𑁨. 𑀦𑀸𑀫𑀓𑀡𑁆𑀟

𑀅𑀣 𑀦𑀸𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑁂. 𑀢𑀁 𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀅𑀢𑁆𑀢𑀦𑀸 𑀘+𑀢𑁆𑀣𑀲𑁆𑀲 𑀦𑀸𑀫𑀦𑀢𑁄 𑀦𑀸𑀫𑀁, 𑀤𑀩𑁆𑀩𑀸𑀪𑀺𑀥𑀸𑀦𑀁. 𑀢𑀁 𑀤𑀼𑀯𑀺𑀥𑀁 𑀲𑀮𑀺𑀗𑁆𑀕𑀸+𑀮𑀺𑀗𑁆𑀕𑀢𑁄, 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀺𑀢𑁄 𑀘, 𑀢𑀺𑀯𑀺𑀥𑀁 𑀧𑀼𑀫𑀺+𑀢𑁆𑀣𑀺+𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁄, 𑀭𑀼𑀓𑁆𑀔𑁄, 𑀮𑀢𑀸, 𑀯𑀦𑀦𑁆𑀢𑀺. 𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜+𑀕𑀼𑀡+𑀓𑁆𑀭𑀺𑀬𑀸+𑀬𑀤𑀺𑀘𑁆𑀙𑀸𑀦𑀸𑀫𑀢𑁄, 𑀭𑀼𑀓𑁆𑀔𑁄, 𑀦𑀻𑀮𑁄, 𑀧𑀸𑀘𑀓𑁄, 𑀲𑀺𑀭𑀺𑀯𑀟𑁆𑀠𑁄𑀢𑀺. 𑀅𑀝𑁆𑀞𑀯𑀺𑀥𑀁 𑀅𑀯𑀡𑁆𑀡𑀺+𑀯𑀡𑁆𑀡𑀼+𑀯𑀡𑁆𑀡𑁄+𑀓𑀸𑀭+𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀓𑀢𑀺𑀪𑁂𑀤𑀢𑁄, 𑀏𑀢𑁆𑀣 𑀓𑀺𑀁𑀲𑀤𑁆𑀤𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑁄. 𑀧𑀘𑁆𑀘𑀬𑀸 𑀧𑀞𑀫𑀁 𑀓𑀭𑀻𑀬𑀢𑀻𑀢𑀺 𑀧𑀓𑀢𑀺, 𑀲𑀤𑁆𑀤𑁄, 𑀥𑀸𑀢𑀼 𑀘.

𑀢𑀢𑁆𑀣 𑀲𑀮𑀺𑀗𑁆𑀕𑁂𑀲𑀼 𑀢𑀸𑀯 𑀅𑀓𑀸𑀭𑀦𑁆𑀢𑀢𑁄 𑀧𑀼𑀮𑁆𑀮𑀺𑀗𑁆𑀕𑀸 𑀲𑀼𑀕𑀢𑀲𑀤𑁆𑀤𑀸 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀧𑀭𑀸 𑀬𑁄𑀚𑀻𑀬𑀦𑁆𑀢𑁂. 𑀲𑀼𑀕𑀢𑀇𑀢𑀺 𑀞𑀺𑀢𑁂 𑁋

𑁧. 𑀤𑁆𑀯𑁂 𑀤𑁆𑀯𑁂+𑀓𑀸𑀦𑁂𑀓𑁂𑀲𑀼 𑀦𑀸𑀫𑀲𑁆𑀫𑀸 𑀲𑀺𑀬𑁄 𑀅𑀁𑀬𑁄 𑀦𑀸 𑀳𑀺 𑀲 𑀦𑀁 𑀲𑁆𑀫𑀸 𑀳𑀺 𑀲 𑀦𑀁 𑀲𑁆𑀫𑀺𑀁 𑀲𑀼

𑀏𑀢𑁂𑀲𑀁 𑀤𑁆𑀯𑁂 𑀤𑁆𑀯𑁂 𑀳𑁄𑀦𑁆𑀢𑀺 𑀏𑀓𑀸𑀦𑁂𑀓𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸 𑀬𑀣𑀸𑀓𑁆𑀓𑀫𑀁. 𑀬𑀢𑁄 𑀇𑀫𑁂 𑀲𑀢𑁆𑀢 𑀤𑀼𑀓𑀸 𑀳𑁄𑀦𑁆𑀢𑀺, ‘‘𑀅𑀢𑁆𑀣𑀯𑀦𑁆𑀢+𑀫𑀥𑀸𑀢𑀼𑀓+𑀫𑀧𑀘𑁆𑀘𑀬𑀁 𑀧𑀸𑀝𑀺𑀧𑀤𑀺𑀓𑀁 𑀓𑀺𑀢𑀓+𑀢𑀤𑁆𑀥𑀺𑀢+𑀲𑀫𑀸𑀲𑀸 𑀘𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀦𑀸𑀫𑀁 𑀧𑀸𑀝𑀺𑀧𑀤𑀺𑀓𑀁 𑀦𑀸𑀫. 𑀓𑁂𑀘𑀺 𑀲𑀓𑀢𑁆𑀣+𑀤𑀩𑁆𑀩+𑀮𑀺𑀗𑁆𑀕+𑀲𑀗𑁆𑀔𑁆𑀬𑀸+𑀓𑀫𑁆𑀫𑀸𑀤𑀺𑀧𑀜𑁆𑀘𑀓𑀁 𑀧𑀸𑀝𑀺𑀧𑀤𑀺𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂+𑀢𑀁 𑀯𑀼𑀘𑁆𑀘𑀢𑀺 𑁋

𑀲𑀓𑀢𑁆𑀣+𑀤𑀩𑁆𑀩+𑀮𑀺𑀗𑁆𑀕𑀸𑀦𑀺, 𑀲𑀤𑁆𑀤𑀢𑁆𑀣+𑀫𑀩𑁆𑀭𑀯𑀼𑀁 𑀧𑀭𑁂;

𑀲𑀗𑁆𑀔𑁆𑀬𑀸+𑀓𑀫𑁆𑀫𑀸𑀤𑀺𑀓𑀸𑀦𑀦𑁆𑀢𑀼, 𑀯𑀺𑀪𑀢𑁆𑀢𑀺 𑀯𑀸𑀘𑀓𑀸 𑀫𑀢𑀸.

𑀲𑀓𑀢𑁆𑀣+𑀤𑀩𑁆𑀩+𑀮𑀺𑀗𑁆𑀕𑀸𑀦𑀺, 𑀲𑀗𑁆𑀔𑁆𑀬𑀸+𑀓𑀫𑁆𑀫𑀸𑀤𑀺𑀧𑀜𑁆𑀘𑀓𑀁;

𑀲𑀤𑁆𑀤𑀢𑁆𑀣+𑀫𑀩𑁆𑀭𑀯𑀼𑀁 𑀓𑁂𑀘𑀺, 𑀯𑀺𑀪𑀢𑁆𑀢𑀺 𑀧𑀦 𑀚𑁄𑀢𑀓𑀸𑀢𑀺 𑀘.

𑀢𑀢𑁄 𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁 𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀜𑁆𑀘𑀸𑀢𑀺 𑀅𑀦𑀺𑀬𑀫𑁂𑀦 𑀧𑀲𑀗𑁆𑀕𑁂 ‘‘𑀦𑀸𑀫𑀲𑁆𑀫𑀸’’𑀢𑀺 𑀅𑀥𑀺𑀓𑀸𑀭𑁄.

𑁩𑁭. 𑀧𑀞𑀫𑀸+𑀢𑁆𑀣𑀫𑀢𑁆𑀢𑁂

𑀦𑀸𑀫𑀲𑁆𑀲𑀸+𑀪𑀺𑀥𑁂𑀬𑁆𑀬𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀯𑀢𑁆𑀢𑀺𑀘𑁆𑀙𑀸𑀯𑀲𑀸 𑀧𑀞𑀫𑀸𑀬𑁂+𑀓𑀯𑀘𑀦𑀩𑀳𑀼𑀯𑀘𑀦𑀸𑀦𑀺. 𑀲𑀺 𑀬𑁄𑀇𑀢𑀺 𑀧𑀞𑀫𑀸. 𑀲𑀺𑀲𑁆𑀲𑀺+𑀓𑀸𑀭𑀲𑁆𑀲𑀸+𑀦𑀼𑀩𑀦𑁆𑀥𑀢𑁆𑀢𑀸 𑀅𑀧𑁆𑀧𑀬𑁄𑀕𑁄. 𑀧𑀬𑁄𑀚𑀦𑀁 ‘‘𑀓𑀺+𑀫𑀁𑀲𑀺𑀲𑀽’’𑀢𑀺 𑀲𑀁𑀓𑁂𑀢𑁄, 𑀢𑀣𑀸 𑀅𑀁𑀯𑀘𑀦𑀲𑁆𑀲𑀸+𑀓𑀸𑀭𑀲𑁆𑀲. 𑀏𑀢𑁆𑀣 𑀢𑀣𑀸𑀢𑀺 𑀯𑀼𑀢𑁆𑀢𑀲𑁆𑀲𑀸𑀢𑀺𑀤𑁂𑀲𑁄 𑀅𑀜𑁆𑀜𑀤𑀻𑀬𑀥𑀫𑁆𑀫𑀸𑀦+𑀫𑀜𑁆𑀜𑀢𑁆𑀣𑀧𑀸𑀧𑀦+𑀫𑀢𑀺𑀤𑁂𑀲𑁄. 𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀧𑀞𑀫𑁂𑀓𑀯𑀘𑀦𑀁 𑀲𑀺.

