𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀦𑀼𑀤𑀻𑀧𑀦𑀻𑀧𑀸𑀞

𑁧. 𑀘𑀺𑀢𑁆𑀢𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑀅𑀦𑀦𑁆𑀢𑀜𑁆𑀜𑀸𑀡𑀁 𑀦𑀢𑁆𑀯𑀸𑀦, 𑀮𑁄𑀓𑀸𑀮𑁄𑀓𑀓𑀭𑀁 𑀚𑀺𑀦𑀁;

𑀓𑀭𑀺𑀲𑁆𑀲𑀸𑀫𑀺 𑀧𑀭𑀫𑀢𑁆𑀣-𑀤𑀻𑀧𑀦𑀺𑀬𑀸 𑀦𑀼𑀤𑀻𑀧𑀦𑀺𑀁.

[𑀢𑀢𑁆𑀣, 𑀮𑁄𑀓𑀸𑀮𑁄𑀓𑀓𑀭𑀦𑁆𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀁 𑀘𑀢𑀼𑀲𑁆𑀲𑀘𑁆𑀘𑀥𑀫𑁆𑀫𑀤𑁂𑀲𑀦𑀸𑀮𑁄𑀓𑀓𑀸𑀭𑀓𑀁. 𑀧𑀭𑀫𑀢𑁆𑀣𑀤𑀻𑀧𑀦𑀻𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀼𑀯𑀺𑀥𑁄 𑀧𑀥𑀸𑀦𑀢𑁆𑀣𑁄𑀘 𑀧𑀭𑀺𑀬𑀸𑀬𑀢𑁆𑀣𑁄𑀘. 𑀢𑀢𑁆𑀣 𑀧𑀥𑀸𑀦𑀢𑁆𑀣𑁄 𑀧𑀭𑀫𑀢𑁆𑀣𑁄𑀦𑀸𑀫, 𑀧𑀥𑀸𑀦𑀢𑁆𑀣𑁄𑀢𑀺𑀘 𑀧𑀤𑀯𑀸𑀓𑁆𑀬𑀸𑀦𑀁 𑀫𑀼𑀔𑁆𑀬𑀢𑁆𑀣𑁄 𑀉𑀚𑀼𑀓𑀢𑁆𑀣𑁄. 𑀧𑀭𑀺𑀬𑀸𑀬𑀢𑁆𑀣𑁄𑀧𑀺 𑀓𑁄𑀘𑀺, 𑀬𑀼𑀢𑁆𑀢𑀭𑀽𑀧𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀬𑁂𑀯. 𑀧𑀭𑀫𑀢𑁆𑀣𑀁𑀤𑀻𑀧𑁂𑀢𑀺𑀧𑀓𑀸𑀲𑁂𑀢𑀻𑀢𑀺𑀧𑀭𑀫𑀢𑁆𑀣𑀤𑀻𑀧𑀦𑀻]. 𑀢𑀁𑀧𑀭 𑀫𑀢𑁆𑀣𑀤𑀻𑀧𑀦𑀺𑀁𑀓𑀭𑁄𑀦𑁆𑀢𑁄𑀆𑀘𑀭𑀺𑀬𑁄 𑀧𑀣𑀫𑀁𑀢𑀸𑀯 𑀩𑀼𑀤𑁆𑀥𑀲𑁆𑀲𑀪𑀕𑀯𑀢𑁄 𑀧𑀡𑀸𑀫𑀁𑀓𑀭𑁄𑀢𑀺 ‘‘𑀉𑀤𑀬𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸.

𑀢𑀢𑁆𑀣 ‘‘𑀉𑀤𑀬𑀸’’𑀢𑀺 𑀉𑀤𑀬𑀢𑁄𑀉𑀕𑁆𑀕𑀫𑀦𑀢𑁄. ‘‘𑀬𑀲𑁆𑀲𑀸’’𑀢𑀺 𑀬𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀫𑀳𑀸𑀲𑀽𑀭𑀲𑁆𑀲. ‘‘𑀏𑀓𑀲𑁆𑀲𑀸’’𑀢𑀺 𑀅𑀤𑀼𑀢𑀻𑀬𑀲𑁆𑀲, 𑀅𑀲𑀤𑀺 𑀲𑀲𑁆𑀲𑀯𑀸. ‘‘𑀲𑀤𑁆𑀥𑀫𑁆𑀫𑀭𑀁𑀲𑀺𑀚𑀸𑀮𑀺𑀦𑁄’’𑀢𑀺 𑀏𑀢𑁆𑀣𑀲𑀤𑁆𑀥𑀫𑁆𑀫𑁄𑀢𑀺𑀲𑀢𑁆𑀣𑀼𑀲𑀸 𑀲𑀦𑀥𑀫𑁆𑀫𑁄𑀯𑀼𑀘𑁆𑀘𑀢𑀺. 𑀢𑀢𑁆𑀣𑀘 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀥𑀫𑁆𑀫𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑁄 𑀤𑁂𑀲𑀦𑀸𑀲𑀤𑁆𑀥𑀫𑁆𑀫𑁄𑀇𑀥𑀸𑀥𑀺𑀧𑁆𑀧𑁂𑀢𑁄. 𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀁𑀭𑀁𑀲𑀺𑀚𑀸𑀮𑀁𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀤𑁆𑀥𑀫𑁆𑀫𑀭𑀁𑀲𑀺𑀚𑀸𑀮𑀻. 𑀢𑀲𑁆𑀲𑀲𑀤𑁆𑀥𑀫𑁆𑀫𑀭𑀁𑀲𑀺𑀚𑀸𑀮𑀺𑀦𑁄. ‘‘𑀧𑀩𑀼𑀚𑁆𑀛𑀺𑀁𑀲𑀽’’𑀢𑀺 𑀯𑀺𑀓𑀲𑀺𑀁𑀲𑀼, 𑀘𑀢𑀼𑀲𑁆𑀲𑀘𑁆𑀘𑀜𑁆𑀜𑀸𑀡𑀯𑀺𑀓𑀸𑀲𑀁𑀢𑀜𑁆𑀜𑀸𑀡𑀲𑀫𑁆𑀨𑀼𑀮𑁆𑀮𑀁 𑀧𑀸𑀧𑀼𑀡𑀺𑀁𑀲𑀼. ‘‘𑀚𑀦𑀫𑁆𑀩𑀼𑀚𑀸’’𑀢𑀺 𑀚𑀦𑀲𑀗𑁆𑀔𑀸𑀢𑀸𑀅𑀫𑁆𑀩𑀼𑀚𑀸. 𑀢𑀢𑁆𑀣𑀚𑀦𑀸𑀦𑀸𑀫 𑀇𑀥𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀬𑁂𑀲𑀩𑁆𑀩𑀜𑁆𑀜𑀼𑀤𑁂𑀲𑀦𑀁 𑀲𑀼𑀢𑁆𑀯𑀸 𑀘𑀢𑀼𑀲𑁆𑀲𑀘𑁆𑀘 𑀥𑀫𑁆𑀫𑀁 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺. 𑀅𑀫𑁆𑀩𑀼𑀚𑀸𑀢𑀺𑀧𑀤𑀼𑀫𑀸. ‘‘𑀚𑀸𑀢𑀺𑀓𑁆𑀔𑁂𑀢𑁆𑀢𑁂𑀫𑀳𑀸𑀲𑀭𑁂𑀢𑀺’’ 𑀚𑀸𑀢𑀺𑀓𑁆𑀔𑁂𑀢𑁆𑀢 𑀲𑀗𑁆𑀔𑀸𑀢𑁂 𑀚𑀦𑀫𑁆𑀩𑀼𑀚𑀫𑀳𑀸𑀲𑀭𑁂. 𑀢𑀢𑁆𑀣 𑀚𑀸𑀢𑀺𑀓𑁆𑀔𑁂𑀢𑁆𑀢𑀁 𑀦𑀸𑀫𑀤𑀲𑀲𑀳𑀲𑁆𑀲 𑀘𑀓𑁆𑀓𑀯𑀸𑀴𑀁, 𑀬𑀁 𑀏𑀓𑀁 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀢𑁆𑀣 𑀘 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑀪𑀸𑀯𑀢𑁆𑀣𑀸𑀬 𑀧𑀣𑀫𑀫𑀳𑀸𑀪𑀺𑀦𑀻𑀳𑀸𑀭𑀓𑀸𑀮𑀸𑀤𑀻𑀲𑀼 𑀏𑀓𑀧𑁆𑀧𑀳𑀸𑀭𑁂𑀦𑀧𑀣𑀯𑀺𑀓𑀫𑁆𑀧𑀦𑀸𑀤𑀻𑀦𑀺𑀧𑀯𑀢𑁆𑀢𑀦𑁆𑀢𑀺. 𑀬𑀢𑁆𑀣𑀘𑀯𑀲𑀦𑁆𑀢𑀸𑀤𑁂𑀯𑀩𑁆𑀭𑀳𑁆𑀫𑀸𑀦𑁄 𑀩𑀼𑀤𑁆𑀥𑀧𑀭𑀺𑀲𑀸𑀳𑁄𑀦𑁆𑀢𑀺. 𑀚𑀸𑀢𑀺𑀓𑁆𑀔𑁂𑀢𑁆𑀢𑁂𑀫𑀳𑀸𑀲𑀭𑁂𑀬𑀲𑁆𑀲 𑀏𑀓𑀲𑁆𑀲 𑀲𑀤𑁆𑀥𑀫𑁆𑀫𑀭𑀁𑀲𑀺𑀚𑀸𑀮𑀺𑀦𑁄 𑀫𑀳𑀸𑀲𑀽𑀭𑀲𑁆𑀲 𑀉𑀤𑀬𑀸 𑀢𑀲𑁆𑀫𑀺𑀁 𑀚𑀸𑀢𑀺𑀓𑁆𑀔𑁂𑀢𑁆𑀢𑁂 𑀫𑀳𑀸𑀲𑀭𑁂 𑀚𑀦𑀫𑁆𑀩𑀼𑀚𑀸𑀧𑀩𑀼𑀚𑁆𑀛𑀺𑀁𑀲𑀽𑀢𑀺𑀬𑁄𑀚𑀦𑀸.

‘‘𑀢𑀁 𑀫𑀳𑀸𑀲𑀽𑀭’’𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀫𑀳𑀸𑀲𑀽𑀭𑀺𑀬𑀫𑀡𑁆𑀟𑀮𑀁. 𑀚𑀦𑀫𑁆𑀩𑀼𑀚 𑀲𑀦𑁆𑀢𑀸𑀦𑁂𑀲𑀼𑀧𑀯𑀢𑁆𑀢𑀁 𑀫𑀳𑀦𑁆𑀢𑀁 𑀫𑁄𑀳𑀢𑀫𑀁𑀦𑀽𑀤𑀢𑀺 𑀅𑀧𑀦𑁂𑀢𑀺, 𑀲𑀤𑁆𑀥𑀫𑁆𑀫𑀭𑀁𑀲𑀺𑀚𑀸𑀮𑀁 𑀯𑀺𑀲𑁆𑀲𑀚𑁆𑀚𑀦𑁆𑀢𑁄 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀫𑀳𑀸𑀫𑁄𑀳𑀢𑀫𑁄𑀦𑀼𑀤𑁄. 𑀢𑀁 ‘‘𑀫𑀳𑀸𑀫𑁄𑀳𑀢𑀫𑁄𑀦𑀼𑀤𑀁’’.

𑀏𑀯𑀁 𑀩𑀼𑀤𑁆𑀥𑀲𑁆𑀲𑀧𑀡𑀸𑀫𑀁 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀁 𑀧𑀡𑀸𑀫𑀧𑁆𑀧𑀬𑁄𑀚𑀦𑀁 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀲𑀜𑁆𑀚𑀸𑀢’’𑀦𑁆𑀢𑀺𑀆𑀤𑀺𑀫𑀸𑀳. ‘‘𑀲𑁄𑀫𑀳𑀸𑀲𑀽𑀭𑁄𑀫𑀬𑁆𑀳𑀁 𑀳𑀤𑀬𑁂 𑀲𑀜𑁆𑀚𑀸𑀢𑀁 𑀢𑀫𑁄𑀔𑀦𑁆𑀥𑀁 𑀧𑀦𑀽𑀤𑀢’’𑀦𑁆𑀢𑀺𑀬𑁄𑀚𑀦𑀸. 𑀢𑀢𑁆𑀣 ‘‘𑀲𑀜𑁆𑀚𑀸𑀢’’𑀦𑁆𑀢𑀺 𑀲𑀼𑀝𑁆𑀞𑀼𑀚𑀸𑀢𑀁, 𑀅𑀦𑀫𑀢𑀕𑁆𑀕𑁂𑀲𑀁𑀲𑀸𑀭𑁂 𑀤𑀴𑁆𑀳𑀁 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀫𑁄𑀔𑀦𑁆𑀥’’𑀦𑁆𑀢𑀺 𑀫𑀳𑀸𑀫𑁄𑀳𑀢𑀫𑁄𑀔𑀦𑁆𑀥𑀁. 𑀲𑀩𑁆𑀩𑀓𑀺𑀮𑁂𑀲𑀢𑀫𑁄𑀔𑀦𑁆𑀥𑀁 𑀯𑀸. 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀉𑀧𑀯𑀻𑀴𑀓𑁄𑀧𑀖𑀸𑀢𑀓𑀓𑀫𑁆𑀫𑀸𑀦𑀺𑀧𑀺 𑀢𑀫𑁄𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸𑀦𑀺 𑀏𑀯. 𑀢𑀣𑀸 𑀭𑁄𑀕𑀸𑀤𑀬𑁄 𑀅𑀦𑁆𑀢𑀭𑀸𑀬 𑀥𑀫𑁆𑀫𑀸𑀧𑀺 𑀢𑀫𑁄𑀚𑀸𑀢𑀺𑀓𑀸𑀏𑀯𑀢𑀫𑁄𑀢𑀫𑀧𑀭𑀸𑀬𑀦𑁄𑀢𑀺𑀆𑀤𑀻𑀲𑀼. ‘‘𑀧𑀦𑀽𑀤𑀢’’𑀦𑁆𑀢𑀺 𑀧𑀦𑀽𑀤𑀢𑀼, 𑀅𑀧𑀦𑁂𑀢𑀼, 𑀅𑀦𑁆𑀢𑀭𑀥𑀸𑀧𑁂𑀢𑀼.

𑀏𑀯𑀁 𑀲𑀧𑁆𑀧𑀬𑁄𑀚𑀦𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀦𑀺𑀤𑀸𑀦𑀁 𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀁 𑀓𑀭𑁄𑀦𑁆𑀢𑁄 ‘‘𑀧𑁄𑀭𑀸𑀡𑀓𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀤𑀸𑀦𑀁 𑀦𑀸𑀫 𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀸𑀬 𑀆𑀲𑀦𑁆𑀦𑀓𑀸𑀭𑀡𑀁. 𑀓𑀢𑀥𑀁𑀧𑀦𑀢𑀦𑁆𑀢𑀺, 𑀲𑀸𑀭𑀢𑁆𑀣𑀸𑀪𑀺𑀫𑀸𑀦𑀻𑀦𑀁 𑀬𑀸𑀘𑀦𑀜𑁆𑀘𑀲𑀗𑁆𑀕𑀳𑀲𑁆𑀲𑀯𑀺𑀧𑀼𑀮𑀢𑁆𑀣𑀢𑀸 𑀘.

𑀢𑀢𑁆𑀣 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀲𑀓𑀸𑀭𑀡𑀁 𑀬𑀸𑀘𑀦𑀁 𑀤𑀲𑁆𑀲𑁂𑀢𑀺. 𑀧𑀼𑀦 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀲𑀉𑀧𑀫𑀁𑀯𑀺𑀧𑀼𑀮𑀢𑁆𑀣𑀢𑀁𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀕𑀦𑁆𑀣𑀧𑁆𑀧𑀓𑀸𑀭 𑀕𑀦𑁆𑀣𑀕𑀼𑀡𑁂𑀳𑀺 𑀲𑀳𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀤𑀺𑀕𑀸𑀣𑀸𑀬𑀁 ‘‘𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑁂 𑀧𑁄𑀭𑀸𑀡𑀓𑁂𑀳𑀺 𑀯𑀺𑀜𑁆𑀜𑀽𑀳𑀺 𑀯𑀡𑁆𑀡𑀺𑀢𑀸 𑀩𑀳𑀽𑀯𑀡𑁆𑀡𑀦𑀸 𑀇𑀥𑀮𑁄𑀓𑀫𑁆𑀳𑀺𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀬𑁄𑀚𑀦𑀸. ‘‘𑀯𑀡𑁆𑀡𑀦𑀸’’𑀢𑀺 𑀧𑁄𑀭𑀸𑀡𑀝𑀻𑀓𑀸𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘𑀲𑀢𑀺 𑀓𑀲𑁆𑀫𑀸 𑀅𑀪𑀺𑀦𑀯𑀁 𑀯𑀡𑁆𑀡𑀦𑀁 𑀬𑀸𑀘𑀦𑁆𑀢𑀻𑀢𑀺. ‘‘𑀬𑁂 𑀲𑀸𑀭𑀢𑁆𑀣𑀸𑀪𑀺𑀫𑀸𑀦𑀺𑀦𑁄, 𑀢𑁂 𑀢𑀸𑀳𑀺𑀩𑀳𑀽𑀳𑀺 𑀧𑁄𑀭𑀸𑀡𑀯𑀡𑁆𑀡𑀦𑀸𑀳𑀺𑀢𑀼𑀝𑁆𑀞𑀺𑀁 𑀦𑀯𑀺𑀦𑁆𑀤𑀦𑁆𑀢𑀺. 𑀢𑀲𑁆𑀫𑀸 𑀢𑀁 𑀬𑀸𑀘𑀦𑁆𑀢𑀻’’𑀢𑀺𑀬𑁄𑀚𑀦𑀸. 𑀏𑀢𑁂𑀦 𑀅𑀧𑁆𑀧𑀲𑀸𑀭𑀢𑁆𑀣𑀸 𑀏𑀯 𑀢𑀸𑀧𑁄𑀭𑀸𑀡𑀯𑀡𑁆𑀡𑀦𑀸𑀬𑁄𑀢𑀺𑀧𑀺 𑀤𑀻𑀧𑁂𑀢𑀺𑀬𑁂𑀯. 𑀢𑀢𑁆𑀣 ‘‘𑀢𑀼𑀝𑁆𑀞𑀺’’𑀦𑁆𑀢𑀺 𑀲𑀦𑁆𑀢𑀼𑀝𑁆𑀞𑀺𑀁. 𑀦𑀯𑀺𑀦𑁆𑀤𑀦𑁆𑀢𑀺𑀦𑀧𑀝𑀺𑀮𑀪𑀦𑁆𑀢𑀺. ‘‘𑀬𑁂’’𑀢𑀺𑀬𑁂𑀚𑀦𑀸.

𑀲𑀸𑀭𑀢𑁆𑀣𑀫𑁂𑀯 𑀅𑀪𑀺𑀫𑀸𑀦𑁂𑀦𑁆𑀢𑀺, 𑀯𑀺𑀲𑁂𑀲𑁂𑀦 𑀦𑀦𑁆𑀤𑀦𑁆𑀢𑀺𑀲𑀻𑀮𑁂𑀦𑀸𑀢𑀺 𑀲𑀸𑀭𑀢𑁆𑀣𑀸𑀪𑀺𑀫𑀸𑀦𑀺𑀦𑁄. 𑀢𑁂𑀦𑀯𑀺𑀦𑁆𑀤𑀦𑁆𑀢𑀻𑀢𑀺𑀧𑀼𑀭𑀺𑀫𑁂𑀦𑀲𑀫𑁆𑀩𑀦𑁆𑀥𑁄. 𑀧𑀼𑀦 ‘‘𑀢𑁂’’𑀢𑀺 𑀢𑀸𑀳𑀺 𑀢𑀼𑀝𑁆𑀞𑀺𑀁 𑀅𑀯𑀺𑀦𑁆𑀤𑀦𑁆𑀢𑀸 𑀢𑁂𑀚𑀦𑀸. ‘‘𑀫’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. ‘‘𑀲𑀗𑁆𑀕𑀫𑁆𑀫𑀸’’𑀢𑀺 𑀲𑀫𑀸𑀕𑀦𑁆𑀢𑁆𑀯𑀸. 𑀬𑀲𑁆𑀫𑀸 𑀧𑀭𑀫𑀢𑁆𑀣𑀲𑁆𑀲𑀤𑀻𑀧𑀦𑀁 𑀬𑀸𑀘𑀦𑁆𑀢𑀺, 𑀢𑀲𑁆𑀫𑀸 𑀇𑀫𑀺𑀲𑁆𑀲𑀸𑀝𑀻𑀓𑀸𑀬 ‘‘𑀧𑀭𑀫𑀢𑁆𑀣𑀤𑀻𑀧𑀦𑀻’’𑀢𑀺 𑀦𑀸𑀫𑀁𑀧𑀺 𑀲𑀺𑀤𑁆𑀥𑀁𑀳𑁄𑀢𑀺. ‘‘𑀫𑀳𑀡𑁆𑀡𑀯𑁂’’𑀢𑀺 𑀫𑀳𑀸𑀲𑀫𑀼𑀤𑁆𑀤𑁂. ‘‘𑀭𑀢𑀦𑀸𑀦𑀻’’𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀻𑀦𑀺 𑀭𑀢𑀦𑀸𑀦𑀺. ‘‘𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀉𑀤𑁆𑀥𑀁 𑀆𑀳𑀭𑀺𑀢𑁆𑀯𑀸. ‘‘𑀬𑀣𑀺𑀘𑁆𑀙𑀓𑀁𑀯𑀻’’𑀢𑀺𑀬𑀣𑀺𑀘𑁆𑀙𑀺𑀢𑀁𑀧𑀺. 𑀬𑀢𑁆𑀢𑀓𑀁 𑀇𑀘𑁆𑀙𑀦𑁆𑀢𑀺, 𑀢𑀢𑁆𑀢𑀓𑀁𑀯𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀤𑀚𑁆𑀚𑁂𑀬𑁆𑀬𑀼𑀁’’𑀢𑀺 𑀤𑀤𑁂𑀬𑁆𑀬𑀼𑀁. 𑀓𑀸𑀫𑀁 𑀤𑀤𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀏𑀬𑁆𑀬𑀸𑀤𑀺𑀯𑀘𑀦𑀸𑀦𑀁 𑀅𑀦𑀼𑀫𑀢𑀺 𑀅𑀢𑁆𑀣𑁂𑀧𑀯𑀢𑁆𑀢𑀦𑀢𑁄. ‘‘𑀦𑀯𑀢𑁆𑀢𑀩𑁆𑀩𑀸𑀯𑀊𑀦𑀢𑀸’’𑀢𑀺 𑀫𑀳𑀡𑁆𑀡𑀯𑁂𑀭𑀢𑀦𑀸𑀦𑀁 𑀊𑀦𑀢𑀸𑀳𑀸𑀦𑀺𑀢𑀸 𑀦𑀯𑀢𑁆𑀢𑀩𑁆𑀩𑀸𑀯. 𑀓𑀲𑁆𑀫𑀸, 𑀅𑀧𑀭𑀺𑀫𑀸𑀡 𑀭𑀢𑀦𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲. 𑀬𑀢𑁄 𑀲𑁄 𑀲𑀸𑀕𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀦𑀁𑀥𑀦𑀭𑀢𑀦𑀸𑀦𑀁 𑀕𑁂𑀳𑀕𑀩𑁆𑀪𑀲𑀤𑀺𑀲𑀢𑁆𑀢𑀸𑀲𑀸𑀕𑀭𑁄𑀢𑀺 𑀳𑀺𑀲𑁆𑀲 𑀅𑀢𑁆𑀣𑁄.

‘‘𑀢𑀣𑁂𑀯𑁂𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑁂𑀢𑀣𑁂𑀯. ‘‘𑀯𑀺𑀧𑀼𑀮𑀢𑁆𑀣𑀸’’𑀢𑀺 𑀫𑀳𑀦𑁆𑀢𑀸 𑀅𑀢𑁆𑀣𑀸. ‘‘𑀭𑀢𑀦𑀽𑀧𑀫𑀸’’𑀢𑀺 𑀫𑀳𑀡𑁆𑀡𑀯𑁂 𑀭𑀢𑀦𑀲𑀤𑀺𑀲𑀸. ‘‘𑀲𑀢𑀓𑁆𑀔𑀢𑁆𑀢𑀼𑀁𑀧𑀻’’𑀢𑀺 𑀅𑀦𑁂𑀓𑀲𑀢𑀯𑀸𑀭𑀁𑀧𑀺. ‘‘𑀯𑀡𑁆𑀡𑁂𑀬𑁆𑀬𑀼𑀁’’𑀢𑀺 𑀓𑀸𑀫𑀁𑀯𑀡𑁆𑀡𑁂𑀦𑁆𑀢𑀼. ‘‘𑀧𑀭𑀺𑀬𑀸𑀤𑀺𑀦𑁆𑀦𑀸’’𑀢𑀺 𑀧𑀭𑀺𑀢𑁄 𑀅𑀦𑀯𑀲𑁂𑀲𑀢𑁄 𑀆𑀤𑀺𑀦𑁆𑀦𑀸 𑀕𑀳𑀺𑀢𑀸. 𑀧𑀭𑀺𑀓𑁆𑀔𑀻𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀦𑀳𑁂𑀲𑁆𑀲𑀭𑁂’’𑀢𑀺 𑀦𑀳𑁂𑀲𑁆𑀲𑀦𑁆𑀢𑀺 𑀦𑀪𑀯𑀺𑀲𑁆𑀲𑀦𑁆𑀢𑀺. ‘‘𑀢𑀲𑁆𑀫𑀸’’𑀢𑀺 𑀬𑀲𑁆𑀫𑀸𑀘 𑀬𑀸𑀘𑀦𑁆𑀢𑀺, 𑀬𑀲𑁆𑀫𑀸𑀘 𑀧𑀭𑀺𑀬𑀸𑀤𑀺𑀦𑁆𑀦𑀸𑀦𑀳𑁂𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸. ‘‘𑀢𑀸𑀲𑀼𑀯𑀡𑁆𑀡𑀦𑀸𑀲𑀽’’𑀢𑀺 𑀢𑀸𑀲𑀼 𑀧𑁄𑀭𑀸𑀡𑀝𑀻𑀓𑀸𑀲𑀼. ‘‘𑀯𑀡𑁆𑀡𑀦’’𑀦𑁆𑀢𑀺 𑀅𑀪𑀺𑀦𑀯𑀯𑀡𑁆𑀡𑀦𑀁, 𑀅𑀪𑀺𑀦𑀯𑀝𑀻𑀓𑀁𑀓𑀭𑀺𑀲𑁆𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀻𑀤𑀺𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀦𑀸𑀦𑀸𑀲𑀸𑀭𑀢𑁆𑀣 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀉𑀢𑁆𑀢𑀸𑀦𑀧𑀤𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀉𑀢𑁆𑀢𑀸𑀦𑀧𑀤𑀜𑁆𑀘 𑀉𑀢𑁆𑀢𑀸𑀦𑀯𑀸𑀓𑁆𑀬𑀜𑁆𑀘. ‘‘𑀦𑀸𑀢𑀺𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭’’𑀦𑁆𑀢𑀺 𑀦𑀸𑀢𑀺𑀲𑀗𑁆𑀔𑁂𑀧𑀁𑀦𑀸𑀢𑀺𑀯𑀺𑀢𑁆𑀣𑀸𑀭𑀜𑁆𑀘. 𑀫𑀦𑁆𑀤𑀸 𑀩𑀼𑀤𑁆𑀥𑀺 𑀬𑁂𑀲𑀁 𑀢𑁂 𑀫𑀦𑁆𑀤𑀩𑀼𑀤𑁆𑀥𑀺𑀦𑁄. ‘‘𑀫𑀦𑁆𑀤𑀸’’𑀢𑀺 𑀫𑀼𑀤𑀼𑀓𑀸. ‘‘𑀩𑀼𑀤𑁆𑀥𑀻’’𑀢𑀺 𑀜𑀸𑀡𑀁. 𑀫𑀦𑁆𑀤𑀩𑀼𑀤𑁆𑀥𑀺𑀦𑁄 𑀲𑁄𑀢𑀼𑀚𑀦𑁂 𑀧𑀩𑁄𑀥𑁂𑀢𑀺 𑀯𑀺𑀓𑀸𑀲𑁂𑀢𑀺, 𑀜𑀸𑀡 𑀯𑀺𑀓𑀸𑀲𑀁𑀧𑀸𑀧𑁂𑀢𑀻𑀢𑀺 𑀫𑀦𑁆𑀤𑀩𑀼𑀤𑁆𑀥𑀺𑀧𑁆𑀧𑀩𑁄𑀥𑀦𑀸. ‘‘𑀓𑀭𑀺𑀲𑁆𑀲’’𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀺. ‘‘𑀢’’𑀦𑁆𑀢𑀺 𑀢𑀁𑀯𑀡𑁆𑀡𑀦𑀁. ‘‘𑀧𑀭𑀫𑀢𑁆𑀣𑁂𑀲𑀼𑀧𑀸𑀝𑀯𑀢𑁆𑀣𑀺𑀦𑁄𑀲𑀼𑀡𑀦𑁆𑀢𑀽’’𑀢𑀺 𑀬𑁄𑀚𑀦𑀸. 𑀧𑀝𑀼𑀦𑁄𑀪𑀸𑀯𑁄𑀧𑀸𑀝𑀯𑀁. 𑀧𑀝𑀼𑀦𑁄𑀢𑀺 𑀩𑁆𑀬𑀢𑁆𑀢𑀲𑁆𑀲𑀧𑀡𑁆𑀟𑀺𑀢𑀲𑁆𑀲. 𑀧𑀸𑀝𑀯𑁂𑀦 𑀅𑀢𑁆𑀣𑁄 𑀬𑁂𑀲𑀁 𑀢𑁂 𑀧𑀸𑀝𑀯𑀢𑁆𑀣𑀺𑀦𑁄. 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀚𑁄𑀢𑀓𑁄. 𑀲𑁄 𑀳𑀺 𑀕𑀦𑁆𑀣𑀸𑀭𑀩𑁆𑀪𑀯𑀺𑀥𑀸𑀦𑀲𑁆𑀲 𑀇𑀥𑀧𑀭𑀺𑀲𑀫𑀸𑀧𑀦𑀁 𑀧𑀭𑀺𑀦𑀺𑀝𑁆𑀞𑀸𑀦𑀁 𑀜𑀸𑀧𑁂𑀢𑀼𑀁 𑀕𑀦𑁆𑀣𑀸𑀭𑀩𑁆𑀪𑀯𑀸𑀓𑁆𑀬𑀲𑁆𑀲𑀧𑀭𑀺𑀬𑀦𑁆𑀢𑁂 𑀬𑁄𑀚𑀺𑀢𑁄. 𑀅𑀯𑀬𑀯 𑀯𑀸𑀓𑁆𑀬𑀸𑀦𑀁 𑀧𑀺𑀬𑁄𑀚𑀻𑀬𑀢𑀺𑀬𑁂𑀯. 𑀏𑀲𑀦𑀬𑁄𑀲𑀩𑁆𑀩𑀢𑁆𑀣.

𑀕𑀦𑁆𑀣𑀸𑀭𑀩𑁆𑀪𑀕𑀸𑀣𑀸𑀯𑀡𑁆𑀡𑀦𑀸𑀦𑀺𑀝𑁆𑀞𑀺𑀢𑀸.

𑁧. 𑀏𑀯𑀁 𑀕𑀦𑁆𑀣𑀸𑀭𑀩𑁆𑀪𑀯𑀺𑀥𑀸𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀆𑀤𑀺𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀫𑁆𑀩𑀦𑁆𑀥𑀦𑁆𑀢𑀺 𑀓𑀸𑀭𑀡𑀧𑁆𑀨𑀮𑀲𑀁𑀬𑁄𑀕𑀁. 𑀢𑀢𑁆𑀣 𑀕𑀸𑀣𑀸𑀧𑀯𑀢𑁆𑀢𑀦𑀁 𑀓𑀸𑀭𑀡𑀁 𑀦𑀸𑀫. 𑀧𑀜𑁆𑀘𑀧𑀺𑀡𑁆𑀟𑀢𑁆𑀣 𑀤𑀲𑁆𑀲𑀦𑀁 𑀨𑀮𑀁 𑀦𑀸𑀫. 𑀓𑀸𑀭𑀡𑀧𑁆𑀨𑀮𑀲𑀁𑀬𑁄𑀕𑁄 𑀲𑀫𑁆𑀩𑀦𑁆𑀥𑁄𑀦𑀸𑀫. ‘‘𑀲𑀧𑁆𑀧𑀬𑁄𑀚𑀦𑁂’’𑀢𑀺 𑀨𑀮𑀧𑁆𑀧𑀬𑁄𑀚𑀦𑀲𑀳𑀺𑀢𑁂. 𑀕𑀦𑁆𑀣𑁂𑀦 𑀅𑀪𑀺𑀥𑀸𑀢𑀩𑁆𑀩𑁄 𑀓𑀣𑁂𑀢𑀩𑁆𑀩𑁄𑀢𑀺 𑀕𑀦𑁆𑀣𑀸𑀪𑀺𑀥𑁂𑀬𑁆𑀬𑁄. 𑀦𑀺𑀧𑀢𑀲𑁆𑀲 𑀓𑀫𑁆𑀫𑀁 𑀦𑀺𑀧𑀘𑁆𑀘𑀁. 𑀦𑀺𑀧𑀘𑁆𑀘 𑀓𑀺𑀭𑀺𑀬𑀸, 𑀦𑀺𑀧𑀘𑁆𑀘𑀸𑀓𑀸𑀭𑁄, 𑀦𑀺𑀧𑀘𑁆𑀘𑀓𑀸𑀭𑀲𑁆𑀲𑀓𑀭𑀡𑀦𑁆𑀢𑀺 𑀲𑀫𑀸𑀲𑁄. ‘‘𑀲𑀸’’𑀢𑀺 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸. 𑀤𑀲𑁆𑀲𑀺𑀢𑀸𑀢𑀺𑀲𑀫𑁆𑀩𑀦𑁆𑀥𑁄. ‘‘𑀅𑀪𑀺𑀳𑀺𑀢𑀸’’𑀢𑀺 𑀓𑀣𑀺𑀢𑀸. 𑀧𑀓𑀸𑀲𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀥𑀸𑀦𑀢𑁆𑀣𑀪𑀽𑀢𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀪𑀽𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀯𑀺𑀥𑁄𑀳𑀺 𑀅𑀢𑁆𑀣𑁄𑀯𑀘𑀦𑀢𑁆𑀣𑁄 𑀘 𑀅𑀪𑀺𑀥𑀸𑀦𑀢𑁆𑀣𑁄𑀘. 𑀢𑀢𑁆𑀣 𑀕𑀘𑁆𑀙𑀢𑀻𑀢𑀺 𑀕𑀢𑁄, 𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑁂𑀕𑀘𑁆𑀙𑀢𑀺 𑀧𑀤𑁂𑀦 𑀯𑀼𑀢𑁆𑀢𑁄 𑀬𑁄𑀓𑁄𑀘𑀺 𑀕𑀘𑁆𑀙𑀦𑁆𑀢𑁄 𑀯𑀘𑀦𑀢𑁆𑀣𑁄𑀦𑀸𑀫. 𑀧𑀼𑀭𑀺𑀲𑁄𑀢𑀺 𑀧𑀤𑁂𑀦𑀤𑀲𑁆𑀲𑀺𑀢𑁄 𑀧𑀥𑀸𑀦𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫𑀸𑀢𑀺. ‘‘𑀅𑀪𑀺𑀥𑀫𑁆𑀫𑀢𑁆𑀣𑀸’’𑀢𑀺.

