𑁨. 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁄

𑁨𑁨. 𑀇𑀤𑀸𑀦𑀺 𑀬𑁂𑀳𑀺 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀲𑀻𑀮𑀲𑁆𑀲 𑀯𑁄𑀤𑀸𑀦𑀁 𑀳𑁄𑀢𑀺, 𑀢𑁂 𑀕𑀼𑀡𑁂 𑀲𑀫𑁆𑀧𑀸𑀤𑁂𑀢𑀼𑀁 𑀬𑀲𑁆𑀫𑀸 𑀲𑀫𑀸𑀤𑀺𑀦𑁆𑀦𑀲𑀻𑀮𑁂𑀦 𑀬𑁄𑀕𑀺𑀦𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀢𑀸𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀸𑀧𑀘𑀬𑀯𑀻𑀭𑀺𑀬𑀸𑀭𑀫𑁆𑀪𑀲𑀼𑀪𑀭𑀢𑀸𑀤𑀺𑀕𑀼𑀡𑀲𑀮𑀺𑀮𑀯𑀺𑀓𑁆𑀔𑀸𑀮𑀺𑀢𑀫𑀮𑀁 𑀲𑀻𑀮𑀜𑁆𑀘𑁂𑀯 𑀲𑀼𑀧𑀭𑀺𑀲𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀺, 𑀯𑀢𑀸𑀦𑀺 𑀘 𑀲𑀫𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀅𑀦𑀯𑀚𑁆𑀚𑀲𑀻𑀮𑀩𑁆𑀩𑀢𑀕𑀼𑀡𑀧𑀭𑀺𑀲𑀼𑀤𑁆𑀥𑀲𑀩𑁆𑀩𑀲𑀫𑀸𑀘𑀸𑀭𑁄 𑀧𑁄𑀭𑀸𑀡𑁂 𑀅𑀭𑀺𑀬𑀯𑀁𑀲𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀬 𑀘𑀢𑀼𑀢𑁆𑀣𑀲𑁆𑀲 𑀪𑀸𑀯𑀦𑀸𑀭𑀸𑀫𑀢𑀸𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀯𑀁𑀲𑀲𑁆𑀲 𑀅𑀥𑀺𑀕𑀫𑀸𑀭𑀳𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀥𑀼𑀢𑀗𑁆𑀕𑀓𑀣𑀁 𑀆𑀭𑀪𑀺𑀲𑁆𑀲𑀸𑀫.

𑀪𑀕𑀯𑀢𑀸 𑀳𑀺 𑀧𑀭𑀺𑀘𑁆𑀘𑀢𑁆𑀢𑀮𑁄𑀓𑀸𑀫𑀺𑀲𑀸𑀦𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀸𑀦𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁𑀬𑁂𑀯 𑀆𑀭𑀸𑀥𑁂𑀢𑀼𑀓𑀸𑀫𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀢𑁂𑀭𑀲𑀥𑀼𑀢𑀗𑁆𑀕𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁, 𑀏𑀓𑀸𑀲𑀦𑀺𑀓𑀗𑁆𑀕𑀁, 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁, 𑀆𑀭𑀜𑁆𑀜𑀺𑀓𑀗𑁆𑀕𑀁, 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁, 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁, 𑀲𑁄𑀲𑀸𑀦𑀺𑀓𑀗𑁆𑀕𑀁, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁, 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺. 𑀢𑀢𑁆𑀣 𑁋

𑀅𑀢𑁆𑀣𑀢𑁄 𑀮𑀓𑁆𑀔𑀡𑀸𑀤𑀻𑀳𑀺, 𑀲𑀫𑀸𑀤𑀸𑀦𑀯𑀺𑀥𑀸𑀦𑀢𑁄;

𑀧𑀪𑁂𑀤𑀢𑁄 𑀪𑁂𑀤𑀢𑁄 𑀘, 𑀢𑀲𑁆𑀲 𑀢𑀲𑁆𑀲𑀸𑀦𑀺𑀲𑀁𑀲𑀢𑁄.

𑀓𑀼𑀲𑀮𑀢𑁆𑀢𑀺𑀓𑀢𑁄 𑀘𑁂𑀯, 𑀥𑀼𑀢𑀸𑀤𑀻𑀦𑀁 𑀯𑀺𑀪𑀸𑀕𑀢𑁄;

𑀲𑀫𑀸𑀲𑀩𑁆𑀬𑀸𑀲𑀢𑁄 𑀘𑀸𑀧𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑁨𑁩. 𑀢𑀢𑁆𑀣 𑀅𑀢𑁆𑀣𑀢𑁄𑀢𑀺 𑀢𑀸𑀯 𑀭𑀣𑀺𑀓𑀲𑀼𑀲𑀸𑀦𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀁𑀲𑀽𑀦𑀁 𑀉𑀧𑀭𑀺 𑀞𑀺𑀢𑀢𑁆𑀢𑀸 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀢𑁂𑀲𑀼 𑀢𑁂𑀲𑀼 𑀧𑀁𑀲𑀼𑀓𑀽𑀮𑀫𑀺𑀯𑀸𑀢𑀺 𑀧𑀁𑀲𑀼𑀓𑀽𑀮𑀁, 𑀅𑀣 𑀯𑀸 𑀧𑀁𑀲𑀼 𑀯𑀺𑀬 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀓𑀼𑀘𑁆𑀙𑀺𑀢𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀮𑀤𑁆𑀥𑀦𑀺𑀩𑁆𑀩𑀘𑀦𑀲𑁆𑀲 𑀧𑀁𑀲𑀼𑀓𑀽𑀮𑀲𑁆𑀲 𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄. 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀅𑀗𑁆𑀕𑀁 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁. 𑀅𑀗𑁆𑀕𑀦𑁆𑀢𑀺 𑀓𑀸𑀭𑀡𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑁂𑀦 𑀲𑀫𑀸𑀤𑀸𑀦𑁂𑀦 𑀲𑁄 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁂𑀦𑁂𑀯 𑀦𑀬𑁂𑀦 𑀲𑀗𑁆𑀖𑀸𑀝𑀺𑀉𑀢𑁆𑀢𑀭𑀸𑀲𑀗𑁆𑀕𑀅𑀦𑁆𑀢𑀭𑀯𑀸𑀲𑀓𑀲𑀗𑁆𑀔𑀸𑀢𑀁 𑀢𑀺𑀘𑀻𑀯𑀭𑀁 𑀲𑀻𑀮𑀫𑀲𑁆𑀲𑀸𑀢𑀺 𑀢𑁂𑀘𑀻𑀯𑀭𑀺𑀓𑁄. 𑀢𑁂𑀘𑀻𑀯𑀭𑀺𑀓𑀲𑁆𑀲 𑀅𑀗𑁆𑀕𑀁 𑀢𑁂𑀘𑀻𑀯𑀭𑀺𑀓𑀗𑁆𑀕𑀁.

𑀪𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀧𑀦 𑀆𑀫𑀺𑀲𑀧𑀺𑀡𑁆𑀟𑀸𑀦𑀁 𑀧𑀸𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑁄, 𑀧𑀭𑁂𑀳𑀺 𑀤𑀺𑀦𑁆𑀦𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀢𑁆𑀢𑁂 𑀦𑀺𑀧𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀉𑀜𑁆𑀙𑀢𑀺 𑀢𑀁 𑀢𑀁 𑀓𑀼𑀮𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀕𑀯𑁂𑀲𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀧𑀺𑀡𑁆𑀟𑀸𑀬 𑀯𑀸 𑀧𑀢𑀺𑀢𑀼𑀁 𑀯𑀢𑀫𑁂𑀢𑀲𑁆𑀲𑀸𑀢𑀺 𑀧𑀺𑀡𑁆𑀟𑀧𑀸𑀢𑀻, 𑀧𑀢𑀺𑀢𑀼𑀦𑁆𑀢𑀺 𑀘𑀭𑀺𑀢𑀼𑀁, 𑀧𑀺𑀡𑁆𑀟𑀧𑀸𑀢𑀻 𑀏𑀯 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀅𑀗𑁆𑀕𑀁 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁.

𑀤𑀸𑀦𑀁 𑀯𑀼𑀘𑁆𑀘𑀢𑀺 𑀅𑀯𑀔𑀡𑁆𑀟𑀦𑀁, 𑀅𑀧𑁂𑀢𑀁 𑀤𑀸𑀦𑀢𑁄𑀢𑀺 𑀅𑀧𑀤𑀸𑀦𑀁, 𑀅𑀦𑀯𑀔𑀡𑁆𑀟𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀳 𑀅𑀧𑀤𑀸𑀦𑁂𑀦 𑀲𑀧𑀤𑀸𑀦𑀁, 𑀅𑀯𑀔𑀡𑁆𑀟𑀦𑀭𑀳𑀺𑀢𑀁 𑀅𑀦𑀼𑀖𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀧𑀤𑀸𑀦𑀁 𑀘𑀭𑀺𑀢𑀼𑀁 𑀇𑀤𑀫𑀲𑁆𑀲 𑀲𑀻𑀮𑀦𑁆𑀢𑀺 𑀲𑀧𑀤𑀸𑀦𑀘𑀸𑀭𑀻, 𑀲𑀧𑀤𑀸𑀦𑀘𑀸𑀭𑀻 𑀏𑀯 𑀲𑀧𑀤𑀸𑀦𑀘𑀸𑀭𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁.

𑀏𑀓𑀸𑀲𑀦𑁂 𑀪𑁄𑀚𑀦𑀁 𑀏𑀓𑀸𑀲𑀦𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀏𑀓𑀸𑀲𑀦𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀏𑀓𑀸𑀲𑀦𑀺𑀓𑀗𑁆𑀕𑀁.

𑀤𑀼𑀢𑀺𑀬𑀪𑀸𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀓𑁂𑀯𑀮𑀁 𑀏𑀓𑀲𑁆𑀫𑀺𑀁𑀬𑁂𑀯 𑀧𑀢𑁆𑀢𑁂 𑀧𑀺𑀡𑁆𑀟𑁄 𑀧𑀢𑁆𑀢𑀧𑀺𑀡𑁆𑀟𑁄. 𑀇𑀤𑀸𑀦𑀺 𑀧𑀢𑁆𑀢𑀧𑀺𑀡𑁆𑀟𑀕𑀳𑀡𑁂 𑀧𑀢𑁆𑀢𑀧𑀺𑀡𑁆𑀟𑀲𑀜𑁆𑀜𑀁 𑀓𑀢𑁆𑀯𑀸 𑀧𑀢𑁆𑀢𑀧𑀺𑀡𑁆𑀟𑁄 𑀲𑀻𑀮𑀫𑀲𑁆𑀲𑀸𑀢𑀺 𑀧𑀢𑁆𑀢𑀧𑀺𑀡𑁆𑀟𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁.

𑀔𑀮𑀽𑀢𑀺 𑀧𑀝𑀺𑀲𑁂𑀥𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀯𑀸𑀭𑀺𑀢𑁂𑀦 𑀲𑀢𑀸 𑀧𑀘𑁆𑀙𑀸 𑀮𑀤𑁆𑀥𑀁 𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀦𑀸𑀫, 𑀢𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀲𑁆𑀲 𑀪𑁄𑀚𑀦𑀁 𑀧𑀘𑁆𑀙𑀸𑀪𑀢𑁆𑀢𑀪𑁄𑀚𑀦𑀁, 𑀢𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑀪𑁄𑀚𑀦𑁂 𑀧𑀘𑁆𑀙𑀸𑀪𑀢𑁆𑀢𑀲𑀜𑁆𑀜𑀁 𑀓𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀘𑁆𑀙𑀸𑀪𑀢𑁆𑀢𑀺𑀓𑁄. 𑀦 𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄. 𑀲𑀫𑀸𑀤𑀸𑀦𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺𑀭𑀺𑀢𑁆𑀢𑀪𑁄𑀚𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑀔𑀮𑀽𑀢𑀺 𑀏𑀓𑁄 𑀲𑀓𑀼𑀡𑁄. 𑀲𑁄 𑀫𑀼𑀔𑁂𑀦 𑀨𑀮𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀢𑀺𑀢𑁂 𑀧𑀼𑀦 𑀅𑀜𑁆𑀜𑀁 𑀦 𑀔𑀸𑀤𑀢𑀺. 𑀢𑀸𑀤𑀺𑀲𑁄 𑀅𑀬𑀦𑁆𑀢𑀺 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁.

𑀅𑀭𑀜𑁆𑀜𑁂 𑀦𑀺𑀯𑀸𑀲𑁄 𑀲𑀻𑀮𑀫𑀲𑁆𑀲𑀸𑀢𑀺 𑀆𑀭𑀜𑁆𑀜𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀆𑀭𑀜𑁆𑀜𑀺𑀓𑀗𑁆𑀕𑀁.

