𑀭𑀽𑀧 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁫𑁬. 𑀏𑀯𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑁂 𑀤𑁆𑀯𑀻𑀳𑀺 𑀧𑀪𑁂𑀤𑀧𑁆𑀧𑀯𑀢𑁆𑀢𑀻𑀳𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀦𑀼𑀧𑁆𑀧𑀢𑁆𑀢𑀁 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀤𑀺𑀕𑀸𑀣 𑀫𑀸𑀳. 𑀢𑀢𑁆𑀣 𑀏𑀢𑀁 𑀧𑀭𑀺𑀫𑀸𑀡𑀁 𑀅𑀲𑁆𑀲𑀸𑀢𑀺 𑀏𑀢𑁆𑀢𑀸𑀯𑀁. 𑀢𑁂𑀦 𑀏𑀢𑁆𑀢𑀯𑀢𑀸. 𑀦𑀺𑀧𑀸𑀢𑀧𑀤𑀁𑀯𑀸 𑀏𑀢𑀁. 𑀳𑀺 𑀲𑀤𑁆𑀤𑁄 𑀧𑀤𑀧𑀽𑀭𑀡𑁂. 𑀧𑀪𑁂𑀤𑁄𑀘 𑀧𑀯𑀢𑁆𑀢𑀺𑀘 𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀬𑁄. 𑀢𑀸𑀳𑀺 𑀲𑀳 𑀬𑁂 𑀯𑀢𑁆𑀢𑀦𑁆𑀢𑀺 𑀢𑁂 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸. 𑀏𑀢𑁆𑀢𑀸𑀯𑀢𑀸 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀫𑀬𑀸 𑀯𑀺𑀪𑀢𑁆𑀢𑀸. 𑀇𑀤𑀸𑀦𑀺 𑀭𑀽𑀧𑀁 𑀧𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀲𑀦𑀁 𑀓𑀣𑀦𑀁 𑀲𑀫𑀼𑀤𑁆𑀤𑁂𑀲𑁄. 𑀲𑀫𑀼𑀤𑁆𑀤𑀺𑀝𑁆𑀞𑀲𑁆𑀲 𑀭𑀽𑀧𑀲𑁆𑀲 𑀧𑀼𑀦 𑀯𑀺𑀪𑀚𑀦𑀁 𑀯𑀺𑀪𑀸𑀕𑁄. 𑀲𑀫𑀼𑀝𑁆𑀞𑀸𑀢𑀺 𑀭𑀽𑀧𑀁 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁. 𑀓𑀫𑁆𑀫𑀸𑀤𑀺. 𑀓𑀮𑀸 𑀯𑀼𑀘𑁆𑀘𑀦𑁆𑀢𑀺 𑀅𑀯𑀬𑀯𑀸. 𑀢𑀸 𑀅𑀧𑁆𑀧𑁂𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀮𑀸𑀧𑁄. 𑀧𑀺𑀡𑁆𑀟𑀻𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀓𑁆𑀓𑀫𑀢𑁄𑀢𑀺 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀢𑁄. 𑀲𑀮𑀓𑁆𑀔𑀡𑀢𑁄 𑀲𑀲𑀫𑁆𑀪𑀸𑀭𑀢𑁄𑀘 𑀫𑀳𑀦𑁆𑀢𑀸𑀦𑀺 𑀳𑀼𑀢𑁆𑀯𑀸 𑀪𑀯𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀫𑀳𑀸𑀪𑀽𑀢𑀸𑀦𑀺. 𑀢𑀸𑀦𑀺 𑀳𑀺 𑀅𑀢𑁆𑀢𑀦𑁄 𑀲𑀪𑀸𑀯𑀢𑁄𑀧𑀺 𑀫𑀳𑀦𑁆𑀢𑀸𑀦𑀺𑀏𑀯 𑀳𑀼𑀢𑁆𑀯𑀸 𑀧𑀸𑀢𑀼𑀪𑀯𑀦𑁆𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀉𑀧𑀸𑀤𑀸𑀬𑀸𑀢𑀺.

[𑁧𑁭𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀫𑀳𑀸𑀝𑀻𑀓𑀸𑀬𑀜𑁆𑀘

‘‘𑀲𑀲𑀫𑁆𑀪𑀸𑀭𑀥𑀸𑀢𑀼𑀯𑀲𑁂𑀦𑀸𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀧𑀧𑀦𑁆𑀦𑀁.

𑀦 𑀳𑀺 𑀲𑀲𑀫𑁆𑀪𑀸𑀭𑀯𑀢𑁆𑀣𑀼𑀯𑀲𑁂𑀦𑁂𑀯 𑀢𑁂𑀲𑀁 𑀅𑀬𑀁 𑀯𑁄𑀳𑀸𑀭𑁄 𑀧𑀯𑀢𑁆𑀢𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦𑀘 𑀲𑀮𑀓𑁆𑀔𑀡𑀢𑁄 𑀫𑀳𑀢𑁆𑀢𑁂𑀦 𑀯𑀺𑀦𑀸 𑀢𑁂𑀲𑀁 𑀲𑀲𑀫𑁆𑀪𑀸𑀭𑀢𑁄 𑀫𑀳𑀢𑁆𑀢𑀁𑀦𑀸𑀫 𑀲𑀫𑁆𑀪𑀯𑀢𑀻𑀢𑀺. 𑀢𑀲𑁆𑀫𑀸 𑀬𑀁 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑁂𑀲𑀼 𑀧𑀣𑀯𑀺𑀧𑀩𑁆𑀩𑀢𑀸𑀤𑀺𑀯𑀲𑁂𑀦 𑀲𑀫𑀼𑀤𑁆𑀤𑁂 𑀫𑀘𑁆𑀙𑀓𑀘𑁆𑀙𑀧𑀸𑀤𑀺𑀯𑀲𑁂𑀦 𑀲𑀲𑀫𑁆𑀪𑀸𑀭𑀢𑁄 𑀫𑀳𑀢𑁆𑀢𑀁. 𑀢𑀁𑀧𑀺 𑀲𑀮𑀓𑁆𑀔𑀡𑀫𑀳𑀢𑁆𑀢𑀫𑀽𑀮𑀓𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀪𑀽𑀢𑀸𑀢𑀺𑀯𑀸 𑀮𑁄𑀓𑁂 𑀯𑀺𑀲𑀁𑀯𑀸𑀤 𑀓𑀝𑁆𑀞𑁂𑀦 𑀫𑀸𑀬𑀸𑀓𑀸𑀭𑀸𑀯𑀸 𑀆𑀯𑀺𑀲𑀦𑀕𑀳𑀡𑁂𑀲𑀼 𑀅𑀘𑀺𑀦𑁆𑀢𑁂𑀬𑁆𑀬𑀝𑁆𑀞𑀸𑀦𑀝𑁆𑀞𑁂𑀦 𑀬𑀓𑁆𑀔𑀸𑀤𑀬𑁄𑀯𑀸 𑀯𑀜𑁆𑀘𑀓𑀝𑁆𑀞𑁂𑀦 𑀬𑀓𑁆𑀔𑀺𑀦𑀺𑀬𑁄𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑁂𑀯𑀝𑁆𑀞𑁂𑀦 𑀢𑁂𑀳𑀺 𑀲𑀤𑀺𑀲𑀢𑁆𑀢𑀸 𑀇𑀫𑀸𑀦𑀺𑀧𑀺 𑀫𑀳𑀸𑀪𑀽𑀢𑀸𑀯𑀺𑀬𑀸𑀢𑀺 𑀫𑀳𑀸𑀪𑀽𑀢𑀸𑀦𑀺. 𑀉𑀪𑀬𑀢𑁆𑀣𑀧𑀺𑀘 𑀫𑀳𑀦𑁆𑀢𑀸𑀦𑀺 𑀅𑀪𑀽𑀢𑀸𑀦𑀺 𑀅𑀩𑁆𑀪𑀼𑀢𑀸𑀦𑀺𑀯𑀸 𑀏𑀢𑁂𑀲𑀽𑀢𑀺 𑀦𑀺𑀩𑁆𑀩𑀘𑀦𑀁 𑀬𑀼𑀚𑁆𑀚𑀢𑀺𑀬𑁂𑀯.

[𑁧𑁭𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀬𑀓𑁆𑀔𑀺𑀦𑀺𑀁 𑀯𑀺𑀲𑀼𑀁 𑀉𑀧𑀫𑀸𑀫𑀢𑁆𑀢𑀁 𑀓𑀢𑁆𑀯𑀸 ‘‘𑀫𑀦𑀸𑀧𑀯𑀡𑁆𑀡𑀲𑀡𑁆𑀞𑀸𑀦𑀸 𑀤𑀻𑀳𑀺𑀯𑀸 𑀲𑀢𑁆𑀢𑀸𑀦𑀁 𑀯𑀜𑁆𑀘𑀺𑀓𑀸 𑀬𑀓𑁆𑀔𑀺𑀦𑀻𑀆𑀤𑀬𑁄 𑀯𑀺𑀬 𑀫𑀦𑀸𑀧 𑀇𑀢𑁆𑀣𑀺𑀧𑀼𑀭𑀺𑀲𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀲𑀢𑁆𑀢𑀸𑀦𑀁 𑀯𑀜𑁆𑀘𑀓𑀢𑁆𑀢𑀸 𑀫𑀳𑀦𑁆𑀢𑀸𑀦𑀺 𑀅𑀪𑀽𑀢𑀸𑀦𑀺 𑀏𑀢𑁂𑀲𑀽𑀢𑀺 𑀫𑀳𑀸𑀪𑀽𑀢𑀸𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀅𑀝𑁆𑀞𑀓𑀣𑀸 𑀬 𑀦 𑀲𑀫𑁂𑀢𑀺.

𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀫𑀳𑀸𑀪𑀽𑀢𑀲𑀸𑀫𑀜𑁆𑀜𑀢𑁄𑀢𑀺 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑁂 𑀏𑀯 𑀫𑀸𑀬𑀸𑀓𑀸𑀭𑁄 𑀬𑀓𑁆𑀔𑁄 𑀬𑀓𑁆𑀔𑀺𑀦𑀻𑀢𑀺 𑀢𑀬𑁄 𑀫𑀳𑀸𑀪𑀽𑀢𑀸 𑀯𑀼𑀢𑁆𑀢𑀸𑀢𑀺. 𑀘𑀢𑀼𑀦𑁆𑀦𑀜𑁆𑀘𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀉𑀧𑀸𑀤𑀸𑀬𑀸𑀢𑀺 𑀤𑀴𑁆𑀳𑀁 𑀦𑀺𑀲𑁆𑀲𑀸𑀬. 𑀧𑀯𑀢𑁆𑀢𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀉𑀧𑀸𑀤𑀸𑀬 𑀭𑀽𑀧𑀦𑁆𑀢𑀺𑀯𑀸 𑀲𑀫𑀸𑀲𑀧𑀤𑀁 𑀤𑀝𑁆𑀞𑀩𑁆𑀩𑀁.

[𑁧𑁭𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀉𑀧𑀸𑀤𑀸𑀬 𑀧𑀯𑀢𑁆𑀢𑀁 𑀭𑀽𑀧𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀇𑀥 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂 𑀓𑀢𑁆𑀣𑀘𑀺 𑀬𑀓𑀸𑀭𑀯𑀺𑀭𑀳𑁄 𑀤𑀺𑀝𑁆𑀞𑁄. 𑀢𑀣𑀸 𑀳𑀺 𑀫𑀽𑀮𑀝𑀻𑀓𑀸𑀬𑀁 𑀉𑀧𑀸𑀤𑀸𑀬𑀢𑀺 𑀦𑀺𑀲𑁆𑀲𑀬𑀢𑀻𑀢𑀺 𑀉𑀧𑀸𑀤𑀸𑀬𑀁. 𑀢𑀫𑁂𑀯 𑀭𑀽𑀧𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀧𑀣𑀬𑀢𑀻𑀢𑀺 𑀧𑀣𑀯𑀻. 𑀲𑀳𑀚𑀸𑀢𑀭𑀽𑀧𑀸𑀦𑀁 𑀧𑀢𑀺𑀝𑁆𑀞𑀸𑀦 𑀪𑀸𑀯𑁂𑀦 𑀧𑀓𑁆𑀔𑀸𑀬𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀣𑀼 𑀫𑀳𑀦𑁆𑀢𑀻 𑀳𑀼𑀢𑁆𑀯𑀸 𑀚𑀸𑀬𑀢𑀻𑀢𑀺𑀧𑀺 𑀧𑀣𑀯𑀻. 𑀧𑀓𑀸𑀭𑁂𑀦 𑀣𑀯𑀻𑀬𑀢𑀺 𑀲𑀩𑁆𑀩𑁂𑀲𑀁 𑀭𑀽𑀧𑀲𑀫𑁆𑀪𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀢𑁆𑀢𑀸. 𑀅𑀬𑀁 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀸 𑀧𑀢𑀺𑀝𑁆𑀞𑀸𑀦𑀸 𑀯𑀢𑁆𑀣𑀼𑀪𑀽𑀢𑀸 𑀪𑀽𑀫𑀺 𑀪𑀽𑀢𑀸𑀢𑀺𑀆𑀤𑀺𑀦𑀸 𑀦𑀸𑀦𑀸𑀧𑁆𑀧𑀓𑀸𑀭𑁂𑀦 𑀕𑀼𑀡𑀧𑀤𑁂𑀦 𑀅𑀪𑀺𑀢𑁆𑀣𑀯𑀻𑀬𑀢𑀻𑀢𑀺 𑀧𑀣𑀯𑀻. 𑀲𑀸𑀏𑀯 𑀦𑀺𑀲𑀢𑁆𑀢𑀦𑀺𑀚𑀻𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀧𑀣𑀯𑀻𑀥𑀸𑀢𑀼. 𑀆𑀧𑁂𑀢𑀺 𑀲𑀳𑀚𑀸𑀢𑀭𑀽𑀧𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀧𑁆𑀧𑀸𑀬𑀢𑀺 𑀯𑀸 𑀢𑀸𑀦𑀺 𑀲𑀼𑀝𑁆𑀞𑀼 𑀩𑁆𑀭𑀽𑀳𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀆𑀧𑁄. 𑀢𑀸𑀦𑀺𑀯𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀓𑀢𑁆𑀯𑀸 𑀪𑀼𑀲𑁄 𑀧𑀸𑀢𑀺 𑀭𑀓𑁆𑀔𑀢𑀺, 𑀧𑀺𑀯𑀢𑀺𑀯𑀸 𑀯𑀺𑀯𑀦𑁆𑀢𑁄 𑀯𑀺𑀬 𑀢𑀸𑀦𑀺 𑀲𑀗𑁆𑀕𑀡𑁆𑀳𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀆𑀧𑁄. 𑀲𑁄𑀬𑁂𑀯 𑀥𑀸𑀢𑀽𑀢𑀺 𑀆𑀧𑁄𑀥𑀸𑀢𑀼. 𑀢𑁂 𑀚𑀢𑀺 𑀢𑀺𑀓𑁆𑀔𑀪𑀸𑀯𑁂𑀦 𑀲𑀫𑀼𑀚𑁆𑀚𑀮𑀦𑁆𑀢𑁄 𑀯𑀺𑀬 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀚𑁆𑀛𑁂 𑀧𑀓𑀸𑀲𑀢𑀺, 𑀢𑁂𑀚𑁂𑀢𑀺𑀯𑀸 𑀦𑀺𑀲𑁂𑀢𑀺 𑀲𑀳𑀚𑀸𑀢𑀥𑀫𑁆𑀫𑁂 𑀢𑀺𑀓𑁆𑀔𑀣𑀸𑀫 𑀩𑀮𑁂 𑀓𑀭𑁄𑀢𑀺, 𑀧𑀭𑀺𑀧𑀸𑀘𑁂𑀢𑀺𑀯𑀸 𑀉𑀲𑁆𑀫𑀸𑀧𑁂𑀢𑀻𑀢𑀺 𑀢𑁂𑀚𑁄, 𑀲𑁄 𑀏𑀯 𑀥𑀸𑀢𑀽𑀢𑀺 𑀢𑁂𑀚𑁄𑀥𑀸𑀢𑀼. 𑀯𑀸𑀬𑀢𑀺 𑀲𑀫𑀻𑀭𑁂𑀢𑀺 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀳𑁂𑀢𑀼𑀪𑀸𑀯𑁂𑀦 𑀪𑀽𑀢𑀲𑀗𑁆𑀖𑀸𑀝𑀁 𑀤𑁂𑀲𑀦𑁆𑀢𑀭𑀁 𑀕𑀫𑁂𑀢𑀻𑀢𑀺 𑀯𑀸𑀬𑁄. 𑀯𑀸𑀬𑀢𑀺 𑀯𑀸 𑀲𑀳𑀚𑀸𑀢𑀥𑀫𑁆𑀫𑁂 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀯𑀳𑀢𑀻𑀢𑀺 𑀯𑀸𑀬𑁄. 𑀲𑁄𑀏𑀯 𑀥𑀸𑀢𑀽𑀢𑀺 𑀯𑀸𑀬𑁄𑀥𑀸𑀢𑀼. 𑀢𑀢𑁆𑀣 𑀓𑀓𑁆𑀔𑀴𑀮𑀓𑁆𑀔𑀡𑀸 𑀧𑀣𑀯𑀻. 𑀆𑀩𑀦𑁆𑀥𑀦𑀮𑀓𑁆𑀔𑀡𑁄 𑀆𑀧𑁄. 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁄 𑀢𑁂𑀚𑁄. 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑁄 𑀯𑀸𑀬𑁄. 𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀧𑀣𑀯𑀻 𑀓𑀓𑁆𑀔𑀴𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀸. 𑀦𑀦𑀼 𑀲𑀸 𑀫𑀼𑀤𑀼𑀪𑀽𑀢𑀸𑀧𑀺 𑀳𑁄𑀢𑀻𑀢𑀺. 𑀲𑀘𑁆𑀘𑀁, 𑀫𑀼𑀤𑀼𑀪𑀽𑀢𑀸𑀧𑀺 𑀧𑀦 𑀲𑀸 𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀧𑀸𑀤𑀸𑀬 𑀓𑀓𑁆𑀔𑀴𑀸 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀉𑀧𑀸𑀤𑀸𑀬𑁂𑀯 𑀧𑀦 𑀅𑀬𑀁𑀫𑀼𑀤𑀼 𑀅𑀬𑀁 𑀓𑀓𑁆𑀔𑀴𑀸𑀢𑀺 𑀪𑀯𑀢𑀺. 𑀢𑁂𑀦𑁂𑀯 𑀫𑀼𑀤𑀼𑀓𑀓𑁆𑀔𑀴𑀸𑀦𑀁 𑀤𑀻𑀖𑀭𑀲𑁆𑀲𑀸𑀦𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑀢𑀸 𑀳𑁄𑀢𑀺. 𑀫𑀼𑀤𑀼𑀪𑀽𑀢𑀸𑀧𑀺 𑀳𑀺 𑀢𑀢𑁄 𑀫𑀼𑀤𑀼𑀢𑀭𑀁 𑀧𑀢𑁆𑀯𑀸 𑀓𑀓𑁆𑀔𑀴𑀸𑀦𑀸𑀫 𑀚𑀸𑀢𑀸. 𑀓𑀓𑁆𑀔𑀴𑀸𑀧𑀺 𑀓𑀓𑁆𑀔𑀴𑀢𑀭𑀁 𑀧𑀢𑁆𑀯𑀸 𑀫𑀼𑀤𑀼𑀪𑀽𑀢𑀸𑀦𑀸𑀫 𑀚𑀸𑀢𑀸𑀢𑀺. 𑀆𑀩𑀦𑁆𑀥𑀦𑀮𑀓𑁆𑀔𑀡𑁄 𑀆𑀧𑁄𑀢𑀺 𑀯𑀼𑀢𑁆𑀢𑁄. 𑀲𑁄𑀘 𑀧𑀓𑀢𑀺𑀉𑀤𑀓𑁂 𑀅𑀥𑀺𑀫𑀢𑁆𑀢𑁄𑀢𑀺 𑀧𑀓𑀢𑀺𑀉𑀤𑀓𑀁 𑀩𑀤𑁆𑀥𑀁 𑀖𑀦𑀻𑀪𑀽𑀢𑀫𑁂𑀯 𑀲𑀺𑀬𑀸𑀢𑀺 𑀘𑁂. 𑀦. 𑀆𑀩𑀦𑁆𑀥𑀺𑀢𑀩𑁆𑀩𑀸𑀬 𑀧𑀣𑀯𑀺𑀬𑀸 𑀢𑀢𑁆𑀣 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸𑀢𑀺, 𑀬𑀢𑁆𑀣 𑀧𑀦 𑀧𑀣𑀯𑀻 𑀩𑀮𑀯𑀢𑀻 𑀳𑁄𑀢𑀺 𑀢𑀢𑁆𑀣𑁂𑀯 𑀲𑁄 𑀩𑀤𑁆𑀥𑀢𑀭𑀁 𑀆𑀩𑀦𑁆𑀥𑀢𑀻𑀢𑀺. 𑀉𑀡𑁆𑀳𑀢𑁆𑀢 𑀮𑀓𑁆𑀔𑀡𑁄 𑀢𑁂𑀚𑁄𑀢𑀺 𑀯𑀼𑀢𑁆𑀢𑁄. 𑀏𑀯𑀜𑁆𑀘𑀲𑀢𑀺 𑀲𑀻𑀢𑀪𑀸𑀯𑁄 𑀢𑁂𑀚𑁄𑀬𑁂𑀯 𑀦 𑀲𑀺𑀬𑀸𑀢𑀺 𑀘𑁂. 𑀦. 𑀉𑀲𑀢𑀺 𑀤𑀳𑀢𑀺 𑀧𑀭𑀺𑀧𑀸𑀘𑁂𑀢𑀺 𑀧𑀭𑀺𑀡 𑀢𑀪𑀸𑀯𑀁 𑀕𑀫𑁂𑀢𑀻𑀢𑀺 𑀉𑀡𑁆𑀳𑁄𑀦𑀸𑀫. 𑀲𑀻𑀢𑀪𑀸𑀯𑁄𑀘 𑀤𑀳𑀢𑀺 𑀧𑀭𑀺𑀧𑀸𑀘𑁂𑀢𑀺 𑀢𑀩𑁆𑀪𑀸𑀯𑀁 𑀕𑀫𑁂𑀢𑀺𑀬𑁂𑀯𑀸𑀢𑀺. 𑀯𑀼𑀢𑁆𑀢𑀜𑁆𑀘 𑀫𑀽𑀮𑀝𑀻𑀓𑀸𑀬𑀁 𑀢𑁂𑀚𑁄𑀏𑀯 𑀳𑀺 𑀲𑀻𑀢𑀁. 𑀳𑀺𑀫𑀧𑀸𑀢𑀲𑀫𑀬𑀸𑀤𑀻𑀲𑀼 𑀲𑀻𑀢𑀲𑁆𑀲 𑀧𑀭𑀺𑀧𑀸𑀘𑀓𑀢𑀸𑀤𑀲𑁆𑀲𑀦 𑀢𑁄𑀢𑀺. 𑀯𑀺𑀢𑁆𑀣𑀫𑁆𑀪𑀦 𑀮𑀓𑁆𑀔𑀡𑁄 𑀯𑀸𑀬𑁄𑀢𑀺 𑀯𑀼𑀢𑁆𑀢𑁄. 𑀲𑁄 𑀧𑀦 𑀖𑀦 𑀣𑀤𑁆𑀥𑁂𑀲𑀼 𑀲𑀺𑀮𑀸𑀣𑀫𑁆𑀪𑀸𑀤𑀻𑀲𑀼 𑀦𑀮𑀩𑁆𑀪𑀢𑀻𑀢𑀺 𑀘𑁂. 𑀦. 𑀢𑀢𑁆𑀣 𑀳𑀺 𑀧𑀣𑀯𑀻 𑀅𑀢𑁆𑀢𑀦𑀸 𑀲𑀳𑀚𑀸𑀢𑀯𑀸𑀬𑀼𑀯𑀺𑀢𑁆𑀣𑀫𑁆𑀪𑀦𑀁 𑀮𑀪𑀺𑀢𑁆𑀯𑀸 𑀣𑀸𑀫𑀧𑁆𑀧𑀢𑁆𑀢𑀸 𑀣𑀺𑀭𑀢𑀭𑀧𑁆𑀧𑀢𑁆𑀢𑀸𑀘 𑀳𑀼𑀢𑁆𑀯𑀸 𑀯𑀳𑀢𑀻𑀢𑀺. 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼. 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀢𑀺 𑀲𑀫𑀯𑀺𑀲𑀫𑀚𑀸𑀦𑀦𑀲𑁆𑀲 𑀢𑀫𑁆𑀫𑀽𑀮𑀓𑀢𑁆𑀢𑀸. 𑀭𑀽𑀧𑀁𑀯𑀸 𑀅𑀲𑁆𑀲𑀸𑀤𑁂𑀢𑀺 𑀆𑀧𑀸𑀢𑀁 𑀆𑀕𑀢𑀸𑀕𑀢𑀲𑁆𑀲 𑀭𑀽𑀧𑀲𑁆𑀲 𑀅𑀦𑀺𑀭𑀸𑀓𑀭𑀡𑀢𑁄. 𑀢𑀁𑀯𑀸 𑀯𑀺𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀡𑀸𑀢𑀻𑀢𑀺 𑀲𑁄𑀢𑀁. 𑀲𑀼𑀡𑀦𑁆𑀢𑀺 𑀲𑀼𑀬𑁆𑀬𑀦𑁆𑀢𑀺𑀯𑀸 𑀏𑀢𑁂 𑀦𑀸𑀢𑀺 𑀲𑁄𑀢𑀁. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀖𑀸𑀬𑀦𑁆𑀢𑀺 𑀖𑀸𑀬𑀺𑀬𑀦𑁆𑀢𑀺𑀯𑀸 𑀏𑀢𑁂𑀦𑀸𑀢𑀺 𑀖𑀸𑀦𑀁. 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀭𑀲𑁄 𑀚𑀻𑀯𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀅𑀣𑀯𑀸. 𑀚𑀻𑀯𑀺𑀢𑀁 𑀯𑀳𑀢𑀺 𑀏𑀢𑀸𑀬𑀯𑀸 𑀢𑀁 𑀯𑀳𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀲𑀫𑁆𑀧𑀸𑀤𑀦𑀢𑁆𑀢𑀸𑀢𑀺 𑀚𑀺𑀯𑁆𑀳𑀸. 𑀚𑀻𑀢𑀺𑀯𑀸 𑀚𑀬𑁄 𑀧𑀭𑀸𑀚𑀬𑁄𑀯𑀸 𑀯𑀼𑀘𑁆𑀘𑀢𑀺. 𑀢𑀤𑀼𑀪𑀬𑀁 𑀯𑀳𑀢𑀺 𑀯𑀳𑀦𑁆𑀢𑀺𑀯𑀸 𑀏𑀢𑀸𑀬𑀸𑀢𑀺 𑀚𑀺𑀯𑁆𑀳𑀸. 𑀲𑀲𑀫𑁆𑀪𑀸𑀭𑀚𑀺𑀯𑁆𑀳𑀸. 𑀬𑀣𑀸𑀳 𑁋

𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀤𑀸𑀭𑀻 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀦𑀭𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀦𑁆𑀢𑀺.

𑀇𑀥 𑀧𑀦 𑀢𑀁 𑀲𑀳𑀘𑀭𑀺𑀢𑀢𑁆𑀢𑀸 𑀚𑀺𑀯𑁆𑀳𑀸𑀢𑀺 𑀧𑀲𑀸𑀤𑀭𑀽𑀧𑀫𑁄 𑀯𑀼𑀘𑁆𑀘𑀢𑀺. 𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀜𑁆𑀘 𑀆𑀬𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄. 𑀲𑀲𑀫𑁆𑀪𑀸𑀭𑀓𑀸𑀬𑁄. 𑀇𑀥 𑀧𑀦 𑀢𑀁 𑀲𑀳𑀘𑀭𑀺𑀢𑁄 𑀧𑀲𑀸𑀤 𑀓𑀸𑀬𑁄𑀏𑀯 𑀅𑀥𑀺𑀧𑁆𑀧𑁂𑀢𑁄. 𑀧𑀲𑀻𑀤𑀦𑁆𑀢𑀻𑀢𑀺 𑀧𑀲𑀸𑀤𑀸. 𑀧𑀲𑀻𑀤𑀦𑁆𑀢𑀺 𑀯𑀸 𑀏𑀢𑁆𑀣 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀦𑀺 𑀆𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀸𑀦𑀺 𑀢𑀢𑁆𑀣 𑀲𑀁𑀲𑀻𑀤𑀫𑀸𑀦𑀸𑀦𑀺 𑀯𑀺𑀬 𑀲𑀭𑀽𑀧𑀢𑁄 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀧𑀲𑀸𑀤𑀸, 𑀲𑀼𑀧𑀭𑀺𑀲𑀼𑀤𑁆𑀥𑀆𑀤𑀸𑀲𑀫𑀡𑁆𑀟𑀲𑀤𑀺𑀲𑀸 𑀓𑀫𑁆𑀫𑀚𑀫𑀡𑁆𑀟𑀸. 𑀇𑀫𑁂 𑀧𑀦 𑀧𑀜𑁆𑀘 𑀤𑀝𑁆𑀞𑀼𑀓𑀸𑀫𑀢𑀸𑀤𑀺 𑀦𑀺𑀤𑀸𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦 𑀪𑀽𑀢𑀧𑀲𑀸𑀤 𑀮𑀓𑁆𑀔𑀡𑀸 𑀭𑀽𑀧𑀸𑀤𑀺 𑀅𑀪𑀺𑀖𑀸𑀢𑀸𑀭𑀳 𑀪𑀽𑀢𑀧𑀲𑀸𑀤𑀮𑀓𑁆𑀔𑀡𑀸 𑀯𑀸 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀘𑀓𑁆𑀔𑀼 𑀢𑀸𑀯 𑀲𑁂𑀢𑀫𑀡𑁆𑀟𑀮 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂 𑀊𑀓𑀸𑀲𑀺𑀭𑀧𑀫𑀸𑀡𑁂 𑀅𑀢𑀺𑀫𑀼𑀔𑁂 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺 𑀧𑀤𑁂𑀲𑀪𑀽𑀢𑁂 𑀤𑀺𑀝𑁆𑀞𑀫𑀡𑁆𑀟𑀮𑁂 𑀢𑁂𑀮𑀫𑀺𑀯 𑀲𑀢𑁆𑀢𑀧𑀺𑀘𑀼𑀧𑀝𑀮𑀸𑀦𑀺 𑀲𑀢𑁆𑀢𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑁄𑀢𑀁 𑀲𑁄𑀢𑀩𑀺𑀮𑀩𑁆𑀪𑀦𑁆𑀢𑀭𑁂 𑀅𑀗𑁆𑀕𑀼𑀮𑀺𑀯𑁂𑀞𑀦𑀸𑀓𑀸𑀭𑀁 𑀉𑀧𑀘𑀺𑀢𑀢𑀦𑀼𑀢𑀫𑁆𑀩𑀮𑁄𑀫𑀁 𑀧𑀤𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀖𑀸𑀦𑀁 𑀦𑀸𑀲𑀺𑀓𑀩𑁆𑀪𑀦𑁆𑀢𑀭𑁂 𑀅𑀚𑀧𑀤𑀲𑀡𑁆𑀞𑀸𑀦𑀁 𑀧𑀤𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀚𑀺𑀯𑁆𑀳𑀸 𑀲𑀲𑀫𑁆𑀪𑀸𑀭 𑀚𑀺𑀯𑁆𑀳𑀸𑀫𑀚𑁆𑀛𑁂 𑀉𑀧𑁆𑀧𑀮 𑀤𑀮𑀕𑁆𑀕 𑀲𑀡𑁆𑀞𑀸𑀦𑀁 𑀧𑀤𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀓𑀸𑀬𑁄 𑀧𑀦 𑀫𑀳𑀦𑁆𑀢𑀺 𑀬𑀸 𑀓𑀧𑁆𑀧𑀸𑀲 𑀧𑀝𑀮𑀯𑀝𑁆𑀝𑀺𑀬𑀁 𑀆𑀲𑀺𑀢𑁆𑀢𑀢𑁂𑀮𑀁𑀯𑀺𑀬 𑀣𑀧𑁂𑀢𑁆𑀯𑀸 𑀧𑀸𑀘𑀓 𑀢𑁂𑀚𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀓𑁂𑀲𑀕𑁆𑀕 𑀮𑁄𑀫𑀕𑁆𑀕 𑀦𑀔𑀕𑁆𑀕 𑀲𑀼𑀓𑁆𑀔𑀘𑀫𑁆𑀫𑀸𑀦𑀺𑀘 𑀅𑀯𑀲𑁂𑀲𑀁 𑀲𑀓𑀮𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀢𑁂 𑀧𑀦 𑀧𑀜𑁆𑀘 𑀬𑀣𑀸𑀭𑀳𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀯𑀢𑁆𑀣𑀼𑀤𑁆𑀯𑀸𑀭𑀪𑀸𑀯𑀁 𑀲𑀸𑀥𑁂𑀦𑁆𑀢𑀺. 𑀢𑁂𑀲𑀼𑀘 𑀏𑀓𑁂𑀓𑀲𑁆𑀲 𑀘𑀢𑀲𑁆𑀲𑁄 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀲𑀦𑁆𑀥𑀸𑀭𑀡𑀆𑀩𑀦𑁆𑀥𑀦 𑀧𑀭𑀺𑀧𑀸𑀘𑀦 𑀲𑀫𑀼𑀤𑀻𑀭𑀡 𑀓𑀺𑀘𑁆𑀘𑁂𑀳𑀺 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀬𑀣𑀸𑀔𑀢𑁆𑀢𑀺 𑀬𑀓𑀼𑀫𑀸𑀭𑀲𑁆𑀲 𑀘𑀢𑀲𑁆𑀲𑁄 𑀥𑀸𑀢𑀺𑀬𑁄 𑀥𑀸𑀭𑀡 𑀦𑀳𑀸𑀧𑀦 𑀫𑀡𑁆𑀟𑀦 𑀩𑀻𑀚𑀦 𑀓𑀺𑀘𑁆𑀘𑁂𑀳𑀻𑀢𑀺. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸𑀘 𑀦𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺. 𑀬𑀣𑀸 𑀢𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀁 𑀧𑀺𑀢𑀼 𑀚𑁂𑀝𑁆𑀞𑀪𑀸𑀢𑀼 𑀚𑁂𑀝𑁆𑀞𑀪𑀕𑀺𑀦𑀺𑀬𑁄𑀯𑀺𑀬. 𑀆𑀬𑀼𑀘 𑀦𑀁 𑀲𑀼𑀝𑁆𑀞𑀼 𑀅𑀦𑀼𑀧𑀸𑀮𑁂𑀢𑀺. 𑀬𑀣𑀸 𑀢𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀁 𑀤𑀺𑀲𑀸𑀧𑀸𑀫𑁄𑀓𑁆𑀔𑁄 𑀭𑀸𑀚𑀲𑀫𑁆𑀫𑀢𑁄 𑀫𑀳𑀸𑀪𑀺𑀲𑀓𑁆𑀓𑁄𑀯𑀺𑀬. 𑀯𑀡𑁆𑀡𑀸𑀤𑀬𑁄𑀘 𑀦𑀁 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀬𑀣𑀸 𑀢𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀁 𑀲𑀳𑀚𑀸𑀢𑀸 𑀅𑀫𑀘𑁆𑀘𑀧𑀼𑀢𑁆𑀢𑀸 𑀯𑀺𑀬𑀸𑀢𑀺. 𑀬𑀲𑁆𑀫𑀸 𑀧𑀦 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀦𑀸𑀫 𑀯𑀺𑀘𑀺𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀲𑀜𑁆𑀜𑀸𑀯𑀺𑀘𑀺𑀢𑁆𑀢𑀸. 𑀲𑀜𑁆𑀜𑀸𑀯𑀺𑀘𑀺𑀢𑁆𑀢𑀢𑀸𑀬 𑀢𑀡𑁆𑀳𑀸𑀯𑀺𑀘𑀺𑀢𑁆𑀢𑀸. 𑀢𑀡𑁆𑀳𑀸𑀯𑀺𑀘𑀺𑀢𑁆𑀢 𑀢𑀸𑀬 𑀓𑀫𑁆𑀫𑀸𑀦𑀺 𑀯𑀺𑀘𑀺𑀢𑁆𑀢𑀸𑀦𑀺. 𑀓𑀫𑁆𑀫𑀯𑀺𑀘𑀺𑀢𑁆𑀢𑀢𑀸𑀬 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺 𑀪𑀽𑀢𑀸𑀦𑀺 𑀯𑀺𑀘𑀺𑀢𑁆𑀢𑀸𑀦𑀺. 𑀪𑀽𑀢𑀯𑀺𑀘𑀺𑀢𑁆𑀢𑀢𑀸𑀬 𑀇𑀫𑁂 𑀧𑀲𑀸𑀤𑀸 𑀯𑀺𑀘𑀺𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀳𑀺 𑀧𑀲𑀸𑀤𑀫𑀡𑁆𑀟𑀪𑀽𑀢𑀸𑀧𑀺 𑀲𑀫𑀸𑀦𑀸 𑀓𑁂𑀘𑀺 𑀭𑀽𑀧𑀲𑁆𑀲𑁂𑀯 𑀅𑀪𑀺𑀖𑀸𑀢𑀸𑀭𑀳𑀸 𑀳𑁄𑀦𑁆𑀢𑀺, 𑀦 𑀲𑀤𑁆𑀤𑀸𑀤𑀻𑀦𑀁. 𑀓𑁂𑀘𑀺 𑀲𑀤𑁆𑀤𑀸𑀤𑀻𑀦𑀁 𑀏𑀯, 𑀦 𑀭𑀽𑀧𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀜𑁆𑀜𑀭𑀽𑀧𑁂𑀳𑀺𑀘 𑀮𑀓𑁆𑀔𑀡𑀢𑁄 𑀅𑀲𑀁𑀫𑀺𑀲𑁆𑀲𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀯𑀡𑁆𑀡𑀯𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀧𑀓𑀢𑀺𑀬𑀸𑀧𑀺 𑀯𑀸 𑀬𑀁𑀓𑀺𑀜𑁆𑀘𑀺𑀤𑀩𑁆𑀩𑀁 𑀲𑀫𑀯𑀺𑀲𑀫𑀁𑀯𑀸 𑀧𑀓𑀸𑀲𑁂 𑀢𑀻𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀢𑀺 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀲𑀤𑁆𑀤𑁄. 𑀲𑀤𑁆𑀤𑀬𑀢𑀻𑀢𑀺 𑀲𑀤𑁆𑀤𑁄. 𑀢𑀁 𑀢𑀁 𑀅𑀢𑁆𑀣𑀁𑀯𑀸 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁𑀯𑀸 𑀆𑀘𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀲𑀤𑀢𑀺𑀯𑀸 𑀢𑀁 𑀢𑀁 𑀤𑀺𑀲𑀁𑀯𑀸 𑀤𑁂𑀲𑀁𑀯𑀸 𑀔𑀡𑁂𑀦 𑀯𑀺𑀲𑁆𑀲𑀭𑀢𑀺 𑀯𑀺𑀧𑁆𑀨𑀭𑀢𑀻𑀢𑀺 𑀲𑀤𑁆𑀤𑁄. 𑀕𑀦𑁆𑀥𑀬𑀢𑀻𑀢𑀺 𑀕𑀦𑁆𑀥𑁄. 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀢𑀻𑀢𑀺 𑀕𑁄. 𑀯𑀸𑀢𑁄. 𑀢𑁂𑀦 𑀥𑀸𑀭𑀻𑀬𑀢𑀻𑀢𑀺 𑀕𑀦𑁆𑀥𑁄. 𑀭𑀲𑀻𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀭𑀲𑁄. 𑀭𑀲𑀦𑁆𑀢𑀺𑀯𑀸 𑀢𑀁 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀭𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑁄𑀝𑁆𑀞𑀩𑁆𑀩𑀁. 𑀨𑀼𑀲𑀦𑀜𑁆𑀘𑁂𑀢𑁆𑀣 𑀧𑀲𑀸𑀤𑁂𑀦 𑀲𑀳 𑀖𑀝𑁆𑀝𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀳𑀦𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀢𑀤𑀼𑀪𑀬𑀁𑀧𑀺 𑀆𑀧𑁄 𑀥𑀸𑀢𑀼𑀬𑀸 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀢𑀁 𑀢𑀲𑁆𑀲𑀸 𑀦𑀢𑁆𑀣𑀺. 𑀦𑀦𑀼 𑀲𑀻𑀢𑀢𑀸𑀯𑀸 𑀤𑁆𑀭𑀯𑀢𑀸𑀯𑀸 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀲𑀻𑀢𑀢𑀸 𑀳𑀺 𑀢𑁂𑀚𑁄𑀬𑁂𑀯, 𑀦 𑀆𑀧𑁄. 𑀬𑀤𑀺 𑀳𑀺 𑀲𑀸 𑀆𑀧𑁄𑀬𑁂𑀯 𑀲𑀺𑀬𑀸. 𑀧𑀓𑁆𑀓𑀼𑀫𑀺𑀢𑁂 𑀲𑀦𑁆𑀢𑀢𑁆𑀢𑁂 𑀮𑁄𑀳𑀭𑀲𑁂𑀧𑀺𑀲𑁆𑀲 𑀲𑀻𑀢𑀢𑀸 𑀮𑀩𑁆𑀪𑀫𑀸𑀦𑀸 𑀲𑀺𑀬𑀸. 𑀲𑁄 𑀳𑀺 𑀭𑀲𑁄 𑀆𑀧𑀸𑀥𑀺𑀓𑁄 𑀳𑁄𑀢𑀻𑀢𑀺. 𑀏𑀯𑀁 𑀧𑀦 𑀦𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀲𑀸 𑀢𑁂𑀚𑁄𑀬𑁂𑀯, 𑀦 𑀆𑀧𑁄𑀢𑀺. 𑀅𑀧𑀺𑀘, 𑀲𑀻𑀢𑀼𑀡𑁆𑀳𑀸𑀦𑀁 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀲𑀳 𑀅𑀧𑁆𑀧𑀯𑀢𑁆𑀢𑀦𑀢𑁄 𑀑𑀭𑀧𑀸𑀭𑀸𑀦𑀁 𑀯𑀺𑀬 𑀢𑁂𑀲𑀁 𑀅𑀦𑀯𑀝𑁆𑀞𑀸𑀦𑀢𑁄𑀘 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀲𑀻𑀢𑀓𑀮𑀸𑀧𑁂 𑀉𑀡𑁆𑀳𑀁, 𑀉𑀡𑁆𑀳𑀓𑀮𑀸𑀧𑁂𑀯𑀸 𑀲𑀻𑀢𑀁 𑀲𑀳 𑀧𑀯𑀢𑁆𑀢𑀢𑀺. 𑀬𑀲𑁆𑀫𑀺𑀁𑀘 𑀯𑀢𑁆𑀣𑀼𑀫𑁆𑀳𑀺 𑀧𑀼𑀩𑁆𑀩𑁂 𑀲𑀻𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺. 𑀧𑀘𑁆𑀙𑀸 𑀢𑀢𑁄 𑀲𑀻𑀢𑀢𑀭𑁂 𑀆𑀕𑀢𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀦 𑀉𑀡𑁆𑀳𑀲𑀜𑁆𑀜𑀸 𑀲𑀡𑁆𑀞𑀸𑀢𑀺. 𑀧𑀼𑀩𑁆𑀩𑁂 𑀉𑀡𑁆𑀳𑀲𑀜𑁆𑀜𑀸𑀬𑀁𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀉𑀡𑁆𑀳𑁂 𑀫𑀦𑁆𑀤𑁂 𑀲𑀻𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺. 𑀲𑀻𑀢𑁂 𑀫𑀦𑁆𑀤𑁂 𑀉𑀡𑁆𑀳𑀲𑀜𑁆𑀜𑀸𑀢𑀺.

