𑁧𑁭. 𑀭𑀼𑀥𑀸𑀤𑀺𑀙𑀓𑁆𑀓

𑀭𑀼𑀥𑀸𑀤𑀺𑀕𑀡𑀺𑀓

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀭𑀼𑀥𑀸𑀤𑀺𑀓𑀕𑀡𑀸𑀤𑀬𑁄;

𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀸𑀬, 𑀕𑀡𑁂 𑀢𑀼 𑀙𑀩𑁆𑀩𑀺𑀥𑁂 𑀓𑀣𑀁.

𑀭𑀼𑀥𑀺 𑀆𑀯𑀭𑀡𑁂. 𑀭𑀼𑀥𑀺𑀥𑀸𑀢𑀼 𑀆𑀯𑀭𑀡𑁂 𑀯𑀢𑁆𑀢𑀢𑀺. 𑀏𑀢𑁆𑀣 𑀆𑀯𑀭𑀡𑀁 𑀦𑀸𑀫 𑀧𑀺𑀤𑀳𑀦𑀁 𑀯𑀸 𑀧𑀭𑀺𑀭𑀼𑀦𑁆𑀥𑀦𑀁 𑀯𑀸 𑀧𑀮𑀺𑀩𑀼𑀤𑁆𑀥𑀦𑀁 𑀯𑀸 𑀳𑀭𑀺𑀢𑀼𑀁 𑀯𑀸 𑀅𑀧𑁆𑀧𑀤𑀸𑀦𑀁, 𑀲𑀩𑁆𑀩𑀫𑁂𑀢𑀁 𑀯𑀝𑁆𑀝𑀢𑀺. 𑀭𑀼𑀦𑁆𑀥𑀢𑀺, 𑀭𑀼𑀦𑁆𑀥𑀺𑀢𑀺, 𑀭𑀼𑀦𑁆𑀥𑀻𑀢𑀺, 𑀭𑀼𑀦𑁆𑀥𑁂𑀢𑀺, 𑀅𑀯𑀭𑀼𑀦𑁆𑀥𑁂𑀢𑀺. 𑀓𑀫𑁆𑀫𑀦𑀺 𑁋 𑀫𑀕𑁆𑀕𑁄 𑀧𑀼𑀭𑀺𑀲𑁂𑀦 𑀭𑀼𑀦𑁆𑀥𑀺𑀬𑀢𑀺. 𑀭𑁄𑀥𑁄, 𑀑𑀭𑁄𑀥𑁄, 𑀯𑀺𑀭𑁄𑀥𑁄, 𑀧𑀝𑀺𑀯𑀺𑀭𑁄𑀥𑁄, 𑀯𑀺𑀭𑀼𑀤𑁆𑀥𑁄, 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀧𑀭𑀺𑀭𑀼𑀤𑁆𑀥𑁄. 𑀭𑀼𑀦𑁆𑀥𑀺𑀢𑀼𑀁, 𑀧𑀭𑀺𑀭𑀼𑀦𑁆𑀥𑀺𑀢𑀼𑀁. 𑀭𑀼𑀦𑁆𑀥𑀺𑀢𑁆𑀯𑀸. 𑀧𑀭𑀺𑀭𑀼𑀦𑁆𑀥𑀺𑀢𑁆𑀯𑀸.

𑀢𑀢𑁆𑀭 𑀭𑁄𑀥𑁄𑀢𑀺 𑀘𑀸𑀭𑀓𑁄. 𑀲𑁄 𑀳𑀺 𑀭𑀼𑀦𑁆𑀥𑀢𑀺 𑀧𑀯𑁂𑀲𑀺𑀢𑀸𑀦𑀁 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀕𑀫𑀦𑀁 𑀆𑀯𑀭𑀢𑀻𑀢𑀺 𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀑𑀭𑁄𑀥𑁄𑀢𑀺 𑀭𑀸𑀚𑀼𑀩𑁆𑀩𑀭𑀻, 𑀲𑀸 𑀧𑀦 𑀬𑀣𑀸𑀓𑀸𑀫𑀘𑀸𑀭𑀁 𑀘𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀑𑀭𑀼𑀦𑁆𑀥𑀺𑀬𑀢𑀺 𑀅𑀯𑀭𑀼𑀦𑁆𑀥𑀺𑀬𑀢𑀻𑀢𑀺 𑀑𑀭𑁄𑀥𑁄. 𑀯𑀺𑀭𑁄𑀥𑁄𑀢𑀺 𑀅𑀦𑀦𑀼𑀓𑀽𑀮𑀢𑀸. 𑀧𑀝𑀺𑀯𑀺𑀭𑁄𑀥𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀦𑀦𑀼𑀓𑀽𑀮𑀢𑀸. 𑀯𑀺𑀭𑀼𑀤𑁆𑀥𑁄𑀢𑀺 𑀯𑀺𑀭𑁄𑀥𑀁 𑀆𑀧𑀦𑁆𑀦𑁄. 𑀧𑀝𑀺𑀯𑀺𑀭𑀼𑀤𑁆𑀥𑁄𑀢𑀺 𑀧𑀝𑀺𑀲𑀢𑁆𑀢𑀼𑀪𑀸𑀯𑁂𑀦 𑀯𑀺𑀭𑁄𑀥𑀁 𑀆𑀧𑀦𑁆𑀦𑁄. 𑀧𑀭𑀺𑀭𑀼𑀤𑁆𑀥𑁄𑀢𑀺 𑀕𑀳𑀡𑀢𑁆𑀣𑀸𑀬 𑀲𑀫𑁆𑀧𑀭𑀺𑀯𑀸𑀭𑀺𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑀣𑀸 𑀅𑀭𑀻𑀳𑀺 𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀦𑁆𑀢𑁂 𑀕𑀫𑀦𑁂 𑀧𑀣𑁂’’𑀢𑀺. 𑀅𑀯𑀭𑀼𑀤𑁆𑀥𑁄𑀢𑀺 𑀧𑀩𑁆𑀩𑀸𑀚𑀺𑀢𑁄.

𑀫𑀼𑀘 𑀫𑁄𑀘𑀦𑁂. 𑀫𑀺𑀕𑀁 𑀩𑀦𑁆𑀥𑀦𑀸 𑀫𑀼𑀜𑁆𑀘𑀢𑀺. 𑀫𑀼𑀜𑁆𑀘𑀦𑀁, 𑀫𑁄𑀘𑀦𑀁. 𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁, 𑀫𑁄𑀘𑁄.

𑀫𑁄𑀘𑁄𑀢𑀺 𑀘𑁂𑀢𑁆𑀣 𑀅𑀝𑁆𑀞𑀺𑀓𑀓𑀤𑀮𑀻𑀭𑀼𑀓𑁆𑀔𑁄. 𑀫𑀼𑀜𑁆𑀘𑀺𑀢𑀼𑀁. 𑀫𑀼𑀜𑁆𑀘𑀺𑀢𑁆𑀯𑀸. 𑀓𑀸𑀭𑀺𑀢𑁂 ‘‘𑀫𑁄𑀘𑁂𑀢𑀺, 𑀫𑁄𑀘𑁂𑀢𑀼𑀁, 𑀫𑁄𑀘𑁂𑀢𑁆𑀯𑀸’’𑀢𑀺𑀆𑀤𑀻𑀦𑀺.

𑀭𑀺𑀘 𑀯𑀺𑀭𑁂𑀘𑀦𑁂. 𑀭𑀺𑀜𑁆𑀘𑀢𑀺. 𑀭𑀺𑀜𑁆𑀘𑀦𑀁, 𑀯𑀺𑀭𑁂𑀘𑀦𑀁, 𑀯𑀺𑀭𑁂𑀓𑁄, 𑀯𑀺𑀭𑁂𑀘𑀓𑁄. 𑀭𑀺𑀜𑁆𑀘𑀺𑀢𑀼𑀁. 𑀭𑀺𑀜𑁆𑀘𑀺𑀢𑁆𑀯𑀸.

𑀲𑀺𑀘 𑀧𑀕𑁆𑀖𑀭𑀡𑁂. 𑀉𑀤𑀓𑁂𑀦 𑀪𑀽𑀫𑀺𑀁 𑀲𑀺𑀜𑁆𑀘𑀢𑀺. 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀅𑀪𑀺𑀲𑁂𑀓𑁄. 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀔𑀢𑁆𑀢𑀺𑀬𑁄. 𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺. 𑀲𑀺𑀢𑁆𑀢𑀝𑁆𑀞𑀸𑀦𑀁. 𑀲𑀺𑀜𑁆𑀘𑀺𑀢𑀼𑀁. 𑀲𑀺𑀜𑁆𑀘𑀺𑀢𑁆𑀯𑀸.

𑀬𑀼𑀚 𑀬𑁄𑀕𑁂. 𑀬𑀼𑀜𑁆𑀚𑀢𑀺, 𑀅𑀦𑀼𑀬𑀼𑀜𑁆𑀚𑀢𑀺. 𑀓𑀫𑁆𑀫𑀦𑀺 ‘‘𑀬𑀼𑀜𑁆𑀚𑀺𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀓𑁂𑀘𑀺 ‘‘𑀬𑀼𑀜𑁆𑀚𑀢𑁂’’𑀢𑀺 𑀇𑀘𑁆𑀙𑀦𑁆𑀢𑀺. 𑀬𑀼𑀜𑁆𑀚𑀦𑀁, 𑀲𑀁𑀬𑁄𑀕𑁄, 𑀅𑀦𑀼𑀬𑁄𑀕𑁄, 𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄, 𑀲𑀜𑁆𑀜𑁄𑀕𑁄, 𑀲𑀜𑁆𑀜𑁄𑀚𑀦𑀁, 𑀅𑀢𑁆𑀣𑀬𑁄𑀚𑀦𑀸. 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁. 𑀬𑀼𑀜𑁆𑀚𑀺𑀢𑀼𑀁, 𑀅𑀦𑀼𑀬𑀼𑀜𑁆𑀚𑀺𑀢𑀼𑀁. 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸. 𑀬𑁄𑀚𑁂𑀢𑀺. 𑀢𑀢𑁆𑀣 𑀲𑀁𑀬𑁄𑀚𑀦𑀦𑁆𑀢𑀺 𑀩𑀦𑁆𑀥𑀦𑀁 𑀓𑀸𑀫𑀭𑀸𑀕𑀸𑀤𑀺. 𑀬𑁄𑀚𑀦𑀦𑁆𑀢𑀺 𑁋

𑀯𑀺𑀤𑀢𑁆𑀣𑀺 𑀤𑁆𑀯𑀸𑀤𑀲𑀗𑁆𑀕𑀼𑀮𑁆𑀬𑁄, 𑀢𑀤𑁆𑀯𑀬𑀁 𑀭𑀢𑀦𑀁 𑀫𑀢𑀁;

𑀲𑀢𑁆𑀢𑀭𑀢𑀦𑀺𑀓𑀸 𑀬𑀝𑁆𑀞𑀺, 𑀉𑀲𑀪𑀁 𑀯𑀻𑀲𑀬𑀝𑁆𑀞𑀺𑀓𑀁;

𑀕𑀸𑀯𑀼𑀢𑀁 𑀉𑀲𑀪𑀸𑀲𑀻𑀢𑀺, 𑀬𑁄𑀚𑀦𑀁 𑀘𑀢𑀼𑀕𑀸𑀯𑀼𑀢𑀁.

