𑁧. 𑀢𑀢𑁆𑀣 𑀤𑁆𑀯𑀺𑀧𑀤𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑁄 𑀓𑀫𑁆𑀫𑀸𑀤𑀻𑀲𑀼 𑀙𑀲𑀼 𑀯𑀺𑀪𑀢𑁆𑀬𑀢𑁆𑀣𑁂𑀲𑀼 𑀪𑀯𑀢𑀺.

(𑀓) 𑀢𑀢𑁆𑀣 𑀤𑀼𑀢𑀺𑀬𑀢𑁆𑀣𑁂 𑀢𑀸𑀯-𑀆𑀕𑀢𑀸 𑀲𑀫𑀡𑀸 𑀇𑀫𑀁 𑀲𑀗𑁆𑀖𑀸𑀭𑀸𑀫𑀦𑁆𑀢𑀺 𑀆𑀕𑀢𑀲𑀫𑀡𑁄 𑀲𑀗𑁆𑀖𑀸𑀭𑀸𑀫𑁄. 𑀲𑁄 𑀘 𑀤𑀼𑀯𑀺𑀥𑁄 𑀢𑀕𑁆𑀕𑀼𑀡𑀸+𑀢𑀕𑁆𑀕𑀼𑀡𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑀺 𑁋

𑀢𑀕𑁆𑀕𑀼𑀡𑁄+𑀢𑀕𑁆𑀕𑀼𑀡𑁄 𑀘𑁂+𑀢𑀺,

𑀲𑁄 𑀲𑀫𑀸𑀲𑁄 𑀤𑁆𑀯𑀺𑀥𑀸 𑀫𑀢𑁄.

𑀢𑀁 𑀬𑀣𑀸 ‘𑀦𑀻𑀬𑀢𑀁 𑀮𑀫𑁆𑀩-

𑀓𑀡𑁆𑀡𑁄+’ ‘𑀬𑀁 𑀤𑀺𑀝𑁆𑀞𑀲𑀸𑀕𑀭𑁄’.

𑀢𑁂𑀲𑀼 𑀬𑀢𑁆𑀣 𑀯𑀺𑀲𑁂𑀲𑀦𑀪𑀽𑀢𑁄 𑀅𑀢𑁆𑀣𑁄 𑀅𑀜𑁆𑀜𑀧𑀤𑀢𑁆𑀣𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀺, 𑀲𑁄 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 ‘𑀮𑀫𑁆𑀩𑀓𑀡𑁆𑀡+𑀫𑀸𑀦𑀬𑀸’𑀢𑀺. 𑀬𑀢𑁆𑀣 𑀧𑀦 𑀦 𑀕𑀬𑁆𑀳𑀢𑀺, 𑀲𑁄 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 ‘𑀩𑀳𑀼𑀥𑀦+𑀫𑀸𑀦𑀬𑀸’𑀢𑀺.

𑀇𑀥 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄. 𑀏𑀢𑁆𑀣 𑀘 𑀆𑀕𑀢𑀲𑀤𑁆𑀤𑁄 𑀘 𑀲𑀫𑀡𑀲𑀤𑁆𑀤𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑁂 𑀅𑀝𑁆𑀞𑀢𑁆𑀯𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀬𑀢𑁆𑀣𑀪𑀽𑀢𑁂 𑀲𑀗𑁆𑀖𑀸𑀭𑀸𑀫𑀲𑀗𑁆𑀔𑀸𑀢𑁂 𑀅𑀜𑁆𑀜𑀧𑀤𑀢𑁆𑀣𑁂 𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀲𑀫𑀸𑀲𑁂𑀦𑁂𑀯 𑀓𑀫𑁆𑀫𑀢𑁆𑀣𑀲𑁆𑀲 𑀅𑀪𑀺𑀳𑀺𑀢𑀢𑁆𑀢𑀸 𑀧𑀼𑀦 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀢𑀣𑀸 𑀆𑀕𑀢𑀲𑀫𑀡𑀸 𑀲𑀸𑀯𑀢𑁆𑀣𑀺, 𑀆𑀕𑀢𑀲𑀫𑀡𑀁 𑀚𑁂𑀢𑀯𑀦𑀁. 𑀧𑀝𑀺𑀧𑀦𑁆𑀦𑀸 𑀅𑀤𑁆𑀥𑀺𑀓𑀸 𑀬𑀁 𑀧𑀝𑀺𑀧𑀦𑁆𑀦𑀤𑁆𑀥𑀺𑀓𑁄 𑀧𑀣𑁄, 𑀅𑀪𑀺𑀭𑀽𑀴𑁆𑀳𑀸𑀯, 𑀡𑀺𑀚𑀸𑀬𑀁 𑀦𑀸𑀯𑀁 𑀲𑀸 𑀅𑀪𑀺𑀭𑀽𑀴𑁆𑀳𑀯𑀸𑀡𑀺𑀚𑀸 𑀦𑀸𑀯𑀸.