𑀭𑀼𑀓𑁆𑀔𑀫𑀽𑀮𑁂 𑀦𑀺𑀯𑀸𑀲𑁄 𑀭𑀼𑀓𑁆𑀔𑀫𑀽𑀮𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑁄. 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲 𑀅𑀗𑁆𑀕𑀁 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁. 𑀅𑀩𑁆𑀪𑁄𑀓𑀸𑀲𑀺𑀓𑀲𑁄𑀲𑀸𑀦𑀺𑀓𑀗𑁆𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀤𑁂𑀯 𑀲𑀦𑁆𑀣𑀢𑀁 𑀬𑀣𑀸𑀲𑀦𑁆𑀣𑀢𑀁, 𑀇𑀤𑀁 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀯𑀁 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀲𑁂𑀦𑀸𑀲𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀺𑀁 𑀬𑀣𑀸𑀲𑀦𑁆𑀣𑀢𑁂 𑀯𑀺𑀳𑀭𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁.

𑀲𑀬𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀚𑁆𑀚𑀸𑀬 𑀯𑀺𑀳𑀭𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀦𑁂𑀲𑀚𑁆𑀚𑀺𑀓𑁄. 𑀢𑀲𑁆𑀲 𑀅𑀗𑁆𑀕𑀁 𑀦𑁂𑀲𑀚𑁆𑀚𑀺𑀓𑀗𑁆𑀕𑀁.

𑀲𑀩𑁆𑀩𑀸𑀦𑁂𑀯 𑀧𑀦𑁂𑀢𑀸𑀦𑀺 𑀢𑁂𑀦 𑀢𑁂𑀦 𑀲𑀫𑀸𑀤𑀸𑀦𑁂𑀦 𑀥𑀼𑀢𑀓𑀺𑀮𑁂𑀲𑀢𑁆𑀢𑀸 𑀥𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀗𑁆𑀕𑀸𑀦𑀺, 𑀓𑀺𑀮𑁂𑀲𑀥𑀼𑀦𑀦𑀢𑁄 𑀯𑀸 𑀥𑀼𑀢𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀜𑀸𑀡𑀁 𑀅𑀗𑁆𑀕𑀁 𑀏𑀢𑁂𑀲𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀺. 𑀅𑀣 𑀯𑀸 𑀥𑀼𑀢𑀸𑀦𑀺 𑀘 𑀢𑀸𑀦𑀺 𑀧𑀝𑀺𑀧𑀓𑁆𑀔𑀦𑀺𑀤𑁆𑀥𑀼𑀦𑀦𑀢𑁄 𑀅𑀗𑁆𑀕𑀸𑀦𑀺 𑀘 𑀧𑀝𑀺𑀧𑀢𑁆𑀢𑀺𑀬𑀸𑀢𑀺𑀧𑀺 𑀥𑀼𑀢𑀗𑁆𑀕𑀸𑀦𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀩𑁆𑀩𑀸𑀦𑁂𑀯 𑀧𑀦𑁂𑀢𑀸𑀦𑀺 𑀲𑀫𑀸𑀤𑀸𑀦𑀘𑁂𑀢𑀦𑀸𑀮𑀓𑁆𑀔𑀡𑀸𑀦𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑁄 𑀲𑀫𑀸𑀤𑀺𑀬𑀢𑀺, 𑀲𑁄 𑀧𑀼𑀕𑁆𑀕𑀮𑁄. 𑀬𑁂𑀦 𑀲𑀫𑀸𑀤𑀺𑀬𑀢𑀺, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸. 𑀬𑀸 𑀲𑀫𑀸𑀤𑀸𑀦𑀘𑁂𑀢𑀦𑀸, 𑀢𑀁 𑀥𑀼𑀢𑀗𑁆𑀕𑀁. 𑀬𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀯𑀢𑁆𑀣𑀽’’𑀢𑀺. 𑀲𑀩𑁆𑀩𑀸𑀦𑁂𑀯 𑀘 𑀮𑁄𑀮𑀼𑀧𑁆𑀧𑀯𑀺𑀤𑁆𑀥𑀁𑀲𑀦𑀭𑀲𑀸𑀦𑀺, 𑀦𑀺𑀮𑁆𑀮𑁄𑀮𑀼𑀧𑁆𑀧𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀅𑀭𑀺𑀬𑀥𑀫𑁆𑀫𑀧𑀤𑀝𑁆𑀞𑀸𑀦𑀸𑀦𑀺. 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀸𑀤𑀻𑀳𑀺 𑀯𑁂𑀤𑀺𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀫𑀸𑀤𑀸𑀦𑀯𑀺𑀥𑀸𑀦𑀢𑁄𑀢𑀺𑀆𑀤𑀻𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀩𑁆𑀩𑀸𑀦𑁂𑀯 𑀥𑀼𑀢𑀗𑁆𑀕𑀸𑀦𑀺 𑀥𑀭𑀫𑀸𑀦𑁂 𑀪𑀕𑀯𑀢𑀺 𑀪𑀕𑀯𑀢𑁄𑀯 𑀲𑀦𑁆𑀢𑀺𑀓𑁂 𑀲𑀫𑀸𑀤𑀸𑀢𑀩𑁆𑀩𑀸𑀦𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀳𑀸𑀲𑀸𑀯𑀓𑀲𑁆𑀲 𑀲𑀦𑁆𑀢𑀺𑀓𑁂. 𑀢𑀲𑁆𑀫𑀺𑀁 𑀅𑀲𑀢𑀺 𑀔𑀻𑀡𑀸𑀲𑀯𑀲𑁆𑀲, 𑀅𑀦𑀸𑀕𑀸𑀫𑀺𑀲𑁆𑀲, 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀲𑁄𑀢𑀸𑀧𑀦𑁆𑀦𑀲𑁆𑀲, 𑀢𑀺𑀧𑀺𑀝𑀓𑀲𑁆𑀲, 𑀤𑁆𑀯𑀺𑀧𑀺𑀝𑀓𑀲𑁆𑀲, 𑀏𑀓𑀧𑀺𑀝𑀓𑀲𑁆𑀲, 𑀏𑀓𑀲𑀗𑁆𑀕𑀻𑀢𑀺𑀓𑀲𑁆𑀲, 𑀅𑀝𑁆𑀞𑀓𑀣𑀸𑀘𑀭𑀺𑀬𑀲𑁆𑀲. 𑀢𑀲𑁆𑀫𑀺𑀁 𑀅𑀲𑀢𑀺 𑀥𑀼𑀢𑀗𑁆𑀕𑀥𑀭𑀲𑁆𑀲, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀯𑀤𑀦𑁆𑀢𑁂𑀦 𑀯𑀺𑀬 𑀲𑀫𑀸𑀤𑀸𑀢𑀩𑁆𑀩𑀸𑀦𑀺, 𑀅𑀧𑀺𑀘 𑀲𑀬𑀫𑁆𑀧𑀺 𑀲𑀫𑀸𑀤𑀸𑀢𑀼𑀁 𑀯𑀝𑁆𑀝𑀢𑀺 𑀏𑀯. 𑀏𑀢𑁆𑀣 𑀘 𑀘𑁂𑀢𑀺𑀬𑀧𑀩𑁆𑀩𑀢𑁂 𑀤𑁆𑀯𑁂 𑀪𑀸𑀢𑀺𑀓𑀢𑁆𑀣𑁂𑀭𑀸𑀦𑀁 𑀚𑁂𑀝𑁆𑀞𑀓𑀪𑀸𑀢𑀼 𑀥𑀼𑀢𑀗𑁆𑀕𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀲𑀸𑀥𑀸𑀭𑀡𑀓𑀣𑀸.

𑁧. 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀓𑀣𑀸

𑁨𑁪. 𑀇𑀤𑀸𑀦𑀺 𑀏𑀓𑁂𑀓𑀲𑁆𑀲 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑁂 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀢𑀸𑀯 ‘‘𑀕𑀳𑀧𑀢𑀺𑀤𑀸𑀦𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀘𑀦𑁂𑀲𑀼 𑀅𑀜𑁆𑀜𑀢𑀭𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺. 𑀇𑀤𑀁 𑀢𑀸𑀯𑁂𑀢𑁆𑀣 𑀲𑀫𑀸𑀤𑀸𑀦𑀁.

