𑁬. 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄

𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀧𑀤𑀢𑁆𑀣𑀯𑀡𑁆𑀡𑀦𑀸

𑁧𑁦𑁨. 𑀓𑀲𑀺𑀡𑀸𑀦𑀦𑁆𑀢𑀭𑀫𑀼𑀤𑁆𑀤𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀼𑀫𑀸𑀢𑀓𑀁, 𑀯𑀺𑀦𑀻𑀮𑀓𑀁, 𑀯𑀺𑀧𑀼𑀩𑁆𑀩𑀓𑀁, 𑀯𑀺𑀘𑁆𑀙𑀺𑀤𑁆𑀤𑀓𑀁, 𑀯𑀺𑀓𑁆𑀔𑀸𑀬𑀺𑀢𑀓𑀁, 𑀯𑀺𑀓𑁆𑀔𑀺𑀢𑁆𑀢𑀓𑀁, 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁, 𑀮𑁄𑀳𑀺𑀢𑀓𑀁, 𑀧𑀼𑀴𑀯𑀓𑀁, 𑀅𑀝𑁆𑀞𑀺𑀓𑀦𑁆𑀢𑀺 𑀤𑀲𑀲𑀼 𑀅𑀯𑀺𑀜𑁆𑀜𑀸𑀡𑀓𑀸𑀲𑀼𑀪𑁂𑀲𑀼 𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀦𑀼𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀉𑀤𑁆𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁, 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀯𑀺𑀦𑀻𑀮𑀁 𑀯𑀼𑀘𑁆𑀘𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀦𑀻𑀮𑀯𑀡𑁆𑀡𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁. 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂𑀲𑀼 𑀭𑀢𑁆𑀢𑀯𑀡𑁆𑀡𑀲𑁆𑀲 𑀧𑀼𑀩𑁆𑀩𑀲𑀦𑁆𑀦𑀺𑀘𑀬𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀯𑀡𑁆𑀡𑀲𑁆𑀲 𑀦𑀻𑀮𑀝𑁆𑀞𑀸𑀦𑁂 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀲𑁆𑀲𑁂𑀯 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀧𑀼𑀩𑁆𑀩𑀁 𑀯𑀺𑀧𑀼𑀩𑁆𑀩𑀁, 𑀯𑀺𑀧𑀼𑀩𑁆𑀩𑀫𑁂𑀯 𑀯𑀺𑀧𑀼𑀩𑁆𑀩𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀧𑀼𑀩𑁆𑀩𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀯𑀺𑀘𑁆𑀙𑀺𑀤𑁆𑀤𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀥𑀸 𑀙𑀺𑀦𑁆𑀤𑀦𑁂𑀦 𑀅𑀧𑀥𑀸𑀭𑀺𑀢𑀁, 𑀯𑀺𑀘𑁆𑀙𑀺𑀤𑁆𑀤𑀫𑁂𑀯 𑀯𑀺𑀘𑁆𑀙𑀺𑀤𑁆𑀤𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀘𑁆𑀙𑀺𑀤𑁆𑀤𑀦𑁆𑀢𑀺 𑀯𑀺𑀘𑁆𑀙𑀺𑀤𑁆𑀤𑀓𑀁. 𑀯𑁂𑀫𑀚𑁆𑀛𑁂 𑀙𑀺𑀦𑁆𑀦𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀇𑀢𑁄 𑀘 𑀏𑀢𑁆𑀢𑁄 𑀘 𑀯𑀺𑀯𑀺𑀥𑀸𑀓𑀸𑀭𑁂𑀦 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀔𑀸𑀤𑀺𑀢𑀦𑁆𑀢𑀺 𑀯𑀺𑀓𑁆𑀔𑀸𑀬𑀺𑀢𑀁, 𑀯𑀺𑀓𑁆𑀔𑀸𑀬𑀺𑀢𑀫𑁂𑀯 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀦𑁆𑀢𑀺 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀯𑀺𑀯𑀺𑀥𑀁 𑀔𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁, 𑀯𑀺𑀓𑁆𑀔𑀺𑀢𑁆𑀢𑀫𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀺𑀢𑁆𑀢𑀓𑀁. 𑀅𑀜𑁆𑀜𑁂𑀦 𑀳𑀢𑁆𑀣𑀁 𑀅𑀜𑁆𑀜𑁂𑀦 𑀧𑀸𑀤𑀁 𑀅𑀜𑁆𑀜𑁂𑀦 𑀲𑀻𑀲𑀦𑁆𑀢𑀺 𑀏𑀯𑀁 𑀢𑀢𑁄 𑀢𑀢𑁄 𑀔𑀺𑀢𑁆𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀳𑀢𑀜𑁆𑀘 𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀜𑁆𑀘𑀸𑀢𑀺 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁. 𑀓𑀸𑀓𑀧𑀤𑀸𑀓𑀸𑀭𑁂𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀓𑁆𑀔𑀺𑀢𑁆𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀮𑁄𑀳𑀺𑀢𑀁 𑀓𑀺𑀭𑀢𑀺 𑀯𑀺𑀓𑁆𑀔𑀺𑀧𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀕𑁆𑀖𑀭𑀢𑀻𑀢𑀺 𑀮𑁄𑀳𑀺𑀢𑀓𑀁. 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀫𑀓𑁆𑀔𑀺𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀧𑀼𑀴𑀯𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀫𑀬𑁄, 𑀧𑀼𑀴𑀯𑁂 𑀓𑀺𑀭𑀢𑀻𑀢𑀺 𑀧𑀼𑀴𑀯𑀓𑀁. 𑀓𑀺𑀫𑀺𑀧𑀭𑀺𑀧𑀼𑀡𑁆𑀡𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀫𑀥𑀺𑀯𑀘𑀦𑀁.

𑀅𑀝𑁆𑀞𑀺𑀬𑁂𑀯 𑀅𑀝𑁆𑀞𑀺𑀓𑀁. 𑀧𑀝𑀺𑀓𑁆𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀅𑀝𑁆𑀞𑀻𑀢𑀺 𑀅𑀝𑁆𑀞𑀺𑀓𑀁. 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸𑀬𑀧𑀺 𑀏𑀓𑀝𑁆𑀞𑀺𑀓𑀲𑁆𑀲𑀧𑁂𑀢𑀫𑀥𑀺𑀯𑀘𑀦𑀁. 𑀇𑀫𑀸𑀦𑀺 𑀘 𑀧𑀦 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀦𑀺𑀫𑀺𑀢𑁆𑀢𑀸𑀦𑀫𑁆𑀧𑀺 𑀦𑀺𑀫𑀺𑀢𑁆𑀢𑁂𑀲𑀼 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀸𑀦𑀫𑁆𑀧𑁂𑀢𑀸𑀦𑁂𑀯 𑀦𑀸𑀫𑀸𑀦𑀺.

𑀉𑀤𑁆𑀥𑀼𑀫𑀸𑀢𑀓𑀓𑀫𑁆𑀫𑀝𑁆𑀞𑀸𑀦𑀁

𑁧𑁦𑁩. 𑀢𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀲𑀭𑀻𑀭𑁂 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀲𑀗𑁆𑀔𑀸𑀢𑀁 𑀛𑀸𑀦𑀁 𑀪𑀸𑀯𑁂𑀢𑀼𑀓𑀸𑀫𑁂𑀦 𑀬𑁄𑀕𑀺𑀦𑀸 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁. 𑀢𑁂𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁂𑀦 𑀅𑀲𑀼𑀪𑀦𑀺𑀫𑀺𑀢𑁆𑀢𑀢𑁆𑀣𑀸𑀬 𑀕𑀫𑀦𑀯𑀺𑀥𑀸𑀦𑀁, 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀁, 𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀕𑀢𑀸𑀕𑀢𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀏𑀯𑀁 𑀅𑀧𑁆𑀧𑀦𑀸𑀯𑀺𑀥𑀸𑀦𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀓𑀣𑁂𑀢𑀩𑁆𑀩𑀁. 𑀢𑁂𑀦𑀸𑀧𑀺 𑀲𑀩𑁆𑀩𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑁂𑀦𑀸𑀲𑀦𑀁 𑀉𑀧𑀕𑀦𑁆𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑁂𑀦 𑀯𑀺𑀳𑀸𑀢𑀩𑁆𑀩𑀁.

𑁧𑁦𑁪. 𑀏𑀯𑀁 𑀯𑀺𑀳𑀭𑀦𑁆𑀢𑁂𑀦 𑀘 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀕𑀸𑀫𑀤𑁆𑀯𑀸𑀭𑁂 𑀯𑀸 𑀅𑀝𑀯𑀺𑀫𑀼𑀔𑁂 𑀯𑀸 𑀧𑀦𑁆𑀣𑁂 𑀯𑀸 𑀧𑀩𑁆𑀩𑀢𑀧𑀸𑀤𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀲𑀼𑀲𑀸𑀦𑁂 𑀯𑀸 𑀉𑀤𑁆𑀥𑀼𑀫𑀸𑀢𑀓𑀲𑀭𑀻𑀭𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀓𑀣𑁂𑀦𑁆𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀦 𑀢𑀸𑀯𑀤𑁂𑀯 𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑀦𑁆𑀢𑁂𑀦 𑀯𑀺𑀬 𑀕𑀦𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀲𑀼𑀪𑀁 𑀳𑀺 𑀦𑀸𑀫𑁂𑀢𑀁 𑀯𑀸𑀴𑀫𑀺𑀕𑀸𑀥𑀺𑀝𑁆𑀞𑀺𑀢𑀫𑁆𑀧𑀺 𑀅𑀫𑀦𑀼𑀲𑁆𑀲𑀸𑀥𑀺𑀝𑁆𑀞𑀺𑀢𑀫𑁆𑀧𑀺 𑀳𑁄𑀢𑀺. 𑀢𑀢𑁆𑀭𑀲𑁆𑀲 𑀚𑀻𑀯𑀺𑀢𑀦𑁆𑀢𑀭𑀸𑀬𑁄𑀧𑀺 𑀲𑀺𑀬𑀸. 𑀕𑀫𑀦𑀫𑀕𑁆𑀕𑁄 𑀯𑀸 𑀧𑀦𑁂𑀢𑁆𑀣 𑀕𑀸𑀫𑀤𑁆𑀯𑀸𑀭𑁂𑀦 𑀯𑀸 𑀦𑀳𑀸𑀦𑀢𑀺𑀢𑁆𑀣𑁂𑀦 𑀯𑀸 𑀓𑁂𑀤𑀸𑀭𑀓𑁄𑀝𑀺𑀬𑀸 𑀯𑀸 𑀳𑁄𑀢𑀺. 𑀢𑀢𑁆𑀣 𑀯𑀺𑀲𑀪𑀸𑀕𑀭𑀽𑀧𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀤𑁂𑀯 𑀯𑀸 𑀲𑀭𑀻𑀭𑀁 𑀯𑀺𑀲𑀪𑀸𑀕𑀁 𑀳𑁄𑀢𑀺. 𑀧𑀼𑀭𑀺𑀲𑀲𑁆𑀲 𑀳𑀺 𑀇𑀢𑁆𑀣𑀺𑀲𑀭𑀻𑀭𑀁 𑀇𑀢𑁆𑀣𑀺𑀬𑀸 𑀘 𑀧𑀼𑀭𑀺𑀲𑀲𑀭𑀻𑀭𑀁 𑀯𑀺𑀲𑀪𑀸𑀕𑀁, 𑀢𑀤𑁂𑀢𑀁 𑀅𑀥𑀼𑀦𑀸𑀫𑀢𑀁 𑀲𑀼𑀪𑀢𑁄𑀧𑀺 𑀉𑀧𑀝𑁆𑀞𑀸𑀢𑀺, 𑀢𑁂𑀦𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄𑀧𑀺 𑀲𑀺𑀬𑀸. 𑀲𑀘𑁂 𑀧𑀦 ‘‘𑀦𑀬𑀺𑀤𑀁 𑀫𑀸𑀤𑀺𑀲𑀲𑁆𑀲 𑀪𑀸𑀭𑀺𑀬’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀢𑀓𑁆𑀓𑀬𑀢𑀺, 𑀏𑀯𑀁 𑀢𑀓𑁆𑀓𑀬𑀫𑀸𑀦𑁂𑀦 𑀕𑀦𑁆𑀢𑀩𑁆𑀩𑀁.

𑁧𑁦𑁫. 𑀕𑀘𑁆𑀙𑀦𑁆𑀢𑁂𑀦 𑀘 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀯𑀸 𑀅𑀪𑀺𑀜𑁆𑀜𑀸𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀲𑀘𑁂 𑀳𑀺𑀲𑁆𑀲 𑀲𑀼𑀲𑀸𑀦𑁂 𑀅𑀫𑀦𑀼𑀲𑁆𑀲𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀭𑀽𑀧𑀲𑀤𑁆𑀤𑀸𑀤𑀺𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀪𑀺𑀪𑀽𑀢𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀯𑀸 𑀧𑀯𑁂𑀥𑁂𑀦𑁆𑀢𑀺, 𑀪𑀼𑀢𑁆𑀢𑀁 𑀯𑀸 𑀦 𑀧𑀭𑀺𑀲𑀡𑁆𑀞𑀸𑀢𑀺, 𑀅𑀜𑁆𑀜𑁄 𑀯𑀸 𑀆𑀩𑀸𑀥𑁄 𑀳𑁄𑀢𑀺. 𑀅𑀣𑀲𑁆𑀲 𑀲𑁄 𑀯𑀺𑀳𑀸𑀭𑁂 𑀧𑀢𑁆𑀢𑀘𑀻𑀯𑀭𑀁 𑀲𑀼𑀭𑀓𑁆𑀔𑀺𑀢𑀁 𑀓𑀭𑀺𑀲𑁆𑀲𑀢𑀺. 𑀤𑀳𑀭𑁂 𑀯𑀸 𑀲𑀸𑀫𑀡𑁂𑀭𑁂 𑀯𑀸 𑀧𑀳𑀺𑀡𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀢𑀺. 𑀅𑀧𑀺𑀘 𑀲𑀼𑀲𑀸𑀦𑀁 𑀦𑀸𑀫 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀓𑀢𑀓𑀫𑁆𑀫𑀸𑀧𑀺 𑀅𑀓𑀢𑀓𑀫𑁆𑀫𑀸𑀧𑀺 𑀘𑁄𑀭𑀸 𑀲𑀫𑁄𑀲𑀭𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀩𑀤𑁆𑀥𑀸 𑀪𑀺𑀓𑁆𑀔𑀼𑀲𑁆𑀲 𑀲𑀫𑀻𑀧𑁂 𑀪𑀡𑁆𑀟𑀓𑀁 𑀙𑀟𑁆𑀟𑁂𑀢𑁆𑀯𑀸𑀧𑀺 𑀧𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 ‘‘𑀲𑀳𑁄𑀟𑁆𑀠𑀁 𑀘𑁄𑀭𑀁 𑀅𑀤𑁆𑀤𑀲𑀸𑀫𑀸’’𑀢𑀺 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀯𑀺𑀳𑁂𑀞𑁂𑀦𑁆𑀢𑀺. 𑀅𑀣𑀲𑁆𑀲 𑀲𑁄 ‘‘𑀫𑀸 𑀇𑀫𑀁 𑀯𑀺𑀳𑁂𑀞𑀬𑀺𑀢𑁆𑀣, 𑀫𑀫𑀸𑀬𑀁 𑀓𑀣𑁂𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫 𑀓𑀫𑁆𑀫𑁂𑀦 𑀕𑀢𑁄’’𑀢𑀺 𑀢𑁂 𑀫𑀦𑀼𑀲𑁆𑀲𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀲𑁄𑀢𑁆𑀣𑀺𑀪𑀸𑀯𑀁 𑀓𑀭𑀺𑀲𑁆𑀲𑀢𑀺. 𑀅𑀬𑀁 𑀆𑀦𑀺𑀲𑀁𑀲𑁄 𑀓𑀣𑁂𑀢𑁆𑀯𑀸 𑀕𑀫𑀦𑁂. 𑀢𑀲𑁆𑀫𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑁂𑀢𑁆𑀯𑀸 𑀅𑀲𑀼𑀪𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑁂 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑁂𑀦 𑀬𑀣𑀸𑀦𑀸𑀫 𑀔𑀢𑁆𑀢𑀺𑀬𑁄 𑀅𑀪𑀺𑀲𑁂𑀓𑀝𑁆𑀞𑀸𑀦𑀁, 𑀬𑀚𑀫𑀸𑀦𑁄 𑀬𑀜𑁆𑀜𑀲𑀸𑀮𑀁, 𑀅𑀥𑀦𑁄 𑀯𑀸 𑀧𑀦 𑀦𑀺𑀥𑀺𑀝𑁆𑀞𑀸𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀕𑀘𑁆𑀙𑀢𑀺, 𑀏𑀯𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀕𑀦𑁆𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀉𑀤𑁆𑀥𑀼𑀫𑀸𑀢𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀺 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀫𑁆𑀫𑀼𑀝𑁆𑀞𑀸𑀬 𑀅𑀦𑁆𑀢𑁄𑀕𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀩𑀳𑀺𑀕𑀢𑁂𑀦 𑀫𑀸𑀦𑀲𑁂𑀦 𑀕𑀢𑀸𑀕𑀢𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀉𑀤𑁆𑀥𑀼𑀫𑀸𑀢𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀸𑀲𑀸𑀡𑀁 𑀯𑀸 𑀯𑀫𑁆𑀫𑀺𑀓𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀕𑀘𑁆𑀙𑀁 𑀯𑀸 𑀮𑀢𑀁 𑀯𑀸 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺, 𑀲𑀸𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀲𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀤𑁆𑀥𑀼𑀫𑀸𑀢𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀲𑀪𑀸𑀯𑀪𑀸𑀯𑀢𑁄 𑀉𑀧𑀮𑀓𑁆𑀔𑁂𑀢𑀺, 𑀯𑀡𑁆𑀡𑀢𑁄𑀧𑀺 𑀮𑀺𑀗𑁆𑀕𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀤𑀺𑀲𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄𑀧𑀺 𑀲𑀦𑁆𑀥𑀺𑀢𑁄 𑀯𑀺𑀯𑀭𑀢𑁄 𑀦𑀺𑀦𑁆𑀦𑀢𑁄 𑀣𑀮𑀢𑁄 𑀲𑀫𑀦𑁆𑀢𑀢𑁄. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀺, 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑀺, 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑀺. 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀏𑀓𑁄 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀺 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀲𑀫𑁆𑀫𑀼𑀝𑁆𑀞𑀸𑀬 𑀅𑀦𑁆𑀢𑁄𑀕𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀩𑀳𑀺𑀕𑀢𑁂𑀦 𑀫𑀸𑀦𑀲𑁂𑀦 𑀕𑀢𑀸𑀕𑀢𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄. 𑀲𑁄 𑀘𑀗𑁆𑀓𑀫𑀦𑁆𑀢𑁄𑀧𑀺 𑀢𑀩𑁆𑀪𑀸𑀕𑀺𑀬𑀜𑁆𑀜𑁂𑀯 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺. 𑀦𑀺𑀲𑀻𑀤𑀦𑁆𑀢𑁄𑀧𑀺 𑀢𑀩𑁆𑀪𑀸𑀕𑀺𑀬𑀜𑁆𑀜𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺.