(𑀔) 𑀢𑀢𑀺𑀬𑀢𑁆𑀣𑁂-𑀚𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦 𑀲𑁄 𑀚𑀺𑀢𑀺𑀦𑁆𑀤𑁆𑀭𑀺𑀬𑁄 𑀲𑀫𑀡𑁄, 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑁄, 𑀧𑀢𑁆𑀢𑀥𑀫𑁆𑀫𑁄, 𑀓𑀢𑀓𑀺𑀘𑁆𑀘𑁄. 𑀯𑀺𑀚𑀺𑀢𑀸 𑀫𑀸𑀭𑀸 𑀅𑀦𑁂𑀦𑀸𑀢𑀺 𑀯𑀺𑀚𑀺𑀢𑀫𑀸𑀭𑁄 𑀪𑀕𑀯𑀸, 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀥𑀫𑁆𑀫𑁄. 𑀓𑀭𑀡𑀢𑁆𑀣𑁂-𑀙𑀺𑀦𑁆𑀦𑁄 𑀭𑀼𑀓𑁆𑀔𑁄 𑀬𑁂𑀦 𑀲𑁄 𑀙𑀺𑀦𑁆𑀦𑀭𑀼𑀓𑁆𑀔𑁄 𑀨𑀭𑀲𑀼.

(𑀕) 𑀘𑀢𑀼𑀢𑁆𑀣𑀺𑀬𑀢𑁆𑀣𑁂-𑀤𑀺𑀦𑁆𑀦𑁄 𑀲𑀼𑀗𑁆𑀓𑁄 𑀬𑀲𑁆𑀲 𑀲𑁄 𑀤𑀺𑀦𑁆𑀦𑀲𑀼𑀗𑁆𑀓𑁄 𑀭𑀸𑀚𑀸, 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀅𑀲𑁆𑀲𑀸𑀢𑀺 𑀤𑀺𑀦𑁆𑀦𑀪𑁄𑀚𑀦𑁄.

(𑀖) 𑀧𑀜𑁆𑀘𑀫𑀺𑀬𑀢𑁆𑀣𑁂-𑀦𑀺𑀕𑁆𑀕𑀢𑀸 𑀚𑀦𑀸 𑀬𑀲𑁆𑀫𑀸 𑀲𑁄 𑀦𑀺𑀕𑁆𑀕𑀢𑀚𑀦𑁄 𑀕𑀸𑀫𑁄, 𑀦𑀺𑀕𑁆𑀕𑀢𑁄 𑀅𑀬𑁄=𑀲𑀼𑀔𑀁 𑀬𑀲𑁆𑀫𑀸𑀢𑀺 𑀦𑀺𑀭𑀬𑁄, 𑀦𑀺𑀓𑁆𑀓𑀺𑀮𑁂- 𑀲𑁄. 𑀅𑀧𑁂𑀢𑀁 𑀯𑀺𑀜𑁆𑀜𑀸𑀡𑀁 𑀅𑀲𑁆𑀫𑀸𑀢𑀺 𑀅𑀧𑁂𑀢𑀯𑀺𑀜𑁆𑀜𑀸𑀡𑁄 𑀫𑀢𑀓𑀸𑀬𑁄, 𑀅𑀧𑀕𑀢𑀪𑀬𑀪𑁂𑀭𑀯𑁄 𑀅𑀭𑀳𑀸.