𑀅𑀣 𑀧𑀦 𑀤𑁆𑀭𑀯𑀪𑀸𑀯𑀪𑀽𑀢𑁄 𑀆𑀧𑁄 𑀨𑀼𑀲𑀺𑀢𑁆𑀯𑀸 𑀕𑀬𑁆𑀳𑀢𑀺. 𑀅𑀬𑁄 𑀧𑀺𑀡𑁆𑀟𑀸𑀤𑀻𑀲𑀼 𑀆𑀩𑀦𑁆𑀥𑀦𑀪𑀽𑀢𑁄𑀧𑀺 𑀨𑀼𑀲𑀺𑀢𑁆𑀯𑀸𑀯 𑀕𑀬𑁆𑀳𑁂𑀬𑁆𑀬. 𑀏𑀯𑀜𑁆𑀘 𑀲𑀢𑀺 𑀬𑀣𑀸 𑀢𑁂𑀲𑀼 𑀇𑀢𑀭𑀸𑀦𑀺 𑀢𑀻𑀡𑀺 𑀪𑀽𑀢𑀸𑀦𑀺 𑀯𑀺𑀦𑀸 𑀇𑀢𑀭𑀻𑀢𑀭𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀸𑀬𑀺𑀓 𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀲𑁄𑀧𑀺 𑀯𑀺𑀦𑀸 𑀇𑀢𑀭𑁂𑀳𑀺 𑀯𑀺𑀲𑀼𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁄𑀏𑀯 𑀲𑀺𑀬𑀸. 𑀦 𑀧𑀦 𑀳𑁄𑀢𑀺. 𑀬𑀜𑁆𑀳𑀺 𑀢𑀸𑀦𑀺 𑀅𑀬𑁄𑀧𑀺𑀡𑁆𑀟𑀸𑀤𑀻𑀦𑀺 𑀨𑀼𑀲𑀦𑁆𑀢𑀸𑀦𑀁 𑀓𑀸𑀬𑀺𑀓𑀁 𑀲𑀼𑀔𑀁𑀯𑀸 𑀤𑀼𑀓𑁆𑀔𑀁𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀡𑁆𑀳𑀣𑀤𑁆𑀥𑀢𑀸 𑀯𑀲𑁂𑀦𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀻𑀢𑀼𑀡𑁆𑀳𑀢𑀸𑀯𑀲𑁂𑀦𑀯𑀸 𑀅𑀩𑁆𑀪𑀦𑁆𑀢𑀭𑀣𑀫𑁆𑀪𑀦𑀲𑁆𑀲 𑀫𑀦𑁆𑀤𑀕𑀸𑀴𑁆𑀳𑀢𑀸𑀯𑀲𑁂𑀦𑀯𑀸. 𑀦𑁄 𑀅𑀜𑁆𑀜𑀣𑀸𑀢𑀺. 𑀢𑀲𑁆𑀫𑀸 𑀧𑀼𑀭𑀺𑀫𑀪𑀸𑀕𑁂 𑀢𑀻𑀡𑀺 𑀪𑀽𑀢𑀸𑀦𑀺 𑀨𑀼𑀲𑀺𑀢𑁆𑀯𑀸𑀯𑀸 𑀯𑀡𑁆𑀡𑀁 𑀤𑀺𑀲𑁆𑀯𑀸𑀯𑀸 𑀧𑀘𑁆𑀙𑀸 𑀪𑀸𑀕𑁂 𑀲𑀼𑀤𑁆𑀥𑁂𑀦 𑀫𑀦𑁄 𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀤𑀻𑀖𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀁𑀯𑀸 𑀭𑀢𑁆𑀢𑀺𑀬𑀁 𑀅𑀮𑀸𑀢𑀘𑀓𑁆𑀓𑀁 𑀯𑀸 𑀢𑀁𑀢𑀁𑀙𑀺𑀤𑁆𑀤𑀯𑀺𑀯𑀭𑀁𑀯𑀸 𑀚𑀸𑀦𑀦𑁆𑀢𑀸 𑀯𑀺𑀬 𑀧𑀣𑀫𑀁 𑀤𑁆𑀭𑀯𑀢𑀸𑀲𑀳𑀺𑀢𑀸𑀦𑀺 𑀯𑀺𑀮𑀻𑀦𑀸𑀦𑀺 𑀫𑀼𑀤𑀽𑀦𑀺 𑀢𑀻𑀡𑀺 𑀪𑀽𑀢𑀸𑀦𑀺 𑀧𑀣𑀯𑀺𑀁 𑀏𑀯 𑀯𑀸 𑀨𑀼𑀲𑀺𑀢𑁆𑀯𑀸 𑀧𑀘𑁆𑀙𑀸 𑀲𑀼𑀤𑁆𑀥𑁂𑀦 𑀫𑀦𑁄 𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀯𑀺𑀲𑀼𑀁 𑀤𑁆𑀭𑀯𑀪𑀸𑀯𑀁 𑀅𑀤𑁆𑀤𑀢𑀺𑀦𑁆𑀢𑀪𑀸𑀯𑀁 𑀚𑀸𑀦𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀨𑀼𑀲𑀺𑀢𑁆𑀯𑀸 𑀚𑀸𑀦𑀦𑁆𑀢𑀸 𑀇𑀘𑁆𑀘𑁂𑀯 𑀫𑀜𑁆𑀜𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀼𑀦𑁄𑀢𑀺. 𑀕𑀼𑀦𑁆𑀦𑀁 𑀅𑀪𑀺𑀡𑁆𑀳𑀁 𑀘𑀭𑀡𑀝𑁆𑀞𑀸𑀦𑀁 𑀕𑁄𑀘𑀭𑁄. 𑀕𑁄𑀘𑀭𑀲𑀤𑀺𑀲𑀢𑁆𑀢𑀸 𑀇𑀥 𑀕𑁄𑀘𑀭𑁄. 𑀕𑁄𑀢𑀺𑀯𑀸 𑀇𑀥 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀦𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀸𑀦𑀺 𑀳𑀼𑀢𑁆𑀯𑀸 𑀏𑀢𑁂𑀲𑀼 𑀘𑀭𑀦𑁆𑀢𑀺. 𑀏𑀢𑀸𑀦𑀺𑀯𑀸𑀢𑁂𑀲𑀼 𑀘𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀖𑀝𑁆𑀝𑁂𑀦𑁆𑀢𑀻𑀢𑀺 𑀕𑁄𑀘𑀭𑀸. 𑀢𑁂𑀬𑁂𑀯 𑀇𑀥 𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸 𑀕𑁄𑀘𑀭𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺𑀧𑀦 𑀧𑀜𑁆𑀘 𑀬𑀣𑀸𑀓𑁆𑀓𑀫𑀁 𑀘𑀓𑁆𑀔𑀸𑀤𑀻𑀲𑀼 𑀧𑀝𑀺𑀳𑀦𑀦 𑀮𑀓𑁆𑀔𑀡𑀸𑀦𑀺 𑀭𑀽𑀧𑀸𑀤𑀻𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀢𑁆𑀣𑀻 𑀯𑀼𑀘𑁆𑀘𑀢𑀺 𑀅𑀯𑀺𑀲𑀤𑀸𑀓𑀸𑀭𑀲𑀡𑁆𑀞𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀬𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑀁 𑀢𑀣𑀸 𑀲𑀡𑁆𑀞𑀸𑀢𑀺 𑀧𑀯𑀢𑁆𑀢𑀢𑀺. 𑀲𑁄 𑀇𑀢𑁆𑀣𑀺 𑀬𑀸 𑀪𑀸𑀯𑁄𑀢𑀺 𑀇𑀢𑁆𑀣𑀢𑁆𑀢𑀁. 𑀧𑀼𑀭𑀺𑀲𑁄 𑀯𑀼𑀘𑁆𑀘𑀢𑀺 𑀯𑀺𑀲𑀤𑀸𑀓𑀸𑀭𑀲𑀡𑁆𑀞𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕 𑀇𑀢𑁆𑀣𑀺𑀦𑀺𑀫𑀺𑀢𑁆𑀢 𑀇𑀢𑁆𑀣𑀺 𑀓𑀼𑀢𑁆𑀢 𑀇𑀢𑁆𑀣𑀸𑀓𑀧𑁆𑀧𑀸𑀦𑀁 𑀳𑁂𑀢𑀼𑀪𑀸𑀯 𑀮𑀓𑁆𑀔𑀡𑀁 𑀇𑀢𑁆𑀣𑀢𑁆𑀢𑀁. 𑀧𑀼𑀭𑀺𑀲𑀮𑀺𑀗𑁆𑀕 𑀧𑀼𑀭𑀺𑀲𑀦𑀺𑀫𑀺𑀢𑁆𑀢 𑀧𑀼𑀭𑀺𑀲𑀓𑀼𑀢𑁆𑀢 𑀧𑀼𑀭𑀺𑀲𑀸𑀓𑀧𑁆𑀧𑀸𑀦𑀁 𑀳𑁂𑀢𑀼𑀪𑀸𑀯 𑀮𑀓𑁆𑀔𑀡𑀁 𑀧𑀼𑀭𑀺𑀲𑀢𑁆𑀢𑀁. 𑀢𑀢𑁆𑀣 𑀮𑀺𑀗𑁆𑀕𑀦𑁆𑀢𑀺 𑀧𑀥𑀸𑀦𑀗𑁆𑀕𑀪𑀽𑀢𑀁 𑀫𑀳𑀸𑀲𑀡𑁆𑀞𑀸𑀦𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀘𑁆𑀘𑀗𑁆𑀕𑀪𑀽𑀢𑀁 𑀔𑀼𑀤𑁆𑀤𑀓𑀲𑀡𑁆𑀞𑀸𑀦𑀁. 𑀓𑀼𑀢𑁆𑀢𑀦𑁆𑀢𑀺 𑀓𑀻𑀴𑀸𑀮𑀺𑀮𑀸𑀤𑀺 𑀓𑁆𑀭𑀺𑀬𑀸𑀯𑀺𑀲𑁂𑀲𑁄. 𑀆𑀓𑀧𑁆𑀧𑁄𑀢𑀺 𑀕𑀫𑀦𑀸𑀤𑀺𑀓𑁄 𑀆𑀓𑀸𑀭𑀯𑀺𑀓𑀸𑀭𑁄. 𑀲𑀩𑁆𑀩𑁂𑀧𑁂𑀢𑁂 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀏𑀯. 𑀬𑁂 𑀲𑀤𑁆𑀤𑀲𑀢𑁆𑀣𑁂𑀲𑀼 𑀮𑀺𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁂𑀲𑀜𑁆𑀘 𑀯𑀲𑁂𑀦 𑀅𑀬𑀁 𑀇𑀢𑁆𑀣𑀻𑀏𑀯, 𑀦 𑀧𑀼𑀭𑀺𑀲𑁄. 𑀅𑀬𑀁 𑀧𑀼𑀭𑀺𑀲𑁄𑀏𑀯, 𑀦 𑀇𑀢𑁆𑀣𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀡𑁆𑀞𑀸𑀦𑀸𑀤𑀻𑀦𑀁 𑀅𑀯𑀺𑀲𑀤𑀸𑀤𑀺𑀪𑀸𑀯𑁄𑀏𑀯 𑀅𑀢𑁆𑀣𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀢𑀸 𑀳𑁄𑀢𑀺. 𑀢𑀤𑀼𑀪𑀬𑀫𑀼𑀢𑁆𑀢𑀪𑀸𑀯𑁄𑀘 𑀦𑀧𑀼𑀁𑀲𑀓𑀢𑀸. 𑀲𑁄𑀘 𑀅𑀓𑁆𑀔𑀭𑀧𑀤 𑀲𑀗𑁆𑀔𑀸𑀢𑁂𑀲𑀼 𑀯𑀘𑀦𑁂𑀲𑀼 𑀘 𑀯𑀘𑀦𑀢𑁆𑀣𑁂𑀲𑀼𑀘 𑀬𑀣𑀸𑀭𑀳𑀁 𑀲𑀦𑁆𑀤𑀺𑀲𑁆𑀲𑀢𑀺𑀬𑁂𑀯. 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀭𑀳𑀺𑀢𑁂𑀲𑀼𑀧𑀺 𑀧𑀤𑁂𑀲𑀼𑀘 𑀭𑀼𑀓𑁆𑀔𑀸𑀤𑀻𑀲𑀼 𑀧𑀤𑀢𑁆𑀣𑁂𑀲𑀼𑀘 𑀧𑀭𑀺𑀬𑀸𑀬𑁂𑀦 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀢𑀸𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

[𑁧𑁭𑁮] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀇𑀢𑁆𑀣𑀻𑀦𑀁 𑀅𑀗𑁆𑀕𑀚𑀸𑀢𑀁 𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸𑀲𑀼𑀘 𑀦𑀺𑀫𑀺𑀢𑁆𑀢𑀲𑀤𑁆𑀤𑁄𑀯𑀺𑀬 𑀮𑀺𑀗𑁆𑀕𑀲𑀤𑁆𑀤𑁄 𑀅𑀗𑁆𑀕𑀚𑀸𑀢𑁂 𑀧𑀸𑀓𑀝𑁄 𑀤𑀺𑀝𑁆𑀞𑁄𑀢𑀺.

[𑁧𑁭𑁯] 𑀬𑀜𑁆𑀘 𑀢𑀢𑁆𑀣

‘‘𑀇𑀢𑁆𑀣𑀺𑀲𑀡𑁆𑀞𑀸𑀦𑀁 𑀇𑀢𑁆𑀣𑀸𑀓𑀧𑁆𑀧𑁄’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀮𑀺𑀗𑁆𑀕𑀲𑀤𑁆𑀤𑁄 𑀯𑀺𑀬 𑀆𑀓𑀧𑁆𑀧𑀲𑀤𑁆𑀤𑁄 𑀲𑀡𑁆𑀞𑀸𑀦𑁂 𑀧𑀸𑀓𑀝𑁄 𑀤𑀺𑀝𑁆𑀞𑁄𑀢𑀺. 𑀲𑁂𑀲𑀁𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀅𑀝𑁆𑀞𑀓𑀣𑀸𑀬 𑀅𑀲𑀫𑁂𑀦𑁆𑀢𑀁𑀧𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀪𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀢𑀁𑀲𑀳𑀺𑀢𑁂 𑀔𑀦𑁆𑀥𑀲𑀦𑁆𑀢𑀸𑀦𑁂 𑀏𑀲𑀸 𑀇𑀢𑁆𑀣𑀻, 𑀏𑀲𑁄 𑀧𑀼𑀭𑀺𑀲𑁄𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀤𑁆𑀤 𑀩𑀼𑀤𑁆𑀥𑀺𑀬𑁄 𑀏𑀢𑁂𑀦𑀸𑀢𑀺 𑀪𑀸𑀯𑁄 𑀪𑀯𑀦𑁆𑀢𑀺𑀯𑀸 𑀧𑀸𑀢𑀼𑀪𑀯𑀦𑁆𑀢𑀺 𑀢𑀁𑀲𑀳𑀺𑀢𑁂 𑀔𑀦𑁆𑀥𑀲𑀦𑁆𑀢𑀸𑀦𑁂 𑀮𑀺𑀗𑁆𑀕𑀸𑀤𑀻𑀦𑀺 𑀏𑀢𑀲𑁆𑀫𑀺𑀁 𑀲𑀢𑀻𑀢𑀺 𑀪𑀸𑀯𑁄. 𑀲𑁄 𑀏𑀯 𑀭𑀽𑀧𑀦𑁆𑀢𑀺 𑀪𑀸𑀯𑀭𑀽𑀧𑀁. 𑀳𑀤𑀦𑁆𑀢𑀺 𑀲𑀢𑁆𑀢𑀸 𑀢𑀁𑀢𑀁𑀅𑀢𑁆𑀣𑀁𑀯𑀸 𑀅𑀦𑀢𑁆𑀣𑀁𑀯𑀸 𑀧𑀽𑀭𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀳𑀤𑀬𑀁. 𑀳𑀤𑀦𑁆𑀢𑀺𑀯𑀸 𑀲𑀢𑁆𑀢𑀸 𑀇𑀢𑁄 𑀦𑀸𑀦𑀸𑀯𑀺𑀓𑀓𑁆𑀓𑁂 𑀑𑀲𑀚𑀦𑁆𑀢𑀺 𑀫𑀼𑀜𑁆𑀘𑀦𑁆𑀢𑀻𑀢𑀺 𑀳𑀤𑀬𑀁. 𑀳𑀭𑀦𑁆𑀢𑀺𑀯𑀸 𑀧𑀭𑀺𑀳𑀭𑀦𑁆𑀢𑀺 𑀢𑀁 𑀲𑀢𑁆𑀢𑀸 𑀚𑀻𑀯𑀺𑀢𑀁𑀯𑀺𑀬 𑀤𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀺𑀘𑀸𑀢𑀺 𑀳𑀤𑀬𑀁. 𑀯𑀲𑀦𑁆𑀢𑀺 𑀦𑀺𑀯𑀲𑀦𑁆𑀢𑀺 𑀘𑀺𑀢𑁆𑀢𑀘𑁂𑀢 𑀲𑀺𑀓𑀸𑀥𑀫𑁆𑀫𑀸 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼. 𑀳𑀤𑀬𑀜𑁆𑀘 𑀢𑀁 𑀯𑀢𑁆𑀣𑀼𑀘𑀸𑀢𑀺 𑀳𑀤𑀬𑀯𑀢𑁆𑀣𑀼. 𑀥𑀸𑀢𑀼𑀤𑁆𑀯𑀬𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀯𑀢𑁆𑀣𑀼𑀭𑀽𑀧𑀁. 𑀢𑀁 𑀧𑀦 𑀳𑀤𑀬𑀓𑁄𑀲𑀩𑁆𑀪𑀦𑁆𑀢𑀭𑁂 𑀅𑀟𑁆𑀠𑀧𑀲𑀢𑀫𑀢𑁆𑀢𑀁 𑀮𑁄𑀳𑀺𑀢𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀧𑀦 𑀤𑁂𑀲𑀦𑀸𑀪𑁂𑀤𑀭𑀓𑁆𑀔𑀦𑀢𑁆𑀣𑀁 𑀅𑀯𑀢𑁆𑀯𑀸 𑀧𑀝𑁆𑀞𑀸𑀦𑁂𑀏𑀯 𑀢𑀁 𑀯𑀼𑀢𑁆𑀢𑀁. 𑀬𑀣𑀸𑀳-𑀯𑀢𑁆𑀣𑀼 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀢𑁆𑀣𑀼 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺. 𑀏𑀢𑁆𑀣𑀘 𑀙𑀳𑀺 𑀯𑀢𑁆𑀣𑀽𑀳𑀺 𑀅𑀜𑁆𑀜𑀁 𑀯𑀢𑁆𑀣𑀼𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀼𑀘 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀓𑀼𑀲𑀮𑀸𑀤𑀻𑀦𑀁 𑀦𑀺𑀲𑁆𑀲𑀬𑀸𑀏𑀯 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑀢𑁆𑀣 𑀯𑀼𑀢𑁆𑀢𑀁 𑀯𑀢𑁆𑀣𑀼𑀦𑀸𑀫 𑀯𑀺𑀲𑀼𑀁 𑀏𑀓𑀁 𑀯𑀢𑁆𑀣𑀼𑀭𑀽𑀧𑀫𑁂𑀯𑀸𑀢𑀺 𑀲𑀺𑀤𑁆𑀥𑀦𑁆𑀢𑀺.

[𑁧𑁮𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬𑀸𑀢𑀺 𑀧𑀸𑀞𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀭𑀽𑀧𑀲𑀸𑀫𑀜𑁆𑀜𑀧𑀲𑀗𑁆𑀕𑁄 𑀳𑁄𑀢𑀻𑀢𑀺 𑀢𑀁 𑀯𑀺𑀲𑁄𑀥𑁂𑀢𑀼𑀁 𑀬𑀼𑀢𑁆𑀢𑀺𑀦𑀸𑀫 𑀯𑀼𑀢𑁆𑀢𑀸. 𑀧𑀝𑁆𑀞𑀸𑀦𑁂 𑀧𑀦 𑀩𑀳𑀽𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀲𑀼 𑀞𑀸𑀦𑁂𑀲𑀼 𑀯𑀢𑁆𑀣𑀼𑀦𑀸𑀫𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀲𑁄𑀧𑀲𑀗𑁆𑀕𑁄 𑀦𑀢𑁆𑀣𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀚𑀻𑀯𑀦𑁆𑀢𑀺 𑀲𑀳𑀚𑀸𑀢𑀥𑀫𑁆𑀫𑀸 𑀬𑁂𑀦𑀸𑀢𑀺 𑀚𑀻𑀯𑀺𑀢𑀁. 𑀢𑁂𑀲𑀁 𑀚𑀻𑀯𑀦𑁂 𑀆𑀥𑀺𑀧𑀘𑁆𑀘𑀬𑁄𑀕𑁂𑀦 𑀢𑁂𑀲𑀼 𑀇𑀦𑁆𑀤𑀁 𑀇𑀲𑁆𑀲𑀭𑀁 𑀅𑀢𑁆𑀢𑀸𑀦𑀁 𑀓𑀭𑁄𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀚𑀻𑀯𑀺𑀢𑀜𑁆𑀘 𑀢𑀁 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑀳𑀚𑀸𑀢𑀸 𑀦𑀼𑀧𑀸𑀮𑀦 𑀮𑀓𑁆𑀔𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀬𑀣𑀸 𑀳𑀺 𑀩𑀻𑀚𑀦𑀺𑀩𑁆𑀩𑀢𑁆𑀢𑀸𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀩𑀻𑀚𑁂𑀯𑀺𑀦𑀝𑁆𑀞𑁂𑀧𑀺 𑀉𑀤𑀓𑀸𑀦𑀼𑀧𑀸𑀮𑀺𑀢𑀸𑀦𑀺 𑀘𑀺𑀭𑀁𑀧𑀺 𑀓𑀸𑀮𑀁 𑀚𑀻𑀯𑀦𑁆𑀢𑀺. 𑀏𑀯𑀫𑁂𑀯𑀁 𑀦𑀺𑀭𑀼𑀤𑁆𑀥 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀓𑀫𑁆𑀫𑁂 𑀅𑀲𑀦𑁆𑀢𑁂𑀧𑀺 𑀚𑀻𑀯𑀺𑀢𑀸𑀦𑀼𑀧𑀸𑀮𑀺𑀢𑀸𑀦𑀺 𑀲𑀦𑁆𑀢𑀢𑀺𑀯𑀲𑁂𑀦 𑀯𑀲𑁆𑀲𑀲𑀢𑀁𑀧𑀺 𑀯𑀲𑁆𑀲𑀲𑀳𑀲𑁆𑀲𑀁𑀧𑀺 𑀓𑀧𑁆𑀧𑀁𑀧𑀺 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺𑀧𑀺 𑀚𑀻𑀯𑀦𑁆𑀢𑀺𑀬𑁂𑀯, 𑀢𑀣𑀸 𑀳𑀺 𑀚𑀻𑀯𑀺𑀢𑀭𑀳𑀺𑀢𑀸𑀦𑀺 𑀇𑀢𑀭𑀭𑀽𑀧𑀸𑀦𑀺 𑀚𑀻𑀯𑀦𑁆𑀢𑀸𑀦𑀺𑀦𑀸𑀫 𑀦𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀬𑁂𑀦 𑀏𑀓𑁂𑀦 𑀘𑀺𑀢𑁆𑀢𑁂𑀦𑀯𑀸 𑀉𑀢𑀼𑀦𑀸𑀯𑀸 𑀆𑀳𑀸𑀭𑁂𑀦𑀯𑀸 𑀚𑀸𑀬𑀦𑁆𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀧𑀭𑀁 𑀫𑀼𑀳𑀼𑀢𑁆𑀢𑀫𑀢𑁆𑀢𑀁𑀧𑀺 𑀲𑀦𑁆𑀢𑀸𑀦𑀁 𑀖𑀝𑁂𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀼 𑀳𑀺 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀏𑀓𑀯𑀻𑀣𑀺 𑀏𑀓𑀚𑀯𑀦𑀯𑀸𑀭 𑀏𑀓𑀲𑀫𑀸𑀧𑀢𑁆𑀢𑀺𑀯𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀉𑀢𑀼𑀚𑀸𑀳𑀸𑀭𑀚𑀸𑀦𑀜𑁆𑀘 𑀲𑀪𑀸𑀕𑁂𑀓 𑀉𑀢𑀼𑀆𑀳𑀸𑀭 𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀓𑀫𑁆𑀫𑀚𑀭𑀽𑀧𑀸𑀦𑀁 𑀧𑀦 𑀯𑀺𑀲𑀼𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀁 𑀏𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. 𑀬𑀤𑀺 𑀏𑀯𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀓𑀣𑀦𑁆𑀢𑀺. 𑀢𑁂𑀳𑀺 𑀚𑀻𑀯𑀺𑀢𑀬𑁄𑀕𑁂𑀦 𑀚𑀻𑀯𑀦𑁆𑀢𑀸𑀏𑀯 𑀳𑁄𑀦𑁆𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀢𑁂𑀲𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀤𑀺𑀲𑁆𑀲𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀅𑀭𑀽𑀧𑀥𑀫𑁆𑀫𑁂𑀲𑀼 𑀯𑀺𑀧𑀸𑀓𑀸𑀦𑀺 𑀢𑀸𑀯 𑀓𑀫𑁆𑀫𑀚𑀭𑀽𑀧𑀲𑀤𑀺𑀲𑀸𑀦𑀺. 𑀢𑀸𑀦𑀺𑀧𑀺 𑀳𑀺 𑀅𑀲𑀢𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀬𑀸𑀯𑀚𑀻𑀯𑀁𑀧𑀺 𑀏𑀓𑀲𑀦𑁆𑀢𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀺𑀬𑁂𑀯. 𑀇𑀢𑀭𑀸𑀦𑀺 𑀧𑀦 𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀧𑀸𑀢𑀸𑀕𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀢𑀤𑀪𑀸𑀯𑁂𑀧𑀺 𑀢𑀤𑀸𑀭𑀫𑁆𑀫𑀡𑀸 𑀩𑀳𑀽 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑁄 𑀚𑀻𑀯𑀺𑀢𑀲𑁆𑀲𑀅𑀤𑁆𑀥𑀸𑀦𑀨𑀭𑀡𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀺𑀬𑁂𑀯. 𑀅𑀧𑀺𑀘, 𑀬𑀸𑀯𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀼𑀧𑀦𑀺𑀩𑀦𑁆𑀥𑁂𑀦 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀸𑀬 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀸𑀯𑀲𑁂𑀦𑀧𑀺 𑀅𑀬𑀫𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑁂𑀦𑁂𑀯 𑀳𑀺 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸. 𑀧𑀯𑀢𑁆𑀢𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁.

[𑁧𑁮𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀆𑀳𑀸𑀭𑀚𑀸𑀤𑀻𑀦𑀁 𑀆𑀳𑀸𑀭𑀸𑀤𑀺𑀬𑁂𑀯 𑀉𑀧𑁆𑀧𑀢𑁆𑀢𑀺𑀬𑀸𑀧𑀺 𑀞𑀺𑀢𑀺𑀬𑀸𑀧𑀺 𑀓𑀸𑀭𑀡𑀁 𑀳𑁄𑀢𑀺. 𑀓𑀲𑁆𑀫𑀸, 𑀢𑀗𑁆𑀔𑀡𑁂 𑀥𑀭𑀫𑀸𑀦𑀢𑁆𑀢𑀸. 𑀓𑀫𑁆𑀫 𑀚𑀸𑀦𑀁 𑀧𑀦 𑀓𑀫𑁆𑀫𑀁 𑀉𑀧𑁆𑀧𑀢𑁆𑀢𑀺𑀬𑀸𑀏𑀯 𑀓𑀸𑀭𑀡𑀁, 𑀦 𑀞𑀺𑀢𑀺𑀬𑀸. 𑀓𑀲𑁆𑀫𑀸, 𑀢𑀗𑁆𑀔𑀡𑀸𑀪𑀸𑀯𑀢𑁄. 𑀚𑀻𑀯𑀺𑀢𑁂𑀦 𑀧𑀦 𑀅𑀦𑀼𑀧𑀸𑀮𑀺𑀢𑀢𑁆𑀢𑀸 𑀏𑀯 𑀢𑁂𑀲𑀁 𑀔𑀡𑀝𑁆𑀞𑀺𑀢𑀺 𑀲𑀺𑀤𑁆𑀥𑀸𑀢𑀺 𑀇𑀫𑀺𑀦𑀸 𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀝𑁆𑀞𑀸𑀬𑀻𑀦𑀁𑀧𑀺 𑀳𑀺 𑀲𑀳𑀚𑀸𑀢𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀅𑀦𑀼𑀧𑀸𑀮𑀓𑀁. 𑀦 𑀳𑀺 𑀢𑁂𑀲𑀁 𑀓𑀫𑁆𑀫𑀁𑀬𑁂𑀯 𑀞𑀺𑀢𑀺𑀓𑀸𑀭𑀡𑀁 𑀳𑁄𑀢𑀺. 𑀆𑀳𑀸𑀭𑀚𑀸𑀤𑀻𑀦𑀁 𑀆𑀳𑀸𑀭𑀸𑀤𑀺 𑀯𑀺𑀬 𑀓𑀫𑁆𑀫𑀲𑁆𑀲 𑀢𑀗𑁆𑀔𑀡𑀸𑀪𑀸𑀯 𑀢𑁄𑀢𑀺’’. 𑀢𑀁 𑀦 𑀬𑀼𑀢𑁆𑀢𑀁.

𑀥𑀫𑁆𑀫𑀸𑀦𑀜𑁆𑀳𑀺 𑀔𑀡𑀝𑁆𑀞𑀺𑀢𑀺𑀦𑀸𑀫 𑀏𑀓𑀓𑀮𑀸𑀧𑀕𑀢𑀲𑀳𑀚𑀸𑀢𑀧𑀘𑁆𑀘𑀬𑀸 𑀬𑀢𑁆𑀢𑀸𑀏𑀯 𑀳𑁄𑀢𑀺. 𑀦 𑀦𑀸𑀦𑀸𑀓𑀮𑀸𑀧𑀕𑀢𑀚𑀦𑀓𑀧𑀘𑁆𑀘𑀬𑀸𑀬𑀢𑁆𑀢𑀸. 𑀇𑀢𑀭𑀣𑀸 𑀉𑀧𑁆𑀧𑀸𑀤𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀸𑀦𑀁 𑀉𑀧𑀘𑀬𑀲𑀦𑁆𑀢𑀢𑀻𑀦𑀁 𑀯𑀺𑀬 𑀞𑀺𑀢𑀺𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀸𑀬 𑀚𑀭𑀢𑀸𑀬𑀧𑀺 𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀢𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸 𑀲𑀺𑀬𑀸𑀢𑀺. 𑀅𑀧𑀺𑀘, 𑀔𑀡𑀝𑁆𑀞𑀺𑀢𑀺𑀦𑀸𑀫 𑀲𑀪𑀸𑀯𑀲𑀺𑀤𑁆𑀥𑀸𑀏𑀯. 𑀦 𑀳𑀺 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀅𑀢𑁆𑀢𑀦𑁄 𑀔𑀡𑁂𑀲𑀼 𑀧𑀭𑀺𑀧𑀼𑀡𑁆𑀡𑀁 𑀅𑀝𑁆𑀞𑀢𑁆𑀯𑀸 𑀅𑀦𑁆𑀢𑀭𑀸𑀯 𑀪𑀺𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑀺. 𑀦𑀘 𑀧𑀘𑁆𑀘𑀬𑀸𑀥𑀺𑀫𑀢𑁆𑀢𑁂𑀦 𑀅𑀢𑀺𑀭𑁂 𑀓𑀢𑀭𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑀺. 𑀢𑀲𑁆𑀫𑀸 𑀔𑀡𑀝𑁆𑀞𑀺𑀢𑀺𑀬𑀁 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑀸𑀧𑀺 𑀆𑀳𑀸𑀭𑀸𑀤𑀬𑁄 𑀅𑀦𑀼𑀧𑀸𑀮𑀬𑀫𑀸𑀦𑀜𑁆𑀘 𑀚𑀻𑀯𑀺𑀢𑀁 𑀧𑀘𑁆𑀙𑀸 𑀩𑀮𑀯𑀭𑀽𑀧𑀲𑀦𑁆𑀢𑀢𑀺 𑀧𑀯𑀢𑁆𑀢𑀺𑀅𑀢𑁆𑀣𑀸𑀬𑀏𑀯 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑀺 𑀧𑀸𑀮𑁂𑀢𑀺𑀘. 𑀦 𑀔𑀡𑀝𑁆𑀞𑀺𑀢𑀺𑀧𑀯𑀢𑁆𑀢𑀺𑀬𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑁂𑀲𑀁𑀧𑀺 𑀔𑀡𑀝𑁆𑀞𑀺𑀢𑀺𑀦𑀸𑀫 𑀥𑀭𑀫𑀸𑀦𑀚𑀦𑀓𑀸𑀬𑀢𑁆𑀢𑀸 𑀯𑀸 𑀚𑀻𑀯𑀺𑀢𑀸𑀬𑀢𑁆𑀢𑀸𑀯𑀸 𑀦𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀬𑀤𑀺 𑀧𑀦 𑀢𑀁 𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸, 𑀏𑀯𑀁𑀲𑀢𑀺 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀅𑀝𑁆𑀞 𑀓𑀣𑀸𑀬𑀁𑀧𑀺 𑀲𑀦𑁆𑀢𑁂𑀧𑀺𑀘 𑀅𑀦𑀼𑀧𑀸𑀮𑀦 𑀮𑀓𑁆𑀔𑀡𑀸𑀤𑀺𑀫𑁆𑀳𑀺 𑀯𑀺𑀥𑀸𑀦𑁂 𑀅𑀢𑁆𑀣𑀺𑀓𑁆𑀔𑀡𑁂𑀬𑁂𑀯 𑀢𑀁 𑀢𑁂𑀥𑀫𑁆𑀫𑁂 𑀧𑀸𑀮𑁂𑀢𑀻𑀢𑀺𑀆𑀤𑀺𑀯𑀘𑀦𑁂 𑀬𑀣𑀸𑀲𑀦𑁆𑀢𑀢𑀺𑀝𑁆𑀞𑀺𑀢𑀺 𑀮𑀩𑁆𑀪𑀢𑀺. 𑀢𑀣𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀢𑀺. 𑀇𑀤𑀁 𑀧𑀦 𑀧𑀸𑀘𑀓𑀕𑁆𑀕𑀺𑀦𑀸 𑀲𑀳 𑀲𑀓𑀮𑀁 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺. 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄. 𑀆𑀳𑀭𑀻𑀬𑀢𑀺 𑀅𑀚𑁆𑀛𑁄𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄. 𑀓𑀩𑀴𑀻𑀓𑀸𑀭𑁄𑀘 𑀲𑁄 𑀆𑀳𑀸𑀭𑁄𑀘𑀸𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺𑀧𑀺 𑀧𑀸𑀞𑁄. 𑀇𑀤𑀜𑁆𑀘 𑀲𑀯𑀢𑁆𑀣𑀼𑀓 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀣𑀯𑀸, 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑀁 𑀪𑀼𑀲𑁄 𑀳𑀭𑀢𑀺 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀻𑀢𑀺 𑀆𑀳𑀸𑀭𑁄. 𑀔𑀚𑁆𑀚 𑀪𑁄𑀚𑁆𑀚𑀸𑀤𑀺𑀓𑁂 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁄 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀢𑀧𑁆𑀧𑀭𑀺𑀬𑀸 𑀧𑀦𑁆𑀦𑀢𑁆𑀢𑀸𑀘𑀸𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀇𑀫𑀲𑁆𑀫𑀺𑀁𑀅𑀢𑁆𑀣𑁂 𑀲𑀢𑀺 𑀦𑀺𑀩𑁆𑀩𑀢𑁆𑀢𑀺𑀢 𑀑𑀚𑀸 𑀏𑀯 𑀮𑀩𑁆𑀪𑀢𑀺. 𑀅𑀢𑁆𑀣𑀢𑁄 𑀧𑀦 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀭𑀲𑀲𑁆𑀲 𑀲𑀸𑀭𑀪𑀽𑀢𑁄 𑀉𑀧𑀢𑁆𑀣𑀫𑁆𑀪𑀩𑀮𑀓𑀸𑀭𑁄 𑀪𑀽𑀢𑀦𑀺𑀲𑁆𑀲𑀺𑀢𑁄 𑀧𑀭𑀫𑀲𑀺𑀦𑀺𑀤𑁆𑀥𑀲𑀺 𑀦𑁂𑀳𑁄 𑀇𑀥 𑀆𑀳𑀸𑀭𑀭𑀽𑀧𑀁𑀦𑀸𑀫. 𑀢𑀢𑁆𑀣 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀭𑀲𑀲𑁆𑀲𑀸𑀢𑀺 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀆𑀫𑀸𑀲𑀬𑁂 𑀧𑀢𑀺𑀝𑁆𑀞𑀺𑀢𑀸𑀦𑀺 𑀆𑀳𑀸𑀭𑀯𑀢𑁆𑀣𑀽𑀦𑀺 𑀧𑀸𑀘𑀓𑀢𑁂𑀚𑁂𑀦 𑀯𑀺𑀯𑁂𑀘𑀺𑀢𑀸𑀦𑀺 𑀭𑀲𑀸𑀤𑀺𑀪𑀸𑀯𑁂𑀦 𑀧𑀜𑁆𑀘𑀥𑀸 𑀯𑀺𑀪𑀸𑀕𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀧𑀡𑀻𑀢 𑀲𑀺𑀦𑀺𑀤𑁆𑀥 𑀮𑀳𑀼𑀓 𑀲𑀺𑀦𑁂𑀳 𑀓𑁄𑀝𑁆𑀞𑀸𑀲𑁄 𑀭𑀲𑁄𑀦𑀸𑀫. 𑀬𑁂 𑀮𑁄𑀓𑁂 𑀭𑀲𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀸𑀘𑀓 𑀢𑁂𑀚𑀩𑀮𑁂𑀦 𑀢𑀢𑁄 𑀉𑀢𑁆𑀢𑀭𑀺𑀢𑁆𑀯𑀸 𑀭𑀲𑀳𑀭𑀡𑀺𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀳𑁂𑀝𑁆𑀞𑀸𑀘 𑀉𑀤𑁆𑀥𑀜𑁆𑀘 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀭𑀦𑁆𑀢𑁄 𑀅𑀦𑀼𑀨𑀭𑀦𑁆𑀢𑁄 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀲𑀸𑀭𑀪𑀽𑀢𑁄 𑀉𑀧𑀢𑁆𑀣𑀫𑁆𑀪𑀁 𑀩𑀮𑀁 𑀓𑀭𑁄𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀩𑀮𑀓𑀸𑀭𑁄. 𑀲𑁄 𑀳𑀺 𑀆𑀫𑀸𑀲𑀬𑁂 𑀧𑀢𑀺𑀝𑁆𑀞𑀺𑀢 𑀫𑀢𑁆𑀢𑁄𑀯 𑀲𑀓𑀮𑀲𑀭𑀻𑀭𑁂 𑀪𑀽𑀢𑁂𑀲𑀼 𑀉𑀧𑀢𑁆𑀣𑀫𑁆𑀪𑀓𑀩𑀮𑀁 𑀚𑀦𑁂𑀢𑀻𑀢𑀺.

[𑁧𑁮𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀅𑀗𑁆𑀕𑀫𑀗𑁆𑀕𑀸 𑀦𑀲𑀸𑀭𑀺 𑀭𑀲𑀳𑀭 𑀲𑀗𑁆𑀔𑀸𑀢𑀸𑀢𑀺’’ 𑀧𑀸𑀞𑁄. 𑀲𑁄 𑀤𑀼𑀧𑁆𑀧𑀸𑀞𑁄.

