𑀲𑀗𑁆𑀔𑁆𑀬𑀸𑀓𑀡𑁆𑀟

𑀅𑀣 𑀲𑀗𑁆𑀔𑁆𑀬𑀸𑀲𑀤𑁆𑀤𑀸 𑀯𑀼𑀘𑁆𑀘𑀦𑁆𑀢𑁂. 𑀏𑀓𑀸𑀤𑀬𑁄 𑀅𑀝𑁆𑀞𑀸𑀭𑀲𑀦𑁆𑀢𑀸 𑀲𑀗𑁆𑀔𑁆𑀬𑁂𑀬𑁆𑀬𑀯𑀘𑀦𑀸. 𑀯𑀻𑀲𑀢𑀺𑀆𑀤𑀬𑁄 ‘‘𑀪𑀺𑀓𑁆𑀔𑀽𑀦𑀁 𑀯𑀻𑀲𑀢𑀻’’𑀢𑀺𑀆𑀤𑀻𑀲𑀼 𑀲𑀗𑁆𑀔𑁆𑀬𑀸𑀯𑀘𑀦𑀸, ‘‘𑀯𑀻𑀲𑀢𑀺 𑀪𑀺𑀓𑁆𑀔𑀯𑁄’’𑀢𑀺𑀆𑀤𑀻𑀲𑀼 𑀲𑀗𑁆𑀔𑁆𑀬𑁂𑀬𑁆𑀬𑀯𑀘𑀦𑀸. 𑀏𑀓𑀲𑀤𑁆𑀤𑁄 𑀲𑀩𑁆𑀩𑀸𑀤𑀻𑀲𑀼 𑀯𑀼𑀢𑁆𑀢𑁄𑀯. 𑀤𑁆𑀯𑀸𑀤𑀬𑁄 𑀅𑀝𑁆𑀞𑀸𑀭𑀲𑀦𑁆𑀢𑀸 𑀩𑀳𑀼𑀯𑀘𑀦𑀦𑁆𑀣𑀸𑀯.

𑁨𑁧𑁯. 𑀬𑁄𑀫𑁆𑀳𑀺 𑀤𑁆𑀯𑀺𑀦𑁆𑀦𑀁 𑀤𑀼𑀯𑁂+𑀤𑁆𑀯𑁂

𑀬𑁄𑀫𑁆𑀳𑀺 𑀤𑁆𑀯𑀺𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀤𑀼𑀯𑁂+𑀤𑁆𑀯𑁂 𑀳𑁄𑀦𑁆𑀢𑀺 𑀧𑀘𑁆𑀘𑁂𑀓𑀁. 𑀤𑀼𑀯𑁂 𑀤𑁆𑀯𑁂, 𑀤𑀼𑀯𑁂 𑀤𑁆𑀯𑁂, 𑀤𑁆𑀯𑀻𑀳𑀺 𑀤𑁆𑀯𑀻𑀪𑀺.

𑁨𑁨𑁦. 𑀤𑀼𑀯𑀺𑀦𑁆𑀦𑀁 𑀦𑀁𑀫𑁆𑀳𑀺 𑀯𑀸

𑀦𑀁𑀫𑁆𑀳𑀺 𑀤𑁆𑀯𑀺𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀤𑀼𑀯𑀺𑀦𑁆𑀦𑀁 𑀳𑁄𑀢𑀺 𑀯𑀸. 𑀤𑀼𑀯𑀺𑀦𑁆𑀦𑀁, 𑀅𑀜𑁆𑀜𑀢𑁆𑀭 𑁋

𑁪𑁭. 𑀦𑀁𑀫𑁆𑀳𑀺 𑀦𑀼𑀓 𑀤𑁆𑀯𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦𑀁

𑀤𑁆𑀯𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀦𑀼𑀓 𑀳𑁄𑀢𑀺 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀉𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀓𑀓𑀸𑀭𑁄 𑀅𑀦𑁆𑀢𑀸𑀯𑀬𑀯𑀢𑁆𑀣𑁄. 𑀏𑀢𑁆𑀣 𑀦𑀸𑀕𑀫𑁄 𑀯𑀺𑀪𑀢𑁆𑀢𑀺𑀲𑁆𑀲 𑀆𑀤𑁆𑀬𑀸𑀯𑀬𑀯𑁄 𑀘𑁂, ‘‘𑀆𑀕𑀫𑀸 𑀢𑀕𑁆𑀕𑀼𑀡𑀻𑀪𑀽𑀢𑀸 𑀢𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑁂’’𑀢𑀺 𑀜𑀸𑀬𑀸 𑀦𑀸𑀕𑀫𑁄𑀧𑀺 𑀢𑀁𑀕𑀳𑀡𑁂𑀦 𑀕𑀬𑁆𑀳𑀢𑀻𑀢𑀺 ‘‘𑀲𑀼𑀦𑀁𑀳𑀺𑀲𑀽’’𑀢𑀺 𑀤𑀻𑀖𑀧𑁆𑀧𑀲𑀗𑁆𑀕𑁂 𑀧𑀓𑀢𑀺𑀬𑀸 𑀅𑀦𑁆𑀢𑀸𑀯𑀬𑀯𑀪𑀽𑀢𑁂 𑀲𑀭𑀦𑁆𑀢𑀢𑀸 𑀦𑀢𑁆𑀣𑀻𑀢𑀺 𑀦 𑀤𑀻𑀖𑁄. 𑀤𑁆𑀯𑀺𑀦𑁆𑀦𑀁, 𑀤𑁆𑀯𑀻𑀲𑀼.

𑁨𑁦𑁭. 𑀧𑀼𑀫𑁂 𑀢𑀬𑁄+𑀘𑀢𑁆𑀢𑀸𑀭𑁄

𑀬𑁄𑀫𑁆𑀳𑀺 𑀲𑀯𑀺𑀪𑀢𑁆𑀢𑀻𑀦𑀁 𑀢𑀺+𑀘𑀢𑀼𑀦𑁆𑀦𑀁 𑀢𑀬𑁄+𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀧𑀼𑀮𑁆𑀮𑀺𑀗𑁆𑀕𑁂. 𑀢𑀬𑁄, 𑀢𑀬𑁄, 𑀢𑀻𑀳𑀺 𑀢𑀻𑀪𑀺.

𑁪𑁯. 𑀡𑁆𑀡𑀁+𑀡𑁆𑀡𑀦𑁆𑀦𑀁 𑀢𑀺𑀢𑁄 𑀛𑀸

𑀛𑀲𑀜𑁆𑀜𑀺𑀢𑁄 𑀢𑀺𑀢𑁄 𑀦𑀁𑀯𑀘𑀦𑀲𑁆𑀲 𑀡𑁆𑀡𑀁+𑀡𑁆𑀡𑀦𑁆𑀦𑀁 𑀳𑁄𑀦𑁆𑀢𑀺. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀲𑀼.

𑀇𑀢𑁆𑀣𑀺𑀬𑀁 𑁋

𑁨𑁦𑁫. 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀬𑁄𑀫𑁆𑀳𑀺 𑀲𑀯𑀺𑀪𑀢𑁆𑀢𑀻𑀦𑀁

𑀯𑀺𑀪𑀢𑁆𑀢𑀺𑀲𑀳𑀺𑀢𑀸𑀦𑀁 𑀢𑀺𑀘𑀢𑀼𑀦𑁆𑀦𑀁 𑀬𑁄𑀫𑁆𑀳𑀺 𑀢𑀺𑀲𑁆𑀲𑁄+𑀘𑀢𑀲𑁆𑀲𑁄 𑀳𑁄𑀦𑁆𑀢𑀺 𑀇𑀢𑁆𑀣𑀺𑀬𑀁 𑀬𑀣𑀸𑀓𑁆𑀓𑀫𑀁. 𑀢𑀺𑀲𑁆𑀲𑁄, 𑀢𑀺𑀲𑁆𑀲𑁄, 𑀢𑀻𑀳𑀺 𑀢𑀻𑀪𑀺.

𑁨𑁦𑁪. 𑀦𑀁𑀫𑁆𑀳𑀺 𑀢𑀺𑀘𑀢𑀼𑀦𑁆𑀦+𑀫𑀺𑀢𑁆𑀣𑀺𑀬𑀁 𑀢𑀺𑀲𑁆𑀲+𑀘𑀢𑀲𑁆𑀲𑀸

𑀦𑀁𑀫𑁆𑀳𑀺 𑀢𑀺𑀘𑀢𑀼𑀦𑁆𑀦𑀁 𑀢𑀺𑀲𑁆𑀲+𑀘𑀢𑀲𑁆𑀲𑀸 𑀳𑁄𑀦𑁆𑀢𑀺+𑀢𑁆𑀣𑀺𑀬𑀁 𑀬𑀣𑀸𑀓𑁆𑀓𑀫𑀁. 𑀦𑀁𑀫𑁆𑀳𑀻𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀲𑀸𑀫𑀜𑁆𑀜𑀯𑀘𑀦𑀁, 𑀦𑁄 𑀘𑁂 𑀦𑀁𑀲𑀽𑀢𑀺 𑀯𑀤𑀢𑀺, 𑀬𑀣𑀸𑀓𑁆𑀓𑀫𑀁𑀢𑀺 𑀲𑀤𑁆𑀤𑀤𑁆𑀯𑀬𑀸𑀧𑁂𑀓𑁆𑀔𑀁. 𑀏𑀯+𑀫𑀻𑀤𑀺𑀲+𑀫𑀜𑁆𑀜𑀫𑁆𑀧𑀺. 𑀢𑀺𑀲𑁆𑀲𑀦𑁆𑀦𑀁 𑀢𑀻𑀲𑀼.

𑁨𑁦𑁬. 𑀢𑀻𑀡𑀺+𑀘𑀢𑁆𑀢𑀸𑀭𑀺 𑀦𑀧𑀼𑀁𑀲𑀓𑁂

𑀬𑁄𑀫𑁆𑀳𑀺 𑀲𑀯𑀺𑀪𑀢𑁆𑀢𑀻𑀦𑀁 𑀢𑀺𑀘𑀢𑀼𑀦𑁆𑀦𑀁 𑀬𑀣𑀸𑀓𑁆𑀓𑀫𑀁 𑀢𑀻𑀡𑀺+𑀘𑀢𑁆𑀢𑀸𑀭𑀺 𑀳𑁄𑀦𑁆𑀢𑀺 𑀦𑀧𑀼𑀁𑀲𑀓𑁂. 𑀢𑀻𑀡𑀺, 𑀢𑀻𑀡𑀺, 𑀢𑀻𑀳𑀺 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑁂𑀯.

𑀘𑀢𑀼 𑀬𑁄,

𑁨𑁦𑁮. 𑀘𑀢𑀼𑀭𑁄 𑀯𑀸 𑀘𑀢𑀼𑀲𑁆𑀲

𑀘𑀢𑀼𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀬𑁄𑀫𑁆𑀳𑀺 𑀘𑀢𑀼𑀭𑁄 𑀳𑁄𑀢𑀺 𑀯𑀸 𑀧𑀼𑀮𑁆𑀮𑀺𑀗𑁆𑀕𑁂. 𑀘𑀢𑀼𑀭𑁄 𑀘𑀢𑁆𑀢𑀸𑀭𑁄. 𑀓𑀣𑀁 ‘‘𑀘𑀢𑀼𑀭𑁄 𑀦𑀺𑀫𑀺𑀢𑁆𑀢𑁂 𑀦𑀸𑀤𑁆𑀤𑀲𑀸𑀲𑀺’’𑀦𑁆𑀢𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀲𑀺𑀤𑁆𑀥𑀁, 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀮𑁆𑀮𑀸𑀲𑁄 𑀢𑀺𑀯𑀺𑀥𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄𑀢𑀺. 𑀘𑀢𑀽𑀳𑀺 𑀘𑀢𑀽𑀪𑀺. 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼.

𑀇𑀢𑁆𑀣𑀺𑀬𑀁 𑀘𑀢𑀲𑁆𑀲𑁄. 𑀘𑀢𑀲𑁆𑀲𑁄. 𑀘𑀢𑀽𑀳𑀺 𑀘𑀢𑀽𑀪𑀺. 𑀘𑀢𑀲𑁆𑀲𑀦𑁆𑀦𑀁. 𑀘𑀢𑀲𑁆𑀲𑀦𑁆𑀦𑀁. 𑀘𑀢𑀽𑀲𑀼.

𑀦𑀧𑀼𑀁𑀲𑀓𑁂 𑀘𑀢𑁆𑀢𑀸𑀭𑀺. 𑀘𑀢𑁆𑀢𑀸𑀭𑀺. 𑀘𑀢𑀽𑀳𑀺 𑀘𑀢𑀽𑀪𑀺. 𑀇𑀘𑁆𑀘𑀸𑀤𑀺 𑀧𑀼𑀫𑁂𑀯.

𑁧𑁬𑁯. 𑀝 𑀧𑀜𑁆𑀘𑀸𑀤𑀻𑀳𑀺 𑀘𑀼𑀤𑁆𑀤𑀲𑀳𑀺

‘‘𑀲𑀼𑀢𑁆𑀢𑁂 𑀮𑀺𑀗𑁆𑀕𑀯𑀘𑀦𑀫𑀢𑁆𑀢’’𑀦𑁆𑀢𑀺 𑀜𑀸𑀬𑀸 𑀝-𑀇𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀸𑀤𑀻𑀳𑀺 𑀘𑀼𑀤𑁆𑀤𑀲𑀳𑀺 𑀲𑀗𑁆𑀔𑁆𑀬𑀸𑀳𑀺 𑀬𑁄𑀦𑀁 𑀝 𑀳𑁄𑀢𑀺. 𑀧𑀜𑁆𑀘. 𑀧𑀜𑁆𑀘. 𑀬𑁄𑀦𑀁 𑀝𑀸+𑀝𑁂𑀦𑀺𑀯𑀢𑁆𑀣𑀦𑀢𑁆𑀣𑀁 𑀝-𑀯𑀺𑀥𑀸𑀦𑀁.

𑁯𑁦. 𑀧𑀜𑁆𑀘𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦+𑀫

𑀧𑀜𑁆𑀘𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦𑀁 𑀲𑀼𑀦𑀁𑀳𑀺𑀲𑁆𑀯 𑀳𑁄𑀢𑀺. 𑀏𑀢𑁆𑀢+𑀤𑀻𑀖𑀸𑀧𑀯𑀸𑀤𑁄+𑀬𑀁. 𑀅𑀧𑀯𑀸𑀤𑀢𑀺 𑀩𑀸𑀥𑁂𑀢𑀻𑀢𑀺 𑀅𑀧𑀯𑀸𑀤𑁄. 𑀢𑀲𑁆𑀫𑀸 ‘‘𑀧𑀓𑀧𑁆𑀬𑀸𑀧𑀯𑀸𑀤𑀯𑀺𑀲𑀬𑀫𑀼𑀲𑁆𑀲𑀕𑁆𑀕𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑁂’’𑀢𑀺 𑀜𑀸𑀬𑀸 ‘‘𑀲𑀼𑀳𑀺𑀲𑁆𑀯+𑀲𑁆𑀲𑁂’’ ‘‘𑀲𑀼𑀦𑀁𑀳𑀺𑀲𑀼’’𑀢𑀺 𑀘 𑀉𑀲𑁆𑀲𑀕𑁆𑀕𑀸 ‘‘𑀧𑀜𑁆𑀘𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦+𑀫’’ 𑀇𑀢𑀺 𑀅𑀧𑀯𑀸𑀤𑀯𑀺𑀲𑀬𑀁 𑀦 𑀧𑀯𑀺𑀲𑀦𑁆𑀢𑀺, 𑀲𑀸𑀫𑀜𑁆𑀜𑀢𑁆𑀢𑀸. 𑀏𑀯+𑀫𑀼𑀧𑀭𑀺𑀧𑀺 ‘‘𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲’’ ‘‘𑀆𑀤𑀺𑀲𑁆𑀲𑀸’’𑀢𑀺. 𑀧𑀜𑁆𑀘𑀳𑀺 𑀧𑀜𑁆𑀘𑀪𑀺 𑀧𑀜𑁆𑀘𑀦𑁆𑀦𑀁. 𑀧𑀜𑁆𑀘𑀦𑁆𑀦𑀁. 𑀧𑀜𑁆𑀘𑀲𑀼. 𑀏𑀯𑀁 𑀙𑀸𑀤𑀬𑁄 𑀅𑀝𑁆𑀞𑀸𑀭𑀲𑀦𑁆𑀢𑀸.