(𑀗) 𑀙𑀝𑁆𑀞𑀺𑀬𑀢𑁆𑀣𑁂-𑀙𑀺𑀦𑁆𑀦𑀸 𑀳𑀢𑁆𑀣𑀸 𑀬𑀲𑁆𑀲 𑀲𑁄 𑀙𑀺𑀦𑁆𑀦𑀳𑀢𑁆𑀣𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀔𑀻𑀡𑀸𑀲𑀯𑁄, 𑀯𑀻𑀢𑁄 𑀭𑀸𑀕𑁄 𑀅𑀲𑁆𑀲𑀸𑀢𑀺 𑀯𑀻𑀢𑀭𑀸𑀕𑁄. 𑀤𑁆𑀯𑁂 𑀧𑀤𑀸𑀦𑀺 𑀅𑀲𑁆𑀲𑀸𑀢𑀺 𑀤𑁆𑀯𑀺𑀧𑀤𑁄, 𑀤𑁆𑀯𑀺𑀳𑀢𑁆𑀣𑁄 𑀧𑀝𑁄. 𑀢𑁂𑀯𑀺𑀚𑁆𑀚𑁄𑀢𑀺 𑀏𑀢𑁆𑀣 𑀢𑀺𑀯𑀺𑀚𑁆𑀚𑁄 𑀏𑀯𑀸𑀢𑀺 𑀲𑀓𑀢𑁆𑀣𑁂 𑀡𑁄 𑀯𑀼𑀤𑁆𑀥𑀺 𑀘. 𑀘𑀢𑀼𑀧𑁆𑀧𑀤𑁄, 𑀧𑀜𑁆𑀘 𑀘𑀓𑁆𑀔𑀽𑀦𑀺 𑀅𑀲𑁆𑀲𑀸𑀢𑀺 𑀧𑀜𑁆𑀘𑀘𑀓𑁆𑀔𑀼 𑀪𑀕𑀯𑀸, 𑀙𑀴𑀪𑀺𑀜𑁆𑀜𑁄, ‘‘𑀖𑀧𑀲𑁆𑀲𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀁. 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁. 𑀤𑀲𑀩𑀮𑁄, 𑀅𑀦𑀦𑁆𑀢𑀜𑀸𑀡𑁄. 𑀢𑀻𑀡𑀺 𑀤𑀲 𑀧𑀭𑀺𑀫𑀸𑀡+𑀫𑁂𑀲𑀁𑀢𑀺 𑀢𑀺𑀤𑀲𑀸 𑀤𑁂𑀯𑀸, 𑀇𑀥 𑀧𑀭𑀺𑀫𑀸𑀡𑀲𑀤𑁆𑀤𑀲𑀦𑁆𑀦𑀺𑀫𑀸𑀦𑀢𑁄 𑀤𑀲𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀢𑁂. 𑀅𑀬𑀁 𑀧𑀘𑁆𑀘𑀬𑁄 𑀏𑀢𑁂𑀲𑀦𑁆𑀢𑀺 𑀇𑀤𑀧𑁆𑀧𑀘𑁆𑀘𑀬𑀸, 𑀉𑀢𑁆𑀢𑀭𑀧𑀤𑁂 ‘‘𑀇𑀫𑀲𑁆𑀲𑀺+𑀤𑀁 𑀯𑀸’’𑀢𑀺 𑀇𑀫𑀲𑁆𑀲 𑀇𑀤𑀁. 𑀓𑁄 𑀧𑀪𑀯𑁄 𑀅𑀲𑁆𑀲𑀸𑀢𑀺 𑀓𑀺𑀁 𑀧𑀪𑀯𑁄 𑀓𑀸𑀬𑁄. 𑀯𑀺𑀕𑀢𑀁 𑀫𑀮𑀁 𑀅𑀲𑁆𑀲𑀸𑀢𑀺 𑀯𑀺𑀫𑀮𑁄, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀲𑀼𑀕𑀦𑁆𑀥𑀁 𑀘𑀦𑁆𑀤𑀦𑀁, 𑀏𑀯𑀁 𑀲𑀼𑀲𑀻𑀮𑁄, 𑀲𑀼𑀫𑀼𑀔𑁄, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀓𑀼𑀡𑀧𑀁, 𑀤𑀼𑀫𑁆𑀫𑀼𑀔𑁄, 𑀤𑀼𑀝𑁆𑀞𑀼 𑀫𑀦𑁄 𑀅𑀲𑁆𑀲𑀸𑀢𑀺 𑀤𑀼𑀫𑁆𑀫𑀦𑁄, 𑀏𑀯𑀁 𑀤𑀼𑀲𑁆𑀲𑀻𑀮𑁄. 𑀢𑀧𑁄 𑀏𑀯 𑀥𑀦𑀁 𑀅𑀲𑁆𑀲𑀸𑀢𑀺 𑀢𑀧𑁄𑀥𑀦𑁄. 𑀔𑀦𑁆𑀢𑀺𑀲𑀗𑁆𑀔𑀸𑀢𑀁 𑀩𑀮𑀁 𑀅𑀲𑁆𑀲𑀸𑀢𑀺 𑀔𑀦𑁆𑀢𑀺𑀩𑀮𑁄. 𑀇𑀦𑁆𑀤𑁄𑀢𑀺 𑀦𑀸𑀫𑀁 𑀏𑀢𑀲𑁆𑀲𑀸𑀢𑀺 𑀇𑀦𑁆𑀤𑀦𑀸𑀫𑁄.

