𑁬. 𑀢𑁆𑀬𑀸𑀤𑀺𑀓𑀡𑁆𑀟

𑀅𑀣 𑀢𑁆𑀬𑀸𑀤𑀬𑁄 𑀓𑁆𑀭𑀺𑀬𑀸𑀯𑀸𑀘𑀻𑀳𑀺 𑀥𑀸𑀢𑀽𑀳𑀺 𑀯𑀼𑀘𑁆𑀘𑀦𑁆𑀢𑁂.

𑀓𑁆𑀭𑀺𑀬𑀁 𑀆𑀘𑀺𑀓𑁆𑀔𑀢𑀻𑀢𑀺 𑀆𑀔𑁆𑀬𑀸𑀢𑀦𑁆𑀢𑀺 𑀓𑁆𑀭𑀺𑀬𑀸𑀧𑀤𑀲𑁆𑀲 𑀧𑀼𑀩𑁆𑀩𑀸𑀘𑀭𑀺𑀬𑀲𑀜𑁆𑀜𑀸. 𑀓𑀸𑀮+𑀓𑀸𑀭𑀓+𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀁 𑀢𑁆𑀬𑀸𑀤𑁆𑀬𑀦𑁆𑀢𑀁 𑀅𑀮𑀺𑀗𑁆𑀕𑀜𑁆𑀘, 𑀯𑀼𑀢𑁆𑀢𑀫𑁆𑀧𑀺 𑀘𑁂+𑀢𑀁 𑁋

𑀬𑀁 𑀢𑀺𑀓𑀸𑀮𑀁 𑀢𑀺𑀧𑀼𑀭𑀺𑀲𑀁, 𑀓𑁆𑀭𑀺𑀬𑀸𑀯𑀸𑀘𑀻 𑀢𑀺𑀓𑀸𑀭𑀓𑀁;

𑀅𑀢𑀺𑀮𑀺𑀗𑁆𑀕𑀁 𑀤𑁆𑀯𑀺𑀯𑀘𑀦𑀁, 𑀢+𑀤𑀸𑀔𑁆𑀬𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁪. 𑀓𑁆𑀭𑀺𑀬𑀢𑁆𑀣𑀸 𑀩𑀳𑀼𑀮𑀁 𑁋𑀢𑀺

𑀘 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂. 𑀓𑁆𑀭𑀺𑀬𑀸 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀓𑁆𑀭𑀺𑀬𑀢𑁆𑀣𑁄 𑀥𑀸𑀢𑀼, 𑀲𑁄 𑀘 𑀤𑀼𑀯𑀺𑀥𑁄 𑀲𑀓𑀫𑁆𑀫𑀓𑀸+𑀓𑀫𑁆𑀫𑀓𑀯𑀲𑁂𑀦. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑁆𑀭𑀺𑀬𑀢𑁆𑀣𑁂 𑀓𑀢𑁆𑀢𑀼𑀯𑀸𑀘𑀺𑀫𑁆𑀳𑀸 𑀓𑀫𑁆𑀫𑀁 𑀕𑀯𑁂𑀲𑀻𑀬𑀢𑁂, 𑀲𑁄 𑀲𑀓𑀫𑁆𑀫𑀓𑁄. 𑀇𑀢𑀭𑁄 𑀅𑀓𑀫𑁆𑀫𑀓𑁄.

𑀢𑀢𑁆𑀭 𑀲𑀓𑀫𑁆𑀫𑀓𑀸 𑀓𑀫𑁆𑀫𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑀓𑀝𑀁 𑀓𑀭𑁄𑀢𑀺, 𑀕𑀸𑀫𑀁 𑀕𑀘𑁆𑀙𑀢𑀺, 𑀑𑀤𑀦𑀁 𑀧𑀘𑀢𑀺. 𑀅𑀓𑀫𑁆𑀫𑀓𑀸 𑀓𑀫𑁆𑀫𑀦𑀺𑀭𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑀅𑀘𑁆𑀙𑀢𑀺 𑀲𑁂𑀢𑀺 𑀢𑀺𑀝𑁆𑀞𑀢𑀺. 𑀓𑁆𑀭𑀺𑀬𑀸𑀢𑀺 𑀘 𑀕𑀫𑀦𑀧𑀘𑀦𑀸𑀤𑀺𑀓𑁄 𑀅𑀲𑀢𑁆𑀢𑀲𑀫𑁆𑀫𑀢𑁄 𑀓𑀢𑁆𑀢𑀭𑀺 𑀓𑀫𑁆𑀫𑁂 𑀯𑀸 𑀧𑀢𑀺𑀝𑁆𑀞𑀺𑀢𑁄 𑀓𑀸𑀭𑀓𑀲𑀫𑀽𑀳𑀲𑀸𑀥𑀺𑀬𑁄 𑀧𑀤𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀅𑀧𑀺 𑀘 𑁋

𑀓𑀭𑀡𑀁 𑀪𑀯𑀦𑀁 𑀘𑀸𑀧𑀺, 𑀓𑀭+𑀪𑀽𑀳𑀺 𑀓𑀣𑀻𑀬𑀢𑁂;

𑀢𑀢𑁄 𑀓𑁆𑀭𑀺𑀬𑀸𑀤𑀺𑀯𑀸𑀘𑀢𑁆𑀢𑀁, 𑀧𑀸𑀓𑀸𑀤𑀻𑀦𑀁 𑀓𑀣𑀁 𑀪𑀯𑁂.

𑀓𑀭+𑀪𑀽𑀥𑀸𑀢𑀽𑀳𑀺 𑀓𑀭𑀡𑀜𑁆𑀘 𑀪𑀯𑀦𑀜𑁆𑀘 𑀯𑀼𑀘𑁆𑀘𑀢𑀺, 𑀧𑀸𑀓+𑀕𑀫𑀦𑀸𑀤𑀻𑀳𑀺 𑀢𑁂𑀲𑀁 𑀓𑁆𑀭𑀺𑀬𑀸𑀪𑀯𑀦𑀸𑀦𑀁 𑀯𑀸𑀘𑁆𑀘𑀢𑁆𑀢𑀁 𑀓𑀣𑀁 𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦𑀧𑀺 𑁋

𑀧𑀸𑀓𑀸𑀤𑀻𑀦𑀜𑁆𑀳𑀺 𑀯𑀸𑀘𑁆𑀘𑀢𑁆𑀢𑀁, 𑀓𑀭𑀪𑀽𑀲𑀼 𑀦 𑀬𑀼𑀚𑁆𑀚𑀢𑀺;

𑀢𑀁 𑀩𑀳𑀼𑀢𑀭𑀯𑀸𑀘𑁆𑀘𑀢𑁆𑀢𑀁, 𑀧𑀸𑀓𑀸𑀤𑀻𑀲𑀼 𑀦 𑀬𑀼𑀚𑁆𑀚𑀢𑀺.

𑀢𑀁 𑀦𑀸𑀫 𑁋

𑀓𑀸𑀭𑀺𑀬𑀭𑀽𑀧𑀸 𑀳𑀺 𑀥𑀸𑀢𑁆𑀯𑀢𑁆𑀣𑀸, 𑀲𑀢𑁆𑀢𑀸𑀬𑀼𑀢𑁆𑀢𑀸 𑀘 𑀢𑁂+𑀔𑀺𑀮𑀸;

𑀢𑀢𑁄 𑀓𑁆𑀭𑀺𑀬𑀸 𑀘 𑀪𑀸𑀯𑁄 𑀘, 𑀲𑀸𑀫𑀜𑁆𑀜𑀁 𑀢𑁂𑀲𑀼 𑀕𑀫𑁆𑀬𑀢𑁂.

𑁧. 𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺 𑀲𑀺 𑀣 𑀫𑀺 𑀫 𑀢𑁂 𑀅𑀦𑁆𑀢𑁂 𑀲𑁂 𑀯𑁆𑀳𑁂 𑀏 𑀫𑁆𑀳𑁂.

𑀯𑀢𑁆𑀢𑀫𑀸𑀦𑁂 𑀆𑀭𑀤𑁆𑀥𑀸𑀧𑀭𑀺𑀲𑀫𑀢𑁆𑀢𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀺. 𑀓𑁆𑀭𑀺𑀬𑀸𑀥𑀺𑀓𑀸𑀭𑀢𑁆𑀢𑀸 ‘‘𑀓𑁆𑀭𑀺𑀬𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲+𑀫𑀦𑀺𑀬𑀫𑁂 𑁋

𑁧𑁪. 𑀧𑀼𑀩𑁆𑀩𑀧𑀭𑀘𑁆𑀙𑀓𑁆𑀓𑀸𑀦+𑀫𑁂𑀓𑀸𑀦𑁂𑀓𑁂𑀲𑀼 𑀢𑀼𑀫𑁆𑀳𑀸+𑀫𑁆𑀳+𑀲𑁂𑀲𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀫𑀚𑁆𑀛𑀺𑀫𑀼+𑀢𑁆𑀢𑀫+𑀧𑀞𑀫𑀸

𑀏𑀓𑀸𑀦𑁂𑀓𑁂𑀲𑀼 𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀢𑀤𑀜𑁆𑀜𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀘 𑀓𑀸𑀭𑀓𑁂𑀲𑀼 𑀧𑀼𑀩𑁆𑀩𑀘𑁆𑀙𑀓𑁆𑀓𑀸𑀦𑀁 𑀧𑀭𑀘𑁆𑀙𑀓𑁆𑀓𑀸𑀦𑀜𑁆𑀘 𑀫𑀚𑁆𑀛𑀺𑀫𑀼+𑀢𑁆𑀢𑀫+𑀧𑀞𑀫𑀸 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀢𑀢𑁆𑀣𑀢𑀺 𑀅𑀦𑁆𑀢𑀻𑀢𑀺 𑀧𑀞𑀫𑀧𑀼𑀭𑀺𑀲𑁄, 𑀆𑀤𑁄 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀲𑀺 𑀣 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀫𑀚𑁆𑀛𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀫𑀺 𑀫 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑁄. 𑀉𑀢𑁆𑀢𑀫𑀲𑀤𑁆𑀤𑁄+𑀬𑀁 𑀲𑀪𑀸𑀯𑀢𑁄 𑀢𑀺𑀧𑀪𑀼𑀢𑀻𑀦+𑀫𑀦𑁆𑀢+𑀫𑀸𑀳. 𑀧𑀭𑀘𑁆𑀙𑀓𑁆𑀓𑁂𑀧𑀺 𑀢𑁂 𑀅𑀦𑁆𑀢𑁂𑀢𑀺𑀆𑀤𑀺𑀦𑀸 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼 𑀪𑀯𑀺𑀲𑁆𑀲𑀢𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀧𑀘𑁆𑀘𑀬𑀯𑀺𑀥𑀸𑀦𑀲𑀼𑀢𑁆𑀢𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀪𑀽𑀯𑀸𑀤𑀻𑀦+𑀫𑀝𑁆𑀞𑀕𑀡𑀸𑀦𑀁 𑀪𑀽𑀯𑀸𑀤𑀺𑀕𑀡𑁂𑀲𑀼 𑀪𑀽=𑀲𑀢𑁆𑀢𑀸𑀬+𑀫𑀺𑀢𑀺 𑀧𑀞𑀫𑀥𑀸𑀢𑀼𑀢𑁄 𑀧𑀭𑀸 𑀢𑁆𑀬𑀸𑀤𑀬𑁄 𑀬𑁄𑀚𑀻𑀬𑀦𑁆𑀢𑁂. 𑀢𑀢𑁆𑀣 ‘‘𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁’’𑀢𑀺 𑀢𑁆𑀬𑀸𑀤𑀻𑀲𑀼 𑀧𑀭𑀪𑀽𑀢𑁂𑀲𑀼 𑀓𑀢𑁆𑀢𑀼+𑀓𑀫𑁆𑀫+𑀪𑀸𑀯𑁂𑀲𑀼𑀬𑁂𑀯 𑀓𑁆𑀬𑀯𑀺𑀓𑀭𑀡𑀮𑀯𑀺𑀓𑀭𑀡𑀸 𑀳𑁄𑀦𑁆𑀢𑀻𑀢𑀺 ‘‘𑀓𑁆𑀬𑁄 𑀪𑀸𑀯𑀓𑀫𑁆𑀫𑁂𑀲𑁆𑀯+𑀧𑀭𑁄𑀓𑁆𑀔𑁂𑀲𑀼 𑀫𑀸𑀦+𑀦𑁆𑀢+𑀢𑁆𑀬𑀸𑀤𑀻𑀲𑀼’’ ‘‘𑀓𑀢𑁆𑀢𑀭𑀺 𑀮𑁄’’ 𑀇𑀘𑁆𑀘𑀸𑀤𑀺𑀦𑀸 𑀢𑁂𑀲𑀁 𑀯𑀺𑀓𑀭𑀡𑀸𑀦𑀁 𑀯𑀺𑀥𑀸𑀦𑀸 𑀢𑁆𑀬𑀸𑀤𑀬𑁄 𑀓𑀢𑁆𑀢𑀼+𑀓𑀫𑁆𑀫+𑀪𑀸𑀯𑁂𑀲𑁆𑀯𑁂𑀯 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀓𑀢𑁆𑀢𑀭𑀺 𑀢𑀺𑀫𑁆𑀳𑀺𑀮𑁄. 𑀓𑁂 𑀢𑁂 𑀯𑀺𑀓𑀭𑀡𑀸 𑁋

𑀧𑀼𑀩𑁆𑀩𑀸𑀧𑀭𑀪𑀸𑀕𑀝𑁆𑀞𑀸𑀦𑀸, 𑀪𑀺𑀦𑁆𑀦𑀥𑀸𑀢𑀼𑀯𑀺𑀪𑀢𑁆𑀢𑀺𑀬𑁄;

𑀦𑀺𑀲𑁆𑀲𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀏𑀢𑁂 𑀯𑀺𑀓𑀭𑀡𑀸 𑀲𑀺𑀬𑀼𑀁.

