𑁫. 𑀲𑁂𑀲𑀓𑀲𑀺𑀡𑀦𑀺𑀤𑁆𑀤𑁂𑀲𑁄

𑀆𑀧𑁄𑀓𑀲𑀺𑀡𑀓𑀣𑀸

𑁯𑁧. 𑀇𑀤𑀸𑀦𑀺 𑀧𑀣𑀯𑀻𑀓𑀲𑀺𑀡𑀸𑀦𑀦𑁆𑀢𑀭𑁂 𑀆𑀧𑁄𑀓𑀲𑀺𑀡𑁂 𑀯𑀺𑀢𑁆𑀣𑀸𑀭𑀓𑀣𑀸 𑀳𑁄𑀢𑀺. 𑀬𑀣𑁂𑀯 𑀳𑀺 𑀧𑀣𑀯𑀻𑀓𑀲𑀺𑀡𑀁, 𑀏𑀯𑀁 𑀆𑀧𑁄𑀓𑀲𑀺𑀡𑀫𑁆𑀧𑀺 𑀪𑀸𑀯𑁂𑀢𑀼𑀓𑀸𑀫𑁂𑀦 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀆𑀧𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀓𑀢𑁂 𑀯𑀸 𑀅𑀓𑀢𑁂 𑀯𑀸𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣. 𑀇𑀢𑁄 𑀧𑀭𑀜𑁆𑀳𑀺 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑀇𑀥𑀸𑀧𑀺 𑀧𑀼𑀩𑁆𑀩𑁂𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀼𑀜𑁆𑀜𑀯𑀢𑁄 𑀅𑀓𑀢𑁂 𑀆𑀧𑀲𑁆𑀫𑀺𑀁 𑀧𑁄𑀓𑁆𑀔𑀭𑀡𑀺𑀬𑀸 𑀯𑀸 𑀢𑀴𑀸𑀓𑁂 𑀯𑀸 𑀮𑁄𑀡𑀺𑀬𑀁 𑀯𑀸 𑀲𑀫𑀼𑀤𑁆𑀤𑁂 𑀯𑀸 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑀽𑀴𑀲𑀺𑀯𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀢𑀲𑁆𑀲 𑀓𑀺𑀭𑀸𑀬𑀲𑁆𑀫𑀢𑁄 𑀮𑀸𑀪𑀲𑀓𑁆𑀓𑀸𑀭𑀁 𑀧𑀳𑀸𑀬 𑀯𑀺𑀯𑀺𑀢𑁆𑀢𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀻𑀢𑀺 𑀫𑀳𑀸𑀢𑀺𑀢𑁆𑀣𑁂 𑀦𑀸𑀯𑀫𑀸𑀭𑀽𑀳𑀺𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀁 𑀕𑀘𑁆𑀙𑀢𑁄 𑀅𑀦𑁆𑀢𑀭𑀸 𑀫𑀳𑀸𑀲𑀫𑀼𑀤𑁆𑀤𑀁 𑀑𑀮𑁄𑀓𑀬𑀢𑁄 𑀢𑀧𑁆𑀧𑀝𑀺𑀪𑀸𑀕𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀉𑀤𑀧𑀸𑀤𑀺.

𑀅𑀓𑀢𑀸𑀥𑀺𑀓𑀸𑀭𑁂𑀦 𑀘𑀢𑁆𑀢𑀸𑀭𑁄 𑀓𑀲𑀺𑀡𑀤𑁄𑀲𑁂 𑀧𑀭𑀺𑀳𑀭𑀦𑁆𑀢𑁂𑀦 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀯𑀡𑁆𑀡𑀸𑀦𑀫𑀜𑁆𑀜𑀢𑀭𑀯𑀡𑁆𑀡𑀁 𑀆𑀧𑀁 𑀅𑀕𑀳𑁂𑀢𑁆𑀯𑀸 𑀬𑀁 𑀧𑀦 𑀪𑀽𑀫𑀺𑀁 𑀅𑀲𑀫𑁆𑀧𑀢𑁆𑀢𑀫𑁂𑀯 𑀆𑀓𑀸𑀲𑁂 𑀲𑀼𑀤𑁆𑀥𑀯𑀢𑁆𑀣𑁂𑀦 𑀕𑀳𑀺𑀢𑀁 𑀉𑀤𑀓𑀁, 𑀅𑀜𑁆𑀜𑀁 𑀯𑀸 𑀢𑀣𑀸𑀭𑀽𑀧𑀁 𑀯𑀺𑀧𑁆𑀧𑀲𑀦𑁆𑀦𑀁 𑀅𑀦𑀸𑀯𑀺𑀮𑀁, 𑀢𑁂𑀦 𑀧𑀢𑁆𑀢𑀁 𑀯𑀸 𑀓𑀼𑀡𑁆𑀟𑀺𑀓𑀁 𑀯𑀸 𑀲𑀫𑀢𑀺𑀢𑁆𑀢𑀺𑀓𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀞𑀧𑁂𑀢𑁆𑀯𑀸 𑀲𑀼𑀔𑀦𑀺𑀲𑀺𑀦𑁆𑀦𑁂𑀦 𑀦 𑀯𑀡𑁆𑀡𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄. 𑀦 𑀮𑀓𑁆𑀔𑀡𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀦𑀺𑀲𑁆𑀲𑀬𑀲𑀯𑀡𑁆𑀡𑀫𑁂𑀯 𑀓𑀢𑁆𑀯𑀸 𑀉𑀲𑁆𑀲𑀤𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀫𑁆𑀩𑀼, 𑀉𑀤𑀓𑀁, 𑀯𑀸𑀭𑀺, 𑀲𑀮𑀺𑀮𑀦𑁆𑀢𑀺𑀆𑀤𑀻𑀲𑀼 𑀆𑀧𑁄𑀦𑀸𑀫𑁂𑀲𑀼 𑀧𑀸𑀓𑀝𑀦𑀸𑀫𑀯𑀲𑁂𑀦𑁂𑀯 ‘‘𑀆𑀧𑁄 𑀆𑀧𑁄’’𑀢𑀺 𑀪𑀸𑀯𑁂𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀪𑀸𑀯𑀬𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀫𑀺𑀢𑁆𑀢𑀤𑁆𑀯𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀥 𑀧𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀘𑀮𑀫𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀲𑀘𑁂 𑀨𑁂𑀡𑀧𑀼𑀧𑁆𑀨𑀼𑀴𑀓𑀫𑀺𑀲𑁆𑀲𑀁 𑀉𑀤𑀓𑀁 𑀳𑁄𑀢𑀺, 𑀢𑀸𑀤𑀺𑀲𑀫𑁂𑀯 𑀉𑀧𑀝𑁆𑀞𑀸𑀢𑀺, 𑀓𑀲𑀺𑀡𑀤𑁄𑀲𑁄 𑀧𑀜𑁆𑀜𑀸𑀬𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀦𑀺𑀧𑁆𑀧𑀭𑀺𑀧𑁆𑀨𑀦𑁆𑀤𑀁 𑀆𑀓𑀸𑀲𑁂 𑀞𑀧𑀺𑀢𑀫𑀡𑀺𑀢𑀸𑀮𑀯𑀡𑁆𑀝𑀁 𑀯𑀺𑀬 𑀫𑀡𑀺𑀫𑀬𑀸𑀤𑀸𑀲𑀫𑀡𑁆𑀟𑀮𑀫𑀺𑀯 𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀲𑁄 𑀢𑀲𑁆𑀲 𑀲𑀳 𑀉𑀧𑀝𑁆𑀞𑀸𑀦𑁂𑀦𑁂𑀯 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀘 𑀧𑀸𑀧𑀼𑀡𑀸𑀢𑀻𑀢𑀺. 𑀆𑀧𑁄𑀓𑀲𑀺𑀡𑀁.