𑀙𑀦𑁆𑀤𑀚𑀸𑀢𑀸𑀤𑀻𑀲𑀼 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀬𑀣𑀺𑀘𑁆𑀙𑀺𑀢𑀢𑁆𑀢𑀸 𑀉𑀪𑀬𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀓𑀫𑀸𑀢𑀺𑀓𑁆𑀓𑀫𑁂 𑀧𑀬𑁄𑀚𑀦𑀸𑀪𑀸𑀯𑀸. 𑀚𑀸𑀢𑁄 𑀙𑀦𑁆𑀤𑁄 𑀅𑀲𑁆𑀲𑀸𑀢𑀺 𑀚𑀸𑀢𑀙𑀦𑁆𑀤𑁄, 𑀏𑀯𑀁 𑀙𑀦𑁆𑀤𑀚𑀸𑀢𑁄. 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄, 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀜𑁆𑀚𑀸𑀢𑁄. 𑀫𑀸𑀲𑀚𑀸𑀢𑁄, 𑀚𑀸𑀢𑀫𑀸𑀲𑁄. 𑀙𑀺𑀦𑁆𑀦𑀳𑀢𑁆𑀣𑁄, 𑀳𑀢𑁆𑀣𑀙𑀺𑀦𑁆𑀦𑁄.

𑀤𑀻𑀖𑀸𑀚𑀗𑁆𑀖𑀸 𑀅𑀲𑁆𑀲𑀸𑀢𑀺 𑀤𑀻𑀖𑀚𑀗𑁆𑀖𑁄, 𑀏𑀢𑁆𑀣 𑀧𑀼𑀫𑁆𑀪𑀸𑀯𑁄, ‘‘𑀖𑀧𑀲𑁆𑀲𑀸’’𑀤𑀺𑀦𑀸 𑀭𑀲𑁆𑀲𑁄 𑀘. 𑀢𑀣𑀸 𑀧𑀳𑀽𑀢𑀚𑀺𑀯𑁆𑀳𑁄. 𑀫𑀳𑀦𑁆𑀢𑀻 𑀧𑀜𑁆𑀜𑀸 𑀅𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑁄. ‘‘𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺+𑀢𑁆𑀣𑀻 𑀧𑀼𑀫𑁂+𑀯𑁂+𑀓𑀢𑁆𑀣𑁂’’𑀢𑀺 𑀯𑀻𑀧𑀘𑁆𑀘𑀬𑀸𑀪𑀸𑀯𑁂𑀦𑁆𑀢𑀲𑁆𑀲 𑀝𑀸𑀤𑁂𑀲𑁄 𑀭𑀲𑁆𑀲𑀢𑁆𑀢𑀜𑁆𑀘. 𑀇𑀢𑁆𑀣𑀺𑀬𑀦𑁆𑀢𑀺 𑀓𑀺𑀁, 𑀔𑀫𑀸𑀥𑀦𑁄. 𑀪𑀸𑀲𑀺𑀢𑀧𑀼𑀫𑀸𑀢𑀺 𑀓𑀺𑀁, 𑀲𑀤𑁆𑀥𑀸𑀥𑀼𑀭𑁄. 𑀧𑀜𑁆𑀜𑀸𑀧𑀓𑀢𑀺𑀓𑁄, 𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀺𑀓𑁄, 𑀏𑀢𑁆𑀣 ‘‘𑀮𑁆𑀢𑁆𑀯𑀺𑀢𑁆𑀣𑀺𑀬𑀽𑀳𑀺 𑀓𑁄’’𑀢𑀺 𑀓𑁄. 𑀕𑀡𑁆𑀟𑀻𑀯𑀥𑀦𑁆𑀯𑀸𑀢𑀺 𑀧𑀓𑀢𑀦𑁆𑀢𑀭𑁂𑀦 𑀲𑀺𑀤𑁆𑀥𑀁.

𑀦𑀸𑀦𑀸=𑀧𑁆𑀧𑀓𑀸𑀭𑀸 𑀤𑀼𑀫𑀸 𑀦𑀸𑀦𑀸𑀤𑀼𑀫𑀸, 𑀦𑀸𑀦𑀸𑀤𑀼𑀫𑁂𑀳𑀺 𑀧𑀢𑀺𑀢𑀸𑀦𑀺 𑀦𑀸𑀦𑀸𑀤𑀼𑀫𑀧𑀢𑀺𑀢𑀸𑀦𑀺, 𑀦𑀸𑀦𑀸𑀤𑀼𑀫𑀧𑀢𑀺𑀢𑀸𑀦𑀺 𑀘 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀘𑁂𑀢𑀺 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀸𑀦𑀺, 𑀢𑁂𑀳𑀺 𑀯𑀸𑀲𑀺𑀢𑀸 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸, 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸𑀲𑀸𑀦𑀼𑀬𑀲𑁆𑀲𑀲𑁄 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀲𑀸𑀦𑀼 𑀧𑀩𑁆𑀩𑀢𑁄, 𑀅𑀬𑀁 𑀯𑀺𑀲𑁂𑀲𑀦+𑀅𑀫𑀸𑀤𑀺𑀲𑀫𑀸𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀅𑀜𑁆𑀜𑀧𑀤𑀢𑁆𑀣𑁄.

