𑁧𑁯. 𑀲𑀩𑁆𑀩𑀕𑀡𑀯𑀺𑀦𑀺𑀘𑁆𑀙𑀬

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀕𑀡𑀯𑀺𑀦𑀺𑀘𑁆𑀙𑀬𑀁;

𑀲𑁄𑀢𑀽𑀦𑀁 𑀧𑀝𑀼𑀪𑀸𑀯𑀢𑁆𑀣𑀁, 𑀧𑀭𑀫𑁂 𑀧𑀺𑀝𑀓𑀢𑁆𑀢𑀬𑁂.

𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑁂𑀳𑀺, 𑀦𑀬𑁂𑀳𑀺 𑀯𑀺𑀯𑀺𑀥𑁂𑀳𑀺 𑀢𑀁;

𑀲𑀼𑀔𑀕𑁆𑀕𑀸𑀳𑀸𑀬 𑀲𑁄𑀢𑀽𑀦𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑀢𑀢𑁆𑀣 𑀧𑀞𑀫𑁄 𑀪𑀽𑀯𑀸𑀤𑀺𑀕𑀡𑁄, 𑀤𑀼𑀢𑀺𑀬𑁄 𑀭𑀼𑀥𑀸𑀤𑀺𑀕𑀡𑁄, 𑀢𑀢𑀺𑀬𑁄 𑀤𑀺𑀯𑀸𑀤𑀺𑀕𑀡𑁄, 𑀘𑀢𑀼𑀢𑁆𑀣𑁄 𑀲𑁆𑀯𑀸𑀤𑀺𑀕𑀼𑀡𑁄, 𑀧𑀜𑁆𑀘𑀫𑁄 𑀓𑀺𑀬𑀸𑀤𑀺𑀕𑀡𑁄, 𑀙𑀝𑁆𑀞𑁄 𑀕𑀳𑀸𑀤𑀺𑀕𑀡𑁄, 𑀲𑀢𑁆𑀢𑀫𑁄 𑀢𑀦𑀸𑀤𑀺𑀕𑀡𑁄, 𑀅𑀝𑁆𑀞𑀫𑁄 𑀘𑀼𑀭𑀸𑀤𑀺𑀕𑀡𑁄, 𑀇𑀫𑀲𑁆𑀫𑀺𑀁 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀅𑀝𑁆𑀞𑀯𑀺𑀥𑀸 𑀥𑀸𑀢𑀼𑀕𑀡𑀸 𑀪𑀯𑀦𑁆𑀢𑀺. 𑀏𑀢𑁂𑀲𑀼 𑀯𑀺𑀓𑀭𑀡𑀧𑀘𑁆𑀘𑀬𑀯𑀲𑁂𑀦 𑁋

𑀪𑀽𑀯𑀸𑀤𑀺𑀢𑁄 𑀅𑀓𑀸𑀭𑁄 𑀘, 𑀲𑀸𑀦𑀼𑀲𑀸𑀭𑁄 𑀭𑀼𑀥𑀸𑀤𑀺𑀢𑁄;

𑀅𑀓𑀸𑀭𑁄 𑀘𑁂𑀯𑀺𑀯𑀡𑁆𑀡𑁄 𑀘, 𑀏𑀓𑀸𑀭𑁄𑀓𑀸𑀭𑀫𑁂𑀯 𑀘.

𑀬𑀧𑀘𑁆𑀘𑀬𑁄 𑀤𑀺𑀯𑀸𑀤𑀺𑀫𑁆𑀳𑀸, 𑀡𑀼 𑀡𑀸 𑀉𑀡𑀸 𑀲𑀼𑀯𑀸𑀤𑀺𑀢𑁄;

𑀓𑁆𑀬𑀸𑀤𑀺𑀢𑁄 𑀧𑀦 𑀦𑀸𑀬𑁂𑀯, 𑀧𑁆𑀧𑀡𑁆𑀳𑀸 𑀧𑀦 𑀕𑀳𑀸𑀤𑀺𑀢𑁄.

𑀑𑀬𑀺𑀭𑀸 𑀢𑀼 𑀢𑀦𑀸𑀤𑀺𑀫𑁆𑀳𑀸, 𑀡𑁂 𑀡𑀬𑀸 𑀘 𑀘𑀼𑀭𑀸𑀤𑀺𑀢𑁄;

𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦, 𑀧𑀘𑁆𑀘𑀬𑀸 𑀤𑀲 𑀧𑀜𑁆𑀘 𑀘.

𑀳𑀺𑀬𑁆𑀬𑀢𑁆𑀢𑀦𑀻 𑀲𑀢𑁆𑀢𑀫𑀻 𑀘, 𑀯𑀢𑁆𑀢𑀫𑀸𑀦𑀸 𑀘 𑀧𑀜𑁆𑀘𑀫𑀻;

𑀘𑀢𑀲𑁆𑀲𑁂𑀢𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀲𑀩𑁆𑀩𑀥𑀸𑀢𑀼𑀓𑀦𑀸𑀫𑀺𑀓𑀸.

𑀏𑀢𑁂𑀲𑀼 𑀯𑀺𑀲𑀬𑁂𑀲𑁆𑀯𑁂𑀯, 𑀅𑀓𑀸𑀭𑁄 𑀲𑀼𑀤𑁆𑀥𑀓𑀢𑁆𑀢𑀭𑀺;

𑀅𑀜𑁆𑀜𑀢𑁆𑀭 𑀔 𑀙 𑀲𑀸𑀤𑀻𑀳𑀺, 𑀲𑀳𑀸𑀧𑀺 𑀘𑀼𑀧𑀮𑀩𑁆𑀪𑀢𑀺.

‘‘𑀪𑀯𑀢𑀺 𑀳𑁄𑀢𑀺 𑀲𑀫𑁆𑀪𑁄𑀢𑀺, 𑀚𑁂𑀢𑀺 𑀚𑀬𑀢𑀺 𑀓𑀻𑀬𑀢𑀺;

𑀟𑁂𑀢𑀺 𑀬𑀸𑀢𑀺 𑀇𑀢𑀺 𑀏𑀢𑀺, 𑀅𑀯𑀢𑀺 𑀓𑁄𑀢𑀺 𑀲𑀗𑁆𑀓𑀢𑀺.

𑀪𑀺𑀓𑁆𑀔𑀢𑀺 𑀧𑀺𑀯𑀢𑀺 𑀧𑀸𑀢𑀺, 𑀯𑀤𑁂𑀢𑀺 𑀯𑀤𑀢𑀺’’ 𑀇𑀢𑀺;

𑀪𑀽𑀯𑀸𑀤𑀺𑀥𑀸𑀢𑀼𑀭𑀽𑀧𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑀭𑀽𑀧𑀁 ‘‘𑀭𑀼𑀦𑁆𑀥𑀢𑀺 𑀭𑀼𑀦𑁆𑀥𑀻𑀢𑀺, 𑀭𑀼𑀦𑁆𑀥𑁂𑀢𑀺 𑀧𑀼𑀦 𑀭𑀼𑀦𑁆𑀥𑀺𑀢𑀺;

𑀲𑀼𑀫𑁆𑀪𑁄𑀢𑀺’’𑀘𑁆𑀘𑀸𑀤𑀻𑀭𑀽𑀧𑀸𑀦𑀺, 𑀭𑀼𑀥𑀸𑀤𑀻𑀦𑁆𑀢𑀺 𑀤𑀻𑀧𑀬𑁂.

‘‘𑀤𑀺𑀩𑁆𑀩𑀢𑀺 𑀲𑀺𑀩𑁆𑀩𑀢𑀺 𑀘𑁂𑀯, 𑀬𑀼𑀚𑁆𑀚𑀢𑀺 𑀯𑀺𑀚𑁆𑀚𑀢𑀺 𑀢𑀣𑀸;

𑀖𑀸𑀬𑀢𑀺 𑀳𑀸𑀬𑀢𑀺’’𑀘𑁆𑀘𑀸𑀤𑀺, 𑀭𑀽𑀧𑀫𑀸𑀳𑀼 𑀤𑀺𑀯𑀸𑀤𑀺𑀦𑀁.

‘‘𑀲𑀼𑀡𑁄𑀢𑀺 𑀘 𑀲𑀼𑀡𑀸𑀢𑀺 𑀘, 𑀯𑀼𑀡𑁄𑀢𑀺 𑀘 𑀯𑀼𑀡𑀸𑀢𑀺 𑀘;

𑀧𑀸𑀧𑀼𑀡𑀸𑀢𑀺 𑀳𑀺𑀦𑁄𑀢𑀻’’𑀢𑀺, 𑀆𑀤𑀺𑀭𑀽𑀧𑀁 𑀲𑀼𑀯𑀸𑀤𑀺𑀦𑀁.

