𑁭. 𑀔𑀸𑀤𑀺𑀓𑀡𑁆𑀟

𑀅𑀣 𑀥𑀸𑀢𑀽𑀳𑀺𑀬𑁂𑀯 𑀪𑀸𑀯+𑀓𑀫𑁆𑀫+𑀓𑀢𑁆𑀢𑀼+𑀓𑀭𑀡𑀸𑀤𑀺𑀲𑀸𑀥𑀦𑀲𑀳𑀺𑀢𑀁 𑀔𑀸𑀤𑀺𑀯𑀺𑀥𑀸𑀦𑀁 𑀆𑀭𑀪𑀻𑀬𑀢𑁂 𑁋

‘‘𑀢𑀺𑀚𑀫𑀸𑀦𑁂𑀳𑀺 𑀔𑀲𑀸 𑀔𑀫𑀸𑀯𑀻𑀫𑀁𑀲𑀸𑀲𑀼’’ 𑀇𑀘𑁆𑀘𑀸𑀤𑀻𑀳𑀺 𑀧𑀘𑁆𑀘𑀬𑀯𑀺𑀥𑀸𑀦𑀜𑁆𑀘 𑀧𑀭𑀭𑀽𑀧𑀤𑁆𑀯𑀺𑀢𑁆𑀢𑀸𑀤𑀺𑀓𑀸𑀭𑀺𑀬𑀜𑁆𑀘 𑀢𑁆𑀬𑀸𑀤𑀺𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀁. 𑀢𑀺𑀢𑀺𑀓𑁆𑀔𑀦𑀁 𑀢𑀺𑀢𑀺𑀓𑁆𑀔𑀸, ‘‘𑀇𑀢𑁆𑀣𑀺𑀬+𑀫𑀡𑀓𑁆𑀢𑀺𑀓𑀬𑀓𑀬𑀸 𑀘’’ 𑀇𑀢𑀺 𑀲𑀼𑀢𑁆𑀢𑁂𑀦 𑀅𑀧𑀘𑁆𑀘𑀬𑁄 𑀘 ‘‘𑀇𑀢𑁆𑀣𑀺𑀬+𑀫𑀢𑁆𑀯𑀸’’𑀢𑀺 𑀆𑀧𑀘𑁆𑀘𑀬𑁄 𑀘 𑀳𑁄𑀢𑀺. 𑀢𑀣𑀸 𑀯𑀻𑀫𑀁𑀲𑀦𑀁 𑀯𑀻𑀫𑀁𑀲𑀸. ‘‘𑀓𑀺𑀢𑀸 𑀢𑀺𑀓𑀺𑀘𑁆𑀙𑀸𑀲𑀁𑀲𑀬𑁂𑀲𑀼 𑀙𑁄’’𑀢𑀺 𑀙𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀓𑀢𑁂 𑀢𑀺𑀓𑀺𑀘𑁆𑀙𑀦𑀁 𑀢𑀺𑀓𑀺𑀘𑁆𑀙𑀸, 𑀯𑀺𑀘𑀺𑀓𑀺𑀘𑁆𑀙𑀦𑀁 𑀯𑀺𑀘𑀺𑀓𑀺𑀘𑁆𑀙𑀸. 𑀕𑀼𑀧=𑀕𑁄𑀧𑀦𑁂, 𑀩𑀥=𑀩𑀦𑁆𑀥𑀦𑁂𑀢𑀺 𑀇𑀫𑁂𑀳𑀺 𑀥𑀸𑀢𑀽𑀳𑀺 ‘‘𑀦𑀺𑀦𑁆𑀤𑀸𑀬𑀁 𑀕𑀼𑀧+𑀩𑀥𑀸 𑀩𑀲𑁆𑀲 𑀪𑁄 𑀘’’ 𑀇𑀢𑀺 𑀙𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀘 𑀤𑁆𑀯𑀺𑀢𑁆𑀢𑁂 𑀧𑀭𑀩𑀓𑀸𑀭𑀲𑁆𑀲 𑀇𑀫𑀺𑀦𑀸 𑀪𑀓𑀸𑀭𑁂 𑀘 𑀓𑀢𑁂 𑀅𑀧𑀘𑁆𑀘𑀬𑀸𑀤𑀺 𑀳𑁄𑀢𑀺. 𑀚𑀺𑀕𑀼𑀘𑁆𑀙𑀦𑀁 𑀚𑀺𑀕𑀼𑀘𑁆𑀙𑀸, 𑀩𑀻𑀪𑀘𑁆𑀙𑀦𑀁 𑀩𑀻𑀪𑀘𑁆𑀙𑀸. ‘‘𑀢𑀼𑀁𑀲𑁆𑀫𑀸 𑀮𑁄𑀧𑁄 𑀘𑀺+𑀘𑁆𑀙𑀸𑀬𑀁 𑀢𑁂’’ 𑀇𑀢𑀺 𑀇𑀘𑁆𑀙𑀸𑀬+𑀫𑀢𑁆𑀣𑁂 𑀔+𑀲+𑀙𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀪𑀼𑀚=𑀧𑀸𑀮𑀦𑀚𑁆𑀛𑁄𑀳𑀸𑀭𑁂𑀲𑀼, 𑀩𑀼𑀪𑀼𑀓𑁆𑀔𑀦𑀁 𑀩𑀼𑀪𑀼𑀓𑁆𑀔𑀸. 𑀚𑀺=𑀚𑀬𑁂, 𑀚𑀺𑀕𑀺𑀁𑀲𑀦𑀁, 𑀚𑀺𑀕𑀺𑀁𑀲𑀸. 𑀖𑀲=𑀅𑀤𑀦𑁂, 𑀚𑀺𑀖𑀘𑁆𑀙𑀦𑀁 𑀚𑀺𑀖𑀘𑁆𑀙𑀸.

𑁨𑁭. 𑀪𑀸𑀯𑀓𑀫𑁆𑀫𑁂𑀲𑀼 𑀢𑀩𑁆𑀩𑀸𑀦𑀻𑀬𑀸

𑀢𑀩𑁆𑀩𑀅𑀦𑀻𑀬𑀸 𑀓𑁆𑀭𑀺𑀬𑀢𑁆𑀣𑀸 𑀧𑀭𑁂 𑀪𑀸𑀯𑀓𑀫𑁆𑀫𑁂𑀲𑀼 𑀪𑀯𑀦𑁆𑀢𑀺, 𑀩𑀳𑀼𑀮𑀁𑀯𑀺𑀥𑀸𑀦𑀸 𑀓𑀢𑁆𑀢𑀼𑀓𑀭𑀡𑀸𑀤𑀻𑀲𑀼𑀧𑀺. 𑀪𑀽=𑀲𑀢𑁆𑀢𑀸𑀬𑀁, ‘‘𑀬𑀼𑀯𑀡𑁆𑀡𑀸𑀦+𑀫𑁂 𑀑𑀧𑀘𑁆𑀘𑀬𑁂’’𑀢𑀺 𑀑𑀓𑀸𑀭𑁂 ‘‘𑀊𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀊𑀆𑀕𑀫𑁄, 𑀜𑁆𑀜𑀓𑀸𑀭𑁄 𑀆𑀤𑁆𑀬𑀸𑀯𑀬𑀯𑀢𑁆𑀣𑁄. 𑀑𑀲𑁆𑀲 ‘‘𑀏𑀑𑀦+ 𑀫𑀬𑀯𑀸 𑀲𑀭𑁂’’𑀢𑀺 𑀅𑀯𑀸𑀤𑁂𑀲𑁄, 𑀪𑀽𑀬𑀢𑁂𑀢𑀺 𑀪𑀯𑀺𑀢𑀩𑁆𑀩𑀁 𑀪𑀯𑀢𑀸 𑀪𑀯𑀦𑀻𑀬𑀁. 𑀪𑀸𑀯𑀲𑁆𑀲𑁂+𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯, 𑀢𑀜𑁆𑀘 𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀢𑀩𑁆𑀩𑀸𑀤𑁆𑀬𑀪𑀺𑀳𑀺𑀢𑁄 𑀪𑀸𑀯𑁄,

𑀤𑀩𑁆𑀩𑀫𑀺𑀯 𑀧𑀓𑀸𑀲𑀢𑀻𑀢𑀺-𑀩𑀳𑀼𑀯𑀘𑀦𑀜𑁆𑀘 𑀳𑁄𑀢𑀺.

𑀓𑀫𑁆𑀫𑁂-𑀅𑀪𑀺𑀧𑀼𑀩𑁆𑀩𑁄, 𑀅𑀪𑀺𑀪𑀽𑀬𑀢𑁂 𑀅𑀪𑀺𑀪𑀽𑀬𑀺𑀢𑁆𑀣 𑀅𑀪𑀺𑀪𑀽𑀬𑀺𑀲𑁆𑀲𑀢𑁂𑀢𑀺 𑀅𑀪𑀺𑀪𑀯𑀺𑀢𑀩𑁆𑀩𑁄 𑀓𑁄𑀥𑁄 𑀧𑀡𑁆𑀟𑀺𑀢𑁂𑀦, 𑀅𑀪𑀺𑀪𑀯𑀺𑀢𑀩𑁆𑀩𑀸 𑀢𑀡𑁆𑀳𑀸, 𑀅𑀪𑀺𑀪𑀯𑀺𑀢𑀩𑁆𑀩𑀁 𑀤𑀼𑀓𑁆𑀔𑀁. 𑀏𑀯𑀁 𑀅𑀪𑀺𑀪𑀯𑀦𑀻𑀬𑁄 𑀅𑀪𑀺𑀪𑀯𑀦𑀻𑀬𑀸 𑀅𑀪𑀺𑀪𑀯𑀦𑀻𑀬𑀁, 𑀓𑀫𑁆𑀫𑁂 𑀅𑀪𑀺𑀥𑁂𑀬𑁆𑀬𑀲𑁆𑀲𑁂𑀯 𑀮𑀺𑀗𑁆𑀕𑀯𑀘𑀦𑀸𑀦𑀺.

𑀯𑀺𑀲𑁂𑀲𑁆𑀲𑀮𑀺𑀗𑁆𑀕𑀸𑀢𑀩𑁆𑀩𑀸𑀤𑀻, 𑀢𑀢𑁆𑀣𑀸+𑀤𑁄 𑀧𑀜𑁆𑀘 𑀪𑀸𑀯𑀚𑀸;

𑀦𑀧𑀼𑀁𑀲𑀓𑁂 𑀲𑀺𑀬𑀼𑀁 𑀪𑀸𑀯𑁂, 𑀓𑁆𑀢𑁄 𑀘𑀸+𑀦𑁄 𑀅𑀓𑀢𑁆𑀢𑀭𑀺.

𑀪𑀸𑀯𑀲𑁆𑀫𑀺𑀁 𑀖𑀡 𑀧𑀼𑀫𑁂 𑀏𑀯𑀁, 𑀇𑀬𑀼𑀯𑀡𑁆𑀡𑀸 𑀕𑀳𑀸𑀤𑀺𑀚𑁄;

𑀅𑀧𑀘𑁆𑀘𑀬𑁄𑀧𑀺 𑀯𑀸+𑀲𑀁𑀔𑁆𑀬𑀸, 𑀢𑀼+𑀫𑀸𑀤𑀺𑀢𑁆𑀯𑀦𑁆𑀢𑀓𑀸 𑀲𑀺𑀬𑀼𑀁.

𑀇𑀢𑁄 𑀧𑀭𑀁 𑀉𑀧𑀲𑀕𑁆𑀕𑀧𑀼𑀩𑁆𑀩𑀢𑀸 𑀘 𑀓𑀸𑀮𑀢𑁆𑀢𑀬𑀲𑁆𑀲 𑀯𑀸𑀓𑁆𑀬𑀕𑀳𑀡𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀦𑀼𑀭𑀽𑀧𑀯𑀸𑀓𑁆𑀬𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫 𑁋

𑀆𑀲=𑀉𑀧𑀯𑁂𑀲𑀦𑁂, 𑀆𑀲𑀦𑁂 𑀆𑀲𑀺𑀢𑀩𑁆𑀩𑀁 𑀢𑀬𑀸 𑀆𑀲𑀦𑀻𑀬𑀁. 𑀓𑀫𑁆𑀫𑁂-𑀉𑀧𑀸𑀲𑀻𑀬𑀢𑀻𑀢𑀺 𑀉𑀧𑀸𑀲𑀺𑀢𑀩𑁆𑀩𑁄 𑀕𑀼𑀭𑀼 𑀉𑀧𑀸𑀲𑀦𑀻𑀬𑁄. 𑀲𑀻=𑀲𑀬𑁂, 𑀏+𑀅𑀬𑀸𑀤𑁂𑀲𑀸, 𑀲𑀬𑀦𑀁 𑀲𑀬𑀺𑀢𑀩𑁆𑀩𑀁 𑀲𑀬𑀦𑀻𑀬𑀁 𑀢𑀬𑀸. 𑀅𑀢𑀺𑀲𑀻𑀬𑀢𑀻𑀢𑀺 𑀅𑀢𑀺𑀲𑀬𑀺𑀢𑀩𑁆𑀩𑁄 𑀓𑀝𑁄 𑀢𑁂 𑀅𑀢𑀺𑀲𑀬𑀦𑀻𑀬𑁄. 𑀧𑀤=𑀕𑀫𑀦𑁂, ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀬𑀼𑀓, 𑀓𑀓𑀸𑀭𑁄 𑀓𑀸𑀦𑀼𑀩𑀦𑁆𑀥𑀓𑀸𑀭𑀺𑀬𑀢𑁆𑀣𑁄, 𑀉𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀤𑀲𑁆𑀲𑀚𑁄 𑀧𑀼𑀩𑁆𑀩𑀭𑀽𑀧𑀜𑁆𑀘, 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀉𑀧𑁆𑀧𑀚𑁆𑀚𑀦𑀻𑀬𑀁. 𑀧𑀝𑀺𑀧𑀚𑁆𑀚𑀻𑀬𑀢𑀻𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄 𑀫𑀕𑁆𑀕𑁄 𑀧𑀝𑀺𑀧𑀚𑁆𑀚𑀦𑀻𑀬𑁄. 𑀩𑀼𑀥=𑀜𑀸𑀡𑁂, 𑀩𑀼𑀚𑁆𑀛𑀢𑁂𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑁄 𑀥𑀫𑁆𑀫𑁄 𑀩𑀼𑀚𑁆𑀛𑀦𑀻𑀬𑁄. 𑀲𑀼=𑀲𑀯𑀦𑁂, 𑀲𑀽𑀬𑀢𑁂𑀢𑀺 𑀲𑁄𑀢𑀩𑁆𑀩𑁄 𑀥𑀫𑁆𑀫𑁄, 𑀜𑁆𑀜𑀺𑀫𑁆𑀳𑀺 𑀦𑀸𑀕𑀫𑁂 ‘‘𑀢𑀣𑀦𑀭𑀸𑀦𑀁 𑀝𑀞𑀡𑀮𑀸’’𑀢𑀺 𑀡𑁂 𑀘 𑀓𑀢𑁂 ‘‘𑀦 𑀢𑁂 𑀓𑀸𑀦𑀼𑀩𑀦𑁆𑀥+𑀦𑀸𑀕𑀫𑁂𑀲𑀽’’𑀢𑀺 𑀑𑀓𑀸𑀭𑀸𑀪𑀸𑀯𑁄. 𑀲𑀼𑀡𑀺𑀢𑀩𑁆𑀩𑁄, 𑀲𑀯𑀦𑀻𑀬𑁄. 𑀓𑀭=𑀓𑀭𑀡𑁂 𑁋

𑁯𑁫. 𑀧𑀭𑀭𑀽𑀧+𑀫𑀬𑀓𑀸𑀭𑁂 𑀩𑁆𑀬𑀜𑁆𑀚𑀦𑁂

𑀓𑁆𑀭𑀺𑀬𑀢𑁆𑀣𑀸𑀦+𑀫𑀦𑁆𑀢𑀩𑁆𑀬𑀜𑁆𑀚𑀦𑀲𑁆𑀲 𑀧𑀭𑀭𑀽𑀧𑀁 𑀳𑁄𑀢𑀺 𑀬𑀓𑀸𑀭𑀢𑁄 𑀅𑀜𑁆𑀜𑀲𑁆𑀫𑀺𑀁 𑀩𑁆𑀬𑀜𑁆𑀚𑀦𑁂. 𑀓𑀭𑀻𑀬𑀢𑀻𑀢𑀺 𑀓𑀢𑁆𑀢𑀩𑁆𑀩𑁄 𑀥𑀫𑁆𑀫𑁄, 𑀓𑀢𑁆𑀢𑀩𑁆𑀩𑀸 𑀧𑀽𑀚𑀸, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁.

𑁧𑁧𑁯. 𑀢𑀼𑀁+𑀢𑀼𑀦+𑀢𑀩𑁆𑀩𑁂𑀲𑀼 𑀯𑀸

𑀢𑀼𑀫𑀸𑀤𑀻𑀲𑀼 𑀓𑀭𑀲𑁆𑀲𑀸 𑀳𑁄𑀢𑀺 𑀯𑀸. 𑀓𑀸𑀢𑀩𑁆𑀩𑀁 𑀳𑀺𑀢𑀁.

𑁧𑁭𑁧. 𑀭𑀸 𑀦𑀲𑁆𑀲 𑀡𑁄

𑀭𑀦𑁆𑀢𑀢𑁄 𑀓𑁆𑀭𑀺𑀬𑀢𑁆𑀣𑀸 𑀧𑀘𑁆𑀘𑀬𑀦𑀓𑀸𑀭𑀲𑁆𑀲 𑀡 𑀳𑁄𑀢𑀺. 𑀓𑀭𑀡𑀻𑀬𑁄.

𑀪𑀭=𑀪𑀭𑀡𑁂, 𑀪𑀭𑀻𑀬𑀢𑀻𑀢𑀺 𑀪𑀭𑀺𑀢𑀩𑁆𑀩𑁄 𑀪𑀭𑀡𑀻𑀬𑁄. 𑀕𑀳=𑀉𑀧𑀸𑀤𑀸𑀦𑁂 ‘‘𑀫𑀁 𑀯𑀸 𑀭𑀼𑀥𑀸𑀤𑀻𑀦𑀁’’𑀢𑀺 𑀅𑀦𑁆𑀢𑀲𑀭𑀸 𑀧𑀭𑁄𑀫𑀁 𑀯𑀸 𑀳𑁄𑀢𑀺. 𑀫𑀓𑀸𑀭𑁄+𑀦𑀼𑀩𑀦𑁆𑀥𑁄. ‘‘𑀡𑁄 𑀦𑀺𑀕𑁆𑀕𑀳𑀻𑀢𑀲𑁆𑀲𑀸’’𑀢𑀺 𑀦𑀺𑀕𑁆𑀕𑀳𑀻𑀢𑀲𑁆𑀲 𑀡𑁄, 𑀲𑀁𑀕𑀬𑁆𑀳𑀢𑀻𑀢𑀺 𑀲𑀁𑀕𑀡𑁆𑀳𑀺𑀢𑀩𑁆𑀩𑁄 𑀲𑀁𑀕𑀡𑁆𑀳𑀦𑀻𑀬𑁄, ‘‘𑀢𑀣𑀦𑀭𑀸’’𑀤𑀺𑀦𑀸 𑀡𑀓𑀸𑀭𑁂 𑀕𑀳𑀡𑀻𑀬𑁄. 𑀭𑀫=𑀓𑀻𑀴𑀸𑀬𑀁, 𑀭𑀫𑀻𑀬𑀢𑀻𑀢𑀺 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄. 𑀆𑀧=𑀧𑀸𑀧𑀼𑀡𑀦𑁂, ‘‘𑀲𑀓𑀸𑀧𑀸𑀦𑀁 𑀓𑀼𑀓𑀓𑀽 𑀡𑁂’’𑀢𑀺 𑀏𑀢𑁆𑀣 ‘𑀲𑀓𑀸𑀧𑀸𑀦𑀁 𑀓𑀼𑀓+𑀓𑀽’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀓𑀼, 𑀊𑀆𑀕𑀫𑁂 𑀦𑀸𑀕𑀫𑀲𑁆𑀲 𑀡𑁂 𑀘 𑀓𑀢𑁂 𑀧𑀸𑀧𑀻𑀬𑀢𑀻𑀢𑀺 𑀧𑀸𑀧𑀼𑀡𑀺𑀢𑀩𑁆𑀩𑁄. 𑀧𑀭𑀭𑀽𑀧𑁂 𑀧𑀢𑁆𑀢𑀩𑁆𑀩𑁄, 𑀧𑀸𑀧𑀼𑀡𑀦𑀻𑀬𑁄, 𑀧𑀸𑀧𑀦𑀻𑀬𑁄.

