𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀻

𑀲𑀗𑁆𑀕𑀳 𑀫𑀳𑀸𑀝𑀻𑀓𑀸 𑀧𑀸𑀞

𑀕𑀦𑁆𑀣𑀸𑀭𑀩𑁆𑀪𑀓𑀣𑀸

[𑀓]

𑀉𑀤𑀬𑀸 𑀬𑀲𑁆𑀲 𑀏𑀓𑀲𑁆𑀲, 𑀲𑀤𑁆𑀥𑀫𑁆𑀫𑀭𑀁𑀲𑀺 𑀚𑀸𑀮𑀺𑀦𑁄;

𑀧𑀩𑀼𑀚𑁆𑀛𑀺𑀁𑀲𑀼 𑀚𑀦𑀫𑁆𑀩𑀼𑀚𑀸, 𑀚𑀸𑀢𑀺𑀓𑁆𑀔𑁂𑀢𑁆𑀢𑁂 𑀫𑀳𑀸𑀲𑀭𑁂.

[𑀔]

𑀯𑀦𑁆𑀤𑀸𑀫𑀺 𑀢𑀁 𑀫𑀳𑀸𑀲𑀽𑀭𑀁, 𑀫𑀳𑀸𑀫𑁄𑀳 𑀢𑀫𑁄𑀦𑀼𑀤𑀁;

𑀲𑀜𑁆𑀚𑀸𑀢𑀁 𑀲𑁄 𑀳𑀤𑀬𑁂 𑀫𑀬𑁆𑀳𑀁, 𑀢𑀫𑁄𑀔𑀦𑁆𑀥𑀁 𑀧𑀦𑀽𑀤𑀢𑀁.

[𑀕]

𑀧𑁄𑀭𑀸𑀡𑀓𑁂𑀳𑀺 𑀯𑀺𑀜𑁆𑀜𑀽𑀳𑀺, 𑀯𑀡𑁆𑀡𑀺𑀢𑀸 𑀯𑀡𑁆𑀡𑀦𑀸 𑀩𑀳𑀽;

𑀤𑀺𑀲𑁆𑀲𑀦𑁆𑀢𑀺 𑀇𑀥 𑀮𑁄𑀓𑀫𑁆𑀳𑀺, 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂.

[𑀖]

𑀦 𑀢𑀸𑀳𑀺 𑀢𑀼𑀝𑁆𑀞𑀺𑀁 𑀯𑀺𑀦𑁆𑀤𑀦𑁆𑀢𑀺, 𑀬𑁂 𑀲𑀸𑀭𑀢𑁆𑀣𑀸 𑀪𑀺𑀫𑀸𑀦𑀺𑀦𑁄;

𑀢𑁂 𑀫𑀁 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀺, 𑀧𑀭𑀫𑀢𑁆𑀣𑀲𑁆𑀲 𑀤𑀻𑀧𑀦𑀁.

[𑀗]

𑀫𑀳𑀡𑁆𑀡𑀯𑁂 𑀭𑀢𑀦𑀸𑀦𑀺, 𑀉𑀤𑁆𑀥𑀭𑀺𑀢𑁆𑀯𑀸 𑀤𑀺𑀧𑀯𑀸𑀲𑀺𑀦𑀁;

𑀬𑀣𑀺𑀘𑁆𑀙𑀓𑀁𑀧𑀺 𑀤𑀚𑁆𑀚𑁂𑀬𑁆𑀬𑀼𑀁, 𑀦 𑀯𑀢𑁆𑀢𑀩𑁆𑀩𑀸𑀯 𑀊𑀦𑀢𑀸.

[𑀘]

𑀢𑀣𑁂𑀯𑁂𑀢𑁆𑀣 𑀯𑀺𑀧𑀼𑀮𑀢𑁆𑀣𑀸, 𑀅𑀡𑁆𑀡𑀯𑁂 𑀭𑀢𑀦𑀽𑀧𑀫𑀸;

𑀲𑀢𑀓𑁆𑀔𑀢𑁆𑀢𑀼𑀁𑀧𑀺 𑀯𑀡𑁆𑀡𑁂𑀬𑁆𑀬𑀼𑀁, 𑀧𑀭𑀺𑀬𑀸𑀤𑀺𑀦𑁆𑀦𑀸 𑀦 𑀳𑁂𑀲𑁆𑀲𑀭𑁂.

[𑀙]

𑀢𑀲𑁆𑀫𑀸 𑀢𑀸𑀲𑀼 𑀯𑀡𑁆𑀡𑀦𑀸𑀲𑀼, 𑀲𑀸𑀭𑀫𑀸𑀤𑀸𑀬 𑀯𑀡𑁆𑀡𑀦𑀁;

𑀦𑀸𑀦𑀸𑀲𑀸𑀭𑀢𑁆𑀣 𑀲𑀫𑁆𑀧𑀼𑀡𑁆𑀡𑀁, 𑀉𑀢𑁆𑀢𑀸𑀦 𑀧𑀤𑀩𑁆𑀬𑀜𑁆𑀚𑀦𑀁.

[𑀚]

𑀦𑀸𑀢𑀺𑀲𑀗𑁆𑀔𑁂𑀧 𑀯𑀺𑀢𑁆𑀣𑀸𑀭𑀁, 𑀫𑀦𑁆𑀤𑀩𑀼𑀤𑁆𑀥𑀺𑀧𑁆𑀧𑀩𑁄𑀥𑀦𑀁;

𑀓𑀭𑀺𑀲𑁆𑀲𑀁 𑀢𑀁 𑀧𑀭𑀫𑀢𑁆𑀣𑁂𑀲𑀼, 𑀲𑀼𑀡𑀦𑁆𑀢𑀼 𑀧𑀸𑀝𑀯𑀢𑁆𑀣𑀺𑀦𑁄𑀢𑀺.

𑀧𑀣𑀫𑀕𑀸𑀣𑀸-𑀧𑀭𑀫𑀢𑁆𑀣𑀤𑀻𑀧𑀦𑀻

𑁧. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀁 𑀓𑀢𑁆𑀢𑀼𑀓𑀸𑀫𑁄 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀲𑀗𑁆𑀕𑀳𑀸𑀭𑀩𑁆𑀪𑁂 𑀢𑀸𑀯 𑀲𑀧𑁆𑀧𑀬𑁄𑀚𑀦𑁂 𑀧𑀜𑁆𑀘𑀧𑀺𑀡𑁆𑀟𑀢𑁆𑀣𑁂 𑀤𑀲𑁆𑀲𑁂𑀦𑁆𑀢𑁄 𑀆𑀤𑀺𑀕𑀸𑀣 𑀫𑀸𑀳. 𑀧𑀜𑁆𑀘𑀧𑀺𑀡𑁆𑀟𑀢𑁆𑀣𑀸𑀦𑀸𑀫 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸, 𑀕𑀦𑁆𑀣𑀸𑀪𑀺𑀥𑁂𑀬𑁆𑀬𑁄, 𑀕𑀦𑁆𑀣𑀧𑁆𑀧𑀓𑀸𑀭𑁄, 𑀕𑀦𑁆𑀣𑀸𑀪𑀺𑀥𑀸𑀦𑀁, 𑀕𑀦𑁆𑀣𑀧𑁆𑀧𑀬𑁄𑀚𑀦𑀁. 𑀢𑀢𑁆𑀣 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀧𑁆𑀧𑀘𑁆𑀘𑀓𑀸𑀭𑀓𑀭𑀡𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀦𑀸𑀫. 𑀲𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀢𑀼𑀮𑀁 𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀁 𑀅𑀪𑀺𑀯𑀸𑀤𑀺𑀬𑀸𑀢𑀺 𑀏𑀢𑁂𑀳𑀺 𑀧𑀤𑁂𑀳𑀺 𑀤𑀲𑁆𑀲𑀺𑀢𑀸. 𑀲𑀓𑀮𑁂𑀦 𑀕𑀦𑁆𑀣𑁂𑀦 𑀅𑀪𑀺𑀳𑀺𑀢𑀸 𑀧𑀥𑀸𑀦𑀢𑁆𑀣𑀪𑀽𑀢𑀸 𑀘𑀢𑁆𑀢𑀸𑀭𑁄 𑀅𑀪𑀺𑀥𑀫𑁆𑀫𑀢𑁆𑀣𑀸 𑀕𑀦𑁆𑀣𑀸𑀪𑀺𑀥𑁂𑀬𑁆𑀬𑁄. 𑀲𑁄 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀦𑁆𑀢𑀺𑀧𑀤𑁂 𑀅𑀪𑀺𑀥𑀫𑁆𑀫𑀢𑁆𑀣 𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑁄.

[𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀗𑁆𑀕𑀳𑀺𑀢𑀪𑀸𑀯𑁄𑀧𑀺 𑀅𑀪𑀺𑀥𑁂𑀬𑁆𑀬𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀅𑀪𑀺𑀥𑁂𑀬𑁆𑀬𑁄 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑁂𑀦 𑀤𑀲𑁆𑀲𑀺𑀢𑁄𑀢𑀺𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀲𑁄 𑀅𑀧𑁆𑀧𑀥𑀸𑀦𑀢𑁆𑀣𑀪𑀽𑀢𑁄 𑀲𑀗𑁆𑀕𑀳𑀺𑀢𑀪𑀸𑀯𑁄 𑀇𑀫𑀲𑁆𑀫𑀺𑀁 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑁂 𑀅𑀪𑀺𑀥𑁂𑀬𑁆𑀬𑁄 𑀦𑀸𑀫 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀇𑀢𑁄 𑀧𑀝𑁆𑀞𑀸𑀬𑀘 𑀝𑀻𑀓𑀸𑀬𑀦𑁆𑀢𑀺 𑀯𑀼𑀢𑁆𑀢𑁂 𑀇𑀫𑀲𑁆𑀲 𑀲𑀗𑁆𑀕𑀳𑀲𑁆𑀲 𑀤𑁆𑀯𑀻𑀲𑀼 𑀲𑀻𑀳𑀴𑀝𑀻𑀓𑀸𑀲𑀼 𑀧𑀣𑀫𑀸𑀝𑀻𑀓𑀸 𑀤𑀝𑁆𑀞𑀩𑁆𑀩𑀸. 𑀯𑀺𑀪𑀸𑀯𑀦𑀺𑀬𑀦𑁆𑀢𑀺 𑀯𑀼𑀢𑁆𑀢𑁂 𑀏𑀢𑀭𑀳𑀺 𑀧𑀸𑀓𑀝𑀸 𑀤𑀼𑀢𑀻𑀬𑀸. 𑀝𑀻𑀓𑀸𑀲𑀽𑀢𑀺 𑀯𑀼𑀢𑁆𑀢𑁂 𑀤𑁆𑀯𑁂𑀧𑀺. 𑀫𑀳𑀸𑀝𑀻𑀓𑀸𑀬𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀳𑀸𑀝𑀻𑀓𑀸 𑀤𑀝𑁆𑀞𑀩𑁆𑀩𑀸. 𑀬𑀜𑁆𑀘 𑀯𑀘𑀦𑀁 𑀯𑀺𑀪𑀸𑀯𑀦𑀺𑀬𑀁𑀧𑀺 𑀆𑀕𑀢𑀁, 𑀅𑀜𑁆𑀜𑀢𑁆𑀣𑀸𑀧𑀺 𑀆𑀕𑀢𑀁, 𑀢𑀁𑀧𑀺 𑀇𑀥 𑀯𑀺𑀪𑀸𑀯𑀦𑀺𑀬𑀁𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀆𑀲𑀦𑁆𑀦𑀢𑁆𑀢𑀸𑀢𑀺. 𑀲𑀪𑀸𑀕𑀥𑀫𑁆𑀫𑀲𑀗𑁆𑀕𑀳𑀯𑀲𑁂𑀦 𑀕𑀦𑁆𑀣𑀯𑀺𑀥𑀸𑀦𑀸𑀓𑀸𑀭𑁄 𑀕𑀦𑁆𑀣𑀧𑁆𑀧𑀓𑀸𑀭𑁄. 𑀲𑁄 𑀧𑀦 𑀲𑀗𑁆𑀕𑀳 𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑁄.

[𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀤𑁆𑀤𑁄 𑀕𑀦𑁆𑀣𑀯𑀺𑀥𑀸𑀦𑀸𑀓𑀸𑀭𑀁 𑀤𑀻𑀧𑁂𑀢𑀻𑀢𑀺. 𑀅𑀢𑁆𑀣𑀸 𑀦𑀼𑀕𑀢𑀸 𑀕𑀦𑁆𑀣𑀲𑀫𑀜𑁆𑀜𑀸 𑀯𑀦𑁆𑀣𑀸𑀪𑀺𑀥𑀸𑀦𑀁. 𑀢𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀧𑀤𑁂𑀦 𑀤𑀲𑁆𑀲𑀺𑀢𑀁. 𑀲𑀗𑁆𑀕𑀳𑀕𑀦𑁆𑀣𑁂 𑀓𑀢𑁂 𑀲𑀢𑀺 𑀢𑀤𑀼𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀅𑀦𑀸𑀬𑀸𑀲𑀢𑁄 𑀮𑀤𑁆𑀥𑀩𑁆𑀩𑀁 𑀥𑀫𑁆𑀫𑀸𑀦𑀁 𑀲𑀭𑀽𑀧𑀸𑀯𑀩𑁄𑀥𑀸𑀤𑀺𑀓𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀁 𑀕𑀦𑁆𑀣𑀲𑁆𑀲 𑀨𑀮𑀸𑀦𑀼𑀨𑀮𑀁 𑀕𑀦𑁆𑀣𑀧𑁆𑀧𑀬𑁄𑀚𑀦𑀁 𑀢𑀁𑀧𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑁂𑀦𑁂𑀯 𑀲𑀸𑀫𑀢𑁆𑀣𑀺𑀬𑀢𑁄 𑀤𑀲𑁆𑀲𑀺𑀢𑀁.

[𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀗𑁆𑀕𑀳𑀲𑀤𑁆𑀤𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀤𑁆𑀤𑁂𑀦 𑀯𑀺𑀦𑀸 𑀅𑀦𑀸𑀬𑀸𑀲𑀢𑁄 𑀲𑀁𑀲𑀺𑀤𑁆𑀥𑀺𑀫𑀢𑁆𑀢𑀤𑀻𑀧𑀓𑁂𑀦 𑀲𑀗𑁆𑀕𑀳𑀲𑀤𑁆𑀤𑀫𑀢𑁆𑀢𑁂𑀦 𑀢𑀸𑀤𑀺𑀲𑁄 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑁄 𑀧𑀬𑁄 𑀚𑀦𑀯𑀺𑀲𑁂𑀲𑁄 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀅𑀲𑀤𑁆𑀥𑀫𑁆𑀫 𑀲𑀗𑁆𑀕𑀳𑀸𑀦𑀁𑀧𑀺 𑀮𑁄𑀓𑁂 𑀲𑀦𑁆𑀤𑀺𑀲𑁆𑀲𑀦𑀢𑁄𑀢𑀺.

𑁨. 𑀢𑀢𑁆𑀣 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀢𑀸𑀯 𑀅𑀲𑀗𑁆𑀔𑁂𑀬𑁆𑀬𑀅𑀧𑁆𑀧𑀫𑁂𑀬𑁆𑀬𑀧𑁆𑀧𑀬𑁄𑀚𑀦𑀸 𑀳𑁄𑀢𑀺. 𑀬𑀣𑀸𑀳 𑁋

𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄 𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀬𑀫𑁂𑀢𑁆𑀣 𑀫𑀧𑀺 𑀓𑁂𑀦𑀘𑀻𑀢𑀺.

𑀬 𑀫𑁂𑀢𑁆𑀣𑀫𑀧𑀻𑀢𑀺𑀏𑀢𑁆𑀣 𑀬𑁂𑀦𑀓𑁂𑀦𑀘𑀺 𑀅𑀧𑀺 𑀫𑀦𑀼𑀲𑁆𑀲𑁂𑀦𑀯𑀸 𑀤𑁂𑀯𑁂𑀦𑀯𑀸 𑀩𑁆𑀭𑀳𑁆𑀫𑀼𑀦𑀸𑀯𑀸 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀬𑁄𑀚𑀦𑀸. 𑀝𑀻𑀓𑀸𑀓𑀸𑀭𑀸𑀧𑀺 𑀢𑀁 𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀲𑀗𑁆𑀕𑀳𑀓𑀸𑀭𑀸 𑀧𑀦 𑀅𑀦𑁆𑀢𑀭𑀸𑀬𑀦𑀻𑀯𑀸𑀭𑀡𑀫𑁂𑀯 𑀯𑀺𑀲𑁂𑀲𑀢𑁄 𑀧𑀘𑁆𑀘𑀸𑀲𑀻𑀲𑀦𑁆𑀢𑀺. 𑀲𑀗𑁆𑀕𑀳𑀓𑀸𑀭𑀸 𑀢𑀺𑀘 𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀸𑀤𑀬𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺.

𑀦𑀺𑀧𑁆𑀧𑀘𑁆𑀘𑀓𑀸𑀭𑀲𑁆𑀲𑁂𑀢𑀲𑁆𑀲,

𑀓𑀢𑀲𑁆𑀲 𑀭𑀢𑀦𑀢𑁆𑀢𑀬𑁂;

𑀆𑀦𑀼𑀪𑀸𑀯𑁂𑀦 𑀲𑁄𑀲𑁂𑀢𑁆𑀯𑀸,

𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄𑀢𑀺 𑀳𑀺 𑀯𑀼𑀢𑁆𑀢𑀁.

𑁩. 𑀓𑀣𑀜𑁆𑀘 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀬 𑀅𑀦𑁆𑀢𑀭𑀸𑀬𑀦𑀻𑀯𑀸𑀭𑀡𑀁 𑀳𑁄𑀢𑀻𑀢𑀺. 𑀯𑀼𑀘𑁆𑀘𑀢𑁂-𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀳𑀺 𑀦𑀸𑀫 𑀯𑀦𑁆𑀤𑀦𑀸𑀓𑀺𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀓𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑁄 𑀫𑀳𑀦𑁆𑀢𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀧𑀼𑀜𑁆𑀜𑀧𑁆𑀧𑀯𑀸𑀳𑁄. 𑀲𑁄 𑀘 𑀅𑀦𑀼𑀢𑁆𑀢𑀭𑁂𑀲𑀼 𑀩𑀼𑀤𑁆𑀥𑀸𑀤𑀻𑀲𑀼 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂𑀲𑀼 𑀲𑀁𑀯𑀟𑁆𑀠𑀺𑀢𑀢𑁆𑀢𑀸 𑀣𑁂𑀭𑀲𑁆𑀲 𑀘 𑀉𑀴𑀸𑀭𑀘𑁆𑀙𑀦𑁆𑀤𑀲𑀤𑁆𑀥𑀸𑀩𑀼𑀤𑁆𑀥𑀺𑀕𑀼𑀡𑁂𑀳𑀺 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀫𑀳𑀸𑀚𑀼𑀢𑀺𑀓𑁄 𑀫𑀳𑀧𑁆𑀨𑀮𑁄 𑀫𑀳𑀸𑀦𑀺𑀲𑀁𑀲𑁄 𑀘 𑀧𑀼𑀜𑁆𑀜𑀸𑀢𑀺𑀲𑀬𑁄 𑀳𑁄𑀢𑀺. 𑀲𑁄 𑀲𑀬𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀪𑀸𑀯𑁂 𑀞𑀢𑁆𑀯𑀸 𑀩𑀳𑀺𑀤𑁆𑀥𑀸 𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑁂 𑀉𑀧𑀦𑁂𑀢𑁆𑀯𑀸 𑀅𑀢𑀺𑀧𑀡𑀻𑀢𑀉𑀢𑀼𑀘𑀺𑀢𑁆𑀢𑀸𑀳𑀸𑀭 𑀲𑀫𑀼𑀝𑁆𑀞𑀺𑀢𑀸𑀦𑀁 𑀲𑀭𑀻𑀭𑀝𑁆𑀞𑀓𑀥𑀸𑀢𑀽𑀦𑀁 𑀉𑀧𑀩𑁆𑀭𑀽𑀳𑀦𑀁 𑀓𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑁄 𑀓𑀸𑀲𑀲𑁆𑀲 𑀚𑀦𑀓𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀁 𑀤𑁂𑀢𑀺. 𑀅𑀮𑀤𑁆𑀥𑁄𑀓𑀸𑀲𑀲𑁆𑀲 𑀘 𑀧𑀼𑀜𑁆𑀜𑀦𑁆𑀢𑀭𑀲𑁆𑀲 𑀑𑀓𑀸𑀲𑀮𑀸𑀪𑀁 𑀓𑀭𑁄𑀢𑀺. 𑀅𑀣 𑀮𑀤𑁆𑀥𑀸𑀦𑀼𑀩𑀮𑁂𑀦 𑀮𑀤𑁆𑀥𑁄 𑀓𑀸𑀲𑁂𑀦 𑀘 𑀢𑀤𑀼𑀪𑀬𑁂𑀦 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀸 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀬𑁄 𑀣𑁂𑀭𑀲𑀦𑁆𑀢𑀸𑀦𑁂 𑀬𑀫𑀓𑀫𑀳𑀸𑀦𑀤𑀺𑀬𑁄 𑀯𑀺𑀬 𑀩𑀮𑀯𑀩𑀮𑀯𑀦𑁆𑀢𑀺 𑀬𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀢𑀲𑁆𑀫𑀺𑀁 𑀇𑀝𑁆𑀞𑀨𑀮𑀖𑀦𑀧𑀭𑀺𑀧𑀽𑀭𑀺𑀢𑁂 𑀣𑁂𑀭𑀲𑀦𑁆𑀢𑀸𑀦𑁂 𑀅𑀦𑀺𑀝𑁆𑀞𑀨𑀮𑀪𑀽𑀢𑀸𑀦𑀁 𑀭𑁄𑀕𑀸𑀤𑀺 𑀅𑀦𑁆𑀢𑀭𑀸𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀝𑁆𑀞𑀨𑀮𑀲𑀦𑁆𑀢𑀸𑀦𑀯𑀺𑀩𑀸𑀥𑀓𑀸𑀦𑀺 𑀅𑀦𑀺𑀝𑁆𑀞𑀨𑀮𑀲𑀦𑁆𑀢𑀸𑀦𑀚𑀦𑀓𑀸𑀦𑀺 𑀘 𑀅𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀤𑀽𑀭𑀢𑁄 𑀅𑀧𑀦𑀻𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀳𑀺 𑀓𑀫𑁆𑀫𑀸𑀦𑀺𑀦𑀸𑀫 𑀧𑀼𑀜𑁆𑀜𑀸𑀦𑀺 𑀅𑀧𑀼𑀜𑁆𑀜𑀸𑀦𑀺 𑀘 𑀅𑀢𑁆𑀢𑀦𑁄 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑁂 𑀅𑀲𑀢𑀺 𑀯𑀺𑀧𑀘𑁆𑀘𑀦𑁆𑀢𑀻𑀢𑀺. 𑀢𑀢𑁄 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀆𑀬𑀼𑀯𑀡𑁆𑀡𑀸 𑀤𑀬𑁄 𑀇𑀝𑁆𑀞𑀨𑀮𑀥𑀫𑁆𑀫𑀸 𑀬𑀸𑀯 𑀕𑀦𑁆𑀣𑀦𑀺𑀝𑁆𑀞𑀸𑀦𑀸 𑀬𑀸𑀯 𑀆𑀬𑀼𑀓𑀧𑁆𑀧𑀧𑀭𑀺𑀬𑁄 𑀲𑀸𑀦𑀸𑀧𑀺 𑀯𑀸 𑀯𑀟𑁆𑀠𑀦𑀧𑀓𑁆𑀔𑁂 𑀞𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀬𑀣𑀸𑀳 𑁋

𑀅𑀪𑀺 𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼𑀯𑀡𑁆𑀡𑁄 𑀲𑀼𑀔𑀁 𑀩𑀮𑀦𑁆𑀢𑀺.

𑀏𑀯𑀁 𑀢𑀸𑀬 𑀯𑀦𑁆𑀤𑀦𑀸𑀬 𑀅𑀦𑁆𑀢𑀭𑀸𑀬𑀦𑀻𑀯𑀸𑀭𑀡𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀲𑀗𑁆𑀕𑀳𑀸𑀭𑀩𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀓𑀭𑀡𑀁 𑀣𑁂𑀭𑀲𑁆𑀲 𑀅𑀢𑁆𑀢𑀦𑀸 𑀆𑀭𑀩𑁆𑀪 𑀫𑀸𑀦𑀲𑀗𑁆𑀕𑀳𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀼𑀢𑁆𑀣𑀁. 𑀦 𑀓𑁂𑀯𑀮𑀜𑁆𑀘 𑀣𑁂𑀭𑀲𑁆𑀲𑁂𑀯, 𑀲𑁄𑀢𑀽𑀦𑀜𑁆𑀘 𑀲𑀗𑁆𑀕𑀳𑀁 𑀕𑀡𑁆𑀳𑀦𑁆𑀢𑀸𑀦𑀁 𑀆𑀤𑀺𑀫𑁆𑀳𑀺𑀬𑁂𑀯 𑀭𑀢𑀦𑀢𑁆𑀢𑀬 𑀯𑀦𑁆𑀤𑀦𑀸 𑀲𑀺𑀤𑁆𑀥𑀺𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀕𑀳𑀡 𑀓𑀺𑀘𑁆𑀘𑀲𑀫𑁆𑀧𑀚𑁆𑀚𑀦𑀢𑁆𑀣𑀦𑁆𑀢𑀺.

[𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀢𑁆𑀢𑀲𑀼 𑀚𑀯𑀦𑁂𑀲𑀼 𑀧𑀣𑀫𑀚𑀯𑀦 𑀯𑀲𑁂𑀦𑁂𑀯 𑀯𑀦𑁆𑀤𑀦𑀸 𑀧𑀬𑁄𑀚𑀦𑀁 𑀯𑀺𑀪𑀸𑀯𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. ‘‘𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸’’𑀢𑀺 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀲𑁆𑀲𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀲𑁆𑀲 𑀘 𑀲𑀢𑁆𑀢𑀲𑀼𑀧𑀺 𑀚𑀯𑀦𑁂𑀲𑀼 𑀉𑀧𑀮𑀤𑁆𑀥𑀢𑁆𑀢𑀸𑀢𑀺. 𑀬𑀣𑀸 𑀳𑀺 𑀆𑀳𑀸𑀭𑀭𑀽𑀧𑀲𑁆𑀲 𑀤𑁆𑀯𑀻𑀲𑀼 𑀓𑀺𑀘𑁆𑀘𑁂𑀲𑀼 𑀑𑀚𑀝𑁆𑀞𑀫𑀓𑀭𑀽𑀧𑀚𑀦𑀦𑀓𑀺𑀘𑁆𑀘𑀁 𑀧𑀭𑀺𑀢𑁆𑀢𑀓𑀁 𑀅𑀧𑁆𑀧𑀫𑀢𑁆𑀢𑀓𑀁 𑀳𑁄𑀢𑀺. 𑀘𑀢𑀼𑀲𑁆𑀲𑀦𑁆𑀢 𑀢𑀺𑀭𑀽𑀧𑀼𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁂𑀯 𑀫𑀳𑀦𑁆𑀢𑀁 𑀅𑀥𑀺𑀫𑀢𑁆𑀢𑀁. 𑀢𑀣𑀸𑀳𑀺 𑀧𑀝𑁆𑀞𑀸𑀦𑁂𑀧𑀺 𑀢𑀤𑀼𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁂𑀯 𑀕𑀳𑁂𑀢𑁆𑀯𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀺𑀪𑀗𑁆𑀕𑀯𑀸𑀭𑁄 𑀯𑀺𑀪𑀢𑁆𑀢𑁄. 𑀏𑀯𑀫𑁂𑀯𑀁 𑀇𑀥𑀧𑀺 𑀧𑀣𑀫𑀚𑀯𑀦𑀲𑁆𑀲 𑀅𑀯𑀼𑀦𑀸𑀯 𑀯𑀺𑀧𑀸𑀓𑀚𑀦𑀦𑀓𑀺𑀘𑁆𑀘𑀁 𑀧𑀭𑀺𑀢𑁆𑀢𑀓𑀁 𑀅𑀧𑁆𑀧𑀫𑀢𑁆𑀢𑀓𑀁 𑀳𑁄𑀢𑀺. 𑀅𑀳𑁂𑀢𑀼𑀓𑀯𑀺𑀧𑀸𑀓𑀫𑀢𑁆𑀢𑀁 𑀚𑀦𑁂𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀓𑀫𑁆𑀫𑀦𑁆𑀢𑀭𑀼𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀫𑁂𑀯 𑀫𑀳𑀦𑁆𑀢𑀁 𑀅𑀥𑀺𑀫𑀢𑁆𑀢𑀁. 𑀢𑀜𑁆𑀘 𑀲𑀢𑁆𑀢𑀲𑀼𑀧𑀺 𑀚𑀯𑀦𑁂𑀲𑀼 𑀉𑀧𑀮𑀩𑁆𑀪𑀢𑀺 𑀬𑁂𑀯𑀸𑀢𑀺. 𑀬𑀲𑁆𑀫𑀸 𑀧𑀦 𑀕𑀦𑁆𑀣𑀸𑀪𑀺𑀥𑁂𑀬𑁆𑀬𑁂 𑀕𑀦𑁆𑀣𑀧𑁆𑀧𑀓𑀸𑀭𑁂 𑀕𑀦𑁆𑀣𑀧𑁆𑀧𑀬𑁄𑀚𑀦𑁂 𑀘 𑀆𑀤𑀺𑀢𑁄 𑀯𑀺𑀯𑀺𑀢𑁂𑀲𑀢𑀺 𑀲𑁄𑀢𑀼 𑀚𑀦𑀸𑀦𑀁 𑀕𑀦𑁆𑀣𑀲𑁆𑀲𑀯𑀦𑁂 𑀉𑀲𑁆𑀲𑀸𑀳𑁄 𑀚𑀸𑀬𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀕𑀦𑁆𑀣𑀸 𑀪𑀺𑀥𑁂𑀬𑁆𑀬𑀸𑀤𑀻𑀦𑀁 𑀤𑀲𑁆𑀲𑀦𑀁 𑀕𑀦𑁆𑀣𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁. 𑀕𑀦𑁆𑀣𑀸𑀪𑀺𑀥𑀸𑀦𑀤𑀲𑁆𑀲𑀦𑀁 𑀯𑁄𑀳𑀸𑀭𑀲𑀼𑀔𑀢𑁆𑀣𑀦𑁆𑀢𑀺. 𑀇𑀤𑀫𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀁.

𑁪. 𑀅𑀬𑀁 𑀧𑀦 𑀧𑀤𑀢𑁆𑀣𑁄. 𑀲𑀫𑁆𑀫𑀸𑀘 𑀩𑀼𑀚𑁆𑀛𑀺 𑀲𑀸𑀫𑀜𑁆𑀘 𑀩𑀼𑀚𑁆𑀛𑀻𑀢𑀺 𑀲𑀫𑁆𑀫𑀸 𑀲𑀫𑁆𑀩𑀼𑀤𑁆𑀥𑁄. 𑀏𑀢𑁆𑀣 𑀘 𑀲𑀫𑁆𑀫𑀸𑀲𑀤𑁆𑀤𑁄 𑀅𑀯𑀺𑀧𑀭𑀻𑀢𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑀩𑀼𑀚𑁆𑀛𑀺𑀢𑀩𑁆𑀩𑁂𑀲𑀼 𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀩𑀼𑀚𑁆𑀛𑀦𑀓𑁆𑀭𑀺𑀬𑀸𑀬 𑀅𑀲𑁂𑀲𑀩𑁆𑀬𑀸𑀯𑀺𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀣𑀸𑀳𑀺 𑀧𑀤𑁂𑀲𑀜𑀸𑀡𑁂 𑀞𑀺𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀯 𑀅𑀯𑀺𑀧𑀭𑀻𑀢𑀁 𑀩𑀼𑀚𑁆𑀛𑀦𑁆𑀢𑀺. 𑀅𑀯𑀺𑀲𑀬𑁂 𑀧𑀦 𑀅𑀦𑁆𑀥𑀓𑀸𑀭𑁂 𑀧𑀯𑀺𑀝𑁆𑀞𑀸𑀯𑀺𑀬 𑀳𑁄𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀺𑀲𑀬𑁄 𑀘 𑀢𑁂𑀲𑀁 𑀅𑀧𑁆𑀧𑀫𑀢𑁆𑀢𑀓𑁄𑀯 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑀁 𑀉𑀧𑀸𑀤𑀸𑀬 𑀬𑀣𑀸 𑀳𑀢𑁆𑀣 𑀧𑀼𑀝𑁂 𑀆𑀓𑀸𑀲𑁄 𑀅𑀧𑁆𑀧𑀫𑀢𑁆𑀢𑀓𑁄𑀯 𑀅𑀚𑀝𑀸𑀓𑀸𑀲𑀁 𑀉𑀧𑀸𑀤𑀸𑀬𑀸𑀢𑀺. 𑀢𑁂 𑀳𑀺 𑀨𑀲𑁆𑀲𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀏𑀓𑀥𑀫𑁆𑀫𑀫𑁆𑀧𑀺 𑀲𑀩𑁆𑀩𑀸𑀓𑀸𑀭𑀢𑁄 𑀩𑀼𑀚𑁆𑀛𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀻𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀧𑀦 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺, 𑀬𑀢𑁆𑀣 𑀢𑁂 𑀯𑀺𑀧𑀭𑀻𑀢𑀁 𑀩𑀼𑀚𑁆𑀛𑁂𑀬𑁆𑀬𑀼𑀁. 𑀢𑁂 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀦𑁆𑀢𑀸𑀲𑀼 𑀘 𑀮𑁄𑀓𑀥𑀸𑀢𑀽𑀲𑀼 𑀢𑀺𑀬𑀤𑁆𑀥𑀕𑀢𑁂 𑀅𑀤𑁆𑀥𑀫𑀼𑀢𑁆𑀢𑀓𑁂 𑀘 𑀥𑀫𑁆𑀫𑁂 𑀳𑀢𑁆𑀣𑀫𑀡𑀺𑀓𑁂 𑀯𑀺𑀬 𑀲𑀫𑀲𑀫𑁂 𑀓𑀢𑁆𑀯𑀸 𑀩𑀼𑀚𑁆𑀛𑀦𑁆𑀢𑀺. 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀜𑀸𑀡𑀫𑀼𑀔𑁂𑀢𑀺 𑀲𑀩𑁆𑀩𑀜𑁆𑀜𑀼𑀁𑀫𑀳𑀸𑀪𑀯𑀗𑁆𑀕𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀳𑀺 𑀢𑁂 𑀥𑀫𑁆𑀫𑀸 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀁 𑀅𑀪𑀺𑀥𑀫𑁆𑀫𑀁 𑀲𑀫𑁆𑀫𑀲𑀦𑀢𑁄 𑀧𑀝𑁆𑀞𑀸𑀬 𑀦𑀺𑀘𑁆𑀘𑀓𑀸𑀮𑀁 𑀉𑀧𑀝𑁆𑀞𑀳𑀦𑁆𑀢𑀻𑀢𑀺. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀧𑀦 𑀬𑀢𑁆𑀢𑀓𑁂 𑀥𑀫𑁆𑀫𑁂 𑀯𑀺𑀘𑀸𑀭𑁂𑀢𑀼𑀁 𑀇𑀘𑁆𑀙𑀦𑁆𑀢𑀺. 𑀢𑀢𑁆𑀢𑀓𑁂 𑀥𑀫𑁆𑀫𑁂 𑀆𑀯𑀚𑁆𑀚𑀦𑀸𑀬 𑀯𑀺𑀲𑀼𑀁 𑀓𑀢𑁆𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀯𑀺𑀘𑀸𑀭𑁂𑀦𑁆𑀢𑀻𑀢𑀺. 𑀦𑀦𑀼 𑀥𑀫𑁆𑀫𑀸 𑀫𑀳𑀦𑁆𑀢𑀸 𑀪𑀯𑀗𑁆𑀕𑀁 𑀧𑀭𑀺𑀢𑁆𑀢𑀓𑀦𑁆𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀳𑀺 𑀧𑀭𑀫𑀼𑀓𑁆𑀓𑀁𑀲𑀧𑀢𑁆𑀢𑀸𑀦𑀁 𑀏𑀲 𑀆𑀦𑀼𑀪𑀸𑀯𑁄𑀢𑀺. 𑀲𑀁𑀲𑀤𑁆𑀤𑁄 𑀧𑀦 𑀲𑀸𑀫𑀦𑁆𑀢𑀺 𑀏𑀢𑀲𑁆𑀲 𑀅𑀢𑁆𑀣𑁂 𑀉𑀧𑀲𑀕𑁆𑀕𑁄. 𑀲𑁄 𑀪𑀕𑀯𑀢𑁄 𑀧𑀝𑀺𑀯𑁂𑀥𑀥𑀫𑁆𑀫𑁂𑀲𑀼 𑀅𑀦𑀸𑀘𑀭𑀺𑀬𑀓𑀢𑀁 𑀤𑀻𑀧𑁂𑀢𑀺. 𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀦𑀼 𑀪𑀕𑀯𑀢𑁄 𑀢𑀢𑀻𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧 𑀲𑀫𑀸𑀧𑀢𑁆𑀢𑀺𑀬𑁄 𑀆𑀴𑀸𑀭𑀼𑀤𑀓𑀫𑀽𑀮𑀺𑀓𑀸𑀢𑀺. 𑀲𑀘𑁆𑀘𑀁. 𑀢𑀸 𑀧𑀦 𑀅𑀦𑀮𑀗𑁆𑀓𑀭𑀺𑀢𑁆𑀯𑀸 𑀮𑀤𑁆𑀥𑀫𑀢𑁆𑀢𑀸𑀯 𑀳𑀼𑀢𑁆𑀯𑀸 𑀙𑀟𑁆𑀟𑀺𑀢𑀢𑁆𑀢𑀸 𑀧𑀘𑁆𑀙𑀸 𑀩𑀼𑀚𑁆𑀛𑀦𑀓𑁆𑀭𑀺𑀬𑀸𑀬 𑀧𑀸𑀤𑀓𑀫𑀢𑁆𑀢𑀸𑀧𑀺 𑀦𑀳𑁄𑀦𑁆𑀢𑀺. 𑀓𑀼𑀢𑁄 𑀧𑀝𑀺𑀯𑁂𑀥𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀢𑀸 𑀪𑀕𑀯𑀢𑁄 𑀩𑀼𑀤𑁆𑀥𑀪𑀸𑀯𑁂 𑀲𑀸𑀘𑀭𑀺𑀬𑀓𑀢𑀁 𑀦 𑀲𑀸𑀥𑁂𑀦𑁆𑀢𑀻𑀢𑀺. 𑀅𑀬𑀫𑁂𑀢𑁆𑀣 𑀧𑀸𑀴𑀺 𑀅𑀦𑀼𑀕𑀢𑁄 𑀅𑀢𑁆𑀣𑁄. 𑀬𑀣𑀸𑀳 𑁋

𑀢𑀢𑁆𑀣 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀺. 𑀩𑀮𑁂𑀲𑀼 𑀘 𑀯𑀲𑀺𑀪𑀸𑀯𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺.

𑀢𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁. 𑀩𑀮𑁂𑀲𑀽𑀢𑀺 𑀤𑀲𑀩𑀮 𑀜𑀸𑀡𑁂𑀲𑀼. 𑀯𑀲𑀺𑀪𑀸𑀯𑀦𑁆𑀢𑀺 𑀇𑀲𑁆𑀲𑀭𑀪𑀸𑀯𑀁. 𑀏𑀢𑁆𑀣𑀘 𑀧𑀼𑀩𑁆𑀩𑁂. 𑀮. 𑀲𑀸𑀫𑀦𑁆𑀢𑀺𑀏𑀢𑁂𑀦 𑀲𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺𑀆𑀤𑀺𑀦𑀸 [𑀲𑀫𑁆𑀫𑀸𑀲𑀤𑁆𑀤𑀲𑁆𑀲𑀅𑀢𑁆𑀣𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑀁]

𑁫. 𑀇𑀤𑀸𑀦𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀯𑀦𑁆𑀤𑀦𑀁 𑀲𑀼𑀝𑁆𑀞𑀼𑀩𑀮𑀯𑀁 𑀓𑀭𑁄𑀦𑁆𑀢𑁄 𑀅𑀢𑀼𑀮𑀦𑁆𑀢𑀺 𑀆𑀳. 𑀅𑀦𑁂𑀓𑀕𑀼𑀡𑀧𑀤𑀯𑀺𑀲𑀬𑀸 𑀳𑀺 𑀯𑀦𑁆𑀤𑀦𑀸 𑀲𑀼𑀝𑁆𑀞𑀼𑀢𑀭𑀁 𑀩𑀮𑀯𑀢𑀻 𑀳𑁄𑀢𑀻𑀢𑀺. 𑀦𑀦𑀼 𑀏𑀓𑀕𑀼𑀡𑀧𑀤𑀯𑀺𑀲𑀬𑀸𑀧𑀺 𑀯𑀦𑁆𑀤𑀦𑀸 𑀅𑀦𑁆𑀢𑀭𑀸 𑀬𑀦𑀻𑀯𑀸𑀭𑀡𑁂𑀲𑀫𑀢𑁆𑀣𑀸 𑀲𑀺𑀬𑀸𑀢𑀺 𑀓𑀺𑀁 𑀤𑀼𑀢𑀻𑀬𑁂𑀦𑀸𑀢𑀺. 𑀦 𑀦 𑀲𑀫𑀢𑁆𑀣𑀸. 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀧𑀦 𑀲𑀢𑁆𑀣𑀼𑀕𑀼𑀡𑀢𑁆𑀣𑁄𑀫𑀦𑁂 𑀫𑀢𑁆𑀢𑀓𑀸𑀭𑀺𑀦𑁄 𑀦𑀸𑀫 𑀦 𑀳𑁄𑀦𑁆𑀢𑀺. 𑀣𑁂𑀭𑁄 𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄. 𑀢𑁆𑀯𑀁 𑀧𑀦 𑀅𑀯𑀺𑀜𑁆𑀜𑀼𑀚𑀸𑀢𑀺𑀓𑁄. 𑀢𑀲𑁆𑀫𑀸 𑀫𑀢𑁆𑀢𑀁 𑀓𑀭𑁄𑀦𑁆𑀢𑁄 𑀘𑁄𑀤𑁂𑀲𑀻𑀢𑀺. 𑀅𑀧𑀺𑀘. 𑀦 𑀓𑁂𑀯𑀮𑀁 𑀅𑀦𑁆𑀢𑀭𑀸 𑀬𑀦𑀻𑀯𑀸𑀭𑀡𑀫𑁂𑀯 𑀯𑀦𑁆𑀤𑀦𑀸𑀬 𑀇𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀣𑀔𑁄 𑀧𑀜𑁆𑀜𑀸𑀧𑀸𑀝𑀯𑀸𑀤𑀺𑀅𑀢𑁆𑀣𑁄𑀧𑀺 𑀇𑀘𑁆𑀙𑀺𑀢𑀩𑁆𑀩𑁄𑀬𑁂𑀯. 𑀲𑁄𑀧𑀺 𑀳𑀺 𑀅𑀦𑀸𑀬𑀸𑀲𑁂𑀦 𑀕𑀦𑁆𑀣 𑀦𑀺𑀝𑁆𑀞𑀸𑀦𑀲𑁆𑀲 𑀕𑀦𑁆𑀣𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑁂𑀲𑀼 𑀳𑀺 𑀘𑀺𑀢𑁆𑀢𑀪𑀸𑀯𑀦𑀸 𑀘𑀺𑀢𑁆𑀢𑀲𑀫𑀸𑀥𑀸𑀦𑀸𑀯𑀳𑀸 𑀳𑁄𑀢𑀺. 𑀘𑀺𑀢𑁆𑀢 𑀲𑀫𑀸𑀥𑀸𑀦𑁂 𑀘 𑀲𑀢𑀺 𑀧𑀜𑁆𑀜𑀸𑀢𑀺𑀓𑁆𑀔𑀸𑀲𑀽𑀭𑀸 𑀳𑀼𑀢𑁆𑀯𑀸 𑀧𑀳𑀢𑀺. 𑀲𑀫𑀸𑀳𑀺𑀢𑁄 𑀪𑀺𑀓𑁆𑀔𑀯𑁂 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀤𑀢𑁆𑀣𑀸𑀬𑀧𑀺 𑀅𑀢𑁆𑀢𑀦𑁄 𑀯𑀦𑁆𑀤𑀦𑀸 𑀲𑀼𑀝𑁆𑀞𑀼 𑀩𑀮𑀯𑀢𑀻 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺.

[𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣 𑀬𑁄𑀕𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀪𑀕𑀯𑀢𑀺 𑀲𑀫𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀢𑀼𑀮𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑁂 𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀫𑀳𑀦𑁆𑀢𑀜𑁆𑀳𑀺 𑀲𑀢𑁆𑀣𑀼𑀕𑀼𑀡𑀧𑀤𑀸𑀦𑀁 𑀫𑀚𑁆𑀛𑁂 𑀏𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑀁, 𑀘𑀦𑁆𑀤𑁄 𑀯𑀺𑀬 𑀢𑀸𑀭𑀓𑀸𑀦𑀁 𑀫𑀚𑁆𑀛𑁂. 𑀢𑀲𑁆𑀫𑀸 𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀚𑀸𑀦𑀦𑁆𑀢𑀸𑀦𑀁𑀲𑀦𑁆𑀢𑀺𑀓𑁂 𑀪𑀸𑀯𑀢𑁆𑀣𑀲𑀼𑀜𑁆𑀜𑀁 𑀲𑀢𑁆𑀣𑀼𑀲𑀫𑀜𑁆𑀜𑀸𑀫𑀢𑁆𑀢𑀁 𑀪𑀯𑀺𑀢𑀼𑀁 𑀦𑀸𑀭𑀳𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀧𑀤𑀲𑀳𑀲𑁆𑀲𑀁 𑀯𑀼𑀘𑁆𑀘𑀫𑀸𑀦𑀁𑀧𑀺 𑀲𑀢𑁆𑀣𑀼 𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺. 𑀢𑀼𑀮𑀬𑀺𑀢𑀩𑁆𑀩𑁄 𑀅𑀜𑁆𑀜𑁂𑀦 𑀲𑀳 𑀧𑀫𑀺𑀢𑀩𑁆𑀩𑁄𑀢𑀺 𑀢𑀼𑀮𑁄. 𑀦 𑀢𑀼𑀮𑁄 𑀅𑀢𑀼𑀮𑁄, 𑀦𑀢𑁆𑀣𑀺𑀢𑀼𑀮𑁄 𑀲𑀤𑀺𑀲𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑀼𑀮𑁄. 𑀪𑀕𑀯𑀸. 𑀦 𑀳𑀺 𑀅𑀢𑁆𑀣𑀺 𑀪𑀕𑀯𑀢𑁄 𑀅𑀢𑁆𑀢𑀦𑀸 𑀲𑀤𑀺𑀲𑁄 𑀓𑁄𑀘𑀺 𑀮𑁄𑀓𑀲𑁆𑀫𑀺𑀦𑁆𑀢𑀺. 𑀬𑀣𑀸𑀳 𑁋

𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄𑀢𑀺.

𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀢𑀼𑀮𑀢𑁆𑀢𑀁. 𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀧𑀺 𑀧𑀦𑀲𑁆𑀲 𑀅𑀢𑀼𑀮𑀢𑀸 𑀧𑀜𑁆𑀜𑀸𑀬𑀢𑀺. 𑀢𑀤𑀸 𑀳𑀺 𑀫𑀳𑀸𑀧𑀼𑀭𑀺𑀲𑁄 𑀲𑀫𑁆𑀧𑀢𑀺𑀚𑀸𑀢𑁄𑀯 𑀲𑀫𑀸𑀦𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀤𑀺𑀲𑀸 𑀪𑀸𑀕𑁂 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑁂𑀲𑀼 𑀞𑀺𑀢𑀸 𑀤𑁂𑀯𑀩𑁆𑀭𑀳𑁆𑀫𑀸𑀦𑁄 𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄 𑀦𑀢𑁆𑀣𑀺. 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄𑀢𑀺 𑀧𑀭𑀫𑀸𑀬 𑀧𑀼𑀚𑀸𑀬 𑀧𑀽𑀚𑁂𑀲𑀼𑀁. 𑀏𑀯𑀁 𑀲𑁂𑀲𑀤𑀺𑀲𑀸𑀲𑀼𑀧𑀺. 𑀢𑀤𑀸 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀲𑀩𑁆𑀩𑀮𑁄𑀓𑀕𑁆𑀕𑀪𑀸𑀯𑀁 𑀜𑀢𑁆𑀯𑀸 𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺𑀮𑁄𑀓𑀲𑁆𑀲 𑀅𑀬𑀫𑀦𑁆𑀢𑀺 𑀫𑀸𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀏𑀯𑀁 𑀅𑀙𑀫𑁆𑀪𑀺𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺. 𑀇𑀤𑀁𑀧𑀺 𑀅𑀦𑀘𑁆𑀙𑀭𑀺𑀬𑀁, 𑀬𑀁 𑀧𑀘𑁆𑀙𑀺𑀫𑀪𑀯𑀁 𑀧𑀢𑁆𑀢𑀲𑁆𑀲 𑀅𑀢𑀼𑀮𑀢𑁆𑀢𑀁. 𑀬𑀤𑀸 𑀧𑀦 𑀲𑁄 𑀲𑀼𑀫𑁂𑀥𑀪𑀽𑀢𑁄 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀬𑀢𑀩𑁆𑀬𑀸𑀓𑀭𑀡𑀁 𑀕𑀡𑁆𑀳𑀺. 𑀢𑀤𑀸𑀧𑀺 𑀣𑀧𑁂𑀢𑁆𑀯𑀸 𑀤𑀻𑀧𑀗𑁆𑀓𑀭𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀸𑀭𑀫𑀺𑀢𑀸𑀕𑀼𑀡𑁂𑀳𑀺 𑀢𑁂𑀦 𑀲𑀤𑀺𑀲𑁄 𑀓𑁄𑀘𑀺 𑀦𑀢𑁆𑀣𑁂𑀯. 𑀦𑀢𑁆𑀣𑀺𑀪𑀸𑀯𑁄𑀘𑀲𑁆𑀲 𑀢𑀤𑀸 𑀧𑀯𑀢𑁆𑀢𑁂 𑀳𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀤𑀻𑀧𑁂𑀢𑀩𑁆𑀩𑁄. 𑀢𑀸𑀦𑀺 𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀢𑀲𑀳𑀲𑁆𑀲𑀁𑀧𑀺 𑀧𑀯𑀢𑁆𑀢𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺𑀬𑁂𑀯. 𑀓𑀼𑀢𑁄 𑀲𑀸𑀯𑀓𑀩𑁄𑀥𑀺 𑀲𑀢𑁆𑀢𑀸𑀦𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀢𑀤𑀸 𑀧𑀯𑀢𑁆𑀢𑀺𑀧𑀸𑀭𑀫𑀺𑀧𑀯𑀺𑀘𑀬𑀜𑁆𑀜𑀸𑀡𑀁 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀲𑀩𑁆𑀩𑀜𑁆𑀜𑀼𑀣𑀜𑁆𑀜𑀸𑀡𑀕𑀢𑀺𑀓𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀧𑀺 𑀳𑀺 𑀬𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀩𑁄𑀥𑀺𑀬𑀸 𑀅𑀦𑀼𑀭𑀽𑀧𑁂 𑀲𑀫𑁆𑀪𑀸𑀭𑀥𑀫𑁆𑀫𑁂 𑀲𑀬𑀫𑁂𑀯 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑀸 𑀳𑀼𑀢𑁆𑀯𑀸 𑀯𑀢𑁆𑀢𑀸𑀦𑀼𑀲𑀸𑀭𑀺𑀫𑀳𑀸𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑀸 𑀳𑁄𑀦𑁆𑀢𑀺. 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑀸 𑀘 𑀦𑀸𑀫 𑀳𑁄𑀦𑁆𑀢𑀺. 𑀢𑀤𑀸 𑀏𑀯 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀺𑀪𑀸𑀯𑁂 𑀲𑀢𑀺 𑀦𑀺𑀬𑀢𑀩𑁆𑀬𑀸𑀓𑀭𑀡𑀁 𑀮𑀪𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼 𑀩𑁄𑀥𑀺𑀲𑀢𑁆𑀢 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺.

[𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀫𑀺𑀢𑀢𑁆𑀣𑁂 𑀬𑁆𑀬𑀓𑀸𑀭𑀲𑁆𑀲 𑀅𑀓𑀸𑀭𑀲𑁆𑀲 𑀯𑀸 𑀯𑀲𑁂𑀦 𑀏𑀢𑀁 𑀲𑀺𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀢𑀼𑀮𑀲𑀤𑁆𑀤𑁄 𑀥𑀸𑀢𑀼𑀲𑀺𑀤𑁆𑀥𑁄 𑀓𑀫𑁆𑀫𑀲𑀸𑀥𑀦𑁄 𑀘 𑀪𑀯𑀺𑀢𑀼𑀁 𑀦 𑀬𑀼𑀢𑁆𑀢𑁄. 𑀢𑀼𑀮𑀬𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀅𑀢𑀼𑀮𑁄. 𑀅𑀧𑁆𑀧𑀫𑁂 𑀬𑁆𑀬𑁄𑀢𑀺 𑀳𑀺 𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀢𑀼𑀮𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄𑀢𑀺 𑀤𑀺𑀧𑁂𑀢𑀺. 𑀏𑀯𑀜𑁆𑀘 𑀲𑀢𑀺 𑀓𑀫𑁆𑀫𑀲𑀸𑀥𑀦𑁂𑀦𑁂𑀯 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀓𑀺𑀁 𑀢𑀢𑁄 𑀲𑀫𑀺𑀢𑀢𑁆𑀣𑁂 𑀬𑁆𑀬𑀓𑀸𑀭𑀲𑁆𑀲𑀅𑀓𑀸𑀭𑀲𑁆𑀲 𑀯𑀸 𑀘𑀺𑀦𑁆𑀢𑀸𑀬𑀸𑀢𑀺. 𑀯𑀢𑁆𑀢𑀺𑀘𑁆𑀙𑀸𑀦𑀼𑀕𑀢𑁄 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺 𑀓𑀢𑁆𑀯𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀦. 𑀬𑀣𑀸 𑀲𑀼𑀢𑀁 𑀬𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀲𑁆𑀲𑀼𑀢𑀲𑁆𑀲 𑀧𑀭𑀺𑀓𑀧𑁆𑀧𑀦𑀸𑀬 𑀧𑀬𑁄 𑀚𑀦𑀸𑀪𑀸𑀯𑀢𑁄𑀢𑀺. [𑀅𑀢𑀼𑀮 𑀧𑀤𑀁]

𑁬. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀢𑁆𑀣𑀼 𑀢𑀺𑀲𑁆𑀲𑁄 𑀲𑀫𑁆𑀧𑀤𑀸 𑀯𑀺𑀪𑀸 𑀯𑀺𑀢𑀸 𑀳𑁄𑀦𑁆𑀢𑀺. 𑀳𑁂𑀢𑀼𑀲𑀫𑁆𑀧𑀤𑀸 𑀨𑀮𑀲𑀫𑁆𑀧𑀤𑀸 𑀲𑀢𑁆𑀢𑀼𑀧𑀓𑀸𑀭𑀲𑀫𑁆𑀧𑀤𑀸𑀘𑀸𑀢𑀺. 𑀢𑀢𑁆𑀣 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸 𑀲𑀫𑀗𑁆𑀕𑀺𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀜𑁆𑀘 𑀳𑁂𑀢𑀼𑀲𑀫𑁆𑀧𑀤𑀸𑀦𑀸𑀫. 𑀩𑁄𑀥𑀺𑀫𑀡𑁆𑀟𑁂 𑀧𑀯𑀢𑁆𑀢𑀺𑀢𑀸 𑀘𑀢𑀼𑀯𑀻𑀲𑀢𑀺 𑀓𑁄𑀝𑀺𑀲𑀪𑀲𑀳𑀲𑁆𑀲𑀲𑀗𑁆𑀔𑀸 𑀫𑀳𑀸𑀯𑀚𑀺𑀭𑀜𑁆𑀜𑀸𑀡𑀲𑀗𑁆𑀔𑀸𑀢𑀸 𑀲𑀩𑁆𑀩𑀜𑁆𑀜𑀼𑀫𑀳𑀸 𑀯𑀺𑀧𑀲𑁆𑀲𑀦𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸. 𑀲𑀸 𑀳𑀺 𑀫𑀳𑀸𑀩𑁄𑀥𑀺𑀬𑀸 𑀧𑀤𑀝𑁆𑀞𑀸𑀦 𑀪𑀽𑀢𑀸𑀢𑀺. 𑀧𑀳𑀸𑀦 𑀲𑀫𑁆𑀧𑀤𑀸𑀬𑀫𑁂𑀯 𑀯𑀸 𑀲𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀨𑀮𑀲𑀫𑁆𑀧𑀤𑀸 𑀘𑀢𑀼𑀩𑁆𑀩𑀺𑀥𑀸 𑀧𑀳𑀸𑀦𑀲𑀫𑁆𑀧𑀤𑀸 𑀜𑀸𑀡𑀲𑀫𑁆𑀧𑀤𑀸 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀢𑁆𑀣 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀳𑀸𑀦𑀲𑀫𑁆𑀧𑀤𑀸 𑀦𑀸𑀫. 𑀧𑀳𑀸𑀦𑀲𑁆𑀲 𑀲𑀩𑁆𑀩𑀧𑀸𑀭𑀺𑀧𑀽𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀦 𑀅𑀭𑀺𑀬𑀫𑀕𑁆𑀕𑁄, 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀫𑁂𑀯 𑀯𑀸. 𑀲𑀩𑁆𑀩𑀜𑁆𑀜𑀼𑀢 𑀜𑁆𑀜𑀸𑀡 𑀤𑀲𑀩𑀮𑀜𑁆𑀜𑀸𑀡𑀸𑀤𑀻𑀦𑀺 𑀜𑀸𑀡𑀲𑀫𑁆𑀧𑀤𑀸.

[𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀏𑀢𑀸𑀲𑀼 𑀤𑁆𑀯𑀻𑀲𑀼 𑀲𑀫𑁆𑀧𑀤𑀸𑀲𑀼 𑀜𑀸𑀡𑀲𑀫𑁆𑀧𑀤𑀸 𑀧𑀣𑀫𑀁 𑀯𑀼𑀢𑁆𑀢𑀸, 𑀢𑀢𑁄 𑀧𑀳𑀸𑀦𑀲𑀫𑁆𑀧𑀤𑀸. 𑀧𑀳𑀸𑀦𑀲𑀫𑁆𑀧𑀤𑀸𑀬𑁂𑀯 𑀧𑀦 𑀧𑀣𑀫𑀁 𑀯𑀢𑁆𑀢𑀩𑁆𑀩𑀸. 𑀲𑀸 𑀳𑀺 𑀜𑀸𑀡𑀲𑀫𑁆𑀧𑀤𑀸𑀬𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀸 𑀧𑀘𑁆𑀘𑀬𑀪𑀽𑀢𑀸 𑀘. 𑀫𑀳𑀸𑀝𑀻𑀓𑀸𑀬𑀜𑁆𑀘 𑀲𑀸𑀬𑁂𑀯 𑀧𑀣𑀫𑀁 𑀯𑀼𑀢𑁆𑀢𑀸𑀢𑀺.

[𑁮] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡’’𑀦𑁆𑀢𑀺 𑀜𑀸𑀡𑀲𑀫𑁆𑀧𑀤𑀸𑀬𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺.

𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀜𑁆𑀳𑀺 𑀧𑀳𑀸𑀦𑀲𑀫𑁆𑀧𑀤𑀸 𑀏𑀯 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀦 𑀳𑀺 𑀫𑀕𑁆𑀕𑀜𑁆𑀜𑀸𑀡𑀢𑁄 𑀅𑀜𑁆𑀜𑀸 𑀧𑀳𑀸𑀦𑀲𑀫𑁆𑀧𑀤𑀸𑀦𑀸𑀫 𑀅𑀢𑁆𑀣𑀻𑀢𑀺. 𑀬𑀜𑁆𑀘 𑀓𑁄𑀘𑀺 𑀯𑀤𑁂𑀬𑁆𑀬 𑀫𑀕𑁆𑀕𑀜𑁆𑀜𑀸𑀡𑀁 𑀜𑀸𑀡𑀜𑁆𑀘 𑀳𑁄𑀢𑀺 𑀧𑀳𑀸𑀦𑀜𑁆𑀘. 𑀢𑀲𑁆𑀫𑀸 𑀉𑀪𑀬𑀢𑁆𑀣 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀲𑀫𑁆𑀧𑀤𑀸𑀲𑀗𑁆𑀓𑀭𑁄 𑀳𑁄𑀢𑀻𑀢𑀺.

[𑁯] 𑀢𑀣𑀸 𑀯𑀺𑀪𑀸𑀯𑀦𑀺𑀬𑀁

𑀜𑀸𑀡𑀲𑀫𑁆𑀧𑀤𑀸𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀩𑁆𑀩𑀧𑀣𑀫𑀁 𑀯𑀢𑁆𑀢𑀩𑁆𑀩𑀁𑀧𑀺 𑀦 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀦𑀦𑀼 ‘‘𑀢𑀫𑁆𑀫𑀽𑀮𑀓𑀸𑀦𑀺 𑀘 𑀤𑀲𑀩𑀮𑀸𑀤𑀺 𑀜𑁆𑀜𑀸𑀡𑀸𑀦𑀻’’𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁𑀧𑀺 𑀕𑀳𑀺𑀢𑀦𑁆𑀢𑀺 𑀘𑁂. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀅𑀧𑁆𑀧𑀥𑀸𑀦𑀁 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀥𑀸𑀦𑀁 𑀧𑀸𑀓𑀝𑀁 𑀆𑀤𑀺𑀲𑀤𑁆𑀤𑁂𑀦 𑀕𑀳𑀺𑀢𑀦𑁆𑀢𑀺 𑀜𑀸𑀬𑀸𑀕𑀢𑀁 𑀳𑁄𑀢𑀻𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁂𑀳𑀺 𑀲𑀻𑀮𑀸 𑀤𑀺𑀕𑀼𑀡𑁂𑀳𑀺 𑀇𑀤𑁆𑀥𑀺 𑀥𑀫𑁆𑀫𑁂𑀳𑀺 𑀘 𑀲𑀫𑁆𑀧𑀤𑀸 𑀆𑀦𑀼𑀪𑀸𑀯𑀲𑀫𑁆𑀧𑀤𑀸. 𑀮𑀓𑁆𑀔𑀡𑀸 𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀲𑀫𑁆𑀧𑀢𑁆𑀢𑀺 𑀭𑀽𑀧𑀓𑀸𑀬𑀲𑀫𑁆𑀧𑀤𑀸. 𑀲𑀢𑁆𑀢𑀼𑀧𑀓𑀸𑀭𑁄𑀤𑀼𑀯𑀺𑀥𑁄 𑀆𑀲𑀬𑀲𑀫𑁆𑀧𑀤𑀸, 𑀧𑀬𑁄𑀕𑀲𑀫𑁆𑀧𑀤𑀸 𑀘. 𑀅𑀚𑁆𑀛𑀸𑀲𑀬𑀲𑁆𑀲 𑀉𑀴𑀸𑀭𑀢𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀘 𑀧𑀭𑀺𑀲𑀼𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑁂𑀯𑀤𑀢𑁆𑀢𑀸𑀤𑀻𑀲𑀼 𑀯𑀺𑀭𑁄𑀥𑀺𑀲𑀢𑁆𑀢𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑀸 𑀆𑀲𑀬 𑀲𑀫𑁆𑀧𑀤𑀸. 𑀮𑁄𑀓𑁂 𑀅𑀪𑀺𑀜𑁆𑀜𑀸𑀢𑀸𑀦𑀁 𑀭𑀸𑀚𑀽𑀦𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑁂𑀝𑁆𑀞𑀺 𑀕𑀳𑀧𑀢𑀻𑀦𑀁 𑀤𑁂𑀯𑀭𑀸𑀚𑀽𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀸𑀤𑀺 𑀦𑀺𑀭𑀧𑁂𑀓𑁆𑀔𑀢𑀸𑀯𑀲𑁂𑀦 𑀤𑁂𑀲𑀦𑀸𑀧𑀬𑁄𑀕𑀲𑀼𑀤𑁆𑀥𑀺 𑀧𑀬𑁄𑀕𑀲𑀫𑁆𑀧𑀤𑀸. 𑀢𑀢𑁆𑀣 𑀤𑁆𑀯𑁂 𑀧𑀳𑀸𑀦𑀜𑀸𑀡𑀲𑀫𑁆𑀧𑀤𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑁂𑀦 𑀯𑀺𑀪𑀸𑀯𑀺𑀢𑀸. 𑀤𑁆𑀯𑀻𑀳𑀺 𑀆𑀦𑀼 𑀪𑀸𑀯𑀭𑀽𑀧𑀓𑀸𑀬𑀲𑀫𑁆𑀧𑀤𑀸𑀳𑀺 𑀲𑀳 𑀤𑁆𑀯𑁂 𑀲𑀢𑁆𑀢𑀼𑀧𑀓𑀸𑀭𑀲𑀫𑁆𑀧𑀤𑀸 𑀅𑀢𑀼𑀮𑀧𑀤𑁂𑀦. 𑀳𑁂𑀢𑀼𑀲𑀫𑁆𑀧𑀤𑀸 𑀧𑀦 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀲𑀸𑀫𑀢𑁆𑀣𑀺𑀬𑀢𑁄 𑀯𑀺𑀪𑀸𑀯𑀺𑀢𑀸. 𑀦 𑀳𑀺 𑀢𑀸𑀤𑀺𑀲𑀺𑀬𑀸 𑀳𑁂𑀢𑀼𑀲𑀫𑁆𑀧𑀤𑀸𑀬 𑀯𑀺𑀦𑀸 𑀇𑀢𑀭𑀸𑀲𑀁 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺. [𑀲𑀫𑁆𑀧𑀤𑀸]

𑁭. 𑀧𑀼𑀦𑀧𑀺 𑀣𑁂𑀭𑁄 𑀅𑀢𑁆𑀢𑀦𑁄 𑀯𑀦𑁆𑀤𑀦𑀁 𑀩𑀮𑀯𑀢𑀭𑀁 𑀓𑀭𑁄𑀦𑁆𑀢𑁄 𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀦𑁆𑀢𑀺 𑀆𑀳. 𑀏𑀢𑁂𑀦 𑀥𑀫𑁆𑀫𑀲𑀗𑁆𑀖𑀸𑀦𑀁𑀧𑀺 𑀯𑀦𑁆𑀤𑀦𑀸 𑀓𑀢𑀸 𑀳𑁄𑀢𑀺. 𑀤𑀽𑀭𑀢𑁄𑀳𑀁 𑀦𑀫𑀲𑁆𑀲𑀺𑀲𑁆𑀲𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀗𑁆𑀖𑀲𑁆𑀲𑀧𑀺 𑀦𑀫𑀦𑀓𑁆𑀭𑀺𑀬𑀸𑀧𑀢𑁆𑀢𑀺 𑀲𑀳𑀲𑀤𑁆𑀤𑁂𑀦 𑀯𑀺𑀜𑁆𑀜𑀸𑀬𑀢𑀺. 𑀏𑀯 𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀦𑀫𑀲𑁆𑀲𑀺𑀲𑁆𑀲𑀦𑁆𑀢𑀺 𑀦𑀫𑀲𑁆𑀲𑀺𑀁.

[𑁧𑁦] 𑀬𑀫𑁆𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀕𑀼𑀡𑀻𑀪𑀽𑀢𑀸𑀦𑀁𑀧𑀺 𑀳𑀺 𑀥𑀫𑁆𑀫𑀲𑀗𑁆𑀖𑀸𑀦𑀁 𑀅𑀪𑀺𑀯𑀸𑀤𑁂𑀢𑀩𑁆𑀩 𑀪𑀸𑀯𑁄 𑀲𑀳𑀬𑁄𑀕𑁂𑀦 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀯𑀸𑀤𑁂𑀢𑀩𑁆𑀩 𑀪𑀸𑀯𑁄𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀅𑀪𑀺𑀯𑀸𑀤𑀺𑀢𑀪𑀸𑀯𑁄𑀢𑀺 𑀧𑀦 𑀅𑀪𑀺𑀯𑀸𑀤𑀦𑀦𑁆𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀲𑁆𑀲 𑀓𑁆𑀭𑀺𑀬𑀸 𑀲𑀫𑀯𑀸𑀬𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀲𑀗𑁆𑀖𑀸𑀦𑀁𑀧𑀺 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸 𑀓𑁆𑀭𑀺𑀬𑀸𑀧𑀢𑁆𑀢𑀺 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺. 𑀇𑀢𑀭𑀣𑀸 𑀢𑀩𑁆𑀩𑀧𑀘𑁆𑀘𑀬𑀲𑁆𑀲 𑀅𑀭𑀳𑀢𑁆𑀣𑀤𑀻𑀧𑀦𑀢𑁄 𑀅𑀪𑀺𑀯𑀸𑀤𑀦𑀸 𑀭𑀳𑀢𑀸 𑀲𑀗𑁆𑀔𑀸𑀢 𑀕𑀼𑀡𑀲𑀫𑀯𑀸𑀬𑁄 𑀯𑀼𑀢𑁆𑀢𑁄 𑀲𑀺𑀬𑀸. 𑀲𑁄𑀘 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀅𑀢𑁆𑀢𑀦𑁄 𑀦𑀺𑀤𑀲𑁆𑀲𑀦𑁂𑀦 𑀘 𑀲𑀳 𑀦 𑀲𑀫𑁂𑀢𑀺 𑀲𑀧𑀼𑀢𑁆𑀢𑀤𑀸𑀭𑁄 𑀆𑀕𑀢𑁄𑀢𑀺.

𑀅𑀧𑀺𑀘 𑀣𑁂𑀭𑁄 𑀇𑀫𑀁 𑀕𑀦𑁆𑀣𑀁 𑀭𑀘𑀬𑀺𑀲𑁆𑀲𑀸𑀫𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀢𑀻𑀡𑀺 𑀭𑀢𑀦𑀸𑀦𑀺 𑀯𑀦𑁆𑀤𑀺, 𑀅𑀣 𑀢𑀁 𑀅𑀢𑁆𑀢𑀦𑁄 𑀯𑀦𑁆𑀤𑀦𑀁 𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀸𑀬 𑀲𑀳 𑀖𑀝𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀁 𑀭𑀘𑀬𑀻𑀢𑀺𑀧𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀣𑀸𑀳𑀺 𑀅𑀪𑀺𑀯𑀸𑀤𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀦 𑀅𑀪𑀺𑀯𑀸𑀤𑀺𑀬𑀸𑀫𑀻𑀢𑀺. 𑀏𑀲𑀦𑀬𑁄 𑀅𑀜𑁆𑀜𑀢𑁆𑀣𑀧𑀺. 𑀢𑀢𑁆𑀣 𑀲𑀤𑁆𑀥𑀫𑁆𑀫𑁂𑀦 𑀘 𑀕𑀡𑀼𑀢𑁆𑀢𑀫𑁂𑀦 𑀘 𑀅𑀢𑁆𑀢𑀦𑀸 𑀦𑀺𑀫𑁆𑀫𑀺𑀢𑁂𑀦 𑀲𑀓𑀮𑀮𑁄𑀓𑀲𑁆𑀲 𑀲𑀭𑀡𑀪𑀽𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀲𑀤𑁆𑀥𑀫𑁆𑀫 𑀕𑀡𑀼𑀢𑁆𑀢𑀫𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀦 𑀳𑀺 𑀧𑀭𑀦𑀺𑀫𑁆𑀫𑀺𑀢𑁂𑀦 𑀲𑀤𑁆𑀥𑀫𑁆𑀫𑁂𑀦 𑀕𑀡𑀼𑀢𑁆𑀢𑀫𑁂𑀦 𑀘 𑀲𑀳𑀺𑀢𑀸 𑀲𑀸𑀯𑀓𑀸 𑀲𑀲𑀤𑁆𑀥𑀫𑁆𑀫𑀸𑀢𑀺 𑀘 𑀲𑀕𑀡𑀼𑀢𑁆𑀢𑀫𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀦 𑀘 𑀅𑀢𑁆𑀢𑀦𑁄𑀏𑀯 𑀲𑀭𑀡𑀪𑀽𑀢𑁂𑀦 𑀲𑀤𑁆𑀥𑀫𑁆𑀫𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀺𑀕𑀡𑀼𑀢𑁆𑀢𑀫𑁂𑀦 𑀘 𑀲𑀳𑀺𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸 𑀣𑁄𑀫𑀦𑀁 𑀅𑀭𑀳𑀦𑁆𑀢𑀻𑀢𑀺, 𑀢𑀲𑁆𑀫𑀸 𑀇𑀤𑀁𑀧𑀺 𑀲𑀢𑁆𑀣𑀼 𑀅𑀲𑀸𑀥𑀸𑀭𑀡𑀕𑀼𑀡𑀧𑀤𑀫𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀓𑁂 𑀥𑀸𑀭𑁂𑀢𑀺, 𑀅𑀢𑁆𑀢𑀸𑀦𑀁 𑀥𑀸𑀭𑁂𑀦𑁆𑀢𑁂. 𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀓𑀣𑀜𑁆𑀘 𑀥𑀸𑀭𑁂𑀢𑀺, 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀯𑀝𑁆𑀝𑀤𑀼𑀓𑁆𑀔𑁂𑀲𑀼𑀘 𑀅𑀧𑀢𑀫𑀸𑀦𑁂 𑀓𑀭𑁄𑀦𑁆𑀢𑁄. 𑀓𑀺𑀜𑁆𑀘 𑀥𑀸𑀭𑀡𑀁𑀦𑀸𑀫, 𑀬𑁂𑀲𑀁 𑀯𑀲𑁂𑀦 𑀲𑀢𑁆𑀢𑀸 𑀅𑀧𑀸𑀬𑁂𑀲𑀼𑀯𑀸 𑀯𑀝𑁆𑀝𑀤𑀼𑀓𑁆𑀔𑁂𑀲𑀼𑀯𑀸 𑀧𑀢𑀦𑁆𑀢𑀺, 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀏𑀓𑀤𑁂𑀲𑁂𑀦𑀯𑀸 𑀲𑀩𑁆𑀩𑀲𑁄𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑀁. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀫𑁆𑀫𑁄𑀦𑀸𑀫. 𑀅𑀭𑀺𑀬𑀫𑀕𑁆𑀕𑀸 𑀳𑀺 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀸 𑀦𑀺𑀩𑁆𑀩𑀸𑀦𑁂𑀦 𑀲𑀳𑁂𑀯 𑀳𑀼𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺. 𑀦 𑀯𑀺𑀦𑀸𑀢𑀺, 𑀢𑀲𑁆𑀫𑀸 𑀢𑁂𑀬𑁂𑀯 𑀧𑀜𑁆𑀘 𑀏𑀓𑀦𑁆𑀢𑀢𑁄 𑀥𑀫𑁆𑀫𑁄𑀦𑀸𑀫𑀸𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀧𑀦 𑀥𑀸𑀭𑀡𑀼𑀧𑀸𑀬𑁄𑀬𑁂𑀯 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺𑀘 𑀥𑀸𑀭𑀡𑀨𑀮𑀸𑀦𑀺𑀬𑁂𑀯 𑀳𑁄𑀦𑁆𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀥𑀸𑀭𑀡𑀸𑀦𑀼𑀓𑀽𑀮𑀧𑁆𑀧𑀯𑀢𑁆𑀢𑀸𑀦𑀺 𑀘. 𑀢𑀲𑁆𑀫𑀸 𑀏𑀢𑁂 𑀧𑀜𑁆𑀘 𑀧𑀭𑀺𑀬𑀸𑀬𑀥𑀫𑁆𑀫𑀸𑀬𑁂𑀯𑀸𑀢𑀺. 𑀅𑀣𑀯𑀸, 𑀥𑀸𑀭𑀻𑀬𑀢𑀻𑀢𑀺 𑀥𑀫𑁆𑀫𑁄. 𑀥𑀸𑀭𑀡𑀸𑀭𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀳𑀺 𑀥𑀸𑀭𑁂𑀦𑁆𑀢𑀁 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑀺. 𑀅𑀕𑁆𑀕𑀲𑀼𑀔𑁂𑀘 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀲𑁄𑀬𑁂𑀯 𑀥𑀸𑀭𑀡𑀸𑀭𑀳𑀢𑁆𑀢𑀸 𑀇𑀥 𑀥𑀫𑁆𑀫𑁄𑀦𑀸𑀫𑀸𑀢𑀺. 𑀓𑁄𑀧𑀦 𑀲𑁄𑀢𑀺, 𑀬𑀣𑀸 𑀧𑀼𑀢𑁆𑀢𑀥𑀫𑁆𑀫𑀸𑀬𑁂𑀯. 𑀢𑁂𑀳𑀺 𑀓𑁂𑀘𑀺 𑀪𑀸𑀯𑀦𑀸 𑀯𑀲𑁂𑀦 𑀓𑁂𑀘𑀺 𑀲𑀘𑁆𑀙𑀺𑀓𑀺𑀭𑀺𑀬𑀯𑀲𑁂𑀦 𑀓𑁂𑀘𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀯𑀲𑁂𑀦 𑀓𑁂𑀘𑀺 𑀉𑀕𑁆𑀕𑀳 𑀥𑀸𑀭𑀡𑀯𑀲𑁂𑀦 𑀥𑀸𑀭𑀻𑀬𑀦𑁆𑀢𑀺. 𑀢𑁂 𑀘 𑀏𑀯𑀁 𑀥𑀸𑀭𑀻𑀬𑀫𑀸𑀦𑀸 𑀥𑀸𑀭𑁂𑀦𑁆𑀢𑀁 𑀬𑀣𑀸𑀭𑀳𑀁 𑀅𑀧𑀸𑀬𑀤𑀼𑀓𑁆𑀔𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄𑀘 𑀫𑁄𑀘𑁂𑀦𑁆𑀢𑀺, 𑀅𑀕𑁆𑀕𑁂𑀘 𑀨𑀮𑀲𑀼𑀔𑁂𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑁂𑀯𑀸 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀻𑀢𑀺. 𑀥𑀸𑀭𑁂𑀦𑁆𑀢𑀺𑀯𑀸 𑀲𑀧𑁆𑀧𑀼𑀭𑀺𑀲𑀸𑀚𑀦𑀸 𑀅𑀧𑀸𑀬𑁂𑀲𑀼 𑀯𑀝𑁆𑀝𑀤𑀼𑀓𑁆𑀔𑁂𑀲𑀼𑀘 𑀅𑀢𑁆𑀢𑀸𑀦𑀁 𑀅𑀧𑀢 𑀫𑀸𑀦𑀁 𑀯𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀥𑀫𑁆𑀫𑁄. 𑀥𑀭𑀦𑁆𑀢𑀺𑀯𑀸 𑀏𑀢𑁆𑀣 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑀸 𑀚𑀦𑀸 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀥𑀫𑁆𑀫𑁄𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀥𑀫𑁆𑀫𑁄 𑀤𑀲𑀯𑀺𑀥𑁄𑀯 𑀯𑀼𑀢𑁆𑀢𑁄. 𑀦𑀦𑀼 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀦 𑀲𑀳 𑀏𑀓𑀸𑀤𑀲𑀯𑀺𑀥𑁄𑀯 𑀯𑀢𑁆𑀢𑀩𑁆𑀩𑁄𑀢𑀺. 𑀲𑀘𑁆𑀘𑀁. 𑀲𑁄𑀧𑀦 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁄 𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀏𑀯 𑀳𑁄𑀢𑀻𑀢𑀺 𑀧𑀼𑀩𑁆𑀩𑀘𑁂𑀢𑀦𑀸 𑀯𑀺𑀬 𑀤𑀸𑀦𑁂 𑀫𑀕𑁆𑀕𑁂 𑀏𑀯 𑀲𑁄 𑀲𑀗𑁆𑀕𑀳𑀺𑀢𑁄. 𑀢𑀲𑁆𑀫𑀸 𑀥𑀫𑁆𑀫𑁄 𑀤𑀲𑀯𑀺𑀥𑁄𑀯 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀧𑀺𑀘, 𑀬𑀤𑀕𑁆𑀕𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀇𑀥 𑀥𑀫𑁆𑀫𑀲𑁆𑀫𑀺𑀁 𑀲𑀗𑁆𑀕𑀳𑀺𑀢𑁄. 𑀢𑀤𑀕𑁆𑀕𑁂𑀦 𑀧𑀭𑀺𑀬𑀢𑁆𑀢𑀺𑀥𑀸𑀭𑀓𑁄𑀧𑀺 𑀲𑀗𑁆𑀖𑁂 𑀯𑀦𑁆𑀤𑀦𑁂𑀬𑁆𑀬𑁂 𑀲𑀗𑁆𑀕𑀳𑀺𑀢𑁄𑀢𑀺 𑀬𑀼𑀢𑁆𑀢𑁄. 𑀬𑀤𑀕𑁆𑀕𑁂𑀦𑀘 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀲𑀗𑁆𑀖𑁂 𑀲𑁂𑀓𑁆𑀔𑁂𑀲𑀼 𑀲𑀗𑁆𑀕𑀳𑀺𑀢𑁄. 𑀢𑀤𑀕𑁆𑀕𑁂𑀦 𑀢𑀲𑁆𑀲 𑀓𑀮𑁆𑀬𑀸𑀡𑀳𑁂𑀢𑀼𑀪𑀽𑀢𑁄 𑀧𑀝𑀺𑀧𑀢𑁆𑀢𑀺 𑀥𑀫𑁆𑀫𑁄𑀧𑀺 𑀥𑀫𑁆𑀫𑁂 𑀯𑀦𑁆𑀤𑀦𑁂𑀬𑁆𑀬𑁂 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑁄 𑀳𑀺 𑀧𑀼𑀣𑀼𑀚𑁆𑀚𑀦𑀪𑀽𑀢𑁄𑀧𑀺 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁂𑀔𑁂 𑀲𑁄𑀢𑀸𑀧𑀢𑁆𑀢𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀲𑀗𑁆𑀕𑀳𑀺𑀢𑁄. 𑀢𑁂 𑀧𑀦 𑀥𑀫𑁆𑀫𑀸 𑀲𑁂𑀓𑁆𑀔𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀅𑀲𑀗𑁆𑀕𑀳𑀺𑀢𑀸𑀢𑀺 𑀦𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀬𑁂 𑀯𑀤𑀦𑁆𑀢𑀺 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺, 𑀏𑀢𑁆𑀣 𑀧𑀼𑀣𑀼𑀚𑁆𑀚𑀦 𑀓𑀮𑁆𑀬𑀸𑀡𑀓𑁄 𑀲𑀗𑁆𑀖𑁂 𑀅𑀲𑀗𑁆𑀕𑀳𑀺𑀢𑁄. 𑀦 𑀳𑀺 𑀢𑀁𑀲𑀭𑀡𑀁 𑀕𑀘𑁆𑀙𑀦𑁆𑀢𑀲𑁆𑀲 𑀲𑀭𑀡𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀻𑀢𑀺. 𑀢𑁂𑀲𑀁 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄, 𑀬𑁄 𑀯𑁄 𑀆𑀦𑀦𑁆𑀤 𑀫𑀬𑀸 𑀥𑀫𑁆𑀫𑁄𑀘 𑀯𑀺𑀦𑀬𑁄𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸𑀢𑀺 𑀏𑀯𑀁 𑀲𑀢𑁆𑀣𑀼𑀞𑀸𑀦𑁂 𑀣𑀧𑁂𑀢𑁆𑀯𑀸 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀥𑀫𑁆𑀫𑀲𑀭𑀡𑁂 𑀲𑀗𑁆𑀕𑀳𑀺𑀢𑁄𑀢𑀺 𑀬𑀼𑀢𑁆𑀢𑁄, 𑀢𑀁 𑀥𑀸𑀭𑁂𑀦𑁆𑀢𑁄𑀧𑀦 𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄𑀧𑀺 𑀅𑀢𑁆𑀣𑀺. 𑀅𑀝𑁆𑀞𑀺𑀢𑁄𑀧𑀺 𑀅𑀢𑁆𑀣𑀺. 𑀬𑁄 𑀅𑀝𑁆𑀞𑀺𑀢𑁄, 𑀲𑁄 𑀅𑀢𑁆𑀢𑀦𑁄𑀧𑀺 𑀲𑀭𑀡𑀁 𑀦𑀳𑁄𑀢𑀺. 𑀓𑀼𑀢𑁄 𑀧𑀭𑀲𑁆𑀲. 𑀲𑀢𑁆𑀣𑀸𑀭𑀸 𑀘 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀳𑀲𑁆𑀲𑁂𑀲𑀼 𑀲𑁄 𑀕𑀭𑀳𑀺𑀢𑁄. 𑀢𑀲𑁆𑀫𑀸 𑀲𑁄 𑀲𑀗𑁆𑀖𑀲𑀭𑀡𑁂 𑀅𑀲𑀗𑁆𑀕𑀳𑀺𑀢𑁄. 𑀇𑀢𑀭𑁄𑀯 𑀲𑀗𑁆𑀕𑀳𑀺𑀢𑁄𑀢𑀺 𑀬𑀼𑀢𑁆𑀢𑁄𑀢𑀺.