‘‘𑀓𑀺𑀦𑀸𑀢𑀺 𑀘 𑀚𑀺𑀦𑀸𑀢𑀺 𑀘, 𑀥𑀼𑀦𑀸𑀢𑀺 𑀘 𑀫𑀼𑀦𑀸𑀢𑀺 𑀘;

𑀅𑀲𑁆𑀦𑀸𑀢𑀺’’𑀘𑁆𑀘𑀸𑀤𑀺𑀭𑀽𑀧𑀜𑁆𑀘, 𑀓𑁆𑀬𑀸𑀤𑀻𑀦𑀦𑁆𑀢𑀺 𑀯𑀺𑀪𑀸𑀯𑀬𑁂.

‘‘𑀖𑁂𑀧𑁆𑀧𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀡𑁆𑀳𑀜𑁆𑀘 𑀲𑀡𑁆𑀳𑀓𑁄𑀢𑀺 𑀘;

𑀓𑀡𑁆𑀳𑀁 𑀢𑀡𑁆𑀳𑀸 𑀘 𑀢𑀺𑀡𑁆𑀳𑀼𑀡𑁆𑀳’’-𑀫𑀺𑀘𑁆𑀘𑀸𑀤𑀺 𑀘 𑀕𑀳𑀸𑀤𑀺𑀦𑀁.

‘‘𑀢𑀦𑁄𑀢𑀺 𑀘 𑀓𑀭𑁄𑀢𑀺 𑀘, 𑀓𑀬𑀺𑀭𑀢𑀺 𑀲𑀦𑁄𑀢𑀺 𑀘;

𑀲𑀓𑁆𑀓𑁄𑀢’𑀧𑁆𑀧𑁄𑀢𑀺 𑀧𑀧𑁆𑀧𑁄𑀢𑀺’’-𑀘𑁆𑀘𑀸𑀤𑀺𑀭𑀽𑀧𑀁 𑀢𑀦𑀸𑀤𑀺𑀦𑀁.

‘‘𑀘𑁄𑀭𑁂𑀢𑀺 𑀘𑁄𑀭𑀬𑀦𑁆𑀢𑁂 𑀘, 𑀘𑀺𑀦𑁆𑀢𑁂𑀢𑀺 𑀘𑀺𑀦𑁆𑀢𑀬𑀦𑁆𑀢𑀺 𑀘;

𑀫𑀦𑁆𑀢𑁂𑀢𑀺’’𑀘𑁆𑀘𑀸𑀤𑀺𑀓𑀜𑁆𑀘𑀸𑀧𑀺, 𑀭𑀽𑀧𑀫𑀸𑀳𑀼 𑀘𑀼𑀭𑀸𑀤𑀺𑀦𑀁.

𑀯𑀺𑀓𑀭𑀡𑀯𑀲𑁂𑀦𑁂𑀯𑀁, 𑀭𑀽𑀧𑀪𑁂𑀤𑁄 𑀧𑀓𑀸𑀲𑀺𑀢𑁄;

𑀥𑀸𑀢𑀽𑀦𑀁 𑀥𑀸𑀢𑀼𑀪𑁂𑀤𑀸𑀤𑀺-𑀓𑀼𑀲𑀮𑀲𑁆𑀲 𑀫𑀢𑀸𑀦𑀼𑀕𑁄.

𑀓𑀺𑀭𑀺𑀬𑀸𑀬 𑀥𑀸𑀭𑀡𑀢𑁄, 𑀥𑀸𑀢𑀯𑁄 𑀏𑀓𑀥𑀸 𑀫𑀢𑀸;

𑀤𑁆𑀯𑀺𑀥𑀸𑀧𑀺 𑀘 𑀧𑀯𑀼𑀘𑁆𑀘𑀦𑁆𑀢𑀺, 𑀲𑀓𑀫𑁆𑀫𑀸𑀓𑀫𑁆𑀫𑀢𑁄 𑀧𑀦.

𑀢𑀢𑁆𑀣 𑀲𑀓𑀫𑁆𑀫𑀓𑀸 𑀦𑀸𑀫, 𑀕𑀫𑀺𑀪𑀓𑁆𑀔𑀸𑀤𑀬𑀸 𑀲𑀺𑀬𑀼𑀁;

𑀞𑀸𑀲𑀸𑀤𑀬𑁄 𑀅𑀓𑀫𑁆𑀫𑀸 𑀘, 𑀉𑀧𑀲𑀕𑁆𑀕𑀁 𑀯𑀺𑀦𑀸 𑀯𑀤𑁂;

𑀲𑀓𑀫𑁆𑀫𑀓𑀓𑀫𑁆𑀫𑀪𑀽𑀢𑁄, 𑀤𑀺𑀯𑀼 𑀇𑀘𑁆𑀘𑀸𑀤𑀬𑁄 𑀧𑀼𑀦;

𑀕𑀳𑁂𑀢𑁆𑀯𑀸𑀦 𑀢𑀺𑀥𑀸 𑀳𑁄𑀦𑁆𑀢𑀺, 𑀏𑀯𑀜𑁆𑀘𑀸𑀧𑀺 𑀯𑀺𑀪𑀸𑀯𑀬𑁂.

𑀲𑀓𑀫𑁆𑀫𑀓𑁂 𑀤𑁆𑀯𑀺𑀥𑀸 𑀪𑀺𑀢𑁆𑀯𑀸, 𑀏𑀓𑀓𑀫𑁆𑀫𑀤𑁆𑀯𑀺𑀓𑀫𑁆𑀫𑀢𑁄;

𑀅𑀓𑀫𑁆𑀫𑀓𑁂𑀳𑀺 𑀲𑀤𑁆𑀥𑀺𑀁 𑀢𑁂, 𑀢𑀺𑀯𑀺𑀥𑀸𑀧𑀺 𑀪𑀯𑀦𑁆𑀢𑀺 𑀳𑀺.

𑀅𑀓𑀫𑁆𑀫𑀓𑀸 𑀭𑀼𑀢𑀸𑀬𑁂𑀯, 𑀏𑀓𑀓𑀫𑁆𑀫𑀸 𑀕𑀫𑀸𑀤𑀬𑁄;

𑀳𑁄𑀦𑁆𑀢𑀺 𑀤𑁆𑀯𑀺𑀓𑀫𑁆𑀫𑀓𑀸 𑀦𑀸𑀫, 𑀤𑀼𑀳𑀺𑀓𑀭𑀯𑀳𑀸𑀤𑀬𑁄.

𑀲𑀓𑀫𑁆𑀫𑀸𑀓𑀫𑁆𑀫𑀓𑀢𑁆𑀢𑀫𑁆𑀳𑀺, 𑀥𑀸𑀢𑀽𑀦𑀫𑀼𑀧𑀲𑀕𑁆𑀕𑀢𑁄;

𑀦𑀺𑀬𑀫𑁄 𑀦𑀢𑁆𑀣𑀺 𑀲𑁄 𑀢𑀲𑁆𑀫𑀸, 𑀦 𑀫𑀬𑀸 𑀏𑀢𑁆𑀣 𑀯𑀼𑀘𑁆𑀘𑀢𑀺.

𑀏𑀓𑀝𑁆𑀞𑀸𑀦𑀸 𑀕𑀫𑀺𑀘𑁆𑀘𑀸𑀤𑀻, 𑀤𑁆𑀯𑀺𑀝𑁆𑀞𑀸𑀦𑀸 𑀪𑀽𑀧𑀘𑀸𑀤𑀬𑁄;

𑀢𑀺𑀝𑁆𑀞𑀸𑀦𑀸 𑀲𑁆𑀯𑀸𑀤𑀬𑁄 𑀏𑀯𑀁, 𑀞𑀸𑀦𑀢𑁄𑀧𑀺 𑀢𑀺𑀥𑀸 𑀫𑀢𑀸.