𑀢𑁂𑀚𑁄𑀓𑀲𑀺𑀡𑀓𑀣𑀸

𑁯𑁨. 𑀢𑁂𑀚𑁄𑀓𑀲𑀺𑀡𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀧𑀺 𑀢𑁂𑀚𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀢𑀢𑁆𑀣 𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀼𑀜𑁆𑀜𑀯𑀢𑁄 𑀅𑀓𑀢𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀻𑀧𑀲𑀺𑀔𑀸𑀬 𑀯𑀸 𑀉𑀤𑁆𑀥𑀦𑁂 𑀯𑀸 𑀧𑀢𑁆𑀢𑀧𑀘𑀦𑀝𑁆𑀞𑀸𑀦𑁂 𑀯𑀸 𑀤𑀯𑀤𑀸𑀳𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀕𑁆𑀕𑀺𑀚𑀸𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀢𑀲𑁆𑀲 𑀳𑀸𑀬𑀲𑁆𑀫𑀢𑁄 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂 𑀉𑀧𑁄𑀲𑀣𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲 𑀤𑀻𑀧𑀲𑀺𑀔𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺.

𑀇𑀢𑀭𑁂𑀦 𑀧𑀦 𑀓𑀸𑀢𑀩𑁆𑀩𑀁. 𑀢𑀢𑁆𑀭𑀺𑀤𑀁 𑀓𑀭𑀡𑀯𑀺𑀥𑀸𑀦𑀁, 𑀲𑀺𑀦𑀺𑀤𑁆𑀥𑀸𑀦𑀺 𑀲𑀸𑀭𑀤𑀸𑀭𑀽𑀦𑀺 𑀨𑀸𑀮𑁂𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀖𑀝𑀺𑀓𑀁 𑀖𑀝𑀺𑀓𑀁 𑀓𑀢𑁆𑀯𑀸 𑀧𑀢𑀺𑀭𑀽𑀧𑀁 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀢𑁆𑀢𑀧𑀘𑀦𑀸𑀓𑀸𑀭𑁂𑀦 𑀭𑀸𑀲𑀺𑀁 𑀓𑀢𑁆𑀯𑀸 𑀆𑀮𑀺𑀫𑁆𑀧𑁂𑀢𑁆𑀯𑀸 𑀓𑀝𑀲𑀸𑀭𑀓𑁂 𑀯𑀸 𑀘𑀫𑁆𑀫𑁂 𑀯𑀸 𑀧𑀝𑁂 𑀯𑀸 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀸𑀢𑀩𑁆𑀩𑀁. 𑀢𑀁 𑀧𑀼𑀭𑀢𑁄 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀢𑀺𑀡𑀓𑀝𑁆𑀞𑀁 𑀯𑀸 𑀉𑀧𑀭𑀺 𑀥𑀽𑀫𑀲𑀺𑀔𑀁 𑀯𑀸 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀯𑁂𑀫𑀚𑁆𑀛𑁂 𑀖𑀦𑀚𑀸𑀮𑀸𑀬 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀦𑀻𑀮𑀦𑁆𑀢𑀺 𑀯𑀸 𑀧𑀻𑀢𑀦𑁆𑀢𑀺 𑀯𑀸𑀢𑀺𑀆𑀤𑀺𑀯𑀲𑁂𑀦 𑀯𑀡𑁆𑀡𑁄 𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄, 𑀉𑀡𑁆𑀳𑀢𑁆𑀢𑀯𑀲𑁂𑀦 𑀮𑀓𑁆𑀔𑀡𑀁 𑀦 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀦𑀺𑀲𑁆𑀲𑀬𑀲𑀯𑀡𑁆𑀡𑀫𑁂𑀯 𑀓𑀢𑁆𑀯𑀸 𑀉𑀲𑁆𑀲𑀤𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑁂 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀧𑀸𑀯𑀓𑁄, 𑀓𑀡𑁆𑀳𑀯𑀢𑁆𑀢𑀦𑀻, 𑀚𑀸𑀢𑀯𑁂𑀤𑁄, 𑀳𑀼𑀢𑀸𑀲𑀦𑁄𑀢𑀺𑀆𑀤𑀻𑀲𑀼 𑀅𑀕𑁆𑀕𑀺𑀦𑀸𑀫𑁂𑀲𑀼 𑀧𑀸𑀓𑀝𑀦𑀸𑀫𑀯𑀲𑁂𑀦𑁂𑀯 ‘‘𑀢𑁂𑀚𑁄 𑀢𑁂𑀚𑁄’’𑀢𑀺 𑀪𑀸𑀯𑁂𑀢𑀩𑁆𑀩𑀁.