𑀏𑀯𑀁 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁂𑀦 𑀧𑀦 𑀢𑁂𑀦 𑀲𑁄𑀲𑀸𑀦𑀺𑀓𑀁, 𑀧𑀸𑀧𑀡𑀺𑀓𑀁, 𑀭𑀣𑀺𑀬𑀘𑁄𑀴𑀁, 𑀲𑀗𑁆𑀓𑀸𑀭𑀘𑁄𑀴𑀁, 𑀲𑁄𑀢𑁆𑀣𑀺𑀬𑀁, 𑀦𑁆𑀳𑀸𑀦𑀘𑁄𑀴𑀁, 𑀢𑀺𑀢𑁆𑀣𑀘𑁄𑀴𑀁, 𑀕𑀢𑀧𑀘𑁆𑀘𑀸𑀕𑀢𑀁, 𑀅𑀕𑁆𑀕𑀺𑀟𑀟𑁆𑀠𑀁, 𑀕𑁄𑀔𑀸𑀬𑀺𑀢𑀁, 𑀉𑀧𑀘𑀺𑀓𑀸𑀔𑀸𑀬𑀺𑀢𑀁, 𑀉𑀦𑁆𑀤𑀽𑀭𑀔𑀸𑀬𑀺𑀢𑀁, 𑀅𑀦𑁆𑀢𑀘𑁆𑀙𑀺𑀦𑁆𑀦𑀁, 𑀤𑀲𑀸𑀘𑁆𑀙𑀺𑀦𑁆𑀦𑀁, 𑀥𑀚𑀸𑀳𑀝𑀁, 𑀣𑀽𑀧𑀘𑀻𑀯𑀭𑀁, 𑀲𑀫𑀡𑀘𑀻𑀯𑀭𑀁, 𑀆𑀪𑀺𑀲𑁂𑀓𑀺𑀓𑀁, 𑀇𑀤𑁆𑀥𑀺𑀫𑀬𑀁, 𑀧𑀦𑁆𑀣𑀺𑀓𑀁, 𑀯𑀸𑀢𑀸𑀳𑀝𑀁, 𑀤𑁂𑀯𑀤𑀢𑁆𑀢𑀺𑀬𑀁, 𑀲𑀸𑀫𑀼𑀤𑁆𑀤𑀺𑀬𑀦𑁆𑀢𑀺𑀏𑀢𑁂𑀲𑀼 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀧𑀳𑀸𑀬 𑀣𑀺𑀭𑀝𑁆𑀞𑀸𑀦𑀸𑀦𑀺 𑀥𑁄𑀯𑀺𑀢𑁆𑀯𑀸 𑀘𑀻𑀯𑀭𑀁 𑀓𑀢𑁆𑀯𑀸 𑀧𑁄𑀭𑀸𑀡𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀢𑀢𑁆𑀣 𑀲𑁄𑀲𑀸𑀦𑀺𑀓𑀦𑁆𑀢𑀺 𑀲𑀼𑀲𑀸𑀦𑁂 𑀧𑀢𑀺𑀢𑀓𑀁. 𑀧𑀸𑀧𑀡𑀺𑀓𑀦𑁆𑀢𑀺 𑀆𑀧𑀡𑀤𑁆𑀯𑀸𑀭𑁂 𑀧𑀢𑀺𑀢𑀓𑀁. 𑀭𑀣𑀺𑀬𑀘𑁄𑀴𑀦𑁆𑀢𑀺 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀯𑀸𑀢𑀧𑀸𑀦𑀦𑁆𑀢𑀭𑁂𑀦 𑀭𑀣𑀺𑀓𑀸𑀬 𑀙𑀟𑁆𑀟𑀺𑀢𑀘𑁄𑀴𑀓𑀁. 𑀲𑀗𑁆𑀓𑀸𑀭𑀘𑁄𑀴𑀦𑁆𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀘𑁄𑀴𑀓𑀁. 𑀲𑁄𑀢𑁆𑀣𑀺𑀬𑀦𑁆𑀢𑀺 𑀕𑀩𑁆𑀪𑀫𑀮𑀁 𑀧𑀼𑀜𑁆𑀙𑀺𑀢𑁆𑀯𑀸 𑀙𑀟𑁆𑀟𑀺𑀢𑀯𑀢𑁆𑀣𑀁. 𑀢𑀺𑀲𑁆𑀲𑀸𑀫𑀘𑁆𑀘𑀫𑀸𑀢𑀸 𑀓𑀺𑀭 𑀲𑀢𑀕𑁆𑀖𑀦𑀓𑁂𑀦 𑀯𑀢𑁆𑀣𑁂𑀦 𑀕𑀩𑁆𑀪𑀫𑀮𑀁 𑀧𑀼𑀜𑁆𑀙𑀸𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀢𑀸𑀮𑀯𑁂𑀴𑀺𑀫𑀕𑁆𑀕𑁂 𑀙𑀟𑁆𑀟𑀸𑀧𑁂𑀲𑀺. 𑀪𑀺𑀓𑁆𑀔𑀽 𑀚𑀺𑀡𑁆𑀡𑀓𑀝𑁆𑀞𑀸𑀦𑀢𑁆𑀣𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀦𑁆𑀳𑀸𑀦𑀘𑁄𑀴𑀦𑁆𑀢𑀺 𑀬𑀁 𑀪𑀽𑀢𑀯𑁂𑀚𑁆𑀚𑁂𑀳𑀺 𑀲𑀲𑀻𑀲𑀁 𑀦𑁆𑀳𑀸𑀧𑀺𑀢𑀸 𑀓𑀸𑀴𑀓𑀡𑁆𑀡𑀺𑀘𑁄𑀴𑀦𑁆𑀢𑀺 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀢𑀺𑀢𑁆𑀣𑀘𑁄𑀴𑀦𑁆𑀢𑀺 𑀦𑁆𑀳𑀸𑀦𑀢𑀺𑀢𑁆𑀣𑁂 𑀙𑀟𑁆𑀟𑀺𑀢𑀧𑀺𑀮𑁄𑀢𑀺𑀓𑀸. 𑀕𑀢𑀧𑀘𑁆𑀘𑀸𑀕𑀢𑀦𑁆𑀢𑀺 𑀬𑀁 𑀫𑀦𑀼𑀲𑁆𑀲𑀸 𑀲𑀼𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀢𑀸 𑀦𑁆𑀳𑀢𑁆𑀯𑀸 𑀙𑀟𑁆𑀟𑁂𑀦𑁆𑀢𑀺. 𑀅𑀕𑁆𑀕𑀺𑀟𑀟𑁆𑀠𑀦𑁆𑀢𑀺 𑀅𑀕𑁆𑀕𑀺𑀦𑀸 𑀟𑀟𑁆𑀠𑀧𑁆𑀧𑀤𑁂𑀲𑀁. 𑀢𑀜𑁆𑀳𑀺 𑀫𑀦𑀼𑀲𑁆𑀲𑀸 𑀙𑀟𑁆𑀟𑁂𑀦𑁆𑀢𑀺. 𑀕𑁄𑀔𑀸𑀬𑀺𑀢𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯. 𑀢𑀸𑀤𑀺𑀲𑀸𑀦𑀺𑀧𑀺 𑀳𑀺 𑀫𑀦𑀼𑀲𑁆𑀲𑀸 𑀙𑀟𑁆𑀟𑁂𑀦𑁆𑀢𑀺. 𑀥𑀚𑀸𑀳𑀝𑀦𑁆𑀢𑀺 𑀦𑀸𑀯𑀁 𑀆𑀭𑁄𑀳𑀦𑁆𑀢𑀸 𑀥𑀚𑀁 𑀩𑀦𑁆𑀥𑀺𑀢𑁆𑀯𑀸 𑀆𑀭𑀽𑀳𑀦𑁆𑀢𑀺. 𑀢𑀁 𑀢𑁂𑀲𑀁 𑀤𑀲𑁆𑀲𑀦𑀸𑀢𑀺𑀓𑁆𑀓𑀫𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀫𑁆𑀧𑀺 𑀬𑀼𑀤𑁆𑀥𑀪𑀽𑀫𑀺𑀬𑀁 𑀥𑀚𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀁, 𑀢𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑁂𑀦𑀸𑀦𑀁 𑀕𑀢𑀓𑀸𑀮𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀣𑀽𑀧𑀘𑀻𑀯𑀭𑀦𑁆𑀢𑀺 𑀯𑀫𑁆𑀫𑀺𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀢𑀁. 𑀲𑀫𑀡𑀘𑀻𑀯𑀭𑀦𑁆𑀢𑀺 𑀪𑀺𑀓𑁆𑀔𑀼𑀲𑀦𑁆𑀢𑀓𑀁. 𑀆𑀪𑀺𑀲𑁂𑀓𑀺𑀓𑀦𑁆𑀢𑀺 𑀭𑀜𑁆𑀜𑁄 𑀅𑀪𑀺𑀲𑁂𑀓𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀘𑀻𑀯𑀭𑀁. 𑀇𑀤𑁆𑀥𑀺𑀫𑀬𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀼𑀘𑀻𑀯𑀭𑀁. 𑀧𑀦𑁆𑀣𑀺𑀓𑀦𑁆𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀢𑀺𑀢𑀓𑀁. 𑀬𑀁 𑀧𑀦 𑀲𑀸𑀫𑀺𑀓𑀸𑀦𑀁 𑀲𑀢𑀺𑀲𑀫𑁆𑀫𑁄𑀲𑁂𑀦 𑀧𑀢𑀺𑀢𑀁, 𑀢𑀁 𑀣𑁄𑀓𑀁 𑀭𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀸𑀢𑀸𑀳𑀝𑀦𑁆𑀢𑀺 𑀯𑀸𑀢𑁂𑀦 𑀧𑀳𑀭𑀺𑀢𑁆𑀯𑀸 𑀤𑀽𑀭𑁂 𑀧𑀸𑀢𑀺𑀢𑀁, 𑀢𑀁 𑀧𑀦 𑀲𑀸𑀫𑀺𑀓𑁂 𑀅𑀧𑀲𑁆𑀲𑀦𑁆𑀢𑁂𑀦 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀤𑁂𑀯𑀤𑀢𑁆𑀢𑀺𑀬𑀦𑁆𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀯𑀺𑀬 𑀤𑁂𑀯𑀢𑀸𑀳𑀺 𑀤𑀺𑀦𑁆𑀦𑀓𑀁. 𑀲𑀸𑀫𑀼𑀤𑁆𑀤𑀺𑀬𑀦𑁆𑀢𑀺 𑀲𑀫𑀼𑀤𑁆𑀤𑀯𑀻𑀘𑀻𑀳𑀺 𑀣𑀮𑁂 𑀉𑀲𑁆𑀲𑀸𑀭𑀺𑀢𑀁.

𑀬𑀁 𑀧𑀦 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀤𑀺𑀦𑁆𑀦𑀁, 𑀘𑁄𑀴𑀓𑀪𑀺𑀓𑁆𑀔𑀸𑀬 𑀯𑀸 𑀘𑀭𑀫𑀸𑀦𑁂𑀳𑀺 𑀮𑀤𑁆𑀥𑀁, 𑀦 𑀢𑀁 𑀧𑀁𑀲𑀼𑀓𑀽𑀮𑀁. 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑁂𑀧𑀺 𑀬𑀁 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑁂𑀢𑁆𑀯𑀸 𑀯𑀸 𑀤𑀻𑀬𑀢𑀺, 𑀲𑁂𑀦𑀸𑀲𑀦𑀘𑀻𑀯𑀭𑀁 𑀯𑀸 𑀳𑁄𑀢𑀺, 𑀦 𑀢𑀁 𑀧𑀁𑀲𑀼𑀓𑀽𑀮𑀁. 𑀦𑁄 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀫𑁂𑀯 𑀧𑀁𑀲𑀼𑀓𑀽𑀮𑀁. 𑀢𑀢𑁆𑀭𑀧𑀺 𑀬𑀁 𑀤𑀸𑀬𑀓𑁂𑀳𑀺 𑀪𑀺𑀓𑁆𑀔𑀼𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀓𑁆𑀔𑀺𑀢𑁆𑀢𑀁, 𑀢𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀁, 𑀢𑀁 𑀏𑀓𑀢𑁄𑀲𑀼𑀤𑁆𑀥𑀺𑀓𑀁 𑀦𑀸𑀫. 𑀬𑀁 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀁, 𑀢𑁂𑀦 𑀧𑀦 𑀧𑀸𑀤𑀫𑀽𑀮𑁂 𑀞𑀧𑀺𑀢𑀁, 𑀢𑀫𑁆𑀧𑀺 𑀏𑀓𑀢𑁄𑀲𑀼𑀤𑁆𑀥𑀺𑀓𑀁. 𑀬𑀁 𑀪𑀺𑀓𑁆𑀔𑀼𑀦𑁄𑀧𑀺 𑀧𑀸𑀤𑀫𑀽𑀮𑁂 𑀞𑀧𑀺𑀢𑀁, 𑀢𑁂𑀦𑀸𑀧𑀺 𑀢𑀣𑁂𑀯 𑀤𑀺𑀦𑁆𑀦𑀁, 𑀢𑀁 𑀉𑀪𑀢𑁄𑀲𑀼𑀤𑁆𑀥𑀺𑀓𑀁. 𑀬𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀮𑀤𑁆𑀥𑀁, 𑀳𑀢𑁆𑀣𑁂𑀬𑁂𑀯 𑀞𑀧𑀺𑀢𑀁, 𑀢𑀁 𑀅𑀦𑀼𑀓𑁆𑀓𑀝𑁆𑀞𑀘𑀻𑀯𑀭𑀁 𑀦𑀸𑀫. 𑀇𑀢𑀺 𑀇𑀫𑀁 𑀧𑀁𑀲𑀼𑀓𑀽𑀮𑀪𑁂𑀤𑀁 𑀜𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑁂𑀦 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑁂𑀢𑁆𑀣 𑀯𑀺𑀥𑀸𑀦𑀁.

𑀅𑀬𑀁 𑀧𑀦 𑀧𑀪𑁂𑀤𑁄, 𑀢𑀬𑁄 𑀧𑀁𑀲𑀼𑀓𑀽𑀮𑀺𑀓𑀸 𑀉𑀓𑁆𑀓𑀝𑁆𑀞𑁄 𑀫𑀚𑁆𑀛𑀺𑀫𑁄 𑀫𑀼𑀤𑀽𑀢𑀺. 𑀢𑀢𑁆𑀣 𑀲𑁄𑀲𑀸𑀦𑀺𑀓𑀁𑀬𑁂𑀯 𑀕𑀡𑁆𑀳𑀦𑁆𑀢𑁄 𑀉𑀓𑁆𑀓𑀝𑁆𑀞𑁄 𑀳𑁄𑀢𑀺. 𑀧𑀩𑁆𑀩𑀚𑀺𑀢𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀞𑀧𑀺𑀢𑀓𑀁 𑀕𑀡𑁆𑀳𑀦𑁆𑀢𑁄 𑀫𑀚𑁆𑀛𑀺𑀫𑁄. 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀤𑀺𑀦𑁆𑀦𑀓𑀁 𑀕𑀡𑁆𑀳𑀦𑁆𑀢𑁄 𑀫𑀼𑀤𑀽𑀢𑀺.

𑀢𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀕𑀺𑀳𑀺𑀤𑀺𑀦𑁆𑀦𑀓𑀁 𑀲𑀸𑀤𑀺𑀢𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, ‘‘𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺 (𑀫𑀳𑀸𑀯. 𑁧𑁨𑁮) 𑀯𑀘𑀦𑀢𑁄 𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑁄, 𑀧𑀞𑀫𑁂 𑀅𑀭𑀺𑀬𑀯𑀁𑀲𑁂 𑀧𑀢𑀺𑀝𑁆𑀞𑀸𑀦𑀁, 𑀆𑀭𑀓𑁆𑀔𑀤𑀼𑀓𑁆𑀔𑀸𑀪𑀸𑀯𑁄, 𑀅𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸, 𑀘𑁄𑀭𑀪𑀬𑁂𑀦 𑀅𑀪𑀬𑀢𑀸, 𑀧𑀭𑀺𑀪𑁄𑀕𑀢𑀡𑁆𑀳𑀸𑀬 𑀅𑀪𑀸𑀯𑁄, 𑀲𑀫𑀡𑀲𑀸𑀭𑀼𑀧𑁆𑀧𑀧𑀭𑀺𑀓𑁆𑀔𑀸𑀭𑀢𑀸, ‘‘𑀅𑀧𑁆𑀧𑀸𑀦𑀺 𑀘𑁂𑀯 𑀲𑀼𑀮𑀪𑀸𑀦𑀺 𑀘 𑀢𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁪.𑁨𑁭; 𑀇𑀢𑀺𑀯𑀼. 𑁧𑁦𑁧) 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑀧𑀘𑁆𑀘𑀬𑀢𑀸, 𑀧𑀸𑀲𑀸𑀤𑀺𑀓𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀨𑀮𑀦𑀺𑀧𑁆𑀨𑀢𑁆𑀢𑀺, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀁, 𑀧𑀘𑁆𑀙𑀺𑀫𑀸𑀬 𑀚𑀦𑀢𑀸𑀬 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀸𑀤𑀦𑀦𑁆𑀢𑀺.

𑀫𑀸𑀭𑀲𑁂𑀦𑀯𑀺𑀖𑀸𑀢𑀸𑀬, 𑀧𑀁𑀲𑀼𑀓𑀽𑀮𑀥𑀭𑁄 𑀬𑀢𑀺;

𑀲𑀦𑁆𑀦𑀤𑁆𑀥𑀓𑀯𑀘𑁄 𑀬𑀼𑀤𑁆𑀥𑁂, 𑀔𑀢𑁆𑀢𑀺𑀬𑁄 𑀯𑀺𑀬 𑀲𑁄𑀪𑀢𑀺.

𑀧𑀳𑀸𑀬 𑀓𑀸𑀲𑀺𑀓𑀸𑀤𑀻𑀦𑀺, 𑀯𑀭𑀯𑀢𑁆𑀣𑀸𑀦𑀺 𑀥𑀸𑀭𑀺𑀢𑀁;

𑀬𑀁 𑀮𑁄𑀓𑀕𑀭𑀼𑀦𑀸 𑀓𑁄 𑀢𑀁, 𑀧𑀁𑀲𑀼𑀓𑀽𑀮𑀁 𑀦 𑀥𑀸𑀭𑀬𑁂.