‘‘𑀘𑀢𑁆𑀣𑁂’’𑀢𑀺 𑀏𑀓𑁄 𑀘 𑀤𑀲 𑀘𑀸𑀢𑀺 𑀘𑀢𑁆𑀢𑀲𑀫𑀸𑀲𑁂 ‘‘𑀅𑀫𑀸𑀤𑀻’’𑀢𑀺 𑀏𑀓𑁂𑀦 𑀅𑀥𑀺𑀓𑀸 𑀤𑀲𑀸𑀢𑀺 𑀢𑀢𑀺𑀬𑀸𑀲𑀫𑀸𑀲𑁂 𑀯𑀸 𑀓𑀢𑁂 ‘‘𑀏𑀓𑀢𑁆𑀣𑀢𑀸𑀬’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀏𑀯+𑀫𑀼𑀧𑀭𑀺 𑀘.

𑁩,𑁧𑁦𑁨. 𑀏𑀓𑀝𑁆𑀞𑀸𑀦+𑀫𑀸

𑀏𑀓𑀅𑀝𑁆𑀞𑀸𑀦𑀁 𑀆 𑀳𑁄𑀢𑀺 𑀤𑀲𑁂 𑀧𑀭𑁂.

𑁩,𑁧𑁦𑁩. 𑀭 𑀲𑀁𑀔𑁆𑀬𑀸𑀢𑁄 𑀯𑀸

𑀲𑀁𑀔𑁆𑀬𑀸𑀢𑁄 𑀧𑀭𑀲𑁆𑀲 𑀤𑀲𑀲𑁆𑀲 𑀭 𑀳𑁄𑀢𑀺 𑀯𑀺𑀪𑀸𑀲𑀸. 𑀲 𑀘 ‘‘𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀆𑀤𑀺𑀲𑁆𑀲𑀸’’𑀢𑀺 𑀤𑀓𑀸𑀭𑀲𑁆𑀲𑁂𑀯 𑀳𑁄𑀢𑀺. 𑀏𑀓𑀸𑀭𑀲 𑀏𑀓𑀸𑀤𑀲. 𑀏𑀓𑀸𑀭𑀲𑀳𑀺 𑀏𑀓𑀸𑀤𑀲𑀳𑀺. 𑀏𑀓𑀸𑀭𑀲𑀦𑁆𑀦𑀁 𑀏𑀓𑀸𑀤𑀲𑀦𑁆𑀦𑀁. 𑀏𑀓𑀸𑀭𑀲𑀲𑀼 𑀏𑀓𑀸𑀤𑀲𑀲𑀼. 𑀏𑀯+𑀫𑁂𑀓𑀸𑀤𑀲𑀇𑀘𑁆𑀘𑀸𑀤𑀺𑀧𑀺.

𑁩,𑁯𑁪. 𑀆 𑀲𑀁𑀔𑁆𑀬𑀸𑀬𑀸 𑀲𑀢𑀸𑀤𑁄 𑀦𑀸𑀜𑁆𑀜𑀢𑁆𑀣𑁂

𑀲𑀁𑀔𑁆𑀬𑀸𑀬+𑀫𑀼𑀢𑁆𑀢𑀭𑀧𑀤𑁂 𑀤𑁆𑀯𑀺𑀲𑁆𑀲𑀸 𑀳𑁄𑀢𑀺 𑀅𑀲𑀢𑀸𑀤𑁄 𑀦𑀸𑀜𑁆𑀜𑀢𑁆𑀣𑁂.

𑀆𑀯𑀺𑀝𑁆𑀞𑀮𑀺𑀗𑁆𑀕𑀢𑁆𑀢𑀸 𑀲𑀁𑀔𑁆𑀬𑀸𑀬𑀁 𑀉𑀢𑁆𑀢𑀭𑀧𑀤𑁂 𑀲𑀮𑀺𑀗𑁆𑀕𑁂𑀦𑁂𑀯 𑀯𑀺𑀲𑁂𑀲𑀦𑀁 𑀪𑀯𑀢𑀺.

𑀲𑀼𑀤𑁆𑀥𑀁 𑀫𑀺𑀲𑁆𑀲𑀜𑁆𑀘 𑀲𑀁𑀓𑀺𑀡𑁆𑀡𑀁, 𑀉𑀧𑀲𑀚𑁆𑀚𑀦𑀫𑁂𑀯 𑀘;

𑀆𑀯𑀺𑀝𑁆𑀞+𑀫𑀣 𑀯𑀸+𑀩𑁆𑀬𑀢𑁆𑀢𑀁, 𑀙𑀥𑀸 𑀮𑀺𑀗𑁆𑀕𑀁 𑀯𑀺𑀯𑀁𑀬𑀢𑁂.

𑀏𑀢𑁆𑀣 𑀬𑀣𑀸𑀓𑁆𑀓𑀫𑀁 𑀭𑀼𑀓𑁆𑀔𑁄 𑀮𑀢𑀸 𑀧𑀡𑁆𑀡𑀁𑀢𑀺 𑀲𑀼𑀤𑁆𑀥𑀁. 𑀖𑀝𑁄 𑀖𑀝𑀻, 𑀯𑀚𑀺𑀭𑁄 𑀯𑀚𑀺𑀭𑀁, 𑀯𑁂𑀤𑀦𑀸 𑀯𑁂𑀤𑀦𑀁𑀢𑀺 𑀫𑀺𑀲𑁆𑀲𑀁. 𑀢𑀝𑁄 𑀢𑀝𑀻 𑀢𑀝𑀁𑀢𑀺 𑀲𑀁𑀓𑀺𑀡𑁆𑀡𑀁. 𑀲𑀼𑀓𑁆𑀓𑁄 𑀧𑀝𑁄, 𑀲𑀼𑀓𑁆𑀓𑀸 𑀧𑀝𑀺, 𑀲𑀼𑀓𑁆𑀓𑀁 𑀯𑀢𑁆𑀣𑀁𑀢𑀺 𑀉𑀧𑀲𑀚𑁆𑀚𑀦𑀁. 𑀭𑀸𑀚𑀸 𑀲𑀭𑀡𑀁, 𑀕𑀼𑀡𑁄 𑀧𑀫𑀸𑀡𑀁𑀢𑀺 𑀆𑀯𑀺𑀝𑁆𑀞𑀁. 𑀢𑀼𑀯𑀁 𑀅𑀳𑀁 𑀓𑀢𑀺 𑀧𑀜𑁆𑀘𑀸𑀢𑀺 𑀅𑀩𑁆𑀬𑀢𑁆𑀢𑀁. 𑀇𑀢𑀺 𑀮𑀺𑀗𑁆𑀕𑀁 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀸𑀤𑀲.

𑁩,𑁯𑁮. 𑀩𑀸 𑀘𑀢𑁆𑀢𑀸𑀮𑀻𑀲𑀸 𑀤𑁄

𑀤𑁆𑀯𑀺𑀲𑁆𑀲 𑀩𑀸 𑀯𑀸 𑀳𑁄𑀢𑀺 𑀘𑀢𑁆𑀢𑀸𑀮𑀻𑀲𑀸 𑀤𑁄 𑀦𑀸𑀜𑁆𑀜𑀢𑁆𑀣𑁂. 𑀭𑀸𑀤𑁂 𑀲𑁂 𑀩𑀸𑀭𑀲.

𑁩,𑁯𑁫. 𑀢𑀺𑀲𑁆𑀲𑁂

𑀲𑀁𑀔𑁆𑀬𑀸𑀬+𑀫𑀼𑀢𑁆𑀢𑀭𑀧𑀤𑁂 𑀢𑀺𑀲𑁆𑀲 𑀏 𑀳𑁄𑀢+𑀲𑀢𑀸𑀤𑁄 𑀦𑀸+𑀜𑁆𑀜𑀢𑁆𑀣𑁂.

𑁩,𑁧𑁦𑁪. 𑀙𑀢𑀻𑀳𑀺 𑀴𑁄 𑀘

𑀙𑀢𑀻𑀳𑀺 𑀧𑀭𑀲𑁆𑀲 𑀤𑀲𑀲𑁆𑀲 𑀴𑁄 𑀳𑁄𑀢𑀺 𑀭𑁄 𑀘. 𑀢𑁂𑀴𑀲 𑀢𑁂𑀭𑀲.

𑁩,𑁧𑁦𑁦. 𑀘𑀢𑀼𑀲𑁆𑀲 𑀘𑀼𑀘𑁄 𑀤𑀲𑁂

𑀘𑀢𑀼𑀲𑁆𑀲 𑀘𑀼+𑀘𑁄 𑀳𑁄𑀦𑁆𑀢𑀺 𑀯𑀸 𑀤𑀲𑁂 𑀧𑀭𑁂. 𑀤𑁆𑀯𑀺𑀢𑁆𑀢𑁂 𑀘𑀼𑀤𑁆𑀤𑀲 𑀘𑁄𑀤𑁆𑀤𑀲 𑀘𑀢𑀼𑀤𑁆𑀤𑀲.

𑁩,𑁯𑁯. 𑀯𑀻𑀲𑀢𑀺𑀤𑀲𑁂𑀲𑀼 𑀧𑀜𑁆𑀘𑀲𑁆𑀲 𑀧𑀡𑁆𑀡+𑀧𑀦𑁆𑀦𑀸

𑀯𑀻𑀲𑀢𑀺 𑀲𑁂𑀲𑀼 𑀧𑀭𑁂𑀲𑀼 𑀧𑀜𑁆𑀘𑀲𑁆𑀲 𑀧𑀡𑁆𑀡+𑀧𑀦𑁆𑀦𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀧𑀦𑁆𑀦𑀭𑀲 𑀧𑀜𑁆𑀘𑀤𑀲.

𑁩,𑁧𑁦𑁧. 𑀙𑀲𑁆𑀲 𑀲𑁄

𑀙𑀲𑁆𑀲 𑀲𑁄-𑀇𑀘𑁆𑀘+𑀬+𑀫𑀸𑀤𑁂𑀲𑁄 𑀳𑁄𑀢𑀺 𑀲𑁂 𑀧𑀭𑁂. 𑀲𑁄𑀴𑀲 𑀲𑁄𑀭𑀲. 𑀲𑀢𑁆𑀢𑀭𑀲 𑀲𑀢𑁆𑀢𑀤𑀲. ‘‘𑀏𑀓𑀝𑁆𑀞𑀸𑀦+𑀫𑀸’’𑀢𑀺 𑀆, 𑀅𑀝𑁆𑀞𑀸𑀭𑀲 𑀅𑀝𑁆𑀞𑀸𑀤𑀲.

𑀊𑀦𑀸 𑀘 𑀲𑀸 𑀯𑀻𑀲𑀢𑀺 𑀘𑀸𑀢𑀺 ‘‘𑀯𑀺𑀲𑁂𑀲𑀦+𑀫𑁂𑀓𑀢𑁆𑀣𑁂𑀦𑁂’’𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁂 ‘‘𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺+𑀢𑁆𑀣𑀻 𑀧𑀼𑀫𑁂+𑀯𑁂𑀓𑀢𑁆𑀣𑁂’’𑀢𑀺 𑀧𑀼𑀫𑀢𑁆𑀢𑁂 𑀘 𑀓𑀢𑁂 𑀏𑀓𑁂𑀦 𑀊𑀦𑀸 𑀯𑀻𑀲𑀢𑀻𑀢𑀺 𑀢𑀢𑀺𑀬𑀸𑀲𑀫𑀸𑀲𑁂 𑀏𑀓𑀽𑀦𑀯𑀻𑀲𑀢𑀺.

𑀯𑀻𑀲𑀢𑀺𑀆𑀤𑀬𑁄 𑀆𑀦𑀯𑀼𑀢𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑁂+𑀓𑀯𑀘𑀦𑀸. 𑀪𑁄 𑀏𑀓𑀽𑀦𑀯𑀻𑀲𑀢𑀺. 𑀏𑀓𑀽𑀦𑀯𑀻𑀲𑀢𑀺𑀁. 𑀏𑀓𑀽𑀦𑀯𑀻𑀲𑀢𑁆𑀬𑀸 𑀏𑀓𑀽𑀦𑀯𑀻𑀲𑀢𑀺𑀬𑀸. 𑀏𑀓𑀽𑀦𑀯𑀻𑀲𑀢𑁆𑀬𑀁 𑀏𑀓𑀽𑀦𑀯𑀻𑀲𑀢𑀺𑀬𑀁 𑀏𑀓𑀽𑀦𑀯𑀻𑀲𑀢𑁆𑀬𑀸 𑀏𑀓𑀽𑀦𑀯𑀻𑀲𑀢𑀺𑀬𑀸. 𑀫𑀢𑀺𑀲𑀫𑀁.

𑀏𑀯𑀁 𑀯𑀻𑀲𑀢𑀺, 𑀏𑀓𑀯𑀻𑀲𑀢𑀺, 𑀤𑁆𑀯𑀸𑀯𑀻𑀲𑀢𑀺 𑀩𑀸𑀯𑀻𑀲𑀢𑀺, 𑀢𑁂𑀯𑀻𑀲𑀢𑀺 𑀘𑀢𑀼𑀯𑀻𑀲𑀢𑀺𑀧𑁆𑀧𑀪𑀼𑀢𑀬𑁄. 𑀧𑀡𑁆𑀡𑀆𑀤𑁂𑀲𑁂 𑀧𑀡𑁆𑀡𑀯𑀻𑀲𑀢𑀺 𑀧𑀜𑁆𑀘𑀯𑀻𑀲𑀢𑀺. 𑀏𑀯𑀁 𑀙𑀩𑁆𑀩𑀻𑀲𑀢𑀺, 𑀲𑀢𑁆𑀢𑀯𑀻𑀲𑀢𑀺, 𑀅𑀝𑁆𑀞𑀯𑀻𑀲𑀢𑀺.

𑀏𑀓𑁂𑀦 𑀊𑀦𑀸 𑀢𑀺𑀁𑀲𑀢𑀺 𑀢𑀺𑀁𑀲𑀸 𑀯𑀸𑀢𑀺 𑀏𑀓𑀽𑀦𑀢𑀺𑀁𑀲𑀢𑀺 𑀏𑀓𑀽𑀦𑀢𑀺𑀁𑀲𑀸 𑀯𑀸. 𑀓𑀭𑀡𑁂 𑀏𑀓𑀽𑀦𑀢𑀺𑀁𑀲𑀸𑀬. 𑀏𑀓𑀽𑀦𑀢𑀺𑀁𑀲𑀸𑀬, 𑀏𑀓𑀽𑀦𑀢𑀺𑀁𑀲𑀸𑀬, 𑀏𑀓𑀽𑀦𑀢𑀺𑀁𑀲𑀸𑀬, 𑀏𑀓𑀽𑀦𑀢𑀺𑀁𑀲𑀸𑀬𑀁. 𑀏𑀯𑀁 𑀢𑀺𑀁𑀲𑀢𑀺𑀡𑀺𑀁𑀲𑀸𑀯𑀪𑀼𑀢𑀬𑁄. 𑀢𑀺𑀁𑀲𑀸𑀲𑀤𑁆𑀤𑀲𑁆𑀲 𑀧𑀦 𑀲𑀺𑀮𑁄𑀧𑁂 ‘‘𑀤𑀻𑀖𑀲𑁆𑀲𑁄’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀭𑀲𑁆𑀲𑁄, 𑀢𑀺𑀁𑀲. 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀢𑀺𑀁𑀲𑀁. 𑀪𑁄𑀢𑀺𑀁𑀲𑁂+𑀘𑁆𑀘𑀸𑀤𑀺 𑀧𑀼𑀫𑁂𑀯.