𑁯𑁬. 𑀫𑀦𑀸𑀦𑀁 𑀦𑀺𑀕𑁆𑀕𑀳𑀻𑀢𑀁

𑀫𑀓𑀸𑀭+𑀦𑀓𑀸𑀭𑀦𑁆𑀢𑀸𑀦𑀁 𑀓𑁆𑀭𑀺𑀬𑀢𑁆𑀣𑀸𑀦𑀁 𑀦𑀺𑀕𑁆𑀕𑀳𑀻𑀢𑀁 𑀳𑁄𑀢𑁆𑀬+𑀬𑀓𑀸𑀭𑁂 𑀩𑁆𑀬𑀜𑁆𑀚𑀦𑁂. 𑀯𑀕𑁆𑀕𑀦𑁆𑀢𑀁, 𑀕𑀫𑀺𑀬𑀢𑀻𑀢𑀺 𑀕𑀦𑁆𑀢𑀩𑁆𑀩𑁄. 𑀕𑀫𑀺𑀢𑀩𑁆𑀩𑀁 𑀕𑀫𑀦𑀻𑀬𑀁. 𑀔𑀦=𑀔𑀡=𑀅𑀯𑀤𑀸𑀭𑀡𑁂, 𑀦𑀺𑀕𑁆𑀕𑀳𑀻𑀢𑀁 𑀯𑀕𑁆𑀕𑀦𑁆𑀢𑀢𑁆𑀢𑀜𑁆𑀘, 𑀔𑀜𑁆𑀜𑀢𑁂𑀢𑀺 𑀔𑀦𑁆𑀢𑀩𑁆𑀩𑀁 𑀆𑀯𑀸𑀝𑀁 𑀔𑀦𑀺𑀢𑀩𑁆𑀩𑀁 𑀔𑀦𑀦𑀻𑀬𑀁. 𑀳𑀦=𑀳𑀺𑀁𑀲𑀸𑀬𑀁, 𑀳𑀜𑁆𑀜𑀢𑁂𑀢𑀺 𑀳𑀦𑁆𑀢𑀩𑁆𑀩𑀁 𑀳𑀦𑀺𑀢𑀩𑁆𑀩𑀁 𑀳𑀦𑀦𑀻𑀬𑀁. 𑀫𑀦=𑀜𑀸𑀡𑁂, 𑀫𑀜𑁆𑀜𑀢𑁂𑀢𑀺 𑀫𑀦𑁆𑀢𑀩𑁆𑀩𑁄 𑀫𑀦𑀺𑀢𑀩𑁆𑀩𑁄. ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀬𑀼𑀓, 𑀘𑀯𑀕𑁆𑀕𑀸𑀤𑀺𑀫𑁆𑀳𑀺 𑀓𑀢𑁂 𑀫𑀜𑁆𑀜𑀺𑀢𑀩𑁆𑀩𑀁 𑀫𑀜𑁆𑀜𑀦𑀻𑀬𑀁.

𑀧𑀽𑀚=𑀧𑀽𑀚𑀸𑀬𑀁, ‘‘𑀘𑀼𑀭𑀸𑀤𑀺𑀢𑁄 𑀡𑀻’’𑀢𑀺 𑀡𑀺𑀫𑁆𑀳𑀺 𑀜𑀼𑀓𑀸𑀭𑀲𑁆𑀲 𑀕𑀼𑀭𑀼𑀢𑁆𑀢𑀸 𑀑𑀓𑀸𑀭𑀸𑀯𑀼𑀢𑁆𑀢𑀺 ‘‘𑀬𑀼𑀯𑀡𑁆𑀡𑀸𑀦+𑀫𑁂𑀑 𑀧𑀘𑁆𑀘𑀬𑁂’’𑀢𑀺 𑀏𑀓𑀸𑀭𑁂 𑀧𑀽𑀚𑁂𑀢𑀩𑁆𑀩𑁄 𑀊𑀫𑁆𑀳𑀺 𑀅𑀬𑀸𑀤𑁂𑀲𑁂 𑀧𑀽𑀚𑀬𑀺𑀢𑀩𑁆𑀩𑁄 𑀧𑀽𑀚𑀦𑀻𑀬𑁄 𑀪𑀕𑀯𑀸.

𑀓𑀢𑁆𑀢𑀭𑀺-𑀬𑀸=𑀧𑀸𑀧𑀼𑀡𑀦𑁂, 𑀦𑀻𑀬𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀬𑁄 𑀫𑀕𑁆𑀕𑁄, 𑀕𑀘𑁆𑀙𑀦𑁆𑀢𑀻𑀢𑀺 𑀕𑀫𑀦𑀻𑀬𑀸 𑀪𑁄𑀕𑀸. 𑀓𑀭𑀡𑁂-𑀦𑀳=𑀲𑁄𑀘𑁂𑀬𑁆𑀬𑁂, 𑀦𑀳𑀸𑀬𑀦𑁆𑀢𑁆𑀬+𑀦𑁂𑀦𑀸𑀢𑀺 𑀦𑀳𑀸𑀦𑀻𑀬𑀁 𑀘𑀼𑀡𑁆𑀡𑀁. 𑀲𑀫𑁆𑀧𑀤𑀸𑀦𑁂-𑀤𑀸=𑀤𑀸𑀦𑁂, 𑀲𑀁+𑀧𑀧𑀼𑀩𑁆𑀩𑁄, 𑀲𑀫𑁆𑀫𑀸 𑀧𑀤𑀻𑀬𑀢𑁂 𑀅𑀲𑁆𑀲𑀸𑀢𑀺 𑀲𑀫𑁆𑀧𑀤𑀸𑀦𑀺𑀬𑁄 𑀩𑁆𑀭𑀸𑀳𑁆𑀫𑀡𑁄.

𑁨𑁮. 𑀖𑁆𑀬𑀡

𑀪𑀸𑀯𑀓𑀫𑁆𑀫𑁂𑀲𑀼 𑀓𑁆𑀭𑀺𑀬𑀢𑁆𑀣𑀸 𑀧𑀭𑁄 𑀖𑁆𑀬𑀡 𑀳𑁄𑀢𑀺 𑀩𑀳𑀼𑀮𑀁. 𑀊𑀫𑁆𑀳𑀺 𑀓𑀢𑁆𑀢𑀩𑁆𑀩𑀁 𑀓𑀸𑀭𑀺𑀬𑀁. 𑀳𑀭=𑀳𑀭𑀡𑁂, 𑀳𑀭𑀻𑀬𑀢𑀻𑀢𑀺 𑀳𑀸𑀭𑀺𑀬𑀁. 𑀪𑀭=𑀪𑀭𑀡𑁂, 𑀪𑀭𑀺𑀢𑀩𑁆𑀩𑀁 𑀪𑀸𑀭𑀺𑀬𑀁. 𑀮𑀪=𑀮𑀸𑀪𑁂, ‘‘𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 𑀧𑀼𑀩𑁆𑀩𑀭𑀽𑀧𑀪𑀓𑀸𑀭𑁂 ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑀸’’ 𑀤𑀺𑀦𑀸 𑀢𑀢𑀺𑀬𑀓𑁆𑀔𑀭𑁂 𑀘 𑀓𑀢𑁂 𑀮𑀪𑀺𑀢𑀩𑁆𑀩𑀁 𑀮𑀩𑁆𑀪𑀁.

𑀯𑀘=𑀩𑁆𑀬𑀢𑁆𑀢𑀯𑀘𑀦𑁂,

𑁯𑁮. 𑀓𑀕𑀸 𑀘𑀚𑀸𑀦𑀁 𑀖𑀸𑀦𑀼𑀩𑀦𑁆𑀥𑁂

𑀖𑀸𑀦𑀼𑀩𑀦𑁆𑀥𑁂 𑀘𑀓𑀸𑀭+𑀚𑀓𑀸𑀭𑀦𑁆𑀢𑀸𑀦𑀁 𑀓𑁆𑀭𑀺𑀬𑀢𑁆𑀣𑀸𑀦𑀁 𑀓+𑀕𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁.

𑁮𑁪. 𑀅𑀲𑁆𑀲𑀸 𑀡𑀸𑀦𑀼𑀩𑀦𑁆𑀥𑁂

𑀡𑀓𑀸𑀭𑀸𑀦𑀼𑀩𑀦𑁆𑀥𑁂 𑀧𑀘𑁆𑀘𑀬𑁂 𑀧𑀭𑁂 𑀉𑀧𑀦𑁆𑀢𑀲𑁆𑀲 𑀅𑀓𑀸𑀭𑀲𑁆𑀲 𑀆 𑀳𑁄𑀢𑀺. 𑀯𑀘𑀦𑀁 𑀯𑀼𑀘𑁆𑀘𑀢𑁂𑀢𑀺 𑀯𑀸𑀓𑁆𑀬𑀁. 𑀪𑀚=𑀲𑁂𑀯𑀸𑀬𑀁, 𑀪𑀚𑀦𑀻𑀬𑀁 𑀪𑀸𑀕𑁆𑀬𑀁, 𑀚𑀲𑁆𑀲 𑀕𑀓𑀸𑀭𑁄. 𑀘𑀺=𑀘𑀬𑁂, 𑀘𑀬𑀦𑀁 𑀘𑀻𑀬𑀢𑀻𑀢𑀺 𑀯𑀸 𑀘𑁂𑀬𑁆𑀬𑀁. 𑀬𑀲𑁆𑀲 𑀤𑁆𑀯𑀺𑀢𑁆𑀢𑀁.

𑁫,𑁧𑁨𑁨. 𑀦𑀺𑀢𑁄 𑀘𑀺𑀲𑁆𑀲 𑀙𑁄

𑀦𑀺𑀢𑁄 𑀧𑀭𑀲𑁆𑀲 𑀘𑀺𑀲𑁆𑀲 𑀙𑁄 𑀳𑁄𑀢𑀻𑀢𑀺𑀆𑀤𑀺𑀘𑀓𑀸𑀭𑀲𑁆𑀲 𑀙𑁄. 𑀯𑀺𑀦𑀺𑀘𑁆𑀙𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑁂𑀬𑁆𑀬𑀁, 𑀦𑀸𑀕𑀫𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀏+𑀅𑀬𑀸𑀤𑁂𑀲𑁂𑀲𑀼 𑀯𑀺𑀦𑀺𑀘𑁆𑀙𑁂𑀢𑀩𑁆𑀩𑀁 𑀯𑀺𑀦𑀺𑀘𑁆𑀙𑀦𑀻𑀬𑀁. 𑀦𑀻=𑀧𑀸𑀧𑀦𑁂, 𑀦𑀻𑀬𑀢𑀻𑀢𑀺 𑀦𑁂𑀬𑁆𑀬𑁄 𑀦𑁂𑀬𑁆𑀬𑀸 𑀦𑁂𑀬𑁆𑀬𑀁, 𑀦𑁂𑀢𑀩𑁆𑀩𑀁.

𑁨𑁯. 𑀆𑀲𑁆𑀲𑁂+𑀘

𑀆𑀓𑀸𑀭𑀦𑁆𑀢𑀢𑁄 𑀓𑁆𑀭𑀺𑀬𑀢𑁆𑀣𑀸 𑀖𑁆𑀬𑀡 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼 𑀆𑀲𑁆𑀲 𑀏 𑀘. 𑀤𑀸=𑀤𑀸𑀦𑁂, 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀁. 𑀧𑀸=𑀧𑀸𑀦𑁂, 𑀧𑀻𑀬𑀢𑀻𑀢𑀺 𑀧𑁂𑀬𑁆𑀬𑀁. 𑀫𑀸=𑀫𑀸𑀦𑁂, 𑀫𑀻𑀬𑀢𑀻𑀢𑀺 𑀫𑁂𑀬𑁆𑀬𑀁. 𑀜𑀸=𑀅𑀯𑀩𑁄𑀥𑀦𑁂, 𑀜𑀸𑀬𑀢𑀻𑀢𑀺 𑀜𑁂𑀬𑁆𑀬𑀁 𑀜𑀸𑀢𑀩𑁆𑀩𑀁, 𑀊𑀫𑁆𑀳𑀺 𑀦𑀸𑀕𑀫𑁄 ‘‘𑀜𑀸𑀲𑁆𑀲 𑀦𑁂+𑀚𑀸’’𑀢𑀺 𑀜𑀸𑀲𑁆𑀲 𑀚𑀸𑀤𑁂𑀲𑁂 𑀚𑀸𑀦𑀺𑀢𑀩𑁆𑀩𑀁, 𑀯𑀺𑀚𑀸𑀦𑀺𑀬𑀁. 𑀔𑀸=𑀧𑀓𑀣𑀦𑁂, 𑀲𑀁𑀔𑀸𑀢𑀩𑁆𑀩𑀁 𑀲𑀁𑀔𑁂𑀬𑁆𑀬𑀁.

𑁩𑁦. 𑀯𑀤𑀸𑀤𑀻𑀳𑀺 𑀬𑁄

𑀯𑀤𑀸𑀤𑀻𑀳𑀺 𑀓𑁆𑀭𑀺𑀬𑀢𑁆𑀣𑁂𑀳𑀺 𑀬𑁄 𑀳𑁄𑀢𑀺 𑀩𑀳𑀼𑀮𑀁 𑀪𑀸𑀯𑀓𑀫𑁆𑀫𑁂𑀲𑀼. 𑀯𑀤=𑀯𑀘𑀦𑁂, 𑀯𑀤𑀦𑀁 𑀯𑀚𑁆𑀚𑀢𑀻𑀢𑀺 𑀯𑀸 𑀯𑀚𑁆𑀚𑀁. 𑀫𑀤=𑀉𑀫𑁆𑀫𑀸𑀤𑁂, 𑀫𑀤𑀦𑀁 𑀫𑀚𑁆𑀚𑀢𑁂 𑀅𑀦𑁂𑀦𑀸𑀢𑀺 𑀯𑀸 𑀫𑀚𑁆𑀚𑀁. 𑀕𑀫𑀦𑀁 𑀕𑀫𑁆𑀫𑀢𑁂𑀢𑀺 𑀯𑀸 𑀕𑀫𑁆𑀫𑀁. 𑀕𑀤=𑀯𑀘𑀦𑁂, 𑀕𑀚𑁆𑀚𑀢𑁂 𑀕𑀤𑀦𑀻𑀬𑀁 𑀯𑀸𑀢𑀺 𑀕𑀚𑁆𑀚𑀁. 𑀧𑀤=𑀕𑀫𑀦𑁂, 𑀧𑀚𑁆𑀚𑀦𑀻𑀬𑀁 𑀧𑀚𑁆𑀚𑀁 𑀕𑀸𑀣𑀸. 𑀅𑀤+𑀔𑀸𑀤=𑀪𑀓𑁆𑀔𑀦𑁂, 𑀔𑀚𑁆𑀚𑀢𑀻𑀢𑀺 𑀔𑀚𑁆𑀚𑀁 𑀔𑀸𑀤𑀦𑀻𑀬𑀁. 𑀤𑀫=𑀤𑀫𑀦𑁂, 𑀤𑀫𑁆𑀫𑀢𑁂𑀢𑀺 𑀤𑀫𑁆𑀫𑁄 𑀤𑀫𑀦𑀻𑀬𑁄.

𑀪𑀼𑀚𑀸+𑀦𑁆𑀦𑁂𑀢𑀺 𑀕𑀡𑀲𑀼𑀢𑁆𑀢𑁂𑀦 𑀅𑀦𑁆𑀦𑁂 𑀯𑀢𑁆𑀢𑀩𑁆𑀩𑁂 𑀬𑀧𑀘𑁆𑀘𑀬𑁄.

𑁮𑁩. 𑀮𑀳𑀼𑀲𑁆𑀲𑀼𑀧𑀦𑁆𑀢𑀲𑁆𑀲𑀢𑀺

𑀮𑀳𑀼𑀪𑀽𑀢𑀲𑁆𑀲 𑀉𑀧𑀦𑁆𑀢𑀲𑁆𑀲 𑀇𑀬𑀼𑀯𑀡𑁆𑀡𑀲𑁆𑀲 𑀏𑀑 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀬𑀲𑁆𑀲 𑀧𑀼𑀩𑁆𑀩𑀭𑀽𑀧𑁂 𑀪𑀼𑀜𑁆𑀚𑀺𑀢𑀩𑁆𑀩𑁄𑀢𑀺 𑀪𑁄𑀚𑁆𑀚𑁄 𑀑𑀤𑀦𑁄, 𑀪𑁄𑀚𑁆𑀚𑀸 𑀬𑀸𑀕𑀼.

𑁩𑁧. 𑀓𑀺𑀘𑁆𑀘 𑀖𑀘𑁆𑀘 𑀪𑀘𑁆𑀘 𑀪𑀩𑁆𑀩 𑀮𑁂𑀬𑁆𑀬𑀸

𑀏𑀢𑁂 𑀲𑀤𑁆𑀤𑀸 𑀬𑀧𑀘𑁆𑀘𑀬𑀦𑁆𑀢𑀸 𑀦𑀺𑀧𑀘𑁆𑀘𑀦𑁆𑀢𑁂. 𑀓𑀭=𑀓𑀭𑀡𑁂, 𑀇𑀫𑀺𑀦𑀸 𑀦𑀺𑀧𑀸𑀢𑀦𑀸 𑀬𑁂 𑀓𑀺𑀘𑀸𑀤𑁂𑀲𑁂 𑀘 𑀓𑀢𑁂 𑀧𑀼𑀩𑁆𑀩𑀭𑀽𑀧𑀁, 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁. 𑀳𑀦=𑀳𑀺𑀁𑀲𑀸𑀬𑀁, 𑀖𑀘𑁆𑀘𑀸𑀤𑁂𑀲𑀸𑀤𑀺𑀫𑁆𑀳𑀺 𑀓𑀢𑁂 𑀳𑀦𑀦𑀁 𑀳𑀜𑁆𑀜𑀢𑁂𑀢𑀺 𑀯𑀸 𑀖𑀘𑁆𑀘𑀁. 𑀪𑀭=𑀪𑀭𑀡𑁂, 𑀪𑀘𑁆𑀘𑀸𑀤𑁂𑀲𑀸𑀤𑀺𑀫𑁆𑀳𑀺 𑀓𑀢𑁂 𑀪𑀭𑀡𑀻𑀬𑁄 𑀪𑀘𑁆𑀘𑁄. 𑀪𑀽=𑀲𑀢𑁆𑀢𑀸𑀬𑀁, 𑀬𑀫𑁆𑀳𑀺 𑀑𑀓𑀸𑀭𑁂 𑀇𑀫𑀺𑀦𑀸 𑀅𑀯𑀸𑀤𑁂𑀲𑁂 𑀪𑀯𑀢𑀻𑀢𑀺 𑀪𑀩𑁆𑀩𑁄. 𑀮𑀺𑀳=𑀅𑀲𑁆𑀲𑀸𑀤𑀦𑁂, 𑀬𑀫𑁆𑀳𑀺 𑀇𑀫𑀺𑀦𑀸 𑀳𑀲𑁆𑀲 𑀬𑀓𑀸𑀭𑁂 𑀮𑁂𑀳𑀺𑀢𑀩𑁆𑀩𑀁 𑀮𑁂𑀬𑁆𑀬𑀁, 𑀏𑀓𑀸𑀭𑀯𑀼𑀤𑁆𑀥𑀺.

𑁩𑁨. 𑀕𑀼𑀳𑀸𑀤𑀻𑀳𑀺 𑀬𑀓

𑀕𑀼𑀳𑀸𑀤𑀻𑀳𑀺 𑀓𑁆𑀭𑀺𑀬𑀢𑁆𑀣𑁂𑀳𑀺 𑀪𑀸𑀯𑀓𑀫𑁆𑀫𑁂𑀲𑀼 𑀬𑀓 𑀳𑁄𑀢𑀺. 𑀕𑀼𑀳=𑀲𑀁𑀯𑀭𑀡𑁂, ‘‘𑀮𑀳𑀼𑀲𑁆𑀲𑀼𑀧𑀦𑁆𑀢𑀲𑁆𑀲𑀸’’𑀢𑀺 𑀲𑀫𑁆𑀧𑀢𑁆𑀢𑀲𑁆𑀲 𑀑𑀓𑀸𑀭𑀲𑁆𑀲 ‘‘𑀦 𑀢𑁂 𑀓𑀸𑀦𑀼𑀩𑀦𑁆𑀥𑀦𑀸𑀕𑀫𑁂𑀲𑀽’’𑀢𑀺 𑀧𑀝𑀺𑀲𑁂𑀥𑁄. ‘‘𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄’’𑀢𑀺 𑀯𑀺𑀧𑀮𑁆𑀮𑀸𑀲𑁂 𑀕𑀼𑀳𑀦𑀁 𑀕𑀼𑀳𑀺𑀢𑀩𑁆𑀩𑀁 𑀕𑀼𑀬𑁆𑀳𑀁. 𑀤𑀼𑀳=𑀧𑀧𑀽𑀭𑀡𑁂, 𑀤𑁄𑀳𑀦𑀁 𑀤𑀼𑀬𑁆𑀳𑀢𑀻𑀢𑀺 𑀯𑀸 𑀤𑀼𑀬𑁆𑀳𑀁. 𑀲𑀸𑀲=𑀅𑀦𑀼𑀲𑀺𑀝𑁆𑀞𑀺𑀬𑀁 𑁋

𑁧𑁧𑁭. 𑀲𑀸𑀲𑀲𑁆𑀲 𑀲𑀺𑀲 𑀯𑀸

𑀲𑀸𑀲𑀲𑁆𑀲 𑀲𑀺𑀲 𑀯𑀸 𑀳𑁄𑀢𑀺 𑀓𑀸𑀦𑀼𑀩𑀦𑁆𑀥𑁂. 𑀧𑀼𑀩𑁆𑀩𑀭𑀽𑀧𑀁, 𑀲𑀸𑀲𑀻𑀬𑀢𑀻𑀢𑀺 𑀲𑀺𑀲𑁆𑀲𑁄.