𑀲𑀦𑁆𑀢𑀸𑀦𑀁 𑀥𑀫𑁆𑀫𑁄𑀢𑀺 𑀲𑀤𑁆𑀥𑀫𑁆𑀫𑁄. 𑀲𑀫𑀺𑀢𑀓𑀺𑀮𑁂𑀲𑀸𑀦𑀁 𑀢𑀢𑁄𑀬𑁂𑀯 𑀧𑀲𑀢𑁆𑀣𑀸𑀦𑀁 𑀧𑀽𑀚𑀺𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀡𑁆𑀟𑀺𑀢𑀸𑀦𑀜𑁆𑀘 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀬𑁄𑀘 𑀲𑀦𑁆𑀢𑀸𑀦𑀁 𑀥𑀫𑁆𑀫𑁄, 𑀲𑁄𑀧𑀺 𑀏𑀓𑀦𑁆𑀢𑁂𑀦 𑀲𑀦𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀲𑀦𑁆𑀢𑁄 𑀥𑀫𑁆𑀫𑁄𑀢𑀺𑀧𑀺 𑀲𑀤𑁆𑀥𑀫𑁆𑀫𑁄. 𑀧𑀲𑀢𑁆𑀣𑁄 𑀧𑀽𑀚𑀺𑀢𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀲𑀘𑁆𑀘𑁄 𑀯𑀸. 𑀅𑀬𑀜𑁆𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀥𑀫𑁆𑀫𑁄 𑀯𑀺𑀬 𑀥𑀸𑀭𑁂𑀦𑁆𑀢𑀁 𑀦𑀯𑀺𑀲𑀁𑀯𑀸𑀤𑁂𑀢𑀺. 𑀲𑁄 𑀳𑀺 𑀅𑀬𑀁 𑀫𑁂 𑀳𑀺𑀢𑁄𑀢𑀺 𑀥𑀸𑀭𑁂𑀦𑁆𑀢𑀲𑁆𑀲 𑀅𑀳𑀺𑀢𑁄𑀬𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀅𑀬𑀁 𑀧𑀦 𑀢𑀣𑀸𑀥𑀸𑀭𑁂𑀦𑁆𑀢𑀲𑁆𑀲 𑀳𑀺𑀢𑁄𑀬𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺. [𑀲𑀤𑁆𑀥𑀫𑁆𑀫𑀧𑀤𑀁]. 𑀕𑀡𑀼𑀢𑁆𑀢𑀫𑀧𑀤𑁂 𑀮𑁄𑀓𑁂 𑀲𑀫𑀸𑀦 𑀤𑀺𑀝𑁆𑀞𑀺𑀲𑀻𑀮𑀸𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀲𑀫𑀽𑀳𑁄 𑀕𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀉𑀢𑁆𑀢𑀫𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀬𑀼𑀢𑁆𑀢𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀉𑀢𑁆𑀢𑀫𑁄𑀘 𑀲𑁄 𑀕𑀡𑁄𑀘𑀸𑀢𑀺 𑀅𑀢𑁆𑀣𑁂𑀦 𑀉𑀢𑁆𑀢𑀫𑀕𑀡𑁄𑀦𑀸𑀫. 𑀲𑁄𑀬𑁂𑀯 𑀇𑀥 𑀕𑀡𑀼𑀢𑁆𑀢𑀫𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 𑀫𑀼𑀦𑀺𑀲𑁂𑀝𑁆𑀞𑁄 𑀫𑀼𑀦𑀺𑀯𑀭𑁄𑀢𑀺.

[𑁧𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀕𑀡𑀸𑀦𑀁 𑀕𑀡𑁂𑀲𑀼𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀲𑀫𑀽𑀳𑁂𑀲𑀼 𑀉𑀢𑁆𑀢𑀫𑁄 𑀕𑀡𑀼𑀢𑁆𑀢𑀫𑁄’’𑀢𑀺 𑀘 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀏𑀢𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀢𑀺 𑀉𑀢𑁆𑀢𑀫𑀲𑀤𑁆𑀤𑁄 𑀧𑀥𑀸𑀦𑀪𑀽𑀢𑁄 𑀳𑁄𑀢𑀺. 𑀲𑁄𑀘 𑀕𑀼𑀡𑀫𑁆𑀳𑀺𑀬𑁂𑀯 𑀧𑀯𑀢𑁆𑀢𑀢𑀻𑀢𑀺 𑀢𑁂𑀦 𑀇𑀥 𑀅𑀭𑀺𑀬𑀲𑀗𑁆𑀖𑁄 𑀯𑀼𑀢𑁆𑀢𑁄𑀢𑀺 𑀦𑀲𑀺𑀚𑁆𑀛𑀢𑀻𑀢𑀺. 𑀏𑀢𑁆𑀣𑀘 𑀕𑀡𑁄𑀢𑀺 𑀲𑀗𑁆𑀖𑁄𑀬𑁂𑀯 𑀯𑀼𑀘𑁆𑀘𑀢𑀺. 𑀲𑁄𑀘 𑀲𑀗𑁆𑀖𑁄 𑀤𑀼𑀯𑀺𑀥𑁄 𑀲𑀫𑁆𑀫𑀼𑀢𑀺𑀲𑀗𑁆𑀖𑁄, 𑀤𑀓𑁆𑀔𑀺𑀡𑁂𑀬𑁆𑀬𑀲𑀗𑁆𑀖𑁄𑀢𑀺. 𑀢𑀢𑁆𑀣 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀢𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀲𑀫𑁆𑀫𑀼𑀢𑀺𑀦𑀸𑀫. 𑀢𑀸𑀬 𑀲𑀫𑁆𑀫𑀼𑀢𑀺𑀬𑀸 𑀉𑀧𑀲𑀫𑁆𑀧𑀦𑁆𑀦𑀪𑀽𑀫𑀺𑀁 𑀧𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀫𑁆𑀫𑀼𑀢𑀺𑀲𑀗𑁆𑀖𑁄𑀦𑀸𑀫. 𑀲𑁄 𑀯𑀺𑀦𑀬𑀓𑀫𑁆𑀫𑁂𑀲𑀼 𑀧𑀲𑀺𑀤𑁆𑀥𑁄. 𑀤𑀓𑁆𑀔𑀺𑀡𑁂𑀬𑁆𑀬𑀲𑀗𑁆𑀖𑁄 𑀦𑀸𑀫 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄. 𑀲𑁄𑀧𑀦 𑀓𑀺𑀜𑁆𑀘𑀸𑀧𑀺 𑀲𑀫𑁆𑀫𑀼𑀢𑀺𑀲𑀗𑁆𑀖𑁂𑀧𑀺 𑀅𑀦𑁆𑀢𑁄𑀕𑀥𑁄𑀬𑁂𑀯 𑀳𑁄𑀢𑀺. 𑀢𑀣𑀸𑀧𑀺 𑀲𑀭𑀡𑀕𑀫𑀦 𑀯𑀦𑁆𑀤𑀦𑀸 𑀫𑀸𑀦 𑀧𑀽𑀚𑀸𑀲𑀓𑁆𑀓𑀸𑀭𑀸𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑁂𑀲𑀼 𑀅𑀦𑀼𑀢𑁆𑀢𑀭 𑀧𑀼𑀜𑁆𑀜𑀓𑁆𑀔𑁂𑀢𑁆𑀢 𑀯𑀺𑀲𑁂 𑀲𑀧𑀭𑀺𑀕𑁆𑀕𑀳𑀢𑁆𑀣𑀁 𑀪𑀕𑀯𑀢𑀸 𑀢𑀣𑀸 𑀢𑀣𑀸 𑀲𑀁𑀯𑀡𑁆𑀡𑁂𑀢𑁆𑀯𑀸 𑀲𑁄 𑀯𑀺𑀲𑀼𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀣𑀼𑀚𑁆𑀚𑀦𑀲𑀗𑁆𑀖𑁄𑀳𑀺 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀲𑀫𑀸𑀦𑁄𑀧𑀺 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀦𑀳𑁄𑀢𑀺. 𑀓𑀲𑁆𑀫𑀸. 𑀲𑀸𑀮𑀺𑀓𑁆𑀔𑁂𑀢𑁆𑀢𑁂 𑀢𑀺𑀡𑀸𑀦𑀁 𑀯𑀺𑀬 𑀔𑁂𑀢𑁆𑀢𑀤𑀼𑀝𑁆𑀞𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀁 𑀲𑀩𑁆𑀪𑀸𑀯𑀸𑀢𑀺. 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑁄 𑀧𑀦𑀲𑁆𑀲 𑀧𑀼𑀭𑀺𑀫𑁂 𑀲𑀤𑁆𑀥𑀫𑁆𑀫𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺. [𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀧𑀤𑀁]

𑁮. 𑀅𑀪𑀺𑀯𑀸𑀤𑀺𑀬𑀸𑀢𑀺 𑀯𑀺𑀲𑁂𑀲𑀢𑁄 𑀯𑀦𑁆𑀤𑀺𑀢𑁆𑀯𑀸. 𑀏𑀢𑁆𑀣 𑀘 𑀅𑀬𑀁 𑀮𑁄𑀓𑁂 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀲𑁂𑀝𑁆𑀞𑁄 𑀯𑀦𑁆𑀤𑀦𑁂𑀬𑁆𑀬𑁄𑀢𑀺 𑀏𑀯𑀁 𑀲𑁂𑀝𑁆𑀞 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀦𑁆𑀢𑁄 𑀯𑀺𑀲𑁂𑀲𑀢𑁄 𑀯𑀦𑁆𑀤𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀯𑀦𑁆𑀤𑀦𑀸 𑀧𑀦 𑀢𑀺𑀯𑀺𑀥𑀸 𑀓𑀸𑀬𑀯𑀦𑁆𑀤𑀦𑀸𑀤𑀺𑀯𑀲𑁂𑀦. 𑀬𑀣𑀸𑀳 𑁋

𑀢𑀺𑀲𑁆𑀲𑁄 𑀇𑀫𑀸 𑀪𑀺𑀓𑁆𑀔𑀯𑁂 𑀯𑀦𑁆𑀤𑀦𑀸, 𑀓𑀢𑀫𑀸 𑀢𑀺𑀲𑁆𑀲𑁄. 𑀓𑀸𑀬𑁂𑀦 𑀯𑀦𑁆𑀤𑀢𑀺, 𑀯𑀸𑀘𑀸𑀬 𑀯𑀦𑁆𑀤𑀢𑀺, 𑀫𑀦𑀲𑀸 𑀯𑀦𑁆𑀤𑀢𑀻𑀢𑀺.

𑀢𑀢𑁆𑀣 𑀲𑁂𑀝𑁆𑀞𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀚𑀸𑀡𑀼𑀤𑁆𑀯𑀬 𑀓𑀧𑁆𑀧𑀭𑀤𑁆𑀯𑀬 𑀦𑀮𑀸𑀝 𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀦𑁂𑀬𑁆𑀬𑀸𑀦𑀁 𑀅𑀪𑀺𑀫𑀼𑀔𑀁 𑀦𑀺𑀧𑁆𑀧𑀚𑁆𑀚𑀦𑁆𑀢𑁄 𑀓𑀸𑀬𑁂𑀦 𑀯𑀦𑁆𑀤𑀢𑀺𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀧𑀜𑁆𑀘𑀧𑁆𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁. 𑀬𑀸𑀬𑀘 𑀅𑀯𑀦𑁆𑀤𑀺𑀬𑀝𑁆𑀞𑀸𑀦𑁂𑀲𑀼 𑀯𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀕𑀼𑀡𑀧𑀤𑀸𑀦𑀺 𑀯𑀸𑀘𑀸𑀬 𑀧𑀯𑀢𑁆𑀢𑁂𑀦𑁆𑀢𑁄 𑀯𑀸𑀘𑀸𑀬 𑀯𑀦𑁆𑀤𑀢𑀺𑀦𑀸𑀫. 𑀦𑀫𑁄 𑀩𑀼𑀤𑁆𑀥𑀲𑁆𑀲, 𑀦𑀫𑀢𑁆𑀣𑀼 𑀩𑀼𑀤𑁆𑀥𑀲𑁆𑀲, 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁, 𑀯𑀺𑀧𑀲𑁆𑀲𑀺𑀲𑁆𑀲 𑀦𑀫𑀢𑁆𑀣𑀽𑀢𑀺 𑀏𑀯𑀫𑀸𑀤𑀻𑀲𑀼𑀧𑀺 𑀯𑀸𑀘𑀸 𑀯𑀦𑁆𑀤𑀦𑀸𑀬𑁂𑀯. 𑀕𑀼𑀡𑀧𑀤𑀸𑀦𑀺 𑀅𑀦𑀼𑀕𑀦𑁆𑀢𑁆𑀯𑀸 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄 𑀫𑀦𑀲𑀸 𑀯𑀦𑁆𑀤𑀢𑀺𑀦𑀸𑀫𑀸𑀢𑀺.

