𑁪𑁭. 𑀢𑀤𑀫𑀺𑀦𑀸𑀤𑀻𑀦𑀺

𑀢𑀤𑀫𑀺𑀦𑀸𑀤𑀻𑀦𑀺 𑀦𑀺𑀧𑁆𑀧𑀚𑁆𑀚𑀦𑁆𑀢𑀺. ‘‘𑀬+𑀤𑀮𑀓𑁆𑀔𑀡𑀺𑀓𑀁, 𑀢𑀁 𑀦𑀺𑀧𑀸𑀢𑀦𑀸’’𑀢𑀺 𑀜𑀸𑀬𑀸 𑀮𑀓𑁆𑀔𑀡𑀦𑁆𑀢𑀭𑁂𑀦 𑀅𑀯𑀺𑀳𑀺𑀢𑀸 𑀤𑁂𑀲+𑀮𑁄𑀧𑀸+𑀕𑀫+𑀯𑀺𑀧𑀮𑁆𑀮𑀸𑀲𑀸, 𑀲𑀩𑁆𑀩𑀢𑁆𑀣 𑀇𑀫𑀺𑀦𑀸𑀯 𑀤𑀝𑁆𑀞𑀩𑁆𑀩𑀸. 𑀇𑀤𑀜𑁆𑀘 𑀧𑀭𑁂𑀲𑀁 𑀧𑀺𑀲𑁄𑀤𑀭𑀸𑀤𑀺𑀫𑀺𑀯 𑀤𑀝𑁆𑀞𑀩𑁆𑀩𑀁. 𑀨𑀼𑀲𑀺𑀢𑀁=𑀚𑀮𑀩𑀺𑀦𑁆𑀤𑀼, 𑀨𑀼𑀲𑀺𑀢+𑀫𑀼𑀤𑀭+𑀫𑀲𑁆𑀲 𑀧𑀺𑀲𑁄𑀤𑀭𑀁. 𑀇𑀲𑁆𑀲 𑀅𑀓𑀸𑀭𑁂 𑀢𑀁 𑀇𑀫𑀺𑀦𑀸=𑀢𑀤𑀫𑀺𑀦𑀸, 𑀲𑀓𑀺𑀁 𑀆𑀕𑀸𑀫𑀻=𑀲𑀓𑀤𑀸𑀕𑀸𑀫𑀻, 𑀥𑀲𑁆𑀲 𑀤𑀓𑀸𑀭𑁂 𑀏𑀓𑀁 𑀇𑀥 𑀅𑀳𑀁=𑀏𑀓+𑀫𑀺𑀤𑀸+𑀳𑀁, 𑀯𑀺𑀥𑀲𑁆𑀲 𑀯𑀺𑀤𑀸𑀤𑁂𑀲𑁄 𑀲𑀁𑀯𑀺𑀥𑀸𑀬 𑀅𑀯𑀳𑀸𑀭𑁄=𑀲𑀁𑀯𑀺𑀤𑀸𑀯𑀳𑀸𑀭𑁄, 𑀯𑀸𑀭𑀺𑀲𑀤𑁆𑀤𑀲𑁆𑀲 𑀯𑀓𑀸𑀭𑁂, 𑀳𑀲𑁆𑀲 𑀮𑀓𑀸𑀭𑁂 𑀘 𑀓𑀢𑁂 𑀯𑀸𑀭𑀺𑀯𑀸𑀳𑀓𑁄=𑀯𑀮𑀸𑀳𑀓𑁄, 𑀚𑀻𑀯𑀦𑀲𑁆𑀲 𑀚𑀻𑀆𑀤𑁂𑀲𑁄, 𑀚𑀻𑀯𑀦𑀲𑁆𑀲 𑀫𑀼𑀢𑁄=𑀚𑀻𑀫𑀽𑀢𑁄. 𑀙𑀯𑀲𑁆𑀲 𑀲𑀼𑀆𑀤𑁂𑀲𑁂, 𑀲𑀬𑀦𑀲𑁆𑀲 𑀲𑀸𑀦𑀸𑀤𑁂𑀲𑁂 𑀘 𑀓𑀢𑁂 𑀙𑀯𑀲𑁆𑀲 𑀲𑀬𑀦𑀁=𑀲𑀼𑀲𑀸𑀦𑀁. 𑀉𑀤𑁆𑀥𑀲𑁆𑀲 𑀉𑀤𑀼𑀆𑀤𑁂𑀲𑁂, 𑀔𑀲𑁆𑀲 𑀔𑀮𑀆𑀤𑁂𑀲𑁂 𑀘 ‘‘𑀲𑀭𑀫𑁆𑀳𑀸 𑀤𑁆𑀯𑁂’’𑀢𑀺 𑀤𑁆𑀯𑀺𑀢𑁆𑀢𑀸𑀤𑀺𑀫𑁆𑀳𑀺 𑀘 𑀓𑀢𑁂 𑀉𑀤𑁆𑀥𑀁 𑀔𑀁 𑀅𑀲𑁆𑀲 𑀉𑀤𑀼𑀓𑁆𑀔𑀮𑀁. 𑀧𑀺𑀲𑀺𑀢𑀲𑁆𑀲 𑀧𑀺𑀆𑀤𑁂𑀲𑁂, 𑀅𑀲𑀲𑁆𑀲 𑀲𑀸𑀘𑀸𑀤𑁂𑀲𑁂 𑀘 𑀓𑀢𑁂 𑀧𑀺𑀲𑀺𑀢𑀸𑀲𑁄=𑀧𑀺𑀲𑀸𑀘𑁄.