𑀅𑀢𑁄𑀢𑀺 𑀯𑀢𑁆𑀢𑀢𑁂, 𑀅𑀢𑁄𑀢𑀺 𑀦𑀸𑀫𑀯𑀺𑀲𑁂𑀲𑀦𑀢𑁆𑀢𑀸 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 𑀧𑀭𑀺𑀪𑀸𑀲𑀢𑁄 𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀯𑀺𑀥𑀺.

𑁧𑁦𑁯. 𑀲𑀺𑀲𑁆𑀲𑁄

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀲𑀺𑀲𑁆𑀲 𑀑 𑀳𑁄𑀢𑀺. 𑀧𑀼𑀩𑁆𑀩𑀲𑀭𑀮𑁄𑀧𑁂 𑀲𑀼𑀕𑀢𑁄 𑀢𑀺𑀝𑁆𑀞𑀢𑀺. 𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀬𑁄. 𑀏𑀯𑀁 𑀉𑀧𑀭𑀺𑀧𑀺 𑀬𑁄𑀚𑁂𑀢𑀩𑁆𑀩𑀁.

𑁪𑁧. 𑀅𑀢𑁄 𑀬𑁄𑀦𑀁 𑀝𑀸𑀝𑁂

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀧𑀞𑀫𑀸𑀤𑀼𑀢𑀺𑀬𑀸𑀬𑁄𑀦𑀁 𑀝𑀸𑀝𑁂 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀝𑀓𑀸𑀭𑀸𑀦𑀼𑀩𑀦𑁆𑀥𑀢𑁆𑀢𑀸 ‘‘𑀝𑀸𑀦𑀼𑀩𑀦𑁆𑀥𑀸+𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑀸’’𑀢𑀺 𑀲𑀩𑁆𑀩𑀸𑀤𑁂𑀲𑁄. 𑀲𑀼𑀕𑀢𑀸 𑀢𑀺𑀝𑁆𑀞𑀦𑁆𑀢𑀺.

‘‘𑀧𑀞𑀫𑀸+𑀢𑁆𑀣𑀫𑀢𑁆𑀢𑁂’’𑀢𑀺 𑀯𑀢𑁆𑀢𑀢𑁂.

𑁩𑁮. 𑀆𑀫𑀦𑁆𑀢𑀡𑁂

𑀆𑀫𑀦𑁆𑀢𑀡𑀸𑀥𑀺𑀓𑁂 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀏𑀓𑀲𑁆𑀫𑀺𑀁 𑀏𑀓𑀯𑀘𑀦𑀁 𑀲𑀺.

𑁧𑁧𑁨. 𑀕𑁄 𑀲𑁆𑀬𑀸+𑀮𑀧𑀦𑁂

𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄 𑀳𑁄𑀢𑀺.

‘‘𑀮𑁄𑀧𑁄’’𑀢𑀺 𑀯𑀢𑁆𑀢𑀢𑁂.

𑁧𑁧𑁭. 𑀕𑀲𑀻𑀦𑀁

𑀦𑀸𑀫𑀲𑁆𑀫𑀸 𑀕+𑀲𑀻𑀦𑀁 𑀮𑁄𑀧𑁄 𑀳𑁄𑀢𑀺. 𑀪𑁄 𑀲𑀼𑀕𑀢 𑀘𑀺𑀭𑀁 𑀢𑀺𑀝𑁆𑀞.

‘‘𑀕𑁂’’𑀢𑀺 𑀯𑀢𑁆𑀢𑀢𑁂.

𑁫𑁯. 𑀅𑀬𑀼𑀦𑀁 𑀯𑀸 𑀤𑀻𑀖𑁄

𑀅𑀇𑀉𑀇𑀘𑁆𑀘𑁂𑀢𑁂𑀲𑀁 𑀯𑀸 𑀤𑀻𑀖𑁄 𑀳𑁄𑀢𑀺 𑀕𑁂 𑀧𑀭𑁂 𑀢𑀺𑀮𑀺𑀗𑁆𑀕𑁂+𑀢𑀺 𑀤𑀻𑀖𑁂 𑀪𑁄 𑀲𑀼𑀕𑀢 𑀲𑀼𑀕𑀢𑀸 𑀘𑀺𑀭𑀁 𑀢𑀺𑀝𑁆𑀞. 𑀲𑀓𑁆𑀓𑀢𑁂 𑀲𑀼𑀕𑀢𑀸𑀢𑀺 𑀤𑀻𑀖𑀁 𑀤𑀽𑀭𑀸𑀮𑀧𑀦𑁂𑀬𑁂𑀯𑀺+𑀘𑁆𑀙𑀦𑁆𑀢𑀺, 𑀲𑀫𑀻𑀧𑀸𑀮𑀧𑀦𑁂𑀧𑀺 𑀤𑀲𑁆𑀲𑀦𑀢𑁄 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀩𑀳𑀼𑀯𑀘𑀦𑁂 𑀬𑁄𑀲𑁆𑀲 𑀝𑀸, 𑀲𑀼𑀕𑀢𑀸 𑀘𑀺𑀭𑀁 𑀢𑀺𑀝𑁆𑀞𑀣.

𑁨. 𑀓𑀫𑁆𑀫𑁂 𑀤𑀼𑀢𑀺𑀬𑀸

𑀢𑀲𑁆𑀫𑀺𑀁 𑀓𑀫𑁆𑀫𑀓𑀸𑀭𑀓𑁂 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀅𑀁𑀬𑁄𑀇𑀢𑀺 𑀤𑀼𑀢𑀺𑀬𑀸. 𑀏𑀢𑁆𑀣 𑀤𑀼𑀢𑀺𑀬𑀸𑀢𑀢𑀺𑀬𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑁂 𑀲𑀺𑀬𑁄 𑀇𑀢𑀺 𑀧𑀞𑀫𑀸𑀯𑀺𑀪𑀢𑁆𑀬𑀸𑀤𑀻𑀦𑀺+𑀫𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀺, 𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑁂𑀓𑀯𑀘𑀦𑀁 𑀅𑀁, 𑀅𑀓𑀸𑀭𑀲𑁆𑀲𑀸+𑀧𑀬𑁄𑀕𑁄. 𑀲𑀼𑀕𑀢𑀁 𑀧𑀲𑁆𑀲. 𑀤𑀼𑀢𑀺𑀬𑀸𑀩𑀳𑀼𑀯𑀘𑀦𑀁 𑀬𑁄, 𑀢𑀲𑁆𑀲 𑀝𑁂, 𑀲𑀼𑀕𑀢𑁂 𑀧𑀲𑁆𑀲.

𑁧𑁯. 𑀓𑀢𑁆𑀢𑀼𑀓𑀭𑀡𑁂𑀲𑀼 𑀢𑀢𑀺𑀬𑀸

𑀢𑀲𑁆𑀫𑀺𑀁 𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀦𑀸+𑀳𑀺𑀇𑀢𑀺 𑀢𑀢𑀺𑀬𑀸𑀯𑀺𑀪𑀢𑁆𑀢𑀺. 𑀢𑀢𑀺𑀬𑀸𑀏𑀓𑀯𑀘𑀦𑀁 𑀦𑀸.

‘‘𑀦𑀸𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁦𑁮. 𑀅𑀢𑁂+𑀦

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀧𑀭𑀲𑁆𑀲 𑀦𑀸𑀯𑀘𑀦𑀲𑁆𑀲 𑀏𑀦𑀸𑀤𑁂𑀲𑁄 𑀳𑁄𑀢𑀺 𑀦𑀺𑀘𑁆𑀘𑀁. 𑀲𑀼𑀕𑀢𑁂𑀦 𑀓𑀢𑀁.

𑁯𑁮. 𑀲𑀼𑀳𑀺𑀲𑁆𑀯+𑀲𑁆𑀲𑁂

𑀅𑀓𑀸𑀭𑀦𑁆𑀢𑀲𑁆𑀲 𑀲𑀼𑀳𑀺𑀲𑁆𑀯𑁂+𑀳𑁄𑀢𑀺. 𑀲𑀼𑀕𑀢𑁂𑀳𑀺.

‘‘𑀯𑁂’’𑀢𑀺 𑀯𑀢𑁆𑀢𑀢𑁂.

𑁯𑁫. 𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸𑀪𑀺𑀫𑁆𑀳𑀺

𑀦𑀸𑀫𑀲𑁆𑀫𑀸 𑀧𑀭𑁂𑀲𑀁 𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸𑀪𑀺𑀫𑁆𑀳𑀺 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁𑀢𑀺 𑀳𑀺𑀲𑁆𑀲 𑀪𑀺𑀆𑀤𑁂𑀲𑁂 𑀲𑀼𑀕𑀢𑁂𑀪𑀺. 𑀓𑀭𑀡𑁂 𑀲𑀼𑀕𑀢𑁂𑀦 𑀮𑁄𑀓𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀲𑀼𑀕𑀢𑁂𑀳𑀺 𑀲𑀼𑀕𑀢𑁂𑀳𑀺 𑀯𑀸.