𑀕𑀼𑀧𑀸𑀤𑀬𑁄 𑀦𑀺𑀬𑁄𑀕𑁂𑀦, 𑀆𑀔𑁆𑀬𑀸𑀢𑀢𑁆𑀢𑁂 𑀲𑀯𑀼𑀤𑁆𑀥𑀺𑀓𑀸;

𑀯𑀘 𑀢𑀼𑀭𑀸𑀤𑀬𑁄 𑀦 𑀳𑀺, 𑀯𑀼𑀤𑁆𑀥𑀺𑀓𑀸 𑀓𑀸𑀭𑀺𑀢𑀁 𑀯𑀺𑀦𑀸;

𑀔𑀺 𑀚𑀺 𑀇𑀘𑁆𑀘𑀸𑀤𑀬𑁄 𑀥𑀸𑀢𑀽, 𑀲𑀯𑀼𑀤𑁆𑀥𑀸𑀯𑀼𑀤𑁆𑀥𑀺𑀓𑀸 𑀫𑀢𑀸;

𑀇𑀢𑀺 𑀯𑀼𑀤𑁆𑀥𑀺𑀯𑀲𑁂𑀦𑀸𑀧𑀺, 𑀢𑀺𑀯𑀺𑀥𑁄 𑀥𑀸𑀢𑀼𑀲𑀗𑁆𑀕𑀳𑁄.

𑀅𑀮𑀼𑀢𑁆𑀢𑀯𑀺𑀓𑀭𑀡𑀸 𑀘, 𑀮𑀼𑀢𑁆𑀢𑀯𑀺𑀓𑀭𑀡𑀸 𑀢𑀣𑀸;

𑀮𑀼𑀢𑁆𑀢𑀸𑀮𑀼𑀢𑁆𑀢𑀯𑀺𑀓𑀭𑀡𑀸, 𑀏𑀯𑀫𑁆𑀧𑀺 𑀢𑀺𑀯𑀺𑀥𑀸 𑀲𑀺𑀬𑀼𑀁.

𑀢𑀢𑁆𑀭𑀸𑀮𑀼𑀢𑁆𑀢𑀯𑀺𑀓𑀭𑀡𑀸, 𑀕𑀫𑀺 𑀭𑀼𑀥𑀺 𑀤𑀺𑀯𑀸𑀤𑀬𑁄;

𑀧𑀸 𑀪𑀸𑀤𑀬𑁄 𑀚𑀺𑀦𑀺𑀘𑁆𑀘𑀸𑀤𑀻, 𑀓𑀫𑀢𑁄 𑀇𑀢𑀭𑁂 𑀲𑀺𑀬𑀼𑀁.

𑀲𑀼𑀤𑁆𑀥𑀲𑁆𑀲𑀭𑀸 𑀏𑀓𑀲𑁆𑀲𑀭𑀸, 𑀢𑀣𑀸𑀦𑁂𑀓𑀲𑁆𑀲𑀭𑀸𑀢𑀺 𑀘;

𑀢𑀺𑀥𑀸 𑀪𑀯𑀦𑁆𑀢𑀺 𑀬𑀼𑀬𑀸𑀢𑀸-𑀧𑀸𑀪𑀸𑀮𑀸𑀤𑀻 𑀓𑀭𑀸𑀤𑀬𑁄.

𑀘𑀢𑀼𑀥𑀸𑀤𑀺𑀦𑀬𑁄 𑀘𑀸𑀧𑀺, 𑀮𑀩𑁆𑀪𑀫𑀸𑀦𑀯𑀲𑁂𑀦 𑀘;

𑀕𑀳𑁂𑀢𑀩𑁆𑀩𑁄 𑀦𑀬𑀜𑁆𑀜𑀽𑀳𑀺, 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄.

𑀧𑀼𑀦 𑀲𑀼𑀤𑁆𑀥𑀲𑁆𑀲𑀭𑀸 𑀥𑀸𑀢𑀽, 𑀏𑀓𑀲𑁆𑀲𑀭𑀸 𑀘 𑀲𑀢𑁆𑀢𑀥𑀸;

𑀆𑀇𑀯𑀡𑁆𑀡𑀉𑀯𑀡𑁆𑀡𑀦𑁆𑀢-𑀏𑀑𑀦𑁆𑀢𑀯𑀲𑀸 𑀫𑀢𑀸.

𑀅𑀯𑀡𑁆𑀡𑀺𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑁂-𑀓𑀸𑀭𑀦𑁆𑀢𑀸𑀦𑀁 𑀯𑀲𑁂𑀦 𑀯𑁂;

𑀅𑀦𑁂𑀓𑀲𑁆𑀲𑀭𑀥𑀸𑀢𑀽 𑀘, 𑀲𑀢𑁆𑀢𑀥𑀸𑀯 𑀧𑀓𑀺𑀢𑁆𑀢𑀺𑀢𑀸.

𑀏𑀯𑀁 𑀧𑀦𑁆𑀦𑀭𑀲𑀥𑀸𑀧𑀺, 𑀥𑀸𑀢𑀽𑀦𑀫𑀺𑀥 𑀲𑀗𑁆𑀕𑀳𑁄;

𑀢𑀧𑁆𑀧𑀪𑁂𑀤𑀁 𑀧𑀓𑀸𑀲𑁂𑀬𑁆𑀬𑀼𑀁, 𑀇𑀉𑀇𑀘𑁆𑀘𑀸𑀤𑀺𑀦𑀸 𑀯𑀺𑀤𑀽.

𑀢𑀢𑁆𑀭 ‘‘𑀇𑀕𑀢𑀺𑀬𑀁, 𑀇 𑀅𑀚𑁆𑀛𑀬𑀦𑁂, 𑀉 𑀲𑀤𑁆𑀤𑁂’’ 𑀇𑀘𑁆𑀘𑁂𑀢𑁂 𑀲𑀼𑀤𑁆𑀥𑀲𑁆𑀲𑀭𑀸 𑀥𑀸𑀢𑀯𑁄. 𑀬𑀸 𑀭𑀸 𑀮𑀸 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀆𑀓𑀸𑀭𑀦𑁆𑀢𑀸. 𑀔𑀺𑀚𑀺𑀦𑀺𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀇𑀓𑀸𑀭𑀦𑁆𑀢𑀸. 𑀧𑀻𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀈𑀓𑀸𑀭𑀦𑁆𑀢𑀸. 𑀔𑀼 𑀤𑀼 𑀓𑀼 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀉𑀓𑀸𑀭𑀦𑁆𑀢𑀸, 𑀪𑀽 𑀳𑀽 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀊𑀓𑀸𑀭𑀦𑁆𑀢𑀸. 𑀔𑁂 𑀚𑁂 𑀲𑁂 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀏𑀓𑀸𑀭𑀦𑁆𑀢𑀸. 𑀲𑁄 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀑𑀓𑀸𑀭𑀦𑁆𑀢𑀸.

𑀓𑀭 𑀧𑀘 𑀲𑀗𑁆𑀕𑀸𑀫 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀅𑀓𑀸𑀭𑀦𑁆𑀢𑀸, 𑀑𑀫𑀸𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀆𑀓𑀸𑀭𑀦𑁆𑀢𑀸, 𑀲𑀓𑀺 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀇𑀓𑀸𑀭𑀦𑁆𑀢𑀸. 𑀘𑀓𑁆𑀔𑀻 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀈𑀓𑀸𑀭𑀦𑁆𑀢𑀸. 𑀅𑀦𑁆𑀥𑀼𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀉𑀓𑀸𑀭𑀦𑁆𑀢𑀸. 𑀓𑀓𑁆𑀔𑀽 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀊𑀓𑀸𑀭𑀦𑁆𑀢𑀸. 𑀕𑀺𑀮𑁂 𑀫𑀺𑀮𑁂 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀏𑀓𑀸𑀭𑀦𑁆𑀢𑀸𑀢𑀺 𑀏𑀯𑀁 𑀧𑀦𑁆𑀦𑀭𑀲𑀯𑀺𑀥𑁂𑀦 𑀥𑀸𑀢𑀼𑀲𑀗𑁆𑀕𑀳𑁄.

𑀅𑀣 𑀢𑁂𑀢𑁆𑀢𑀺𑀁𑀲𑀯𑀺𑀥𑁂𑀦𑀧𑀺 𑀥𑀸𑀢𑀼𑀲𑀗𑁆𑀕𑀳𑁄 𑀪𑀯𑀢𑀺. 𑀓𑀣𑀁?

𑀥𑀸𑀢𑀽 𑀲𑀼𑀤𑁆𑀥𑀲𑁆𑀲𑀭𑀸 𑀘𑁂𑀯, 𑀧𑀼𑀦 𑀘𑁂𑀓𑀲𑁆𑀲𑀭𑀸𑀧𑀺 𑀘;

𑀓𑀓𑀸𑀭𑀦𑁆𑀢𑀸 𑀔𑀓𑀸𑀭𑀦𑁆𑀢𑀸, 𑀕𑀦𑁆𑀢𑀸 𑀖𑀦𑁆𑀢𑀸 𑀘 𑀥𑀸𑀢𑀯𑁄.