(𑀘) 𑀲𑀢𑁆𑀢𑀫𑁆𑀬𑀢𑁆𑀣𑁂-𑀲𑀫𑁆𑀧𑀦𑁆𑀦𑀸𑀦𑀺 𑀲𑀲𑁆𑀲𑀸𑀦𑀺 𑀬𑀲𑁆𑀫𑀺𑀁 𑀲𑁄 𑀲𑀫𑁆𑀧𑀦𑁆𑀦𑀲𑀲𑁆𑀲𑁄 𑀚𑀦𑀧𑀤𑁄. 𑀲𑀼𑀮𑀪𑁄 𑀧𑀺𑀡𑁆𑀟𑁄 𑀇𑀫𑀲𑁆𑀫𑀺𑀦𑁆𑀢𑀺 𑀲𑀼𑀮𑀪𑀧𑀺𑀡𑁆𑀟𑁄 𑀤𑁂𑀲𑁄. 𑀆𑀓𑀺𑀡𑁆𑀡𑀸 𑀫𑀦𑀼𑀲𑁆𑀲𑀸 𑀬𑀲𑁆𑀲𑀁 𑀲𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀭𑀸𑀚𑀥𑀸𑀦𑀻. 𑀩𑀳𑀯𑁄 𑀢𑀸𑀧𑀲𑀸 𑀏𑀢𑀲𑁆𑀫𑀺𑀦𑁆𑀢𑀺 𑀩𑀳𑀼𑀢𑀸𑀧𑀲𑁄 𑀅𑀲𑁆𑀲𑀫𑁄. 𑀉𑀧𑀘𑀺𑀢𑀁 𑀫𑀁𑀲𑀮𑁄𑀳𑀺𑀢𑀁 𑀅𑀲𑁆𑀫𑀺𑀦𑁆𑀢𑀺 𑀉𑀧𑀘𑀺𑀢𑀫𑀁𑀲𑀮𑁄𑀳𑀺𑀢𑀁 𑀲𑀭𑀻𑀭𑀁. 𑀩𑀳𑀯𑁄 𑀲𑀸𑀫𑀺𑀦𑁄 𑀅𑀲𑁆𑀫𑀺𑀦𑁆𑀢𑀺 𑀩𑀳𑀼𑀲𑀸𑀫𑀺𑀓𑀁 𑀦𑀕𑀭𑀁, 𑀩𑀳𑀽 𑀦𑀤𑀺𑀬𑁄 𑀅𑀲𑁆𑀫𑀺𑀦𑁆𑀢𑀺 𑀩𑀳𑀼𑀦𑀤𑀺𑀓𑁄, 𑀈𑀓𑀸𑀭𑀦𑁆𑀢𑀢𑁆𑀢𑀸 𑀓𑀧𑀘𑁆𑀘𑀬𑁄. 𑀏𑀯𑀁 𑀩𑀳𑀼𑀚𑀫𑁆𑀩𑀼𑀓𑀁 𑀯𑀦𑀁, 𑀩𑀳𑀯𑁄 𑀓𑀢𑁆𑀢𑀸𑀭𑁄 𑀅𑀲𑁆𑀫𑀺𑀁 𑀅𑀲𑁆𑀲 𑀯𑀸𑀢𑀺 𑀩𑀳𑀼𑀓𑀢𑁆𑀢𑀼𑀓𑁄 𑀤𑁂𑀲𑁄, 𑀏𑀯𑀁 𑀩𑀳𑀼𑀪𑀢𑁆𑀢𑀼𑀓𑁄, ‘‘𑀮𑁆𑀢𑁆𑀯𑀺𑀢𑁆𑀣𑀺𑀬𑀽𑀳𑀺 𑀓𑁄’’𑀢𑀺 𑀓𑁄.

