𑁫,𑁧𑁬. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀡𑀸𑀧𑀺 𑀘

𑀓𑀢𑁆𑀢𑀸𑀭𑀁 𑀬𑁄 𑀧𑀬𑁄𑀚𑁂𑀢𑀺, 𑀢𑀲𑁆𑀲 𑀩𑁆𑀬𑀸𑀧𑀸𑀭𑁂 𑀓𑁆𑀭𑀺𑀬𑀢𑁆𑀣𑀸 𑀡𑀺+𑀡𑀸𑀧𑀻 𑀳𑁄𑀦𑁆𑀢𑀺 𑀩𑀳𑀼𑀮𑀁.

𑀡𑀺𑀧𑀘𑁆𑀘𑀬𑁄 𑀉𑀯𑀡𑁆𑀡𑀦𑁆𑀢𑀸, 𑀆𑀢𑁄 𑀡𑀸𑀧𑁂𑀯 𑀳𑁄𑀢𑀺+𑀳;

𑀤𑁆𑀯𑁂 𑀤𑁆𑀯𑁂+𑀓𑁄 𑀳𑁄𑀢𑀺 𑀯𑀸 𑀲𑁂𑀲𑁂, 𑀩𑀳𑀼𑀮𑀁𑀢𑁆𑀬𑀦𑀼𑀯𑀼𑀢𑁆𑀢𑀺𑀬𑀸.

𑀅𑀓𑀫𑁆𑀫𑀓𑀸𑀧𑀺 𑀳𑁄𑀦𑁆𑀢𑁂𑀯, 𑀡𑀺+𑀡𑀸𑀧𑁆𑀬𑀦𑁆𑀢𑀸 𑀲𑀓𑀫𑁆𑀫𑀓𑀸;

𑀲𑀓𑀫𑁆𑀫𑀓𑀸 𑀤𑁆𑀯𑀺𑀓𑀫𑁆𑀫𑀸+𑀲𑁆𑀲𑀼, 𑀤𑁆𑀯𑀺𑀓𑀫𑁆𑀫𑀸 𑀘 𑀢𑀺𑀓𑀫𑁆𑀫𑀓𑀸.

𑀢𑀲𑁆𑀫𑀸 𑀓𑀢𑁆𑀢𑀭𑀺 𑀓𑀫𑁆𑀫𑁂 𑀘, 𑀡𑀺+𑀡𑀸𑀧𑀻𑀦𑀁 𑀢𑀼 𑀲𑀫𑁆𑀪𑀯𑁄;

𑀦 𑀪𑀸𑀯𑁂 𑀲𑀼𑀤𑁆𑀥𑀓𑀢𑁆𑀢𑀸 𑀢𑀼, 𑀓𑀫𑁆𑀫𑀁 𑀳𑁄𑀢𑀺 𑀧𑀬𑁄𑀚𑀓𑁂.

𑀦𑀬𑀸𑀤𑀻𑀦𑀁 𑀧𑀥𑀸𑀦𑀜𑁆𑀘, 𑀅𑀧𑀥𑀸𑀦𑀁 𑀤𑀼𑀳𑀸𑀤𑀺𑀦𑀁;

𑀲𑀼𑀤𑁆𑀥𑀓𑀢𑁆𑀢𑀸 𑀡𑀺+𑀡𑀸𑀧𑀻𑀲𑀼, 𑀓𑀫𑁆𑀫+𑀫𑀓𑁆𑀔𑁆𑀬𑀸𑀢 𑀕𑁄𑀘𑀭𑀁.