𑀲𑀺𑀤𑁆𑀥𑀸 𑀏𑀯𑁂+𑀢𑁂 𑀢𑀩𑁆𑀩𑀸𑀤𑀬𑁄 𑀧𑁂𑀲𑀸+𑀢𑀺𑀲𑀕𑁆𑀕+𑀧𑁆𑀧𑀢𑁆𑀢𑀓𑀸𑀮𑁂𑀲𑀼 𑀕𑀫𑁆𑀬𑀫𑀸𑀦𑁂𑀲𑀼𑀧𑀺, 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀢𑁄. 𑀧𑁂𑀲𑀦𑀁 𑁋 ‘‘𑀓𑀢𑁆𑀢𑀩𑁆𑀩+𑀫𑀺𑀤𑀁 𑀪𑀯𑀢𑀸’’𑀢𑀺 𑀆𑀡𑀸𑀧𑀦𑀁 𑀅𑀚𑁆𑀛𑁂𑀲𑀦𑀜𑁆𑀘. 𑀅𑀢𑀺𑀲𑀕𑁆𑀕𑁄 𑀦𑀸𑀫 ‘‘𑀓𑀺+𑀫𑀺𑀤𑀁 𑀫𑀬𑀸 𑀓𑀢𑁆𑀢𑀩𑁆𑀩𑀁’’𑀢𑀺 𑀧𑀼𑀝𑁆𑀞𑀲𑁆𑀲 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀼𑀔𑁂𑀦 𑀓𑀢𑁆𑀢𑀩𑁆𑀩𑀲𑁆𑀲 𑀅𑀦𑀼𑀜𑁆𑀜𑀸. 𑀧𑀢𑁆𑀢𑀓𑀸𑀮𑁄 𑀦𑀸𑀫 𑀲𑀫𑁆𑀧𑀢𑁆𑀢𑀲𑀫𑀬𑁄. 𑀬𑁄 𑀓𑀺𑀘𑁆𑀘𑀓𑀭𑀡𑀲𑀫𑀬𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑀬𑀸𑀭𑁄𑀘𑀦𑀁, 𑀦 𑀢𑀢𑁆𑀣 𑀅𑀚𑁆𑀛𑁂𑀲𑀦+𑀫𑀢𑁆𑀣𑀺. 𑀪𑁄𑀢𑀸 𑀔𑀮𑀼 𑀓𑀝𑁄 𑀓𑀢𑁆𑀢𑀩𑁆𑀩𑁄 𑀓𑀭𑀡𑀻𑀬𑁄 𑀓𑀸𑀭𑀺𑀬𑁄 𑀓𑀺𑀘𑁆𑀘𑁄’’ 𑀏𑀯𑀁 𑀢𑁆𑀯𑀬𑀸 𑀓𑀝𑁄 𑀓𑀢𑁆𑀢𑀩𑁆𑀩𑁄, 𑀪𑁄𑀢𑁄 𑀳𑀺 𑀧𑀢𑁆𑀢𑁄 𑀓𑀸𑀮𑁄 𑀓𑀝𑀓𑀭𑀡𑁂.

𑀏𑀯𑀁 𑀉𑀤𑁆𑀥𑀫𑀼𑀳𑀼𑀢𑁆𑀢𑁂𑀧𑀺 𑀯𑀢𑁆𑀢𑀫𑀸𑀦𑀢𑁄 𑀧𑁂𑀲𑀸𑀤𑀻𑀲𑀼 𑀲𑀺𑀤𑁆𑀥𑀸 𑀏𑀯. 𑀢𑀣𑀸 𑀅𑀭𑀳𑁂 𑀓𑀢𑁆𑀢𑀭𑀺 𑀲𑀢𑁆𑀢𑀺𑀯𑀺𑀲𑀺𑀝𑁆𑀞𑁂 𑀘 𑀧𑀢𑀻𑀬𑀫𑀸𑀦𑁂, 𑀆𑀯𑀲𑁆𑀲𑀓𑀸+𑀥𑀫𑀻𑀡𑀢𑀸𑀯𑀺𑀲𑀺𑀝𑁆𑀞𑁂 𑀘 𑀪𑀸𑀯𑀸𑀤𑁄 𑀲𑀺𑀤𑁆𑀥𑀸. 𑀉𑀤𑁆𑀥𑀁 𑀫𑀼𑀳𑀼𑀢𑁆𑀢𑀢𑁄-𑀪𑁄𑀢𑀸 𑀓𑀝𑁄 𑀓𑀢𑁆𑀢𑀩𑁆𑀩𑁄. 𑀪𑁄𑀢𑀸 𑀭𑀚𑁆𑀚𑀁 𑀓𑀸𑀢𑀩𑁆𑀩𑀁, 𑀪𑀯𑀁 𑀅𑀭𑀳𑁄. 𑀪𑁄𑀢𑀸 𑀪𑀸𑀭𑁄 𑀯𑀳𑀺𑀢𑀩𑁆𑀩𑁄, 𑀪𑀯𑀁 𑀲𑀓𑁆𑀓𑁄. 𑀪𑁄𑀢𑀸 𑀅𑀯𑀲𑁆𑀲𑀁 𑀓𑀝𑁄 𑀓𑀢𑁆𑀢𑀩𑁆𑀩𑁄. 𑀪𑁄𑀢𑀸 𑀦𑀺𑀓𑁆𑀔𑁄 𑀤𑀸𑀢𑀩𑁆𑀩𑁄.

𑁩𑁩. 𑀓𑀢𑁆𑀢𑀭𑀺 𑀮𑁆𑀢𑀼+𑀡𑁆𑀓𑀸

𑀓𑀢𑁆𑀢𑀭𑀺 𑀓𑀸𑀭𑀓𑁂 𑀓𑁆𑀭𑀺𑀬𑀢𑁆𑀣𑀸 𑀮𑁆𑀢𑀼+𑀡𑁆𑀓𑀸 𑀳𑁄𑀦𑁆𑀢𑀺. 𑀓𑀭=𑀓𑀭𑀡𑁂, 𑀧𑀭𑀭𑀽𑀧𑁂 ‘‘𑀮𑁆𑀢𑀼+𑀧𑀺𑀢𑀸𑀤𑀻𑀦+𑀫𑀸 𑀲𑀺𑀫𑁆𑀳𑀻’’𑀢𑀺 𑀆 𑀲𑀺𑀮𑁄𑀧𑁄 𑀘. 𑀓𑀭𑁄𑀢𑀻𑀢𑀺 𑀓𑀢𑁆𑀢𑀸. 𑀏𑀯𑀁 𑀪𑀭𑀢𑀻𑀢𑀺 𑀪𑀢𑁆𑀢𑀸. 𑀳𑀭𑀢𑀻𑀢𑀺 𑀳𑀢𑁆𑀢𑀸. 𑀪𑀺𑀤𑀢𑀻𑀢𑀺 𑀪𑁂𑀢𑁆𑀢𑀸, 𑀏𑀓𑀸𑀭𑁄, 𑀊𑀫𑁆𑀳𑀺 𑀪𑁂𑀤𑀺𑀢𑀸. 𑀙𑀺𑀦𑁆𑀤𑀢𑀻𑀢𑀺 𑀙𑁂𑀢𑁆𑀢𑀸. 𑀪𑁄𑀚𑀦𑀲𑁆𑀲 𑀤𑀸𑀢𑀸 𑀪𑁄𑀚𑀦𑀤𑀸𑀢𑀸. 𑀲𑀦𑁆𑀥𑀸𑀢𑀻𑀢𑀺 𑀲𑀦𑁆𑀥𑀸𑀢𑀸. 𑀯𑀘𑀢𑀻𑀢𑀺 𑀯𑀢𑁆𑀢𑀸. 𑀑𑀓𑀸𑀭𑀧𑀭𑀭𑀽𑀧𑁂𑀲𑀼 𑀪𑀼𑀜𑁆𑀚𑀢𑀻𑀢𑀺 𑀪𑁄𑀢𑁆𑀢𑀸. ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀬𑀼𑀓𑀸𑀕𑀫𑁄, 𑀩𑀼𑀚𑁆𑀛𑀢𑀻𑀢𑀺 𑀩𑀼𑀚𑁆𑀛𑀺𑀢𑀸. 𑀚𑀸𑀦𑀸𑀢𑀻𑀢𑀺 𑀜𑀸𑀢𑀸. 𑀙𑀺𑀦𑁆𑀤𑀢𑀻𑀢𑀺 𑀙𑁂𑀢𑀸. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀸. ‘‘𑀊+𑀮𑀲𑁆𑀲𑁂’’𑀢𑀺 𑀊𑀲𑁆𑀲 𑀏𑀓𑀸𑀭𑁂 𑀕𑀡𑁆𑀳𑀸𑀢𑀻𑀢𑀺 𑀕𑀳𑁂𑀢𑀸. 𑀪𑀯𑀢𑀻𑀢𑀺 𑀪𑀯𑀺𑀢𑀸. 𑀲𑀭𑀢𑀻𑀢𑀺 𑀲𑀭𑀺𑀢𑀸. ‘‘𑀫𑀦𑀸𑀦𑀁 𑀦𑀺𑀕𑁆𑀕𑀳𑀻𑀢𑀁’’𑀢𑀺 𑀫𑀲𑁆𑀲 𑀦𑀺𑀕𑁆𑀕𑀳𑀻𑀢𑁂 𑀯𑀕𑁆𑀕𑀦𑁆𑀢𑁂 𑀘 𑀕𑀘𑁆𑀙𑀢𑀻𑀢𑀺 𑀕𑀦𑁆𑀢𑀸. 𑀦𑀓𑀸𑀭𑀦𑁆𑀢𑀸𑀦𑀫𑁆𑀧𑀺 𑀦𑀺𑀕𑁆𑀕𑀳𑀻𑀢𑀁, 𑀔𑀦𑀢𑀻𑀢𑀺 𑀔𑀦𑁆𑀢𑀸. 𑀲𑀦𑀢𑀻𑀢𑀺 𑀲𑀦𑁆𑀢𑀸. 𑀫𑀜𑁆𑀜𑀢𑀻𑀢𑀺 𑀫𑀦𑁆𑀢𑀸. 𑀧𑀸𑀮𑁂𑀢𑀻𑀢𑀺 𑀧𑀸𑀮𑀬𑀺𑀢𑀸 𑀧𑀸𑀮𑁂𑀢𑀸, 𑀏𑀢𑁆𑀣 𑀘𑀼𑀭𑀸𑀤𑀺𑀢𑁆𑀢𑀸 𑀡𑀺.

𑀡𑀺𑀡𑀸𑀧𑀻𑀲𑀼-𑀪𑀸𑀯𑀬𑀢𑀻𑀢𑀺 𑀪𑀸𑀯𑀬𑀺𑀢𑀸 𑀪𑀸𑀯𑁂𑀢𑀸. 𑀏𑀯𑀁 𑀲𑀸𑀭𑀬𑀺𑀢𑀸 𑀲𑀸𑀭𑁂𑀢𑀸, 𑀤𑀸𑀧𑀬𑀺𑀢𑀸 𑀤𑀸𑀧𑁂𑀢𑀸, 𑀳𑀸𑀧𑀬𑀺𑀢𑀸 𑀳𑀸𑀧𑁂𑀢𑀸, 𑀦𑀺𑀭𑁄𑀥𑀬𑀺𑀢𑀸 𑀦𑀺𑀭𑁄𑀥𑁂𑀢𑀸, 𑀩𑁄𑀥𑀬𑀺𑀢𑀸 𑀩𑁄𑀥𑁂𑀢𑀸, 𑀜𑀸𑀧𑀬𑀺𑀢𑀸 𑀜𑀸𑀧𑁂𑀢𑀸, 𑀲𑀸𑀯𑀬𑀺𑀢𑀸 𑀲𑀸𑀯𑁂𑀢𑀸, 𑀕𑀸𑀳𑀬𑀺𑀢𑀸 𑀕𑀸𑀳𑁂𑀢𑀸, 𑀓𑀸𑀭𑀬𑀺𑀢𑀸 𑀓𑀸𑀭𑁂𑀢𑀸, 𑀓𑀸𑀭𑀸𑀧𑀬𑀺𑀢𑀸 𑀓𑀸𑀭𑀸𑀧𑁂𑀢𑀸 𑀇𑀘𑁆𑀘𑀸𑀤𑀺.

𑀡𑁆𑀓𑀧𑀘𑁆𑀘𑀬𑁂-𑀡𑀓𑀸𑀭𑁄 𑀯𑀼𑀤𑁆𑀥𑁆𑀬𑀢𑁆𑀣𑁄. 𑀭𑀣𑀁 𑀓𑀭𑁄𑀢𑀻𑀢𑀺 𑀭𑀣𑀓𑀸𑀭𑀓𑁄, ‘‘𑀅𑀲𑁆𑀲𑀸 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀆 𑀅𑀫𑀸𑀤𑀺𑀲𑀫𑀸𑀲𑁄 𑀘. 𑀅𑀦𑁆𑀦𑀁 𑀤𑀤𑀸𑀢𑀻𑀢𑀺 𑀅𑀦𑁆𑀦𑀤𑀸𑀬𑀓𑁄. ‘‘𑀅𑀥𑀸𑀢𑀼𑀲𑁆𑀲 𑀓𑀸+𑀲𑁆𑀬𑀸𑀤𑀺𑀢𑁄 𑀖𑁂+𑀲𑁆𑀲𑀻’’𑀢𑀺 𑀖𑁂 𑀧𑀭𑁂 𑀅𑀲𑁆𑀲 𑀇𑀆𑀤𑁂𑀲𑁄, 𑀅𑀦𑁆𑀦𑀤𑀸𑀬𑀺𑀓𑀸, 𑀅𑀦𑁆𑀦𑀤𑀸𑀬𑀓𑀁 𑀓𑀼𑀮𑀁. ‘‘𑀆𑀲𑁆𑀲𑀸+𑀡𑀸𑀧𑀺𑀫𑁆𑀳𑀺 𑀬𑀼𑀓’’ 𑀇𑀢𑀺𑀡𑀸𑀧𑀺𑀢𑁄+𑀜𑁆𑀜𑀢𑁆𑀭 𑀬𑀼𑀓. 𑀮𑁄𑀓𑀁 𑀦𑁂𑀢𑀻𑀢𑀺 𑀮𑁄𑀓𑀦𑀸𑀬𑀓𑁄, 𑀏𑀓𑀸𑀭𑁂 ‘‘𑀆𑀬𑀸+𑀯𑀸 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀆𑀬𑀸𑀤𑁂𑀲𑁄. 𑀏𑀯𑀁 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄.

𑀅𑀓𑀫𑁆𑀫𑀼𑀧𑀧𑀤𑁂-𑀓𑀭𑁄𑀢𑀻𑀢𑀺 𑀓𑀸𑀭𑀓𑁄, 𑀏𑀯𑀁 𑀤𑀸𑀬𑀓𑁄 𑀦𑀸𑀬𑀓𑁄, 𑀑𑀓𑀸𑀭𑁂 𑀆𑀯𑀸𑀤𑁂𑀲𑁂 𑀲𑀼𑀡𑀸𑀢𑀻𑀢𑀺 𑀲𑀸𑀯𑀓𑁄. 𑀧𑀼𑀭𑁂 𑀯𑀺𑀬 𑀇𑀓𑀸𑀭𑁂 𑀲𑀸𑀯𑀺𑀓𑀸. 𑀮𑀼𑀦𑀸𑀢𑀻𑀢𑀺 𑀮𑀸𑀯𑀓𑁄. 𑀧𑀼=𑀧𑀯𑀦𑁂, 𑀧𑀼𑀦𑀸𑀢𑀻𑀢𑀺 𑀧𑀸𑀯𑀓𑁄. 𑀪𑀯𑀢𑀻𑀢𑀺 𑀪𑀸𑀯𑀓𑁄, 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄. 𑀕𑀡𑁆𑀳𑀸𑀢𑀻𑀢𑀺 𑀕𑀸𑀳𑀓𑁄 𑀧𑀸𑀯𑀓𑁄, 𑀬𑀸𑀚𑀓𑁄. 𑀯𑀥=𑀳𑀺𑀁𑀲𑀸𑀬𑀁, 𑀯𑀥𑁂𑀢𑀻𑀢𑀺 𑀯𑀥𑀓𑁄, ‘‘𑀅𑀜𑁆𑀜𑀢𑁆𑀭𑀸𑀧𑀻’’𑀢𑀺 𑀯𑀼𑀤𑁆𑀥𑀺𑀧𑀝𑀺𑀲𑁂𑀥𑁄. ‘‘𑀳𑀦𑀲𑁆𑀲 𑀖𑀸𑀢𑁄 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀖𑀸𑀢𑀸𑀤𑁂𑀲𑁄, 𑀳𑀦𑀢𑀻𑀢𑀺 𑀖𑀸𑀢𑀓𑁄. ‘‘𑀫𑀁 𑀯𑀸 𑀭𑀼𑀥𑀸𑀤𑀻𑀦𑀁’’𑀢𑀺 𑀫𑀁, 𑀭𑀼𑀦𑁆𑀥𑀓𑁄, 𑀕𑀼𑀭𑀼𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀢𑀣𑀸 𑀪𑀼𑀜𑁆𑀚𑀢𑀻𑀢𑀺 𑀪𑀼𑀜𑁆𑀚𑀓𑁄. 𑀆𑀬𑀲𑁆𑀲 𑀭𑀲𑁆𑀲𑁂 𑀓𑀺𑀡𑀸𑀢𑀻𑀢𑀺 𑀓𑀬𑀓𑁄. 𑀧𑀸𑀮𑁂𑀢𑀻𑀢𑀺 𑀧𑀸𑀮𑀓𑁄. 𑀧𑀽𑀚𑁂𑀢𑀻𑀢𑀺 𑀧𑀽𑀚𑀓𑁄.

𑀔𑀸𑀤𑀻𑀲𑀼-𑀢𑀺𑀢𑀺𑀓𑁆𑀔𑀢𑀻𑀢𑀺 𑀢𑀺𑀢𑀺𑀓𑁆𑀔𑀓𑁄. 𑀯𑀻𑀫𑀁𑀲𑀢𑀻𑀢𑀺 𑀯𑀻𑀫𑀁𑀲𑀓𑁄 𑀇𑀘𑁆𑀘𑀸𑀤𑀺. 𑀧𑀦𑀼𑀤𑀢𑀻𑀢𑀺 𑀧𑀦𑀽𑀤𑀓𑁄, ‘‘𑀩𑁆𑀬𑀜𑁆𑀚𑀦𑁂’’𑀘𑁆𑀘𑀸𑀤𑀺𑀦𑀸 𑀤𑀻𑀖𑁄. ‘‘𑀪𑀻𑀢𑁆𑀯𑀸+𑀦𑀓𑁄’’𑀢𑀺 𑀏𑀢𑁆𑀣 ‘𑀆𑀦𑀓𑁄’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀆𑀦𑀓𑁄, 𑀆𑀲𑁆𑀲 𑀭𑀲𑁆𑀲𑁂 𑀦𑀓𑀸𑀭𑀸𑀕𑀫𑁂 𑀘 ‘‘𑀜𑀸𑀲𑁆𑀲 𑀦𑁂 𑀚𑀸’’𑀢𑀺 𑀚𑀸𑀤𑁂𑀲𑁄, 𑀚𑀸𑀦𑀦𑀓𑁄. 𑀡𑀸𑀧𑀺𑀫𑁆𑀳𑀺 𑁋

𑀅𑀡-𑀇𑀢𑀺 𑀤𑀡𑁆𑀟𑀓𑀥𑀸𑀢𑀼, 𑀆𑀡𑀸𑀧𑁂𑀢𑀻𑀢𑀺 𑀆𑀡𑀸𑀧𑀓𑁄. 𑀢𑀣𑀸 𑀲𑀜𑁆𑀜𑀸𑀧𑀓𑁄, 𑀧𑀢𑀺𑀝𑁆𑀞𑀸𑀧𑀓𑁄. 𑀲𑀁+𑀧 𑀧𑀼𑀩𑁆𑀩𑁄 𑀆𑀧=𑀧𑀸𑀧𑀼𑀡𑀦𑁂, 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑁂𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑁄. 𑀓𑀸𑀭𑀸𑀧𑀓𑁄, 𑀓𑀸𑀭𑀸𑀧𑀺𑀓𑀸 𑀇𑀘𑁆𑀘𑀸𑀤𑀺.

𑀩𑀳𑀼𑀮𑀁𑀯𑀺𑀥𑀸𑀦𑀸 𑀓𑀫𑁆𑀫𑁂𑀧𑀺-𑀧𑀸𑀤𑁂𑀳𑀺 𑀳𑀭𑀻𑀬𑀢𑀻𑀢𑀺 𑀧𑀸𑀤𑀳𑀸𑀭𑀓𑁄. 𑀘𑀼𑀧=𑀫𑀦𑁆𑀤𑀕𑀫𑀦𑁂, 𑀕𑀮𑁂 𑀘𑀼𑀧𑁆𑀧𑀢𑀻𑀢𑀺 𑀕𑀮𑀘𑁄𑀧𑀓𑁄.