𑀢𑀲𑁆𑀲𑁂𑀯𑀁 𑀪𑀸𑀯𑀬𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀫𑀺𑀢𑁆𑀢𑀤𑁆𑀯𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀚𑀸𑀮𑀁 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑀲𑀤𑀺𑀲𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀅𑀓𑀢𑁂 𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀓𑀲𑀺𑀡𑀤𑁄𑀲𑁄 𑀧𑀜𑁆𑀜𑀸𑀬𑀢𑀺, 𑀅𑀮𑀸𑀢𑀔𑀡𑁆𑀟𑀁 𑀯𑀸 𑀅𑀗𑁆𑀕𑀸𑀭𑀧𑀺𑀡𑁆𑀟𑁄 𑀯𑀸 𑀙𑀸𑀭𑀺𑀓𑀸 𑀯𑀸 𑀥𑀽𑀫𑁄 𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑀺𑀘𑁆𑀘𑀮𑀁 𑀆𑀓𑀸𑀲𑁂 𑀞𑀧𑀺𑀢𑀭𑀢𑁆𑀢𑀓𑀫𑁆𑀩𑀮𑀓𑁆𑀔𑀡𑁆𑀟𑀁 𑀯𑀺𑀬 𑀲𑀼𑀯𑀡𑁆𑀡𑀢𑀸𑀮𑀯𑀡𑁆𑀝𑀁 𑀯𑀺𑀬 𑀓𑀜𑁆𑀘𑀦𑀢𑁆𑀣𑀫𑁆𑀪𑁄 𑀯𑀺𑀬 𑀘 𑀉𑀧𑀝𑁆𑀞𑀸𑀢𑀺. 𑀲𑁄 𑀢𑀲𑁆𑀲 𑀲𑀳 𑀉𑀧𑀝𑁆𑀞𑀸𑀦𑁂𑀦𑁂𑀯 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀘 𑀧𑀸𑀧𑀼𑀡𑀸𑀢𑀻𑀢𑀺. 𑀢𑁂𑀚𑁄𑀓𑀲𑀺𑀡𑀁.

𑀯𑀸𑀬𑁄𑀓𑀲𑀺𑀡𑀓𑀣𑀸

𑁯𑁩. 𑀯𑀸𑀬𑁄𑀓𑀲𑀺𑀡𑀁 𑀪𑀸𑀯𑁂𑀢𑀼𑀓𑀸𑀫𑁂𑀦𑀸𑀧𑀺 𑀯𑀸𑀬𑀼𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀢𑀜𑁆𑀘 𑀔𑁄 𑀤𑀺𑀝𑁆𑀞𑀯𑀲𑁂𑀦 𑀯𑀸 𑀨𑀼𑀝𑁆𑀞𑀯𑀲𑁂𑀦 𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀯𑀸𑀬𑁄𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀯𑀸𑀬𑀼𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀉𑀘𑁆𑀙𑀕𑁆𑀕𑀁 𑀯𑀸 𑀏𑀭𑀺𑀢𑀁 𑀲𑀫𑁂𑀭𑀺𑀢𑀁 𑀉𑀧𑀮𑀓𑁆𑀔𑁂𑀢𑀺, 𑀯𑁂𑀴𑀕𑁆𑀕𑀁 𑀯𑀸…𑀧𑁂… 𑀭𑀼𑀓𑁆𑀔𑀕𑁆𑀕𑀁 𑀯𑀸 𑀓𑁂𑀲𑀕𑁆𑀕𑀁 𑀯𑀸 𑀏𑀭𑀺𑀢𑀁 𑀲𑀫𑁂𑀭𑀺𑀢𑀁 𑀉𑀧𑀮𑀓𑁆𑀔𑁂𑀢𑀺, 𑀓𑀸𑀬𑀲𑁆𑀫𑀺𑀁 𑀯𑀸 𑀨𑀼𑀝𑁆𑀞𑀁 𑀉𑀧𑀮𑀓𑁆𑀔𑁂𑀢𑀻’’𑀢𑀺. 𑀢𑀲𑁆𑀫𑀸 𑀲𑀫𑀲𑀻𑀲𑀝𑁆𑀞𑀺𑀢𑀁 𑀖𑀦𑀧𑀢𑁆𑀢𑀁 𑀉𑀘𑁆𑀙𑀼𑀁 𑀯𑀸 𑀯𑁂𑀴𑀼𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀖𑀦𑀓𑁂𑀲𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀻𑀲𑀁 𑀯𑀸 𑀯𑀸𑀢𑁂𑀦 𑀧𑀳𑀭𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀯𑀸𑀢𑁄 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀧𑀳𑀭𑀢𑀻’’𑀢𑀺 𑀲𑀢𑀺𑀁 𑀞𑀧𑁂𑀢𑁆𑀯𑀸, 𑀬𑀁 𑀯𑀸 𑀧𑀦𑀲𑁆𑀲 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀬 𑀯𑀸 𑀪𑀺𑀢𑁆𑀢𑀺𑀙𑀺𑀤𑁆𑀤𑁂𑀦 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀯𑀸𑀢𑁄 𑀓𑀸𑀬𑀧𑁆𑀧𑀤𑁂𑀲𑀁 𑀧𑀳𑀭𑀢𑀺, 𑀢𑀢𑁆𑀣 𑀲𑀢𑀺𑀁 𑀞𑀧𑁂𑀢𑁆𑀯𑀸 𑀯𑀸𑀢𑀫𑀸𑀮𑀼𑀢𑀅𑀦𑀺𑀮𑀸𑀤𑀻𑀲𑀼 𑀯𑀸𑀬𑀼𑀦𑀸𑀫𑁂𑀲𑀼 𑀧𑀸𑀓𑀝𑀦𑀸𑀫𑀯𑀲𑁂𑀦𑁂𑀯 ‘‘𑀯𑀸𑀢𑁄 𑀯𑀸𑀢𑁄’’𑀢𑀺 𑀪𑀸𑀯𑁂𑀢𑀩𑁆𑀩𑀁. 𑀇𑀥 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀢𑁄 𑀑𑀢𑀸𑀭𑀺𑀢𑀫𑀢𑁆𑀢𑀲𑁆𑀲 𑀧𑀸𑀬𑀸𑀲𑀲𑁆𑀲 𑀉𑀲𑀼𑀫𑀯𑀝𑁆𑀝𑀺𑀲𑀤𑀺𑀲𑀁 𑀘𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀲𑀦𑁆𑀦𑀺𑀲𑀺𑀦𑁆𑀦𑀁 𑀳𑁄𑀢𑀺 𑀦𑀺𑀘𑁆𑀘𑀮𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀯𑀸𑀬𑁄𑀓𑀲𑀺𑀡𑀁.