𑀢𑀁 𑀧𑀦 𑀲𑁂𑀦𑁆𑀤𑁆𑀭𑀺𑀬𑀓𑀸𑀬𑁄𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀁 𑀆𑀳𑀸𑀭𑀭𑀽𑀧𑀁. 𑀑𑀚𑀸𑀮𑀓𑁆𑀔𑀡𑀁 𑀯𑀸. 𑀢𑀢𑁆𑀣 𑀉𑀤𑀬𑀢𑀺 𑀧𑀲𑀯𑀢𑀻𑀢𑀺 𑀑𑀚𑀸. 𑀅𑀯𑀲𑀤𑁆𑀤𑁄𑀯𑀸 𑀭𑀓𑁆𑀔𑀡𑁂. 𑀭𑀓𑁆𑀔𑀡𑀜𑁆𑀘𑁂𑀢𑁆𑀣 𑀉𑀧𑀢𑁆𑀣𑀫𑁆𑀪𑀦𑀫𑁂𑀯. 𑀅𑀯𑀢𑀺 𑀚𑀦𑁂𑀢𑀺𑀘𑀸𑀢𑀺 𑀑𑀚𑀸. 𑀓𑀺𑀁 𑀅𑀯𑀢𑀺. 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀢𑁆𑀣𑀼𑀁. 𑀓𑀺𑀁𑀘 𑀚𑀦𑁂𑀢𑀺. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀉𑀤𑀬𑀸𑀦𑀦𑁆𑀢𑀭𑀁 𑀭𑀽𑀧𑀁 𑀚𑀦𑁂𑀢𑀻𑀢𑀺 𑀑𑀚𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀜𑁆𑀜𑀸𑀧𑀤𑁂𑀲𑀭𑀳𑀺𑀢𑁂𑀦 𑀓𑀓𑁆𑀔𑀴𑀢𑁆𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀪𑀸𑀯𑁂𑀦 𑀲𑀺𑀤𑁆𑀥𑀁 𑀭𑀽𑀧𑀁 𑀲𑀪𑀸𑀯𑀭𑀽𑀧𑀁. 𑀉𑀧𑁆𑀧𑀸𑀤𑀸𑀤𑀺𑀦𑀸 𑀅𑀦𑀺𑀘𑁆𑀘𑀢𑀸𑀤𑀺𑀦𑀸𑀘 𑀲𑀗𑁆𑀔𑀳𑀮𑀓𑁆𑀔𑀡𑁂𑀦 𑀲𑀳𑀺𑀢𑀁 𑀭𑀽𑀧𑀁 𑀲𑀮𑀓𑁆𑀔𑀡𑀭𑀽𑀧𑀁. 𑀉𑀚𑀼𑀓𑀢𑁄𑀯 𑀓𑀫𑁆𑀫𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀁 𑀭𑀽𑀧𑀁 𑀦𑀺𑀧𑁆𑀨𑀦𑁆𑀦𑀭𑀽𑀧𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀭𑀽𑀧𑀁 𑀭𑀽𑀧𑀭𑀽𑀧𑀁. 𑀬𑀣𑀸 𑀤𑀼𑀓𑁆𑀔𑀤𑀼𑀓𑁆𑀔𑀁 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀦𑁆𑀢𑀺. 𑀲𑀗𑁆𑀔𑀢𑀮𑀓𑁆𑀔𑀡𑀬𑀼𑀢𑁆𑀢 𑀢𑀸𑀬 𑀅𑀦𑀺𑀘𑁆𑀘𑀢𑀸𑀤𑀺𑀓𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑀸𑀭𑀳𑀁 𑀭𑀽𑀧𑀁 𑀲𑀫𑁆𑀫𑀲𑀦𑀭𑀽𑀧𑀁. 𑀢𑁂 𑀢𑁂 𑀤𑀩𑁆𑀩𑀲𑀫𑁆𑀪𑀸𑀭𑀸𑀯𑀸 𑀭𑀽𑀧𑀓𑀮𑀸𑀧𑀸𑀯𑀸 𑀯𑀺𑀲𑀼𑀁𑀯𑀺𑀲𑀼𑀁 𑀪𑀼𑀲𑁄 𑀓𑀸𑀲𑀦𑁆𑀢𑀺 𑀧𑀓𑀸𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀓𑀸𑀲𑁄. 𑀦𑀺𑀲𑀢𑁆𑀢 𑀦𑀺𑀚𑀻𑀯𑀝𑁆𑀞𑁂𑀦 𑀥𑀸𑀢𑀼. 𑀆𑀓𑀸𑀲𑀲𑀗𑁆𑀔𑀸𑀢𑀸 𑀥𑀸𑀢𑀽𑀢𑀺 𑀆𑀓𑀸𑀲𑀥𑀸𑀢𑀼. 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀙𑀺𑀦𑁆𑀤𑀢𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀺 𑀓𑀮𑀸𑀧𑀦𑁆𑀢𑀭 𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀅𑀲𑀁𑀫𑀺𑀲𑁆𑀲𑀁 𑀏𑀓𑀢𑁆𑀢𑀁 𑀅𑀦𑀼𑀧𑀕𑀫𑀦𑀁 𑀓𑀭𑁄𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑁄. 𑀢𑁂𑀳𑀺𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀻𑀬𑀢𑀺 𑀅𑀢𑁆𑀢𑀦𑁄𑀯𑀸 𑀧𑀭𑁂𑀲𑀁𑀯𑀸 𑀅𑀓𑀢𑁆𑀯𑀸𑀫𑀚𑁆𑀛𑁂 𑀯𑀺𑀲𑀼𑀁 𑀣𑀧𑀻𑀬𑀢𑀺. 𑀢𑁂𑀲𑀁𑀯𑀸 𑀙𑀺𑀤𑁆𑀤𑀯𑀺𑀯𑀭𑀫𑀢𑁆𑀢𑀪𑀽𑀢𑁄. 𑀦 𑀯𑀺𑀲𑀼𑀁 𑀏𑀓𑁄 𑀉𑀧𑁆𑀧𑀸𑀤𑀲𑀳𑀺𑀢𑁄 𑀲𑀪𑀸𑀯𑀥𑀫𑁆𑀫𑁄. 𑀦𑀸𑀧𑀺 𑀓𑀲𑁆𑀲𑀘𑀺 𑀭𑀽𑀧𑀓𑀮𑀸𑀧𑀲𑁆𑀲 𑀧𑀓𑁆𑀔𑀪𑀽𑀢𑁄𑀢𑀺 𑀧𑀭𑀺𑀘𑁆𑀙𑁂𑀤𑁄. 𑀯𑀺𑀓𑀸𑀭𑀮𑀓𑁆𑀔𑀡𑀭𑀽𑀧𑀸𑀦𑀺 𑀳𑀺 𑀅𑀲𑀪𑀸𑀯𑀥𑀫𑁆𑀫𑀪𑀽𑀢𑀸𑀦𑀺𑀧𑀺 𑀢𑀁𑀢𑀁 𑀭𑀽𑀧𑀓𑀮𑀸𑀧𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀢𑀸 𑀢𑀁𑀢𑀁𑀭𑀽𑀧𑀓𑀮𑀸𑀧𑀧𑀓𑁆𑀔𑀺𑀓𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀅𑀬𑀁 𑀧𑀦 𑀢𑁂𑀳𑀺 𑀭𑀽𑀧 𑀓𑀮𑀸𑀧𑁂𑀳𑀺 𑀲𑀩𑁆𑀩𑀲𑁄 𑀯𑀺𑀫𑀼𑀢𑁆𑀢𑀪𑀸𑀯𑁂𑀦 𑀩𑀳𑀺𑀪𑀽𑀢𑀢𑁆𑀢𑀸 𑀓𑀲𑁆𑀲𑀘𑀺 𑀭𑀽𑀧 𑀓𑀮𑀸𑀧𑀲𑁆𑀲 𑀧𑀓𑁆𑀔𑀪𑀽𑀢𑁄 𑀦 𑀳𑁄𑀢𑀻𑀢𑀺. 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸𑀘 𑀧𑀦 𑀓𑁂𑀦𑀘𑀺 𑀭𑀽𑀧𑁂𑀦 𑀨𑀼𑀲𑀦 𑀧𑀭𑀺𑀬𑀸𑀬𑁄𑀧𑀺 𑀢𑀲𑁆𑀲 𑀲𑀩𑁆𑀩𑀲𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀲𑁄 𑀅𑀲𑀁𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀖𑀦𑀧𑀺𑀡𑁆𑀟𑀯𑀢𑁆𑀣𑀽𑀲𑀼 𑀧𑀝𑀺𑀖𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑀸𑀦𑀁 𑀦𑀸𑀦𑀸 𑀓𑀮𑀸𑀧𑀕𑀢𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀁𑀨𑀼𑀝𑁆𑀞𑀢𑀸 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀅𑀲𑀁𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻𑀢𑀺 𑀏𑀢𑁂𑀳𑀺 𑀅𑀲𑀁𑀨𑀼𑀝𑁆𑀞𑀁 𑀅𑀚𑀝𑀸𑀓𑀸𑀲𑀁 𑀓𑀁𑀣𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀝𑀻𑀓𑀸𑀬𑀁 𑀧𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀅𑀚𑀝𑀸𑀓𑀸𑀲𑀦𑀺𑀤𑁆𑀤𑁂𑀲𑁄 𑀦𑀳𑁄𑀢𑀺, 𑀧𑀭𑀺𑀘𑁆𑀙𑁂𑀤𑀭𑀽𑀧𑀦𑀺𑀤𑁆𑀤𑁂𑀲𑁄𑀬𑁂𑀯. 𑀲𑁄𑀘 𑀖𑀦𑀧𑀺𑀡𑁆𑀟 𑀯𑀢𑁆𑀣𑀽𑀲𑀼𑀏𑀯 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼𑀘 𑀪𑀽𑀢𑀸𑀦𑀁 𑀅𑀲𑀁𑀨𑀼𑀝𑁆𑀞𑀢𑀸𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀅𑀩𑁆𑀬𑀸𑀧𑀺𑀢𑀸 𑀏𑀓𑀢𑁆𑀢𑀁 𑀅𑀦𑀼𑀧𑀕𑀢𑀢𑀸𑀏𑀯. 𑀢𑀢𑁆𑀣 𑀅𑀲𑀁𑀨𑀼𑀝𑁆𑀞𑀢𑀸𑀦𑀸𑀫 𑀬𑀼𑀢𑁆𑀢𑀸 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀩𑁆𑀬𑀸𑀧𑀺𑀓𑀢𑀸 𑀳𑀺 𑀅𑀲𑀁𑀨𑀼𑀝𑁆𑀞𑀢𑀸𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀦𑀸𑀦𑀸𑀓𑀮𑀸𑀧𑀕𑀢𑀸𑀦𑀁 𑀪𑀽𑀢𑀸𑀦𑀁 𑀧𑀭𑀺𑀬𑀦𑁆𑀢𑀢𑀸 𑀲𑀗𑁆𑀔𑀸𑀢𑁄 𑀅𑀦𑁆𑀢𑀭𑀸𑀴𑀥𑀫𑁆𑀫𑁄. 𑀭𑀽𑀧𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀁 𑀧𑀭𑀺𑀘𑁆𑀙𑁂𑀤𑀭𑀽𑀧𑀁. 𑀬𑀸 𑀧𑀦 𑀘𑀮𑀫𑀸𑀦𑁂𑀦 𑀓𑀸𑀬𑀗𑁆𑀕𑁂𑀦 𑀅𑀢𑁆𑀢𑀸𑀦𑀜𑁆𑀘 𑀅𑀢𑁆𑀢𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀥𑀺𑀧𑁆𑀧𑀸𑀬𑀜𑁆𑀘 𑀧𑀘𑁆𑀘𑀓𑁆𑀔𑁂 𑀞𑀺𑀢𑁂 𑀚𑀦𑁂 𑀯𑀺𑀜𑁆𑀜𑀸𑀧𑁂𑀢𑀺 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀬𑀜𑁆𑀘 𑀢𑁂𑀦 𑀓𑀸𑀬𑀗𑁆𑀕𑁂𑀦 𑀢𑁂𑀳𑀺 𑀚𑀦𑁂𑀳𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀸𑀫. 𑀬𑀸 𑀉𑀘𑁆𑀘𑀸𑀭𑀻𑀬𑀫𑀸𑀦𑁂𑀦 𑀯𑀸𑀘𑀗𑁆𑀕𑁂𑀦 𑀲𑀤𑁆𑀤𑁂𑀦 𑀅𑀢𑁆𑀢𑀸𑀦𑀜𑁆𑀘 𑀅𑀢𑁆𑀢𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀥𑀺𑀧𑁆𑀧𑀸𑀬𑀜𑁆𑀘 𑀲𑁄𑀢𑀧𑀣𑁂 𑀞𑀺𑀢𑁂 𑀚𑀦𑁂 𑀯𑀺𑀜𑁆𑀜𑀸𑀧𑁂𑀢𑀺. 𑀲𑀬𑀜𑁆𑀘 𑀢𑁂𑀦𑀯𑀸𑀘𑀗𑁆𑀕𑁂𑀦 𑀢𑁂𑀳𑀺 𑀚𑀦𑁂𑀳𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀦𑀸𑀫. 𑀅𑀣𑀯𑀸, 𑀯𑀺𑀜𑁆𑀜𑀸𑀧𑁂𑀦𑁆𑀢𑀺 𑀚𑀦𑀸 𑀯𑀺𑀜𑁆𑀜𑀸𑀬𑀦𑁆𑀢𑀺𑀯𑀸 𑀚𑀦𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘𑀺𑀢𑁆𑀢𑀸𑀦𑀺 𑀏𑀢𑀸𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀲𑀲𑀫𑁆𑀪𑀸𑀭𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀪𑀽𑀢𑁂 𑀓𑀸𑀬𑁂 𑀧𑀯𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀘𑁄𑀧𑀦 𑀓𑀸𑀬𑀲𑀗𑁆𑀔𑀸𑀢𑁄 𑀓𑀸𑀬𑁄 𑀏𑀯𑀯𑀸 𑀯𑀺𑀜𑁆𑀜𑀢𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀘𑀺𑀢𑁆𑀢𑀚𑀲𑀤𑁆𑀤𑀲𑀗𑁆𑀔𑀸𑀢𑀸𑀬 𑀯𑀸𑀘𑀸𑀬 𑀧𑀯𑀢𑁆𑀢𑀸 𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀘𑁄𑀧𑀦𑀯𑀸𑀘𑀸 𑀲𑀗𑁆𑀔𑀸𑀢𑀸 𑀯𑀸𑀘𑀸 𑀏𑀯𑀯𑀸 𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀢𑀢𑁆𑀣 𑀘𑀺𑀢𑁆𑀢𑀯𑀲𑁂𑀦 𑀬𑀁𑀓𑀺𑀜𑁆𑀘𑀺 𑀓𑀸𑀬𑀗𑁆𑀕𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀢𑀁𑀢𑀁𑀅𑀗𑁆𑀕𑀁 𑀲𑀦𑁆𑀢𑀫𑁆𑀪𑀦𑁆𑀢𑀸 𑀲𑀦𑁆𑀥𑀸𑀭𑁂𑀦𑁆𑀢𑀸 𑀘𑀸𑀮𑁂𑀦𑁆𑀢𑀸 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀚𑀯𑀸𑀢𑀓𑀮𑀸𑀧𑀸 𑀢𑀁𑀢𑀁𑀅𑀗𑁆𑀕𑀁 𑀧𑀽𑀭𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀸𑀘 𑀬𑀣𑀸𑀯𑀸 𑀢𑀣𑀸𑀯𑀸 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀲𑁆𑀲 𑀢𑁂𑀳𑀺 𑀘𑀺𑀢𑁆𑀢𑀚𑀯𑀸𑀢𑀓𑀮𑀸𑀧𑁂𑀢𑀺 𑀲𑀳𑀚𑀸𑀢𑀲𑁆𑀲 𑀘𑁄𑀧𑀦𑀓𑀸𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀩𑁆𑀩𑁂 𑀢𑁂 𑀓𑀮𑀸𑀧𑀸 𑀬𑀣𑀸𑀥𑀺𑀧𑁆𑀧𑁂𑀢𑀤𑀺𑀲𑀸𑀪𑀺𑀫𑀼𑀔𑀸𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀘𑁄𑀧𑀦𑀓𑀸𑀬𑀲𑀗𑁆𑀔𑀸𑀢𑁄 𑀆𑀓𑀸𑀭𑀯𑀺𑀓𑀸𑀭𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀫. 𑀦𑀺𑀬𑀸𑀫𑀓𑀲𑀤𑀺𑀲𑀻 𑀳𑀺 𑀅𑀬𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀢𑁂𑀘 𑀦𑀸𑀯𑀸𑀲𑀤𑀺 𑀲𑀸𑀢𑀺. 𑀬𑀣𑀸 𑀳𑀺 𑀦𑀺𑀬𑀸𑀫𑀓𑁄 𑀦𑀸𑀯𑀸𑀬 𑀫𑀽𑀮𑀪𑀸𑀕𑁂 𑀞𑀢𑁆𑀯𑀸 𑀏𑀓𑀁 𑀫𑀳𑀸𑀨𑀺𑀬𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀦𑀤𑀺𑀲𑁄𑀢𑁂 𑀘𑀸𑀭𑁂𑀢𑁆𑀯𑀸 𑀲𑀓𑀮𑀁 𑀫𑀳𑀸𑀦𑀸𑀯𑀁 𑀇𑀘𑁆𑀙𑀺𑀢𑀤𑀺𑀲𑀸𑀪𑀺𑀫𑀼𑀔𑀁 𑀦𑀺𑀬𑁄𑀚𑁂𑀢𑀺. 𑀦 𑀬𑀁𑀯𑀸 𑀢𑀁𑀯𑀸 𑀤𑀺𑀲𑀁 𑀕𑀦𑁆𑀢𑀼𑀁 𑀤𑁂𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀳𑀺 𑀯𑀺𑀜𑁆𑀜𑀢𑁆𑀢𑀺 𑀢𑁂𑀲𑀁 𑀫𑀽𑀮𑀪𑀸𑀕𑁂𑀏𑀯 𑀮𑀩𑁆𑀪𑀫𑀸𑀦𑀸 𑀢𑁂 𑀬𑀣𑀸𑀥𑀺𑀧𑁆𑀧𑁂𑀢𑀤𑀺𑀲𑀸𑀪𑀺𑀫𑀼𑀔𑁂 𑀏𑀯𑀁 𑀓𑀢𑁆𑀯𑀸 𑀦𑀺𑀬𑁄𑀚𑁂𑀢𑀻𑀢𑀺 𑀲𑀸 𑀦𑀺𑀬𑀸𑀫𑀓𑀲𑀤𑀺𑀲𑀻 𑀳𑁄𑀢𑀻𑀢𑀺. 𑀏𑀢𑁆𑀣𑀘 𑀬𑀤𑁂𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀏𑀓𑀚𑀯𑀦𑀯𑀻𑀣𑀺𑀬𑀁 𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀧𑀣𑀫 𑀚𑀯𑀦𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑁆𑀢𑀦𑀸 𑀲𑀳𑀚𑀸𑀢𑀭𑀽𑀧𑀓𑀸𑀬𑀁 𑀲𑀁𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀧𑀭𑀸𑀧𑀭𑀁 𑀧𑀦 𑀘𑀸𑀮𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀤𑀼𑀢𑀻𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀫𑀘𑀺𑀢𑁆𑀢𑁂𑀦 𑀧𑀦 𑀲𑀫𑀼𑀝𑁆𑀞𑀺𑀢𑀸 𑀯𑀸𑀬𑁄𑀥𑀸𑀢𑀼 𑀳𑁂𑀝𑁆𑀞𑀸 𑀙𑀳𑀺𑀘𑀺𑀢𑁆𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀁 𑀯𑀸𑀬𑁄𑀥𑀸𑀢𑀼𑀁 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸𑀅𑀢𑁆𑀢𑀦𑀸𑀲𑀳𑀚𑀸𑀢𑀁 𑀭𑀽𑀧𑀓𑀸𑀬𑀁 𑀲𑀁𑀣𑀫𑁆𑀪𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀘𑀸𑀮𑁂𑀢𑀼𑀁 𑀅𑀪𑀺𑀓𑁆𑀓𑀫𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀓𑀸𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑁂𑀲𑀼 𑀚𑀯𑀦 𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀬𑀲𑁆𑀫𑀺𑀁𑀯𑀸𑀭𑁂 𑀘𑀮𑀦𑀲𑀗𑁆𑀔𑀸𑀢𑀁 𑀤𑁂𑀲𑀦𑁆𑀢𑀭𑀧𑀸𑀧𑀦𑀁 𑀚𑀸𑀬𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀓𑀢𑀺𑀧𑀬𑀚𑀯𑀦𑀯𑀸𑀭𑁂𑀳𑀺 𑀘𑀮𑀦𑀁 𑀚𑀸𑀬𑀢𑀺. 𑀬𑀤𑀺 𑀚𑀸𑀬𑁂𑀬𑁆𑀬, 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀬𑀸𑀕𑀫𑀦𑀁 𑀯𑀺𑀬 𑀲𑀩𑁆𑀩𑁂𑀲𑀁𑀧𑀺 𑀲𑀻𑀖𑀢𑀭𑀁 𑀕𑀫𑀦𑀁 𑀧𑀜𑁆𑀜𑀸𑀬𑁂𑀬𑁆𑀬. 𑀓𑀲𑁆𑀫𑀸, 𑀏𑀓𑀘𑁆𑀙𑀭𑀓𑁆𑀔𑀡𑁂𑀧𑀺 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀺𑀓𑁆𑀓𑀧𑀯𑀢𑁆𑀢𑀺𑀬𑀸 𑀲𑀫𑁆𑀪𑀯𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀭𑀺 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀯𑀺𑀘𑀸𑀭𑀡𑀸𑀬𑀁 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀲𑁆𑀫𑀸 𑀢𑀢𑁄 𑀧𑀼𑀭𑀺𑀫𑀯𑀸𑀭𑁂𑀲𑀼 𑀲𑀁𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀸𑀦𑀺𑀏𑀯 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀸 𑀘𑁂𑀢𑁆𑀣 𑀲𑀢𑁆𑀢𑀬𑀼𑀕𑀲𑀓𑀝𑁄𑀧𑀫𑀸 𑀯𑀼𑀢𑁆𑀢𑀸, 𑀲𑀸𑀧𑀺 𑀦𑀸𑀦𑀸𑀚𑀯𑀦𑀯𑀻𑀣𑀻𑀲𑀼 𑀲𑀫𑀼𑀝𑁆𑀞𑀺𑀢𑀸𑀦𑀁 𑀯𑀸𑀬𑁄𑀥𑀸𑀢𑀽𑀦𑀁 𑀅𑀧𑀭𑀸𑀧𑀭𑀁 𑀉𑀧𑀢𑁆𑀣𑀫𑁆𑀪𑀦𑁂𑀘 𑀬𑀼𑀚𑁆𑀚𑀢𑀺𑀬𑁂𑀯. 𑀢𑀣𑀸 𑀳𑀺 𑀘𑀮𑀦𑀘𑀺𑀢𑁆𑀢𑀚𑀭𑀽𑀧𑀲𑀦𑁆𑀢𑀢𑀺𑀬𑀁 𑀧𑀯𑀢𑁆𑀢𑀸𑀦𑀺 𑀉𑀢𑀼𑀚𑀭𑀽𑀧𑀲𑀗𑁆𑀖𑀸𑀝𑀸𑀦𑀺𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀸𑀦𑀺 𑀯𑀺𑀬 𑀢𑀤𑀸𑀓𑀸𑀭𑀯𑀦𑁆𑀢𑀸𑀦𑀺 𑀲𑀯𑁂𑀕𑀸𑀦𑀺 𑀲𑀯𑀺𑀧𑁆𑀨𑀸𑀭𑀸𑀦𑀺𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀧𑀼𑀩𑁆𑀩𑀸𑀧𑀭𑀧𑀯𑀢𑁆𑀢𑀸𑀦𑀁 𑀦𑀸𑀦𑀸 𑀚𑀯𑀦𑀯𑀻𑀣𑀻𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀪𑀯𑀗𑁆𑀕𑀲𑀫𑀬𑁂𑀲𑀼𑀧𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀓𑀁 𑀘𑀮𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯. 𑀏𑀓𑀸𑀩𑀤𑁆𑀥𑀧𑀯𑀢𑁆𑀢𑀸𑀦𑀺𑀘 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀺𑀦𑀸𑀫 𑀏𑀓𑀲𑁆𑀲 𑀯𑀺𑀲𑀬𑁂 𑀇𑀢𑀭𑀸𑀦𑀺 𑀏𑀓𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀺𑀬 𑀲𑀩𑁆𑀩𑀲𑁄 𑀢𑀤𑀦𑀼 𑀧𑀭𑀺𑀯𑀢𑁆𑀢𑀻𑀦𑀺 𑀳𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀚𑁂 𑀘𑀮𑀦𑁆𑀢𑁂 𑀇𑀢𑀭𑀸𑀦𑀺𑀧𑀺 𑀘𑀮𑀦𑁆𑀢𑀺 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀮𑀦𑀜𑁆𑀘𑁂𑀢𑁆𑀣 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀸𑀦𑀁 𑀭𑀽𑀧𑀓𑀮𑀸𑀧𑀲𑀗𑁆𑀖𑀸𑀝𑀸𑀦𑀁 𑀧𑀼𑀭𑀺𑀫 𑀧𑀼𑀭𑀺𑀫𑀸𑀦𑀁 𑀉𑀧𑁆𑀧𑀦𑁆𑀦𑀤𑁂𑀲𑀢𑁄 𑀤𑁂𑀲𑀦𑁆𑀢𑀭𑁂 𑀬𑀣𑀸𑀧𑀯𑀢𑁆𑀢𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑁂𑀦 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀉𑀧𑁆𑀧𑀦𑁆𑀦 𑀤𑁂𑀲𑁂 𑀅𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀓𑁂𑀲𑀕𑁆𑀕𑀫𑀢𑁆𑀢𑀁𑀧𑀺 𑀤𑁂𑀲𑀦𑁆𑀢𑀭 𑀲𑀗𑁆𑀓𑀫𑀦𑀁𑀦𑀸𑀫 𑀅𑀢𑁆𑀣𑀺. 𑀇𑀢𑀭𑀣𑀸 𑀔𑀡𑀺𑀓𑀥𑀫𑁆𑀫𑀢𑀸 𑀅𑀩𑁆𑀬𑀸𑀧𑀸𑀭𑀥𑀫𑁆𑀫𑀢𑀸 𑀅𑀯𑀲𑀯𑀢𑁆𑀢𑀺𑀢𑀸𑀘 𑀢𑁂𑀲𑀁 𑀦𑀲𑀺𑀬𑀸𑀢𑀺. 𑀬𑀁𑀓𑀺𑀜𑁆𑀘𑀺 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀡𑁆𑀞𑀝𑁆𑀞𑀸𑀦𑀸𑀤𑀺 𑀕𑀢𑀉𑀧𑀸𑀤𑀺𑀦𑁆𑀦𑀓 𑀧𑀣𑀯𑀻𑀥𑀸𑀢𑀽𑀲𑀼 𑀘𑀮𑀫𑀸𑀦𑀓𑀡𑁆𑀞𑀧𑀤𑁂𑀲𑀸𑀤𑀺𑀕𑀢𑀘𑀺𑀢𑁆𑀢𑀚 𑀧𑀣𑀯𑀻𑀥𑀸𑀢𑀽𑀦𑀁 𑀲𑀗𑁆𑀖𑀝𑁆𑀝𑀦𑀲𑀗𑁆𑀔𑀸𑀢𑁂𑀦 𑀞𑀸𑀦𑀓𑀭𑀡𑀲𑀦𑁆𑀦𑀺𑀧𑀸𑀢𑁂𑀦 𑀲𑀳𑁂𑀯𑀬𑁄 𑀯𑀘𑀻𑀖𑁄𑀲𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀚𑀲𑀤𑁆𑀤𑁄 𑀚𑀸𑀬𑀢𑀺. 𑀲𑁄 𑀬𑁂𑀦 𑀅𑀢𑁆𑀢𑀦𑀸 𑀲𑀳 𑀚𑀸𑀢𑁂𑀦 𑀆𑀓𑀸𑀭𑀯𑀺𑀓𑀸𑀭𑁂𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀢𑀁𑀢𑀁 𑀯𑀡𑁆𑀡𑀯𑀺𑀲𑁂𑀲𑀢𑁆𑀢𑀁 𑀉𑀧𑀕𑀘𑁆𑀙𑀢𑀺. 𑀬𑁂𑀦𑀘 𑀲𑀼𑀡𑀦𑁆𑀢𑀸𑀦𑀁 𑀢𑀁𑀢𑀁𑀅𑀢𑁆𑀣𑀚𑁄𑀢𑀓𑁄 𑀅𑀓𑁆𑀔𑀭𑀲𑀦𑁆𑀦𑀺𑀧𑀸𑀢𑀪𑀽𑀢𑁄 𑀧𑀤𑀩𑁆𑀬𑀜𑁆𑀚𑀦𑀯𑀺𑀲𑁂𑀲𑁄 𑀉𑀧𑀮𑀩𑁆𑀪𑀢𑀺. 𑀲𑁄 𑀘𑁄𑀧𑀦𑀯𑀸𑀘𑀸𑀲𑀗𑁆𑀔𑀸𑀢𑁄 𑀆𑀓𑀸𑀭𑀯𑀺𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀦𑀸𑀫. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀲𑁆𑀲𑀸 𑀧𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀏𑀓𑁄 𑀆𑀓𑀸𑀭𑀯𑀺𑀓𑀸𑀭𑁄 𑀯𑀘𑀻 𑀯𑀺𑀜𑁆𑀜𑀢𑁆𑀢𑀺𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀸𑀤𑀺𑀦𑁆𑀦𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄𑀢𑀺 𑀓𑀫𑁆𑀫𑀚𑀪𑀽𑀢𑀸𑀬 𑀘𑀢𑀼𑀚𑀪𑀽𑀢𑀸𑀬𑀏𑀯𑀯𑀸 𑀉𑀧𑀸𑀤𑀺𑀦𑁆𑀦𑀧𑀣𑀯𑀻𑀥𑀸𑀢𑀼𑀬𑀸 𑀲𑀳𑀖𑀝𑁆𑀝𑀦𑀁 𑀧𑀝𑀺𑀘𑁆𑀘 𑀲𑀤𑁆𑀤𑀯𑀺𑀲𑁂𑀲𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑁄 𑀧𑀦 𑀘𑀮𑀫𑀸𑀦𑀓𑀡𑁆𑀞𑀧𑀤𑁂𑀲𑀸𑀤𑀺𑀯𑀺𑀓𑀸𑀭𑀪𑀽𑀢𑁄 𑀓𑀸𑀬𑀗𑁆𑀕𑀯𑀺𑀲𑁂𑀲𑁄𑀏𑀯 𑀲𑀺𑀬𑀸. 𑀯𑀺𑀓𑀸𑀭𑀤𑁆𑀯𑀬𑀜𑁆𑀘 𑀅𑀲𑀁𑀫𑀺𑀲𑁆𑀲𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀏𑀢𑁆𑀣𑀘 𑀉𑀧𑀸𑀤𑀺𑀦𑁆𑀦𑀓𑀧𑀣𑀯𑀻𑀳𑀺 𑀲𑀳 𑀖𑀝𑁆𑀝𑀦𑀁 𑀘𑀺𑀢𑁆𑀢𑀚𑀧𑀣𑀯𑀻𑀦𑀁 𑀓𑀺𑀘𑁆𑀘𑀁. 𑀬𑀁 𑀧𑀦 𑀢𑀸𑀲𑀁 𑀬𑀣𑀸𑀯𑀸 𑀢𑀣𑀸𑀯𑀸 𑀅𑀖𑀝𑁆𑀝𑁂𑀢𑁆𑀯𑀸 𑀬𑀣𑀸 𑀇𑀘𑁆𑀙𑀺𑀢𑀓𑁆𑀔𑀭𑀁 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀖𑀝𑁆𑀝𑀦𑀧𑀓𑀸𑀭𑀯𑀺𑀥𑀸𑀦𑀁. 𑀇𑀤𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀺𑀘𑁆𑀘𑀁. 𑀖𑀝𑁆𑀝𑀦𑁂𑀦 𑀲𑀳𑁂𑀯 𑀉𑀧𑁆𑀧𑀦𑁆𑀦𑀲𑀤𑁆𑀤𑀸𑀦𑀁 𑀢𑀁𑀢𑀁𑀯𑀡𑁆𑀡𑀢𑁆𑀢 𑀧𑀢𑁆𑀢𑀺𑀬𑀸 𑀯𑀺𑀤𑀳𑀦𑀫𑁂𑀯 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀺𑀘𑁆𑀘𑀁. 𑀓𑀼𑀫𑁆𑀪𑀣𑀼𑀦𑀢𑀮𑀁 𑀯𑀺𑀬𑀘 𑀉𑀧𑀸𑀤𑀺𑀦𑁆𑀦𑀓𑀧𑀣𑀯𑀻. 𑀧𑀳𑀭𑀡𑀳𑀢𑁆𑀣𑁄 𑀯𑀺𑀬 𑀘𑀺𑀢𑁆𑀢𑀚𑀧𑀣𑀯𑀻. 𑀳𑀢𑁆𑀣𑀧𑀭𑀺 𑀯𑀢𑁆𑀢𑀦 𑀯𑀺𑀓𑀸𑀭𑁄 𑀯𑀺𑀬 𑀓𑀸𑀬𑀯𑀺𑀜𑁆𑀜𑀢𑁆𑀢𑀺. 𑀲𑀤𑁆𑀤𑀯𑀺𑀓𑀸𑀭𑁄 𑀯𑀺𑀬 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀓𑀼𑀫𑁆𑀪𑀣𑀼𑀦𑀲𑁆𑀲 𑀦𑀸𑀦𑀸𑀲𑀤𑁆𑀤𑀧𑀪𑁂𑀤𑁄𑀯𑀺𑀬 𑀦𑀸𑀦𑀸𑀯𑀡𑁆𑀡𑀪𑁂𑀤𑁄𑀢𑀺. 𑀏𑀢𑁆𑀣𑀘 𑀬𑀤𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑀇𑀤𑀁 𑀯𑀓𑁆𑀔𑀸𑀫𑀺 𑀏𑀢𑀁 𑀯𑀓𑁆𑀔𑀸𑀫𑀻𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀘𑀺𑀢𑁆𑀢𑀁 𑀅𑀝𑁆𑀞𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁂 𑀘𑀺𑀢𑁆𑀢 𑀲𑀫𑀼𑀝𑁆𑀞𑀸𑀦𑀸 𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑀬𑀫𑀸𑀦𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀥𑀸𑀢𑀼𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀻𑀢𑀺𑀘 𑀧𑀼𑀭𑀺𑀫𑀘𑀺𑀢𑁆𑀢𑀲𑀫𑀼𑀝𑁆𑀞𑀸 𑀦𑀸𑀬 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀁𑀧𑀺 𑀦𑀢𑁆𑀣𑀻𑀢𑀺𑀘 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀦𑁂𑀓𑀲𑀢𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼 𑀬𑀲𑁆𑀫𑀺𑀁𑀯𑀸𑀭𑁂 𑀧𑀭𑀺𑀩𑁆𑀬𑀢𑁆𑀢𑀁 𑀅𑀓𑁆𑀔𑀭𑀁 𑀧𑀯𑀢𑁆𑀢𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀫𑀽𑀮 𑀝𑀻𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀁 𑀦𑀢𑁆𑀣𑀺 𑀮𑀤𑁆𑀥𑀸𑀲𑁂𑀯𑀦𑁂𑀦 𑀘𑀺𑀢𑁆𑀢𑁂𑀦𑁂𑀯 𑀖𑀝𑁆𑀝𑀦𑀲𑁆𑀲 𑀩𑀮𑀯𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀮𑀤𑁆𑀥𑀸𑀲𑁂𑀯𑀦𑁂𑀦𑀸𑀢𑀺 𑀏𑀢𑁂𑀦 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀚𑀯𑀦𑀯𑀻𑀣𑀻𑀳𑀺 𑀮𑀤𑁆𑀥𑀸𑀲𑁂𑀯𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀣𑀫 𑀚𑀯𑀦𑀘𑀺𑀢𑁆𑀢𑀲𑁆𑀲𑀧𑀺 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦𑀘 𑀏𑀓𑀚𑀯𑀦 𑀯𑀸𑀭𑀫𑀢𑁆𑀢𑁂𑀦 𑀧𑀭𑀺𑀩𑁆𑀬𑀢𑁆𑀢𑀁 𑀏𑀓𑀓𑁆𑀔𑀭𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀓𑀲𑁆𑀫𑀸, 𑀢𑀲𑁆𑀲 𑀏𑀓𑀤𑁆𑀯𑀺𑀅𑀘𑁆𑀙𑀭𑀓𑁆𑀔𑀡𑀫𑀢𑁆𑀢𑁂𑀦 𑀓𑀸𑀮𑁂𑀦 𑀯𑀢𑁆𑀢𑀩𑁆𑀩𑀢𑁆𑀢𑀸 𑀏𑀓𑀘𑁆𑀙𑀭𑀓𑁆𑀔𑀡𑁂𑀘 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀚𑀯𑀦𑀯𑀻𑀣𑀻𑀦𑀁 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀯𑀼𑀢𑁆𑀢𑀜𑁆𑀘 𑁋

𑀏𑀓𑀫𑀢𑁆𑀢𑀸 𑀢𑀬𑁄 𑀭𑀲𑁆𑀲𑀸, 𑀤𑁆𑀯𑀺𑀫𑀢𑁆𑀢𑀸 𑀤𑀻𑀖𑀫𑀼𑀘𑁆𑀘𑀭𑁂;

𑀢𑀺𑀫𑀢𑁆𑀢𑁄 𑀢𑀼 𑀕𑀻𑀢𑁄 𑀜𑁂𑀬𑁆𑀬𑁄, 𑀩𑁆𑀬𑀜𑁆𑀚𑀦𑀸 𑀅𑀟𑁆𑀠𑀫𑀢𑁆𑀢𑀺𑀓𑀸𑀢𑀺.

𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀘 𑀲𑀸𑀥𑀺𑀓𑁂 𑀯𑀻𑀳𑀺𑀯𑀸𑀳𑀲𑀢𑁂 𑀯𑀻𑀳𑀺𑀩𑀻𑀚𑀸𑀦𑀺 𑀏𑀓𑀘𑁆𑀙𑀭𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀓𑀮𑀁𑀧𑀺 𑀦𑀉𑀧𑁂𑀦𑁆𑀢𑀺. 𑀓𑀮𑀪𑀸𑀕𑀁𑀧𑀺 𑀦𑀉𑀧𑁂𑀦𑁆𑀢𑀻𑀢𑀺 𑀤𑀻𑀧𑀺𑀢𑀁. 𑀏𑀓𑀓𑁆𑀔𑀭𑀁 𑀉𑀘𑁆𑀘𑀸𑀭𑁂𑀦𑁆𑀢𑀲𑁆𑀲𑀘 𑀢𑀢𑁆𑀢𑀓𑀁𑀧𑀺 𑀓𑀸𑀮𑀁 𑀉𑀘𑁆𑀘𑀸𑀭𑀡𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑁄 𑀲𑀦𑁆𑀤𑀺𑀲𑁆𑀲𑀢𑀺𑀬𑁂𑀯. 𑀦𑀘 𑀧𑀭𑀫𑀢𑁆𑀣𑀢𑁄 𑀏𑀓𑀫𑁂𑀯 𑀲𑀤𑁆𑀤𑀁 𑀉𑀘𑁆𑀘𑀸𑀭𑁂𑀫𑀻𑀢𑀺𑀯𑀸 𑀲𑀼𑀡𑁄𑀫𑀻𑀢𑀺𑀯𑀸 𑀲𑀓𑁆𑀓𑀸 𑀦𑀺𑀬𑀫𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀼𑀁 𑀲𑁄𑀢𑀼𑀜𑁆𑀘. 𑀢𑀣𑀸 𑀦𑀺𑀬𑀫𑁂𑀦𑁆𑀢𑀲𑁆𑀲𑀧𑀺 𑀲𑀤𑁆𑀤𑀸𑀦𑀁 𑀧𑀼𑀩𑁆𑀩𑀸𑀧𑀭𑀢𑁄 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑁆𑀲𑁂𑀯 𑀉𑀘𑁆𑀘𑀸𑀭𑀡 𑀲𑀯𑀦 𑀲𑀫𑁆𑀪𑀯𑀢𑁄. 𑀏𑀓𑀫𑁂𑀯𑀸𑀢𑀺 𑀅𑀪𑀺𑀫𑀸𑀦𑁄 𑀧𑀦 𑀲𑀫𑀽𑀳𑀖𑀦 𑀲𑀦𑁆𑀢𑀢𑀺𑀖𑀦𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸𑀏𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦 𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀏𑀢𑁆𑀣𑀘 𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑁄 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀻𑀢𑀺𑀆𑀤𑀺𑀲𑀼 𑀩𑁄𑀥𑀦𑀢𑁆𑀣𑁄. 𑀲𑀼𑀤𑀺𑀦𑁆𑀦 𑀓𑀡𑁆𑀟𑁂 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺𑀆𑀤𑀻𑀲𑀼 𑀧𑀯𑀢𑁆𑀢𑀦𑀢𑁆𑀣𑁄. 𑀇𑀥 𑀧𑀦 𑀤𑀼𑀯𑀺𑀥𑁄𑀧𑀺 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸𑀭𑀳𑀺 𑀢𑁂𑀲𑀼 𑀲𑀩𑁆𑀩𑁂𑀲𑀼 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑁄𑀧𑀦𑁂𑀲𑀼𑀧𑀺 𑀧𑀯𑀢𑁆𑀢𑀓𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀩𑁆𑀪𑀫𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸 𑀳𑁄𑀢𑀻𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀧𑀭𑀁 𑀩𑁄𑀥𑁂𑀢𑀼𑀓𑀸𑀫𑀢𑀸𑀬 𑀯𑀺𑀦𑀸𑀧𑀺 𑀅𑀪𑀺𑀓𑁆𑀓𑀫𑀦𑀸𑀤𑀺𑀧𑀯𑀢𑁆𑀢𑀦𑁂𑀦 𑀲𑁄 𑀘𑀺𑀢𑁆𑀢 𑀲𑀳𑀪𑀽𑀯𑀺𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀲𑀬𑀜𑁆𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑁆𑀯𑀺𑀥𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀤𑁆𑀯𑀻𑀲𑀼 𑀩𑁄𑀥𑀦𑀯𑀺𑀜𑁆𑀜𑀢𑁆𑀢𑀻𑀲𑀼 𑀧𑀼𑀭𑀺𑀫𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀘𑀮𑀫𑀸𑀦𑀯𑀡𑁆𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀘𑀮𑀫𑀸𑀦𑀗𑁆𑀕𑀧𑀘𑁆𑀘𑀗𑁆𑀕𑀁 𑀓𑀸𑀬𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀲𑀼𑀤𑁆𑀥𑁂𑀦 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦𑀏𑀯 𑀯𑀺𑀜𑁆𑀜𑀸𑀬𑀢𑀺 𑀧𑀘𑁆𑀙𑀺𑀫𑀸𑀘 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀉𑀘𑁆𑀘𑀸𑀭𑀺𑀬𑀫𑀸𑀦𑀁 𑀲𑀤𑁆𑀤𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀲𑀼𑀤𑁆𑀥𑁂𑀦 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑁂𑀦𑀏𑀯 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦. 𑀲𑀸 𑀳𑀺 𑀅𑀢𑁆𑀢𑀸𑀦𑀁 𑀚𑀸𑀦𑀦𑁆𑀢𑁂𑀏𑀯 𑀧𑀭𑀲𑀢𑁆𑀢𑁂 𑀅𑀢𑁆𑀢𑀦𑀸 𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀚𑀸𑀦𑀦𑁆𑀢𑁂. 𑀜𑀸𑀧𑀓 𑀳𑁂𑀢𑀼 𑀳𑀺 𑀦𑀸𑀫 𑀅𑀢𑁆𑀢𑀸𑀦𑀁 𑀚𑀸𑀦𑀦𑁆𑀢𑁂𑀏𑀯 𑀜𑀸𑀧𑁂𑀢𑀩𑁆𑀩𑀁 𑀜𑀸𑀧𑁂𑀢𑀺, 𑀦𑁄 𑀅𑀚𑀸𑀦𑀦𑁆𑀢𑁂. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀸𑀬𑀗𑁆𑀕 𑀘𑁄𑀧𑀦𑀁 𑀤𑀺𑀲𑁆𑀯𑀸𑀯𑀸 𑀧𑀭𑀸𑀫𑀲𑀺𑀢𑁆𑀯𑀸𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯𑀸 𑀧𑀭𑀲𑁆𑀲 𑀢𑀁𑀢𑀁𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦 𑀕𑀢𑀸𑀦𑀁𑀧𑀺 𑀧𑀣𑀥𑀁 𑀯𑀺𑀜𑁆𑀜𑀢𑁆𑀢𑀺𑀚𑀸𑀦𑀦𑀁 𑀲𑀺𑀤𑁆𑀥𑀁 𑀪𑀯𑀢𑀺. 𑀢𑀁𑀚𑀸𑀦𑀦𑁂𑀦 𑀯𑀺𑀦𑀸 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀯𑀺𑀜𑁆𑀜𑀢𑁆𑀢𑀺𑀁 𑀚𑀸𑀦𑀦𑁆𑀢𑀸𑀦𑀁𑀘 𑀧𑀼𑀭𑀺𑀫𑀲𑀺𑀤𑁆𑀥𑀲𑀗𑁆𑀓𑁂𑀢 𑀲𑀫𑁆𑀩𑀦𑁆𑀥 𑀚𑀸𑀦𑀦𑁂𑀦 𑀯𑀺𑀦𑀸 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀫𑀚𑁆𑀛𑁂 𑀯𑀺𑀲𑀼𑀁 𑀧𑀼𑀩𑁆𑀩𑀲𑀗𑁆𑀓𑁂𑀢 𑀲𑀫𑁆𑀩𑀦𑁆𑀥𑀕𑀳𑀦𑀁𑀧𑀺 𑀇𑀘𑁆𑀙𑀦𑁆𑀢𑀺, 𑀤𑁆𑀯𑀻𑀲𑀼 𑀧𑀦 𑀧𑀯𑀢𑁆𑀢𑀓𑀯𑀺𑀜𑁆𑀜𑀢𑁆𑀢𑀻𑀲𑀼 𑀧𑀭𑀁 𑀅𑀪𑀺𑀓𑁆𑀓𑀫𑀦𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀤𑀺𑀲𑁆𑀯𑀸 𑀅𑀪𑀺𑀓𑁆𑀓𑀫𑀦𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀅𑀪𑀺𑀓𑁆𑀓𑀫𑀦𑀘𑀺𑀢𑁆𑀢𑀜𑁆𑀘 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀚𑀸𑀦𑀦𑁆𑀢𑀺. 𑀏𑀲𑀦𑀬𑁄 𑀧𑀝𑀺𑀓𑁆𑀓𑀫𑀦𑀸𑀤𑀻𑀲𑀼. 𑀢𑀣𑀸 𑀧𑀭𑀲𑁆𑀲 𑀓𑀣𑀁 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀼𑀢𑁆𑀯𑀸 𑀓𑀣𑀦𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀓𑀣𑀦𑀘𑀺𑀢𑁆𑀢𑀜𑁆𑀘 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀚𑀸𑀦𑀦𑁆𑀢𑀺. 𑀧𑀭𑀁 𑀭𑀢𑁆𑀢𑀘𑀺𑀢𑁆𑀢𑁂𑀦 𑀓𑀸𑀬𑀗𑁆𑀕𑀁 𑀘𑀸𑀮𑁂𑀦𑁆𑀢𑀁 𑀤𑀺𑀲𑁆𑀯𑀸 𑀘𑀮𑀦𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀭𑀸𑀕𑀘𑀺𑀢𑁆𑀢𑀜𑁆𑀘 𑀚𑀸𑀦𑀦𑁆𑀢𑀺. 𑀭𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀓𑀣𑀦 𑀯𑀺𑀜𑁆𑀜𑀢𑁆𑀢𑀺𑀜𑁆𑀘 𑀭𑀸𑀕𑀘𑀺𑀢𑁆𑀢𑀜𑁆𑀘 𑀚𑀸𑀦𑀦𑁆𑀢𑀺. 𑀏𑀲𑀦𑀬𑁄 𑀲𑀩𑁆𑀩𑀸𑀲𑀼 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑁆𑀭𑀺𑀬𑀸𑀲𑀽𑀢𑀺. 𑀮𑀳𑀼𑀦𑁄 𑀪𑀸𑀯𑁄 𑀮𑀳𑀼𑀢𑀸. 𑀫𑀼𑀤𑀼𑀦𑁄 𑀪𑀸𑀯𑁄 𑀫𑀼𑀤𑀼𑀢𑀸. 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁. 𑀓𑀫𑁆𑀫𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀜𑁆𑀜𑀲𑁆𑀲 𑀪𑀸𑀯𑁄 𑀓𑀫𑁆𑀫𑀜𑁆𑀜𑀢𑀸.

