𑁧𑁮. 𑀘𑀼𑀭𑀸𑀤𑀺𑀕𑀡𑀧𑀭𑀺𑀤𑀻𑀧𑀦

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀧𑀘𑀼𑀭𑀢𑁆𑀣𑀳𑀺𑀢𑀓𑁆𑀓𑀭𑀁;

𑀘𑀼𑀭𑀸𑀤𑀺𑀓𑀕𑀡𑀦𑀸𑀫𑀁, 𑀦𑀸𑀫𑀢𑁄 𑀅𑀝𑁆𑀞𑀫𑀁 𑀕𑀡𑀁.

𑀘𑀼𑀭 𑀣𑁂𑀬𑁆𑀬𑁂. 𑀣𑁂𑀦𑀦𑀁 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀣𑁂𑀬𑁆𑀬𑁂 𑀘𑀼𑀭𑀥𑁆𑀢𑀼 𑀯𑀢𑁆𑀢𑀢𑀺. 𑀘𑁄𑀭𑁂𑀢𑀺, 𑀘𑁄𑀭𑀬𑀢𑀺, 𑀘𑁄𑀭𑁄, 𑀘𑁄𑀭𑀻, 𑀘𑁄𑀭𑀺𑀓𑀸, 𑀘𑁄𑀭𑁂𑀢𑀼, 𑀘𑁄𑀭𑀬𑀺𑀢𑀼𑀁, 𑀘𑁄𑀭𑁂𑀢𑁆𑀯𑀸, 𑀘𑁄𑀭𑀬𑀺𑀢𑁆𑀯𑀸. 𑀓𑀢𑁆𑀢𑀼𑀢𑁆𑀣𑁂𑀲𑀼 𑀡𑁂𑀡𑀬𑀢𑀸 𑀘𑀼𑀭𑀸𑀤𑀺𑀕𑀡𑀮𑀓𑁆𑀔𑀡𑀁. 𑀓𑀸𑀭𑀺𑀢𑁂 𑁋 𑀘𑁄𑀭𑀸𑀧𑁂𑀢𑀺, 𑀘𑁄𑀭𑀸𑀧𑀬𑀢𑀺, 𑀘𑁄𑀭𑀸𑀧𑁂𑀢𑀼𑀁, 𑀘𑁄𑀭𑀸𑀧𑀬𑀺𑀢𑀼𑀁, 𑀘𑁄𑀭𑀸𑀧𑁂𑀢𑁆𑀯𑀸, 𑀘𑁄𑀭𑀸𑀧𑀬𑀺𑀢𑁆𑀯𑀸. 𑀓𑀫𑁆𑀫𑁂𑀥𑀦𑀁 𑀘𑁄𑀭𑁂𑀳𑀺 𑀘𑁄𑀭𑀺𑀬𑀢𑀺, 𑀘𑁄𑀭𑀺𑀢𑀁 𑀥𑀦𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀓𑀓𑀸𑀭𑀦𑁆𑀢𑀥𑀸𑀢𑀼

𑀮𑁄𑀓 𑀤𑀲𑁆𑀲𑀦𑁂. 𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺, 𑀑𑀮𑁄𑀓𑁂𑀢𑀺, 𑀑𑀮𑁄𑀓𑀬𑀢𑀺, 𑀉𑀮𑁆𑀮𑁄𑀓𑁂𑀢𑀺, 𑀉𑀮𑁆𑀮𑁄𑀓𑀬𑀢𑀺, 𑀅𑀧𑀮𑁄𑀓𑁂𑀢𑀺, 𑀅𑀧𑀮𑁄𑀓𑀬𑀢𑀺, 𑀆𑀮𑁄𑀓𑁂𑀢𑀺, 𑀆𑀮𑁄𑀓𑀬𑀢𑀺, 𑀯𑀺𑀮𑁄𑀓𑁂𑀢𑀺, 𑀯𑀺𑀮𑁄𑀓𑀬𑀢𑀺. 𑀮𑁄𑀓𑁄, 𑀆𑀮𑁄𑀓𑁄, 𑀮𑁄𑀓𑀦𑀁, 𑀑𑀮𑁄𑀓𑀦𑀁, 𑀉𑀮𑁆𑀮𑁄𑀓𑀦𑀁, 𑀆𑀮𑁄𑀓𑀦𑀁, 𑀯𑀺𑀮𑁄𑀓𑀦𑀁, 𑀅𑀧𑀮𑁄𑀓𑀦𑀁, 𑀅𑀯𑀮𑁄𑀓𑀦𑀁. 𑀑𑀮𑁄𑀓𑁂𑀢𑀼𑀁, 𑀑𑀮𑁄𑀓𑀬𑀺𑀢𑀼𑀁, 𑀑𑀮𑁄𑀓𑁂𑀢𑁆𑀯𑀸, 𑀑𑀮𑁄𑀓𑀬𑀺𑀢𑁆𑀯𑀸. 𑀓𑀸𑀭𑀺𑀢𑁂 𑀧𑀦 ‘‘𑀑𑀮𑁄𑀓𑀸𑀧𑁂𑀢𑀺, 𑀑𑀮𑁄𑀓𑀸𑀧𑀬𑀢𑀺, 𑀑𑀮𑁄𑀓𑀸𑀧𑁂𑀢𑀼𑀁, 𑀑𑀮𑁄𑀓𑀸𑀧𑀬𑀺𑀢𑀼𑀁, 𑀑𑀮𑁄𑀓𑀸𑀧𑁂𑀢𑁆𑀯𑀸, 𑀑𑀮𑁄𑀓𑀸𑀧𑀬𑀺𑀢𑁆𑀯𑀸’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀧𑀺.

𑀢𑀢𑁆𑀣 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸 ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄,

𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 𑀯𑀲𑁄’’𑀢𑀺

𑀆𑀕𑀢𑀝𑁆𑀞𑀸𑀦𑁂 𑀑𑀓𑀸𑀲𑀮𑁄𑀓𑁄.

𑀅𑀣 𑀯𑀸 𑀮𑁄𑀓𑁄𑀢𑀺 𑀢𑀺𑀯𑀺𑀥𑁄 𑀮𑁄𑀓𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺. 𑀢𑀢𑁆𑀣 𑀭𑀸𑀕𑀸𑀤𑀺𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀓𑀸𑀫𑀸𑀯𑀘𑀭𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀛𑀸𑀦𑀸𑀪𑀺𑀜𑁆𑀜𑀸𑀧𑀭𑀺𑀩𑀼𑀤𑁆𑀥𑀺𑀬𑀸 𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀪𑀯𑀮𑁄𑀓𑁄. 𑀆𑀦𑁂𑀜𑁆𑀚𑀲𑀫𑀸𑀥𑀺𑀩𑀳𑀼𑀮𑀢𑀸𑀬 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀮𑁄𑀓𑁄. 𑀅𑀣 𑀯𑀸 𑀓𑀺𑀮𑀺𑀲𑁆𑀲𑀦𑀁 𑀓𑀺𑀮𑁂𑀲𑁄, 𑀯𑀺𑀧𑀸𑀓𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀢𑀤𑀜𑁆𑀜𑁂 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑀪𑀸𑀯𑀢𑁄 𑀪𑀯𑀮𑁄𑀓𑁄. 𑀢𑀢𑁆𑀣 𑀬𑁂 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀲𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀥𑀸𑀢𑀼𑀮𑁄𑀓𑁄𑀢𑀺 𑀅𑀦𑁂𑀓𑀯𑀺𑀥𑁄 𑀮𑁄𑀓𑁄. 𑀏𑀢𑁆𑀣 ‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸…𑀧𑁂… 𑀅𑀝𑁆𑀞𑀸𑀭𑀲 𑀮𑁄𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀮𑁄𑀓𑁄 𑀯𑀼𑀢𑁆𑀢𑁄. 𑀔𑀦𑁆𑀥𑀮𑁄𑀓𑀸𑀤𑀬𑁄 𑀢𑀤𑀦𑁆𑀢𑁄𑀕𑀥𑀸𑀬𑁂𑀯. ‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄’𑀢𑀺𑀆𑀤𑀻𑀲𑀼 𑀧𑀦 𑀲𑀢𑁆𑀢𑀮𑁄𑀓𑁄 𑀯𑀼𑀢𑁆𑀢𑁄. ‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂𑀯𑀢𑁆𑀢𑀢𑁂 𑀯𑀲𑁄’𑀢𑀺 𑀏𑀢𑁆𑀣 𑀑𑀓𑀸𑀲𑀮𑁄𑀓𑁄 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀅𑀢𑁆𑀣𑀢𑁄 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑀮𑁄𑀓𑁄, 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑁄, 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀑𑀓𑀸𑀲𑀮𑁄𑀓𑁄, 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀢𑀲𑀸 𑀣𑀸𑀯𑀭𑀸 𑀘, 𑀢𑁂𑀲𑀜𑁆𑀘 𑀑𑀓𑀸𑀲𑀪𑀽𑀢𑁄𑀢𑀺, 𑀢𑀤𑀸𑀥𑀸𑀭𑀡𑀢𑀸𑀬 𑀳𑁂𑀲 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑀼𑀯𑀺𑀥𑁄𑀧𑀺 𑀘𑁂𑀲 𑀭𑀽𑀧𑀸𑀤𑀺𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀪𑀽𑀢𑁄 𑀅𑀧𑀭𑀫𑀢𑁆𑀣𑀲𑀪𑀸𑀯𑁄 𑀲𑀧𑁆𑀧𑀘𑁆𑀘𑀬𑁂 𑀧𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀢𑀤𑀼𑀪𑀬𑀲𑁆𑀲𑀸𑀧𑀺 𑀉𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀉𑀧𑀘𑀭𑀺𑀢𑀩𑁆𑀩𑀸, 𑀢𑀤𑀼𑀪𑀬𑁂 𑀔𑀦𑁆𑀥𑀸 𑀲𑀗𑁆𑀔𑀸𑀭𑀮𑁄𑀓𑁄, 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀺𑀬𑀦𑁆𑀢𑀺, 𑀮𑀼𑀚𑁆𑀚𑀦𑁆𑀢𑀺 𑀧𑀮𑀼𑀚𑁆𑀚𑀦𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀲𑀢𑀺𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀢𑁆𑀢𑁂 𑀢𑁂𑀪𑀽𑀫𑀺𑀓𑀥𑀫𑁆𑀫𑀸𑀦𑀁𑀬𑁂𑀯 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀢𑁆𑀣𑀺 𑀮𑁄𑀓𑀢𑀸𑀧𑀚𑁆𑀚𑀦𑀁. 𑀢𑀣𑀸 𑀳𑀺 𑀢𑁂 ‘‘𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀯𑀼𑀢𑁆𑀢𑀸.

𑀆𑀮𑁄𑀓𑁄𑀢𑀺 𑀭𑀲𑁆𑀫𑀺, 𑀆𑀮𑁄𑀓𑁂𑀦𑁆𑀢𑀺 𑀏𑀢𑁂𑀦 𑀪𑀼𑀲𑁄 𑀧𑀲𑁆𑀲𑀦𑁆𑀢𑀺 𑀚𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀸𑀢𑀺 𑀆𑀮𑁄𑀓𑁄. 𑀑𑀮𑁄𑀓𑀦𑀦𑁆𑀢𑀺 𑀳𑁂𑀝𑁆𑀞𑀸 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀦𑀦𑁆𑀢𑀺 𑀉𑀤𑁆𑀥𑀁 𑀧𑁂𑀓𑁆𑀔𑀦𑀁. 𑀆𑀮𑁄𑀓𑀦𑀦𑁆𑀢𑀺 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀦𑀦𑁆𑀢𑀺 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀧𑁂𑀓𑁆𑀔𑀦𑀁, 𑀯𑀺𑀯𑀺𑀥𑀸 𑀯𑀸 𑀧𑁂𑀓𑁆𑀔𑀦𑀁. 𑀅𑀧𑀮𑁄𑀓𑀦𑀦𑁆𑀢𑀺 ‘‘𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀚𑀸𑀦𑀸𑀧𑀦𑀁. 𑀅𑀯𑀮𑁄𑀓𑀦𑀦𑁆𑀢𑀺 ‘‘𑀦𑀸𑀕𑀸𑀯𑀮𑁄𑀓𑀺𑀢𑀁 𑀅𑀯𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀼𑀭𑀺𑀫𑀓𑀸𑀬𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑁂𑀓𑁆𑀔𑀦𑀁. ‘‘𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀪𑀸𑀯𑀯𑀲𑁂𑀦 𑀆𑀮𑁄𑀓𑀦𑀁 𑀆𑀮𑁄𑀓𑀺𑀢𑀁 𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀣𑀓 𑀧𑀝𑀺𑀖𑀸𑀢𑁂. 𑀣𑀓𑁂𑀢𑀺, 𑀣𑀓𑀬𑀢𑀺 𑀤𑁆𑀯𑀸𑀭𑀁 𑀧𑀼𑀭𑀺𑀲𑁄.