𑁨𑁪. 𑀘𑀢𑀼𑀢𑁆𑀣𑀻 𑀲𑀫𑁆𑀧𑀤𑀸𑀦𑁂

𑀢𑀲𑁆𑀫𑀺𑀁 𑀲𑀫𑁆𑀧𑀤𑀸𑀦𑀓𑀸𑀭𑀓𑁂 𑀘𑀢𑀼𑀢𑁆𑀣𑀻 𑀲𑀺𑀬𑀸. 𑀲+𑀦𑀁𑀇𑀢𑀺 𑀘𑀢𑀼𑀢𑁆𑀣𑀻. 𑀘𑀢𑀼𑀢𑁆𑀣𑁂+𑀓𑀯𑀘𑀦𑀁 𑀲. 𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑁂 𑀲𑁆𑀲+𑀦𑀁𑀢𑀺 𑀤𑀻𑀖𑀧𑀸𑀞𑁂𑀦 𑀲𑀼𑀕𑀢𑀲𑁆𑀲𑀸𑀢𑀺 𑀲𑀺𑀤𑁆𑀥𑁂𑀧𑀺 ‘‘𑀛𑀮𑀸 𑀲𑀲𑁆𑀲 𑀦𑁄’’ 𑀢𑁆𑀬𑀸𑀤𑀺𑀓𑀸𑀭𑀺𑀬𑀲𑀼𑀢𑁆𑀢𑁂𑀲𑀼 𑀲𑁆𑀲𑀲𑁆𑀲𑀸𑀢𑀺 𑀅𑀓𑁆𑀔𑀭𑀕𑀸𑀭𑀯𑀢𑀸 𑀳𑁄𑀢𑀻𑀢𑀺 𑀮𑀸𑀖𑀯𑀢𑁆𑀣+𑀫𑀺𑀤+𑀫𑀸𑀭𑀤𑁆𑀥𑀁 𑁋

𑁫𑁧. 𑀲𑀼𑀜 𑀲𑀲𑁆𑀲

𑀦𑀸𑀫𑀲𑁆𑀫𑀸 𑀧𑀭𑀲𑁆𑀲 𑀲𑀲𑁆𑀲 𑀲𑀼𑀜𑀸𑀕𑀫𑁄 𑀳𑁄𑀢𑀺. 𑀲 𑀘 ‘‘𑀙𑀝𑁆𑀞𑀺𑀬𑀸’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁧,𑁨𑁦. 𑀜𑀸𑀓𑀸𑀦𑀼 𑀩𑀦𑁆𑀥𑀸+𑀤𑁆𑀬𑀦𑁆𑀢𑀸

𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀜𑀸𑀦𑀼𑀩𑀦𑁆𑀥+𑀓𑀸𑀦𑀼𑀩𑀦𑁆𑀥𑀸 𑀆𑀤𑁆𑀬𑀦𑁆𑀢𑀸𑀳𑁄𑀦𑁆𑀢𑀻𑀢𑀺 𑀆𑀤𑁆𑀬𑀯𑀬𑀯𑁄. 𑀉𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀜𑁆𑀜𑀓𑀸𑀭𑁄 𑀅𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀁𑀓𑁂𑀢𑀢𑁆𑀣𑁄. 𑀲𑀼𑀕𑀢𑀲𑁆𑀲 𑀤𑀸𑀦𑀁 𑀤𑁂𑀢𑀺.

𑁧,𑁫𑁮. ‘‘𑀩𑀳𑀼𑀮𑀁’’𑀢𑁆𑀬+𑀥𑀺𑀓𑀸𑀭𑁄

𑀩𑀳𑀼𑀮𑀸𑀥𑀺𑀓𑀸𑀭𑀁 𑀓𑀧𑁆𑀧𑀤𑀼𑀫𑀫𑀺𑀯 𑀫𑀜𑁆𑀜𑀦𑁆𑀢𑀺 𑀲𑀤𑁆𑀤𑀺𑀓𑀸. 𑀢𑀜𑁆𑀘 𑁋

𑀓𑁆𑀯𑀘𑀺 𑀧𑀯𑀢𑁆𑀢𑁆𑀬+𑀧𑀯𑀢𑁆𑀢𑀺, 𑀓𑁆𑀯𑀘+𑀜𑁆𑀜𑀁 𑀓𑁆𑀯𑀘𑀺 𑀯𑀸 𑀓𑁆𑀯𑀘𑀺;

𑀲𑀺𑀬𑀸 𑀩𑀳𑀼𑀮𑀲𑀤𑁆𑀤𑁂𑀦, 𑀯𑀺𑀥𑀺 𑀲𑀩𑁆𑀩𑁄 𑀬𑀣𑀸𑀕𑀫𑀁𑀢𑀺 𑁋

𑀘𑀢𑀼𑀩𑁆𑀩𑀺𑀥𑀁 𑀩𑀳𑀼𑀮𑀁 𑀲𑀫𑀺𑀓𑁆𑀔𑀦𑁆𑀢𑀺.

‘‘𑀅𑀢𑁄 𑀯𑀸’’𑀢𑁆𑀯𑁂𑀯,

𑁪𑁪. 𑀲𑀲𑁆𑀲𑀸𑀬 𑀘𑀢𑀼𑀢𑁆𑀣𑀺𑀬𑀸

𑀅𑀓𑀸𑀭𑀦𑁆𑀢𑀢𑁄 𑀧𑀭𑀲𑁆𑀲 𑀘𑀢𑀼𑀢𑁆𑀣𑀺𑀬𑀸 𑀲𑀲𑁆𑀲 𑀆𑀬𑁄 𑀳𑁄𑀢𑀺 𑀯𑀸 𑀩𑀳𑀼𑀮𑀁. 𑀲𑀼𑀕𑀢𑀸𑀬. 𑀬𑁂𑀪𑀼𑀬𑁆𑀬𑁂𑀦 𑀢𑀸𑀤𑀢𑁆𑀣𑁂𑀬𑁂𑀯𑀸+𑀬+𑀫𑀸𑀬𑁄 𑀤𑀺𑀲𑁆𑀲𑀢𑀻𑀢𑀺 𑀇𑀢𑁄 𑀧𑀭𑀁 𑀦𑁄+𑀤𑀸𑀳𑀭𑀻𑀬𑀢𑁂. 𑀘𑀢𑀼𑀢𑁆𑀣𑀻𑀩𑀳𑀼𑀯𑀘𑀦𑀁 𑀦𑀁,

‘‘𑀤𑀻𑀖𑁄’’𑀢𑀺 𑀯𑀢𑁆𑀢𑀢𑁂.

𑁮𑁯. 𑀲𑀼𑀦𑀁𑀳𑀺𑀲𑀼

𑀦𑀸𑀫𑀲𑁆𑀲 𑀤𑀻𑀖𑁄 𑀳𑁄𑀢𑀺 𑀲𑀼𑀦𑀁𑀳𑀺𑀲𑀼. 𑀲𑀼𑀕𑀢𑀸𑀦𑀁.

𑁨𑁯. 𑀧𑀜𑁆𑀘𑀫𑁆𑀬+𑀯𑀥𑀺𑀲𑁆𑀫𑀸

𑀏𑀢𑀲𑁆𑀫𑀸 𑀅𑀯𑀥𑀺𑀓𑀸𑀭𑀓𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲𑁆𑀫𑀸+𑀳𑀺𑀇𑀢𑀺 𑀧𑀜𑁆𑀘𑀫𑀻. 𑀧𑀜𑁆𑀘𑀫𑁆𑀬𑁂𑀓𑀯𑀘𑀦𑀁 𑀲𑁆𑀫𑀸,

‘‘𑀅𑀢𑁄’’ ‘‘𑀝𑀸𑀝𑁂’’ ‘‘𑀯𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩. 𑀲𑁆𑀫𑀸+𑀲𑁆𑀫𑀺𑀁𑀦𑀁

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀧𑀭𑁂𑀲𑀁 𑀲𑁆𑀫𑀸+𑀲𑁆𑀫𑀺𑀁𑀦𑀁 𑀝𑀸+𑀝𑁂 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀲𑀼𑀕𑀢𑀸 𑀅𑀧𑁂𑀳𑀺 𑀲𑀼𑀕𑀢𑀫𑁆𑀳𑀸 𑀲𑀼𑀕𑀢𑀲𑁆𑀫𑀸 𑀯𑀸. 𑀧𑀜𑁆𑀘𑀫𑀻𑀩𑀳𑀼𑀯𑀘𑀦𑀜𑁆𑀳𑀺, 𑀲𑀼𑀕𑀢𑁂𑀪𑀺 𑀲𑀼𑀕𑀢𑁂𑀳𑀺.

𑁩𑁯. 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑁂

𑀓𑀸𑀭𑀓𑁂𑀳𑀺 𑀅𑀜𑁆𑀜𑁄 𑀲𑀫𑁆𑀩𑀦𑁆𑀥𑁄, 𑀢𑀢𑁆𑀭 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲+𑀦𑀁𑀇𑀢𑀺 𑀙𑀝𑁆𑀞𑀻, 𑀙𑀝𑁆𑀞𑁂𑀓𑀯𑀘𑀦𑀁 𑀲, 𑀲𑀼𑀕𑀢𑀲𑁆𑀲 𑀯𑀺𑀳𑀸𑀭𑁄, 𑀙𑀝𑁆𑀞𑀻𑀩𑀳𑀼𑀯𑀘𑀦𑀁 𑀦𑀁, 𑀲𑀼𑀕𑀢𑀸𑀦𑀁.

𑁧𑁪. 𑀲𑀢𑁆𑀢𑀫𑁆𑀬𑀸+𑀥𑀸𑀭𑁂

𑀆𑀥𑀸𑀭𑀓𑀸𑀭𑀓𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲𑁆𑀫𑀺𑀁+𑀲𑀼𑀇𑀢𑀺 𑀲𑀢𑁆𑀢𑀫𑀻. 𑀲𑀢𑁆𑀢𑀫𑁆𑀬𑁂𑀓𑀯𑀘𑀦𑀁 𑀲𑁆𑀫𑀺𑀁, 𑀲𑀼𑀕𑀢𑁂 𑀧𑀢𑀺𑀝𑁆𑀞𑀺𑀢𑀁 𑀲𑀼𑀕𑀢𑀫𑁆𑀳𑀺 𑀲𑀼𑀕𑀢𑀲𑁆𑀫𑀺𑀁 𑀯𑀸. 𑀲𑀢𑁆𑀢𑀫𑀻𑀩𑀳𑀼𑀯𑀘𑀦𑀁 𑀲𑀼, ‘‘𑀲𑀼+𑀳𑀺𑀲𑁆𑀯+𑀲𑁆𑀲𑁂’’𑀢𑀺 𑀏, 𑀲𑀼𑀕𑀢𑁂𑀲𑀼.

