𑀨𑀸𑀲𑀼𑀓𑀝𑁆𑀞𑀸𑀦𑀁 𑀦 𑀮𑀪𑀢𑀺, 𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀲𑀩𑁆𑀩𑀁 𑀕𑀡𑁆𑀞𑀺𑀝𑁆𑀞𑀸𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑀁 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑀽𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀲𑀫𑀸𑀥𑀺𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀸𑀢𑀩𑁆𑀩𑀁.

𑀅𑀦𑀦𑀼𑀭𑀽𑀧𑀯𑀺𑀳𑀸𑀭𑁄

𑁫𑁨. 𑀢𑀢𑁆𑀣 𑀅𑀦𑀦𑀼𑀭𑀽𑀧𑁄 𑀦𑀸𑀫 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑀢𑁆𑀭𑀺𑀫𑁂 𑀅𑀝𑁆𑀞𑀸𑀭𑀲 𑀤𑁄𑀲𑀸 𑁋 𑀫𑀳𑀢𑁆𑀢𑀁, 𑀦𑀯𑀢𑁆𑀢𑀁, 𑀚𑀺𑀡𑁆𑀡𑀢𑁆𑀢𑀁, 𑀧𑀦𑁆𑀣𑀦𑀺𑀲𑁆𑀲𑀺𑀢𑀢𑁆𑀢𑀁, 𑀲𑁄𑀡𑁆𑀟𑀻, 𑀧𑀡𑁆𑀡𑀁, 𑀧𑀼𑀧𑁆𑀨𑀁, 𑀨𑀮𑀁, 𑀧𑀢𑁆𑀣𑀦𑀻𑀬𑀢𑀸, 𑀦𑀕𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀤𑀸𑀭𑀼𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀯𑀺𑀲𑀪𑀸𑀕𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀺𑀢𑀸, 𑀧𑀝𑁆𑀝𑀦𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀧𑀘𑁆𑀘𑀦𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑀢𑀸, 𑀅𑀲𑀧𑁆𑀧𑀸𑀬𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄𑀢𑀺 𑀇𑀫𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀤𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀦𑀦𑀼𑀭𑀽𑀧𑁄 𑀦𑀸𑀫. 𑀦 𑀢𑀢𑁆𑀣 𑀯𑀺𑀳𑀸𑀢𑀩𑁆𑀩𑀁.

𑀓𑀲𑁆𑀫𑀸? 𑀫𑀳𑀸𑀯𑀺𑀳𑀸𑀭𑁂 𑀢𑀸𑀯 𑀩𑀳𑀽 𑀦𑀸𑀦𑀸𑀙𑀦𑁆𑀤𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀯𑀺𑀭𑀼𑀤𑁆𑀥𑀢𑀸𑀬 𑀯𑀢𑁆𑀢𑀁 𑀦 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀬𑀗𑁆𑀕𑀡𑀸𑀤𑀻𑀦𑀺 𑀅𑀲𑀫𑁆𑀫𑀝𑁆𑀞𑀸𑀦𑁂𑀯 𑀳𑁄𑀦𑁆𑀢𑀺. 𑀅𑀦𑀼𑀧𑀝𑁆𑀞𑀸𑀧𑀺𑀢𑀁 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁. 𑀢𑀢𑁆𑀭𑀸𑀬𑀁 𑀕𑁄𑀘𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻𑀢𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀺𑀓𑁆𑀔𑀦𑁆𑀢𑁄 𑀲𑀘𑁂 𑀧𑀲𑁆𑀲𑀢𑀺 𑀯𑀢𑁆𑀢𑀁 𑀯𑀸 𑀅𑀓𑀢𑀁 𑀧𑀸𑀦𑀻𑀬𑀖𑀝𑀁 𑀯𑀸 𑀭𑀺𑀢𑁆𑀢𑀁, 𑀅𑀣𑀸𑀦𑁂𑀦 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀅𑀓𑀭𑁄𑀦𑁆𑀢𑁄 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀭𑁄𑀦𑁆𑀢𑀲𑁆𑀲 𑀓𑀸𑀮𑁄 𑀅𑀢𑀺𑀓𑁆𑀓𑀫𑀢𑀺, 𑀅𑀢𑀺𑀤𑀺𑀯𑀸 𑀧𑀯𑀺𑀝𑁆𑀞𑁄 𑀦𑀺𑀝𑁆𑀞𑀺𑀢𑀸𑀬 𑀪𑀺𑀓𑁆𑀔𑀸𑀬 𑀓𑀺𑀜𑁆𑀘𑀺 𑀦 𑀮𑀪𑀢𑀺. 𑀧𑀝𑀺𑀲𑀮𑁆𑀮𑀸𑀦𑀕𑀢𑁄𑀧𑀺 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽𑀦𑀁 𑀉𑀘𑁆𑀘𑀸𑀲𑀤𑁆𑀤𑁂𑀦 𑀲𑀗𑁆𑀖𑀓𑀫𑁆𑀫𑁂𑀳𑀺 𑀘 𑀯𑀺𑀓𑁆𑀔𑀺𑀧𑀢𑀺. 𑀬𑀢𑁆𑀣 𑀧𑀦 𑀲𑀩𑁆𑀩𑀁 𑀯𑀢𑁆𑀢𑀁 𑀓𑀢𑀫𑁂𑀯 𑀳𑁄𑀢𑀺, 𑀅𑀯𑀲𑁂𑀲𑀸𑀧𑀺 𑀘 𑀲𑀗𑁆𑀖𑀝𑁆𑀝𑀦𑀸 𑀦𑀢𑁆𑀣𑀺. 𑀏𑀯𑀭𑀽𑀧𑁂 𑀫𑀳𑀸𑀯𑀺𑀳𑀸𑀭𑁂𑀧𑀺 𑀯𑀺𑀳𑀸𑀢𑀩𑁆𑀩𑀁.

𑀦𑀯𑀯𑀺𑀳𑀸𑀭𑁂 𑀩𑀳𑀼 𑀦𑀯𑀓𑀫𑁆𑀫𑀁 𑀳𑁄𑀢𑀺, 𑀅𑀓𑀭𑁄𑀦𑁆𑀢𑀁 𑀉𑀚𑁆𑀛𑀸𑀬𑀦𑁆𑀢𑀺. 𑀬𑀢𑁆𑀣 𑀧𑀦 𑀪𑀺𑀓𑁆𑀔𑀽 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀬𑀲𑁆𑀫𑀸 𑀬𑀣𑀸𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀼, 𑀫𑀬𑀁 𑀦𑀯𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀭𑀽𑀧𑁂 𑀯𑀺𑀳𑀸𑀢𑀩𑁆𑀩𑀁.

𑀚𑀺𑀡𑁆𑀡𑀯𑀺𑀳𑀸𑀭𑁂 𑀧𑀦 𑀩𑀳𑀼 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑀫𑀲𑁄 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀫𑀢𑁆𑀢𑀫𑁆𑀧𑀺 𑀅𑀧𑁆𑀧𑀝𑀺𑀚𑀕𑁆𑀕𑀦𑁆𑀢𑀁 𑀉𑀚𑁆𑀛𑀸𑀬𑀦𑁆𑀢𑀺, 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀳𑀸𑀬𑀢𑀺.

𑀧𑀦𑁆𑀣𑀦𑀺𑀲𑁆𑀲𑀺𑀢𑁂 𑀫𑀳𑀸𑀧𑀣𑀯𑀺𑀳𑀸𑀭𑁂 𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀕𑀦𑁆𑀢𑀼𑀓𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀯𑀺𑀓𑀸𑀮𑁂 𑀆𑀕𑀢𑀸𑀦𑀁 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀁 𑀤𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑁂 𑀯𑀸 𑀯𑀲𑀺𑀢𑀩𑁆𑀩𑀁 𑀳𑁄𑀢𑀺. 𑀧𑀼𑀦𑀤𑀺𑀯𑀲𑁂𑀧𑀺 𑀏𑀯𑀫𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺. 𑀬𑀢𑁆𑀣 𑀧𑀦 𑀏𑀯𑀭𑀽𑀧𑁄 𑀆𑀕𑀦𑁆𑀢𑀼𑀓𑀲𑀫𑁆𑀩𑀸𑀥𑁄 𑀦 𑀳𑁄𑀢𑀺, 𑀢𑀢𑁆𑀣 𑀯𑀺𑀳𑀸𑀢𑀩𑁆𑀩𑀁.

𑀲𑁄𑀡𑁆𑀟𑀻 𑀦𑀸𑀫 𑀧𑀸𑀲𑀸𑀡𑀧𑁄𑀓𑁆𑀔𑀭𑀡𑀻 𑀳𑁄𑀢𑀺, 𑀢𑀢𑁆𑀣 𑀧𑀸𑀦𑀻𑀬𑀢𑁆𑀣𑀁 𑀫𑀳𑀸𑀚𑀦𑁄 𑀲𑀫𑁄𑀲𑀭𑀢𑀺, 𑀦𑀕𑀭𑀯𑀸𑀲𑀻𑀦𑀁 𑀭𑀸𑀚𑀓𑀼𑀮𑀽𑀧𑀓𑀢𑁆𑀣𑁂𑀭𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀭𑀚𑀦𑀓𑀫𑁆𑀫𑀢𑁆𑀣𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀪𑀸𑀚𑀦𑀤𑀸𑀭𑀼𑀤𑁄𑀡𑀺𑀓𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 𑀅𑀲𑀼𑀓𑁂 𑀘 𑀅𑀲𑀼𑀓𑁂 𑀘 𑀞𑀸𑀦𑁂𑀢𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀓𑀸𑀮𑀫𑁆𑀧𑀺 𑀦𑀺𑀘𑁆𑀘𑀩𑁆𑀬𑀸𑀯𑀝𑁄 𑀳𑁄𑀢𑀺.

𑀬𑀢𑁆𑀣 𑀦𑀸𑀦𑀸𑀯𑀺𑀥𑀁 𑀲𑀸𑀓𑀧𑀡𑁆𑀡𑀁 𑀳𑁄𑀢𑀺, 𑀢𑀢𑁆𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑁂 𑀲𑀸𑀓𑀳𑀸𑀭𑀺𑀓𑀸 𑀕𑀸𑀬𑀫𑀸𑀦𑀸 𑀧𑀡𑁆𑀡𑀁 𑀉𑀘𑁆𑀘𑀺𑀦𑀦𑁆𑀢𑀺𑀬𑁄 𑀯𑀺𑀲𑀪𑀸𑀕𑀲𑀤𑁆𑀤𑀲𑀗𑁆𑀖𑀝𑁆𑀝𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀺.

𑀬𑀢𑁆𑀣 𑀧𑀦 𑀦𑀸𑀦𑀸𑀯𑀺𑀥𑀸 𑀫𑀸𑀮𑀸𑀕𑀘𑁆𑀙𑀸 𑀲𑀼𑀧𑀼𑀧𑁆𑀨𑀺𑀢𑀸 𑀳𑁄𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀢𑀸𑀤𑀺𑀲𑁄𑀬𑁂𑀯 𑀉𑀧𑀤𑁆𑀤𑀯𑁄.

𑀬𑀢𑁆𑀣 𑀦𑀸𑀦𑀸𑀯𑀺𑀥𑀁 𑀅𑀫𑁆𑀩𑀚𑀫𑁆𑀩𑀼𑀧𑀦𑀲𑀸𑀤𑀺𑀨𑀮𑀁 𑀳𑁄𑀢𑀺, 𑀢𑀢𑁆𑀣 𑀨𑀮𑀢𑁆𑀣𑀺𑀓𑀸 𑀆𑀕𑀦𑁆𑀢𑁆𑀯𑀸 𑀬𑀸𑀘𑀦𑁆𑀢𑀺, 𑀅𑀤𑁂𑀦𑁆𑀢𑀲𑁆𑀲 𑀓𑀼𑀚𑁆𑀛𑀦𑁆𑀢𑀺, 𑀩𑀮𑀓𑁆𑀓𑀸𑀭𑁂𑀦 𑀯𑀸 𑀕𑀡𑁆𑀳𑀦𑁆𑀢𑀺, 𑀲𑀸𑀬𑀦𑁆𑀳𑀲𑀫𑀬𑁂 𑀯𑀺𑀳𑀸𑀭𑀫𑀚𑁆𑀛𑁂 𑀘𑀗𑁆𑀓𑀫𑀦𑁆𑀢𑁂𑀦 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀉𑀧𑀸𑀲𑀓𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀸 𑀬𑀣𑀸𑀭𑀼𑀘𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀅𑀯𑀸𑀲𑀸𑀬𑀧𑀺𑀲𑁆𑀲 𑀧𑀭𑀓𑁆𑀓𑀫𑀦𑁆𑀢𑀺.

𑀧𑀢𑁆𑀣𑀦𑀻𑀬𑁂 𑀧𑀦 𑀮𑁂𑀡𑀲𑀫𑁆𑀫𑀢𑁂 𑀤𑀓𑁆𑀔𑀺𑀡𑀕𑀺𑀭𑀺𑀳𑀢𑁆𑀣𑀺𑀓𑀼𑀘𑁆𑀙𑀺𑀘𑁂𑀢𑀺𑀬𑀕𑀺𑀭𑀺𑀘𑀺𑀢𑁆𑀢𑀮𑀧𑀩𑁆𑀩𑀢𑀲𑀤𑀺𑀲𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑀁 𑀅𑀬𑀫𑀭𑀳𑀸𑀢𑀺 𑀲𑀫𑁆𑀪𑀸𑀯𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀫𑀦𑀼𑀲𑁆𑀲𑀸 𑀲𑀫𑀦𑁆𑀢𑀸 𑀑𑀲𑀭𑀦𑁆𑀢𑀺, 𑀢𑁂𑀦𑀲𑁆𑀲 𑀦 𑀨𑀸𑀲𑀼 𑀳𑁄𑀢𑀺, 𑀬𑀲𑁆𑀲 𑀧𑀦 𑀢𑀁 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀢𑁂𑀦 𑀤𑀺𑀯𑀸 𑀅𑀜𑁆𑀜𑀢𑁆𑀭 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀁 𑀯𑀲𑀺𑀢𑀩𑁆𑀩𑀁.

𑀦𑀕𑀭𑀲𑀦𑁆𑀦𑀺𑀲𑁆𑀲𑀺𑀢𑁂 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀸𑀦𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀓𑀼𑀫𑁆𑀪𑀤𑀸𑀲𑀺𑀬𑁄𑀧𑀺 𑀖𑀝𑁂𑀳𑀺 𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺, 𑀑𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀁 𑀦 𑀤𑁂𑀦𑁆𑀢𑀺, 𑀇𑀲𑁆𑀲𑀭𑀫𑀦𑀼𑀲𑁆𑀲𑀸𑀧𑀺 𑀯𑀺𑀳𑀸𑀭𑀫𑀚𑁆𑀛𑁂 𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺.

𑀤𑀸𑀭𑀼𑀲𑀦𑁆𑀦𑀺𑀲𑁆𑀲𑀬𑁂 𑀧𑀦 𑀬𑀢𑁆𑀣 𑀓𑀝𑁆𑀞𑀸𑀦𑀺 𑀘 𑀤𑀩𑁆𑀩𑀼𑀧𑀓𑀭𑀡𑀭𑀼𑀓𑁆𑀔𑀸 𑀘 𑀲𑀦𑁆𑀢𑀺, 𑀢𑀢𑁆𑀣 𑀓𑀝𑁆𑀞𑀳𑀸𑀭𑀺𑀓𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀸𑀓𑀧𑀼𑀧𑁆𑀨𑀳𑀸𑀭𑀺𑀓𑀸 𑀯𑀺𑀬 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺, 𑀯𑀺𑀳𑀸𑀭𑁂 𑀭𑀼𑀓𑁆𑀔𑀸 𑀲𑀦𑁆𑀢𑀺, 𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀖𑀭𑀸𑀦𑀺 𑀓𑀭𑀺𑀲𑁆𑀲𑀸𑀫𑀸𑀢𑀺 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀺. 𑀲𑀘𑁂 𑀲𑀸𑀬𑀦𑁆𑀳𑀲𑀫𑀬𑀁 𑀧𑀥𑀸𑀦𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀘𑀗𑁆𑀓𑀫𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 ‘‘𑀓𑀺𑀁 𑀉𑀧𑀸𑀲𑀓𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀯𑀤𑀢𑀺, 𑀬𑀣𑀸𑀭𑀼𑀘𑀺 𑀅𑀓𑁆𑀓𑁄𑀲𑀦𑁆𑀢𑀺, 𑀅𑀯𑀸𑀲𑀸𑀬𑀧𑀺𑀲𑁆𑀲 𑀧𑀭𑀓𑁆𑀓𑀫𑀦𑁆𑀢𑀺.

𑀬𑁄 𑀧𑀦 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺 𑀲𑀫𑀦𑁆𑀢𑀸 𑀔𑁂𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 𑀔𑀮𑀁 𑀓𑀢𑁆𑀯𑀸 𑀥𑀜𑁆𑀜𑀁 𑀫𑀤𑁆𑀤𑀦𑁆𑀢𑀺, 𑀧𑀫𑀼𑀔𑁂𑀲𑀼 𑀲𑀬𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀩𑀳𑀼𑀁 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺. 𑀬𑀢𑁆𑀭𑀸𑀧𑀺 𑀫𑀳𑀸𑀲𑀗𑁆𑀖𑀪𑁄𑀕𑁄 𑀳𑁄𑀢𑀺, 𑀆𑀭𑀸𑀫𑀺𑀓𑀸 𑀓𑀼𑀮𑀸𑀦𑀁 𑀕𑀸𑀯𑁄 𑀭𑀼𑀦𑁆𑀥𑀦𑁆𑀢𑀺, 𑀉𑀤𑀓𑀯𑀸𑀭𑀁 𑀧𑀝𑀺𑀲𑁂𑀥𑁂𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀯𑀻𑀳𑀺𑀲𑀻𑀲𑀁 𑀕𑀳𑁂𑀢𑁆𑀯𑀸 ‘‘𑀧𑀲𑁆𑀲𑀣 𑀢𑀼𑀫𑁆𑀳𑀸𑀓𑀁 𑀆𑀭𑀸𑀫𑀺𑀓𑀸𑀦𑀁 𑀓𑀫𑁆𑀫’’𑀦𑁆𑀢𑀺 𑀲𑀗𑁆𑀖𑀲𑁆𑀲 𑀤𑀲𑁆𑀲𑁂𑀦𑁆𑀢𑀺. 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀖𑀭𑀤𑁆𑀯𑀸𑀭𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀅𑀬𑀫𑁆𑀧𑀺 𑀔𑁂𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑁄.

