𑁧𑁦. 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀓𑀣𑀸

𑁩𑁩. 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀫𑁆𑀧𑀺 ‘‘𑀙𑀦𑁆𑀦𑀜𑁆𑀘 𑀭𑀼𑀓𑁆𑀔𑀫𑀽𑀮𑀜𑁆𑀘 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀇𑀫𑁂𑀲𑀁 𑀅𑀜𑁆𑀜𑀢𑀭𑀯𑀘𑀦𑁂𑀦 𑀲𑀫𑀸𑀤𑀺𑀦𑁆𑀦𑀁 𑀳𑁄𑀢𑀺.

𑀢𑀲𑁆𑀲 𑀧𑀦 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀸𑀬 𑀯𑀸 𑀉𑀧𑁄𑀲𑀣𑀢𑁆𑀣𑀸𑀬 𑀯𑀸 𑀉𑀧𑁄𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀯𑀺𑀝𑁆𑀞𑀲𑁆𑀲 𑀤𑁂𑀯𑁄 𑀯𑀲𑁆𑀲𑀢𑀺, 𑀤𑁂𑀯𑁂 𑀯𑀲𑁆𑀲𑀫𑀸𑀦𑁂 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀲𑁆𑀲𑀽𑀧𑀭𑀫𑁂 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀪𑁄𑀚𑀦𑀲𑀸𑀮𑀁 𑀯𑀸 𑀅𑀕𑁆𑀕𑀺𑀲𑀸𑀮𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀯𑀢𑁆𑀢𑀁 𑀓𑀸𑀢𑀼𑀁, 𑀪𑁄𑀚𑀦𑀲𑀸𑀮𑀸𑀬 𑀣𑁂𑀭𑁂 𑀪𑀺𑀓𑁆𑀔𑀽 𑀪𑀢𑁆𑀢𑁂𑀦 𑀆𑀧𑀼𑀘𑁆𑀙𑀺𑀢𑀼𑀁, 𑀉𑀤𑁆𑀤𑀺𑀲𑀦𑁆𑀢𑁂𑀦 𑀯𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦 𑀯𑀸 𑀙𑀦𑁆𑀦𑀁 𑀧𑀯𑀺𑀲𑀺𑀢𑀼𑀁, 𑀩𑀳𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀲𑀘𑁂 𑀫𑀕𑁆𑀕𑀁 𑀕𑀘𑁆𑀙𑀦𑁆𑀢𑁂𑀦 𑀯𑀼𑀟𑁆𑀠𑀢𑀭𑀸𑀦𑀁 𑀧𑀭𑀺𑀓𑁆𑀔𑀸𑀭𑁄 𑀕𑀳𑀺𑀢𑁄 𑀳𑁄𑀢𑀺, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀫𑀕𑁆𑀕𑀫𑀚𑁆𑀛𑁂 𑀞𑀺𑀢𑀁 𑀲𑀸𑀮𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀦 𑀓𑀺𑀜𑁆𑀘𑀺 𑀕𑀳𑀺𑀢𑀁 𑀳𑁄𑀢𑀺, 𑀲𑀸𑀮𑀸𑀬 𑀞𑀲𑁆𑀲𑀸𑀫𑀻𑀢𑀺 𑀯𑁂𑀕𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀧𑀓𑀢𑀺𑀕𑀢𑀺𑀬𑀸 𑀕𑀦𑁆𑀢𑁆𑀯𑀸 𑀧𑀯𑀺𑀝𑁆𑀞𑁂𑀦 𑀧𑀦 𑀬𑀸𑀯 𑀯𑀲𑁆𑀲𑀽𑀧𑀭𑀫𑀸 𑀞𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀇𑀤𑀫𑀲𑁆𑀲 𑀯𑀺𑀥𑀸𑀦𑀁. 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄.