𑀢𑀓𑁆𑀓 𑀯𑀺𑀢𑀓𑁆𑀓𑁂. 𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑀬𑀢𑀺. 𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄, 𑀯𑀺𑀢𑀓𑁆𑀓𑀺𑀢𑀸.

𑀢𑀢𑁆𑀣 𑀢𑀓𑁆𑀓𑀦𑀁 𑀢𑀓𑁆𑀓𑁄, 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀯𑀺𑀢𑀓𑁆𑀓𑁄. 𑀅𑀣 𑀯𑀸 𑀯𑀺𑀢𑀓𑁆𑀓𑁂𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑀦𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀯𑀺𑀢𑀓𑁆𑀓𑁄. ‘‘𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄, 𑀅𑀧𑁆𑀧𑀦𑀸, 𑀩𑁆𑀬𑀧𑁆𑀧𑀦𑀸, 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸’’𑀢𑀺 𑀅𑀪𑀺𑀥𑀫𑁆𑀫𑁂 𑀧𑀭𑀺𑀬𑀸𑀬𑀲𑀤𑁆𑀤𑀸 𑀯𑀼𑀢𑁆𑀢𑀸. 𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑀺𑀢𑀸, 𑀧𑀼𑀕𑁆𑀕𑀮𑁄. ‘‘𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀻’’𑀢𑀺 𑀧𑀸𑀴𑀺.

𑀅𑀓𑀺 𑀮𑀓𑁆𑀔𑀡𑁂. 𑀮𑀓𑁆𑀔𑀡𑀁 𑀲𑀜𑁆𑀜𑀸𑀡𑀁, 𑀲𑀜𑁆𑀚𑀸𑀦𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀭𑀺𑀤𑀁 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀁. 𑀬𑁂 𑀇𑀫𑀲𑁆𑀫𑀺𑀁 𑀘𑀼𑀭𑀸𑀤𑀺𑀕𑀡𑁂 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑀸 𑀇𑀓𑀸𑀭𑀸𑀦𑀼𑀩𑀦𑁆𑀥𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀥𑀸𑀢𑀯𑁄, 𑀢𑁂 𑀏𑀯𑀁𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀆𑀔𑁆𑀬𑀸𑀢𑀢𑁆𑀢𑀁 𑀦𑀸𑀫𑀺𑀓𑀢𑁆𑀢𑀜𑁆𑀘 𑀧𑀸𑀧𑀼𑀡𑀦𑁆𑀢𑀸 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀬𑁂𑀯 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀯𑀺𑀕𑀢𑀦𑀺𑀕𑁆𑀕𑀳𑀻𑀢𑀸𑀕𑀫𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀅𑀗𑁆𑀓𑁂𑀢𑀺, 𑀅𑀗𑁆𑀓𑀬𑀢𑀺. 𑀅𑀗𑁆𑀓𑀦𑀁, 𑀅𑀗𑁆𑀓𑁄. 𑀲𑀫𑀸𑀲𑁂 𑀧𑀦 ‘‘𑀲𑀲𑀗𑁆𑀓𑁄, 𑀘𑀓𑁆𑀓𑀗𑁆𑀓𑀺𑀢𑀘𑀭𑀡𑁄’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀲𑀓𑁆𑀓 𑀯𑀓𑁆𑀓 𑀪𑀸𑀲𑀦𑁂. 𑀲𑀓𑁆𑀓𑁂𑀢𑀺, 𑀲𑀓𑁆𑀓𑀬𑀢𑀺. 𑀯𑀓𑁆𑀓𑁂𑀢𑀺, 𑀯𑀓𑁆𑀓𑀬𑀢𑀺.

𑀦𑀓𑁆𑀓 𑀯𑀓𑁆𑀓 𑀦𑀸𑀲𑀦𑁂. 𑀦𑀓𑁆𑀓𑁂𑀢𑀺, 𑀦𑀓𑁆𑀓𑀬𑀢𑀺. 𑀯𑀓𑁆𑀓𑁂𑀢𑀺, 𑀯𑀓𑁆𑀓𑀬𑀢𑀺.

𑀘𑀓𑁆𑀓 𑀘𑀼𑀓𑁆𑀓 𑀩𑁆𑀬𑀣𑀦𑁂. 𑀘𑀓𑁆𑀓𑁂𑀢𑀺, 𑀘𑀓𑁆𑀓𑀬𑀢𑀺. 𑀘𑀼𑀓𑁆𑀓𑁂𑀢𑀺, 𑀘𑀼𑀓𑁆𑀓𑀬𑀢𑀺. 𑀘𑀓𑁆𑀓𑀁. 𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀘𑀓𑁆𑀓𑀁? 𑀘𑀓𑁆𑀓𑁂𑀢𑀺 𑀩𑁆𑀬𑀣𑀢𑀺 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁂𑀦 𑀘𑀓𑁆𑀓𑀁. 𑀘𑀓𑁆𑀓𑀲𑀤𑁆𑀤𑁄 𑁋

𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;

𑀤𑀸𑀦𑁂 𑀭𑀢𑁆𑀦𑀥𑀫𑁆𑀫𑀔𑀼𑀭-𑀘𑀓𑁆𑀓𑀸𑀤𑀻𑀲𑀼 𑀧𑀤𑀺𑀲𑁆𑀲𑀢𑀺;

‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤 𑀪𑀼𑀜𑁆𑀚 𑀘 𑀫𑀸 𑀘𑀧𑁆𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀲𑁆𑀲𑀼 𑀧𑀸𑀡𑀺𑀦’’𑀦𑁆𑀢𑀺 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 𑀏𑀢𑁆𑀣 𑀔𑀼𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂𑀢𑀺.

𑀢𑀓𑀺 𑀩𑀦𑁆𑀥𑀦𑁂. 𑀢𑀗𑁆𑀓𑁂𑀢𑀺, 𑀢𑀗𑁆𑀓𑀬𑀢𑀺.

𑀅𑀓𑁆𑀓 𑀣𑀯𑀦𑁂. 𑀣𑀯𑀦𑀁 𑀣𑀼𑀢𑀺. 𑀅𑀓𑁆𑀓𑁂𑀢𑀺, 𑀅𑀓𑁆𑀓𑀬𑀢𑀺. 𑀅𑀓𑁆𑀓𑁄. 𑀅𑀓𑁆𑀓𑁄𑀢𑀺 𑀲𑀽𑀭𑀺𑀬𑁄. 𑀲𑁄 𑀳𑀺 𑀫𑀳𑀸𑀚𑀼𑀢𑀺𑀢𑀸𑀬 𑀅𑀓𑁆𑀓𑀺𑀬𑀢𑀺 𑀅𑀪𑀺𑀢𑁆𑀣𑀯𑀺𑀬𑀢𑀺 𑀢𑀧𑁆𑀧𑀲𑀦𑁆𑀦𑁂𑀳𑀺 𑀚𑀦𑁂𑀳𑀻𑀢𑀺 𑀅𑀓𑁆𑀓𑁄. 𑀢𑀣𑀸 𑀳𑀺 𑀢𑀲𑁆𑀲 ‘‘𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 𑀆𑀪𑀸. 𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸’’𑀢𑀺𑀆𑀤𑀺𑀦𑀸 𑀅𑀪𑀺𑀓𑁆𑀔𑀼𑀢𑀺 𑀤𑀺𑀲𑁆𑀲𑀢𑀺.

𑀳𑀺𑀓𑁆𑀓 𑀳𑀺𑀁𑀲𑀸𑀬𑀁. 𑀳𑀺𑀓𑁆𑀓𑁂𑀢𑀺, 𑀳𑀺𑀓𑁆𑀓𑀬𑀢𑀺.

𑀦𑀺𑀓𑁆𑀓 𑀧𑀭𑀺𑀫𑀸𑀡𑁂. 𑀦𑀺𑀓𑁆𑀓𑁂𑀢𑀺, 𑀦𑀺𑀓𑁆𑀓𑀬𑀢𑀺.

𑀩𑀼𑀓𑁆𑀓 𑀪𑀲𑁆𑀲𑀦𑁂. 𑀏𑀢𑁆𑀣 𑀲𑀼𑀦𑀔𑀪𑀲𑁆𑀲𑀦𑀁 𑀪𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀯𑀸𑀘𑀸𑀲𑀗𑁆𑀔𑀸𑀢𑀁 𑀪𑀲𑁆𑀲𑀦𑀁. 𑀩𑀼𑀓𑁆𑀓𑁂𑀢𑀺, 𑀩𑀼𑀓𑁆𑀓𑀬𑀢𑀺. 𑀏𑀢𑁆𑀣 𑀘 ‘‘𑀩𑀼𑀓𑁆𑀓𑀬𑀢𑀺 𑀲𑀸 𑀘𑁄𑀭𑁂’’ 𑀇𑀢𑀺 𑀮𑁄𑀓𑀺𑀬𑀧𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀩𑀼𑀓𑁆𑀓𑀢𑀺 𑀲𑀸’’𑀢𑀺 𑀭𑀽𑀧𑀁 𑀪𑀯𑀢𑀺. 𑀅𑀜𑁆𑀜𑁄 𑀢𑀼 ‘‘𑀩𑀼𑀓𑁆𑀓 𑀧𑀭𑀺𑀪𑀸𑀲𑀦𑁂’’ 𑀇𑀢𑀺 𑀧𑀞𑀢𑀺, 𑀏𑀯𑀁 𑀧𑀞𑀦𑁆𑀢𑁂𑀧𑀺 𑀲𑀼𑀦𑀔𑀪𑀲𑁆𑀲𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁.

𑀤𑀓 𑀮𑀓 𑀅𑀲𑁆𑀲𑀸𑀤𑀦𑁂. 𑀤𑀓𑁂𑀢𑀺, 𑀤𑀓𑀬𑀢𑀺. 𑀮𑀓𑁂𑀢𑀺, 𑀮𑀓𑀬𑀢𑀺.

𑀢𑀓𑁆𑀓 𑀮𑁄𑀓 𑀪𑀸𑀲𑀸𑀬𑀁. 𑀢𑀓𑁆𑀓𑁂𑀢𑀺, 𑀢𑀓𑁆𑀓𑀬𑀢𑀺. 𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺.

𑀘𑀺𑀓 𑀲𑀺𑀓 𑀆𑀫𑀲𑀦𑁂. 𑀘𑀺𑀓𑁂𑀢𑀺, 𑀘𑀺𑀓𑀬𑀢𑀺. 𑀲𑀺𑀓𑁂𑀢𑀺, 𑀲𑀺𑀓𑀬𑀢𑀺.

𑀓𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀔𑀓𑀸𑀭𑀦𑁆𑀢𑀥𑀸𑀢𑀼

𑀮𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼. 𑀤𑀲𑁆𑀲𑀦𑀁 𑀧𑀲𑁆𑀲𑀦𑀁. 𑀅𑀗𑁆𑀓𑁄 𑀮𑀜𑁆𑀚𑀦𑀁. 𑀮𑀓𑁆𑀔𑁂𑀢𑀺, 𑀮𑀓𑁆𑀔𑀬𑀢𑀺. 𑀲𑀮𑁆𑀮𑀓𑁆𑀔𑁂𑀢𑀺, 𑀲𑀮𑁆𑀮𑀓𑁆𑀔𑀬𑀢𑀺. 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺 𑀉𑀲𑀼𑀦𑀸, 𑀮𑀓𑁆𑀔𑀁 𑀓𑀭𑁄𑀢𑀺.

