𑁧. 𑀲𑀜𑁆𑀜𑀸𑀤𑀺𑀓𑀡𑁆𑀟

𑀲𑀺𑀤𑁆𑀥-𑀫𑁆𑀩𑀢𑁆𑀣𑀼𑀁 𑀲𑀫𑁆𑀫𑀸 𑀯𑀦𑁆𑀤𑁂

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀲𑀺𑀤𑁆𑀥+𑀫𑀺𑀝𑁆𑀞𑀤𑀤𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀁 𑀫𑀡𑀺𑀁𑀯 𑀲𑁆𑀯𑀢𑁆𑀣𑀤𑀁;

𑀲𑀗𑁆𑀖𑀜𑁆𑀘 𑀲𑀸𑀤𑀭𑀁 𑀦𑀢𑁆𑀯𑀸, 𑀧𑀬𑁄𑀕𑀲𑀺𑀤𑁆𑀥𑀺 𑀯𑀼𑀘𑁆𑀘𑀢𑁂.

𑀧𑀪𑀸𑀯𑁄 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀩𑁆𑀬𑀸𑀓𑀭𑀡𑁂 𑀘 𑀧𑁂𑀝𑀓𑁂;

𑀦𑀺𑀲𑁆𑀲𑁂𑀲𑁂𑀯 𑀓𑀩𑁆𑀩𑀸𑀢𑀺𑀢𑁆𑀢𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀯𑀢.

𑀯𑀼𑀢𑁆𑀢𑀜𑁆𑀳𑀺 𑀧𑀼𑀩𑁆𑀩𑀲𑀻𑀳𑀴𑀸𑀘𑀭𑀺𑀬+𑀧𑀸𑀘𑀭𑀺𑀬𑁂𑀳𑀺 𑁋

𑀬𑀸 𑀲𑀢𑁆𑀢𑀺 𑀧𑀸𑀡𑀺𑀦𑁂 𑀬𑀸 𑀘, 𑀘𑀦𑁆𑀤𑁆𑀭+𑀓𑀸𑀢𑁆𑀬𑀸𑀬𑀦𑀸𑀤𑀺𑀲𑀼;

𑀲𑀸+𑀬𑀁 𑀫𑀼𑀢𑁆𑀢𑀺𑀫𑀢𑀻 𑀫𑀜𑁆𑀜𑁂, 𑀫𑁄𑀕𑁆𑀕𑀮𑁆𑀮𑀸𑀬𑀦𑀭𑀽𑀧𑀺𑀦𑀻-𑀢𑀺.

𑀲𑀼𑀢𑁆𑀢𑀁 𑀯𑀼𑀢𑁆𑀢𑀺 𑀘 𑀢𑁂𑀦𑁂𑀯, 𑀓𑀢𑀸 𑀏𑀓𑁂𑀦 𑀧𑀜𑁆𑀘𑀺𑀓𑀸;

𑀢𑀲𑁆𑀫𑀸+𑀲𑁆𑀲 𑀲𑀢𑁆𑀣+𑀫𑀜𑁆𑀜𑁂𑀳𑀺, 𑀲𑀼𑀧𑀲𑀝𑁆𑀞𑀁+𑀢𑀺𑀲𑀼𑀦𑁆𑀤𑀭𑀁.

𑀢𑀫𑁆𑀳𑀺 𑀘 𑀤𑀼𑀩𑁆𑀩𑀺𑀥𑀁 𑀜𑁂𑀬𑁆𑀬𑀁, 𑀲𑀼𑀢𑁆𑀢𑀁 𑀓𑀫𑁆𑀫𑀢𑁆𑀣𑀪𑁂𑀤𑀢𑁄;

𑀢𑁂𑀲𑁆𑀯𑀸+𑀤𑀺 𑀫𑀻𑀢𑀺𑀲𑀤𑁆𑀤𑁂𑀦, 𑀤𑀼𑀢𑀺𑀬𑀁 𑀢𑀺𑀧𑁆𑀧𑀓𑀸𑀭𑀢𑁄.

𑀲𑀼𑀯𑀺𑀲𑀤𑀁 𑀧𑀓𑀸𑀲𑁂𑀢𑁆𑀯𑀸, 𑀲𑀼𑀩𑁄𑀥+𑀫𑀸𑀓𑀼𑀫𑀸𑀭𑀓𑀁;

𑀩𑁆𑀬𑀸𑀧𑀺𑀓𑀸𑀯𑀴𑀺𑀬𑀸 𑀓𑀲𑁆𑀲𑀁, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺.

𑁧. 𑀅𑀆𑀤𑀬𑁄 𑀢𑀺𑀢𑀸𑀮𑀻𑀲 𑀯𑀡𑁆𑀡𑀸

𑀅𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀢𑁂𑀘𑀢𑁆𑀢𑀸𑀮𑀻𑀲𑀓𑁆𑀔𑀭𑀸 𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑀅, 𑀆, 𑀇, 𑀈, 𑀉, 𑀊, 𑀏, ऐ, 𑀑, औ, 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮𑀯 𑀲 𑀳 𑀴 𑀅𑀁. 𑀢𑁂𑀦 𑀓𑁆𑀯𑀢𑁆𑀣𑁄 ‘‘𑀏 𑀑𑀦+𑀫 𑀯𑀡𑁆𑀡𑁂’’𑀢𑀺. 𑀢𑀺𑀢𑀸𑀮𑀻𑀲𑀸𑀢𑀺 𑀯𑀘𑀦𑀁 𑀓𑀢𑁆𑀣𑀘𑀺 𑀯𑀡𑁆𑀡𑀮𑁄𑀧𑀁 𑀜𑀸𑀧𑁂𑀢𑀺, 𑀢𑁂𑀦 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺𑀆𑀤𑀺 𑀲𑀺𑀤𑁆𑀥𑀁.

𑀅𑀓𑀸𑀭𑁄 𑀆𑀤𑀺 𑀫𑀭𑀺𑀬𑀸𑀤𑀪𑀽𑀢𑁄 𑀬𑁂𑀲𑀁 𑀢𑁂 𑀅𑀆𑀤𑀬𑁄. 𑀢𑀬𑁄 𑀘 𑀘𑀢𑁆𑀢𑀸𑀮𑀻𑀲 𑀘𑁂𑀢𑀺 𑀢𑀺𑀢𑀸𑀮𑀻𑀲, 𑀇𑀫𑀺𑀦𑀸 𑀦𑀺𑀧𑀸𑀢𑀦𑁂𑀦 𑀯𑀸 𑀘𑀢𑀪𑀸𑀕𑀮𑁄𑀧𑁄. 𑀯𑀡𑁆𑀡𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀳𑀻𑀢𑀺 𑀯𑀡𑁆𑀡𑀸.

𑀏𑀢𑁆𑀣𑀸+𑀳 𑁋 ‘‘𑀓𑀲𑁆𑀫𑀸 𑀆𑀘𑀭𑀺𑀬𑀓𑀘𑁆𑀘𑀸𑀬𑀦𑀸𑀤𑀻𑀳𑀺 𑀯𑀺𑀬 𑀏𑀓𑀘𑀢𑁆𑀢𑀸𑀮𑀻𑀲𑀓𑁆𑀔𑀭𑀸𑀦+𑀫𑀓𑁆𑀔𑀭𑀲𑀜𑁆𑀜+𑀫𑀓𑀢𑁆𑀯𑀸 𑀢𑀺𑀢𑀸𑀮𑀻𑀲𑀓𑁆𑀔𑀭𑀸𑀦𑀁 𑀯𑀡𑁆𑀡𑀲𑀜𑁆𑀜𑀸 𑀓𑀢𑀸’’𑀢𑀺. 𑀯𑀼𑀘𑁆𑀘𑀢𑁂 𑁋

𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸+𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘𑀸-𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂𑀢𑀺 𑁋

𑀯𑀘𑀦𑀢𑁄 𑀫𑀸𑀕𑀥𑀺𑀓𑀸𑀦𑀁 𑀏𑀢𑁆𑀣, 𑀲𑁂𑀬𑁆𑀬𑁄, 𑀑𑀝𑁆𑀞𑁄, 𑀲𑁄𑀢𑁆𑀣𑀺-𑀢𑁆𑀬𑀸𑀤𑀻𑀲𑀼𑀧𑀺 𑀅𑀲𑁂𑀲𑀩𑁆𑀬𑀸𑀧𑀺𑀓𑀸𑀦𑀁 𑀢𑀺𑀢𑀸𑀮𑀻𑀲𑀓𑁆𑀔𑀭𑀸𑀦𑀁𑀯 𑀉𑀚𑀼𑀓𑀸𑀦𑁆𑀯𑀢𑁆𑀣𑀧𑁆𑀧𑀓𑁆𑀔𑀭𑀕𑀼𑀡𑀺𑀓𑀸, 𑀦𑁂𑀯 𑀧𑀦 ‘𑀭𑀼𑀓𑁆𑀔𑀸 𑀯𑀦𑀁’𑀢𑁆𑀬𑀸𑀤𑁄 𑀯𑀺𑀬 𑀅𑀯𑀬𑀯𑁂 𑀲𑀫𑀼𑀤𑀸𑀬𑀯𑁄𑀳𑀸𑀭𑁄, ‘𑀲𑀫𑀼𑀤𑁆𑀤𑁄 𑀫𑀬𑀸 𑀤𑀺𑀝𑁆𑀞𑁄’𑀢𑁆𑀬𑀸𑀤𑁄 𑀯𑀺𑀬 𑀘 𑀲𑀫𑀼𑀤𑀸𑀬𑁂 𑀅𑀯𑀬𑀯𑀯𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑁂𑀓𑀁 𑀯𑀡𑁆𑀡𑀲𑀜𑁆𑀜𑀸 𑀓𑀢𑀸𑀢𑀺.

‘‘𑀲𑀓𑁆𑀓𑀘𑁆𑀘𑀲𑀯𑀦𑀁 𑀩𑀼𑀤𑁆𑀥𑀲𑀸𑀲𑀦𑀲𑀫𑁆𑀧𑀢𑁆𑀢𑀻’’𑀢𑀺 ‘‘𑀲𑀺𑀣𑀺𑀮𑀥𑀦𑀺𑀢𑀸𑀤𑀺 𑀅𑀓𑁆𑀔𑀭𑀯𑀺𑀧𑀢𑁆𑀢𑀺𑀬𑀜𑁆𑀳𑀺 𑀅𑀢𑁆𑀣𑀲𑁆𑀲 𑀤𑀼𑀦𑁆𑀦𑀬𑀢𑀸 𑀳𑁄𑀢𑀻’’𑀢𑀺 𑀘 𑀬𑀲𑁆𑀫𑀸 𑀯𑀼𑀢𑁆𑀢𑀁.

𑀢𑀲𑁆𑀫𑀸 𑀅𑀓𑁆𑀔𑀭𑀓𑁄𑀲𑀮𑁆𑀮𑀁, 𑀲𑀫𑁆𑀧𑀸𑀤𑁂𑀬𑁆𑀬 𑀯𑀺𑀘𑀓𑁆𑀔𑀡𑁄;

𑀉𑀧𑀝𑁆𑀞𑀳𑀁 𑀕𑀭𑀼𑀁 𑀲𑀫𑁆𑀫𑀸, 𑀉𑀝𑁆𑀞𑀸𑀦𑀸𑀤𑀻𑀳𑀺 𑀧𑀜𑁆𑀘𑀳𑀺.

𑀢𑀢𑁆𑀣 𑀅𑀓𑀸𑀭𑀸𑀤𑀻𑀦+𑀫𑀦𑀼𑀓𑁆𑀓𑀫𑁄 𑀧𑀦𑁂+𑀲 𑀞𑀸𑀦𑀸𑀤𑀺𑀓𑁆𑀓𑀫𑀲𑀦𑁆𑀦𑀺𑀲𑁆𑀲𑀺𑀢𑁄. 𑀢𑀣𑀸 𑀳𑀺 𑀞𑀸𑀦+𑀓𑀭𑀡+𑀧𑀬𑀢𑀦𑁂𑀳𑀺 𑀯𑀡𑁆𑀡𑀸 𑀚𑀸𑀬𑀦𑁆𑀢𑀺. 𑀢𑀢𑁆𑀣 𑀙 𑀞𑀸𑀦𑀸𑀦𑀺 𑀓𑀡𑁆𑀞+𑀢𑀸𑀮𑀼+𑀫𑀼𑀤𑁆𑀥+𑀤𑀦𑁆𑀢+𑀑𑀝𑁆𑀞+𑀦𑀸𑀲𑀺𑀓𑀸𑀯𑀲𑁂𑀦.

𑀢𑀢𑁆𑀣 𑀅𑀯𑀡𑁆𑀡+𑀓𑀯𑀕𑁆𑀕+𑀳𑀸𑀦𑀁 𑀓𑀡𑁆𑀞𑁄 𑀞𑀸𑀦𑀁, 𑀇𑀯𑀡𑁆𑀡+𑀘𑀯𑀕𑁆𑀕+𑀬𑀸𑀦𑀁 𑀢𑀸𑀮𑀼, 𑀝𑀯𑀕𑁆𑀕+𑀭+𑀴𑀸𑀦𑀁 𑀫𑀼𑀤𑁆𑀥𑀸, 𑀢𑀯𑀕𑁆𑀕+𑀮+𑀲𑀸𑀦𑀁 𑀤𑀦𑁆𑀢𑀸, 𑀉𑀯𑀡𑁆𑀡+𑀧𑀯𑀕𑁆𑀕𑀸𑀦𑀁 𑀑𑀝𑁆𑀞𑁄, 𑀏 𑀯𑀡𑁆𑀡𑀲𑁆𑀲 𑀓𑀡𑁆𑀞𑀢𑀸𑀮𑀽, 𑀑 𑀯𑀡𑁆𑀡𑀲𑁆𑀲 𑀓𑀡𑁆𑀞𑁄+𑀝𑁆𑀞𑀸, 𑀯𑀓𑀸𑀭𑀲𑁆𑀲 𑀤𑀦𑁆𑀢𑁄+𑀝𑁆𑀞𑀸, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀦𑀸𑀲𑀺𑀓𑀸, 𑀗, 𑀜𑁆𑀜, 𑀡, 𑀦, 𑀫𑀸𑀦𑀁 𑀲𑀓𑀞𑀸𑀦𑀁 𑀦𑀸𑀲𑀺𑀓𑀸 𑀘. 𑀏𑀢𑁆𑀣 𑀘 𑁋

𑀳𑀓𑀸𑀭𑁄 𑀧𑀜𑁆𑀘𑀫𑁂𑀳𑁂𑀯, 𑀅𑀦𑁆𑀢𑀝𑁆𑀞𑀸𑀳𑀺 𑀘 𑀲𑀁𑀬𑀼𑀢𑁄;

𑀑𑀭𑀲𑁄 𑀇𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀓𑀡𑁆𑀞𑀚𑁄 𑀢𑀤𑀲𑀁𑀬𑀼𑀢𑁄.

𑀬𑀣𑀸 𑀅𑀯𑀗𑁆𑀳𑁄𑀢𑀺 (𑀅𑀯𑀗 𑀳𑁄𑀢𑀺., 𑀢𑀜𑁆𑀳𑀺, 𑀢𑀡𑁆𑀳𑀸, 𑀧𑀼𑀩𑁆𑀩𑀦𑁆𑀳𑁄, 𑀅𑀫𑁆𑀳𑁂, 𑀕𑀼𑀬𑁆𑀳𑀁, 𑀕𑀸𑀭𑀬𑁆𑀳𑀸, 𑀆𑀭𑀼𑀮𑁆𑀳𑁄, 𑀩𑀳𑁆𑀯𑀓𑁆𑀔𑀭𑀦𑁆𑀢𑀺.

𑀓𑀭𑀡𑀁 𑁋

𑀚𑀺𑀯𑁆𑀳𑀸𑀫𑀚𑁆𑀛𑀁 𑀢𑀸𑀮𑀼𑀚𑀸𑀦𑀁,

𑀚𑀺𑀯𑁆𑀳𑁄𑀧𑀕𑁆𑀕𑀁 𑀫𑀼𑀤𑁆𑀥𑀚𑀸𑀦𑀁,

𑀚𑀺𑀯𑁆𑀳𑀕𑁆𑀕𑀁 𑀤𑀦𑁆𑀢𑀚𑀸𑀦𑀁 𑀲𑁂-

𑀲𑀸 𑀲𑀓𑀞𑀸𑀦𑀓𑀭𑀡𑀸.

𑀯𑀡𑁆𑀡𑀸𑀦𑀁 𑀉𑀘𑁆𑀘𑀸𑀭𑀡𑀼𑀲𑁆𑀲𑀸𑀳𑁄 𑀧𑀬𑀢𑀦𑀁, 𑀢𑀁 𑀓𑀺𑀁 𑁋 𑀲𑀁𑀯𑀼𑀢𑀸𑀤𑀺𑀓𑀭𑀡𑀯𑀺𑀲𑁂𑀲𑁄, 𑀲𑀁𑀯𑀼𑀢𑀢𑁆𑀢+𑀫𑀓𑀸𑀭𑀲𑁆𑀲, 𑀯𑀺𑀯𑀝𑀢𑁆𑀢𑀁 𑀲𑁂𑀲𑀲𑀭𑀸𑀦𑀁 𑀲𑀓𑀸𑀭+𑀳𑀓𑀸𑀭𑀸𑀦𑀜𑁆𑀘, 𑀨𑀼𑀝𑁆𑀞𑀢𑁆𑀢𑀁 𑀯𑀕𑁆𑀕𑀸𑀦𑀁, 𑀈𑀲𑀁𑀨𑀼𑀝𑁆𑀞𑀢𑁆𑀢𑀁 𑀬+𑀭+𑀮+𑀯𑀸𑀦𑀁.

