𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑀁

𑀥𑀸𑀢𑀼𑀫𑀸𑀮𑀸

𑁧𑁫. 𑀲𑀭𑀯𑀕𑁆𑀕𑀧𑀜𑁆𑀘𑀓𑀦𑁆𑀢𑀺𑀓 𑀲𑀼𑀤𑁆𑀥𑀲𑁆𑀲𑀭𑀥𑀸𑀢𑀼

𑀇𑀢𑁄 𑀧𑀭𑀁 𑀢𑀼 𑀲𑀭𑀢𑁄, 𑀓𑀓𑀸𑀭𑀦𑁆𑀢𑀸𑀤𑀺𑀪𑁂𑀤𑀢𑁄;

𑀥𑀸𑀢𑀼𑀬𑁄 𑀥𑀸𑀢𑀼𑀦𑀺𑀧𑁆𑀨𑀦𑁆𑀦-𑀭𑀽𑀧𑀸𑀦𑀺 𑀯𑀺𑀯𑀺𑀥𑀸𑀦𑀺 𑀘.

𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀫𑁆𑀳𑀺, 𑀚𑀺𑀦𑀧𑀸𑀞𑁂 𑀬𑀣𑀸𑀩𑀮𑀁;

𑀦𑀬𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀲𑀫𑀸𑀲𑁂𑀦 𑀓𑀣𑁂𑀲𑁆𑀲’𑀳𑀁.

𑀇 𑀕𑀢𑀺𑀬𑀁. 𑀬𑁂𑀲𑀁 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀧𑀸𑀧𑀼𑀡𑀸𑀦𑀺𑀧𑀺. 𑀢𑀢𑁆𑀭 𑀕𑀫𑀦𑀁 𑀤𑀼𑀯𑀺𑀥𑀁 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘. 𑀢𑁂𑀲𑀼 𑀓𑀸𑀬𑀕𑀫𑀦𑀁 𑀦𑀸𑀫 𑀇𑀭𑀺𑀬𑀸𑀧𑀣𑀕𑀫𑀦𑀁, 𑀜𑀸𑀡𑀕𑀫𑀦𑀁 𑀦𑀸𑀫 𑀜𑀸𑀡𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀧𑀬𑁄𑀕𑀸𑀦𑀼𑀭𑀽𑀧𑁂𑀦 ‘‘𑀕𑀘𑁆𑀙𑀢𑀻’’𑀢𑀺 𑀧𑀤𑀲𑁆𑀲 ‘‘𑀚𑀸𑀦𑀸𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀧𑀯𑀢𑁆𑀢𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀧𑀸𑀧𑀼𑀡𑀸𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, 𑀇𑀭𑀺𑀬𑀸𑀧𑀣𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, 𑀜𑀸𑀡𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺. 𑀢𑀣𑀸 𑀳𑀺 ‘‘𑀲𑀻𑀖𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀇𑀭𑀺𑀬𑀸𑀧𑀣𑀕𑀫𑀦𑀁 ‘‘𑀕𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀦𑁆𑀤𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄. ‘‘𑀕𑀢𑀺𑀫𑀸’’𑀢𑀺𑀆𑀤𑀻𑀲𑀼 𑀧𑀦 𑀜𑀸𑀡𑀕𑀫𑀦𑀁. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀕𑀢𑁆𑀬𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀬𑀣𑀸𑀧𑀬𑁄𑀕𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀲𑁆𑀲𑀺𑀫𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 𑀇𑀢𑀺, 𑀏𑀢𑀺, 𑀉𑀤𑁂𑀢𑀺. 𑀓𑀸𑀭𑀺𑀢𑁂 ‘‘𑀉𑀤𑀸𑀬𑀢𑀻’’𑀢𑀺 𑀭𑀽𑀧𑀁 𑀪𑀯𑀢𑀺. 𑀉𑀝𑁆𑀞𑀸𑀧𑁂𑀢𑀻𑀢𑀺 𑀳𑀺 𑀅𑀢𑁆𑀣𑁄, 𑀤𑀼𑀓𑀸𑀭𑁄 𑀆𑀕𑀫𑁄. 𑀉𑀧𑁂𑀢𑀺, 𑀲𑀫𑀼𑀧𑁂𑀢𑀺, 𑀯𑁂𑀢𑀺, 𑀅𑀧𑁂𑀢𑀺, 𑀅𑀯𑁂𑀢𑀺, 𑀅𑀦𑁆𑀯𑁂𑀢𑀺, 𑀲𑀫𑁂𑀢𑀺, 𑀅𑀪𑀺𑀲𑀫𑁂𑀢𑀺, 𑀲𑀫𑀬𑁄, 𑀅𑀪𑀺𑀲𑀫𑀬𑁄, 𑀈𑀤𑀺, 𑀉𑀤𑀺, 𑀏𑀓𑁄𑀤𑀺, 𑀧𑀡𑁆𑀟𑀺𑀢𑁄, 𑀇𑀢𑁄, 𑀉𑀤𑀺𑀢𑁄, 𑀉𑀧𑁂𑀢𑁄, 𑀲𑀫𑀼𑀧𑁂𑀢𑁄, 𑀅𑀦𑁆𑀯𑀺𑀢𑁄, 𑀅𑀧𑁂𑀢𑁄, 𑀲𑀫𑁂𑀢𑁄, 𑀏𑀢𑀩𑁆𑀩𑁄, 𑀧𑀘𑁆𑀘𑁂𑀢𑀩𑁆𑀩𑁄, 𑀧𑀝𑀺𑀬𑀫𑀸𑀦𑁄, 𑀧𑀝𑀺𑀘𑁆𑀘𑁄, 𑀏𑀦𑁆𑀢𑁄, 𑀅𑀥𑀺𑀧𑁆𑀧𑁂𑀢𑁄, 𑀅𑀥𑀺𑀧𑁆𑀧𑀸𑀬𑁄, 𑀧𑀘𑁆𑀘𑀬𑁄, 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀇𑀢𑀸, 𑀇𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦𑀧𑀺. 𑀧𑀘𑁆𑀘𑁂𑀢𑀼𑀁, 𑀉𑀧𑁂𑀢𑀼𑀁, 𑀲𑀫𑀼𑀧𑁂𑀢𑀼𑀁, 𑀅𑀦𑁆𑀯𑁂𑀢𑀼𑀁, 𑀲𑀫𑁂𑀢𑀼𑀁, 𑀅𑀪𑀺𑀲𑀫𑁂𑀢𑀼𑀁, 𑀇𑀘𑁆𑀘, 𑀧𑀝𑀺𑀘𑁆𑀘, 𑀲𑀫𑁂𑀘𑁆𑀘, 𑀅𑀪𑀺𑀲𑀫𑁂𑀘𑁆𑀘, 𑀅𑀧𑁂𑀘𑁆𑀘, 𑀉𑀧𑁂𑀘𑁆𑀘, 𑀧𑀝𑀺𑀫𑀼𑀔𑀁 𑀇𑀢𑁆𑀯𑀸, 𑀇𑀢𑁆𑀯𑀸𑀦, 𑀉𑀧𑁂𑀢𑁆𑀯𑀸, 𑀉𑀧𑁂𑀢𑁆𑀯𑀸𑀦, 𑀉𑀧𑁂𑀢𑀼𑀦, 𑀅𑀜𑁆𑀜𑀸𑀦𑀺𑀧𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀢𑁄 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀇𑀢𑀺𑀇𑀢𑀺 𑀓𑁆𑀭𑀺𑀬𑀸𑀲𑀤𑁆𑀤𑁄, 𑀲𑀼𑀢𑁆𑀢𑀦𑁆𑀢𑁂𑀲𑀼 𑀦 𑀤𑀺𑀲𑁆𑀲𑀢𑀺;

𑀇𑀤𑀫𑁂𑀢𑁆𑀣 𑀦 𑀯𑀢𑁆𑀢𑀩𑁆𑀩𑀁, 𑀤𑀲𑁆𑀲𑀦𑀸𑀬𑁂𑀯 𑀫𑁂 𑀭𑀼𑀢𑁄.

‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦’’, 𑀇𑀢𑀺 𑀧𑀸𑀴𑀺 𑀳𑀺 𑀤𑀺𑀲𑁆𑀲𑀢𑀺;

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀫𑁆𑀳𑀺, 𑀫𑀼𑀦𑀺𑀦𑀸𑀳𑀘𑁆𑀘 𑀪𑀸𑀲𑀺𑀢𑀸;

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀓𑁄𑀥𑀁 𑀦𑀺𑀦𑁆𑀤𑀦𑁆𑀢𑁂𑀦 𑁋

‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦, 𑀫𑀘𑁆𑀘𑀼𑀯𑁂𑀲𑁄 𑀕𑀼𑀳𑀸𑀲𑀬𑁄;

𑀢𑀁 𑀤𑀫𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑁂, 𑀧𑀜𑁆𑀜𑀸𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸’’𑀢𑀺.

𑀢𑀢𑁆𑀭 𑀇𑀢𑀸𑀬𑀦𑁆𑀢𑀺 𑀇𑀢𑀺 𑀅𑀬𑀦𑁆𑀢𑀺 𑀙𑁂𑀤𑁄. 𑀇𑀢𑀺𑀇𑀢𑀺 𑀘 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀼𑀢𑁆𑀢𑀧𑀤𑀢𑁆𑀣𑁄 𑁋 𑀬𑁄 𑀤𑁄𑀲𑁄 𑀮𑁄𑀓𑁂 ‘‘𑀓𑁄𑀥𑁄’’𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀯𑀼𑀘𑁆𑀘𑀢𑀺, 𑀦𑀸𑀬𑀁 𑀅𑀢𑁆𑀣𑀢𑁄 𑀓𑁄𑀥𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀓𑀺𑀦𑁆𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄, 𑀏𑀲𑁄 𑀳𑀺 𑀲𑀭𑀻𑀭𑀲𑀗𑁆𑀔𑀸𑀢𑀕𑀼𑀳𑀸𑀲𑀬𑁄 𑀫𑀘𑁆𑀘𑀼𑀭𑀸𑀚𑀸 𑀏𑀯 𑀓𑁄𑀥𑀯𑀲𑁂𑀦 𑀧𑀫𑀤𑁆𑀤𑀦𑁆𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁂 𑀕𑀘𑁆𑀙𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀢𑀁 𑀏𑀯𑀭𑀽𑀧𑀁 ‘‘𑀫𑀘𑁆𑀘𑀼𑀭𑀸𑀚𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀓𑀭𑀁 𑀓𑁄𑀥𑀁 𑀳𑀺𑀢𑀓𑀸𑀫𑁄 𑀤𑀫𑁂𑀦 𑀧𑀜𑁆𑀜𑀸𑀬 𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸 𑀘 𑀙𑀺𑀦𑁆𑀤𑁂𑀬𑁆𑀬𑀸𑀢𑀺.

𑀏𑀢𑀻𑀢𑀺 𑀇𑀫𑀲𑁆𑀲 𑀧𑀦 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀢𑀻’’𑀢𑀺 𑀏𑀢𑁆𑀣 𑀳𑀺 𑀆𑀉𑀧𑀲𑀕𑁆𑀕𑁄 𑀲𑀦𑁆𑀥𑀺𑀓𑀺𑀘𑁆𑀘𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀧𑀸𑀓𑀝𑁄 𑀯𑀮𑀸𑀳𑀓𑀸𑀯𑀢𑁆𑀣𑀭𑀺𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬. 𑀢𑀣𑀸 𑀳𑀺 𑀏𑀢𑁆𑀣 𑀆 𑀇𑀢𑀺 𑀏𑀢𑀻𑀢𑀺 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 𑀪𑀯𑀢𑀺, 𑀆𑀓𑀸𑀭𑀲𑁆𑀲 𑀘 𑀇𑀓𑀸𑀭𑁂𑀦 𑀧𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀏𑀓𑀸𑀭𑀸𑀤𑁂𑀲𑁄. 𑀢𑀲𑁆𑀫𑀸 ‘‘𑀅𑀬𑀁 𑀲𑁄 𑀲𑀸𑀭𑀣𑀻 𑀏𑀢𑀺. 𑀏𑀢𑀼 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸’’𑀢𑀺𑀆𑀤𑀻𑀲𑀼 ‘‘𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄. 𑀩𑁆𑀬𑀸𑀓𑀭𑀡𑀲𑀢𑁆𑀣𑁂𑀧𑀺 𑀳𑀺 𑀆 𑀇𑀢𑀺 𑀏𑀢𑀻𑀢𑀺 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀅𑀣 𑀯𑀸 𑀇𑀢𑀻𑀢𑀺 𑀭𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀁 𑀧𑀤𑀁 𑀕𑀫𑀦𑀁 𑀩𑁄𑀥𑁂𑀢𑀺, 𑀏𑀢𑀻𑀢𑀺 𑀯𑀼𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁 𑀧𑀦 𑀬𑀣𑀸𑀧𑀬𑁄𑀕𑀁 𑀆𑀕𑀫𑀦𑀸𑀤𑀻𑀦𑀺. 𑀫𑀢𑁆𑀢𑀸𑀯𑀲𑁂𑀦𑀧𑀺 𑀳𑀺 𑀧𑀤𑀸𑀦𑀺 𑀲𑀯𑀺𑀲𑁂𑀲𑀢𑁆𑀣𑀸𑀦𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄𑀢𑀺. 𑀲𑀜𑁆𑀜𑁄𑀕𑀸𑀲𑀜𑁆𑀜𑁄𑀕𑀯𑀲𑁂𑀦𑀧𑀺, 𑀢𑀁 𑀬𑀣𑀸? 𑀕𑀸𑀫𑀸 𑀦𑀺𑀕𑁆𑀕𑀘𑁆𑀙𑀢𑀺. 𑀬𑀲𑀁 𑀧𑁄𑀲𑁄 𑀦𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀇 𑀕𑀢𑀺𑀬𑀦𑁆𑀢𑀺 𑀓𑀣𑀺𑀢𑀸, 𑀥𑀸𑀢𑀼 𑀯𑀼𑀤𑁆𑀥𑀺𑀁 𑀕𑀢𑀸 𑀬𑀤𑀸;

𑀢𑀤𑀸 𑀆𑀕𑀫𑀦𑀢𑁆𑀣𑀲𑁆𑀲, 𑀯𑀸𑀘𑀺𑀓𑀸 𑀧𑀸𑀬𑀢𑁄 𑀯𑀲𑀸.