𑀲𑀼𑀕𑀢𑁄, 𑀲𑀼𑀕𑀢𑀸. 𑀪𑁄 𑀲𑀼𑀕𑀢, 𑀪𑁄 𑀲𑀼𑀕𑀢𑀸, 𑀪𑀯𑀦𑁆𑀢𑁄 𑀲𑀼𑀕𑀢𑀸. 𑀲𑀼𑀕𑀢𑀁, 𑀲𑀼𑀕𑀢𑁂. 𑀲𑀼𑀕𑀢𑁂𑀦, 𑀲𑀼𑀕𑀢𑁂𑀪𑀺, 𑀲𑀼𑀕𑀢𑁂𑀳𑀺. 𑀓𑀭𑀡𑁂 𑀲𑀼𑀕𑀢𑁂𑀦, 𑀲𑀼𑀕𑀢𑁂𑀪𑀺, 𑀲𑀼𑀕𑀢𑁂𑀳𑀺. 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀬, 𑀲𑀼𑀕𑀢𑀸𑀦𑀁. 𑀲𑀼𑀕𑀢𑀸, 𑀲𑀼𑀕𑀢𑀫𑁆𑀳𑀸, 𑀲𑀼𑀕𑀢𑀲𑁆𑀫𑀸, 𑀲𑀼𑀕𑀢𑁂𑀪𑀺, 𑀲𑀼𑀕𑀢𑁂𑀳𑀺. 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀦𑀁. 𑀲𑀼𑀕𑀢𑁂, 𑀲𑀼𑀕𑀢𑀫𑁆𑀳𑀺, 𑀲𑀼𑀕𑀢𑀲𑁆𑀫𑀺𑀁, 𑀲𑀼𑀕𑀢𑁂𑀲𑀼.

𑀲𑀼𑀕𑀢𑁄 𑀲𑀼𑀕𑀢𑁄. 𑀲𑀼𑀕𑀢𑀁 𑀦𑀫𑀢𑀺. 𑀲𑀼𑀕𑀢𑁂𑀦 𑀓𑀢𑁄. 𑀲𑀼𑀕𑀢𑁂𑀦 𑀚𑀺𑀢𑁄. 𑀲𑀼𑀕𑀢𑀲𑁆𑀲 𑀤𑀤𑁂. 𑀲𑀼𑀕𑀢𑀸 𑀯𑀺𑀕𑀢𑁄. 𑀲𑀼𑀕𑀢𑀲𑁆𑀲 𑀲𑀼𑀢𑁄. 𑀲𑀼𑀕𑀢𑁂 𑀭𑀫𑀢𑁂. 𑀏𑀯𑀁 𑁋

𑀲𑀽𑀭𑀸+𑀲𑀼𑀭+𑀦𑀭𑁄+𑀭𑀕+𑀦𑀸𑀕+𑀬𑀓𑁆𑀔𑀸,

𑀕𑀦𑁆𑀥𑀩𑁆𑀩+𑀓𑀺𑀦𑁆𑀦𑀭+𑀫𑀦𑀼𑀲𑁆𑀲+𑀧𑀺𑀲𑀸𑀘+𑀧𑁂𑀢𑀸;

𑀫𑀸𑀢𑀗𑁆𑀕+𑀚𑀗𑁆𑀕𑀫+𑀢𑀼𑀭𑀗𑁆𑀕+𑀯𑀭𑀸𑀳+𑀲𑀻𑀳𑀸,

𑀩𑁆𑀬𑀕𑁆𑀖+𑀘𑁆𑀙+𑀓𑀘𑁆𑀙𑀧+𑀢𑀭𑀘𑁆𑀙+𑀫𑀺𑀕+𑀲𑁆𑀲+𑀲𑁄𑀡𑀸.

𑀆𑀮𑁄𑀓+𑀮𑁄𑀓+𑀦𑀺𑀮𑀬𑀸+𑀦𑀺𑀮+𑀘𑀸𑀕+𑀬𑁄𑀕𑀸,

𑀯𑀸𑀬𑀸𑀫+𑀕𑀸𑀫+𑀦𑀺𑀕𑀫𑀸+𑀕𑀫+𑀥𑀫𑁆𑀫+𑀓𑀸𑀫𑀸;

𑀲𑀗𑁆𑀖𑁄+𑀖+𑀖𑁄𑀲+𑀧𑀝𑀺𑀖𑀸+𑀲𑀯+𑀓𑁄𑀥+𑀮𑁄𑀪𑀸,

𑀲𑀸𑀭𑀫𑁆𑀪+𑀣𑀫𑁆𑀪+𑀫𑀤+𑀫𑀸𑀦+𑀧𑀫𑀸𑀤+𑀫𑀓𑁆𑀔𑀸.

𑀧𑀼𑀦𑁆𑀦𑀸𑀕+𑀧𑀽𑀕+𑀧𑀦𑀲𑀸+𑀲𑀦+𑀘𑀫𑁆𑀧𑀓+𑀫𑁆𑀩-

𑀳𑀺𑀦𑁆𑀢𑀸𑀮+𑀢𑀸𑀮+𑀯𑀓𑀼𑀮+𑀚𑁆𑀚𑀼𑀦+𑀓𑀺𑀁𑀲𑀼𑀓𑀸 𑀘;

𑀫𑀦𑁆𑀤𑀸𑀭+𑀓𑀼𑀦𑁆𑀤+𑀧𑀼𑀘𑀺𑀫𑀦𑁆𑀤+𑀓𑀭𑀜𑁆𑀚+𑀭𑀼𑀓𑁆𑀔𑀸,

𑀜𑁂𑀬𑁆𑀬𑀸 𑀫𑀬𑀽𑀭+𑀲𑀓𑀼𑀡+𑀡𑁆𑀟𑀚+𑀓𑁄𑀜𑁆𑀘+𑀳𑀁𑀲𑀸.

𑀲𑀼𑀕𑀢𑀲𑀤𑁆𑀤𑁄𑀯, 𑀬𑀢𑁄 𑀲𑀩𑁆𑀩𑁄 𑀲𑀤𑁆𑀤𑁄, 𑀦 𑀲𑀤𑁆𑀤𑀢𑀸𑀮𑀺𑀢𑀢𑁆𑀣𑁄𑀯, 𑀅𑀣 𑀔𑁄 𑀲𑀁𑀬𑁄𑀕𑀸𑀤𑀺𑀯𑀲𑁂𑀦𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑁂𑀦𑁂+𑀢𑀁 𑀯𑀼𑀘𑁆𑀘𑀢𑀺 𑁋

𑀲𑀁𑀬𑁄𑀕𑀸 𑀯𑀺𑀧𑁆𑀧𑀬𑁄𑀕𑀸 𑀘, 𑀲𑀸𑀳𑀘𑀭𑀺𑀬𑀸+𑀯𑀺𑀭𑁄𑀥𑀢𑁄;

𑀅𑀢𑁆𑀣𑀸 𑀧𑀓𑀭𑀡𑀸 𑀮𑀺𑀗𑁆𑀕𑀸, 𑀲𑀤𑁆𑀤𑀦𑁆𑀢𑀭𑀲𑀫𑀻𑀧𑀢𑁄.

𑀲𑀸𑀫𑀢𑁆𑀣𑁆𑀬𑁄+𑀘𑀺𑀢𑁆𑀭+𑀤𑁂𑀲𑁂𑀳𑀺, 𑀓𑀸𑀮+𑀩𑁆𑀬𑀢𑁆𑀢𑀸+𑀦𑀼𑀭𑀽𑀧𑀢𑁄;

𑀉𑀧𑀘𑀸𑀭+𑀓𑀸𑀓𑀼𑀪𑁂𑀤, 𑀲𑀫𑁆𑀩𑀦𑁆𑀥𑁂𑀳𑀼+𑀧𑀮𑀓𑁆𑀔𑀡𑀸.

𑀯𑀘𑀦𑀸 𑀘 𑀢𑀤𑀗𑁆𑀕𑀢𑁆𑀢𑀸, 𑀧𑀥𑀸𑀦𑀢𑁆𑀢𑀸𑀢𑀺𑀆𑀤𑀺𑀳𑀺;

𑀲𑀤𑁆𑀤+𑀢𑁆𑀣𑀸 𑀧𑀯𑀺𑀪𑀚𑁆𑀚𑀦𑁆𑀢𑁂, 𑀦 𑀲𑀤𑁆𑀤𑀸𑀤𑁂𑀯 𑀓𑁂𑀯𑀮𑀸𑀢𑀺.

𑀏𑀢𑁆𑀣 𑀲𑀁𑀬𑁄𑀕𑀢𑁄 𑀢𑀸𑀯, ‘‘𑀲𑀓𑀺𑀲𑁄𑀭𑀸 𑀥𑁂𑀦𑀼 𑀤𑀻𑀬𑀢𑀽’’𑀢𑀺, 𑀓𑀺𑀲𑁄𑀭𑁄 𑀅𑀲𑁆𑀲𑀧𑁄𑀢𑀓𑁄, 𑀢𑀁𑀲𑀁𑀬𑁄𑀕𑀢𑁄 𑀯𑀴𑀯𑀸 𑀏𑀯 𑀧𑀢𑀻𑀬𑀢𑁂.