𑀪𑀼𑀚 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼. 𑀧𑀸𑀮𑀦𑀁 𑀭𑀓𑁆𑀔𑀡𑀁. 𑀩𑁆𑀬𑀯𑀳𑀭𑀡𑀁 𑀅𑀚𑁆𑀛𑁄𑀳𑀭𑀡𑀁. 𑀪𑀼𑀜𑁆𑀚𑀢𑀺, 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀁𑀪𑀼𑀜𑁆𑀚𑀢𑀺. 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺. 𑀓𑀸𑀭𑀺𑀢𑁂 ‘‘𑀪𑁄𑀚𑁂𑀢𑀺 𑀪𑁄𑀚𑀬𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺. 𑀪𑁄𑀚𑀦𑀁, 𑀲𑀫𑁆𑀪𑁄𑀕𑁄, 𑀫𑀳𑀺𑀪𑀼𑀚𑁄, 𑀕𑀸𑀫𑀪𑁄𑀚𑀓𑁄, 𑀉𑀧𑀪𑁄𑀕𑁄, 𑀧𑀭𑀺𑀪𑁄𑀕𑁄. 𑀪𑀼𑀢𑁆𑀢𑁄 𑀑𑀤𑀦𑁄 𑀪𑀯𑀢𑀸. 𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁. 𑀑𑀤𑀦𑀁 𑀪𑀼𑀢𑁆𑀢𑁄 𑀪𑀼𑀢𑁆𑀢𑀯𑀸 𑀪𑀼𑀢𑁆𑀢𑀸𑀯𑀻. 𑀢𑀼𑀫𑀦𑁆𑀢𑀸𑀤𑀺𑀢𑁆𑀢𑁂 ‘‘𑀪𑀼𑀜𑁆𑀚𑀺𑀢𑀼𑀁, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀪𑁄𑀚𑁂𑀢𑀼𑀁, 𑀪𑁄𑀚𑀬𑀺𑀢𑀼𑀁, 𑀪𑀼𑀜𑁆𑀚𑀺𑀢𑁆𑀯𑀸, 𑀪𑀼𑀜𑁆𑀚𑀺𑀢𑁆𑀯𑀸𑀦, 𑀪𑀼𑀜𑁆𑀚𑀺𑀬, 𑀪𑀼𑀜𑁆𑀚𑀺𑀬𑀸𑀦, 𑀪𑁄𑀚𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸𑀦, 𑀪𑁄𑀚𑀬𑀺𑀢𑁆𑀯𑀸, 𑀪𑁄𑀚𑀬𑀺𑀢𑁆𑀯𑀸𑀦’’ 𑀇𑀘𑁆𑀘𑀸𑀤𑀻𑀦𑀺 𑀧𑀭𑀺𑀲𑀤𑁆𑀤𑀸𑀤𑀻𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀪𑀼𑀜𑁆𑀚𑀢𑀻𑀢𑀺 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀪𑁄𑀚𑀦𑀻𑀬𑀁 𑀪𑀼𑀜𑁆𑀚𑀢𑀺. 𑀢𑀣𑀸 𑀳𑀺 ‘‘𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀓𑀤𑀸𑀘𑀺 𑀔𑀸𑀤𑀦𑀻𑀬𑁂𑀧𑀺 ‘‘𑀪𑀼𑀜𑁆𑀚𑀢𑀻’’𑀢𑀺 𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. ‘‘𑀨𑀮𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀸𑀦𑀺, 𑀪𑀼𑀜𑁆𑀚 𑀭𑀸𑀚 𑀯𑀭𑀸𑀯𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀝𑀺𑀲𑁂𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀘 𑀧𑀝𑀺𑀲𑁂𑀯𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀬𑀢𑀺. 𑀅𑀧𑀺𑀘 ‘‘𑀓𑀸𑀫𑁂 𑀪𑀼𑀜𑁆𑀚𑀢𑀻’’𑀢𑀺 𑀘 ‘‘𑀧𑀜𑁆𑀘𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀘 𑀤𑀲𑁆𑀲𑀦𑀢𑁄 𑀧𑀦 𑀪𑀼𑀜𑁆𑀚𑀦𑀧𑀭𑀺𑀪𑀼𑀜𑁆𑀚𑀦𑀲𑀤𑁆𑀤𑀸 𑀧𑀝𑀺𑀲𑁂𑀯𑀦𑀢𑁆𑀣𑁂𑀦 𑀓𑀢𑁆𑀣𑀘𑀺 𑀲𑀫𑀸𑀦𑀢𑁆𑀣𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀸. 𑀲𑀁𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀪𑁄𑀕𑀁 𑀓𑀭𑁄𑀢𑀺, 𑀏𑀓𑀢𑁄 𑀯𑀸𑀲𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 𑀅𑀢𑁆𑀭 𑀪𑀼𑀚𑀥𑀸𑀢𑀼 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼 𑀯𑀼𑀢𑁆𑀢𑁄, 𑀲𑁄 𑀓𑀣𑀁 𑀏𑀢𑁆𑀢𑀓𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀻’’𑀢𑀺? 𑀯𑀢𑁆𑀢𑀢𑁂𑀯, 𑀅𑀦𑁂𑀓𑀢𑁆𑀣𑀸 𑀳𑀺 𑀥𑀸𑀢𑀯𑁄, 𑀢𑁂 𑀉𑀧𑀲𑀕𑁆𑀕𑀲𑀳𑀸𑀬𑁂 𑀮𑀪𑀺𑀢𑁆𑀯𑀸𑀧𑀺 𑀅𑀦𑁂𑀓𑀢𑁆𑀣𑀢𑀭𑀸𑀯 𑀳𑁄𑀦𑁆𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑀦𑁆𑀢𑀸𑀤𑀻𑀦𑀺 𑀭𑀽𑀧𑀸𑀦𑀺 𑀦 𑀯𑀓𑁆𑀔𑀸𑀫. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫.

𑀓𑀢𑀺 𑀙𑁂𑀤𑀦𑁂. 𑀓𑀦𑁆𑀢𑀢𑀺, 𑀯𑀺𑀓𑀦𑁆𑀢𑀢𑀺. 𑀲𑀮𑁆𑀮𑀓𑀢𑁆𑀢𑁄.

𑀪𑀺𑀤𑀺 𑀯𑀺𑀤𑀸𑀭𑀡𑁂. 𑀪𑀺𑀦𑁆𑀤𑀢𑀺. 𑀅𑀦𑀸𑀕𑀢𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 ‘‘𑀪𑁂𑀚𑁆𑀚𑀺𑀲𑁆𑀲𑀢𑀺, 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀺𑀥𑀸 𑀪𑀯𑀦𑁆𑀢𑀺 𑀭𑀽𑀧𑀸𑀦𑀺. 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀪𑀺𑀦𑁆𑀤𑀢𑀻𑀢𑀺 𑀪𑀺𑀓𑁆𑀔𑀼. 𑀢𑁂𑀦𑀸𑀳 𑁋

‘‘𑀦 𑀢𑁂𑀦 𑀪𑀺𑀓𑁆𑀔𑀼 𑀲𑁄 𑀳𑁄𑀢𑀺, 𑀬𑀸𑀯𑀢𑀸 𑀪𑀺𑀓𑁆𑀔𑀢𑁂 𑀧𑀭𑁂;

𑀯𑀺𑀲𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬, 𑀪𑀺𑀓𑁆𑀔𑀼 𑀳𑁄𑀢𑀺 𑀦 𑀢𑀸𑀯𑀢𑀸.

𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀩𑀸𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀲𑀗𑁆𑀔𑀸𑀬 𑀮𑁄𑀓𑁂 𑀘𑀭𑀢𑀺, 𑀲𑀯𑁂 ‘𑀪𑀺𑀓𑁆𑀔𑀽’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀇𑀤𑀜𑁆𑀘 𑀔𑀻𑀡𑀸𑀲𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀫𑀡𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 ‘‘𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀧𑀸𑀧𑀼𑀡𑀦𑁆𑀢𑀺𑀬𑁂𑀯. 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺 𑀲𑀗𑁆𑀖𑀪𑁂𑀤𑀓𑁄. 𑀤𑁂𑀯𑀤𑀢𑁆𑀢𑁂𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄,. 𑀪𑀺𑀦𑁆𑀤𑀺𑀬𑀢𑀻𑀢𑀺 𑀪𑀺𑀦𑁆𑀦𑁄𑀢𑀺 𑀳𑀺 𑀦𑀺𑀩𑁆𑀩𑀘𑀦𑀁. 𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺. 𑀪𑀺𑀦𑁆𑀤𑀢𑀻𑀢𑀺 𑀪𑁂𑀢𑁆𑀢𑀸.

𑀙𑀺𑀤𑀺 𑀤𑁆𑀯𑁂𑀥𑀸𑀓𑀭𑀡𑁂. 𑀙𑀺𑀦𑁆𑀤𑀢𑀻𑀢𑀺 𑀙𑁂𑀤𑀓𑁄, 𑀏𑀯𑀁 𑀙𑁂𑀢𑁆𑀢𑀸. 𑀓𑁂𑀲𑁂 𑀙𑁂𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀙𑀺𑀦𑁆𑀤𑀺𑀬𑀢𑀻𑀢𑀺 𑀙𑀺𑀦𑁆𑀦𑁄. 𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀤𑁂𑀯 𑀭𑀽𑀳𑀢𑀺. 𑀇𑀤𑀁 𑀧𑀦 𑀪𑀺𑀤𑀺𑀙𑀺𑀤𑀺𑀤𑁆𑀯𑀬𑀁 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀯𑀸 ‘‘𑀪𑀺𑀚𑁆𑀚𑀢𑀺 𑀙𑀺𑀚𑁆𑀚𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀁 𑀭𑀽𑀧𑀤𑁆𑀯𑀬𑀁 𑀚𑀦𑁂𑀢𑀺, 𑀢𑀲𑁆𑀫𑀸 ‘‘𑀪𑀺𑀚𑁆𑀚𑀢𑀻𑀢𑀺 𑀪𑀺𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁.

𑀢𑀤𑀺 𑀳𑀺𑀁𑀲𑀸𑀦𑀸𑀤𑀭𑁂𑀲𑀼. 𑀢𑀦𑁆𑀤𑀢𑀺. 𑀢𑀦𑁆𑀤𑀻, 𑀢𑀤𑁆𑀤𑀼. 𑀢𑀤𑁆𑀤𑀢𑀺 𑀓𑀘𑁆𑀙𑀼.

𑀉𑀤𑀺 𑀧𑀲𑀯𑀓𑀺𑀮𑁂𑀤𑀦𑁂𑀲𑀼. 𑀧𑀲𑀯𑀦𑀁 𑀲𑀦𑁆𑀤𑀦𑀁. 𑀓𑀺𑀮𑁂𑀤𑀦𑀁 𑀢𑀺𑀦𑁆𑀤𑀢𑀸. 𑀉𑀦𑁆𑀤𑀢𑀺. 𑀉𑀦𑁆𑀤𑀽𑀭𑁄, 𑀲𑀫𑀼𑀤𑁆𑀤𑁄.

𑀯𑀺𑀤 𑀮𑀸𑀪𑁂. 𑀯𑀺𑀦𑁆𑀤𑀢𑀺. 𑀕𑁄𑀯𑀺𑀦𑁆𑀤𑁄, 𑀯𑀺𑀢𑁆𑀢𑀺. 𑀏𑀢𑁆𑀣 𑀯𑀺𑀢𑁆𑀢𑀻𑀢𑀺 𑀅𑀦𑀼𑀪𑀯𑀦𑀁, 𑀯𑁂𑀤𑀦𑀸 𑀯𑀸.

𑀯𑀺𑀤 𑀢𑀼𑀝𑁆𑀞𑀺𑀬𑀁. 𑀯𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀦𑀁. 𑀯𑀺𑀭𑀚𑁆𑀚𑀢𑀺. 𑀦𑀺𑀩𑁆𑀩𑀺𑀦𑁆𑀤𑁄 𑀓𑀸𑀫𑀭𑀢𑀺𑀬𑀸. 𑀯𑀺𑀢𑁆𑀢𑀺, 𑀯𑀺𑀢𑁆𑀢𑀁, 𑀯𑁂𑀤𑁄. 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀥𑀫𑁆𑀫𑀯𑁂𑀤𑀁.

𑀏𑀢𑁆𑀣 𑀯𑀺𑀢𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀁. ‘‘𑀯𑀺𑀢𑁆𑀢𑀺 𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀼𑀢 𑀤𑀺𑀲𑁆𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀢𑀦𑁆𑀢𑀺 𑀯𑀺𑀢𑁆𑀢𑀺𑀚𑀦𑀦𑀢𑁆𑀢𑀸 𑀯𑀺𑀢𑁆𑀢𑀲𑀗𑁆𑀔𑀸𑀢𑀁 𑀥𑀦𑀁. 𑀯𑁂𑀤𑁄𑀢𑀺 𑀕𑀦𑁆𑀣𑁄𑀧𑀺 𑀜𑀸𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽’’𑀢𑀺𑀆𑀤𑀻𑀲𑀼 𑀳𑀺 𑀕𑀦𑁆𑀣𑁄 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀪𑀺𑀚𑀜𑁆𑀜𑀸 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀜𑀸𑀡𑀁. ‘‘𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺𑀆𑀤𑀻𑀲𑀼 𑀲𑁄𑀫𑀦𑀲𑁆𑀲𑀁.

𑀯𑁂𑀤𑀕𑀦𑁆𑀣𑁂 𑀘 𑀜𑀸𑀡𑁂 𑀘, 𑀲𑁄𑀫𑀦𑀲𑁆𑀲𑁂 𑀘 𑀯𑀢𑁆𑀢𑀢𑀺;

𑀯𑁂𑀤𑀲𑀤𑁆𑀤𑁄 𑀇𑀫𑀁 𑀦𑀸𑀦𑀸-𑀥𑀸𑀢𑀼𑀢𑁄 𑀲𑀫𑀼𑀤𑀻𑀭𑀬𑁂.

𑀮𑀺𑀧 𑀮𑀺𑀫𑁆𑀧𑀦𑁂. 𑀮𑀺𑀫𑁆𑀧𑀢𑀺, 𑀮𑀺𑀫𑁆𑀧𑀓𑁄. 𑀅𑀯𑀮𑁂𑀧𑁄. 𑀅𑀯𑀮𑁂𑀧𑁄𑀢𑀺 𑀅𑀳𑀗𑁆𑀓𑀸𑀭𑁄.

𑀮𑀼𑀧 𑀅𑀘𑁆𑀙𑁂𑀤𑀦𑁂. 𑀮𑀼𑀫𑁆𑀧𑀢𑀺. 𑀯𑀺𑀮𑀼𑀫𑁆𑀧𑀓𑁄, 𑀯𑀺𑀮𑀼𑀢𑁆𑀢𑁄 𑀯𑀺𑀮𑁄𑀧𑁄.

𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀺;

𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀫𑁆𑀧𑀢𑀻𑀢𑀺.

𑀧𑀺𑀲 𑀘𑀼𑀡𑁆𑀡𑀦𑁂. 𑀧𑀺𑀁𑀲𑀢𑀺. 𑀧𑀺𑀲𑀓𑁄. 𑀧𑀺𑀲𑀼𑀡𑀸 𑀯𑀸𑀘𑀸. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀬𑀸𑀬 𑀯𑀸𑀘𑀸𑀬 𑀪𑀸𑀲𑀢𑀺, 𑀲𑀸 𑀧𑀺𑀲𑀼𑀡𑀸 𑀯𑀸𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀳𑀺𑀲𑀺 𑀯𑀺𑀳𑀺𑀁𑀲𑀸𑀬𑀁. 𑀳𑀺𑀁𑀲𑀢𑀺, 𑀯𑀺𑀳𑀺𑀁𑀲𑀢𑀺. 𑀳𑀺𑀁𑀲𑀓𑁄.

𑀅𑀳𑀺𑀁𑀲𑀓𑁄𑀢𑀺 𑀫𑁂 𑀦𑀸𑀫𑀁, 𑀳𑀺𑀁𑀲𑀓𑀲𑁆𑀲 𑀧𑀼𑀭𑁂 𑀲𑀢𑁄;

𑀅𑀚𑁆𑀚𑀸𑀳𑀁 𑀲𑀘𑁆𑀘𑀦𑀸𑀫𑁄𑀫𑁆𑀳𑀺, 𑀦 𑀦𑀁 𑀳𑀺𑀁𑀲𑀸𑀫𑀺 𑀓𑀺𑀜𑁆𑀘𑀦𑀁.