𑀲𑀺𑀤𑁆𑀥𑁄𑀯 𑀮𑁆𑀢𑀼 𑀅𑀭𑀳𑀸𑀤𑀻𑀲𑀼 ‘‘𑀪𑀯𑀁 𑀔𑀮𑀼 𑀓𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀸𑀭𑀳𑁄’’𑀢𑀺 (𑀧𑀭𑀺𑀕𑁆𑀕𑀳𑀺𑀢𑀸). 𑀲𑀻𑀮𑀢𑁆𑀣𑁂-𑀉𑀧𑀸𑀤𑀸𑀦𑀲𑀻𑀮𑁄𑀢𑀺 𑀉𑀧𑀸𑀤𑀸𑀢𑀸. 𑀲𑀸𑀥𑀼 𑀕𑀘𑁆𑀙𑀢𑀻𑀢𑀺 𑀕𑀦𑁆𑀢𑀸. 𑀫𑀼𑀡𑁆𑀟𑀦𑀥𑀫𑁆𑀫𑀸 𑀫𑀼𑀡𑁆𑀟𑀦𑀸𑀘𑀸𑀭𑀸𑀢𑀺 𑀫𑀼𑀡𑁆𑀟𑀬𑀺𑀢𑀸𑀭𑁄, 𑀏𑀢𑁆𑀣 ‘‘𑀥𑀸𑀢𑁆𑀯𑀢𑁆𑀣𑁂 𑀦𑀸𑀫𑀲𑁆𑀫𑀻’’𑀢𑀺 𑀇𑀫𑁆𑀳𑀺 𑀊𑀆𑀕𑀫𑁂 𑀏+𑀅𑀬𑀸𑀤𑁂𑀲𑁂 𑀫𑀼𑀡𑁆𑀟𑀬𑀺𑀢𑀼𑀲𑀤𑁆𑀤𑀫𑁆𑀳𑀺 𑀆𑀭𑀗𑀸𑀤𑁂𑀲𑁂 𑀘 𑀓𑀢𑁂 𑀬𑁄𑀲𑁆𑀲 𑀝𑁄.

𑁩𑁪. 𑀆𑀯𑀻

𑀓𑁆𑀭𑀺𑀬𑀢𑁆𑀣𑀸 𑀆𑀯𑀻 𑀳𑁄𑀢𑀺 𑀩𑀳𑀼𑀮𑀁 𑀓𑀢𑁆𑀢𑀭𑀺. ‘‘𑀤𑀺𑀲𑀲𑁆𑀲 𑀧𑀲𑁆𑀲+𑀤𑀲𑁆𑀲=𑀤𑀲+𑀤+𑀤𑀓𑁆𑀔𑀸’’𑀢𑀺 𑀤𑀲𑁆𑀲𑀸𑀤𑁂𑀲𑁄, 𑀪𑀬𑀁 𑀧𑀲𑁆𑀲𑀢𑀻𑀢𑀺 𑀪𑀬𑀤𑀲𑁆𑀲𑀸𑀯𑀻. 𑀦𑀻𑀫𑁆𑀳𑀺 𑀪𑀬𑀤𑀲𑁆𑀲𑀸𑀯𑀺𑀦𑀻. 𑀪𑀬𑀤𑀲𑁆𑀲𑀸𑀯𑀺 𑀘𑀺𑀢𑁆𑀢𑀁. 𑀅𑀧𑁆𑀧𑀯𑀺𑀲𑀬𑀢𑀸𑀜𑀸𑀧𑀦𑀢𑁆𑀣𑀁 𑀪𑀺𑀦𑁆𑀦𑀬𑁄𑀕𑀓𑀭𑀡𑀁. 𑀲𑀸𑀫𑀜𑁆𑀜𑀯𑀺𑀳𑀺𑀢𑀢𑁆𑀢𑀸 𑀲𑀻𑀮𑀸𑀤𑀻𑀲𑀼 𑀘 𑀳𑁄𑀢𑁂𑀯.

𑁩𑁫. 𑀆𑀲𑀺𑀁𑀲𑀸𑀬+𑀫𑀓𑁄

𑀆𑀲𑀺𑀁𑀲𑀸𑀬𑀁 𑀕𑀫𑁆𑀫𑀫𑀸𑀦𑀸𑀬𑀁 𑀓𑁆𑀭𑀺𑀬𑀢𑁆𑀣𑀸 𑀅𑀓𑁄 𑀳𑁄𑀢𑀺 𑀓𑀢𑁆𑀢𑀭𑀺. 𑀚𑀻𑀯=𑀧𑀸𑀡𑀥𑀸𑀭𑀡𑁂, 𑀚𑀻𑀯𑀢𑀽𑀢𑀺 𑀚𑀻𑀯𑀓𑁄. 𑀦𑀦𑁆𑀤=𑀲𑀫𑀺𑀤𑁆𑀥𑀺𑀬𑀁, 𑀦𑀦𑁆𑀤𑀢𑀽𑀢𑀺 𑀦𑀦𑁆𑀤𑀓𑁄. 𑀪𑀯𑀢𑀽𑀢𑀺 𑀪𑀯𑀓𑁄.

𑁩𑁬. 𑀓𑀭𑀸 𑀡𑀦𑁄

𑀓𑀭𑀢𑁄 𑀓𑀢𑁆𑀢𑀭𑀺 𑀡 𑀦𑁄 𑀳𑁄𑀢𑀺. 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁. 𑀓𑀢𑁆𑀢𑀭𑀻𑀢𑀺 𑀓𑀺𑀁, 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀓𑀭𑀡𑀁.

𑁩𑁭. 𑀳𑀸𑀢𑁄 𑀯𑀻𑀳𑀺+𑀓𑀸𑀮𑁂𑀲𑀼

𑀳𑀸𑀢𑁄 𑀯𑀻𑀳𑀺𑀲𑁆𑀫𑀺𑀁 𑀓𑀸𑀮𑁂 𑀘 𑀡𑀦𑁄 𑀳𑁄𑀢𑀺. ‘‘𑀆𑀲𑁆𑀲𑀸’’𑀢𑁆𑀬𑀸𑀤𑀺𑀦𑀸 𑀬𑀼𑀓, 𑀚𑀳𑀦𑁆𑀢𑀺 𑀉𑀤𑀓𑀁𑀢𑀺 𑀳𑀸𑀬𑀦𑀸 𑀯𑀻𑀳𑀬𑁄. 𑀚𑀳𑀸𑀢𑀺 𑀪𑀸𑀯𑁂 𑀧𑀤𑀢𑁆𑀣𑁂𑀢𑀺 𑀳𑀸𑀬𑀦𑁄 𑀲𑀁𑀯𑀘𑁆𑀙𑀭𑁄. 𑀯𑀻𑀳𑀺𑀓𑀸𑀮𑁂𑀲𑀽𑀢𑀺 𑀓𑀺𑀁, 𑀚𑀳𑀸𑀢𑀻𑀢𑀺 𑀳𑀸𑀢𑀸.

𑁩𑁮. 𑀯𑀺𑀤𑀸 𑀓𑀽

𑀯𑀺𑀤𑀲𑁆𑀫𑀸 𑀓𑀽 𑀳𑁄𑀢𑀺 𑀓𑀢𑁆𑀢𑀭𑀺. 𑀓𑀓𑀸𑀭𑁄 ‘‘𑀓𑀽𑀢𑁄’’𑀢𑀺 𑀯𑀺𑀲𑁂𑀲𑀦𑀢𑁆𑀣𑁄. 𑀯𑀺𑀤𑀢𑀻𑀢𑀺 𑀯𑀺𑀤𑀽, 𑀮𑁄𑀓𑀯𑀺𑀤𑀽.

𑁩𑁯. 𑀯𑀺𑀢𑁄 𑀜𑀸𑀢𑁄

𑀯𑀺𑀧𑀼𑀩𑁆𑀩𑀸 𑀜𑀸𑀇𑀘𑁆𑀘+𑀲𑁆𑀫𑀸 𑀓𑀽 𑀳𑁄𑀢𑀺 𑀓𑀢𑁆𑀢𑀭𑀺. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀽.

𑁪𑁦. 𑀓𑀫𑁆𑀫𑀸

𑀓𑀫𑁆𑀫𑀢𑁄 𑀧𑀭𑀸 𑀜𑀸𑀇𑀘𑁆𑀘+𑀲𑁆𑀫𑀸 𑀓𑀽 𑀳𑁄𑀢𑀺 𑀓𑀢𑁆𑀢𑀭𑀺. 𑀲𑀩𑁆𑀩𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽. 𑀏𑀯𑀁 𑀫𑀢𑁆𑀢𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽 𑀓𑀸𑀮𑀜𑁆𑀜𑀽, 𑀓𑀢𑀜𑁆𑀜𑀽 𑀇𑀘𑁆𑀘𑀸𑀤𑀺. (𑀪𑀺𑀓𑁆𑀔𑀽𑀢𑀺 𑀧𑀦 ‘‘𑀪𑀭𑀸𑀤𑀺’’ 𑀡𑁆𑀯𑀸𑀤𑀺𑀲𑀼𑀢𑁆𑀢𑁂𑀦 𑀲𑀺𑀤𑁆𑀥𑀁).

𑁪𑁧. 𑀓𑁆𑀯𑀘𑀡

𑀓𑀫𑁆𑀫𑀢𑁄 𑀧𑀭𑀸 𑀓𑁆𑀭𑀺𑀬𑀢𑁆𑀣𑀸 𑀓𑁆𑀯𑀘𑀺 𑀅𑀡 𑀳𑁄𑀢𑀺 𑀓𑀢𑁆𑀢𑀭𑀺. 𑀓𑀼𑀫𑁆𑀪𑀁 𑀓𑀭𑁄𑀢𑀻𑀢𑀺 𑀓𑀼𑀫𑁆𑀪𑀓𑀸𑀭𑁄, 𑀅𑀫𑀸𑀤𑀺𑀲𑀫𑀸𑀲𑁄. 𑀇𑀢𑁆𑀣𑀺𑀬𑀁 𑀓𑀼𑀫𑁆𑀪𑀓𑀸𑀭𑀻. 𑀏𑀯𑀁 𑀓𑀫𑁆𑀫𑀓𑀸𑀭𑁄, 𑀫𑀸𑀲𑀸𑀓𑀸𑀭𑁄, 𑀓𑀝𑁆𑀞𑀓𑀸𑀭𑁄, 𑀭𑀣𑀓𑀸𑀭𑁄 𑀲𑀼𑀯𑀡𑁆𑀡𑀓𑀸𑀭𑁄, 𑀲𑀼𑀢𑁆𑀢𑀓𑀸𑀭𑁄, 𑀯𑀼𑀢𑁆𑀢𑀺𑀓𑀸𑀭𑁄, 𑀝𑀻𑀓𑀸𑀓𑀸𑀭𑁄. 𑀲𑀭𑀁 𑀮𑀼𑀦𑀸𑀢𑀻𑀢𑀺 𑀲𑀭𑀮𑀸𑀯𑁄𑀢𑀺 𑀑+𑀅𑀯𑀸𑀤𑁂𑀲𑀸. 𑀫𑀦𑁆𑀢𑁂 𑀅𑀚𑁆𑀛𑀸𑀬𑀢𑀻𑀢𑀺 𑀫𑀦𑁆𑀣𑀚𑁆𑀛𑀸𑀬𑁄, 𑀇=𑀅𑀚𑁆𑀛𑁂𑀦𑀕𑀢𑀻𑀲𑀼, 𑀅𑀥𑀺𑀧𑀼𑀩𑁆𑀩𑁄, 𑀏+𑀅𑀬𑀸𑀤𑁂𑀲𑀸, 𑀅𑀥𑀺𑀦𑁄 𑀇𑀲𑁆𑀲 𑀬𑀓𑀸𑀭+𑀘𑀯𑀕𑁆𑀕𑀸𑀤𑀬𑁄 𑀘.

𑀩𑀳𑀼𑀮𑀸𑀥𑀺𑀓𑀸𑀭𑀸 𑀇𑀳 𑀦 𑀳𑁄𑀢𑀺 ‘‘𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺, 𑀳𑀺𑀫𑀯𑀦𑁆𑀢𑀁 𑀲𑀼𑀡𑁄𑀢𑀺, 𑀕𑀸𑀫𑀁 𑀕𑀘𑁆𑀙𑀢𑀺’’. 𑀓𑁆𑀯𑀘𑀻𑀢𑀺 𑀓𑀺𑀁, 𑀓𑀫𑁆𑀫𑀓𑀭𑁄, 𑀏𑀢𑁆𑀣 𑀅𑀧𑀘𑁆𑀘𑀬𑁄.

𑁪𑁨. 𑀕𑀫𑀸 𑀭𑀽

𑀓𑀫𑁆𑀫𑀢𑁄 𑀧𑀭𑀸 𑀕𑀫𑀸 𑀭𑀽 𑀳𑁄𑀢𑀺 𑀓𑀢𑁆𑀢𑀭𑀺. 𑀭𑀸𑀦𑀼𑀩𑀦𑁆𑀥𑀢𑁆𑀢𑀸 𑀅𑀫𑀪𑀸𑀕𑀮𑁄𑀧𑁄. 𑀯𑁂𑀤𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀕𑀽, 𑀏𑀯𑀁 𑀧𑀸𑀭𑀕𑀽.

𑀲𑀸𑀫𑀜𑁆𑀜𑀯𑀺𑀥𑀸𑀦𑀢𑁄 𑀲𑀻𑀮𑀸𑀤𑀻𑀲𑀼𑀧𑀺 𑀳𑁄𑀢𑀺. 𑀪𑀯𑀧𑀸𑀭𑀁 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀪𑀯𑀧𑀸𑀭𑀕𑀽. 𑀅𑀦𑁆𑀢𑀕𑀫𑀦𑀲𑀻𑀮𑁄 𑀅𑀦𑁆𑀢𑀕𑀽, 𑀏𑀯𑀁 𑀅𑀤𑁆𑀥𑀕𑀽.

𑁪𑁩. 𑀲𑀫𑀸𑀦+𑀜𑁆𑀜+𑀪𑀯𑀦𑁆𑀢+𑀬𑀸𑀤𑀺𑀢𑀽+𑀧𑀫𑀸𑀦𑀸 𑀤𑀺𑀲𑀸 𑀓𑀫𑁆𑀫𑁂 𑀭𑀻+𑀭𑀺𑀓𑁆𑀔+𑀓𑀸

𑀲𑀫𑀸𑀦𑀸𑀤𑀻𑀳𑀺 𑀬𑀸𑀤𑀻𑀳𑀺 𑀘𑁄+𑀧𑀫𑀸𑀦𑁂𑀳𑀺 𑀧𑀭𑀸 𑀤𑀺𑀲𑀸 𑀓𑀫𑁆𑀫𑀓𑀸𑀭𑀓𑁂 𑀭𑀻+𑀭𑀺𑀓𑁆𑀔+𑀓𑀸 𑀳𑁄𑀦𑁆𑀢𑀺. ‘‘𑀲𑁆𑀬𑀸𑀤𑀺 𑀲𑁆𑀬𑀸𑀤𑀺𑀦𑁂+𑀓𑀢𑁆𑀣𑀁’’𑀢𑀺 𑀲𑀫𑀸𑀲𑁂 ‘‘𑀭𑀸𑀦𑀼𑀩𑀦𑁆𑀥𑁂+𑀦𑁆𑀢𑀲𑀭𑀸𑀤𑀺𑀲𑁆𑀲𑀸’’𑀢𑀺 𑀤𑀺𑀲𑀲𑁆𑀲 𑀇𑀲𑀪𑀸𑀕𑀮𑁄𑀧𑁂 ‘‘𑀭𑀻𑀭𑀺𑀓𑁆𑀔𑀓𑁂𑀲𑀽’’𑀢𑀺 𑀲𑀫𑀸𑀦𑀲𑁆𑀲 𑀲𑀸𑀤𑁂𑀲𑁂 𑀘 𑀲𑀫𑀸𑀦𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀲𑀤𑀻, 𑀲𑀤𑀺𑀓𑁆𑀔𑁄. 𑀓𑁂 𑁋 ‘‘𑀦 𑀢𑁂 𑀓𑀸𑀦𑀼𑀩𑀦𑁆𑀥𑀦𑀸𑀕𑀫𑁂𑀲𑀽’’𑀢𑀺 𑀏𑀢𑁆𑀢𑀸𑀪𑀸𑀯𑁄, 𑀲𑀤𑀺𑀲𑁄.

𑁧𑁨𑁫. 𑀲𑀫𑀸𑀦𑀸 𑀭𑁄 𑀭𑀻+𑀭𑀺𑀓𑁆𑀔+𑀓𑁂𑀲𑀼

𑀲𑀫𑀸𑀦𑀲𑀤𑁆𑀤𑀢𑁄 𑀧𑀭𑀲𑁆𑀲 𑀤𑀺𑀲𑀲𑁆𑀲 𑀭 𑀳𑁄𑀢𑀺 𑀯𑀸 𑀭𑀻+𑀭𑀺𑀓𑁆𑀔+𑀓𑁂𑀲𑀽𑀢𑀺 𑀧𑀓𑁆𑀔𑁂 𑀤𑀲𑁆𑀲 𑀭𑀸𑀤𑁂𑀲𑁂 𑀲𑀭𑀻, 𑀲𑀭𑀺𑀓𑁆𑀔𑁄, 𑀲𑀭𑀺𑀲𑁄.

𑁩,𑁮𑁬. 𑀲𑀩𑁆𑀩𑀸𑀤𑀻𑀦+𑀫𑀸

𑀭𑀻+𑀭𑀺𑀓𑁆𑀔+𑀓𑁂𑀲𑀼 𑀲𑀩𑁆𑀩𑀸𑀤𑀻𑀦+𑀫𑀸 𑀳𑁄𑀢𑀺. 𑀅𑀜𑁆𑀜𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀅𑀜𑁆𑀜𑀸𑀤𑀻, 𑀅𑀜𑁆𑀜𑀸𑀤𑀺𑀓𑁆𑀔𑁄, 𑀅𑀜𑁆𑀜𑀸𑀤𑀺𑀲𑁄.

𑁩,𑁮𑁭. 𑀦𑁆𑀢+𑀓𑀺+𑀫𑀺+𑀫𑀸𑀦𑀁 𑀝𑀸+𑀓𑀻+𑀝𑀻

𑀭𑀻+𑀭𑀺𑀓𑁆𑀔+𑀓𑁂𑀲𑀼 𑀦𑁆𑀢+𑀓𑀺𑀁+𑀇𑀫𑀲𑀤𑁆𑀤𑀸𑀦𑀁 𑀝𑀸+𑀓𑀻+𑀝𑀻 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀝𑀓𑀸𑀭𑀸 𑀲𑀩𑁆𑀩𑀸𑀤𑁂𑀲𑀢𑁆𑀣𑀸. 𑀪𑀯𑀸𑀤𑀻 𑀪𑀯𑀸𑀤𑀺𑀓𑁆𑀔𑁄 𑀪𑀯𑀸𑀤𑀺𑀲𑁄, 𑀓𑀻𑀤𑀻 𑀓𑀻𑀤𑀺𑀓𑁆𑀔𑁄 𑀓𑀻𑀤𑀺𑀲𑁄, 𑀅𑀬𑀫𑀺𑀯 𑀤𑀺𑀲𑁆𑀲𑀢𑀻𑀢𑀺 𑀈𑀤𑀻 𑀈𑀤𑀺𑀓𑁆𑀔𑁄 𑀈𑀤𑀺𑀲𑁄. 𑀆𑀓𑀸𑀭𑁂 𑀬𑀸𑀤𑀻 𑀬𑀸𑀤𑀺𑀓𑁆𑀔𑁄 𑀬𑀸𑀤𑀺𑀲𑁄, 𑀢𑁆𑀬𑀸𑀤𑀻 𑀢𑁆𑀬𑀸𑀤𑀺𑀓𑁆𑀔𑁄 𑀢𑁆𑀬𑀸𑀤𑀺𑀲𑁄 𑀇𑀘𑁆𑀘𑀸𑀤𑀺.

𑁩,𑁮𑁮. 𑀢𑀼𑀫𑁆𑀳𑀸𑀫𑁆𑀳𑀸𑀦𑀁 𑀢𑀸𑀫𑁂+𑀓𑀲𑁆𑀫𑀺𑀁

𑀭𑀻+𑀭𑀺𑀓𑁆𑀔+𑀓𑁂𑀲𑀼 𑀢𑀼𑀫𑁆𑀳𑀸𑀫𑁆𑀳𑀸𑀦𑀁 𑀢𑀸𑀫𑀸 𑀳𑁄𑀦𑁆𑀢𑁂+𑀓𑀲𑁆𑀫𑀺𑀁 𑀬𑀣𑀸𑀓𑁆𑀓𑀫𑀁. 𑀢𑁆𑀯𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀅𑀬𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀢𑀸𑀤𑀻 𑀫𑀸𑀤𑀻 𑀇𑀘𑁆𑀘𑀸𑀤𑀺. 𑀏𑀓𑀲𑁆𑀫𑀺𑀦𑁆𑀢𑀺 𑀓𑀺𑀁, 𑀢𑀼𑀫𑁆𑀳𑀸𑀤𑀺𑀲𑁄 𑀅𑀫𑁆𑀳𑀸𑀤𑀺𑀲𑁄.

𑁩,𑁮𑁯. 𑀢𑀁+𑀫+𑀫𑀜𑁆𑀜𑀢𑁆𑀭

𑀭𑀻𑀭𑀺𑀓𑁆𑀔𑀓𑀦𑁆𑀢𑀢𑁄+𑀜𑁆𑀜𑀲𑁆𑀫𑀺𑀁 𑀉𑀢𑁆𑀢𑀭𑀧𑀤𑁂 𑀢𑀼𑀫𑁆𑀳𑀸𑀫𑁆𑀳𑀸𑀦+𑀫𑁂𑀓𑀲𑁆𑀫𑀺𑀁 𑀢𑀁+𑀫𑀁 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀢𑁆𑀯𑀁 𑀤𑀻𑀧𑁄 𑀏𑀲𑀁, 𑀅𑀳𑀁 𑀤𑀻𑀧𑁄 𑀏𑀲𑀁𑀢𑀺 𑀅𑀜𑁆𑀜𑀧𑀤𑀢𑁆𑀣𑁂 𑀢𑀁𑀤𑀻𑀧𑀸 𑀫𑀁𑀤𑀻𑀧𑀸. 𑀢𑁆𑀯𑀁 𑀲𑀭𑀡+𑀫𑁂𑀲𑀁, 𑀅𑀳𑀁 𑀲𑀭𑀡+ 𑀫𑁂𑀲𑀦𑁆𑀢𑀺 𑀢𑀁𑀲𑀭𑀡𑀸 𑀫𑀁𑀲𑀭𑀡𑀸. 𑀢𑀬𑀸 𑀬𑁄𑀕𑁄 𑀢𑀬𑁆𑀬𑁄𑀕𑁄, 𑀫𑀬𑀸 𑀬𑁄𑀕𑁄 𑀫𑀬𑁆𑀬𑁄𑀕𑁄𑀢𑀺 𑀅𑀫𑀸𑀤𑀺𑀲𑀫𑀸𑀲𑁂 𑀦𑀺𑀕𑁆𑀕𑀳𑀻𑀢𑀮𑁄𑀧𑁄.