𑀏𑀯𑀁 𑀞𑀸𑀦+𑀓𑀭𑀡+𑀧𑀬𑀢𑀦+𑀲𑀼𑀢𑀺 𑀓𑀸𑀮𑀪𑀺𑀦𑁆𑀦𑁂𑀲𑀼 𑀅𑀓𑁆𑀔𑀭𑁂𑀲𑀼 𑀲𑀭𑀸 𑀦𑀺𑀲𑁆𑀲𑀬𑀸, 𑀇𑀢𑀭𑁂 𑀦𑀺𑀲𑁆𑀲𑀺𑀢𑀸. 𑀢𑀢𑁆𑀣 𑁋

𑀦𑀺𑀲𑁆𑀲𑀬𑀸+𑀤𑁄 𑀲𑀭𑀸 𑀯𑀼𑀢𑁆𑀢𑀸, 𑀦𑀺𑀲𑁆𑀲𑀺𑀢𑀸 𑀩𑁆𑀬𑀜𑁆𑀚𑀦𑀸 𑀢𑀢𑁄;

𑀯𑀕𑁆𑀕𑁂+𑀓𑀚𑀸 𑀩𑀳𑀼𑀢𑁆𑀢𑀸+𑀤𑁄, 𑀢𑀢𑁄 𑀞𑀸𑀦+𑀮𑀳𑀼𑀓𑁆𑀓𑀫𑀸.

‘‘𑀅𑀆𑀤𑀬𑁄’’𑀢𑀺 𑀯𑀢𑁆𑀢𑀢𑁂 𑀬𑀸𑀯 ‘‘𑀩𑀺𑀦𑁆𑀤𑀼 𑀦𑀺𑀕𑁆𑀕𑀳𑀻𑀢’’𑀦𑁆𑀢𑀺. 𑀢𑀜𑁆𑀘 𑀔𑁄 ‘‘𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄’’𑀢𑀺 𑀲𑀢𑁆𑀢𑀫𑁆𑀬𑀦𑁆𑀢+𑀫𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑁂, ‘‘𑀯𑀡𑁆𑀡𑀸’’𑀢𑀺 𑀯𑀢𑁆𑀢𑀢𑁂 𑁋

𑁨. 𑀤𑀲𑀸+𑀤𑁄 𑀲𑀭𑀸

𑀅𑀆𑀤𑀻𑀲𑁆𑀯𑀸+𑀤𑀺𑀫𑁆𑀳𑀺 𑀦𑀺𑀤𑁆𑀤𑀺𑀝𑁆𑀞𑀸 𑀑𑀤𑀦𑁆𑀢𑀸 𑀤𑀲 𑀯𑀡𑁆𑀡𑀸 𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑀣𑀸 𑀅 𑀆, 𑀇 𑀈, 𑀉 𑀊, 𑀏 ऐ, 𑀑 औ. 𑀲𑀭𑀦𑁆𑀢𑀺=𑀲𑀧𑁆𑀧𑀥𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀩𑁆𑀬𑀜𑁆𑀚𑀦𑁂 𑀯𑀸 𑀲𑀸𑀭𑁂𑀦𑁆𑀢𑀻𑀢𑀺 𑀲𑀭𑀸.

‘‘𑀤𑀲𑀸+𑀤𑁄 𑀲𑀭𑀸’’𑀢𑀺 𑀯𑀢𑁆𑀢𑀢𑁂.

𑁩. 𑀤𑁆𑀯𑁂 𑀤𑁆𑀯𑁂 𑀲𑀯𑀡𑁆𑀡𑀸

𑀅𑀆𑀤𑀻𑀲𑁆𑀯𑀸+𑀤𑀺𑀫𑁂𑀲𑀼 𑀤𑀲𑀲𑀼 𑀤𑁆𑀯𑁂 𑀤𑁆𑀯𑁂 𑀲𑀯𑀡𑁆𑀡𑀸 𑀦𑀸𑀫 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀬𑀣𑀸 𑀅 𑀆𑀇𑀢𑀺, 𑀇 𑀈𑀇𑀢𑀺, 𑀉 𑀊 𑀇𑀢𑀺, 𑀏 𑀏𑀇𑀢𑀺, 𑀑, 𑀑𑀇𑀢𑀺. 𑀲𑀫𑀸𑀦𑀸 𑀲𑀤𑀺𑀲𑀸 𑀯𑀡𑁆𑀡𑀸 𑀲𑀯𑀡𑁆𑀡𑀸, 𑀲𑀫𑀸𑀦𑀢𑁆𑀢𑀜𑁆𑀘 𑀞𑀸𑀦𑀢𑁄. ‘‘𑀤𑁆𑀯𑁂 𑀤𑁆𑀯𑁂’’𑀢𑀺 𑀯𑀢𑁆𑀢𑀢𑁂 𑀯𑀓𑁆𑀔𑀫𑀸𑀦𑁂𑀲𑀼 𑀤𑁆𑀯𑀻𑀲𑀼.

𑁪. 𑀧𑀼𑀩𑁆𑀩𑁄 𑀭𑀲𑁆𑀲𑁄

𑀢𑁂𑀲𑁆𑀯𑁂𑀯 𑀤𑀲𑀲𑀼 𑀬𑁂 𑀤𑁆𑀯𑁂 𑀤𑁆𑀯𑁂 𑀲𑀯𑀡𑁆𑀡𑀸, 𑀢𑁂𑀲𑀼 𑀬𑁄 𑀬𑁄 𑀧𑀼𑀩𑁆𑀩𑁄, 𑀲𑁄 𑀲𑁄 𑀭𑀲𑁆𑀲𑀲𑀜𑁆𑀜𑁄 𑀳𑁄𑀢𑀺. 𑀬𑀣𑀸 𑀅 𑀇 𑀉 𑀏 𑀑. 𑀢𑁂𑀲𑀼 ‘𑀲𑀁𑀬𑁄𑀕𑀢𑁄 𑀧𑀼𑀩𑁆𑀩𑀸𑀯 𑀤𑀺𑀲𑁆𑀲𑀦𑁆𑀢𑀺 𑀤𑁆𑀯𑁂 𑀧𑀦𑀦𑁆𑀢𑀺𑀫𑀸’𑀢 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀲𑀸𑀥𑀼𑀢𑁆𑀢𑀸 𑀢𑁂𑀲𑀫𑁆𑀧𑀺 𑀇𑀥 𑀲𑀗𑁆𑀕𑀳𑁄, 𑀬𑀣𑀸 𑀏𑀢𑁆𑀣 𑀲𑁂𑀬𑁆𑀬𑁄 𑀑𑀝𑁆𑀞𑁄 𑀲𑁄𑀢𑁆𑀣𑀺. 𑀭𑀲𑁆𑀲𑀓𑀸𑀮𑀬𑁄𑀕𑀸 𑀢𑀩𑁆𑀩𑀦𑁆𑀢𑀢𑀸𑀬 𑀯𑀸 𑀭𑀲𑁆𑀲𑀸. 𑀭𑀲𑁆𑀲𑀓𑀸𑀮𑁄 𑀦𑀸𑀫 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑁄 𑀅𑀓𑁆𑀔𑀺𑀦𑀺𑀫𑁆𑀫𑀺𑀮𑀦𑀲𑀗𑁆𑀔𑀸𑀢𑁄 𑀯𑀸 𑀓𑀸𑀮𑁄, 𑀢𑁂𑀦 𑀏𑀓𑀫𑀢𑁆𑀢𑁄 𑀭𑀲𑁆𑀲𑁄, 𑀤𑁆𑀯𑀺𑀫𑀢𑁆𑀢𑁄 𑀤𑀻𑀖𑁄, 𑀅𑀟𑁆𑀠𑀫𑀢𑁆𑀢𑁄 𑀩𑁆𑀬𑀜𑁆𑀚𑀦𑁄. 𑀙𑀦𑁆𑀤𑀲𑀺 𑀤𑀺𑀬𑀟𑁆𑀠𑀫𑀢𑁆𑀢𑀫𑁆𑀧𑀺 𑀭𑀲𑁆𑀲𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀆𑀘𑀭𑀺𑀬𑀸.

𑁫. 𑀧𑀭𑁄 𑀤𑀻𑀖𑁄

𑀅𑀆𑀤𑀻𑀲𑁆𑀯𑀸+𑀤𑀺𑀪𑀽𑀢𑁂𑀲𑀼 𑀤𑀲𑀲𑀼 𑀬𑁂 𑀤𑁆𑀯𑁂 𑀤𑁆𑀯𑁂 𑀲𑀯𑀡𑁆𑀡𑀸, 𑀢𑁂𑀲𑀼 𑀬𑁄 𑀬𑁄 𑀧𑀭𑁄, 𑀲𑁄 𑀲𑁄 𑀤𑀻𑀖𑀲𑀜𑁆𑀜𑁄 𑀳𑁄𑀢𑀺. 𑀢𑀁 𑀬𑀣𑀸 𑀆 𑀈 𑀊 𑀏 𑀑. 𑀤𑀻𑀖𑀓𑀸𑀮𑀬𑁄𑀕𑀸 𑀢𑀩𑁆𑀩𑀦𑁆𑀢𑀢𑀸𑀬 𑀯𑀸 𑀤𑀻𑀖𑀸.

𑁬. 𑀓𑀸𑀤𑀬𑁄 𑀩𑁆𑀬𑀜𑁆𑀚𑀦𑀸

𑀅𑀆𑀤𑀻𑀲𑀼 𑀓𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀧𑀭𑀺𑀬𑀦𑁆𑀢𑀸 𑀢𑁂𑀢𑁆𑀢𑀺𑀁𑀲 𑀩𑁆𑀬𑀜𑁆𑀚𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑀣𑀸 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮𑀯 𑀲 𑀳 𑀴 𑀅𑀁 𑀇𑀢𑀺. 𑀩𑁆𑀬𑀜𑁆𑀚𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀳𑀻𑀢𑀺 𑀩𑁆𑀬𑀜𑁆𑀚𑀦𑀸. 𑀓𑀓𑀸𑀭𑀸𑀤𑀻𑀲𑁆𑀯+𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄.

‘‘𑀓𑀸𑀤𑀬𑁄’’𑀢𑀺 𑀯𑀢𑁆𑀢𑀢𑁂.

𑁭. 𑀧𑀜𑁆𑀘𑀧𑀜𑁆𑀘𑀓𑀸 𑀯𑀕𑁆𑀕𑀸

𑀅𑀆𑀤𑀻𑀲𑀼 𑀓𑀓𑀸𑀭𑀸𑀤𑀬𑁄 𑀫𑀓𑀸𑀭𑀦𑁆𑀢𑀸 𑀧𑀜𑁆𑀘𑀧𑀜𑁆𑀘𑀓𑀸 𑀯𑀕𑁆𑀕𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑀣𑀸 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫 𑀇𑀢𑀺. 𑀧𑀜𑁆𑀘 𑀧𑀜𑁆𑀘 𑀧𑀭𑀺𑀫𑀸𑀡+𑀫𑁂𑀲𑀁 𑀧𑀜𑁆𑀘𑀧𑀜𑁆𑀘𑀓𑀸. 𑀯𑀚𑁆𑀚𑁂𑀦𑁆𑀢𑀺 𑀬𑀓𑀸𑀭𑀸𑀤𑀬𑁄𑀢𑀺 𑀯𑀕𑁆𑀕𑀸. 𑀢𑁂 𑀧𑀦 𑀧𑀞𑀫𑀓𑁆𑀔𑀭𑀯𑀲𑁂𑀦 𑀓𑀯𑀕𑁆𑀕+𑀘𑀯𑀕𑁆𑀕𑀸𑀤𑀺𑀯𑁄𑀳𑀸𑀭𑀁 𑀕𑀢𑀸 𑀓𑀼𑀲𑀮𑀢𑁆𑀢𑀺𑀓𑀸𑀤𑀬𑁄 𑀯𑀺𑀬.

𑁮. 𑀩𑀺𑀦𑁆𑀤𑀼 𑀦𑀺𑀕𑁆𑀕𑀳𑀻𑀢𑀁

𑀅𑀓𑀸𑀭𑀸𑀤𑀻𑀲𑁆𑀯+𑀬𑀁 𑀯𑀡𑁆𑀡𑁄 𑀩𑀺𑀦𑁆𑀤𑀼𑀫𑀢𑁆𑀢𑁄, 𑀲𑁄 𑀦𑀺𑀕𑁆𑀕𑀳𑀻𑀢𑀲𑀜𑁆𑀜𑁄 𑀳𑁄𑀢𑀺. 𑀭𑀲𑁆𑀲𑀲𑀭𑀁 𑀦𑀺𑀲𑁆𑀲𑀸𑀬 𑀕𑀳𑀺𑀢+𑀫𑀼𑀘𑁆𑀘𑀸𑀭𑀺𑀢𑀁 𑀦𑀺𑀕𑁆𑀕𑀳𑀻𑀢𑀁, 𑀓𑀭𑀡𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀸.

𑀓𑀭𑀡𑀁 𑀦𑀺𑀕𑁆𑀕𑀳𑁂𑀢𑁆𑀯𑀸𑀦, 𑀫𑀼𑀔𑁂𑀦𑀸+𑀯𑀺𑀯𑀝𑁂𑀦 𑀬𑀁;

𑀯𑀼𑀘𑁆𑀘𑀢𑁂 𑀦𑀺𑀕𑁆𑀕𑀳𑀻𑀢𑀦𑁆𑀢𑀺, 𑀯𑀼𑀢𑁆𑀢𑀁 𑀩𑀺𑀦𑁆𑀤𑀼 𑀲𑀭𑀸𑀦𑀼𑀕𑀁.

𑀩𑀳𑁆𑀯𑀓𑁆𑀔𑀭𑀲𑀜𑁆𑀜𑀸𑀓𑀭𑀡𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑁆𑀣𑀁, 𑀛+𑀮𑀸𑀤𑀬𑁄 𑀢𑀼 𑀭𑀼𑀴𑁆𑀳𑀻𑀲𑀜𑁆𑀜𑀸.

𑀯𑀡𑁆𑀡𑀸 𑀲𑀭𑀸 𑀲𑀯𑀡𑁆𑀡𑀸 𑀘, 𑀭𑀲𑁆𑀲𑀸 𑀤𑀻𑀖𑀸 𑀘 𑀩𑁆𑀬𑀜𑁆𑀚𑀦𑀸;

𑀯𑀕𑁆𑀕𑀸 𑀘 𑀦𑀺𑀕𑁆𑀕𑀳𑀻𑀢𑀦𑁆𑀢𑀺, 𑀳𑁄𑀢𑀺 𑀲𑀜𑁆𑀜𑀸𑀯𑀺𑀥𑀺𑀓𑁆𑀓𑀫𑁄.

(𑀲𑀜𑁆𑀜𑀸𑀯𑀺𑀥𑀸𑀦𑀁.)

𑀲𑀦𑁆𑀥𑀺 𑀯𑀼𑀘𑁆𑀘𑀢𑁂 𑁋

𑀮𑁄𑀓 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀧𑀜𑁆𑀜𑀸 𑀇𑀦𑁆𑀤𑁆𑀭𑀺𑀬𑀁, 𑀢𑀻𑀡𑀺 𑀇𑀫𑀸𑀦𑀺, 𑀦𑁄 𑀳𑀺 𑀏𑀢𑀁, 𑀪𑀺𑀓𑁆𑀔𑀼𑀦𑀻 𑀑𑀯𑀸𑀤𑁄, 𑀫𑀸𑀢𑀼 𑀉𑀧𑀝𑁆𑀞𑀸𑀦𑀁, 𑀲𑀫𑁂𑀢𑀼 𑀆𑀬𑀲𑁆𑀫𑀸, 𑀅𑀪𑀺𑀪𑀽 𑀆𑀬𑀢𑀦𑀁, 𑀥𑀦𑀁 𑀫𑁂 𑀅𑀢𑁆𑀣𑀺, 𑀲𑀩𑁆𑀩𑁂 𑀏𑀯, 𑀢𑀬𑁄 𑀅𑀲𑁆𑀲𑀼 𑀥𑀫𑁆𑀫𑀸, 𑀅𑀲𑀦𑁆𑀢𑁄 𑀏𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺 𑀇𑀢𑀻+𑀥 𑀲𑀭𑀲𑀜𑁆𑀜𑀸𑀬𑀁 𑁋

𑁨𑁬. 𑀲𑀭𑁄 𑀮𑁄𑀧𑁄 𑀲𑀭𑁂

𑀲𑀭𑁂 𑀲𑀭𑁄 𑀮𑁄𑀧𑀦𑀻𑀬𑁄 𑀳𑁄𑀢𑀺. 𑀲𑀭𑁄𑀢𑀺 𑀓𑀸𑀭𑀺𑀬𑀻𑀦𑀺𑀤𑁆𑀤𑁂𑀲𑁄, 𑀮𑁄𑀧𑁄𑀢𑀺 𑀓𑀸𑀭𑀺𑀬𑀦𑀺𑀤𑁆𑀤𑁂𑀲𑁄. 𑀮𑁄𑀧𑁄= 𑀅𑀤𑀲𑁆𑀲𑀦𑀁 𑀅𑀦𑀼𑀘𑁆𑀘𑀸𑀭𑀡𑀁, 𑀲𑀭𑁄𑀢𑀺 𑀚𑀸𑀢𑁆𑀬𑁂𑀓𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀲𑀭𑁂𑀢𑀺 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑀲𑀢𑁆𑀢𑀫𑀻, 𑀢𑀢𑁄 𑀯𑀡𑁆𑀡 𑀓𑀸𑀮 𑀩𑁆𑀬𑀯𑀥𑀸𑀦𑁂 𑀓𑀸𑀭𑀺𑀬𑀁 𑀦 𑀳𑁄𑀢𑀺, 𑀢𑁆𑀯+𑀫𑀲𑀺, 𑀓𑀢𑀫𑀸 𑀘𑀸𑀦𑀦𑁆𑀤 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺. 𑀏𑀯𑀁 𑀲𑀩𑁆𑀩𑀲𑀦𑁆𑀥𑀻𑀲𑀼.

