𑁧𑁧. 𑀲𑁄𑀲𑀸𑀦𑀺𑀓𑀗𑁆𑀕𑀓𑀣𑀸

𑁩𑁪. 𑀲𑁄𑀲𑀸𑀦𑀺𑀓𑀗𑁆𑀕𑀫𑁆𑀧𑀺 ‘‘𑀦 𑀲𑀼𑀲𑀸𑀦𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀲𑁄𑀲𑀸𑀦𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑁂𑀦 𑀧𑀦 𑀲𑁄𑀲𑀸𑀦𑀺𑀓𑁂𑀦 𑀬𑀁 𑀫𑀦𑀼𑀲𑁆𑀲𑀸 𑀕𑀸𑀫𑀁 𑀦𑀺𑀯𑁂𑀲𑀦𑁆𑀢𑀸 ‘‘𑀇𑀤𑀁 𑀲𑀼𑀲𑀸𑀦’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀦𑁆𑀢𑀺, 𑀦 𑀢𑀢𑁆𑀣 𑀯𑀲𑀺𑀢𑀩𑁆𑀩𑀁. 𑀦 𑀳𑀺 𑀫𑀢𑀲𑀭𑀻𑀭𑁂 𑀅𑀚𑁆𑀛𑀸𑀧𑀺𑀢𑁂 𑀢𑀁 𑀲𑀼𑀲𑀸𑀦𑀁 𑀦𑀸𑀫 𑀳𑁄𑀢𑀺, 𑀛𑀸𑀧𑀺𑀢𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀙𑀟𑁆𑀟𑀺𑀢𑀁, 𑀢𑀁 𑀲𑀼𑀲𑀸𑀦𑀫𑁂𑀯.

𑀢𑀲𑁆𑀫𑀺𑀁 𑀧𑀦 𑀯𑀲𑀦𑁆𑀢𑁂𑀦 𑀘𑀗𑁆𑀓𑀫𑀫𑀡𑁆𑀟𑀧𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁂𑀦 𑀦 𑀯𑀲𑀺𑀢𑀩𑁆𑀩𑀁. 𑀕𑀭𑀼𑀓𑀁 𑀳𑀺 𑀇𑀤𑀁 𑀥𑀼𑀢𑀗𑁆𑀕𑀁, 𑀢𑀲𑁆𑀫𑀸 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀯𑀺𑀖𑀸𑀢𑀢𑁆𑀣𑀸𑀬 𑀲𑀗𑁆𑀖𑀢𑁆𑀣𑁂𑀭𑀁 𑀯𑀸 𑀭𑀸𑀚𑀬𑀼𑀢𑁆𑀢𑀓𑀁 𑀯𑀸 𑀚𑀸𑀦𑀸𑀧𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀘𑀗𑁆𑀓𑀫𑀦𑁆𑀢𑁂𑀦 𑀅𑀤𑁆𑀥𑀓𑁆𑀔𑀺𑀓𑁂𑀦 𑀆𑀴𑀸𑀳𑀦𑀁 𑀑𑀮𑁄𑀓𑁂𑀦𑁆𑀢𑁂𑀦 𑀘𑀗𑁆𑀓𑀫𑀺𑀢𑀩𑁆𑀩𑀁.