𑀘𑀓𑀸𑀭𑀦𑁆𑀢𑀸 𑀙𑀓𑀸𑀭𑀦𑁆𑀢𑀸, 𑀚𑀦𑁆𑀢𑀸 𑀛𑀦𑁆𑀢𑀸 𑀘 𑀜𑀦𑁆𑀢𑀓𑀸;

𑀝𑀓𑀸𑀭𑀦𑁆𑀢𑀸 𑀞𑀓𑀸𑀭𑀦𑁆𑀢𑀸, 𑀟𑀦𑁆𑀢𑀸 𑀠𑀦𑁆𑀢𑀸 𑀘 𑀡𑀦𑁆𑀢𑀓𑀸.

𑀢𑀦𑁆𑀢𑀸 𑀘𑁂𑀯 𑀢𑀣𑀸 𑀣𑀦𑁆𑀢𑀸, 𑀤𑀦𑁆𑀢𑀸 𑀥𑀦𑁆𑀢𑀸 𑀘 𑀦𑀦𑁆𑀢𑀓𑀸;

𑀧𑀦𑁆𑀢𑀸 𑀨𑀦𑁆𑀢𑀸 𑀩𑀓𑀸𑀭𑀦𑁆𑀢𑀸, 𑀪𑀦𑁆𑀢𑀸 𑀫𑀦𑁆𑀢𑀸 𑀘 𑀬𑀦𑁆𑀢𑀓𑀸.

𑀭𑀦𑁆𑀢𑀸 𑀮𑀦𑁆𑀢𑀸 𑀯𑀓𑀸𑀭𑀦𑁆𑀢𑀸, 𑀲𑀦𑁆𑀢𑀸 𑀳𑀦𑁆𑀢𑀸 𑀘 𑀴𑀦𑁆𑀢𑀓𑀸;

𑀇𑀢𑀺 𑀢𑁂𑀢𑁆𑀢𑀺𑀁𑀲𑀥𑀸 𑀜𑁂𑀬𑁆𑀬𑁄, 𑀥𑀸𑀢𑀽𑀦𑀫𑀺𑀥 𑀲𑀗𑁆𑀕𑀳𑁄.

𑀫𑀢𑁂 𑀲𑀢𑁆𑀣𑀼𑀲𑁆𑀲 𑀠𑀡𑀴𑀸, 𑀧𑀤𑀸𑀤𑀺𑀫𑁆𑀳𑀺 𑀦 𑀤𑀺𑀲𑁆𑀲𑀭𑁂;

𑀢𑁂𑀦𑁂𑀓𑀲𑁆𑀲𑀭𑀥𑀸𑀢𑀽𑀲𑀼, 𑀠𑀡𑀴𑀸 𑀦 𑀓𑀣𑀻𑀬𑀭𑁂.

𑀇𑀓𑀸𑀭𑀦𑁆𑀢𑀢𑀺𑀓𑀸𑀭𑀦𑁆𑀢-𑀯𑀲𑁂𑀦 𑀢𑀼 𑀬𑀣𑀸𑀭𑀳𑀁;

𑀦𑀸𑀫𑀁 𑀲𑀫𑁆𑀪𑁄𑀢𑀺 𑀥𑀸𑀢𑀽𑀦𑀁, 𑀇𑀢𑀺𑀧𑁆𑀧𑀘𑁆𑀘𑀬𑀬𑁄𑀕𑀢𑁄.

𑀧𑀘𑀺𑀪𑀺𑀓𑁆𑀔𑀺𑀙𑀺𑀤𑀺𑀔𑀸𑀤𑀺, 𑀓𑀭𑁄𑀢𑀺 𑀪𑀯𑀢𑀺 𑀕𑀫𑀺;

𑀕𑀢𑀺𑀕𑀘𑁆𑀙𑀢𑀺𑀳𑁄𑀢𑀻𑀢𑀺, 𑀆𑀤𑀺𑀯𑁄𑀳𑀸𑀭𑀫𑀼𑀤𑁆𑀥𑀭𑁂.

𑀏𑀯𑀁 𑀢𑁂𑀢𑁆𑀢𑀺𑀁𑀲𑀪𑁂𑀤𑁂𑀳𑀺 𑀕𑀳𑀺𑀢𑁂𑀲𑀼 𑀦𑀺𑀔𑀺𑀮𑁂𑀲𑀼 𑀥𑀸𑀢𑀽𑀲𑀼 𑁋

𑀲𑀳𑀳𑀺𑀁𑀲𑀈𑀳𑀯𑀲𑀸, 𑀲𑀻𑀳𑀲𑀤𑁆𑀤𑀕𑀢𑀺𑀁 𑀯𑀤𑁂;

𑀲𑀳𑀦𑀢𑁄 𑀳𑀦𑀦𑀢𑁄, 𑀲𑀻𑀳𑁄𑀢𑀺 𑀳𑀺 𑀕𑀭𑀽 𑀯𑀤𑀼𑀁.

𑀢𑀣𑀸 𑀳𑀺 𑀲𑀻𑀳𑁄 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀫𑁆𑀧𑀺 𑀲𑀳𑀢𑀺, ‘‘𑀓𑀺𑀁 𑀫𑁂 𑀩𑀳𑀽𑀳𑀺 𑀖𑀸𑀝𑀺𑀢𑁂𑀳𑀻’’𑀢𑀺 𑀅𑀢𑁆𑀢𑀦𑁄 𑀕𑁄𑀘𑀭𑀢𑁆𑀣𑀸𑀬 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀕𑀡𑁆𑀳𑀦𑁆𑀢𑁄, ‘‘𑀫𑀸𑀳𑀁 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀻’’𑀢𑀺 𑀅𑀦𑀼𑀤𑁆𑀤𑀬𑀯𑀲𑁂𑀦 𑀲𑀳𑀺𑀢𑀩𑁆𑀩𑁂 𑀔𑀼𑀤𑁆𑀤𑀓𑀲𑀢𑁆𑀢𑁂𑀧𑀺 𑀲𑀳𑀢𑀺. 𑀳𑀺𑀁𑀲𑀺𑀢𑀩𑁆𑀩𑁂 𑀧𑀦 𑀓𑀸𑀬𑀽𑀧𑀧𑀦𑁆𑀦𑁂 𑀲𑀽𑀓𑀭𑀫𑀳𑀺𑀁𑀲𑀸𑀤𑀬𑁄 𑀲𑀢𑁆𑀢𑁂 𑀳𑀺𑀁𑀲𑀢𑀺, 𑀢𑀲𑁆𑀫𑀸𑀧𑀺 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀓𑀦𑁆𑀢𑀦𑀝𑁆𑀞𑁂𑀦 𑀆𑀤𑀺𑀅𑀦𑁆𑀢𑀯𑀺𑀧𑀮𑁆𑀮𑀸𑀲𑀢𑁄 𑀢𑀓𑁆𑀓𑀁 𑀯𑀼𑀘𑁆𑀘𑀢𑀺, 𑀏𑀯𑀁 𑀳𑀺𑀁𑀲𑀦𑀝𑁆𑀞𑁂𑀦𑀧𑀺 𑀲𑀻𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑀢𑁆𑀢𑀸 𑀲𑀼𑀝𑁆𑀞𑀼 𑀈𑀳𑀢𑀻𑀢𑀺 𑀲𑀻𑀳𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀮𑀻𑀦𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀫𑀦𑁄 𑀲𑀤𑀸’’𑀢𑀺.

𑀅𑀧𑀭𑁄 𑀦𑀬𑁄 𑁋

𑀲𑀳𑀦𑀸 𑀘 𑀳𑀺𑀁𑀲𑀦𑀸 𑀘, 𑀢𑀣𑀸 𑀲𑀻𑀖𑀚𑀯𑀢𑁆𑀢𑀢𑁄;

𑀲𑀻𑀳𑁄 𑀇𑀘𑁆𑀘𑀧𑀺 𑀪𑀸𑀲𑁂𑀬𑁆𑀬, 𑀲𑀓𑁆𑀬𑀲𑀻𑀳𑀲𑁆𑀲 𑀲𑀸𑀲𑀦𑁂.

𑀯𑀼𑀢𑁆𑀢𑀜𑁆𑀳𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀲𑀳𑀭𑀸 𑀘 𑀳𑀦𑀦𑀸 𑀘 𑀲𑀻𑀖𑀚𑀯𑀢𑁆𑀢𑀸 𑀘 𑀲𑀻𑀳𑁄’’𑀢𑀺.