𑀕𑀗𑁆𑀕𑀸𑀬 𑀯𑀸𑀮𑀼𑀓𑀸 𑀔𑀻𑀬𑁂, 𑀉𑀤𑀓𑀁 𑀔𑀻𑀬𑁂 𑀫𑀳𑀡𑁆𑀡𑀯𑁂;

𑀫𑀳𑀺𑀬𑀸 𑀫𑀢𑁆𑀢𑀺𑀓𑀸 𑀔𑀻𑀬𑁂, 𑀮𑀓𑁆𑀔𑁂 𑀦 𑀫𑀫 𑀩𑀼𑀤𑁆𑀥𑀺𑀬𑀸.

𑀓𑀧𑁆𑀧𑀮𑀓𑁆𑀔𑀡𑀁. 𑀕𑁄𑀮𑀓𑁆𑀔𑀡𑀁. 𑀇𑀢𑁆𑀣𑀺𑀮𑀓𑁆𑀔𑀡𑀁. 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁. 𑀲𑀮𑁆𑀮𑀓𑁆𑀔𑀦𑀸. 𑀉𑀧𑀮𑀓𑁆𑀔𑀦𑀸. 𑀧𑀘𑁆𑀘𑀼𑀧𑀮𑀓𑁆𑀔𑀦𑀸. 𑀮𑀓𑁆𑀔𑀥𑀸𑀢𑀼𑀬𑀸 𑀬𑀼𑀧𑀘𑁆𑀘𑀬𑀦𑁆𑀢𑀸𑀬 𑀲𑀫𑀸𑀤𑀺𑀧𑀼𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀦𑀓𑀸𑀭𑁄 𑀤𑀦𑁆𑀢𑀚𑁄.

𑀪𑀓𑁆𑀔 𑀅𑀤𑀦𑁂. 𑀪𑀓𑁆𑀔𑁂𑀢𑀺, 𑀪𑀓𑁆𑀔𑀬𑀢𑀺. 𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄. 𑀪𑀓𑁆𑀔𑀬𑀦𑁆𑀢𑀺 𑀫𑀺𑀕𑀸𑀥𑀫𑀸. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀪𑀓𑁆𑀔𑀢𑀻’’𑀢𑀺 𑀭𑀽𑀧𑀁.

𑀦𑀓𑁆𑀔 𑀲𑀫𑁆𑀩𑀦𑁆𑀥𑁂. 𑀦𑀓𑁆𑀔𑁂𑀢𑀺, 𑀦𑀓𑁆𑀔𑀬𑀢𑀺.

𑀫𑀓𑁆𑀔 𑀫𑀓𑁆𑀔𑀦𑁂. 𑀫𑀓𑁆𑀔𑁂𑀢𑀺, 𑀫𑀓𑁆𑀔𑀬𑀢𑀺. 𑀫𑀓𑁆𑀔𑁄, 𑀫𑀓𑁆𑀔𑀻. 𑀢𑀢𑁆𑀣 𑀫𑀓𑁆𑀔𑁄𑀢𑀺 𑀧𑀭𑁂𑀳𑀺 𑀓𑀢𑀕𑀼𑀡𑀁 𑀫𑀓𑁆𑀔𑁂𑀢𑀺 𑀧𑀺𑀲𑀢𑀻𑀢𑀺 𑀫𑀓𑁆𑀔𑁄, 𑀕𑀼𑀡𑀥𑀁𑀲𑀦𑀸. ‘‘𑀫𑀓𑁆𑀔𑀁 𑀅𑀲𑀳𑀫𑀸𑀦𑁄’’𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀢𑀦𑀺 𑀧𑀭𑁂𑀳𑀺 𑀓𑀢𑀁 𑀅𑀯𑀫𑀜𑁆𑀜𑀦𑀁 𑀫𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀓𑁆𑀔 𑀧𑀽𑀚𑀸𑀬𑀁. 𑀬𑀓𑁆𑀔𑁂𑀢𑀺, 𑀬𑀓𑁆𑀔𑀬𑀢𑀺. 𑀬𑀓𑁆𑀔𑁄. 𑀬𑀓𑁆𑀔𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀲𑀢𑁆𑀢𑁄. 𑀢𑀣𑀸 𑀳𑀺 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀫𑀳𑀸𑀬𑀓𑁆𑀔, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭𑀸’’𑀢𑀺 𑀏𑀢𑁆𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀬𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀬𑀓𑁆𑀔𑁄𑀢𑀺 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁄. 𑀲𑀩𑁆𑀩𑁂𑀧𑀺 𑀯𑀸 𑀲𑀢𑁆𑀢𑀸 ‘‘𑀬𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀧𑀭𑀫𑀬𑀓𑁆𑀔𑀯𑀺𑀲𑀼𑀤𑁆𑀥𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀳𑀺 𑀬𑀓𑁆𑀔𑀲𑀤𑁆𑀤𑁄 𑀲𑀢𑁆𑀢𑁂 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀬𑀓𑁆𑀔𑁄𑀧𑀺 𑀲𑀢𑁆𑀢𑁄𑀧𑀺 𑀤𑁂𑀯𑁄𑀧𑀺 𑀲𑀓𑁆𑀓𑁄𑀧𑀺 𑀔𑀻𑀡𑀸𑀲𑀯𑁄𑀧𑀺 𑀬𑀓𑁆𑀔𑁄𑀬𑁂𑀯 𑀦𑀸𑀫, 𑀫𑀳𑀸𑀦𑀼𑀪𑀸𑀯𑀢𑀸𑀬 𑀬𑀓𑁆𑀔𑀺𑀬𑀢𑀺 𑀲𑀭𑀡𑀕𑀢𑁂𑀳𑀺 𑀚𑀦𑁂𑀳𑀺 𑀦𑀸𑀦𑀸𑀧𑀘𑁆𑀘𑀬𑁂𑀳𑀺 𑀦𑀸𑀦𑀸𑀩𑀮𑀻𑀳𑀺 𑀘 𑀧𑀽𑀚𑀺𑀬𑀢𑀻𑀢𑀺 𑀬𑀓𑁆𑀔𑁄.

𑀲𑀢𑁆𑀢𑁂 𑀤𑁂𑀯𑁂 𑀘 𑀲𑀓𑁆𑀓𑁂 𑀘, 𑀔𑀻𑀡𑀸𑀲𑀯𑁂 𑀘 𑀭𑀓𑁆𑀔𑀲𑁂;

𑀧𑀜𑁆𑀘𑀲𑁆𑀯𑁂𑀢𑁂𑀲𑀼 𑀅𑀢𑁆𑀣𑁂𑀲𑀼, 𑀬𑀓𑁆𑀔𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀮𑀓𑁆𑀔 𑀆𑀮𑁄𑀘𑀦𑁂. 𑀮𑀓𑁆𑀔𑁂𑀢𑀺, 𑀮𑀓𑁆𑀔𑀬𑀢𑀺. 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺 𑀉𑀲𑀼𑀦𑀸.

𑀫𑁄𑀓𑁆𑀔 𑀆𑀲𑀦𑁂. 𑀫𑁄𑀓𑁆𑀔𑁂𑀢𑀺, 𑀫𑁄𑀓𑁆𑀔𑀬𑀢𑀺.

𑀭𑀼𑀓𑁆𑀔 𑀨𑀸𑀭𑀼𑀲𑁆𑀲𑁂. 𑀨𑀸𑀭𑀼𑀲𑁆𑀲𑀁 𑀨𑀭𑀼𑀲𑀪𑀸𑀯𑁄. 𑀭𑀼𑀓𑁆𑀔𑁂𑀢𑀺, 𑀭𑀼𑀓𑁆𑀔𑀬𑀢𑀺. 𑀲𑀫𑀸𑀲𑁂 ‘‘𑀭𑀼𑀓𑁆𑀔𑀓𑁂𑀲𑁄, 𑀅𑀢𑀺𑀭𑀼𑀓𑁆𑀔𑀯𑀘𑀦𑁄’’𑀢𑀺 𑀭𑀽𑀧𑀸𑀦𑀺. 𑀏𑀢𑁆𑀣 𑀘 ‘‘𑀲𑀫𑀡𑁄 𑀅𑀬𑀁 𑀧𑀸𑀧𑁄 𑀅𑀢𑀺𑀭𑀼𑀓𑁆𑀔𑀯𑀸𑀘𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀢𑀺𑀭𑀼𑀓𑁆𑀔𑀯𑀸𑀘𑁄𑀢𑀺 𑀅𑀢𑀺𑀨𑀭𑀼𑀲𑀯𑀘𑀦𑁄𑀢𑀺 𑀅𑀢𑁆𑀣𑁄.

𑀔𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀕𑀓𑀸𑀭𑀦𑁆𑀢𑀥𑀸𑀢𑀼

𑀮𑀺𑀗𑁆𑀕 𑀘𑀺𑀢𑁆𑀢𑀻𑀓𑀭𑀡𑁂. 𑀘𑀺𑀢𑁆𑀢𑀻𑀓𑀭𑀡𑀁 𑀯𑀺𑀘𑀺𑀢𑁆𑀭𑀪𑀸𑀯𑀓𑀭𑀡𑀁. 𑀮𑀺𑀗𑁆𑀕𑁂𑀢𑀺, 𑀮𑀺𑀗𑁆𑀕𑀬𑀢𑀺, 𑀮𑀺𑀗𑁆𑀕𑀁. 𑀏𑀢𑁆𑀣 𑀮𑀺𑀗𑁆𑀕𑀁 𑀦𑀸𑀫 𑀤𑀻𑀖𑀭𑀲𑁆𑀲𑀓𑀺𑀲𑀣𑀽𑀮𑀧𑀭𑀺𑀫𑀡𑁆𑀟𑀮𑀸𑀤𑀺𑀪𑁂𑀤𑀁 𑀲𑀡𑁆𑀞𑀸𑀦𑀦𑁆𑀢𑀺 𑀕𑀳𑀡𑁂 𑀅𑀢𑀻𑀯 𑀬𑀼𑀚𑁆𑀚𑀢𑀺. 𑀢𑀜𑁆𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀺𑀘𑀺𑀢𑁆𑀭𑀁 𑀳𑁄𑀢𑀺, 𑀮𑀺𑀗𑁆𑀕𑀻𑀬𑀢𑀺 𑀯𑀺𑀘𑀺𑀢𑁆𑀢𑀁 𑀓𑀭𑀺𑀬𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀓𑀫𑁆𑀫𑁂𑀳𑀺 𑀉𑀢𑀼𑀦𑀸 𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀯𑀸 𑀲𑀭𑀻𑀭𑀫𑀺𑀢𑀺 𑀮𑀺𑀗𑁆𑀕𑀁, 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀼𑀡𑁆𑀟𑀮𑀓𑀭𑀡𑁆𑀟𑀓𑀸𑀤𑀻𑀲𑀼 𑀧𑀯𑀢𑁆𑀢𑀲𑀡𑁆𑀞𑀸𑀦𑀯𑀲𑁂𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀮𑀺𑀗𑁆𑀕𑀲𑀤𑁆𑀤𑁄 𑀲𑀤𑁆𑀤𑁂 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑁂 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑁂 𑀲𑀜𑁆𑀜𑀸𑀡𑁂 𑀆𑀓𑀸𑀭𑁂 𑀘𑀸𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀭𑀼𑀓𑁆𑀔𑁄𑀢𑀺 𑀯𑀘𑀦𑀁 𑀮𑀺𑀗𑁆𑀕’’𑀦𑁆𑀢𑀺 𑀏𑀢𑁆𑀣 𑀲𑀤𑁆𑀤𑁂 𑀤𑀺𑀲𑁆𑀲𑀢𑀺. ‘‘𑀲𑀢𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑀲𑁆𑀲𑀸’’𑀢𑀺 𑀏𑀢𑁆𑀣 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀻’’𑀢𑀺 𑀏𑀢𑁆𑀣 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑁂. ‘‘𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦’’𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑁂. ‘‘𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀲𑀜𑁆𑀜𑀸𑀡𑁂. ‘‘𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀆𑀕𑀦𑁆𑀢𑀼𑀓𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 ‘‘𑀆𑀕𑀦𑁆𑀢𑀼𑀓𑀸 𑀇𑀫𑁂’’𑀢𑀺 𑀏𑀢𑁆𑀣 𑀆𑀓𑀸𑀭𑁂 𑀤𑀺𑀲𑁆𑀲𑀢𑀺.