𑀢𑀲𑁆𑀫𑀸 𑀳𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀼, 𑀧𑀝𑀺𑀜𑁆𑀜𑀁 𑀲𑀫𑀦𑀼𑀲𑁆𑀲𑀭𑀁;

𑀬𑁄𑀕𑀸𑀘𑀸𑀭𑀸𑀦𑀼𑀓𑀽𑀮𑀫𑁆𑀳𑀺, 𑀧𑀁𑀲𑀼𑀓𑀽𑀮𑁂 𑀭𑀢𑁄 𑀲𑀺𑀬𑀸𑀢𑀺.

𑀅𑀬𑀁 𑀢𑀸𑀯 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁨. 𑀢𑁂𑀘𑀻𑀯𑀭𑀺𑀓𑀗𑁆𑀕𑀓𑀣𑀸

𑁨𑁫. 𑀢𑀤𑀦𑀦𑁆𑀢𑀭𑀁 𑀧𑀦 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 ‘‘𑀘𑀢𑀼𑀢𑁆𑀣𑀓𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀢𑁂𑀘𑀻𑀯𑀭𑀺𑀓𑁂𑀦 𑀘𑀻𑀯𑀭𑀤𑀼𑀲𑁆𑀲𑀁 𑀮𑀪𑀺𑀢𑁆𑀯𑀸 𑀬𑀸𑀯 𑀅𑀨𑀸𑀲𑀼𑀓𑀪𑀸𑀯𑁂𑀦 𑀓𑀸𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀯𑀺𑀘𑀸𑀭𑀓𑀁 𑀯𑀸 𑀦 𑀮𑀪𑀢𑀺, 𑀲𑀽𑀘𑀺𑀆𑀤𑀻𑀲𑀼 𑀯𑀸𑀲𑁆𑀲 𑀓𑀺𑀜𑁆𑀘𑀺 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀸𑀯 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀦𑀺𑀓𑁆𑀔𑀺𑀢𑁆𑀢𑀧𑀘𑁆𑀘𑀬𑀸 𑀤𑁄𑀲𑁄 𑀦𑀢𑁆𑀣𑀺. 𑀭𑀚𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀥𑀼𑀢𑀗𑁆𑀕𑀘𑁄𑀭𑁄 𑀦𑀸𑀫 𑀳𑁄𑀢𑀺. 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁂𑀦 𑀭𑀚𑀦𑀓𑀸𑀮𑁂 𑀧𑀞𑀫𑀁 𑀅𑀦𑁆𑀢𑀭𑀯𑀸𑀲𑀓𑀁 𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑀁 𑀯𑀸 𑀭𑀚𑀺𑀢𑁆𑀯𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀇𑀢𑀭𑀁 𑀭𑀚𑀺𑀢𑀩𑁆𑀩𑀁. 𑀢𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀗𑁆𑀖𑀸𑀝𑀺 𑀭𑀚𑀺𑀢𑀩𑁆𑀩𑀸. 𑀲𑀗𑁆𑀖𑀸𑀝𑀺𑀁 𑀧𑀦 𑀦𑀺𑀯𑀸𑀲𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀤𑀫𑀲𑁆𑀲 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀢𑁆𑀢𑀁. 𑀆𑀭𑀜𑁆𑀜𑀓𑁂 𑀧𑀦 𑀤𑁆𑀯𑁂 𑀏𑀓𑀢𑁄 𑀥𑁄𑀯𑀺𑀢𑁆𑀯𑀸 𑀭𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀣𑀸 𑀧𑀦 𑀓𑀜𑁆𑀘𑀺 𑀤𑀺𑀲𑁆𑀯𑀸 𑀲𑀓𑁆𑀓𑁄𑀢𑀺 𑀓𑀸𑀲𑀸𑀯𑀁 𑀆𑀓𑀟𑁆𑀠𑀺𑀢𑁆𑀯𑀸 𑀉𑀧𑀭𑀺𑀓𑀸𑀢𑀼𑀁, 𑀏𑀯𑀁 𑀆𑀲𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑀲𑁆𑀲 𑀭𑀚𑀦𑀲𑀸𑀮𑀸𑀬𑀁 𑀭𑀚𑀦𑀓𑀸𑀲𑀸𑀯𑀁 𑀦𑀸𑀫 𑀳𑁄𑀢𑀺, 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀸 𑀭𑀚𑀦𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀤𑀼𑀓𑀲𑁆𑀲 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀯𑀸 𑀭𑀚𑀦𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀝𑁆𑀞𑀓𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀢𑀲𑁆𑀲 𑀯𑀝𑁆𑀝𑀢𑀺. 𑀧𑀭𑀺𑀳𑀭𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀺. 𑀲𑀪𑀸𑀕𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀫𑁆𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀥𑀼𑀢𑀗𑁆𑀕𑀢𑁂𑀘𑀻𑀯𑀭𑀺𑀓𑀲𑁆𑀲 𑀧𑀦 𑀘𑀢𑀼𑀢𑁆𑀣𑀁 𑀯𑀢𑁆𑀢𑀫𑀸𑀦𑀁 𑀅𑀁𑀲𑀓𑀸𑀲𑀸𑀯𑀫𑁂𑀯 𑀯𑀝𑁆𑀝𑀢𑀺. 𑀢𑀜𑁆𑀘 𑀔𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀤𑀢𑁆𑀣𑀺, 𑀤𑀻𑀖𑀢𑁄 𑀢𑀺𑀳𑀢𑁆𑀣𑀫𑁂𑀯 𑀯𑀝𑁆𑀝𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀘𑀢𑀼𑀢𑁆𑀣𑀓𑀘𑀻𑀯𑀭𑀁 𑀲𑀸𑀤𑀺𑀢𑀓𑁆𑀔𑀡𑁂𑀬𑁂𑀯 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀢𑁂𑀘𑀻𑀯𑀭𑀺𑀓𑁄 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦. 𑀢𑁂𑀦𑀲𑁆𑀲 𑀧𑀓𑁆𑀔𑀺𑀦𑁄 𑀯𑀺𑀬 𑀲𑀫𑀸𑀤𑀸𑀬𑁂𑀯 𑀕𑀫𑀦𑀁, 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀸, 𑀯𑀢𑁆𑀣𑀲𑀦𑁆𑀦𑀺𑀥𑀺𑀧𑀭𑀺𑀯𑀚𑁆𑀚𑀦𑀁, 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸, 𑀅𑀢𑀺𑀭𑁂𑀓𑀘𑀻𑀯𑀭𑀮𑁄𑀮𑀼𑀧𑁆𑀧𑀧𑁆𑀧𑀳𑀸𑀦𑀁, 𑀓𑀧𑁆𑀧𑀺𑀬𑁂 𑀫𑀢𑁆𑀢𑀓𑀸𑀭𑀺𑀢𑀸𑀬 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀨𑀮𑀦𑀺𑀧𑁆𑀨𑀢𑁆𑀢𑀻𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺.

𑀅𑀢𑀺𑀭𑁂𑀓𑀯𑀢𑁆𑀣𑀢𑀡𑁆𑀳𑀁, 𑀧𑀳𑀸𑀬 𑀲𑀦𑁆𑀦𑀺𑀥𑀺𑀯𑀺𑀯𑀚𑁆𑀚𑀺𑀢𑁄 𑀥𑀻𑀭𑁄;

𑀲𑀦𑁆𑀢𑁄𑀲𑀲𑀼𑀔𑀭𑀲𑀜𑁆𑀜𑀽, 𑀢𑀺𑀘𑀻𑀯𑀭𑀥𑀭𑁄 𑀪𑀯𑀢𑀺 𑀬𑁄𑀕𑀻.

𑀢𑀲𑁆𑀫𑀸 𑀲𑀧𑀢𑁆𑀢𑀘𑀭𑀡𑁄, 𑀧𑀓𑁆𑀔𑀻𑀯 𑀲𑀘𑀻𑀯𑀭𑁄𑀯 𑀬𑁄𑀕𑀺𑀯𑀭𑁄;

𑀲𑀼𑀔𑀫𑀦𑀼𑀯𑀺𑀘𑀭𑀺𑀢𑀼𑀓𑀸𑀫𑁄, 𑀘𑀻𑀯𑀭𑀦𑀺𑀬𑀫𑁂 𑀭𑀢𑀺𑀁 𑀓𑀬𑀺𑀭𑀸𑀢𑀺.

𑀅𑀬𑀁 𑀢𑁂𑀘𑀻𑀯𑀭𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁩. 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀓𑀣𑀸

𑁨𑁬. 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀫𑁆𑀧𑀺 ‘‘𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑁂𑀦 ‘‘𑀲𑀗𑁆𑀖𑀪𑀢𑁆𑀢𑀁, 𑀉𑀤𑁆𑀤𑁂𑀲𑀪𑀢𑁆𑀢𑀁, 𑀦𑀺𑀫𑀦𑁆𑀢𑀦𑀪𑀢𑁆𑀢𑀁, 𑀲𑀮𑀸𑀓𑀪𑀢𑁆𑀢𑀁, 𑀧𑀓𑁆𑀔𑀺𑀓𑀁, 𑀉𑀧𑁄𑀲𑀣𑀺𑀓𑀁, 𑀧𑀸𑀝𑀺𑀧𑀤𑀺𑀓𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀕𑀫𑀺𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑀢𑁆𑀢𑀁, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁, 𑀯𑀺𑀳𑀸𑀭𑀪𑀢𑁆𑀢𑀁, 𑀥𑀼𑀭𑀪𑀢𑁆𑀢𑀁, 𑀯𑀸𑀭𑀓𑀪𑀢𑁆𑀢’’𑀦𑁆𑀢𑀺 𑀏𑀢𑀸𑀦𑀺 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺 𑀦 𑀲𑀸𑀤𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀦 ‘‘𑀲𑀗𑁆𑀖𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀯𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀲𑀗𑁆𑀖𑁄 𑀪𑀺𑀓𑁆𑀔𑀁 𑀕𑀡𑁆𑀳𑀸𑀢𑀼, 𑀢𑀼𑀫𑁆𑀳𑁂𑀧𑀺 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀲𑀸𑀤𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀲𑀗𑁆𑀖𑀢𑁄 𑀦𑀺𑀭𑀸𑀫𑀺𑀲𑀲𑀮𑀸𑀓𑀸𑀧𑀺 𑀯𑀺𑀳𑀸𑀭𑁂 𑀧𑀓𑁆𑀓𑀪𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄𑀧𑀺 𑀆𑀳𑀝𑀪𑀺𑀓𑁆𑀔𑀁 𑀕𑀡𑁆𑀳𑀢𑀺, 𑀧𑀢𑁆𑀢𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀸𑀦𑀫𑁆𑀧𑀺 𑀤𑁂𑀢𑀺, 𑀧𑀝𑀺𑀓𑁆𑀓𑀫𑀦𑀁 𑀆𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀪𑀺𑀓𑁆𑀔𑀫𑁆𑀧𑀺 𑀕𑀡𑁆𑀳𑀢𑀺, 𑀢𑀁 𑀤𑀺𑀯𑀲𑀁 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀦 𑀕𑀡𑁆𑀳𑀢𑀺. 𑀫𑀚𑁆𑀛𑀺𑀫𑁄 𑀢𑀁 𑀤𑀺𑀯𑀲𑀁 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀕𑀡𑁆𑀳𑀢𑀺, 𑀲𑁆𑀯𑀸𑀢𑀦𑀸𑀬 𑀧𑀦 𑀦𑀸𑀥𑀺𑀯𑀸𑀲𑁂𑀢𑀺. 𑀫𑀼𑀤𑀼𑀓𑁄𑀲𑁆𑀯𑀸𑀢𑀦𑀸𑀬𑀧𑀺 𑀧𑀼𑀦𑀤𑀺𑀯𑀲𑀸𑀬𑀧𑀺 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑀺. 𑀢𑁂 𑀉𑀪𑁄𑀧𑀺 𑀲𑁂𑀭𑀺𑀯𑀺𑀳𑀸𑀭𑀲𑀼𑀔𑀁 𑀦 𑀮𑀪𑀦𑁆𑀢𑀺, 𑀉𑀓𑁆𑀓𑀝𑁆𑀞𑁄𑀯 𑀮𑀪𑀢𑀺. 𑀏𑀓𑀲𑁆𑀫𑀺𑀁 𑀓𑀺𑀭 𑀕𑀸𑀫𑁂 𑀅𑀭𑀺𑀬𑀯𑀁𑀲𑁄 𑀳𑁄𑀢𑀺, 𑀉𑀓𑁆𑀓𑀝𑁆𑀞𑁄 𑀇𑀢𑀭𑁂 𑀆𑀳 𑁋 ‘‘𑀆𑀬𑀸𑀫𑀸𑀯𑀼𑀲𑁄, 𑀥𑀫𑁆𑀫𑀲𑀯𑀦𑀸𑀬𑀸’’𑀢𑀺. 𑀢𑁂𑀲𑀼 𑀏𑀓𑁄 𑀏𑀓𑁂𑀦𑀫𑁆𑀳𑀺, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑁂𑀦 𑀦𑀺𑀲𑀻𑀤𑀸𑀧𑀺𑀢𑁄𑀢𑀺 𑀆𑀳. 𑀅𑀧𑀭𑁄 𑀫𑀬𑀸, 𑀪𑀦𑁆𑀢𑁂, 𑀲𑁆𑀯𑀸𑀢𑀦𑀸𑀬 𑀏𑀓𑀲𑁆𑀲 𑀪𑀺𑀓𑁆𑀔𑀸 𑀅𑀥𑀺𑀯𑀸𑀲𑀺𑀢𑀸𑀢𑀺. 𑀏𑀯𑀁 𑀢𑁂 𑀉𑀪𑁄 𑀧𑀭𑀺𑀳𑀻𑀦𑀸. 𑀇𑀢𑀭𑁄 𑀧𑀸𑀢𑁄𑀯 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀥𑀫𑁆𑀫𑀭𑀲𑀁 𑀧𑀝𑀺𑀲𑀁𑀯𑁂𑀤𑁂𑀲𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀢𑀺𑀭𑁂𑀓𑀮𑀸𑀪𑀁 𑀲𑀸𑀤𑀺𑀢𑀓𑁆𑀔𑀡𑁂𑀯 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, ‘‘𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺 (𑀅. 𑀦𑀺. 𑁪.𑁨𑁭; 𑀇𑀢𑀺𑀯𑀼. 𑁧𑁦𑁧) 𑀯𑀘𑀦𑀢𑁄 𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑁄, 𑀤𑀼𑀢𑀺𑀬𑁂 𑀅𑀭𑀺𑀬𑀯𑀁𑀲𑁂 𑀧𑀢𑀺𑀝𑁆𑀞𑀸𑀦𑀁, 𑀅𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸, ‘‘𑀅𑀧𑁆𑀧𑀸𑀦𑀺 𑀘𑁂𑀯 𑀲𑀼𑀮𑀪𑀸𑀦𑀺 𑀘 𑀢𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻’’𑀢𑀺 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑀧𑀘𑁆𑀘𑀬𑀢𑀸, 𑀓𑁄𑀲𑀚𑁆𑀚𑀦𑀺𑀫𑁆𑀫𑀤𑁆𑀤𑀦𑀢𑀸, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀢𑀸, 𑀲𑁂𑀔𑀺𑀬𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁, 𑀅𑀧𑀭𑀧𑁄𑀲𑀺𑀢𑀸, 𑀧𑀭𑀸𑀦𑀼𑀕𑁆𑀕𑀳𑀓𑀺𑀭𑀺𑀬𑀸, 𑀫𑀸𑀦𑀧𑁆𑀧𑀳𑀸𑀦𑀁, 𑀭𑀲𑀢𑀡𑁆𑀳𑀸𑀦𑀺𑀯𑀸𑀭𑀡𑀁, 𑀕𑀡𑀪𑁄𑀚𑀦𑀧𑀭𑀫𑁆𑀧𑀭𑀪𑁄𑀚𑀦𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀦𑀸𑀧𑀢𑁆𑀢𑀺𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀩𑁆𑀭𑀽𑀳𑀦𑀁, 𑀧𑀘𑁆𑀙𑀺𑀫𑀚𑀦𑀢𑀸𑀦𑀼𑀓𑀫𑁆𑀧𑀦𑀦𑁆𑀢𑀺.