𑁯. 𑀪𑀸𑀲𑀺𑀲𑁆𑀲𑀦𑁆𑀢𑀺 𑀓𑀣𑁂𑀲𑁆𑀲𑀸𑀫𑀺. 𑀓𑀸𑀫𑀜𑁆𑀘 𑀣𑁂𑀭𑁄 𑀇𑀫𑀁 𑀲𑀗𑁆𑀕𑀳𑀁 𑀭𑀘𑀬𑀦𑁆𑀢𑁄 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀁 𑀓𑀢𑁆𑀯𑀸𑀯 𑀭𑀘𑀬𑀺𑀲𑁆𑀲𑀢𑀺. 𑀕𑀦𑁆𑀣𑀓𑀫𑁆𑀫𑀁 𑀦𑀸𑀫 𑀯𑀸𑀘𑀸𑀓𑀫𑁆𑀫𑁂𑀲𑀼 𑀧𑀲𑀺𑀤𑁆𑀥𑀦𑁆𑀢𑀺 𑀓𑀢𑁆𑀯𑀸 𑀪𑀸𑀲𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁦. 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀦𑁆𑀢𑀺 𑀧𑀤𑁂 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸 𑀅𑀢𑁆𑀣𑀸 𑀅𑀪𑀺𑀥𑀫𑁆𑀫𑀢𑁆𑀣𑀸. 𑀢𑁂 𑀲𑀗𑁆𑀕𑀬𑁆𑀳𑀦𑁆𑀢𑀺 𑀏𑀢𑁆𑀣 𑀏𑀢𑁂𑀦𑀸𑀢𑀺𑀯𑀸 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁄. 𑀲𑀗𑁆𑀕𑀬𑁆𑀳𑀦𑁆𑀢𑀺𑀢𑀺𑀘 𑀣𑁂𑀭𑁂𑀦 𑀲𑀁𑀔𑀺𑀧𑀺𑀢𑁆𑀯𑀸 𑀕𑀬𑁆𑀳𑀦𑁆𑀢𑀺 𑀓𑀣𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀥𑀫𑁆𑀫𑁂𑀢𑀺 𑀘𑁂𑀢𑁆𑀣 𑀅𑀪𑀺𑀅𑀢𑀺𑀭𑁂𑀓𑁄 𑀅𑀪𑀺𑀯𑀺𑀲𑁂 𑀲𑁄𑀘 𑀥𑀫𑁆𑀫𑁄 𑀅𑀪𑀺𑀥𑀫𑁆𑀫𑁄. 𑀥𑀫𑁆𑀫𑁄𑀢𑀺 𑀘 𑀯𑀺𑀦𑀬𑀧𑀸𑀴𑀺𑀢𑁄 𑀅𑀜𑁆𑀜𑀁𑀧𑀸𑀴𑀺 𑀤𑁆𑀯𑀬𑀁 𑀯𑀼𑀘𑁆𑀘𑀢𑀺. 𑀬𑁄 𑀯𑁄 𑀆𑀦𑀦𑁆𑀤 𑀫𑀬𑀸 𑀥𑀫𑁆𑀫𑁄𑀘 𑀯𑀺𑀦𑀬𑁄𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀜𑁆𑀘 𑀧𑀸𑀴𑀺𑀤𑁆𑀯𑀬𑀁 𑀆𑀡𑀸𑀯𑀺𑀥𑀸𑀦𑀲𑀗𑁆𑀔𑀸𑀢𑀁 𑀯𑀺𑀦𑀬𑀦 𑀓𑀺𑀘𑁆𑀘𑀁 𑀯𑀚𑁆𑀚𑁂𑀢𑁆𑀯𑀸 𑀓𑀼𑀲𑀮𑀸𑀤𑀺𑀓𑁂 𑀬𑀣𑀸𑀧𑀯𑀢𑁆𑀢𑁂 𑀧𑀭𑀫𑀢𑁆𑀣𑀥𑀫𑁆𑀫𑁂 𑀏𑀯 𑀤𑀻𑀧𑁂𑀢𑀻𑀢𑀺. 𑀏𑀯𑀁 𑀤𑀻𑀧𑁂𑀦𑁆𑀢𑁂𑀲𑀼𑀘 𑀢𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀇𑀢𑀭𑀢𑁄 𑀅𑀢𑀺𑀭𑁂𑀓𑁄𑀘 𑀳𑁄𑀢𑀺 𑀯𑀺𑀲𑁂𑀲𑁄𑀘. 𑀅𑀬𑀫𑁂𑀯 𑀅𑀪𑀺𑀥𑀫𑁆𑀫𑁄 𑀦𑀸𑀫. 𑀇𑀢𑀭𑁄𑀧𑀦 𑀥𑀫𑁆𑀫𑁄𑀬𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑀥𑀫𑁆𑀫𑁄 𑀅𑀪𑀺𑀥𑀫𑁆𑀫𑁄 𑀯𑀺𑀦𑀬𑁄 𑀅𑀪𑀺𑀯𑀺𑀦𑀬𑁄𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀥𑀫𑁆𑀫𑁄𑀦𑀸𑀫 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁. 𑀅𑀪𑀺𑀥𑀫𑁆𑀫𑁄𑀦𑀸𑀫 𑀬𑀢𑁆𑀢𑀧𑀓𑀭𑀡𑀸𑀦𑀺. 𑀯𑀺𑀦𑀬𑁄𑀦𑀸𑀫 𑀉𑀪𑀢𑁄 𑀯𑀺𑀪𑀗𑁆𑀕𑁄, 𑀅𑀪𑀺𑀯𑀺𑀦𑀬𑁄𑀦𑀸𑀫 𑀔𑀦𑁆𑀥𑀓𑀧𑀭𑀺𑀯𑀸𑀭𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀯𑀺𑀲𑁂𑀲𑀢𑀸 𑀘𑁂𑀢𑁆𑀣 𑀓𑀼𑀲𑀮𑀸𑀤𑀺 𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀸𑀦𑀁 𑀅𑀦𑀯𑀲𑁂𑀲𑀯𑀺𑀪𑀢𑁆𑀢𑀺𑀯𑀲𑁂𑀦𑀯𑀸 𑀲𑀼𑀤𑁆𑀥𑀥𑀫𑁆𑀫𑀸𑀥𑀺𑀝𑁆𑀞𑀸𑀦 𑀤𑁂𑀲𑀦𑀸𑀧𑀯𑀢𑁆𑀢𑀺𑀯𑀲𑁂𑀦𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀇𑀫𑀁 𑀅𑀪𑀺𑀥𑀫𑁆𑀫𑀤𑁂𑀲𑀦𑀁 𑀤𑁂𑀯𑁂𑀲𑀼𑀏𑀯 𑀤𑁂𑀲𑁂𑀦𑁆𑀢𑀺. 𑀦 𑀳𑀺 𑀫𑀦𑀼𑀲𑁆𑀲𑀸 𑀏𑀯𑀭𑀽𑀧𑀁 𑀢𑀬𑁄 𑀫𑀸𑀲𑁂 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀦𑀬𑁄𑀕𑁆𑀬𑀁 𑀓𑀣𑀸𑀫𑀕𑁆𑀕𑀁 𑀏𑀓𑁂𑀦 𑀇𑀭𑀺𑀬𑀸𑀧𑀣𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀬𑁄𑀲𑀸𑀦𑀁 𑀧𑀸𑀧𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦𑀘 𑀏𑀯 𑀭𑀽𑀧𑁄 𑀏𑀓𑀫𑀸𑀢𑀺𑀓𑀸𑀦𑀼𑀩𑀦𑁆𑀥𑁄 𑀓𑀣𑀸𑀫𑀕𑁆𑀕𑁄 𑀦𑀸𑀦𑀸𑀔𑀡𑁂𑀲𑀼 𑀦𑀸𑀦𑀸𑀚𑀦𑀸𑀦𑀁 𑀤𑁂𑀲𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄 𑀳𑁄𑀢𑀻𑀢𑀺. 𑀓𑁂𑀘𑀺𑀧𑀦 𑀯𑀺𑀦𑀬𑀧𑀸𑀴𑀺𑀢𑁄𑀧𑀺 𑀅𑀪𑀺𑀭𑁂𑀓𑀯𑀺𑀲𑁂𑀲𑀢𑀁 𑀢𑀲𑁆𑀲 𑀯𑀡𑁆𑀡𑁂𑀦𑁆𑀢𑀺. 𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀥𑀫𑁆𑀫𑀦𑀸𑀫𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀸𑀴𑀻𑀦𑀁 𑀫𑀚𑁆𑀛𑁂𑀏𑀯 𑀅𑀬𑀁 𑀅𑀢𑀺𑀭𑁂𑀓𑀯𑀺𑀲𑁂𑀲𑀢𑀸 𑀯𑀺𑀘𑀸𑀭𑀺𑀢𑀸. 𑀦𑀘 𑀬𑀼𑀚𑁆𑀚𑀢𑀺 𑀯𑀺𑀦𑀬𑁂𑀦 𑀲𑀳 𑀢𑀣𑀸 𑀯𑀺𑀘𑀸𑀭𑁂𑀢𑀼𑀁 𑀅𑀲𑀫𑀸𑀦𑀓𑀺𑀘𑁆𑀘𑀯𑀺𑀲𑀬𑀢𑁆𑀢𑀸. 𑀯𑀺𑀦𑀬𑁄 𑀳𑀺 𑀓𑀸𑀬𑀯𑀸𑀘𑀸𑀦𑀁 𑀯𑀺𑀦𑀬𑀦𑀓𑀺𑀘𑁆𑀘𑁄, 𑀅𑀚𑁆𑀛𑀸𑀘𑀸𑀭𑀯𑀺𑀲𑀬𑁄𑀘. 𑀥𑀫𑁆𑀫𑁄 𑀧𑀦 𑀥𑀫𑁆𑀫𑀯𑀺𑀪𑀸𑀕𑀓𑀺𑀘𑁆𑀘𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀯𑀺𑀲𑀬𑁄𑀘𑀸𑀢𑀺. 𑀓𑁂𑀘𑀺𑀧𑀦 𑀯𑀤𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀺𑀦𑀬𑁄 𑀏𑀯 𑀲𑀩𑁆𑀩𑀚𑁂𑀝𑁆𑀞𑀓𑁄 𑀲𑀺𑀬𑀸. 𑀯𑀺𑀦𑀬𑀁 𑀯𑀺𑀯𑀡𑁆𑀡𑁂𑀦𑁆𑀢𑀲𑁆𑀲 𑀳𑀺 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺 𑀳𑁄𑀢𑀺. 𑀥𑀫𑁆𑀫𑀁 𑀯𑀺𑀯𑀡𑁆𑀡𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀫𑀢𑁆𑀢𑀸𑀢𑀺, 𑀢𑀁 𑀦𑀬𑀼𑀚𑁆𑀚𑀢𑀺. 𑀯𑀺𑀦𑀬𑁄 𑀳𑀺 𑀆𑀡𑀸𑀘𑀓𑁆𑀓𑀁. 𑀥𑀫𑁆𑀫𑁄𑀘 𑀥𑀫𑁆𑀫𑀘𑀓𑁆𑀓𑀁. 𑀢𑀢𑁆𑀣 𑀯𑀺𑀦𑀬𑀁 𑀯𑀺𑀯𑀡𑁆𑀡𑁂𑀦𑁆𑀢𑁄 𑀲𑀢𑁆𑀣𑀼 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀺. 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀫𑀳𑀦𑁆𑀢𑁄 𑀳𑁄𑀢𑀺. 𑀬𑀲𑁆𑀲𑀘 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄, 𑀢𑀲𑁆𑀲 𑀥𑀫𑁆𑀫𑀲𑀗𑁆𑀖𑁂𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼𑀘 𑀅𑀕𑀸𑀭𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀲𑁆𑀫𑀸 𑀯𑀺𑀦𑀬 𑀯𑀺𑀯𑀡𑁆𑀡𑀦𑁂 𑀆𑀧𑀢𑁆𑀢𑀺 𑀫𑀳𑀦𑁆𑀢𑀻 𑀳𑁄𑀢𑀺. 𑀦 𑀲𑀩𑁆𑀩𑀚𑁂𑀝𑁆𑀞𑀓𑀢𑁆𑀢𑀸𑀢𑀺. 𑀅𑀧𑀺𑀘, 𑀯𑀺𑀦𑀬𑁄𑀦𑀸𑀫 𑀲𑀸𑀲𑀦𑀲𑁆𑀲 𑀫𑀽𑀮𑀁. 𑀯𑀺𑀦𑀬𑁂 𑀅𑀝𑁆𑀞𑀺𑀢𑁂 𑀲𑀸𑀲𑀦𑀁 𑀦𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀢𑁆𑀣𑀁𑀧𑀺 𑀯𑀺𑀦𑀬𑀯𑀺𑀯𑀡𑁆𑀡𑀦𑁂 𑀫𑀳𑀢𑀻 𑀆𑀧𑀢𑁆𑀢𑀺 𑀧𑀜𑁆𑀜𑀢𑁆𑀢𑀸𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀧𑀣𑀫𑀕𑀸𑀣𑀸𑀬

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀻𑀬𑀕𑀸𑀣𑀸-𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁧. 𑀏𑀯𑀁 𑀆𑀤𑀺𑀕𑀸𑀣𑀸𑀬𑀢𑀁𑀢𑀁 𑀧𑀬𑁄𑀚𑀦 𑀲𑀳𑀺𑀢𑁂 𑀧𑀜𑁆𑀘 𑀅𑀢𑁆𑀣𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂 𑀅𑀪𑀺𑀥𑀫𑁆𑀫𑀢𑁆𑀣𑁂 𑀉𑀤𑁆𑀤𑁂𑀲𑀢𑁄 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀻𑀬𑀕𑀸𑀣𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀪𑀸𑀲𑀺𑀲𑁆𑀲𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀦𑁆𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑁂 𑀫𑀬𑀸 𑀯𑀼𑀢𑁆𑀢𑀸 𑀅𑀪𑀺𑀥𑀫𑁆𑀫𑀢𑁆𑀣𑀸 𑀲𑀩𑁆𑀩𑀣𑀸𑀧𑀭𑀫𑀢𑁆𑀣𑀢𑁄 𑀘𑀢𑀼𑀥𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 -

[𑁧𑁨] 𑀝𑀻𑀓𑀸𑀬𑀁 𑀢𑀸𑀯

𑀢𑀢𑁆𑀣 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀓𑀭𑀡𑁂𑀢𑀺𑀯𑀸 𑀅𑀪𑀺𑀥𑀫𑁆𑀫𑀢𑁆𑀣 𑀧𑀤𑁂𑀢𑀺𑀯𑀸 𑀅𑀪𑀺𑀥𑀫𑁆𑀫𑁂𑀢𑀺𑀯𑀸 𑀢𑀲𑀤𑁆𑀤𑀢𑁆𑀣𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑁂𑀢𑀺. 𑀲𑀩𑁆𑀩𑀁 𑀦𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀧𑀓𑀭𑀡𑁂 𑀫𑀬𑀸 𑀯𑀼𑀢𑁆𑀢𑀸 𑀅𑀪𑀺𑀥𑀫𑁆𑀫𑀢𑁆𑀣𑀸𑀢𑀺 𑀬𑀼𑀚𑁆𑀚𑀢𑀺. 𑀧𑀓𑀭𑀡𑀁𑀧𑀺 𑀳𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀫𑁂𑀯 𑀳𑁄𑀢𑀺. 𑀦𑀢𑀼 𑀯𑀼𑀢𑁆𑀢𑀁. 𑀓𑀼𑀢𑁄 𑀅𑀪𑀺𑀥𑀫𑁆𑀫𑀢𑁆𑀣𑀸𑀢𑀺. 𑀦 𑀘 𑀲𑀁𑀯𑀡𑁆𑀡𑀦𑀸𑀧𑀓𑀭𑀡𑁂𑀲𑀼 𑀆𑀤𑀺𑀫𑁆𑀳𑀺𑀬𑁂𑀯 𑀢𑀸𑀯 𑀢𑀲𑀤𑁆𑀤𑁄 𑀅𑀧𑁆𑀧𑀥𑀸𑀦𑀧𑀤𑀸𑀦𑀺 𑀧𑀘𑁆𑀘𑀸𑀫𑀲𑀢𑀻𑀢𑀺 𑀅𑀢𑁆𑀣𑀺. 𑀢𑀲𑁆𑀫𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀆𑀤𑀺𑀫𑁆𑀳𑀺 𑀢𑀢𑁆𑀣 𑀓𑁂𑀦 𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄𑀢𑀺 𑀯𑀸𑀓𑁆𑀬𑁂𑀯𑀺𑀬 𑀇𑀥 𑀢𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑁋

[𑁧𑁩] 𑀝𑀻𑀓𑀸𑀲𑀼

𑀲𑀩𑁆𑀩𑀣𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺.

𑀲𑀸 𑀳𑀺 𑀯𑀓𑁆𑀔𑀫𑀸𑀦𑁂𑀳𑀺 𑀲𑀩𑁆𑀩𑀬𑀸𑀧𑀺 𑀤𑁆𑀯𑀸𑀤𑀲, 𑀲𑀩𑁆𑀩𑀣𑀸𑀧𑀺 𑀅𑀝𑁆𑀞𑀸𑀭𑀲𑀸𑀢𑀺𑀆𑀤𑀻𑀳𑀺 𑀦𑀲𑀫𑁂𑀢𑀻𑀢𑀺. 𑀢𑀢𑁆𑀢 𑀲𑀩𑁆𑀩𑀣𑀸𑀢𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀼𑀢𑁆𑀢𑁂𑀦 𑀓𑀼𑀲𑀮𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀘𑀢𑀼𑀥𑀸𑀯 𑀳𑁄𑀦𑁆𑀢𑀺, 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑁂 𑀦 𑀔𑀦𑁆𑀥𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀘𑀢𑀼𑀥𑀸𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀥𑀸𑀢𑀼 𑀓𑀣𑀸𑀬𑀁 𑀯𑀼𑀢𑁆𑀢𑁂𑀦𑀸𑀢𑀺𑀆𑀤𑀺𑀦𑀸𑀧𑀺 𑀯𑀢𑁆𑀢𑀩𑁆𑀩𑀁.

𑁧𑁨. 𑀧𑀭𑀫𑀢𑁆𑀣𑀢𑁄𑀢𑀺 𑀧𑀭𑀫𑀢𑁆𑀣 𑀲𑀘𑁆𑀘𑀢𑁄. 𑀤𑁆𑀯𑁂 𑀳𑀺 𑀲𑀘𑁆𑀘𑀸𑀦𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁, 𑀧𑀭𑀫𑀢𑁆𑀣𑀲𑀘𑁆𑀘𑀦𑁆𑀢𑀺, 𑀢𑀢𑁆𑀣 𑀲𑀢𑁆𑀢 𑀧𑀼𑀕𑁆𑀕𑀮 𑀅𑀢𑁆𑀢 𑀚𑀻𑀯𑀸𑀤𑀺𑀓𑀸 𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑀸 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀬𑁂𑀯 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑁆𑀜𑀸𑀡𑀭𑀳𑀺𑀢𑀸𑀦𑀁𑀧𑀦 𑀫𑀳𑀸𑀚𑀦𑀸𑀦𑀁 𑀘𑀺𑀢𑁆𑀢𑁂 𑀫𑀳𑀦𑁆𑀢𑀫𑀳𑀦𑁆𑀢𑀸𑀧𑀺 𑀳𑀼𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀸𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀺, 𑀢𑁂𑀘 𑀫𑀳𑀸𑀚𑀦𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀢𑁂𑀲𑀁 𑀏𑀓𑀦𑁆𑀢𑁂𑀦 𑀅𑀢𑁆𑀣𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀢𑀣𑀸 𑀯𑁄𑀳𑀭𑀦𑁆𑀢𑀺 𑀘𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀺𑀘. 𑀢𑀲𑁆𑀫𑀸 𑀢𑁂 𑀫𑀳𑀸𑀚𑀦𑁂𑀳𑀺 𑀲𑀫𑀕𑁆𑀕𑁂𑀳𑀺 𑀲𑀫𑁆𑀫𑀢𑀢𑁆𑀢𑀸𑀢𑀢𑁄𑀬𑁂𑀯𑀘 𑀯𑀘𑀻𑀲𑀘𑁆𑀘𑀯𑀺𑀭𑀢𑀺𑀲𑀘𑁆𑀘𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁆𑀢𑀸𑀲𑀫𑁆𑀫𑀼𑀢𑀺 𑀲𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑁂 𑀞𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀩𑁆𑀩 𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀬𑁄𑀘 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭 𑀥𑀫𑁆𑀫𑁂𑀘 𑀆𑀭𑀸𑀥𑁂𑀦𑁆𑀢𑀺. 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑁆𑀢𑀸 𑀅𑀧𑀸𑀬𑀧𑀽𑀭𑀓𑀸 𑀳𑁄𑀦𑁆𑀢𑀺. 𑀏𑀯𑀁 𑀫𑀳𑀦𑁆𑀢𑀜𑁆𑀳𑀺 𑀲𑀫𑁆𑀫𑀼𑀢𑀺 𑀲𑀘𑁆𑀘𑀦𑁆𑀢𑀺. 𑀧𑀭𑀫𑀢𑁆𑀣𑀲𑀘𑁆𑀘𑀁 𑀧𑀦 𑀧𑀢𑁆𑀯𑀸 𑀢𑀁 𑀲𑀘𑁆𑀘𑀫𑁂𑀯 𑀦𑀳𑁄𑀢𑀺. 𑀢𑀜𑁆𑀳𑀺 𑀲𑀬𑀁 𑀅𑀯𑀺𑀚𑁆𑀚𑀫𑀸𑀦𑀁𑀬𑁂𑀯 𑀲𑀫𑀸𑀦𑀁 𑀫𑀳𑀸𑀚𑀦𑁂 𑀯𑀺𑀚𑁆𑀚𑀫𑀸𑀦𑀦𑁆𑀢𑁆𑀯𑁂𑀯 𑀕𑀡𑁆𑀳𑀸𑀧𑁂𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺 𑀢𑀺𑀯𑀺𑀥𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀦𑀁 𑀯𑀢𑁆𑀣𑀼 𑀳𑀼𑀢𑁆𑀯𑀸 𑀩𑀸𑀮𑀚𑀦𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀼𑀁 𑀦𑀤𑁂𑀢𑀺. 𑀏𑀯𑀁 𑀯𑀺𑀧𑀭𑀻𑀢𑀜𑁆𑀳𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀁. 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀜𑁆𑀘𑀸𑀢𑀺. 𑀧𑀭𑀫𑀢𑁆𑀣𑀲𑀘𑁆𑀘𑀁𑀧𑀦 𑀤𑀼𑀯𑀺𑀥𑀁 𑀲𑀪𑀸𑀯𑀲𑀘𑁆𑀘𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀥𑀫𑁆𑀫𑀲𑀗𑁆𑀕𑀡𑀺𑀆𑀤𑀻𑀲𑀼 𑀲𑀢𑁆𑀢𑀲𑀼 𑀧𑀓𑀭𑀡𑁂𑀲𑀼 𑀯𑀺𑀪𑀢𑁆𑀢𑀸 𑀓𑀼𑀲𑀮𑀸𑀤𑀬𑁄 𑀥𑀫𑁆𑀫𑀸 𑀲𑀪𑀸𑀯𑀲𑀘𑁆𑀘𑀁𑀦𑀸𑀫. 𑀢𑁂 𑀳𑀺 𑀲𑀬𑀁 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀓𑀼𑀲𑀮𑀸𑀦𑀸𑀫 𑀥𑀫𑁆𑀫𑀸 𑀅𑀢𑁆𑀣𑀺 𑀲𑀼𑀔𑀸𑀦𑀸𑀫 𑀯𑁂𑀤𑀦𑀸 𑀅𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑁂𑀦 𑀯𑀺𑀲𑀁𑀯𑀸𑀤𑁂𑀦𑁆𑀢𑀻𑀢𑀺. 𑀢𑀁 𑀧𑀦 𑀅𑀭𑀺𑀬𑀲𑀘𑁆𑀘𑀁 𑀧𑀢𑁆𑀯𑀸 𑀓𑀺𑀜𑁆𑀘𑀺 𑀅𑀲𑀘𑁆𑀘𑀁𑀧𑀺 𑀳𑁄𑀢𑀺𑀬𑁂𑀯. 𑀢𑀣𑀸𑀳𑀺 𑀅𑀦𑀼𑀪𑀯𑀦𑀪𑁂𑀤𑀫𑀢𑁆𑀢𑀁 𑀉𑀧𑀸𑀤𑀸𑀬𑁂𑀯 𑀯𑁂𑀤𑀦𑀸 𑀲𑀼𑀔𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀯𑀼𑀢𑁆𑀢𑀸. 𑀦 𑀲𑀩𑁆𑀩𑀸𑀓𑀸𑀭𑀢𑁄 𑀲𑀼𑀔𑀪𑀽𑀢𑀢𑁆𑀢𑀸. 𑀲𑀩𑁆𑀩𑁂𑀳𑀺 𑀧𑀦 𑀅𑀦𑀺𑀘𑁆𑀘𑀢𑀸 𑀲𑀗𑁆𑀔𑀢𑀢𑀸𑀤𑀻𑀳𑀺 𑀅𑀦𑁂𑀓𑀲𑀢𑁂𑀳𑀺 𑀆𑀓𑀸𑀭𑁂𑀳𑀺 𑀲𑀩𑁆𑀩𑀸𑀧𑀺 𑀯𑁂𑀤𑀦𑀸 𑀤𑀼𑀓𑁆𑀔𑀸𑀏𑀯. 𑀢𑀣𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦 𑀓𑀼𑀲𑀮𑀪𑀸𑀯𑁄𑀧𑀺 𑀅𑀓𑀼𑀲𑀮𑀁 𑀉𑀧𑀸𑀤𑀸𑀬𑁂𑀯 𑀯𑀼𑀢𑁆𑀢𑁄. 𑀲𑀩𑁆𑀩𑁂𑀧𑀺 𑀳𑀺 𑀢𑁂𑀪𑀽𑀫𑀓𑀸 𑀓𑀼𑀲𑀮𑀲𑀫𑁆𑀫𑀢𑀸 𑀥𑀫𑁆𑀫𑀸 𑀲𑀸𑀲𑀯𑀢𑀸 𑀲𑀁𑀓𑀺𑀮𑁂𑀲𑀺𑀓𑀢𑀸 𑀑𑀖𑀦𑀺𑀬 𑀬𑁄𑀕𑀦𑀺𑀬 𑀉𑀧𑀸𑀤𑀸𑀦𑀺𑀬𑀢𑀸 𑀲𑀗𑁆𑀔𑀸𑀢𑁂𑀳𑀺 𑀯𑀚𑁆𑀚𑁂𑀳𑀺 𑀲𑀸𑀯𑀚𑁆𑀚𑀸𑀏𑀯 𑀳𑁄𑀦𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀪𑀽𑀢𑀸𑀦𑀜𑁆𑀘 𑀯𑀺𑀧𑀸𑀓𑀸𑀦𑀁 𑀚𑀦𑀦𑀝𑁆𑀞𑁂𑀦 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀸𑀏𑀯 𑀳𑁄𑀦𑁆𑀢𑀺. 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀜𑁆𑀘 𑀲𑀩𑁆𑀩𑀮𑁄𑀓𑀺𑀬𑀲𑀫𑁆𑀫𑀢𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀘𑀢𑀼𑀩𑁆𑀪𑀽 𑀫𑀓𑀥𑀫𑁆𑀫𑀸 𑀏𑀓𑀦𑁆𑀢𑁂𑀦 𑀅𑀢𑁆𑀢𑀸𑀧𑀺𑀦𑀸𑀫 𑀦𑀢𑁆𑀣𑀺. 𑀓𑀼𑀢𑁄 𑀅𑀚𑁆𑀛𑀢𑁆𑀢𑀸𑀦𑀸𑀫. 𑀩𑀳𑀺𑀤𑁆𑀥𑀸𑀏𑀯 𑀳𑁄𑀦𑁆𑀢𑀺. 𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲𑀸𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀬𑀁 𑀦𑀬𑁄 𑀲𑁂𑀲𑀢𑁆𑀢𑀺𑀓 𑀤𑀼𑀓𑀥𑀫𑁆𑀫𑁂𑀲𑀼𑀧𑀺 𑀬𑀣𑀸𑀭𑀳𑀁 𑀦𑁂𑀢𑀩𑁆𑀩𑁄. 𑀅𑀭𑀺𑀬 𑀲𑀘𑁆𑀘𑀁𑀦𑀸𑀫 𑀲𑀩𑁆𑀩𑁂𑀲𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀏𑀓𑀦𑁆𑀢 𑀤𑀼𑀓𑁆𑀔𑀪𑀸𑀯𑁄 𑀢𑀡𑁆𑀳𑀸𑀬 𑀏𑀓𑀦𑁆𑀢 𑀤𑀼𑀓𑁆𑀔𑀲𑀫𑀼𑀤𑀬 𑀪𑀸𑀯𑁄 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥 𑀪𑀸𑀯𑁄 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥𑀫𑀕𑁆𑀕𑀪𑀸𑀯𑁄𑀘𑀸𑀢𑀺. 𑀇𑀥𑀫𑁂𑀯 𑀳𑀺 𑀧𑀭𑀺𑀲𑀼𑀤𑁆𑀥𑀩𑀼𑀤𑁆𑀥𑀻𑀦𑀁 𑀅𑀭𑀺𑀬𑀸𑀦𑀁 𑀜𑀸𑀡𑁂 𑀅𑀘𑀮𑀫𑀸𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁 𑀦𑀺𑀧𑁆𑀧𑀭𑀺𑀬𑀸𑀬𑀲𑀘𑁆𑀘𑀁 𑀳𑁄𑀢𑀻𑀢𑀺. 𑀢𑁂𑀲𑀼 𑀇𑀥 𑀲𑀫𑁆𑀫𑀼𑀢𑀺𑀲𑀘𑁆𑀘𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 𑀧𑀭𑀫𑀢𑁆𑀣𑀢𑁄𑀢𑀺 𑀇𑀤 𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀢𑁄𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀢𑁄𑀢𑀺. 𑀢𑀢𑁆𑀣 𑀅𑀢𑁆𑀣𑁄 𑀤𑀼𑀯𑀺𑀥𑁄 𑀲𑀪𑀸𑀯𑀲𑀺𑀤𑁆𑀥𑁄𑀘 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑁄𑀘. 𑀢𑀢𑁆𑀣 𑀬𑁄 𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀓𑁂𑀯𑀮𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀮𑀓𑁆𑀔𑀡𑁂𑀦 𑀯𑀺𑀚𑁆𑀚𑀫𑀸𑀦𑁄 𑀳𑀼𑀢𑁆𑀯𑀸 𑀲𑀺𑀤𑁆𑀥𑁄. 𑀲𑁄 𑀘𑀺𑀢𑁆𑀢𑀸𑀤𑀺𑀓𑁄 𑀅𑀢𑁆𑀣𑁄 𑀲𑀪𑀸𑀯𑀲𑀺𑀤𑁆𑀥𑁄𑀦𑀸𑀫. 𑀬𑁄𑀧𑀦 𑀅𑀢𑁆𑀢𑀦𑁄 𑀮𑀓𑁆𑀔𑀡𑁂𑀦 𑀯𑀺𑀚𑁆𑀚𑀫𑀸𑀦𑁄𑀬𑁂𑀯 𑀦𑀳𑁄𑀢𑀺. 𑀯𑀺𑀚𑁆𑀚𑀫𑀸𑀦𑀲𑁆𑀲𑀧𑀦 𑀅𑀢𑁆𑀣𑀲𑁆𑀲 𑀦𑀸𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑁂 𑀉𑀧𑀸𑀤𑀸𑀬 𑀘𑀺𑀢𑁆𑀢𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀲𑀯𑀺𑀕𑁆𑀕𑀳𑀁 𑀓𑀢𑁆𑀯𑀸 𑀕𑀳𑀺𑀢𑁄 𑀘𑀺𑀢𑁆𑀢𑀫𑀬𑁄 𑀘𑀺𑀢𑁆𑀢𑀦𑀺𑀫𑁆𑀫𑀺𑀢𑁄 𑀳𑀼𑀢𑁆𑀯𑀸 𑀘𑀺𑀢𑁆𑀢𑁂𑀏𑀯 𑀉𑀧𑀮𑀩𑁆𑀪𑀫𑀸𑀦𑁄 𑀳𑁄𑀢𑀺. 𑀲𑁄 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀓𑁄 𑀅𑀢𑁆𑀣𑁄 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑁄 𑀦𑀸𑀫. 𑀢𑁂𑀲𑀼 𑀲𑀪𑀸𑀯𑀲𑀺𑀤𑁆𑀥𑁄𑀬𑁂𑀯 𑀧𑀭𑀫𑀢𑁆𑀣𑁄𑀦𑀸𑀫. 𑀲𑁄 𑀳𑀺 𑀲𑀦𑁆𑀢𑀺 𑀪𑀯𑀦𑁆𑀢𑀺 𑀩𑀼𑀤𑁆𑀥𑀺𑀲𑀤𑁆𑀤𑀸 𑀏𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀏𑀓𑀦𑁆𑀢𑀯𑀺𑀚𑁆𑀚𑀫𑀸𑀦𑀝𑁆𑀞𑁂𑀦 𑀇𑀢𑀭𑀢𑁄 𑀧𑀭𑀫𑁄 𑀉𑀓𑁆𑀓𑀁𑀲𑀕𑀢𑁄 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑁄. 𑀅𑀧𑀺 𑀘, 𑀬𑁂 𑀅𑀬𑀁 𑀅𑀢𑁆𑀣𑀺 𑀅𑀬𑀁 𑀉𑀧𑀮𑀩𑁆𑀪𑀢𑀻𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀺𑀜𑁆𑀜𑀢𑁆𑀣𑀸𑀬, 𑀧𑀭𑀺𑀜𑁆𑀜𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀢𑁆𑀣𑀸𑀬, 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑀢𑁆𑀣𑀸𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁆𑀣𑀸𑀬, 𑀪𑀸𑀯𑁂𑀢𑀩𑁆𑀩𑀲𑁆𑀲 𑀪𑀸𑀯𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀢𑀤𑀢𑁆𑀣𑀲𑀸𑀥𑀦𑁂 𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑁂𑀦 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑁄. 𑀇𑀢𑀭𑁄𑀧𑀦 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀲𑁆𑀲 𑀅𑀪𑀺𑀜𑁆𑀜𑀸𑀤𑀺𑀅𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀢𑀤𑀢𑁆𑀣𑀲𑀸𑀥𑀦𑁂 𑀯𑀺𑀲𑀁𑀯𑀸𑀤𑀓𑁄𑀬𑁂𑀯 𑀪𑀯𑀺𑀲𑁆𑀲𑀢𑀺. 𑀦𑀧𑀦 𑀢𑀤𑀢𑁆𑀣𑀁 𑀲𑀸𑀥𑁂𑀲𑁆𑀲 𑀢𑀻𑀢𑀺 𑀧𑀭𑀫𑀢𑁆𑀣𑁄𑀢𑀺 𑀯𑀢𑁆𑀢𑀼𑀁 𑀦𑀸𑀭𑀳𑀢𑀻𑀢𑀺.