𑀯𑀺𑀥𑀻𑀢𑀺 𑀯𑀢𑁆𑀢𑀢𑁂.

𑁧𑁪. 𑀲𑀢𑁆𑀢𑀫𑀺𑀬𑀁 𑀧𑀼𑀩𑁆𑀩𑀲𑁆𑀲

𑀣𑁂𑀭𑀬𑀝𑁆𑀞𑀺𑀦𑁆𑀬𑀸𑀬𑁂𑀦 𑀧𑀯𑀢𑁆𑀢𑀢𑁂 𑀧𑀭𑀺𑀪𑀸𑀲𑀸 𑀤𑀼𑀩𑁆𑀩𑀮𑀯𑀺𑀥𑀺𑀦𑁄 𑀧𑀢𑀺𑀝𑁆𑀞𑀸𑀪𑀸𑀯𑀢𑁄. 𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁂 𑀧𑀼𑀩𑁆𑀩𑀲𑁆𑀲𑁂𑀯 𑀯𑀺𑀥𑀻𑀢𑀺 𑀧𑀼𑀩𑁆𑀩𑀲𑀭𑀮𑁄𑀧𑁄. 𑀮𑁄𑀓𑀕𑁆𑀕𑀧𑀼𑀕𑁆𑀕𑀮𑁄, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀢𑀻𑀡𑀺𑀫𑀸𑀦𑀺, 𑀦𑁄 𑀳𑁂𑀢𑀁, 𑀪𑀺𑀓𑁆𑀔𑀼𑀦𑁄𑀯𑀸𑀤𑁄, 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀲𑀫𑁂𑀢𑀸𑀬𑀲𑁆𑀫𑀸, 𑀅𑀪𑀺𑀪𑀸𑀬𑀢𑀦𑀁, 𑀥𑀦𑀁𑀫𑀢𑁆𑀣𑀺, 𑀲𑀩𑁆𑀩𑁂𑀯, 𑀢𑀬𑀲𑁆𑀲𑀼 𑀥𑀫𑁆𑀫𑀸, 𑀅𑀲𑀦𑁆𑀢𑁂+𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺. 𑀧𑀼𑀩𑁆𑀩𑀲𑁆𑀲 𑀓𑀸𑀭𑀺𑀬𑀯𑀺𑀥𑀸𑀦𑀸 𑀲𑀢𑁆𑀢𑀫𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀭𑀢𑀸+𑀯 𑀕𑀫𑁆𑀬𑀢𑁂𑀢𑀺 𑀧𑀭𑁂𑀢𑀺 𑀧𑀭𑀯𑀘𑀦𑀫𑁆𑀧𑀺 𑀖𑀝𑀢𑁂.

𑀬𑀲𑁆𑀲 𑀇𑀤𑀸𑀦𑀺, 𑀲𑀜𑁆𑀜𑀸 𑀇𑀢𑀺, 𑀙𑀸𑀬𑀸 𑀇𑀯, 𑀇𑀢𑀺 𑀅𑀧𑀺, 𑀅𑀲𑁆𑀲𑀫𑀡𑀻 𑀅𑀲𑀺, 𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀅𑀓𑀢𑀜𑁆𑀜𑀽 𑀅𑀲𑀺, 𑀆𑀓𑀸𑀲𑁂 𑀇𑀯, 𑀢𑁂 𑀅𑀧𑀺, 𑀯𑀦𑁆𑀤𑁂 𑀅𑀳𑀁, 𑀲𑁄 𑀅𑀳𑀁, 𑀘𑀢𑁆𑀢𑀸𑀭𑁄 𑀇𑀫𑁂, 𑀯𑀲𑀮𑁄 𑀇𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀲𑀺 𑀩𑀻𑀚𑀓𑁄, 𑀓𑀣𑀸 𑀏𑀯 𑀓𑀸, 𑀧𑀸𑀢𑁄 𑀏𑀯𑀸𑀢𑀻+𑀥 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 ‘‘𑀲𑀭𑁄 𑀮𑁄𑀧𑁄 𑀲𑀭𑁂’’ 𑀢𑁆𑀯𑁂𑀯.

𑁨𑁭. 𑀧𑀭𑁄 𑀓𑁆𑀯𑀘𑀺

𑀲𑀭𑀫𑁆𑀳𑀸 𑀧𑀭𑁄 𑀲𑀭𑁄 𑀓𑁆𑀯𑀘𑀺 𑀮𑁄𑀧𑀦𑀻𑀬𑁄 𑀳𑁄𑀢𑀺. 𑀬𑀲𑁆𑀲 𑀤𑀸𑀦𑀺, 𑀲𑀜𑁆𑀜𑀸𑀢𑀺, 𑀙𑀸𑀬𑀸𑀯, 𑀇𑀢𑀺𑀧𑀺, 𑀅𑀲𑁆𑀲𑀫𑀡𑀻𑀲𑀺, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀅𑀓𑀢𑀜𑁆𑀜𑀽𑀲𑀺, 𑀆𑀓𑀸𑀲𑁂𑀯, 𑀢𑁂𑀧𑀺, 𑀯𑀦𑁆𑀤𑁂𑀳𑀁, 𑀲𑁄𑀳𑀁, 𑀘𑀢𑁆𑀢𑀸𑀭𑁄𑀫𑁂, 𑀯𑀲- 𑀮𑁄𑀪𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄𑀲𑀺 𑀩𑀻𑀚𑀓𑁄, 𑀓𑀣𑀸𑀯 𑀓𑀸, 𑀧𑀸𑀢𑁄𑀯. 𑀓𑁆𑀯𑀘𑀻𑀢𑀺 𑀓𑀺𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀢𑁆𑀢𑀼𑀢𑁆𑀢𑀫𑁄, 𑀏𑀓𑀽𑀦𑀯𑀻𑀲𑀢𑀺, 𑀬𑀲𑁆𑀲𑁂𑀢𑁂, 𑀲𑀼𑀕𑀢𑁄𑀯𑀸𑀤𑁄, 𑀤𑀺𑀝𑁆𑀞𑀸𑀲𑀯𑁄, 𑀤𑀺𑀝𑁆𑀞𑁄𑀖𑁄, 𑀘𑀓𑁆𑀔𑀸𑀬𑀢𑀦𑀁, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸. ‘‘𑀯𑀺𑀯𑀓𑁆𑀔𑀸𑀢𑁄 𑀲𑀦𑁆𑀥𑀬𑁄 𑀪𑀯𑀦𑁆𑀢𑀻’’𑀢𑀺 𑀜𑀸𑀬𑀸 𑀯𑀢𑁆𑀢𑀺𑀘𑁆𑀙𑀸𑀧𑀺 𑀇𑀥 𑀲𑀺𑀚𑁆𑀛𑀢𑀺. 𑀓𑁆𑀯𑀘𑀻𑀢𑁆𑀬+𑀥𑀺𑀓𑀸𑀭𑁄 𑀲𑀩𑁆𑀩𑀲𑀦𑁆𑀥𑀻𑀲𑀼, 𑀢𑁂𑀦 𑀦𑀸𑀢𑀺𑀧𑁆𑀧𑀲𑀗𑁆𑀕𑁄. (𑀮𑁄𑀧𑀲𑀦𑁆𑀥𑀺).

𑀲𑀭𑁄 𑀧𑀭𑁄 𑀯𑁂𑀢𑀺 𑀘 𑀯𑀢𑁆𑀢𑀢𑁂.

𑀢𑀲𑁆𑀲 𑀇𑀤𑀁, 𑀯𑀸𑀢 𑀈𑀭𑀺𑀢𑀁, 𑀦 𑀉𑀧𑁂𑀢𑀺, 𑀯𑀸𑀫 𑀊𑀭𑀼, 𑀅𑀢𑀺 𑀇𑀯 𑀅𑀜𑁆𑀜𑁂𑀳𑀺, 𑀯𑀺 𑀉𑀤𑀓𑀁 𑀇𑀢𑀻𑀥 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁂 𑁋

𑁨𑁯. 𑀬𑀼𑀯𑀡𑁆𑀡𑀸𑀦+𑀫𑁂𑀑 𑀮𑀼𑀢𑁆𑀢𑀸

𑀮𑀼𑀢𑁆𑀢𑀸 𑀲𑀭𑀸 𑀧𑀭𑁂𑀲𑀁 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀏+𑀑 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀬𑀣𑀸𑀲𑀁𑀔𑁆𑀬𑀸𑀦𑀼𑀤𑁆𑀤𑁂𑀲𑁄 𑀲𑀫𑀸𑀦𑀸𑀦𑀁.

𑁨𑁪. 𑀯𑀡𑁆𑀡𑀧𑀭𑁂𑀦 𑀲𑀯𑀡𑁆𑀡𑁄𑀧𑀺

𑀯𑀡𑁆𑀡𑀲𑀤𑁆𑀤𑁄 𑀧𑀭𑁄 𑀬𑀲𑁆𑀫𑀸, 𑀢𑁂𑀦 𑀲𑀯𑀡𑁆𑀡𑁄𑀧𑀺 𑀕𑀬𑁆𑀳𑀢𑀺 𑀲𑀬𑀜𑁆𑀘 𑀭𑀽𑀧𑀁𑀢𑀺 𑀈𑀊𑀦𑀫𑁆𑀧𑀺 𑀏+𑀑. 𑀲𑀩𑁆𑀩𑀢𑁆𑀣 𑀭𑀲𑁆𑀲𑀲𑁆𑀲 𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀤𑀻𑀖𑀲𑁆𑀲𑀸𑀧𑀺 𑀕𑀳𑀡𑀢𑁆𑀣𑀁 𑀇𑀤+𑀫𑀸𑀭𑀤𑁆𑀥𑀁. 𑀢𑀲𑁆𑀲𑁂𑀤𑀁, 𑀯𑀸𑀢𑁂𑀭𑀺𑀢𑀁, 𑀦𑁄𑀧𑁂𑀢𑀺, 𑀯𑀸𑀫𑁄𑀭𑀼, 𑀅𑀢𑁂𑀯𑀜𑁆𑀜𑁂𑀳𑀺, 𑀯𑁄𑀤𑀓𑀁. 𑀇𑀤𑀜𑁆𑀘 𑀧𑀘𑁆𑀙𑀺𑀫𑁄𑀤𑀸𑀳𑀭𑀡𑀤𑁆𑀯𑀬𑀁 ‘‘𑀅𑀯𑀡𑁆𑀡𑁂 𑀮𑀼𑀢𑁆𑀢𑁂 𑀏𑀯 𑀏+𑀑 𑀳𑁄𑀦𑁆𑀢𑀻’’𑀢𑀺 𑀕𑀸𑀳𑀲𑁆𑀲 𑀦𑀺𑀲𑁂𑀥𑀦𑀢𑁆𑀣𑀁. 𑀯𑀸𑀢𑁆𑀯𑁂𑀯, 𑀢𑀲𑁆𑀲𑀺𑀤𑀁. 𑀓𑀣𑀁 ‘‘𑀧𑀘𑁆𑀘𑁄𑀭𑀲𑁆𑀫𑀺’’𑀦𑁆𑀢𑀺, 𑀬𑁄𑀕𑀯𑀺𑀪𑀸𑀕𑀸. 𑀧𑀢𑀺 𑀉𑀭𑀲𑁆𑀫𑀺𑀦𑁆𑀢𑀺 𑀯𑀺𑀪𑀚𑁆𑀚 ‘‘𑀬𑀯𑀸 𑀲𑀭𑁂’’𑀢𑀺 𑀬𑀓𑀸𑀭𑁂 ‘‘𑀢𑀯𑀕𑁆𑀕𑀯𑀭𑀡𑀸’’𑀤𑀺𑀦𑀸 𑀘𑁄, ‘‘𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 𑀧𑀼𑀩𑁆𑀩𑀭𑀽𑀧𑀜𑁆𑀘, ‘‘𑀬𑀼𑀯𑀡𑁆𑀡𑀸𑀦+𑀫𑁂𑀑’’𑀢𑀺 (𑀬𑁄𑀕𑀯𑀺𑀪𑀸𑀕𑀸) 𑀉𑀲𑁆𑀲 𑀑 𑀘. 𑀮𑀼𑀢𑁆𑀢𑀸𑀢𑀺 𑀓𑀺𑀁, 𑀤𑀲 𑀇𑀫𑁂 𑀥𑀫𑁆𑀫𑀸, 𑀬𑀣𑀸 𑀇𑀤𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸. 𑀅𑀢𑀺𑀧𑁆𑀧𑀲𑀗𑁆𑀕𑀩𑀸𑀥𑀓𑀲𑁆𑀲 𑀓𑁆𑀯𑀘𑀺𑀲𑀤𑁆𑀤𑀲𑁆𑀲𑀸𑀦𑀼𑀯𑀢𑁆𑀢𑀦𑀢𑁄 𑀦 𑀯𑀺𑀓𑀧𑁆𑀧𑀯𑀺𑀥𑀺 𑀦𑀺𑀬𑀢𑀸, 𑀢𑁂𑀦 𑀉𑀧𑁂𑀢𑁄, 𑀅𑀯𑁂𑀘𑁆𑀘𑀸𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁄. 𑀢𑀸𑀭𑀓𑀺𑀢𑀸, 𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀫𑀳𑀺𑀤𑁆𑀥𑀺𑀓𑁄, 𑀲𑀩𑁆𑀩𑀻𑀢𑀺𑀬𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀮𑁄𑀓𑀼𑀢𑁆𑀢𑀭𑁄𑀢𑀺𑀆𑀤𑀻𑀲𑀼 𑀯𑀺𑀥𑀺 𑀘 𑀦 𑀳𑁄𑀢𑀺.

𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺 𑀅𑀲𑁆𑀲, 𑀲𑀩𑁆𑀩𑀯𑀺𑀢𑁆𑀢𑀺 𑀅𑀦𑀼𑀪𑀽𑀬𑀢𑁂, 𑀯𑀺 𑀅𑀜𑁆𑀚𑀦𑀁, 𑀯𑀺 𑀆𑀓𑀢𑁄, 𑀤𑀸𑀲𑀻 𑀅𑀳𑀁, 𑀅𑀳𑀼𑀯𑀸 𑀧𑀼𑀭𑁂, 𑀅𑀦𑀼 𑀅𑀤𑁆𑀥𑀫𑀸𑀲𑀁, 𑀅𑀦𑀼 𑀏𑀢𑀺, 𑀲𑀼 𑀆𑀕𑀢𑀁, 𑀲𑀼 𑀆𑀓𑀸𑀭𑁄, 𑀤𑀼 𑀆𑀓𑀸𑀭𑁄, 𑀘𑀓𑁆𑀔𑀼 𑀆𑀧𑀸𑀣𑀁, 𑀩𑀳𑀼 𑀆𑀩𑀸𑀥𑁄, 𑀧𑀸𑀢𑀼 𑀅𑀓𑀸𑀲𑀺, 𑀦 𑀢𑀼 𑀏𑀯, 𑀪𑀽 𑀆𑀧𑀦𑀮𑀸𑀦𑀺𑀮𑀁 𑀇𑀢𑀻+𑀥 ‘‘𑀬𑀼𑀯𑀡𑁆𑀡𑀸𑀦𑀁’’ ‘‘𑀯𑁂’’𑀢𑀺 𑀘 𑀯𑀢𑁆𑀢𑀢𑁂,

𑁩𑁦. 𑀬𑀯𑀸 𑀲𑀭𑁂

𑀲𑀭𑁂 𑀧𑀭𑁂 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀬𑀓𑀸𑀭+𑀯𑀓𑀸𑀭𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲, 𑀲𑀩𑁆𑀩𑀯𑀺𑀢𑁆𑀬𑀦𑀼𑀪𑀽𑀬𑀢𑁂, 𑀩𑁆𑀬𑀜𑁆𑀚𑀦𑀁, 𑀩𑁆𑀬𑀸𑀓𑀢𑁄 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀤𑀻𑀖𑁂 𑀤𑀸𑀲𑁆𑀬𑀸𑀳𑀁, 𑀅𑀳𑀸𑀧𑀼𑀭𑁂, 𑀅𑀦𑁆𑀯𑀤𑁆𑀥𑀫𑀸𑀲𑀁, 𑀅𑀦𑁆𑀯𑁂𑀢𑀺, 𑀲𑁆𑀯𑀸𑀕𑀢𑀁, 𑀲𑁆𑀯𑀸𑀓𑀸𑀭𑁄, 𑀤𑁆𑀯𑀸𑀓𑀸𑀭𑁄, 𑀘𑀓𑁆𑀔𑁆𑀯𑀸𑀧𑀸𑀣𑀁, 𑀩𑀳𑁆𑀯𑀸𑀩𑀸𑀥𑁄, 𑀧𑀸𑀢𑁆𑀯𑀸𑀓𑀸𑀲𑀺, 𑀦 𑀢𑁆𑀯𑁂𑀯, 𑀪𑁆𑀯𑀸𑀧𑀦𑀮𑀸𑀦𑀺𑀮𑀁. 𑀯𑀸𑀢𑁆𑀯𑁂𑀯, 𑀯𑀺𑀆𑀓𑀢𑁄, 𑀲𑀸𑀕𑀢𑀁.

