𑁩. 𑀓𑀸𑀭𑀓𑀓𑀡𑁆𑀟

𑀅𑀣 𑀯𑀺𑀪𑀢𑁆𑀢𑀻𑀦+𑀫𑀢𑁆𑀣𑀪𑁂𑀤𑀸 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀏𑀓𑀫𑁆𑀧𑀺 𑀅𑀢𑁆𑀣𑀁 𑀓𑀫𑁆𑀫𑀸𑀤𑀺𑀯𑀲𑁂𑀦 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄, 𑀲𑁆𑀬𑀸𑀤𑀬𑁄. 𑀢𑀸 𑀧𑀦 𑀧𑀞𑀫𑀸𑀤𑀺𑀪𑁂𑀤𑁂𑀦 𑀲𑀢𑁆𑀢𑀯𑀺𑀥𑀸. 𑀢𑀸 𑀬𑀣𑀸 ‘‘𑀧𑀞𑀫𑀸+𑀢𑁆𑀣𑀫𑀢𑁆𑀢𑁂’’𑀢𑀺 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲𑀺𑀲𑁆𑀲 𑀑𑀓𑀸𑀭+𑀮𑁄𑀧+𑀅-𑀫𑀸𑀤𑁂𑀲𑁂𑀲𑀼 𑀦𑀭𑁄 𑀇𑀢𑁆𑀣𑀻 𑀦𑀧𑀼𑀁𑀲𑀓𑀁.

𑀲𑀓𑀢𑁆𑀣+𑀤𑀩𑁆𑀩+𑀮𑀺𑀗𑁆𑀕𑀸𑀦𑀺, 𑀲𑀁𑀔𑁆𑀬𑀸+𑀓𑀫𑁆𑀫𑀸𑀤𑀺𑀧𑀜𑁆𑀘𑀓𑀁;

𑀦𑀸𑀫𑀢𑁆𑀣𑁄 𑀢𑀲𑁆𑀲 𑀲𑀸𑀫𑀜𑁆𑀜-𑀫𑀢𑁆𑀣𑀫𑀢𑁆𑀣𑀁 𑀧𑀯𑀼𑀘𑁆𑀘𑀢𑁂.

𑀲𑁄 𑀦𑀸𑀫𑀢𑁆𑀣𑁄 𑀘 𑁋

𑀚𑀸𑀢𑀺 𑀓𑁆𑀭𑀺𑀬𑀸 𑀕𑀼𑀡𑁄 𑀤𑀩𑁆𑀩𑀁, 𑀢𑀣𑀸 𑀦𑀸𑀫𑀦𑁆𑀢𑀺 𑀧𑀜𑁆𑀘𑀥𑀸;

𑀲𑀤𑁆𑀤𑀲𑁆𑀲+𑀢𑁆𑀣𑁄 𑀲 𑀲𑀤𑁆𑀤𑁄𑀧𑀺, 𑀧𑀜𑁆𑀘𑀥𑀸𑀯+𑀢𑁆𑀭 𑀪𑀺𑀚𑁆𑀚𑀢𑁂.

𑀓𑀣𑀁 𑀚𑀸𑀢𑀺𑀲𑀤𑁆𑀤𑁄 𑀕𑀼𑀡𑀲𑀤𑁆𑀤𑁄𑀢𑁆𑀬𑀸𑀤𑀺𑀦𑀸.

𑀪𑀺𑀦𑁆𑀦𑁂𑀲𑁆𑀯+𑀪𑀺𑀦𑁆𑀦𑀥𑀻+𑀲𑀤𑁆𑀤𑀸, 𑀲𑀩𑀮𑀸𑀤𑀻𑀲𑀼 𑀬𑀩𑁆𑀩𑀮𑀸;

𑀯𑀢𑁆𑀢𑀦𑁆𑀢𑁂 𑀚𑀸𑀢𑀺 𑀏𑀲𑀸+𑀲𑁆𑀲, 𑀫𑀸𑀮𑀸 𑀲𑀼𑀢𑁆𑀢+𑀫𑀺𑀯𑀸+𑀦𑁆𑀯𑀺𑀢𑀸.

𑀅𑀤𑀩𑁆𑀩𑀪𑀽𑀢𑀁 𑀓𑀢𑁆𑀢𑀸𑀤𑀺-𑀓𑀸𑀭𑀓𑀕𑁆𑀕𑀸𑀫𑀲𑀸𑀥𑀺𑀬𑀁;

𑀧𑀤𑀢𑁆𑀣𑀁 𑀓𑀢𑁆𑀢𑀼𑀓𑀫𑁆𑀫𑀝𑁆𑀞𑀁, 𑀓𑁆𑀭𑀺𑀬+𑀫𑀺𑀘𑁆𑀙𑀦𑁆𑀢𑀺 𑀢𑀩𑁆𑀩𑀺𑀤𑀽.

𑀤𑀩𑁆𑀩𑀲𑁆𑀲𑀺𑀢𑁄 𑀢𑀢𑁄 𑀪𑀺𑀦𑁆𑀦𑁄, 𑀦𑀺𑀫𑀺𑀢𑁆𑀢𑁄 𑀢𑀧𑁆𑀧𑀢𑀻𑀢𑀺𑀬𑀸;

𑀯𑀺𑀦𑀲𑁆𑀲𑀦𑀲𑀪𑀸𑀯𑁄 𑀘, 𑀦𑀺𑀕𑁆𑀕𑀼𑀡𑁄𑀯 𑀕𑀼𑀡𑁄+𑀘𑁆𑀘𑀢𑁂.

𑀏𑀢𑁆𑀣 𑀧𑀝𑁄 𑀲𑀼𑀓𑁆𑀓𑁄𑀢𑀺 𑀯𑀺𑀦𑀲𑁆𑀲𑀦𑀲𑀪𑀸𑀯𑁄 𑀘 𑀘𑀲𑀤𑁆𑀤𑁂𑀦 𑀯𑀺𑀧𑀼𑀮𑁄 𑀆𑀓𑀸𑀲𑁄𑀢𑀺 𑀅𑀯𑀺𑀦𑀲𑁆𑀲𑀦𑀲𑀪𑀸𑀯𑁄 𑀘 𑀅𑀢𑁆𑀢𑀦𑀺 𑀯𑀺𑀲𑀼𑀁 𑀕𑀼𑀡𑀭𑀳𑀺𑀢𑁄 𑀕𑀼𑀡𑁄+𑀘𑁆𑀘𑀢𑁂 𑀢𑁆𑀬𑀢𑁆𑀣𑁄.

𑀬𑀁 𑀬𑀁 𑀯𑀺𑀲𑁂𑀲𑁆𑀲𑀢𑁂 𑀓𑀺𑀜𑁆𑀘𑀺, 𑀢𑀁 𑀢𑀁 𑀤𑀩𑁆𑀩+𑀫𑀺𑀳𑁄+𑀘𑁆𑀘𑀢𑁂;

𑀚𑀸𑀢𑁆𑀬𑀸𑀤𑀺𑀦𑁄𑀧𑁆𑀬+𑀢𑁄 𑀢𑀸𑀤𑀺, 𑀤𑀩𑁆𑀩𑀢𑁆𑀢𑀁 𑀧𑀭𑀺𑀓𑀧𑁆𑀧𑀢𑁂.

𑀏𑀢𑁆𑀣 𑀕𑁄𑀚𑀸𑀢𑀺 𑀅𑀲𑁆𑀲𑀚𑀸𑀢𑀻𑀢𑀺 𑀯𑀼𑀢𑁆𑀢𑁂 𑀚𑀸𑀢𑀺 𑀤𑀩𑁆𑀩𑀁. 𑀦𑀻𑀮𑁄 𑀕𑀼𑀡𑁄𑀢𑀺 𑀘 𑀕𑀼𑀡𑁄 𑀤𑀩𑁆𑀩𑀁. 𑀧𑀘𑀦𑀓𑁆𑀭𑀺𑀬𑀸𑀢𑀺 𑀘 𑀕𑀫𑀦𑀸𑀤𑀺𑀓𑁆𑀭𑀺𑀬𑀸𑀢𑁄 𑀯𑀺𑀲𑁂𑀲𑀺𑀬𑀢𑀻𑀢𑀺 𑀓𑁆𑀭𑀺𑀬𑀸𑀯 𑀤𑀩𑁆𑀩𑀁.

𑀦𑀸𑀫𑀭𑀽𑀧𑁂𑀦 𑀲𑀤𑀩𑁆𑀩𑁂, 𑀓𑁆𑀯𑀘𑀺 𑀲𑀜𑁆𑀜𑀻 𑀓𑀣𑀻𑀬𑀢𑁂;

𑀦𑀸𑀫𑀦𑁆𑀢𑀺 𑀢𑀁 𑀬𑀣𑀸 𑀘𑀺𑀢𑁆𑀢𑁄, 𑀲𑀜𑁆𑀜𑀸 𑀲𑀤𑁆𑀤𑁄 𑀢𑀼 𑀢𑀤𑁆𑀥𑀦𑀻.

𑀦𑀸𑀫𑀲𑁆𑀲 𑀤𑀩𑁆𑀩𑀢𑁆𑀢𑁂𑀧𑀺 𑀘𑀺𑀢𑁆𑀢𑁄𑀢𑁆𑀬𑀸𑀤𑀺 𑀦𑀸𑀫𑁂𑀦𑁂𑀯 𑀧𑀲𑀺𑀚𑁆𑀛𑀢𑀺, 𑀦𑁄 𑀖𑀝+𑀧𑀝𑀸𑀤𑀬𑁄𑀯 𑀤𑀩𑁆𑀩𑀢𑁆𑀢𑁂𑀦, 𑀢𑀲𑁆𑀫𑀸 𑀦𑀸𑀫+𑀫𑀺𑀢𑀺 𑀲𑀜𑁆𑀜𑀻 𑀓𑀣𑀻𑀬𑀢𑁂, 𑀢𑀁𑀯𑀸𑀘𑀓𑀢𑁆𑀢𑀸 𑀢𑀩𑁆𑀩𑀢𑀻 𑀘𑀺𑀢𑁆𑀢𑀸𑀤𑀺 𑀲𑀜𑁆𑀜𑀸𑀲𑀤𑁆𑀤𑁄𑀢𑀺 𑀦𑀺𑀘𑁆𑀙𑀺𑀬𑀢𑁂𑀬𑁆𑀬+𑀥𑀺𑀧𑁆𑀧𑀸𑀬𑁄.

𑀅𑀬𑀁 𑀧𑀜𑁆𑀘𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀤𑁆𑀤𑀢𑁆𑀣𑁄 𑀘𑁂𑀯 𑀲𑀸𑀫𑀢𑁆𑀣𑀺𑀬𑀸 𑀕𑀫𑁆𑀬𑀫𑀸𑀦𑀢𑁆𑀣𑁄 𑀘𑀸𑀢𑀺 𑀤𑀼𑀩𑁆𑀩𑀺𑀥𑁄. 𑀢𑀣𑀸 𑀳𑀺 ‘‘𑀧𑀻𑀦𑁄 𑀤𑀺𑀯𑀸 𑀦 𑀪𑀼𑀜𑁆𑀚𑁂𑀬𑁆𑀬’’𑀫𑀺𑀢𑀺 𑀪𑀼𑀢𑁆𑀢𑀺𑀦𑀺𑀭𑀸𑀓𑀢𑀺 𑀲𑀤𑁆𑀤𑀢𑁆𑀣𑁄. 𑀭𑀢𑁆𑀢𑀺𑀪𑀼𑀢𑁆𑀢𑀺 𑀢𑀼 𑀲𑀸𑀫𑀢𑁆𑀣𑀺𑀬𑀸+𑀯𑀕𑀫𑁆𑀬𑀢𑁂. 𑀢𑁂𑀦𑁂+𑀢𑀁 𑀯𑀼𑀘𑁆𑀘𑀢𑀺 𑁋

𑀅𑀢𑁆𑀣𑀧𑁆𑀧𑀢𑀻𑀢𑀺𑀬𑀁 𑀲𑀤𑁆𑀤-𑀩𑁆𑀬𑀸𑀧𑀸𑀭𑁄 𑀢𑀺𑀯𑀺𑀥𑁄 𑀪𑀯𑁂;

𑀫𑀼𑀔𑁆𑀬𑁄 𑀮𑀓𑁆𑀔𑀡+𑀩𑁆𑀬𑀜𑁆𑀚𑀦-𑀲𑀪𑀸𑀯𑁄 𑀘𑀸𑀢𑀺 𑀏𑀢𑁆𑀣 𑀢𑀼.

𑀫𑀼𑀔𑁆𑀬𑁄 𑀢𑀼 𑀦𑀺𑀭𑀦𑁆𑀢𑀭𑀢𑁆𑀣𑁂, 𑀮𑀓𑁆𑀔𑀡𑁄 𑀢𑀼 𑀢𑀺𑀭𑁄𑀳𑀺𑀢𑁂;

𑀅𑀢𑁆𑀣𑁂+𑀢𑀭𑁄 𑀢𑀼 𑀯𑀸𑀓𑁆𑀬𑀲𑁆𑀲, 𑀅𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀢𑀺.

‘‘𑀫𑀜𑁆𑀘𑁂’’𑀢𑀺 𑀦𑀺𑀭𑀦𑁆𑀢𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀫𑀼𑀔𑁆𑀬𑁄, ‘‘𑀫𑀜𑁆𑀘𑀸 𑀉𑀕𑁆𑀖𑁄𑀲𑀦𑁆𑀢𑀻’’𑀢𑀺 𑀢𑀺𑀭𑁄𑀳𑀺𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀮𑀓𑁆𑀔𑀡𑁄, 𑀕𑀸𑀣𑀸𑀤𑀺𑀲𑀓𑀮𑀯𑀸𑀓𑁆𑀬𑀲𑁆𑀲+𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀩𑁆𑀬𑀜𑁆𑀚𑀦𑀲𑀪𑀸𑀯𑁄.

𑀩𑁆𑀬𑀸𑀧𑀸𑀭𑀲𑁆𑀲 𑀧𑀪𑁂𑀤𑁂𑀦, 𑀢𑀺𑀥𑀸 𑀲𑀤𑁆𑀤𑁄𑀧𑀺 𑀯𑀸𑀘𑀓𑁄;

𑀮𑀓𑁆𑀔𑀡𑀺𑀓𑁄 𑀩𑁆𑀬𑀜𑁆𑀚𑀓𑁄𑀢𑀺, 𑀢𑀤𑀢𑁆𑀣𑁄𑀧𑀺 𑀢𑀺𑀥𑀸 𑀫𑀢𑁄.

𑀯𑀘𑁆𑀘𑁄 𑀮𑀓𑁆𑀔𑀡𑀺𑀓𑁄 𑀩𑁆𑀬𑀗𑁆𑀕𑁆𑀬𑁄, 𑀘𑁂𑀯𑀁 𑀲𑀤𑁆𑀤𑁄 𑀲𑀼𑀯𑀸𑀘𑀓𑁄;

𑀯𑀼𑀢𑁆𑀢𑀓𑀫𑁂𑀦 𑀚𑀸𑀢𑁆𑀬𑀸𑀤𑀺-𑀪𑁂𑀤𑁂𑀦 𑀧𑀜𑁆𑀘𑀥𑀸 𑀪𑀯𑁂𑀢𑀺.

𑁩𑁮. 𑀆𑀫𑀦𑁆𑀢𑀡𑁂 𑁋

𑀢𑀺 𑀆𑀫𑀦𑁆𑀢𑀡𑀸𑀥𑀺𑀓𑁂 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀪𑁄 𑀦𑀭, 𑀪𑁄 𑀇𑀢𑁆𑀣𑀺, 𑀪𑁄 𑀦𑀧𑀼𑀁𑀲𑀓.