𑀳𑀺𑀁𑀲𑀺𑀢𑀩𑁆𑀩𑀁 𑀓𑀺𑀁𑀲𑀢𑀻𑀢𑀺 𑀲𑀻𑀳𑁄. 𑀆𑀤𑀺𑀅𑀦𑁆𑀢𑀓𑁆𑀔𑀭𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀲𑀤𑁆𑀤𑀲𑀺𑀤𑁆𑀥𑀺, 𑀬𑀣𑀸 ‘‘𑀓𑀦𑁆𑀢𑀦𑀝𑁆𑀞𑁂𑀦 𑀢𑀓𑁆𑀓’’𑀦𑁆𑀢𑀺. 𑀯𑀺𑀳𑁂𑀲𑀓𑁄, 𑀯𑀺𑀳𑁂𑀲𑀦𑀁.

𑀲𑀼𑀫𑁆𑀪 𑀧𑀳𑀸𑀭𑁂. 𑀬𑁄 𑀦𑁄 𑀕𑀸𑀯𑁄𑀯 𑀲𑀼𑀫𑁆𑀪𑀢𑀺. 𑀧𑀭𑀺𑀲𑀼𑀫𑁆𑀪𑀢𑀺. 𑀲𑀼𑀫𑁆𑀪𑁄𑀢𑀺. 𑀅𑀢𑁆𑀭𑀺𑀫𑁂 𑀧𑀸𑀴𑀺𑀢𑁄 𑀧𑀬𑁄𑀕𑀸 𑁋

‘‘𑀲𑀁𑀲𑀼𑀫𑁆𑀪𑀫𑀸𑀦𑀸 𑀅𑀢𑁆𑀢𑀸𑀦𑀁, 𑀓𑀸𑀮𑀫𑀸𑀕𑀫𑀬𑀸𑀫𑀲𑁂’’𑀢𑀺 𑀘,

‘‘𑀓𑁂𑀲𑀕𑁆𑀕𑀳𑀡𑀫𑀼𑀓𑁆𑀔𑁂𑀧𑀸, 𑀪𑀽𑀫𑁆𑀬𑀸 𑀘 𑀧𑀭𑀺𑀲𑀼𑀫𑁆𑀪𑀦𑀸;

𑀤𑀢𑁆𑀯𑀸 𑀘 𑀦𑁄 𑀧𑀓𑁆𑀓𑀫𑀢𑀺, 𑀩𑀳𑀼𑀤𑀼𑀓𑁆𑀔𑀁 𑀅𑀦𑀧𑁆𑀧𑀓’’𑀦𑁆𑀢𑀺 𑀘,

‘‘𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀺 𑀯𑁂𑀕𑀲𑀸’’𑀢𑀺 𑀘.

𑀅𑀜𑁆𑀜𑀢𑁆𑀣 𑀧𑀦 𑀅𑀜𑁆𑀜𑀸𑀧𑀺 𑀯𑀼𑀢𑁆𑀢𑀸. 𑀢𑀸 𑀇𑀥 𑀅𑀦𑀼𑀧𑀧𑀢𑁆𑀢𑀺𑀢𑁄 𑀦 𑀯𑀼𑀢𑁆𑀢𑀸. 𑀓𑁂𑀘𑁂𑀢𑁆𑀣 𑀫𑀜𑁆𑀜𑁂𑀬𑁆𑀬𑀼𑀁, 𑀬𑀣𑀸 𑀪𑀽𑀯𑀸𑀤𑀺𑀕𑀡𑁂 ‘‘𑀲𑀓𑀺 𑀲𑀗𑁆𑀓𑀸𑀬𑀁 𑀔𑀚𑀺 𑀕𑀢𑀺𑀯𑁂𑀓𑀮𑁆𑀮𑁂’’𑀢𑀺𑀆𑀤𑀻𑀦𑀁 𑀥𑀸𑀢𑀽𑀦𑀁 𑀧𑀝𑀺𑀮𑀤𑁆𑀥𑀯𑀕𑁆𑀕𑀦𑁆𑀢𑀪𑀸𑀯𑀲𑁆𑀲 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀯𑀲𑁂𑀦 ‘‘𑀲𑀗𑁆𑀓𑀢𑀺 𑀔𑀜𑁆𑀚𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀣𑀸 𑀇𑀫𑀲𑁆𑀫𑀺𑀁 𑀭𑀼𑀥𑀸𑀤𑀺𑀕𑀡𑁂 ‘‘𑀫𑀼𑀘 𑀫𑁄𑀘𑀦𑁂 𑀓𑀢𑀺 𑀙𑁂𑀤𑀦𑁂’’𑀢𑀺𑀆𑀤𑀻𑀦𑀁 𑀥𑀸𑀢𑀽𑀦𑀁 𑀧𑀝𑀺𑀮𑀤𑁆𑀥𑀯𑀕𑁆𑀕𑀦𑁆𑀢𑀪𑀸𑀯𑀲𑁆𑀲 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀯𑀲𑁂𑀦 ‘‘𑀫𑀼𑀜𑁆𑀘𑀢𑀺 𑀓𑀦𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑁄 𑀇𑀫𑁂𑀲𑀁 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑁂 𑀪𑀽𑀯𑀸𑀤𑀺𑀕𑀡𑀲𑁆𑀫𑀺𑀁 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑀸 𑀇𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀆𑀔𑁆𑀬𑀸𑀢𑀢𑁆𑀢𑀜𑁆𑀘 𑀦𑀸𑀫𑀺𑀓𑀢𑁆𑀢𑀜𑁆𑀘 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂𑀲𑀼 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀢𑁂𑀲𑀁 𑀯𑀺𑀦𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀭𑀽𑀧𑀧𑁆𑀧𑀯𑀢𑁆𑀢𑀺 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? 𑀲𑀗𑁆𑀓𑀢𑀺, 𑀲𑀗𑁆𑀓𑀸, 𑀔𑀜𑁆𑀚𑀢𑀺, 𑀔𑀜𑁆𑀚𑁄 𑀇𑀘𑁆𑀘𑀸𑀤𑀺. 𑀅𑀬𑀁 𑀅𑀦𑁂𑀓𑀲𑁆𑀲𑀭𑀸𑀦𑀁 𑀇𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀪𑀽𑀯𑀸𑀤𑀺𑀕𑀡𑀺𑀓𑀸𑀦𑀁 𑀯𑀺𑀲𑁂𑀲𑁄.

𑀬𑁂 𑀘 𑀭𑀼𑀥𑀸𑀤𑀺𑀕𑀡𑀲𑁆𑀫𑀺𑀁 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑁆𑀯𑀸 𑀅𑀓𑀸𑀭𑀦𑁆𑀢𑀯𑀲𑁂𑀦 𑀯𑀸 𑀉𑀓𑀸𑀭𑀦𑁆𑀢𑀯𑀲𑁂𑀦 𑀯𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀆𑀔𑁆𑀬𑀸𑀢𑀢𑁆𑀢𑀁 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀯𑀺𑀲𑀬𑁂𑀬𑁂𑀯 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺, 𑀦 𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂. 𑀦𑀸𑀫𑀺𑀓𑀢𑁆𑀢𑀁 𑀧𑀦 𑀲𑀳𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀯𑀺𑀦𑀸 𑀘 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺. 𑀬𑀢𑁆𑀣 𑀯𑀺𑀦𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸, 𑀢𑀢𑁆𑀣 𑀲𑀲𑀁𑀬𑁄𑀕𑀭𑀽𑀧𑀸𑀬𑁂𑀯 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀫𑀼𑀜𑁆𑀘𑀢𑀺, 𑀫𑀼𑀜𑁆𑀘𑀸𑀧𑁂𑀢𑀺, 𑀫𑁄𑀘𑁂𑀢𑀺, 𑀫𑁄𑀘𑀸𑀧𑁂𑀢𑀺. 𑀙𑀺𑀦𑁆𑀤𑀸𑀧𑁂𑀢𑀺. 𑀙𑁂𑀤𑁂𑀢𑀺, 𑀙𑁂𑀤𑀸𑀧𑁂𑀢𑀺. 𑀙𑀺𑀦𑁆𑀤𑀦𑀁, 𑀙𑁂𑀤𑁄. 𑀫𑀼𑀜𑁆𑀘𑀦𑀁, 𑀫𑁄𑀘𑀦𑀁. 𑀓𑀦𑁆𑀢𑀢𑀺, 𑀓𑀦𑁆𑀢𑀦𑀁, 𑀲𑀮𑁆𑀮𑀓𑀢𑁆𑀢𑁄. 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄, 𑀲𑀸𑀫𑀁 𑀉𑀓𑁆𑀓𑀘𑁆𑀘 𑀔𑀸𑀤𑀲𑀺 𑀇𑀘𑁆𑀘𑀸𑀤𑀻𑀦𑀺. 𑀢𑀢𑁆𑀣 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀆𑀔𑁆𑀬𑀸𑀢𑀦𑀸𑀫𑀺𑀓𑀪𑀸𑀯𑀁 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂𑀲𑀼 𑀏𑀓𑀦𑁆𑀢𑀢𑁄 𑀧𑀝𑀺𑀮𑀤𑁆𑀥𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀳𑀺 𑀲𑀓𑀺 𑀔𑀚𑀺 𑀆𑀤𑀻𑀳𑀺𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀦 𑀧𑀦 𑀫𑀼𑀘𑀙𑀺𑀤𑀺𑀆𑀤𑀻𑀳𑀻𑀢𑀺? 𑀢𑀦𑁆𑀦, 𑀫𑀼𑀘𑀙𑀺𑀤𑀺𑀆𑀤𑀻𑀳𑀺𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁 𑀭𑀼𑀘𑀥𑀸𑀢𑀼𑀬𑀸 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀢𑀣𑀸 𑀳𑀺 𑀬𑀣𑀸 ‘‘𑀭𑀼𑀦𑁆𑀥𑀺𑀲𑁆𑀲, 𑀭𑀼𑀦𑁆𑀥𑀬𑀢𑀺, 𑀭𑀼𑀦𑁆𑀥𑀸𑀧𑁂𑀢𑀺, 𑀭𑀼𑀦𑁆𑀥𑀦𑀁, 𑀭𑁄𑀥𑁄, 𑀯𑀺𑀭𑁄𑀥𑁄’’𑀢𑀺𑀆𑀤𑀻𑀲𑀼 𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀫𑀼𑀘𑀙𑀺𑀤𑀺𑀆𑀤𑀻𑀦𑀫𑁆𑀧𑀻𑀢𑀺.

𑀦𑀦𑀼 𑀓𑀘𑁆𑀘𑀸𑀬𑀦𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀦𑀺𑀘𑁆𑀘𑀯𑀺𑀥𑀸𑀦𑀢𑁆𑀣𑀁 ‘‘𑀭𑀼𑀥𑀸𑀤𑀺𑀢𑁄 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀜𑁆𑀘𑀸’’𑀢𑀺 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀓𑁆𑀭𑀺𑀬𑀸𑀧𑀤𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀘 𑀦𑀸𑀫𑀺𑀓𑀧𑀤𑀢𑁆𑀢𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, ‘‘𑀯𑀺𑀭𑁄𑀥𑁄’’𑀢𑀺𑀆𑀤𑀻𑀦𑀁 𑀤𑀲𑁆𑀲𑀦𑀢𑁄 𑀯𑀸𑀲𑀤𑁆𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀸𑀲𑀤𑁆𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑁂𑀦 𑀜𑀸𑀬𑀢𑀺 𑀓𑁆𑀭𑀺𑀬𑀸𑀧𑀤𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀲𑀓𑀺𑀔𑀚𑀺𑀆𑀤𑀻𑀦𑀁 𑀦𑀺𑀘𑁆𑀘𑀁 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀓𑁆𑀭𑀺𑀬𑀸𑀧𑀤𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀭𑀼𑀥𑀸𑀤𑀺𑀢𑁄 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀜𑁆𑀘𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀫𑀦𑁆𑀢𑀼𑀦𑁆𑀢𑀺? 𑀦 𑀲𑀓𑁆𑀓𑀸, 𑀲𑀓𑀺𑀔𑀚𑀺𑀆𑀤𑀻𑀦𑀁 𑀭𑀼𑀥𑀥𑀸𑀢𑀼𑀬𑀸 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀦𑀸𑀫𑀺𑀓𑀢𑁆𑀢𑁂 𑀤𑁆𑀯𑀺𑀧𑁆𑀧𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀬𑁂𑀲𑀁 𑀬𑀸 𑀦𑀸𑀫𑀺𑀓𑀢𑁆𑀢𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸, 𑀲𑀸 𑀏𑀯 𑀢𑁂𑀲𑀁 𑀭𑀼𑀥𑀸𑀤𑀺𑀕𑀡𑀪𑀸𑀯𑀲𑁆𑀲 𑀮𑀓𑁆𑀔𑀡𑀁. 𑀢𑀜𑁆𑀘 𑀲𑀓𑀺𑀔𑀚𑀺𑀆𑀤𑀻𑀦𑀁 𑀦𑀢𑁆𑀣𑀺. ‘‘𑀲𑀗𑁆𑀓𑀸 𑀔𑀜𑁆𑀚𑁄’’𑀢𑀺𑀆𑀤𑀺𑀦𑀸 𑀳𑀺 𑀦𑀸𑀫𑀢𑁆𑀢𑁂 𑀏𑀓𑁄𑀬𑁂𑀯 𑀧𑀓𑀸𑀭𑁄 𑀤𑀺𑀲𑁆𑀲𑀢𑀺 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑁄, ‘‘𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂’’𑀇𑀘𑁆𑀘𑀸𑀤𑀻𑀦𑀁 𑀧𑀦 ‘‘𑀓𑀫𑁄, 𑀓𑀫𑀦𑀁, 𑀘𑀗𑁆𑀓𑀫𑁄, 𑀘𑀗𑁆𑀓𑀫𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀸𑀫𑀺𑀓𑀢𑁆𑀢𑁂 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸𑀲𑀫𑁆𑀪𑀯𑁂𑀧𑀺 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀅𑀩𑁆𑀪𑀸𑀲𑀯𑀺𑀲𑀬𑁂 𑀧𑀯𑀢𑁆𑀢𑀢𑁆𑀢𑀸 𑀲𑀸 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸 𑀭𑀼𑀥𑀸𑀤𑀺𑀕𑀡𑀪𑀸𑀯𑀲𑁆𑀲 𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀩𑁆𑀪𑀸𑀲𑀯𑀺𑀲𑀬𑁂 𑀧𑀯𑀢𑁆𑀢𑀁 𑀦𑀺𑀕𑁆𑀕𑀳𑀻𑀢𑀸𑀕𑀫𑀁 𑀯𑀚𑁆𑀚𑁂𑀢𑁆𑀯𑀸 𑀬𑀸 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸, 𑀲𑀸𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑀪𑀸𑀯𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀢𑀻𑀯 𑀲𑀼𑀔𑀼𑀫𑁄 𑀲𑀫𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀭𑀼𑀥𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄𑀢𑀺.