‘‘𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀸 𑀓𑀺𑀫𑀢𑁆𑀣𑀺𑀬𑀸 𑀓𑀺𑀫𑀸𑀦𑀺𑀲𑀁𑀲𑀸𑀢𑀺? 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀸 𑀅𑀲𑀫𑁆𑀫𑁄𑀳𑀢𑁆𑀣𑀸 𑀅𑀲𑀫𑁆𑀫𑁄𑀳𑀸𑀦𑀺𑀲𑀁𑀲𑀸. 𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀓𑀺𑀫𑀢𑁆𑀣𑀺𑀬𑁄 𑀓𑀺𑀫𑀸𑀦𑀺𑀲𑀁𑀲𑁄𑀢𑀺? 𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑁄 𑀉𑀧𑀦𑀺𑀩𑀦𑁆𑀥𑀦𑀸𑀦𑀺𑀲𑀁𑀲𑁄. 𑀕𑀢𑀸𑀕𑀢𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀺𑀫𑀢𑁆𑀣𑀺𑀬𑀸 𑀓𑀺𑀫𑀸𑀦𑀺𑀲𑀁𑀲𑀸𑀢𑀺? 𑀕𑀢𑀸𑀕𑀢𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸 𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀸𑀦𑀺𑀲𑀁𑀲𑀸.

‘‘𑀲𑁄 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻 𑀭𑀢𑀦𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺 ‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀫𑁆𑀳𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲𑀸𑀥𑀺𑀕𑀢𑀁 𑀳𑁄𑀢𑀺 𑀭𑀽𑀧𑀸𑀯𑀘𑀭𑀁 𑀧𑀞𑀫𑀁 𑀛𑀸𑀦𑀁 𑀤𑀺𑀩𑁆𑀩𑁄 𑀘 𑀯𑀺𑀳𑀸𑀭𑁄 𑀪𑀸𑀯𑀦𑀸𑀫𑀬𑀜𑁆𑀘 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼’’𑀦𑁆𑀢𑀺.

𑁧𑁦𑁬. 𑀢𑀲𑁆𑀫𑀸 𑀬𑁄 𑀘𑀺𑀢𑁆𑀢𑀲𑀜𑁆𑀜𑀢𑁆𑀢𑀢𑁆𑀣𑀸𑀬 𑀲𑀺𑀯𑀣𑀺𑀓𑀤𑀲𑁆𑀲𑀦𑀁 𑀕𑀘𑁆𑀙𑀢𑀺, 𑀲𑁄 𑀖𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀕𑀡𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀧𑀺 𑀕𑀘𑁆𑀙𑀢𑀼. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀧𑀦 𑀕𑀘𑁆𑀙𑀦𑁆𑀢𑁂𑀦 𑀏𑀓𑀓𑁂𑀦 𑀅𑀤𑀼𑀢𑀺𑀬𑁂𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑁂𑀦𑁂𑀯 𑀲𑀼𑀲𑀸𑀦𑁂 𑀲𑁄𑀡𑀸𑀤𑀺𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀢𑁆𑀣𑀁 𑀓𑀢𑁆𑀢𑀭𑀤𑀡𑁆𑀟𑀁 𑀯𑀸 𑀬𑀝𑁆𑀞𑀺𑀁 𑀯𑀸 𑀕𑀳𑁂𑀢𑁆𑀯𑀸, 𑀲𑀽𑀧𑀝𑁆𑀞𑀺𑀢 𑀪𑀸𑀯𑀲𑀫𑁆𑀧𑀸𑀤𑀦𑁂𑀦 𑀅𑀲𑀫𑁆𑀫𑀼𑀝𑁆𑀞𑀁 𑀲𑀢𑀺𑀁 𑀓𑀢𑁆𑀯𑀸, 𑀫𑀦𑀘𑁆𑀙𑀝𑁆𑀞𑀸𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑁆𑀢𑁄𑀕𑀢𑀪𑀸𑀯𑀲𑀫𑁆𑀧𑀸𑀤𑀦𑀢𑁄 𑀅𑀩𑀳𑀺𑀕𑀢𑀫𑀦𑁂𑀦 𑀳𑀼𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁂𑀦𑁂𑀯 𑀅𑀲𑀼𑀓𑀤𑀺𑀲𑀸𑀬 𑀅𑀲𑀼𑀓𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻𑀢𑀺 𑀤𑁆𑀯𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀢𑀢𑁄 𑀬𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀢𑀺, 𑀲𑁄 𑀫𑀕𑁆𑀕𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄, 𑀅𑀬𑀁 𑀫𑀕𑁆𑀕𑁄 𑀧𑀸𑀘𑀺𑀦𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀢𑀺, 𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀓𑁆𑀔𑀺𑀡𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀯𑀺𑀤𑀺𑀲𑀸𑀪𑀺𑀫𑀼𑀔𑁄𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀯𑀸𑀫𑀢𑁄 𑀕𑀘𑁆𑀙𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑀓𑁆𑀔𑀺𑀡𑀢𑁄, 𑀇𑀫𑀲𑁆𑀫𑀺𑀁 𑀘𑀲𑁆𑀲 𑀞𑀸𑀦𑁂 𑀧𑀸𑀲𑀸𑀡𑁄, 𑀇𑀫𑀲𑁆𑀫𑀺𑀁 𑀯𑀫𑁆𑀫𑀺𑀓𑁄, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁄, 𑀇𑀫𑀲𑁆𑀫𑀺𑀁 𑀕𑀘𑁆𑀙𑁄, 𑀇𑀫𑀲𑁆𑀫𑀺𑀁 𑀮𑀢𑀸𑀢𑀺. 𑀏𑀯𑀁 𑀕𑀫𑀦𑀫𑀕𑁆𑀕𑀁 𑀯𑀯𑀢𑁆𑀣𑀧𑁂𑀦𑁆𑀢𑁂𑀦 𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑀩𑁆𑀩𑀁. 𑀦𑁄 𑀘 𑀔𑁄 𑀧𑀝𑀺𑀯𑀸𑀢𑀁. 𑀧𑀝𑀺𑀯𑀸𑀢𑀁 𑀕𑀘𑁆𑀙𑀦𑁆𑀢𑀲𑁆𑀲 𑀳𑀺 𑀓𑀼𑀡𑀧𑀕𑀦𑁆𑀥𑁄 𑀖𑀸𑀦𑀁 𑀧𑀳𑀭𑀺𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑀁 𑀯𑀸 𑀲𑀗𑁆𑀔𑁄𑀪𑁂𑀬𑁆𑀬, 𑀆𑀳𑀸𑀭𑀁 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬, 𑀯𑀺𑀧𑁆𑀧𑀝𑀺𑀲𑀸𑀭𑀁 𑀯𑀸 𑀚𑀦𑁂𑀬𑁆𑀬 ‘‘𑀈𑀤𑀺𑀲𑀁 𑀦𑀸𑀫 𑀓𑀼𑀡𑀧𑀝𑁆𑀞𑀸𑀦𑀁 𑀆𑀕𑀢𑁄𑀫𑁆𑀳𑀻’’𑀢𑀺. 𑀢𑀲𑁆𑀫𑀸 𑀧𑀝𑀺𑀯𑀸𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀯𑀸𑀢𑀁 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀅𑀦𑀼𑀯𑀸𑀢𑀫𑀕𑁆𑀕𑁂𑀦 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀦𑁆𑀢𑀼𑀁, 𑀅𑀦𑁆𑀢𑀭𑀸 𑀧𑀩𑁆𑀩𑀢𑁄 𑀯𑀸 𑀧𑀧𑀸𑀢𑁄 𑀯𑀸 𑀧𑀸𑀲𑀸𑀡𑁄 𑀯𑀸 𑀯𑀢𑀺 𑀯𑀸 𑀓𑀡𑁆𑀝𑀓𑀝𑁆𑀞𑀸𑀦𑀁 𑀯𑀸 𑀉𑀤𑀓𑀁 𑀯𑀸 𑀘𑀺𑀓𑁆𑀔𑀮𑁆𑀮𑀁 𑀯𑀸 𑀳𑁄𑀢𑀺, 𑀘𑀻𑀯𑀭𑀓𑀡𑁆𑀡𑁂𑀦 𑀦𑀸𑀲𑀁 𑀧𑀺𑀤𑀳𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀇𑀤𑀫𑀲𑁆𑀲 𑀕𑀫𑀦𑀯𑀢𑁆𑀢𑀁.

𑁧𑁦𑁭. 𑀏𑀯𑀁 𑀕𑀢𑁂𑀦 𑀧𑀦 𑀦 𑀢𑀸𑀯 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀢𑀩𑁆𑀩𑀁. 𑀤𑀺𑀲𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀏𑀓𑀲𑁆𑀫𑀺𑀁 𑀳𑀺 𑀤𑀺𑀲𑀸𑀪𑀸𑀕𑁂 𑀞𑀺𑀢𑀲𑁆𑀲 𑀆𑀭𑀫𑁆𑀫𑀡𑀜𑁆𑀘 𑀦 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀔𑀸𑀬𑀢𑀺, 𑀘𑀺𑀢𑁆𑀢𑀜𑁆𑀘 𑀦 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀯𑀚𑁆𑀚𑁂𑀢𑁆𑀯𑀸 𑀬𑀢𑁆𑀣 𑀞𑀺𑀢𑀲𑁆𑀲 𑀆𑀭𑀫𑁆𑀫𑀡𑀜𑁆𑀘 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀔𑀸𑀬𑀢𑀺, 𑀘𑀺𑀢𑁆𑀢𑀜𑁆𑀘 𑀓𑀫𑁆𑀫𑀦𑀺𑀬𑀁 𑀳𑁄𑀢𑀺, 𑀢𑀢𑁆𑀣 𑀞𑀸𑀢𑀩𑁆𑀩𑀁. 𑀧𑀝𑀺𑀯𑀸𑀢𑀸𑀦𑀼𑀯𑀸𑀢𑀜𑁆𑀘 𑀧𑀳𑀸𑀢𑀩𑁆𑀩𑀁. 𑀧𑀝𑀺𑀯𑀸𑀢𑁂 𑀞𑀺𑀢𑀲𑁆𑀲 𑀳𑀺 𑀓𑀼𑀡𑀧𑀕𑀦𑁆𑀥𑁂𑀦 𑀉𑀩𑁆𑀩𑀸𑀴𑁆𑀳𑀲𑁆𑀲 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺. 𑀅𑀦𑀼𑀯𑀸𑀢𑁂 𑀞𑀺𑀢𑀲𑁆𑀲 𑀲𑀘𑁂 𑀢𑀢𑁆𑀣 𑀅𑀥𑀺𑀯𑀢𑁆𑀣𑀸 𑀅𑀫𑀦𑀼𑀲𑁆𑀲𑀸 𑀳𑁄𑀦𑁆𑀢𑀺, 𑀢𑁂 𑀓𑀼𑀚𑁆𑀛𑀺𑀢𑁆𑀯𑀸 𑀅𑀦𑀢𑁆𑀣𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀈𑀲𑀓𑀁 𑀉𑀓𑁆𑀓𑀫𑁆𑀫 𑀦𑀸𑀢𑀺𑀅𑀦𑀼𑀯𑀸𑀢𑁂 𑀞𑀸𑀢𑀩𑁆𑀩𑀁. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁂𑀦𑀸𑀧𑀺 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀦𑀸𑀦𑀼𑀧𑀸𑀤𑀁 𑀦𑀸𑀦𑀼𑀲𑀻𑀲𑀁 𑀞𑀸𑀢𑀩𑁆𑀩𑀁. 𑀅𑀢𑀺𑀤𑀽𑀭𑁂 𑀞𑀺𑀢𑀲𑁆𑀲 𑀳𑀺 𑀆𑀭𑀫𑁆𑀫𑀡𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀪𑀬𑀫𑀼𑀧𑁆𑀧𑀚𑁆𑀚𑀢𑀺. 𑀅𑀦𑀼𑀧𑀸𑀤𑀁 𑀯𑀸 𑀅𑀦𑀼𑀲𑀻𑀲𑀁 𑀯𑀸 𑀞𑀺𑀢𑀲𑁆𑀲 𑀲𑀩𑁆𑀩𑀁 𑀅𑀲𑀼𑀪𑀁 𑀲𑀫𑀁 𑀦 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀑𑀮𑁄𑀓𑁂𑀦𑁆𑀢𑀲𑁆𑀲 𑀨𑀸𑀲𑀼𑀓𑀝𑁆𑀞𑀸𑀦𑁂 𑀲𑀭𑀻𑀭𑀯𑁂𑀫𑀚𑁆𑀛𑀪𑀸𑀕𑁂 𑀞𑀸𑀢𑀩𑁆𑀩𑀁.