𑀇𑀤𑀸𑀦𑀺 𑀢𑀤𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂, 𑀲𑀻𑀳𑀲𑀤𑁆𑀤𑁄 ‘‘𑀲𑀻𑀳𑁄 𑀪𑀺𑀓𑁆𑀔𑀯𑁂 𑀫𑀺𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 𑀫𑀺𑀕𑀭𑀸𑀚𑁂 𑀆𑀕𑀢𑁄. ‘‘𑀅𑀣 𑀔𑁄 𑀲𑀻𑀳𑁄 𑀲𑁂𑀦𑀸𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀲𑀻𑀳𑁄𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀢𑀣𑀸𑀕𑀢𑁂. 𑀢𑀢𑁆𑀣 𑀢𑀣𑀸𑀕𑀢𑁂 𑀲𑀤𑀺𑀲𑀓𑀧𑁆𑀧𑀦𑀸𑀬 𑀆𑀕𑀢𑁄.

𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀲𑀻𑀳𑁂 𑀧𑀜𑁆𑀜𑀢𑁆𑀢𑀺𑀬𑀜𑁆𑀘𑀸𑀧𑀺, 𑀩𑀼𑀤𑁆𑀥𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁂;

𑀇𑀫𑁂𑀲𑀼 𑀢𑀻𑀲𑀼 𑀅𑀢𑁆𑀣𑁂𑀲𑀼, 𑀲𑀻𑀳𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀭𑀽𑀧𑀺𑀭𑀼𑀧𑁆𑀧𑀢𑀺𑀥𑀸𑀢𑀽𑀳𑀺, 𑀭𑀽𑀧𑀲𑀤𑁆𑀤𑀕𑀢𑀺𑀁 𑀯𑀤𑁂;

‘‘𑀭𑀽𑀧𑀬𑀢𑀺 𑀭𑀼𑀧𑁆𑀧𑀢𑀻’’𑀢𑀺, 𑀯𑀢𑁆𑀯𑀸 𑀦𑀺𑀩𑁆𑀩𑀘𑀦𑀤𑁆𑀯𑀬𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀕𑀭𑀽𑀳𑀺 ‘‘𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀭𑀽𑀧𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀭𑀽𑀧𑀁? 𑀭𑀼𑀧𑁆𑀧𑀦𑀝𑁆𑀞𑁂𑀦𑀸’’𑀢𑀺. 𑀪𑀕𑀯𑀢𑀸 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀓𑀺𑀜𑁆𑀘 𑀪𑀺𑀓𑁆𑀔𑀯𑁂 𑀭𑀽𑀧𑀁 𑀯𑀤𑁂𑀣, 𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺, 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀻’’𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀢𑁆𑀣𑀼𑀤𑁆𑀥𑀸𑀭𑁄 𑀧𑀦𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯.

𑀧𑀲𑀯𑀢𑁂𑀫𑀦𑀢𑁆𑀣𑁂𑀦, 𑀥𑀸𑀢𑀼𑀦𑀸 𑀉𑀤𑀺𑀦𑀸 𑀧𑀦;

𑀲𑀫𑀼𑀤𑁆𑀤𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺𑀁, 𑀯𑀤𑁂𑀬𑁆𑀬 𑀫𑀢𑀺𑀫𑀸 𑀦𑀭𑁄.

𑀏𑀢𑁆𑀣 𑀳𑀺 𑀲𑀫𑀼𑀤𑁆𑀤𑁄𑀢𑀺 𑀅𑀝𑁆𑀞𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀼𑀤𑁆𑀤𑀢𑀺 𑀅𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀫𑀘𑁆𑀙𑀫𑀓𑀭𑀸𑀤𑀻𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀲𑀯𑀢𑀺 𑀚𑀦𑁂𑀢𑀻𑀢𑀺 𑀲𑀫𑀼𑀤𑁆𑀤𑁄. 𑀅𑀬𑀫𑀲𑁆𑀫𑀸𑀓𑀁 𑀔𑀦𑁆𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 ‘‘𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄, 𑀓𑀺𑀮𑁂𑀤𑀦𑀝𑁆𑀞𑁂𑀦 𑀢𑁂𑀦𑀫𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑀧𑀦 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦 𑀲𑀫𑀼𑀤𑁆𑀤𑁄 𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀺, 𑀓𑁂𑀦 𑀓𑀸𑀭𑀡𑁂𑀦 𑀆𑀧𑀁 𑀉𑀤𑀓𑀁 𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀆𑀳 ‘‘𑀬𑀢𑁆𑀢𑀓𑀁 𑀫𑀳𑀸𑀭𑀸𑀚 𑀉𑀤𑀓𑀁, 𑀢𑀢𑁆𑀢𑀓𑀁 𑀮𑁄𑀡𑀁, 𑀬𑀢𑁆𑀢𑀓𑀁 𑀮𑁄𑀡𑀁, 𑀢𑀢𑁆𑀢𑀓𑀁 𑀉𑀤𑀓𑀁, 𑀉𑀤𑀓𑀲𑀫𑀢𑁆𑀢𑀸 𑀲𑀫𑀼𑀤𑁆𑀤𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀤𑀸 𑀭𑀜𑁆𑀜𑀸 𑀫𑀺𑀮𑀺𑀦𑁆𑀤𑁂𑀦 ‘‘𑀓𑀮𑁆𑀮𑁄𑀲𑀺 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀲𑀫𑀁 𑀉𑀤𑀓𑁂𑀦 𑀮𑁄𑀡𑀁 𑀏𑀢𑁆𑀣𑀸𑀢𑀺 𑀲𑀫𑀼𑀤𑁆𑀤𑁄𑀢𑀺 𑀦𑀺𑀩𑁆𑀩𑀘𑀦𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀦𑀻𑀮𑁄𑀤’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀢𑁆𑀣 𑀪𑀤𑀦𑁆𑀢𑀦𑀸𑀕𑀲𑁂𑀦𑀫𑀢𑀜𑁆𑀘 𑀅𑀫𑁆𑀳𑀸𑀓𑀁 𑀫𑀢𑀜𑁆𑀘 𑀧𑀓𑀢𑀺𑀲𑀫𑀼𑀤𑁆𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑀫𑁆𑀧𑀺 ‘‘𑀢𑀡𑁆𑀳𑀸𑀲𑀫𑀼𑀤𑁆𑀤𑁄’’𑀢𑀺 𑀘 ‘‘𑀲𑀫𑀼𑀤𑁆𑀤𑁄𑀧𑁂𑀲𑁄’’𑀢𑀺 𑀘 𑀆𑀕𑀢𑀸𑀦𑀺 𑀲𑀫𑀼𑀤𑁆𑀤𑀲𑀭𑀺𑀓𑁆𑀔𑀓𑀸𑀦𑀺 𑀘 𑀢𑀡𑁆𑀳𑀸𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀔𑀸𑀤𑀥𑀸𑀢𑀼𑀯𑀲𑀸 𑀘𑀸𑀧𑀺, 𑀔𑀦𑀼𑀥𑀸𑀢𑀼𑀯𑀲𑁂𑀦 𑀯𑀸;

𑀔𑀦𑀺𑀢𑁄 𑀯𑀸𑀧𑀺 𑀥𑀸𑀢𑀼𑀫𑁆𑀳𑀸, 𑀥𑀸𑀢𑁄 𑀔𑀁𑀧𑀼𑀩𑁆𑀩𑀢𑁄𑀧𑀺 𑀯𑀸;

𑀔𑀦𑁆𑀥𑀲𑀤𑁆𑀤𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁, 𑀲𑀤𑁆𑀤𑀓𑁆𑀔𑀦𑁆𑀥𑀯𑀺𑀤𑀽 𑀯𑀤𑁂.