𑀢𑀢𑁆𑀣 𑀯𑀼𑀢𑁆𑀢𑀸𑀪𑀺𑀥𑀫𑁆𑀫𑀢𑁆𑀣𑀸, 𑀘𑀢𑀼𑀥𑀸 𑀧𑀭𑀫𑀢𑁆𑀣𑀢𑁄;

𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀫𑀺𑀢𑀺 𑀲𑀩𑁆𑀩𑀣𑀸. 𑀢𑀺

𑀏𑀯𑀁 𑀯𑀼𑀢𑁆𑀢𑀸 𑀅𑀪𑀺𑀥𑀫𑁆𑀫𑀢𑁆𑀣𑀸. 𑀏𑀯𑀁 𑀯𑀼𑀢𑁆𑀢𑀢𑁆𑀢𑀸𑀬𑁂𑀯𑀘 𑀢𑁂𑀘𑀢𑁆𑀢𑀸𑀭𑁄 𑀅𑀪𑀺𑀥𑀫𑁆𑀫𑀢𑁆𑀣𑀸 𑀏𑀯 𑀇𑀥𑀧𑀥𑀸𑀦𑀢𑁆𑀣𑀪𑀽𑀢𑀸𑀢𑀺 𑀘, - 𑀧𑀥𑀸𑀦𑀢𑁆𑀣𑀸𑀏𑀯 𑀇𑀥𑀕𑀦𑁆𑀣𑀸𑀪𑀺𑀥𑁂𑀬𑁆𑀬 𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀸𑀢𑀺 𑀘𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁂𑀘𑀺𑀧𑀦𑀯𑀤𑁂𑀬𑁆𑀬𑀼𑀁, 𑀢𑁂𑀅𑀪𑀺𑀥𑀫𑁆𑀫𑀢𑁆𑀣𑀸 𑀲𑀗𑁆𑀕𑀳𑀧𑁆𑀧𑀓𑀭𑀡𑀁 𑀧𑀢𑁆𑀢𑀸 𑀯𑀺𑀲𑀼𑀁 𑀲𑀗𑁆𑀕𑀳𑀢𑁆𑀣𑀸𑀦𑀸𑀫𑀪𑀯𑁂𑀬𑁆𑀬𑀼𑀁, 𑀦𑀅𑀪𑀺𑀥𑀫𑁆𑀫𑀢𑁆𑀣𑀸 𑀦𑀸𑀫. 𑀇𑀥 𑀘 𑀲𑀗𑁆𑀕𑀳𑀢𑁆𑀣𑀸 𑀏𑀯 𑀅𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 𑀅𑀪𑀺𑀥𑁂𑀬𑁆𑀬𑁄 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀧𑁆𑀧𑀤𑁂𑀦𑀸𑀢𑀺. 𑀯𑀼𑀘𑁆𑀘𑀢𑁂. 𑀢𑁂𑀅𑀪𑀺𑀥𑀫𑁆𑀫𑀢𑁆𑀣𑀸 𑀲𑀗𑁆𑀕𑀳𑀧𑁆𑀧𑀓𑀭𑀡𑀁 𑀧𑀢𑁆𑀢𑀸𑀧𑀺 𑀅𑀪𑀺𑀥𑀫𑁆𑀫𑀢𑁆𑀣𑀸 𑀏𑀯𑀦𑀸𑀫 𑀳𑁄𑀦𑁆𑀢𑀺, 𑀦 𑀯𑀺𑀲𑀼𑀁 𑀲𑀗𑁆𑀕𑀳𑀢𑁆𑀣𑀸𑀦𑀸𑀫. 𑀢𑀢𑁆𑀣 𑀯𑀼𑀢𑁆𑀢𑀸𑀪𑀺𑀥𑀫𑁆𑀫𑀢𑁆𑀣𑀸𑀢𑀺𑀳𑀺 𑀯𑀼𑀢𑁆𑀢𑀁, 𑀦𑀢𑀼𑀯𑀼𑀢𑁆𑀢𑀁 𑀢𑀢𑁆𑀣 𑀯𑀼𑀢𑁆𑀢𑀸𑀲𑀗𑁆𑀕𑀳𑀢𑁆𑀣𑀸𑀢𑀺. 𑀏𑀯𑀜𑁆𑀘𑀲𑀢𑀺 𑀲𑀗𑁆𑀕𑀳𑀺𑀢𑀪𑀸𑀯𑀫𑀢𑁆𑀢𑀁 𑀯𑀺𑀲𑀺𑀝𑁆𑀞𑀁 𑀳𑁄𑀢𑀺. 𑀢𑀤𑁂𑀯 𑀇𑀥 𑀅𑀪𑀺𑀥𑁂𑀬𑁆𑀬𑁄 𑀦𑀸𑀫 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀳𑀺𑀢𑀪𑀸𑀯𑁄𑀧𑀺 𑀅𑀪𑀺𑀥𑁂𑀬𑁆𑀬𑁄 𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀲𑀗𑁆𑀕𑀳𑀺𑀢𑀪𑀸𑀯𑁄’’𑀢𑀺𑀘𑀺𑀢𑁆𑀢𑀲𑀗𑁆𑀕𑀳𑁄, 𑀘𑁂𑀢𑀲𑀺𑀓𑀲𑀗𑁆𑀕𑀳𑁄𑀢𑀺𑀆𑀤𑀺𑀦𑀸 𑀲𑀗𑁆𑀕𑀳𑀡𑀓𑀺𑀭𑀺𑀬𑀸. 𑀲𑀸 𑀲𑀗𑁆𑀕𑀳𑀺𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀜𑁆𑀜𑀸 𑀦𑀳𑁄𑀢𑀺. 𑀢𑁂𑀲𑁆𑀯𑁂𑀯𑀥𑀫𑁆𑀫𑁂𑀲𑀼𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀳𑀺𑀢𑀪𑀸𑀯𑁄𑀧𑀺 𑀅𑀪𑀺𑀥𑁂𑀬𑁆𑀬𑁄 𑀬𑁂𑀯𑀸’’𑀢𑀺. 𑀓𑀺𑀜𑁆𑀘𑀸𑀧𑀺𑀢𑁂𑀳𑀺 𑀅𑀜𑁆𑀜𑀸𑀦𑀳𑁄𑀢𑀺, 𑀢𑁂 𑀲𑁆𑀯𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀲𑀸𑀧𑀦 𑀕𑀦𑁆𑀣𑀲𑁆𑀲𑀧𑀥𑀸𑀦𑀢𑁆𑀣𑁄 𑀦𑀳𑁄𑀢𑀺. 𑀇𑀥 𑀘 𑀧𑀥𑀸𑀦𑀢𑁆𑀣𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀢𑀁𑀦𑀲𑀼𑀦𑁆𑀤𑀭’’𑀦𑁆𑀢𑀺. 𑀓𑀲𑁆𑀫𑀸 𑀦𑀲𑀼𑀦𑁆𑀤𑀭𑀦𑁆𑀢𑀺 𑀆𑀳 ‘‘𑀦𑀳𑀺𑀲𑁄’’𑀢𑀺𑀆𑀤𑀺𑀁. 𑀏𑀢𑁆𑀣𑀘𑀳𑀺𑀲𑀤𑁆𑀤𑁄 𑀇𑀫𑀲𑁆𑀲 𑀯𑀸𑀓𑁆𑀬𑀲𑁆𑀲𑀳𑁂𑀢𑀼𑀯𑀸𑀓𑁆𑀬𑀪𑀸𑀯𑀁 𑀚𑁄𑀢𑁂𑀢𑀺. 𑀏𑀲𑀦𑀬𑁄𑀧𑀭𑀢𑁆𑀣𑀧𑀺. ‘‘𑀇𑀢𑁄𑀧𑀝𑁆𑀞𑀸𑀬 𑀘𑀸’’𑀢𑀺𑀆𑀤𑀺 𑀕𑀦𑁆𑀣 𑀕𑀭𑀼𑀤𑁄𑀲𑀯𑀺𑀯𑀚𑁆𑀚𑀦𑀁. 𑀢𑀢𑁆𑀣 ‘‘𑀇𑀫𑀲𑁆𑀲𑀲𑀗𑁆𑀕𑀳𑀲𑁆𑀲𑀸’’𑀢𑀺 𑀇𑀫𑀲𑁆𑀲𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲. ‘‘𑀤𑀼𑀢𑀻𑀬𑀸’’𑀢𑀺𑀤𑀼𑀢𑀻𑀬𑀸𑀝𑀻𑀓𑀸. ‘‘𑀤𑁆𑀯𑁂𑀧𑀻’’𑀢𑀺 𑀤𑁆𑀯𑁂𑀧𑀺𑀝𑀻𑀓𑀸𑀬𑁄. ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀫𑀳𑀸𑀝𑀻𑀓𑀸’’𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀓𑀢𑀸𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀦𑀸𑀫𑀝𑀻𑀓𑀸. 𑀲𑀸 𑀩𑁆𑀭𑀫𑁆𑀫𑀭𑀝𑁆𑀞𑁂 𑀢𑀺𑀭𑀺𑀬𑀧𑀩𑁆𑀩𑀢𑀯𑀸𑀲𑀺𑀦𑀸 𑀣𑁂𑀭𑁂𑀦𑀓𑀢𑀁 𑀘𑀽𑀴𑀝𑀻𑀓𑀁 𑀉𑀧𑀸𑀤𑀸𑀬 𑀫𑀳𑀸𑀝𑀻𑀓𑀸𑀢𑀺 𑀧𑀸𑀓𑀝𑀸. 𑀢𑀁𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀕𑀦𑁆𑀣𑀧𑁆𑀧𑀓𑀸𑀭𑁄𑀘 𑀧𑀓𑀸𑀭𑀯𑀦𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀳𑁂𑀯𑀲𑀺𑀚𑁆𑀛𑀢𑀺, 𑀯𑀺𑀦𑀸 𑀦𑀲𑀺𑀚𑁆𑀛𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑁄𑀅𑀪𑀺𑀥𑀫𑁆𑀫𑀢𑁆𑀣𑀧𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘 𑀲𑁄 𑀢𑁂𑀳𑀺 𑀲𑀳𑁂𑀯𑀲𑀺𑀚𑁆𑀛𑀢𑀺, 𑀯𑀺𑀦𑀸𑀦𑀲𑀺𑀚𑁆𑀛𑀢𑀺. 𑀅𑀪𑀺𑀥𑀫𑁆𑀫𑀢𑁆𑀣𑀧𑀤𑀁 𑀧𑀦 𑀲𑀗𑁆𑀕𑀳𑀡𑀓𑀺𑀭𑀺𑀬𑀸𑀧𑀓𑀸𑀭𑀁𑀦 𑀯𑀤𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁 𑀦𑀲𑀼𑀦𑁆𑀤𑀭’’𑀦𑁆𑀢𑀺. 𑀤𑀼𑀯𑀺𑀥𑀁 𑀦𑀸𑀫𑀁 𑀅𑀦𑁆𑀯𑀢𑁆𑀣𑀦𑀸𑀫𑀁 𑀭𑀼𑀴𑀺𑀦𑀸𑀫𑀦𑁆𑀢𑀺. 𑀢𑀢𑁆𑀣, 𑀅𑀢𑁆𑀣𑀸𑀦𑀼𑀕𑀢𑀁 𑀦𑀸𑀫𑀁 𑀅𑀦𑁆𑀯𑀢𑁆𑀣𑀦𑀸𑀫𑀁, 𑀬𑀣𑀸 𑀲𑀼𑀔𑀺𑀢𑀲𑁆𑀲𑀚𑀦𑀲𑁆𑀲 𑀲𑀼𑀔𑁄𑀢𑀺𑀦𑀸𑀫𑀁. 𑀅𑀢𑁆𑀣𑀭𑀳𑀺𑀢𑀁 𑀆𑀭𑁄𑀧𑀺𑀢𑀁 𑀦𑀸𑀫𑀁 𑀭𑀼𑀴𑀺𑀦𑀸𑀫𑀁, 𑀬𑀣𑀸 𑀤𑀼𑀓𑁆𑀔𑀺𑀢𑀲𑁆𑀲𑀚𑀦𑀲𑁆𑀲 𑀲𑀼𑀔𑁄𑀢𑀺 𑀦𑀸𑀫𑀁. 𑀇𑀥 𑀧𑀦 𑀅𑀦𑁆𑀯𑀢𑁆𑀣𑀦𑀸 𑀫𑀦𑁆𑀢𑀺𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀸𑀦𑀼𑀕𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀣𑀸𑀦𑀼𑀕𑀢𑀸’’𑀢𑀺 𑀲𑀓𑀢𑁆𑀣𑀸𑀦𑀼𑀕𑀢𑀸. 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀼𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀕𑀦𑁆𑀣𑀲𑀫𑀜𑁆𑀜𑀸’’𑀢𑀺 𑀕𑀦𑁆𑀣𑀲𑀫𑁆𑀫𑀼𑀢𑀺. 𑀕𑀦𑁆𑀣𑀲𑁆𑀲𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀕𑀳𑀕𑀦𑁆𑀣𑁄𑀦𑀸𑀫 𑀧𑀸𑀴𑀺𑀬𑀁𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑁂𑀥𑀫𑁆𑀫𑁂 𑀏𑀓𑀢𑁆𑀣 𑀲𑀪𑀸𑀕𑀭𑀸𑀲𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀕𑀦𑁆𑀣𑁄. 𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀅𑀧𑁆𑀧𑀓𑁂𑀦 𑀕𑀦𑁆𑀣𑁂𑀦𑀩𑀳𑀼𑀓𑁂𑀥𑀫𑁆𑀫𑁂𑀲𑀼𑀔𑁂𑀦𑀚𑀸𑀦𑀸𑀢𑀺. ‘‘𑀢𑀤𑀼𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀲𑁂𑀦𑀸’’𑀢𑀺 𑀢𑀲𑁆𑀲𑀉𑀕𑁆𑀕𑀳𑁄𑀘 𑀧𑀭𑀺𑀧𑀼𑀘𑁆𑀙𑀸𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀆𑀤𑀺𑀲𑀤𑁆𑀤𑁂𑀦 𑀥𑀸𑀭𑀡𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀧𑀸𑀞𑀲𑁆𑀲𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄𑀦𑀸𑀫. 𑀉𑀕𑁆𑀕𑀳𑀺 𑀢𑀲𑁆𑀲𑀧𑀸𑀞𑀲𑁆𑀲 𑀅𑀢𑁆𑀣𑀕𑁆𑀕𑀳𑀡𑀁 𑀧𑀭𑀺𑀧𑀼𑀘𑁆𑀙𑀸𑀦𑀸𑀫. ‘‘𑀅𑀦𑀸𑀬𑀸𑀲𑀢𑁄’’𑀢𑀺 𑀦𑀺𑀤𑁆𑀤𑀼𑀓𑁆𑀔𑁂𑀦. ‘‘𑀮𑀤𑁆𑀥𑀩𑁆𑀩𑀁𑀨𑀮𑀸𑀦𑀼𑀨𑀮’’𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀭𑀽𑀧𑀢𑁄 𑀅𑀯𑀩𑀼𑀚𑁆𑀛𑀦𑀁 𑀲𑀭𑀽𑀧𑀸𑀯𑀩𑁄𑀥𑁄. 𑀆𑀤𑀺𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀯𑀩𑁄𑀥𑁄 𑀭𑀲𑀸𑀯 𑀩𑁄𑀥𑁄𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑁆𑀢𑁄 𑀧𑀭𑀺𑀬𑁄𑀲𑀸𑀦𑀁 𑀬𑀲𑁆𑀲𑀸𑀢𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀁. 𑀢𑀢𑁆𑀣 ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀔𑀦𑁆𑀥𑁂𑀲𑀼 𑀅𑀦𑀼𑀧𑀸𑀤𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁. 𑀅𑀦𑀼𑀧𑀸𑀤𑀺𑀲𑁂𑀲 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀨𑀮𑀸𑀦𑀼𑀨𑀮’’𑀦𑁆𑀢𑀺 𑀨𑀮𑀜𑁆𑀘𑁂𑀯 𑀅𑀦𑀼𑀨𑀮𑀜𑁆𑀘. 𑀢𑀢𑁆𑀣 ‘‘𑀨𑀮’’𑀦𑁆𑀢𑀺 𑀫𑀽𑀮𑀧𑁆𑀨𑀮𑀁. ‘‘𑀅𑀦𑀼𑀨𑀮’’𑀦𑁆𑀢𑀺 𑀧𑀭𑀫𑁆𑀧𑀭𑀧𑁆𑀨𑀮𑀁. 𑀧𑀬𑁄𑀚𑁂𑀢𑀻𑀢𑀺 ‘‘𑀧𑀬𑁄𑀚𑀦𑀁’’. 𑀧𑀬𑁄𑀚𑁂𑀢𑀻𑀢𑀺 𑀦𑀺𑀬𑁄𑀚𑁂𑀢𑀺. 𑀓𑀺𑀁 𑀦𑀺𑀬𑁄𑀚𑁂𑀢𑀺. 𑀨𑀮𑀢𑁆𑀣𑀺𑀓𑀁𑀚𑀦𑀁. 𑀓𑀢𑁆𑀣 𑀦𑀺𑀬𑁄𑀚𑁂𑀢𑀺. 𑀨𑀮𑀦𑀺𑀩𑁆𑀩𑀢𑁆𑀢𑀓𑁂𑀓𑀫𑁆𑀫𑁂. 𑀓𑀺𑀫𑀢𑁆𑀣𑀸𑀬 𑀦𑀺𑀬𑁄𑀚𑁂𑀢𑀺. 𑀢𑀲𑁆𑀲𑀓𑀫𑁆𑀫𑀲𑁆𑀲 𑀓𑀭𑀡𑀢𑁆𑀣𑀸𑀬𑀸𑀢𑀺. 𑀨𑀮𑀸𑀦𑀼𑀪𑀯𑀦𑀢𑁆𑀣𑀸𑀬 𑀢𑀢𑁆𑀣𑀢𑀢𑁆𑀣 𑀨𑀮𑀸𑀦𑀼𑀪𑀯𑀦𑀓𑀺𑀘𑁆𑀘𑁂𑀲𑀼 𑀧𑀬𑀼𑀚𑁆𑀚𑀻𑀬𑀢𑀻𑀢𑀺 𑀧𑀬𑁄𑀚𑀦𑀦𑁆𑀢𑀺 𑀧𑀺𑀯𑀤𑀦𑁆𑀢𑀺. ‘‘𑀲𑀸𑀫𑀢𑁆𑀣𑀺𑀬𑀢𑁄’’𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀢𑁄. 𑀓𑀺𑀁 𑀯𑀘𑀦𑀲𑀸𑀫𑀢𑁆𑀣𑀺𑀬𑀦𑁆𑀢𑀺. 𑀓𑀸𑀭𑀡𑀯𑀘𑀦𑀁 𑀨𑀮𑀁𑀧𑀺𑀤𑀻𑀧𑁂𑀢𑀺. 𑀨𑀮𑀯𑀘𑀦𑀁 𑀓𑀸𑀭𑀡𑀁𑀧𑀺𑀤𑀻𑀧𑁂𑀢𑀺. 𑀬𑀣𑀸𑀢𑀁 𑀅𑀲𑀼𑀓𑀲𑁆𑀫𑀺𑀁 𑀭𑀝𑁆𑀞𑁂 𑀲𑀫𑁆𑀫𑀸𑀤𑁂𑀯𑁄 𑀯𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑁂 𑀢𑀁 𑀭𑀝𑁆𑀞𑀁𑀲𑀼 𑀪𑀺𑀓𑁆𑀔𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀲𑀼𑀓𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀦𑁆𑀢𑀺𑀯𑀼𑀢𑁆𑀢𑁂 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀲𑀫𑁆𑀫𑀸𑀤𑁂𑀯𑁄 𑀯𑀼𑀝𑁆𑀞𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀧𑀬𑁄𑀚𑀦𑀁 𑀧𑀦 𑀅𑀪𑀺𑀥𑀫𑁆𑀫𑀢𑁆𑀣 𑀲𑀤𑁆𑀤𑁂𑀦 𑀤𑀲𑁆𑀲𑁂𑀢𑀩𑁆𑀩𑀁 𑀦𑀢𑁆𑀣𑀺, 𑀲𑀗𑁆𑀕𑀳𑀯𑀘𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀗𑁆𑀕𑀳𑀲𑀤𑁆𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀢𑁆𑀣𑀺𑀬𑀤𑀲𑁆𑀲𑀦𑁂 𑀧𑀦 𑀲𑀼𑀝𑁆𑀞𑀼 𑀧𑀭𑀺𑀧𑀼𑀡𑁆𑀡𑀯𑀘𑀦𑀁 𑀇𑀘𑁆𑀙𑀺𑀢𑀩𑁆𑀩𑀁 𑀳𑁄𑀢𑀺. 𑀇𑀢𑀭𑀣𑀸 𑀅𑀦𑀺𑀝𑁆𑀞𑀢𑁆𑀣𑀧𑁆𑀧𑀲𑀗𑁆𑀕𑁄𑀧𑀺 𑀲𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀦 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀢𑁆𑀯𑀸 ‘‘𑀦𑀳𑀻’’𑀢𑀺𑀆𑀤𑀺𑀦𑀸 𑀳𑁂𑀢𑀼𑀯𑀸𑀓𑁆𑀬𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀺.

𑁨. 𑀏𑀯𑀁 𑀲𑀧𑁆𑀧𑀬𑁄𑀚𑀦𑁂 𑀧𑀜𑁆𑀘𑀧𑀺𑀡𑁆𑀟𑀢𑁆𑀣𑁂𑀢𑀺 𑀏𑀢𑁆𑀣 𑀧𑀜𑁆𑀘𑀧𑀺𑀡𑁆𑀟𑀢𑁆𑀣𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁𑀧𑀜𑁆𑀘𑀦𑁆𑀦𑀁 𑀧𑀺𑀡𑁆𑀟𑀢𑁆𑀣𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀧𑀜𑁆𑀘𑀧𑁆𑀧𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀢𑁆𑀣𑀸’’𑀢𑀺 𑀢𑁂𑀲𑀼𑀧𑀜𑁆𑀘𑀲𑀼 𑀧𑀺𑀡𑁆𑀟𑀢𑁆𑀣𑁂𑀲𑀼. 𑀦𑀲𑀗𑁆𑀔𑁆𑀬𑀸𑀢𑀩𑁆𑀩𑀦𑁆𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁. 𑀲𑀗𑁆𑀔𑀸𑀢𑀼𑀁𑀅𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀦𑀧𑀫𑁂𑀢𑀩𑁆𑀩𑀦𑁆𑀢𑀺 𑀅𑀧𑁆𑀧𑀫𑁂𑀬𑁆𑀬𑀁. 𑀧𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀺𑀘𑁆𑀘𑀧𑀘𑁆𑀘𑀬𑀸𑀦𑀁 𑀓𑀢𑁆𑀣𑀘𑀺 𑀲𑀓𑁆𑀓𑀢𑁆𑀣 𑀤𑀻𑀧𑀦𑀁 𑀳𑁄𑀢𑀺. 𑀲𑀓𑀯𑀘𑀦𑀁 𑀧𑀸𑀴𑀺𑀯𑀘𑀦𑁂𑀦 𑀲𑀸𑀥𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀸𑀴𑀺𑀕𑀸𑀣𑀁 𑀆𑀳𑀭𑀺. 𑀢𑀢𑁆𑀣 ‘‘𑀬𑀣𑀸𑀳𑀸’’𑀢𑀺 𑀓𑀣𑀁 𑀆𑀳 𑀇𑀘𑁆𑀘𑁂𑀯𑀢𑁆𑀣𑁄. 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁 𑀓𑀣𑀁 𑀧𑀸𑀴𑀺𑀬𑀁 𑀆𑀳, 𑀓𑀣𑀁 𑀅𑀝𑁆𑀞𑀓𑀣𑀸𑀬𑀁 𑀆𑀳, 𑀓𑀣𑀁 𑀝𑀻𑀓𑀸𑀬𑀁 𑀆𑀳𑀸𑀢𑀺 𑀏𑀯𑀁 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀢𑁂𑀢𑀸𑀤𑀺𑀲𑁂𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂 𑀧𑀽𑀚𑀬𑀢𑁄’’𑀢𑀺 𑀬𑁄𑀚𑀦𑀸. 𑀢𑀢𑁆𑀣 ‘‘𑀢𑁂’’𑀢𑀺 𑀩𑀼𑀤𑁆𑀥 𑀩𑀼𑀤𑁆𑀥 𑀲𑀸𑀯𑀓𑁂. ‘‘𑀢𑀸𑀤𑀺𑀲𑁂’’𑀢𑀺 𑀢𑀣𑀸 𑀭𑀽𑀧𑁂𑀲𑀻 𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡 𑀲𑀫𑁆𑀧𑀦𑁆𑀦𑁂. ‘‘𑀦𑀺𑀩𑁆𑀩𑀼𑀢𑁂’’𑀢𑀺 𑀓𑀺𑀮𑁂𑀲 𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁂. 𑀦𑀢𑁆𑀣𑀺 𑀓𑀼𑀢𑁄𑀘𑀺 𑀳𑁂𑀢𑀼𑀢𑁄 𑀪𑀬𑀁 𑀬𑁂𑀲𑀁 𑀢𑁂 𑀅𑀓𑀼𑀢𑁄 𑀪𑀬𑀸. 𑀅𑀦𑀸𑀕𑀸𑀫𑀺 𑀔𑀻𑀡𑀸𑀲𑀯𑀸. ‘‘𑀪𑀬’’𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁. ‘‘𑀧𑀽𑀚𑀬𑀢𑁄’’𑀢𑀺 𑀧𑀽𑀚𑁂𑀦𑁆𑀢𑀲𑁆𑀲. ‘‘𑀢𑀁 𑀧𑀬𑁄𑀚𑀦’’𑀦𑁆𑀢𑀺𑀢𑀲𑁆𑀲𑀸𑀭𑀢𑀦𑀢𑁆𑀢𑀬 𑀯𑀦𑁆𑀤𑀦𑀸𑀬 𑀧𑀬𑁄𑀚𑀦𑀁. ‘‘𑀲𑀗𑁆𑀕𑀳𑀓𑀸𑀭𑀸’’𑀢𑀺 𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑀸𑀤𑀬𑁄 𑀧𑀘𑁆𑀙𑀺𑀫 𑀅𑀝𑁆𑀞𑀓𑀣𑀸𑀓𑀸𑀭𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑁂𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁂𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑀗𑁆𑀕𑀳𑁂𑀢𑁆𑀯𑀸 𑀅𑀪𑀺𑀦𑀯 𑀅𑀝𑁆𑀞𑀓𑀣𑀸𑀬𑁄 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀸𑀅𑀪𑀺𑀦𑀯𑀅𑀝𑁆𑀞𑀓𑀣𑀸𑀬𑁄 𑀲𑀗𑁆𑀕𑀳𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂 𑀘 𑀆𑀘𑀭𑀺𑀬𑀸 𑀲𑀗𑁆𑀕𑀳𑀓𑀸𑀭𑀸 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀕𑀳𑀓𑀸𑀭𑀸𑀢𑀺 𑀩𑀼𑀤𑁆𑀥𑀖𑁄𑀲. 𑀧𑁂… 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀢𑁂 𑀅𑀦𑁆𑀢𑀭𑀸𑀬 𑀦𑀻𑀯𑀸𑀭𑀡𑀫𑁂𑀯 𑀇𑀘𑁆𑀙𑀦𑁆𑀢𑀻𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂. 𑀢𑁂𑀲𑀁 𑀯𑀘𑀦𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀗𑁆𑀕𑀳𑀓𑀸𑀭 𑀕𑀸𑀣𑀁 𑀆𑀳𑀭𑀺. ‘‘𑀭𑀢𑀦𑀢𑁆𑀢𑀬𑁂𑀓𑀢𑀲𑁆𑀲 𑀏𑀢𑀲𑁆𑀲𑀦𑀺𑀧𑀘𑁆𑀘𑀓𑀸𑀭𑀲𑁆𑀲 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑀭𑀸𑀬𑁂 𑀅𑀲𑁂𑀲𑀢𑁄𑀲𑁄𑀲𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀳𑀻’’𑀢𑀺 𑀜𑀸𑀧𑀓𑀳𑁂𑀢𑀼 𑀚𑁄𑀢𑀓𑁄. ‘‘𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁.