𑀪𑀯𑀺𑀢𑀼𑀁 𑀧𑀬𑁄𑀚𑀬𑀢𑀻𑀢𑀺 𑀅𑀢𑁆𑀣𑁂 𑀇𑀫𑀺𑀦𑀸 𑀡𑀺𑀧𑁆𑀧𑀘𑁆𑀘𑀬𑁄. 𑀡𑀓𑀸𑀭𑁄 𑀡𑀸𑀦𑀼𑀩𑀦𑁆𑀥𑀓𑀸𑀭𑀺𑀬𑀢𑁆𑀣𑁄. ‘‘𑀬𑀼𑀯𑀡𑁆𑀡𑀸𑀦+𑀫𑁂+𑀑 𑀧𑀘𑁆𑀘𑀬𑁂’’𑀢𑀺 𑀑𑀓𑀸𑀭𑁂 ‘‘𑀆𑀬𑀸+𑀯𑀸 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀡𑀸𑀦𑀼𑀩𑀦𑁆𑀥𑁂 𑀆𑀯𑀸𑀤𑁂𑀲𑁄. 𑀢𑁆𑀬𑀸𑀤𑀺𑀫𑁆𑀳𑀺 ‘‘𑀡𑀺+𑀡𑀸𑀧𑁆𑀬𑀸+𑀧𑀻𑀳𑀺 𑀯𑀸’’𑀢𑀺 𑀮𑀯𑀺𑀓𑀭𑀡𑁂 𑀏𑀓𑀸𑀭𑁂 ‘‘𑀏𑀑𑀦+𑀫𑀬𑀯𑀸 𑀲𑀭𑁂’’𑀢𑀺 𑀅𑀬𑀸𑀤𑁂𑀲𑁄. 𑀲𑁄 𑀲𑀫𑀸𑀥𑀺𑀁 𑀪𑀸𑀯𑀬𑀢𑀺 𑀪𑀸𑀯𑁂𑀢𑀺, 𑀪𑀸𑀯𑀬𑀦𑁆𑀢𑀺 𑀪𑀸𑀯𑁂𑀦𑁆𑀢𑀺+𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀢𑁂𑀦 𑀲𑀫𑀸𑀥𑀺 𑀪𑀸𑀯𑀻𑀬𑀢𑀺+𑀘𑁆𑀘𑀸𑀤𑀺. 𑀏𑀢𑁆𑀣 ‘‘𑀤𑀻𑀖𑁄 𑀲𑀭𑀲𑁆𑀲𑀸’’𑀢𑀺 𑀓𑁆𑀬𑁂 𑀇𑀓𑀸𑀭𑀲𑁆𑀲 𑀤𑀻𑀖𑁄. 𑀪𑀸𑀯𑀬𑀺𑀲𑁆𑀲𑀢𑀺 𑀪𑀸𑀯𑁂𑀲𑁆𑀲𑀢𑀺, 𑀪𑀸𑀯𑀬𑀺𑀲𑁆𑀲𑀦𑁆𑀢𑀺 𑀪𑀸𑀯𑁂𑀲𑁆𑀲𑀦𑁆𑀢𑀺+𑀘𑁆𑀘𑀸𑀤𑀺. 𑀅𑀚𑁆𑀚𑀢𑀦𑁂 𑀈𑀲𑁆𑀲 𑀲𑀺𑀫𑁆𑀳𑀺 𑀅𑀪𑀸𑀯𑁂𑀲𑀺 𑀪𑀸𑀯𑁂𑀲𑀺, 𑀅𑀪𑀸𑀯𑀬𑀺 𑀪𑀸𑀯𑀬𑀺, 𑀅𑀪𑀸𑀯𑀬𑀺𑀁𑀲𑀼 𑀪𑀸𑀯𑀬𑀺𑀁𑀲𑀼. 𑀧𑀭𑀲𑁆𑀲𑀭𑀮𑁄𑀧𑁂 𑀅𑀪𑀸𑀯𑁂𑀲𑀼𑀁 𑀪𑀸𑀯𑁂𑀲𑀼𑀁, 𑀅𑀪𑀸𑀯𑀬𑀁𑀲𑀼 𑀪𑀸𑀯𑀬𑀁𑀲𑀼, 𑀅𑀪𑀸𑀯𑀬𑀼𑀁 𑀪𑀸𑀯𑀬𑀼𑀁 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀅𑀪𑀸𑀯𑀻𑀬𑀺 𑀪𑀸𑀯𑀻𑀬𑀺 𑀇𑀘𑁆𑀘𑀸𑀤𑀺. 𑀅𑀪𑀸𑀯𑀺𑀲𑁆𑀲 𑀅𑀪𑀸𑀯𑀬𑀺𑀲𑁆𑀲, 𑀅𑀪𑀸𑀯𑀺𑀲𑁆𑀲𑀁𑀲𑀼 𑀅𑀪𑀸𑀯𑀬𑀺𑀲𑁆𑀲𑀁𑀲𑀼. 𑀓𑀫𑁆𑀫𑁂-𑀅𑀪𑀸𑀯𑀬𑀺𑀲𑁆𑀲𑀁 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀸𑀯𑁂𑀬𑁆𑀬 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀪𑀸𑀯𑀻𑀬𑁂𑀬𑁆𑀬 𑀇𑀘𑁆𑀘𑀸𑀤𑀺. 𑀪𑀸𑀯𑀬𑀢𑀼 𑀪𑀸𑀯𑁂𑀢𑀼 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀪𑀸𑀯𑀻𑀬𑀢𑀼 𑀇𑀘𑁆𑀘𑀸𑀤𑀺.