𑀅𑀥𑀺𑀕𑀢𑁄 𑀔𑁄 𑀫𑁂 𑀅𑀬𑀁 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀢𑁂 𑀅𑀳𑀁, 𑀢𑁂 𑀅𑀲𑁆𑀲 𑀧𑀳𑀻𑀦𑀸 𑀧𑀜𑁆𑀘, 𑀢𑁂 𑀅𑀳𑀁, 𑀬𑁂 𑀅𑀲𑁆𑀲, 𑀢𑁂 𑀅𑀚𑁆𑀚, 𑀬𑀸𑀯𑀢𑀓𑁄 𑀅𑀲𑁆𑀲 𑀓𑀸𑀬𑁄, 𑀢𑀸𑀯𑀢𑀓𑁄 𑀅𑀲𑁆𑀲 𑀩𑁆𑀬𑀸𑀫𑁄, 𑀓𑁄 𑀅𑀢𑁆𑀣𑁄, 𑀅𑀣 𑀔𑁄 𑀅𑀲𑁆𑀲, 𑀅𑀳𑀁 𑀔𑁄 𑀅𑀚𑁆𑀚, 𑀲𑁄 𑀅𑀳𑀁, 𑀲𑁄 𑀅𑀚𑁆𑀚, 𑀲𑁄 𑀏𑀯, 𑀬𑀢𑁄 𑀅𑀥𑀺𑀓𑀭𑀡𑀁, 𑀲𑁄 𑀅𑀳𑀁 𑀇𑀢𑀻+𑀥 ‘‘𑀬𑀯𑀸 𑀲𑀭𑁂’’ ‘‘𑀯𑁂’’𑀢𑀺 𑀘 𑀯𑀢𑁆𑀢𑀢𑁂,

𑁩𑁦. 𑀏𑀑𑀦𑀁

𑀏𑀑𑀦𑀁 𑀬𑀓𑀸𑀭+𑀯𑀓𑀸𑀭𑀸 𑀳𑁄𑀦𑁆𑀢𑀺 𑀯𑀸 𑀲𑀭𑁂 𑀧𑀭𑁂 𑀬𑀣𑀸𑀓𑁆𑀓𑀫𑀁. ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀤𑀻𑀖𑁂 𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁, 𑀢𑁆𑀬𑀸𑀲𑁆𑀲 𑀧𑀳𑀻𑀦𑀸 𑀧𑀜𑁆𑀘, 𑀢𑁆𑀬𑀸𑀳𑀁, 𑀬𑁆𑀬𑀲𑁆𑀲, 𑀢𑁆𑀬𑀚𑁆𑀚, 𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄, 𑀢𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀓𑁆𑀯𑀢𑁆𑀣𑁄, 𑀅𑀣 𑀔𑁆𑀯𑀲𑁆𑀲, 𑀅𑀳𑀁 𑀔𑁆𑀯𑀚𑁆𑀚, 𑀲𑁆𑀯𑀸𑀳𑀁, 𑀲𑁆𑀯𑀚𑁆𑀚, 𑀲𑁆𑀯𑁂𑀯, 𑀬𑀢𑁆𑀯𑀸𑀥𑀺𑀓𑀭𑀡𑀁, 𑀲𑁆𑀯𑀸𑀳𑀁. 𑀯𑀸𑀢𑁆𑀯𑁂𑀯, 𑀢𑁂𑀚𑁆𑀚, 𑀲𑁄𑀳𑀁. 𑀓𑁆𑀯𑀘𑀺 𑀢𑁆𑀯𑁂𑀯, 𑀥𑀦𑀫𑀢𑁆𑀣𑀺, 𑀧𑀼𑀢𑁆𑀢𑀸𑀫𑀢𑁆𑀣𑀺, 𑀢𑁂 𑀦𑀸𑀕𑀢𑀸, 𑀅𑀲𑀦𑁆𑀢𑁂𑀢𑁆𑀣, 𑀘𑀢𑁆𑀢𑀸𑀭𑁄 𑀇𑀫𑁂.

𑀕𑁄 𑀏𑀴𑀓𑀁, 𑀕𑁄 𑀅𑀲𑁆𑀲𑀁, 𑀕𑁄 𑀅𑀚𑀺𑀦𑀁 𑀇𑀢𑀻+𑀥 ‘‘𑀲𑀭𑁂’’𑀢𑀺 𑀯𑀢𑁆𑀢𑀢𑁂.

𑁩𑁨. 𑀕𑁄𑀲𑁆𑀲𑀸+𑀯𑀗

𑀲𑀭𑁂 𑀧𑀭𑁂 𑀕𑁄𑀲𑁆𑀲 𑀅𑀯𑀯𑀸𑀤𑁂𑀲𑁄 𑀳𑁄𑀢𑀺. 𑀲 𑀘 ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑀸’’𑀢𑀺 𑀲𑀩𑁆𑀩𑀲𑁆𑀲 𑀧𑀲𑀗𑁆𑀕𑁂 ‘𑀅𑀦𑁆𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁮. 𑀗+𑀦𑀼𑀩𑀦𑁆𑀥𑁄

𑀗-𑀓𑀸𑀭𑁄 𑀅𑀦𑀼𑀩𑀦𑁆𑀥𑁄 𑀬𑀲𑁆𑀲, 𑀲𑁄 𑀅𑀦𑁂𑀓𑀯𑀡𑁆𑀡𑁄𑀧𑀺 𑀅𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀑𑀓𑀸𑀭𑀲𑁆𑀲𑁂𑀯 𑀳𑁄𑀢𑀺. ‘‘𑀲𑀁𑀓𑁂𑀢𑁄+𑀦𑀯𑀬𑀯𑁄+𑀦𑀼𑀩𑀦𑁆𑀥𑁄’’𑀢𑀺 𑀯𑀘𑀦𑀸 𑀗-𑀓𑀸𑀭𑀲𑁆𑀲𑀸+𑀧𑁆𑀧𑀬𑁄𑀕𑁄. 𑀉𑀘𑁆𑀘𑀸𑀭𑀺𑀢𑀸𑀦𑀦𑁆𑀢𑀭𑀧𑁆𑀧𑀥𑀁𑀲𑀺𑀦𑁄 𑀳𑀺 𑀅𑀦𑀼𑀩𑀦𑁆𑀥𑀸, 𑀧𑀬𑁄𑀚𑀦𑀁 𑀅𑀦𑀼𑀩𑀦𑁆𑀥𑁄𑀢𑀺 𑀲𑀁𑀓𑁂𑀢𑁄. 𑀕𑀯𑁂𑀴𑀓𑀁, 𑀕𑀯𑀸𑀲𑁆𑀲𑀁, 𑀕𑀯𑀸𑀚𑀺𑀦𑀁.

𑀇𑀢𑀺 𑀏𑀯𑀸+𑀢𑀻+𑀥 𑁋

𑁩𑁬. 𑀯𑀻+𑀢𑀺𑀲𑁆𑀲𑁂+𑀯𑁂 𑀯𑀸

𑀏𑀯𑀲𑀤𑁆𑀤𑁂 𑀧𑀭𑁂 𑀇𑀢𑀺𑀲𑁆𑀲 𑀯𑁄 𑀳𑁄𑀢𑀺 𑀯𑀸. 𑀲 𑀘 𑁋

𑁧𑁭. 𑀙𑀝𑁆𑀞𑀺𑀬𑀦𑁆𑀢𑀲𑁆𑀲

𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀬𑀁 𑀓𑀸𑀭𑀺𑀬𑀁, 𑀢+𑀤𑀦𑁆𑀢𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀓𑀸𑀭𑀲𑁆𑀲𑀸+𑀤𑁂𑀲𑁄. 𑀆𑀤𑁂𑀲𑀺𑀝𑁆𑀞𑀸𑀦𑁂 𑀆𑀤𑀺𑀲𑁆𑀲𑀢𑀻𑀢𑀺 𑀆𑀤𑁂𑀲𑁄. 𑀇𑀢𑁆𑀯𑁂𑀯. 𑀅𑀜𑁆𑀜𑀢𑁆𑀭 𑀬𑀸𑀤𑁂𑀲𑁄, ‘‘𑀢𑀯𑀕𑁆𑀕𑀯𑀭𑀡𑀸𑀦𑀁 𑀬𑁂 𑀘𑀯𑀕𑁆𑀕𑀩𑀬𑀜𑀸’’𑀢𑀺 𑀢𑀲𑁆𑀲 𑀘𑁄, ‘‘𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 𑀬𑀲𑁆𑀲 𑀘𑀓𑀸𑀭𑁄, 𑀇𑀘𑁆𑀘𑁂𑀯. 𑀏𑀯𑁂𑀢𑀺 𑀓𑀺𑀁, 𑀇𑀘𑁆𑀘𑀸𑀳. (𑀆𑀤𑁂𑀲𑀲𑀦𑁆𑀥𑀺).

𑀢𑀺 𑀅𑀗𑁆𑀕𑀼𑀮𑀁,𑀢𑀺 𑀅𑀗𑁆𑀕𑀺𑀓𑀁, 𑀪𑀽 𑀆𑀤𑀬𑁄, 𑀫𑀺𑀕𑀻 𑀪𑀦𑁆𑀢𑀸 𑀉𑀤𑀺𑀓𑁆𑀔𑀢𑀺𑀢𑁆𑀬𑀸𑀤𑀺𑀲𑀦𑁆𑀥𑀬𑁄 𑀯𑀼𑀘𑁆𑀘𑀦𑁆𑀢𑁂. ‘‘𑀫𑀬𑀤𑀸 𑀲𑀭𑁂’’𑀢𑀺 𑀯𑀢𑁆𑀢𑀢𑁂.

𑁪𑁫. 𑀯𑀦𑀢𑀭𑀕𑀸 𑀘𑀸+𑀕𑀫𑀸

𑀏𑀢𑁂 𑀫𑀬𑀤𑀸 𑀘 𑀆𑀕𑀫𑀸 𑀳𑁄𑀦𑁆𑀢𑀺 𑀯𑀸 𑀲𑀭𑁂 𑀓𑁆𑀯𑀘𑀺. 𑀆𑀕𑀫𑀺𑀦𑁄 𑀅𑀦𑀺𑀬𑀫𑁂𑀧𑀺 𑁋

𑀲𑀭𑁄𑀬𑁂𑀯𑀸+𑀕𑀫𑀺 𑀳𑁄𑀢𑀺, 𑀯𑀦𑀸𑀤𑀺𑀦𑀦𑁆𑀢𑀼 𑀜𑀸𑀧𑀓𑀸;

𑀅𑀜𑁆𑀜𑀣𑀸 𑀳𑀺 𑀧𑀤𑀸𑀤𑀻𑀦𑀁, 𑀬𑀼𑀓𑀯𑀺𑀥𑀸𑀦+𑀫𑀦𑀢𑁆𑀣𑀓𑀁.

𑀏𑀢𑁆𑀣𑀸+𑀕𑀫𑀸 𑀅𑀦𑀺𑀬𑀢𑀸𑀕𑀫𑀻𑀦𑀫𑁂𑀯 𑀪𑀯𑀦𑁆𑀢𑀺 𑀘𑁂, 𑀬𑀓𑀸𑀭𑀸𑀕𑀫𑁂𑀦𑁂𑀯 ‘‘𑀦𑀺𑀧𑀚𑁆𑀚’’𑀦𑁆𑀢𑀺 𑀲𑀺𑀤𑁆𑀥𑁂 ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀩𑁆𑀬𑀜𑁆𑀚𑀦𑀲𑁆𑀲 𑀬𑀼𑀓𑀸+𑀕𑀫𑁄 𑀦𑀺𑀭𑀢𑁆𑀣𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀺𑀯𑀗𑁆𑀕𑀼𑀮𑀁, 𑀢𑀺𑀯𑀗𑁆𑀕𑀺𑀓𑀁, 𑀪𑀽𑀯𑀸𑀤𑀬𑁄, 𑀫𑀺𑀕𑀻 𑀪𑀦𑁆𑀢𑀸 𑀯𑀼𑀤𑀺𑀓𑁆𑀔𑀢𑀺, 𑀧𑀯𑀼𑀘𑁆𑀘𑀢𑀺, 𑀧𑀸𑀕𑀼𑀜𑁆𑀜𑀯𑀼𑀚𑀼𑀢𑀸. 𑀇𑀢𑁄 𑀦𑀸𑀬𑀢𑀺, 𑀘𑀺𑀦𑀺𑀢𑁆𑀯𑀸. 𑀬𑀲𑁆𑀫𑀸𑀢𑀺𑀳, 𑀢𑀲𑁆𑀫𑀸𑀢𑀺𑀳, 𑀅𑀚𑁆𑀚𑀢𑀕𑁆𑀕𑁂. 𑀦𑀺𑀭𑀦𑁆𑀢𑀭𑀁, 𑀦𑀺𑀭𑀸𑀮𑀬𑁄, 𑀦𑀺𑀭𑀺𑀦𑁆𑀥𑀦𑁄, 𑀦𑀺𑀭𑀻𑀳𑀓𑀁, 𑀦𑀺𑀭𑀼𑀢𑁆𑀢𑀭𑁄, 𑀦𑀺𑀭𑁄𑀚𑀁, 𑀤𑀼𑀭𑀢𑀺𑀓𑁆𑀓𑀫𑁄, 𑀤𑀼𑀭𑀸𑀕𑀢𑀁, 𑀤𑀼𑀭𑀼𑀢𑁆𑀢𑀭𑀁, 𑀧𑀸𑀢𑀼𑀭𑀳𑁄𑀲𑀺, 𑀧𑀼𑀦𑀭𑀸𑀕𑀘𑁆𑀙𑁂𑀬𑁆𑀬, 𑀧𑀼𑀦𑀭𑀼𑀢𑁆𑀢𑀁, 𑀧𑀼𑀦𑀭𑁂𑀯, 𑀧𑀼𑀦𑀭𑁂𑀢𑀺, 𑀥𑀻𑀭𑀢𑁆𑀣𑀼, 𑀧𑀸𑀢𑀭𑀸𑀲𑁄, 𑀘𑀢𑀼𑀭𑀗𑁆𑀕𑀺𑀓𑀁, 𑀘𑀢𑀼𑀭𑀸𑀭𑀓𑁆𑀔𑀁, 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑁄, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀁, 𑀪𑀢𑁆𑀢𑀼𑀭𑀢𑁆𑀣𑁂, 𑀯𑀼𑀢𑁆𑀢𑀺𑀭𑁂𑀲𑀸, 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁, 𑀯𑀺𑀚𑁆𑀚𑀼𑀭𑀺𑀯𑀩𑁆𑀪𑀓𑀼𑀝𑁂, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄, 𑀉𑀲𑀪𑁄𑀭𑀺𑀯, 𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣. 𑀧𑀼𑀣𑀕𑁂𑀯, 𑀭𑀲𑁆𑀲𑁂 𑀧𑀕𑁂𑀯. 𑀮𑀳𑀼𑀫𑁂𑀲𑁆𑀲𑀢𑀺, 𑀕𑀼𑀭𑀼𑀫𑁂𑀲𑁆𑀲𑀢𑀺, 𑀇𑀥𑀫𑀸𑀳𑀼, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺, 𑀪𑀤𑁆𑀭𑁄 𑀓𑀲𑀸𑀫𑀺𑀯, 𑀆𑀓𑀸𑀲𑁂 𑀫𑀪𑀺𑀧𑀽𑀚𑀬𑁂, 𑀏𑀓𑀫𑁂𑀓𑀲𑁆𑀲, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂. 𑀪𑀸𑀢𑀺𑀬𑁂𑀯, 𑀳𑁄𑀢𑀺𑀬𑁂𑀯, 𑀬𑀣𑀸𑀬𑀺𑀤𑀁, 𑀬𑀣𑀸𑀬𑁂𑀯, 𑀫𑀸𑀬𑀺𑀤𑀁, 𑀦𑀬𑀺𑀤𑀁, 𑀦𑀬𑀺𑀥, 𑀙𑀬𑀺𑀫𑀸𑀦𑀺, 𑀦𑀯𑀬𑀺𑀫𑁂 𑀥𑀫𑁆𑀫𑀸, 𑀩𑁄𑀥𑀺𑀬𑀸𑀬𑁂𑀯, 𑀧𑀣𑀯𑀻𑀬𑁂𑀯 𑀥𑀸𑀢𑀼, 𑀢𑁂𑀲𑀼𑀬𑁂𑀯, 𑀢𑁂𑀬𑁂𑀯, 𑀲𑁄𑀬𑁂𑀯, 𑀧𑀸𑀝𑀺𑀬𑁂𑀓𑁆𑀓𑀁, 𑀯𑀺𑀬𑀜𑁆𑀚𑀦𑀁, 𑀯𑀺𑀬𑀸𑀓𑀸𑀲𑀺, 𑀧𑀭𑀺𑀬𑀦𑁆𑀢𑀁, 𑀧𑀭𑀺𑀬𑀸𑀤𑀸𑀦𑀁, 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀧𑀭𑀺𑀬𑁂𑀲𑀢𑀺, 𑀧𑀭𑀺𑀬𑁄𑀲𑀸𑀦𑀁, 𑀦𑀺𑀬𑀸𑀬𑁄𑀕𑁄. 𑀉𑀤𑀕𑁆𑀕𑁄, 𑀉𑀤𑀬𑁄, 𑀉𑀤𑀸𑀳𑀝𑀁, 𑀉𑀤𑀺𑀢𑁄, 𑀉𑀤𑀻𑀭𑀺𑀢𑀁, 𑀉𑀤𑁂𑀢𑀺, 𑀲𑀓𑀺𑀤𑁂𑀯, 𑀓𑀺𑀜𑁆𑀘𑀺𑀤𑁂𑀯, 𑀓𑁂𑀦𑀘𑀺𑀤𑁂𑀯, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯, 𑀓𑁄𑀘𑀺𑀤𑁂𑀯, 𑀲𑀫𑁆𑀫𑀤𑀢𑁆𑀢𑁄, 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀲𑀫𑁆𑀫𑀤𑁂𑀯, 𑀬𑀸𑀯𑀤𑀢𑁆𑀣𑀁, 𑀬𑀸𑀯𑀤𑀺𑀘𑁆𑀙𑀓𑀁, 𑀬𑀸𑀯𑀤𑁂𑀯, 𑀢𑀸𑀯𑀤𑁂𑀯, 𑀧𑀼𑀦𑀤𑁂𑀯, 𑀬𑀤𑀢𑁆𑀣𑀁, 𑀬𑀤𑀦𑁆𑀢𑀭𑀁, 𑀢𑀤𑀦𑁆𑀢𑀭𑀁, 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺, 𑀏𑀢𑀤𑀢𑁆𑀣𑀁, 𑀅𑀢𑁆𑀢𑀤𑀢𑁆𑀣𑀁, 𑀢𑀤𑀢𑁆𑀣𑀁, 𑀲𑀤𑀢𑁆𑀣𑀧𑀲𑀼𑀢𑁄 𑀲𑀺𑀬𑀸, 𑀅𑀜𑁆𑀜𑀤𑀢𑁆𑀣𑀼, 𑀫𑀦𑀲𑀸𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀩𑀳𑀼𑀤𑁂𑀯 𑀭𑀢𑁆𑀢𑀺. 𑀯𑀸𑀢𑁆𑀯𑁂𑀯, 𑀅𑀢𑁆𑀢𑀅𑀢𑁆𑀣𑀁, 𑀤𑁆𑀯𑀸𑀥𑀺𑀝𑁆𑀞𑀺𑀢𑀁, 𑀧𑀸𑀢𑀼𑀅𑀳𑁄𑀲𑀺. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀯𑀸𑀥𑀺𑀓𑀸𑀭𑀲𑁆𑀲 𑀩𑁆𑀬𑀜𑁆𑀚𑀦𑀢𑁄𑀧𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀘𑀺𑀭𑀁 𑀦𑀸𑀬𑀢𑀺, 𑀢𑀁𑀬𑁂𑀯.