𑀲𑀤𑁆𑀤𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑁂 𑀘, 𑀓𑀸𑀝𑀓𑁄𑀝𑀘𑀺𑀓𑀸𑀬 𑀘;

𑀮𑀓𑁆𑀔𑀡𑁂 𑀘𑁂𑀯 𑀆𑀓𑀸𑀭𑁂, 𑀮𑀺𑀗𑁆𑀕𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀫𑀕 𑀅𑀦𑁆𑀯𑁂𑀲𑀦𑁂. 𑀫𑀕𑁂𑀢𑀺, 𑀫𑀕𑀬𑀢𑀺. 𑀫𑀺𑀕𑁄, 𑀫𑀕𑁄, 𑀫𑀕𑁄, 𑀫𑀕𑀬𑀫𑀸𑀦𑁄.

𑀏𑀢𑁆𑀣 𑀘 ‘‘𑀬𑀣𑀸 𑀩𑀺𑀴𑀸𑀭𑁄 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. ‘‘𑀫𑀺𑀕𑁄’’𑀢𑀺 𑀘 ‘‘𑀫𑀕𑁄’’𑀢𑀺 𑀘 𑀘𑀢𑀼𑀧𑁆𑀧𑀤𑁄 𑀧𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀫𑀺𑀕𑁄𑀢𑀺 𑀫𑀕𑀬𑀢𑀺 𑀇𑀢𑁄 𑀘𑀺𑀢𑁄 𑀕𑁄𑀘𑀭𑀁 𑀅𑀦𑁆𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀻𑀢𑀺 𑀫𑀺𑀕𑁄. 𑀏𑀯𑀁 𑀫𑀕𑁄. 𑀏𑀢𑁆𑀣 𑀯𑀺𑀲𑁂𑀲𑀢𑁄 𑀳𑀭𑀺𑀡 𑀫𑀺𑀕𑁄 𑀫𑀺𑀕𑁄 𑀦𑀸𑀫. 𑀲𑀸𑀫𑀜𑁆𑀜𑀢𑁄 𑀧𑀦 𑀅𑀯𑀲𑁂𑀲𑀸𑀧𑀺 𑀘𑀢𑀼𑀧𑁆𑀧𑀤𑀸 ‘‘𑀫𑀺𑀕𑁄’’ 𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀲𑀻𑀫𑀚𑀸𑀢𑀓𑁂 ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯 𑀇𑀫𑁂, 𑀧𑀭𑁄𑀲𑀳𑀲𑁆𑀲𑀁 𑀳𑁂𑀫𑀚𑀸𑀮𑀸𑀪𑀺𑀲𑀜𑁆𑀙𑀦𑁆𑀦𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀦𑁄𑀧𑀺 𑀫𑀺𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸 ‘‘𑀓𑀸𑀴𑀫𑀺𑀕𑀸’’𑀢𑀺. 𑀅𑀣 𑀯𑀸 𑀫𑀕𑀺𑀬𑀢𑀺 𑀚𑀻𑀯𑀺𑀢𑀓𑀧𑁆𑀧𑀦𑀢𑁆𑀣𑀸𑀬 𑀫𑀁𑀲𑀸𑀤𑀻𑀳𑀺 𑀅𑀢𑁆𑀣𑀺𑀓𑁂𑀳𑀺 𑀮𑀼𑀤𑁆𑀤𑁂𑀳𑀺 𑀅𑀦𑁆𑀯𑁂𑀲𑀺𑀬𑀢𑀺 𑀧𑀭𑀺𑀬𑁂𑀲𑀺𑀬𑀢𑀻𑀢𑀺 𑀫𑀺𑀕𑁄, 𑀅𑀭𑀜𑁆𑀜𑀚𑀸𑀢𑀸 𑀲𑀲𑀧𑀲𑀤𑀳𑀭𑀺𑀡𑁂𑀡𑁂𑀬𑁆𑀬𑀸𑀤𑀬𑁄 𑀘𑀢𑀼𑀧𑁆𑀧𑀸𑀤𑀸, 𑀏𑀯𑀁 𑀫𑀕𑁄. ‘‘𑀅𑀢𑁆𑀣𑀁 𑀦 𑀮𑀪𑀢𑁂 𑀫𑀕𑁄’’𑀢𑀺 𑀏𑀢𑁆𑀣 𑀧𑀦 𑀫𑀕𑁄 𑀯𑀺𑀬𑀸𑀢𑀺 𑀫𑀕𑁄, 𑀩𑀸𑀮𑁄𑀢𑀺 𑀅𑀢𑁆𑀣𑁄.

𑀫𑀕𑁆𑀕 𑀕𑀯𑁂𑀲𑀦𑁂. 𑀫𑀕𑁆𑀕𑁂𑀢𑀺, 𑀫𑀕𑁆𑀕𑀬𑀢𑀺. 𑀫𑀕𑁆𑀕𑁄, 𑀫𑀕𑁆𑀕𑀦𑀁.

𑀏𑀢𑁆𑀣 𑀘 𑀫𑀕𑁆𑀕𑁄𑀢𑀺 𑀧𑀝𑀺𑀧𑀤𑀸𑀬 𑀘 𑀧𑀓𑀢𑀺𑀫𑀕𑁆𑀕𑀲𑁆𑀲 𑀘 𑀉𑀧𑀸𑀬𑀲𑁆𑀲 𑀘 𑀅𑀥𑀺𑀯𑀘𑀦𑀁. ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀓𑀣𑀸𑀧𑀩𑀦𑁆𑀥𑁄𑀧𑀺 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀧𑀝𑀺𑀧𑀤𑀸 𑀏𑀓𑀦𑁆𑀢𑀢𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀤𑀼𑀓𑁆𑀔𑀸𑀤𑀻𑀳𑀺 𑀧𑀻𑀴𑀺𑀢𑁂𑀳𑀺 𑀲𑀢𑁆𑀢𑁂𑀳𑀺 𑀤𑀼𑀓𑁆𑀔𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀢𑁆𑀣𑀸𑀬 𑀫𑀕𑁆𑀕𑀺𑀢𑀩𑁆𑀩𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀧𑀓𑀢𑀺𑀫𑀕𑁆𑀕𑁄 𑀧𑀦 𑀫𑀕𑁆𑀕𑀫𑀽𑀴𑁆𑀳𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀧𑀓𑀢𑀺𑀫𑀕𑁆𑀕𑀫𑀽𑀴𑁆𑀳𑁂𑀳𑀺 𑀘 𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀸𑀭𑀺𑀬𑀫𑀕𑁆𑀕𑀫𑀽𑀴𑁆𑀳𑀸 𑀏𑀯 𑀩𑀳𑀯𑁄 𑀲𑀦𑁆𑀢𑀺. 𑀧𑀓𑀢𑀺𑀫𑀕𑁆𑀕𑁄 𑀳𑀺 𑀓𑀤𑀸𑀘𑀺 𑀏𑀯 𑀅𑀤𑁆𑀥𑀺𑀓𑀸𑀦𑀁 𑀫𑀼𑀬𑁆𑀳𑀢𑀺, ‘‘𑀏𑀲 𑀫𑀕𑁆𑀕𑁄’’𑀢𑀺 𑀦𑀸𑀬𑀓𑀸 𑀦 𑀤𑀼𑀮𑁆𑀮𑀪𑀸. 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀲𑀩𑁆𑀩𑀤𑀸𑀬𑁂𑀯 𑀲𑀩𑁆𑀩𑀮𑁄𑀓𑀲𑁆𑀲 𑀫𑀼𑀬𑁆𑀳𑀢𑀺, 𑀦𑀸𑀬𑀓𑀸 𑀧𑀭𑀫𑀤𑀼𑀮𑁆𑀮𑀪𑀸. 𑀢𑀲𑁆𑀫𑀸 𑀲𑁄 𑀏𑀯 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀅𑀜𑁆𑀜𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺 𑀕𑀭𑀽 ‘‘𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄’’𑀢𑀺. 𑀢𑀁 𑀢𑀁 𑀓𑀺𑀘𑁆𑀘𑀁 𑀳𑀺𑀢𑀁 𑀯𑀸 𑀦𑀺𑀧𑁆𑀨𑀸𑀤𑁂𑀢𑀼𑀓𑀸𑀫𑁂𑀳𑀺 𑀫𑀕𑁆𑀕𑀺𑀬𑀢𑀺 𑀕𑀯𑁂𑀲𑀺𑀬𑀢𑀻𑀢𑀺 𑀫𑀕𑁆𑀕𑁄, 𑀉𑀧𑀸𑀬𑁄. 𑀫𑀕𑁆𑀕𑀲𑀤𑁆𑀤𑁄 𑀳𑀺 ‘‘𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁, 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀻’’𑀢𑀺 𑀏𑀢𑁆𑀣 𑀉𑀧𑀸𑀬𑁂𑀧𑀺 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 ‘‘𑀫𑀕𑁆𑀕𑁄𑀢𑀺 𑀉𑀧𑀸𑀬𑁄, 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀓𑀼𑀲𑀮𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀯𑀩𑁄𑀥𑀲𑁆𑀲 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲𑁂𑀯 𑀯𑀸 𑀉𑀧𑀸𑀬𑀪𑀸𑀯𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀧𑀩𑀦𑁆𑀥𑁄 𑀯𑀸 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀤𑀻𑀖𑀢𑁆𑀢𑀸 𑀫𑀕𑁆𑀕𑁄 𑀯𑀺𑀬𑀸𑀢𑀺 𑀫𑀕𑁆𑀕𑁄, 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀧𑀓𑀢𑀺𑀧𑀝𑀺𑀧𑀤𑀸𑀫𑀕𑁆𑀕𑀸𑀦𑀁 𑀦𑀸𑀫𑀸𑀦𑀺 𑀓𑀣𑀬𑀸𑀫. 𑀢𑁂𑀲𑀼 𑀧𑀓𑀢𑀺𑀫𑀕𑁆𑀕𑀲𑁆𑀲 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀛𑀲𑀁 𑀯𑀝𑀼𑀫𑀸’𑀬𑀦𑀁;

𑀅𑀤𑁆𑀥𑀸𑀦’𑀫𑀤𑁆𑀥𑀸 𑀧𑀤𑀯𑀻, 𑀯𑀢𑁆𑀢𑀦𑀺 𑀘𑁂𑀯 𑀲𑀦𑁆𑀢𑀢𑀻’’𑀢𑀺

𑀇𑀫𑀸𑀦𑀺 𑀦𑀸𑀫𑀸𑀦𑀺. 𑀧𑀝𑀺𑀧𑀤𑀸𑀫𑀕𑁆𑀕𑀲𑁆𑀲 𑀧𑀦 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸’𑀬𑀦𑀁;

𑀦𑀸𑀯 𑀉𑀢𑁆𑀢𑀭 𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’𑀢𑀺

𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺. 𑀏𑀢𑁆𑀣 𑀧𑀦 𑀓𑁂𑀘𑀺 ‘‘𑀦𑀸𑀯𑀸𑀢𑀺𑀆𑀤𑀻𑀦𑀺 𑀧𑀓𑀢𑀺𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀧𑀓𑀢𑀺𑀫𑀕𑁆𑀕𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 ‘‘𑀦𑀸𑀯𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑀸𑀪𑀸𑀯𑀢𑁄, 𑀅𑀪𑀺𑀥𑀸𑀦𑀲𑀢𑁆𑀣𑁂𑀲𑀼 𑀘 ‘‘𑀦𑀸𑀯𑀸’’ 𑀇𑀘𑁆𑀘𑀸𑀤𑀺𑀓𑀸𑀦𑀁 𑀢𑀤𑀪𑀺𑀥𑀸𑀦𑀸𑀦𑀁 𑀅𑀦𑀸𑀕𑀢𑀢𑁆𑀢𑀸.

𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀦𑀸𑀯𑀸𑀯𑀺𑀬𑀸𑀢𑀺 𑀦𑀸𑀯𑀸, 𑀉𑀢𑁆𑀢𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀢𑁆𑀢𑀭𑀁, 𑀦𑀸𑀯𑀸𑀬𑁂𑀯 𑀉𑀢𑁆𑀢𑀭𑀦𑁆𑀢𑀺. 𑀅𑀬𑀜𑁆𑀳𑀺 𑀦𑀸𑀯𑀸𑀧𑀭𑀺𑀬𑀸𑀬𑁄 ‘‘𑀢𑀭𑀁, 𑀢𑀭𑀡𑀁, 𑀧𑁄𑀢𑁄, 𑀧𑁆𑀮𑀯𑁄’’𑀢𑀺. 𑀇𑀫𑁂𑀧𑀺 𑀢𑀁𑀧𑀭𑀺𑀬𑀸𑀬𑀸𑀬𑁂𑀯. 𑀉𑀢𑁆𑀢𑀭𑀁 𑀯𑀺𑀬𑀸𑀢𑀺 𑀉𑀢𑁆𑀢𑀭𑀁. 𑀲𑁂𑀢𑀼 𑀯𑀺𑀬𑀸𑀢𑀺 𑀲𑁂𑀢𑀼. 𑀓𑀼𑀮𑁆𑀮𑁄 𑀯𑀺𑀬𑀸𑀢𑀺 𑀓𑀼𑀮𑁆𑀮𑁄. 𑀪𑀺𑀲𑀺 𑀯𑀺𑀬𑀸𑀢𑀺 𑀪𑀺𑀲𑀺. 𑀲𑀗𑁆𑀓𑀫𑁄 𑀯𑀺𑀬, 𑀲𑀗𑁆𑀓𑀫𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀲𑀗𑁆𑀓𑀫𑁄, 𑀲𑀩𑁆𑀩𑀫𑁂𑀢𑀁 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀦𑀸𑀫𑀁, 𑀦 𑀧𑀓𑀢𑀺𑀫𑀕𑁆𑀕𑀲𑁆𑀲. 𑀢𑀣𑀸 𑀳𑀺 ‘‘𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀽𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺 𑀘, ‘‘𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀦𑀭𑀸𑀲𑀪𑁄’’𑀢𑀺 𑀘, ‘‘𑀓𑀼𑀮𑁆𑀮𑁄’𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀫𑀕𑁆𑀕𑁄 ‘‘𑀦𑀸𑀯𑀸’’𑀢𑀺𑀆𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺𑀧𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀩𑀤𑁆𑀥𑀸 𑀪𑀺𑀲𑀺 𑀲𑀼𑀲𑀗𑁆𑀔𑀢𑀸 𑀪𑀕𑀯𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀏𑀯𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀢𑀸 ‘‘𑀪𑀺𑀲𑀻𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀧𑀼𑀣𑀼𑀮𑀁 𑀓𑀢𑁆𑀯𑀸 𑀩𑀤𑁆𑀥𑀸 ‘𑀓𑀼𑀮𑁆𑀮𑀸’𑀢𑀺 𑀯𑀼𑀘𑁆𑀘𑀢𑀺 𑀮𑁄𑀓𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀦 𑀅𑀭𑀺𑀬𑀫𑀕𑁆𑀕𑁄’𑀢𑀺.

‘𑀫𑀕𑁆𑀕𑁄 𑀧𑀚𑁆𑀚𑁄 𑀧𑀣𑁄 𑀧𑀦𑁆𑀣𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸’𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭 𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄;

𑀅𑀤𑁆𑀥𑀸𑀦𑀁 𑀧𑀪𑀯𑁄’𑀘𑁆𑀘𑁂𑀯, 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑁄’’𑀢𑀺.

𑀏𑀯𑀁 𑀆𑀘𑀭𑀺𑀬𑁂𑀳𑀺 𑀓𑀢𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀤𑀲𑁆𑀲𑀦𑀢𑁄 𑀘 ‘‘𑀦𑀸𑀯𑀸𑀢𑀺𑀆𑀤𑀻𑀦𑀺𑀧𑀺 𑀧𑀓𑀢𑀺𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀻’’𑀢𑀺 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑀫𑁂𑀯 𑀯𑀘𑀦𑀁 𑀕𑀳𑁂𑀢𑀩𑁆𑀩𑀁.

𑀓𑁄𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬 ‘‘𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸’𑀢𑀺 𑀏𑀢𑁆𑀣 ‘𑀥𑀫𑁆𑀫𑀲𑁂𑀢𑀼𑀦𑁆𑀢𑀺 𑀫𑀕𑁆𑀕𑀲𑁂𑀢𑀼’𑀦𑁆𑀢𑀺 𑀯𑀘𑀦𑀢𑁄 𑀥𑀫𑁆𑀫𑀲𑀤𑁆𑀤𑁄 𑀫𑀕𑁆𑀕𑁂 𑀯𑀢𑁆𑀢𑀢𑀺, 𑀦 𑀲𑁂𑀢𑀼𑀲𑀤𑁆𑀤𑁄’’𑀢𑀺. 𑀢𑀦𑁆𑀦, 𑀥𑀫𑁆𑀫𑀲𑀤𑁆𑀤𑁄 𑀯𑀺𑀬 𑀲𑁂𑀢𑀼𑀲𑀤𑁆𑀤𑁄𑀧𑀺 𑀫𑀕𑁆𑀕𑁂 𑀯𑀢𑁆𑀢𑀢𑀻𑀢𑀺 𑀲𑁂𑀢𑀼 𑀯𑀺𑀬𑀸𑀢𑀺 𑀲𑁂𑀢𑀼, 𑀥𑀫𑁆𑀫𑁄 𑀏𑀯 𑀲𑁂𑀢𑀼 𑀥𑀫𑁆𑀫𑀲𑁂𑀢𑀽𑀢𑀺 𑀅𑀢𑁆𑀣𑀯𑀲𑁂𑀦, 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺. 𑀅𑀧𑀭𑀫𑁆𑀧𑀺 𑀯𑀤𑁂𑀬𑁆𑀬 ‘‘𑀦𑀦𑀼 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 ‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀅𑀲𑁆𑀲𑀢𑁆𑀣𑀤𑀼𑀫𑀭𑀸𑀚𑀸𑀦𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀪𑀸𑀕𑁂 𑀞𑀺𑀢𑁄’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑀓𑁆𑀔𑀺𑀡𑀼𑀢𑁆𑀢𑀭𑀲𑀤𑁆𑀤𑁂𑀦 𑀤𑀓𑁆𑀔𑀺𑀡𑁄 𑀫𑀕𑁆𑀕𑁄 𑀯𑀼𑀢𑁆𑀢𑁄’’𑀢𑀺. 𑀦, 𑀅𑀦𑁂𑀓𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀅𑀝𑁆𑀞𑀓𑀣𑀸𑀧𑀤𑁂𑀲𑁂𑀲𑀼 𑀘 𑀅𑀪𑀺𑀥𑀸𑀦𑀲𑀢𑁆𑀣𑁂𑀲𑀼 𑀘 𑀫𑀕𑁆𑀕𑀯𑀸𑀘𑀓𑀲𑁆𑀲 𑀉𑀢𑁆𑀢𑀭𑀲𑀤𑁆𑀤𑀲𑁆𑀲 𑀅𑀦𑀸𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀤𑀓𑁆𑀔𑀺𑀡𑀤𑀺𑀲𑀢𑁄 𑀕𑀦𑁆𑀢𑀩𑁆𑀩𑁄 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁄 𑀤𑀓𑁆𑀔𑀺𑀡𑀼𑀢𑁆𑀢𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀪𑀽𑀢𑁂𑀦 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀧𑀯𑀺𑀲𑀦𑀁 𑀲𑀦𑁆𑀥𑀸𑀬 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀅𑀣 𑀯𑀸 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸𑀢𑀺 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀼𑀢𑁆𑀢𑀭𑁂𑀦, 𑀏𑀢𑁆𑀣 𑀆𑀤𑀺𑀅𑀯𑀲𑀸𑀦𑀕𑁆𑀕𑀳𑀡𑁂𑀦 𑀫𑀚𑁆𑀛𑀲𑁆𑀲𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀕𑀳𑀡𑀁𑀬𑁂𑀯 𑀳𑀺 𑀬𑀁 𑀚𑀸𑀢𑀓𑀦𑀺𑀤𑀸𑀦𑁂 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑁄 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀽𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀔𑀡𑁂 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀩𑁄𑀥𑀺𑀲𑀢𑁆𑀢𑁄 𑀇𑀤𑀁 𑀲𑀫𑁆𑀩𑁄𑀥𑀺𑀧𑀸𑀧𑀼𑀡𑀝𑁆𑀞𑀸𑀦𑀁 𑀦 𑀪𑀯𑀢𑀺 𑀫𑀜𑁆𑀜𑁂𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀻’’𑀢𑀺𑀆𑀤𑀺, 𑀢𑁂𑀦 𑀲𑀫𑁂𑀢𑀺. 𑀅𑀣𑀸𑀧𑀺 𑀯𑀤𑁂𑀬𑁆𑀬 ‘‘𑀬𑀤𑀺 𑀉𑀢𑁆𑀢𑀭𑀲𑀤𑁆𑀤𑁄 𑀤𑀺𑀲𑀸𑀯𑀸𑀘𑀓𑁄, 𑀏𑀯𑀜𑁆𑀘 𑀲𑀢𑀺 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸’’𑀢𑀺 𑀏𑀦𑀬𑁄𑀕𑀁 𑀅𑀯𑀢𑁆𑀯𑀸 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸’’𑀢𑀺 𑀆𑀬𑀬𑁄𑀕𑁄 𑀯𑀢𑁆𑀢𑀩𑁆𑀩𑁄’’𑀢𑀺. 𑀢𑀦𑁆𑀦, 𑀤𑀺𑀲𑀸𑀯𑀸𑀘𑀓𑀲𑁆𑀲𑀧𑀺 𑀲𑀤𑁆𑀤𑀲𑁆𑀲 ‘‘𑀉𑀢𑁆𑀢𑀭𑁂𑀦 𑀦𑀤𑀻 𑀲𑀻𑀢𑀸, 𑀕𑀫𑁆𑀪𑀻𑀭𑀸 𑀤𑀼𑀭𑀢𑀺𑀓𑁆𑀓𑀫𑀸’’𑀢𑀺 𑀏𑀦𑀬𑁄𑀕𑀯𑀲𑁂𑀦 𑀯𑀘𑀦𑀢𑁄. 𑀅𑀧𑀺𑀘 𑀤𑀺𑀲𑀸𑀪𑀸𑀕𑀁 𑀲𑀦𑁆𑀥𑀸𑀬 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁. 𑀤𑀺𑀲𑀸𑀪𑀸𑀕𑁄 𑀳𑀺 𑀤𑀺𑀲𑀸 𑀏𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁.

𑀕𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀖𑀓𑀸𑀭𑀦𑁆𑀢𑀥𑀸𑀢𑀼

𑀮𑀺𑀖𑀺 𑀪𑀸𑀲𑀦𑁂. 𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀺. 𑀏𑀢𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀺𑀧𑀺 𑀮𑁄𑀓𑀺𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑀸𑀦𑀺. 𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀪𑀽𑀯𑀸𑀤𑀺𑀕𑀡𑀘𑀼𑀭𑀸𑀤𑀺𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀕𑀢𑁆𑀬𑀢𑁆𑀣𑀯𑀸𑀘𑀓𑀉𑀮𑁆𑀮𑀗𑁆𑀖𑀦𑀢𑁆𑀣𑀧𑀭𑀺𑀤𑀻𑀧𑀓𑀲𑁆𑀲 𑀥𑀸𑀢𑀼𑀲𑁆𑀲 𑀭𑀽𑀧𑀁 𑀅𑀢𑀻𑀯 𑀧𑀲𑀺𑀤𑁆𑀥𑀁.

𑀮𑀗𑁆𑀖 𑀮𑀗𑁆𑀖𑀦𑁂. 𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀺.