𑀧𑀘𑀺𑀢𑀼𑀁 𑀧𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁂 𑀡𑀺+𑀡𑀸𑀧𑀻 𑀳𑁄𑀦𑁆𑀢𑀺. 𑀲𑁄 𑀤𑁂𑀯𑀤𑀢𑁆𑀢𑁂𑀦 𑀑𑀤𑀦𑀁 𑀧𑀸𑀘𑀬𑀢𑀺 𑀧𑀸𑀘𑁂𑀢𑀺 𑀇𑀘𑁆𑀘𑀸𑀤𑀺, 𑀢𑀣𑀸 𑀧𑀸𑀘𑀸𑀧𑀬𑀢𑀺 𑀧𑀸𑀘𑀸𑀧𑁂𑀢𑀺+𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀲𑁄 𑀢𑁂𑀦 𑀤𑁂𑀯𑀤𑀢𑁆𑀢𑁂𑀦 𑀑𑀤𑀦𑁄 𑀧𑀸𑀘𑀻𑀬𑀢𑀺 𑀧𑀸𑀘𑀸𑀧𑀻𑀬𑀢𑀺+𑀘𑁆𑀘𑀸𑀤𑀺, 𑀪𑀯𑀺𑀲𑁆𑀲𑀢𑁆𑀬𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀕𑀦𑁆𑀢𑀼𑀁 𑀧𑀬𑁄𑀚𑁂𑀢𑀻𑀢𑀺 𑀅𑀢𑁆𑀣𑁂 𑀲𑁄 𑀢𑀁 𑀧𑀼𑀭𑀺𑀲𑀁 𑀕𑀸𑀫𑀁 𑀕𑀫𑀬𑀢𑀺 𑀕𑀫𑁂𑀢𑀺 𑀕𑀘𑁆𑀙𑀸𑀧𑀬𑀢𑀺 𑀕𑀘𑁆𑀙𑀸𑀧𑁂𑀢𑀺+𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀢𑁂𑀦 𑀲𑁄 𑀕𑀸𑀫𑀁 𑀕𑀫𑀻𑀬𑀢𑀺 𑀕𑀘𑁆𑀙𑀸𑀧𑀻𑀬𑀢𑀺+𑀘𑁆𑀘𑀸𑀤𑀺.

𑀕𑀼𑀳=𑀲𑀁𑀯𑀭𑀡𑁂, 𑀕𑀼𑀳𑀺𑀢𑀼𑀁 𑀧𑀬𑁄𑀚𑁂𑀢𑀻𑀢𑀺 𑀡𑀺𑀫𑁆𑀳𑀺 ‘‘𑀕𑀼𑀳𑀺𑀲𑁆𑀲 𑀲𑀭𑁂’’𑀢𑀺 𑀤𑀻𑀖𑁄. 𑀕𑀽𑀳𑀬𑀢𑀺, 𑀕𑀽𑀳𑀬𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀤𑀺𑀲+𑀤𑀼𑀲=𑀅𑀧𑁆𑀧𑀻𑀢𑀺𑀬𑀁, 𑀤𑀼𑀲𑀺𑀢𑀼𑀁 𑀧𑀬𑁄𑀚𑁂𑀢𑀻𑀢𑀺 𑀡𑀺𑀫𑁆𑀳𑀺 ‘‘𑀡𑀺𑀫𑁆𑀳𑀺 𑀤𑀻𑀖𑁄 𑀤𑀼𑀲𑀲𑁆𑀲𑀸’’𑀢𑀺 𑀤𑀻𑀖𑁂 𑀤𑀽𑀲𑀬𑀢𑀺+𑀘𑁆𑀘𑀸𑀤𑀺.