𑀤𑀼𑀥𑀸𑀤𑀺𑀕𑀡𑁄𑀬𑀁.

𑀤𑀺𑀯𑀸𑀤𑀺𑀕𑀡𑀺𑀓

𑀤𑀺𑀯𑀼 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀩𑁆𑀬𑀯𑀳𑀸𑀭𑀚𑀼𑀢𑀺𑀣𑀼𑀢𑀺𑀓𑀦𑁆𑀢𑀺𑀕𑀢𑀺𑀲𑀢𑁆𑀢𑀻𑀲𑀼. 𑀏𑀢𑁆𑀣 𑀘 𑀓𑀻𑀴𑀸𑀢𑀺 𑀮𑀴𑀦𑀸, 𑀯𑀺𑀳𑀸𑀭𑁄 𑀯𑀸. 𑀮𑀴𑀦𑀸𑀢𑀺 𑀘 𑀮𑀴𑀺𑀢𑀸𑀦𑀼𑀪𑀯𑀦𑀯𑀲𑁂𑀦 𑀭𑀫𑀡𑀁. 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀺𑀦𑀸 𑀯𑀢𑁆𑀢𑀦𑀁. 𑀯𑀺𑀚𑀺𑀕𑀺𑀲𑀸𑀢𑀺 𑀯𑀺𑀚𑀬𑀺𑀘𑁆𑀙𑀸. 𑀩𑁆𑀬𑀯𑀳𑀸𑀭𑁄𑀢𑀺 𑀯𑁄𑀳𑀸𑀭𑁄. 𑀚𑀼𑀢𑀻𑀢𑀺 𑀲𑁄𑀪𑀸. 𑀣𑀼𑀢𑀻𑀢𑀺 𑀣𑁄𑀫𑀦𑀸. 𑀓𑀦𑁆𑀢𑀻𑀢𑀺 𑀓𑀫𑀦𑀻𑀬𑀢𑀸. 𑀕𑀢𑀻𑀢𑀺 𑀕𑀫𑀦𑀁. 𑀲𑀢𑁆𑀢𑀻𑀢𑀺 𑀲𑀸𑀫𑀢𑁆𑀣𑀺𑀬𑀁. 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀯𑀼𑀥𑀸𑀢𑀼 𑀯𑀢𑁆𑀢𑀢𑀺. 𑀤𑀺𑀩𑁆𑀩𑀢𑀺. 𑀤𑁂𑀯𑁄. 𑀤𑁂𑀯𑀻. 𑀤𑁂𑀯𑀢𑀸.

𑀏𑀢𑁆𑀣 𑀤𑁂𑀯𑁄𑀢𑀺 𑀢𑀺𑀯𑀺𑀥𑀸 𑀤𑁂𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀢𑁂𑀲𑀼 𑀫𑀳𑀸𑀲𑀫𑁆𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂𑀦 ‘‘𑀤𑁂𑀯𑀸’’𑀢𑀺 𑀲𑀫𑁆𑀫𑀢𑀢𑁆𑀢𑀸 𑀭𑀸𑀚𑀭𑀸𑀚𑀓𑀼𑀫𑀸𑀭𑀸𑀤𑀬𑁄 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫. 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫. 𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀓𑀼𑀫𑀸𑀭𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀪𑀼𑀫𑁆𑀫𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀢𑁆𑀢𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸’’𑀢𑀺.

𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑁋 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀛𑀸𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺 𑀓𑀻𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀩𑁆𑀩𑀦𑁆𑀢𑀺 𑀬𑀣𑀸𑀪𑀺𑀮𑀸𑀲𑀺𑀢𑀁 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀩𑁆𑀩𑀦𑁆𑀢𑀺 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑁂𑀯𑀸. 𑀅𑀣 𑀯𑀸 𑀢𑀁𑀢𑀁𑀩𑁆𑀬𑀲𑀦𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀲𑀭𑀡𑀁 𑀧𑀭𑀸𑀬𑀡𑀦𑁆𑀢𑀺 𑀤𑁂𑀯𑀦𑀻𑀬𑀸 𑀅𑀪𑀺𑀢𑁆𑀣𑀯𑀦𑀻𑀬𑀸𑀢𑀺 𑀤𑁂𑀯𑀸. 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦 𑀓𑀫𑀦𑀻𑀬𑀸𑀢𑀺 𑀯𑀸 𑀤𑁂𑀯𑀸.

𑀏𑀢𑁆𑀣 𑀘 𑀣𑀼𑀢𑀺𑀓𑀦𑁆𑀢𑀺 𑀅𑀢𑁆𑀣𑀸 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑀸, 𑀓𑀻𑀴𑀸𑀤𑀬𑁄 𑀙 𑀅𑀢𑁆𑀣𑀸 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦. 𑀓𑁂𑀘𑀺 𑀧𑀦 ‘‘𑀤𑀺𑀯𑀼 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀩𑁆𑀬𑀯𑀳𑀸𑀭𑀚𑀼𑀢𑀺𑀣𑀼𑀢𑀺𑀕𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺. 𑀓𑁂𑀘𑀺 ‘‘𑀕𑀢𑀻’’𑀢𑀺 𑀧𑀤𑀁 𑀯𑀺𑀳𑀸𑀬 ‘‘𑀚𑀼𑀢𑀺𑀣𑀼𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺. 𑀓𑁂𑀘𑀺 ‘‘𑀣𑀼𑀢𑀻’’𑀢𑀺 𑀧𑀤𑀁 𑀯𑀺𑀳𑀸𑀬 ‘‘𑀚𑀼𑀢𑀺𑀕𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺, 𑀓𑁂𑀘𑀺 𑀧𑀦 𑀤𑀺𑀯𑀼𑀥𑀸𑀢𑀼𑀁 ‘‘𑀲𑀢𑁆𑀢𑀺𑀣𑀼𑀢𑀺𑀓’’𑀦𑁆𑀢𑀺𑀅𑀢𑁆𑀣𑁂𑀧𑀺 𑀇𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑀅𑀪𑀺𑀥𑀫𑁆𑀫𑀲𑁆𑀲 𑀅𑀦𑀼𑀝𑀻𑀓𑀸𑀓𑀸𑀭𑁄 ‘‘𑀤𑁂𑀯𑀲𑀤𑁆𑀤𑁄 𑀬𑀣𑀸 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀯𑁄𑀳𑀸𑀭𑀚𑀼𑀢𑀺𑀕𑀢𑀺𑀅𑀢𑁆𑀣𑁄, 𑀏𑀯𑀁 𑀲𑀢𑁆𑀢𑀺𑀅𑀪𑀺𑀢𑁆𑀣𑀯𑀓𑀫𑀦𑀢𑁆𑀣𑁄𑀧𑀺 𑀳𑁄𑀢𑀺 𑀥𑀸𑀢𑀼𑀲𑀤𑁆𑀤𑀸𑀦𑀁 𑀅𑀦𑁂𑀓𑀢𑁆𑀣𑀪𑀸𑀯𑀢𑁄’’𑀢𑀺𑀆𑀤𑀺.

𑀇𑀤𑀁 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀻𑀲𑀼 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀁 𑁋 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀇𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀤𑁂𑀯𑀸, 𑀭𑀸𑀚𑀸𑀦𑁄. 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺, 𑀧𑀝𑀺𑀧𑀓𑁆𑀔𑁂 𑀯𑀸 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀯𑁄𑀳𑀭𑀦𑁆𑀢𑀺 𑀘 𑀮𑁄𑀓𑀲𑁆𑀲 𑀬𑀼𑀢𑁆𑀢𑀸𑀬𑀼𑀢𑁆𑀢𑀁, 𑀚𑁄𑀢𑀦𑁆𑀢𑀺 𑀧𑀭𑀫𑀸𑀬 𑀲𑀭𑀻𑀭𑀚𑀼𑀢𑀺𑀬𑀸, 𑀣𑁄𑀫𑀺𑀬𑀦𑁆𑀢𑀺 𑀢𑀩𑁆𑀪𑀸𑀯𑀢𑁆𑀣𑀺𑀓𑁂𑀳𑀺, 𑀓𑀸𑀫𑀺𑀬𑀦𑁆𑀢𑀺 𑀤𑀝𑁆𑀞𑀼𑀁 𑀲𑁄𑀢𑀼𑀜𑁆𑀘 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦, 𑀕𑀘𑁆𑀙𑀦𑁆𑀢𑀺 𑀘 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀧𑁆𑀧𑀝𑀺𑀳𑀢𑀕𑀫𑀦𑁂𑀦, 𑀲𑀓𑁆𑀓𑁄𑀦𑁆𑀢𑀺 𑀘 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁𑀢𑀁𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀼𑀦𑁆𑀢𑀺 𑀤𑁂𑀯𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄. 𑀓𑀻𑀴𑀦𑁆𑀢𑀺 𑀧𑀭𑀫𑀸𑀬 𑀛𑀸𑀦𑀓𑀻𑀴𑀸𑀬, 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺 𑀧𑀝𑀺𑀧𑀓𑁆𑀔𑀁, 𑀧𑀭𑀫𑀲𑀼𑀔𑀼𑀫𑀜𑀸𑀡𑀯𑀺𑀲𑁂𑀲𑀯𑀺𑀲𑀬𑀁 𑀅𑀢𑁆𑀣𑀜𑁆𑀘 𑀯𑁄𑀳𑀭𑀦𑁆𑀢𑀺, 𑀚𑁄𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑁄𑀲𑀓𑀮𑀼𑀲𑀸𑀪𑀸𑀯𑀸 𑀧𑀭𑀫𑀯𑀺𑀲𑀼𑀤𑁆𑀥𑀸𑀬 𑀜𑀸𑀡𑀚𑀼𑀢𑀺𑀬𑀸, 𑀣𑁄𑀫𑀺𑀬𑀦𑁆𑀢𑀺 𑀘 𑀯𑀺𑀜𑁆𑀜𑀸𑀢𑀲𑀪𑀸𑀯𑁂𑀳𑀺 𑀧𑀭𑀫𑀦𑀺𑀫𑁆𑀫𑀮𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄, 𑀓𑀸𑀫𑀺𑀬𑀦𑁆𑀢𑀺 𑀘 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀢𑀸𑀬 𑀤𑀝𑁆𑀞𑀼𑀁 𑀲𑁄𑀢𑀼𑀁 𑀧𑀽𑀚𑀺𑀢𑀼𑀜𑁆𑀘, 𑀕𑀘𑁆𑀙𑀦𑁆𑀢𑀺 𑀘 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀅𑀧𑀘𑁆𑀘𑀸𑀕𑀫𑀦𑀻𑀬𑀸𑀬 𑀕𑀢𑀺𑀬𑀸, 𑀲𑀓𑁆𑀓𑁄𑀦𑁆𑀢𑀺 𑀘 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑁂 𑀢𑁂 𑀲𑀢𑁆𑀢𑁂 𑀳𑀺𑀢𑁂 𑀦𑀺𑀬𑁄𑀚𑁂𑀢𑀼𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑀼𑀔𑁂 𑀘 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸.

𑀤𑁂𑀯𑀲𑀤𑁆𑀤 ‘‘𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂’’𑀢𑀺𑀆𑀤𑀻𑀲𑀼 𑀅𑀚𑀝𑀸𑀓𑀸𑀲𑁂 𑀆𑀕𑀢𑁄. ‘‘𑀤𑁂𑀯𑁄 𑀘 𑀣𑁄𑀓𑀁 𑀣𑁄𑀓𑀁 𑀨𑀼𑀲𑀸𑀬𑀢𑀻’’𑀢𑀺𑀆𑀤𑀻𑀲𑀼 𑀫𑁂𑀖𑁂. ‘‘𑀅𑀬𑀜𑁆𑀳𑀺 𑀤𑁂𑀯 𑀓𑀼𑀫𑀸𑀭𑁄’’𑀢𑀺𑀆𑀤𑀻𑀲𑀼 𑀔𑀢𑁆𑀢𑀺𑀬𑁂. ‘‘𑀅𑀳𑀁 𑀤𑁂𑀯 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀪𑀬𑀁 𑀦 𑀧𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀇𑀲𑁆𑀲𑀭𑀧𑀼𑀕𑁆𑀕𑀮𑁂. ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑀤𑁂𑀯𑁄 𑀫𑀜𑁆𑀜𑁂’’𑀢𑀺𑀆𑀤𑀻𑀲𑀼 𑀉𑀧𑀧𑀢𑁆𑀢𑀺𑀤𑁂𑀯𑁂. ‘‘𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀼𑀤𑁆𑀥𑀺𑀤𑁂𑀯𑁂 𑀆𑀕𑀢𑁄.

𑀤𑁂𑀯𑀻𑀢𑀺 𑀭𑀸𑀚𑀪𑀭𑀺𑀬𑀸𑀧𑀺 𑀤𑁂𑀯𑀥𑀻𑀢𑀸𑀧𑀺 ‘‘𑀤𑁂𑀯𑀻’’𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀯𑀲𑁆𑀲 𑀪𑀭𑀺𑀬𑀸𑀢𑀺 𑀳𑀺 𑀤𑁂𑀯𑀻, 𑀲𑀸𑀧𑀺 𑀅𑀢𑁆𑀣𑀢𑁄 ‘‘𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑀻’’𑀢𑀺 𑀯𑀢𑁆𑀢𑀩𑁆𑀩𑀸, 𑀬𑀣𑀸 ‘‘𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼𑀦𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀤𑀺𑀩𑁆𑀩𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀓𑀻𑀴𑀢𑀻𑀢𑀺 𑀤𑁂𑀯𑀻’’𑀢𑀺.