𑀧𑀺𑀡𑁆𑀟𑀺𑀬𑀸𑀮𑁄𑀧𑀲𑀦𑁆𑀢𑀼𑀝𑁆𑀞𑁄, 𑀅𑀧𑀭𑀸𑀬𑀢𑁆𑀢𑀚𑀻𑀯𑀺𑀓𑁄;

𑀧𑀳𑀻𑀦𑀸𑀳𑀸𑀭𑀮𑁄𑀮𑀼𑀧𑁆𑀧𑁄, 𑀳𑁄𑀢𑀺 𑀘𑀸𑀢𑀼𑀤𑁆𑀤𑀺𑀲𑁄 𑀬𑀢𑀺.

𑀯𑀺𑀦𑁄𑀤𑀬𑀢𑀺 𑀓𑁄𑀲𑀚𑁆𑀚𑀁, 𑀆𑀚𑀻𑀯𑀲𑁆𑀲 𑀯𑀺𑀲𑀼𑀚𑁆𑀛𑀢𑀺;

𑀢𑀲𑁆𑀫𑀸 𑀳𑀺 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀲𑀼𑀫𑁂𑀥𑀲𑁄.

𑀏𑀯𑀭𑀽𑀧𑀲𑁆𑀲 𑀳𑀺 𑁋

‘‘𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄,

𑀅𑀢𑁆𑀢𑀪𑀭𑀲𑁆𑀲 𑀅𑀦𑀜𑁆𑀜𑀧𑁄𑀲𑀺𑀦𑁄;

𑀤𑁂𑀯𑀸𑀧𑀺 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄,

𑀦𑁄 𑀘𑁂 𑀮𑀸𑀪𑀲𑀺𑀮𑁄𑀓𑀦𑀺𑀲𑁆𑀲𑀺𑀢𑁄’’𑀢𑀺.

𑀅𑀬𑀁 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁪. 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀓𑀣𑀸

𑁨𑁭. 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀫𑁆𑀧𑀺 ‘‘𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀲𑀧𑀤𑀸𑀦𑀘𑀸𑀭𑀺𑀓𑁂𑀦 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸 𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀬𑀲𑁆𑀲𑀸 𑀭𑀘𑁆𑀙𑀸𑀬 𑀯𑀸 𑀕𑀸𑀫𑁂 𑀯𑀸 𑀧𑀭𑀺𑀲𑁆𑀲𑀬𑁄 𑀳𑁄𑀢𑀺, 𑀢𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀘𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀺𑀁 𑀖𑀭𑀤𑁆𑀯𑀸𑀭𑁂 𑀯𑀸 𑀭𑀘𑁆𑀙𑀸𑀬 𑀯𑀸 𑀕𑀸𑀫𑁂 𑀯𑀸 𑀓𑀺𑀜𑁆𑀘𑀺 𑀦 𑀮𑀪𑀢𑀺, 𑀅𑀕𑀸𑀫𑀲𑀜𑁆𑀜𑀁 𑀓𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀬𑀢𑁆𑀣 𑀓𑀺𑀜𑁆𑀘𑀺 𑀮𑀪𑀢𑀺, 𑀢𑀁 𑀧𑀳𑀸𑀬 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀇𑀫𑀺𑀦𑀸 𑀘 𑀪𑀺𑀓𑁆𑀔𑀼𑀦𑀸 𑀓𑀸𑀮𑀢𑀭𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀏𑀯𑀜𑁆𑀳𑀺 𑀅𑀨𑀸𑀲𑀼𑀓𑀝𑁆𑀞𑀸𑀦𑀁 𑀧𑀳𑀸𑀬 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀲𑀘𑁂 𑀧𑀦𑀲𑁆𑀲 𑀯𑀺𑀳𑀸𑀭𑁂 𑀤𑀸𑀦𑀁 𑀤𑁂𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸 𑀆𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑀺 𑀯𑀝𑁆𑀝𑀢𑀺. 𑀇𑀫𑀺𑀦𑀸 𑀘 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀲𑀫𑁆𑀧𑀢𑁆𑀢𑀕𑀸𑀫𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀺𑀢𑀩𑁆𑀩𑀫𑁂𑀯. 𑀢𑀢𑁆𑀣 𑀅𑀮𑀪𑀺𑀢𑁆𑀯𑀸 𑀯𑀸 𑀣𑁄𑀓𑀁 𑀮𑀪𑀺𑀢𑁆𑀯𑀸 𑀯𑀸 𑀕𑀸𑀫𑀧𑀝𑀺𑀧𑀸𑀝𑀺𑀬𑀸 𑀘𑀭𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀧𑀼𑀭𑀢𑁄 𑀆𑀳𑀝𑀪𑀺𑀓𑁆𑀔𑀫𑁆𑀧𑀺 𑀧𑀘𑁆𑀙𑀢𑁄 𑀆𑀳𑀝𑀪𑀺𑀓𑁆𑀔𑀫𑁆𑀧𑀺 𑀧𑀝𑀺𑀓𑁆𑀓𑀫𑀦𑀁 𑀆𑀳𑀭𑀺𑀢𑁆𑀯𑀸 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀦 𑀕𑀡𑁆𑀳𑀢𑀺, 𑀧𑀢𑁆𑀢𑀤𑁆𑀯𑀸𑀭𑁂 𑀧𑀦 𑀧𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀥𑀼𑀢𑀗𑁆𑀕𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑀺𑀲𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲𑀧𑀺 𑀧𑀢𑁆𑀢𑀯𑀺𑀲𑁆𑀲𑀝𑁆𑀞𑀝𑁆𑀞𑀸𑀦𑀫𑁂𑀯 𑀧𑀜𑁆𑀜𑀸𑀬𑀢𑀺. 𑀫𑀚𑁆𑀛𑀺𑀫𑁄 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀆𑀳𑀝𑀫𑁆𑀧𑀺 𑀧𑀝𑀺𑀓𑁆𑀓𑀫𑀦𑀁 𑀆𑀳𑀝𑀫𑁆𑀧𑀺 𑀕𑀡𑁆𑀳𑀢𑀺, 𑀧𑀢𑁆𑀢𑀤𑁆𑀯𑀸𑀭𑁂𑀧𑀺 𑀧𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀦 𑀧𑀦 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀢𑀺. 𑀏𑀯𑀁 𑀲𑁄 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀅𑀦𑀼𑀮𑁄𑀫𑁂𑀢𑀺. 𑀫𑀼𑀤𑀼𑀓𑁄 𑀢𑀁 𑀤𑀺𑀯𑀲𑀁 𑀦𑀺𑀲𑀻𑀤𑀺𑀢𑁆𑀯𑀸 𑀆𑀕𑀫𑁂𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀮𑁄𑀮𑀼𑀧𑁆𑀧𑀘𑀸𑀭𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀓𑀼𑀮𑁂𑀲𑀼 𑀦𑀺𑀘𑁆𑀘𑀦𑀯𑀓𑀢𑀸, 𑀘𑀦𑁆𑀤𑀽𑀧𑀫𑀢𑀸, 𑀓𑀼𑀮𑀫𑀘𑁆𑀙𑁂𑀭𑀧𑁆𑀧𑀳𑀸𑀦𑀁, 𑀲𑀫𑀸𑀦𑀼𑀓𑀫𑁆𑀧𑀺𑀢𑀸, 𑀓𑀼𑀮𑀽𑀧𑀓𑀸𑀤𑀻𑀦𑀯𑀸𑀪𑀸𑀯𑁄, 𑀅𑀯𑁆𑀳𑀸𑀦𑀸𑀦𑀪𑀺𑀦𑀦𑁆𑀤𑀦𑀸, 𑀅𑀪𑀺𑀳𑀸𑀭𑁂𑀦 𑀅𑀦𑀢𑁆𑀣𑀺𑀓𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀘𑀦𑁆𑀤𑀽𑀧𑀫𑁄 𑀦𑀺𑀘𑁆𑀘𑀦𑀯𑁄 𑀓𑀼𑀮𑁂𑀲𑀼,

𑀅𑀫𑀘𑁆𑀙𑀭𑀻 𑀲𑀩𑁆𑀩𑀲𑀫𑀸𑀦𑀼𑀓𑀫𑁆𑀧𑁄;

𑀓𑀼𑀮𑀽𑀧𑀓𑀸𑀤𑀻𑀦𑀯𑀯𑀺𑀧𑁆𑀧𑀫𑀼𑀢𑁆𑀢𑁄,

𑀳𑁄𑀢𑀻𑀥 𑀪𑀺𑀓𑁆𑀔𑀼 𑀲𑀧𑀤𑀸𑀦𑀘𑀸𑀭𑀻.

𑀮𑁄𑀮𑀼𑀧𑁆𑀧𑀘𑀸𑀭𑀜𑁆𑀘 𑀧𑀳𑀸𑀬 𑀢𑀲𑁆𑀫𑀸,

𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀬𑀼𑀕𑀫𑀢𑁆𑀢𑀤𑀲𑁆𑀲𑀻;

𑀆𑀓𑀗𑁆𑀔𑀫𑀸𑀦𑁄 𑀪𑀼𑀯𑀺 𑀲𑁂𑀭𑀺𑀘𑀸𑀭𑀁,

𑀘𑀭𑁂𑀬𑁆𑀬 𑀥𑀻𑀭𑁄 𑀲𑀧𑀤𑀸𑀦𑀘𑀸𑀭𑀦𑁆𑀢𑀺.