𑁨. 𑀪𑀺𑀦𑁆𑀦𑀸𑀥𑀺𑀓𑀭𑀡𑁄 𑀬𑀣𑀸-𑀏𑀓𑀭𑀢𑁆𑀢𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀏𑀓𑀭𑀢𑁆𑀢𑀺𑀯𑀸𑀲𑁄, 𑀲𑀫𑀸𑀦𑁂𑀦 𑀚𑀦𑁂𑀦 𑀲𑀤𑁆𑀥𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀲𑀫𑀸𑀦𑀯𑀸𑀲𑁄 𑀧𑀼𑀭𑀺𑀲𑁄. 𑀉𑀪𑀢𑁄 𑀩𑁆𑀬𑀜𑁆𑀚𑀦+𑀫𑀲𑁆𑀲𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀯𑀺𑀪𑀢𑁆𑀬𑀮𑁄𑀧𑁄 ‘‘𑀯𑀸+𑀜𑁆𑀜𑀢𑁄’’𑀢𑀺 𑀓𑁄 𑀘, 𑀙𑀢𑁆𑀢𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀙𑀢𑁆𑀢𑀧𑀸𑀡𑀺, 𑀏𑀯𑀁 𑀤𑀡𑁆𑀟𑀧𑀸𑀡𑀺, 𑀲𑀢𑁆𑀣𑀧𑀸𑀡𑀺, 𑀯𑀚𑀺𑀭𑀧𑀸𑀡𑀺, 𑀔𑀕𑁆𑀕𑀳𑀢𑁆𑀣𑁄, 𑀧𑀢𑁆𑀢𑀳𑀢𑁆𑀣𑁄, 𑀤𑀸𑀦𑁂 𑀅𑀚𑁆𑀛𑀸𑀲𑀬𑁄 𑀅𑀲𑁆𑀲𑀸𑀢𑀺 𑀤𑀸𑀦𑀚𑁆𑀛𑀸𑀲𑀬𑁄 𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑁄, 𑀩𑀼𑀤𑁆𑀥𑀪𑀢𑁆𑀢𑀺𑀓𑁄, 𑀲𑀤𑁆𑀥𑀫𑁆𑀫𑀕𑀸𑀭𑀯𑁄 𑀇𑀘𑁆𑀘𑀸𑀤𑀺.

𑁩. 𑀢𑀺𑀧𑀤𑁄 𑀬𑀣𑀸-𑀧𑀭𑀓𑁆𑀓𑀫𑁂𑀦𑀸+𑀥𑀺𑀕𑀢𑀸 𑀲𑀫𑁆𑀧𑀤𑀸 𑀬𑁂𑀳𑀺 𑀢𑁂 𑀧𑀭𑀓𑁆𑀓𑀫𑀸𑀥𑀺𑀕𑀢𑀲𑀫𑁆𑀧𑀤𑀸 𑀫𑀳𑀸𑀧𑀼𑀭𑀺𑀲𑀸. 𑀏𑀯𑀁 𑀥𑀫𑁆𑀫𑀸𑀥𑀺𑀕𑀢𑀪𑁄𑀕𑀸. 𑀑𑀦𑀻𑀢𑁄 𑀧𑀢𑁆𑀢𑀢𑁄 𑀧𑀸𑀡𑀺 𑀬𑁂𑀦 𑀲𑁄 𑀑𑀦𑀻𑀢𑀧𑀢𑁆𑀢𑀧𑀸𑀡𑀺. 𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀫𑀺𑀯 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄. 𑀫𑀢𑁆𑀢𑀸 𑀩𑀳𑀯𑁄 𑀫𑀸𑀢𑀗𑁆𑀕𑀸 𑀅𑀲𑁆𑀫𑀺𑀦𑁆𑀢𑀺 𑀫𑀢𑁆𑀢𑀩𑀳𑀼𑀫𑀸𑀢𑀗𑁆𑀕𑀁 𑀯𑀦𑀁.