𑀯𑀺𑀲𑀪𑀸𑀕𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀺𑀢𑀸𑀢𑀺 𑀬𑀢𑁆𑀣 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀪𑀸𑀕𑀯𑁂𑀭𑀻 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺, 𑀬𑁂 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀫𑀸, 𑀪𑀦𑁆𑀢𑁂, 𑀏𑀯𑀁 𑀓𑀭𑁄𑀣𑀸𑀢𑀺 𑀯𑀸𑀭𑀺𑀬𑀫𑀸𑀦𑀸 𑀏𑀢𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀝𑁆𑀞𑀸𑀫𑁆𑀳𑀸𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺.

𑀬𑁄𑀧𑀺 𑀉𑀤𑀓𑀧𑀝𑁆𑀝𑀦𑀁 𑀯𑀸 𑀣𑀮𑀧𑀝𑁆𑀝𑀦𑀁 𑀯𑀸 𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀅𑀪𑀺𑀡𑁆𑀳𑀁 𑀦𑀸𑀯𑀸𑀳𑀺 𑀘 𑀲𑀢𑁆𑀣𑁂𑀳𑀺 𑀘 𑀆𑀕𑀢𑀫𑀦𑀼𑀲𑁆𑀲𑀸 𑀑𑀓𑀸𑀲𑀁 𑀤𑁂𑀣, 𑀧𑀸𑀦𑀻𑀬𑀁 𑀤𑁂𑀣, 𑀮𑁄𑀡𑀁 𑀤𑁂𑀣𑀸𑀢𑀺 𑀖𑀝𑁆𑀝𑀬𑀦𑁆𑀢𑀸 𑀅𑀨𑀸𑀲𑀼𑀁 𑀓𑀭𑁄𑀦𑁆𑀢𑀺.

𑀧𑀘𑁆𑀘𑀦𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁂 𑀧𑀦 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀸𑀤𑀻𑀲𑀼 𑀅𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺.

𑀭𑀚𑁆𑀚𑀲𑀻𑀫𑀲𑀦𑁆𑀦𑀺𑀲𑁆𑀲𑀺𑀢𑁂 𑀭𑀸𑀚𑀪𑀬𑀁 𑀳𑁄𑀢𑀺. 𑀢𑀜𑁆𑀳𑀺 𑀧𑀤𑁂𑀲𑀁 𑀏𑀓𑁄 𑀭𑀸𑀚𑀸 𑀦 𑀫𑀬𑁆𑀳𑀁 𑀯𑀲𑁂 𑀯𑀢𑁆𑀢𑀢𑀻𑀢𑀺 𑀧𑀳𑀭𑀢𑀺, 𑀇𑀢𑀭𑁄𑀧𑀺 𑀦 𑀫𑀬𑁆𑀳𑀁 𑀯𑀲𑁂 𑀯𑀢𑁆𑀢𑀢𑀻𑀢𑀺. 𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀓𑀤𑀸𑀘𑀺 𑀇𑀫𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑁂 𑀯𑀺𑀘𑀭𑀢𑀺, 𑀓𑀤𑀸𑀘𑀺 𑀏𑀢𑀲𑁆𑀲. 𑀅𑀣 𑀦𑀁 ‘‘𑀘𑀭𑀧𑀼𑀭𑀺𑀲𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺.

𑀅𑀲𑀧𑁆𑀧𑀸𑀬𑀢𑀸𑀢𑀺 𑀯𑀺𑀲𑀪𑀸𑀕𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀲𑀫𑁄𑀲𑀭𑀡𑁂𑀦 𑀯𑀸 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀢𑀸𑀬 𑀯𑀸 𑀅𑀲𑀧𑁆𑀧𑀸𑀬𑀢𑀸. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼. 𑀏𑀓𑁄 𑀓𑀺𑀭 𑀣𑁂𑀭𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑀲𑁆𑀲 𑀏𑀓𑀸 𑀬𑀓𑁆𑀔𑀺𑀦𑀻 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀞𑀢𑁆𑀯𑀸 𑀕𑀸𑀬𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺, 𑀲𑀸 𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑀦𑀲𑀻𑀲𑁂 𑀕𑀸𑀬𑀺. 𑀣𑁂𑀭𑁄 𑀘𑀗𑁆𑀓𑀫𑀦𑀲𑀻𑀲𑀁 𑀅𑀕𑀫𑀸𑀲𑀺. 𑀲𑀸 𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀞𑀢𑁆𑀯𑀸 𑀕𑀸𑀬𑀺. 𑀣𑁂𑀭𑁄 𑀧𑀝𑀺𑀦𑀺𑀯𑀢𑁆𑀢𑀺. 𑀅𑀣 𑀦𑀁 𑀲𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀕𑀳𑁂𑀢𑁆𑀯𑀸 ‘‘𑀫𑀬𑀸, 𑀪𑀦𑁆𑀢𑁂, 𑀦 𑀏𑀓𑁄 𑀦 𑀤𑁆𑀯𑁂 𑀢𑀼𑀫𑁆𑀳𑀸𑀤𑀺𑀲𑀸 𑀔𑀸𑀤𑀺𑀢𑀸’’𑀢𑀺 𑀆𑀳.

𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄𑀢𑀺 𑀬𑀢𑁆𑀣 𑀦 𑀲𑀓𑁆𑀓𑀸 𑀳𑁄𑀢𑀺 𑀆𑀘𑀭𑀺𑀬𑀁 𑀯𑀸 𑀆𑀘𑀭𑀺𑀬𑀲𑀫𑀁 𑀯𑀸 𑀉𑀧𑀚𑁆𑀛𑀸𑀬𑀁 𑀯𑀸 𑀉𑀧𑀚𑁆𑀛𑀸𑀬𑀲𑀫𑀁 𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀤𑁆𑀥𑀼𑀁. 𑀢𑀢𑁆𑀣 𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀅𑀮𑀸𑀪𑁄 𑀫𑀳𑀸𑀤𑁄𑀲𑁄𑀬𑁂𑀯𑀸𑀢𑀺 𑀇𑀫𑁂𑀲𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀦𑀦𑀼𑀭𑀽𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸𑀢𑀺.

𑀅𑀦𑀼𑀭𑀽𑀧𑀯𑀺𑀳𑀸𑀭𑁄

𑁫𑁩. 𑀬𑁄 𑀧𑀦 𑀕𑁄𑀘𑀭𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀢𑀸𑀤𑀻𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀅𑀬𑀁 𑀅𑀦𑀼𑀭𑀽𑀧𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸, 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺, 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀝𑁆𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧).

𑀅𑀬𑀁 ‘‘𑀲𑀫𑀸𑀥𑀺𑀪𑀸𑀯𑀦𑀸𑀬 𑀅𑀦𑀦𑀼𑀭𑀽𑀧𑀁 𑀯𑀺𑀳𑀸𑀭𑀁 𑀧𑀳𑀸𑀬 𑀅𑀦𑀼𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀣 𑀯𑀺𑀢𑁆𑀣𑀸𑀭𑁄.

𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀸

𑁫𑁪. 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀏𑀯𑀁 𑀧𑀢𑀺𑀭𑀽𑀧𑁂 𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁂𑀦 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀸, 𑀢𑁂𑀧𑀺 𑀉𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸. 𑀲𑁂𑀬𑁆𑀬𑀣𑀺𑀤𑀁, 𑀤𑀻𑀖𑀸𑀦𑀺 𑀓𑁂𑀲𑀦𑀔𑀮𑁄𑀫𑀸𑀦𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀺. 𑀚𑀺𑀡𑁆𑀡𑀘𑀻𑀯𑀭𑁂𑀲𑀼 𑀤𑀴𑁆𑀳𑀻𑀓𑀫𑁆𑀫𑀁 𑀯𑀸 𑀢𑀼𑀦𑁆𑀦𑀓𑀫𑁆𑀫𑀁 𑀯𑀸 𑀓𑀸𑀢𑀩𑁆𑀩𑀁. 𑀓𑀺𑀮𑀺𑀝𑁆𑀞𑀸𑀦𑀺 𑀯𑀸 𑀭𑀚𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀢𑁆𑀢𑁂 𑀫𑀮𑀁 𑀳𑁄𑀢𑀺, 𑀧𑀢𑁆𑀢𑁄 𑀧𑀘𑀺𑀢𑀩𑁆𑀩𑁄. 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀲𑁄𑀥𑁂𑀢𑀩𑁆𑀩𑀸𑀦𑀻𑀢𑀺. ‘‘𑀅𑀬𑀁 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀁 𑀓𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀺𑀢𑁆𑀣𑀸𑀭𑁄.

𑀪𑀸𑀯𑀦𑀸𑀯𑀺𑀥𑀸𑀦𑀁

𑁫𑁫. 𑀇𑀤𑀸𑀦𑀺 𑀲𑀩𑁆𑀩𑀁 𑀪𑀸𑀯𑀦𑀸𑀯𑀺𑀥𑀸𑀦𑀁 𑀅𑀧𑀭𑀺𑀳𑀸𑀧𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑁄𑀢𑀺 𑀏𑀢𑁆𑀣 𑀅𑀬𑀁 𑀧𑀣𑀯𑀻𑀓𑀲𑀺𑀡𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑀓𑀣𑀸 𑀳𑁄𑀢𑀺.

𑀏𑀯𑀁 𑀉𑀧𑀘𑁆𑀙𑀺𑀦𑁆𑀦𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂𑀦 𑀪𑀢𑁆𑀢𑀲𑀫𑁆𑀫𑀤𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀧𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀓𑀢𑀸𑀬 𑀯𑀸 𑀅𑀓𑀢𑀸𑀬 𑀯𑀸 𑀧𑀣𑀯𑀺𑀬𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀣𑀯𑀻𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀓𑀢𑁂 𑀯𑀸 𑀅𑀓𑀢𑁂 𑀯𑀸 𑀲𑀸𑀦𑁆𑀢𑀓𑁂, 𑀦𑁄 𑀅𑀦𑀦𑁆𑀢𑀓𑁂, 𑀲𑀓𑁄𑀝𑀺𑀬𑁂, 𑀦𑁄 𑀅𑀓𑁄𑀝𑀺𑀬𑁂, 𑀲𑀯𑀝𑁆𑀝𑀼𑀫𑁂, 𑀦𑁄 𑀅𑀯𑀝𑁆𑀝𑀼𑀫𑁂, 𑀲𑀧𑀭𑀺𑀬𑀦𑁆𑀢𑁂, 𑀦𑁄 𑀅𑀧𑀭𑀺𑀬𑀦𑁆𑀢𑁂, 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻 𑀭𑀢𑀦𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺 ‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀫𑁆𑀳𑀸 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺.

𑀢𑀢𑁆𑀣 𑀬𑁂𑀦 𑀅𑀢𑀻𑀢𑀪𑀯𑁂𑀧𑀺 𑀲𑀸𑀲𑀦𑁂 𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀸𑀬 𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀣𑀯𑀻𑀓𑀲𑀺𑀡𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑀼𑀩𑁆𑀩𑀸𑀦𑀺, 𑀏𑀯𑀭𑀽𑀧𑀲𑁆𑀲 𑀧𑀼𑀜𑁆𑀜𑀯𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀅𑀓𑀢𑀸𑀬 𑀧𑀣𑀯𑀺𑀬𑀸 𑀓𑀲𑀺𑀢𑀝𑁆𑀞𑀸𑀦𑁂 𑀯𑀸 𑀔𑀮𑀫𑀡𑁆𑀟𑀮𑁂 𑀯𑀸 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀫𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀢𑀲𑁆𑀲 𑀓𑀺𑀭𑀸𑀬𑀲𑁆𑀫𑀢𑁄 𑀓𑀲𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀢𑀁𑀞𑀸𑀦𑀧𑁆𑀧𑀫𑀸𑀡𑀫𑁂𑀯 𑀦𑀺𑀫𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀲𑁄 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺.

𑀬𑁄 𑀧𑀦𑁂𑀯𑀁 𑀅𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺, 𑀢𑁂𑀦 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀸𑀦𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀓𑀲𑀺𑀡𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁂𑀦 𑀓𑀲𑀺𑀡𑀁 𑀓𑀸𑀢𑀩𑁆𑀩𑀁. 𑀦𑀻𑀮𑀧𑀻𑀢𑀮𑁄𑀳𑀺𑀢𑀑𑀤𑀸𑀢𑀲𑀫𑁆𑀪𑁂𑀤𑀯𑀲𑁂𑀦 𑀳𑀺 𑀘𑀢𑁆𑀢𑀸𑀭𑁄 𑀧𑀣𑀯𑀻𑀓𑀲𑀺𑀡𑀤𑁄𑀲𑀸. 𑀢𑀲𑁆𑀫𑀸 𑀦𑀻𑀮𑀸𑀤𑀺𑀯𑀡𑁆𑀡𑀁 𑀫𑀢𑁆𑀢𑀺𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀕𑀗𑁆𑀕𑀸𑀯𑀳𑁂 𑀫𑀢𑁆𑀢𑀺𑀓𑀸𑀲𑀤𑀺𑀲𑀸𑀬 𑀅𑀭𑀼𑀡𑀯𑀡𑁆𑀡𑀸𑀬 𑀫𑀢𑁆𑀢𑀺𑀓𑀸𑀬 𑀓𑀲𑀺𑀡𑀁 𑀓𑀸𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀯𑀺𑀳𑀸𑀭𑀫𑀚𑁆𑀛𑁂 𑀲𑀸𑀫𑀡𑁂𑀭𑀸𑀤𑀻𑀦𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑁂 𑀦 𑀓𑀸𑀢𑀩𑁆𑀩𑀁. 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀧𑀦 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑁂 𑀧𑀩𑁆𑀪𑀸𑀭𑁂 𑀯𑀸 𑀧𑀡𑁆𑀡𑀲𑀸𑀮𑀸𑀬 𑀯𑀸 𑀲𑀁𑀳𑀸𑀭𑀺𑀫𑀁 𑀯𑀸 𑀢𑀢𑁆𑀭𑀝𑁆𑀞𑀓𑀁 𑀯𑀸 𑀓𑀸𑀢𑀩𑁆𑀩𑀁. 𑀢𑀢𑁆𑀭 𑀲𑀁𑀳𑀸𑀭𑀺𑀫𑀁 𑀘𑀢𑀽𑀲𑀼 𑀤𑀡𑁆𑀟𑀓𑁂𑀲𑀼 𑀧𑀺𑀮𑁄𑀢𑀺𑀓𑀁 𑀯𑀸 𑀘𑀫𑁆𑀫𑀁 𑀯𑀸 𑀓𑀝𑀲𑀸𑀭𑀓𑀁 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀅𑀧𑀦𑀻𑀢𑀢𑀺𑀡𑀫𑀽𑀮𑀲𑀓𑁆𑀔𑀭𑀓𑀣𑀮𑀺𑀓𑀸𑀬 𑀲𑀼𑀫𑀤𑁆𑀤𑀺𑀢𑀸𑀬 𑀫𑀢𑁆𑀢𑀺𑀓𑀸𑀬 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀯𑀝𑁆𑀝𑀁 𑀮𑀺𑀫𑁆𑀧𑁂𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀢𑀁 𑀧𑀭𑀺𑀓𑀫𑁆𑀫𑀓𑀸𑀮𑁂 𑀪𑀽𑀫𑀺𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀁. 𑀢𑀢𑁆𑀭𑀝𑁆𑀞𑀓𑀁 𑀪𑀽𑀫𑀺𑀬𑀁 𑀧𑀤𑀼𑀫𑀓𑀡𑁆𑀡𑀺𑀓𑀸𑀓𑀸𑀭𑁂𑀦 𑀔𑀸𑀡𑀼𑀓𑁂 𑀆𑀓𑁄𑀝𑁂𑀢𑁆𑀯𑀸 𑀯𑀮𑁆𑀮𑀻𑀳𑀺 𑀯𑀺𑀦𑀦𑁆𑀥𑀺𑀢𑁆𑀯𑀸 𑀓𑀸𑀢𑀩𑁆𑀩𑀁. 𑀬𑀤𑀺 𑀲𑀸 𑀫𑀢𑁆𑀢𑀺𑀓𑀸 𑀦𑀧𑁆𑀧𑀳𑁄𑀢𑀺, 𑀅𑀥𑁄 𑀅𑀜𑁆𑀜𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀪𑀸𑀕𑁂 𑀲𑀼𑀧𑀭𑀺𑀲𑁄𑀥𑀺𑀢𑀸𑀬 𑀅𑀭𑀼𑀡𑀯𑀡𑁆𑀡𑀸𑀬 𑀫𑀢𑁆𑀢𑀺𑀓𑀸𑀬 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑀁 𑀯𑀝𑁆𑀝𑀁 𑀓𑀸𑀢𑀩𑁆𑀩𑀁. 𑀏𑀢𑀤𑁂𑀯 𑀳𑀺 𑀧𑀫𑀸𑀡𑀁 𑀲𑀦𑁆𑀥𑀸𑀬 ‘‘𑀲𑀼𑀧𑁆𑀧𑀫𑀢𑁆𑀢𑀁 𑀯𑀸 𑀲𑀭𑀸𑀯𑀫𑀢𑁆𑀢𑀁 𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀸𑀦𑁆𑀢𑀓𑁂 𑀦𑁄 𑀅𑀦𑀦𑁆𑀢𑀓𑁂’’𑀢𑀺𑀆𑀤𑀺 𑀧𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀢𑁆𑀣𑀸𑀬 𑀯𑀼𑀢𑁆𑀢𑀁.