[𑁧𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀭𑀫𑀲𑁆𑀲𑀯𑀸 𑀉𑀢𑁆𑀢𑀫𑀲𑁆𑀲 𑀜𑀸𑀡𑀲𑁆𑀲 𑀅𑀢𑁆𑀣𑁄 𑀕𑁄𑀘𑀭𑁄𑀢𑀺 𑀧𑀭𑀫𑀢𑁆𑀣𑁄’’𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀧𑀭𑀫𑀲𑀤𑁆𑀤𑁄𑀜𑀸𑀡𑁂 𑀯𑀢𑁆𑀢𑀫𑀸𑀦𑁄 𑀤𑀺𑀲𑁆𑀲𑀢𑀺. 𑀦𑀘 𑀅𑀢𑁆𑀣𑀲𑀤𑁆𑀤𑁄 𑀕𑁄𑀘𑀭𑁂𑀢𑀺. 𑀬𑀜𑁆𑀘 𑀅𑀦𑀼𑀝𑀻𑀓𑀸𑀬𑀁 𑀲𑀘𑁆𑀘𑀫𑁂𑀯 𑀲𑀘𑁆𑀘𑀺𑀓𑀁. 𑀲𑁄 𑀏𑀯 𑀅𑀢𑁆𑀣𑁄 𑀅𑀯𑀺𑀧𑀭𑀻𑀢𑀲𑁆𑀲 𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀝𑁆𑀞𑁂𑀦𑀸𑀢𑀺 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀯𑀺𑀧𑀭𑀻𑀢𑁂𑀦 𑀜𑀸𑀡𑁂𑀦 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩 𑀢𑁄 𑀅𑀢𑁆𑀣𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀧𑀭𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀦𑁆𑀢𑀺. [𑀧𑀭𑀫𑀢𑁆𑀣𑀧𑀤𑀁]

𑁧𑁩. 𑀘𑀺𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁. 𑀏𑀢𑁆𑀣𑀘 𑀘𑀺𑀦𑁆𑀢𑀦𑀓𑁆𑀭𑀺𑀬𑀸 𑀦𑀸𑀫 𑀦𑀺𑀘𑁆𑀘𑀁 𑀆𑀭𑀫𑁆𑀫𑀡𑀸𑀧𑁂𑀓𑁆𑀔𑀸 𑀳𑁄𑀢𑀺. 𑀦 𑀳𑀺 𑀲𑀸 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀮𑀩𑁆𑀪𑀢𑀻𑀢𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀕𑁆𑀕𑀳𑀡 𑀆𑀭𑀫𑁆𑀫𑀡𑀼𑀧𑀮𑀤𑁆𑀥𑀺𑀬𑁂𑀯 𑀇𑀥 𑀘𑀺𑀦𑁆𑀢𑀦𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀪𑀯𑀗𑁆𑀕𑀲𑀫𑀬 𑀯𑀺𑀲𑀜𑁆𑀜𑀺𑀲𑀫𑀬𑁂𑀲𑀼 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸𑀧𑀺 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀯𑀸𑀤𑀻𑀦𑀁 𑀯𑀸𑀤𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀲𑀦𑁆𑀢𑁂𑀲𑀼𑀧𑀺𑀘 𑀦𑀺𑀲𑁆𑀲𑀬 𑀲𑀫𑀦𑀦𑁆𑀢𑀭𑀸𑀤𑀻𑀲𑀼 𑀢𑀲𑁆𑀲 𑀧𑀘𑁆𑀘𑀬𑁂𑀲𑀼 𑀢𑁂𑀳𑀺 𑀦𑀸𑀫𑀁 𑀅𑀮𑀪𑀺𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀲𑁂𑀦𑁂𑀯𑀲𑁆𑀲 𑀦𑀸𑀫𑀁 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀺𑀦𑁆𑀢𑁂𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀘𑀺𑀢𑁆𑀢𑀁. 𑀢𑀜𑁆𑀳𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑀓𑀺𑀘𑁆𑀘𑁂 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀦𑁆𑀢𑀺 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀆𑀭𑀫𑁆𑀫𑀡𑀁 𑀕𑀡𑁆𑀳𑀦𑁆𑀢𑀸 𑀢𑀲𑁆𑀲 𑀯𑀲𑁂𑀦𑁂𑀯 𑀕𑀡𑁆𑀳𑀦𑁆𑀢𑀻𑀢𑀺. 𑀘𑀺𑀦𑁆𑀢𑀦𑀫𑀢𑁆𑀢𑀁𑀯𑀸 𑀘𑀺𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀥𑀫𑁆𑀫𑀸 𑀢𑀁𑀢𑀁 𑀓𑁆𑀭𑀺𑀬𑀸𑀫𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀦 𑀢𑁂𑀲𑀼 𑀤𑀩𑁆𑀩𑀁𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀺𑀕𑁆𑀕𑀳𑁄𑀯𑀸 𑀉𑀧𑀮𑀩𑁆𑀪𑀢𑀺. 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀦𑁄 𑀘 𑀳𑁄𑀦𑁆𑀢𑀺. 𑀦 𑀢𑁂 𑀅𑀢𑁆𑀢𑀦𑁄 𑀣𑀸𑀫𑁂𑀦𑀯𑀸 𑀩𑀮𑁂𑀦𑀯𑀸 𑀯𑀲𑁂𑀦𑀯𑀸 𑀲𑀢𑁆𑀢𑀺𑀬𑀸𑀯𑀸 𑀉𑀧𑁆𑀧𑀚𑁆𑀚𑀺𑀢𑀼𑀁𑀧𑀺 𑀲𑀓𑁆𑀓𑁄𑀦𑁆𑀢𑀺. 𑀧𑀕𑁂𑀯 𑀘𑀺𑀦𑁆𑀢𑁂𑀢𑀼𑀁𑀯𑀸 𑀨𑀼𑀲𑁂𑀢𑀼𑀁𑀯𑀸𑀢𑀺. 𑀔𑀡𑀫𑀢𑁆𑀢𑀝𑁆𑀞𑀸𑀬𑀺𑀦𑁄𑀘 𑀳𑁄𑀦𑁆𑀢𑀺, 𑀦 𑀓𑀤𑀸𑀘𑀺 𑀓𑀲𑁆𑀲𑀘𑀺 𑀯𑀲𑁂 𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀇𑀤𑀁 𑀤𑀩𑁆𑀩𑀁, 𑀅𑀬𑀁 𑀲𑀢𑁆𑀢𑀺, 𑀅𑀬 𑀓𑁆𑀭𑀺𑀬𑀸𑀢𑀺 𑀏𑀯𑀁 𑀯𑀺𑀪𑀸𑀕𑁄 𑀦𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀩𑁆𑀩𑁂𑀲𑀼 𑀧𑀭𑀫𑀢𑁆𑀣𑀧𑀤𑁂𑀲𑀼 𑀏𑀓𑀁 𑀪𑀸𑀯𑀲𑀸𑀥𑀦𑀫𑁂𑀯 𑀧𑀥𑀸𑀦𑀢𑁄 𑀮𑀩𑁆𑀪𑀢𑀺. 𑀢𑀤𑀜𑁆𑀜 𑀲𑀸𑀥𑀦𑀸𑀦𑀺𑀧𑀦 𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀤𑀩𑁆𑀩𑀸𑀤𑀺𑀯𑀲𑁂𑀦 𑀅𑀪𑁂𑀤𑀲𑁆𑀲 𑀘𑀺𑀦𑁆𑀢𑀦𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀜𑀸𑀧𑀦𑀢𑁆𑀣𑀁 𑀯𑀺𑀪𑀸𑀕 𑀓𑀧𑁆𑀧𑀦𑀸𑀯𑀲𑁂𑀦 𑀪𑁂𑀤𑀓𑀭𑀡𑀁 𑀧𑀭𑀺𑀬𑀸𑀬𑀓𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀲𑀺𑀮𑀸 𑀧𑀼𑀢𑁆𑀢𑀓𑀲𑁆𑀲𑀲𑀭𑀻𑀭𑀦𑁆𑀢𑀺, 𑀢𑀣𑀸 𑀓𑀭𑀡𑀜𑁆𑀘 𑀢𑀁 𑀢𑀁 𑀓𑁆𑀭𑀺𑀬𑀸𑀲𑀗𑁆𑀔𑀸𑀢 𑀥𑀫𑁆𑀫𑀯𑀺𑀫𑀼𑀢𑁆𑀢𑀲𑁆𑀲 𑀧𑀭𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀓𑀸𑀭𑀓𑀪𑀽𑀢𑀲𑁆𑀲 𑀅𑀢𑁆𑀢 𑀚𑀻𑀯 𑀲𑀢𑁆𑀢 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀲𑁄 𑀅𑀪𑀸𑀯𑀤𑀻𑀧𑀦𑀢𑁆𑀣𑀁. 𑀲𑀢𑀺 𑀳𑀺 𑀅𑀢𑁆𑀢𑀸𑀤𑀺𑀫𑁆𑀳𑀺 𑀓𑀺𑀁 𑀅𑀪𑁂𑀤𑀲𑁆𑀲 𑀪𑁂𑀤𑀓𑀧𑁆𑀧𑀦𑀸𑀬𑀸𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀲𑀯𑀺𑀲𑀸𑀡𑀁 𑀯𑀺𑀬 𑀅𑀪𑀽𑀢𑀲𑁆𑀲 𑀪𑀽𑀢 𑀓𑀧𑁆𑀧𑀦𑀸 𑀯𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀬𑀫𑀲𑁆𑀲𑀸𑀥𑀺𑀧𑁆𑀧𑀸𑀬𑁄-𑀥𑀫𑁆𑀫𑁂𑀲𑀼 𑀓𑀢𑁆𑀢𑀸𑀯𑀸 𑀓𑀸𑀭𑁂 𑀢𑀸𑀯𑀸 𑀓𑁄𑀘𑀺 𑀦𑀢𑁆𑀣𑀺. 𑀮𑁄𑀓𑁂𑀧𑀦 𑀅𑀢𑁆𑀢𑀧𑁆𑀧𑀥𑀸𑀦𑁄 𑀓𑁆𑀭𑀺𑀬𑀸 𑀦𑀺𑀧𑁆𑀨𑀸𑀤𑀓𑁄 𑀓𑀢𑁆𑀢𑀸𑀦𑀸𑀫 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀘𑀺𑀦𑁆𑀢𑀦𑀓𑀺𑀘𑁆𑀘𑁂 𑀅𑀢𑁆𑀢𑀧𑁆𑀧𑀥𑀸𑀦𑀢𑀸 𑀤𑀻𑀧𑀦𑀢𑁆𑀣𑀁 𑀢𑀁 𑀓𑀢𑁆𑀢𑀼𑀪𑀸𑀯𑀁 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀲𑁆𑀲𑀘 𑀩𑀮𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁𑀧𑀺 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀢𑀤𑀦𑀼𑀓𑀽𑀮𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑀢𑁆𑀣𑀁 𑀧𑀼𑀦𑀓𑀭𑀡𑀪𑀸𑀯𑀁 𑀘𑀺𑀢𑁆𑀢𑁂 𑀓𑀢𑁆𑀢𑀼𑀪𑀸𑀯𑀜𑁆𑀘 𑀢𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀅𑀧𑀺 𑀘𑁂𑀢𑁆𑀣 𑀘𑀺𑀢𑁆𑀢𑀲𑀤𑁆𑀤𑁄 𑀯𑀺𑀘𑀺𑀢𑁆𑀭𑀢𑁆𑀣𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂 𑀢𑀁 𑀲𑀁𑀬𑀼𑀢𑁆𑀢𑀓𑁂 𑁋

𑀤𑀺𑀝𑁆𑀞𑀁 𑀯𑁄 𑀪𑀺𑀓𑁆𑀔𑀯𑁂 𑀘𑀭𑀡𑀁𑀦𑀸𑀫 𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀪𑀦𑁆𑀢𑁂. 𑀢𑀫𑁆𑀧𑀺 𑀔𑁄 𑀪𑀺𑀓𑁆𑀔𑀯𑁂 𑀘𑀭𑀡𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦𑁂𑀯 𑀘𑀺𑀦𑁆𑀢𑀺𑀢𑀦𑁆𑀢𑀺. 𑀢𑁂𑀦𑀸𑀧𑀺 𑀔𑁄 𑀪𑀺𑀓𑁆𑀔𑀯𑁂 𑀘𑀭𑀡𑁂𑀦 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀜𑁆𑀜𑁂𑀯 𑀘𑀺𑀢𑁆𑀢𑀢𑀭𑀦𑁆𑀢𑀺, 𑀦𑀸 𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀁𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁 𑀏𑀯𑀁 𑀘𑀺𑀢𑁆𑀢𑀁. 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸. 𑀢𑁂𑀧𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀘𑀺𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑀺𑀓𑀢𑀸. 𑀢𑁂𑀳𑀺𑀧𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀺𑀭𑀘𑁆𑀙𑀸𑀦 𑀕𑀢𑁂𑀳𑀺 𑀧𑀸𑀡𑁂𑀳𑀺 𑀘𑀺𑀢𑁆𑀢𑀜𑁆𑀜𑁂𑀯 𑀘𑀺𑀢𑁆𑀢𑀢𑀭𑀦𑁆𑀢𑀺.

𑀢𑀢𑁆𑀣 𑀘𑀭𑀡𑀁𑀦𑀸𑀫 𑀘𑀺𑀢𑁆𑀢𑀦𑁆𑀢𑀺 𑀬𑀢𑁆𑀣𑀯𑀺𑀘𑀺𑀢𑁆𑀭𑀸𑀦𑀺 𑀤𑀺𑀩𑁆𑀩𑀯𑀺𑀫𑀸𑀦𑀸𑀤𑀻𑀦𑀺 𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸 𑀇𑀥𑀘𑀺𑀥𑀘 𑀦𑀺𑀩𑁆𑀩𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀢𑀲𑁆𑀲 𑀧𑀝𑀓𑁄𑀝𑁆𑀞𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀘𑀺𑀢𑁆𑀢𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀬𑀣𑀬𑀺𑀤𑀦𑁆𑀢𑀺 𑀬𑀣𑀸 𑀇𑀫𑁂. 𑀘𑀺𑀢𑁆𑀢𑀺𑀓𑀢𑀸𑀢𑀺 𑀯𑀺𑀘𑀺𑀢𑁆𑀭𑀸 𑀓𑀢𑀸. 𑀏𑀢𑁆𑀣𑀘 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀓𑀸𑀬 𑀲𑀜𑁆𑀜𑀸𑀯𑀺𑀘𑀺𑀢𑁆𑀢𑀸. 𑀲𑀜𑁆𑀜𑀸𑀯𑀺𑀘𑀺𑀢𑁆𑀢𑀢𑀸𑀬 𑀢𑀡𑁆𑀳𑀸𑀯𑀺𑀘𑀺𑀢𑁆𑀢𑀸. 𑀢𑀡𑁆𑀳𑀸𑀯𑀺𑀘𑀺𑀢𑁆𑀢𑀢𑀸𑀬 𑀓𑀫𑁆𑀫𑀸𑀦𑀺 𑀯𑀺𑀘𑀺𑀢𑁆𑀢𑀸𑀦𑀺. 𑀓𑀫𑁆𑀫𑀯𑀺𑀘𑀺𑀢𑁆𑀢 𑀢𑀸𑀬 𑀬𑁄𑀦𑀺𑀬𑁄 𑀯𑀺𑀘𑀺𑀢𑁆𑀢𑀸. 𑀬𑁄𑀦𑀺𑀯𑀺𑀘𑀺𑀢𑁆𑀢𑀢𑀸𑀬 𑀢𑁂𑀲𑀁 𑀢𑀺𑀭𑀘𑁆𑀙𑀸 𑀦𑀕𑀢𑀸𑀦𑀁 𑀯𑀺𑀘𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. [𑀯𑀘𑀦𑀢𑁆𑀣𑁄]

𑀢𑀁 𑀢𑀁 𑀲𑀪𑀸𑀯𑁄 𑀮𑀓𑁆𑀔𑀡𑀁, 𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑁄 𑀭𑀲𑁄;

𑀕𑀬𑁆𑀳𑀸𑀓𑀸𑀭𑁄 𑀨𑀮𑀁𑀯𑀸𑀧𑀺, 𑀧𑀘𑁆𑀘𑀼𑀧𑀝𑁆𑀞𑀸𑀦 𑀲𑀜𑁆𑀜𑀺𑀢𑀁.

𑀆𑀲𑀦𑁆𑀦𑀓𑀸𑀭𑀡𑀁 𑀬𑀁 𑀢𑀁, 𑀧𑀤𑀝𑁆𑀞𑀸𑀦𑀦𑁆𑀢𑀺 𑀢𑀁 𑀫𑀢𑀁;

𑀥𑀫𑁆𑀫𑀸𑀦𑀁 𑀯𑀯𑀢𑁆𑀣𑀸𑀦𑀸𑀬, 𑀅𑀮𑀁 𑀏𑀢𑁂 𑀯𑀺𑀩𑀼𑀤𑁆𑀥𑀺𑀦𑁄.

𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀘𑀺𑀢𑁆𑀢𑀁, 𑀧𑀼𑀩𑁆𑀩𑀗𑁆𑀕𑀫𑀭𑀲𑀁, 𑀲𑀦𑁆𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀸𑀫𑀭𑀽𑀧𑀧𑀤𑀝𑁆𑀞𑀸𑀦𑀁. [𑀘𑀺𑀢𑁆𑀢𑀁]

𑁧𑁪. 𑀘𑁂𑀢𑀲𑀺𑀓𑀦𑁆𑀢𑀺 𑀏𑀢𑁆𑀣 𑀘𑁂𑀢𑀲𑀺 𑀪𑀯𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀘𑁂𑀢𑀲𑀺𑀓𑀁. 𑀨𑀲𑁆𑀲𑀸𑀤𑀺 𑀥𑀫𑁆𑀫𑀚𑀸𑀢𑀁. 𑀏𑀢𑁆𑀣𑀘 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀦𑀸𑀫 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀮𑀓𑁆𑀔𑀡𑁂𑀳𑀺 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀻 𑀪𑀽𑀢𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺. 𑀏𑀢𑁂𑀦 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀸𑀢𑀺. 𑀲𑀸𑀏𑀯 𑀨𑀲𑁆𑀲𑀸𑀤𑀻𑀦𑀁. 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀭𑀸, 𑀬𑀁 𑀘𑀺𑀢𑁆𑀢𑀲𑁆𑀲 𑀫𑀭𑀡𑀁, 𑀬𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁, 𑀬𑀁 𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼, 𑀢𑀤𑁂𑀯 𑀨𑀲𑁆𑀲𑀸𑀤𑀻𑀦𑀦𑁆𑀢𑀺 𑀏𑀯𑀁 𑀏𑀓𑀧𑀼𑀧𑁆𑀨 𑀫𑀜𑁆𑀚𑀭𑀺𑀬𑀁 𑀏𑀓𑀯𑀡𑁆𑀝𑀼𑀧𑀦𑀺𑀩𑁆𑀩𑀦𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀚𑀸𑀢𑀺𑀬𑀸𑀤𑀺 𑀉𑀧𑀦𑀺𑀩𑁆𑀩𑀦𑁆𑀥𑀸 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀇𑀥 𑀘𑁂𑀢𑀲𑀺𑀓𑀁𑀦𑀸𑀫𑀸𑀢𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀘𑀺𑀢𑁆𑀢𑀁𑀧𑀺 𑀢𑁂𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀳 𑀢𑀣𑁂𑀯 𑀆𑀬𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀢𑀁𑀧𑀺 𑀨𑀲𑁆𑀲𑀺𑀓𑀁 𑀯𑁂𑀤𑀦𑀺𑀓𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂. 𑀦. 𑀘𑀺𑀢𑁆𑀢𑀲𑁆𑀲𑁂𑀯 𑀚𑁂𑀝𑁆𑀞𑀓𑀢𑁆𑀢𑀸. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀫𑀦𑁄𑀫𑀬𑀸𑀢𑀺 𑀫𑀦𑀲𑀸𑀏𑀯 𑀧𑀓𑀢𑀸 𑀦𑀺𑀫𑁆𑀫𑀺𑀢𑀸 𑀘𑀺𑀢𑁆𑀢𑀓𑁆𑀭𑀺𑀬𑀸 𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀢𑁂 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑀸 𑀘𑀺𑀢𑁆𑀢𑁂𑀦 𑀯𑀺𑀦𑀸 𑀦𑀼𑀧𑀮𑀩𑁆𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀁𑀧𑀦 𑀢𑁂𑀳𑀺 𑀓𑁂𑀳𑀺𑀘𑀺 𑀯𑀺𑀦𑀸𑀧𑀺 𑀧𑀯𑀢𑁆𑀢𑀢𑀺𑀬𑁂𑀯. 𑀧𑀜𑁆𑀘𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑀜𑁆𑀳𑀺𑀢𑁂𑀳𑀺 𑀓𑁂𑀳𑀺𑀘𑀺 𑀯𑀺𑀢𑀓𑁆𑀓𑀸𑀤𑀻𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀢𑀲𑁆𑀫𑀸 𑀢𑁂𑀲𑀜𑁆𑀜𑁂𑀯 𑀢𑀤𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸 𑀯𑀢𑁆𑀢𑀩𑁆𑀩𑀸 𑀦 𑀘𑀺𑀢𑁆𑀢𑀲𑁆𑀲𑀸𑀢𑀺.

[𑁧𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀏𑀓𑀸𑀮𑀫𑁆𑀩𑀡𑀢𑀸 𑀫𑀢𑁆𑀢𑁂𑀦 𑀢𑁂𑀲𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀁 𑀘𑁂𑀢𑀲𑀺 𑀓𑀢𑁆𑀢𑀜𑁆𑀘 𑀯𑀺𑀪𑀸𑀯𑁂𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀏𑀓𑀸𑀮𑀫𑁆𑀩𑀡𑀢𑀸𑀫𑀢𑁆𑀢𑁂𑀦 𑀘𑁂𑀢𑀲𑀺𑀓𑀁𑀦𑀸𑀫 𑀚𑀸𑀢𑀦𑁆𑀢𑀺. 𑀏𑀢𑁆𑀣 𑀘 𑀮𑁄𑀓𑁂 𑀦𑀸𑀦𑀸𑀯𑀡𑁆𑀡𑀥𑀸𑀢𑀼𑀬𑁄 𑀉𑀤𑀓𑁂 𑀖𑀁𑀲𑀺𑀢𑁆𑀯𑀸 𑀯𑀢𑁆𑀣𑀼𑀫𑁆𑀳𑀺 𑀦𑀸𑀦𑀸 𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀣 𑀯𑀢𑁆𑀣𑀼𑀫𑁆𑀳𑀺 𑀨𑀭𑀡𑀁 𑀩𑀦𑁆𑀥𑀦𑀜𑁆𑀘 𑀉𑀤𑀓𑀲𑁆𑀲𑁂𑀯 𑀓𑀺𑀘𑁆𑀘𑀁, 𑀦 𑀯𑀡𑁆𑀡𑀥𑀸𑀢𑀽𑀦𑀁. 𑀦𑀸𑀦𑀸𑀭𑀽𑀧 𑀤𑀲𑁆𑀲𑀦𑀁 𑀯𑀡𑁆𑀡𑀥𑀸𑀢𑀽𑀦𑀫𑁂𑀯 𑀓𑀺𑀘𑁆𑀘𑀁, 𑀦 𑀉𑀤𑀓𑀲𑁆𑀲. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀬 𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁. 𑀉𑀤𑀓𑀁𑀯𑀺𑀬 𑀘𑀺𑀢𑁆𑀢𑀁. 𑀦𑀸𑀦𑀸 𑀯𑀡𑁆𑀡𑀥𑀸𑀢𑀼𑀬𑁄𑀯𑀺𑀬 𑀘𑁂𑀢𑀲𑀺𑀓𑀥𑀫𑁆𑀫𑀸𑀢𑀺. [𑀘𑁂𑀢𑀲𑀺𑀓𑀁]

𑁧𑁫. 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀁. 𑀲𑀻𑀢𑀼𑀡𑁆𑀳𑀸𑀤𑀻𑀳𑀺 𑀯𑀺𑀭𑁄𑀥𑀺 𑀧𑀘𑁆𑀘𑀬𑁂𑀳𑀺 𑀯𑀺𑀲𑀫 𑀧𑀯𑀢𑁆𑀢𑀺 𑀯𑀲𑁂𑀦 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺, 𑀢𑁂𑀳𑀺 𑀯𑀸 𑀯𑀺𑀓𑀸𑀭𑀁 𑀆𑀧𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺. 𑀲𑀺𑀢𑁂𑀦𑀧𑀺 𑀭𑀼𑀧𑁆𑀧𑀢𑀺. 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺. 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺. 𑀯𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺. 𑀟𑀁𑀲 𑀫𑀓𑀲 𑀯𑀸𑀢𑀸𑀢𑀧 𑀲𑀭𑀺𑀁 𑀲𑀧 𑀲𑀧𑁆𑀨𑀲𑁆𑀲𑁂𑀳𑀺𑀧𑀺 𑀭𑀼𑀧𑁆𑀧𑀢𑀻𑀢𑀺. 𑀭𑀼𑀧𑁆𑀧𑀢𑀻𑀢𑀺𑀘 𑀭𑀼𑀧𑁆𑀧𑀢𑀺, 𑀓𑀼𑀧𑁆𑀧𑀢𑀺, 𑀖𑀝𑁆𑀝𑀻𑀬𑀢𑀺, 𑀧𑀺𑀴𑀻 𑀬𑀢𑀺, 𑀪𑀺𑀚𑁆𑀚𑀢𑀻𑀢𑀺.