𑁪. 𑀦-𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀬𑀣𑀸-𑀦𑀢𑁆𑀣𑀺 𑀏𑀢𑀲𑁆𑀲 𑀲𑀫𑁄𑀢𑀺 𑀅𑀲𑁆𑀲𑀫𑁄, ‘‘𑀝 𑀦𑀜𑀲𑁆𑀲𑀸’’𑀢𑀺 𑀦𑀲𑁆𑀲 𑀝𑁄. 𑀏𑀯𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀅𑀧𑀼𑀢𑁆𑀢𑀓𑁄, 𑀅𑀳𑁂𑀢𑀼𑀓𑁄, 𑀓𑀧𑀘𑁆𑀘𑀬𑁄, 𑀏𑀯+𑀫𑀼𑀧𑀭𑀺𑀧𑀺 𑀜𑁂𑀬𑁆𑀬𑀁. 𑀦𑀢𑁆𑀣𑀺 𑀲𑀁𑀯𑀸𑀲𑁄 𑀏𑀢𑁂𑀦𑀸𑀢𑀺 𑀅𑀲𑀁𑀯𑀸𑀲𑁄, 𑀦 𑀯𑀺𑀚𑁆𑀚𑀢𑁂 𑀯𑀼𑀝𑁆𑀞𑀺 𑀏𑀢𑁆𑀣𑀸𑀢𑀺 𑀅𑀯𑀼𑀝𑁆𑀞𑀺𑀓𑁄 𑀚𑀦𑀧𑀤𑁄, 𑀅𑀪𑀺𑀓𑁆𑀔𑀼𑀓𑁄 𑀯𑀺𑀳𑀸𑀭𑁄. 𑀏𑀯𑀁 𑀅𑀦𑀼𑀢𑁆𑀢𑀭𑁄 ‘‘𑀅𑀦 𑀲𑀭𑁂’’𑀢𑀺 𑀅𑀦, 𑀏𑀯𑀁 𑀅𑀦𑀦𑁆𑀢𑀁, 𑀅𑀦𑀸𑀲𑀯𑁄.

𑁫. 𑀧𑀞𑀫𑀸𑀢𑁆𑀣𑁂 𑀲𑀳𑀧𑀼𑀩𑁆𑀩𑀧𑀤𑁄 𑀬𑀣𑀸-𑀲𑀳 𑀳𑁂𑀢𑀼𑀦𑀸 𑀯𑀢𑁆𑀢𑀢𑀺 𑀲𑁄 𑀲𑀳𑁂𑀢𑀼𑀓𑁄 𑀲𑀳𑁂𑀢𑀼 𑀯𑀸, ‘‘𑀲𑀳𑀲𑁆𑀲 𑀲𑁄+𑀜𑁆𑀜𑀢𑁆𑀣𑁂’’𑀢𑀺 𑀲𑀳𑀲𑁆𑀲 𑀲𑁄, 𑀏𑀯𑀁 𑀲𑀧𑁆𑀧𑀻𑀢𑀺𑀓𑀸, 𑀲𑀧𑁆𑀧𑀘𑁆𑀘𑀬𑀸, 𑀲𑀓𑀺𑀮𑁂𑀲𑁄, 𑀲𑀉𑀧𑀸𑀤𑀸𑀦𑁄, 𑀲𑀧𑀭𑀺𑀯𑀸𑀭𑁄 𑀲𑀳𑀧𑀭𑀺𑀯𑀸𑀭𑁄 𑀯𑀸, 𑀲𑀳 𑀫𑀽𑀮𑁂𑀦 𑀉𑀤𑁆𑀥𑀝𑁄 𑀲𑀫𑀽𑀮𑀼𑀤𑁆𑀥𑀝𑁄 𑀭𑀼𑀓𑁆𑀔𑁄.

𑁬. 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀚𑁄𑀢𑀓𑀇𑀯𑀬𑀼𑀢𑁆𑀢𑁄 𑀉𑀧𑀫𑀸𑀦𑀧𑀼𑀩𑁆𑀩𑀧𑀤𑁄 𑀧𑀞𑀫𑀸𑀬 𑀬𑀣𑀸-𑀦𑀺𑀕𑁆𑀭𑁄𑀥𑁄 𑀇𑀯 𑀧𑀭𑀺𑀫𑀡𑁆𑀟𑀮𑁄 𑀬𑁄 𑀲𑁄 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄. 𑀲𑀗𑁆𑀔𑁄 𑀯𑀺𑀬 𑀧𑀡𑁆𑀟𑀭𑁄 𑀅𑀬𑀦𑁆𑀢𑀺 𑀲𑀗𑁆𑀔𑀧𑀡𑁆𑀟𑀭𑁄, 𑀓𑀸𑀓𑁄 𑀯𑀺𑀬 𑀲𑀽𑀭𑁄 𑀅𑀬𑀦𑁆𑀢𑀺 𑀓𑀸𑀓𑀲𑀽𑀭𑁄. 𑀘𑀓𑁆𑀔𑀼 𑀇𑀯 𑀪𑀽𑀢𑁄 𑀅𑀬𑀁 𑀧𑀭𑀫𑀢𑁆𑀣𑀤𑀲𑁆𑀲𑀦𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄 𑀪𑀕𑀯𑀸. 𑀏𑀯𑀁 𑀅𑀢𑁆𑀣𑀪𑀽𑀢𑁄, 𑀥𑀫𑁆𑀫𑀪𑀽𑀢𑁄, 𑀩𑁆𑀭𑀳𑁆𑀫𑀪𑀽𑀢𑁄, 𑀅𑀦𑁆𑀥𑀪𑀽𑀢𑁄. 𑀫𑀼𑀜𑁆𑀚𑀧𑀩𑁆𑀩𑀚𑀫𑀺𑀯 𑀪𑀽𑀢𑀸 𑀅𑀬𑀁 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀓𑀼𑀤𑀺𑀝𑁆𑀞𑀺. 𑀢𑀦𑁆𑀢𑀸𑀓𑀼𑀮𑀫𑀺𑀯 𑀚𑀸𑀢𑀸 𑀅𑀬𑀁𑀢𑀺 𑀢𑀦𑁆𑀢𑀸𑀓𑀼𑀮𑀚𑀸𑀢𑀸.