𑁧𑁦𑁮. 𑀏𑀯𑀁 𑀞𑀺𑀢𑁂𑀦 ‘‘𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀸𑀲𑀸𑀡𑀁 𑀯𑀸…𑀧𑁂… 𑀮𑀢𑀁 𑀯𑀸 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀮𑀓𑁆𑀔𑁂𑀢𑀩𑁆𑀩𑀸𑀦𑀺. 𑀢𑀢𑁆𑀭𑀺𑀤𑀁 𑀉𑀧𑀮𑀓𑁆𑀔𑀡𑀯𑀺𑀥𑀸𑀦𑀁, 𑀲𑀘𑁂 𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑀦𑁆𑀢𑀸 𑀘𑀓𑁆𑀔𑀼𑀧𑀣𑁂 𑀧𑀸𑀲𑀸𑀡𑁄 𑀳𑁄𑀢𑀺, 𑀲𑁄 ‘‘𑀅𑀬𑀁 𑀧𑀸𑀲𑀸𑀡𑁄 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀢𑀫𑁆𑀩𑁄 𑀯𑀸 𑀓𑀸𑀴𑁄 𑀯𑀸 𑀲𑁂𑀢𑁄 𑀯𑀸 𑀤𑀻𑀖𑁄 𑀯𑀸 𑀧𑀭𑀺𑀫𑀡𑁆𑀟𑀮𑁄 𑀯𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀅𑀬𑀁 𑀧𑀸𑀲𑀸𑀡𑁄 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀅𑀬𑀁 𑀧𑀸𑀲𑀸𑀡𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀲𑀘𑁂 𑀯𑀫𑁆𑀫𑀺𑀓𑁄 𑀳𑁄𑀢𑀺, 𑀲𑁄𑀧𑀺 ‘‘𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀢𑀫𑁆𑀩𑁄 𑀯𑀸 𑀓𑀸𑀴𑁄 𑀯𑀸 𑀲𑁂𑀢𑁄 𑀯𑀸 𑀤𑀻𑀖𑁄 𑀯𑀸 𑀧𑀭𑀺𑀫𑀡𑁆𑀟𑀮𑁄 𑀯𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀅𑀬𑀁 𑀯𑀫𑁆𑀫𑀺𑀓𑁄 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀲𑀘𑁂 𑀭𑀼𑀓𑁆𑀔𑁄 𑀳𑁄𑀢𑀺, 𑀲𑁄𑀧𑀺 ‘‘𑀅𑀲𑁆𑀲𑀢𑁆𑀣𑁄 𑀯𑀸 𑀦𑀺𑀕𑁆𑀭𑁄𑀥𑁄 𑀯𑀸 𑀓𑀘𑁆𑀙𑀓𑁄 𑀯𑀸 𑀓𑀧𑀻𑀢𑀦𑁄 𑀯𑀸 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀢𑀫𑁆𑀩𑁄 𑀯𑀸 𑀓𑀸𑀴𑁄 𑀯𑀸 𑀲𑁂𑀢𑁄 𑀯𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀅𑀬𑀁 𑀭𑀼𑀓𑁆𑀔𑁄 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀲𑀘𑁂 𑀕𑀘𑁆𑀙𑁄 𑀳𑁄𑀢𑀺, 𑀲𑁄𑀧𑀺 ‘‘𑀲𑀺𑀦𑁆𑀤𑀺𑀯𑀸 𑀓𑀭𑀫𑀦𑁆𑀤𑁄 𑀯𑀸 𑀓𑀡𑀯𑀻𑀭𑁄 𑀯𑀸 𑀓𑀼𑀭𑀡𑁆𑀟𑀓𑁄 𑀯𑀸 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀅𑀬𑀁 𑀕𑀘𑁆𑀙𑁄 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀲𑀘𑁂 𑀮𑀢𑀸 𑀳𑁄𑀢𑀺, 𑀲𑀸𑀧𑀺 ‘‘𑀮𑀸𑀩𑀼 𑀯𑀸 𑀓𑀼𑀫𑁆𑀪𑀡𑁆𑀟𑀻 𑀯𑀸 𑀲𑀸𑀫𑀸 𑀯𑀸 𑀓𑀸𑀴𑀯𑀮𑁆𑀮𑀺 𑀯𑀸 𑀧𑀽𑀢𑀺𑀮𑀢𑀸 𑀯𑀸’’𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀸. 𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀅𑀬𑀁 𑀮𑀢𑀸 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀅𑀬𑀁 𑀮𑀢𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁.

𑁧𑁦𑁯. 𑀬𑀁 𑀧𑀦 𑀯𑀼𑀢𑁆𑀢𑀁 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑀲𑀸𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺, 𑀢𑀁 𑀇𑀥𑁂𑀯 𑀅𑀦𑁆𑀢𑁄𑀕𑀥𑀁. 𑀧𑀼𑀦𑀧𑁆𑀧𑀼𑀦𑀁 𑀯𑀯𑀢𑁆𑀣𑀧𑁂𑀦𑁆𑀢𑁄 𑀳𑀺 𑀲𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀅𑀬𑀁 𑀧𑀸𑀲𑀸𑀡𑁄 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀇𑀤𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀅𑀬𑀁 𑀧𑀸𑀲𑀸𑀡𑁄𑀢𑀺 𑀏𑀯𑀁 𑀤𑁆𑀯𑁂 𑀤𑁆𑀯𑁂 𑀲𑀫𑀸𑀲𑁂𑀢𑁆𑀯𑀸 𑀲𑀫𑀸𑀲𑁂𑀢𑁆𑀯𑀸 𑀯𑀯𑀢𑁆𑀣𑀧𑁂𑀦𑁆𑀢𑁄 𑀲𑀸𑀭𑀫𑁆𑀫𑀡𑀁 𑀓𑀭𑁄𑀢𑀺 𑀦𑀸𑀫.

𑀏𑀯𑀁 𑀲𑀦𑀺𑀫𑀺𑀢𑁆𑀢𑀁 𑀲𑀸𑀭𑀫𑁆𑀫𑀡𑀜𑁆𑀘 𑀓𑀢𑁆𑀯𑀸 𑀧𑀦 𑀲𑀪𑀸𑀯𑀪𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁆𑀯𑀸𑀲𑁆𑀲 𑀲𑀪𑀸𑀯𑀪𑀸𑀯𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀅𑀢𑁆𑀢𑀦𑀺𑀬𑁄 𑀉𑀤𑁆𑀥𑀼𑀫𑀸𑀢𑀓𑀪𑀸𑀯𑁄, 𑀢𑁂𑀦 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀯𑀡𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀦𑁆𑀢𑀺 𑀏𑀯𑀁 𑀲𑀪𑀸𑀯𑁂𑀦 𑀲𑀭𑀲𑁂𑀦 𑀯𑀯𑀢𑁆𑀣𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑁧𑁧𑁦. 𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀯𑀡𑁆𑀡𑀢𑁄𑀧𑀺 𑀮𑀺𑀗𑁆𑀕𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀤𑀺𑀲𑀢𑁄𑀧𑀺 𑀑𑀓𑀸𑀲𑀢𑁄𑀧𑀺 𑀧𑀭𑀺𑀘𑁆𑀙𑁂𑀤𑀢𑁄𑀧𑀻𑀢𑀺 𑀙𑀩𑁆𑀩𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀓𑀣𑀁? 𑀢𑁂𑀦 𑀳𑀺 𑀬𑁄𑀕𑀺𑀦𑀸 𑀇𑀤𑀁 𑀲𑀭𑀻𑀭𑀁 𑀓𑀸𑀴𑀲𑁆𑀲 𑀯𑀸 𑀑𑀤𑀸𑀢𑀲𑁆𑀲 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀺𑀦𑁄 𑀯𑀸𑀢𑀺 𑀯𑀡𑁆𑀡𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀮𑀺𑀗𑁆𑀕𑀢𑁄 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀯𑀸𑀢𑀺 𑀅𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀞𑀫𑀯𑀬𑁂 𑀯𑀸 𑀫𑀚𑁆𑀛𑀺𑀫𑀯𑀬𑁂 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀯𑀸 𑀞𑀺𑀢𑀲𑁆𑀲 𑀇𑀤𑀁 𑀲𑀭𑀻𑀭𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀲𑀡𑁆𑀞𑀸𑀦𑀢𑁄 𑀉𑀤𑁆𑀥𑀼𑀫𑀸𑀢𑀓𑀲𑁆𑀲 𑀲𑀡𑁆𑀞𑀸𑀦𑀯𑀲𑁂𑀦𑁂𑀯 𑀇𑀤𑀫𑀲𑁆𑀲 𑀲𑀻𑀲𑀲𑀡𑁆𑀞𑀸𑀦𑀁, 𑀇𑀤𑀁 𑀕𑀻𑀯𑀸𑀲𑀡𑁆𑀞𑀸𑀦𑀁, 𑀇𑀤𑀁 𑀳𑀢𑁆𑀣𑀲𑀡𑁆𑀞𑀸𑀦𑀁, 𑀇𑀤𑀁 𑀉𑀤𑀭𑀲𑀡𑁆𑀞𑀸𑀦𑀁, 𑀇𑀤𑀁 𑀦𑀸𑀪𑀺𑀲𑀡𑁆𑀞𑀸𑀦𑀁, 𑀇𑀤𑀁 𑀓𑀝𑀺𑀲𑀡𑁆𑀞𑀸𑀦𑀁, 𑀇𑀤𑀁 𑀊𑀭𑀼𑀲𑀡𑁆𑀞𑀸𑀦𑀁, 𑀇𑀤𑀁 𑀚𑀗𑁆𑀖𑀸𑀲𑀡𑁆𑀞𑀸𑀦𑀁, 𑀇𑀤𑀁 𑀧𑀸𑀤𑀲𑀡𑁆𑀞𑀸𑀦𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀤𑀺𑀲𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀤𑁆𑀯𑁂 𑀤𑀺𑀲𑀸 𑀦𑀸𑀪𑀺𑀬𑀸 𑀅𑀥𑁄 𑀳𑁂𑀝𑁆𑀞𑀺𑀫𑀤𑀺𑀲𑀸 𑀉𑀤𑁆𑀥𑀁 𑀉𑀧𑀭𑀺𑀫𑀤𑀺𑀲𑀸𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀳𑀁 𑀇𑀫𑀺𑀲𑁆𑀲𑀸 𑀤𑀺𑀲𑀸𑀬 𑀞𑀺𑀢𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀇𑀫𑀺𑀲𑁆𑀲𑀸𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀑𑀓𑀸𑀲𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀦𑀸𑀫 𑀑𑀓𑀸𑀲𑁂 𑀳𑀢𑁆𑀣𑀸, 𑀇𑀫𑀲𑁆𑀫𑀺𑀁 𑀧𑀸𑀤𑀸, 𑀇𑀫𑀲𑁆𑀫𑀺𑀁 𑀲𑀻𑀲𑀁, 𑀇𑀫𑀲𑁆𑀫𑀺𑀁 𑀫𑀚𑁆𑀛𑀺𑀫𑀓𑀸𑀬𑁄 𑀞𑀺𑀢𑁄𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀳𑀁 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀺𑀢𑁄 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀇𑀫𑀲𑁆𑀫𑀺𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀧𑀭𑀺𑀘𑁆𑀙𑁂𑀤𑀢𑁄 𑀇𑀤𑀁 𑀲𑀭𑀻𑀭𑀁 𑀅𑀥𑁄 𑀧𑀸𑀤𑀢𑀮𑁂𑀦 𑀉𑀧𑀭𑀺 𑀓𑁂𑀲𑀫𑀢𑁆𑀣𑀓𑁂𑀦 𑀢𑀺𑀭𑀺𑀬𑀁 𑀢𑀘𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀘 𑀞𑀸𑀦𑁂 𑀤𑁆𑀯𑀢𑁆𑀢𑀺𑀁𑀲𑀓𑀼𑀡𑀧𑀪𑀭𑀺𑀢𑀫𑁂𑀯𑀸𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀬𑀫𑀲𑁆𑀲 𑀳𑀢𑁆𑀣𑀧𑀭𑀺𑀘𑁆𑀙𑁂𑀤𑁄, 𑀅𑀬𑀁 𑀧𑀸𑀤𑀧𑀭𑀺𑀘𑁆𑀙𑁂𑀤𑁄, 𑀅𑀬𑀁 𑀲𑀻𑀲𑀧𑀭𑀺𑀘𑁆𑀙𑁂𑀤𑁄, 𑀅𑀬𑀁 𑀫𑀚𑁆𑀛𑀺𑀫𑀓𑀸𑀬𑀧𑀭𑀺𑀘𑁆𑀙𑁂𑀤𑁄𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀬𑀢𑁆𑀢𑀓𑀁 𑀯𑀸 𑀧𑀦 𑀞𑀸𑀦𑀁 𑀕𑀡𑁆𑀳𑀢𑀺, 𑀢𑀢𑁆𑀢𑀓𑀫𑁂𑀯 𑀇𑀤𑀁 𑀈𑀤𑀺𑀲𑀁 𑀉𑀤𑁆𑀥𑀼𑀫𑀸𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀧𑀼𑀭𑀺𑀲𑀲𑁆𑀲 𑀧𑀦 𑀇𑀢𑁆𑀣𑀺𑀲𑀭𑀻𑀭𑀁 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑀭𑀻𑀭𑀁 𑀦 𑀯𑀝𑁆𑀝𑀢𑀺. 𑀯𑀺𑀲𑀪𑀸𑀕𑁂 𑀲𑀭𑀻𑀭𑁂 𑀆𑀭𑀫𑁆𑀫𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀯𑀺𑀧𑁆𑀨𑀦𑁆𑀤𑀦𑀲𑁆𑀲𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺. ‘‘𑀉𑀕𑁆𑀖𑀸𑀝𑀺𑀢𑀸𑀧𑀺 𑀳𑀺 𑀇𑀢𑁆𑀣𑀻 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀅. 𑀦𑀺. 𑁫.𑁫𑁫) 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀪𑀸𑀕𑀲𑀭𑀻𑀭𑁂𑀬𑁂𑀯 𑀏𑀯𑀁 𑀙𑀩𑁆𑀩𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁.

𑁧𑁧𑁧. 𑀬𑁄 𑀧𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀆𑀲𑁂𑀯𑀺𑀢𑀓𑀫𑁆𑀫𑀝𑁆𑀞𑀸𑀦𑁄 𑀧𑀭𑀺𑀳𑀢𑀥𑀼𑀢𑀗𑁆𑀕𑁄 𑀧𑀭𑀺𑀫𑀤𑁆𑀤𑀺𑀢𑀫𑀳𑀸𑀪𑀽𑀢𑁄 𑀧𑀭𑀺𑀕𑁆𑀕𑀳𑀺𑀢𑀲𑀗𑁆𑀔𑀸𑀭𑁄 𑀯𑀯𑀢𑁆𑀣𑀸𑀧𑀺𑀢𑀦𑀸𑀫𑀭𑀽𑀧𑁄 𑀉𑀕𑁆𑀖𑀸𑀝𑀺𑀢𑀲𑀢𑁆𑀢𑀲𑀜𑁆𑀜𑁄 𑀓𑀢𑀲𑀫𑀡𑀥𑀫𑁆𑀫𑁄 𑀯𑀸𑀲𑀺𑀢𑀯𑀸𑀲𑀦𑁄 𑀪𑀸𑀯𑀺𑀢𑀪𑀸𑀯𑀦𑁄 𑀲𑀩𑀻𑀚𑁄 𑀜𑀸𑀡𑀼𑀢𑁆𑀢𑀭𑁄 𑀅𑀧𑁆𑀧𑀓𑀺𑀮𑁂𑀲𑁄 𑀓𑀼𑀮𑀧𑀼𑀢𑁆𑀢𑁄, 𑀢𑀲𑁆𑀲 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺. 𑀦𑁄 𑀘𑁂 𑀏𑀯𑀁 𑀉𑀧𑀝𑁆𑀞𑀸𑀢𑀺, 𑀅𑀣𑁂𑀯𑀁 𑀙𑀩𑁆𑀩𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀢𑁄 𑀉𑀧𑀝𑁆𑀞𑀸𑀢𑀺. 𑀬𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀦 𑀉𑀧𑀝𑁆𑀞𑀸𑀢𑀺, 𑀢𑁂𑀦 𑀲𑀦𑁆𑀥𑀺𑀢𑁄 𑀯𑀺𑀯𑀭𑀢𑁄 𑀦𑀺𑀦𑁆𑀦𑀢𑁄 𑀣𑀮𑀢𑁄 𑀲𑀫𑀦𑁆𑀢𑀢𑁄𑀢𑀺 𑀧𑀼𑀦𑀧𑀺 𑀧𑀜𑁆𑀘𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁.