𑁫,𑁮𑁨. 𑀬𑀼𑀯𑀡𑁆𑀡𑀸𑀦+𑀫𑁂, 𑀑 𑀧𑀘𑁆𑀘𑀬𑁂

𑀇𑀯𑀡𑁆𑀡𑀼+𑀯𑀡𑁆𑀡𑀦𑁆𑀢𑀸𑀦𑀁 𑀓𑁆𑀭𑀺𑀬𑀢𑁆𑀢𑀸𑀦𑀁 𑀏+𑀑 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀧𑀘𑁆𑀘𑀬𑁂𑀢𑀺 𑀊𑀲𑁆𑀲𑁄+𑀓𑀸𑀭𑁄.

𑁫,𑁮𑁯. 𑀏𑀑𑀦+𑀫𑀬+𑀯𑀸 𑀲𑀭𑁂

𑀲𑀭𑁂 𑀧𑀭𑁂 𑀏𑀑𑀦+𑀫𑀬𑀯𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁𑀢𑀺 𑀑𑀲𑁆𑀲 𑀅𑀯𑀸𑀤𑁂𑀲𑁄. 𑀲𑁄 𑀧𑀼𑀭𑀺𑀲𑁄 𑀲𑀸𑀥𑀼 𑀪𑀯𑀢𑀺, 𑀲𑀸 𑀇𑀢𑁆𑀣𑀻 𑀲𑀸𑀥𑀼 𑀪𑀯𑀢𑀺, 𑀘𑀺𑀢𑁆𑀢𑀁 𑀲𑀸𑀥𑀼 𑀪𑀯𑀢𑀺.

𑀉𑀢𑁆𑀢𑀢𑁆𑀢𑀸 𑀓𑀢𑁆𑀢𑀼 𑀆𑀔𑁆𑀬𑀸𑀢𑁂, 𑀢𑀢𑀺𑀬𑀸 𑀦 𑀘 𑀓𑀢𑁆𑀢𑀭𑀺;

𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑁂𑀯, 𑀅𑀢𑁆𑀣𑀫𑀢𑁆𑀢𑀁 𑀅𑀧𑁂𑀓𑁆𑀔𑀺𑀬.

𑀲𑀢𑀺𑀧𑀺 𑀓𑁆𑀭𑀺𑀬𑀸𑀬𑁂𑀓𑀢𑁆𑀢𑁂 𑀓𑀢𑁆𑀢𑀽𑀦𑀁 𑀩𑀳𑀼𑀢𑁆𑀢𑀸 ‘‘𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁’’𑀢𑀺 𑀅𑀦𑁆𑀢𑀺.

𑁧𑁬𑁧. 𑀓𑁆𑀯𑀘𑀺 𑀯𑀺𑀓𑀭𑀡𑀸𑀦𑀦𑁆𑀢𑀺

𑀯𑀺𑀓𑀭𑀡𑀸𑀦𑀁 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀻𑀢𑀺 𑀮𑀯𑀺𑀓𑀭𑀡𑀲𑁆𑀲 𑀮𑁄𑀧𑁄, 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀁. 𑀢𑁂 𑀧𑀼𑀭𑀺𑀲𑀸 𑀪𑀯𑀦𑁆𑀢𑀺. 𑀫𑀚𑁆𑀛𑀺𑀫𑀧𑀼𑀭𑀺- 𑀲𑁂𑀓𑀯𑀘𑀦𑀁 𑀲𑀺, 𑀢𑁆𑀯𑀁 𑀪𑀯𑀲𑀺. 𑀩𑀳𑀼𑀯𑀘𑀦𑀁 𑀣𑀧𑀘𑁆𑀘𑀬𑁄, 𑀢𑀼𑀫𑁆𑀳𑁂 𑀪𑀯𑀣. 𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀫𑀺𑀧𑀘𑁆𑀘𑀬𑁄.

𑁫𑁭. 𑀳𑀺𑀫𑀺𑀫𑁂𑀲𑁆𑀯+𑀲𑁆𑀲

𑀅𑀓𑀸𑀭𑀲𑁆𑀲 𑀤𑀻𑀖𑁄 𑀳𑁄𑀢𑀺 𑀳𑀺𑀫𑀺𑀫𑁂𑀲𑀼. 𑀅𑀳𑀁 𑀪𑀯𑀸𑀫𑀺. 𑀩𑀳𑀼𑀯𑀘𑀦𑀁 𑀫𑀧𑀘𑁆𑀘𑀬𑁄, 𑀫𑀬𑀁 𑀪𑀯𑀸𑀫. 𑀏𑀯𑀁 𑀧𑀭𑀘𑁆𑀙𑁂𑀓𑁆𑀓𑁂𑀧𑀺-𑀪𑀯𑀢𑁂, 𑀪𑀯𑀦𑁆𑀢𑁂. 𑀪𑀯𑀲𑁂, 𑀪𑀯𑀯𑁆𑀳𑁂. 𑀪𑀯𑁂, 𑀪𑀯𑀫𑁆𑀳𑁂. 𑀓𑁂𑀘𑀺 𑀤𑀻𑀖𑀁 𑀓𑀢𑁆𑀯𑀸 𑀧𑀞𑀦𑁆𑀢𑀺, ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀤𑀻𑀖𑁄, 𑀪𑀯𑀸𑀫𑁆𑀳𑁂.

𑀏𑀢𑁆𑀣 𑀘 𑁋

𑀮𑀚𑁆𑀚𑀸 𑀲𑀢𑁆𑀢𑀸 𑀞𑀺𑀢𑀺 𑀚𑀸𑀕𑀭𑀡𑀁,

𑀯𑀼𑀤𑁆𑀥𑀺 𑀓𑁆𑀔𑀬 𑀚𑀻𑀯𑀺𑀢 𑀫𑀭𑀡𑀁;

𑀓𑀻𑀴𑀸 𑀭𑀼𑀘𑀺 𑀭𑁄𑀘𑀢𑁂 𑀇𑀢𑁆𑀬𑁂𑀯𑀁,

𑀯𑀼𑀢𑁆𑀢𑀸 𑀅𑀓𑀫𑁆𑀫𑀓𑀥𑀸𑀢𑀼 𑀲𑀩𑁆𑀩𑁂.

𑁋𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀁 𑀤𑀼𑀢𑀺𑀬𑀸 𑀦.

𑀧𑀘=𑀧𑀸𑀓𑁂, 𑀅𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀏𑀯+𑀫𑀼𑀧𑀭𑀺𑀧𑀺. 𑀧𑀘 𑀇𑀢𑀺 𑀞𑀺𑀢𑁂 𑀮𑀯𑀺𑀓𑀭𑀡𑀁, 𑀯𑀺𑀓𑀭𑀡𑀮𑁄𑀧𑀸𑀤𑀺 𑀧𑀼𑀭𑀺𑀫𑀲𑀫𑀁. 𑀲𑁄 𑀑𑀤𑀦𑀁 𑀧𑀘𑀢𑀺, 𑀢𑁂 𑀧𑀘𑀦𑁆𑀢𑀺. 𑀢𑁆𑀯𑀁 𑀧𑀘𑀲𑀺, 𑀢𑀼𑀫𑁆𑀳𑁂 𑀧𑀘𑀣. 𑀅𑀳𑀁 𑀧𑀘𑀸𑀫𑀺, 𑀫𑀬𑀁 𑀧𑀘𑀸𑀫. 𑀧𑀭𑀘𑁆𑀙𑀓𑁆𑀓𑁂-𑀧𑀘𑀢𑁂, 𑀧𑀘𑀦𑁆𑀢𑁂. 𑀧𑀘𑀲𑁂, 𑀧𑀘𑀯𑁆𑀳𑁂. 𑀧𑀘𑁂, 𑀧𑀘𑀸𑀫𑁆𑀳𑁂.

𑁧,𑁨𑁨. 𑀯𑀺𑀧𑁆𑀧𑀝𑀺𑀲𑁂𑀥𑁂

𑀯𑀺𑀧𑁆𑀧𑀝𑀺𑀲𑁂𑀥𑀦𑀁=𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑀦𑀁 𑀯𑀺𑀧𑁆𑀧𑀝𑀺𑀲𑁂𑀥𑁄. 𑀧𑀞𑀫𑀫𑀚𑁆𑀛𑀺𑀫𑀧𑀼𑀭𑀺𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀏𑀓𑀢𑁆𑀣 𑀧𑀲𑀗𑁆𑀕𑁂 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀣𑀧𑀘𑁆𑀘𑀬𑁄. 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀺, 𑀢𑀼𑀫𑁆𑀳𑁂 𑀧𑀘𑀣. 𑀢𑀼𑀮𑁆𑀬𑀩𑀮𑀯𑀺𑀭𑁄𑀥𑀺𑀦𑁄 𑀳𑀺 𑀯𑀺𑀧𑁆𑀧𑀝𑀺𑀲𑁂𑀥𑀸 𑀧𑀞𑀫𑀫𑀚𑁆𑀛𑀺𑀫𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀢𑀺𑀡𑁆𑀡𑀁 𑀏𑀓𑀢𑁆𑀣 𑀧𑀲𑀗𑁆𑀕𑁂 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀳𑁄𑀢𑀺, 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀺, 𑀅𑀳𑀜𑁆𑀘 𑀧𑀘𑀸𑀫𑀺 𑀫𑀬𑀁 𑀧𑀘𑀸𑀫𑀸𑀢𑀺 𑀪𑀯𑀢𑀺.

𑀅𑀫+𑀕𑀫=𑀕𑀫𑀦𑁂 𑁋

𑁫,𑁧𑁭𑁩. 𑀕𑀫 𑀬𑀫𑀺+𑀲𑀸+𑀲 𑀤𑀺𑀲𑀸𑀦𑀁 𑀯𑀸 𑀘𑁆𑀙𑀗

𑀏𑀢𑁂𑀲𑀁 𑀥𑀸𑀢𑀽𑀦𑀁 𑀘𑁆𑀙𑀗 𑀯𑀸 𑀳𑁄𑀢𑀺 𑀦𑁆𑀢+𑀫𑀸𑀦+𑀢𑁆𑀬𑀸𑀤𑀻𑀲𑀼. 𑀲𑁄 𑀕𑀸𑀫𑀁 𑀕𑀘𑁆𑀙𑀢𑀺. 𑀅𑀦𑁆𑀢𑀺 𑁋

𑁭𑁪. 𑀕𑀭𑀼𑀧𑀼𑀩𑁆𑀩𑀸 𑀭𑀲𑁆𑀲𑀸 𑀭𑁂+𑀦𑁆𑀢𑁂𑀦𑁆𑀢𑀻𑀦𑀁

𑀕𑀭𑀼𑀧𑀼𑀩𑁆𑀩𑀲𑁆𑀫𑀸 𑀭𑀲𑁆𑀲𑀸 𑀦𑁆𑀢𑁂+𑀦𑁆𑀢𑀻𑀦𑀁 𑀭𑁂 𑀯𑀸 𑀳𑁄𑀢𑀺.

𑀅𑀓𑁆𑀔𑀭𑀦𑀺𑀬𑀫𑁄 𑀙𑀦𑁆𑀤𑀁,

𑀕𑀭𑀼𑀮𑀳𑀼𑀦𑀺𑀬𑀫𑁄 𑀪𑀯𑁂 𑀯𑀼𑀢𑁆𑀢𑀺;

𑀤𑀻𑀖𑁄 𑀲𑀁𑀬𑁄𑀕𑀸𑀤𑀺𑀧𑀼𑀩𑁆𑀩𑁄,

𑀭𑀲𑁆𑀲𑁄 𑀕𑀭𑀼 𑀮𑀳𑀼 𑀢𑀼 𑀭𑀲𑁆𑀲𑁄.

𑀕𑀘𑁆𑀙𑀭𑁂 𑀕𑀘𑁆𑀙𑀦𑁆𑀢𑀺. 𑀢𑁆𑀯𑀁 𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣. 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫. 𑀘𑁆𑀙𑀸𑀤𑁂𑀲𑀸𑀪𑀸𑀯𑀧𑀓𑁆𑀔𑁂 ‘‘𑀊 𑀮𑀲𑁆𑀲𑁂’’𑀢𑀺 𑀏𑀓𑀸𑀭𑁂 𑀕𑀫𑁂𑀢𑀺. 𑀧𑀭𑀮𑁄𑀧𑁂 𑀕𑀫𑁂𑀦𑁆𑀢𑀺. 𑀕𑀫𑁂𑀲𑀺, 𑀕𑀫𑁂𑀣. 𑀕𑀫𑁂𑀫𑀺, 𑀕𑀫𑁂𑀫. 𑀧𑀭𑀘𑁆𑀙𑀓𑁆𑀓𑁂𑀧𑀺 𑀲𑁄 𑀕𑀘𑁆𑀙𑀢𑁂, 𑀕𑀘𑁆𑀙𑀭𑁂 𑀕𑀘𑁆𑀙𑀦𑁆𑀢𑁂. 𑀕𑀘𑁆𑀙𑀲𑁂, 𑀕𑀘𑁆𑀙𑀯𑁆𑀳𑁂. 𑀕𑀘𑁆𑀙𑁂, 𑀕𑀘𑁆𑀙𑀸𑀫𑁆𑀳𑁂.

𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀩𑁆𑀩𑀢𑀺, 𑀧𑀼𑀭𑀸 𑀫𑀭𑀸𑀫𑀻𑀢𑀺 𑀘 𑀢𑀁𑀲𑀫𑀻𑀧𑁂 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑁂𑀦 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑀺 𑁋

𑀆𑀭𑀤𑁆𑀥𑀸+𑀦𑀺𑀝𑁆𑀞𑀺𑀢𑀁 𑀓𑀺𑀘𑁆𑀘𑀁, 𑀯𑀢𑁆𑀢𑀫𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀯𑀢𑁆𑀢𑀫𑀸𑀦𑀲𑀫𑀻𑀧𑀜𑁆𑀘, 𑀯𑀢𑁆𑀢𑀫𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀺𑀫𑀺𑀯 𑀢𑁂 𑁋

𑀕𑀗𑁆𑀕𑀸𑀘 𑀢𑀁𑀲𑀫𑀻𑀧𑀜𑁆𑀘, 𑀬𑀢𑁄 𑀕𑀗𑁆𑀕𑀸𑀢𑀺 𑀜𑀸𑀬𑀢𑁂;

𑀕𑀗𑁆𑀕𑀸𑀬𑀁 𑀧𑀸𑀢𑀼+𑀫𑀸𑀕𑀘𑁆𑀙, 𑀖𑁄𑀲𑁄 𑀕𑀗𑁆𑀕𑀸𑀬+𑀫𑀺𑀢𑁆𑀬𑀧𑀺.

