𑁧𑁨. 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀓𑀣𑀸

𑁩𑁫. 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀫𑁆𑀧𑀺 ‘‘𑀲𑁂𑀦𑀸𑀲𑀦𑀮𑁄𑀮𑀼𑀧𑁆𑀧𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀬𑀣𑀸𑀲𑀦𑁆𑀣𑀢𑀺𑀓𑁂𑀦 𑀬𑀤𑀲𑁆𑀲 𑀲𑁂𑀦𑀸𑀲𑀦𑀁 ‘‘𑀇𑀤𑀁 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀸𑀳𑀺𑀢𑀁 𑀳𑁄𑀢𑀺, 𑀢𑁂𑀦𑁂𑀯 𑀢𑀼𑀝𑁆𑀞𑀩𑁆𑀩𑀁, 𑀦 𑀅𑀜𑁆𑀜𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄. 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁄 𑀅𑀢𑁆𑀢𑀦𑁄 𑀧𑀢𑁆𑀢𑀲𑁂𑀦𑀸𑀲𑀦𑀁 𑀤𑀽𑀭𑁂𑀢𑀺 𑀯𑀸 𑀅𑀘𑁆𑀘𑀸𑀲𑀦𑁆𑀦𑁂𑀢𑀺 𑀯𑀸 𑀅𑀫𑀦𑀼𑀲𑁆𑀲𑀤𑀻𑀖𑀚𑀸𑀢𑀺𑀓𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀦𑁆𑀢𑀺 𑀯𑀸 𑀉𑀡𑁆𑀳𑀦𑁆𑀢𑀺 𑀯𑀸 𑀲𑀻𑀢𑀮𑀦𑁆𑀢𑀺 𑀯𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀢𑀺. 𑀫𑀚𑁆𑀛𑀺𑀫𑁄 𑀧𑀼𑀘𑁆𑀙𑀺𑀢𑀼𑀁 𑀮𑀪𑀢𑀺. 𑀕𑀦𑁆𑀢𑁆𑀯𑀸 𑀧𑀦 𑀑𑀮𑁄𑀓𑁂𑀢𑀼𑀁 𑀦 𑀮𑀪𑀢𑀺. 𑀫𑀼𑀤𑀼𑀓𑁄 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀲𑀘𑀲𑁆𑀲 𑀢𑀁 𑀦 𑀭𑀼𑀘𑁆𑀘𑀢𑀺, 𑀅𑀜𑁆𑀜𑀁 𑀕𑀳𑁂𑀢𑀼𑀁 𑀮𑀪𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀲𑁂𑀦𑀸𑀲𑀦𑀮𑁄𑀮𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, ‘‘𑀬𑀁 𑀮𑀤𑁆𑀥𑀁 𑀢𑁂𑀦 𑀢𑀼𑀝𑁆𑀞𑀩𑁆𑀩’’𑀦𑁆𑀢𑀺 (𑀚𑀸. 𑁧.𑁧.𑁧𑁩𑁬; 𑀧𑀸𑀘𑀺. 𑁭𑁯𑁩) 𑀯𑀼𑀢𑁆𑀢𑁄𑀯𑀸𑀤𑀓𑀭𑀡𑀁, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀳𑀺𑀢𑁂𑀲𑀺𑀢𑀸, 𑀳𑀻𑀦𑀧𑀡𑀻𑀢𑀯𑀺𑀓𑀧𑁆𑀧𑀧𑀭𑀺𑀘𑁆𑀘𑀸𑀕𑁄, 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑁆𑀧𑀳𑀸𑀦𑀁, 𑀅𑀢𑁆𑀭𑀺𑀘𑁆𑀙𑀢𑀸𑀬 𑀤𑁆𑀯𑀸𑀭𑀧𑀺𑀤𑀳𑀦𑀁, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀬𑀁 𑀮𑀤𑁆𑀥𑀁 𑀢𑁂𑀦 𑀲𑀦𑁆𑀢𑀼𑀝𑁆𑀞𑁄, 𑀬𑀣𑀸𑀲𑀦𑁆𑀣𑀢𑀺𑀓𑁄 𑀬𑀢𑀺;

𑀦𑀺𑀩𑁆𑀩𑀺𑀓𑀧𑁆𑀧𑁄 𑀲𑀼𑀔𑀁 𑀲𑁂𑀢𑀺, 𑀢𑀺𑀡𑀲𑀦𑁆𑀣𑀭𑀓𑁂𑀲𑀼𑀧𑀺.

𑀦 𑀲𑁄 𑀭𑀚𑁆𑀚𑀢𑀺 𑀲𑁂𑀝𑁆𑀞𑀫𑁆𑀳𑀺, 𑀳𑀻𑀦𑀁 𑀮𑀤𑁆𑀥𑀸 𑀦 𑀓𑀼𑀧𑁆𑀧𑀢𑀺;

𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑀯𑀓𑁂, 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀢𑀺.

𑀢𑀲𑁆𑀫𑀸 𑀅𑀭𑀺𑀬𑀲𑀢𑀸𑀘𑀺𑀡𑁆𑀡𑀁, 𑀫𑀼𑀦𑀺𑀧𑀼𑀗𑁆𑀕𑀯𑀯𑀡𑁆𑀡𑀺𑀢𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀬𑀣𑀸𑀲𑀦𑁆𑀣𑀢𑀭𑀸𑀫𑀢𑀦𑁆𑀢𑀺.

𑀅𑀬𑀁 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.