𑁧𑁧𑁨. 𑀢𑀢𑁆𑀣 𑀲𑀦𑁆𑀥𑀺𑀢𑁄𑀢𑀺 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀢𑁄. 𑀉𑀤𑁆𑀥𑀼𑀫𑀸𑀢𑀓𑁂 𑀧𑀦 𑀓𑀣𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀬𑁄 𑀯𑀯𑀢𑁆𑀣𑀧𑁂𑀲𑁆𑀲𑀢𑀺. 𑀢𑀲𑁆𑀫𑀸𑀦𑁂𑀦 𑀢𑀬𑁄 𑀤𑀓𑁆𑀔𑀺𑀡𑀳𑀢𑁆𑀣𑀲𑀦𑁆𑀥𑀻, 𑀢𑀬𑁄 𑀯𑀸𑀫𑀳𑀢𑁆𑀣𑀲𑀦𑁆𑀥𑀻, 𑀢𑀬𑁄 𑀤𑀓𑁆𑀔𑀺𑀡𑀧𑀸𑀤𑀲𑀦𑁆𑀥𑀻, 𑀢𑀬𑁄 𑀯𑀸𑀫𑀧𑀸𑀤𑀲𑀦𑁆𑀥𑀻, 𑀏𑀓𑁄 𑀕𑀻𑀯𑀲𑀦𑁆𑀥𑀺, 𑀏𑀓𑁄 𑀓𑀝𑀺𑀲𑀦𑁆𑀥𑀻𑀢𑀺 𑀏𑀯𑀁 𑀘𑀼𑀤𑁆𑀤𑀲𑀫𑀳𑀸𑀲𑀦𑁆𑀥𑀺𑀯𑀲𑁂𑀦 𑀲𑀦𑁆𑀥𑀺𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀯𑀺𑀯𑀭𑀢𑁄𑀢𑀺 𑀯𑀺𑀯𑀭𑀁 𑀦𑀸𑀫 𑀳𑀢𑁆𑀣𑀦𑁆𑀢𑀭𑀁 𑀧𑀸𑀤𑀦𑁆𑀢𑀭𑀁 𑀉𑀤𑀭𑀦𑁆𑀢𑀭𑀁 𑀓𑀡𑁆𑀡𑀦𑁆𑀢𑀭𑀦𑁆𑀢𑀺 𑀏𑀯𑀁 𑀯𑀺𑀯𑀭𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀓𑁆𑀔𑀻𑀦𑀫𑁆𑀧𑀺 𑀦𑀺𑀫𑁆𑀫𑀻𑀮𑀺𑀢𑀪𑀸𑀯𑁄 𑀯𑀸 𑀉𑀫𑁆𑀫𑀻𑀮𑀺𑀢𑀪𑀸𑀯𑁄 𑀯𑀸 𑀫𑀼𑀔𑀲𑁆𑀲 𑀘 𑀧𑀺𑀳𑀺𑀢𑀪𑀸𑀯𑁄 𑀯𑀸 𑀯𑀺𑀯𑀝𑀪𑀸𑀯𑁄 𑀯𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. 𑀦𑀺𑀦𑁆𑀦𑀢𑁄𑀢𑀺 𑀬𑀁 𑀲𑀭𑀻𑀭𑁂 𑀦𑀺𑀦𑁆𑀦𑀝𑁆𑀞𑀸𑀦𑀁 𑀅𑀓𑁆𑀔𑀺𑀓𑀽𑀧𑁄 𑀯𑀸 𑀅𑀦𑁆𑀢𑁄𑀫𑀼𑀔𑀁 𑀯𑀸 𑀕𑀮𑀯𑀸𑀝𑀓𑁄 𑀯𑀸, 𑀢𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀳𑀁 𑀦𑀺𑀦𑁆𑀦𑁂 𑀞𑀺𑀢𑁄 𑀲𑀭𑀻𑀭𑀁 𑀉𑀦𑁆𑀦𑀢𑁂𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀣𑀮𑀢𑁄𑀢𑀺 𑀬𑀁 𑀲𑀭𑀻𑀭𑁂 𑀉𑀦𑁆𑀦𑀢𑀝𑁆𑀞𑀸𑀦𑀁 𑀚𑀡𑁆𑀡𑀼𑀓𑀁 𑀯𑀸 𑀉𑀭𑁄 𑀯𑀸 𑀦𑀮𑀸𑀝𑀁 𑀯𑀸, 𑀢𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀣 𑀯𑀸 𑀅𑀳𑀁 𑀣𑀮𑁂 𑀞𑀺𑀢𑁄 𑀲𑀭𑀻𑀭𑀁 𑀦𑀺𑀦𑁆𑀦𑁂𑀢𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀁 𑀲𑀭𑀻𑀭𑀁 𑀲𑀫𑀦𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀲𑀓𑀮𑀲𑀭𑀻𑀭𑁂 𑀜𑀸𑀡𑀁 𑀘𑀸𑀭𑁂𑀢𑁆𑀯𑀸 𑀬𑀁 𑀞𑀸𑀦𑀁 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀢𑁆𑀣 ‘‘𑀉𑀤𑁆𑀥𑀼𑀫𑀸𑀢𑀓𑀁 𑀉𑀤𑁆𑀥𑀼𑀫𑀸𑀢𑀓’’𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀏𑀯𑀫𑁆𑀧𑀺 𑀦 𑀉𑀧𑀝𑁆𑀞𑀸𑀢𑀺, 𑀉𑀤𑀭𑀧𑀭𑀺𑀬𑁄𑀲𑀸𑀦𑀁 𑀅𑀢𑀺𑀭𑁂𑀓𑀁 𑀉𑀤𑁆𑀥𑀼𑀫𑀸𑀢𑀓𑀁 𑀳𑁄𑀢𑀺, 𑀢𑀢𑁆𑀣 ‘‘𑀉𑀤𑁆𑀥𑀼𑀫𑀸𑀢𑀓𑀁 𑀉𑀤𑁆𑀥𑀼𑀫𑀸𑀢𑀓’’𑀦𑁆𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁.

𑁧𑁧𑁩. 𑀇𑀤𑀸𑀦𑀺 ‘‘𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀓𑀭𑁄𑀢𑀻’’𑀢𑀺𑀆𑀤𑀻𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋

𑀢𑁂𑀦 𑀬𑁄𑀕𑀺𑀦𑀸 𑀢𑀲𑁆𑀫𑀺𑀁 𑀲𑀭𑀻𑀭𑁂 𑀬𑀣𑀸𑀯𑀼𑀢𑁆𑀢𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀲𑀼𑀝𑁆𑀞𑀼 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁. 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑁂𑀦 𑀲𑀸𑀥𑀼𑀓𑀁 𑀉𑀧𑀥𑀸𑀭𑁂𑀢𑀩𑁆𑀩𑀜𑁆𑀘𑁂𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑀜𑁆𑀘. 𑀲𑀭𑀻𑀭𑀢𑁄 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀧𑀤𑁂𑀲𑁂 𑀞𑀺𑀢𑁂𑀦 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀁. ‘‘𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮𑀁 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀲𑀢𑀓𑁆𑀔𑀢𑁆𑀢𑀼𑀁 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀁, 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑀺𑀢𑀩𑁆𑀩𑀁. 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑁄𑀦𑁆𑀢𑀲𑁆𑀲 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀺. 𑀓𑀤𑀸 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀺? 𑀬𑀤𑀸 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑀺𑀫𑁆𑀫𑀻𑀮𑁂𑀢𑁆𑀯𑀸 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀘 𑀏𑀓𑀲𑀤𑀺𑀲𑀁 𑀳𑀼𑀢𑁆𑀯𑀸 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀤𑀸 𑀲𑀼𑀕𑁆𑀕𑀳𑀺𑀢𑀁 𑀦𑀸𑀫 𑀳𑁄𑀢𑀺.

𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀏𑀯𑀁 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀲𑀽𑀧𑀥𑀸𑀭𑀺𑀢𑀁 𑀉𑀧𑀥𑀸𑀭𑁂𑀢𑁆𑀯𑀸 𑀲𑀼𑀯𑀯𑀢𑁆𑀣𑀺𑀢𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀘𑁂 𑀢𑀢𑁆𑀣𑁂𑀯 𑀪𑀸𑀯𑀦𑀸𑀧𑀭𑀺𑀬𑁄𑀲𑀸𑀦𑀁 𑀧𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣𑀸𑀦𑁂𑀦 𑀆𑀕𑀫𑀦𑀓𑀸𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀓𑀓𑁂𑀦 𑀅𑀤𑀼𑀢𑀺𑀬𑁂𑀦 𑀢𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀲𑀽𑀧𑀝𑁆𑀞𑀺𑀢𑀁 𑀲𑀢𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄𑀕𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀩𑀳𑀺𑀕𑀢𑁂𑀦 𑀫𑀸𑀦𑀲𑁂𑀦 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀫𑁂𑀯 𑀕𑀦𑁆𑀢𑀩𑁆𑀩𑀁.

𑀲𑀼𑀲𑀸𑀦𑀸 𑀦𑀺𑀓𑁆𑀔𑀫𑀦𑁆𑀢𑁂𑀦𑁂𑀯 𑀘 𑀆𑀕𑀫𑀦𑀫𑀕𑁆𑀕𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄, 𑀬𑁂𑀦 𑀫𑀕𑁆𑀕𑁂𑀦 𑀦𑀺𑀓𑁆𑀔𑀦𑁆𑀢𑁄𑀲𑁆𑀫𑀺, 𑀅𑀬𑀁 𑀫𑀕𑁆𑀕𑁄 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀢𑀺, 𑀧𑀘𑁆𑀙𑀺𑀫𑀉𑀢𑁆𑀢𑀭𑀤𑀓𑁆𑀔𑀺𑀡𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀢𑀺, 𑀯𑀺𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀯𑀸𑀫𑀢𑁄 𑀕𑀘𑁆𑀙𑀢𑀺, 𑀇𑀫𑀲𑁆𑀫𑀺𑀁 𑀤𑀓𑁆𑀔𑀺𑀡𑀢𑁄, 𑀇𑀫𑀲𑁆𑀫𑀺𑀁 𑀘𑀲𑁆𑀲 𑀞𑀸𑀦𑁂 𑀧𑀸𑀲𑀸𑀡𑁄, 𑀇𑀫𑀲𑁆𑀫𑀺𑀁 𑀯𑀫𑁆𑀫𑀺𑀓𑁄, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁄, 𑀇𑀫𑀲𑁆𑀫𑀺𑀁 𑀕𑀘𑁆𑀙𑁄, 𑀇𑀫𑀲𑁆𑀫𑀺𑀁 𑀮𑀢𑀸𑀢𑀺 𑀏𑀯𑀁 𑀆𑀕𑀫𑀦𑀫𑀕𑁆𑀕𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀆𑀕𑀢𑁂𑀦 𑀘𑀗𑁆𑀓𑀫𑀦𑁆𑀢𑁂𑀦𑀸𑀧𑀺 𑀢𑀩𑁆𑀪𑀸𑀕𑀺𑀬𑁄𑀯 𑀘𑀗𑁆𑀓𑀫𑁄 𑀅𑀥𑀺𑀝𑁆𑀞𑀸𑀢𑀩𑁆𑀩𑁄, 𑀅𑀲𑀼𑀪𑀦𑀺𑀫𑀺𑀢𑁆𑀢𑀤𑀺𑀲𑀸𑀪𑀺𑀫𑀼𑀔𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀘𑀗𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀦𑁆𑀢𑁂𑀦 𑀆𑀲𑀦𑀫𑁆𑀧𑀺 𑀢𑀩𑁆𑀪𑀸𑀕𑀺𑀬𑀫𑁂𑀯 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀲𑁆𑀲𑀁 𑀤𑀺𑀲𑀸𑀬𑀁 𑀲𑁄𑀩𑁆𑀪𑁄 𑀯𑀸 𑀧𑀧𑀸𑀢𑁄 𑀯𑀸 𑀭𑀼𑀓𑁆𑀔𑁄 𑀯𑀸 𑀯𑀢𑀺 𑀯𑀸 𑀓𑀮𑀮𑀁 𑀯𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀢𑀁𑀤𑀺𑀲𑀸𑀪𑀺𑀫𑀼𑀔𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀘𑀗𑁆𑀓𑀫𑀺𑀢𑀼𑀁, 𑀆𑀲𑀦𑀫𑁆𑀧𑀺 𑀅𑀦𑁄𑀓𑀸𑀲𑀢𑁆𑀢𑀸 𑀦 𑀲𑀓𑁆𑀓𑀸 𑀧𑀜𑁆𑀜𑀧𑁂𑀢𑀼𑀁. 𑀢𑀁 𑀤𑀺𑀲𑀁 𑀅𑀦𑀧𑀮𑁄𑀓𑁂𑀦𑁆𑀢𑁂𑀦𑀸𑀧𑀺 𑀑𑀓𑀸𑀲𑀸𑀦𑀼𑀭𑀽𑀧𑁂 𑀞𑀸𑀦𑁂 𑀘𑀗𑁆𑀓𑀫𑀺𑀢𑀩𑁆𑀩𑀜𑁆𑀘𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀜𑁆𑀘. 𑀘𑀺𑀢𑁆𑀢𑀁 𑀧𑀦 𑀢𑀁𑀤𑀺𑀲𑀸𑀪𑀺𑀫𑀼𑀔𑀁𑀬𑁂𑀯 𑀓𑀸𑀢𑀩𑁆𑀩𑀁.

𑁧𑁧𑁪. 𑀇𑀤𑀸𑀦𑀺 ‘‘𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀸 𑀓𑀺𑀫𑀢𑁆𑀣𑀺𑀬𑀸’’𑀢𑀺𑀆𑀤𑀺𑀧𑀜𑁆𑀳𑀸𑀦𑀁 ‘‘𑀅𑀲𑀫𑁆𑀫𑁄𑀳𑀢𑁆𑀣𑀸’’𑀢𑀺𑀆𑀤𑀺𑀯𑀺𑀲𑁆𑀲𑀚𑁆𑀚𑀦𑁂 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀲 𑀳𑀺 𑀅𑀯𑁂𑀮𑀸𑀬𑀁 𑀉𑀤𑁆𑀥𑀼𑀫𑀸𑀢𑀓𑀦𑀺𑀫𑀺𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀁 𑀓𑀢𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀢𑀁 𑀫𑀢𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑀁 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑀁 𑀯𑀺𑀬 𑀅𑀦𑀼𑀩𑀦𑁆𑀥𑀫𑀸𑀦𑀁 𑀯𑀺𑀬 𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀲𑁄 𑀢𑀁 𑀩𑀻𑀪𑀘𑁆𑀙𑀁 𑀪𑁂𑀭𑀯𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑁄𑀢𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀧𑀸𑀧𑀼𑀡𑀸𑀢𑀺. 𑀧𑀸𑀴𑀺𑀬𑀁 𑀳𑀺 𑀯𑀺𑀪𑀢𑁆𑀢𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀅𑀜𑁆𑀜𑀁 𑀏𑀯𑀭𑀽𑀧𑀁 𑀪𑁂𑀭𑀯𑀸𑀭𑀫𑁆𑀫𑀡𑀁 𑀦𑀸𑀫 𑀦𑀢𑁆𑀣𑀺. 𑀇𑀫𑀲𑁆𑀫𑀺𑀁 𑀳𑀺 𑀓𑀫𑁆𑀫𑀝𑁆𑀞𑀸𑀦𑁂 𑀛𑀸𑀦𑀯𑀺𑀩𑁆𑀪𑀦𑁆𑀢𑀓𑁄 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? 𑀅𑀢𑀺𑀪𑁂𑀭𑀯𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲. 𑀢𑀲𑁆𑀫𑀸 𑀢𑁂𑀦 𑀬𑁄𑀕𑀺𑀦𑀸 𑀲𑀦𑁆𑀣𑀫𑁆𑀪𑁂𑀢𑁆𑀯𑀸 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀫𑀢𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑀓𑀁 𑀦𑀸𑀫 𑀦𑀢𑁆𑀣𑀺. 𑀲𑀘𑁂 𑀳𑀺 𑀲𑁄 ‘‘𑀏𑀢𑀲𑁆𑀲 𑀲𑀫𑀻𑀧𑁂 𑀞𑀺𑀢𑁄 𑀧𑀸𑀲𑀸𑀡𑁄 𑀯𑀸 𑀮𑀢𑀸 𑀯𑀸 𑀆𑀕𑀘𑁆𑀙𑁂𑀬𑁆𑀬, 𑀲𑀭𑀻𑀭𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬. 𑀬𑀣𑀸 𑀧𑀦 𑀲𑁄 𑀧𑀸𑀲𑀸𑀡𑁄 𑀯𑀸 𑀮𑀢𑀸 𑀯𑀸 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀲𑀭𑀻𑀭𑀫𑁆𑀧𑀺 𑀦𑀸𑀕𑀘𑁆𑀙𑀢𑀺. 𑀅𑀬𑀁 𑀧𑀦 𑀢𑀼𑀬𑁆𑀳𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀲𑀜𑁆𑀜𑀚𑁄 𑀲𑀜𑁆𑀜𑀸𑀲𑀫𑁆𑀪𑀯𑁄, 𑀓𑀫𑁆𑀫𑀝𑁆𑀞𑀸𑀦𑀁 𑀢𑁂 𑀅𑀚𑁆𑀚 𑀉𑀧𑀝𑁆𑀞𑀺𑀢𑀁, 𑀫𑀸 𑀪𑀸𑀬𑀺 𑀪𑀺𑀓𑁆𑀔𑀽’’𑀢𑀺 𑀢𑀸𑀲𑀁 𑀯𑀺𑀦𑁄𑀤𑁂𑀢𑁆𑀯𑀸 𑀳𑀸𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀲𑀜𑁆𑀘𑀭𑀸𑀧𑁂𑀢𑀩𑁆𑀩𑀁. 𑀏𑀯𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀺. 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀼𑀧𑀮𑀓𑁆𑀔𑀡𑀸 𑀅𑀲𑀫𑁆𑀫𑁄𑀳𑀢𑁆𑀣𑀸’’𑀢𑀺.

𑀏𑀓𑀸𑀤𑀲𑀯𑀺𑀥𑁂𑀦 𑀧𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀉𑀧𑀦𑀺𑀩𑀦𑁆𑀥𑀢𑀺. 𑀢𑀲𑁆𑀲 𑀳𑀺 𑀘𑀓𑁆𑀔𑀽𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑀦𑀧𑀘𑁆𑀘𑀬𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀫𑀸𑀦𑀲𑀁 𑀘𑀸𑀭𑁂𑀦𑁆𑀢𑀲𑁆𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀫𑀸𑀦𑀲𑀁 𑀘𑀸𑀭𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀅𑀧𑁆𑀧𑀦𑀸𑀬𑀁 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀉𑀧𑀦𑀺𑀩𑀦𑁆𑀥𑀦𑀢𑁆𑀣𑁄’’𑀢𑀺.