𑀲𑀤𑁆𑀤𑁂𑀦𑀸+𑀪𑀺𑀫𑀼𑀔𑀻𑀓𑀸𑀭𑁄, 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀢𑁆𑀣𑀼𑀦𑁄;

𑀆𑀫𑀦𑁆𑀢𑀡𑀁 𑀯𑀺𑀥𑀸𑀢𑀩𑁆𑀩𑁂, 𑀦𑀢𑁆𑀣𑀺 ‘‘𑀭𑀸𑀚𑀸 𑀪𑀯𑁂’’𑀢𑀺+𑀤𑀁.

𑀓𑁆𑀭𑀺𑀬𑀸 𑀦𑀺𑀫𑀺𑀢𑁆𑀢𑀁 𑀓𑀸𑀭𑀓𑀦𑁆𑀢𑀼 𑀓𑀫𑁆𑀫, 𑀓𑀢𑁆𑀢𑀼, 𑀓𑀭𑀡, 𑀲𑀫𑁆𑀧𑀤𑀸𑀦, 𑀅𑀯𑀥𑀺, 𑀆𑀥𑀸𑀭𑀪𑁂𑀤𑁂𑀦 𑀙𑀩𑁆𑀩𑀺𑀥𑀁, 𑀢𑀁 𑀬𑀣𑀸 𑁋

𑁨,𑁨. 𑀓𑀫𑁆𑀫𑁂 𑀤𑀼𑀢𑀺𑀬𑀸

𑀓𑀭𑀻𑀬𑀢𑀺 𑀓𑀢𑁆𑀢𑀼𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀢𑀲𑁆𑀫𑀺𑀁 𑀓𑀫𑁆𑀫𑀓𑀸𑀭𑀓𑁂 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀢𑀁 𑀢𑀺𑀯𑀺𑀥𑀁 𑀦𑀺𑀩𑁆𑀩𑀢𑁆𑀢𑀺, 𑀯𑀺𑀓𑀢𑀺, 𑀧𑀢𑁆𑀢𑀺 𑀪𑁂𑀤𑁂𑀦, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑁂 𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺, 𑀆𑀳𑀸𑀭𑁄 𑀲𑀼𑀔𑀁 𑀚𑀦𑀬𑀢𑀺, 𑀓𑀝𑀁 𑀓𑀭𑁄𑀢𑀺 𑀤𑀢𑁆𑀢𑁄. 𑀯𑀺𑀓𑀢𑀺𑀬𑀁 𑀓𑀝𑁆𑀞+𑀫𑀗𑁆𑀕𑀸𑀭𑀁 𑀓𑀭𑁄𑀢𑀺, 𑀲𑀼𑀯𑀡𑁆𑀡𑀁 𑀓𑀝𑀓𑀁 𑀓𑀭𑁄𑀢𑀺, 𑀯𑀻𑀳𑀬𑁄 𑀮𑀼𑀦𑀸𑀢𑀺. 𑀧𑀢𑁆𑀢𑀺𑀬𑀁 𑀤𑀢𑁆𑀢𑁄 𑀖𑀭𑀁 𑀧𑀯𑀺𑀲𑀢𑀺, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀧𑀡𑁆𑀟𑀺𑀢𑁂 𑀧𑀬𑀺𑀭𑀼𑀧𑀸𑀲𑀢𑀺.

𑀯𑀼𑀢𑁆𑀢𑀜𑁆𑀘 𑁋

𑀦𑀺𑀩𑁆𑀩𑀢𑁆𑀢𑀺+𑀯𑀺𑀓𑀢𑀺+𑀧𑀢𑁆𑀢𑀺-𑀪𑁂𑀤𑀸 𑀓𑀫𑁆𑀫𑀁 𑀢𑀺𑀥𑀸 𑀫𑀢𑀁;

𑀓𑀢𑁆𑀢𑀼𑀓𑁆𑀭𑀺𑀬𑀸𑀪𑀺𑀕𑀫𑁆𑀫𑀦𑁆𑀢𑀁, 𑀲𑀼𑀔+𑀫𑀗𑁆𑀕𑀸𑀭𑀁+𑀖𑀭𑀁 𑀬𑀣𑀸𑀢𑀺.

𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑀁 𑀤𑀲𑁆𑀲𑀦𑀻𑀬𑀦𑁆𑀢𑀺 𑀅𑀢𑁆𑀣𑁂𑀯 𑀕𑀼𑀡𑀬𑀼𑀢𑁆𑀢𑀲𑁆𑀲 𑀓𑀫𑁆𑀫𑀢𑀸, 𑀯𑀺𑀧𑀼𑀮𑀁 𑀓𑀭𑁄𑀢𑀺, 𑀤𑀲𑁆𑀲𑀦𑀻𑀬𑀁 𑀓𑀭𑁄𑀢𑀻𑀢𑀺 𑀓𑁆𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀺𑀬𑀫𑀸𑀦𑀢𑁆𑀢𑀸. 𑀑𑀤𑀦𑁄 𑀧𑀘𑁆𑀘𑀢𑁂𑀢𑀺 𑀑𑀤𑀦𑀲𑀤𑁆𑀤𑀢𑁄 𑀓𑀫𑁆𑀫𑀢𑀸 𑀦𑀧𑁆𑀧𑀢𑀻𑀬𑀢𑁂, 𑀓𑀺𑀜𑁆𑀘𑀭𑀳𑀺 𑀆𑀔𑁆𑀬𑀸𑀢𑀢𑁄.

𑀇𑀘𑁆𑀙𑀺𑀢𑀓𑀫𑁆𑀫𑀁 𑀬𑀣𑀸-𑀕𑀸𑀯𑀼𑀁 𑀧𑀬𑁄 𑀤𑁄𑀳𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀬𑀸𑀘𑀢𑀺, 𑀕𑀸𑀯+𑀫𑀯 𑀭𑀼𑀦𑁆𑀥𑀢𑀺 𑀯𑀚𑀁, 𑀫𑀸𑀡𑀯𑀓𑀁 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺, 𑀕𑁄𑀫𑀦𑁆𑀢𑀁 𑀕𑀸𑀯𑀁 𑀪𑀺𑀓𑁆𑀔𑀢𑁂, 𑀭𑀼𑀓𑁆𑀔+𑀫𑀯𑀘𑀺𑀦𑀸𑀢𑀺 𑀨𑀮𑀸𑀦𑀺, 𑀭𑀼𑀓𑁆𑀔𑀸𑀢𑁆𑀬𑀢𑁆𑀣𑁄. 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁆𑀭𑀽𑀢𑁂. 𑀏𑀢𑁆𑀣 𑀧𑀬𑁄, 𑀕𑀸𑀯𑀁 𑀇𑀘𑁆𑀘𑀸𑀤𑀺 𑀇𑀘𑁆𑀙𑀺𑀢𑀁, 𑀕𑀸𑀯𑀼𑀁, 𑀕𑁄𑀫𑀦𑁆𑀢+𑀫𑀺𑀘𑁆𑀘𑀸𑀤𑀺 𑀅𑀦𑀺𑀘𑁆𑀙𑀺𑀢𑀁. 𑀏𑀯+𑀫𑀦𑀺𑀘𑁆𑀙𑀺𑀢𑁂𑀧𑀺 𑀓𑀡𑁆𑀝𑀓𑀁 𑀫𑀤𑁆𑀤𑀢𑀺, 𑀯𑀺𑀲𑀁 𑀕𑀺𑀮𑀢𑀺. 𑀬𑀁 𑀦𑁂𑀯𑀺+𑀘𑁆𑀙𑀺𑀢𑀁, 𑀦𑀸𑀧𑀺 𑀅𑀦𑀺𑀘𑁆𑀙𑀺𑀢𑀁, 𑀢𑀢𑁆𑀭𑀸𑀧𑀺 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀫𑀽𑀮+𑀫𑀼𑀧𑀲𑀧𑁆𑀧𑀢𑀺.

𑀆𑀥𑀸𑀭𑁂 𑀅𑀥𑀺𑀲𑀺+𑀞𑀸+𑀲𑀸𑀦𑀁 𑀧𑀬𑁄𑀕𑁂 𑀘, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫+𑀫𑀥𑀺𑀢𑀺𑀝𑁆𑀞𑀢𑀺, 𑀭𑀼𑀓𑁆𑀔+𑀫𑀚𑁆𑀛𑀸𑀲𑀢𑁂𑀢𑀺. 𑀏𑀢𑁆𑀣 𑀧𑀣𑀯𑀺𑀦𑁆𑀢𑀺 𑀧𑀣𑀯𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀯+𑀫𑀪𑀺, 𑀦𑀺𑀧𑀼𑀩𑁆𑀩𑀯𑀺𑀲𑀲𑁆𑀲𑀸𑀧𑀺, 𑀥𑀫𑁆𑀫+𑀫𑀪𑀺𑀦𑀺𑀯𑀺𑀲𑀢𑁂, 𑀥𑀫𑁆𑀫𑁂 𑀯𑀸. 𑀢𑀣𑀸 𑀉𑀧, 𑀦𑁆𑀯+𑀚𑁆𑀛𑀸+𑀧𑀼𑀩𑁆𑀩𑀯𑀲𑀢𑀺𑀲𑁆𑀲, 𑀕𑀸𑀫+𑀫𑀼𑀧𑀯𑀲𑀢𑀺, 𑀕𑀸𑀫+𑀫𑀦𑀼𑀯𑀲𑀢𑀺, 𑀯𑀺𑀳𑀸𑀭+𑀫𑀥𑀺𑀯𑀲𑀢𑀺, 𑀕𑀸𑀫+𑀫𑀸𑀯𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀯𑀲𑀢𑀺, 𑀏𑀢𑁆𑀣 𑀕𑀸𑀫𑀦𑁆𑀢𑀺 𑀕𑀸𑀫𑁂𑀢𑁆𑀬𑀢𑁆𑀣𑁄. 𑀢𑀣𑀸 𑀢𑀧𑁆𑀧𑀸𑀦𑀸+𑀘𑀸𑀭𑁂𑀧𑀺, 𑀦𑀤𑀺𑀁 𑀧𑀺𑀩𑀢𑀺, 𑀕𑀸𑀫𑀁 𑀘𑀭𑀢𑀺, 𑀦𑀤𑀺𑀬𑀁𑀢𑁆𑀬𑀢𑁆𑀣𑁄. 𑀲𑀘𑁂 𑀫𑀁 𑀦𑀸𑀮𑀧𑀺𑀲𑁆𑀲𑀢𑀻𑀢𑀺 𑀫𑀬𑀸 𑀲𑀤𑁆𑀥𑀺𑀁𑀢𑁆𑀬𑀢𑁆𑀣𑁄. 𑀯𑀺𑀳𑀺𑀢𑀸𑀯 𑀧𑀝𑀺-𑀬𑁄𑀕𑁂𑀧𑀺 𑀤𑀼𑀢𑀺𑀬𑀸, 𑀧𑀝𑀺𑀪𑀦𑁆𑀢𑀼 𑀢𑀁 𑀘𑀼𑀦𑁆𑀤 𑀩𑁄𑀚𑁆𑀛𑀗𑁆𑀕𑀸, 𑀢𑀫𑁆𑀧𑀝𑀺 𑀩𑁄𑀚𑁆𑀛𑀗𑁆𑀕𑀸 𑀪𑀸𑀲𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀉𑀧𑀫𑀸 𑀫𑀁 𑀧𑀢𑀺𑀪𑀸𑀢𑀺, 𑀉𑀧𑀫𑀸 𑀫𑀁 𑀉𑀧𑀝𑁆𑀞𑀸𑀢𑀺𑀢𑁆𑀬𑀢𑁆𑀣𑁄. 𑀥𑀸𑀢𑀼𑀦𑀸𑀬𑀼𑀢𑁆𑀢𑁂 ‘‘𑀢𑀲𑁆𑀲 𑀦𑀧𑁆𑀧𑀝𑀺𑀪𑀸𑀢𑀻’’𑀢𑀺 𑀙𑀝𑁆𑀞𑀻.

𑁩. 𑀓𑀸𑀮𑀤𑁆𑀥𑀸𑀦+𑀫𑀘𑁆𑀘𑀦𑁆𑀢𑀲𑀁𑀬𑁄𑀕𑁂

𑀓𑀸𑀮𑀤𑁆𑀥𑀸𑀦𑀁 𑀤𑀩𑁆𑀩+𑀕𑀼𑀡+𑀓𑁆𑀭𑀺𑀬𑀸𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀢𑁂𑀳𑀺 𑀓𑀸𑀮𑀤𑁆𑀥𑀸𑀦𑀯𑀸𑀘𑀻𑀳𑀺 𑀤𑀼𑀢𑀺𑀬𑀸 𑀳𑁄𑀢𑀺. 𑀓𑀸𑀮𑁂-𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁, 𑀫𑀸𑀲𑀁 𑀫𑀁𑀲𑁄𑀤𑀦𑀁, 𑀲𑀭𑀤𑀁 𑀭𑀫𑀡𑀻𑀬𑀸 𑀦𑀤𑀻, 𑀲𑀩𑁆𑀩𑀓𑀸𑀮𑀁 𑀭𑀫𑀡𑀻𑀬𑀁 𑀦𑀦𑁆𑀤𑀦𑀁, 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀤𑁆𑀥𑀦𑀺-𑀬𑁄𑀚𑀦𑀁 𑀯𑀦𑀭𑀸𑀚𑀺, 𑀬𑁄𑀚𑀦𑀁 𑀤𑀻𑀖𑁄 𑀧𑀩𑁆𑀩𑀢𑁄, 𑀓𑁄𑀲𑀁 𑀲𑀚𑁆𑀛𑀸𑀬𑀢𑀺.

𑀧𑀼𑀩𑁆𑀩𑀦𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀇𑀫𑀁 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄𑀢𑀺 𑀏𑀯𑀫𑀸𑀤𑀻𑀲𑀼 𑀓𑀸𑀮𑀯𑀸𑀘𑀻𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀤𑀼𑀢𑀺𑀬𑀸, 𑀩𑀳𑀼𑀮𑀁𑀯𑀺𑀥𑀸𑀦𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀯𑀸. 𑀫𑀸𑀲𑁂𑀦𑀸+𑀦𑀼𑀯𑀸𑀓𑁄+𑀥𑀻𑀢𑁄, 𑀓𑁄𑀲𑁂𑀦𑀸+𑀦𑀼𑀯𑀸𑀓𑁄+𑀥𑀻𑀢𑁄𑀢𑀺 𑀓𑀭𑀡𑀢𑁆𑀣𑁂 𑀢𑀢𑀺𑀬𑀸.