𑀦𑀻𑀮𑀓𑀲𑀺𑀡𑀓𑀣𑀸

𑁯𑁪. 𑀢𑀤𑀦𑀦𑁆𑀢𑀭𑀁 𑀧𑀦 𑀦𑀻𑀮𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀦𑀻𑀮𑀓𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺 𑀯𑀘𑀦𑀢𑁄 𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀼𑀜𑁆𑀜𑀯𑀢𑁄 𑀢𑀸𑀯 𑀢𑀣𑀸𑀭𑀽𑀧𑀁 𑀫𑀸𑀮𑀸𑀕𑀘𑁆𑀙𑀁 𑀯𑀸 𑀧𑀽𑀚𑀸𑀞𑀸𑀦𑁂𑀲𑀼 𑀧𑀼𑀧𑁆𑀨𑀲𑀦𑁆𑀣𑀭𑀁 𑀯𑀸 𑀦𑀻𑀮𑀯𑀢𑁆𑀣𑀫𑀡𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀦 𑀦𑀻𑀮𑀼𑀧𑁆𑀧𑀮𑀕𑀺𑀭𑀺𑀓𑀡𑁆𑀡𑀺𑀓𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀬𑀣𑀸 𑀓𑁂𑀲𑀭𑀁 𑀯𑀸 𑀯𑀡𑁆𑀝𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀗𑁆𑀕𑁄𑀝𑀓𑀁 𑀯𑀸 𑀓𑀭𑀡𑁆𑀟𑀧𑀝𑀮𑀁 𑀯𑀸 𑀧𑀢𑁆𑀢𑁂𑀳𑀺𑀬𑁂𑀯 𑀲𑀫𑀢𑀺𑀢𑁆𑀢𑀺𑀓𑀁 𑀧𑀽𑀭𑁂𑀢𑁆𑀯𑀸 𑀲𑀦𑁆𑀣𑀭𑀺𑀢𑀩𑁆𑀩𑀁. 𑀦𑀻𑀮𑀯𑀡𑁆𑀡𑁂𑀦 𑀯𑀸 𑀯𑀢𑁆𑀣𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀁. 𑀫𑀼𑀔𑀯𑀝𑁆𑀝𑀺𑀬𑀁 𑀯𑀸 𑀅𑀲𑁆𑀲 𑀪𑁂𑀭𑀺𑀢𑀮𑀫𑀺𑀯 𑀩𑀦𑁆𑀥𑀺𑀢𑀩𑁆𑀩𑀁. 𑀓𑀁𑀲𑀦𑀻𑀮𑀧𑀮𑀸𑀲𑀦𑀻𑀮𑀅𑀜𑁆𑀚𑀦𑀦𑀻𑀮𑀸𑀦𑀁 𑀯𑀸 𑀅𑀜𑁆𑀜𑀢𑀭𑁂𑀦 𑀥𑀸𑀢𑀼𑀦𑀸 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦 𑀲𑀁𑀳𑀸𑀭𑀺𑀫𑀁 𑀯𑀸 𑀪𑀺𑀢𑁆𑀢𑀺𑀬𑀁𑀬𑁂𑀯 𑀯𑀸 𑀓𑀲𑀺𑀡𑀫𑀡𑁆𑀟𑀮𑀁 𑀓𑀢𑁆𑀯𑀸 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀢𑀢𑁄 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦 ‘‘𑀦𑀻𑀮𑀁 𑀦𑀻𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀇𑀥𑀸𑀧𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀓𑀲𑀺𑀡𑀤𑁄𑀲𑁄 𑀧𑀜𑁆𑀜𑀸𑀬𑀢𑀺, 𑀓𑁂𑀲𑀭𑀤𑀡𑁆𑀟𑀓𑀧𑀢𑁆𑀢𑀦𑁆𑀢𑀭𑀺𑀓𑀸𑀤𑀻𑀦𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀓𑀲𑀺𑀡𑀫𑀡𑁆𑀟𑀮𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀆𑀓𑀸𑀲𑁂 𑀫𑀡𑀺𑀢𑀸𑀮𑀯𑀡𑁆𑀝𑀲𑀤𑀺𑀲𑀁 𑀉𑀧𑀝𑁆𑀞𑀸𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀦𑀻𑀮𑀓𑀲𑀺𑀡𑀁.

𑀧𑀻𑀢𑀓𑀲𑀺𑀡𑀓𑀣𑀸

𑁯𑁫. 𑀧𑀻𑀢𑀓𑀲𑀺𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀻𑀢𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀧𑀻𑀢𑀓𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀼𑀜𑁆𑀜𑀯𑀢𑁄 𑀢𑀣𑀸𑀭𑀽𑀧𑀁 𑀫𑀸𑀮𑀸𑀕𑀘𑁆𑀙𑀁 𑀯𑀸 𑀧𑀼𑀧𑁆𑀨𑀲𑀦𑁆𑀣𑀭𑀁 𑀯𑀸 𑀧𑀻𑀢𑀯𑀢𑁆𑀣𑀥𑀸𑀢𑀽𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀢𑀲𑁆𑀲 𑀓𑀺𑀭𑀸𑀬𑀲𑁆𑀫𑀢𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀧𑀢𑁆𑀢𑀗𑁆𑀕𑀧𑀼𑀧𑁆𑀨𑁂𑀳𑀺 𑀓𑀢𑀁 𑀆𑀲𑀦𑀧𑀽𑀚𑀁 𑀧𑀲𑁆𑀲𑀢𑁄 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀆𑀲𑀦𑀧𑁆𑀧𑀫𑀸𑀡𑀁 𑀦𑀺𑀫𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀇𑀢𑀭𑁂𑀦 𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀦𑀸 𑀯𑀸 𑀧𑀻𑀢𑀯𑀢𑁆𑀣𑁂𑀦 𑀯𑀸 𑀥𑀸𑀢𑀼𑀦𑀸 𑀯𑀸 𑀦𑀻𑀮𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀲𑀺𑀡𑀁 𑀓𑀢𑁆𑀯𑀸 ‘‘𑀧𑀻𑀢𑀓𑀁 𑀧𑀻𑀢𑀓’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀧𑀻𑀢𑀓𑀲𑀺𑀡𑀁.