𑁧𑁧𑁫. 𑀕𑀢𑀸𑀕𑀢𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸𑀢𑀺 𑀏𑀢𑁆𑀣 𑀧𑀦 𑀬𑀸 𑀕𑀢𑀫𑀕𑁆𑀕𑀲𑁆𑀲 𑀘 𑀆𑀕𑀢𑀫𑀕𑁆𑀕𑀲𑁆𑀲 𑀘 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀼𑀢𑁆𑀢𑀸, 𑀲𑀸 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀬𑀸 𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀘𑁂 𑀳𑀺 𑀇𑀫𑀁 𑀪𑀺𑀓𑁆𑀔𑀼𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑁂𑀘𑀺 𑀅𑀚𑁆𑀚, 𑀪𑀦𑁆𑀢𑁂, 𑀓𑀢𑀺𑀫𑀻𑀢𑀺 𑀤𑀺𑀯𑀲𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀝𑀺𑀲𑀦𑁆𑀣𑀸𑀭𑀁 𑀯𑀸 𑀓𑀭𑁄𑀦𑁆𑀢𑀺, 𑀅𑀳𑀁 𑀓𑀫𑁆𑀫𑀝𑁆𑀞𑀸𑀦𑀺𑀓𑁄𑀢𑀺 𑀢𑀼𑀡𑁆𑀳𑀻𑀪𑀽𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀺𑀯𑀲𑁄 𑀓𑀣𑁂𑀢𑀩𑁆𑀩𑁄, 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄. 𑀲𑀘𑁂 𑀦 𑀚𑀸𑀦𑀸𑀢𑀺, 𑀦 𑀚𑀸𑀦𑀸𑀫𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀥𑀫𑁆𑀫𑀺𑀓𑁄 𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄. 𑀢𑀲𑁆𑀲𑁂𑀯𑀁 𑀓𑀭𑁄𑀦𑁆𑀢𑀲𑁆𑀲 𑀉𑀕𑁆𑀕𑀳𑀺𑀢𑀁 𑀢𑀭𑀼𑀡𑀦𑀺𑀫𑀺𑀢𑁆𑀢𑀁 𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀦𑀲𑁆𑀲𑀦𑁆𑀢𑁂𑀧𑀺 𑀤𑀺𑀯𑀲𑀁 𑀧𑀼𑀝𑁆𑀞𑁂𑀦 𑀓𑀣𑁂𑀢𑀩𑁆𑀩𑀫𑁂𑀯. 𑀧𑀜𑁆𑀳𑀁 𑀅𑀚𑀸𑀦𑀦𑁆𑀢𑁂𑀦 𑀦 𑀚𑀸𑀦𑀸𑀫𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀚𑀸𑀦𑀦𑁆𑀢𑁂𑀦 𑀏𑀓𑀤𑁂𑀲𑁂𑀦 𑀓𑀣𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀝𑀺𑀲𑀦𑁆𑀣𑀸𑀭𑁄𑀧𑀺 𑀓𑀸𑀢𑀩𑁆𑀩𑁄. 𑀆𑀕𑀦𑁆𑀢𑀼𑀓𑀁 𑀧𑀦 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑀼𑀓𑀧𑀝𑀺𑀲𑀦𑁆𑀣𑀸𑀭𑁄 𑀓𑀸𑀢𑀩𑁆𑀩𑁄𑀯. 𑀅𑀯𑀲𑁂𑀲𑀸𑀦𑀺𑀧𑀺 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀉𑀧𑁄𑀲𑀣𑀸𑀕𑀸𑀭𑀯𑀢𑁆𑀢𑀪𑁄𑀚𑀦𑀲𑀸𑀮𑀸𑀚𑀦𑁆𑀢𑀸𑀖𑀭𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀆𑀕𑀦𑁆𑀢𑀼𑀓𑀕𑀫𑀺𑀓𑀯𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀧𑀽𑀭𑁂𑀢𑀩𑁆𑀩𑀸𑀦𑁂𑀯. 𑀢𑀲𑁆𑀲 𑀢𑀸𑀦𑀺 𑀧𑀽𑀭𑁂𑀦𑁆𑀢𑀲𑁆𑀲𑀸𑀧𑀺 𑀢𑀁 𑀢𑀭𑀼𑀡𑀦𑀺𑀫𑀺𑀢𑁆𑀢𑀁 𑀦𑀲𑁆𑀲𑀢𑀺, 𑀧𑀼𑀦 𑀕𑀦𑁆𑀢𑁆𑀯𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑀼𑀓𑀸𑀫𑀲𑁆𑀲𑀸𑀧𑀺 𑀅𑀫𑀦𑀼𑀲𑁆𑀲𑁂𑀳𑀺 𑀯𑀸 𑀯𑀸𑀴𑀫𑀺𑀕𑁂𑀳𑀺 𑀯𑀸 𑀅𑀥𑀺𑀝𑁆𑀞𑀺𑀢𑀢𑁆𑀢𑀸 𑀲𑀼𑀲𑀸𑀦𑀫𑁆𑀧𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀉𑀤𑁆𑀥𑀼𑀫𑀸𑀢𑀓𑀁 𑀳𑀺 𑀏𑀓𑀫𑁂𑀯 𑀯𑀸 𑀤𑁆𑀯𑁂 𑀯𑀸 𑀤𑀺𑀯𑀲𑁂 𑀞𑀢𑁆𑀯𑀸 𑀯𑀺𑀦𑀻𑀮𑀓𑀸𑀤𑀺𑀪𑀸𑀯𑀁 𑀕𑀘𑁆𑀙𑀢𑀺. 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀢𑁂𑀦 𑀲𑀫𑀁 𑀤𑀼𑀮𑁆𑀮𑀪𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀯𑀁 𑀦𑀝𑁆𑀞𑁂 𑀦𑀺𑀫𑀺𑀢𑁆𑀢𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀭𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀤𑀺𑀯𑀸𑀞𑀸𑀦𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀅𑀳𑀁 𑀇𑀫𑀺𑀦𑀸 𑀦𑀸𑀫 𑀤𑁆𑀯𑀸𑀭𑁂𑀦 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀲𑀼𑀓𑀤𑀺𑀲𑀸𑀪𑀺𑀫𑀼𑀔𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀯𑀸𑀫𑀁 𑀕𑀡𑁆𑀳𑀺, 𑀅𑀲𑀼𑀓𑀲𑁆𑀫𑀺𑀁 𑀤𑀓𑁆𑀔𑀺𑀡𑀁. 𑀢𑀲𑁆𑀲 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀸𑀲𑀸𑀡𑁄, 𑀅𑀲𑀼𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀦𑀫𑀜𑁆𑀜𑀢𑀭𑀁. 𑀲𑁄𑀳𑀁 𑀢𑁂𑀦 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀅𑀲𑀼𑀪𑀁 𑀅𑀤𑁆𑀤𑀲𑀁. 𑀢𑀢𑁆𑀣 𑀅𑀲𑀼𑀓𑀤𑀺𑀲𑀸𑀪𑀺𑀫𑀼𑀔𑁄 𑀞𑀢𑁆𑀯𑀸 𑀏𑀯𑀜𑁆𑀘𑁂𑀯𑀜𑁆𑀘 𑀲𑀫𑀦𑁆𑀢𑀸 𑀦𑀺𑀫𑀺𑀢𑁆𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀯𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀲𑀼𑀓𑀤𑀺𑀲𑀸𑀬 𑀲𑀼𑀲𑀸𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀯𑀭𑀽𑀧𑁂𑀦 𑀦𑀸𑀫 𑀫𑀕𑁆𑀕𑁂𑀦 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀇𑀥 𑀦𑀺𑀲𑀺𑀦𑁆𑀦𑁄𑀢𑀺 𑀏𑀯𑀁 𑀬𑀸𑀯 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁, 𑀢𑀸𑀯 𑀕𑀢𑀸𑀕𑀢𑀫𑀕𑁆𑀕𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄. 𑀢𑀲𑁆𑀲𑁂𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺, 𑀧𑀼𑀭𑀢𑁄 𑀦𑀺𑀓𑁆𑀔𑀺𑀢𑁆𑀢𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀭𑀺𑀫𑀸𑀓𑀸𑀭𑁂𑀦𑁂𑀯 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀢𑀸𑀕𑀢𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀻𑀣𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀸’’𑀢𑀺.

𑁧𑁧𑁬. 𑀇𑀤𑀸𑀦𑀺 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀻 𑀭𑀢𑀦𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀻𑀢𑀺 𑀏𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮𑁂 𑀫𑀸𑀦𑀲𑀁 𑀘𑀸𑀭𑁂𑀢𑁆𑀯𑀸 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀫𑁆𑀳𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑀸 𑀪𑀯𑀺𑀢𑀩𑁆𑀩𑀁.

𑀬𑀣𑀸 𑀧𑀦 𑀤𑀼𑀕𑁆𑀕𑀢𑁄 𑀧𑀼𑀭𑀺𑀲𑁄 𑀫𑀳𑀕𑁆𑀖𑀁 𑀫𑀡𑀺𑀭𑀢𑀦𑀁 𑀮𑀪𑀺𑀢𑁆𑀯𑀸 𑀤𑀼𑀮𑁆𑀮𑀪𑀁 𑀯𑀢 𑀫𑁂 𑀮𑀤𑁆𑀥𑀦𑁆𑀢𑀺 𑀢𑀲𑁆𑀫𑀺𑀁 𑀭𑀢𑀦𑀲𑀜𑁆𑀜𑀻 𑀳𑀼𑀢𑁆𑀯𑀸 𑀕𑀸𑀭𑀯𑀁 𑀚𑀦𑁂𑀢𑁆𑀯𑀸 𑀯𑀺𑀧𑀼𑀮𑁂𑀦 𑀧𑁂𑀫𑁂𑀦 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀢𑀁 𑀭𑀓𑁆𑀔𑁂𑀬𑁆𑀬, 𑀏𑀯𑀫𑁂𑀯 ‘‘𑀤𑀼𑀮𑁆𑀮𑀪𑀁 𑀫𑁂 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀮𑀤𑁆𑀥𑀁 𑀤𑀼𑀕𑁆𑀕𑀢𑀲𑁆𑀲 𑀫𑀳𑀕𑁆𑀖𑀫𑀡𑀺𑀭𑀢𑀦𑀲𑀤𑀺𑀲𑀁. 𑀘𑀢𑀼𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀳𑀺 𑀅𑀢𑁆𑀢𑀦𑁄 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀅𑀢𑁆𑀢𑀦𑁄 𑀦𑀸𑀲𑀺𑀓𑀯𑀸𑀢𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀓𑀲𑀺𑀡𑀁 𑀓𑀢𑁆𑀯𑀸 𑀬𑀣𑀸𑀲𑀼𑀔𑀁 𑀪𑀸𑀯𑁂𑀢𑀺, 𑀏𑀯𑀁 𑀇𑀢𑀭𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀼𑀮𑀪𑀸𑀦𑀺. ‘𑀇𑀤𑀁 𑀧𑀦 𑀏𑀓𑀫𑁂𑀯 𑀯𑀸 𑀤𑁆𑀯𑁂 𑀯𑀸 𑀤𑀺𑀯𑀲𑁂 𑀢𑀺𑀝𑁆𑀞𑀢𑀺, 𑀢𑀢𑁄 𑀧𑀭𑀁 𑀯𑀺𑀦𑀻𑀮𑀓𑀸𑀤𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀻’𑀢𑀺 𑀦𑀢𑁆𑀣𑀺 𑀇𑀢𑁄 𑀤𑀼𑀮𑁆𑀮𑀪𑀢𑀭’’𑀦𑁆𑀢𑀺 𑀢𑀲𑁆𑀫𑀺𑀁 𑀭𑀢𑀦𑀲𑀜𑁆𑀜𑀺𑀦𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁂𑀦 𑀢𑀁 𑀦𑀺𑀫𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁. 𑀭𑀢𑁆𑀢𑀺𑀝𑁆𑀞𑀸𑀦𑁂 𑀘 𑀤𑀺𑀯𑀸𑀞𑀸𑀦𑁂 𑀘 ‘‘𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮𑀁 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀢𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑀩𑁆𑀩𑀁. 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑀩𑁆𑀩𑀁, 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀸𑀳𑀢𑀁 𑀓𑀸𑀢𑀩𑁆𑀩𑀁.

𑁧𑁧𑁭. 𑀢𑀲𑁆𑀲𑁂𑀯𑀁 𑀓𑀭𑁄𑀢𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀭𑀺𑀤𑀁 𑀦𑀺𑀫𑀺𑀢𑁆𑀢𑀤𑁆𑀯𑀬𑀲𑁆𑀲 𑀦𑀸𑀦𑀸𑀓𑀭𑀡𑀁, 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁 𑀪𑁂𑀭𑀯𑀤𑀲𑁆𑀲𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀣𑀽𑀮𑀗𑁆𑀕𑀧𑀘𑁆𑀘𑀗𑁆𑀕𑀧𑀼𑀭𑀺𑀲𑁄 𑀯𑀺𑀬. 𑀢𑀲𑁆𑀲 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀧𑀝𑀺𑀮𑀸𑀪𑀲𑀫𑀓𑀸𑀮𑀫𑁂𑀯 𑀩𑀳𑀺𑀤𑁆𑀥𑀸 𑀓𑀸𑀫𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀅𑀦𑀼𑀦𑀬𑀧𑁆𑀧𑀳𑀸𑀦𑁂𑀦𑁂𑀯 𑀘𑀲𑁆𑀲 𑀮𑁄𑀳𑀺𑀢𑀧𑁆𑀧𑀳𑀸𑀦𑁂𑀦 𑀧𑀼𑀩𑁆𑀩𑁄 𑀯𑀺𑀬 𑀩𑁆𑀬𑀸𑀧𑀸𑀤𑁄𑀧𑀺 𑀧𑀳𑀻𑀬𑀢𑀺. 𑀢𑀣𑀸 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀣𑀺𑀦𑀫𑀺𑀤𑁆𑀥𑀁, 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀦𑁆𑀢𑀥𑀫𑁆𑀫𑀸𑀦𑀼𑀬𑁄𑀕𑀯𑀲𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀅𑀥𑀺𑀕𑀢𑀯𑀺𑀲𑁂𑀲𑀲𑁆𑀲 𑀧𑀘𑁆𑀘𑀓𑁆𑀔𑀢𑀸𑀬 𑀧𑀝𑀺𑀧𑀢𑁆𑀢𑀺𑀤𑁂𑀲𑀓𑁂 𑀲𑀢𑁆𑀣𑀭𑀺 𑀧𑀝𑀺𑀧𑀢𑁆𑀢𑀺𑀬𑀁 𑀧𑀝𑀺𑀧𑀢𑁆𑀢𑀺𑀨𑀮𑁂 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀻𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀧𑀳𑀻𑀬𑀦𑁆𑀢𑀺. 𑀢𑀲𑁆𑀫𑀺𑀜𑁆𑀜𑁂𑀯 𑀘 𑀦𑀺𑀫𑀺𑀢𑁆𑀢𑁂 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄, 𑀦𑀺𑀫𑀺𑀢𑁆𑀢𑀸𑀦𑀼𑀫𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑁄 𑀯𑀺𑀘𑀸𑀭𑁄, 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀸𑀥𑀺𑀕𑀫𑀧𑀘𑁆𑀘𑀬𑀸 𑀧𑀻𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀪𑀯𑀢𑁄 𑀧𑀲𑁆𑀲𑀤𑁆𑀥𑀺, 𑀢𑀦𑁆𑀦𑀺𑀫𑀺𑀢𑁆𑀢𑀁 𑀲𑀼𑀔𑀁, 𑀲𑀼𑀔𑀺𑀢𑀲𑁆𑀲 𑀘𑀺𑀢𑁆𑀢𑀲𑀫𑀸𑀥𑀺𑀲𑀫𑁆𑀪𑀯𑀢𑁄 𑀲𑀼𑀔𑀦𑀺𑀫𑀺𑀢𑁆𑀢𑀸 𑀏𑀓𑀕𑁆𑀕𑀢𑀸 𑀘𑀸𑀢𑀺 𑀛𑀸𑀦𑀗𑁆𑀕𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀫𑀲𑁆𑀲 𑀧𑀞𑀫𑀚𑁆𑀛𑀸𑀦𑀧𑀝𑀺𑀩𑀺𑀫𑁆𑀩𑀪𑀽𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀫𑁆𑀧𑀺 𑀢𑀗𑁆𑀔𑀡𑀜𑁆𑀜𑁂𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀢𑁄 𑀧𑀭𑀁 𑀬𑀸𑀯 𑀧𑀞𑀫𑀚𑁆𑀛𑀸𑀦𑀲𑁆𑀲 𑀅𑀧𑁆𑀧𑀦𑀸 𑀘𑁂𑀯 𑀯𑀲𑀺𑀧𑁆𑀧𑀢𑁆𑀢𑀺 𑀘, 𑀢𑀸𑀯 𑀲𑀩𑁆𑀩𑀁 𑀧𑀣𑀯𑀻𑀓𑀲𑀺𑀡𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀦𑀻𑀮𑀓𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀸𑀦𑀺

𑁧𑁧𑁮. 𑀇𑀢𑁄 𑀧𑀭𑁂𑀲𑀼 𑀧𑀦 𑀯𑀺𑀦𑀻𑀮𑀓𑀸𑀤𑀻𑀲𑀼𑀧𑀺 𑀬𑀁 𑀢𑀁 ‘‘𑀉𑀤𑁆𑀥𑀼𑀫𑀸𑀢𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀏𑀓𑁄 𑀅𑀤𑀼𑀢𑀺𑀬𑁄 𑀕𑀘𑁆𑀙𑀢𑀺 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 ‘‘𑀯𑀺𑀦𑀻𑀮𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄, 𑀯𑀺𑀧𑀼𑀩𑁆𑀩𑀓𑀁 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀢𑀢𑁆𑀣 𑀢𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀧𑀤𑀫𑀢𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀯𑀺𑀦𑀺𑀘𑁆𑀙𑀬𑀸𑀥𑀺𑀧𑁆𑀧𑀸𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀯𑀺𑀦𑀻𑀮𑀓𑁂 ‘‘𑀯𑀺𑀦𑀻𑀮𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀦𑀻𑀮𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀜𑁆𑀘𑁂𑀢𑁆𑀣 𑀓𑀩𑀭𑀓𑀩𑀭𑀯𑀡𑁆𑀡𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀉𑀲𑁆𑀲𑀤𑀯𑀲𑁂𑀦 𑀉𑀧𑀝𑁆𑀞𑀸𑀢𑀺.