𑀙 𑀅𑀪𑀺𑀜𑁆𑀜𑀸, 𑀙 𑀅𑀗𑁆𑀕𑀁, 𑀙 𑀅𑀲𑀻𑀢𑀺, 𑀙 𑀅𑀁𑀲𑀸, 𑀙 𑀆𑀬𑀢𑀦𑀁 𑀇𑀢𑀻+𑀥 ‘‘𑀯𑀸 𑀲𑀭𑁂’’ ‘‘𑀆𑀕𑀫𑁄’’𑀢𑀺 𑀘 𑀯𑀢𑁆𑀢𑀢𑁂.

𑁪𑁯. 𑀙𑀸 𑀴𑁄

𑀙𑀲𑀤𑁆𑀤𑀸 𑀧𑀭𑀲𑁆𑀲 𑀲𑀭𑀲𑁆𑀲 𑀴𑀓𑀸𑀭𑁄 𑀆𑀕𑀫𑁄 𑀳𑁄𑀢𑀺 𑀯𑀸. 𑀙𑀸𑀢𑀺 𑀅𑀦𑀼𑀓𑀭𑀡𑀢𑁆𑀢𑀸 𑀏𑀓𑀯𑀘𑀦𑀁. 𑀙𑀴𑀪𑀺𑀜𑁆𑀜𑀸, 𑀙𑀴𑀗𑁆𑀕𑀁, 𑀙𑀴𑀲𑀻𑀢𑀺, 𑀙𑀴𑀁𑀲𑀸, 𑀙𑀴𑀸𑀬𑀢𑀦𑀁. 𑀯𑀸𑀢𑁆𑀯𑁂𑀯, 𑀙𑀅𑀪𑀺𑀜𑁆𑀜𑀸. (𑀆𑀕𑀫𑀲𑀦𑁆𑀥𑀺).

𑀮𑁄𑀧𑁄 𑀅𑀤𑀲𑁆𑀲𑀦𑀁, 𑀞𑀸𑀦𑀺𑀁, 𑀬+𑀫𑀸𑀫𑀤𑁆𑀤𑀺𑀬 𑀤𑀺𑀲𑁆𑀲𑀢𑀺;

𑀆𑀤𑁂𑀲𑁄 𑀦𑀸𑀫 𑀲𑁄 𑀬𑀸 𑀢𑀼, 𑀅𑀲𑀦𑁆𑀢𑀼𑀧𑁆𑀧𑀢𑁆𑀢𑀺 𑀆𑀕𑀫𑁄.

𑀲𑀭𑀲𑀦𑁆𑀥𑀺.

𑀓𑀜𑁆𑀜𑀸 𑀇𑀯, 𑀓𑀜𑁆𑀜𑀸𑀯 𑀇𑀘𑁆𑀘𑀸𑀤𑀺 𑀲𑀭𑀲𑀦𑁆𑀥𑀺𑀦𑀺𑀲𑁂𑀥𑁄 𑀯𑀼𑀘𑁆𑀘𑀢𑀺, 𑀧𑀲𑀗𑁆𑀕𑀧𑀼𑀩𑁆𑀩𑀓𑁄 𑀳𑀺 𑀧𑀝𑀺𑀲𑁂𑀥𑁄. 𑀧𑀼𑀩𑁆𑀩𑀲𑀭𑀸𑀦𑀁 𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 ‘‘𑀲𑀭𑁄’’ ‘‘𑀯𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁮. 𑀦 𑀤𑁆𑀯𑁂 𑀯𑀸

𑀧𑀼𑀩𑁆𑀩𑀧𑀭𑀲𑁆𑀲𑀭𑀸 𑀤𑁆𑀯𑁂𑀧𑀺 𑀯𑀸 𑀓𑁆𑀯𑀘𑀺 𑀦 𑀮𑀼𑀧𑁆𑀬𑀦𑁆𑀢𑁂. 𑀓𑀜𑁆𑀜𑀸 𑀇𑀯, 𑀓𑀜𑁆𑀜𑁂𑀯, 𑀓𑀜𑁆𑀜𑀸𑀯.

𑀲𑀸𑀭𑀺𑀧𑀼𑀢𑁆𑀢 𑀇𑀥𑁂𑀓𑀘𑁆𑀘𑁄, 𑀏𑀳𑀺 𑀲𑀺𑀯𑀓 𑀉𑀝𑁆𑀞𑁂𑀳𑀺, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀕𑀸𑀣𑀸 𑀅𑀪𑀸𑀲𑀺, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸, 𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸, 𑀪𑀕𑀯𑀸 𑀏𑀢+𑀤𑀯𑁄𑀘, 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄, 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻, 𑀬𑀁 𑀇𑀢𑁆𑀣𑀻 𑀅𑀭𑀳𑀁 𑀅𑀲𑁆𑀲, 𑀲𑀸𑀫𑀸𑀯𑀢𑀻 𑀆𑀳, 𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀢𑀧𑁆𑀧𑀢𑀺, 𑀦𑀤𑀻 𑀑𑀢𑁆𑀣𑀭𑀢𑀺, 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸, 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀪𑀺𑀓𑁆𑀔𑀽 𑀉𑀚𑁆𑀛𑀸𑀬𑀺𑀁𑀲𑀼, 𑀪𑀺𑀓𑁆𑀔𑀽 𑀏𑀯+𑀫𑀸𑀳𑀁𑀲𑀼, 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀆𑀭𑀓𑁆𑀔𑀓𑀸, 𑀲𑀩𑁆𑀩𑁂 𑀇𑀫𑁂, 𑀓𑀢𑀫𑁂 𑀏𑀓𑀸𑀤𑀲, 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂, 𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁, 𑀲𑀗𑁆𑀖𑁄 𑀆𑀕𑀘𑁆𑀙𑀢𑀼, 𑀓𑁄 𑀇𑀫𑀁 𑀧𑀣𑀯𑀺𑀁 𑀯𑀺𑀘𑁂𑀲𑁆𑀲𑀢𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺, 𑀏𑀓𑁄 𑀏𑀓𑀸𑀬, 𑀘𑀢𑁆𑀢𑀸𑀭𑁄 𑀑𑀖𑀸, 𑀅𑀭𑁂 𑀅𑀳𑀫𑁆𑀧𑀺, 𑀲𑀘𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀦𑁄 𑀅𑀢𑀺𑀓𑁆𑀓𑀫𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄, 𑀅𑀣𑁄 𑀅𑀦𑁆𑀢𑁄 𑀘, 𑀅𑀣 𑀔𑁄 𑀆𑀬𑀲𑁆𑀫𑀸, 𑀅𑀣𑁄 𑀑𑀝𑁆𑀞𑀯+𑀘𑀺𑀢𑁆𑀢𑀓𑀸, 𑀢𑀢𑁄 𑀆- 𑀫𑀦𑁆𑀢𑀬𑀺 𑀲𑀢𑁆𑀣𑀸𑀢𑀺 𑀏𑀯𑀫𑀸𑀤𑀬𑁄 𑀇𑀥 𑀓𑀸𑀮𑀩𑁆𑀬𑀯𑀥𑀸𑀦𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀺. 𑀓𑁆𑀯𑀘𑀻𑀢𑀺 𑀓𑀺𑀁, 𑀆𑀕𑀢𑀸+𑀢𑁆𑀣, 𑀆𑀕𑀢𑀸+𑀫𑁆𑀳𑀸, 𑀓𑀢𑀫+𑀲𑁆𑀲 𑀯𑀸𑀭𑁄, 𑀅𑀧𑁆𑀧𑀲𑁆𑀲𑀼𑀢𑀸+𑀬𑀁 𑀧𑀼𑀭𑀺𑀲𑁄, 𑀘𑀫𑀭𑀻+𑀯, 𑀲𑀩𑁆𑀩𑁂+𑀯, 𑀲𑁆𑀯𑁂+𑀯, 𑀏𑀲𑁂+𑀯 𑀦𑀬𑁄, 𑀧𑀭𑀺𑀲𑀼𑀤𑁆𑀥𑁂+𑀢𑁆𑀣𑀸+𑀬𑀲𑁆𑀫𑀦𑁆𑀢𑁄, 𑀦𑁂+𑀢𑁆𑀣, 𑀓𑀼𑀢𑁂+𑀢𑁆𑀣 𑀮𑀩𑁆𑀪𑀸, 𑀲𑀘𑁂+𑀲 𑀩𑁆𑀭𑀸𑀳𑁆𑀫𑀡, 𑀢𑀣𑀽+𑀧𑀫𑀁, 𑀬𑀣𑀸+𑀳, 𑀚𑀻𑀯𑁆𑀳𑀸+𑀬𑀢𑀦𑀁, 𑀅𑀯𑀺𑀚𑁆𑀚𑁄+𑀖𑁄, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀅𑀪𑀺𑀪𑀸+𑀬𑀢𑀦𑀁, 𑀪𑀬𑀢𑀽+𑀧𑀝𑁆𑀞𑀸𑀦𑀁, 𑀲𑀤𑁆𑀥𑀻+𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁. (𑀲𑀭𑀲𑀦𑁆𑀥𑀺𑀦𑀺𑀲𑁂𑀥𑁄)

𑀢𑀢𑁆𑀭 𑀅𑀪𑀺𑀭𑀢𑀺, 𑀢𑀢𑁆𑀭 𑀅𑀬𑀁, 𑀩𑀼𑀤𑁆𑀥 𑀅𑀦𑀼𑀲𑁆𑀲𑀢𑀺, 𑀲 𑀅𑀢𑁆𑀣𑀺𑀓𑀸, 𑀲𑀜𑁆𑀜𑀸𑀯𑀸 𑀅𑀲𑁆𑀲, 𑀢𑀤𑀸 𑀅𑀳𑀁, 𑀬𑀸𑀦𑀺 𑀇𑀥 𑀪𑀽𑀢𑀸𑀦𑀺, 𑀕𑀘𑁆𑀙𑀸𑀫𑀺 𑀇𑀢𑀺, 𑀅𑀢𑀺 𑀇𑀢𑁄, 𑀓𑀺𑀓𑀻 𑀇𑀯, 𑀩𑀳𑀼 𑀉𑀧𑀓𑀸𑀭𑀁, 𑀫𑀥𑀼 𑀉𑀤𑀓𑀁, 𑀲𑀼 𑀉𑀧𑀥𑀸𑀭𑀺𑀢𑀁, 𑀲𑁄𑀧𑀺 𑀅𑀬𑀁, 𑀇𑀤𑀸𑀦𑀺 𑀅𑀳𑀁, 𑀲𑀘𑁂 𑀅𑀬𑀁, 𑀅𑀧𑁆𑀧𑀲𑁆𑀲𑀼𑀢𑁄 𑀅𑀬𑀁, 𑀇𑀢𑀭 𑀇𑀢𑀭𑁂𑀦, 𑀲𑀤𑁆𑀥𑀸 𑀇𑀥 𑀯𑀺𑀢𑁆𑀢𑀁, 𑀓𑀫𑁆𑀫 𑀉𑀧𑀦𑀺𑀲𑁆𑀲𑀬𑁄, 𑀢𑀣𑀸 𑀉𑀧𑀫𑀁, 𑀭𑀢𑁆𑀢𑀺 𑀉𑀧𑀭𑀢𑁄, 𑀯𑀺 𑀉𑀧𑀲𑀫𑁄, 𑀮𑁄𑀓𑀲𑁆𑀲 𑀇𑀢𑀺, 𑀤𑁂𑀯 𑀇𑀢𑀺, 𑀯𑀺 𑀅𑀢𑀺𑀧𑀢𑀦𑁆𑀢𑀺, 𑀯𑀺 𑀅𑀢𑀺𑀦𑀸𑀫𑁂𑀦𑁆𑀢𑀺, 𑀲𑀗𑁆𑀖𑀸𑀝𑀺 𑀅𑀧𑀺, 𑀚𑀻𑀯𑀺𑀢𑀳𑁂𑀢𑀼 𑀅𑀧𑀺, 𑀯𑀺𑀚𑁆𑀚𑀼 𑀇𑀯, 𑀓𑀺𑀁𑀲𑀼 𑀇𑀥 𑀯𑀺𑀢𑁆𑀢𑀁, 𑀲𑀸𑀥𑀼 𑀇𑀢𑀺, 𑀢𑁂 𑀅𑀲𑁆𑀲 𑀧𑀳𑀻𑀦𑀸, 𑀲𑁄 𑀅𑀲𑁆𑀲, 𑀫𑀥𑀼𑀯𑀸 𑀫𑀜𑁆𑀜𑀢𑀺 𑀩𑀸𑀮𑁄, 𑀏𑀯𑀁 𑀕𑀸𑀫𑁂 𑀫𑀼𑀦𑀺 𑀘𑀭𑁂, 𑀔𑀦𑁆𑀢𑀺 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦 𑀫𑀁𑀓𑀼 𑀪𑀯𑀺𑀲𑁆𑀲𑀸𑀫𑀺, 𑀲𑀼 𑀅𑀓𑁆𑀔𑀸𑀢𑁄, 𑀬𑁄 𑀅𑀳𑀁, 𑀲𑁄 𑀅𑀳𑀁, 𑀓𑀸𑀫𑀢𑁄 𑀚𑀸𑀬𑀢𑀺 𑀲𑁄𑀓𑁄, 𑀓𑀸𑀫𑀢𑁄 𑀚𑀸𑀬𑀢𑀺 𑀪𑀬𑀁, 𑀲𑀓𑁆𑀓𑁄 𑀉𑀚𑀼 𑀘 𑀲𑀼𑀳𑀼𑀚𑀼𑀘, 𑀅𑀦𑀼𑀧𑀖𑀸𑀢𑁄, 𑀤𑀼𑀭𑀓𑁆𑀔𑀁, 𑀤𑀼𑀭𑀫𑀁, 𑀤𑀼𑀪𑀭𑀢𑀸. 𑀬𑀺𑀝𑁆𑀞𑀁 𑀯𑀸 𑀳𑀼𑀢𑀁 𑀯𑀸 𑀮𑁄𑀓𑁂, 𑀬𑀤𑀺 𑀯𑀸 𑀲𑀸𑀯𑀓𑁂, 𑀧𑀼𑀕𑁆𑀕𑀮𑀸 𑀥𑀫𑁆𑀫𑀤𑀲𑀸 𑀢𑁂, 𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀺, 𑀬𑀣𑀸𑀪𑀸𑀯𑀻 𑀕𑀼𑀡𑁂𑀦 𑀲𑁄, 𑀬𑀣𑀸 𑀇𑀤𑀁, 𑀲𑀫𑁆𑀫𑀸 𑀤𑀓𑁆𑀔𑀸𑀢𑁄, 𑀧𑀭𑀸 𑀓𑀫𑁄, 𑀢𑀡𑁆𑀳𑀸 𑀓𑁆𑀔𑀬𑁄, 𑀛𑀸𑀦𑀲𑁆𑀲 𑀮𑀸𑀪𑀻 𑀅𑀫𑁆𑀳𑀺, 𑀣𑀼𑀮𑁆𑀮𑀘𑁆𑀘𑀬𑁄 𑀇𑀢𑀻+𑀥 𑁋