𑀇𑀭𑀺𑀬𑀸𑀧𑀣𑀢𑁆𑀣𑀢𑁄 𑀳𑁂-𑀲𑀸 𑀦𑀺𑀘𑁆𑀘𑀸𑀕𑀫𑀯𑀸𑀘𑀺𑀓𑀸;

‘‘𑀅𑀬𑀁 𑀲𑁄 𑀲𑀸𑀭𑀣𑀻 𑀏𑀢𑀺’’, 𑀇𑀘𑁆𑀘𑀸𑀤𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀦𑀺𑀭𑀺𑀬𑀸𑀧𑀣𑀢𑁆𑀣𑁂𑀦, 𑀯𑀢𑁆𑀢𑀦𑁂 𑀕𑀫𑀦𑁂𑀧𑀺 𑀘;

𑀆𑀕𑀫𑀦𑁂 𑀘 𑀳𑁄𑀢𑀻𑀢𑀺, 𑀥𑀻𑀫𑀸 𑀮𑀓𑁆𑀔𑁂𑀬𑁆𑀬 𑀢𑀁 𑀬𑀣𑀸.

‘‘𑀧𑀝𑀺𑀘𑁆𑀘 𑀨𑀮𑀫𑁂𑀢𑀻’’𑀢𑀺, 𑀏𑀯𑀫𑀸𑀤𑀻𑀲𑀼 𑀯𑀢𑁆𑀢𑀦𑁂;

𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀇𑀓𑀸𑀭𑀯𑁆𑀳𑀸, 𑀏𑀲𑀸 𑀥𑀸𑀢𑀼 𑀧𑀯𑀢𑁆𑀢𑀢𑀺.

‘‘𑀅𑀢𑁆𑀣𑀫𑁂𑀦𑁆𑀢𑀫𑁆𑀳𑀺 𑀲𑀽𑀭𑀺𑀬𑁂, 𑀯𑀸𑀴𑀸’’ 𑀇𑀘𑁆𑀘𑀸𑀤𑀻𑀲𑀼 𑀧𑀦;

𑀕𑀢𑁂, ‘‘𑀏𑀢𑀻𑀢𑀺 𑀇𑀢𑀻’’𑀢𑀺-𑀆𑀤𑀺𑀲𑁆𑀯𑀸𑀕𑀫𑀦𑁂 𑀲𑀺𑀬𑀸.

𑀢𑀣𑀸 𑀳𑀺 𑀈𑀢𑀻𑀢𑀺 𑀅𑀦𑀢𑁆𑀣𑀸𑀬 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀈𑀢𑀺, 𑀉𑀧𑀤𑁆𑀤𑀯𑁄, 𑀇𑀢𑀺 𑀆𑀕𑀫𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀆𑀳 𑀘 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀪𑀸𑀕𑀻𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀇𑀤𑀸𑀦𑀺 𑀬𑀣𑀸𑀭𑀳𑀁 𑀦𑀺𑀧𑀸𑀢𑀸𑀔𑁆𑀬𑀸𑀢𑀦𑀸𑀫𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀇𑀢𑀺𑀇𑀢𑁄 𑀲𑀤𑁆𑀤𑀸𑀦𑀫𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑀤𑀢𑁆𑀣 𑀯𑀺𑀧𑀭𑀺𑀬𑀸𑀬 𑀧𑀓𑀸𑀭𑀸𑀯𑀥𑀸𑀭𑀡 𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 𑀳𑁂𑀢𑀼𑀅𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸, 𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 𑀧𑀭𑀺𑀲𑀫𑀸𑀧𑀦𑁂. ‘‘𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 𑀆𑀤𑀺𑀅𑀢𑁆𑀣𑁄. ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀫𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂. ‘‘𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 𑀧𑀓𑀸𑀭𑁄. ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸 𑀆𑀤𑀦𑁆𑀤 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂. ‘‘𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀦𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀦𑀺𑀤𑀲𑁆𑀲𑀦𑁂. 𑀦𑀺𑀧𑀸𑀢𑀯𑀲𑁂𑀦𑁂𑀯 𑀢𑁂 𑀧𑀬𑁄𑀕𑀸 𑀕𑀳𑁂𑀢𑀩𑁆𑀩𑀸. ‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦𑀸’’𑀢𑀺 𑀏𑀢𑁆𑀣 𑀧𑀦 𑀆𑀔𑁆𑀬𑀸𑀢𑀯𑀲𑁂𑀦 𑀕𑀫𑀦𑁂 𑀇𑀢𑀺𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦𑀺𑀧𑀸𑀢𑀢𑁆𑀣𑁄 𑀧𑀦 𑀦 𑀇𑀘𑁆𑀙𑀺𑀢𑀩𑁆𑀩𑁄, 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀕𑁆𑀕𑀳𑀡𑁂 𑀓𑁄𑀲𑀮𑁆𑀮𑀼𑀧𑀸𑀤𑀦𑀢𑁆𑀣𑀁 𑀓𑁂𑀯𑀮𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀆𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑁄 𑀧𑀦 𑁋

𑀕𑀢𑁆𑀬𑀢𑁆𑀣𑁂 𑀘𑀺𑀫𑀲𑀤𑁆𑀤𑀢𑁆𑀣𑁂, 𑀇𑀢𑁄𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀅𑀦𑁆𑀯𑀺𑀢𑁄’’𑀢𑀺 𑀳𑀺 𑀕𑀢𑁆𑀬𑀢𑁆𑀣𑁂, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑁂.

𑀇𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑁆𑀳𑀺, 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑁂;

‘‘𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸’’, 𑀇𑀢𑀺𑀆𑀤𑀻𑀲𑀼 𑀧𑀸𑀴𑀺𑀲𑀼.

𑀕𑀢𑁆𑀬𑀢𑁆𑀣𑁄 𑀇𑀘𑁆𑀙𑀺𑀢𑁄 𑀏𑀢𑁆𑀣, 𑀇𑀢𑀭𑀢𑁆𑀣𑁄 𑀦 𑀇𑀘𑁆𑀙𑀺𑀢𑁄;

𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑀸 𑀯𑀼𑀢𑁆𑀢𑁄, 𑀓𑁄𑀲𑀮𑁆𑀮𑀢𑁆𑀣𑀸𑀬 𑀯𑀺𑀜𑁆𑀜𑀼𑀦𑀁.

𑀇𑀥 𑀧𑀦 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀲𑀦𑀺𑀩𑁆𑀩𑀘𑀦𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀅𑀯𑀢𑁆𑀯𑀸 𑀉𑀧𑀭𑀺 𑀅𑀬𑀥𑀸𑀢𑀼𑀯𑀺𑀲𑀬𑁂𑀬𑁂𑀯 𑀯𑀓𑁆𑀔𑀸𑀫 𑀇 𑀏 𑀅𑀬𑀥𑀸𑀢𑀼𑀯𑀲𑁂𑀦 𑀢𑀺𑀥𑀸𑀢𑀼𑀫𑀬𑀢𑁆𑀢𑀸 𑀲𑀫𑀬𑀲𑀤𑁆𑀤𑀲𑁆𑀲. 𑀢𑀢𑁆𑀭 𑀇𑀢𑀻𑀢𑀺 𑀇𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀘 ‘‘𑀏𑀢𑀺, 𑀉𑀤𑁂𑀢𑀻’’𑀢𑀺𑀆𑀤𑀻𑀦𑀜𑁆𑀘 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀏𑀯𑀭𑀽𑀧𑀸𑀦𑀁 𑀧𑀤𑀫𑀸𑀮𑀸 𑀬𑀣𑀸𑀭𑀳𑀁 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀦𑁄𑀧𑀤𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀤𑀼𑀓𑁆𑀓𑀭𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸. 𑀬𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀼𑀓𑀭𑀸 𑀘 𑀤𑀼𑀓𑁆𑀓𑀭𑀸 𑀘 𑀢𑁆𑀬𑀦𑁆𑀢𑀧𑀤𑀫𑀸𑀮𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀪𑀽𑀯𑀸𑀤𑀺𑀕𑀡𑀸𑀤𑀻𑀲𑀼 𑀅𑀝𑁆𑀞𑀲𑀼 𑀕𑀡𑁂𑀲𑀼 𑀯𑀺𑀳𑀺𑀢𑁂𑀳𑀺 𑀙𑀦𑁆𑀦𑀯𑀼𑀢𑀺𑀬𑀸 𑀯𑀘𑀦𑁂𑀳𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀅𑀲𑀩𑁆𑀩𑀲𑀸𑀥𑀸𑀭𑀡𑀜𑁆𑀘 𑀧𑀤𑀫𑀸𑀮𑀸𑀦𑀬𑀁 𑀩𑁆𑀭𑀽𑀫 𑁋

𑀅𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀁 𑀧𑀦𑁆𑀢𑀺𑀬𑁄 𑀩𑀼𑀥𑁄;

𑀪𑀯𑀢𑀺 𑀭𑀼𑀦𑁆𑀥𑀢𑀸𑀤𑀻𑀦𑀁, 𑀬𑁄𑀚𑁂 𑀲𑀩𑁆𑀩𑀢𑁆𑀣 𑀲𑀩𑁆𑀩𑀣𑀸.

𑀇𑀢𑀺 𑀏𑀢𑀻’’𑀢𑀺 𑀘𑁂𑀢𑁂𑀲𑀁, 𑀧𑀤𑀸𑀦𑀁 𑀧𑀦 𑀧𑀦𑁆𑀢𑀺𑀬𑁄;

𑀲𑀼𑀤𑁆𑀥𑀲𑁆𑀲𑀭𑀧𑀼𑀩𑁆𑀩𑀓𑀸𑀦𑀁, 𑀬𑁄𑀚𑁂 𑀯𑀺𑀜𑁆𑀜𑀽 𑀬𑀣𑀸𑀭𑀳𑀁.

𑀆𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀜𑁆𑀘𑀸𑀧𑀺 𑀧𑀦𑁆𑀢𑀺𑀬𑁄;

‘‘𑀬𑀸𑀢𑀺 𑀲𑀼𑀡𑀸𑀢𑀺 𑀅𑀲𑁆𑀦𑀸-𑀢𑀺’’ 𑀇𑀘𑁆𑀘𑀸𑀤𑀻𑀦𑀁 𑀬𑀣𑀸𑀭𑀳𑀁.

𑀇𑀯𑀡𑁆𑀡𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑀧𑀺 𑀧𑀸𑀴𑀺𑀬𑁄;

𑀬𑁄𑀚𑁂 ‘‘𑀭𑀼𑀦𑁆𑀥𑀺𑀢𑀺 𑀭𑀼𑀦𑁆𑀥𑀻𑀢𑀺’’-𑀇𑀘𑁆𑀘𑀸𑀤𑀻𑀦𑀁 𑀬𑀣𑀸𑀭𑀳𑀁.

𑀉𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀲𑀼𑀢𑀺𑀇𑀢𑀺 𑀧𑀤𑀲𑁆𑀲 𑀘;

𑀧𑁂𑀭𑀡𑀢𑁆𑀣𑁂 𑀧𑀯𑀢𑁆𑀢𑀲𑁆𑀲, 𑀬𑁄𑀚𑁂 𑀫𑀸𑀮𑀁 𑀬𑀣𑀸𑀭𑀳𑀁.

𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑁆𑀧𑀺 𑀬𑀣𑀸𑀭𑀳𑀁;

‘‘𑀚𑁂𑀢𑀺 𑀭𑀼𑀦𑁆𑀥𑁂𑀢𑀺 𑀓𑀸𑀭𑁂𑀢𑀺, 𑀓𑀸𑀭𑀸𑀧𑁂𑀢𑀻’’𑀢𑀺𑀆𑀤𑀻𑀦𑀁.

𑀑𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑁆𑀧𑀺 𑀧𑀤𑀓𑁆𑀓𑀫𑁂;

‘‘𑀓𑀭𑁄𑀢𑀺 𑀪𑁄𑀢𑀺 𑀳𑁄𑀢𑀻’’𑀢𑀺-𑀆𑀤𑀻𑀦𑀁 𑀬𑀼𑀢𑁆𑀢𑀺𑀢𑁄𑀯𑀤𑁂;

𑀇𑀘𑁆𑀘𑁂𑀯𑀁 𑀲𑀢𑁆𑀢𑀥𑀸 𑀯𑀼𑀢𑁆𑀢𑁄, 𑀧𑀤𑀫𑀸𑀮𑀸𑀦𑀬𑁄 𑀫𑀬𑀸;

𑀇𑀢𑁄 𑀫𑀼𑀢𑁆𑀢𑁄 𑀦𑀬𑁄 𑀦𑀸𑀫, 𑀦𑀢𑁆𑀣𑀺 𑀓𑁄𑀘𑀺 𑀓𑁆𑀭𑀺𑀬𑀸𑀧𑀤𑁂.

‘‘𑀆𑀤𑀢𑁆𑀢𑁂 𑀓𑀼𑀭𑀼𑀢𑁂 𑀧𑁂𑀢𑁂’’, 𑀇𑀘𑁆𑀘𑀸𑀤𑀺 𑀦𑀬𑀤𑀲𑁆𑀲𑀦𑀸;

𑀬𑀣𑀸𑀭𑀳𑀁 𑀬𑀼𑀢𑁆𑀢𑀺𑀢𑁄𑀢𑀺, 𑀯𑀘𑀦𑀁 𑀏𑀢𑁆𑀣 𑀪𑀸𑀲𑀺𑀢𑀁.