𑀯𑀺𑀧𑁆𑀧𑀬𑁄𑀕𑀢𑁄 𑁋 ‘‘𑀅𑀓𑀺𑀲𑁄𑀭𑀸 𑀆𑀦𑀻𑀬𑀢𑀽’’𑀢𑀺 𑀢𑀧𑁆𑀧𑀝𑀺𑀲𑁂𑀥𑀸 𑀯𑀴𑀯𑀸 𑀏𑀯 𑀧𑀢𑀻𑀬𑀢𑁂.

𑀲𑀳𑀘𑀭𑀡𑀢𑁄 𑁋 ‘‘𑀭𑀸𑀫+𑀮𑀓𑁆𑀔𑀡’’𑀇𑀢𑀺 𑀉𑀪𑀺𑀦𑁆𑀦𑀁 𑀲𑀳𑀘𑀭𑀡𑁂𑀦 𑀭𑀸𑀫𑁄𑀢𑀺 𑀤𑀸𑀲𑀭𑀣𑀺 𑀏𑀯 𑀭𑀸𑀫𑁄, 𑀦 𑀅𑀜𑁆𑀜𑀸𑀪𑀺𑀥𑀸𑀦𑁄 𑀚𑀸𑀫𑀤𑀕𑀦𑁆𑀬𑀸𑀤𑀺. 𑀮𑀓𑁆𑀔𑀡𑁄𑀧𑀺 𑀲𑁄𑀫𑀺𑀢𑁆𑀢𑀺 𑀏𑀯, 𑀦 𑀢𑀼 𑀬𑁄 𑀓𑁄𑀘𑀺 𑀮𑀓𑁆𑀔𑀡𑁄.

𑀯𑀺𑀭𑁄𑀥𑀢𑁄 𑁋 ‘‘𑀭𑀸𑀫+𑀚𑁆𑀚𑀼𑀦𑀸’’ 𑀇𑀢𑀺 𑀪𑀕𑁆𑀕𑀯𑁄 𑀲𑀳𑀲𑁆𑀲𑀩𑀸𑀳𑀼 𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀢𑀺 𑀢𑁂 𑀏𑀯 𑀧𑀢𑀻𑀬𑀦𑁆𑀢𑁂, 𑀦 𑀤𑀸𑀲𑀭𑀣𑀺 𑀲𑀩𑁆𑀬𑀲𑀸𑀘𑀺 𑀘.

𑀅𑀢𑁆𑀣𑀢𑁄 𑁋 ‘‘𑀲𑀺𑀦𑁆𑀥𑀯+𑀫𑀸𑀦𑀬, 𑀧𑀯𑀺𑀲𑀸𑀫𑀺 𑀭𑀡𑀗𑁆𑀕𑀡’’𑀫𑀺𑀢𑀺 𑀭𑀡𑀗𑁆𑀕𑀡𑀧𑀯𑁂𑀲𑁄 𑀯𑀸𑀳𑀦𑀯𑀺𑀲𑁂𑀲𑁂𑀦 𑀳𑁄𑀢𑀻𑀢𑀺 𑀅𑀢𑁆𑀣𑀢𑁄 𑀢𑀼𑀭𑀗𑁆𑀕𑀧𑀢𑀻𑀢𑀺, 𑀦 𑀢𑀼 𑀮𑀯𑀡𑀯𑀺𑀲𑁂𑀲𑀁.

𑀧𑀓𑀭𑀡𑀢𑁄-𑀪𑁄𑀚𑀦𑀯𑀺𑀥𑀺𑀫𑁆𑀳𑀺 𑀉𑀧𑀲𑀗𑁆𑀔𑀭𑀺𑀬𑀫𑀸𑀦𑁂 ‘‘𑀲𑀺𑀦𑁆𑀥𑀯+𑀫𑀸𑀦𑀬𑁂’’𑀢𑀺, 𑀅𑀢𑁆𑀭 𑀳𑀺 𑀲𑀤𑁆𑀤𑀦𑁆𑀢𑀭𑀲𑁆𑀲𑀸+𑀪𑀸𑀯𑁂𑀧𑀺 𑀪𑁄𑀚𑀦𑁄𑀧𑀓𑀭𑀡𑀲𑀫𑀯𑀸𑀬+𑀫𑀸𑀮𑁄𑀓𑀺𑀢𑀪𑀸𑀯𑀢𑁄 𑀮𑀯𑀡𑁂 𑀧𑀝𑀺𑀧𑀢𑁆𑀢𑀺, 𑀢𑀸𑀤𑀺𑀲𑁄 𑀳𑀺 𑀧𑀢𑁆𑀣𑀸𑀯𑁄𑀢𑀺.

𑀮𑀺𑀗𑁆𑀕𑀢𑁄 𑁋 ‘‘𑀤𑁂𑀯𑀤𑀢𑁆𑀢𑀁 𑀧𑀞𑀫+𑀫𑀼𑀧𑀯𑁂𑀲𑀬 𑀲𑀫𑀸𑀭𑀸𑀥𑀺𑀢𑀕𑀼𑀭𑀼𑀁’’𑀢𑀺, 𑀅𑀢𑁆𑀭 𑀲𑀫𑀸𑀭𑀸𑀥𑀺𑀢𑀕𑀼𑀭𑀼𑀢𑁆𑀢𑁂𑀦 𑀮𑀺𑀗𑁆𑀕𑁂𑀦 𑀢𑀲𑁆𑀲 𑀩𑀸𑀳𑀼𑀲𑁆𑀲𑀘𑁆𑀘+𑀫𑀯𑀕𑀫𑁆𑀬𑀢𑁂, 𑀦 𑀢𑀼 𑀬𑁄 𑀓𑁄𑀘𑀺 𑀤𑁂𑀯𑀕𑀼𑀡𑁄.

𑀲𑀦𑁆𑀦𑀺𑀥𑀸𑀦𑀢𑁄 𑁋 ‘‘𑀅𑀚𑁆𑀚𑀼𑀦𑁄 𑀓𑀢𑀯𑀻𑀭𑀺𑀬𑁄𑀢𑀺’’ 𑀧𑀢𑀻𑀬𑀢𑁂, 𑀦𑁄 𑀅𑀓𑀢𑀯𑀻𑀭𑀺𑀬𑁄 𑀅𑀚𑁆𑀚𑀼𑀦𑁄𑀢𑀺.

𑀲𑀸𑀫𑀢𑁆𑀣𑀺𑀬𑀢𑁄 𑁋 ‘‘𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 𑀉𑀤𑀭𑁂 𑀅𑀲𑀢𑀺 𑀓𑀜𑁆𑀜𑀸 𑀏𑀯 𑀦𑀢𑁆𑀣𑀻𑀢𑀺 𑀢𑀲𑁆𑀲𑀸 𑀓𑀺𑀲𑀸𑀗𑁆𑀕𑀺𑀬𑀸 𑀫𑀚𑁆𑀛𑀧𑀤𑁂𑀲𑁄𑀢𑀺 𑀧𑀢𑀻𑀬𑀢𑁂.

𑀑𑀘𑀺𑀢𑁆𑀭𑀢𑁄 𑁋 ‘‘𑀭𑀸𑀫𑀲𑀤𑀺𑀲𑁄+𑀬𑀁’’ 𑀇𑀢𑀺, 𑀅𑀢𑁆𑀭 𑀳𑀺 𑀭𑀸𑀫𑁄 𑀧𑀬𑀼𑀢𑁆𑀢𑀤𑀸𑀲𑀭𑀣𑀺𑀲𑁆𑀫𑀺𑀁 𑀪𑀺𑀬𑁆𑀬𑁄 𑀲𑀸𑀥𑀸𑀭𑀡𑁄 𑀧𑀭𑀺𑀘𑀬𑁄𑀢𑀺 𑀤𑀸𑀲𑀭𑀣𑀺 𑀏𑀯 𑀧𑀢𑀻𑀬𑀢𑁂, 𑀦 𑀪𑀕𑁆𑀕𑀯𑀭𑀸𑀫𑁄.

𑀤𑁂𑀲𑀢𑁄 𑁋 ‘‘𑀧𑁄𑀝𑁆𑀞𑀧𑀸’’ 𑀇𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀤𑁂𑀲𑁂 𑀧𑀲𑀁𑀲𑀸𑀯𑀘𑀦𑀁. 𑀓𑀺𑀲𑁆𑀫𑀺𑀜𑁆𑀘𑀺 𑀅𑀓𑁆𑀓𑁄𑀲𑀯𑀘𑀦𑀁.

𑀓𑀸𑀮𑀢𑁄 𑁋 ‘‘𑀧𑀘𑁂’’𑀢𑀺 𑀤𑀓𑁆𑀔𑀺𑀡𑀸𑀧𑀣𑁂 𑀓𑀢𑁆𑀣𑀘𑀺 𑀧𑀼𑀩𑁆𑀩𑀡𑁆𑀳𑁂 𑀬𑀸𑀕𑀼𑀧𑀸𑀓𑁂, 𑀲𑀸𑀬𑀡𑁆𑀳𑁂 𑀢𑀼 𑀑𑀤𑀦𑀧𑀸𑀓𑁂.

𑀩𑁆𑀬𑀢𑁆𑀢𑀺𑀢𑁄 𑁋 ‘‘𑀕𑀸𑀫𑀲𑁆𑀲 𑀅𑀤𑁆𑀥’’ 𑀫𑀺𑀢𑀺 𑀲𑀫𑀪𑀸𑀕𑁂, 𑀦𑀧𑀼𑀁𑀲𑀓𑀢𑁆𑀢𑀸. ‘‘𑀕𑀸𑀫𑀲𑁆𑀲 𑀅𑀤𑁆𑀥𑁄’’𑀢𑀺 𑀧𑀼𑀫𑀢𑁆𑀢𑁂𑀦 𑀢𑀼 𑀅𑀲𑀫𑀪𑀸𑀕𑁂.