𑀅𑀬𑀁 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁫. 𑀏𑀓𑀸𑀲𑀦𑀺𑀓𑀗𑁆𑀕𑀓𑀣𑀸

𑁨𑁮. 𑀏𑀓𑀸𑀲𑀦𑀺𑀓𑀗𑁆𑀕𑀫𑁆𑀧𑀺 ‘‘𑀦𑀸𑀦𑀸𑀲𑀦𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀏𑀓𑀸𑀲𑀦𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀏𑀓𑀸𑀲𑀦𑀺𑀓𑁂𑀦 𑀆𑀲𑀦𑀲𑀸𑀮𑀸𑀬𑀁 𑀦𑀺𑀲𑀻𑀤𑀦𑁆𑀢𑁂𑀦 𑀣𑁂𑀭𑀸𑀲𑀦𑁂 𑀅𑀦𑀺𑀲𑀻𑀤𑀺𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀧𑀢𑀺𑀭𑀽𑀧𑀁 𑀆𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑀲𑁆𑀲 𑀯𑀺𑀧𑁆𑀧𑀓𑀢𑁂 𑀪𑁄𑀚𑀦𑁂 𑀆𑀘𑀭𑀺𑀬𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀕𑀘𑁆𑀙𑀢𑀺, 𑀉𑀝𑁆𑀞𑀸𑀬 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀆𑀲𑀦𑀁 𑀯𑀸 𑀭𑀓𑁆𑀔𑁂𑀬𑁆𑀬 𑀪𑁄𑀚𑀦𑀁 𑀯𑀸, 𑀅𑀬𑀜𑁆𑀘 𑀯𑀺𑀧𑁆𑀧𑀓𑀢𑀪𑁄𑀚𑀦𑁄, 𑀢𑀲𑁆𑀫𑀸 𑀯𑀢𑁆𑀢𑀁 𑀓𑀭𑁄𑀢𑀼, 𑀪𑁄𑀚𑀦𑀁 𑀧𑀦 𑀫𑀸 𑀪𑀼𑀜𑁆𑀚𑀢𑀽’’𑀢𑀺. 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀅𑀧𑁆𑀧𑀁 𑀯𑀸 𑀳𑁄𑀢𑀼 𑀩𑀳𑀼 𑀯𑀸, 𑀬𑀫𑁆𑀳𑀺 𑀪𑁄𑀚𑀦𑁂 𑀳𑀢𑁆𑀣𑀁 𑀑𑀢𑀸𑀭𑁂𑀢𑀺, 𑀢𑀢𑁄 𑀅𑀜𑁆𑀜𑀁 𑀕𑀡𑁆𑀳𑀺𑀢𑀼𑀁 𑀦 𑀮𑀪𑀢𑀺. 𑀲𑀘𑁂𑀧𑀺 𑀫𑀦𑀼𑀲𑁆𑀲𑀸 ‘‘𑀣𑁂𑀭𑁂𑀦 𑀦 𑀓𑀺𑀜𑁆𑀘𑀺 𑀪𑀼𑀢𑁆𑀢’’𑀦𑁆𑀢𑀺 𑀲𑀧𑁆𑀧𑀺𑀆𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀪𑁂𑀲𑀚𑁆𑀚𑀢𑁆𑀣𑀫𑁂𑀯 𑀯𑀝𑁆𑀝𑀦𑁆𑀢𑀺, 𑀦 𑀆𑀳𑀸𑀭𑀢𑁆𑀣𑀁. 𑀫𑀚𑁆𑀛𑀺𑀫𑁄 𑀬𑀸𑀯 𑀧𑀢𑁆𑀢𑁂 𑀪𑀢𑁆𑀢𑀁 𑀦 𑀔𑀻𑀬𑀢𑀺, 𑀢𑀸𑀯 𑀅𑀜𑁆𑀜𑀁 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀅𑀬𑀜𑁆𑀳𑀺 𑀪𑁄𑀚𑀦𑀧𑀭𑀺𑀬𑀦𑁆𑀢𑀺𑀓𑁄 𑀦𑀸𑀫 𑀳𑁄𑀢𑀺. 𑀫𑀼𑀤𑀼𑀓𑁄 𑀬𑀸𑀯 𑀆𑀲𑀦𑀸 𑀦 𑀯𑀼𑀝𑁆𑀞𑀸𑀢𑀺 𑀢𑀸𑀯 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀺. 𑀲𑁄 𑀳𑀺 𑀉𑀤𑀓𑀧𑀭𑀺𑀬𑀦𑁆𑀢𑀺𑀓𑁄 𑀯𑀸 𑀳𑁄𑀢𑀺 𑀬𑀸𑀯 𑀧𑀢𑁆𑀢𑀥𑁄𑀯𑀦𑀁 𑀦 𑀕𑀡𑁆𑀳𑀸𑀢𑀺 𑀢𑀸𑀯 𑀪𑀼𑀜𑁆𑀚𑀦𑀢𑁄, 𑀆𑀲𑀦𑀧𑀭𑀺𑀬𑀦𑁆𑀢𑀺𑀓𑁄 𑀯𑀸 𑀬𑀸𑀯 𑀦 𑀯𑀼𑀝𑁆𑀞𑀸𑀢𑀺 𑀢𑀸𑀯 𑀪𑀼𑀜𑁆𑀚𑀦𑀢𑁄.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀦𑀸𑀦𑀸𑀲𑀦𑀪𑁄𑀚𑀦𑀁 𑀪𑀼𑀢𑁆𑀢𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀅𑀧𑁆𑀧𑀸𑀩𑀸𑀥𑀢𑀸, 𑀅𑀧𑁆𑀧𑀸𑀢𑀗𑁆𑀓𑀢𑀸, 𑀮𑀳𑀼𑀝𑁆𑀞𑀸𑀦𑀁, 𑀩𑀮𑀁, 𑀨𑀸𑀲𑀼𑀯𑀺𑀳𑀸𑀭𑁄, 𑀅𑀦𑀢𑀺𑀭𑀺𑀢𑁆𑀢𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺, 𑀭𑀲𑀢𑀡𑁆𑀳𑀸𑀯𑀺𑀦𑁄𑀤𑀦𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀏𑀓𑀸𑀲𑀦𑀪𑁄𑀚𑀦𑁂 𑀭𑀢𑀁,

𑀦 𑀬𑀢𑀺𑀁 𑀪𑁄𑀚𑀦𑀧𑀘𑁆𑀘𑀬𑀸 𑀭𑀼𑀚𑀸;

𑀯𑀺𑀲𑀳𑀦𑁆𑀢𑀺 𑀭𑀲𑁂 𑀅𑀮𑁄𑀮𑀼𑀧𑁄,

𑀧𑀭𑀺𑀳𑀸𑀧𑁂𑀢𑀺 𑀦 𑀓𑀫𑁆𑀫𑀫𑀢𑁆𑀢𑀦𑁄.

𑀇𑀢𑀺 𑀨𑀸𑀲𑀼𑀯𑀺𑀳𑀸𑀭𑀓𑀸𑀭𑀡𑁂,

𑀲𑀼𑀘𑀺𑀲𑀮𑁆𑀮𑁂𑀔𑀭𑀢𑀽𑀧𑀲𑁂𑀯𑀺𑀢𑁂;

𑀚𑀦𑀬𑁂𑀣 𑀯𑀺𑀲𑀼𑀤𑁆𑀥𑀫𑀸𑀦𑀲𑁄,

𑀭𑀢𑀺𑀫𑁂𑀓𑀸𑀲𑀦𑀪𑁄𑀚𑀦𑁂 𑀬𑀢𑀻𑀢𑀺.

𑀅𑀬𑀁 𑀏𑀓𑀸𑀲𑀦𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁬. 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀓𑀣𑀸

𑁨𑁯. 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀫𑁆𑀧𑀺 ‘‘𑀤𑀼𑀢𑀺𑀬𑀓𑀪𑀸𑀚𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀧𑀢𑁆𑀢𑀧𑀺𑀡𑁆𑀟𑀺𑀓𑁂𑀦 𑀬𑀸𑀕𑀼𑀧𑀸𑀦𑀓𑀸𑀮𑁂 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀩𑁆𑀬𑀜𑁆𑀚𑀦𑁂 𑀮𑀤𑁆𑀥𑁂 𑀩𑁆𑀬𑀜𑁆𑀚𑀦𑀁 𑀯𑀸 𑀧𑀞𑀫𑀁 𑀔𑀸𑀤𑀺𑀢𑀩𑁆𑀩𑀁, 𑀬𑀸𑀕𑀼 𑀯𑀸 𑀧𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀬𑀸𑀕𑀼𑀬𑀁 𑀧𑀓𑁆𑀔𑀺𑀧𑀢𑀺, 𑀧𑀽𑀢𑀺𑀫𑀘𑁆𑀙𑀓𑀸𑀤𑀺𑀫𑁆𑀳𑀺 𑀩𑁆𑀬𑀜𑁆𑀚𑀦𑁂 𑀧𑀓𑁆𑀔𑀺𑀢𑁆𑀢𑁂 𑀬𑀸𑀕𑀼 𑀧𑀝𑀺𑀓𑀽𑀮𑀸 𑀳𑁄𑀢𑀺, 𑀅𑀧𑁆𑀧𑀝𑀺𑀓𑀽𑀮𑀫𑁂𑀯 𑀘 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀢𑀣𑀸𑀭𑀽𑀧𑀁 𑀩𑁆𑀬𑀜𑁆𑀚𑀦𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀬𑀁 𑀧𑀦 𑀫𑀥𑀼𑀲𑀓𑁆𑀓𑀭𑀸𑀤𑀺𑀓𑀁 𑀅𑀧𑁆𑀧𑀝𑀺𑀓𑀽𑀮𑀁 𑀳𑁄𑀢𑀺, 𑀢𑀁 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀕𑀡𑁆𑀳𑀦𑁆𑀢𑁂𑀦 𑀘 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀺𑀢𑀩𑁆𑀩𑀁. 𑀆𑀫𑀓𑀲𑀸𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀧𑀦 𑀅𑀓𑀢𑁆𑀯𑀸 𑀧𑀢𑁆𑀢𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀤𑀼𑀢𑀺𑀬𑀓𑀪𑀸𑀚𑀦𑀲𑁆𑀲 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀜𑁆𑀜𑀁 𑀭𑀼𑀓𑁆𑀔𑀧𑀡𑁆𑀡𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀲𑁆𑀲 𑀅𑀜𑁆𑀜𑀢𑁆𑀭 𑀉𑀘𑁆𑀙𑀼𑀔𑀸𑀤𑀦𑀓𑀸𑀮𑀸 𑀓𑀘𑀯𑀭𑀫𑁆𑀧𑀺 𑀙𑀟𑁆𑀟𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀑𑀤𑀦𑀧𑀺𑀡𑁆𑀟𑀫𑀘𑁆𑀙𑀫𑀁𑀲𑀧𑀽𑀯𑁂𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀫𑀚𑁆𑀛𑀺𑀫𑀲𑁆𑀲 𑀏𑀓𑁂𑀦 𑀳𑀢𑁆𑀣𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀳𑀢𑁆𑀣𑀬𑁄𑀕𑀻 𑀦𑀸𑀫𑁂𑀲. 𑀫𑀼𑀤𑀼𑀓𑁄 𑀧𑀦 𑀧𑀢𑁆𑀢𑀬𑁄𑀕𑀻 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀬𑀁 𑀲𑀓𑁆𑀓𑀸 𑀳𑁄𑀢𑀺 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑀼𑀁, 𑀢𑀁 𑀲𑀩𑁆𑀩𑀁 𑀳𑀢𑁆𑀣𑁂𑀦 𑀯𑀸 𑀤𑀦𑁆𑀢𑁂𑀳𑀺 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀯𑀝𑁆𑀝𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀤𑀼𑀢𑀺𑀬𑀓𑀪𑀸𑀚𑀦𑀁 𑀲𑀸𑀤𑀺𑀢𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀦𑀸𑀦𑀸𑀭𑀲𑀢𑀡𑁆𑀳𑀸𑀯𑀺𑀦𑁄𑀤𑀦𑀁. 𑀅𑀢𑁆𑀭𑀺𑀘𑁆𑀙𑀢𑀸𑀬 𑀧𑀳𑀸𑀦𑀁, 𑀆𑀳𑀸𑀭𑁂 𑀧𑀬𑁄𑀚𑀦𑀫𑀢𑁆𑀢𑀤𑀲𑁆𑀲𑀺𑀢𑀸, 𑀣𑀸𑀮𑀓𑀸𑀤𑀺𑀧𑀭𑀺𑀳𑀭𑀡𑀔𑁂𑀤𑀸𑀪𑀸𑀯𑁄, 𑀅𑀯𑀺𑀓𑁆𑀔𑀺𑀢𑁆𑀢𑀪𑁄𑀚𑀺𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀦𑀸𑀦𑀸𑀪𑀸𑀚𑀦𑀯𑀺𑀓𑁆𑀔𑁂𑀧𑀁, 𑀳𑀺𑀢𑁆𑀯𑀸 𑀑𑀓𑁆𑀔𑀺𑀢𑁆𑀢𑀮𑁄𑀘𑀦𑁄;

𑀔𑀡𑀦𑁆𑀢𑁄 𑀯𑀺𑀬 𑀫𑀽𑀮𑀸𑀦𑀺, 𑀭𑀲𑀢𑀡𑁆𑀳𑀸𑀬 𑀲𑀼𑀩𑁆𑀩𑀢𑁄.