𑀫𑀳𑀸𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀧𑀺𑀡𑁆𑀟𑀢𑁆𑀣𑁄, 𑀬𑁂 𑀥𑀫𑁆𑀫𑀸 𑀘𑀺𑀭𑀝𑁆𑀞𑀺𑀢𑀺𑀓𑀸𑀘 𑀳𑁄𑀦𑁆𑀢𑀺 𑀲𑀧𑁆𑀧𑀝𑀺𑀖𑀲𑀪𑀸𑀯𑀸𑀘. 𑀢𑁂𑀲𑀜𑁆𑀜𑁂𑀯 𑀞𑀺𑀢𑀺𑀓𑁆𑀔𑀡𑁂𑀲𑀼 𑀯𑀺𑀭𑁄𑀥𑀺𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀫𑁄𑀦𑀸𑀫 𑀳𑁄𑀢𑀺. 𑀦𑀧𑀦𑀜𑁆𑀜𑁂𑀲𑀁 𑀧𑀭𑀺𑀢𑁆𑀢𑀓𑁆𑀔𑀡𑀸𑀦𑀁 𑀅𑀧𑁆𑀧𑀝𑀺𑀖𑀲𑀪𑀸𑀯𑀸𑀦𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀧𑁆𑀧𑀝𑀺𑀖𑀲𑀪𑀸𑀯𑀸𑀦𑀁 𑀲𑀼𑀔𑀼𑀫 𑀭𑀽𑀧𑀸𑀦𑀁𑀧𑀺 𑀩𑀳𑀺𑀤𑁆𑀥𑀸 𑀲𑀻𑀢𑀸𑀤𑀻𑀳𑀺 𑀲𑀫𑀸𑀕𑀫𑁄𑀦𑀸𑀫 𑀦𑀢𑁆𑀣𑀺. 𑀓𑀼𑀢𑁄 𑀧𑀭𑀺𑀢𑁆𑀢𑀓𑁆𑀔𑀡𑀸𑀦𑀁 𑀅𑀧𑁆𑀧𑀝𑀺𑀖𑀲𑀪𑀸𑀯𑀸𑀦𑀜𑁆𑀘 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺. 𑀬𑀤𑀺𑀏𑀯𑀁 𑀲𑀼𑀔𑀼𑀫𑀭𑀽𑀧𑀸𑀦𑀁 𑀅𑀭𑀽𑀧𑀢𑀸𑀧𑀢𑁆𑀢𑀺 𑀲𑀺𑀬𑀸𑀢𑀺. 𑀦𑀲𑀺𑀬𑀸. 𑀑𑀴𑀸𑀭𑀺𑀓𑀭𑀽𑀧𑁂𑀳𑀺 𑀲𑀫𑀸𑀦𑀕𑀢𑀺 𑀓𑀢𑁆𑀢𑀸. 𑀢𑀸𑀦𑀺𑀳𑀺 𑀑𑀴𑀸𑀭𑀺𑀓𑁂𑀲𑀼 𑀭𑀼𑀧𑁆𑀧𑀫𑀸𑀦𑁂𑀲𑀼 𑀭𑀼𑀧𑁆𑀧𑀦𑁆𑀢𑀺𑀬𑁂𑀯𑀸𑀢𑀺. 𑀲𑀫𑀸𑀕𑀫𑁄𑀘 𑀦𑀸𑀫 𑀇𑀥 𑀣𑀧𑁂𑀢𑁆𑀯𑀸 𑀆𑀧𑀸𑀢𑀕𑀫𑀦𑀁 𑀆𑀭𑀫𑁆𑀫𑀡𑀓𑀭𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀁 𑀞𑀺𑀢𑀺𑀧𑀢𑁆𑀢𑀸𑀦𑀁 𑀑𑀴𑀸𑀭𑀺𑀓𑀭𑀽𑀧𑀸𑀦𑀁 𑀫𑀳𑀸𑀪𑀽𑀢𑀸𑀦𑀫𑁂𑀯𑀯𑀸 𑀅𑀜𑁆𑀜𑀫𑀜𑁆𑀜𑀸𑀪𑀺𑀖𑀝𑁆𑀝𑀦𑀁 𑀯𑀼𑀘𑁆𑀘𑀢𑀺, 𑀭𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀭𑀼𑀧𑁆𑀧𑀦𑀜𑁆𑀘𑀦𑀸𑀫 𑀧𑀭𑀲𑁂𑀦𑀸𑀬𑀼𑀤𑁆𑀥𑁂𑀦 𑀭𑀝𑁆𑀞𑀔𑁄𑀪𑁄𑀯𑀺𑀬 𑀓𑀮𑀸𑀧𑀦𑁆𑀢𑀭𑀕𑀢𑀥𑀸𑀢𑀽𑀦𑀁 𑀓𑀼𑀧𑁆𑀧𑀦𑀁 𑀪𑀺𑀚𑁆𑀚𑀦𑀁𑀘 𑀯𑀼𑀘𑁆𑀘𑀢𑀺. 𑀓𑀼𑀧𑁆𑀧𑀢𑀺 𑀪𑀺𑀚𑁆𑀚𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀓𑀼𑀧𑁆𑀧𑀢𑀻𑀢𑀺 𑀔𑁄𑀪𑀢𑀺 𑀘𑀜𑁆𑀘𑀮𑀢𑀺, 𑀪𑀺𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺. 𑀬𑀲𑁆𑀫𑀺𑀁 𑀔𑀡𑁂 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀕𑀫𑀁 𑀮𑀪𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀬𑀁𑀧𑀺 𑀯𑀺𑀓𑀸𑀭𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀭𑀽𑀧𑀲𑀦𑁆𑀢𑀢𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀁 𑀧𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘𑁂𑀢𑁆𑀣 𑀭𑀼𑀧𑁆𑀧𑀦𑀁 𑀤𑀼𑀯𑀺𑀥𑀁 𑀯𑀟𑁆𑀠𑀦𑀁, 𑀳𑀸𑀬𑀦𑀜𑁆𑀘. 𑀢𑀤𑀼𑀪𑀬𑀁𑀧𑀺 𑀓𑀧𑁆𑀧𑀯𑀼𑀝𑁆𑀞𑀸𑀦𑁂 𑀓𑀧𑁆𑀧𑀲𑀡𑁆𑀞𑀸𑀦𑁂 𑀦𑀸𑀦𑀸𑀆𑀬𑀼𑀓𑀧𑁆𑀧 𑀲𑀁𑀯𑀘𑁆𑀙𑀭 𑀉𑀢𑀼 𑀫𑀸𑀲 𑀭𑀢𑁆𑀢𑀺 𑀤𑀺𑀯𑀸𑀤𑀻𑀦𑀁 𑀧𑀭𑀺𑀯𑀢𑁆𑀢𑀦𑁂𑀘 𑀧𑀸𑀓𑀝𑀁 𑀳𑁄𑀢𑀻𑀢𑀺. 𑀓𑀲𑁆𑀫𑀸 𑀧𑀦 𑀭𑀽𑀧𑀦𑁆𑀢𑀺 𑀦𑀸𑀫𑀁 𑀖𑀝𑁆𑀝𑀦𑀯𑀲𑁂𑀦 𑀭𑀼𑀧𑁆𑀧𑀦𑀥𑀫𑁆𑀫𑀸𑀦𑀫𑁂𑀯 𑀲𑀺𑀤𑁆𑀥𑀦𑁆𑀢𑀺. 𑀢𑁂𑀲𑀫𑁂𑀯 𑀲𑀯𑀺𑀕𑁆𑀕𑀳𑀢𑁆𑀢𑀸. 𑀭𑀽𑀧𑀥𑀫𑁆𑀫𑀸 𑀳𑀺 𑀲𑀫𑀽𑀳𑀲𑀡𑁆𑀞𑀸𑀦𑀸𑀤𑀺 𑀪𑀸𑀯𑀧𑀢𑁆𑀢𑀺𑀬𑀸 𑀲𑀯𑀺𑀕𑁆𑀕𑀳𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀫𑁂𑀯 𑀭𑀼𑀧𑁆𑀧𑀦𑀁 𑀧𑀘𑁆𑀘𑀓𑁆𑀔𑀢𑁄𑀧𑀺 𑀮𑁄𑀓𑀲𑁆𑀲 𑀧𑀸𑀓𑀝𑀦𑁆𑀢𑀺 𑀢𑁂𑀲𑁆𑀯𑁂𑀯 𑀭𑀽𑀧𑀦𑁆𑀢𑀺 𑀦𑀸𑀫𑀁 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀭𑀽𑀧𑀥𑀫𑁆𑀫𑀸 𑀧𑀦 𑀅𑀯𑀺𑀕𑁆𑀕𑀳𑀸𑀢𑀺 𑀦 𑀢𑁂𑀲𑀁 𑀯𑀺𑀓𑀸𑀭𑁄 𑀧𑀘𑁆𑀘𑀓𑁆𑀔𑀢𑁄 𑀮𑁄𑀓𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀢𑀁 𑀢𑀁 𑀭𑀽𑀧𑀯𑀺𑀓𑀸𑀭𑀁 𑀤𑀺𑀲𑁆𑀯𑀸𑀯𑀸 𑀲𑀼𑀢𑁆𑀯𑀸 𑀯𑀸 𑀧𑀼𑀘𑁆𑀙𑀺𑀢𑁆𑀯𑀸𑀬𑁂𑀯 𑀯𑀸 𑀲𑁄 𑀮𑁄𑀓𑁂𑀦 𑀚𑀸𑀦𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀧𑀭𑀘𑀺𑀢𑁆𑀢𑀯𑀺𑀤𑀽𑀳𑀺. 𑀢𑀲𑁆𑀫𑀸 𑀢𑁂𑀲𑀁 𑀭𑀽𑀧𑀢𑀸𑀧𑀢𑁆𑀢𑀺 𑀦𑀢𑁆𑀣𑀻𑀢𑀺.

[𑁧𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑁂𑀲𑀁 𑀭𑀽𑀧𑀢𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀲𑀻𑀢𑀸𑀤𑀺𑀕𑁆𑀕𑀳𑀡 𑀲𑀸𑀫𑀢𑁆𑀣𑀺𑀬𑁂𑀦 𑀦𑀺𑀯𑀢𑁆𑀢𑀺𑀢𑁄. 𑀬𑀲𑁆𑀫𑀸 𑀧𑀦 𑀯𑁄𑀳𑀸𑀭𑁄𑀦𑀸𑀫 𑀮𑁄𑀓𑁄𑀧𑀘𑀸𑀭𑁂𑀦 𑀯𑀺𑀦𑀸 𑀦𑀲𑀺𑀚𑁆𑀛𑀢𑀺. 𑀮𑁄𑀓𑁄𑀧𑀘𑀸𑀭𑁄𑀘 𑀧𑀸𑀓𑀝𑀦𑀺𑀫𑀺𑀢𑁆𑀢𑀯𑀲𑁂 𑀦𑁂𑀯 𑀧𑀯𑀢𑁆𑀢𑁄. 𑀢𑀲𑁆𑀫𑀸 𑀇𑀥 𑀲𑀻𑀢𑀸𑀤𑀺𑀕𑁆𑀕𑀳𑀡𑁂𑀦 𑀯𑀺𑀦𑀸𑀧𑀺 𑀢𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀺 𑀮𑁄𑀓𑀢𑁄𑀯 𑀲𑀺𑀤𑁆𑀥𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀬𑀲𑁆𑀫𑀸 𑀘 𑀩𑁆𑀭𑀳𑁆𑀫𑀮𑁄𑀓𑁂 𑀩𑁆𑀭𑀳𑁆𑀫𑀸𑀦𑀁 𑀓𑀸𑀬𑀯𑀺𑀓𑀸𑀭 𑀯𑀘𑀻𑀯𑀺𑀓𑀸𑀭𑀸 𑀘 𑀇𑀤𑁆𑀥𑀺𑀯𑀺𑀓𑀼𑀧𑁆𑀧𑀦𑀸𑀯𑀲𑀧𑁆𑀧𑀯𑀢𑁆𑀢𑀸 𑀦𑀸𑀦𑀸𑀭𑀽𑀧𑀯𑀺𑀓𑀸𑀭𑀸𑀘 𑀤𑀺𑀲𑁆𑀲𑀦𑁆𑀢𑀺𑀬𑁂𑀯. 𑀢𑁂𑀘 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀭𑀼𑀧𑁆𑀧𑀦𑀸𑀓𑀸𑀭𑀸𑀏𑀯 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀢𑀢𑁆𑀣 𑀭𑀽𑀧𑀸𑀦𑀁 𑀭𑀽𑀧𑀢𑀸𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀬𑀢𑀺 𑀯𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀧𑀓𑀸𑀲𑀢𑀻𑀢𑀺 𑀭𑀽𑀧𑀁. 𑀅𑀭𑀽𑀧𑀥𑀫𑁆𑀫𑀸 𑀳𑀺 𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸. 𑀇𑀤𑀁 𑀧𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀧𑀸𑀓𑀝𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺𑀧𑀺 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀭𑀽𑀧𑀸𑀦𑀁𑀧𑀺 𑀉𑀚𑀼 𑀓𑀢𑁄𑀯 𑀭𑀽𑀧𑀢𑀸𑀲𑀺𑀤𑁆𑀥𑀺 𑀳𑁄𑀢𑀻𑀢𑀺.

[𑁧𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀦𑀼𑀕𑁆𑀕𑀸𑀳𑀓𑀸𑀦𑀁 𑀲𑀻𑀢𑀸𑀤𑀻𑀦𑀁 𑀯𑀲𑁂𑀦 𑀢𑀁 𑀲𑀪𑀸𑀯𑀸 𑀦𑀸𑀢𑀺𑀯𑀢𑁆𑀢𑀦 𑀯𑀲𑁂𑀦𑀘 𑀢𑀢𑁆𑀣 𑀭𑀽𑀧𑀢𑀸𑀲𑀺𑀤𑁆𑀥𑀺 𑀯𑀺𑀪𑀸𑀯𑀺𑀢𑀸. 𑀬𑀲𑁆𑀫𑀸𑀧𑀦 𑀲𑀻𑀢𑁂 𑀦𑀸𑀧𑀺 𑀉𑀡𑁆𑀳𑁂𑀦𑀸𑀧𑀻𑀢𑀺𑀆𑀤𑀺𑀯𑀘𑀦𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫 𑀘𑀺𑀢𑁆𑀢𑀸𑀳𑀸𑀭𑀸𑀦𑀁𑀧𑀺 𑀯𑀲𑁂𑀦 𑀭𑀼𑀧𑁆𑀧𑀦𑀲𑁆𑀲 𑀲𑀫𑁆𑀪𑀯𑀢𑁄, 𑀢𑀣𑀸𑀳𑀺 𑀲𑀜𑁆𑀜𑀸 𑀯𑀺𑀜𑁆𑀜𑀸𑀡𑀸𑀦𑀺𑀧𑀺 𑀭𑀽𑀧𑀸𑀭𑀫𑁆𑀫𑀡𑀭𑀲𑀸𑀭𑀫𑁆𑀫𑀡𑁂𑀳𑀺 𑀏𑀯 𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀦 𑀳𑀺 𑀲𑀜𑁆𑀜𑀸 𑀭𑀽𑀧𑀁𑀏𑀯 𑀲𑀜𑁆𑀚𑀸𑀦𑀸𑀢𑀺. 𑀦 𑀘 𑀯𑀺𑀜𑁆𑀜𑀸𑀡𑀁 𑀭𑀲 𑀫𑁂𑀯 𑀯𑀺𑀚𑀸𑀦𑀸𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑁂𑀦 𑀤𑁂𑀲𑀦𑀸 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀢𑀲𑁆𑀫𑀸 𑀲𑀻𑀢𑀸𑀤𑀺𑀕𑁆𑀕𑀳𑀡𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀢𑀢𑁆𑀣 𑀭𑀽𑀧𑀢𑀸𑀲𑀺𑀤𑁆𑀥𑀺𑀯𑀺𑀪𑀸𑀯𑀦𑁂𑀦 𑀧𑀬𑁄𑀚𑀦 𑀦𑀢𑁆𑀣𑀻𑀢𑀺. [𑀭𑀽𑀧𑀁]

𑁧𑁬. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀬𑀦𑁆𑀢𑀺 𑀲𑀩𑁆𑀩𑁂 𑀯𑀝𑁆𑀝𑀤𑀼𑀓𑁆𑀔𑀲𑀦𑁆𑀢𑀸𑀧𑀸 𑀏𑀢𑀲𑁆𑀫𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀬𑁂 𑀓𑀺𑀮𑁂𑀲𑀸𑀯𑀸 𑀔𑀦𑁆𑀥𑀸𑀯𑀸 𑀅𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀧𑀓𑁆𑀔𑁂 𑀞𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀬𑁂𑀯 𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀸𑀭𑀳𑀧𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀔𑀡𑀢𑁆𑀢𑀬𑀁 𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀅𑀢𑀻𑀢𑀥𑀫𑁆𑀫𑀸 𑀦𑀺𑀩𑁆𑀩𑀸𑀬𑀦𑁆𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀆𑀬𑀢𑀺𑀁 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀘 𑀥𑀫𑁆𑀫𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀯𑀝𑁆𑀝𑀤𑀼𑀓𑁆𑀔𑀲𑀦𑁆𑀢𑀸𑀧𑀸𑀢𑀺 𑀓𑀺𑀮𑁂𑀲𑀯𑀝𑁆𑀝 𑀓𑀫𑁆𑀫𑀯𑀝𑁆𑀝 𑀯𑀺𑀧𑀸𑀓𑀯𑀝𑁆𑀝 𑀤𑀼𑀓𑁆𑀔𑀲𑀦𑁆𑀢𑀸𑀧𑀸. 𑀦 𑀳𑀺 𑀢𑀺𑀯𑀺𑀥 𑀯𑀝𑁆𑀝𑀤𑀼𑀓𑁆𑀔𑀲𑀦𑁆𑀢𑀸𑀧𑀭𑀳𑀺𑀢𑀸𑀦𑀁 𑀭𑀼𑀓𑁆𑀔𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁𑀦𑀸𑀫 𑀳𑁄𑀢𑀻𑀢𑀺. 𑀏𑀢𑀲𑁆𑀫𑀺𑀦𑁆𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀬𑀣𑀸 𑀆𑀓𑀸𑀲𑁂 𑀲𑀓𑀼𑀡𑀸 𑀧𑀓𑁆𑀔𑀦𑁆𑀢𑀻𑀢𑀺. 𑀬𑁂𑀳𑀺 𑀢𑁂 𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑁂𑀲𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀅𑀜𑁆𑀜𑀁 𑀦𑀺𑀩𑁆𑀩𑀼𑀢𑀺𑀝𑁆𑀞𑀸𑀦𑀁𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺. 𑀦𑀺𑀩𑁆𑀩𑀸𑀬𑀦𑁆𑀢𑀺 𑀯𑀸 𑀅𑀭𑀺𑀬𑀚𑀦𑀸 𑀏𑀢𑀲𑁆𑀫𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀦𑀺𑀩𑁆𑀩𑀦𑁆𑀢𑀺 𑀥𑀻𑀭𑀸 𑀬𑀣𑀬𑀁 𑀧𑀤𑀻𑀧𑁄𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀢𑀁 𑀢𑀁 𑀓𑀺𑀮𑁂𑀲𑀸𑀦𑀁𑀯𑀸 𑀔𑀦𑁆𑀥𑀸𑀦𑀁𑀯𑀸 𑀧𑀼𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀦𑁆𑀢𑀺 𑀯𑀺𑀲𑀬𑁂𑀏𑀯 𑀪𑀼𑀫𑁆𑀫𑀁, 𑀏𑀢𑀲𑁆𑀫𑀺𑀁 𑀅𑀥𑀺 𑀕𑀢𑁂𑀢𑀺𑀧𑀺 𑀬𑁄𑀚𑁂𑀦𑁆𑀢𑀺. 𑀝𑀻𑀓𑀸𑀲𑀼𑀧𑀦 𑀪𑀯𑀸𑀪𑀯𑀁 𑀯𑀺𑀦𑀦𑀢𑁄 𑀲𑀁𑀲𑀺𑀩𑁆𑀩𑀦 𑀢𑁄 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀢𑀢𑁄 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

[𑁧𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀦𑀺𑀩𑁆𑀩𑀸𑀪𑀺𑀯𑀸 𑀏𑀢𑁂𑀦 𑀭𑀸𑀕𑀕𑁆𑀕𑀺𑀆𑀤𑀺𑀓𑁄𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀫𑀕𑁆𑀕𑁂𑀯𑀺𑀬 𑀦𑀺𑀩𑁆𑀩𑀸𑀦𑁂 𑀓𑀢𑁆𑀣𑀘𑀺 𑀓𑀭𑀡𑀲𑀸𑀥𑀦𑀁 𑀤𑀺𑀝𑁆𑀞𑀁, 𑀦𑀘 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀽𑀢𑀺 𑀓𑁆𑀭𑀺𑀬𑀸𑀲𑀸𑀥𑀦𑁂 𑀭𑀸𑀕𑀸𑀤𑀺𑀓𑀲𑁆𑀲 𑀓𑀢𑁆𑀢𑀼𑀦𑁄 𑀲𑀳 𑀓𑀸𑀭𑀺𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. [𑀦𑀺𑀩𑁆𑀩𑀸𑀦𑀁]

𑀤𑀼𑀢𑀻𑀬𑀕𑀸𑀣𑀸𑀬 𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀲𑀗𑁆𑀕𑀳-𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁭. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀘𑀺𑀢𑁆𑀢𑀁 𑀢𑀸𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀅𑀪𑀺𑀥𑀫𑁆𑀫𑀢𑁆𑀣𑁂𑀲𑀼. 𑀢𑀸𑀯 𑀧𑀣𑀫𑀁. 𑀘𑀢𑁆𑀢𑀸𑀭𑁄 𑀯𑀺𑀥𑀸 𑀧𑀓𑀸𑀭𑀸 𑀬𑀲𑁆𑀲 𑀢𑀁 𑀘𑀢𑀼𑀩𑁆𑀩𑀺𑀥𑀁.