𑀫𑀼𑀔𑁆𑀬𑀸+𑀫𑀼𑀔𑁆𑀬𑀢𑁆𑀣𑀪𑁂𑀤𑁂𑀦, 𑀯𑀢𑁆𑀢𑀫𑀸𑀦𑀁 𑀢𑀢𑁄 𑀤𑁆𑀯𑀺𑀥𑀸;

𑀫𑀼𑀔𑁆𑀬𑀜𑁆𑀳𑀺 𑀭𑀼𑀴𑁆𑀳𑀺+𑀫𑀸𑀧𑀦𑁆𑀦𑀁, 𑀢+𑀤𑀸𑀭𑁄𑀧𑀸 𑀅𑀫𑀼𑀔𑁆𑀬𑀢𑀸𑀢𑀺.

𑀧𑀼𑀭𑁂+𑀧𑀼𑀭𑀸𑀲𑀤𑁆𑀤𑁂𑀳𑀺 𑀯𑀸 𑀅𑀦𑀸𑀕𑀢𑀢𑀸 𑀕𑀫𑁆𑀬𑀢𑁂, 𑀢𑀤𑀸 𑀢𑀲𑁆𑀲 𑀯𑀢𑁆𑀢𑀫𑀸𑀦𑀢𑁆𑀢𑀸. 𑀓𑀸𑀮𑀩𑁆𑀬𑀢𑁆𑀢𑀬𑁄 𑀯𑀸 𑀏𑀲𑁄, 𑀪𑀯𑀦𑁆𑀢𑁆𑀬𑁂𑀯 𑀳𑀺 𑀓𑀸𑀮𑀦𑁆𑀢𑀭𑁂𑀧𑀺 𑀢𑁆𑀬𑀸𑀤𑀬𑁄 𑀩𑀸𑀳𑀼𑀮𑀓𑀸 ‘‘𑀲𑀦𑁆𑀢𑁂𑀲𑀼 𑀧𑀭𑀺𑀕𑀽𑀳𑀸𑀫𑀺’’ ‘‘𑀓𑀸𑀬𑀲𑁆𑀲 𑀪𑁂𑀤𑀸 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀲𑀳𑀩𑁆𑀬𑀢𑀁 𑀕𑀘𑁆𑀙𑀢𑀺 𑀯𑀸𑀲𑀯𑀲𑁆𑀲’’ ‘‘𑀅𑀢𑀺𑀯𑁂𑀮𑀁 𑀦𑀫𑀲𑁆𑀲𑀺𑀲𑁆𑀲𑀁’’𑀢𑀺. ‘‘𑀓𑀼𑀢𑁄 𑀦𑀼 𑀢𑁆𑀯𑀁 𑀆𑀕𑀘𑁆𑀙𑀲𑀺, 𑀭𑀸𑀚𑀕𑀳𑀢𑁄 𑀆𑀕𑀘𑁆𑀙𑀸𑀫𑀻’’𑀢𑀺𑀆𑀤𑀻𑀲𑀼 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁.

𑁫,𑁧𑁭𑁫. 𑀕𑀫 𑀯𑀤 𑀤𑀸𑀦𑀁 𑀖𑀫𑁆𑀫 𑀯𑀚𑁆𑀚 𑀤𑀚𑁆𑀚𑀸

𑀕𑀫𑀸𑀤𑀻𑀦𑀁 𑀖𑀫𑁆𑀫𑀸𑀤𑀬𑁄 𑀯𑀸 𑀳𑁄𑀦𑁆𑀢𑀺 𑀦𑁆𑀢+𑀫𑀸𑀦+𑀢𑁆𑀬𑀸𑀤𑀻𑀲𑀼. 𑀖𑀫𑁆𑀫𑀢𑀺, 𑀖𑀫𑁆𑀫𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀓𑀫𑁆𑀫𑁂 𑁋

𑀉𑀧𑀲𑀕𑁆𑀕𑀯𑀲𑀸 𑀓𑁄𑀘𑀺, 𑀅𑀓𑀫𑁆𑀫𑁄𑀧𑀺 𑀲𑀓𑀫𑁆𑀫𑀓𑁄;

𑀬𑀣𑀸+𑀪𑀺𑀪𑀽𑀬𑀢𑁂 𑀭𑀸𑀕𑁄, 𑀢𑀸𑀧𑀲𑁂𑀦 𑀫𑀳𑀺𑀤𑁆𑀥𑀺𑀦𑀸𑀢𑀺 𑁋

𑀯𑀼𑀢𑁆𑀢𑀢𑁆𑀢𑀸 𑀅𑀓𑀫𑁆𑀫𑀓𑀢𑁄 𑀓𑀫𑁆𑀫𑀦𑀺 𑀅𑀦𑀼𑀧𑀼𑀩𑁆𑀩𑀸 𑀪𑀽𑀥𑀸𑀢𑀼𑀢𑁄 𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀺.

𑁫,𑁧𑁭. 𑀓𑁆𑀬𑁄 𑀪𑀸𑀯𑀓𑀫𑁆𑀫𑁂𑀲𑁆𑀯+𑀧𑀭𑁄𑀓𑁆𑀔𑁂𑀲𑀼 𑀫𑀸𑀦+𑀦𑁆𑀢+𑀢𑁆𑀬𑀸𑀤𑀻𑀲𑀼

𑀪𑀸𑀯𑀓𑀫𑁆𑀫𑀯𑀺𑀳𑀺𑀢𑁂𑀲𑀼 𑀧𑀭𑁄𑀓𑁆𑀔𑀸𑀯𑀚𑁆𑀚𑀺𑀢𑁂𑀲𑀼 𑀫𑀸𑀦+𑀦𑁆𑀢+𑀢𑁆𑀬𑀸𑀤𑀻𑀲𑀼 𑀧𑀭𑁂𑀲𑀼 𑀓𑁆𑀬𑁄 𑀳𑁄𑀢𑀺 𑀓𑁆𑀭𑀺𑀬𑀢𑁆𑀣𑀸. 𑀓𑀓𑀸𑀭𑁄+𑀦𑀼𑀩𑀦𑁆𑀥𑀓𑀸𑀭𑀺𑀬𑀢𑁆𑀣𑁄. ‘‘𑀦 𑀢𑁂 𑀓𑀸𑀦𑀼𑀩𑀦𑁆𑀥+𑀦𑀸𑀕𑀫𑁂𑀲𑀽’’𑀢𑀺 𑀧𑀝𑀺𑀲𑁂𑀥𑀸 𑀑𑀓𑀸𑀭𑀸𑀪𑀸𑀯𑁄. 𑀅𑀦𑀼𑀪𑀽𑀬𑀢𑀺 𑀲𑀼𑀔𑀁 𑀤𑁂𑀯𑀤𑀢𑁆𑀢𑁂𑀦.

𑀏𑀢𑁆𑀣 𑀘 𑁋

𑀆𑀔𑁆𑀬𑀸𑀢𑁂𑀦 𑀅𑀯𑀼𑀢𑁆𑀢𑀢𑁆𑀢𑀸, 𑀓𑀢𑁆𑀢𑀼𑀢𑁄 𑀢𑀢𑀺𑀬𑀸 𑀦 𑀢𑀼;

𑀤𑀼𑀢𑀺𑀬𑀸 𑀳𑁄𑀢𑀺 𑀓𑀫𑁆𑀫𑀲𑁆𑀲, 𑀯𑀼𑀢𑁆𑀢𑀢𑁆𑀢𑀸 𑀧𑀞𑀫𑀸𑀧𑀺+𑀥.

𑀅𑀦𑀼𑀪𑀽𑀬𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑁄 𑀢𑀬𑀸. 𑀅𑀦𑀼𑀪𑀽𑀬𑀲𑀺 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦. 𑀅𑀦𑀼𑀪𑀽𑀬𑀣 𑀢𑀼𑀫𑁆𑀳𑁂. 𑀅𑀳𑀁 𑀅𑀦𑀼𑀪𑀽𑀬𑀸𑀫𑀺, 𑀢𑀬𑀸 𑀫𑀬𑀁 𑀅𑀦𑀼𑀪𑀽𑀬𑀸𑀫. 𑀤𑁆𑀯𑀺𑀢𑁆𑀢𑁂 𑀅𑀦𑀼𑀪𑀼𑀬𑁆𑀬𑀢𑀺+𑀘𑁆𑀘𑀸𑀤𑀺. 𑀏𑀯𑀁 𑀧𑀭𑀘𑁆𑀙𑀓𑁆𑀓𑁂.

𑀪𑀸𑀯𑁂 𑀅𑀤𑀩𑁆𑀩𑀯𑀼𑀢𑁆𑀢𑀺𑀦𑁄 𑀪𑀸𑀯𑀲𑁆𑀲 𑀏𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯. 𑀢𑀜𑁆𑀘 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂𑀬𑁂𑀯 𑀲𑀫𑁆𑀪𑀯𑀢𑀺, 𑀦𑁂𑀯+𑀜𑁆𑀜𑀁, 𑀩𑀳𑀼𑀮𑀁𑀯𑀺𑀥𑀸𑀦𑀸. 𑀪𑀽𑀬𑀢𑀺 𑀪𑀽𑀬𑀢𑁂 𑀤𑁂𑀯𑀤𑀢𑁆𑀢𑁂𑀦, 𑀲𑀫𑁆𑀧𑀢𑀺 𑀪𑀯𑀦𑀦𑁆𑀢𑁆𑀬𑀢𑁆𑀣𑁄.

𑀧𑀘𑀥𑀸𑀢𑀼𑀢𑁄 𑀓𑀫𑁆𑀫𑁂 𑀓𑁆𑀬𑁄.

𑁩𑁭. 𑀓𑁆𑀬𑀲𑁆𑀲𑀢𑀺

𑀓𑁆𑀭𑀺𑀬𑀢𑁆𑀣𑀸 𑀓𑁆𑀬𑀲𑁆𑀲 𑀈𑀜 𑀯𑀸 𑀳𑁄𑀢𑀺. 𑀜𑁄 𑀆𑀤𑁆𑀬𑀸𑀯𑀬𑀯𑀢𑁆𑀣𑁄. 𑀤𑁂𑀯𑀤𑀢𑁆𑀢𑁂𑀦 𑀑𑀤𑀦𑁄 𑀧𑀘𑀻𑀬𑀢𑀺 𑀧𑀘𑁆𑀘𑀢𑀺, 𑀭𑁂𑀆𑀤𑁂𑀲𑁂 𑀑𑀤𑀦𑀸 𑀧𑀘𑀻𑀬𑀭𑁂 𑀧𑀘𑀻𑀬𑀦𑁆𑀢𑀺, 𑀧𑀘𑁆𑀘𑀭𑁂 𑀧𑀘𑁆𑀘𑀦𑁆𑀢𑀺. 𑀘𑀯𑀕𑁆𑀕𑀧𑀼𑀩𑁆𑀩𑀭𑀽𑀧𑀸𑀦𑀺. 𑀢𑁆𑀯𑀁 𑀧𑀘𑀻𑀬𑀲𑀺 𑀧𑀘𑁆𑀘𑀲𑀺, 𑀢𑀼𑀫𑁆𑀳𑁂 𑀧𑀘𑀻𑀬𑀣 𑀧𑀘𑁆𑀘𑀣. 𑀅𑀳𑀁 𑀧𑀘𑀻𑀬𑀸𑀫𑀺 𑀧𑀘𑁆𑀘𑀸𑀫𑀺, 𑀫𑀬𑀁 𑀧𑀘𑀻𑀬𑀸𑀫 𑀧𑀘𑁆𑀘𑀸𑀫. 𑀧𑀭𑀘𑁆𑀙𑀓𑁆𑀓𑁂 𑀤𑁂𑀯𑀤𑀢𑁆𑀢𑁂𑀦 𑀑𑀤𑀦𑁄 𑀧𑀘𑀻𑀬𑀢𑁂 𑀇𑀘𑁆𑀘𑀸𑀤𑀺.

𑀕𑀫𑀺𑀢𑁄 𑀓𑀫𑁆𑀫𑁂 𑀘𑁆𑀙𑀗 𑀘 𑀈𑀜𑀆𑀕𑀫𑁂 𑀘 𑀓𑀢𑁂 𑀢𑁂𑀦 𑀕𑀸𑀫𑁄 𑀕𑀘𑁆𑀙𑀻𑀬𑀢𑀺, 𑀕𑀸𑀫𑀸 𑀕𑀘𑁆𑀙𑀻𑀬𑀦𑁆𑀢𑀺. 𑀕𑀘𑁆𑀙𑀻𑀬𑀲𑀺, 𑀕𑀘𑁆𑀙𑀻𑀬𑀣. 𑀕𑀘𑁆𑀙𑀻𑀬𑀸𑀫𑀺, 𑀕𑀘𑁆𑀙𑀻𑀬𑀸𑀫. 𑀏𑀯𑀁 𑀧𑀭𑀘𑁆𑀙𑀓𑁆𑀓𑁂. 𑀕𑀫𑀻𑀬𑀢𑀺 𑀕𑀫𑁆𑀫𑀢𑀺, 𑀕𑀫𑀻𑀬𑀦𑁆𑀢𑀺 𑀕𑀫𑁆𑀫𑀦𑁆𑀢𑀺. 𑀕𑀫𑀻𑀬𑀲𑀺 𑀕𑀫𑁆𑀫𑀲𑀺, 𑀕𑀫𑀻𑀬𑀣 𑀕𑀫𑁆𑀫𑀣, 𑀕𑀫𑀻𑀬𑀸𑀫𑀺 𑀕𑀫𑁆𑀫𑀸𑀫𑀺, 𑀕𑀫𑀻𑀬𑀸𑀫 𑀕𑀫𑁆𑀫𑀸𑀫 𑀧𑀭𑀘𑁆𑀙𑀓𑁆𑀓𑁂𑀧𑀺 𑀏𑀯𑀁. 𑀢𑀣𑀸 𑀖𑀫𑁆𑀫𑀻𑀬𑀢𑀺, 𑀖𑀫𑁆𑀫𑀻𑀬𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀓𑁆𑀭𑀺𑀬𑀢𑁆𑀣𑀸 𑀓𑀢𑁆𑀢𑀭𑀺 𑀢𑁆𑀬𑀸𑀤𑀺, 𑀓𑀫𑁆𑀫𑀲𑁆𑀫𑀺𑀜𑁆𑀘 𑀲𑀓𑀫𑁆𑀫𑀓𑀸;

𑀪𑀸𑀯𑁂 𑀯𑀸+𑀓𑀫𑁆𑀫𑀓𑀸 𑀓𑀫𑁆𑀫𑀸+𑀯𑀘𑀦𑀺𑀘𑁆𑀙𑀸𑀬 𑀫𑀜𑁆𑀜𑀢𑁂.