𑁪. 𑀕𑀢𑀺𑀩𑁄𑀥𑀸𑀳𑀸𑀭𑀲𑀤𑁆𑀤𑀢𑁆𑀣𑀸𑀓𑀫𑁆𑀫𑀓𑀪𑀚𑁆𑀚𑀸𑀤𑀻𑀦𑀁 𑀧𑀬𑁄𑀚𑁆𑀚𑁂

𑀕𑀢𑁆𑀬𑀢𑁆𑀣𑀸𑀦𑀁 𑀩𑁄𑀥𑀢𑁆𑀣𑀸𑀦𑀁 𑀆𑀳𑀸𑀭𑀢𑁆𑀣𑀸𑀦𑀁 𑀲𑀤𑁆𑀤𑀢𑁆𑀣𑀸𑀦+𑀫𑀓𑀫𑁆𑀫𑀓𑀸𑀦𑀁 𑀪𑀚𑁆𑀚𑀸𑀤𑀻𑀦𑀜𑁆𑀘 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺. 𑀤𑀢𑁆𑀢𑁄 𑀕𑀫𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫𑀁, 𑀬𑀸𑀧𑀬𑀢𑀺 𑀯𑀸. 𑀕𑀼𑀭𑀼 𑀩𑁄𑀥𑀬𑀢𑀺 𑀫𑀸𑀡𑀯𑀓𑀁 𑀥𑀫𑁆𑀫𑀁, 𑀯𑁂𑀤𑀬𑀢𑀺 𑀯𑀸. 𑀫𑀸𑀢𑀸 𑀪𑁄𑀚𑀬𑀢𑀺 𑀧𑀼𑀢𑁆𑀢+𑀫𑁄𑀤𑀦𑀁, 𑀆𑀲𑀬𑀢𑀺 𑀯𑀸. 𑀕𑀼𑀭𑀼 𑀅𑀚𑁆𑀛𑀸𑀧𑀬𑀢𑀺 𑀲𑀺𑀲𑁆𑀲𑀁 𑀯𑁂𑀤𑀁, 𑀧𑀸𑀞𑀬𑀢𑀺 𑀯𑀸. 𑀧𑀬𑁄𑀚𑁆𑀚𑀢𑁄+𑀜𑁆𑀜𑀢𑁆𑀭 𑀓𑀫𑁆𑀫𑁂 𑀤𑀼𑀢𑀺𑀬𑀸. 𑀧𑁄𑀲𑁄 𑀆𑀲𑀬𑀢𑀺 𑀤𑀢𑁆𑀢𑀁, 𑀲𑀸𑀬𑀬𑀢𑀺 𑀯𑀸. 𑀧𑁄𑀲𑁄 𑀅𑀜𑁆𑀜𑀁 𑀪𑀚𑁆𑀚𑀸𑀧𑁂𑀢𑀺, 𑀅𑀜𑁆𑀜𑀁 𑀓𑁄𑀝𑁆𑀝𑀸𑀧𑁂𑀢𑀺, 𑀅𑀜𑁆𑀜𑀁 𑀲𑀦𑁆𑀣𑀭𑀸𑀧𑁂𑀢𑀺.

𑁫. 𑀳𑀭𑀸𑀤𑀻𑀦𑀁 𑀯𑀸

𑀳𑀭𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀳𑁄𑀢𑀺 𑀯𑀸. 𑀧𑁄𑀲𑁄 𑀳𑀸𑀭𑁂𑀢𑀺 𑀪𑀸𑀭𑀁 𑀤𑀢𑁆𑀢𑀁, 𑀤𑀢𑁆𑀢𑁂𑀦𑁂𑀢𑀺 𑀯𑀸. 𑀤𑀲𑁆𑀲𑀬𑀢𑁂 𑀚𑀦𑀁 𑀭𑀸𑀚𑀸, 𑀚𑀦𑁂𑀦𑁂𑀢𑀺 𑀯𑀸. 𑀅𑀪𑀺𑀯𑀸𑀤𑀬𑀢𑁂 𑀕𑀼𑀭𑀼𑀁 𑀤𑀢𑁆𑀢𑀁, 𑀤𑀢𑁆𑀢𑁂𑀦𑁂𑀢𑀺 𑀯𑀸. 𑀅𑀚𑁆𑀛𑁄𑀳𑀸𑀭𑁂𑀢𑀺 𑀲𑀢𑁆𑀢𑀼𑀁 𑀤𑀢𑁆𑀢𑀁, 𑀤𑀢𑁆𑀢𑁂𑀦𑁂𑀢𑀺 𑀯𑀸. 𑀓𑀸𑀭𑁂𑀢𑀺 𑀤𑀢𑁆𑀢𑁄 𑀤𑀢𑁆𑀢𑀁, 𑀤𑀢𑁆𑀢𑁂𑀦𑁂𑀢𑀺 𑀯𑀸. 𑀧𑀓𑁆𑀔𑁂 𑀲𑀩𑁆𑀩𑀢𑁆𑀭 𑀓𑀢𑁆𑀢𑀭𑀺 𑀢𑀢𑀺𑀬𑀸.

𑁬. 𑀦 𑀔𑀸𑀤𑀸𑀤𑀻𑀦𑀁

𑀔𑀸𑀤𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀕𑀢𑁆𑀬𑀢𑁆𑀣𑀸𑀤𑀻𑀲𑀼 𑀓𑁆𑀯𑀘𑀺 𑀧𑀝𑀺𑀲𑁂𑀥𑀢𑁆𑀣+𑀫𑀺𑀤𑀁. 𑀔𑀸𑀤𑀬𑀢𑀺 𑀤𑀢𑁆𑀢𑁄 𑀤𑀢𑁆𑀢𑁂𑀦, 𑀆𑀤𑀬𑀢𑀺 𑀤𑀢𑁆𑀢𑁂𑀦, 𑀅𑀯𑁆𑀳𑀸𑀧𑀬𑀢𑀺 𑀤𑀢𑁆𑀣𑁂𑀦, 𑀲𑀤𑁆𑀤𑀸𑀬𑀬𑀢𑀺 𑀤𑀢𑁆𑀢𑁂𑀦, 𑀦𑀸𑀬𑀬𑀢𑀺 𑀤𑀢𑁆𑀢𑁂𑀦, 𑀓𑀦𑁆𑀤𑀬𑀢𑀺 𑀤𑀢𑁆𑀢𑁂𑀦.

𑁭. 𑀛𑀸𑀤𑀻𑀳𑀺 𑀬𑀼𑀢𑁆𑀢𑀸

𑀥𑀺𑀆𑀤𑀻𑀳𑀺 𑀬𑀼𑀢𑁆𑀢𑀢𑁄 𑀤𑀼𑀢𑀺𑀬𑀸 𑀳𑁄𑀢𑀺. 𑀥𑀺+𑀭𑀢𑁆𑀣𑀼+𑀫𑀁 𑀧𑀼𑀢𑀺𑀓𑀸𑀬𑀁, 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀮𑀦𑁆𑀤𑀁, 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀮𑀦𑁆𑀤𑀲𑁆𑀲 𑀘 𑀯𑀺𑀯𑀭𑀪𑀽𑀢𑁂 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀸𑀦+𑀫𑀦𑁆𑀢𑀭𑁂𑀦, 𑀫𑀼𑀘𑀮𑀺𑀦𑁆𑀤+𑀫𑀪𑀺𑀢𑁄 𑀲𑀭𑀁. 𑀙𑀝𑁆𑀞𑁆𑀬𑀢𑁆𑀣𑁂+𑀬𑀁 𑀤𑀼𑀢𑀺𑀬𑀸.

𑁮. 𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀯𑀺𑀘𑁆𑀙𑀸𑀲𑁆𑀯+𑀪𑀺𑀦𑀸

𑀮𑀓𑁆𑀔𑀡𑀸𑀤𑀻𑀲𑁆𑀯+𑀢𑁆𑀣𑁂𑀲𑀼 𑀅𑀪𑀺𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺. 𑀭𑀼𑀓𑁆𑀔+𑀫𑀪𑀺𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀏𑀢𑁆𑀣 𑀭𑀼𑀓𑁆𑀔𑁄 𑀮𑀓𑁆𑀔𑀡𑀁, 𑀘𑀦𑁆𑀤𑁄 𑀮𑀓𑁆𑀔𑀺𑀢𑀩𑁆𑀩𑁄, 𑀢𑀢𑁆𑀭 𑀅𑀪𑀺𑀦𑀸 𑀭𑀼𑀓𑁆𑀔𑀲𑁆𑀲 𑀮𑀓𑁆𑀔𑀡𑀯𑀼𑀢𑁆𑀢𑀺𑀢𑀸 𑀧𑀓𑀸𑀲𑀻𑀬𑀢𑀻𑀢𑀺 𑀭𑀼𑀓𑁆𑀔𑁄 𑀅𑀪𑀺𑀦𑀸 𑀬𑀼𑀢𑁆𑀢𑁄 𑀦𑀸𑀫. 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭+𑀫𑀪𑀺, 𑀫𑀸𑀢𑀭𑀺 𑀲𑀸𑀥𑀼𑀢𑁆𑀢𑀁 𑀧𑀢𑁆𑀢𑁄𑀢𑁆𑀬𑀢𑁆𑀣𑁄. 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁𑀅𑀪𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀭𑀼𑀓𑁆𑀔𑁂 𑀭𑀼𑀓𑁆𑀔𑁂𑀢𑁆𑀬𑀢𑁆𑀣𑁄.

𑁯. 𑀧𑀢𑀺𑀧𑀭𑀻𑀳𑀺 𑀪𑀸𑀕𑁂 𑀘

𑀧𑀢𑀺𑀧𑀭𑀻𑀳𑀺 𑀬𑀼𑀢𑁆𑀢𑀢𑁄 𑀮𑀓𑁆𑀔𑀡𑀸𑀤𑀻𑀲𑀼 𑀪𑀸𑀕𑁂 𑀘+𑀢𑁆𑀣𑁂 𑀤𑀼𑀢𑀺𑀬𑀸 𑀳𑁄𑀢𑀺. 𑀭𑀼𑀓𑁆𑀔𑀁𑀧𑀢𑀺 𑀯𑀺𑀚𑁆𑀚𑁄𑀢𑀢𑁂, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁𑀧𑀢𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁𑀧𑀢𑀺 𑀢𑀺𑀝𑁆𑀞𑀢𑀺, 𑀬+𑀤𑁂𑀢𑁆𑀣 𑀫𑀁 𑀧𑀢𑀺 𑀲𑀺𑀬𑀸, 𑀬𑁄 𑀫𑀫 𑀪𑀸𑀕𑁄, 𑀲𑁄 𑀤𑀻𑀬𑀢𑀼𑀢𑁆𑀬𑀢𑁆𑀣𑁄. 𑀏𑀯𑀁 𑀭𑀼𑀓𑁆𑀔𑀁𑀧𑀭𑀺𑀢𑁆𑀬𑀸𑀤𑀺𑀧𑀺.

𑁧𑁦. 𑀅𑀦𑀼𑀦𑀸𑀢𑀺

𑀮𑀓𑁆𑀔𑀡𑀸𑀤𑀻𑀲𑀼 𑀤𑀼𑀢𑀺𑀬𑀸. 𑀭𑀼𑀓𑁆𑀔𑀫𑀦𑀼 𑀯𑀺𑀚𑁆𑀚𑁄𑀢𑀢𑁂, 𑀲𑀘𑁆𑀘𑀓𑀺𑀭𑀺𑀬+𑀫𑀦𑀼 𑀯𑀲𑁆𑀲𑀺, 𑀳𑁂𑀢𑀼 𑀘 𑀮𑀓𑁆𑀔𑀡𑀁 𑀪𑀯𑀢𑀺, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭+𑀫𑀦𑀼, 𑀭𑀼𑀓𑁆𑀔𑀁 𑀭𑀼𑀓𑁆𑀔+𑀫𑀦𑀼 𑀯𑀺𑀚𑁆𑀚𑁄𑀢𑀢𑁂, 𑀬𑀤𑁂𑀢𑁆𑀣 𑀫𑀁𑀅𑀦𑀼 𑀲𑀺𑀬𑀸.

𑁧𑁧. 𑀲𑀳𑀢𑁆𑀣𑁂

𑀲𑀳𑀢𑁆𑀣𑁂 𑀅𑀦𑀼𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸. 𑀧𑀩𑁆𑀩𑀢+𑀫𑀦𑀼 𑀢𑀺𑀝𑁆𑀞𑀢𑀺, 𑀧𑀩𑁆𑀩𑀢𑁂𑀦 𑀲𑀳 𑀢𑁆𑀬𑀢𑁆𑀣𑁄.

𑁧𑁨. 𑀳𑀻𑀦𑁂

𑀳𑀻𑀦𑀢𑁆𑀣𑁂 𑀅𑀦𑀼𑀦𑀸 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸. 𑀅𑀦𑀼𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄 𑀪𑀺𑀓𑁆𑀔𑀽, 𑀲𑀸𑀭𑀺𑀧𑀼𑀢𑁆𑀢𑀢𑁄 𑀧𑀜𑁆𑀜𑀸𑀬 𑀳𑀻𑀦𑀸𑀢𑁆𑀬𑀢𑁆𑀣𑁄.

𑁧𑁩. 𑀉𑀧𑁂𑀦

𑀳𑀻𑀦𑀢𑁆𑀣𑁂 𑀉𑀧𑁂𑀦 𑀬𑀼𑀢𑁆𑀢𑀫𑁆𑀳𑀸 𑀤𑀼𑀢𑀺𑀬𑀸. 𑀉𑀧𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄.

𑁧𑁬. 𑀓𑀢𑁆𑀢𑀼𑀓𑀭𑀡𑁂𑀲𑀼 𑀢𑀢𑀺𑀬𑀸

𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀓𑀸𑀭𑀓𑁂 𑀢𑀢𑀺𑀬𑀸 𑀳𑁄𑀢𑀺. 𑀚𑀺𑀦𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀩𑀼𑀤𑁆𑀥𑁂𑀦 𑀚𑀺𑀢𑁄 𑀫𑀸𑀭𑁄, 𑀅𑀳𑀺𑀦𑀸 𑀤𑀝𑁆𑀞𑁄 𑀦𑀭𑁄. 𑀬𑀢𑁆𑀣 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀓𑀸𑀭𑀡𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀢𑀢𑁆𑀣𑀸𑀧𑀺 𑀢𑀢𑀺𑀬𑀸, 𑀘𑁄𑀭𑁂𑀳𑀺 𑀕𑀸𑀫𑁄 𑀤𑀟𑁆𑀠𑁄, 𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥𑀁, 𑀲𑀤𑁆𑀥𑁂𑀳𑀺 𑀓𑀸𑀭𑀺𑀢𑀸 𑀯𑀺𑀳𑀸𑀭𑀸.

𑀅𑀢𑁆𑀢𑀧𑀥𑀸𑀦𑁄 𑀓𑀺𑀭𑀺𑀬𑀁, 𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺 𑀓𑀸𑀭𑀓𑁄;

𑀅𑀧𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀯𑀸, 𑀲 𑀓𑀢𑁆𑀢𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀭𑀡𑁂-𑀢𑀁 𑀧𑀦 𑀤𑀼𑀯𑀺𑀥𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦, 𑀬𑀣𑀸 𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬𑀢𑀺. 𑀤𑀢𑁆𑀢𑁂𑀦 𑀯𑀺𑀳𑀬𑁄 𑀮𑀼𑀦𑀸𑀢𑀺, 𑀅𑀕𑁆𑀕𑀺𑀦𑀸 𑀓𑀼𑀝𑀺𑀁 𑀛𑀸𑀧𑁂𑀢𑀺.

𑀩𑀸𑀳𑀺𑀭𑀜𑁆𑀘 𑀢𑀣𑀸+𑀚𑁆𑀛𑀢𑁆𑀢𑀁, 𑀓𑀭𑀡𑀁 𑀤𑀼𑀯𑀺𑀥𑀁 𑀬𑀣𑀸;

𑀯𑀻𑀳𑀺𑀁 𑀮𑀼𑀦𑀸𑀢𑀺 𑀤𑀢𑁆𑀢𑁂𑀦, 𑀦𑁂𑀢𑁆𑀢𑁂𑀦 𑀘𑀦𑁆𑀤+𑀫𑀺𑀓𑁆𑀔𑀢𑁂.