𑁩. ‘‘𑀓𑀣𑀜𑁆𑀘𑀳𑁄𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀺 𑀅𑀬𑀁 𑀧𑀼𑀘𑁆𑀙𑀸. ‘‘𑀯𑀼𑀘𑁆𑀘𑀢𑁂’’𑀢𑀺 𑀯𑀺𑀲𑀚𑁆𑀚𑀦𑀸 𑀓𑀣𑀻𑀬𑀢𑁂. ‘‘𑀳𑀻’’𑀢𑀺𑀯𑀺𑀢𑁆𑀣𑀸𑀭𑀚𑁄𑀢𑀓𑁄. ‘‘𑀯𑀦𑁆𑀤𑀦𑀸 𑀓𑀺𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀓𑁄 𑀧𑀼𑀜𑁆𑀜𑀧𑁆𑀧𑀯𑀸𑀳𑁄’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁂𑀓…𑀧𑁂… 𑀯𑀸𑀭𑁂’’𑀢𑀺 𑀅𑀘𑁆𑀘𑀦𑁆𑀢 𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕 𑀯𑀘𑀦𑀁. ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄’’𑀢𑀺 𑀧𑀼𑀜𑁆𑀜𑀸𑀪𑀺𑀲𑁄𑀢𑁄, 𑀧𑀼𑀜𑁆𑀜𑀧𑁆𑀧𑀯𑀸𑀳𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀲𑁄 𑀘 𑀧𑀼𑀜𑁆𑀜𑀸𑀢𑀺𑀲𑁆𑀲𑀬𑁄 𑀳𑁄𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀲𑁄 𑀧𑀼𑀜𑁆𑀜𑀸 𑀢𑀺𑀲𑁆𑀲𑀬𑁄 𑀳𑁄𑀢𑀻𑀢𑀺. 𑀔𑁂𑀢𑁆𑀢 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀚𑁆𑀛𑀸𑀲𑀬 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀢𑁆𑀢𑀭𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀲𑀁𑀯𑀟𑁆𑀠𑀺𑀢𑁆𑀣𑀸𑀢𑀺 𑀲𑀁𑀯𑀟𑁆𑀠𑀺𑀢𑁄. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄. 𑀲𑀁𑀯𑀟𑁆𑀠𑀺𑀢𑀲𑁆𑀲𑀪𑀸𑀯𑁄 𑀲𑀁𑀯𑀟𑁆𑀠𑀺𑀢𑀢𑁆𑀢𑀁. 𑀲𑀼𑀕𑀦𑁆𑀥𑁂𑀳𑀺𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑀁𑀯𑀢𑁆𑀣𑀁 𑀧𑀭𑀺𑀪𑀸𑀯𑀻𑀬𑀺𑀢𑁆𑀣𑀸𑀢𑀺 𑀧𑀭𑀺𑀪𑀸𑀯𑀺𑀢𑁄. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄𑀬𑁂𑀯. 𑀧𑀭𑀺𑀪𑀸𑀯𑀺𑀢𑀲𑁆𑀲 𑀪𑀸𑀯𑁄 𑀧𑀭𑀺𑀪𑀸𑀯𑀺𑀢𑀢𑁆𑀢𑀁. 𑀉𑀪𑀬𑀢𑁆𑀣𑀸𑀧𑀺 𑀳𑁂𑀢𑀼 𑀅𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. ‘‘𑀫𑀳𑀸𑀚𑀼𑀢𑀺𑀓𑁄’’𑀢𑀺 𑀫𑀳𑀸𑀢𑁂𑀚𑁄. ‘‘𑀫𑀳𑀧𑁆𑀨𑀮𑁄’’𑀢𑀺 𑀫𑀽𑀮𑀧𑁆𑀨𑀮𑁂𑀦 𑀫𑀳𑀧𑁆𑀨𑀮𑁄. ‘‘𑀫𑀳𑀸𑀦𑀺𑀲𑀁𑀲𑁄’’𑀢𑀺 𑀆𑀦𑀺𑀲𑀁𑀲𑀧𑁆𑀨𑀮𑁂𑀦 𑀫𑀳𑀸𑀦𑀺𑀲𑀁𑀲𑁄. 𑀆𑀦𑀺𑀲𑀁𑀲𑀧𑁆𑀨𑀮𑀦𑁆𑀢𑀺 𑀘 𑀧𑀭𑀫𑁆𑀧𑀭𑀸 𑀨𑀮𑀁 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀁 𑀧𑀼𑀜𑁆𑀜𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀲𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑀺𑀲𑁆𑀲𑀬𑁄. 𑀧𑀼𑀜𑁆𑀜𑀜𑁆𑀘 𑀢𑀁 𑀅𑀢𑀺𑀲𑁆𑀲𑀬𑁄𑀘𑀸𑀢𑀺 𑀧𑀼𑀜𑁆𑀜𑀸𑀢𑀺𑀲𑁆𑀲𑀬𑁄. 𑀅𑀢𑀺𑀲𑁆𑀲𑀬𑀧𑀼𑀜𑁆𑀜𑀁, 𑀅𑀥𑀺𑀓 𑀧𑀼𑀜𑁆𑀜𑀦𑁆𑀢𑀺 𑀅𑀢𑁆𑀣𑁄. ‘‘𑀲𑁄 𑀅𑀦𑀼𑀩𑀮𑀁 𑀤𑁂𑀢𑀺, 𑀑𑀓𑀸𑀲𑀮𑀸𑀪𑀁 𑀓𑀭𑁄𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀜𑁆𑀘 𑀅𑀦𑀼𑀩𑀮𑀁 𑀤𑁂𑀢𑀺, 𑀓𑀣𑀜𑁆𑀘 𑀑𑀓𑀸𑀲𑀮𑀸𑀪𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀲𑀬𑀁 𑀧𑀬𑁄𑀕 𑀲𑀫𑁆𑀧𑀢𑁆𑀢𑀺𑀪𑀸𑀯𑁂𑀞𑀢𑁆𑀯𑀸’’𑀢𑀺𑀆𑀤𑀺𑀁. 𑀢𑀢𑁆𑀣 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀦𑀸𑀫 𑀅𑀢𑀻𑀢 𑀧𑀼𑀜𑁆𑀜𑀓𑀫𑁆𑀫𑀸𑀦𑀁 𑀩𑀮𑀯𑀢𑀭𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀳𑁄𑀢𑀺. ‘‘𑀩𑀳𑀺𑀤𑁆𑀥𑀸’’𑀢𑀺 𑀩𑀳𑀺𑀤𑁆𑀥𑀲𑀦𑁆𑀢𑀸𑀦𑀢𑁄. ‘‘𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑁂 𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑁂’’𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣, 𑀯𑀺𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀸𑀫-𑀭𑀸𑀚𑀢𑁄𑀯𑀸 𑀘𑁄𑀭𑀢𑁄𑀯𑀸-𑀢𑀺𑀆𑀤𑀺𑀦𑀸 𑀆𑀕𑀢𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀸. 𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀸𑀫 𑀓𑀸𑀬𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀸𑀬 𑀧𑀘𑁆𑀘𑀬𑀸. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀘 𑀉𑀧𑀝𑁆𑀞𑀸𑀓𑀓𑀼𑀮𑀸𑀦𑀺 𑀘 𑀆𑀭𑀓𑁆𑀔 𑀤𑁂𑀯𑀢𑀸𑀤𑀬𑁄 𑀘 𑀲𑀼𑀔𑀼𑀧𑁆𑀧𑀢𑁆𑀢𑀺 𑀧𑀘𑁆𑀘𑀬𑀸. 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀸𑀫𑁄𑀚𑁆𑀚 𑀩𑀳𑀼 𑀮𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀸𑀦𑁂 𑀭𑀢𑁆𑀢𑀺𑀤𑀺𑀯𑀁 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀲𑀫𑀸𑀥𑀻𑀦𑀁 𑀧𑀯𑀢𑁆𑀢𑀺𑀬𑀸 𑀅𑀚𑁆𑀛𑀢𑁆𑀢𑀪𑀽𑀢𑀸 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸 𑀘 𑀅𑀢𑀺 𑀧𑀡𑀻𑀢𑀸 𑀳𑁄𑀦𑁆𑀢𑀺. 𑀢𑁂𑀳𑀺 𑀲𑀫𑀼𑀝𑁆𑀞𑀺𑀢𑀸 𑀲𑀭𑀻𑀭𑀝𑁆𑀞𑀓𑀥𑀸𑀢𑀼𑀬𑁄 𑀘 𑀅𑀢𑀺𑀧𑀡𑀻𑀢𑀸 𑀏𑀯 𑀳𑀼𑀢𑁆𑀯𑀸 𑀉𑀧𑀩𑁆𑀭𑀽𑀳𑀦𑁆𑀢𑀺. 𑀢𑀢𑁆𑀣 𑀲𑀭𑀻𑀭𑀝𑁆𑀞𑀓𑀥𑀸𑀢𑀼𑀬𑁄 𑀦𑀸𑀫 𑀧𑀣𑀯𑀺 𑀆𑀤𑀬𑁄 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀬𑁄𑀘. ‘‘𑀅𑀦𑀼𑀩𑀮𑀁𑀤𑁂𑀢𑀻’’𑀢𑀺𑀅𑀪𑀺𑀦𑀯𑀁𑀣𑀸𑀫𑀩𑀮𑀁 𑀧𑀯𑀢𑁆𑀢𑁂𑀢𑀺. ‘‘𑀧𑀼𑀜𑁆𑀜𑀦𑁆𑀢𑀭𑀲𑁆𑀲𑀸’’𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀚𑀦𑀓𑀲𑁆𑀲 𑀩𑀳𑀼𑀯𑀺𑀥𑀲𑁆𑀲 𑀧𑀼𑀜𑁆𑀜 𑀓𑀫𑁆𑀫𑀲𑁆𑀲. ‘‘𑀅𑀣𑀸’’𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀩𑀮𑀯𑀩𑀮𑀯𑀦𑁆𑀢𑀺𑀬𑁄 𑀳𑀼𑀢𑁆𑀯𑀸’’𑀢𑀺 𑀧𑀓𑀢𑀺 𑀩𑀮𑀢𑁄 𑀅𑀢𑀺𑀩𑀮𑀯𑀦𑁆𑀢𑀺𑀬𑁄 𑀳𑀼𑀢𑁆𑀯𑀸. ‘‘𑀢𑀲𑁆𑀫𑀺𑀁 𑀣𑁂𑀭𑀲𑀦𑁆𑀢𑀸𑀦𑁂’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀝𑁆𑀞𑀧𑁆𑀨𑀮𑀖𑀦𑀧𑀽𑀭𑀺𑀢𑁂’’𑀢𑀺 𑀇𑀝𑁆𑀞𑀧𑁆𑀨𑀮𑀪𑀽𑀢𑀸𑀦𑀁 𑀭𑀽𑀧𑀲𑀦𑁆𑀢𑀢𑀻𑀦𑀁 𑀖𑀦𑁂𑀦 𑀧𑀽𑀭𑀺𑀢𑁂. ‘‘𑀑𑀓𑀸𑀲𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄 𑀦𑀸𑀫 𑀦𑀢𑁆𑀣𑀺. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀤𑀽𑀭𑀢𑁄 𑀅𑀧𑀦𑀻𑀢𑀸𑀦𑁂𑀯 𑀳𑁄𑀦𑁆𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀝𑁆𑀞𑀧𑁆𑀨𑀮𑀲𑀦𑁆𑀢𑀸𑀦𑀁 𑀯𑀺𑀩𑀸𑀥𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀇𑀝𑁆𑀞𑀧𑁆𑀨𑀮𑀲𑀦𑁆𑀢𑀸𑀦𑀯𑀺𑀩𑀸𑀥𑀓𑀸𑀦𑀺 𑀉𑀧𑀧𑀻𑀴𑀓𑀽𑀧𑀖𑀸𑀢𑀓𑀓𑀫𑁆𑀫𑀸𑀦𑀺. 𑀅𑀦𑀺𑀝𑁆𑀞𑀧𑁆𑀨𑀮 𑀲𑀦𑁆𑀢𑀸𑀦 𑀚𑀦𑀓𑀸𑀦𑀺, 𑀅𑀓𑀼𑀲𑀮 𑀚𑀦𑀓 𑀓𑀫𑁆𑀫𑀸𑀦𑀺, 𑀅𑀧𑀼𑀜𑁆𑀜 𑀓𑀫𑁆𑀫𑀸𑀦𑀻𑀢𑀺 𑀢𑀸𑀦𑀺𑀢𑀺𑀯𑀺𑀥𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀤𑀽𑀭𑀢𑁄 𑀅𑀧𑀦𑀻𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀺𑀧𑀸𑀓𑀲𑁆𑀲 𑀅𑀦𑁄𑀓𑀸𑀲𑀓𑀭𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦𑀳𑀻’’𑀢𑀺𑀆𑀤𑀺𑀁. ‘‘𑀢𑀢𑁄’’𑀢𑀺 𑀢𑀲𑁆𑀫𑀸 𑀅𑀧𑀼𑀜𑁆𑀜 𑀓𑀫𑁆𑀫𑀸𑀦𑀁 𑀤𑀽𑀭𑀢𑁄 𑀅𑀧𑀦𑀻𑀢𑀢𑁆𑀢𑀸. 𑀅𑀪𑀺𑀯𑀸𑀤𑁂𑀢𑀩𑁆𑀩𑀸𑀦𑀁 𑀫𑀸𑀢𑀸𑀧𑀺𑀢𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀅𑀪𑀺𑀯𑀸𑀤𑀦𑀓𑀫𑁆𑀫𑁂𑀕𑀭𑀼𑀁𑀓𑀭𑀡𑀁 𑀅𑀪𑀺𑀯𑀸𑀤𑀦 𑀲𑀻𑀮𑀁 𑀦𑀸𑀫. 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀪𑀺𑀯𑀸𑀤𑀦𑀲𑀻𑀮𑀻. 𑀕𑀼𑀡𑀯𑀼𑀤𑁆𑀥𑀯𑀬𑀯𑀼𑀤𑁆𑀥𑁂 𑀅𑀧𑀘𑁂𑀢𑀺 𑀅𑀢𑁆𑀢𑀸𑀦𑀁 𑀦𑀻𑀘𑀯𑀼𑀢𑁆𑀢𑀺 𑀓𑀭𑀡𑁂𑀦 𑀧𑀽𑀚𑁂𑀢𑀺𑀲𑀻𑀮𑁂𑀦𑀸𑀢𑀺 𑀯𑀼𑀤𑁆𑀥𑀸𑀧𑀘𑀸𑀬𑀻. 𑀉𑀪𑀬𑀢𑁆𑀣𑀸𑀧𑀺𑀲𑀫𑁆𑀧𑀤𑀸𑀦 𑀯𑀘𑀦𑀁. 𑀏𑀯𑀦𑁆𑀢𑀺𑀆𑀤𑀺𑀦𑀺 𑀕𑀫𑀦 𑀯𑀘𑀦𑀁. 𑀦𑀺𑀕𑀫𑀦𑁆𑀢𑀺 𑀘 𑀦𑀺𑀝𑁆𑀞𑀗𑁆𑀕𑀫𑀦𑀁. 𑀢𑀲𑁆𑀫𑀸𑀢𑀺𑀆𑀤𑀺 𑀮𑀤𑁆𑀥𑀕𑀼𑀡 𑀯𑀘𑀦𑀁. 𑀮𑀤𑁆𑀥𑀕𑀼𑀡𑁄𑀢𑀺 𑀘 𑀢𑀁𑀢𑀁𑀧𑀲𑀗𑁆𑀕 𑀯𑀺𑀲𑁄𑀥𑀦𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀮𑀤𑁆𑀥𑁄𑀯𑀺𑀲𑀼𑀤𑁆𑀥𑁄 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀢𑀣𑀸 𑀯𑀘𑀦 𑀲𑀸𑀫𑀢𑁆𑀣𑀺𑀬𑁂𑀦 𑀮𑀤𑁆𑀥𑁄 𑀅𑀢𑁆𑀣𑀦𑁆𑀢𑀭𑁄𑀧𑀺 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄. ‘‘𑀦𑀓𑁂𑀯𑀮𑀜𑁆𑀘 𑀣𑁂𑀭𑀲𑁆𑀲𑁂𑀯 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀁 𑀳𑁄𑀢𑀻’’𑀢𑀺 𑀬𑁄𑀚𑀦𑀸. ‘‘𑀲𑁄𑀢𑀽𑀦𑀜𑁆𑀘𑀕𑀳𑀡 𑀓𑀺𑀘𑁆𑀘 𑀲𑀫𑁆𑀧𑀚𑁆𑀚𑀦𑀢𑁆𑀣’’𑀦𑁆𑀢𑀺𑀲𑀫𑁆𑀩𑀦𑁆𑀥𑁄. 𑀲𑀼𑀡𑀦𑁆𑀢𑀻𑀢𑀺 𑀲𑁄𑀢𑀸𑀭𑁄. 𑀢𑁂𑀲𑀁. ‘‘𑀕𑀡𑁆𑀳𑀦𑁆𑀢𑀸𑀦’’𑀦𑁆𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑀸𑀦𑀁. ‘‘𑀯𑀦𑁆𑀤𑀦𑀸𑀲𑀺𑀤𑁆𑀥𑀺𑀬𑀸’’𑀢𑀺𑀭 𑀢𑀦𑀢𑁆𑀢𑀬𑁂𑀯𑀦𑁆𑀤𑀦𑀸 𑀧𑀼𑀜𑁆𑀜𑀲𑁆𑀲𑀲𑀺𑀤𑁆𑀥𑀺𑀢𑁄. 𑀚𑀯𑀦𑀯𑀺𑀦𑀺𑀘𑁆𑀙𑀬𑁂 𑀬𑀲𑁆𑀫𑀸 𑀅𑀦𑁆𑀢𑀭𑀸𑀬 𑀦𑀻𑀯𑀸𑀭𑀡𑀁𑀦𑀸𑀫 𑀤𑀺𑀝𑁆𑀞𑀥𑀫𑁆𑀫𑁂 𑀇𑀘𑁆𑀙𑀺𑀢𑀩𑁆𑀩𑀁 𑀨𑀮𑀁 𑀳𑁄𑀢𑀺. 𑀤𑀺𑀝𑁆𑀞 𑀥𑀫𑁆𑀫𑁄 𑀘 𑀧𑀣𑀫 𑀚𑀯𑀦𑀲𑁆𑀲 𑀯𑀺𑀧𑀸𑀓𑀓𑁆𑀔𑁂𑀢𑁆𑀢𑀁. 𑀢𑀲𑁆𑀫𑀸 𑀉𑀧𑀢𑁆𑀣𑀫𑁆𑀪𑀦 𑀓𑀺𑀘𑁆𑀘𑀁 𑀧𑀢𑁆𑀯𑀸𑀧𑀺 𑀧𑀣𑀫 𑀚𑀯𑀦 𑀘𑁂𑀢𑀦𑀸 𑀏𑀯 𑀇𑀥𑀧𑀭𑀺𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀧𑀣𑀫 𑀚𑀯𑀦 𑀘𑁂𑀢𑀦𑀸 𑀉𑀧𑀢𑁆𑀣𑀫𑁆𑀪𑀦 𑀓𑀺𑀘𑁆𑀘𑀁 𑀧𑀢𑁆𑀯𑀸𑀧𑀺 𑀲𑀩𑁆𑀩𑀤𑀼𑀩𑁆𑀩𑀮𑀸 𑀏𑀯𑀲𑀺𑀬𑀸. 𑀓𑀲𑁆𑀫𑀸, 𑀅𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸. 𑀲𑁂𑀲 𑀘𑁂𑀢𑀦𑀸𑀬𑁄 𑀏𑀯 𑀩𑀮𑀯𑀢𑀺𑀬𑁄 𑀲𑀺𑀬𑀼𑀁. 𑀓𑀲𑁆𑀫𑀸, 𑀮𑀤𑁆𑀥𑀸 𑀲𑁂𑀯𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀢𑁆𑀢𑀚𑀯𑀦𑀧𑀓𑁆𑀔𑁂 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀉𑀧𑀮𑀤𑁆𑀥𑀩𑁆𑀩𑀢𑁆𑀢𑀸 𑀢𑀁 𑀦𑀲𑀼𑀦𑁆𑀤𑀭’’𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀻’’𑀢𑀺 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀁. ‘‘𑀬𑀣𑀸 𑀅𑀧𑁆𑀧𑀫𑀢𑁆𑀢𑀓𑀁 𑀳𑁄𑀢𑀺. 𑀏𑀯𑀫𑁂𑀯𑀁 𑀅𑀧𑁆𑀧𑀫𑀢𑁆𑀢𑀓𑀁 𑀳𑁄𑀢𑀻’’𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀢𑀣𑀸𑀳𑀻’’𑀢𑀺 𑀢𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀸𑀦𑁂𑀧𑀺=𑀓𑀩𑀴𑀻𑀓𑀸𑀭𑁄𑀆𑀳𑀸𑀭𑁄 𑀇𑀫𑀲𑁆𑀲𑀓𑀸𑀬𑀲𑁆𑀲 𑀆𑀳𑀸𑀭 𑀧𑀘𑁆𑀘𑀬𑁂𑀦𑀧𑀘𑁆𑀘𑀬𑁄=𑀢𑀺𑀯𑀺𑀪𑀢𑁆𑀢𑁄. 𑀇𑀢𑀭𑀣𑀸 ‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’𑀢𑀺 𑀯𑀺𑀪𑀢𑁆𑀢𑁄 𑀲𑀺𑀬𑀸𑀢𑀺. ‘‘𑀅𑀥𑀼𑀦𑀸𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀏𑀯. 𑀏𑀯𑀁 𑀯𑀦𑁆𑀤𑀦𑀸𑀬𑀧𑀬𑁄𑀚𑀦𑀁 𑀤𑀻𑀧𑁂𑀢𑁆𑀯𑀸 𑀇𑀤𑀸𑀦𑀺 𑀲𑁂𑀲𑀸𑀦𑀁 𑀧𑀺𑀡𑁆𑀟𑀢𑁆𑀣𑀸𑀦𑀁 𑀧𑀬𑁄𑀚𑀦𑀁 𑀤𑀻𑀧𑁂𑀢𑀼𑀁 ‘‘𑀬𑀲𑁆𑀫𑀸𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣, ‘‘𑀆𑀤𑀺𑀢𑁄𑀯𑀺𑀤𑀺𑀢𑁂𑀲𑀢𑀻’’𑀢𑀺𑀆𑀤𑀺𑀫𑁆𑀳𑀺-𑀪𑀸𑀲𑀺𑀲𑁆𑀲𑀁 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳-𑀦𑁆𑀢𑀺 𑀧𑀤𑀁 𑀲𑀼𑀢𑁆𑀯𑀸 𑀯𑀺𑀜𑁆𑀜𑀸𑀢𑁂𑀲𑀢𑀺, ‘‘𑀉𑀲𑁆𑀲𑀸𑀳𑁄𑀚𑀸𑀬𑀢𑀺’’. 𑀇𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀤𑀼𑀮𑁆𑀮𑀪𑁂 𑀅𑀪𑀺𑀥𑀫𑁆𑀫𑀢𑁆𑀣𑁂 𑀘 𑀅𑀦𑀸𑀬𑀸𑀲𑁂𑀦 𑀚𑀸𑀦𑀺𑀲𑁆𑀲𑀸𑀫, 𑀢𑀫𑁆𑀫𑀽𑀮𑀓𑀲𑁆𑀲 𑀘 𑀅𑀦𑀼𑀧𑀸𑀤𑀸 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀲𑁆𑀲 𑀧𑀬𑁄𑀚𑀦𑀲𑁆𑀲𑀪𑀸𑀕𑀺𑀦𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤 𑀲𑀫𑁆𑀪𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀺𑀡𑁆𑀟𑀢𑁆𑀣𑀸𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀢𑁆𑀣𑁂. ‘‘𑀩𑀼𑀚𑁆𑀛𑀻’’𑀢𑀺 𑀅𑀜𑁆𑀜𑀸𑀲𑀺. ‘‘𑀏𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀘 𑀲𑀤𑁆𑀤𑁄 𑀯𑀸𑀓𑁆𑀬𑀸𑀭𑀫𑁆𑀪 𑀚𑁄𑀢𑀓𑁄. 𑀯𑀸𑀓𑁆𑀬𑀸 𑀭𑀫𑁆𑀪𑁄𑀢𑀺 𑀘 𑀫𑀽𑀮𑀯𑀸𑀓𑁆𑀬𑁂 𑀬𑀁 𑀬𑀁 𑀯𑀢𑁆𑀢𑀩𑁆𑀩𑀁 𑀅𑀯𑀼𑀢𑁆𑀢𑀁, 𑀢𑀲𑁆𑀲 𑀢𑀲𑁆𑀲 𑀓𑀣𑀦𑀢𑁆𑀣𑀸𑀬 𑀅𑀦𑀼𑀯𑀸𑀓𑁆𑀬𑀲𑁆𑀲 𑀆𑀭𑀫𑁆𑀪𑁄. 𑀩𑀼𑀚𑁆𑀛𑀦𑀓𑀺𑀭𑀺𑀬𑀸𑀯𑀼𑀘𑁆𑀘𑀢𑀺𑀜𑀸𑀡𑀁. 𑀓𑀣𑀁𑀧𑀦𑀅𑀯𑀺𑀧𑀭𑀻𑀢𑀢𑁆𑀣𑁂 𑀧𑀯𑀢𑁆𑀢𑁄 𑀲𑀫𑁆𑀫𑀸𑀲𑀤𑁆𑀤𑁄 𑀅𑀲𑁂𑀲 𑀩𑁆𑀬𑀸𑀧𑀦𑀁 𑀤𑀻𑀧𑁂𑀢𑀻𑀢𑀺 𑀧𑀼𑀘𑁆𑀙𑀸𑀬 𑀧𑀼𑀭𑀺𑀫𑀢𑁆𑀣𑀫𑁂 𑀯𑀩𑁆𑀬𑀢𑀺𑀭𑁂𑀓𑀢𑁄 𑀘 𑀅𑀦𑁆𑀯𑀬𑀢𑁄 𑀘 𑀧𑀼𑀦 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣, ‘‘𑀢𑀣𑀸𑀳𑀻’’𑀢𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀬𑀁 𑀯𑀺𑀢𑁆𑀣𑀸𑀭𑁄𑀢𑀺 𑀚𑁄𑀢𑁂𑀢𑀺. ‘‘𑀅𑀯𑀺𑀧𑀭𑀻𑀢’’𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦 𑀧𑀤𑀫𑁂𑀢𑀁. ‘‘𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀯𑀸’’𑀢𑀺 𑀅𑀢𑁆𑀢𑀦𑁄 𑀜𑀸𑀡𑀯𑀺𑀲𑀬𑁂 𑀏𑀯 𑀢𑁂𑀲𑀁 𑀯𑀺𑀲𑀬𑁄𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀏𑀓𑁄𑀧𑀺 𑀥𑀫𑁆𑀫𑁄 𑀓𑀸𑀮𑀤𑁂𑀲𑀲𑀦𑁆𑀢𑀸𑀦𑀸𑀤𑀺𑀪𑁂𑀤𑁂𑀦 𑀅𑀦𑀦𑁆𑀢 𑀪𑁂𑀤𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀤𑁂𑀲𑀜𑀸𑀡𑀺𑀓𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄 𑀏𑀓𑀥𑀫𑁆𑀫𑀁𑀧𑀺 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑁂𑀳𑀻’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀲𑀩𑁆𑀩𑀸𑀓𑀸𑀭𑀢𑁄’’𑀢𑀺 𑀲𑀪𑀸𑀯𑀢𑁄, 𑀳𑁂𑀢𑀼𑀢𑁄, 𑀧𑀘𑁆𑀘𑀬𑀢𑁄, 𑀨𑀮𑀢𑁄, 𑀦𑀺𑀲𑁆𑀲𑀦𑁆𑀤𑀢𑁄, 𑀓𑀸𑀮𑀢𑁄, 𑀤𑁂𑀲𑀢𑁄𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦. ‘‘𑀬𑀢𑁆𑀣𑀸’’𑀢𑀺 𑀬𑀲𑁆𑀫𑀺𑀁 𑀅𑀯𑀺𑀲𑀬𑁂𑀥𑀫𑁆𑀫𑁂. ‘‘𑀢𑁂 𑀯𑀺𑀧𑀭𑀻𑀢𑀁 𑀩𑀼𑀚𑁆𑀛𑁂𑀬𑁆𑀬𑀼𑀁, 𑀲𑁄 𑀅𑀯𑀺𑀲𑀬𑁄 𑀦𑀸𑀫𑀥𑀫𑁆𑀫𑁄𑀦𑀢𑁆𑀣𑀻’’𑀢𑀺𑀬𑁄𑀚𑀦𑀸. 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 ‘‘𑀢𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣, ‘‘𑀢𑀺𑀬𑀤𑁆𑀥𑀕𑀢𑁂’’𑀢𑀺 𑀢𑀻𑀲𑀼𑀓𑀸𑀮𑁂𑀲𑀼 𑀕𑀢𑁂 𑀧𑀯𑀢𑁆𑀢𑁂. ‘‘𑀅𑀤𑁆𑀥𑀸𑀫𑀼𑀢𑁆𑀢𑀓𑁂’’𑀢𑀺 𑀓𑀸𑀮𑀢𑁆𑀢𑀬𑀯𑀺𑀫𑀼𑀢𑁆𑀢𑀓𑁂. ‘‘𑀳𑀢𑁆𑀣𑀫𑀡𑀺𑀓𑁂𑀯𑀺𑀬𑀸’’𑀢𑀺 𑀳𑀢𑁆𑀣 𑀢𑀮𑁂 𑀞𑀧𑀺𑀢𑀫𑀡𑀺𑀭𑀢𑀦𑀸𑀦𑀺𑀯𑀺𑀬. ‘‘𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺𑀆𑀤𑀺 𑀧𑀸𑀴𑀺𑀲𑀸𑀥𑀓𑀁. 𑀢𑀢𑁆𑀣, ‘‘𑀆𑀧𑀸𑀢’’𑀦𑁆𑀢𑀺 𑀅𑀪𑀺𑀫𑀼𑀔𑀁 𑀧𑀢𑀦𑀁. 𑀆𑀩𑀸𑀥𑀦𑁆𑀢𑀺𑀧𑀺 𑀧𑀸𑀞𑁄, 𑀑𑀢𑁆𑀣𑀭𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑀜𑁆𑀜𑀼𑀫𑀳𑀸𑀪𑀯𑀗𑁆𑀕’’𑀦𑁆𑀢𑀺 𑀲𑀩𑁆𑀩𑁂𑀲𑀁𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀧𑀘𑁆𑀙𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀁 𑀅𑀝𑁆𑀞𑀲𑀼 𑀫𑀳𑀸𑀯𑀺𑀧𑀸𑀓𑁂𑀲𑀼 𑀧𑀣𑀫𑀫𑀳𑀸𑀯𑀺𑀧𑀸𑀓𑀁 𑀪𑀯𑀗𑁆𑀕 𑀘𑀺𑀢𑁆𑀢𑀁. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀫𑀳𑀸𑀪𑀯𑀗𑁆𑀕𑁂. ‘‘𑀦𑀺𑀘𑁆𑀘𑀓𑀸𑀮𑀁 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀸𑀦𑀸𑀓𑀸𑀭 𑀧𑀢𑁆𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀓𑀲𑁆𑀫𑀸, 𑀓𑀲𑁆𑀲𑀘𑀺 𑀆𑀯𑀭𑀡𑀲𑁆𑀲 𑀅𑀪𑀸𑀯𑀢𑁄. 𑀇𑀤𑀁𑀧𑀺𑀳𑀺 𑀏𑀓𑀁 𑀉𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺. ‘‘𑀆𑀯𑀚𑁆𑀚𑀦𑀸𑀬𑀸’’𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦 𑀘𑀺𑀢𑁆𑀢𑁂𑀦. 𑀥𑀫𑁆𑀫𑀸 𑀫𑀳𑀦𑁆𑀢𑀸. 𑀪𑀯𑀗𑁆𑀕𑀁 𑀧𑀭𑀺𑀢𑁆𑀢𑀓𑀁. 𑀢𑀲𑁆𑀫𑀸 𑀧𑀭𑀺𑀢𑁆𑀢𑀓𑀁 𑀪𑀯𑀗𑁆𑀕𑀁 𑀏𑀓𑀓𑁆𑀔𑀡𑁂 𑀫𑀳𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀦𑀧𑀳𑁄𑀢𑀻𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀘𑁄𑀤𑁂𑀢𑀩𑁆𑀩𑀫𑁂𑀢’’𑀦𑁆𑀢𑀺 𑀏𑀢𑀁 𑀞𑀸𑀦𑀁 𑀦𑀘𑁄𑀤𑁂𑀢𑀩𑁆𑀩𑀁. ‘‘𑀧𑀭𑀫𑀼𑀓𑁆𑀓𑀁𑀲𑀧𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣 ‘‘𑀉𑀓𑁆𑀓𑀁𑀲𑁄’’𑀢𑀺 𑀅𑀘𑁆𑀘𑀼𑀕𑁆𑀕𑀫𑁄 𑀅𑀘𑁆𑀘𑀼𑀢𑁆𑀢𑀭𑁄. 𑀧𑀭𑀫𑁄 𑀉𑀓𑁆𑀓𑀁𑀲𑁄 𑀧𑀭𑀫𑀼𑀓𑁆𑀓𑀁𑀲𑁄𑀢𑀺𑀯𑀺𑀕𑁆𑀕𑀳𑁄.

𑀏𑀯𑀁 𑀲𑀫𑁆𑀫𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀲𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀲𑀁𑀲𑀤𑁆𑀤𑁄𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣, ‘‘𑀉𑀧𑀲𑀕𑁆𑀕𑁄’’𑀢𑀺 𑀉𑀧𑀲𑀕𑁆𑀕𑀧𑀤𑀁. ‘‘𑀧𑀝𑀺𑀯𑁂𑀥𑀥𑀫𑁆𑀫𑁂𑀲𑀽’’𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀦𑀁 𑀧𑀝𑀺𑀯𑀺𑀚𑁆𑀛𑀦𑀜𑁆𑀜𑀸𑀡𑁂𑀲𑀼. 𑀦𑀢𑁆𑀣𑀺 𑀆𑀘𑀭𑀺𑀬𑁄 𑀏𑀢𑀲𑁆𑀲𑀸𑀢𑀺 𑀅𑀦𑀸𑀘𑀭𑀺𑀬𑁄. 𑀲𑀫𑀸𑀲𑀦𑁆𑀢𑁂 𑀓𑀓𑀸𑀭𑁂𑀦 𑀲𑀳 𑀅𑀦𑀸𑀘𑀭𑀺𑀬𑀓𑁄. 𑀅𑀦𑀸𑀘𑀭𑀺𑀬𑀓𑀲𑁆𑀲 𑀪𑀸𑀯𑁄 𑀅𑀦𑀸𑀘𑀭𑀺𑀬𑀓𑀢𑀸. 𑀢𑀁 𑀅𑀦𑀸𑀘𑀭𑀺𑀬𑀓𑀢𑀁. 𑀢𑀢𑀻𑀬𑀸 𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺 𑀦𑀸𑀫 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁. 𑀢𑀁 𑀪𑀕𑀯𑀸 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀸𑀢𑀺. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺 𑀦𑀸𑀫 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁. 𑀢𑀁 𑀉𑀤𑀓𑀲𑁆𑀲𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀴𑀸𑀭𑀼𑀤𑀓𑀫𑀽𑀮𑀺𑀓𑀸’’𑀢𑀺. ‘‘𑀅𑀦𑀮𑀗𑁆𑀓𑀭𑀺𑀢𑁆𑀯𑀸’’𑀢𑀺 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀮𑀗𑁆𑀓𑀭𑀺𑀢𑁆𑀯𑀸. 𑀅𑀦𑀸𑀲𑁂𑀯𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀙𑀟𑁆𑀟𑀺𑀢𑀢𑁆𑀢𑀸’’𑀢𑀺 𑀏𑀢𑀸𑀲𑀫𑀸𑀧𑀢𑁆𑀢𑀺𑀬𑁄𑀦𑀸𑀮𑀁 𑀩𑁄𑀥𑀸𑀬, 𑀅𑀣 𑀔𑁄 𑀬𑀸𑀯𑀤𑁂𑀯 𑀢𑀢𑀻𑀬 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀪𑀯𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀙𑀟𑁆𑀟𑀺𑀢𑀢𑁆𑀢𑀸. ‘‘𑀩𑀼𑀚𑁆𑀛𑀦𑀓𑀺𑀭𑀺𑀬𑀸𑀬𑀸’’𑀢𑀺 𑀧𑀝𑀺𑀯𑁂𑀥𑀜𑁆𑀜𑀸𑀡𑀲𑁆𑀲. ‘‘𑀓𑀼𑀢𑁄 𑀧𑀝𑀺𑀯𑁂𑀥𑀥𑀫𑁆𑀫𑀸’’𑀢𑀺 𑀢𑀸 𑀓𑀼𑀢𑁄 𑀧𑀝𑀺𑀯𑁂𑀥𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀧𑀝𑀺𑀯𑁂𑀥𑀥𑀫𑁆𑀫𑀸 𑀏𑀯 𑀘 𑀩𑀼𑀤𑁆𑀥𑀪𑀸𑀯𑀸𑀬𑀧𑀤𑀝𑁆𑀞𑀸𑀦𑀸𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀸𑀴𑀺𑀬𑀁. ‘‘𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼𑀥𑀫𑁆𑀫𑁂𑀲𑀽’’𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀇𑀢𑁄 𑀧𑀼𑀩𑁆𑀩𑁂 𑀓𑀲𑁆𑀲𑀘𑀺𑀲𑀦𑁆𑀢𑀺𑀓𑁂 𑀅𑀦𑀦𑀼𑀲𑁆𑀲𑀼𑀢𑁂 𑀲𑀼𑀘𑀢𑀼𑀲𑁆𑀲𑀘𑁆𑀘 𑀥𑀫𑁆𑀫𑁂𑀲𑀼. ‘‘𑀅𑀪𑀺𑀲𑀫𑁆𑀩𑀼𑀚𑁆𑀛𑀻’’𑀢𑀺𑀧𑀤𑁂 𑀅𑀪𑀺𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑁆𑀜𑀸𑀡𑀁 𑀯𑀼𑀢𑁆𑀢𑀁. 𑀢𑀤𑁂𑀯 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀧𑁆𑀧𑀘𑁆𑀘𑀬𑀸 𑀢𑀤𑀦𑀦𑁆𑀢𑀭𑀸 𑀏𑀯𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀸𑀢𑀼𑀩𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀢𑀤𑀦𑀦𑁆𑀢𑀭𑀸’’𑀢𑀺 𑀘 𑀅𑀭𑀳𑀢𑁆𑀢 𑀫𑀕𑁆𑀕𑀯𑀻𑀣𑀺𑀬𑀸𑀘 𑀘𑀢𑀼𑀦𑁆𑀦𑀁 𑀧𑀘𑁆𑀘𑀯𑁂𑀓𑁆𑀔𑀦 𑀯𑀸𑀭𑀸𑀦𑀜𑁆𑀘 𑀅𑀦𑀦𑁆𑀢𑀭𑁂 𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀦𑀺𑀫𑀺𑀢𑁆𑀢𑀢𑁆𑀣𑁂’’𑀢𑀺 𑀦𑀺𑀫𑀺𑀢𑁆𑀢 𑀳𑁂𑀢𑁆𑀯𑀢𑁆𑀣𑁂. ‘‘𑀪𑀼𑀫𑁆𑀫’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼𑀆𑀕𑀢𑀁 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀸𑀦𑀸𑀫𑀁. 𑀢𑀸𑀲𑀼 𑀳𑀺 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀉𑀧𑀬𑁄𑀕𑀯𑀘𑀦𑀁, 𑀓𑀭𑀡 𑀯𑀘𑀦𑀁, 𑀲𑀫𑁆𑀧𑀤𑀸𑀦 𑀯𑀘𑀦𑀁, 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀲𑀸𑀫𑀺𑀯𑀘𑀦𑀁, 𑀲𑀼𑀫𑁆𑀫𑀯𑀘𑀦𑀦𑁆𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀲𑀢𑁆𑀢𑀦𑁆𑀦𑀁 𑀯𑀺𑀪𑀢𑁆𑀢𑀻𑀦𑀁 𑀦𑀸𑀫𑀸𑀦𑀺 𑀆𑀕𑀢𑀸𑀦𑀻𑀢𑀺.

‘‘𑀤𑀲𑀩𑀮𑀜𑁆𑀜𑀸𑀡𑁂𑀲𑀽’’𑀢𑀺 𑀞𑀸𑀦𑀸𑀞𑀸𑀦 𑀓𑁄𑀲𑀮𑁆𑀮𑀜𑁆𑀜𑀸𑀡𑀸𑀤𑀻𑀲𑀼 𑀤𑀲 𑀜𑀸𑀡𑀩𑀮𑁂𑀲𑀼. ‘‘𑀯𑀲𑀺𑀪𑀸𑀯’’𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑀢𑀸 𑀲𑀗𑁆𑀔𑀸𑀢𑁄𑀲𑀢𑁆𑀢𑀺 𑀯𑀺𑀲𑁂𑀲𑁄 𑀯𑀲𑁄𑀦𑀸𑀫. 𑀯𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀲𑀻-𑀯𑀲𑀺𑀕𑀡𑁂𑀳𑀻𑀢𑀺𑀆𑀤𑀻𑀲𑀼𑀯𑀺𑀬. 𑀯𑀲𑀺𑀦𑁄 𑀪𑀸𑀯𑁄 𑀯𑀲𑀺𑀪𑀸𑀯𑁄. 𑀢𑀁 𑀯𑀲𑀺𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀲𑀺𑀪𑀸𑀯’’𑀦𑁆𑀢𑀺 𑀇𑀲𑁆𑀲𑀭𑀪𑀸𑀯𑀦𑁆𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀯𑀲𑀻’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀤𑀁𑀧𑀺 𑀤𑀺𑀲𑁆𑀲𑀢𑀺=𑀢𑀢𑁆𑀭𑀺𑀫𑀸 𑀧𑀜𑁆𑀘𑀯𑀲𑀺𑀬𑁄 𑀆𑀯𑀚𑁆𑀚𑀦𑀯𑀲𑀻𑀲𑀫𑀸𑀧𑀚𑁆𑀚𑀦𑀯𑀲𑀻=𑀢𑀺𑀆𑀤𑀻𑀲𑀼.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤.

𑁫. 𑀅𑀢𑀼𑀮𑀧𑀤𑁂. 𑀅𑀦𑁂𑀓𑁂𑀳𑀺𑀕𑀼𑀡𑀧𑀤𑁂𑀳𑀺 𑀧𑀯𑀢𑁆𑀢𑀺𑀢𑀸𑀯𑀦𑁆𑀤𑀦𑀸 ‘‘𑀅𑀦𑁂𑀓𑀕𑀼𑀡𑀧𑀤𑀯𑀺𑀲𑀬𑀸𑀦𑀸𑀫’’. ‘‘𑀇𑀢𑀺𑀓𑀺𑀁𑀤𑀼𑀢𑀻𑀬𑁂𑀦𑀸’’𑀢𑀺 𑀇𑀢𑀺 𑀢𑀲𑁆𑀫𑀸 𑀤𑀼𑀢𑀻𑀬𑁂𑀦 𑀅𑀢𑀼𑀮𑀧𑀤𑁂𑀦 𑀓𑀺𑀁 𑀧𑀬𑁄𑀚𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀦𑀦 𑀲𑀫𑀢𑁆𑀣𑀸’’𑀢𑀺 𑀦𑀲𑀫𑀢𑁆𑀣𑀸 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀫𑀢𑁆𑀣𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀫𑀢𑁆𑀢𑀓𑀸𑀭𑀺𑀦𑁄’’𑀢𑀺 𑀧𑀫𑀸𑀡𑀓𑀸𑀭𑀺𑀦𑁄. ‘‘𑀣𑁂𑀭𑁄 𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄’’, 𑀢𑀲𑁆𑀫𑀸 𑀫𑀢𑁆𑀢𑀁 𑀦 𑀓𑀭𑁄𑀢𑀺, 𑀤𑀼𑀢𑀻𑀬𑀁 𑀅𑀢𑀼𑀮 𑀧𑀤𑀁 𑀆𑀳𑀭𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀧𑀺𑀘𑀸’’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀦𑀓𑁂𑀯𑀮𑀁 𑀯𑀦𑁆𑀤𑀦𑀸𑀬 𑀅𑀦𑁆𑀢𑀭𑀸𑀬𑀦𑀻𑀯𑀸𑀭𑀡𑀫𑁂𑀯 𑀇𑀘𑁆𑀙𑀺 𑀢𑀩𑁆𑀩𑀁 𑀳𑁄𑀢𑀻’’𑀢𑀺 𑀬𑁄𑀚𑀦𑀸. ‘‘𑀯𑀦𑁆𑀤𑀦𑀸𑀬𑀸’’𑀢𑀺 𑀯𑀦𑁆𑀤𑀦𑀸𑀳𑁂𑀢𑀼. 𑀲𑁄𑀧𑀺 𑀧𑀜𑁆𑀜𑀸𑀧𑀸𑀝𑀯𑀸𑀤𑀺 𑀅𑀢𑁆𑀣𑁄. ‘‘𑀕𑀦𑁆𑀣𑀧𑀸𑀭𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀕𑀦𑁆𑀣𑀤𑁄𑀲𑀸𑀦𑀸𑀫 𑀧𑀤𑀤𑁄𑀲 𑀯𑀸𑀓𑁆𑀬𑀤𑁄𑀲 𑀅𑀢𑁆𑀣𑀤𑁄𑀲𑀸𑀤𑀬𑁄 𑀅𑀢𑁆𑀣𑀺. 𑀢𑁂𑀳𑀺 𑀤𑁄𑀲𑁂𑀳𑀺 𑀇𑀫𑀲𑁆𑀲 𑀕𑀦𑁆𑀣𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀺𑀬𑀸. 𑀓𑀣𑀁 𑀧𑀦 𑀯𑀦𑁆𑀤𑀦𑀸𑀬 𑀧𑀜𑁆𑀜𑀸𑀧𑀸𑀝𑀯𑀸𑀤𑀺 𑀅𑀢𑁆𑀣𑁄𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑁂𑀲𑀽’’𑀢𑀺𑀆𑀤𑀺. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀦𑀸𑀫 𑀩𑀼𑀤𑁆𑀥 𑀥𑀫𑁆𑀫 𑀲𑀗𑁆𑀖𑀲𑀻𑀮𑀸𑀤𑀻𑀦𑀺. 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀆𑀯𑀳𑀢𑀻𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀸𑀯𑀳𑁄. ‘‘𑀢𑀺𑀓𑁆𑀔𑀸𑀲𑀽𑀭𑀸𑀳𑀼𑀢𑁆𑀯𑀸𑀯𑀳𑀢𑀻’’𑀢𑀺 𑀕𑀫𑁆𑀪𑀻𑀭𑁂𑀲𑀼 𑀅𑀢𑁆𑀣 𑀩𑁆𑀬𑀜𑁆𑀚𑀦 𑀧𑀤𑁂𑀲𑀼 𑀅𑀫𑀦𑁆𑀤𑀸 𑀯𑀺𑀲𑁆𑀲𑀝𑁆𑀞𑀸 𑀳𑀼𑀢𑁆𑀯𑀸 𑀯𑀳𑀢𑀺. ‘‘𑀢𑀤𑀢𑁆𑀣𑀸𑀬𑀧𑀻’’𑀢𑀺 𑀧𑀜𑁆𑀜𑀸𑀧𑀸𑀝𑀯𑀸𑀤𑀺 𑀅𑀢𑁆𑀣𑀸𑀬𑀧𑀺. 𑀕𑀼𑀡𑀦𑀸𑀫𑀧𑀤𑀸𑀦𑀁 𑀕𑀼𑀡𑀢𑁆𑀣𑁄𑀦𑀸𑀫𑀯𑀺𑀕𑁆𑀕𑀳 𑀯𑀸𑀓𑁆𑀬𑁂𑀲𑀼 𑀧𑀸𑀓𑀝𑁄, 𑀲𑀺𑀤𑁆𑀥𑀧𑀤𑁂𑀲𑀼 𑀅𑀧𑀸𑀓𑀝𑁄. 𑀢𑀲𑁆𑀫𑀸 𑀢𑀸𑀦𑀺 𑀯𑀺𑀕𑁆𑀕𑀳𑀢𑁆𑀣𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀦𑀸𑀫 𑀫𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀣𑀸𑀯𑀼𑀢𑁆𑀢 𑀯𑀘𑀦𑀢𑁆𑀣𑀬𑁄𑀕𑁂𑀧𑀺…𑀧𑁂… 𑀧𑀯𑀢𑁆𑀢𑀢𑁆𑀢𑀸’’𑀢𑀺. ‘‘𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀚𑀸𑀦𑀦𑁆𑀢𑀸𑀦’’𑀦𑁆𑀢𑀺 𑀫𑀸𑀕𑀥 𑀪𑀸𑀲𑀁 𑀚𑀸𑀦𑀦𑁆𑀢𑀸𑀦𑀁. 𑀫𑀸𑀕𑀥𑀪𑀸𑀲𑀸𑀳𑀺 𑀫𑀽𑀮𑀪𑀸𑀲𑀸𑀢𑀺 𑀘 𑀅𑀭𑀺𑀬𑀪𑀸𑀲𑀸𑀢𑀺 𑀘 𑀫𑀸𑀕𑀥𑀪𑀸𑀲𑀸𑀢𑀺 𑀘 𑀧𑀸𑀴𑀺𑀪𑀸𑀲𑀸𑀢𑀺 𑀘 𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀢𑀺 𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀘 𑀯𑀼𑀘𑁆𑀘𑀢𑀺. ‘‘𑀪𑀸𑀯𑀢𑁆𑀣𑀲𑀼𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀕𑀼𑀡𑀦𑀸𑀫𑀸𑀦𑀁 𑀕𑀼𑀡𑀢𑁆𑀣𑁄 𑀪𑀸𑀯𑀢𑁆𑀣𑁄 𑀦𑀸𑀫. 𑀲𑁄 𑀏𑀯𑀲𑀓𑀢𑁆𑀣𑁄𑀢𑀺 𑀘 𑀯𑀘𑀦𑀢𑁆𑀣𑁄𑀢𑀺 𑀘 𑀯𑀺𑀕𑁆𑀕𑀳𑀢𑁆𑀣𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀭𑀺𑀬𑀦𑀸𑀫𑀸𑀤𑀻𑀲𑀽𑀧𑀺 𑀏𑀲𑁂𑀯𑀦𑀬𑁄. ‘‘𑀲𑀢𑁆𑀣𑀽’’𑀢𑀺 𑀲𑀢𑁆𑀣𑀼𑀦𑁄. ‘‘𑀲𑀫𑀜𑁆𑀜𑀸𑀫𑀢𑁆𑀢’’𑀦𑁆𑀢𑀺 𑀦𑀸𑀫𑀲𑀜𑁆𑀜𑀸𑀫𑀢𑁆𑀢𑀁 𑀪𑀯𑀺𑀢𑀼𑀁 𑀦𑀸𑀭𑀳𑀢𑀺. 𑀢𑀣𑀸𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀲𑁂𑀝𑁆𑀞𑀺 𑀭𑀸𑀚𑀕𑀳𑀁 𑀅𑀦𑀼𑀧𑀢𑁆𑀢𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄𑀢𑀺 𑀲𑀼𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺=𑀖𑁄𑀲𑁄𑀧𑀺 𑀔𑁄 𑀏𑀲𑁄𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑀩𑀼𑀤𑁆𑀥𑁄=𑀢𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄𑀢𑀺 𑀦𑀸𑀫𑀁𑀧𑀺 𑀮𑁄𑀓𑁂 𑀫𑀳𑀦𑁆𑀢𑀁 𑀲𑀼𑀤𑀼𑀮𑁆𑀮𑀪𑀁𑀕𑀼𑀡𑀧𑀤𑀁 𑀳𑁄𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥 𑀦𑀸𑀫𑁂𑀯𑀢𑁆𑀢𑀩𑁆𑀩𑀫𑁂𑀯𑀦𑀢𑁆𑀣𑀻𑀢𑀺. ‘‘𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸𑀦𑀁 𑀧𑀦 𑀧𑀤𑀲𑀳𑀲𑁆𑀲𑀁 𑀯𑀼𑀘𑁆𑀘𑀫𑀸𑀦𑀁𑀧𑀻’’𑀢𑀺 𑀢𑀺𑀝𑁆𑀞𑀢𑀼 𑀏𑀓𑀁 𑀅𑀢𑀼𑀮𑀧𑀤𑀁, 𑀧𑀤𑀲𑀳𑀲𑁆𑀲𑀁𑀧𑀺 𑀯𑀼𑀘𑁆𑀘𑀫𑀸𑀦𑀁 𑀲𑀢𑁆𑀣𑀼𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯 𑀲𑀫𑁆𑀧𑀚𑁆𑀚𑀢𑀺. 𑀢𑀸𑀤𑀺𑀲𑀸𑀳𑀺 𑀚𑀦𑀸 𑀇𑀤𑀁 𑀮𑁄𑀓𑁂 𑀫𑀳𑀦𑁆𑀢𑀁 𑀕𑀼𑀡𑀧𑀤𑀦𑁆𑀢𑀺𑀧𑀺 𑀦𑀚𑀸𑀦𑀦𑁆𑀢𑀺. 𑀪𑀸𑀯𑀢𑁆𑀣𑀁 𑀓𑀺𑀁𑀚𑀸𑀦𑀺𑀲𑁆𑀲𑀦𑁆𑀢𑀺.