𑀫𑀳𑀻𑀲𑀤𑁆𑀤𑀲𑁆𑀲 𑀫𑀬𑀽𑀆𑀤𑁂𑀲𑁂, 𑀭𑀯𑀢𑀺𑀲𑁆𑀲 𑀭𑀸𑀤𑁂𑀲𑁂 𑀘 𑀓𑀢𑁂 𑀫𑀳𑀺𑀬𑀁 𑀭𑀯𑀢𑀻𑀢𑀺 𑀫𑀬𑀽𑀭𑁄. 𑀏𑀯+𑀫𑀜𑁆𑀜𑁂𑀧𑀺 𑀧𑀬𑁄𑀕𑀢𑁄+𑀦𑀼𑀕𑀦𑁆𑀢𑀩𑁆𑀩𑀸. 𑀏𑀢𑁆𑀣 𑀘 𑁋

𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄,

𑀤𑁆𑀯𑁂 𑀘𑀸+𑀧𑀭𑁂 𑀯𑀡𑁆𑀡𑀯𑀺𑀓𑀸𑀭+𑀦𑀸𑀲𑀸;

𑀥𑀸𑀢𑀼𑀲𑁆𑀲 𑀅𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄,

𑀢+𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀁 𑀦𑀺𑀭𑀼𑀢𑁆𑀢𑀁𑀢𑀺.

𑀬𑀣𑀸 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄=𑀤𑁄𑀯𑀸𑀭𑀺𑀓𑁄𑀢𑀺 𑀑𑀓𑀆𑀕𑀫𑁄. 𑀳𑀺𑀁𑀲𑀲𑀤𑁆𑀤𑀲𑁆𑀲 𑀲𑀻𑀳𑁄𑀢𑀺 𑀯𑀺𑀧𑀮𑁆𑀮𑀸𑀲𑁄. 𑀦𑀺𑀚𑀓𑁄=𑀦𑀺𑀬𑀓𑁄𑀢𑀺 𑀯𑀺𑀓𑀸𑀭𑁄. 𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸 𑀫𑁂𑀔𑀮𑀸𑀢𑀺 𑀯𑀡𑁆𑀡𑀮𑁄𑀧𑁄, 𑀳+𑀦+𑀫𑀓𑀸𑀭𑀸𑀦𑀁 𑀮𑁄𑀧𑁄. 𑀫𑀬𑀽𑀭𑁄𑀢𑀺 𑀅𑀢𑁆𑀣𑁂 𑀭𑀯𑀢𑀺𑀲𑁆𑀲 𑀅𑀢𑀺𑀲𑁆𑀲𑀬𑀬𑁄𑀕𑁄𑀢𑀺.

𑀬𑀣𑀭𑀺𑀯 𑀢𑀣𑀭𑀺𑀯𑁂𑀢𑀺 𑀦𑀺𑀧𑀸𑀢𑀸𑀯. ‘‘𑀚𑀭𑀕𑁆𑀕𑀯𑀸 𑀯𑀺𑀘𑀺𑀦𑁆𑀢𑁂𑀲𑀼𑀁, 𑀯𑀭+𑀫𑁆𑀳𑀸𑀓𑀁 𑀪𑀼𑀲𑀸𑀫𑀺𑀯𑁂’’𑀢𑀺 𑀏𑀢𑁆𑀣 𑀇𑀯𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑁄. 𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺.

𑀲𑀦𑁆𑀥𑀺𑀲𑁆𑀲𑀭𑀸𑀦𑀁 𑀧𑀝𑀺𑀲𑁂𑀥𑀲𑀦𑁆𑀥𑀺,

𑀅𑀣𑁄 𑀩𑁆𑀬𑀜𑁆𑀚𑀦+𑀲𑀭𑀩𑁆𑀬𑀜𑁆𑀚𑀦𑀸𑀦𑀁;

𑀲𑀦𑁆𑀥𑀺 𑀘+𑀣𑁄 𑀦𑀺𑀕𑁆𑀕𑀳𑀻𑀢𑀲𑁆𑀲 𑀲𑀦𑁆𑀥𑀺,

𑀪𑀯𑀦𑁆𑀢𑀺 𑀲𑀦𑁆𑀥𑀺 𑀧𑀦 𑀧𑀜𑁆𑀘𑀥𑀸 𑀯𑁂.

𑀇𑀢𑀺 𑀧𑀬𑁄𑀕𑀲𑀺𑀤𑁆𑀥𑀺𑀬𑀁 𑀲𑀦𑁆𑀥𑀺𑀓𑀡𑁆𑀟𑁄 𑀧𑀞𑀫𑁄.