𑀘𑀢𑁆𑀢𑀸𑀮𑀻𑀲𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀏𑀯𑀫𑁂𑀯. 𑀤𑁆𑀯𑀺𑀢𑁆𑀢𑁂 𑀏𑀓𑀢𑁆𑀢𑀺𑀁𑀲𑀢𑀺 𑀏𑀓𑀢𑁆𑀢𑀺𑀁𑀲𑀸. 𑀭𑀲𑁆𑀲𑀤𑁆𑀯𑀺𑀢𑁆𑀢𑁂 𑀤𑁆𑀯𑀢𑁆𑀢𑀺𑀁𑀲𑀢𑀺 𑀤𑁆𑀯𑀢𑁆𑀢𑀺𑀁𑀲. 𑀏𑀯𑀁 𑀢𑁂𑀢𑁆𑀢𑀺𑀁𑀲𑀢𑀺 𑀢𑁂𑀢𑁆𑀢𑀺𑀁𑀲𑀸𑀤𑀬𑁄 𑀬𑀸𑀯 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀢𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲𑀸. 𑀘𑀢𑁆𑀢𑀸𑀮𑀻𑀲𑀸𑀬 𑀲𑀺𑀫𑁆𑀳𑀺 𑀘𑀢𑁆𑀢𑀸𑀭𑀻𑀲𑀸 𑀘𑀢𑁆𑀢𑀸𑀮𑀻𑀲𑀸 𑀘𑀢𑁆𑀢𑀸𑀮𑀻𑀲𑀁, 𑀪𑁄 𑀘𑀢𑁆𑀢𑀸𑀮𑀻𑀲𑁂+𑀘𑁆𑀘𑀸𑀤𑀺 𑀳𑁄𑀢𑀺. 𑀏𑀯𑀁 𑀏𑀓𑀘𑀢𑁆𑀢𑀸𑀭𑀻𑀲𑀸.

𑁩,𑁯𑁭. 𑀤𑁆𑀯𑀻𑀲𑁆𑀲𑀸 𑀘

𑀅𑀲𑀢𑀸𑀤𑁄 𑀦𑀸𑀜𑁆𑀜𑀢𑁆𑀣𑁂 𑀘𑀢𑁆𑀢𑀸𑀮𑀻𑀲𑀸𑀤𑁄 𑀤𑁆𑀯𑀺𑀲𑁆𑀲 𑀏 𑀯𑀸 𑀳𑁄𑀢𑀺 𑀆 𑀘. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁, 𑀏𑀯𑀁 𑀤𑁆𑀯𑀸𑀘𑀢𑁆𑀢𑀸𑀮𑀻𑀲-𑀇𑀘𑁆𑀘𑀸𑀤𑀺. 𑀤𑁆𑀯𑁂𑀘𑀢𑁆𑀢𑀸𑀭𑀻𑀲𑀸 𑀤𑁆𑀯𑁂𑀘𑀢𑁆𑀢𑀸𑀭𑀻𑀲 𑀤𑁆𑀯𑁂𑀘𑀢𑁆𑀢𑀸𑀭𑀻𑀲𑀁, 𑀏𑀯𑀁 𑀤𑁆𑀯𑀸𑀘𑀢𑁆𑀢𑀸𑀭𑀻𑀲𑀸 𑀤𑁆𑀯𑀸𑀘𑀢𑁆𑀢𑀸𑀭𑀻𑀲 𑀇𑀘𑁆𑀘𑀸𑀤𑀺. 𑀘𑀢𑁆𑀢𑀸𑀮𑀻𑀲𑀢𑀺 𑀏𑀓𑀘𑀢𑁆𑀢𑀸𑀮𑀻𑀲𑀢𑀺 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀢𑀺 𑀇𑀘𑁆𑀘𑀸𑀤𑀺 𑀏𑀓𑀽𑀦𑀯𑀻𑀲𑀢𑀺𑀲𑀫𑀁.

𑁩,𑁯𑁮. 𑀘𑀢𑁆𑀢𑀸𑀮𑀻𑀲𑀸𑀤𑁄 𑀯𑀸

𑀅𑀲𑀢𑀸𑀤𑁄 𑀦𑀸𑀜𑁆𑀜𑀢𑁆𑀣𑁂 𑀘𑀢𑁆𑀢𑀸𑀮𑀻𑀲𑀸𑀤𑁄 𑀢𑀺𑀲𑁆𑀲𑁂 𑀳𑁄𑀢𑀺 𑀯𑀸. 𑀢𑁂𑀘𑀢𑁆𑀢𑀸𑀮𑀻𑀲𑀸 𑀢𑁂𑀘𑀢𑁆𑀢𑀸𑀮𑀻𑀲 𑀢𑁂𑀘𑀢𑁆𑀢𑀸𑀮𑀻𑀲𑀁. 𑀪𑁄 𑀢𑁂𑀘𑀢𑁆𑀢𑀸𑀮𑀻𑀲𑁂 𑀇𑀘𑁆𑀘𑀸𑀤𑀺 𑀳𑁄𑀢𑀺. 𑀏𑀯𑀁 𑀢𑀺𑀘𑀢𑁆𑀢𑀸𑀮𑀻𑀲𑀸 𑀢𑁂𑀘𑀢𑁆𑀢𑀸𑀭𑀻𑀲𑀸 𑀢𑀺𑀘𑀢𑁆𑀢𑀸𑀭𑀻𑀲𑀸 𑀇𑀘𑁆𑀘𑀸𑀤𑀺, 𑀢𑁂𑀘𑀢𑁆𑀢𑀸𑀮𑀻𑀲𑀢𑀺 𑀢𑀺𑀘𑀢𑁆𑀢𑀸𑀮𑀻𑀲𑀢𑀺 𑀇𑀘𑁆𑀘𑀸𑀤𑀺 𑀧𑀼𑀩𑁆𑀩𑁂𑀯.

𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸 𑀘𑀢𑀼𑀘𑀢𑁆𑀢𑀸𑀮𑀻𑀲𑀢𑀺 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀢𑀺 𑀇𑀘𑁆𑀘𑀸𑀤𑀺 𑀬𑀸𑀯 𑀏𑀓𑀽𑀦𑀧𑀜𑁆𑀜𑀸𑀲𑀸.

𑀧𑀜𑁆𑀜𑀸𑀲𑀸 𑀧𑀜𑁆𑀜𑀸𑀲 𑀧𑀜𑁆𑀜𑀸𑀲𑀁 𑀇𑀘𑁆𑀘𑀸𑀤𑀺 𑀳𑁄𑀢𑀺. 𑀏𑀯𑀁 𑀤𑁆𑀯𑁂𑀧𑀜𑁆𑀜𑀸𑀲𑀸 𑀤𑁆𑀯𑀸𑀧𑀜𑁆𑀜𑀸𑀲𑀸 𑀤𑁆𑀯𑀺𑀧𑀜𑁆𑀜𑀸𑀲𑀸 𑀤𑁆𑀯𑁂𑀧𑀡𑁆𑀡𑀸𑀲𑀸 𑀤𑁆𑀯𑀸𑀧𑀡𑁆𑀡𑀸𑀲𑀸 𑀤𑁆𑀯𑀺𑀧𑀡𑁆𑀡𑀸𑀲𑀸. 𑀢𑁂𑀧𑀜𑁆𑀜𑀸𑀲𑀸 𑀢𑀺𑀧𑀜𑁆𑀜𑀸𑀲𑀸 𑀢𑀺𑀧𑀜𑁆𑀜𑀸𑀲𑀁 𑀢𑁂𑀧𑀡𑁆𑀡𑀸𑀲𑀸 𑀢𑀺𑀧𑀡𑁆𑀡𑀸𑀲𑀸. 𑀘𑀢𑀼𑀧𑀡𑁆𑀡𑀸𑀲𑀸 𑀧𑀜𑁆𑀘𑀧𑀡𑁆𑀡𑀸𑀲𑀸 𑀇𑀘𑁆𑀘𑀸𑀤𑀺 𑀬𑀸𑀯 𑀏𑀓𑀽𑀦𑀲𑀝𑁆𑀞𑀺.

𑀏𑀯𑀁 𑀲𑀝𑁆𑀞𑀺, 𑀏𑀓𑀲𑀝𑁆𑀞𑀺, 𑀤𑁆𑀯𑁂𑀲𑀝𑁆𑀞𑀺 𑀤𑁆𑀯𑀸𑀲𑀝𑁆𑀞𑀺 𑀤𑁆𑀯𑀺𑀲𑀝𑁆𑀞𑀺, 𑀢𑁂𑀲𑀝𑁆𑀞𑀺 𑀢𑀺𑀲𑀝𑁆𑀞𑀺, 𑀘𑀢𑀼𑀲𑀝𑁆𑀞𑀺 𑀧𑀜𑁆𑀘𑀲𑀝𑁆𑀞𑀺 𑀇𑀘𑁆𑀘𑀸𑀤𑀺 𑀬𑀸𑀯 𑀏𑀓𑀽𑀦𑀲𑀢𑁆𑀢𑀢𑀺.

𑀲𑀢𑁆𑀢𑀢𑀺, 𑀏𑀓𑀲𑀢𑁆𑀢𑀢𑀺, 𑀤𑁆𑀯𑁂𑀲𑀢𑁆𑀢𑀢𑀺 𑀤𑁆𑀯𑀸𑀲𑀢𑁆𑀢𑀢𑀺 𑀤𑁆𑀯𑀺𑀲𑀢𑁆𑀢𑀢𑀺, 𑀢𑁂𑀲𑀢𑁆𑀢𑀢𑀺 𑀢𑀺𑀲𑀢𑁆𑀢𑀢𑀺. 𑀤𑁆𑀯𑁂𑀲𑀢𑁆𑀢𑀭𑀺 𑀤𑁆𑀯𑀸𑀲𑀢𑁆𑀢𑀭𑀺 𑀤𑁆𑀯𑀺𑀲𑀢𑁆𑀢𑀭𑀺, 𑀘𑀢𑀼𑀲𑀢𑁆𑀢𑀢𑀺, 𑀧𑀜𑁆𑀘𑀲𑀢𑁆𑀢𑀢𑀺, 𑀘𑀢𑀼𑀲𑀢𑁆𑀢𑀭𑀺, 𑀧𑀜𑁆𑀘𑀲𑀢𑁆𑀢𑀭𑀻𑀢𑀺 𑀬𑀸𑀯 𑀏𑀓𑀽𑀦𑀸𑀲𑀻𑀢𑀺.

𑀅𑀲𑀻𑀢𑀺, 𑀏𑀓𑀸𑀲𑀻𑀢𑀺, 𑀤𑁆𑀯𑀸𑀲𑀻𑀢𑀺, 𑀬𑀸𑀕𑀫𑁂 𑀤𑁆𑀯𑀺𑀬𑀸𑀲𑀻𑀢𑀺, 𑀢𑁂𑀅𑀲𑀻𑀢𑀺 𑀢𑀺𑀬𑀸𑀲𑀻𑀢𑀺, 𑀘𑀢𑀼𑀭𑀸𑀲𑀻𑀢𑀺, 𑀧𑀜𑁆𑀘𑀸𑀲𑀻𑀢𑀺 𑀇𑀘𑁆𑀘𑀸𑀤𑀺 𑀬𑀸𑀯 𑀏𑀓𑀽𑀦𑀦𑀯𑀼𑀢𑀺.

𑀦𑀯𑀼𑀢𑀺, 𑀏𑀓𑀦𑀯𑀼𑀢𑀺, 𑀤𑁆𑀯𑁂𑀦𑀯𑀼𑀢𑀺 𑀤𑁆𑀯𑀸𑀦𑀯𑀼𑀢𑀺 𑀤𑁆𑀯𑀺𑀦𑀯𑀼𑀢𑀺, 𑀢𑁂𑀦𑀯𑀼𑀢𑀺 𑀢𑀺𑀦𑀯𑀼𑀢𑀺, 𑀘𑀢𑀼𑀦𑀯𑀼𑀢𑀺, 𑀧𑀜𑁆𑀘𑀦𑀯𑀼𑀢𑀺 𑀇𑀘𑁆𑀘𑀸𑀤𑀺 𑀬𑀸𑀯 𑀏𑀓𑀽𑀦𑀲𑀢𑀁, 𑀏𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕+𑀫𑁂𑀓𑀯𑀘𑀦𑀦𑁆𑀢𑀁.

𑀲𑀢𑀁, 𑀪𑁄 𑀲𑀢 𑀲𑀢𑀸, 𑀲𑀢𑀁, 𑀲𑀢𑀁. 𑀲𑀢𑁂𑀦, 𑀓𑀭𑀡𑁂 𑀲𑀢𑁂𑀦. 𑀲𑀢𑀲𑁆𑀲, 𑀲𑀢𑀸 𑀲𑀢𑀫𑁆𑀳𑀸 𑀲𑀢𑀲𑁆𑀫𑀸, 𑀲𑀢𑀲𑁆𑀲, 𑀲𑀢𑁂 𑀲𑀢𑀫𑁆𑀳𑀺 𑀲𑀢𑀲𑁆𑀫𑀺𑀁. 𑀏𑀯𑀁 𑀏𑀓𑀲𑀢𑀢𑁄 𑀧𑀪𑀼𑀢𑀺 𑀬𑀸𑀯 𑀲𑀳𑀲𑁆𑀲𑀁.

𑀓𑁄𑀝𑀺 𑀧𑀓𑁄𑀝𑀺 𑀓𑁄𑀝𑀺𑀧𑁆𑀧𑀓𑁄𑀝𑀺 𑀅𑀓𑁆𑀔𑁄𑀪𑀺𑀡𑀺𑀬𑁄 𑀇𑀢𑁆𑀣𑀺𑀮𑀺𑀗𑁆𑀕𑁂+𑀓𑀯𑀘𑀦𑀦𑁆𑀢𑀸. 𑀯𑀕𑁆𑀕𑀪𑁂𑀤𑁂 𑀢𑀼 𑀲𑀩𑁆𑀩𑀸𑀲𑀫𑁆𑀧𑀺 𑀲𑀁𑀔𑁆𑀬𑀸𑀦𑀁 𑀩𑀳𑀼𑀯𑀘𑀦𑁄𑀧𑀺 𑀳𑁄𑀢𑁂𑀯 ‘‘𑀤𑁆𑀯𑁂𑀯𑀻𑀲𑀢𑀺𑀬𑁄 𑀚𑀺𑀦𑀤𑀦𑁆𑀢𑀸’’ ‘‘𑀢𑀺𑀲𑁆𑀲𑁄 𑀯𑀻𑀲𑀢𑀺𑀬𑁄 𑀤𑀺𑀦𑀖𑀝𑀺𑀓𑀸’’ 𑀇𑀘𑁆𑀘𑀸𑀤𑀺.