𑀅𑀤𑀦𑁆𑀥𑀢𑀸𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀮𑀳𑀼𑀢𑀸. 𑀅𑀣𑀤𑁆𑀥𑀢𑀸 𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸. 𑀲𑀭𑀻𑀭𑀓𑁆𑀭𑀺𑀬𑀸𑀦𑀼𑀓𑀽𑀮𑀓𑀫𑁆𑀫𑀜𑁆𑀜𑀪𑀸𑀯𑀮𑀓𑁆𑀔𑀡𑀸 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸. 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀚𑀳𑀦𑁆𑀢𑀺𑀬𑁄𑀧𑀺 𑀏𑀢𑀸 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀲𑀧𑁆𑀧𑀸𑀬 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀅𑀲𑀁𑀫𑀺𑀲𑁆𑀲𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀅𑀢𑁆𑀢𑀦𑁄 𑀓𑀸𑀬𑀯𑀺𑀭𑀼𑀤𑁆𑀥𑀁 𑀉𑀢𑀼𑀁𑀯𑀸 𑀆𑀳𑀸𑀭𑀁𑀯𑀸 𑀘𑀺𑀢𑁆𑀢𑀓𑁆𑀭𑀺𑀬𑀁𑀯𑀸 𑀲𑁂𑀯𑀦𑁆𑀢𑀸𑀦𑀁 𑀲𑀭𑀻𑀭𑀕𑀢𑀸 𑀥𑀸𑀢𑀼𑀬𑁄 𑀓𑀤𑀸𑀘𑀺 𑀲𑀓𑀮𑀲𑀭𑀻𑀭𑀁𑀯𑀸 𑀲𑀭𑀻𑀭𑁂𑀓𑀤𑁂𑀲𑀁𑀯𑀸 𑀔𑁄𑀪𑁂𑀢𑁆𑀯𑀸 𑀯𑀺𑀲𑁂𑀲𑀢𑁄 𑀧𑀽𑀢𑀺𑀫𑀼𑀔 𑀲𑀧𑁆𑀧𑀲𑀗𑁆𑀔𑀸𑀢𑀆𑀧𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀢𑁆𑀯𑀸 𑀓𑀸𑀬𑀁 𑀅𑀲𑀬𑁆𑀳𑀪𑀸𑀭𑀁 𑀯𑀺𑀬 𑀕𑀭𑀼𑀁 𑀪𑀸𑀭𑀺𑀬𑀁 𑀓𑀭𑁄𑀦𑁆𑀢𑀺. 𑀇𑀭𑀺𑀬𑀸 𑀧𑀣𑀧𑀭𑀺𑀯𑀢𑁆𑀢𑀦𑁂 𑀓𑀸𑀬𑀪𑀸𑀭𑀺𑀬𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀤𑀸𑀭𑀽𑀧𑀲𑁆𑀲 𑀮𑀳𑀼𑀢𑀸 𑀦𑀧𑀯𑀢𑁆𑀢𑀢𑀺. 𑀧𑀼𑀦 𑀅𑀢𑁆𑀢𑀦𑁄 𑀲𑀭𑀻𑀭𑀲𑀧𑁆𑀧𑀸𑀬𑀁 𑀉𑀢𑀼𑀁𑀯𑀸 𑀆𑀳𑀸𑀭𑀁𑀯𑀸 𑀘𑀺𑀢𑁆𑀢𑀓𑀺𑀭𑀺𑀬𑀁𑀯𑀸 𑀲𑁂𑀯𑀦𑁆𑀢𑀸𑀦𑀁 𑀲𑁄 𑀥𑀸𑀢𑀼𑀓𑁆𑀔𑁄𑀪𑁄 𑀯𑀽𑀧𑀲𑀫𑁆𑀫𑀢𑀺. 𑀓𑀸𑀬𑁄 𑀲𑀮𑁆𑀮𑀳𑀼𑀓𑁄 𑀳𑁄𑀢𑀺. 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀓𑀸𑀬 𑀪𑀸𑀭𑀺𑀬𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁𑀦𑀸𑀫 𑀦𑀢𑁆𑀣𑀺. 𑀢𑀤𑀸 𑀲𑀸 𑀧𑀯𑀢𑁆𑀢𑀢𑀺. 𑀏𑀲𑀦𑀬𑁄 𑀲𑁂𑀲𑀸𑀲𑀼𑀧𑀺. 𑀯𑀺𑀲𑁂𑀲𑀦𑀢𑁄 𑀧𑀦𑁂𑀢𑁆𑀣 𑀫𑀼𑀤𑀼𑀪𑀸𑀬𑀁 𑀓𑀝𑁆𑀞𑀫𑀼𑀔𑀲𑀧𑁆𑀧𑀲𑀗𑁆𑀔𑀸𑀢 𑀧𑀣𑀯𑀻𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀼𑀓𑁆𑀔𑀓𑀝𑁆𑀞𑀁𑀯𑀺𑀬 𑀓𑀸𑀬𑀁 𑀣𑀤𑁆𑀥𑀁 𑀓𑀓𑁆𑀔𑀴𑀁𑀓𑀭𑁄𑀦𑁆𑀢𑀺. 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀅𑀗𑁆𑀕𑀫𑀗𑁆𑀕𑀸𑀦𑀁𑀙𑀺𑀚𑁆𑀚𑀦𑀪𑀺𑀚𑁆𑀚𑀦𑀸𑀓𑀸𑀭𑀧𑀢𑁆𑀢𑀁 𑀣𑀤𑁆𑀥𑀁 𑀓𑀓𑁆𑀔𑀴𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀫𑁆𑀫𑀜𑁆𑀜𑀢𑀸𑀬𑀁 𑀲𑀢𑁆𑀣𑀫𑀼𑀔𑀲𑀧𑁆𑀧𑀲𑀗𑁆𑀔𑀸𑀢 𑀯𑀸𑀬𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑀸𑀬𑁄𑀯𑀺𑀲𑀫𑀁 𑀓𑀢𑁆𑀯𑀸 𑀤𑀸𑀫𑀭𑀺𑀓𑀘𑁄𑀭𑀧𑀭𑀺𑀬𑀼𑀝𑁆𑀞𑀺𑀢𑀁 𑀧𑀘𑁆𑀘𑀦𑁆𑀢𑀭𑀝𑁆𑀞𑀁 𑀯𑀺𑀬 𑀓𑀸𑀬𑀁 𑀯𑀺𑀯𑀝𑁆𑀝𑀫𑀸𑀦𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀁𑀦𑀸𑀫 𑀦𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀚𑁄𑀥𑀸𑀢𑀼 𑀧𑀦 𑀢𑀸𑀲𑀁 𑀲𑀩𑁆𑀩𑀸𑀲𑀁𑀧𑀺 𑀫𑀽𑀮𑀪𑀽𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀸 𑀧𑀦 𑀅𑀭𑁄𑀕𑀺𑀦𑁄 𑀓𑀮𑁆𑀮𑀪𑀸𑀯𑁄𑀯𑀺𑀬 𑀲𑀼𑀧𑀭𑀺𑀫𑀤𑁆𑀤𑀺𑀢𑀘𑀫𑁆𑀫𑀲𑁆𑀲 𑀫𑀼𑀤𑀼𑀪𑀸𑀯𑁄𑀯𑀺𑀬 𑀲𑀼𑀤𑀦𑁆𑀥𑀲𑀼𑀯𑀡𑁆𑀡𑀲𑁆𑀲 𑀓𑀫𑁆𑀫𑀓𑁆𑀔𑀫𑀪𑀸𑀯𑁄𑀯𑀺𑀬 𑀭𑀽𑀧𑀓𑀸𑀬𑀲𑁆𑀲 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑁂 𑀲𑀮𑁆𑀮𑀳𑀼𑀓𑀢𑀸𑀤𑀺𑀯𑀲𑁂𑀦 𑀲𑀦𑁆𑀤𑀺𑀲𑁆𑀲𑀫𑀸𑀦𑀸 𑀯𑀺𑀲𑁂𑀲𑀸𑀓𑀸𑀭𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀺𑀓𑀸𑀭𑀭𑀽𑀧𑀁 𑀦𑀸𑀫. 𑀘𑀬𑀦𑀁 𑀘𑀬𑁄. 𑀧𑀺𑀡𑁆𑀟𑀯𑀲𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀺𑀢𑁄 𑀉𑀧𑀭𑀺𑀢𑁄𑀘 𑀘𑀬𑁄 𑀉𑀧𑀘𑀬𑁄. 𑀧𑀣𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀉𑀧𑀭𑀼𑀧𑀭𑀺𑀯𑀟𑁆𑀠𑀺𑀘𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀉𑀧𑀲𑀤𑁆𑀤𑁄 𑀉𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀣𑀫𑀢𑁆𑀣𑁄 𑀉𑀧𑀲𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀘 𑀉𑀧𑀭𑀺 𑀅𑀢𑁆𑀣𑁄𑀢𑀺. 𑀯𑀼𑀢𑁆𑀢𑀜𑁆𑀘 𑀫𑀽𑀮𑀝𑀻𑀓𑀸𑀬𑀁 𑀉𑀧𑀲𑀤𑁆𑀤𑁄 𑀧𑀣𑀫𑀢𑁆𑀣𑁄 𑀉𑀧𑀭𑀺𑀅𑀢𑁆𑀣𑁄𑀘 𑀳𑁄𑀢𑀻𑀢𑀺. 𑀢𑁂𑀦𑁂𑀯𑀳𑀺 𑀧𑀸𑀴𑀺𑀬𑀁 𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄, 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄. 𑀬𑁄𑀭𑀽𑀧𑀲𑁆𑀲 𑀉𑀧𑀘𑀬𑁄, 𑀲𑀸 𑀭𑀽𑀧𑀲𑁆𑀲 𑀲𑀦𑁆𑀢𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀦𑀦𑀁 𑀯𑀺𑀢𑁆𑀣𑀸𑀭𑀡𑀁 𑀢𑀢𑀺. 𑀲𑀫𑁆𑀩𑀦𑁆𑀥𑀸 𑀢𑀢𑀺 𑀧𑀼𑀦𑀧𑁆𑀧𑀼𑀦𑀁𑀯𑀸 𑀢𑀢𑀺 𑀲𑀦𑁆𑀢𑀢𑀺. 𑀬𑀣𑀸 𑀧𑀯𑀢𑁆𑀢𑀸𑀦𑀁 𑀆𑀬𑀢𑀦𑀸𑀦𑀁 𑀅𑀤𑁆𑀥𑀸𑀦𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀧𑀣𑀫𑀸𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁂𑀦 𑀉𑀧𑀘𑀬𑁄𑀦𑀸𑀫. 𑀢𑀢𑁄 𑀧𑀭𑀁 𑀬𑀸𑀯 𑀲𑀩𑁆𑀩𑀧𑀣𑀫𑀁 𑀉𑀧𑁆𑀧𑀦𑁆𑀦𑀸𑀦𑀁 𑀘𑀓𑁆𑀔𑀼 𑀲𑁄𑀢 𑀖𑀸𑀦𑀚𑀺𑀯𑁆𑀳𑀸𑀦𑀁 𑀉𑀧𑁆𑀧𑀸𑀤𑁄, 𑀏𑀢𑁆𑀣𑀦𑁆𑀢𑀭𑁂 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀉𑀧𑀭𑀺 𑀯𑀟𑁆𑀠𑀺𑀅𑀢𑁆𑀣𑁂𑀦 𑀉𑀧𑀘𑀬𑁄𑀦𑀸𑀫. 𑀢𑀢𑁄 𑀧𑀭𑀁 𑀬𑀸𑀯𑀚𑀻𑀯𑀁 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀲𑀦𑁆𑀢𑀢𑀺𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑀦𑀤𑀻𑀢𑀻𑀭𑁂 𑀦𑀺𑀔𑀸𑀢𑀓𑀽𑀧𑀲𑁆𑀫𑀺𑀁 𑀉𑀤𑀓𑀼𑀕𑁆𑀕𑀫𑀦𑀓𑀸𑀮𑁄𑀯𑀺𑀬 𑀆𑀘𑀬𑁄 𑀦𑀺𑀩𑁆𑀩𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑀓𑀸𑀮𑁄𑀯𑀺𑀬 𑀉𑀧𑀘𑀬𑁄 𑀯𑀟𑁆𑀠𑀺. 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀫𑀦𑀓𑀸𑀮𑁄 𑀯𑀺𑀬 𑀲𑀦𑁆𑀢𑀢𑀺 𑀧𑀯𑀢𑁆𑀢𑀻𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯𑀘𑀓𑁆𑀔𑀸𑀤𑀺 𑀤𑀲𑀓𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀭𑀽𑀧𑀼𑀧𑁆𑀧𑀸𑀤𑁄 𑀉𑀧𑀘𑀬𑁄𑀦𑀸𑀫. 𑀢𑀢𑁄 𑀧𑀭𑀁 𑀲𑀦𑁆𑀢𑀢𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺𑀬𑁂𑀯.

𑀲𑀁𑀲𑁂𑀤𑀚𑁄𑀧𑀯𑀸𑀢𑀺𑀓𑀸𑀦𑀁 𑀧𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀧𑀣𑀫𑀸 𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑁂𑀦 𑀧𑀭𑀺𑀧𑀼𑀡𑁆𑀡 𑀯𑀟𑁆𑀠𑀺 𑀅𑀢𑁆𑀣𑁂𑀦𑀘 𑀉𑀧𑀘𑀬𑁄 𑀦𑀸𑀫, 𑀢𑀢𑁄 𑀧𑀭𑀁 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀲𑀦𑁆𑀢𑀢𑀺𑀦𑀸𑀫. 𑀅𑀧𑀺𑀘, 𑀢𑀺𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀸𑀦𑀁𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀲𑀘 𑀏𑀓𑁂𑀓𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀯𑀟𑁆𑀠𑀺 𑀧𑀯𑀢𑁆𑀢𑀺 𑀯𑀲𑁂𑀦 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄𑀅𑀯𑀢𑁆𑀣𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀏𑀓𑁂𑀓𑀲𑀦𑁆𑀢𑀢𑀺𑀬𑀁 𑀆𑀤𑀺𑀫𑁆𑀳𑀺 𑀲𑀦𑁆𑀢𑀢𑀺𑀲𑀻𑀲𑀭𑀽𑀧𑀸𑀦𑀁 𑀲𑀩𑁆𑀩𑀧𑀣𑀫𑀁 𑀉𑀧𑁆𑀧𑀸𑀤𑁄 𑀦𑀺𑀩𑁆𑀩𑀢𑁆𑀢𑀺𑀦𑀸𑀫. 𑀢𑀢𑁄 𑀯𑀟𑁆𑀠𑀦𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑁄 𑀯𑀟𑁆𑀠𑀻𑀦𑀸𑀫. 𑀯𑀟𑁆𑀠𑀦𑁂 𑀲𑀫𑀢𑁆𑀢𑁂 𑀅𑀯𑀟𑁆𑀠𑀺𑀢𑁆𑀯𑀸 𑀧𑀩𑀦𑁆𑀥𑀝𑁆𑀞𑀺𑀢𑀺𑀯𑀲𑁂𑀦 𑀯𑀢𑁆𑀢𑀦𑀯𑀲𑁂𑀦𑀉𑀧𑁆𑀧𑀸𑀤𑁄𑀧𑀯𑀢𑁆𑀢𑀺𑀦𑀸𑀫. 𑀢𑀢𑁆𑀣 𑀘 𑀦𑀺𑀩𑁆𑀩𑀢𑁆𑀢𑀺𑀯𑀟𑁆𑀠𑀺𑀬𑁄 𑀉𑀧𑀘𑀬𑁄𑀦𑀸𑀫. 𑀧𑀯𑀢𑁆𑀢𑀺𑀲𑀦𑁆𑀢𑀢𑀺 𑀦𑀸𑀫. 𑀲𑀗𑁆𑀔𑁂𑀧𑀢𑁄 𑀧𑀦 𑀮𑁄𑀓𑁂 𑀲𑀩𑁆𑀩𑀸𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀧𑀯𑀢𑁆𑀢𑀻𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑁂 𑀚𑀸𑀬𑀦 𑀯𑀟𑁆𑀠𑀦 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁂 𑀅𑀯𑀢𑁆𑀣𑀸𑀪𑁂𑀤𑁂 𑀤𑀺𑀲𑁆𑀯𑀸 𑀉𑀧𑀘𑀬𑀲𑀦𑁆𑀢 𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀬𑀁 𑀦𑀬𑁄-𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀺𑀯𑀸 𑀲𑀸𑀔𑀸 𑀧𑀢𑁆𑀢𑀧𑀼𑀧𑁆𑀨𑀨𑀮𑀸𑀤𑀻𑀦𑀺𑀯𑀸 𑀆𑀤𑀺𑀫𑁆𑀳𑀺 𑀚𑀸𑀬𑀦𑁆𑀢𑀺. 𑀚𑀸𑀬𑀺𑀢𑁆𑀯𑀸 𑀯𑀟𑁆𑀠𑀦𑁆𑀢𑀺. 𑀯𑀟𑁆𑀠𑀦𑁂 𑀲𑀫𑀢𑁆𑀢𑁂 𑀅𑀯𑀟𑁆𑀠𑀺𑀢𑁆𑀯𑀸 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀻𑀢𑀺. 𑀚𑀻𑀭𑀡𑀁 𑀚𑀭𑀸, 𑀚𑀻𑀭𑀦𑁆𑀢𑀺 𑀚𑀺𑀡𑁆𑀡𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀏𑀢𑀸𑀬𑀸𑀢𑀺 𑀚𑀭𑀸. 𑀲𑀸𑀬𑁂𑀯 𑀚𑀭𑀢𑀸. 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀦𑀺𑀘𑁆𑀘𑀮𑀢𑀺 𑀦𑀓𑀫𑁆𑀧𑀢𑀻𑀢𑀺 𑀦𑀺𑀘𑁆𑀘𑁄 𑀅𑀲𑀗𑁆𑀔𑀢 𑀥𑀫𑁆𑀫𑁄. 𑀦 𑀦𑀺𑀘𑁆𑀘𑁄 𑀅𑀦𑀺𑀘𑁆𑀘𑁄, 𑀲𑀗𑁆𑀔𑀢𑀥𑀫𑁆𑀫𑁄. 𑀅𑀦𑀺𑀘𑁆𑀘𑀲𑁆𑀲 𑀪𑀸𑀯𑁄 𑀅𑀦𑀺𑀘𑁆𑀘𑀢𑀸, 𑀪𑀗𑁆𑀕𑁄.

[𑁧𑁮𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀦𑀺𑀘𑁆𑀘𑀥𑀼𑀯𑀪𑀸𑀯𑁂𑀦 𑀦 𑀇𑀘𑁆𑀘𑀁 𑀅𑀦𑀼𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦𑀺𑀘𑁆𑀘𑀲𑀤𑁆𑀤𑁄 𑀳𑀺 𑀲𑀸𑀲𑀦𑁂 𑀮𑁄𑀓𑁂𑀘 𑀧𑀸𑀓𑀝𑁄. 𑀲𑁄 𑀏𑀯 𑀇𑀥 𑀦𑀓𑀸𑀭𑀬𑀼𑀢𑁆𑀢𑁄 𑀅𑀦𑀺𑀘𑁆𑀘𑁄𑀢𑀺 𑀯𑀼𑀢𑁆𑀢𑁄𑀢𑀺. 𑀮𑀓𑁆𑀔𑀻𑀬𑀦𑁆𑀢𑀺 𑀲𑀮𑁆𑀮𑀓𑁆𑀔𑀻𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀻𑀬𑀦𑁆𑀢𑀺 𑀥𑀫𑁆𑀫𑀸 𑀇𑀫𑁂 𑀲𑀗𑁆𑀔𑀢𑀸𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁. 𑀲𑀗𑁆𑀔𑀢 𑀪𑀸𑀯𑀚𑀸𑀦𑀦𑀦𑀺𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀳- 𑀅𑀗𑁆𑀕𑀼𑀢𑁆𑀢𑀭𑁂 𑀢𑀻𑀡𑀺 𑀫𑀸𑀦𑀺 𑀪𑀺𑀓𑁆𑀔𑀯𑁂 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺, 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺. 𑀦𑀦𑀼 𑀧𑀸𑀴𑀺𑀬𑀁 𑀚𑀸𑀢𑀺𑀦𑀸𑀫 𑀆𑀕𑀢𑀸. 𑀢𑀲𑁆𑀫𑀸 𑀲𑀸𑀧𑀺 𑀇𑀥 𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀚𑀸𑀢𑀺𑀭𑀽𑀧𑀫𑁂𑀯𑀸𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀭𑀽𑀧𑀲𑀫𑀼𑀤𑁆𑀤𑁂𑀲𑁂. 𑀚𑀦𑀦𑀁 𑀧𑀸𑀢𑀼𑀪𑀯𑀦𑀁 𑀚𑀸𑀢𑀺. 𑀚𑀸𑀬𑀦𑁆𑀢𑀺𑀯𑀸 𑀏𑀢𑀸𑀬𑀸𑀢𑀺 𑀚𑀸𑀢𑀺, 𑀉𑀧𑀘𑀬 𑀲𑀦𑁆𑀢𑀢𑀺 𑀦𑀸𑀫𑁂𑀦𑀧𑀯𑀼𑀘𑁆𑀘𑀢𑀺 𑀢𑀲𑁆𑀲𑀸𑀚𑀸𑀢𑀺𑀬𑀸𑀢𑀣𑀸 𑀅𑀯𑀢𑁆𑀣𑀸𑀪𑁂𑀤𑀬𑁄𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸 𑀳𑀺 𑀆𑀤𑀺𑀢𑁄 𑀧𑀝𑀺𑀲𑀦𑁆𑀥𑀺𑀭𑀽𑀧𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀸𑀦𑀺 𑀓𑀭𑁄𑀢𑀺. 𑀧𑀼𑀦 𑀅𑀧𑀭𑀺𑀧𑀼𑀡𑁆𑀡𑀸𑀦𑀺𑀘 𑀆𑀬𑀢𑀦𑀸𑀦𑀺 𑀧𑀽𑀭𑁂𑀢𑀺. 𑀧𑀽𑀭𑀺𑀢𑀸𑀦𑀺 𑀘 𑀤𑀻𑀖𑀁𑀧𑀺 𑀅𑀤𑁆𑀥𑀸𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀢𑀺 𑀧𑀩𑀦𑁆𑀥𑀬𑀢𑀻𑀢𑀺. 𑀏𑀓𑀸 𑀤𑀲𑀯𑀺𑀥𑀁𑀧𑀻𑀢𑀺 𑀫𑀳𑀸𑀪𑀽𑀢𑀸𑀤𑀺𑀪𑀸𑀯𑁂𑀦 𑀏𑀓𑀢𑁆𑀢𑀁 𑀉𑀧𑀦𑀬𑀦𑀯𑀲𑁂𑀦 𑀏𑀓𑀸 𑀤𑀲𑀧𑀪𑁂𑀤𑀁𑀧𑀺. 𑀓𑀣𑀁 𑀲𑀭𑀽𑀧𑀯𑀲𑁂𑀦 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀪𑀽𑀢𑀧𑁆𑀧𑀲𑀸𑀤 𑀯𑀺𑀲𑀬𑀸𑀢𑀺𑀆𑀤𑀺𑀦𑀸 𑀏𑀓𑀸𑀤𑀲𑀯𑀺𑀥𑀲𑁆𑀲𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑀦𑀁 𑀅𑀦𑁆𑀢𑁄𑀕𑀥𑀪𑁂𑀤𑀸𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀪𑀸𑀯𑁂𑀦 𑀲𑀼𑀧𑀸𑀓𑀝𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳-𑀅𑀝𑁆𑀞𑀸𑀭𑀲𑀯𑀺𑀥𑀦𑁆𑀢𑀺.

𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺 𑀧𑀜𑁆𑀘𑀧𑀲𑀸𑀤𑀸 𑀅𑀕𑀳𑀺𑀢𑀕𑀳𑀡𑁂𑀦 𑀘𑀢𑁆𑀢𑀸𑀭𑁄 𑀯𑀺𑀲𑀬𑀸 𑀕𑁄𑀘𑀭𑀸. 𑀤𑀼𑀯𑀺𑀥𑁄 𑀪𑀸𑀯𑁄. 𑀏𑀓𑀁 𑀳𑀤𑀬𑀁. 𑀇𑀢𑀺 𑀇𑀤𑀁 𑀲𑁄𑀴𑀲𑀯𑀺𑀥𑀁 𑀭𑀽𑀧𑀁 𑀚𑀻𑀯𑀺𑀢𑀸𑀳𑀸𑀭𑀭𑀽𑀧𑁂𑀳𑀺 𑀲𑀳 𑀅𑀝𑁆𑀞𑀸𑀭𑀲𑀯𑀺𑀥𑀁 𑀳𑁄𑀢𑀺 𑀢𑀣𑀸 𑀏𑀓𑁄 𑀧𑀭𑀺𑀘𑁆𑀙𑁂𑀤𑁄. 𑀤𑀼𑀯𑀺𑀥𑀸 𑀯𑀺𑀜𑁆𑀜𑀢𑁆𑀢𑀺. 𑀅𑀕𑀳𑀺𑀢𑀕𑀳𑀡𑁂𑀦 𑀢𑀺𑀯𑀺𑀥𑁄 𑀯𑀺𑀓𑀸𑀭𑁄. 𑀘𑀢𑀼𑀩𑁆𑀩𑀺𑀥𑀁 𑀮𑀓𑁆𑀔𑀡𑀦𑁆𑀢𑀺 𑀤𑀲 𑀅𑀦𑀺𑀧𑁆𑀨𑀦𑁆𑀦𑀸𑀘𑀸𑀢𑀺 𑀭𑀽𑀧𑀁 𑀲𑀭𑀽𑀧𑀢𑁄 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 𑀪𑀯𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀧𑀘𑁆𑀙𑀺𑀫𑀸𑀦𑀺 𑀤𑀲𑀭𑀽𑀧𑀸𑀦𑀺 𑀲𑀪𑀸𑀯𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀸𑀦𑀺 𑀭𑀽𑀧𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀅𑀦𑀺𑀧𑁆𑀨𑀦𑁆𑀦𑀸𑀦𑀺 𑀦𑀸𑀫. 𑀅𑀧𑀺 𑀘𑁂𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀺𑀲𑀼𑀁 𑀉𑀤𑁆𑀤𑀺𑀝𑁆𑀞𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺𑀘 𑀏𑀢𑀸𑀦𑀺 𑀲𑀪𑀸𑀯𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀸𑀦𑀻𑀢𑀺 𑀯𑀸 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀻𑀢𑀺𑀯𑀸 𑀦𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀯𑁄𑀳𑀸𑀭𑀲𑀺𑀤𑁆𑀥 𑀫𑀢𑁆𑀢𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀢𑀸𑀤𑀺𑀲𑁂𑀦 𑀲𑀼𑀤𑁆𑀥𑀥𑀫𑁆𑀫𑀕𑀢𑀺𑀬𑀸 𑀲𑀺𑀤𑁆𑀥𑁂𑀦 𑀧𑀭𑀫𑀢𑁆𑀣 𑀮𑀓𑁆𑀔𑀡𑁂𑀦 𑀉𑀧𑀮𑀤𑁆𑀥𑀢𑁆𑀢𑀸. 𑀇𑀢𑀭𑀣𑀸 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀭𑀳𑀺𑀢𑀁 𑀅𑀲𑀗𑁆𑀔𑀢 𑀦𑀺𑀩𑁆𑀩𑀸𑀦𑀁𑀧𑀺 𑀲𑀪𑀸𑀯𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀜𑁆𑀘 𑀦𑀸𑀫 𑀲𑀺𑀬𑀸𑀢𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀢𑁆𑀢𑀺 𑀮𑀓𑁆𑀔𑀡𑀭𑀳𑀺𑀢𑀢𑁆𑀢𑀸𑀏𑀯 𑀏𑀢𑀸𑀦𑀺 𑀅𑀦𑀺𑀧𑁆𑀨𑀦𑁆𑀦𑀸𑀦𑀺𑀦𑀸𑀫. 𑀦 𑀲𑀪𑀸𑀯𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺. [𑀭𑀽𑀧𑀲𑀫𑀼𑀤𑁆𑀤𑁂𑀲𑁄]

𑁧𑁫𑁭. 𑀭𑀽𑀧𑀯𑀺𑀪𑀸𑀕𑁂𑀲𑀩𑁆𑀩𑀜𑁆𑀘 𑀧𑀦 𑀏𑀢𑀁 𑀬𑀣𑀸𑀲𑀫𑀼𑀤𑁆𑀤𑀺𑀝𑁆𑀞𑀁 𑀅𑀝𑁆𑀞𑀯𑀻𑀲𑀢𑀺 𑀯𑀺𑀥𑀁 𑀭𑀽𑀧𑀁 𑀅𑀳𑁂𑀢𑀼𑀓𑀝𑁆𑀞𑁂𑀦 𑀏𑀓𑀯𑀺𑀥𑀫𑁂𑀯. 𑀦 𑀲𑀳𑁂𑀢𑀼𑀓𑀸 𑀳𑁂𑀢𑀼𑀓 𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀣𑀸𑀲𑀧𑁆𑀧𑀘𑁆𑀘𑀬𑀝𑁆𑀞𑁂𑀦 𑀏𑀓𑀯𑀺𑀥𑀫𑁂𑀯. 𑀦 𑀲𑀧𑁆𑀧𑀘𑁆𑀘𑀬𑀸𑀧𑀘𑁆𑀘𑀬 𑀯𑀲𑁂𑀦 𑀤𑀼𑀯𑀺𑀥𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀏𑀓𑀯𑀺𑀥𑀦𑀬𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀲𑀩𑁆𑀩𑀜𑁆𑀘𑀸𑀢𑀺𑀆𑀤𑀺𑀫𑀸𑀭𑀤𑁆𑀥𑀁.

[𑁧𑁮𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀏𑀓𑀯𑀺𑀥𑀦𑀬𑁄𑀧𑀺 𑀭𑀽𑀧𑀯𑀺𑀪𑀸𑀕𑁄𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀬𑀣𑀸 𑀉𑀤𑁆𑀤𑀺𑀝𑁆𑀞 𑀭𑀽𑀧𑀸𑀦𑀁 𑀏𑀓𑀯𑀺𑀥𑀸𑀤𑀺𑀦𑀬𑀁 𑀤𑀲𑁆𑀲𑀦𑀢𑁆𑀣𑀁 𑀲𑀩𑁆𑀩𑀜𑁆𑀘 𑀧𑀦𑁂𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀫𑁂𑀢𑀺.

𑀯𑀓𑁆𑀔𑀢𑀺 𑀳𑀺 𑁋

𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀪𑁂𑀤𑁂𑀦, 𑀯𑀺𑀪𑀚𑀦𑁆𑀢𑀺 𑀬𑀣𑀸𑀭𑀳𑀦𑁆𑀢𑀺.

𑀏𑀢𑁂𑀦 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀪𑁂𑀤𑁄 𑀏𑀯 𑀭𑀽𑀧𑀯𑀺𑀪𑀸𑀕𑁄𑀦𑀸𑀫𑀸𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀢𑀢𑁆𑀣 𑀲𑀩𑁆𑀩𑀁𑀧𑀺 𑀭𑀽𑀧𑀁 𑀳𑁂𑀢𑀼𑀲𑀫𑁆𑀧𑀬𑁄𑀕𑀸 𑀪𑀸𑀯𑀢𑁄 𑀅𑀳𑁂𑀢𑀼𑀓 𑀫𑁂𑀯, 𑀦 𑀓𑀺𑀜𑁆𑀘𑀺 𑀲𑀳𑁂𑀢𑀼𑀓𑀁. 𑀓𑀺𑀜𑁆𑀘𑀺 𑀅𑀳𑁂𑀢𑀼𑀓𑀦𑁆𑀢𑀺 𑀏𑀯𑀁 𑀯𑀺𑀪𑀸𑀕𑁄 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀧𑁆𑀧𑀘𑁆𑀘𑀬𑀁 𑀲𑀸𑀲𑀯𑀁 𑀲𑀗𑁆𑀔𑀢𑀁 𑀮𑁄𑀓𑀺𑀬𑀦𑁆𑀢𑀺 𑀧𑀸𑀞𑁄. 𑀲𑀧𑁆𑀧𑀘𑁆𑀘𑀬𑀁 𑀲𑀗𑁆𑀔𑀢𑀁 𑀮𑁄𑀓𑀺𑀬𑀁 𑀲𑀸𑀲𑀯𑀦𑁆𑀢𑀺 𑀧𑀦 𑀬𑀼𑀢𑁆𑀢𑁄. 𑀧𑀸𑀴𑀺𑀬𑀁𑀧𑀺 𑀢𑀣𑀸 𑀤𑀺𑀝𑁆𑀞𑀢𑁆𑀢𑀸 𑀲𑀪𑀸𑀕𑀬𑀼𑀕𑀴𑀲𑀫𑁆𑀪𑀯𑀢𑁄𑀘𑀸𑀢𑀺. 𑀇𑀢𑀭𑀸𑀦𑀺 𑀧𑀦 𑀧𑀸𑀴𑀺𑀓𑀫𑁂𑀦 𑀅𑀲𑀫𑁂𑀦𑁆𑀢𑀸𑀦𑀺𑀧𑀺 𑀲𑀪𑀸𑀕 𑀬𑀼𑀕𑀴𑀢𑁆𑀢𑀸 𑀪𑀸𑀕𑀢𑁄 𑀬𑀼𑀢𑁆𑀢𑀸𑀦𑀺𑀏𑀯. 𑀢𑀢𑁆𑀣 𑀅𑀢𑁆𑀢𑀦𑁄 𑀚𑀦𑀓𑁂𑀦 𑀧𑀘𑁆𑀘𑀬𑁂𑀦 𑀲𑀳𑁂𑀯 𑀯𑀢𑁆𑀢𑀢𑀻𑀢𑀺 𑀲𑀧𑀘𑁆𑀘𑀬𑀁. 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀫𑁆𑀫 𑀓𑀭𑀻𑀬𑀢𑀻𑀢𑀺 𑀲𑀗𑁆𑀔𑀢𑀁. 𑀧𑀜𑁆𑀘𑀼𑀧𑀸𑀤𑀸 𑀦𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁂 𑀮𑁄𑀓𑁂𑀏𑀯 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀮𑁄𑀓𑀺𑀬𑀁. 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑁂𑀳𑀺 𑀆𑀲𑀯𑁂𑀳𑀺 𑀲𑀳𑁂𑀯 𑀯𑀢𑁆𑀢𑀢𑀻𑀢𑀺 𑀲𑀸𑀲𑀯𑀁. 𑀅𑀓𑀦𑀺𑀝𑁆𑀞 𑀩𑁆𑀭𑀳𑁆𑀫𑀲𑀦𑁆𑀢𑀸𑀦 𑀪𑀽𑀢𑀁𑀧𑀺 𑀭𑀽𑀧𑀁 𑀓𑀸𑀫𑀢𑀡𑁆𑀳𑀸 𑀯𑀺𑀲𑀬𑀪𑀸𑀯𑁂𑀦 𑀓𑀸𑀫𑁂𑀏𑀯 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀸𑀫𑀸𑀯𑀘𑀭𑀁. 𑀦𑀢𑁆𑀣𑀺 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁𑀦𑀸𑀫 𑀅𑀲𑁆𑀲𑀸𑀢𑀺 𑀅𑀦𑀸𑀭𑀫𑁆𑀫𑀡𑀁. 𑀬𑁄 𑀥𑀫𑁆𑀫𑁄 𑀅𑀜𑁆𑀜𑁂𑀦 𑀧𑀬𑁄𑀕𑁂𑀦 𑀧𑀳𑀻𑀦𑁄𑀧𑀺 𑀲𑀫𑀼𑀤𑀬𑀧𑀳𑀸𑀦𑁂 𑀅𑀲𑀢𑀺 𑀅𑀧𑀳𑀻𑀦𑁄𑀯 𑀳𑁄𑀢𑀺. 𑀧𑀼𑀦 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀢𑁆𑀢𑀸. 𑀅𑀧𑁆𑀧𑀳𑀻𑀦𑁄𑀧𑀺 𑀢𑀲𑁆𑀫𑀺𑀁 𑀲𑀢𑀺 𑀧𑀳𑀻𑀦𑁄𑀯 𑀳𑁄𑀢𑀺. 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀢𑁆𑀢𑀸. 𑀢𑀸𑀤𑀺𑀲𑁄 𑀥𑀫𑁆𑀫𑁄 𑀧𑀳𑀸𑀦𑀯𑀸𑀬𑀸𑀫𑀲𑁆𑀲 𑀅𑀝𑁆𑀞𑀸𑀦𑀢𑁆𑀢𑀸 𑀅𑀧𑁆𑀧𑀳𑀸𑀢𑀩𑁆𑀩𑁄𑀦𑀸𑀫. 𑀭𑀽𑀧𑀁𑀧𑀺 𑀏𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀧𑁆𑀧𑀳𑀸𑀢𑀩𑁆𑀩 𑀫𑁂𑀯𑀸𑀢𑀺. 𑀅𑀝𑁆𑀞𑀸𑀦𑀢𑁆𑀢𑀸 𑀧𑀳𑀸𑀦 𑀯𑀸𑀬𑀸𑀫𑀁 𑀦 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀯𑀸, 𑀯𑀺𑀦𑀸 𑀲𑀫𑀼𑀤𑀬𑀧𑀳𑀸𑀦𑁂𑀦 𑀧𑀳𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀭𑀽𑀧𑀁 𑀪𑀺𑀓𑁆𑀔𑀯𑁂 𑀦 𑀢𑀼𑀫𑁆𑀳𑀸𑀓𑀁. 𑀢𑀁 𑀧𑀚𑀳𑀣. 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁 𑀓𑀣𑀦𑁆𑀢𑀺. 𑀢𑀁𑀧𑀺 𑀢𑀩𑁆𑀩𑀺𑀲𑀬𑀲𑁆𑀲 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

𑀭𑀽𑀧𑁂 𑀔𑁄 𑀭𑀸𑀥 𑀬𑁄 𑀙𑀦𑁆𑀤𑁄, 𑀬𑁄 𑀭𑀸𑀕𑁄, 𑀬𑀸𑀦𑀦𑁆𑀤𑀻, 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑀁𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀦𑁆𑀢𑀺.