𑀇𑀤𑀸𑀦𑀺 𑀇𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀓𑀫𑁄 𑀯𑀼𑀘𑁆𑀘𑀢𑁂 𑁋 𑀇𑀢𑀺, 𑀇𑀦𑁆𑀢𑀺. 𑀇𑀲𑀺, 𑀇𑀣. 𑀇𑀫𑀺, 𑀇𑀫. 𑀅𑀧𑀭𑀺𑀧𑀼𑀡𑁆𑀡𑁄 𑀯𑀢𑁆𑀢𑀫𑀸𑀦𑀸𑀦𑀬𑁄. 𑀇𑀢𑀼, 𑀇𑀦𑁆𑀢𑀼. 𑀇𑀳𑀺, 𑀇𑀣. 𑀇𑀫𑀺, 𑀇𑀫. 𑀅𑀧𑀭𑀺𑀧𑀼𑀡𑁆𑀡𑁄 𑀧𑀜𑁆𑀘𑀫𑀻𑀦𑀬𑁄. 𑀏𑀢𑁆𑀣 𑀘 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀸𑀲𑀦𑀸𑀦𑀼𑀭𑀽𑀧𑀪𑀸𑀯𑀲𑁆𑀲 𑀇𑀫𑀸𑀦𑀺 𑀲𑀸𑀥𑀓𑀧𑀤𑀸𑀦𑀺 ‘‘𑀯𑁂𑀢𑀺, 𑀅𑀧𑁂𑀢𑀺, 𑀅𑀦𑁆𑀯𑁂𑀢𑀻’’𑀢𑀺. 𑀢𑀢𑁆𑀣 𑀯𑀺 𑀇𑀢𑀺 𑀯𑁂𑀢𑀺. 𑀯𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄, 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀕𑀫𑀦𑀁 𑀩𑁄𑀥𑁂𑀢𑀺. 𑀢𑀣𑀸 𑀅𑀧 𑀇𑀢𑀺 𑀅𑀧𑁂𑀢𑀺. 𑀅𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼 𑀇𑀢𑀺 𑀅𑀦𑁆𑀯𑁂𑀢𑀺. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀕𑀭𑀽 𑀧𑀦 𑀅𑀦𑀼 𑀏𑀢𑀺 𑀅𑀦𑁆𑀯𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑁋

‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻;

𑀚𑁂𑀲𑁆𑀲𑀦𑁆𑀢𑀁 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀲𑀫𑁂𑀲𑀼 𑀯𑀺𑀲𑀫𑁂𑀲𑀼 𑀘;

𑀏𑀯𑀁 𑀢𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀧𑀼𑀢𑁆𑀢𑁂 𑀆𑀤𑀸𑀬 𑀧𑀘𑁆𑀙𑀢𑁄’’𑀢𑀺.

𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺 ‘‘𑀚𑁂𑀲𑁆𑀲𑀦𑁆𑀢𑀁 𑀅𑀦𑁆𑀯𑁂𑀢𑀻’’𑀢𑀺 𑀯𑀘𑀦𑀢𑁄 ‘‘𑀅𑀦𑀼𑀕𑀘𑁆𑀙𑀸𑀫𑀻’’𑀢𑀺 𑀯𑀘𑀦𑀢𑁄 𑀘. 𑀢𑀣𑀸 𑀳𑀺 𑀏𑀢𑀺𑀲𑀤𑁆𑀤𑁄 𑀬𑀢𑁆𑀣 𑀘𑁂 𑀇𑀭𑀺𑀬𑀸𑀧𑀣𑀯𑀸𑀘𑀓𑁄, 𑀢𑀢𑁆𑀣 𑀆𑀕𑀫𑀦𑀁𑀬𑁂𑀯 𑀚𑁄𑀢𑁂𑀢𑀺, 𑀦 𑀕𑀫𑀦𑀁, 𑀢𑀲𑁆𑀫𑀸 𑀆𑀕𑀫𑀦𑀢𑁆𑀣𑀲𑁆𑀲 𑀅𑀬𑀼𑀢𑁆𑀢𑀺𑀢𑁄 𑀕𑀫𑀦𑀢𑁆𑀣𑀲𑁆𑀲 𑀘 𑀬𑀼𑀢𑁆𑀢𑀺𑀢𑁄 𑀯𑀺 𑀇𑀢𑀺𑀆𑀤𑀺𑀦𑀸 𑀙𑁂𑀤𑁄 𑀜𑁂𑀬𑁆𑀬𑁄. 𑀏𑀢𑁂𑀲𑀜𑁆𑀘 𑀇𑀢𑀺𑀲𑀤𑁆𑀤𑀯𑀲𑁂𑀦 𑀓𑀢𑀙𑁂𑀤𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀬𑀼𑀢𑁆𑀢𑀺𑀪𑀸𑀯𑀜𑁆𑀘 ‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦𑀸’’𑀢𑀺 𑀧𑀸𑀴𑀺𑀬𑁂𑀯 𑀲𑀸𑀥𑁂𑀢𑀺, 𑀢𑀲𑁆𑀫𑀸𑀬𑁂𑀯 ‘‘𑀅𑀦𑀼 𑀇𑀢𑀺, 𑀅𑀦𑀼 𑀇𑀦𑁆𑀢𑀺, 𑀅𑀦𑀼 𑀇𑀲𑀻’’𑀢𑀺𑀆𑀤𑀺𑀦𑀸 ‘‘𑀅𑀦𑁆𑀯𑁂𑀢𑀻’’𑀢𑀺𑀆𑀤𑀻𑀦𑀁 𑀙𑁂𑀤𑁂 𑀮𑀩𑁆𑀪𑀫𑀸𑀦𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀦𑀬𑁄 𑀧𑀭𑀲𑁆𑀲𑀧𑀤𑀯𑀲𑁂𑀦 𑀤𑀲𑁆𑀲𑀺𑀢𑁄. 𑀲𑀢𑁆𑀢𑀫𑀻𑀭𑀽𑀧𑀸𑀤𑀻𑀦𑀺 𑀲𑀩𑁆𑀩𑀣𑀸 𑀅𑀧𑁆𑀧𑀲𑀺𑀤𑁆𑀥𑀸𑀦𑀺.

𑀇𑀫𑀸𑀦𑀺 𑀧𑀦 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀸𑀦𑀺, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺. 𑀇𑀲𑁆𑀲𑀢𑀺, 𑀇𑀲𑁆𑀲𑀦𑁆𑀢𑀺. 𑀇𑀲𑁆𑀲𑀲𑀺, 𑀇𑀲𑁆𑀲𑀣. 𑀇𑀲𑁆𑀲𑀸𑀫𑀺, 𑀇𑀲𑁆𑀲𑀸𑀫. 𑀇𑀲𑁆𑀲𑀢𑁂, 𑀇𑀲𑁆𑀲𑀦𑁆𑀢𑁂. 𑀇𑀲𑁆𑀲𑀲𑁂, 𑀇𑀲𑁆𑀲𑀯𑁆𑀳𑁂. 𑀇𑀲𑁆𑀲𑀁, 𑀇𑀲𑁆𑀲𑀸𑀫𑁆𑀳𑁂. 𑀅𑀲𑀩𑁆𑀩𑀥𑀸𑀢𑀼𑀓𑀢𑁆𑀢𑁂𑀧𑀺 𑀲𑀼𑀤𑁆𑀥𑀲𑁆𑀲𑀭𑀢𑁆𑀢𑀸 𑀥𑀸𑀢𑀼𑀲𑁆𑀲 𑀇𑀓𑀸𑀭𑀸𑀕𑀫𑁄 𑀦 𑀮𑀩𑁆𑀪𑀢𑀺. 𑀧𑀭𑀺𑀧𑀼𑀡𑁆𑀡𑁄 𑀪𑀯𑀺𑀲𑁆𑀲𑀦𑁆𑀢𑀻𑀦𑀬𑁄.

𑀅𑀣 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀇𑀲𑁆𑀲𑀸, 𑀇𑀲𑁆𑀲𑀁𑀲𑀼. 𑀇𑀲𑁆𑀲𑁂, 𑀇𑀲𑁆𑀲𑀣. 𑀇𑀲𑁆𑀲𑀁, 𑀇𑀲𑁆𑀲𑀫𑁆𑀳𑀸. 𑀇𑀲𑁆𑀲𑀣, 𑀇𑀲𑁆𑀲𑀺𑀲𑀼. 𑀇𑀲𑁆𑀲𑀲𑁂, 𑀇𑀲𑁆𑀲𑀯𑁆𑀳𑁂. 𑀇𑀲𑁆𑀲𑀁, 𑀇𑀲𑁆𑀲𑀸𑀫𑁆𑀳𑀲𑁂. 𑀓𑀸𑀮𑀸𑀢𑀺𑀧𑀢𑁆𑀢𑀺𑀪𑀸𑀯𑁂 𑀘 𑀅𑀲𑀩𑁆𑀩𑀥𑀸𑀢𑀼𑀓𑀢𑁆𑀢𑁂 𑀘 𑀲𑀦𑁆𑀢𑁂𑀧𑀺 𑀲𑀼𑀤𑁆𑀥𑀲𑁆𑀲𑀭𑀢𑁆𑀢𑀸 𑀥𑀸𑀢𑀼𑀲𑁆𑀲 𑀅𑀓𑀸𑀭𑀺𑀓𑀸𑀭𑀸𑀕𑀫𑁄 𑀦 𑀮𑀩𑁆𑀪𑀢𑀺 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀯𑀸 𑀅𑀦𑀼𑀧𑀧𑀦𑁆𑀦𑀢𑁆𑀢𑀸 𑀘 𑀅𑀓𑀸𑀭𑀸𑀕𑀫𑁄 𑀦 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀜𑁆𑀳𑁂𑀢𑁆𑀣 𑀲𑀼𑀤𑁆𑀥𑀲𑁆𑀲𑀭𑀸𑀦𑀁 𑀅𑀦𑀦𑁆𑀢𑀭𑀺𑀓𑀸𑀦𑀁 𑀏𑀓𑀢𑁄𑀲𑀦𑁆𑀦𑀺𑀧𑀸𑀢𑁄 𑀅𑀦𑀼𑀧𑀧𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑁄 𑀓𑀸𑀮𑀸𑀢𑀺𑀧𑀢𑁆𑀢𑀺𑀦𑀬𑁄.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑁄𑀢𑀽𑀦𑀁 𑀧𑀬𑁄𑀕𑀢𑁆𑀣𑁂𑀲𑀼 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 ‘‘𑀦𑀦𑀼 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡 𑀪𑀜𑁆𑀜𑀫𑀸𑀦𑁂, 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲𑀸’’𑀢𑀺 𑀧𑀸𑀴𑀺𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑁂𑀳𑀺 𑀲𑀩𑁆𑀩𑀲𑁄 𑀲𑀫𑀸𑀦𑀸𑀦𑀺 𑀅𑀲𑀫𑀸𑀦𑀢𑁆𑀣𑀸𑀦𑀺 𑀯𑀢𑁆𑀢𑀫𑀸𑀦𑀺𑀓𑀭𑀽𑀧𑀸𑀦𑀺 𑀘 𑀈𑀲𑀓𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀓𑀸𑀮𑀸𑀢𑀺𑀧𑀢𑁆𑀢𑀻𑀦𑀁 𑀭𑀽𑀧𑀸𑀦𑀺 𑀘 𑀧𑀓𑀸𑀲𑀬𑀺𑀲𑁆𑀲𑀸𑀫 𑁋 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀢𑀸𑀯 ‘‘𑀇𑀲𑁆𑀲𑀢𑀺, 𑀇𑀲𑁆𑀲𑀦𑁆𑀢𑀺. 𑀇𑀲𑁆𑀲𑀲𑀺, 𑀇𑀲𑁆𑀲𑀣𑀸’’𑀢𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀪𑀯𑀺𑀲𑁆𑀲𑀦𑁆𑀢𑀻𑀯𑀲𑁂𑀦 ‘‘𑀇𑀲𑁆𑀲𑀺𑀲𑁆𑀲𑀢𑀺, 𑀇𑀲𑁆𑀲𑀺𑀲𑁆𑀲𑀦𑁆𑀢𑀺. 𑀇𑀲𑁆𑀲𑀺𑀲𑁆𑀲𑀲𑀺, 𑀇𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀧𑀦 ‘‘𑀇𑀲𑁆𑀲𑀺𑀲𑁆𑀲𑀸, 𑀇𑀲𑁆𑀲𑀺𑀲𑁆𑀲𑀁𑀲𑀼. 𑀇𑀲𑁆𑀲𑀺𑀲𑁆𑀲𑁂, 𑀇𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁, 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀅𑀓𑀭𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀥𑀸𑀢𑁆𑀯𑀦𑁆𑀢𑀭𑀯𑀲𑁂𑀦 𑀲𑀁𑀲𑀦𑁆𑀤𑀦𑀸𑀦𑀬𑁄𑀬𑀁.

𑀇𑀤𑀸𑀦𑀺 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀓𑀫𑁄 𑀯𑀼𑀘𑁆𑀘𑀢𑁂 𑁋

𑀏𑀢𑀺, 𑀏𑀦𑁆𑀢𑀺. 𑀏𑀲𑀺, 𑀏𑀣. 𑀏𑀫𑀺, 𑀏𑀫.

𑀏𑀢𑀼, 𑀏𑀦𑁆𑀢𑀼. 𑀏𑀳𑀺, 𑀏𑀣. 𑀏𑀫𑀺, 𑀏𑀫.

𑀦 𑀘 𑀅𑀧𑁆𑀧𑀢𑁆𑀯𑀸 𑀤𑀼𑀓𑁆𑀔𑀦𑁆𑀢𑀁, 𑀯𑀺𑀲𑁆𑀲𑀸𑀲𑀁 𑀏𑀬𑁆𑀬 𑀧𑀡𑁆𑀟𑀺𑀢𑁄;

𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀬𑀤𑀸 𑀢𑁂 𑀧𑀳𑀺𑀡𑀺𑀲𑁆𑀲𑀸𑀫𑀺, 𑀢𑀤𑀸 𑀏𑀬𑁆𑀬𑀸𑀲𑀺 𑀔𑀢𑁆𑀢𑀺𑀬.

𑀏𑀬𑁆𑀬, 𑀏𑀬𑁆𑀬𑀼𑀁. 𑀏𑀬𑁆𑀬𑀸𑀲𑀺, 𑀏𑀬𑁆𑀬𑀸𑀣. 𑀏𑀬𑁆𑀬𑀸𑀫𑀺, 𑀏𑀬𑁆𑀬𑀸𑀫. 𑀏𑀣, 𑀏𑀭𑀁. 𑀏𑀣𑁄, 𑀏𑀬𑁆𑀬𑀸𑀯𑁆𑀳𑁄. 𑀏𑀬𑁆𑀬𑀁, 𑀏𑀬𑁆𑀬𑀸𑀫𑁆𑀳𑁂.

𑀲𑁄 𑀧𑀼𑀭𑀺𑀲𑁄 𑀏𑀬𑁆𑀬, 𑀢𑁂 𑀏𑀬𑁆𑀬𑀼𑀁. 𑀢𑁆𑀯𑀁 𑀏𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀏𑀬𑁆𑀬𑀸𑀣. 𑀅𑀳𑀁 𑀏𑀬𑁆𑀬𑀸𑀫𑀺, 𑀫𑀬𑀁 𑀏𑀬𑁆𑀬𑀸𑀫. 𑀲𑁄 𑀧𑀼𑀭𑀺𑀲𑁄 𑀏𑀣, 𑀢𑁂 𑀏𑀭𑀁. 𑀢𑁆𑀯𑀁 𑀏𑀣𑁄, 𑀢𑀼𑀫𑁆𑀳𑁂 𑀏𑀬𑁆𑀬𑀸𑀯𑁆𑀳𑁄. 𑀅𑀳𑀁 𑀏𑀬𑁆𑀬𑀁, 𑀫𑀬𑀁 𑀏𑀬𑁆𑀬𑀸𑀫𑁆𑀳𑁂.

𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀭𑀽𑀧𑀸𑀦𑀺 𑀲𑀩𑁆𑀩𑀲𑁄 𑀅𑀧𑁆𑀧𑀲𑀺𑀤𑁆𑀥𑀸𑀦𑀺.

𑀏𑀲𑁆𑀲𑀢𑀺, 𑀏𑀲𑁆𑀲𑀦𑁆𑀢𑀺. 𑀏𑀲𑁆𑀲𑀲𑀺, 𑀏𑀲𑁆𑀲𑀣. 𑀏𑀲𑁆𑀲𑀸𑀫𑀺, 𑀏𑀲𑁆𑀲𑀸𑀫. 𑀏𑀲𑁆𑀲𑀢𑁂, 𑀏𑀲𑁆𑀲𑀦𑁆𑀢𑁂. 𑀏𑀲𑁆𑀲𑀲𑁂, 𑀏𑀲𑁆𑀲𑀯𑁆𑀳𑁂. 𑀏𑀲𑁆𑀲𑀁, 𑀏𑀲𑁆𑀲𑀸𑀫𑁆𑀳𑁂.

𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲𑀁.

‘‘𑀅𑀪𑀺𑀤𑁄𑀲𑀕𑀢𑁄 𑀇𑀤𑀸𑀦𑀺 𑀏𑀳𑀻’’𑀢𑀺 𑀯𑀘𑀦𑀤𑀲𑁆𑀲𑀦𑀢𑁄 𑀅𑀧𑀭𑀸𑀦𑀺𑀧𑀺 𑀪𑀯𑀺𑀲𑁆𑀲𑀦𑁆𑀢𑀻𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀳𑀺𑀢𑀺, 𑀏𑀳𑀺𑀦𑁆𑀢𑀺. 𑀏𑀳𑀺𑀲𑀺, 𑀏𑀳𑀺𑀣. 𑀏𑀳𑀺𑀫𑀺, 𑀏𑀳𑀺𑀫. 𑀏𑀳𑀺𑀢𑁂, 𑀏𑀳𑀺𑀦𑁆𑀢𑁂. 𑀏𑀳𑀺𑀲𑁂, 𑀏𑀳𑀺𑀯𑁆𑀳𑁂. 𑀏𑀳𑀺𑀲𑁆𑀲𑀁, 𑀏𑀳𑀺𑀲𑁆𑀲𑀸𑀫𑁆𑀳𑁂.

𑀏𑀲𑁆𑀲𑀸, 𑀏𑀲𑁆𑀲𑀁𑀲𑀼. 𑀏𑀲𑁆𑀲𑁂, 𑀏𑀲𑁆𑀲𑀣. 𑀏𑀲𑁆𑀲𑀁 𑀏𑀲𑁆𑀲𑀸𑀫𑁆𑀳𑀸. 𑀏𑀲𑁆𑀲𑀣, 𑀏𑀲𑁆𑀲𑀺𑀲𑀼. 𑀏𑀲𑁆𑀲𑀲𑁂, 𑀏𑀲𑁆𑀲𑀯𑁆𑀳𑁂. 𑀏𑀲𑁆𑀲𑀺𑀁, 𑀏𑀲𑁆𑀲𑀸𑀫𑁆𑀳𑀲𑁂.

𑀅𑀣𑀸𑀧𑀭𑁄𑀧𑀺 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀓𑁆𑀓𑀫𑁄 𑀪𑀯𑀢𑀺;

𑀉𑀤𑁂𑀢𑀺, 𑀉𑀤𑁂𑀦𑁆𑀢𑀺; 𑀉𑀤𑁂𑀲𑀺, 𑀉𑀤𑁂𑀣; 𑀉𑀤𑁂𑀫𑀺, 𑀉𑀤𑁂𑀫.

𑀉𑀤𑁂𑀢𑀼, 𑀉𑀤𑁂𑀦𑁆𑀢𑀼. 𑀉𑀤𑁂𑀳𑀺, 𑀉𑀤𑁂𑀣. 𑀉𑀤𑁂𑀫𑀺, 𑀉𑀤𑁂𑀫, 𑀉𑀤𑀸𑀫𑀲𑁂.

𑀉𑀤𑁂𑀬𑁆𑀬, 𑀉𑀤𑁂𑀬𑁆𑀬𑀼𑀁. 𑀲𑁂𑀲𑀁 𑀦𑁂𑀬𑁆𑀬𑀁. 𑀉𑀤𑀺𑀲𑁆𑀲𑀢𑀺, 𑀉𑀤𑀺𑀲𑁆𑀲𑀦𑁆𑀢𑀺. 𑀲𑁂𑀲𑀁 𑀦𑁂𑀬𑁆𑀬𑀁. 𑀉𑀤𑀺𑀲𑁆𑀲𑀸, 𑀉𑀤𑀺𑀲𑁆𑀲𑀁𑀲𑀼. 𑀲𑁂𑀲𑀁 𑀦𑁂𑀬𑁆𑀬𑀁.

𑀇𑀫𑀸𑀦𑀺 𑀲𑀼𑀤𑁆𑀥𑀲𑁆𑀲𑀭𑀥𑀸𑀢𑀼𑀭𑀽𑀧𑀸𑀦𑀺.

𑀓𑀓𑀸𑀭𑀦𑁆𑀢𑀥𑀸𑀢𑀼

𑀓𑀼 𑀲𑀤𑁆𑀤𑁂 𑀓𑁂 𑀘. 𑀓𑁄𑀢𑀺, 𑀓𑀯𑀢𑀺, 𑀓𑀸𑀬𑀢𑀺, 𑀏𑀯𑀁 𑀓𑀢𑁆𑀢𑀼𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀓𑀼𑀬𑁆𑀬𑀢𑀺, 𑀓𑀺𑀬𑁆𑀬𑀢𑀺, 𑀏𑀯𑀁 𑀓𑀫𑁆𑀫𑀧𑀤𑀸𑀦𑀺. 𑀓𑀸𑀦𑀦𑀁, 𑀓𑀩𑁆𑀩𑀁, 𑀚𑀸𑀢𑀓𑀁, 𑀏𑀯𑀁 𑀦𑀸𑀫𑀺𑀓𑀧𑀤𑀸𑀦𑀺. 𑀓𑀼𑀢𑁆𑀯𑀸, 𑀓𑀼𑀢𑁆𑀯𑀸𑀦, 𑀓𑀯𑀺𑀢𑁆𑀯𑀸, 𑀓𑀯𑀺𑀢𑁆𑀯𑀸𑀦, 𑀓𑀸𑀯𑀺𑀢𑁆𑀯𑀸, 𑀓𑀸𑀯𑀺𑀢𑁆𑀯𑀸𑀦, 𑀓𑀸𑀬𑀺𑀢𑀼𑀁, 𑀏𑀯𑀁 𑀅𑀩𑁆𑀬𑀬𑀧𑀤𑀸𑀦𑀺.

𑀢𑀢𑁆𑀭 𑀓𑀸𑀦𑀦𑀦𑁆𑀢𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀓𑀯𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀸𑀦𑀦𑀁, 𑀯𑀦𑀁. 𑀢𑀣𑀸 𑀳𑀺 𑁋

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺

𑀯𑀼𑀢𑁆𑀢𑀁. 𑀅𑀣 𑀯𑀸 𑀓𑁄𑀓𑀺𑀮𑀫𑀬𑀽𑀭𑀸𑀤𑀬𑁄 𑀓𑀯𑀦𑁆𑀢𑀺 𑀲𑀤𑁆𑀤𑀸𑀬𑀦𑁆𑀢𑀺 𑀓𑀽𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀸𑀦𑀦𑀁. 𑀫𑀦𑁄𑀳𑀭𑀢𑀸𑀬 𑀅𑀯𑀲𑁆𑀲𑀁 𑀓𑀼𑀬𑁆𑀬𑀢𑀺 𑀧𑀡𑁆𑀟𑀺𑀢𑁂𑀳𑀻𑀢𑀺 𑀓𑀩𑁆𑀩𑀁. 𑀓𑀸𑀯𑀺𑀬𑀁. 𑀓𑀸𑀯𑁂𑀬𑁆𑀬𑀁. 𑀅𑀜𑁆𑀜𑀢𑁆𑀭 𑀧𑀦 𑀓𑀯𑀻𑀦𑀁 𑀇𑀤𑀦𑁆𑀢𑀺 𑀓𑀩𑁆𑀩𑀦𑁆𑀢𑀺 𑀢𑀤𑁆𑀥𑀺𑀢𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑁂𑀘𑀺 𑀢𑀼 𑀓𑀸𑀩𑁆𑀬𑀦𑁆𑀢𑀺 𑀲𑀤𑁆𑀤𑀭𑀽𑀧𑀁 𑀇𑀘𑁆𑀙𑀦𑁆𑀢𑀺, 𑀦 𑀢𑀁 𑀧𑀸𑀯𑀘𑀦𑁂 𑀧𑀫𑀸𑀡𑀁 𑀲𑀓𑁆𑀓𑀝𑀪𑀸𑀲𑀸𑀪𑀸𑀯𑀢𑁄. 𑀲𑀓𑁆𑀓𑀝𑀪𑀸𑀲𑀸𑀢𑁄𑀧𑀺 𑀳𑀺 𑀆𑀘𑀭𑀺𑀬𑀸 𑀦𑀬𑀁 𑀕𑀡𑁆𑀳𑀦𑁆𑀢𑀺. 𑀚𑀸𑀢𑀁 𑀪𑀽𑀢𑀁 𑀅𑀢𑀻𑀢𑀁 𑀪𑀕𑀯𑀢𑁄 𑀘𑀭𑀺𑀬𑀁, 𑀢𑀁 𑀓𑀻𑀬𑀢𑀺 𑀓𑀣𑀻𑀬𑀢𑀺 𑀏𑀢𑁂𑀦𑀸𑀢𑀺 𑀚𑀸𑀢𑀓𑀁. 𑀚𑀸𑀢𑀓𑀧𑀸𑀴𑀺 𑀳𑀺 𑀇𑀥 ‘‘𑀚𑀸𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀜𑁆𑀜𑀢𑁆𑀭 𑀧𑀦 𑀚𑀸𑀢𑀁 𑀏𑀯 𑀚𑀸𑀢𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀚𑀸𑀢𑀓𑀲𑀤𑁆𑀤𑁄 𑀤𑁂𑀲𑀦𑀸𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼. 𑀚𑀸𑀢𑀺𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀻’’𑀢𑀺𑀆𑀤𑀻𑀲𑀼.

𑀧𑀓𑁆𑀓 𑀦𑀻𑀘𑀕𑀢𑀺𑀬𑀁. 𑀦𑀻𑀘𑀕𑀫𑀦𑀁 𑀦𑀸𑀫 𑀳𑀻𑀦𑀕𑀫𑀦𑀁 𑀳𑀻𑀦𑀧𑁆𑀧𑀯𑀢𑁆𑀢𑀺 𑀯𑀸. 𑀦𑀻𑀘𑀲𑀤𑁆𑀤𑁄 𑀳𑀺 𑀳𑀻𑀦𑀯𑀸𑀘𑀓𑁄 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺 𑀏𑀢𑁆𑀣 𑀯𑀺𑀬. 𑀧𑀓𑁆𑀓𑀢𑀺 𑀓𑁆𑀭𑀺𑀬𑀸𑀧𑀤𑀫𑁂𑀢𑁆𑀣 𑀤𑀺𑀲𑁆𑀲𑀢𑀺, 𑀦 𑀦𑀸𑀫𑀺𑀓𑀧𑀤𑀁. 𑀬𑀢𑁆𑀣 𑀬𑀢𑁆𑀣 𑀦𑀸𑀫𑀺𑀓𑀧𑀤𑀁 𑀦 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀢𑀢𑁆𑀣 𑀦𑀸𑀫𑀺𑀓𑀧𑀤𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀓𑁆𑀭𑀺𑀬𑀸𑀧𑀤𑀫𑁂𑀯 𑀳𑀺 𑀤𑀼𑀤𑁆𑀤𑀲𑀁, 𑀓𑁆𑀭𑀺𑀬𑀸𑀧𑀤𑁂 𑀯𑀺𑀚𑁆𑀚𑀫𑀸𑀦𑁂 𑀦𑀸𑀫𑀺𑀓𑀧𑀤𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀦𑁆𑀢𑀫𑀲𑁄 ‘‘𑀧𑀓𑁆𑀓𑀦𑀁, 𑀢𑀓𑀦𑀁’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀪𑀸𑀯𑀯𑀸𑀘𑀓𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀲𑀩𑁆𑀩𑀸𑀲𑀼 𑀥𑀸𑀢𑀽𑀲𑀼 𑀬𑀣𑀸𑀭𑀳𑀁 𑀮𑀩𑁆𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀓 𑀳𑀲𑀦𑁂. 𑀳𑀲𑀦𑀁 𑀳𑀸𑀲𑁄. 𑀢𑀓𑀢𑀺.

𑀢𑀓𑀺 𑀓𑀺𑀘𑁆𑀙𑀚𑀻𑀯𑀦𑁂. 𑀓𑀺𑀘𑁆𑀙𑀚𑀻𑀯𑀦𑀁 𑀓𑀲𑀺𑀭𑀚𑀻𑀯𑀦𑀁. 𑀢𑀗𑁆𑀓𑀢𑀺. 𑀆𑀢𑀗𑁆𑀓𑀢𑀺. 𑀆𑀢𑀗𑁆𑀓𑁄. 𑀆𑀢𑀗𑁆𑀓𑁄𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄 𑀭𑁄𑀕𑁄, 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂 𑀇𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁 ‘‘𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸 𑀯𑀼𑀘𑁆𑀘𑀢𑀺, 𑀬𑀸 𑀏𑀓𑀤𑁂𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀅𑀬𑀧𑀝𑁆𑀝𑁂𑀦 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀡𑁆𑀳𑀸𑀢𑀺. 𑀆𑀢𑀗𑁆𑀓𑁄𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄 𑀭𑁄𑀕𑁄. 𑀅𑀣 𑀯𑀸 𑀬𑀸𑀧𑁂𑀢𑀩𑁆𑀩𑀭𑁄𑀕𑁄 𑀆𑀢𑀗𑁆𑀓𑁄, 𑀇𑀢𑀭𑁄 𑀆𑀩𑀸𑀥𑁄. 𑀔𑀼𑀤𑁆𑀤𑀓𑁄 𑀯𑀸 𑀭𑁄𑀕𑁄 𑀆𑀢𑀗𑁆𑀓𑁄, 𑀩𑀮𑀯𑀸 𑀆𑀩𑀸𑀥𑁄. 𑀓𑁂𑀘𑀺 𑀧𑀦 ‘𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑁄 𑀆𑀢𑀗𑁆𑀓𑁄’𑀢𑀺 𑀯𑀤𑀦𑁆𑀢𑀻’’𑀢𑀺.