𑀢𑀣𑀸 𑀳𑀺 𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀓𑀫𑁆𑀫𑀸𑀲𑁆𑀲 𑀅𑀯𑀘𑀦𑀺𑀘𑁆𑀙𑀸𑀬𑀁 𑀇𑀤𑀁 𑀯𑀼𑀘𑁆𑀘𑀢𑀺 𑁋

𑀲𑀢𑁄𑀧𑀺 𑀦 𑀯𑀺𑀯𑀓𑁆𑀔𑀸+𑀲𑁆𑀲, 𑀅𑀲𑀢𑁄𑀧𑀺 𑀘 𑀲𑀸 𑀪𑀯𑁂;

𑀢𑀁 𑀬𑀣𑀸+𑀦𑀼𑀤𑀭𑀸 𑀓𑀜𑁆𑀜𑀸, 𑀯𑀜𑁆𑀛𑀸𑀯𑀤𑁆𑀥𑀺𑀢𑀓𑁄 𑀬𑀣𑀸.

𑀯𑀺𑀯𑀓𑁆𑀔𑀸 𑀮𑁄𑀓𑀺𑀓𑀸 𑀏𑀲𑀸, 𑀅𑀲𑀓𑁆𑀬+𑀫𑀢𑀺𑀯𑀢𑁆𑀢𑀺𑀢𑀼𑀁;

𑀓𑀣+𑀫𑁂𑀲 𑀯𑀺𑀧𑀭𑀺𑀬𑀸𑀲𑁄, 𑀮𑁄𑀓𑁄 𑀏𑀯𑀸+𑀦𑀬𑀼𑀚𑁆𑀚𑀢𑁂.

(𑀯𑀢𑁆𑀢𑀫𑀸𑀦𑀧𑀘𑁆𑀘𑀬𑀦𑀬𑁄).

𑁨. 𑀪𑀯𑀺𑀲𑁆𑀲𑀢𑀺 𑀲𑁆𑀲𑀢𑀺 𑀲𑁆𑀲𑀦𑁆𑀢𑀺 𑀲𑁆𑀲𑀢𑀺 𑀲𑁆𑀲𑀣 𑀲𑁆𑀲𑀸𑀫𑀺 𑀲𑁆𑀲𑀸𑀫 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂 𑀲𑁆𑀲𑀁 𑀲𑁆𑀲𑀸𑀫𑁆𑀳𑁂

𑀪𑀯𑀺𑀲𑁆𑀲𑀢𑀺=𑀅𑀦𑀸𑀭𑀤𑁆𑀥𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀲𑁆𑀲𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀺.

𑁩𑁫. 𑀅+𑀈+𑀲𑁆𑀲𑀸𑀤𑀻𑀦𑀁 𑀩𑁆𑀬𑀜𑁆𑀚𑀦𑀲𑁆𑀲𑀺𑀜

𑀓𑁆𑀭𑀺𑀬𑀢𑁆𑀣𑀸 𑀧𑀭𑁂𑀲𑀁 𑀅𑀆𑀤𑀻𑀦𑀁 𑀈𑀆𑀤𑀻𑀦𑀁 𑀲𑁆𑀲𑀸𑀤𑀻𑀦𑀜𑁆𑀘 𑀩𑁆𑀬𑀜𑁆𑀚𑀦𑀲𑁆𑀲𑀺+𑀜 𑀳𑁄𑀢𑀺 𑀯𑀺𑀪𑀸𑀲𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸+𑀬𑀁. 𑀲𑁆𑀲𑁂𑀢𑀺 𑀲𑁆𑀲𑀸𑀤𑀻𑀦𑀁 𑀲𑁆𑀲𑀢𑀺𑀆𑀤𑀻𑀦𑀜𑁆𑀘𑀸𑀯𑀬𑀯𑁄 𑀕𑀳𑀺𑀢𑁄, ‘‘𑀊𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀲𑀺𑀤𑁆𑀥𑁂𑀧𑀺 𑀢𑁆𑀬𑀸𑀤𑀻𑀲𑀼 𑀏𑀢𑁂𑀲𑀫𑁂𑀯𑀸𑀢𑀺 𑀦𑀺𑀬𑀫𑀢𑁆𑀣𑁄+𑀬+𑀫𑀸𑀭𑀫𑁆𑀪𑁄. 𑀮𑀲𑁆𑀲𑀸𑀓𑀸𑀭𑀮𑁄𑀧𑁂 𑀑+𑀅𑀯𑀸𑀤𑁂𑀲𑁂 𑀪𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺. 𑀪𑀯𑀺𑀲𑁆𑀲𑀲𑀺, 𑀪𑀯𑀺𑀲𑁆𑀲𑀣. 𑀪𑀯𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀸𑀫. 𑀪𑀯𑀺𑀲𑁆𑀲𑀢𑁂, 𑀪𑀯𑀺𑀲𑁆𑀲𑀦𑁆𑀢𑁂. 𑀪𑀯𑀺𑀲𑁆𑀲𑀲𑁂, 𑀪𑀯𑀺𑀲𑁆𑀲𑀯𑁆𑀳𑁂. 𑀪𑀯𑀺𑀲𑁆𑀲𑀁, 𑀪𑀯𑀺𑀲𑁆𑀲𑀸𑀫𑁆𑀳𑁂.

𑀓𑀫𑁆𑀫𑁂 𑁋

𑁪𑁯. 𑀓𑁆𑀬𑀲𑁆𑀲 𑀲𑁆𑀲𑁂

𑀓𑁆𑀬𑀲𑁆𑀲 𑀯𑀸 𑀮𑁄𑀧𑁄 𑀳𑁄𑀢𑀺 𑀲𑁆𑀲𑁂. 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀯𑀺𑀲𑁆𑀲𑀢𑀺, 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀺. 𑀅𑀦𑀼𑀪𑀯𑀺𑀲𑁆𑀲𑀲𑀺, 𑀅𑀦𑀼𑀪𑀯𑀺𑀲𑁆𑀲𑀣. 𑀅𑀦𑀼𑀪𑀯𑀺𑀲𑁆𑀲𑀸𑀫𑀺, 𑀅𑀦𑀼𑀪𑀯𑀺𑀲𑁆𑀲𑀸𑀫. 𑀅𑀜𑁆𑀜𑀢𑁆𑀭 𑀅𑀦𑀼𑀪𑀽𑀬𑀺𑀲𑁆𑀲𑀢𑀺, 𑀅𑀦𑀼𑀪𑀽𑀬𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀏𑀯𑀁 𑀧𑀭𑀘𑁆𑀙𑀓𑁆𑀓𑁂. 𑀪𑀸𑀯𑁂-𑀪𑀽𑀬𑀺𑀲𑁆𑀲𑀢𑀺 𑀪𑀽𑀬𑀺𑀲𑁆𑀲𑀢𑁂.

𑀓𑀢𑁆𑀢𑀭𑀺-𑀧𑀘𑀺𑀲𑁆𑀲𑀢𑀺, 𑀧𑀘𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀧𑀘𑀺𑀲𑁆𑀲𑀢𑀺 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀘𑀻𑀬𑀺𑀲𑁆𑀲𑀢𑀺, 𑀧𑀘𑁆𑀘𑀺𑀲𑁆𑀲𑀢𑀺. 𑀧𑀘𑁆𑀘𑀺𑀲𑁆𑀲𑀦𑁆𑀢𑀺 𑀑𑀤𑀦𑀸 𑀧𑀘𑀻𑀬𑀺𑀲𑁆𑀲𑀦𑁆𑀢𑀺, 𑀧𑀘𑀻𑀬𑀺𑀲𑁆𑀲𑀭𑁂, 𑀧𑀘𑁆𑀘𑀺𑀲𑁆𑀲𑀭𑁂, 𑀧𑀘𑁆𑀘𑀺𑀲𑁆𑀲𑀦𑁆𑀢𑀺.

𑀕𑀫𑀺𑀢𑁄 𑀓𑀢𑁆𑀢𑀭𑀺-𑀲𑁄 𑀕𑀘𑁆𑀙𑀺𑀲𑁆𑀲𑀢𑀺, 𑀢𑁂 𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀺𑀲𑁆𑀲𑀣. 𑀅𑀳𑀁 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀫𑀬𑀁 𑀕𑀘𑁆𑀙𑀺𑀲𑁆𑀲𑀸𑀫. 𑀕𑀘𑁆𑀙𑀺𑀲𑁆𑀲𑀢𑁂, 𑀕𑀘𑁆𑀙𑀺𑀲𑁆𑀲𑀦𑁆𑀢𑁂. 𑀕𑀘𑁆𑀙𑀺𑀲𑁆𑀲𑀲𑁂, 𑀕𑀘𑁆𑀙𑀺𑀲𑁆𑀲𑀯𑁆𑀳𑁂. 𑀕𑀘𑁆𑀙𑀺𑀲𑁆𑀲𑀁, 𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑁂. 𑀲𑀕𑁆𑀕𑀁 𑀕𑀫𑀺𑀲𑁆𑀲𑀢𑀺, 𑀕𑀫𑀺𑀲𑁆𑀲𑀦𑁆𑀢𑀺. 𑀕𑀫𑀺𑀲𑁆𑀲𑀲𑀺, 𑀕𑀫𑀺𑀲𑁆𑀲𑀣. 𑀕𑀫𑀺𑀲𑁆𑀲𑀸𑀫𑀺, 𑀕𑀫𑀺𑀲𑁆𑀲𑀸𑀫 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀕𑀘𑁆𑀙𑀺𑀬𑀺𑀲𑁆𑀲𑀢𑀺, 𑀕𑀘𑁆𑀙𑀺𑀬𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀓𑁆𑀬𑀮𑁄𑀧𑁂 𑀕𑀫𑀺𑀲𑁆𑀲𑀢𑀺, 𑀕𑀫𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀢𑀣𑀸 𑀖𑀫𑁆𑀫𑀺𑀲𑁆𑀲𑀢𑀺 𑀖𑀫𑁆𑀫𑀻𑀬𑀺𑀲𑁆𑀲𑀢𑀺, 𑀖𑀫𑁆𑀫𑀺𑀲𑁆𑀲𑀦𑁆𑀢𑀺, 𑀖𑀫𑁆𑀫𑀻𑀬𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺.

𑁩. 𑀦𑀸𑀫𑁂 𑀕𑀭𑀳𑀸𑀯𑀺𑀫𑁆𑀳𑀬𑁂𑀲𑀼

𑀦𑀸𑀫𑀲𑀤𑁆𑀤𑁂 𑀦𑀺𑀧𑀸𑀢𑁂 𑀲𑀢𑀺 𑀕𑀭𑀳𑀸𑀬𑀁 𑀯𑀺𑀫𑁆𑀳𑀬𑁂 𑀘 𑀕𑀫𑁆𑀬𑀫𑀸𑀦𑁂 𑀲𑁆𑀲𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀺. 𑀇𑀫𑁂 𑀳𑀺 𑀦𑀸𑀫 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺. 𑀏𑀢𑁆𑀣 ‘‘𑀚𑁆𑀬𑀸𑀤𑀻𑀳𑀺 𑀓𑁆𑀦𑀸’’𑀢𑀺 𑀓𑁆𑀦𑀸𑀯𑀺𑀓𑀭𑀡𑁂 ‘‘𑀜𑀸𑀲𑁆𑀲𑀦𑁂 𑀚𑀸’’𑀢𑀺 𑀚𑀸𑀤𑁂𑀲𑁄. 𑀦 𑀳𑀺 𑀦𑀸𑀫 𑀪𑀺𑀓𑁆𑀔𑀯𑁂 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀧𑀸𑀡𑁂𑀲𑀼 𑀅𑀦𑀼𑀤𑁆𑀤𑀬𑀸 𑀪𑀯𑀺𑀲𑁆𑀲𑀢𑀺. 𑀓𑀣𑀜𑁆𑀳𑀺 𑀦𑀸𑀫 𑀲𑁄 𑀪𑀺𑀓𑁆𑀔𑀯𑁂 𑀫𑁄𑀖𑀧𑀼𑀭𑀺𑀲𑁄 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀓𑀁 𑀓𑀭𑀺𑀲𑁆𑀲𑀢𑀺. 𑀯𑀺𑀫𑁆𑀳𑀬𑁂-𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀲𑀦𑁆𑀢𑁂𑀦 𑀯𑀢 𑀪𑁄 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀤𑀓𑁆𑀔𑀺𑀢𑀺, 𑀦 𑀧𑀦 𑀲𑀤𑁆𑀤𑀁 𑀲𑁄𑀲𑁆𑀲𑀢𑀺. 𑀅𑀘𑁆𑀙𑀭𑀺𑀬𑀁 𑀅𑀦𑁆𑀥𑁄 𑀦𑀸𑀫 𑀧𑀩𑁆𑀩𑀢+𑀫𑀸𑀭𑁄𑀳𑀺𑀲𑁆𑀲𑀢𑀺, 𑀩𑀥𑀺𑀭𑁄 𑀦𑀸𑀫 𑀲𑀤𑁆𑀤𑀁 𑀲𑁄𑀲𑁆𑀲𑀢𑀺. (𑀪𑀯𑀺𑀲𑁆𑀲𑀦𑁆𑀢𑀺𑀧𑀘𑁆𑀘𑀬𑀦𑀬𑁄).