𑀅𑀦𑀼𑀭𑀽𑀧𑀢𑁄 𑁋 ‘‘𑀦𑀭𑀧𑀢𑀺 𑀲𑀸𑀥𑀼 𑀭𑀓𑁆𑀔𑀢𑀺 𑀕𑁄𑀫𑀡𑁆𑀟𑀮’’𑀫𑀺𑀢𑀺 𑀫𑀳𑀻𑀫𑀡𑁆𑀟𑀮𑀧𑀸𑀮𑀦𑀁 𑀭𑀸𑀚𑀺𑀦𑁄+𑀦𑀼𑀭𑀽𑀧+𑀫𑀺𑀢𑀺 𑀫𑀳𑀻𑀫𑀡𑁆𑀟𑀮𑀧𑀸𑀮𑀦𑁂𑀯 𑀧𑀢𑀻𑀢𑀺, 𑀦 𑀢𑀼 𑀕𑁄𑀬𑀽𑀣𑀭𑀓𑁆𑀔𑀦𑁂.

𑀉𑀧𑀘𑀸𑀭𑀢𑁄 𑁋 𑀅𑀢𑀁𑀲𑀪𑀸𑀯𑁂 𑀢𑀁𑀲𑀪𑀸𑀯𑀸𑀭𑁄𑀧𑀦+𑀫𑀼𑀧𑀘𑀸𑀭𑁄, 𑀲 𑀘 𑀢𑀤𑀝𑁆𑀞𑁄, 𑀢𑀤𑁆𑀥𑀫𑁆𑀫𑁄, 𑀢𑀁𑀲𑀳𑀘𑀭𑀺𑀬𑁄, 𑀢𑀁𑀲𑀫𑀻𑀧𑁄𑀢𑀺 𑀘𑀢𑀼𑀩𑁆𑀩𑀺𑀥𑁄, 𑀢𑀢𑁆𑀣 𑀬𑀣𑀸𑀓𑁆𑀓𑀫𑀁 𑀫𑀜𑁆𑀘𑀸 𑀉𑀓𑁆𑀓𑁄𑀲𑀦𑁆𑀢𑀺, 𑀅𑀕𑁆𑀕𑀺 𑀫𑀸𑀡𑀯𑁄, 𑀬𑀝𑁆𑀞𑀺𑀁 𑀧𑀯𑁂𑀲𑀬, 𑀕𑀗𑁆𑀕𑀸𑀬𑀁 𑀯𑀚𑁄𑀢𑀺.

𑀓𑀸𑀓𑀼𑀢𑁄-𑀓𑀸𑀓𑀼𑀲𑀤𑁆𑀤𑁄 𑀇𑀢𑁆𑀣𑀺𑀬𑀁, 𑀲 𑀘 𑀯𑀺𑀓𑀸𑀭+𑀲𑁄𑀓+𑀪𑀻𑀢𑀺+𑀥𑀦𑀺𑀭𑀽𑀧𑁂𑀲𑀼 𑀤𑀺𑀲𑁆𑀲𑀢𑀺, 𑀯𑀢𑁆𑀢𑀼 𑀓𑀸𑀬𑀯𑀺𑀓𑀸𑀭𑀸 𑀓𑀣𑀜𑁆𑀘𑀺 𑀢𑀁 𑀅𑀓𑀢𑀯𑀸𑀅𑀧𑀺 𑀓𑁂𑀦𑀘𑀺 𑀅𑀜𑁆𑀜𑁂𑀦 ‘‘𑀓𑀺𑀁 𑀢𑁆𑀯𑀁 𑀢𑀁 𑀅𑀓𑀸𑀲𑀺 ‘‘𑀇𑀢𑀺 𑀧𑀼𑀝𑁆𑀞𑁄 𑀓𑁄𑀧𑁂𑀦 𑀪𑀫𑀼𑀪𑁂𑀤𑀸 ‘‘𑀅𑀳𑀁 𑀓𑀢𑀯𑀸 𑀅𑀫𑁆𑀳𑀻’’𑀢𑀺 𑀓𑀣𑁂𑀢𑀺, 𑀢𑀲𑁆𑀲 𑀪𑀫𑀼𑀪𑁂𑀤𑀓𑁆𑀭𑀺𑀬𑀸 𑀅𑀓𑁆𑀭𑀺𑀬𑀸𑀧𑀝𑀺𑀜𑁆𑀜𑀁 𑀲𑀽𑀘𑀬𑀢𑀺.

𑀲𑀫𑁆𑀩𑀦𑁆𑀥 𑀢𑁄 𑁋 ‘‘𑀫𑀸𑀢𑀭𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁, 𑀧𑀺𑀢𑀭𑀺 𑀲𑀼𑀲𑁆𑀲𑀽𑀬𑀺𑀢𑀩𑁆𑀩𑀁’’ 𑀇𑀢𑀺, 𑀅𑀢𑁆𑀭 𑀳𑀺 𑀲𑀫𑀸𑀢𑀭𑀺 𑀲𑀧𑀺𑀢𑀭𑀻𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸𑀪𑀸𑀯𑁂𑀧𑀺 𑀲𑀸 𑀫𑀸𑀢𑀸 𑀲𑁄 𑀧𑀺𑀢𑀸 𑀘 𑀅𑀲𑁆𑀲 𑀧𑀼𑀢𑁆𑀢𑀲𑁆𑀲𑀸𑀢𑀺 𑀧𑀢𑀻𑀬𑀢𑁂.

𑀉𑀧𑀮𑀓𑁆𑀔𑀡𑀢𑁄 𑁋 ‘‘𑀓𑀸𑀓𑁂𑀳𑀺 𑀭𑀓𑁆𑀔𑀺𑀢𑀩𑁆𑀩𑀁 𑀤𑀥𑀻’’𑀢𑀺 𑀓𑀸𑀓𑀲𑀤𑁆𑀤𑁄 𑀲𑀩𑁆𑀩𑁂𑀲+𑀫𑀼𑀧𑀖𑀸𑀢𑀓𑀸𑀦𑀁 𑀲𑀸𑀫𑀜𑁆𑀜𑀁 𑀉𑀧𑀮𑀓𑁆𑀔𑁂𑀢𑀻𑀢𑀺 𑀲𑀼𑀦𑀔𑀸𑀤𑀺𑀲𑀩𑁆𑀩𑁂𑀳𑀺𑀧𑀺 𑀦𑀺𑀯𑀸𑀭𑀻𑀬𑀢𑁂.

𑀯𑀘𑀦𑀢𑁄 𑁋 ‘‘𑀤𑀸𑀭𑀸’’𑀇𑀢𑀺 𑀤𑀸𑀭𑀲𑀤𑁆𑀤𑁄 𑀓𑀮𑀢𑁆𑀢𑁂 𑀩𑀳𑀼𑀯𑀘𑀦𑀦𑁆𑀢𑁄, 𑀅𑀜𑁆𑀜𑀢𑁆𑀣 𑀅𑀦𑀺𑀬𑀢𑀯𑀘𑀦𑁄.

𑀢𑀤𑀗𑁆𑀕𑀢𑁆𑀢𑀸 𑁋 ‘‘𑀲𑀚𑁆𑀚𑀺𑀢𑀁 𑀪𑁄𑀚𑀦’’𑀫𑀺𑀢𑀺 𑀯𑀼𑀢𑁆𑀢𑁂 𑀢𑀧𑁆𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀢𑀤𑀼𑀧𑀓𑀭𑀡 𑀆𑀲𑀦, 𑀧𑀸𑀢𑀺, 𑀩𑁆𑀬𑀜𑁆𑀚𑀦𑀸𑀤𑀻𑀦𑀁 𑀲𑀫𑁆𑀧𑀸𑀤𑀦𑀫𑁆𑀧𑀺 𑀧𑀢𑀻𑀬𑀢𑁂.

𑀧𑀥𑀸𑀦𑀪𑀸𑀯𑀢𑁄 𑁋 ‘‘𑀦𑀺𑀕𑁆𑀕𑀘𑁆𑀙𑀢𑀺 𑀅𑀯𑀦𑀺𑀦𑀸𑀣𑁄’’𑀢𑀺 𑀭𑀜𑁆𑀜𑁄 𑀦𑀺𑀕𑁆𑀕𑀫𑀦𑁂𑀦 𑀢𑀤𑀼𑀧𑀚𑀻𑀯𑀻𑀦𑀫𑁆𑀧𑀺 𑀦𑀺𑀕𑁆𑀕𑀫𑀦𑀁 𑀯𑀺𑀜𑁆𑀜𑀸𑀬𑀢𑀺.

𑀯𑀼𑀢𑁆𑀢𑀜𑁆𑀘 𑁋

𑀦𑁂𑀬𑁆𑀬𑀦𑀻𑀢𑀢𑁆𑀣𑀲𑀼𑀢𑁆𑀢𑁂𑀲𑀼, 𑀜𑁂𑀬𑁆𑀬𑀁 𑀲𑀤𑁆𑀤𑀢𑁆𑀣𑀫𑀢𑁆𑀢𑀓𑀁;

𑀦𑁂+𑀢𑁆𑀣 𑀯𑀢𑁆𑀢𑀩𑁆𑀩𑀅𑀢𑁆𑀣𑁂𑀦, 𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀓𑀁 𑀪𑀯𑁂𑀢𑀺.