𑀤𑁂𑀯𑀢𑀸𑀢𑀺 𑀤𑁂𑀯𑀧𑀼𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀸𑀧𑀺 𑀤𑁂𑀯𑀥𑀻𑀢𑀸𑀧𑀺. ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀼𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀳𑀺 𑀤𑁂𑀯𑀧𑀼𑀢𑁆𑀢𑁄 ‘‘𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄 ‘‘𑀤𑁂𑀯𑁄𑀬𑁂𑀯 𑀤𑁂𑀯𑀢𑀸’’𑀢𑀺 𑀓𑀢𑁆𑀯𑀸, 𑀢𑀣𑀸 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀩𑁆𑀭𑀳𑁆𑀫𑀸𑀦𑁄.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺-

𑀆𑀤𑀻𑀲𑀼 𑀤𑁂𑀯𑀥𑀻𑀢𑀸.

𑀇𑀫𑀸𑀦𑀺 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀦𑀸𑀫𑀸𑀦𑀺 𑁋

𑀤𑁂𑀯𑁄 𑀲𑀼𑀭𑁄 𑀘 𑀯𑀺𑀩𑀼𑀥𑁄, 𑀦𑀺𑀚𑁆𑀚𑀭𑁄 𑀅𑀫𑀭𑁄 𑀫𑀭𑀼;

𑀲𑀼𑀥𑀸𑀲𑀻 𑀢𑀺𑀤𑀲𑁄 𑀲𑀕𑁆𑀕-𑀯𑀸𑀲𑀻 𑀅𑀦𑀺𑀫𑀺𑀲𑁄𑀧𑀺 𑀘;

𑀤𑀺𑀯𑁄𑀓𑁄’𑀫𑀢𑀧𑀸𑀬𑀻 𑀘, 𑀲𑀕𑁆𑀕𑀝𑁆𑀞𑁄 𑀤𑁂𑀯𑀢𑀸𑀦𑀺 𑀘.

𑀔𑀺 𑀔𑀬𑁂. 𑀔𑀺𑀬𑀢𑀺. 𑀔𑀬𑁄. 𑀔𑀺𑀬𑀦𑀁. 𑀭𑀸𑀕𑀓𑁆𑀔𑀬𑁄.

𑀔𑀺 𑀦𑀺𑀯𑀸𑀲𑁂 𑀓𑁄𑀥𑀳𑀺𑀁𑀲𑀸𑀲𑀼 𑀘. 𑀔𑀺𑀬𑀢𑀺. 𑀦 𑀕𑀘𑁆𑀙𑀲𑀺 𑀬𑀫𑀓𑁆𑀔𑀬𑀁. 𑀦𑀸𑀕𑀤𑀸𑀦𑁂𑀦 𑀔𑀺𑀬𑀦𑁆𑀢𑀺.

𑀢𑀢𑁆𑀣 𑀔𑀺𑀬𑀢𑀻𑀢𑀺 𑀦𑀺𑀯𑀲𑀢𑀺. 𑀬𑀫𑀓𑁆𑀔𑀬𑀦𑁆𑀢𑀺 𑀬𑀫𑀦𑀺𑀯𑁂𑀲𑀦𑀁. 𑀔𑀺𑀬𑀦𑁆𑀢𑀻𑀢𑀺 𑀓𑀼𑀚𑁆𑀛𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀯𑀸.

𑀖𑀸 𑀕𑀦𑁆𑀥𑁄𑀧𑀸𑀤𑀸𑀦𑁂. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑀼𑀁 𑀖𑀸𑀬𑀺𑀢𑁆𑀯𑀸.

𑀭𑀼𑀘 𑀭𑁄𑀘𑀦𑁂. 𑀭𑁄𑀘𑀦𑀁 𑀭𑀼𑀘𑀺. 𑀪𑀢𑁆𑀢𑀁 𑀫𑁂 𑀭𑀼𑀘𑁆𑀘𑀢𑀺. 𑀪𑀢𑁆𑀢𑀫𑁆𑀧𑀺𑀢𑀲𑁆𑀲 𑀦 𑀭𑀼𑀘𑁆𑀘𑀢𑀺. 𑀧𑀩𑁆𑀩𑀚𑁆𑀚𑀸 𑀫𑀫 𑀭𑀼𑀘𑁆𑀘𑀢𑀺. 𑀭𑀼𑀘𑁆𑀘𑀺𑀢𑀼𑀁, 𑀭𑀼𑀘𑁆𑀘𑀺𑀢𑁆𑀯𑀸. 𑀓𑁂𑀘𑀺 𑀧𑀦 𑀇𑀫𑀲𑁆𑀫𑀺𑀁 𑀤𑀺𑀯𑀸𑀤𑀺𑀕𑀡𑁂 ‘‘𑀭𑀼𑀘 𑀤𑀺𑀢𑁆𑀢𑀺𑀫𑁆𑀳𑀻’’𑀢𑀺 𑀧𑀞𑀦𑁆𑀢𑀺. 𑀢𑀁 𑀦 𑀬𑀼𑀢𑁆𑀢𑀁 𑀓𑀢𑁆𑀣𑀘𑀺𑀧𑀺 𑀤𑀺𑀢𑁆𑀢𑀺𑀲𑀗𑁆𑀔𑀸𑀢𑀲𑁄𑀪𑀦𑀢𑁆𑀣𑀯𑀸𑀘𑀓𑀲𑁆𑀲 𑀭𑀼𑀘𑀥𑀸𑀢𑀼𑀦𑁄 ‘‘𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁, 𑀤𑀺𑀢𑁆𑀢𑀺𑀭𑀼𑀘𑀻𑀦𑀁 𑀯𑀸𑀘𑀓𑁄 𑀭𑀼𑀘𑀥𑀸𑀢𑀼 𑀪𑀼𑀯𑀸𑀤𑀺𑀕𑀡𑀺𑀓𑁄. 𑀢𑀲𑁆𑀲 𑀳𑀺 ‘‘𑀭𑁄𑀘𑀢𑀺, 𑀯𑀺𑀭𑁄𑀘𑀢𑀺. 𑀏𑀓𑀢𑁆𑀢𑀫𑀼𑀧𑀭𑁄𑀘𑀺𑀢’’𑀦𑁆𑀢𑀺 𑀭𑀽𑀧𑀸𑀦𑀺𑀬𑁂𑀯 𑀪𑀯𑀦𑁆𑀢𑀺, 𑀦 ‘‘𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀁. 𑀭𑀼𑀘𑀺𑀬𑀸𑀬𑁂𑀯 𑀯𑀸𑀘𑀓𑁄 𑀧𑀦 𑀤𑀺𑀯𑀸𑀤𑀺𑀕𑀡𑀺𑀓𑁄𑀧𑀺 𑀳𑁄𑀢𑀺 𑀘𑀼𑀭𑀸𑀤𑀺𑀕𑀡𑀺𑀓𑁄𑀧𑀺. 𑀢𑀲𑁆𑀲 𑀳𑀺 𑀤𑀺𑀯𑀸𑀤𑀺𑀕𑀡𑀺𑀓𑀓𑀸𑀮𑁂 ‘‘𑀕𑀫𑀦𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀁. 𑀘𑀼𑀭𑀸𑀤𑀺𑀕𑀡𑀺𑀓𑀓𑀸𑀮𑁂 ‘‘𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀻’’𑀢𑀺 𑀭𑀽𑀧𑀁. 𑀆𑀧𑀼𑀩𑁆𑀩𑁄 𑀘𑁂 𑀆𑀘𑀺𑀓𑁆𑀔𑀦𑁂 𑀯𑀢𑁆𑀢𑀢𑀺, ‘‘𑀆𑀭𑁄𑀘𑁂𑀢𑀺, 𑀆𑀭𑁄𑀘𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀫𑀼𑀘 𑀫𑁄𑀓𑁆𑀔𑁂. 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀢𑀺. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀺. 𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺, 𑀅𑀥𑀺𑀫𑀼𑀢𑁆𑀢𑀺, 𑀫𑀼𑀘𑁆𑀘𑀫𑀸𑀦𑁄.

𑀉𑀘 𑀲𑀫𑀯𑀸𑀬𑁂. 𑀉𑀘𑁆𑀘𑀢𑀺. 𑀑𑀓𑁄, 𑀊𑀓𑀸, 𑀉𑀓𑁆𑀓𑀸.

𑀑𑀓𑁄𑀢𑀺 𑀉𑀤𑀓𑀫𑁆𑀧𑀺 𑀆𑀯𑀸𑀲𑁄𑀧𑀺. ‘‘𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀻’’𑀢𑀺 𑀘, ‘‘𑀯𑀸𑀭𑀺𑀚𑁄𑀯 𑀣𑀮𑁂 𑀔𑀺𑀢𑁆𑀢𑁄, 𑀑𑀓𑀫𑁄𑀓𑀢𑀫𑀼𑀩𑁆𑀪𑀢𑁄’’𑀢𑀺 𑀘𑁂𑀢𑁆𑀣 𑀧𑀬𑁄𑀕𑁄. 𑀊𑀓𑀸𑀢𑀺 𑀲𑀻𑀲𑁂 𑀦𑀺𑀩𑁆𑀩𑀢𑁆𑀢𑀓𑀺𑀫𑀺𑀯𑀺𑀲𑁂𑀲𑁄.

𑀉𑀓𑁆𑀓𑀸𑀢𑀺 𑀤𑀻𑀧𑀺𑀓𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀽’’𑀢𑀺 𑀳𑀺 𑀆𑀕𑀢𑀝𑁆𑀞𑀸𑀦𑁂 𑀤𑀻𑀧𑀺𑀓𑀸 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀅𑀗𑁆𑀕𑀸𑀭𑀓𑀧𑀮𑁆𑀮𑀁. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀼𑀤𑁆𑀥𑀦𑀁. ‘‘𑀏𑀯𑀁 𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀸𑀢𑀯𑁂𑀕𑁄 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 ‘‘𑀉𑀓𑁆𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀘𑁆𑀘𑁂𑀯𑀁 𑁋

𑀤𑀻𑀧𑀺𑀓𑀸𑀯𑀸𑀢𑀯𑁂𑀕𑁂𑀲𑀼, 𑀓𑀫𑁆𑀫𑀸𑀭𑀸𑀦𑀜𑁆𑀘 𑀉𑀤𑁆𑀥𑀦𑁂;

𑀫𑀽𑀲𑀸𑀬𑀫𑁆𑀧𑀺 𑀘 𑀅𑀗𑁆𑀕𑀸𑀭-𑀓𑀧𑀮𑁆𑀮𑁂 𑀘𑀸𑀢𑀺 𑀧𑀜𑁆𑀘𑀲𑀼;

𑀯𑀺𑀲𑀬𑁂𑀲𑀼 𑀧𑀦𑁂𑀢𑁂𑀲𑀼, 𑀉𑀓𑁆𑀓𑀸𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀙𑁂 𑀙𑁂𑀤𑀦𑁂. 𑀙𑀺𑀬𑀢𑀺, 𑀙𑀺𑀬𑀦𑁆𑀢𑀺. 𑀅𑀯𑀘𑁆𑀙𑀺𑀢𑀁, 𑀅𑀯𑀘𑁆𑀙𑀸𑀢𑀁. 𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁.

𑀲𑀚 𑀲𑀗𑁆𑀕𑁂. 𑀲𑀗𑁆𑀕𑁄 𑀮𑀕𑀦𑀁. 𑀲𑀚𑁆𑀚𑀢𑀺. 𑀲𑀚𑁆𑀚𑀦𑀁, 𑀲𑀚𑁆𑀚𑀺𑀢𑁄, 𑀲𑀢𑁆𑀢𑁄.

𑀬𑀼𑀚 𑀲𑀫𑀸𑀥𑀺𑀫𑁆𑀳𑀺. 𑀲𑀫𑀸𑀥𑀸𑀦𑀁 𑀲𑀫𑀸𑀥𑀺, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀫𑁆𑀫𑀸𑀧𑀬𑁄𑀕𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀬𑀼𑀚𑁆𑀚𑀢𑀺. 𑀬𑁄𑀕𑁄, 𑀬𑁄𑀕𑀻.

𑀏𑀢𑁆𑀣 𑀬𑁄𑀕𑁄𑀢𑀺 𑀯𑀻𑀭𑀺𑀬𑀁. 𑀢𑀜𑁆𑀳𑀺 𑁋

‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄’𑀳’𑀫𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼’’𑀦𑁆𑀢𑀺

𑀯𑀘𑀦𑀢𑁄 𑀅𑀯𑀲𑁆𑀲𑀁 𑀓𑀸𑀢𑀼𑀁 𑀬𑀼𑀚𑁆𑀚𑀢𑀺 𑀉𑀧𑀧𑀚𑁆𑀚𑀢𑀻𑀢𑀺 𑀬𑁄𑀕𑁄𑀢𑀺 𑀯𑀼𑀘𑁆𑀘𑀢𑀺.

𑀭𑀦𑁆𑀚 𑀭𑀸𑀕𑁂. 𑀭𑀚𑁆𑀚𑀢𑀺. 𑀯𑀺𑀭𑀚𑁆𑀚𑀢𑀺. 𑀭𑀚𑁆𑀚𑀫𑀸𑀦𑁄, 𑀭𑀚𑁆𑀚𑀁, 𑀭𑀚𑁆𑀚𑀦𑁆𑀢𑁄, 𑀭𑀸𑀕𑁄, 𑀯𑀺𑀭𑀸𑀕𑁄, 𑀭𑀚𑁆𑀚𑀦𑀁, 𑀯𑀺𑀭𑀚𑁆𑀚𑀦𑀁, 𑀭𑀚𑀦𑀻𑀬𑀁. 𑀉𑀧𑀲𑀕𑁆𑀕𑀯𑀲𑁂𑀦 𑀅𑀜𑁆𑀜𑁄 𑀅𑀢𑁆𑀣𑁄 𑀪𑀯𑀢𑀺. 𑀲𑀫𑁆𑀳𑀸 𑀭𑀝𑁆𑀞𑀸 𑀦𑀺𑀭𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀭𑀝𑁆𑀞𑀸 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀯𑀺𑀭𑀸𑀕𑁄𑀢𑀺 𑀯𑀺𑀭𑀚𑁆𑀚𑀦𑁆𑀢𑀺 𑀏𑀢𑁆𑀣 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀢𑀺 𑀯𑀺𑀭𑀸𑀕𑁄, 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑁄 𑀘.