𑁩𑁩. 𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸

𑀭𑀲𑁆𑀲+𑀤𑀻𑀖𑀸𑀦𑀁 𑀓𑁆𑀯𑀘𑀺 𑀤𑀻𑀖+𑀭𑀲𑁆𑀲𑀸 𑀳𑁄𑀦𑁆𑀢𑀺 𑀩𑁆𑀬𑀜𑁆𑀚𑀦𑁂. 𑀢𑀢𑁆𑀭𑀸𑀪𑀺𑀭𑀢𑀺, 𑀢𑀢𑁆𑀭𑀸𑀬𑀁, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀲𑀸𑀢𑁆𑀣𑀺𑀓𑀸, 𑀲𑀜𑁆𑀜𑀸𑀯𑀸+𑀲𑁆𑀲, 𑀢𑀤𑀸𑀳𑀁, 𑀬𑀸𑀦𑀻+𑀥 𑀪𑀽𑀢𑀸𑀦𑀺, 𑀕𑀘𑁆𑀙𑀸𑀫𑀻𑀢𑀺, 𑀅𑀢𑀻𑀢𑁄, 𑀓𑀺𑀓𑀻𑀯, 𑀩𑀳𑀽𑀧𑀓𑀸𑀭𑀁, 𑀫𑀥𑀽𑀤𑀓𑀁, 𑀲𑀽𑀧𑀥𑀸𑀭𑀺𑀢𑀁, 𑀲𑁄𑀧𑀸𑀬𑀁, 𑀇𑀤𑀸𑀦𑀸𑀳𑀁, 𑀲𑀘𑀸𑀬𑀁, 𑀅𑀧𑁆𑀧𑀲𑁆𑀲𑀼𑀢𑀸𑀬𑀁, 𑀇𑀢𑀭𑀻𑀢𑀭𑁂𑀦, 𑀲𑀤𑁆𑀥𑀻𑀥 𑀯𑀺𑀢𑁆𑀢𑀁, 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑁄, 𑀢𑀣𑀽𑀧𑀫𑀁, 𑀭𑀢𑁆𑀢𑀽𑀧𑀭𑀢𑁄, 𑀯𑀽𑀧𑀲𑀫𑁄, 𑀮𑁄𑀓𑀲𑁆𑀲𑀸𑀢𑀺, 𑀤𑁂𑀯𑀸𑀢𑀺, 𑀯𑀻𑀢𑀺𑀧𑀢𑀦𑁆𑀢𑀺, 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀲𑀗𑁆𑀖𑀸𑀝𑀻𑀧𑀺, 𑀚𑀻𑀯𑀺𑀢𑀳𑁂𑀢𑀽𑀧𑀺, 𑀯𑀺𑀚𑁆𑀚𑀽𑀯, 𑀓𑀺𑀁𑀲𑀽𑀥 𑀯𑀺𑀢𑁆𑀢𑀁, 𑀲𑀸𑀥𑀽𑀢𑀺, 𑀢𑁆𑀬𑀸𑀲𑁆𑀲 𑀧𑀳𑀻𑀦𑀸, 𑀲𑁆𑀯𑀸𑀲𑁆𑀲, 𑀫𑀥𑀼𑀯𑀸 𑀫𑀜𑁆𑀜𑀢𑀻 𑀩𑀸𑀮𑁄, 𑀏𑀯𑀁 𑀕𑀸𑀫𑁂 𑀫𑀼𑀦𑀻 𑀘𑀭𑁂, 𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦 𑀫𑀁𑀓𑀽 𑀪𑀯𑀺𑀲𑁆𑀲𑀸𑀫𑀺, 𑀲𑁆𑀯𑀸𑀓𑁆𑀔𑀸𑀢𑁄, 𑀬𑁆𑀯𑀸𑀳𑀁, 𑀲𑁆𑀯𑀸𑀳𑀁, 𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀓𑀸𑀫𑀢𑁄 𑀚𑀸𑀬𑀢𑀻 𑀪𑀬𑀁, 𑀲𑀓𑁆𑀓𑁄 𑀉𑀚𑀽 𑀘 𑀲𑀼𑀳𑀼𑀚𑀽 𑀘, 𑀅𑀦𑀽𑀧𑀖𑀸𑀢𑁄, 𑀤𑀽𑀭𑀓𑁆𑀔𑀁, 𑀤𑀽𑀭𑀫𑀁, 𑀤𑀽𑀪𑀭𑀢𑀸. 𑀬𑀺𑀝𑁆𑀞𑀁𑀯 𑀳𑀼𑀢𑀁𑀯 𑀮𑁄𑀓𑁂, 𑀬𑀤𑀺𑀯 𑀲𑀸𑀯𑀓𑁂, 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂, 𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀬𑀣𑀸𑀪𑀸𑀯𑀺 𑀕𑀼𑀡𑁂𑀦 𑀲𑁄, 𑀬𑀣𑀬𑀺𑀤𑀁, 𑀲𑀫𑁆𑀫𑀤𑀓𑁆𑀔𑀸𑀢𑁄, 𑀧𑀭𑀓𑁆𑀓𑀫𑁄, 𑀢𑀡𑁆𑀳𑀓𑁆𑀔𑀬𑁄, 𑀛𑀸𑀦𑀲𑁆𑀲 𑀮𑀸𑀪𑀺𑀫𑁆𑀳𑀺, 𑀯𑀲𑀺𑀫𑁆𑀳𑀺, 𑀣𑀼𑀮𑁆𑀮𑀘𑁆𑀘𑀬𑁄. 𑀓𑁆𑀯𑀘𑀻𑀢𑀺 𑀓𑀺𑀁, 𑀢𑁆𑀬𑀚𑁆𑀚, 𑀲𑁆𑀯𑀲𑁆𑀲, 𑀧𑀢𑀺𑀮𑀺𑀬𑀢𑀻𑀢𑀺 𑀤𑀻𑀖𑀦𑀺𑀲𑁂𑀥𑁄, 𑀫𑀸𑀬𑀺𑀤𑀁, 𑀫𑀦𑀲𑀸𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀬𑀣𑀸𑀓𑁆𑀓𑀫𑀁, 𑀆𑀭𑀓𑁆𑀔𑀸𑀢𑀻𑀢𑀁, 𑀤𑀻𑀬𑀢𑀺, 𑀲𑀽𑀬𑀢𑀻𑀢𑀺 𑀭𑀲𑁆𑀲𑀓𑀸𑀭𑀺𑀬𑀦𑀺𑀲𑁂𑀥𑁄. 𑀓𑀣𑀁 𑀬𑀸𑀦𑀺𑀯 𑀅𑀦𑁆𑀢𑀮𑀺𑀓𑁆𑀔𑁂𑀢𑀺, ‘‘𑀤𑀻𑀖𑀭𑀲𑁆𑀲𑀸’’𑀢𑀺 𑀬𑁄𑀕𑀯𑀺𑀪𑀸𑀕𑀸. (𑀤𑀻𑀖+𑀭𑀲𑁆𑀲𑀲𑀦𑁆𑀥𑀺).

𑀩𑁆𑀬𑀜𑁆𑀚𑀦𑁂𑀢𑀺 𑀯𑀢𑁆𑀢𑀢𑁂.

𑁩𑁪. 𑀲𑀭𑀫𑁆𑀳𑀸 𑀤𑁆𑀯𑁂

𑀲𑀭𑀫𑁆𑀳𑀸 𑀧𑀭𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀓𑁆𑀯𑀘𑀺 𑀤𑁆𑀯𑁂 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀆𑀯𑀼𑀢𑁆𑀢𑀺𑀤𑁆𑀯𑀺𑀯𑀘𑀦𑀁 𑀞𑀸𑀦𑁂𑀤𑁆𑀯𑀺𑀯𑀘𑀦𑀦𑁆𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀤𑁆𑀯𑀺𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀸𑀦𑀺 𑀘 𑀧+𑀧𑀢𑀺+𑀧𑀝𑀺+𑀓𑀫+𑀓𑀼𑀲+𑀓𑀼𑀥+𑀓𑀻+𑀕𑀳+𑀚𑀼𑀢+𑀜𑀸+𑀲𑀺+ 𑀲𑀼+𑀲𑀽+𑀲𑀫𑁆𑀪𑀽+𑀲𑀭+𑀲𑀲𑀸𑀤𑀻𑀦𑀫𑀸𑀤𑀺𑀩𑁆𑀬𑀜𑁆𑀚𑀦𑀸𑀦𑀜𑁆𑀘 𑀳𑁄𑀢𑀺. 𑀇𑀥 𑀧𑀫𑀸𑀤𑁄=𑀇𑀥𑀧𑁆𑀧𑀫𑀸𑀤𑁄, 𑀏𑀯𑀁 𑀅𑀧𑁆𑀧𑀫𑀸𑀤𑁄, 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀲𑀼𑀧𑁆𑀧𑀲𑀦𑁆𑀦𑁄, 𑀲𑀫𑁆𑀫𑀸 𑀧𑀥𑀸𑀦𑀁=𑀲𑀫𑁆𑀫𑀧𑁆𑀧𑀥𑀸𑀦𑀁 𑀭𑀲𑁆𑀲𑀢𑁆𑀢𑀁. 𑀅𑀧𑁆𑀧𑀢𑀺𑀯𑀢𑁆𑀢𑀺𑀬𑁄, 𑀅𑀥𑀺𑀧𑁆𑀧𑀢𑀺𑀧𑀘𑁆𑀘𑀬𑁄, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄,. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀯𑀺𑀧𑁆𑀧𑀝𑀺𑀲𑀸𑀭𑁄, 𑀲𑀼𑀧𑁆𑀧𑀝𑀺𑀧𑀢𑁆𑀢𑀺. 𑀧𑀓𑁆𑀓𑀫𑁄, 𑀧𑀝𑀺𑀓𑁆𑀓𑀫𑁄, 𑀳𑁂𑀢𑀼𑀓𑁆𑀓𑀫𑁄, 𑀆𑀓𑀫𑀢𑀺=𑀅𑀓𑁆𑀓𑀫𑀢𑀺, 𑀏𑀯𑀁 𑀧𑀓𑁆𑀓𑀫𑀢𑀺, 𑀬𑀣𑀸𑀓𑁆𑀓𑀫𑀁. 𑀅𑀓𑁆𑀓𑁄𑀲𑀢𑀺, 𑀧𑀝𑀺𑀓𑁆𑀓𑁄𑀲𑀢𑀺, 𑀅𑀦𑀼𑀓𑁆𑀓𑁄𑀲𑀢𑀺, 𑀆𑀓𑁄𑀲𑀢𑀺=𑀅𑀓𑁆𑀓𑁄𑀲𑀢𑀺. 𑀅𑀓𑁆𑀓𑀼𑀤𑁆𑀥𑁄, 𑀅𑀪𑀺𑀓𑁆𑀓𑀼𑀤𑁆𑀥𑁄. 𑀥𑀦𑀓𑁆𑀓𑀻𑀢𑁄, 𑀯𑀺𑀓𑁆𑀓𑀬𑁄, 𑀅𑀦𑀼𑀓𑁆𑀓𑀬𑁄. 𑀧𑀕𑁆𑀕𑀳𑁄, 𑀯𑀺𑀕𑁆𑀕𑀳𑁄, 𑀅𑀦𑀼𑀕𑁆𑀕𑀳𑁄, 𑀘𑀦𑁆𑀤𑀕𑁆𑀕𑀸𑀳𑁄, 𑀤𑀺𑀝𑁆𑀞𑀺𑀕𑁆𑀕𑀸𑀳𑁄. 𑀧𑀚𑁆𑀚𑁄𑀢𑁄, 𑀯𑀺𑀚𑁆𑀚𑁄𑀢𑁄, 𑀉𑀚𑁆𑀚𑁄𑀢𑁄. 𑀓𑀢𑀜𑁆𑀜𑀽, 𑀯𑀺𑀜𑁆𑀜𑀽, 𑀧𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀁, 𑀅𑀦𑀜𑁆𑀜𑀸𑀡𑀁. 𑀅𑀯𑀲𑁆𑀲𑀬𑁄, 𑀦𑀺𑀲𑁆𑀲𑀬𑁄, 𑀲𑀫𑀼𑀲𑁆𑀲𑀬𑁄. 𑀅𑀧𑁆𑀧𑀲𑁆𑀲𑀼𑀢𑁄, 𑀯𑀺𑀲𑁆𑀲𑀼𑀢𑁄, 𑀩𑀳𑀼𑀲𑁆𑀲𑀼𑀢𑁄. 𑀆𑀲𑀯𑀸=𑀅𑀲𑁆𑀲𑀯𑀸. 𑀧𑀲𑁆𑀲𑀫𑁆𑀪𑁂𑀦𑁆𑀢𑁄, 𑀯𑀺𑀲𑁆𑀲𑀫𑁆𑀪𑁂𑀦𑁆𑀢𑁄. 𑀅𑀝𑁆𑀝𑀲𑁆𑀲𑀭𑁄, 𑀯𑀺𑀲𑁆𑀲𑀭𑀢𑀺, 𑀅𑀦𑀼𑀲𑁆𑀲𑀭𑀢𑀺, 𑀅𑀦𑀼𑀲𑁆𑀲𑀢𑀺. 𑀧𑀲𑁆𑀲𑀲𑀦𑁆𑀢𑁄, 𑀯𑀺𑀲𑁆𑀲𑀲𑀦𑁆𑀢𑁄, 𑀫𑀼𑀳𑀼𑀲𑁆𑀲𑀲𑀦𑁆𑀢𑁄, 𑀆𑀲𑀸𑀲𑁄=𑀅𑀲𑁆𑀲𑀸𑀲𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀯𑀺𑀲𑁆𑀲𑀚𑁂𑀦𑁆𑀢𑁄, 𑀯𑀺𑀲𑁆𑀲𑀚𑁂𑀦𑁆𑀢𑁄, 𑀅𑀪𑀺𑀓𑁆𑀓𑀦𑁆𑀢𑀢𑀭𑁄, 𑀧𑀭𑀺𑀘𑁆𑀘𑀚𑁂𑀦𑁆𑀢𑁄, 𑀉𑀧𑀤𑁆𑀤𑀯𑁄, 𑀉𑀧𑀓𑁆𑀓𑀺𑀮𑁂𑀲𑁄, 𑀫𑀺𑀢𑁆𑀢𑀤𑁆𑀤𑀼𑀦𑁄, 𑀆𑀬𑀩𑁆𑀬𑀬𑁄, 𑀅𑀩𑁆𑀩𑀳𑀺 𑀇𑀘𑁆𑀘𑀸𑀤𑀺.

𑀢𑀺𑀓+𑀢𑀬+𑀢𑀺𑀁𑀲+𑀯𑀢𑀸𑀤𑀻𑀦+𑀫𑀸𑀤𑀺𑀩𑁆𑀬𑀜𑁆𑀚𑀦𑀲𑁆𑀲 𑀘. 𑀓𑀼𑀲𑀮𑀢𑁆𑀢𑀺𑀓𑀁, 𑀧𑀻𑀢𑀺𑀢𑁆𑀢𑀺𑀓𑀁, 𑀳𑁂𑀢𑀼𑀢𑁆𑀢𑀺𑀓𑀁. 𑀮𑁄𑀓𑀢𑁆𑀢𑀬𑀁, 𑀩𑁄𑀥𑀺𑀢𑁆𑀢𑀬𑀁, 𑀯𑀢𑁆𑀣𑀼𑀢𑁆𑀢𑀬𑀁. 𑀏𑀓𑀢𑁆𑀢𑀺𑀁𑀲, 𑀤𑁆𑀯𑀢𑁆𑀢𑀺𑀁𑀲, 𑀢𑁂𑀢𑁆𑀢𑀺𑀁𑀲, 𑀘𑀢𑀼𑀢𑁆𑀢𑀺𑀁𑀲. 𑀲𑀻𑀮𑀩𑁆𑀩𑀢𑀁, 𑀲𑀼𑀩𑁆𑀩𑀢𑁄. 𑀲𑀧𑁆𑀧𑀻𑀢𑀺𑀓𑁄, 𑀲𑀫𑀦𑁆𑀦𑀸𑀕𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀇𑀘𑁆𑀘𑀸𑀤𑀺.

𑀯𑀢𑀼+𑀯𑀝+𑀤𑀺𑀲𑀸𑀦+𑀫𑀦𑁆𑀢𑁂, 𑀬𑀣𑀸 𑀯𑀢𑁆𑀢𑀢𑀺, 𑀯𑀝𑁆𑀝𑀢𑀺, 𑀤𑀲𑁆𑀲𑀦𑀁, 𑀨𑀲𑁆𑀲𑁄 𑀇𑀘𑁆𑀘𑀸𑀤𑀺.