‘‘𑀅𑀢𑀺𑀓𑀭’𑀫𑀓𑀭𑀸’𑀘𑀭𑀺𑀬, 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀺;

𑀘𑀢𑀼𑀢𑁆𑀣𑁂 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀧𑀜𑁆𑀘𑀫𑀺𑀬𑀫𑁆𑀧𑀺 𑀆𑀯𑀼𑀢𑁄’’𑀢𑀺

𑀇𑀫𑀲𑁆𑀫𑀺𑀁 𑀲𑀢𑁆𑀢𑀺𑀮𑀗𑁆𑀖𑀦𑀚𑀸𑀢𑀓𑁂 𑀘𑀼𑀭𑀸𑀤𑀺𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀕𑀢𑁆𑀬𑀢𑁆𑀣𑀯𑀸𑀘𑀓𑀲𑁆𑀲 𑀉𑀮𑁆𑀮𑀗𑁆𑀖𑀦𑀢𑁆𑀣𑀧𑀭𑀺𑀤𑀻𑀧𑀓𑀲𑁆𑀲 𑀮𑀗𑁆𑀖𑀥𑀸𑀢𑀼𑀲𑁆𑀲 ‘‘𑀮𑀗𑁆𑀖𑀬𑀺𑀢𑁆𑀯𑀸, 𑀮𑀗𑁆𑀖𑀬𑀺𑀢𑁆𑀯𑀸𑀦𑀸’’𑀢𑀺 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀤𑀺𑀝𑁆𑀞𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀪𑀸𑀲𑀢𑁆𑀣𑀯𑀸𑀘𑀓𑀲𑁆𑀲 𑀧𑀦 𑀢𑀣𑀸𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀦 𑀤𑀺𑀝𑁆𑀞𑀸𑀦𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀤𑀻𑀖𑀤𑀲𑁆𑀲𑀻𑀳𑀺 𑀅𑀪𑀺𑀫𑀢𑀢𑁆𑀢𑀸 𑀪𑀸𑀲𑀢𑁆𑀣𑀯𑀸𑀘𑀺𑀓𑀸𑀧𑀺 𑀮𑀗𑁆𑀖𑀥𑀸𑀢𑀼 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀸, 𑀏𑀯𑀁 𑀲𑀩𑁆𑀩𑁂𑀲𑀼𑀧𑀺 𑀪𑀽𑀯𑀸𑀤𑀺𑀕𑀡𑀸𑀤𑀻𑀲𑀼 𑀲𑀸𑀲𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀫𑁆𑀧𑀺 𑀭𑀽𑀧𑀸𑀦𑀁 𑀲𑀸𑀲𑀦𑀸𑀦𑀼𑀓𑀽𑀮𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀦𑀦𑀼𑀓𑀽𑀮𑀸𑀦𑀜𑁆𑀘 𑀅𑀧𑁆𑀧𑀲𑀺𑀤𑁆𑀥𑀸𑀦𑀁 𑀙𑀟𑁆𑀟𑀦𑀁.

𑀅𑀖 𑀧𑀸𑀧𑀓𑀭𑀡𑁂. 𑀅𑀖𑁂𑀢𑀺, 𑀅𑀖𑀬𑀢𑀺. 𑀅𑀖𑀁, 𑀅𑀖𑁄, 𑀅𑀦𑀖𑁄.

𑀢𑀢𑁆𑀣 𑀅𑀖𑀦𑁆𑀢𑀺 𑀤𑀼𑀓𑁆𑀔𑀁. ‘‘𑀅𑀖𑀦𑁆𑀢𑀁 𑀧𑀝𑀺𑀲𑁂𑀯𑀺𑀲𑁆𑀲𑀁. 𑀯𑀦𑁂 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑁂. 𑀔𑀕𑁆𑀕𑀤𑀻𑀧𑀺𑀦𑀺𑀲𑁂𑀯𑀺𑀢𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀅𑀖𑁄𑀢𑀺 𑀓𑀺𑀮𑁂𑀲𑁄. 𑀢𑁂𑀦 𑀅𑀖𑁂𑀦 𑀅𑀭𑀳𑀸 𑀅𑀦𑀖𑁄. 𑀢𑀢𑁆𑀣 𑀅𑀖𑀬𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀖𑀁, 𑀓𑀺𑀦𑁆𑀢𑀁? 𑀤𑀼𑀓𑁆𑀔𑀁, 𑀏𑀯𑀁 𑀅𑀖𑁄. 𑀦𑀦𑀼 𑀘 𑀲𑀧𑁆𑀧𑀼𑀭𑀺𑀲𑀸 𑀤𑀼𑀓𑁆𑀔𑀳𑁂𑀢𑀼𑀧𑀺 𑀓𑀺𑀮𑁂𑀲𑀳𑁂𑀢𑀼𑀧𑀺 𑀘 𑀅𑀢𑁆𑀢𑀦𑁄 𑀲𑀼𑀔𑀢𑁆𑀣𑀸𑀬 𑀧𑀸𑀧𑀁 𑀦 𑀓𑀭𑁄𑀦𑁆𑀢𑀺. 𑀢𑀣𑀸 𑀳𑀺 𑁋

‘‘𑀦 𑀧𑀡𑁆𑀟𑀺𑀢𑀸 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼,

𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑀺;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸 𑀔𑀮𑀺𑀢𑀸𑀧𑀺 𑀲𑀦𑁆𑀢𑀸,

𑀙𑀦𑁆𑀤𑀸 𑀘 𑀤𑁄𑀲𑀸 𑀦 𑀚𑀳𑀦𑁆𑀢𑀺 𑀥𑀫𑁆𑀫’’𑀦𑁆𑀢𑀺

𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀅𑀖 𑀧𑀸𑀧𑀓𑀭𑀡𑁂’’𑀢𑀺 𑀥𑀸𑀢𑀼 𑀘 ‘‘𑀅𑀖𑀬𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀖’’𑀦𑁆𑀢𑀺𑀆𑀤𑀺𑀯𑀘𑀦𑀜𑁆𑀘 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀲𑀢𑁆𑀢𑀸 𑀤𑀼𑀓𑁆𑀔𑀸𑀤𑀺𑀳𑁂𑀢𑀼 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀼 𑀲𑀧𑁆𑀧𑀼𑀭𑀺𑀲𑀸 𑀏𑀯 𑀦 𑀓𑀭𑁄𑀦𑁆𑀢𑀺, 𑀇𑀢𑀭𑁂 𑀓𑀭𑁄𑀦𑁆𑀢𑀺. 𑀏𑀯𑀁 𑀧𑀸𑀧𑀓𑀭𑀡𑀲𑁆𑀲 𑀳𑀺 𑀤𑀼𑀓𑁆𑀔𑀁 𑀓𑀺𑀮𑁂𑀲𑁄 𑀘 𑀳𑁂𑀢𑀼. 𑀢𑀣𑀸 𑀳𑀺 𑁋

𑀲𑀼𑀔𑀻𑀧𑀺 𑀳𑁂𑀓𑁂 𑀦 𑀓𑀭𑁄𑀦𑁆𑀢𑀺 𑀧𑀸𑀧𑀁,

𑀅𑀯𑀡𑁆𑀡𑀲𑀁𑀲𑀕𑁆𑀕𑀪𑀬𑀸 𑀧𑀼𑀦𑁂𑀓𑁂;

𑀧𑀳𑀽 𑀲𑀫𑀸𑀦𑁄 𑀯𑀺𑀧𑀼𑀮𑀢𑁆𑀣𑀘𑀺𑀦𑁆𑀢𑀻,

𑀓𑀺𑀁𑀓𑀸𑀭𑀡𑀸 𑀫𑁂 𑀦 𑀓𑀭𑁄𑀲𑀺 𑀤𑀼𑀓𑁆𑀔’’𑀦𑁆𑀢𑀺

𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀕𑀸𑀣𑀸 𑀤𑀼𑀓𑁆𑀔𑀳𑁂𑀢𑀼𑀧𑀺 𑀲𑀢𑁆𑀢𑀸 𑀧𑀸𑀧𑀁 𑀓𑀭𑁄𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. ‘‘𑀓𑀼𑀤𑁆𑀥𑁄 𑀳𑀺 𑀧𑀺𑀢𑀭𑀁 𑀳𑀦𑁆𑀢𑀺, 𑀓𑀼𑀤𑁆𑀥𑁄 𑀳𑀦𑁆𑀢𑀺 𑀲𑀫𑀸𑀢𑀭’’𑀦𑁆𑀢𑀺 𑀅𑀬𑀁 𑀧𑀦 𑀓𑀺𑀮𑁂𑀲𑀳𑁂𑀢𑀼𑀧𑀺 𑀧𑀸𑀧𑀁 𑀓𑀭𑁄𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 ‘‘𑀅𑀖 𑀧𑀸𑀧𑀓𑀭𑀡𑁂’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁.

𑀖𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀘𑀓𑀸𑀭𑀦𑁆𑀢𑀥𑀸𑀢𑀼

𑀮𑁄𑀘 𑀤𑀲𑁆𑀲𑀦𑁂. 𑀮𑁄𑀘𑁂𑀢𑀺, 𑀮𑁄𑀘𑀬𑀢𑀺. 𑀮𑁄𑀘𑀦𑀁. 𑀭𑀽𑀧𑀸𑀭𑀫𑁆𑀫𑀡𑀁 𑀮𑁄𑀘𑀬𑀢𑀺 𑀧𑀲𑁆𑀲𑀢𑀻𑀢𑀺 𑀮𑁄𑀘𑀦𑀁, 𑀘𑀓𑁆𑀔𑀼.

𑀓𑀺𑀘𑀺 𑀫𑀤𑁆𑀤𑀦𑁂. 𑀓𑀺𑀜𑁆𑀘𑁂𑀢𑀺, 𑀓𑀺𑀜𑁆𑀘𑀬𑀢𑀺. 𑀓𑀺𑀜𑁆𑀘𑀦𑀁, 𑀅𑀓𑀺𑀜𑁆𑀘𑀦𑁄.

𑀢𑀢𑁆𑀣 𑀓𑀺𑀜𑁆𑀘𑀦𑀦𑁆𑀢𑀺 𑀧𑀮𑀺𑀩𑁄𑀥𑁄. 𑀓𑀺𑀜𑁆𑀘𑁂𑀢𑀺 𑀲𑀢𑁆𑀢𑁂 𑀫𑀤𑁆𑀤𑀢𑀻𑀢𑀺 𑀓𑀺𑀜𑁆𑀘𑀦𑀁. 𑀓𑀺𑀜𑁆𑀘𑀦𑀲𑀤𑁆𑀤𑁄 𑀫𑀤𑁆𑀤𑀦𑀢𑁆𑀣𑁂 𑀯𑀢𑁆𑀢𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀯𑀻𑀳𑀺𑀁 𑀫𑀤𑁆𑀤𑀦𑁆𑀢𑀸 𑀕𑁄𑀡𑀁 ‘‘𑀓𑀺𑀜𑁆𑀘𑁂𑀳𑀺 𑀓𑀸𑀧𑀺𑀮, 𑀓𑀺𑀜𑁆𑀘𑁂𑀳𑀺 𑀓𑀸𑀧𑀺𑀮𑀸’’𑀢𑀺 𑀯𑀤𑀦𑁆𑀢𑀺.

𑀧𑀘𑀺 𑀯𑀺𑀢𑁆𑀣𑀸𑀭𑁂. 𑀧𑀜𑁆𑀘𑁂𑀢𑀺, 𑀧𑀜𑁆𑀘𑀬𑀢𑀺. 𑀧𑀧𑀜𑁆𑀘𑁂𑀢𑀺, 𑀧𑀧𑀜𑁆𑀘𑀬𑀢𑀺. 𑀧𑀧𑀜𑁆𑀘𑀸.

𑀏𑀢𑁆𑀣 𑀧𑀧𑀜𑁆𑀘𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄. 𑀏𑀢𑀸 𑀳𑀺 𑀅𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀁 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀺𑀦𑁆𑀦𑀁 𑀓𑀭𑁄𑀦𑁆𑀢𑀻𑀢𑀺 𑀧𑀧𑀜𑁆𑀘𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀸 𑀢𑀁𑀲𑀦𑁆𑀢𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑀺 𑀘𑀺𑀭𑀁 𑀞𑀧𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀮𑁄𑀓𑀺𑀬𑀸 𑀧𑀦 ‘‘𑀅𑀫𑁆𑀳𑀸𑀓𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀸𑀦𑀁 𑀧𑀧𑀜𑁆𑀘𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀓𑀸𑀮𑀲𑁆𑀲 𑀘𑀺𑀭𑀪𑀸𑀯𑀁 𑀧𑀧𑀜𑁆𑀘𑁄𑀢𑀺 𑀯𑀤𑀦𑁆𑀢𑀺, 𑀲𑀸𑀲𑀦𑁂 𑀧𑀦 𑀤𑁆𑀯𑀬𑀫𑁆𑀧𑀺 𑀮𑀩𑁆𑀪𑀢𑀺.

𑀲𑀺𑀘𑁆𑀘 𑀓𑀼𑀟𑁆𑀟𑀦𑁂. 𑀲𑀺𑀘𑁆𑀘𑁂𑀢𑀺, 𑀲𑀺𑀘𑁆𑀘𑀬𑀢𑀺.