𑀅𑀬𑀁 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀓𑀼𑀲𑀮𑀸𑀤𑀻𑀲𑀼 𑀅𑀧𑁆𑀧𑀳𑀸𑀢𑀩𑁆𑀩𑁂𑀲𑀼 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀏𑀯𑀲𑀤𑁆𑀤𑁄 𑀘𑁂𑀢𑁆𑀣 𑀧𑀼𑀭𑀺𑀫𑀧𑀤𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀇𑀢𑀺𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄𑀯𑀸. 𑀢𑁂𑀦 𑀧𑀸𑀴𑀺𑀬𑀁 𑀆𑀕𑀢𑀁 𑀦 𑀳𑁂𑀢𑀼 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁄 𑀥𑀫𑁆𑀫𑀲𑀫𑀽𑀳𑁄 𑀅𑀚𑁆𑀛𑀢𑁆𑀢𑀁𑀦𑀸𑀫. 𑀢𑀲𑁆𑀫𑀺𑀁𑀧𑀺𑀘 𑀬𑀢𑁆𑀣 𑀢𑀡𑁆𑀳𑀸𑀬 𑀅𑀢𑀺𑀭𑁂𑀓𑀢𑀭𑀁 𑀤𑀴𑁆𑀳𑀧𑀭𑀺𑀕𑁆𑀕𑀳𑁄 𑀳𑁄𑀢𑀺. 𑀲𑁄 𑀘𑀓𑁆𑀔𑀸𑀤𑀺𑀓𑁄 𑀘𑀺𑀢𑁆𑀢𑁂𑀦 𑀲𑀳 𑀙𑀩𑁆𑀩𑀺𑀥𑁄 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀺𑀓𑁄 𑀦𑀸𑀫. 𑀅𑀚𑁆𑀛𑀢𑁆𑀢𑁂 𑀯𑀺𑀤𑀺𑀢𑁄 𑀧𑀸𑀓𑀝𑁄𑀢𑀺 𑀓𑀢𑁆𑀯𑀸. 𑀢𑀣𑀸 𑀳𑀺 𑀲𑁄 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀦𑁆𑀢𑀺𑀧𑀺 𑀯𑀼𑀢𑁆𑀢𑁄. 𑀇𑀢𑀭𑀸𑀦𑀺 𑀧𑀦 𑀭𑀽𑀧𑀸𑀤𑀺𑀦𑀺 𑀨𑀲𑁆𑀲𑀸𑀤𑀻𑀦𑀺𑀘 𑀢𑀤𑀼𑀧𑀸𑀤𑀸𑀬 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑀲𑁆𑀲 𑀫𑀦𑁆𑀤𑀢𑁆𑀢𑀸 𑀩𑀸𑀳𑀺𑀭𑀸𑀦𑀺 𑀦𑀸𑀫. 𑀬𑀣𑀸 𑀳𑀺 𑀮𑁄𑀓𑁂 𑀫𑀡𑀺𑀯𑀸 𑀲𑀼𑀯𑀡𑁆𑀡𑀁𑀯𑀸 𑀭𑀚𑀢𑀁𑀯𑀸 𑀩𑀳𑀺𑀕𑁂𑀳𑁂 𑀦𑀺𑀤𑀳𑀺𑀢𑁆𑀯𑀸 𑀣𑀧𑀺𑀢𑀁 𑀳𑁄𑀢𑀺. 𑀧𑀘𑁆𑀙𑀺𑀯𑀸 𑀲𑀼𑀧𑁆𑀧𑀁𑀯𑀸 𑀖𑀝𑁄𑀯𑀸 𑀲𑀭𑀸𑀯𑁄𑀯𑀸 𑀅𑀦𑁆𑀢𑁄 𑀕𑁂𑀳𑁂 𑀣𑀧𑀺𑀢𑁄. 𑀢𑀢𑁆𑀣 𑀧𑀘𑁆𑀙𑀺𑀫𑀸𑀦𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀧𑀼𑀭𑀺𑀫𑀸𑀦𑀺 𑀭𑀓𑁆𑀔𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑁂𑀯 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑀤𑀴𑁆𑀳𑀢𑀸𑀬 𑀅𑀦𑁆𑀢𑁄𑀧𑀭𑀺𑀪𑁄𑀕𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀧𑀘𑁆𑀙𑀺𑀫𑀸𑀦𑀺 𑀧𑀦 𑀩𑀸𑀳𑀺𑀭 𑀧𑀭𑀺𑀪𑁄𑀕𑀸𑀢𑁆𑀯𑁂𑀯. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀇𑀥𑀧𑀺 𑀳𑀺 𑀬𑀤𑀺 𑀲𑀓𑁆𑀓𑀼𑀡𑁂𑀬𑁆𑀬. 𑀭𑀽𑀧𑀸𑀤𑀻𑀦𑀺 𑀨𑀲𑁆𑀲𑀸𑀤𑀺𑀦𑀺𑀘 𑀲𑀩𑁆𑀩𑀸𑀦𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀘𑀓𑁆𑀔𑀸𑀤𑀺𑀓𑀁 𑀙𑀩𑁆𑀩𑀺𑀥𑀫𑁂𑀯 𑀅𑀯𑀲𑁆𑀲𑀁 𑀭𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺. 𑀇𑀢𑀺 𑀢𑀡𑁆𑀳𑀸 𑀧𑀭𑀺𑀕𑁆𑀕𑀳𑀲𑁆𑀲 𑀤𑀴𑁆𑀳𑀫𑀦𑁆𑀤𑀢𑀸 𑀯𑀲𑁂𑀦𑁂𑀯 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀚𑁆𑀛𑀢𑁆𑀢𑀺𑀓 𑀩𑀸𑀳𑀺𑀭𑀢𑀸 𑀯𑀼𑀢𑁆𑀢𑀸. 𑀦 𑀧𑀯𑀢𑁆𑀢𑀺𑀤𑁂𑀲𑀯𑀲𑁂𑀦𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

[𑁧𑁮𑁫] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀁 𑀅𑀢𑁆𑀣𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀓𑀸𑀫𑀁 𑀅𑀜𑁆𑀜𑁂𑀧𑀺 𑀅𑀚𑁆𑀛𑀢𑁆𑀢𑀲𑀫𑁆𑀪𑀽𑀢𑀸 𑀅𑀢𑁆𑀣𑀺. 𑀭𑀼𑀴𑁆𑀳𑀻𑀯𑀲𑁂𑀦 𑀧𑀦 𑀘𑀓𑁆𑀔𑀸𑀤𑀺𑀓𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

[𑁧𑁮𑁬] 𑀬𑀜𑁆𑀘 𑀢𑀢𑁆𑀣

‘‘𑀅𑀢𑁆𑀢𑀲𑀗𑁆𑀔𑀸𑀢𑀁𑀧𑀸 𑀘𑀺𑀢𑁆𑀢𑀁 𑀅𑀥𑀺𑀓𑀺𑀘𑁆𑀘 𑀢𑀲𑁆𑀲 𑀤𑁆𑀯𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀣𑀺 𑀅𑀚𑁆𑀛𑀢𑁆𑀢𑀁. 𑀢𑀤𑁂𑀯 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑀺 𑀲𑀢𑀺 𑀘𑀺𑀢𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺. 𑀅𑀚𑁆𑀛𑀢𑁆𑀢𑀥𑀫𑁆𑀫 𑀅𑀚𑁆𑀛𑀢𑁆𑀢𑀺𑀓𑀫𑁆𑀫𑁄𑀦𑀜𑁆𑀘 𑀅𑀯𑀺𑀲𑁂𑀲𑁄 𑀆𑀧𑀚𑁆𑀚𑀢𑀻𑀢𑀺.

𑀬𑀁 𑀧𑀦 𑀢𑀢𑁆𑀣

𑀅𑀣𑀯𑀸 𑀬𑀤𑀺 𑀫𑀬𑀁 𑀦 𑀳𑁄𑀫, 𑀢𑁆𑀯𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑀸 𑀯𑀺𑀬 𑀅𑀢𑁆𑀢𑀪𑀸𑀯𑀲𑁆𑀲 𑀲𑀸𑀢𑀺𑀲𑀬𑀁 𑀉𑀧𑀓𑀸𑀭𑀓𑀢𑁆𑀢𑀸 𑀘𑀓𑁆𑀔𑀸𑀤𑀺𑀦𑁂𑀯 𑀯𑀺𑀲𑁂𑀲𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀬𑀼𑀢𑁆𑀢𑀢𑀭𑀁.

𑀢𑀣𑀸 𑀉𑀧𑀓𑀸𑀭𑀸𑀢𑀺𑀲𑀬𑀢𑁆𑀢𑀸𑀏𑀯 𑀳𑀺 𑀢𑁂𑀲𑀼 𑀲𑀢𑁆𑀢𑀸𑀦𑀁 𑀧𑀭𑀺𑀕𑁆𑀕𑀳 𑀤𑀴𑁆𑀳𑀢𑀸 𑀳𑁄𑀢𑀻𑀢𑀺. 𑀲𑀢𑁆𑀢𑀯𑀺𑀥𑀁𑀧𑀺 𑀤𑁆𑀯𑀸𑀭𑀭𑀽𑀧𑀁𑀦𑀸𑀫. 𑀬𑀣𑀸𑀓𑁆𑀓𑀫𑀁 𑀯𑀻𑀣𑀺 𑀘𑀺𑀢𑁆𑀢𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀫𑁆𑀫𑀸𑀦𑀜𑁆𑀘 𑀧𑀯𑀢𑁆𑀢𑀺𑀫𑀼𑀔𑀢𑁆𑀢𑀸. 𑀢𑀢𑁆𑀣 𑀧𑀦 𑀧𑀜𑁆𑀘 𑀯𑀺𑀥𑀁 𑀧𑀲𑀸𑀤𑀭𑀽𑀧𑀁 𑀉𑀧𑀧𑀢𑁆𑀢𑀺𑀤𑁆𑀯𑀸𑀭𑀁𑀦𑀸𑀫. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀓𑀫𑁆𑀫𑀤𑁆𑀯𑀸𑀭𑀁𑀦𑀸𑀫𑀸𑀢𑀺 𑀑𑀴𑀸𑀭𑀺𑀓𑀭𑀽𑀧𑀁 𑀧𑀓𑀢𑀺𑀬𑀸 𑀣𑀽𑀮𑀲𑀪𑀸𑀯𑀢𑁆𑀢𑀸 𑀖𑀝𑁆𑀝𑀦𑀲𑀗𑁆𑀔𑀸𑀢𑀲𑁆𑀲𑀘 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑁆𑀲 𑀑𑀴𑀸𑀭𑀺𑀓𑀢𑁆𑀢𑀸. 𑀲𑀦𑁆𑀢𑀺𑀓𑁂𑀭𑀽𑀧𑀁 𑀤𑀽𑀭𑁂 𑀧𑀯𑀢𑁆𑀢𑀲𑁆𑀲𑀧𑀺 𑀲𑀻𑀖𑀢𑀭𑀁 𑀜𑀸𑀡𑁂𑀦 𑀕𑀳𑀡𑀬𑁄𑀕𑁆𑀬𑀢𑁆𑀢𑀸. 𑀲𑀧𑁆𑀧𑀝𑀺𑀖𑀭𑀽𑀧𑀜𑁆𑀘𑀸𑀢𑀺 𑀏𑀢𑁆𑀣 𑀧𑀝𑀺𑀳𑀦𑀦𑀁 𑀧𑀝𑀺𑀖𑁄. 𑀲𑁄 𑀤𑀼𑀯𑀺𑀥𑁄 𑀯𑀺𑀲𑀬𑀯𑀺𑀲𑀬𑀻𑀦𑀁 𑀧𑀝𑀺𑀖𑀝𑁆𑀝𑀦𑀁 𑀫𑀳𑀸 𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀖𑀝𑁆𑀝𑀦𑀦𑁆𑀢𑀺. 𑀢𑀢𑁆𑀣 𑀬𑁂𑀦 𑀧𑀝𑀺𑀖𑀝𑁆𑀝𑀦𑁂𑀦 𑀧𑀲𑀸𑀤 𑀤𑁆𑀯𑀸𑀭𑀸𑀦𑀁 𑀪𑀯𑀗𑁆𑀕𑀲𑁆𑀲𑀘 𑀯𑀺𑀓𑀸𑀭𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀇𑀤𑀁 𑀯𑀺𑀲𑀬𑀯𑀺𑀲𑀬𑀻𑀦𑀁 𑀧𑀝𑀺𑀖𑀝𑁆𑀝𑀦𑀁𑀦𑀸𑀫. 𑀬𑁂𑀦 𑀭𑀼𑀧𑁆𑀧𑀦𑀮𑀓𑁆𑀔𑀡𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦 𑀓𑀼𑀧𑁆𑀧𑀦 𑀖𑀝𑁆𑀝𑀦 𑀧𑀻𑀴𑀦 𑀪𑀺𑀚𑁆𑀚𑀦𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀺. 𑀇𑀤𑀁 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀖𑀝𑁆𑀝𑀦𑀁 𑀦𑀸𑀫. 𑀧𑀝𑀺𑀖𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀧𑁆𑀧𑀝𑀺𑀖𑀁.

[𑁧𑁮𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀬𑁄 𑀲𑀬𑀁 𑀦𑀺𑀲𑁆𑀲𑀬𑀯𑀲𑁂𑀦𑀘 𑀲𑀫𑁆𑀧𑀢𑁆𑀢𑀸𑀦𑀁 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀘 𑀧𑀝𑀺𑀫𑀼𑀔𑀪𑀸𑀯𑁄 𑀅𑀜𑁆𑀜𑀫𑀜𑁆𑀜𑀧𑀢𑀦𑀁. 𑀲𑁄 𑀧𑀝𑀺𑀖𑁄 𑀯𑀺𑀬𑀸𑀢𑀺 𑀧𑀝𑀺𑀖𑁄. 𑀬𑀣𑀸𑀳𑀺 𑀧𑀝𑀺𑀖𑀸𑀢𑁂 𑀲𑀢𑀺 𑀤𑀼𑀩𑁆𑀩𑀮𑀲𑁆𑀲 𑀘𑀮𑀦𑀁 𑀳𑁄𑀢𑀺. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀫𑀼𑀔𑀪𑀸𑀯𑁂 𑀲𑀢𑀺 𑀅𑀭𑀽𑀧𑀲𑀪𑀸𑀯𑀢𑁆𑀢𑀸 𑀤𑀼𑀩𑁆𑀩𑀮𑀲𑁆𑀲 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁 𑀳𑁄𑀢𑀻𑀢𑀺’’ 𑀏𑀯𑀁 𑀫𑀳𑀸𑀪𑀽𑀢𑀖𑀝𑁆𑀝𑀦𑀁 𑀉𑀧𑀫𑀸𑀫𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑀬𑀯𑀺𑀲𑀬𑀺𑀖𑀝𑁆𑀝𑀦𑀫𑁂𑀯 𑀕𑀳𑀺𑀢𑀁. 𑀢𑀁 𑀅𑀦𑀼𑀧𑀧𑀦𑁆𑀦𑀁.

𑀏𑀯𑀜𑁆𑀳𑀺 𑀲𑀢𑀺 𑀬𑀸𑀦𑀺 𑀮𑁄𑀓𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑁂𑀲𑀼 𑀖𑀝𑁆𑀝𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀬𑁂𑀲𑀁 𑀯𑀲𑁂𑀦 𑀭𑀽𑀧𑀥𑀫𑁆𑀫𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀮𑀕𑁆𑀕𑀦 𑀩𑀦𑁆𑀥𑀦 𑀣𑀫𑁆𑀪𑀦 𑀥𑀸𑀭𑀡 𑀘𑀮𑀦𑀸𑀤𑀻𑀦𑀺𑀯𑀸 𑀯𑀟𑁆𑀠𑀦 𑀳𑀸𑀬𑀦 𑀙𑁂𑀤𑀦 𑀪𑁂𑀤𑀦 𑀯𑀺𑀮𑀻𑀦 𑀯𑀺𑀓𑀺𑀭𑀡𑀸𑀤𑀻𑀦𑀺𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀦𑀺 𑀇𑀥 𑀅𑀲𑀗𑁆𑀕𑀳𑀺𑀢𑀸𑀦𑀺 𑀲𑀺𑀬𑀼𑀁. 𑀦𑀘 𑀢𑀸𑀦𑀺 𑀅𑀦𑀼𑀕𑁆𑀕𑀳 𑀉𑀧𑀖𑀸𑀢 𑀯𑀲𑁂𑀦 𑀧𑀯𑀢𑁆𑀢𑀺𑀪𑀽𑀢 𑀲𑀦𑁆𑀦𑀺𑀧𑀸𑀢 𑀲𑀗𑁆𑀔𑀸𑀢𑀁 𑀖𑀝𑁆𑀝𑀦𑀁𑀯𑀺𑀦𑀸 𑀅𑀜𑁆𑀜𑀧𑀓𑀸𑀭𑀸𑀦𑀺𑀏𑀯 𑀲𑀓𑁆𑀓𑀸 𑀪𑀯𑀺𑀢𑀼𑀦𑁆𑀢𑀺. 𑀇𑀢𑀭𑀁 𑀲𑁄𑀴𑀲𑀯𑀺𑀥𑀁 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀲𑀼𑀔𑀼𑀫𑀭𑀽𑀧𑀁 𑀤𑀽𑀭𑁂𑀭𑀽𑀧𑀁 𑀅𑀧𑀝𑀺𑀖𑀭𑀽𑀧𑀜𑁆𑀘. 𑀉𑀧𑀸𑀤𑀺𑀦𑁆𑀦𑀭𑀽𑀧𑀁 𑀦𑀸𑀫 𑀓𑀢𑁆𑀣𑀘𑀺 𑀬𑀁𑀓𑀺𑀜𑁆𑀘𑀺 𑀲𑀭𑀻𑀭𑀝𑁆𑀞𑀓𑀭𑀽𑀧𑀁 𑀯𑀼𑀘𑁆𑀘𑀢𑀺. 𑀓𑀢𑁆𑀣𑀘𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦 𑀫𑁂𑀯 𑀢𑀤𑀼𑀪𑀬𑀁𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀢𑀼𑀲𑀁 𑀆𑀤𑀺𑀦𑁆𑀦𑀧𑀭𑀸𑀫𑀝𑁆𑀞𑀢𑁆𑀢𑀸 𑀉𑀧𑀸𑀤𑀺𑀦𑁆𑀦𑀁 𑀦𑀸𑀫 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯 𑀉𑀧𑀸𑀤𑀺𑀦𑁆𑀦𑀁𑀦𑀸𑀫. 𑀓𑀲𑁆𑀫𑀸 𑀢𑀲𑁆𑀲𑁂𑀯 𑀲𑀢𑁆𑀢𑀲𑀦𑁆𑀢𑀸𑀦𑁂 𑀦𑀺𑀘𑁆𑀘𑀓𑀸𑀮𑀁 𑀧𑀯𑀢𑁆𑀢𑀺𑀯𑀲𑁂𑀦 𑀲𑀸𑀢𑀺𑀲𑀬𑀁 𑀪𑀼𑀲𑀁 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀢𑀸𑀲𑀫𑁆𑀪𑀯𑀢𑁄𑀢𑀺 𑀯𑀼𑀢𑁆𑀢𑀁 𑀓𑀫𑁆𑀫𑀚𑀁𑀉𑀧𑀸𑀤𑀺𑀦𑁆𑀦𑀭𑀽𑀧𑀦𑁆𑀢𑀺. 𑀏𑀢𑀁 𑀫𑀫𑀸𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀪𑀼𑀲𑀁 𑀆𑀤𑀺𑀬𑀢𑀻𑀢𑀺 𑀉𑀧𑀸𑀤𑀺𑀦𑁆𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀉𑀧𑁂𑀢𑁂𑀦 𑀓𑀫𑁆𑀫𑀼𑀦𑀸 𑀅𑀢𑁆𑀢𑀦𑁄 𑀨𑀮𑀪𑀸𑀯𑁂𑀦 𑀆𑀤𑀺𑀦𑁆𑀦𑀁 𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀲𑀦𑀺𑀤𑀲𑁆𑀲𑀦𑀁. 𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀝𑁆𑀞𑀩𑁆𑀩𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀥𑀫𑁆𑀫𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀜𑁆𑀜𑁂 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀻𑀬𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀅𑀢𑁆𑀣𑀯𑀺𑀲𑁂𑀲𑀩𑁄𑀥𑁄 𑀳𑁄𑀢𑀻𑀢𑀺. 𑀦𑀺𑀤𑀲𑁆𑀲𑀦𑀦𑁆𑀢𑀺𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀁 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀦𑀺𑀤𑀲𑁆𑀲𑀦𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀘𑀓𑁆𑀔𑀸𑀤𑀺𑀤𑁆𑀯𑀬𑀁 𑀅𑀲𑀫𑁆𑀧𑀢𑁆𑀢𑀯𑀲𑁂𑀦 𑀕𑁄𑀘𑀭𑀕𑁆𑀕𑀸𑀳𑀺𑀓𑀁. 𑀖𑀸𑀦𑀸𑀤𑀺𑀢𑁆𑀢𑀬𑀁 𑀲𑀫𑁆𑀧𑀢𑁆𑀢𑀯𑀲𑁂𑀦 𑀕𑁄𑀘𑀭𑀕𑁆𑀕𑀸𑀳𑀺𑀓𑀦𑁆𑀢𑀺 𑀧𑀜𑁆𑀘𑀯𑀺𑀥𑀁𑀧𑀺 𑀕𑁄𑀘𑀭𑀕𑁆𑀕𑀸𑀳𑀺𑀓𑀭𑀽𑀧𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀲𑀸𑀤𑁂 𑀅𑀮𑁆𑀮𑀻𑀬𑀺𑀢𑁆𑀯𑀸 𑀮𑀕𑁆𑀕𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀁 𑀲𑀫𑁆𑀧𑀢𑁆𑀢𑀁𑀦𑀸𑀫. 𑀓𑁂𑀲𑀕𑁆𑀕𑀫𑀢𑁆𑀢𑀁𑀧𑀺 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀅𑀲𑀫𑁆𑀧𑀢𑁆𑀢𑀁𑀦𑀸𑀫. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀘𑀓𑁆𑀔𑀸𑀤𑀺𑀤𑁆𑀯𑀬𑀁 𑀅𑀲𑀫𑁆𑀧𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺. 𑀖𑀸𑀦𑀸𑀤𑀺𑀢𑁆𑀢𑀬𑀁 𑀲𑀫𑁆𑀧𑀢𑁆𑀢𑀫𑁂𑀯𑀸𑀢𑀺, 𑀧𑀘𑁆𑀘𑀬𑀯𑀺𑀲𑁂𑀲𑀢𑁄. 𑀆𑀮𑁄𑀓𑁄 𑀳𑀺 𑀭𑀽𑀧𑀕𑀳𑀡𑁂 𑀘𑀓𑁆𑀔𑀼𑀲𑁆𑀲 𑀧𑀘𑁆𑀘𑀬𑁄. 𑀆𑀓𑀸𑀲𑁄𑀘 𑀲𑀤𑁆𑀤𑀕𑀳𑀡𑁂 𑀲𑁄𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀭𑀽𑀧𑁂𑀲𑀼𑀘 𑀅𑀜𑁆𑀜𑀫𑀜𑁆𑀜𑀁 𑀮𑀕𑁆𑀕𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀆𑀮𑁄𑀓𑀧𑀭𑀺𑀯𑀸𑀭𑀲𑁆𑀲 𑀑𑀓𑀸𑀲𑁄 𑀦𑀢𑁆𑀣𑀺. 𑀢𑀣𑀸 𑀲𑁄𑀢𑀲𑀤𑁆𑀤𑁂𑀲𑀼𑀘 𑀆𑀓𑀸𑀲𑀧𑀭𑀺𑀯𑀸𑀭𑀲𑁆𑀲𑀸𑀢𑀺. 𑀯𑀸𑀬𑀼𑀆𑀧𑀧𑀣𑀯𑀺𑀬𑁄 𑀧𑀦 𑀖𑀸𑀦𑀸𑀤𑀺𑀢𑁆𑀢𑀬𑀲𑁆𑀲 𑀕𑀦𑁆𑀥𑀸𑀤𑀺𑀕𑀳𑀡𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀯𑀸𑀬𑀼𑀦𑀸𑀫 𑀕𑀦𑁆𑀥𑀸𑀓𑀟𑁆𑀠𑀦𑀓𑁄 𑀦𑀸𑀲𑀯𑀸𑀢𑁄𑀬𑁂𑀯, 𑀲𑁄𑀘 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀘𑁆𑀘𑀬𑁄. 𑀆𑀧𑁄𑀦𑀸𑀫 𑀚𑀺𑀯𑁆𑀳𑀸𑀢𑁂𑀫𑀦𑀓𑁄 𑀆𑀧𑁄, 𑀲𑁄𑀧𑀺 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀘𑁆𑀘𑀬𑁄. 𑀦 𑀳𑀺 𑀭𑀲𑁄 𑀲𑀼𑀓𑁆𑀔𑀚𑀺𑀯𑁆𑀳𑀸𑀬 𑀨𑀭𑀢𑀻𑀢𑀺. 𑀧𑀣𑀯𑀻𑀘 𑀖𑀝𑁆𑀝𑀦𑀢𑁆𑀣𑀸𑀬 𑀧𑀘𑁆𑀘𑀬𑁄. 𑀦 𑀳𑀺 𑀤𑀼𑀩𑁆𑀩𑀮𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀬𑁄 𑀆𑀮𑁄𑀓𑁄𑀯𑀸 𑀭𑀚𑁄𑀯𑀸𑀓𑀸𑀬𑁂 𑀧𑀢𑀫𑀸𑀦𑁄𑀧𑀺 𑀧𑀲𑀸𑀤𑁂 𑀖𑀝𑁆𑀝𑁂𑀢𑀻𑀢𑀺. 𑀇𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑀢𑁄 𑀢𑁂𑀲𑀁 𑀲𑀫𑁆𑀧𑀢𑁆𑀢𑀸𑀲𑀫𑁆𑀧𑀢𑁆𑀢𑀯𑀲𑁂𑀦 𑀕𑀳𑀡 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀲𑁆𑀲 𑀢𑀸𑀯 𑀅𑀲𑀫𑁆𑀧𑀢𑁆𑀢𑀕𑀳𑀡𑀁 𑀧𑀸𑀓𑀝𑀁. 𑀢𑀜𑁆𑀳𑀺 𑀲𑀫𑀻𑀧𑁂 𑀅𑀓𑁆𑀔𑀺𑀯𑀡𑁆𑀡𑀁𑀯𑀸 𑀪𑀫𑀼𑀓𑀫𑀽𑀮𑀁𑀯𑀸 𑀦𑀧𑀲𑁆𑀲𑀢𑀺. 𑀤𑀽𑀭𑁂 𑀧𑀦 𑀫𑀳𑀦𑁆𑀢𑀁 𑀘𑀦𑁆𑀤𑀫𑀡𑁆𑀟𑀮𑀸𑀤𑀺𑀓𑀁𑀯𑀸 𑀨𑀮𑀺𑀓𑀸𑀤𑀺𑀢𑀺𑀭𑁄𑀳𑀺𑀢𑀁𑀯𑀸 𑀯𑀡𑁆𑀡𑀁 𑀧𑀲𑁆𑀲𑀢𑀺. 𑀤𑀺𑀲𑀸𑀤𑁂𑀲𑀯𑀯𑀢𑁆𑀣𑀸𑀦𑀜𑁆𑀘𑀲𑁆𑀲 𑀧𑀜𑁆𑀜𑀸𑀬𑀢𑀻𑀢𑀺. 𑀲𑁄𑀢𑀲𑁆𑀲 𑀧𑀦 𑀓𑀣𑀦𑁆𑀢𑀺, 𑀢𑀢𑁆𑀣 𑀳𑀺 𑀤𑀽𑀭𑁂 𑀲𑀤𑁆𑀤𑁄 𑀘𑀺𑀭𑁂𑀦 𑀲𑀼𑀬𑁆𑀬𑀫𑀸𑀦𑁄 𑀤𑀺𑀲𑁆𑀲𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀉𑀧𑁆𑀧𑀦𑁆𑀦𑁄𑀧𑀺 𑀲𑀤𑁆𑀤𑁄 𑀅𑀦𑁆𑀢𑀭𑀸 𑀫𑀳𑀦𑁆𑀢𑁂 𑀘𑁂𑀢𑀺𑀬𑀸𑀤𑀺𑀓𑁂 𑀅𑀦𑁆𑀢𑀭𑀺𑀢𑁂 𑀲𑀢𑀺 𑀤𑀓𑁆𑀔𑀺𑀡𑀧𑀲𑁆𑀲𑀢𑁄𑀯𑀸 𑀲𑀼𑀬𑁆𑀬𑀢𑀺. 𑀉𑀢𑁆𑀢𑀭𑀧𑀲𑁆𑀲𑀢𑁄𑀯𑀸. 𑀅𑀲𑀼𑀬𑁆𑀬𑀫𑀸𑀦𑁄𑀯𑀸 𑀳𑁄𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀉𑀧𑁆𑀧𑀦𑁆𑀦𑁄 𑀲𑀤𑁆𑀤𑀲𑀗𑁆𑀖𑀸𑀝𑁄 𑀆𑀲𑀦𑁆𑀦𑁂 𑀞𑀺𑀢𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀯𑀲𑀸𑀦𑀸 𑀓𑀫𑁂𑀦 𑀧𑀸𑀓𑀝𑀻𑀪𑀽𑀢𑁄 𑀳𑁄𑀢𑀺. 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄𑀘 𑀩𑀮𑀯𑀸 𑀳𑁄𑀢𑀺. 𑀅𑀳𑀁 𑀲𑀼𑀡𑁄𑀫𑀻𑀢𑀺 𑀧𑀯𑀢𑁆𑀢𑀸 𑀲𑀮𑁆𑀮𑀓𑁆𑀔𑀡𑀯𑀻𑀣𑀺𑀬𑁄 𑀲𑀻𑀖𑀢𑀭𑀁 𑀦𑀺𑀭𑀦𑁆𑀢𑀭𑀁 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺. 𑀤𑀽𑀭𑁂 𑀞𑀺𑀢𑀸𑀦𑀁 𑀧𑀦 𑀧𑀝𑀺𑀖𑀝𑁆𑀝𑀦𑀸𑀦𑀺𑀖𑀁𑀲𑁄 𑀫𑀦𑁆𑀤𑀢𑀭𑁄 𑀳𑁄𑀢𑀺. 𑀆𑀤𑀺𑀢𑁄 𑀅𑀧𑀸𑀓𑀝𑁄. 𑀫𑀚𑁆𑀛𑁂𑀯𑀸 𑀅𑀯𑀲𑀸𑀦𑁂𑀯𑀸 𑀧𑀺𑀡𑁆𑀟𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑁄. 𑀲𑀮𑁆𑀮𑀓𑁆𑀔𑀡𑀯𑀻𑀣𑀺𑀬𑁄 𑀘𑀺𑀭𑁂𑀦 𑀧𑀭𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀮𑀳𑀼𑀁 𑀲𑀼𑀢𑁄. 𑀘𑀺𑀭𑁂𑀦 𑀲𑀼𑀢𑁄𑀢𑀺 𑀅𑀢𑀺𑀫𑀸𑀦𑁄 𑀳𑁄𑀢𑀻𑀢𑀺. 𑀅𑀧𑀺𑀘, 𑀲𑀤𑁆𑀤𑁄𑀦𑀸𑀫 𑀦𑀺𑀲𑁆𑀲𑀬𑀥𑀸𑀢𑀼𑀧𑀭𑀁𑀧𑀭𑀸𑀬 𑀧𑀯𑀢𑁆𑀢𑀺𑀢𑁆𑀯𑀸 𑀤𑀽𑀭𑀁𑀧𑀺 𑀤𑁂𑀲𑀁 𑀕𑀘𑁆𑀙𑀢𑀺𑀬𑁂𑀯. 𑀏𑀯𑀁 𑀕𑀘𑁆𑀙𑀦𑁆𑀢𑁄𑀘 𑀕𑀢𑀕𑀢𑀝𑁆𑀞𑀸𑀦𑁂𑀏𑀯 𑀞𑀢𑁆𑀯𑀸 𑀲𑀯𑀦𑀽𑀧𑀘𑀸𑀭𑁂 𑀞𑀺𑀢𑀸𑀦𑀁 𑀲𑁄𑀢𑀲𑀳𑀲𑁆𑀲𑀁𑀧𑀺 𑀖𑀝𑁆𑀝𑁂𑀢𑀺. 𑀫𑀳𑀦𑁆𑀢𑁂 𑀧𑀦 𑀘𑁂𑀢𑀺𑀬𑀸𑀤𑀺𑀓𑁂 𑀅𑀦𑁆𑀢𑀭𑀺𑀢𑁂 𑀲𑀢𑀺 𑀬𑀢𑁄 𑀆𑀓𑀸𑀲𑁄 𑀉𑀚𑀼𑀁 𑀯𑀺𑀯𑀝𑁄 𑀳𑁄𑀢𑀺. 𑀢𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑀢𑁄𑀯𑀸 𑀉𑀢𑁆𑀢𑀭𑀧𑀲𑁆𑀲𑀢𑁄𑀯𑀸 𑀕𑀢𑀕𑀢𑀞𑀸𑀦𑀢𑁄𑀯𑀲𑁄𑀢𑀁 𑀖𑀝𑁆𑀝𑁂𑀢𑀺. 𑀫𑀦𑁆𑀤𑀢𑀭𑁄 𑀧𑀦 𑀲𑀤𑁆𑀤𑁄𑀅𑀲𑀼𑀬𑁆𑀬 𑀫𑀸𑀦𑁄𑀧𑀺 𑀳𑁄𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁄𑀘 𑀬𑀸𑀯 𑀲𑁄𑀢𑀧𑀲𑀸𑀤𑁂 𑀅𑀮𑁆𑀮𑀻𑀬𑀺𑀢𑁆𑀯𑀸 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀸𑀯 𑀅𑀲𑀫𑁆𑀧𑀢𑁆𑀢𑁄𑀬𑁂𑀯 𑀳𑁄𑀢𑀺. 𑀬𑁄 𑀧𑀦 𑀅𑀮𑁆𑀮𑀻 𑀬𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀲𑀫𑁆𑀧𑀢𑁆𑀢𑁄𑀦𑀸𑀫 𑀳𑁄𑀢𑀺. 𑀦 𑀲𑁄 𑀲𑀼𑀬𑁆𑀬𑀢𑀻𑀢𑀺. 𑀬𑀤𑀺 𑀧𑀦 𑀲𑁄𑀢𑀁 𑀲𑀫𑁆𑀧𑀢𑁆𑀢𑀯𑀺𑀲𑀬𑀁 𑀲𑀺𑀬𑀸. 𑀬𑀣𑀸 𑀅𑀦𑁆𑀢𑁄 𑀓𑀼𑀘𑁆𑀙𑀺𑀕𑀢𑁄 𑀕𑀦𑁆𑀥𑁄 𑀩𑀳𑀺 𑀦𑀖𑀸𑀬𑀺𑀬𑀢𑀺. 𑀢𑀣𑀸 𑀅𑀦𑁆𑀢𑁄 𑀓𑀼𑀘𑁆𑀙𑀺𑀕𑀢𑁄 𑀲𑀤𑁆𑀤𑁄𑀧𑀺 𑀩𑀳𑀺 𑀦𑀲𑀼𑀬𑁂𑀬𑁆𑀬. 𑀕𑀦𑁆𑀥𑀲𑁆𑀲 𑀯𑀺𑀬 𑀤𑀺𑀲𑀸𑀤𑁂𑀲𑀯𑀯𑀢𑁆𑀣𑀸𑀦𑀁 𑀯𑀺𑀲𑁆𑀲𑀦 𑀲𑀺𑀬𑀸𑀢𑀺.

[𑁧𑁮𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀕𑀦𑁆𑀢𑁆𑀯𑀸 𑀯𑀺𑀲𑀬𑀤𑁂𑀲𑀁 𑀢𑀁, 𑀨𑀭𑀺𑀢𑁆𑀯𑀸 𑀕𑀡𑁆𑀳𑀢𑀻𑀢𑀺 𑀘𑁂. 𑀅𑀥𑀺𑀝𑁆𑀞𑀸𑀦 𑀯𑀺𑀥𑀸 𑀦𑁂𑀧𑀺, 𑀢𑀲𑁆𑀲 𑀲𑁄 𑀕𑁄𑀘𑀭𑁄 𑀲𑀺𑀬𑀸.’’ 𑀢𑀺𑀧𑀺 𑀯𑀺𑀘𑀸𑀭𑀺𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀘𑀓𑁆𑀔𑀸𑀤𑀺𑀤𑁆𑀯𑀬𑀲𑁆𑀲 𑀩𑀳𑀺𑀤𑁆𑀥𑀸 𑀯𑀺𑀲𑀬𑀤𑁂𑀲𑀕𑀫𑀦𑀲𑀗𑁆𑀕𑁄 𑀅𑀢𑁆𑀣𑀻𑀢𑀺. 𑀕𑁄𑀘𑀭𑀁 𑀕𑀡𑁆𑀳𑀸𑀢𑀻𑀢𑀺 𑀕𑁄𑀘𑀭𑀕𑁆𑀕𑀸𑀳𑀺𑀓𑀁. 𑀧𑀲𑀸𑀤 𑀫𑀡𑁆𑀟𑀪𑀽𑀢𑀢𑁆𑀢𑀸 𑀆𑀧𑀸𑀢𑀫𑀸𑀕𑀢𑀁 𑀆𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀳𑀼𑀢𑁆𑀯𑀸 𑀢𑀁𑀢𑀁 𑀕𑁄𑀘𑀭𑀕𑀳𑀡 𑀲𑀪𑀸𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀁.

𑀯𑀡𑁆𑀡𑁄𑀢𑀺 𑀭𑀽𑀧𑀸𑀭𑀫𑁆𑀫𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀑𑀚𑀸𑀢𑀺 𑀆𑀳𑀸𑀭 𑀭𑀽𑀧 𑀫𑀸𑀳. 𑀯𑀺𑀦𑀺𑀪𑀼𑀚𑁆𑀚𑀢𑀻𑀢𑀺 𑀯𑀺𑀦𑀺𑀩𑁆𑀪𑁄𑀕𑁄. 𑀞𑀸𑀦𑀢𑁄 𑀤𑁂𑀲𑀢𑁄 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁄 𑀯𑀺𑀲𑀼𑀁𑀯𑀺𑀲𑀼𑀁 𑀯𑀯𑀢𑁆𑀣𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀦𑀯𑀺𑀦𑀺𑀩𑁆𑀪𑁄 𑀕𑁄𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑁄. 𑀲𑁄 𑀏𑀯 𑀭𑀽𑀧𑀦𑁆𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦𑀧𑀦𑁂𑀢𑁆𑀣 𑀕𑀦𑁆𑀥𑀭𑀲𑀑𑀚𑀸 𑀓𑀢𑁆𑀣𑀘𑀺 𑀯𑀺𑀦𑀻𑀪𑀼𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑀫𑁂𑀯 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀁 𑀇𑀘𑁆𑀙𑀺𑀢𑀁. 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺. [𑀭𑀽𑀧𑀯𑀺𑀪𑀸𑀕𑁄].

𑁧𑁫𑁮. 𑀓𑀫𑁆𑀫𑀦𑁆𑀢𑀺 𑀏𑀓𑀸 𑀘𑁂𑀢𑀦𑀸𑀏𑀯. 𑀲𑀸𑀬𑁂𑀯 𑀳𑀺 𑀧𑀝𑁆𑀞𑀸𑀦𑁂 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀬𑀣𑀸𑀳-𑀦𑀸𑀦𑀸𑀓𑁆𑀔𑀡𑀺𑀓𑀸 𑀓𑀼𑀲𑀮𑀸𑀓𑀼𑀲𑀮𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀧𑀦 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀝𑁆𑀞𑀸𑀦𑁂 𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁𑀧𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸𑀳-𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀆𑀤𑀺. 𑀉𑀢𑀽𑀢𑀺 𑀢𑁂𑀚𑁄𑀬𑁂𑀯. 𑀲𑁄 𑀳𑀺 𑀓𑀧𑁆𑀧𑀲𑀡𑁆𑀞𑀸𑀧𑀦𑀯𑀲𑁂𑀦 𑀲𑀓𑀮𑀁 𑀑𑀓𑀸𑀲 𑀮𑁄𑀓𑀁𑀧𑀺 𑀦𑀸𑀦𑀸𑀲𑀭𑀻𑀭𑀲𑀡𑁆𑀞𑀸𑀧𑀦𑀯𑀲𑁂𑀦 𑀲𑀓 𑀮𑀁 𑀭𑀽𑀧𑀫𑀬𑀁 𑀓𑀸𑀬𑀁 𑀲𑀢𑁆𑀢𑀮𑁄𑀓𑀁𑀧𑀺 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀁 𑀅𑀩𑁆𑀪𑀧𑀝𑀮𑀫𑁂𑀖𑀯𑀼𑀝𑁆𑀞𑀺𑀚𑀮𑀅𑀕𑁆𑀕𑀺 𑀯𑀸𑀢𑀸𑀤𑀻𑀦𑀜𑁆𑀘 𑀲𑀡𑁆𑀞𑀸𑀧𑀦𑀯𑀲𑁂𑀦 𑀲𑀓𑀮𑀁 𑀲𑀗𑁆𑀔𑀸𑀭𑀮𑁄𑀓𑀁𑀧𑀺 𑀉𑀤𑀬𑀢𑀺 𑀧𑀲𑀯𑀢𑀺 𑀚𑀦𑁂𑀢𑀺 𑀯𑀟𑁆𑀠𑁂𑀢𑀺. 𑀢𑀲𑁆𑀫𑀸 𑀉𑀢𑀽𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀉𑀢𑀽𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀳𑀸𑀭𑁄𑀢𑀺 𑀑𑀚𑀸𑀏𑀯. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀪𑀽𑀢𑀁 𑀅𑀭𑀽𑀧𑀓𑀼𑀲𑀮𑀁 𑀓𑀫𑁆𑀫𑀚𑀭𑀽𑀧𑀁 𑀦𑀚𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀁𑀧𑀻𑀢𑀺. 𑀅𑀢𑀺𑀲𑀗𑁆𑀔𑀢𑀦𑁆𑀢𑀺 𑀅𑀢𑀻𑀢𑀓𑀸𑀮𑁂 𑀬𑀣𑀸𑀓𑀸 𑀮𑀦𑁆𑀢𑀭𑁂 𑀭𑀽𑀧𑀁 𑀚𑀦𑁂𑀢𑀺, 𑀢𑀣𑀸 𑀯𑀺𑀲𑁂𑀲𑁂𑀢𑁆𑀯𑀸 𑀲𑀼𑀝𑁆𑀞𑀼𑀓𑀢𑀁. 𑀅𑀚𑁆𑀛𑀢𑁆𑀢𑀺 𑀓𑀲𑀦𑁆𑀢𑀸𑀦𑁂𑀢𑀺 𑀯𑀼𑀢𑁆𑀢𑀁, 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀅𑀚𑁆𑀛𑀢𑁆𑀢 𑀫𑁂𑀯 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺𑀯𑀸 𑀇𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀲𑀦𑁆𑀥𑀺𑀫𑀼𑀧𑀸𑀤𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀁 𑀉𑀧𑀸𑀤𑀸𑀬. 𑀔𑀡𑁂𑀔𑀡𑁂𑀢𑀺 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀢𑀻𑀲𑀼 𑀔𑀡𑁂𑀲𑀼. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀲𑀩𑁆𑀩𑁂𑀲𑀁𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀏𑀯 𑀉𑀧𑁆𑀧𑀸𑀤𑀁 𑀪𑀗𑁆𑀕𑀓𑁆𑀔𑀡𑁂𑀏𑀯 𑀦𑀺𑀭𑁄𑀥𑀜𑁆𑀘 𑀆𑀳. 𑀅𑀳𑀁 𑀧𑀦𑀲𑁆𑀲𑀸 𑀥𑀺𑀧𑁆𑀧𑀸𑀬𑁄-𑀲𑀩𑁆𑀩𑀸𑀦𑀺𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀪𑀗𑁆𑀕𑀓𑁆𑀔𑀡𑁂. 𑀬𑀣𑀸𑀳 𑁋

𑀬𑀲𑁆𑀲𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀦𑁄𑀢𑀺.