𑀮𑁄𑀳𑀺𑀢𑀓𑀲𑀺𑀡𑀓𑀣𑀸

𑁯𑁬. 𑀮𑁄𑀳𑀺𑀢𑀓𑀲𑀺𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀮𑁄𑀳𑀺𑀢𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀮𑁄𑀳𑀺𑀢𑀓𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀓𑀢𑀸𑀥𑀺𑀓𑀸𑀭𑀲𑁆𑀲 𑀧𑀼𑀜𑁆𑀜𑀯𑀢𑁄 𑀢𑀣𑀸𑀭𑀽𑀧𑀁 𑀩𑀦𑁆𑀥𑀼𑀚𑀻𑀯𑀓𑀸𑀤𑀺𑀫𑀸𑀮𑀸𑀕𑀘𑁆𑀙𑀁 𑀯𑀸 𑀧𑀼𑀧𑁆𑀨𑀲𑀦𑁆𑀣𑀭𑀁 𑀯𑀸 𑀮𑁄𑀳𑀺𑀢𑀓𑀯𑀢𑁆𑀣𑀫𑀡𑀺𑀥𑀸𑀢𑀽𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀦 𑀚𑀬𑀲𑀼𑀫𑀦𑀩𑀦𑁆𑀥𑀼𑀚𑀻𑀯𑀓𑀭𑀢𑁆𑀢𑀓𑁄𑀭𑀡𑁆𑀟𑀓𑀸𑀤𑀺𑀧𑀼𑀧𑁆𑀨𑁂𑀳𑀺 𑀯𑀸 𑀭𑀢𑁆𑀢𑀯𑀢𑁆𑀣𑁂𑀦 𑀯𑀸 𑀥𑀸𑀢𑀼𑀦𑀸 𑀯𑀸 𑀦𑀻𑀮𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀲𑀺𑀡𑀁 𑀓𑀢𑁆𑀯𑀸 ‘‘𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀮𑁄𑀳𑀺𑀢𑀓𑀲𑀺𑀡𑀁.

𑀑𑀤𑀸𑀢𑀓𑀲𑀺𑀡𑀓𑀣𑀸

𑁯𑁭. 𑀑𑀤𑀸𑀢𑀓𑀲𑀺𑀡𑁂𑀧𑀺 𑀑𑀤𑀸𑀢𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀑𑀤𑀸𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺 𑀯𑀘𑀦𑀢𑁄 𑀓𑀢𑀸𑀥𑀺𑀓𑀸𑀭𑀲𑁆𑀲 𑀢𑀸𑀯 𑀧𑀼𑀜𑁆𑀜𑀯𑀢𑁄 𑀢𑀣𑀸𑀭𑀽𑀧𑀁 𑀫𑀸𑀮𑀸𑀕𑀘𑁆𑀙𑀁 𑀯𑀸 𑀯𑀲𑁆𑀲𑀺𑀓𑀲𑀼𑀫𑀦𑀸𑀤𑀺𑀧𑀼𑀧𑁆𑀨𑀲𑀦𑁆𑀣𑀭𑀁 𑀯𑀸 𑀓𑀼𑀫𑀼𑀤𑀧𑀤𑀼𑀫𑀭𑀸𑀲𑀺𑀁 𑀯𑀸 𑀑𑀤𑀸𑀢𑀯𑀢𑁆𑀣𑀥𑀸𑀢𑀽𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀺𑀧𑀼𑀫𑀡𑁆𑀟𑀮𑀭𑀚𑀢𑀫𑀡𑁆𑀟𑀮𑀘𑀦𑁆𑀤𑀫𑀡𑁆𑀟𑀮𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀇𑀢𑀭𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀑𑀤𑀸𑀢𑀧𑀼𑀧𑁆𑀨𑁂𑀳𑀺 𑀯𑀸 𑀑𑀤𑀸𑀢𑀯𑀢𑁆𑀣𑁂𑀦 𑀯𑀸 𑀥𑀸𑀢𑀼𑀦𑀸 𑀯𑀸 𑀦𑀻𑀮𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀲𑀺𑀡𑀁 𑀓𑀢𑁆𑀯𑀸 ‘‘𑀑𑀤𑀸𑀢𑀁 𑀑𑀤𑀸𑀢’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀑𑀤𑀸𑀢𑀓𑀲𑀺𑀡𑀁.

𑀆𑀮𑁄𑀓𑀓𑀲𑀺𑀡𑀓𑀣𑀸

𑁯𑁮. 𑀆𑀮𑁄𑀓𑀓𑀲𑀺𑀡𑁂 𑀧𑀦 𑀆𑀮𑁄𑀓𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀆𑀮𑁄𑀓𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀪𑀺𑀢𑁆𑀢𑀺𑀙𑀺𑀤𑁆𑀤𑁂 𑀯𑀸 𑀢𑀸𑀴𑀘𑁆𑀙𑀺𑀤𑁆𑀤𑁂 𑀯𑀸 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀬 𑀯𑀸𑀢𑀺 𑀯𑀘𑀦𑀢𑁄 𑀓𑀢𑀸𑀥𑀺𑀓𑀸𑀭𑀲𑁆𑀲 𑀢𑀸𑀯 𑀧𑀼𑀜𑁆𑀜𑀯𑀢𑁄 𑀬𑀁 𑀪𑀺𑀢𑁆𑀢𑀺𑀙𑀺𑀤𑁆𑀤𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦 𑀲𑀽𑀭𑀺𑀬𑀸𑀮𑁄𑀓𑁄 𑀯𑀸 𑀘𑀦𑁆𑀤𑀸𑀮𑁄𑀓𑁄 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀪𑀺𑀢𑁆𑀢𑀺𑀬𑀁 𑀯𑀸 𑀪𑀽𑀫𑀺𑀬𑀁 𑀯𑀸 𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀖𑀦𑀧𑀡𑁆𑀡𑀭𑀼𑀓𑁆𑀔𑀲𑀸𑀔𑀦𑁆𑀢𑀭𑁂𑀦 𑀯𑀸 𑀖𑀦𑀲𑀸𑀔𑀸𑀫𑀡𑁆𑀟𑀧𑀦𑁆𑀢𑀭𑁂𑀦 𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀽𑀫𑀺𑀬𑀫𑁂𑀯 𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀦𑀸𑀧𑀺 𑀢𑀤𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁄𑀪𑀸𑀲𑀫𑀡𑁆𑀟𑀮𑀁 ‘‘𑀑𑀪𑀸𑀲𑁄 𑀑𑀪𑀸𑀲𑁄’’𑀢𑀺 𑀯𑀸 ‘‘𑀆𑀮𑁄𑀓𑁄 𑀆𑀮𑁄𑀓𑁄’’𑀢𑀺 𑀯𑀸 𑀪𑀸𑀯𑁂𑀢𑀩𑁆𑀩𑀁. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁂𑀦 𑀖𑀝𑁂 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀖𑀝𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀖𑀝𑁂 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀫𑀼𑀔𑀁 𑀞𑀧𑁂𑀢𑀩𑁆𑀩𑀁. 𑀢𑁂𑀦 𑀙𑀺𑀤𑁆𑀤𑁂𑀦 𑀤𑀻𑀧𑀸𑀮𑁄𑀓𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀢𑁆𑀢𑀺𑀬𑀁 𑀫𑀡𑁆𑀟𑀮𑀁 𑀓𑀭𑁄𑀢𑀺, 𑀢𑀁 𑀆𑀮𑁄𑀓𑁄 𑀆𑀮𑁄𑀓𑁄𑀢𑀺 𑀪𑀸𑀯𑁂𑀢𑀩𑁆𑀩𑀁. 𑀇𑀤𑀫𑀺𑀢𑀭𑁂𑀳𑀺 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺. 𑀇𑀥 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀪𑀺𑀢𑁆𑀢𑀺𑀬𑀁 𑀯𑀸 𑀪𑀽𑀫𑀺𑀬𑀁 𑀯𑀸 𑀉𑀝𑁆𑀞𑀺𑀢𑀫𑀡𑁆𑀟𑀮𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀖𑀦𑀯𑀺𑀧𑁆𑀧𑀲𑀦𑁆𑀦𑀆𑀮𑁄𑀓𑀧𑀼𑀜𑁆𑀚𑀲𑀤𑀺𑀲𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀆𑀮𑁄𑀓𑀓𑀲𑀺𑀡𑀁.

𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀓𑀣𑀸

𑁯𑁯. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑁂𑀧𑀺 𑀆𑀓𑀸𑀲𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀆𑀓𑀸𑀲𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀪𑀺𑀢𑁆𑀢𑀺𑀙𑀺𑀤𑁆𑀤𑁂 𑀯𑀸 𑀢𑀸𑀴𑀘𑁆𑀙𑀺𑀤𑁆𑀤𑁂 𑀯𑀸 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀬 𑀯𑀸𑀢𑀺 𑀯𑀘𑀦𑀢𑁄 𑀓𑀢𑀸𑀥𑀺𑀓𑀸𑀭𑀲𑁆𑀲 𑀢𑀸𑀯 𑀧𑀼𑀜𑁆𑀜𑀯𑀢𑁄 𑀪𑀺𑀢𑁆𑀢𑀺𑀙𑀺𑀤𑁆𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀤𑀺𑀲𑁆𑀯𑀸𑀯 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑁂𑀦 𑀲𑀼𑀘𑁆𑀙𑀦𑁆𑀦𑀫𑀡𑁆𑀟𑀧𑁂 𑀯𑀸 𑀘𑀫𑁆𑀫𑀓𑀝𑀲𑀸𑀭𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀙𑀺𑀤𑁆𑀤𑀁 𑀓𑀢𑁆𑀯𑀸 𑀢𑀤𑁂𑀯 𑀯𑀸 𑀪𑀺𑀢𑁆𑀢𑀺𑀙𑀺𑀤𑁆𑀤𑀸𑀤𑀺𑀪𑁂𑀤𑀁 𑀙𑀺𑀤𑁆𑀤𑀁 ‘‘𑀆𑀓𑀸𑀲𑁄 𑀆𑀓𑀸𑀲𑁄’’𑀢𑀺 𑀪𑀸𑀯𑁂𑀢𑀩𑁆𑀩𑀁. 𑀇𑀥 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀢𑁆𑀢𑀺𑀧𑀭𑀺𑀬𑀦𑁆𑀢𑀸𑀤𑀻𑀳𑀺 𑀙𑀺𑀤𑁆𑀤𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀯𑀟𑁆𑀠𑀺𑀬𑀫𑀸𑀦𑀫𑁆𑀧𑀺 𑀦 𑀯𑀟𑁆𑀠𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑀸𑀓𑀸𑀲𑀫𑀡𑁆𑀟𑀮𑀫𑁂𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀯𑀟𑁆𑀠𑀺𑀬𑀫𑀸𑀦𑀜𑁆𑀘 𑀯𑀟𑁆𑀠𑀢𑀺. 𑀲𑁂𑀲𑀁 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀁.

𑀇𑀢𑀺 𑀓𑀲𑀺𑀡𑀸𑀦𑀺 𑀤𑀲𑀩𑀮𑁄,

𑀤𑀲 𑀬𑀸𑀦𑀺 𑀅𑀯𑁄𑀘 𑀲𑀩𑁆𑀩𑀥𑀫𑁆𑀫𑀤𑀲𑁄;

𑀭𑀽𑀧𑀸𑀯𑀘𑀭𑀫𑁆𑀳𑀺 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀳𑁂𑀢𑀽𑀦𑀺.

𑀏𑀯𑀁 𑀢𑀸𑀦𑀺 𑀘 𑀢𑁂𑀲𑀜𑁆𑀘,

𑀪𑀸𑀯𑀦𑀸𑀦𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸𑀦;