𑀧𑀓𑀢𑀺𑀬𑀸 𑀅𑀪𑀺𑀭𑀽𑀧𑁄, 𑀕𑁄𑀢𑁆𑀢𑁂𑀦 𑀕𑁄𑀢𑀫𑁄 𑀇𑀘𑁆𑀘𑀸𑀤𑀺 𑀪𑀽𑀥𑀸𑀢𑀼𑀲𑁆𑀲 𑀲𑀫𑁆𑀪𑀯𑀸 𑀓𑀭𑀡𑁂 𑀢𑀢𑀺𑀬𑀸. 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁄, 𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑁄 𑀩𑀼𑀤𑁆𑀥𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄, 𑀲𑀺𑀧𑁆𑀧𑁂𑀦 𑀦𑀴𑀓𑀸𑀭𑁄 𑀲𑁄, 𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸, 𑀏𑀯𑀁 𑀲𑀫𑁂𑀦 𑀥𑀸𑀯𑀢𑀺, 𑀯𑀺𑀲𑀫𑁂𑀦 𑀥𑀸𑀯𑀢𑀺, 𑀤𑁆𑀯𑀺𑀤𑁄𑀡𑁂𑀦 𑀥𑀜𑁆𑀜𑀁 𑀓𑀺𑀡𑀸𑀢𑀺.

𑁧𑁭. 𑀲𑀳𑀢𑁆𑀣𑁂𑀦

𑀲𑀳𑀢𑁆𑀣𑁂𑀦 𑀬𑁄𑀕𑁂 𑀢𑀢𑀺𑀬𑀸 𑀲𑀺𑀬𑀸. 𑀢𑀢𑀺𑀬𑀸𑀧𑀺 𑀙𑀝𑁆𑀞𑀻𑀯 𑀅𑀧𑁆𑀧𑀥𑀸𑀦𑁂 𑀏𑀯 𑀪𑀯𑀢𑀺. 𑀧𑀼𑀢𑁆𑀢𑁂𑀦 𑀲𑀳𑀸+𑀕𑀢𑁄, 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀆𑀕𑀢𑁄, 𑀯𑀺𑀢𑀓𑁆𑀓𑁂𑀦 𑀲𑀳 𑀯𑀢𑁆𑀢𑀢𑀺, 𑀧𑀼𑀢𑁆𑀢𑁂𑀦 𑀲𑀳 𑀣𑀽𑀮𑁄, 𑀦𑀺𑀲𑀻𑀤𑀺 𑀪𑀕𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸, 𑀲𑀩𑁆𑀩𑁂𑀳𑀺 𑀫𑁂 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄.

𑁧𑁮. 𑀮𑀓𑁆𑀔𑀡𑁂

𑀮𑀓𑁆𑀔𑀡𑁂 𑀯𑀢𑁆𑀢𑀫𑀸𑀦𑀢𑁄 𑀢𑀢𑀺𑀬𑀸. 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀮𑁄𑀳𑀺𑀢𑁂𑀦 𑀧𑀝𑀻𑀯𑀺𑀲𑁆𑀲𑀓𑁂 𑀉𑀚𑁆𑀛𑀸𑀧𑁂𑀲𑀺, 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀅𑀜𑁆𑀜𑀁 𑀦𑀯𑀁 𑀧𑀢𑁆𑀢𑀁 𑀘𑁂𑀢𑀸𑀧𑁂𑀬𑁆𑀬, 𑀢𑀺𑀤𑀡𑁆𑀟𑀓𑁂𑀦 𑀧𑀭𑀺𑀩𑁆𑀩𑀸𑀚𑀓+𑀫𑀤𑁆𑀤𑀓𑁆𑀔𑀺, 𑀅𑀓𑁆𑀔𑀺𑀦𑀸 𑀓𑀸𑀡𑁄, 𑀳𑀢𑁆𑀣𑁂𑀦 𑀓𑀼𑀡𑀻, 𑀧𑀸𑀤𑁂𑀦 𑀔𑀜𑁆𑀚𑁄, 𑀧𑀺𑀝𑁆𑀞𑀺𑀬𑀸 𑀔𑀼𑀚𑁆𑀚𑁄. 𑀢𑁂𑀦 𑀳𑀺 𑀯𑀺𑀓𑀮𑀗𑁆𑀕𑁂𑀦 𑀯𑀺𑀓𑀮𑀗𑁆𑀕𑀺𑀦𑁄 𑀯𑀺𑀓𑀸𑀭𑁄 𑀮𑀓𑁆𑀔𑀺𑀬𑀢𑁂.

𑁧𑁯. 𑀳𑁂𑀢𑀼𑀫𑁆𑀳𑀺

𑀯𑀸𑀲𑀸𑀤𑀺𑀮𑀓𑁆𑀔𑀡𑀓𑁆𑀭𑀺𑀬𑀸𑀬 𑀳𑁂𑀢𑀼𑀢𑁄 𑀢𑀢𑀺𑀬𑀸. 𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀺, 𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺, 𑀤𑀸𑀦𑁂𑀦 𑀪𑁄𑀕𑀯𑀸, 𑀆𑀘𑀸𑀭𑁂𑀦 𑀓𑀼𑀮𑀁, 𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄.

𑁨𑁦. 𑀧𑀜𑁆𑀘𑀫𑀻+𑀡𑁂 𑀯𑀸

𑀇𑀡𑁂 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑀫𑀻 𑀯𑀸. 𑀲𑀢𑀲𑁆𑀫𑀸 𑀩𑀤𑁆𑀥𑁄, 𑀲𑀢𑁂𑀦 𑀯𑀸.

𑁨𑁧. 𑀕𑀼𑀡𑁂

𑀧𑀭𑀗𑁆𑀕𑀪𑀽𑀢𑁂 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑀫𑀻 𑀳𑁄𑀢𑀺 𑀯𑀸. 𑀚𑀴𑀢𑁆𑀢𑀸 𑀩𑀤𑁆𑀥𑁄, 𑀚𑀴𑀢𑁆𑀢𑁂𑀦𑀯𑀸, 𑀧𑀜𑁆𑀜𑀸𑀬 𑀫𑀼𑀢𑁆𑀢𑁄, 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄. 𑀩𑀳𑀼𑀮𑀁𑀯𑀺𑀥𑀸𑀦𑀸 𑀲𑀢𑁆𑀢𑀫𑁆𑀬𑀢𑁆𑀣𑁂𑀳𑀺𑀧𑀺, 𑀢𑁂𑀦 𑀲𑀫𑀬𑁂𑀦, 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸, 𑀧𑀼𑀭𑀢𑁆𑀣𑀺𑀫𑁂𑀦 𑀥𑀢𑀭𑀝𑁆𑀞𑁄, 𑀤𑀓𑁆𑀔𑀺𑀡𑁂𑀦 𑀯𑀺𑀭𑀽𑀴𑁆𑀳𑀓𑁄, 𑀉𑀢𑁆𑀢𑀭𑁂𑀦 𑀓𑀧𑀺𑀮𑀯𑀢𑁆𑀣𑀼, 𑀬𑁂𑀦 𑀪𑀕𑀯𑀸, 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀲𑁄 𑀯𑁄 𑀫𑀫+𑀘𑁆𑀘𑀬𑁂𑀦 𑀲𑀢𑁆𑀣𑀸𑀢𑀺. 𑀫𑀸𑀲𑁂𑀦 𑀪𑀼𑀜𑁆𑀚𑀢𑀺, 𑀏𑀓𑀸𑀳𑁂𑀦𑁂𑀯 𑀩𑀸𑀭𑀸𑀡𑀲𑀺𑀁 𑀧𑀸𑀯𑀺𑀲𑀺, 𑀦𑀯𑀳𑀺 𑀫𑀸𑀲𑁂𑀳𑀺 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀺, 𑀓𑀳𑀸𑀧𑀡𑁂𑀦 𑀊𑀦𑁄, 𑀥𑀦𑁂𑀦 𑀯𑀺𑀓𑀮𑁄, 𑀅𑀲𑀺𑀦𑀸 𑀓𑀮𑀳𑁄, 𑀆𑀘𑀸𑀭𑁂𑀦 𑀦𑀺𑀧𑀼𑀡𑁄, 𑀕𑀼𑀴𑁂𑀦 𑀫𑀺𑀲𑁆𑀲𑀓𑀁, 𑀯𑀸𑀘𑀸𑀬 𑀲𑀔𑀺𑀮𑁄, 𑀫𑀡𑀺𑀦𑀸 𑀅𑀢𑁆𑀣𑁄, 𑀥𑀦𑁂𑀦 𑀅𑀢𑁆𑀣𑁄, 𑀬𑁄𑀚𑀦𑁂𑀦 𑀕𑀘𑁆𑀙𑀢𑀺 𑀇𑀘𑁆𑀘𑀸𑀤𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑁂 𑀯𑀸 𑀢𑀢𑀺𑀬𑀸. 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀢𑀻𑀢𑀺 𑀧𑀘𑁆𑀘𑀢𑁆𑀢𑁂 𑀩𑀳𑀼𑀮𑀁𑀯𑀺𑀥𑀸𑀦𑀸 𑀓𑀢𑁆𑀢𑀭𑀺 𑀢𑀢𑀺𑀬𑀸. 𑀏𑀯𑀁 𑀢𑀺𑀮𑁂𑀳𑀺 𑀔𑁂𑀢𑁆𑀢𑁂 𑀯𑀧𑀢𑀻𑀢𑀺 𑀓𑀫𑁆𑀫𑀢𑁆𑀣𑁂, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦𑀸𑀢𑀺 𑀧𑀜𑁆𑀘𑀫𑁆𑀬𑀢𑁆𑀣𑁂 𑀘.

𑁨𑁪. 𑀘𑀢𑀼𑀢𑁆𑀣𑀻 𑀲𑀫𑁆𑀧𑀤𑀸𑀦𑁂

𑀅𑀘𑁂𑀢𑀦𑀁 𑀲𑀘𑁂𑀢𑀦𑀁 𑀯𑀸 𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑁂𑀦𑀸+𑀧𑁂𑀓𑁆𑀔𑀺𑀢𑀁, 𑀢𑀁 𑀲𑀫𑁆𑀧𑀤𑀸𑀦𑀁, 𑀢𑀜𑁆𑀘 𑀤𑀸-𑀤𑀸𑀦𑁂𑀢𑀺 𑀥𑀸𑀢𑀼𑀢𑁄 𑀩𑁆𑀬𑀧𑁆𑀧𑁂𑀦 𑀬𑀼𑀢𑁆𑀢𑀫𑁂𑀯, 𑀢𑀢𑁆𑀣 𑀘𑀢𑀼𑀢𑁆𑀣𑀻 𑀳𑁄𑀢𑀺. 𑀢𑀜𑁆𑀘 𑀤𑀻𑀬𑀫𑀸𑀦𑀲𑁆𑀲 𑀯𑀢𑁆𑀣𑀼𑀦𑁄 𑀅𑀦𑀺𑀯𑀸𑀭𑀡+𑀚𑁆𑀛𑁂𑀲𑀦𑀸+𑀦𑀼𑀫𑀢𑀺𑀢𑁄 𑀢𑀺𑀯𑀺𑀥𑁄, 𑀬𑀣𑀸 𑀩𑀼𑀤𑁆𑀥𑀲𑁆𑀲 𑀧𑀼𑀧𑁆𑀨𑀁 𑀤𑁂𑀢𑀺, 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀚𑀮𑀁 𑀤𑁂𑀢𑀺, 𑀬𑀸𑀘𑀓𑀲𑁆𑀲 𑀥𑀦𑀁 𑀤𑁂𑀢𑀺, 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑁂𑀢𑀺.

𑀅𑀦𑀺𑀭𑀸𑀓𑀭𑀡𑀸+𑀭𑀸𑀥-𑀦+𑀩𑁆𑀪𑀦𑀼𑀜𑁆𑀜𑀯𑀲𑁂𑀦 𑀳𑀺;

𑀲𑀫𑁆𑀧𑀤𑀸𑀦𑀁 𑀢𑀺𑀥𑀸 𑀯𑀼𑀢𑁆𑀢𑀁, 𑀭𑀼𑀓𑁆𑀔+𑀬𑀸𑀘𑀓+𑀪𑀺𑀓𑁆𑀔𑀯𑁄.

𑀆𑀥𑀸𑀭𑀯𑀺𑀯𑀓𑁆𑀔𑀸𑀬𑀁 𑀲𑀢𑁆𑀢𑀫𑀻𑀧𑀺, 𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺, 𑀬𑀸 𑀧𑀮𑀸𑀮𑀫𑀬𑀁 𑀫𑀸𑀮𑀁, 𑀦𑀸𑀭𑀻 𑀤𑀢𑁆𑀯𑀸𑀦 𑀘𑁂𑀢𑀺𑀬𑁂𑀢𑀺.

𑁨𑁫. 𑀢𑀸𑀤𑀢𑁆𑀣𑁆𑀬𑁂

𑀢𑀸𑀤𑀢𑁆𑀣𑁆𑀬𑁂 𑀘𑀢𑀼𑀢𑁆𑀣𑀻 𑀲𑀺𑀬𑀸. 𑀢𑀤𑀢𑁆𑀣𑀲𑁆𑀲 𑀪𑀸𑀯𑁂, 𑀢𑀸𑀤𑀢𑁆𑀣𑁆𑀬𑀁, 𑀢𑀲𑁆𑀫𑀺𑀁 𑀢𑀤𑀢𑁆𑀣𑀪𑀸𑀯𑁂 𑀚𑁄𑀢𑀦𑀻𑀬𑁂𑀯 𑀘𑀢𑀼𑀢𑁆𑀣𑀻 𑀲𑀺𑀬𑀸. 𑀢𑀤𑀢𑁆𑀣𑀲𑁆𑀲 𑀪𑀸𑀯𑁄𑀢𑀺 𑀦𑀺𑀫𑀺𑀢𑁆𑀢𑀦𑀺𑀫𑀺𑀢𑁆𑀢𑀻𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀢𑀲𑁆𑀫𑀸 𑀙𑀝𑁆𑀞𑀸𑀧𑀯𑀸𑀤𑁄+𑀬𑀁. 𑀲𑀫𑁂𑀧𑀺 𑀦𑀺𑀫𑀺𑀢𑁆𑀢𑀦𑀺𑀫𑀺𑀢𑁆𑀢𑀻𑀦𑀁 𑀲𑀫𑁆𑀩𑀦𑁆𑀥𑁂 𑀦𑀺𑀫𑀺𑀢𑁆𑀢𑀪𑀽𑀢𑀬𑀽𑀧𑀢𑁄𑀯 𑀘𑀢𑀼𑀢𑁆𑀣𑀻, 𑀦𑁄 𑀦𑀺𑀫𑀺𑀢𑁆𑀢𑀻𑀪𑀽𑀢𑀤𑀸𑀭𑀼𑀢𑁄. 𑀬𑀽𑀧𑀸𑀬 𑀤𑀸𑀭𑀼, 𑀧𑀸𑀓𑀸𑀬 𑀯𑀚𑀢𑀺, 𑀩𑀼𑀤𑁆𑀥𑀲𑁆𑀲𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀦𑁂𑀯 𑀤𑀯𑀸𑀬, 𑀦 𑀫𑀤𑀸𑀬, 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸, 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀮𑁄𑀓𑀸𑀦𑀼𑀓𑀫𑁆𑀧𑀸𑀬, 𑀨𑀸𑀲𑀼 𑀯𑀺𑀳𑀸𑀭𑀸𑀬.