‘‘𑀅𑀢𑀼𑀮𑁄’’𑀢𑀺 𑀅𑀜𑁆𑀜𑁂𑀦 𑀲𑁄 𑀅𑀲𑀤𑀺𑀲𑁄𑀢𑀺 𑀯𑀸, 𑀅𑀜𑁆𑀜𑁄 𑀯𑀸𑀢𑁂𑀦 𑀲𑀤𑀺𑀲𑁄𑀢𑀲𑁆𑀲𑀦𑀢𑁆𑀣𑀻𑀢𑀺𑀯𑀸, - 𑀤𑁆𑀯𑀺𑀥𑀸𑀧𑀺𑀅𑀢𑁆𑀣𑁄𑀮𑀩𑁆𑀪𑀢𑀺. 𑀲𑀸𑀥𑀓𑀕𑀸𑀣𑀸𑀬𑀁 ‘‘𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺 𑀬𑀼𑀕𑀕𑁆𑀕𑀸𑀳𑀻𑀧𑀼𑀕𑁆𑀕𑀮𑁄. 𑀓𑀺𑀜𑁆𑀘𑀸𑀧𑀺 𑀫𑀓𑁆𑀔𑀮𑀺 𑀧𑀽𑀭𑀡𑀸𑀤𑀬𑁄 𑀯𑀺𑀲𑀼𑀁𑀯𑀺𑀲𑀼𑀁 - 𑀅𑀳𑀁 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 - 𑀢𑀺𑀘, 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄-𑀢𑀺𑀘 𑀧𑀝𑀺𑀚𑀸𑀦𑀦𑁆𑀢𑀸 𑀬𑀼𑀕𑀕𑁆𑀕𑀸𑀳𑀺𑀦𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀥𑀫𑁆𑀫𑀢𑁄 𑀧𑀦 𑀲𑀺𑀦𑁂𑀭𑀼 𑀧𑀩𑁆𑀩𑀢 𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀲𑀓𑁆𑀔𑀭 𑀓𑀣𑀮𑀸𑀦𑀺𑀯𑀺𑀬𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺. ‘‘𑀅𑀦𑀘𑁆𑀙𑀭𑀺𑀬’’𑀦𑁆𑀢𑀺 𑀦𑀢𑀸𑀯 𑀅𑀘𑁆𑀙𑀭𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀩𑀼𑀤𑁆𑀥𑀪𑀽𑀢𑀲𑁆𑀲𑀸’’𑀢𑀺 𑀩𑀼𑀤𑁆𑀥𑀪𑀸𑀯𑀁 𑀪𑀽𑀢𑀲𑁆𑀲𑀧𑀢𑁆𑀢𑀲𑁆𑀲. ‘‘𑀬𑀁 𑀩𑀼𑀤𑁆𑀥 𑀪𑀽𑀢𑀲𑁆𑀲 𑀅𑀢𑀼𑀮𑀢𑁆𑀢𑀁, 𑀏𑀢𑀁 𑀅𑀦𑀘𑁆𑀙𑀭𑀺𑀬’’𑀦𑁆𑀢𑀺 𑀬𑁄𑀚𑀦𑀸. 𑀬𑀤𑀺 𑀘𑁂𑀢𑀁 𑀅𑀦𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀓𑀢𑀫𑀁 𑀧𑀦 𑀢𑀸𑀯 𑀅𑀘𑁆𑀙𑀭𑀺𑀬𑀁 𑀪𑀯𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀸’’𑀢𑀺 𑀅𑀚𑁆𑀚𑁂𑀯𑀚𑀸𑀢𑀲𑁆𑀲𑀧𑀺 𑀅𑀲𑁆𑀲 𑀪𑀕𑀯𑀢𑁄. 𑀓𑀣𑀁 𑀅𑀢𑀼𑀮𑀢𑀸 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀤𑀸𑀳𑀻’’𑀢𑀺𑀆𑀤𑀺𑀁. ‘‘𑀏𑀓𑀗𑁆𑀕𑀡𑀸𑀦𑀻’’𑀢𑀺 𑀏𑀓𑀢𑀮𑀸𑀦𑀺. 𑀢𑀤𑀸𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀢𑀺𑀫𑀳𑀦𑁆𑀢𑁄 𑀑𑀪𑀸𑀲𑁄 𑀧𑀸𑀢𑀼𑀩𑁆𑀪𑀯𑀢𑀺. = 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑁆𑀓𑀫𑁆𑀫𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯=𑀦𑁆𑀢𑀺𑀳𑀺 𑀯𑀼𑀢𑁆𑀢𑀁. 𑀢𑁂𑀦 𑀑𑀪𑀸𑀲𑁂𑀦 𑀨𑀭𑀺𑀢𑀸 𑀲𑀩𑁆𑀩𑁂 𑀧𑀣𑀯𑀺 𑀧𑀩𑁆𑀩𑀢𑀸𑀤𑀬𑁄 𑀚𑀸𑀢𑀺𑀨𑀮𑀺𑀓𑀓𑁆𑀔𑀦𑁆𑀥𑀸𑀯𑀺𑀬 𑀲𑀼𑀧𑁆𑀧𑀲𑀦𑁆𑀦𑀸 𑀳𑁄𑀦𑁆𑀢𑀺. 𑀤𑀲𑀲𑀳𑀲𑁆𑀲 𑀘𑀓𑁆𑀓𑀯𑀸𑀴𑀸𑀦𑀺 𑀏𑀓𑀢𑀮𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼’’𑀦𑁆𑀢𑀺. ‘‘𑀧𑀭𑀫𑀸𑀬 𑀧𑀽𑀚𑀸𑀬𑀸𑀢𑀺 𑀣𑀼𑀢𑀺𑀫𑀗𑁆𑀕𑀮𑀯𑀘𑀦𑀧𑀽𑀚𑀸𑀬. ‘‘𑀮𑁄𑀓𑀲𑁆𑀲𑀸’’𑀢𑀺 𑀲𑀩𑁆𑀩 𑀲𑀢𑁆𑀢𑀮𑁄𑀓𑀢𑁄. 𑀏𑀯𑀁 𑀅𑀘𑁆𑀙𑀫𑁆𑀪𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺 𑀥𑀫𑁆𑀫𑀢𑀸𑀬 𑀲𑀜𑁆𑀘𑁄𑀤𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 ‘‘𑀅𑀘𑁆𑀙𑀫𑁆𑀪𑀺𑀯𑀸𑀘’’𑀦𑁆𑀢𑀺 𑀯𑀺𑀲𑀸𑀭𑀤𑀯𑀸𑀘𑀁. 𑀆𑀲𑀪𑀺𑀁 𑀯𑀸𑀘𑀦𑁆𑀢𑀺𑀧𑀺 𑀧𑀸𑀞𑁄. 𑀉𑀢𑁆𑀢𑀫𑀯𑀸𑀘𑀦𑁆𑀢𑀺 𑀅𑀢𑁆𑀣𑁄. ‘‘𑀦𑀺𑀘𑁆𑀙𑀸𑀭𑁂𑀲𑀻’’𑀢𑀺 𑀉𑀤𑀸𑀳𑀭𑀢𑀺. 𑀇𑀤𑀫𑁆𑀧𑀺 𑀅𑀦𑀘𑁆𑀙𑀭𑀺𑀬𑀁, 𑀅𑀜𑁆𑀜𑀁 𑀧𑀺𑀢𑀢𑁄 𑀅𑀘𑁆𑀙𑀭𑀺𑀬𑀢𑀭𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀸𑀭𑀫𑀺𑀢𑀸 𑀕𑀼𑀡𑁂𑀳𑀺 𑀢𑁂𑀦 𑀲𑀤𑀺𑀲𑁄 𑀓𑁄𑀘𑀺𑀦𑀢𑁆𑀣𑁂𑀯 𑀣𑀧𑁂𑀢𑁆𑀯𑀸 𑀅𑀜𑁆𑀜𑁂 𑀘 𑀫𑀳𑀸𑀩𑁄𑀥𑀺 𑀲𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀲𑁆𑀲𑀸’’𑀢𑀺 𑀢𑁂𑀦 𑀲𑀤𑀺𑀲𑀲𑁆𑀲. ‘‘𑀦𑀢𑁆𑀣𑀺𑀪𑀸𑀯𑁄 𑀤𑀻𑀧𑁂𑀢𑀩𑁆𑀩𑁄’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀤𑀻𑀧𑁂𑀢𑀩𑁆𑀩𑁄’’𑀢𑀺 𑀩𑀼𑀤𑁆𑀥𑀯𑀁𑀲𑀧𑀸𑀴𑀺𑀢𑁄 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄. ‘‘𑀓𑀼𑀢𑁄𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀢𑀲𑀳𑀲𑁆𑀲𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀬𑁄𑀚𑀦𑀸. 𑀧𑀸𑀭𑀫𑀺𑀬𑁄 𑀧𑀓𑀸𑀭𑁂𑀦𑀯𑀺𑀘𑀺𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀭𑀫𑀺𑀧𑀯𑀺𑀘𑀬𑁄. 𑀜𑀸𑀡𑀁. 𑀢𑀁𑀧𑀦𑀜𑀸𑀡𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀏𑀯 𑀉𑀧𑁆𑀧𑀦𑁆𑀦𑀁 𑀦𑀳𑁄𑀢𑀺. 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁𑀧𑀺 𑀉𑀧𑁆𑀧𑀦𑁆𑀦𑀫𑁂𑀯. 𑀢𑀤𑁂𑀯 𑀘 𑀲𑀩𑁆𑀩𑁂𑀲𑀁𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀦𑀺𑀬𑀢𑀩𑁆𑀬𑀸𑀓𑀭𑀡𑀧𑁆𑀧𑀝𑀺𑀮𑀸𑀪𑁂 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁄𑀥𑀺𑀯𑀼𑀘𑁆𑀘𑀢𑀺𑀯𑀺𑀫𑁄𑀓𑁆𑀔𑀜𑁆𑀜𑀸𑀡𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀩𑁄𑀥𑀺𑀫𑁆𑀳𑀺𑀲𑀚𑀦𑁆𑀢𑀺 𑀮𑀕𑁆𑀕𑀦𑁆𑀢𑀻𑀢𑀺 𑀩𑁄𑀥𑀺𑀲𑀢𑁆𑀢𑀸. ‘‘𑀮𑀕𑁆𑀕𑀦𑁆𑀢𑀻’’𑀢𑀺 𑀢𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬 𑀦𑀺𑀬𑀢 𑀘𑀺𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀩𑁄𑀥𑀺 𑀅𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀸 𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀩𑀼𑀤𑁆𑀥 𑀲𑀼𑀜𑁆𑀜𑁂𑀧𑀺𑀮𑁄𑀓𑁂 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂 𑀞𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑀥𑀫𑁆𑀫𑀧𑀭𑀺𑀬𑁂𑀲𑀺𑀦𑁄 𑀲𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀫𑁆𑀪𑀸𑀭 𑀥𑀫𑁆𑀫𑁂’’𑀢𑀺 𑀤𑀲𑀯𑀺𑀥𑁂 𑀧𑀸𑀭𑀫𑀺 𑀥𑀫𑁆𑀫𑁂. 𑀯𑀝𑁆𑀝𑀁 𑀅𑀦𑀼𑀲𑀭𑀦𑁆𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀻𑀢𑀺 𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄. 𑀧𑀣𑀯𑀺𑀬𑀁 𑀧𑀁𑀲𑀼𑀘𑀼𑀡𑁆𑀡𑀸𑀦𑀺 𑀯𑀺𑀬 𑀧𑀓𑀢𑀺𑀬𑀸 𑀯𑀧𑀼𑀣𑀼𑀪𑀽𑀢𑀸𑀚𑀦𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀫𑀳𑀦𑁆𑀢𑀸𑀧𑀼𑀣𑀼𑀚𑁆𑀚𑀦𑀸𑀢𑀺 𑀫𑀳𑀸𑀧𑀼𑀣𑀼𑀚𑁆𑀚𑀦𑀸. 𑀯𑀝𑁆𑀝𑀸𑀦𑀼𑀲𑀸𑀭𑀺𑀦𑁄 𑀘 𑀢𑁂 𑀫𑀳𑀸𑀧𑀼𑀣𑀼𑀚𑁆𑀚𑀦𑀸𑀘𑀸𑀢𑀺 𑀲𑀫𑀸𑀲𑁄. 𑀢𑁂𑀲𑀁 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. 𑀅𑀬𑀁 𑀪𑀸𑀯𑁄𑀬𑁂𑀯 𑀢𑁂𑀲𑀁 𑀪𑀽𑀫𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀢𑁄 𑀧𑀦 𑀫𑁄𑀓𑁆𑀔𑀥𑀫𑁆𑀫𑀦𑀺𑀭𑀧𑁂𑀓𑁆𑀔𑀢𑀸 𑀏𑀯. 𑀅𑀘𑁆𑀙𑀦𑁆𑀤𑀺𑀓𑀢𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀑𑀓𑁆𑀓𑀦𑁆𑀢𑀸’’𑀢𑀺 𑀧𑀯𑀺𑀝𑁆𑀞𑀸. 𑀢𑀬𑁄𑀦𑀺𑀬𑀢𑀸, 𑀩𑁄𑀥𑀺𑀲𑀢𑁆𑀢𑀦𑀺𑀬𑀢𑁄 𑀘 𑀘𑀽𑀴𑀲𑁄𑀢𑀸𑀧𑀦𑁆𑀦𑀦𑀺𑀬𑀢𑁄 𑀘 𑀅𑀭𑀺𑀬 𑀲𑁄𑀢𑀸𑀧𑀦𑁆𑀦𑀦𑀺𑀬𑀢𑁄 𑀘. 𑀢𑀢𑁆𑀣 𑀩𑁄𑀥𑀺𑀲𑀢𑁆𑀢𑀦𑀺𑀬𑀢𑁄 𑀩𑁄𑀥𑀺𑀲𑀫𑁆𑀪𑀸𑀭𑀩𑀮𑁂𑀦 𑀲𑀺𑀤𑁆𑀥𑁄. 𑀘𑀽𑀴𑀲𑁄𑀢𑀸𑀧𑀦𑁆𑀦 𑀦𑀺𑀬𑀢𑁄 𑀧𑀘𑁆𑀘𑀬𑀸𑀓𑀸𑀭𑀸𑀦𑀼𑀩𑁄𑀥𑀜𑁆𑀜𑀸𑀡𑀩𑀮𑁂𑀦. 𑀅𑀭𑀺𑀬𑀲𑁄𑀢𑀸𑀧𑀦𑁆𑀦 𑀦𑀺𑀬𑀢𑁄 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀜𑁆𑀜𑀸𑀡 𑀩𑀮𑁂𑀦. 𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀦𑀺𑀬𑀢𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺. 𑀯𑀢𑁆𑀢𑀩𑁆𑀩𑀫𑁂𑀯𑀦𑀢𑁆𑀣𑀺𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀸𑀭𑀫𑀺 𑀧𑀯𑀺𑀘𑀬𑀜𑁆𑀜𑀸𑀡 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀦𑀸 𑀦𑀺𑀬𑀢𑀩𑁆𑀬𑀸𑀓𑀭𑀡 𑀮𑀸𑀪𑀸 𑀲𑀗𑁆𑀓𑀸𑀬 𑀏𑀯 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀤𑀲𑀺𑀤𑁆𑀥𑀺𑀯𑀺𑀘𑀸𑀭𑁂𑀬𑀁 𑀯𑀼𑀢𑁆𑀢𑀁 𑀯𑀺𑀪𑀸𑀯𑀦𑀺𑀬𑀁=𑀢𑀼𑀮𑀸𑀬𑀲𑀫𑀺𑀢𑁄𑀢𑀼𑀮𑁆𑀬𑁄. 𑀢𑀼𑀮𑁆𑀬𑁄 𑀏𑀯 𑀢𑀼𑀮𑁄𑀬𑀓𑀸𑀭 𑀮𑁄𑀧𑀯𑀲𑁂𑀦𑀸=𑀢𑀺. 𑀢𑀁𑀲𑀦𑁆𑀥𑀸𑀬 ‘‘𑀬 𑀓𑀸𑀭𑀲𑁆𑀲𑀯𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀜𑁆𑀘𑀯𑀼𑀢𑁆𑀢𑀁 𑀢𑀢𑁆𑀣𑁂𑀯=𑀅𑀣𑀯𑀸𑀲𑀫𑀻𑀢𑀢𑁆𑀣𑁂 𑀅𑀓𑀸𑀭𑀧𑀘𑁆𑀘𑀬𑀯𑀲𑁂𑀦 𑀢𑀼𑀮𑀸𑀬𑀲𑀫𑀻𑀢𑁄𑀢𑀼𑀮𑁄=𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀅𑀓𑀸𑀭𑀲𑁆𑀲𑀯𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀢𑀼𑀮𑀸𑀬𑀸’’𑀢𑀺 𑀮𑁄𑀓𑁂 𑀥𑀸𑀭𑀡𑀢𑀼𑀮𑀸𑀲𑀤𑀺𑀲𑀸𑀬 𑀧𑀜𑁆𑀜𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀫𑀻𑀢𑁄’’𑀢𑀺 𑀲𑀫𑀁 𑀓𑀢𑁄. 𑀦𑀳𑀺 𑀢𑀼𑀮𑀲𑀤𑁆𑀤𑁄 𑀪𑀯𑀺𑀢𑀼𑀁 𑀦𑀬𑀼𑀢𑁆𑀢𑁄. 𑀬𑀼𑀢𑁆𑀢𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀼𑀮𑀬𑀺𑀢𑀼’’𑀦𑁆𑀢𑀺𑀆𑀤𑀺𑀁. 𑀢𑀢𑁆𑀣𑀳𑀺 ‘‘𑀢𑀼𑀮𑀬𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄’’𑀢𑀺𑀯𑀘𑀦𑁂𑀦 𑀢𑀲𑁆𑀲𑀓𑀫𑁆𑀫𑀲𑀸𑀥𑀦𑀢𑁆𑀢𑀁𑀤𑀲𑁆𑀲𑁂𑀢𑀺. ‘‘𑀓𑀫𑁆𑀫𑀲𑀸𑀥𑀦𑁂𑀦𑁂𑀯𑀸’’𑀢𑀺 𑀧𑀼𑀩𑁆𑀩𑁂-𑀢𑀼𑀮𑀬𑀺𑀢𑀩𑁆𑀩𑁄 𑀅𑀜𑁆𑀜𑁂𑀦 𑀲𑀳 𑀧𑀫𑀺𑀢𑀩𑁆𑀩𑁄𑀢𑀺 𑀢𑀼𑀮𑁄𑀢𑀺 𑀏𑀯𑀁 𑀇𑀥𑀯𑀼𑀢𑁆𑀢𑁂𑀦 𑀓𑀫𑁆𑀫 𑀲𑀸𑀥𑀦 𑀯𑀘𑀦𑀢𑁆𑀣𑁂𑀦𑁂𑀯. ‘‘𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄’’𑀢𑀺 𑀢𑀲𑁆𑀲 𑀯𑀺𑀪𑀸𑀯𑀦𑀺𑀬𑀁 𑀯𑀼𑀢𑁆𑀢𑀲𑁆𑀲 𑀤𑀼𑀯𑀺𑀥𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀢𑁄. ‘‘𑀢𑀢𑁄’’𑀢𑀺 𑀢𑀼𑀮𑀲𑀤𑁆𑀤𑀢𑁄. 𑀘𑀺𑀦𑁆𑀢𑀸𑀬 𑀓𑀺𑀁 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀦𑀢𑁆𑀣𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀤𑀢𑀺 𑀲𑀻𑀮𑁂𑀦𑀸𑀢𑀺 𑀯𑀢𑁆𑀢𑀸. 𑀯𑀸𑀤𑀻 𑀧𑀼𑀕𑁆𑀕𑀮𑁄. 𑀯𑀢𑁆𑀢𑀼𑀦𑁄 𑀇𑀘𑁆𑀙𑀸𑀯𑀢𑁆𑀢𑀺𑀘𑁆𑀙𑀸. 𑀯𑀢𑁆𑀢𑀼𑀁 𑀇𑀘𑁆𑀙𑀸𑀯𑀢𑁆𑀢𑀺𑀘𑁆𑀙𑀸𑀢𑀺𑀧𑀺𑀯𑀤𑀦𑁆𑀢𑀺. 𑀯𑀢𑁆𑀢𑀺𑀘𑁆𑀙𑀁 𑀅𑀦𑀼𑀕𑀢𑁄 𑀲𑀫𑁆𑀫𑀼𑀢𑀺 𑀲𑀗𑁆𑀓𑁂𑀢𑀯𑁄𑀳𑀸𑀭 𑀲𑀺𑀤𑁆𑀥𑀢𑁆𑀢𑀸𑀢𑀺 𑀲𑀫𑀸𑀲𑁄. ‘‘𑀏𑀢’’𑀦𑁆𑀢𑀺 𑀏𑀢𑀁 𑀤𑁆𑀯𑀺𑀥𑀸𑀲𑀺𑀤𑁆𑀥𑀯𑀘𑀦𑀁. ‘‘𑀘𑁂’’𑀢𑀺 𑀘𑁂𑀯𑀤𑁂𑀬𑁆𑀬. ‘‘𑀦𑀸’’𑀢𑀺 𑀦𑀬𑀼𑀢𑁆𑀢𑀁. ‘‘𑀬𑀣𑀸𑀲𑀼𑀢’’𑀦𑁆𑀢𑀺 𑀢𑀼𑀮 𑀇𑀢𑀺 𑀲𑀼𑀢𑀁. ‘‘𑀬𑀼𑀢𑁆𑀢’’𑀦𑁆𑀢𑀺 𑀬𑀣𑀸𑀲𑀼𑀢 𑀦𑀺𑀬𑀸𑀫𑁂𑀦𑁂𑀯 𑀬𑀼𑀢𑁆𑀢𑀁 𑀯𑀚𑁆𑀚𑁂𑀢𑁆𑀯𑀸. ‘‘𑀅𑀲𑁆𑀲𑀼𑀢𑀲𑁆𑀲𑀸’’𑀢𑀺 𑀥𑀸𑀭𑀡𑀢𑀼𑀮𑀸𑀧𑀭𑀺𑀬𑀸𑀬𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑀼𑀮𑀸𑀲𑀤𑁆𑀤𑀲𑁆𑀲. 𑀢𑀢𑁄𑀬𑁂𑀯𑀬𑀓𑀸𑀭 𑀬𑀼𑀢𑁆𑀢𑀲𑁆𑀲𑀢𑀼𑀮𑁆𑀬𑀲𑀤𑁆𑀤𑀲𑁆𑀲 𑀘 𑀅𑀲𑁆𑀲𑀼𑀢𑀲𑁆𑀲. 𑀇𑀢𑁆𑀣𑀺𑀮𑀺𑀗𑁆𑀕𑁂𑀲𑀢𑀺, 𑀢𑀢𑁄𑀧𑀺 𑀏𑀓𑁄 𑀅𑀓𑀸𑀭𑁄𑀢𑀺 𑀓𑀢𑁆𑀯𑀸 𑀲𑀫𑀻𑀢𑀢𑁆𑀣𑁂 𑀤𑀼𑀢𑀻𑀬𑁄 𑀢𑀤𑁆𑀥𑀺𑀢 𑀅𑀓𑀸𑀭𑁄𑀧𑀺 𑀅𑀲𑁆𑀲𑀼𑀢𑁄𑀬𑁂𑀯𑀦𑀸𑀫𑀳𑁄𑀢𑀺. ‘‘𑀧𑀭𑀺𑀓𑀧𑁆𑀧𑀦𑀸𑀬𑀸’’𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀓𑀣𑀦𑀸𑀬. 𑀧𑀬𑁄𑀚𑀦𑀸𑀪𑀸𑀯𑀢𑁄 𑀦 𑀬𑀼𑀢𑁆𑀢𑀦𑁆𑀢𑀺𑀲𑀫𑁆𑀩𑀦𑁆𑀥𑁄. 𑀅𑀢𑀼𑀮𑀧𑀤𑀁.

𑁬. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀧𑀤𑀢𑁆𑀣 𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀼𑀤𑁆𑀥𑀸𑀭𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀇𑀫𑁂𑀳𑀺 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀲𑀫𑁆𑀧𑀤𑀸’’𑀢𑀺 𑀲𑀫𑁆𑀧𑀢𑁆𑀢𑀺𑀬𑁄. ‘‘𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦𑀸𑀫’’ 𑀲𑀫𑀢𑀺𑀁 𑀲𑀧𑀸𑀭𑀫𑀻𑀦𑀁 𑀧𑀭𑀺𑀧𑀽𑀭𑀡𑀁. ‘‘𑀫𑀳𑀸𑀯𑀚𑀺𑀭𑀜𑁆𑀜𑀸𑀡’’𑀦𑁆𑀢𑀺 𑀪𑀕𑀯𑀢𑁄 𑀆𑀲𑀯𑀓𑁆𑀔𑀬𑀜𑁆𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀩𑀼𑀤𑁆𑀥𑀪𑀸𑀯𑀢𑁆𑀣𑀸𑀬 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀙𑀢𑁆𑀢𑀺𑀁𑀲 𑀓𑁄𑀝𑀺 𑀲𑀢𑀲𑀳𑀲𑁆𑀲 𑀲𑀗𑁆𑀔𑀸𑀦𑀁 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀧𑁆𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀩𑁆𑀩𑀪𑀸𑀕 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺 𑀫𑀳𑀸𑀯𑀚𑀺𑀭𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀫𑁆𑀧𑁂𑀢𑀁 𑀫𑀳𑀸𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. ‘‘𑀫𑀳𑀸𑀩𑁄𑀥𑀺𑀬𑀸’’𑀢𑀺 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀦𑀁 𑀅𑀪𑀺𑀲𑀫𑁆𑀩𑁄𑀥𑀺 𑀲𑀗𑁆𑀔𑀸𑀢𑀲𑁆𑀲 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀲𑁆𑀲. 𑀧𑀳𑀺𑀬𑁆𑀬𑀦𑁆𑀢𑀺 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀧𑀳𑀸𑀦𑀁. 𑀧𑀚𑀳𑀦𑁆𑀢𑀺 𑀧𑀳𑀸𑀢𑀩𑁆𑀩𑁂𑀥𑀫𑁆𑀫𑁂𑀏𑀢𑁂𑀦𑀸𑀢𑀺𑀯𑀸 𑀧𑀳𑀸𑀦𑀦𑁆𑀢𑀺 𑀓𑀢𑁆𑀯𑀸 𑀢𑀁 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀫𑁆𑀧𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺 𑀧𑀳𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀳𑀸𑀦𑀲𑀫𑁆𑀧𑀤𑀸𑀬𑀁 𑀯𑀸 𑀲𑀸 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀻𑀮𑀸𑀦𑀺. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀸𑀦𑀁𑀲𑀻𑀮𑀁, 𑀯𑁂𑀭𑀫𑀡𑀺𑀲𑀻𑀮𑀁, 𑀘𑁂𑀢𑀲𑀺𑀓𑀁𑀲𑀻𑀮𑀁, 𑀲𑀁𑀯𑀭𑁄𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄𑀲𑀺𑀮𑀦𑁆𑀢𑀺𑀆𑀤𑀻𑀲𑀼𑀯𑀺𑀬 𑀏𑀢𑁆𑀣𑀳𑀺 𑀧𑀳𑀸𑀦𑀲𑀻𑀮𑀁 𑀦𑀸𑀫 𑀬𑀣𑀸 𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀯𑁂𑀭𑀫𑀡𑀺𑀲𑀻𑀮𑀫𑁂𑀯𑀸𑀢𑀺 𑀬𑀼𑀚𑁆𑀚𑀢𑀺. 𑀧𑀳𑀸𑀦𑀁 𑀦𑀸𑀫 𑀓𑁄𑀘𑀺𑀥𑀫𑁆𑀫𑁄 𑀦𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂 𑀧𑀦 𑀲𑀢𑀺𑀧𑀳𑀸𑀦 𑀲𑀻𑀲𑁂𑀦 𑀧𑀳𑀸𑀦𑀲𑀸𑀥𑀓𑀁 𑀢𑀤𑁂𑀯𑀜𑀸𑀡𑀤𑁆𑀯𑀬𑀁 𑀉𑀧𑀘𑀸𑀭𑁂𑀦𑀧𑀳𑀸𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀧𑀳𑀸𑀦𑀲𑀫𑁆𑀧𑀤𑀸 𑀦𑀸𑀫 𑀅𑀲𑀸𑀭𑀸 𑀅𑀨𑀮𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥 𑀩𑀼𑀤𑁆𑀥𑀲𑀸𑀯𑀓𑀸 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀸𑀧𑀺 𑀯𑀸𑀲𑀦𑀸𑀬 𑀲𑀳 𑀅𑀧𑁆𑀧𑀚𑀳𑀦𑀢𑁄 𑀘𑀺𑀢𑁆𑀢 𑀲𑀦𑁆𑀢𑀸𑀦𑁂 𑀫𑁄𑀳𑀯𑀸𑀲𑀦𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀼 𑀪𑀸𑀯𑀁 𑀦𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸𑀢𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀧𑀳𑀸𑀦𑀲𑀫𑁆𑀧𑀤𑀸 𑀦𑀸𑀫 𑀦𑀳𑁄𑀢𑀺. 𑀦𑀢𑀣𑀸𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀦𑁆𑀢𑀺 𑀆𑀳 ‘‘𑀲𑀳𑀯𑀸𑀲𑀦𑀸𑀬𑀸’’𑀢𑀺𑀆𑀤𑀺𑀁. 𑀯𑀺𑀪𑀸𑀯𑀦𑀺𑀬𑀁𑀜𑀸𑀡𑀲𑀫𑁆𑀧𑀤𑀸 𑀧𑀣𑀫𑀁 𑀯𑀼𑀢𑁆𑀢𑀸. 𑀢𑀢𑁄 𑀧𑀳𑀸𑀦 𑀲𑀫𑁆𑀧𑀤𑀸. 𑀝𑀻𑀓𑀸𑀬𑀁 𑀧𑀦 𑀧𑀳𑀸𑀦𑀲𑀫𑁆𑀧𑀤𑀸 𑀧𑀣𑀫𑀁 𑀯𑀼𑀢𑁆𑀢𑀸. 𑀢𑀢𑁄 𑀅𑀥𑀺𑀕𑀫 𑀲𑀫𑁆𑀧𑀤𑀸𑀦𑀸𑀫 𑀯𑀼𑀢𑁆𑀢𑀸. 𑀢𑀢𑁄 𑀜𑀸𑀡𑀲𑀫𑁆𑀧𑀤𑀸. 𑀧𑀳𑀸𑀦𑀲𑀫𑁆𑀧𑀤𑀸𑀬𑀜𑁆𑀘 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀁 𑀤𑀲𑁆𑀲𑀺𑀢𑀁. 𑀅𑀥𑀺𑀕𑀫 𑀲𑀫𑁆𑀧𑀤𑀸𑀢𑀺 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑁄 𑀯𑀼𑀢𑁆𑀢𑁄. 𑀜𑀸𑀡𑀲𑀫𑁆𑀧𑀤𑀸𑀬𑀫𑁆𑀧𑀦 𑀢𑁂𑀳𑀺 𑀤𑁆𑀯𑀻𑀳𑀺 𑀜𑀸𑀡𑁂𑀳𑀺 𑀅𑀯𑀲𑁂𑀲𑀸𑀦𑀺𑀤𑀲𑀩𑀮𑀜𑁆𑀜𑀸𑀡𑀸𑀤𑀻𑀦𑀺𑀲𑀩𑁆𑀩𑀜𑁆𑀜𑀸𑀡𑀸𑀦𑀺𑀤𑀲𑁆𑀲𑀺𑀢𑀸𑀦𑀺. 𑀇𑀥𑀧𑀺 𑀝𑀻𑀓𑀸𑀦𑀬𑀫𑁂𑀯 𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀧𑀳𑀸𑀦𑀲𑀫𑁆𑀧𑀤𑀸𑀬𑁂𑀯𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀧𑀤𑀝𑁆𑀞𑀸𑀦𑀁, 𑀆𑀲𑀦𑁆𑀦 𑀓𑀸𑀭𑀡𑀁. ‘‘𑀦 𑀳𑀺 𑀫𑀕𑁆𑀕𑀜𑁆𑀜𑀸𑀡𑀢𑁄 𑀅𑀜𑁆𑀜𑀸 𑀧𑀳𑀸𑀦𑀲𑀫𑁆𑀧𑀤𑀸𑀦𑀸𑀫 𑀅𑀢𑁆𑀣𑀺’’. 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂=𑀧𑀳𑀸𑀦𑀦𑁆𑀢𑀺 𑀓𑁄𑀘𑀺 𑀥𑀫𑁆𑀫𑁄𑀦𑀸𑀫 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀫𑀢𑁆𑀢𑀢𑁄=𑀢𑀺 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀳𑀸𑀬𑀓𑀥𑀫𑁆𑀫𑀲𑀫𑀸𑀤𑀸𑀦𑁂𑀦 𑀧𑀦 𑀧𑀳𑀸𑀢𑀩𑁆𑀩 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑁄 𑀦𑀸𑀫 𑀏𑀓𑁄𑀧𑀡𑀻𑀢 𑀥𑀫𑁆𑀫𑁄𑀳𑁄𑀢𑀺. 𑀏𑀓𑀁 𑀲𑀦𑁆𑀢𑀺 𑀧𑀤𑀁 𑀳𑁄𑀢𑀺. 𑀢𑀣𑀸𑀳𑀺 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑁂=𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂 𑀜𑀸𑀡𑀁. 𑀧𑀯𑀢𑁆𑀢𑀺 𑀪𑀬𑀁, 𑀅𑀧𑁆𑀧𑀯𑀢𑁆𑀢𑀺 𑀔𑁂𑀫𑀦𑁆𑀢𑀺 𑀲𑀦𑁆𑀢𑀺𑀧𑀤𑁂𑀜𑀸𑀡=𑀦𑁆𑀢𑀺. 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀧𑀦𑀢𑀤𑀗𑁆𑀕𑀅𑀦𑀼𑀧𑁆𑀧𑀸𑀤𑁄 𑀦𑀸𑀫. 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦 𑀅𑀦𑀼𑀧𑁆𑀧𑀸𑀤𑁄 𑀦𑀸𑀫. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤 𑀅𑀦𑀼𑀧𑁆𑀧𑀸𑀤𑁄 𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀇𑀥 𑀧𑀦 𑀅𑀦𑀼𑀧𑁆𑀧𑀸𑀤 𑀲𑀫𑁆𑀧𑀸𑀧𑀓𑀁 𑀯𑀺𑀧𑀲𑁆𑀲𑀦𑀸 𑀜𑀸𑀡𑀜𑁆𑀘 𑀫𑀕𑁆𑀕𑀜𑁆𑀜𑀸𑀡𑀜𑁆𑀘 𑀉𑀧𑀘𑀸𑀭𑁂𑀦 𑀧𑀳𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀓𑀲𑁆𑀫𑀸, 𑀉𑀧𑀭𑀺𑀜𑀸𑀡 𑀲𑀫𑁆𑀧𑀤𑀸𑀤𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀫𑁆𑀧𑀤𑀸𑀲𑀗𑁆𑀓𑀭𑁄’’𑀢𑀺 𑀲𑀫𑁆𑀧𑀤𑀸𑀲𑀫𑁆𑀪𑁂𑀤𑁄, 𑀲𑀫𑁆𑀧𑀤𑀸𑀲𑀫𑁆𑀫𑀺𑀲𑁆𑀲𑁄. ‘‘𑀜𑀸𑀬𑀸𑀕𑀢’’𑀦𑁆𑀢𑀺 𑀬𑀼𑀢𑁆𑀢𑀺𑀢𑁄 𑀆𑀕𑀢𑀁. ‘‘𑀲𑀻𑀮𑀸𑀤𑀺𑀕𑀼𑀡𑁂𑀳𑀻’’𑀢𑀺 𑀲𑀻𑀮 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑁆𑀜𑀸𑀡𑀤𑀲𑁆𑀲𑀦 𑀕𑀼𑀡𑁂𑀳𑀺. ‘‘𑀇𑀤𑁆𑀥𑀺𑀥𑀫𑁆𑀫𑁂𑀳𑀻’’𑀢𑀺 𑀇𑀤𑁆𑀥𑀺𑀯𑀺𑀥𑀸𑀪𑀺𑀜𑁆𑀜𑀸𑀤𑀻𑀳𑀺 𑀇𑀤𑁆𑀥𑀺𑀕𑀼𑀡𑁂𑀳𑀺. ‘‘𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀲𑁆𑀲𑀸’’𑀢𑀺 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘 𑀅𑀲𑀻𑀢𑀺 𑀔𑀼𑀤𑁆𑀤𑀓𑀮𑀓𑁆𑀔𑀡𑁂𑀳𑀺 𑀘 𑀧𑀝𑀺𑀫𑀡𑁆𑀟𑀺𑀢𑀲𑁆𑀲. ‘‘𑀆𑀲𑀬𑁄’’𑀢𑀺 𑀘𑀺𑀢𑁆𑀢 𑀲𑀦𑁆𑀢𑀸𑀦𑁂 𑀅𑀥𑀺𑀲𑀬𑀺𑀢𑁄 𑀇𑀘𑁆𑀙𑀸𑀯𑀺𑀲𑁂𑀲𑁄. ‘‘𑀅𑀚𑁆𑀛𑀸𑀲𑀬𑀲𑁆𑀲𑀸’’𑀢𑀺 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀓𑀲𑁆𑀲𑀅𑀚𑁆𑀛𑀸𑀲𑀬𑀲𑁆𑀲. ‘‘𑀉𑀴𑀸𑀭𑀢𑀸’’𑀢𑀺 𑀧𑀡𑀻𑀢𑀢𑀸. ‘‘𑀳𑀺𑀢𑀚𑁆𑀛𑀸𑀲𑀬𑀢𑀸’’𑀢𑀺𑀳𑀺𑀢𑀓𑀸𑀫𑀢𑀸. 𑀅𑀧𑀭𑀺𑀧𑀸𑀓 𑀕𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀜𑁆𑀘 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁. ‘‘𑀅𑀪𑀺𑀜𑁆𑀜𑀸𑀢𑀸𑀦’’𑀦𑁆𑀢𑀺 𑀅𑀢𑀺𑀧𑀸𑀓𑀝𑀸𑀦𑀁. ‘‘𑀤𑁆𑀯𑁂𑀧𑀳𑀸𑀦𑀲𑀫𑁆𑀧𑀤𑀸’’𑀢𑀺 𑀤𑁆𑀯𑁂𑀧𑀳𑀸𑀦 𑀲𑀫𑁆𑀧𑀤𑀸 𑀜𑀸𑀡𑀲𑀫𑁆𑀧𑀤𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑁂. ‘‘𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀻’’𑀢𑀺 𑀏𑀢𑁆𑀣 𑀅𑀪𑀺𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑀁 𑀕𑀳𑀺𑀢𑀁. 𑀢𑀜𑁆𑀘 𑀧𑀳𑀸𑀦𑀓𑀺𑀘𑁆𑀘𑀧𑁆𑀧𑀥𑀸𑀦𑀁 𑀳𑁄𑀢𑀺. ‘‘𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄’’𑀢𑀺 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀩𑀮𑁂𑀲𑀼 𑀘 𑀯𑀲𑀺𑀪𑀸𑀯’’𑀦𑁆𑀢𑀺 𑀏𑀢𑁆𑀣 𑀤𑀲𑀩𑀮𑀜𑁆𑀜𑀸𑀡𑀸𑀦𑀺 𑀕𑀳𑀺𑀢𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑁂…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑁂𑀦𑀯𑀺𑀪𑀸𑀯𑀺𑀢𑀸’’𑀢𑀺.

𑀲𑀫𑁆𑀧𑀤𑀸𑀦𑀺𑀝𑁆𑀞𑀺𑀢𑀸.