𑀆𑀢𑀗𑁆𑀓𑁄 𑀆𑀫𑀬𑁄 𑀭𑁄𑀕𑁄,

𑀩𑁆𑀬𑀸𑀥𑀸’𑀩𑀸𑀥𑁄 𑀕𑀤𑁄 𑀭𑀼𑀚𑀸;

𑀅𑀓𑀮𑁆𑀮𑀜𑁆𑀘𑁂𑀯 𑀕𑁂𑀮𑀜𑁆𑀜𑀁,

𑀦𑀸𑀫𑀁 𑀭𑁄𑀕𑀸𑀪𑀺𑀥𑀸𑀦𑀓𑀁.

𑀲𑀼𑀓 𑀕𑀢𑀺𑀬𑀁. 𑀲𑁄𑀓𑀢𑀺, 𑀲𑀼𑀓𑁄, 𑀲𑀼𑀓𑀻. 𑀢𑀢𑁆𑀭 𑀲𑀼𑀓𑁄𑀢𑀺 𑀲𑀼𑀯𑁄. 𑀲𑁄𑀓𑀢𑀺 𑀫𑀦𑀸𑀧𑁂𑀦 𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺 𑀲𑀼𑀓𑁄. 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀓𑀻.

𑀩𑀼𑀓𑁆𑀓 𑀪𑀲𑁆𑀲𑀦𑁂. 𑀇𑀥 𑀪𑀲𑁆𑀲𑀦𑀁 𑀦𑀸𑀫 𑀲𑀼𑀦𑀔𑀪𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀲𑀼𑀦𑀔𑁄 𑀪𑀲𑁆𑀲𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀺𑀬, 𑀦 ‘‘𑀆𑀯𑀸𑀲𑁄 𑀕𑁄𑀘𑀭𑀁 𑀪𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀘𑀦𑀲𑀗𑁆𑀔𑀸𑀢𑀁 𑀪𑀲𑁆𑀲𑀦𑀁, 𑀩𑀼𑀓𑁆𑀓𑀢𑀺 𑀲𑀸.

𑀥𑀓 𑀧𑀝𑀺𑀖𑀸𑀢𑁂 𑀕𑀢𑀺𑀬𑀜𑁆𑀘. 𑀧𑀝𑀺𑀖𑀸𑀢𑁄 𑀧𑀝𑀺𑀳𑀦𑀦𑀁. 𑀥𑀓𑀢𑀺.

𑀘𑀓 𑀢𑀺𑀢𑁆𑀢𑀺𑀧𑀝𑀺𑀖𑀸𑀢𑁂𑀲𑀼. 𑀢𑀺𑀢𑁆𑀢𑀺 𑀢𑀧𑁆𑀧𑀦𑀁, 𑀧𑀝𑀺𑀖𑀸𑀢𑀁 𑀧𑀝𑀺𑀳𑀦𑀦𑀁𑀯. 𑀘𑀓𑀢𑀺.

𑀅𑀓 𑀓𑀼𑀝𑀺𑀮𑀕𑀢𑀺𑀬𑀁. 𑀅𑀓𑀢𑀺. 𑀏𑀢𑀸 𑀓𑀼𑀆𑀤𑀺𑀓𑀸 𑀅𑀓𑀧𑀭𑀺𑀬𑀦𑁆𑀢𑀸 𑀥𑀸𑀢𑀼𑀬𑁄 𑀧𑀭𑀲𑁆𑀲 𑀪𑀸𑀲𑀸𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂 𑀏𑀢𑀸 ‘‘𑀢𑀺 𑀅𑀦𑁆𑀢𑀺, 𑀢𑀼 𑀅𑀦𑁆𑀢𑀼’’ 𑀇𑀘𑁆𑀘𑀸𑀤𑀻𑀦𑀁𑀬𑁂𑀯 𑀯𑀺𑀲𑀬𑁄. 𑀧𑀸𑀴𑀺𑀬𑀁 𑀧𑀦 𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑀁 𑀇𑀥 𑀧𑀫𑀸𑀡𑀁.

𑀇 𑀅𑀚𑁆𑀛𑀬𑀦𑁂. 𑀅𑀚𑁆𑀛𑀬𑀦𑀁 𑀉𑀘𑁆𑀘𑀸𑀭𑀡𑀁 𑀲𑀺𑀓𑁆𑀔𑀦𑀁 𑀯𑀸, 𑀅𑀬𑀢𑀺, 𑀅𑀥𑀻𑀬𑀢𑀺, 𑀅𑀚𑁆𑀛𑀬𑀢𑀺, 𑀅𑀥𑀻𑀢𑁂, 𑀅𑀚𑁆𑀛𑁂𑀦𑀁, 𑀅𑀚𑁆𑀛𑀸𑀬𑀓𑁄. 𑀤𑀺𑀩𑁆𑀩𑀁 𑀅𑀥𑀻𑀬𑀲𑁂 𑀫𑀸𑀬𑀁. 𑀅𑀥𑀻𑀬𑀦𑁆𑀢𑀺 𑀫𑀳𑀸𑀭𑀸𑀚, 𑀤𑀺𑀩𑁆𑀩𑀫𑀸𑀬𑀺𑀥 𑀧𑀡𑁆𑀟𑀺𑀢𑀸. 𑀅𑀚𑁆𑀛𑁂𑀦𑀫𑀭𑀺𑀬𑀸 𑀧𑀣𑀯𑀺𑀁 𑀚𑀦𑀺𑀦𑁆𑀤𑀸. 𑀢𑀢𑁆𑀣 𑀅𑀚𑁆𑀛𑀸𑀬𑀓𑁄𑀢𑀺 𑀅𑀚𑁆𑀛𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄.

𑀉 𑀲𑀤𑁆𑀤𑁂. 𑀅𑀯𑀢𑀺, 𑀅𑀯𑀦𑁆𑀢𑀺. 𑀅𑀯𑀲𑀺. 𑀏𑀢𑁆𑀣 ‘‘𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸’’𑀢𑀺 𑀧𑀸𑀴𑀺 𑀧𑀧𑀼𑀩𑁆𑀩𑀲𑁆𑀲 𑀉𑀥𑀸𑀢𑀼𑀲𑁆𑀲 𑀧𑀬𑁄𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀧𑀼𑀩𑁆𑀩𑀲𑁆𑀲 𑀯𑀤𑀥𑀸𑀢𑀼𑀲𑁆𑀲 𑀤𑀓𑀸𑀭𑀮𑁄𑀧𑀧𑁆𑀧𑀬𑁄𑀕𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀯𑀗𑁆𑀓 𑀓𑁄𑀝𑀺𑀮𑁆𑀮𑁂. 𑀯𑀗𑁆𑀓𑀢𑀺. 𑀯𑀗𑁆𑀓𑀁. 𑀯𑀗𑁆𑀓𑀲𑀤𑁆𑀤𑁄 𑀳𑀺 𑀯𑀓𑁆𑀓𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄, 𑀯𑀓𑁆𑀓𑀲𑀤𑁆𑀤𑁄 𑀘 𑀯𑀗𑁆𑀓𑀲𑀤𑁆𑀤𑁂𑀦. 𑀢𑀣𑀸 𑀳𑀺 𑁋

‘‘𑀬𑀁 𑀦𑀺𑀲𑁆𑀲𑀺𑀢𑀸 𑀚𑀕𑀢𑀺𑀭𑀼𑀳𑀁, 𑀲𑁆𑀯𑀸𑀬𑀁 𑀅𑀕𑁆𑀕𑀺𑀁 𑀧𑀫𑀼𑀜𑁆𑀘𑀢𑀺;

𑀤𑀺𑀲𑀸 𑀪𑀚𑀣 𑀯𑀓𑁆𑀓𑀗𑁆𑀕𑀸, 𑀚𑀸𑀢𑀁 𑀲𑀭𑀡𑀢𑁄 𑀪𑀬’’𑀦𑁆𑀢𑀺.

𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀅𑀬𑀁 𑀧𑀦 𑀯𑀓𑁆𑀓𑀲𑀤𑁆𑀤𑁄 𑀲𑀓𑁆𑀓𑀝𑀪𑀸𑀲𑀁 𑀧𑀢𑁆𑀯𑀸 𑀓𑀓𑀸𑀭𑀭𑀓𑀸𑀭𑀲𑀜𑁆𑀜𑁄𑀕𑀓𑁆𑀔𑀭𑀺𑀓𑁄 𑀪𑀯𑀢𑀺, 𑀥𑀸𑀢𑀼𑀪𑀸𑀯𑁄 𑀧𑀦𑀲𑁆𑀲 𑀧𑁄𑀭𑀸𑀡𑁂𑀳𑀺 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀓𑁆𑀭𑀺𑀬𑀸𑀧𑀤𑀁 𑀦 𑀤𑀺𑀝𑁆𑀞𑀁. 𑀇𑀫𑀲𑁆𑀲 𑀧𑀦 𑀯𑀗𑁆𑀓𑀲𑀤𑁆𑀤𑀲𑁆𑀲 ‘‘𑀯𑀗𑁆𑀓 𑀓𑁄𑀝𑀺𑀮𑁆𑀮𑁂’’𑀢𑀺 𑀥𑀸𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, ‘‘𑀯𑀗𑁆𑀓𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀜𑁆𑀘, 𑀧𑀸𑀴𑀺𑀬𑀁 𑀢𑀼 ‘‘𑀯𑀗𑁆𑀓𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀁 𑀦 𑀤𑀺𑀝𑁆𑀞𑀁, 𑀢𑀣𑀸 𑀪𑀸𑀯𑀯𑀸𑀘𑀓𑁄 𑀯𑀗𑁆𑀓𑀲𑀤𑁆𑀤𑁄𑀧𑀺. 𑀯𑀸𑀘𑁆𑀘𑀮𑀺𑀗𑁆𑀕𑁄 𑀧𑀦 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑁄. 𑀢𑀢𑁆𑀢 𑀯𑀗𑁆𑀓𑀢𑀻𑀢𑀺 𑀓𑁆𑀭𑀺𑀬𑀸𑀧𑀤𑀁 𑀧𑀸𑀴𑀺𑀬𑀁 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀳𑁂𑀢𑀩𑁆𑀩𑀫𑁂𑀯 𑀦𑀸𑀣𑀢𑀻𑀢𑀺 𑀓𑁆𑀭𑀺𑀬𑀸𑀧𑀤𑀫𑀺𑀯. 𑀪𑀸𑀯𑀯𑀸𑀘𑀓𑀲𑁆𑀲 𑀧𑀦 𑀯𑀗𑁆𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸 𑀦𑀢𑁆𑀣𑀺𑀢𑀸 𑀘 𑀧𑀸𑀴𑀺𑀆𑀤𑀻𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀬𑀤𑀺 𑀪𑀸𑀯𑀯𑀸𑀘𑀓𑁄 𑀯𑀗𑁆𑀓𑀲𑀤𑁆𑀤𑁄 𑀦𑀢𑁆𑀣𑀺, 𑀓𑀣𑀁 ‘𑀅𑀝𑁆𑀞𑀯𑀗𑁆𑀓𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭’𑀦𑁆𑀢𑀺 𑀏𑀢𑁆𑀣 𑀲𑀫𑀸𑀲𑁄’’𑀢𑀺. 𑀏𑀢𑁆𑀣 𑀧𑀦 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀗𑁆𑀓𑀁 𑀅𑀝𑁆𑀞𑀯𑀗𑁆𑀓𑀁, 𑀦 𑀅𑀝𑁆𑀞𑀯𑀗𑁆𑀓𑀸𑀦𑀺 𑀬𑀲𑁆𑀲𑀸𑀢𑀺. 𑀤𑀩𑁆𑀩𑀯𑀸𑀘𑀓𑁄 𑀳𑀺 𑀯𑀗𑁆𑀓𑀲𑀤𑁆𑀤𑁄, 𑀦 𑀪𑀸𑀯𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀗𑁆𑀓𑀁 𑀯𑀓𑁆𑀓𑀜𑁆𑀘 𑀓𑀼𑀝𑀺𑀮𑀁, 𑀚𑀺𑀫𑁆𑀳𑀜𑁆𑀘 𑀭𑀺𑀫𑁆𑀳𑀫𑀦𑀼𑀚𑀼;

𑀯𑀗𑁆𑀓𑀲𑀤𑁆𑀤𑀸𑀤𑀬𑁄 𑀏𑀢𑁂, 𑀯𑀸𑀘𑁆𑀘𑀮𑀺𑀗𑁆𑀕𑀸 𑀢𑀺𑀮𑀺𑀗𑁆𑀕𑀺𑀓𑀸.

𑀅𑀣 𑀯𑀸 𑀯𑀗𑁆𑀓𑀲𑀤𑁆𑀤𑁄𑀬𑀁, ‘‘𑀯𑀗𑁆𑀓𑀖𑀲𑁆𑀢𑀸’’𑀢𑀺𑀆𑀤𑀺𑀲𑀼;

𑀩𑀴𑀺𑀲𑁂 𑀕𑀺𑀭𑀺𑀪𑁂𑀤𑁂 𑀘, 𑀯𑀢𑁆𑀢𑀢𑁂 𑀲 𑀧𑀼𑀫𑀸 𑀢𑀤𑀸.

𑀅𑀬𑀜𑁆𑀳𑀺 ‘‘𑀢𑁂’𑀫𑁂 𑀚𑀦𑀸 𑀯𑀗𑁆𑀓𑀖𑀲𑁆𑀢𑀸 𑀲𑀬𑀦𑁆𑀢𑀺. 𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢𑀁. 𑀯𑀗𑁆𑀓𑀖𑀲𑁆𑀢𑁄𑀯 𑀅𑀫𑁆𑀩𑀼𑀚𑁄’’𑀢𑀺𑀆𑀤𑀻𑀲𑀼 𑀩𑀴𑀺𑀲𑁂 𑀯𑀢𑁆𑀢𑀢𑀺.