𑀲𑀭𑀽𑀧𑀁 𑀯𑀺𑀬 𑀲𑀦𑁆𑀢𑀼𑀝𑁆𑀞𑀺𑀁, 𑀥𑀸𑀭𑀬𑀦𑁆𑀢𑁄 𑀲𑀼𑀫𑀸𑀦𑀲𑁄;

𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀆𑀳𑀸𑀭𑀁, 𑀓𑁄 𑀅𑀜𑁆𑀜𑁄 𑀧𑀢𑁆𑀢𑀧𑀺𑀡𑁆𑀟𑀺𑀓𑁄𑀢𑀺.

𑀅𑀬𑀁 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁭. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀓𑀣𑀸

𑁩𑁦. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀫𑁆𑀧𑀺 ‘‘𑀅𑀢𑀺𑀭𑀺𑀢𑁆𑀢𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁂𑀦 𑀧𑀯𑀸𑀭𑁂𑀢𑁆𑀯𑀸 𑀧𑀼𑀦 𑀪𑁄𑀚𑀦𑀁 𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑁆𑀯𑀸 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀬𑀲𑁆𑀫𑀸 𑀧𑀞𑀫𑀧𑀺𑀡𑁆𑀟𑁂 𑀧𑀯𑀸𑀭𑀡𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀦 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑁂 𑀅𑀜𑁆𑀜𑀁 𑀧𑀝𑀺𑀓𑁆𑀔𑀺𑀧𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀧𑀯𑀸𑀭𑀺𑀢𑁄 𑀧𑀞𑀫𑀧𑀺𑀡𑁆𑀟𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀤𑀼𑀢𑀺𑀬𑀧𑀺𑀡𑁆𑀟𑀁 𑀦 𑀪𑀼𑀜𑁆𑀚𑀢𑀺. 𑀫𑀚𑁆𑀛𑀺𑀫𑁄 𑀬𑀲𑁆𑀫𑀺𑀁 𑀪𑁄𑀚𑀦𑁂 𑀧𑀯𑀸𑀭𑀺𑀢𑁄, 𑀢𑀤𑁂𑀯 𑀪𑀼𑀜𑁆𑀚𑀢𑀺. 𑀫𑀼𑀤𑀼𑀓𑁄 𑀧𑀦 𑀬𑀸𑀯 𑀆𑀲𑀦𑀸 𑀦 𑀯𑀼𑀝𑁆𑀞𑀸𑀢𑀺 𑀢𑀸𑀯 𑀪𑀼𑀜𑁆𑀚𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀧𑀯𑀸𑀭𑀺𑀢𑀸𑀦𑀁 𑀓𑀧𑁆𑀧𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀼𑀢𑁆𑀢𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀧𑀢𑁆𑀢𑀺𑀬𑀸 𑀤𑀽𑀭𑀪𑀸𑀯𑁄, 𑀑𑀤𑀭𑀺𑀓𑀢𑁆𑀢𑀸𑀪𑀸𑀯𑁄, 𑀦𑀺𑀭𑀸𑀫𑀺𑀲𑀲𑀦𑁆𑀦𑀺𑀥𑀺𑀢𑀸, 𑀧𑀼𑀦 𑀧𑀭𑀺𑀬𑁂𑀲𑀦𑀸𑀬 𑀅𑀪𑀸𑀯𑁄, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀧𑀭𑀺𑀬𑁂𑀲𑀦𑀸𑀬 𑀔𑁂𑀤𑀁, 𑀦 𑀬𑀸𑀢𑀺 𑀦 𑀓𑀭𑁄𑀢𑀺 𑀲𑀦𑁆𑀦𑀺𑀥𑀺𑀁 𑀥𑀻𑀭𑁄;

𑀑𑀤𑀭𑀺𑀓𑀢𑁆𑀢𑀁 𑀧𑀚𑀳𑀢𑀺, 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄 𑀬𑁄𑀕𑀻.

𑀢𑀲𑁆𑀫𑀸 𑀲𑀼𑀕𑀢𑀧𑀲𑀢𑁆𑀣𑀁, 𑀲𑀦𑁆𑀢𑁄𑀲𑀕𑀼𑀡𑀸𑀤𑀺𑀯𑀼𑀟𑁆𑀠𑀺𑀲𑀜𑁆𑀚𑀦𑀦𑀁;

𑀤𑁄𑀲𑁂 𑀯𑀺𑀥𑀼𑀦𑀺𑀢𑀼𑀓𑀸𑀫𑁄, 𑀪𑀚𑁂𑀬𑁆𑀬 𑀬𑁄𑀕𑀻 𑀥𑀼𑀢𑀗𑁆𑀕𑀫𑀺𑀤𑀦𑁆𑀢𑀺.

𑀅𑀬𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁮. 𑀆𑀭𑀜𑁆𑀜𑀺𑀓𑀗𑁆𑀕𑀓𑀣𑀸

𑁩𑁧. 𑀆𑀭𑀜𑁆𑀜𑀺𑀓𑀗𑁆𑀕𑀫𑁆𑀧𑀺 ‘‘𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀆𑀭𑀜𑁆𑀜𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀆𑀭𑀜𑁆𑀜𑀺𑀓𑁂𑀦 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀳𑀸𑀬 𑀅𑀭𑀜𑁆𑀜𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀢𑀢𑁆𑀣 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦 𑀕𑀸𑀫𑁄𑀬𑁂𑀯 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁.

𑀕𑀸𑀫𑁄 𑀦𑀸𑀫 𑀬𑁄 𑀓𑁄𑀘𑀺 𑀏𑀓𑀓𑀼𑀝𑀺𑀓𑁄 𑀯𑀸 𑀅𑀦𑁂𑀓𑀓𑀼𑀝𑀺𑀓𑁄 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀸 𑀲𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀅𑀦𑁆𑀢𑀫𑀲𑁄 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀦𑀺𑀯𑀺𑀝𑁆𑀞𑁄 𑀬𑁄 𑀓𑁄𑀘𑀺 𑀲𑀢𑁆𑀣𑁄𑀧𑀺.

𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀲𑀘𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲𑁂𑀯 𑀤𑁆𑀯𑁂 𑀇𑀦𑁆𑀤𑀔𑀻𑀮𑀸 𑀳𑁄𑀦𑁆𑀢𑀺, 𑀅𑀩𑁆𑀪𑀦𑁆𑀢𑀭𑀺𑀫𑁂 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄. 𑀢𑀲𑁆𑀲 𑀮𑀓𑁆𑀔𑀡𑀁 𑀬𑀣𑀸 𑀢𑀭𑀼𑀡𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑀸 𑀩𑀸𑀳𑀁 𑀧𑀲𑀸𑀭𑁂𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑀦𑁆𑀢𑀺 𑀯𑀺𑀦𑀬𑀥𑀭𑀸. 𑀲𑀼𑀢𑁆𑀢𑀦𑁆𑀢𑀺𑀓𑀸 𑀧𑀦 𑀓𑀸𑀓𑀦𑀺𑀯𑀸𑀭𑀡𑀦𑀺𑀬𑀫𑁂𑀦 𑀔𑀺𑀢𑁆𑀢𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. 𑀅𑀧𑀭𑀺𑀓𑁆𑀔𑀺𑀢𑁆𑀢𑀕𑀸𑀫𑁂 𑀬𑀁 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑀲𑁆𑀲 𑀖𑀭𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑁄 𑀫𑀸𑀢𑀼𑀕𑀸𑀫𑁄 𑀪𑀸𑀚𑀦𑁂𑀦 𑀉𑀤𑀓𑀁 𑀙𑀟𑁆𑀟𑁂𑀢𑀺, 𑀢𑀲𑁆𑀲 𑀧𑀢𑀦𑀝𑁆𑀞𑀸𑀦𑀁 𑀖𑀭𑀽𑀧𑀘𑀸𑀭𑁄. 𑀢𑀢𑁄 𑀯𑀼𑀢𑁆𑀢𑀦𑀬𑁂𑀦 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑁄, 𑀤𑀼𑀢𑀺𑀬𑁄 𑀕𑀸𑀫𑀽𑀧𑀘𑀸𑀭𑁄.

𑀅𑀭𑀜𑁆𑀜𑀁 𑀧𑀦 𑀯𑀺𑀦𑀬𑀧𑀭𑀺𑀬𑀸𑀬𑁂 𑀢𑀸𑀯 ‘‘𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀧𑀸𑀭𑀸. 𑁯𑁨) 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸, 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀇𑀤𑀁 𑀮𑀓𑁆𑀔𑀡𑀁. 𑀢𑀁 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀢𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀞𑀫𑀮𑁂𑀟𑁆𑀟𑀼𑀧𑀸𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀳𑀸𑀭𑀧𑀭𑀺𑀓𑁆𑀔𑁂𑀧𑀸 𑀫𑀺𑀦𑀺𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑀁.

𑀲𑀘𑁂 𑀧𑀦 𑀯𑀺𑀳𑀸𑀭𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀬𑀁 𑀲𑀩𑁆𑀩𑀧𑀞𑀫𑀁 𑀲𑁂𑀦𑀸𑀲𑀦𑀁 𑀯𑀸 𑀪𑀢𑁆𑀢𑀲𑀸𑀮𑀸 𑀯𑀸 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀸 𑀩𑁄𑀥𑀺 𑀯𑀸 𑀘𑁂𑀢𑀺𑀬𑀁 𑀯𑀸 𑀤𑀽𑀭𑁂 𑀘𑁂𑀧𑀺 𑀲𑁂𑀦𑀸𑀲𑀦𑀢𑁄 𑀳𑁄𑀢𑀺, 𑀢𑀁 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀳𑀸𑀭𑀲𑁆𑀲𑀧𑀺 𑀕𑀸𑀫𑀲𑁆𑀲𑁂𑀯 𑀉𑀧𑀘𑀸𑀭𑀁 𑀦𑀻𑀳𑀭𑀺𑀢𑁆𑀯𑀸 𑀉𑀪𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑀭𑀸 𑀫𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀧𑀫𑀸𑀡𑀁.

𑀲𑀘𑁂𑀧𑀺 𑀆𑀲𑀦𑁆𑀦𑁂 𑀕𑀸𑀫𑁄 𑀳𑁄𑀢𑀺, 𑀯𑀺𑀳𑀸𑀭𑁂 𑀞𑀺𑀢𑁂𑀳𑀺 𑀫𑀸𑀦𑀼𑀲𑀓𑀸𑀦𑀁 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀧𑀩𑁆𑀩𑀢𑀦𑀤𑀻𑀆𑀤𑀻𑀳𑀺 𑀧𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀉𑀚𑀼𑀁 𑀕𑀦𑁆𑀢𑀼𑀁. 𑀬𑁄 𑀢𑀲𑁆𑀲 𑀧𑀓𑀢𑀺𑀫𑀕𑁆𑀕𑁄 𑀳𑁄𑀢𑀺, 𑀲𑀘𑁂𑀧𑀺 𑀦𑀸𑀯𑀸𑀬 𑀲𑀜𑁆𑀘𑀭𑀺𑀢𑀩𑁆𑀩𑁄, 𑀢𑁂𑀦 𑀫𑀕𑁆𑀕𑁂𑀦 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀕𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀆𑀲𑀦𑁆𑀦𑀕𑀸𑀫𑀲𑁆𑀲 𑀅𑀗𑁆𑀕𑀲𑀫𑁆𑀧𑀸𑀤𑀦𑀢𑁆𑀣𑀁 𑀢𑀢𑁄 𑀢𑀢𑁄 𑀫𑀕𑁆𑀕𑀁 𑀧𑀺𑀤𑀳𑀢𑀺, 𑀅𑀬𑀁 𑀥𑀼𑀢𑀗𑁆𑀕𑀘𑁄𑀭𑁄 𑀳𑁄𑀢𑀺.