𑁪. 𑀪𑀽𑀢𑁂 𑀈 𑀉𑀁 𑀑 𑀢𑁆𑀣 𑀇𑀁 𑀫𑁆𑀳𑀸 𑀆 𑀊 𑀲𑁂 𑀯𑁆𑀳𑀁 𑀅 𑀫𑁆𑀳𑁂

𑀪𑀽𑀢𑁂 𑀧𑀭𑀺𑀲𑀫𑀢𑁆𑀢𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀈𑀆𑀤𑀬𑁄 𑀳𑁄𑀦𑁆𑀢𑀺. 𑀪𑀽𑀢𑀸𑀦𑀚𑁆𑀚𑀢𑀦𑁂 𑀉𑀧𑀭𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀫𑁂 𑀈𑀆𑀤𑀬𑁄 𑀪𑀽𑀢𑀚𑁆𑀚𑀢𑀦𑁂. ‘‘𑀲𑀼𑀯𑁄 𑀅𑀳𑁄𑀲𑀺 𑀆𑀦𑀦𑁆𑀤𑁄’’𑀢𑀺𑀆𑀤𑀻𑀲𑀼 𑀪𑀽𑀢𑀲𑀸𑀫𑀜𑁆𑀜𑁂𑀯 𑀪𑀯𑀦𑁆𑀢𑀺.

𑀅𑀳𑀲𑁆𑀲𑀼+𑀪𑀬𑀢𑁄 𑀅𑀟𑁆𑀠-𑀭𑀢𑁆𑀢𑀁 𑀯𑀸 𑀢𑀤𑀼𑀧𑀟𑁆𑀠𑀢𑀁;

𑀅𑀦𑁆𑀢𑁄𑀓𑀢𑁆𑀯𑀸𑀦 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀳𑁄 𑀅𑀚𑁆𑀚𑀢𑀦𑁄 𑀇𑀢𑀺;

𑀢𑀤𑀜𑁆𑀜𑁄 𑀧𑀦 𑀬𑁄 𑀓𑀸𑀮𑁄, 𑀲𑁄+𑀦𑀚𑁆𑀚𑀢𑀦𑀲𑀜𑁆𑀜𑀺𑀢𑁄.

𑀇𑀢𑀺 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀈,

𑁧𑁫. 𑀆+𑀈+𑀲𑁆𑀲𑀸𑀤𑀻𑀲𑁆𑀯+𑀜 𑀯𑀸

𑀆𑀆𑀤𑁄 𑀈𑀆𑀤𑁄 𑀲𑁆𑀲𑀸𑀤𑁄 𑀘 𑀓𑁆𑀭𑀺𑀬𑀢𑁆𑀣𑀲𑁆𑀲 𑀯𑀸 𑀅𑀜 𑀳𑁄𑀢𑀻𑀢𑀺 𑀥𑀸𑀢𑀼𑀢𑁄 𑀧𑀼𑀩𑁆𑀩𑀁 𑀅𑀜. ‘‘𑀓𑀢𑁆𑀢𑀭𑀺 𑀮𑁄’’𑀢𑀺 𑀮𑁄, 𑀏𑀓𑀸𑀭+𑀅𑀯𑀸𑀤𑁂𑀲𑀸 𑀘.

𑁩𑁮. 𑀏𑀬𑁆𑀬𑀸𑀣+𑀲𑁆𑀲𑁂+𑀅+𑀆+𑀈+𑀣𑀸𑀦𑀁 𑀑+𑀅+𑀅𑀁+𑀢𑁆𑀣+𑀢𑁆𑀣𑁄+𑀯𑁆𑀳𑁄𑀓

𑀏𑀬𑁆𑀬𑀸𑀣𑀸𑀤𑀻𑀦𑀁 𑀑𑀆𑀤𑀬𑁄 𑀯𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁𑀢𑀺 𑀈𑀲𑁆𑀲𑀢𑁆𑀣𑁄, 𑀅𑀪𑀯𑀺𑀢𑁆𑀣𑁄, 𑀪𑀯𑀺𑀢𑁆𑀣𑁄, 𑀅𑀪𑀯𑀢𑁆𑀣𑁄, 𑀪𑀯𑀢𑁆𑀣𑁄. ‘‘𑀆 𑀈 𑀊 𑀫𑁆𑀳𑀸 𑀲𑁆𑀲𑀸 𑀲𑁆𑀲𑀫𑁆𑀳𑀸𑀦𑀁 𑀯𑀸’’𑀢𑀺 𑀈𑀲𑁆𑀲 𑀭𑀲𑁆𑀲𑀢𑁆𑀢𑀁. 𑀲𑁄 𑀅𑀪𑀯𑀺 𑀪𑀯𑀺, 𑀅𑀪𑀯𑀻 𑀪𑀯𑀻.

𑁩𑁯. 𑀉𑀁𑀲𑁆𑀲𑀺𑀁+𑀲𑁆𑀯𑀁+𑀲𑀼

𑀢𑀺𑀉𑀁𑀲𑁆𑀲 𑀇𑀁𑀲𑀼+𑀅𑀁𑀲𑀼 𑀯𑀸 𑀳𑁄𑀦𑁆𑀢𑀺. 𑀅𑀪𑀯𑀺𑀁𑀲𑀼 𑀪𑀯𑀺𑀁𑀲𑀼, 𑀅𑀪𑀯𑀁𑀲𑀼 𑀪𑀯𑀁𑀲𑀼, 𑀅𑀪𑀯𑀼𑀁 𑀪𑀯𑀼𑀁.

𑁪𑁨. 𑀑𑀲𑁆𑀲 𑀅+𑀇+𑀢𑁆𑀣+𑀢𑁆𑀣𑁄

𑀑𑀲𑁆𑀲 𑀅𑀆𑀤𑀬𑁄 𑀯𑀸 𑀳𑁄𑀦𑁆𑀢𑀺. 𑀅𑀪𑀯 𑀪𑀯, 𑀅𑀪𑀯𑀺 𑀪𑀯𑀺, 𑀇𑀜𑀸𑀕𑀫𑁂 𑀅𑀪𑀯𑀺𑀢𑁆𑀣 𑀪𑀯𑀺𑀢𑁆𑀣, 𑀅𑀪𑀯𑀢𑁆𑀣 𑀪𑀯𑀢𑁆𑀣, 𑀅𑀪𑀯𑀺𑀢𑁆𑀣𑁄 𑀪𑀯𑀺𑀢𑁆𑀣𑁄, 𑀅𑀪𑀯𑀢𑁆𑀣𑁄 𑀪𑀯𑀢𑁆𑀣𑁄.

𑁪𑁩. 𑀲𑀺

𑀑𑀲𑁆𑀲 𑀲𑀺 𑀯𑀸 𑀳𑁄𑀢𑀺. 𑀅𑀪𑀯𑀺𑀲𑀺 𑀪𑀯𑀺𑀲𑀺, 𑀅𑀪𑀯𑀲𑀺 𑀪𑀯𑀲𑀺. 𑀅𑀪𑀯𑁄 𑀪𑀯𑁄.

𑁪𑁫. 𑀫𑁆𑀳𑀸𑀢𑁆𑀣𑀸𑀦+𑀫𑀼𑀜

𑀏𑀲𑀁 𑀉𑀜 𑀯𑀸 𑀳𑁄𑀢𑀺. 𑀈𑀆𑀤𑀺𑀲𑀫𑁆𑀩𑀦𑁆𑀥𑀻𑀦𑀫𑁂𑀯 𑀕𑀳𑀡𑀁. 𑀅𑀪𑀯𑀼𑀢𑁆𑀣 𑀪𑀯𑀼𑀢𑁆𑀣.

𑁪𑁬. 𑀇𑀁𑀲𑁆𑀲 𑀘 𑀲𑀺𑀜

𑀇𑀁𑀲𑁆𑀲 𑀘 𑀲𑀺𑀜 𑀯𑀸 𑀳𑁄𑀢𑀺 𑀫𑁆𑀳𑀸𑀢𑁆𑀣𑀸𑀦𑀜𑁆𑀘 𑀩𑀳𑀼𑀮𑀁. 𑀇𑀓𑀸𑀭𑀜𑁆𑀜𑀓𑀸𑀭𑀸 𑀉𑀘𑁆𑀘𑀸𑀭𑀡𑀆𑀤𑁆𑀬𑀸𑀯𑀬𑀯𑀢𑁆𑀣𑀸. 𑀅𑀪𑀯𑀲𑀺𑀢𑁆𑀣 𑀪𑀯𑀲𑀺𑀢𑁆𑀣, 𑀅𑀪𑀯𑀺𑀢𑁆𑀣 𑀪𑀯𑀺𑀢𑁆𑀣, 𑀅𑀪𑀯𑀢𑁆𑀣 𑀪𑀯𑀢𑁆𑀣, 𑀅𑀪𑀯𑀺𑀲𑀺𑀁 𑀪𑀯𑀺𑀲𑀺𑀁, 𑀅𑀪𑀯𑀲𑀺𑀁 𑀪𑀯𑀲𑀺𑀁, 𑀅𑀪𑀯𑀺𑀁 𑀪𑀯𑀺𑀁. 𑀉𑀜𑀸𑀕𑀫𑁂 𑀆𑀲𑁆𑀲 𑀭𑀲𑁆𑀲𑁄. 𑀅𑀪𑀯𑀼𑀫𑁆𑀳 𑀪𑀯𑀼𑀫𑁆𑀳 𑀅𑀪𑀯𑀼𑀫𑁆𑀳𑀸 𑀪𑀯𑀼𑀫𑁆𑀳𑀸. 𑀲𑀺𑀜𑀸𑀕𑀫𑁂 𑀅𑀪𑀯𑀲𑀺𑀫𑁆𑀳 𑀪𑀯𑀲𑀺𑀫𑁆𑀳 𑀅𑀪𑀯𑀲𑀺𑀫𑁆𑀳𑀸 𑀪𑀯𑀲𑀺𑀫𑁆𑀳𑀸 𑀅𑀪𑀯𑀺𑀫𑁆𑀳 𑀪𑀯𑀺𑀫𑁆𑀳 𑀅𑀪𑀯𑀺𑀫𑁆𑀳𑀸 𑀪𑀯𑀺𑀫𑁆𑀳𑀸 𑀅𑀪𑀯𑀫𑁆𑀳 𑀪𑀯𑀫𑁆𑀳 𑀅𑀪𑀯𑀫𑁆𑀳𑀸 𑀪𑀯𑀫𑁆𑀳𑀸. 𑀧𑀭𑀘𑁆𑀙𑀓𑁆𑀓𑁂 𑁋 ‘‘𑀏𑀬𑁆𑀬𑀸𑀣𑀸’’𑀤𑀺𑀦𑀸 𑀢𑁆𑀣𑁂 𑀅𑀪𑀯𑀺𑀢𑁆𑀣 𑀪𑀯𑀺𑀢𑁆𑀣 𑀅𑀪𑀯𑀢𑁆𑀣 𑀪𑀯𑀢𑁆𑀣. 𑀭𑀲𑁆𑀲𑁂 𑀅𑀪𑀯𑀣 𑀪𑀯𑀣, 𑀅𑀪𑀯𑀸 𑀪𑀯𑀸, 𑀅𑀪𑀯𑀼 𑀪𑀯𑀼. 𑀅𑀪𑀯𑀺𑀲𑁂 𑀪𑀯𑀺𑀲𑁂, 𑀅𑀪𑀯𑀲𑁂 𑀪𑀯𑀲𑁂, 𑀅𑀪𑀯𑀺𑀯𑁆𑀳𑀁 𑀪𑀯𑀺𑀯𑁆𑀳𑀁 𑀅𑀪𑀯𑀯𑁆𑀳𑀁 𑀪𑀯𑀯𑁆𑀳𑀁, 𑀅𑀲𑁆𑀲 𑀅+𑀫𑀸𑀤𑁂𑀲𑁂 𑀅𑀪𑀯𑀁 𑀪𑀯𑀁 𑀅𑀪𑀯 𑀪𑀯, 𑀅𑀪𑀯𑀺𑀫𑁆𑀳𑁂 𑀪𑀯𑀺𑀫𑁆𑀳𑁂 𑀅𑀪𑀯𑀫𑁆𑀳𑁂 𑀪𑀯𑀫𑁆𑀳𑁂. 𑀓𑀫𑁆𑀫𑁂 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀽𑀬𑀺𑀢𑁆𑀣𑁄 𑀅𑀦𑁆𑀯𑀪𑀽𑀬𑀢𑁆𑀣𑁄 𑀅𑀦𑀼𑀪𑀽𑀬𑀢𑁆𑀣𑁄 𑀅𑀦𑁆𑀯𑀪𑀽𑀲𑀺 𑀅𑀦𑀼𑀪𑀽𑀲𑀻 𑀅𑀦𑁆𑀯𑀪𑀽𑀬𑀻 𑀅𑀦𑀼𑀪𑀽𑀬𑀻, 𑀅𑀦𑁆𑀯𑀪𑀽𑀬𑀺𑀁𑀲𑀼 𑀅𑀦𑀼𑀪𑀽𑀬𑀺𑀁𑀲𑀼 𑀅𑀦𑁆𑀯𑀪𑀽𑀬𑀁𑀲𑀼 𑀅𑀦𑀼𑀪𑀽𑀬𑀁𑀲𑀼 𑀅𑀦𑁆𑀯𑀪𑀽𑀬𑀼𑀁 𑀅𑀦𑀼𑀪𑀽𑀬𑀼𑀁 𑀇𑀘𑁆𑀘𑀸𑀤𑀺. 𑀪𑀸𑀯𑁂-𑀢𑁂𑀦 𑀅𑀪𑀽𑀬𑀺𑀢𑁆𑀣𑁄 𑀪𑀽𑀬𑀺𑀢𑁆𑀣𑁄 𑀅𑀪𑀽𑀬𑀢𑁆𑀣𑁄 𑀪𑀽𑀬𑀢𑁆𑀣𑁄 𑀅𑀪𑀽𑀬𑀺 𑀪𑀽𑀬𑀺 𑀅𑀪𑀽𑀬𑀻 𑀪𑀽𑀬𑀻. 𑀢𑁂𑀦 𑀅𑀪𑀽𑀬𑀢𑁆𑀣 𑀪𑀽𑀬𑀢𑁆𑀣 𑀅𑀪𑀽𑀬 𑀪𑀽𑀬 𑀅𑀪𑀽𑀬𑀸 𑀪𑀽𑀬𑀸.