𑀢𑀢𑁆𑀣 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺 𑀤𑀼𑀓𑁆𑀔𑀸’’𑀢𑀺 𑀯𑀘𑀦𑀢𑁄 𑀲𑀬𑀫𑁆𑀧𑀺 𑀤𑀼𑀓𑁆𑀔𑀥𑀫𑁆𑀫𑁄𑀬𑁂𑀯 𑀲𑀫𑀸𑀦𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀤𑀼𑀓𑁆𑀔𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀔𑀚𑁆𑀚𑀢𑀺 𑀔𑀸𑀤𑀺𑀬𑀢𑀻𑀢𑀺 𑀔𑀦𑁆𑀥𑁄, 𑀢𑁂𑀳𑁂𑀯 𑀤𑀼𑀓𑁆𑀔𑁂𑀳𑀺 𑀔𑀜𑁆𑀜𑀢𑀺 𑀅𑀯𑀤𑀸𑀭𑀺𑀬𑀢𑀻𑀢𑀺𑀧𑀺 𑀔𑀦𑁆𑀥𑁄, 𑀔𑀦𑀺𑀬𑀢𑀺 𑀧𑀭𑀺𑀔𑀜𑁆𑀜𑀢𑀻𑀢𑀺𑀧𑀺 𑀔𑀦𑁆𑀥𑁄, 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸 𑀢𑀼𑀘𑁆𑀙𑀢𑁆𑀢𑀸 𑀔𑀁 𑀲𑀼𑀜𑁆𑀜𑀸𑀓𑀸𑀭𑀁 𑀥𑀸𑀭𑁂𑀢𑀻𑀢𑀺𑀧𑀺 𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑀸𑀤𑀺. 𑀅𑀢𑁆𑀣𑀼𑀤𑁆𑀥𑀸𑀭𑀢𑁄 𑀧𑀦 𑁋

𑀔𑀦𑁆𑀥𑀲𑀤𑁆𑀤𑁄 𑀭𑀸𑀲𑀺𑀕𑀼𑀡-𑀧𑀡𑁆𑀡𑀢𑁆𑀢𑀻𑀲𑀼 𑀘 𑀭𑀽𑀴𑁆𑀳𑀺𑀬𑀁;

𑀓𑁄𑀝𑁆𑀞𑀸𑀲𑁂 𑀘𑁂𑀯 𑀅𑀁𑀲𑁂 𑀘, 𑀯𑀢𑁆𑀢𑀢𑀻𑀢𑀺 𑀯𑀺𑀪𑀸𑀯𑀬𑁂.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑁋 𑀔𑀦𑁆𑀥𑀲𑀤𑁆𑀤𑁄 𑀲𑀫𑁆𑀩𑀳𑀼𑀮𑁂𑀲𑀼 𑀞𑀸𑀦𑁂𑀲𑀼 𑀦𑀺𑀧𑀢𑀢𑀺 𑀭𑀸𑀲𑀺𑀫𑁆𑀳𑀺 𑀕𑀼𑀡𑁂 𑀧𑀡𑁆𑀡𑀢𑁆𑀢𑀺𑀬𑀁 𑀭𑀽𑀴𑁆𑀳𑀺𑀬𑀦𑁆𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀲𑀫𑀼𑀤𑁆𑀤𑁂 𑀦 𑀲𑀼𑀓𑀭𑀁 𑀉𑀤𑀓𑀲𑁆𑀲 𑀧𑀫𑀸𑀡𑀁 𑀕𑀳𑁂𑀢𑀼𑀁 ‘‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀻’𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀻’𑀢𑀺 𑀯𑀸, 𑀅𑀣 𑀔𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀳𑀺 𑀭𑀸𑀲𑀺𑀢𑁄 𑀔𑀦𑁆𑀥𑁄 𑀦𑀸𑀫. 𑀦 𑀳𑀺 𑀧𑀭𑀺𑀢𑁆𑀢𑀓𑀁 𑀉𑀤𑀓𑀁 𑀉𑀤𑀓𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀓𑀫𑁂𑀯 𑀯𑀼𑀘𑁆𑀘𑀢𑀺, 𑀢𑀣𑀸 𑀦 𑀧𑀭𑀺𑀢𑁆𑀢𑀓𑀁 𑀭𑀚𑁄 𑀭𑀚𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀸 𑀕𑀸𑀯𑁄 𑀕𑀯𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀁 𑀩𑀮𑀁 𑀩𑀮𑀓𑁆𑀔𑀦𑁆𑀥𑁄, 𑀦 𑀅𑀧𑁆𑀧𑀫𑀢𑁆𑀢𑀓𑀁 𑀧𑀼𑀜𑁆𑀜𑀁 𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀩𑀳𑀼𑀓𑀫𑁂𑀯 𑀳𑀺 𑀭𑀚𑁄 𑀭𑀚𑀓𑁆𑀔𑀦𑁆𑀥𑁄, 𑀩𑀳𑀼𑀓𑀸 𑀘 𑀕𑀯𑀸𑀤𑀬𑁄 𑀕𑀯𑀓𑁆𑀔𑀦𑁆𑀥𑁄, 𑀩𑀮𑀓𑁆𑀔𑀦𑁆𑀥𑁄, 𑀧𑀼𑀜𑁆𑀜𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀻𑀮𑀓𑁆𑀔𑀦𑁆𑀥𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀧𑀦 𑀕𑀼𑀡𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀅𑀤𑁆𑀤𑀲𑀸 𑀔𑀸 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺𑀢𑁄 𑀔𑀦𑁆𑀥𑁄 𑀦𑀸𑀫. ‘‘𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀭𑀽𑀴𑁆𑀳𑀻𑀢𑁄 𑀔𑀦𑁆𑀥𑁄 𑀦𑀸𑀫. 𑀲𑁆𑀯𑀸𑀬𑀫𑀺𑀥 𑀭𑀸𑀲𑀺𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀳𑀺 𑀔𑀦𑁆𑀥𑀝𑁆𑀞𑁄 𑀦𑀸𑀫 𑀧𑀺𑀡𑁆𑀟𑀝𑁆𑀞𑁄 𑀧𑀽𑀕𑀝𑁆𑀞𑁄 𑀖𑀝𑀝𑁆𑀞𑁄 𑀭𑀸𑀲𑀝𑁆𑀞𑁄, 𑀢𑀲𑁆𑀫𑀸 𑀭𑀸𑀲𑀺𑀮𑀓𑁆𑀔𑀡𑀸 𑀔𑀦𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁄𑀝𑁆𑀞𑀸𑀲𑀝𑁆𑀞𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀇𑀡𑀁 𑀕𑀳𑁂𑀢𑁆𑀯𑀸 𑀘𑁄𑀤𑀺𑀬𑀫𑀸𑀦𑀸 ‘‘𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫, 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀓𑁄𑀝𑁆𑀞𑀸𑀲𑀮𑀓𑁆𑀔𑀡𑀸 𑀔𑀦𑁆𑀥𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀫𑁂𑀢𑁆𑀣 ‘‘𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀭𑀽𑀧𑀭𑀸𑀲𑀺 𑀭𑀽𑀧𑀓𑁄𑀝𑁆𑀞𑀸𑀲𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀢𑀺 𑀯𑁂𑀤𑀦𑀸𑀭𑀸𑀲𑀺 𑀯𑁂𑀤𑀦𑀸𑀓𑁄𑀝𑁆𑀞𑀸𑀲𑁄’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀔𑀦𑁆𑀥𑁂 𑀪𑀸𑀭𑀁. 𑀔𑀦𑁆𑀥𑀢𑁄 𑀑𑀢𑀸𑀭𑁂𑀢𑀺, 𑀫𑀳𑀸𑀳𑀦𑀼𑀲𑀪𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀁𑀲𑁄 ‘‘𑀔𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺.

𑀆𑀧𑀼𑀩𑁆𑀩𑀬𑀢𑀢𑁄 𑀘𑀸𑀧𑀺, 𑀆𑀬𑀽𑀧𑀧𑀤𑀢𑁄 𑀧𑀼𑀦;

𑀢𑀦𑀼𑀢𑁄 𑀢𑀦𑀺𑀢𑁄 𑀯𑀸𑀧𑀺, 𑀆𑀬𑀢𑀦𑀭𑀯𑁄 𑀕𑀢𑁄.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀯𑀸 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀓𑁆𑀔𑀼 𑀭𑀽𑀧𑀸𑀤𑀻𑀲𑀼 𑀳𑀺 𑀢𑀁𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺 𑀯𑀸𑀬𑀫𑀦𑁆𑀢𑀻𑀢𑀺 𑀯𑀸 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀧𑀦 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀏𑀢𑀸𑀦𑀺 𑀢𑀦𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀬𑀸𑀯 𑀦 𑀦𑀺𑀯𑀢𑁆𑀢𑀢𑀺, 𑀢𑀸𑀯 𑀦𑀬𑀦𑁆𑀢𑀺, 𑀧𑀯𑀢𑁆𑀢𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺𑀫𑁂 𑀥𑀫𑁆𑀫𑀸 𑀆𑀬𑀢𑀦𑀢𑁄, 𑀆𑀬𑀸𑀦𑀁 𑀯𑀸 𑀢𑀦𑀦𑀢𑁄, 𑀆𑀬𑀢𑀲𑁆𑀲 𑀘 𑀦𑀬𑀦𑀢𑁄 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀧𑀺𑀘 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦 𑀆𑀬𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀮𑁄𑀓𑁂 𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄, 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁄. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 𑀓𑀸𑀭𑀡𑀁.