𑀲𑀼𑀲𑀸𑀦𑀁 𑀕𑀘𑁆𑀙𑀦𑁆𑀢𑁂𑀦𑀸𑀧𑀺 𑀫𑀳𑀸𑀧𑀣𑀸 𑀉𑀓𑁆𑀓𑀫𑁆𑀫 𑀉𑀧𑁆𑀧𑀣𑀫𑀕𑁆𑀕𑁂𑀦 𑀕𑀦𑁆𑀢𑀩𑁆𑀩𑀁. 𑀤𑀺𑀯𑀸𑀬𑁂𑀯 𑀆𑀭𑀫𑁆𑀫𑀡𑀁 𑀯𑀯𑀢𑁆𑀣𑀧𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺𑀲𑁆𑀲 𑀢𑀁 𑀭𑀢𑁆𑀢𑀺𑀁 𑀪𑀬𑀸𑀦𑀓𑀁 𑀦 𑀪𑀯𑀺𑀲𑁆𑀲𑀢𑀺, 𑀅𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀁 𑀯𑀺𑀭𑀯𑀺𑀢𑁆𑀯𑀸 𑀯𑀺𑀭𑀯𑀺𑀢𑁆𑀯𑀸 𑀆𑀳𑀺𑀡𑁆𑀟𑀦𑁆𑀢𑀸𑀧𑀺 𑀦 𑀓𑁂𑀦𑀘𑀺 𑀧𑀳𑀭𑀺𑀢𑀩𑁆𑀩𑀸. 𑀏𑀓𑀤𑀺𑀯𑀲𑀫𑁆𑀧𑀺 𑀲𑀼𑀲𑀸𑀦𑀁 𑀅𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀫𑀚𑁆𑀛𑀺𑀫𑀬𑀸𑀫𑀁 𑀲𑀼𑀲𑀸𑀦𑁂 𑀔𑁂𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀓𑁆𑀓𑀫𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸. 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑀁 𑀢𑀺𑀮𑀧𑀺𑀝𑁆𑀞𑀫𑀸𑀲𑀪𑀢𑁆𑀢𑀫𑀘𑁆𑀙𑀫𑀁𑀲𑀔𑀻𑀭𑀢𑁂𑀮𑀕𑀼𑀴𑀸𑀤𑀺𑀔𑀚𑁆𑀚𑀪𑁄𑀚𑁆𑀚𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀓𑀼𑀮𑀕𑁂𑀳𑀁 𑀦 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑁂𑀦 𑀬𑀢𑁆𑀣 𑀥𑀼𑀯𑀟𑀸𑀳𑀥𑀼𑀯𑀓𑀼𑀡𑀧𑀥𑀼𑀯𑀭𑁄𑀤𑀦𑀸𑀦𑀺 𑀅𑀢𑁆𑀣𑀺, 𑀢𑀢𑁆𑀣𑁂𑀯 𑀯𑀲𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑀲𑁆𑀲 𑀢𑀻𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀯𑀝𑁆𑀝𑀢𑀺. 𑀫𑀼𑀤𑀼𑀓𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀲𑀼𑀲𑀸𑀦𑀮𑀓𑁆𑀔𑀡𑀁 𑀧𑀢𑁆𑀢𑀫𑀢𑁆𑀢𑁂 𑀯𑀝𑁆𑀝𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀦 𑀲𑀼𑀲𑀸𑀦𑀫𑁆𑀳𑀺 𑀯𑀸𑀲𑀁 𑀓𑀧𑁆𑀧𑀦𑁂𑀦 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀲𑀼𑀲𑀸𑀦𑀁 𑀅𑀕𑀢𑀤𑀺𑀯𑀲𑁂𑀢𑀺 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄 𑀫𑀭𑀡𑀲𑁆𑀲𑀢𑀺𑀧𑀝𑀺𑀮𑀸𑀪𑁄, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀢𑀸, 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀥𑀺𑀕𑀫𑁄, 𑀓𑀸𑀫𑀭𑀸𑀕𑀯𑀺𑀦𑁄𑀤𑀦𑀁, 𑀅𑀪𑀺𑀡𑁆𑀳𑀁 𑀓𑀸𑀬𑀲𑀪𑀸𑀯𑀤𑀲𑁆𑀲𑀦𑀁, 𑀲𑀁𑀯𑁂𑀕𑀩𑀳𑀼𑀮𑀢𑀸 𑀆𑀭𑁄𑀕𑁆𑀬𑀫𑀤𑀸𑀤𑀺𑀧𑁆𑀧𑀳𑀸𑀦𑀁, 𑀪𑀬𑀪𑁂𑀭𑀯𑀲𑀳𑀦𑀢𑀸, 𑀅𑀫𑀦𑀼𑀲𑁆𑀲𑀸𑀦𑀁 𑀕𑀭𑀼𑀪𑀸𑀯𑀦𑀻𑀬𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀲𑁄𑀲𑀸𑀦𑀺𑀓𑀜𑁆𑀳𑀺 𑀫𑀭𑀡𑀸𑀦𑀼𑀲𑀢𑀺𑀧𑁆𑀧𑀪𑀸𑀯𑀸,

𑀦𑀺𑀤𑁆𑀤𑀸𑀕𑀢𑀫𑁆𑀧𑀺 𑀦 𑀨𑀼𑀲𑀦𑁆𑀢𑀺 𑀧𑀫𑀸𑀤𑀤𑁄𑀲𑀸;

𑀲𑀫𑁆𑀧𑀲𑁆𑀲𑀢𑁄 𑀘 𑀓𑀼𑀡𑀧𑀸𑀦𑀺 𑀩𑀳𑀽𑀦𑀺 𑀢𑀲𑁆𑀲,

𑀓𑀸𑀫𑀸𑀦𑀼𑀪𑀸𑀯𑀯𑀲𑀕𑀫𑁆𑀧𑀺 𑀦 𑀳𑁄𑀢𑀺 𑀘𑀺𑀢𑁆𑀢𑀁.

𑀲𑀁𑀯𑁂𑀕𑀫𑁂𑀢𑀺 𑀯𑀺𑀧𑀼𑀮𑀁 𑀦 𑀫𑀤𑀁 𑀉𑀧𑁂𑀢𑀺,

𑀲𑀫𑁆𑀫𑀸 𑀅𑀣𑁄 𑀖𑀝𑀢𑀺 𑀦𑀺𑀩𑁆𑀩𑀼𑀢𑀺𑀫𑁂𑀲𑀫𑀸𑀦𑁄;

𑀲𑁄𑀲𑀸𑀦𑀺𑀓𑀗𑁆𑀕𑀫𑀺𑀢𑀺𑀦𑁂𑀓𑀕𑀼𑀡𑀸𑀯𑀳𑀢𑁆𑀢𑀸,

𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀳𑀤𑀬𑁂𑀦 𑀦𑀺𑀲𑁂𑀯𑀺𑀢𑀩𑁆𑀩𑀦𑁆𑀢𑀺.

𑀅𑀬𑀁 𑀲𑁄𑀲𑀸𑀦𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.