𑁫𑁬. 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀭𑀼𑀓𑁆𑀔𑀧𑀸𑀡𑀺𑀓𑀸 𑀯𑀺𑀲𑀪𑀸𑀕𑀯𑀡𑁆𑀡𑀁 𑀲𑀫𑀼𑀝𑁆𑀞𑀧𑁂𑀢𑀺. 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀲𑀸𑀡𑀧𑀸𑀡𑀺𑀓𑀸𑀬 𑀖𑀁𑀲𑁂𑀢𑁆𑀯𑀸 𑀲𑀫𑀁 𑀪𑁂𑀭𑀻𑀢𑀮𑀲𑀤𑀺𑀲𑀁 𑀓𑀢𑁆𑀯𑀸 𑀢𑀁 𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀓𑀲𑀺𑀡𑀫𑀡𑁆𑀟𑀮𑀢𑁄 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀦𑁆𑀢𑀭𑁂 𑀧𑀤𑁂𑀲𑁂 𑀧𑀜𑁆𑀜𑀢𑁆𑀢𑁂 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑀸𑀤𑀓𑁂 𑀲𑀼𑀅𑀢𑁆𑀣𑀢𑁂 𑀧𑀻𑀞𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀢𑀢𑁄 𑀤𑀽𑀭𑀢𑀭𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀓𑀲𑀺𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀆𑀲𑀦𑁆𑀦𑀢𑀭𑁂 𑀓𑀲𑀺𑀡𑀤𑁄𑀲𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀉𑀘𑁆𑀘𑀢𑀭𑁂 𑀦𑀺𑀲𑀺𑀦𑁆𑀦𑁂𑀦 𑀕𑀻𑀯𑀁 𑀑𑀦𑀫𑀺𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺, 𑀦𑀻𑀘𑀢𑀭𑁂 𑀚𑀡𑁆𑀡𑀼𑀓𑀸𑀦𑀺 𑀭𑀼𑀚𑀦𑁆𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀓𑀸𑀫𑀦𑀺𑀲𑁆𑀲𑀭𑀡𑁂 𑀲𑀩𑁆𑀩𑀤𑀼𑀓𑁆𑀔𑀲𑀫𑀢𑀺𑀓𑁆𑀓𑀫𑀼𑀧𑀸𑀬𑀪𑀽𑀢𑁂 𑀦𑁂𑀓𑁆𑀔𑀫𑁆𑀫𑁂 𑀚𑀸𑀢𑀸𑀪𑀺𑀮𑀸𑀲𑁂𑀦 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸 ‘‘𑀅𑀬𑀁 𑀤𑀸𑀦𑀺 𑀲𑀸 𑀲𑀩𑁆𑀩𑀩𑀼𑀤𑁆𑀥 𑀧𑀘𑁆𑀘𑁂𑀓𑀩𑀼𑀤𑁆𑀥 𑀅𑀭𑀺𑀬𑀲𑀸𑀯𑀓𑁂𑀳𑀺 𑀧𑀝𑀺𑀧𑀦𑁆𑀦𑀸 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀸’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀲𑀜𑁆𑀚𑀸𑀢𑀕𑀸𑀭𑀯𑁂𑀦 ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀧𑀯𑀺𑀯𑁂𑀓𑀲𑀼𑀔𑀭𑀲𑀲𑁆𑀲 𑀪𑀸𑀕𑀻 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀁 𑀚𑀦𑀬𑀺𑀢𑁆𑀯𑀸 𑀲𑀫𑁂𑀦 𑀆𑀓𑀸𑀭𑁂𑀦 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀁.

𑀅𑀢𑀺𑀉𑀫𑁆𑀫𑀻𑀮𑀬𑀢𑁄 𑀳𑀺 𑀘𑀓𑁆𑀔𑀼 𑀓𑀺𑀮𑀫𑀢𑀺, 𑀫𑀡𑁆𑀟𑀮𑀜𑁆𑀘 𑀅𑀢𑀺𑀯𑀺𑀪𑀽𑀢𑀁 𑀳𑁄𑀢𑀺, 𑀢𑁂𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀢𑀺𑀫𑀦𑁆𑀤𑀁 𑀉𑀫𑁆𑀫𑀻𑀮𑀬𑀢𑁄 𑀫𑀡𑁆𑀟𑀮𑀫𑀯𑀺𑀪𑀽𑀢𑀁 𑀳𑁄𑀢𑀺, 𑀘𑀺𑀢𑁆𑀢𑀜𑁆𑀘 𑀮𑀻𑀦𑀁 𑀳𑁄𑀢𑀺, 𑀏𑀯𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀤𑀸𑀲𑀢𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀤𑀲𑁆𑀲𑀺𑀦𑀸 𑀯𑀺𑀬 𑀲𑀫𑁂𑀦𑀸𑀓𑀸𑀭𑁂𑀦 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀁, 𑀦 𑀯𑀡𑁆𑀡𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄, 𑀦 𑀮𑀓𑁆𑀔𑀡𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀅𑀧𑀺𑀘 𑀯𑀡𑁆𑀡𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀲𑁆𑀲𑀬𑀲𑀯𑀡𑁆𑀡𑀁 𑀓𑀢𑁆𑀯𑀸 𑀉𑀲𑁆𑀲𑀤𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀧𑀣𑀯𑀻 𑀫𑀳𑀻, 𑀫𑁂𑀤𑀺𑀦𑀻, 𑀪𑀽𑀫𑀺, 𑀯𑀲𑀼𑀥𑀸, 𑀯𑀲𑀼𑀦𑁆𑀥𑀭𑀸𑀢𑀺𑀆𑀤𑀻𑀲𑀼 𑀧𑀣𑀯𑀻𑀦𑀸𑀫𑁂𑀲𑀼 𑀬𑀫𑀺𑀘𑁆𑀙𑀢𑀺, 𑀬𑀤𑀲𑁆𑀲 𑀲𑀜𑁆𑀜𑀸𑀦𑀼𑀓𑀽𑀮𑀁 𑀳𑁄𑀢𑀺, 𑀢𑀁 𑀯𑀢𑁆𑀢𑀩𑁆𑀩𑀁. 𑀅𑀧𑀺𑀘 𑀧𑀣𑀯𑀻𑀢𑀺 𑀏𑀢𑀤𑁂𑀯 𑀦𑀸𑀫𑀁 𑀧𑀸𑀓𑀝𑀁, 𑀢𑀲𑁆𑀫𑀸 𑀧𑀸𑀓𑀝𑀯𑀲𑁂𑀦𑁂𑀯 𑀧𑀣𑀯𑀻 𑀧𑀣𑀯𑀻𑀢𑀺 𑀪𑀸𑀯𑁂𑀢𑀩𑁆𑀩𑀁. 𑀓𑀸𑀮𑁂𑀦 𑀉𑀫𑁆𑀫𑀻𑀮𑁂𑀢𑁆𑀯𑀸 𑀓𑀸𑀮𑁂𑀦 𑀦𑀺𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀬𑀸𑀯 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀓𑀸𑀮𑀲𑀢𑀫𑁆𑀧𑀺 𑀓𑀸𑀮𑀲𑀳𑀲𑁆𑀲𑀫𑁆𑀧𑀺 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀏𑀢𑁂𑀦𑁂𑀯 𑀦𑀬𑁂𑀦 𑀪𑀸𑀯𑁂𑀢𑀩𑁆𑀩𑀁.

𑁫𑁭. 𑀢𑀲𑁆𑀲𑁂𑀯𑀁 𑀪𑀸𑀯𑀬𑀢𑁄 𑀬𑀤𑀸 𑀦𑀺𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑀦𑁆𑀢𑀲𑁆𑀲 𑀉𑀫𑁆𑀫𑀻𑀮𑀺𑀢𑀓𑀸𑀮𑁂 𑀯𑀺𑀬 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀤𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀚𑀸𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀲 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀦 𑀪𑀸𑀯𑁂𑀢𑀩𑁆𑀩𑀁. 𑀧𑀸𑀤𑀥𑁄𑀯𑀦𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁 𑀧𑀦𑀲𑁆𑀲 𑀏𑀓𑀧𑀝𑀮𑀺𑀓𑀼𑀧𑀸𑀳𑀦𑀸 𑀘 𑀓𑀢𑁆𑀢𑀭𑀤𑀡𑁆𑀟𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄. 𑀅𑀣𑀸𑀦𑁂𑀦 𑀲𑀘𑁂 𑀢𑀭𑀼𑀡𑁄 𑀲𑀫𑀸𑀥𑀺 𑀓𑁂𑀦𑀘𑀺𑀤𑁂𑀯 𑀅𑀲𑀧𑁆𑀧𑀸𑀬𑀓𑀸𑀭𑀡𑁂𑀦 𑀦𑀲𑁆𑀲𑀢𑀺, 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳 𑀓𑀢𑁆𑀢𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀪𑀸𑀯𑁂𑀢𑀩𑁆𑀩𑀁, 𑀧𑀼𑀦𑀧𑁆𑀧𑀼𑀦𑀁 𑀲𑀫𑀦𑁆𑀦𑀸𑀳𑀭𑀺𑀢𑀩𑁆𑀩𑀁, 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀸𑀢𑀩𑁆𑀩𑀁. 𑀢𑀲𑁆𑀲𑁂𑀯𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀻𑀤𑀦𑁆𑀢𑀺, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀭𑀸𑀬𑀁 𑀧𑀼𑀭𑀺𑀫𑀲𑁆𑀲 𑀘 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀲𑁆𑀲 𑀇𑀫𑀲𑁆𑀲 𑀘 𑀯𑀺𑀲𑁂𑀲𑁄, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀓𑀲𑀺𑀡𑀤𑁄𑀲𑁄 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀣𑀯𑀺𑀓𑀢𑁄 𑀦𑀺𑀳𑀢𑀸𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀲𑀼𑀥𑁄𑀢𑀲𑀗𑁆𑀔𑀣𑀸𑀮𑀁 𑀯𑀺𑀬 𑀯𑀮𑀸𑀳𑀓𑀦𑁆𑀢𑀭𑀸 𑀦𑀺𑀓𑁆𑀔𑀦𑁆𑀢𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀫𑁂𑀖𑀫𑀼𑀔𑁂 𑀩𑀮𑀸𑀓𑀸 𑀯𑀺𑀬 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀤𑀸𑀮𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀫𑀺𑀯 𑀢𑀢𑁄 𑀲𑀢𑀕𑀼𑀡𑀁 𑀲𑀳𑀲𑁆𑀲𑀕𑀼𑀡𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑀜𑁆𑀘 𑀔𑁄 𑀦𑁂𑀯 𑀯𑀡𑁆𑀡𑀯𑀦𑁆𑀢𑀁, 𑀦 𑀲𑀡𑁆𑀞𑀸𑀦𑀯𑀦𑁆𑀢𑀁. 𑀬𑀤𑀺 𑀳𑀺 𑀢𑀁 𑀈𑀤𑀺𑀲𑀁 𑀪𑀯𑁂𑀬𑁆𑀬, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀲𑀺𑀬𑀸 𑀑𑀴𑀸𑀭𑀺𑀓𑀁 𑀲𑀫𑁆𑀫𑀲𑀦𑀼𑀧𑀕𑀁 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀁, 𑀦 𑀧𑀦𑁂𑀢𑀁 𑀢𑀸𑀤𑀺𑀲𑀁. 𑀓𑁂𑀯𑀮𑀜𑁆𑀳𑀺 𑀲𑀫𑀸𑀥𑀺𑀮𑀸𑀪𑀺𑀦𑁄 𑀉𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀁 𑀲𑀜𑁆𑀜𑀚𑀫𑁂𑀢𑀦𑁆𑀢𑀺.

𑁫𑁮. 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀘 𑀧𑀦𑀲𑁆𑀲 𑀧𑀝𑁆𑀞𑀸𑀬 𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀺𑀦𑁆𑀦𑀸𑀯, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀫𑁂𑀯𑀸𑀢𑀺.

𑀤𑀼𑀯𑀺𑀥𑁄 𑀳𑀺 𑀲𑀫𑀸𑀥𑀺 𑀉𑀧𑀘𑀸𑀭𑀲𑀫𑀸𑀥𑀺 𑀘 𑀅𑀧𑁆𑀧𑀦𑀸𑀲𑀫𑀸𑀥𑀺 𑀘. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺 𑀉𑀧𑀘𑀸𑀭𑀪𑀽𑀫𑀺𑀬𑀁 𑀯𑀸 𑀧𑀝𑀺𑀮𑀸𑀪𑀪𑀽𑀫𑀺𑀬𑀁 𑀯𑀸. 𑀢𑀢𑁆𑀣 𑀉𑀧𑀘𑀸𑀭𑀪𑀽𑀫𑀺𑀬𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀳𑁄𑀢𑀺. 𑀧𑀝𑀺𑀮𑀸𑀪𑀪𑀽𑀫𑀺𑀬𑀁 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦.

𑀤𑁆𑀯𑀺𑀦𑁆𑀦𑀁 𑀧𑀦 𑀲𑀫𑀸𑀥𑀻𑀦𑀁 𑀇𑀤𑀁 𑀦𑀸𑀦𑀸𑀓𑀸𑀭𑀡𑀁, 𑀉𑀧𑀘𑀸𑀭𑁂 𑀅𑀗𑁆𑀕𑀸𑀦𑀺 𑀦 𑀣𑀸𑀫𑀚𑀸𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀗𑁆𑀕𑀸𑀦𑀁 𑀅𑀣𑀸𑀫𑀚𑀸𑀢𑀢𑁆𑀢𑀸, 𑀬𑀣𑀸 𑀦𑀸𑀫 𑀤𑀳𑀭𑁄 𑀓𑀼𑀫𑀸𑀭𑀓𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀬𑀫𑀸𑀦𑁄 𑀧𑀼𑀦𑀧𑁆𑀧𑀼𑀦𑀁 𑀪𑀽𑀫𑀺𑀬𑀁 𑀧𑀢𑀢𑀺, 𑀏𑀯𑀫𑁂𑀯 𑀉𑀧𑀘𑀸𑀭𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀁 𑀓𑀸𑀮𑁂𑀦 𑀦𑀺𑀫𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀓𑀸𑀮𑁂𑀦 𑀪𑀯𑀗𑁆𑀕𑀫𑁄𑀢𑀭𑀢𑀺. 𑀅𑀧𑁆𑀧𑀦𑀸𑀬𑀁 𑀧𑀦 𑀅𑀗𑁆𑀕𑀸𑀦𑀺 𑀣𑀸𑀫𑀚𑀸𑀢𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀣𑀸𑀫𑀚𑀸𑀢𑀢𑁆𑀢𑀸, 𑀬𑀣𑀸 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀤𑀺𑀯𑀲𑀫𑁆𑀧𑀺 𑀢𑀺𑀝𑁆𑀞𑁂𑀬𑁆𑀬, 𑀏𑀯𑀫𑁂𑀯 𑀅𑀧𑁆𑀧𑀦𑀸𑀲𑀫𑀸𑀥𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀁 𑀲𑀓𑀺𑀁 𑀪𑀯𑀗𑁆𑀕𑀯𑀸𑀭𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀯𑀮𑀫𑁆𑀧𑀺 𑀭𑀢𑁆𑀢𑀺𑀁 𑀓𑁂𑀯𑀮𑀫𑁆𑀧𑀺 𑀤𑀺𑀯𑀲𑀁 𑀢𑀺𑀝𑁆𑀞𑀢𑀺, 𑀓𑀼𑀲𑀮𑀚𑀯𑀦𑀧𑀝𑀺𑀧𑀸𑀝𑀺𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺.

𑀢𑀢𑁆𑀭 𑀬𑀤𑁂𑀢𑀁 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀉𑀧𑁆𑀧𑀸𑀤𑀦𑀁 𑀦𑀸𑀫 𑀅𑀢𑀺𑀤𑀼𑀓𑁆𑀓𑀭𑀁. 𑀢𑀲𑁆𑀫𑀸 𑀲𑀘𑁂 𑀢𑁂𑀦𑁂𑀯 𑀧𑀮𑁆𑀮𑀗𑁆𑀓𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀧𑁆𑀧𑀦𑀁 𑀅𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀼𑀦𑁆𑀤𑀭𑀁. 𑀦𑁄 𑀘𑁂 𑀲𑀓𑁆𑀓𑁄𑀢𑀺, 𑀅𑀣𑀸𑀦𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁂𑀦 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑁄 𑀯𑀺𑀬 𑀭𑀓𑁆𑀔𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑁋

𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀢𑁄 𑀮𑀤𑁆𑀥-𑀧𑀭𑀺𑀳𑀸𑀦𑀺 𑀦 𑀯𑀺𑀚𑁆𑀚𑀢𑀺;

𑀆𑀭𑀓𑁆𑀔𑀫𑁆𑀳𑀺 𑀅𑀲𑀦𑁆𑀢𑀫𑁆𑀳𑀺, 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀦𑀲𑁆𑀲𑀢𑀺.

𑀲𑀢𑁆𑀢𑀲𑀧𑁆𑀧𑀸𑀬𑀸

𑁫𑁯. 𑀢𑀢𑁆𑀭𑀸𑀬𑀁 𑀭𑀓𑁆𑀔𑀡𑀯𑀺𑀥𑀺 𑁋

𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼;

𑀇𑀭𑀺𑀬𑀸𑀧𑀣𑁄𑀢𑀺 𑀲𑀢𑁆𑀢𑁂𑀢𑁂, 𑀅𑀲𑀧𑁆𑀧𑀸𑀬𑁂 𑀯𑀺𑀯𑀚𑁆𑀚𑀬𑁂.

𑀲𑀧𑁆𑀧𑀸𑀬𑁂 𑀲𑀢𑁆𑀢 𑀲𑁂𑀯𑁂𑀣, 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄;

𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀳𑁄𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀦𑀸.

𑀢𑀢𑁆𑀭𑀲𑁆𑀲 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀁 𑀯𑀸 𑀯𑀺𑀦𑀲𑁆𑀲𑀢𑀺, 𑀅𑀦𑀼𑀧𑀝𑁆𑀞𑀺𑀢𑀸 𑀘 𑀲𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀅𑀲𑀫𑀸𑀳𑀺𑀢𑀜𑁆𑀘 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀬𑀁 𑀅𑀲𑀧𑁆𑀧𑀸𑀬𑁄. 𑀬𑀢𑁆𑀣 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀣𑀸𑀯𑀭𑀜𑁆𑀘 𑀳𑁄𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺 𑀦𑀸𑀕𑀧𑀩𑁆𑀩𑀢𑀯𑀸𑀲𑀻𑀧𑀥𑀸𑀦𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀅𑀬𑀁 𑀲𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀩𑀳𑀽 𑀆𑀯𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑀫𑁂𑀓𑀲𑁆𑀫𑀺𑀁 𑀢𑀻𑀡𑀺 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀲𑀺𑀢𑁆𑀯𑀸 𑀬𑀢𑁆𑀣𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀆𑀯𑀸𑀲𑀲𑀧𑁆𑀧𑀸𑀬𑀢𑀸𑀬 𑀳𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺 𑀘𑀽𑀴𑀦𑀸𑀕𑀮𑁂𑀡𑁂 𑀯𑀲𑀦𑁆𑀢𑀸 𑀢𑀢𑁆𑀣𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀦 𑀅𑀜𑁆𑀜𑀢𑁆𑀣 𑀅𑀭𑀺𑀬𑀪𑀽𑀫𑀺𑀁 𑀧𑀢𑁆𑀯𑀸 𑀢𑀢𑁆𑀣 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀜𑁆𑀘 𑀕𑀡𑀦𑀸 𑀦𑀢𑁆𑀣𑀺. 𑀏𑀯𑀫𑀜𑁆𑀜𑁂𑀲𑀼𑀧𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀸𑀤𑀻𑀲𑀼.