𑀘𑀓𑁆𑀔𑀼𑀆𑀤𑀻𑀲𑀼 𑀘𑀸𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀦𑀺𑀯𑀲𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀘𑀓𑁆𑀔𑀸𑀤𑀻𑀲𑀼 𑀢𑁂 𑀆𑀓𑀺𑀡𑁆𑀡𑀸 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀢𑁆𑀢𑀸 𑀘𑀸𑀢𑀺 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀆𑀓𑀭𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀲𑁂𑀦 𑀲𑀫𑁄𑀲𑀭𑀡𑀢𑁄. 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀲𑀜𑁆𑀚𑀸𑀢𑀺𑀤𑁂𑀲𑁄 𑀢𑀦𑁆𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀸𑀯𑁂𑀦 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀢𑁄, 𑀘𑀓𑁆𑀔𑀸𑀤𑀬𑁄 𑀘 𑀦𑁂𑀲𑀁 𑀓𑀸𑀭𑀡𑀁 𑀢𑁂𑀲𑀁 𑀅𑀪𑀸𑀯𑁂 𑀅𑀪𑀸𑀯𑀢𑁄. 𑀇𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦 𑀲𑀫𑁄𑀲𑀭𑀡𑀝𑁆𑀞𑀸𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀓𑀸𑀭𑀡𑀝𑁆𑀞𑁂𑀦𑀸𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀢𑁂 𑀥𑀫𑁆𑀫𑀸 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀘𑀓𑁆𑀔𑀼 𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸 𑀘 𑀢𑁂 𑀆𑀬𑀢𑀦𑀜𑁆𑀘𑀸𑀢𑀺 𑀥𑀫𑁆𑀫𑀸𑀬𑀢𑀦𑀦𑁆𑀢𑀺 𑀏𑀯𑀁 𑀢𑀸𑀯𑁂𑀢𑁆𑀣 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄𑀢𑀺. 𑀇𑀘𑁆𑀘𑁂𑀯𑀁 𑁋

𑀦𑀺𑀯𑀸𑀲𑁄 𑀆𑀓𑀭𑁄 𑀘𑁂𑀯, 𑀚𑀸𑀢𑀺𑀤𑁂𑀲𑁄 𑀘 𑀓𑀸𑀭𑀡𑀁;

𑀲𑀫𑁄𑀲𑀭𑀡𑀝𑁆𑀞𑀸𑀦𑀜𑁆𑀘, 𑀯𑀼𑀘𑁆𑀘𑀢𑀸’𑀬𑀢𑀦𑀁 𑀇𑀢𑀺;

𑀯𑀺𑀤𑀺𑀯𑀺𑀤𑁂𑀳𑀺 𑀥𑀸𑀢𑀽𑀳𑀺, 𑀅𑀓𑀸𑀭𑀧𑀼𑀩𑁆𑀩𑀓𑁂𑀳𑀺 𑀯𑀸;

𑀅𑀦𑁆𑀢𑀯𑀺𑀭𑀳𑀺𑀢𑀲𑀤𑁆𑀤𑀽-𑀧𑀧𑀤𑁂𑀦 𑀚𑀼𑀦𑀸𑀧𑀺 𑀯𑀸.

𑀅𑀯𑀺𑀚𑁆𑀚𑀸𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺, 𑀤𑀻𑀧𑁂𑀢𑀩𑁆𑀩𑀸 𑀲𑀼𑀥𑀻𑀫𑀢𑀸.

𑀏𑀢𑁆𑀣 𑀧𑀽𑀭𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀅𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀢𑀁 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀢𑀩𑁆𑀩𑀺𑀧𑀭𑀻𑀢𑀢𑁄 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀢𑀁 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀔𑀦𑁆𑀥𑀸𑀤𑀻𑀲𑀼 𑀦 𑀚𑀯𑀢𑀻𑀢𑀺 𑀅𑀯𑀺𑀚𑁆𑀚𑀸.

𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀧𑀺𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀦𑀁 𑀥𑀫𑁆𑀫𑀸𑀦𑀁 𑀙𑀸𑀤𑀦𑀢𑁄𑀧𑀺 𑀅𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑀁 𑀦 𑀲𑀤𑁆𑀤𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀬 𑀙𑀸𑀤𑀦𑀓𑀺𑀘𑁆𑀘𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 𑀇𑀤𑀁 𑀯𑀼𑀢𑁆𑀢𑀁 𑁋

‘‘𑀩𑁆𑀬𑀜𑁆𑀚𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘𑀅𑀧𑀺𑀘𑀸’𑀢𑀺𑀆𑀤𑀺𑀫𑀸𑀳, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 ‘𑀇𑀤𑀁 𑀯𑀢𑁆𑀢𑀼, 𑀇𑀤𑀫𑀸𑀭𑀫𑁆𑀫𑀡’𑀦𑁆𑀢𑀺 𑀅𑀯𑀺𑀚𑁆𑀚𑀸𑀬 𑀜𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀚𑁆𑀚𑀸 𑀢𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸 𑀯𑀼𑀢𑁆𑀢𑀸, 𑀯𑀢𑁆𑀣𑀸𑀭𑀫𑁆𑀫𑀡𑀲𑀪𑀸𑀯𑀘𑁆𑀙𑀸𑀤𑀦𑀢𑁄 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀪𑀸𑀯𑀲𑁆𑀲, 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑀲𑁆𑀲 𑀘 𑀙𑀸𑀤𑀦𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀙𑀸𑀤𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀫𑁆𑀫𑀲𑁆𑀲 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀅𑀯𑀺𑀚𑁆𑀚𑀸 ‘𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀯𑀺𑀦𑁆𑀤𑀦𑀻𑀬𑀲𑁆𑀲 𑀦 𑀳𑁄𑀢𑀻𑀢𑀺 ‘𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻’𑀢𑀺 𑀘, 𑀅𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀧𑀯𑀢𑁆𑀢𑀸𑀧𑀦𑀁 𑀉𑀧𑁆𑀧𑀸𑀤𑀦𑀁 𑀆𑀬𑀢𑀦𑀁, 𑀲𑀫𑁆𑀫𑁄𑀳𑀪𑀸𑀯𑁂𑀦𑁂𑀯 𑀅𑀦𑀪𑀺𑀲𑀫𑀬𑀪𑀽𑀢𑀢𑁆𑀢𑀸 ‘𑀅𑀯𑀺𑀤𑀺𑀢𑀁 𑀅𑀜𑁆𑀜𑀸𑀢𑀁 𑀓𑀭𑁄𑀢𑀺, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀚𑀯𑀸𑀧𑁂𑀢𑀻’𑀢𑀺 𑀯𑀡𑁆𑀡𑀸𑀕𑀫𑀯𑀺𑀧𑀭𑀺𑀬𑀸𑀬𑀯𑀺𑀓𑀸𑀭𑀯𑀺𑀦𑀸𑀲𑀥𑀸𑀢𑀼𑀅𑀢𑁆𑀣𑀯𑀺𑀲𑁂𑀲𑀬𑁄𑀕𑁂𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀯𑀲𑁂𑀦 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀅𑀓𑀸𑀭𑀯𑀺𑀓𑀸𑀭𑀚𑀓𑀸𑀭𑁂 𑀕𑀳𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀯𑀡𑁆𑀡𑀸𑀦𑀁 𑀮𑁄𑀧𑀁 𑀓𑀢𑁆𑀯𑀸 𑀚𑀓𑀸𑀭𑀲𑁆𑀲 𑀘 𑀤𑀼𑀢𑀺𑀬𑀲𑁆𑀲 𑀆𑀕𑀫𑀁 𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀢𑀺 𑀯𑀼𑀢𑁆𑀢𑀸’’𑀢𑀺.

𑀅𑀭𑀳𑀥𑀸𑀢𑀼𑀢𑁄 𑀜𑁂𑀬𑁆𑀬𑀸, 𑀅𑀭𑀳𑀁𑀲𑀤𑁆𑀤𑀲𑀡𑁆𑀞𑀺𑀢𑀺;

𑀅𑀭𑀸𑀭𑀽𑀧𑀧𑀤𑀳𑀦-𑀥𑀸𑀢𑀼𑀢𑁄 𑀯𑀸𑀣𑀯𑀸 𑀧𑀦.