𑀉+𑀤𑀼+𑀦𑀺𑀉𑀧𑀲𑀕𑁆𑀕+𑀢+𑀘𑀢𑀼+𑀙+𑀲𑀦𑁆𑀢𑀲𑀤𑁆𑀤𑀸𑀤𑁂𑀲𑀸𑀤𑀻𑀳𑀺 𑀧𑀭𑁂𑀲𑀜𑁆𑀘. 𑀉𑀓𑀁𑀲𑁄=𑀉𑀓𑁆𑀓𑀁𑀲𑁄, 𑀏𑀯𑀁 𑀤𑀼𑀓𑁆𑀓𑀭𑀁, 𑀦𑀺𑀓𑁆𑀓𑀗𑁆𑀔𑁄, 𑀉𑀕𑁆𑀕𑀢𑀁, 𑀤𑀼𑀘𑁆𑀘𑀭𑀺𑀢𑀁, 𑀦𑀺𑀚𑁆𑀚𑀝𑀁, 𑀉𑀚𑁆𑀚𑀳𑀁, 𑀉𑀘𑁆𑀘𑀗𑁆𑀕𑀁, 𑀉𑀦𑁆𑀦𑀫𑀢𑀺, 𑀤𑀼𑀓𑁆𑀓𑀭𑁄, 𑀦𑀺𑀤𑁆𑀤𑀭𑁄, 𑀉𑀦𑁆𑀦𑀢𑁄, 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀫𑁆𑀫𑀮𑁄, 𑀉𑀬𑁆𑀬𑀼𑀢𑁆𑀢𑁄, 𑀤𑀼𑀮𑁆𑀮𑀪𑁄, 𑀦𑀺𑀩𑁆𑀩𑀢𑁆𑀢𑁄, 𑀉𑀲𑁆𑀲𑀸𑀳𑁄, 𑀦𑀺𑀲𑁆𑀲𑀸𑀭𑁄. 𑀢𑀓𑁆𑀓𑀭𑁄, 𑀢𑀚𑁆𑀚𑁄, 𑀢𑀦𑁆𑀦𑀺𑀦𑁆𑀦𑁄, 𑀢𑀧𑁆𑀧𑀪𑀯𑁄, 𑀢𑀫𑁆𑀫𑀬𑁄, 𑀘𑀢𑀼𑀓𑁆𑀓𑀁, 𑀘𑀢𑀼𑀤𑁆𑀤𑀺𑀲𑀁, 𑀘𑀢𑀼𑀧𑁆𑀧𑀤𑁄, 𑀘𑀢𑀼𑀩𑁆𑀩𑀺𑀥𑀁, 𑀘𑀢𑀼𑀲𑁆𑀲𑀸𑀮𑀁, 𑀙𑀓𑁆𑀓𑀁, 𑀙𑀦𑁆𑀦𑀯𑀼𑀢𑀺, 𑀙𑀧𑁆𑀧𑀤𑀺𑀓𑁄, 𑀙𑀩𑁆𑀩𑀲𑁆𑀲𑀸𑀦𑀺. 𑀲𑀓𑁆𑀓𑀸𑀭𑁄, 𑀲𑀕𑁆𑀕𑀼𑀡𑁄, 𑀲𑀦𑁆𑀤𑀺𑀝𑁆𑀞𑀺, 𑀲𑀧𑁆𑀧𑀼𑀭𑀺𑀲𑁄, 𑀫𑀳𑀩𑁆𑀩𑀮𑁄.

𑀅𑀧𑀤𑀦𑁆𑀢𑀆𑀓𑀸𑀭𑀯𑀚𑁆𑀚𑀺𑀢𑀤𑀻𑀖𑀢𑁄 𑀬𑀓𑀸𑀭𑀲𑁆𑀲 𑀘, 𑀦𑀺𑀬𑁆𑀬𑀸𑀢𑀺, 𑀲𑀼𑀬𑁆𑀬𑀢𑀺, 𑀅𑀪𑀺𑀪𑀼𑀬𑁆𑀬, 𑀯𑀺𑀘𑁂𑀬𑁆𑀬, 𑀯𑀺𑀦𑁂𑀬𑁆𑀬, 𑀥𑁂𑀬𑁆𑀬𑀁, 𑀦𑁂𑀬𑁆𑀬𑀁, 𑀲𑁂𑀬𑁆𑀬𑁄, 𑀚𑁂𑀬𑁆𑀬𑁄, 𑀯𑁂𑀬𑁆𑀬𑀸𑀓𑀭𑀡𑁄. 𑀆𑀓𑀸𑀭𑀯𑀚𑁆𑀚𑀺𑀢𑀦𑁆𑀢𑀺 𑀓𑀺𑀁, 𑀫𑀸𑀮𑀸𑀬, 𑀤𑁄𑀮𑀸𑀬, 𑀲𑀫𑀸𑀤𑀸𑀬.

𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂-𑀦𑀧𑁆𑀧𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁, 𑀉𑀚𑁆𑀚𑀼𑀕𑀢𑁂𑀲𑀼 𑀲𑁂𑀬𑁆𑀬𑁄, 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀁. 𑀲𑀭𑀫𑁆𑀳𑀸𑀢𑀺 𑀓𑀺𑀁, 𑀜𑀸𑀬𑁄, 𑀢𑀁𑀔𑀡𑀁. 𑀓𑁆𑀯𑀘𑀺𑀢𑁆𑀯𑁂𑀯, 𑀦𑀺𑀓𑀸𑀬𑁄, 𑀦𑀺𑀤𑀸𑀦𑀁, 𑀦𑀺𑀯𑀸𑀲𑁄, 𑀢𑀢𑁄, 𑀙𑀲𑀝𑁆𑀞𑀺, 𑀉𑀧𑀦𑀻𑀬𑀢𑀺, 𑀲𑀽𑀬𑀢𑀺.

𑁩𑁫. 𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑁆𑀯𑁂+𑀲𑀁 𑀢𑀢𑀺𑀬𑀧𑀞𑀫𑀸

𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑀼 𑀧𑀭𑁂𑀲𑁆𑀯𑁂+𑀲𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀩𑁆𑀩𑀕𑁆𑀕𑁂 𑀢𑀢𑀺𑀬𑀧𑀞𑀫𑀸 𑀳𑁄𑀦𑁆𑀢𑀺 𑀧𑀘𑁆𑀘𑀸𑀲𑀢𑁆𑀬𑀸. 𑀯𑀕𑁆𑀕𑁂 𑀖+𑀛+𑀠+𑀥+𑀪𑀸 𑀘𑀢𑀼𑀢𑁆𑀣𑀸, 𑀔+𑀙+𑀞+𑀣+𑀨𑀸 𑀤𑀼𑀢𑀺𑀬𑀸, 𑀕+𑀚+𑀟+𑀤+𑀩𑀸 𑀢𑀢𑀺𑀬𑀸, 𑀓+𑀘+𑀝+𑀢+𑀧𑀸 𑀧𑀞𑀫𑀸. 𑀧+𑀉+𑀤𑀼-𑀦𑀺𑀆𑀤𑀻𑀳𑀺 𑀧𑀭𑁂𑀲𑀁 𑀖𑀸𑀤𑀻𑀦𑀁 𑀤𑁆𑀯𑀺𑀪𑀸𑀯𑁂 𑀢𑀢𑀺𑀬𑀧𑀞𑀫𑀸 𑀳𑁄𑀦𑁆𑀢𑀺. 𑀧𑀕𑀭𑀢𑀺=𑀧𑀕𑁆𑀖𑀭𑀢𑀺, 𑀏𑀯𑀁 𑀉𑀕𑁆𑀖𑀭𑀢𑀺, 𑀦𑀺𑀕𑁆𑀖𑁄𑀲𑁄, 𑀉𑀕𑁆𑀖𑀸𑀝𑁂𑀢𑀺. 𑀏𑀲𑁄𑀯 𑀢𑀚𑁆𑀛𑀸𑀦𑀨𑀮𑁄, 𑀧𑀞𑀫𑀚𑁆𑀛𑀸𑀦𑀁, 𑀅𑀪𑀺𑀚𑁆𑀛𑀸-𑀬𑀢𑀺, 𑀉𑀚𑁆𑀛𑀸𑀬𑀢𑀺. 𑀤𑀟𑁆𑀠𑁄, 𑀩𑀼𑀟𑁆𑀠𑁄. 𑀯𑀺𑀤𑁆𑀥𑀁𑀲𑁂𑀢𑀺, 𑀉𑀤𑁆𑀥𑀁𑀲𑀺𑀢𑁄, 𑀉𑀤𑁆𑀥𑀸𑀭𑁄, 𑀦𑀺𑀤𑁆𑀥𑀦𑁄, 𑀦𑀺𑀤𑁆𑀥𑀼𑀢𑁄. 𑀯𑀺𑀩𑁆𑀪𑀦𑁆𑀢𑁄, 𑀉𑀩𑁆𑀪𑀦𑁆𑀢𑁄, 𑀲𑀫𑀼𑀩𑁆𑀪𑀦𑁆𑀢𑁄, 𑀤𑀼𑀩𑁆𑀪𑀺𑀓𑁆𑀔𑀁, 𑀦𑀺𑀩𑁆𑀪𑀬𑀁, 𑀢𑀩𑁆𑀪𑀸𑀯𑁄, 𑀘𑀢𑀼𑀩𑁆𑀪𑀺. 𑀲𑀤𑁆𑀥𑀸, 𑀲𑀤𑁆𑀥𑀫𑁆𑀫𑁄. 𑀫𑀳𑀩𑁆𑀪𑀬𑀁.

𑀭𑀲𑁆𑀲𑀲𑀭𑁂𑀳𑀺 𑀧𑀭𑁂𑀲𑀁 𑀯𑀕𑁆𑀕𑀤𑀼𑀢𑀺𑀬𑀸𑀦𑀁 𑀤𑁆𑀯𑀺𑀪𑀸𑀯𑁄 𑀘𑁂, 𑀧𑀞𑀫𑀸. 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀏𑀯𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀅𑀓𑁆𑀔𑀫𑁄, 𑀅𑀪𑀺𑀓𑁆𑀔𑀡𑀁, 𑀅𑀯𑀺𑀓𑁆𑀔𑁂𑀧𑁄, 𑀚𑀸𑀢𑀺𑀓𑁆𑀔𑁂𑀢𑁆𑀢𑀁, 𑀥𑀸𑀢𑀼𑀓𑁆𑀔𑁄𑀪𑁄, 𑀆𑀬𑀼𑀓𑁆𑀔𑀬𑁄. 𑀲𑁂𑀢𑀘𑁆𑀙𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀘𑁆𑀙𑀦𑁆𑀦𑀁, 𑀯𑀺𑀘𑁆𑀙𑀦𑁆𑀦𑀁, 𑀩𑁄𑀥𑀺𑀘𑁆𑀙𑀸𑀬𑀸, 𑀚𑀫𑁆𑀩𑀼𑀘𑁆𑀙𑀸𑀬𑀸, 𑀲𑀫𑀼𑀘𑁆𑀙𑁂𑀤𑁄. 𑀢𑀢𑁆𑀭 𑀞𑀺𑀢𑁄=𑀢𑀢𑁆𑀭𑀝𑁆𑀞𑀺𑀢𑁄, 𑀏𑀯𑀁 𑀣𑀮𑀝𑁆𑀞𑀁, 𑀚𑀮𑀝𑁆𑀞𑀁, 𑀅𑀝𑁆𑀞𑀺𑀢𑀁, 𑀦𑀺𑀝𑁆𑀞𑀺𑀢𑀁, 𑀘𑀢𑁆𑀢𑀸𑀭𑀺𑀝𑁆𑀞𑀸𑀦𑀸𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁄, 𑀲𑀫𑀼𑀝𑁆𑀞𑀺𑀢𑁄. 𑀲𑀩𑁆𑀩𑀢𑁆𑀣𑀸𑀫𑁂𑀦, 𑀬𑀲𑀢𑁆𑀣𑁂𑀭𑁄, 𑀧𑀢𑁆𑀣𑀭𑀢𑀺, 𑀯𑀺𑀢𑁆𑀣𑀸𑀭𑁄, 𑀅𑀪𑀺𑀢𑁆𑀣𑀼𑀢𑁄, 𑀯𑀺𑀢𑁆𑀣𑀫𑁆𑀪𑀺𑀢𑁄, 𑀅𑀦𑀼𑀢𑁆𑀣𑀼𑀦𑀁. 𑀧𑀧𑁆𑀨𑁄𑀝𑁂𑀢𑀺, 𑀫𑀳𑀧𑁆𑀨𑀮𑀁, 𑀅𑀦𑀺𑀧𑁆𑀨𑀮𑀁, 𑀯𑀺𑀧𑁆𑀨𑀸𑀭𑁄, 𑀧𑀭𑀺𑀧𑁆𑀨𑀼𑀝𑁂𑀬𑁆𑀬, 𑀫𑀥𑀼𑀧𑁆𑀨𑀸𑀡𑀺𑀢𑀁. 𑀆𑀓𑀸𑀭𑀢𑁄, 𑀆𑀔𑀸𑀢𑁄=𑀅𑀓𑁆𑀔𑀸𑀢𑁄, 𑀏𑀯𑀁 𑀢𑀡𑁆𑀳𑀸𑀓𑁆𑀔𑀬𑁄, 𑀆𑀡𑀸𑀓𑁆𑀔𑁂𑀢𑁆𑀢𑀁, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀆𑀙𑀸𑀤𑀬𑀺=𑀅𑀘𑁆𑀙𑀸𑀤𑀬𑀺, 𑀏𑀯𑀁 𑀅𑀘𑁆𑀙𑀺𑀦𑁆𑀤𑀢𑀺, 𑀦𑀸𑀯𑀝𑁆𑀞𑀁, 𑀅𑀢𑁆𑀣𑀭𑀢𑀺, 𑀅𑀧𑁆𑀨𑁄𑀝𑁂𑀢𑀺. 𑀓𑁆𑀯𑀘𑀺 𑀢𑁆𑀯𑁂𑀯, 𑀧𑀼𑀯𑀔𑀚𑁆𑀚𑀓𑀁, 𑀢𑀲𑁆𑀲 𑀙𑀯𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸, 𑀬𑀣𑀸𑀞𑀺𑀢𑀁, 𑀓𑀫𑁆𑀫𑀨𑀮𑀁, 𑀲𑀻𑀮𑀁 𑀢𑀲𑁆𑀲 𑀛𑀸𑀬𑀺𑀦𑁄, 𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸, 𑀦𑀺𑀥𑀦𑀁, 𑀫𑀳𑀸𑀥𑀦𑀁. (𑀤𑁆𑀯𑀺𑀪𑀸𑀯𑀲𑀦𑁆𑀥𑀺).

𑀅𑀓𑀭𑀫𑁆𑀳 𑀲𑁂 𑀢𑁂, 𑀲𑁄 𑀔𑁄 𑀩𑁆𑀬𑀦𑁆𑀢𑀺 𑀓𑀸𑀳𑀺𑀢𑀺, 𑀲𑁄 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺, 𑀏𑀲𑁄 𑀅𑀢𑁆𑀣𑁄, 𑀏𑀲𑁄 𑀆𑀪𑁄𑀕𑁄, 𑀏𑀲𑁄 𑀇𑀤𑀸𑀦𑀺 𑀇𑀢𑀻+𑀥 ‘‘𑀯𑁂’’𑀢𑀺 𑀯𑀢𑁆𑀢𑀢𑁂.

𑁩𑁭. 𑀏𑀑𑀦+𑀫 𑀯𑀡𑁆𑀡𑁂

𑀏𑀑𑀦𑀁 𑀯𑀡𑁆𑀡𑁂 𑀓𑁆𑀯𑀘𑀺 𑀅 𑀳𑁄𑀢𑀺 𑀯𑀸. 𑀅𑀓𑀭𑀫𑁆𑀳 𑀲 𑀢𑁂, 𑀅𑀓𑀭𑀫𑁆𑀳 𑀲𑁂 𑀢𑁂, 𑀏𑀯𑀁 𑀲 𑀔𑁄 𑀩𑁆𑀬𑀦𑁆𑀢𑀺 𑀓𑀸𑀳𑀺𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺, 𑀏𑀲 𑀅𑀢𑁆𑀣𑁄, 𑀏𑀲 𑀆𑀪𑁄𑀕𑁄, 𑀏𑀲 𑀇𑀤𑀸𑀦𑀺. 𑀯𑀡𑁆𑀡𑁂𑀢𑀺 𑀓𑀺𑀁, 𑀅𑀫𑁄𑀖𑀯𑀘𑀦𑁄 𑀘 𑀲𑁄, 𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺 𑀲𑁄𑀢𑀺. ‘‘𑀦 𑀲𑀦𑁆𑀥𑀺𑀲𑀫𑀸𑀲𑀸 𑀯𑀤𑁆𑀥𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀸𑀣𑀸𑀫𑀚𑁆𑀛𑁂 𑀲𑀦𑁆𑀥𑀺 𑀦 𑀳𑁄𑀢𑀻𑀢𑀺 ‘‘𑀢𑀺𑀯𑀺𑀥𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑀺𑀫𑁆𑀳𑀺 𑀧𑀭𑁂𑀧𑀺 𑀯𑀡𑁆𑀡𑁄 𑀧𑀭𑁄 𑀦𑀸𑀫 𑀦 𑀇𑀢𑀺. (𑀲𑀭𑀩𑁆𑀬𑀜𑁆𑀚𑀦𑀲𑀦𑁆𑀥𑀺).