𑀯𑀺𑀧𑀼𑀩𑁆𑀩𑀓𑁂 ‘‘𑀯𑀺𑀧𑀼𑀩𑁆𑀩𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀧𑀼𑀩𑁆𑀩𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀦𑁂𑀢𑁆𑀣 𑀧𑀕𑁆𑀖𑀭𑀦𑁆𑀢𑀫𑀺𑀯 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑀺𑀘𑁆𑀘𑀮𑀁 𑀲𑀦𑁆𑀦𑀺𑀲𑀺𑀦𑁆𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀯𑀺𑀘𑁆𑀙𑀺𑀤𑁆𑀤𑀓𑀁 𑀬𑀼𑀤𑁆𑀥𑀫𑀡𑁆𑀟𑀮𑁂 𑀯𑀸 𑀘𑁄𑀭𑀸𑀝𑀯𑀺𑀬𑀁 𑀯𑀸 𑀲𑀼𑀲𑀸𑀦𑁂 𑀯𑀸 𑀬𑀢𑁆𑀣 𑀭𑀸𑀚𑀸𑀦𑁄 𑀘𑁄𑀭𑁂 𑀙𑀺𑀦𑁆𑀤𑀸𑀧𑁂𑀦𑁆𑀢𑀺. 𑀅𑀭𑀜𑁆𑀜𑁂 𑀯𑀸 𑀧𑀦 𑀲𑀻𑀳𑀩𑁆𑀬𑀕𑁆𑀖𑁂𑀳𑀺 𑀙𑀺𑀦𑁆𑀦𑀧𑀼𑀭𑀺𑀲𑀝𑁆𑀞𑀸𑀦𑁂 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀢𑀣𑀸𑀭𑀽𑀧𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀦𑀸𑀦𑀸𑀤𑀺𑀲𑀸𑀬𑀁 𑀧𑀢𑀺𑀢𑀫𑁆𑀧𑀺 𑀏𑀓𑀸𑀯𑀚𑁆𑀚𑀦𑁂𑀦 𑀆𑀧𑀸𑀣𑀫𑀸𑀕𑀘𑁆𑀙𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀆𑀕𑀘𑁆𑀙𑀢𑀺, 𑀲𑀬𑀁 𑀳𑀢𑁆𑀣𑁂𑀦 𑀦 𑀧𑀭𑀸𑀫𑀲𑀺𑀢𑀩𑁆𑀩𑀁. 𑀧𑀭𑀸𑀫𑀲𑀦𑁆𑀢𑁄 𑀳𑀺 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀆𑀭𑀸𑀫𑀺𑀓𑁂𑀦 𑀯𑀸 𑀲𑀫𑀡𑀼𑀤𑁆𑀤𑁂𑀲𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀏𑀓𑀝𑁆𑀞𑀸𑀦𑁂 𑀓𑀸𑀭𑁂𑀢𑀩𑁆𑀩𑀁. 𑀅𑀮𑀪𑀦𑁆𑀢𑁂𑀦 𑀓𑀢𑁆𑀢𑀭𑀬𑀝𑁆𑀞𑀺𑀬𑀸 𑀯𑀸 𑀤𑀡𑁆𑀟𑀓𑁂𑀦 𑀯𑀸 𑀏𑀓𑀗𑁆𑀕𑀼𑀮𑀦𑁆𑀢𑀭𑀁 𑀓𑀢𑁆𑀯𑀸 𑀉𑀧𑀦𑀸𑀫𑁂𑀢𑀩𑁆𑀩𑀁. 𑀏𑀯𑀁 𑀉𑀧𑀦𑀸𑀫𑁂𑀢𑁆𑀯𑀸 ‘‘𑀯𑀺𑀘𑁆𑀙𑀺𑀤𑁆𑀤𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀘𑁆𑀙𑀺𑀤𑁆𑀤𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀚𑁆𑀛𑁂 𑀙𑀺𑀤𑁆𑀤𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀧𑀭𑀺𑀧𑀼𑀡𑁆𑀡𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀯𑀺𑀓𑁆𑀔𑀸𑀬𑀺𑀢𑀓𑁂 𑀯𑀺𑀓𑁆𑀔𑀸𑀬𑀺𑀢𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀓𑁆𑀔𑀸𑀬𑀺𑀢𑀓𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀦𑁂𑀢𑁆𑀣 𑀢𑀳𑀺𑀁 𑀢𑀳𑀺𑀁 𑀔𑀸𑀬𑀺𑀢𑀲𑀤𑀺𑀲𑀫𑁂𑀯 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀯𑀺𑀓𑁆𑀔𑀺𑀢𑁆𑀢𑀓𑀫𑁆𑀧𑀺 𑀯𑀺𑀘𑁆𑀙𑀺𑀤𑁆𑀤𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑀁 𑀓𑀸𑀭𑁂𑀢𑁆𑀯𑀸 𑀯𑀸 𑀓𑀢𑁆𑀯𑀸 𑀯𑀸 ‘‘𑀯𑀺𑀓𑁆𑀔𑀺𑀢𑁆𑀢𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀓𑁆𑀔𑀺𑀢𑁆𑀢𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀦𑁆𑀢𑀭𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀧𑀭𑀺𑀧𑀼𑀡𑁆𑀡𑀁𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀫𑁆𑀧𑀺 𑀯𑀺𑀘𑁆𑀙𑀺𑀤𑁆𑀤𑀓𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼𑀬𑁂𑀯 𑀞𑀸𑀦𑁂𑀲𑀼 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀗𑁆𑀕𑀼𑀮𑀗𑁆𑀕𑀼𑀮𑀦𑁆𑀢𑀭𑀁 𑀓𑀸𑀭𑁂𑀢𑁆𑀯𑀸 𑀯𑀸 𑀓𑀢𑁆𑀯𑀸 𑀯𑀸 ‘‘𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀧𑀝𑀺𑀓𑁆𑀓𑀽𑀮𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀦𑁂𑀢𑁆𑀣 𑀧𑀜𑁆𑀜𑀸𑀬𑀫𑀸𑀦𑀁 𑀧𑀳𑀸𑀭𑀫𑀼𑀔𑀁 𑀯𑀺𑀬 𑀳𑁄𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀫𑁂𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀮𑁄𑀳𑀺𑀢𑀓𑀁 𑀬𑀼𑀤𑁆𑀥𑀫𑀡𑁆𑀟𑀮𑀸𑀤𑀻𑀲𑀼 𑀮𑀤𑁆𑀥𑀧𑁆𑀧𑀳𑀸𑀭𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀯𑀸 𑀙𑀺𑀦𑁆𑀦𑁂𑀲𑀼 𑀪𑀺𑀦𑁆𑀦𑀕𑀡𑁆𑀟𑀧𑀻𑀴𑀓𑀸𑀤𑀻𑀦𑀁 𑀯𑀸 𑀫𑀼𑀔𑀢𑁄 𑀧𑀕𑁆𑀖𑀭𑀫𑀸𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀲𑁆𑀯𑀸 ‘‘𑀮𑁄𑀳𑀺𑀢𑀓𑀧𑀝𑀺𑀓𑁆𑀓𑀽𑀮𑀁 𑀮𑁄𑀳𑀺𑀢𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀏𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀸𑀢𑀧𑁆𑀧𑀳𑀢𑀸 𑀯𑀺𑀬 𑀭𑀢𑁆𑀢𑀧𑀝𑀸𑀓𑀸 𑀘𑀮𑀫𑀸𑀦𑀸𑀓𑀸𑀭𑀁 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀧𑀦 𑀲𑀦𑁆𑀦𑀺𑀲𑀺𑀦𑁆𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀧𑀼𑀴𑀯𑀓𑀁 𑀤𑁆𑀯𑀻𑀳𑀢𑀻𑀳𑀘𑁆𑀘𑀬𑁂𑀦 𑀓𑀼𑀡𑀧𑀲𑁆𑀲 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀓𑀺𑀫𑀺𑀭𑀸𑀲𑀺𑀧𑀕𑁆𑀖𑀭𑀡𑀓𑀸𑀮𑁂 𑀳𑁄𑀢𑀺. 𑀅𑀧𑀺𑀘 𑀢𑀁 𑀲𑁄𑀡𑀲𑀺𑀗𑁆𑀕𑀸𑀮𑀫𑀦𑀼𑀲𑁆𑀲𑀕𑁄𑀫𑀳𑀺𑀁𑀲𑀳𑀢𑁆𑀣𑀺𑀅𑀲𑁆𑀲𑀅𑀚𑀕𑀭𑀸𑀤𑀻𑀦𑀁 𑀲𑀭𑀻𑀭𑀧𑁆𑀧𑀫𑀸𑀡𑀫𑁂𑀯 𑀳𑀼𑀢𑁆𑀯𑀸 𑀲𑀸𑀮𑀺𑀪𑀢𑁆𑀢𑀭𑀸𑀲𑀺 𑀯𑀺𑀬 𑀢𑀺𑀝𑁆𑀞𑀢𑀺. 𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 ‘‘𑀧𑀼𑀴𑀯𑀓𑀧𑀝𑀺𑀓𑁆𑀓𑀽𑀮𑀁 𑀧𑀼𑀴𑀯𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀳𑀺 𑀓𑀸𑀴𑀤𑀻𑀖𑀯𑀸𑀧𑀺𑀬𑀸 𑀅𑀦𑁆𑀢𑁄 𑀳𑀢𑁆𑀣𑀺𑀓𑀼𑀡𑀧𑁂 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀲𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀦𑁂𑀢𑁆𑀣 𑀘𑀮𑀫𑀸𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀲𑀸𑀮𑀺𑀪𑀢𑁆𑀢𑀧𑀺𑀡𑁆𑀟𑁄 𑀯𑀺𑀬 𑀲𑀦𑁆𑀦𑀺𑀲𑀺𑀦𑁆𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀅𑀝𑁆𑀞𑀺𑀓𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀁 𑀲𑀫𑀁𑀲𑀮𑁄𑀳𑀺𑀢𑀁 𑀦𑀳𑀸𑀭𑀼𑀲𑀫𑁆𑀩𑀦𑁆𑀥’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁫𑁪) 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀢𑁆𑀣 𑀢𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀲𑀫𑀦𑁆𑀢𑀸 𑀧𑀸𑀲𑀸𑀡𑀸𑀤𑀻𑀦𑀁 𑀯𑀲𑁂𑀦 𑀲𑀦𑀺𑀫𑀺𑀢𑁆𑀢𑀁 𑀲𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀇𑀤𑀁 𑀅𑀝𑁆𑀞𑀺𑀓𑀦𑁆𑀢𑀺 𑀲𑀪𑀸𑀯𑀪𑀸𑀯𑀢𑁄 𑀉𑀧𑀮𑀓𑁆𑀔𑁂𑀢𑁆𑀯𑀸 𑀯𑀡𑁆𑀡𑀸𑀤𑀺𑀯𑀲𑁂𑀦 𑀏𑀓𑀸𑀤𑀲𑀳𑀸𑀓𑀸𑀭𑁂𑀳𑀺 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑁂𑀢𑀩𑁆𑀩𑀁.

𑁧𑁧𑁯. 𑀢𑀁 𑀧𑀦 𑀯𑀡𑁆𑀡𑀢𑁄 𑀲𑁂𑀢𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦 𑀉𑀧𑀝𑁆𑀞𑀸𑀢𑀺, 𑀑𑀤𑀸𑀢𑀓𑀲𑀺𑀡𑀲𑀫𑁆𑀪𑁂𑀤𑁄 𑀳𑁄𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀺𑀓𑀦𑁆𑀢𑀺 𑀧𑀝𑀺𑀓𑁆𑀓𑀽𑀮𑀯𑀲𑁂𑀦𑁂𑀯 𑀑𑀮𑁄𑀓𑁂𑀢𑀩𑁆𑀩𑀁. 𑀮𑀺𑀗𑁆𑀕𑀦𑁆𑀢𑀺 𑀇𑀥 𑀳𑀢𑁆𑀣𑀸𑀤𑀻𑀦𑀁 𑀦𑀸𑀫𑀁. 𑀢𑀲𑁆𑀫𑀸 𑀳𑀢𑁆𑀣𑀧𑀸𑀤𑀲𑀻𑀲𑀉𑀭𑀩𑀸𑀳𑀼𑀓𑀝𑀺𑀊𑀭𑀼𑀚𑀗𑁆𑀖𑀸𑀦𑀁 𑀯𑀲𑁂𑀦 𑀮𑀺𑀗𑁆𑀕𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀤𑀻𑀖𑀭𑀲𑁆𑀲𑀯𑀝𑁆𑀝𑀘𑀢𑀼𑀭𑀲𑁆𑀲𑀔𑀼𑀤𑁆𑀤𑀓𑀫𑀳𑀦𑁆𑀢𑀯𑀲𑁂𑀦 𑀧𑀦 𑀲𑀡𑁆𑀞𑀸𑀦𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀤𑀺𑀲𑁄𑀓𑀸𑀲𑀸 𑀯𑀼𑀢𑁆𑀢𑀦𑀬𑀸 𑀏𑀯. 𑀢𑀲𑁆𑀲 𑀢𑀲𑁆𑀲 𑀅𑀝𑁆𑀞𑀺𑀦𑁄 𑀧𑀭𑀺𑀬𑀦𑁆𑀢𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀬𑀤𑁂𑀯𑁂𑀢𑁆𑀣 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀅𑀧𑁆𑀧𑀦𑀸 𑀧𑀸𑀧𑀼𑀡𑀺𑀢𑀩𑁆𑀩𑀸. 𑀢𑀲𑁆𑀲 𑀢𑀲𑁆𑀲 𑀅𑀝𑁆𑀞𑀺𑀦𑁄 𑀦𑀺𑀦𑁆𑀦𑀝𑁆𑀞𑀸𑀦𑀣𑀮𑀝𑁆𑀞𑀸𑀦𑀯𑀲𑁂𑀦 𑀧𑀦 𑀦𑀺𑀦𑁆𑀦𑀢𑁄 𑀘 𑀣𑀮𑀢𑁄 𑀘 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀧𑀤𑁂𑀲𑀯𑀲𑁂𑀦𑀸𑀧𑀺 𑀅𑀳𑀁 𑀦𑀺𑀦𑁆𑀦𑁂 𑀞𑀺𑀢𑁄, 𑀅𑀝𑁆𑀞𑀺 𑀣𑀮𑁂, 𑀅𑀳𑀁 𑀣𑀮𑁂, 𑀅𑀝𑁆𑀞𑀺 𑀦𑀺𑀦𑁆𑀦𑁂𑀢𑀺𑀧𑀺 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀧𑀦 𑀅𑀝𑁆𑀞𑀺𑀓𑀸𑀦𑀁 𑀖𑀝𑀺𑀢𑀖𑀝𑀺𑀢𑀝𑁆𑀞𑀸𑀦𑀯𑀲𑁂𑀦 𑀲𑀦𑁆𑀥𑀺𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀅𑀝𑁆𑀞𑀺𑀓𑀸𑀦𑀁𑀬𑁂𑀯 𑀅𑀦𑁆𑀢𑀭𑀯𑀲𑁂𑀦 𑀯𑀺𑀯𑀭𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑁂𑀯 𑀧𑀦 𑀜𑀸𑀡𑀁 𑀘𑀸𑀭𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀫𑀝𑁆𑀞𑀻𑀢𑀺 𑀲𑀫𑀦𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀦𑀺𑀫𑀺𑀢𑁆𑀢𑁂 𑀅𑀦𑀼𑀧𑀝𑁆𑀞𑀳𑀦𑁆𑀢𑁂 𑀦𑀮𑀸𑀝𑀝𑁆𑀞𑀺𑀫𑁆𑀳𑀺 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀩𑁆𑀩𑀁.

