𑁪. 𑀲𑀫𑀸𑀲𑀓𑀡𑁆𑀟

𑀅𑀣 𑀦𑀸𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀻𑀦𑀁 𑀲𑀫𑀸𑀲𑁄𑀢𑀺 𑀦𑀸𑀫𑀦𑀺𑀲𑁆𑀲𑀺𑀢𑀢𑁆𑀢𑀸, 𑀲𑀬𑀜𑁆𑀘 𑀦𑀸𑀫𑀺𑀓𑀢𑁆𑀢𑀸 𑀦𑀸𑀫𑀸𑀦𑀦𑁆𑀢𑀭𑀁 𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑁧. 𑀲𑁆𑀬𑀸𑀤𑀺 𑀲𑁆𑀬𑀸𑀤𑀺𑀦𑁂+𑀓𑀢𑁆𑀣𑀦𑁆𑀢𑀺

𑀇𑀤+𑀫𑀥𑀺𑀓𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑀺𑀥𑀺𑀕𑁆𑀕𑀳𑀡𑀜𑀸𑀬𑁂𑀦 𑀲𑁆𑀬𑀸𑀤𑀻𑀢𑀺 𑀢𑀤𑀦𑁆𑀢𑀲𑁆𑀲 𑀕𑀳𑀡𑀁. 𑀲𑁄 𑀘 𑀪𑀺𑀦𑁆𑀦𑀢𑁆𑀣𑀸𑀦𑀁 𑀦𑀸𑀫𑀸𑀦+𑀫𑁂𑀓𑀢𑁆𑀣𑀻𑀪𑀸𑀯𑁄 𑀲𑀫𑀸𑀲𑁄𑀢𑀺 𑀯𑀼𑀘𑁆𑀘𑀢𑁂.

𑁨. 𑀅𑀲𑀗𑁆𑀔𑁆𑀬𑀁 𑀯𑀺𑀪𑀢𑁆𑀢𑀺+𑀲𑀫𑁆𑀧𑀢𑁆𑀢𑀺+𑀲𑀫𑀻𑀧+𑀲𑀸𑀓𑀮𑁆𑀬𑀸+𑀪𑀸𑀯+𑀬𑀣𑀸+ 𑀧𑀘𑁆𑀙𑀸+𑀬𑀼𑀕𑀧𑀤𑀢𑁆𑀣𑁂

𑀧𑀼𑀩𑁆𑀩𑀲𑁆𑀲+𑀢𑁆𑀣𑀧𑀭𑀁 𑀬𑀲𑁆𑀲, 𑀅𑀜𑁆𑀜𑀢𑁆𑀣𑀧𑀭𑀫𑀜𑁆𑀘 𑀬𑀁;

𑀦𑀧𑀼𑀁𑀲𑀓𑀁 𑀪𑀯𑁂 𑀬𑀜𑁆𑀘, 𑀢+𑀤𑀸𑀲𑀁𑀔𑁆𑀬+𑀫𑀺𑀳𑁂+𑀲𑁆𑀲𑀢𑁂.

𑀲𑀢𑁆𑀣𑀦𑁆𑀢𑀭𑁂 𑀧𑀲𑀺𑀤𑁆𑀥𑀁 𑀬𑀁, 𑀅𑀩𑁆𑀬𑀬𑀻𑀪𑀸𑀯𑀦𑀸𑀫𑀢𑁄;

𑀉𑀧𑀓𑀼𑀫𑁆𑀪𑀁 𑀢𑀺𑀝𑁆𑀞𑀕𑀼 𑀘, 𑀧𑀸𑀢𑀫𑁂𑀖𑀁𑀢𑀺 𑀢𑀁 𑀬𑀣𑀸.

𑀅𑀲𑀗𑁆𑀔𑁆𑀬𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀯𑀺𑀪𑀢𑁆𑀬𑀸𑀤𑀻𑀦+𑀫𑀢𑁆𑀣𑁂 𑀯𑀢𑁆𑀢𑀫𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑀁 𑀪𑀯𑀢𑀺. ‘‘𑀅𑀯𑀺𑀕𑁆𑀕𑀳𑁄 𑀦𑀺𑀘𑁆𑀘𑀲𑀫𑀸𑀲𑁄, 𑀧𑀤𑀦𑁆𑀢𑀭𑀯𑀺𑀕𑁆𑀕𑀳𑁄 𑀘𑁂’’𑀢𑀺 𑀧𑀤𑀦𑁆𑀢𑀭𑀯𑀺𑀕𑁆𑀕𑀳𑁄. 𑀇𑀢𑁆𑀣𑀻𑀲𑀼 𑀢𑀣𑀸 𑀧𑀯𑀢𑁆𑀢𑀸𑀢𑀺 𑀯𑀺𑀕𑁆𑀕𑀬𑁆𑀳 𑀯𑀺𑀪𑀢𑁆𑀬𑀢𑁆𑀣𑁂 𑀲𑀫𑀸𑀲𑁂 𑀓𑀢𑁂 𑁋

𑁨,𑁧𑁧𑁯. 𑀏𑀓𑀢𑁆𑀣𑀢𑀸𑀬𑀁

𑀏𑀓𑁄 𑀅𑀢𑁆𑀣𑁄 𑀬𑀲𑁆𑀲 𑀧𑀓𑀢𑀺𑀧𑀘𑁆𑀘𑀬𑀸𑀤𑀺𑀲𑀫𑀼𑀤𑀸𑀬𑀲𑁆𑀲 𑀲𑁄 𑀏𑀓𑀢𑁆𑀣𑁄. 𑀢𑀲𑁆𑀲 𑀪𑀸𑀯𑁄 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀏𑀓𑀢𑁆𑀣𑀢𑀸, 𑀈𑀬𑀸𑀤𑀺+𑀡𑀸𑀤𑀺+𑀲𑀫𑀸𑀲𑀯𑀺𑀥𑀸𑀦𑀁, 𑀢𑀲𑁆𑀫𑀺𑀁 𑀲𑀢𑀺 𑀲𑁆𑀬𑀸𑀤𑀺𑀮𑁄𑀧𑁄 𑀳𑁄𑀢𑀺.

𑁯. 𑀢𑀁 𑀦𑀧𑀼𑀁𑀲𑀓𑀦𑁆𑀢𑀺

𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀘 ‘‘𑀧𑀼𑀩𑁆𑀩𑀲𑁆𑀫𑀸+𑀫𑀸𑀤𑀺𑀢𑁄’’𑀢𑀺 𑀲𑀩𑁆𑀩𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁂 𑀘 𑀓𑀢𑁂 𑀅𑀥𑀺𑀢𑁆𑀣𑀺 𑀢𑀺𑀝𑁆𑀞𑀢𑀺, 𑀪𑁄 𑀅𑀥𑀺𑀢𑁆𑀣𑀺, 𑀅𑀥𑀺𑀢𑁆𑀣𑀺 𑀧𑀲𑁆𑀲, 𑀅𑀥𑀺𑀢𑁆𑀣𑀺 𑀓𑀢𑀁, 𑀅𑀥𑀺𑀢𑁆𑀢𑀺 𑀘𑀭𑀢𑀺, 𑀅𑀥𑀺𑀢𑁆𑀣𑀺 𑀤𑁂𑀳𑀺, 𑀅𑀥𑀺𑀢𑁆𑀣𑀺 𑀅𑀧𑁂𑀳𑀺, 𑀅𑀥𑀺𑀢𑁆𑀣𑀺 𑀆𑀬𑀢𑁆𑀢𑀁, 𑀅𑀥𑀺𑀢𑁆𑀣𑀺 𑀧𑀢𑀺𑀝𑁆𑀞𑀺𑀢𑀁. 𑀏𑀯𑀁 𑀅𑀥𑀺𑀓𑀼𑀫𑀸𑀭𑀺, 𑀅𑀦𑁆𑀢𑀪𑀽𑀢𑀲𑁆𑀲 𑀅𑀧𑁆𑀧𑀥𑀸𑀦𑀲𑁆𑀲 𑀖𑀧𑀲𑁆𑀲 ‘‘𑀖𑀧𑀲𑁆𑀲+𑀦𑁆𑀢𑀲𑁆𑀲𑀸+𑀧𑁆𑀧𑀥𑀸𑀦𑀲𑁆𑀲𑀸’’𑀢𑀺 𑀧𑀲𑁆𑀲 𑀭𑀲𑁆𑀲𑁄.

𑀲𑀳=𑀲𑀫𑁆𑀧𑀦𑁆𑀦𑀁 𑀩𑁆𑀭𑀳𑁆𑀫𑀁 𑀲𑀩𑁆𑀭𑀳𑁆𑀫𑀁. 𑀯𑀼𑀢𑁆𑀢𑀦𑀬𑁂𑀦 𑀏𑀢𑁆𑀣 𑀘 𑀉𑀧𑀭𑀺 𑀘 𑀲𑀫𑀸𑀲𑀸𑀤𑀬𑁄 𑀳𑁄𑀦𑁆𑀢𑀺, 𑀏𑀢𑁆𑀣 ‘‘𑀅𑀓𑀸𑀮𑁂 𑀲𑀢𑀢𑁆𑀣𑁂’’𑀢𑀺 𑀲𑀳𑀲𑁆𑀲 𑀲𑀸𑀤𑁂𑀲𑁄. 𑀲𑁆𑀬𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀧𑀼𑀩𑁆𑀩𑀲𑁆𑀫𑀸+𑀫𑀸𑀤𑀺𑀢𑁄’’𑀢𑀺 𑀲𑁆𑀬𑀸𑀤𑀻𑀦𑀁 𑀮𑁄𑀧𑁂 𑀘 𑀲𑀫𑁆𑀧𑀢𑁆𑀢𑁂 ‘‘𑀦𑀸+𑀢𑁄+𑀫𑀧𑀜𑁆𑀘𑀫𑀺𑀬𑀸’’𑀢𑀺 𑀅𑀧𑀜𑁆𑀘𑀫𑀺𑀬𑀸 𑀧𑀝𑀺𑀲𑁂𑀥𑁄 𑀘 𑀅𑀓𑀸𑀭𑀦𑁆𑀢𑀅𑀲𑀁𑀔𑁆𑀬𑀲𑀫𑀸𑀲𑀢𑁄 𑀧𑀭𑀸𑀲𑀁 𑀲𑀩𑁆𑀩𑀯𑀺𑀪𑀢𑁆𑀢𑀻𑀦𑀁 𑀅𑀁𑀆𑀤𑁂𑀲𑁄 𑀘 𑀳𑁄𑀢𑀺. 𑀏𑀯+𑀫𑀼𑀧𑀭𑀺𑀧𑀺.

𑀪𑀺𑀓𑁆𑀔𑀸𑀦𑀁 𑀲𑀫𑀺𑀤𑁆𑀥𑀺 𑀲𑀼𑀪𑀺𑀓𑁆𑀔𑀁, 𑀏𑀢𑁆𑀣 𑀖𑀲𑁆𑀲 𑀭𑀲𑁆𑀲𑁄. 𑀲𑀼𑀪𑀺𑀓𑁆𑀔𑀁 𑀢𑀺𑀝𑁆𑀞𑀢𑀺 𑀪𑁄 𑀲𑀼𑀪𑀺𑀓𑁆𑀔𑀁, 𑀲𑀼𑀪𑀺𑀓𑁆𑀔𑀁 𑀧𑀲𑁆𑀲. 𑀦𑀸+𑀲𑁆𑀫𑀺𑀁𑀲𑀼 ‘‘𑀯𑀸 𑀢𑀢𑀺𑀬𑀸 𑀲𑀢𑁆𑀢𑀫𑀻𑀦𑀁’’𑀢𑀺 𑀯𑀺𑀓𑀧𑁆𑀧𑁂𑀦 𑀅𑀁, 𑀲𑀼𑀪𑀺𑀓𑁆𑀔𑀁 𑀲𑀼𑀪𑀺𑀓𑁆𑀔𑁂𑀦 𑀯𑀸 𑀓𑀢𑀁, 𑀲𑀼𑀪𑀺𑀓𑁆𑀔𑀁 𑀲𑀼𑀪𑀺𑀓𑁆𑀔𑁂𑀦 𑀯𑀸 𑀘𑀭𑀢𑀺, 𑀲𑀼𑀪𑀺𑀓𑁆𑀔𑀁 𑀤𑁂𑀳𑀺. 𑀧𑀜𑁆𑀘𑀫𑀺𑀬𑀁 𑀅+𑀫𑀩𑁆𑀪𑀸𑀯𑀸 𑀲𑀼𑀪𑀺𑀓𑁆𑀔𑀸 𑀅𑀧𑀕𑀘𑁆𑀙, 𑀲𑀼𑀪𑀺𑀓𑁆𑀔+𑀫𑀸𑀬𑀢𑁆𑀢𑀁, 𑀲𑀼𑀪𑀺𑀓𑁆𑀔𑀁 𑀲𑀼𑀪𑀺𑀓𑁆𑀔𑁂 𑀯𑀸 𑀧𑀢𑀺𑀝𑁆𑀞𑀺𑀢𑀁.

𑀲𑀫𑀻𑀧𑀢𑁆𑀣𑁂-𑀓𑀼𑀫𑁆𑀪𑀲𑁆𑀲 𑀲𑀫𑀻𑀧𑀁 𑀉𑀧𑀓𑀼𑀫𑁆𑀪𑀁, 𑀏𑀯𑀁 𑀉𑀧𑀦𑀕𑀭𑀁, 𑀪𑁄 𑀉𑀧𑀓𑀼𑀫𑁆𑀪𑀁 𑀇𑀘𑁆𑀘𑀸𑀤𑀺.

𑀲𑀸𑀓𑀮𑁆𑀬𑁂-𑀢𑀺𑀡𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸𑀢𑀺 𑀲𑀢𑀺𑀡𑀁, 𑀢𑀺𑀡𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀡𑀻𑀬+𑀫𑀚𑁆𑀛𑁄𑀳𑀭𑀢𑀻𑀢𑁆𑀬𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀭𑀳𑁆𑀫𑀲𑀫𑀁. 𑀅𑀕𑁆𑀕𑀺𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸𑀢𑀺 𑀲𑀸𑀕𑁆𑀕𑀺, 𑀅𑀕𑁆𑀕𑀺𑀕𑀦𑁆𑀣𑀁𑀧𑀺 𑀅𑀲𑁂𑀲𑁂𑀢𑁆𑀯𑀸 𑀅𑀥𑀻𑀢𑁂𑀢𑁆𑀬𑀢𑁆𑀣𑁄. 𑀯𑀸𑀭𑀕𑁆𑀕𑀳𑀡𑀁 𑀅𑀥𑀺𑀢𑁆𑀣𑀺𑀲𑀫𑀁.

𑀅𑀪𑀸𑀯𑁄 𑀲𑀫𑁆𑀩𑀦𑁆𑀥𑀻𑀪𑁂𑀤𑀸 𑀩𑀳𑀼𑀯𑀺𑀥𑁄, 𑀢𑀢𑁆𑀭 𑀇𑀤𑁆𑀥𑀸𑀪𑀸𑀯𑁂𑀯𑀺𑀕𑀢𑀸 𑀇𑀤𑁆𑀥𑀺=𑀯𑀺𑀪𑀽𑀢𑀺 𑀲𑀤𑁆𑀤𑀺𑀓𑀸𑀦𑀦𑁆𑀢𑀺 𑀤𑀼𑀲𑁆𑀲𑀤𑁆𑀤𑀺𑀓𑀁. 𑀅𑀢𑁆𑀣𑀸𑀪𑀸𑀯𑁂𑀫𑀓𑁆𑀔𑀺𑀓𑀸𑀦𑀁 𑀅𑀪𑀸𑀯𑁄 𑀦𑀺𑀫𑁆𑀫𑀓𑁆𑀔𑀺𑀓𑀁, 𑀦𑀺𑀤𑁆𑀤𑀭𑀣𑀁, 𑀦𑀺𑀫𑁆𑀫𑀲𑀓𑀁. 𑀅𑀢𑀺𑀓𑁆𑀓𑀫𑀸𑀪𑀸𑀯𑁂-𑀅𑀢𑀺𑀕𑀢𑀸𑀦𑀺 𑀢𑀺𑀡𑀸𑀦𑀺 𑀦𑀺𑀢𑁆𑀢𑀺𑀡𑀁. 𑀉𑀧𑀪𑁄𑀕𑀲𑀫𑁆𑀩𑀦𑁆𑀥𑀻𑀯𑀢𑁆𑀢𑀫𑀸𑀦𑀓𑀸𑀮𑀲𑁆𑀲 𑀅𑀪𑀸𑀯𑁂-𑀅𑀢𑀺𑀕𑀢𑀁 𑀮𑀳𑀼𑀧𑀸𑀯𑀼𑀭𑀡𑀁 𑀅𑀢𑀺𑀮𑀳𑀼𑀧𑀸𑀯𑀼𑀭𑀡𑀁, 𑀮𑀳𑀼𑀧𑀸𑀯𑀼𑀭𑀡𑀲𑁆𑀲 𑀦𑀸+𑀬𑀁 𑀉𑀧𑀪𑁄𑀕𑀢𑀸 𑀮𑁄𑀢𑀺 𑀅𑀢𑁆𑀣𑁄.

𑀬𑀣𑀸𑀢𑁆𑀣𑁄+𑀦𑁂𑀓𑀯𑀺𑀥𑁄, 𑀢𑀢𑁆𑀭 𑀬𑁄𑀕𑁆𑀕𑀢𑀸𑀬𑀁-𑀬𑁄𑀕𑁆𑀕𑀁 𑀭𑀽𑀧+𑀫𑀦𑀼𑀭𑀽𑀧𑀁. 𑀯𑀺𑀘𑁆𑀙𑀸𑀬𑀁-𑀅𑀤𑁆𑀥𑀫𑀸𑀲𑀁 𑀅𑀤𑁆𑀥𑀫𑀸𑀲𑀁 𑀅𑀦𑀼 𑀅𑀦𑁆𑀯𑀤𑁆𑀥𑀫𑀸𑀲𑀁, 𑀏𑀯𑀁 𑀧𑀘𑁆𑀘𑀢𑁆𑀢𑀁. 𑀅𑀢𑁆𑀣𑀸𑀦𑀢𑀺𑀯𑀢𑁆𑀢𑀺𑀬𑀁-𑀲𑀢𑁆𑀢𑀺𑀁 𑀅𑀦𑀢𑀺𑀓𑁆𑀓𑀫𑁆𑀫 𑀬𑀣𑀸𑀲𑀢𑁆𑀢𑀺. 𑀏𑀯𑀁 𑀬𑀣𑀸𑀓𑁆𑀓𑀫𑀁, 𑀬𑀣𑀸𑀩𑀮𑀁. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀬𑀸 𑀬𑀸 𑀧𑀭𑀺𑀲𑀸 𑀬𑀣𑀸𑀧𑀭𑀺𑀲𑀸. 𑀲𑀤𑀺𑀲𑀢𑁆𑀣𑁂-𑀓𑀺𑀔𑀺𑀬𑀸 𑀓𑀡𑁆𑀳𑀯𑀺𑀘𑁆𑀙𑀺𑀢𑀥𑁂𑀦𑀼𑀬𑀸 𑀲𑀤𑀺𑀲𑁄 𑀲𑀓𑀺𑀔𑀺, 𑀲𑀳𑀲𑁆𑀲 𑀲𑀸𑀤𑁂𑀲𑁄. 𑀆𑀦𑀼𑀧𑀼𑀩𑁆𑀩𑀺𑀬𑀁-𑀚𑁂𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀅𑀦𑀼𑀚𑁂𑀝𑁆𑀞𑀁.

