𑁫. 𑀡𑀸𑀤𑀺𑀓𑀡𑁆𑀟

𑀲𑀫𑀸𑀲𑁄 𑀧𑀤𑀲𑀁𑀔𑁂𑀧𑁄, 𑀧𑀤𑀧𑀘𑁆𑀘𑀬𑀲𑀁𑀳𑀺𑀢𑀁;

𑀢𑀤𑁆𑀥𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺, 𑀯𑀺𑀜𑁆𑀜𑁂𑀬𑁆𑀬𑀁 𑀢𑁂𑀲+𑀫𑀦𑁆𑀢𑀭𑀁.

𑁧. 𑀡𑁄 𑀯𑀸+𑀧𑀘𑁆𑀘𑁂

𑀙𑀝𑁆𑀞𑀻𑀬𑀦𑁆𑀢𑀸 𑀦𑀸𑀫𑀲𑁆𑀫𑀸 𑀯𑀸 𑀡𑀧𑀘𑁆𑀘𑀬𑁄 𑀳𑁄𑀢𑀺 𑀅𑀧𑀘𑁆𑀘𑁂+𑀪𑀺𑀥𑁂𑀬𑁆𑀬𑁂. 𑀅𑀧𑀘𑁆𑀘𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀢𑁆𑀢𑁂𑀦 𑀅𑀧𑀘𑁆𑀘𑀯𑀦𑁆𑀢𑀢𑁄 𑀓𑀢𑀲𑀭𑀧𑀘𑁆𑀘𑀬𑁄 𑀲𑀫𑀢𑁆𑀣𑁆𑀬𑀢𑁄 𑀙𑀝𑁆𑀞𑁆𑀬𑀦𑁆𑀢𑀢𑁄 𑀳𑁄𑀢𑀻𑀢𑀺 ‘‘𑀙𑀝𑁆𑀞𑀻𑀬𑀦𑁆𑀢𑀸 𑀦𑀸𑀫𑀲𑁆𑀫𑀸’’𑀢𑀺 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀁. 𑀡𑀸𑀤𑀻𑀦𑀁 𑀢𑀤𑁆𑀥𑀺𑀢𑀦𑁆𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀲𑀜𑁆𑀜𑀸. 𑀡𑀓𑀸𑀭𑁄 𑀯𑀼𑀤𑁆𑀥𑁆𑀬𑀢𑁆𑀣𑁄. 𑀏𑀯+𑀫𑀜𑁆𑀜𑀢𑁆𑀭𑀸𑀧𑀺. 𑀡𑀸𑀤𑀺𑀯𑀼𑀢𑁆𑀢𑀺𑀢𑁆𑀢𑀸 ‘‘𑀏𑀓𑀢𑁆𑀣𑀢𑀸𑀬𑀁’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄.

𑁧𑁨𑁪. 𑀲𑀭𑀸𑀦+𑀫𑀸𑀤𑀺𑀲𑁆𑀲𑀸+𑀬𑀼𑀯𑀡𑁆𑀡𑀲𑁆𑀲𑀸+𑀏𑀑 𑀡𑀸𑀦𑀼𑀩𑀦𑁆𑀥𑁂

𑀲𑀭𑀸𑀦+𑀫𑀸𑀤𑀺𑀪𑀽𑀢𑀸 𑀬𑁂 𑀅𑀓𑀸𑀭𑀺+𑀯𑀡𑁆𑀡𑀼+𑀯𑀡𑁆𑀡𑀸, 𑀢𑁂𑀲𑀁 𑀆+𑀏+𑀑 𑀯𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀡𑀸𑀦𑀼𑀩𑀦𑁆𑀥𑁂𑀢𑀺 𑀅𑀓𑀸𑀭𑀲𑁆𑀲 𑀆𑀓𑀸𑀭𑁄. 𑀆+𑀏+𑀑𑀦𑀁 𑀯𑀼𑀤𑁆𑀥𑀻𑀢𑀺𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀲𑀜𑁆𑀜𑀸. 𑀯𑀲𑀺𑀝𑁆𑀞𑀲𑁆𑀲𑀸+𑀧𑀘𑁆𑀘𑀁 𑀯𑀸𑀲𑀺𑀝𑁆𑀞𑁄. 𑀯𑀻𑀫𑁆𑀳𑀺 𑀯𑀸𑀲𑀺𑀝𑁆𑀞𑀻. 𑀯𑁂𑀢𑀺 𑀯𑀲𑀺𑀝𑁆𑀞𑀲𑁆𑀲𑀸+𑀧𑀘𑁆𑀘𑀁𑀢𑀺 𑀯𑀸𑀓𑁆𑀬𑀲𑁆𑀲 𑀘 𑀯𑀲𑀺𑀝𑁆𑀞𑀸𑀧𑀘𑁆𑀘𑀁𑀢𑀺 𑀲𑀫𑀸𑀲𑀲𑁆𑀲 𑀘 𑀯𑀺𑀓𑀧𑁆𑀧𑀢𑁆𑀣𑀁. 𑀲𑁄 𑀘 𑀯𑀸𑀲𑀤𑁆𑀤𑁄 𑀬𑀸𑀯 ‘‘𑀲𑀓𑀢𑁆𑀣𑁂’’𑀢𑀺 𑀅𑀥𑀺𑀓𑀭𑀻𑀬𑀢𑀺.

𑀦𑀧𑀼𑀁𑀲𑀓𑁂𑀦 𑀮𑀺𑀗𑁆𑀕𑁂𑀦, 𑀲𑀤𑁆𑀤𑁄+𑀤𑀸𑀳𑀼 𑀧𑀼𑀫𑁂𑀦 𑀯𑀸;

𑀦𑀺𑀤𑁆𑀤𑀺𑀲𑁆𑀲𑀢𑀻𑀢𑀺 𑀜𑀸𑀢𑀩𑁆𑀩+𑀫𑀯𑀺𑀲𑁂𑀲𑁂 𑀧𑀦𑀺+𑀘𑁆𑀙𑀺𑀢𑁂𑀢𑀺 𑁋

𑀯𑀼𑀢𑁆𑀢𑀢𑁆𑀣𑀸 𑀅𑀧𑀘𑁆𑀘𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀢𑁆𑀣𑁂𑀧𑀺 𑀧𑀼𑀢𑁆𑀢𑀧𑀼𑀢𑁆𑀢𑀻𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀘𑀓𑁄 𑀳𑁄𑀢𑀺.

𑀡𑀸𑀤𑀬𑁄+𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀸, 𑀅𑀧𑀘𑁆𑀘𑁂 𑀢𑁆𑀯+𑀦𑀧𑀼𑀁𑀲𑀓𑀸;

𑀦𑀧𑀼𑀁𑀲𑀓𑁂 𑀲𑀓𑀢𑁆𑀣𑁂 𑀡𑁆𑀬𑁄, 𑀪𑀺𑀬𑁆𑀬𑁄 𑀪𑀸𑀯𑀲𑀫𑀽𑀳𑀚𑀸;

𑀢𑀸 𑀢𑀼+𑀢𑁆𑀣𑀺𑀬+𑀫𑀲𑀁𑀔𑁆𑀬𑀸𑀦𑁂, 𑀢𑁆𑀯𑀸𑀤𑀺𑀘𑀻𑀧𑀘𑁆𑀘𑀬𑀦𑁆𑀢𑀓𑀸.

𑀪𑀸𑀭𑀤𑁆𑀯𑀸𑀚𑀲𑁆𑀲 𑀅𑀧𑀘𑁆𑀘𑀁=𑀧𑀼𑀢𑁆𑀢𑁄 𑀪𑀸𑀭𑀤𑁆𑀯𑀸𑀚𑁄, 𑀏𑀯𑀁 𑀯𑁂𑀲𑁆𑀲𑀸𑀫𑀺𑀢𑁆𑀢𑁄, 𑀕𑁄𑀢𑀫𑁄. 𑀏𑀢𑁆𑀣 𑀘 𑀅+𑀬𑀼𑀯𑀡𑁆𑀡𑀦𑁆𑀢𑀸𑀪𑀸𑀯𑀸 𑀆+𑀏+𑀑𑀦𑀁 𑀦 𑀯𑀼𑀤𑁆𑀥𑀺. 𑀯𑀸𑀲𑀼𑀤𑁂𑀯𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀼𑀤𑁂𑀯𑁄, 𑀩𑀮𑀤𑁂𑀯𑁄. 𑀘𑀺𑀢𑁆𑀢𑀓𑁄𑀢𑀺𑀆𑀤𑀻𑀲𑀼 𑀧𑀦 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 ‘‘𑀲𑀁𑀬𑁄𑀕𑁂 𑀓𑁆𑀯𑀘𑀻’’𑀢𑀺 𑀓𑁆𑀯𑀘𑀺 𑀦 𑀯𑀼𑀤𑁆𑀥𑀺. 𑀉𑀧𑀕𑀼𑀦𑁄 𑀅𑀧𑀘𑁆𑀘𑀁 𑀑𑀧𑀕𑀯𑁄 𑀑𑀧𑀕𑀯𑀻. 𑀏𑀢𑁆𑀣 ‘‘𑀉𑀯𑀡𑁆𑀡𑀲𑁆𑀲𑀸+𑀯𑀗 𑀲𑀭𑁂’’𑀢𑀺 𑀉𑀓𑀸𑀭𑀲𑁆𑀲 𑀅𑀯𑀗.

𑀯𑀘𑁆𑀙𑀲𑁆𑀲𑀸+𑀧𑀘𑁆𑀘𑀦𑁆𑀢𑀺 𑀯𑀺𑀕𑁆𑀕𑀬𑁆𑀳 𑀧𑀼𑀩𑁆𑀩𑀲𑀼𑀢𑁆𑀢𑁂𑀦 𑀡𑀧𑀘𑁆𑀘𑀬𑁂 𑀓𑀢𑁂 𑀧𑀼𑀦 𑀯𑀘𑁆𑀙𑀲𑁆𑀲𑀸+𑀧𑀘𑁆𑀘𑀁𑀢𑀺 𑀯𑀺𑀕𑁆𑀕𑀳𑁄.

𑁨. 𑀯𑀘𑁆𑀙𑀸𑀤𑀺𑀢𑁄 𑀡𑀸𑀦+𑀡𑀸𑀬𑀦𑀸

𑀯𑀘𑁆𑀙𑀸𑀤𑀻𑀳𑀺 𑀅𑀧𑀘𑁆𑀘𑀧𑀘𑁆𑀘𑀬𑀦𑁆𑀢𑁂𑀳𑀺 𑀕𑁄𑀢𑁆𑀢𑀸𑀤𑀻𑀳𑀺 𑀘 𑀲𑀤𑁆𑀤𑁂𑀳𑀺 𑀡𑀸𑀦+𑀡𑀸𑀬𑀦𑀧𑀘𑁆𑀘𑀬𑀸 𑀯𑀸 𑀳𑁄𑀦𑁆𑀢𑀺 𑀅𑀧𑀘𑁆𑀘𑁂. 𑀯𑀘𑁆𑀙𑀸𑀦𑁄, 𑀯𑀘𑁆𑀙𑀸𑀬𑀦𑁄, ‘‘𑀲𑀁𑀬𑁄𑀕𑁂 𑀓𑁆𑀯𑀘𑀻’’𑀢𑀺 𑀦 𑀯𑀼𑀤𑁆𑀥𑀺. 𑀓𑀢𑀺𑀲𑁆𑀲𑀸+𑀧𑀘𑁆𑀘𑀁 𑀓𑀘𑁆𑀘𑁄, ‘‘𑀡𑁆𑀬 𑀤𑀺𑀘𑁆𑀘𑀸𑀤𑀻𑀳𑀻’’𑀢𑀺 𑀡𑁆𑀬𑁄, ‘‘𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁’’𑀢𑀺 𑀅𑀓𑀸𑀭𑀮𑁄𑀧𑁂 𑀘𑀯𑀕𑁆𑀕𑀧𑀼𑀩𑁆𑀩𑀭𑀽𑀧𑀸𑀦𑀺. 𑀓𑀘𑁆𑀘𑀲𑁆𑀲𑀸+𑀧𑀘𑁆𑀘𑀁 𑀓𑀘𑁆𑀘𑀸𑀦𑁄, 𑀓𑀘𑁆𑀘𑀸𑀬𑀦𑁄, 𑀬𑀸𑀕𑀫𑁂 𑀓𑀸𑀢𑀺𑀬𑀸𑀦𑁄. 𑀫𑀼𑀕𑁆𑀕𑀲𑁆𑀲𑀸+𑀧𑀘𑁆𑀘𑀁=𑀦𑀢𑁆𑀢𑀸𑀤𑀻𑀢𑀺 𑀯𑀸𑀓𑁆𑀬𑁂 𑀯𑀼𑀤𑁆𑀥𑀺+𑀇𑀓𑀸𑀭𑀮𑁄𑀧+𑀧𑀼𑀩𑁆𑀩𑀭𑀽𑀧𑀸𑀦𑀺. 𑀫𑁄𑀕𑁆𑀕𑀮𑁆𑀮𑀲𑁆𑀲𑀸+𑀧𑀘𑁆𑀘𑀁𑀢𑀺 𑀧𑀼𑀦𑀡𑀸𑀦+𑀡𑀸𑀬𑀦𑀸 𑀳𑁄𑀦𑁆𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑁄𑀕𑁆𑀕𑀮𑁆𑀮𑀸𑀬𑀦𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀧𑀘𑁆𑀘𑀧𑀘𑁆𑀘𑀬𑀦𑁆𑀢𑀸. 𑀕𑁄𑀢𑁆𑀢𑀸𑀤𑀺𑀢𑁄 𑀬𑀣𑀸𑀲𑀓𑀝𑀲𑁆𑀲𑀸+𑀧𑀘𑁆𑀘𑀁 𑀦𑀢𑁆𑀢𑀸𑀤𑀻𑀳𑀺 𑀲𑀓𑀝𑀸𑀦𑁄 𑀲𑀓𑀝𑀸𑀬𑀦𑁄. 𑀓𑀡𑁆𑀳𑀲𑁆𑀲𑀸+𑀧𑀘𑁆𑀘𑀁 𑀦𑀢𑁆𑀢𑀸𑀤𑀺 𑀓𑀡𑁆𑀳𑀸𑀦𑁄 𑀓𑀡𑁆𑀳𑀸𑀬𑀦𑁄. 𑀏𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀸𑀦𑁄 𑀅𑀕𑁆𑀕𑀺𑀯𑁂𑀲𑁆𑀲𑀸𑀬𑀦𑁄, 𑀫𑀼𑀜𑁆𑀚𑀸𑀦𑁄 𑀫𑀼𑀜𑁆𑀚𑀸𑀬𑀦𑁄, 𑀓𑀼𑀜𑁆𑀚𑀸𑀦𑁄 𑀓𑀼𑀜𑁆𑀚𑀸𑀬𑀦𑁄. 𑀲𑀩𑁆𑀩𑀢𑁆𑀣 𑀲𑀁𑀬𑁄𑀕𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀆𑀓𑀢𑀺𑀕𑀡𑁄+𑀬𑀁.

𑁩. 𑀓𑀢𑁆𑀢𑀺𑀓𑀸𑀯𑀺𑀥𑀯𑀸𑀤𑀻𑀳𑀺 𑀡𑁂𑀬𑁆𑀬𑀡𑁂𑀭𑀸

𑀓𑀢𑁆𑀢𑀺𑀓𑀸𑀤𑀻𑀳𑀺 𑀯𑀺𑀥𑀯𑀸𑀤𑀻𑀳𑀺 𑀘 𑀡𑁂𑀬𑁆𑀬𑀡𑁂𑀭𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀓𑀢𑁆𑀢𑀺𑀓𑀸𑀬 𑀅𑀧𑀘𑁆𑀘𑀁 𑀓𑀢𑁆𑀢𑀺𑀓𑁂𑀬𑁆𑀬𑁄, 𑀕𑀭𑀼𑀴𑁄 𑀯𑀺𑀦𑀢𑀸𑀬=𑀲𑀼𑀧𑀡𑁆𑀡𑀫𑀸𑀢𑀼𑀬𑀸 𑀅𑀧𑀘𑁆𑀘𑀁 𑀯𑁂𑀦𑀢𑁂𑀬𑁆𑀬𑁄. 𑀭𑁄𑀳𑀺𑀡𑀺𑀬𑀸 𑀅𑀧𑀘𑁆𑀘𑀁 𑀭𑁄𑀳𑀺𑀡𑁂𑀬𑁆𑀬𑁄, 𑀕𑀗𑁆𑀕𑀸𑀬 𑀅𑀧𑀘𑁆𑀘𑀁 𑀕𑀗𑁆𑀕𑁂𑀬𑁆𑀬𑁄. 𑀏𑀯𑀁 𑀪𑀸𑀕𑀺𑀦𑁂𑀬𑁆𑀬𑁄, 𑀦𑀸𑀤𑁂𑀬𑁆𑀬𑁄, 𑀅𑀦𑁆𑀢𑁂𑀬𑁆𑀬𑁄, 𑀆𑀳𑁂𑀬𑁆𑀬𑁄, 𑀓𑀸𑀧𑁂𑀬𑁆𑀬𑁄, 𑀲𑀼𑀘𑀺𑀬𑀸 𑀅𑀧𑀘𑁆𑀘𑀁 𑀲𑁄𑀘𑁂𑀬𑁆𑀬𑁄, 𑀩𑀸𑀮𑁂𑀬𑁆𑀬𑁄. 𑀡𑁂𑀭𑁂-𑀯𑀺𑀥𑀯𑀸𑀬 𑀅𑀧𑀘𑁆𑀘𑀁 𑀯𑁂𑀥𑀯𑁂𑀭𑁄. 𑀩𑀦𑁆𑀥𑀓𑀺𑀬𑀸=𑀅𑀪𑀺𑀲𑀸𑀭𑀺𑀓𑀸𑀬 𑀅𑀧𑀘𑁆𑀘𑀁 𑀩𑀦𑁆𑀥-𑀓𑁂𑀭𑁄. 𑀲𑀫𑀡𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲𑀸+𑀧𑀘𑁆𑀘𑀁 𑀲𑀸𑀫𑀡𑁂𑀭𑁄, 𑀦𑀸𑀴𑀺𑀓𑁂𑀭𑁄 𑀇𑀘𑁆𑀘𑀸𑀤𑀺.