𑀯𑀺𑀚𑀻 𑀪𑀬𑀘𑀮𑀦𑁂𑀲𑀼. 𑀯𑀺𑀚𑁆𑀚𑀢𑀺, 𑀲𑀁𑀯𑀺𑀚𑁆𑀚𑀢𑀺. 𑀲𑀁𑀯𑁂𑀕𑁄, 𑀲𑀁𑀯𑁂𑀚𑀦𑀻𑀬𑀁. 𑀉𑀩𑁆𑀩𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑁄, 𑀉𑀩𑁆𑀩𑀺𑀕𑁆𑀕𑀳𑀤𑀬𑁄.

𑀮𑀼𑀚 𑀯𑀺𑀦𑀸𑀲𑁂. 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄. 𑀮𑁄𑀧𑁄, 𑀮𑀼𑀢𑁆𑀢𑀺, 𑀮𑀼𑀚𑁆𑀚𑀦𑀁, 𑀮𑀼𑀢𑁆𑀢𑁄.

𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁. 𑀞𑀸𑀬𑀢𑀺. 𑀞𑀸𑀬𑀻, 𑀞𑀺𑀢𑀺, 𑀞𑀸𑀦𑀁, 𑀞𑀺𑀢𑁄, 𑀢𑀢𑁆𑀭𑀝𑁆𑀞𑁄, 𑀢𑀺𑀝𑁆𑀞𑀁, 𑀓𑀧𑁆𑀧𑀝𑁆𑀞𑀸𑀬𑀻, 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀻.

‘‘𑀲𑀼𑀔𑀁 𑀲𑀬𑀸𑀫𑀺 𑀞𑀸𑀬𑀸𑀫𑀺, 𑀲𑀼𑀔𑀁 𑀓𑀧𑁆𑀧𑁂𑀫𑀺 𑀚𑀻𑀯𑀺𑀢𑀁;

𑀅𑀳𑀢𑁆𑀣𑀧𑀸𑀲𑁄 𑀫𑀸𑀭𑀲𑁆𑀲, 𑀅𑀳𑁄 𑀲𑀢𑁆𑀣𑀸𑀦𑀼𑀓𑀫𑁆𑀧𑀓𑁄’’𑀢𑀺

𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀮𑀸𑀧𑀁 𑀕𑁄𑀘𑀭𑀝𑁆𑀞𑀸𑀬𑀺𑀦𑀦𑁆𑀢𑀺 𑀘. 𑀢𑀢𑁆𑀣 𑀞𑀸𑀬𑀸𑀫𑀻𑀢𑀺 𑀢𑀺𑀝𑁆𑀞𑀸𑀫𑀺.

𑀟𑀺𑀕𑀢𑀺𑀬𑀁. 𑀟𑀺𑀬𑀢𑀺. 𑀟𑁂𑀫𑀸𑀦𑁄. 𑀟𑀺𑀦𑁄 𑀯𑀸. ‘‘𑀉𑀘𑁆𑀘𑁂 𑀲𑀓𑀼𑀡 𑀟𑁂𑀫𑀸𑀦, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫. 𑀯𑀚𑁆𑀚𑁂𑀲𑀺 𑀔𑁄 𑀢𑁆𑀯𑀁 𑀯𑀸𑀫𑀽𑀭𑀼’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀁.

𑀏𑀢𑁆𑀣 𑀟𑀺𑀬𑀢𑀻𑀢𑀺 𑀟𑁂𑀫𑀸𑀦𑁄𑀢𑀺 𑀦𑀺𑀩𑁆𑀩𑀘𑀦𑀁 𑀕𑀳𑁂𑀢𑀩𑁆𑀩𑀁.

𑀢𑀸 𑀧𑀸𑀮𑀦𑁂. 𑀢𑀸𑀬𑀢𑀺. 𑀅𑀖𑀲𑁆𑀲 𑀢𑀸𑀢𑀸. 𑀲𑁄 𑀦𑀽𑀦 𑀓𑀧𑀡𑁄 𑀢𑀸𑀢𑁄, 𑀘𑀺𑀭𑀁 𑀭𑀼𑀚𑁆𑀚𑀢𑀺 𑀅𑀲𑁆𑀲𑀫𑁂. 𑀢𑀸𑀡𑀁, 𑀧𑀭𑀺𑀢𑁆𑀢𑀁, 𑀕𑁄𑀢𑁆𑀢𑀁. 𑀢𑁆𑀯𑀁 𑀔𑁄𑀲𑀺 𑀉𑀧𑀸𑀲𑀓 𑀓𑀢𑀓𑀮𑁆𑀬𑀸𑀡𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄.

𑀢𑀢𑁆𑀭 𑀧𑀭𑀺𑀢𑁆𑀢𑀦𑁆𑀢𑀺 𑀫𑀳𑀸𑀢𑁂𑀚𑀯𑀦𑁆𑀢𑀢𑀸𑀬 𑀲𑀫𑀦𑁆𑀢𑀢𑁄 𑀲𑀢𑁆𑀢𑀸𑀦𑀁 𑀪𑀬𑀁 𑀉𑀧𑀤𑁆𑀤𑀯𑀁 𑀉𑀧𑀲𑀕𑁆𑀕𑀜𑁆𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀧𑀭𑀺𑀢𑁆𑀢𑀁, 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁.

𑀦𑀢 𑀕𑀢𑁆𑀢𑀯𑀺𑀦𑀸𑀫𑁂. 𑀕𑀢𑁆𑀢𑀯𑀺𑀦𑀸𑀫𑁄 𑀕𑀢𑁆𑀢𑀯𑀺𑀓𑁆𑀔𑁂𑀧𑁄. 𑀦𑀘𑁆𑀘𑀢𑀺. 𑀦𑀘𑁆𑀘𑀁. 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄.

𑀤𑀸 𑀲𑁄𑀥𑀦𑁂. 𑀤𑀸𑀬𑀢𑀺. 𑀤𑀸𑀦𑀁. 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁. 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸. 𑀤𑀸𑀦𑀁 𑀤𑀢𑁆𑀯𑀸.

𑀤𑀸 𑀲𑀼𑀧𑀦𑁂. 𑀤𑀸𑀬𑀢𑀺. 𑀦𑀺𑀤𑁆𑀤𑀸𑀬𑀢𑀺. 𑀦𑀺𑀤𑁆𑀤𑀸𑀬𑀦𑀁, 𑀦𑀺𑀤𑁆𑀤𑀸𑀬𑀫𑀸𑀦𑁄, 𑀦𑀺𑀤𑁆𑀤𑀸𑀬𑀦𑁆𑀢𑁄.

𑀤𑀸𑀤𑀸𑀦𑁂. 𑀧𑀼𑀭𑀺𑀲𑁄 𑀤𑀸𑀦𑀁 𑀤𑀸𑀬𑀢𑀺. 𑀆𑀧𑀼𑀩𑁆𑀩𑁄 𑀕𑀳𑀡𑁂. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺. 𑀓𑀫𑁆𑀫𑁂 𑁋 𑀧𑀼𑀭𑀺𑀲𑁂𑀦 𑀤𑀸𑀦𑀁 𑀤𑀻𑀬𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀓𑀸𑀭𑀺𑀢𑁂 𑁋 𑀆𑀤𑀧𑁂𑀢𑀺, 𑀲𑀫𑀸𑀤𑀧𑁂𑀢𑀺, 𑀆𑀤𑀧𑀬𑀢𑀺, 𑀲𑀫𑀸𑀤𑀧𑀬𑀢𑀺, 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄.

𑀤𑀸 𑀅𑀯𑀔𑀡𑁆𑀟𑀦𑁂. 𑀤𑀺𑀬𑀢𑀺, 𑀤𑀺𑀬𑀦𑁆𑀢𑀺. 𑀧𑀭𑀺𑀢𑁆𑀢𑀁.

𑀏𑀢𑁆𑀣 𑀘 𑀧𑀭𑀺𑀢𑁆𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀧𑀭𑀺𑀢𑁆𑀢𑀁. 𑀅𑀧𑁆𑀧𑀫𑀢𑁆𑀢𑀓𑀜𑁆𑀳𑀺 𑀕𑁄𑀫𑀬𑀧𑀺𑀡𑁆𑀟𑀁 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀓𑀲𑁆𑀲 𑀦𑀸𑀫𑀁 𑀓𑀸𑀫𑀸𑀯𑀘𑀭𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀧𑁆𑀧𑁂𑀲𑀓𑁆𑀔𑀢𑁆𑀢𑀸.

𑀤𑀸 𑀲𑀼𑀤𑁆𑀥𑀺𑀬𑀁. 𑀤𑀸𑀬𑀢𑀺. 𑀯𑁄𑀤𑀸𑀬𑀢𑀺. 𑀯𑁄𑀤𑀸𑀦𑀁. 𑀅𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. 𑀢𑀣𑀸 𑀳𑀺 ‘‘𑀯𑁄𑀤𑀸𑀬𑀢𑀺 𑀲𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑁄𑀤𑀸𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸’’𑀢𑀺 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁.

𑀤𑀻 𑀔𑀬𑁂. 𑀤𑀻𑀬𑀢𑁂. 𑀤𑀻𑀦𑁄, 𑀆𑀤𑀻𑀦𑀯𑁄.

𑀢𑀢𑁆𑀭 𑀤𑀻𑀦𑁄𑀢𑀺 𑀧𑀭𑀺𑀓𑁆𑀔𑀻𑀡𑀜𑀸𑀢𑀺𑀥𑀦𑀸𑀤𑀺𑀪𑀸𑀯𑁂𑀦 𑀤𑀼𑀓𑁆𑀔𑀺𑀢𑁄. 𑀆𑀤𑀻𑀦𑀯𑁄𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀁 𑀯𑀸𑀢𑀺 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺𑀆𑀤𑀻𑀦𑀯𑁄, 𑀤𑁄𑀲𑁄.

𑀤𑀼 𑀧𑀭𑀺𑀢𑀸𑀧𑁂. 𑀤𑀼𑀬𑀢𑁂. 𑀤𑀼𑀦𑁄, 𑀤𑀽𑀢𑁄.

𑀪𑀺𑀤𑀺 𑀪𑀺𑀚𑁆𑀚𑀦𑁂. 𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀚𑁆𑀚𑀢𑀺. 𑀪𑀺𑀚𑁆𑀚𑀢𑀻𑀢𑀺 𑀪𑀺𑀦𑁆𑀦𑁄. 𑀪𑀺𑀚𑁆𑀚𑀦𑀁 𑀪𑁂𑀤𑁄.

𑀙𑀺𑀤𑀺 𑀙𑀺𑀚𑁆𑀚𑀦𑁂. 𑀲𑀼𑀢𑁆𑀢𑀁 𑀙𑀺𑀚𑁆𑀚𑀢𑀺. 𑀙𑀺𑀚𑁆𑀚𑀢𑀻𑀢𑀺 𑀙𑀺𑀦𑁆𑀦𑁄. 𑀏𑀯𑀁 𑀙𑀺𑀤𑁆𑀤𑀁. 𑀙𑀺𑀚𑁆𑀚𑀦𑀁 𑀙𑁂𑀤𑁄.

𑀔𑀺𑀤𑀺 𑀤𑀻𑀦𑀺𑀬𑁂. 𑀤𑀻𑀦𑀪𑀸𑀯𑁄 𑀤𑀻𑀦𑀺𑀬𑀁, 𑀬𑀣𑀸 𑀤𑀓𑁆𑀔𑀺𑀬𑀁. 𑀔𑀺𑀚𑁆𑀚𑀢𑀺, 𑀔𑀺𑀦𑁆𑀦𑁄, 𑀅𑀔𑀺𑀦𑁆𑀦𑀫𑀢𑀺, 𑀔𑁂𑀤𑁄, 𑀔𑁂𑀤𑀗𑁆𑀕𑀢𑁄 𑀮𑁄𑀓𑀳𑀺𑀢𑀸𑀬 𑀦𑀸𑀣𑁄.

𑀏𑀢𑁆𑀣 𑀔𑁂𑀤𑀗𑁆𑀕𑀢𑁄𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀧𑀭𑀺𑀲𑁆𑀲𑀫𑀁 𑀧𑀢𑁆𑀢𑁄, 𑀤𑀼𑀓𑁆𑀔𑀫𑀦𑀼𑀪𑀯𑀻𑀢𑀺 𑀅𑀢𑁆𑀣𑁄.

𑀧𑀤 𑀕𑀢𑀺𑀬𑀁. 𑀧𑀚𑁆𑀚𑀢𑀺. 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺. 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀅𑀓𑀫𑁆𑀫𑀓𑀫𑁆𑀧𑀺 𑀪𑀯𑀢𑀺, 𑀢𑁂𑀲𑀁 𑀅𑀥𑀫𑁆𑀫𑁄 𑀆𑀧𑀚𑁆𑀚𑀢𑀺, 𑀧𑀚𑁆𑀚𑁄, 𑀩𑁆𑀬𑀕𑁆𑀖𑀧𑀚𑁆𑀚𑁄, 𑀲𑀫𑁆𑀧𑀤𑀸𑀬𑁄.