𑀧𑀘𑁆𑀙𑀸𑀅𑀢𑁆𑀣𑁂-𑀭𑀣𑀲𑁆𑀲 𑀧𑀘𑁆𑀙𑀸 𑀅𑀦𑀼𑀭𑀣𑀁.

𑀬𑀼𑀕𑀧𑀤𑀢𑁆𑀣𑁂-𑀘𑀓𑁆𑀓𑁂𑀦 𑀲𑀳=𑀏𑀓𑀓𑀸𑀮𑀁 𑀲𑀘𑀓𑁆𑀓𑀁, 𑀘𑀓𑁆𑀓𑁂𑀦 𑀏𑀓𑀓𑁆𑀔𑀡𑁂 𑀦𑀺𑀥𑁂𑀢𑀻𑀢𑀺 𑀅𑀢𑁆𑀣𑁄.

𑁩. 𑀬𑀣𑀸 𑀦 𑀢𑀼𑀮𑁆𑀬𑁂

𑀬𑀣𑀸𑀲𑀤𑁆𑀤𑁄 𑀢𑀼𑀮𑁆𑀬𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑁄 𑀦 𑀪𑀯𑀢𑀺. 𑀬𑀣𑀸 𑀤𑁂𑀯𑀤𑀢𑁆𑀢𑁄, 𑀢𑀣𑀸 𑀬𑀜𑁆𑀜𑀤𑀢𑁆𑀢𑁄. 𑀏𑀢𑁆𑀣 𑀉𑀧𑀫𑀸𑀦𑀪𑀽𑀢𑁄 𑀬𑀣𑀸𑀲𑀤𑁆𑀤𑁄 ‘𑀢𑀣𑀸 𑀬𑀜𑁆𑀜𑀤𑀢𑁆𑀢𑁄’𑀢𑀺 𑀉𑀧𑀫𑁂𑀬𑁆𑀬+𑀫𑀧𑁂𑀓𑁆𑀔𑀢𑀺, 𑀢𑀲𑁆𑀫𑀸 ‘‘𑀲𑀸𑀧𑁂𑀓𑁆𑀔+𑀫𑀲𑀫𑀢𑁆𑀣𑀁 𑀪𑀯𑀢𑀻’’𑀢𑀺 𑀜𑀸𑀬𑀸 𑀅𑀲𑀫𑀸𑀲𑁂 ‘‘𑀦 𑀢𑀼𑀮𑁆𑀬𑁂’’𑀢𑀺 𑀧𑀝𑀺𑀲𑁂𑀥𑁄 𑀓𑀺𑀫𑀢𑁆𑀣+𑀫𑀺𑀢𑀺 𑀘𑁂. 𑀬𑀲𑁆𑀫𑀸 ‘‘𑀬𑀣𑀸 𑀤𑁂𑀯𑀤𑀢𑁆𑀢𑁄’’𑀢𑀺 𑀲𑀫𑀼𑀤𑀸𑀬𑀫𑁂𑀯 𑀉𑀧𑀫𑀸𑀦𑀁 𑀪𑀯𑀢𑀺, 𑀦 𑀯𑀺𑀲𑀼𑀁 𑀬𑀣𑀸𑀲𑀤𑁆𑀤𑁄, 𑀢𑀲𑁆𑀫𑀸 𑀲𑀫𑀼𑀤𑀸𑀬𑀲𑁆𑀲𑁂𑀯 𑀉𑀧𑀫𑁂𑀬𑁆𑀬𑀲𑀸𑀧𑁂𑀓𑁆𑀔𑀢𑁆𑀢𑁂 𑀦 𑀅𑀲𑀸𑀫𑀢𑁆𑀣𑀺𑀬𑀢𑀸 𑀦 𑀯𑀺𑀲𑀼𑀁 𑀬𑀣𑀸𑀲𑀤𑁆𑀤𑀲𑁆𑀲, 𑀢𑀲𑁆𑀫𑀸 𑀲𑀸𑀤𑀺𑀲𑁆𑀲𑁂 𑀧𑀢𑁆𑀢𑀲𑀫𑀸𑀲𑀲𑁆𑀲 𑀧𑀝𑀺𑀲𑁂𑀥𑀢𑁆𑀣+𑀫𑀺𑀤𑀁. 𑀢𑀼𑀮𑁆𑀬𑀢𑁆𑀣𑁂𑀢𑀺 𑀯𑀢𑁆𑀢𑀩𑁆𑀩𑁂 𑀢𑀼𑀮𑁆𑀬𑀁 𑀯𑀺𑀦𑀸 𑀢𑀼𑀮𑁆𑀬𑀢𑀸 𑀦𑀢𑁆𑀣𑀻𑀢𑀺 𑀢𑀼𑀮𑁆𑀬𑀢𑁆𑀣𑁂𑀢𑀺 𑀅𑀯𑀢𑁆𑀯𑀸 𑀢𑀼𑀮𑁆𑀬𑁂𑀢𑀺 𑀯𑀼𑀢𑁆𑀢𑀁.

𑀬𑀣𑀸𑀓𑀣𑀜𑁆𑀘𑀺 𑀲𑀸𑀤𑀺𑀲𑁆𑀲𑀁, 𑀜𑀸𑀬𑀢𑁂 𑀬𑀢𑁆𑀣 𑀲𑀫𑁆𑀪𑀯𑀁;

𑀉𑀧𑀫𑀸 𑀦𑀸𑀫 𑀲𑀸 𑀢𑀲𑁆𑀲𑀸, 𑀧𑀧𑀜𑁆𑀘𑁄 𑀩𑀳𑀼𑀥𑀸 𑀪𑀯𑁂.

𑁪. 𑀬𑀸𑀯𑀸+𑀯𑀥𑀸𑀭𑀡𑁂

𑀬𑀸𑀯𑀲𑀤𑁆𑀤𑁄 𑀅𑀯𑀥𑀸𑀭𑀡𑁂 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑁄 𑀪𑀯𑀢𑀺. 𑀅𑀯𑀥𑀸𑀭𑀡𑀁=𑀏𑀢𑁆𑀢𑀓𑀢𑀸𑀧𑀭𑀺𑀘𑁆𑀙𑁂𑀤𑁄. 𑀬𑀸𑀯𑀦𑁆𑀢𑀸𑀦𑀺 𑀅𑀫𑀢𑁆𑀢𑀸𑀦𑀺=𑀪𑀸𑀚𑀦𑀸𑀦𑀺 𑀬𑀸𑀯𑀸𑀫𑀢𑁆𑀢𑀁, 𑀇𑀫𑀺𑀦𑀸 𑀲𑀫𑀸𑀲𑁂 𑀓𑀢𑁂 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁. 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁. 𑀬𑀸𑀯𑀢𑀸𑀬𑀼𑀓𑀁, ‘‘𑀲𑀓𑀢𑁆𑀣𑁂’’𑀢𑀺 𑀓𑀧𑀘𑁆𑀘𑀬𑁄. 𑀬𑀢𑁆𑀢𑀓𑁂𑀦 𑀅𑀢𑁆𑀣𑁄 𑀬𑀸𑀯𑀤𑀢𑁆𑀣𑀁.

𑁫. 𑀧𑀬𑁆𑀬𑀧𑀸 𑀩𑀳𑀺 𑀢𑀺𑀭𑁄 𑀧𑀼𑀭𑁂 𑀧𑀘𑁆𑀙𑀸 𑀯𑀸 𑀧𑀜𑁆𑀘𑀫𑁆𑀬𑀸

𑀧𑀭𑀺𑀆𑀤𑀬𑁄 𑀧𑀜𑁆𑀘𑀫𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑀸 𑀳𑁄𑀦𑁆𑀢𑀺 𑀯𑀸. 𑀧𑀭𑀺 𑀧𑀩𑁆𑀩𑀢𑀸 𑀧𑀭𑀺𑀧𑀩𑁆𑀩𑀢𑀁. 𑀯𑀸𑀲𑁆𑀲 𑀯𑀸𑀓𑁆𑀬𑀯𑀺𑀓𑀧𑁆𑀧𑀢𑁆𑀣𑀢𑁆𑀢𑀸 𑀧𑀭𑀺 𑀧𑀩𑁆𑀩𑀢𑀸 𑀇𑀘𑁆𑀘𑀸𑀤𑀬𑁄𑀧𑀺 𑀳𑁄𑀦𑁆𑀢𑀺. 𑀅𑀧 𑀧𑀩𑁆𑀩𑀢𑀸 𑀅𑀧𑀧𑀩𑁆𑀩𑀢𑀁, 𑀆 𑀧𑀸𑀝𑀮𑀺𑀧𑀼𑀢𑁆𑀢𑀸 𑀆𑀧𑀸𑀝𑀮𑀺𑀧𑀼𑀢𑁆𑀢𑀁, 𑀩𑀳𑀺 𑀕𑀸𑀫𑀸 𑀩𑀳𑀺𑀕𑀸𑀫𑀁, 𑀢𑀺𑀭𑁄 𑀧𑀩𑁆𑀩𑀢𑀸 𑀢𑀺𑀭𑁄𑀧𑀩𑁆𑀩𑀢𑀁, 𑀧𑀼𑀭𑁂 𑀪𑀢𑁆𑀢𑀸 𑀧𑀼𑀭𑁂𑀪𑀢𑁆𑀢𑀁, 𑀧𑀘𑁆𑀙𑀸 𑀪𑀢𑁆𑀢𑀸 𑀧𑀘𑁆𑀙𑀸𑀪𑀢𑁆𑀢𑀁, 𑀲𑀩𑁆𑀩𑀁 𑀉𑀧𑀓𑀼𑀫𑁆𑀪𑀲𑀫𑀁, 𑀇𑀫𑀺𑀦𑀸 𑀲𑀫𑀸𑀲𑁄 𑀯𑀺𑀲𑁂𑀲𑁄. 𑀏𑀯+𑀫𑀼𑀧𑀭𑀺𑀲𑀼𑀢𑁆𑀢𑁂𑀧𑀺.

𑀯𑀸𑀢𑁆𑀬+𑀥𑀺𑀓𑀸𑀭𑁄 𑁋

𑁬. 𑀲𑀫𑀻𑀧𑀸+𑀬𑀸𑀫𑁂𑀲𑁆𑀯+𑀦𑀼

‘‘𑀅𑀲𑀁𑀔𑁆𑀬’’𑀫𑀺𑀘𑁆𑀘𑀸𑀤𑀺𑀦𑀸 𑀦𑀺𑀘𑁆𑀘𑀲𑀫𑀸𑀲𑀲𑁆𑀲 𑀯𑀺𑀓𑀧𑁆𑀧𑀢𑁆𑀣𑀁 𑀲𑀫𑀻𑀧𑀕𑁆𑀕𑀳𑀡𑀁. 𑀅𑀦𑀼𑀲𑀤𑁆𑀤𑁄 𑀲𑀸𑀫𑀻𑀧𑁆𑀬𑁂 𑀆𑀬𑀸𑀫𑁂 𑀘 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑁄 𑀯𑀸 𑀳𑁄𑀢𑀺. 𑀏𑀢𑁆𑀣 𑀲𑀫𑀻𑀧𑀕𑁆𑀕𑀳𑀡𑀲𑁆𑀲 𑀪𑀸𑀯𑀧𑁆𑀧𑀥𑀸𑀦𑀢𑁆𑀢𑀸 𑀲𑀸𑀫𑀻𑀧𑁆𑀬𑀫𑁂𑀯 𑀕𑀫𑁆𑀬𑀢𑁂𑀢𑀺 𑀲𑀸𑀫𑀻𑀧𑁆𑀬𑁂𑀢𑀺 𑀯𑀼𑀢𑁆𑀢𑀁. 𑀯𑀦𑀲𑁆𑀲 𑀅𑀦𑀼=𑀲𑀫𑀻𑀧𑀁 𑀅𑀦𑀼𑀯𑀦𑀁, 𑀕𑀗𑁆𑀕𑀸𑀬 𑀅𑀦𑀼=𑀆𑀬𑀸𑀫𑁄 𑀅𑀦𑀼𑀕𑀗𑁆𑀕𑀁, 𑀕𑀗𑁆𑀕𑀸𑀬 𑀅𑀦𑀼 𑀯𑀸 𑀩𑀸𑀭𑀸𑀡𑀲𑀻.

𑁭. 𑀢𑀺𑀝𑁆𑀞𑀕𑁆𑀯𑀸𑀤𑀻𑀦𑀺

𑀢𑀺𑀝𑁆𑀞𑀕𑀼𑀆𑀤𑀻𑀦𑀺 𑀅𑀜𑁆𑀜𑀢𑁆𑀣𑁂𑀦 𑀲𑀺𑀤𑁆𑀥𑀸𑀧𑀺 𑀅𑀲𑁆𑀫𑀺𑀁 𑀅𑀲𑀁𑀔𑁆𑀬𑀲𑀫𑀸𑀲𑁂 𑀦𑀺𑀧𑀸𑀢𑀺𑀬𑀦𑁆𑀢𑀺. 𑀢𑀺𑀝𑁆𑀞𑀦𑁆𑀢𑀺 𑀕𑀸𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀢𑀺𑀝𑁆𑀞𑀦𑁆𑀢𑀲𑀤𑁆𑀤+𑀕𑁄𑀲𑀤𑁆𑀤𑁂𑀳𑀺 𑀧𑀞𑀫𑀸𑀬𑁄𑀫𑁆𑀳𑀺 𑀓𑀢𑁂 ‘‘𑀯𑀸+𑀦𑁂𑀓𑀜𑁆𑀜𑀢𑁆𑀣𑁂’’𑀢𑀺 𑀲𑀫𑀸𑀲𑁄, 𑀇𑀫𑀺𑀦𑀸 𑀦𑀺𑀧𑀸𑀢𑀦𑀸 𑀮𑁄𑀧𑁂 𑀦𑀧𑀼𑀁𑀲𑀓𑀢𑁆𑀣𑁂 𑀘 𑀓𑀢𑁂 𑀲𑀺𑀫𑁆𑀳𑀺 𑀕𑁄𑀲𑁆𑀲 ‘‘𑀕𑁄𑀲𑁆𑀲𑀼’’𑀢𑀺 𑀉𑀓𑀸𑀭𑁂 ‘‘𑀧𑀼𑀩𑁆𑀩𑀲𑁆𑀫𑀸+𑀫𑀸𑀤𑀺𑀢𑁄’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀏𑀯𑀁 𑀯𑀳𑀦𑁆𑀢𑀻 𑀕𑀸𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀳𑀕𑁆𑀕𑀼 𑀇𑀘𑁆𑀘𑀸𑀤𑀺. 𑀯𑁂𑀮𑀸𑀧𑁆𑀧𑀓𑀸𑀲𑀓𑀧𑀸𑀢𑁄𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄, 𑀧𑀸𑀢𑁄 𑀦𑀳𑀸𑀦𑀦𑁆𑀢𑀺 𑀲𑀢𑁆𑀢𑀫𑀻𑀅𑀫𑀸𑀤𑀺𑀲𑀫𑀸𑀲𑁂 𑀧𑀸𑀢𑀦𑀳𑀸𑀦𑀁, 𑀏𑀯𑀁 𑀲𑀸𑀬𑀦𑀳𑀸𑀦𑀁, 𑀧𑀸𑀢𑀓𑀸𑀮𑀁, 𑀲𑀸𑀬𑀓𑀸𑀮𑀁, 𑀧𑀸𑀢𑀫𑁂𑀖𑀁, 𑀲𑀸𑀬𑀫𑁂𑀖𑀁, 𑀧𑀸𑀢𑀫𑀕𑁆𑀕𑀁, 𑀲𑀸𑀬𑀫𑀕𑁆𑀕𑀁, 𑀏𑀢𑁆𑀣 ‘‘𑀏𑀑𑀦+𑀫 𑀯𑀡𑁆𑀡𑁂’’𑀢𑀺 𑀅𑀓𑀸𑀭𑁄, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀮𑁄𑀧𑁄 𑀘 𑀳𑁄𑀢𑀺.

𑁮. 𑀑𑀭𑁂+𑀧𑀭𑀺+𑀧𑀝𑀺+𑀧𑀸𑀭𑁂+𑀫𑀚𑁆𑀛𑁂+𑀳𑁂𑀝𑁆𑀞𑀼+𑀤𑁆𑀥𑀸+𑀥𑁄+𑀦𑁆𑀢𑁄 𑀯𑀸 𑀙𑀝𑁆𑀞𑀺𑀬𑀸.

𑀑𑀭𑀸𑀤𑀬𑁄 𑀲𑀤𑁆𑀤𑀸 𑀙𑀝𑁆𑀞𑀺𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑀸 𑀯𑀸 𑀳𑁄𑀦𑁆𑀢𑀺. 𑀑𑀭𑀁 𑀕𑀗𑁆𑀕𑀸𑀬 𑀑𑀭𑁂𑀕𑀗𑁆𑀕𑀸, 𑀉𑀧𑀭𑀺 𑀲𑀺𑀔𑀭𑀲𑁆𑀲 𑀉𑀧𑀭𑀺𑀲𑀺𑀔𑀭𑀁, 𑀧𑀝𑀺=𑀫𑀼𑀔𑀁 𑀲𑁄𑀢𑀲𑁆𑀲 𑀧𑀝𑀺𑀲𑁄𑀢𑀁, 𑀧𑀸𑀭𑀁 𑀬𑀫𑀼𑀦𑀸𑀬 𑀧𑀸𑀭𑁂𑀬𑀫𑀼𑀦𑀁, 𑀫𑀚𑁆𑀛𑀁 𑀕𑀗𑁆𑀕𑀸𑀬 𑀫𑀚𑁆𑀛𑁂𑀕𑀗𑁆𑀕𑀁, 𑀳𑁂𑀝𑁆𑀞𑀸 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸𑀧𑀸𑀲𑀸𑀤𑀁, 𑀉𑀤𑁆𑀥𑀁 𑀕𑀗𑁆𑀕𑀸𑀬 𑀉𑀤𑁆𑀥𑀕𑀗𑁆𑀕𑀁, 𑀅𑀥𑁄 𑀕𑀗𑁆𑀕𑀸𑀬 𑀅𑀥𑁄𑀕𑀗𑁆𑀕𑀁, 𑀅𑀦𑁆𑀢𑁄 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄𑀧𑀸𑀲𑀸𑀤𑀁. 𑀇𑀫𑀺𑀦𑀸 𑀦𑀺𑀧𑀸𑀢𑀦𑀸𑀯 𑀦𑀺𑀕𑁆𑀕𑀳𑀻𑀢𑀮𑁄𑀧𑁂 𑀘 𑀏𑀓𑀸𑀭𑁂 𑀘 𑀓𑀢𑁂 𑀑𑀭𑁂𑀘𑁆𑀘𑀸𑀤𑀺 𑀳𑁄𑀢𑀺.