𑀅𑀢 𑀬𑀦𑁆𑀢𑀁, 𑀢𑀣 𑀬𑀁, 𑀫𑀤 𑀬𑀁, 𑀩𑀼𑀥 𑀬𑀢𑀺, 𑀥𑀦 𑀬𑀁, 𑀲𑁂𑀯 𑀬𑁄, 𑀧𑀭 𑀬𑁂𑀲𑀦𑀸, 𑀧𑁄𑀓𑁆𑀔𑀭𑀡 𑀬𑁄 𑀇𑀢𑀻+𑀥 𑁋

𑁪𑁮. 𑀢𑀯𑀕𑁆𑀕𑀯𑀭𑀡𑀸𑀦𑀁 𑀬𑁂 𑀘𑀯𑀕𑁆𑀕 𑀩𑀬𑀜𑀸

𑀢𑀯𑀕𑁆𑀕𑀯𑀭𑀡𑀸𑀦𑀁 𑀘𑀯𑀕𑁆𑀕𑀩𑀬𑀜𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀬𑀓𑀸𑀭𑁂. ‘‘𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 𑀧𑀼𑀩𑁆𑀩𑀭𑀽𑀧𑀁. 𑀅𑀘𑁆𑀘𑀦𑁆𑀢𑀁, 𑀢𑀘𑁆𑀙𑀁, 𑀫𑀚𑁆𑀚𑀁, 𑀩𑀼𑀚𑁆𑀛𑀢𑀺, 𑀥𑀜𑁆𑀜𑀁, 𑀲𑁂𑀩𑁆𑀩𑁄, 𑀧𑀬𑁆𑀬𑁂𑀲𑀦𑀸, 𑀧𑁄𑀓𑁆𑀔𑀭𑀜𑁆𑀜𑁄. 𑀅𑀧𑀼𑀘𑁆𑀘𑀡𑁆𑀟𑀓𑀸𑀬𑀁, 𑀚𑀘𑁆𑀘𑀦𑁆𑀥𑁄, 𑀬𑀚𑁆𑀚𑁂𑀯𑀁, 𑀅𑀚𑁆𑀛𑀕𑀫𑀸, 𑀅𑀚𑁆𑀛𑀢𑁆𑀢𑀁, 𑀅𑀚𑁆𑀛𑀼𑀧𑀕𑀢𑁄, 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸, 𑀤𑀺𑀩𑁆𑀩𑀁. 𑀓𑁆𑀯𑀘𑀺𑀢𑁆𑀯𑁂𑀯, 𑀭𑀢𑁆𑀬𑀸.

𑀲𑀓 𑀬𑀢𑁂, 𑀭𑀼𑀘 𑀬𑀢𑁂, 𑀧𑀘 𑀬𑀢𑁂, 𑀅𑀝 𑀬𑀢𑁂, 𑀮𑀼𑀧 𑀬𑀢𑁂, 𑀓𑀼𑀧 𑀬𑀢𑁂, 𑀲𑀮 𑀬𑀢𑁂, 𑀨𑀮 𑀬𑀢𑁂, 𑀤𑀺𑀲 𑀬𑀢𑁂, 𑀅𑀲 𑀬𑀢𑁂 𑀇𑀢𑀻+𑀥 ‘‘𑀬𑁂’’𑀢𑀺 𑀯𑀢𑁆𑀢𑀢𑁂 𑀯𑀓𑁆𑀔𑀫𑀸𑀦𑁂𑀲𑀼 𑀤𑁆𑀯𑀻𑀲𑀼.

𑁪𑁯. 𑀯𑀕𑁆𑀕𑀮𑀲𑁂𑀳𑀺𑀢𑁂

𑀯𑀕𑁆𑀕𑀮𑀲𑁂𑀳𑀺 𑀧𑀭𑀲𑁆𑀲 𑀬𑀓𑀸𑀭𑀲𑁆𑀲 𑀓𑁆𑀯𑀘𑀺 𑀢𑁂 𑀯𑀕𑁆𑀕𑀮𑀲𑀸 𑀳𑁄𑀦𑁆𑀢𑀺. 𑀲𑀓𑁆𑀓𑀢𑁂, 𑀭𑀼𑀘𑁆𑀘𑀢𑁂, 𑀧𑀘𑁆𑀘𑀢𑁂, 𑀅𑀝𑁆𑀝𑀢𑁂, 𑀮𑀼𑀧𑁆𑀧𑀢𑁂, 𑀓𑀼𑀧𑁆𑀧𑀢𑁂, 𑀲𑀮𑁆𑀮𑀢𑁂, 𑀨𑀮𑁆𑀮𑀢𑁂, 𑀤𑀺𑀲𑁆𑀲𑀢𑁂, 𑀅𑀲𑁆𑀲𑀢𑁂. 𑀓𑁆𑀯𑀘𑀺𑀢𑁆𑀯𑁂𑀯, 𑀓𑁆𑀬𑀸𑀳𑀁.

𑀫𑀼𑀳 𑀬𑀢𑀺, 𑀕𑀼𑀳 𑀬𑀢𑀺 𑀇𑀢𑀻+𑀥 𑁋

𑁫𑁦. 𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄

𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺 𑀬𑀓𑀸𑀭𑁂. 𑀫𑀼𑀬𑁆𑀳𑀢𑀺, 𑀕𑀼𑀬𑁆𑀳𑀢𑀺.

𑀩𑀳𑀼 𑀆𑀩𑀸𑀥𑁄 𑀇𑀢𑀻+𑀥 𑀉𑀲𑁆𑀲𑀯𑀓𑀸𑀭𑁂 ‘‘𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄’’𑀢𑀺 𑀯𑀢𑁆𑀢𑀢𑁂.

𑁫𑁧. 𑀯𑁂 𑀯𑀸

𑀳𑀲𑁆𑀲 𑀯𑀺𑀧𑀮𑁆𑀮𑀸𑀲𑁄 𑀳𑁄𑀢𑀺 𑀯𑀸 𑀯𑀓𑀸𑀭𑁂. 𑀩𑀯𑁆𑀳𑀸𑀩𑀸𑀥𑁄. 𑀯𑀸𑀢𑁆𑀯𑁂𑀯, 𑀩𑀳𑁆𑀯𑀸𑀩𑀸𑀥𑁄.

𑁫𑁨. 𑀢𑀣𑀦𑀭𑀸𑀦𑀁 𑀝𑀞𑀡𑀮𑀸

𑀢𑀣𑀦𑀭𑀸𑀦𑀁 𑀝𑀞𑀡𑀮𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁. 𑀤𑀼𑀓𑁆𑀓𑀢𑀁=𑀤𑀼𑀓𑁆𑀓𑀝𑀁, 𑀏𑀯𑀁 𑀲𑀼𑀓𑀝𑀁, 𑀧𑀢𑁆𑀣𑀝𑁄, 𑀧𑀢𑀝𑁄, 𑀉𑀤𑁆𑀥𑀝𑁄, 𑀯𑀺𑀲𑀝𑁄. 𑀅𑀝𑁆𑀞𑀓𑀣𑀸. 𑀧𑀡𑀺𑀥𑀸𑀦𑀁, 𑀧𑀡𑀺𑀧𑀸𑀢𑁄, 𑀧𑀡𑀸𑀫𑁄, 𑀧𑀡𑀻𑀢𑀁, 𑀧𑀭𑀺𑀡𑀢𑁄, 𑀧𑀭𑀺𑀡𑀸𑀫𑁄, 𑀤𑀼𑀡𑁆𑀡𑀬𑁄, 𑀦𑀺𑀡𑁆𑀡𑀬𑁄, 𑀑𑀡𑀢𑁄. 𑀧𑀭𑀺𑀧𑀦𑁆𑀦𑁄=𑀧𑀮𑀺𑀧𑀦𑁆𑀦𑁄, 𑀏𑀯𑀁 𑀧𑀮𑀺𑀩𑁄𑀥𑁄, 𑀧𑀮𑁆𑀮𑀗𑁆𑀓𑀁, 𑀢𑀮𑀼𑀦𑁄, 𑀫𑀳𑀸𑀲𑀸𑀮𑁄, 𑀫𑀸𑀮𑀼𑀢𑁄, 𑀲𑀼𑀔𑀼𑀫𑀸𑀮𑁄. (𑀩𑁆𑀬𑀜𑁆𑀚𑀦𑀲𑀦𑁆𑀥𑀺).

𑀘𑀓𑁆𑀔𑀼 𑀉𑀤𑀧𑀸𑀤𑀺, 𑀅𑀓𑁆𑀔𑀺 𑀭𑀼𑀚𑀢𑀺, 𑀧𑀼𑀭𑀺𑀫 𑀚𑀸𑀢𑀺, 𑀅𑀡𑀼 𑀣𑀽𑀮𑀸𑀦𑀺, 𑀓𑀢𑁆𑀢𑀩𑁆𑀩 𑀓𑀼𑀲𑀮𑀁 𑀩𑀳𑀼𑀁, 𑀢 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀢 𑀲𑀪𑀸𑀯𑀢𑁄 𑀇𑀢𑀻+𑀥 ‘‘𑀯𑁂’’𑀢𑀺 𑀯𑀢𑁆𑀢𑀢𑁂 𑀬𑀸𑀯 ‘‘𑀫𑀬𑀤𑀸 𑀲𑀭𑁂’’𑀢𑀺.

𑁩𑁮. 𑀦𑀺𑀕𑁆𑀕𑀳𑀻𑀢𑀁

𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀲𑀸𑀫𑀢𑁆𑀣𑀺𑀬𑁂𑀦𑀸+𑀕𑀫𑁄𑀯, 𑀲 𑀘 𑀭𑀲𑁆𑀲𑀲𑀭𑀲𑁆𑀲𑁂𑀯 𑀳𑁄𑀢𑀺… 𑀢𑀲𑁆𑀲 𑀭𑀲𑁆𑀲𑀲𑀭𑀸𑀦𑀼𑀕𑀢𑀢𑁆𑀢𑀸. 𑀞𑀸𑀦𑀻𑀦+𑀫𑀸𑀮𑀺𑀗𑁆𑀖𑀺𑀬 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀕𑀫𑁄. 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀅𑀓𑁆𑀔𑀺𑀁 𑀭𑀼𑀚𑀢𑀺, 𑀧𑀼𑀭𑀺𑀫𑀁 𑀚𑀸𑀢𑀺, 𑀅𑀡𑀼𑀁 𑀣𑀽𑀮𑀸𑀦𑀺, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀢𑀁𑀢𑀁𑀲𑀪𑀸𑀯𑀢𑁄. 𑀯𑀸𑀕𑁆𑀕𑀳𑀡𑁂𑀦 𑀘𑀓𑁆𑀔𑀼 𑀉𑀤𑀧𑀸𑀤𑀺 𑀇𑀘𑁆𑀘𑀸𑀤𑀺. 𑀅𑀯𑀁𑀲𑀺𑀭𑁄, 𑀬𑀸𑀯𑀜𑁆𑀘𑀺𑀤𑀁𑀢𑀺𑀆𑀤𑀺 𑀦𑀺𑀘𑁆𑀘𑀁… 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀯𑀸𑀥𑀺𑀓𑀸𑀭𑀲𑁆𑀲, 𑀯𑀯𑀢𑁆𑀣𑀺𑀢𑀲𑁆𑀲 𑀮𑀓𑁆𑀔𑀡𑀲𑁆𑀲𑀸+𑀦𑀼𑀭𑁄𑀥𑁂𑀦 𑀮𑀓𑁆𑀔𑀡𑁂 𑀧𑀯𑀢𑁆𑀢𑀺𑀢𑀸 𑀯𑀺𑀪𑀸𑀲𑀸 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸. 𑀯𑀸𑀲𑀤𑁆𑀤𑁄 𑀳𑀺 𑀅𑀢𑁆𑀣𑀤𑁆𑀯𑀬𑁂 𑀯𑀢𑁆𑀢𑀢𑁂 𑀓𑀢𑁆𑀣𑀘𑀺 𑀯𑀺𑀓𑀧𑁆𑀧𑁂, 𑀓𑀢𑁆𑀣𑀘𑀺 𑀬𑀣𑀸𑀯𑀯𑀢𑁆𑀣𑀺𑀢𑀭𑀽𑀧𑀧𑀭𑀺𑀕𑁆𑀕𑀳𑁂𑀢𑀺. 𑀬𑀤𑀸 𑀧𑀘𑁆𑀙𑀺𑀫𑁂, 𑀢𑀤𑀸 𑀦𑀺𑀘𑁆𑀘+𑀫𑀦𑀺𑀘𑁆𑀘+𑀫𑀲𑀦𑁆𑀢𑀜𑁆𑀘 𑀯𑀺𑀥𑀺𑀁 𑀤𑀻𑀧𑁂𑀢𑀺. 𑀏𑀢𑁆𑀣 𑀧𑀦 𑀓𑁆𑀯𑀘𑀺𑀲𑀤𑁆𑀤𑀲𑁆𑀲𑀸+𑀦𑀼𑀯𑀢𑁆𑀢𑀦𑀸 𑀢𑁂𑀦𑁂𑀯𑀸+𑀲𑀦𑁆𑀢𑀯𑀺𑀥𑀺 𑀲𑀺𑀤𑁆𑀥𑁄𑀢𑀺 𑀯𑀸𑀲𑀤𑁆𑀤𑁂𑀦𑀺+𑀢𑀭𑀤𑁆𑀯𑀬𑀁. 𑀓𑁆𑀯𑀘𑀺 𑀢𑁆𑀯𑁂𑀯, 𑀦 𑀳𑀺 𑀏𑀢𑁂𑀳𑀺, 𑀇𑀥 𑀘𑁂𑀯.

𑀲𑀁 𑀭𑀫𑁆𑀪𑁄, 𑀲𑀁 𑀭𑀢𑁆𑀢𑁄, 𑀲𑀁 𑀭𑀸𑀕𑁄, 𑀢𑀸𑀲𑀁 𑀅𑀳𑀁 𑀲𑀦𑁆𑀢𑀺𑀓𑁂, 𑀏𑀯𑀁 𑀅𑀬𑀁, 𑀧𑀼𑀁 𑀮𑀺𑀗𑁆𑀕𑀁, 𑀓𑀺𑀁 𑀅𑀳𑀁, 𑀢𑀲𑁆𑀲 𑀅𑀤𑀸𑀲𑀺𑀁 𑀅𑀳𑀁 𑀇𑀢𑀻+𑀥 ‘‘𑀦𑀺𑀕𑁆𑀕𑀳𑀻𑀢𑀸’’𑀥𑀺𑀓𑀸𑀭𑁄 𑀆 ‘‘𑀫𑀬𑀤𑀸 𑀲𑀭𑁂’’𑀢𑀺.

𑁩𑁯. 𑀮𑁄𑀧𑁄

𑀦𑀺𑀕𑁆𑀕𑀳𑀻𑀢𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀯𑀸 𑀓𑁆𑀯𑀘𑀺. 𑀤𑀻𑀖𑁂 𑀲𑀸𑀭𑀫𑁆𑀪𑁄 𑀲𑀁𑀭𑀫𑁆𑀪𑁄, 𑀲𑀸𑀭𑀢𑁆𑀢𑁄 𑀲𑀁𑀭𑀢𑁆𑀢𑁄, 𑀲𑀸𑀭𑀸𑀕𑁄 𑀲𑀁𑀭𑀸𑀕𑁄, 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁂 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂, 𑀏𑀯𑀸𑀬𑀁, 𑀤𑁆𑀯𑀺𑀢𑁆𑀢𑁂 𑀧𑀼𑀮𑁆𑀮𑀺𑀗𑁆𑀕𑀁 𑀧𑀼𑀁𑀮𑀺𑀗𑁆𑀕𑀁, 𑀓𑁆𑀬𑀸𑀳𑀁, 𑀢𑀲𑁆𑀲 𑀅𑀤𑀸𑀲𑀳𑀁. 𑀧𑀝𑀺𑀲𑀮𑁆𑀮𑀸𑀦𑁄, 𑀲𑀮𑁆𑀮𑁂𑀔𑁄, 𑀧𑀸𑀢𑀼𑀓𑀸𑀫𑁄, 𑀕𑀦𑁆𑀢𑀼𑀫𑀦𑁄, 𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁, 𑀅𑀯𑀺𑀲𑀸𑀳𑀸𑀭𑁄, 𑀘𑀺𑀭𑀧𑁆𑀧𑀯𑀸𑀲𑀺𑀦𑁆𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁. 𑀓𑁆𑀯𑀘𑀻𑀢𑀺 𑀓𑀺𑀁, 𑀏𑀯+𑀫𑀬𑀁, 𑀓𑀺+𑀫𑀳𑀁, 𑀏𑀢𑀁 𑀫𑀗𑁆𑀕𑀮+𑀫𑀼𑀢𑁆𑀢𑀫𑀁.

𑀓𑀢𑀁 𑀇𑀢𑀺, 𑀅𑀪𑀺𑀦𑀦𑁆𑀤𑀼𑀁 𑀇𑀢𑀺, 𑀉𑀢𑁆𑀢𑀢𑁆𑀢𑀁 𑀇𑀯, 𑀘𑀓𑁆𑀓𑀁 𑀇𑀯, 𑀓𑀮𑀺𑀁𑀇𑀯, 𑀳𑀮𑀁 𑀇𑀤𑀸𑀦𑀺, 𑀓𑀺𑀁 𑀇𑀤𑀸𑀦𑀺, 𑀢𑁆𑀯𑀁 𑀅𑀲𑀺, 𑀇𑀤𑀁 𑀅𑀧𑀺, 𑀉𑀢𑁆𑀢𑀭𑀺𑀁 𑀅𑀧𑀺, 𑀤𑀸𑀢𑀼𑀁 𑀅𑀧𑀺, 𑀲𑀤𑀺𑀲𑀁 𑀏𑀯 𑀇𑀢𑀻+𑀥 𑁋