𑁪. 𑀡𑁆𑀬 𑀤𑀺𑀘𑁆𑀘𑀸𑀤𑀻𑀳𑀺

𑀤𑀺𑀢𑀺𑀧𑁆𑀧𑀪𑀼𑀢𑀻𑀳𑀺 𑀡𑁆𑀬𑁄 𑀳𑁄𑀢𑀺 𑀅𑀧𑀘𑁆𑀘𑁂.

𑁧𑁨𑁫. 𑀲𑀁𑀬𑁄𑀕𑁂 𑀓𑁆𑀯𑀘𑀺

𑀲𑀁𑀬𑁄𑀕𑀯𑀺𑀲𑀬𑁂 𑀓𑁆𑀯𑀘𑀺 𑀆+𑀏+𑀑𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺 𑀡𑀸𑀦𑀼𑀩𑀦𑁆𑀥𑁂.

𑁧𑁩𑁧. 𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁

𑀅𑀯𑀡𑁆𑀡𑀺+𑀯𑀡𑁆𑀡𑀸𑀦𑀁 𑀮𑁄𑀧𑁄 𑀳𑁄𑀢𑀺 𑀬𑀓𑀸𑀭𑀸𑀤𑁄 𑀧𑀘𑁆𑀘𑀬𑁂. 𑀤𑀺𑀢𑀺𑀬𑀸=𑀅𑀲𑀼𑀭𑀫𑀸𑀢𑀼𑀬𑀸 𑀅𑀧𑀘𑁆𑀘𑀁 𑀤𑁂𑀘𑁆𑀘𑁄 𑀆𑀤𑀺𑀘𑁆𑀘𑁄. 𑀓𑀼𑀡𑁆𑀟𑀦𑀺𑀬𑀸 𑀅𑀧𑀘𑁆𑀘𑀁 𑀓𑁄𑀡𑁆𑀟𑀜𑁆𑀜𑁄, 𑀦𑀲𑁆𑀲 𑀜𑁆𑀜𑁂 𑀧𑀼𑀩𑁆𑀩𑀭𑀽𑀧𑀁. 𑀅𑀤𑀺𑀢𑀻𑀢𑀺 𑀤𑁂𑀯𑀫𑀸𑀢𑀸.

𑀪𑀸𑀢𑀼𑀦𑁄 𑀅𑀧𑀘𑁆𑀘𑀁 𑀪𑀸𑀢𑀩𑁆𑀬𑁄, ‘‘𑀬𑀫𑁆𑀳𑀺 𑀕𑁄𑀲𑁆𑀲 𑀘𑀸’’𑀢𑀺 𑀬𑀫𑁆𑀳𑀺 𑀉𑀲𑁆𑀲 𑀅𑀯𑀗 𑀅𑀓𑀸𑀭𑀮𑁄𑀧𑀧𑀼𑀩𑁆𑀩𑀭𑀽𑀧𑀸𑀦𑀺.

𑁫. 𑀆 𑀡𑀺

𑀅𑀓𑀸𑀭𑀦𑁆𑀢𑀢𑁄 𑀡𑀺 𑀯𑀸 𑀳𑁄𑀢+𑀧𑀘𑁆𑀘𑁂 𑀩𑀳𑀼𑀮𑀁. 𑀆=𑀢𑀺 𑀦𑀸𑀫𑀯𑀺𑀲𑁂𑀲𑀦𑀢𑁆𑀢𑀸 𑀅-𑀓𑀸𑀭𑀦𑁆𑀢𑀢𑁄𑀢𑀺 𑀯𑀼𑀢𑁆𑀢𑀁. 𑀤𑀓𑁆𑀔𑀲𑁆𑀲𑀸+𑀧𑀘𑁆𑀘𑀁 𑀤𑀓𑁆𑀔𑀺, 𑀤𑀢𑁆𑀢𑀺, 𑀤𑁄𑀡𑀺, 𑀯𑀸𑀲𑀯𑀺, 𑀯𑀸𑀭𑀼𑀡𑀺. 𑀚𑀺𑀦𑀤𑀢𑁆𑀢𑀲𑁆𑀲𑀸+𑀧𑀘𑁆𑀘𑀁 𑀚𑁂𑀦𑀤𑀢𑁆𑀢𑀺, 𑀲𑀼𑀤𑁆𑀥𑁄𑀤𑀦𑀺, 𑀆𑀦𑀼𑀭𑀼𑀤𑁆𑀥𑀺 𑀇𑀘𑁆𑀘𑀸𑀤𑀺.

𑁬. 𑀭𑀸𑀚𑀢𑁄 𑀜𑁆𑀜𑁄 𑀚𑀸𑀢𑀺𑀬𑀁

𑀭𑀸𑀚𑀢𑁄 𑀜𑁆𑀜𑁄 𑀯𑀸 𑀳𑁄𑀢+𑀧𑀘𑁆𑀘𑁂 𑀔𑀢𑁆𑀣𑀺𑀬𑀚𑀸𑀢𑀺𑀬𑀁 𑀕𑀫𑁆𑀬𑀫𑀸𑀦𑀸𑀬𑀁. 𑀭𑀜𑁆𑀜𑁄 𑀅𑀧𑀘𑁆𑀘𑀁 𑀭𑀸𑀚𑀜𑁆𑀜𑁄. 𑀚𑀸𑀢𑀻𑀬𑀦𑁆𑀢𑀺 𑀓𑀺𑀁, 𑀭𑀸𑀚𑀸𑀧𑀘𑁆𑀘𑀁.

𑁭. 𑀔𑀢𑁆𑀢𑀸 𑀬𑀺+𑀬𑀸

𑀢𑀺𑀚𑀸𑀢𑀺𑀬𑀁 𑀅𑀧𑀘𑁆𑀘𑁂 𑀬+𑀇𑀬𑀸 𑀳𑁄𑀦𑁆𑀢𑀺. 𑀔𑀢𑁆𑀢𑀲𑁆𑀲𑀸+𑀧𑀘𑁆𑀘𑀁 𑀔𑀢𑁆𑀬𑁄 𑀔𑀢𑁆𑀢𑀺𑀬𑁄. 𑀚𑀸𑀢𑀺𑀬𑀁 𑀢𑁆𑀯𑁂𑀯, 𑀔𑀢𑁆𑀢𑀺.

𑁮. 𑀫𑀦𑀼𑀢𑁄 𑀲𑁆𑀲+𑀲𑀡

𑀫𑀦𑀼𑀢𑁄 𑀚𑀸𑀢𑀺𑀲𑀫𑀼𑀤𑀸𑀬𑁂 𑀲𑁆𑀲+𑀲𑀡 𑀳𑁄𑀦𑁆𑀢𑀼+𑀧𑀘𑁆𑀘𑁂. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀦𑀼𑀲𑁆𑀲𑁄 𑀫𑀸𑀦𑀼𑀲𑁄, 𑀫𑀦𑀼𑀲𑁆𑀲𑀻 𑀫𑀸𑀦𑀼𑀲𑀻. 𑀚𑀸𑀢𑀺𑀬𑀁 𑀢𑁆𑀯𑁂𑀯, 𑀫𑀸𑀦𑀯𑁄, 𑀦𑀲𑁆𑀲 𑀡𑁄, 𑀫𑀸𑀡𑀯𑁄.

𑁯. 𑀚𑀦𑀧𑀤𑀦𑀸𑀫𑀲𑁆𑀫𑀸 𑀔𑀢𑁆𑀢𑀺𑀬𑀸 𑀭𑀜𑁆𑀜𑁂 𑀘 𑀡𑁄

𑀚𑀦𑀧𑀤𑀲𑁆𑀲 𑀬𑀁 𑀦𑀸𑀫𑀁, 𑀢𑀁 𑀦𑀸𑀫𑀲𑁆𑀫𑀸 𑀔𑀢𑁆𑀢𑀺𑀬𑀸 𑀅𑀧𑀘𑁆𑀘𑁂 𑀭𑀜𑁆𑀜𑁂 𑀘 𑀡𑁄 𑀳𑁄𑀢𑀺. 𑀧𑀜𑁆𑀘𑀸𑀮𑀸𑀦𑀁 𑀅𑀧𑀘𑁆𑀘𑀁 𑀭𑀸𑀚𑀸 𑀯𑀸 𑀧𑀜𑁆𑀘𑀸𑀮𑁄, 𑀓𑁄𑀲𑀮𑁄, 𑀫𑀸𑀕𑀥𑁄, 𑀑𑀓𑁆𑀓𑀸𑀓𑁄. 𑀚𑀦𑀧𑀤𑀦𑀸𑀫𑀲𑁆𑀫𑀸𑀢𑀺 𑀓𑀺𑀁, 𑀤𑀸𑀲𑀭𑀣𑀺. 𑀔𑀢𑁆𑀢𑀺𑀬𑀸𑀢𑀺 𑀓𑀺𑀁, 𑀧𑀜𑁆𑀘𑀸𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲𑀸+𑀧𑀘𑁆𑀘𑀁 𑀧𑀜𑁆𑀘𑀸𑀮𑀺.

𑁧𑁦. 𑀡𑁆𑀬 𑀓𑀼𑀭𑀼𑀲𑀺𑀯𑀻𑀳𑀺

𑀓𑀼𑀭𑀼𑀲𑀺𑀯𑀻𑀳𑀺 𑀅𑀧𑀘𑁆𑀘𑁂 𑀭𑀜𑁆𑀜𑁂 𑀘 𑀡𑁆𑀬𑁄 𑀳𑁄𑀢𑀺. 𑀓𑀼𑀭𑀽𑀦𑀁 𑀅𑀧𑀘𑁆𑀘𑀁 𑀭𑀸𑀚𑀸 𑀯𑀸 𑀓𑁄𑀭𑀩𑁆𑀬𑁄. ‘‘𑀬𑀫𑁆𑀳𑀺 𑀕𑁄𑀲𑁆𑀲 𑀘𑀸’’𑀢𑀺𑀫𑀺𑀦𑀸 𑀅𑀯𑀗, 𑀩𑀓𑀸𑀭𑀧𑀼𑀩𑁆𑀩𑀭𑀽𑀧𑀸𑀦𑀺. 𑀲𑁂𑀩𑁆𑀩𑁄, 𑀇𑀮𑁄𑀧𑁄. (𑀅𑀧𑀘𑁆𑀘𑀢𑀤𑁆𑀥𑀺𑀢𑀁).

𑁧𑁧. 𑀡 𑀭𑀸𑀕𑀸 𑀢𑁂𑀦 𑀭𑀢𑁆𑀢𑀁

𑀭𑀸𑀕𑀯𑀸𑀘𑀻𑀢𑀢𑀺𑀬𑀦𑁆𑀢𑀢𑁄 𑀭𑀢𑁆𑀢+𑀫𑀺𑀘𑁆𑀘𑁂+𑀢𑀲𑁆𑀫𑀺𑀁 𑀅𑀢𑁆𑀢𑁂 𑀡𑁄 𑀳𑁄𑀢𑀺. 𑀓𑀼𑀲𑀼𑀫𑁆𑀪𑀸𑀤𑀻𑀳𑀺 𑀯𑀡𑁆𑀡𑀦𑁆𑀢𑀭𑀧𑀢𑁆𑀢𑀁 𑀭𑀢𑁆𑀢𑀁 𑀦𑀸𑀫. 𑀓𑀲𑀸𑀯𑁂𑀦 𑀭𑀢𑁆𑀢𑀁 𑀓𑀸𑀲𑀸𑀯𑀁. 𑀏𑀯𑀁 𑀓𑀼𑀲𑀼𑀫𑁆𑀪𑁂𑀦 𑀭𑀢𑁆𑀢𑀁 𑀓𑁄𑀲𑀼𑀫𑁆𑀪𑀁, 𑀳𑀸𑀮𑀺𑀤𑁆𑀤𑀁, 𑀧𑀢𑁆𑀢𑀗𑁆𑀕𑀁, 𑀫𑀜𑁆𑀚𑁂𑀝𑁆𑀞𑀁, 𑀓𑀼𑀗𑁆𑀓𑀼𑀫𑀁. 𑀇𑀥 𑀦 𑀳𑁄𑀢𑀺 𑀦𑀻𑀮𑀁 𑀧𑀻𑀢𑀦𑁆𑀢𑀺, 𑀕𑀼𑀡𑀯𑀘𑀦𑀢𑁆𑀢𑀸 𑀡𑁂𑀦 𑀯𑀺𑀦𑀸𑀧𑀺 𑀤𑀩𑁆𑀩𑀲𑁆𑀲𑀸+𑀪𑀺𑀥𑀸𑀦𑀢𑁄.

𑁧𑁨. 𑀦𑀓𑁆𑀔𑀢𑁆𑀢𑁂𑀦𑀺+𑀦𑁆𑀤𑀼𑀬𑀼𑀢𑁆𑀢𑁂𑀦 𑀓𑀸𑀮𑁂

𑀢𑀢𑀺𑀬𑀦𑁆𑀢𑀢𑁄 𑀦𑀓𑁆𑀔𑀢𑁆𑀢𑀸 𑀢𑁂𑀦 𑀮𑀓𑁆𑀔𑀺𑀢𑁂 𑀓𑀸𑀮𑁂 𑀡𑁄 𑀳𑁄𑀢𑀺, 𑀢𑀁 𑀘𑁂 𑀦𑀓𑁆𑀔𑀢𑁆𑀢+𑀫𑀺𑀦𑁆𑀤𑀼𑀬𑀼𑀢𑁆𑀢𑀁 𑀳𑁄𑀢𑀺. 𑀨𑀼𑀲𑁆𑀲𑁂𑀦 𑀇𑀦𑁆𑀤𑀼𑀬𑀼𑀢𑁆𑀢𑁂𑀦 𑀮𑀓𑁆𑀔𑀺𑀢𑀸 𑀧𑀼𑀡𑁆𑀡𑀫𑀸𑀲𑀻 𑀨𑀼𑀲𑁆𑀲𑀻 𑀭𑀢𑁆𑀢𑀺, 𑀨𑀼𑀲𑁆𑀲𑁄 𑀅𑀳𑁄, 𑀫𑀖𑀸𑀬 𑀇𑀦𑁆𑀤𑀼𑀬𑀼𑀢𑁆𑀢𑀸𑀬 𑀮𑀓𑁆𑀔𑀺𑀢𑀸 𑀧𑀼𑀡𑁆𑀡𑀫𑀸𑀲𑀻 𑀫𑀸𑀖𑀻, 𑀫𑀸𑀖𑁄.

𑁧𑁩. 𑀲𑀸+𑀲𑁆𑀲 𑀤𑁂𑀯𑀢𑀸 𑀧𑀼𑀡𑁆𑀡𑀫𑀸𑀲𑀻

𑀲𑁂𑀢𑀺 𑀧𑀞𑀫𑀦𑁆𑀢𑀸 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀡𑁄 𑀳𑁄𑀢𑀺, 𑀬𑀁 𑀧𑀞𑀫𑀦𑁆𑀢𑀁, 𑀲𑀸 𑀘𑁂 𑀤𑁂𑀯𑀢𑀸 𑀧𑀼𑀡𑁆𑀡𑀫𑀸𑀲𑀻 𑀯𑀸. 𑀲𑀼𑀕𑀢𑁄 𑀤𑁂𑀯𑀢𑀸 𑀅𑀲𑁆𑀲 𑀲𑁄𑀕𑀢𑁄, 𑀫𑀸𑀳𑀺𑀦𑁆𑀤𑁄, 𑀬𑀸𑀫𑁄, 𑀯𑀸𑀭𑀼𑀡𑁄. 𑀩𑀼𑀤𑁆𑀥𑁄 𑀅𑀲𑁆𑀲 𑀤𑁂𑀯𑀢𑀸𑀢𑀺 𑀩𑀼𑀤𑁆𑀥𑁄. 𑀨𑀼𑀲𑁆𑀲𑀻 𑀧𑀼𑀡𑁆𑀡𑀫𑀸𑀲𑀻 𑀅𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻𑀢𑀺 𑀨𑀼𑀲𑁆𑀲𑁄 𑀫𑀸𑀲𑁄. 𑀏𑀯𑀁 𑀫𑀸𑀖𑁄, 𑀨𑀕𑁆𑀕𑀼𑀦𑁄, 𑀘𑀺𑀢𑁆𑀢𑁄, 𑀯𑁂𑀲𑀸𑀔𑁄, 𑀚𑁂𑀝𑁆𑀞𑀫𑀽𑀮𑁄, 𑀆𑀲𑀸𑀴𑁆𑀳𑁄, 𑀲𑀸𑀯𑀡𑁄, 𑀧𑁄𑀝𑁆𑀞𑀧𑀸𑀤𑁄, 𑀅𑀲𑁆𑀲𑀬𑀼𑀚𑁄, 𑀓𑀢𑁆𑀢𑀺𑀓𑁄, 𑀫𑀸𑀕𑀲𑀺𑀭𑁄. 𑀧𑀼𑀡𑁆𑀡𑀫𑀸𑀲𑀻 𑀘 𑀪𑀢𑀓𑀫𑀸𑀲𑀲𑀫𑁆𑀩𑀦𑁆𑀥𑀺𑀦𑀻 𑀦 𑀳𑁄𑀢𑀺, 𑀧𑀼𑀡𑁆𑀡𑁄 𑀫𑀸 𑀅𑀲𑁆𑀲𑀦𑁆𑀢𑀺 𑀦𑀺𑀩𑁆𑀩𑀘𑀦𑀸, 𑀅𑀢𑁄 𑀏𑀯 𑀦𑀺𑀧𑀸𑀢𑀦𑀸 𑀡𑁄, 𑀲𑀸𑀕𑀫𑁄 𑀘.

𑁧𑁪. 𑀢+𑀫𑀥𑀻𑀢𑁂 𑀢𑀁 𑀚𑀸𑀦𑀸𑀢𑀺 𑀓+𑀡𑀺𑀓𑀸 𑀘

𑀤𑀼𑀢𑀺𑀬𑀦𑁆𑀢𑀢𑁄 𑀢+𑀫𑀥𑀻𑀢𑁂 𑀢𑀁 𑀚𑀸𑀦𑀸𑀢𑀻𑀢𑀺 𑀏𑀢𑁂𑀲𑁆𑀯+𑀢𑁆𑀣𑁂𑀲𑀼 𑀡𑁄 𑀳𑁄𑀢𑀺 𑀓𑁄 𑀡𑀺𑀓𑁄 𑀘. 𑀏𑀢𑁆𑀣 𑀘𑀲𑀤𑁆𑀤𑁄 𑀓𑁄 𑀘𑀡𑀺𑀓𑁄 𑀘 𑀳𑁄𑀢𑀻𑀢𑀺 𑀲𑀫𑀼𑀘𑁆𑀘𑀺𑀦𑁄, 𑀦𑁄 𑀡𑀧𑀘𑁆𑀘𑀬𑀁. 𑀩𑁆𑀬𑀸𑀓𑀭𑀡+𑀫𑀥𑀻𑀢𑁂 𑀚𑀸𑀦𑀸𑀢𑀻𑀢𑀺 𑀯𑀸 𑀯𑁂𑀬𑁆𑀬𑀸𑀓𑀭𑀡𑁄, 𑀯𑀺+𑀆+𑀓𑀭𑀡𑀦𑁆𑀢𑀺 𑀯𑀺𑀘𑁆𑀙𑀺𑀚𑁆𑀚 𑀓𑀢𑀬𑀸𑀤𑁂𑀲𑀲𑁆𑀲𑀺+𑀓𑀸𑀭𑀲𑁆𑀲 ‘‘𑀢𑀤𑀸𑀤𑁂𑀲𑀸 𑀢𑀤𑀻𑀯 𑀪𑀯𑀦𑁆𑀢𑀻’’𑀢𑀺 𑀜𑀸𑀬𑀸 ‘‘𑀲𑀭𑀸𑀦’’𑀫𑀺𑀘𑁆𑀘𑀸𑀤𑀺𑀦𑀸 𑀏𑀓𑀸𑀭𑁂 𑀬𑀸𑀕𑀫𑀤𑁆𑀯𑀺𑀢𑁆𑀢𑀸𑀦𑀺. 𑀏𑀯𑀁 𑀫𑁄𑀳𑀼𑀢𑁆𑀢𑁄, 𑀦𑁂𑀫𑀺𑀢𑁆𑀢𑁄, 𑀅𑀗𑁆𑀕𑀯𑀺𑀚𑁆𑀚𑁄, 𑀯𑀢𑁆𑀣𑀼𑀯𑀺𑀚𑁆𑀚𑁄, 𑀙𑀦𑁆𑀤𑀲𑁄, ‘‘𑀫𑀦𑀸, 𑀤𑀻𑀦𑀁 𑀲𑀓’’ 𑀇𑀢𑀺 𑀲𑀓𑀸𑀕𑀫𑁄. 𑀓𑀫𑀓𑁄, 𑀧𑀤𑀓𑁄, 𑀯𑁂𑀦𑀬𑀺𑀓𑁄, 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀆𑀪𑀺𑀥𑀫𑁆𑀫𑀺𑀓𑁄. 𑀤𑁆𑀯𑀺𑀢𑀕𑁆𑀕𑀳𑀡𑀁 𑀅𑀚𑁆𑀛𑁂𑀦𑀚𑀸𑀦𑀦𑁂 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀘𑁆𑀘𑀬𑀯𑀺𑀥𑀸𑀦𑀢𑁆𑀣𑀁, 𑀅𑀚𑁆𑀛𑁂𑀦𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀁, 𑀧𑀲𑀺𑀤𑁆𑀥𑀼𑀧𑀲𑀁𑀳𑀭𑀡𑀢𑁆𑀣𑀜𑁆𑀘.

𑁧𑁫. 𑀢𑀲𑁆𑀲 𑀯𑀺𑀲𑀬𑁂 𑀤𑁂𑀲𑁂

𑀙𑀝𑁆𑀞𑀺𑀬𑀦𑁆𑀢𑀸 𑀯𑀺𑀲𑀬𑁂 𑀤𑁂𑀲𑀲𑀭𑀽𑀧𑁂 𑀡𑁄 𑀳𑁄𑀢𑀺. 𑀯𑀲𑀸𑀢𑀻𑀦𑀁 𑀯𑀺𑀲𑀬𑁄 𑀤𑁂𑀲𑁄 𑀯𑀸𑀲𑀸𑀢𑁄. 𑀤𑁂𑀲𑁂𑀢𑀺 𑀓𑀺𑀁, 𑀘𑀓𑁆𑀔𑀼𑀲𑁆𑀲 𑀯𑀺𑀲𑀬𑁄 𑀭𑀽𑀧𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀯𑀺𑀲𑀬𑁄+𑀦𑀼𑀯𑀸𑀓𑁄.

𑁧𑁬. 𑀦𑀺𑀯𑀸𑀲𑁂 𑀢𑀦𑁆𑀦𑀸𑀫𑁂

𑀢𑀺 𑀢𑀦𑁆𑀦𑀸𑀫𑁂 𑀦𑀺𑀯𑀸𑀲𑁂 𑀤𑁂𑀲𑁂 𑀡𑁄 𑀳𑁄𑀢𑀺. 𑀲𑀺𑀯𑀻𑀦𑀁 𑀦𑀺𑀯𑀸𑀲𑁄 𑀤𑁂𑀲𑁄 𑀲𑁂𑀩𑁆𑀩𑁄. 𑀏𑀢𑁆𑀣 ‘‘𑀬𑀯𑀸 𑀲𑀭𑁂’’𑀢𑀺 𑀬𑀓𑀸𑀭𑁂 𑀩𑀓𑀸𑀭𑀧𑀼𑀩𑁆𑀩𑀭𑀽𑀧𑀸𑀦𑀺. 𑀯𑀸𑀲𑀸𑀢𑁄.

𑁧𑁭. 𑀅𑀤𑀽𑀭𑀪𑀯𑁂𑀢𑀺

𑀡𑁄, 𑀯𑀺𑀤𑀺𑀲𑀸𑀬 𑀅𑀤𑀽𑀭𑀪𑀯𑀁 𑀯𑁂𑀤𑀺𑀲𑀁.

𑁧𑁮. 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀺

𑀢𑀢𑀺𑀬𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑀢𑁆𑀣𑁂 𑀡𑁄 𑀳𑁄𑀢𑀺. 𑀓𑀼𑀲𑀫𑁆𑀩𑁂𑀦 𑀦𑀺𑀩𑁆𑀩𑀢𑁆𑀢𑀸 𑀓𑁄𑀲𑀫𑁆𑀩𑀻 𑀦𑀕𑀭𑀁, 𑀏𑀯𑀁 𑀓𑀸𑀓𑀦𑁆𑀤𑀻, 𑀫𑀸𑀓𑀦𑁆𑀤𑀻, 𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀢𑁆𑀢𑀸 𑀲𑀸𑀳𑀲𑁆𑀲𑀻 𑀧𑀭𑀺𑀔𑀸, 𑀳𑁂𑀢𑀼𑀫𑁆𑀳𑀺 𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀬𑀣𑀸𑀬𑁄𑀕𑀁 𑀢𑀢𑀺𑀬𑀸.

𑁧𑁯. 𑀢+𑀫𑀺𑀥+𑀢𑁆𑀣𑀺

𑀢𑀦𑁆𑀢𑀺 𑀧𑀞𑀫𑀦𑁆𑀢𑀸 𑀇𑀥𑀸𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀤𑁂𑀲𑁂 𑀢𑀦𑁆𑀦𑀸𑀫𑁂 𑀡𑁄 𑀳𑁄𑀢𑀺, 𑀬𑀁 𑀢𑀁 𑀧𑀞𑀫𑀦𑁆𑀢+𑀫𑀢𑁆𑀣𑀺 𑀘𑁂. 𑀉𑀤𑀼𑀫𑁆𑀩𑀭𑀸 𑀅𑀲𑁆𑀫𑀺𑀁 𑀤𑁂𑀲𑁂 𑀲𑀦𑁆𑀢𑀻𑀢𑀺 𑀑𑀤𑀼𑀫𑁆𑀩𑀭𑁄, 𑀩𑀸𑀤𑀭𑁄, 𑀧𑀩𑁆𑀩𑀚𑁄.

𑁨𑁦. 𑀢𑀢𑁆𑀭 𑀪𑀯𑁂𑀢𑀺

𑀲𑀢𑁆𑀢𑀫𑁆𑀬𑀦𑁆𑀢𑀸 𑀪𑀯𑀢𑁆𑀣𑁂 𑀡𑁄. 𑀉𑀤𑀓𑁂 𑀪𑀯𑁄 𑀑𑀤𑀓𑁄, 𑀑𑀭𑀲𑁄, 𑀚𑀸𑀦𑀧𑀤𑁄, 𑀫𑀸𑀕𑀥𑁄, 𑀓𑀸𑀧𑀺𑀮𑀯𑀢𑁆𑀣𑀯𑁄, 𑀓𑁄𑀲𑀫𑁆𑀩𑁄, 𑀫𑀦𑀲𑀺 𑀪𑀯𑀁 𑀫𑀸𑀦𑀲𑀁 𑀲𑀼𑀔𑀁, 𑀲𑀓𑀸𑀕𑀫𑁄. 𑀲𑀸𑀭𑀲𑁄 𑀲𑀓𑀼𑀡𑁄, 𑀲𑀸𑀭𑀲𑀻 𑀲𑀓𑀼𑀡𑀻, 𑀲𑀸𑀭𑀲𑀁 𑀧𑀼𑀧𑁆𑀨𑀁. 𑀫𑀺𑀢𑁆𑀢𑁂 𑀪𑀯𑀸 𑀫𑁂𑀢𑁆𑀢𑀸 𑀫𑁂𑀢𑁆𑀢𑀻 𑀯𑀸. 𑀧𑀼𑀭𑁂 𑀪𑀯𑀸 𑀧𑁄𑀭𑀻 𑀯𑀸𑀘𑀸. 𑀧𑀸𑀯𑀼𑀲𑁂 𑀪𑀯𑁄 𑀧𑀸𑀯𑀼𑀲𑁄 𑀫𑁂𑀖𑁄. 𑀧𑀸𑀯𑀼𑀲𑀸 𑀭𑀢𑁆𑀢𑀺, 𑀧𑀸𑀯𑀼𑀲𑀁 𑀅𑀩𑁆𑀪𑀁. 𑀲𑀸𑀭𑀤𑁄, 𑀲𑀸𑀭𑀤𑀸, 𑀲𑀸𑀭𑀤𑀁 𑀧𑀼𑀧𑁆𑀨𑀁. 𑀫𑀸𑀥𑀼𑀭𑁄 𑀚𑀦𑁄, 𑀫𑀸𑀥𑀼𑀭𑀸 𑀕𑀡𑀺𑀓𑀸, 𑀫𑀸𑀥𑀼𑀭𑀁 𑀯𑀢𑁆𑀣𑀁.

𑁨𑁧. 𑀅𑀚𑁆𑀚𑀸𑀤𑀻𑀳𑀺 𑀢𑀦𑁄𑀢𑀺

𑀪𑀯𑀢𑁆𑀣𑁂 𑀢𑀦𑁄. 𑀅𑀚𑁆𑀚 𑀪𑀯𑁄 𑀅𑀚𑁆𑀚𑀢𑀦𑁄, 𑀲𑁆𑀯𑀸𑀢𑀦𑁄, 𑀳𑀺𑀬𑁆𑀬𑀢𑀦𑁄. ‘‘𑀏𑀑𑀦+𑀫 𑀯𑀡𑁆𑀡𑁂’’𑀢𑀺 𑀏𑀑𑀦𑀁 𑀅 𑀳𑁄𑀢𑀺.

𑁨𑁨. 𑀧𑀼𑀭𑀸𑀢𑁄 𑀡𑁄 𑀘𑀢𑀺

𑀪𑀯𑀢𑁆𑀣𑁂 𑀡𑁄 𑀢𑀦𑁄 𑀘. 𑀏𑀢𑁆𑀣 𑀡𑀓𑀸𑀭𑁄 𑀅𑀯𑀬𑀯𑁄, 𑀦𑁂𑀯𑀸+𑀦𑀼𑀩𑀦𑁆𑀥𑁄. 𑀧𑀼𑀭𑀸𑀡𑁄, 𑀧𑀼𑀭𑀸𑀢𑀦𑁄.

𑁨𑁩. 𑀅𑀫𑀸𑀢𑁆𑀯+𑀘𑁆𑀘𑁄𑀢𑀺

𑀪𑀯𑀢𑁆𑀣𑁂 𑀅𑀘𑁆𑀘𑁄 𑀳𑁄𑀢𑀺. 𑀅𑀫𑀸=𑀲𑀳 𑀪𑀯𑁄 𑀅𑀫𑀘𑁆𑀘𑁄.

𑁨𑁪. 𑀫𑀚𑁆𑀛𑀸𑀤𑀺𑀢𑁆𑀯𑀺+𑀫𑁄𑀢𑀺

𑀪𑀯𑀢𑁆𑀣𑁂 𑀇𑀫𑁄, 𑀫𑀚𑁆𑀛𑁂 𑀪𑀯𑁄 𑀫𑀚𑁆𑀛𑀺𑀫𑁄. 𑀏𑀯𑀁 𑀅𑀦𑁆𑀢𑀺𑀫𑁄, 𑀳𑁂𑀝𑁆𑀞𑀺𑀫𑁄, 𑀉𑀧𑀭𑀺𑀫𑁄, 𑀑𑀭𑀺𑀫𑁄, 𑀧𑀸𑀭𑀺𑀫𑁄, 𑀧𑀘𑁆𑀙𑀺𑀫𑁄, 𑀅𑀩𑁆𑀪𑀦𑁆𑀢𑀭𑀺𑀥𑁄, 𑀧𑀘𑁆𑀘𑀦𑁆𑀢𑀺𑀫𑁄.

𑁨𑁫. 𑀓𑀡+𑀡𑁂𑀬𑁆𑀬+𑀡𑁂𑀬𑁆𑀬𑀓+𑀬𑀺+𑀬𑀸𑀢𑀺

𑀪𑀯𑀢𑁆𑀣𑁂 𑀓𑀡𑀆𑀤𑀬𑁄 𑀳𑁄𑀦𑁆𑀢𑀺. 𑀓𑀡-𑀓𑀼𑀲𑀺𑀦𑀸𑀭𑀸𑀬𑀁 𑀪𑀯𑁄 𑀓𑁄𑀲𑀺𑀦𑀸𑀭𑀓𑁄, 𑀫𑀸𑀕𑀥𑀓𑁄, 𑀆𑀭𑀜𑁆𑀜𑀓𑁄 𑀯𑀺𑀳𑀸𑀭𑁄, 𑀭𑀸𑀚𑀕𑀳𑀓𑁄, 𑀓𑁄𑀲𑀫𑁆𑀩𑀓𑁄, 𑀇𑀦𑁆𑀤𑀧𑀢𑁆𑀢𑀓𑁄, 𑀓𑀸𑀧𑀺𑀮𑀓𑁄, 𑀪𑀸𑀭𑀼𑀓𑀘𑁆𑀙𑀓𑁄, 𑀦𑀸𑀕𑀭𑀓𑁄. 𑀅𑀗𑁆𑀕𑁂𑀲𑀼 𑀚𑀸𑀢𑁄 𑀅𑀗𑁆𑀕𑀓𑁄, 𑀓𑁄𑀲𑀮𑀓𑁄, 𑀯𑁂𑀤𑁂𑀳𑀓𑁄, 𑀓𑀫𑁆𑀩𑁄𑀚𑀓𑁄, 𑀕𑀦𑁆𑀥𑀸𑀭𑀓𑁄, 𑀲𑁄𑀯𑀻𑀭𑀓𑁄, 𑀲𑀺𑀦𑁆𑀥𑀯𑀓𑁄, 𑀅𑀲𑁆𑀲𑀓𑁄 𑀇𑀘𑁆𑀘𑀸𑀤𑀺. 𑀡𑁂𑀬𑁆𑀬-𑀕𑀗𑁆𑀕𑁂𑀬𑁆𑀬𑁄, 𑀧𑀩𑁆𑀩𑀢𑁂𑀬𑁆𑀬𑁄, 𑀯𑀸𑀦𑁂𑀬𑁆𑀬𑁄. 𑀡𑁂𑀬𑁆𑀬𑀓-𑀓𑁄𑀲𑀮𑁂𑀬𑁆𑀬𑀓𑁄, 𑀩𑀸𑀭𑀸𑀡𑀲𑁂𑀬𑁆𑀬𑀓𑁄, 𑀘𑀫𑁆𑀧𑁂𑀬𑁆𑀬𑀓𑁄, 𑀲𑀺𑀮𑀸𑀬 𑀚𑀸𑀢𑀁 𑀲𑁂𑀮𑁂𑀬𑁆𑀬𑀓𑀁, 𑀫𑀺𑀣𑀺𑀮𑁂𑀬𑁆𑀬𑀓𑁄. 𑀩𑀸𑀭𑀸𑀡𑀲𑁂𑀬𑁆𑀬𑀓𑁄𑀢𑁆𑀬𑀸𑀤𑀻𑀲𑀼 ‘‘𑀤𑀺𑀲𑁆𑀲𑀦𑁆𑀢+𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 𑀏𑀬𑁆𑀬𑀓𑁄, 𑀏𑀯𑀁 𑀉𑀧𑀭𑀺 𑀲𑀼𑀢𑁆𑀢𑁂 𑀤𑀲𑁆𑀲𑀺𑀢𑀧𑀘𑁆𑀘𑀬𑀢𑁄 𑀯𑀺𑀲𑀼𑀁 𑀧𑀘𑁆𑀘𑀬𑁂 𑀤𑀲𑁆𑀲𑀺𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬-𑀕𑀫𑁆𑀫𑁄, 𑀬𑀫𑁆𑀳𑀺 𑀅𑀓𑀸𑀭𑀮𑁄𑀧𑁂 𑀧𑀼𑀩𑁆𑀩𑀭𑀽𑀧𑀁 𑀭𑀲𑁆𑀲𑁄 𑀘. 𑀤𑀺𑀩𑁆𑀩𑁄. 𑀇𑀬-𑀉𑀤𑀭𑀺𑀬𑁄, 𑀤𑀺𑀯𑀺𑀬𑁄, 𑀧𑀜𑁆𑀘𑀸𑀮𑀺𑀬𑁄, 𑀩𑁄𑀥𑀺𑀧𑀓𑁆𑀔𑀺𑀬𑁄, 𑀮𑁄𑀓𑀺𑀬𑁄.

𑁨𑁬. 𑀡𑀺𑀓𑁄

𑀲𑀢𑁆𑀢𑀫𑁆𑀬𑀦𑁆𑀢𑀸 𑀪𑀯𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺. 𑀲𑀭𑀤𑁂 𑀪𑀯𑁄 𑀲𑀸𑀭𑀤𑀺𑀓𑁄 𑀤𑀺𑀯𑀲𑁄, 𑀲𑀸𑀭𑀤𑀺𑀓𑀸 𑀭𑀢𑁆𑀢𑀺.

𑁨𑁭. 𑀢+𑀫𑀲𑁆𑀲 𑀲𑀺𑀧𑁆𑀧𑀁 𑀲𑀻𑀮𑀁 𑀧𑀡𑁆𑀬𑀁 𑀧𑀳𑀭𑀡𑀁 𑀧𑀬𑁄𑀚𑀦𑀁

𑀧𑀞𑀫𑀦𑁆𑀢𑀸 𑀲𑀺𑀧𑁆𑀧𑀸𑀤𑀺𑀯𑀸𑀘𑀓𑀸 𑀅𑀲𑁆𑀲𑁂𑀢𑀺 𑀙𑀝𑁆𑀞𑁆𑀬𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺. 𑀯𑀻𑀡𑀸𑀯𑀸𑀤𑀦𑀁 𑀲𑀺𑀧𑁆𑀧+𑀫𑀲𑁆𑀲 𑀯𑁂𑀡𑀺𑀓𑁄, 𑀯𑀻𑀡𑀸𑀯𑀸𑀤𑀦𑀁 𑀅𑀪𑁂𑀤𑁄𑀧𑀘𑀸𑀭𑁂𑀦 𑀯𑀻𑀡𑀸 𑀦𑀸𑀫. 𑀫𑁄𑀤𑀺𑀗𑁆𑀕𑀺𑀓𑁄, 𑀯𑀁𑀲𑀺𑀓𑁄. 𑀧𑀁𑀲𑀼𑀓𑀽𑀮𑀥𑀸𑀭𑀡𑀁 𑀲𑀻𑀮+𑀫𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑁄, 𑀢𑁂𑀘𑀻𑀯𑀭𑀺𑀓𑁄. 𑀕𑀦𑁆𑀥𑁄 𑀧𑀡𑁆𑀬+𑀫𑀲𑁆𑀲 𑀕𑀦𑁆𑀥𑀺𑀓𑁄, 𑀢𑁂𑀮𑀺𑀓𑁄, 𑀕𑁄𑀴𑀺𑀓𑁄, 𑀧𑀽𑀯𑀺𑀓𑁄, 𑀧𑀡𑁆𑀡𑀺𑀓𑁄, 𑀢𑀫𑁆𑀩𑀼𑀮𑀺𑀓𑁄, 𑀮𑁄𑀡𑀺𑀓𑁄. 𑀘𑀸𑀧𑁄𑀧𑀳𑀭𑀡+𑀫𑀲𑁆𑀲 𑀘𑀸𑀧𑀺𑀓𑁄, 𑀢𑁄𑀫𑀭𑀺𑀓𑁄, 𑀫𑀼𑀕𑁆𑀕𑀭𑀺𑀓𑁄, 𑀫𑁄𑀲𑀮𑀺𑀓𑁄. 𑀉𑀧𑀥𑀺=𑀓𑁆𑀔𑀦𑁆𑀥𑀸𑀤𑀺 𑀧𑀬𑁄𑀚𑀦+𑀫𑀲𑁆𑀲 𑀑𑀧𑀥𑀺𑀓𑀁, 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁.

𑁨𑁮. 𑀢𑀁 𑀳𑀦𑁆𑀢+𑀭𑀳𑀢𑀺 𑀕𑀘𑁆𑀙𑀢𑀼+𑀜𑁆𑀙𑀢𑀺+𑀘𑀭𑀢𑀺

𑀤𑀼𑀢𑀺𑀬𑀦𑁆𑀢𑀸 𑀳𑀦𑁆𑀢𑀻𑀢𑀺 𑀏𑀯𑀫𑀸𑀤𑀻𑀲𑁆𑀯+𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺. 𑀧𑀓𑁆𑀔𑀺𑀦𑁄 𑀳𑀦𑁆𑀢𑀻𑀢𑀺 𑀧𑀓𑁆𑀔𑀺𑀓𑁄, 𑀲𑀸𑀓𑀼𑀡𑀺𑀓𑁄, 𑀫𑀸𑀬𑀽𑀭𑀺𑀓𑁄, 𑀫𑀘𑁆𑀙𑁂 𑀳𑀦𑁆𑀢𑀻𑀢𑀺 𑀫𑀘𑁆𑀙𑀺𑀓𑁄, 𑀫𑁂𑀦𑀺𑀓𑁄. 𑀫𑀺𑀕𑁂 𑀳𑀦𑁆𑀢𑀻𑀢𑀺 𑀫𑀸𑀕𑀯𑀺𑀓𑁄, 𑀯𑀓𑀸𑀭𑀸𑀕𑀫𑁄. 𑀫𑀺𑀕𑀲𑁆𑀲 ‘‘𑀢𑀤𑀫𑀺𑀦𑀸’’𑀤𑀺𑀦𑀸 𑀫𑀕𑀯𑀸𑀤𑁂𑀲𑁂𑀧𑀺 𑀫𑀸𑀕𑀯𑀺𑀓𑁄. 𑀑𑀭𑀩𑁆𑀪𑀺𑀓𑁄, 𑀳𑀸𑀭𑀺𑀡𑀺𑀓𑁄. 𑀲𑀽𑀓𑀭𑀺𑀓𑁄𑀢𑀺 𑀇𑀓𑁄. 𑀲𑀢+𑀫𑀭𑀳𑀢𑀻𑀢𑀺 𑀲𑀸𑀢𑀺𑀓𑀁, 𑀲𑀦𑁆𑀤𑀺𑀝𑁆𑀞𑀺𑀓𑀁, 𑀏𑀳𑀺 𑀧𑀲𑁆𑀲 𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄. 𑀏𑀢𑁆𑀣 𑀢𑁆𑀬𑀸𑀤𑁆𑀬𑀦𑁆𑀢𑀲𑀫𑀼𑀤𑀸𑀬𑀢𑁄 𑀅𑀦𑀼𑀓𑀭𑀡𑀢𑁆𑀢𑀸 𑀯𑀸 𑀢𑀤𑁆𑀥𑀺𑀢𑀲𑁆𑀲 𑀅𑀪𑀺𑀥𑀸𑀦𑀮𑀓𑁆𑀔𑀡𑀢𑁆𑀢𑀸 𑀯𑀸 𑀩𑀳𑀼𑀮𑀁𑀯𑀺𑀥𑀸𑀦𑁂𑀦 𑀯𑀸 𑀧𑀘𑁆𑀘𑀬𑁄. 𑀲𑀸𑀳𑀲𑁆𑀲𑀺𑀓𑁄, 𑀓𑀼𑀫𑁆𑀪𑀺𑀓𑁄, 𑀤𑁄𑀡𑀺𑀓𑁄, 𑀅𑀤𑁆𑀥𑀫𑀸𑀲𑀺𑀓𑁄, 𑀓𑀳𑀸𑀧𑀡𑀺𑀓𑁄, 𑀆𑀲𑀻𑀢𑀺𑀓𑀸 𑀕𑀸𑀣𑀸, 𑀦𑀸𑀯𑀼𑀢𑀺𑀓𑀸. 𑀲𑀳𑀲𑁆𑀲𑀺𑀬𑁄𑀢𑀺 𑀇𑀬𑁄. 𑀧𑀭𑀤𑀸𑀭𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀤𑀸𑀭𑀺𑀓𑁄, 𑀫𑀕𑁆𑀕𑀺𑀓𑁄, 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑁄, 𑀧𑀣𑀺𑀓𑁄. 𑀩𑀤𑀭𑁂 𑀉𑀜𑁆𑀙𑀢𑀻𑀢𑀺 𑀩𑀸𑀤𑀭𑀺𑀓𑁄, 𑀲𑀸𑀫𑀸𑀓𑀺𑀓𑁄. 𑀥𑀫𑁆𑀫𑀁 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄, 𑀅𑀥𑀫𑁆𑀫𑀺𑀓𑁄.

𑁨𑁯. 𑀢𑁂𑀦 𑀓𑀢𑀁 𑀓𑀻𑀢𑀁 𑀩𑀤𑁆𑀥+𑀫𑀪𑀺𑀲𑀗𑁆𑀔𑀢𑀁 𑀲𑀁𑀲𑀝𑁆𑀞𑀁 𑀳𑀢𑀁 𑀳𑀦𑁆𑀢𑀺 𑀚𑀺𑀢𑀁 𑀚𑀬𑀢𑀺 𑀤𑀺𑀩𑁆𑀩𑀢𑀺 𑀔𑀦𑀢𑀺 𑀢𑀭𑀢𑀺 𑀘𑀭𑀢𑀺 𑀯𑀳𑀢𑀺 𑀚𑀻𑀯𑀢𑀺𑀢𑀺

𑀓𑀢𑀸𑀤𑀻𑀲𑁆𑀯+𑀢𑁆𑀣𑁂𑀲𑀼 𑀡𑀺𑀓𑁄. 𑀓𑀸𑀬𑁂𑀦 𑀓𑀢𑀁 𑀓𑀸𑀬𑀺𑀓𑀁, 𑀯𑀸𑀘𑀲𑀺𑀓𑀁, 𑀫𑀸𑀦𑀲𑀺𑀓𑀁𑀢𑀺 𑀲𑀓𑀸𑀕𑀫𑁄. 𑀯𑀸𑀢𑁂𑀦 𑀓𑀢𑁄 𑀆𑀩𑀸𑀥𑁄 𑀯𑀸𑀢𑀺𑀢𑁄, 𑀲𑁂𑀫𑁆𑀳𑀺𑀓𑁄, 𑀧𑀺𑀢𑁆𑀢𑀺𑀓𑁄. 𑀲𑀢𑁂𑀦 𑀓𑀻𑀢𑀁 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁, 𑀯𑀢𑁆𑀣𑁂𑀦 𑀓𑀻𑀢𑀁 𑀯𑀢𑁆𑀣𑀺𑀓𑀁, 𑀓𑀼𑀫𑁆𑀪𑀺𑀓𑀁, 𑀲𑁄𑀯𑀡𑁆𑀡𑀺𑀓𑀁, 𑀖𑀸𑀢𑀺𑀓𑀁. 𑀫𑀽𑀮𑀢𑁄𑀯 𑀧𑀘𑁆𑀘𑀬𑁄, 𑀅𑀫𑀽𑀮𑀯𑀸𑀘𑀺𑀢𑁆𑀢𑀸 𑀤𑁂𑀯𑀤𑀢𑁆𑀢𑁂𑀦 𑀓𑀻𑀢𑁄𑀢𑀺 𑀦 𑀳𑁄𑀢𑀺, 𑀢𑀤𑀢𑁆𑀣𑀸𑀧𑁆𑀧𑀢𑀻𑀢𑀺𑀬𑀸. 𑀯𑀭𑀢𑁆𑀣𑀸𑀬 𑀩𑀤𑁆𑀥𑁄 𑀯𑀸𑀭𑀢𑁆𑀢𑀺𑀓𑁄, 𑀆𑀬𑀲𑀺𑀓𑁄, 𑀧𑀸𑀲𑀺𑀓𑁄, 𑀲𑀼𑀢𑁆𑀢𑀺𑀓𑁄. 𑀖𑀢𑁂𑀦 𑀅𑀪𑀺𑀲𑀗𑁆𑀔𑀢𑀁 𑀲𑀁𑀲𑀝𑁆𑀞𑀁 𑀯𑀸 𑀖𑀸𑀢𑀺𑀓𑀁, 𑀕𑁄𑀴𑀺𑀓𑀁, 𑀤𑀥𑀺𑀓𑀁, 𑀫𑀸𑀭𑀻𑀘𑀺𑀓𑀁. 𑀚𑀸𑀮𑁂𑀦 𑀳𑀢𑁄 𑀳𑀦𑁆𑀢𑀻𑀢𑀺 𑀯𑀸 𑀚𑀸𑀮𑀺𑀓𑁄, 𑀩𑀸𑀮𑀺𑀲𑀺𑀓𑁄. 𑀅𑀓𑁆𑀔𑁂𑀳𑀺 𑀚𑀺𑀢𑀁 𑀅𑀓𑁆𑀔𑀺𑀓𑀁 𑀥𑀦𑀁, 𑀲𑀸𑀮𑀸𑀓𑀺𑀓𑀁, 𑀢𑀺𑀦𑁆𑀤𑀼𑀓𑀺𑀓𑁄, 𑀅𑀫𑁆𑀩𑀨𑀮𑀺𑀓𑁄. 𑀅𑀓𑁆𑀔𑁂𑀳𑀺 𑀚𑀬𑀢𑀺 𑀤𑀺𑀩𑁆𑀩𑀢𑀺 𑀯𑀸 𑀅𑀓𑁆𑀔𑀺𑀓𑁄. 𑀔𑀡𑀺𑀢𑁆𑀢𑀺𑀬𑀸 𑀔𑀦𑀢𑀻𑀢𑀺 𑀔𑀸𑀡𑀺𑀢𑁆𑀢𑀺𑀓𑁄, 𑀓𑀼𑀤𑁆𑀤𑀸𑀮𑀺𑀓𑁄. 𑀤𑁂𑀯𑀤𑀢𑁆𑀢𑁂𑀦 𑀚𑀺𑀢𑀁, 𑀅𑀗𑁆𑀕𑀼𑀮𑁆𑀬𑀸 𑀔𑀦𑀢𑀻𑀢𑀺 𑀦 𑀳𑁄𑀢𑀺, 𑀢𑀤𑀢𑁆𑀣𑀸𑀦𑀯𑀕𑀫𑀸. 𑀉𑀴𑀼𑀫𑁆𑀧𑁂𑀦 𑀢𑀭𑀢𑀻𑀢𑀺 𑀑𑀴𑀼𑀫𑁆𑀧𑀺𑀓𑁄, 𑀉𑀴𑀼𑀫𑁆𑀧𑀺𑀓𑁄𑀢𑀺 𑀇𑀓𑁄. 𑀓𑀼𑀮𑁆𑀮𑀺𑀓𑁄, 𑀕𑁄𑀧𑀼𑀘𑁆𑀙𑀺𑀓𑁄, 𑀦𑀸𑀯𑀺𑀓𑁄. 𑀲𑀓𑀝𑁂𑀦 𑀘𑀭𑀢𑀻𑀢𑀺 𑀲𑀸𑀓𑀝𑀺𑀓𑁄, 𑀭𑀣𑀺𑀓𑁄. 𑀧𑀭𑀧𑁆𑀧𑀺𑀓𑁄𑀢𑀺 𑀇𑀓𑁄. 𑀔𑀦𑁆𑀥𑁂𑀦 𑀯𑀳𑀢𑀻𑀢𑀺 𑀔𑀦𑁆𑀥𑀺𑀓𑁄. 𑀅𑀁𑀲𑀺𑀓𑁄, 𑀲𑀻𑀲𑀺𑀓𑁄𑀢𑀺 𑀇𑀓𑁄. 𑀯𑁂𑀢𑀦𑁂𑀦 𑀚𑀻𑀯𑀢𑀻𑀢𑀺 𑀯𑁂𑀢𑀦𑀺𑀓𑁄, 𑀪𑀢𑀺𑀓𑁄, 𑀓𑀬𑀺𑀓𑁄, 𑀯𑀺𑀓𑁆𑀓𑀬𑀺𑀓𑁄, 𑀓𑀬𑀯𑀺𑀓𑁆𑀓𑀬𑀺𑀓𑁄𑀢𑀺 𑀇𑀓𑁄.

𑁩𑁦. 𑀢𑀲𑁆𑀲 𑀲𑀁𑀯𑀢𑁆𑀢𑀢𑀺

𑀘𑀢𑀼𑀢𑁆𑀣𑁆𑀬𑀦𑁆𑀢𑀸 𑀲𑀁𑀯𑀢𑁆𑀢𑀢𑀻𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂𑀡𑀺𑀓𑁄 𑀳𑁄𑀢𑀺. 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑁄, 𑀇𑀢𑁆𑀣𑀺𑀬𑀁 𑀧𑁄𑀦𑁄𑀩𑁆𑀪𑀯𑀺𑀓𑀸. 𑀮𑁄𑀓𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀮𑁄𑀓𑀺𑀓𑁄. 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄, 𑀲𑀕𑁆𑀕𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀲𑁄𑀯𑀕𑁆𑀕𑀺𑀓𑁄, 𑀲𑀲𑁆𑀲𑁄+𑀯𑀓 𑀢𑀤𑀫𑀺𑀦𑀸𑀤𑀻𑀧𑀸𑀞𑀸. 𑀥𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀥𑀜𑁆𑀜𑀁.

𑁩𑁧. 𑀢𑀢𑁄 𑀲𑀫𑁆𑀪𑀽𑀢+𑀫𑀸𑀕𑀢𑀁

𑀧𑀜𑁆𑀘𑀫𑁆𑀬𑀦𑁆𑀢𑀸 𑀲𑀫𑁆𑀪𑀽𑀢+𑀫𑀸𑀕𑀢𑀦𑁆𑀢𑀺 𑀏𑀢𑁂𑀲𑁆𑀯+𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺. 𑀫𑀸𑀢𑀺𑀢𑁄 𑀲𑀫𑁆𑀪𑀽𑀢+𑀫𑀸𑀕𑀢𑀁𑀯𑀸+𑀢𑀺 𑀏𑀢𑁆𑀣 ‘‘𑀫𑀸𑀢𑀺𑀢𑁄 𑀘 𑀪𑀕𑀺𑀦𑀺𑀬𑀁𑀘𑁆𑀙𑁄’’𑀢𑀺 ‘‘𑀫𑀸𑀢𑀺𑀢𑁄’’𑀢𑀺 𑀪𑀸𑀕𑁂𑀦 𑀉𑀲𑁆𑀲 𑀇𑀫𑁆𑀳𑀺 𑀯𑀸𑀓𑁆𑀬𑀁, 𑀭𑀲𑁆𑀲𑀤𑁆𑀯𑀺𑀢𑁆𑀢𑁂𑀲𑀼 𑀫𑀢𑁆𑀢𑀺𑀓𑀁, 𑀧𑁂𑀢𑁆𑀢𑀺𑀓𑀁. 𑀡𑁆𑀬+𑀭𑀺𑀬𑀡+𑀭𑁆𑀬𑀧𑀘𑁆𑀘𑀬𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀲𑀼𑀭𑀪𑀺𑀢𑁄 𑀲𑀫𑁆𑀪𑀽𑀢𑀁 𑀲𑁄𑀭𑀪𑁆𑀬𑀁. 𑀬𑀫𑁆𑀳𑀺 𑀣𑀜𑁆𑀜𑀁. 𑀉𑀪𑀬𑀢𑁆𑀣 ‘‘𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁’’𑀢𑀺 𑀮𑁄𑀧𑁄. 𑀭𑀺𑀬𑀡-𑀧𑀺𑀢𑀼𑀢𑁄 𑀲𑀫𑁆𑀪𑀽𑀢𑁄 𑀧𑁂𑀢𑁆𑀢𑀺𑀬𑁄, 𑀫𑀸𑀢𑀺𑀬𑁄, ‘‘𑀭𑀸𑀦𑀼𑀩𑀦𑁆𑀥𑁂+𑀦𑁆𑀢𑀲𑀭𑀸𑀤𑀺𑀲𑁆𑀲𑀸’’𑀢𑀺 𑀉𑀮𑁄𑀧𑁄, 𑀫𑀢𑁆𑀢𑀺𑀬𑁄. 𑀭𑁆𑀬𑀫𑁆𑀳𑀺-𑀉𑀮𑁄𑀧𑁄, 𑀘𑀯𑀕𑁆𑀕𑀧𑀼𑀩𑁆𑀩𑀭𑀽𑀧𑀸𑀦𑀺, 𑀫𑀘𑁆𑀘𑁄 𑀯𑀸.

𑁩𑁨. 𑀢𑀢𑁆𑀣 𑀯𑀲𑀢𑀺 𑀯𑀺𑀤𑀺𑀢𑁄 𑀪𑀢𑁆𑀢𑁄 𑀦𑀺𑀬𑀼𑀢𑁆𑀢𑁄

𑀲𑀢𑁆𑀢𑀫𑁆𑀬𑀦𑁆𑀢𑀸 𑀯𑀲𑀢𑀻𑀢𑁆𑀯𑁂𑀯𑀫𑀸𑀤𑀻𑀲𑁆𑀯+𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺. 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀻𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀆𑀭𑀜𑁆𑀜𑀺𑀓𑁄, 𑀭𑀸𑀚𑀕𑀳𑀺𑀓𑁄, 𑀫𑀸𑀕𑀥𑀺𑀓𑁄, 𑀲𑁄𑀲𑀸𑀦𑀺𑀓𑁄. 𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀓𑁄. 𑀘𑀢𑀼𑀫𑀳𑀸𑀭𑀸𑀚𑁂𑀲𑀼 𑀪𑀢𑁆𑀢𑀸 𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸. 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀤𑀲𑁆𑀲𑁄𑀓 𑀢𑀤𑀫𑀺𑀦𑀸𑀤𑀺𑀧𑀸𑀞𑀸. 𑀪𑀡𑁆𑀟𑀸𑀕𑀸𑀭𑀺𑀓𑁄. 𑀇𑀓𑁂-𑀦𑀯𑀓𑀫𑁆𑀫𑀺𑀓𑁄, 𑀆𑀤𑀺𑀓𑀫𑁆𑀫𑀺𑀓𑁄. 𑀓𑀺𑀬𑁂-𑀚𑀸𑀢𑀺𑀓𑀺𑀬𑁄, 𑀅𑀦𑁆𑀥𑀓𑀺𑀬𑁄.

𑁩𑁩. 𑀢𑀲𑁆𑀲𑀺+𑀤𑀁

𑀙𑀝𑁆𑀞𑀺𑀬𑀦𑁆𑀢𑀸 𑀇𑀤+𑀫𑀺𑀘𑁆𑀘+𑀲𑁆𑀫𑀺𑀁 𑀅𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺. 𑀲𑀗𑁆𑀖𑀲𑁆𑀲 𑀇𑀤𑀁 𑀲𑀗𑁆𑀖𑀺𑀓𑀁, 𑀧𑀼𑀕𑁆𑀕𑀮𑀺𑀓𑀁, 𑀲𑀓𑁆𑀬𑀧𑀼𑀢𑁆𑀢𑀺𑀓𑁄, 𑀦𑀸𑀝𑀧𑀼𑀢𑁆𑀢𑀺𑀓𑁄, 𑀚𑁂𑀦𑀤𑀢𑁆𑀢𑀺𑀓𑁄. 𑀓𑀺𑀬𑁂-𑀲𑀲𑁆𑀲 𑀇𑀤𑀁 𑀲𑀓𑀺𑀬𑁄, 𑀧𑀭𑀓𑀺𑀬𑁄. 𑀦𑀺𑀬𑁂𑀅𑀢𑁆𑀢𑀦𑀺𑀬𑀁. 𑀓𑁂-𑀲𑀓𑁄, 𑀭𑀜𑁆𑀜𑁄 𑀇𑀤𑀁 𑀭𑀸𑀚𑀓𑀁 𑀪𑀡𑁆𑀟𑀁.

𑁩𑁪. 𑀡𑁄

𑀙𑀝𑁆𑀞𑀺𑀬𑀦𑁆𑀢𑀸 𑀇𑀤+𑀫𑀺𑀘𑁆𑀘+𑀲𑁆𑀫𑀺𑀁 𑀅𑀢𑁆𑀣𑁂 𑀡𑁄 𑀳𑁄𑀢𑀺. 𑀓𑀘𑁆𑀘𑀸𑀬𑀦𑀲𑁆𑀲 𑀇𑀤𑀁 𑀓𑀘𑁆𑀘𑀸𑀬𑀦𑀁, 𑀩𑁆𑀬𑀸𑀓𑀭𑀡𑀁, 𑀲𑁄𑀕𑀢𑀁 𑀲𑀸𑀲𑀦𑀁, 𑀫𑀸𑀳𑀺𑀲𑀁 𑀫𑀁𑀲𑀸𑀤𑀺.

𑁩𑁫. 𑀕𑀯𑀸𑀤𑀻𑀳𑀺 𑀬𑁄

𑀕𑀯𑀸𑀤𑀻𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀇𑀤+𑀫𑀺𑀘𑁆𑀘+𑀲𑁆𑀫𑀺𑀁 𑀅𑀢𑁆𑀣𑁂 𑀬𑁄 𑀳𑁄𑀢𑀺. 𑀕𑀼𑀦𑁆𑀦𑀁 𑀇𑀤𑀁 𑀕𑀩𑁆𑀬𑀁, 𑀅𑀯𑀗, 𑀫𑀁𑀲𑀸𑀤𑀺. 𑀇𑀮𑁄𑀧𑁂 𑀓𑀩𑁆𑀩𑀁. 𑀤𑀼𑀦𑁄 𑀇𑀤𑀁 𑀤𑀩𑁆𑀩𑀁.

𑁩𑁬. 𑀧𑀺𑀢𑀺𑀢𑁄 𑀪𑀸𑀢𑀭𑀺 𑀭𑁂𑀬𑁆𑀬𑀡

‘‘𑀧𑀺𑀢𑀺𑀢𑁄 𑀫𑀸𑀢𑀺𑀢𑁄’’𑀢𑀺 𑀢𑁂𑀦 𑀢𑁂𑀦 𑀲𑀼𑀢𑁆𑀢𑀦𑀺𑀧𑀸𑀢𑁂𑀦𑁂𑀯 𑀉𑀲𑁆𑀲 𑀇. 𑀧𑀺𑀢𑀼𑀲𑀤𑁆𑀤𑀸 𑀢𑀲𑁆𑀲 𑀪𑀸𑀢𑀭𑀺 𑀭𑁂𑀬𑁆𑀬𑀡. 𑀧𑀺𑀢𑀼 𑀪𑀸𑀢𑀸 𑀧𑁂𑀢𑁆𑀢𑁂𑀬𑁆𑀬𑁄.

𑁩𑁭. 𑀫𑀸𑀢𑀺𑀢𑁄 𑀘 𑀪𑀕𑀺𑀦𑀺𑀬𑀁 𑀘𑁆𑀙𑁄

𑀫𑀸𑀢𑀼𑀢𑁄 𑀘 𑀧𑀺𑀢𑀼𑀢𑁄 𑀘 𑀢𑁂𑀲𑀁 𑀪𑀕𑀺𑀦𑀺𑀬𑀁 𑀘𑁆𑀙𑁄 𑀳𑁄𑀢𑀺. 𑀫𑀸𑀢𑀼 𑀪𑀕𑀺𑀦𑀺 𑀫𑀸𑀢𑀼𑀘𑁆𑀙𑀸, 𑀧𑀺𑀢𑀼 𑀪𑀕𑀺𑀦𑀺 𑀧𑀺𑀢𑀼𑀘𑁆𑀙𑀸. 𑀓𑀣𑀁 ‘‘𑀫𑀸𑀢𑀼 𑀪𑀸𑀢𑀸 𑀫𑀸𑀢𑀼𑀮𑁄’’𑀢𑀺, ‘‘𑀫𑀸𑀢𑀼𑀮𑀸𑀤𑀺𑀢𑁆𑀯𑀸𑀦𑀻’’𑀢𑀺 𑀦𑀺𑀧𑀸𑀢𑀦𑀸 𑀮𑀧𑀘𑁆𑀘𑀬𑁄.

𑁩𑁮. 𑀫𑀸𑀢𑀸𑀧𑀺𑀢𑀽𑀲𑁆𑀯𑀸+𑀫𑀳𑁄

𑀫𑀸𑀢𑀸𑀧𑀺𑀢𑀽𑀳𑀺 𑀢𑁂𑀲𑀁 𑀫𑀸𑀢𑀸𑀧𑀺𑀢𑀽𑀲𑁆𑀯𑀸+𑀫𑀳𑁄 𑀳𑁄𑀢𑀺. 𑀫𑀸𑀢𑀼 𑀫𑀸𑀢𑀸 𑀫𑀸𑀢𑀸𑀫𑀳𑀻, 𑀫𑀸𑀢𑀼 𑀧𑀺𑀢𑀸 𑀫𑀸𑀢𑀸𑀫𑀳𑁄. 𑀧𑀺𑀢𑀼 𑀫𑀸𑀢𑀸 𑀧𑀺𑀢𑀸𑀫𑀳𑀻, 𑀧𑀺𑀢𑀼 𑀧𑀺𑀢𑀸 𑀧𑀺𑀢𑀸𑀫𑀳𑁄. 𑀦 𑀬𑀣𑀸𑀲𑀗𑁆𑀔𑁆𑀬𑀁 𑀧𑀘𑁆𑀘𑁂𑀓𑀸𑀪𑀺𑀲𑀫𑁆𑀩𑀦𑁆𑀥𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀫𑀸𑀢𑀸𑀧𑀺𑀢𑀼𑀲𑀤𑁆𑀤𑁂𑀳𑀺 𑀢𑁂𑀲𑀁 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀅𑀢𑁆𑀣𑁂 𑀧𑀘𑁆𑀘𑀬𑁄 𑀳𑁄𑀢𑀺.

𑁩𑁯. 𑀳𑀺𑀢𑁂 𑀭𑁂𑀬𑁆𑀬𑀡

𑀫𑀸𑀢𑀸𑀧𑀺𑀢𑀽𑀳𑀺 𑀳𑀺𑀢𑁂 𑀭𑁂𑀬𑁆𑀬𑀡 𑀳𑁄𑀢𑀺. 𑀫𑀸𑀢𑀼 𑀳𑀺𑀢𑁄 𑀫𑀢𑁆𑀢𑁂𑀬𑁆𑀬𑁄, 𑀧𑁂𑀢𑁆𑀢𑁂𑀬𑁆𑀬𑁄.

𑁪𑁦. 𑀦𑀺𑀦𑁆𑀤𑀸+𑀜𑁆𑀜𑀸𑀢+𑀧𑁆𑀧 𑀧𑀝𑀺𑀪𑀸𑀕 𑀭𑀲𑁆𑀲 𑀤𑀬𑀸 𑀲𑀜𑁆𑀜𑀸𑀲𑀼 𑀓𑁄

𑀦𑀺𑀦𑁆𑀤𑀸𑀤𑀻𑀲𑁆𑀯+𑀢𑁆𑀣𑁂𑀲𑀼 𑀦𑀸𑀫𑀲𑁆𑀫𑀸 𑀓𑁄 𑀳𑁄𑀢𑀺. 𑀦𑀺𑀦𑁆𑀤𑀸𑀬𑀁-𑀦𑀺𑀦𑁆𑀤𑀺𑀢𑁄 𑀫𑀼𑀡𑁆𑀟𑁄 𑀫𑀼𑀡𑁆𑀟𑀓𑁄, 𑀏𑀯𑀁 𑀲𑀫𑀡𑀓𑁄, 𑀧𑀡𑁆𑀟𑀺𑀢𑀓𑁄, 𑀩𑁆𑀭𑀸𑀳𑁆𑀫𑀡𑀓𑁄, 𑀯𑁂𑀬𑁆𑀬𑀸𑀓𑀭𑀡𑀓𑁄. 𑀅𑀜𑁆𑀜𑀸𑀢𑁂-𑀓𑀲𑁆𑀲𑀸+𑀬𑀁 𑀅𑀲𑁆𑀲𑁄 𑀅𑀲𑁆𑀲𑀓𑁄, 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀲𑀫𑁆𑀩𑀦𑁆𑀥𑀺𑀯𑀺𑀲𑁂𑀲𑀸𑀦𑀸𑀯𑀕𑀫𑁄+𑀯𑀕𑀫𑁆𑀬𑀢𑁂. 𑀅𑀧𑁆𑀧𑀢𑁆𑀣𑁂-𑀅𑀧𑁆𑀧𑀓𑀁 𑀢𑁂𑀮𑀁 𑀢𑁂𑀮𑀓𑀁, 𑀖𑀢𑀓𑀁. 𑀧𑀝𑀺𑀪𑀸𑀕𑀢𑁆𑀣𑁂-𑀳𑀢𑁆𑀣𑀻 𑀯𑀺𑀬 𑀳𑀢𑁆𑀣𑀺𑀓𑁄, 𑀅𑀲𑁆𑀲𑀓𑁄, 𑀩𑀮𑀻𑀩𑀤𑁆𑀥𑀓𑁄. ‘‘𑀇𑀫𑁂 𑀦𑁄 𑀳𑀢𑁆𑀣𑀺𑀓𑀸 𑀅𑀲𑁆𑀲𑀸, 𑀩𑀮𑀻𑀩𑀤𑁆𑀥𑀸 𑀘 𑀦𑁄 𑀇𑀫𑁂’’𑀢𑁆𑀬𑀸𑀤𑀺𑀧𑀸𑀞𑁂 ‘‘𑀮𑁄𑀧𑁄’’𑀢𑀺 𑀓𑀧𑀘𑁆𑀘𑀬𑀮𑁄𑀧𑁂𑀦 𑀯𑀸 𑀅𑀪𑁂𑀤𑁄𑀧𑀘𑀸𑀭𑁂𑀦 𑀯𑀸 𑀤𑀝𑁆𑀞𑀩𑁆𑀩𑀁, 𑀇𑀫𑁂 𑀘 𑀤𑀸𑀭𑀼𑀆𑀤𑀻𑀳𑀺 𑀓𑀢𑀭𑀽𑀧𑀸𑀦𑀺. 𑀭𑀲𑁆𑀲𑁂𑀭𑀲𑁆𑀲𑁄 𑀫𑀸𑀦𑀼𑀲𑁄 𑀫𑀸𑀦𑀼𑀲𑀓𑁄, 𑀭𑀼𑀓𑁆𑀔𑀓𑁄, 𑀧𑀺𑀮𑀓𑁆𑀔𑀓𑁄. 𑀤𑀬𑀸𑀬𑀁-𑀤𑀬𑀺𑀢𑁄=𑀦𑀼𑀓𑀫𑁆𑀧𑀺𑀢𑁄 𑀧𑀼𑀢𑁆𑀢𑁄 𑀧𑀼𑀢𑁆𑀢𑀓𑁄, 𑀯𑀘𑁆𑀙𑀓𑁄. 𑀲𑀜𑁆𑀜𑀸𑀬𑀁-𑀫𑁄𑀭𑁄 𑀯𑀺𑀬 𑀫𑁄𑀭𑀓𑁄, 𑀓𑀢𑀓𑁄, 𑀪𑀢𑀓𑁄.

𑁪𑁧. 𑀢+𑀫𑀲𑁆𑀲 𑀧𑀭𑀺𑀫𑀸𑀡𑀁 𑀡𑀺𑀓𑁄 𑀘

𑀧𑀞𑀫𑀦𑁆𑀢𑀸 𑀅𑀲𑁆𑀲𑁂𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺 𑀓𑁄 𑀘, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺. 𑀤𑁄𑀡𑀸𑀤𑀻𑀦𑀁 𑀧𑀭𑀺𑀫𑀺𑀢𑀯𑀻𑀳𑀸𑀤𑀻𑀦𑀁 𑀓𑀭𑀡𑀢𑁆𑀢𑀸 ‘‘𑀧𑀭𑀺𑀫𑀻𑀬𑀦𑁆𑀢𑁆𑀬+𑀦𑁂𑀦𑀸𑀢𑀺 𑀧𑀭𑀺𑀫𑀸𑀡’’𑀦𑁆𑀢𑀺 𑀳𑁄𑀢𑀺. 𑀤𑁄𑀡𑁄 𑀧𑀭𑀺𑀫𑀸𑀡+𑀫𑀲𑁆𑀲𑀸𑀢𑀺 𑀤𑁄𑀡𑀺𑀓𑁄 𑀯𑀻𑀳𑀺, 𑀔𑀸𑀭𑀲𑀢𑀺𑀓𑁄, 𑀔𑀸𑀭𑀲𑀳𑀲𑁆𑀲𑀺𑀓𑁄, 𑀆𑀲𑀻𑀢𑀺𑀓𑁄 𑀯𑀬𑁄, 𑀉𑀧𑀟𑁆𑀠𑀓𑀸𑀬𑁄 𑀧𑀭𑀺𑀫𑀸𑀡+𑀫𑀲𑁆𑀲 𑀉𑀧𑀟𑁆𑀠𑀓𑀸𑀬𑀺𑀓𑀁 𑀩𑀺𑀫𑁆𑀩𑁄𑀳𑀦𑀁. 𑀧𑀜𑁆𑀘𑀓𑀁, 𑀙𑀓𑁆𑀓𑀁.

𑁪𑁨. 𑀬+𑀢𑁂+𑀢𑁂𑀳𑀺+𑀢𑁆𑀢𑀓𑁄

𑀬𑀸𑀤𑀻𑀳𑀺 𑀧𑀞𑀫𑀦𑁆𑀢𑁂𑀳𑀺 𑀅𑀲𑁆𑀲𑁂𑀢𑀺 𑀙𑀝𑁆𑀞𑁆𑀬𑀢𑁆𑀣𑁂 𑀢𑁆𑀢𑀓𑁄 𑀳𑁄𑀢𑀺, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺. 𑀬𑀁 𑀧𑀭𑀺𑀫𑀸𑀡+𑀫𑀲𑁆𑀲 𑀬𑀢𑁆𑀢𑀓𑀁, 𑀢𑀢𑁆𑀢𑀓𑀁, ‘‘𑀏𑀢𑀲𑁆𑀲𑁂𑀝 𑀢𑁆𑀢𑀓𑁂’’𑀢𑀺 𑀏𑀢𑀲𑁆𑀲 𑀏𑀝, 𑀏𑀢𑁆𑀢𑀓𑀁. 𑀆𑀯𑀢𑀓𑁂-𑀬𑀁 𑀧𑀭𑀺𑀫𑀸𑀡+𑀫𑀲𑁆𑀲 𑀬𑀸𑀯𑀢𑀓𑁄, 𑀢𑀸𑀯𑀢𑀓𑁄.

𑁪𑁩. 𑀲𑀩𑁆𑀩𑀸 𑀘𑀸+𑀯𑀦𑁆𑀢𑀼

𑀲𑀩𑁆𑀩𑀢𑁄 𑀧𑀞𑀫𑀦𑁆𑀢𑀸 𑀬𑀸𑀤𑀻𑀳𑀺 𑀘 𑀅𑀲𑁆𑀲𑁂𑀢𑀺 𑀙𑀝𑁆𑀞𑁆𑀬𑀢𑁆𑀣𑁂 𑀆𑀯𑀦𑁆𑀢𑀼 𑀳𑁄𑀢𑀺, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺. 𑀲𑀩𑁆𑀩𑀁 𑀧𑀭𑀺𑀫𑀸𑀡+𑀫𑀲𑁆𑀲 𑀲𑀩𑁆𑀩𑀸𑀯𑀦𑁆𑀢𑀁, ‘‘𑀅𑀁𑀗𑀁 𑀦𑀧𑀼𑀁𑀲𑀓𑁂’’𑀢𑀺 𑀅𑀁. 𑀬𑀸𑀯𑀦𑁆𑀢𑀁, 𑀢𑀸𑀯𑀦𑁆𑀢𑀁.

𑁪𑁪. 𑀓𑀺𑀫𑁆𑀳𑀸 𑀭𑀢𑀺+𑀭𑀻𑀯+𑀭𑀻𑀯𑀢𑀓+𑀭𑀺𑀢𑁆𑀢𑀓𑀸

𑀓𑀺𑀫𑁆𑀳𑀸 𑀧𑀞𑀫𑀦𑁆𑀢𑀸 𑀅𑀲𑁆𑀲𑁂𑀢𑀺 𑀙𑀝𑁆𑀞𑁆𑀬𑀢𑁆𑀣𑁂 𑀭𑀢𑀺+𑀭𑀻𑀯+𑀭𑀻𑀯𑀢𑀓+𑀭𑀺𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀓𑀺𑀁𑀲𑀗𑁆𑀔𑁆𑀬𑀸𑀦𑀁 𑀧𑀭𑀺𑀫𑀸𑀡+𑀫𑁂𑀲𑀁 𑀓𑀢𑀺, 𑀭𑀸𑀦𑀼𑀩𑀦𑁆𑀥𑀢𑁆𑀢𑀸 𑀇𑀁𑀪𑀸𑀕𑀮𑁄𑀧𑁄. 𑀓𑀻𑀯, 𑀓𑀻𑀯𑀢𑀓𑀁, 𑀓𑀺𑀢𑁆𑀢𑀓𑀁. 𑀭𑀻𑀯𑀦𑁆𑀢𑁄 𑀲𑀪𑀸𑀯𑀢𑁄 𑀅𑀲𑀁𑀔𑁆𑀬𑁄.

𑁪𑁫. 𑀲𑀜𑁆𑀚𑀸𑀢𑀁 𑀢𑀸𑀭𑀓𑀸𑀤𑀺𑀢𑁆𑀯𑀺+𑀢𑁄𑀢𑀺

𑀲𑀜𑁆𑀚𑀸𑀢𑀢𑁆𑀣𑁂 𑀇𑀢𑁄. 𑀢𑀸𑀭𑀓𑀸 𑀲𑀜𑁆𑀚𑀸𑀢𑀸 𑀅𑀲𑁆𑀲 𑀢𑀸𑀭𑀓𑀺𑀢𑀁 𑀕𑀕𑀦𑀁, 𑀧𑀼𑀧𑁆𑀨𑀸𑀦𑀺 𑀲𑀜𑁆𑀚𑀸𑀢𑀸𑀦𑀺 𑀅𑀲𑁆𑀲 𑀧𑀼𑀧𑁆𑀨𑀺𑀢𑁄 𑀭𑀼𑀓𑁆𑀔𑁄, 𑀧𑀮𑁆𑀮𑀯𑀺𑀢𑀸 𑀮𑀢𑀸.

𑁪𑁬. 𑀫𑀸𑀦𑁂 𑀫𑀢𑁆𑀢𑁄

𑀧𑀞𑀫𑀦𑁆𑀢𑀸 𑀫𑀸𑀦𑀯𑀼𑀢𑁆𑀢𑀺𑀢𑁄 𑀅𑀲𑁆𑀲𑁂𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀫𑀢𑁆𑀢𑁄 𑀳𑁄𑀢𑀺. 𑀧𑀮𑀁 𑀉𑀫𑁆𑀫𑀸𑀦+𑀫𑀲𑁆𑀲 𑀧𑀮𑀫𑀢𑁆𑀢𑀁. 𑀳𑀢𑁆𑀣𑁄 𑀧𑀡𑀸𑀫+𑀫𑀲𑁆𑀲 𑀳𑀢𑁆𑀣𑀫𑀢𑁆𑀢𑀁. 𑀲𑀢𑀁 𑀫𑀸𑀦+𑀫𑀲𑁆𑀲 𑀲𑀢𑀫𑀢𑁆𑀢𑀁. 𑀤𑁄𑀡𑁄 𑀧𑀭𑀺𑀫𑀸𑀡+𑀫𑀲𑁆𑀲 𑀤𑁄𑀡𑀫𑀢𑁆𑀢𑀁. 𑀅𑀪𑁂𑀤𑁄𑀧𑀘𑀸𑀭𑀸 𑀤𑁄𑀡𑁄𑀢𑀺𑀧𑀺 𑀳𑁄𑀢𑀺. 𑀫𑀻𑀬𑀢𑁂+𑀦𑁂𑀦𑀸𑀢𑀺 𑀫𑀸𑀦𑀁, 𑀫𑀸𑀦𑀲𑁆𑀲 𑀲𑀫𑁆𑀩𑀦𑁆𑀥𑀺𑀢𑁆𑀢𑀸 𑀙𑀝𑁆𑀞𑁆𑀬𑀦𑁆𑀢𑀪𑀽𑀢𑀸𑀦𑀫𑁂𑀯 𑀯𑀺𑀥𑀺 𑀳𑁄𑀢𑀺. 𑀏𑀢𑁆𑀣 𑀘 𑁋

𑀉𑀤𑁆𑀥𑀫𑀸𑀦𑀦𑁆𑀢𑀼 𑀉𑀫𑁆𑀫𑀸𑀦𑀁, 𑀧𑀭𑀺𑀫𑀸𑀡𑀦𑁆𑀢𑀼 𑀲𑀩𑁆𑀩𑀢𑁄;

𑀧𑀫𑀸𑀡𑀁 𑀳𑁄𑀢𑀺 𑀆𑀬𑀸𑀫𑁄, 𑀲𑀁𑀔𑁆𑀬𑀸𑀲𑁂𑀲𑁄 𑀢𑀼 𑀲𑀩𑁆𑀩𑀢𑁄.

𑁪𑁭. 𑀢𑀕𑁆𑀖𑁄 𑀘𑀼+𑀤𑁆𑀥𑀁

𑀉𑀤𑁆𑀥𑀫𑀸𑀦𑀯𑀼𑀢𑁆𑀢𑀺𑀢𑁄 𑀢𑀕𑁆𑀖𑁄 𑀳𑁄𑀢𑀺 𑀫𑀢𑁆𑀢𑁄 𑀘. 𑀚𑀡𑁆𑀡𑀼 𑀧𑀭𑀺𑀫𑀸𑀡+𑀫𑀲𑁆𑀲 𑀚𑀡𑁆𑀡𑀼𑀢𑀕𑁆𑀖𑀁, 𑀚𑀡𑁆𑀡𑀼𑀫𑀢𑁆𑀢𑀁.

𑁪𑁮. 𑀡𑁄 𑀘 𑀧𑀼𑀭𑀺𑀲𑀸𑀢𑀺

𑀧𑀼𑀭𑀺𑀲𑀸 𑀡𑁄 𑀳𑁄𑀢𑀺 𑀫𑀢𑁆𑀢𑀸𑀤𑀬𑁄 𑀘. 𑀧𑀼𑀭𑀺𑀲𑁄 𑀧𑀭𑀺𑀫𑀸𑀡+𑀫𑀲𑁆𑀲 𑀧𑁄𑀭𑀺𑀲𑀁, 𑀧𑀼𑀭𑀺𑀲𑀫𑀢𑁆𑀢𑀁+𑀧𑀼𑀭𑀺𑀲𑀢𑀕𑁆𑀖𑀁.

𑁪𑁯. 𑀅𑀬𑀼+𑀪𑀤𑁆𑀯𑀺𑀢𑀻𑀳𑀁+𑀲𑁂

𑀉𑀪𑀤𑁆𑀯𑀺𑀢𑀻𑀳𑀺 𑀅𑀯𑀬𑀯𑀯𑀼𑀢𑁆𑀢𑀻𑀳𑀺 𑀅𑀬𑁄 𑀳𑁄𑀢𑀺. 𑀉𑀪𑁄 𑀅𑀁𑀲𑀸 𑀅𑀲𑁆𑀲 𑀉𑀪𑀬𑀁, 𑀤𑁆𑀯𑀬𑀁, 𑀢𑀬𑀁. 𑀅𑀁𑀲𑀲𑀫𑁆𑀩𑀦𑁆𑀥𑁂𑀦 𑀲𑀫𑀼𑀤𑀸𑀬𑁂 𑀯𑀺𑀥𑀺 𑀳𑁄𑀢𑀻𑀢𑀺 𑀦 𑀉𑀪𑀬𑀸𑀤𑀺𑀢𑁄 𑀩𑀳𑀼𑀯𑀘𑀦𑀦𑁆𑀢𑀺 𑀘𑁂, ‘‘𑀭𑀸𑀳𑀼𑀦𑁄 𑀲𑀺𑀭𑁄’’ 𑀢𑁆𑀬𑀸𑀤𑁄 𑀅𑀪𑁂𑀤𑁂𑀧𑀺 𑀪𑁂𑀤𑀯𑀺𑀯𑀓𑁆𑀔𑀸𑀬 𑀮𑀩𑁆𑀪𑀫𑀸𑀦𑀢𑁄 𑀩𑀳𑀼𑀯𑀘𑀦𑀁 𑀳𑁄𑀢𑁂𑀯.

𑁫𑁦. 𑀲𑀗𑁆𑀔𑁆𑀬𑀸𑀬 𑀲𑀘𑁆𑀘𑀼+𑀢𑀻+𑀲𑀸+𑀲+𑀤𑀲𑀦𑁆𑀢𑀸𑀬𑀸+𑀥𑀺𑀓𑀸+𑀲𑁆𑀫𑀺𑀁 𑀲𑀢𑀲𑀳𑀲𑁆𑀲𑁂 𑀟𑁄

𑀲𑀢𑁆𑀬𑀦𑁆𑀢𑀸𑀬 𑀉𑀢𑁆𑀬𑀦𑁆𑀢𑀸𑀬 𑀈𑀲𑀦𑁆𑀢𑀸𑀬 𑀆𑀲𑀦𑁆𑀢𑀸𑀬 𑀤𑀲𑀦𑁆𑀢𑀸𑀬 𑀲𑀗𑁆𑀔𑁆𑀬𑀸𑀬 𑀧𑀞𑀫𑀦𑁆𑀢𑀸𑀬 𑀅𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀟𑁄 𑀳𑁄𑀢𑀺, 𑀲𑀸 𑀘𑁂 𑀲𑀗𑁆𑀔𑁆𑀬𑀸 𑀅𑀥𑀺𑀓𑀸 𑀳𑁄𑀢𑀺, 𑀬+𑀤𑀲𑁆𑀫𑀺𑀦𑁆𑀢𑀺, 𑀢𑀁 𑀘𑁂 𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸 𑀳𑁄𑀢𑀺. 𑀯𑀻𑀲𑀢𑀺 𑀅𑀥𑀺𑀓𑀸 𑀅𑀲𑁆𑀫𑀺𑀁 𑀲𑀢𑁂𑀢𑀺 𑀯𑀻𑀲𑀁𑀲𑀢𑀁.

𑁧𑁩𑁯. 𑀟𑁂 𑀲𑀢𑀺𑀲𑁆𑀲 𑀢𑀺𑀲𑁆𑀲𑀢𑀺

𑀟𑁂 𑀧𑀭𑁂 𑀲𑀢𑁆𑀬𑀦𑁆𑀢𑀲𑁆𑀲 𑀢𑀺𑀓𑀸𑀭𑀲𑁆𑀲 𑀮𑁄𑀧𑁄 𑀳𑁄𑀢𑀺. 𑀏𑀓𑀯𑀻𑀲𑀁𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸. 𑀢𑀺𑀁𑀲𑀢𑀺 𑀅𑀥𑀺𑀓𑀸 𑀅𑀲𑁆𑀫𑀺𑀁 𑀲𑀢𑀸𑀤𑀺𑀓𑁂𑀢𑀺 𑀢𑀺𑀁𑀲𑀲𑀢𑀁 𑀏𑀓𑀢𑀺𑀁𑀲𑀲𑀢𑀁 𑀇𑀘𑁆𑀘𑀸𑀤𑀺. 𑀉𑀢𑁆𑀬𑀦𑁆𑀢𑀸𑀬𑀦𑀯𑀼𑀢𑀺 𑀅𑀥𑀺𑀓𑀸 𑀅𑀲𑁆𑀫𑀺𑀁 𑀲𑀢𑀸𑀤𑀺𑀓𑁂𑀢𑀺 𑀦𑀯𑀼𑀢𑀁𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸. 𑀈𑀲𑀦𑁆𑀢𑀸𑀬-𑀘𑀢𑁆𑀢𑀸𑀮𑀻𑀲𑀁 𑀅𑀥𑀺𑀓𑀸 𑀅𑀲𑁆𑀫𑀺𑀁 𑀲𑀢𑁂 𑀲𑀳𑀲𑁆𑀲𑁂 𑀲𑀢𑀲𑀳𑀲𑁆𑀲𑁂𑀢𑀺 𑀘𑀢𑁆𑀢𑀸𑀮𑀻𑀲𑀲𑀢+𑀫𑀺𑀘𑁆𑀘𑀸𑀤𑀺. 𑀆𑀲𑀦𑁆𑀢𑀸𑀬 𑀏𑀯𑀁, 𑀧𑀜𑁆𑀜𑀸𑀲𑀁𑀲𑀢+𑀫𑀺𑀘𑁆𑀘𑀸𑀤𑀺. 𑀤𑀲𑀦𑁆𑀢𑀸𑀬-𑀏𑀓𑀸𑀤𑀲𑀁𑀲𑀢+𑀫𑀺𑀘𑁆𑀘𑀸𑀤𑀺.

𑁫𑁧. 𑀢𑀲𑁆𑀲 𑀧𑀽𑀭𑀡𑁂+𑀓𑀸𑀤𑀲𑀸𑀤𑀺𑀢𑁄 𑀯𑀸

𑀙𑀝𑁆𑀞𑀺𑀬𑀦𑁆𑀢𑀸𑀬𑁂+𑀓𑀸𑀤𑀲𑀸𑀤𑀺𑀓𑀸𑀬 𑀲𑀁𑀔𑁆𑀬𑀸𑀬 𑀟𑁄 𑀳𑁄𑀢𑀺 𑀧𑀽𑀭𑀡𑀢𑁆𑀣𑁂 𑀯𑀺𑀪𑀸𑀲𑀸. 𑀲𑀸 𑀲𑀁𑀔𑁆𑀬𑀸 𑀧𑀽𑀭𑀺𑀬𑀢𑁂 𑀬𑁂𑀦 𑀢𑀁 𑀧𑀽𑀭𑀡𑀁. 𑀏𑀓𑀸𑀤𑀲𑀦𑁆𑀦𑀁 𑀧𑀽𑀭𑀡𑁄 𑀏𑀓𑀸𑀤𑀲𑁄. 𑀅𑀜𑁆𑀜𑀢𑁆𑀭 ‘‘𑀫 𑀧𑀜𑁆𑀘𑀸𑀤𑀺𑀓𑀢𑀻𑀳𑀻’’𑀢𑀺 𑀫𑁄, 𑀏𑀓𑀸𑀤𑀲𑀫𑁄. 𑀯𑀻𑀲𑀢𑀺𑀬𑀸 𑀧𑀽𑀭𑀡𑁄 𑀯𑀻𑀲𑁄 𑀯𑀻𑀲𑀢𑀺𑀫𑁄, 𑀢𑀺𑀁𑀲𑁄, 𑀢𑀺𑀁𑀲𑀢𑀺𑀫𑁄. 𑀯𑀸𑀲𑀤𑁆𑀤𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀦𑀺𑀘𑁆𑀘𑀁 𑀘𑀢𑁆𑀢𑀸𑀮𑀻𑀲𑁄 𑀧𑀜𑁆𑀜𑀸𑀲𑁄.

𑁫𑁨. 𑀫 𑀧𑀜𑁆𑀘𑀸𑀤𑀺𑀓𑀢𑀻𑀳𑀺𑀢𑀺

𑀫𑀧𑀘𑁆𑀘𑀬𑁂 𑀧𑀜𑁆𑀘𑀫𑁄, 𑀧𑀜𑁆𑀘𑀫𑀻. 𑀲𑀢𑁆𑀢𑀫𑁄, 𑀲𑀢𑁆𑀢𑀫𑀻. 𑀅𑀝𑁆𑀞𑀫𑁄, 𑀅𑀝𑁆𑀞𑀫𑀻. 𑀓𑀢𑀺𑀫𑁄, 𑀓𑀢𑀺𑀫𑀻 𑀇𑀘𑁆𑀘𑀸𑀤𑀺.

𑁫𑁩. 𑀲𑀣𑀸𑀤𑀻𑀦+𑀫𑀺 𑀘𑀢𑀺

𑀲𑀢𑀸𑀤𑀻𑀦𑀁 𑀫𑁄 𑀘 𑀅𑀦𑁆𑀢𑀸𑀤𑁂𑀲𑁄 𑀇 𑀘. 𑀲𑀢𑀲𑁆𑀲 𑀧𑀽𑀭𑀡𑁄 𑀲𑀢𑀺𑀫𑁄, 𑀲𑀳𑀲𑁆𑀲𑀺𑀫𑁄.

𑁫𑁪. 𑀙𑀸 𑀝𑁆𑀞+𑀝𑁆𑀞𑀫𑀸𑀢𑀺

𑀙𑀲𑀤𑁆𑀤𑀸 𑀧𑀽𑀭𑀡𑀢𑁆𑀣𑁂 𑀝𑁆𑀞+𑀝𑁆𑀞𑀫𑀸. 𑀙𑀦𑁆𑀦𑀁 𑀧𑀽𑀭𑀡𑁄 𑀙𑀝𑁆𑀞𑁄, 𑀙𑀝𑁆𑀞𑀫𑁄. 𑀇𑀢𑁆𑀣𑀺𑀬𑀁 𑀙𑀝𑁆𑀞𑀻, 𑀙𑀝𑁆𑀞𑀫𑀻. ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑁆𑀯𑁂+𑀲𑀁 𑀢𑀢𑀺𑀬𑀧𑀞𑀫𑀸’’𑀢𑀺 𑀦𑀺𑀧𑀸𑀢𑀦𑀸 𑀧𑀽𑀭𑀡𑀢𑁆𑀣𑁂 𑀤𑁆𑀯𑀺𑀢𑁄 𑀢𑀺𑀬𑁄 𑀤𑁆𑀯𑀺𑀲𑁆𑀲 𑀤𑀼 𑀘, 𑀢𑀺𑀘𑀢𑀽𑀳𑀺 𑀢𑀺𑀲𑁆𑀲 𑀅, 𑀢𑀺𑀬+𑀢𑁆𑀣𑀸 𑀘 𑀬𑀣𑀸𑀓𑁆𑀓𑀫𑀁, 𑀤𑀼𑀢𑀺𑀬𑁄 𑀢𑀢𑀺𑀬𑁄, 𑀘𑀢𑀼𑀢𑁆𑀣𑁄.

𑁫𑁫. 𑀏𑀓𑀸 𑀓𑀸+𑀓𑁆𑀬+𑀲𑀳𑀸𑀬𑁂

‘‘𑀲𑀢𑀺 𑀩𑁆𑀬𑀪𑀺𑀘𑀸𑀭𑁂 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁’’𑀢𑀺 𑀜𑀸𑀬𑀸 𑀲𑀁𑀔𑁆𑀬𑀸𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀅𑀲𑀳𑀸𑀬𑁂’’𑀢𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀫𑀸 𑀅𑀲𑀳𑀸𑀬𑀢𑁆𑀣𑁂 𑀓+𑀆𑀓𑀻 𑀳𑁄𑀦𑁆𑀢𑀺 𑀯𑀸. 𑀏𑀓𑁄𑀯 𑀏𑀓𑀓𑁄, 𑀏𑀓𑀸𑀓𑀻, 𑀏𑀓𑁄 𑀯𑀸.

𑁫𑁬. 𑀯𑀘𑁆𑀙𑀸𑀤𑀻𑀳𑀺 𑀢𑀦𑀼𑀢𑁆𑀢𑁂 𑀢𑀭𑁄

𑀯𑀘𑁆𑀙𑀸𑀤𑀻𑀦𑀁 𑀲𑀪𑀸𑀯𑀲𑁆𑀲 𑀢𑀦𑀼𑀢𑁆𑀢𑁂=𑀓𑀺𑀜𑁆𑀘𑀺𑀫𑀢𑁆𑀢𑀸𑀯𑀲𑁂𑀲𑁂 𑀢𑀭𑁄 𑀳𑁄𑀢𑀺. 𑀲𑁄=𑀲𑀓𑁄 𑀪𑀸𑀯𑁄 𑀲𑀪𑀸𑀯𑁄 𑀅𑀢𑁆𑀢𑀦𑀺𑀬𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀲𑀼𑀲𑀼𑀢𑁆𑀢𑀲𑁆𑀲 𑀢𑀦𑀼𑀢𑁆𑀢𑁂 𑀯𑀘𑁆𑀙𑀢𑀭𑁄, 𑀇𑀢𑁆𑀣𑀺𑀬𑀁 𑀯𑀘𑁆𑀙𑀢𑀭𑀻. 𑀬𑁄𑀩𑁆𑀩𑀦𑀲𑁆𑀲 𑀢𑀦𑀼𑀢𑁆𑀢𑁂 𑀑𑀓𑁆𑀔𑀢𑀭𑁄. 𑀑𑀓𑁆𑀔𑀸=𑀤𑀼𑀢𑀺𑀬𑀯𑀬𑀝𑁆𑀞𑀕𑁄𑀡𑁄. 𑀅𑀲𑁆𑀲𑀪𑀸𑀯𑀲𑁆𑀲 𑀢𑀦𑀼𑀢𑁆𑀢𑁂 𑀅𑀲𑁆𑀲𑀢𑀭𑁄. 𑀕𑀸𑀯𑁄𑀢𑀺 𑀚𑀸𑀢𑀺𑀲𑀸𑀫𑀢𑁆𑀣𑀺𑀬𑀲𑁆𑀲 𑀢𑀦𑀼𑀢𑁆𑀢𑁂 𑀉𑀲𑀪𑀢𑀭𑁄. 𑀏𑀢𑁆𑀣 𑀢𑀦𑀼𑀢𑁆𑀢𑀁 𑀅𑀧𑁆𑀧𑀩𑀮𑀢𑀸.

𑁫𑁭. 𑀓𑀺𑀫𑁆𑀳𑀸 𑀦𑀺𑀤𑁆𑀥𑀸𑀭𑀡𑁂 𑀭𑀢𑀭+𑀭𑀢𑀫𑀸

𑀓𑀺𑀁𑀲𑀤𑁆𑀤𑀸 𑀦𑀺𑀤𑁆𑀥𑀸𑀭𑀡𑁂 𑀭𑀢𑀭+𑀭𑀢𑀫𑀸 𑀳𑁄𑀦𑁆𑀢𑀺. 𑀓𑁄 𑀏𑀯𑀸𑀢𑀺 𑀓𑀢𑀭𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄, 𑀓𑀢𑀭𑁄 𑀪𑀯𑀢𑀁 𑀓𑀝𑁆𑀞𑁄. 𑀓𑀢𑀫𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄, 𑀓𑀢𑀫𑁄 𑀪𑀯𑀢𑀁 𑀓𑀝𑁆𑀞𑁄. 𑀪𑀸𑀭𑀤𑁆𑀯𑀸𑀚𑀸𑀦𑀁 𑀓𑀢𑀫𑁄+𑀲𑀺 𑀩𑁆𑀭𑀳𑁆𑀫𑁂.

𑁫𑁮. 𑀢𑁂𑀦 𑀤𑀢𑁆𑀢𑁂 𑀮𑀺+𑀬𑀸𑀢𑀺

𑀤𑀢𑁆𑀢𑁂+𑀪𑀺𑀥𑁂𑀬𑁆𑀬𑁂 𑀮+𑀇𑀬𑀸 𑀳𑁄𑀦𑁆𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀸 𑀫𑀦𑀼𑀲𑁆𑀲𑀲𑀜𑁆𑀜𑀸𑀬𑀁. 𑀤𑁂𑀯𑁂𑀦 𑀤𑀢𑁆𑀢𑁄 𑀤𑁂𑀯𑀮𑁄 𑀤𑁂𑀯𑀺𑀬𑁄, 𑀩𑁆𑀭𑀳𑁆𑀫𑀮𑁄 𑀩𑁆𑀭𑀳𑁆𑀫𑀺𑀬𑁄. 𑀲𑀻𑀯𑀮𑁄 𑀲𑀻𑀯𑀺𑀬𑁄 𑀲𑀺𑀲𑁆𑀲 𑀤𑀻𑀖𑁄. 𑀤𑁂𑀯+𑀩𑁆𑀭𑀳𑁆𑀫+𑀲𑀺𑀯𑀸𑀢𑀺 𑀢𑀦𑁆𑀦𑀸𑀫𑀓𑀸 𑀫𑀦𑀼𑀲𑁆𑀲𑀸. (𑀭𑀢𑁆𑀢𑀫𑀺𑀘𑁆𑀘𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢𑀁).