𑀢𑀣𑀸 𑀢𑀸𑀦𑀺 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀏𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀦 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀬𑀣𑀸𑀳 𑁋

𑀬𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀦𑁄𑀢𑀺.

𑀅𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 𑀏𑀢𑀁 𑀬𑀫𑀓𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀭𑀽𑀧𑀸𑀦𑀺 𑀧𑀦 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀘𑁂. 𑀦. 𑀏𑀯𑀜𑁆𑀳𑀺 𑀲𑀢𑀺 𑁋

𑀬𑀲𑁆𑀲𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀭𑀽𑀧𑁂 𑀢𑀡𑁆𑀳𑀸𑀬 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺. 𑀦𑁄𑀘 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀜𑁆𑀘𑀯𑁄𑀓𑀸𑀭𑁂 𑀢𑀡𑁆𑀳𑀸𑀬 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀲𑀫𑀼𑀤𑀬𑀲𑀘𑁆𑀘𑀜𑁆𑀘 𑀦𑀺𑀭𑀼𑀚𑁆𑀛𑀢𑀺, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀉𑀧𑁆𑀧𑀚𑁆𑀚𑀢𑀻𑀢𑀺𑀘.

𑀇𑀢𑀭𑀢𑁆𑀣𑀘

𑀅𑀭𑀽𑀧𑁂 𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑁄𑀘 𑀢𑁂𑀲𑀁 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀧𑀜𑁆𑀘𑀯𑁄𑀓𑀸𑀭𑁂 𑀓𑀼𑀲𑀮𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀓𑀼𑀲𑀮𑀸 𑀥𑀫𑁆𑀫𑀸𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸𑀘 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺𑀘.

𑀏𑀯𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀸𑀏𑀯 𑀉𑀤𑁆𑀥𑀝𑀸 𑀲𑀺𑀬𑀼𑀁. 𑀦𑁄𑀢𑀺 𑀧𑀦 𑀧𑀝𑀺𑀲𑁂𑀥𑁄𑀯 𑀉𑀤𑁆𑀥𑀝𑁄. 𑀢𑀲𑁆𑀫𑀸 𑀦𑀬𑀺𑀤𑀁 𑀅𑀭𑀽𑀧𑀪𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀘𑀺𑀢𑁆𑀢𑀚𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀢𑀫𑁆𑀧𑀺 𑀦. 𑀓𑀫𑁆𑀫𑀚𑀭𑀽𑀧𑀲𑁆𑀲 𑀯𑀺𑀕𑀳𑀡𑁂 𑀯𑀺𑀭𑁄𑀥𑀲𑁆𑀲 𑀬𑀫𑀓𑀧𑀸𑀞𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀅𑀦𑀼𑀮𑁄𑀫𑀲𑁆𑀲𑁂𑀯𑀘 𑀪𑀸𑀯𑀢𑁄. 𑀬𑀣𑀸𑀳 𑁋

𑀬𑀲𑁆𑀲𑀯𑀸𑀧𑀦 𑀬𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀢𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀦𑁄𑀘 𑀢𑁂𑀲𑀁 𑀢𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺.

𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀉𑀧𑁆𑀧𑀚𑁆𑀚𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀉𑀧𑁆𑀧𑀚𑁆𑀚𑀢𑀻𑀢𑀺.

𑀏𑀢𑁆𑀣 𑀳𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀦𑁆𑀢𑀺 𑀏𑀢𑁂𑀦 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬 𑀫𑁂𑀯 𑀯𑀼𑀢𑁆𑀢𑀁. 𑀬𑀤𑀺𑀘 𑀢𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁.𑀮. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂𑀘 𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂 𑀧𑀦 𑀅𑀭𑀽𑀧 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀦. 𑀢𑀣𑀸 𑀕𑀳𑀡𑀢𑁆𑀣𑀁 𑀬𑀫𑀓 𑀧𑀸𑀞𑀦𑁆𑀢𑀭𑀸𑀪𑀸𑀯𑀢𑁄 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂𑀘 𑀞𑀸𑀦𑁂 𑀧𑀸𑀴𑀺𑀬𑁄 𑀲𑀁𑀲𑀦𑁆𑀤𑀺𑀢𑁆𑀯𑀸 𑀩𑀮𑀯𑀢𑀺𑀬𑀸 𑀧𑀸𑀴𑀺𑀬𑀼𑀢𑁆𑀢𑀺𑀬𑀸𑀏𑀯 𑀞𑀸𑀢𑀩𑁆𑀩𑀢𑁄𑀢𑀺. 𑀬𑀲𑁆𑀫𑀸𑀘 𑀭𑀽𑀧𑀥𑀫𑁆𑀫𑀸 𑀦𑀸𑀫 𑀤𑀦𑁆𑀥𑀧𑀯𑀢𑁆𑀢𑀺𑀦𑁄 𑀳𑁄𑀦𑁆𑀢𑀺. 𑀅𑀭𑀽𑀧𑀥𑀫𑁆𑀫𑀸 𑀮𑀳𑀼𑀧𑀯𑀢𑁆𑀢𑀺𑀦𑁄 𑀞𑀺𑀢𑀺𑀓𑁆𑀔𑀡𑁄𑀘 𑀢𑁂𑀲𑀁 𑀯𑀺𑀲𑀼𑀁 𑀕𑀡𑀦𑀽𑀧𑀕𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀬𑁂𑀯 𑀭𑀽𑀧 𑀥𑀫𑁆𑀫𑀸𑀦𑀁 𑀔𑀡𑀧𑀩𑀦𑁆𑀥𑁄. 𑀅𑀜𑁆𑀜𑁄 𑀅𑀭𑀽𑀧𑀥𑀫𑁆𑀫𑀸𑀦𑀁. 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀭𑀽𑀧𑀥𑀫𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀧𑀭𑀺𑀫𑀸𑀡𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀬𑀼𑀢𑁆𑀢𑀸 𑀔𑀡𑁂 𑀔𑀡𑁂 𑀦𑀺𑀭𑀦𑁆𑀢𑀭𑀫𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀲𑀳𑀼𑀧𑁆𑀧𑀦𑁆𑀦𑀢𑁆𑀢𑀸𑀘 𑀧𑀦 𑀤𑁆𑀯𑀺𑀦𑁆𑀦𑀁 𑀢𑁂𑀲𑀁 𑀉𑀧𑁆𑀧𑀸𑀤𑀸𑀤𑀺𑀯𑀸 𑀦𑀺𑀭𑁄𑀥𑀦𑁆𑀢𑁄𑀯𑀸 𑀬𑀸𑀯𑀚𑀻𑀯𑀁𑀧𑀺𑀲𑀳𑁂𑀯 𑀳𑁄𑀢𑀻𑀢𑀺𑀧𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄𑀢𑀺. 𑀬𑀫𑀓 𑀧𑀸𑀴𑀺𑀬𑁄 𑀧𑀦 𑀦𑀸𑀦𑀸𑀢𑁆𑀣𑀸, 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀕𑀫𑁆𑀪𑀻𑀭𑁄𑀘 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀦 𑀧𑀦 𑀥𑀫𑁆𑀫𑀢𑀸 𑀏𑀲𑀸 𑀬𑀫𑀓𑀲𑁆𑀲. 𑀬𑀤𑀺𑀤𑀁 𑀬𑀣𑀸𑀮𑀸𑀪𑀬𑁄𑀚𑀦𑀸𑀢𑀺 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀬𑀫𑀓𑀧𑀸𑀞𑀁 𑀬𑀣𑀸𑀮𑀸𑀪𑀬𑁄 𑀚𑀦𑀸𑀬𑀏𑀯 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀺𑀲𑁂𑀲𑀪𑀽𑀢𑀁 𑀅𑀭𑀽𑀧𑀓𑀼𑀲𑀮𑀁 𑀢𑀲𑁆𑀫𑀺𑀁 𑀮𑁄𑀓𑁂 𑀭𑀽𑀧𑀲𑀳𑀺𑀢𑀁 𑀧𑀝𑀺𑀲𑀦𑁆𑀥𑀺𑀁 𑀦𑀚𑀦𑁂𑀢𑀺. 𑀲𑀼𑀤𑁆𑀥𑀅𑀭𑀽𑀧𑀫𑁂𑀯 𑀚𑀦𑁂𑀢𑀺. 𑀢𑀲𑁆𑀫𑀸 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀲𑁆𑀲 𑀲𑀩𑁆𑀩𑀲𑁄 𑀅𑀪𑀸𑀯𑀸 𑀢𑀢𑁆𑀭𑀼𑀧𑁆𑀧𑀦𑁆𑀦𑀸𑀦𑀺 𑀲𑀩𑁆𑀩𑀸𑀦𑀺 𑀙𑀘𑀢𑁆𑀢𑀸𑀮𑀻𑀲𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀚𑀦𑁂𑀢𑀼𑀁 𑀦 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀭𑀽𑀧𑀯𑀺𑀧𑀸𑀓𑀸 𑀧𑀦 𑀢𑀢𑁆𑀣𑁂𑀯 𑀦𑀺𑀬𑀫𑀼𑀧𑁆𑀧𑀦𑁆𑀦𑀸𑀢𑀺 𑀅𑀭𑀽𑀧𑀧𑀸𑀓𑀲𑁆𑀲𑁂𑀯 𑀕𑀳𑀡𑀁 𑀓𑀢𑀁, 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁, 𑀅𑀜𑁆𑀜𑀸𑀦𑀺𑀧𑀺 𑀩𑀳𑀽𑀦𑀺 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑀸𑀦𑀺 𑀅𑀦𑁄𑀓𑀸𑀲𑀢𑁆𑀣𑀸 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀅𑀦𑁄𑀓𑀸𑀲𑀢𑀸𑀦𑀸𑀫 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑀦𑁆𑀢𑀢𑀺𑀲𑀻𑀲𑀲𑁆𑀲 𑀅𑀪𑀸𑀯𑁄 𑀏𑀯 𑀤𑀝𑁆𑀞𑀩𑁆𑀩𑁄𑀢𑀺.

[𑁧𑁮𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀳𑁂𑀢𑀼𑀦𑁄 𑀢𑀩𑁆𑀩𑀺𑀥𑀼𑀭𑀢𑀸𑀬𑀸’’𑀢𑀺𑀧𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅𑀓𑀸𑀭𑀡𑀁.

𑀭𑀽𑀧𑀸𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀪𑀽𑀢𑀫𑀕𑁆𑀕𑀦𑀺𑀩𑁆𑀩𑀢𑁆𑀢𑀲𑁆𑀲 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀲𑁆𑀲 𑀭𑀽𑀧𑁄𑀓𑀸𑀲𑁂 𑀲𑀢𑀺 𑀭𑀽𑀧𑀚𑀦𑀓𑀢𑀸𑀤𑀲𑁆𑀲𑀦𑀢𑁄𑀢𑀺. 𑀛𑀸𑀦𑀗𑁆𑀕𑀯𑀺𑀭𑀳𑁂𑀦 𑀅𑀗𑁆𑀕𑀤𑀼𑀩𑁆𑀩𑀮𑀸𑀦𑀺𑀧𑀺 𑀭𑀽𑀧𑀁 𑀦 𑀚𑀦𑁂𑀦𑁆𑀢𑀻𑀢𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀕𑀳𑀡𑀁 𑀓𑀢𑀁. 𑀇𑀢𑀭𑀸 𑀦𑀺𑀧𑀺 𑀧𑀦 𑀧𑀦𑁆𑀦𑀭𑀲𑀓𑀸𑀫𑀭𑀽𑀧 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺 𑀔𑀻𑀡𑀸𑀲𑀯𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀘𑀼𑀢𑀺 𑀘𑀺𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀘𑀺𑀢𑁆𑀢𑀸𑀦𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺𑀬𑁂𑀯. 𑀏𑀯𑀁𑀲𑀦𑁆𑀢𑁂𑀧𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀪𑀯𑀗𑁆𑀕𑀓𑀸𑀮𑁂 𑀅𑀔𑀻𑀡𑀸𑀲𑀯𑀸𑀦𑀜𑁆𑀘 𑀘𑀼𑀢𑀺𑀓𑀸𑀮𑁂 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀢𑁂𑀲𑀁 𑀇𑀥 𑀅𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

[𑁧𑁯𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀦 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀏𑀓𑀽𑀦𑀯𑀻𑀲𑀢𑀺 𑀪𑀯𑀗𑁆𑀕𑀲𑁆𑀲𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 𑀘𑀺𑀢𑁆𑀢𑀦𑁆𑀢𑀭𑀁 𑀦 𑀳𑁄𑀢𑀻𑀢𑀺 𑀦 𑀢𑀲𑁆𑀲 𑀯𑀚𑁆𑀚𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀽𑀦𑀯𑀻𑀲𑀢𑀺 𑀪𑀯𑀗𑁆𑀕𑀲𑁆𑀲𑁂𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁.

𑀅𑀭𑀽𑀧𑀯𑀺𑀧𑀸𑀓𑀲𑁆𑀲 𑀲𑀭𑀽𑀧𑀢𑁄 𑀯𑀚𑁆𑀚𑀺𑀢𑀢𑁆𑀢𑀸𑀢𑀺. 𑀓𑀲𑁆𑀫𑀸 𑀧𑀦 𑀬𑀣𑀸 𑀯𑀼𑀢𑁆𑀢𑀸𑀦𑀺 𑀧𑀦𑁆𑀦𑀭𑀲 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺, 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸. 𑀘𑀺𑀢𑁆𑀢𑀜𑁆𑀳𑀺𑀦𑀸𑀫 𑀉𑀧𑁆𑀧𑀸𑀤𑀓𑁆𑀔𑀡𑁂𑀏𑀯 𑀧𑀭𑀺𑀧𑀼𑀡𑁆𑀡𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀩𑀮𑀯𑀁 𑀳𑁄𑀢𑀺. 𑀭𑀽𑀧𑀜𑁆𑀘 𑀞𑀺𑀢𑀺𑀓𑁆𑀔𑀡𑁂𑀯.

𑀢𑀲𑁆𑀫𑀸 𑀅𑀢𑁆𑀢𑀦𑁄 𑀩𑀮𑀯𑀦𑁆𑀢𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀪𑀸𑀯𑁂𑀦 𑀤𑀼𑀩𑁆𑀩𑀮𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀲𑀬𑀁𑀧𑀺 𑀧𑀭𑀺𑀤𑀼𑀩𑁆𑀩𑀮𑀁 𑀳𑁄𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀢𑀤𑀸 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸 𑀧𑁂𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀓𑁂𑀘𑀺 𑀅𑀦𑀦𑁆𑀢𑀭𑀸𑀲𑁂𑀯𑀦𑀸𑀤𑀺𑀧𑀘𑁆𑀘𑀬𑀸 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀏𑀯 𑀨𑀭𑀦𑁆𑀢𑀺. 𑀭𑀽𑀧𑀲𑁆𑀲 𑀧𑀦 𑀉𑀧𑀢𑁆𑀣𑀫𑁆𑀪𑀓𑀪𑀽𑀢𑀸 𑀉𑀢𑀼𑀆𑀳𑀸𑀭𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀥𑀫𑁆𑀫𑀸𑀘 𑀞𑀺𑀢𑀺𑀓𑁆𑀔𑀡𑁂𑀏𑀯𑀨𑀭𑀦𑁆𑀢𑀻𑀢𑀺 𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺𑀓𑁆𑀔𑀡𑁂𑀘 𑀧𑀭𑀺𑀧𑀼𑀡𑁆𑀡𑀧𑀘𑁆𑀘𑀬𑀮𑀸𑀪𑁄 𑀯𑁂𑀤𑀺𑀢𑀩𑁆𑀩𑁄.

[𑁧𑁯𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑀭𑀳𑀺𑀢𑀁 𑀧𑀦 𑀆𑀳𑀸𑀭𑀸𑀤𑀻𑀳𑀺𑀘 𑀅𑀦𑀼𑀧𑀢𑁆𑀣𑀤𑁆𑀥𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑁄𑀘 𑀆𑀕𑀦𑁆𑀢𑀼𑀓𑀢𑀸𑀬 𑀓𑀫𑁆𑀫𑀚𑀭𑀽𑀧𑁂𑀳𑀺𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀞𑀸𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬 𑀭𑀳𑀺𑀢𑀦𑁆𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬 𑀭𑀳𑀺𑀢𑀲𑁆𑀲 𑀧𑀺𑀉𑀢𑀼𑀲𑁆𑀲 𑀭𑀽𑀧𑀚𑀦𑀓𑀪𑀸𑀯𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀦 𑀳𑀺 𑀅𑀢𑁆𑀢𑀦𑀸 𑀅𑀯𑀺𑀚𑁆𑀚𑀫𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑁂 𑀞𑀺𑀢𑀲𑁆𑀲 𑀓𑀲𑁆𑀲𑀘𑀺 𑀭𑀽𑀧𑀲𑁆𑀲 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀢𑁆𑀣𑀺 𑀧𑀘𑁆𑀘𑀬𑁂𑀓𑀤𑁂𑀲𑀢𑁆𑀢𑀸 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲𑀸𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀦 𑀧𑀓𑀢𑀺𑀬𑀸𑀯 𑀯𑀽𑀧𑀲𑀦𑁆𑀢𑀯𑀝𑁆𑀝𑀫𑀽𑀮𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑁆𑀢𑀸 𑀲𑀦𑁆𑀢𑀢𑀭𑀁 𑀳𑁄𑀢𑀺. 𑀧𑀼𑀦 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀓𑁆𑀔𑀬𑁂𑀦 𑀤𑀼𑀩𑁆𑀩𑀮𑀢𑀭𑁂 𑀧𑀭𑀺𑀬𑀦𑁆𑀢𑀕𑀢𑁂 𑀘 𑀯𑀢𑁆𑀣𑀼𑀫𑁆𑀳𑀺 𑀦𑀺𑀲𑁆𑀲𑀺𑀢𑀢𑁆𑀢𑀸 𑀤𑀼𑀩𑁆𑀩𑀮𑀢𑀭𑀜𑁆𑀘 𑀳𑁄𑀢𑀻𑀢𑀺 𑀢𑀁 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺, 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀲𑀩𑁆𑀩𑀲𑀢𑁆𑀢𑀸𑀦𑀁𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀇𑀘𑁆𑀙𑀢𑀺. 𑀬𑀣𑀸𑀳-𑀔𑀻𑀡𑀸𑀲𑀯𑀸𑀦𑀁 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀬𑁂𑀘 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁, 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀯𑀘𑀻 𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄𑀘 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑁋

𑀧𑀦 𑀯𑀘𑀦𑀢𑁄 𑀅𑀜𑁆𑀜𑁂𑀲𑀁𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓 𑀘𑀺𑀢𑁆𑀢𑀲𑁆𑀲 𑀕𑀩𑁆𑀪𑀕𑀫𑀦𑀸𑀤𑀺 𑀯𑀺𑀦𑀺𑀩𑀤𑁆𑀥𑀸𑀪𑀸𑀯𑁂 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀁 𑀅𑀢𑁆𑀣𑀺, 𑀦 𑀘 𑀬𑀼𑀢𑁆𑀢𑀁 𑀘𑀼𑀢𑁄𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘𑀲𑁆𑀲 𑀧𑀯𑀢𑁆𑀢𑀢𑀻𑀢𑀺. 𑀦𑀸𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀧𑀸𑀴𑀺 𑀅𑀢𑁆𑀣𑀻𑀢𑀺.

𑀅𑀦𑀼𑀝𑀻𑀓𑀸𑀬𑀁 𑀧𑀦

𑀢𑀲𑁆𑀫𑀺𑀁 𑀧𑀸𑀞𑁂 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁 𑀦𑁄𑀘 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑀯𑀘𑀦𑀁 𑀦 𑀓𑁂𑀯𑀮𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑁂𑀯 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀸𑀪𑀸𑀯𑀁 𑀲𑀸𑀥𑁂𑀢𑀺, 𑀅𑀣𑀔𑁄 𑀢𑀢𑁄 𑀧𑀼𑀭𑀺𑀫𑀸𑀦𑀁 𑀲𑀩𑁆𑀩𑁂𑀲𑀁 𑀫𑀭𑀡𑀸𑀲𑀦𑁆𑀦 𑀘𑀺𑀢𑁆𑀢𑀸𑀦𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀸𑀪𑀸𑀯𑀁𑀧𑀺 𑀲𑀸𑀥𑁂𑀢𑀺𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀘𑀼𑀢𑀺 𑀘𑀺𑀢𑁆𑀢𑀲𑁆𑀫𑀺𑀁𑀳𑀺 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀦𑀺𑀭𑁄𑀥𑁂 𑀧𑀝𑀺𑀲𑀺𑀤𑁆𑀥𑁂 𑀢𑀢𑁄 𑀧𑀼𑀩𑁆𑀩𑁂 𑀬𑀸𑀯 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀸 𑀏𑀢𑁆𑀣𑀦𑁆𑀢𑀭𑁂 𑀢𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀧𑀝𑀺𑀲𑀺𑀤𑁆𑀥𑁄𑀏𑀯 𑀳𑁄𑀢𑀻𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀯𑀼𑀘𑁆𑀘𑀢𑀺. 𑀲𑁄𑀘 𑀲𑀼𑀝𑁆𑀞𑀼 𑀑𑀴𑀸𑀭𑀺𑀓𑁄 𑀭𑀽𑀧𑀥𑀫𑁆𑀫𑁄𑀢𑀺 𑀦𑀘𑀼𑀢𑀺𑀘𑀺𑀢𑁆𑀢𑁂 𑀢𑀦𑁆𑀦𑀺𑀭𑁄𑀥𑀸𑀪𑀸𑀯 𑀯𑀘𑀦𑁂𑀦 𑀇𑀢𑀭𑀸𑀦𑀺 𑀲𑀼𑀔𑀼𑀫𑀸𑀦𑀺𑀧𑀺 𑀭𑀽𑀧𑀸𑀦𑀺 𑀘𑀼𑀢𑀺𑀘𑀺𑀢𑁆𑀢𑀁 𑀦𑀚𑀦𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁.

[𑁧𑁯𑁨] 𑀬𑀜𑁆𑀘 𑀢𑀢𑁆𑀣

𑀦 𑀳𑀺 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑁆𑀲 𑀕𑀩𑁆𑀪𑀕𑀫𑀦𑀸𑀤𑀺 𑀯𑀺𑀦𑀺𑀩𑀤𑁆𑀥𑀸𑀪𑀸𑀯𑁂 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀁 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺.

𑀢𑀸𑀦𑀺𑀏𑀯 𑀳𑀺 𑀕𑀩𑁆𑀪𑀕𑀫𑀦𑀸𑀤𑀻𑀦𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀸𑀦𑀺 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀺 𑀑𑀴𑀸𑀭𑀺𑀓𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀲𑁆𑀲 𑀅𑀲𑀫𑀼𑀝𑁆𑀞𑀸𑀧𑀓𑀁𑀧𑀺 𑀘𑀺𑀢𑁆𑀢𑀁 𑀇𑀢𑀭𑀁 𑀲𑀼𑀔𑀼𑀫𑀭𑀽𑀧𑀁 𑀧𑀦 𑀲𑀫𑀼𑀝𑁆𑀞𑀸𑀧𑁂𑀢𑀺𑀬𑁂𑀯𑀸𑀢𑀺.

[𑁧𑁯𑁩] 𑀬𑀁𑀧𑀺 𑀢𑀢𑁆𑀣

𑀦 𑀘 𑀬𑀼𑀢𑁆𑀢𑀁 𑀘𑀼𑀢𑁄𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀜𑁆𑀘𑀲𑁆𑀲 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀓𑀸𑀭𑀡𑀁.

𑀦 𑀳𑀺 𑀘𑀼𑀢𑀺𑀢𑁄 𑀧𑀭𑀁 𑀓𑀢𑀺𑀧𑀬𑀔𑀡𑀫𑀢𑁆𑀢𑀁 𑀘𑀺𑀢𑁆𑀢𑀚𑀭𑀽𑀧𑀧𑀯𑀢𑁆𑀢𑀺𑀬𑀸 𑀓𑁄𑀘𑀺 𑀯𑀺𑀭𑁄𑀥𑁄 𑀅𑀢𑁆𑀣𑀻𑀢𑀺.

𑀬𑀜𑁆𑀘 𑀢𑀢𑁆𑀣

𑀦𑀸𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀧𑀸𑀴𑀺 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀧𑀺 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺𑀧𑀺 𑀦𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀓𑀸𑀬𑀲𑀗𑁆𑀔𑀸𑀭𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀏𑀯𑀁 𑀧𑀦 𑀬𑀼𑀢𑁆𑀢𑀁 𑀲𑀺𑀬𑀸, 𑀬𑀣𑀸 𑀭𑀽𑀧𑀥𑀫𑁆𑀫𑀸 𑀆𑀤𑀺𑀢𑁄 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑁂 𑀧𑀘𑁆𑀘𑀬𑀧𑀭𑀺𑀢𑁆𑀢𑀢𑀸𑀬𑀯𑀸 𑀅𑀢𑁆𑀢𑀦𑁄 𑀤𑀦𑁆𑀥𑀯𑀼𑀢𑁆𑀢𑀺 𑀢𑀸𑀬𑀯𑀸 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀭𑀺𑀬𑁄𑀲𑀸𑀦𑁂𑀧𑀺 𑀫𑀭𑀡𑀓𑀸𑀮𑁂 𑀧𑀭𑀺𑀓𑁆𑀔𑀻𑀬𑀫𑀸𑀦𑀧𑀘𑁆𑀘𑀬𑀢𑀸𑀬𑀯𑀸 𑀦𑀺𑀭𑁄𑀥𑀸𑀲𑀦𑁆𑀦𑀢𑀸𑀬𑀯𑀸 𑀧𑀭𑀺𑀤𑀼𑀩𑁆𑀩𑀮𑀸𑀏𑀯 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀲𑁆𑀫𑀸 𑀯𑀢𑁆𑀣𑀼𑀲𑁆𑀲 𑀆𑀤𑀺𑀅𑀦𑁆𑀢𑀦𑀺𑀲𑁆𑀲𑀺𑀢𑀸𑀦𑀺 𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀘𑀺𑀢𑁆𑀢𑀸𑀦𑀺 𑀲𑀫𑀤𑀼𑀩𑁆𑀩𑀮𑀸𑀦𑀺𑀏𑀯 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀓𑀸𑀲𑀦𑀺𑀬𑀜𑁆𑀘 𑀧𑀸𑀴𑀺𑀯𑀺𑀭𑁄𑀥𑀁 𑀫𑀜𑁆𑀜𑀫𑀸𑀦𑁄 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀝𑀻𑀓𑀸𑀲𑀼 𑀯𑀼𑀢𑁆𑀢𑀦𑀬𑀫𑁂𑀯 𑀲𑀼𑀝𑁆𑀞𑀼 𑀯𑀺𑀓𑀸𑀲𑀬𑀺𑀢𑁆𑀯𑀸 𑀕𑀢𑁄𑀢𑀺.

𑀧𑀣𑀫𑀪𑀯𑀗𑁆𑀕𑀫𑀼𑀧𑀸𑀤𑀸𑀬𑀸𑀢𑀺 𑀧𑀣𑀫 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀧𑀝𑁆𑀞𑀸𑀬. 𑀚𑀸𑀬𑀦𑁆𑀢𑀫𑁂𑀯𑀸𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚 𑀫𑀸𑀦𑀫𑁂𑀯, 𑀦 𑀢𑀺𑀝𑁆𑀞𑀦𑁆𑀢𑀁. 𑀦𑀘 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀜𑁆𑀘𑀲𑀢𑁆𑀢𑀢𑀺𑀯𑀺𑀥𑁂 𑀘𑀺𑀢𑁆𑀢𑁂. 𑀅𑀧𑁆𑀧𑀦𑀸𑀚𑀯𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀤𑁆𑀯𑀬𑀯𑀚𑁆𑀚𑀺𑀢𑀁 𑀙𑀩𑁆𑀩𑀻𑀲𑀢𑀺𑀯𑀺𑀥𑀁 𑀅𑀧𑁆𑀧𑀦𑀸𑀚𑀯𑀦𑀘𑀺𑀢𑁆𑀢𑀁. 𑀇𑀭𑀺𑀬𑀸𑀧𑀣𑀦𑁆𑀢𑀺 𑀕𑀫𑀦𑀯𑀚𑁆𑀚𑀺𑀢𑀁 𑀢𑀺𑀯𑀺𑀥𑀁𑀧𑀺 𑀇𑀭𑀺𑀬𑀸𑀧𑀣𑀁.

[𑁧𑁯𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀕𑀫𑀦𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀘𑀮𑀦𑀨𑀦𑁆𑀤𑀦𑀫𑀢𑁆𑀢𑀁𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀦𑀸 𑀲𑀺𑀚𑁆𑀛𑀢𑀺. 𑀓𑀼𑀢𑁄 𑀕𑀫𑀦𑀁. 𑀦𑀘 𑀬𑀣𑀸𑀯𑀼𑀢𑁆𑀢𑀁 𑀅𑀧𑁆𑀧𑀦𑀸𑀚𑀯𑀦𑀁 𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺. 𑀧𑀺 𑀲𑀤𑁆𑀤𑁂𑀦 𑀢𑀁 𑀦𑀓𑁂𑀯𑀮𑀁 𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀫𑀢𑁆𑀢𑀁𑀢𑀺 𑀤𑀲𑁆𑀲𑁂𑀢𑀺. 𑀲𑀦𑁆𑀦𑀸𑀫𑁂𑀢𑀻𑀢𑀺 𑀲𑀦𑁆𑀥𑀸𑀭𑁂𑀢𑀺 𑀅𑀬𑀫𑁂𑀯𑀯𑀸 𑀧𑀸𑀞𑁄 𑀲𑀺𑀬𑀸, 𑀯𑀓𑁆𑀔𑀫𑀸𑀦𑁂𑀳𑀺 𑀘𑀺𑀢𑁆𑀢𑁂𑀳𑀺 𑀅𑀪𑀺𑀲𑀗𑁆𑀔𑀢𑀁 𑀬𑀣𑀸𑀧𑀯𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀅𑀧𑀢𑀫𑀸𑀦𑀁 𑀅𑀘𑀮𑀫𑀸𑀦𑀁 𑀥𑀸𑀭𑁂𑀢𑀺 𑀉𑀧𑀢𑁆𑀣𑀫𑁆𑀪𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀢𑁆𑀣𑀫𑁆𑀪𑀦𑀜𑁆𑀘𑁂𑀢𑁆𑀣 𑀬𑀣𑀸𑀧𑀯𑀢𑁆𑀢𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀭𑀓𑁆𑀔𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀦𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀬 𑀅𑀪𑀺𑀦𑀻𑀳𑀭𑀡𑀁. 𑀇𑀢𑀭𑀣𑀸 𑀣𑀫𑁆𑀪𑀦𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀲𑀗𑁆𑀕𑁄 𑀲𑀺𑀬𑀸𑀢𑀺. 𑀏𑀢𑁆𑀣𑀘 𑀬𑀣𑀸𑀦𑀺𑀲𑀺𑀦𑁆𑀦𑀲𑁆𑀲𑀯𑀸 𑀞𑀺𑀢𑀲𑁆𑀲𑀯𑀸 𑀪𑀯𑀗𑁆𑀕 𑀘𑀺𑀢𑁆𑀢𑁂 𑀅𑀩𑁆𑀩𑁄𑀓𑀺𑀡𑁆𑀡𑁂 𑀧𑀯𑀢𑁆𑀢𑀫𑀸𑀦𑁂 𑀅𑀗𑁆𑀕𑀸𑀦𑀺 𑀑𑀲𑀻𑀤𑀦𑁆𑀢𑀺 𑀧𑀢𑀦𑁆𑀢𑀺. 𑀦 𑀢𑀣𑀸 𑀇𑀫𑀲𑁆𑀫𑀺𑀁 𑀙𑀩𑁆𑀩𑀻𑀲𑀢𑀺𑀯𑀺𑀥𑁂 𑀚𑀸𑀕𑀭𑀡𑀘𑀺𑀢𑁆𑀢𑁂 𑀯𑀓𑁆𑀔𑀫𑀸𑀦𑁂𑀲𑀼𑀘𑀤𑁆𑀯𑀢𑁆𑀢𑀺𑀁𑀲 𑀯𑀺𑀥𑁂𑀲𑀼 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼𑀧𑀯𑀢𑁆𑀢𑀫𑀸𑀦𑁂𑀲𑀼. 𑀢𑁂𑀲𑀼 𑀧𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 𑀅𑀗𑁆𑀕𑀸𑀦𑀺 𑀉𑀧𑀢𑁆𑀣𑀤𑁆𑀥𑀸𑀦𑀺 𑀳𑁄𑀦𑁆𑀢𑀺. 𑀦 𑀑𑀲𑀻𑀤𑀦𑁆𑀢𑀺 𑀦 𑀧𑀢𑀦𑁆𑀢𑀺. 𑀧𑀼𑀩𑁆𑀩𑁂 𑀬𑀣𑀸 𑀣𑀧𑀺𑀢𑀸𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

[𑁧𑁯𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀦 𑀏𑀯 𑀫𑁂𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑁂𑀲𑀼 𑀯𑀓𑁆𑀔𑀫𑀸𑀦𑁂𑀲𑀼 𑀘 𑀙𑀩𑁆𑀩𑀻𑀲𑀢𑀺 𑀬𑀸 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀽’’𑀢𑀺 𑀧𑀸𑀞𑁄.

𑀦 𑀏𑀯𑀫𑁂𑀢𑁂𑀲𑀼 𑀙𑀩𑁆𑀩𑀻𑀲𑀢𑀺𑀬𑀸 𑀚𑀸𑀕𑀭𑀡𑀘𑀺𑀢𑁆𑀢𑁂𑀲𑀼 𑀯𑀓𑁆𑀔𑀫𑀸𑀦𑁂 𑀲𑀼𑀘 𑀤𑁆𑀯𑀢𑁆𑀢𑀺𑀁𑀲 𑀯𑀺𑀥𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀽𑀢𑀺 𑀧𑀦 𑀧𑀸𑀞𑁄 𑀬𑀼𑀢𑁆𑀢𑁄. 𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀫𑀸𑀳. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺 𑀚𑀯𑀦 𑀘𑀺𑀢𑁆𑀢𑀸𑀦𑀺𑀧𑀺 𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺. 𑀇𑀭𑀺𑀬𑀸𑀧𑀣𑀼𑀧𑀢𑁆𑀣𑀫𑁆𑀪𑀦 𑀫𑀢𑁆𑀢𑀁 𑀯𑀸 𑀧𑀺𑀲𑀤𑁆𑀤𑁂𑀦 𑀕𑀳𑀺𑀣𑀁 𑀲𑀦𑁆𑀥𑀸𑀬 𑀯𑁄𑀝𑁆𑀞𑀩𑁆𑀩𑀦𑀸𑀤𑀻𑀦𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺𑀧𑀺 𑀕𑀳𑀺𑀢𑀸𑀦𑀺𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀇𑀭𑀺𑀬𑀸𑀧𑀣𑁄𑀦𑀸𑀫 𑀕𑀫𑀦𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸𑀏𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀺𑀜𑁆𑀘𑀺𑀘𑀺𑀢𑁆𑀢𑀁 𑀭𑀽𑀧 𑀲𑀸𑀫𑀜𑁆𑀜𑀫𑁂𑀯 𑀚𑀦𑁂𑀢𑀺 𑀦 𑀢𑀢𑁄𑀧𑀭𑀁. 𑀓𑀺𑀜𑁆𑀘𑀺 𑀅𑀜𑁆𑀜𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀬𑀣𑀸𑀧𑀯𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀭𑀓𑁆𑀔𑀺𑀢𑀼𑀁𑀏𑀯 𑀲𑀓𑁆𑀓𑁄𑀢𑀺, 𑀦 𑀅𑀧𑁆𑀧𑀯𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀼𑀁. 𑀓𑀺𑀜𑁆𑀘𑀺 𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀜𑁆𑀘 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀜𑁆𑀜𑀸𑀦𑀺𑀘 𑀓𑀸𑀬𑀺𑀓 𑀯𑀸𑀘𑀲𑀺𑀓 𑀯𑀺𑀓𑀸𑀭𑀸𑀦𑀺 𑀚𑀦𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀸𑀦𑀺𑀘 𑀘𑀺𑀢𑁆𑀢𑀸𑀦𑀺 𑀉𑀢𑁆𑀢𑀭𑀓𑀺𑀘𑁆𑀘𑀁 𑀚𑀦𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀸𑀦𑀺 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀁 𑀓𑀺𑀘𑁆𑀘𑀁 𑀚𑀦𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀯𑀺𑀪𑀸𑀕𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

[𑁧𑁯𑁬] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀬𑀁𑀧𑀦 𑀘𑀺𑀢𑁆𑀢𑀁 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀁, 𑀢𑀁 𑀏𑀓𑀁𑀲𑀢𑁄 𑀇𑀭𑀺𑀬𑀸𑀧𑀣𑀼 𑀧𑀢𑁆𑀣𑀫𑁆𑀪𑀓𑀁. 𑀇𑀭𑀺𑀬𑀸 𑀧𑀣𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳 𑀅𑀯𑀺𑀦𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀇𑀥 𑀳𑀺 𑀇𑀭𑀺𑀬𑀸𑀧𑀣𑀼𑀧𑀢𑁆𑀣𑀫𑁆𑀪𑀦𑀁𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑀫𑁂𑀯𑀸 𑀥𑀺𑀧𑁆𑀧𑁂𑀢𑀁, 𑀦 𑀯𑀺𑀜𑁆𑀜𑀢𑁆𑀢𑀺𑀲𑀳𑀺𑀢𑀁. 𑀇𑀢𑀭𑀣𑀸 𑀅𑀧𑁆𑀧𑀦𑀸𑀚𑀯𑀦𑀸𑀦𑀁𑀧𑀺 𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀲𑁄𑀫𑀦𑀲𑁆𑀲𑀚𑀯𑀦𑀸𑀦𑀺 𑀢𑁂𑀭𑀲𑀸𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑁂𑀦 𑀲𑀤𑁆𑀥𑀺𑀁 𑀮𑁄𑀪𑀫𑀽𑀮𑀢𑁄 𑀫𑀳𑀸 𑀓𑀼𑀲𑀮𑀢𑁄 𑀫𑀳𑀸 𑀓𑁆𑀭𑀺𑀬𑀢𑁄 𑀘 𑀘𑀢𑁆𑀢𑀸𑀭𑀺𑀘𑀢𑁆𑀢𑀸𑀭𑀻𑀢𑀺 𑀢𑁂𑀭𑀲 𑀲𑁄𑀫𑀦𑀲𑁆𑀲𑀚𑀯𑀦𑀸𑀦𑀺. 𑀢𑁂𑀲𑀼𑀧𑀦 𑀓𑀼𑀲𑀮𑀸 𑀓𑀼𑀲𑀮𑀢𑁄 𑀅𑀝𑁆𑀞𑀧𑀼𑀣𑀼𑀚𑁆𑀚𑀦𑀸𑀦𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀓𑀼𑀲𑀮𑀢𑁄 𑀙𑀲𑁂𑀓𑁆𑀔𑀸𑀦𑀁. 𑀓𑁆𑀭𑀺𑀬𑀢𑁄 𑀧𑀜𑁆𑀘𑀔𑀻𑀡𑀸𑀲𑀯𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀯𑀘𑀦𑀢𑁄 𑀯𑀺𑀘𑀸𑀭𑀡𑀓𑀺𑀘𑁆𑀘𑀭𑀳𑀺𑀢𑁄 𑀳𑀲𑀺𑀢𑀼𑀧𑁆𑀧𑀸𑀤𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀦𑀲𑀫𑁆𑀪𑀯𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀯𑀸𑀤𑁄 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯. 𑀢𑀲𑁆𑀫𑀺𑀁𑀯𑀸𑀤𑁂 𑀳𑀺 𑀲𑀢𑀺 𑀇𑀢𑀭𑁂𑀲𑀁𑀧𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀫𑀳𑀸 𑀓𑁆𑀭𑀺𑀬𑀚𑀯𑀦𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀅𑀲𑀫𑁆𑀪𑀯𑁄 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀲𑁆𑀲 𑀲𑀺𑀢𑀓𑀫𑁆𑀫𑀲𑁆𑀲 𑀧𑀼𑀩𑁆𑀩𑀸𑀧𑀭𑀧𑀯𑀢𑁆𑀢𑀸𑀦𑀁 𑀜𑀸𑀡𑀸𑀦𑀁 𑀯𑀲𑁂𑀦 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀲𑀻𑀢𑀼𑀡𑁆𑀳𑁄𑀢𑀼 𑀲𑀫𑀜𑁆𑀜𑀸𑀢𑀸𑀢𑀺 𑀇𑀤𑀁 𑀲𑀻𑀢𑀁 𑀇𑀤𑀁 𑀉𑀡𑁆𑀳𑀦𑁆𑀢𑀺 𑀏𑀯𑀁 𑀲𑀩𑁆𑀩 𑀮𑁄𑀓𑀺𑀬𑀫𑀳𑀸𑀚𑀦𑁂𑀳𑀺 𑀲𑀼𑀝𑁆𑀞𑀼 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀸. 𑀞𑀺𑀢𑀺𑀧𑁆𑀧𑀢𑁆𑀢𑀸𑀯𑀸𑀢𑀺 𑀅𑀢𑁆𑀢𑀦𑁄 𑀞𑀺𑀢𑀺𑀪𑀸𑀯𑀁 𑀞𑀺𑀢𑀺𑀓𑁆𑀔𑀡𑀁𑀯𑀸 𑀧𑀢𑁆𑀢𑀸𑀏𑀯. 𑀦 𑀧𑀦 𑀘𑀺𑀢𑁆𑀢𑀫𑀺𑀯 𑀚𑀸𑀬𑀦𑁆𑀢 𑀫𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯.

[𑁧𑁯𑁭] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀧𑀘𑁆𑀙𑀸𑀚𑀸𑀢𑀸𑀤𑀺𑀧𑀘𑁆𑀘𑀬𑀼𑀧𑀢𑁆𑀣𑀫𑁆𑀪𑀮𑀸𑀪𑁂𑀦 𑀞𑀺𑀢𑀺𑀓𑁆𑀔𑀡𑁂𑀏𑀯 𑀉𑀢𑀼𑀑𑀚𑀸𑀦𑀁 𑀩𑀮𑀯𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀢𑁂𑀚𑁄𑀥𑀸𑀢𑀼 𑀞𑀺𑀢𑀺𑀧𑁆𑀧𑀢𑁆𑀢𑀸𑀢𑀺𑀆𑀤𑀺’’. 𑀢𑀢𑁆𑀣 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀯𑀘𑀦𑀁 𑀳𑁂𑀝𑁆𑀞𑀸 𑀯𑀺𑀘𑀸𑀭𑀺𑀢𑀫𑁂𑀯.