𑀤𑀲𑀤𑀲𑀓𑀁 𑀲𑀢𑀁 𑀦𑀸𑀫, 𑀤𑀲𑀲𑀢𑀁 𑀲𑀳𑀲𑁆𑀲𑀁 𑀦𑀸𑀫, 𑀤𑀲𑀲𑀳𑀲𑁆𑀲𑀁 𑀦𑀳𑀼𑀢𑀁, 𑀤𑀲𑀦𑀳𑀼𑀢𑀁 𑀮𑀓𑁆𑀔𑀁, 𑀲𑀢𑀲𑀳𑀲𑁆𑀲𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀮𑀓𑁆𑀔𑀲𑀢𑀁 𑀓𑁄𑀝𑀺, 𑀓𑁄𑀝𑀺𑀮𑀓𑁆𑀔𑀲𑀢𑀁 𑀧𑀓𑁄𑀝𑀺, 𑀧𑀓𑁄𑀝𑀺𑀮𑀓𑁆𑀔𑀲𑀢𑀁 𑀓𑁄𑀝𑀺𑀧𑁆𑀧𑀓𑁄𑀝𑀺, 𑀏𑀯𑀁 𑀦𑀳𑀼𑀢𑀁, 𑀦𑀺𑀦𑁆𑀦𑀳𑀼𑀢𑀁, 𑀅𑀓𑁆𑀔𑁄𑀪𑀺𑀡𑀻, 𑀩𑀺𑀦𑁆𑀤𑀼, 𑀅𑀩𑁆𑀩𑀼𑀤𑀁, 𑀦𑀺𑀭𑀩𑁆𑀩𑀼𑀤𑀁, 𑀅𑀳𑀳𑀁, 𑀅𑀩𑀩𑀁, 𑀅𑀝𑀝𑀁, 𑀲𑁄𑀕𑀡𑁆𑀟𑀺𑀓𑀁, 𑀉𑀧𑁆𑀧𑀮𑀁, 𑀓𑀼𑀫𑀼𑀤𑀁, 𑀧𑀼𑀡𑁆𑀟𑀭𑀻𑀓𑀁, 𑀧𑀤𑀼𑀫𑀁, 𑀓𑀣𑀸𑀦𑀁, 𑀫𑀳𑀸𑀓𑀣𑀸𑀦𑀁, 𑀅𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀲𑀢𑀮𑀓𑁆𑀔𑀕𑀼𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀘𑁆𑀘𑁂𑀯𑀁 𑀞𑀸𑀦𑀢𑁄 𑀞𑀸𑀦𑀁, 𑀲𑀢𑀮𑀓𑁆𑀔𑀕𑀼𑀡𑀁 𑀫𑀢𑀁;

𑀓𑁄𑀝𑀺𑀧𑁆𑀧𑀪𑀼𑀢𑀻𑀦𑀁 𑀯𑀻𑀲-𑀲𑀗𑁆𑀔𑁆𑀬𑀸𑀦𑀜𑁆𑀘 𑀬𑀣𑀸𑀓𑁆𑀓𑀫𑀦𑁆𑀢𑀺.

𑀅𑀣𑀸+𑀲𑀁𑀔𑁆𑀬𑀸 𑀯𑀼𑀘𑁆𑀘𑀢𑁂, 𑀅𑀩𑁆𑀬𑀬𑀦𑁆𑀢𑀺 𑀘 𑀯𑀼𑀘𑁆𑀘𑀢𑁂. 𑀢𑀁 𑀧𑀸𑀤𑀺 𑀘𑀸𑀤𑀺, 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀢𑀺 𑀘 𑀤𑀼𑀯𑀺𑀥𑀁.

𑀧 𑀧𑀭𑀸 𑀅𑀧 𑀲𑀁 𑀅𑀦𑀼 𑀅𑀯 𑀑 𑀦𑀺 𑀤𑀼 𑀯𑀺 𑀅𑀥𑀺 𑀅𑀧𑀺 𑀅𑀢𑀺 𑀲𑀼 𑀉 𑀅𑀪𑀺 𑀧𑀢𑀺 𑀧𑀭𑀺 𑀉𑀧 𑀆 𑀇𑀫𑁂 𑀯𑀻𑀲𑀢𑀺 𑀧𑀸𑀤𑀬𑁄. 𑀧𑀸𑀤𑀬𑁄 𑀳𑀺 𑀚𑁄𑀢𑀓𑀸, 𑀦 𑀯𑀸𑀘𑀓𑀸.

𑀢𑀢𑁆𑀣 𑀧-𑀲𑀤𑁆𑀤𑁄 𑀧𑀓𑀸𑀭𑀸+𑀤𑀺𑀓𑀫𑁆𑀫, 𑀧𑀥𑀸𑀦+𑀦𑁆𑀢𑁄𑀪𑀸𑀯, 𑀯𑀺𑀬𑁄𑀕, 𑀢𑀧𑁆𑀧𑀭, 𑀪𑀼𑀲𑀢𑁆𑀣, 𑀲𑀫𑁆𑀪𑀯, 𑀢𑀺𑀢𑁆𑀢𑀺, 𑀅𑀦𑀸𑀯𑀺𑀮, 𑀧𑀢𑁆𑀣𑀦𑀸𑀤𑀻𑀲𑀼. 𑀬𑀣𑀸 𑀧𑀓𑀸𑀭𑁂-𑀧𑀜𑁆𑀜𑀸. 𑀆𑀤𑀺𑀓𑀫𑁆𑀫𑁂-𑀯𑀺𑀧𑁆𑀧𑀓𑀢𑀁, 𑀧𑀥𑀸𑀦𑁂-𑀧𑀡𑀻𑀢𑀁, 𑀅𑀦𑁆𑀢𑁄𑀪𑀸𑀯𑁂-𑀧𑀓𑁆𑀔𑀺𑀢𑁆𑀢𑀁, 𑀔𑀺𑀢𑁆𑀢𑀦𑁆𑀢𑀺 𑀧𑁂𑀭𑀡𑀁, 𑀧𑀓𑁆𑀔𑀺𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀓𑀭𑀡𑀁, 𑀥𑀸𑀢𑁆𑀯𑀢𑁆𑀣𑀲𑁆𑀲 𑀩𑀸𑀥𑀺𑀢𑀢𑁆𑀢𑀸. 𑀯𑀼𑀢𑁆𑀣𑀜𑁆𑀳𑀺 𑁋

𑀥𑀸𑀢𑁆𑀯𑀢𑁆𑀣𑀁 𑀩𑀸𑀥𑀢𑁂 𑀓𑁄𑀘𑀺, 𑀓𑁄𑀘𑀺 𑀢𑀁 𑀅𑀦𑀼𑀯𑀢𑁆𑀢𑀢𑁂;

𑀢𑀫𑁂𑀯+𑀜𑁆𑀜𑁄 𑀯𑀺𑀲𑁂𑀲𑁂𑀢𑀺, 𑀉𑀧𑀲𑀕𑁆𑀕𑀕𑀢𑀻 𑀢𑀺𑀥𑀸𑀢𑀺.

𑀏𑀢𑁆𑀣 𑀘 ‘‘𑀅𑀦𑀼𑀭𑀼𑀤𑁆𑀥𑀓𑀸 𑀫𑁂 𑀲𑀗𑁆𑀕𑀸𑀫𑀬𑀼𑀤𑁆𑀥𑁂’’𑀢𑀺 𑀘 𑀇𑀫𑁂 𑀉𑀧𑀲𑀕𑁆𑀕𑀸 𑀥𑀸𑀢𑁆𑀯𑀢𑁆𑀣𑀁 𑀯𑀺𑀲𑁂𑀲𑁂𑀦𑁆𑀢𑀺 𑀦𑀸𑀫. 𑀯𑀺𑀬𑁄𑀕𑁂-𑀧𑀯𑀸𑀲𑀻, 𑀢𑀧𑁆𑀧𑀭𑁂-𑀧𑀸𑀘𑀭𑀺𑀬𑁄, 𑀪𑀼𑀲𑀢𑁆𑀣𑁂-𑀧𑀯𑀼𑀤𑁆𑀥𑀓𑀸𑀬𑁄, 𑀲𑀫𑁆𑀪𑀯𑁂-𑀳𑀺𑀫𑀯𑀦𑁆𑀢𑀸 𑀕𑀗𑁆𑀕𑀸 𑀧𑀪𑀯𑀢𑀺, 𑀢𑀺𑀢𑁆𑀢𑀺𑀬𑀁-𑀧𑀳𑀽𑀢+𑀫𑀦𑁆𑀦𑀁, 𑀅𑀦𑀸𑀯𑀺𑀮𑁂-𑀧𑀲𑀦𑁆𑀦+𑀫𑀼𑀤𑀓𑀁, 𑀧𑀢𑁆𑀣𑀦𑁂-𑀧𑀡𑀺𑀳𑀺𑀢𑀁.

𑀧𑀭𑀸𑀇𑀢𑀺 𑀧𑀭𑀺𑀳𑀸𑀦𑀺, 𑀧𑀭𑀸𑀚𑀬, 𑀕𑀢𑀺, 𑀯𑀺𑀓𑁆𑀓𑀫𑀸+𑀫𑀲𑀦𑀸𑀤𑀻𑀲𑀼. 𑀬𑀣𑀸 𑀧𑀭𑀺𑀳𑀸𑀦𑀺𑀬𑀁-𑀧𑀭𑀸𑀪𑀯𑁄. 𑀧𑀭𑀸𑀚𑀬𑁂-𑀧𑀭𑀸𑀚𑀺𑀢𑁄, 𑀕𑀢𑀺𑀬𑀁-𑀧𑀭𑀸𑀬𑀦𑀁, 𑀯𑀺𑀓𑁆𑀓𑀫𑁂-𑀧𑀭𑀓𑁆𑀓𑀫𑀢𑀺, 𑀆𑀫𑀲𑀦𑁂-𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁.

𑀅𑀧𑀇𑀢𑀺 𑀅𑀧𑀕𑀢, 𑀕𑀭𑀳, 𑀯𑀚𑁆𑀚𑀦, 𑀧𑀽𑀚𑀸, 𑀧𑀤𑀼𑀲𑁆𑀲𑀦𑀸𑀤𑀻𑀲𑀼. 𑀬𑀣𑀸 𑀅𑀧𑀕𑀢𑁂-𑀅𑀧𑀫𑀸𑀦𑁄 𑀅𑀧𑁂𑀢𑁄, 𑀕𑀭𑀳𑁂-𑀅𑀧𑀕𑀩𑁆𑀪𑁄, 𑀯𑀚𑁆𑀚𑀦𑁂-𑀅𑀧𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀧𑀽𑀚𑀸𑀬𑀁-𑀯𑀼𑀤𑁆𑀥𑀸𑀧𑀘𑀸𑀬𑀻, 𑀧𑀤𑀼𑀲𑁆𑀲𑀦𑁂-𑀅𑀧𑀭𑀚𑁆𑀛𑀦𑁆𑀢𑀺.

𑀲𑀁𑀇𑀢𑀺 𑀲𑀫𑁄𑀥𑀸𑀦, 𑀲𑀫𑁆𑀫𑀸𑀲𑀫, 𑀲𑀫𑀦𑁆𑀢𑀪𑀸𑀯, 𑀲𑀁𑀕𑀢, 𑀲𑀁𑀔𑁂𑀧, 𑀪𑀼𑀲𑀢𑁆𑀣, 𑀲𑀳+𑀧𑁆𑀧𑀢𑁆𑀣, 𑀧𑀪𑀯𑀸+𑀪𑀺𑀫𑀼𑀔𑀪𑀸𑀯, 𑀯𑀺𑀥𑀸𑀦, 𑀧𑀼𑀦𑀧𑁆𑀧𑀼𑀦, 𑀓𑀭𑀡, 𑀲𑀫𑀺𑀤𑁆𑀥𑀸𑀤𑀻𑀲𑀼. 𑀬𑀣𑀸 𑀲𑀫𑁄𑀥𑀸𑀦𑁂-𑀲𑀦𑁆𑀥𑀺, 𑀲𑀫𑁆𑀫𑀸𑀲𑀫𑁂-𑀲𑀫𑀸𑀥𑀺, 𑀲𑀫𑁆𑀧𑀬𑀼𑀢𑁆𑀢𑁄, 𑀲𑀫𑀦𑁆𑀢𑀪𑀸𑀯𑁂-𑀲𑀁𑀓𑀺𑀡𑁆𑀡𑀁, 𑀲𑀫𑀼𑀮𑁆𑀮𑀧𑀦𑀸, 𑀲𑀁𑀕𑀢𑁂-𑀲𑀗𑁆𑀕𑀫𑁄, 𑀲𑀁𑀔𑁂𑀧𑁂-𑀲𑀫𑀸𑀲𑁄, 𑀪𑀼𑀲𑀢𑁆𑀣𑁂-𑀲𑀸𑀭𑀢𑁆𑀣𑁄, 𑀲𑀳𑀢𑁆𑀣𑁂-𑀲𑀁𑀯𑀸𑀲𑁄, 𑀅𑀧𑁆𑀧𑀢𑁆𑀣𑁂-𑀲𑀫𑀕𑁆𑀖𑁄, 𑀧𑀪𑀯𑁂-𑀲𑀫𑁆𑀪𑀯𑁄, 𑀅𑀪𑀺𑀫𑀼𑀔𑀪𑀸𑀯𑁂-𑀲𑀫𑁆𑀫𑀼𑀔𑀁. 𑀲𑀁𑀕𑀢𑁂-𑀲𑀁𑀕𑀡𑁆𑀳𑀸𑀢𑀺, 𑀯𑀺𑀥𑀸𑀦𑁂-𑀲𑀁𑀯𑀼𑀢𑀁, 𑀧𑀼𑀦𑀧𑁆𑀧𑀼𑀦𑀓𑀭𑀡𑁂-𑀲𑀦𑁆𑀥𑀸𑀯𑀢𑀺, 𑀲𑀫𑀺𑀤𑁆𑀥𑀺𑀬𑀁-𑀲𑀫𑁆𑀧𑀦𑁆𑀦𑁄.

𑀅𑀦𑀼𑀇𑀢𑀺 𑀅𑀦𑀼𑀕𑀢𑀸+𑀦𑀼𑀧𑀘𑁆𑀙𑀺𑀦𑁆𑀦, 𑀧𑀘𑁆𑀙𑀸𑀢𑁆𑀣, 𑀪𑀼𑀲𑀢𑁆𑀣, 𑀲𑀸𑀤𑀺𑀲𑁆𑀲, 𑀳𑀻𑀦, 𑀢𑀢𑀺𑀬𑀢𑁆𑀣, 𑀮𑀓𑁆𑀔𑀡𑀺+𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦, 𑀪𑀸𑀕, 𑀯𑀺𑀘𑁆𑀙𑀸𑀤𑀻𑀲𑀼. 𑀅𑀦𑀼𑀕𑀢𑁂-𑀅𑀦𑁆𑀯𑁂𑀢𑀺, 𑀅𑀦𑀼𑀧𑀘𑁆𑀙𑀺𑀦𑁆𑀦𑁂-𑀅𑀦𑀼𑀲𑀬𑁄, 𑀧𑀘𑁆𑀙𑀸𑀢𑁆𑀣𑁂-𑀅𑀦𑀼𑀭𑀣𑀁, 𑀪𑀼𑀲𑀢𑁆𑀣𑁂-𑀅𑀦𑀼𑀭𑀢𑁆𑀢𑁄, 𑀲𑀸𑀤𑀺𑀲𑁆𑀲𑁂-𑀅𑀦𑀼𑀭𑀽𑀧𑀁, 𑀳𑀻𑀦𑁂-𑀅𑀦𑀼𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄, 𑀢𑀢𑀺𑀬𑀢𑁆𑀣𑁂-𑀦𑀤𑀺+𑀫𑀦𑁆𑀯𑀯𑀲𑀺𑀢𑀸 𑀲𑁂𑀦𑀸, 𑀮𑀓𑁆𑀔𑀡𑁂𑀭𑀼𑀓𑁆𑀔+𑀫𑀦𑀼𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀇𑀢𑁆𑀣𑀫𑁆𑀪𑀽𑀢𑀔𑁆𑀬𑀸𑀦𑁂-𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭+𑀫𑀦𑀼, 𑀪𑀸𑀕𑁂-𑀬+𑀤𑁂𑀢𑁆𑀣 𑀫𑀁 𑀅𑀦𑀼 𑀲𑀺𑀬𑀸, 𑀢𑀁 𑀤𑀻𑀬𑀢𑀼, 𑀯𑀺𑀘𑁆𑀙𑀸𑀬𑀁-𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀅𑀦𑀼 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄.