𑀲𑁄 𑀅𑀧𑀘𑀺𑀢𑁆𑀣𑁄 𑀧𑀘𑀺𑀢𑁆𑀣𑁄 𑀇𑀘𑁆𑀘𑀸𑀤𑀺 𑀓𑀢𑁆𑀢𑀼𑀲𑀫𑀁. 𑀓𑀫𑁆𑀫𑁂-𑀅𑀧𑀘𑀻𑀬𑀺𑀢𑁆𑀣𑁄 𑀧𑀘𑀻𑀬𑀺𑀢𑁆𑀣𑁄 𑀅𑀧𑀘𑀻𑀬𑀢𑁆𑀣𑁄 𑀧𑀘𑀻𑀬𑀢𑁆𑀣𑁄. 𑀘𑀯𑀕𑁆𑀕𑀧𑀼𑀩𑁆𑀩- 𑀭𑀽𑀧𑁂 𑀅𑀧𑀘𑁆𑀘𑀺𑀢𑁆𑀣𑁄 𑀧𑀘𑁆𑀘𑀺𑀢𑁆𑀣𑁄 𑀅𑀧𑀘𑁆𑀘𑀢𑁆𑀣𑁄 𑀧𑀘𑁆𑀘𑀢𑁆𑀣𑁄 𑀅𑀧𑀘𑀻𑀬𑀺 𑀧𑀘𑀻𑀬𑀺 𑀅𑀧𑀘𑀻𑀬𑀻 𑀧𑀘𑀻𑀬𑀻 𑀅𑀧𑀘𑁆𑀘𑀺 𑀧𑀘𑁆𑀘𑀺 𑀅𑀧𑀘𑁆𑀘𑀻 𑀧𑀘𑁆𑀘𑀻, 𑀅𑀧𑀘𑀻𑀬𑀺𑀁𑀲𑀼 𑀧𑀘𑀻𑀬𑀺𑀁𑀲𑀼 𑀅𑀧𑀘𑀺𑀁𑀲𑀼 𑀧𑀘𑀺𑀁𑀲𑀼 𑀅𑀧𑀘𑀻𑀬𑀁𑀲𑀼 𑀧𑀘𑀻𑀬𑀁𑀲𑀼 𑀅𑀧𑀘𑁆𑀘𑀁𑀲𑀼 𑀧𑀘𑁆𑀘𑀁𑀲𑀼 𑀅𑀧𑀘𑀻𑀬𑀼𑀁 𑀧𑀘𑀻𑀬𑀼𑀁 𑀅𑀧𑀘𑁆𑀘𑀼𑀁 𑀧𑀘𑁆𑀘𑀼𑀁 𑀇𑀘𑁆𑀘𑀸𑀤𑀺 𑀓𑀢𑁆𑀢𑀼𑀲𑀫𑀁, 𑀧𑀼𑀩𑁆𑀩𑀭𑀽𑀧𑁄𑀯 𑀯𑀺𑀲𑁂𑀲𑁄.

𑀲𑁄 𑀕𑀸𑀫𑀁 𑀅𑀕𑀘𑁆𑀙𑀺𑀢𑁆𑀣𑁄 𑀕𑀘𑁆𑀙𑀺𑀢𑁆𑀣𑁄 𑀇𑀘𑁆𑀘𑀸𑀤𑀺 𑀧𑀼𑀭𑀺𑀫𑀲𑀫𑀁.

𑁩𑁦. 𑀟𑀁𑀲𑀲𑁆𑀲 𑀘 𑀜𑁆𑀙𑀗

𑀟𑀁𑀲𑀲𑁆𑀲 𑀘 𑀕𑀫𑀺𑀲𑁆𑀲 𑀘 𑀜𑁆𑀙𑀗 𑀯𑀸 𑀳𑁄𑀢𑀺 𑀆+𑀈𑀆𑀤𑀻𑀲𑀼. 𑀅𑀕𑀜𑁆𑀙𑀺𑀢𑁆𑀣𑁄 𑀕𑀜𑁆𑀙𑀺𑀢𑁆𑀣𑁄 𑀅𑀕𑀜𑁆𑀙𑀢𑁆𑀣𑁄 𑀕𑀜𑁆𑀙𑀢𑁆𑀣𑁄 𑀅𑀕𑀜𑁆𑀙𑀺 𑀕𑀜𑁆𑀙𑀺 𑀅𑀕𑀜𑁆𑀙𑀻 𑀕𑀜𑁆𑀙𑀻 𑀇𑀘𑁆𑀘𑀸𑀤𑀺.

𑁨𑁯. 𑀕𑀫𑀺𑀲𑁆𑀲𑀸

𑀆𑀆𑀤𑁄 𑀈𑀆𑀤𑁄 𑀘 𑀕𑀫𑀺𑀲𑁆𑀲 𑀆 𑀳𑁄𑀢𑀺 𑀯𑀸. 𑀲𑁄 𑀅𑀕𑀸 𑀅𑀕𑀫𑀺 𑀕𑀫𑀺 𑀅𑀕𑀫𑀺𑀢𑁆𑀣𑁄 𑀕𑀫𑀺𑀢𑁆𑀣𑁄 𑀅𑀕𑀫𑀢𑁆𑀣𑁄 𑀕𑀫𑀢𑁆𑀣𑁄. 𑀈𑀧𑀘𑁆𑀘𑀬𑁂 𑀮𑀲𑁆𑀲𑀸𑀓𑀸𑀭𑀲𑁆𑀲 ‘‘𑀳𑀺𑀫𑀺𑀫𑁂𑀲𑁆𑀯+𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀸’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀤𑀻𑀖𑁂 ‘‘𑀤𑀻𑀖𑀸 𑀈𑀲𑁆𑀲𑀸’’𑀢𑀺 𑀈𑀲𑁆𑀲 𑀲𑀺𑀆𑀤𑁂𑀲𑁄, 𑀅𑀕𑀫𑀸𑀲𑀺 𑀅𑀕𑀫𑀺 𑀕𑀫𑀺 𑀅𑀕𑀫𑀻 𑀕𑀫𑀻, 𑀅𑀕𑀫𑀺𑀁𑀲𑀼 𑀕𑀫𑀺𑀁𑀲𑀼 𑀅𑀕𑀫𑀁𑀲𑀼 𑀕𑀫𑀁𑀲𑀼 𑀅𑀕𑀫𑀼𑀁 𑀕𑀫𑀼𑀁. 𑀑𑀲𑁆𑀲 𑀅𑀆𑀤𑁂𑀲𑁂 𑀅𑀚𑁆𑀛𑀕𑀼𑀁. 𑀢𑁆𑀯𑀁 𑀅𑀚𑁆𑀛𑀕𑀸 𑀧𑀭𑀲𑁆𑀲 𑀮𑁄𑀧𑁄. 𑀢𑀼𑀫𑁆𑀳𑁂 𑀅𑀚𑁆𑀛𑀕𑀼𑀢𑁆𑀣. 𑀅𑀳𑀁 𑀅𑀚𑁆𑀛𑀕𑀁, 𑀫𑀬𑀁 𑀅𑀚𑁆𑀛𑀕𑀫𑁆𑀳. 𑀧𑀭𑀘𑁆𑀙𑀓𑁆𑀓𑁂 𑁋 ‘‘𑀏𑀬𑁆𑀬𑀸𑀣𑀸’’𑀤𑀺𑀦𑀸 𑀢𑁆𑀣𑁂 𑀲𑁄 𑀅𑀕𑀘𑁆𑀙𑀺𑀢𑁆𑀣 𑀕𑀘𑁆𑀙𑀺𑀢𑁆𑀣 𑀅𑀕𑀜𑁆𑀙𑀺𑀢𑁆𑀣 𑀕𑀜𑁆𑀙𑀺𑀢𑁆𑀣 𑀅𑀕𑀫𑀺𑀢𑁆𑀣 𑀕𑀫𑀺𑀢𑁆𑀣 𑀅𑀕𑀫 𑀕𑀫 𑀅𑀕𑀫𑀸 𑀕𑀫𑀸. 𑀢𑁂 𑀅𑀕𑀫𑀽 𑀕𑀫𑀽, 𑀑𑀲𑁆𑀲 𑀆𑀆𑀤𑁂𑀲𑁂 𑀅𑀚𑁆𑀛𑀕𑀼𑀁. 𑀢𑁆𑀯𑀁 𑀅𑀕𑀫𑀺𑀲𑁂 𑀕𑀫𑀺𑀲𑁂. 𑀢𑀼𑀫𑁆𑀳𑁂 𑀅𑀕𑀫𑀺𑀯𑁆𑀳𑀁. ‘‘𑀏𑀬𑁆𑀬𑀸𑀣𑀸’’ 𑀤𑀺𑀦𑀸 𑀅+𑀫𑀸𑀤𑁂𑀲𑁂 𑀅𑀳𑀁 𑀅𑀕𑀫𑀁 𑀕𑀫𑀁 𑀅𑀚𑁆𑀛𑀕𑀁. 𑀫𑀬𑀁 𑀅𑀕𑀫𑀺𑀫𑁆𑀳𑁂 𑀕𑀫𑀺𑀫𑁆𑀳𑁂. 𑀓𑀫𑁆𑀫𑁂𑀅𑀕𑀘𑁆𑀙𑀻𑀬𑀺 𑀅𑀕𑀫𑀻𑀬𑀺, 𑀅𑀕𑀘𑁆𑀙𑀺𑀬𑀼𑀁 𑀅𑀕𑀫𑀺𑀬𑀼𑀁 𑀇𑀘𑁆𑀘𑀸𑀤𑀺. 𑀢𑀣𑀸 𑀅𑀖𑀫𑁆𑀫𑀻 𑀖𑀫𑁆𑀫𑀻 𑀇𑀘𑁆𑀘𑀸𑀤𑀺.

𑁧𑁩. 𑀫𑀸𑀬𑁄𑀕𑁂 𑀈+𑀆𑀆𑀤𑀻

𑀫𑀸𑀬𑁄𑀕𑁂 𑀲𑀢𑀺 𑀈𑀆𑀤𑀬𑁄 𑀆𑀆𑀤𑀬𑁄 𑀘 𑀯𑀸 𑀳𑁄𑀦𑁆𑀢𑀺. 𑀲𑀓𑀓𑀸𑀮𑀢𑁄 𑀓𑀸𑀮𑀦𑁆𑀢𑀭𑁂𑀧𑀺 𑀧𑀘𑁆𑀘𑀬𑀯𑀺𑀥𑀸𑀦𑀢𑁆𑀣𑁄+𑀬𑀁. 𑀫𑀸 𑀪𑀯𑀁 𑀅𑀪𑀯𑀺𑀢𑁆𑀣𑁄 𑀇𑀘𑁆𑀘𑀸𑀤𑀺. 𑀯𑀸𑀯𑀺𑀥𑀸𑀦𑀸𑀲𑁆𑀲𑀢𑁆𑀬𑀸𑀤𑀺+𑀏𑀬𑁆𑀬𑀸𑀤𑀺+𑀢𑁆𑀯𑀸𑀤𑀬𑁄𑀧𑀺 𑀳𑁄𑀦𑁆𑀢𑀺, 𑀫𑀸 𑀪𑀯𑀁 𑀪𑀯𑀺𑀲𑁆𑀲𑀢𑀺, 𑀫𑀸 𑀪𑀯𑀁 𑀪𑀯𑁂𑀬𑁆𑀬, 𑀫𑀸 𑀪𑀯𑀁 𑀪𑀯𑀢𑀼 𑀇𑀘𑁆𑀘𑀸𑀤𑀺. (𑀈𑀆𑀤𑀺𑀧𑀘𑁆𑀘𑀬𑀦𑀬𑁄).