𑁧𑁮. 𑀓𑀸𑀫𑀸𑀯𑀘𑀭𑀦𑁆𑀢𑀺 𑀏𑀢𑁆𑀣 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄. 𑀓𑀸𑀫𑁂𑀦𑁆𑀢𑀺𑀯𑀸 𑀏𑀢𑁆𑀣 𑀲𑀢𑁆𑀢𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀸𑀫𑀭𑀸𑀕𑀢𑁆𑀢𑀸 𑀓𑀸𑀫𑀭𑀢𑀺𑀬𑀸𑀏𑀯 𑀭𑀫𑀦𑁆𑀢𑀺. 𑀦 𑀉𑀧𑀭𑀺𑀪𑀽𑀫𑀻𑀲𑀼 𑀯𑀺𑀬 𑀛𑀸𑀦𑀭𑀢𑀺𑀬𑀸𑀢𑀺 𑀓𑀸𑀫𑁄. 𑀏𑀓𑀸𑀤𑀲𑀯𑀺𑀥𑀸 𑀓𑀸𑀫𑀪𑀽𑀫𑀺. 𑀦𑀦𑀼 𑀘𑁂𑀢𑁆𑀣 𑀛𑀸𑀦𑀮𑀸𑀪𑀺𑀦𑁄𑀧𑀺 𑀲𑀦𑁆𑀢𑀻𑀢𑀺. 𑀦 𑀦 𑀲𑀦𑁆𑀢𑀺. 𑀢𑁂𑀧𑀦 𑀓𑀤𑀸𑀘𑀺 𑀤𑁂𑀯𑀸𑀢𑀺 𑀦𑀢𑁆𑀣𑁂𑀢𑁆𑀣 𑀤𑁄𑀲𑁄. 𑀅𑀯𑀻𑀘𑀺𑀦𑀺𑀭𑀬𑀸𑀤𑀬𑁄 𑀓𑀣𑀁 𑀓𑀸𑀫𑀻𑀬𑀦𑁆𑀢𑀺. 𑀓𑀣𑀜𑁆𑀘 𑀢𑀢𑁆𑀣 𑀲𑀢𑁆𑀢𑀸 𑀓𑀸𑀫𑀭𑀢𑀺𑀬𑀸 𑀭𑀫𑀦𑁆𑀢𑀻𑀢𑀺. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀲𑁂𑀦𑀯𑀸 𑀪𑀯𑀦𑀺𑀓𑀦𑁆𑀢𑀺𑀯𑀲𑁂𑀦𑀯𑀸𑀢𑀺. 𑀫𑀭𑀡𑀓𑀸𑀮𑁂 𑀳𑀺 𑀉𑀧𑀝𑁆𑀞𑀺𑀢𑀸 𑀦𑀺𑀭𑀬𑀕𑁆𑀕𑀺𑀚𑀸𑀮𑀸 𑀲𑀼𑀯𑀡𑁆𑀡𑀯𑀡𑁆𑀡𑀸𑀯𑀺𑀬 𑀔𑀸𑀬𑀦𑁆𑀢𑀺. 𑀏𑀓𑁄 𑀓𑀺𑀭 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀫𑀭𑀡𑀫𑀜𑁆𑀘𑁂 𑀦𑀺𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀪𑁄 𑀕𑀘𑁆𑀙𑀸𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲𑀧𑀦 𑀅𑀯𑀻𑀘𑀺𑀦𑀺𑀭𑀬𑁂 𑀅𑀕𑁆𑀕𑀺𑀚𑀸𑀮𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀤𑀸 𑀲𑁄 𑀪𑁄 𑀆𑀘𑀭𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀆𑀳. 𑀏𑀲 𑀪𑁄 𑀩𑁆𑀭𑀳𑁆𑀫𑀮𑁄𑀓𑁄. 𑀢𑀢𑁆𑀣 𑀕𑀘𑁆𑀙𑀸𑀢𑀺 𑀯𑀤𑀦𑁆𑀢𑀺. 𑀲𑁄 𑀓𑀸𑀮𑀗𑁆𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺. 𑀏𑀯𑀁 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀲𑁂𑀦 𑀢𑁂 𑀓𑀸𑀫𑀻𑀬𑀦𑁆𑀢𑀺. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁𑀧𑀺 𑀪𑀯𑀦𑀺𑀓𑀦𑁆𑀢𑀺𑀦𑀸𑀫 𑀳𑁄𑀢𑀻𑀢𑀺. 𑀅𑀧𑀺𑀘, 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀸𑀫𑀭𑀸𑀕𑀸𑀏𑀯 𑀳𑁄𑀦𑁆𑀢𑀺, 𑀑𑀓𑀸𑀲𑁂 𑀲𑀢𑀺 𑀓𑀸𑀫𑀭𑀢𑀺𑀬𑀸 𑀭𑀫𑀺𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺. 𑀢𑀲𑁆𑀫𑀺𑀁 𑀓𑀸𑀫𑁂 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁. 𑀏𑀢𑁆𑀣𑀘 𑀅𑀯𑀘𑀭𑀢𑀻𑀢𑀺 𑀧𑀤𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀅𑀢𑁆𑀣𑁄 𑀧𑀸𑀴𑀺𑀬𑀸𑀘 𑀦𑀲𑀫𑁂𑀢𑀺. 𑀦𑀸𑀦𑀸𑀤𑁄𑀲𑀬𑀼𑀢𑁆𑀢𑁄𑀘 𑀳𑁄𑀢𑀻𑀢𑀺. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀬𑀤𑀺 𑀘𑁂𑀢𑁆𑀣 𑀲𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸. 𑀏𑀯𑀁 𑀲𑀪𑀺 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣𑀼𑀧𑁆𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀦𑀧𑀦 𑀯𑀼𑀢𑁆𑀢𑀁. 𑀦𑀘 𑀧𑀭𑀺𑀬𑀸𑀧𑀦𑁆𑀦𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀲𑀳 𑀲𑀫𑀸𑀦𑀢𑁆𑀣𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀸 𑀦𑀺𑀧𑀺 𑀢𑀢𑁆𑀭 𑀧𑀭𑀺𑀬𑀸𑀧𑀦𑁆𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀢𑀸𑀯 𑀧𑀸𑀴𑀺𑀬𑀸 𑀦𑀲𑀫𑁂𑀢𑀻𑀢𑀺.

𑀬𑀤𑀺𑀘 𑀲𑁄 𑀅𑀢𑁆𑀣𑁄 𑀕𑀳𑀺𑀢𑁄 𑀲𑀺𑀬𑀸. 𑀏𑀯𑀜𑁆𑀘 𑀲𑀢𑀺 𑀢𑀲𑁆𑀫𑀺𑀁 𑀓𑀸𑀫𑁂 𑀬𑁂 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁𑀧𑀺 𑀓𑀸𑀫𑀸 𑀯𑀘𑀭𑀢𑀸𑀧𑀢𑁆𑀢𑀺𑀤𑁄𑀲𑁄 𑀭𑀽𑀧𑀸𑀯𑀘𑀭𑀢𑀸𑀤𑀺 𑀫𑀼𑀢𑁆𑀢𑀺𑀤𑁄𑀲𑁄𑀘 𑀆𑀧𑀚𑁆𑀚𑀢𑀺. 𑀬𑁂𑀘 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀜𑁆𑀘 𑀭𑀽𑀧𑀸𑀭𑀽𑀧𑀸 𑀯𑀘𑀭𑀢𑀸 𑀧𑀢𑁆𑀢𑀺𑀤𑁄𑀲𑁄 𑀓𑀸𑀫𑀸𑀯𑀘𑀭𑀢𑀸 𑀫𑀼𑀢𑁆𑀢𑀺𑀤𑁄𑀲𑁄𑀘 𑀆𑀧𑀚𑁆𑀚𑀢𑀻𑀢𑀺. 𑀦𑀦𑀼 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀯𑀲𑁂𑀦𑀧𑀺 𑀓𑁂𑀲𑀜𑁆𑀘𑀺 𑀦𑀸𑀫𑀮𑀸𑀪𑁄 𑀳𑁄𑀢𑀺. 𑀬𑀣𑀸 𑀯𑀦𑀘𑀭𑀓𑁄 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺. 𑀢𑀲𑁆𑀫𑀸 𑀇𑀥𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀼𑀫𑁆𑀫𑀻𑀲𑀼 𑀉𑀧𑁆𑀧𑀦𑁆𑀦𑀩𑀳𑀼𑀮𑀢𑁆𑀢𑀸 𑀓𑀸𑀫𑀸𑀯𑀘𑀭𑀸𑀤𑀺 𑀦𑀸𑀫𑀮𑀸𑀪𑁂 𑀲𑀢𑀺 𑀦 𑀓𑁄𑀘𑀺 𑀤𑁄𑀲𑁄𑀢𑀺.𑀦. 𑀏𑀯𑀜𑁆𑀳𑀺 𑀲𑀢𑀺 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸𑀦𑀁 𑀓𑀸𑀫𑀸𑀯𑀘𑀭𑀢𑀸𑀤𑀺 𑀫𑀼𑀘𑁆𑀘𑀦𑀢𑁆𑀣𑀁 𑀬𑁂𑀪𑀼𑀬𑁆𑀬𑁂𑀦 𑀉𑀧𑁆𑀧𑀦𑁆𑀦𑀪𑀽𑀫𑀺 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀦 𑀘 𑀲𑀸 𑀦𑀸𑀫𑀪𑀽𑀫𑀺 𑀅𑀢𑁆𑀣𑀺. 𑀬𑀢𑁆𑀣 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀸 𑀢𑀻𑀲𑀼 𑀪𑀯𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀓𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭𑀢𑀸𑀧𑀢𑁆𑀢𑀺𑀤𑁄𑀲𑁄 𑀤𑀼𑀦𑁆𑀦𑀺𑀯𑀸𑀭𑁄 𑀲𑀺𑀬𑀸𑀢𑀺. 𑀏𑀯𑀁 𑀦𑀸𑀦𑀸𑀤𑁄𑀲𑀬𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀲𑁆𑀲 𑀢𑀣𑀸 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑁂𑀦 𑀧𑀸𑀴𑀺𑀦𑀬𑁂𑀦𑁂𑀯𑀲𑁆𑀲 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀓𑀸𑀫𑁂 𑀅𑀯𑀘𑀭𑀢𑀺 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀢𑀲𑁆𑀫𑀺𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑀸𑀫𑀸𑀯𑀘𑀭𑀦𑁆𑀢𑀺. 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄𑀘𑀦𑀸𑀫 𑀅𑀢𑁆𑀢𑀦𑁄 𑀆𑀥𑀸𑀭𑀪𑀽𑀢𑁂𑀦 𑀢𑁂𑀦 𑀓𑀸𑀫𑁂𑀦 𑀲𑀳 𑀲𑀫𑀸𑀦𑀚𑀸𑀢𑀺𑀕𑁄𑀢𑁆𑀢𑀦𑀸𑀫𑀢𑀸 𑀲𑀗𑁆𑀔𑀸𑀢𑁂𑀳𑀺 𑀧𑀭𑀺𑀢𑁄𑀪𑀸𑀕𑁂𑀳𑀺 𑀢𑀲𑁆𑀫𑀺𑀁 𑀓𑀸𑀫𑁂 𑀆𑀧𑀦𑁆𑀦𑀪𑀸𑀯𑁄 𑀅𑀦𑀼𑀧𑁆𑀧𑀯𑀺𑀝𑁆𑀞 𑀪𑀸𑀯𑁄. 𑀅𑀦𑁆𑀢𑁄𑀕𑀥𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀘 𑀢𑀣𑀸 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄 𑀧𑀭𑀺𑀕𑁆𑀕𑀸𑀳𑀺𑀦𑀺𑀬𑀸 𑀓𑀸𑀫𑀢𑀡𑁆𑀳𑀸𑀬 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀬𑁂𑀥𑀫𑁆𑀫𑀸 𑀭𑀽𑀧𑀸𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦𑀪𑀽𑀢𑀸𑀧𑀺 𑀫𑀬𑁆𑀳𑀁 𑀏𑀢𑁂𑀢𑀺 𑀓𑀸𑀫 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑁂 𑀧𑀭𑀺𑀬𑀸𑀧𑀦𑁆𑀦𑀸𑀯 𑀳𑁄𑀦𑁆𑀢𑀺. 𑀢𑁂 𑀓𑀸𑀫𑀸𑀯𑀘𑀭𑀸𑀦𑀸𑀫𑀸𑀢𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀭𑀽𑀧𑀸𑀭𑀽𑀧𑀸 𑀯𑀘𑀭𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀢𑁂𑀲𑀼𑀧𑀦 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸𑀘 𑀧𑀭𑀺𑀕𑁆𑀕𑀸𑀳𑀺𑀦𑀻 𑀢𑀡𑁆𑀳𑀸 𑀤𑀝𑁆𑀞𑀩𑁆𑀩𑀸.

𑀬𑁂𑀧𑀦 𑀥𑀫𑁆𑀫𑀸 𑀢𑀺𑀡𑁆𑀡𑀁 𑀢𑀡𑁆𑀳𑀸𑀦𑀁 𑀧𑀭𑀺𑀕𑁆𑀕𑀳𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀸𑀧𑀺 𑀢𑀢𑁆𑀭 𑀅𑀧𑀭𑀺𑀬𑀸𑀧𑀦𑁆𑀦𑀸𑀏𑀯 𑀳𑁄𑀦𑁆𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀸 𑀦𑀸𑀫 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀘 𑀧𑀝𑁆𑀞𑀸𑀦𑁂 𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀁 𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀦𑁆𑀢𑀺𑀆𑀤𑀺𑀦𑀸 𑀅𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦𑁂𑀧𑀺 𑀓𑀸𑀫𑀘𑁆𑀙𑀦𑁆𑀤𑀲𑀗𑁆𑀔𑀸𑀢𑀸𑀬 𑀓𑀸𑀫𑀢𑀡𑁆𑀳𑀸𑀬 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀭𑀽𑀧𑀸𑀭𑀽𑀧 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀓𑀸𑀫𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀸𑀳𑀺𑀦𑀻𑀢𑀡𑁆𑀳𑀸 𑀭𑀽𑀧𑀸𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦 𑀕𑀢𑀸𑀧𑀺 𑀤𑀝𑁆𑀞𑀩𑁆𑀩𑀸. 𑀧𑀸𑀴𑀺𑀬𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀇𑀤𑀁 𑀦𑀻𑀯𑀭𑀡𑀚𑀸𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀛𑀸𑀦𑀪𑀽𑀫𑀻𑀲𑀼 𑀏𑀓𑀦𑁆𑀢𑀦𑀻𑀯𑀭𑀡𑀓𑀺𑀘𑁆𑀘𑀸𑀦𑀺 𑀦𑀻𑀯𑀭𑀡𑀸𑀦𑀺 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀅𑀢𑁆𑀭 𑀓𑀸𑀫𑀪𑁂𑀤𑁄 𑀯𑀢𑁆𑀢𑀩𑁆𑀩𑁄. 𑀤𑁆𑀯𑁂𑀓𑀸𑀫𑀸 𑀓𑀺𑀮𑁂 𑀲𑀓𑀸𑀫𑁄𑀘, 𑀯𑀢𑁆𑀣𑀼𑀓𑀸𑀫𑁄𑀘𑀸𑀢𑀺. 𑀢𑀢𑁆𑀣 𑀣𑀧𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀭𑀸𑀕𑁂 𑀅𑀜𑁆𑀜𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀇𑀫𑀲𑁆𑀫𑀺𑀁 𑀘𑀢𑀼𑀩𑁆𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁂 𑀓𑀺𑀮𑁂 𑀲𑀓𑀸𑀫𑁄𑀦𑀸𑀫. 𑀣𑀧𑁂𑀢𑁆𑀯𑀸𑀘 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀅𑀜𑁆𑀜𑁂 𑀲𑀩𑁆𑀩𑁂𑀧𑀺 𑀢𑀻𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀯𑀢𑁆𑀣𑀼𑀓𑀸𑀫𑁄𑀦𑀸𑀫𑀸𑀢𑀺. 𑀬𑀁𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀯𑀢𑁆𑀣𑀼𑀓𑀸𑀫𑁄𑀢𑀺 𑀯𑀼𑀢𑁆𑀢𑀁. 𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀅𑀪𑀺𑀥𑀫𑁆𑀫𑁂 𑀓𑀸𑀫𑀦𑀸𑀫𑁂𑀦 𑀯𑀼𑀢𑁆𑀢𑀸 𑀅𑀢𑁆𑀣𑀻𑀢𑀺. [𑀓𑀸𑀫𑀸𑀯𑀘𑀭𑀧𑀤𑀁]

𑁧𑁯. 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀦𑁆𑀢𑀺 𑀏𑀢𑁆𑀣 𑀭𑀽𑀧𑀸𑀭𑀽𑀧𑀲𑀤𑁆𑀤𑀸 𑀢𑀸𑀲𑀼 𑀪𑀽𑀫𑀻𑀲𑀼 𑀦𑀺𑀭𑀼𑀴𑁆𑀳𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀧𑀺𑀘 𑀤𑁆𑀯𑁂 𑀪𑀽𑀫𑀺𑀬𑁄 𑀭𑀽𑀧𑀪𑀽𑀫𑀺, 𑀅𑀭𑀽𑀧𑀪𑀽𑀫𑀻𑀢𑀺. 𑀢𑀢𑁆𑀣 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁 𑀬𑀢𑁆𑀣 𑀦𑀢𑁆𑀣𑀺, 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀪𑀼𑀫𑁆𑀫𑀺 𑀅𑀭𑀽𑀧𑀪𑀽𑀫𑀺𑀦𑀸𑀫. 𑀲𑁂𑀲𑀸 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀸 𑀪𑀼𑀫𑁆𑀫𑀺 𑀭𑀽𑀧𑀪𑀽𑀫𑀺𑀦𑀸𑀫. 𑀢𑀢𑁆𑀣𑀘 𑀳𑁂𑀝𑁆𑀞𑀸 𑀏𑀓𑀸𑀤𑀲𑀯𑀺𑀥𑀸 𑀪𑀼𑀫𑁆𑀫𑀺 𑀑𑀴𑀸𑀭𑀺𑀓𑁂𑀦 𑀓𑀸𑀫𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀓𑀸𑀫 𑀪𑀽𑀫𑀻𑀢𑀺 𑀯𑀼𑀢𑁆𑀢𑀸. 𑀉𑀧𑀭𑀺 𑀲𑁄𑀴𑀲𑀯𑀺𑀥𑀸 𑀪𑀼𑀫𑁆𑀫𑀺 𑀭𑀽𑀧𑀪𑀽𑀫𑀺𑀇𑀘𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀢𑁆𑀣𑀧𑀦 𑀢𑀡𑁆𑀳𑀸𑀯𑀸 𑀛𑀸𑀦𑀸𑀦𑀺𑀯𑀸 𑀭𑀽𑀧𑀸𑀭𑀽𑀧𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀦𑀺𑀲𑁆𑀲𑀬𑀲𑁆𑀲𑀦𑀸𑀫𑀁 𑀦𑀺𑀲𑁆𑀲𑀺𑀢𑁂 𑀆𑀭𑁄𑀧𑀦𑀯𑀲𑁂𑀦 𑀦𑀺𑀲𑁆𑀲𑀬𑁄𑀧𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣𑀘 𑀓𑀸𑀫𑀸𑀯𑀘𑀭𑀸𑀤𑀺𑀲𑀤𑁆𑀤𑁂𑀳𑀺 𑀪𑀽𑀫𑀺𑀏𑀯 𑀯𑀼𑀢𑁆𑀢𑀸. 𑀢𑀢𑁆𑀣 𑀦𑀺𑀲𑁆𑀲𑀺𑀢𑀲𑁆𑀲 𑀦𑀸𑀫𑀁 𑀦𑀺𑀲𑁆𑀲𑀬𑁂 𑀆𑀭𑁄𑀧𑀦𑀯𑀲𑁂𑀦 𑀦𑀺𑀲𑁆𑀲𑀺𑀢𑁄 𑀧𑀘𑀸𑀭𑁄𑀢𑀺. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀸𑀫𑀸𑀯𑀘𑀭𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀢𑁂𑀪𑀽𑀫𑀓 𑀧𑀭𑀺𑀘𑁆𑀙𑁂𑀤𑁂 𑀧𑀸𑀴𑀺𑀅𑀦𑀼𑀕𑀢𑀸 𑀧𑀭𑀫𑀢𑁆𑀣𑀤𑀻𑀧𑀦𑀸. 𑀬𑀣𑀸𑀳 𑁋

𑀓𑀢𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀇𑀫𑁂𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸. 𑀓𑀢𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀅𑀓𑀦𑀺𑀝𑁆𑀞𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀸𑀧𑀦𑁆𑀦𑀲𑁆𑀲𑀯𑀸 𑀉𑀧𑀧𑀦𑁆𑀦𑀲𑁆𑀲𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸 𑀬𑀢𑀦𑀼𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂. 𑀮. 𑀇𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸𑀢𑀺.

[𑁧𑁯] 𑀝𑀻𑀓𑀸𑀲𑀼 𑀧𑀦

𑀬𑀣𑀸𑀯𑀼𑀢𑁆𑀢𑀁 𑀲𑀼𑀯𑀺𑀲𑀤𑀁 𑀧𑀸𑀴𑀺𑀦𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀣𑀸 𑀯𑀘𑀦𑀢𑁆𑀣𑀸𑀘 𑀯𑀺𑀦𑀺𑀘𑁆𑀙𑀬𑀸𑀘 𑀏𑀢𑁆𑀣 𑀯𑀼𑀢𑁆𑀢𑀸. 𑀲𑀩𑁆𑀩𑁂 𑀢𑁂 𑀲𑀸𑀭𑀢𑁄 𑀦 𑀧𑀘𑁆𑀘𑁂𑀢𑀩𑁆𑀩𑀸𑀢𑀺.

𑀦𑀦𑀼 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁂𑀯 𑀢𑁂𑀘 𑀅𑀜𑁆𑀜𑁂𑀘 𑀅𑀢𑁆𑀣𑀸 𑀯𑀼𑀢𑁆𑀢𑀸𑀢𑀺. 𑀲𑀘𑁆𑀘𑀁. 𑀪𑀽𑀢𑀁𑀧𑀦 𑀲𑀼𑀯𑀺𑀲𑀤𑀁 𑀧𑀸𑀴𑀺𑀅𑀦𑀼𑀕𑀢𑀁 𑀅𑀢𑁆𑀣𑀁 𑀜𑀢𑁆𑀯𑀸 𑀓𑀺𑀁𑀯𑀺𑀓𑁆𑀔𑁂𑀧𑁂𑀦𑀸𑀢𑀺.

𑁨𑁦. 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀏𑀢𑁆𑀣 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀬𑀣𑀸𑀯𑀼𑀢𑁆𑀢𑁄 𑀢𑁂𑀪𑀽𑀫𑀓𑀥𑀫𑁆𑀫𑁄. 𑀬𑀣𑀸𑀳 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁𑀧𑀺 𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦𑀁 𑀮𑁄𑀓𑀢𑀸𑀧𑀢𑁆𑀢𑀺 𑀲𑀺𑀬𑀸. 𑀓𑀲𑁆𑀫𑀸, 𑀢𑁂𑀲𑀁𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀥𑀫𑁆𑀫𑀢𑁆𑀢𑀸𑀢𑀺. 𑀦𑀲𑀺𑀬𑀸. 𑀬𑀢𑁆𑀣 𑀳𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄𑀢𑀺 𑀫𑀳𑀸𑀚𑀦𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄 𑀦𑀺𑀯𑀺𑀲𑀢𑀺. 𑀢𑀢𑁆𑀣𑁂𑀯 𑀢𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 𑀅𑀬𑀁 𑀮𑁄𑀓𑀲𑀫𑀜𑁆𑀜𑀸 𑀦𑀺𑀬𑀫𑀻𑀬𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀕𑀸𑀳𑀯𑀺𑀫𑀼𑀢𑁆𑀢𑀸𑀦𑀁 𑀢𑁂𑀲𑀁 𑀮𑁄𑀓𑀢𑀸𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀬𑁂𑀲𑀁𑀯𑀸 𑀮𑀼𑀚𑁆𑀚𑀦𑀁𑀧𑀮𑀼𑀚𑁆𑀚𑀦𑀜𑁆𑀘 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑀁. 𑀢𑁂𑀲𑀜𑁆𑀜𑁂𑀯 𑀮𑁄𑀓𑀢𑀸𑀲𑀺𑀤𑁆𑀥𑀻𑀢𑀺 𑀦𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸𑀦𑀁 𑀮𑁄𑀓𑀢𑁆𑀢𑀧𑁆𑀧𑀲𑀗𑁆𑀕𑁄𑀢𑀺. 𑀮𑁄𑀓𑀢𑁄 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀫𑀕𑁆𑀕𑀘𑀺𑀢𑁆𑀢𑀁. 𑀢𑀢𑁄 𑀉𑀢𑁆𑀢𑀺𑀡𑁆𑀡𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀨𑀮𑀘𑀺𑀢𑁆𑀢𑀁. 𑀦𑀺𑀩𑁆𑀩𑀸𑀦𑀁𑀧𑀦 𑀇𑀥 𑀦𑀮𑀩𑁆𑀪𑀢𑀻𑀢𑀺. 𑀉𑀢𑁆𑀢𑀭𑀡𑀜𑁆𑀘𑁂𑀢𑁆𑀣 𑀢𑀡𑁆𑀳𑀸𑀢𑁆𑀢𑀬𑀕𑁆𑀕𑀸𑀳 𑀯𑀺𑀫𑀼𑀢𑁆𑀢𑀺𑀬𑀸 𑀢𑀻𑀲𑀼 𑀮𑁄𑀓𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄𑀬𑁂𑀯. 𑀲𑁄𑀘 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄 𑀓𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦 𑀪𑀽𑀢𑁄𑀯𑀺𑀬 𑀕𑀬𑁆𑀳𑀢𑀻𑀢𑀺 𑀯𑀺𑀲𑀼𑀁 𑀏𑀓𑀸 𑀘𑀢𑀼𑀢𑁆𑀣𑀻 𑀅𑀯𑀢𑁆𑀣𑀸𑀪𑀽𑀫𑀺𑀦𑀸𑀫𑀸𑀢𑀺.

𑀘𑀢𑀼𑀩𑁆𑀪𑀽𑀫𑀺𑀯𑀺𑀪𑀸𑀕𑀲𑁆𑀲 𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀯𑀁 𑀘𑀺𑀢𑁆𑀢𑀁 𑀪𑀽𑀫𑀺𑀪𑁂𑀤𑁂𑀦 𑀳𑀻𑀦𑀧𑀡𑀻𑀢𑀸 𑀦𑀼𑀓𑁆𑀓𑀫𑀢𑁄 𑀘𑀢𑀼𑀥𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀤𑁂𑀯 𑀘𑀢𑀼𑀩𑁆𑀩𑀺𑀥𑀁 𑀘𑀺𑀢𑁆𑀢𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀯𑀺𑀪𑀚𑀦𑁆𑀢𑁄 𑀧𑀣𑀫𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁. 𑀢𑀢𑁆𑀣𑀘 𑀳𑀻𑀦𑀁 𑀅𑀲𑁄𑀪𑀡𑀘𑀺𑀢𑁆𑀢𑀁. 𑀢𑀢𑁆𑀣𑀘 𑀲𑀩𑁆𑀩𑀳𑀻𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀲𑁄𑀫𑀦𑀲𑁆𑀲𑀲𑀳 𑀕𑀢𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀘 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑁆𑀲𑀧𑀺 𑀅𑀓𑀼𑀲𑀮𑀸𑀳𑁂𑀢𑀼𑀓 𑀲𑀳𑁂𑀢𑀼𑀓𑀸𑀦𑀼𑀓𑁆𑀓𑀫𑁄 𑀳𑀻𑀦 𑀧𑀡𑀻𑀢𑀸𑀦𑀼𑀓𑁆𑀓𑀫𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

[𑁨𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀩𑀳𑀽𑀦𑀁 𑀘𑀺𑀢𑁆𑀢𑀸𑀦𑀁 𑀲𑁄𑀪𑀡𑀲𑀜𑁆𑀜𑀸𑀓𑀭𑀡𑀲𑀼𑀔𑀢𑁆𑀣𑀁 𑀅𑀧𑁆𑀧𑀓𑁂 𑀧𑀸𑀧𑀸𑀳𑁂𑀢𑀼𑀓𑁂𑀬𑁂𑀯 𑀧𑀣𑀫𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.