𑀅𑀯𑀇𑀢𑀺 𑀅𑀥𑁄𑀪𑀸𑀕, 𑀯𑀺𑀬𑁄𑀕, 𑀧𑀭𑀺𑀪𑀯, 𑀚𑀸𑀦𑀦, [𑀲𑀼𑀤𑁆𑀥𑀺] 𑀦𑀺𑀘𑁆𑀙𑀬, 𑀤𑁂𑀲, 𑀣𑁂𑀬𑁆𑀬𑀸𑀤𑀻𑀲𑀼. 𑀅𑀥𑁄𑀪𑀸𑀕𑁂-𑀅𑀯𑀓𑁆𑀔𑀺𑀢𑁆𑀢𑀘𑀓𑁆𑀔𑀼, 𑀯𑀺𑀬𑁄𑀕𑁂-𑀅𑀯𑀓𑁄𑀓𑀺𑀮𑀁 𑀯𑀦𑀁, 𑀧𑀭𑀺𑀪𑀯𑁂-𑀅𑀯𑀚𑀸𑀦𑀦𑀁, 𑀅𑀯𑀫𑀜𑁆𑀜𑀢𑀺, 𑀚𑀸𑀦𑀦𑁂-𑀅𑀯𑀕𑀘𑁆𑀙𑀢𑀺. [𑀲𑀼𑀤𑁆𑀥𑀺𑀬𑀁𑁋𑀯𑁄𑀤𑀸𑀦𑀁 (𑀭𑀽𑀧𑀲𑀺𑀤𑁆𑀥𑀺)], 𑀦𑀺𑀘𑁆𑀙𑀬𑁂-𑀅𑀯𑀥𑀸𑀭𑀡𑀁, 𑀤𑁂𑀲𑁂-𑀅𑀯𑀓𑀸𑀲𑁄, 𑀣𑁂𑀬𑁆𑀬𑁂-𑀅𑀯𑀳𑀸𑀭𑁄.

𑀑𑀇𑀢𑀺 𑀑𑀭𑁄𑀳𑀭𑀡, 𑀦𑀻𑀳𑀭𑀡, 𑀲𑀼𑀤𑁆𑀥𑀺𑀆𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀑𑀭𑁄𑀳𑀡𑁂-𑀧𑀸𑀲𑀸𑀤𑀸 𑀑𑀭𑁄𑀳𑀢𑀺, 𑀦𑀻𑀳𑀭𑀡𑁂-𑀑𑀫𑀼𑀓𑁆𑀓𑀼𑀧𑀸𑀳𑀦𑁄, 𑀲𑀼𑀤𑁆𑀥𑀺𑀬𑀁-𑀑𑀤𑀸𑀢𑀁.

𑀦𑀺𑀇𑀢𑀺, 𑀦𑀺𑀲𑁆𑀲𑁂𑀲, 𑀦𑀺𑀕𑁆𑀕𑀢, 𑀦𑀻𑀳𑀭𑀡,+𑀦𑁆𑀢𑁄𑀧𑀯𑁂𑀲𑀦𑀸+𑀪𑀸𑀯, 𑀦𑀺𑀲𑁂𑀥𑀦, 𑀦𑀺𑀓𑁆𑀔𑀦𑁆𑀢, 𑀧𑀸𑀢𑀼𑀪𑀸𑀯𑀸+𑀯𑀥𑀸𑀭𑀡, 𑀯𑀺𑀪𑀚𑀦, 𑀉𑀧𑀫𑀼+𑀧𑀥𑀸𑀭𑀡𑀸+𑀯𑀲𑀸𑀦, 𑀙𑁂𑀓, 𑀦𑀻𑀳𑀭𑀡𑀸+𑀯𑀭𑀡𑀸𑀤𑀻𑀲𑀼. 𑀦𑀺𑀲𑁆𑀲𑁂𑀲𑁂-𑀦𑀺𑀭𑀼𑀢𑁆𑀢𑀺, 𑀦𑀺𑀕𑁆𑀕𑀢𑁂-𑀦𑀺𑀓𑁆𑀓𑀺𑀮𑁂𑀲𑁄, 𑀦𑀺𑀬𑁆𑀬𑀸𑀢𑀺, 𑀦𑀻𑀳𑀭𑀡𑁂-𑀦𑀺𑀤𑁆𑀥𑀸𑀭𑀡𑀁, 𑀅𑀦𑁆𑀢𑁄𑀧𑀯𑁂𑀲𑀦𑁂-𑀦𑀺𑀔𑀸𑀢𑁄, 𑀅𑀪𑀸𑀯𑁂-𑀦𑀺𑀫𑁆𑀫𑀓𑁆𑀔𑀺𑀓𑀁, 𑀦𑀺𑀲𑁂𑀥𑁂-𑀦𑀺𑀯𑀸𑀭𑁂𑀢𑀺, 𑀦𑀺𑀓𑁆𑀔𑀦𑁆𑀢𑁂-𑀦𑀺𑀩𑁆𑀩𑀸𑀦𑀁, 𑀧𑀸𑀢𑀼𑀪𑀸𑀯𑁂-𑀦𑀺𑀫𑁆𑀫𑀺𑀢𑀁, 𑀅𑀯𑀥𑀸𑀭𑀡𑁂-𑀦𑀺𑀘𑁆𑀙𑀬𑁄, 𑀯𑀺𑀪𑀚𑀦𑁂-𑀦𑀺𑀤𑁆𑀤𑁂𑀲𑁄. 𑀉𑀧𑀫𑀸𑀬𑀁-𑀦𑀺𑀤𑀲𑁆𑀲𑀦𑀁, 𑀉𑀧𑀥𑀸𑀭𑀡𑁂-𑀦𑀺𑀲𑀸𑀫𑀦𑀁, 𑀅𑀯𑀲𑀸𑀦𑁂-𑀦𑀺𑀝𑁆𑀞𑀺𑀢𑀁, 𑀙𑁂𑀓𑁂-𑀦𑀺𑀧𑀼𑀡𑁄, 𑀦𑀻𑀳𑀭𑀡𑁂-𑀦𑀻𑀳𑀭𑀢𑀺, 𑀇𑀲𑁆𑀲 𑀤𑀻𑀖𑁄. 𑀆𑀯𑀭𑀡𑁂-𑀦𑀻𑀯𑀭𑀡𑀁.

𑀤𑀼𑀇𑀢𑀺 𑀅𑀲𑁄𑀪𑀡𑀸+𑀪𑀸𑀯, 𑀓𑀼𑀘𑁆𑀙𑀺𑀢𑀸+𑀲𑀫𑀺𑀤𑁆𑀥𑀺, 𑀓𑀺𑀘𑁆𑀙, 𑀯𑀺𑀭𑀽𑀧𑀢𑀸𑀤𑀻𑀲𑀼. 𑀅𑀲𑁄𑀪𑀡𑁂-𑀤𑀼𑀕𑁆𑀕𑀦𑁆𑀥𑁄, 𑀅𑀪𑀸𑀯𑁂-𑀤𑀼𑀩𑁆𑀪𑀺𑀓𑁆𑀔𑀁, 𑀓𑀼𑀘𑁆𑀙𑀺𑀢𑁂 𑁋 𑀤𑀼𑀓𑁆𑀓𑀝𑀁. 𑀅𑀲𑀫𑀺𑀤𑁆𑀥𑀺𑀬𑀁-𑀤𑀼𑀲𑁆𑀲𑀲𑁆𑀲𑀁, 𑀓𑀺𑀘𑁆𑀙𑁂-𑀤𑀼𑀓𑁆𑀓𑀭𑀁, 𑀯𑀺𑀭𑀽𑀧𑀢𑀸𑀬𑀁-𑀤𑀼𑀩𑁆𑀩𑀡𑁆𑀡𑁄 𑀤𑀼𑀫𑁆𑀫𑀼𑀔𑁄.

𑀯𑀺𑀇𑀢𑀺 𑀯𑀺𑀲𑁂𑀲, 𑀯𑀺𑀯𑀺𑀥, 𑀯𑀺𑀭𑀼𑀤𑁆𑀥, 𑀯𑀺𑀕𑀢, 𑀯𑀺𑀬𑁄𑀕, 𑀯𑀺𑀭𑀽𑀧𑀢𑀸𑀤𑀻𑀲𑀼. 𑀯𑀺𑀲𑁂𑀲𑁂-𑀯𑀺𑀫𑀼𑀢𑁆𑀢𑀺, 𑀯𑀺𑀲𑀺𑀝𑁆𑀞𑁄, 𑀯𑀺𑀯𑀺𑀥𑁂-𑀯𑀺𑀫𑀢𑀺, 𑀯𑀺𑀭𑀼𑀤𑁆𑀥𑁂-𑀯𑀺𑀯𑀸𑀤𑁄, 𑀯𑀺𑀕𑀢𑁂-𑀯𑀺𑀫𑀮𑀁, 𑀯𑀺𑀬𑁄𑀕𑁂-𑀯𑀺𑀧𑁆𑀧𑀬𑀼𑀢𑁆𑀢𑁄, 𑀯𑀺𑀭𑀽𑀧𑀢𑀸𑀬𑀁-𑀯𑀺𑀭𑀽𑀧𑁄.

𑀅𑀥𑀺𑀇𑀢𑀺 𑀅𑀥𑀺𑀓𑀺+𑀲𑁆𑀲𑀭𑀽+𑀧𑀭𑀺𑀪𑀸𑀯𑀸+𑀥𑀺𑀪𑀯𑀦+𑀚𑁆𑀛𑀸𑀬𑀸+𑀥𑀺𑀝𑁆𑀞𑀸𑀦, 𑀦𑀺𑀘𑁆𑀙𑀬, 𑀧𑀸𑀧𑀼𑀡𑀦𑀸𑀤𑀻𑀲𑀼. 𑀅𑀥𑀺𑀓𑁂-𑀅𑀥𑀺𑀲𑀻𑀮𑀁, 𑀇𑀲𑁆𑀲𑀭𑁂-𑀅𑀥𑀺𑀧𑀢𑀺, 𑀅𑀥𑀺 𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸, 𑀉𑀧𑀭𑀺𑀪𑀸𑀯𑁂-𑀅𑀥𑀺𑀭𑁄𑀳𑀢𑀺, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀅𑀥𑀺𑀪𑀯𑀦𑁂-𑀅𑀥𑀺𑀪𑀯𑀢𑀺, 𑀅𑀚𑁆𑀛𑀸𑀬𑀦𑁂-𑀩𑁆𑀬𑀸𑀓𑀭𑀡+𑀫𑀥𑀻𑀢𑁂, 𑀅𑀥𑀺𑀝𑁆𑀞𑀸𑀦𑁂-𑀪𑀽𑀫𑀺𑀓𑀫𑁆𑀧𑀸𑀤𑀺𑀁 𑀅𑀥𑀺𑀝𑁆𑀞𑀸𑀢𑀺, 𑀦𑀺𑀘𑁆𑀙𑀬𑁂-𑀅𑀥𑀺𑀫𑁄𑀓𑁆𑀔𑁄, 𑀧𑀸𑀧𑀼𑀡𑀦𑁂-𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺.

𑀅𑀧𑀺𑀇𑀢𑀺 𑀲𑀫𑁆𑀪𑀸𑀯𑀦𑀸+𑀧𑁂𑀓𑁆𑀔𑀸, 𑀲𑀫𑀼𑀘𑁆𑀘𑀬, 𑀕𑀭𑀳, 𑀧𑀜𑁆𑀳𑀸𑀤𑀻𑀲𑀼. 𑀲𑀫𑁆𑀪𑀸𑀯𑀦𑀸𑀬𑀁-𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀫𑁂𑀭𑀼𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀅𑀧𑁂𑀓𑁆𑀔𑀸𑀬𑀁-𑀅𑀬𑀫𑁆𑀧𑀺 𑀥𑀫𑁆𑀫𑁄 𑀅𑀦𑀺𑀬𑀢𑁄, 𑀲𑀫𑀼𑀘𑁆𑀘𑀬𑁂-𑀇𑀢𑀺𑀧𑀺 𑀅𑀭𑀳𑀁, 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬, 𑀕𑀭𑀳𑁂-𑀅𑀧𑀺 𑀅𑀫𑁆𑀳𑀸𑀓𑀁 𑀧𑀡𑁆𑀟𑀺𑀢𑀓, 𑀧𑀜𑁆𑀳𑁂-𑀅𑀧𑀺 𑀪𑀦𑁆𑀢𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀣.

𑀅𑀢𑀺𑀇𑀢𑀺 𑀅𑀢𑀺𑀓𑁆𑀓𑀫𑀦𑀸+𑀢𑀺𑀓𑁆𑀓𑀦𑁆𑀢𑀸+𑀢𑀺𑀲𑀬, 𑀪𑀼𑀲𑀢𑁆𑀣𑀸𑀤𑀻𑀲𑀼. 𑀅𑀢𑀺𑀓𑁆𑀓𑀫𑁂-𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀅𑀢𑀻𑀢𑁄, 𑀅𑀢𑀺𑀓𑁆𑀓𑀦𑁆𑀢𑁂-𑀅𑀘𑁆𑀘𑀦𑁆𑀢𑀁, 𑀅𑀢𑀺𑀲𑀬𑁂-𑀅𑀢𑀺𑀓𑀼𑀲𑀮𑁄, 𑀪𑀼𑀲𑀢𑁆𑀣𑁂-𑀅𑀢𑀺𑀓𑁄𑀥𑁄, 𑀅𑀢𑀺𑀯𑀼𑀤𑁆𑀥𑀺.

𑀲𑀼𑀇𑀢𑀺 𑀲𑁄𑀪𑀡, 𑀲𑀼𑀝𑁆𑀞𑀼, 𑀲𑀫𑁆𑀫𑀸, 𑀲𑀫𑀺𑀤𑁆𑀥𑀺, 𑀲𑀼𑀔𑀢𑁆𑀣𑀸𑀤𑀻𑀲𑀼. 𑀲𑁄𑀪𑀡𑁂-𑀲𑀼𑀕𑀦𑁆𑀥𑁄, 𑀲𑀼𑀝𑁆𑀞𑀼+𑀲𑀫𑁆𑀫𑀸𑀤𑀢𑁆𑀣𑁂𑀲𑀼-𑀲𑀼𑀝𑁆𑀞𑀼 𑀕𑀢𑁄 𑀲𑀼𑀕𑀢𑁄, 𑀲𑀫𑁆𑀫𑀸 𑀕𑀢𑁄𑀢𑀺𑀧𑀺 𑀲𑀼𑀕𑀢𑁄, 𑀲𑀫𑀺𑀤𑁆𑀥𑀺𑀬𑀁-𑀲𑀼𑀪𑀺𑀓𑁆𑀔𑀁, 𑀲𑀼𑀔𑀢𑁆𑀣𑁂-𑀲𑀼𑀓𑀭𑁄.

𑀉𑀇𑀢𑀺 𑀉𑀕𑁆𑀕𑀢𑀼+𑀤𑁆𑀥𑀓𑀫𑁆𑀫, 𑀧𑀥𑀸𑀦, 𑀯𑀺𑀬𑁄𑀕, 𑀲𑀫𑁆𑀪𑀯, 𑀅𑀢𑁆𑀢𑀮𑀸𑀪, 𑀲𑀢𑁆𑀢𑀺, 𑀲𑀭𑀽𑀧𑀓𑀣𑀦𑀸𑀤𑀻𑀲𑀼. 𑀉𑀕𑁆𑀕𑀢𑁂-𑀉𑀕𑁆𑀕𑀘𑁆𑀙𑀢𑀺, 𑀉𑀤𑁆𑀥𑀓𑀫𑁆𑀫𑁂-𑀆𑀲𑀦𑀸 𑀉𑀝𑁆𑀞𑀺𑀢𑁄, 𑀉𑀓𑁆𑀔𑁂𑀧𑁄, 𑀧𑀥𑀸𑀦𑁂-𑀉𑀢𑁆𑀢𑀫𑁄, 𑀮𑁄𑀓𑀼𑀢𑁆𑀢𑀭𑁄, 𑀯𑀺𑀬𑁄𑀕𑁂-𑀉𑀩𑁆𑀪𑀸𑀲𑀺𑀢𑁄, 𑀲𑀫𑁆𑀪𑀯𑁂-𑀉𑀩𑁆𑀪𑀼𑀢𑁄, 𑀅𑀢𑁆𑀢𑀮𑀸𑀪𑁂-𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀲𑀢𑁆𑀢𑀺𑀬𑀁-𑀉𑀲𑁆𑀲𑀳𑀢𑀺 𑀕𑀦𑁆𑀢𑀼𑀁, 𑀲𑀭𑀽𑀧𑀓𑀣𑀦𑁂-𑀉𑀤𑁆𑀤𑀺𑀲𑀢𑀺 𑀲𑀼𑀢𑁆𑀢𑀁.