𑀅𑀧𑀺𑀘, 𑀬𑀤𑀺 𑀉𑀢𑀼𑀦𑁄 𑀩𑀮𑀯𑀪𑀸𑀯𑁄 𑀭𑀽𑀧𑀼𑀧𑁆𑀧𑀸𑀤𑀦𑀜𑁆𑀘 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀸𑀬𑀢𑁆𑀢𑀁 𑀲𑀺𑀬𑀸. 𑀏𑀯𑀁 𑀲𑀢𑀺 𑀲𑁄 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀬𑁆𑀬, 𑀢𑀤𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀯𑀓𑁆𑀔𑀢𑀺𑀘 𑀞𑀺𑀢𑀺𑀓𑀸𑀮𑀫𑀼𑀧𑀸𑀤𑀸𑀬 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀢𑀺. 𑀏𑀢𑁆𑀣𑀘 𑀞𑀺𑀢𑀺𑀓𑀸𑀮𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀻𑀢𑀺𑀓𑀸𑀮𑁄 𑀯𑀼𑀢𑁆𑀢𑁄𑀢𑀺. 𑀢𑀲𑁆𑀫𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀯𑀘𑀦𑀁 𑀯𑀺𑀘𑀸𑀭𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀑𑀚𑀸𑀲𑀗𑁆𑀔𑀸𑀢𑁄 𑀆𑀳𑀸𑀭𑁄𑀢𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦 𑀕𑀢𑁄𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄, 𑀩𑀳𑀺𑀤𑁆𑀥𑀲𑀦𑁆𑀢𑀸 𑀦𑀕𑀢𑁄𑀘 𑀑𑀚𑀸𑀲𑀗𑁆𑀔𑀸𑀢𑁄 𑀤𑀼𑀯𑀺𑀥𑀸𑀳𑀸𑀭𑁄. 𑀢𑀤𑀼𑀪𑀬𑀸𑀧𑀺𑀘 𑀲𑀁𑀲𑀕𑁆𑀕 𑀯𑀲𑁂𑀦 𑀮𑀤𑁆𑀥𑀼𑀧𑀢𑁆𑀣𑀫𑁆𑀪𑀸 𑀏𑀯𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀅𑀚𑁆𑀛𑁄𑀳𑀭𑀡 𑀓𑀸𑀮𑁂𑀢𑀺. 𑀏𑀢𑁆𑀣𑀘 𑀩𑀳𑀺𑀤𑁆𑀥𑀸𑀲𑀫𑁆𑀪𑀽𑀢𑁂𑀦 𑀉𑀢𑀼𑀦𑀸 𑀲𑀳 𑀅𑀚𑁆𑀛𑀢𑁆𑀢 𑀲𑀫𑁆𑀪𑀽𑀢𑀸𑀦𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀁 𑀉𑀢𑀼𑀑𑀚𑀸𑀦𑀁 𑀯𑀺𑀬 𑀩𑀳𑀺𑀤𑁆𑀥𑀸𑀲𑀫𑁆𑀪𑀽𑀢𑀸𑀬 𑀑𑀚𑀸𑀬𑀧𑀺 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀫𑀼𑀝𑁆𑀞𑀸𑀦𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁.

𑀬𑀣𑀸𑀳-𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁

𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀢𑀸𑀯 𑀫𑀼𑀔𑁂 𑀣𑀧𑀺𑀢𑀫𑀢𑁆𑀢𑁄 𑀏𑀯 𑀅𑀝𑁆𑀞𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀤𑀦𑁆𑀢𑀯𑀺𑀘𑀼𑀡𑁆𑀡𑀺𑀢𑀁 𑀧𑀦 𑀅𑀚𑁆𑀛𑁄𑀳𑀭𑀻𑀬𑀫𑀸𑀦𑀁 𑀏𑀓𑁂𑀓𑀁 𑀲𑀺𑀢𑁆𑀣𑀁 𑀅𑀝𑁆𑀞 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺.

𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 𑀬𑀤𑀺 𑀩𑀳𑀺𑀤𑁆𑀥𑀲𑀫𑁆𑀪𑀽𑀢𑀸 𑀑𑀚𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬, 𑀏𑀯𑀁 𑀲𑀢𑀺 𑀬𑀣𑀸 𑀩𑀳𑀺𑀤𑁆𑀥𑀲𑀫𑁆𑀪𑀽𑀢𑁄 𑀉𑀢𑀼 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸𑀘 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀣𑀸 𑀲𑀸 𑀩𑀳𑀺𑀤𑁆𑀥𑀸𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀬𑁆𑀬. 𑀦 𑀧𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀲𑁆𑀫𑀸 𑀲𑀸 𑀅𑀚𑁆𑀛𑀢𑁆𑀢𑀁 𑀧𑀢𑁆𑀯𑀸𑀧𑀺 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸 𑀧𑁂𑀢𑀺𑀬𑁂𑀯. 𑀏𑀓𑀦𑁆𑀢𑁂𑀦 𑀧𑀦 𑀅𑀚𑁆𑀛𑀢𑁆𑀢𑀑𑀚𑀸𑀏𑀯 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀸 𑀧𑀦 𑀢𑀲𑁆𑀲𑀸 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑁄𑀏𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑀼𑀔𑁂 𑀣𑀧𑀺𑀢𑀫𑀢𑁆𑀢𑁄𑀏𑀯. 𑀦 𑀲𑀗𑁆𑀔𑀸𑀤𑀺𑀢𑁄. 𑀢𑀢𑁆𑀢𑀓𑁂𑀦𑀧𑀺 𑀅𑀩𑁆𑀪𑀦𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯, 𑀓𑁂𑀦𑀸𑀳 𑀅𑀝𑁆𑀞 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀫𑀚𑁆𑀛𑀺𑀫𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀉𑀧𑀸𑀤𑀺𑀦𑁆𑀦𑀓𑀸 𑀉𑀢𑀼 𑀑𑀚𑀸𑀦𑀸𑀫 𑀲𑀼𑀝𑁆𑀞𑀼 𑀧𑀡𑀻𑀢𑀭𑀽𑀧𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀺𑀤𑁆𑀥𑀸 𑀑𑀚𑀸𑀧𑀺 𑀅𑀚𑁆𑀛𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦 𑀉𑀢𑀼𑀦𑀸 𑀲𑀼𑀝𑁆𑀞𑀼 𑀲𑁂𑀤𑀺𑀬𑀫𑀸𑀦𑀸 𑀢𑀸𑀬𑀘 𑀑𑀚𑀸𑀬 𑀲𑀼𑀝𑁆𑀞𑀼 𑀉𑀧𑀢𑁆𑀣𑀫𑁆𑀪𑀻𑀬 𑀫𑀸𑀦𑀸 𑀲𑀭𑀻𑀭𑁂 𑀫𑁂𑀤𑀲𑀺𑀦𑁂𑀳𑀼𑀧𑀘𑀬𑀯𑀲𑁂𑀦 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺𑀬𑁂𑀯𑀸𑀢𑀺 𑀬𑀼𑀢𑁆𑀢𑀁. 𑀅𑀚𑁆𑀛𑁄𑀳𑀭𑀡𑀓𑀸𑀮𑁂𑀢𑀺 𑀇𑀤𑀜𑁆𑀘 𑀲𑀼𑀝𑁆𑀞𑀼 𑀩𑀮𑀯𑀪𑀸𑀯𑀧𑁆𑀧𑀢𑁆𑀢 𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 𑀫𑀸𑀢𑀭𑀸 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄𑀧𑀺 𑀤𑀸𑀭𑀓𑀲𑁆𑀲 𑀲𑀭𑀭𑀁 𑀨𑀭𑀺𑀢𑁆𑀯𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀭𑀻𑀭𑁂 𑀫𑀓𑁆𑀔𑀺𑀢𑀸𑀳𑀸 𑀭𑁄𑀧𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀼𑀔𑁂 𑀣𑀧𑀺𑀢𑀫𑀢𑁆𑀢𑁄𑀏𑀯 𑀅𑀝𑁆𑀞𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑁆𑀢𑀺. 𑀞𑀸𑀦 𑀧𑀢𑁆𑀢𑁄𑀯𑀸𑀢𑀺 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑀁 𑀧𑀢𑁆𑀢𑁄𑀏𑀯. 𑀏𑀢𑁆𑀣𑀘 𑀘𑀢𑀽𑀲𑀼 𑀲𑀫𑀼𑀝𑁆𑀞𑀸𑀦𑁂𑀲𑀼 𑀉𑀢𑀼𑀏𑀯 𑀫𑀳𑀦𑁆𑀢𑁄 𑀫𑀳𑀸𑀣𑀸𑀫𑁄 𑀫𑀳𑀸𑀯𑀺𑀧𑁆𑀨𑀸𑀭𑁄𑀘 𑀳𑁄𑀢𑀺. 𑀲𑁄 𑀳𑀺 𑀲𑀓𑀮𑀲𑁆𑀲𑀧𑀺 𑀑𑀓𑀸𑀲𑀮𑁄𑀓𑀲𑁆𑀲 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲𑀘 𑀲𑀫𑀼𑀝𑁆𑀞𑀸 𑀧𑀓𑁄 𑀯𑀺𑀦𑀸𑀲𑀓𑁄 𑀘 𑀳𑁄𑀢𑀺. 𑀲𑀢𑁆𑀢𑀮𑁄𑀓𑀲𑁆𑀲𑀘 𑀲𑁄𑀏𑀯 𑀫𑀳𑀦𑁆𑀢𑁄 𑀅𑀚𑁆𑀛𑀢𑁆𑀢𑀲𑀫𑁆𑀪𑀸𑀭𑀪𑀽𑀢𑁄 𑀳𑁄𑀢𑀺. 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀢𑀲𑁆𑀲 𑀧𑀭𑀺𑀯𑀸𑀭𑀫𑀢𑁆𑀢𑀸𑀦𑀺𑀏𑀯 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺.

𑀳𑀤𑀬 𑀇𑀦𑁆𑀤𑁆𑀭𑀺𑀬 𑀭𑀽𑀧𑀸𑀦𑀺 𑀓𑀫𑁆𑀫𑀚𑀸𑀦𑁂𑀯, 𑀦 𑀘𑀺𑀢𑁆𑀢𑀚𑀸𑀤𑀺𑀦𑀺. 𑀬𑀤𑀺𑀏𑀯𑀁 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀭𑁂𑀦 𑀢𑁆𑀯𑀁 𑀏𑀢𑀭𑀳𑀺 𑀯𑀺𑀳𑀸𑀭𑁂𑀦 𑀯𑀺𑀳𑀭𑀲𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀲𑀫𑁆𑀪𑀸𑀭𑀸𑀦𑀁 𑀯𑀡𑁆𑀡𑀸𑀦𑀁 𑀲𑀫𑀸𑀧𑀢𑁆𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸𑀦𑀁 𑀯𑀺𑀲𑀤𑀯𑀺𑀧𑁆𑀧𑀲𑀦𑁆𑀦𑀢𑀸𑀯𑀲𑁂𑀦 𑀉𑀧𑀘𑀭𑀺 𑀢𑀢𑁆𑀢𑀸𑀢𑀺. 𑀢𑀣𑀸 𑀳𑀺 𑀏𑀓𑀸𑀩𑀤𑁆𑀥𑀧𑀯𑀢𑁆𑀢𑀸𑀦𑀺 𑀘𑀢𑀼𑀚𑀭𑀽𑀧𑀸𑀦𑀺 𑀏𑀓𑀲𑁆𑀫𑀺𑀁 𑀯𑀺𑀧𑁆𑀧𑀲𑀦𑁆𑀦𑁂 𑀲𑀩𑁆𑀩𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺. 𑀫𑀺𑀮𑀸𑀢𑁂𑀘 𑀫𑀺𑀮𑀸𑀢𑀸𑀦𑁂𑀯𑀸𑀢𑀺. 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸 𑀧𑀦 𑀢𑁂𑀲𑀁 𑀦𑀯𑀦𑁆𑀦𑀁 𑀉𑀧𑀢𑁆𑀣𑀫𑁆𑀪𑀦𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀉𑀧𑁆𑀧𑀮𑀧𑀤𑀼𑀫𑀸𑀦𑀺 𑀯𑀺𑀬 𑀓𑀫𑁆𑀫𑀚𑀭𑀽𑀧𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑁂𑀲𑀁 𑀩𑀻𑀚𑀁 𑀯𑀺𑀬 𑀓𑀫𑁆𑀫𑀁. 𑀓𑀤𑁆𑀤𑀫𑁄𑀤𑀓𑀸𑀦𑀺 𑀯𑀺𑀬 𑀉𑀢𑀼𑀆𑀳𑀸𑀭𑀸𑀤𑀻𑀦𑀺. 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑀁 𑀘𑀺𑀢𑁆𑀢𑀚𑀫𑁂𑀯. 𑀢𑀣𑀸 𑀳𑀺 𑀢𑀁 𑀘𑀺𑀢𑁆𑀢𑀲𑀳𑀪𑀽 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀥𑀫𑁆𑀫𑁂𑀲𑀼 𑀪𑀕𑀯𑀢𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺. 𑀲𑀤𑁆𑀤𑁄𑀘𑀺𑀢𑁆𑀢𑁄𑀢𑀼𑀚𑁄𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼𑀦𑀺𑀥𑀺𑀓𑀡𑁆𑀟𑀲𑀼𑀢𑁆𑀢𑁂 𑀲𑀼𑀯𑀡𑁆𑀡𑀢𑀸 𑀲𑀼𑀲𑀭𑀢𑀸 𑀲𑀼𑀲𑀡𑁆𑀞𑀸𑀦𑀁 𑀲𑀼𑀭𑀽𑀧𑀢𑀸𑀢𑀺𑀆𑀤𑀺𑀦𑀸 𑀢𑀸𑀤𑀺𑀲𑁂𑀦 𑀓𑀫𑁆𑀫𑀯𑀺𑀲𑁂𑀲𑁂𑀦 𑀲𑀤𑁆𑀤𑀲𑀫𑁆𑀧𑀢𑁆𑀢𑀺𑀦𑀸𑀫 𑀯𑀼𑀢𑁆𑀢𑀸𑀢𑀺. 𑀲𑀘𑁆𑀘𑀁, 𑀓𑀫𑁆𑀫𑀯𑀺𑀲𑁂𑀲𑁂𑀦 𑀧𑀦 𑀬𑀣𑀸 𑀲𑀼𑀯𑀺𑀲𑀤𑁄 𑀲𑀼𑀫𑀥𑀼𑀭𑁄 𑀲𑀤𑁆𑀤𑁄 𑀧𑀯𑀢𑁆𑀢𑀢𑀺, 𑀢𑀣𑀸 𑀞𑀸𑀦𑀓𑀭𑀡𑀕𑀢𑀸𑀦𑀁 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀸𑀦𑀁 𑀲𑀼𑀲𑀡𑁆𑀞𑀺𑀢𑀢𑀸 𑀯𑀸𑀢 𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑀸𑀘 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑁆𑀫𑀽𑀮𑀺𑀓𑀸𑀲𑀤𑁆𑀤𑀲𑀫𑁆𑀧𑀢𑁆𑀢𑀺 𑀓𑀫𑁆𑀫𑀨𑀮𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀲𑀭𑀢𑀸𑀢𑀺 𑀯𑀼𑀢𑁆𑀢𑀸. 𑀦 𑀏𑀓𑀦𑁆𑀢𑁂𑀦 𑀲𑀤𑁆𑀤𑀲𑁆𑀲 𑀓𑀫𑁆𑀫𑀚𑀦𑀺𑀢𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀲𑀫𑁆𑀪𑁄𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀅𑀧𑁆𑀧𑀸𑀩𑀸𑀥𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸 𑀫𑀸𑀡𑀯 𑀧𑀝𑀺𑀧𑀤𑀸, 𑀬𑀤𑀺𑀤𑀁 𑀅𑀯𑀺𑀳𑀺𑀁𑀲𑀸𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀸𑀩𑀸𑀥 𑀧𑀘𑁆𑀘𑀬𑀲𑀫𑀼𑀝𑁆𑀞𑀺𑀢𑀜𑁆𑀘 𑀏𑀢𑀁 𑀭𑀽𑀧𑀢𑁆𑀢𑀬𑀁. 𑀢𑀣𑀸 𑀳𑀺 𑀤𑀦𑁆𑀥𑀢𑁆𑀢𑀸𑀤𑀺 𑀓𑀭 𑀥𑀸𑀢𑀼𑀓𑁆𑀔𑁄𑀢 𑀧𑀝𑀺𑀧𑀓𑁆𑀔𑀧𑀘𑁆𑀘𑀬 𑀲𑀫𑀼𑀝𑁆𑀞𑀸𑀦𑀢𑀸 𑀏𑀢𑀲𑁆𑀲 𑀯𑀼𑀢𑁆𑀢𑀸𑀢𑀺. 𑀯𑀼𑀘𑁆𑀘𑀢𑁂, 𑀓𑀫𑁆𑀫𑀚𑀭𑀽𑀧𑀸𑀦𑀺𑀦𑀸𑀫 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀸𑀦𑀺 𑀲𑀢𑀧𑀸𑀓𑀢𑁂𑀮𑀸𑀦𑀺 𑀯𑀺𑀬 𑀧𑀓𑀢𑀺𑀬𑀸𑀯 𑀓𑀫𑁆𑀫𑀸𑀦𑀼𑀭𑀽𑀧𑀁 𑀮𑀳𑀼 𑀫𑀼𑀤𑀼 𑀓𑀫𑁆𑀫𑀜𑁆𑀜 𑀪𑀽𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀯𑀺𑀲𑀼𑀁 𑀮𑀳𑀼𑀢𑀸𑀤𑀺 𑀯𑀺𑀓𑀸𑀭𑁄𑀦𑀸𑀫 𑀦𑀢𑁆𑀣𑀺. 𑀬𑀢𑁄 𑀢𑁂𑀲𑀁 𑀏𑀓𑀲𑁆𑀫𑀺𑀁𑀪𑀯𑁂 𑀏𑀓𑀸𑀅𑀤𑁆𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀯 𑀮𑀩𑁆𑀪𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀫𑀓𑁂𑀲𑀼𑀧𑀺 𑀢𑁂𑀲𑀁 𑀓𑀸𑀮𑀪𑁂𑀤𑁄 𑀧𑀝𑀺𑀲𑀦𑁆𑀥𑀺𑀯𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀅𑀤𑁆𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑁂𑀯 𑀕𑀳𑀺𑀢𑁄𑀢𑀺. 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑀁𑀦𑀸𑀫 𑀦𑀸𑀦𑀸𑀦𑀻𑀯𑀭𑀡𑀪𑁂𑀤𑀯𑀲𑁂𑀦𑀯𑀸 𑀲𑀼𑀔 𑀤𑀼𑀓𑁆𑀔 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺 𑀲𑀤𑁆𑀥𑀸 𑀧𑀜𑁆𑀜𑀸𑀤𑀺 𑀯𑀲𑁂𑀦𑀯𑀸 𑀦𑀸𑀦𑀸 𑀔𑀡𑁂𑀲𑀼 𑀦𑀸𑀦𑀸 𑀅𑀯𑀢𑁆𑀣𑀸 𑀬𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀉𑀢𑀼𑀆𑀳𑀸𑀭𑀸𑀘 𑀲𑀧𑁆𑀧𑀸𑀬𑀸 𑀲𑀧𑁆𑀧𑀸𑀬𑀪𑁂𑀤𑀯𑀲𑁂𑀦. 𑀢𑀲𑁆𑀫𑀸 𑀢𑁂𑀳𑀺 𑀢𑀻𑀳𑀺 𑀲𑀫𑀼𑀝𑁆𑀞𑀺𑀢 𑀭𑀽𑀧𑀸𑀦𑀺𑀏𑀯 𑀦𑀸𑀦𑀸𑀔𑀡𑁂𑀲𑀼 𑀕𑀭𑀼𑀓𑀮𑀳𑀼𑀓𑀸𑀤𑀺 𑀯𑀲𑁂𑀦 𑀦𑀸𑀦𑀸𑀯𑀺𑀓𑀸𑀭𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀢𑁄 𑀢𑁂𑀲𑀁 𑀲𑀦𑁆𑀢𑀢𑀺 𑀲𑀫𑀬 𑀯𑀲𑁂𑀦 𑀓𑀸𑀮𑀪𑁂𑀤𑁄 𑀮𑀩𑁆𑀪𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀫𑀓𑁂𑀲𑀼𑀧𑀺 𑀅𑀓𑀫𑁆𑀫𑀚𑀸𑀦𑀁 𑀧𑀯𑀢𑁆𑀢𑀺𑀓𑀸𑀮𑁂 𑀔𑀡𑀲𑀦𑁆𑀢𑀢𑀺𑀯𑀲𑁂𑀦𑀧𑀺 𑀓𑀸𑀮𑀪𑁂𑀤𑁄 𑀕𑀳𑀺𑀢𑁄𑀢𑀺. 𑀦𑀦𑀼 𑀓𑀫𑁆𑀫𑀯𑀺𑀧𑀸𑀓𑀚𑀸 𑀆𑀩𑀸𑀥𑀸𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀘 𑀓𑀫𑁆𑀫 𑀲𑀫𑀼𑀝𑁆𑀞𑀸𑀦𑁂 𑀆𑀩𑀸𑀥𑀭𑀽𑀧𑁂 𑀢𑀢𑁄𑀯𑀼𑀝𑁆𑀞𑀸𑀦𑀪𑀽𑀢𑁄 𑀓𑀫𑁆𑀫𑀚𑁄 𑀮𑀳𑀼𑀢𑀸𑀤𑀺 𑀕𑀼𑀡𑁄𑀧𑀺 𑀯𑀺𑀲𑀼𑀁 𑀮𑀩𑁆𑀪𑀫𑀸𑀦𑁄 𑀲𑀺𑀬𑀸𑀢𑀺. 𑀦. 𑀬𑁂𑀲𑀜𑁆𑀳𑀺 𑀯𑀲𑁂𑀦 𑀇𑀫𑀲𑁆𑀫𑀺𑀁 𑀲𑀭𑀻𑀭𑁂 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀸𑀫 𑀆𑀩𑀸𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀉𑀧𑀧𑀻𑀴𑀓𑀼𑀧 𑀖𑀸𑀢𑀓𑀓𑀫𑁆𑀫𑀸𑀦𑀺𑀧𑀺 𑀕𑀢𑀺𑀓𑀸𑀮𑀧𑀬𑁄𑀕 𑀯𑀺𑀧𑀢𑁆𑀢𑀺𑀬𑁄 𑀮𑀪𑀫𑀸𑀦𑀸𑀦𑀺 𑀏𑀯 𑀲𑀭𑀻𑀭𑀝𑁆𑀞𑀓𑀸 𑀧𑀣𑀯𑀸𑀤𑀬𑁄 𑀯𑀸𑀢𑀧𑀺𑀢𑁆𑀢𑀸𑀤𑀬𑁄𑀘 𑀉𑀢𑀼𑀲𑀫𑀼𑀝𑁆𑀞𑀸𑀦𑀸 𑀥𑀸𑀢𑀼𑀬𑁄 𑀔𑁄𑀪𑁂𑀢𑁆𑀯𑀸 𑀦𑀸𑀦𑀸𑀩𑀸𑀥𑁂 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀉𑀢𑀼𑀲𑀫𑀼𑀝𑁆𑀞𑀸𑀦𑀸𑀲𑀼 𑀧𑀦 𑀔𑀼𑀩𑁆𑀪𑀺𑀢𑀸𑀲𑀼 𑀇𑀢𑀭𑀸𑀦𑀺 𑀢𑀤𑀦𑀼𑀕𑀢𑀺𑀓𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀕𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀯𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀻𑀢𑀺𑀆𑀤𑀺𑀦𑀸 𑀉𑀢𑀼𑀧𑀥𑀸𑀦𑁄𑀯 𑀭𑀽𑀧𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀢𑀺. 𑀢𑀲𑁆𑀫𑀸 𑀓𑁂𑀯𑀮𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄𑀦𑀸𑀫 𑀦𑀢𑁆𑀣𑀺. 𑀬𑀢𑁄 𑀬𑀣𑀸𑀯𑀼𑀢𑁆𑀢𑁄 𑀓𑀫𑁆𑀫𑀚𑁄 𑀮𑀳𑀼𑀢𑀸𑀤𑀺𑀕𑀼𑀡𑁄𑀦𑀸𑀫 𑀯𑀺𑀲𑀼𑀁 𑀮𑀩𑁆𑀪𑀫𑀸𑀦𑁄 𑀲𑀺𑀬𑀸𑀢𑀺.

𑀬𑀲𑁆𑀫𑀸 𑀧𑀦 𑀅𑀯𑀺𑀳𑀺𑀁𑀲𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀢𑁂𑀲𑀁 𑀉𑀧𑀧𑀻𑀴𑀓𑀸𑀤𑀻𑀦𑀁 𑀓𑀫𑁆𑀫𑀸𑀦𑀁 𑀲𑀼𑀯𑀺𑀤𑀽𑀭𑀢𑀸𑀬𑀘𑁂𑀯 𑀲𑀭𑀻𑀭𑀓𑁄𑀝𑁆𑀞𑀸𑀲𑀸𑀦𑀁 𑀖𑀦𑀲𑀺𑀦𑀺𑀤𑁆𑀥𑀲𑀡𑁆𑀞𑀺𑀢𑀺𑀬𑀸 𑀤𑀼𑀓𑁆𑀔𑁄𑀪𑀦𑀺𑀬𑀢𑀸𑀬𑀘 𑀦𑀺𑀩𑁆𑀩𑀢𑁆𑀢𑀪𑀯𑁂 𑀦𑀺𑀭𑀸𑀩𑀸𑀥𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀲𑀦𑁆𑀥𑀸𑀬 𑀅𑀧𑁆𑀧𑀸𑀩𑀸𑀥𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸 𑀫𑀸𑀡𑀯𑀧𑀝𑀺𑀧𑀤𑀸. 𑀬𑀤𑀺𑀤𑀁 𑀅𑀯𑀺𑀳𑀺𑀁𑀲𑀸𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀅𑀧𑁆𑀧𑀸𑀩𑀸𑀥𑀦𑀺𑀫𑀺𑀢𑁆𑀢𑀲𑁆𑀲 𑀮𑀳𑀼𑀢𑀸𑀤𑀺𑀢𑁆𑀢𑀬𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀢𑀸𑀬. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀓𑀡𑁆𑀟𑁂𑀦 𑀓𑀫𑁆𑀫𑀲𑁆𑀲𑀓𑀝𑀢𑁆𑀢𑀸𑀭𑀽𑀧𑁂𑀲𑀼 𑀏𑀯 𑀏𑀢𑀁 𑀭𑀽𑀧𑀢𑁆𑀢𑀬𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀽𑀧𑀓𑀮𑀸𑀧𑀸𑀦𑀸𑀫 𑀏𑀓𑀲𑁆𑀫𑀺𑀁 𑀧𑀭𑀫𑀸𑀡𑀼𑀲𑁆𑀫𑀺𑀁𑀧𑀺 𑀩𑀳𑀼𑀯𑀺𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀘𑀢𑀼𑀚𑀭𑀽𑀧 𑀓𑀮𑀸𑀧𑁂𑀲𑀼 𑀖𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁂𑀲𑀼 𑀓𑀮𑀸𑀧𑀦𑁆𑀢𑀭𑀪𑀽𑀢𑀸 𑀆𑀓𑀸𑀲𑀥𑀸𑀢𑀼𑀧𑀺 𑀤𑀺𑀲𑁆𑀲𑀫𑀸𑀦𑀸𑀏𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀘𑀢𑀼𑀚𑁂𑀲𑀼 𑀢𑀲𑁆𑀲𑀸 𑀕𑀳𑀡𑀁 𑀓𑀢𑀁. 𑀓𑀸𑀫𑀁 𑀲𑀩𑁆𑀩𑀸𑀦𑀺𑀧𑀺 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀅𑀦𑀺𑀧𑁆𑀨𑀸𑀤𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀧𑀦 𑀦 𑀢𑀣𑀸 𑀮𑀓𑁆𑀔𑀡𑀭𑀽𑀧𑀸𑀦𑀺. 𑀬𑀣𑀸 𑀇𑀢𑀭𑀸𑀦𑀺 𑀘𑀺𑀢𑁆𑀢𑀸𑀤𑀺 𑀧𑀘𑁆𑀘𑀬 𑀯𑀺𑀲𑁂𑀲𑁂𑀦 𑀤𑀺𑀲𑁆𑀲𑀫𑀸𑀦 𑀯𑀺𑀲𑁂𑀲𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀮𑀓𑁆𑀔𑀡𑀭𑀽𑀧𑀸𑀦𑀺 𑀦 𑀓𑀼𑀢𑁄𑀘𑀺 𑀚𑀸𑀬𑀦𑁆𑀢𑀻𑀢𑀺. 𑀚𑀸𑀬𑀫𑀸𑀦𑀸𑀤𑀺 𑀭𑀽𑀧𑀸𑀦𑀦𑁆𑀢𑀺 𑀚𑀸𑀬𑀫𑀸𑀦 𑀚𑀺𑀬𑁆𑀬𑀫𑀸𑀦 𑀫𑀺𑀬𑁆𑀬𑀫𑀸𑀦𑀸𑀦𑀁 𑀭𑀽𑀧𑀓𑀮𑀸𑀧𑀸𑀦𑀁. 𑀲𑀪𑀸𑀯𑀢𑁆𑀢𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑀗𑁆𑀔𑀸𑀢𑀮𑀓𑁆𑀔𑀡𑀲𑀪𑀸𑀯𑀫𑀢𑁆𑀢𑀢𑁆𑀢𑀸. 𑀏𑀢𑁆𑀣𑀘 𑀭𑀽𑀧𑀓𑀡𑁆𑀟𑁂 𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘 𑀯𑀼𑀢𑁆𑀢𑀁 𑀦𑀢𑁆𑀣𑀺. 𑀧𑀝𑁆𑀞𑀸𑀦𑁂 𑀏𑀯 𑀯𑀼𑀢𑁆𑀢𑀁.

𑀏𑀢𑁆𑀣 𑀲𑀺𑀬𑀸, 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸 𑀧𑀸𑀴𑀺𑀬𑀫𑁂𑀯 𑀦 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀇𑀥𑀧𑀺 𑀢𑀸𑀲𑀁 𑀦𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑁂𑀲𑀼 𑀕𑀳𑀡𑀁 𑀬𑀼𑀢𑁆𑀢𑀁. 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀧𑀦 𑀧𑀸𑀴𑀺𑀬𑀁𑀧𑀺 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑁂𑀲𑀼 𑀯𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀬𑀁𑀧𑀺 𑀢𑀸𑀳𑀺 𑀲𑀤𑁆𑀥𑀺𑀁 𑀯𑀺𑀲𑀢𑀺 𑀓𑀫𑁆𑀫𑀚𑀭𑀽𑀧𑀸𑀦𑀺 𑀲𑀢𑁆𑀢𑀭𑀲 𑀘𑀺𑀢𑁆𑀢𑀚𑀭𑀽𑀧𑀸𑀦𑀺 𑀘𑀼𑀤𑁆𑀤𑀲 𑀉𑀢𑀼𑀚𑀭𑀽𑀧𑀸𑀦𑀺 𑀢𑁂𑀭𑀲 𑀆𑀳𑀸𑀭𑀚 𑀭𑀽𑀧𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀇𑀥 𑀢𑀸𑀲𑀁 𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀦𑀢𑀸 𑀦𑀯𑀢𑁆𑀢𑀩𑁆𑀩𑀸𑀢𑀺. 𑀯𑀼𑀘𑁆𑀘𑀢𑁂, 𑀭𑀽𑀧𑀚𑀦𑀓𑀸𑀦𑀁 𑀚𑀦𑀦𑀩𑁆𑀬𑀸𑀧𑀸𑀭𑁄𑀦𑀸𑀫 𑀅𑀢𑁆𑀢𑀦𑀸 𑀚𑀦𑀺𑀢𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀯 𑀨𑀭𑀢𑀺. 𑀦-𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑁂 𑀮𑀩𑁆𑀪𑀫𑀸𑀦𑀸 𑀉𑀧𑀘𑀬𑀲𑀦𑁆𑀢𑀢𑀺𑀬𑁄𑀬𑁂𑀯 𑀓𑀼𑀢𑁄𑀘𑀺 𑀚𑀸𑀢𑀧𑀭𑀺𑀬𑀸𑀬𑀁 𑀅𑀭𑀳𑀦𑁆𑀢𑀺, 𑀦 𑀚𑀭𑀢𑀸 𑀅𑀦𑀺𑀘𑁆𑀘𑀢𑀸𑀬𑁄𑀢𑀺 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀅𑀝𑁆𑀞𑀓𑀣𑀸 𑀬𑀁𑀘 𑀢𑀸𑀲𑀁𑀏𑀯 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑁂𑀲𑀼 𑀕𑀳𑀡𑀁 𑀓𑀢𑀁. 𑀅𑀧𑀺𑀘, 𑀧𑀼𑀩𑁆𑀩𑁂 𑀅𑀚𑀸𑀢𑀸 𑀥𑀫𑁆𑀫𑀸 𑀧𑀘𑁆𑀘𑀬𑁂 𑀲𑀢𑀺 𑀚𑀸𑀬𑀦𑁆𑀢𑀺. 𑀅𑀲𑀢𑀺 𑀦 𑀚𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑀺. 𑀚𑀸𑀢𑀸 𑀧𑀦 𑀥𑀫𑁆𑀫𑀸 𑀧𑀘𑁆𑀘𑀬𑁂 𑀲𑀢𑀺 𑀚𑀺𑀬𑁆𑀬𑀦𑁆𑀢𑀺, 𑀫𑀺𑀬𑁆𑀬𑀦𑁆𑀢𑀺. 𑀅𑀲𑀢𑀺 𑀦𑀚𑀺𑀬𑁆𑀬𑀦𑁆𑀢𑀺 𑀦𑀫𑀺𑀬𑁆𑀬𑀦𑁆𑀢𑀻𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀯𑀢𑁆𑀢𑀺 𑀏𑀓𑀦𑁆𑀢𑁂𑀦 𑀧𑀘𑁆𑀘𑀬𑀸𑀬𑀢𑁆𑀢𑀸 𑀳𑁄𑀢𑀺. 𑀧𑀘𑁆𑀙𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀯𑀢𑁆𑀢𑀺 𑀧𑀦 𑀏𑀓𑀦𑁆𑀢𑁂𑀦 𑀧𑀘𑁆𑀘𑀬 𑀦𑀺𑀭𑀧𑁂𑀓𑁆𑀔𑀸 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀢𑀸𑀲𑀁 𑀢𑁂𑀲𑀼 𑀕𑀳𑀡𑀁 𑀅𑀕𑀳𑀡𑀜𑁆𑀘 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀲𑀼𑀢𑁆𑀢𑀧𑀤𑁂𑀲𑀼 𑀚𑀭𑀸𑀫𑀭𑀡𑀁 𑀪𑀺𑀓𑁆𑀔𑀯𑁂 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀚𑀸𑀢𑀺𑀬𑀸 𑀲𑀢𑀺𑀏𑀯 𑀢𑀤𑀼𑀪𑀬𑀁 𑀧𑀜𑁆𑀜𑀸𑀬𑀢𑀺. 𑀅𑀲𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀇𑀢𑀭 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀯𑀺𑀬 𑀘𑀢𑁆𑀢𑀸𑀭𑀺𑀧𑀺 𑀏𑀢𑀸𑀦𑀺 𑀘𑀺𑀢𑁆𑀢𑀸𑀤𑀺𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀤𑀺𑀲𑁆𑀲𑀫𑀸𑀦𑀯𑀺𑀲𑁂𑀲𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀘𑀢𑀼𑀦𑁆𑀦𑀁𑀧𑀺 𑀦 𑀓𑀼𑀢𑁄𑀘𑀺 𑀚𑀸𑀢𑀢𑀸 𑀯𑀼𑀢𑁆𑀢𑀸. 𑀏𑀯𑀁𑀲𑀦𑁆𑀢𑁂𑀧𑀺 𑀲𑀸𑀭𑀢𑀭𑀁 𑀧𑀸𑀴𑀺𑀦𑀬𑀁 𑀅𑀢𑀺𑀥𑀸𑀯𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀉𑀧𑀘𑀬𑀲𑀦𑁆𑀢 𑀢𑀻𑀦𑀁 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀦𑁂𑀲𑀼 𑀲𑀗𑁆𑀕𑀳𑁄𑀏𑀯 𑀲𑁂𑀬𑁆𑀬𑁄𑀢𑀺. [𑀭𑀽𑀧𑀲𑀫𑀼𑀝𑁆𑀞𑀸𑀦𑀦𑀬𑁄]

𑁧𑁫𑁯. 𑀏𑀓𑁄 𑀏𑀯 𑀚𑀸𑀢𑀺 𑀲𑀗𑁆𑀔𑀸𑀢𑁄 𑀉𑀧𑁆𑀧𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀸. 𑀏𑀓𑁄𑀏𑀯 𑀅𑀦𑀺𑀘𑁆𑀘𑀢𑀸𑀲𑀗𑁆𑀔𑀸𑀢𑁄 𑀦𑀺𑀭𑁄𑀥𑁄 𑀏𑀢𑁂𑀲𑀦𑁆𑀢𑀺 𑀏𑀓𑀦𑀺𑀭𑁄𑀥𑀸. 𑀏𑀓𑀲𑀤𑁆𑀤𑁄 𑀘𑁂𑀢𑁆𑀣 𑀲𑀗𑁆𑀔𑀸𑀦𑁂 𑀧𑀯𑀢𑁆𑀢𑁄. 𑀢𑀲𑁆𑀫𑀸 𑀢𑁂𑀦 𑀬𑀸𑀦𑀺 𑀭𑀽𑀧𑀸𑀦𑀺 𑀏𑀓𑀸𑀬𑀏𑀯 𑀚𑀸𑀢𑀺𑀬𑀸 𑀚𑀸𑀬𑀦𑁆𑀢𑀺. 𑀏𑀓𑀸𑀬 𑀏𑀯 𑀅𑀦𑀺𑀘𑁆𑀘𑀢𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂𑀲𑀁 𑀧𑀺𑀡𑁆𑀟𑀺 𑀇𑀥 𑀭𑀽𑀧𑀓𑀮𑀸𑀧𑁄𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀬𑁂 𑀧𑀦 𑀓𑀮𑀸𑀧𑀕𑀢 𑀭𑀽𑀧𑀕𑀡𑀦𑀸𑀬 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂𑀧𑀺 𑀅𑀦𑁂𑀓𑀸𑀦𑀺 𑀚𑀸𑀢𑀺𑀆𑀤𑀻𑀦𑀺 𑀓𑀧𑁆𑀧𑁂𑀦𑁆𑀢𑀺, 𑀢𑁂𑀲𑀁 𑀫𑀽𑀮𑀝𑀻𑀓𑀸𑀬 𑀦𑀲𑀫𑁂𑀢𑀺. 𑀬𑀼𑀢𑁆𑀢𑀺𑀘 𑀦𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀏𑀓𑁂𑀓𑀓𑀮𑀸𑀧 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀸𑀦𑀁 𑀲𑀳𑁂𑀯 𑀉𑀧𑁆𑀧𑀸𑀤𑀸𑀤𑀺𑀧𑀯𑀢𑁆𑀢𑀺𑀢𑁄 𑀏𑀓𑁂𑀓𑀓𑀮𑀸𑀧𑀲𑁆𑀲 𑀉𑀧𑁆𑀧𑀸𑀤𑀸𑀤𑀬𑁄 𑀏𑀓𑁂𑀓𑀸𑀯 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀏𑀓𑁂𑀓𑀲𑁆𑀲 𑀓𑀮𑀸𑀧𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀮𑀸𑀧𑀸 𑀦𑀼𑀧𑀸𑀮𑀓𑀁 𑀉𑀧𑀸𑀤𑀸𑀬 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀓𑀮𑀸𑀧𑀼𑀧𑁆𑀧𑀸𑀤𑀸𑀤𑀺 𑀲𑀪𑀸𑀯𑀸 𑀚𑀸𑀢𑀺𑀆𑀤𑀬𑁄 𑀉𑀧𑀸𑀤𑀸𑀬𑀭𑀽𑀧𑀸𑀦𑀺𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀯𑀺𑀓𑀸𑀭𑀧𑀭𑀺𑀘𑁆𑀙𑁂𑀤 𑀭𑀽𑀧𑀸𑀦𑀺𑀘 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺. 𑀬𑀤𑀺𑀘 𑀬𑁄 𑀆𑀬𑀢𑀦𑀸𑀦𑀁 𑀆𑀘𑀬𑁄. 𑀲𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄𑀢𑀺𑀘 𑀬𑁄 𑀭𑀽𑀧𑀲𑁆𑀲 𑀉𑀧𑀘𑀬𑁄. 𑀲𑀸𑀭𑀽𑀧𑀲𑁆𑀲 𑀲𑀦𑁆𑀢𑀢𑀻𑀢𑀺𑀘 𑀯𑀼𑀢𑁆𑀢𑀢𑁆𑀢𑀸 𑀢𑀸𑀦𑀺 𑀚𑀸𑀢𑀺𑀆𑀤𑀻𑀦𑀺 𑀮𑀓𑁆𑀔𑀡𑀭𑀽𑀧𑀸𑀦𑀺 𑀯𑀺𑀲𑀼𑀁𑀯𑀺𑀲𑀼𑀁 𑀭𑀽𑀧𑀸𑀦𑀁𑀏𑀯, 𑀦𑀓𑀮𑀸𑀧𑀲𑁆𑀲𑀸𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁. 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀽𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀘𑀓𑁆𑀔𑀸𑀤𑀺 𑀚𑀻𑀯𑀺𑀢𑀸𑀤𑀻𑀦𑀺𑀧𑀺 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀅𑀦𑁂𑀓𑀸𑀦𑀺𑀏𑀯 𑀆𑀧𑀚𑁆𑀚𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀢𑀣𑀸 𑀓𑀧𑁆𑀧𑀦𑀁 𑀅𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀅𑀜𑁆𑀜𑀸𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀯𑀺𑀬 𑀮𑀓𑁆𑀔𑀡𑀭𑀽𑀧𑀸𑀦𑀺𑀧𑀺 𑀏𑀓𑁂𑀓𑀸𑀦𑀺𑀏𑀯𑀸𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀏𑀓𑁄 𑀲𑀫𑀸𑀦𑁄 𑀫𑀳𑀸𑀪𑀽𑀢𑀲𑀗𑁆𑀔𑀸𑀢𑁄 𑀦𑀺𑀲𑁆𑀲𑀬𑁄 𑀏𑀢𑁂𑀲𑀦𑁆𑀢𑀺 𑀏𑀓𑀦𑀺𑀲𑁆𑀲𑀬𑀸. 𑀏𑀢𑁆𑀣 𑀧𑀦 𑀲𑀫𑀸𑀦𑀢𑁆𑀣𑁂 𑀏𑀓𑀲𑀤𑁆𑀤𑁄 𑀬𑀼𑀢𑁆𑀢𑁄. 𑀘𑀢𑀼𑀦𑁆𑀦𑀁 𑀪𑀽𑀢𑀸𑀦𑀁 𑀦𑀺𑀲𑁆𑀲𑀬𑀢𑀸𑀲𑀫𑁆𑀪𑀯𑀢𑁄. 𑀬𑀸𑀦𑀺𑀘𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺𑀢𑀻𑀳𑀺𑀮𑀓𑁆𑀔𑀡𑁂𑀳𑀺 𑀬𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀏𑀓𑀦𑁆𑀢𑁂𑀦 𑀲𑀳𑀯𑀼𑀢𑁆𑀢𑀻𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀲𑀳𑀯𑀼𑀢𑁆𑀢𑀺𑀦𑁄𑀢𑀺. 𑀤𑀲𑀧𑀭𑀺𑀫𑀸𑀡𑀸𑀦𑀺𑀅𑀲𑁆𑀲𑀸𑀢𑀺𑀤𑀲𑀓𑀁. 𑀤𑀲𑀦𑁆𑀦𑀁 𑀲𑀫𑀽𑀳𑁄 𑀯𑀸 𑀤𑀲𑀓𑀁. 𑀘𑀓𑁆𑀔𑀼𑀦𑀸 𑀉𑀧𑀮𑀓𑁆𑀔𑀺𑀢𑀁 𑀤𑀲𑀓𑀦𑁆𑀢𑀺 𑀘𑀓𑁆𑀔𑀼𑀤𑀲𑀓𑀁. 𑀘𑀓𑁆𑀔𑀼𑀧𑀥𑀸𑀦𑀁𑀯𑀸 𑀤𑀲𑀓𑀁 𑀘𑀓𑁆𑀔𑀼𑀤𑀲𑀓𑀁. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑁂𑀦 𑀯𑀺𑀦𑀸 𑀦𑀧𑀯𑀢𑁆𑀢𑀢𑀺. 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑁄𑀘 𑀢𑁂𑀦 𑀲𑀤𑁆𑀤𑁂𑀦 𑀯𑀺𑀦𑀸 𑀦𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀘𑀺𑀢𑁆𑀢𑀚𑀁 𑀲𑀤𑁆𑀤𑀦𑀯𑀓𑀁𑀯𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀦𑀯𑀓𑀁𑀯𑀸 𑀦𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀤𑁆𑀤𑁂 𑀳𑀺 𑀘 𑀲𑀳𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀤𑀲𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 𑀯𑀺𑀜𑁆𑀜𑀢𑁆𑀢𑀺 𑀯𑀺𑀓𑀸𑀭𑁄 𑀲𑀤𑁆𑀤𑁂𑀦 𑀯𑀺𑀦𑀸 𑀦𑀧𑀯𑀢𑁆𑀢𑀢𑀻𑀢𑀺 𑀇𑀤𑀁 𑀢𑀸𑀯 𑀬𑀼𑀚𑁆𑀚𑀢𑀺. 𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀧𑀦𑀸 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀁. 𑀇𑀤𑀁 𑀢𑀁𑀭𑀽𑀧𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑀁 𑀧𑀦 𑀘𑀺𑀢𑁆𑀢𑀚𑀁 𑀲𑀤𑁆𑀤𑀦𑀯𑀓𑀁. 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀫𑁂𑀯. 𑀬𑀣𑀸𑀳-𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀦𑀺𑀤𑁆𑀤𑁂𑀲𑁂𑀲𑀼 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀉𑀢𑀼𑀢𑁄𑀘𑁂𑀯 𑀘𑀺𑀢𑁆𑀢𑀢𑁄𑀘 𑀲𑀤𑁆𑀤𑀦𑀯𑀓𑀦𑁆𑀢𑀺.