𑁫. 𑀅𑀦𑀚𑁆𑀚𑀢𑀦𑁂 𑀆 𑀊𑀑 𑀢𑁆𑀣 𑀅 𑀫𑁆𑀳𑀸 𑀢𑁆𑀣 𑀢𑁆𑀣𑀼𑀁 𑀲𑁂 𑀯𑁆𑀳𑀁 𑀇𑀁 𑀫𑁆𑀳𑀲𑁂

𑀅𑀯𑀺𑀚𑁆𑀚𑀫𑀸𑀦𑀚𑁆𑀚𑀢𑀦𑁂 𑀪𑀽𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀆𑀆𑀤𑀬𑁄 𑀳𑁄𑀦𑁆𑀢𑀺 𑀯𑀸. ‘‘𑀏𑀬𑁆𑀬𑀸𑀣𑀸’’𑀤𑀺𑀦𑀸 𑀢𑁆𑀣𑁂 ‘‘𑀆 𑀈 𑀊 𑀫𑁆𑀳𑀸’’ 𑀇𑀘𑁆𑀘𑀸𑀤𑀺𑀦𑀸 𑀭𑀲𑁆𑀲𑁂 𑀘 𑀲𑁄 𑀅𑀪𑀯𑀢𑁆𑀣 𑀪𑀯𑀢𑁆𑀣 𑀅𑀪𑀯 𑀪𑀯 𑀅𑀪𑀯𑀸 𑀪𑀯𑀸, 𑀢𑁂 𑀅𑀪𑀯𑀼 𑀪𑀯𑀼 𑀅𑀪𑀯𑀽 𑀪𑀯𑀽. 𑀑, ‘‘𑀑𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀆𑀤𑀬𑁄, 𑀅𑀪𑀯 𑀪𑀯 𑀅𑀪𑀯𑀺 𑀪𑀯𑀺 𑀅𑀪𑀯𑀢𑁆𑀣 𑀪𑀯𑀢𑁆𑀣 𑀅𑀪𑀯𑀢𑁆𑀣𑁄 𑀪𑀯𑀢𑁆𑀣𑁄, 𑀲𑀺𑀆𑀤𑁂𑀲𑁂 𑀅𑀪𑀯𑀲𑀺 𑀪𑀯𑀲𑀺 𑀅𑀪𑀯𑁄 𑀪𑀯𑁄. 𑀢𑀼𑀫𑁆𑀳𑁂 𑀅𑀪𑀯𑀢𑁆𑀣 𑀪𑀯𑀢𑁆𑀣. 𑀅𑀳𑀁 𑀅𑀪𑀯𑀁 𑀪𑀯𑀁 𑀅𑀪𑀯 𑀪𑀯, 𑀫𑀬𑀁 𑀅𑀪𑀯𑀫𑁆𑀳 𑀪𑀯𑀫𑁆𑀳 𑀅𑀪𑀯𑀫𑁆𑀳𑀸 𑀪𑀯𑀫𑁆𑀳𑀸. 𑀲𑁄 𑀅𑀪𑀯𑀢𑁆𑀣 𑀪𑀯𑀢𑁆𑀣. 𑀢𑁂 𑀅𑀪𑀯𑀢𑁆𑀣𑀼𑀁 𑀪𑀯𑀢𑁆𑀣𑀼𑀁. 𑀢𑁆𑀯𑀁 𑀅𑀪𑀯𑀲𑁂 𑀪𑀯𑀲𑁂. 𑀢𑀼𑀫𑁆𑀳𑁂 𑀅𑀪𑀯𑀯𑁆𑀳𑀁 𑀪𑀯𑀯𑁆𑀳𑀁. ‘‘𑀇𑀲𑁆𑀲 𑀘 𑀲𑀺𑀜’’𑀢𑀺 𑀲𑀺𑀁, 𑀅𑀳𑀁 𑀅𑀪𑀯𑀲𑀺𑀁 𑀪𑀯𑀲𑀺𑀁 𑀅𑀪𑀯𑀺𑀁 𑀪𑀯𑀺𑀁. 𑀫𑀬𑀁 𑀅𑀪𑀯𑀫𑁆𑀳𑀲𑁂 𑀪𑀯𑀫𑁆𑀳𑀲𑁂. 𑀓𑀫𑁆𑀫𑁂-𑀢𑁆𑀣𑁂 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀽𑀬𑀺𑀢𑁆𑀣, 𑀇𑀜𑀸𑀕𑀫𑀸𑀪𑀸𑀯𑁂 𑀅𑀦𑀼𑀪𑀽𑀬𑀢𑁆𑀣 𑀇𑀘𑁆𑀘𑀸𑀤𑀺. 𑀪𑀸𑀯𑁂-𑀅𑀪𑀽𑀬𑀢𑁆𑀣 𑀪𑀽𑀬𑀢𑁆𑀣 𑀇𑀘𑁆𑀘𑀸𑀤𑀺.

𑀲𑁄 𑀑𑀤𑀦𑀁 𑀅𑀧𑀘𑀢𑁆𑀣 𑀧𑀘𑀢𑁆𑀣 𑀇𑀘𑁆𑀘𑀸𑀤𑀺 𑀓𑀢𑁆𑀢𑀼𑀲𑀫𑀁. 𑀓𑀫𑁆𑀫𑁂-𑀅𑀧𑀘𑀻𑀬𑀢𑁆𑀣 𑀧𑀘𑀻𑀬𑀢𑁆𑀣 𑀅𑀧𑀘𑁆𑀘𑀢𑁆𑀣 𑀧𑀘𑁆𑀘𑀢𑁆𑀣 𑀅𑀧𑀘𑀻𑀬 𑀧𑀘𑀻𑀬 𑀅𑀧𑀘𑀻𑀬𑀸 𑀧𑀘𑀻𑀬𑀸 𑀅𑀧𑀘𑁆𑀘 𑀧𑀘𑁆𑀘 𑀅𑀧𑀘𑁆𑀘𑀸 𑀧𑀘𑁆𑀘𑀸. 𑀅𑀧𑀘𑀻𑀬𑀼 𑀧𑀘𑀻𑀬𑀼 𑀅𑀧𑀘𑀻𑀬𑀽 𑀧𑀘𑀻𑀬𑀽 𑀅𑀧𑀘𑁆𑀘𑀼 𑀧𑀘𑁆𑀘𑀼 𑀅𑀧𑀘𑁆𑀘𑀽 𑀧𑀘𑁆𑀘𑀽 𑀇𑀘𑁆𑀘𑀸𑀤𑀺. ‘‘𑀫𑀸𑀬𑁄𑀕𑁂 𑀈+𑀆𑀆𑀤𑀻’’𑀢𑀺 𑀫𑀸𑀬𑁄𑀕𑁂𑀧𑀺 𑀆𑀆𑀤𑀬𑁄, 𑀫𑀸 𑀪𑀯𑀁 𑀅𑀧𑀘𑁆𑀘𑀢𑁆𑀣 𑀇𑀘𑁆𑀘𑀸𑀤𑀺.

𑀢𑀣𑀸 𑀅𑀕𑀘𑁆𑀙𑀢𑁆𑀣 𑀕𑀘𑁆𑀙𑀢𑁆𑀣 𑀇𑀘𑁆𑀘𑀸𑀤𑀺 𑀧𑀼𑀭𑀺𑀫𑀲𑀫𑀁. 𑀢𑀣𑀸 𑀅𑀕𑀫𑀢𑁆𑀣 𑀕𑀫𑀢𑁆𑀣 𑀇𑀘𑁆𑀘𑀸𑀤𑀺𑀧𑀺 𑀅𑀖𑀫𑁆𑀫𑀢𑁆𑀣 𑀖𑀫𑁆𑀫𑀢𑁆𑀣 𑀇𑀘𑁆𑀘𑀸𑀤𑀺𑀧𑀺. (𑀅𑀦𑀚𑁆𑀚𑀢𑀦𑀧𑀘𑁆𑀘𑀬𑀦𑀬𑁄).

𑁬. 𑀧𑀭𑁄𑀓𑁆𑀔𑁂 𑀅 𑀉 𑀏 𑀢𑁆𑀣 𑀅 𑀫𑁆𑀳 𑀢𑁆𑀣 𑀭𑁂 𑀢𑁆𑀣𑁄 𑀯𑁆𑀳𑁄 𑀇 𑀫𑁆𑀳𑁂

𑀅𑀧𑀘𑁆𑀘𑀓𑁆𑀔𑁂 𑀪𑀽𑀢𑀸𑀦𑀚𑁆𑀚𑀢𑀦𑁂 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀅𑀆𑀤𑀬𑁄 𑀳𑁄𑀦𑁆𑀢𑀺. 𑀅𑀓𑁆𑀔𑀸𑀦𑀁=𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀁 𑀧𑀭𑁄𑀓𑁆𑀔𑀁. 𑀢𑀲𑁆𑀫𑀺𑀁. ‘‘𑀅𑀧𑀭𑁄𑀓𑁆𑀔𑁂𑀲𑀽’’𑀢𑀺 𑀯𑀘𑀦𑀸 𑀓𑁆𑀬+𑀮𑀸𑀤𑀺𑀯𑀺𑀓𑀭𑀡𑀸 𑀦 𑀳𑁄𑀦𑁆𑀢𑀺.

𑁫,𑁭𑁧. 𑀧𑀭𑁄𑀓𑁆𑀔𑀸𑀬𑀜𑁆𑀘

𑀧𑀭𑁄𑀓𑁆𑀔𑀸𑀬𑀁 𑀧𑀞𑀫+𑀫𑁂𑀓𑀲𑁆𑀲𑀭𑀁 𑀲𑀤𑁆𑀤𑀭𑀽𑀧𑀁 𑀤𑁆𑀯𑁂 𑀪𑀯𑀢𑀺. ‘‘𑀪𑀽𑀲𑁆𑀲 𑀯𑀼𑀓’’ 𑀇𑀢𑀺𑀆𑀤𑀻𑀲𑀼 𑀯𑀼𑀓, 𑀪𑀽𑀯 𑀪𑀽𑀯 𑀇𑀢𑀺 𑀤𑁆𑀯𑀺𑀢𑁆𑀢𑁂 𑁋

𑁫,𑁭𑁫. 𑀮𑁄𑀧𑁄+𑀦𑀸𑀤𑀺𑀩𑁆𑀬𑀜𑁆𑀚𑀦𑀲𑁆𑀲

𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀲𑁆𑀲 𑀆𑀤𑀺𑀢𑁄+𑀜𑁆𑀜𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀮𑁄𑀧𑁄 𑀳𑁄𑀢𑀺.

𑁧𑁮. 𑀧𑀼𑀩𑁆𑀩𑀲𑁆𑀲 𑀅

𑀅𑀆𑀤𑀻𑀲𑀼 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀲𑁆𑀲 𑀪𑀽𑀲𑁆𑀲 𑀅 𑀳𑁄𑀢𑀺.

𑁫,𑁭𑁮. 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀢𑀺𑀬𑀧𑀞𑀫𑀸

𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑁂𑀲𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀢𑀺𑀬𑀧𑀞𑀫𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁𑀢𑀺 𑀩𑀓𑀸𑀭𑁂 𑀲𑁄 𑀩𑀪𑀽𑀯 𑀓𑀺𑀭, 𑀢𑁂 𑀩𑀪𑀼𑀯𑀼 𑀓𑀺𑀭. 𑀢𑁆𑀯𑀁 𑀩𑀪𑀼𑀯𑁂 𑀓𑀺𑀭, 𑀇𑀜 𑀢𑀼𑀫𑁆𑀳𑁂 𑀩𑀪𑀼𑀯𑀺𑀢𑁆𑀣 𑀓𑀺𑀭. 𑀅𑀳𑀁 𑀩𑀪𑀼𑀯 𑀓𑀺𑀭, 𑀫𑀬𑀁 𑀩𑀪𑀼𑀯𑀺𑀫𑁆𑀳 𑀓𑀺𑀭. 𑀲𑁄 𑀩𑀪𑀼𑀯𑀺𑀢𑁆𑀣 𑀓𑀺𑀭, 𑀢𑁂 𑀩𑀪𑀼𑀯𑀺𑀭𑁂 𑀓𑀺𑀭. 𑀢𑁆𑀯𑀁 𑀩𑀪𑀼𑀯𑀺𑀢𑁆𑀣𑁄 𑀓𑀺𑀭, 𑀢𑀼𑀫𑁆𑀳𑁂 𑀩𑀪𑀼𑀯𑀺𑀯𑁆𑀳𑁄 𑀓𑀺𑀭. 𑀅𑀳𑀁 𑀩𑀪𑀼𑀯𑀺 𑀓𑀺𑀭, 𑀫𑀬𑀁 𑀩𑀪𑀼𑀯𑀺𑀫𑁆𑀳𑁂 𑀓𑀺𑀭. 𑀓𑀫𑁆𑀫𑁂-𑀅𑀦𑀼𑀧𑀪𑀼𑀯 𑀓𑀺𑀭 𑀇𑀘𑁆𑀘𑀸𑀤𑀺. 𑀪𑀸𑀯𑁂𑀩𑀪𑀼𑀯 𑀩𑀪𑀼𑀯𑀺𑀢𑁆𑀣 𑀓𑀺𑀭.

𑀧𑀧𑀘, 𑀧𑀧𑀘𑀼. 𑀧𑀧𑀘𑁂, 𑀇𑀜𑀸𑀕𑀫𑁂 𑀧𑀧𑀘𑀺𑀢𑁆𑀣. 𑀅𑀜𑁆𑀜𑀢𑁆𑀭 ‘‘𑀲𑀁𑀬𑁄𑀕𑀸𑀤𑀺𑀮𑁄𑀧𑁄’’𑀢𑀺 𑀮𑁄𑀧𑁄, 𑀧𑀧𑀘𑀺𑀢𑁆𑀣. 𑀧𑀧𑀘, 𑀧𑀧𑀘𑀺𑀫𑁆𑀳. 𑀧𑀧𑀘𑀺𑀢𑁆𑀣, 𑀧𑀧𑀘𑀺𑀭𑁂. 𑀧𑀧𑀘𑀺𑀢𑁆𑀣𑁄 𑀧𑀧𑀘𑀺𑀣𑁄, 𑀧𑀧𑀘𑀺𑀯𑁆𑀳𑁄. 𑀧𑀧𑀘𑀺, 𑀧𑀧𑀘𑀺𑀫𑁆𑀳𑁂. 𑀏𑀯𑀁 𑀓𑀫𑁆𑀫𑁂.

𑀅𑀆𑀤𑀺𑀧𑀘𑁆𑀘𑀬𑁂 𑀤𑁆𑀯𑀺𑀪𑀸𑀯𑁂 𑀅𑀦𑀸𑀤𑀺𑀩𑁆𑀬𑀜𑁆𑀚𑀦𑀮𑁄𑀧𑁂 𑀧𑀼𑀩𑁆𑀩𑀲𑁆𑀲 ‘‘𑀓𑀯𑀕𑁆𑀕𑀳𑀸𑀦𑀁 𑀘𑀯𑀕𑁆𑀕𑀚𑀸’’𑀢𑀺 𑀘𑀯𑀕𑁆𑀕𑀚𑀓𑀸𑀭𑁂 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀤𑀻𑀖𑁂 𑀘 𑀓𑀢𑁂 𑀲𑁄 𑀕𑀸𑀫𑀁 𑀚𑀕𑀸𑀫 𑀓𑀺𑀭, 𑀚𑀕𑀫𑀼. 𑀚𑀕𑀫𑁂, 𑀚𑀕𑀫𑀺𑀢𑁆𑀣. 𑀚𑀕𑀫, 𑀚𑀕𑀫𑀺𑀫𑁆𑀳. 𑀚𑀕𑀫𑀺𑀢𑁆𑀣, 𑀚𑀕𑀫𑀺𑀭𑁂. 𑀚𑀕𑀫𑀺𑀢𑁆𑀣𑁄, 𑀚𑀕𑀫𑀺𑀯𑁆𑀳𑁄. 𑀚𑀕𑀫𑀺, 𑀚𑀕𑀫𑀺𑀫𑁆𑀳𑁂. 𑀏𑀯𑀁 𑀓𑀫𑁆𑀫𑁂.