𑀕𑁄𑀘𑀭𑀕𑀸𑀫𑁄 𑀧𑀦 𑀬𑁄 𑀲𑁂𑀦𑀸𑀲𑀦𑀢𑁄 𑀉𑀢𑁆𑀢𑀭𑁂𑀦 𑀯𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀦𑀸𑀢𑀺𑀤𑀽𑀭𑁂 𑀤𑀺𑀬𑀟𑁆𑀠𑀓𑁄𑀲𑀩𑁆𑀪𑀦𑁆𑀢𑀭𑁂 𑀳𑁄𑀢𑀺 𑀲𑀼𑀮𑀪𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑁄, 𑀲𑁄 𑀲𑀧𑁆𑀧𑀸𑀬𑁄. 𑀯𑀺𑀧𑀭𑀻𑀢𑁄 𑀅𑀲𑀧𑁆𑀧𑀸𑀬𑁄.

𑀪𑀲𑁆𑀲𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸𑀧𑀭𑀺𑀬𑀸𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁, 𑀢𑀜𑁆𑀳𑀺𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀲𑀧𑁆𑀧𑀸𑀬𑀁, 𑀢𑀫𑁆𑀧𑀺 𑀫𑀢𑁆𑀢𑀸𑀬 𑀪𑀸𑀲𑀺𑀢𑀩𑁆𑀩𑀁.

𑀧𑀼𑀕𑁆𑀕𑀮𑁄𑀧𑀺 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄, 𑀬𑀁 𑀦𑀺𑀲𑁆𑀲𑀸𑀬 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀣𑀺𑀭𑀢𑀭𑀁 𑀳𑁄𑀢𑀺, 𑀏𑀯𑀭𑀽𑀧𑁄 𑀲𑀧𑁆𑀧𑀸𑀬𑁄. 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀧𑀦 𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁄 𑀅𑀲𑀧𑁆𑀧𑀸𑀬𑁄. 𑀲𑁄 𑀳𑀺 𑀢𑀁 𑀓𑀤𑁆𑀤𑀫𑁄𑀤𑀓𑀫𑀺𑀯 𑀅𑀘𑁆𑀙𑀁 𑀉𑀤𑀓𑀁 𑀫𑀮𑀻𑀦𑀫𑁂𑀯 𑀓𑀭𑁄𑀢𑀺, 𑀢𑀸𑀤𑀺𑀲𑀜𑁆𑀘 𑀆𑀕𑀫𑁆𑀫 𑀓𑁄𑀝𑀧𑀩𑁆𑀩𑀢𑀯𑀸𑀲𑀻𑀤𑀳𑀭𑀲𑁆𑀲𑁂𑀯 𑀲𑀫𑀸𑀧𑀢𑁆𑀢𑀺𑀧𑀺 𑀦𑀲𑁆𑀲𑀢𑀺, 𑀧𑀕𑁂𑀯 𑀦𑀺𑀫𑀺𑀢𑁆𑀢𑀁.

𑀪𑁄𑀚𑀦𑀁 𑀧𑀦 𑀓𑀲𑁆𑀲𑀘𑀺 𑀫𑀥𑀼𑀭𑀁, 𑀓𑀲𑁆𑀲𑀘𑀺 𑀅𑀫𑁆𑀩𑀺𑀮𑀁 𑀲𑀧𑁆𑀧𑀸𑀬𑀁 𑀳𑁄𑀢𑀺. 𑀉𑀢𑀼𑀧𑀺 𑀓𑀲𑁆𑀲𑀘𑀺 𑀲𑀻𑀢𑁄, 𑀓𑀲𑁆𑀲𑀘𑀺 𑀉𑀡𑁆𑀳𑁄 𑀲𑀧𑁆𑀧𑀸𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀁 𑀪𑁄𑀚𑀦𑀁 𑀯𑀸 𑀉𑀢𑀼𑀁 𑀯𑀸 𑀲𑁂𑀯𑀦𑁆𑀢𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀣𑀺𑀭𑀢𑀭𑀁 𑀳𑁄𑀢𑀺, 𑀢𑀁 𑀪𑁄𑀚𑀦𑀁 𑀲𑁄 𑀘 𑀉𑀢𑀼 𑀲𑀧𑁆𑀧𑀸𑀬𑁄. 𑀇𑀢𑀭𑀁 𑀪𑁄𑀚𑀦𑀁 𑀇𑀢𑀭𑁄 𑀘 𑀉𑀢𑀼 𑀅𑀲𑀧𑁆𑀧𑀸𑀬𑁄.

𑀇𑀭𑀺𑀬𑀸𑀧𑀣𑁂𑀲𑀼𑀧𑀺 𑀓𑀲𑁆𑀲𑀘𑀺 𑀘𑀗𑁆𑀓𑀫𑁄 𑀲𑀧𑁆𑀧𑀸𑀬𑁄 𑀳𑁄𑀢𑀺, 𑀓𑀲𑁆𑀲𑀘𑀺 𑀲𑀬𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀦𑀁 𑀅𑀜𑁆𑀜𑀢𑀭𑁄. 𑀢𑀲𑁆𑀫𑀸 𑀢𑀁 𑀆𑀯𑀸𑀲𑀁 𑀯𑀺𑀬 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀣𑀺𑀭𑀢𑀭𑀁 𑀳𑁄𑀢𑀺, 𑀲𑁄 𑀲𑀧𑁆𑀧𑀸𑀬𑁄. 𑀇𑀢𑀭𑁄 𑀅𑀲𑀧𑁆𑀧𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀇𑀫𑀁 𑀲𑀢𑁆𑀢𑀯𑀺𑀥𑀁 𑀅𑀲𑀧𑁆𑀧𑀸𑀬𑀁 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀁 𑀲𑁂𑀯𑀺𑀢𑀩𑁆𑀩𑀁. 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀳𑀺 𑀦𑀺𑀫𑀺𑀢𑁆𑀢𑀸𑀲𑁂𑀯𑀦𑀩𑀳𑀼𑀮𑀲𑁆𑀲 𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦 𑀳𑁄𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀦𑀸.

𑀤𑀲𑀯𑀺𑀥𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁

𑁬𑁦. 𑀬𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀧𑀝𑀺𑀧𑀚𑁆𑀚𑀢𑁄 𑀦 𑀳𑁄𑀢𑀺, 𑀢𑁂𑀦 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀦𑀬𑁄, 𑀤𑀲𑀸𑀳𑀸𑀓𑀸𑀭𑁂𑀳𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑁄, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑁄, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑁄, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺, 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑁄, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑁄, 𑀢𑀤𑀥𑀺𑀫𑀼𑀢𑁆𑀢𑀢𑁄𑀢𑀺.

𑁬𑁧. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀦𑀸𑀫 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸𑀦𑀺 𑀤𑀻𑀖𑀸𑀦𑀺 𑀳𑁄𑀦𑁆𑀢𑀺, 𑀲𑀭𑀻𑀭𑀁 𑀯𑀸 𑀲𑁂𑀤𑀫𑀮𑀕𑁆𑀕𑀳𑀺𑀢𑀁, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 𑀧𑀦𑀲𑁆𑀲 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀢𑀤𑀸 𑀩𑀸𑀳𑀺𑀭𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀘 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀅𑀧𑀭𑀺𑀲𑀼𑀤𑁆𑀥𑁂𑀦 𑀜𑀸𑀡𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑁄 𑀲𑀗𑁆𑀔𑀸𑀭𑀸𑀧𑀺 𑀅𑀯𑀺𑀪𑀽𑀢𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀦 𑀕𑀘𑁆𑀙𑀢𑀺. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀁, 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀺𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀧𑀭𑀺𑀲𑀼𑀤𑁆𑀥𑁂𑀦 𑀘 𑀜𑀸𑀡𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑁄 𑀲𑀗𑁆𑀔𑀸𑀭𑀸𑀧𑀺 𑀯𑀺𑀪𑀽𑀢𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀕𑀘𑁆𑀙𑀢𑀺.

𑁬𑁨. 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀁 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀅𑀣 𑀦𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁, 𑀢𑀲𑁆𑀫𑀸 𑀢𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀲𑁄𑀡𑀢𑁆𑀣𑁂𑀭𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀤𑁆𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀉𑀪𑀺𑀦𑁆𑀦𑀁 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺. 𑀩𑀮𑀯𑀯𑀻𑀭𑀺𑀬𑀁 𑀫𑀦𑁆𑀤𑀲𑀫𑀸𑀥𑀺𑀁 𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀲𑀫𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺. 𑀅𑀧𑀺𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀁 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬𑀧𑀺 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀓𑁄𑀲𑀚𑁆𑀚𑀧𑀓𑁆𑀔𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀲𑀸 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀲𑀢𑀺 𑀘 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀜𑁆𑀳𑀺 𑀲𑀢𑀺𑀧𑀝𑀺𑀲𑀭𑀡𑀁, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘 𑀲𑀢𑀺, 𑀦 𑀯𑀺𑀦𑀸 𑀲𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁄 𑀳𑁄𑀢𑀻’’𑀢𑀺.

𑁬𑁩. 𑀦𑀺𑀫𑀺𑀢𑁆𑀢𑀓𑁄𑀲𑀮𑁆𑀮𑀁 𑀦𑀸𑀫 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀅𑀓𑀢𑀲𑁆𑀲 𑀓𑀭𑀡𑀓𑁄𑀲𑀮𑁆𑀮𑀁, 𑀓𑀢𑀲𑁆𑀲 𑀘 𑀪𑀸𑀯𑀦𑀸𑀓𑁄𑀲𑀮𑁆𑀮𑀁, 𑀪𑀸𑀯𑀦𑀸𑀬 𑀮𑀤𑁆𑀥𑀲𑁆𑀲 𑀭𑀓𑁆𑀔𑀡𑀓𑁄𑀲𑀮𑁆𑀮𑀜𑁆𑀘, 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁.

𑁬𑁪. 𑀓𑀣𑀜𑁆𑀘 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺? 𑀬𑀤𑀸𑀲𑁆𑀲 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀤𑀓𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀲𑀫𑀸𑀥𑀺…𑀧𑁂… 𑀅𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀬𑀲𑁆𑀫𑀺𑀁 𑀘 𑀔𑁄, 𑀪𑀺𑀓𑁆𑀔𑀯𑁂, 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺? 𑀏𑀯𑀁 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣 𑀘 𑀬𑀣𑀸𑀲𑀓𑀫𑀸𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀳𑀻𑀦𑀧𑁆𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀢𑁆𑀣 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 𑀓𑀼𑀲𑀮𑀸𑀤𑀻𑀲𑀼 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀦𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄 𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀲𑀼 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀢𑀢𑁆𑀣 𑀆𑀭𑀫𑁆𑀪𑀥𑀸𑀢𑀽𑀢𑀺 𑀧𑀞𑀫𑀯𑀻𑀭𑀺𑀬𑀁 𑀯𑀼𑀘𑁆𑀘𑀢𑀺. 𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀽𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸𑀢𑀺 𑀧𑀦 𑀧𑀻𑀢𑀺𑀬𑀸 𑀏𑀯 𑀏𑀢𑀁 𑀦𑀸𑀫𑀁. 𑀢𑀲𑁆𑀲𑀸𑀧𑀺 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄𑀯 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀅𑀧𑀸𑀬𑀸𑀤𑀺𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀯𑀻𑀭𑀺𑀬𑀸𑀬𑀢𑁆𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀺𑀲𑀁𑀲𑀤𑀲𑁆𑀲𑀺𑀢𑀸, ‘‘𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀸𑀲𑀸𑀯𑀓𑁂𑀳𑀺 𑀕𑀢𑀫𑀕𑁆𑀕𑁄 𑀫𑀬𑀸 𑀕𑀦𑁆𑀢𑀩𑁆𑀩𑁄, 𑀲𑁄 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀧𑀺𑀡𑁆𑀟𑀸𑀧𑀘𑀸𑀬𑀦𑀢𑀸, ‘‘𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀻 𑀫𑁂 𑀲𑀢𑁆𑀣𑀸, 𑀲𑁄 𑀘 𑀅𑀦𑀢𑀺𑀓𑁆𑀓𑀫𑀦𑀻𑀬𑀲𑀸𑀲𑀦𑁄 𑀅𑀫𑁆𑀳𑀸𑀓𑀜𑁆𑀘 𑀩𑀳𑀽𑀧𑀓𑀸𑀭𑁄 𑀧𑀝𑀺𑀧𑀢𑁆𑀢𑀺𑀬𑀸 𑀘 𑀧𑀽𑀚𑀺𑀬𑀫𑀸𑀦𑁄 𑀧𑀽𑀚𑀺𑀢𑁄 𑀳𑁄𑀢𑀺 𑀦 𑀇𑀢𑀭𑀣𑀸’’𑀢𑀺 𑀏𑀯𑀁 𑀲𑀢𑁆𑀣𑀼 𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, ‘‘𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀁 𑀫𑁂 𑀫𑀳𑀸𑀤𑀸𑀬𑀚𑁆𑀚𑀁 𑀕𑀳𑁂𑀢𑀩𑁆𑀩𑀁, 𑀢𑀜𑁆𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼’’𑀦𑁆𑀢𑀺 𑀏𑀯𑀁 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀅𑀩𑁆𑀪𑁄𑀓𑀸𑀲𑀲𑁂𑀯𑀦𑀸𑀤𑀻𑀳𑀺 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫… 𑀲𑀗𑁆𑀖… 𑀲𑀻𑀮… 𑀘𑀸𑀕… 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀧𑀲𑀸𑀤𑀦𑀺𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀏𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺.

𑁬𑁫. 𑀓𑀣𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺? 𑀬𑀤𑀸𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀢𑀬𑁄 𑀅𑀪𑀸𑀯𑁂𑀢𑁆𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬…𑀧𑁂… 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀅𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀅𑀓𑀸𑀮𑁄 𑀯𑀻𑀭𑀺𑀬…𑀧𑁂… 𑀅𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀤𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀬𑀲𑁆𑀫𑀺𑀁 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬…𑀧𑁂… 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺? 𑀏𑀯𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣𑀸𑀧𑀺 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀣𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀢𑀢𑁆𑀣 𑀬𑀣𑀸𑀲𑁆𑀲 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄𑀯 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫. 𑀲𑀫𑀣𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀲𑀫𑀣𑀲𑁆𑀲𑁂𑀯𑁂𑀢𑀫𑀥𑀺𑀯𑀘𑀦𑀁. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀢𑀲𑁆𑀲𑁂𑀯 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸, 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀯𑀢𑁆𑀣𑀼𑀯𑀺𑀲𑀤𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀡𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀡𑀢𑀸, 𑀦𑀺𑀭𑀲𑁆𑀲𑀸𑀤𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀤𑁆𑀥𑀸𑀲𑀁𑀯𑁂𑀕𑀯𑀲𑁂𑀦 𑀲𑀫𑁆𑀧𑀳𑀁𑀲𑀦𑀢𑀸, 𑀲𑀫𑁆𑀫𑀸𑀧𑀯𑀢𑁆𑀢𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀇𑀢𑀺 𑀇𑀫𑁂𑀳𑀸𑀓𑀸𑀭𑁂𑀳𑀺 𑀏𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀦𑁆𑀢𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁬𑁬. 𑀓𑀣𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺? 𑀬𑀤𑀸𑀲𑁆𑀲 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀦𑀁 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺. 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘𑀲𑁆𑀲 𑀧𑀲𑀸𑀤𑀁 𑀚𑀦𑁂𑀢𑀺. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑀺.

𑀓𑀣𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺? 𑀬𑀤𑀸𑀲𑁆𑀲 𑀏𑀯𑀁 𑀧𑀝𑀺𑀧𑀚𑁆𑀚𑀢𑁄 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺, 𑀲𑀸𑀭𑀣𑀺 𑀯𑀺𑀬 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀏𑀯𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺.

𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀦𑀸𑀫 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀁 𑀅𑀦𑀸𑀭𑀼𑀴𑁆𑀳𑀧𑀼𑀩𑁆𑀩𑀸𑀦𑀁 𑀅𑀦𑁂𑀓𑀓𑀺𑀘𑁆𑀘𑀧𑀲𑀼𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀳𑀤𑀬𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀘𑁆𑀘𑀸𑀕𑁄.

𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀦𑀸𑀫 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸𑀦𑀁 𑀲𑀫𑀸𑀥𑀺𑀮𑀸𑀪𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀁.

𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀲𑀫𑀸𑀥𑀺𑀅𑀥𑀺𑀫𑀼𑀢𑁆𑀢𑀢𑀸 𑀲𑀫𑀸𑀥𑀺𑀕𑀭𑀼𑀲𑀫𑀸𑀥𑀺𑀦𑀺𑀦𑁆𑀦𑀲𑀫𑀸𑀥𑀺𑀧𑁄𑀡𑀲𑀫𑀸𑀥𑀺𑀧𑀩𑁆𑀪𑀸𑀭𑀢𑀸𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁.

𑁬𑁭. 𑀏𑀯𑀜𑁆𑀳𑀺 𑀲𑀫𑁆𑀧𑀸𑀤𑀬𑀢𑁄, 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀁 𑀇𑀫𑀁;

𑀧𑀝𑀺𑀮𑀤𑁆𑀥𑁂 𑀦𑀺𑀫𑀺𑀢𑁆𑀢𑀲𑁆𑀫𑀺𑀁, 𑀅𑀧𑁆𑀧𑀦𑀸 𑀲𑀫𑁆𑀧𑀯𑀢𑁆𑀢𑀢𑀺.