𑀏𑀯+𑀫𑀜𑁆𑀜𑁂𑀲𑀫𑁆𑀧𑀺 𑀅𑀓𑀸𑀭𑀦𑁆𑀢𑀸𑀦𑀁 𑀧𑀼𑀮𑁆𑀮𑀺𑀗𑁆𑀕𑀸𑀦𑀁 𑀲𑀤𑁆𑀤𑀸𑀦𑀁 𑀭𑀽𑀧𑀦𑀬𑁄 𑀓𑁆𑀭𑀺𑀬𑀸+𑀪𑀺𑀲𑀫𑁆𑀩𑀦𑁆𑀥𑁄 𑀘. 𑀲𑀼𑀕𑀢𑀲𑀤𑁆𑀤𑀢𑁄 𑀬𑀲𑁆𑀲 𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀁 𑀯𑀓𑁆𑀔𑀸𑀫. 𑀇𑀢𑁄 𑀧𑀭𑀁 𑀙𑀝𑁆𑀞𑀺𑀬𑀸 𑀘𑀢𑀼𑀢𑁆𑀣𑀻𑀲𑀫𑀢𑁆𑀢𑀸 𑀧𑀜𑁆𑀘𑀫𑀻𑀩𑀳𑀼𑀯𑀘𑀦𑀲𑁆𑀲 𑀘 𑀢𑀢𑀺𑀬𑀸𑀩𑀳𑀼𑀯𑀘𑀦𑁂𑀦 𑀲𑀫𑀢𑁆𑀢𑀸 𑀦 𑀢𑀸 𑀤𑀲𑁆𑀲𑀺𑀬𑀦𑁆𑀢𑁂.

𑀕𑀼𑀫𑁆𑀩 𑀲𑀺, ‘‘𑀅𑀢𑁄’’ ‘‘𑀲𑀺𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁧𑁦. 𑀓𑁆𑀯𑀘𑁂+𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀧𑀭𑀲𑁆𑀲 𑀲𑀺𑀲𑁆𑀲 𑀏 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀕𑀼𑀫𑁆𑀩𑁂 𑀕𑀼𑀫𑁆𑀩𑁄, 𑀕𑀼𑀫𑁆𑀩𑀸. 𑀪𑁄 𑀕𑀼𑀫𑁆𑀩 𑀕𑀼𑀫𑁆𑀩𑀸, 𑀪𑀯𑀦𑁆𑀢𑁄 𑀕𑀼𑀫𑁆𑀩𑀸 𑀇𑀘𑁆𑀘𑀸𑀤𑀺 𑀲𑀼𑀕𑀢𑀲𑀫𑀁. 𑀏𑀯𑀁 𑀨𑀼𑀲𑁆𑀲𑀺𑀢𑀕𑁆𑀕𑁂 𑀨𑀼𑀲𑁆𑀲𑀺𑀢𑀕𑁆𑀕𑁄, 𑀯𑀢𑁆𑀢𑀩𑁆𑀩𑁂 𑀯𑀢𑁆𑀢𑀩𑁆𑀩𑁄 𑀇𑀘𑁆𑀘𑀸𑀤𑀺. 𑀲𑀺𑀲𑁆𑀲𑁄+𑀓𑀸𑀭𑀲𑁆𑀲 𑀦𑀺𑀘𑁆𑀘𑀢𑁆𑀢𑀸 𑀓𑀢𑁆𑀣𑀘𑀺 𑀧𑀓𑁆𑀔𑁂 𑀏𑀓𑀸𑀭𑀢𑁆𑀢+𑀫𑀺𑀤+𑀫𑀸𑀭𑀤𑁆𑀥𑀦𑁆𑀢𑀺 𑀲𑀺𑀲𑁆𑀲𑁄+𑀓𑀸𑀭𑀧𑀓𑁆𑀔𑁂 𑀏𑀯 𑀪𑀯𑀢𑀻𑀢𑀺 ‘‘𑀅𑀁 𑀦𑀧𑀼𑀁𑀲𑀓𑁂’’𑀢𑀺 𑀅+𑀫𑀸𑀤𑁂𑀲𑁂𑀦 𑀏𑀓𑀸𑀭𑀲𑁆𑀲 𑀦𑀧𑀼𑀁𑀲𑀓𑀯𑀺𑀲𑀬𑁂 𑀩𑀸𑀥𑀺𑀢𑀢𑁆𑀢𑀸 ‘‘𑀩𑀳𑀼𑀮𑀁’’ 𑀯𑀺𑀥𑀸𑀦𑀸 𑀦𑀧𑀼𑀁𑀲𑀓𑁂𑀧𑀺 𑀲𑀼𑀔𑁂 𑀤𑀼𑀓𑁆𑀔𑁂𑀢𑀺 𑀓𑁆𑀯𑀘𑀺 𑀳𑁄𑀢𑁂𑀯.

‘‘𑀬𑁄𑀲𑁆𑀲’’ ‘‘𑀝𑁂’’𑀢𑀺 𑀘 𑀯𑀢𑁆𑀢𑀢𑁂.

𑁧𑁩𑁫. 𑀏𑀓𑀘𑁆𑀘𑀸𑀤𑀻𑀳+𑀢𑁄

𑀅𑀓𑀸𑀭𑀦𑁆𑀢𑁂𑀳𑀺 𑀏𑀓𑀘𑁆𑀘𑀸𑀤𑀻𑀳𑀺 𑀬𑁄𑀦𑀁 𑀝𑁂 𑀳𑁄𑀢𑀺. 𑀏𑀓𑀘𑁆𑀘𑁄, 𑀏𑀓𑀘𑁆𑀘𑁂. 𑀪𑁄 𑀏𑀓𑀘𑁆𑀘 𑀏𑀓𑀘𑁆𑀘𑀸, 𑀏𑀓𑀘𑁆𑀘𑁂. 𑀏𑀓𑀘𑁆𑀘𑀁, 𑀏𑀓𑀘𑁆𑀘𑁂. 𑀏𑀯𑀁 𑀏𑀲+𑀲+𑀧𑀞𑀫𑀲𑀤𑁆𑀤𑀸𑀦𑀁.

𑀓𑁄𑀥𑁄, 𑀓𑁄𑀥𑀸. 𑀪𑁄 𑀓𑁄𑀥 𑀓𑁄𑀥𑀸, 𑀓𑁄𑀥𑀸. 𑀓𑁄𑀥𑀁, 𑀓𑁄𑀥𑁂.

‘‘𑀦𑀸𑀲𑁆𑀲’’ ‘‘𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁦𑁭. 𑀓𑁄𑀥𑀸𑀤𑀻𑀳𑀺

𑀓𑁄𑀥𑀸𑀤𑀻𑀳𑀺 𑀦𑀸𑀲𑁆𑀲 𑀲𑀸 𑀳𑁄𑀢𑀺 𑀯𑀸. 𑀓𑁄𑀥𑀲𑀸 𑀓𑁄𑀥𑁂𑀦. 𑀅𑀢𑁆𑀣𑀲𑀸 𑀅𑀢𑁆𑀣𑁂𑀦. ‘‘𑀬𑁂 𑀉𑀢𑁆𑀢𑀫𑀢𑁆𑀣𑀸𑀦𑀺 𑀢𑀬𑀺 𑀮𑀪𑀺𑀫𑁆𑀳𑀸’’𑀢𑀺 𑀅𑀢𑁆𑀣𑀲𑀤𑁆𑀤𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀧𑀺 𑀤𑀺𑀲𑁆𑀲𑀢𑀺.

‘‘𑀲𑁆𑀫𑀺𑀦𑁄 𑀝𑀻’’𑀢𑀺 𑀘 𑀯𑀢𑁆𑀢𑀢𑁂.

𑁧𑁭𑁫. 𑀤𑀺𑀯𑀸𑀤𑀺𑀢𑁄

𑀤𑀺𑀯𑀸𑀤𑀻𑀳𑀺 𑀦𑀸𑀫𑁂𑀳𑀺 𑀲𑁆𑀫𑀺𑀦𑁄 𑀝𑀺 𑀳𑁄𑀢𑀺 𑀦𑀺𑀘𑁆𑀘𑀁. 𑀤𑀺𑀯𑀺, 𑀏𑀯𑀁 𑀪𑀼𑀯𑀺. 𑀏𑀢𑁆𑀣𑀝𑀺𑀫𑁆𑀳𑀺 𑀦𑀺𑀘𑁆𑀘𑀁 𑀯𑀓𑀸𑀭𑀸𑀕𑀫𑁄 𑀭𑀲𑁆𑀲𑁄 𑀘. 𑀏𑀢𑁆𑀣 𑀪𑀽𑀲𑀤𑁆𑀤𑁄 𑀯𑀥𑀽𑀲𑀤𑁆𑀤𑀲𑀫𑀁.

‘‘𑀯𑁂’’𑀢𑀺 𑀯𑀢𑁆𑀢𑀢𑁂.

𑁧𑁪𑁪. 𑀫𑀦𑀸𑀤𑀻𑀳𑀺 𑀲𑁆𑀫𑀺𑀁+𑀲𑀁+𑀦𑀸+𑀲𑁆𑀫𑀸𑀦𑀁 𑀲𑀺+𑀲𑁄+𑀑+𑀲𑀸+𑀲𑀸

𑀫𑀦𑀸𑀤𑀻𑀳𑀺 𑀲𑁆𑀫𑀺+𑀫𑀸𑀤𑀻𑀦𑀁 𑀲𑀺+𑀲𑁄+𑀑+𑀲𑀸+𑀲𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀫𑀦𑁄, 𑀫𑀦𑀸. 𑀪𑁄 𑀫𑀦 𑀫𑀦𑀸, 𑀫𑀦𑀸. 𑀫𑀦𑁄, 𑀫𑀦𑀁, 𑀫𑀦𑁂. 𑀫𑀦𑀲𑀸 𑀫𑀦𑁂𑀦, 𑀫𑀦𑁂𑀳𑀺 𑀫𑀦𑁂𑀪𑀺. 𑀫𑀦𑀲𑁄 𑀫𑀦𑀲𑁆𑀲, 𑀫𑀦𑀸𑀦𑀁. 𑀫𑀦𑀲𑀸 𑀫𑀦𑀸 𑀫𑀦𑀫𑁆𑀳𑀸 𑀫𑀦𑀲𑁆𑀫𑀸, 𑀫𑀦𑁂𑀳𑀺 𑀫𑀦𑁂𑀪𑀺. 𑀫𑀦𑀲𑀺 𑀫𑀦𑀫𑁆𑀳𑀺 𑀫𑀦𑀲𑁆𑀫𑀺𑀁, 𑀫𑀦𑁂𑀲𑀼.