𑀏𑀢𑁆𑀣 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 ‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢’𑀦𑁆𑀢𑀺 𑀏𑀢𑁆𑀣 𑀯𑀗𑁆𑀓𑀲𑀤𑁆𑀤𑁄 𑀕𑀼𑀡𑀯𑀸𑀘𑀓𑁄 𑀯𑀺𑀲𑁂𑀲𑀦𑀲𑀤𑁄, 𑀬𑁂𑀦 𑀩𑀴𑀺𑀲𑁄 𑀯𑀺𑀲𑁂𑀲𑀺𑀢𑁄, 𑀢𑁂𑀦 𑀯𑀗𑁆𑀓𑀁 𑀓𑀼𑀝𑀺𑀮𑀁 𑀩𑀴𑀺𑀲𑀦𑁆𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻’’𑀢𑀺? 𑀢𑀦𑁆𑀦, 𑀯𑀗𑁆𑀓𑀲𑀤𑁆𑀤𑁂 𑀅𑀯𑀼𑀢𑁆𑀢𑁂𑀧𑀺 𑀩𑀴𑀺𑀲𑀲𑀪𑀸𑀯𑀲𑁆𑀲 𑀯𑀗𑁆𑀓𑀢𑁆𑀢𑀸 𑀓𑀼𑀝𑀺𑀮𑀢𑁆𑀣𑁄 𑀧𑀸𑀓𑀝𑁄𑀢𑀺 𑀦𑀢𑁆𑀣𑀺 𑀯𑀺𑀲𑁂𑀲𑀦𑀲𑀤𑁆𑀤𑁂𑀦 𑀧𑀬𑁄𑀚𑀦𑀁. 𑀇𑀤𑀁 𑀧𑀦 ‘‘𑀩𑀴𑀺𑀲𑀁 𑀯𑀗𑁆𑀓’’𑀦𑁆𑀢𑀺 𑀯𑀘𑀦𑀁 ‘‘𑀳𑀢𑁆𑀣𑀺 𑀦𑀸𑀕𑁄. 𑀲𑀭𑁄𑀭𑀼𑀳𑀁 𑀧𑀤𑀼𑀫𑀁. 𑀳𑀢𑁆𑀣𑀻 𑀘 𑀓𑀼𑀜𑁆𑀚𑀭𑁄 𑀦𑀸𑀕𑁄’’𑀢𑀺𑀆𑀤𑀺𑀯𑀘𑀦𑀫𑀺𑀯 𑀧𑀭𑀺𑀬𑀸𑀬𑀯𑀘𑀦𑀁, 𑀢𑀲𑁆𑀫𑀸 ‘‘𑀯𑀗𑁆𑀓’’𑀦𑁆𑀢𑀺 𑀧𑀤𑀲𑁆𑀲 ‘‘𑀓𑀼𑀝𑀺𑀮’’𑀦𑁆𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀬𑀣𑀸 ‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻’’𑀢𑀺 𑀏𑀢𑁆𑀣 𑀦𑀸𑀕𑀲𑀤𑁆𑀤𑀲𑁆𑀲 𑀤𑀦𑁆𑀢𑀻𑀲𑀤𑁆𑀤𑀲𑁆𑀲 𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸 𑀬𑀯𑀘𑀦𑀢𑁆𑀢𑁂𑀧𑀺 𑀤𑀦𑁆𑀢𑀺𑀦𑁆𑀢𑀺 𑀫𑀦𑁄𑀭𑀫𑀤𑀦𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄, 𑀢𑀣𑀸 ‘‘𑀩𑀴𑀺𑀲𑀁 𑀯𑀗𑁆𑀓’’𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀬𑀸𑀬𑀯𑀘𑀦𑀢𑁆𑀢𑁂𑀧𑀺 𑀯𑀗𑁆𑀓𑀦𑁆𑀢𑀺 𑀓𑀼𑀝𑀺𑀮𑀦𑁆𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀢𑁆𑀣𑁄 𑀲𑀸𑀮𑀭𑀸𑀚𑀸 𑀯𑀺𑀬 𑀲𑀼𑀨𑀼𑀮𑁆𑀮𑀺𑀢𑁄 𑀳𑁄𑀢𑀺, 𑀤𑁂𑀲𑀦𑀸 𑀘 𑀯𑀺𑀮𑀸𑀲𑀧𑁆𑀧𑀢𑁆𑀢𑀸, 𑀦 𑀧𑀦 ‘‘𑀯𑀗𑁆𑀓𑀁 𑀩𑀴𑀺𑀲’’𑀦𑁆𑀢𑀺 𑀲𑀤𑁆𑀤𑀸𑀦𑀁 𑀕𑀼𑀡𑀕𑀼𑀡𑀻𑀯𑀲𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 ‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀇𑀫𑁂𑀲𑀁 𑀯𑀺𑀬 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀦 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀧𑁄𑀭𑀸𑀡𑁂𑀳𑀺 𑀅𑀦𑀼𑀫𑀢𑁄.

‘‘𑀬𑀢𑁆𑀣 𑀏𑀢𑀸𑀤𑀺𑀲𑁄 𑀲𑀢𑁆𑀣𑀸, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀢𑀣𑀸𑀕𑀢𑁄 𑀩𑀮𑀧𑁆𑀧𑀢𑁆𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺,

‘‘𑀩𑀼𑀤𑁆𑀥𑀁 𑀩𑀼𑀤𑁆𑀥𑀁 𑀦𑀺𑀔𑀺𑀮𑀯𑀺𑀲𑀬𑀁 𑀲𑀼𑀤𑁆𑀥𑀺𑀬𑀸 𑀬𑀸𑀯 𑀲𑀼𑀤𑁆𑀥𑀺’’𑀦𑁆𑀢𑀺 𑀘 𑀆𑀤𑀻𑀲𑀼 𑀧𑀦 𑀅𑀦𑀼𑀫𑀢𑁄. 𑀏𑀢𑁆𑀣 𑀳𑀺 ‘‘𑀏𑀢𑀸𑀤𑀺𑀲𑁄’’𑀢𑀺 𑀘 ‘‘𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺 𑀘 ‘‘𑀢𑀣𑀸𑀕𑀢𑁄’’𑀢𑀺 𑀘 ‘‘𑀩𑀮𑀧𑁆𑀧𑀢𑁆𑀢𑁄’’𑀢𑀺 𑀘 ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀘 𑀇𑀫𑀸𑀦𑀺 ‘‘𑀲𑀢𑁆𑀣𑀸’’𑀢𑀺 𑀅𑀦𑁂𑀦 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺. 𑀢𑀣𑀸 ‘‘𑀩𑀼𑀤𑁆𑀥𑀁 𑀩𑀼𑀤𑁆𑀥’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 𑀪𑀯𑀢𑀺.

𑀇𑀢𑀺 ‘‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢’’𑀦𑁆𑀢𑀺 𑀏𑀢𑁆𑀣 𑀯𑀗𑁆𑀓𑀲𑀤𑁆𑀤𑁄 𑀩𑀴𑀺𑀲𑀲𑁆𑀲𑀸𑀪𑀺𑀥𑀸𑀦𑀦𑁆𑀢𑀭𑀁, 𑀦 𑀕𑀼𑀡𑀯𑀸𑀘𑀓𑁄. 𑀏𑀯𑀁 𑀯𑀗𑁆𑀓𑀲𑀤𑁆𑀤𑁄 𑀩𑀴𑀺𑀲𑁂 𑀯𑀢𑁆𑀢𑀢𑀺. ‘‘𑀓𑀗𑁆𑀓𑀁 𑀕𑀘𑁆𑀙𑀸𑀫 𑀧𑀩𑁆𑀩𑀢𑀁. 𑀤𑀽𑀭𑁂 𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺𑀆𑀤𑀻𑀲𑀼 𑀧𑀦 𑀕𑀺𑀭𑀺𑀯𑀺𑀲𑁂𑀲𑁂 𑀯𑀢𑁆𑀢𑀢𑀺. 𑀏𑀢𑁆𑀣 𑀘 ‘‘𑀯𑀗𑁆𑀓𑀧𑀩𑁆𑀩𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀫𑀚𑁆𑀛𑁂 𑀅𑀦𑀺𑀫𑀺𑀢𑁆𑀢𑀁 𑀢𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 ‘‘𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀗𑁆𑀓𑁄𑀬𑁂𑀯 𑀯𑀗𑁆𑀓𑀢𑀸, 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸. 𑀬𑀣𑀸 𑀘 𑀤𑀺𑀲𑀸 𑀏𑀯 𑀤𑀺𑀲𑀢𑀸𑀢𑀺, 𑀏𑀯𑀁 𑀢𑀸𑀧𑀘𑁆𑀘𑀬𑀯𑀲𑁂𑀦 𑀯𑀗𑁆𑀓𑀢𑀸 𑀘 𑀲𑀸 𑀧𑀩𑁆𑀩𑀢𑁄 𑀘𑀸𑀢𑀺 ‘‘𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀁, 𑀫𑀚𑁆𑀛𑁂 𑀭𑀲𑁆𑀲𑀯𑀲𑁂𑀦 𑀘𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀯𑀗𑁆𑀓𑀫𑀲𑁆𑀲 𑀲𑀡𑁆𑀞𑀸𑀦𑀫𑀢𑁆𑀣𑀻𑀢𑀺 𑀯𑀗𑁆𑀓𑀢𑁄𑀢𑀺 𑀫𑀦𑁆𑀢𑀼𑀅𑀢𑁆𑀣𑁂 𑀢𑀧𑀘𑁆𑀘𑀬𑁄, 𑀬𑀣𑀸 𑀧𑀩𑁆𑀩𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀩𑁆𑀩𑀢𑁄𑀢𑀺. 𑀏𑀯𑀁 𑀯𑀗𑁆𑀓𑀢𑁄 𑀘 𑀲𑁄 𑀧𑀩𑁆𑀩𑀢𑁄 𑀘𑀸𑀢𑀺 𑀯𑀗𑁆𑀓𑀢𑀧𑀩𑁆𑀩𑀢𑁄. ‘‘𑀯𑀗𑁆𑀓𑀧𑀩𑁆𑀩𑀢𑁄’’ 𑀇𑀘𑁆𑀘𑁂𑀯 𑀯𑀸 𑀧𑀡𑁆𑀡𑀢𑁆𑀢𑀺, 𑀧𑀸𑀤𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀬𑀸 𑀧𑀦 ‘‘𑀤𑀽𑀭𑁂 𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀮𑁄𑀓 𑀤𑀲𑁆𑀲𑀦𑁂. 𑀮𑁄𑀓𑀢𑀺. 𑀮𑁄𑀓𑁄. 𑀆𑀮𑁄𑀓𑁄𑀢𑀺 𑀅𑀜𑁆𑀜𑀸𑀦𑀺𑀧𑀺 𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀘𑀼𑀭𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 𑀇𑀫𑀺𑀲𑁆𑀲𑀸 ‘‘𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺, 𑀑𑀮𑁄𑀓𑁂𑀢𑀺, 𑀑𑀮𑁄𑀓𑀬𑀢𑀻’’𑀢𑀺𑀆𑀤𑀺𑀦𑀸 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄, 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀆𑀕𑀢𑁄 𑀲𑀗𑁆𑀔𑀸𑀭𑁄 𑀏𑀯 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄. 𑀲𑀢𑁆𑀢𑀸 𑀏𑀯 𑀮𑁄𑀓𑁄 𑀲𑀢𑁆𑀢𑀮𑁄𑀓𑁄. 𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁄 𑀑𑀓𑀸𑀲𑁄 𑀏𑀯 𑀮𑁄𑀓𑁄 𑀑𑀓𑀸𑀲𑀮𑁄𑀓𑁄, 𑀬𑁄 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀲𑀗𑁆𑀔𑀸𑀭𑁄 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀲𑀢𑁆𑀢𑁄 𑀮𑁄𑀓𑁄. 𑀮𑁄𑀓𑀺𑀬𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑁄 𑀤𑀺𑀲𑁆𑀲𑀢𑀻𑀢𑀺 𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁄 𑀑𑀓𑀸𑀲𑁄 𑀮𑁄𑀓𑁄. 𑀬𑀲𑁆𑀫𑀸 𑀧𑀦 𑀮𑁄𑀓𑀲𑀤𑁆𑀤𑁄 𑀲𑀫𑀽𑀳𑁂𑀧𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀮𑁄𑀓𑀺𑀬𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀧𑀜𑁆𑀜𑀸𑀧𑀺𑀬𑀢𑀻𑀢𑀺 𑀮𑁄𑀓𑁄, 𑀲𑀫𑀽𑀳𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺. 𑀢𑁂𑀲𑀁 𑀲𑀭𑀽𑀧𑀁 𑀘𑀼𑀭𑀸𑀤𑀺𑀕𑀡𑁂 𑀓𑀣𑁂𑀲𑁆𑀲𑀸𑀫 𑀩𑀳𑀼𑀯𑀺𑀥𑀢𑀜𑁆𑀘. 𑀩𑀳𑀺𑀤𑁆𑀥𑀸 𑀧𑀦 𑀓𑀯𑀻𑀳𑀺 ‘‘𑀮𑁄𑀓𑁄 𑀢𑀼 𑀪𑀼𑀯𑀦𑁂 𑀚𑀦𑁂’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀲𑀺𑀮𑁄𑀓 𑀲𑀗𑁆𑀖𑀸𑀢𑁂. 𑀲𑀗𑁆𑀖𑀸𑀢𑁄 𑀧𑀺𑀡𑁆𑀟𑀦𑀁. 𑀲𑀺𑀮𑁄𑀓𑀢𑀺, 𑀲𑀺𑀮𑁄𑀓𑁄, 𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀺. 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑁄 𑀯𑀘𑀦𑀲𑀗𑁆𑀖𑀸𑀢𑁄 𑀲𑀺𑀮𑁄𑀓𑁄. 𑀲𑁄 𑀧𑀚𑁆𑀚𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀳𑀺 ‘‘𑀲𑀺𑀮𑁄𑀓𑁄 𑀬𑀲𑀲𑁆𑀲𑀺 𑀧𑀚𑁆𑀚𑁂’’𑀢𑀺 𑀓𑀯𑀬𑁄 𑀯𑀤𑀦𑁆𑀢𑀺.