𑀢𑁂𑀲𑁆𑀯𑁂𑀯 𑀅𑀬𑀁 𑀪𑀺𑀬𑁆𑀬𑁄,

𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀧𑀓𑀺𑀡𑁆𑀡𑀓𑀓𑀣𑀸

𑁧𑁦𑁦. 𑀇𑀫𑁂𑀲𑀼 𑀳𑀺 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻𑀢𑀺𑀆𑀤𑀺𑀪𑀸𑀯𑁄, 𑀆𑀓𑀸𑀲𑁂 𑀯𑀸 𑀉𑀤𑀓𑁂 𑀯𑀸 𑀧𑀣𑀯𑀺𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀤𑀲𑀸 𑀕𑀫𑀦𑀁, 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀓𑀧𑁆𑀧𑀦𑀁 𑀯𑀸, 𑀧𑀭𑀺𑀢𑁆𑀢𑀅𑀧𑁆𑀧𑀫𑀸𑀡𑀦𑀬𑁂𑀦 𑀅𑀪𑀺𑀪𑀸𑀬𑀢𑀦𑀧𑀝𑀺𑀮𑀸𑀪𑁄𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀆𑀧𑁄𑀓𑀲𑀺𑀡𑀯𑀲𑁂𑀦 𑀧𑀣𑀯𑀺𑀬𑀁 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑁆𑀫𑀼𑀚𑁆𑀚𑀦𑀁, 𑀉𑀤𑀓𑀯𑀼𑀝𑁆𑀞𑀺𑀲𑀫𑀼𑀧𑁆𑀧𑀸𑀤𑀦𑀁, 𑀦𑀤𑀻𑀲𑀫𑀼𑀤𑁆𑀤𑀸𑀤𑀺𑀦𑀺𑀫𑁆𑀫𑀸𑀦𑀁, 𑀧𑀣𑀯𑀻𑀧𑀩𑁆𑀩𑀢𑀧𑀸𑀲𑀸𑀤𑀸𑀤𑀻𑀦𑀁 𑀓𑀫𑁆𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀢𑁂𑀚𑁄𑀓𑀲𑀺𑀡𑀯𑀲𑁂𑀦 𑀥𑀽𑀫𑀸𑀬𑀦𑀸, 𑀧𑀚𑁆𑀚𑀮𑀦𑀸, 𑀅𑀗𑁆𑀕𑀸𑀭𑀯𑀼𑀝𑁆𑀞𑀺𑀲𑀫𑀼𑀧𑁆𑀧𑀸𑀤𑀦𑀁, 𑀢𑁂𑀚𑀲𑀸 𑀢𑁂𑀚𑁄𑀧𑀭𑀺𑀬𑀸𑀤𑀸𑀦𑀁, 𑀬𑀤𑁂𑀯 𑀲𑁄 𑀇𑀘𑁆𑀙𑀢𑀺 𑀢𑀲𑁆𑀲 𑀟𑀳𑀦𑀲𑀫𑀢𑁆𑀣𑀢𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀢𑁆𑀣𑀸𑀬 𑀆𑀮𑁄𑀓𑀓𑀭𑀡𑀁, 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂 𑀢𑁂𑀚𑁄𑀥𑀸𑀢𑀼𑀬𑀸 𑀲𑀭𑀻𑀭𑀚𑁆𑀛𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀯𑀸𑀬𑁄𑀓𑀲𑀺𑀡𑀯𑀲𑁂𑀦 𑀯𑀸𑀬𑀼𑀕𑀢𑀺𑀕𑀫𑀦𑀁, 𑀯𑀸𑀢𑀯𑀼𑀝𑁆𑀞𑀺𑀲𑀫𑀼𑀧𑁆𑀧𑀸𑀤𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀦𑀻𑀮𑀓𑀲𑀺𑀡𑀯𑀲𑁂𑀦 𑀦𑀻𑀮𑀭𑀽𑀧𑀦𑀺𑀫𑁆𑀫𑀸𑀦𑀁, 𑀅𑀦𑁆𑀥𑀓𑀸𑀭𑀓𑀭𑀡𑀁, 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀦𑀬𑁂𑀦 𑀅𑀪𑀺𑀪𑀸𑀬𑀢𑀦𑀧𑀝𑀺𑀮𑀸𑀪𑁄, 𑀲𑀼𑀪𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑁄𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀧𑀻𑀢𑀓𑀲𑀺𑀡𑀯𑀲𑁂𑀦 𑀧𑀻𑀢𑀓𑀭𑀽𑀧𑀦𑀺𑀫𑁆𑀫𑀸𑀦𑀁, 𑀲𑀼𑀯𑀡𑁆𑀡𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀦𑀸, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀪𑀺𑀪𑀸𑀬𑀢𑀦𑀧𑀝𑀺𑀮𑀸𑀪𑁄, 𑀲𑀼𑀪𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑁄 𑀘𑀸𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀮𑁄𑀳𑀺𑀢𑀓𑀲𑀺𑀡𑀯𑀲𑁂𑀦 𑀮𑁄𑀳𑀺𑀢𑀓𑀭𑀽𑀧𑀦𑀺𑀫𑁆𑀫𑀸𑀦𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀪𑀺𑀪𑀸𑀬𑀢𑀦𑀧𑀝𑀺𑀮𑀸𑀪𑁄, 𑀲𑀼𑀪𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑁄𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀑𑀤𑀸𑀢𑀓𑀲𑀺𑀡𑀯𑀲𑁂𑀦 𑀑𑀤𑀸𑀢𑀭𑀽𑀧𑀦𑀺𑀫𑁆𑀫𑀸𑀦𑀁, 𑀣𑀺𑀦𑀫𑀺𑀤𑁆𑀥𑀲𑁆𑀲 𑀤𑀽𑀭𑀪𑀸𑀯𑀓𑀭𑀡𑀁, 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀁, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀢𑁆𑀣𑀸𑀬 𑀆𑀮𑁄𑀓𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀆𑀮𑁄𑀓𑀓𑀲𑀺𑀡𑀯𑀲𑁂𑀦 𑀲𑀧𑁆𑀧𑀪𑀸𑀭𑀽𑀧𑀦𑀺𑀫𑁆𑀫𑀸𑀦𑀁, 𑀣𑀺𑀦𑀫𑀺𑀤𑁆𑀥𑀲𑁆𑀲 𑀤𑀽𑀭𑀪𑀸𑀯𑀓𑀭𑀡𑀁, 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀁, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀢𑁆𑀣𑀁 𑀆𑀮𑁄𑀓𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀆𑀓𑀸𑀲𑀓𑀲𑀺𑀡𑀯𑀲𑁂𑀦 𑀧𑀝𑀺𑀘𑁆𑀙𑀦𑁆𑀦𑀸𑀦𑀁 𑀯𑀺𑀯𑀝𑀓𑀭𑀡𑀁, 𑀅𑀦𑁆𑀢𑁄𑀧𑀣𑀯𑀻𑀧𑀩𑁆𑀩𑀢𑀸𑀤𑀻𑀲𑀼𑀧𑀺 𑀆𑀓𑀸𑀲𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁, 𑀢𑀺𑀭𑁄𑀓𑀼𑀟𑁆𑀟𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺.