𑀇𑀘𑁆𑀘𑀸𑀬𑀁 𑀓𑀘𑁆𑀘𑀸𑀬𑀦𑁂 𑀉𑀧𑀭𑀺 𑀯𑀓𑁆𑀔𑀫𑀸𑀦𑀲𑁆𑀲 𑀘𑀢𑀼𑀢𑁆𑀣𑀻𑀢𑀺 𑀲𑀸𑀥𑀺𑀢𑀢𑁆𑀢𑀸 𑀇𑀥 𑀙𑀝𑁆𑀞𑀻𑀢𑀺 𑀤𑀻𑀧𑀦𑀢𑁆𑀣𑀁 𑀯𑀼𑀘𑁆𑀘𑀢𑁂 𑁋

𑀓𑀲𑁆𑀲 𑀲𑀸𑀤𑀼 𑀦𑀭𑀼𑀘𑁆𑀘𑀢𑀺, 𑀫𑀸 𑀅𑀬𑀲𑁆𑀫𑀦𑁆𑀢𑀸𑀦𑀫𑁆𑀧𑀺 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀪𑀢𑁆𑀢+𑀫𑀲𑁆𑀲 𑀦𑀘𑁆𑀙𑀸𑀤𑁂𑀢𑀻𑀢𑀺 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁, 𑀦 𑀘𑁂+𑀯𑀁 𑀯𑀺𑀭𑁄𑀥𑁄 𑀲𑀺𑀬𑀸, 𑀲𑀤𑀺𑀲𑀭𑀽𑀧𑀢𑁆𑀢𑀸, 𑀏𑀯𑀁𑀯𑀺𑀥𑁂𑀲𑀼 𑀘 𑀲𑀫𑁆𑀩𑀦𑁆𑀥𑀲𑁆𑀲 𑀲𑀤𑁆𑀤𑀺𑀓𑀸𑀦𑀼𑀫𑀢𑀢𑁆𑀢𑀸. 𑀢𑀣𑀸 𑀳𑀺 𑀪𑀸𑀕𑀯𑀼𑀢𑁆𑀢𑀺𑀬𑀸 ‘‘𑀉𑀧𑀧𑀤𑀯𑀺𑀪𑀢𑁆𑀢𑀺 𑀙𑀝𑁆𑀞𑀺𑀬𑀸+𑀧𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁, 𑀲𑀤𑁆𑀤𑀦𑁆𑀢𑀭𑁂 𑀯𑀺𑀳𑀺𑀢𑀸 𑀯𑀺𑀪𑀢𑁆𑀢𑀺 𑀉𑀧𑀧𑀤𑀯𑀺𑀪𑀢𑁆𑀢𑀺.

𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻𑀢𑀺 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸, 𑀓𑀲𑁆𑀲 𑀯𑀸 𑀢𑀼𑀬𑁆𑀳𑀦𑁆𑀢𑀺 𑀅𑀯𑀢𑁆𑀯𑀸 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻𑀢𑀺 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸𑀯𑀲𑁂𑀦 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀸. 𑀏𑀯+𑀫𑀜𑁆𑀜𑀸𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀭𑀢𑁄𑀧𑀺 𑀬𑀣𑀸𑀕𑀫𑀁.

𑀭𑀜𑁆𑀜𑁄 𑀲𑀢𑀁 𑀥𑀸𑀭𑁂𑀢𑀺 𑀭𑀜𑁆𑀜𑁄 𑀙𑀢𑁆𑀢𑀁 𑀥𑀸𑀭𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀯. 𑀲𑀺𑀮𑀸𑀖=𑀓𑀣𑀦𑁂, 𑀏𑀯𑀁 𑀭𑀜𑁆𑀜𑁄 𑀲𑀺𑀮𑀸𑀖𑀢𑁂 𑀇𑀘𑁆𑀘𑀸𑀤𑀺, 𑀣𑀼𑀢𑀺𑀁 𑀓𑀭𑁄𑀢𑀻𑀢𑁆𑀬𑀢𑁆𑀣𑁄. 𑀳𑀦𑀼=𑀅𑀧𑀦𑀬𑀦𑁂, 𑀭𑀜𑁆𑀜𑁄 𑀳𑀦𑀼𑀢𑁂, 𑀯𑀜𑁆𑀘𑁂𑀢𑀻𑀢𑁆𑀬𑀢𑁆𑀣𑁄. 𑀉𑀧𑀢𑀺𑀝𑁆𑀞𑁂𑀬𑁆𑀬 𑀲𑀓𑁆𑀬𑀧𑀼𑀢𑁆𑀢𑀸𑀦𑀁 𑀯𑀟𑁆𑀠𑀓𑀻, 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑁆𑀬𑀢𑁆𑀣𑁄. 𑀲𑀧=𑀅𑀓𑁆𑀓𑁄𑀲𑁂, 𑀫𑀬𑁆𑀳𑀁 𑀲𑀧𑀢𑁂, 𑀲𑀘𑁆𑀘𑀁 𑀓𑀼𑀭𑀼𑀢𑁂𑀢𑁆𑀬𑀢𑁆𑀣𑁄. 𑀥𑀭=𑀥𑀸𑀭𑀡𑁂, 𑀲𑀼𑀯𑀡𑁆𑀡𑀁 𑀢𑁂 𑀥𑀸𑀭𑀬𑀢𑁂, 𑀇𑀡𑀁 𑀢𑁂 𑀥𑀸𑀭𑀬𑀢𑀺, 𑀅𑀲𑁆𑀲 𑀭𑀜𑁆𑀜𑁄 𑀦𑀸𑀕𑀁 𑀥𑀸𑀭𑀬𑀸𑀫. 𑀧𑀺𑀳=𑀇𑀘𑁆𑀙𑀸𑀬𑀁, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄, 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢𑀁, 𑀧𑀺𑀳𑀬𑀦𑁆𑀢𑀺=𑀧𑀢𑁆𑀣𑁂𑀦𑁆𑀢𑀺. 𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀬𑀤𑀺+𑀳𑀁 𑀢𑀲𑁆𑀲 𑀧𑀓𑀼𑀧𑁆𑀧𑁂𑀬𑁆𑀬𑀁, 𑀤𑀼𑀪𑀬𑀢𑀺 𑀤𑀺𑀲𑀸𑀦𑀁 𑀫𑁂𑀖𑁄, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀽𑀪𑀢𑀺, 𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺. 𑀇𑀲𑁆𑀲=𑀇𑀲𑁆𑀲𑀸𑀬𑀁, 𑀢𑀺𑀢𑁆𑀣𑀺𑀬𑀸 𑀇𑀲𑁆𑀲𑀬𑀦𑁆𑀢𑀺 𑀲𑀫𑀡𑀸𑀦𑀁. 𑀉𑀲𑀽𑀬=𑀤𑁄𑀲𑀸𑀯𑀺𑀓𑀭𑀡𑁂, 𑀤𑀼𑀚𑁆𑀚𑀦𑀸 𑀕𑀼𑀡𑀯𑀦𑁆𑀢𑀸𑀦𑀁 𑀉𑀲𑁆𑀲𑀽𑀬𑀦𑁆𑀢𑀺, 𑀓𑀸 𑀉𑀲𑀼𑀬𑀸 𑀯𑀺𑀚𑀸𑀦𑀢𑀁. 𑀇𑀥+𑀲𑀺𑀥+𑀭𑀸𑀥+𑀲𑀸𑀥=𑀲𑀁𑀲𑀺𑀤𑁆𑀥𑀺𑀬𑀁, 𑀆𑀭𑀸𑀥𑁄 𑀫𑁂 𑀭𑀜𑁆𑀜𑁄, 𑀭𑀜𑁆𑀜𑁄 𑀪𑀸𑀕𑁆𑀬+𑀫𑀸𑀭𑀚𑁆𑀛𑀢𑀺, 𑀓𑁆𑀬𑀸+𑀳𑀁 𑀅𑀬𑁆𑀬𑀸𑀦𑀁 𑀅𑀧𑀭𑀚𑁆𑀛𑀸𑀫𑀺, 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀉𑀧𑀢𑀺𑀲𑁆𑀲𑁄. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁, 𑀆𑀲𑀼𑀡𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑀦𑁄𑀅𑀦𑀼𑀕𑀺𑀡𑀸𑀢𑀺, 𑀧𑀢𑀺𑀕𑀺𑀡𑀸𑀢𑀺, 𑀲𑀸𑀥𑀼𑀓𑀸𑀭𑀤𑀸𑀦𑀸𑀤𑀺𑀦𑀸 𑀢𑀁 𑀉𑀲𑁆𑀲𑀳𑀢𑀻𑀢𑁆𑀬𑀢𑁆𑀣𑁄. 𑀆𑀭𑁄𑀘𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀆𑀫𑀦𑁆𑀢𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚, 𑀥𑀫𑁆𑀫𑀁 𑀢𑁂 𑀤𑁂𑀲𑀺𑀲𑁆𑀲𑀸𑀫𑀺, 𑀤𑁂𑀲𑁂𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁 𑀪𑀺𑀓𑁆𑀔𑀽𑀦𑀁, 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬, 𑀦𑀺𑀭𑀼𑀢𑁆𑀢𑀺𑀁 𑀢𑁂 𑀧𑀯𑀓𑁆𑀔𑀸𑀫𑀺, 𑀅𑀮𑀁 𑀫𑁂 𑀭𑀚𑁆𑀚𑀁, 𑀅𑀮𑀁 𑀪𑀺𑀓𑁆𑀔𑀼 𑀧𑀢𑁆𑀢𑀲𑁆𑀲, 𑀅𑀮𑀁 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀅𑀭𑀳𑀢𑀺 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦, 𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦𑀸𑀢𑀺 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻.

𑀏𑀯𑀁 𑀆𑀬𑀼 𑀪𑁄𑀢𑁄 𑀳𑁄𑀢𑀼, 𑀘𑀺𑀭𑀁 𑀚𑀻𑀯𑀺𑀢𑀁, 𑀪𑀤𑁆𑀤𑀁, 𑀓𑀮𑁆𑀬𑀸𑀡𑀁, 𑀅𑀢𑁆𑀣𑀁, 𑀧𑀬𑁄𑀚𑀦𑀁, 𑀓𑀼𑀲𑀮𑀁, 𑀅𑀦𑀸𑀫𑀬𑀁, 𑀳𑀺𑀢𑀁, 𑀧𑀢𑁆𑀣𑀁, 𑀲𑀼𑀔𑀁, 𑀲𑀸𑀢𑀁, 𑀪𑁄𑀢𑁄 𑀳𑁄𑀢𑀼, 𑀲𑀸𑀥𑀼 𑀲𑀫𑁆𑀫𑀼𑀢𑀺 𑀫𑁂 𑀢𑀲𑁆𑀲, 𑀧𑀼𑀢𑁆𑀢𑀲𑁆𑀲𑀸+𑀯𑀺𑀓𑀭𑁂𑀬𑁆𑀬 𑀕𑀼𑀬𑁆𑀳+𑀫𑀢𑁆𑀣𑀁, 𑀢𑀲𑁆𑀲 𑀫𑁂 𑀲𑀓𑁆𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀢𑀲𑁆𑀲 𑀧𑀳𑀺𑀡𑁂𑀬𑁆𑀬, 𑀪𑀺𑀓𑁆𑀔𑀽𑀦𑀁 𑀤𑀽𑀢𑀁 𑀧𑀸𑀳𑁂𑀲𑀺, 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀆𑀬𑁄𑀕𑁄, 𑀏𑀓𑀲𑁆𑀲 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀳𑁄𑀢𑀺, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀅𑀜𑁆𑀚𑀮𑀺𑀁𑀢𑁂 𑀧𑀕𑁆𑀕𑀡𑁆𑀳𑀸𑀫𑀺, 𑀢𑀲𑁆𑀲 𑀨𑀸𑀲𑀼, 𑀮𑁄𑀓𑀲𑁆𑀲+𑀢𑁆𑀣𑁄, 𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀲𑁄𑀢𑁆𑀣𑀺 𑀢𑀲𑁆𑀲, 𑀲𑀫𑀢𑁆𑀣𑁄 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀢𑀲𑁆𑀲 𑀳𑀺𑀢𑀁, 𑀢𑀲𑁆𑀲 𑀲𑀼𑀔𑀁, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸𑀢𑀺 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻.

𑁨𑁬. 𑀧𑀜𑁆𑀘𑀫𑁆𑀬+𑀯𑀥𑀺𑀲𑁆𑀫𑀸

𑀧𑀤𑀢𑁆𑀣𑀸𑀯𑀥𑀺𑀲𑁆𑀫𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑀫𑁂𑀧𑁆𑀬+𑀧𑀕𑀫𑁂 𑀤𑁆𑀯𑀺𑀦𑁆𑀦𑀁, 𑀧𑀼𑀩𑁆𑀩𑀭𑀽𑀧𑀸 𑀬+𑀤𑀘𑁆𑀘𑀼𑀢𑀁;

𑀯𑀼𑀘𑁆𑀘𑀢𑁂 𑀢+𑀤𑀧𑀸𑀤𑀸𑀦𑀁, 𑀢𑀁 𑀘𑀮𑀸𑀘𑀮𑀢𑁄 𑀤𑁆𑀯𑀺𑀥𑀸;

𑀬𑀣𑀸+𑀲𑁆𑀲𑀸 𑀥𑀸𑀯𑀢𑀸 𑀧𑁄𑀲𑁄, 𑀧𑀢𑁄, 𑀭𑀼𑀓𑁆𑀔𑀸𑀨𑀮𑀦𑁆𑀢𑀺 𑀘.

𑀢𑀢𑁆𑀣 𑀘𑀮𑀸𑀯𑀥𑀺 𑀥𑀸𑀯𑀢𑀸 𑀅𑀲𑁆𑀲𑀸 𑀧𑀼𑀭𑀺𑀲𑁄 𑀧𑀢𑀢𑀺, 𑀅𑀘𑀮𑀸𑀯𑀥𑀺 𑀧𑀩𑁆𑀩𑀢𑀸 𑀑𑀢𑀭𑀦𑁆𑀢𑀺 𑀯𑀦𑀘𑀸𑀭𑀓𑀸𑀢𑀺.

𑀢𑀜𑁆𑀘 𑀅𑀯𑀥𑀺 𑀯𑀺𑀲𑀬𑀓𑁆𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑀁, 𑀬𑀢𑁆𑀣 𑀅𑀧 𑀅𑀧𑀕𑀫𑀦𑀓𑁆𑀭𑀺𑀬𑀁 𑀉𑀧𑀸𑀢𑁆𑀢𑀁=𑀅𑀚𑁆𑀛𑀸𑀳𑀝𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀁 𑀉𑀧𑀸𑀢𑁆𑀢𑀁. 𑀬𑀁 𑀓𑁂𑀦𑀘𑀺 𑀕𑀼𑀡𑁂𑀦 𑀉𑀓𑁆𑀓𑀁𑀲𑀺𑀬𑀢𑀺, 𑀢𑀁 𑀅𑀦𑀼𑀫𑁂𑀬𑁆𑀬𑀁. 𑀬𑀣𑀸 𑀕𑀸𑀫𑀸 𑀅𑀧𑁂𑀦𑁆𑀢𑀺 𑀫𑀼𑀦𑀬𑁄, 𑀦𑀕𑀭𑀸 𑀦𑀺𑀕𑁆𑀕𑀢𑁄 𑀭𑀸𑀚𑀸, 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀦𑁆𑀢𑀺. 𑀯𑀮𑀸𑀳𑀓𑀸 𑀯𑀺𑀚𑁆𑀚𑁄𑀢𑀢𑁂, 𑀓𑀼𑀲𑀼𑀮𑀢𑁄 𑀧𑀘𑀢𑀻𑀢𑀺. 𑀏𑀢𑁆𑀣 𑀘 𑀯𑀴𑀸𑀳𑀓𑀸 𑀦𑀺𑀓𑁆𑀔𑀫𑁆𑀫, 𑀓𑀼𑀲𑀼𑀮𑀢𑁄 𑀅𑀧𑀦𑁂𑀢𑁆𑀯𑀸𑀢𑀺 𑀘 𑀧𑀼𑀩𑁆𑀩𑀓𑁆𑀭𑀺𑀬𑀸 𑀅𑀚𑁆𑀛𑀸𑀳𑀭𑀻𑀬𑀢𑀺. 𑀫𑀣𑀼𑀭𑀸 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀳𑀺 𑀅𑀪𑀺𑀭𑀽𑀧𑀸𑀢𑀺 𑀅𑀦𑀼𑀫𑀻𑀬𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑀁 𑀓𑀺𑀜𑁆𑀘𑀺, 𑀉𑀧𑀸𑀢𑁆𑀢𑀯𑀺𑀲𑀬𑀁 𑀢𑀣𑀸;

𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀜𑁆𑀘𑁂𑀢𑀺, 𑀢𑀺𑀥𑀸+𑀳𑀼 𑀅𑀯𑀥𑀺𑀁 𑀩𑀼𑀥𑀸𑀢𑀺.