𑀭𑀳𑀢𑁄 𑀭𑀳𑀺𑀢𑁄 𑀘𑀸𑀧𑀺, 𑀅𑀓𑀸𑀭𑀧𑀼𑀩𑁆𑀩𑀢𑁄 𑀇𑀥;

𑀯𑀼𑀘𑁆𑀘𑀢𑁂 𑀅𑀲𑁆𑀲 𑀦𑀺𑀧𑁆𑀨𑀢𑁆𑀢𑀺, 𑀆𑀭𑀓𑀸𑀤𑀺𑀭𑀯𑀲𑁆𑀲𑀺𑀢𑀸.

𑀢𑀣𑀸 𑀳𑀺 𑀅𑀭𑀳𑀦𑁆𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂 𑀅𑀭𑀳𑀢𑀺 𑀧𑀽𑀚𑀸𑀯𑀺𑀲𑁂𑀲𑀜𑁆𑀘𑀸𑀢𑀺 𑀅𑀭𑀳𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀽𑀚𑀸𑀯𑀺𑀲𑁂𑀲𑀁 𑀲𑀳 𑀧𑀘𑁆𑀘𑀬𑁂𑀳𑀺,

𑀬𑀲𑁆𑀫𑀸 𑀅𑀬𑀁 𑀅𑀭𑀳𑀢𑀺 𑀮𑁄𑀓𑀦𑀸𑀣𑁄;

𑀅𑀢𑁆𑀣𑀸𑀦𑀼𑀭𑀽𑀧𑀁 𑀅𑀭𑀳𑀦𑁆𑀢𑀺 𑀮𑁄𑀓𑁂,

𑀢𑀲𑁆𑀫𑀸 𑀚𑀺𑀦𑁄 𑀅𑀭𑀳𑀢𑀺 𑀦𑀸𑀫𑀫𑁂𑀢’’𑀦𑁆𑀢𑀺.

𑀢𑀣𑀸 𑀲𑁄 𑀓𑀺𑀮𑁂𑀲𑀸𑀭𑀬𑁄 𑀫𑀕𑁆𑀕𑁂𑀦 𑀳𑀦𑀻𑀢𑀺 𑀅𑀭𑀳𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀲𑁆𑀫𑀸 𑀭𑀸𑀕𑀸𑀤𑀺𑀲𑀗𑁆𑀔𑀸𑀢𑀸, 𑀲𑀩𑁆𑀩𑁂𑀧𑀺 𑀅𑀭𑀬𑁄 𑀳𑀢𑀸;

𑀧𑀜𑁆𑀜𑀸𑀲𑀢𑁆𑀣𑁂𑀦 𑀦𑀸𑀣𑁂𑀦, 𑀢𑀲𑁆𑀫𑀸𑀧𑀺 𑀅𑀭𑀳𑀁 𑀫𑀢𑁄’’𑀢𑀺.

𑀬𑀜𑁆𑀘𑁂𑀢𑀁 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸𑀫𑀬𑀦𑀸𑀪𑀺𑀁 𑀧𑀼𑀜𑁆𑀜𑀸𑀤𑀺𑀅𑀪𑀺𑀲𑀗𑁆𑀔𑀸𑀭𑀸𑀭𑀁 𑀚𑀭𑀸𑀫𑀭𑀡𑀦𑁂𑀫𑀺𑀁 𑀆𑀲𑀯𑀲𑀫𑀼𑀤𑀬𑀫𑀬𑁂𑀦 𑀅𑀓𑁆𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀪𑀯𑀭𑀣𑁂 𑀲𑀫𑀸𑀬𑁄𑀚𑀺𑀢𑀁 𑀅𑀦𑀸𑀤𑀺𑀓𑀸𑀮𑀧𑁆𑀧𑀯𑀢𑁆𑀢𑀁 𑀲𑀁𑀲𑀸𑀭𑀘𑀓𑁆𑀓𑀁, 𑀢𑀲𑁆𑀲 𑀲𑁄 𑀩𑁄𑀥𑀺𑀫𑀡𑁆𑀟𑁂 𑀯𑀻𑀭𑀺𑀬𑀧𑀸𑀤𑁂𑀳𑀺 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀧𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁂 𑀅𑀭𑁂 𑀳𑀦𑀻𑀢𑀺𑀧𑀺 𑀅𑀭𑀳𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀅𑀭𑀸 𑀲𑀁𑀲𑀸𑀭𑀘𑀓𑁆𑀓𑀲𑁆𑀲, 𑀳𑀢𑀸 𑀜𑀸𑀡𑀸𑀲𑀺𑀦𑀸 𑀬𑀢𑁄;

𑀮𑁄𑀓𑀦𑀸𑀣𑁂𑀦 𑀢𑁂𑀦𑁂𑀲, 𑀅𑀭𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀣𑀸 𑀅𑀢𑁆𑀢𑀳𑀺𑀢𑀁 𑀧𑀭𑀳𑀺𑀢𑀜𑁆𑀘 𑀧𑀭𑀺𑀧𑀽𑀭𑁂𑀢𑀼𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀲𑀸𑀥𑀽𑀳𑀺 𑀤𑀽𑀭𑀢𑁄 𑀭𑀳𑀺𑀢𑀩𑁆𑀩𑀸 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀸 𑀧𑀭𑀺𑀳𑀸𑀢𑀩𑁆𑀩𑀸𑀢𑀺 𑀭𑀳𑀸, 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸, 𑀦 𑀲𑀦𑁆𑀢𑀺 𑀏𑀢𑀲𑁆𑀲 𑀭𑀳𑀸𑀢𑀺 𑀅𑀭𑀳𑀁. ‘‘𑀅𑀭𑀳𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀑𑀓𑀸𑀭𑀲𑁆𑀲 𑀲𑀸𑀦𑀼𑀲𑀸𑀭𑀁 𑀅𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 ‘‘𑀅𑀭𑀳𑀁’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀳 𑀘 𑁋

‘‘𑀧𑀸𑀧𑀥𑀫𑁆𑀫𑀸 𑀭𑀳𑀸 𑀦𑀸𑀫, 𑀲𑀸𑀥𑀽𑀳𑀺 𑀭𑀳𑀺𑀢𑀩𑁆𑀩𑀢𑁄;

𑀢𑁂𑀲𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸, 𑀪𑀕𑀯𑀸 𑀅𑀭𑀳𑀁 𑀫𑀢𑁄’’𑀢𑀺.

𑀅𑀣 𑀯𑀸 𑀔𑀻𑀡𑀸𑀲𑀯𑁂𑀳𑀺 𑀲𑁂𑀓𑁆𑀔𑁂𑀳𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂𑀳𑀺 𑀘 𑀦 𑀭𑀳𑀺𑀢𑀩𑁆𑀩𑁄 𑀦 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑁄, 𑀢𑁂 𑀘 𑀪𑀕𑀯𑀸𑀢𑀺 𑀅𑀭𑀳𑀁. 𑀆𑀳 𑀘 𑁋

‘‘𑀬𑁂 𑀘 𑀲𑀘𑁆𑀙𑀺𑀓𑀢𑀥𑀫𑁆𑀫𑀸,

𑀅𑀭𑀺𑀬𑀸 𑀲𑀼𑀤𑁆𑀥𑀕𑁄𑀘𑀭𑀸;

𑀦 𑀢𑁂𑀳𑀺 𑀭𑀳𑀺𑀢𑁄 𑀳𑁄𑀢𑀺,

𑀦𑀸𑀣𑁄 𑀢𑁂𑀦𑀸’𑀭𑀳𑀁 𑀫𑀢𑁄’’𑀢𑀺.

𑀭𑀳𑁄𑀢𑀺 𑀘 𑀕𑀫𑀦𑀁 𑀯𑀼𑀘𑁆𑀘𑀢𑀺, 𑀦𑀢𑁆𑀣𑀺 𑀏𑀢𑀲𑁆𑀲 𑀭𑀳𑁄 𑀕𑀫𑀦𑀁 𑀕𑀢𑀻𑀲𑀼 𑀧𑀘𑁆𑀘𑀸𑀚𑀸𑀢𑀻𑀢𑀺 𑀅𑀭𑀳𑀁. 𑀆𑀳 𑀘 𑁋

‘‘𑀭𑀳𑁄 𑀯𑀸 𑀕𑀫𑀦𑀁 𑀬𑀲𑁆𑀲, 𑀲𑀁𑀲𑀸𑀭𑁂 𑀦𑀢𑁆𑀣𑀺 𑀲𑀩𑁆𑀩𑀲𑁄;