𑀅𑀪𑀺𑀇𑀢𑀺 𑀅𑀪𑀺𑀫𑀼𑀔𑀪𑀸𑀯, 𑀯𑀺𑀲𑀺𑀝𑁆𑀞𑀸+𑀥𑀺𑀓𑀼+𑀤𑁆𑀥𑀓𑀫𑁆𑀫, 𑀓𑀼𑀮, 𑀲𑀸𑀭𑀼𑀧𑁆𑀧, 𑀯𑀦𑁆𑀤𑀦, 𑀮𑀓𑁆𑀔𑀡𑀺+𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦, 𑀯𑀺𑀘𑁆𑀙𑀸𑀤𑀻𑀲𑀼. 𑀅𑀪𑀺𑀫𑀼𑀔𑀪𑀸𑀯𑁂-𑀅𑀪𑀺𑀫𑀼𑀔𑁄, 𑀅𑀪𑀺𑀓𑁆𑀓𑀫𑀢𑀺, 𑀯𑀺𑀲𑀺𑀝𑁆𑀞𑁂-𑀅𑀪𑀺𑀥𑀫𑁆𑀫𑁄, 𑀅𑀥𑀺𑀓𑁂-𑀅𑀪𑀺𑀯𑀲𑀢𑀺, 𑀉𑀤𑁆𑀥𑀓𑀫𑁆𑀫𑁂-𑀅𑀪𑀺𑀭𑀼𑀳𑀢𑀺. 𑀓𑀼𑀮𑁂-𑀅𑀪𑀺𑀚𑀸𑀢𑁄, 𑀲𑀸𑀭𑀼𑀧𑁆𑀧𑁂-𑀅𑀪𑀺𑀭𑀽𑀧𑁄, 𑀯𑀦𑁆𑀤𑀦𑁂-𑀅𑀪𑀺𑀯𑀸𑀤𑁂𑀢𑀺, 𑀮𑀓𑁆𑀔𑀡𑀸𑀤𑀻𑀲𑀼 𑀧𑀼𑀭𑀺𑀫𑀲𑀫𑀁.

𑀧𑀢𑀺𑀇𑀢𑀺 𑀧𑀝𑀺𑀕𑀢, 𑀧𑀝𑀺𑀮𑁄𑀫, 𑀧𑀝𑀺𑀦𑀺𑀥𑀺, 𑀧𑀝𑀺𑀤𑀸𑀦, 𑀦𑀺𑀲𑁂𑀥, 𑀦𑀺𑀯𑀢𑁆𑀢𑀦, 𑀲𑀸𑀤𑀺𑀲𑁆𑀲, 𑀧𑀝𑀺𑀓𑀭𑀡𑀸+𑀤𑀸𑀦, 𑀧𑀝𑀺𑀩𑁄𑀥, 𑀧𑀝𑀺𑀘𑁆𑀘, 𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦, 𑀪𑀸𑀕, 𑀯𑀺𑀘𑁆𑀙𑀸𑀤𑀻𑀲𑀼. 𑀧𑀝𑀺𑀕𑀢𑁂-𑀧𑀘𑁆𑀘𑀓𑁆𑀔𑀁, 𑀧𑀝𑀺𑀮𑁄𑀫𑁂-𑀧𑀝𑀺𑀲𑁄𑀢𑀁, 𑀧𑀝𑀺𑀦𑀺𑀥𑀺𑀫𑁆𑀳𑀺-𑀆𑀘𑀭𑀺𑀬𑀢𑁄 𑀧𑀢𑀺 𑀲𑀺𑀲𑁆𑀲𑁄, 𑀧𑀝𑀺𑀤𑀸𑀦𑁂-𑀢𑁂𑀮𑀢𑁆𑀣𑀺𑀓𑀲𑁆𑀲 𑀖𑀢𑀁 𑀧𑀝𑀺𑀤𑀤𑀸𑀢𑀺, 𑀦𑀺𑀲𑁂𑀥𑁂-𑀧𑀝𑀺𑀲𑁂𑀥𑁂𑀢𑀺, 𑀦𑀺𑀯𑀢𑁆𑀢𑀦𑁂-𑀧𑀝𑀺𑀓𑁆𑀓𑀫𑀢𑀺, 𑀲𑀸𑀤𑀺𑀲𑁆𑀲𑁂-𑀧𑀝𑀺𑀭𑀽𑀧𑀓𑀁, 𑀧𑀝𑀺𑀓𑀭𑀡𑁂-𑀧𑀝𑀺𑀓𑀸𑀭𑁄, 𑀆𑀤𑀸𑀦𑁂-𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀧𑀝𑀺𑀩𑁄𑀥𑁂-𑀧𑀝𑀺𑀯𑁂𑀥𑁄, 𑀧𑀝𑀺𑀘𑁆𑀘𑁂-𑀧𑀘𑁆𑀘𑀬𑁄, 𑀮𑀓𑁆𑀔𑀡𑀸𑀤𑀻𑀲𑀼 𑀧𑀼𑀭𑀺𑀫𑀲𑀫𑀁.

𑀧𑀭𑀺𑀇𑀢𑀺 𑀲𑀫𑀦𑁆𑀢𑀢𑁄𑀪𑀸𑀯, 𑀧𑀭𑀺𑀘𑁆𑀙𑁂𑀤, 𑀯𑀚𑁆𑀚𑀦𑀸+𑀮𑀺𑀗𑁆𑀕𑀦, 𑀦𑀺𑀯𑀲𑀦, 𑀧𑀽𑀚𑀸, 𑀪𑁄𑀚𑀦𑀸+𑀯𑀚𑀸𑀦𑀦, 𑀤𑁄𑀲𑀓𑁆𑀔𑀸𑀦, 𑀮𑀓𑁆𑀔𑀡𑀸𑀤𑀻𑀲𑀼. 𑀲𑀫𑀦𑁆𑀣- 𑀢𑁄𑀪𑀸𑀯𑁂-𑀧𑀭𑀺𑀯𑀼𑀢𑁄, 𑀧𑀭𑀺𑀘𑁆𑀙𑁂𑀤𑁂-𑀧𑀭𑀺𑀜𑁆𑀜𑁂𑀬𑁆𑀬𑀁, 𑀯𑀚𑁆𑀚𑀦𑁂-𑀧𑀭𑀺𑀳𑀭𑀢𑀺, 𑀆𑀮𑀺𑀗𑁆𑀕𑀦𑁂-𑀧𑀭𑀺𑀲𑁆𑀲𑀚𑀢𑀺, 𑀦𑀺𑀯𑀲𑀦𑁂-𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑁂𑀲𑁆𑀲𑀢𑀺, 𑀧𑀽𑀚𑀸𑀬𑀁-𑀧𑀭𑀺𑀘𑀭𑀺𑀬𑀸, 𑀪𑁄𑀚𑀦𑁂-𑀪𑀺𑀓𑁆𑀔𑀼𑀁 𑀧𑀭𑀺𑀯𑀺𑀲𑀢𑀺, 𑀅𑀯𑀚𑀸𑀦𑀦𑁂-𑀧𑀭𑀺𑀪𑀯𑀢𑀺. 𑀤𑁄𑀲𑀓𑁆𑀔𑀸𑀦𑁂-𑀧𑀭𑀺𑀪𑀸𑀲𑀢𑀺, 𑀮𑀓𑁆𑀔𑀡𑀸𑀤𑀻𑀲𑀼-𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼 𑀇𑀘𑁆𑀘𑀸𑀤𑀺.

𑀉𑀧𑀇𑀢𑀺 𑀉𑀧𑀕𑀫𑀦, 𑀲𑀫𑀻𑀧𑀽+𑀧𑀧𑀢𑁆𑀢𑀺, 𑀲𑀸𑀤𑀺𑀲𑁆𑀲𑀸+𑀥𑀺𑀓𑀼+𑀧𑀭𑀺𑀪𑀸𑀯𑀸+𑀦𑀲𑀦, 𑀤𑁄𑀲𑀓𑁆𑀔𑀸𑀦, 𑀲𑀜𑁆𑀜𑀸, 𑀧𑀼𑀩𑁆𑀩𑀓𑀫𑁆𑀫, 𑀧𑀽𑀚𑀸, 𑀕𑀬𑁆𑀳𑀸𑀓𑀸𑀭, 𑀪𑀼𑀲𑀢𑁆𑀣𑀸𑀤𑀻𑀲𑀼. 𑀉𑀧𑀕𑀫𑀦𑁂-𑀦𑀺𑀲𑀺𑀦𑁆𑀦𑀁 𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬, 𑀲𑀫𑀻𑀧𑁂-𑀉𑀧𑀦𑀕𑀭𑀁, 𑀉𑀧𑀧𑀢𑁆𑀢𑀺𑀬𑀁-𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺, 𑀅𑀣 𑀯𑀸 𑀉𑀧𑀧𑀢𑁆𑀢𑀺=𑀬𑀼𑀢𑁆𑀢𑀺, 𑀬𑀣𑀸 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀲𑀸𑀤𑀺𑀲𑁆𑀲𑁂-𑀉𑀧𑀫𑀸𑀦𑀁, 𑀉𑀧𑀫𑀸, 𑀅𑀥𑀺𑀓𑁂-𑀉𑀧𑀔𑀸𑀭𑀺𑀬𑀁 𑀤𑁄𑀡𑁄, 𑀉𑀧𑀭𑀺𑀪𑀸𑀯𑁂-𑀉𑀧𑀲𑀫𑁆𑀧𑀦𑁆𑀦𑁄, 𑀅𑀦𑀲𑀦𑁂-𑀉𑀧𑀯𑀸𑀲𑁄, 𑀤𑁄𑀲𑀓𑁆𑀔𑀸𑀦𑁂-𑀧𑀭𑀁 𑀉𑀧𑀯𑀤𑀢𑀺, 𑀲𑀜𑁆𑀜𑀸𑀬𑀁-𑀉𑀧𑀥𑀸, 𑀉𑀧𑀲𑀕𑁆𑀕𑁄, 𑀧𑀼𑀩𑁆𑀩𑀓𑀫𑁆𑀫𑁂-𑀉𑀧𑀓𑁆𑀓𑀫𑁄, 𑀉𑀧𑀓𑀸𑀭𑁄, 𑀧𑀽𑀚𑀸𑀬𑀁-𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄, 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀕𑀬𑁆𑀳𑀸𑀓𑀸𑀭𑁂-𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀪𑀼𑀲𑀢𑁆𑀣𑁂-𑀉𑀧𑀸𑀤𑀸𑀦𑀁, 𑀉𑀧𑀸𑀬𑀸𑀲𑁄, 𑀉𑀧𑀦𑀺𑀲𑁆𑀲𑀬𑁄𑀢𑀺.

𑀆𑀇𑀢𑀺 𑀅𑀪𑀺𑀫𑀼𑀔𑀪𑀸𑀯𑀼+𑀤𑁆𑀥𑀓𑀫𑁆𑀫+𑀫𑀭𑀺𑀬𑀸𑀤𑀸+𑀪𑀺𑀯𑀺𑀥𑀺, 𑀧𑀢𑁆𑀢𑀺+𑀘𑁆𑀙𑀸, 𑀧𑀭𑀺𑀲𑁆𑀲𑀚𑀦, 𑀆𑀤𑀺𑀓𑀫𑁆𑀫, 𑀕𑀳𑀡, 𑀦𑀺𑀯𑀸𑀲𑀦, 𑀲𑀫𑀻𑀧, 𑀆𑀯𑁆𑀳𑀸𑀦𑀸𑀤𑀻𑀲𑀼. 𑀅𑀪𑀺𑀫𑀼𑀔𑀪𑀸𑀯𑁂-𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀥𑀓𑀫𑁆𑀫𑁂-𑀆𑀭𑁄𑀳𑀢𑀺, 𑀫𑀭𑀺𑀬𑀸𑀤𑀸𑀬𑀁-𑀆𑀧𑀩𑁆𑀩𑀢𑀸 𑀔𑁂𑀢𑁆𑀢𑀁, 𑀅𑀪𑀺𑀯𑀺𑀥𑀺𑀫𑁆𑀳𑀺-𑀆𑀓𑀼𑀫𑀸𑀭𑀁 𑀬𑀲𑁄 𑀓𑀘𑁆𑀘𑀸𑀬𑀦𑀲𑁆𑀲, 𑀧𑀢𑁆𑀢𑀺𑀬𑀁-𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄, 𑀇𑀘𑁆𑀙𑀸𑀬𑀁-𑀆𑀓𑀗𑁆𑀔𑀸, 𑀧𑀭𑀺𑀲𑁆𑀲𑀚𑀦𑁂-𑀆𑀮𑀺𑀗𑁆𑀕𑀦𑀁, 𑀆𑀤𑀺𑀓𑀫𑁆𑀫𑁂-𑀆𑀭𑀫𑁆𑀪𑁄, 𑀕𑀳𑀡𑁂-𑀆𑀤𑀻𑀬𑀢𑀺, 𑀆𑀮𑀺𑀗𑁆𑀕𑀢𑀺, (𑀆𑀮𑀺𑀫𑁆𑀧𑀢𑀺, 𑀭𑀽), 𑀦𑀺𑀯𑀸𑀲𑁂-𑀆𑀯𑀲𑀣𑁄, 𑀆𑀯𑀸𑀲𑁄, 𑀲𑀫𑀻𑀧𑁂-𑀆𑀲𑀦𑁆𑀦𑀁, 𑀆𑀯𑁆𑀳𑀸𑀦𑁂-𑀆𑀫𑀦𑁆𑀢𑁂𑀢𑀺.

𑀧 𑀧𑀭𑀸+𑀧 𑀲+𑀫𑀦𑁆𑀯+𑀯, 𑀑 𑀦𑀺 𑀤𑀼 𑀭𑀪𑀺 𑀩𑁆𑀬𑀸+𑀥𑀺𑀲𑀼;

𑀅𑀢𑀺 𑀦𑀺 𑀧𑁆𑀧𑀢𑀺 𑀧𑀭𑀺 𑀅𑀧𑀬𑁄, 𑀉𑀧 𑀆 𑀇𑀢𑀺 𑀯𑀻𑀲𑀢𑀺;

𑀏𑀲 𑀳𑀺 𑀪𑁄 𑀉𑀧𑀲𑀕𑁆𑀕-𑀯𑀺𑀥𑀺+𑀓𑁆𑀓𑀫𑀢𑁄 𑀓𑀣𑀺𑀢𑁄.

𑀏𑀢𑁆𑀣 𑀘 𑁋

𑀉𑀧𑀲𑀕𑁆𑀕+𑀦𑀺𑀧𑀸𑀢𑀸 𑀘, 𑀧𑀘𑁆𑀘𑀬𑀸 𑀘 𑀇𑀫𑁂 𑀢𑀬𑁄;

𑀦𑁂𑀓𑁂+𑀦𑁂𑀓𑀢𑁆𑀣𑀯𑀸𑀘𑀓𑀸, 𑀇𑀢𑀺 𑀦𑁂𑀭𑀼𑀢𑁆𑀢𑀺𑀓𑀸+𑀩𑁆𑀭𑀯𑀼𑀁.