𑀪𑀬𑀳𑁂𑀢𑀼𑀫𑁆𑀳𑀺-𑀘𑁄𑀭𑀸 𑀪𑀬𑀁 𑀚𑀸𑀬𑀢𑀺, 𑀢𑀡𑁆𑀳𑀸𑀬 𑀚𑀸𑀬𑀢𑀺 𑀪𑀬𑀁, 𑀧𑀸𑀧𑀢𑁄 𑀉𑀢𑁆𑀢𑀲𑀢𑀺, 𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁. 𑀅𑀓𑁆𑀔𑀸𑀢𑀭𑀺-𑀉𑀧𑀚𑁆𑀛𑀸𑀬𑀸 𑀲𑀺𑀓𑁆𑀔𑀁 𑀕𑀡𑁆𑀳𑀸𑀢𑀺, 𑀆𑀘𑀭𑀺𑀬𑀫𑁆𑀳𑀸 𑀅𑀥𑀻𑀢𑁄 𑀲𑀼𑀡𑀸𑀢𑀺 𑀯𑀸. 𑀩𑀼𑀤𑁆𑀥𑀲𑁆𑀫𑀸 𑀧𑀭𑀸𑀚𑁂𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸, 𑀧𑀭𑀸𑀚𑀺𑀢𑀸 𑀪𑀯𑀦𑁆𑀢𑀻𑀢𑁆𑀬𑀢𑁆𑀣𑁄. 𑀳𑀺𑀫𑀯𑀢𑀸 𑀧𑀪𑀯𑀢𑀺 𑀕𑀗𑁆𑀕𑀸, 𑀅𑀘𑀺𑀭𑀯𑀢𑀺𑀬𑀸 𑀧𑀪𑀯𑀦𑁆𑀢𑀺 𑀓𑀼𑀦𑁆𑀦𑀤𑀺𑀬𑁄. 𑀉𑀭𑀲𑁆𑀫𑀸 𑀚𑀸𑀢𑁄 𑀧𑀼𑀢𑁆𑀢𑁄, 𑀓𑀫𑁆𑀫𑀢𑁄 𑀚𑀸𑀢𑀁 𑀇𑀦𑁆𑀤𑁆𑀭𑀺𑀬𑀁, 𑀉𑀧𑀚𑁆𑀛𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺 𑀲𑀺𑀲𑁆𑀲𑁄, 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑁆𑀢𑀭𑀥𑀸𑀭𑀬𑀢𑀺 𑀧𑀼𑀢𑁆𑀢𑁄, 𑀦𑀺𑀮𑀻𑀬𑀢𑀻𑀢𑁆𑀬𑀢𑁆𑀣𑁄. 𑀤𑀽𑀭𑀢𑁆𑀣𑀬𑁄𑀕𑁂𑀓𑀻𑀯𑀤𑀽𑀭𑁄 𑀇𑀢𑁄 𑀦𑀴𑀓𑀸𑀭𑀕𑀸𑀫𑁄, 𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑁂, 𑀆𑀭𑀓𑀸 𑀢𑁂 𑀫𑁄𑀖𑀧𑀼𑀭𑀺𑀲𑀸 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀆𑀭𑀓𑀸 𑀢𑁂𑀳𑀺 𑀪𑀕𑀯𑀸 𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀅𑀤𑁆𑀤𑀲 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀅𑀦𑁆𑀢𑀺𑀓𑀢𑁆𑀣𑀬𑁄𑀕𑁂-𑀅𑀦𑁆𑀢𑀺𑀓𑀁 𑀕𑀸𑀫𑀸, 𑀆𑀲𑀦𑁆𑀦𑀁 𑀕𑀸𑀫𑀸, 𑀲𑀫𑀻𑀧𑀁 𑀕𑀸𑀫𑀸. 𑀧𑀭𑀺𑀫𑀸𑀡𑁂-𑀇𑀢𑁄 𑀫𑀣𑀼𑀭𑀸𑀬 𑀘𑀢𑀽𑀲𑀼 𑀬𑁄𑀚𑀦𑁂𑀲𑀼 𑀲𑀁𑀓𑀲𑁆𑀲𑀁, 𑀭𑀸𑀚𑀕𑀳𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀲𑀸𑀯𑀢𑁆𑀣𑀺. 𑀓𑀸𑀮𑀧𑀭𑀺𑀫𑀸𑀡𑁂-𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂, 𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀧𑀸𑀲𑀸𑀤𑀸 𑀲𑀁𑀓𑀫𑁂𑀬𑁆𑀬, 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀁𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀢𑀣𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀲𑀁𑀓𑀫𑁂𑀬𑁆𑀬, 𑀅𑀪𑀺𑀥𑀫𑁆𑀫𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀪𑀺𑀥𑀫𑁆𑀫𑀁 𑀲𑀼𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀆𑀲𑀦𑀸 𑀯𑀼𑀝𑁆𑀞𑀳𑁂𑀬𑁆𑀬. 𑀤𑀺𑀲𑀢𑁆𑀣𑀯𑀸𑀘𑀻𑀳𑀺 𑀬𑁄𑀕𑁂-𑀇𑀢𑁄 𑀲𑀸 𑀧𑀼𑀭𑀺𑀫𑀸 𑀤𑀺𑀲𑀸, 𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸, 𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀁, 𑀉𑀤𑁆𑀥𑀁 𑀧𑀸𑀤𑀢𑀮𑀸, 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸. 𑀯𑀺𑀪𑀚𑀦𑁂-𑀬𑀢𑁄 𑀧𑀡𑀻𑀢𑀢𑀭𑁄 𑀯𑀸 𑀯𑀺𑀲𑀺𑀝𑁆𑀞𑀢𑀭𑁄 𑀯𑀸 𑀦𑀢𑁆𑀣𑀺, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭𑀁, 𑀓𑀺𑀜𑁆𑀘𑀸𑀧𑀺 𑀤𑀸𑀦𑀢𑁄 𑀲𑀻𑀮𑀁 𑀯𑀭𑀁, 𑀢𑀢𑁄 𑀫𑀬𑀸 𑀩𑀳𑀼𑀢𑀭𑀁 𑀲𑀼𑀢𑀁, 𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄. 𑀆𑀭𑀢𑀺𑀧𑁆𑀧𑀬𑁄𑀕𑁂-𑀆𑀭𑀢𑀺 𑀯𑀺𑀭𑀢𑀺 𑀧𑀸𑀧𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀅𑀧𑁆𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸. 𑀲𑀼𑀤𑁆𑀥𑀢𑁆𑀣𑀬𑁄𑀕𑁂-𑀮𑁄𑀪𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀤𑁆𑀥𑁄, 𑀫𑀸𑀢𑀼𑀢𑁄 𑀘 𑀧𑀺𑀢𑀼𑀢𑁄 𑀘 𑀲𑀼𑀤𑁆𑀥𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄. 𑀧𑀫𑁄𑀘𑀦𑀢𑁆𑀣𑀬𑁄𑀕𑁂-𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺, 𑀫𑀼𑀢𑁆𑀢𑁄+𑀲𑁆𑀫𑀺 𑀫𑀸𑀭𑀩𑀦𑁆𑀥𑀦𑀸, 𑀦 𑀢𑁂 𑀫𑀼𑀘𑁆𑀘𑀦𑁆𑀢𑀺 𑀫𑀘𑁆𑀘𑀼𑀦𑀸, 𑀫𑀼𑀢𑁆𑀢𑁄+𑀳𑀁+𑀲𑀩𑁆𑀩𑀧𑀸𑀲𑁂𑀳𑀺. 𑀯𑀺𑀯𑁂𑀘𑀦𑁂-𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀧𑀫𑀸𑀡𑀢𑁆𑀣𑁂-𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀁, 𑀕𑀫𑁆𑀪𑀻𑀭𑀢𑁄 𑀘 𑀧𑀼𑀣𑀼𑀮𑀢𑁄 𑀘 𑀬𑁄𑀚𑀦𑀁 𑀘𑀦𑁆𑀤𑀪𑀸𑀕𑀸𑀬 𑀧𑀭𑀺𑀫𑀸𑀡𑀁, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑁄 𑀫𑀚𑁆𑀛𑀺𑀫𑀤𑁂𑀲𑁄. 𑀧𑀼𑀩𑁆𑀩𑀸𑀤𑀺𑀬𑁄𑀕𑁂-𑀧𑀼𑀩𑁆𑀩𑁂𑀯 𑀫𑁂 𑀪𑀺𑀓𑁆𑀔𑀯𑁂 𑀲𑀫𑁆𑀩𑁄𑀥𑀸, 𑀇𑀢𑁄 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦. 𑀧𑀜𑁆𑀳𑁂-𑀓𑀼𑀢𑁄+𑀲𑀺 𑀢𑁆𑀯𑀁, 𑀓𑀼𑀢𑁄 𑀪𑀯𑀁, 𑀧𑀸𑀝𑀮𑀺𑀧𑀼𑀢𑁆𑀢𑀢𑁄. 𑀓𑀺𑀘𑁆𑀙𑀸 𑀮𑀤𑁆𑀥𑀦𑁆𑀢𑀺 𑀕𑀼𑀡𑁂 𑀧𑀜𑁆𑀘𑀫𑀻, 𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀦𑁆𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑁂 𑀯𑀸 𑀢𑀢𑀺𑀬𑀸, 𑀏𑀯𑀁 𑀣𑁄𑀓𑀸 𑀫𑀼𑀢𑁆𑀢𑁄, 𑀣𑁄𑀓𑁂𑀦 𑀫𑀼𑀢𑁆𑀢𑁄𑀢𑀺.

𑀓𑀣𑀁 ‘‘𑀣𑁄𑀓𑀁 𑀘𑀮𑀢𑀻’’𑀢𑀺, 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑁂 𑀓𑀫𑁆𑀫𑀦𑀺 𑀤𑀼𑀢𑀺𑀬𑀸, 𑀣𑁄𑀓𑀁 𑀘𑀮𑀦𑀁 𑀓𑀭𑁄𑀢𑀻𑀢𑁆𑀬𑀢𑁆𑀣𑁄, 𑀣𑁄𑀓𑀦𑁆𑀢𑀺 𑀘𑀮𑀦𑀓𑁆𑀭𑀺𑀬𑀸𑀬 𑀯𑀺𑀲𑁂𑀲𑀦𑀢𑁆𑀢𑀸 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁.

𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁 𑀦𑀸𑀫, 𑀓𑀫𑁆𑀫𑀢𑁆𑀢𑁂+𑀓𑀢𑁆𑀢𑀲𑀡𑁆𑀞𑀺𑀢𑀸;

𑀦𑁆𑀬𑀸𑀬𑀲𑀺𑀤𑁆𑀥𑀁 𑀬𑀢𑁄 𑀢𑀲𑁆𑀫𑀸, 𑀢𑀤𑀢𑁆𑀣𑀁 𑀦 𑀯𑀺𑀲𑀼𑀁 𑀯𑀺𑀥𑀺.

𑀦𑁆𑀬𑀸𑀬𑀲𑀺𑀤𑁆𑀥𑀁𑀯=𑀘𑀮𑀦𑀦𑁆𑀢𑀺 𑀬𑀲𑁆𑀫𑀸 𑀪𑀸𑀯𑁂 𑀅𑀦𑁄, 𑀢𑀲𑁆𑀫𑀸 𑀪𑀸𑀯𑀲𑁆𑀲𑁂+𑀓𑀢𑁆𑀢𑀸 𑀏𑀓𑀯𑀘𑀦𑀦𑁆𑀢𑀺 𑀜𑀸𑀬𑀸 𑀏𑀓𑀢𑁆𑀢𑀜𑁆𑀘, 𑀪𑀸𑀯𑁂 𑀅𑀦𑀢𑁆𑀢𑀸 𑀦𑀧𑀼𑀁𑀲𑀓𑀢𑁆𑀢𑀜𑁆𑀘, 𑀓𑀭𑁄𑀢𑀺𑀓𑁆𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑁂𑀦 𑀓𑀫𑁆𑀫𑀢𑁆𑀢𑀜𑁆𑀘 𑀲𑀺𑀚𑁆𑀛𑀢𑀻𑀢𑀺. 𑀓𑀭+𑀪𑀽𑀥𑀸𑀢𑀯𑁄 𑀘 𑁋

𑀓𑀸𑀭𑀺𑀬𑀭𑀽𑀧𑀸𑀪𑀺𑀥𑀸𑀢𑁆𑀯𑀢𑁆𑀣𑀸, 𑀲𑀩𑁆𑀩𑁂 𑀲𑀢𑁆𑀢𑀸𑀬 𑀬𑀼𑀚𑁆𑀚𑀭𑁂;

𑀢𑀢𑁄 𑀓𑁆𑀭𑀺𑀬𑀸 𑀘 𑀪𑀸𑀯𑁄 𑀘, 𑀲𑀸𑀫𑀜𑁆𑀜𑀁 𑀢𑁂𑀲𑀼 𑀕𑀫𑁆𑀬𑀢𑁂 𑁋

𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀼𑀚𑁆𑀚𑀦𑁆𑀢𑀺.

𑀣𑁄𑀓𑀢𑁆𑀣𑁂-𑀣𑁄𑀓𑀸 𑀫𑀼𑀘𑁆𑀘𑀢𑀺. 𑀲𑀩𑁆𑀩𑀢𑁆𑀣 𑀲𑀯𑀺𑀲𑀬𑁂 𑀧𑀜𑁆𑀘𑀫𑀻. 𑀏𑀢𑁆𑀣 ‘‘𑀯𑀺𑀯𑀓𑁆𑀔𑀸 𑀮𑁄𑀓𑀺𑀓𑀸 𑀲𑀸 𑀘, 𑀦 𑀲𑀓𑁆𑀓𑀸 𑀅𑀦𑀺𑀯𑀢𑁆𑀢𑀺𑀢𑀼𑀁’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀦 𑀲𑀺𑀬𑀸. 𑀫𑀭𑀺𑀬𑀸𑀤𑀸𑀬𑀁-𑀆𑀧𑀩𑁆𑀩𑀢𑀸 𑀔𑁂𑀢𑁆𑀢𑀁. 𑀅𑀪𑀺𑀯𑀺𑀥𑀺𑀫𑁆𑀳𑀺-𑀆𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀧𑀩𑁆𑀩𑀢𑀁 𑀯𑀚𑁆𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑁆𑀳𑀺 𑀩𑁆𑀬𑀸𑀧𑁂𑀢𑁆𑀯𑀸𑀢𑀺 𑀘 𑀅𑀢𑁆𑀣𑁄. 𑀏𑀢𑁆𑀣 𑀯𑀚𑁆𑀚𑀫𑀸𑀦𑀲𑀻𑀫𑀸 𑀫𑀭𑀺𑀬𑀸𑀤𑀸, 𑀕𑀬𑁆𑀳𑀫𑀸𑀦𑀲𑀻𑀫𑀸 𑀅𑀪𑀺𑀯𑀺𑀥𑀺.