𑀫𑀳𑀸𑀅𑀝𑁆𑀞𑀓𑀣𑀸 𑀦𑀬𑁂𑀦 𑀯𑀺𑀜𑁆𑀜𑀢𑁆𑀢𑀺 𑀭𑀳𑀺𑀢𑁄 𑀯𑀺𑀢𑀓𑁆𑀓 𑀯𑀺𑀧𑁆𑀨𑀸𑀭 𑀲𑀤𑁆𑀤𑁄𑀦𑀸𑀫 𑀅𑀲𑁄𑀢 𑀯𑀺𑀜𑁆𑀜𑁂𑀬𑁆𑀬𑁄 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄 𑀮𑀩𑁆𑀪𑀢𑀺. 𑀲𑁄 𑀧𑀦 𑀲𑀗𑁆𑀕𑀳𑀓𑀸𑀭𑁂𑀦 𑀧𑀝𑀺𑀲𑀺𑀤𑁆𑀥𑁄. 𑀬𑀣𑀸𑀳-𑀧𑀝𑁆𑀞𑀸𑀦𑁂𑀧𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀯𑀢𑀁. 𑀢𑀲𑁆𑀫𑀸 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀖𑀝𑁆𑀝𑀦𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑁄𑀢 𑀯𑀺𑀜𑁆𑀜𑁂𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄𑀦𑀸𑀫 𑀦𑀢𑁆𑀣𑀻𑀢𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀲𑁆𑀲𑀸𑀲 𑀧𑀲𑁆𑀲𑀸𑀲𑁂 𑀘𑀺𑀢𑁆𑀢𑀚𑀁 𑀲𑀤𑁆𑀤𑀦𑀯𑀓𑀁 𑀯𑀼𑀢𑁆𑀢𑀁. 𑀬𑀣𑀸𑀳-𑀘𑀺𑀢𑁆𑀢𑀚𑁂 𑀅𑀲𑁆𑀲𑀸𑀲 𑀧𑀲𑁆𑀲𑀸𑀲 𑀓𑁄𑀝𑁆𑀞𑀸𑀲𑁂𑀧𑀺 𑀑𑀚𑀝𑁆𑀞𑀫𑀓𑀜𑁆𑀘𑁂𑀯 𑀲𑀤𑁆𑀤𑁄𑀘𑀸𑀢𑀺 𑀦𑀯𑀸𑀢𑀺, 𑀲𑀤𑁆𑀤𑀦𑀯𑀓𑁂𑀘 𑀆𑀕𑀢𑁂 𑀲𑀤𑁆𑀤𑀮𑀳𑀼𑀢𑀸𑀤𑀺 𑀤𑁆𑀯𑀸𑀤𑀲𑀓𑀁𑀧𑀺 𑀆𑀕𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀲𑀼𑀤𑁆𑀥𑀝𑁆𑀞𑀓𑀁, 𑀲𑀤𑁆𑀤𑀦𑀯𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦𑀸𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀤𑀲𑀓𑀁, 𑀮𑀳𑀼𑀢𑀸𑀤𑁂𑀓𑀸 𑀤𑀲𑀓𑀁, 𑀲𑀤𑁆𑀤𑀮𑀳𑀼𑀢𑀸𑀤𑀺𑀤𑁆𑀯𑀸𑀤𑀲𑀓𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀮𑀳𑀼𑀢𑀸𑀤𑀺 𑀤𑁆𑀯𑀸𑀤𑀲𑀓𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀤𑁆𑀤𑀮𑀳𑀼𑀢𑀸𑀤𑀺 𑀢𑁂 𑀭𑀲𑀓𑀦𑁆𑀢𑀺 𑀅𑀝𑁆𑀞𑀘𑀺𑀢𑁆𑀢𑀚𑀓𑀮𑀸𑀧𑀸 𑀧𑀘𑁆𑀘𑁂𑀢𑀩𑁆𑀩𑀸𑀢𑀺. 𑀲𑀘𑁆𑀘𑀲𑀗𑁆𑀔𑁂𑀧𑁂 𑀧𑀦 𑀲𑀤𑁆𑀤 𑀮𑀳𑀼𑀢𑀸𑀤𑀺 𑀤𑁆𑀯𑀸𑀤𑀲𑀓𑀁 𑀯𑀺𑀲𑀼𑀁 𑀅𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀚 𑀓𑀮𑀸𑀧𑀸 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸.

𑀝𑀻𑀓𑀸𑀲𑀼 𑀧𑀦𑀲𑁆𑀲 𑀧𑁄𑀭𑀸𑀡𑀝𑀻𑀓𑀸𑀬𑀁

𑀫𑀳𑀸𑀝𑁆𑀞𑀓𑀣𑀸𑀦𑀬𑁂𑀦 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁂 𑀅𑀲𑁄𑀢 𑀯𑀺𑀜𑁆𑀜𑁂𑀬𑁆𑀬𑁂 𑀯𑀺𑀢𑀓𑁆𑀓 𑀯𑀺𑀧𑁆𑀨𑀸𑀭𑀲𑀤𑁆𑀤𑁂 𑀲𑀤𑁆𑀤𑀦𑀯𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀯𑀸𑀤𑀦𑁆𑀢𑀭𑀁 𑀤𑀲𑁆𑀲𑁂𑀦𑁆𑀢𑁂𑀦. 𑀅𑀧𑀺𑀘, 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑀲𑁆𑀲 𑀤𑀽𑀭𑀢𑁄 𑀅𑀧𑀜𑁆𑀜𑀸𑀬𑀫𑀸𑀦𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀢𑁆𑀣𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑀺𑀖𑁄𑀲𑀲𑀤𑁆𑀤𑁄 𑀅𑀯𑀺𑀜𑁆𑀜𑀢𑁆𑀢𑀺𑀓𑁄 𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀫𑀺𑀕𑀧𑀓𑁆𑀔𑀻𑀦𑀁𑀘 𑀅𑀜𑁆𑀜𑀫𑀜𑁆𑀜𑀁 𑀪𑀸𑀲𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀦𑁆𑀥𑀤𑀫𑀺𑀴𑀸𑀤𑀺𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀓𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁄 𑀅𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭 𑀲𑀤𑁆𑀤𑁄 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑀲𑁆𑀲 𑀘𑀺𑀢𑁆𑀢 𑀲𑀫𑀼𑀝𑁆𑀞𑀸𑀦 𑀦𑀺𑀖𑁄𑀲𑀲𑀤𑁆𑀤𑁄𑀧𑀺 𑀆𑀲𑀦𑁆𑀦𑁂 𑀞𑀺𑀢𑀸𑀦𑀁 𑀧𑀜𑁆𑀜𑀸𑀬𑀫𑀸𑀦𑀓𑁆𑀔𑀭𑀧𑀤 𑀩𑁆𑀬𑀜𑁆𑀚𑀦𑀢𑁆𑀣𑁄 𑀲𑀯𑀺𑀜𑁆𑀜𑀢𑁆𑀢𑀺𑀓𑁄𑀏𑀯 𑀳𑁄𑀢𑀺. 𑀇𑀢𑀭𑀣𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢 𑀚𑀲𑀤𑁆𑀤𑀸 𑀤𑀽𑀭𑀢𑀭𑁂 𑀞𑀺𑀢𑀸𑀦𑀁 𑀅𑀧𑀜𑁆𑀜𑀸𑀬𑀫𑀸𑀦 𑀧𑀤𑀩𑁆𑀬𑀜𑁆𑀚𑀦𑀸𑀏𑀯 𑀳𑁄𑀦𑁆𑀢𑀻𑀢𑀺 𑀲𑀩𑁆𑀩𑁂𑀧𑀺 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑀸 𑀲𑀺𑀬𑀼𑀦𑁆𑀢𑀺. 𑀦𑀘 𑀫𑀺𑀕𑀧𑀓𑁆𑀔𑀺𑀆𑀤𑀻𑀦𑀁 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄 𑀯𑀺𑀜𑁆𑀜𑀢𑁆𑀢𑀺𑀭𑀳𑀺𑀢𑁄 𑀳𑁄𑀢𑀺. 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀧𑀭𑁂𑀲𑀁 𑀅𑀥𑀺𑀧𑁆𑀧𑀸𑀬𑀢𑁆𑀣 𑀯𑀺𑀜𑁆𑀜𑀸𑀧𑀦𑀢𑁄𑀢𑀺.

𑀧𑀘𑁆𑀙𑀺𑀫 𑀝𑀻𑀓𑀸𑀬𑀁 𑀧𑀦𑀲𑁆𑀲

𑀲𑀤𑁆𑀤𑀦𑀯𑀓𑀁 𑀧𑀦𑁂𑀢𑁆𑀣 𑀅𑀘𑁆𑀙𑀭𑀸 𑀲𑀗𑁆𑀖𑀸𑀢 𑀧𑀸𑀡𑀺𑀧𑁆𑀧𑀳𑀸𑀭𑀸𑀤𑀺 𑀲𑀤𑁆𑀤 𑀲𑀳𑀺𑀢𑀁 𑀅𑀝𑁆𑀞𑀓𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀢𑁆𑀢𑀁.

𑀢𑀸𑀤𑀺𑀲𑁄 𑀳𑀺 𑀲𑀤𑁆𑀤𑁄 𑀘𑀺𑀢𑁆𑀢𑀧𑀘𑁆𑀘𑀬𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀏𑀯. 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂𑀯𑀸 𑀅𑀯𑀘𑀻𑀖𑁄𑀲𑁂𑀲𑀼 𑀓𑀤𑀸𑀘𑀺 𑀘𑀺𑀢𑁆𑀢𑀲𑀳𑀺𑀢𑁂𑀲𑀼 𑀉𑀓𑁆𑀓𑀸𑀲𑀺𑀢 𑀔𑀺𑀧𑀺𑀢 𑀯𑀫𑀺𑀢 𑀙𑀟𑁆𑀟𑀺𑀢𑀲𑀤𑁆𑀤𑀸𑀤𑀻𑀲𑀼 𑀧𑀺𑀯𑀸 𑀏𑀢𑀁 𑀲𑀤𑁆𑀤𑀦𑀯𑀓𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀉𑀢𑀼𑀚𑀓𑀮𑀸𑀧𑁂𑀲𑀼 𑀧𑀘𑁆𑀙𑀺𑀫𑀸 𑀤𑁆𑀯𑁂𑀧𑀺 𑀓𑀲𑁆𑀫𑀸 𑀩𑀳𑀺𑀤𑁆𑀥𑀸 𑀦𑀮𑀩𑁆𑀪𑀦𑁆𑀢𑀺. 𑀦𑀦𑀼 𑀩𑀳𑀺𑀤𑁆𑀥𑀸𑀧𑀺 𑀭𑀽𑀧𑀸𑀦𑀁 𑀮𑀳𑀼 𑀕𑀭𑀼 𑀫𑀼𑀤𑀼 𑀣𑀤𑁆𑀥 𑀓𑀫𑁆𑀫𑀜𑁆𑀜𑀢𑀸 𑀤𑀺𑀲𑁆𑀲𑀦𑁆𑀢𑀻𑀢𑀺. 𑀲𑀘𑁆𑀘𑀁, 𑀢𑀸 𑀧𑀦 𑀪𑀽𑀢𑀸𑀦𑀁 𑀑𑀫𑀢𑁆𑀢𑀸𑀥𑀺𑀫𑀢𑁆𑀢 𑀯𑀲𑁂𑀦 𑀳𑁄𑀦𑁆𑀢𑀺, 𑀦 𑀧𑀦 𑀮𑀳𑀼𑀢𑀸𑀤𑀺𑀢𑁆𑀢𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦 𑀆𑀓𑀸𑀲𑀥𑀸𑀢𑀼𑀘 𑀮𑀓𑁆𑀔𑀡𑀭𑀽𑀧𑀸𑀦𑀺𑀘 𑀭𑀽𑀧𑀓𑀮𑀸𑀧𑁂𑀲𑀼 𑀦𑀕𑀳𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀓𑀮𑀸𑀧𑀸𑀦𑀦𑁆𑀢𑀺𑀆𑀤𑀺. 𑀆𑀓𑀸𑀲𑀥𑀸𑀢𑀼𑀓𑀮𑀸𑀧𑀸𑀦𑀁 𑀧𑀭𑀺𑀘𑁆𑀙𑁂𑀤 𑀫𑀢𑁆𑀢𑀢𑁆𑀢𑀸 𑀓𑀲𑁆𑀲𑀘𑀺 𑀭𑀽𑀧𑀓𑀮𑀸𑀧𑀲𑁆𑀲 𑀅𑀗𑁆𑀕𑀪𑀽𑀢𑀸 𑀅𑀯𑀬𑀯𑀪𑀽𑀢𑀸 𑀦 𑀳𑁄𑀢𑀺, 𑀮𑀓𑁆𑀔𑀡𑀭𑀽𑀧𑀸𑀦𑀺𑀘 𑀲𑀩𑁆𑀩𑁂𑀲𑀁𑀧𑀺 𑀓𑀮𑀸𑀧𑀸𑀦𑀁 𑀉𑀧𑁆𑀧𑀸𑀤𑀸𑀤𑀺 𑀮𑀓𑁆𑀔𑀡 𑀫𑀢𑁆𑀢𑀢𑁆𑀢𑀸 𑀯𑀺𑀓𑀸𑀭𑀭𑀽𑀧𑀸𑀦𑀺 𑀯𑀺𑀬 𑀓𑀮𑀸𑀧𑀸𑀦𑀁 𑀪𑁂𑀤𑀓𑀭𑀸𑀦𑀺 𑀅𑀗𑁆𑀕𑀪𑀽𑀢𑀸𑀦𑀺 𑀓𑀮𑀸𑀧𑀯𑀺𑀲𑁂𑀲𑀧𑀜𑁆𑀜𑀸𑀧𑀦𑀲𑁆𑀲 𑀓𑀸𑀭𑀡𑀪𑀽𑀢𑀸𑀦𑀺 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀢𑁂𑀲𑀼 𑀦𑀕𑀳𑀺𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀏𑀓𑀼𑀧𑁆𑀧𑀸𑀤𑀸𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀺𑀬𑀫𑁄 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀜𑁆𑀜𑁂𑀯, 𑀦 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁. 𑀢𑁂𑀲𑀁 𑀧𑀦 𑀓𑀮𑀸𑀧 𑀪𑁂𑀤 𑀓𑀭𑀡 𑀫𑁂𑀯 𑀓𑀮𑀸𑀧𑀗𑁆𑀕𑀦𑁆𑀢𑀺 𑀘 𑀤𑀻𑀧𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀏𑀓𑀦𑀺𑀭𑁄𑀥𑀗𑁆𑀕𑀭𑀳𑀺𑀢𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲 𑀓𑀮𑀸𑀧𑀪𑁂𑀤 𑀓𑀭𑀢𑁆𑀢𑀸𑀏𑀯 𑀢𑁂𑀲𑀼 𑀕𑀳𑀡𑀁 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. [𑀓𑀮𑀸𑀧𑀬𑁄𑀚𑀦𑀸]

𑁧𑁬𑁦. 𑀬𑀣𑀸𑀭𑀳𑀦𑁆𑀢𑀺 𑀲𑀪𑀸𑀯𑀓𑀸 𑀪𑀸𑀯𑀓𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀧𑀭𑀺 𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀅𑀭𑀳𑀸𑀦𑀼𑀭𑀽𑀧𑀢𑁄. 𑀅𑀦𑀽𑀦𑀸𑀦𑀻𑀢𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀦𑀜𑁆𑀳𑀺 𑀇𑀤𑀁 𑀦𑀸𑀫𑀭𑀽𑀧𑀁 𑀓𑀸𑀫𑀮𑁄𑀓𑁂 𑀧𑀯𑀢𑁆𑀢𑀺𑀬𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑀻𑀢𑀺.

[𑁧𑁯𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀬𑀣𑀸𑀭𑀳𑀦𑁆𑀢𑀺 𑀲𑀪𑀸𑀯𑀓𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀅𑀦𑀼𑀭𑀽𑀧𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀦𑀽𑀦𑀸𑀦𑀻𑀢𑀺 𑀇𑀤𑀁 𑀧𑀼𑀕𑁆𑀕𑀮𑀯𑀲𑁂𑀦 𑀯𑀺𑀲𑁂𑀲𑀦𑀁 𑀳𑁄𑀢𑀻𑀢𑀺. 𑀲𑀁𑀲𑁂𑀤𑀚𑀸𑀦𑀜𑁆𑀘𑁂𑀯𑀑𑀧𑀧𑀸𑀢𑀺𑀓𑀸𑀦𑀜𑁆𑀘𑀸𑀢𑀺 𑀏𑀢𑁆𑀣 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂-

𑀘𑀢𑀲𑁆𑀲𑁄 𑀔𑁄 𑀇𑀫𑀸 𑀲𑀸𑀭𑀺𑀧𑀼𑀢𑁆𑀢 𑀬𑁄𑀦𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄, 𑀅𑀡𑁆𑀟𑀚𑀸 𑀬𑁄𑀦𑀺 𑀚𑀮𑀸𑀩𑀼𑀚𑀸 𑀬𑁄𑀦𑀺 𑀲𑀁𑀲𑁂𑀤𑀚𑀸𑀬𑁄𑀦𑀺 𑀑𑀧𑀧𑀸𑀢𑀺𑀓𑀸 𑀬𑁄𑀦𑀻𑀢𑀺. 𑀬𑁂 𑀔𑁄 𑀢𑁂 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀢𑀸 𑀅𑀡𑁆𑀟𑀓𑁄𑀲𑀁 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀸𑀭𑀺𑀧𑀼𑀢𑁆𑀢 𑀅𑀡𑁆𑀟𑀚𑀸 𑀬𑁄𑀦𑀺. 𑀬𑁂 𑀔𑁄 𑀢𑁂 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀢𑀸 𑀯𑀢𑁆𑀣𑀺𑀓𑁄𑀲𑀁 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀸𑀭𑀺𑀧𑀼𑀢𑁆𑀢 𑀚𑀮𑀸𑀩𑀼𑀚𑀸 𑀬𑁄𑀦𑀺. 𑀬𑁂 𑀔𑁄 𑀢𑁂𑀲𑀸𑀭𑀺 𑀧𑀼𑀢𑁆𑀢𑀲𑀢𑁆𑀢𑀸𑀧𑀽𑀢𑀺𑀫𑀘𑁆𑀙𑁂𑀯𑀸 𑀚𑀸𑀬𑀦𑁆𑀢𑀺. 𑀧𑀽𑀢𑀺𑀓𑀼𑀡𑀧𑁂𑀯𑀸 𑀧𑀽𑀢𑀺𑀓𑀼𑀫𑁆𑀫𑀸𑀲𑁂𑀯𑀸 𑀘𑀦𑁆𑀤𑀦𑀺𑀓𑀸𑀬𑀯𑀸 𑀑𑀴𑀺𑀕𑀮𑁆𑀮𑁂𑀯𑀸 𑀚𑀸𑀬𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀸𑀭𑀺𑀧𑀼𑀢𑁆𑀢 𑀲𑀁𑀲𑁂𑀤𑀚𑀸 𑀬𑁄𑀦𑀺. 𑀤𑁂𑀯𑀸 𑀦𑁂𑀭𑀓𑀸 𑀏𑀓𑀘𑁆𑀘𑁂 𑀘 𑀫𑀦𑀼𑀲𑁆𑀲𑀸 𑀏𑀓𑀘𑁆𑀘𑁂𑀘 𑀯𑀺𑀦𑀺𑀧𑀸𑀢𑀺𑀓𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀸𑀭𑀺𑀧𑀼𑀢𑁆𑀢 𑀑𑀧𑀧𑀸𑀢𑀺𑀓𑀸 𑀬𑁄𑀦𑀻𑀢𑀺 𑀯𑀼𑀢𑁆𑀢𑀁.

𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀡𑁆𑀟𑁂 𑀚𑀸𑀢𑀸 𑀅𑀡𑁆𑀟𑀚𑀸. 𑀚𑀮𑀸𑀩𑀼𑀫𑁆𑀳𑀺 𑀚𑀸𑀢𑀸 𑀚𑀮𑀸𑀩𑀼𑀚𑀸. 𑀲𑀁𑀲𑁂𑀤𑁂 𑀚𑀸𑀢𑀸 𑀲𑀁𑀲𑁂𑀤𑀚𑀸. 𑀯𑀺𑀦𑀸 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀢𑁆𑀢𑀺𑀢𑁆𑀯𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀑𑀧𑀧𑀸𑀢𑀺𑀓𑀸. 𑀅𑀪𑀺𑀦𑀺𑀩𑁆𑀪𑀺𑀚𑁆𑀚 𑀚𑀸𑀬𑀦𑁆𑀢𑀻𑀢𑀺 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀯𑀲𑁂𑀦 𑀚𑀸𑀬𑀦𑁆𑀢𑀺. 𑀧𑀽𑀢𑀺 𑀓𑀼𑀡𑀧𑁂𑀢𑀺𑀆𑀤𑀻𑀳𑀺 𑀅𑀦𑀺𑀝𑁆𑀞𑀝𑁆𑀞𑀸𑀦𑀸𑀦𑁂𑀯 𑀤𑀲𑁆𑀲𑀺𑀢𑀸𑀦𑀺. 𑀇𑀝𑁆𑀞𑁂𑀲𑀼 𑀲𑀧𑁆𑀧𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀲𑀢𑁆𑀢𑀸 𑀚𑀸𑀬𑀦𑁆𑀢𑀺𑀏𑀯𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀧𑀸𑀴𑀺𑀦𑀬𑁂𑀦 𑀅𑀡𑁆𑀟𑀁 𑀯𑀼𑀘𑁆𑀘𑀢𑀺 𑀅𑀡𑁆𑀟𑀓𑁄𑀲𑁄. 𑀚𑀮𑀸𑀩𑀼𑀯𑀼𑀘𑁆𑀘𑀢𑀺 𑀯𑀢𑁆𑀣𑀺𑀓𑁄𑀲𑁄, 𑀢𑀢𑁄 𑀚𑀸𑀢𑀸 𑀯𑀺𑀚𑀸𑀢𑀸 𑀦𑀺𑀓𑁆𑀔𑀦𑁆𑀢𑀸𑀢𑀺 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸𑀢𑀺𑀘 𑀯𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀚𑀭𑀁 𑀚𑀻𑀭𑀡𑀁 𑀪𑁂𑀤𑀁 𑀬𑀸𑀢𑀺 𑀉𑀧𑁂𑀢𑀻𑀢𑀺 𑀚𑀮𑀸𑀩𑀽𑀢𑀺 𑀲𑀤𑁆𑀤𑀦𑀻𑀢𑀺𑀬𑀁 𑀯𑀼𑀢𑁆𑀢𑀁. 𑀚𑀮𑀁 𑀯𑀼𑀘𑁆𑀘𑀢𑀺 𑀓𑀮𑀮𑀁. 𑀢𑀁 𑀆𑀯𑀼𑀦𑀸𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺 𑀅𑀯𑀢𑀺𑀯𑀸 𑀭𑀓𑁆𑀔𑀢𑀻𑀢𑀺 𑀚𑀮𑀸𑀩𑀼, 𑀕𑀩𑁆𑀪𑀧𑀮𑀺𑀯𑁂𑀞𑀦𑀸𑀲𑀬𑁄. 𑀲𑀁𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀲𑁂𑀤𑁄. 𑀧𑀽𑀢𑀺𑀫𑀘𑁆𑀙𑀸 𑀤𑀺𑀓𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀓𑁄 𑀧𑀤𑀼𑀫𑀕𑀩𑁆𑀪𑀯𑁂𑀴𑀼𑀕𑀩𑁆𑀪𑀭𑀼𑀓𑁆𑀔𑀲𑀼𑀲𑀺𑀭𑀧𑀼𑀧𑁆𑀨𑀨𑀮𑀸𑀤𑀺 𑀓𑁄𑀘 𑀅𑀮𑁆𑀮𑀓𑀺𑀮𑀺𑀦𑁆𑀦𑀧𑀤𑁂𑀲𑁄. 𑀉𑀧𑀧𑀢𑁆𑀢𑀺𑀓𑁆𑀔𑀡𑁂𑀏𑀯 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑀧𑀘𑁆𑀘𑀗𑁆𑀕𑀢𑁆𑀢𑀸 𑀢𑀢𑁄 𑀢𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀯𑀺𑀬 𑀚𑀸𑀬𑀦𑁆𑀢𑀻𑀢𑀺 𑀑𑀧𑀧𑀸𑀢𑀺𑀓𑀸.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀡𑁆𑀟𑀚𑀸𑀤𑀬𑁄𑀧𑀺 𑀅𑀡𑁆𑀟𑀓𑁄𑀲𑀸𑀤𑀺𑀫𑁆𑀳𑀺 𑀑𑀓𑁆𑀓𑀫𑀦𑁆𑀢𑀸 𑀉𑀧𑁆𑀧𑀢𑀦𑁆𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁𑀧𑀺 𑀑𑀧𑀧𑀸𑀢𑀺𑀓𑀢𑁆𑀢𑀧𑀲𑀗𑁆𑀕𑀁 𑀫𑀜𑁆𑀜𑀫𑀸𑀦𑁄 𑀉𑀧𑀧𑀸𑀢𑁄 𑀦𑁂𑀲𑀁 𑀅𑀢𑁆𑀣𑀻𑀢𑀺 𑀑𑀧𑀧𑀸𑀢𑀺𑀓𑀸𑀢𑀺 𑀯𑀢𑁆𑀯𑀸 𑀉𑀓𑁆𑀓𑀁𑀲𑀕𑀢𑀺 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀘𑁂𑀢𑁆𑀣 𑀯𑀺𑀲𑀺𑀝𑁆𑀞𑀑𑀧𑀧𑀸𑀢𑁄 𑀕𑀳𑀺𑀢𑁄. 𑀬𑀣𑀸 𑀅𑀪𑀺𑀭𑀽𑀧𑀲𑁆𑀲 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸𑀢𑀺 𑀯𑀤𑀢𑀺.

𑀉𑀓𑁆𑀓𑀝𑁆𑀞𑀯𑀲𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀪𑀸𑀯𑀲𑀗𑁆𑀔𑀸𑀢𑁂𑀦 𑀉𑀓𑁆𑀓𑀁𑀲𑀢𑀸𑀯𑁂𑀦, 𑀢𑀢𑁆𑀣 𑀑𑀧𑀧𑀸𑀢𑀺𑀓𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀲𑀳 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑁂𑀦 𑀅𑀢𑁆𑀢𑀪𑀸𑀯𑁂𑀦 𑀚𑀸𑀬𑀦𑁆𑀢𑀺. 𑀧𑀼𑀦 𑀢𑁂𑀲𑀁 𑀯𑀟𑁆𑀠𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀁𑀲𑁂𑀤𑀚𑀸𑀦𑀁 𑀧𑀦 𑀆𑀬𑀢𑀦𑀸𑀦𑀺 𑀏𑀯 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀧𑀦 𑀧𑀼𑀦 𑀯𑀟𑁆𑀠𑀺𑀢𑁆𑀯𑀸𑀏𑀯 𑀧𑀭𑀺𑀧𑀼𑀡𑁆𑀡𑀸𑀦𑀺 𑀚𑀸𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀑𑀫𑀓𑀯𑀲𑁂𑀦𑀸𑀢𑀺 𑀅𑀯𑀓𑀁𑀲𑀯𑀲𑁂𑀦. 𑀘𑀓𑁆𑀔𑀼𑀲𑁄𑀢𑀖𑀸𑀦𑀪𑀸𑀯𑀲𑁂𑀓𑀸𑀦𑀺𑀓𑀤𑀸𑀘𑀺𑀧𑀺 𑀦 𑀮𑀩𑁆𑀪𑀦𑁆𑀢𑀺 𑀚𑀸𑀢𑀺𑀩𑀥𑀺𑀭 𑀚𑀘𑁆𑀘𑀖𑀸𑀦𑀓𑀸𑀦𑀁 𑀅𑀪𑀸𑀯𑀓𑀸𑀦𑀜𑁆𑀘 𑀲𑀫𑁆𑀪𑀯𑀢𑁄𑀢𑀺 𑀅𑀧𑁆𑀧𑁄𑀬𑁄. 𑀢𑀢𑁆𑀣 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀲𑀼𑀕𑀢𑀺 𑀤𑀼𑀕𑁆𑀕𑀢𑀺 𑀚𑀸𑀢𑀺𑀬𑀸𑀦𑀁 𑀅𑀳𑁂𑀢𑀼𑀓𑀲𑀁𑀲𑁂𑀤𑀚𑀸𑀦𑀁 𑀓𑀤𑀸𑀘𑀺 𑀦𑀮𑀩𑁆𑀪𑀦𑁆𑀢𑀺. 𑀲𑀼𑀕𑀢𑀺𑀬𑀁 𑀧𑀦 𑀑𑀧𑀧𑀸𑀢𑀺𑀓𑀪𑀸𑀯𑁄𑀦𑀸𑀫 𑀲𑁂𑀝𑁆𑀞𑁄 𑀅𑀢𑁆𑀢𑀪𑀸𑀯 𑀧𑀝𑀺𑀮𑀸𑀪𑁄𑀢𑀺 𑀦𑀬𑁂𑀦 𑀓𑁂𑀦𑀘𑀺 𑀑𑀫𑀓𑁂𑀦 𑀓𑀫𑁆𑀫𑁂𑀦 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀲𑀼𑀕𑀢𑀺𑀚𑀸𑀢𑀺 𑀬𑀸𑀦𑀁 𑀑𑀧𑀧𑀸𑀢𑀺𑀓𑀸𑀦𑀁 𑀅𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀢𑀸𑀦𑀸𑀫 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀅𑀪𑀸𑀯𑀓𑁂𑀳𑀺 𑀆𑀤𑀺𑀓𑀧𑁆𑀧𑀺𑀓𑁂𑀳𑀺𑀢𑀺. 𑀤𑀼𑀕𑁆𑀕𑀢𑀺𑀚𑀸𑀢𑀺𑀬𑀸𑀦𑀁𑀧𑀺 𑀧𑀦 𑀢𑁂𑀲𑀁 𑀓𑀤𑀸𑀘𑀺 𑀘𑀓𑁆𑀔𑀼 𑀲𑁄𑀢 𑀪𑀸𑀯 𑀯𑁂𑀓𑀮𑁆𑀮𑀢𑀸𑀏𑀯 𑀯𑀢𑁆𑀢𑀩𑁆𑀩𑀸. 𑀦 𑀖𑀸𑀦𑀯𑁂𑀓𑀮𑁆𑀮𑀢𑀸. 𑀓𑀸𑀫𑀥𑀸𑀢𑀼𑀬𑀁 𑀧𑀦 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀻𑀢𑀺 𑀳𑀺 𑀅𑀝𑁆𑀞 𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀚𑀺𑀯𑁆𑀳𑀸𑀯𑁂𑀓𑀮𑁆𑀮𑀢𑀸𑀦𑀸𑀫 𑀲𑀩𑁆𑀩𑁂𑀲𑀁𑀧𑀺 𑀦𑀢𑁆𑀣𑀺 𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑁋

𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸 𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀲𑁆𑀲𑀘𑀺 𑀤𑀲. 𑀓𑀲𑁆𑀲𑀘𑀺𑀅𑀧𑀭𑀸𑀦𑀺 𑀤𑀲. 𑀓𑀲𑁆𑀲𑀘𑀺 𑀦𑀯. 𑀓𑀲𑁆𑀲𑀘𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀸𑀫𑀥𑀸𑀢𑀼𑀬𑀦𑁆𑀢𑀺 𑀓𑀸𑀫𑀮𑁄𑀓𑁂. 𑀉𑀧𑀧𑀢𑁆𑀢𑀺𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀓𑀲𑁆𑀲𑀘𑀺 𑀏𑀓𑀸𑀤𑀲𑀸 𑀬𑀢𑀦𑀸𑀦𑀻𑀢𑀺𑀆𑀤𑀺𑀲𑀼 𑀘𑀢𑀽𑀲𑀼 𑀯𑀸𑀓𑁆𑀬𑁂𑀲𑀼 𑀲𑀁𑀲𑁂𑀤𑀚𑁄𑀧𑀧𑀸𑀢𑀺𑀓𑀸 𑀯𑀼𑀢𑁆𑀢𑀸. 𑀓𑀲𑁆𑀲𑀘𑀺 𑀲𑀢𑁆𑀢𑀸𑀬𑀢𑀦𑀸𑀦𑀻𑀢𑀺 𑀏𑀢𑁆𑀣 𑀧𑀦 𑀕𑀩𑁆𑀪𑀲𑁂𑀬𑁆𑀬𑀓𑁄𑀯 𑀯𑀼𑀢𑁆𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀲𑀢𑁆𑀢𑀸𑀬𑀢𑀦𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀦 𑀮𑀩𑁆𑀪𑀢𑀺. 𑀧𑀯𑀢𑁆𑀢𑀺 𑀓𑀸𑀮𑁂𑀬𑁂𑀯 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀏𑀓𑀸𑀤𑀲𑀬𑀢𑀦𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀲𑀘𑀺 𑀤𑀲𑀸𑀢𑀺 𑀘𑀓𑁆𑀔𑀼𑀯𑁂𑀓𑀮𑁆𑀮𑀯𑀲𑁂𑀦. 𑀓𑀲𑁆𑀲𑀘𑀺 𑀅𑀧𑀭𑀸𑀦𑀺 𑀤𑀲𑀸𑀢𑀺 𑀲𑁄𑀢 𑀯𑁂𑀓𑀮𑁆𑀮𑀯𑀲𑁂𑀦. 𑀓𑀲𑁆𑀲𑀘𑀺 𑀦𑀯𑀸𑀢𑀺 𑀘𑀓𑁆𑀔𑀼𑀲𑁄𑀢 𑀤𑁆𑀯𑀬 𑀯𑁂𑀓𑀮𑁆𑀮 𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀤𑀺𑀘 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺𑀓𑁄𑀦𑀸𑀫 𑀲𑀺𑀬𑀸. 𑀢𑀤𑀸 𑀲𑀼𑀤𑁆𑀥𑀚𑀘𑁆𑀘𑀖𑀸𑀦𑀓𑁂𑀦 𑀲𑀤𑁆𑀥𑀺𑀁 𑀢𑀬𑁄 𑀤𑀲𑀓𑀯𑀸𑀭𑀸 𑀯𑀼𑀢𑁆𑀢𑀸 𑀲𑀺𑀬𑀼𑀁. 𑀢𑀣𑀸 𑀚𑀘𑁆𑀘𑀦𑁆𑀥𑀖𑀸𑀦𑀓 𑀚𑀘𑁆𑀘𑀩𑀥𑀺𑀭𑀖𑀸𑀦𑀓𑁂𑀳𑀺 𑀲𑀤𑁆𑀥𑀺𑀁 𑀢𑀬𑁄 𑀦𑀯𑀓𑀯𑀸𑀭𑀸 𑀏𑀓𑁄𑀘 𑀅𑀝𑁆𑀞𑀓𑀯𑀸𑀭𑁄 𑀯𑀼𑀢𑁆𑀢𑁄 𑀲𑀺𑀬𑀸 𑀢𑀺𑀡𑁆𑀡𑀁 𑀯𑀺𑀧𑀦𑁆𑀦𑀸𑀦𑀁 𑀯𑀲𑁂𑀦. 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸 𑀧𑀦 𑀦𑀢𑁆𑀣𑀺 𑀅𑀖𑀸𑀦𑀓𑁄 𑀑𑀧𑀧𑀸𑀢𑀺 𑀓𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀢𑀲𑁆𑀫𑀺𑀁 𑀧𑀦 𑀯𑀺𑀪𑀗𑁆𑀕𑁂 𑀇𑀦𑁆𑀤𑁆𑀭𑀺𑀬𑀯𑀸𑀭𑁂 𑀦𑀧𑀼𑀁𑀲𑀓𑀸𑀦𑀁 𑀑𑀧𑀧𑀸𑀢𑀺𑀓𑀸𑀦𑀦𑁆𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀣𑀧𑁂𑀢𑁆𑀯𑀸 𑀆𑀤𑀺𑀓𑀧𑁆𑀧𑀺𑀓𑁂 𑀅𑀪𑀸𑀯𑀓𑁄𑀧𑀺 𑀑𑀧𑀧𑀸𑀢𑀺𑀓𑁄 𑀦𑀢𑁆𑀣𑀺𑀬𑁂𑀯𑀸𑀢𑀺. 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀁𑀧𑀺 𑀧𑀦 𑀲𑀁𑀲𑁂𑀤𑀚𑀸𑀦𑀁 𑀯𑀼𑀢𑁆𑀢𑀧𑀓𑀸𑀭𑀁 𑀘𑀓𑁆𑀔𑀸𑀤𑀺𑀯𑁂𑀓𑀮𑁆𑀮𑀁 𑀅𑀝𑁆𑀞𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀳-𑀲𑀢𑁆𑀢𑀢𑀺 𑀉𑀓𑁆𑀓𑀁𑀲𑀢𑁄𑀯 𑀭𑀽𑀧𑀸𑀦𑀺 𑀲𑀁𑀲𑁂𑀤𑀚𑁄𑀧𑀧𑀸𑀢 𑀬𑁄𑀦𑀻𑀲𑀼. 𑀅𑀣𑀯𑀸, 𑀅𑀯𑀓𑀁𑀲𑀢𑁄 𑀢𑀺𑀁𑀲𑀸𑀢𑀺. 𑀢𑀢𑁆𑀣 𑀢𑀺𑀁𑀲𑀸𑀢𑀺 𑀚𑀺𑀯𑁆𑀳𑀸𑀓𑀸𑀬 𑀯𑀢𑁆𑀣𑀼 𑀤𑀲𑀓𑀸𑀦𑀁 𑀯𑀲𑁂𑀦 𑀢𑀺𑀁𑀲𑀭𑀽𑀧𑀸𑀦𑀻𑀢𑀺 𑀘 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀯𑀘𑀦𑀁 𑀲𑀁𑀲𑁂𑀤𑀚𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀸 𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀦 𑀬𑀫𑀓𑁂 𑀖𑀸𑀦𑀚𑀺𑀯𑁆𑀳𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀸𑀪𑀸𑀯 𑀯𑀼𑀢𑁆𑀢𑀺𑀢𑀸 𑀯𑀼𑀢𑁆𑀢𑀸𑀢𑀺 𑀚𑀺𑀯𑁆𑀳𑀸 𑀯𑁂𑀓𑀮𑁆𑀮𑀢𑀸 𑀯𑀺𑀬 𑀖𑀸𑀦𑀯𑁂𑀓𑀮𑁆𑀮𑀢𑀸𑀧𑀺 𑀦𑀢𑁆𑀣𑀻𑀢𑀺 𑀇𑀘𑁆𑀙𑀺𑀢𑀁. 𑀇𑀦𑁆𑀤𑁆𑀭𑀺𑀬 𑀬𑀫𑀓𑁂 𑀧𑀦 𑁋

𑀬𑀲𑁆𑀲𑀯𑀸 𑀧𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀖𑀸𑀦𑀓𑀸𑀦𑀁 𑀇𑀢𑁆𑀣𑀻𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦𑀁 𑀢𑀸𑀲𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄𑀘 𑀢𑀸𑀲𑀗𑁆𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺𑀘. 𑀬𑀲𑁆𑀲𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀖𑀸𑀦𑀓𑀸𑀦𑀁 𑀧𑀼𑀭𑀺𑀲𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄𑀘 𑀢𑁂𑀲𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺𑀘 𑀯𑀼𑀢𑁆𑀢𑀁.

𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀖𑀸𑀦𑀯𑁂𑀓𑀮𑁆𑀮𑀢𑀸𑀧𑀺 𑀅𑀢𑁆𑀣𑀻𑀢𑀺 𑀬𑀼𑀢𑁆𑀢𑀁.