𑁧𑁧𑁮. 𑀅𑀲𑀁𑀔𑁆𑀬𑁂𑀳𑀺 𑀲𑀩𑁆𑀩𑀸𑀲𑀁

𑀅𑀯𑀺𑀚𑁆𑀚𑀫𑀸𑀦𑀲𑀁𑀔𑁆𑀬𑁂𑀳𑀺 𑀧𑀭𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀳𑁄𑀢𑀺. 𑀦 𑀲𑀦𑁆𑀢𑀺 𑀏𑀓𑀯𑀘𑀦𑀸𑀤𑀺𑀲𑀁𑀔𑁆𑀬𑀸 𑀏𑀢𑁂𑀲𑀦𑁆𑀢𑀺 𑀅𑀲𑀁𑀔𑁆𑀬𑀸, 𑀢𑁂𑀲𑀁 𑀅𑀲𑀁𑀔𑁆𑀬𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀪𑁂𑀤𑁂 𑀅𑀲𑀢𑀺𑀧𑀺 𑀲𑁆𑀬𑀸𑀤𑀺𑀯𑀺𑀥𑀸𑀦𑀁 ‘‘𑀫𑀸 𑀦𑁄 𑀅𑀚𑁆𑀚 𑀯𑀺𑀓𑀦𑁆𑀢𑀺𑀁𑀲𑀽’’𑀢𑀺𑀆𑀤𑁄 𑀯𑀺𑀪𑀢𑁆𑀬𑀦𑁆𑀢𑀢𑁆𑀢𑀸 𑀧𑀤𑀢𑁆𑀢𑀲𑀺𑀤𑁆𑀥𑀻𑀢𑀺 𑀯𑁄+𑀦𑁄𑀆𑀤𑀻𑀦𑀁 𑀲𑀺𑀤𑁆𑀥𑀺𑀬𑀸 𑀘 𑀢𑁂𑀲𑀁 𑀧𑀞𑀫𑀸𑀤𑀺𑀅𑀢𑁆𑀣𑁂 𑀤𑀲𑁆𑀲𑀦𑀢𑁄 𑀘 𑀳𑁄𑀢𑀺. 𑀧𑀳𑀸𑀭𑁄 𑀧𑀭𑀸𑀪𑀯𑁄 𑀅𑀧𑀳𑀸𑀭𑁄 𑀲𑀁𑀳𑀸𑀭𑁄 𑀅𑀯𑀳𑀸𑀭𑁄 𑀑𑀳𑀸𑀭𑁄 𑀇𑀘𑁆𑀘𑀸𑀤𑀺 𑀳𑁄𑀢𑀺.

𑀉𑀧𑁂𑀘𑁆𑀘+𑀢𑁆𑀣𑀁 𑀲𑀚𑀦𑁆𑀢𑀻𑀢𑀺, 𑀉𑀧𑀲𑀕𑁆𑀕𑀸 𑀳𑀺 𑀧𑀸𑀤𑀬𑁄;

𑀘𑀸𑀤𑀻 𑀧𑀤𑀸𑀤𑀺𑀫𑀚𑁆𑀛𑀦𑁆𑀢𑁂, 𑀦𑀺𑀧𑀸𑀢𑀸 𑀦𑀺𑀧𑀢𑀦𑁆𑀢𑀻𑀢𑀺.

𑀑𑀧𑀲𑀕𑁆𑀕𑀺𑀓𑀧𑀤𑀁.

𑀲𑀫𑀼𑀘𑁆𑀘𑀬+𑀯𑀺𑀓𑀧𑁆𑀧𑀦+𑀧𑀝𑀺𑀲𑁂𑀥+𑀧𑀽𑀭𑀡𑀸𑀤𑀺𑀅𑀢𑁆𑀣𑀁 𑀅𑀲𑀢𑁆𑀢𑀯𑀸𑀘𑀺𑀓𑀁 𑀦𑁂𑀧𑀸𑀢𑀺𑀓𑀁.

𑀘-𑀇𑀢𑀺 𑀲𑀫𑀼𑀘𑁆𑀘𑀬𑀸+𑀦𑁆𑀯𑀸𑀘𑀬+𑀇𑀢𑀭𑁂𑀢𑀭𑀬𑁄𑀕+𑀲𑀫𑀸𑀳𑀸𑀭𑀸+𑀯𑀥𑀸𑀭𑀡𑀸𑀤𑀻𑀲𑀼. 𑀯𑀸-𑀇𑀢𑀺 𑀯𑀺𑀓𑀧𑁆𑀧𑀦𑀼+𑀧𑀫𑀸𑀦+𑀲𑀫𑀼𑀘𑁆𑀘𑀬+𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀤𑀻𑀲𑀼. 𑀦, 𑀦𑁄, 𑀫𑀸, 𑀅, 𑀅𑀮𑀁, 𑀳𑀮𑀁 𑀇𑀘𑁆𑀘𑁂𑀢𑁂 𑀧𑀝𑀺𑀲𑁂𑀥𑁂. ‘‘𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀅𑀢𑁆𑀣𑀁 𑀕𑀫𑀬𑀦𑁆𑀢𑀻’’𑀢𑀺 𑀜𑀸𑀬𑀸 ‘‘𑀦 𑀢𑁂𑀲𑀁 𑀧𑀦 𑀭𑀽𑀧𑀸𑀦𑀁 𑀧𑀘𑁆𑀘𑀬𑀸 𑀦 𑀘 𑀳𑁄𑀦𑁆𑀢𑀻’’𑀢𑀺 𑀏𑀢𑁆𑀣 𑀦 𑀘 𑀦 𑀳𑁄𑀦𑁆𑀢𑀺-𑀳𑁄𑀦𑁆𑀢𑁂𑀯𑀸𑀢𑀺 𑀧𑀓𑀢𑀺𑀅𑀢𑁆𑀣𑀁 𑀕𑀫𑀬𑀢𑀺. 𑀅𑀮𑀁 𑀧𑀭𑀺𑀬𑀢𑁆𑀢𑀺+𑀪𑀽𑀲𑀦𑁂𑀲𑀼 𑀘.

𑀧𑀽𑀭𑀡𑀢𑁆𑀣𑀁 𑀤𑀼𑀯𑀺𑀥𑀁 𑀅𑀢𑁆𑀢𑀧𑀽𑀭𑀡𑀁 𑀧𑀤𑀧𑀽𑀭𑀡𑀜𑁆𑀘, 𑀢𑀢𑁆𑀣 𑀅𑀣, 𑀔𑀮𑀼, 𑀯𑀢, 𑀅𑀣𑁄, 𑀅𑀲𑁆𑀲𑀼, 𑀬𑀕𑁆𑀖𑁂, 𑀳𑀺, 𑀘𑀭𑀳𑀺, 𑀦𑀁, 𑀢𑀁, 𑀘, 𑀢𑀼, 𑀯𑀸, 𑀯𑁄, 𑀧𑀦, 𑀳𑀯𑁂, 𑀓𑀻𑀯, 𑀳, 𑀢𑀢𑁄, 𑀬𑀣𑀸, 𑀲𑀼𑀤𑀁, 𑀔𑁄, 𑀯𑁂, 𑀳𑀁, 𑀏𑀦𑀁, (𑀏𑀯𑀁, 𑀭𑀽) 𑀲𑁂𑀬𑁆𑀬𑀣𑀺𑀤𑀁 𑀇𑀘𑁆𑀘𑁂𑀯𑀫𑀸𑀤𑀺 𑀧𑀤𑀧𑀽𑀭𑀡𑁂. 𑀢𑀢𑁆𑀣 𑀅𑀣-𑀇𑀢𑀺 𑀧𑀜𑁆𑀳𑀸+𑀦𑀦𑁆𑀢𑀭𑀺𑀬𑀸+𑀥𑀺𑀓𑀸𑀭𑀸𑀤𑀻𑀲𑀼 𑀘. 𑀔𑀮𑀼-𑀇𑀢𑀺 𑀧𑀝𑀺𑀲𑁂𑀥𑀸+𑀯𑀥𑀸𑀭𑀡, 𑀧𑀲𑀺𑀤𑁆𑀥𑀻𑀲𑀼 𑀘. 𑀯𑀢+𑀇𑀢𑀺 𑀏𑀓𑀁𑀲, 𑀔𑁂𑀤𑀸+𑀦𑀼𑀓𑀫𑁆𑀧, 𑀲𑀁𑀓𑀧𑁆𑀧𑁂𑀲𑀼 𑀘. 𑀅𑀣𑁄-𑀇𑀢𑀺 𑀅𑀦𑁆𑀯𑀸𑀤𑁂𑀲𑁂 𑀘. 𑀳𑀺-𑀇𑀢𑀺 𑀳𑁂𑀢𑀼, 𑀅𑀯𑀥𑀸𑀭𑀡𑁂𑀲𑀼 𑀘. 𑀢𑀼-𑀇𑀢𑀺 𑀯𑀺𑀲𑁂𑀲, 𑀳𑁂𑀢𑀼, 𑀦𑀺𑀯𑀢𑁆𑀢𑀦𑀸𑀤𑀻𑀲𑀼 𑀘. 𑀧𑀦-𑀇𑀢𑀺 𑀯𑀺𑀲𑁂𑀲𑁂𑀧𑀺. 𑀳𑀯𑁂+𑀯𑁂 𑀇𑀘𑁆𑀘𑁂𑀢𑁂 𑀏𑀓𑀁𑀲𑀢𑁆𑀣𑁂𑀧𑀺. 𑀳𑀁-𑀯𑀺𑀲𑀸𑀤, 𑀯𑀺𑀫𑁆𑀳𑁂𑀲𑀼𑀧𑀺. (𑀯𑀺𑀲𑀸𑀤, 𑀲𑀫𑁆𑀪𑀯𑁂𑀲𑀼, 𑀭𑀽). 𑀲𑁂𑀬𑁆𑀬𑀣𑀺𑀤𑀁𑀢𑀺 𑀢𑀁 𑀓𑀢𑀫𑀁𑀢𑀺 𑀅𑀢𑁆𑀣𑁂𑀧𑀺.

𑀅𑀢𑁆𑀣𑀧𑀽𑀭𑀡𑀁 𑀤𑀼𑀯𑀺𑀥𑀁 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀁 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀜𑁆𑀘. 𑀅𑀢𑁆𑀣𑀺, 𑀲𑀓𑁆𑀓𑀸, 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀁. 𑀆𑀯𑀼𑀲𑁄 𑀅𑀫𑁆𑀪𑁄 𑀳𑀫𑁆𑀪𑁄 𑀅𑀭𑁂 𑀳𑀭𑁂 𑀭𑁂 𑀚𑁂 𑀇𑀘𑁆𑀘𑁂𑀢𑁂 𑀆𑀫𑀦𑁆𑀢𑀡𑁂. 𑀤𑀺𑀯𑀸 𑀪𑀺𑀬𑁆𑀬𑁄 (𑀦𑀫𑁄, 𑀭𑀽) 𑀇𑀘𑁆𑀘𑁂𑀢𑁂 𑀧𑀞𑀫𑀸𑀤𑀼𑀢𑀺𑀬𑀸𑀲𑀼. 𑀲𑀬𑀁 𑀲𑀸𑀫𑀁 𑀲𑀁 𑀲𑀫𑁆𑀫𑀸 𑀓𑀺𑀦𑁆𑀢𑀺 𑀇𑀘𑁆𑀘𑁂𑀢𑁂 𑀢𑀢𑀺𑀬𑀢𑁆𑀣𑁂. 𑀲𑁄+𑀢𑁄+𑀥𑀸𑀧𑀘𑁆𑀘𑀬𑀦𑁆𑀢𑀸 𑀘 𑀲𑀼𑀢𑁆𑀢𑀲𑁄 𑀧𑀤𑀲𑁄 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀏𑀓𑀥𑀸 𑀤𑁆𑀯𑀺𑀥𑀸 𑀇𑀘𑁆𑀘𑀸𑀤𑀺. 𑀢𑀯𑁂+𑀢𑀼𑀁 𑀧𑀘𑁆𑀘𑀬𑀦𑁆𑀢𑀸 𑀘𑀢𑀼𑀢𑁆𑀣𑀺𑀬𑀸𑀯, 𑀓𑀸𑀢𑀯𑁂 𑀤𑀸𑀢𑀯𑁂, 𑀓𑀸𑀢𑀼𑀁 𑀓𑀸𑀭𑁂𑀢𑀼𑀁, (𑀤𑀸𑀢𑀼𑀁, 𑀭𑀽) 𑀤𑀸𑀧𑁂𑀢𑀼𑀁 𑀇𑀘𑁆𑀘𑀸𑀤𑀺. 𑀲𑁄+𑀢𑁄𑀧𑀘𑁆𑀘𑀬𑀦𑁆𑀢𑀸 𑀧𑀜𑁆𑀘𑀫𑀺𑀬𑀢𑁆𑀣𑁂, 𑀤𑀻𑀖𑀲𑁄 𑀑𑀭𑀲𑁄 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀇𑀘𑁆𑀘𑀸𑀤𑀺. 𑀢𑁄 𑀲𑀢𑁆𑀢- 𑀫𑁆𑀬𑀢𑁆𑀣𑁂𑀧𑀺 𑀢𑁆𑀭+𑀢𑁆𑀣𑀸𑀤𑀺𑀧𑀘𑁆𑀘𑀬𑀦𑁆𑀢𑀸 𑀘, 𑀏𑀓𑀢𑁄 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀧𑀲𑁆𑀲𑀢𑁄 𑀧𑀺𑀝𑁆𑀞𑀺𑀢𑁄 𑀧𑀸𑀤𑀢𑁄 𑀲𑀻𑀲𑀢𑁄 𑀅𑀕𑁆𑀕𑀢𑁄 𑀫𑀽𑀮𑀢𑁄, 𑀬𑀢𑁆𑀭 𑀬𑀢𑁆𑀣 𑀬𑀳𑀺𑀁 𑀢𑀢𑁆𑀭 𑀢𑀢𑁆𑀣 𑀢𑀳𑀺𑀁 𑀇𑀘𑁆𑀘𑀸𑀤𑀺. 𑀲𑀫𑀦𑁆𑀢𑀸 𑀲𑀸𑀫𑀦𑁆𑀢𑀸 𑀧𑀭𑀺𑀢𑁄 𑀅𑀪𑀺𑀢𑁄 𑀲𑀫𑀦𑁆𑀢𑀢𑁄 𑀏𑀓𑀚𑁆𑀛𑀁 𑀏𑀓𑀫𑀦𑁆𑀢𑀁 𑀳𑁂𑀝𑁆𑀞𑀸 𑀉𑀧𑀭𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀲𑀫𑁆𑀫𑀼𑀔𑀸 𑀧𑀭𑀫𑀼𑀔𑀸 𑀆𑀯𑀺 𑀭𑀳𑁄 𑀢𑀺𑀭𑁄 𑀉𑀘𑁆𑀘𑀁 𑀦𑀻𑀘𑀁 𑀅𑀦𑁆𑀢𑁄 𑀅𑀦𑁆𑀢𑀭𑀸 𑀅𑀦𑁆𑀢𑀭𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀸 𑀩𑀸𑀳𑀺𑀭𑀁 𑀩𑀳𑀺 𑀑𑀭𑀁 𑀧𑀸𑀭𑀁 𑀆𑀭𑀸 𑀆𑀭𑀓𑀸 𑀧𑀘𑁆𑀙𑀸 𑀧𑀼𑀭𑁂 𑀳𑀼𑀭𑀁 𑀧𑁂𑀘𑁆𑀘 𑀇𑀘𑁆𑀘𑁂𑀢𑁂 𑀲𑀢𑁆𑀢𑀫𑀺𑀬𑀸. 𑀲𑀫𑁆𑀧𑀢𑀺 𑀆𑀬𑀢𑀺 𑀅𑀚𑁆𑀚 𑀅𑀧𑀭𑀚𑁆𑀛 𑀲𑀼𑀯𑁂 𑀲𑁆𑀯𑁂 𑀉𑀢𑁆𑀢𑀭𑀲𑀼𑀯𑁂 (𑀓𑀺𑀲𑀼, 𑀭𑀽) 𑀳𑀺𑀬𑁆𑀬𑁄 𑀧𑀭𑁂 (𑀧𑀭𑀲𑀼𑀯𑁂, 𑀭𑀽) 𑀲𑀚𑁆𑀚𑀼 𑀲𑀸𑀬𑀁 𑀧𑀸𑀢𑁄 𑀓𑀸𑀮𑀁 𑀓𑀮𑁆𑀮𑀁 𑀤𑀺𑀯𑀸 𑀭𑀢𑁆𑀢𑀁 𑀦𑀺𑀘𑁆𑀘𑀁 𑀲𑀢𑀢𑀁 𑀅𑀪𑀺𑀡𑁆𑀳𑀁 𑀅𑀪𑀺𑀓𑁆𑀔𑀡𑀁 𑀫𑀼𑀳𑀼𑀁 𑀫𑀼𑀳𑀼𑀢𑁆𑀢𑀁 𑀪𑀽𑀢𑀧𑀼𑀩𑁆𑀩𑀁 𑀧𑀼𑀭𑀸 𑀬𑀤𑀸 𑀢𑀤𑀸 (𑀓𑀤𑀸, 𑀭𑀽) 𑀇𑀘𑁆𑀘𑀸𑀤𑀬𑁄 𑀓𑀸𑀮𑀲𑀢𑁆𑀢𑀫𑀺𑀬𑀁. 𑀇𑀢𑀺 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀺.

𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑁂𑀲𑀼 𑀅𑀧𑁆𑀧𑁂𑀯 𑀅𑀧𑁆𑀧𑁂𑀯𑀦𑀸𑀫 𑀦𑀼 𑀇𑀘𑁆𑀘𑁂𑀢𑁂 𑀲𑀁𑀲𑀬𑀢𑁆𑀣𑁂. 𑀅𑀤𑁆𑀥𑀸 𑀅𑀜𑁆𑀜𑀤𑀢𑁆𑀣𑀼 𑀢𑀕𑁆𑀖 𑀚𑀸𑀢𑀼 𑀓𑀸𑀫𑀁 𑀲𑀲𑀓𑁆𑀓𑀁 𑀇𑀘𑁆𑀘𑁂𑀢𑁂 𑀏𑀓𑀁𑀲𑀢𑁆𑀣𑁂. 𑀏𑀯𑀁 𑀇𑀢𑀺 𑀅𑀯𑀥𑀸𑀭𑀡𑁂. 𑀓𑀘𑁆𑀘𑀺 𑀦𑀼 𑀦𑀦𑀼 𑀓𑀣𑀁 (𑀓𑀺𑀁𑀲𑀼, 𑀭𑀽) 𑀓𑀺𑀁 𑀇𑀘𑁆𑀘𑁂𑀢𑁂 𑀧𑀼𑀘𑁆𑀙𑀦𑀢𑁆𑀣𑁂. 𑀏𑀯𑀁 𑀇𑀢𑀺 𑀇𑀢𑁆𑀣𑀁 𑀇𑀘𑁆𑀘𑁂𑀢𑁂 𑀦𑀺𑀤𑀲𑁆𑀲𑀦𑀢𑁆𑀣𑁂. 𑀇𑀢𑀺 𑀳𑁂𑀢𑀼+𑀯𑀸𑀓𑁆𑀬𑀧𑀭𑀺𑀲𑀫𑀢𑁆𑀢𑀻𑀲𑀼 𑀘. 𑀬𑀸𑀯 𑀢𑀸𑀯 𑀬𑀸𑀯𑀢𑀸 𑀢𑀸𑀯𑀢𑀸 𑀓𑀺𑀢𑁆𑀢𑀸𑀯𑀢𑀸 𑀏𑀢𑁆𑀢𑀸𑀯𑀢𑀸 𑀓𑀻𑀯 𑀇𑀘𑁆𑀘𑁂𑀢𑁂 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑁂. 𑀏𑀯𑀁 𑀲𑀸𑀳𑀼 𑀮𑀳𑀼 𑀑𑀧𑀸𑀬𑀺𑀓𑀁 𑀧𑀝𑀺𑀭𑀽𑀧𑀁 𑀆𑀫 𑀲𑀸𑀥𑀼 𑀇𑀘𑁆𑀘𑁂𑀢𑁂 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂. 𑀢𑀣𑀸 𑀬𑀣𑀸 𑀬𑀣𑁂𑀯 𑀢𑀣𑁂𑀯 𑀏𑀯𑀁 𑀏𑀯𑀫𑁂𑀯 𑀏𑀯𑀫𑁆𑀧𑀺 𑀬𑀣𑀸𑀧𑀺 𑀲𑁂𑀬𑁆𑀬𑀣𑀸𑀧𑀺 𑀲𑁂𑀬𑁆𑀬𑀣𑀸𑀧𑀺𑀦𑀸𑀫 𑀯𑀺𑀬 𑀇𑀯 𑀬𑀣𑀭𑀺𑀯 𑀢𑀣𑀭𑀺𑀯 𑀬𑀣𑀸𑀦𑀸𑀫 𑀢𑀣𑀸𑀦𑀸𑀫 𑀬𑀣𑀸𑀳𑀺 𑀢𑀣𑀸𑀳𑀺 𑀬𑀣𑀸𑀘 𑀢𑀣𑀸𑀘 𑀇𑀘𑁆𑀘𑁂𑀢𑁂 𑀧𑀝𑀺𑀪𑀸𑀕𑀢𑁆𑀣𑁂. 𑀬𑀣𑀸𑀇𑀢𑀺 𑀬𑁄𑀕𑁆𑀕𑀢𑀸+𑀯𑀺𑀘𑁆𑀙𑀸+𑀧𑀤𑀢𑁆𑀣𑀸𑀦𑀢𑀺𑀯𑀢𑁆𑀢𑀺+𑀦𑀺𑀤𑀲𑁆𑀲𑀦𑁂𑀲𑀼 𑀘. 𑀏𑀯𑀁𑀇𑀢𑀺 𑀉𑀧𑀤𑁂𑀲+𑀧𑀜𑁆𑀳𑀸𑀤𑀻𑀲𑀼 𑀘. 𑀓𑀺𑀜𑁆𑀘𑀸𑀧𑀺𑀇𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑁂. 𑀥𑀺𑀇𑀢𑀺 𑀕𑀭𑀳𑁂. 𑀅𑀳𑁄𑀇𑀢𑀺 𑀕𑀭𑀳+𑀧𑀲𑀁𑀲𑀦+𑀧𑀢𑁆𑀣𑀦𑁂𑀲𑀼. 𑀦𑀸𑀫𑀇𑀢𑀺 𑀕𑀭𑀳+𑀧𑀲𑀁𑀲𑀦+𑀲𑀜𑁆𑀜𑀸+𑀧𑀜𑁆𑀳𑁂𑀲𑀼. 𑀲𑀸𑀥𑀽𑀢𑀺 𑀧𑀲𑀁𑀲𑀦+𑀬𑀸𑀘𑀦𑁂𑀲𑀼. 𑀇𑀗𑁆𑀖 𑀳𑀦𑁆𑀤 𑀇𑀘𑁆𑀘𑁂𑀢𑁂 𑀘𑁄𑀤𑀦𑀢𑁆𑀣𑁂. 𑀲𑀸𑀥𑀼 𑀲𑀼𑀝𑁆𑀞𑀼 𑀏𑀯𑀫𑁂𑀢𑀁𑀢𑀺 𑀅𑀦𑀼𑀫𑁄𑀤𑀦𑁂. 𑀓𑀺𑀭𑀇𑀢𑀺 𑀅𑀦𑀼𑀲𑁆𑀲𑀯𑀦+𑀅𑀲𑀤𑁆𑀥𑁂𑀬𑁆𑀬𑁂𑀲𑀼. 𑀦𑀼𑀦𑀇𑀢𑀺 𑀅𑀦𑀼𑀫𑀸𑀦𑀸+𑀦𑀼𑀲𑁆𑀲𑀭𑀡+𑀧𑀭𑀺𑀯𑀺𑀢𑀓𑁆𑀓𑁂𑀲𑀼. 𑀓𑀲𑁆𑀫𑀸𑀢𑀺 𑀓𑀸𑀭𑀡𑀧𑀼𑀘𑁆𑀙𑀦𑁂. 𑀬𑀲𑁆𑀫𑀸 𑀢𑀲𑁆𑀫𑀸 𑀢𑀣𑀸 𑀳𑀺 𑀢𑁂𑀦 𑀇𑀘𑁆𑀘𑁂𑀢𑁂 𑀓𑀸𑀭𑀡𑀘𑁆𑀙𑁂𑀤𑀦𑀢𑁆𑀣𑁂. 𑀲𑀳 𑀲𑀤𑁆𑀥𑀺𑀁 𑀅𑀫𑀸 (𑀲𑀫𑀁, 𑀭𑀽) 𑀇𑀢𑀺 𑀲𑀫𑀓𑁆𑀭𑀺𑀬𑀸𑀬𑀁. 𑀯𑀺𑀦𑀸 𑀭𑀺𑀢𑁂 𑀯𑀺𑀧𑁆𑀧𑀬𑁄𑀕𑁂. 𑀦𑀸𑀦𑀸 𑀧𑀼𑀣𑀼 𑀩𑀳𑀼𑀧𑀓𑀸𑀭𑁂. 𑀧𑀼𑀣𑀼 𑀯𑀺𑀲𑀼𑀁 𑀅𑀲𑀗𑁆𑀖𑀸𑀢𑁂 𑀘. 𑀤𑀼𑀝𑁆𑀞𑀼 𑀓𑀼 𑀓𑀼𑀘𑁆𑀙𑀸𑀬𑀁 (𑀚𑀺𑀕𑀼𑀘𑁆𑀙𑀸𑀬𑀁, 𑀭𑀽). 𑀧𑀼𑀦 𑀅𑀧𑁆𑀧𑀞𑀫𑁂. 𑀓𑀣𑀁 𑀘𑀺𑀓𑀺𑀘𑁆𑀙𑀢𑁆𑀣𑁂. 𑀥𑀸 𑀓𑁆𑀔𑀢𑁆𑀢𑀼𑀁 𑀲𑁄 𑀓𑀺𑀜𑁆𑀘𑀇𑀢𑀺 𑀲𑀁𑀔𑁆𑀬𑀸𑀯𑀺𑀪𑀸𑀕𑁂. 𑀈𑀲𑀓𑀁 𑀅𑀧𑁆𑀧𑀫𑀸𑀦𑁂𑀲𑀼 (𑀅𑀧𑁆𑀧𑀫𑀢𑁆𑀢𑁂, 𑀭𑀽). 𑀲𑀡𑀺𑀓𑀁 𑀫𑀦𑁆𑀤𑀢𑁆𑀣𑁂. 𑀔𑀺𑀧𑁆𑀧𑀁 𑀅𑀭𑀁 𑀮𑀳𑀼𑀁 𑀆𑀲𑀼 𑀢𑀼𑀡𑁆𑀳𑀁 𑀅𑀘𑀺𑀭𑀁 𑀲𑀻𑀖𑀢𑁆𑀣𑁂. 𑀘𑀺𑀭𑀁 𑀘𑀺𑀭𑀲𑁆𑀲𑀁 𑀤𑀻𑀖𑀓𑀸𑀮𑁂. 𑀘𑁂 𑀬𑀤𑀺 𑀲𑀁𑀓𑀸+𑀯𑀝𑁆𑀞𑀸𑀦𑁂. 𑀥𑀼𑀭𑀁 𑀣𑀺𑀭𑀸+𑀯𑀥𑀸𑀭𑀡𑁂𑀲𑀼 (𑀥𑀼𑀯𑀁 𑀣𑀺𑀭𑀸+𑀯𑀥𑀸𑀭𑀡𑁂𑀲𑀼, 𑀭𑀽). 𑀳𑀸 𑀯𑀺𑀲𑀸𑀤𑁂. 𑀢𑀼𑀡𑁆𑀳𑀻 𑀅𑀪𑀸𑀲𑀦𑁂. 𑀲𑀘𑁆𑀙𑀺 𑀧𑀘𑁆𑀘𑀓𑁆𑀔𑁂. 𑀫𑀼𑀲𑀸 𑀫𑀺𑀘𑁆𑀙𑀸𑀅𑀮𑀺𑀓𑀁 𑀅𑀲𑀘𑁆𑀘𑁂. 𑀲𑀼𑀯𑀢𑁆𑀣𑀺 𑀆𑀲𑀺𑀝𑁆𑀞𑁂 𑀇𑀘𑁆𑀘𑀸𑀤𑀺.

𑀢𑀼𑀦+𑀓𑁆𑀢𑁆𑀯𑀸𑀦+𑀓𑁆𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀸 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑁂 𑀪𑀯𑀦𑁆𑀢𑀺. 𑀬𑀣𑀸 𑀧𑀲𑁆𑀲𑀺𑀢𑀼𑀦 𑀧𑀲𑁆𑀲𑀺𑀬 𑀧𑀲𑁆𑀲𑀺𑀢𑁆𑀯𑀸𑀦 𑀧𑀲𑁆𑀲𑀺𑀢𑁆𑀯𑀸, 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸𑀦 𑀤𑀲𑁆𑀲𑁂𑀢𑁆𑀯𑀸 𑀤𑀸𑀢𑀼𑀦 𑀤𑀢𑁆𑀯𑀸𑀦 𑀤𑀢𑁆𑀯𑀸 𑀉𑀧𑀸𑀤𑀸𑀬 𑀤𑀸𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀬 𑀯𑀺𑀘𑁂𑀬𑁆𑀬 𑀯𑀺𑀦𑁂𑀬𑁆𑀬 𑀲𑀫𑁂𑀘𑁆𑀘 𑀦𑀺𑀳𑀘𑁆𑀘 𑀉𑀧𑁂𑀘𑁆𑀘 𑀆𑀭𑀩𑁆𑀪 𑀆𑀕𑀫𑁆𑀫 𑀇𑀘𑁆𑀘𑀸𑀤𑀺.

𑀯𑀺𑀪𑀢𑁆𑀢𑀺𑀬𑀸 𑀓𑀢𑁄 𑀪𑁂𑀤𑁄, 𑀲𑀮𑀺𑀗𑁆𑀕𑀸𑀦𑀁 𑀪𑀯𑁂 𑀢𑀣𑀸;

𑀢𑀼𑀫𑁆𑀳𑀸𑀤𑀻𑀦𑀁 𑀢𑁆𑀯+𑀮𑀺𑀗𑁆𑀕𑁂𑀲𑀼, 𑀦𑁂𑀯+𑀢𑁆𑀣𑀺 𑀧𑀸𑀤𑀺+𑀘𑀸𑀤𑀺𑀦𑀁.

𑀏𑀯𑀁 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑁂𑀳𑀺 𑀯𑀺𑀦𑀺𑀫𑀼𑀢𑁆𑀢𑀁 𑀏𑀢𑀁 𑀦𑀺𑀧𑀸𑀢𑀧𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀧𑀸𑀢𑀺𑀓𑀧𑀤𑀁.

𑀧𑀼𑀮𑁆𑀮𑀺𑀗𑁆𑀕𑀁 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘, 𑀦𑀧𑀼𑀁𑀲𑀓+𑀫𑀣𑀸+𑀧𑀭𑀁;

𑀢𑀺𑀮𑀺𑀗𑁆𑀕𑀜𑁆𑀘 𑀅𑀮𑀺𑀗𑁆𑀕𑀜𑁆𑀘, 𑀦𑀸𑀫𑀺𑀓𑀁 𑀧𑀜𑁆𑀘𑀥𑀸 𑀞𑀺𑀢𑀁.

𑀇𑀢𑀺 𑀧𑀬𑁄𑀕𑀲𑀺𑀤𑁆𑀥𑀺𑀬𑀁 𑀦𑀸𑀫𑀓𑀡𑁆𑀟𑁄 𑀤𑀼𑀢𑀺𑀬𑁄.