𑁨𑁭. 𑀅𑀧𑀧𑀭𑀻𑀳𑀺 𑀯𑀚𑁆𑀚𑀦𑁂

𑀯𑀚𑁆𑀚𑀦𑁂 𑀯𑀢𑁆𑀢𑀫𑀸𑀦𑁂𑀳𑀻 𑀅𑀧𑀧𑀭𑀻𑀳𑀺 𑀬𑁄𑀕𑁂 𑀧𑀜𑁆𑀘𑀫𑀻 𑀳𑁄𑀢𑀺. 𑀅𑀧𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀧𑀭𑀺𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀲𑀸𑀮𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁮. 𑀧𑀝𑀺𑀦𑀺𑀥𑀺𑀧𑀢𑀺𑀤𑀸𑀦𑁂𑀲𑀼 𑀧𑀢𑀺𑀦𑀸

𑀧𑀝𑀺𑀦𑀺𑀥𑀺𑀫𑁆𑀳𑀺 𑀧𑀢𑀺𑀤𑀸𑀦𑁂 𑀘 𑀯𑀢𑁆𑀢𑀫𑀸𑀦𑁂𑀦 𑀧𑀢𑀺𑀦𑀸 𑀬𑁄𑀕𑁂 𑀦𑀸𑀫𑀲𑁆𑀫𑀸 𑀧𑀜𑁆𑀘𑀫𑀻 𑀳𑁄𑀢𑀺. 𑀩𑀼𑀤𑁆𑀥𑀲𑁆𑀫𑀸 𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄, 𑀖𑀢+𑀫𑀲𑁆𑀲 𑀢𑁂𑀮𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺.

𑁨𑁯. 𑀭𑀺𑀢𑁂 𑀤𑀼𑀢𑀺𑀬𑀸 𑀘

𑀭𑀺𑀢𑁂𑀲𑀤𑁆𑀤𑀬𑁄𑀕𑁂 𑀦𑀸𑀫𑀲𑁆𑀫𑀸 𑀤𑀼𑀢𑀺𑀬𑀸 𑀳𑁄𑀢𑀺 𑀧𑀜𑁆𑀘𑀫𑀻 𑀘. 𑀭𑀺𑀢𑁂 𑀲𑀤𑁆𑀥𑀫𑁆𑀫𑀸, 𑀭𑀺𑀢𑁂 𑀲𑀤𑁆𑀥𑀫𑁆𑀫𑀁.

𑁩𑁦. 𑀯𑀺𑀦𑀸+𑀜𑁆𑀜𑀢𑁆𑀭 𑀢𑀢𑀺𑀬𑀸 𑀘

𑀯𑀺𑀦𑀸+𑀜𑁆𑀜𑀢𑁆𑀭𑀬𑁄𑀕𑁂 𑀦𑀸𑀫𑀲𑁆𑀫𑀸 𑀢𑀢𑀺𑀬𑀸 𑀤𑀼𑀢𑀺𑀬𑀸 𑀧𑀜𑁆𑀘𑀫𑀻 𑀘. 𑀯𑀺𑀦𑀸 𑀯𑀸𑀢𑁂𑀦, 𑀯𑀺𑀦𑀸 𑀯𑀸𑀢𑀁, 𑀯𑀺𑀦𑀸 𑀯𑀸𑀢𑀲𑁆𑀫𑀸. 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀁, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀸.

𑁩𑁧. 𑀧𑀼𑀣𑀦𑀸𑀦𑀸𑀳𑀺

𑀏𑀢𑁂𑀳𑀺 𑀬𑁄𑀕𑁂 𑀢𑀢𑀺𑀬𑀸 𑀳𑁄𑀢𑀺 𑀧𑀜𑁆𑀘𑀫𑀻 𑀘. 𑀪𑀺𑀦𑁆𑀦𑀬𑁄𑀕𑀓𑀭𑀡𑀁 𑀤𑀼𑀢𑀺𑀬𑀸𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀼𑀣𑀕𑁂𑀯 𑀚𑀦𑁂𑀦, 𑀧𑀼𑀣𑀕𑁂𑀯 𑀚𑀦𑀲𑁆𑀫𑀸, 𑀚𑀦𑁂𑀦 𑀦𑀸𑀦𑀸, 𑀚𑀦𑀲𑁆𑀫𑀸 𑀦𑀸𑀦𑀸.

𑁩𑁯. 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑁂

𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻 𑀳𑁄𑀢𑀺. 𑀭𑀜𑁆𑀜𑁄 𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀭𑀸𑀚𑀸 𑀤𑀤𑀸𑀢𑀺, 𑀧𑀼𑀭𑀺𑀲𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀭𑀸𑀚𑀧𑀼𑀭𑀺𑀲𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑁂𑀯 𑀬𑁄 𑀬𑀲𑁆𑀲 𑀆𑀬𑀢𑁆𑀢𑁄 𑀲𑁂𑀯𑀓𑀸𑀤𑀺𑀪𑀸𑀯𑁂𑀦 𑀪𑀡𑁆𑀟𑀪𑀸𑀯𑁂𑀦 𑀯𑀸 𑀲𑀫𑀻𑀧+𑀲𑀫𑀽𑀳𑀸+𑀯𑀬𑀯+𑀯𑀺𑀓𑀸𑀭+𑀓𑀸𑀭𑀺𑀬+𑀅𑀯𑀢𑁆𑀣𑀸+𑀚𑀸𑀢𑀺+𑀕𑀼𑀡+𑀓𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀸, 𑀞𑀸𑀦𑀻𑀯𑀲𑁂𑀦 𑀯𑀸, 𑀆𑀕𑀫𑀻𑀯𑀲𑁂𑀦 𑀯𑀸, 𑀲𑁄 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀫𑁆𑀩𑀦𑁆𑀥𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑀺 𑁋

𑀓𑁆𑀭𑀺𑀬𑀸𑀓𑀸𑀭𑀓𑀲𑀜𑁆𑀚𑀸𑀢𑁄, 𑀅𑀲𑁆𑀲𑁂+𑀤𑀁𑀪𑀸𑀯𑀳𑁂𑀢𑀼𑀓𑁄;

𑀲𑀫𑁆𑀩𑀦𑁆𑀥𑁄 𑀦𑀸𑀫 𑀲𑁄 𑀅𑀢𑁆𑀣𑁄, 𑀢𑀢𑁆𑀣 𑀙𑀝𑁆𑀞𑀻 𑀯𑀺𑀥𑀻𑀬𑀢𑁂.

𑀧𑀸𑀭𑀢𑀦𑁆𑀢𑁆𑀬𑀜𑁆𑀳𑀺 𑀲𑀫𑁆𑀩𑀦𑁆𑀥𑁄, 𑀢𑀢𑁆𑀣 𑀙𑀝𑁆𑀞𑀻 𑀪𑀯𑁂 𑀢𑀺𑀢𑁄;

𑀉𑀧𑀸𑀥𑀺+𑀞𑀸𑀦𑁆𑀬𑀸+𑀕𑀫𑀺𑀢𑁄, 𑀦 𑀯𑀺𑀲𑁂𑀲𑁆𑀲𑀸𑀤𑀺𑀢𑁄 𑀢𑀺𑀢𑁄𑀢𑀺.

𑀉𑀧𑀸𑀥𑀺𑀲𑀗𑁆𑀔𑀸𑀢𑀯𑀺𑀲𑁂𑀲𑀦𑀢𑁄 𑀢𑀸𑀯-𑀭𑀜𑁆𑀜𑁄 𑀧𑀼𑀭𑀺𑀲𑁄. 𑀏𑀢𑁆𑀣 𑀘 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀸𑀫𑀺𑀢𑁄 𑀦𑀺𑀯𑀢𑁆𑀢𑁂𑀢𑀻𑀢𑀺 𑀭𑀸𑀚𑀸 𑀯𑀺𑀲𑁂𑀲𑀦𑀁, 𑀧𑀼𑀭𑀺𑀲𑁄 𑀢𑁂𑀦 𑀯𑀺𑀲𑁂𑀲𑀺𑀬𑀢𑀻𑀢𑀺 𑀯𑀺𑀲𑁂𑀲𑁆𑀲𑁄. 𑀪𑀡𑁆𑀟𑀲𑀫𑁆𑀩𑀦𑁆𑀥𑀢𑁄-𑀧𑀳𑀼𑀢𑀁 𑀫𑁂 𑀥𑀦𑀁 𑀲𑀓𑁆𑀓, 𑀏𑀓𑀲𑁆𑀲 𑀧𑀝𑀺𑀯𑀻𑀲𑁄, 𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀘𑀻𑀯𑀭𑀁. 𑀲𑀫𑀻𑀧𑀢𑁄-𑀅𑀫𑁆𑀩𑀯𑀦𑀲𑁆𑀲 𑀅𑀯𑀺𑀤𑀽𑀭𑁂, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂. 𑀲𑀫𑀽𑀳𑁂-𑀲𑀼𑀯𑀡𑁆𑀡𑀲𑁆𑀲 𑀭𑀸𑀲𑀺, 𑀪𑀺𑀓𑁆𑀔𑀽𑀦𑀁 𑀲𑀫𑀽𑀳𑁄. 𑀅𑀯𑀬𑀯𑁂-𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸. 𑀯𑀺𑀓𑀸𑀭𑁂-𑀲𑀼𑀯𑀡𑁆𑀡𑀲𑁆𑀲 𑀯𑀺𑀓𑀢𑀺, 𑀪𑀝𑁆𑀞𑀥𑀜𑁆𑀜𑀸𑀦𑀁 𑀲𑀢𑁆𑀢𑀼. 𑀓𑀸𑀭𑀺𑀬𑁂-𑀬𑀯𑀲𑁆𑀲 𑀅𑀗𑁆𑀓𑀼𑀭𑁄, 𑀫𑁂𑀖𑀲𑁆𑀲 𑀲𑀤𑁆𑀤𑁄, 𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄. 𑀅𑀯𑀢𑁆𑀣𑀸𑀬𑀁-𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀚𑀭𑀸, 𑀪𑁂𑀤𑁄 𑀯𑀸. 𑀚𑀸𑀢𑀺𑀬𑀁-𑀫𑀦𑀼𑀲𑁆𑀲𑀲𑁆𑀲 𑀪𑀸𑀯𑁄, 𑀫𑀦𑀼𑀲𑁆𑀲𑀸𑀦𑀁 𑀚𑀸𑀢𑀺. 𑀕𑀼𑀡𑁂-𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀕𑀼𑀡𑀖𑁄𑀲𑁄, 𑀧𑀼𑀧𑁆𑀨𑀸𑀦𑀁 𑀕𑀦𑁆𑀥𑁄, 𑀨𑀮𑀸𑀦𑀁 𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀨𑀼𑀲𑀦𑀸, 𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀺, 𑀢𑀺𑀮𑀸𑀦𑀁 𑀫𑀼𑀝𑁆𑀞𑀺, 𑀢𑁂𑀲𑀁 𑀲𑀫𑀸𑀬𑁄𑀕𑁄, 𑀲𑀦𑁆𑀥𑀺𑀦𑁄 𑀯𑀺𑀫𑁄𑀓𑁆𑀔𑁄, 𑀢𑀣𑀸𑀕𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪, 𑀲𑀼𑀔𑀁 𑀢𑁂, 𑀤𑀼𑀓𑁆𑀔𑀁 𑀢𑁂, 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀧𑀜𑁆𑀜𑀸𑀬 𑀧𑀝𑀼𑀪𑀸𑀯𑁄, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀫𑀼𑀤𑀼𑀢𑀸 𑀯𑀸, 𑀉𑀧𑀘𑀬𑁄 𑀯𑀸. 𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑁂-𑀧𑀸𑀤𑀲𑁆𑀲 𑀉𑀓𑁆𑀔𑁂𑀧𑀦𑀁, 𑀅𑀯𑀓𑁆𑀔𑁂𑀧𑀦𑀁 𑀯𑀸, 𑀳𑀢𑁆𑀣𑀲𑁆𑀲 𑀲𑀫𑀺𑀜𑁆𑀚𑀦𑀁, 𑀤𑀸𑀦𑀁, 𑀧𑀲𑀸𑀭𑀡𑀁, 𑀥𑀸𑀢𑀽𑀦𑀁 𑀕𑀫𑀦𑀁, 𑀞𑀸𑀦𑀁, 𑀦𑀺𑀲𑀚𑁆𑀚𑀸, 𑀲𑀬𑀦𑀁 𑀯𑀸, 𑀢𑀣𑀸𑀕𑀢𑀲𑁆𑀲 𑀦𑀸𑀫𑀕𑁄𑀢𑁆𑀢𑀸𑀤𑀺, 𑀢𑀲𑁆𑀲 𑀓𑀸𑀭𑀡𑀁, 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀢𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺, 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀢𑁄, 𑀯𑀲𑁆𑀲𑀸𑀦𑀁 𑀢𑀢𑀺𑀬𑁂 𑀫𑀸𑀲𑁂, 𑀦 𑀢𑀲𑁆𑀲 𑀉𑀧𑀫𑀸, 𑀓𑀼𑀯𑁂𑀭𑀲𑁆𑀲 𑀩𑀮𑀺 𑀇𑀘𑁆𑀘𑀸𑀤𑀺. 𑀅𑀧𑀺 𑀘 𑁋

𑀕𑀸𑀯𑀲𑁆𑀲 𑀚𑀸𑀢𑀺, 𑀥𑀯𑀮𑁄, 𑀕𑀢𑀺, 𑀲𑀺𑀗𑁆𑀕𑀁, 𑀦𑀸𑀫𑀦𑁆𑀢𑀺+𑀥;

𑀤𑀩𑁆𑀩𑀲𑁆𑀲𑀸𑀧𑀺 𑀘 𑀚𑀸𑀢𑁆𑀬𑀸𑀤𑀺, 𑀯𑀺𑀲𑁂𑀲𑁆𑀲𑀸 𑀳𑁄𑀦𑁆𑀢𑀺 𑀓𑀸𑀫𑀢𑁄.

𑀕𑁄𑀢𑁆𑀢𑀜𑁆𑀘 𑀲𑀩𑀮𑁄𑀤𑀺𑀲𑁆𑀲, 𑀧𑀸𑀓+𑀫𑀦𑁆𑀦𑀲𑁆𑀲 𑀲𑀼𑀓𑁆𑀓𑀢𑀸;

𑀧𑀝𑀲𑁆𑀲, 𑀲𑀺𑀗𑁆𑀕𑀁𑀫𑁂𑀡𑁆𑀟𑀲𑁆𑀲, 𑀦𑀸+𑀜𑁆𑀜𑁂𑀲𑀁𑀢𑀺 𑀯𑀺𑀲𑁂𑀲𑁆𑀲𑀢𑁂.