𑁧𑁦. 𑀅+𑀫𑀸𑀤𑀺

𑀅+𑀫𑀸𑀤𑀺𑀲𑁆𑀬𑀸𑀤𑁆𑀬𑀦𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳 𑀩𑀳𑀼𑀮+𑀫𑁂𑀓𑀢𑁆𑀢𑀁 𑀳𑁄𑀢𑀺.

𑀉𑀢𑁆𑀢𑀭𑀲𑁆𑀲 𑀧𑀤𑀲𑁆𑀲+𑀢𑁆𑀣𑁄, 𑀧𑀥𑀸𑀦𑀁 𑀮𑀺𑀗𑁆𑀕+𑀫𑀲𑁆𑀲 𑀘;

𑀤𑀼𑀢𑀺𑀬𑀦𑁆𑀢𑀸𑀤𑀺𑀧𑀤𑁂𑀓𑀢𑁆𑀣𑁄, 𑀩𑀳𑀼𑀥𑀸 𑀢𑀁 𑀯𑀺𑀪𑀚𑁆𑀚𑀢𑁂.

𑀧𑀭𑁂𑀲+𑀫𑀺𑀲𑁆𑀲𑀢𑁂 𑀢𑀜𑁆𑀘, 𑀪𑀺𑀬𑁆𑀬𑁄 𑀢𑀧𑁆𑀧𑀼𑀭𑀺𑀲𑀸+𑀔𑁆𑀬𑀬𑀸;

𑀢𑀁 𑀬𑀣𑀸+𑀢𑁆𑀭 𑀭𑀸𑀚𑀸𑀧𑀘𑁆𑀘𑀁, 𑀓𑀢𑁆𑀣𑀘𑀻𑀢𑀺+𑀫𑀺𑀢𑀻𑀤𑀺𑀲𑀁.

𑀅+𑀫𑀸𑀤𑁆𑀬𑀦𑁆𑀢𑀸𑀦𑀁 𑀓𑀸𑀭𑀓𑀸𑀦𑀁 𑀅𑀓𑀸𑀭𑀓𑀸𑀦𑀜𑁆𑀘 𑀲𑀫𑀸𑀲𑁄 𑀓𑀢𑁆𑀣𑀘𑀺𑀫𑁂𑀯 𑀯𑀸 𑀳𑁄𑀢𑀺. 𑀢𑀜𑁆𑀘 𑀩𑀳𑀼𑀮𑀁𑀯𑀺𑀥𑀸𑀦𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄 𑀅𑀫𑀸𑀤𑀺 𑀕𑀢+𑀦𑀺𑀲𑁆𑀲𑀺𑀢𑀸+𑀢𑀻𑀢𑀸+𑀢𑀺𑀓𑁆𑀓𑀦𑁆𑀢+𑀧𑀢𑁆𑀢𑀸+𑀧𑀦𑁆𑀦𑀸𑀤𑀻𑀳𑀺 𑀪𑀯𑀢𑀺. 𑀲𑀭𑀡𑀁 𑀕𑀢𑁄𑀢𑀺 𑀲𑀫𑀸𑀲𑁂 𑀓𑀢𑁂 ‘‘𑀏𑀓𑀢𑁆𑀣𑀢𑀸𑀬𑀁’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺 𑀉𑀧𑀭𑀺 𑀲𑀩𑁆𑀩𑀢𑁆𑀣 𑀧𑀼𑀩𑁆𑀩𑀲𑀫𑀁. 𑀲𑀭𑀡𑀕𑀢𑁄, 𑀲𑀭𑀡𑀕𑀢𑀸. 𑀲𑀭𑀡𑀕𑀢𑀸, 𑀲𑀭𑀡𑀕𑀢𑀸𑀬𑁄. 𑀲𑀭𑀡𑀕𑀢𑀁 𑀓𑀼𑀮𑀁, 𑀲𑀭𑀡𑀕𑀢𑀸𑀦𑀺 𑀓𑀼𑀮𑀸𑀦𑀺 𑀇𑀘𑁆𑀘𑀸𑀤𑀺. 𑀅𑀭𑀜𑁆𑀜𑀕𑀢𑁄, 𑀪𑀽𑀫𑀺𑀕𑀢𑁄. 𑀥𑀫𑁆𑀫𑀁 𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀦𑀺𑀲𑁆𑀲𑀺𑀢𑁄, 𑀅𑀢𑁆𑀣𑀦𑀺𑀲𑁆𑀲𑀺𑀢𑁄. 𑀪𑀯𑀁 𑀅𑀢𑀻𑀢𑁄 𑀪𑀯𑀸𑀢𑀻𑀢𑁄, 𑀓𑀸𑀮𑀸𑀢𑀻𑀢𑁄. 𑀧𑀫𑀸𑀡𑀁 𑀅𑀢𑀺𑀓𑁆𑀓𑀦𑁆𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀁. 𑀲𑀼𑀔𑀁 𑀧𑀢𑁆𑀢𑁄 𑀲𑀼𑀔𑀧𑁆𑀧𑀢𑁆𑀢𑁄, 𑀤𑀼𑀓𑁆𑀔𑀧𑁆𑀧𑀢𑁆𑀢𑁄. 𑀲𑁄𑀢𑀁 𑀆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄. 𑀭𑀣𑀁 𑀆𑀭𑀼𑀴𑁆𑀳𑁄 𑀭𑀣𑀸𑀭𑀼𑀴𑁆𑀳𑁄. 𑀲𑀩𑁆𑀩𑀭𑀢𑁆𑀢𑀺𑀁 𑀲𑁄𑀪𑀡𑁄 𑀲𑀩𑁆𑀩𑀭𑀢𑁆𑀢𑀺𑀲𑁄𑀪𑀡𑁄, 𑀫𑀼𑀳𑀼𑀢𑁆𑀢𑀲𑀼𑀔𑀁. 𑀅𑀓𑀸𑀭𑀓𑀸𑀦𑀁 𑀲𑀫𑀸𑀲𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂. 𑀯𑀼𑀢𑁆𑀢𑀺𑀬𑁂𑀯𑁄+𑀧𑀧𑀤𑀲𑀫𑀸𑀲𑁂, 𑀢𑀲𑁆𑀲 𑀦𑀺𑀘𑁆𑀘𑀢𑁆𑀢𑀸. 𑀬𑀣𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀓𑀸𑀭𑁄, 𑀓𑀼𑀫𑁆𑀪𑀓𑀸𑀭𑁄, 𑀅𑀢𑁆𑀣𑀁 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑀓𑀸𑀫𑁄, 𑀥𑀫𑁆𑀫𑀓𑀸𑀫𑁄, 𑀥𑀫𑁆𑀫𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀭𑁄, 𑀯𑀺𑀦𑀬𑀥𑀭𑁄. 𑀲𑀸𑀦𑀁 𑀧𑀘𑀢𑀻𑀢𑀺 𑀲𑀧𑀸𑀓𑁄, 𑀢𑀦𑁆𑀢𑀁 𑀯𑀸𑀬𑀢𑀻𑀢𑀺 𑀢𑀦𑁆𑀢𑀯𑀸𑀬𑁄, 𑀯𑀭𑀁 𑀆𑀳𑀭𑀢𑀻𑀢𑀺 𑀯𑀭𑀸𑀳𑀭𑁄. 𑀦𑁆𑀢+𑀫𑀸𑀦+𑀓𑁆𑀢𑀯𑀦𑁆𑀢𑁂𑀳𑀺 𑀯𑀸𑀓𑁆𑀬𑀫𑁂𑀯. 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄, 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄, 𑀑𑀤𑀦𑀁 𑀪𑀼𑀢𑁆𑀢𑀯𑀸.

𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄 𑀓𑀺𑀢𑀓+𑀧𑀼𑀩𑁆𑀩+𑀲𑀤𑀺𑀲+𑀲𑀫𑁄+𑀦𑀢𑁆𑀣+𑀓𑀮𑀳+𑀦𑀺𑀧𑀼𑀡+𑀫𑀺𑀲𑁆𑀲+𑀲𑀔𑀺𑀮𑀸𑀤𑀻𑀳𑀺. 𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁄 𑀥𑀫𑁆𑀫𑁄, 𑀏𑀯𑀁 𑀚𑀺𑀦𑀤𑁂𑀲𑀺𑀢𑁄. 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄 𑀲𑀢𑁆𑀣𑀼𑀯𑀡𑁆𑀡𑀺𑀢𑁄. 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑁄 𑀯𑀺𑀜𑁆𑀜𑀼𑀕𑀭𑀳𑀺𑀢𑁄, 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁄, 𑀇𑀲𑁆𑀲𑀭𑀓𑀢𑀁, 𑀲𑀬𑀁 𑀓𑀢𑀁, 𑀲𑀼𑀓𑁂𑀳𑀺 𑀆𑀳𑀝𑀁 𑀲𑀼𑀓𑀸𑀳𑀝𑀁, 𑀭𑀜𑁆𑀜𑀸 𑀳𑀢𑁄 𑀭𑀸𑀚𑀳𑀢𑁄, 𑀭𑀸𑀚𑀧𑀻𑀴𑀺𑀢𑁄. 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄 𑀅𑀕𑁆𑀕𑀺𑀤𑀟𑁆𑀠𑁄, 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀲𑀧𑁆𑀧𑀤𑀝𑁆𑀞𑁄, 𑀲𑀮𑁆𑀮𑁂𑀳𑀺 𑀯𑀺𑀤𑁆𑀥𑁄 𑀲𑀮𑁆𑀮𑀯𑀺𑀤𑁆𑀥𑁄, 𑀇𑀘𑁆𑀙𑀸𑀬 𑀧𑀓𑀢𑁄 𑀇𑀘𑁆𑀙𑀸𑀧𑀓𑀢𑁄, 𑀲𑀻𑀮𑀲𑀫𑁆𑀧𑀦𑁆𑀦𑁄. 𑀏𑀯𑀁 𑀲𑀼𑀔𑀲𑀳𑀕𑀢𑀁, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀫𑀺𑀢𑁆𑀢𑀲𑀁𑀲𑀕𑁆𑀕𑁄, 𑀧𑀺𑀬𑀯𑀺𑀧𑁆𑀧𑀬𑁄𑀕𑁄, 𑀚𑀸𑀢𑀺𑀣𑀤𑁆𑀥𑁄, 𑀕𑀼𑀡𑀳𑀻𑀦𑁄, 𑀕𑀼𑀡𑀯𑀼𑀤𑁆𑀥𑁄, 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀁, 𑀘𑀢𑀼𑀯𑀕𑁆𑀕𑀸𑀤𑀺𑀓𑀢𑁆𑀢𑀩𑁆𑀩𑀁. 𑀓𑀸𑀓𑁂𑀳𑀺 𑀧𑁂𑀬𑁆𑀬𑀸 𑀓𑀸𑀓𑀧𑁂𑀬𑁆𑀬𑀸, 𑀦𑀤𑀻. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯, 𑀉𑀭𑀲𑀸 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄, 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄. 𑀓𑁆𑀯𑀘𑀺 𑀯𑀸𑀓𑁆𑀬𑀫𑁂𑀯, 𑀨𑀭𑀲𑀼𑀦𑀸 𑀙𑀺𑀦𑁆𑀦𑀯𑀸, 𑀓𑀸𑀓𑁂𑀳𑀺 𑀧𑀸𑀢𑀩𑁆𑀩𑀸, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸. 𑀧𑀼𑀩𑁆𑀩𑀸𑀤𑀺𑀬𑁄𑀕𑁂-𑀫𑀸𑀲𑁂𑀦 𑀧𑀼𑀩𑁆𑀩𑁄 𑀫𑀸𑀲𑀧𑀼𑀩𑁆𑀩𑁄. 𑀏𑀯𑀁 𑀫𑀸𑀢𑀼𑀲𑀤𑀺𑀲𑁄, 𑀫𑀸𑀢𑀼𑀲𑀫𑁄. 𑀏𑀓𑀽𑀦𑀯𑀻𑀲𑀢𑀺, 𑀲𑀻𑀮𑀯𑀺𑀓𑀮𑁄, 𑀅𑀲𑀺𑀓𑀮𑀳𑁄, 𑀯𑀸𑀘𑀸𑀦𑀺𑀧𑀼𑀡𑁄, 𑀬𑀸𑀯𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁, 𑀯𑀸𑀘𑀸𑀲𑀔𑀺𑀮𑁄. 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 𑀲𑀢𑁆𑀣𑀼𑀲𑀤𑀺𑀲𑁄, 𑀲𑀢𑁆𑀣𑀼𑀓𑀧𑁆𑀧𑁄, 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄 𑀧𑀼𑀜𑁆𑀜𑀢𑁆𑀣𑀺𑀓𑁄, 𑀕𑀼𑀡𑀸𑀥𑀺𑀓𑁄. 𑀤𑀥𑀺𑀦𑀸 𑀉𑀧𑀲𑀺𑀢𑁆𑀢𑀁 𑀪𑁄𑀚𑀦𑀁 𑀤𑀥𑀺𑀪𑁄𑀚𑀦𑀁, 𑀕𑀼𑀴𑁂𑀦 𑀲𑀁𑀲𑀝𑁆𑀞𑁄 𑀑𑀤𑀦𑁄 𑀕𑀼𑀴𑁄𑀤𑀦𑁄. 𑀓𑀸𑀭𑀓𑀲𑀫𑁆𑀩𑀦𑁆𑀥𑁄 𑀓𑁆𑀭𑀺𑀬𑀸𑀬 𑀓𑀢𑁄, 𑀉𑀧𑀲𑀺𑀢𑁆𑀢𑀸𑀤𑀺𑀓𑁆𑀭𑀺𑀬𑀸𑀦𑀁 𑀅𑀧𑀜𑁆𑀜𑀸𑀬𑀦𑁂𑀧𑀺 𑀯𑀼𑀢𑁆𑀢𑀺𑀬𑁂𑀯𑁄+𑀧𑀲𑀺𑀢𑁆𑀢𑀸𑀤𑀺𑀓𑁆𑀭𑀺𑀬𑀸𑀦+𑀫𑀸𑀔𑁆𑀬𑀸𑀧𑀦𑀢𑁄 𑀦𑀢𑁆𑀣𑀸+𑀬𑀼𑀢𑁆𑀢𑀢𑁆𑀣𑀢𑀸. 𑀏𑀯𑀁 𑀔𑀻𑀭𑁄𑀤𑀦𑁄. 𑀅𑀲𑁆𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀅𑀲𑁆𑀲𑀭𑀣𑁄, 𑀫𑀕𑁆𑀕𑀘𑀺𑀢𑁆𑀢𑀁, 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀢𑁄 𑀮𑀓𑁆𑀔𑀺𑀢𑁄 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄, 𑀏𑀓𑁂𑀦 𑀅𑀥𑀺𑀓𑀸 𑀤𑀲 𑀏𑀓𑀸𑀤𑀲, 𑀚𑀸𑀢𑀺𑀬𑀸 𑀅𑀦𑁆𑀥𑁄 𑀚𑀘𑁆𑀘𑀦𑁆𑀥𑁄, 𑀧𑀓𑀢𑀺𑀬𑀸 𑀫𑁂𑀥𑀸𑀯𑀻 𑀧𑀓𑀢𑀺𑀫𑁂𑀥𑀸𑀯𑀻 𑀇𑀘𑁆𑀘𑀸𑀤𑀺.

𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲𑁄 𑀢𑀤𑀢𑁆𑀣+𑀅𑀢𑁆𑀣+𑀳𑀺𑀢+𑀤𑁂𑀬𑁆𑀬𑀸𑀤𑀻𑀳𑀺. 𑀢𑀤𑀢𑁆𑀣𑁂-𑀓𑀣𑀺𑀦𑀲𑁆𑀲 𑀤𑀼𑀲𑁆𑀲𑀁 𑀓𑀣𑀺𑀦𑀤𑀼𑀲𑁆𑀲𑀁, 𑀓𑀣𑀺𑀦𑀘𑀻𑀯𑀭𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀻𑀯𑀭𑀤𑀼𑀲𑁆𑀲𑀁, 𑀘𑀻𑀯𑀭𑀫𑀽𑀮𑀁, 𑀬𑀸𑀕𑀼𑀬𑀸 𑀅𑀢𑁆𑀣𑀸𑀬 𑀢𑀡𑁆𑀟𑀼𑀮𑀸 𑀬𑀸𑀕𑀼𑀢𑀡𑁆𑀟𑀼𑀮𑀸, 𑀪𑀢𑁆𑀢𑀢𑀡𑁆𑀟𑀼𑀮𑀸, 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀏𑀯𑀁 𑀕𑀫𑀺𑀓𑀪𑀢𑁆𑀢𑀁, 𑀧𑀸𑀲𑀸𑀤𑀸𑀬 𑀤𑀩𑁆𑀩𑀁 𑀧𑀸𑀲𑀸𑀤𑀤𑀩𑁆𑀩𑀁. 𑀏𑀢𑁆𑀣 𑀘𑀸+𑀬𑀁 𑀦𑀺𑀘𑁆𑀘𑀲𑀫𑀸𑀲𑁄, 𑀢𑀲𑁆𑀲 𑀢𑀺𑀮𑀺𑀗𑁆𑀕𑀢𑀸 𑀘-𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀢𑁆𑀣𑁄 𑀯𑀺𑀳𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑁄 𑀯𑀺𑀳𑀸𑀭𑁄, 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑀸 𑀬𑀸𑀕𑀼, 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑀁 𑀘𑀻𑀯𑀭𑀁. 𑀬𑀲𑁆𑀲 𑀅𑀢𑁆𑀣𑁄 𑀬𑀤𑀢𑁆𑀣𑁄, 𑀬𑀤𑀢𑁆𑀣𑀸, 𑀬𑀤𑀢𑁆𑀣𑀁. 𑀏𑀯𑀁 𑀢𑀤𑀢𑁆𑀣𑁄, 𑀢𑀤𑀢𑁆𑀣𑀸, 𑀢𑀤𑀢𑁆𑀣𑀁. 𑀢𑀣𑀸 𑀮𑁄𑀓𑀳𑀺𑀢𑁄. 𑀩𑀼𑀤𑁆𑀥𑀲𑁆𑀲 𑀤𑁂𑀬𑁆𑀬𑀁 𑀩𑀼𑀤𑁆𑀥𑀤𑁂𑀬𑁆𑀬𑀁 𑀧𑀼𑀧𑁆𑀨𑀁. 𑀲𑀗𑁆𑀖𑀤𑁂𑀬𑁆𑀬𑀁 𑀘𑀻𑀯𑀭𑀁. 𑀇𑀥 𑀦 𑀳𑁄𑀢𑀺 ‘‘𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁’’.

𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲𑁄 𑀅𑀧𑀕𑀫𑀦+𑀪𑀬+𑀯𑀺𑀭𑀢𑀺+𑀫𑁄𑀘𑀦𑀢𑁆𑀣𑀸𑀤𑀻𑀳𑀺. 𑀫𑁂𑀣𑀼𑀦𑀲𑁆𑀫𑀸 𑀅𑀧𑁂𑀢𑁄 𑀫𑁂𑀣𑀼𑀦𑀸𑀧𑁂𑀢𑁄, 𑀏𑀯𑀁 𑀧𑀮𑀸𑀧𑀕𑀢𑁄, 𑀦𑀕𑀭𑀦𑀺𑀕𑁆𑀕𑀢𑁄, 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄, 𑀓𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀦𑀺𑀓𑁆𑀔𑀦𑁆𑀢𑀁, 𑀭𑀼𑀓𑁆𑀔𑀕𑁆𑀕𑀸 𑀧𑀢𑀺𑀢𑁄 𑀭𑀼𑀓𑁆𑀔𑀕𑁆𑀕𑀧𑀢𑀺𑀢𑁄, 𑀲𑀸𑀲𑀦𑀘𑁆𑀘𑀼𑀢𑁄, 𑀆𑀧𑀢𑁆𑀢𑀺- 𑀯𑀼𑀝𑁆𑀞𑀸𑀦𑀁, 𑀥𑀭𑀡𑀻𑀢𑀮𑀕𑁆𑀕𑀢𑁄, 𑀲𑀩𑁆𑀩𑀪𑀯𑁂𑀳𑀺 𑀦𑀺𑀲𑁆𑀲𑀝𑁄 𑀲𑀩𑁆𑀩𑀪𑀯𑀦𑀺𑀲𑁆𑀲𑀝𑁄. 𑀪𑀬𑀢𑀸𑀤𑀺𑀬𑁄𑀕𑁂-𑀭𑀸𑀚𑀢𑁄 𑀪𑀬𑀁 𑀭𑀸𑀚𑀪𑀬𑀁, 𑀘𑁄𑀭𑀪𑀬𑀁, 𑀅𑀫𑀦𑀼𑀲𑁆𑀲𑀪𑀬𑀁, 𑀅𑀕𑁆𑀕𑀺𑀪𑀬𑀁, 𑀧𑀸𑀧𑀪𑀻𑀢𑁄, 𑀧𑀸𑀧𑀪𑀻𑀭𑀼𑀓𑁄. 𑀅𑀓𑀢𑁆𑀢𑀩𑁆𑀩𑀢𑁄 𑀯𑀺𑀭𑀢𑀺 𑀅𑀓𑀢𑁆𑀢𑀩𑁆𑀩𑀯𑀺𑀭𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀩𑀦𑁆𑀥𑀦𑀫𑀼𑀢𑁆𑀢𑁄, 𑀯𑀦𑀫𑀼𑀢𑁆𑀢𑁄, 𑀩𑀦𑁆𑀥𑀦𑀫𑁄𑀓𑁆𑀔𑁄. 𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁, 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀁, 𑀑𑀫𑀓𑁄𑀫𑀓𑀁. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯, 𑀓𑀫𑁆𑀫𑀢𑁄 𑀚𑀸𑀢𑀁 𑀓𑀫𑁆𑀫𑀚𑀁, 𑀏𑀯𑀁 𑀘𑀺𑀢𑁆𑀢𑀚𑀁, 𑀉𑀢𑀼𑀚𑀁, 𑀆𑀳𑀸𑀭𑀚𑀁. 𑀇𑀥 𑀦 𑀳𑁄𑀢𑀺 ‘𑀧𑀸𑀲𑀸𑀤𑀸 𑀧𑀢𑀺𑀢𑁄’.

𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄, 𑀏𑀯𑀁 𑀭𑀸𑀚𑀧𑀼𑀭𑀺𑀲𑁄, 𑀆𑀘𑀭𑀺𑀬𑀧𑀽𑀚𑀓𑁄, 𑀩𑀼𑀤𑁆𑀥𑀲𑀸𑀯𑀓𑁄, 𑀩𑀼𑀤𑁆𑀥𑀭𑀽𑀧𑀁, 𑀚𑀺𑀦𑀯𑀘𑀦𑀁, 𑀲𑀫𑀼𑀤𑁆𑀤𑀖𑁄𑀲𑁄, 𑀥𑀜𑁆𑀜𑀸𑀦𑀁 𑀭𑀸𑀲𑀺 𑀥𑀜𑁆𑀜𑀭𑀸𑀲𑀺, 𑀧𑀼𑀧𑁆𑀨𑀕𑀦𑁆𑀥𑁄, 𑀨𑀮𑀭𑀲𑁄, 𑀓𑀸𑀬𑀲𑁆𑀲 𑀮𑀳𑀼𑀢𑀸 𑀓𑀸𑀬𑀮𑀳𑀼𑀢𑀸. 𑀫𑀭𑀡𑀲𑁆𑀲𑀢𑀺, 𑀭𑀼𑀓𑁆𑀔𑀫𑀽𑀮𑀁, 𑀅𑀬𑀲𑁆𑀲 𑀧𑀢𑁆𑀢𑁄 𑀅𑀬𑁄𑀧𑀢𑁆𑀢𑁄, 𑀏𑀢𑁆𑀣 ‘‘𑀫𑀦𑀸𑀤𑁆𑀬𑀸𑀧𑀸𑀤𑀻𑀦+𑀫𑁄 𑀫𑀬𑁂 𑀘𑁂’’𑀢𑀺 𑀑. 𑀏𑀯𑀁 𑀲𑀼𑀯𑀡𑁆𑀡𑀓𑀝𑀸𑀳𑀁, 𑀧𑀸𑀦𑀻𑀬𑀣𑀸𑀮𑀓𑀁, 𑀲𑀧𑁆𑀧𑀺𑀓𑀼𑀫𑁆𑀪𑁄, 𑀤𑁂𑀯𑀸𑀦𑀁 𑀭𑀸𑀚𑀸 𑀤𑁂𑀯𑀭𑀸𑀚𑀸. 𑀧𑀼𑀫𑀲𑁆𑀲 𑀮𑀺𑀗𑁆𑀕𑀁 𑀧𑀼𑀮𑁆𑀮𑀺𑀗𑁆𑀕𑀁, ‘‘𑀧𑀼𑀁 𑀧𑀼𑀫𑀲𑁆𑀲𑀯𑀸’’𑀢𑀺 𑀧𑀼𑀫𑀲𑁆𑀲 𑀧𑀼𑀁, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀮𑀲𑁆𑀲 𑀤𑁆𑀯𑀺𑀪𑀸𑀯𑁄 𑀘. 𑀳𑀢𑁆𑀣𑀺𑀧𑀤𑀁, 𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀚𑀫𑁆𑀩𑀼𑀲𑀸𑀔𑀸, 𑀏𑀢𑁆𑀣 𑀈𑀓𑀸𑀭𑀽𑀓𑀸𑀭𑀸𑀦𑀁 𑀭𑀲𑁆𑀲𑁄. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀦𑁆𑀢+𑀫𑀸𑀦+𑀦𑀺𑀤𑁆𑀥𑀸𑀭𑀺𑀬+𑀧𑀽𑀭𑀡+𑀪𑀸𑀯+𑀢𑀺𑀢𑁆𑀢𑀢𑁆𑀣𑁂𑀳𑀺 𑀦 𑀳𑁄𑀢𑀺. 𑀫𑀫𑀸+𑀦𑀼𑀓𑀼𑀩𑁆𑀩𑀁, 𑀫𑀫𑀸+𑀦𑀼𑀓𑀼𑀭𑀼𑀫𑀸𑀦𑁄, 𑀕𑀼𑀦𑁆𑀦𑀁 𑀓𑀡𑁆𑀳𑀸 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀲𑀺𑀲𑁆𑀲𑀸𑀦𑀁 𑀧𑀜𑁆𑀘𑀫𑁄, 𑀧𑀝𑀲𑁆𑀲 𑀲𑀼𑀢𑁆𑀢𑀢𑀸. 𑀓𑁆𑀯𑀘𑀺 𑀳𑁄𑀢𑁂𑀯 ‘𑀯𑀢𑁆𑀢𑀫𑀸𑀦𑀲𑀸𑀫𑀻𑀧𑁆𑀬𑀁’. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀓𑁆𑀓𑀸 𑀤𑀦𑁆𑀢𑀸𑀢𑀺 𑀲𑀸𑀧𑁂𑀓𑁆𑀔𑀢𑀸𑀬 𑀦 𑀳𑁄𑀢𑀺. 𑀨𑀮𑀸𑀦𑀁 𑀢𑀺𑀢𑁆𑀢𑁄, 𑀨𑀮𑀸𑀦+𑀫𑀸𑀲𑀺𑀢𑁄, 𑀨𑀮𑀸𑀦𑀁 𑀲𑀼𑀳𑀺𑀢𑁄. ‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀘𑁆𑀘𑀁 𑀕𑁂𑀳𑀁’’𑀢𑀺 𑀲𑀸𑀧𑁂𑀓𑁆𑀔𑀢𑀸𑀬 𑀦 𑀳𑁄𑀢𑀺. ‘‘𑀭𑀜𑁆𑀜𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑀲𑁆𑀲 𑀥𑀦𑀁’’𑀢𑀺 𑀥𑀦𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀦 𑀳𑁄𑀢𑀺. ‘‘𑀭𑀜𑁆𑀜𑁄 𑀕𑁄 𑀘 𑀅𑀲𑁆𑀲𑁄 𑀘 𑀧𑀼𑀭𑀺𑀲𑁄 𑀘𑀸’’𑀢𑀺 𑀪𑀺𑀦𑁆𑀦𑀢𑁆𑀣𑀢𑀸𑀬 𑀯𑀸𑀓𑁆𑀬𑀫𑁂𑀯. 𑀭𑀜𑁆𑀜𑁄 𑀕𑀯𑀲𑁆𑀲𑀧𑀼𑀭𑀺𑀲𑀸 𑀭𑀸𑀚𑀕𑀯𑀲𑁆𑀲𑀧𑀼𑀭𑀺𑀲𑀸𑀢𑀺 𑀯𑀼𑀢𑁆𑀢𑀺 𑀳𑁄𑀢𑁂𑀯, 𑀏𑀓𑀢𑁆𑀣𑀻𑀪𑀸𑀯𑀸. 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀸𑀦𑀁 𑀧𑀦 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄, 𑀕𑀫𑀓𑀢𑁆𑀢𑀫𑁆𑀧𑀺 𑀳𑀺 𑀲𑀫𑀸𑀲𑀲𑁆𑀲 𑀦𑀺𑀩𑀦𑁆𑀥𑀦𑀁, 𑀬𑀣𑀸 𑀤𑁂𑀯𑀤𑀢𑁆𑀢𑀲𑁆𑀲 𑀕𑀼𑀭𑀼𑀓𑀼𑀮𑀁, 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺𑀆𑀤𑀺.

𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁄 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀏𑀯𑀁 𑀭𑀽𑀧𑀲𑀜𑁆𑀘𑁂𑀢𑀦𑀸, 𑀲𑀁𑀲𑀸𑀭𑀤𑀼𑀓𑁆𑀔𑀁. 𑀘𑀓𑁆𑀔𑀼𑀫𑁆𑀳𑀺 𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀥𑀫𑁆𑀫𑁂 𑀭𑀢𑁄 𑀥𑀫𑁆𑀫𑀭𑀢𑁄, 𑀥𑀫𑁆𑀫𑀸𑀪𑀺𑀭𑀢𑀺, 𑀥𑀫𑁆𑀫𑀭𑀼𑀘𑀺, 𑀥𑀫𑁆𑀫𑀕𑀸𑀭𑀯𑁄, 𑀥𑀫𑁆𑀫𑁂𑀲𑀼 𑀦𑀺𑀭𑀼𑀢𑁆𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺, 𑀤𑀸𑀦𑀸𑀥𑀺𑀫𑀼𑀢𑁆𑀢𑀺, 𑀪𑀯𑀦𑁆𑀢𑀭𑀓𑀢𑀁. 𑀤𑀲𑁆𑀲𑀦𑁂 𑀅𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄. 𑀅𑀭𑀜𑁆𑀜𑁂 𑀯𑀸𑀲𑁄 𑀅𑀭𑀜𑁆𑀜𑀯𑀸𑀲𑁄, 𑀯𑀺𑀓𑀸𑀮𑀪𑁄𑀚𑀦𑀁, 𑀓𑀸𑀮𑀯𑀲𑁆𑀲𑀁, 𑀯𑀦𑀧𑀼𑀧𑁆𑀨𑀁, 𑀯𑀦𑀫𑀳𑀺𑀲𑁄, 𑀕𑀸𑀫𑀲𑀽𑀓𑀭𑁄, 𑀲𑀫𑀼𑀤𑁆𑀤𑀫𑀘𑁆𑀙𑀸, 𑀆𑀯𑀸𑀝𑀓𑀘𑁆𑀙𑀧𑁄, 𑀆𑀯𑀸𑀝𑀫𑀡𑁆𑀟𑀽𑀓𑁄, 𑀓𑀽𑀧𑀫𑀡𑁆𑀟𑀽𑀓𑁄, 𑀢𑀺𑀢𑁆𑀣𑀦𑀸𑀯𑀸. 𑀇𑀢𑁆𑀣𑀻𑀲𑀼 𑀥𑀼𑀢𑁆𑀢𑁄 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀅𑀓𑁆𑀔𑀥𑀼𑀢𑁆𑀢𑁄. 𑀙𑀸𑀬𑀸𑀬𑀁 𑀲𑀼𑀓𑁆𑀔𑁄 𑀙𑀸𑀬𑀸𑀲𑀼𑀓𑁆𑀔𑁄, 𑀅𑀗𑁆𑀕𑀸𑀭𑀧𑀓𑁆𑀓𑀁, 𑀘𑀸𑀭𑀓𑀯𑀦𑁄. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯, 𑀯𑀦𑁂 𑀘𑀭𑀢𑀻𑀢𑀺 𑀯𑀦𑀘𑀭𑀓𑁄, 𑀓𑀼𑀘𑁆𑀙𑀺𑀫𑁆𑀳𑀺 𑀲𑀬𑀦𑁆𑀢𑀻𑀢𑀺 𑀓𑀼𑀘𑁆𑀙𑀺𑀲𑀬𑀸, 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀣𑀮𑀝𑁆𑀞𑁄, 𑀚𑀮𑀝𑁆𑀞𑁄, 𑀧𑀩𑁆𑀩𑀢𑀝𑁆𑀞𑁄, 𑀫𑀕𑁆𑀕𑀝𑁆𑀞𑁄. 𑀧𑀗𑁆𑀓𑁂 𑀚𑀸𑀢𑀁 𑀧𑀗𑁆𑀓𑀚𑀁, 𑀲𑀭𑁄𑀭𑀼𑀳+𑀫𑀺𑀘𑁆𑀘𑀸𑀤𑀺. 𑀇𑀥 𑀦 𑀳𑁄𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁧𑁧. 𑀯𑀺𑀲𑁂𑀲𑀦+𑀫𑁂𑀓𑀢𑁆𑀣𑁂𑀦

𑀯𑀺𑀲𑁂𑀲𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀯𑀺𑀲𑁂𑀲𑁆𑀲𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁂𑀦𑀲𑀳𑁂+𑀓𑀢𑁆𑀣𑀁 𑀳𑁄𑀢𑀺.

𑀲𑀫𑀸𑀦𑀢𑁆𑀣𑁂 𑀧𑀤𑁂 𑀬𑀢𑁆𑀣, 𑀪𑁂𑀤𑁆𑀬𑀪𑁂𑀤𑀓𑀯𑀸𑀘𑀓𑁂;

𑀯𑀺𑀲𑁂𑀲𑀦𑀲𑀫𑀸𑀲𑁄+𑀬𑀁, 𑀯𑀺𑀲𑁂𑀲𑁆𑀲𑀢𑁆𑀣𑀧𑀥𑀸𑀦𑀢𑁄.

𑀯𑀺𑀲𑁂𑀲𑁆𑀲𑀕𑀢+𑀫𑁂𑀯+𑀢𑁆𑀭, 𑀮𑀺𑀗𑁆𑀕+𑀫𑁂𑀢𑀁 𑀧𑀭𑀁 𑀢𑀢𑁄;

𑀓𑀫𑁆𑀫𑀥𑀸𑀭𑀬+𑀫𑀺𑀘𑁆𑀘𑁂+𑀲, 𑀲𑀫𑀸𑀲𑁄+𑀜𑁆𑀜𑁂𑀳𑀺 𑀲𑀜𑁆𑀜𑀺𑀢𑁄.

𑀲𑀼𑀢𑁆𑀢𑁂 𑀯𑀺𑀲𑁂𑀲𑁆𑀲𑁂𑀦𑀸𑀢𑀺 𑀅𑀯𑀼𑀢𑁆𑀢𑁂𑀧𑀺 𑀯𑀺𑀲𑁂𑀲𑀦𑀲𑁆𑀲 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀢𑁆𑀢𑀸 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀫𑀸𑀦𑀆𑀓𑀟𑁆𑀠𑀺𑀢𑀲𑀤𑁆𑀤𑀁 𑀧𑀢𑀺 ‘‘𑀯𑀺𑀲𑁂𑀲𑁆𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀘 𑁋

𑀲𑀸𑀫𑀜𑁆𑀜𑀯𑀢𑁆𑀣𑀼 𑀬𑀸 𑀯𑀢𑁆𑀣+𑀦𑁆𑀢𑀭𑀢𑁄 𑀢𑀼 𑀯𑀺𑀲𑁂𑀲𑀺𑀬;

𑀏𑀓𑀧𑁆𑀧𑀓𑀸𑀭𑁂 𑀞𑀧𑀦𑀸, 𑀯𑀺𑀲𑁂𑀲𑀦+𑀫𑀺𑀢𑀻+𑀭𑀺𑀢𑀁.

𑀏𑀓𑀧𑁆𑀧𑀓𑀸𑀭𑀕𑀁 𑀯𑀢𑁆𑀣𑀼, 𑀯𑀺𑀲𑁂𑀲𑁆𑀲𑀦𑁆𑀢𑀺 𑀧𑀯𑀼𑀘𑁆𑀘𑀢𑀺;

𑀧𑀤𑀸𑀦𑀺 𑀬𑀸𑀦𑀺 𑀬𑀸𑀦𑁂𑀯, 𑀲𑀫𑁆𑀩𑀦𑁆𑀥+𑀫𑀼𑀧𑀬𑀦𑁆𑀢𑀺+𑀳;

𑀕𑀫𑁆𑀬𑀢𑁂 𑀓𑀸𑀫𑀘𑀸𑀭𑁂𑀦, 𑀯𑀺𑀲𑁂𑀲𑀦+𑀯𑀺𑀲𑁂𑀲𑁆𑀲𑀢𑀸𑀢𑀺.

𑀏𑀢𑁆𑀣 𑀘 𑀉𑀧𑁆𑀧𑀮𑀤𑀩𑁆𑀩𑀁 𑀭𑀢𑁆𑀢𑀼𑀧𑁆𑀧𑀮𑀸𑀤𑀺𑀢𑁄 𑀯𑀺𑀲𑁂𑀲𑀬𑀢𑀻𑀢𑀺 𑀦𑀻𑀮𑀲𑀤𑁆𑀤𑁄 𑀯𑀺𑀲𑁂𑀲𑀦𑀁. 𑀢𑁂𑀦 𑀯𑀺𑀲𑁂𑀲𑀺𑀬𑀢𑀻𑀢𑀺 𑀉𑀧𑁆𑀧𑀮𑀲𑀤𑁆𑀤𑁄 𑀯𑀺𑀲𑁂𑀲𑁆𑀲𑀁. 𑀅𑀧𑀺 𑀘 𑀪𑀫𑀭+𑀗𑁆𑀕𑀸𑀭𑀸𑀤𑀺𑀲𑀸𑀫𑀜𑁆𑀜 𑀦𑀻𑀮𑀢𑁆𑀣𑀢𑁄 𑀯𑀺𑀲𑁂𑀲𑀺𑀬𑀢𑀻𑀢𑀺 𑀦𑀻𑀮𑀁 𑀯𑀺𑀲𑁂𑀲𑁆𑀲𑀁. 𑀦 𑀯𑀢𑁆𑀣𑀸𑀤𑀻𑀦𑀁, 𑀉𑀧𑁆𑀧𑀮𑀲𑁆𑀲𑁂𑀯𑀸𑀢𑀺 𑀯𑀺𑀲𑁂𑀲𑀦𑀢𑁄 𑀉𑀧𑁆𑀧𑀮𑀁 𑀯𑀺𑀲𑁂𑀲𑀦𑀁𑀢𑀺 𑀓𑀸𑀫𑀘𑀸𑀭𑁂𑀦𑁂𑀢𑀺 𑀯𑀼𑀢𑁆𑀢𑀁. 𑀅𑀧𑀺 𑀘 𑁋

𑀧𑀭𑀺𑀢𑁄 𑀅𑀬𑀦𑁆𑀢𑁆𑀬+𑀦𑁂𑀦+𑀢𑁆𑀣𑀸, 𑀧𑀭𑀺𑀬𑀸𑀬𑁄𑀢𑀺 𑀯𑀼𑀘𑁆𑀘𑀢𑀺;

𑀕𑁄𑀯𑀸𑀘𑀸𑀢𑀺 𑀧𑀯𑀼𑀢𑁆𑀢𑁂 𑀢𑀼, 𑀯𑀸𑀘𑀢𑁆𑀣𑁄 𑀢𑀼 𑀯𑀺𑀲𑁂𑀲𑀦𑀁.

𑀯𑀺𑀲𑁂𑀲𑁆𑀲𑁂 𑀤𑀺𑀲𑁆𑀲𑀫𑀸𑀦𑀸 𑀬𑀸, 𑀮𑀺𑀗𑁆𑀕+𑀲𑀁𑀔𑁆𑀬𑀸+𑀯𑀺𑀪𑀢𑁆𑀢𑀺𑀬𑁄;

𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀪𑀺𑀬𑁆𑀬𑁄, 𑀓𑀢𑁆𑀢𑀩𑁆𑀩𑀸 𑀢𑀸 𑀯𑀺𑀲𑁂𑀲𑀦𑁂𑀢𑀺 𑁋

𑀯𑀼𑀢𑁆𑀢𑀢𑁆𑀢𑀸 𑀫𑀳𑀦𑁆𑀢𑁄+𑀘𑁆𑀘𑀸𑀤𑀻𑀲𑀼 𑀲𑀫𑀸𑀦𑀮𑀺𑀗𑁆𑀕𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀪𑀺𑀬𑁆𑀬𑁄𑀢𑀺 𑀓𑀺𑀁, 𑀤𑁂𑀯𑀸 𑀧𑀫𑀸𑀡𑀁 𑀇𑀘𑁆𑀘𑀸𑀤𑀺.

𑀲𑁄 𑀘 𑀙𑀩𑁆𑀩𑀺𑀥𑁄 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄, 𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁄, 𑀯𑀺𑀲𑁂𑀲𑀦𑁄𑀪𑀬𑀧𑀤𑁄, 𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁄, 𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄, 𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄𑀢𑀺.

𑀢𑀢𑁆𑀣 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁂 𑀢𑀸𑀯-𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀯𑀸𑀓𑁆𑀬𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀫𑀸𑀲𑁄. ‘‘𑀝 𑀦𑁆𑀢+𑀦𑁆𑀢𑀽𑀦𑀁’’𑀢𑀺 𑀦𑁆𑀢𑀲𑁆𑀲 𑀝𑀸𑀤𑁂𑀲𑁂 𑀤𑀻𑀖𑁄 𑀳𑁄𑀢𑀺, 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸𑀧𑀼𑀭𑀺𑀲𑀸 𑀇𑀘𑁆𑀘𑀸𑀤𑀺.

𑀯𑀸𑀓𑁆𑀬𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯 𑀧𑀓𑀸𑀲𑀦𑀢𑁆𑀣𑀁 𑀘+𑀢-𑀲𑀤𑁆𑀤𑀧𑀬𑁄𑀕𑁄. 𑀯𑀼𑀢𑁆𑀢𑀺𑀬𑀦𑁆𑀢𑀼 𑀲𑀫𑀸𑀲𑁂𑀦𑁂𑀯 𑀢𑀧𑁆𑀧𑀓𑀸𑀲𑀦𑀢𑁄 𑀦 𑀢𑀧𑁆𑀧𑀬𑁄𑀕𑁄. 𑀏𑀯+𑀫𑀜𑁆𑀜𑀢𑁆𑀭𑀸𑀧𑀺 𑀯𑀼𑀢𑁆𑀢𑀢𑁆𑀣𑀸𑀦+𑀫𑀧𑁆𑀧𑀬𑁄𑀕𑁄. 𑀏𑀯𑀁 𑀫𑀳𑀸𑀯𑀻𑀭𑁄, 𑀫𑀳𑀸𑀫𑀼𑀦𑀺. 𑀫𑀳𑀦𑁆𑀢𑀜𑁆𑀘 𑀢𑀁 𑀩𑀮𑀜𑁆𑀘𑀸𑀢𑀺 𑀫𑀳𑀸𑀩𑀮𑀁, 𑀫𑀳𑀩𑁆𑀪𑀬𑀁. 𑀲𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀲𑀧𑁆𑀧𑀼𑀭𑀺𑀲𑁄. 𑀢𑀣𑀸 𑀧𑀼𑀩𑁆𑀩𑀧𑀼𑀭𑀺𑀲𑁄, 𑀅𑀧𑀭𑀧𑀼𑀭𑀺𑀲𑁄, 𑀧𑀞𑀫𑀧𑀼𑀭𑀺𑀲𑁄, 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀉𑀢𑁆𑀢𑀫𑀧𑀼𑀭𑀺𑀲𑁄, 𑀧𑀭𑀧𑀼𑀭𑀺𑀲𑁄, 𑀲𑁂𑀢𑀳𑀢𑁆𑀣𑀻, 𑀓𑀡𑁆𑀳𑀲𑀧𑁆𑀧𑁄, 𑀦𑀻𑀮𑀼𑀧𑁆𑀧𑀮𑀁, 𑀭𑀢𑁆𑀢𑀼𑀧𑁆𑀧𑀮𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁. 𑀓𑁆𑀯𑀘𑀺 𑀦 𑀳𑁄𑀢𑀺, 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀻𑀧𑀼𑀢𑁆𑀢𑁄, 𑀘𑀺𑀢𑁆𑀢𑁄 𑀕𑀳𑀧𑀢𑀺. 𑀧𑀼𑀫𑀸 𑀘 𑀲𑁄 𑀓𑁄𑀓𑀺𑀮𑁄 𑀘𑀸𑀢𑀺 𑀧𑀼𑀗𑁆𑀓𑁄𑀓𑀺𑀮𑁄, 𑀉𑀢𑁆𑀢𑀭𑀧𑀤𑁂 𑀧𑀼𑀫𑀲𑁆𑀲 𑀧𑀼𑀁 𑀳𑁄𑀢𑀺. 𑀏𑀯𑀁 𑀧𑀼𑀦𑁆𑀦𑀸𑀕𑁄.

𑀔𑀢𑁆𑀢𑀺𑀬𑀸 𑀘 𑀲𑀸 𑀓𑀜𑁆𑀜𑀸 𑀘𑀸𑀢𑀺 𑀔𑀢𑁆𑀢𑀺𑀬𑀓𑀜𑁆𑀜𑀸.

𑁬𑁭. 𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺+𑀢𑁆𑀣𑀻 𑀧𑀼𑀫𑁂𑀯𑁂+𑀓𑀢𑁆𑀣𑁂𑀢𑀺

𑀪𑀸𑀲𑀺𑀢𑀧𑀼𑀫𑀸 𑀇𑀢𑁆𑀣𑀻 𑀧𑀼𑀫𑁂𑀯 𑀳𑁄𑀢𑀻𑀢𑀺 𑀧𑀼𑀫𑁆𑀪𑀸𑀯𑀸 𑀇𑀢𑁆𑀣𑀺𑀧𑀘𑁆𑀘𑀬𑀸𑀦𑀁 𑀦𑀺𑀯𑀢𑁆𑀢𑀺 𑀳𑁄𑀢𑀺. 𑀏𑀯𑀁 𑀭𑀢𑁆𑀢𑀮𑀢𑀸, 𑀤𑀼𑀢𑀺𑀬𑀪𑀺𑀓𑁆𑀔𑀸. 𑀩𑁆𑀭𑀸𑀳𑁆𑀫𑀡𑀻 𑀘 𑀲𑀸 𑀤𑀸𑀭𑀺𑀓𑀸 𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀸, 𑀦𑀸𑀕𑀫𑀸𑀡𑀯𑀺𑀓𑀸. 𑀇𑀢𑁆𑀣𑀺𑀬𑀦𑁆𑀢𑀺 𑀓𑀺𑀁, 𑀓𑀼𑀫𑀸𑀭𑀺𑀭𑀢𑀦𑀁, 𑀲𑀫𑀡𑀺𑀧𑀤𑀼𑀫𑀁. 𑀪𑀸𑀲𑀺𑀢𑀧𑀼𑀫𑀸𑀢𑀺 𑀓𑀺𑀁, 𑀕𑀗𑁆𑀕𑀸𑀦𑀤𑀻, 𑀢𑀡𑁆𑀳𑀸𑀦𑀤𑀻, 𑀧𑀣𑀯𑀻𑀥𑀸𑀢𑀼. 𑀧𑀼𑀭𑀢𑁆𑀣𑀺𑀫𑁄 𑀘 𑀲𑁄 𑀓𑀸𑀬𑁄 𑀘𑀸𑀢𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑁄. 𑀏𑀢𑁆𑀣 𑀘 𑀓𑀸𑀬𑁂𑀓𑀤𑁂𑀲𑁂 𑀓𑀸𑀬𑀲𑀤𑁆𑀤𑁄. 𑀏𑀯𑀁 𑀧𑀘𑁆𑀙𑀺𑀫𑀓𑀸𑀬𑁄, 𑀉𑀧𑀭𑀺𑀫𑀓𑀸𑀬𑁄, 𑀳𑁂𑀝𑁆𑀞𑀺𑀫𑀓𑀸𑀬𑁄, 𑀲𑀩𑁆𑀩𑀓𑀸𑀬𑁄, 𑀦𑀯𑀸𑀯𑀸𑀲𑁄, 𑀓𑀢𑀭𑀦𑀺𑀓𑀸𑀬𑁄, 𑀳𑁂𑀢𑀼𑀧𑀘𑁆𑀘𑀬𑁄. 𑀚𑀻𑀯𑀺𑀢𑀧𑁆𑀧𑀥𑀸𑀦𑀁 𑀦𑀯𑀓𑀁 𑀚𑀻𑀯𑀺𑀢𑀦𑀯𑀓+𑀫𑀺𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁂 𑀣𑁂𑀭𑀸+𑀘𑀭𑀺𑀬+𑀧𑀡𑁆𑀟𑀺𑀢𑀸 𑀯𑀺𑀲𑁂𑀲𑀦𑀁 𑀧𑀭𑀜𑁆𑀘 𑀪𑀯𑀢𑀺. 𑀬𑀣𑀸 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀲𑁄 𑀣𑁂𑀭𑁄 𑀘𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀏𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄, 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄, 𑀆𑀘𑀭𑀺𑀬𑀕𑀼𑀢𑁆𑀢𑀺𑀮𑁄 𑀯𑀸. 𑀫𑀳𑁄𑀲𑀥𑁄 𑀘 𑀲𑁄 𑀧𑀡𑁆𑀟𑀺𑀢𑁄 𑀘𑀸𑀢𑀺 𑀫𑀳𑁄𑀲𑀥𑀧𑀡𑁆𑀟𑀺𑀢𑁄, 𑀏𑀯𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑁄.

𑀯𑀺𑀲𑁂𑀲𑀦𑁄𑀪𑀬𑀧𑀤𑁂 𑀬𑀣𑀸-𑀲𑀻𑀢𑀜𑁆𑀘 𑀢𑀁 𑀉𑀡𑁆𑀳𑀜𑁆𑀘𑀸𑀢𑀺 𑀲𑀻𑀢𑀼𑀡𑁆𑀳𑀁, 𑀲𑀺𑀦𑀺𑀤𑁆𑀥𑁄 𑀘 𑀲𑁄 𑀉𑀡𑁆𑀳𑁄 𑀘𑀸𑀢𑀺 𑀲𑀺𑀦𑀺𑀤𑁆𑀥𑀼𑀡𑁆𑀳𑁄 𑀫𑀸𑀲𑁄. 𑀔𑀜𑁆𑀚𑁄 𑀘 𑀲𑁄 𑀔𑀼𑀚𑁆𑀚𑁄 𑀘𑀸𑀢𑀺 𑀔𑀜𑁆𑀚𑀔𑀼𑀚𑁆𑀚𑁄, 𑀏𑀯𑀁 𑀅𑀦𑁆𑀥𑀩𑀥𑀺𑀭𑁄, 𑀓𑀢𑀸𑀓𑀢𑀁, 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁, 𑀉𑀘𑁆𑀘𑀸𑀯𑀘𑀁, 𑀙𑀺𑀦𑁆𑀦𑀪𑀺𑀦𑁆𑀦𑀁, 𑀕𑀢𑀧𑀘𑁆𑀘𑀸𑀕𑀢𑀁. 𑀓𑁆𑀯𑀘𑀺 𑀧𑀼𑀩𑁆𑀩𑀓𑀸𑀮𑀲𑁆𑀲𑀸𑀧𑀺 𑀧𑀭𑀦𑀺𑀧𑀸𑀢𑁄, 𑀯𑀸𑀲𑀺𑀢𑁄 𑀘 𑀲𑁄 𑀮𑀺𑀢𑁆𑀢𑁄 𑀘𑀸𑀢𑀺 𑀮𑀺𑀢𑁆𑀢𑀯𑀸𑀲𑀺𑀢𑁄, 𑀏𑀯𑀁 𑀦𑀕𑁆𑀕𑀫𑀽𑀲𑀺𑀢𑁄, 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁄, 𑀪𑀝𑁆𑀞𑀮𑀼𑀜𑁆𑀚𑀺𑀢𑁄.

𑀉𑀧𑀫𑀦𑀼𑀢𑁆𑀢𑀭𑀧𑀤𑁂 𑀉𑀧𑀫𑀸𑀦𑀪𑀽𑀢𑀁 𑀯𑀺𑀲𑁂𑀲𑀦𑀁 𑀧𑀭𑀁 𑀪𑀯𑀢𑀺, 𑀬𑀣𑀸 𑀲𑀻𑀳𑁄𑀢𑀺 𑀯𑀼𑀢𑁆𑀢𑁂 𑀉𑀧𑀘𑀭𑀺𑀢𑀸+𑀦𑀼𑀧𑀘𑀭𑀺𑀢𑀲𑀻𑀳𑀸𑀦𑀁 𑀲𑀸𑀫𑀜𑁆𑀜𑀧𑁆𑀧𑀢𑀻𑀢𑀺𑀬𑀁 𑀫𑀼𑀦𑀺𑀲𑀤𑁆𑀤𑁄 𑀯𑀺𑀲𑁂𑀲𑁂𑀢𑀺. 𑀏𑀢𑁆𑀣 𑀘 𑁋

𑀉𑀧𑀫𑀸𑀦𑁄+𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄+𑀧𑀫𑀸.

𑀲𑀸 𑀘 𑀯𑀢𑁆𑀣𑀼+𑀯𑀡𑁆𑀡+𑀆𑀓𑀸𑀭𑀸𑀦𑀁 𑀲𑀸𑀫𑁆𑀬𑁂𑀦 𑀳𑁄𑀢𑀺. 𑀲𑀻𑀳𑁄𑀯 𑀲𑀻𑀳𑁄, 𑀫𑀼𑀦𑀺 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀫𑀼𑀦𑀺𑀲𑀻𑀳𑁄, 𑀫𑀼𑀦𑀺𑀯𑀲𑀪𑁄, 𑀫𑀼𑀦𑀺𑀧𑀼𑀗𑁆𑀕𑀯𑁄, 𑀩𑀼𑀤𑁆𑀥𑀦𑀸𑀕𑁄, 𑀩𑀼𑀤𑁆𑀥𑀸𑀤𑀺𑀘𑁆𑀘𑁄. 𑀭𑀁𑀲𑀻 𑀯𑀺𑀬 𑀭𑀁𑀲𑀻, 𑀲𑀤𑁆𑀥𑀫𑁆𑀫𑁄 𑀘 𑀲𑁄 𑀭𑀁𑀲𑀻 𑀘𑀸𑀢𑀺 𑀲𑀤𑁆𑀥𑀫𑁆𑀫𑀭𑀁𑀲𑀻, 𑀏𑀯𑀁 𑀯𑀺𑀦𑀬𑀲𑀸𑀕𑀭𑁄. 𑀧𑀼𑀡𑁆𑀟𑀭𑀺𑀓𑀫𑀺𑀯 𑀧𑀼𑀡𑁆𑀟𑀭𑀺𑀓𑁄, 𑀲𑀫𑀡𑁄 𑀘 𑀲𑁄 𑀧𑀼𑀡𑁆𑀟𑀭𑀺𑀓𑁄 𑀘𑀸𑀢𑀺 𑀲𑀫𑀡𑀧𑀼𑀡𑁆𑀟𑀭𑀺𑀓𑁄, 𑀲𑀫𑀡𑀧𑀤𑀼𑀫𑁄. 𑀘𑀦𑁆𑀤𑁄 𑀯𑀺𑀬 𑀘𑀦𑁆𑀤𑁄, 𑀫𑀼𑀔𑀜𑁆𑀘 𑀢𑀁 𑀘𑀦𑁆𑀤𑁄 𑀘𑀸𑀢𑀺 𑀫𑀼𑀔𑀘𑀦𑁆𑀤𑁄, 𑀫𑀼𑀔𑀧𑀤𑀼𑀫𑀁 𑀇𑀘𑁆𑀘𑀸𑀤𑀺.

𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁂 𑀬𑀣𑀸-𑀥𑀫𑁆𑀫𑁄𑀢𑀺 𑀩𑀼𑀤𑁆𑀥𑀺 𑀥𑀫𑁆𑀫𑀩𑀼𑀤𑁆𑀥𑀺, 𑀏𑀯𑀁 𑀥𑀫𑁆𑀫𑀲𑀜𑁆𑀜𑀸, 𑀥𑀫𑁆𑀫𑀲𑀗𑁆𑀔𑀸𑀢𑁄, 𑀥𑀫𑁆𑀫𑀲𑀫𑁆𑀫𑀢𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀅𑀲𑀼𑀪𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀥𑀸𑀢𑀼𑀲𑀜𑁆𑀜𑀸, 𑀅𑀢𑁆𑀢𑀲𑀜𑁆𑀜𑀸, 𑀅𑀢𑁆𑀢𑀤𑀺𑀝𑁆𑀞𑀺 𑀇𑀘𑁆𑀘𑀸𑀤𑀺.

𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁂 𑀬𑀣𑀸-𑀕𑀼𑀡𑁄 𑀏𑀯 𑀥𑀦𑀁 𑀕𑀼𑀡𑀥𑀦𑀁, 𑀏𑀯𑀁 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀧𑀜𑁆𑀜𑀸𑀭𑀢𑀦𑀁, 𑀘𑀓𑁆𑀔𑀼 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀏𑀯𑀁 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀼𑀥𑀸𑀢𑀼, 𑀘𑀓𑁆𑀔𑀼𑀤𑁆𑀯𑀸𑀭𑀁, 𑀭𑀽𑀧𑀸𑀭𑀫𑁆𑀫𑀡+𑀫𑀺𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦+𑀯𑀺𑀲𑁂𑀲𑁆𑀲𑁂𑀳𑀺, 𑀓𑁆𑀭𑀺𑀬𑀸𑀬 𑀘 𑀲𑀳𑁂+𑀭𑀺𑀢𑁄;

𑀢𑁂𑀲𑀁 𑀪𑀸𑀯𑀁 𑀯𑀺𑀯𑁂𑀘𑁂𑀢𑀸, 𑀦𑀺𑀧𑀸𑀢𑁄 𑀩𑁆𑀬𑀯𑀘𑁆𑀙𑀺𑀦𑁆𑀤𑀢𑀺.

𑀅𑀬𑁄𑀕+𑀫𑀜𑁆𑀜𑀬𑁄𑀕𑀜𑁆𑀘, 𑀅𑀘𑁆𑀘𑀦𑁆𑀢𑀸𑀬𑁄𑀕+𑀫𑁂𑀯𑀺+𑀢𑀺;

𑀯𑀺𑀯𑀓𑁆𑀔𑀸𑀢𑁄 𑀧𑀬𑀼𑀢𑁆𑀢𑁄𑀧𑀺, 𑀏𑀯𑀢𑁆𑀣𑁄 𑀜𑀸𑀬𑀢𑁂 𑀬𑀢𑁄.

𑀩𑁆𑀬𑀯𑀘𑁆𑀙𑁂𑀤𑀨𑀮𑀁 𑀯𑀸𑀓𑁆𑀬𑀁, 𑀢𑀢𑁄 𑀘𑀺𑀢𑁆𑀢𑁄 𑀥𑀦𑀼𑀤𑁆𑀥𑀭𑁄;

𑀧𑀸𑀢𑁆𑀣𑁄 𑀥𑀦𑀼𑀤𑁆𑀥𑀭𑁄 𑀦𑀻𑀮𑀼+𑀧𑁆𑀧𑀮+𑀫𑀢𑁆𑀣𑀻𑀢𑀺 𑀢𑀁 𑀬𑀣𑀸.

𑀏𑀢𑁆𑀣 𑀦𑀺𑀧𑀸𑀢𑁄𑀢𑀺 𑀏𑀯-𑀇𑀢𑀺𑀦𑀺𑀧𑀸𑀢𑁄, 𑀅𑀧𑁆𑀧𑀬𑀼𑀢𑁆𑀢𑁄𑀧𑀺 𑀏𑀯𑀲𑀤𑁆𑀤𑁄 𑀏𑀯𑀁 𑀬𑁄𑀚𑁂𑀢𑀩𑁆𑀩𑁄 𑁋 ‘‘𑀘𑀺𑀢𑁆𑀢𑁄 𑀥𑀦𑀼𑀤𑁆𑀥𑀭𑁄 𑀏𑀯𑀸’’𑀢𑀺 𑀯𑀺𑀲𑁂𑀲𑀦𑁂𑀦 𑀬𑀼𑀢𑁆𑀢𑁄 𑀅𑀬𑁄𑀕𑀯𑀺𑀯𑀘𑁆𑀙𑁂𑀤𑀓𑁄, 𑀥𑀦𑀼𑀦𑀸 𑀬𑁄𑀕𑁂 𑀧𑀢𑀺𑀝𑁆𑀞𑀸𑀧𑀦𑀢𑁄 ‘‘𑀧𑀸𑀢𑁆𑀣𑁄 𑀏𑀯 𑀥𑀦𑀼𑀤𑁆𑀥𑀭𑁄’’𑀢𑀺 𑀯𑀺𑀲𑁂𑀲𑁆𑀲𑁂𑀦 𑀬𑀼𑀢𑁆𑀢𑁄 𑀅𑀜𑁆𑀜𑀬𑁄𑀕𑀯𑀺𑀯𑀘𑁆𑀙𑁂𑀤𑀓𑁄, 𑀥𑀦𑀼𑀤𑁆𑀥𑀭𑀢𑁆𑀢𑀲𑁆𑀲 𑀧𑀸𑀢𑁆𑀣𑀲𑀁𑀔𑀸𑀢𑀅𑀚𑁆𑀚𑀼𑀦𑁂 𑀏𑀯 𑀧𑀢𑀺𑀝𑁆𑀞𑀸𑀧𑀦𑀢𑁄. ‘‘𑀦𑀻𑀮𑀼𑀧𑁆𑀧𑀮+𑀫𑀢𑁆𑀣𑁂𑀯𑀸’’𑀢𑀺 𑀓𑁆𑀭𑀺𑀬𑀸𑀬 𑀬𑀼𑀢𑁆𑀢𑁄 𑀅𑀘𑁆𑀘𑀦𑁆𑀢𑀸𑀬𑁄𑀕𑀯𑀺𑀯𑀘𑁆𑀙𑁂𑀤𑀓𑁄, 𑀦𑀻𑀮𑀼𑀧𑁆𑀧𑀮𑀲𑁆𑀲 𑀲𑀩𑁆𑀪𑀸𑀯𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑀦𑀢𑁄.

𑁨𑁧. 𑀲𑀁𑀔𑁆𑀬𑀸𑀤𑀺

𑀏𑀓𑀢𑁆𑀣𑁂 𑀲𑀫𑀸𑀳𑀸𑀭𑁂 𑀲𑀁𑀔𑁆𑀬𑀸𑀤𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀪𑀯𑀢𑀺. 𑀢𑀬𑁄 𑀮𑁄𑀓𑀸 𑀲𑀫𑀸𑀳𑀝𑀸=𑀘𑀺𑀢𑁆𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀸, 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀯𑀸𑀓𑁆𑀬𑁂 𑀯𑀺𑀲𑁂𑀲𑀦𑀲𑀫𑀸𑀲𑁂 𑀓𑀢𑁂 𑀇𑀫𑀺𑀦𑀸 𑀦𑀧𑀼𑀁𑀲𑀓𑀢𑁆𑀢𑀁 𑀪𑀯𑀢𑀺. 𑀲𑀫𑀸𑀳𑀸𑀭𑀲𑁆𑀲𑁂+𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯, 𑀢𑀺𑀮𑁄𑀓𑀁, 𑀪𑁄 𑀢𑀺𑀮𑁄𑀓, 𑀢𑀺𑀮𑁄𑀓𑀁, 𑀢𑀺𑀮𑁄𑀓𑁂𑀦 𑀇𑀘𑁆𑀘𑀸𑀤𑀺. 𑀏𑀯𑀁 𑀢𑀬𑁄 𑀤𑀡𑁆𑀟𑀸 𑀢𑀺𑀤𑀡𑁆𑀟𑀁, 𑀢𑀻𑀡𑀺 𑀫𑀮𑀸𑀦𑀺 𑀲𑀫𑀸𑀳𑀝𑀸𑀦𑀺, 𑀢𑀺𑀡𑁆𑀡𑀁 𑀫𑀮𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀢𑀺𑀫𑀮𑀁, 𑀢𑀺𑀮𑀓𑁆𑀔𑀡𑀁, 𑀘𑀢𑀼𑀲𑀘𑁆𑀘𑀁, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀁, 𑀙𑀝𑁆𑀞𑀸𑀬𑀢𑀦𑀁, 𑀲𑀢𑁆𑀢𑀸𑀳𑀁, 𑀅𑀝𑁆𑀞𑀲𑀻𑀮𑀁, 𑀦𑀯𑀮𑁄𑀓𑀼𑀢𑁆𑀢𑀭𑀁, 𑀤𑀲𑀲𑀻𑀮𑀁, 𑀲𑀢𑀬𑁄𑀚𑀦𑀁. 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀲𑀫𑀸𑀳𑀝𑀸 𑀤𑁆𑀯𑀺𑀭𑀢𑁆𑀢𑀁.

𑁧𑁨. 𑀦𑀜

𑀦𑀊𑀘𑁆𑀘𑁂𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑀁 𑀳𑁄𑀢𑀺. 𑀜𑁆𑀜𑀓𑀸𑀭𑁄 ‘‘𑀝 𑀦𑀜𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀢𑁆𑀣𑁄 ‘𑀧𑀸𑀫𑀦𑀧𑀼𑀢𑁆𑀢𑀸𑀤𑀻𑀲𑀼 𑀦𑀲𑁆𑀲 𑀝𑁄 𑀫𑀸 𑀳𑁄𑀢𑀽’𑀢𑀺. 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀸𑀳𑁆𑀫𑀡𑁄, ‘‘𑀝 𑀦𑀜𑀲𑁆𑀲𑀸’’𑀢𑀺 𑀦𑀲𑁆𑀲 𑀝𑀸𑀤𑁂𑀲𑁄. 𑀜𑁆𑀜-𑀓𑀸𑀭𑁄 𑀏𑀢𑁆𑀣𑁂𑀯 𑀯𑀺𑀲𑁂𑀲𑀦𑀢𑁆𑀣𑁄.

𑀦-𑀦𑀺𑀲𑁂𑀥𑁄 𑀲𑀢𑁄 𑀬𑀼𑀢𑁆𑀢𑁄, 𑀤𑁂𑀲𑀸𑀤𑀺𑀦𑀺𑀬𑀫𑀁 𑀯𑀺𑀦𑀸;

𑀅𑀲𑀢𑁄 𑀯𑀸+𑀨𑀮𑁄 𑀢𑀲𑁆𑀫𑀸, 𑀓𑀣+𑀫𑀩𑁆𑀭𑀸𑀳𑁆𑀫𑀡𑁄𑀢𑀺𑀘𑁂.

𑀦𑀺𑀲𑁂𑀥𑀢𑁆𑀣𑀸𑀦𑀼𑀯𑀸𑀤𑁂𑀦, 𑀧𑀝𑀺𑀲𑁂𑀥𑀯𑀺𑀥𑀺 𑀓𑁆𑀯𑀘𑀺;

𑀧𑀭𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀢𑁆𑀢𑀸+𑀔𑁆𑀬𑀸𑀧𑀦𑀸𑀬𑁄+𑀧𑀧𑀚𑁆𑀚𑀢𑁂.

𑀤𑀼𑀯𑀺𑀥𑁄 𑀘+𑀲𑁆𑀲 𑀦𑀲𑁆𑀲 𑀅𑀢𑁆𑀣𑁄 𑀧𑀲𑀚𑁆𑀚𑀧𑀝𑀺𑀲𑁂𑀥+𑀧𑀭𑀺𑀬𑀼𑀤𑀸𑀲𑀯𑀲𑁂𑀦. 𑀢𑀢𑁆𑀣 𑀬𑁄 ‘‘𑀅𑀲𑀽𑀭𑀺𑀓𑀧𑀲𑁆𑀲𑀸𑀭𑀸𑀚𑀤𑀸𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀲𑁆𑀲 𑀲𑀩𑁆𑀩𑀤𑀸 𑀅𑀪𑀸𑀯𑀁 𑀤𑀻𑀧𑁂𑀢𑀺, 𑀲𑁄 𑀧𑀲𑀚𑁆𑀚𑀧𑀝𑀺𑀲𑁂𑀥𑀯𑀸𑀘𑀻 𑀦𑀸𑀫. 𑀬𑁄 𑀧𑀦 ‘‘𑀅𑀩𑁆𑀭𑀸𑀳𑁆𑀫𑀡+𑀫𑀸𑀦𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀁 𑀧𑀭𑀺𑀬𑀼𑀤𑀸𑀲𑀺𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁𑀲𑀤𑀺𑀲𑁂 𑀯𑀢𑁆𑀣𑀼𑀫𑁆𑀳𑀺 𑀓𑀸𑀭𑀺𑀬𑀁 𑀧𑀝𑀺𑀧𑀸𑀤𑀬𑀢𑀺, 𑀲𑁄 𑀧𑀭𑀺𑀬𑀼𑀤𑀸𑀲𑀯𑀸𑀘𑀻 𑀦𑀸𑀫. 𑀯𑀼𑀢𑁆𑀢𑀜𑁆𑀘 𑁋

𑀧𑀲𑀚𑁆𑀚𑀧𑀝𑀺𑀲𑁂𑀥𑀲𑁆𑀲, 𑀮𑀓𑁆𑀔𑀡𑀁 𑀯𑀢𑁆𑀣𑀼𑀦𑀢𑁆𑀣𑀺𑀢𑀸;

𑀯𑀢𑁆𑀣𑀼𑀢𑁄+𑀜𑁆𑀜𑀢𑁆𑀭 𑀬𑀸 𑀯𑀼𑀢𑁆𑀢𑀺, 𑀧𑀭𑀺𑀬𑀼𑀤𑀸𑀲𑀮𑀓𑁆𑀔𑀡𑀁.

𑀬𑀢𑁆𑀭 𑀅𑀩𑁆𑀭𑀸𑀳𑁆𑀫𑀡𑀸𑀤𑀻𑀲𑀼, 𑀯𑀢𑁆𑀣𑀼𑀁 𑀧𑀭𑀺𑀬𑀼𑀤𑀲𑁆𑀲𑀢𑀺;

𑀢𑀓𑁆𑀭𑀺𑀬𑀸𑀬𑀼𑀢𑁆𑀢𑀭𑀸𑀚𑀸𑀤𑀺𑀁, 𑀯𑀤𑁂 𑀲𑁄 𑀧𑀭𑀺𑀬𑀼𑀤𑀸𑀲𑀓𑁄.

𑀧𑀲𑀚𑁆𑀚𑀧𑀝𑀺𑀲𑁂𑀥𑁄 𑀢𑀼, 𑀯𑀢𑁆𑀣𑀦𑁆𑀢𑀭+𑀫𑀦𑀸𑀤𑀺𑀬;

𑀓𑀺𑀜𑁆𑀘𑀺𑀯𑀢𑁆𑀣𑀼𑀦𑀺𑀲𑁂𑀥𑀲𑁆𑀲, 𑀧𑀲𑀗𑁆𑀕𑁄 𑀦 𑀪𑀯𑁂𑀬𑁆𑀬 𑀲𑁄.

𑀢𑀤𑀜𑁆𑀜𑁄 𑀘 𑀢𑀁𑀯𑀺𑀭𑀼𑀤𑁆𑀥𑁄,

𑀢𑀤𑀪𑀸𑀯𑁄 𑀘 𑀦𑀜𑁆𑀜𑀢𑁆𑀣𑁄.

𑀢𑀤𑀜𑁆𑀜𑀢𑁆𑀣𑁂 𑁋 𑀅𑀩𑁆𑀭𑀸𑀳𑁆𑀫𑀡𑁄, 𑀩𑁆𑀭𑀸𑀳𑁆𑀫𑀡𑀢𑁄 𑀅𑀜𑁆𑀜𑁄 𑀢𑀁𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑁄, 𑀅𑀲𑁆𑀲𑀫𑀡𑁄, 𑀦 𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀢𑀩𑁆𑀩𑀺𑀭𑀼𑀤𑁆𑀥𑀢𑁆𑀣𑁂-𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀮𑁄𑀪𑁄, 𑀅𑀫𑀺𑀢𑁆𑀢𑁄, 𑀅𑀬𑀁 𑀧𑀭𑀺𑀬𑀼𑀤𑀸𑀲𑀦𑀬𑁄. 𑀢𑀤𑀪𑀸𑀯𑁂-𑀦 𑀓𑀢𑁆𑀯𑀸 𑀅𑀓𑀢𑁆𑀯𑀸, 𑀅𑀓𑀸𑀢𑀼𑀦 𑀧𑀼𑀜𑁆𑀜𑀁, 𑀅𑀓𑀭𑁄𑀦𑁆𑀢𑁄, 𑀅𑀪𑀸𑀯𑁄 𑀪𑀯𑀢𑀺. 𑀅𑀬𑀁 𑀧𑀲𑀚𑁆𑀚𑀧𑀝𑀺𑀲𑁂𑀥𑀦𑀬𑁄.

𑀏𑀢𑁆𑀣 𑀘 𑀉𑀪𑁄𑀲𑀼 𑀧𑀭𑀺𑀬𑀼𑀤𑀸𑀲𑁂 𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑁄 𑀔𑀢𑁆𑀢𑀺𑀬𑀸𑀤𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄𑀯 𑀅𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀢𑁆𑀢𑁂 𑀧𑀢𑀻𑀬𑀢𑁂. 𑀇𑀢𑀭𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀓𑁂𑀦𑀘𑀺 𑀲𑀁𑀲𑀬𑀦𑀺𑀫𑀺𑀢𑁆𑀢𑁂𑀦 𑀔𑀢𑁆𑀢𑀺𑀬𑀸𑀤𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀢𑁆𑀢𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀦𑀺𑀯𑀼𑀢𑁆𑀢𑀺 𑀓𑀭𑀻𑀬𑀢𑀺 ‘‘𑀩𑁆𑀭𑀸𑀳𑁆𑀫𑀡𑁄+𑀬𑀁 𑀦 𑀪𑀯𑀢𑀺 𑀅𑀩𑁆𑀭𑀸𑀳𑁆𑀫𑀡𑁄’’𑀢𑀺, 𑀩𑁆𑀭𑀸𑀳𑁆𑀫𑀡𑀢𑁆𑀢𑀚𑁆𑀛𑀸𑀲𑀺𑀢𑁄 𑀦 𑀪𑀯𑀢𑀻𑀢𑁆𑀬𑀢𑁆𑀣𑁄. 𑀢𑀢𑁆𑀣 𑀲𑀤𑀺𑀲𑀢𑁆𑀢𑀁 𑀯𑀺𑀦𑀸 𑀫𑀺𑀘𑁆𑀙𑀸𑀜𑀸𑀡𑀸𑀲𑀫𑁆𑀪𑀯𑀸 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀘 𑀲𑀤𑀺𑀲𑀧𑀝𑀺𑀧𑀢𑁆𑀢𑀺, 𑀢𑀕𑁆𑀕𑀢𑀸 𑀘 𑀮𑀺𑀗𑁆𑀕+𑀲𑀗𑁆𑀔𑁆𑀬𑀸 𑀪𑀯𑀦𑁆𑀢𑀺. 𑀅𑀢𑁄𑀬𑁂𑀯 𑀉𑀘𑁆𑀘𑀢𑁂 ‘‘𑀦𑀜𑁆𑀜𑀺𑀯𑀬𑀼𑀢𑁆𑀢+𑀫𑀜𑁆𑀜𑀲𑀤𑀺𑀲𑀸𑀥𑀺𑀓𑀭𑀡𑁂, 𑀓𑀣𑀸 𑀳𑀺 𑀅𑀢𑁆𑀣𑀲𑀫𑁆𑀧𑀘𑁆𑀘𑀬𑁄’’𑀢𑀺.

𑁭𑁫. 𑀅𑀦 𑀲𑀭𑁂𑀢𑀺

𑀦𑀜𑀲𑀤𑁆𑀤𑀲𑁆𑀲 𑀲𑀭𑁂 𑀅𑀦, 𑀦 𑀅𑀲𑁆𑀲𑁄 𑀅𑀦𑀲𑁆𑀲𑁄, 𑀦 𑀅𑀭𑀺𑀬𑁄 𑀅𑀦𑀭𑀺𑀬𑁄. 𑀏𑀯𑀁 𑀅𑀦𑀺𑀲𑁆𑀲𑀭𑁄, 𑀅𑀦𑀺𑀝𑁆𑀞𑁄, 𑀅𑀦𑀸𑀲𑀯𑁄. 𑀦 𑀆𑀤𑀸𑀬 𑀅𑀦𑀸𑀤𑀸𑀬, 𑀅𑀦𑁄𑀮𑁄𑀓𑁂𑀢𑁆𑀯𑀸 𑀇𑀘𑁆𑀙𑀸𑀤𑀺. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀅𑀬𑀼𑀢𑁆𑀢𑀢𑁆𑀣𑁂𑀳𑀺 𑀓𑁂𑀳𑀺𑀘𑀺 𑀳𑁄𑀢𑀺. 𑀧𑀼𑀦 𑀦 𑀕𑀻𑀬𑀦𑁆𑀢𑀻𑀢𑀺 𑀅𑀧𑀼𑀦𑀕𑁂𑀬𑁆𑀬𑀸 𑀕𑀸𑀣𑀸, 𑀅𑀦𑁄𑀓𑀸𑀲𑀁 𑀓𑀸𑀭𑁂𑀢𑁆𑀯𑀸, 𑀅𑀫𑀽𑀮𑀸𑀫𑀽𑀮𑀁 𑀕𑀦𑁆𑀢𑁆𑀯𑀸, 𑀅𑀘𑀦𑁆𑀤𑀫𑀼𑀮𑁆𑀮𑁄𑀓𑀺𑀓𑀸𑀦𑀺 𑀫𑀼𑀔𑀸𑀦𑀺, 𑀅𑀲𑀤𑁆𑀥𑀪𑁄𑀚𑀻, 𑀅𑀮𑀯𑀡𑀪𑁄𑀚𑀻.

𑁧𑁩. 𑀓𑀼𑀧𑀸𑀤𑀬𑁄 𑀦𑀺𑀘𑁆𑀘+𑀫𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀺

𑀓𑀼𑀲𑀤𑁆𑀤𑁄 𑀧𑀸𑀤𑀬𑁄 𑀘 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂+𑀓𑀢𑁆𑀣𑀸 𑀳𑁄𑀦𑁆𑀢𑀺 𑀦𑀺𑀘𑁆𑀘𑀁 𑀲𑁆𑀬𑀸𑀤𑀺𑀯𑀺𑀥𑀺𑀯𑀺𑀲𑀬𑀢𑁄+𑀜𑁆𑀜𑀢𑁆𑀣. 𑀏𑀢𑁆𑀣 𑀅𑀩𑁆𑀬𑀪𑀺𑀘𑀸𑀭𑀺𑀧𑀸𑀤𑀺𑀲𑀳𑀘𑀭𑀡𑀢𑁆𑀣𑁂𑀦 𑀓𑀼𑀇𑀢𑀺 𑀦𑀺𑀧𑀸𑀢𑁄𑀯, 𑀦 𑀧𑀣𑀯𑀻𑀯𑀸𑀘𑀓𑁄 𑀓𑀼𑀲𑀤𑁆𑀤𑁄. 𑀲𑁆𑀬𑀸𑀤𑀺𑀯𑀺𑀥𑀺𑀯𑀺𑀲𑀬𑁄 𑀦𑀸𑀫 ‘‘𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀸’’ 𑀤𑀺𑀦𑀸 𑀧𑀢𑀺𑀆𑀤𑀻𑀦𑀁 𑀯𑀺𑀲𑀬𑁂 𑀓𑀢𑀤𑀼𑀢𑀺𑀬𑀸, 𑀢𑀜𑁆𑀘 𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀅𑀲𑀁𑀔𑁆𑀬𑀲𑀫𑀸𑀲+𑀫𑀺𑀯 𑀫𑀸 𑀳𑁄𑀢𑀽𑀢𑀺 ‘‘𑀅𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀻’’𑀢𑀺 𑀦𑀺𑀲𑁂𑀥𑁄. 𑀓𑀼𑀘𑁆𑀙𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀓𑀼𑀩𑁆𑀭𑀸𑀳𑁆𑀫𑀡𑁄, 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸 𑀅𑀲𑀧𑀤𑁂𑀦 𑀯𑀺𑀕𑁆𑀕𑀳𑁄.

𑁧𑁦𑁭. 𑀲𑀭𑁂 𑀓𑀤 𑀓𑀼𑀲𑁆𑀲𑀼+𑀢𑁆𑀢𑀭𑀢𑁆𑀣𑁂

𑀓𑀼𑀲𑁆𑀲𑀼+𑀢𑁆𑀢𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀭𑀸𑀤𑁄 𑀉𑀢𑁆𑀢𑀭𑀧𑀤𑁂 𑀓𑀤𑀸𑀤𑁂𑀲𑁄 𑀳𑁄𑀢𑀺. 𑀈𑀲𑀓𑀁 𑀉𑀡𑁆𑀳𑀁 𑀓𑀤𑀼𑀡𑁆𑀳𑀁, 𑀓𑀼𑀘𑁆𑀙𑀺𑀢𑀁 𑀅𑀦𑁆𑀦𑀁 𑀓𑀤𑀦𑁆𑀦𑀁, 𑀓𑀤𑀲𑀦𑀁. 𑀲𑀭𑁂𑀢𑀺 𑀓𑀺𑀁, 𑀓𑀼𑀧𑀼𑀢𑁆𑀢𑀸, 𑀓𑀼𑀤𑀸𑀭𑀸, 𑀓𑀼𑀤𑀸𑀲𑀸, 𑀓𑀼𑀤𑀺𑀝𑁆𑀞𑀺.

𑁧𑁦𑁮. 𑀓𑀸+𑀧𑁆𑀧𑀢𑁆𑀣𑁂

𑀅𑀧𑁆𑀧𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲 𑀓𑀼𑀲𑁆𑀲 𑀓𑀸 𑀳𑁄𑀢𑀼+𑀢𑁆𑀢𑀭𑀧𑀤𑁂. 𑀅𑀧𑁆𑀧𑀓𑀁 𑀮𑀯𑀡𑀁 𑀓𑀸𑀮𑀯𑀡𑀁. 𑀏𑀯𑀁 𑀓𑀸𑀧𑀼𑀧𑁆𑀨𑀁.

𑁧𑁦𑁯. 𑀧𑀼𑀭𑀺𑀲𑁂 𑀯𑀸𑀢𑀺

𑀓𑀼𑀲𑁆𑀲 𑀓𑀸 𑀯𑀸. 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄 𑀓𑀸𑀧𑀼𑀭𑀺𑀲𑁄, 𑀓𑀼𑀧𑀼𑀭𑀺𑀲𑁄 𑀯𑀸. 𑀧𑀓𑀝𑁆𑀞𑁄 𑀦𑀸𑀬𑀓𑁄 𑀧𑀦𑀸𑀬𑀓𑁄, 𑀧𑀥𑀸𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁 𑀪𑀼𑀲𑀁 𑀯𑀤𑁆𑀥𑀁 𑀧𑀯𑀤𑁆𑀥𑀁 𑀲𑀭𑀻𑀭𑀁, 𑀲𑀫𑀁 𑀲𑀫𑁆𑀫𑀸 𑀯𑀸 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁, 𑀯𑀺𑀯𑀺𑀥𑀸 𑀫𑀢𑀺 𑀯𑀺𑀫𑀢𑀺, 𑀯𑀺𑀯𑀺𑀥𑁄 𑀯𑀺𑀲𑀺𑀝𑁆𑀞𑁄 𑀯𑀸 𑀓𑀧𑁆𑀧𑁄 𑀯𑀺𑀓𑀧𑁆𑀧𑁄, 𑀅𑀥𑀺𑀓𑁄 𑀤𑁂𑀯𑁄 𑀅𑀢𑀺𑀤𑁂𑀯𑁄, 𑀏𑀯𑀁 𑀅𑀥𑀺𑀤𑁂𑀯𑁄, 𑀅𑀥𑀺𑀲𑀻𑀮𑀁. 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀲𑀼𑀕𑀦𑁆𑀥𑁄, 𑀓𑀘𑁆𑀙𑀺𑀢𑁄 𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀲𑀼𑀝𑁆𑀞𑀼 𑀓𑀢𑀁 𑀲𑀼𑀓𑀢𑀁, 𑀤𑀼𑀝𑁆𑀞𑀼 𑀓𑀢𑀁 𑀤𑀼𑀓𑁆𑀓𑀢𑀁 𑀅𑀪𑀺 𑀲𑀺𑀜𑁆𑀘𑀦𑀁 𑀅𑀪𑀺𑀲𑁂𑀓𑁄𑀢𑀺 𑀲𑀦𑀦𑁆𑀢𑁄, 𑀅𑀢𑀺𑀲𑀬𑁂𑀦 𑀓𑀢𑁆𑀯𑀸, 𑀓𑀢𑀁 𑀧𑀓𑀭𑀺𑀢𑁆𑀯𑀸, 𑀧𑀓𑀢𑀁, 𑀅𑀢𑀺𑀲𑀬𑁂𑀦 𑀣𑀼𑀢𑀁 𑀅𑀢𑀺𑀢𑁆𑀣𑀼𑀢𑀁, 𑀅𑀢𑀺𑀓𑁆𑀓𑀫𑁆𑀫 𑀣𑀼𑀢𑀁 𑀅𑀢𑀺𑀢𑁆𑀣𑀼𑀢𑀁, 𑀈𑀲𑀁 𑀓𑀴𑀸𑀭𑁄 𑀆𑀓𑀴𑀸𑀭𑁄, 𑀲𑀼𑀝𑁆𑀞𑀼 𑀩𑀤𑁆𑀥𑁄 𑀆𑀩𑀤𑁆𑀥𑁄.

𑀧𑀸𑀤𑀬𑁄 𑀕𑀢𑀸𑀤𑁆𑀬𑀢𑁆𑀣𑁂 𑀧𑀞𑀫𑀸𑀬

𑀧𑀕𑀢𑁄 𑀆𑀘𑀭𑀺𑀬𑁄 𑀧𑀸𑀘𑀭𑀺𑀬𑁄, 𑀏𑀯𑀁 𑀧𑀦𑁆𑀢𑁂𑀯𑀸𑀲𑀻.

𑀅𑀘𑁆𑀘𑀸𑀤𑀬𑁄 𑀓𑀦𑁆𑀢𑀸𑀤𑁆𑀬𑀢𑁆𑀣𑁂 𑀤𑀼𑀢𑀺𑀬𑀸𑀬

𑀅𑀢𑀺𑀓𑁆𑀓𑀦𑁆𑀢𑁄 𑀫𑀜𑁆𑀘𑀁 𑀅𑀢𑀺𑀫𑀜𑁆𑀘𑁄. 𑀅𑀢𑀺𑀫𑀸𑀮𑁄, ‘‘𑀖𑀧𑀲𑁆𑀲+𑀦𑁆𑀢𑀲𑁆𑀲𑀸+𑀧𑁆𑀧𑀥𑀸𑀦𑀲𑁆𑀲𑀸’’𑀢𑀺 𑀫𑀸𑀮𑀸𑀲𑀤𑁆𑀤𑁂 𑀖𑀲𑁆𑀲 𑀭𑀲𑁆𑀲𑁄. 𑀏𑀯+𑀫𑀼𑀧𑀭𑀺𑀧𑀺 𑀖𑀧𑀸𑀦𑀁 𑀭𑀲𑁆𑀲𑁄.

𑀅𑀯𑀸𑀤𑀬𑁄 𑀓𑀼𑀝𑁆𑀞𑀸𑀤𑁆𑀬𑀢𑁆𑀣𑁂 𑀢𑀢𑀺𑀬𑀸𑀬

𑀅𑀯𑀓𑀼𑀝𑁆𑀞𑀁 𑀓𑁄𑀓𑀺𑀮𑀸𑀬 𑀯𑀦𑀁 𑀅𑀯𑀓𑁄𑀓𑀺𑀮𑀁, 𑀅𑀯𑀫𑀬𑀽𑀭𑀁. 𑀅𑀯𑀓𑀼𑀝𑁆𑀞𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀁.

𑀧𑀭𑀺𑀬𑀸𑀤𑀬𑁄 𑀕𑀺𑀮𑀸𑀦𑀸𑀤𑁆𑀬𑀢𑁆𑀣𑁂 𑀘𑀢𑀼𑀢𑁆𑀣𑀺𑀬𑀸

𑀧𑀭𑀺𑀕𑀺𑀮𑀸𑀦𑁄+𑀚𑁆𑀛𑁂𑀦𑀸𑀬 𑀧𑀭𑀺𑀬𑀚𑁆𑀛𑁂𑀦𑁄.

𑀦𑁆𑀬𑀸𑀤𑀬𑁄 𑀓𑀦𑁆𑀢𑀸𑀤𑁆𑀬𑀢𑁆𑀣𑁂 𑀧𑀜𑁆𑀘𑀫𑀺𑀬𑀸

𑀦𑀺𑀓𑁆𑀔𑀦𑁆𑀢𑁄 𑀓𑁄𑀲𑀫𑁆𑀩𑀺𑀬𑀸 𑀦𑀺𑀓𑁆𑀓𑁄𑀲𑀫𑁆𑀩𑀺. 𑀅𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀻𑀢𑀺 𑀓𑀺𑀁, 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂.

𑁧𑁪. 𑀘𑀻 𑀓𑁆𑀭𑀺𑀬𑀢𑁆𑀣𑁂𑀳𑀺

𑀘𑀻𑀧𑀘𑁆𑀘𑀬𑀦𑁆𑀢𑁄 𑀓𑁆𑀭𑀺𑀬𑀢𑁆𑀣𑁂𑀳𑀺 𑀲𑁆𑀬𑀸𑀤𑁆𑀬𑀦𑁆𑀢𑁂𑀳𑀺 𑀲𑀳𑁂+𑀓𑀢𑁆𑀣𑁄 𑀳𑁄𑀢𑀺. 𑀅𑀫𑀮𑀻𑀦𑀁 𑀫𑀮𑀻𑀦𑀁 𑀓𑀭𑀺𑀢𑁆𑀯𑀸𑀢𑀺 𑀯𑀺𑀕𑁆𑀕𑀬𑁆𑀳 ‘‘𑀅𑀪𑀽𑀢𑀢𑀩𑁆𑀪𑀸𑀯𑁂 𑀓𑀭𑀸+𑀲+𑀪𑀽𑀬𑁄𑀕𑁂 𑀯𑀺𑀓𑀸𑀭𑀸𑀘𑀻’’𑀢𑀺 𑀘𑀻𑀧𑀘𑁆𑀘𑀬𑁂𑀓𑀢𑁂 𑀇𑀫𑀺𑀦𑀸 𑀲𑀫𑀸𑀲𑁄. 𑀏𑀢𑁆𑀣 𑀘-𑀓𑀸𑀭𑁄 ‘‘𑀘𑀻 𑀓𑁆𑀭𑀺𑀬𑀢𑁆𑀣𑁂𑀳𑀻’’𑀢𑀺 𑀯𑀺𑀲𑁂𑀲𑀦𑀢𑁆𑀣𑁄. ‘‘𑀧𑁆𑀬𑁄 𑀯𑀸 𑀢𑁆𑀯𑀸𑀲𑁆𑀲 𑀲𑀫𑀸𑀲𑁂’’𑀢𑀺 𑀧𑁆𑀬 𑀳𑁄𑀢𑀺, 𑀧-𑀓𑀸𑀭𑁄 ‘‘𑀧𑁆𑀬𑁂 𑀲𑀺𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀢𑁆𑀣𑁄. 𑀫𑀮𑀺𑀦𑀻𑀓𑀭𑀺𑀬.

𑁧𑁫. 𑀪𑀽𑀲𑀦𑀸+𑀤𑀭𑀸+𑀦𑀸𑀤𑀭𑁂𑀲𑁆𑀯+𑀮𑀁+𑀲𑀸+𑀲𑀸𑀢𑀺

𑀪𑀽𑀲𑀦𑀸𑀤𑀻𑀲𑁆𑀯+𑀢𑁆𑀣𑁂𑀲𑁆𑀯+𑀮+𑀫𑀸𑀤𑀬𑁄 𑀲𑀤𑁆𑀤𑀸 𑀏𑀓𑀢𑁆𑀣𑀸 𑀳𑁄𑀦𑁆𑀢𑀺. 𑀅𑀮𑀁 𑀓𑀭𑀺𑀢𑁆𑀯𑀸 𑀲𑀓𑁆𑀓𑀭𑀺𑀢𑁆𑀯𑀸 𑀅𑀲𑀓𑁆𑀓𑀭𑀺𑀢𑁆𑀯𑀸𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑁂 𑀓𑀢𑁂 𑀧𑁆𑀬𑁂 𑀘 ‘‘𑀲𑀸 𑀲𑀸𑀥𑀺𑀓𑀭𑀸 𑀘 𑀘𑀭𑀺𑀘𑁆𑀘𑀸’’𑀢𑀺 𑀘𑀸𑀤𑁂𑀲𑁄 𑀧𑀭𑀭𑀽𑀧𑀜𑁆𑀘. 𑀅𑀮𑀁𑀓𑀭𑀺𑀬, 𑀲𑀓𑁆𑀓𑀘𑁆𑀘, 𑀅𑀲𑀓𑁆𑀓𑀘𑁆𑀘.

𑁧𑁬. 𑀅𑀜𑁆𑀜𑁂𑀘𑀸+𑀢𑀺 𑀲𑀼𑀢𑁆𑀢𑁂𑀦 𑀲𑀫𑀸𑀲𑁂 𑀓𑀢𑁂… 𑀏𑀢𑁆𑀣 𑀬𑀣𑀸 𑀤𑁆𑀯𑀸𑀭𑀁 𑀯𑀺𑀯𑀭𑀸𑀢𑀺 𑀯𑀼𑀢𑁆𑀢𑁂 𑀧𑀓𑀭𑀡𑀢𑁄 𑀅𑀕𑁆𑀕𑀮+𑀫𑀺𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯+𑀫𑀺𑀥𑀸𑀧𑀺 𑀦𑀺𑀧𑀸𑀢𑀧𑀪𑀸𑀯𑁂 𑀅𑀜𑁆𑀜𑁂 𑀘𑀸𑀢𑀺 𑀲𑀸𑀫𑀜𑁆𑀜𑀁 𑀘𑁂+𑀢𑀺 𑀆𑀕𑀫𑀸𑀦𑀼𑀲𑀸𑀭𑁂𑀦 𑀮𑀩𑁆𑀪𑀫𑀸𑀦𑀯𑀺𑀪𑀢𑁆𑀬𑀦𑁆𑀢𑀧𑀝𑀺𑀭𑀽𑀧𑀦𑀺𑀧𑀸𑀢𑀸𑀯 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀅𑀕𑁆𑀕𑀢𑁄 𑀪𑀯𑀺𑀢𑁆𑀯𑀸 𑀧𑀼𑀭𑁄𑀪𑀼𑀬𑁆𑀬, 𑀅𑀦𑁆𑀢𑀭𑀳𑀺𑀢𑁄 𑀳𑀼𑀢𑁆𑀯𑀸 𑀢𑀺𑀭𑁄𑀪𑀽𑀬, 𑀅𑀦𑁆𑀢𑀭𑀥𑀸𑀦𑀁 𑀓𑀢𑁆𑀯𑀸 𑀢𑀺𑀭𑁄𑀓𑀭𑀺𑀬, 𑀉𑀭𑀲𑀺 𑀓𑀢𑁆𑀯𑀸 𑀉𑀭𑀲𑀺𑀓𑀭𑀺𑀬, 𑀫𑀦𑀲𑀺 𑀓𑀢𑁆𑀯𑀸 𑀫𑀦𑀲𑀺𑀓𑀭𑀺𑀬, 𑀫𑀚𑁆𑀛𑁂 𑀓𑀢𑁆𑀯𑀸 𑀫𑀚𑁆𑀛𑁂𑀓𑀭𑀺𑀬, 𑀢𑀼𑀡𑁆𑀳𑀻 𑀪𑀯𑀺𑀢𑁆𑀯𑀸 𑀢𑀼𑀡𑁆𑀳𑀻 𑀪𑀽𑀬.

𑁧𑁭. 𑀯𑀸+𑀦𑁂𑀓+𑀜𑁆𑀜𑀢𑁆𑀣𑁂

𑀅𑀦𑁂𑀓𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀅𑀜𑁆𑀜𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁂 𑀏𑀓𑀢𑁆𑀣𑀁 𑀯𑀸 𑀳𑁄𑀢𑀺.

𑀧𑀤𑀦𑁆𑀢𑀭𑀲𑁆𑀲 𑀬𑀲𑁆𑀲+𑀢𑁆𑀣𑁄, 𑀧𑀥𑀸𑀦𑀁 𑀮𑀺𑀗𑁆𑀕+𑀫𑀲𑁆𑀲 𑀘;

𑀲𑀫𑀸𑀲𑁄 𑀲𑁄+𑀬+𑀫𑀜𑁆𑀜𑀢𑁆𑀣𑁄, 𑀩𑀳𑀼𑀩𑁆𑀩𑀻𑀳𑀺𑀧𑀭𑀯𑁆𑀳𑀬𑁄.

𑀲𑁄 𑀘 𑀦𑀯𑀯𑀺𑀥𑁄 𑀤𑁆𑀯𑀺𑀧𑀤𑁄, 𑀪𑀺𑀦𑁆𑀦𑀸𑀥𑀺𑀓𑀭𑀡𑁄, 𑀢𑀺𑀧𑀤𑁄, 𑀦-𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄, 𑀲𑀳𑀧𑀼𑀩𑁆𑀩𑀧𑀤𑁄, 𑀉𑀧𑀫𑀸𑀦𑀧𑀼𑀩𑁆𑀩𑀧𑀤𑁄, 𑀲𑀗𑁆𑀔𑁆𑀬𑁄𑀪𑀬𑀧𑀤𑁄, 𑀤𑀺𑀲𑀦𑁆𑀢𑀭𑀸𑀮𑀢𑁆𑀣𑁄, 𑀩𑁆𑀬𑀢𑀺𑀳𑀸𑀭𑀮𑀓𑁆𑀔𑀡𑁄 𑀘𑀸𑀢𑀺.

𑁧. 𑀢𑀢𑁆𑀣 𑀤𑁆𑀯𑀺𑀧𑀤𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑁄 𑀓𑀫𑁆𑀫𑀸𑀤𑀻𑀲𑀼 𑀙𑀲𑀼 𑀯𑀺𑀪𑀢𑁆𑀬𑀢𑁆𑀣𑁂𑀲𑀼 𑀪𑀯𑀢𑀺.

(𑀓) 𑀢𑀢𑁆𑀣 𑀤𑀼𑀢𑀺𑀬𑀢𑁆𑀣𑁂 𑀢𑀸𑀯-𑀆𑀕𑀢𑀸 𑀲𑀫𑀡𑀸 𑀇𑀫𑀁 𑀲𑀗𑁆𑀖𑀸𑀭𑀸𑀫𑀦𑁆𑀢𑀺 𑀆𑀕𑀢𑀲𑀫𑀡𑁄 𑀲𑀗𑁆𑀖𑀸𑀭𑀸𑀫𑁄. 𑀲𑁄 𑀘 𑀤𑀼𑀯𑀺𑀥𑁄 𑀢𑀕𑁆𑀕𑀼𑀡𑀸+𑀢𑀕𑁆𑀕𑀼𑀡𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑀺 𑁋

𑀢𑀕𑁆𑀕𑀼𑀡𑁄+𑀢𑀕𑁆𑀕𑀼𑀡𑁄 𑀘𑁂+𑀢𑀺,

𑀲𑁄 𑀲𑀫𑀸𑀲𑁄 𑀤𑁆𑀯𑀺𑀥𑀸 𑀫𑀢𑁄.

𑀢𑀁 𑀬𑀣𑀸 ‘𑀦𑀻𑀬𑀢𑀁 𑀮𑀫𑁆𑀩-

𑀓𑀡𑁆𑀡𑁄+’ ‘𑀬𑀁 𑀤𑀺𑀝𑁆𑀞𑀲𑀸𑀕𑀭𑁄’.

𑀢𑁂𑀲𑀼 𑀬𑀢𑁆𑀣 𑀯𑀺𑀲𑁂𑀲𑀦𑀪𑀽𑀢𑁄 𑀅𑀢𑁆𑀣𑁄 𑀅𑀜𑁆𑀜𑀧𑀤𑀢𑁆𑀣𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀺, 𑀲𑁄 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 ‘𑀮𑀫𑁆𑀩𑀓𑀡𑁆𑀡+𑀫𑀸𑀦𑀬𑀸’𑀢𑀺. 𑀬𑀢𑁆𑀣 𑀧𑀦 𑀦 𑀕𑀬𑁆𑀳𑀢𑀺, 𑀲𑁄 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 ‘𑀩𑀳𑀼𑀥𑀦+𑀫𑀸𑀦𑀬𑀸’𑀢𑀺.

𑀇𑀥 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄. 𑀏𑀢𑁆𑀣 𑀘 𑀆𑀕𑀢𑀲𑀤𑁆𑀤𑁄 𑀘 𑀲𑀫𑀡𑀲𑀤𑁆𑀤𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑁂 𑀅𑀝𑁆𑀞𑀢𑁆𑀯𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀬𑀢𑁆𑀣𑀪𑀽𑀢𑁂 𑀲𑀗𑁆𑀖𑀸𑀭𑀸𑀫𑀲𑀗𑁆𑀔𑀸𑀢𑁂 𑀅𑀜𑁆𑀜𑀧𑀤𑀢𑁆𑀣𑁂 𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀲𑀫𑀸𑀲𑁂𑀦𑁂𑀯 𑀓𑀫𑁆𑀫𑀢𑁆𑀣𑀲𑁆𑀲 𑀅𑀪𑀺𑀳𑀺𑀢𑀢𑁆𑀢𑀸 𑀧𑀼𑀦 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀢𑀣𑀸 𑀆𑀕𑀢𑀲𑀫𑀡𑀸 𑀲𑀸𑀯𑀢𑁆𑀣𑀺, 𑀆𑀕𑀢𑀲𑀫𑀡𑀁 𑀚𑁂𑀢𑀯𑀦𑀁. 𑀧𑀝𑀺𑀧𑀦𑁆𑀦𑀸 𑀅𑀤𑁆𑀥𑀺𑀓𑀸 𑀬𑀁 𑀧𑀝𑀺𑀧𑀦𑁆𑀦𑀤𑁆𑀥𑀺𑀓𑁄 𑀧𑀣𑁄, 𑀅𑀪𑀺𑀭𑀽𑀴𑁆𑀳𑀸𑀯, 𑀡𑀺𑀚𑀸𑀬𑀁 𑀦𑀸𑀯𑀁 𑀲𑀸 𑀅𑀪𑀺𑀭𑀽𑀴𑁆𑀳𑀯𑀸𑀡𑀺𑀚𑀸 𑀦𑀸𑀯𑀸.

(𑀔) 𑀢𑀢𑀺𑀬𑀢𑁆𑀣𑁂-𑀚𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦 𑀲𑁄 𑀚𑀺𑀢𑀺𑀦𑁆𑀤𑁆𑀭𑀺𑀬𑁄 𑀲𑀫𑀡𑁄, 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑁄, 𑀧𑀢𑁆𑀢𑀥𑀫𑁆𑀫𑁄, 𑀓𑀢𑀓𑀺𑀘𑁆𑀘𑁄. 𑀯𑀺𑀚𑀺𑀢𑀸 𑀫𑀸𑀭𑀸 𑀅𑀦𑁂𑀦𑀸𑀢𑀺 𑀯𑀺𑀚𑀺𑀢𑀫𑀸𑀭𑁄 𑀪𑀕𑀯𑀸, 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀥𑀫𑁆𑀫𑁄. 𑀓𑀭𑀡𑀢𑁆𑀣𑁂-𑀙𑀺𑀦𑁆𑀦𑁄 𑀭𑀼𑀓𑁆𑀔𑁄 𑀬𑁂𑀦 𑀲𑁄 𑀙𑀺𑀦𑁆𑀦𑀭𑀼𑀓𑁆𑀔𑁄 𑀨𑀭𑀲𑀼.

(𑀕) 𑀘𑀢𑀼𑀢𑁆𑀣𑀺𑀬𑀢𑁆𑀣𑁂-𑀤𑀺𑀦𑁆𑀦𑁄 𑀲𑀼𑀗𑁆𑀓𑁄 𑀬𑀲𑁆𑀲 𑀲𑁄 𑀤𑀺𑀦𑁆𑀦𑀲𑀼𑀗𑁆𑀓𑁄 𑀭𑀸𑀚𑀸, 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀅𑀲𑁆𑀲𑀸𑀢𑀺 𑀤𑀺𑀦𑁆𑀦𑀪𑁄𑀚𑀦𑁄.

(𑀖) 𑀧𑀜𑁆𑀘𑀫𑀺𑀬𑀢𑁆𑀣𑁂-𑀦𑀺𑀕𑁆𑀕𑀢𑀸 𑀚𑀦𑀸 𑀬𑀲𑁆𑀫𑀸 𑀲𑁄 𑀦𑀺𑀕𑁆𑀕𑀢𑀚𑀦𑁄 𑀕𑀸𑀫𑁄, 𑀦𑀺𑀕𑁆𑀕𑀢𑁄 𑀅𑀬𑁄=𑀲𑀼𑀔𑀁 𑀬𑀲𑁆𑀫𑀸𑀢𑀺 𑀦𑀺𑀭𑀬𑁄, 𑀦𑀺𑀓𑁆𑀓𑀺𑀮𑁂- 𑀲𑁄. 𑀅𑀧𑁂𑀢𑀁 𑀯𑀺𑀜𑁆𑀜𑀸𑀡𑀁 𑀅𑀲𑁆𑀫𑀸𑀢𑀺 𑀅𑀧𑁂𑀢𑀯𑀺𑀜𑁆𑀜𑀸𑀡𑁄 𑀫𑀢𑀓𑀸𑀬𑁄, 𑀅𑀧𑀕𑀢𑀪𑀬𑀪𑁂𑀭𑀯𑁄 𑀅𑀭𑀳𑀸.

(𑀗) 𑀙𑀝𑁆𑀞𑀺𑀬𑀢𑁆𑀣𑁂-𑀙𑀺𑀦𑁆𑀦𑀸 𑀳𑀢𑁆𑀣𑀸 𑀬𑀲𑁆𑀲 𑀲𑁄 𑀙𑀺𑀦𑁆𑀦𑀳𑀢𑁆𑀣𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀔𑀻𑀡𑀸𑀲𑀯𑁄, 𑀯𑀻𑀢𑁄 𑀭𑀸𑀕𑁄 𑀅𑀲𑁆𑀲𑀸𑀢𑀺 𑀯𑀻𑀢𑀭𑀸𑀕𑁄. 𑀤𑁆𑀯𑁂 𑀧𑀤𑀸𑀦𑀺 𑀅𑀲𑁆𑀲𑀸𑀢𑀺 𑀤𑁆𑀯𑀺𑀧𑀤𑁄, 𑀤𑁆𑀯𑀺𑀳𑀢𑁆𑀣𑁄 𑀧𑀝𑁄. 𑀢𑁂𑀯𑀺𑀚𑁆𑀚𑁄𑀢𑀺 𑀏𑀢𑁆𑀣 𑀢𑀺𑀯𑀺𑀚𑁆𑀚𑁄 𑀏𑀯𑀸𑀢𑀺 𑀲𑀓𑀢𑁆𑀣𑁂 𑀡𑁄 𑀯𑀼𑀤𑁆𑀥𑀺 𑀘. 𑀘𑀢𑀼𑀧𑁆𑀧𑀤𑁄, 𑀧𑀜𑁆𑀘 𑀘𑀓𑁆𑀔𑀽𑀦𑀺 𑀅𑀲𑁆𑀲𑀸𑀢𑀺 𑀧𑀜𑁆𑀘𑀘𑀓𑁆𑀔𑀼 𑀪𑀕𑀯𑀸, 𑀙𑀴𑀪𑀺𑀜𑁆𑀜𑁄, ‘‘𑀖𑀧𑀲𑁆𑀲𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀁. 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁. 𑀤𑀲𑀩𑀮𑁄, 𑀅𑀦𑀦𑁆𑀢𑀜𑀸𑀡𑁄. 𑀢𑀻𑀡𑀺 𑀤𑀲 𑀧𑀭𑀺𑀫𑀸𑀡+𑀫𑁂𑀲𑀁𑀢𑀺 𑀢𑀺𑀤𑀲𑀸 𑀤𑁂𑀯𑀸, 𑀇𑀥 𑀧𑀭𑀺𑀫𑀸𑀡𑀲𑀤𑁆𑀤𑀲𑀦𑁆𑀦𑀺𑀫𑀸𑀦𑀢𑁄 𑀤𑀲𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀢𑁂. 𑀅𑀬𑀁 𑀧𑀘𑁆𑀘𑀬𑁄 𑀏𑀢𑁂𑀲𑀦𑁆𑀢𑀺 𑀇𑀤𑀧𑁆𑀧𑀘𑁆𑀘𑀬𑀸, 𑀉𑀢𑁆𑀢𑀭𑀧𑀤𑁂 ‘‘𑀇𑀫𑀲𑁆𑀲𑀺+𑀤𑀁 𑀯𑀸’’𑀢𑀺 𑀇𑀫𑀲𑁆𑀲 𑀇𑀤𑀁. 𑀓𑁄 𑀧𑀪𑀯𑁄 𑀅𑀲𑁆𑀲𑀸𑀢𑀺 𑀓𑀺𑀁 𑀧𑀪𑀯𑁄 𑀓𑀸𑀬𑁄. 𑀯𑀺𑀕𑀢𑀁 𑀫𑀮𑀁 𑀅𑀲𑁆𑀲𑀸𑀢𑀺 𑀯𑀺𑀫𑀮𑁄, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀲𑀼𑀕𑀦𑁆𑀥𑀁 𑀘𑀦𑁆𑀤𑀦𑀁, 𑀏𑀯𑀁 𑀲𑀼𑀲𑀻𑀮𑁄, 𑀲𑀼𑀫𑀼𑀔𑁄, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀓𑀼𑀡𑀧𑀁, 𑀤𑀼𑀫𑁆𑀫𑀼𑀔𑁄, 𑀤𑀼𑀝𑁆𑀞𑀼 𑀫𑀦𑁄 𑀅𑀲𑁆𑀲𑀸𑀢𑀺 𑀤𑀼𑀫𑁆𑀫𑀦𑁄, 𑀏𑀯𑀁 𑀤𑀼𑀲𑁆𑀲𑀻𑀮𑁄. 𑀢𑀧𑁄 𑀏𑀯 𑀥𑀦𑀁 𑀅𑀲𑁆𑀲𑀸𑀢𑀺 𑀢𑀧𑁄𑀥𑀦𑁄. 𑀔𑀦𑁆𑀢𑀺𑀲𑀗𑁆𑀔𑀸𑀢𑀁 𑀩𑀮𑀁 𑀅𑀲𑁆𑀲𑀸𑀢𑀺 𑀔𑀦𑁆𑀢𑀺𑀩𑀮𑁄. 𑀇𑀦𑁆𑀤𑁄𑀢𑀺 𑀦𑀸𑀫𑀁 𑀏𑀢𑀲𑁆𑀲𑀸𑀢𑀺 𑀇𑀦𑁆𑀤𑀦𑀸𑀫𑁄.

𑀙𑀦𑁆𑀤𑀚𑀸𑀢𑀸𑀤𑀻𑀲𑀼 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀬𑀣𑀺𑀘𑁆𑀙𑀺𑀢𑀢𑁆𑀢𑀸 𑀉𑀪𑀬𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀓𑀫𑀸𑀢𑀺𑀓𑁆𑀓𑀫𑁂 𑀧𑀬𑁄𑀚𑀦𑀸𑀪𑀸𑀯𑀸. 𑀚𑀸𑀢𑁄 𑀙𑀦𑁆𑀤𑁄 𑀅𑀲𑁆𑀲𑀸𑀢𑀺 𑀚𑀸𑀢𑀙𑀦𑁆𑀤𑁄, 𑀏𑀯𑀁 𑀙𑀦𑁆𑀤𑀚𑀸𑀢𑁄. 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄, 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀜𑁆𑀚𑀸𑀢𑁄. 𑀫𑀸𑀲𑀚𑀸𑀢𑁄, 𑀚𑀸𑀢𑀫𑀸𑀲𑁄. 𑀙𑀺𑀦𑁆𑀦𑀳𑀢𑁆𑀣𑁄, 𑀳𑀢𑁆𑀣𑀙𑀺𑀦𑁆𑀦𑁄.