𑀏𑀯𑀜𑁆𑀳𑀺 𑀧𑀝𑀺𑀧𑀦𑁆𑀦𑀲𑁆𑀲, 𑀲𑀘𑁂 𑀲𑀸 𑀦𑀧𑁆𑀧𑀯𑀢𑁆𑀢𑀢𑀺;

𑀢𑀣𑀸𑀧𑀺 𑀦 𑀚𑀳𑁂 𑀬𑁄𑀕𑀁, 𑀯𑀸𑀬𑀫𑁂𑀣𑁂𑀯 𑀧𑀡𑁆𑀟𑀺𑀢𑁄.

𑀳𑀺𑀢𑁆𑀯𑀸 𑀳𑀺 𑀲𑀫𑁆𑀫𑀸𑀯𑀸𑀬𑀸𑀫𑀁, 𑀯𑀺𑀲𑁂𑀲𑀁 𑀦𑀸𑀫 𑀫𑀸𑀡𑀯𑁄;

𑀅𑀥𑀺𑀕𑀘𑁆𑀙𑁂 𑀧𑀭𑀺𑀢𑁆𑀢𑀫𑁆𑀧𑀺, 𑀞𑀸𑀦𑀫𑁂𑀢𑀁 𑀦 𑀯𑀺𑀚𑁆𑀚𑀢𑀺.

𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀁, 𑀢𑀲𑁆𑀫𑀸 𑀲𑀮𑁆𑀮𑀓𑁆𑀔𑀬𑀁 𑀩𑀼𑀥𑁄;

𑀲𑀫𑀢𑀁 𑀯𑀻𑀭𑀺𑀬𑀲𑁆𑀲𑁂𑀯, 𑀬𑁄𑀚𑀬𑁂𑀣 𑀧𑀼𑀦𑀧𑁆𑀧𑀼𑀦𑀁.

𑀈𑀲𑀓𑀫𑁆𑀧𑀺 𑀮𑀬𑀁 𑀬𑀦𑁆𑀢𑀁, 𑀧𑀕𑁆𑀕𑀡𑁆𑀳𑁂𑀣𑁂𑀯 𑀫𑀸𑀦𑀲𑀁;

𑀅𑀘𑁆𑀘𑀸𑀭𑀤𑁆𑀥𑀁 𑀦𑀺𑀲𑁂𑀥𑁂𑀢𑁆𑀯𑀸, 𑀲𑀫𑀫𑁂𑀯 𑀧𑀯𑀢𑁆𑀢𑀬𑁂.

𑀭𑁂𑀡𑀼𑀫𑁆𑀳𑀺 𑀉𑀧𑁆𑀧𑀮𑀤𑀮𑁂, 𑀲𑀼𑀢𑁆𑀢𑁂 𑀦𑀸𑀯𑀸𑀬 𑀦𑀸𑀴𑀺𑀬𑀸;

𑀬𑀣𑀸 𑀫𑀥𑀼𑀓𑀭𑀸𑀤𑀻𑀦𑀁, 𑀧𑀯𑀢𑁆𑀢𑀺 𑀲𑀫𑁆𑀫𑀯𑀡𑁆𑀡𑀺𑀢𑀸.

𑀮𑀻𑀦𑀉𑀤𑁆𑀥𑀢𑀪𑀸𑀯𑁂𑀳𑀺, 𑀫𑁄𑀘𑀬𑀺𑀢𑁆𑀯𑀸𑀦 𑀲𑀩𑁆𑀩𑀲𑁄;

𑀏𑀯𑀁 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁, 𑀫𑀸𑀦𑀲𑀁 𑀧𑀝𑀺𑀧𑀸𑀤𑀬𑁂𑀢𑀺.

𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀧𑀝𑀺𑀧𑀸𑀤𑀦𑀁

𑁬𑁮. 𑀢𑀢𑁆𑀭𑀸𑀬𑀫𑀢𑁆𑀣𑀤𑀻𑀧𑀦𑀸 𑁋 𑀬𑀣𑀸 𑀳𑀺 𑀅𑀙𑁂𑀓𑁄 𑀫𑀥𑀼𑀓𑀭𑁄 𑀅𑀲𑀼𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀼𑀧𑁆𑀨𑀁 𑀧𑀼𑀧𑁆𑀨𑀺𑀢𑀦𑁆𑀢𑀺 𑀜𑀢𑁆𑀯𑀸 𑀢𑀺𑀓𑁆𑀔𑁂𑀦 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑁄 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀔𑀻𑀡𑁂 𑀭𑁂𑀡𑀼𑀫𑁆𑀳𑀺 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀅𑀧𑀭𑁄 𑀅𑀙𑁂𑀓𑁄 𑀫𑀦𑁆𑀤𑁂𑀦 𑀚𑀯𑁂𑀦 𑀧𑀓𑁆𑀔𑀦𑁆𑀤𑁄 𑀔𑀻𑀡𑁂𑀬𑁂𑀯 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀙𑁂𑀓𑁄 𑀧𑀦 𑀲𑀫𑁂𑀦 𑀚𑀯𑁂𑀦 𑀧𑀓𑁆𑀔𑀦𑁆𑀤𑁄 𑀲𑀼𑀔𑁂𑀦 𑀧𑀼𑀧𑁆𑀨𑀭𑀸𑀲𑀺𑀁 𑀲𑀫𑁆𑀧𑀢𑁆𑀯𑀸 𑀬𑀸𑀯𑀤𑀺𑀘𑁆𑀙𑀓𑀁 𑀭𑁂𑀡𑀼𑀁 𑀆𑀤𑀸𑀬 𑀫𑀥𑀼𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀥𑀼𑀭𑀲𑀫𑀦𑀼𑀪𑀯𑀢𑀺.

𑀬𑀣𑀸 𑀘 𑀲𑀮𑁆𑀮𑀓𑀢𑁆𑀢𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀉𑀤𑀓𑀣𑀸𑀮𑀕𑀢𑁂 𑀉𑀧𑁆𑀧𑀮𑀧𑀢𑁆𑀢𑁂 𑀲𑀢𑁆𑀣𑀓𑀫𑁆𑀫𑀁 𑀲𑀺𑀓𑁆𑀔𑀦𑁆𑀢𑁂𑀲𑀼 𑀏𑀓𑁄 𑀅𑀙𑁂𑀓𑁄 𑀯𑁂𑀕𑁂𑀦 𑀲𑀢𑁆𑀣𑀁 𑀧𑀸𑀢𑁂𑀦𑁆𑀢𑁄 𑀉𑀧𑁆𑀧𑀮𑀧𑀢𑁆𑀢𑀁 𑀤𑁆𑀯𑀺𑀥𑀸 𑀯𑀸 𑀙𑀺𑀦𑁆𑀤𑀢𑀺, 𑀉𑀤𑀓𑁂 𑀯𑀸 𑀧𑀯𑁂𑀲𑁂𑀢𑀺. 𑀅𑀧𑀭𑁄 𑀅𑀙𑁂𑀓𑁄 𑀙𑀺𑀚𑁆𑀚𑀦𑀧𑀯𑁂𑀲𑀦𑀪𑀬𑀸 𑀲𑀢𑁆𑀣𑀓𑁂𑀦 𑀨𑀼𑀲𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺. 𑀙𑁂𑀓𑁄 𑀧𑀦 𑀲𑀫𑁂𑀦 𑀧𑀬𑁄𑀕𑁂𑀦 𑀢𑀢𑁆𑀣 𑀲𑀢𑁆𑀣𑀧𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄 𑀳𑀼𑀢𑁆𑀯𑀸 𑀢𑀣𑀸𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺.

𑀬𑀣𑀸 𑀘 𑀬𑁄 𑀘𑀢𑀼𑀩𑁆𑀬𑀸𑀫𑀧𑁆𑀧𑀫𑀸𑀡𑀁 𑀫𑀓𑁆𑀓𑀝𑀲𑀼𑀢𑁆𑀢𑀫𑀸𑀳𑀭𑀢𑀺, 𑀲𑁄 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀮𑀪𑀢𑀻𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑁂 𑀏𑀓𑁄 𑀅𑀙𑁂𑀓𑀧𑀼𑀭𑀺𑀲𑁄 𑀯𑁂𑀕𑁂𑀦 𑀫𑀓𑁆𑀓𑀝𑀲𑀼𑀢𑁆𑀢𑀫𑀸𑀓𑀟𑁆𑀠𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁 𑀙𑀺𑀦𑁆𑀤𑀢𑀺𑀬𑁂𑀯. 𑀅𑀧𑀭𑁄 𑀅𑀙𑁂𑀓𑁄 𑀙𑁂𑀤𑀦𑀪𑀬𑀸 𑀳𑀢𑁆𑀣𑁂𑀦 𑀨𑀼𑀲𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺. 𑀙𑁂𑀓𑁄 𑀧𑀦 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀲𑀫𑁂𑀦 𑀧𑀬𑁄𑀕𑁂𑀦 𑀤𑀡𑁆𑀟𑀓𑁂 𑀯𑁂𑀥𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺.

𑀬𑀣𑀸 𑀘 𑀅𑀙𑁂𑀓𑁄 𑀦𑀺𑀬𑀸𑀫𑀓𑁄 𑀩𑀮𑀯𑀯𑀸𑀢𑁂 𑀮𑀗𑁆𑀓𑀸𑀭𑀁 𑀧𑀽𑀭𑁂𑀦𑁆𑀢𑁄 𑀦𑀸𑀯𑀁 𑀯𑀺𑀤𑁂𑀲𑀁 𑀧𑀓𑁆𑀔𑀦𑁆𑀤𑀸𑀧𑁂𑀢𑀺. 𑀅𑀧𑀭𑁄 𑀅𑀙𑁂𑀓𑁄 𑀫𑀦𑁆𑀤𑀯𑀸𑀢𑁂 𑀮𑀗𑁆𑀓𑀸𑀭𑀁 𑀑𑀭𑁄𑀧𑁂𑀦𑁆𑀢𑁄 𑀦𑀸𑀯𑀁 𑀢𑀢𑁆𑀣𑁂𑀯 𑀞𑀧𑁂𑀢𑀺. 𑀙𑁂𑀓𑁄 𑀧𑀦 𑀫𑀦𑁆𑀤𑀯𑀸𑀢𑁂 𑀮𑀗𑁆𑀓𑀸𑀭𑀁 𑀧𑀽𑀭𑁂𑀢𑁆𑀯𑀸 𑀩𑀮𑀯𑀯𑀸𑀢𑁂 𑀅𑀟𑁆𑀠𑀮𑀗𑁆𑀓𑀸𑀭𑀁 𑀓𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺.

𑀬𑀣𑀸 𑀘 𑀬𑁄 𑀢𑁂𑀮𑁂𑀦 𑀅𑀙𑀟𑁆𑀟𑁂𑀦𑁆𑀢𑁄 𑀦𑀸𑀴𑀺𑀁 𑀧𑀽𑀭𑁂𑀢𑀺, 𑀲𑁄 𑀮𑀸𑀪𑀁 𑀮𑀪𑀢𑀻𑀢𑀺 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀼𑀢𑁆𑀢𑁂 𑀏𑀓𑁄 𑀅𑀙𑁂𑀓𑁄 𑀮𑀸𑀪𑀮𑀼𑀤𑁆𑀥𑁄 𑀯𑁂𑀕𑁂𑀦 𑀧𑀽𑀭𑁂𑀦𑁆𑀢𑁄 𑀢𑁂𑀮𑀁 𑀙𑀟𑁆𑀟𑁂𑀢𑀺. 𑀅𑀧𑀭𑁄 𑀅𑀙𑁂𑀓𑁄 𑀢𑁂𑀮𑀙𑀟𑁆𑀟𑀦𑀪𑀬𑀸 𑀆𑀲𑀺𑀜𑁆𑀘𑀺𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀺. 𑀙𑁂𑀓𑁄 𑀧𑀦 𑀲𑀫𑁂𑀦 𑀧𑀬𑁄𑀕𑁂𑀦 𑀧𑀽𑀭𑁂𑀢𑁆𑀯𑀸 𑀮𑀸𑀪𑀁 𑀮𑀪𑀢𑀺.

𑀏𑀯𑀫𑁂𑀯 𑀏𑀓𑁄 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑁂 𑀦𑀺𑀫𑀺𑀢𑁆𑀢𑁂 𑀲𑀻𑀖𑀫𑁂𑀯 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀕𑀸𑀴𑁆𑀳𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸 𑀉𑀤𑁆𑀥𑀘𑁆𑀘𑁂 𑀧𑀢𑀢𑀺, 𑀲𑁄 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁. 𑀏𑀓𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀤𑁄𑀲𑀁 𑀤𑀺𑀲𑁆𑀯𑀸 𑀓𑀺𑀁 𑀤𑀸𑀦𑀺𑀫𑁂 𑀅𑀧𑁆𑀧𑀦𑀸𑀬𑀸𑀢𑀺 𑀯𑀻𑀭𑀺𑀬𑀁 𑀳𑀸𑀧𑁂𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀅𑀢𑀺𑀮𑀻𑀦𑀯𑀻𑀭𑀺𑀬𑀢𑁆𑀢𑀸 𑀓𑁄𑀲𑀚𑁆𑀚𑁂 𑀧𑀢𑀢𑀺, 𑀲𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀢𑀼𑀁. 𑀬𑁄 𑀧𑀦 𑀈𑀲𑀓𑀫𑁆𑀧𑀺 𑀮𑀻𑀦𑀁 𑀮𑀻𑀦𑀪𑀸𑀯𑀢𑁄 𑀉𑀤𑁆𑀥𑀢𑀁 𑀉𑀤𑁆𑀥𑀘𑁆𑀘𑀢𑁄 𑀫𑁄𑀘𑁂𑀢𑁆𑀯𑀸 𑀲𑀫𑁂𑀦 𑀧𑀬𑁄𑀕𑁂𑀦 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑁂𑀢𑀺, 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀁 𑁋

𑀭𑁂𑀡𑀼𑀫𑁆𑀳𑀺 𑀉𑀧𑁆𑀧𑀮𑀤𑀮𑁂, 𑀲𑀼𑀢𑁆𑀢𑁂 𑀦𑀸𑀯𑀸𑀬 𑀦𑀸𑀴𑀺𑀬𑀸;

𑀬𑀣𑀸 𑀫𑀥𑀼𑀓𑀭𑀸𑀤𑀻𑀦𑀁, 𑀧𑀯𑀢𑁆𑀢𑀺 𑀲𑀫𑁆𑀫𑀯𑀡𑁆𑀡𑀺𑀢𑀸.

𑀮𑀻𑀦𑀉𑀤𑁆𑀥𑀢𑀪𑀸𑀯𑁂𑀳𑀺, 𑀫𑁄𑀘𑀬𑀺𑀢𑁆𑀯𑀸𑀦 𑀲𑀩𑁆𑀩𑀲𑁄;

𑀏𑀯𑀁 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁, 𑀫𑀸𑀦𑀲𑀁 𑀧𑀝𑀺𑀧𑀸𑀤𑀬𑁂𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸

𑁬𑁯. 𑀇𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀸𑀪𑀺𑀫𑀼𑀔𑀁 𑀫𑀸𑀦𑀲𑀁 𑀧𑀝𑀺𑀧𑀸𑀤𑀬𑀢𑁄 𑀧𑀦𑀲𑁆𑀲 𑀇𑀤𑀸𑀦𑀺 𑀅𑀧𑁆𑀧𑀦𑀸 𑀇𑀚𑁆𑀛𑀺𑀲𑁆𑀲𑀢𑀻𑀢𑀺 𑀪𑀯𑀗𑁆𑀕𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀣𑀯𑀻 𑀧𑀣𑀯𑀻𑀢𑀺 𑀅𑀦𑀼𑀬𑁄𑀕𑀯𑀲𑁂𑀦 𑀉𑀧𑀝𑁆𑀞𑀺𑀢𑀁 𑀢𑀤𑁂𑀯 𑀧𑀣𑀯𑀻𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀫𑀼𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀢𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀢𑁂𑀲𑀼 𑀅𑀯𑀲𑀸𑀦𑁂 𑀏𑀓𑀁 𑀭𑀽𑀧𑀸𑀯𑀘𑀭𑀁, 𑀲𑁂𑀲𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑀺. 𑀧𑀓𑀢𑀺𑀘𑀺𑀢𑁆𑀢𑁂𑀳𑀺 𑀩𑀮𑀯𑀢𑀭𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀦𑀺 𑀬𑀸𑀦𑀺 𑀅𑀧𑁆𑀧𑀦𑀸𑀬 𑀧𑀭𑀺𑀓𑀫𑁆𑀫𑀢𑁆𑀢𑀸 𑀧𑀭𑀺𑀓𑀫𑁆𑀫𑀸𑀦𑀻𑀢𑀺𑀧𑀺, 𑀬𑀣𑀸 𑀕𑀸𑀫𑀸𑀤𑀻𑀦𑀁 𑀆𑀲𑀦𑁆𑀦𑀧𑀤𑁂𑀲𑁄 𑀕𑀸𑀫𑀽𑀧𑀘𑀸𑀭𑁄 𑀦𑀕𑀭𑀽𑀧𑀘𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀧𑁆𑀧𑀦𑀸𑀬 𑀆𑀲𑀦𑁆𑀦𑀢𑁆𑀢𑀸 𑀲𑀫𑀻𑀧𑀘𑀸𑀭𑀢𑁆𑀢𑀸 𑀯𑀸 𑀉𑀧𑀘𑀸𑀭𑀸𑀦𑀻𑀢𑀺𑀧𑀺, 𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀸𑀦𑀁, 𑀉𑀧𑀭𑀺 𑀅𑀧𑁆𑀧𑀦𑀸𑀬 𑀘 𑀅𑀦𑀼𑀮𑁄𑀫𑀢𑁄 𑀅𑀦𑀼𑀮𑁄𑀫𑀸𑀦𑀻𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀜𑁆𑀘𑁂𑀢𑁆𑀣 𑀲𑀩𑁆𑀩𑀦𑁆𑀢𑀺𑀫𑀁, 𑀢𑀁 𑀧𑀭𑀺𑀢𑁆𑀢𑀕𑁄𑀢𑁆𑀢𑀸𑀪𑀺𑀪𑀯𑀦𑀢𑁄, 𑀫𑀳𑀕𑁆𑀕𑀢𑀕𑁄𑀢𑁆𑀢𑀪𑀸𑀯𑀦𑀢𑁄 𑀘 𑀕𑁄𑀢𑁆𑀭𑀪𑀽𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦𑁂𑀢𑁆𑀣 𑀧𑀞𑀫𑀁 𑀧𑀭𑀺𑀓𑀫𑁆𑀫𑀁, 𑀤𑀼𑀢𑀺𑀬𑀁 𑀉𑀧𑀘𑀸𑀭𑀁, 𑀢𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀘𑀢𑀼𑀢𑁆𑀣𑀁 𑀕𑁄𑀢𑁆𑀭𑀪𑀼. 𑀧𑀞𑀫𑀁 𑀯𑀸 𑀉𑀧𑀘𑀸𑀭𑀁, 𑀤𑀼𑀢𑀺𑀬𑀁 𑀅𑀦𑀼𑀮𑁄𑀫𑀁, 𑀢𑀢𑀺𑀬𑀁 𑀕𑁄𑀢𑁆𑀭𑀪𑀼, 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑀦𑀸𑀘𑀺𑀢𑁆𑀢𑀁. 𑀘𑀢𑀼𑀢𑁆𑀣𑀫𑁂𑀯 𑀳𑀺 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀢𑀜𑁆𑀘 𑀔𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑀤𑀦𑁆𑀥𑀸𑀪𑀺𑀜𑁆𑀜𑀯𑀲𑁂𑀦. 𑀢𑀢𑁄 𑀧𑀭𑀁 𑀚𑀯𑀦𑀁 𑀧𑀢𑀢𑀺. 𑀪𑀯𑀗𑁆𑀕𑀲𑁆𑀲 𑀯𑀸𑀭𑁄 𑀳𑁄𑀢𑀺.

𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀧𑀦 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁨) 𑀇𑀫𑀁 𑀲𑀼𑀢𑁆𑀢𑀁 𑀯𑀢𑁆𑀯𑀸 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀙𑀺𑀫𑁄 𑀧𑀘𑁆𑀙𑀺𑀫𑁄 𑀥𑀫𑁆𑀫𑁄 𑀩𑀮𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀙𑀝𑁆𑀞𑁂𑀧𑀺 𑀲𑀢𑁆𑀢𑀫𑁂𑀧𑀺 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀆𑀳, 𑀢𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀅𑀢𑁆𑀢𑀦𑁄 𑀫𑀢𑀺𑀫𑀢𑁆𑀢𑀁 𑀣𑁂𑀭𑀲𑁆𑀲𑁂𑀢’’𑀦𑁆𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼𑀬𑁂𑀯 𑀧𑀦 𑀅𑀧𑁆𑀧𑀦𑀸 𑀳𑁄𑀢𑀺. 𑀧𑀭𑀢𑁄 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺, 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀙𑀺𑀦𑁆𑀦𑀧𑀧𑀸𑀢𑀸𑀪𑀺𑀫𑀼𑀔𑁄 𑀥𑀸𑀯𑀦𑁆𑀢𑁄 𑀞𑀸𑀢𑀼𑀓𑀸𑀫𑁄𑀧𑀺 𑀧𑀭𑀺𑀬𑀦𑁆𑀢𑁂 𑀧𑀸𑀤𑀁 𑀓𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀧𑀧𑀸𑀢𑁂 𑀏𑀯 𑀧𑀢𑀢𑀺, 𑀏𑀯𑀁 𑀙𑀝𑁆𑀞𑁂 𑀯𑀸 𑀲𑀢𑁆𑀢𑀫𑁂 𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀢𑁆𑀢𑀸. 𑀢𑀲𑁆𑀫𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼𑀬𑁂𑀯 𑀅𑀧𑁆𑀧𑀦𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀸 𑀘 𑀧𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀬𑁂𑀯. 𑀲𑀢𑁆𑀢𑀲𑀼 𑀳𑀺 𑀞𑀸𑀦𑁂𑀲𑀼 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺 𑀧𑀞𑀫𑀧𑁆𑀧𑀦𑀸𑀬𑀁, 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼, 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑁂, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀪𑀯𑀗𑁆𑀕𑀚𑁆𑀛𑀸𑀦𑁂, 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺. 𑀏𑀢𑁆𑀣 𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀁 𑀢𑀺𑀡𑁆𑀡𑀁 𑀉𑀧𑀭𑀺 𑀦 𑀳𑁄𑀢𑀺. 𑀦𑀺𑀭𑁄𑀥𑀲𑁆𑀲 𑀧𑀘𑁆𑀘𑀬𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑁆𑀯𑀺𑀦𑁆𑀦𑀫𑀼𑀧𑀭𑀺 𑀦 𑀳𑁄𑀢𑀺. 𑀭𑀽𑀧𑀸𑀭𑀽𑀧𑁂𑀲𑀼 𑀪𑀯𑀗𑁆𑀕𑀲𑁆𑀲 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺, 𑀲𑁂𑀲𑀝𑁆𑀞𑀸𑀦𑁂𑀲𑀼 𑀏𑀓𑀫𑁂𑀯 𑀘𑀺𑀢𑁆𑀢𑀦𑁆𑀢𑀺. 𑀇𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀬𑁂𑀯 𑀅𑀧𑁆𑀧𑀦𑀸. 𑀢𑀢𑁄 𑀪𑀯𑀗𑁆𑀕𑀧𑀸𑀢𑁄. 𑀅𑀣 𑀪𑀯𑀗𑁆𑀕𑀁 𑀯𑁄𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀆𑀯𑀚𑁆𑀚𑀦𑀁, 𑀢𑀢𑁄 𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀧𑀦𑁂𑀲 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 (𑀥. 𑀲. 𑁧𑁬𑁦; 𑀤𑀻. 𑀦𑀺. 𑁧.𑁨𑁨𑁬). 𑀏𑀯𑀫𑀦𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀁 𑀛𑀸𑀦𑀁 𑀅𑀥𑀺𑀕𑀢𑀁 𑀳𑁄𑀢𑀺 𑀧𑀣𑀯𑀻𑀓𑀲𑀺𑀡𑀁.

𑁭𑁦. 𑀢𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀬𑁄 𑀧𑀦𑀸𑀬𑀫𑁂𑀢𑁆𑀣 𑀏𑀯𑀓𑀸𑀭𑁄, 𑀲𑁄 𑀦𑀺𑀬𑀫𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀦𑀺𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀡𑀲𑀫𑀬𑁂 𑀅𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀁 𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑀁 𑀤𑀻𑀧𑁂𑀢𑀺.

𑀓𑀣𑀁? ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀏𑀯𑀜𑁆𑀳𑀺 𑀦𑀺𑀬𑀫𑁂 𑀓𑀭𑀺𑀬𑀫𑀸𑀦𑁂 𑀇𑀤𑀁 𑀧𑀜𑁆𑀜𑀸𑀬𑀢𑀺, 𑀦𑀽𑀦 𑀛𑀸𑀦𑀲𑁆𑀲 𑀓𑀸𑀫𑀸 𑀧𑀝𑀺𑀧𑀓𑁆𑀔𑀪𑀽𑀢𑀸 𑀬𑁂𑀲𑀼 𑀲𑀢𑀺 𑀇𑀤𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀦𑁆𑀥𑀓𑀸𑀭𑁂 𑀲𑀢𑀺 𑀧𑀤𑀻𑀧𑁄𑀪𑀸𑀲𑁄 𑀯𑀺𑀬. 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁂𑀦𑁂𑀯 𑀘𑀲𑁆𑀲 𑀅𑀥𑀺𑀕𑀫𑁄 𑀳𑁄𑀢𑀺, 𑀑𑀭𑀺𑀫𑀢𑀻𑀭𑀧𑀭𑀺𑀘𑁆𑀘𑀸𑀕𑁂𑀦 𑀧𑀸𑀭𑀺𑀫𑀢𑀻𑀭𑀲𑁆𑀲𑁂𑀯. 𑀢𑀲𑁆𑀫𑀸 𑀦𑀺𑀬𑀫𑀁 𑀓𑀭𑁄𑀢𑀻𑀢𑀺.

𑀢𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀧𑀦𑁂𑀲 𑀧𑀼𑀩𑁆𑀩𑀧𑀤𑁂𑀬𑁂𑀯 𑀯𑀼𑀢𑁆𑀢𑁄, 𑀦 𑀉𑀢𑁆𑀢𑀭𑀧𑀤𑁂, 𑀓𑀺𑀁 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘𑀸𑀧𑀺 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀁𑀦𑀺𑀲𑁆𑀲𑀭𑀡𑀢𑁄 𑀳𑀺 𑀧𑀼𑀩𑁆𑀩𑀧𑀤𑁂 𑀏𑀲 𑀯𑀼𑀢𑁆𑀢𑁄. 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀢𑁄 𑀳𑀺 𑀓𑀸𑀫𑀭𑀸𑀕𑀧𑀝𑀺𑀧𑀓𑁆𑀔𑀢𑁄 𑀘 𑀇𑀤𑀁 𑀛𑀸𑀦𑀁 𑀓𑀸𑀫𑀸𑀦𑀫𑁂𑀯 𑀦𑀺𑀲𑁆𑀲𑀭𑀡𑀁. 𑀬𑀣𑀸𑀳, ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁫𑁩). 𑀉𑀢𑁆𑀢𑀭𑀧𑀤𑁂𑀧𑀺 𑀧𑀦 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧) 𑀏𑀢𑁆𑀣 𑀏𑀯𑀓𑀸𑀭𑁄 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀲𑀓𑁆𑀓𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀦𑀻𑀯𑀭𑀡𑀲𑀗𑁆𑀔𑀸𑀢𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀯𑀺𑀯𑀺𑀘𑁆𑀘 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀢𑀲𑁆𑀫𑀸 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑁂𑀯 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀏𑀯𑀁 𑀧𑀤𑀤𑁆𑀯𑀬𑁂𑀧𑀺 𑀏𑀲 𑀤𑀝𑁆𑀞𑀩𑁆𑀩𑁄. 𑀧𑀤𑀤𑁆𑀯𑀬𑁂𑀧𑀺 𑀘 𑀓𑀺𑀜𑁆𑀘𑀸𑀧𑀺 𑀯𑀺𑀯𑀺𑀘𑁆𑀘𑀸𑀢𑀺 𑀇𑀫𑀺𑀦𑀸 𑀲𑀸𑀥𑀸𑀭𑀡𑀯𑀘𑀦𑁂𑀦 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄, 𑀓𑀸𑀬𑀯𑀺𑀯𑁂𑀓𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀯𑀺𑀯𑁂𑀓𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀢𑀣𑀸𑀧𑀺 𑀓𑀸𑀬𑀯𑀺𑀯𑁂𑀓𑁄 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄𑀢𑀺 𑀢𑀬𑁄 𑀏𑀯 𑀇𑀥 𑀤𑀝𑁆𑀞𑀩𑁆𑀩𑀸.

𑀓𑀸𑀫𑁂𑀳𑀻𑀢𑀺 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀬𑁂 𑀘 𑀦𑀺𑀤𑁆𑀤𑁂𑀲𑁂 ‘‘𑀓𑀢𑀫𑁂 𑀯𑀢𑁆𑀣𑀼𑀓𑀸𑀫𑀸, 𑀫𑀦𑀸𑀧𑀺𑀬𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧) 𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸, 𑀬𑁂 𑀘 𑀢𑀢𑁆𑀣𑁂𑀯 𑀯𑀺𑀪𑀗𑁆𑀕𑁂 𑀘 ‘‘𑀙𑀦𑁆𑀤𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀸𑀫𑀸’’𑀢𑀺 (𑀫𑀳𑀸𑀦𑀺. 𑁧; 𑀯𑀺𑀪. 𑁫𑁬𑁪) 𑀏𑀯𑀁 𑀓𑀺𑀮𑁂𑀲𑀓𑀸𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀲𑀗𑁆𑀕𑀳𑀺𑀢𑀸𑀇𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀯𑀺𑀯𑀺𑀘𑁆𑀘𑁂𑀯𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀢𑁂𑀦 𑀓𑀸𑀬𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀓𑀺𑀮𑁂𑀲𑀓𑀸𑀫𑁂𑀳𑀺 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀯𑀸 𑀯𑀺𑀯𑀺𑀘𑁆𑀘𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀧𑀼𑀭𑀺𑀫𑁂𑀦 𑀘𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀏𑀯 𑀓𑀸𑀫𑀲𑀼𑀔𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀓𑀺𑀮𑁂𑀲𑀓𑀸𑀫𑁂𑀳𑀺 𑀯𑀺𑀯𑁂𑀓𑀯𑀘𑀦𑀢𑁄 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑀭𑀺𑀕𑁆𑀕𑀳𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀏𑀯𑀁 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀯𑀘𑀦𑀢𑁄𑀬𑁂𑀯 𑀘 𑀏𑀢𑁂𑀲𑀁 𑀧𑀞𑀫𑁂𑀦 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀧𑁆𑀧𑀳𑀸𑀦𑀁, 𑀤𑀼𑀢𑀺𑀬𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀧𑀞𑀫𑁂𑀦 𑀮𑁄𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄, 𑀤𑀼𑀢𑀺𑀬𑁂𑀦 𑀩𑀸𑀮𑀪𑀸𑀯𑀲𑁆𑀲. 𑀧𑀞𑀫𑁂𑀦 𑀘 𑀧𑀬𑁄𑀕𑀲𑀼𑀤𑁆𑀥𑀺, 𑀤𑀼𑀢𑀺𑀬𑁂𑀦 𑀆𑀲𑀬𑀧𑁄𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀏𑀲 𑀢𑀸𑀯 𑀦𑀬𑁄 𑀓𑀸𑀫𑁂𑀳𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀓𑀸𑀫𑁂𑀲𑀼 𑀯𑀢𑁆𑀣𑀼𑀓𑀸𑀫𑀧𑀓𑁆𑀔𑁂.

𑀓𑀺𑀮𑁂𑀲𑀓𑀸𑀫𑀧𑀓𑁆𑀔𑁂 𑀧𑀦 𑀙𑀦𑁆𑀤𑁄𑀢𑀺 𑀘 𑀭𑀸𑀕𑁄𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁄 𑀓𑀸𑀫𑀘𑁆𑀙𑀦𑁆𑀤𑁄𑀬𑁂𑀯 𑀓𑀸𑀫𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑁄𑀧𑀺 𑀲𑀫𑀸𑀦𑁄 ‘‘𑀢𑀢𑁆𑀣 𑀓𑀢𑀫𑁄 𑀓𑀸𑀫𑁄 𑀙𑀦𑁆𑀤𑁄 𑀓𑀸𑀫𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁪) 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀛𑀸𑀦𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄. 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀧𑀼𑀭𑀺𑀫𑀧𑀤𑁂 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀢𑀺𑀬𑀧𑀤𑁂. 𑀅𑀦𑁂𑀓𑀪𑁂𑀤𑀢𑁄 𑀘𑀲𑁆𑀲 𑀓𑀸𑀫𑀢𑁄𑀢𑀺 𑀅𑀯𑀢𑁆𑀯𑀸 𑀓𑀸𑀫𑁂𑀳𑀻𑀢𑀺 𑀯𑀼𑀢𑁆𑀢𑀁.

𑀅𑀜𑁆𑀜𑁂𑀲𑀫𑁆𑀧𑀺 𑀘 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 ‘‘𑀢𑀢𑁆𑀣 𑀓𑀢𑀫𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀪𑀗𑁆𑀕𑁂 𑀉𑀧𑀭𑀺 𑀛𑀸𑀦𑀗𑁆𑀕𑀸𑀦𑀁 𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀦𑀻𑀯𑀭𑀡𑀸𑀦𑀺 𑀳𑀺 𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀸𑀦𑀺, 𑀢𑁂𑀲𑀁 𑀛𑀸𑀦𑀗𑁆𑀕𑀸𑀦𑁂𑀯 𑀧𑀝𑀺𑀧𑀓𑁆𑀔𑀸𑀦𑀺 𑀯𑀺𑀤𑁆𑀥𑀁𑀲𑀓𑀸𑀦𑀺 𑀯𑀺𑀖𑀸𑀢𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄, 𑀧𑀻𑀢𑀺 𑀩𑁆𑀬𑀸𑀧𑀸𑀤𑀲𑁆𑀲, 𑀯𑀺𑀢𑀓𑁆𑀓𑁄 𑀣𑀺𑀦𑀫𑀺𑀤𑁆𑀥𑀲𑁆𑀲, 𑀲𑀼𑀔𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲, 𑀯𑀺𑀘𑀸𑀭𑁄 𑀯𑀺𑀘𑀺𑀓𑀺𑀘𑁆𑀙𑀸𑀬𑀸𑀢𑀺 𑀧𑁂𑀝𑀓𑁂 𑀯𑀼𑀢𑁆𑀢𑀁.

𑀏𑀯𑀫𑁂𑀢𑁆𑀣 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀇𑀫𑀺𑀦𑀸 𑀧𑀜𑁆𑀘𑀦𑁆𑀦𑀫𑁆𑀧𑀺 𑀦𑀻𑀯𑀭𑀡𑀸𑀦𑀁, 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀧𑀞𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲, 𑀤𑀼𑀢𑀺𑀬𑁂𑀦 𑀲𑁂𑀲𑀦𑀻𑀯𑀭𑀡𑀸𑀦𑀁. 𑀢𑀣𑀸 𑀧𑀞𑀫𑁂𑀦 𑀢𑀻𑀲𑀼 𑀅𑀓𑀼𑀲𑀮𑀫𑀽𑀮𑁂𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀪𑁂𑀤𑀯𑀺𑀲𑀬𑀲𑁆𑀲 𑀮𑁄𑀪𑀲𑁆𑀲, 𑀤𑀼𑀢𑀺𑀬𑁂𑀦 𑀆𑀖𑀸𑀢𑀯𑀢𑁆𑀣𑀼𑀪𑁂𑀤𑀸𑀤𑀺𑀯𑀺𑀲𑀬𑀸𑀦𑀁 𑀤𑁄𑀲𑀫𑁄𑀳𑀸𑀦𑀁. 𑀑𑀖𑀸𑀤𑀻𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀧𑀞𑀫𑁂𑀦 𑀓𑀸𑀫𑁄𑀖𑀓𑀸𑀫𑀬𑁄𑀕𑀓𑀸𑀫𑀸𑀲𑀯𑀓𑀸𑀫𑀼𑀧𑀸𑀤𑀸𑀦𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀸𑀦𑀁, 𑀤𑀼𑀢𑀺𑀬𑁂𑀦 𑀅𑀯𑀲𑁂𑀲𑀑𑀖𑀬𑁄𑀕𑀸𑀲𑀯𑀉𑀧𑀸𑀤𑀸𑀦𑀕𑀦𑁆𑀣𑀲𑀁𑀬𑁄𑀚𑀦𑀸𑀦𑀁. 𑀧𑀞𑀫𑁂𑀦 𑀘 𑀢𑀡𑁆𑀳𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘, 𑀤𑀼𑀢𑀺𑀬𑁂𑀦 𑀅𑀯𑀺𑀚𑁆𑀚𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀜𑁆𑀘. 𑀅𑀧𑀺𑀘 𑀧𑀞𑀫𑁂𑀦 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁, 𑀤𑀼𑀢𑀺𑀬𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀏𑀢𑁆𑀣 𑀅𑀢𑁆𑀣𑀧𑁆𑀧𑀓𑀸𑀲𑀦𑀸.