𑀞𑀸𑀦𑀺𑀢𑁄-𑀬𑀼𑀯𑀡𑁆𑀡𑀸𑀦+𑀫𑁂𑀑 𑀮𑀼𑀢𑁆𑀢𑀸. 𑀆𑀕𑀫𑀺𑀢𑁄-𑀲𑀼𑀜 𑀲𑀲𑁆𑀲. 𑀲𑀸𑀫𑀺𑀬𑁄𑀕𑁂-𑀤𑁂𑀯𑀸𑀦+𑀫𑀺𑀦𑁆𑀤𑁄, 𑀫𑀺𑀕𑀸𑀦𑀁 𑀭𑀸𑀚𑀸. 𑀭𑀼𑀚𑀸𑀤𑀺𑀬𑁄𑀕𑁂-𑀤𑁂𑀯𑀤𑀢𑁆𑀢𑀲𑁆𑀲 𑀭𑀼𑀚𑀢𑀺, 𑀢𑀲𑁆𑀲 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺, 𑀫𑀳𑀸𑀲𑁂𑀦𑀸𑀧𑀢𑀻𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩𑀁, 𑀭𑀚𑀓𑀲𑁆𑀲 𑀯𑀢𑁆𑀣𑀁 𑀤𑀤𑀸𑀢𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀑𑀢𑁆𑀢𑀧𑁆𑀧𑀁 𑀇𑀘𑁆𑀘𑀸𑀤𑀺. 𑀬𑀚𑀲𑁆𑀲 𑀬𑁄𑀕𑁂-𑀧𑀼𑀧𑁆𑀨𑀲𑁆𑀲 𑀩𑀼𑀤𑁆𑀥𑀲𑁆𑀲 𑀬𑀚𑀢𑀺, 𑀧𑀼𑀧𑁆𑀨𑁂𑀦𑀸𑀢𑁆𑀬𑀢𑁆𑀣𑁄. 𑀏𑀯𑀁 𑀖𑀢𑀲𑁆𑀲 𑀅𑀕𑁆𑀕𑀺𑀁 𑀚𑀼𑀳𑀢𑀺. 𑀲𑀼𑀳𑀺𑀢𑀢𑁆𑀣𑁂-𑀧𑀢𑁆𑀢𑀁 𑀑𑀤𑀦𑀲𑁆𑀲 𑀧𑀽𑀭𑁂𑀢𑁆𑀯𑀸, 𑀧𑀽𑀭𑀁 𑀦𑀸𑀦𑀸𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄, 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲, 𑀧𑀽𑀭𑀢𑀺 𑀩𑀸𑀮𑁄 𑀧𑀸𑀧𑀲𑁆𑀲. 𑀓𑀺𑀢𑀓𑀧𑁆𑀧𑀬𑁄𑀕𑁂-𑀩𑀳𑀼𑀮𑀁𑀯𑀺𑀥𑀸𑀦𑀸 𑀙𑀝𑁆𑀞𑀻, 𑀭𑀜𑁆𑀜𑁄 𑀲𑀫𑁆𑀫𑀢𑁄, 𑀧𑀽𑀚𑀺𑀢𑁄, 𑀲𑀓𑁆𑀓𑀢𑁄, 𑀅𑀧𑀘𑀺𑀢𑁄, 𑀫𑀸𑀦𑀺𑀢𑁄 𑀯𑀸, 𑀅𑀫𑀢𑀁 𑀢𑁂𑀲𑀁 𑀪𑀺𑀓𑁆𑀔𑀯𑁂 𑀅𑀧𑀭𑀺𑀪𑀼𑀢𑁆𑀢𑀁, 𑀬𑁂𑀲𑀁 𑀓𑀸𑀬𑀕𑀢𑀸 𑀲𑀢𑀺 𑀅𑀧𑀭𑀺𑀪𑀼𑀢𑁆𑀢𑀸, 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲, 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀩𑀼𑀤𑁆𑀥𑀸𑀦𑀁 𑀥𑀫𑁆𑀫𑀥𑀸𑀢𑀼, 𑀥𑀫𑁆𑀫𑀲𑁆𑀲 𑀕𑀼𑀢𑁆𑀢𑁄 𑀫𑁂𑀥𑀸𑀯𑀻. 𑀓𑀫𑁆𑀫𑀢𑁆𑀣𑁂-𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄, 𑀲𑀳𑀲𑀸 𑀓𑀫𑁆𑀫𑀲𑁆𑀲 𑀓𑀢𑁆𑀢𑀸𑀭𑁄, 𑀅𑀫𑀢𑀲𑁆𑀲 𑀤𑀸𑀢𑀸, 𑀪𑀺𑀦𑁆𑀦𑀸𑀦𑀁 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀅𑀦𑀼𑀧𑁆𑀧𑀤𑀸𑀢𑀸, 𑀩𑁄𑀥𑁂𑀢𑀸 𑀧𑀚𑀸𑀬, 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀺, 𑀯𑀺𑀧𑀸𑀓𑀲𑁆𑀲 𑀘 𑀯𑁂𑀤𑀓𑁄, 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄. 𑀲𑀭𑀢𑀺+𑀘𑁆𑀙𑀸𑀬𑁄𑀕𑁂-𑀫𑀸𑀢𑀼 𑀲𑀭𑀢𑀺, 𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺, 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑀸, 𑀧𑀼𑀢𑁆𑀢𑀲𑁆𑀲 𑀇𑀘𑁆𑀙𑀢𑀺. 𑀓𑀭𑁄𑀢𑀺𑀲𑁆𑀲 (𑀬𑁄𑀕𑁂) 𑁋 𑀉𑀤𑀓𑀲𑁆𑀲 𑀧𑀢𑀺𑀓𑀼𑀭𑀼𑀢𑁂, 𑀓𑀡𑁆𑀟𑀲𑁆𑀲 𑀧𑀢𑀺𑀓𑀼𑀭𑀼𑀢𑁂, 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑁆𑀬𑀢𑁆𑀣𑁄. 𑀧𑀜𑁆𑀘𑀫𑀺𑀬𑀢𑁆𑀣𑁂 𑀧𑀭𑀺𑀳𑀸𑀦𑀺𑀪𑀬𑀢𑁆𑀣𑀬𑁄𑀕𑁂𑀧𑀺 𑀙𑀝𑁆𑀞𑀻, 𑀅𑀲𑁆𑀲𑀯𑀦𑀢𑀸𑀬 𑀥𑀫𑁆𑀫𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀺, 𑀓𑀺𑀦𑁆𑀦𑀼 𑀔𑁄 𑀅𑀳𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀪𑀸𑀬𑀸𑀫𑀺, 𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄, 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀖𑁄𑀭𑀯𑀺𑀲𑀸𑀦𑀁 𑀇𑀘𑁆𑀘𑀸𑀤𑀺.

𑁪𑁦. 𑀢𑀼𑀮𑁆𑀬𑀢𑁆𑀣𑁂𑀦 𑀯𑀸 𑀢𑀢𑀺𑀬𑀸

𑀢𑀼𑀮𑁆𑀬𑀢𑁆𑀣𑁂𑀦 𑀬𑁄𑀕𑁂 𑀯𑀸 𑀙𑀝𑁆𑀞𑀻 𑀳𑁄𑀢𑀺 𑀢𑀢𑀺𑀬𑀸 𑀘. 𑀧𑀺𑀢𑀼 𑀢𑀼𑀮𑁆𑀬𑁄, 𑀧𑀺𑀢𑀭𑀸 𑀯𑀸, 𑀫𑀸𑀢𑀼 𑀢𑀼𑀮𑁆𑀬𑁄, 𑀫𑀸𑀢𑀭𑀸 𑀯𑀸.

𑁩𑁨. 𑀲𑀢𑁆𑀢𑀫𑁆𑀬𑀸+𑀥𑀸𑀭𑁂

𑀓𑀢𑁆𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑀚𑁆𑀚+𑀧𑀘𑀦𑀸𑀤𑀺𑀓𑁆𑀭𑀺𑀬𑀸𑀦𑀁 𑀬𑁄 𑀆𑀥𑀸𑀭𑁄, 𑀢𑀁 𑀆𑀥𑀸𑀭𑀓𑀸𑀭𑀓𑀁 𑀦𑀸𑀫. 𑀓𑀣𑀁 𑀓𑀝𑁂 𑀦𑀺𑀲𑀻𑀤𑀢𑀺 𑀤𑁂𑀯𑀤𑀢𑁆𑀢𑁄, 𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀺, 𑀤𑁂𑀯𑀤𑀢𑁆𑀢+𑀢𑀡𑁆𑀟𑀼𑀮𑀸𑀦𑀁 𑀓𑀢𑁆𑀢𑀼+𑀓𑀫𑁆𑀫𑀸𑀦𑀁 𑀥𑀸𑀭𑀡𑀢𑁄 𑀢𑀤𑀝𑁆𑀞𑀆𑀲𑀦+𑀧𑀘𑀦𑀓𑁆𑀭𑀺𑀬𑀁 𑀓𑀝+𑀣𑀸𑀮𑀺𑀬𑁄 𑀥𑀸𑀭𑁂𑀦𑁆𑀢𑀺 𑀦𑀸𑀫, 𑀢𑀲𑁆𑀫𑀺𑀁 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑁄 𑀩𑁆𑀬𑀸𑀧𑀺𑀓𑁄, 𑀑𑀧𑀲𑀺𑀮𑁂𑀲𑀺𑀓𑁄, 𑀯𑁂𑀲𑀬𑀺𑀓𑁄, 𑀲𑀸𑀫𑀻𑀧𑀺𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀬𑁄 𑀆𑀥𑁂𑀬𑁆𑀬𑀲𑁆𑀲 𑀦𑀺𑀲𑁆𑀲𑁂𑀲𑀸𑀥𑀸𑀭𑀪𑀽𑀢𑁄, 𑀲𑁄 𑀩𑁆𑀬𑀸𑀧𑀺𑀓𑁄, 𑀬𑀣𑀸 𑀢𑀺𑀮𑁂𑀲𑀼 𑀢𑁂𑀮𑀁 𑀅𑀢𑁆𑀣𑀺, 𑀔𑀻𑀭𑁂𑀲𑀼 𑀚𑀮𑀁, 𑀤𑀥𑀺𑀫𑁆𑀳𑀺 𑀲𑀧𑁆𑀧𑀺. 𑀧𑀘𑁆𑀘𑁂𑀓𑀲𑀺𑀤𑁆𑀥𑀸𑀦𑀁 𑀪𑀸𑀯𑀸𑀦𑀁 𑀬𑀁 𑀆𑀥𑁂𑀬𑁆𑀬𑀪𑀸𑀯𑁂𑀦 𑀉𑀧𑀲𑀺𑀮𑁂𑀲𑀦𑀁 𑀅𑀮𑁆𑀮𑀻𑀬𑀦𑀁 𑀅𑀢𑁆𑀣𑀺, 𑀲𑁄 𑀑𑀧𑀲𑀺𑀮𑁂𑀲𑀺𑀓𑁄. 𑀬𑀣𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑁄, 𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀺, 𑀖𑀝𑁂 𑀉𑀤𑀓+𑀫𑀢𑁆𑀣𑀺, 𑀤𑀽𑀭𑁂 𑀞𑀺𑀢𑁄, 𑀲𑀫𑀻𑀧𑁂 𑀞𑀺𑀢𑁄. 𑀬𑀢𑁆𑀣 𑀲𑀫𑀻𑀧𑁂 𑀲𑀫𑀻𑀧𑀻𑀯𑁄𑀳𑀸𑀭𑀁 𑀓𑀢𑁆𑀯𑀸 𑀢𑀤𑀸𑀬𑀢𑁆𑀢𑀢𑀸𑀤𑀻𑀧𑀦𑀢𑁆𑀣𑀁 𑀆𑀥𑀸𑀭𑀪𑀸𑀯𑁄 𑀉𑀧𑀘𑀭𑀻𑀬𑀢𑀺, 𑀢𑀁 𑀲𑀸𑀫𑀻𑀧𑀺𑀓𑀁, 𑀬𑀣𑀸 𑀕𑀗𑁆𑀕𑀸𑀬𑀁 𑀖𑁄𑀲𑁄, 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀯𑀚𑁄𑀢𑁆𑀬𑀢𑁆𑀣𑁄. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂. 𑀬𑀢𑁆𑀣 𑀅𑀜𑁆𑀜𑀣𑀸𑀪𑀸𑀯𑀯𑀲𑁂𑀦 𑀤𑁂𑀲𑀦𑁆𑀢𑀭𑀸𑀯𑀘𑁆𑀙𑁂𑀤𑀯𑀲𑁂𑀦 𑀯𑀸 𑀆𑀥𑀸𑀭𑀧𑀭𑀺𑀓𑀧𑁆𑀧𑁄, 𑀲𑁄 𑀯𑁂𑀲𑀬𑀺𑀢𑁄. 𑀬𑀣𑀸 𑀆𑀓𑀸𑀲𑁂 𑀲𑀓𑀼𑀡𑀸 𑀘𑀭𑀦𑁆𑀢𑀺, 𑀪𑀽𑀫𑀺𑀬𑀁 𑀫𑀦𑀼𑀲𑁆𑀲𑀸, 𑀚𑀮𑁂 𑀫𑀘𑁆𑀙𑀸, 𑀧𑀸𑀲𑀸𑀤𑁂𑀲𑀼 𑀧𑀢𑀺𑀢𑁄, 𑀧𑀸𑀧𑀲𑁆𑀫𑀺𑀁 𑀭𑀫𑀢𑀻 𑀫𑀦𑁄, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂, 𑀧𑀜𑁆𑀜𑀸𑀬 𑀲𑀸𑀥𑀼, 𑀯𑀺𑀦𑀬𑁂 𑀦𑀺𑀧𑀼𑀡𑁄, 𑀫𑀸𑀢𑀭𑀺 𑀲𑀸𑀥𑀼, 𑀧𑀺𑀢𑀭𑀺 𑀦𑀺𑀧𑀼𑀡𑁄.

𑀓𑀺𑀭𑀺𑀬𑀸 𑀓𑀢𑁆𑀢𑀼+𑀓𑀫𑁆𑀫𑀝𑁆𑀞𑀸, 𑀆𑀥𑀸𑀭𑀻𑀬𑀢𑀺 𑀬𑁂𑀦 𑀲𑁄;

𑀆𑀥𑀸𑀭𑁄 𑀘𑀢𑀼𑀥𑀸 𑀯𑀼𑀢𑁆𑀢𑁄, 𑀩𑁆𑀬𑀸𑀧𑀓𑀸𑀤𑀺𑀧𑁆𑀧𑀪𑁂𑀤𑀢𑁄.

𑀩𑁆𑀬𑀸𑀧𑀓𑁄 𑀢𑀺𑀮𑀔𑀻𑀭𑀸𑀤𑀺, 𑀓𑀝𑁄 𑀑𑀧𑀲𑀺𑀮𑁂𑀲𑀺𑀓𑁄;

𑀲𑀸𑀫𑀻𑀧𑀺𑀓𑁄 𑀢𑀼 𑀕𑀗𑁆𑀕𑀸𑀤𑀺, 𑀆𑀓𑀸𑀲𑁄 𑀯𑀺𑀲𑀬𑁄 𑀫𑀢𑁄.

𑁩𑁩. 𑀦𑀺𑀫𑀺𑀢𑁆𑀢𑁂

𑀦𑀺𑀫𑀺𑀢𑁆𑀢𑀢𑁆𑀣𑁂 𑀲𑀢𑁆𑀢𑀫𑀻 𑀳𑁄𑀢𑀺. 𑀅𑀚𑀺𑀦𑀫𑁆𑀳𑀺 𑀳𑀜𑁆𑀜𑀢𑁂 𑀤𑀻𑀧𑀺, 𑀓𑀼𑀜𑁆𑀚𑀭𑁄 𑀤𑀦𑁆𑀢𑁂𑀲𑀼 𑀳𑀜𑁆𑀜𑀢𑁂, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀫𑀺𑀢𑁆𑀬𑀢𑁆𑀣𑁄.

𑁩𑁪. 𑀬𑀩𑁆𑀪𑀸𑀯𑁄 𑀪𑀸𑀯𑀮𑀓𑁆𑀔𑀡𑀁