𑀏𑀢𑁆𑀣 𑀘 𑀧𑀚𑁆𑀚𑁄𑀢𑀺 𑀫𑀕𑁆𑀕𑁄. 𑀩𑁆𑀬𑀕𑁆𑀖𑀧𑀚𑁆𑀚𑁂 𑀲𑀤𑁆𑀤𑀼𑀮𑀧𑀣𑁂 𑀚𑀸𑀢𑁄𑀢𑀺 𑀩𑁆𑀬𑀕𑁆𑀖𑀧𑀚𑁆𑀚𑁄, 𑀏𑀯𑀁𑀦𑀸𑀫𑀓𑁄 𑀓𑀼𑀮𑀧𑀼𑀢𑁆𑀢𑁄. 𑀲𑀫𑁆𑀧𑀤𑀺𑀬𑀢𑀺 𑀜𑀸𑀧𑀺𑀬𑀢𑀺 𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀲𑀫𑁆𑀧𑀤𑀸𑀬𑁄, 𑀅𑀓𑁆𑀔𑀸𑀢𑀸.

𑀯𑀺𑀤 𑀲𑀢𑁆𑀢𑀸𑀬𑀁. 𑀲𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑁄. 𑀯𑀺𑀚𑁆𑀚𑀢𑀺, 𑀲𑀁𑀯𑀺𑀚𑁆𑀚𑀢𑀺. 𑀚𑀸𑀢𑀯𑁂𑀤𑁄, 𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀸, 𑀯𑀺𑀤𑀺𑀢𑁄.

𑀢𑀢𑁆𑀣 𑀚𑀸𑀢𑀯𑁂𑀤𑁄𑀢𑀺 𑀅𑀕𑁆𑀕𑀺. 𑀲𑁄 𑀳𑀺 𑀚𑀸𑀢𑁄𑀯 𑀯𑁂𑀤𑀬𑀢𑀺 𑀥𑀽𑀫𑀚𑀸𑀮𑀼𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀚𑀸𑀢𑀯𑁂𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀚𑁆𑀚𑀸𑀢𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀯𑀺𑀚𑁆𑀚𑀸, 𑀜𑀸𑀡𑀁. 𑀅𑀯𑀺𑀚𑁆𑀚𑀸𑀢𑀺 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀫𑁄𑀳𑁄.

𑀫𑀤 𑀉𑀫𑁆𑀫𑀸𑀤𑁂. 𑀉𑀫𑁆𑀫𑀸𑀤𑁄 𑀦𑀸𑀫 𑀫𑀼𑀬𑁆𑀳 𑀦𑀁 𑀯𑀸 𑀲𑀢𑀺𑀯𑀺𑀧𑁆𑀧𑀯𑀸𑀲𑁄 𑀯𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀯𑀸. 𑀫𑀚𑁆𑀚𑀢𑀺, 𑀧𑀫𑀚𑁆𑀚𑀢𑀺. 𑀫𑀢𑁆𑀢𑁄, 𑀲𑀼𑀭𑀸𑀫𑀤𑀫𑀢𑁆𑀢𑁄. 𑀫𑀢𑁆𑀢𑁄 𑀅𑀳𑀁 𑀫𑀳𑀸𑀭𑀸𑀚. 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀬𑀺𑀁. 𑀫𑀢𑁆𑀢𑀳𑀢𑁆𑀣𑀻, 𑀧𑀫𑀢𑁆𑀢𑁄, 𑀉𑀫𑁆𑀫𑀢𑁆𑀢𑁄.

𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀺𑀬𑁆𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸.

𑀫𑀺𑀤 𑀲𑀺𑀦𑁂𑀳𑀦𑁂. 𑀫𑁂𑀚𑁆𑀚𑀢𑀺. 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀺, 𑀫𑀺𑀢𑁆𑀢𑀁, 𑀫𑀺𑀢𑁆𑀢𑁄.

𑀅𑀦𑁆𑀢𑀭𑀥𑀸 𑀅𑀤𑀲𑁆𑀲𑀦𑁂. 𑀅𑀦𑁆𑀢𑀭𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀢𑁆𑀣𑀼𑀦𑁄 𑀅𑀤𑀲𑁆𑀲𑀦𑁂 𑀯𑀢𑁆𑀢𑀢𑀺. 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀦𑁆𑀢𑀭𑀥𑀸𑀦𑀁, 𑀅𑀦𑁆𑀢𑀭𑀥𑀸𑀬𑀦𑁆𑀢𑁄. 𑀲𑀸 𑀤𑁂𑀯𑀢𑀸 𑀅𑀦𑁆𑀢𑀭𑀳𑀺𑀢𑀸. 𑀅𑀦𑁆𑀢𑀭𑀸𑀧𑀺𑀥𑀸𑀬𑀢𑀺.

𑀩𑀼𑀥 𑀅𑀯𑀕𑀫𑀦𑁂. 𑀅𑀯𑀕𑀫𑀦𑀁 𑀚𑀸𑀦𑀦𑀁. 𑀩𑀼𑀚𑁆𑀛𑀢𑀺, 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀺, 𑀩𑀼𑀤𑁆𑀥𑀁, 𑀩𑁄𑀥𑁄, 𑀩𑁄𑀥𑀺. 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀺. 𑀲𑀓𑀮𑀁 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀯𑀸, 𑀯𑀺𑀩𑁄𑀥𑁂𑀢𑀺, 𑀩𑁄𑀥𑁂𑀢𑀸, 𑀩𑀼𑀤𑁆𑀥𑁄, 𑀯𑀺𑀩𑀼𑀤𑁆𑀥𑁄 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀭 𑀩𑀼𑀤𑁆𑀥𑁄𑀢𑀺 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄. 𑀅𑀣 𑀯𑀸 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀅𑀩𑀼𑀚𑁆𑀛𑀻𑀢𑀺 𑀩𑀼𑀤𑁆𑀥𑁄. 𑀓𑁂𑀘𑀺 𑀧𑀦 𑀓𑀫𑁆𑀫𑁂𑀦𑀧𑀺 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀁 𑀇𑀘𑁆𑀙𑀦𑁆𑀢𑀸 𑀏𑀯𑀁 𑀦𑀺𑀩𑁆𑀩𑀘𑀦𑀁 𑀓𑀭𑁄𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸𑀢𑀺 𑀅𑀥𑀺𑀕𑀢𑀕𑀼𑀡𑀯𑀺𑀲𑁂𑀲𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀩𑀼𑀚𑁆𑀛𑀺𑀢𑀩𑁆𑀩𑁄𑀢𑀺 𑀩𑀼𑀤𑁆𑀥𑁄’’𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄. 𑀩𑀼𑀤𑁆𑀥𑀻𑀢𑀺 𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑀺. 𑀏𑀯𑀁 𑀩𑀼𑀤𑁆𑀥𑀁 𑀩𑁄𑀥𑁄 𑀩𑁄𑀥𑀺 𑀘. 𑀅𑀣 𑀯𑀸 𑀩𑀼𑀚𑁆𑀛𑀦𑀁 𑀩𑀼𑀤𑁆𑀥𑀺. 𑀏𑀯𑀁 𑀩𑁄𑀥𑁄 𑀩𑁄𑀥𑀺 𑀘, 𑀲𑀩𑁆𑀩𑀫𑁂𑀢𑀁 𑀧𑀜𑁆𑀜𑀸𑀬𑀸𑀥𑀺𑀯𑀘𑀦𑀁.

𑀇𑀤𑀸𑀦𑀺 𑀩𑁄𑀥𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫. 𑀩𑁄𑀥𑀻𑀢𑀺 𑀳𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀏𑀯𑀁𑀧𑀡𑁆𑀡𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄𑀧𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀳𑀺 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘, ‘‘𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀦𑁆𑀢𑀭𑀸 𑀘 𑀕𑀬’’𑀦𑁆𑀢𑀺 𑀘 𑀆𑀕𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺 𑀲𑀼𑀫𑁂𑀥𑀲𑁄’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. ‘‘𑀩𑁄𑀥𑀺 𑀪𑀦𑁆𑀢𑁂 𑀭𑀸𑀚𑀓𑀼𑀫𑀸𑀭𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺 ‘‘𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀘 𑀆𑀕𑀢𑀝𑁆𑀞𑀸𑀦𑁂 𑀏𑀯𑀁𑀧𑀡𑁆𑀡𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄.

𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀭𑀼𑀓𑁆𑀔𑁂 𑀫𑀕𑁆𑀕𑁂 𑀘 𑀦𑀺𑀩𑁆𑀩𑀸𑀦𑁂, 𑀜𑀸𑀡𑁂 𑀲𑀩𑁆𑀩𑀜𑁆𑀜𑀼𑀢𑀸𑀬 𑀘;

𑀢𑀣𑀸 𑀧𑀡𑁆𑀡𑀢𑁆𑀢𑀺𑀬𑀜𑁆𑀘𑁂𑀯, 𑀩𑁄𑀥𑀺𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀩𑀼𑀚𑁆𑀛𑀢𑀻𑀢𑀺 𑀩𑀼𑀚𑁆𑀛𑀺𑀢𑀸, 𑀩𑁄𑀥𑁂𑀢𑀻𑀢𑀺 𑀩𑁄𑀥𑁂𑀢𑀸.

𑀏𑀢𑁆𑀣 𑀘 𑀓𑁄𑀘𑀺 𑀧𑀬𑁄𑀕𑁄 𑀢𑀼𑀫𑀦𑁆𑀢𑀸𑀤𑀻𑀦𑀺 𑀘 𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋 ‘‘𑀕𑀼𑀬𑁆𑀳𑀫𑀢𑁆𑀣𑀫𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑁄𑀥𑀬𑀢𑀺 𑀬𑁄 𑀦𑀭𑁄. 𑀧𑀭𑀁 𑀲𑀫𑁆𑀩𑀼𑀤𑁆𑀥𑀼𑀫𑀭𑀳𑀢𑀺. 𑀩𑀼𑀚𑁆𑀛𑀺𑀢𑀼𑀁, 𑀩𑀼𑀤𑁆𑀥𑀼𑀁, 𑀩𑀼𑀚𑁆𑀛𑀺𑀢𑁆𑀯𑀸, 𑀩𑀼𑀚𑁆𑀛𑀺𑀢𑁆𑀯𑀸𑀦, 𑀩𑀼𑀚𑁆𑀛𑀺𑀢𑀼𑀦, 𑀩𑀼𑀤𑁆𑀥𑀺𑀬, 𑀩𑀼𑀤𑁆𑀥𑀺𑀬𑀸𑀦, 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦’’ 𑀇𑀢𑀺 𑀪𑀯𑀦𑁆𑀢𑀺.

𑀢𑀢𑁆𑀭 𑀅𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀧𑀭𑁂𑀳𑀺 𑀅𑀜𑁆𑀜𑀸𑀢𑀁, ‘‘𑀅𑀲𑀫𑁆𑀩𑁄𑀥’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀭𑁂𑀲𑀁 𑀩𑁄𑀥𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀼𑀤𑁆𑀥𑀼𑀦𑁆𑀢𑀺 𑀲𑀁𑀩𑀼𑀚𑁆𑀛𑀺𑀢𑀼𑀁. 𑀩𑀼𑀤𑁆𑀥𑀸𑀢𑀺 𑀩𑀼𑀚𑁆𑀛𑀺𑀢𑁆𑀯𑀸, 𑀏𑀯𑀁 𑀩𑀼𑀤𑁆𑀥𑀸𑀦𑀸𑀢𑀺 𑀏𑀢𑁆𑀣𑀸𑀧𑀺.

𑀓𑁂𑀘𑀺 𑀧𑀦 ‘‘𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 ‘𑀩𑁄𑀥𑀺𑀫𑀕𑁆𑀕𑁂𑀦 𑀩𑀼𑀥𑁆𑀯𑀸’𑀢𑀺 𑀘, ‘‘𑀩𑀼𑀥𑁆𑀯𑀸 𑀩𑁄𑀥𑀺𑀢𑀮𑁂 𑀬𑀫𑀸𑀳 𑀲𑀼𑀕𑀢𑁄’𑀢𑀺 𑀘 𑀥𑀓𑀸𑀭𑀯𑀓𑀸𑀭𑀲𑀜𑁆𑀜𑁄𑀕𑀯𑀢𑁄 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀢𑁄 𑀘 𑀥𑀓𑀸𑀭𑀯𑀓𑀸𑀭𑀲𑀁𑀬𑁄𑀕𑀯𑀲𑁂𑀦 ‘‘𑀩𑀼𑀥𑁆𑀯𑀸’’𑀢𑀺 𑀧𑀤𑀲𑀺𑀤𑁆𑀥𑀺 𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑀸𑀤𑀺𑀲𑀲𑁆𑀲 𑀧𑀤𑀭𑀽𑀧𑀲𑁆𑀲 𑀩𑀼𑀤𑁆𑀥𑀯𑀘𑀦𑁂 𑀅𑀤𑀲𑁆𑀲𑀦𑀢𑁄 𑀘, 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀦𑀼𑀓𑀽𑀮𑀢𑀸𑀬 𑀘, 𑀧𑀭𑀺𑀲𑀼𑀤𑁆𑀥𑁂 𑀘 𑀧𑁄𑀭𑀸𑀡𑀧𑁄𑀢𑁆𑀣𑀓𑁂 𑀯𑀓𑀸𑀭𑀲𑀁𑀬𑁄𑀕𑀯𑀺𑀕𑀢𑀲𑁆𑀲 ‘‘𑀩𑁄𑀥𑀺𑀫𑀕𑁆𑀕𑁂𑀦 𑀩𑀼𑀤𑁆𑀥𑀸’’𑀢𑀺𑀘, ‘‘𑀩𑀼𑀤𑁆𑀥𑀸 𑀩𑁄𑀥𑀺𑀢𑀮𑁂’’𑀢𑀺 𑀘 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀦 𑀢𑀸𑀤𑀺𑀲𑁄 𑀧𑀸𑀞𑁄 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀼𑀓𑀽𑀮𑁄 𑀳𑁄𑀢𑀻𑀢𑀺. 𑀦 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀬𑁂𑀲𑀦𑁆𑀢𑀸 𑀢𑀸𑀤𑀺𑀲𑀁 𑀯𑀓𑀸𑀭𑀥𑀓𑀸𑀭𑀲𑀜𑁆𑀜𑁄𑀕𑀧𑀤𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀏𑀯𑀁 ‘‘𑀩𑀼𑀥𑁆𑀯𑀸’’𑀢𑀺 𑀧𑀤𑀭𑀽𑀧𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀦𑀼𑀓𑀽𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀜𑁆𑀳𑀺 𑀲𑀓𑁆𑀓𑀝𑀕𑀦𑁆𑀣𑁂 𑀓𑀢𑀧𑀭𑀺𑀘𑀬𑀪𑀸𑀯𑁂𑀦 𑀯𑀜𑁆𑀘𑀺𑀢𑁂𑀳𑀺 𑀯𑀺𑀤𑀽𑀳𑀺 𑀇𑀘𑁆𑀙𑀺𑀢𑀁, 𑀦 𑀲𑀤𑁆𑀥𑀫𑁆𑀫𑀦𑀻𑀢𑀺𑀯𑀺𑀤𑀽𑀳𑀺. 𑀏𑀢𑁆𑀣 𑀇𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋

𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀢𑀺. 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺. 𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁, 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂.

𑀉𑀫𑁆𑀫𑀸𑀤𑀦𑁆𑀢𑀺𑀫𑀳𑀁 𑀤𑀺𑀝𑁆𑀞𑀸, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀁;

𑀦 𑀲𑀼𑀧𑀸𑀫𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀳𑀲𑁆𑀲𑀁𑀯 𑀧𑀭𑀸𑀚𑀺𑀢𑁄’’𑀢𑀺;

𑀢𑀢𑁆𑀣 𑀯𑀺𑀤𑁆𑀥𑀸𑀢𑀺 𑀯𑀺𑀚𑁆𑀛𑀺𑀢𑁆𑀯𑀸. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀮𑀤𑁆𑀥𑀸𑀦𑀸𑀢𑀺 𑀮𑀪𑀺𑀢𑁆𑀯𑀸𑀦. 𑀤𑀺𑀝𑁆𑀞𑀸𑀢𑀺 𑀤𑀺𑀲𑁆𑀯𑀸. 𑀇𑀢𑀺 ‘‘𑀯𑀺𑀤𑁆𑀥𑀸 𑀮𑀤𑁆𑀥𑀸 𑀮𑀤𑁆𑀥𑀸𑀦 𑀤𑀺𑀝𑁆𑀞𑀸’’𑀢𑀺 𑀧𑀤𑀸𑀦𑀺 𑀢𑁆𑀯𑀸𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀕𑀢𑀸𑀦𑀺𑀧𑀺 𑀲𑀜𑁆𑀜𑁄𑀕𑀯𑀲𑁂𑀦 𑀯𑀓𑀸𑀭𑀧𑀝𑀺𑀩𑀤𑁆𑀥𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦’’ 𑀇𑀘𑁆𑀘𑁂𑀢𑀸𑀦𑀺𑀧𑀺 ‘‘𑀮𑀤𑁆𑀥𑀸 𑀮𑀤𑁆𑀥𑀸𑀦’’ 𑀇𑀘𑁆𑀘𑀸𑀤𑀻𑀦𑀺 𑀯𑀺𑀬 𑀧𑀭𑀺𑀳𑀻𑀦𑀯𑀓𑀸𑀭𑀲𑀜𑁆𑀜𑁄𑀕𑀸𑀦𑀺 𑀏𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀬𑁂 ‘‘𑀩𑀼𑀥𑁆𑀯𑀸’’𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺 𑀧𑀞𑀦𑁆𑀢𑀺 𑀘, 𑀫𑀜𑁆𑀜𑁂 𑀢𑁂 𑀢𑁆𑀯𑀸𑀧𑀘𑁆𑀘𑀬𑁄 𑀯𑀜𑁆𑀘𑁂𑀢𑀺, 𑀢𑁂𑀦 𑀢𑁂 𑀯𑀜𑁆𑀘𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑁄 𑀲𑀤𑁆𑀤𑀦𑀻𑀢𑀺𑀬𑀁 𑀲𑀤𑁆𑀤𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀲𑁄𑀬𑁂𑀯 𑀆𑀬𑀲𑁆𑀫𑀦𑁆𑀢𑁂𑀳𑀺 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄.

𑀩𑀼𑀥 𑀩𑁄𑀥𑀦𑁂. 𑀲𑀓𑀫𑁆𑀫𑀓𑀸𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. 𑀢𑀣𑀸 𑀳𑀺 𑀩𑁄𑀥𑀦𑀲𑀤𑁆𑀤𑀼𑀘𑁆𑀘𑀸𑀭𑀡𑁂𑀦 𑀚𑀸𑀦𑀦𑀁 𑀯𑀺𑀓𑀲𑀦𑀁 𑀦𑀺𑀤𑁆𑀤𑀓𑁆𑀔𑀬𑁄 𑀘 𑀕𑀳𑀺𑀢𑁄, 𑀢𑀲𑁆𑀫𑀸 ‘‘𑀩𑀼𑀥 𑀜𑀸𑀡𑁂, 𑀩𑀼𑀥 𑀯𑀺𑀓𑀲𑀦𑁂, 𑀩𑀼𑀥 𑀦𑀺𑀤𑁆𑀤𑀓𑁆𑀔𑀬𑁂’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀼𑀚𑁆𑀛𑀢𑀺 𑀪𑀕𑀯𑀸, 𑀥𑀫𑁆𑀫𑁂 𑀩𑀼𑀚𑁆𑀛𑀢𑀺, 𑀧𑀩𑀼𑀚𑁆𑀛𑀢𑀺, 𑀧𑀤𑀼𑀫𑀁 𑀩𑀼𑀚𑁆𑀛𑀢𑀺. 𑀧𑀼𑀭𑀺𑀲𑁄 𑀩𑀼𑀤𑁆𑀥𑁄, 𑀧𑀩𑀼𑀤𑁆𑀥𑁄, 𑀩𑁄𑀥𑀢𑀺, 𑀧𑀩𑁄𑀥𑀢𑀺 𑀇𑀘𑁆𑀘𑀸𑀤𑀻𑀦𑀺.

𑀲𑀁𑀥𑀸 𑀲𑀦𑁆𑀥𑀺𑀫𑁆𑀳𑀺. 𑀲𑀁𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀲𑀦𑁆𑀥𑀺𑀫𑁆𑀳𑀺 𑀯𑀢𑁆𑀢𑀢𑀺. 𑀦𑁂𑀯𑀲𑁆𑀲 𑀫𑀤𑁆𑀤𑀻 𑀪𑀸𑀓𑀼𑀝𑀺, 𑀦 𑀲𑀦𑁆𑀥𑀺𑀬𑀢𑀺 𑀦 𑀭𑁄𑀤𑀢𑀺. 𑀦 𑀲𑀦𑁆𑀥𑀺𑀬𑀢𑀻𑀢𑀺 𑀇𑀤𑀁 𑀅𑀜𑁆𑀜𑁂𑀳𑀺 𑀧𑀓𑀭𑀡𑁂𑀳𑀺 𑀅𑀲𑀸𑀥𑀸𑀭𑀡𑀁 𑀤𑀺𑀯𑀸𑀤𑀺𑀭𑀽𑀧𑀁.

𑀥𑀦𑀼 𑀬𑀸𑀘𑀦𑁂. 𑀫𑀸𑀢𑀸 𑀳𑀺 𑀢𑀯 𑀇𑀭𑀦𑁆𑀥𑀢𑀺, 𑀯𑀺𑀥𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑁆𑀬𑀢𑀺. 𑀇𑀤𑀫𑁆𑀧𑀺 𑀅𑀲𑀸𑀥𑀸𑀭𑀡𑀁 𑀤𑀺𑀯𑀸𑀤𑀺𑀭𑀽𑀧𑀁.

𑀥𑀻 𑀅𑀦𑀸𑀤𑀭𑁂. 𑀥𑀻𑀬𑀢𑁂. 𑀥𑀻𑀦𑁄.

𑀬𑀼𑀥 𑀲𑀫𑁆𑀧𑀳𑀸𑀭𑁂. 𑀬𑀼𑀚𑁆𑀛𑀢𑀺. 𑀬𑁄𑀥𑁄, 𑀬𑀼𑀤𑁆𑀥𑀁, 𑀘𑀭𑀡𑀸𑀬𑀼𑀥𑁄, 𑀬𑀓𑀸𑀭𑀲𑁆𑀲 𑀯𑀓𑀸𑀭𑀪𑀸𑀯𑁂 ‘‘𑀆𑀯𑀼𑀥’’𑀦𑁆𑀢𑀺 𑀭𑀽𑀧𑀁. 𑀢𑀢𑁆𑀭 𑀘𑀭𑀡𑀸𑀬𑀼𑀥𑁄𑀢𑀺 𑀓𑀼𑀓𑁆𑀓𑀼𑀝𑁄.

𑀓𑀼𑀥 𑀓𑁄𑀧𑁂. 𑀓𑀼𑀚𑁆𑀛𑀢𑀺. 𑀓𑁄𑀥𑁄, 𑀓𑀼𑀚𑁆𑀛𑀦𑀸, 𑀓𑀼𑀚𑁆𑀛𑀺𑀢𑀢𑁆𑀢𑀁. 𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺.

𑀲𑀼𑀥 𑀲𑁄𑀘𑁂𑀬𑁆𑀬𑁂. 𑀲𑁄𑀘𑁂𑀬𑁆𑀬𑀁 𑀲𑀼𑀘𑀺𑀪𑀸𑀯𑁄. 𑀲𑀼𑀚𑁆𑀛𑀢𑀺. 𑀲𑀼𑀤𑁆𑀥𑀺, 𑀯𑀺𑀲𑀼𑀤𑁆𑀥𑀺, 𑀲𑀼𑀚𑁆𑀛𑀦𑀁, 𑀲𑀼𑀤𑁆𑀥𑁄, 𑀯𑀺𑀲𑀼𑀤𑁆𑀥𑁄, 𑀧𑀭𑀺𑀲𑀼𑀤𑁆𑀥𑁄. 𑀓𑀸𑀭𑀺𑀢𑁂 ‘‘𑀲𑁄𑀥𑁂𑀢𑀺, 𑀲𑁄𑀥𑀓𑁄’’ 𑀇𑀘𑁆𑀘𑀸𑀤𑀻𑀦𑀺.

𑀲𑀺𑀥𑀼 𑀲𑀁𑀭𑀸𑀥𑀦𑁂. 𑀲𑀺𑀚𑁆𑀛𑀢𑀺. 𑀲𑀺𑀤𑁆𑀥𑀺.

𑀭𑀥 𑀳𑀺𑀁𑀲𑀸𑀬𑀁. 𑀭𑀚𑁆𑀛𑀢𑀺, 𑀯𑀺𑀭𑀚𑁆𑀛𑀢𑀺, 𑀅𑀧𑀭𑀚𑁆𑀛𑀢𑀺. 𑀅𑀧𑀭𑀸𑀥𑁄.

𑀭𑀸𑀥 𑀲𑀸𑀥 𑀲𑀁𑀲𑀺𑀤𑁆𑀥𑀺𑀬𑀁. 𑀭𑀸𑀥𑀬𑀢𑀺, 𑀲𑀸𑀥𑀬𑀢𑀺. 𑀆𑀭𑀸𑀥𑀦𑀁, 𑀲𑀸𑀥𑀦𑀁. 𑀲𑀧𑀭𑀳𑀺𑀢𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲𑁄. 𑀅𑀘𑁆𑀘𑀦𑁆𑀢𑀁 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀲𑀸𑀥𑀼, 𑀮𑀤𑁆𑀥𑀓𑀁 𑀲𑀼𑀦𑁆𑀤𑀭𑀁 𑀤𑀸𑀦𑀲𑀻𑀮𑀸𑀤𑀺.

𑀯𑀺𑀥 𑀯𑀺𑀚𑁆𑀛𑀦𑁂. 𑀯𑀺𑀚𑁆𑀛𑀢𑀺. 𑀧𑀝𑀺𑀯𑀺𑀚𑁆𑀛𑀢𑀺. 𑀔𑀡 𑀯𑀺𑀤𑁆𑀥, 𑀯𑀺𑀥𑀼, 𑀯𑀺𑀚𑁆𑀛𑀦𑀓𑁄, 𑀯𑀺𑀤𑁆𑀥𑁄, 𑀧𑀝𑀺𑀯𑀺𑀤𑁆𑀥𑁄, 𑀯𑀺𑀚𑁆𑀛𑀦𑀁, 𑀯𑁂𑀥𑁄, 𑀧𑀝𑀺𑀯𑁂𑀥𑁄, 𑀯𑀺𑀚𑁆𑀛𑀺𑀢𑁆𑀯𑀸, 𑀯𑀺𑀤𑁆𑀥𑀸, 𑀯𑀺𑀤𑁆𑀥𑀸𑀦. 𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀢𑀺.

𑀇𑀥 𑀯𑀼𑀤𑁆𑀥𑀺𑀬𑀁. 𑀇𑀚𑁆𑀛𑀢𑀺, 𑀲𑀫𑀺𑀚𑁆𑀛𑀢𑀺. 𑀇𑀤𑁆𑀥𑀺, 𑀇𑀚𑁆𑀛𑀦𑀁, 𑀲𑀫𑀺𑀚𑁆𑀛𑀦𑀁, 𑀇𑀤𑁆𑀥𑁄. 𑀢𑀢𑁆𑀣 𑀇𑀤𑁆𑀥𑀻𑀢𑀺 𑀇𑀚𑁆𑀛𑀦𑀁 𑀇𑀤𑁆𑀥𑀺. 𑀇𑀚𑁆𑀛𑀦𑁆𑀢𑀺 𑀯𑀸 𑀲𑀢𑁆𑀢𑀸 𑀏𑀢𑀸𑀬 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺.

𑀕𑀺𑀥𑀼 𑀅𑀪𑀺𑀓𑀗𑁆𑀔𑀸𑀬𑀁. 𑀕𑀺𑀚𑁆𑀛𑀢𑀺, 𑀕𑀺𑀚𑁆𑀛𑁄. 𑀕𑀤𑁆𑀥𑁄. 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄. 𑀓𑀸𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀲𑀺. 𑀕𑁂𑀥𑁄.