𑁭𑁧. 𑀏𑀢𑁆𑀢𑀸𑀯𑀢𑀸 𑀘 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑁄𑀕𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄, 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄, 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁄. 𑀢𑀣𑀸 𑀳𑀺 𑀢𑁂𑀦 𑀬𑁄𑀕𑀸𑀯𑀘𑀭𑁄 𑀆𑀭𑀫𑁆𑀫𑀡𑀁 𑀯𑀺𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀯𑀺𑀘𑀭𑀡𑀁 𑀯𑀺𑀘𑀸𑀭𑁄, 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁆𑀯𑀸𑀬𑀁 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄, 𑀢𑀢𑁆𑀣 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀲𑀦𑁆𑀢𑁂𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀑𑀴𑀸𑀭𑀺𑀓𑀝𑁆𑀞𑁂𑀦 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦 𑀘 𑀖𑀡𑁆𑀟𑀸𑀪𑀺𑀖𑀸𑀢𑁄 𑀯𑀺𑀬 𑀘𑁂𑀢𑀲𑁄 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀯𑀺𑀢𑀓𑁆𑀓𑁄. 𑀲𑀼𑀔𑀼𑀫𑀝𑁆𑀞𑁂𑀦 𑀅𑀦𑀼𑀫𑀚𑁆𑀚𑀦𑀲𑀪𑀸𑀯𑁂𑀦 𑀘 𑀖𑀡𑁆𑀟𑀸𑀦𑀼𑀭𑀯𑁄 𑀯𑀺𑀬 𑀅𑀦𑀼𑀧𑁆𑀧𑀩𑀦𑁆𑀥𑁄 𑀯𑀺𑀘𑀸𑀭𑁄. 𑀯𑀺𑀧𑁆𑀨𑀸𑀭𑀯𑀸 𑀘𑁂𑀢𑁆𑀣 𑀯𑀺𑀢𑀓𑁆𑀓𑁄 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀮𑁂 𑀧𑀭𑀺𑀧𑁆𑀨𑀦𑁆𑀤𑀦𑀪𑀽𑀢𑁄 𑀘𑀺𑀢𑁆𑀢𑀲𑁆𑀲 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀼𑀓𑀸𑀫𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀯𑀺𑀓𑁆𑀔𑁂𑀧𑁄 𑀯𑀺𑀬 𑀧𑀤𑀼𑀫𑀸𑀪𑀺𑀫𑀼𑀔𑀧𑀸𑀢𑁄 𑀯𑀺𑀬 𑀘 𑀕𑀦𑁆𑀥𑀸𑀦𑀼𑀩𑀦𑁆𑀥𑀘𑁂𑀢𑀲𑁄 𑀪𑀫𑀭𑀲𑁆𑀲. 𑀲𑀦𑁆𑀢𑀯𑀼𑀢𑁆𑀢𑀺 𑀯𑀺𑀘𑀸𑀭𑁄 𑀦𑀸𑀢𑀺𑀧𑀭𑀺𑀧𑁆𑀨𑀦𑁆𑀤𑀦𑀪𑀸𑀯𑁄 𑀘𑀺𑀢𑁆𑀢𑀲𑁆𑀲 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑀲𑁆𑀲 𑀧𑀓𑁆𑀔𑀺𑀦𑁄 𑀧𑀓𑁆𑀔𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀧𑀭𑀺𑀩𑁆𑀪𑀫𑀦𑀁 𑀯𑀺𑀬 𑀘 𑀧𑀤𑀼𑀫𑀸𑀪𑀺𑀫𑀼𑀔𑀧𑀢𑀺𑀢𑀲𑁆𑀲 𑀪𑀫𑀭𑀲𑁆𑀲 𑀧𑀤𑀼𑀫𑀲𑁆𑀲 𑀉𑀧𑀭𑀺𑀪𑀸𑀕𑁂. 𑀤𑀼𑀓𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀆𑀓𑀸𑀲𑁂 𑀕𑀘𑁆𑀙𑀢𑁄 𑀫𑀳𑀸𑀲𑀓𑀼𑀡𑀲𑁆𑀲 𑀉𑀪𑁄𑀳𑀺 𑀧𑀓𑁆𑀔𑁂𑀳𑀺 𑀯𑀸𑀢𑀁 𑀕𑀳𑁂𑀢𑁆𑀯𑀸 𑀧𑀓𑁆𑀔𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀯𑀸𑀢𑀕𑁆𑀕𑀳𑀡𑀢𑁆𑀣𑀁 𑀧𑀓𑁆𑀔𑁂 𑀨𑀦𑁆𑀤𑀸𑀧𑀬𑀫𑀸𑀦𑀲𑁆𑀲 𑀕𑀫𑀦𑀁 𑀯𑀺𑀬 𑀅𑀦𑀼𑀫𑀚𑁆𑀚𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀯𑀺𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀧𑁆𑀧𑀩𑀦𑁆𑀥𑁂𑀦 𑀧𑀯𑀢𑁆𑀢𑀺𑀬𑀁 𑀬𑀼𑀚𑁆𑀚𑀢𑀺. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀼 𑀧𑀸𑀓𑀝𑁄 𑀳𑁄𑀢𑀺.

𑀅𑀧𑀺𑀘 𑀫𑀮𑀕𑁆𑀕𑀳𑀺𑀢𑀁 𑀓𑀁𑀲𑀪𑀸𑀚𑀦𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀘𑀼𑀡𑁆𑀡𑀢𑁂𑀮𑀯𑀸𑀮𑀡𑁆𑀟𑀼𑀧𑀓𑁂𑀦 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲 𑀤𑀴𑁆𑀳𑀕𑀳𑀡𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀧𑀭𑀺𑀫𑀚𑁆𑀚𑀦𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀤𑀡𑁆𑀟𑀧𑁆𑀧𑀳𑀸𑀭𑁂𑀦 𑀘𑀓𑁆𑀓𑀁 𑀪𑀫𑀬𑀺𑀢𑁆𑀯𑀸 𑀪𑀸𑀚𑀦𑀁 𑀓𑀭𑁄𑀦𑁆𑀢𑀲𑁆𑀲 𑀉𑀧𑁆𑀧𑀻𑀴𑀦𑀳𑀢𑁆𑀣𑁄 𑀯𑀺𑀬 𑀯𑀺𑀢𑀓𑁆𑀓𑁄, 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀳𑀢𑁆𑀣𑁄 𑀯𑀺𑀬 𑀯𑀺𑀘𑀸𑀭𑁄. 𑀢𑀣𑀸 𑀫𑀡𑁆𑀟𑀮𑀁 𑀓𑀭𑁄𑀦𑁆𑀢𑀲𑁆𑀲 𑀫𑀚𑁆𑀛𑁂 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑁄 𑀯𑀺𑀬 𑀅𑀪𑀺𑀦𑀺𑀭𑁄𑀧𑀦𑁄 𑀯𑀺𑀢𑀓𑁆𑀓𑁄, 𑀩𑀳𑀺 𑀧𑀭𑀺𑀩𑁆𑀪𑀫𑀦𑀓𑀡𑁆𑀝𑀓𑁄 𑀯𑀺𑀬 𑀅𑀦𑀼𑀫𑀚𑁆𑀚𑀦𑁄 𑀯𑀺𑀘𑀸𑀭𑁄. 𑀇𑀢𑀺 𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀲𑀳 𑀯𑀢𑁆𑀢𑀢𑀺 𑀭𑀼𑀓𑁆𑀔𑁄 𑀯𑀺𑀬 𑀧𑀼𑀧𑁆𑀨𑁂𑀦 𑀨𑀮𑁂𑀦 𑀘𑀸𑀢𑀺 𑀇𑀤𑀁 𑀛𑀸𑀦𑀁 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀫𑀺𑀦𑀸 𑀘 𑀯𑀺𑀢𑀓𑁆𑀓𑁂𑀦 𑀇𑀫𑀺𑀦𑀸 𑀘 𑀯𑀺𑀘𑀸𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁫) 𑀦𑀬𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸. 𑀅𑀢𑁆𑀣𑁄 𑀧𑀦 𑀢𑀢𑁆𑀭𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀯𑀺𑀯𑁂𑀓𑀚𑀦𑁆𑀢𑀺 𑀏𑀢𑁆𑀣 𑀯𑀺𑀯𑀺𑀢𑁆𑀢𑀺 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀕𑀫𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀢𑁆𑀢𑁄𑀢𑀺 𑀯𑀸 𑀯𑀺𑀯𑁂𑀓𑁄, 𑀦𑀻𑀯𑀭𑀡𑀯𑀺𑀯𑀺𑀢𑁆𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀯𑀺𑀯𑁂𑀓𑀸, 𑀢𑀲𑁆𑀫𑀺𑀁 𑀯𑀸 𑀯𑀺𑀯𑁂𑀓𑁂 𑀚𑀸𑀢𑀦𑁆𑀢𑀺 𑀯𑀺𑀯𑁂𑀓𑀚𑀁.

𑁭𑁨. 𑀧𑀻𑀢𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀧𑀻𑀡𑀬𑀢𑀻𑀢𑀺 𑀧𑀻𑀢𑀺. 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀸, 𑀓𑀸𑀬𑀘𑀺𑀢𑁆𑀢𑀧𑀻𑀦𑀦𑀭𑀲𑀸, 𑀨𑀭𑀡𑀭𑀲𑀸 𑀯𑀸, 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀲𑀸 𑀧𑀦𑁂𑀲𑀸 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺, 𑀔𑀡𑀺𑀓𑀸𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺, 𑀉𑀩𑁆𑀩𑁂𑀕𑀸𑀧𑀻𑀢𑀺, 𑀨𑀭𑀡𑀸𑀧𑀻𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀺𑀓𑀸𑀧𑀻𑀢𑀺 𑀲𑀭𑀻𑀭𑁂 𑀮𑁄𑀫𑀳𑀁𑀲𑀫𑀢𑁆𑀢𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀡𑀺𑀓𑀸𑀧𑀻𑀢𑀺 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀳𑁄𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺 𑀲𑀫𑀼𑀤𑁆𑀤𑀢𑀻𑀭𑀁 𑀯𑀻𑀘𑀺 𑀯𑀺𑀬 𑀓𑀸𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑀸𑀧𑀻𑀢𑀺 𑀩𑀮𑀯𑀢𑀻 𑀳𑁄𑀢𑀺 𑀓𑀸𑀬𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀧𑁆𑀧𑀢𑁆𑀢𑀸. 𑀢𑀣𑀸 𑀳𑀺 𑀧𑀼𑀡𑁆𑀡𑀯𑀮𑁆𑀮𑀺𑀓𑀯𑀸𑀲𑀻 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀸𑀬𑀁 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑀁 𑀤𑀺𑀲𑁆𑀯𑀸 𑀫𑀳𑀸𑀘𑁂𑀢𑀺𑀬𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 ‘‘𑀇𑀫𑀸𑀬 𑀯𑀢 𑀯𑁂𑀮𑀸𑀬 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀦𑁆𑀢𑀻’’𑀢𑀺 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀉𑀩𑁆𑀩𑁂𑀕𑀸𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀥𑀸𑀢𑀮𑁂 𑀧𑀳𑀝𑀘𑀺𑀢𑁆𑀭𑀕𑁂𑀡𑁆𑀟𑀼𑀓𑁄 𑀯𑀺𑀬 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂𑀬𑁂𑀯 𑀧𑀢𑀺𑀝𑁆𑀞𑀸𑀲𑀺. 𑀢𑀣𑀸 𑀕𑀺𑀭𑀺𑀓𑀡𑁆𑀟𑀓𑀯𑀺𑀳𑀸𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀯𑀢𑁆𑀢𑀓𑀸𑀮𑀓𑀕𑀸𑀫𑁂 𑀏𑀓𑀸 𑀓𑀼𑀮𑀥𑀻𑀢𑀸𑀧𑀺 𑀩𑀮𑀯𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀉𑀩𑁆𑀩𑁂𑀕𑀸𑀧𑀻𑀢𑀺𑀬𑀸 𑀆𑀓𑀸𑀲𑁂 𑀮𑀗𑁆𑀖𑁂𑀲𑀺.

𑀢𑀲𑁆𑀲𑀸 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀲𑀸𑀬𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 ‘‘𑀅𑀫𑁆𑀫 𑀢𑁆𑀯𑀁 𑀕𑀭𑀼𑀪𑀸𑀭𑀸 𑀅𑀓𑀸𑀮𑁂 𑀯𑀺𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀲𑀺, 𑀫𑀬𑀁 𑀢𑀼𑀬𑁆𑀳𑀁 𑀧𑀢𑁆𑀢𑀺𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀅𑀕𑀫𑀁𑀲𑀼. 𑀲𑀸 𑀕𑀦𑁆𑀢𑀼𑀓𑀸𑀫𑀸𑀧𑀺 𑀢𑁂𑀲𑀁 𑀯𑀘𑀦𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀖𑀭𑁂 𑀑𑀳𑀻𑀬𑀺𑀢𑁆𑀯𑀸 𑀖𑀭𑀸𑀚𑀺𑀭𑁂 𑀞𑀢𑁆𑀯𑀸 𑀘𑀦𑁆𑀤𑀸𑀮𑁄𑀓𑁂𑀦 𑀕𑀺𑀭𑀺𑀓𑀡𑁆𑀟𑀓𑁂 𑀆𑀓𑀸𑀲𑀘𑁂𑀢𑀺𑀬𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑀻 𑀘𑁂𑀢𑀺𑀬𑀲𑁆𑀲 𑀤𑀻𑀧𑀧𑀽𑀚𑀁 𑀅𑀤𑁆𑀤𑀲, 𑀘𑀢𑀲𑁆𑀲𑁄 𑀘 𑀧𑀭𑀺𑀲𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀘𑁂𑀢𑀺𑀬𑀧𑀽𑀚𑀁 𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀺𑀬𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀡𑀲𑀚𑁆𑀛𑀸𑀬𑀲𑀤𑁆𑀤𑀁 𑀅𑀲𑁆𑀲𑁄𑀲𑀺. 𑀅𑀣𑀲𑁆𑀲𑀸 ‘‘𑀥𑀜𑁆𑀜𑀸𑀯𑀢𑀺𑀫𑁂, 𑀬𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀏𑀯𑀭𑀽𑀧𑁂 𑀘𑁂𑀢𑀺𑀬𑀗𑁆𑀕𑀡𑁂 𑀅𑀦𑀼𑀲𑀜𑁆𑀘𑀭𑀺𑀢𑀼𑀁, 𑀏𑀯𑀭𑀽𑀧𑀜𑁆𑀘 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀮𑀪𑀦𑁆𑀢𑀻’’𑀢𑀺 𑀫𑀼𑀢𑁆𑀢𑀭𑀸𑀲𑀺𑀲𑀤𑀺𑀲𑀁 𑀘𑁂𑀢𑀺𑀬𑀁 𑀧𑀲𑁆𑀲𑀦𑁆𑀢𑀺𑀬𑀸 𑀏𑀯 𑀉𑀩𑁆𑀩𑁂𑀕𑀸𑀧𑀻𑀢𑀺 𑀉𑀤𑀧𑀸𑀤𑀺. 𑀲𑀸 𑀆𑀓𑀸𑀲𑁂 𑀮𑀗𑁆𑀖𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀭𑀺𑀫𑀢𑀭𑀁𑀬𑁂𑀯 𑀆𑀓𑀸𑀲𑀢𑁄 𑀘𑁂𑀢𑀺𑀬𑀗𑁆𑀕𑀡𑁂 𑀑𑀭𑀼𑀬𑁆𑀳 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀅𑀫𑁆𑀫 𑀢𑁆𑀯𑀁 𑀓𑀢𑀭𑁂𑀦 𑀫𑀕𑁆𑀕𑁂𑀦 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 ‘‘𑀆𑀓𑀸𑀲𑁂𑀦 𑀆𑀕𑀢𑀸𑀫𑁆𑀳𑀺, 𑀦 𑀫𑀕𑁆𑀕𑁂𑀦𑀸’’𑀢𑀺 𑀯𑀢𑁆𑀯𑀸 ‘‘𑀅𑀫𑁆𑀫 𑀆𑀓𑀸𑀲𑁂𑀦 𑀦𑀸𑀫 𑀔𑀻𑀡𑀸𑀲𑀯𑀸 𑀲𑀜𑁆𑀘𑀭𑀦𑁆𑀢𑀺, 𑀢𑁆𑀯𑀁 𑀓𑀣𑀁 𑀆𑀕𑀢𑀸’’𑀢𑀺 𑀯𑀼𑀢𑁆𑀢𑀸 𑀆𑀳 𑁋 ‘‘𑀫𑀬𑁆𑀳𑀁 𑀘𑀦𑁆𑀤𑀸𑀮𑁄𑀓𑁂𑀦 𑀘𑁂𑀢𑀺𑀬𑀁 𑀆𑀮𑁄𑀓𑁂𑀦𑁆𑀢𑀺𑀬𑀸 𑀞𑀺𑀢𑀸𑀬 𑀩𑀼𑀤𑁆𑀥𑀸𑀭𑀫𑁆𑀫𑀡𑀸 𑀩𑀮𑀯𑀧𑀻𑀢𑀺 𑀉𑀧𑁆𑀧𑀚𑁆𑀚𑀺. 𑀅𑀣𑀸𑀳𑀁 𑀦𑁂𑀯 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀁, 𑀦 𑀦𑀺𑀲𑀺𑀦𑁆𑀦𑀪𑀸𑀯𑀁 𑀅𑀜𑁆𑀜𑀸𑀲𑀺𑀁, 𑀕𑀳𑀺𑀢𑀦𑀺𑀫𑀺𑀢𑁆𑀢𑁂𑀦𑁂𑀯 𑀧𑀦 𑀆𑀓𑀸𑀲𑁂 𑀮𑀗𑁆𑀖𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀧𑀢𑀺𑀝𑁆𑀞𑀺𑀢𑀸𑀫𑁆𑀳𑀻’’𑀢𑀺.