𑀧𑀪𑁂𑀤𑀢𑁄 𑀧𑀦 𑀅𑀬𑀫𑁆𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀲𑁆𑀲 𑀭𑀼𑀓𑁆𑀔𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀕𑁂𑀳𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀩𑁆𑀪𑁄𑀓𑀸𑀲𑁂𑀬𑁂𑀯 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑀲𑁆𑀲 𑀭𑀼𑀓𑁆𑀔𑀧𑀩𑁆𑀩𑀢𑀕𑁂𑀳𑀸𑀦𑀺 𑀉𑀧𑀦𑀺𑀲𑁆𑀲𑀸𑀬 𑀅𑀦𑁆𑀢𑁄 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀫𑀼𑀤𑀼𑀓𑀲𑁆𑀲 𑀅𑀘𑁆𑀙𑀦𑁆𑀦𑀫𑀭𑀺𑀬𑀸𑀤𑀁 𑀧𑀩𑁆𑀪𑀸𑀭𑀫𑁆𑀧𑀺 𑀲𑀸𑀔𑀸𑀫𑀡𑁆𑀟𑀧𑁄𑀧𑀺 𑀧𑀻𑀞𑀧𑀝𑁄𑀧𑀺 𑀔𑁂𑀢𑁆𑀢𑀭𑀓𑁆𑀔𑀓𑀸𑀤𑀻𑀳𑀺 𑀙𑀟𑁆𑀟𑀺𑀢𑀸 𑀢𑀢𑁆𑀭𑀝𑁆𑀞𑀓𑀓𑀼𑀝𑀺𑀓𑀸𑀧𑀺 𑀯𑀝𑁆𑀝𑀢𑀻𑀢𑀺.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀯𑀸𑀲𑀢𑁆𑀣𑀸𑀬 𑀙𑀦𑁆𑀦𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀧𑀯𑀺𑀝𑁆𑀞𑀓𑁆𑀔𑀡𑁂 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀺. 𑀚𑀸𑀦𑀺𑀢𑁆𑀯𑀸 𑀢𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀸𑀧𑀺𑀢𑀫𑀢𑁆𑀢𑁂𑀢𑀺 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸. 𑀅𑀬𑀫𑁂𑀢𑁆𑀣 𑀪𑁂𑀤𑁄.

𑀅𑀬𑀁 𑀧𑀦𑀸𑀦𑀺𑀲𑀁𑀲𑁄, 𑀆𑀯𑀸𑀲𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑁄, 𑀣𑀺𑀦𑀫𑀺𑀤𑁆𑀥𑀧𑀦𑀽𑀤𑀦𑀁, ‘‘𑀫𑀺𑀕𑀸 𑀯𑀺𑀬 𑀅𑀲𑀗𑁆𑀕𑀘𑀸𑀭𑀺𑀦𑁄, 𑀅𑀦𑀺𑀓𑁂𑀢𑀸 𑀯𑀺𑀳𑀭𑀦𑁆𑀢𑀺 𑀪𑀺𑀓𑁆𑀔𑀯𑁄’’𑀢𑀺 (𑀲𑀁. 𑀦𑀺. 𑁧.𑁨𑁨𑁪) 𑀧𑀲𑀁𑀲𑀸𑀬 𑀅𑀦𑀼𑀭𑀽𑀧𑀢𑀸, 𑀦𑀺𑀲𑁆𑀲𑀗𑁆𑀕𑀢𑀸, 𑀘𑀸𑀢𑀼𑀤𑁆𑀤𑀺𑀲𑀢𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀮𑁄𑀫𑀯𑀼𑀢𑁆𑀢𑀺𑀢𑀸𑀢𑀺.

𑀅𑀦𑀕𑀸𑀭𑀺𑀬𑀪𑀸𑀯𑀲𑁆𑀲, 𑀅𑀦𑀼𑀭𑀽𑀧𑁂 𑀅𑀤𑀼𑀮𑁆𑀮𑀪𑁂;

𑀢𑀸𑀭𑀸𑀫𑀡𑀺𑀯𑀺𑀢𑀸𑀦𑀫𑁆𑀳𑀺, 𑀘𑀦𑁆𑀤𑀤𑀻𑀧𑀧𑁆𑀧𑀪𑀸𑀲𑀺𑀢𑁂.

𑀅𑀩𑁆𑀪𑁄𑀓𑀸𑀲𑁂 𑀯𑀲𑀁 𑀪𑀺𑀓𑁆𑀔𑀼, 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸;

𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀪𑀸𑀯𑀦𑀸𑀭𑀸𑀫𑀢𑀁 𑀲𑀺𑀢𑁄.

𑀧𑀯𑀺𑀯𑁂𑀓𑀭𑀲𑀲𑁆𑀲𑀸𑀤𑀁, 𑀦𑀘𑀺𑀭𑀲𑁆𑀲𑁂𑀯 𑀯𑀺𑀦𑁆𑀤𑀢𑀺;

𑀬𑀲𑁆𑀫𑀸 𑀢𑀲𑁆𑀫𑀸 𑀳𑀺 𑀲𑀧𑁆𑀧𑀜𑁆𑀜𑁄, 𑀅𑀩𑁆𑀪𑁄𑀓𑀸𑀲𑀭𑀢𑁄 𑀲𑀺𑀬𑀸𑀢𑀺.

𑀅𑀬𑀁 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑁂 𑀲𑀫𑀸𑀤𑀸𑀦𑀯𑀺𑀥𑀸𑀦𑀧𑁆𑀧𑀪𑁂𑀤𑀪𑁂𑀤𑀸𑀦𑀺𑀲𑀁𑀲𑀯𑀡𑁆𑀡𑀦𑀸.