𑁩,𑁯𑁦. 𑀯𑁂+𑀢𑀲𑁆𑀲𑁂+𑀝

𑀭𑀻+𑀭𑀺𑀓𑁆𑀔+𑀓𑁂𑀲𑀼 𑀏𑀢𑀲𑁆𑀲 𑀏𑀝 𑀯𑀸 𑀳𑁄𑀢𑀺. 𑀏𑀤𑀻 𑀏𑀢𑀸𑀤𑀻, 𑀏𑀤𑀺𑀓𑁆𑀔𑁄 𑀏𑀢𑀸𑀤𑀺𑀓𑁆𑀔𑁄, 𑀏𑀤𑀺𑀲𑁄 𑀏𑀢𑀸𑀤𑀺𑀲𑁄.

𑁪𑁪. 𑀪𑀸𑀯𑀓𑀸𑀭𑀓𑁂 𑀲𑁆𑀯+𑀖𑀡 𑀖 𑀓𑀸

𑀪𑀸𑀯𑁂 𑀓𑀸𑀭𑀓𑁂 𑀘 𑀓𑁆𑀭𑀺𑀬𑀢𑁆𑀣𑀸 𑀅 𑀖𑀡 𑀖 𑀓𑀸 𑀳𑁄𑀦𑁆𑀢𑀺 𑀩𑀳𑀼𑀮𑀁.

𑀅𑀧𑀘𑁆𑀘𑀬𑁄-𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀳𑁄, 𑀏𑀯𑀁 𑀦𑀺𑀕𑁆𑀕𑀳𑁄, 𑀥𑀫𑁆𑀫𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀭𑁄, 𑀏𑀯𑀁 𑀯𑀺𑀦𑀬𑀥𑀭𑁄. 𑀢𑀣𑀸 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀤𑁆𑀯𑀺𑀢𑁆𑀢𑀁. 𑀏𑀯𑀁 𑀳𑀺𑀢𑀓𑀭𑁄, 𑀤𑀺𑀯𑀲𑀓𑀭𑁄, 𑀤𑀺𑀦𑀓𑀭𑁄, 𑀤𑀺𑀯𑀸𑀓𑀭𑁄, 𑀦𑀺𑀲𑀸𑀓𑀭𑁄, 𑀥𑀦𑀼𑀁 𑀕𑀡𑁆𑀳𑀻𑀢𑀺 𑀥𑀦𑀼𑀕𑁆𑀕𑀳𑁄. 𑀏𑀯𑀁 𑀓𑀯𑀘𑀕𑁆𑀕𑀳𑁄. 𑀤𑀤=𑀤𑀸𑀦𑁂, 𑀲𑀩𑁆𑀩𑀓𑀸𑀫𑀁 𑀤𑀤𑀸𑀢𑀻𑀢𑀺 𑀲𑀩𑁆𑀩𑀓𑀸𑀫𑀤𑀤𑁄, 𑀲𑀩𑁆𑀩𑀤𑀤𑁄. 𑀆𑀢𑁄 ‘‘𑀧𑀭𑁄𑀓𑁆𑀔𑀸𑀬𑀜𑁆𑀘𑀸’’𑀢𑀺 𑀘𑀕𑁆𑀕𑀳𑀡𑁂𑀦 𑀤𑁆𑀯𑀺𑀢𑁆𑀢𑁂 ‘‘𑀭𑀲𑁆𑀲𑁄 𑀧𑀼𑀩𑁆𑀩𑀲𑁆𑀲𑀸’’𑀢𑀺 𑀭𑀲𑁆𑀲𑁂 𑀘 𑀅𑀦𑁆𑀦𑀁 𑀤𑀤𑀸𑀢𑀻𑀢𑀺 𑀅𑀦𑁆𑀦𑀤𑀤𑁄, 𑀏𑀯𑀁 𑀥𑀦𑀤𑁄. 𑀲𑀁𑀧𑀼𑀩𑁆𑀩𑁄 𑀥𑀸=𑀥𑀸𑀭𑀡𑁂, 𑀲𑀩𑁆𑀩𑀁 𑀲𑀦𑁆𑀥𑀳𑀢𑀻𑀢𑀺 𑀲𑀩𑁆𑀩𑀲𑀦𑁆𑀥𑁄. 𑀦𑀻=𑀧𑀸𑀧𑀦𑁂, 𑀯𑀺𑀧𑀼𑀩𑁆𑀩𑁄, 𑀯𑀺𑀦𑁂𑀲𑀺 𑀯𑀺𑀦𑁂𑀢𑀺 𑀯𑀺𑀦𑁂𑀲𑁆𑀲𑀢𑀺 𑀏𑀢𑁂𑀦 𑀏𑀢𑁆𑀣𑀸𑀢𑀺 𑀯𑀸 𑀯𑀺𑀦𑀬𑁄, 𑀏+𑀅𑀬𑀸𑀤𑁂𑀲𑀸. 𑀦𑀬𑀦𑀁 𑀦𑀬𑁄. 𑀲𑀺=𑀲𑁂𑀯𑀸𑀬𑀁, 𑀦𑀺𑀧𑀼𑀩𑁆𑀩𑁄, 𑀦𑀺𑀲𑁆𑀲𑀻𑀬𑀢𑀻𑀢𑀺 𑀦𑀺𑀲𑁆𑀲𑀬𑁄. 𑀲𑀺=𑀲𑀬𑁂, 𑀅𑀦𑀼𑀲𑀬𑀺 𑀅𑀦𑀼𑀲𑁂𑀢𑀺 𑀅𑀦𑀼𑀲𑁂𑀲𑁆𑀲𑀢𑀻𑀢𑀺 𑀅𑀦𑀼𑀲𑀬𑁄. 𑀇=𑀕𑀢𑀺𑀫𑁆𑀳𑀺, 𑀧𑀢𑀺𑀧𑀼𑀩𑁆𑀩𑁄, 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀨𑀮+𑀫𑁂𑀢𑀻𑀢𑀺 𑀧𑀘𑁆𑀘𑀬𑁄. 𑀲𑀁+𑀉𑀧𑀼𑀩𑁆𑀩𑁄, 𑀤𑀸𑀕𑀫𑁂 𑀲𑀫𑀼𑀤𑀬𑁄. 𑀘𑀺=𑀘𑀬𑁂, 𑀯𑀺𑀦𑀺𑀘𑁆𑀙𑀬𑀢𑁂+𑀦𑁂𑀦 𑀯𑀺𑀦𑀺𑀘𑁆𑀙𑀬𑀦𑀁 𑀯𑀸 𑀯𑀺𑀦𑀺𑀘𑁆𑀙𑀬𑁄, ‘‘𑀦𑀺𑀢𑁄 𑀘𑀺𑀲𑁆𑀲 𑀙𑁄’’𑀢𑀺 𑀘𑀺𑀲𑁆𑀲 𑀙𑁄. 𑀉𑀘𑁆𑀘𑀬𑀦𑀁 𑀉𑀘𑁆𑀘𑀬𑁄, 𑀲𑀁𑀘𑀬𑁄. 𑀔𑀺=𑀔𑀬𑁂, 𑀔𑀬𑀦𑀁 𑀔𑀬𑁄. 𑀚𑀺=𑀚𑀬𑁂, 𑀯𑀺𑀚𑀬𑀦𑀁 𑀯𑀺𑀚𑀬𑁄, 𑀚𑀬𑁄. 𑀓𑀻=𑀤𑀩𑁆𑀩𑀯𑀺𑀦𑀻𑀫𑀬𑁂, 𑀯𑀺𑀓𑁆𑀓𑀬𑀦𑀁 𑀯𑀺𑀓𑁆𑀓𑀬𑁄, 𑀓𑀬𑁄. 𑀮𑀻=𑀲𑀺𑀮𑁂𑀲𑀦𑁂, 𑀅𑀮𑁆𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀮𑀬𑁄, 𑀮𑀬𑁄. (𑀇𑀯𑀡𑁆𑀡𑀦𑁆𑀢𑀸).

𑀆𑀲𑀼𑀡𑀦𑁆𑀢𑀻𑀢𑀺 𑀅𑀲𑁆𑀲𑀯𑀸, 𑀆𑀲𑁆𑀲 𑀭𑀲𑁆𑀲𑁄. 𑀧𑀝𑀺𑀲𑁆𑀲𑀯𑀦𑀁 𑀧𑀝𑀺𑀲𑁆𑀲𑀯𑁄. 𑀲𑀼=𑀧𑀲𑁆𑀲𑀯𑀦𑁂, 𑀆𑀪𑀯𑀕𑁆𑀕𑀸 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸. 𑀭𑀼=𑀲𑀤𑁆𑀤𑁄 𑀭𑀯𑀢𑀻𑀢𑀺 𑀭𑀯𑁄. 𑀪𑀯𑀢𑀻𑀢𑀺 𑀪𑀯𑁄. 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄. 𑀮𑀽=𑀙𑁂𑀤𑀦𑁂, 𑀮𑀯𑀦𑀁 𑀮𑀯𑁄. (𑀉𑀯𑀡𑁆𑀡𑀦𑁆𑀢𑀸).

𑀘𑀭=𑀘𑀭𑀡𑁂, 𑀲𑀁𑀘𑀭𑀡𑀁 𑀲𑀁𑀘𑀭𑁄. 𑀤𑀭=𑀯𑀺𑀤𑀸𑀭𑀡𑁂, 𑀆𑀤𑀭𑀦𑀁 𑀆𑀤𑀭𑁄. 𑀆𑀕𑀘𑁆𑀙𑀢𑀺 𑀆𑀕𑀫𑀦𑀁𑀢𑀺 𑀯𑀸 𑀆𑀕𑀫𑁄. 𑀲𑀧𑁆𑀧=𑀕𑀫𑀦𑁂, 𑀲𑀧𑁆𑀧𑀢𑀻𑀢𑀺 𑀲𑀧𑁆𑀧𑁄. 𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑁄. 𑀧𑀓𑁆𑀓𑀫𑀦𑀁 𑀧𑀓𑁆𑀓𑀫𑀢𑀻𑀢𑀺 𑀯𑀸 𑀧𑀓𑁆𑀓𑀫𑁄, 𑀏𑀯𑀁 𑀯𑀺𑀓𑁆𑀓𑀫𑁄. 𑀘𑀭=𑀘𑀭𑀡𑁂, 𑀯𑀦𑀁 𑀘𑀭𑀢𑀻𑀢𑀺 𑀯𑀦𑀘𑀭𑁄. 𑀓𑀸𑀫𑁄 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀓𑀸𑀫𑀸𑀯𑀘𑀭𑁄 𑀮𑁄𑀓𑁄, 𑀓𑀸𑀫𑀸𑀯𑀘𑀭𑀸 𑀧𑀜𑁆𑀜𑀸, 𑀓𑀸𑀫𑀸𑀯𑀘𑀭𑀁 𑀘𑀺𑀢𑁆𑀢𑀁. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄. 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄. 𑀏𑀯𑀁 𑀓𑀘𑁆𑀙𑀧𑁄. 𑀲𑀺𑀭𑀲𑁆𑀫𑀺𑀁 𑀭𑀼𑀳𑀢𑀻𑀢𑀺 𑀲𑀺𑀭𑁄𑀭𑀼𑀳𑁄, 𑀫𑀦𑀸𑀤𑀺𑀢𑁆𑀢𑀸 𑀑. 𑀕𑀼𑀳𑀸𑀬𑀁 𑀲𑀬𑀢𑀻𑀢𑀺 𑀕𑀼𑀳𑀸𑀲𑀬𑀁 𑀘𑀺𑀢𑁆𑀢𑀁, 𑀏𑀯𑀁 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸. 𑀧𑀩𑁆𑀩𑀢𑁂 𑀢𑀺𑀝𑁆𑀞𑀢𑀻𑀢𑀺 𑀧𑀩𑁆𑀩𑀢𑀝𑁆𑀞𑁄 𑀧𑀼𑀭𑀺𑀲𑁄, 𑀧𑀩𑁆𑀩𑀢𑀝𑁆𑀞𑀸 𑀦𑀤𑀻, 𑀧𑀩𑁆𑀩𑀢𑀝𑁆𑀞𑀁 𑀪𑀲𑁆𑀫𑀁. 𑀏𑀯𑀁 𑀣𑀮𑀝𑁆𑀞𑀁 𑀚𑀮𑀝𑁆𑀞𑀁.

𑀓𑀺𑀘𑁆𑀙𑀢𑁆𑀣𑁂 𑀤𑀼𑀫𑁆𑀳𑀺 𑀅𑀓𑀺𑀘𑁆𑀙𑀢𑁆𑀣𑁂 𑀲𑀼+𑀈𑀲𑀁+𑀲𑀼𑀔 𑀉𑀧𑀧𑀤𑁂𑀲𑀼-𑀤𑀼𑀓𑁆𑀔𑁂𑀦 𑀓𑀭𑀻𑀬𑀢𑀺 𑀓𑀭𑀡𑀁 𑀯𑀸 𑀤𑀼𑀓𑁆𑀓𑀭𑀁. 𑀏𑀯𑀁 𑀤𑀼𑀲𑁆𑀲𑀬𑁄, 𑀤𑀼𑀓𑁆𑀔𑁂𑀦 𑀪𑀭𑀻𑀬𑀢𑀻𑀢𑀺 𑀤𑀼𑀩𑁆𑀪𑀭𑁄 𑀫𑀳𑀺𑀘𑁆𑀙𑁄. 𑀏𑀯𑀁 𑀤𑀼𑀭𑀓𑁆𑀔𑀁 𑀘𑀺𑀢𑁆𑀢𑀁, 𑀤𑀼𑀤𑁆𑀤𑀲𑁄 𑀥𑀫𑁆𑀫𑁄, 𑀤𑀼𑀭𑀦𑀼𑀩𑁄𑀥𑁄 𑀥𑀫𑁆𑀫𑁄. 𑀈𑀲𑀁 𑀲𑀬𑀢𑀻𑀢𑀺 𑀈𑀲𑀁𑀲𑀬𑁄, 𑀏𑀯𑀁 𑀲𑀼𑀔𑀲𑀬𑁄. 𑀈𑀲𑀁 𑀓𑀭𑀻𑀬𑀢𑀻𑀢𑀺 𑀈𑀲𑀓𑁆𑀓𑀭𑀁 𑀓𑀫𑁆𑀫𑀁. 𑀲𑀼𑀔𑁂𑀦 𑀓𑀭𑀻𑀬𑀢𑀻𑀢𑀺 𑀲𑀼𑀓𑀭𑀁 𑀧𑀸𑀧𑀁 𑀩𑀸𑀮𑁂𑀦. 𑀏𑀯𑀁 𑀲𑀼𑀪𑀭𑁄 𑀅𑀧𑁆𑀧𑀺𑀘𑁆𑀙𑁄, 𑀲𑀼𑀤𑀲𑁆𑀲𑀁 𑀧𑀭𑀯𑀚𑁆𑀚𑀁, 𑀲𑀼𑀩𑁄𑀥+𑀫𑀺𑀘𑁆𑀘𑀸𑀤𑀺. 𑀲𑀩𑁆𑀩𑀢𑁆𑀣 𑀧𑀸𑀤𑀺𑀅𑀫𑀸𑀤𑀺𑀲𑀫𑀸𑀲𑀸.

𑀖𑀡-𑀪𑀯𑀢𑀻𑀢𑀺 𑀪𑀸𑀯𑁄, 𑀑+𑀆𑀯𑀸𑀤𑁂𑀲𑀸. 𑀅𑀬=𑀇𑀢𑀺 𑀤𑀡𑁆𑀟𑀓𑀥𑀸𑀢𑀼, 𑀅𑀬𑀢𑀺 𑀇𑀢𑁄𑀢𑀺 𑀆𑀬𑁄, 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄. 𑀉𑀧𑀳𑀦𑀢𑀻𑀢𑀺 𑀉𑀧𑀖𑀸𑀢𑁄, ‘‘𑀳𑀦𑀲𑁆𑀲 𑀖𑀸𑀢𑁄 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀖𑀸𑀢𑀸𑀤𑁂𑀲𑁄. 𑀭𑀜𑁆𑀚𑀢𑀻𑀢𑀺 𑀭𑀸𑀕𑁄, ‘‘𑀓𑀕𑀸 𑀘𑀚𑀸𑀦𑀁 𑀖𑀸𑀦𑀼𑀩𑀦𑁆𑀥𑁂’’𑀢𑀺 𑀚𑀲𑁆𑀲 𑀕𑁄. 𑀭𑀜𑁆𑀚𑀦𑁆𑀢𑀺 𑀅𑀦𑁂𑀦𑀸𑀢𑀺 𑀭𑀸𑀕𑁄. ‘‘𑀅𑀲𑁆𑀲𑀸 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀆, 𑀧𑀚𑁆𑀚𑀢𑁂+𑀦𑁂𑀦𑀸𑀢𑀺 𑀧𑀸𑀤𑁄. 𑀢𑀼𑀤=𑀩𑁆𑀬𑀣𑀦𑁂, 𑀧𑀢𑀼𑀚𑁆𑀚𑀢𑁂+𑀦𑁂𑀦𑀸𑀢𑀺 𑀧𑀢𑁄𑀤𑁄. 𑀚𑀭𑀻𑀬𑀢𑀺 𑀅𑀦𑁂𑀦𑀸𑀢𑀺 𑀚𑀸𑀭𑁄, 𑀏𑀯𑀁 𑀤𑀸𑀭𑁄. 𑀪𑀚𑀻𑀬𑀢𑀻𑀢𑀺 𑀪𑀸𑀕𑁄. 𑀏𑀯𑀁 𑀪𑀸𑀭𑁄. 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄. 𑀯𑀺+𑀑𑀧𑀼𑀩𑁆𑀩𑁄, 𑀯𑁄𑀳𑀭𑀻𑀬𑀢𑀻𑀢𑀺 𑀯𑁄𑀳𑀸𑀭𑁄. 𑀤𑀺𑀬𑁆𑀬𑀢𑀻𑀢𑀺 𑀤𑀸𑀬𑁄, 𑀬𑀼𑀓. 𑀯𑀺𑀳𑀜𑁆𑀜𑀢𑀺 𑀏𑀢𑀲𑁆𑀫𑀸𑀢𑀺 𑀯𑀺𑀖𑀸𑀢𑁄. 𑀯𑀺𑀳𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄. 𑀆𑀭𑀫𑀦𑁆𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 𑀆𑀭𑀸𑀫𑁄. 𑀧𑀘𑀦𑀁 𑀯𑀸 𑀧𑀸𑀓𑁄, 𑀘𑀲𑁆𑀲 𑀓𑁄. 𑀘𑀚𑀦𑀁 𑀘𑀸𑀕𑁄. 𑀬𑀚𑀦𑀁 𑀬𑀸𑀕𑁄. 𑀭𑀚𑀦𑀁 𑀭𑀸𑀕𑁄.

𑁧𑁨𑁭. 𑀅𑀦+𑀖𑀡𑀲𑁆𑀯𑀸+𑀧𑀭𑀻𑀳𑀺 𑀴𑁄

𑀆+𑀧𑀭𑀻𑀳𑀺 𑀧𑀭𑀲𑁆𑀲 𑀤𑀳𑀲𑁆𑀲 𑀴𑁄 𑀳𑁄𑀢+𑀦+𑀖𑀡𑀲𑀼. 𑀧𑀭𑀺𑀤𑀳𑀦𑀁 𑀧𑀭𑀺𑀴𑀸𑀳𑁄. 𑀏𑀯𑀁 𑀤𑀸𑀳𑁄. 𑀪𑀜𑁆𑀚𑀦𑀁 𑀲𑀗𑁆𑀕𑁄. 𑀏𑀯𑀁 𑀲𑀗𑁆𑀕𑁄. 𑀲𑀁𑀔𑀭𑀦𑀁 𑀲𑀁𑀔𑀸𑀭𑁄, ‘‘𑀓𑀭𑁄𑀢𑀺𑀲𑁆𑀲 𑀔𑁄’’𑀢𑀺 𑀓𑀲𑁆𑀲 𑀔𑁄. 𑀏𑀯𑀁 𑀧𑀭𑀺𑀓𑁆𑀔𑀸𑀭𑁄. ‘‘𑀧𑀼𑀭𑀲𑁆𑀫𑀸’’𑀢𑀺 𑀓𑀭𑀲𑁆𑀲 𑀔𑁄, 𑀧𑀼𑀭𑁂𑀓𑁆𑀔𑀸𑀭𑁄, 𑀏𑀢𑁆𑀢𑀁 𑀢𑀤𑀫𑀺𑀦𑀸𑀤𑀺𑀧𑀸𑀞𑀸. 𑀏𑀯𑀁 𑀉𑀧𑀓𑀸𑀭𑁄, 𑀕𑀸𑀳𑁄.