𑀏𑀯𑀁 𑀯𑀘𑁄 𑀧𑀬𑁄 𑀢𑁂𑀚𑁄,

𑀢𑀧𑁄 𑀘𑁂𑀢𑁄 𑀢𑀫𑁄 𑀬𑀲𑁄.

𑀅𑀬𑁄 𑀯𑀬𑁄 𑀲𑀺𑀭𑁄 𑀲𑀭𑁄,

𑀉𑀭𑁄+𑀢𑁆𑀬𑁂+𑀢𑁂 𑀫𑀦𑀸𑀤𑀬𑁄.

𑀭𑀽𑀧𑀲𑀺𑀤𑁆𑀥𑀺𑀬𑀁 𑀅𑀳+𑀭𑀳𑀲𑀤𑁆𑀤𑀸 𑀫𑀦𑀸𑀤𑀻𑀲𑀼 𑀧𑀞𑀺𑀢𑀸. 𑀅𑀳𑀲𑁆𑀲 𑀆𑀧𑀸𑀤𑀺𑀢𑁆𑀢𑀸 𑀭𑀳𑁄𑀢𑀺 𑀦𑀺𑀧𑀸𑀢𑀢𑁆𑀢𑀸 𑀭𑀳𑀲𑀻𑀢𑀺 𑀯𑀺𑀪𑀢𑁆𑀬𑀦𑁆𑀢𑀧𑀝𑀺𑀭𑀽𑀧𑀓𑀦𑀺𑀧𑀸𑀢𑀢𑁆𑀢𑀸 𑀇𑀥 𑀦 𑀕𑀳𑀺𑀢𑀸.

𑀕𑀘𑁆𑀙𑀦𑁆𑀢 𑀲𑀺, ‘‘𑀲𑀺𑀲𑁆𑀲’’ ‘‘𑀯𑁂’’𑀢𑀺 𑀘 𑀯𑀢𑁆𑀢𑀢𑁂. 𑀧𑀭𑀢𑁄 𑀪𑀺𑀬𑁆𑀬𑁄 𑀦𑀸𑀦𑀼𑀯𑀢𑁆𑀢𑀬𑀺𑀲𑁆𑀲𑀸𑀫, 𑀯𑀼𑀢𑁆𑀢𑀺𑀬𑀸 𑀏𑀯 𑀅𑀦𑀼𑀯𑀢𑁆𑀢𑀲𑁆𑀲 𑀕𑀫𑁆𑀬𑀫𑀸𑀦𑀢𑁆𑀢𑀸.

𑁧𑁪𑁮. 𑀦𑁆𑀢𑀲𑁆𑀲𑀁

𑀲𑀺𑀫𑁆𑀳𑀺 𑀦𑁆𑀢𑀧𑀘𑁆𑀘𑀬𑀲𑁆𑀲 𑀅𑀁 𑀳𑁄𑀢𑀺 𑀯𑀸. ‘‘𑀲𑀼𑀢𑀸𑀦𑀼𑀫𑀺𑀢𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑁄𑀯 𑀩𑀮𑀯𑀸’’𑀢𑀺 𑀜𑀸𑀬𑀸 ‘‘𑀦𑁆𑀢𑀲𑁆𑀲𑀸’’𑀢𑀺 𑀲𑀼𑀢𑀢𑁆𑀢𑀸 𑀦𑁆𑀢𑀲𑁆𑀲𑁂𑀯 𑀅𑀁, 𑀦 𑀢𑀤𑀦𑁆𑀢𑀲𑁆𑀲 𑀅𑀦𑀼𑀫𑀺𑀢𑀲𑁆𑀲 𑀲𑀤𑁆𑀤𑀲𑁆𑀲. 𑀏𑀯+𑀫𑀼𑀧𑀭𑀺𑀧𑀺 𑀦𑁆𑀢+𑀦𑁆𑀢𑀽𑀦𑀁 𑀆𑀤𑁂𑀲𑀯𑀺𑀥𑀸𑀦𑀝𑁆𑀞𑀸𑀦𑁂𑀲𑀼. ‘‘𑀕𑀲𑀺𑀦𑀁’’𑀢𑀺 𑀲𑀺𑀮𑁄𑀧𑁄. 𑀕𑀘𑁆𑀙𑀁 𑀕𑀘𑁆𑀙𑀦𑁆𑀢𑁄.

𑁨𑁧𑁫. 𑀦𑁆𑀢+𑀦𑁆𑀢𑀽𑀦𑀁 𑀦𑁆𑀢𑁄 𑀬𑁄𑀫𑁆𑀳𑀺 𑀧𑀞𑀫𑁂

𑀧𑀞𑀫𑁂 𑀬𑁄𑀫𑁆𑀳𑀺 𑀦𑁆𑀢+𑀦𑁆𑀢𑀽𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀦𑁆𑀢𑁄𑀇𑀘𑁆𑀘𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀲 𑀘 𑀩𑀳𑀼𑀮𑀸𑀥𑀺𑀓𑀸𑀭𑀸 𑀧𑀼𑀫𑁂𑀯, 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸.

𑁨𑁧𑁮. 𑀝+𑀝𑀸+𑀅𑀁 𑀕𑁂

𑀕𑁂 𑀧𑀭𑁂 𑀦𑁆𑀢+𑀦𑁆𑀢𑀽𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀝+𑀝𑀸+𑀅𑀁𑀇𑀘𑁆𑀘𑀸𑀤𑁂𑀲𑀸 𑀦𑀺𑀘𑁆𑀘𑀁 𑀳𑁄𑀦𑁆𑀢𑀺 𑀩𑀳𑀼𑀮𑀁. 𑀪𑁄 𑀕𑀘𑁆𑀙 𑀕𑀘𑁆𑀙𑀸 𑀕𑀘𑁆𑀙𑀁, 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸.

𑁯𑁨. 𑀦𑁆𑀢𑀲𑁆𑀲 𑀘 𑀝 𑀯𑀁+𑀲𑁂

𑀅𑀁𑀲𑁂𑀲𑀼 𑀦𑁆𑀢𑀧𑀘𑁆𑀘𑀬𑀲𑁆𑀲 𑀝 𑀳𑁄𑀢𑀺 𑀯𑀸 𑀦𑁆𑀢𑀼𑀲𑁆𑀲 𑀘. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸+𑀬𑀁. 𑀕𑀘𑁆𑀙𑀁 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑁂.

𑁨𑁧𑁭. 𑀢𑁄+𑀢𑀸+𑀢𑀺+𑀢𑀸 𑀲+𑀲𑁆𑀫𑀸+𑀲𑁆𑀫𑀺𑀁 𑀦𑀸𑀲𑀼

𑀲+𑀲𑁆𑀫𑀸+𑀲𑁆𑀫𑀺𑀁+𑀦𑀸𑀲𑀼 𑀦𑁆𑀢+𑀦𑁆𑀢𑀽𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑁄+𑀢𑀸+𑀢𑀺+𑀢𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀕𑀘𑁆𑀙𑀢𑀸 𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑁂𑀳𑀺 𑀕𑀘𑁆𑀙𑀦𑁆𑀢𑁂𑀪𑀺. 𑀕𑀘𑁆𑀙𑀢𑁄 𑀕𑀘𑁆𑀙𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲.

𑁨𑁧𑁬. 𑀢𑀁 𑀦𑀁𑀫𑁆𑀳𑀺

𑀦𑀁𑀫𑁆𑀳𑀺 𑀦𑁆𑀢+𑀦𑁆𑀢𑀽𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀁 𑀯𑀸 𑀳𑁄𑀢𑀺. 𑀕𑀘𑁆𑀙𑀢𑀁 𑀕𑀘𑁆𑀙𑀦𑁆𑀢𑀸𑀦𑀁. 𑀕𑀘𑁆𑀙𑀢𑀸 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀫𑁆𑀳𑀸 𑀕𑀘𑁆𑀙𑀦𑁆𑀢𑀲𑁆𑀫𑀸. 𑀕𑀘𑁆𑀙𑀢𑀺 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑀫𑁆𑀳𑀺 𑀕𑀘𑁆𑀙𑀦𑁆𑀣𑀲𑁆𑀫𑀺𑀁, 𑀘𑁆𑀙𑁂𑀦𑁆𑀢𑁂𑀲𑀼.

𑀏𑀯𑀁 𑀫𑀳𑀁 𑀘𑀭𑀁 𑀢𑀺𑀝𑁆𑀞𑀁, 𑀤𑀤𑀁 𑀪𑀼𑀜𑁆𑀚𑀁 𑀲𑀼𑀡𑀁 𑀧𑀘𑀁;

𑀚𑀬𑀁 𑀚𑀻𑀭𑀁 𑀯𑀘𑀁 𑀧𑀻𑀬𑀁, 𑀲𑀭𑀁 𑀓𑀼𑀩𑁆𑀩𑀁 𑀚𑀧𑀁 𑀯𑀚𑀁.

𑀇𑀘𑁆𑀘𑀸𑀤𑀬𑁄.

𑀪𑀯𑀦𑁆𑀢 𑀲𑀺,