𑀙𑀝𑁆𑀞𑁆𑀬𑀢𑁆𑀣𑁂-𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀲𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀪𑀕𑀯𑀸, 𑀫𑀚𑁆𑀛𑀧𑀤𑀮𑁄𑀧𑁄. 𑀦𑀸𑀕𑀲𑁆𑀲 𑀕𑀢𑀺 𑀯𑀺𑀬 𑀕𑀢𑀺 𑀅𑀲𑁆𑀲𑀸𑀢𑀺 𑀦𑀸𑀕𑀕𑀢𑀺. 𑀏𑀯𑀁 𑀲𑀻𑀳𑀕𑀢𑀺, 𑀦𑀸𑀕𑀯𑀺𑀓𑁆𑀓𑀫𑁄, 𑀲𑀻𑀳𑀯𑀺𑀓𑁆𑀓𑀫𑁄, 𑀲𑀻𑀳𑀳𑀦𑀼. 𑀏𑀡𑀺𑀲𑁆𑀲 𑀯𑀺𑀬 𑀚𑀗𑁆𑀖𑀸 𑀅𑀲𑁆𑀲𑀸𑀢𑀺 𑀏𑀡𑀺𑀚𑀗𑁆𑀖𑁄. 𑀩𑁆𑀭𑀳𑁆𑀫𑀼𑀦𑁄 𑀯𑀺𑀬 𑀲𑀭𑁄 𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁄.

𑁭. 𑀯𑀸𑀲𑀤𑁆𑀤𑀢𑁆𑀣𑁂 𑀲𑀗𑁆𑀔𑁆𑀬𑀸𑀉𑀪𑀬𑀧𑀤𑁄 𑀬𑀣𑀸-𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑁆𑀯𑀢𑁆𑀢𑀺, 𑀤𑁆𑀯𑀢𑁆𑀢𑀬𑁄 𑀘 𑀢𑁂 𑀧𑀢𑁆𑀢𑀸 𑀘𑁂𑀢𑀺 𑀤𑁆𑀯𑀢𑁆𑀢𑀺𑀧𑀢𑁆𑀢𑀸, ‘‘𑀢𑀺𑀲𑁆𑀯’’𑀇𑀢𑀺 𑀢𑀺𑀲𑀤𑁆𑀤𑁂 𑀧𑀭𑁂 𑀤𑁆𑀯𑀺𑀲𑁆𑀲 𑀅𑀢𑁆𑀢𑀁. 𑀤𑁆𑀯𑀻𑀳𑀁 𑀯𑀸 𑀢𑀻𑀳𑀁 𑀯𑀸 𑀤𑁆𑀯𑀻𑀳𑀢𑀻𑀳𑀁, 𑀙 𑀯𑀸 𑀧𑀜𑁆𑀘 𑀯𑀸 𑀯𑀸𑀘𑀸 𑀙𑀧𑁆𑀧𑀜𑁆𑀘𑀯𑀸𑀘𑀸, 𑀏𑀯𑀁 𑀲𑀢𑁆𑀢𑀝𑁆𑀞𑀫𑀸𑀲𑀸, 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀸𑀦𑀺.

𑁮. 𑀤𑀺𑀲𑀦𑁆𑀢𑀭𑀸𑀮𑀢𑁆𑀣𑁄 𑀬𑀣𑀸-𑀧𑀼𑀩𑁆𑀩𑀲𑁆𑀲𑀸 𑀘 𑀤𑀓𑁆𑀔𑀺𑀡𑀲𑁆𑀲𑀸 𑀘 𑀤𑀺𑀲𑀸𑀬 𑀬𑀤𑀦𑁆𑀢𑀭𑀸𑀮𑀁 𑀲𑀸 𑀧𑀼𑀩𑁆𑀩𑀤𑀓𑁆𑀔𑀺𑀡𑀸 𑀯𑀺𑀤𑀺𑀲𑀸. 𑀏𑀢𑁆𑀣 𑁋