𑀲𑀘𑁂 𑀧𑀦 𑀆𑀭𑀜𑁆𑀜𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑀚𑁆𑀛𑀸𑀬𑁄 𑀯𑀸 𑀆𑀘𑀭𑀺𑀬𑁄 𑀯𑀸 𑀕𑀺𑀮𑀸𑀦𑁄 𑀳𑁄𑀢𑀺, 𑀢𑁂𑀦 𑀅𑀭𑀜𑁆𑀜𑁂 𑀲𑀧𑁆𑀧𑀸𑀬𑀁 𑀅𑀮𑀪𑀦𑁆𑀢𑁂𑀦 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀦𑁂𑀢𑁆𑀯𑀸 𑀉𑀧𑀝𑁆𑀞𑀸𑀢𑀩𑁆𑀩𑁄. 𑀓𑀸𑀮𑀲𑁆𑀲𑁂𑀯 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀗𑁆𑀕𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀅𑀭𑀼𑀡𑀼𑀝𑁆𑀞𑀸𑀦𑀯𑁂𑀮𑀸𑀬𑀁 𑀢𑁂𑀲𑀁 𑀆𑀩𑀸𑀥𑁄 𑀯𑀟𑁆𑀠𑀢𑀺, 𑀢𑁂𑀲𑀁𑀬𑁂𑀯 𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁. 𑀦 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁂𑀦 𑀲𑀩𑁆𑀩𑀓𑀸𑀮𑀁 𑀅𑀭𑀜𑁆𑀜𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑁂𑀢𑀩𑁆𑀩𑀁. 𑀫𑀚𑁆𑀛𑀺𑀫𑁄 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀕𑀸𑀫𑀦𑁆𑀢𑁂 𑀯𑀲𑀺𑀢𑀼𑀁 𑀮𑀪𑀢𑀺. 𑀫𑀼𑀤𑀼𑀓𑁄 𑀳𑁂𑀫𑀦𑁆𑀢𑀺𑀓𑁂𑀧𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀬𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀮𑁂 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀡𑀦𑁆𑀢𑀸𑀦𑀁 𑀅𑀭𑀼𑀡𑁂 𑀉𑀝𑁆𑀞𑀺𑀢𑁂𑀧𑀺 𑀥𑀼𑀢𑀗𑁆𑀕𑀁 𑀦 𑀪𑀺𑀚𑁆𑀚𑀢𑀺. 𑀲𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀉𑀝𑁆𑀞𑀺𑀢𑁂𑀧𑀺 𑀦 𑀪𑀺𑀚𑁆𑀚𑀢𑀺. 𑀲𑀘𑁂 𑀧𑀦 𑀉𑀝𑁆𑀞𑀺𑀢𑁂𑀧𑀺 𑀥𑀫𑁆𑀫𑀓𑀣𑀺𑀓𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸𑀢𑀺 𑀦𑀺𑀤𑁆𑀤𑀸𑀬𑀦𑁆𑀢𑀸𑀦𑀁 𑀅𑀭𑀼𑀡𑀁 𑀉𑀝𑁆𑀞𑀳𑀢𑀺, 𑀅𑀢𑁆𑀢𑀦𑁄 𑀯𑀸 𑀭𑀼𑀘𑀺𑀬𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀅𑀭𑀼𑀡𑀁 𑀉𑀝𑁆𑀞𑀧𑁂𑀦𑁆𑀢𑀺, 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀆𑀭𑀜𑁆𑀜𑀺𑀓𑁄 𑀪𑀺𑀓𑁆𑀔𑀼 𑀅𑀭𑀜𑁆𑀜𑀲𑀜𑁆𑀜𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀪𑀩𑁆𑀩𑁄 𑀅𑀮𑀤𑁆𑀥𑀁 𑀯𑀸 𑀲𑀫𑀸𑀥𑀺𑀁 𑀧𑀝𑀺𑀮𑀤𑁆𑀥𑀼𑀁 𑀮𑀤𑁆𑀥𑀁 𑀯𑀸 𑀭𑀓𑁆𑀔𑀺𑀢𑀼𑀁, 𑀲𑀢𑁆𑀣𑀸𑀧𑀺𑀲𑁆𑀲 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀬𑀣𑀸𑀳 𑁋 ‘‘𑀢𑁂𑀦𑀸𑀳𑀁, 𑀦𑀸𑀕𑀺𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀫𑀦𑁄 𑀳𑁄𑀫𑀺 𑀅𑀭𑀜𑁆𑀜𑀯𑀺𑀳𑀸𑀭𑁂𑀦𑀸’’𑀢𑀺 (𑀅. 𑀦𑀺. 𑁬.𑁪𑁨; 𑁮.𑁮𑁬). 𑀧𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀘𑀲𑁆𑀲 𑀅𑀲𑀧𑁆𑀧𑀸𑀬𑀭𑀽𑀧𑀸𑀤𑀬𑁄 𑀘𑀺𑀢𑁆𑀢𑀁 𑀦 𑀯𑀺𑀓𑁆𑀔𑀺𑀧𑀦𑁆𑀢𑀺, 𑀯𑀺𑀕𑀢𑀲𑀦𑁆𑀢𑀸𑀲𑁄 𑀳𑁄𑀢𑀺, 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀁 𑀚𑀳𑀢𑀺, 𑀧𑀯𑀺𑀯𑁂𑀓𑀲𑀼𑀔𑀭𑀲𑀁 𑀅𑀲𑁆𑀲𑀸𑀤𑁂𑀢𑀺, 𑀧𑀁𑀲𑀼𑀓𑀽𑀮𑀺𑀓𑀸𑀤𑀺𑀪𑀸𑀯𑁄𑀧𑀺 𑀘𑀲𑁆𑀲 𑀧𑀢𑀺𑀭𑀽𑀧𑁄 𑀳𑁄𑀢𑀻𑀢𑀺.

𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄, 𑀧𑀦𑁆𑀢𑀲𑁂𑀦𑀸𑀲𑀦𑁂 𑀭𑀢𑁄;

𑀆𑀭𑀸𑀥𑀬𑀦𑁆𑀢𑁄 𑀦𑀸𑀣𑀲𑁆𑀲, 𑀯𑀦𑀯𑀸𑀲𑁂𑀦 𑀫𑀸𑀦𑀲𑀁.

𑀏𑀓𑁄 𑀅𑀭𑀜𑁆𑀜𑁂 𑀦𑀺𑀯𑀲𑀁, 𑀬𑀁 𑀲𑀼𑀔𑀁 𑀮𑀪𑀢𑁂 𑀬𑀢𑀺;

𑀭𑀲𑀁 𑀢𑀲𑁆𑀲 𑀦 𑀯𑀺𑀦𑁆𑀤𑀦𑁆𑀢𑀺, 𑀅𑀧𑀺 𑀤𑁂𑀯𑀸 𑀲𑀇𑀦𑁆𑀤𑀓𑀸.

𑀧𑀁𑀲𑀼𑀓𑀽𑀮𑀜𑁆𑀘 𑀏𑀲𑁄𑀯, 𑀓𑀯𑀘𑀁 𑀯𑀺𑀬 𑀥𑀸𑀭𑀬𑀁;

𑀅𑀭𑀜𑁆𑀜𑀲𑀗𑁆𑀕𑀸𑀫𑀕𑀢𑁄, 𑀅𑀯𑀲𑁂𑀲𑀥𑀼𑀢𑀸𑀬𑀼𑀥𑁄.

𑀲𑀫𑀢𑁆𑀣𑁄 𑀦𑀘𑀺𑀭𑀲𑁆𑀲𑁂𑀯, 𑀚𑁂𑀢𑀼𑀁 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁;

𑀢𑀲𑁆𑀫𑀸 𑀅𑀭𑀜𑁆𑀜𑀯𑀸𑀲𑀫𑁆𑀳𑀺, 𑀭𑀢𑀺𑀁 𑀓𑀬𑀺𑀭𑀸𑀣 𑀧𑀡𑁆𑀟𑀺𑀢𑁄𑀢𑀺.

𑀅𑀬𑀁 𑀆𑀭𑀜𑁆𑀜𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.

𑁯. 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀓𑀣𑀸

𑁩𑁨. 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀫𑁆𑀧𑀺 ‘‘𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀭𑀼𑀓𑁆𑀔𑀫𑀽𑀮𑀺𑀓𑁂𑀦 𑀲𑀻𑀫𑀦𑁆𑀢𑀭𑀺𑀓𑀭𑀼𑀓𑁆𑀔𑀁, 𑀘𑁂𑀢𑀺𑀬𑀭𑀼𑀓𑁆𑀔𑀁, 𑀦𑀺𑀬𑁆𑀬𑀸𑀲𑀭𑀼𑀓𑁆𑀔𑀁, 𑀨𑀮𑀭𑀼𑀓𑁆𑀔𑀁, 𑀯𑀕𑁆𑀕𑀼𑀮𑀺𑀭𑀼𑀓𑁆𑀔𑀁, 𑀲𑀼𑀲𑀺𑀭𑀭𑀼𑀓𑁆𑀔𑀁, 𑀯𑀺𑀳𑀸𑀭𑀫𑀚𑁆𑀛𑁂 𑀞𑀺𑀢𑀭𑀼𑀓𑁆𑀔𑀦𑁆𑀢𑀺 𑀇𑀫𑁂 𑀭𑀼𑀓𑁆𑀔𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀞𑀺𑀢𑀭𑀼𑀓𑁆𑀔𑁄 𑀕𑀳𑁂𑀢𑀩𑁆𑀩𑁄𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀬𑀣𑀸𑀭𑀼𑀘𑀺𑀢𑀁 𑀭𑀼𑀓𑁆𑀔𑀁 𑀕𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀸𑀧𑁂𑀢𑀼𑀁 𑀦 𑀮𑀪𑀢𑀺. 𑀧𑀸𑀤𑁂𑀦 𑀧𑀡𑁆𑀡𑀲𑀝𑀁 𑀅𑀧𑀦𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑁄 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑁂𑀳𑀺𑀬𑁂𑀯 𑀧𑀝𑀺𑀚𑀕𑁆𑀕𑀸𑀧𑁂𑀢𑀼𑀁 𑀮𑀪𑀢𑀺. 𑀫𑀼𑀤𑀼𑀓𑁂𑀦 𑀆𑀭𑀸𑀫𑀺𑀓𑀲𑀫𑀡𑀼𑀤𑁆𑀤𑁂𑀲𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑁄𑀥𑀸𑀧𑁂𑀢𑁆𑀯𑀸 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀸𑀧𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑀸𑀧𑁂𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀫𑀳𑀤𑀺𑀯𑀲𑁂 𑀧𑀦 𑀭𑀼𑀓𑁆𑀔𑀫𑀽𑀮𑀺𑀓𑁂𑀦 𑀢𑀢𑁆𑀣 𑀅𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀧𑀝𑀺𑀘𑁆𑀙𑀦𑁆𑀦𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀙𑀦𑁆𑀦𑁂 𑀯𑀸𑀲𑀁 𑀓𑀧𑁆𑀧𑀺𑀢𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀚𑀸𑀦𑀺𑀢𑁆𑀯𑀸 𑀙𑀦𑁆𑀦𑁂 𑀅𑀭𑀼𑀡𑀁 𑀉𑀝𑁆𑀞𑀸𑀧𑀺𑀢𑀫𑀢𑁆𑀢𑁂𑀢𑀺 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀢𑀺 (𑀫𑀳𑀸𑀯. 𑁧𑁨𑁮) 𑀯𑀘𑀦𑀢𑁄 𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑁄, 𑀅𑀧𑁆𑀧𑀸𑀦𑀺 𑀘𑁂𑀯 𑀲𑀼𑀮𑀪𑀸𑀦𑀺 𑀘 𑀢𑀸𑀦𑀺 𑀘 𑀅𑀦𑀯𑀚𑁆𑀚𑀸𑀦𑀻𑀢𑀺 (𑀅. 𑀦𑀺. 𑁪.𑁨𑁭; 𑀇𑀢𑀺𑀯𑀼. 𑁧𑁦𑁧) 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑀧𑀘𑁆𑀘𑀬𑀢𑀸, 𑀅𑀪𑀺𑀡𑁆𑀳𑀁 𑀢𑀭𑀼𑀧𑀡𑁆𑀡𑀯𑀺𑀓𑀸𑀭𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀫𑀼𑀝𑁆𑀞𑀸𑀧𑀦𑀢𑀸, 𑀲𑁂𑀦𑀸𑀲𑀦𑀫𑀘𑁆𑀙𑁂𑀭𑀓𑀫𑁆𑀫𑀸𑀭𑀸𑀫𑀢𑀸𑀦𑀁 𑀅𑀪𑀸𑀯𑁄, 𑀤𑁂𑀯𑀢𑀸𑀳𑀺 𑀲𑀳𑀯𑀸𑀲𑀺𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀯𑀡𑁆𑀡𑀺𑀢𑁄 𑀩𑀼𑀤𑁆𑀥𑀲𑁂𑀝𑁆𑀞𑁂𑀦, 𑀦𑀺𑀲𑁆𑀲𑀬𑁄𑀢𑀺 𑀘 𑀪𑀸𑀲𑀺𑀢𑁄;

𑀦𑀺𑀯𑀸𑀲𑁄 𑀧𑀯𑀺𑀯𑀺𑀢𑁆𑀢𑀲𑁆𑀲, 𑀭𑀼𑀓𑁆𑀔𑀫𑀽𑀮𑀲𑀫𑁄 𑀓𑀼𑀢𑁄.

𑀆𑀯𑀸𑀲𑀫𑀘𑁆𑀙𑁂𑀭𑀳𑀭𑁂, 𑀤𑁂𑀯𑀢𑀸 𑀧𑀭𑀺𑀧𑀸𑀮𑀺𑀢𑁂;

𑀧𑀯𑀺𑀯𑀺𑀢𑁆𑀢𑁂 𑀯𑀲𑀦𑁆𑀢𑁄 𑀳𑀺, 𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀲𑀼𑀩𑁆𑀩𑀢𑁄.

𑀅𑀪𑀺𑀭𑀢𑁆𑀢𑀸𑀦𑀺 𑀦𑀻𑀮𑀸𑀦𑀺, 𑀧𑀡𑁆𑀟𑀽𑀦𑀺 𑀧𑀢𑀺𑀢𑀸𑀦𑀺 𑀘;

𑀧𑀲𑁆𑀲𑀦𑁆𑀢𑁄 𑀢𑀭𑀼𑀧𑀡𑁆𑀡𑀸𑀦𑀺, 𑀦𑀺𑀘𑁆𑀘𑀲𑀜𑁆𑀜𑀁 𑀧𑀦𑀽𑀤𑀢𑀺.