𑀲𑀩𑁆𑀩𑀸𑀦𑁂𑀯 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀅𑀤𑁆𑀯𑀬𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀇𑀫𑀁 𑀧𑀪𑁂𑀤𑀁 𑀮𑀪𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀺. 𑀉𑀤𑁆𑀥𑀫𑀥𑁄𑀢𑀺𑀭𑀺𑀬𑀁 𑀅𑀤𑁆𑀯𑀬𑀫𑀧𑁆𑀧𑀫𑀸𑀡’’𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀉𑀤𑁆𑀥𑀦𑁆𑀢𑀺 𑀉𑀧𑀭𑀺𑀕𑀕𑀦𑀢𑀮𑀸𑀪𑀺𑀫𑀼𑀔𑀁. 𑀅𑀥𑁄𑀢𑀺 𑀳𑁂𑀝𑁆𑀞𑀸𑀪𑀽𑀫𑀺𑀢𑀮𑀸𑀪𑀺𑀫𑀼𑀔𑀁. 𑀢𑀺𑀭𑀺𑀬𑀦𑁆𑀢𑀺 𑀔𑁂𑀢𑁆𑀢𑀫𑀡𑁆𑀟𑀮𑀫𑀺𑀯 𑀲𑀫𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀁. 𑀏𑀓𑀘𑁆𑀘𑁄 𑀳𑀺 𑀉𑀤𑁆𑀥𑀫𑁂𑀯 𑀓𑀲𑀺𑀡𑀁 𑀯𑀟𑁆𑀠𑁂𑀢𑀺, 𑀏𑀓𑀘𑁆𑀘𑁄 𑀅𑀥𑁄, 𑀏𑀓𑀘𑁆𑀘𑁄 𑀲𑀫𑀦𑁆𑀢𑀢𑁄. 𑀢𑁂𑀦 𑀢𑁂𑀦 𑀯𑀸 𑀓𑀸𑀭𑀡𑁂𑀦 𑀏𑀯𑀁 𑀧𑀲𑀸𑀭𑁂𑀢𑀺. 𑀆𑀮𑁄𑀓𑀫𑀺𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀓𑀸𑀫𑁄. 𑀢𑁂𑀦 𑀯𑀼𑀢𑁆𑀢𑀁 𑀉𑀤𑁆𑀥𑀫𑀥𑁄𑀢𑀺𑀭𑀺𑀬𑀦𑁆𑀢𑀺. 𑀅𑀤𑁆𑀯𑀬𑀦𑁆𑀢𑀺 𑀇𑀤𑀁 𑀧𑀦 𑀏𑀓𑀲𑁆𑀲 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀉𑀤𑀓𑀁 𑀧𑀯𑀺𑀝𑁆𑀞𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀉𑀤𑀓𑀫𑁂𑀯 𑀳𑁄𑀢𑀺, 𑀦 𑀅𑀜𑁆𑀜𑀁, 𑀏𑀯𑀫𑁂𑀯 𑀧𑀣𑀯𑀻𑀓𑀲𑀺𑀡𑀁 𑀧𑀣𑀯𑀻𑀓𑀲𑀺𑀡𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀢𑀲𑁆𑀲 𑀅𑀜𑁆𑀜𑁄 𑀓𑀲𑀺𑀡𑀲𑀫𑁆𑀪𑁂𑀤𑁄𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑁆𑀧𑀫𑀸𑀡𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀨𑀭𑀡𑀅𑀧𑁆𑀧𑀫𑀸𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀘𑁂𑀢𑀲𑀸 𑀨𑀭𑀦𑁆𑀢𑁄 𑀲𑀓𑀮𑀫𑁂𑀯 𑀨𑀭𑀢𑀺. 𑀦 𑀅𑀬𑀫𑀲𑁆𑀲 𑀆𑀤𑀺 𑀇𑀤𑀁 𑀫𑀚𑁆𑀛𑀦𑁆𑀢𑀺 𑀧𑀫𑀸𑀡𑀁 𑀕𑀡𑁆𑀳𑀸𑀢𑀻𑀢𑀺.

𑁧𑁦𑁧. 𑀬𑁂 𑀘 𑀢𑁂 𑀲𑀢𑁆𑀢𑀸 𑀓𑀫𑁆𑀫𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸 𑀓𑀺𑀮𑁂𑀲𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸 𑀯𑀺𑀧𑀸𑀓𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸 𑀅𑀲𑀤𑁆𑀥𑀸 𑀅𑀘𑁆𑀙𑀦𑁆𑀤𑀺𑀓𑀸 𑀤𑀼𑀧𑁆𑀧𑀜𑁆𑀜𑀸 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀫𑁂𑀓𑀲𑁆𑀲𑀸𑀧𑁂𑀓𑀓𑀲𑀺𑀡𑁂𑀧𑀺 𑀪𑀸𑀯𑀦𑀸 𑀦 𑀇𑀚𑁆𑀛𑀢𑀺. 𑀢𑀢𑁆𑀣 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑀫𑀗𑁆𑀕𑀺𑀦𑁄. 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑁂𑀯 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀡𑁆𑀟𑀓𑀸 𑀘. 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸. 𑀅𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬𑀁 𑀙𑀦𑁆𑀤𑀯𑀺𑀭𑀳𑀺𑀢𑀸. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀭𑀳𑀺𑀢𑀸. 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀲𑀫𑁆𑀫𑀢𑁆𑀢𑀲𑀗𑁆𑀔𑀸𑀢𑀜𑁆𑀘 𑀅𑀭𑀺𑀬𑀫𑀕𑁆𑀕𑀁 𑀑𑀓𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀓𑀲𑀺𑀡𑁂𑀬𑁂𑀯, 𑀅𑀜𑁆𑀜𑁂𑀲𑀼𑀧𑀺 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀢𑁂𑀲𑀫𑁂𑀓𑀲𑁆𑀲𑀧𑀺 𑀪𑀸𑀯𑀦𑀸 𑀦 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀯𑀺𑀕𑀢𑀯𑀺𑀧𑀸𑀓𑀸𑀯𑀭𑀡𑁂𑀦𑀧𑀺 𑀓𑀼𑀮𑀧𑀼𑀢𑁆𑀢𑁂𑀦 𑀓𑀫𑁆𑀫𑀸𑀯𑀭𑀡𑀜𑁆𑀘 𑀓𑀺𑀮𑁂𑀲𑀸𑀯𑀭𑀡𑀜𑁆𑀘 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀻𑀳𑀺 𑀲𑀤𑁆𑀥𑀜𑁆𑀘 𑀙𑀦𑁆𑀤𑀜𑁆𑀘 𑀧𑀜𑁆𑀜𑀜𑁆𑀘 𑀯𑀟𑁆𑀠𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀲𑀫𑀸𑀥𑀺𑀪𑀸𑀯𑀦𑀸𑀥𑀺𑀓𑀸𑀭𑁂

𑀲𑁂𑀲𑀓𑀲𑀺𑀡𑀦𑀺𑀤𑁆𑀤𑁂𑀲𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.