𑀖-𑀯𑀘𑀢𑀻𑀢𑀺 𑀯𑀓𑁄. 𑀲𑀺𑀘=𑀧𑀕𑁆𑀖𑀭𑀡𑁂, 𑀲𑁂𑀘𑀦𑀁 𑀲𑁂𑀓𑁄. 𑀏𑀯𑀁 𑀲𑁄𑀓𑁄, 𑀏𑀑𑀯𑀼𑀤𑁆𑀥𑀺𑀬𑁄. 𑀬𑀼𑀜𑁆𑀚𑀦𑀁 𑀬𑁄𑀕𑁄.

𑀓-𑀧𑀻=𑀢𑀧𑁆𑀧𑀦𑁂, 𑀧𑀻𑀦𑁂𑀢𑀻𑀢𑀺 𑀧𑀻𑀬𑁄, 𑀓𑀸𑀦𑀼𑀩𑀦𑁆𑀥𑀢𑁆𑀢𑀸 𑀦 𑀯𑀼𑀤𑁆𑀥𑀺, ‘‘𑀬𑀼𑀯𑀡𑁆𑀡𑀸𑀦+𑀫𑀺𑀬𑀗𑀼𑀯𑀗 𑀲𑀭𑁂’’𑀢𑀺 𑀇𑀬𑀗. 𑀔𑀺𑀧=𑀧𑁂𑀭𑀡𑁂, 𑀔𑀺𑀧𑀢𑀻𑀢𑀺 𑀔𑀺𑀧𑁄. 𑀪𑀼𑀜𑁆𑀚𑀦𑁆𑀢𑁆𑀬+𑀦𑁂𑀦𑀸𑀢𑀺 𑀪𑀼𑀚𑁄. 𑀬𑀼𑀥=𑀲𑀫𑁆𑀧𑀳𑀸𑀭𑁂 𑀆𑀬𑀼𑀚𑁆𑀛𑀦𑁆𑀢𑀺 𑀅𑀦𑁂𑀦𑀸𑀢𑀺 𑀆𑀬𑀼𑀥𑀁.

𑁪𑁫. 𑀤𑀸𑀥𑀸𑀢𑁆𑀯𑀺

𑀤𑀸𑀥𑀸𑀢𑁄 𑀩𑀳𑀼𑀮+𑀫𑀺 𑀳𑁄𑀢𑀺 𑀪𑀸𑀯𑀓𑀸𑀭𑀓𑁂𑀲𑀼. 𑀤𑀸=𑀤𑀸𑀦𑁂, 𑀆𑀤𑀺𑀬𑀢𑀻𑀢𑀺𑀆𑀤𑀺. 𑀏𑀯𑀁 𑀉𑀧𑀸𑀤𑀺. 𑀥𑀸=𑀥𑀸𑀭𑀡𑁂, 𑀉𑀤𑀓𑀁 𑀤𑀥𑀸𑀢𑀻𑀢𑀺 𑀉𑀤𑀥𑀺, ‘‘𑀲𑀜𑁆𑀜𑀸𑀬+𑀫𑀼𑀤𑁄+𑀤𑀓𑀲𑁆𑀲𑀸’’𑀢𑀺 𑀉𑀤𑀓𑀲𑁆𑀲 𑀉𑀤𑀸𑀤𑁂𑀲𑁄. 𑀚𑀮𑀁 𑀥𑀺𑀬𑀢𑁂 𑀅𑀲𑁆𑀫𑀺𑀦𑁆𑀢𑀺 𑀚𑀮𑀥𑀺. 𑀯𑀸𑀮𑀸𑀦𑀺 𑀥𑀻𑀬𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀯𑀸𑀮𑀥𑀺. 𑀲𑀦𑁆𑀥𑀻𑀬𑀢𑀺 𑀲𑀦𑁆𑀥𑀸𑀢𑀻𑀢𑀺 𑀯𑀸 𑀲𑀦𑁆𑀥𑀺. 𑀥𑀻𑀬𑀢𑀻𑀢𑀺 𑀥𑀺. 𑀯𑀺𑀥𑀻𑀬𑀢𑀺 𑀯𑀺𑀥𑀸𑀢𑀺 𑀯𑀺𑀥𑀸𑀦𑀁 𑀯𑀸 𑀯𑀺𑀥𑀺. 𑀲𑀫𑁆𑀫𑀸 𑀲𑀫𑀁 𑀯𑀸 𑀘𑀺𑀢𑁆𑀢𑀁 𑀆𑀤𑀥𑀸𑀢𑀻𑀢𑀺 𑀲𑀫𑀸𑀥𑀺.

𑁪𑁬. 𑀯𑀫𑀸𑀤𑀻𑀳𑁆𑀬+𑀣𑀼

𑀯𑀫𑀸𑀤𑀻𑀳𑀺 𑀪𑀸𑀯𑀓𑀸𑀭𑀓𑁂𑀲𑁆𑀯+𑀣𑀼 𑀳𑁄𑀢𑀺. 𑀯𑀫=𑀉𑀕𑁆𑀕𑀺𑀭𑀡𑁂, 𑀯𑀫𑀦𑀁 𑀯𑀫𑀻𑀬𑀢𑀻𑀢𑀺 𑀯𑀸 𑀯𑀫𑀣𑀼. 𑀯𑁂𑀧+𑀓𑀫𑁆𑀧=𑀘𑀮𑀦𑁂, 𑀯𑁂𑀧𑀦𑀁 𑀯𑁂𑀧𑀣𑀼.

𑁪𑁭. 𑀓𑁆𑀯𑀺

𑀓𑁆𑀭𑀺𑀬𑀢𑁆𑀣𑀸 𑀓𑁆𑀯𑀺 𑀳𑁄𑀢𑀺 𑀩𑀳𑀼𑀮𑀁 𑀪𑀸𑀯𑀓𑀸𑀭𑀓𑁂𑀲𑀼. 𑀓𑀓𑀸𑀭𑁄 𑀓𑀸𑀦𑀼𑀩𑀦𑁆𑀥𑀓𑀸𑀭𑀺𑀬𑀢𑁆𑀣𑁄.

𑁧𑁫𑁯. 𑀓𑁆𑀯𑀺𑀲𑁆𑀲

𑀓𑁆𑀭𑀺𑀬𑀢𑁆𑀣𑀸 𑀧𑀭𑀲𑁆𑀲 𑀓𑁆𑀯𑀺𑀲𑁆𑀲 𑀮𑁄𑀧𑁄 𑀳𑁄𑀢𑀺. 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀽. 𑀏𑀯𑀁 𑀯𑀺𑀪𑀯𑀢𑀻𑀢𑀺 𑀯𑀺𑀪𑀽, 𑀅𑀪𑀺𑀪𑀽, 𑀲𑀬𑀫𑁆𑀪𑀽. 𑀢𑀣𑀸 𑀥𑀼=𑀓𑀫𑁆𑀧𑀦𑁂, 𑀲𑀦𑁆𑀥𑀼𑀦𑀸𑀢𑀻𑀢𑀺 𑀲𑀦𑁆𑀥𑀼. 𑀯𑀺𑀪𑀸𑀢𑀻𑀢𑀺 𑀯𑀺𑀪𑀸. 𑀧𑀪𑀸𑀢𑀻𑀢𑀺 𑀧𑀪𑀸. 𑀲𑀁𑀕𑀫𑁆𑀫 𑀪𑀸𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀪𑀸, ‘‘𑀓𑁆𑀯𑀺𑀫𑁆𑀳𑀺 𑀮𑁄𑀧𑁄+𑀦𑁆𑀢𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀅𑀦𑁆𑀢𑀩𑁆𑀬𑀜𑁆𑀚𑀦𑀲𑁆𑀲 𑀮𑁄𑀧𑁄. 𑀪𑀼𑀚𑁂𑀦 𑀕𑀘𑁆𑀙𑀢𑀻𑀢𑀺 𑀪𑀼𑀚𑀕𑁄. 𑀏𑀯𑀁 𑀉𑀭𑀕𑁄. 𑀢𑀼𑀭𑀁=𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀢𑀼𑀭𑀗𑁆𑀕𑁄. 𑀔𑁂𑀦 𑀕𑀘𑁆𑀙𑀢𑀻𑀢𑀺 𑀔𑀕𑁄. 𑀯𑀺𑀳𑀸𑀬𑀲𑁂 𑀕𑀘𑁆𑀙𑀢𑀻𑀢𑀺 𑀯𑀺𑀳𑀕𑁄, 𑀢𑀤𑀫𑀺𑀦𑀸𑀤𑀺𑀧𑀸𑀞𑀸 𑀯𑀺𑀳𑀸𑀤𑁂𑀲𑁄. 𑀦 𑀕𑀘𑁆𑀙𑀢𑀻𑀢𑀺 𑀦𑀕𑁄. 𑀏𑀯𑀁 𑀅𑀕𑁄, ‘‘𑀦𑀕𑁄 𑀯𑀸+𑀧𑁆𑀧𑀸𑀡𑀺𑀦𑀻’’𑀢𑀺 𑀯𑀺𑀓𑀧𑁆𑀧𑁂𑀦 𑀦𑀜𑀲𑀫𑀸𑀲𑁂 𑀝𑀸𑀤𑁂𑀲𑀦𑀺𑀲𑁂𑀥𑁄. 𑀚𑀦=𑀚𑀦𑀦𑁂, 𑀓𑀫𑁆𑀫𑀢𑁄 𑀚𑀸𑀢𑁄𑀢𑀺 𑀓𑀫𑁆𑀫𑀚𑁄, 𑀅𑀫𑀸𑀤𑀺𑀲𑀫𑀸𑀲𑁄, 𑀓𑀫𑁆𑀫𑀚𑁄 𑀯𑀺𑀧𑀸𑀓𑁄, 𑀓𑀫𑁆𑀫𑀚𑀸 𑀧𑀝𑀺𑀲𑀦𑁆𑀥𑀺, 𑀓𑀫𑁆𑀫𑀚𑀁 𑀭𑀽𑀧𑀁. 𑀏𑀯𑀁 𑀘𑀺𑀢𑁆𑀢𑀚𑀁, 𑀉𑀢𑀼𑀚𑀁, 𑀆𑀳𑀸𑀭𑀚𑀁. 𑀅𑀢𑁆𑀢𑀚𑁄 𑀧𑀼𑀢𑁆𑀢𑁄, 𑀯𑀸𑀭𑀺𑀫𑁆𑀳𑀺 𑀚𑀸𑀢𑁄 𑀯𑀸𑀭𑀺𑀚𑁄. 𑀏𑀯𑀁 𑀣𑀮𑀚𑁄. 𑀧𑀗𑁆𑀓𑀚𑀁. 𑀚𑀮𑀚𑀁. 𑀅𑀡𑁆𑀟𑀚𑀁. 𑀲𑀭𑀲𑀺𑀚𑀁, 𑀉𑀧𑀧𑀤𑀲𑀫𑀸𑀲𑁂 𑀩𑀳𑀼𑀮𑀁𑀯𑀺𑀥𑀸𑀦𑀸 𑀯𑀺𑀪𑀢𑁆𑀬𑀮𑁄𑀧𑁂 ‘‘𑀫𑀦𑀸𑀤𑀻𑀳𑀻’’𑀢𑀺𑀆𑀤𑀺𑀦𑀸 𑀲𑀺𑀆𑀤𑁂𑀲𑁄. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀚𑀸𑀢𑁄 𑀤𑁆𑀯𑀺𑀚𑁄, ‘‘𑀢𑀤𑀫𑀺𑀦𑀸’’ 𑀤𑀺𑀦𑀸 𑀓𑁆𑀔𑀢𑁆𑀢𑀼𑀁𑀮𑁄𑀧𑁄. 𑀧𑀘𑁆𑀙𑀸 𑀚𑀸𑀢𑁄 𑀅𑀦𑀼𑀚𑁄. 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀏𑀯𑀁 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀢𑀺𑀝𑁆𑀞𑀸. 𑀛𑀸=𑀘𑀺𑀦𑁆𑀢𑀸𑀬𑀁, 𑀧𑀭𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸. 𑀳𑀺𑀢𑁂𑀲𑀺𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀛𑀸𑀬𑀢𑀻𑀢𑀺 𑀉𑀧𑀚𑁆𑀛𑀸. 𑀲𑁄 𑀏𑀯 𑀉𑀧𑀚𑁆𑀛𑀸𑀬𑁄, ‘‘𑀲𑀓𑀢𑁆𑀣𑁂’’𑀢𑀺 𑀬𑁄. 𑀲𑀫𑁆𑀫𑀸 𑀛𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀛𑀸. 𑀓𑁆𑀯𑀺𑀤𑀦𑁆𑀢𑀸 𑀥𑀸𑀢𑁆𑀯𑀢𑁆𑀣𑀁 𑀦 𑀚𑀳𑀦𑁆𑀢𑀺, 𑀮𑀺𑀗𑁆𑀕𑀢𑁆𑀣𑀁 𑀧𑀝𑀺𑀧𑀸𑀤𑀬𑀦𑁆𑀢𑀺.

𑁪𑁮. 𑀅𑀦𑁄

𑀓𑁆𑀭𑀺𑀬𑀢𑁆𑀣𑀸 𑀪𑀸𑀯𑀓𑀸𑀭𑀓𑁂𑀲𑀼 𑀅𑀦𑁄 𑀳𑁄𑀢𑀺. 𑀦𑀦𑁆𑀤=𑀲𑀫𑀺𑀤𑁆𑀥𑀺𑀬𑀁, 𑀪𑀸𑀯𑁂-𑀦𑀦𑁆𑀤𑀺𑀬𑀢𑁂 𑀦𑀦𑁆𑀤𑀦𑀁. 𑀓𑀫𑁆𑀫𑁂-𑀅𑀦𑀦𑁆𑀤𑀻𑀬𑀺𑀢𑁆𑀣 𑀦𑀦𑁆𑀤𑀻𑀬𑀢𑀺 𑀦𑀦𑁆𑀤𑀻𑀬𑀺𑀲𑁆𑀲𑀢𑀺 𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀯𑀸 𑀦𑀦𑁆𑀤𑀦𑀁 𑀯𑀦𑀁. 𑀕𑀳𑀦𑀁 𑀕𑀳𑀦𑀻𑀬𑀁 𑀯𑀸 𑀕𑀳𑀡𑀁, ‘‘𑀢𑀣𑀦𑀭𑀸’’ 𑀤𑀺𑀦𑀸 𑀦𑀲𑁆𑀲 𑀡𑁄. 𑀕𑀡𑁆𑀳𑀦𑀁, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀦𑁄. 𑀘𑀭𑀺𑀢𑀩𑁆𑀩𑀁 𑀘𑀭𑀡𑀁. 𑀪𑀼𑀬𑀢𑁂 𑀪𑀯𑀦𑀁. 𑀳𑀼𑀬𑀢𑁂 𑀳𑀯𑀦𑀁. 𑀭𑀼𑀦𑁆𑀥𑀺𑀢𑀩𑁆𑀩𑀁 𑀭𑀼𑀦𑁆𑀥𑀦𑀁 𑀭𑁄𑀥𑀦𑀁 𑀯𑀸. 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀼𑀜𑁆𑀚𑀦𑀁 𑀪𑁄𑀚𑀦𑀁 𑀯𑀸. 𑀩𑀼𑀚𑁆𑀛𑀺𑀢𑀩𑁆𑀩𑀁 𑀩𑀼𑀚𑁆𑀛𑀦𑀁, ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀬𑀼𑀓. 𑀩𑁄𑀥𑀦𑀁 𑀯𑀸. 𑀲𑀼𑀢𑀺 𑀲𑀼𑀬𑁆𑀬𑀢𑀺 𑀯𑀸 𑀲𑀯𑀦𑀁. 𑀧𑀸𑀧𑀻𑀬𑀢𑀻𑀢𑀺 𑀧𑀸𑀧𑀼𑀡𑀦𑀁, ‘‘𑀲𑀓𑀸𑀧𑀸𑀦𑀁 𑀓𑀼𑀓+𑀓𑀽’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀓𑀼𑀆𑀕𑀫𑁂 𑀦𑀸𑀕𑀫𑁂 𑀘 𑀢𑀲𑁆𑀲 𑀡𑁄 𑀘. 𑀧𑀸𑀮𑀻𑀬𑀢𑀻𑀢𑀺 𑀧𑀸𑀮𑀦𑀁 𑀇𑀘𑁆𑀘𑀸𑀤𑀺.

𑀓𑀢𑁆𑀢𑀭𑀺-𑀭𑀚𑀁 𑀳𑀭𑀢𑀻𑀢𑀺 𑀭𑀚𑁄𑀳𑀭𑀡𑀁 𑀢𑁄𑀬𑀁. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀖𑀸=𑀕𑀦𑁆𑀥𑁄𑀧𑀸𑀤𑀸𑀦𑁂, 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀛𑀸=𑀘𑀺𑀦𑁆𑀢𑀸𑀬𑀁, 𑀛𑀸𑀬𑀢𑀻𑀢𑀺 𑀛𑀸𑀦𑀁. 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀓𑀸𑀭𑀡𑀁, 𑀤𑀻𑀖𑁄. 𑀯𑀺𑀆𑀓𑀭𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁. 𑀧𑀽𑀭𑀢𑀺+𑀦𑁂𑀦𑀸𑀢𑀺 𑀧𑀽𑀭𑀡𑀁. 𑀤𑀻𑀬𑀢𑁂+𑀦𑁂𑀦𑀸𑀢𑀺 𑀤𑀸𑀦𑀁. 𑀧𑀫𑀻𑀬𑀢𑁂+𑀦𑁂𑀦𑀸𑀢𑀺 𑀧𑀫𑀸𑀡𑀁. 𑀯𑀼𑀘𑁆𑀘𑀢𑁂+𑀦𑁂𑀦𑀸𑀢𑀺 𑀯𑀘𑀦𑀁. 𑀧𑀦𑀼𑀤𑀢𑀺 𑀧𑀦𑀼𑀚𑁆𑀚𑀢𑁂+𑀦𑁂𑀦𑀸𑀢𑀺 𑀯𑀸 𑀧𑀦𑀼𑀤𑀦𑀁. 𑀲𑀽𑀤=𑀧𑀕𑀭𑀡𑁂, 𑀲𑀽𑀤𑀢𑀺 𑀲𑀼𑀚𑁆𑀚𑀢𑁂+𑀦𑁂𑀦𑀸𑀢𑀺 𑀯𑀸 𑀲𑀽𑀤𑀦𑁄. 𑀲𑀼𑀡𑀸𑀢𑀺 𑀲𑀼𑀬𑀢𑁂+𑀦𑁂𑀦𑁂𑀢𑀺 𑀯𑀸 𑀲𑀯𑀦𑀁. 𑀮𑀼𑀬𑀢𑀺 𑀮𑀼𑀬𑀢𑁂+𑀦𑁂𑀦𑁂𑀢𑀺 𑀯𑀸 𑀮𑀯𑀦𑀁. 𑀏𑀯𑀁 𑀦𑀬𑀦𑀁. 𑀧𑀼𑀦𑀸𑀢𑀺 𑀧𑀼𑀬𑀢𑁂+𑀦𑁂𑀦𑁂𑀢𑀺 𑀯𑀸 𑀧𑀯𑀦𑁄. 𑀲𑀫𑁂𑀢𑀻𑀢𑀺 𑀲𑀫𑀡𑁄 𑀲𑀫𑀦𑀁 𑀯𑀸. 𑀢𑀣𑀸 𑀪𑀸𑀯𑁂𑀢𑀺 𑀪𑀸𑀯𑀻𑀬𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀪𑀸𑀯𑀦𑀁. 𑀏𑀯𑀁 𑀧𑀸𑀘𑀦𑀁 𑀧𑀸𑀘𑀸𑀧𑀦𑀁 𑀇𑀘𑁆𑀘𑀸𑀤𑀺. ‘‘𑀅𑀦+𑀲𑀡𑀲𑁆𑀯𑀸 𑀧𑀭𑀻𑀳𑀺 𑀴𑁄’’𑀢𑀺 𑀴𑁄, 𑀆𑀴𑀸𑀳𑀦𑀁.

𑀅𑀥𑀺𑀓𑀭𑀡𑁂-𑀢𑀺𑀝𑁆𑀞𑀢𑀺 𑀅𑀲𑀺𑀦𑁆𑀢𑀺 𑀞𑀸𑀦𑀁. 𑀏𑀯𑀁 𑀲𑀬𑀦𑀁, 𑀲𑁂𑀦𑀁 𑀯𑀸 𑀆𑀲𑀦𑀁. 𑀅𑀥𑀺𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀁.