𑀏𑀯𑀁 𑀉𑀩𑁆𑀩𑁂𑀕𑀸𑀧𑀻𑀢𑀺 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀨𑀭𑀡𑀸𑀧𑀻𑀢𑀺𑀬𑀸 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀲𑀓𑀮𑀲𑀭𑀻𑀭𑀁 𑀥𑀫𑀺𑀢𑁆𑀯𑀸 𑀧𑀽𑀭𑀺𑀢𑀯𑀢𑁆𑀣𑀺 𑀯𑀺𑀬 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀓𑁆𑀔𑀦𑁆𑀤𑀧𑀩𑁆𑀩𑀢𑀓𑀼𑀘𑁆𑀙𑀺 𑀯𑀺𑀬 𑀘 𑀅𑀦𑀼𑀧𑀭𑀺𑀧𑁆𑀨𑀼𑀝𑀁 𑀳𑁄𑀢𑀺.

𑀲𑀸 𑀧𑀦𑁂𑀲𑀸 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀁 𑀧𑀲𑁆𑀲𑀤𑁆𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑀓𑀸𑀬𑀧𑀲𑁆𑀲𑀤𑁆𑀥𑀺𑀜𑁆𑀘 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀜𑁆𑀘. 𑀧𑀲𑁆𑀲𑀤𑁆𑀥𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀻 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀻 𑀤𑀼𑀯𑀺𑀥𑀫𑁆𑀧𑀺 𑀲𑀼𑀔𑀁 𑀧𑀭𑀺𑀧𑀽𑀭𑁂𑀢𑀺 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘. 𑀲𑀼𑀔𑀁 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀢𑀺𑀯𑀺𑀥𑀁 𑀲𑀫𑀸𑀥𑀺𑀁 𑀧𑀭𑀺𑀧𑀽𑀭𑁂𑀢𑀺 𑀔𑀡𑀺𑀓𑀲𑀫𑀸𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸 𑀲𑀫𑀸𑀥𑀺𑀦𑁆𑀢𑀺. 𑀢𑀸𑀲𑀼 𑀬𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀫𑀽𑀮𑀁 𑀳𑀼𑀢𑁆𑀯𑀸 𑀯𑀟𑁆𑀠𑀫𑀸𑀦𑀸 𑀲𑀫𑀸𑀥𑀺𑀲𑀫𑁆𑀧𑀬𑁄𑀕𑀁 𑀕𑀢𑀸 𑀨𑀭𑀡𑀸𑀧𑀻𑀢𑀺, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀧𑀻𑀢𑀻𑀢𑀺.

𑁭𑁩. 𑀇𑀢𑀭𑀁 𑀧𑀦 𑀲𑀼𑀔𑀦𑀁 𑀲𑀼𑀔𑀁, 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀘 𑀓𑀸𑀬𑀘𑀺𑀢𑁆𑀢𑀸𑀩𑀸𑀥𑀦𑁆𑀢𑀺 𑀲𑀼𑀔𑀁, 𑀢𑀁 𑀲𑀸𑀢𑀮𑀓𑁆𑀔𑀡𑀁, 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀉𑀧𑀩𑁆𑀭𑀽𑀳𑀦𑀭𑀲𑀁, 𑀅𑀦𑀼𑀕𑁆𑀕𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀁. 𑀲𑀢𑀺𑀧𑀺 𑀘 𑀦𑁂𑀲𑀁 𑀓𑀢𑁆𑀣𑀘𑀺 𑀅𑀯𑀺𑀧𑁆𑀧𑀬𑁄𑀕𑁂 𑀇𑀝𑁆𑀞𑀸𑀭𑀫𑁆𑀫𑀡𑀧𑀝𑀺𑀮𑀸𑀪𑀢𑀼𑀝𑁆𑀞𑀺 𑀧𑀻𑀢𑀺. 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀲𑀼𑀔𑀁. 𑀬𑀢𑁆𑀣 𑀧𑀻𑀢𑀺, 𑀢𑀢𑁆𑀣 𑀲𑀼𑀔𑀁. 𑀬𑀢𑁆𑀣 𑀲𑀼𑀔𑀁, 𑀢𑀢𑁆𑀣 𑀦 𑀦𑀺𑀬𑀫𑀢𑁄 𑀧𑀻𑀢𑀺. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀧𑀻𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀁 𑀲𑀼𑀔𑀁. 𑀓𑀦𑁆𑀢𑀸𑀭𑀔𑀺𑀦𑁆𑀦𑀲𑁆𑀲 𑀯𑀦𑀦𑁆𑀢𑀼𑀤𑀓𑀤𑀲𑁆𑀲𑀦𑀲𑀯𑀦𑁂𑀲𑀼 𑀯𑀺𑀬 𑀧𑀻𑀢𑀺. 𑀯𑀦𑀘𑁆𑀙𑀸𑀬𑀸𑀧𑀯𑁂𑀲𑀦𑀉𑀤𑀓𑀧𑀭𑀺𑀪𑁄𑀕𑁂𑀲𑀼 𑀯𑀺𑀬 𑀲𑀼𑀔𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀅𑀬𑀜𑁆𑀘 𑀧𑀻𑀢𑀺 𑀇𑀤𑀜𑁆𑀘 𑀲𑀼𑀔𑀁 𑀅𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀇𑀤𑀁 𑀛𑀸𑀦𑀁 𑀧𑀻𑀢𑀺𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀅𑀣 𑀯𑀸 𑀧𑀻𑀢𑀺 𑀘 𑀲𑀼𑀔𑀜𑁆𑀘 𑀧𑀻𑀢𑀺𑀲𑀼𑀔𑀁, 𑀥𑀫𑁆𑀫𑀯𑀺𑀦𑀬𑀸𑀤𑀬𑁄 𑀯𑀺𑀬. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀫𑀲𑁆𑀲 𑀛𑀸𑀦𑀲𑁆𑀲, 𑀅𑀲𑁆𑀫𑀺𑀁 𑀯𑀸 𑀛𑀸𑀦𑁂 𑀅𑀢𑁆𑀣𑀻𑀢𑀺 𑀏𑀯𑀫𑁆𑀧𑀺 𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔𑀁. 𑀬𑀣𑁂𑀯 𑀳𑀺 𑀛𑀸𑀦𑀁, 𑀏𑀯𑀁 𑀧𑀻𑀢𑀺𑀲𑀼𑀔𑀫𑁆𑀧𑁂𑀢𑁆𑀣 𑀯𑀺𑀯𑁂𑀓𑀚𑀫𑁂𑀯 𑀳𑁄𑀢𑀺, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀧𑀤𑁂𑀦𑁂𑀯 ‘‘𑀯𑀺𑀯𑁂𑀓𑀚𑀁𑀧𑀻𑀢𑀺𑀲𑀼𑀔’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁬𑁭) 𑀦𑀬𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀢𑀢𑁆𑀣𑀸𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀧𑀞𑀫𑀁 𑀛𑀸𑀦𑀦𑁆𑀢𑀺 𑀇𑀤𑀁 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀉𑀧𑀕𑀦𑁆𑀢𑁆𑀯𑀸, 𑀧𑀸𑀧𑀼𑀡𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀫𑁆𑀧𑀸𑀤𑀬𑀺𑀢𑁆𑀯𑀸 𑀯𑀸, 𑀦𑀺𑀧𑁆𑀨𑀸𑀤𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀗𑁆𑀕𑁂 𑀧𑀦 ‘‘𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀨𑀼𑀲𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀏𑀯𑀫𑁂𑀯𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀳𑀭𑀢𑀻𑀢𑀺 𑀢𑀤𑀦𑀼𑀭𑀽𑀧𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀇𑀢𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀛𑀸𑀦𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑁆𑀲 𑀇𑀭𑀺𑀬𑀁 𑀯𑀼𑀢𑁆𑀢𑀺𑀁 𑀧𑀸𑀮𑀦𑀁 𑀬𑀧𑀦𑀁 𑀬𑀸𑀧𑀦𑀁 𑀘𑀸𑀭𑀁 𑀯𑀺𑀳𑀸𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 ‘‘𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁪𑁦).

𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀸𑀤𑀺

𑁭𑁪. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺, 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄, 𑀩𑁆𑀬𑀸𑀧𑀸𑀤𑁄, 𑀣𑀺𑀦𑀫𑀺𑀤𑁆𑀥𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀯𑀲𑁂𑀦 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀏𑀢𑁂𑀲𑀼 𑀅𑀧𑁆𑀧𑀳𑀻𑀦𑁂𑀲𑀼 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀲𑁆𑀲𑁂𑀢𑀸𑀦𑀺 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀛𑀸𑀦𑀓𑁆𑀔𑀡𑁂 𑀅𑀜𑁆𑀜𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺, 𑀢𑀣𑀸𑀧𑀺 𑀏𑀢𑀸𑀦𑁂𑀯 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀸𑀦𑀺. 𑀓𑀸𑀫𑀘𑁆𑀙𑀦𑁆𑀤𑁂𑀦 𑀳𑀺 𑀦𑀸𑀦𑀸𑀯𑀺𑀲𑀬𑀧𑁆𑀧𑀮𑁄𑀪𑀺𑀢𑀁 𑀘𑀺𑀢𑁆𑀢𑀁 𑀦 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀬𑀢𑀺. 𑀓𑀸𑀫𑀘𑁆𑀙𑀦𑁆𑀤𑀸𑀪𑀺𑀪𑀽𑀢𑀁 𑀯𑀸 𑀢𑀁 𑀦 𑀓𑀸𑀫𑀥𑀸𑀢𑀼𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺. 𑀩𑁆𑀬𑀸𑀧𑀸𑀤𑁂𑀦 𑀘𑀸𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀫𑀸𑀦𑀁 𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺. 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑀁 𑀅𑀓𑀫𑁆𑀫𑀜𑁆𑀜𑀁 𑀳𑁄𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑀭𑁂𑀢𑀁 𑀅𑀯𑀽𑀧𑀲𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀧𑀭𑀺𑀩𑁆𑀪𑀫𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑀳𑀢𑀁 𑀛𑀸𑀦𑀸𑀥𑀺𑀕𑀫𑀲𑀸𑀥𑀺𑀓𑀁 𑀧𑀝𑀺𑀧𑀤𑀁 𑀦𑀸𑀭𑁄𑀳𑀢𑀺. 𑀇𑀢𑀺 𑀯𑀺𑀲𑁂𑀲𑁂𑀦 𑀛𑀸𑀦𑀦𑁆𑀢𑀭𑀸𑀬𑀓𑀭𑀢𑁆𑀢𑀸 𑀏𑀢𑀸𑀦𑁂𑀯 𑀧𑀳𑀸𑀦𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀻𑀢𑀺.

𑀬𑀲𑁆𑀫𑀸 𑀧𑀦 𑀯𑀺𑀢𑀓𑁆𑀓𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀯𑀺𑀘𑀸𑀭𑁄 𑀅𑀦𑀼𑀧𑁆𑀧𑀩𑀦𑁆𑀥𑀢𑀺, 𑀢𑁂𑀳𑀺 𑀅𑀯𑀺𑀓𑁆𑀔𑁂𑀧𑀸𑀬 𑀲𑀫𑁆𑀧𑀸𑀤𑀺𑀢𑀧𑁆𑀧𑀬𑁄𑀕𑀲𑁆𑀲 𑀘𑁂𑀢𑀲𑁄 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀸 𑀧𑀻𑀢𑀺 𑀧𑀻𑀡𑀦𑀁, 𑀲𑀼𑀔𑀜𑁆𑀘 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺. 𑀅𑀣 𑀦𑀁 𑀲𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀏𑀢𑁂𑀳𑀺 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀧𑁆𑀧𑀩𑀦𑁆𑀥𑀦𑀧𑀻𑀡𑀦𑀉𑀧𑀩𑁆𑀭𑀽𑀳𑀦𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀏𑀓𑀕𑁆𑀕𑀢𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑁂 𑀲𑀫𑀁 𑀲𑀫𑁆𑀫𑀸 𑀘 𑀆𑀥𑀺𑀬𑀢𑀺, 𑀢𑀲𑁆𑀫𑀸 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑁂𑀲𑀼 𑀳𑀺 𑀏𑀢𑁂𑀲𑀼 𑀧𑀜𑁆𑀘𑀲𑀼 𑀛𑀸𑀦𑀁 𑀉𑀧𑁆𑀧𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀲𑁆𑀲 𑀏𑀢𑀸𑀦𑀺 𑀧𑀜𑁆𑀘 𑀲𑀫𑀦𑁆𑀦𑀸𑀕𑀢𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀦 𑀏𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀜𑁆𑀜𑀤𑁂𑀯 𑀛𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸 𑀧𑀦 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀁, 𑀅𑀝𑁆𑀞𑀗𑁆𑀕𑀺𑀓𑁄 𑀘 𑀫𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑁂𑀯 𑀧𑀜𑁆𑀘𑀗𑁆𑀕𑀺𑀓𑀦𑁆𑀢𑀺 𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑀸𑀦𑀺 𑀘 𑀧𑀜𑁆𑀘𑀗𑁆𑀕𑀸𑀦𑀺 𑀓𑀺𑀜𑁆𑀘𑀸𑀧𑀺 𑀉𑀧𑀘𑀸𑀭𑀓𑁆𑀔𑀡𑁂𑀧𑀺 𑀅𑀢𑁆𑀣𑀺, 𑀅𑀣 𑀔𑁄 𑀉𑀧𑀘𑀸𑀭𑁂 𑀧𑀓𑀢𑀺𑀘𑀺𑀢𑁆𑀢𑀢𑁄 𑀩𑀮𑀯𑀢𑀭𑀸𑀦𑀺. 𑀇𑀥 𑀧𑀦 𑀉𑀧𑀘𑀸𑀭𑀢𑁄𑀧𑀺 𑀩𑀮𑀯𑀢𑀭𑀸𑀦𑀺 𑀭𑀽𑀧𑀸𑀯𑀘𑀭𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺. 𑀏𑀢𑁆𑀣 𑀳𑀺 𑀯𑀺𑀢𑀓𑁆𑀓𑁄 𑀲𑀼𑀯𑀺𑀲𑀤𑁂𑀦 𑀆𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑀬𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀘𑀸𑀭𑁄 𑀅𑀢𑀺𑀯𑀺𑀬 𑀆𑀭𑀫𑁆𑀫𑀡𑀁 𑀅𑀦𑀼𑀫𑀚𑁆𑀚𑀫𑀸𑀦𑁄. 𑀧𑀻𑀢𑀺𑀲𑀼𑀔𑀁 𑀲𑀩𑁆𑀩𑀸𑀯𑀦𑁆𑀢𑀫𑁆𑀧𑀺 𑀓𑀸𑀬𑀁 𑀨𑀭𑀫𑀸𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁮). 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀧𑀺 𑀳𑁂𑀝𑁆𑀞𑀺𑀫𑀫𑁆𑀳𑀺 𑀲𑀫𑀼𑀕𑁆𑀕𑀧𑀝𑀮𑁂 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀯𑀺𑀬 𑀆𑀭𑀫𑁆𑀫𑀡𑁂𑀲𑀼 𑀨𑀼𑀲𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁂𑀢𑁂𑀲𑀁 𑀇𑀢𑀭𑁂𑀳𑀺 𑀯𑀺𑀲𑁂𑀲𑁄. 𑀢𑀢𑁆𑀣 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀓𑀺𑀜𑁆𑀘𑀸𑀧𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀣𑀸𑀧𑀺 𑀯𑀺𑀪𑀗𑁆𑀕𑁂 ‘‘𑀛𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑁄 𑀧𑀻𑀢𑀺 𑀲𑀼𑀔𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸’’𑀢𑀺 (𑀯𑀺𑀪. 𑁫𑁬𑁯) 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸 𑀅𑀗𑁆𑀕𑀫𑁂𑀯. 𑀬𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀉𑀤𑁆𑀤𑁂𑀲𑁄 𑀓𑀢𑁄, 𑀲𑁄𑀬𑁂𑀯 𑀢𑁂𑀦 𑀯𑀺𑀪𑀗𑁆𑀕𑁂 𑀧𑀓𑀸𑀲𑀺𑀢𑁄𑀢𑀺.

𑀢𑀺𑀯𑀺𑀥𑀓𑀮𑁆𑀬𑀸𑀡𑀁

𑁭𑁫. 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀺𑀯𑀺𑀥𑀓𑀮𑁆𑀬𑀸𑀡𑀢𑀸. 𑀢𑁂𑀲𑀁𑀬𑁂𑀯 𑀘 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀮𑀓𑁆𑀔𑀡𑀯𑀲𑁂𑀦 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀫𑀚𑁆𑀛𑁂, 𑀲𑀫𑁆𑀧𑀳𑀁𑀲𑀦𑀸 𑀧𑀭𑀺𑀬𑁄𑀲𑀸𑀦𑀁, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀆𑀤𑀺𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺, 𑀬𑁄 𑀢𑀲𑁆𑀲 𑀧𑀭𑀺𑀩𑀦𑁆𑀥𑁄, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀬𑀜𑁆𑀘 𑀧𑀭𑀺𑀩𑀦𑁆𑀥𑀢𑁄 𑀘𑀺𑀢𑁆𑀢𑀁 𑀯𑀺𑀲𑀼𑀚𑁆𑀛𑀢𑀺, 𑀬𑀜𑁆𑀘 𑀯𑀺𑀲𑀼𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀚𑁆𑀚𑀢𑀺, 𑀬𑀜𑁆𑀘 𑀧𑀝𑀺𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀺, 𑀆𑀤𑀺𑀲𑁆𑀲 𑀇𑀫𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀞𑀫𑀁 𑀛𑀸𑀦𑀁 𑀆𑀤𑀺𑀓𑀮𑁆𑀬𑀸𑀡𑀜𑁆𑀘𑁂𑀯 𑀳𑁄𑀢𑀺 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀜𑁆𑀘.