𑀯𑀜𑁆𑀘𑀼 𑀧𑀮𑀫𑁆𑀪𑀦𑁂. 𑀧𑀮𑀫𑁆𑀪𑀦𑀁 𑀉𑀧𑀮𑀸𑀧𑀦𑀁. 𑀯𑀜𑁆𑀘𑁂𑀢𑀺, 𑀯𑀜𑁆𑀘𑀬𑀢𑀺. 𑀯𑀜𑁆𑀘𑀓𑁄, 𑀯𑀜𑁆𑀘𑀦𑀁. 𑀪𑀽𑀯𑀸𑀤𑀺𑀕𑀡𑁂 𑀧𑀦 𑀯𑀜𑁆𑀘𑀥𑀸𑀢𑀼 𑀕𑀢𑁆𑀬𑀢𑁆𑀣𑁂 𑀯𑀢𑁆𑀢𑀢𑀺. ‘‘𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸’’𑀢𑀺 𑀳𑀺 𑀧𑀸𑀴𑀺

𑀘𑀘𑁆𑀘 𑀅𑀚𑁆𑀛𑀬𑀦𑁂. 𑀘𑀘𑁆𑀘𑁂𑀢𑀺, 𑀘𑀘𑁆𑀘𑀬𑀢𑀺.

𑀘𑀼 𑀘𑀯𑀦𑁂. 𑀘𑀸𑀯𑁂𑀢𑀺, 𑀘𑀸𑀯𑀬𑀢𑀺. 𑀅𑀜𑁆𑀜𑁄 ‘‘𑀘𑀼 𑀲𑀳𑀦𑁂’’ 𑀇𑀢𑀺 𑀩𑁆𑀭𑀼𑀢𑁂. 𑀘𑀸𑀯𑁂𑀢𑀺, 𑀘𑀸𑀯𑀬𑀢𑀺, 𑀲𑀳𑀢𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀘𑀼 𑀯𑀺𑀲𑁂𑀲𑀦𑁂. 𑀅𑀜𑁆𑀘𑁂𑀢𑀺, 𑀅𑀜𑁆𑀘𑀬𑀢𑀺.

𑀮𑁄𑀘 𑀪𑀸𑀲𑀸𑀬𑀁. 𑀮𑁄𑀘𑁂𑀢𑀺, 𑀮𑁄𑀘𑀬𑀢𑀺. 𑀮𑁄𑀘𑀦𑀁, 𑀮𑁄𑀘𑀬𑀢𑀺 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀪𑀯𑀢𑀻𑀢𑀺 𑀮𑁄𑀘𑀦𑀁, 𑀘𑀓𑁆𑀔𑀼.

𑀭𑀘 𑀧𑀢𑀺𑀬𑀢𑀦𑁂. 𑀭𑀘𑁂𑀢𑀺, 𑀭𑀘𑀬𑀢𑀺. 𑀭𑀘𑀦𑀸, 𑀯𑀺𑀭𑀘𑀺𑀢𑀁, 𑀓𑁂𑀲𑀭𑀘𑀦𑀸, 𑀕𑀸𑀣𑀸𑀭𑀘𑀦𑀸.

𑀲𑀽𑀘 𑀧𑁂𑀲𑀼𑀜𑁆𑀜𑁂. 𑀧𑀺𑀲𑀼𑀡𑀪𑀸𑀯𑁄 𑀧𑁂𑀲𑀼𑀜𑁆𑀜𑀁. 𑀲𑀽𑀘𑁂𑀢𑀺, 𑀲𑀽𑀘𑀬𑀢𑀺. 𑀲𑀽𑀘𑀓𑁄.

𑀧𑀘𑁆𑀘 𑀲𑀁𑀬𑀫𑀦𑁂. 𑀧𑀘𑁆𑀘𑁂𑀢𑀺, 𑀧𑀘𑁆𑀘𑀬𑀢𑀺.

𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀧𑀚𑁆𑀚𑀦𑁂𑀲𑀼. 𑀭𑁂𑀘𑁂𑀢𑀺, 𑀭𑁂𑀘𑀬𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑁂𑀬𑁆𑀬. 𑀯𑀺𑀭𑁂𑀘𑁂𑀢𑀺, 𑀯𑀺𑀭𑁂𑀘𑀬𑀢𑀺. 𑀯𑀺𑀭𑁂𑀘𑀓𑁄, 𑀯𑀺𑀭𑁂𑀘𑀦𑀁.

𑀯𑀘 𑀪𑀸𑀲𑀦𑁂. 𑀯𑀘𑁂𑀢𑀺, 𑀯𑀘𑀬𑀢𑀺. 𑀪𑀽𑀯𑀸𑀤𑀺𑀕𑀡𑁂𑀧𑀺 𑀅𑀬𑀁 𑀯𑀢𑁆𑀢𑀢𑀺. 𑀢𑀤𑀸 𑀢𑀲𑁆𑀲𑀸 ‘‘𑀯𑀢𑁆𑀢𑀺, 𑀯𑀘𑀢𑀺, 𑀅𑀯𑁄𑀘, 𑀅𑀯𑁄𑀘𑀼’’𑀦𑁆𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀓𑀸𑀭𑀺𑀢𑁂 𑀧𑀦 ‘‘𑀅𑀦𑁆𑀢𑁂𑀯𑀸𑀲𑀺𑀓𑀁 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀯𑀸𑀘𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀯𑀢𑁆𑀢𑀼𑀁, 𑀯𑀢𑁆𑀢𑀯𑁂, 𑀯𑀢𑁆𑀯𑀸, 𑀯𑀼𑀢𑁆𑀢𑀁, 𑀯𑀼𑀘𑁆𑀘𑀢𑀺.

𑀅𑀘𑁆𑀘 𑀧𑀽𑀚𑀸𑀬𑀁. 𑀅𑀘𑁆𑀘𑁂𑀢𑀺, 𑀅𑀘𑁆𑀘𑀬𑀢𑀺. 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄.

𑀲𑀽𑀘 𑀕𑀦𑁆𑀥𑀦𑁂. 𑀲𑀼𑀘𑁂𑀢𑀺, 𑀲𑀽𑀘𑀬𑀢𑀺. 𑀲𑀽𑀘𑀓𑁄, 𑀲𑀼𑀢𑁆𑀢𑀁.

𑀏𑀢𑁆𑀣 𑀘 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀲𑀽𑀘𑁂𑀢𑀻𑀢𑀺 𑀲𑀼𑀢𑁆𑀢𑀁. 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁.

𑀓𑀘 𑀤𑀺𑀢𑁆𑀢𑀺𑀬𑀁. 𑀓𑀘𑁆𑀘𑁂𑀢𑀺, 𑀓𑀘𑁆𑀘𑀬𑀢𑀺. 𑀓𑀘𑁆𑀘𑁄.

𑀏𑀢𑁆𑀣 𑀓𑀘𑁆𑀘𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀓𑀘𑁆𑀘𑁂𑀢𑀺 𑀤𑀺𑀩𑁆𑀩𑀢𑀺 𑀯𑀺𑀭𑁄𑀘𑀢𑀻𑀢𑀺 𑀓𑀘𑁆𑀘𑁄, 𑀏𑀯𑀁𑀦𑀸𑀫𑀓𑁄 𑀆𑀤𑀺𑀧𑀼𑀭𑀺𑀲𑁄, 𑀢𑀩𑁆𑀩𑀁𑀲𑁂 𑀚𑀸𑀢𑀸 𑀧𑀼𑀭𑀺𑀲𑀸 ‘‘𑀓𑀘𑁆𑀘𑀸𑀦𑀸’’𑀢𑀺𑀧𑀺 ‘‘𑀓𑀘𑁆𑀘𑀸𑀬𑀦𑀸’’𑀢𑀺𑀧𑀺 ‘‘𑀓𑀸𑀢𑀺𑀬𑀸𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑁆𑀣𑀺𑀬𑁄 𑀧𑀦 ‘‘𑀓𑀘𑁆𑀘𑀸𑀦𑀻’’𑀢𑀺𑀧𑀺 ‘‘𑀓𑀘𑁆𑀘𑀸𑀬𑀦𑀻’’𑀢𑀺𑀧𑀺 ‘‘𑀓𑀸𑀢𑀺𑀬𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑀘𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀙𑀓𑀸𑀭𑀦𑁆𑀢𑀥𑀸𑀢𑀼

𑀫𑀺𑀮𑁂𑀙 𑀅𑀩𑁆𑀬𑀢𑁆𑀢𑀸𑀬𑀁 𑀯𑀸𑀘𑀸𑀬𑀁. 𑀫𑀺𑀮𑁂𑀘𑁆𑀙𑁂𑀢𑀺, 𑀫𑀺𑀮𑁂𑀘𑁆𑀙𑀬𑀢𑀺. 𑀫𑀺𑀮𑀓𑁆𑀔𑀼.

𑀏𑀢𑁆𑀣 𑀫𑀺𑀮𑀓𑁆𑀔𑀽𑀢𑀺 𑀫𑀺𑀮𑁂𑀘𑁆𑀙𑁂𑀢𑀺 𑀅𑀩𑁆𑀬𑀢𑁆𑀢𑀯𑀸𑀘𑀁 𑀪𑀸𑀲𑀢𑀻𑀢𑀺 𑀫𑀺𑀮𑀓𑁆𑀔𑀼.

𑀓𑀼𑀘𑁆𑀙 𑀅𑀯𑀓𑁆𑀔𑁂𑀧𑁂. 𑀅𑀯𑀓𑁆𑀔𑁂𑀧𑁄 𑀅𑀥𑁄𑀔𑀺𑀧𑀦𑀁. 𑀓𑀼𑀘𑁆𑀙𑁂𑀢𑀺, 𑀓𑀼𑀘𑁆𑀙𑀬𑀢𑀺.

𑀯𑀺𑀘𑁆𑀙 𑀪𑀸𑀲𑀸𑀬𑀁. 𑀯𑀺𑀘𑁆𑀙𑁂𑀢𑀺, 𑀯𑀺𑀘𑁆𑀙𑀬𑀢𑀺.

𑀙𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀚𑀓𑀸𑀭𑀦𑁆𑀢𑀥𑀸𑀢𑀼

𑀯𑀚𑁆𑀚 𑀯𑀚𑁆𑀚𑀦𑁂. 𑀯𑀚𑁆𑀚𑁂𑀢𑀺, 𑀯𑀚𑁆𑀚𑀬𑀢𑀺. 𑀧𑀭𑀺𑀯𑀚𑁆𑀚𑀦𑀓𑁄. 𑀯𑀚𑁆𑀚𑀺𑀢𑁄 𑀲𑀻𑀮𑀯𑀦𑁆𑀢𑁂𑀳𑀺, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻𑀢𑀺.

𑀢𑀼𑀚𑁆𑀚 𑀩𑀮𑀧𑀸𑀮𑀦𑁂𑀲𑀼. 𑀢𑀼𑀚𑁆𑀚𑁂𑀢𑀺, 𑀢𑀼𑀚𑁆𑀚𑀬𑀢𑀺.

𑀢𑀼𑀚𑀺 𑀧𑀺𑀚𑀺 𑀳𑀺𑀁𑀲𑀸𑀩𑀮𑀤𑀸𑀦𑀦𑀺𑀓𑁂𑀢𑀦𑁂𑀲𑀼. 𑀦𑀺𑀓𑁂𑀢𑀦𑀁 𑀦𑀺𑀯𑀸𑀲𑁄. 𑀢𑀼𑀜𑁆𑀚𑁂𑀢𑀺, 𑀢𑀼𑀜𑁆𑀚𑀬𑀢𑀺. 𑀧𑀺𑀜𑁆𑀚𑁂𑀢𑀺. 𑀧𑀺𑀜𑁆𑀚𑀬𑀢𑀺.

𑀔𑀚𑀺 𑀓𑀺𑀘𑁆𑀙𑀚𑀻𑀯𑀦𑁂. 𑀔𑀜𑁆𑀚𑁂𑀢𑀺, 𑀔𑀜𑁆𑀚𑀬𑀢𑀺. 𑀔𑀜𑁆𑀚𑁄.