𑀲𑀫𑁆𑀧𑀤𑀸𑀦𑀸𑀧𑀸𑀤𑀸𑀦𑁂𑀲𑀼-𑀲𑀫𑁆𑀫𑀸 𑀧𑀤𑀻𑀬𑀢𑁂 𑀬𑀲𑁆𑀲 𑀢𑀁 𑀲𑀫𑁆𑀧𑀤𑀸𑀦𑀁. 𑀅𑀧𑁂𑀘𑁆𑀘 𑀏𑀢𑀲𑁆𑀫𑀸 𑀆𑀤𑀤𑀸𑀢𑀻𑀢𑀺 𑀅𑀧𑀸𑀤𑀸𑀦𑀁. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀘𑀮𑀦𑀸𑀤𑀻𑀳𑀺𑀧𑀺 𑀲𑀻𑀮𑀲𑀸𑀥𑀼𑀥𑀫𑁆𑀫𑁂𑀲𑀼𑀧𑀺 𑀅𑀦𑁄, 𑀘𑀮𑀢𑀺 𑀲𑀻𑀮𑁂𑀦𑀸𑀢𑀺 𑀘𑀮𑀦𑁄 𑀏𑀯𑀁 𑀚𑀮𑀦𑁄, 𑀓𑁄𑀥𑀦𑁄, 𑀓𑁄𑀧𑀦𑁄. 𑀫𑀡𑁆𑀟=𑀪𑀼𑀲𑀦𑁂, 𑀫𑀡𑁆𑀟𑁂𑀢𑀺 𑀲𑀻𑀮𑁂𑀦𑀸𑀢𑀺 𑀫𑀡𑁆𑀟𑀦𑁄. 𑀏𑀯𑀁 𑀪𑀽𑀲𑀦𑁄. ‘‘𑀅𑀜𑁆𑀜𑀸𑀢𑁆𑀭𑀧𑀻’’𑀢𑀺 𑀑𑀓𑀸𑀭𑀦𑀺𑀲𑁂𑀥𑁄.

𑁪𑁯. 𑀇𑀢𑁆𑀣𑀺𑀬+𑀫+𑀡+𑀓𑁆𑀢𑀺+𑀓+𑀬𑀓+𑀬𑀸 𑀘

𑀇𑀢𑁆𑀣𑀺𑀮𑀺𑀗𑁆𑀕𑁂 𑀪𑀸𑀯𑁂 𑀓𑀸𑀭𑀓𑁂 𑀘 𑀓𑁆𑀭𑀺𑀬𑀢𑁆𑀣𑀸 𑀅𑀆𑀤𑀬𑁄 𑀳𑁄𑀦𑁆𑀢𑀺 𑀅𑀦𑁄 𑀘 𑀩𑀳𑀼𑀮𑀁.

𑀅-𑀚𑀭=𑀯𑀬𑁄𑀳𑀸𑀦𑀺𑀬𑀁, 𑀚𑀺𑀭𑀢𑀺 𑀚𑀺𑀭𑀡𑀁 𑀯𑀸 𑀚𑀭𑀸. ‘‘𑀇𑀢𑁆𑀣𑀺𑀬+𑀫+𑀢𑁆𑀯𑀸’’𑀢𑀺 𑀆𑀧𑀘𑁆𑀘𑀬𑁄. 𑀧𑀝𑀺𑀲𑀫𑁆𑀪𑀺𑀚𑁆𑀚𑀢𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸. 𑀏𑀯𑀁 𑀲𑀫𑁆𑀧𑀤𑀸, 𑀆𑀧𑀤𑀸. 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀸. 𑀇𑀓𑁆𑀔+𑀘𑀓𑁆𑀔=𑀤𑀲𑁆𑀲𑀦𑁂, 𑀉𑀧𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸. ‘‘𑀬𑀼𑀯𑀡𑁆𑀡𑀸𑀦+𑀫𑁂𑀑 𑀮𑀼𑀢𑁆𑀢𑀸’’𑀢𑀺 𑀏𑀓𑀸𑀭𑁄. 𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑀸. 𑀲𑀺𑀓𑁆𑀔=𑀯𑀺𑀚𑁆𑀚𑁄𑀧𑀸𑀤𑀸𑀦𑁂, 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀻𑀬𑀦𑁆𑀢𑀻𑀢𑀺 𑀯𑀸 𑀲𑀺𑀓𑁆𑀔𑀸. 𑀏𑀯𑀁 𑀪𑀺𑀓𑁆𑀔𑀸. 𑀇𑀘𑁆𑀙𑀦𑀁 𑀇𑀘𑁆𑀙𑀸. ‘‘𑀕𑀫𑀬𑀫𑀺’’𑀘𑁆𑀘𑀸𑀤𑀺𑀦𑀸 𑀘𑁆𑀙𑀗𑀸𑀤𑁂𑀲𑁄. 𑀧𑀼𑀘𑁆𑀙=𑀧𑀼𑀘𑁆𑀙𑀦𑁂, 𑀧𑀼𑀘𑁆𑀙𑀦𑀁 𑀧𑀼𑀘𑁆𑀙𑀸. 𑀫𑀺𑀥+𑀫𑁂𑀥=𑀲𑀗𑁆𑀕𑀫𑁂, 𑀅𑀧𑀞𑀺𑀢𑀥𑀸𑀢𑀼, 𑀫𑁂𑀥𑀦𑀁 𑀫𑁂𑀥𑀸. 𑀏𑀯𑀁 𑀕𑀼𑀥=𑀧𑀭𑀺𑀯𑁂𑀞𑀦𑁂, 𑀕𑁄𑀥𑀦𑀁 𑀕𑁄𑀥𑀸. 𑀢𑀺𑀢𑀺𑀓𑁆𑀔𑀦𑀁 𑀢𑀺𑀢𑀺𑀓𑁆𑀔𑀸. 𑀏𑀯𑀁 𑀯𑀻𑀫𑀁𑀲𑀸, 𑀚𑀺𑀕𑀼𑀘𑁆𑀙𑀸, 𑀧𑀺𑀧𑀸𑀲𑀸, 𑀧𑀼𑀢𑁆𑀢𑀺𑀬𑀸. 𑀈𑀳𑀦𑀁 𑀈𑀳𑀸.

𑀡-𑀓𑀭𑀡𑀁 𑀓𑀸𑀭𑀸, ‘‘𑀅𑀲𑁆𑀲𑀸 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀆 𑀳𑁄𑀢𑀺, 𑀏𑀯+𑀫𑀼𑀧𑀭𑀺𑀧𑀺. 𑀳𑀭𑀡𑀁 𑀳𑀸𑀭𑀸 𑀫𑀼𑀢𑁆𑀢𑀸𑀯𑀮𑀺. 𑀢𑀭𑀡𑀁 𑀢𑀸𑀭𑀸, 𑀥𑀭𑀡𑀁 𑀥𑀸𑀭𑀸. 𑀅𑀭𑀡𑀁 𑀆𑀭𑀸.

𑀬𑀣𑀸𑀓𑀣𑀜𑁆𑀘𑀺 𑀲𑀤𑁆𑀤𑀫𑁆𑀳𑀺, 𑀭𑀼𑀴𑁆𑀳𑀺𑀬𑀸 𑀅𑀢𑁆𑀣𑀦𑀺𑀘𑁆𑀙𑀬𑁄.

𑀓𑁆𑀢𑀺-𑀲𑀫𑁆𑀪𑀼𑀯𑀦𑀁 𑀲𑀫𑁆𑀪𑀼𑀢𑀺. ‘‘𑀦 𑀢𑁂’’𑀘𑁆𑀘𑀸𑀤𑀺𑀦𑀸 𑀦 𑀯𑀼𑀤𑁆𑀥𑀺. 𑀲𑀯𑀦𑀁 𑀲𑀼𑀢𑀺. 𑀦𑀬𑀦𑀁 𑀦𑀬𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀦𑀻𑀢𑀺. 𑀫𑀜𑁆𑀜𑀢𑀻𑀢𑀺 𑀫𑀢𑀺, ‘‘𑀕𑀫𑀸𑀤𑀺𑀭𑀸𑀦𑀁 𑀮𑁄𑀧𑁄𑀦𑁆𑀢𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀕𑀫𑀸𑀤𑀺𑀢𑁆𑀢𑀸 𑀦𑀮𑁄𑀧𑁄. 𑀕𑀫𑀦𑀁 𑀕𑀦𑁆𑀢𑀩𑁆𑀩𑀸𑀢𑀺 𑀯𑀸 𑀕𑀢𑀺. 𑀉𑀧𑀳𑀦𑀦𑀁 𑀉𑀧𑀳𑀢𑀺. 𑀭𑀫𑀦𑁆𑀢𑀺 𑀏𑀢𑀸𑀬 𑀭𑀫𑀦𑀁 𑀯𑀸 𑀭𑀢𑀺. 𑀢𑀦𑀦𑀁 𑀢𑀢𑀺. 𑀦𑀺𑀬𑀫𑀦𑀁 𑀦𑀺𑀬𑀢𑀺. 𑀪𑀼𑀜𑁆𑀚𑀦𑀁 𑀪𑀼𑀢𑁆𑀢𑀺. 𑀬𑀼𑀜𑁆𑀚𑀦𑀁 𑀬𑀼𑀢𑁆𑀢𑀺, 𑀧𑀭𑀭𑀽𑀧𑀁. 𑀏𑀯𑀁 𑀲𑀫𑀸𑀧𑀚𑁆𑀚𑀦𑀁 𑀲𑀫𑀸𑀧𑀚𑁆𑀚𑀢𑁂𑀢𑀺 𑀲𑀫𑀸𑀧𑀢𑁆𑀢𑀺. 𑀲𑀫𑁆𑀧𑀢𑁆𑀢𑀺. 𑀬𑀚=𑀤𑁂𑀯𑀧𑀽𑀚𑀸𑀲𑀗𑁆𑀕𑀢𑀺𑀓𑀭𑀡𑀤𑀸𑀦𑁂𑀲𑀼, 𑀬𑀚𑀦𑀁 𑀇𑀝𑁆𑀞𑀺, ‘‘𑀬𑀚𑀲𑁆𑀲 𑀬𑀲𑁆𑀲 𑀝𑀺𑀬𑀻’’𑀢𑀺 𑀝𑀺𑀆𑀤𑁂𑀲𑁄, ‘‘𑀧𑀼𑀘𑁆𑀙𑀸𑀤𑀺𑀢𑁄’’𑀢𑀺 𑀢𑀲𑁆𑀲 𑀞𑁄, 𑀧𑀭𑀭𑀽𑀧𑀧𑀞𑀫𑀓𑁆𑀔𑀭𑀸 𑀘. 𑀲𑀸𑀲𑀦𑀁 𑀲𑀺𑀝𑁆𑀞𑀺, ‘‘𑀲𑀸𑀲𑀲𑁆𑀲 𑀲𑀺𑀲 𑀯𑀸’’𑀢𑀺 𑀲𑀺𑀲, 𑀲𑀸𑀦𑀦𑁆𑀢𑀭𑀲𑁆𑀲 𑀢𑀲𑁆𑀲 𑀞𑁄’’𑀢𑀺 𑀞𑀸𑀤𑁂𑀲𑁄. 𑀪𑁂𑀤𑀦𑀁 𑀪𑀺𑀚𑁆𑀚𑀢𑁂𑀢𑀺 𑀯𑀸 𑀪𑀺𑀢𑁆𑀢𑀺. 𑀪𑀚=𑀲𑁂𑀯𑀸𑀬𑀁, 𑀪𑀚𑀦𑀁 𑀪𑀢𑁆𑀢𑀺. 𑀢𑀦=𑀯𑀺𑀢𑁆𑀣𑀸𑀭𑁂, 𑀢𑀦𑁄𑀢𑀻𑀢𑀺 𑀢𑀦𑁆𑀢𑀺, 𑀦𑀲𑁆𑀲 𑀦𑀺𑀕𑁆𑀕𑀳𑀻𑀢𑀸𑀤𑀺.

𑀓-𑀕𑀼𑀳𑀦𑁆𑀢𑀻 𑀏𑀢𑁆𑀣𑀸𑀢𑀺 𑀕𑀼𑀳𑀸, 𑀑𑀓𑀸𑀭𑀦𑀺𑀯𑀼𑀢𑁆𑀢𑀺. 𑀭𑀼𑀚𑀢𑀻𑀢𑀺 𑀭𑀼𑀚𑀸. 𑀫𑁄𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀼𑀤𑀸 𑀦𑀸𑀫 𑀫𑀼𑀤𑀺𑀢𑀸.

𑀬𑀓-𑀯𑀺𑀤=𑀜𑀸𑀡𑁂, 𑀯𑀺𑀤𑀦𑀁 𑀯𑀺𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀯𑀺𑀚𑁆𑀚𑀸, 𑀤𑀲𑁆𑀲 𑀚𑁂 𑀧𑀼𑀩𑁆𑀩𑀭𑀽𑀧𑀁. 𑀬𑀚𑀦𑀁 𑀇𑀚𑁆𑀚𑀸, 𑀝𑀺𑀆𑀤𑁂𑀲𑁄.

𑀬-𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀤𑁆𑀯𑀺𑀢𑁆𑀢𑀁. 𑀅𑀚=𑀯𑀚=𑀕𑀫𑀦𑁂, 𑀲𑀫𑀚𑀦𑀁 𑀲𑀫𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀫𑀚𑁆𑀚𑀸. 𑀧𑀧𑀼𑀩𑁆𑀩𑁄, 𑀧𑀩𑁆𑀩𑀚𑀦𑀁 𑀧𑀩𑁆𑀩𑀚𑁆𑀚𑀸. 𑀢𑀯𑀕𑁆𑀕𑀯𑀭𑀡𑀸’’𑀤𑀺𑀫𑁆𑀳𑀺 ‘‘𑀘𑀯𑀕𑁆𑀕𑀩𑀬𑀜𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀯𑀲𑁆𑀲 𑀩𑁂 𑀤𑁆𑀯𑀺𑀢𑁆𑀢𑀁. 𑀊𑀫𑁆𑀳𑀺 𑀧𑀭𑀺𑀘𑀭𑀡𑀁 𑀧𑀭𑀺𑀘𑀭𑀺𑀬𑀸. 𑀚𑀸𑀕𑀭𑀡𑀁 𑀚𑀸𑀕𑀭𑀺𑀬𑀸.

𑀅𑀦-𑀧𑀬𑁄𑀚𑀓𑁂 𑀓𑀸𑀭𑀺𑀬𑀥𑀸𑀢𑀼𑀢𑁄 𑀓𑀢𑁆𑀢𑀼𑀁 𑀧𑀬𑁄𑀚𑀦𑀁 𑀓𑀸𑀭𑀡𑀁, 𑀏𑀓𑀸𑀭𑀦𑀺𑀲𑁂𑀥𑁄 𑀦𑀲𑁆𑀲 𑀡𑁄 𑀘. 𑀏𑀯𑀁 𑀳𑀭𑀺𑀢𑀼𑀁 𑀧𑀬𑁄𑀚𑀦𑀁 𑀳𑀸𑀭𑀡𑀁. 𑀯𑀺𑀤=𑀅𑀦𑀼𑀪𑀯𑁂, 𑀯𑀺𑀢𑁆𑀢𑀺 𑀯𑁂𑀤𑀬𑀢𑀻𑀢𑀺 𑀯𑀸 𑀯𑁂𑀤𑀦𑀸. 𑀯𑀦𑁆𑀤=𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀼, 𑀯𑀦𑁆𑀤𑀦𑀁 𑀯𑀦𑁆𑀤𑀦𑀸. 𑀉𑀧𑀸𑀲𑀦𑀁 𑀉𑀧𑀸𑀲𑀦𑀸. 𑀘𑀺𑀢=𑀲𑀁𑀘𑁂𑀢𑀦𑀸𑀬𑀁, 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸. 𑀤𑁂𑀲𑀺𑀬𑀢𑀻𑀢𑀺 𑀤𑁂𑀲𑀦𑀸. 𑀪𑀸𑀯𑀺𑀬𑀢𑀻𑀢𑀺 𑀪𑀸𑀯𑀦𑀸.

𑁫𑁦. 𑀚𑀸𑀳𑀸𑀳𑀺 𑀦𑀺

𑀚𑀸=𑀯𑀬𑁄𑀳𑀸𑀦𑀺𑀫𑁆𑀳𑀺, 𑀳𑀸=𑀘𑀸𑀕𑁂, 𑀇𑀫𑁂𑀳𑀺 𑀇𑀢𑁆𑀣𑀺𑀬𑀁 𑀦𑀺 𑀳𑁄𑀢𑀺. 𑀚𑀸𑀦𑀁=𑀯𑀬𑀧𑀭𑀺𑀧𑀸𑀓𑁄 𑀚𑀸𑀦𑀺. 𑀳𑀸𑀦𑀁 𑀳𑀸𑀦𑀺.

𑁫𑁧. 𑀓𑀭𑀸 𑀭𑀺𑀭𑀺𑀬𑁄

𑀓𑀭𑀢𑁄 𑀭𑀺𑀭𑀺𑀬𑁄 𑀳𑁄𑀢𑀺+𑀢𑁆𑀣𑀺𑀬𑀁. 𑀭𑀸𑀦𑀼𑀩𑀦𑁆𑀥𑀢𑁆𑀢𑀸 𑀅𑀭𑀮𑁄𑀧𑁂 𑀓𑀭𑀡𑀁 𑀓𑀺𑀭𑀺𑀬𑀸. ‘‘𑀓𑁆𑀭𑀺𑀬𑀸’’𑀢𑀺 ‘‘𑀢𑀼𑀁𑀢𑀸𑀬𑁂’’𑀘𑁆𑀘𑀸𑀤𑀺𑀫𑁆𑀳𑀺 ‘‘𑀓𑁆𑀭𑀺𑀬𑀸𑀬𑀁’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀭𑀺𑀬𑀭𑀫𑁆𑀳𑀺 𑀅𑀭𑀮𑁄𑀧𑁄, 𑀭𑀺𑀓𑀸𑀭𑁄 𑀓𑀓𑀸𑀭𑁂+𑀦𑀼𑀩𑀦𑁆𑀥𑁄 𑀳𑁄𑀢𑀺.

𑁫𑁨. 𑀇+𑀓𑀺+𑀢𑀻 𑀲𑀭𑀽𑀧𑁂

𑀥𑀸𑀢𑀼𑀲𑁆𑀲 𑀲𑀭𑀽𑀧𑁂+𑀪𑀺𑀥𑁂𑀬𑁆𑀬𑁂 𑀏𑀢𑁂 𑀳𑁄𑀦𑁆𑀢𑀺. 𑀯𑀘𑀇𑀘𑁆𑀘+𑀬𑀁 𑀥𑀸𑀢𑀼 𑀏𑀯 𑀯𑀘𑀺. 𑀏𑀯𑀁 𑀬𑀼𑀥𑀺. ‘‘𑀓𑀭𑁄𑀢𑀺𑀲𑁆𑀲 𑀔𑁄’’𑀢𑀺 𑀯𑀺𑀓𑀭𑀡𑀲𑁆𑀲 𑀜𑀸𑀧𑀺𑀢𑀢𑁆𑀢𑀸 ‘‘𑀓𑀢𑁆𑀢𑀭𑀺 𑀮𑁄’’𑀢𑀺 𑀮𑁄, 𑀧𑀘𑀢𑀺. 𑀅𑀓𑀸𑀭𑁄 𑀓𑀓𑀸𑀭𑁄𑀢𑀺 𑀖𑀡𑀦𑁆𑀢𑁂𑀦 𑀓𑀸𑀭𑀲𑀤𑁆𑀤𑁂𑀦 𑀙𑀝𑁆𑀞𑀻𑀲𑀫𑀸𑀲𑁄.

𑁫𑁩. 𑀲𑀻𑀮𑀸+𑀪𑀺𑀓𑁆𑀔𑀜𑁆𑀜𑀸+𑀯𑀲𑁆𑀲𑀓𑁂𑀲𑀼 𑀡𑀻

𑀓𑁆𑀭𑀺𑀬𑀢𑁆𑀣𑀸 𑀡𑀻 𑀳𑁄𑀢𑀺 𑀲𑀻𑀮𑀸𑀤𑀻𑀲𑀼. 𑀲𑀁𑀲=𑀧𑀲𑀁𑀲𑀦𑁂, 𑀧𑀺𑀬𑀧𑀼𑀩𑁆𑀩𑁄, 𑀧𑀺𑀬𑀁 𑀧𑀲𑀁𑀲𑀢𑀺 𑀲𑀻𑀮𑁂𑀦𑀸𑀢𑀺 𑀧𑀺𑀬𑀧𑀲𑀁𑀲𑀻 𑀭𑀸𑀚𑀸. 𑀅𑀣 𑀯𑀸 𑀧𑀺𑀬𑀁 𑀧𑀲𑀁𑀲𑀢𑀺 𑀲𑀻𑀮𑁂𑀦 𑀯𑀸 𑀥𑀫𑁆𑀫𑁂𑀦 𑀯𑀸 𑀢𑀲𑁆𑀫𑀺𑀁 𑀲𑀸𑀥𑀼 𑀯𑀸𑀢𑀺 𑀧𑀺𑀬𑀧𑀲𑀁𑀲𑀻, 𑀧𑀺𑀬𑀧𑀲𑀁𑀲𑀦𑀻, 𑀧𑀺𑀬𑀧𑀲𑀁𑀲𑀺 𑀓𑀼𑀮𑀁, 𑀆𑀯𑀼𑀤𑁆𑀥𑀺𑀫𑁆𑀳𑀺 𑀢𑀣𑀸 𑀲𑀘𑁆𑀘𑀯𑀸𑀤𑀻, 𑀥𑀫𑁆𑀫𑀯𑀸𑀤𑀻. 𑀲𑀻𑀖𑀬𑀸𑀬𑀻𑀢𑀺 ‘‘𑀅𑀲𑁆𑀲𑀸+𑀡𑀸𑀧𑀺𑀫𑁆𑀳𑀻 𑀬𑀼𑀓’’ 𑀇𑀢𑀺 𑀬𑀼𑀓. 𑀧𑀸𑀧𑀓𑀸𑀭𑀻, 𑀫𑀸𑀮𑀓𑀸𑀭𑀻 𑀇𑀘𑁆𑀘𑀸𑀤𑀺. 𑀉𑀡𑁆𑀳𑀁 𑀪𑀼𑀜𑁆𑀚𑀢𑀺 𑀲𑀻𑀮𑁂𑀦𑀸𑀢𑀺 𑀉𑀡𑁆𑀳𑀪𑁄𑀚𑀻, ‘‘𑀮𑀳𑀼𑀲𑁆𑀲𑀼𑀧𑀦𑁆𑀢𑀲𑁆𑀲𑀸’’𑀢𑀺 𑀑𑀓𑀸𑀭𑁄.