𑀢𑀣𑀸 𑀇𑀘𑁆𑀙𑀦𑁆𑀢𑀁 𑀧𑀬𑁄𑀚𑀬𑀢𑀺 𑀇𑀘𑁆𑀙𑀸𑀧𑀬𑀢𑀺 𑀇𑀘𑁆𑀙𑀸𑀧𑁂𑀢𑀺, 𑀏𑀲𑀬𑀢𑀺 𑀏𑀲𑁂𑀢𑀺. 𑀦𑀺𑀬𑀘𑁆𑀙𑀦𑁆𑀢𑀁 𑀧𑀬𑁄𑀚𑀬𑀢𑀺 𑀦𑀺𑀬𑀫𑀬𑀢𑀺 𑀦𑀺𑀬𑀫𑁂𑀢𑀺. 𑀢𑀣𑀸 𑀆𑀲𑀬𑀢𑀺 𑀆𑀲𑁂𑀢𑀺, 𑀅𑀘𑁆𑀙𑀸𑀧𑀬𑀢𑀺 𑀅𑀘𑁆𑀙𑀸𑀧𑁂𑀢𑀺. 𑀮𑀸𑀪𑀬𑀢𑀺 𑀮𑀸𑀪𑁂𑀢𑀺, 𑀏𑀯𑀁 𑀯𑀸𑀲𑀬𑀢𑀺 𑀯𑀸𑀲𑁂𑀢𑀺, 𑀯𑀸𑀲𑀸𑀧𑀬𑀢𑀺 𑀯𑀸𑀲𑀸𑀧𑁂𑀢𑀺. 𑀯𑀸𑀳𑀬𑀢𑀺 𑀯𑀸𑀳𑁂𑀢𑀺, 𑀯𑀸𑀳𑀸𑀧𑀬𑀢𑀺 𑀯𑀸𑀳𑀸𑀧𑁂𑀢𑀺+𑀘𑁆𑀘𑀸𑀤𑀺. 𑀏𑀯𑀁 𑀚𑀻𑀭𑀬𑀢𑀺, 𑀫𑀸𑀭𑀬𑀢𑀺, 𑀤𑀲𑁆𑀲𑀬𑀢𑀺 𑀇𑀘𑁆𑀘𑀸𑀤𑀺. 𑀳𑀽=𑀲𑀢𑁆𑀢𑀸𑀬𑀁, 𑀧𑀳𑁄𑀦𑁆𑀢𑀁 𑀧𑀬𑁄𑀚𑀬𑀢𑀺 𑀧𑀳𑀸𑀯𑀬𑀢𑀺 𑀧𑀳𑀸𑀯𑁂𑀢𑀺 𑀇𑀘𑁆𑀘𑀸𑀤𑀺. 𑀲𑀸𑀬𑀬𑀢𑀺 𑀲𑀸𑀬𑀸𑀧𑀬𑀢𑀺 𑀲𑀸𑀬𑀸𑀧𑁂𑀢𑀺. 𑀦𑀸𑀬𑀸𑀧𑀬𑀢𑀺 𑀦𑀸𑀬𑀸𑀧𑁂𑀢𑀺. 𑀧𑀢𑀺𑀝𑁆𑀞𑀸𑀧𑀬𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀭𑀲𑁆𑀲𑁂 𑀧𑀢𑀺𑀝𑁆𑀞𑀧𑁂𑀢𑀺. 𑀳𑀦𑁆𑀢𑀼𑀁 𑀧𑀬𑁄𑀚𑀬𑀢𑀻𑀢𑀺 𑀡𑀺+𑀡𑀸𑀧𑀻, ‘‘𑀳𑀦𑀲𑁆𑀲 𑀖𑀸𑀢𑁄 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀖𑀸𑀢𑀸𑀤𑁂𑀲𑁂 𑀖𑀸𑀢𑀬𑀢𑀺 𑀖𑀸𑀢𑁂𑀢𑀺. 𑀢𑀣𑀸 𑀚𑀼𑀳𑀸𑀯𑀬𑀢𑀺 𑀚𑀼𑀳𑀸𑀯𑁂𑀢𑀺, 𑀚𑀳𑀸𑀧𑀬𑀢𑀺 𑀚𑀳𑀸𑀧𑁂𑀢𑀺. 𑀳𑀸𑀧𑀬𑀢𑀺 𑀳𑀸𑀧𑁂𑀢𑀺. 𑀤𑀸𑀧𑀬𑀢𑀺 𑀤𑀸𑀧𑁂𑀢𑀺. 𑀯𑀺𑀥𑀸𑀧𑀬𑀢𑀺 𑀯𑀺𑀥𑀸𑀧𑁂𑀢𑀺, 𑀧𑀺𑀤𑀳𑀸𑀧𑀬𑀢𑀺 𑀧𑀺𑀤𑀳𑀸𑀧𑁂𑀢𑀺. (𑀪𑀽𑀯𑀸𑀤𑀺𑀦𑀬𑁄).