𑀔𑀚𑀺 𑀭𑀓𑁆𑀔𑀡𑁂. 𑀢𑀸𑀤𑀺𑀲𑀸𑀦𑀺𑀬𑁂𑀯 𑀭𑀽𑀧𑀸𑀦𑀺. 𑀪𑀽𑀯𑀸𑀤𑀺𑀕𑀡𑁂 ‘‘𑀔𑀚𑀺 𑀕𑀢𑀺𑀯𑁂𑀓𑀮𑁆𑀮𑁂𑀢𑀺 𑀇𑀫𑀺𑀲𑁆𑀲𑀸 ‘‘𑀔𑀜𑁆𑀚𑀢𑀻’’𑀢𑀺 𑀭𑀽𑀧𑀁.

𑀧𑀽𑀚 𑀧𑀽𑀚𑀸𑀬𑀁. 𑀧𑀽𑀚𑁂𑀢𑀺, 𑀧𑀽𑀚𑀬𑀢𑀺. 𑀧𑀽𑀚𑀸. 𑀏𑀲𑀸𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄. 𑀧𑀽𑀚𑀓𑁄, 𑀧𑀽𑀚𑀺𑀢𑁄, 𑀧𑀽𑀚𑀦𑀻𑀬𑁄, 𑀧𑀽𑀚𑀦𑁂𑀬𑁆𑀬𑁄, 𑀧𑀽𑀚𑁂𑀢𑀩𑁆𑀩𑁄, 𑀧𑀼𑀚𑁆𑀚𑁄.

𑀕𑀚 𑀫𑀤𑁆𑀤𑀦𑀲𑀤𑁆𑀤𑁂𑀲𑀼. 𑀕𑀚𑁂𑀢𑀺, 𑀕𑀚𑀬𑀢𑀺. 𑀕𑀚𑁄.

𑀢𑀺𑀚 𑀦𑀺𑀲𑀸𑀦𑁂. 𑀢𑁂𑀚𑁂𑀢𑀺, 𑀢𑁂𑀚𑀬𑀢𑀺.

𑀯𑀚 𑀫𑀕𑁆𑀕𑀦𑀲𑀗𑁆𑀔𑀸𑀭𑁂𑀲𑀼. 𑀯𑀚𑁂𑀢𑀺, 𑀯𑀚𑀬𑀢𑀺.

𑀢𑀚𑁆𑀚 𑀲𑀦𑁆𑀢𑀚𑁆𑀚𑀦𑁂. 𑀢𑀚𑁆𑀚𑁂𑀢𑀺, 𑀢𑀚𑁆𑀚𑀬𑀢𑀺. 𑀲𑀦𑁆𑀢𑀚𑁆𑀚𑁂𑀢𑀺, 𑀲𑀦𑁆𑀢𑀚𑁆𑀚𑀬𑀢𑀺. 𑀲𑀦𑁆𑀢𑀚𑁆𑀚𑀺𑀢𑁄.

𑀅𑀚𑁆𑀚 𑀧𑀝𑀺𑀲𑀚𑁆𑀚𑀦𑁂. 𑀅𑀚𑁆𑀚𑁂𑀢𑀺, 𑀅𑀚𑁆𑀚𑀬𑀢𑀺.

𑀲𑀚𑁆𑀚 𑀲𑀚𑁆𑀚𑀦𑁂. 𑀲𑀚𑁆𑀚𑁂𑀢𑀺, 𑀲𑀚𑁆𑀚𑀬𑀢𑀺 𑀤𑀸𑀦𑀁. 𑀕𑀫𑀦𑀲𑀚𑁆𑀚𑁄 𑀳𑀼𑀢𑁆𑀯𑀸.

𑀪𑀚 𑀯𑀺𑀲𑁆𑀲𑀸𑀲𑁂. 𑀪𑀚𑁂𑀢𑀺, 𑀪𑀚𑀬𑀢𑀺. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀪𑀚𑀢𑀻’’𑀢𑀺 𑀭𑀽𑀧𑀁, 𑀪𑀢𑁆𑀢𑀺, 𑀲𑀫𑁆𑀪𑀢𑁆𑀢𑀺.

𑀢𑀼𑀚𑀺 𑀧𑀺𑀚𑀺 𑀮𑀼𑀚𑀺 𑀪𑀚𑀺 𑀪𑀸𑀲𑀸𑀬𑀁. 𑀢𑀼𑀜𑁆𑀚𑁂𑀢𑀺, 𑀢𑀼𑀜𑁆𑀚𑀬𑀢𑀺. 𑀧𑀺𑀜𑁆𑀚𑁂𑀢𑀺, 𑀧𑀺𑀜𑁆𑀚𑀬𑀢𑀺. 𑀮𑀼𑀜𑁆𑀚𑁂𑀢𑀺, 𑀮𑀼𑀜𑁆𑀚𑀬𑀢𑀺. 𑀪𑀜𑁆𑀚𑁂𑀢𑀺, 𑀪𑀜𑁆𑀚𑀬𑀢𑀺. 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑀭𑀼𑀚 𑀳𑀺𑀁𑀲𑀸𑀬𑀁. 𑀭𑁄𑀚𑁂𑀢𑀺, 𑀭𑁄𑀚𑀬𑀢𑀺. 𑀭𑁄𑀕𑁄.

𑀪𑀸𑀚 𑀧𑀼𑀣𑀓𑀫𑁆𑀫𑀦𑀺. 𑀧𑀼𑀣𑀓𑀫𑁆𑀫𑀁 𑀧𑀼𑀣𑀓𑁆𑀓𑀭𑀡𑀁, 𑀯𑀺𑀲𑀼𑀁 𑀓𑁆𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀪𑀸𑀚𑁂𑀢𑀺, 𑀪𑀸𑀚𑀬𑀢𑀺. 𑀯𑀺𑀪𑀸𑀚𑁂𑀢𑀺, 𑀯𑀺𑀪𑀸𑀚𑀬𑀢𑀺. 𑀯𑀺𑀪𑀢𑁆𑀢𑀺.

𑀲𑀪𑀸𑀚 𑀲𑀻𑀢𑀺𑀲𑁂𑀯𑀦𑁂𑀲𑀼. 𑀲𑀪𑀸𑀚𑁂𑀢𑀺, 𑀲𑀪𑀸𑀚𑀬𑀢𑀺.

𑀮𑀚 𑀧𑀓𑀸𑀲𑀦𑁂. 𑀮𑀚𑁂𑀢𑀺, 𑀮𑀚𑀬𑀢𑀺. 𑀮𑀸𑀚𑀸.

𑀬𑀼𑀚 𑀲𑀁𑀬𑀫𑀦𑁂. 𑀲𑀁𑀧𑀼𑀩𑁆𑀩𑁄 𑀩𑀦𑁆𑀥𑀦𑁂. 𑀬𑁄𑀚𑁂𑀢𑀺, 𑀬𑁄𑀚𑀬𑀢𑀺. 𑀲𑀁𑀬𑁄𑀚𑁂𑀢𑀺, 𑀲𑀁𑀬𑁄𑀚𑀬𑀢𑀺. 𑀲𑀁𑀬𑁄𑀚𑀦𑀁.

𑀫𑀚𑁆𑀚 𑀲𑁄𑀘𑁂𑀬𑁆𑀬𑀸𑀮𑀗𑁆𑀓𑀸𑀭𑁂𑀲𑀼. 𑀫𑀚𑁆𑀚𑁂𑀢𑀺, 𑀫𑀚𑁆𑀚𑀬𑀢𑀺. 𑀲𑀫𑁆𑀫𑀚𑁆𑀚𑁂𑀢𑀺, 𑀲𑀫𑁆𑀫𑀚𑁆𑀚𑀬𑀢𑀺. 𑀲𑀫𑁆𑀫𑀚𑁆𑀚𑀸.

𑀪𑀸𑀚 𑀪𑀸𑀚𑀦𑀤𑀸𑀦𑁂𑀲𑀼. 𑀪𑀸𑀚𑁂𑀢𑀺, 𑀪𑀸𑀚𑀬𑀢𑀺. 𑀓𑀣𑀁 𑀯𑁂𑀲𑁆𑀲𑀦𑁆𑀢𑀭𑁄 𑀧𑀼𑀢𑁆𑀢𑁄, 𑀕𑀚𑀁 𑀪𑀸𑀚𑁂𑀢𑀺 𑀲𑀜𑁆𑀘𑀬.

𑀚𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀛𑀜𑀦𑁆𑀢𑀸 𑀅𑀧𑁆𑀧𑀲𑀺𑀤𑁆𑀥𑀸. 𑀲𑀤𑁆𑀤𑀲𑀢𑁆𑀣𑁂 𑀧𑀦 ‘‘𑀜𑀸 𑀦𑀺𑀬𑁄𑀚𑀦𑁂’’𑀢𑀺 𑀧𑀞𑀦𑁆𑀢𑀺, 𑀭𑀽𑀧𑀁 𑀧𑀦 𑀩𑀼𑀤𑁆𑀥𑀯𑀘𑀦𑀸𑀦𑀼𑀓𑀽𑀮𑀁 𑀦 𑀪𑀯𑀢𑀺, 𑀢𑀲𑁆𑀫𑀸 𑀦 𑀤𑀲𑁆𑀲𑀺𑀢𑀁 𑀅𑀫𑁆𑀳𑁂𑀳𑀺.

𑀝𑀓𑀸𑀭𑀦𑁆𑀢𑀥𑀸𑀢𑀼

𑀖𑀝𑁆𑀝 𑀖𑀝𑁆𑀝𑀦𑁂. 𑀖𑀝𑁆𑀝𑀦𑀁 𑀯𑀸𑀬𑀸𑀫𑀓𑀭𑀡𑀁. 𑀖𑀝𑁆𑀝𑁂𑀢𑀺, 𑀖𑀝𑁆𑀝𑀬𑀢𑀺. 𑀏𑀢𑁆𑀣 𑀢𑀼 ‘‘𑀖𑀝𑁆𑀝𑁂𑀲𑀺, 𑀖𑀝𑁆𑀝𑁂𑀲𑀺, 𑀓𑀺𑀁𑀓𑀸𑀭𑀡𑀸 𑀖𑀝𑁆𑀝𑁂𑀲𑀺, 𑀅𑀳𑀁 𑀢𑀁 𑀚𑀸𑀦𑀸𑀫𑀻’’𑀢𑀺 𑀦𑀺𑀤𑀲𑁆𑀲𑀦𑀁.

𑀖𑀝 𑀲𑀗𑁆𑀖𑀸𑀢𑁂. 𑀧𑀼𑀩𑁆𑀩𑁂 𑀯𑀺𑀬 𑀓𑁆𑀭𑀺𑀬𑀸𑀧𑀤𑀸𑀦𑀺, 𑀦𑀸𑀫𑀺𑀓𑀢𑁆𑀢𑁂 ‘‘𑀖𑀝𑁄, 𑀖𑀝𑀸’’𑀢𑀺 𑀭𑀽𑀧𑀸𑀦𑀺. 𑀏𑀢𑁆𑀣 𑀕𑀝𑁄𑀢𑀺 𑀧𑀸𑀦𑀻𑀬𑀖𑀝𑁄. 𑀖𑀝𑀸𑀢𑀺 𑀲𑀫𑀽𑀳𑁄 ‘‘𑀫𑀘𑁆𑀙𑀖𑀝𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀖𑀝𑁆𑀝 𑀘𑀮𑀦𑁂. 𑀖𑀝𑁆𑀝𑁂𑀢𑀺, 𑀖𑀝𑁆𑀝𑀬𑀢𑀺.

𑀦𑀝 𑀅𑀯𑀲𑀦𑁆𑀤𑀦𑁂. 𑀅𑀯𑀲𑀦𑁆𑀤𑀦𑀁 𑀕𑀢𑁆𑀢𑀯𑀺𑀓𑁆𑀔𑁂𑀧𑁄. 𑀦𑀝𑁂𑀢𑀺, 𑀦𑀝𑀬𑀢𑀺.

𑀘𑀼𑀝 𑀙𑀼𑀝 𑀓𑀼𑀝𑁆𑀝 𑀙𑁂𑀤𑀦𑁂. 𑀘𑀼𑀝𑁂𑀢𑀺, 𑀘𑀼𑀝𑀬𑀢𑀺. 𑀙𑀼𑀝𑁂𑀢𑀺, 𑀙𑀼𑀝𑀬𑀢𑀺. 𑀓𑀼𑀝𑁆𑀝𑁂𑀢𑀺, 𑀓𑀼𑀝𑁆𑀝𑀬𑀢𑀺.