𑀫𑀽𑀴𑁆𑀳𑀯𑀺𑀓𑁆𑀔𑀺𑀢𑁆𑀢𑀩𑁆𑀬𑀸𑀲𑀢𑁆𑀢𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑀸𑀧𑀺 𑀓𑁆𑀭𑀺𑀬𑀸 𑀓𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀓𑀸𑀮𑁂+𑀦𑀼𑀧𑀮𑀤𑁆𑀥𑀸𑀲𑀫𑀸𑀦𑀸 𑀨𑀮𑁂𑀦𑀸+𑀦𑀼𑀫𑀻𑀬𑀫𑀸𑀦𑀸 𑀧𑀭𑁄𑀓𑁆𑀔𑀸𑀯 𑀯𑀢𑁆𑀣𑀼𑀢𑁄. 𑀢𑁂𑀦 𑀉𑀢𑁆𑀢𑀫𑀯𑀺𑀲𑀬𑁂𑀧𑀺 𑀧𑀬𑁄𑀕𑀲𑀫𑁆𑀪𑀯𑁄. (𑀧𑀭𑁄𑀓𑁆𑀔𑀸𑀧𑀘𑁆𑀘𑀬𑀦𑀬𑁄).

𑁭. 𑀬𑁆𑀬𑁄𑀤𑁄 𑀯𑀸+𑀢𑀺𑀧𑀢𑁆𑀢𑀺𑀬𑀁 𑀲𑁆𑀲𑀸 𑀲𑁆𑀲𑀁𑀲𑀼 𑀲𑁆𑀲𑁂 𑀲𑁆𑀲𑀣 𑀲𑁆𑀲𑀁 𑀲𑁆𑀲𑀫𑁆𑀳𑀸 𑀲𑁆𑀲𑀣 𑀲𑁆𑀲𑀺𑀁𑀲𑀼𑀲𑁆𑀲𑀲𑁂𑀲𑁆𑀲𑀯𑁆𑀳𑁂𑀲𑁆𑀲𑀺𑀁 𑀲𑁆𑀲𑀸𑀫𑁆𑀳𑀲𑁂.

𑀏𑀬𑁆𑀬𑀸𑀤𑁄 𑀯𑀺𑀲𑀬𑁂 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀁 𑀲𑁆𑀲𑀸𑀤𑀬𑁄 𑀳𑁄𑀦𑁆𑀢𑀺. 𑀯𑀺𑀥𑀼𑀭𑀧𑀘𑁆𑀘𑀬𑁄𑀧𑀦𑀺𑀧𑀸𑀢𑀢𑁄 𑀓𑀸𑀭𑀡𑀯𑁂𑀓𑀮𑁆𑀮𑀢𑁄 𑀯𑀸 𑀓𑁆𑀭𑀺𑀬𑀸𑀢𑀺𑀧𑀢𑀦+𑀫𑀦𑀺𑀧𑁆𑀨𑀢𑁆𑀢𑀺 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺. 𑀏𑀢𑁂 𑀘 𑀲𑁆𑀲𑀸𑀤𑀬𑁄 𑀲𑀸𑀫𑀢𑁆𑀣𑀺𑀬𑀸 𑀅𑀢𑀻𑀢𑀸𑀦𑀸𑀕𑀢𑁂𑀲𑁆𑀯𑁂𑀯 𑀳𑁄𑀦𑁆𑀢𑀺, 𑀦 𑀯𑀢𑁆𑀢𑀫𑀸𑀦𑁂, 𑀢𑀢𑁆𑀭 𑀓𑁆𑀭𑀺𑀬𑀸𑀢𑀺𑀧𑀢𑁆𑀬𑀲𑀫𑁆𑀪𑀯𑀸. 𑀇𑀜𑀸𑀕𑀫𑁂 𑀲𑁆𑀲𑀸𑀲𑁆𑀲 𑀯𑀸 𑀭𑀲𑁆𑀲𑁂 𑀘 𑀲𑀘𑁂 𑀲𑁄 𑀧𑀞𑀫𑀯𑀬𑁂 𑀧𑀩𑁆𑀩𑀚𑁆𑀚𑀁 𑀅𑀮𑀪𑀺𑀲𑁆𑀲, 𑀅𑀭𑀳𑀸 𑀅𑀪𑀯𑀺𑀲𑁆𑀲 𑀪𑀯𑀺𑀲𑁆𑀲 𑀅𑀪𑀯𑀺𑀲𑁆𑀲𑀸 𑀪𑀯𑀺𑀲𑁆𑀲𑀸 𑀯𑀸, 𑀢𑁂 𑀘 𑀢𑀁 𑀅𑀮𑀪𑀺𑀲𑁆𑀲𑀁𑀲𑀼, 𑀅𑀭𑀳𑀦𑁆𑀢𑁄 𑀅𑀪𑀯𑀺𑀲𑁆𑀲𑀁𑀲𑀼 𑀪𑀯𑀺𑀲𑁆𑀲𑀁𑀲𑀼. ‘‘𑀏𑀬𑁆𑀬𑀸𑀣𑀸’’𑀤𑀺𑀦𑀸 𑀲𑁆𑀲𑁂𑀲𑁆𑀲 𑀯𑀸 𑀅𑀓𑀸𑀭𑁂 𑀢𑁆𑀯𑀁 𑀅𑀪𑀯𑀺𑀲𑁆𑀲 𑀪𑀯𑀺𑀲𑁆𑀲𑁂. 𑀢𑀼𑀫𑁆𑀳𑁂 𑀅𑀪𑀯𑀺𑀲𑁆𑀲𑀣. 𑀅𑀳𑀁 𑀅𑀪𑀯𑀺𑀲𑁆𑀲𑀁. 𑀭𑀲𑁆𑀲𑁂 𑀫𑀬𑀁 𑀅𑀪𑀯𑀺𑀲𑁆𑀲𑀫𑁆𑀳 𑀪𑀯𑀺𑀲𑁆𑀲𑀫𑁆𑀳 𑀅𑀪𑀯𑀺𑀲𑁆𑀲𑀫𑁆𑀳𑀸 𑀪𑀯𑀺𑀲𑁆𑀲𑀫𑁆𑀳𑀸. 𑀧𑀭𑀘𑁆𑀙𑀓𑁆𑀓𑁂-𑀲𑁄 𑀅𑀪𑀯𑀺𑀲𑁆𑀲𑀣, 𑀅𑀪𑀯𑀺𑀲𑁆𑀲𑀺𑀁𑀲𑀼. 𑀅𑀪𑀯𑀺𑀲𑁆𑀲𑀲𑁂, 𑀅𑀪𑀯𑀺𑀲𑁆𑀲𑀯𑁆𑀳𑁂. 𑀅𑀪𑀯𑀺𑀲𑁆𑀲𑀺𑀁, 𑀅𑀪𑀯𑀺𑀲𑁆𑀲𑀸𑀫𑁆𑀳𑀲𑁂.

𑀓𑀫𑁆𑀫𑁂-𑀢𑁂𑀦 𑀲𑀼𑀔𑀁 𑀅𑀦𑁆𑀯𑀪𑀯𑀺𑀲𑁆𑀲, 𑀅𑀦𑁆𑀯𑀪𑀯𑀺𑀲𑁆𑀲𑀁𑀲𑀼 𑀓𑁆𑀬𑀮𑁄𑀧𑁄. 𑀅𑀦𑁆𑀯𑀪𑀽𑀬𑀺𑀲𑁆𑀲 𑀅𑀦𑁆𑀯𑀪𑀽𑀬𑀺𑀲𑁆𑀲𑀸 𑀇𑀘𑁆𑀘𑀸𑀤𑀺. 𑀪𑀸𑀯𑁂-𑀢𑁂𑀦 𑀅𑀪𑀽𑀬𑀺𑀲𑁆𑀲 𑀪𑀽𑀬𑀺𑀲𑁆𑀲 𑀅𑀪𑀽𑀬𑀺𑀲𑁆𑀲𑀸 𑀪𑀽𑀬𑀺𑀲𑁆𑀲𑀸. 𑀅𑀪𑀽𑀬𑀺𑀲𑁆𑀲𑀣 𑀪𑀽𑀬𑀺𑀲𑁆𑀲𑀣.

𑀏𑀯𑀁 𑀢𑀡𑁆𑀟𑀼𑀮𑀸𑀤𑀺𑀲𑀸𑀥𑀦𑀁 𑀅𑀮𑀪𑀺𑀲𑁆𑀲, 𑀑𑀤𑀦𑀁 𑀅𑀧𑀘𑀺𑀲𑁆𑀲 𑀧𑀘𑀺𑀲𑁆𑀲 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀢𑁂𑀦 𑀑𑀤𑀦𑁄 𑀅𑀧𑀘𑀺𑀲𑁆𑀲 𑀧𑀘𑀺𑀲𑁆𑀲 𑀅𑀧𑀘𑀺𑀲𑁆𑀲𑀸 𑀧𑀘𑀺𑀲𑁆𑀲𑀸 𑀅𑀧𑀘𑀻𑀬𑀺𑀲𑁆𑀲 𑀧𑀘𑀻𑀬𑀺𑀲𑁆𑀲 𑀅𑀧𑀘𑀻𑀬𑀺𑀲𑁆𑀲𑀸 𑀧𑀘𑀻𑀬𑀺𑀲𑁆𑀲𑀸 𑀅𑀧𑀘𑁆𑀘𑀺𑀲𑁆𑀲 𑀧𑀘𑁆𑀘𑀺𑀲𑁆𑀲 𑀅𑀧𑀘𑁆𑀘𑀺𑀲𑁆𑀲𑀸 𑀧𑀘𑁆𑀘𑀺𑀲𑁆𑀲𑀸 𑀇𑀘𑁆𑀘𑀸𑀤𑀺.

𑀲𑁄 𑀅𑀕𑀘𑁆𑀙𑀺𑀲𑁆𑀲 𑀕𑀘𑁆𑀙𑀺𑀲𑁆𑀲 𑀅𑀕𑀘𑁆𑀙𑀺𑀲𑁆𑀲𑀸 𑀕𑀘𑁆𑀙𑀺𑀲𑁆𑀲𑀸 𑀇𑀘𑁆𑀘𑀸𑀤𑀺. 𑀘𑁆𑀙𑀸𑀤𑁂𑀲𑀸+𑀪𑀸𑀯𑁂 𑀅𑀕𑀫𑀺𑀲𑁆𑀲 𑀕𑀫𑀺𑀲𑁆𑀲 𑀅𑀕𑀫𑀺𑀲𑁆𑀲𑀸 𑀕𑀫𑀺𑀲𑁆𑀲𑀸 𑀇𑀘𑁆𑀘𑀸𑀤𑀺. 𑀓𑀫𑁆𑀫𑁂-𑀅𑀕𑀘𑁆𑀙𑀺𑀲𑁆𑀲 𑀕𑀘𑁆𑀙𑀺𑀲𑁆𑀲 𑀅𑀕𑀘𑁆𑀙𑀻𑀬𑀺𑀲𑁆𑀲 𑀇𑀘𑁆𑀘𑀸𑀤𑀺. 𑀅𑀕𑀫𑀺𑀲𑁆𑀲 𑀕𑀫𑀺𑀲𑁆𑀲 𑀅𑀕𑀫𑀻𑀬𑀺𑀲𑁆𑀲 𑀇𑀘𑁆𑀘𑀸𑀤𑀺. 𑀢𑀣𑀸 𑀅𑀖𑀫𑁆𑀫𑀺𑀲𑁆𑀲 𑀇𑀘𑁆𑀘𑀸𑀤𑀺. (𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀧𑀘𑁆𑀘𑀬𑀦𑀬𑁄).

𑁮. 𑀳𑁂𑀢𑀼𑀨𑀮𑁂𑀲𑁆𑀯𑁂+𑀬𑁆𑀬 𑀏𑀬𑁆𑀬𑀼𑀁 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀣 𑀏𑀬𑁆𑀬𑀸𑀫𑀺 𑀏𑀬𑁆𑀬𑀸𑀫 𑀏𑀣 𑀏𑀭𑀁 𑀏𑀣𑁄 𑀏𑀬𑁆𑀬𑀸𑀯𑁆𑀳𑁄 𑀏𑀬𑁆𑀬𑀁 𑀏𑀬𑁆𑀬𑀸𑀫𑁆𑀳𑁂.

𑀳𑁂𑀢𑀼𑀪𑀽𑀢𑀸𑀬𑀁 𑀨𑀮𑀪𑀽𑀢𑀸𑀬𑀜𑁆𑀘 𑀓𑁆𑀭𑀺𑀬𑀸𑀬𑀁 𑀯𑀢𑁆𑀢𑀫𑀸𑀦𑀢𑁄 𑀓𑁆𑀭𑀺𑀬𑀢𑁆𑀣𑀸 𑀏𑀬𑁆𑀬𑀸𑀤𑀬𑁄 𑀳𑁄𑀦𑁆𑀢𑀺 𑀯𑀸. 𑀮𑀯𑀺𑀓𑀭𑀡𑀯𑀼𑀤𑁆𑀥𑀺𑀆𑀤𑀺 𑀧𑀼𑀩𑁆𑀩𑀲𑀫𑀁. 𑀧𑀭𑀺𑀓𑀧𑁆𑀧𑁂 𑁋