𑁭. 𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀧𑀤𑁂. 𑀬𑀣𑀸=𑀲𑀲𑀗𑁆𑀖𑀁𑀮𑁄𑀓𑀦𑀸𑀬𑀓𑀁 𑀦𑀫𑀲𑁆𑀲𑀺𑀲𑁆𑀲𑀁=𑀢𑀺 𑀏𑀢𑁆𑀣𑀲𑀳𑀲𑀤𑁆𑀤𑀲𑁆𑀲 𑀲𑀫𑀯𑀸𑀬𑀢𑁆𑀣𑀢𑁆𑀢𑀸 𑀅𑀳𑀁𑀮𑁄𑀓𑀦𑀸𑀬𑀓𑀜𑁆𑀘 𑀲𑀗𑁆𑀖𑀜𑁆𑀘 𑀦𑀫𑀲𑁆𑀲𑀺𑀲𑁆𑀲𑀦𑁆𑀢𑀺 𑀏𑀯𑀁 𑀲𑀫𑀯𑀸𑀬𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀇𑀥𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀘𑀲𑀤𑁆𑀥𑀫𑁆𑀫𑀜𑁆𑀘 𑀕𑀡𑀼𑀢𑁆𑀢𑀫𑀜𑁆𑀘 𑀅𑀪𑀺𑀯𑀸𑀤𑀺𑀬𑀸𑀫𑀻𑀢𑀺 𑀏𑀯𑀁 𑀓𑀺𑀭𑀺𑀬𑀸𑀲𑀫𑀯𑀸𑀬𑀢𑁆𑀣𑁄 𑀲𑀳𑀲𑀤𑁆𑀤𑁂𑀦 𑀤𑀻𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀽𑀭𑀢𑁄𑀳𑀁…𑀧𑁂… 𑀏𑀯𑀫𑀺𑀤𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀇𑀤’’𑀦𑁆𑀢𑀺 𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀧𑀤𑀁. 𑀏𑀢𑁆𑀣 𑀘‘‘𑀲𑀫𑀯𑀸𑀬𑁄’’𑀢𑀺 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀩𑀳𑀽𑀦𑀁 𑀯𑀸 𑀅𑀢𑁆𑀣𑀸𑀦𑀁 𑀏𑀓𑀲𑁆𑀫𑀺𑀁 𑀤𑀩𑁆𑀩𑁂𑀯𑀸 𑀕𑀼𑀡𑁂𑀯𑀸𑀓𑀺𑀭𑀺𑀬𑀸𑀬𑀯𑀸𑀲𑀫𑀁 𑀅𑀯𑁂𑀘𑁆𑀘 𑀅𑀬𑀦𑀁𑀧𑀯𑀢𑁆𑀢𑀦𑀁 𑀲𑀫𑀯𑀸𑀬𑁄. 𑀧𑀘𑁆𑀘𑀸𑀦𑀼𑀢𑀸𑀧 𑀧𑀘𑁆𑀘𑀸𑀦𑀼𑀫𑁄𑀤𑀦𑀸𑀤𑀺𑀞𑀸𑀦𑁂𑀲𑀼=𑀅𑀳𑀁 𑀧𑀼𑀩𑁆𑀩𑁂𑀤𑀸𑀦𑀁 𑀦𑀤𑀤𑀺𑀲𑁆𑀲𑀁, 𑀲𑀻𑀮𑀁 𑀦𑀭𑀓𑁆𑀔𑀺𑀲𑁆𑀲𑀁. - 𑀅𑀦𑁂𑀓𑀚𑀸𑀢𑀺 𑀲𑀁𑀲𑀸𑀭𑀁 𑀲𑀦𑁆𑀥𑀸𑀯𑀺𑀲𑁆𑀲=𑀦𑁆𑀢𑀺𑀆𑀤𑀺𑀦𑀸 𑀅𑀢𑀻𑀢𑁂𑀧𑀺𑀓𑀸𑀮𑁂 𑀅𑀦𑀸𑀕𑀢𑀯𑀘𑀦𑀁 𑀧𑀬𑀼𑀚𑁆𑀚𑀢𑀻𑀢𑀺 𑀆𑀳 ‘‘𑀦𑀫𑀲𑁆𑀲𑀺𑀲𑁆𑀲’’𑀦𑁆𑀢𑀺 𑀦𑀫𑀲𑁆𑀲𑀺𑀁𑀢𑀺. ‘‘𑀕𑀼𑀡𑀻𑀪𑀽𑀢𑀸𑀦’’𑀦𑁆𑀢𑀺 𑀲𑀫𑀸𑀲𑀧𑀤𑁂 𑀯𑀺𑀲𑁂𑀲𑀦𑀪𑀽𑀢𑀸𑀦𑀁, 𑀅𑀧𑁆𑀧𑀥𑀸𑀦𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀽𑀢 𑀢𑀩𑁆𑀪𑀸𑀯𑁂𑀘𑀸𑀬𑀁 𑀈𑀓𑀸𑀭𑁄. 𑀬𑀣𑀸, 𑀓𑀸𑀓𑁄 𑀲𑁂𑀢𑀻 𑀪𑀯𑀢𑀺, 𑀩𑀓𑁄 𑀓𑀡𑁆𑀳𑀻𑀪𑀯𑀢𑀻𑀢𑀺. 𑀏𑀢𑁆𑀣 𑀘 ‘‘𑀲𑁂𑀢𑀻 𑀪𑀯𑀢𑀻’’𑀢𑀺 𑀅𑀲𑁂𑀢𑀧𑀼𑀩𑁆𑀩𑁄 𑀲𑁂𑀢𑁄𑀪𑀯𑀢𑀺. ‘‘𑀓𑀡𑁆𑀳𑀻𑀪𑀯𑀢𑀻’’𑀢𑀺 𑀅𑀓𑀡𑁆𑀳𑀧𑀼𑀩𑁆𑀩𑁄 𑀓𑀡𑁆𑀳𑁄𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀇𑀥𑀧𑀺. 𑀩𑀼𑀤𑁆𑀥𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘𑀯𑀦𑁆𑀤𑀺𑀢𑁆𑀯𑀸-𑀢𑀺𑀆𑀤𑀻𑀲𑀼 𑀯𑀺𑀲𑀼𑀁𑀯𑀺𑀲𑀼𑀁 𑀧𑀥𑀸𑀦𑀢𑁆𑀢𑀸 𑀅𑀕𑀼𑀡𑀪𑀽𑀢𑀸𑀧𑀺 𑀥𑀫𑁆𑀫𑀲𑀗𑁆𑀖𑀸 𑀇𑀥𑀲𑀫𑀸𑀲𑀧𑀤𑁂 𑀅𑀜𑁆𑀜𑀧𑀤𑀢𑁆𑀣𑀲𑁆𑀲𑀕𑀼𑀡𑀪𑀽𑀢𑀸𑀳𑁄𑀦𑁆𑀢𑀺. 𑀅𑀬𑀁 𑀅𑀩𑁆𑀪𑀽𑀢𑀢𑀩𑁆𑀪𑀸𑀯𑀢𑁆𑀣𑁄 𑀦𑀸𑀫. ‘‘𑀅𑀪𑀺𑀯𑀸𑀤𑀺𑀢𑀪𑀸𑀯𑁄’’𑀢𑀺 𑀯𑀼𑀢𑁆𑀢𑁂 𑀢𑀧𑀘𑁆𑀘𑀬𑀲𑁆𑀲 𑀩𑀳𑀼𑀮𑀁 𑀅𑀢𑀻𑀢𑀓𑀸𑀮𑀯𑀺𑀲𑀬𑀢𑁆𑀢𑀸 𑀧𑀼𑀩𑁆𑀩𑁂𑀕𑀦𑁆𑀣𑀸𑀭𑀫𑁆𑀪𑀓𑀸𑀮𑁂 𑀥𑀫𑁆𑀫 𑀲𑀗𑁆𑀖𑀸𑀦𑀁𑀧𑀺 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. ‘‘𑀅𑀪𑀺𑀯𑀸𑀤𑁂𑀢𑀩𑁆𑀩 𑀪𑀸𑀯𑁄’’𑀢𑀺 𑀯𑀼𑀢𑁆𑀢𑁂𑀧𑀦 𑀢𑀩𑁆𑀩𑀧𑀘𑁆𑀘𑀬𑀲𑁆𑀲𑀓𑀸𑀮𑀲𑀸𑀫𑀜𑁆𑀜𑀯𑀺𑀲𑀬𑀢𑁆𑀢𑀸𑀦 𑀢𑀣𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀲𑀻𑀮𑀁 𑀭𑀓𑁆𑀔𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀥𑀫𑁆𑀫𑀲𑀗𑁆𑀖𑀸𑀦𑀸𑀫𑀲𑀩𑁆𑀩𑀓𑀸𑀮𑀁𑀧𑀺 𑀅𑀪𑀺𑀯𑀸𑀤𑁂𑀢𑀩𑁆𑀩𑀸𑀢𑀺. 𑀏𑀯𑀁 𑀥𑀫𑁆𑀫𑀲𑀗𑁆𑀖𑀸𑀦𑀁 𑀲𑀩𑁆𑀩𑀓𑀸𑀮𑀁𑀧𑀺 𑀅𑀪𑀺𑀯𑀸𑀤𑀦𑀸𑀭𑀳𑀕𑀼𑀡𑁄 𑀏𑀯 𑀤𑀲𑁆𑀲𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣, ‘‘𑀅𑀪𑀺𑀯𑀸𑀤𑀦’’𑀦𑁆𑀢𑀺 𑀇𑀤𑀁 𑀓𑀺𑀭𑀺𑀬𑀸𑀲𑀫𑀯𑀸𑀬𑀤𑀲𑁆𑀲𑀦𑀢𑁄 𑀯𑀼𑀢𑁆𑀢𑀁. 𑀓𑀸𑀮𑀯𑀺𑀲𑁂𑀲𑀁 𑀧𑀦 𑀦𑀤𑀻𑀧𑁂𑀢𑀺𑀬𑁂𑀯. ‘‘𑀅𑀢𑁆𑀢𑀦𑁄 𑀦𑀺𑀤𑀲𑁆𑀲𑀦𑁂𑀦𑀸’’𑀢𑀺 𑀲𑀧𑀼𑀢𑁆𑀢𑀤𑀸𑀭𑁄 𑀆𑀕𑀢𑁄𑀢𑀺 𑀅𑀢𑁆𑀢𑀦𑀸 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀺𑀢𑁂𑀦 𑀧𑀬𑁄𑀕𑁂𑀦. 𑀲𑁄𑀳𑀺 𑀧𑀬𑁄𑀕𑁄 𑀓𑀺𑀭𑀺𑀬𑀸 𑀲𑀫𑀯𑀸𑀬𑀲𑁆𑀲𑁂𑀯. 𑀦𑀕𑀼𑀡𑀲𑀫𑀯𑀸𑀬𑀲𑁆𑀲𑀸𑀢𑀺. 𑀏𑀢𑁆𑀣 𑀘 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸𑀯𑀘𑀦𑁂 𑀣𑁂𑀭𑁄 𑀇𑀫𑁂𑀳𑀺 𑀬𑁂𑀯𑀧𑀤𑁂𑀳𑀺 𑀭𑀢𑀦𑀢𑁆𑀢𑀬𑀁𑀢𑀻𑀳𑀺𑀤𑁆𑀯𑀸𑀭𑁂 𑀳𑀺𑀯𑀦𑁆𑀤𑀢𑀻𑀢𑀺 𑀕𑀳𑁂𑀢𑁆𑀯𑀸 ‘‘𑀅𑀪𑀺𑀯𑀸𑀤𑀺𑀬𑀸’’𑀢𑀺 𑀏𑀢𑁆𑀣 𑀅𑀪𑀺𑀯𑀸𑀤𑀺𑀬𑀸𑀥𑀻𑀢𑀺 𑀘 𑀅𑀢𑁆𑀣𑀁 𑀦𑀻𑀳𑀭𑀦𑁆𑀢𑀺. 𑀅𑀧𑁆𑀧𑀥𑀸𑀦 𑀓𑀺𑀭𑀺𑀬𑀸𑀧𑀤𑁂 𑀧𑀦 𑀢𑀤𑀢𑁆𑀣 𑀦𑀻𑀳𑀭𑀡𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀧𑀺𑀘𑀸’’𑀢𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑀚𑁄𑀢𑀦𑁂 𑀅𑀬𑀁 𑀦𑀺𑀧𑀸𑀢𑀲𑀫𑀼𑀤𑀬𑁄. ‘‘𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀕𑀦𑁆𑀣𑀧𑁆𑀧𑀝𑀺𑀜𑁆𑀜𑀸𑀯𑀘𑀦𑁂𑀦. ‘‘𑀲𑀳𑀖𑀝𑁂𑀢𑁆𑀯𑀸’’𑀢𑀺 𑀏𑀓𑀢𑁄 𑀲𑀫𑁆𑀩𑀦𑁆𑀥𑀺𑀢𑁆𑀯𑀸.

𑀯𑀘𑀦𑀢𑁆𑀣𑁂. 𑀲𑀥𑀦𑁄 𑀧𑀼𑀭𑀺𑀲𑁄, 𑀥𑀦𑀯𑀸𑀧𑀼𑀭𑀺𑀲𑁄-𑀢𑀺 𑀆𑀤𑀬𑁄 𑀲𑀫𑀸𑀲𑀢𑀤𑁆𑀥𑀺𑀢𑀲𑀤𑁆𑀤𑀸 𑀬𑁂𑀪𑀽𑀬𑁆𑀬𑁂𑀦 𑀅𑀢𑀺𑀲𑁆𑀲𑀬𑀢𑁆𑀣 𑀤𑀻𑀧𑀓𑀸 𑀳𑁄𑀦𑁆𑀢𑀺. 𑀦𑀳𑀺 𑀅𑀧𑁆𑀧𑀓𑁂𑀦 𑀥𑀦𑁂𑀦 𑀢𑀣𑀸 𑀯𑁄𑀳𑀭𑀦𑁆𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀢𑀣𑀸 𑀭𑀽𑀧𑀁 𑀅𑀢𑀺𑀲𑁆𑀲𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀢𑀦𑀸𑀦𑀺𑀫𑁆𑀫𑀺𑀢𑁂𑀦…𑀧𑁂… 𑀲𑀭𑀡𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣, ‘‘𑀅𑀢𑁆𑀢𑀦𑀸𑀦𑀺𑀫𑁆𑀫𑀺𑀢𑁂𑀦𑀸’’𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑁂𑀦. ‘‘𑀦𑀳𑀻’’𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀫𑁂𑀯 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀯𑀭𑀢𑀺. 𑀢𑀢𑁆𑀣, ‘‘𑀧𑀭𑀦𑀺𑀫𑁆𑀫𑀺𑀢𑁂𑀦𑀸’’𑀢𑀺 𑀩𑀼𑀤𑁆𑀥𑀦𑀺𑀫𑁆𑀫𑀺𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀣𑀸 𑀣𑁄𑀫𑀦’’𑀦𑁆𑀢𑀺 𑀲𑀲𑀤𑁆𑀥𑀫𑁆𑀫 𑀕𑀡𑀼𑀢𑁆𑀢𑀫𑀦𑁆𑀢𑀺 𑀣𑁄𑀫𑀦𑀁. ‘‘𑀇𑀤𑀁𑀧𑀻’’𑀢𑀺 𑀤𑀼𑀢𑀻𑀬𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑁂 𑀅𑀬𑀁𑀧𑀺𑀓𑀸𑀭𑁄. 𑀦𑀓𑁂𑀯𑀮𑀁 𑀧𑀼𑀭𑀺𑀫𑀧𑀤𑀤𑁆𑀯𑀬𑀫𑁂𑀯 𑀲𑀢𑁆𑀣𑀼 𑀅𑀲𑀸𑀥𑀸𑀭𑀡𑀕𑀼𑀡𑀧𑀤𑀁 𑀳𑁄𑀢𑀺. 𑀅𑀣 𑀔𑁄 𑀇𑀤𑀁𑀧𑀺 𑀧𑀤𑀁 𑀲𑀢𑁆𑀣𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀅𑀲𑀸𑀥𑀸𑀭𑀡 𑀧𑀤𑀫𑁂𑀯𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀥𑀫𑁆𑀫𑀯𑀘𑀦𑀢𑁆𑀣𑁂. ‘‘𑀥𑀸𑀭𑁂𑀢𑀻’’𑀢𑀺 𑀯𑀳𑀢𑀺. 𑀕𑀸𑀣𑀸𑀬𑀁 ‘‘𑀭𑀓𑁆𑀔𑀢𑀻’’𑀢𑀺 𑀅𑀧𑀸𑀬𑀸𑀤𑀺𑀤𑀼𑀓𑁆𑀔𑀢𑁄𑀭𑀓𑁆𑀔𑀢𑀺. ‘‘𑀬𑁂𑀲’’𑀦𑁆𑀢𑀺 𑀓𑀺𑀮𑁂𑀲𑀸𑀦𑀁. ‘‘𑀇𑀫𑀲𑁆𑀫𑀺𑀁 𑀅𑀢𑁆𑀣𑁂’’𑀢𑀺 𑀓𑀺𑀮𑁂𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀲𑀗𑁆𑀔𑀸𑀢𑁂 𑀥𑀸𑀭𑀡𑀢𑁆𑀣𑁂. ‘‘𑀦𑀺𑀩𑁆𑀩𑀸𑀦𑀜𑁆𑀘𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀫𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀓𑀺𑀘𑁆𑀘𑀁, 𑀇𑀤𑀜𑁆𑀘 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀦𑁆𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑀸𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀦𑀺𑀩𑁆𑀩𑀸𑀦𑁂𑀦 𑀲𑀳𑁂𑀯 𑀳𑀼𑀢𑁆𑀯𑀸’’𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀽𑀢𑀁 𑀆𑀭𑀫𑁆𑀫𑀡𑀽 𑀧𑀦𑀺𑀲𑁆𑀲𑀬𑀪𑀽𑀢𑀜𑁆𑀘 𑀦𑀺𑀩𑁆𑀩𑀸𑀦𑀁 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘, 𑀲𑀫𑀼𑀘𑁆𑀙𑁂𑀤𑁄𑀢𑀺 𑀘 𑀦𑀺𑀲𑁆𑀲𑀭𑀡𑀦𑁆𑀢𑀺 𑀘 𑀅𑀢𑁆𑀣𑀢𑁄 𑀲𑀫𑀸𑀦𑀕𑀢𑀺𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀦𑀺𑀲𑁆𑀲𑀭𑀡𑀁𑀧𑀺 𑀫𑀼𑀔𑁆𑀬𑀥𑀸𑀭𑀡 𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀲𑁆𑀲𑀭𑀡𑀫𑁂𑀯𑀯𑀸 𑀧𑀥𑀸𑀦𑀥𑀸𑀭𑀡𑀦𑁆𑀢𑀺 𑀧𑀺𑀬𑀼𑀚𑁆𑀚𑀢𑀺𑀬𑁂𑀯. ‘‘𑀥𑀸𑀭𑀡𑀽𑀧𑀸𑀬𑁄𑀬𑁂𑀯𑀳𑁄𑀢𑀺’’. 𑀦𑀫𑀼𑀔𑁆𑀬𑀥𑀸𑀭𑀡𑀁. 𑀓𑀲𑁆𑀫𑀸, 𑀲𑀫𑀼𑀘𑁆𑀙𑁂𑀤 𑀓𑀺𑀘𑁆𑀘𑀸𑀪𑀸𑀯𑀢𑁄. ‘‘𑀏𑀢𑁂𑀧𑀜𑁆𑀘 𑀧𑀭𑀺𑀬𑀸𑀬𑀥𑀫𑁆𑀫𑀸𑀬𑁂𑀯’’. 𑀓𑀲𑁆𑀫𑀸, 𑀦𑀺𑀩𑁆𑀩𑀸𑀦𑀲𑁆𑀲𑀯𑀺𑀬𑀫𑀕𑁆𑀕𑀸𑀦𑀁 𑀲𑀫𑀼𑀘𑁆𑀙𑁂𑀤 𑀓𑀺𑀘𑁆𑀘𑁂 𑀅𑀲𑀳𑀸𑀬𑀢𑁆𑀢𑀸𑀢𑀺. 𑀏𑀢𑁆𑀣 𑀘 ‘‘𑀲𑀸𑀫𑀜𑁆𑀜𑀧𑁆𑀨𑀮𑀸𑀦𑀻’’𑀢𑀺 𑀲𑀫𑀡𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀲𑀸𑀫𑀜𑁆𑀜𑀲𑁆𑀲𑀨𑀮𑀁 𑀲𑀸𑀫𑀜𑁆𑀜𑀧𑁆𑀨𑀮𑀁. 𑀤𑀼𑀢𑀻𑀬𑀯𑀺𑀓𑀧𑁆𑀧𑁂 𑀅𑀓𑀺𑀘𑁆𑀘 𑀧𑀘𑁆𑀘𑀬𑀪𑀽𑀢𑀸𑀧𑀺 𑀓𑁂𑀘𑀺𑀓𑀺𑀢𑀓𑀧𑀘𑁆𑀘𑀬𑀸 𑀓𑀫𑁆𑀫𑀢𑁆𑀣𑁂𑀕𑀢𑀸 𑀓𑀺𑀘𑁆𑀘𑀧𑀘𑁆𑀘𑀬𑀸𑀦𑀁𑀧𑀺 𑀅𑀢𑁆𑀣𑀁 𑀤𑀻𑀧𑁂𑀢𑀺. 𑀬𑀣𑀸, 𑀤𑀺𑀝𑁆𑀞𑀁, 𑀲𑀼𑀢𑀁, 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀥𑀸𑀭𑀡𑀸𑀭𑀳𑁄’’𑀢𑀺. ‘‘𑀬𑀣𑀸 𑀯𑀼𑀢𑁆𑀢 𑀥𑀫𑁆𑀫𑀸 𑀬𑁂𑀯𑀸’’𑀢𑀺 𑀧𑀜𑁆𑀘𑀫𑀼𑀔𑁆𑀬𑀥𑀫𑁆𑀫𑀸, 𑀧𑀜𑁆𑀘𑀧𑀭𑀺𑀬𑀸𑀬𑀥𑀫𑁆𑀫𑀸𑀬𑁂𑀯. ‘‘𑀓𑁂𑀘𑀻’’𑀢𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸. 𑀧𑀼𑀦 ‘‘𑀓𑁂𑀘𑀻’’𑀢𑀺 𑀦𑀺𑀩𑁆𑀩𑀸𑀦𑀫𑁂𑀯. 𑀩𑀳𑀼𑀯𑀘𑀦 𑀲𑁄𑀢𑁂𑀧𑀢𑀺𑀢𑀢𑁆𑀢𑀸 𑀏𑀢𑁆𑀣 𑀩𑀳𑀼𑀯𑀘𑀦𑀁 𑀭𑀼𑀴𑀁. 𑀧𑀼𑀦 ‘‘𑀓𑁂𑀘𑀻’’𑀢𑀺 𑀘𑀢𑁆𑀢𑀸𑀭𑁄 𑀲𑀸𑀫𑀜𑁆𑀜𑀧𑁆𑀨𑀮 𑀥𑀫𑁆𑀫𑀸. ‘‘𑀓𑁂𑀘𑀻’’𑀢𑀺 𑀧𑀭𑀺𑀬𑀢𑁆𑀢𑀺 𑀥𑀫𑁆𑀫𑁄. 𑀏𑀢𑁆𑀣𑀸𑀧𑀺 𑀩𑀳𑀼𑀯𑀘𑀦𑀁 𑀲𑁄𑀢𑀧𑀢𑀺𑀢𑀫𑁂𑀯. ‘‘𑀥𑀸𑀭𑁂𑀦𑁆𑀢’’𑀦𑁆𑀢𑀺 𑀥𑀸𑀭𑁂𑀦𑁆𑀢𑀁 𑀧𑀼𑀕𑁆𑀕𑀮𑀁. 𑀢𑀢𑀻𑀬 𑀯𑀺𑀓𑀧𑁆𑀧𑁂 ‘‘𑀅𑀧𑀢𑀫𑀸𑀦𑀁 𑀯𑀳𑀦𑁆𑀢𑀻’’𑀢𑀺 𑀅𑀧𑀢𑀫𑀸𑀦𑀁 𑀓𑀢𑁆𑀯𑀸 𑀯𑀳𑀦𑁆𑀢𑀺. 𑀘𑀢𑀼𑀢𑁆𑀣 𑀯𑀺𑀓𑀧𑁆𑀧𑁂 ‘‘𑀏𑀢𑁆𑀣𑀸’’𑀢𑀺 𑀏𑀢𑀲𑁆𑀫𑀺𑀁 𑀥𑀫𑁆𑀫𑁂. 𑀥𑀫𑁆𑀫𑁄𑀯𑀤𑀻𑀧𑀁 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀤𑀻𑀧𑀸. 𑀥𑀫𑁆𑀫𑁄𑀯 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑀸. 𑀥𑀫𑁆𑀫𑀤𑀻𑀧𑀸 𑀪𑀺𑀓𑁆𑀔𑀯𑁂 𑀪𑀯𑀣 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑀸, 𑀅𑀦𑀜𑁆𑀜𑀧𑁆𑀧𑀝𑀺𑀲𑀭𑀡𑀸 𑀢𑀺𑀳𑀺 𑀯𑀼𑀢𑁆𑀢𑀁. 𑀮𑀤𑁆𑀥𑀸 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀸. 𑀬𑀼𑀚𑁆𑀚𑀢𑀺𑀬𑁂𑀯. 𑀥𑀫𑁆𑀫𑀤𑀻𑀧𑀧𑀸𑀞𑀸𑀦𑀼𑀮𑁄𑀫𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀯𑀺𑀘𑀸𑀭𑀡𑀸𑀬𑀁, 𑀘𑁄𑀤𑀓𑁄𑀧𑀝𑀺𑀧𑀢𑁆𑀢𑀺 𑀥𑀫𑁆𑀫𑀁 𑀤𑀲𑀯𑀺𑀥 𑀥𑀫𑁆𑀫𑀢𑁄 𑀅𑀜𑁆𑀜𑀁𑀫𑀜𑁆𑀜𑀫𑀸𑀦𑁄 ‘‘𑀓𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀲𑁄 𑀧𑀦 𑀧𑀝𑀺𑀧𑀢𑁆𑀢𑀺 𑀥𑀫𑁆𑀫𑁄 𑀢𑀢𑁄 𑀅𑀜𑁆𑀜𑁄𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸 𑀳𑁄𑀢𑀻’’𑀢𑀺 𑀬𑀣𑀸 𑀅𑀫𑁆𑀩𑀭𑀼𑀓𑁆𑀔𑁄 𑀅𑀫𑁆𑀩𑀧𑀼𑀧𑁆𑀨𑀅𑀫𑁆𑀩𑀧𑁆𑀨𑀮𑀲𑁆𑀲 𑀧𑀢𑀺𑀝𑁆𑀞𑀸 𑀪𑀸𑀯𑁂𑀦 𑀧𑀼𑀩𑁆𑀩𑀪𑀸𑀕 𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀓𑀲𑁆𑀫𑀸, 𑀇𑀢𑁄𑀬𑁂𑀯𑀢𑀲𑁆𑀲 𑀧𑀼𑀧𑁆𑀨𑀧𑁆𑀨𑀮𑀲𑁆𑀲 𑀚𑀸𑀢𑀢𑁆𑀢𑀸 𑀏𑀢𑁆𑀣𑁂𑀯𑀲𑀁 𑀯𑀟𑁆𑀠𑀺𑀢𑀢𑁆𑀢𑀸 𑀘. 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀥𑀫𑁆𑀫𑁄𑀧𑀺 𑀅𑀭𑀺𑀬𑀫𑀕𑁆𑀕𑀧𑁆𑀨𑀮𑀲𑁆𑀲𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀧𑀼𑀩𑁆𑀩𑀪𑀸𑀕𑀽𑀧𑀦𑀺𑀲𑁆𑀲𑀬𑀧𑁆𑀧𑀝𑀺𑀧𑀤𑀸𑀳𑁄𑀢𑀺. 𑀓𑀲𑁆𑀫𑀸, 𑀇𑀢𑁄𑀬𑁂𑀯 𑀢𑀲𑁆𑀲𑀚𑀸𑀢𑀢𑁆𑀢𑀸 𑀏𑀢𑁆𑀣𑁂𑀯𑀲𑀁 𑀯𑀟𑁆𑀠𑀺𑀢𑀢𑁆𑀢𑀸 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀯𑀕𑁆𑀕 𑀲𑀁𑀬𑀼𑀢𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀬𑁂𑀓𑁂𑀘𑀺 𑀫𑁂𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀩𑁆𑀩𑁂𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀁 𑀧𑀢𑀺𑀝𑁆𑀞𑀸𑀬. 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀻𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀽𑀢𑀺. ‘‘𑀧𑀼𑀩𑁆𑀩𑀘𑁂𑀢𑀦𑀸𑀯𑀺𑀬𑀤𑀸𑀦𑁂’’𑀢𑀺 𑀬𑀣𑀸 𑀢𑀺𑀯𑀺𑀥𑀁 𑀧𑀼𑀜𑁆𑀜𑀁, 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀲𑀻𑀮𑀫𑀬𑀁 𑀧𑀼𑀜𑁆𑀜𑀁 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑁂 𑀤𑀸𑀦𑀯𑀢𑁆𑀣𑀼 𑀧𑀭𑀺𑀬𑁂𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀩𑁆𑀪𑀧𑀯𑀢𑁆𑀢𑀸 𑀲𑀩𑁆𑀩𑀸 𑀧𑀼𑀩𑁆𑀩𑀪𑀸𑀕 𑀘𑁂𑀢𑀦𑀸 𑀤𑀸𑀦𑀯𑀘𑀦𑁂 𑀲𑀗𑁆𑀕𑀳𑀺𑀢𑀸 𑀤𑀸𑀦𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁𑀕𑀢𑀸. 𑀏𑀯𑀁 𑀲𑁄 𑀧𑀝𑀺𑀧𑀢𑁆𑀢𑀺 𑀥𑀫𑁆𑀫𑁄 𑀅𑀭𑀺𑀬 𑀫𑀕𑁆𑀕𑀯𑀘𑀦𑁂 𑀏𑀯𑀲𑀗𑁆𑀕𑀳𑀺𑀢𑁄, 𑀅𑀭𑀺𑀬𑀫𑀕𑁆𑀕𑁄 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀫𑀲𑁆𑀫𑀺𑀁 𑀥𑀫𑁆𑀫𑀲𑀁𑀲𑀦𑁆𑀤𑀦𑁂 𑀅𑀧𑀭𑀫𑁆𑀧𑀺 𑀯𑀢𑁆𑀢𑀩𑁆𑀩𑀁 𑀯𑀤𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑀤𑀕𑁆𑀕𑁂𑀦𑀸’’𑀢𑀺 𑀬𑁂𑀦𑀓𑀸𑀭𑀡𑀓𑁄𑀝𑁆𑀞𑀸𑀲𑁂𑀦 𑀥𑀸𑀭𑀡𑀽𑀧𑀸𑀬𑁄𑀢𑀺𑀆𑀤𑀺𑀦𑀸 𑀓𑀸𑀭𑀡𑀪𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀦𑁆𑀤𑀦𑀁 𑀅𑀭𑀳 𑀢𑀻𑀢𑀺 𑀯𑀦𑁆𑀤𑀦𑁂𑀬𑁆𑀬𑁄. 𑀢𑀲𑁆𑀫𑀺𑀁 𑀯𑀦𑁆𑀤𑀦𑁂𑀬𑁆𑀬𑁂. ‘‘𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄’’𑀢𑀺 𑀏𑀢𑁆𑀣 𑀢𑀺𑀯𑀺𑀥𑁄 𑀓𑀮𑁆𑀬𑀸𑀡𑀓𑁄 𑀯𑀺𑀦𑀬𑀓𑀮𑁆𑀬𑀸𑀡𑀓𑁄 𑀲𑀼𑀢𑁆𑀢𑀦𑁆𑀢𑀓𑀮𑁆𑀬𑀸𑀡𑀓𑁄 𑀅𑀪𑀺𑀥𑀫𑁆𑀫𑀓𑀮𑁆𑀬𑀸𑀡𑀓𑁄𑀢𑀺. 𑀢𑀢𑁆𑀣 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀸𑀬 𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀯𑀺𑀦𑀬𑀓𑀮𑁆𑀬𑀸𑀡𑀓𑁄 𑀦𑀸𑀫. 𑀲𑁄 𑀇𑀥 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔 𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭 𑀕𑁄𑀘𑀭 𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀏𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀸𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀤𑀼𑀯𑀺𑀥𑀸, 𑀆𑀤𑀺 𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑀻𑀮𑀁 𑀅𑀪𑀺𑀲𑀫𑀘𑀸𑀭𑀺𑀓𑀲𑀻𑀮𑀦𑁆𑀢𑀺. 𑀢𑀢𑁆𑀣, 𑀉𑀪𑀢𑁄𑀯𑀺𑀪𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁 𑀲𑀻𑀮𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀦𑀸𑀫. 𑀔𑀦𑁆𑀥𑀓𑀧𑀭𑀺𑀬𑀸𑀧𑀦𑁆𑀦𑀁 𑀲𑀻𑀮𑀁 𑀅𑀪𑀺𑀲𑀫𑀘𑀸𑀭𑀺𑀓𑀁 𑀦𑀸𑀫.

𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀼𑀢𑁆𑀢𑀸𑀬 𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀲𑀼𑀢𑁆𑀢𑀦𑁆𑀢 𑀓𑀮𑁆𑀬𑀸𑀡𑀓𑁄 𑀦𑀸𑀫. 𑀲𑁄 𑀘𑀢𑀽𑀳𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑀩𑁆𑀩𑀁 𑀤𑀼𑀕𑁆𑀕𑀢𑀺𑀪𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺. 𑀇𑀥 𑀪𑀺𑀓𑁆𑀔𑀯𑁂 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀇𑀢𑀺 𑀧𑀺𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀩𑀼𑀤𑁆𑀥𑁄, 𑀪𑀕𑀯𑀸𑀢𑀺. 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄…𑀧𑁂… 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺. 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀦𑀸𑀫 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀺𑀆𑀤𑀺𑀓𑀸𑀦𑀁 𑀕𑀼𑀡𑀧𑀤𑀸𑀦𑀁 𑀅𑀢𑁆𑀣 𑀚𑀸𑀦𑀦𑀜𑁆𑀜𑀸𑀡𑁂𑀦 𑀬𑀼𑀢𑁆𑀢𑁄 𑀧𑀲𑀸𑀤𑁄. 𑀅𑀭𑀺𑀬𑁂𑀳𑀺𑀓𑀸𑀫𑀻𑀬𑀦𑁆𑀢𑀺 𑀇𑀘𑁆𑀙𑀻𑀬𑀦𑁆𑀢𑀻𑀢𑀺 𑀅𑀭𑀺𑀬𑀓𑀦𑁆𑀢𑀸𑀦𑀺. 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀲𑁆𑀲𑁂𑀢𑀁 𑀦𑀸𑀫𑀁. 𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺. 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼 𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀻𑀢𑀺𑀆𑀤𑀻𑀦𑀺 𑀩𑀳𑀽𑀦𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀇𑀥 𑀯𑀢𑁆𑀢𑀩𑁆𑀩𑀸𑀦𑀺.

𑀅𑀪𑀺𑀥𑀫𑁆𑀫𑁂 𑀯𑀸 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀸 𑀯𑀼𑀢𑁆𑀢𑀸𑀬 𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀪𑀺𑀥𑀫𑁆𑀫𑀓𑀮𑁆𑀬𑀸𑀡𑀓𑁄 𑀦𑀸𑀫. 𑀲𑁄 𑀇𑀥 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬 𑀥𑀫𑁆𑀫𑀲𑁆𑀲𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂𑀲𑀼 𑀯𑀺𑀦𑀻𑀢𑁄. 𑀲𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣, ‘‘𑀲𑀼𑀢𑀯𑀸’’𑀢𑀺 𑀏𑀢𑁆𑀣 𑀔𑀦𑁆𑀥𑀸, 𑀬𑀢𑀦, 𑀥𑀸𑀢𑀼, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤, 𑀲𑀢𑀺𑀧𑀝𑁆𑀞𑀸𑀦𑀸, 𑀤𑀻𑀲𑀼 𑀉𑀕𑁆𑀕𑀳 𑀧𑀭𑀺𑀧𑀼𑀘𑁆𑀙𑀸 𑀯𑀺𑀦𑀺𑀘𑁆𑀙𑀬𑀜𑁆𑀜𑀸𑀡 𑀲𑀫𑀦𑁆𑀦𑀸𑀕𑀢𑁄 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀲𑀼𑀢 𑀯𑀸 𑀦𑀸𑀫𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄. 𑀲𑁄 𑀏𑀯 𑀧𑀼𑀣𑀼𑀚𑁆𑀚𑀦 𑀓𑀮𑁆𑀬𑀸𑀡𑀓𑁄𑀢𑀺 𑀘 𑀯𑀼𑀘𑁆𑀘𑀢𑀺.

𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄. 𑀢𑀺

𑀘 𑀯𑀼𑀢𑁆𑀢𑀁. 𑀅𑀗𑁆𑀕𑀼𑀢𑁆𑀢𑀭𑁂 𑀧𑀦 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀓𑀢𑀫𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀲𑁆𑀲𑀼𑀢𑁄 𑀲𑀼𑀢𑁂𑀦 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀏𑀓𑀸𑀬𑀧𑀺 𑀘𑀸𑀢𑀼𑀧𑁆𑀧𑀤𑀺𑀓𑀸𑀬 𑀕𑀸𑀣𑀸𑀬 𑀅𑀢𑁆𑀣 𑀫𑀜𑁆𑀜𑀸𑀬 𑀥𑀫𑁆𑀫 𑀫𑀜𑁆𑀜𑀸𑀬 𑀥𑀫𑁆𑀫𑀸 𑀦𑀼 𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀬𑀁 𑀅𑀧𑁆𑀧𑀲𑁆𑀲𑀼𑀢𑁄𑀲𑀼𑀢𑁂𑀦 𑀉𑀧𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁. 𑀲𑀼𑀢𑀯𑀸𑀢𑀺 𑀘 𑀲𑀼𑀢𑁂𑀦 𑀉𑀧𑀧𑀦𑁆𑀦𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦 𑀓𑀮𑁆𑀬𑀸𑀡𑀓𑁄 𑀲𑀗𑁆𑀖𑁂 𑀲𑁂𑀓𑁆𑀔𑁂𑀲𑀼𑀲𑀗𑁆𑀕𑀳𑀺𑀢𑁄. 𑀯𑀼𑀢𑁆𑀢𑀁𑀳𑁂𑀢𑀁 𑀧𑀭𑀺𑀯𑀸𑀭𑁂 𑀓𑁂 𑀲𑀺𑀓𑁆𑀔𑀦𑁆𑀢𑀻𑀢𑀺. 𑀧𑀼𑀣𑀼𑀚𑁆𑀚𑀦 𑀓𑀮𑁆𑀬𑀸𑀡𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀺𑀓𑁆𑀔𑀦𑁆𑀢𑀺. 𑀅𑀭𑀳𑀸 𑀔𑀻𑀡𑀸𑀲𑀯𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄𑀢𑀺. 𑀤𑀓𑁆𑀔𑀺𑀡 𑀯𑀺𑀪𑀗𑁆𑀕𑀲𑀼𑀢𑁆𑀢 𑀅𑀝𑁆𑀞𑀓𑀣𑀸𑀬𑀁 𑀧𑀦. 𑀢𑀺 𑀲𑀭𑀡 𑀲𑀭𑀡𑀁 𑀕𑀢𑁄 𑀉𑀧𑀸𑀲𑀓𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀲𑀗𑁆𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄𑀦𑀸𑀫 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀝𑁆𑀞𑁄 𑀅𑀭𑀺𑀬𑀧𑀼𑀕𑁆𑀕𑀮𑁄. ‘‘𑀲𑁄𑀳𑀺𑀲𑀗𑁆𑀕𑀳𑀺𑀢𑁄’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀢𑁆𑀢𑀸𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀗𑁆𑀖𑁂 𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀲𑀗𑁆𑀖𑀁𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀘, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺 𑀘, 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀆𑀕𑀢𑁂 𑀲𑀗𑁆𑀖 𑀯𑀘𑀦𑁂 𑀅𑀲𑀗𑁆𑀕𑀳𑀺𑀢𑁄. ‘‘𑀦 𑀳𑀺𑀢𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀲𑁆𑀲𑀲𑀭𑀡𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀲𑀗𑁆𑀖𑀁𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀏𑀢𑁆𑀣 𑀲𑀗𑁆𑀖 𑀯𑀘𑀦𑁂𑀢𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀅𑀲𑀗𑁆𑀕𑀳𑀺𑀢 𑀪𑀸𑀯𑀲𑀸𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺. 𑀲𑀘𑁂 𑀧𑀦 𑀲𑀩𑁆𑀩𑀁 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑀁 𑀅𑀦𑀼𑀤𑁆𑀥𑀺𑀲𑁆𑀲𑀢𑀫𑁂𑀯 𑀧𑀼𑀕𑁆𑀕𑀮𑀁 𑀲𑀗𑁆𑀖𑀁𑀲𑀭𑀡𑀁 𑀕𑀘𑁆𑀙𑁂𑀬𑁆𑀬 𑀆𑀬𑀲𑁆𑀫𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺. 𑀲𑀭𑀡 𑀕𑀫𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺𑀬𑁂𑀯. 𑀅𑀣 𑀲𑀩𑁆𑀩𑀁 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀭𑀡𑀁 𑀕𑀘𑁆𑀙𑁂𑀬𑁆𑀬 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺. 𑀲𑀫𑁆𑀧𑀚𑁆𑀚𑀢𑀺𑀬𑁂𑀯. 𑀇𑀤𑀜𑁆𑀘 𑀤𑀳𑀭𑀓𑀸𑀮𑁂 𑀲𑀩𑁆𑀩𑀧𑁆𑀧𑀣𑀫𑀁 𑀲𑀭𑀡𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀲𑀭𑀡 𑀕𑀫𑀦𑀁 𑀦𑀸𑀫 𑀲𑀓𑀺𑀁 𑀕𑀳𑁂𑀢𑁆𑀯𑀸 𑀭𑀢𑀦𑀢𑁆𑀢𑀬𑁂 𑀲𑀤𑁆𑀥𑀁 𑀅𑀚𑀳𑀦𑁆𑀢𑀲𑁆𑀲 𑀬𑀸𑀯𑀚𑀻𑀯𑀁𑀧𑀺 𑀦 𑀪𑀺𑀚𑁆𑀚𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀕𑀳𑀡 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀼𑀦𑀧𑁆𑀧𑀼𑀦𑀁 𑀕𑀡𑁆𑀳𑀦𑁆𑀢𑁂𑀧𑀺 𑀤𑁄𑀲𑁄𑀦𑀢𑁆𑀣𑀺. 𑀧𑀼𑀦𑀧𑁆𑀧𑀼𑀦𑀁 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀲𑀩𑁆𑀩𑀧𑁆𑀧𑀣𑀫𑀁 𑀕𑀳𑀡𑀓𑀸𑀮𑁂 𑀘 𑀅𑀜𑁆𑀜𑁂𑀦 𑀤𑀺𑀦𑁆𑀦𑀢𑁆𑀢𑀸 𑀮𑀤𑁆𑀥𑀁 𑀦𑀳𑁄𑀢𑀺. 𑀅𑀢𑁆𑀢𑀦𑁄𑀯𑀘𑀻 𑀪𑁂𑀤𑁂𑀦 𑀮𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀅𑀕𑁆𑀕𑀳𑁂𑀢𑁆𑀯𑀸 𑀲𑀬𑀫𑁂𑀯 𑀯𑀘𑀻𑀪𑁂𑀤𑀁 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀝𑁆𑀞𑀲𑁆𑀲 𑀲𑀭𑀡 𑀕𑀫𑀦𑀁 𑀲𑀫𑁆𑀧𑀚𑁆𑀚𑀢𑀺𑀬𑁂𑀯. 𑀢𑀣𑀸 𑀲𑀩𑁆𑀩𑀸𑀦𑀺 𑀕𑀳𑀝𑁆𑀞𑀲𑀻𑀮𑀸𑀦𑀻𑀢𑀺. 𑀲𑀸𑀫𑀡𑁂𑀭 𑀲𑀭𑀡 𑀕𑀫𑀦𑀫𑁆𑀧𑀦 𑀪𑀺𑀓𑁆𑀔𑀼𑀦𑀸𑀤𑀺𑀦𑁆𑀦𑀫𑁂𑀯 𑀮𑀩𑁆𑀪𑀢𑀺. 𑀢𑀜𑁆𑀘 𑀔𑁄 𑀉𑀪𑀺𑀦𑁆𑀦𑀁𑀧𑀺𑀞𑀸𑀦𑀓𑀭𑀡 𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀯𑁄’’𑀢𑀺 𑀢𑀼𑀫𑁆𑀳𑀸𑀓𑀁. 𑀬𑁄𑀥𑀫𑁆𑀫𑁄 𑀘 𑀤𑁂𑀲𑀺𑀢𑁄 𑀬𑁄𑀯𑀺𑀦𑀬𑁄𑀘𑀧𑀜𑁆𑀜𑀢𑁆𑀢𑁄. ‘‘𑀫𑀫𑀘𑁆𑀘𑀬𑁂𑀦𑀸’’𑀢𑀺 𑀫𑀫𑀸𑀢𑀺𑀓𑁆𑀓𑀫𑁂𑀦. 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀞𑀲𑁂𑀲𑁄. ‘‘𑀲𑀁𑀯𑀡𑁆𑀡𑀺𑀢𑁄’’𑀢𑀺 𑀲𑀼𑀝𑁆𑀞𑀼𑀢𑀭𑀁𑀯𑀡𑁆𑀡𑀺𑀢𑁄 𑀣𑁄𑀫𑀺𑀢𑁄. ‘‘𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄𑀧𑀻’’𑀢𑀺 𑀢𑀻𑀲𑀼𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀻𑀲𑀼 𑀅𑀜𑁆𑀜𑀢𑀭𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄𑀧𑀺. ‘‘𑀅𑀝𑁆𑀞𑀺𑀢𑁄𑀧𑀻’’𑀢𑀺 𑀲𑀩𑁆𑀩𑀧𑁆𑀧𑀝𑀺𑀧𑀢𑁆𑀢𑀺𑀩𑀸𑀳𑀺𑀭𑁄 𑀤𑀼𑀲𑁆𑀲𑀻𑀮𑁄𑀧𑀸𑀧𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑁂𑀲𑀢𑁄 𑀧𑀦 𑀯𑀺𑀦𑀬𑀧𑁆𑀧𑀝𑀺𑀧𑀢𑁆𑀢𑀺 𑀏𑀯 𑀇𑀥 𑀧𑀭𑀺𑀬𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀲𑁄’’𑀢𑀺 𑀲𑁄𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄. 𑀅𑀢𑁆𑀢𑀦𑁄𑀧𑀺 𑀲𑀭𑀡𑀁 𑀦𑀳𑁄𑀢𑀺. 𑀅𑀯𑀲𑁆𑀲𑀁 𑀅𑀧𑀸𑀬𑀕𑀸𑀫𑀻𑀬𑁂𑀯 𑀲𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀼𑀢𑁄 𑀲𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀬𑁄𑀚𑀦𑀸. ‘‘𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀳𑀲𑁆𑀲𑁂𑀲𑀽’’𑀢𑀺 𑀯𑀺𑀦𑀬𑁂𑀧𑀺 𑀩𑀳𑀽𑀦𑀺 𑀕𑀭𑀳𑀲𑀼𑀢𑁆𑀢𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑁂𑀲𑀼𑀧𑀺. 𑀯𑀺𑀲𑁂𑀲𑀢𑁄 𑀧𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀻𑀲𑀼.

𑀲𑀤𑁆𑀥𑀫𑁆𑀫𑀯𑀘𑀦𑀢𑁆𑀣𑁂. 𑀓𑀺𑀮𑁂𑀲𑁂𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀲𑀦𑁆𑀢𑁄𑀢𑀺 𑀯𑀘𑀦𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀫𑀺𑀢𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀢 𑀲𑀤𑁆𑀤𑁄 𑀧𑀦 𑀧𑀲𑀢𑁆𑀣𑁂𑀘, 𑀧𑀽𑀚𑀺𑀢𑁂𑀘, 𑀲𑀧𑁆𑀧𑀼𑀭𑀺𑀲𑁂𑀘, 𑀧𑀡𑁆𑀟𑀺𑀢𑁂𑀘, 𑀤𑀺𑀲𑁆𑀲𑀢𑀻𑀢𑀺 𑀇𑀫𑀁 𑀅𑀪𑀺𑀥𑀸𑀦𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀧𑀲𑀢𑁆𑀣𑀸𑀦’’𑀦𑁆𑀢𑀺𑀆𑀤𑀺𑀯𑀼𑀢𑁆𑀢𑀁. ‘‘𑀲𑀘𑁆𑀘𑁄𑀯𑀸 𑀥𑀫𑁆𑀫𑁄 𑀲𑀤𑁆𑀥𑀫𑁆𑀫𑁄’’𑀢𑀺 𑀬𑁄𑀚𑀦𑀸. 𑀏𑀢𑁂𑀦 𑀲𑀪𑀸𑀯𑀢𑁄 𑀅𑀢𑁆𑀣𑀺𑀲𑀁𑀯𑀺𑀚𑁆𑀚𑀢𑀻𑀢𑀺 𑀲𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀲𑁄’’𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬 𑀥𑀫𑁆𑀫𑁄. ‘‘𑀥𑀸𑀭𑁂𑀦𑁆𑀢𑀲𑁆𑀲𑀸’’𑀢𑀺 𑀲𑀯𑀦𑀼𑀕𑁆𑀕𑀳𑀥𑀸𑀭𑀡𑀧𑁆𑀧𑀝𑀺𑀧𑀚𑁆𑀚𑀦𑀸𑀤𑀺𑀯𑀲𑁂𑀦 𑀥𑀸𑀭𑁂𑀦𑁆𑀢𑀲𑁆𑀲. 𑀅𑀳𑀺𑀢𑁄𑀬𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀤𑀼𑀕𑁆𑀕𑀢𑀺 𑀯𑀺𑀧𑀸𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀬𑀁 𑀧𑀦𑀸’’𑀢𑀺 𑀲𑀢𑁆𑀣𑀼 𑀲𑀤𑁆𑀥𑀫𑁆𑀫𑁄 𑀧𑀦. ‘‘𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲𑀸’’𑀢𑀺 𑀅𑀬𑀁 𑀫𑁂 𑀳𑀺𑀢𑁄𑀢𑀺 𑀥𑀸𑀭𑁂𑀦𑁆𑀢𑀲𑁆𑀲 𑀳𑀺𑀢𑁄𑀬𑁂𑀯𑀲𑀫𑁆𑀧𑀚𑁆𑀚𑀢𑀺, 𑀲𑀼𑀕𑀢𑀺 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀲𑀫𑀸𑀦𑀤𑀺𑀝𑁆𑀞𑀺𑀲𑀻𑀮𑀸𑀦’’𑀦𑁆𑀢𑀺 𑀲𑀫𑀸𑀦𑀤𑀺𑀝𑁆𑀞𑀺𑀓𑀸𑀦𑀁 𑀲𑀫𑀸𑀦𑀲𑀻𑀮𑀸𑀦𑀜𑁆𑀘. 𑀏𑀢𑁂𑀦 𑀲𑀫𑀸𑀦𑀤𑀺𑀝𑁆𑀞𑀺𑀲𑀻𑀮𑀸 𑀚𑀦𑀸 𑀕𑀡𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀡𑁄. 𑀲𑀁𑀳𑀦𑀻𑀬𑀦𑁆𑀢𑀺 𑀏𑀓𑀢𑁄𑀓𑀭𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀖𑁄𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀲𑀳 𑀏𑀓𑀢𑁄 𑀥𑀫𑁆𑀫𑀁 𑀘𑀭𑀦𑁆𑀢𑀻𑀢𑀺 𑀲𑀳𑀥𑀫𑁆𑀫𑀺𑀓𑀸. 𑀏𑀓𑀲𑁆𑀲 𑀲𑀢𑁆𑀣𑀼𑀦𑁄 𑀥𑀫𑁆𑀫 𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸. 𑀢𑁂𑀲𑀁 𑀲𑀳𑀥𑀫𑁆𑀫𑀺𑀓𑀸𑀦𑀁. 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀉𑀢𑁆𑀢𑀫𑀕𑀡𑁄 𑀦𑀸𑀫. 𑀬𑁂 𑀓𑁂𑀘𑀺 𑀮𑁄𑀓𑁂 𑀲𑀗𑁆𑀖𑀸𑀯𑀸 𑀕𑀡𑀸𑀯𑀸. 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑁄𑀬𑁂𑀯 𑀇𑀥 𑀕𑀡𑀼𑀢𑁆𑀢𑀫𑁄𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑁂𑀲𑀦 𑀧𑀭 𑀦𑀺𑀧𑀸𑀢 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀢𑁆𑀢𑀫𑀲𑀤𑁆𑀤𑀲𑁆𑀲 𑀕𑀼𑀡𑀦𑀸𑀫𑀢𑁆𑀢𑀸 ‘‘𑀕𑀼𑀡𑀫𑁆𑀳𑀺𑀬𑁂𑀯 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀢𑁂𑀦𑀸’’𑀢𑀺 𑀉𑀢𑁆𑀢𑀫 𑀲𑀤𑁆𑀤𑁂𑀦. ‘‘𑀕𑀡𑁄𑀢𑀺 𑀲𑀗𑁆𑀖𑁄𑀬𑁂𑀯 𑀯𑀼𑀘𑁆𑀘𑀢𑀺’’ 𑀲𑀗𑁆𑀖𑀲𑀤𑁆𑀤𑀲𑁆𑀲𑀧𑀺 𑀲𑀫𑀽𑀳𑀝𑁆𑀞𑁂 𑀦𑀺𑀭𑀼𑀴𑁆𑀳𑀢𑁆𑀢𑀸, ‘‘𑀲𑁄 𑀯𑀺𑀦𑀬𑀓𑀫𑁆𑀫𑁂𑀲𑀼 𑀧𑀲𑀺𑀤𑁆𑀥𑁄’’𑀢𑀺 𑀧𑀜𑁆𑀘𑀲𑀗𑁆𑀖𑀸 𑀘𑀢𑀼𑀯𑀕𑁆𑀕𑀲𑀗𑁆𑀖𑁄, 𑀧𑀜𑁆𑀘𑀯𑀕𑁆𑀕𑀲𑀗𑁆𑀖𑁄, 𑀤𑀲𑀯𑀕𑁆𑀕𑀲𑀗𑁆𑀖𑁄, 𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀖𑁄, 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀕𑁆𑀕𑀲𑀗𑁆𑀖𑁄, 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀁 𑀓𑀫𑁆𑀫𑀁, 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀁 𑀓𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀧𑀲𑀺𑀤𑁆𑀥𑁄 𑀧𑀸𑀓𑀝𑁄. 𑀤𑀓𑁆𑀔𑀺𑀡𑀸 𑀯𑀼𑀘𑁆𑀘𑀢𑀺 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀆𑀬𑀢𑀺𑀁 𑀯𑀺𑀧𑀸𑀓𑀧𑁆𑀨𑀮𑀧𑁆𑀧𑀝𑀺 𑀮𑀸𑀪𑀢𑁆𑀣𑀸𑀬 𑀤𑀺𑀦𑁆𑀦𑀁 𑀤𑀸𑀦𑀓𑀫𑁆𑀫𑀁 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀢𑀁𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄. ‘‘𑀅𑀭𑀳𑀢𑀻’’𑀢𑀺 𑀘 𑀅𑀦𑀼𑀢𑁆𑀢𑀭 𑀧𑀼𑀜𑁆𑀜𑀓𑁆𑀔𑁂𑀢𑁆𑀢 𑀯𑀺𑀲𑁂𑀲𑀢𑁆𑀢𑀸𑀤𑀸𑀬𑀓𑁂𑀦 𑀇𑀘𑁆𑀙𑀺𑀢 𑀧𑀢𑁆𑀣𑀺𑀢𑀲𑁆𑀲 𑀆𑀬𑀢𑀺𑀁 𑀨𑀮𑀲𑁆𑀲 𑀲𑀼𑀝𑁆𑀞𑀼𑀲𑀫𑁆𑀧𑀸𑀤𑀦𑀯𑀲𑁂𑀦 𑀤𑀸𑀬𑀓𑀲𑁆𑀲 𑀘 𑀅𑀯𑀺𑀭𑀸𑀥𑀦𑀢𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑁆𑀧𑀫𑁂𑀬𑁆𑀬𑀯𑀟𑁆𑀠𑀺 𑀆𑀯𑀳𑀦𑀢𑁄 𑀘 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀭𑀳𑀢𑀺. 𑀏𑀯𑀭𑀽𑀧𑀁𑀳𑀺𑀤𑀸𑀦𑀁 𑀦𑀸𑀫 𑀉𑀴𑀸𑀭𑀤𑀸𑀦𑀁 𑀳𑁄𑀢𑀺. 𑀢𑀁 𑀬𑁂𑀲𑀼𑀤𑀼𑀲𑁆𑀲𑀻𑀮𑁂𑀲𑀼𑀤𑀺𑀬𑁆𑀬𑀢𑀺. 𑀢𑁂𑀲𑀁 𑀔𑁂𑀢𑁆𑀢 𑀤𑀼𑀝𑁆𑀞𑀢𑁆𑀢𑀸 𑀤𑀸𑀬𑀓𑁂𑀦 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀁 𑀨𑀮𑀁 𑀦 𑀲𑀫𑁆𑀧𑀸𑀤𑁂𑀢𑀺. 𑀦𑀺𑀧𑁆𑀨𑀮𑀁 𑀯𑀸 𑀳𑁄𑀢𑀺. 𑀅𑀧𑁆𑀧𑀧𑁆𑀨𑀮𑀁 𑀯𑀸. 𑀏𑀯𑀁𑀲𑀢𑀺, 𑀢𑁂 𑀤𑀸𑀬𑀓𑀜𑁆𑀘 𑀯𑀺𑀭𑀸𑀥𑁂𑀦𑁆𑀢𑀺 𑀦𑀸𑀫. 𑀧𑀼𑀜𑁆𑀜𑀧𑁆𑀨𑀮𑀸𑀦𑀺 𑀘 𑀯𑀺𑀦𑀸𑀲𑁂𑀦𑁆𑀢𑀺 𑀦𑀸𑀫. 𑀲𑀬𑀜𑁆𑀘 𑀢𑀁𑀤𑀸𑀦𑀁 𑀧𑀝𑀺𑀕𑁆𑀕𑀳𑀡𑀢𑁄 𑀯𑀸 𑀧𑀭𑀺𑀪𑁄𑀕𑀢𑁄 𑀯𑀸 𑀲𑀤𑁆𑀥𑀸𑀤𑁂𑀬𑁆𑀬𑀁 𑀯𑀺𑀦𑀺𑀧𑀸𑀢𑀦𑀢𑁄 𑀯𑀸 𑀤𑀼𑀕𑁆𑀕𑀢𑀺 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺. 𑀢𑀲𑁆𑀫𑀸𑀢𑁂 𑀏𑀯𑀭𑀽𑀧𑀁 𑀤𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀦𑀸𑀭𑀳𑀦𑁆𑀢𑀻𑀢𑀺. ‘‘𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀲𑀫𑁆𑀫𑀼𑀢𑀺 𑀦𑀸𑀫𑀸’’𑀢𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀼𑀢𑀺 𑀓𑀫𑁆𑀫𑀁 𑀦𑀸𑀫. 𑀢𑀜𑁆𑀳𑀺 𑀓𑀸𑀫𑀁𑀢𑁂𑀭 𑀲𑀲𑀼𑀲𑀫𑁆𑀫𑀼𑀢𑀺 𑀓𑀫𑁆𑀫𑁂𑀲𑀼𑀦𑀸𑀕𑀢𑀁. 𑀜𑀢𑁆𑀢𑀺 𑀘𑀢𑀼𑀢𑁆𑀣 𑀓𑀫𑁆𑀫𑀯𑀸𑀘𑀸 𑀲𑀗𑁆𑀔𑀸𑀢𑀸𑀬 𑀧𑀦 𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀲𑀺𑀤𑁆𑀥𑀢𑁆𑀢𑀸 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀼𑀢𑀺 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. ‘‘𑀉𑀧𑀲𑀫𑁆𑀧𑀦𑁆𑀦𑀪𑀽𑀫𑀺𑀁 𑀧𑀢𑁆𑀯𑀸’’𑀢𑀺 𑀉𑀧𑀲𑀫𑁆𑀧𑀦𑁆𑀦𑀪𑀽𑀫𑀺 𑀲𑀗𑁆𑀔𑀸𑀢𑀁 𑀉𑀧𑀭𑀺𑀞𑀸𑀦𑀦𑁆𑀢𑀭𑀁 𑀧𑀢𑁆𑀯𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀦𑀬𑁂 𑀪𑀺𑀓𑁆𑀔𑀼 𑀯𑀺𑀪𑀗𑁆𑀕𑁂. 𑀜𑀢𑁆𑀢𑀺 𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦𑀸𑀢𑀺. 𑀢𑀢𑁆𑀣, ‘‘𑀞𑀸𑀦𑀸𑀭𑀳𑁂𑀦𑀸’’𑀢𑀺 𑀉𑀧𑀲𑀫𑁆𑀧𑀦𑁆𑀦 𑀪𑀽𑀫𑀺𑀲𑀗𑁆𑀔𑀸𑀢𑀁 𑀞𑀸𑀦𑀦𑁆𑀢𑀭𑀁 𑀧𑀸𑀧𑁂𑀢𑀼𑀁 𑀅𑀭𑀳𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀉𑀧𑀲𑀫𑁆𑀧𑀦𑁆𑀦𑀪𑀽𑀫𑀻’’𑀢𑀺 𑀘 𑀉𑀧𑀲𑀫𑁆𑀧𑀦𑁆𑀦 𑀲𑀻𑀮𑀁 𑀯𑀼𑀘𑁆𑀘𑀢𑀺. ‘‘𑀯𑀺𑀦𑀬𑀓𑀫𑁆𑀫𑁂𑀲𑀼 𑀧𑀲𑀺𑀤𑁆𑀥𑁄’’𑀢𑀺. 𑀲𑀼𑀡𑀸𑀢𑀼𑀫𑁂𑀪𑀦𑁆𑀢𑁂 𑀲𑀗𑁆𑀖𑁄 𑀢𑀺𑀆𑀤𑀻𑀲𑀼 𑀧𑀸𑀓𑀝𑁄. 𑀅𑀧𑀺𑀘 ‘‘𑀲𑀫𑁆𑀫𑀼𑀢𑀺 𑀲𑀗𑁆𑀖𑁄’’𑀢𑀺, 𑀤𑁂𑀯𑀲𑀗𑁆𑀖𑀸𑀲𑀫𑀸𑀕𑀢𑀸𑀢𑀺𑀆𑀤𑀻𑀲𑀼 𑀯𑀺𑀬 𑀩𑀳𑀽𑀦𑀁 𑀲𑀫𑀽𑀳𑀦𑀝𑁆𑀞𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀲𑀺𑀤𑁆𑀥𑁄𑀲𑀗𑁆𑀖𑁄 𑀲𑀫𑁆𑀫𑀼𑀢𑀺 𑀲𑀗𑁆𑀖𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁄’’𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀝𑁆𑀞𑁂 𑀲𑀗𑁆𑀕𑀳𑀺𑀢𑁄𑀢𑀺, 𑀢𑁂𑀦 𑀲𑀳 𑀅𑀝𑁆𑀞𑀯𑀺𑀥𑁄 𑀅𑀭𑀺𑀬 𑀧𑀼𑀕𑁆𑀕𑀮𑀲𑀫𑀽𑀳𑁄. ‘‘𑀲𑀫𑁆𑀫𑀼𑀢𑀺 𑀲𑀗𑁆𑀖𑁂 𑀅𑀦𑁆𑀢𑁄𑀕𑀥𑁄𑀬𑁂𑀯𑀸’’𑀢𑀺 𑀏𑀢𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀲𑀗𑁆𑀖𑁄 𑀦𑀸𑀫 𑀯𑀺𑀲𑀼𑀁 𑀦𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀺𑀜𑁆𑀘 𑀦𑀯𑀢𑁆𑀢𑀩𑁆𑀩𑁂 𑀲𑀢𑀺, 𑀲𑀫𑁆𑀫𑀼𑀢𑀺 𑀲𑀗𑁆𑀖𑁄𑀢𑀺𑀧𑀺 𑀯𑀢𑁆𑀢𑀩𑁆𑀩 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀢𑁆𑀯𑁂𑀯 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀘𑁆𑀘𑀫𑁂𑀢𑀁. 𑀇𑀥 𑀧𑀦 𑀲𑀗𑁆𑀖𑀯𑀘𑀦𑁂𑀦 𑀆𑀕𑀢𑀝𑁆𑀞𑀸𑀦𑀲𑁆𑀲 𑀤𑀼𑀯𑀺𑀥𑀢𑁆𑀢𑀸 𑀲𑀗𑁆𑀖𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀫𑁆𑀫𑀼𑀢𑀺 𑀲𑀗𑁆𑀖𑀲𑁆𑀲 𑀆𑀕𑀢𑀝𑁆𑀞𑀸𑀦𑀁 𑀯𑀺𑀦𑀬𑀓𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀫𑁂𑀯. 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀆𑀕𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀭𑀡 𑀕𑀫𑀦…𑀧𑁂… 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑁂𑀲𑀼 𑀉𑀧𑀲𑀫𑁆𑀧𑀦𑁆𑀦𑀪𑀽𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄𑀯 𑀕𑀳𑁂𑀢𑀩𑁆𑀩𑁄. 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀝𑁆𑀞𑀸𑀦𑁂 𑀧𑀦 𑀧𑀼𑀕𑁆𑀕𑀮𑀺𑀓𑀤𑀸𑀦𑁂𑀲𑀼 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑀸𑀲𑀓𑁄𑀧𑀺 𑀲𑀸𑀫𑀡𑁂𑀭𑁄𑀧𑀺 𑀬𑀼𑀚𑁆𑀚𑀢𑀺. 𑀲𑀗𑁆𑀖𑀺𑀓 𑀤𑀸𑀦𑁂𑀲𑀼 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑁄𑀯. ‘‘𑀢𑀣𑀸 𑀢𑀣𑀸 𑀲𑀁𑀯𑀡𑁆𑀡𑁂𑀢𑁆𑀯𑀸’’𑀢𑀺 𑀆𑀳𑀼𑀦𑁂𑀬𑁆𑀬𑁄, 𑀧𑀸𑀳𑀼𑀦𑁂𑀬𑁆𑀬𑁄, 𑀤𑀓𑁆𑀔𑀺𑀡𑁂𑀬𑁆𑀬𑁄, 𑀅𑀜𑁆𑀚𑀮𑀻𑀓𑀭𑀡𑀻𑀬𑁆𑀬𑁄, 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸, 𑀢𑀺𑀆𑀤𑀺𑀦𑀸𑀲𑀼𑀝𑁆𑀞𑀼 𑀣𑁄𑀫𑁂𑀢𑁆𑀯𑀸. 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬 𑀲𑀗𑁆𑀖𑁄. ‘‘𑀧𑀼𑀣𑀼𑀚𑁆𑀚𑀦 𑀲𑀗𑁆𑀖𑁄’’𑀢𑀺 𑀇𑀤𑀁 𑀅𑀭𑀺𑀬 𑀲𑀗𑁆𑀖𑁂𑀦 𑀯𑀺𑀦𑀸𑀓𑁂𑀯𑀮𑀁 𑀧𑀼𑀣𑀼𑀚𑁆𑀚𑀦𑀲𑀗𑁆𑀖𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀗𑁆𑀖 𑀯𑀘𑀦𑁂𑀦 𑀲𑀗𑁆𑀖 𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀕𑀳𑁂𑀢𑀩𑁆𑀩𑁄. 𑀲𑁄 𑀲𑀘𑁂 𑀧𑀼𑀣𑀼𑀚𑁆𑀚𑀦𑁄 𑀳𑁄𑀢𑀺, 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀦𑀳𑁄𑀢𑀺. 𑀬𑀤𑀺 𑀅𑀭𑀺𑀬 𑀧𑀼𑀕𑁆𑀕𑀮𑁄 𑀳𑁄𑀢𑀺, 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀳𑁄𑀢𑀺.

𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂 𑀲𑀗𑁆𑀖𑀺𑀓𑀤𑀸𑀦𑁂 𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀢𑁂𑀲𑀁𑀧𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺. 𑀢𑀤𑀸𑀧𑀸𑀦𑀦𑁆𑀤 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀤𑀓𑁆𑀔𑀺𑀡𑁂𑀬𑁆𑀬 𑀲𑀗𑁆𑀖𑁂 𑀅𑀲𑀗𑁆𑀕𑀳𑀺𑀢𑁄𑀢𑀺 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀔𑁂𑀢𑁆𑀢𑀁 𑀤𑀽𑀲𑁂𑀦𑁆𑀢𑀻𑀢𑀺 𑀔𑁂𑀢𑁆𑀢𑀤𑀼𑀝𑁆𑀞𑀸𑀦𑀺. 𑀢𑀺𑀡𑀸𑀦𑀺. 𑀔𑁂𑀢𑁆𑀢𑀤𑀼𑀝𑁆𑀞𑀸 𑀓𑀺𑀮𑁂𑀲𑀸. 𑀯𑀼𑀢𑁆𑀢𑀜𑁆𑀳𑀺𑀥𑀫𑁆𑀫𑀧𑀤𑁂.

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀭𑀸𑀕𑀤𑁄𑀲𑀸 𑀅𑀬𑀁𑀧𑀚𑀸;

𑀢𑀲𑁆𑀫𑀸𑀳𑀺 𑀯𑀻𑀢𑀭𑀸𑀕𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀤𑁄𑀲𑀤𑁄𑀲𑀸 𑀅𑀬𑀁𑀧𑀚𑀸;

𑀢𑀲𑁆𑀫𑀸𑀳𑀺 𑀯𑀻𑀢𑀤𑁄𑀲𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑀢𑀺𑀡𑀤𑁄𑀲𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀫𑁄𑀳𑀤𑁄𑀲𑀸 𑀅𑀬𑀁𑀧𑀚𑀸;

𑀢𑀲𑁆𑀫𑀸𑀳𑀺 𑀯𑀻𑀢𑀫𑁄𑀳𑁂𑀲𑀼, 𑀤𑀺𑀦𑁆𑀦𑀁 𑀳𑁄𑀢𑀺 𑀫𑀳𑀧𑁆𑀨𑀮𑀦𑁆𑀢𑀺.

𑀇𑀥 𑀧𑀦 𑀲𑀸𑀢𑀺𑀲𑁆𑀲𑀬𑀢𑁄 𑀔𑁂𑀢𑁆𑀢𑀤𑀼𑀝𑁆𑀞𑁂 𑀓𑀺𑀮𑁂𑀲𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀪𑀸𑀯𑀸’’𑀢𑀺 𑀲𑀦𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲𑀪𑀸𑀯𑁄 𑀲𑀩𑁆𑀪𑀸𑀯𑁄𑀢𑀺𑀯𑀺𑀕𑁆𑀕𑀳𑁄. ‘‘𑀅𑀲𑁆𑀲𑀸’’𑀢𑀺 𑀧𑀼𑀣𑀼𑀚𑁆𑀚𑀦 𑀲𑀗𑁆𑀖𑀲𑁆𑀲. ‘‘𑀲𑀤𑁆𑀥𑀫𑁆𑀫𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀅𑀧𑀺𑀘𑀬𑀤𑀕𑁆𑀕𑁂𑀦𑀸𑀢𑀺 𑀯𑀼𑀢𑁆𑀢𑀦𑀬𑁂𑀦.

𑀲𑀲𑀤𑁆𑀥𑀫𑁆𑀫𑀕𑀡𑀼𑀢𑁆𑀢𑀫𑀧𑀤𑀢𑁆𑀣𑀸𑀦𑀼𑀤𑀻𑀧𑀦𑀻 𑀦𑀺𑀝𑁆𑀞𑀺𑀢𑀸.

𑁮. ‘‘𑀅𑀪𑀺𑀯𑀸𑀤𑀺𑀬𑀸’’𑀢𑀺 𑀲𑀼𑀔𑀻𑀳𑁄𑀳𑀺𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀯𑀁 𑀅𑀪𑀺𑀯𑀤𑀸𑀧𑁂𑀢𑁆𑀯𑀸. 𑀅𑀪𑀺𑀯𑀸𑀤𑀦𑀜𑁆𑀘 𑀦𑀸𑀫 𑀯𑀦𑁆𑀤𑀦𑀸𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺. 𑀯𑀦𑁆𑀤𑀦𑁆𑀢𑁄𑀳𑀺 𑀯𑀦𑁆𑀤𑀦𑁂𑀬𑁆𑀬𑁂 𑀯𑀼𑀤𑁆𑀥𑁂 𑀢𑀣𑀸 𑀯𑀤𑀸𑀧𑁂𑀢𑀺 𑀦𑀸𑀫. 𑀢𑀣𑀸 𑀯𑀤𑀦𑀜𑁆𑀘 𑀯𑀦𑁆𑀤𑀦𑁂𑀬𑁆𑀬𑀸𑀦𑀁𑀯𑀼𑀤𑁆𑀥𑀸𑀦𑀁 𑀯𑀢𑁆𑀢𑀁. ‘‘𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺 𑀧𑀝𑀺𑀫𑀼𑀔𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸. ‘‘𑀢𑀺𑀯𑀺𑀥𑀸’’𑀢𑀺 𑀤𑁆𑀯𑀸𑀭 𑀪𑁂𑀤𑁂𑀦 𑀢𑀺𑀯𑀺𑀥𑀸. ‘‘𑀯𑀦𑁆𑀤𑀦𑁂𑀬𑁆𑀬𑀸𑀦’’𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀦𑀁. ‘‘𑀦𑀺𑀧𑀚𑁆𑀚𑀦𑁆𑀢𑁄’’𑀢𑀺 𑀦𑀺𑀧𑀢𑀦𑁆𑀢𑁄. ‘‘𑀅𑀯𑀦𑁆𑀤𑀺𑀬𑁂𑀲𑀽’’𑀢𑀺 𑀪𑀺𑀓𑁆𑀔𑀽𑀳𑀺 𑀅𑀯𑀦𑁆𑀤𑀺𑀢𑀩𑁆𑀩𑁂 𑀲𑀼𑀦𑀯𑀓𑀢𑀭𑀸𑀤𑀻𑀲𑀼. ‘‘𑀕𑀼𑀡𑀧𑀤𑀸𑀦𑀻’’𑀢𑀺 𑀕𑀼𑀡𑀤𑀻𑀧𑀓𑀸𑀦𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀧𑀤𑀸𑀦𑀺. 𑀏𑀢𑁆𑀣𑀘𑀓𑀸𑀬𑁂𑀦𑀯𑀦𑁆𑀤𑀢𑀻𑀢𑀺𑀆𑀤𑀺 𑀉𑀧𑀘𑀸𑀭 𑀯𑀘𑀦𑀁 𑀳𑁄𑀢𑀺. 𑀬𑀣𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺. 𑀢𑀣𑀸𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀓𑀭𑀡𑀯𑀲𑁂𑀦 𑀘𑀓𑁆𑀔𑀽𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀭𑀽𑀧𑀤𑀲𑁆𑀲𑀦 𑀲𑀫𑀢𑁆𑀣𑁂𑀦 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑀘𑀓𑁆𑀔𑀼 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀅𑀘𑀺𑀢𑁆𑀢𑀢𑁆𑀢𑀸. 𑀘𑀺𑀢𑁆𑀢𑀁 𑀦 𑀧𑀲𑁆𑀲𑀢𑀺, 𑀅𑀘𑀓𑁆𑀔𑀼𑀢𑁆𑀢𑀸. 𑀤𑁆𑀯𑀸𑀭𑀸𑀭𑀫𑁆𑀫𑀡 𑀲𑀗𑁆𑀖𑀝𑁆𑀝𑀦𑁂 𑀧𑀦 𑀲𑀢𑀺 𑀘𑀓𑁆𑀔𑀼 𑀧𑀲𑀸𑀤𑀯𑀢𑁆𑀣𑀼 𑀓𑁂𑀦𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀈𑀤𑀺𑀲𑀻 𑀧𑀦𑁂𑀲𑀸 𑀓𑀣𑀸 𑀥𑀦𑀼𑀦𑀸 𑀯𑀺𑀚𑁆𑀛𑀢𑀻𑀢𑀺𑀆𑀤𑀻𑀲𑀼 𑀯𑀺𑀬 𑀲𑀲𑀫𑁆𑀪𑀸𑀭 𑀓𑀣𑀸𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄𑀢𑀺. 𑀏𑀢𑁆𑀣𑀳𑀺 ‘‘𑀓𑀸𑀬𑁂𑀦𑀸’’𑀢𑀺 𑀓𑀸𑀬 𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀤𑁆𑀯𑀸𑀭 𑀭𑀽𑀧𑀁 𑀓𑀭𑀡𑀁 𑀳𑁄𑀢𑀺. 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸𑀢𑀺 𑀯𑀘𑀦𑁂 𑀉𑀧𑀘𑀸𑀭 𑀯𑀘𑀦𑁂 𑀲𑀢𑀺 𑀓𑀸𑀬𑁂𑀦𑀸𑀢𑀺 𑀯𑀘𑀦𑀁𑀧𑀺 𑀉𑀧𑀘𑀸𑀭 𑀯𑀘𑀦𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀘𑀓𑁆𑀔𑀼𑀦𑀸𑀢𑀺 𑀧𑀤𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀓𑀸𑀬𑁂𑀦𑀸𑀢𑀺 𑀧𑀤𑁂𑀧𑀺 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀯𑀸𑀘𑀸𑀬 𑀯𑀦𑁆𑀤𑀢𑀺, 𑀫𑀦𑀲𑀸𑀯𑀦𑁆𑀤𑀢𑀻,𑀢𑀺 𑀧𑀤𑁂𑀲𑀼𑀧𑀺 𑀏𑀲𑀦𑀬𑁄. 𑀏𑀯𑀜𑁆𑀘 𑀲𑀢𑀺, 𑀓𑀸𑀬 𑀓𑀫𑁆𑀫𑁂𑀦𑀯𑀦𑁆𑀤𑀸𑀫𑀺, 𑀯𑀘𑀻𑀓𑀫𑁆𑀫𑁂𑀦 𑀯𑀦𑁆𑀤𑀸𑀫𑀺, 𑀫𑀦𑁄𑀓𑀫𑁆𑀫𑁂𑀦 𑀯𑀦𑁆𑀤𑀸𑀫𑀺, 𑀢𑀻𑀳𑀺 𑀓𑀫𑁆𑀫𑁂𑀳𑀺 𑀯𑀦𑁆𑀤𑀸𑀫𑀻𑀢𑀺 𑀇𑀤𑀫𑁂𑀯 𑀫𑀼𑀔𑁆𑀬𑀯𑀘𑀦𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀲𑀩𑁆𑀩𑀫𑀺𑀤𑀁 𑀇𑀦𑁆𑀤𑁆𑀭𑀺𑀬 𑀲𑀁𑀯𑀭𑀲𑀻𑀮𑀝𑁆𑀞𑀸𑀦𑁂 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀦𑀸𑀢𑀺 𑀇𑀤𑀁 𑀧𑀦 𑀫𑀼𑀔𑁆𑀬 𑀓𑀭𑀡 𑀯𑀘𑀦𑀫𑁂𑀯 𑀲𑀫𑁆𑀪𑀯𑀢𑀺. 𑀓𑀲𑁆𑀫𑀸, 𑀘𑀓𑁆𑀔𑀼𑀲𑁆𑀲 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼 𑀧𑀼𑀭𑁂𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀯𑀺𑀲𑁂𑀲𑀢𑁆𑀢𑀸. 𑀲𑁄𑀢𑁂𑀦 𑀲𑀤𑁆𑀤𑀁𑀲𑀼𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑀦𑀬𑁄.