𑀆𑀪𑀺𑀓𑁆𑀔𑀜𑁆𑀜𑁂-𑀧𑀼𑀦𑀧𑁆𑀧𑀼𑀦 𑀔𑀻𑀭𑀁 𑀧𑀺𑀯𑀢𑀻𑀢𑀺 𑀔𑀻𑀭𑀧𑀸𑀬𑀻, 𑀬𑀼𑀓. 𑀅𑀯𑀲𑁆𑀲𑀁 𑀓𑀭𑁄𑀢𑀻𑀢𑀺 𑀅𑀯𑀲𑁆𑀲𑀓𑀸𑀭𑀻. ‘‘𑀲𑁆𑀬𑀸𑀤𑀺 𑀲𑁆𑀬𑀸𑀤𑀺𑀦𑁂+𑀓𑀢𑁆𑀣𑀁’’𑀢𑀺 𑀲𑀫𑀸𑀲𑁂 𑀯𑀺𑀪𑀢𑁆𑀢𑀺𑀮𑁄𑀧𑁂 𑀘 𑀓𑀢𑁂 ‘‘𑀮𑁄𑀧𑁄’’𑀢𑀺 𑀦𑀺𑀕𑁆𑀕𑀳𑀻𑀢𑀮𑁄𑀧𑁄. 𑀲𑀢𑀦𑁆𑀤𑀸𑀬𑀻𑀢𑀺 𑀏𑀢𑁆𑀣 𑀩𑀳𑀼𑀮𑀁𑀯𑀺𑀥𑀸𑀦𑀸 𑀯𑀺𑀪𑀢𑁆𑀢𑀺𑀅𑀮𑁄𑀧𑁂 𑀅𑀫𑀸𑀤𑀺𑀲𑀫𑀸𑀲𑀧𑀝𑀺𑀲𑁂𑀥𑁂 𑀘 𑀓𑀢𑁂 𑀯𑀕𑁆𑀕𑀦𑁆𑀢𑀁.

𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂𑀧𑀺 ‘‘𑀡𑀻’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀲𑀺𑀤𑁆𑀥𑀁. 𑀲𑀸𑀥𑀼𑀓𑀸𑀭𑀻, 𑀩𑁆𑀭𑀳𑁆𑀫𑀘𑀸𑀭𑀻, 𑀅𑀲𑁆𑀲𑀤𑁆𑀥𑀪𑁄𑀚𑀻. 𑀧𑀡𑁆𑀟𑀺𑀢𑀁 𑀅𑀢𑁆𑀢𑀸𑀦𑀁 𑀫𑀜𑁆𑀜𑀢𑀻𑀢𑀺 𑀧𑀡𑁆𑀟𑀺𑀢𑀫𑀸𑀦𑀻, 𑀩𑀳𑀼𑀲𑁆𑀲𑀼𑀢𑀥𑀸𑀭𑀻 𑀇𑀘𑁆𑀘𑀸𑀤𑀺.

𑀲𑀸𑀥𑀼𑀓𑀭𑀡𑀁 𑀲𑀸𑀥𑀼𑀓𑀸𑀭𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀸𑀥𑀼𑀓𑀸𑀭𑀻𑀢𑀺 𑀖𑀡𑀦𑁆𑀢𑀸 𑀈.

𑁫𑁪. 𑀣𑀸𑀯𑀭𑀺+𑀢𑁆𑀢𑀭 𑀪𑀗𑁆𑀕𑀼𑀭 𑀪𑀺𑀤𑀼𑀭 𑀪𑀸𑀲𑀼𑀭 𑀪𑀲𑁆𑀲𑀭𑀸

𑀏𑀢𑁂 𑀲𑀤𑁆𑀤𑀸 𑀦𑀺𑀧𑀘𑁆𑀘𑀦𑁆𑀢𑁂 𑀲𑀻𑀮𑁂 𑀕𑀫𑁆𑀬𑀫𑀸𑀦𑁂. 𑀇𑀫𑀺𑀦𑀸 𑀦𑀺𑀧𑀸𑀢𑀦𑀸 𑀯𑀭𑀧𑀘𑁆𑀘𑀬𑁄 𑀘 𑀣𑀸𑀲𑁆𑀲 𑀣𑁄 𑀘, 𑀢𑀺𑀝𑁆𑀞𑀢𑀺 𑀲𑀻𑀮𑁂𑀦𑀸𑀢𑀺 𑀣𑀸𑀯𑀭𑁄. 𑀇=𑀅𑀚𑁆𑀛𑁂𑀦𑀕𑀢𑀻𑀲𑀼, 𑀢𑁆𑀢𑀭𑀧𑀘𑁆𑀘𑀬𑁄, 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀇𑀢𑁆𑀢𑀭𑁄. 𑀪𑀜𑁆𑀚=𑀑𑀫𑀤𑁆𑀤𑀦𑁂, 𑀪𑀚𑁆𑀚𑀢𑁂 𑀲𑀬𑀫𑁂𑀯 𑀪𑀚𑁆𑀚𑀢𑀺 𑀯𑀸 𑀅𑀢𑁆𑀢𑀦𑀸 𑀅𑀢𑁆𑀢𑀸𑀦𑀦𑁆𑀢𑀺 𑀪𑀗𑁆𑀕𑀼𑀭𑁄, 𑀓𑀫𑁆𑀫𑁂 𑀓𑀢𑁆𑀢𑀭𑀺 𑀯𑀸 𑀕𑀼𑀭𑀧𑀘𑁆𑀘𑀬𑁄. 𑀪𑀺𑀚𑁆𑀚𑀢𑁂 𑀲𑀬𑀫𑁂𑀯 𑀪𑀺𑀦𑁆𑀤𑀢𑀺 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀪𑀺𑀤𑀽𑀭𑁄, 𑀏𑀢𑁆𑀣 𑀓𑀽𑀭𑀧𑀘𑁆𑀘𑀬𑁄, 𑀓𑀓𑀸𑀭𑁄+𑀦𑀼𑀩𑀦𑁆𑀥𑁄. 𑀧𑀭𑀪𑀜𑁆𑀚𑀦𑀯𑀺𑀲𑀬𑁂𑀲𑀼𑀧𑀺 𑀉𑀤𑀸𑀳𑀭𑀡𑁂𑀲𑀼 𑀦 𑀳𑁄𑀢𑀺. 𑀢𑀢𑁆𑀣𑀸𑀧𑀺 𑀓𑁂𑀘𑀺 ‘‘𑀤𑁄𑀲𑀦𑁆𑀥𑀓𑀸𑀭𑀪𑀺𑀤𑀽𑀭𑁄’’𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀇𑀘𑁆𑀙𑀦𑁆𑀢𑀺. 𑀪𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀪𑀸𑀲𑀼𑀭𑁄, 𑀉𑀭𑀧𑀘𑁆𑀘𑀬𑁄. 𑀲𑀭𑀧𑀘𑁆𑀘𑀬𑁂 𑀪𑀲𑁆𑀲𑀭𑁄, ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀭𑀲𑁆𑀲𑁄. (𑀢𑁂𑀓𑀸𑀮𑀺𑀓𑀧𑁆𑀧𑀘𑁆𑀘𑀬𑀸).

𑁫𑁫. 𑀓𑀢𑁆𑀢𑀭𑀺 𑀪𑀽𑀢𑁂 𑀓𑁆𑀢𑀯𑀦𑁆𑀢𑀼+𑀓𑁆𑀢𑀸𑀯𑀻

𑀪𑀽𑀢𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀓𑁆𑀢𑀯𑀦𑁆𑀢𑀼+𑀓𑁆𑀢𑀸𑀯𑀻 𑀳𑁄𑀦𑁆𑀢𑀺 𑀓𑀢𑁆𑀢𑀭𑀺. 𑀯𑀺𑀚𑀺𑀦𑀻𑀢𑀺 𑀯𑀺𑀚𑀺𑀢𑀯𑀸 𑀯𑀺𑀚𑀺𑀢𑀸𑀯𑀻, 𑀓𑀸𑀦𑀼𑀩𑀦𑁆𑀥𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀕𑀼𑀡𑀯𑀦𑁆𑀢𑀼 𑀤𑀡𑁆𑀟𑀺𑀲𑀫𑀁. 𑀳𑀼=𑀳𑀯𑀦𑁂, 𑀅𑀕𑁆𑀕𑀺𑀁 𑀅𑀳𑀯𑀻𑀢𑀺 𑀳𑀼𑀢𑀯𑀸 𑀳𑀼𑀢𑀸𑀯𑀻, 𑀳𑀼𑀢𑀸𑀯𑀺𑀦𑀻 𑀳𑀼𑀢𑀯𑀸𑀦𑀻. ‘‘𑀪𑀽𑀢𑁂’’𑀢𑀺 𑀬𑀸𑀯 ‘‘𑀆𑀳𑀸𑀭𑀢𑁆𑀣𑀸’’𑀢𑀺 𑀅𑀥𑀺𑀓𑀸𑀭𑁄.

𑁫𑁬. 𑀓𑁆𑀢𑁄 𑀪𑀸𑀯𑀓𑀫𑁆𑀫𑁂𑀲𑀼𑀢𑀺

𑀪𑀸𑀯𑁂 𑀓𑀫𑁆𑀫𑁂 𑀘 𑀪𑀽𑀢𑁂 𑀓𑁆𑀢𑁄 𑀳𑁄𑀢𑀺. 𑀅𑀲𑀦𑀁 𑀆𑀲𑀺𑀢𑀁 𑀪𑀯𑀢𑀸, 𑀜𑀺. 𑀓𑀭𑀻𑀬𑀺𑀢𑁆𑀣𑀸𑀢𑀺 𑀓𑀢𑁄 𑀓𑀝𑁄 𑀪𑀯𑀢𑀸, ‘‘𑀕𑀫𑀸𑀤𑀺𑀭𑀸𑀦𑀁’’ 𑀢𑁆𑀬𑀸𑀤𑀺𑀦𑀸 𑀭𑀮𑁄𑀧𑁄. 𑀏𑀯+𑀫𑀼𑀧𑀭𑀺𑀧𑀺.

𑁫𑁭. 𑀓𑀢𑁆𑀢𑀭𑀺 𑀘𑀸+𑀭𑀫𑁆𑀪𑁂

𑀓𑁆𑀭𑀺𑀬𑀸𑀭𑀫𑁆𑀪𑁂 𑀓𑀢𑁆𑀢𑀭𑀺𑀓𑁆𑀢𑁄 𑀳𑁄𑀢𑀺 𑀬𑀣𑀸𑀧𑀢𑁆𑀢𑀜𑁆𑀘, 𑀧𑀓𑀭𑀻𑀢𑀺 𑀧𑀓𑀢𑁄 𑀪𑀯𑀁 𑀓𑀝𑀁. 𑀧𑀓𑀭𑀻𑀬𑀺𑀢𑁆𑀣𑀸𑀢𑀺 𑀧𑀓𑀢𑁄 𑀓𑀝𑁄 𑀪𑀯𑀢𑀸. 𑀧𑀲𑀼𑀧𑀻𑀢𑀺 𑀧𑀲𑀼𑀢𑁆𑀢𑁄 𑀪𑀯𑀁. 𑀧𑀲𑀼𑀧𑀻𑀬𑀺𑀢𑁆𑀣𑀸𑀢𑀺 𑀧𑀲𑀼𑀢𑁆𑀢𑀁 𑀪𑀯𑀢𑀸, 𑀧𑀭𑀭𑀽𑀧𑀁.

𑁫𑁮. 𑀞𑀸+𑀲 𑀯𑀲 𑀲𑀺𑀮𑀺𑀲 𑀲𑀻 𑀭𑀼𑀳 𑀚𑀭 𑀚𑀦𑀻𑀳𑀺

𑀞𑀸𑀤𑀻𑀳𑀺 𑀓𑀢𑁆𑀢𑀭𑀺 𑀓𑁆𑀢𑁄 𑀳𑁄𑀢𑀺 𑀬𑀣𑀸𑀧𑀢𑁆𑀢𑀜𑁆𑀘. 𑀉𑀧𑀝𑁆𑀞𑀸𑀲𑀻𑀢𑀺 𑀉𑀧𑀝𑁆𑀞𑀻𑀢𑁄 𑀪𑀯𑀁 𑀕𑀼𑀭𑀼𑀁. 𑀉𑀧𑀝𑁆𑀞𑀻𑀬𑀺𑀢𑁆𑀣𑀸𑀢𑀺 𑀉𑀧𑀝𑁆𑀞𑀺𑀢𑁄 𑀕𑀼𑀭𑀼 𑀪𑁄𑀢𑀸, ‘‘𑀞𑀸𑀲𑁆𑀲𑀻’’𑀢𑀺 𑀞𑀸𑀲𑁆𑀲 𑀇. 𑀏𑀯𑀁 𑀉𑀧𑀸𑀲𑀻𑀢𑀺 𑀉𑀧𑀸𑀲𑀺𑀢𑁄. 𑀉𑀧𑀸𑀲𑀻𑀬𑀺𑀢𑁆𑀣𑀸𑀢𑀺 𑀉𑀧𑀸𑀲𑀺𑀢𑁄. ‘‘𑀜𑀺 𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀜𑀺. 𑀅𑀦𑀼𑀯𑀼𑀲𑀺 𑀅𑀦𑀼𑀯𑀼𑀲𑀻𑀬𑀺𑀢𑁆𑀣𑀸𑀢𑀺 𑀯𑀸 𑀅𑀦𑀼𑀯𑀼𑀲𑀻𑀢𑁄. ‘‘𑀅𑀲𑁆𑀲𑀽’’𑀢𑀺 𑀅𑀲𑁆𑀲 𑀉𑀓𑀸𑀭𑁄. 𑀆𑀧𑀼𑀩𑁆𑀩𑁄 𑀲𑀺𑀮𑀺𑀲=𑀆𑀮𑀺𑀗𑁆𑀕𑀦𑁂, 𑀆𑀲𑀺𑀮𑁂𑀲𑀺 𑀆𑀲𑀺𑀮𑁂𑀲𑀻𑀬𑀺𑀢𑁆𑀣𑀸𑀢𑀺 𑀯𑀸 𑀆𑀲𑀺𑀮𑀺𑀝𑁆𑀞𑁄. ‘‘𑀲𑀸𑀦𑀦𑁆𑀢𑀭𑀲𑁆𑀲 𑀢𑀲𑁆𑀲 𑀞𑁄’’𑀢𑀺 𑀞𑁂 𑀧𑀭𑀭𑀽𑀧𑀁 𑀧𑀞𑀫𑀓𑁆𑀔𑀭𑀜𑁆𑀘. 𑀅𑀥𑀺𑀲𑀬𑀺 𑀅𑀥𑀺𑀲𑀻𑀬𑀺𑀢𑁆𑀣𑀸𑀢𑀺 𑀯𑀸 𑀅𑀥𑀺𑀲𑀬𑀺𑀢𑁄 𑀔𑀝𑁄𑀧𑀺𑀓𑀁 𑀪𑀯𑀁, 𑀅𑀥𑀺𑀲𑀬𑀺𑀢𑀸 𑀔𑀝𑁄𑀧𑀺𑀓𑀸 𑀪𑁄𑀢𑀸. 𑀏𑀯𑀁 𑀆𑀭𑀼𑀳𑀺 𑀆𑀭𑀼𑀳𑀻𑀬𑀺𑀢𑁆𑀣𑀸𑀢𑀺 𑀯𑀸 𑀆𑀭𑀼𑀴𑁆𑀳𑁄 𑀭𑀼𑀓𑁆𑀔𑀁 𑀪𑀯𑀁, 𑀆𑀭𑀼𑀴𑁆𑀳𑁄 𑀭𑀼𑀓𑁆𑀔𑁄 𑀪𑁄𑀢𑀸, ‘‘𑀭𑀼𑀳𑀸𑀤𑀻𑀳𑀺 𑀳𑁄 𑀴 𑀘𑀸’’𑀢𑀺 𑀢𑀲𑁆𑀲 𑀳𑀓𑀸𑀭𑁄 𑀧𑀼𑀩𑁆𑀩𑀳𑀓𑀸𑀭𑀲𑁆𑀲 𑀘 𑀴𑁄. 𑀅𑀦𑀼𑀚𑀻𑀭𑀺 𑀅𑀦𑀼𑀚𑀻𑀭𑀻𑀬𑀺𑀢𑁆𑀣𑀸𑀢𑀺 𑀯𑀸 𑀅𑀦𑀼𑀚𑀺𑀡𑁆𑀡𑁄 𑀯𑀲𑀮𑀺𑀁 𑀪𑀯𑀁, 𑀅𑀦𑀼𑀚𑀺𑀡𑁆𑀡𑀸 𑀯𑀲𑀮𑀻 𑀪𑁄𑀢𑀸, ‘‘𑀢𑀭𑀸𑀤𑀻𑀳𑀺 𑀭𑀺𑀡𑁆𑀡𑁄’’𑀢𑀺 𑀓𑁆𑀢𑀲𑁆𑀲 𑀭𑀺𑀡𑁆𑀡𑀸𑀤𑁂𑀲𑁄 ‘‘𑀭𑀸𑀦𑀼𑀩𑀦𑁆𑀥𑁂’’𑀢𑁆𑀬𑀸𑀤𑀺𑀦𑀸 𑀅𑀭𑀪𑀸𑀕𑀲𑁆𑀲 𑀮𑁄𑀧𑁄 𑀘. 𑀅𑀦𑁆𑀯𑀚𑀸𑀬𑀺 𑀅𑀦𑁆𑀯𑀚𑀸𑀬𑀺𑀢𑁆𑀣𑀸𑀢𑀺 𑀯𑀸 𑀅𑀦𑀼𑀚𑀸𑀢𑁄 𑀫𑀸𑀡𑀯𑀓𑁄 𑀫𑀸𑀡𑀯𑀺𑀓𑀁, 𑀅𑀦𑀼𑀚𑀸𑀢𑀸 𑀫𑀸𑀡𑀯𑀺𑀓𑀸 𑀫𑀸𑀡𑀯𑀓𑁂𑀦, ‘‘𑀚𑀦𑀺𑀲𑁆𑀲𑀸’’𑀢𑀺 𑀦𑀲𑁆𑀲 𑀆.

𑁫𑁯. 𑀕𑀫𑀦𑀢𑁆𑀣𑀸+𑀓𑀫𑁆𑀫𑀓𑀸+𑀥𑀸𑀭𑁂 𑀘

𑀕𑀫𑀦𑀢𑁆𑀣𑀢𑁄 𑀅𑀓𑀫𑁆𑀫𑀓𑀢𑁄 𑀘 𑀓𑁆𑀭𑀺𑀬𑀢𑁆𑀣𑀸 𑀆𑀥𑀸𑀭𑁂 𑀓𑁆𑀢𑁄 𑀳𑁄𑀢𑀺 𑀓𑀢𑁆𑀢𑀭𑀺 𑀘 𑀬𑀣𑀸𑀧𑀢𑁆𑀢𑀜𑁆𑀘. 𑀬𑀸=𑀧𑀸𑀧𑀼𑀡𑀦𑁂, 𑀬𑀸𑀢𑀯𑀦𑁆𑀢𑁄 𑀅𑀲𑁆𑀫𑀺𑀦𑁆𑀢𑀺 𑀬𑀸𑀢𑀁 𑀞𑀸𑀦𑀁. 𑀬𑀸𑀢𑀯𑀦𑁆𑀢𑁄 𑀬𑀸𑀢𑀸, 𑀬𑀸𑀦𑀁 𑀬𑀸𑀢𑀁. 𑀏𑀢𑁆𑀣 𑀲𑀦𑁆𑀢𑀫𑁆𑀧𑀺 𑀓𑀫𑁆𑀫𑀁 𑀅𑀦𑀺𑀘𑁆𑀙𑀺𑀢𑀁. 𑀬𑀸𑀬𑀺𑀢𑀸𑀢𑀺 𑀬𑀸𑀢𑁄 𑀧𑀣𑁄. ‘‘𑀬𑁂 𑀕𑀢𑁆𑀬𑀢𑁆𑀣𑀸, 𑀢𑁂 𑀩𑀼𑀤𑁆𑀥𑁆𑀬𑀢𑁆𑀣𑀸. 𑀬𑁂 𑀩𑀼𑀤𑁆𑀥𑁆𑀬𑀢𑁆𑀣𑀸, 𑀢𑁂 𑀕𑀢𑁆𑀬𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀣𑀮𑀓𑁆𑀔𑀡𑀁 𑀬𑀸𑀣𑀸𑀯𑀢𑁄 𑀆𑀕𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄 𑀇𑀢𑀺𑀧𑀺 𑀳𑁄𑀢𑀺. 𑀆𑀲𑀺𑀢𑀯𑀦𑁆𑀢𑁄 𑀅𑀲𑁆𑀫𑀺𑀦𑁆𑀢𑀺 𑀆𑀲𑀺𑀢𑀁. 𑀆𑀲𑀺𑀢𑀯𑀦𑁆𑀢𑁄 𑀆𑀲𑀺𑀢𑀸. 𑀆𑀲𑀦+𑀫𑀸𑀲𑀺𑀢𑀁.

𑁬𑁦. 𑀆𑀳𑀸𑀭𑀢𑁆𑀣𑀸