𑀤𑁂𑀓 𑀥𑁂𑀓 𑀲𑀤𑁆𑀤𑀼𑀲𑁆𑀲𑀸𑀳𑁂𑀲𑀼. 𑀲𑀤𑁆𑀤𑁄 𑀭𑀯𑁄, 𑀉𑀲𑁆𑀲𑀸𑀳𑁄 𑀯𑀸𑀬𑀸𑀫𑁄. 𑀤𑁂𑀓𑀢𑀺. 𑀥𑁂𑀓𑀢𑀺.

𑀭𑁂𑀓 𑀲𑀓𑀺 𑀲𑀗𑁆𑀓𑀸𑀬𑀁. 𑀭𑁂𑀓𑀢𑀺. 𑀲𑀗𑁆𑀓𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄. 𑀲𑀗𑁆𑀓𑀸.

𑀅𑀓𑀺 𑀮𑀓𑁆𑀔𑀡𑁂. 𑀅𑀗𑁆𑀓𑀢𑀺, 𑀅𑀗𑁆𑀓𑁄, 𑀲𑀲𑀗𑁆𑀓𑁄.

𑀫𑀓𑀺 𑀫𑀡𑁆𑀟𑀦𑁂. 𑀫𑀡𑁆𑀟𑀦𑀁 𑀪𑀽𑀲𑀦𑀁, 𑀫𑀗𑁆𑀓𑀢𑀺.

𑀓𑀢 𑀮𑁄𑀮𑀺𑀬𑁂. 𑀮𑁄𑀮𑀪𑀸𑀯𑁄 𑀮𑁄𑀮𑀺𑀬𑀁 𑀬𑀣𑀸 𑀤𑀓𑁆𑀔𑀺𑀬𑀁. 𑀓𑀓𑀢𑀺, 𑀓𑀸𑀓𑁄, 𑀓𑀸𑀓𑀻. 𑀏𑀢𑁆𑀣 ‘‘𑀓𑀸𑀓𑁄, 𑀥𑀗𑁆𑀓𑁄, 𑀯𑀸𑀬𑀲𑁄, 𑀩𑀮𑀺, 𑀪𑁄𑀚𑀺, 𑀅𑀭𑀺𑀝𑁆𑀞𑁄’’𑀢𑀺 𑀇𑀫𑀸𑀦𑀺 𑀓𑀸𑀓𑀸𑀪𑀺𑀥𑀸𑀦𑀸𑀦𑀺.

𑀓𑀼𑀓 𑀯𑀓 𑀆𑀤𑀸𑀦𑁂. 𑀓𑀼𑀓𑀢𑀺, 𑀯𑀓𑀢𑀺, 𑀓𑁄𑀓𑁄, 𑀯𑀓𑁄. 𑀏𑀢𑁆𑀣 𑀓𑁄𑀓𑁄𑀢𑀺 𑀅𑀭𑀜𑁆𑀜𑀲𑀼𑀦𑀔𑁄. 𑀯𑀓𑁄𑀢𑀺 𑀔𑀼𑀤𑁆𑀤𑀓𑀯𑀦𑀤𑀻𑀧𑀺𑀓𑁄, 𑀩𑁆𑀬𑀕𑁆𑀖𑁄𑀢𑀺𑀧𑀺 𑀯𑀤𑀦𑁆𑀢𑀺.

𑀯𑀓 𑀤𑀺𑀢𑁆𑀢𑀺𑀬𑀁 𑀧𑀝𑀺𑀖𑀸𑀢𑁂 𑀘. 𑀤𑀺𑀢𑁆𑀢𑀺 𑀲𑁄𑀪𑀸, 𑀯𑀓𑀢𑀺.

𑀓𑀓𑀺 𑀯𑀓𑀺 𑀲𑀓𑁆𑀓 𑀢𑀺𑀓 𑀝𑀺𑀓 𑀲𑁂𑀓 𑀕𑀢𑁆𑀬𑀢𑁆𑀣𑀸. 𑀓𑀗𑁆𑀓𑀢𑀺, 𑀯𑀗𑁆𑀓𑀢𑀺, 𑀲𑀓𑁆𑀓𑀢𑀺, 𑀦𑀺𑀲𑀓𑁆𑀓𑀢𑀺, 𑀧𑀭𑀺𑀲𑀓𑁆𑀓𑀢𑀺, 𑀑𑀲𑀓𑁆𑀓𑀢𑀺, 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁. 𑀩𑀺𑀴𑀸𑀭𑀦𑀺𑀲𑀓𑁆𑀓𑀫𑀢𑁆𑀢𑀫𑁆𑀧𑀺. 𑀢𑁂𑀓𑀢𑀺, 𑀝𑁂𑀓𑀢𑀺, 𑀝𑀻𑀓𑀸 𑀲𑁂𑀓𑀢𑀺. 𑀏𑀢𑁆𑀣 𑀝𑀻𑀓𑀸𑀢𑀺 𑀝𑀺𑀓𑀺𑀬𑀢𑀺 𑀚𑀸𑀦𑀺𑀬𑀢𑀺 𑀲𑀁𑀯𑀡𑁆𑀡𑀦𑀸𑀬 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀝𑀻𑀓𑀸. 𑀏𑀢𑀸 𑀇𑀥𑀸𑀢𑀼𑀆𑀤𑀺𑀓𑀸 𑀲𑁂𑀓𑀧𑀭𑀺𑀬𑀦𑁆𑀢𑀸 𑀥𑀸𑀢𑀼𑀬𑁄 ‘‘𑀅𑀢𑁆𑀢𑀦𑁄𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂 𑀏𑀢𑀸 ‘‘𑀢𑁂 𑀅𑀦𑁆𑀢𑁂, 𑀢𑀁 𑀅𑀦𑁆𑀢𑀁’’𑀇𑀘𑁆𑀘𑀸𑀤𑀻𑀦𑀁𑀬𑁂𑀯 𑀯𑀺𑀲𑀬𑁄, 𑀧𑀸𑀯𑀘𑀦𑁂 𑀧𑀦 𑀦𑀺𑀬𑀫𑁄 𑀦𑀢𑁆𑀣𑀺.

𑀳𑀺𑀓𑁆𑀓 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀅𑀩𑁆𑀬𑀢𑁆𑀢𑀲𑀤𑁆𑀤𑁄 𑀅𑀯𑀺𑀪𑀸𑀯𑀺𑀢𑀢𑁆𑀣𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑀲𑀤𑁆𑀤𑁄 𑀘. 𑀳𑀺𑀓𑁆𑀓𑀢𑀺, 𑀳𑀺𑀓𑁆𑀓𑀢𑁂. 𑀇𑀫𑀁 ‘‘𑀉𑀪𑀬𑀢𑁄𑀪𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀢𑀼 𑀧𑀸𑀯𑀘𑀦𑁂𑀦 𑀲𑀁𑀲𑀦𑁆𑀤𑀢𑀺. 𑀧𑀭𑀲𑁆𑀲𑀢𑁆𑀢𑀦𑁄𑀪𑀸𑀲𑀸𑀦𑀜𑁆𑀳𑀺 𑀥𑀸𑀢𑀽𑀦𑀁 ‘‘𑀪𑀯𑀢𑀺, 𑀪𑀯𑀢𑁂, 𑀩𑀸𑀥𑀢𑁂, 𑀩𑀸𑀥𑀢𑀻’’𑀢𑀺𑀆𑀤𑀺𑀦𑀸 𑀬𑁂𑀪𑀼𑀬𑁆𑀬𑁂𑀦 𑀤𑁆𑀯𑀺𑀥𑀸 𑀤𑁆𑀯𑀺𑀥𑀸 𑀭𑀽𑀧𑀸𑀦𑀺 𑀲𑀸𑀲𑀦𑁂 𑀤𑀺𑀲𑁆𑀲𑀦𑁆𑀢𑀺.

𑀇𑀫𑀸𑀦𑀺 𑀓𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀔𑀓𑀸𑀭𑀦𑁆𑀢𑀥𑀸𑀢𑀼

𑀔𑀸 𑀧𑀓𑀣𑀦𑁂 𑀔𑁆𑀬𑀸 𑀘. 𑀧𑀓𑀣𑀦𑀁 𑀆𑀘𑀺𑀓𑁆𑀔𑀦𑀁 𑀤𑁂𑀲𑀦𑀁 𑀯𑀸. 𑀔𑀸𑀢𑀺, 𑀲𑀗𑁆𑀔𑀸𑀢𑀺. 𑀆𑀧𑀼𑀩𑁆𑀩𑀢𑁆𑀢𑁂 𑀯𑀺𑀲𑀤𑀺𑀲𑀪𑀸𑀯𑁂𑀦 𑀔𑀸𑀢𑁆𑀬𑀓𑁆𑀔𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀆𑀓𑀸𑀭𑀲𑁆𑀲 𑀘 𑀲𑀜𑁆𑀜𑁄𑀕𑀧𑀼𑀩𑁆𑀩𑀢𑁆𑀢𑀸 𑀭𑀲𑁆𑀲𑀢𑁆𑀢𑀁, 𑀅𑀓𑁆𑀔𑀸𑀢𑀺. 𑀅𑀓𑁆𑀔𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄. 𑀅𑀓𑁆𑀔𑁂𑀬𑁆𑀬𑀁 𑀢𑁂 𑀅𑀳𑀁 𑀅𑀬𑁆𑀬𑁂. 𑀥𑀫𑁆𑀫𑁄 𑀲𑀗𑁆𑀔𑀸𑀬𑀢𑀺. 𑀅𑀓𑁆𑀔𑀸𑀬𑀢𑀺. 𑀅𑀢𑁆𑀭 𑀧𑀦 𑀓𑀓𑀸𑀭𑀮𑁄𑀧𑁄. 𑀲𑁆𑀯𑀸𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄. 𑀲𑀗𑁆𑀔𑀸𑀢𑁄. 𑀅𑀓𑁆𑀔𑀸𑀢𑁄. 𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸. 𑀲𑀗𑁆𑀔𑀸𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀯𑀺𑀥𑀼𑀭𑁄. 𑀲𑀗𑁆𑀔𑀸, 𑀧𑀝𑀺𑀲𑀗𑁆𑀔𑀸. 𑀓𑁆𑀭𑀺𑀬𑀁 𑀆𑀓𑁆𑀬𑀸𑀢𑀺 𑀓𑀣𑁂𑀢𑀻𑀢𑀺 𑀆𑀔𑁆𑀬𑀸𑀢𑀁. 𑀓𑁂𑀘𑀺 𑀧𑀦 ‘‘𑀲𑁆𑀯𑀸𑀔𑀸𑀢𑁄’’𑀢𑀺 𑀘 ‘‘𑀲𑁆𑀯𑀸𑀓𑁆𑀔𑁆𑀬𑀸𑀢𑁄’’𑀢𑀺 𑀘 ‘‘𑀲𑁆𑀯𑀸𑀔𑁆𑀬𑀸𑀢𑁄’’𑀢𑀺 𑀘 𑀧𑀤𑀫𑀺𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀸𑀦𑀺 𑀲𑀓𑁆𑀓𑀝𑀪𑀸𑀲𑀸𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀇𑀢𑀭𑀁 𑀬𑀣𑀸𑀞𑀺𑀢𑀭𑀽𑀧𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦, 𑀅𑀢𑁄 𑀬𑀣𑀸𑀤𑀲𑁆𑀲𑀺𑀢𑀧𑀤𑀸𑀦𑀺𑀬𑁂𑀯 𑀧𑀲𑀢𑁆𑀣𑀢𑀭𑀸𑀦𑀺. 𑀢𑀢𑁆𑀣 𑀲𑀗𑁆𑀔𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂 𑁋 𑀲𑀗𑁆𑀔𑀸𑀲𑀤𑁆𑀤𑁄 𑀜𑀸𑀡𑀓𑁄𑀝𑁆𑀞𑀸𑀲𑀧𑀜𑁆𑀜𑀢𑁆𑀢𑀺𑀕𑀡𑀦𑀸𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 𑀳𑀺 𑀜𑀸𑀡𑁂 𑀤𑀺𑀲𑁆𑀲𑀢𑀺. ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀓𑁄𑀝𑁆𑀞𑀸𑀲𑁂. ‘‘𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀕𑀡𑀦𑀸𑀬𑀁. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀜𑀸𑀡𑀧𑀜𑁆𑀜𑀢𑁆𑀢𑀺𑀓𑁄𑀝𑁆𑀞𑀸𑀲-𑀕𑀡𑀦𑀸𑀲𑀼 𑀧𑀤𑀺𑀲𑁆𑀲𑀢𑀺;

𑀲𑀗𑁆𑀔𑀸𑀲𑀤𑁆𑀤𑁄𑀢𑀺 𑀤𑀻𑀧𑁂𑀬𑁆𑀬, 𑀥𑀫𑁆𑀫𑀤𑀻𑀧𑀲𑁆𑀲 𑀲𑀸𑀲𑀦𑁂’’𑀢𑀺.

𑀔𑀺 𑀔𑀬𑁂. 𑀔𑀺𑀬𑀦𑀥𑀫𑁆𑀫𑀁 𑀔𑀻𑀬𑀢𑀺. 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 𑀲𑀭𑁂 𑀇𑀓𑀸𑀭𑀲𑁆𑀲 𑀇𑀬𑁆𑀬𑀸𑀤𑁂𑀲𑁄, 𑀔𑀺𑀬𑁆𑀬𑀢𑀺. ‘‘𑀔𑀬𑁄, 𑀔𑀁’’ 𑀇𑀘𑁆𑀘𑀧𑀺 𑀭𑀽𑀧𑀸𑀦𑀺 𑀜𑁂𑀬𑁆𑀬𑀸𑀦𑀺. 𑀢𑀢𑁆𑀣 𑀔𑀬𑁄𑀢𑀺 𑀔𑀺𑀬𑀦𑀁 𑀔𑀬𑁄. 𑀅𑀣 𑀯𑀸 𑀔𑀺𑀬𑀦𑁆𑀢𑀺 𑀓𑀺𑀮𑁂𑀲𑀸 𑀏𑀢𑁆𑀣𑀸𑀢𑀺 𑀔𑀬𑁄, 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀺. 𑀔𑀬𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀧𑀸𑀧𑀼𑀡𑀺𑀬𑀢𑁆𑀢𑀸 𑀨𑀮𑀫𑁆𑀧𑀺 𑀔𑀬𑁄. 𑀔𑀦𑁆𑀢𑀺 𑀢𑀼𑀘𑁆𑀙𑀁 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑀁 𑀭𑀺𑀢𑁆𑀢𑀁, 𑀔𑀦𑁆𑀢𑀺 𑀯𑀸 𑀆𑀓𑀸𑀲𑁄.