𑀓𑀸𑀬𑁂𑀦𑀯𑀦𑁆𑀤𑀢𑀺, 𑀯𑀸𑀘𑀸𑀬𑀯𑀦𑁆𑀤𑀢𑀻,𑀢𑀺 𑀏𑀢𑁆𑀣 𑀢𑀁𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀭𑀽𑀧 𑀤𑁆𑀯𑀬𑀁 𑀓𑀺𑀜𑁆𑀘𑀸𑀧𑀺 𑀲𑀳𑀚𑀸𑀢 𑀘𑁂𑀢𑀦𑀸 𑀓𑀫𑁆𑀫𑁂𑀦 𑀚𑀸𑀢𑀁 𑀳𑁄𑀢𑀺. 𑀦 𑀢𑀁 𑀘𑁂𑀢𑀦𑀸𑀓𑀫𑁆𑀫𑀁 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬𑁂𑀦𑀚𑀸𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀭𑀽𑀧 𑀤𑁆𑀯𑀬𑀁 𑀢𑀲𑁆𑀲𑀸𑀘𑁂𑀢𑀦𑀸𑀬 𑀓𑀸𑀬𑀯𑀦𑁆𑀤𑀦𑀸𑀓𑀫𑁆𑀫, 𑀯𑀘𑀻𑀯𑀦𑁆𑀤𑀦𑀸𑀓𑀫𑁆𑀫 𑀲𑀺𑀤𑁆𑀥𑀺𑀬𑀸 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀯𑀺𑀲𑁂𑀲𑁄 𑀳𑁄𑀢𑀺. 𑀬𑀣𑀸𑀢𑀁 𑀫𑀸𑀢𑀺𑀢𑁄 𑀚𑀸𑀢𑁄 𑀧𑀼𑀢𑁆𑀢𑁄 𑀯𑀼𑀤𑁆𑀥𑀺 𑀧𑀢𑁆𑀢𑁄 𑀢𑀁 𑀢𑀁 𑀓𑀫𑁆𑀫𑁂𑀲𑀼 𑀫𑀸𑀢𑀼𑀬𑀸 𑀩𑀮 𑀯𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀁 𑀭𑀽𑀧𑀤𑁆𑀯𑀬𑀁 𑀅𑀪𑀺𑀥𑀫𑁆𑀫𑁂 𑀤𑁆𑀯𑀸𑀭𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘𑀓𑀸𑀬𑁂𑀦, 𑀯𑀸𑀘𑀸𑀬𑀸,𑀢𑀺 𑀇𑀤𑀁𑀧𑀺 𑀫𑀼𑀔𑁆𑀬 𑀓𑀭𑀡 𑀯𑀘𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀬𑁂𑀦𑀸𑀢𑀺 𑀧𑀦 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺, 𑀢𑀲𑁆𑀲𑀓𑀫𑁆𑀫𑀲𑁆𑀲 𑀯𑀦𑁆𑀤𑀦𑀸𑀓𑀺𑀭𑀺𑀬𑀸𑀬 𑀲𑀳 𑀅𑀪𑁂𑀤𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂. 𑀦𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀘𑁂𑀢𑀦𑀸𑀳𑀁 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀯𑀤𑀸𑀫𑀺, 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 ‘𑀓𑀸𑀬𑁂𑀦, 𑀯𑀸𑀘𑀸𑀬, 𑀫𑀦𑀲𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀬𑀣𑀸𑀳𑀺 ‘‘𑀘𑁂𑀢𑀬𑀺𑀢𑁆𑀯𑀸’’𑀢𑀺 𑀧𑀼𑀭𑀺𑀫𑀘𑁂𑀢𑀦𑀸𑀳𑀺 𑀘𑁂𑀢 𑀬𑀺𑀢𑁆𑀯𑀸. ‘‘𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 𑀧𑀘𑁆𑀙𑀺𑀫𑀁 𑀲𑀦𑁆𑀦𑀺𑀝𑁆𑀞𑀸𑀧𑀦 𑀘𑁂𑀢𑀦𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀇𑀥𑀧𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀘𑁂𑀢𑀦𑀸 𑀲𑀫𑁆𑀪𑀯𑀢𑁄𑀢𑀺. 𑀏𑀢𑁆𑀣 𑀳𑀺 ‘‘𑀓𑀸𑀬𑀓𑀫𑁆𑀫𑁂𑀦𑀸’’𑀢𑀺 𑀧𑀼𑀭𑀺𑀫𑀘𑁂𑀢𑀦𑀸 𑀓𑀫𑁆𑀫𑀁 𑀕𑀬𑁆𑀳𑀢𑀺. ‘‘𑀯𑀦𑁆𑀤𑀢𑀻’’𑀢𑀺 𑀧𑀘𑁆𑀙𑀺𑀫 𑀲𑀦𑁆𑀦𑀺𑀝𑁆𑀞𑀸𑀧𑀦𑀘𑁂𑀢𑀦𑀸𑀓𑀫𑁆𑀫𑀦𑁆𑀢𑀺.

𑁯. ‘‘𑀭𑀘𑀬𑀦𑁆𑀢𑁄’’𑀢𑀺 𑀯𑀺𑀤𑀳𑀦𑁆𑀢𑁄. ‘‘𑀭𑀘𑀬𑀺𑀲𑁆𑀲𑀢𑀻’’𑀢𑀺 𑀅𑀧𑀘𑁆𑀘𑀓𑁆𑀔𑁂 𑀅𑀢𑀻𑀢𑁂 𑀅𑀦𑀸𑀕𑀢𑀯𑀘𑀦𑀁. ‘‘𑀧𑁄𑀢𑁆𑀣𑀓𑀸𑀭𑀼𑀴𑁆𑀳’’𑀦𑁆𑀢𑀺 𑀧𑁄𑀢𑁆𑀣𑀓 𑀧𑀢𑁆𑀢𑁂𑀲𑀼𑀮𑀺𑀔𑀦𑀯𑀲𑁂𑀦 𑀆𑀭𑀼𑀴𑁆𑀳𑀁.

𑁧𑁦. 𑀅𑀪𑀺𑀥𑀫𑁆𑀫𑀢𑁆𑀣𑀧𑀤𑁂. ‘‘𑀅𑀪𑀺𑀥𑀫𑁆𑀫𑁂’’𑀢𑀺 𑀅𑀪𑀺𑀥𑀫𑁆𑀫𑀧𑁆𑀧𑀓𑀭𑀡𑁂. ‘‘𑀏𑀢𑁆𑀣, 𑀏𑀢𑁂𑀦𑀸’’𑀢𑀺 𑀯𑀘𑀦𑁂𑀳𑀺 𑀲𑀗𑁆𑀕𑀳𑀲𑀤𑁆𑀤𑀲𑁆𑀲 𑀏𑀓𑀲𑁂𑀲𑀯𑀺𑀥𑀸𑀦𑀁𑀧𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀜𑁆𑀜𑀁𑀧𑀸𑀴𑀺𑀤𑁆𑀯𑀬𑀁 𑀯𑀼𑀘𑁆𑀘𑀢𑀺’’. 𑀓𑀲𑁆𑀫𑀸𑀢𑀁 𑀧𑀸𑀴𑀺𑀤𑁆𑀯𑀬𑀁 𑀅𑀪𑀺𑀥𑀫𑁆𑀫𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀜𑁆𑀘𑀸’’𑀢𑀺𑀆𑀤𑀺. ‘‘𑀬𑀣𑀸𑀧𑀯𑀢𑁆𑀢𑁂’’𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑁂. ‘‘𑀧𑀭𑀫𑀢𑁆𑀣𑀥𑀫𑁆𑀫𑁂 𑀏𑀯𑀸’’𑀢𑀺 𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸, 𑀢𑀬𑁄𑀫𑁂𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸𑀢𑀺𑀆𑀤𑀺𑀦𑀸 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑁂𑀦 𑀧𑀯𑀢𑁆𑀢𑀸𑀧𑀺 𑀤𑁂𑀲𑀦𑀸 𑀧𑀭𑀫𑀢𑁆𑀣 𑀥𑀫𑁆𑀫𑁂𑀳𑀺 𑀯𑀺𑀦𑀸 𑀦𑀧𑀯𑀢𑁆𑀢𑀢𑀺. 𑀧𑀭𑀫𑀢𑁆𑀣 𑀥𑀫𑁆𑀫𑀸𑀦𑀁 𑀦𑀸𑀦𑀢𑁆𑀢𑀯𑀲𑁂𑀦𑁂𑀯 𑀧𑀼𑀕𑁆𑀕𑀮𑀸𑀦𑀁 𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀧𑀭𑀫𑀢𑁆𑀣𑀥𑀫𑁆𑀫𑁂 𑀏𑀯 𑀤𑀻𑀧𑁂𑀢𑀺. 𑀦 𑀆𑀡𑀸𑀯𑀺𑀥𑀸𑀦𑀁 𑀤𑀻𑀧𑁂𑀢𑀺. ‘‘𑀤𑁆𑀯𑀻𑀲𑀼𑀥𑀫𑁆𑀫𑁂𑀲𑀽’’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀘𑀦𑀁. ‘‘𑀬𑁄𑀇𑀢𑀭𑀢𑁄’’𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑀁. ‘‘𑀬𑁄’’𑀢𑀺 𑀬𑁄 𑀥𑀫𑁆𑀫𑁄. ‘‘𑀇𑀢𑀭𑀢𑁄’’𑀢𑀺 𑀇𑀢𑀭 𑀥𑀫𑁆𑀫𑀢𑁄 𑀲𑀼𑀢𑁆𑀢𑀦𑁆𑀢 𑀥𑀫𑁆𑀫𑀢𑁄. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀸𑀦𑀁 𑀅𑀦𑀯𑀲𑁂𑀲𑀯𑀺𑀪𑀢𑁆𑀢𑀺𑀯𑀲𑁂𑀦 𑀅𑀢𑀺𑀭𑁂𑀓𑀢𑀸, 𑀲𑀼𑀤𑁆𑀥 𑀥𑀫𑁆𑀫𑀸𑀥𑀺𑀝𑁆𑀞𑀸𑀦 𑀤𑁂𑀲𑀦𑀸 𑀧𑀯𑀢𑁆𑀢𑀺𑀯𑀲𑁂𑀦 𑀯𑀺𑀲𑁂𑀲𑀢𑀸 𑀬𑁄𑀚𑁂𑀢𑀩𑁆𑀩𑀸. ‘‘𑀬𑀢𑁄’’𑀢𑀺 𑀬𑀲𑁆𑀫𑀸 𑀅𑀦𑀯𑀲𑁂𑀲𑀯𑀺𑀪𑀢𑁆𑀢𑀺𑀢𑁄, 𑀅𑀢𑀺𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀤𑁂𑀯𑁂𑀲𑀼 𑀏𑀯 𑀤𑁂𑀲𑁂𑀦𑁆𑀢𑀻𑀢𑀺 𑀆𑀳 ‘‘𑀦 𑀳𑀺 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀦 𑀳𑀺 𑀫𑀦𑀼𑀲𑁆𑀲𑀸 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀯𑀢𑁆𑀢𑀦𑀬𑁄𑀕𑁆𑀬’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁆𑀣𑀸𑀬 𑀧𑀳𑁄𑀦𑁆𑀢𑀁. ‘‘𑀓𑀣𑀸𑀫𑀕𑁆𑀕’’𑀦𑁆𑀢𑀺 𑀤𑁂𑀲𑀦𑀸𑀓𑀣𑀸𑀧𑀩𑀦𑁆𑀥𑀁. ‘‘𑀏𑀓𑀫𑀸𑀢𑀺𑀓𑀸𑀦𑀼 𑀩𑀦𑁆𑀥𑀸’’𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀺𑀓𑀁 𑀏𑀓𑀁 𑀅𑀪𑀺𑀥𑀫𑁆𑀫 𑀫𑀸𑀢𑀺𑀓𑀁 𑀅𑀦𑀼𑀕𑀢𑀸. ‘‘𑀢𑀲𑁆𑀲𑀸’’𑀢𑀺 𑀅𑀪𑀺𑀥𑀫𑁆𑀫𑀲𑁆𑀲. 𑀅𑀢𑀺𑀭𑁂𑀓 𑀯𑀺𑀲𑁂𑀲𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀢𑁆𑀣𑀸’’𑀢𑀺 𑀢𑀺𑀲𑁆𑀲𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁. 𑀆𑀤𑀺𑀫𑁆𑀳𑀺𑀬𑁂𑀯𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀅𑀪𑀺𑀥𑀫𑁆𑀫𑁄, 𑀥𑀫𑁆𑀫𑀸𑀢𑀺𑀭𑁂𑀓 𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂 𑀦𑀸-𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀲𑀼𑀢𑁆𑀢𑀜𑁆𑀳𑀺 𑀧𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀓𑀤𑁂𑀲𑁂𑀦𑁂𑀯 𑀯𑀺𑀪𑀢𑁆𑀢𑀸, 𑀦𑀦𑀺𑀧𑁆𑀧𑀤𑁂𑀲𑁂𑀦. 𑀅𑀪𑀺𑀥𑀫𑁆𑀫𑀁 𑀧𑀢𑁆𑀯𑀸 𑀧𑀦 𑀦𑀺𑀧𑁆𑀧𑀤𑁂𑀲𑀢𑁄𑀯 𑀯𑀺𑀪𑀢𑁆𑀢𑀸-𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀥𑀫𑁆𑀫𑀦𑀸𑀫𑀺𑀓𑀸𑀦’’𑀦𑁆𑀢𑀺𑀆𑀤𑀺𑀁. ‘‘𑀥𑀫𑁆𑀫𑁄 𑀧𑀦𑀸’’𑀢𑀺 𑀧𑀸𑀴𑀺𑀤𑁆𑀯𑀬𑀫𑀸𑀳.‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀏𑀯𑀁 𑀯𑀺𑀘𑀸𑀭𑀺𑀢𑁂𑀧𑀺𑀲𑀢𑀺. ‘‘𑀲𑀩𑁆𑀩𑀚𑁂𑀝𑁆𑀞𑀓𑁄’’𑀢𑀺 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀫𑀚𑁆𑀛𑁂𑀲𑀩𑁆𑀩𑀚𑁂𑀝𑁆𑀞𑀓𑁄. 𑀓𑀲𑁆𑀫𑀸 𑀲𑀩𑁆𑀩𑀚𑁂𑀝𑁆𑀞𑀓𑁄 𑀲𑀺𑀬𑀸𑀢𑀺 𑀆𑀳 ‘‘𑀯𑀺𑀦𑀬𑀁 𑀯𑀺𑀯𑀡𑁆𑀡𑁂𑀦𑁆𑀢𑀲𑁆𑀲𑀳𑀻’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀯𑀺𑀯𑀡𑁆𑀡𑁂𑀦𑁆𑀢𑀲𑁆𑀲𑀸’’𑀢𑀺 𑀕𑀭𑀳𑀦𑁆𑀢𑀲𑁆𑀲. 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀘𑀓𑁆𑀓𑀁. 𑀮𑁄𑀓𑀲𑁆𑀫𑀺𑀁 𑀓𑁂𑀦𑀘𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀆𑀡𑀸𑀯𑀺𑀥𑀸𑀦𑀁 𑀆𑀡𑀸𑀘𑀓𑁆𑀓𑀁 𑀦𑀸𑀫. 𑀢𑀣𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀤𑁂𑀲𑀦𑀸 𑀯𑀺𑀥𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 𑀦𑀸𑀫. 𑀢𑀢𑁆𑀣, 𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄-𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀆𑀡𑀸𑀯𑀺𑀥𑀸𑀦𑀁 𑀆𑀡𑀸𑀘𑀓𑁆𑀓𑀁 𑀦𑀸𑀫. 𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀅𑀭𑀺𑀬𑀲𑀘𑁆𑀘𑀸𑀦𑀻-𑀢𑀺𑀆𑀤𑀺𑀓𑀁 𑀤𑁂𑀲𑀦𑀸𑀯𑀺𑀥𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 𑀦𑀸𑀫. 𑀢𑀤𑀼𑀪𑀬𑀁𑀧𑀺 𑀓𑁄𑀘𑀺 𑀪𑀺𑀦𑁆𑀤𑀺𑀢𑀼𑀁 𑀧𑀸𑀭𑀸𑀚𑀺𑀓𑀁 𑀯𑀸 𑀪𑀺𑀓𑁆𑀔𑀼𑀁 𑀅𑀧𑀸𑀭𑀸𑀚𑀺𑀓𑀁 𑀓𑀸𑀢𑀼𑀁 𑀘𑀢𑀼𑀲𑁆𑀲𑀘𑁆𑀘𑀁 𑀯𑀸 𑀥𑀫𑁆𑀫𑀁 𑀅𑀲𑀘𑁆𑀘𑀁 𑀓𑀸𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀅𑀣 𑀔𑁄 𑀓𑀭𑁄𑀦𑁆𑀢𑁄𑀬𑁂𑀯 𑀤𑁂𑀯𑀤𑀢𑁆𑀢𑁄𑀯𑀺𑀬 𑀆𑀧𑀸𑀬𑀺𑀓𑁄 𑀳𑁄𑀢𑀺. 𑀧𑀸𑀭𑀸𑀚𑀺𑀓𑁄𑀘 𑀪𑀺𑀓𑁆𑀔𑀼 𑀅𑀢𑁆𑀢𑀸𑀦𑀁 𑀲𑀼𑀤𑁆𑀥𑀁 𑀅𑀓𑀭𑁄𑀦𑁆𑀢𑁄 𑀅𑀧𑀸𑀬𑀕𑀸𑀫𑀻𑀬𑁂𑀯 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀼 𑀯𑀺𑀦𑀬 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀏𑀯𑀁 𑀓𑁂𑀦𑀘𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀤𑀼𑀪𑀬𑀁𑀧𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀘𑀓𑁆𑀓𑀁 𑀦𑀸𑀫 𑀳𑁄𑀢𑀺. ‘‘𑀯𑀺𑀦𑀬𑁄 𑀦𑀸𑀫 𑀲𑀸𑀲𑀦𑀲𑁆𑀲 𑀫𑀽𑀮’’𑀦𑁆𑀢𑀺 𑀯𑀺𑀦𑀬𑁂 𑀞𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀜𑁆𑀜𑀸𑀬𑀢𑀺. 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀧𑀜𑁆𑀜𑀸𑀬𑀦𑁆𑀢𑁂 𑀢𑀺𑀯𑀺𑀥𑁄𑀧𑀺𑀲𑀤𑁆𑀥𑀫𑁆𑀫𑁄𑀧𑀜𑁆𑀜𑀸𑀬𑀢𑀺, 𑀢𑀺𑀯𑀺𑀥𑀁𑀧𑀺 𑀲𑀢𑁆𑀣𑀼𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀏𑀯𑀁 𑀯𑀺𑀦𑀬𑁄 𑀢𑀺𑀯𑀺𑀥𑀲𑁆𑀲𑀲𑀸𑀲𑀦𑀲𑁆𑀲 𑀫𑀽𑀮𑀁 𑀳𑁄𑀢𑀻𑀢𑀺. 𑀓𑀣𑀜𑁆𑀘𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁂 𑀧𑀜𑁆𑀜𑀸𑀬𑀦𑁆𑀢𑁂 𑀢𑀺𑀯𑀺𑀥𑀁𑀧𑀺 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀢𑀢𑁆𑀣 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻𑀢𑀺 𑀓𑀺𑀢𑁆𑀢𑀓𑀁𑀓𑀸𑀮𑀁 𑀢𑀺𑀝𑁆𑀞𑀢𑀻𑀢𑀺. 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀢𑀺𑀝𑁆𑀞𑀢𑀻𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼𑀓𑀣𑀬𑀺𑀁𑀲𑀼. 𑀫𑀺𑀘𑁆𑀙𑀸𑀯𑀸𑀤𑀺𑀦𑁄𑀧𑀦𑀯𑀤𑀦𑁆𑀢𑀺 𑀯𑀺𑀦𑀬𑁂 𑀘𑀽𑀴𑀯𑀕𑁆𑀕𑁂𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑁂 𑀲𑀘𑁂 𑀆𑀦𑀦𑁆𑀤 𑀫𑀫𑀲𑀸𑀲𑀦𑁂𑀫𑀸𑀢𑀼𑀕𑀸𑀫𑁄 𑀧𑀩𑁆𑀩𑀚𑁆𑀚𑀁 𑀦𑀮𑀪𑁂𑀬𑁆𑀬. 𑀯𑀲𑁆𑀲𑀲𑀳𑀲𑁆𑀲𑀁 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬. 𑀇𑀤𑀸𑀦𑀺 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸 𑀕𑁄𑀢𑀫𑀺𑀬𑀸 𑀧𑀼𑀦𑀧𑁆𑀧𑀼𑀦𑀁 𑀆𑀬𑀸𑀘𑀦𑀁 𑀉𑀧𑀸𑀤𑀸𑀬. 𑀧𑀜𑁆𑀘𑁂𑀯𑀤𑀸𑀦𑀺 𑀆𑀦𑀦𑁆𑀤 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄𑀞𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀩𑀼𑀤𑁆𑀥𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀏𑀯 𑀢𑀺𑀝𑁆𑀞𑀢𑀺. 𑀢𑀢𑁄𑀧𑀭𑀁 𑀏𑀓𑀤𑀺𑀯𑀲𑀁𑀧𑀺 𑀦 𑀢𑀺𑀝𑁆𑀞𑀢𑀺. 𑀇𑀤𑀸𑀦𑀺 𑀲𑀸𑀲𑀦𑀧𑁆𑀧𑀝𑀺 𑀭𑀽𑀧𑀓𑀫𑀢𑁆𑀢𑀁 𑀳𑁄𑀢𑀻𑀢𑀺. 𑀢𑀁 𑀢𑁂𑀲𑀁 𑀫𑀺𑀘𑁆𑀙𑀸 𑀯𑀘𑀦𑀫𑀢𑁆𑀢𑀁. ‘‘𑀧𑀜𑁆𑀘𑁂𑀯𑀯𑀲𑁆𑀲𑀲𑀢𑀸𑀦𑀻’’𑀢𑀺 𑀇𑀤𑀁 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦 𑀯𑀘𑀦𑀁 𑀦𑀳𑁄𑀢𑀺. 𑀫𑀸𑀢𑀼𑀕𑀸𑀫𑀸𑀦𑀁 𑀆𑀤𑀻𑀦𑀯 𑀤𑀻𑀧𑀦𑀫𑀢𑁆𑀢𑀯𑀘𑀦𑀁. 𑀲𑁄 𑀘 𑀆𑀤𑀻𑀦𑀯𑁄 𑀅𑀝𑁆𑀞𑀕𑀭𑀼𑀥𑀫𑁆𑀫𑁂 𑀲𑀡𑁆𑀞𑀧𑁂𑀢𑁆𑀯𑀸 𑀲𑀢𑁆𑀣𑀸𑀭𑀸 𑀏𑀯 𑀧𑀝𑀺𑀩𑀸𑀳𑀺𑀢𑁄. 𑀧𑀼𑀦 ‘‘𑀯𑀲𑁆𑀲𑀲𑀳𑀲𑁆𑀲’’𑀦𑁆𑀢𑀺 𑀇𑀤𑀫𑁂𑀯𑀲𑀦𑁆𑀦𑀺𑀝𑁆𑀞𑀸𑀦 𑀯𑀘𑀦𑀁 𑀚𑀸𑀢𑀦𑁆𑀢𑀺. 𑀏𑀢𑁆𑀣𑀧𑀺𑀓𑁂𑀘𑀺𑀯𑀤𑀦𑁆𑀢𑀺 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺, 𑀢𑀢𑁄𑀧𑀭𑀁 𑀏𑀓𑀤𑀺𑀯𑀲 𑀫𑀢𑁆𑀢𑀁𑀧𑀺 𑀦 𑀢𑀺𑀝𑁆𑀞𑀢𑀺, 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀸 𑀲𑀻𑀫𑀸𑀬𑁄𑀧𑀺 𑀅𑀲𑀻𑀫𑀸 𑀳𑁄𑀦𑁆𑀢𑀺. 𑀧𑀘𑁆𑀙𑀸𑀢𑀸𑀲𑀼 𑀉𑀧𑀲𑀫𑁆𑀧𑀸𑀤𑀺𑀢𑀸𑀧𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀇𑀤𑀸𑀦𑀺 𑀲𑀸𑀲𑀦𑀧𑁆𑀧𑀝𑀺 𑀭𑀽𑀧𑀓𑀫𑀢𑁆𑀢𑀁 𑀳𑁄𑀢𑀻𑀢𑀺. 𑀇𑀤𑀁𑀧𑀺 𑀢𑁂𑀲𑀁 𑀅𑀢𑁆𑀣𑀜𑁆𑀘𑀓𑀸𑀭𑀡𑀜𑁆𑀘 𑀅𑀤𑀺𑀲𑁆𑀯𑀸 𑀅𑀚𑀸𑀦𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀫𑀺𑀘𑁆𑀙𑀸 𑀯𑀘𑀦𑀫𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄. ‘‘𑀯𑀲𑁆𑀲𑀲𑀳𑀲𑁆𑀲𑀁 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀲𑀤𑁆𑀥𑀫𑁆𑀫𑁄 𑀅𑀧𑀭𑀺𑀳𑀸𑀬𑀫𑀸𑀦𑁄 𑀢𑀺𑀝𑁆𑀞𑁂𑀬𑁆𑀬. 𑀢𑀢𑁄𑀧𑀭𑀁 𑀧𑀦 𑀦 𑀢𑀺𑀝𑁆𑀞𑁂𑀬𑁆𑀬, 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀫𑀸𑀦𑁄 𑀕𑀘𑁆𑀙𑁂𑀬𑁆𑀬𑀸𑀢𑀺. 𑀓𑀣𑀁 𑀧𑀦 𑀅𑀧𑀭𑀺𑀳𑀸𑀬𑀫𑀸𑀦𑁄 𑀢𑀺𑀝𑁆𑀞𑀢𑀺, 𑀓𑀣𑀜𑁆𑀘 𑀧𑀭𑀺𑀳𑀸𑀬𑀫𑀸𑀦𑁄 𑀕𑀘𑁆𑀙𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀧𑀜𑁆𑀘𑀲𑀗𑁆𑀖𑀸 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀲𑀼 𑀲𑀗𑁆𑀖𑁂 𑀲𑀼𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀺. 𑀓𑀢𑀫𑁂 𑀧𑀜𑁆𑀘. 𑀔𑀻𑀡𑀸𑀲𑀯𑀲𑀗𑁆𑀖𑁄, 𑀅𑀦𑀸𑀕𑀸𑀫𑀺𑀲𑀗𑁆𑀖𑁄, 𑀲𑀓𑀤𑀸𑀕𑀸𑀫𑀺𑀲𑀗𑁆𑀖𑁄, 𑀲𑁄𑀢𑀸𑀧𑀦𑁆𑀦𑀲𑀗𑁆𑀖𑁄, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑀗𑁆𑀖𑁄,𑀢𑀺. 𑀢𑀢𑁆𑀣, 𑀯𑀲𑁆𑀲𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑁂𑀧𑀜𑁆𑀘𑀲𑀗𑁆𑀖𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀯𑀁 𑀯𑀲𑁆𑀲𑀲𑀳𑀲𑁆𑀲𑀁 𑀲𑀤𑁆𑀥𑀫𑁆𑀫𑁄 𑀅𑀧𑀭𑀺𑀳𑀸𑀬𑀫𑀸𑀦𑁄 𑀢𑀺𑀝𑁆𑀞𑀢𑀺. 𑀢𑀢𑁄𑀧𑀭𑀁 𑀔𑀻𑀡𑀸𑀲𑀯𑀲𑀗𑁆𑀖𑁄 𑀦 𑀧𑀜𑁆𑀜𑀸𑀬𑀢𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀲𑀗𑁆𑀖𑀸𑀦𑀁 𑀔𑁂𑀢𑁆𑀢𑀸𑀦𑀺 𑀚𑀸𑀢𑀸𑀦𑀺. 𑀏𑀯𑀁 𑀢𑀢𑁄𑀧𑀭𑀁 𑀧𑀭𑀺𑀳𑀸𑀬𑀫𑀸𑀦𑁄 𑀕𑀘𑁆𑀙𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀓𑀸𑀭𑀡𑀁 𑀯𑀼𑀘𑁆𑀘𑀢𑁂. ‘‘𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 ‘𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄,𑀢𑀺. 𑀲𑁄 𑀏𑀯 𑀢𑀺𑀯𑀺𑀥𑀁 𑀲𑀸𑀲𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀢𑁆𑀣, 𑀧𑀭𑀺𑀬𑀢𑁆𑀢𑀺 𑀲𑀤𑁆𑀥𑀫𑁆𑀫𑁄 𑀦𑀸𑀫 𑀲𑀸𑀝𑁆𑀞𑀓𑀣𑀸𑀦𑀺𑀢𑀻𑀡𑀺𑀧𑀺𑀝𑀓𑀸𑀦𑀺. 𑀲𑁄𑀘 𑀏𑀢𑀭𑀳𑀺 𑀧𑀭𑀺𑀧𑀼𑀡𑁆𑀡𑁄 𑀢𑀺𑀝𑁆𑀞𑀢𑀺. 𑀓𑀣𑀁 𑀧𑀭𑀺𑀬𑀢𑁆𑀢𑀺 𑀲𑀸𑀲𑀦𑀁 𑀧𑀝𑀺𑀭𑀽𑀧𑀓𑀫𑀢𑁆𑀢𑀁 𑀪𑀯𑁂𑀬𑁆𑀬. 𑀪𑀺𑀓𑁆𑀔𑀽 𑀘 𑀧𑀭𑀺𑀬𑀢𑁆𑀢𑀺𑀓𑀫𑁆𑀫𑀺𑀓𑀸 𑀅𑀦𑁂𑀓 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀓𑀣𑀜𑁆𑀘𑀺𑀤𑀁 𑀲𑀸𑀲𑀦𑀁 𑀢𑀢𑁄𑀧𑀭𑀁 𑀏𑀓𑀤𑀺𑀯𑀲𑀁𑀧𑀺 𑀦 𑀢𑀺𑀝𑁆𑀞𑁂𑀬𑁆𑀬. 𑀢𑁂 𑀘 𑀪𑀺𑀓𑁆𑀔𑀽 𑀲𑀻𑀮𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀸 𑀅𑀦𑁂𑀓 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀏𑀢𑀭𑀳𑀺 𑀲𑀦𑁆𑀥𑀺𑀲𑁆𑀲𑀦𑁆𑀢𑀺. 𑀓𑀣𑀜𑁆𑀘 𑀧𑀝𑀺𑀧𑀢𑁆𑀢𑀺 𑀲𑀸𑀲𑀦𑀁 𑀢𑀢𑁄𑀧𑀭𑀁 𑀦 𑀢𑀺𑀝𑁆𑀞𑁂𑀬𑁆𑀬. 𑀧𑀭𑀺𑀬𑀢𑁆𑀢𑀺𑀬𑀸𑀘 𑀧𑀝𑀺𑀧𑀢𑁆𑀢𑀺𑀬𑀸𑀘 𑀢𑀺𑀝𑁆𑀞𑀫𑀸𑀦𑀸𑀬𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀣𑀸𑀳𑀺-𑀏𑀓𑁄 𑀥𑀦𑀲𑁂𑀝𑁆𑀞𑀺 𑀦𑀸𑀫 𑀅𑀢𑁆𑀣𑀺. 𑀲𑁄 𑀧𑀼𑀢𑁆𑀢𑀥𑀻𑀢𑀼 𑀧𑀭𑀫𑁆𑀧𑀭𑀸𑀦𑀁 𑀅𑀢𑁆𑀣𑀸𑀬 𑀫𑀳𑀦𑁆𑀢𑀸𑀭𑀢𑀦𑀦𑀺𑀥𑀬𑁄 𑀪𑀽𑀫𑀺𑀬𑀁 𑀩𑀳𑀽𑀲𑀼𑀝𑁆𑀞𑀸𑀦𑁂𑀲𑀼 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀘 𑀢𑁂𑀲𑀁 𑀧𑀯𑀢𑁆𑀢𑀺𑀁 𑀧𑀭𑀺𑀧𑀼𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀞𑀧𑁂𑀢𑀺. 𑀢𑀢𑁆𑀣 𑀦𑀺𑀫𑀻𑀲𑀼 𑀘 𑀧𑁄𑀢𑁆𑀣𑀓𑁂𑀲𑀼 𑀘 𑀅𑀓𑁆𑀔𑀭𑁂𑀲𑀼 𑀘 𑀥𑀭𑀦𑁆𑀢𑁂𑀲𑀼 𑀢𑁂𑀦𑀺𑀥𑀬𑁄 𑀦𑀲𑁆𑀲𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀬𑁂𑀯. 𑀏𑀯𑀫𑀺𑀤𑀁 𑀲𑀸𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣𑀳𑀺 𑀦𑀺𑀥𑀻𑀦𑀁𑀦𑀺𑀥𑀸𑀦𑀪𑀽𑀫𑀺𑀲𑀤𑀺𑀲𑀁 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁, 𑀥𑀦𑀭𑀢𑀦𑀲𑀤𑀺𑀲𑀸𑀦𑀺 𑀥𑀫𑁆𑀫𑀭𑀢𑀦𑀸𑀦𑀺. 𑀬𑀣𑀸 𑀘 𑀲𑁂𑀝𑁆𑀞𑀺𑀯𑀁𑀲𑁂𑀚𑀸𑀢𑁄 𑀩𑀮𑀲𑀫𑁆𑀧𑀦𑁆𑀦𑁄 𑀧𑀼𑀭𑀺𑀲𑁄 𑀧𑁄𑀢𑁆𑀣𑀓𑀁 𑀧𑀲𑁆𑀲𑀺𑀢𑁆𑀯𑀸 𑀲𑀼𑀝𑁆𑀞𑀼 𑀔𑀡𑀦𑁆𑀢𑁄 𑀢𑀸𑀦𑀺𑀭𑀢𑀦𑀸𑀦𑀺 𑀮𑀪𑀺𑀲𑁆𑀲𑀢𑀺𑀬𑁂𑀯. 𑀏𑀯𑀫𑀺𑀥𑀧𑀺 𑀩𑀮𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀤𑁂𑀲𑀦𑀸𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀼𑀝𑁆𑀞𑀼 𑀧𑀝𑀺𑀧𑀚𑁆𑀚𑀦𑁆𑀢𑁄 𑀢𑀸𑀦𑀺𑀥𑀫𑁆𑀫𑀭𑀢𑀦𑀸𑀦𑀺 𑀮𑀪𑀺𑀲𑁆𑀲𑀢𑀺𑀬𑁂𑀯. 𑀮𑀪𑀫𑀸𑀦𑁂 𑀘 𑀲𑀢𑀺, 𑀓𑀣𑀁 𑀢𑀸𑀦𑀺𑀥𑀫𑁆𑀫𑀭𑀢𑀦𑀸𑀦𑀺 𑀅𑀦𑁆𑀢𑀭𑀳𑀺𑀢𑀸𑀦𑀺. 𑀲𑀻𑀫𑀸𑀦𑀜𑁆𑀘 𑀧𑀯𑀢𑁆𑀢𑀺𑀯𑀸𑀦𑀺𑀯𑀢𑁆𑀢𑀺 𑀯𑀸 𑀆𑀡𑀸𑀘𑀓𑁆𑀓𑀲𑁆𑀲𑁂𑀯 𑀯𑀺𑀲𑀬𑁄 𑀳𑁄𑀢𑀺. 𑀦 𑀥𑀫𑁆𑀫𑀘𑀓𑁆𑀓𑀲𑁆𑀲. 𑀬𑀜𑁆𑀘 𑀯𑀼𑀢𑁆𑀢𑀁-𑀧𑀜𑁆𑀘𑁂𑀯𑀯𑀲𑁆𑀲𑀲𑀢𑀸𑀦𑀺𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀻𑀢𑀺 𑀘, - 𑀯𑀲𑁆𑀲𑀲𑀳𑀲𑁆𑀲𑀁 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀘. 𑀇𑀤𑀜𑁆𑀘 𑀯𑀘𑀦𑀁 𑀥𑀫𑁆𑀫𑀘𑀓𑁆𑀓𑀫𑁂𑀯 𑀳𑁄𑀢𑀺, 𑀦 𑀆𑀡𑀸𑀘𑀓𑁆𑀓𑀁. 𑀩𑀤𑁆𑀥𑀲𑀻𑀫𑀸𑀬𑁄 𑀘 𑀦𑀺𑀯𑀢𑁆𑀢𑀫𑀸𑀦𑀸 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀦𑀺𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀆𑀡𑀸𑀘𑀓𑁆𑀓𑀪𑀽𑀢𑀸𑀬 𑀓𑀫𑁆𑀫𑀯𑀸𑀘𑀸𑀬 𑀲𑀫𑀽𑀳𑀦𑀦𑁂𑀦 𑀯𑀸, 𑀲𑀸𑀲𑀦𑀲𑁆𑀲 𑀯𑀸 𑀅𑀦𑁆𑀢𑀭𑀥𑀸𑀦𑁂𑀦. 𑀢𑀢𑁆𑀣 𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀬𑀦𑁆𑀢𑁂 𑀓𑀫𑁆𑀫𑀯𑀸𑀘𑀸𑀬 𑀲𑀫𑀽𑀳𑀦𑀦𑀜𑁆𑀘 𑀦𑀢𑁆𑀣𑀺. 𑀲𑀸𑀲𑀦𑀦𑁆𑀢𑀭𑀥𑀸𑀦𑀜𑁆𑀘 𑀦𑀸𑀫 𑀅𑀦𑀸𑀕𑀢𑁂 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀳𑁄𑀢𑀺. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂𑀳𑀺 𑀚𑀸𑀢𑁂 𑀲𑀩𑁆𑀩𑀁 𑀆𑀡𑀸𑀘𑀓𑁆𑀓𑀁 𑀯𑀺𑀕𑀢𑀁 𑀳𑁄𑀢𑀺, 𑀅𑀦𑁆𑀢𑀭𑀥𑀸𑀬𑀢𑀺. 𑀥𑀫𑁆𑀫𑀘𑀓𑁆𑀓𑀁 𑀧𑀦 𑀤𑁂𑀯𑀮𑁄𑀓𑁂𑀲𑀼 𑀬𑀸𑀯𑀸𑀦𑀸𑀕𑀢𑀩𑀼𑀤𑁆𑀥𑀓𑀸𑀮𑀸𑀧𑀺 𑀧𑀯𑀢𑁆𑀢𑀺𑀲𑁆𑀲𑀢𑀺𑀬𑁂𑀯 𑀆𑀴𑀯𑀓𑀧𑀼𑀘𑁆𑀙𑀸𑀕𑀸𑀣𑀸𑀬𑁄 𑀯𑀺𑀬. 𑀅𑀧𑀺𑀘𑀬𑁄 𑀯𑁄 𑀆𑀦𑀦𑁆𑀤 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄. 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸-𑀢𑀺 𑀯𑀼𑀢𑁆𑀢𑀁. 𑀲𑁄𑀘𑀢𑀺 𑀧𑀺𑀝𑀓𑀪𑀽𑀢𑁄 𑀥𑀫𑁆𑀫𑀯𑀺𑀦𑀬𑁄 𑀲𑀢𑁆𑀣𑀸 𑀏𑀢𑀭𑀳𑀺 𑀢𑀺𑀯𑀺𑀥𑀁𑀧𑀺 𑀲𑀸𑀲𑀦𑀁 𑀮𑁄𑀓𑀲𑁆𑀲 𑀤𑀻𑀧𑁂𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀬𑀢𑁄𑀩𑀼𑀤𑁆𑀥𑀪𑀸𑀲𑀺𑀓𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀦𑀸𑀦𑀸 𑀩𑀸𑀳𑀺𑀭𑀓𑁂𑀳𑀺 𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑁄 𑀫𑀳𑀦𑁆𑀢𑁄 𑀜𑀸𑀡𑀸𑀮𑁄𑀓𑁄 𑀏𑀢𑀭𑀳𑀺 𑀯𑀺𑀚𑁆𑀚𑁄𑀢𑀫𑀸𑀦𑁄 𑀧𑀯𑀢𑁆𑀢𑀢𑀺. 𑀢𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀤𑁂𑀲𑀺𑀢𑀸𑀦𑀺 𑀏𑀢𑀭𑀳𑀺𑀥𑀭𑀫𑀸𑀦𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥 𑀲𑀳𑀲𑁆𑀲𑀸𑀦𑀺 𑀲𑀼𑀢𑁆𑀯𑀸 𑀅𑀦𑀫𑀢𑀕𑁆𑀕𑁂𑀲𑀁𑀲𑀸𑀭𑁂 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀲𑀩𑁆𑀩𑀁𑀮𑁄𑀓𑀢𑁆𑀢𑀬𑀧𑁆𑀧𑀯𑀢𑁆𑀢𑀺𑀜𑁆𑀘, 𑀲𑀩𑁆𑀩𑀁𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀜𑁆𑀘, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀕𑀢𑀺𑀓𑁂𑀦 𑀲𑀼𑀢𑀫𑀬𑀜𑁆𑀜𑀸𑀡𑁂𑀦 𑀚𑀸𑀦𑀦𑁆𑀢𑀺. 𑀆𑀬𑀢𑀺𑀜𑁆𑀘 𑀲𑀕𑁆𑀕𑀢𑁆𑀣𑀸𑀬 𑀘 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀘 𑀦𑀸𑀦𑀸𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀆𑀭𑀪𑀦𑁆𑀢𑀺, 𑀧𑀩𑁆𑀩𑀚𑀦𑁆𑀢𑀺. 𑀧𑀭𑀺𑀬𑀢𑁆𑀢𑀺𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀦𑁆𑀢𑀺. 𑀪𑀸𑀯𑀦𑀁𑀪𑀸𑀯𑁂𑀦𑁆𑀢𑀺. 𑀇𑀤𑀁 𑀲𑀩𑁆𑀩𑀁 𑀲𑀸𑀲𑀦𑀧𑁆𑀧𑀝𑀺𑀭𑀽𑀧𑀓𑀫𑀢𑁆𑀢𑀁𑀦 𑀳𑁄𑀢𑀺. 𑀏𑀓𑀦𑁆𑀢 𑀲𑀸𑀲𑀦𑀁 𑀳𑁄𑀢𑀺. 𑀓𑀲𑁆𑀫𑀸, 𑀬𑀣𑀸 𑀥𑀫𑁆𑀫𑀁 𑀬𑀣𑀸 𑀯𑀺𑀦𑀬𑀁 𑀧𑀝𑀺𑀧𑀚𑁆𑀚𑀦𑀢𑁄. 𑀇𑀫𑀸𑀬 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀆𑀬𑀢𑀺𑀁 𑀲𑀕𑁆𑀕𑀫𑀕𑁆𑀕𑀨𑀮 𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀺𑀓𑀢𑁆𑀢𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀁 𑀫𑀺𑀘𑁆𑀙𑀸𑀯𑀸𑀤𑀻𑀦𑀁 𑀫𑀺𑀘𑁆𑀙𑀸𑀯𑀘𑀦𑀁 𑀯𑀺𑀥𑀫𑀺𑀢𑀁𑀯𑀺𑀤𑁆𑀥𑀁𑀲𑀺𑀢𑀁 𑀳𑁄𑀢𑀻𑀢𑀺.