𑁧𑁨𑁦. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀤𑀁 𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀇𑀢𑁄 𑀧𑀼𑀭𑀺𑀫𑁂𑀲𑀼 𑀧𑀼𑀴𑀯𑀓𑀸𑀤𑀻𑀲𑀼𑀧𑀺 𑀬𑀼𑀚𑁆𑀚𑀫𑀸𑀦𑀯𑀲𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀲𑀓𑀮𑀸𑀬𑀧𑀺 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀬 𑀏𑀓𑀲𑁆𑀫𑀺𑀫𑁆𑀧𑀺 𑀅𑀝𑁆𑀞𑀺𑀓𑁂 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀬𑀢𑁆𑀣𑀓𑀢𑁆𑀣𑀘𑀺 𑀏𑀓𑀸𑀤𑀲𑀯𑀺𑀥𑁂𑀦 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀺𑀓𑀧𑀝𑀺𑀓𑁆𑀓𑀽𑀮𑀁 𑀅𑀝𑁆𑀞𑀺𑀓𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑁂𑀢𑀩𑁆𑀩𑁄. 𑀇𑀥 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀫𑁆𑀧𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀫𑁆𑀧𑀺 𑀏𑀓𑀲𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀏𑀓𑀲𑁆𑀫𑀺𑀁 𑀅𑀝𑁆𑀞𑀺𑀓𑁂 𑀬𑀼𑀢𑁆𑀢𑀁. 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀸𑀬 𑀧𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂 𑀧𑀜𑁆𑀜𑀸𑀬𑀫𑀸𑀦𑁂 𑀯𑀺𑀯𑀭𑀢𑀸. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀧𑀭𑀺𑀧𑀼𑀡𑁆𑀡𑀪𑀸𑀯𑁄 𑀬𑀼𑀚𑁆𑀚𑀢𑀺. 𑀏𑀓𑀝𑁆𑀞𑀺𑀓𑁂𑀧𑀺 𑀘 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂𑀦 𑀩𑀻𑀪𑀘𑁆𑀙𑁂𑀦 𑀪𑀬𑀸𑀦𑀓𑁂𑀦 𑀪𑀯𑀺𑀢𑀩𑁆𑀩𑀁. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀦 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀓𑁂𑀦, 𑀉𑀧𑀘𑀸𑀭𑀸𑀯𑀳𑀢𑁆𑀢𑀸.

𑀇𑀫𑀲𑁆𑀫𑀺𑀁 𑀳𑀺 𑀑𑀓𑀸𑀲𑁂 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀁 𑀤𑁆𑀯𑀸𑀭𑀁 𑀤𑀢𑁆𑀯𑀸𑀯 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀢𑁆𑀣 ‘‘𑀘𑀢𑀽𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀤𑀲𑀲𑀼 𑀘 𑀅𑀲𑀼𑀪𑁂𑀲𑀼 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀦𑀢𑁆𑀣𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀳𑀺 𑀲𑀻𑀫𑀲𑀫𑁆𑀪𑁂𑀤𑁄𑀬𑁂𑀯 𑀦𑀺𑀫𑀺𑀢𑁆𑀢𑀁. 𑀤𑀲𑀲𑀼 𑀘 𑀅𑀲𑀼𑀪𑁂𑀲𑀼 𑀦𑀺𑀩𑁆𑀩𑀺𑀓𑀧𑁆𑀧𑀁 𑀓𑀢𑁆𑀯𑀸 𑀧𑀝𑀺𑀓𑁆𑀓𑀽𑀮𑀪𑀸𑀯𑁂𑀬𑁂𑀯 𑀤𑀺𑀝𑁆𑀞𑁂 𑀦𑀺𑀫𑀺𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦 𑀅𑀦𑀦𑁆𑀢𑀭𑀫𑁂𑀯 ‘‘𑀤𑀼𑀯𑀺𑀥𑀁 𑀇𑀥 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀺𑀭𑀽𑀧𑀁 𑀩𑀻𑀪𑀘𑁆𑀙𑀁 𑀪𑀬𑀸𑀦𑀓𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀁 𑀯𑀺𑀘𑀸𑀭𑁂𑀢𑁆𑀯𑀸 𑀅𑀯𑁄𑀘𑀼𑀫𑁆𑀳, 𑀇𑀤𑀫𑁂𑀯𑁂𑀢𑁆𑀣 𑀬𑀼𑀢𑁆𑀢𑀁.

𑀅𑀧𑀺𑀘 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀤𑀦𑁆𑀢𑀝𑁆𑀞𑀺𑀓𑀫𑀢𑁆𑀢𑀸𑀯𑀮𑁄𑀓𑀦𑁂𑀦 𑀲𑀓𑀮𑀺𑀢𑁆𑀣𑀺𑀲𑀭𑀻𑀭𑀲𑁆𑀲 𑀅𑀝𑁆𑀞𑀺𑀲𑀗𑁆𑀖𑀸𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀸𑀤𑀻𑀦𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀸𑀦𑀻𑀢𑀺.

𑀇𑀢𑀺 𑀅𑀲𑀼𑀪𑀸𑀦𑀺 𑀲𑀼𑀪𑀕𑀼𑀡𑁄, 𑀤𑀲𑀲𑀢𑀮𑁄𑀘𑀦𑁂𑀦 𑀣𑀼𑀢𑀓𑀺𑀢𑁆𑀢𑀺;

𑀬𑀸𑀦𑀺 𑀅𑀯𑁄𑀘 𑀤𑀲𑀩𑀮𑁄, 𑀏𑀓𑁂𑀓𑀚𑁆𑀛𑀸𑀦𑀳𑁂𑀢𑀼𑀦𑀻𑀢𑀺.

𑀏𑀯𑀁 𑀢𑀸𑀦𑀺 𑀘 𑀢𑁂𑀲𑀜𑁆𑀘, 𑀪𑀸𑀯𑀦𑀸𑀦𑀬𑀫𑀺𑀫𑀁 𑀯𑀺𑀤𑀺𑀢𑁆𑀯𑀸𑀦;

𑀢𑁂𑀲𑁆𑀯𑁂𑀯 𑀅𑀬𑀁 𑀪𑀺𑀬𑁆𑀬𑁄, 𑀧𑀓𑀺𑀡𑁆𑀡𑀓𑀓𑀣𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸.

𑀧𑀓𑀺𑀡𑁆𑀡𑀓𑀓𑀣𑀸

𑁧𑁨𑁧. 𑀏𑀢𑁂𑀲𑀼 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀥𑀺𑀕𑀢𑀚𑁆𑀛𑀸𑀦𑁄 𑀲𑀼𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑀢𑁆𑀢𑀸 𑀯𑀻𑀢𑀭𑀸𑀕𑁄 𑀯𑀺𑀬 𑀦𑀺𑀮𑁆𑀮𑁄𑀮𑀼𑀧𑁆𑀧𑀘𑀸𑀭𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁆𑀯𑀸𑀬𑀁 𑀅𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀘 𑀭𑀸𑀕𑀘𑀭𑀺𑀢𑀪𑁂𑀤𑀯𑀲𑁂𑀦 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀙𑀯𑀲𑀭𑀻𑀭𑀁 𑀳𑀺 𑀧𑀝𑀺𑀓𑁆𑀓𑀽𑀮𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑀁 𑀉𑀤𑁆𑀥𑀼𑀫𑀸𑀢𑀓𑀲𑀪𑀸𑀯𑀧𑁆𑀧𑀢𑁆𑀢𑀁 𑀯𑀸 𑀲𑀺𑀬𑀸, 𑀯𑀺𑀦𑀻𑀮𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀲𑀪𑀸𑀯𑀧𑁆𑀧𑀢𑁆𑀢𑀁. 𑀇𑀢𑀺 𑀬𑀸𑀤𑀺𑀲𑀁 𑀬𑀸𑀤𑀺𑀲𑀁 𑀲𑀓𑁆𑀓𑀸 𑀳𑁄𑀢𑀺 𑀮𑀤𑁆𑀥𑀼𑀁, 𑀢𑀸𑀤𑀺𑀲𑁂 𑀢𑀸𑀤𑀺𑀲𑁂 𑀉𑀤𑁆𑀥𑀼𑀫𑀸𑀢𑀓𑀧𑀝𑀺𑀓𑁆𑀓𑀽𑀮𑀁 𑀯𑀺𑀦𑀻𑀮𑀓𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀏𑀯𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀩𑁆𑀩𑀫𑁂𑀯𑀸𑀢𑀺 𑀲𑀭𑀻𑀭𑀲𑀪𑀸𑀯𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑀲𑀥𑀸 𑀅𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀉𑀤𑁆𑀥𑀼𑀫𑀸𑀢𑀓𑀁 𑀲𑀭𑀻𑀭𑀲𑀡𑁆𑀞𑀸𑀦𑀯𑀺𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁄 𑀲𑀡𑁆𑀞𑀸𑀦𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀦𑀻𑀮𑀓𑀁 𑀙𑀯𑀺𑀭𑀸𑀕𑀯𑀺𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑀯𑀡𑁆𑀡𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀧𑀼𑀩𑁆𑀩𑀓𑀁 𑀓𑀸𑀬𑀯𑀡𑀧𑀝𑀺𑀩𑀤𑁆𑀥𑀲𑁆𑀲 𑀤𑀼𑀕𑁆𑀕𑀦𑁆𑀥𑀪𑀸𑀯𑀲𑁆𑀲 𑀧𑀓𑀸𑀲𑀦𑀢𑁄 𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀲𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀲𑀭𑀻𑀭𑀕𑀦𑁆𑀥𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀘𑁆𑀙𑀺𑀤𑁆𑀤𑀓𑀁 𑀅𑀦𑁆𑀢𑁄𑀲𑀼𑀲𑀺𑀭𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑁂 𑀖𑀦𑀪𑀸𑀯𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀓𑁆𑀔𑀸𑀬𑀺𑀢𑀓𑀁 𑀫𑀁𑀲𑀼𑀧𑀘𑀬𑀲𑀫𑁆𑀧𑀢𑁆𑀢𑀺𑀯𑀺𑀦𑀸𑀲𑀧𑁆𑀧𑀓𑀸𑀲𑀦𑀢𑁄 𑀣𑀦𑀸𑀤𑀻𑀲𑀼 𑀲𑀭𑀻𑀭𑀧𑁆𑀧𑀤𑁂𑀲𑁂𑀲𑀼 𑀫𑀁𑀲𑀼𑀧𑀘𑀬𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀯𑀺𑀓𑁆𑀔𑀺𑀢𑁆𑀢𑀓𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀺𑀓𑁆𑀔𑁂𑀧𑀧𑁆𑀧𑀓𑀸𑀲𑀦𑀢𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀮𑀻𑀮𑀸𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁 𑀲𑀭𑀻𑀭𑀲𑀗𑁆𑀖𑀸𑀢𑀪𑁂𑀤𑀯𑀺𑀓𑀸𑀭𑀧𑁆𑀧𑀓𑀸𑀲𑀦𑀢𑁄 𑀲𑀭𑀻𑀭𑀲𑀗𑁆𑀖𑀸𑀢𑀲𑀫𑁆𑀧𑀢𑁆𑀢𑀺𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀫𑀓𑁆𑀔𑀺𑀢𑀧𑀝𑀺𑀓𑁆𑀓𑀽𑀮𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀅𑀮𑀗𑁆𑀓𑀸𑀭𑀚𑀦𑀺𑀢𑀲𑁄𑀪𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀧𑀼𑀴𑀯𑀓𑀁 𑀓𑀸𑀬𑀲𑁆𑀲 𑀅𑀦𑁂𑀓𑀓𑀺𑀫𑀺𑀓𑀼𑀮𑀲𑀸𑀥𑀸𑀭𑀡𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀓𑀸𑀬𑁂 𑀫𑀫𑀢𑁆𑀢𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀁. 𑀅𑀝𑁆𑀞𑀺𑀓𑀁 𑀲𑀭𑀻𑀭𑀝𑁆𑀞𑀻𑀦𑀁 𑀧𑀝𑀺𑀓𑁆𑀓𑀽𑀮𑀪𑀸𑀯𑀧𑁆𑀧𑀓𑀸𑀲𑀦𑀢𑁄 𑀤𑀦𑁆𑀢𑀲𑀫𑁆𑀧𑀢𑁆𑀢𑀺𑀭𑀸𑀕𑀺𑀦𑁄 𑀲𑀧𑁆𑀧𑀸𑀬𑀦𑁆𑀢𑀺 𑀏𑀯𑀁 𑀭𑀸𑀕𑀘𑀭𑀺𑀢𑀪𑁂𑀤𑀯𑀲𑁂𑀦𑀸𑀧𑀺 𑀤𑀲𑀥𑀸 𑀅𑀲𑀼𑀪𑀧𑁆𑀧𑀪𑁂𑀤𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀤𑀲𑀯𑀺𑀥𑁂𑀧𑀺 𑀏𑀢𑀲𑁆𑀫𑀺𑀁 𑀅𑀲𑀼𑀪𑁂 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀧𑀭𑀺𑀲𑀡𑁆𑀞𑀺𑀢𑀚𑀮𑀸𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦𑁂𑀯 𑀦𑀸𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀅𑀭𑀺𑀢𑁆𑀢𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀏𑀯𑀫𑁂𑀯 𑀤𑀼𑀩𑁆𑀩𑀮𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁, 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀢𑁆𑀣 𑀳𑁄𑀢𑀺, 𑀦 𑀤𑀼𑀢𑀺𑀬𑀸𑀤𑀻𑀦𑀺.

𑀧𑀝𑀺𑀓𑁆𑀓𑀽𑀮𑁂𑀧𑀺 𑀘 𑀏𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀫𑁆𑀳𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀘𑁂𑀯 𑀦𑀻𑀯𑀭𑀡𑀲𑀦𑁆𑀢𑀸𑀧𑀧𑁆𑀧𑀳𑀸𑀦𑁂𑀦 𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, ‘‘𑀩𑀳𑀼𑀁 𑀤𑀸𑀦𑀺 𑀯𑁂𑀢𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄 𑀧𑀼𑀧𑁆𑀨𑀙𑀟𑁆𑀟𑀓𑀲𑁆𑀲 𑀕𑀽𑀣𑀭𑀸𑀲𑀺𑀫𑁆𑀳𑀺 𑀯𑀺𑀬, 𑀉𑀲𑁆𑀲𑀦𑁆𑀦𑀩𑁆𑀬𑀸𑀥𑀺𑀤𑀼𑀓𑁆𑀔𑀲𑁆𑀲 𑀭𑁄𑀕𑀺𑀦𑁄 𑀯𑀫𑀦𑀯𑀺𑀭𑁂𑀘𑀦𑀧𑁆𑀧𑀯𑀢𑁆𑀢𑀺𑀬𑀁 𑀯𑀺𑀬 𑀘.