𑀔𑀺 𑀦𑀺𑀯𑀸𑀲𑁂. 𑀔𑀻𑀬𑀢𑀺, 𑀔𑀺𑀬𑁆𑀬𑀢𑀺 𑀯𑀸. 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 𑀇𑀓𑀸𑀭𑀲𑁆𑀲 𑀈𑀬 𑀇𑀬𑁆𑀬𑀸𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀤𑀺𑀯𑀸𑀤𑀺𑀕𑀡𑁂𑀧𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑁄. 𑀔𑀁 𑀔𑀬𑀁. 𑀅𑀪𑀺𑀭𑀫𑀡𑀻𑀬𑀁 𑀭𑀸𑀚𑀓𑁆𑀔𑀬𑀁. 𑀢𑀢𑁆𑀣 𑀔𑀻𑀬𑀢𑀻𑀢𑀺 𑀦𑀺𑀯𑀲𑀢𑀺. 𑀔𑀦𑁆𑀢𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀯𑀸𑀲𑀝𑁆𑀞𑁂𑀦. 𑀔𑀬𑀦𑁆𑀢𑀺 𑀦𑀺𑀯𑁂𑀲𑀦𑀁. 𑀭𑀸𑀚𑀓𑁆𑀔𑀬𑀦𑁆𑀢𑀺 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀲𑀘𑁂 𑀘 𑀅𑀚𑁆𑀚 𑀥𑀸𑀭𑁂𑀲𑀺, 𑀓𑀼𑀫𑀸𑀭𑀁 𑀘𑀸𑀭𑀼𑀤𑀲𑁆𑀲𑀦𑀁;

𑀓𑀼𑀲𑁂𑀦 𑀚𑀸𑀢𑀔𑀢𑁆𑀢𑀺𑀬𑀁, 𑀲𑀯𑀡𑁆𑀡𑀫𑀡𑀺𑀫𑁂𑀔𑀮𑀁;

𑀧𑀽𑀚𑀺𑀢𑀸 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀦 𑀕𑀘𑁆𑀙𑀲𑀺 𑀬𑀫𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀣 𑀬𑀫𑀓𑁆𑀔𑀬𑀦𑁆𑀢𑀺 𑀬𑀫𑀦𑀺𑀯𑁂𑀲𑀦𑀁.

𑀔𑀼 𑀲𑀤𑁆𑀤𑁂. 𑀔𑁄𑀢𑀺 𑀔𑀯𑀢𑀺.

𑀔𑁂 𑀔𑀸𑀤𑀦𑀲𑀢𑁆𑀢𑀸𑀲𑀼. 𑀔𑀸𑀬𑀢𑀺. 𑀉𑀦𑁆𑀤𑀽𑀭𑀸 𑀔𑀸𑀬𑀦𑁆𑀢𑀺. 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀕𑁄𑀔𑀸𑀬𑀺𑀢𑀓𑀁. 𑀅𑀲𑁆𑀲𑀺𑀭𑀻 𑀯𑀺𑀬 𑀔𑀸𑀬𑀢𑀺. 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺. 𑀏𑀢𑁆𑀣𑀸𑀤𑀺𑀫𑁆𑀳𑀺 𑀓𑀸𑀬𑀢𑀻𑀢𑀺 𑀔𑀸𑀤𑀢𑀺. 𑀅𑀣 𑀯𑀸 𑀉𑀧𑀝𑁆𑀞𑀸𑀢𑀺 𑀧𑀜𑁆𑀜𑀸𑀬𑀢𑀺.

𑀲𑀼𑀔 𑀤𑀼𑀓𑁆𑀔 𑀢𑀓𑁆𑀭𑀺𑀬𑀸𑀬𑀁. 𑀢𑀓𑁆𑀭𑀺𑀬𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑁂𑀤𑀦𑀸𑀦𑀁 𑀓𑁆𑀭𑀺𑀬𑀸, 𑀲𑀼𑀔𑀦𑀁 𑀤𑀼𑀓𑁆𑀔𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀫𑁆𑀫𑀓𑀸 𑀇𑀫𑁂 𑀥𑀸𑀢𑀯𑁄. 𑀲𑀼𑀔𑀢𑀺, 𑀤𑀼𑀓𑁆𑀔𑀢𑀺. 𑀲𑀼𑀔𑀁, 𑀤𑀼𑀓𑁆𑀔𑀁. 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁄. 𑀲𑀼𑀔𑀁 𑀲𑀸𑀢𑀁 𑀧𑀻𑀡𑀦𑀁, 𑀤𑀼𑀓𑁆𑀔𑀁 𑀯𑀺𑀖𑀸𑀢𑀁 𑀅𑀖𑀁 𑀓𑀺𑀮𑁂𑀲𑁄. 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀦𑀺𑀩𑁆𑀩𑀘𑀦𑀸𑀦𑀺 𑀓𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀲𑀼𑀔𑀤𑀼𑀓𑁆𑀔𑀲𑀤𑁆𑀤𑀢𑁆𑀣𑀁 𑀯𑀤𑀦𑁆𑀢𑁂𑀳𑀺 𑀕𑀭𑀽𑀳𑀺 𑀲𑀼𑀔𑀬𑀢𑀺 𑀤𑀼𑀓𑁆𑀔𑀬𑀢𑀺𑀲𑀤𑁆𑀤𑀸𑀦𑀁 𑀓𑀫𑁆𑀫𑀢𑁆𑀣𑀫𑀸𑀤𑀸𑀬 𑀯𑀺𑀯𑀭𑀡𑀲𑁆𑀲 𑀓𑀢𑀢𑁆𑀢𑀸. 𑀢𑀣𑀸 𑀳𑀺 ‘‘𑀲𑀼𑀔𑁂𑀢𑀺 𑀲𑀼𑀔𑀬𑀢𑀺, 𑀲𑀼𑀔𑀸𑀧𑁂𑀢𑀺 𑀲𑀼𑀔𑀸𑀧𑀬𑀢𑀺, 𑀤𑀼𑀓𑁆𑀔𑁂𑀢𑀺 𑀤𑀼𑀓𑁆𑀔𑀬𑀢𑀺, 𑀤𑀼𑀓𑁆𑀔𑀸𑀧𑁂𑀢𑀺 𑀤𑀼𑀓𑁆𑀔𑀸𑀧𑀬𑀢𑀻’’𑀢𑀺 𑀇𑀫𑀸𑀦𑀺 𑀢𑁂𑀲𑀁 𑀓𑀸𑀭𑀺𑀢𑀧𑀤𑀭𑀽𑀧𑀸𑀦𑀺, 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺 𑀘, 𑀲𑀼𑀔𑀬𑀢𑀺 𑀲𑀼𑀔𑀁, 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀦𑁆𑀢𑀺 𑀘,

‘‘𑀲𑀘𑁂 𑀘 𑀓𑀺𑀫𑁆𑀳𑀺𑀘𑀺 𑀓𑀸𑀮𑁂,

𑀫𑀭𑀡𑀁 𑀫𑁂 𑀧𑀼𑀭𑁂 𑀲𑀺𑀬𑀸;

𑀧𑀼𑀢𑁆𑀢𑁂 𑀘 𑀫𑁂 𑀧𑀧𑀼𑀢𑁆𑀢𑁂 𑀘,

𑀲𑀼𑀔𑀸𑀧𑁂𑀬𑁆𑀬 𑀫𑀳𑁄𑀲𑀥𑁄’’𑀢𑀺 𑀘

𑀧𑀸𑀴𑀺𑀆𑀤𑀺𑀤𑀲𑁆𑀲𑀦𑀢𑁄. 𑀲𑀤𑁆𑀤𑀲𑀢𑁆𑀣𑁂 𑀧𑀦 𑀥𑀸𑀢𑀼𑀧𑀸𑀞𑀲𑀗𑁆𑀔𑁂𑀧𑁂 𑀘 𑀇𑀫𑁂 𑀥𑀸𑀢𑀯𑁄 𑀘𑀼𑀭𑀸𑀤𑀺𑀕𑀡𑁂𑀬𑁂𑀯 𑀯𑀼𑀢𑁆𑀢𑀸. ‘‘𑀲𑀼𑀔𑀬𑀢𑀺 𑀤𑀼𑀓𑁆𑀔𑀬𑀢𑀻’’𑀢𑀺 𑀘 𑀅𑀓𑀸𑀭𑀺𑀢𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀇𑀘𑁆𑀙𑀺𑀢𑀸𑀦𑀺. 𑀫𑀬𑀁 𑀢𑀼 𑀢𑁂𑀲𑀁 𑀢𑀩𑁆𑀩𑀘𑀦𑀁 𑀲𑀼𑀤𑁆𑀥𑀓𑀢𑁆𑀢𑀭𑀺 𑀘 𑀢𑀸𑀦𑀺 𑀧𑀤𑀭𑀽𑀧𑀸𑀦𑀺 𑀦 𑀇𑀘𑁆𑀙𑀸𑀫 𑀧𑀸𑀴𑀺𑀆𑀤𑀻𑀳𑀺 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸𑀬𑁂𑀯 𑀢𑁂 𑀇𑀫𑀲𑁆𑀫𑀺𑀁 𑀪𑀽𑀯𑀸𑀤𑀺𑀕𑀡𑁂 𑀯𑀼𑀢𑁆𑀢𑀸. 𑀅𑀬𑀜𑁆𑀳𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀺𑀲𑀬𑁂 𑀅𑀲𑁆𑀫𑀸𑀓𑀁 𑀭𑀼𑀘𑀺 ‘‘𑀲𑀼𑀔𑀢𑀻𑀢𑀺 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀢𑀻𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺.

𑀦𑀦𑀼 𑀘 𑀪𑁄 ‘‘𑀲𑀼𑀔𑀢𑀺 𑀤𑀼𑀓𑁆𑀔𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺? 𑀲𑀘𑁆𑀘𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺𑀬𑁂𑀯 𑀦𑀸𑀫. 𑀦 𑀳𑀺 𑀲𑀩𑁆𑀩𑀣𑀸 𑀲𑀩𑁆𑀩𑁂𑀲𑀁 𑀥𑀸𑀢𑀽𑀦𑀁 𑀭𑀽𑀧𑀸𑀦𑀺 𑀲𑀸𑀲𑀦𑁂 𑀮𑁄𑀓𑁂 𑀯𑀸 𑀮𑀩𑁆𑀪𑀦𑁆𑀢𑀺, 𑀏𑀓𑀘𑁆𑀘𑀸𑀦𑀺 𑀧𑀦 𑀮𑀩𑁆𑀪𑀦𑁆𑀢𑀺, 𑀏𑀓𑀘𑁆𑀘𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀺𑀬𑁂𑀯. ‘‘𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸’’𑀢𑀺 𑀳𑀺 𑀤𑀺𑀝𑁆𑀞𑁂 ‘‘𑀘𑀭𑀯𑁆𑀳𑁄 𑀪𑀼𑀜𑁆𑀚𑀯𑁆𑀳𑁄’’𑀢𑀺𑀆𑀤𑀻𑀦𑀺𑀧𑀺 𑀦𑀬𑀯𑀲𑁂𑀦 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫.

𑀢𑀢𑁆𑀭 𑀧𑀦𑀸𑀬𑀁 𑀦𑀬𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀳𑀺 ‘‘𑀏𑀓𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 𑀯𑀸𑀬𑁄 𑀓𑀼𑀧𑁆𑀧𑀢𑀺, 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀻’’𑀢𑀺 𑀏𑀯𑀁 𑀪𑀽𑀯𑀸𑀤𑀺𑀕𑀡𑀺𑀓𑀁 𑀅𑀓𑀫𑁆𑀫𑀓𑀁 𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀁 ‘‘𑀤𑀼𑀓𑁆𑀔𑀦𑁆𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀁 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀤𑀺𑀝𑁆𑀞𑀺𑀬𑁂𑀯 ‘‘𑀲𑀼𑀔𑀢𑀺, 𑀲𑀼𑀔𑀦𑁆𑀢𑀺. 𑀲𑀼𑀔𑀲𑀺, 𑀲𑀼𑀔𑀣. 𑀲𑀼𑀔𑀸𑀫𑀺, 𑀲𑀼𑀔𑀸𑀫𑀸’’𑀢𑀺𑀆𑀤𑀻𑀦𑀺 𑀘 ‘‘𑀤𑀼𑀓𑁆𑀔𑀢𑀺, 𑀤𑀼𑀓𑁆𑀔𑀦𑁆𑀢𑀺. 𑀤𑀼𑀓𑁆𑀔𑀲𑀺, 𑀤𑀼𑀓𑁆𑀔𑀣𑀸’’𑀢𑀺𑀆𑀤𑀻𑀦𑀺𑀘 𑀤𑀺𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀦𑀯𑀚𑁆𑀚𑀲𑁆𑀲 𑀦𑀬𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸 ‘‘𑀲𑀼𑀔𑀢𑀻𑀢𑀺 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀢𑀻𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺 𑀪𑀽𑀯𑀸𑀤𑀺𑀦𑀬𑁄 𑀏𑀯 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀘𑀼𑀭𑀸𑀤𑀺𑀦𑀬𑁄. 𑀅𑀧𑀭𑀫𑁆𑀧𑁂𑀢𑁆𑀣 𑀦𑀺𑀩𑁆𑀩𑀘𑀦𑀁, 𑀲𑀼𑀔𑀁 𑀲𑀜𑁆𑀚𑀸𑀢𑀁 𑀏𑀢𑀲𑁆𑀲𑀸𑀢𑀺 𑀲𑀼𑀔𑀺𑀢𑁄, 𑀲𑀜𑁆𑀚𑀸𑀢𑀲𑀼𑀔𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀓𑁆𑀔𑀺𑀢𑁄𑀢𑀺 𑀏𑀢𑁆𑀣𑀸𑀧𑀺. 𑀅𑀣 𑀯𑀸 𑀲𑀼𑀔𑁂𑀦 𑀇𑀢𑁄 𑀧𑀯𑀢𑁆𑀢𑁄𑀢𑀺 𑀲𑀼𑀔𑀺𑀢𑁄. 𑀏𑀲 𑀦𑀬𑁄 ‘‘𑀤𑀼𑀓𑁆𑀔𑀺𑀢𑁄’’𑀢𑀺 𑀏𑀢𑁆𑀣𑀸𑀧𑀺. 𑀤𑀼𑀮𑁆𑀮𑀪𑀸𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.