𑀇𑀤𑀸𑀦𑀺 𑀭𑀼𑀥𑀸𑀤𑀺𑀅𑀝𑁆𑀞𑀕𑀡𑀸 𑀤𑀲𑁆𑀲𑀻𑀬𑀦𑁆𑀢𑁂-𑀭𑁄𑀥𑀬𑀢𑀺 𑀭𑁄𑀥𑁂𑀢𑀺. 𑀤𑁂𑀯𑀬𑀢𑀺 𑀤𑁂𑀯𑁂𑀢𑀺. 𑀢𑁄𑀤𑀬𑀢𑀺 𑀢𑁄𑀤𑁂𑀢𑀺. 𑀚𑀬𑀸𑀧𑀬𑀢𑀺 𑀚𑀬𑀸𑀧𑁂𑀢𑀺. 𑀯𑀺𑀓𑁆𑀓𑀬𑀢𑀺 𑀯𑀺𑀓𑁆𑀓𑀬𑀸𑀧𑁂𑀢𑀺. 𑀲𑀸𑀯𑀬𑀢𑀺 𑀲𑀸𑀯𑁂𑀢𑀺. 𑀯𑀺𑀢𑀸𑀦𑀬𑀢𑀺 𑀯𑀺𑀢𑀸𑀦𑁂𑀢𑀺. 𑀘𑁄𑀭𑀸𑀧𑀬𑀢𑀺 𑀘𑁄𑀭𑀸𑀧𑁂𑀢𑀺 𑀇𑀘𑁆𑀘𑀸𑀤𑀺.

𑀔𑀸𑀤𑀻𑀳𑀺 𑀧𑀘𑁆𑀘𑀬𑀦𑁆𑀢𑁂𑀳𑀺, 𑀅𑀧𑀺 𑀳𑁄𑀦𑁆𑀢𑀺 𑀡𑀺+𑀡𑀸𑀧𑀬𑁄;

𑀡𑀺+𑀡𑀸𑀧𑀺𑀦𑀸+𑀦𑀓𑀸𑀦𑀸𑀦𑀁, 𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀲𑀸𑀥𑀦𑀁.

𑀢𑀺𑀢𑀺𑀓𑁆𑀔𑀦𑁆𑀢𑀁 𑀧𑀬𑁄𑀚𑀬𑀢𑀺 𑀢𑀺𑀢𑀺𑀓𑁆𑀔𑁂𑀢𑀺 𑀢𑀺𑀢𑀺𑀓𑁆𑀔𑀸𑀧𑁂𑀢𑀺, 𑀢𑀺𑀓𑀺𑀘𑁆𑀙𑀬𑀢𑀺 𑀢𑀺𑀓𑀺𑀘𑁆𑀙𑁂𑀢𑀺 𑀢𑀺𑀓𑀺𑀘𑁆𑀙𑀸𑀧𑀬𑀢𑀺 𑀢𑀺𑀓𑀺𑀘𑁆𑀙𑀸𑀧𑁂𑀢𑀺. 𑀏𑀯𑀁 𑀩𑀼𑀪𑀼𑀓𑁆𑀔𑁂𑀢𑀺 𑀩𑀼𑀪𑀼𑀓𑁆𑀔𑀸𑀧𑁂𑀢𑀺. 𑀧𑀩𑁆𑀩𑀢𑀸𑀬𑀬𑀢𑀺. 𑀧𑀼𑀢𑁆𑀢𑀻𑀬𑀬𑀢𑀺 𑀇𑀘𑁆𑀘𑀸𑀤𑀺. (𑀔𑀸𑀤𑀺𑀧𑀘𑁆𑀘𑀬𑀦𑀬𑁄).

𑀇𑀢𑀺 𑀧𑀬𑁄𑀕𑀲𑀺𑀤𑁆𑀥𑀺𑀬𑀁 𑀢𑁆𑀬𑀸𑀤𑀺𑀓𑀡𑁆𑀟𑁄 𑀙𑀝𑁆𑀞𑁄.