𑁧𑁨𑁨. 𑀤𑀲𑀯𑀺𑀥𑀫𑁆𑀧𑀺 𑀘𑁂𑀢𑀁 𑀅𑀲𑀼𑀪𑀁 𑀮𑀓𑁆𑀔𑀡𑀢𑁄 𑀏𑀓𑀫𑁂𑀯 𑀳𑁄𑀢𑀺. 𑀤𑀲𑀯𑀺𑀥𑀲𑁆𑀲𑀸𑀧𑀺 𑀳𑁂𑀢𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀪𑀸𑀯𑁄 𑀏𑀯 𑀮𑀓𑁆𑀔𑀡𑀁. 𑀢𑀤𑁂𑀢𑀁 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀦 𑀓𑁂𑀯𑀮𑀁 𑀫𑀢𑀲𑀭𑀻𑀭𑁂, 𑀤𑀦𑁆𑀢𑀝𑁆𑀞𑀺𑀓𑀤𑀲𑁆𑀲𑀸𑀯𑀺𑀦𑁄 𑀧𑀦 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀺𑀦𑁄 𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀭𑀸𑀚𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀽𑀧𑀝𑁆𑀞𑀸𑀓𑀲𑀸𑀫𑀡𑁂𑀭𑀲𑁆𑀲 𑀯𑀺𑀬 𑀘 𑀚𑀻𑀯𑀫𑀸𑀦𑀓𑀲𑀭𑀻𑀭𑁂𑀧𑀺 𑀉𑀧𑀝𑁆𑀞𑀸𑀢𑀺. 𑀬𑀣𑁂𑀯 𑀳𑀺 𑀫𑀢𑀲𑀭𑀻𑀭𑀁, 𑀏𑀯𑀁 𑀚𑀻𑀯𑀫𑀸𑀦𑀓𑀫𑁆𑀧𑀺 𑀅𑀲𑀼𑀪𑀫𑁂𑀯. 𑀅𑀲𑀼𑀪𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀆𑀕𑀦𑁆𑀢𑀼𑀓𑁂𑀦 𑀅𑀮𑀗𑁆𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀧𑀜𑁆𑀜𑀸𑀬𑀢𑀺. 𑀧𑀓𑀢𑀺𑀬𑀸 𑀧𑀦 𑀇𑀤𑀁 𑀲𑀭𑀻𑀭𑀁 𑀦𑀸𑀫 𑀅𑀢𑀺𑀭𑁂𑀓𑀢𑀺𑀲𑀢𑀅𑀝𑁆𑀞𑀺𑀓𑀲𑀫𑀼𑀲𑁆𑀲𑀬𑀁 𑀅𑀲𑀻𑀢𑀺𑀲𑀢𑀲𑀦𑁆𑀥𑀺𑀲𑀗𑁆𑀖𑀝𑀺𑀢𑀁 𑀦𑀯𑀦𑁆𑀳𑀸𑀭𑀼𑀲𑀢𑀦𑀺𑀩𑀦𑁆𑀥𑀦𑀁 𑀦𑀯𑀫𑀁𑀲𑀧𑁂𑀲𑀺𑀲𑀢𑀸𑀦𑀼𑀮𑀺𑀢𑁆𑀢𑀁 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀁 𑀙𑀯𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀁 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀫𑁂𑀤𑀓𑀣𑀸𑀮𑀺𑀓𑀸 𑀯𑀺𑀬 𑀦𑀺𑀘𑁆𑀘𑀼𑀕𑁆𑀖𑀭𑀺𑀢𑀧𑀕𑁆𑀖𑀭𑀺𑀢𑀁 𑀓𑀺𑀫𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀁 𑀭𑁄𑀕𑀸𑀦𑀁 𑀆𑀬𑀢𑀦𑀁 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀯𑀢𑁆𑀣𑀼 𑀧𑀭𑀺𑀪𑀺𑀦𑁆𑀦𑀧𑀼𑀭𑀸𑀡𑀕𑀡𑁆𑀟𑁄 𑀯𑀺𑀬 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀲𑀢𑀢𑀯𑀺𑀲𑁆𑀲𑀦𑁆𑀤𑀦𑀁. 𑀬𑀲𑁆𑀲 𑀉𑀪𑁄𑀳𑀺 𑀅𑀓𑁆𑀔𑀻𑀳𑀺 𑀅𑀓𑁆𑀔𑀺𑀕𑀽𑀣𑀓𑁄 𑀧𑀕𑁆𑀖𑀭𑀢𑀺, 𑀓𑀡𑁆𑀡𑀩𑀺𑀮𑁂𑀳𑀺 𑀓𑀡𑁆𑀡𑀕𑀽𑀣𑀓𑁄, 𑀦𑀸𑀲𑀸𑀧𑀼𑀝𑁂𑀳𑀺 𑀲𑀺𑀗𑁆𑀖𑀸𑀡𑀺𑀓𑀸, 𑀫𑀼𑀔𑀢𑁄 𑀆𑀳𑀸𑀭𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀥𑀺𑀭𑀸𑀦𑀺, 𑀅𑀥𑁄𑀤𑁆𑀯𑀸𑀭𑁂𑀳𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸, 𑀦𑀯𑀦𑀯𑀼𑀢𑀺𑀬𑀸 𑀮𑁄𑀫𑀓𑀽𑀧𑀲𑀳𑀲𑁆𑀲𑁂𑀳𑀺 𑀅𑀲𑀼𑀘𑀺𑀲𑁂𑀤𑀬𑀽𑀲𑁄 𑀧𑀕𑁆𑀖𑀭𑀢𑀺. 𑀦𑀻𑀮𑀫𑀓𑁆𑀔𑀺𑀓𑀸𑀤𑀬𑁄 𑀲𑀫𑁆𑀧𑀭𑀺𑀯𑀸𑀭𑁂𑀦𑁆𑀢𑀺. 𑀬𑀁 𑀤𑀦𑁆𑀢𑀓𑀝𑁆𑀞𑀫𑀼𑀔𑀥𑁄𑀯𑀦𑀲𑀻𑀲𑀫𑀓𑁆𑀔𑀦𑀦𑀳𑀸𑀦𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀻𑀳𑀺 𑀅𑀧𑁆𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀬𑀣𑀸𑀚𑀸𑀢𑁄𑀯 𑀨𑀭𑀼𑀲𑀯𑀺𑀧𑁆𑀧𑀓𑀺𑀡𑁆𑀡𑀓𑁂𑀲𑁄 𑀳𑀼𑀢𑁆𑀯𑀸 𑀕𑀸𑀫𑁂𑀦 𑀕𑀸𑀫𑀁 𑀯𑀺𑀘𑀭𑀦𑁆𑀢𑁄 𑀭𑀸𑀚𑀸𑀧𑀺 𑀧𑀼𑀧𑁆𑀨𑀙𑀟𑁆𑀟𑀓𑀘𑀡𑁆𑀟𑀸𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑁄𑀧𑀺 𑀲𑀫𑀲𑀭𑀻𑀭𑀧𑀝𑀺𑀓𑁆𑀓𑀽𑀮𑀢𑀸𑀬 𑀦𑀺𑀩𑁆𑀩𑀺𑀲𑁂𑀲𑁄 𑀳𑁄𑀢𑀺, 𑀏𑀯𑀁 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑁆𑀓𑀽𑀮𑀢𑀸𑀬 𑀭𑀜𑁆𑀜𑁄 𑀯𑀸 𑀘𑀡𑁆𑀟𑀸𑀮𑀲𑁆𑀲 𑀯𑀸 𑀲𑀭𑀻𑀭𑁂 𑀯𑁂𑀫𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀤𑀦𑁆𑀢𑀓𑀝𑁆𑀞𑀫𑀼𑀔𑀥𑁄𑀯𑀦𑀸𑀤𑀻𑀳𑀺 𑀧𑀦𑁂𑀢𑁆𑀣 𑀤𑀦𑁆𑀢𑀫𑀮𑀸𑀤𑀻𑀦𑀺 𑀧𑀫𑀚𑁆𑀚𑀺𑀢𑁆𑀯𑀸 𑀦𑀸𑀦𑀸𑀯𑀢𑁆𑀣𑁂𑀳𑀺 𑀳𑀺𑀭𑀺𑀓𑁄𑀧𑀻𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀸𑀦𑀸𑀯𑀡𑁆𑀡𑁂𑀦 𑀲𑀼𑀭𑀪𑀺𑀯𑀺𑀮𑁂𑀧𑀦𑁂𑀦 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀧𑀼𑀧𑁆𑀨𑀸𑀪𑀭𑀡𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 ‘‘𑀅𑀳𑀁 𑀫𑀫’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀸𑀓𑀸𑀭𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀇𑀫𑀺𑀦𑀸 𑀆𑀕𑀦𑁆𑀢𑀼𑀓𑁂𑀦 𑀅𑀮𑀗𑁆𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀢𑀤𑀲𑁆𑀲 𑀬𑀸𑀣𑀸𑀯𑀲𑀭𑀲𑀁 𑀅𑀲𑀼𑀪𑀮𑀓𑁆𑀔𑀡𑀁 𑀅𑀲𑀜𑁆𑀚𑀸𑀦𑀦𑁆𑀢𑀸 𑀧𑀼𑀭𑀺𑀲𑀸 𑀇𑀢𑁆𑀣𑀻𑀲𑀼, 𑀇𑀢𑁆𑀣𑀺𑀬𑁄 𑀘 𑀧𑀼𑀭𑀺𑀲𑁂𑀲𑀼 𑀭𑀢𑀺𑀁 𑀓𑀭𑁄𑀦𑁆𑀢𑀺. 𑀧𑀭𑀫𑀢𑁆𑀣𑀢𑁄 𑀧𑀦𑁂𑀢𑁆𑀣 𑀭𑀚𑁆𑀚𑀺𑀢𑀩𑁆𑀩𑀓𑀬𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀡𑀼𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀢𑀣𑀸 𑀳𑀺 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀲𑀼 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺 𑀲𑀭𑀻𑀭𑀢𑁄 𑀩𑀳𑀺 𑀧𑀢𑀺𑀢𑀁 𑀲𑀢𑁆𑀢𑀸 𑀳𑀢𑁆𑀣𑁂𑀦 𑀙𑀼𑀧𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀺, 𑀅𑀝𑁆𑀝𑀻𑀬𑀦𑁆𑀢𑀺 𑀳𑀭𑀸𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀬𑀁 𑀬𑀁 𑀧𑀦𑁂𑀢𑁆𑀣 𑀅𑀯𑀲𑁂𑀲𑀁 𑀳𑁄𑀢𑀺, 𑀢𑀁 𑀢𑀁 𑀏𑀯𑀁 𑀧𑀝𑀺𑀓𑁆𑀓𑀽𑀮𑀫𑁆𑀧𑀺 𑀲𑀫𑀸𑀦𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀧𑀭𑀺𑀬𑁄𑀦𑀤𑁆𑀥𑀸 𑀅𑀢𑁆𑀢𑀲𑀺𑀦𑁂𑀳𑀭𑀸𑀕𑀭𑀢𑁆𑀢𑀸 ‘‘𑀇𑀝𑁆𑀞𑀁 𑀓𑀦𑁆𑀢𑀁 𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀺. 𑀢𑁂 𑀏𑀯𑀁 𑀕𑀡𑁆𑀳𑀦𑁆𑀢𑀸 𑀅𑀝𑀯𑀺𑀬𑀁 𑀓𑀺𑀁𑀲𑀼𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀢𑁄 𑀅𑀧𑀢𑀺𑀢𑀧𑀼𑀧𑁆𑀨𑀁 ‘‘𑀅𑀬𑀁 𑀫𑀁𑀲𑀧𑁂𑀲𑀻’’𑀢𑀺 𑀯𑀺𑀳𑀜𑁆𑀜𑀫𑀸𑀦𑁂𑀦 𑀚𑀭𑀲𑀺𑀗𑁆𑀕𑀸𑀮𑁂𑀦 𑀲𑀫𑀸𑀦𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑁋

𑀬𑀣𑀸𑀧𑀺 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀲𑀺𑀗𑁆𑀕𑀸𑀮𑁄 𑀓𑀺𑀁𑀲𑀼𑀓𑀁 𑀯𑀦𑁂;

𑀫𑀁𑀲𑀭𑀼𑀓𑁆𑀔𑁄 𑀫𑀬𑀸 𑀮𑀤𑁆𑀥𑁄, 𑀇𑀢𑀺 𑀕𑀦𑁆𑀢𑁆𑀯𑀸𑀦 𑀯𑁂𑀕𑀲𑀸.

𑀧𑀢𑀺𑀢𑀁 𑀧𑀢𑀺𑀢𑀁 𑀧𑀼𑀧𑁆𑀨𑀁, 𑀟𑀁𑀲𑀺𑀢𑁆𑀯𑀸 𑀅𑀢𑀺𑀮𑁄𑀮𑀼𑀧𑁄;

𑀦𑀬𑀺𑀤𑀁 𑀫𑀁𑀲𑀁 𑀅𑀤𑀼𑀁 𑀫𑀁𑀲𑀁, 𑀬𑀁 𑀭𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀕𑀡𑁆𑀳𑀢𑀺.

𑀓𑁄𑀝𑁆𑀞𑀸𑀲𑀁 𑀧𑀢𑀺𑀢𑀁𑀬𑁂𑀯, 𑀅𑀲𑀼𑀪𑀦𑁆𑀢𑀺 𑀢𑀣𑀸 𑀩𑀼𑀥𑁄;

𑀅𑀕𑁆𑀕𑀳𑁂𑀢𑁆𑀯𑀸𑀦 𑀕𑀡𑁆𑀳𑁂𑀬𑁆𑀬, 𑀲𑀭𑀻𑀭𑀝𑁆𑀞𑀫𑁆𑀧𑀺 𑀦𑀁 𑀢𑀣𑀸.

𑀇𑀫𑀜𑁆𑀳𑀺 𑀲𑀼𑀪𑀢𑁄 𑀓𑀸𑀬𑀁, 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀫𑀼𑀘𑁆𑀙𑀺𑀢𑀸;

𑀩𑀸𑀮𑀸 𑀓𑀭𑁄𑀦𑁆𑀢𑀸 𑀧𑀸𑀧𑀸𑀦𑀺, 𑀤𑀼𑀓𑁆𑀔𑀸 𑀦 𑀧𑀭𑀺𑀫𑀼𑀘𑁆𑀘𑀭𑁂.

𑀢𑀲𑁆𑀫𑀸 𑀧𑀲𑁆𑀲𑁂𑀬𑁆𑀬 𑀫𑁂𑀥𑀸𑀯𑀻, 𑀚𑀻𑀯𑀢𑁄 𑀯𑀸 𑀫𑀢𑀲𑁆𑀲 𑀯𑀸;

𑀲𑀪𑀸𑀯𑀁 𑀧𑀽𑀢𑀺𑀓𑀸𑀬𑀲𑁆𑀲, 𑀲𑀼𑀪𑀪𑀸𑀯𑁂𑀦 𑀯𑀚𑁆𑀚𑀺𑀢𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

𑀤𑀼𑀕𑁆𑀕𑀦𑁆𑀥𑁄 𑀅𑀲𑀼𑀘𑀺 𑀓𑀸𑀬𑁄, 𑀓𑀼𑀡𑀧𑁄 𑀉𑀓𑁆𑀓𑀭𑀽𑀧𑀫𑁄;

𑀦𑀺𑀦𑁆𑀤𑀺𑀢𑁄 𑀘𑀓𑁆𑀔𑀼𑀪𑀽𑀢𑁂𑀳𑀺, 𑀓𑀸𑀬𑁄 𑀩𑀸𑀮𑀸𑀪𑀺𑀦𑀦𑁆𑀤𑀺𑀢𑁄.

𑀅𑀮𑁆𑀮𑀘𑀫𑁆𑀫𑀧𑀝𑀺𑀘𑁆𑀙𑀦𑁆𑀦𑁄, 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄;

𑀲𑀫𑀦𑁆𑀢𑀢𑁄 𑀧𑀕𑁆𑀖𑀭𑀢𑀺, 𑀅𑀲𑀼𑀘𑀺 𑀧𑀽𑀢𑀺𑀕𑀦𑁆𑀥𑀺𑀬𑁄.

𑀲𑀘𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀅𑀦𑁆𑀢𑁄 𑀩𑀸𑀳𑀺𑀭𑀓𑁄 𑀲𑀺𑀬𑀸;

𑀤𑀡𑁆𑀟𑀁 𑀦𑀽𑀦 𑀕𑀳𑁂𑀢𑁆𑀯𑀸𑀦, 𑀓𑀸𑀓𑁂 𑀲𑁄𑀡𑁂 𑀦𑀺𑀯𑀸𑀭𑀬𑁂𑀢𑀺.

𑀢𑀲𑁆𑀫𑀸 𑀤𑀩𑁆𑀩𑀚𑀸𑀢𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀚𑀻𑀯𑀫𑀸𑀦𑀲𑀭𑀻𑀭𑀁 𑀯𑀸 𑀳𑁄𑀢𑀼

𑀫𑀢𑀲𑀭𑀻𑀭𑀁 𑀯𑀸 𑀬𑀢𑁆𑀣 𑀬𑀢𑁆𑀣 𑀅𑀲𑀼𑀪𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀅𑀧𑁆𑀧𑀦𑀁 𑀧𑀸𑀧𑁂𑀢𑀩𑁆𑀩𑀦𑁆𑀢𑀺.

𑀇𑀢𑀺 𑀲𑀸𑀥𑀼𑀚𑀦𑀧𑀸𑀫𑁄𑀚𑁆𑀚𑀢𑁆𑀣𑀸𑀬 𑀓𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂

𑀲𑀫𑀸𑀥𑀺𑀪𑀸𑀯𑀦𑀸𑀥𑀺𑀓𑀸𑀭𑁂

𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄 𑀦𑀸𑀫

𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄.