𑁧𑁫. 𑀲𑀸𑀫𑀺𑀢𑁆𑀣𑁂+𑀥𑀺𑀦𑀸

𑀲𑀸𑀫𑀺𑀪𑀸𑀯𑀢𑁆𑀣𑁂 𑀅𑀥𑀺𑀦𑀸 𑀬𑀼𑀢𑁆𑀢𑀫𑁆𑀳𑀸 𑀲𑀢𑁆𑀢𑀫𑀻 𑀳𑁄𑀢𑀺. 𑀅𑀥𑀺𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸, 𑀅𑀥𑀺𑀧𑀜𑁆𑀘𑀸𑀮𑁂𑀲𑀼 𑀩𑁆𑀭𑀳𑁆𑀫𑀤𑀢𑁆𑀢𑁄, 𑀩𑁆𑀭𑀳𑁆𑀫𑀤𑀢𑁆𑀢𑀺𑀲𑁆𑀲𑀭𑀸 𑀧𑀜𑁆𑀘𑀸𑀮𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀤𑁂𑀯𑁂𑀲𑀼 𑀩𑀼𑀤𑁆𑀥𑁄, 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀻𑀳𑀺 𑀩𑀼𑀤𑁆𑀥𑁄 𑀅𑀥𑀺𑀓𑁄𑀢𑁆𑀬𑀢𑁆𑀣𑁄.

𑀏𑀢𑁆𑀣 𑀘 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑁂𑀲𑀼 𑀅𑀬𑀁 𑀪𑁂𑀤𑁄 𑁋

𑀓𑀸𑀭𑀓𑀁 𑀲𑀸𑀥𑀓𑀁 𑀦𑀺𑀩𑁆𑀩𑀢𑁆𑀢𑀓𑀁 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀢𑀜𑁆𑀘 𑀤𑀡𑁆𑀟𑁄, 𑀥𑀯𑀮𑁄, 𑀧𑀘𑀦𑀁, 𑀘𑀺𑀢𑁆𑀢𑁄, 𑀕𑁄𑀢𑀺 𑀤𑀩𑁆𑀩+𑀕𑀼𑀡+𑀓𑁆𑀭𑀺𑀬𑀸+𑀦𑀸𑀫+𑀚𑀸𑀢𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀫𑁆𑀧𑀺 𑀓𑀫𑁆𑀫+𑀓𑀢𑁆𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀁, 𑀢𑀁 𑀲𑀢𑁆𑀢𑀺𑀓𑀸𑀭𑀓𑀁, 𑀢𑀤𑀸𑀥𑀸𑀭𑀪𑀽𑀢𑀤𑀩𑁆𑀩𑀸𑀤𑀬𑁄 𑀢𑀢𑁆𑀭𑀝𑁆𑀞𑀓𑀸𑀭𑀓𑀁, 𑀦 𑀫𑀼𑀔𑁆𑀬𑀢𑁄. 𑀫𑀼𑀔𑁆𑀬𑀢𑁄 𑀘𑁂 𑀳𑁄𑀦𑁆𑀢𑀺, 𑀢𑁂𑀲𑀁 𑀲𑀢𑁆𑀢𑀺𑀤𑀩𑁆𑀩𑀸𑀦𑀁 𑀅𑀜𑁆𑀜𑀫𑀜𑁆𑀜𑀩𑁆𑀬𑀸𑀯𑀝𑀭𑀽𑀧𑀢𑁆𑀢𑀸 𑀬𑁄 𑀆𑀥𑀸𑀭𑁄, 𑀲𑁄 𑀆𑀥𑀸𑀭𑁄𑀬𑁂𑀯, 𑀓𑀺𑀲𑁆𑀫𑀺𑀜𑁆𑀘𑀺𑀓𑀸𑀮𑁂 𑀓𑀭𑀡𑀁 𑀯𑀸 𑀓𑀢𑁆𑀢𑀼𑀭𑀽𑀧𑀪𑀽𑀢𑁄 𑀯𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀣𑀸𑀮𑀺 𑀧𑀘𑀢𑀺, 𑀣𑀸𑀮𑀺𑀬𑀸 𑀧𑀘𑀢𑀺, 𑀣𑀸𑀮𑀺𑀬𑀁 𑀧𑀘𑀢𑀻𑀢𑁆𑀬𑀸𑀤𑀺𑀦𑀸 𑀏𑀓𑀲𑁆𑀲 𑀯𑀢𑁆𑀣𑀼𑀦𑁄 𑀓𑀢𑁆𑀢𑀼+𑀓𑀭𑀡𑀸+𑀥𑀸𑀭𑀪𑁂𑀤𑁄 𑀦 𑀲𑀺𑀬𑀸. 𑀲𑀢𑁆𑀢𑀺𑀧𑀓𑁆𑀔𑁂 𑀧𑀦 𑀤𑀩𑁆𑀩𑀸𑀤𑀻𑀦𑀁 𑀅𑀦𑁂𑀓𑀲𑀢𑁆𑀢𑀺𑀬𑀸 𑀆𑀥𑀸𑀭𑀢𑁆𑀢𑀸 𑀲𑀢𑁆𑀢𑀺𑀬𑀸 𑀤𑀩𑁆𑀩𑀸𑀤𑀬𑁄 𑀯𑀺𑀯𑀓𑁆𑀔𑀺𑀢𑀸 𑀢𑀁 𑀢𑀁 𑀓𑀸𑀭𑀓𑀁 𑀳𑁄𑀢𑀻𑀢𑀺 𑀤𑀩𑁆𑀩𑀸𑀤𑀻𑀦𑀁 𑀅𑀪𑁂𑀤𑁂𑀧𑀺 𑀓𑀸𑀭𑀓𑀪𑁂𑀤𑁄 𑀬𑀼𑀚𑁆𑀚𑀢𑁂. 𑀯𑀼𑀢𑁆𑀢𑀜𑁆𑀳𑀺 𑁋

𑀯𑀺𑀘𑀺𑀢𑁆𑀢𑀓𑀢𑁆𑀢𑀼𑀆𑀤𑀻𑀳𑀺, 𑀲𑀁𑀬𑁄𑀕𑀸 𑀏𑀓𑀯𑀢𑁆𑀣𑀼𑀦𑁄;

𑀦𑀸𑀦𑀸𑀢𑁆𑀢𑀁 𑀬𑀼𑀚𑁆𑀚𑀢𑁂 𑀦𑀸𑀝𑁆𑀬-𑀪𑁂𑀤𑁂𑀦 𑀦𑀝𑀓𑀲𑁆𑀲𑀺+𑀯𑀸𑀢𑀺.

𑀣𑀸𑀮𑀺 𑀯𑀢𑁆𑀣𑀼𑀢𑁄 𑀏𑀓𑀸 𑀘𑁂𑀤𑀧𑀺 𑀲𑀢𑁆𑀢𑀺𑀓𑀸𑀭𑀓𑀪𑀽𑀢𑀓𑀢𑁆𑀢𑀼+𑀓𑀭𑀡𑀸+𑀥𑀸𑀭𑀸𑀤𑀻𑀦𑀁 𑀪𑁂𑀤𑁂𑀦 𑀪𑁂𑀤+𑀫𑀼𑀧𑀬𑀸𑀢𑀺, 𑀓𑀺𑀫𑀺𑀯 𑀭𑀸𑀫+𑀭𑀸𑀯𑀡𑀸𑀤𑀺𑀯𑁂𑀲𑀥𑀸𑀭𑀻𑀦𑀝𑀓𑁄 𑀢𑁂𑀲𑀁 𑀦𑀸𑀫𑀯𑀲𑁂𑀦 𑀭𑀸𑀫𑁄, 𑀭𑀸𑀯𑀡𑁄𑀢𑀺 𑀪𑁂𑀤+𑀫𑀼𑀧𑀬𑀸𑀢𑀺, 𑀢+𑀫𑀺𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀦+𑀭𑀧𑀺 𑁋

𑀬𑀣𑁂+𑀓𑁄𑀧𑀺 𑀧𑀝𑁄 𑀲𑀼𑀢𑁆𑀢, 𑀧𑀻𑀢𑀸𑀤𑀺𑀕𑀼𑀡𑀲𑀁𑀬𑀼𑀢𑁄;

𑀲𑀼𑀓𑁆𑀓𑁄 𑀧𑀝𑁄𑀢𑀺 𑀧𑀻𑀢𑁄𑀢𑀺, 𑀪𑁂𑀤𑀁 𑀬𑀸𑀢𑁆𑀬𑁂+𑀯𑀫𑁂𑀯+𑀬𑀁.

𑀏𑀢𑁆𑀣 𑀘 𑀲𑀢𑁆𑀢𑀺𑀪𑀽𑀢𑀓𑀢𑁆𑀢𑀸𑀤𑀬𑁄 𑀫𑀼𑀔𑁆𑀬𑀓𑀸𑀭𑀓𑀁, 𑀢𑀁𑀬𑁄𑀕𑁂𑀦 𑀤𑀩𑁆𑀩𑀪𑀽𑀢𑀣𑀸𑀮𑀻 𑀕𑀼𑀡𑀓𑀸𑀭𑀓𑀁, 𑀢𑁂 𑀘 𑀓𑀣𑀁 𑀓𑁆𑀭𑀺𑀬𑀸𑀬 𑀓𑀸𑀭𑀓𑀸 𑀳𑁄𑀦𑁆𑀢𑀺. 𑀓𑀢𑁆𑀢𑀸 𑀅𑀢𑁆𑀢𑀦𑀸 𑀧𑀢𑀺𑀝𑁆𑀞𑀺𑀢𑀸𑀬 𑀳𑀲𑀢𑀺+𑀦𑀘𑁆𑀘𑀢𑀺𑀘𑁆𑀘𑀸𑀤𑀺𑀓𑁆𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀜𑁆𑀘 𑀅𑀢𑁆𑀢𑀦𑀸 𑀧𑀢𑀺𑀝𑁆𑀞𑀺𑀢𑀓𑁆𑀭𑀺𑀬𑀸𑀬 𑀢𑀤𑀢𑁆𑀣𑀪𑀽𑀢𑀇𑀦𑁆𑀥𑀦𑀸𑀤𑀻𑀦𑀺 𑀧𑀯𑀢𑁆𑀢𑁂𑀦𑁆𑀢𑀁 ‘‘𑀑𑀤𑀦𑀁 𑀧𑀘𑀢𑀻’’𑀢𑁆𑀬𑀸𑀤𑁄 𑀦𑀺𑀫𑀺𑀢𑁆𑀢𑀁. ‘𑀓𑀝𑁆𑀞𑁂𑀳𑀺 𑀧𑀘𑁆𑀘𑀢𑀻’𑀢𑁆𑀬𑀸𑀤𑁄 𑀓𑀝𑁆𑀞𑀸𑀦𑀺 𑀚𑀮𑀦𑀓𑁆𑀭𑀺𑀬𑀸𑀬 𑀲𑀸𑀥𑁂𑀢𑀩𑁆𑀩𑀧𑀸𑀓𑀲𑁆𑀲 𑀅𑀗𑁆𑀕𑀪𑀸𑀯𑁂𑀦 𑀦𑀺𑀫𑀺𑀢𑁆𑀢𑀁. ‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀻’𑀢𑁆𑀬𑀸𑀤𑁄 𑀨𑀭𑀲𑀼 𑀘 𑀓𑀝𑁆𑀞𑀸𑀦𑀁 𑀤𑁆𑀯𑀺𑀥𑀸𑀧𑀯𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀁. 𑀓𑀫𑁆𑀫𑀜𑁆𑀘 𑀓𑁆𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀻𑀬𑀫𑀸𑀦𑀩𑁆𑀬𑀸𑀧𑁆𑀬𑁂 𑀲𑀢𑀺 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀓𑁆𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀲𑀫𑁆𑀧𑀤𑀸𑀦𑀸+𑀯𑀥𑀺+𑀆𑀥𑀸𑀭𑀸𑀦𑀁 ‘𑀕𑀸𑀯𑁄 𑀤𑀤𑀸𑀢𑀺’ ‘𑀕𑀸𑀫𑀲𑁆𑀫𑀸 𑀅𑀧𑀦𑀬𑀢𑀺’ ‘𑀣𑀸𑀮𑀺𑀬𑀁 𑀧𑀘𑀢𑀻’𑀢𑁆𑀬𑀸𑀤𑀻𑀲𑀼 𑀕𑁄𑀤𑀸𑀦𑀸+𑀧𑀦𑀬𑀦+𑀧𑀘𑀦𑀓𑁆𑀭𑀺𑀬𑀸𑀦𑀁 𑀦𑀺𑀫𑀺𑀢𑁆𑀢𑀢𑁆𑀢𑀸 𑀓𑁆𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀁 𑀬𑀣𑀸𑀲𑀓𑀁 𑀓𑁆𑀭𑀺𑀬𑀸𑀬 𑀧𑀯𑀢𑁆𑀢𑀓𑁄 𑀓𑀢𑁆𑀢𑀸, 𑀢𑀲𑁆𑀫𑀸 𑀲 𑀏𑀯 𑀧𑀥𑀸𑀦𑁄 𑀓𑀢𑁆𑀢𑀸𑀢𑀺 𑀯𑁄𑀳𑀸𑀭𑀁 𑀮𑀪𑀢𑀺, 𑀅𑀜𑁆𑀜𑁂𑀲𑀁 𑀓𑀭𑀡𑀸𑀤𑀻𑀦𑀁 𑀓𑀢𑁆𑀢𑀼𑀪𑀸𑀯𑁂 𑀲𑀢𑀺𑀧𑀺 𑀅𑀧𑁆𑀧𑀥𑀸𑀦𑀢𑁆𑀢𑀸 𑀢𑀁 𑀦 𑀮𑀪𑀢𑀺.

𑀘𑁄𑀤𑀓𑁂𑀦 𑀯𑀼𑀢𑁆𑀢𑀜𑁆𑀳𑀺 𑁋

𑀦𑀦𑀼 𑀲𑀸𑀫𑀕𑁆𑀬𑀫𑀻𑀦𑀸𑀬𑀁, 𑀓𑁆𑀭𑀺𑀬𑀸𑀲𑀺𑀤𑁆𑀥𑀺 𑀓𑀣𑀁 𑀯𑀤;

𑀏𑀓𑀲𑁆𑀲 𑀓𑀢𑁆𑀢𑀼𑀦𑁄 𑀏𑀯, 𑀲𑀩𑁆𑀩𑁂𑀲𑀁 𑀓𑀢𑁆𑀢𑀼𑀢𑀁 𑀯𑀺𑀦𑀸.

𑀲𑀩𑁆𑀩𑁂𑀲𑀁 𑀓𑀭𑀡𑀸𑀤𑀻𑀦𑀁, 𑀓𑀢𑁆𑀢𑀼𑀢𑀸𑀬 𑀯𑀺𑀬𑁄𑀕𑀢𑁄;

𑀓𑀭𑀡𑀸𑀤𑀻𑀦𑀁 𑀅𑀪𑀸𑀯𑀢𑁆𑀢𑀸, 𑀓𑀸𑀭𑀓𑀁 𑀦 𑀳𑀺 𑀙𑀩𑁆𑀩𑀺𑀥𑀦𑁆𑀢𑀺.

𑀯𑀼𑀘𑁆𑀘𑀢𑁂 𑁋

𑀬𑀤𑁆𑀬𑀧𑁆𑀬+𑀢𑁆𑀣𑀺 𑀳𑀺 𑀓𑀢𑁆𑀢𑀼𑀢𑁆𑀢𑀁, 𑀲𑀪𑀸𑀯𑀸 𑀓𑀭𑀡𑀸𑀤𑀺𑀲𑀼;

𑀓𑁆𑀭𑀺𑀬𑀸𑀲𑀺𑀤𑁆𑀥𑁆𑀬𑀸 𑀢𑀣𑀸𑀧𑁆𑀬𑁂+𑀢+𑀫𑀧𑁆𑀧𑀥𑀸𑀦𑀁 𑀧𑀭𑀗𑁆𑀕𑀢𑁄.

𑀏𑀢𑀁 𑀲𑀪𑀸𑀯𑀢𑁄 𑀉𑀧𑀮𑀩𑁆𑀪𑀫𑀸𑀦𑀁 𑀓𑀭𑀡𑀸𑀤𑀻𑀲𑀼 𑀓𑀢𑁆𑀢𑀼𑀢𑁆𑀢𑀁 𑀧𑀭𑁂𑀲𑀁 𑀓𑀭𑀡𑀸𑀤𑀻𑀦𑀁 𑀚𑀮𑀦+𑀥𑀸𑀭𑀡𑀸𑀤𑀺𑀓𑁆𑀭𑀺𑀬𑀸𑀬 𑀅𑀗𑁆𑀕𑀁 𑀉𑀧𑀸𑀬𑀢𑀺 𑀅𑀧𑁆𑀧𑀥𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀸𑀭𑀓𑀁 𑀙𑀩𑁆𑀩𑀺𑀥𑀁 𑀲𑀜𑁆𑀜𑀸-𑀯𑀲𑀸 𑀙𑀩𑁆𑀩𑀻𑀲𑀢𑀺𑀯𑀺𑀥𑀁;

𑀧𑀪𑁂𑀤𑀸 𑀲𑀢𑁆𑀢𑀥𑀸 𑀓𑀫𑁆𑀫𑀁, 𑀓𑀢𑁆𑀢𑀸 𑀧𑀜𑁆𑀘𑀯𑀺𑀥𑁄 𑀪𑀯𑁂.

𑀓𑀭𑀡𑀁 𑀤𑀼𑀯𑀺𑀥𑀁 𑀳𑁄𑀢𑀺, 𑀲𑀫𑁆𑀧𑀤𑀸𑀦𑀁 𑀢𑀺𑀥𑀸 𑀫𑀢𑀁;

𑀅𑀧𑀸𑀤𑀸𑀦𑀁 𑀧𑀜𑁆𑀘𑀯𑀺𑀥𑀁, 𑀆𑀥𑀸𑀭𑁄 𑀢𑀼 𑀘𑀢𑀼𑀩𑁆𑀩𑀺𑀥𑁄.

𑀯𑀺𑀪𑀢𑁆𑀢𑀺𑀬𑁄 𑀧𑀦 𑁋

𑀧𑀘𑁆𑀘𑀢𑁆𑀢+𑀫𑀼𑀧𑀬𑁄𑀕𑀜𑁆𑀘, 𑀓𑀭𑀡𑀁 𑀲𑀫𑁆𑀧𑀤𑀸𑀦𑀺𑀬𑀁;

𑀦𑀺𑀲𑁆𑀲𑀓𑁆𑀓𑀁 𑀲𑀸𑀫𑀺𑀯𑀘𑀦𑀁, 𑀪𑀼𑀫𑁆𑀫+𑀫𑀸𑀮𑀧𑀦+𑀝𑁆𑀞𑀫𑀁𑀢𑀺.

𑀇𑀢𑀺 𑀧𑀬𑁄𑀕𑀲𑀺𑀤𑁆𑀥𑀺𑀬𑀁 𑀓𑀸𑀭𑀓𑀓𑀡𑁆𑀟𑁄 𑀢𑀢𑀺𑀬𑁄.