𑁫𑁯. 𑀢𑀲𑁆𑀲 𑀪𑀸𑀯𑀓𑀫𑁆𑀫𑁂𑀲𑀼𑀢𑁆𑀢+𑀢𑀸+𑀢𑁆𑀢𑀦+𑀡𑁆𑀬+𑀡𑁂𑀬𑁆𑀬+𑀡𑀺+𑀬+𑀡𑀺𑀬𑀸

𑀙𑀝𑁆𑀞𑀺𑀬𑀦𑁆𑀢𑀸 𑀪𑀸𑀯𑁂 𑀓𑀫𑁆𑀫𑁂 𑀘 𑀢𑁆𑀢𑀸𑀤𑀬𑁄 𑀳𑁄𑀦𑁆𑀢𑀺 𑀩𑀳𑀼𑀮𑀁. 𑀦 𑀲𑀩𑁆𑀩𑁂 𑀧𑀘𑁆𑀘𑀬𑀸 𑀲𑀩𑁆𑀩𑀢𑁄 𑀳𑁄𑀦𑁆𑀢𑀺 𑀅𑀜𑁆𑀜𑀢𑁆𑀭𑀢𑁆𑀢+𑀢𑀸𑀳𑀺. 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀩𑀼𑀤𑁆𑀥𑀺𑀲𑀤𑁆𑀤𑀸𑀢𑀺 𑀪𑀸𑀯𑁄 𑀲𑀤𑁆𑀤𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀘 𑁋

𑀳𑁄𑀦𑁆𑀢𑁆𑀬+𑀲𑁆𑀫𑀸 𑀲𑀤𑁆𑀤𑀩𑀼𑀤𑁆𑀥𑀻𑀢𑀺, 𑀪𑀸𑀯𑁄 𑀢𑀁 𑀲𑀤𑁆𑀤𑀯𑀼𑀢𑁆𑀢𑀺𑀬𑀸;

𑀦𑀺𑀫𑀺𑀢𑁆𑀢𑀪𑀽𑀢𑀁 𑀦𑀸𑀫𑀜𑁆𑀘, 𑀚𑀸𑀢𑀺 𑀤𑀩𑁆𑀩𑀁 𑀓𑁆𑀭𑀺𑀬𑀸 𑀕𑀼𑀡𑁄𑀢𑀺.

𑀦𑀻𑀮𑀲𑁆𑀲 𑀧𑀝𑀲𑁆𑀲 𑀪𑀸𑀯𑁄 𑀦𑀻𑀮𑀢𑁆𑀢𑀁 𑀦𑀻𑀮𑀢𑀸𑀢𑀺 𑀕𑀼𑀡𑁄 𑀪𑀸𑀯𑁄. 𑀏𑀢𑁆𑀣 𑀦𑀻𑀮𑀕𑀼𑀡𑀯𑀲𑁂𑀦 𑀧𑀝𑁂 𑀦𑀻𑀮𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀺𑀬𑀸 𑀧𑀝𑀩𑀼𑀤𑁆𑀥𑀺𑀬𑀸 𑀦𑀺𑀫𑀺𑀢𑁆𑀢𑀁 𑀪𑀸𑀯𑁄 𑀦𑀸𑀫. 𑀦𑀻𑀮𑀲𑁆𑀲 𑀕𑀼𑀡𑀲𑁆𑀲 𑀪𑀸𑀯𑁄 𑀦𑀻𑀮𑀢𑁆𑀢𑀁 𑀦𑀻𑀮𑀢𑀸𑀢𑀺 𑀦𑀻𑀮𑀕𑀼𑀡𑀚𑀸𑀢𑀺, 𑀏𑀢𑁆𑀣 𑀦𑀻𑀮𑀕𑀼𑀡𑀚𑀸𑀢𑀺 𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀦𑀻𑀮𑀲𑀤𑁆𑀤𑀲𑁆𑀲 𑀕𑀼𑀡𑀯𑀼𑀢𑁆𑀢𑀺𑀬𑀸 𑀦𑀻𑀮𑀕𑀼𑀡𑀚𑀸𑀢𑀺 𑀦𑀺𑀫𑀺𑀢𑁆𑀢𑀁. 𑀕𑁄𑀢𑁆𑀢𑀁 𑀕𑁄𑀢𑀸𑀢𑀺 𑀕𑁄𑀚𑀸𑀢𑀺, 𑀏𑀢𑁆𑀣 𑀚𑀸𑀢𑀺𑀲𑀤𑁆𑀤𑀸𑀦𑀁 𑀤𑀩𑁆𑀩𑀯𑀼𑀢𑁆𑀢𑀺𑀬𑀸 𑀲𑀢𑀺 𑀚𑀸𑀢𑀺 𑀦𑀺𑀫𑀺𑀢𑁆𑀢𑀁. 𑀧𑀸𑀘𑀓𑀲𑁆𑀲 𑀪𑀸𑀯𑁄 𑀧𑀸𑀘𑀓𑀢𑁆𑀢𑀁𑀢𑀺 𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑀺𑀢𑁆𑀢𑀁 𑀪𑀸𑀯𑁄, 𑀏𑀢𑁆𑀣 𑀧𑀘𑀦𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑀺𑀢𑁆𑀢𑀁 𑀪𑀸𑀯𑁄. 𑀤𑀡𑁆𑀟𑀺𑀢𑁆𑀢𑀁 𑀯𑀺𑀲𑀸𑀡𑀺𑀢𑁆𑀢𑀁 𑀭𑀸𑀚𑀧𑀼𑀭𑀺𑀲𑀢𑁆𑀢𑀁𑀢𑀺 𑀤𑀡𑁆𑀟+𑀯𑀺𑀲𑀸𑀡+𑀭𑀸𑀚𑀤𑀩𑁆𑀩𑀸𑀦𑀁 𑀲𑀫𑁆𑀩𑀦𑁆𑀥𑀺𑀢𑁆𑀢𑀁 𑀪𑀸𑀯𑁄, 𑀤𑀡𑁆𑀟𑀻𑀢𑁆𑀬𑀸𑀤𑀺𑀲𑀤𑁆𑀤𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀢𑁆𑀢𑀸.

𑀤𑁂𑀯𑀤𑀢𑁆𑀢𑀲𑁆𑀲 𑀪𑀸𑀯𑁄 𑀤𑁂𑀯𑀤𑀢𑁆𑀢𑀢𑁆𑀢𑀁, 𑀘𑀦𑁆𑀤𑀢𑁆𑀢𑀁, 𑀲𑀽𑀭𑀺𑀬𑀢𑁆𑀢𑀁𑀢𑀺 𑀢𑀤𑀯𑀢𑁆𑀣𑀸 𑀯𑀺𑀲𑁂𑀲𑀲𑀸𑀫𑀜𑁆𑀜𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀩𑀸𑀮𑀢𑀸𑀤𑀺𑀅𑀯𑀢𑁆𑀣𑀸𑀪𑁂𑀤𑁄, 𑀘𑀦𑁆𑀤𑀲𑁆𑀲 𑀓𑀮𑀸𑀤𑀺𑀅𑀯𑀢𑁆𑀣𑀪𑁂𑀤𑁄 𑀘, 𑀲𑀽𑀭𑀺𑀬𑀲𑁆𑀲 𑀫𑀦𑁆𑀤𑀧𑀝𑀼𑀢𑀸𑀤𑀺𑀅𑀯𑀢𑁆𑀣𑀸𑀪𑁂𑀤𑁄 𑀘 𑀲𑀸𑀫𑀜𑁆𑀜𑀁, 𑀢𑀤𑁂𑀢𑁆𑀣 𑀦𑀺𑀫𑀺𑀢𑁆𑀢𑀁. 𑀏𑀢𑁆𑀣 𑀯𑀺𑀚𑁆𑀚𑀫𑀸𑀦𑀧𑀤𑀢𑁆𑀣𑀸𑀦𑀁 𑀯𑀺𑀲𑀬𑀪𑀽𑀢𑀲𑀜𑁆𑀜𑀸𑀲𑀤𑁆𑀤𑀸𑀦𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑀁. 𑀆𑀓𑀸𑀲𑀢𑁆𑀢𑀁 𑀅𑀪𑀸𑀯𑀢𑁆𑀢𑀁𑀢𑀺, 𑀢𑀢𑁆𑀣 𑀖𑀝𑀸𑀓𑀸𑀲+𑀧𑀻𑀞𑀭𑀸𑀓𑀸𑀲, 𑀧𑀝𑀸𑀪𑀸𑀯+𑀖𑀝𑀸𑀪𑀸𑀯𑀸𑀤𑀺𑀦𑀸 𑀉𑀧𑀘𑀭𑀺𑀢𑀪𑁂𑀤𑀲𑀸𑀫𑀜𑁆𑀜𑀁 𑀪𑀸𑀯𑁄.

𑀢𑁆𑀢𑀦-𑀧𑀼𑀣𑀼𑀚𑁆𑀚𑀦𑀢𑁆𑀢𑀦𑀁. 𑀯𑁂𑀤𑀦𑀸𑀬 𑀪𑀸𑀯𑁄 𑀯𑁂𑀤𑀦𑀢𑁆𑀢𑀦𑀁, 𑀭𑀲𑁆𑀲𑁄. 𑀏𑀯𑀁 𑀚𑀸𑀬𑀢𑁆𑀢𑀦𑀁, 𑀚𑀸𑀭𑀢𑁆𑀢𑀦𑀁.

𑀡𑁆𑀬-𑀅𑀮𑀲𑀲𑁆𑀲 𑀪𑀸𑀯𑁄 𑀓𑀫𑁆𑀫𑀁 𑀯𑀸 𑀆𑀮𑀲𑁆𑀬𑀁, 𑀏𑀢𑁆𑀣 ‘‘𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁’’𑀢𑀺 𑀅-𑀮𑁄𑀧𑁂 ‘‘𑀲𑀭𑀸𑀦+𑀫𑀸𑀤𑀺𑀲𑁆𑀲𑀸’’𑀤𑀺𑀦𑀸 𑀆𑀓𑀸𑀭𑁄, 𑀏𑀯+𑀫𑀼𑀧𑀭𑀺 𑀘. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀸𑀯𑁄 𑀩𑁆𑀭𑀳𑁆𑀫𑀜𑁆𑀜𑀁, 𑀜𑁆𑀜𑀓𑀸𑀭𑀧𑀼𑀩𑁆𑀩𑀭𑀽𑀧𑀸𑀦𑀺. 𑀘𑀸𑀧𑀮𑁆𑀬𑀁, 𑀦𑁂𑀧𑀼𑀜𑁆𑀜𑀁, 𑀧𑁂𑀲𑀼𑀜𑁆𑀜𑀁, 𑀭𑀜𑁆𑀜𑁄 𑀪𑀸𑀯𑁄 𑀭𑀚𑁆𑀚𑀁, 𑀆𑀥𑀺𑀧𑀘𑁆𑀘𑀁, 𑀤𑀸𑀬𑀚𑁆𑀚𑀁, 𑀯𑁂𑀲𑀫𑁆𑀫𑀁, 𑀯𑁂𑀲𑀫𑀁, 𑀡𑀧𑀘𑁆𑀘𑀬𑁄. 𑀲𑀔𑀺𑀦𑁄 𑀪𑀸𑀯𑁄 𑀲𑀔𑁆𑀬𑀁, 𑀯𑀸𑀡𑀺𑀚𑁆𑀚𑀁, 𑀆𑀭𑁄𑀕𑁆𑀬𑀁, 𑀑𑀤𑀕𑁆𑀬𑀁, 𑀆𑀦𑀡𑁆𑀬𑀁, 𑀤𑀼𑀩𑁆𑀩𑀮𑁆𑀬𑀁, 𑀩𑀮𑁆𑀬𑀁, 𑀧𑀡𑁆𑀟𑀺𑀘𑁆𑀘𑀁, 𑀩𑀸𑀳𑀼𑀲𑁆𑀲𑀘𑁆𑀘𑀁, 𑀧𑁄𑀭𑁄𑀳𑀺𑀘𑁆𑀘𑀁. 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀇𑀮𑁄𑀧𑁄. 𑀓𑁄𑀲𑀮𑁆𑀮𑀁, 𑀯𑁂𑀧𑀼𑀮𑁆𑀮𑀁. 𑀲𑀫𑀸𑀦𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀧𑁂𑀭𑀺𑀲𑁆𑀲𑀁, 𑀲𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀁, 𑀲𑁄𑀯𑀘𑀲𑁆𑀲𑀁, 𑀤𑁄𑀯𑀘𑀲𑁆𑀲𑀁, 𑀦𑀺𑀧𑀓𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁, 𑀆𑀥𑀺𑀓𑁆𑀓𑀁, 𑀤𑀼𑀪𑀕𑀲𑁆𑀲 𑀪𑀸𑀯𑁄 𑀤𑁄𑀪𑀕𑁆𑀕𑀁, 𑀲𑀭𑀽𑀧𑀲𑁆𑀲 𑀪𑀸𑀯𑁄 𑀲𑀸𑀭𑀼𑀧𑁆𑀧𑀁, 𑀑𑀧𑀫𑁆𑀫𑀁, 𑀲𑁄𑀔𑀼𑀫𑁆𑀫𑀁, 𑀢𑀣𑀲𑁆𑀲 𑀪𑀸𑀯𑁄 𑀢𑀘𑁆𑀙𑀁. 𑀤𑀼𑀫𑁆𑀫𑁂𑀥𑀲𑁆𑀲 𑀪𑀸𑀯𑁄 𑀤𑀼𑀫𑁆𑀫𑁂𑀚𑁆𑀛𑀁. 𑀪𑁂𑀲𑀚𑀲𑁆𑀲 𑀪𑀸𑀯𑁄 𑀪𑁂𑀲𑀚𑁆𑀚𑀁, 𑀩𑁆𑀬𑀸𑀯𑀝𑀲𑁆𑀲 𑀓𑀫𑁆𑀫𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀬𑀣𑀸 𑀯𑁂𑀬𑁆𑀬𑀸𑀓𑀭𑀡𑀁.

𑀡𑁂𑀬𑁆𑀬-𑀲𑀼𑀘𑀺𑀦𑁄 𑀪𑀸𑀯𑁄 𑀲𑁄𑀘𑁂𑀬𑁆𑀬𑀁, 𑀆𑀥𑀺𑀧𑀢𑁂𑀬𑁆𑀬𑀁, 𑀓𑀧𑀺𑀲𑁆𑀲 𑀪𑀸𑀯𑁄 𑀓𑀸𑀧𑁂𑀬𑁆𑀬𑀁. 𑀲𑀞𑀲𑁆𑀲 𑀪𑀸𑀯𑁄 𑀓𑀫𑁆𑀫𑀁 𑀯𑀸 𑀲𑀸𑀞𑁂𑀬𑁆𑀬𑀁.

𑀡-𑀕𑀭𑀽𑀦𑀁 𑀪𑀸𑀯𑁄 𑀕𑀸𑀭𑀯𑀁, 𑀉 𑀅𑀯𑀗. 𑀧𑀸𑀝𑀯𑀁, 𑀅𑀚𑁆𑀚𑀯𑀁, 𑀫𑀤𑁆𑀤𑀯𑀁, ‘‘𑀓𑁄𑀲𑀚𑁆𑀚𑀸’’𑀤𑀺𑀦𑀸 𑀉𑀲𑁆𑀲 𑀅𑀢𑁆𑀢𑀁 𑀤𑁆𑀯𑀺𑀢𑁆𑀢𑀜𑁆𑀘. 𑀧𑀭𑀫𑀸𑀦𑀁 𑀪𑀸𑀯𑁄 𑀧𑀸𑀭𑀫𑀻, 𑀯𑀻𑀧𑀘𑁆𑀘𑀬𑁄. 𑀲𑀫𑀕𑁆𑀕𑀸𑀦𑀁 𑀪𑀸𑀯𑁄 𑀲𑀸𑀫𑀕𑁆𑀕𑀻.

𑀇𑀬-𑀅𑀥𑀺𑀧𑀢𑀺𑀦𑁄 𑀪𑀸𑀯𑁄 𑀅𑀥𑀺𑀧𑀢𑀺𑀬𑀁, 𑀧𑀡𑁆𑀟𑀺𑀢𑀺𑀬𑀁, 𑀩𑀳𑀼𑀲𑁆𑀲𑀼𑀢𑀺𑀬𑀁, 𑀦𑀕𑁆𑀕𑀺𑀬𑀁, 𑀲𑀽𑀭𑀺𑀬𑀁.

𑀡𑀺𑀬-𑀅𑀮𑀲𑀲𑁆𑀲 𑀪𑀸𑀯𑁄 𑀓𑀫𑁆𑀫𑀁 𑀯𑀸 𑀆𑀮𑀲𑀺𑀬𑀁, 𑀢𑀸𑀮𑀼𑀲𑀺𑀬𑀁, 𑀫𑀦𑁆𑀤𑀺𑀬𑀁, 𑀤𑀓𑁆𑀔𑀺𑀬𑀁, 𑀧𑁄𑀭𑁄𑀳𑀺𑀢𑀺𑀬𑀁, 𑀯𑁂𑀬𑁆𑀬𑀢𑁆𑀢𑀺𑀬𑀁.