𑀧𑀡𑀸𑀫𑀕𑀸𑀣𑀸𑀯𑀡𑁆𑀡𑀦𑀸.

𑁧𑁧. 𑀤𑀼𑀢𑀻𑀬𑀕𑀸𑀣𑀸𑀯𑀡𑁆𑀡𑀦𑀸𑀬𑀁. ‘‘𑀆𑀤𑀺𑀕𑀸𑀣𑀸𑀬𑀸’’𑀢𑀺 𑀧𑀣𑀫𑀕𑀸𑀣𑀸𑀯𑀸𑀓𑁆𑀬𑁂𑀦. ‘‘𑀢𑀁 𑀢𑀁 𑀧𑀬𑁄𑀚𑀦𑀲𑀳𑀺𑀢𑁂’’𑀢𑀺 𑀢𑁂𑀦𑀢𑁂𑀦𑀧𑀬𑁄𑀚𑀦𑁂𑀦 𑀲𑀳𑀺𑀢𑁂. ‘‘𑀧𑀜𑁆𑀘 𑀅𑀢𑁆𑀣𑁂’’𑀢𑀺 𑀧𑀜𑁆𑀘𑀧𑀺𑀡𑁆𑀟𑀢𑁆𑀣𑁂. ‘‘𑀢𑁂𑀅𑀪𑀺𑀥𑀫𑁆𑀫𑀢𑁆𑀣𑁂’’𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀧𑀤𑁂 𑀤𑀻𑀧𑀺𑀢𑁂 𑀢𑁂𑀅𑀪𑀺𑀥𑀫𑁆𑀫𑀢𑁆𑀣𑁂. ‘‘𑀢𑀢𑁆𑀣𑀸’’𑀢𑀺 𑀢𑀺𑀲𑁆𑀲𑀁 𑀤𑀼𑀢𑀻𑀬𑀕𑀸𑀣𑀸𑀬𑀁. ‘‘𑀦𑀢𑀼 𑀯𑀼𑀢𑁆𑀢’’𑀦𑁆𑀢𑀺 𑀦𑀧𑀦𑀧𑀓𑀭𑀡𑀁𑀧𑀺 𑀧𑀼𑀩𑁆𑀩𑁂𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀪𑀺𑀥𑀫𑁆𑀫𑀢𑁆𑀣𑀸 𑀓𑀼𑀢𑁄𑀧𑀼𑀩𑁆𑀩𑁂𑀯𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀯𑀁𑀢𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀧𑀣𑀫𑀲𑁆𑀲 𑀓𑀸𑀮𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀢𑀻𑀬 𑀢𑀢𑀻𑀬𑀸𑀦𑀁 𑀲𑀤𑁆𑀤𑀢𑁄𑀯𑀺𑀭𑁄𑀥𑀁 𑀯𑀢𑁆𑀢𑀼𑀁 ‘‘𑀦𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀆𑀤𑀺𑀫𑁆𑀳𑀺 𑀬𑁂𑀯𑀸’’𑀢𑀺 𑀏𑀢𑁂𑀦 𑀬𑀤𑀸𑀓𑀤𑀸𑀘𑀺 𑀧𑀘𑁆𑀘𑀸𑀫𑀲𑀦𑀁 𑀅𑀧𑁆𑀧𑀥𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀧𑁆𑀧𑀥𑀸𑀦𑀧𑀤𑀸𑀦𑀻’’𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀦𑁆𑀢𑀺 𑀇𑀫𑀲𑁆𑀫𑀺𑀁 𑀏𑀓𑀲𑁆𑀫𑀺𑀁 𑀲𑀫𑀸𑀲𑀧𑀤𑁂 𑀧𑀼𑀭𑀺𑀫𑀸𑀦𑀺 𑀯𑀺𑀲𑁂𑀲𑀦 𑀧𑀤𑀸𑀦𑀺. 𑀢𑀢𑁆𑀣 𑀲𑀩𑁆𑀩𑀣𑀸𑀧𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀺𑀢𑁂 𑀲𑀢𑀺, 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑁆𑀧𑀓𑀭𑀡𑁂 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣 𑀧𑀤𑁂𑀯𑀸 𑀲𑀩𑁆𑀩𑀣𑀸 𑀫𑀬𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄 𑀳𑁄𑀢𑀺. 𑀲𑁄 𑀦 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑁂 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀲𑀩𑁆𑀩𑀣𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀅𑀧𑁆𑀧𑀥𑀸𑀦𑀧𑀤𑀁 𑀧𑀘𑁆𑀘𑀸𑀫𑀲𑀢𑀻𑀢𑀺 𑀤𑁄𑀲𑁄𑀧𑀦 𑀆𑀧𑀚𑁆𑀚𑀢𑁂𑀯. 𑀢𑁂𑀦𑀸𑀳 ‘‘𑀏𑀯𑀜𑁆𑀳𑀺𑀲𑀢𑀻’’𑀢𑀺𑀆𑀤𑀺𑀁. 𑀢𑀢𑁆𑀣, ‘‘𑀏𑀯𑀜𑁆𑀳𑀺𑀲𑀢𑀻’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀺𑀬 𑀇𑀥 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑀁 𑀧𑀘𑁆𑀘𑀸𑀫𑀲𑀦𑁆𑀢𑁂 𑀲𑀢𑀺. 𑀳𑀺𑀲𑀤𑁆𑀤𑁄 𑀨𑀮 𑀯𑀸𑀓𑁆𑀬𑀚𑁄𑀢𑀓𑁄. 𑀮𑀤𑁆𑀥𑀕𑀼𑀡𑀚𑁄𑀢𑀓𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺’’ 𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀤𑁂 𑀫𑀬𑀸 𑀲𑀩𑁆𑀩𑀣𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀦 𑀓𑁂𑀯𑀮𑀁 𑀲𑁄 𑀏𑀯 𑀤𑁄𑀲𑁄 𑀆𑀧𑀚𑁆𑀚𑀢𑀺. 𑀅𑀧𑀭𑁄𑀧𑀺𑀤𑁄𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀳𑀻’’𑀢𑀺𑀆𑀤𑀺𑀫𑀸𑀳. 𑀥𑀸𑀢𑀼𑀓𑀣𑀸𑀬𑀁 𑀯𑀼𑀢𑁆𑀢𑁂𑀦𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀧𑁆𑀧𑀓𑀸𑀭𑁂𑀦𑀸𑀢𑀺𑀬𑁄𑀚𑀦𑀸.

𑁧𑁨. 𑀧𑀭𑀫𑀢𑁆𑀣𑀧𑀤𑀯𑀡𑁆𑀡𑀦𑀸𑀬𑀁. 𑀯𑀺𑀲𑁂𑀲𑀦𑀧𑀤𑀁 𑀦𑀸𑀫 𑀓𑀢𑁆𑀣𑀘𑀺 𑀪𑀽𑀢𑀓𑀣𑀦𑀢𑁆𑀣𑀸𑀬𑀯𑀸 𑀧𑀬𑀼𑀚𑁆𑀚𑀢𑀺 𑀓𑀡𑁆𑀳𑁄𑀓𑀸𑀓𑁄, 𑀲𑁂𑀢𑁄𑀩𑀓𑁄,𑀢𑀺. 𑀓𑀢𑁆𑀣𑀘𑀺 𑀅𑀜𑁆𑀜𑀦𑀺𑀯𑀢𑁆𑀢𑀦𑀢𑁆𑀣𑀸𑀬 𑀯𑀸 𑀧𑀬𑀼𑀚𑁆𑀚𑀢𑀺 𑀦𑀻𑀮𑁄𑀧𑀝𑁄, 𑀦𑀻𑀮𑀁𑀧𑀼𑀧𑁆𑀨, 𑀦𑁆𑀢𑀺. 𑀇𑀥 𑀧𑀦 𑀅𑀜𑁆𑀜 𑀦𑀺𑀯𑀢𑁆𑀢𑀦𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑀸𑀦𑀺𑀳𑀺𑀲𑀘𑁆𑀘𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀜𑀸𑀧𑀻𑀬𑀢𑀻𑀢𑀺𑀧𑀜𑁆𑀜𑀢𑁆𑀢𑀺. 𑀧𑀜𑁆𑀜𑀸𑀧𑀦𑀜𑁆𑀘 𑀦𑀸𑀫 𑀲𑀫𑀕𑁆𑀕𑀸𑀦𑀁 𑀚𑀦𑀸𑀦𑀁 𑀯𑁄𑀳𑀸𑀭𑁂𑀦 𑀘 𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀲𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀢𑁂𑀘𑀫𑀳𑀸𑀚𑀦𑀸’’𑀢𑀺𑀆𑀤𑀺𑀁. ‘‘𑀢𑀲𑁆𑀫𑀸𑀢𑁂 𑀲𑀫𑁆𑀫𑀼𑀢𑀺 𑀲𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀫𑁆𑀫𑀢𑀢𑁆𑀢𑀸’’𑀢𑀺 𑀯𑁄𑀳𑀭𑀺𑀢𑀢𑁆𑀢𑀸𑀘𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀘. ‘‘𑀯𑀘𑀻𑀲𑀘𑁆𑀘𑀯𑀺𑀭𑀢𑀺𑀲𑀘𑁆𑀘𑀸𑀦’’𑀦𑁆𑀢𑀺 𑀏𑀢𑁆𑀣 𑀯𑀘𑀻𑀲𑀘𑁆𑀘𑀁 𑀦𑀸𑀫 𑀫𑀼𑀲𑀸𑀯𑀸𑀤𑀭𑀳𑀺𑀢𑀁 𑀲𑀘𑁆𑀘𑀯𑀘𑀦𑀁. 𑀯𑀺𑀭𑀢𑀺𑀲𑀘𑁆𑀘𑀁 𑀦𑀸𑀫 𑀲𑀫𑁆𑀫𑀸𑀯𑀸𑀘𑀸𑀯𑀺𑀭𑀢𑀺. 𑀲𑀸𑀳𑀺 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀯𑀺𑀭𑀫𑀡𑀫𑀢𑁆𑀢𑁂𑀦 𑀯𑀘𑀻𑀲𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀯𑀢𑁆𑀣𑀼𑀪𑀽𑀢𑀢𑁆𑀢𑀸’’𑀢𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑀢𑁆𑀢𑀸. 𑀲𑀫𑁆𑀫𑀼𑀢𑀺𑀲𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀫𑁆𑀫𑀢𑀢𑁆𑀢𑀸 𑀲𑀫𑁆𑀫𑀼𑀢𑀺 𑀘, 𑀲𑀸 𑀲𑀘𑁆𑀘𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁆𑀢𑀸 𑀲𑀘𑁆𑀘𑀜𑁆𑀘𑀸𑀢𑀺 𑀓𑀢𑁆𑀯𑀸. 𑀲𑀫𑁆𑀫𑀼𑀢𑀺𑀬𑀸 𑀲𑀺𑀤𑁆𑀥𑀁 𑀲𑀘𑁆𑀘𑀁 𑀲𑀫𑁆𑀫𑀼𑀢𑀺𑀲𑀘𑁆𑀘𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀸’’𑀢𑀺 𑀧𑀸𑀡𑁄 𑀦𑀳𑀦𑁆𑀢𑀩𑁆𑀩𑁄, 𑀲𑀩𑁆𑀩𑁂𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁆𑀢𑀸. ‘‘𑀲𑀩𑁆𑀩𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀬𑁄’’𑀢𑀺 𑀤𑀸𑀦𑀲𑀻𑀮𑀸𑀤𑀻𑀦𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀨𑀮𑀯𑀺𑀧𑀸𑀓𑀪𑀽𑀢𑀸 𑀲𑀩𑁆𑀩𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀬𑁄. 𑀲𑀩𑁆𑀩𑁂 ‘‘𑀩𑁄𑀥𑀺𑀲𑀫𑁆𑀪𑀸𑀭𑀥𑀫𑁆𑀫𑁂’’𑀢𑀺 𑀤𑀸𑀦𑀧𑀸𑀭𑀫𑀺𑀲𑀻𑀮𑀧𑀸𑀭𑀫𑀺𑀆𑀤𑀺𑀓𑁂𑀧𑀸𑀭𑀫𑀺𑀥𑀫𑁆𑀫𑁂. ‘‘𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀲𑀫𑁆𑀧𑀸𑀤𑁂𑀦𑁆𑀢𑀺. ‘‘𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑁆𑀢𑀸’’𑀢𑀺 𑀤𑀼𑀘𑁆𑀘𑀭𑀺𑀢 𑀤𑀼𑀭𑀸𑀚𑀻𑀯𑀫𑀺𑀘𑁆𑀙𑀸𑀚𑀻𑀯𑀸𑀤𑀻𑀦𑀁 𑀯𑀲𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑁆𑀢𑀸. ‘‘𑀏𑀯𑀁 𑀫𑀳𑀦𑁆𑀢𑀁 𑀲𑀫𑁆𑀫𑀼𑀢𑀺 𑀲𑀘𑁆𑀘’’𑀦𑁆𑀢𑀺 𑀏𑀢𑁂𑀦 𑀅𑀳𑀁 𑀧𑀭𑀫𑀢𑁆𑀣 𑀲𑀘𑁆𑀘𑀫𑁂𑀯𑀕𑀡𑁆𑀳𑀸𑀫𑀻𑀢𑀺 𑀲𑀫𑁆𑀫𑀼𑀢𑀺 𑀲𑀘𑁆𑀘𑀁 𑀦𑀪𑀺𑀦𑁆𑀤𑀺𑀢𑀩𑁆𑀩𑀁. 𑀪𑀺𑀦𑁆𑀤𑀦𑁆𑀢𑁄𑀳𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀧𑀭𑀺𑀩𑀸𑀳𑀺𑀭𑁄 𑀅𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀜𑁆𑀘 𑀢𑀁 𑀪𑀺𑀦𑁆𑀤𑀢𑀻𑀢𑀺. 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑀢𑁆𑀢𑀲𑁆𑀲 𑀪𑀯𑀢𑁄𑀲𑀗𑁆𑀓𑀦𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀪𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀁 𑀢𑀺𑀝𑁆𑀞𑀢𑀺. 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺. 𑀅𑀧𑀸𑀬 𑀧𑀽𑀭𑀓𑁄 𑀪𑀯𑀢𑀻𑀢𑀺. ‘‘𑀯𑀺𑀚𑁆𑀚𑀫𑀸𑀦𑀦𑁆𑀢𑁆𑀯𑁂𑀯 𑀕𑀡𑁆𑀳𑀸𑀧𑁂𑀢𑀻’’𑀢𑀺 𑀲𑀜𑁆𑀜𑀸 𑀘𑀺𑀢𑁆𑀢𑀤𑀺𑀝𑁆𑀞𑀺 𑀯𑀺𑀧𑀮𑁆𑀮𑀸𑀲𑀸𑀦𑀁 𑀯𑀢𑁆𑀣𑀼𑀪𑀸𑀯𑁂𑀦 𑀕𑀡𑁆𑀳𑀸𑀧𑁂𑀢𑀺. 𑀢𑁂𑀦𑀸𑀳 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀻’’𑀢𑀺𑀆𑀤𑀺𑀁. ‘‘𑀏𑀯𑀁 𑀯𑀺𑀧𑀭𑀻𑀢𑀜𑁆𑀳𑀺 𑀲𑀫𑁆𑀫𑀼𑀢𑀺𑀲𑀘𑁆𑀘’’𑀦𑁆𑀢𑀺 𑀏𑀢𑁂𑀦𑀲𑀫𑁆𑀫𑀼𑀢𑀺 𑀲𑀘𑁆𑀘𑀫𑁂𑀯𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀭𑀫𑀢𑁆𑀣 𑀲𑀘𑁆𑀘𑀁 𑀦𑀪𑀺𑀦𑁆𑀤𑀺𑀢𑀩𑁆𑀩𑀁. 𑀪𑀺𑀦𑁆𑀤𑀦𑁆𑀢𑁄𑀳𑀺 𑀢𑀸𑀳𑀺 𑀤𑀺𑀝𑁆𑀞𑀻𑀳𑀺 𑀦𑀫𑀼𑀘𑁆𑀘𑀢𑀺. 𑀓𑀣𑀜𑁆𑀘 𑀢𑀁 𑀪𑀺𑀦𑁆𑀤𑀢𑀺. 𑀔𑀦𑁆𑀥𑁂 𑀯𑀸 𑀔𑀦𑁆𑀥𑀫𑀼𑀢𑁆𑀢𑀓𑁂𑀯𑀸 𑀅𑀢𑁆𑀢𑀚𑀻𑀯𑁂 𑀕𑀳𑁂𑀢𑁆𑀯𑀸 𑀢𑁂𑀘 𑀅𑀢𑁆𑀢𑀚𑀻𑀯𑀸 𑀧𑀭𑀫𑁆𑀫𑀭𑀡𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀁 𑀢𑀺𑀝𑁆𑀞𑀢𑀺. 𑀢𑁂 𑀘 𑀅𑀢𑁆𑀢𑀚𑀻𑀯𑀸 𑀪𑀯𑀸𑀪𑀯𑁂𑀲𑀼𑀲𑀲𑁆𑀲𑀢𑀸 𑀳𑀼𑀢𑁆𑀯𑀸 𑀪𑀯𑀢𑁄𑀪𑀯𑀁 𑀲𑀁𑀲𑀭𑀦𑁆𑀢𑀺 𑀲𑀦𑁆𑀥𑀸𑀯𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑁄𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀁 𑀢𑀺𑀝𑁆𑀞𑀢𑀺. ‘‘𑀦𑀯𑀺𑀲𑀁𑀯𑀸𑀤𑁂𑀦𑁆𑀢𑀻’’𑀢𑀺 𑀯𑀺𑀧𑀭𑀻𑀢𑀁 𑀦𑀸𑀧𑀸𑀤𑁂𑀦𑁆𑀢𑀺. ‘‘𑀢𑀁 𑀧𑀦𑀸’’𑀢𑀺 𑀲𑀪𑀸𑀯𑀲𑀘𑁆𑀘𑀁 𑀧𑀦. 𑀅𑀦𑀼𑀪𑀯𑀦𑀪𑁂𑀤𑀫𑀢𑁆𑀢𑀁 𑀉𑀧𑀸𑀤𑀸𑀬𑁂𑀯 𑀯𑁂𑀤𑀦𑀸 𑀲𑀼𑀔𑀸𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀸𑀓𑀸𑀭𑀢𑁄 𑀲𑀼𑀔𑀪𑀽𑀢𑀢𑁆𑀢𑀸 𑀯𑁂𑀤𑀦𑀸 𑀲𑀼𑀔𑀸𑀢𑀺 𑀯𑀼𑀢𑁆𑀢𑀸 𑀦𑀳𑁄𑀢𑀺. ‘‘𑀲𑀩𑁆𑀩𑀸𑀧𑀺𑀯𑁂𑀤𑀦𑀸 𑀤𑀼𑀓𑁆𑀔𑀸 𑀏𑀯𑀸’’𑀢𑀺 𑀧𑀥𑀸𑀦𑀢𑁆𑀣𑁄. 𑀢𑀢𑁆𑀣 𑀅𑀦𑀼𑀪𑀯𑀦𑀪𑁂𑀤𑁄 𑀢𑀺𑀯𑀺𑀥𑁄. 𑀲𑀸𑀢𑀢𑁄 𑀯𑀸 𑀅𑀦𑀼𑀪𑀯𑀦𑀁, 𑀅𑀲𑁆𑀲𑀸𑀢𑀢𑁄 𑀯𑀸, 𑀫𑀚𑁆𑀛𑀢𑁆𑀢𑀢𑁄 𑀯𑀸. ‘‘𑀤𑀼𑀓𑁆𑀔𑀸 𑀏𑀯𑀸’’𑀢𑀺 𑀪𑀬𑀝𑁆𑀞𑁂𑀦 𑀤𑀼𑀓𑁆𑀔𑀸 𑀏𑀯. 𑀪𑀬𑀝𑁆𑀞𑁂𑀦𑀸𑀢𑀺 𑀘 𑀲𑀁𑀲𑀸𑀭 𑀪𑀬𑀤𑀲𑁆𑀲𑀻𑀳𑀺𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦. 𑀲𑀼𑀔𑁄 𑀯𑀺𑀧𑀸𑀓𑁄 𑀬𑁂𑀲𑀁 𑀢𑁂 𑀲𑀼𑀔𑀯𑀺𑀧𑀸𑀓𑀸. 𑀢𑁂𑀪𑀽𑀫𑀓𑀓𑀼𑀲𑀮𑀸. ‘‘𑀓𑀼𑀲𑀮𑀲𑀫𑁆𑀫𑀢𑀸’’𑀢𑀺 𑀏𑀢𑁂𑀦 𑀲𑀪𑀸𑀯𑀲𑀘𑁆𑀘𑁂𑀧𑀺 𑀏𑀢𑁂𑀯𑁄𑀳𑀸𑀭𑀸 𑀮𑁄𑀓𑀲𑀫𑁆𑀫𑀼𑀢𑀺 𑀦𑀺𑀲𑁆𑀲𑀺𑀢𑀸𑀢𑀺 𑀤𑀻𑀧𑁂𑀢𑀺. ‘‘𑀲𑀸𑀲𑀯𑀢𑀸’’𑀢𑀺 𑀆𑀲𑀯𑁂𑀳𑀺 𑀲𑀳𑀺𑀢𑀪𑀸𑀯𑁄. ‘‘𑀲𑀁𑀓𑀺𑀮𑁂𑀲𑀺 𑀓𑀢𑀸’’𑀢𑀺 𑀲𑀁𑀓𑀺𑀮𑁂𑀲 𑀥𑀫𑁆𑀫𑁂𑀳𑀺 𑀲𑀁𑀬𑀼𑀢𑁆𑀢𑀪𑀸𑀯𑁄. 𑀑𑀖𑁂𑀳𑀺 𑀘 𑀬𑁄𑀕𑁂𑀳𑀺 𑀘 𑀉𑀧𑀸𑀤𑀸𑀦𑁂𑀳𑀺 𑀘 𑀧𑀢𑁆𑀢𑀩𑁆𑀩𑀪𑀸𑀯𑁄 ‘‘𑀑𑀖𑀦𑀻𑀬𑀬𑁄𑀕𑀦𑀻𑀬 𑀉𑀧𑀸𑀤𑀸𑀦𑀻𑀬𑀢𑀸’’. 𑀅𑀥𑀺𑀓𑀸 𑀅𑀢𑁆𑀢𑀸 𑀅𑀚𑁆𑀛𑀢𑁆𑀢𑀸. 𑀩𑀳𑀺𑀤𑁆𑀥𑀸𑀭𑀼𑀓𑁆𑀔𑁂𑀭𑀽𑀧𑀥𑀫𑁆𑀫𑀸𑀭𑀼𑀓𑁆𑀔𑀲𑁆𑀲 𑀅𑀢𑁆𑀢𑀸𑀦𑀸𑀫 𑀲𑀸𑀭𑀝𑁆𑀞𑁂𑀦. 𑀲𑀸𑀔𑀸𑀬𑀁 𑀭𑀽𑀧𑀥𑀫𑁆𑀫𑀸 𑀲𑀸𑀔𑀸𑀬 𑀅𑀢𑁆𑀢𑀸𑀦𑀸𑀫 𑀲𑀸𑀭𑀝𑁆𑀞𑁂𑀦. 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀧𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑀡𑁆𑀳𑀸𑀧𑀭𑀺𑀕𑁆𑀕𑀳 𑀤𑀴𑁆𑀳𑀝𑁆𑀞𑁂𑀦 𑀢𑀢𑁄 𑀩𑀳𑀺𑀤𑁆𑀥𑀸 𑀅𑀢𑁆𑀢𑀢𑁄 𑀅𑀥𑀺𑀓𑀸 𑀅𑀢𑁆𑀢𑀸𑀢𑀺 𑀅𑀢𑁆𑀣𑁂𑀦 𑀅𑀚𑁆𑀛𑀢𑁆𑀢𑀸𑀢𑀺 𑀮𑁄𑀓𑀲𑀫𑁆𑀫𑀼𑀢𑀺 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀚𑁆𑀛𑀢𑁆𑀢𑀢𑀺𑀓𑀜𑁆𑀘𑀸’’𑀢𑀺𑀆𑀤𑀺𑀁. 𑀤𑀼𑀓𑁆𑀔𑀦𑀺𑀭𑁄𑀥 𑀫𑀕𑁆𑀕𑀪𑀸𑀯𑁄 𑀘, 𑀇𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀇𑀤𑀫𑁂𑀯𑀸’’𑀢𑀺 𑀇𑀤𑀁 𑀘𑀢𑀼𑀓𑁆𑀓𑀫𑁂𑀯. ‘‘𑀅𑀘𑀮𑀫𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀻𑀧𑁂𑀢𑀺. 𑀢𑁂𑀪𑀽𑀫𑀓 𑀥𑀫𑁆𑀫𑀸𑀦𑀁 𑀲𑀼𑀔𑀢𑀸 𑀦𑀸𑀫 𑀘𑀮𑀸 𑀳𑁄𑀢𑀺. 𑀓𑀲𑁆𑀫𑀸, 𑀅𑀦𑀺𑀘𑁆𑀘 𑀥𑀫𑁆𑀫𑀢𑁆𑀢𑀸. 𑀢𑁂 𑀥𑀫𑁆𑀫𑁂𑀲𑀼𑀔𑀸𑀢𑀺 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀢𑁆𑀢𑀗𑁆𑀕𑀁 𑀓𑀭𑁄𑀦𑁆𑀢𑀸 𑀅𑀘𑀺𑀭𑁂𑀦𑁂𑀯 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂 𑀥𑀫𑁆𑀫𑁂 𑀤𑀼𑀓𑁆𑀔𑀸𑀢𑀺 𑀜𑀢𑁆𑀯𑀸 𑀢𑁂𑀳𑀺𑀯𑀺𑀫𑀼𑀢𑁆𑀢𑀸 𑀧𑀼𑀦 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀦𑀢𑁆𑀣𑀺. 𑀏𑀲𑀦𑀬𑁄 𑀲𑁂𑀲𑀅𑀭𑀺𑀬𑀲𑀘𑁆𑀘𑁂𑀲𑀼. ‘‘𑀢𑁂𑀲𑀽’’𑀢𑀺𑀆𑀤𑀺𑀫𑁆𑀳𑀺 𑀤𑀼𑀯𑀺𑀥𑀸𑀦𑀺𑀳𑀺 𑀲𑀘𑁆𑀘𑀸𑀦𑀻𑀢𑀺 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼. ‘‘𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀯𑀘𑀦𑀁. ‘‘𑀬𑁄 𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦𑀸’’𑀢𑀺 𑀏𑀢𑁆𑀣 𑀅𑀜𑁆𑀜𑀸𑀧𑀤𑁂𑀲𑁄 𑀦𑀸𑀫 𑀅𑀝𑁆𑀞𑀥𑀫𑁆𑀫 𑀲𑀫𑁄𑀥𑀸𑀦𑀁 𑀦𑀺𑀲𑁆𑀲𑀸𑀬 𑀖𑀝𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀧𑀝𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀢𑀁 𑀲𑀡𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀲𑀺𑀤𑁆𑀥𑀁 𑀳𑁄𑀢𑀺. 𑀬𑀸𑀧𑀦𑀘𑀺𑀦𑁆𑀢𑀦 𑀓𑀺𑀭𑀺𑀬𑀸 𑀦𑀸𑀫 𑀅𑀢𑁆𑀣𑀺. 𑀬𑀁 𑀘𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀲𑀺𑀤𑁆𑀥𑀸 𑀦 𑀳𑁄𑀢𑀺. 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯𑀲𑀺𑀤𑁆𑀥𑀸. 𑀏𑀲𑀦𑀬𑁄 𑀨𑀼𑀲𑀦𑀓𑀺𑀭𑀺𑀬𑀸, 𑀯𑁂𑀤𑀬𑀺𑀢𑀓𑀺𑀭𑀺𑀬𑀸, 𑀤𑀻𑀲𑀽𑀢𑀺. 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀯𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀘𑀺𑀢𑁆𑀢𑁂𑀦𑀧𑀭𑀺𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀫𑀦𑁄𑀯𑀺𑀜𑁆𑀜𑀸𑀡 𑀘𑀺𑀢𑁆𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀲𑀡𑁆𑀞𑀸𑀦𑀁 𑀯𑀺𑀚𑁆𑀚𑀫𑀸𑀦𑀁 𑀓𑀢𑁆𑀯𑀸. ‘‘𑀲𑀯𑀺𑀕𑁆𑀕𑀳𑀁 𑀓𑀢𑁆𑀯𑀸’’𑀢𑀺 𑀲𑀭𑀻𑀭𑀁 𑀓𑀢𑁆𑀯𑀸. 𑀯𑀢𑁆𑀣𑀼 𑀤𑀩𑁆𑀩𑀲𑀳𑀺𑀢𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀘𑀺𑀢𑁆𑀢𑀫𑀬𑁄𑀘𑀺𑀢𑁆𑀢𑀦𑀺𑀫𑁆𑀫𑀺𑀢𑁄’’𑀢𑀺 𑀲𑀼𑀧𑀺𑀦𑀦𑁆𑀢𑁂 𑀤𑀺𑀝𑁆𑀞𑀭𑀽𑀧𑀸𑀦𑀺 𑀯𑀺𑀬 𑀘𑀺𑀢𑁆𑀢𑁂𑀦𑀧𑀓𑀢𑁄 𑀘𑀺𑀢𑁆𑀢𑁂𑀦 𑀦𑀺𑀫𑁆𑀫𑀺𑀢𑁄. 𑀓𑀲𑁆𑀫𑀸 𑀲𑀪𑀸𑀯𑀲𑀺𑀤𑁆𑀥𑁄 𑀧𑀭𑀫𑀢𑁆𑀣𑁄 𑀦𑀸𑀫𑀸𑀢𑀺 𑀆𑀳 ‘‘𑀲𑁄𑀳𑀻’’𑀢𑀺𑀆𑀤𑀺𑀁. ‘‘𑀲𑀦𑁆𑀢𑀻’’𑀢𑀺 𑀏𑀢𑁂𑀦 𑀅𑀲𑀥𑀸𑀢𑀼 𑀯𑀲𑁂𑀦 𑀅𑀢𑁆𑀣𑁄𑀢𑀺 𑀲𑀺𑀤𑁆𑀥𑀁 𑀯𑀼𑀢𑁆𑀢𑀁. 𑀲𑀤𑁆𑀤𑀸𑀩𑀼𑀤𑁆𑀥𑀻𑀳𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀅𑀢𑁆𑀣𑁄𑀢𑀺𑀧𑀺𑀯𑀤𑀦𑁆𑀢𑀺. ‘‘𑀇𑀢𑀭𑀢𑁄’’𑀢𑀺 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑀢𑁄. ‘‘𑀧𑀭𑀫𑁄’’𑀢𑀺 𑀅𑀥𑀺𑀓𑁄. 𑀢𑁂𑀦𑀸𑀳 ‘‘𑀉𑀓𑁆𑀓𑀁𑀲𑀕𑀢𑁄’’𑀢𑀺. 𑀏𑀢𑁂𑀦 𑀧𑀭𑀫𑀲𑀤𑁆𑀤𑀲𑁆𑀲 𑀅𑀥𑀺𑀓𑀢𑁆𑀣𑀁 𑀯𑀤𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀉𑀢𑁆𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀢𑀢𑁆𑀣, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀲𑀸𑀲𑀦𑁂 𑀧𑀜𑁆𑀘𑀲𑀸𑀲𑀦 𑀓𑀺𑀘𑁆𑀘𑀸𑀦𑀺 𑀫𑀳𑀦𑁆𑀢𑀸𑀦𑀺 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀚𑀸𑀦𑀦𑀁. 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀧𑀭𑀺𑀚𑀸𑀦𑀦𑀁. 𑀧𑀳𑀸𑀢𑀩𑁆𑀩𑀸𑀦𑀁 𑀧𑀳𑀸𑀦𑀁. 𑀲𑀘𑁆𑀙𑀺 𑀓𑀸𑀢𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀡𑀁. 𑀪𑀸𑀯𑁂𑀢𑀩𑁆𑀩𑀸𑀦𑀁 𑀪𑀸𑀯𑀦𑀸𑀢𑀺. 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀧𑀭𑀫𑀢𑁆𑀣 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. 𑀤𑀼𑀓𑁆𑀔 𑀲𑀘𑁆𑀘𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀦𑀸𑀫. 𑀲𑀫𑀼𑀤𑀬 𑀲𑀘𑁆𑀘𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸 𑀦𑀸𑀫. 𑀲𑀸𑀫𑀜𑁆𑀜𑀧𑁆𑀨𑀮𑀸𑀦𑀺 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀦𑀸𑀫. 𑀫𑀕𑁆𑀕𑀲𑀘𑁆𑀘𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸 𑀦𑀸𑀫. 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀢𑁂𑀲𑀁 𑀓𑀺𑀘𑁆𑀘𑀸𑀦𑀁 𑀲𑀺𑀤𑁆𑀥𑀺𑀬𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀸𑀲𑀦𑀓𑀺𑀘𑁆𑀘𑀁 𑀲𑀺𑀤𑁆𑀥𑀁 𑀳𑁄𑀢𑀺. 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀢𑁂 𑀘 𑀥𑀫𑁆𑀫𑀸 𑀏𑀯 𑀭𑀽𑀧𑀸𑀦𑀁 𑀲𑀸𑀲𑀦 𑀓𑀺𑀘𑁆𑀘𑀸𑀦𑀁 𑀅𑀯𑀺𑀭𑀸𑀥𑀓𑀢𑁆𑀢𑀸 𑀅𑀯𑀺𑀲𑀁𑀯𑀸𑀤𑀓𑀢𑁆𑀢𑀸 𑀉𑀢𑁆𑀢𑀫𑀝𑁆𑀞𑁂𑀦 𑀧𑀭𑀫𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑁂’’𑀢𑀺𑀬𑁂𑀚𑀦𑀸. ‘‘𑀅𑀬’’𑀦𑁆𑀢𑀺 𑀅𑀬𑀁 𑀥𑀫𑁆𑀫𑁄. ‘‘𑀢𑀲𑁆𑀲𑀸’’𑀢𑀺 𑀢𑀲𑁆𑀲𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲, 𑀢𑀲𑁆𑀲𑀧𑀭𑀺𑀜𑁆𑀜𑁂𑀬𑁆𑀬𑀲𑁆𑀲, 𑀢𑀲𑁆𑀲𑀧𑀳𑀸𑀢𑀩𑁆𑀩𑀲𑁆𑀲, 𑀢𑀲𑁆𑀲𑀲𑀘𑁆𑀙𑀺𑀓𑀸 𑀢𑀩𑁆𑀩𑀲𑁆𑀲 𑀢𑀲𑁆𑀲𑀪𑀸𑀯𑁂𑀢𑀩𑁆𑀩𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀫𑀢𑁆𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

‘‘𑀢𑀁 𑀦𑀲𑀼𑀦𑁆𑀤𑀭’’𑀦𑁆𑀢𑀺 𑀩𑁆𑀬𑀜𑁆𑀚𑀦𑀢𑁄 𑀦𑀲𑀼𑀦𑁆𑀤𑀭𑀁. 𑀦𑀓𑁂𑀯𑀮𑀁 𑀩𑁆𑀬𑀜𑁆𑀚𑀦𑀢𑁄𑀬𑁂𑀯 𑀦𑀲𑀼𑀦𑁆𑀤𑀭𑀁, 𑀅𑀢𑁆𑀣𑀢𑁄𑀧𑀺 𑀦𑀲𑀼𑀦𑁆𑀤𑀭𑀫𑁂𑀯. 𑀘𑀢𑀼𑀲𑀘𑁆𑀘 𑀥𑀫𑁆𑀫𑀸𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑁆𑀜𑀸𑀡𑀲𑁆𑀲𑀧𑀺 𑀕𑁄𑀘𑀭𑀸 𑀳𑁄𑀦𑁆𑀢𑀺. 𑀧𑀜𑁆𑀘𑀜𑁂𑀬𑁆𑀬 𑀥𑀫𑁆𑀫𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯. 𑀢𑀢𑁆𑀣 𑀘𑀢𑀼𑀲𑀘𑁆𑀘 𑀥𑀫𑁆𑀫𑀸 𑀦𑀸𑀫 𑀧𑀭𑀫𑀢𑁆𑀣 𑀥𑀫𑁆𑀫𑀸 𑀏𑀯. 𑀧𑀜𑁆𑀘𑀜𑁂𑀬𑁆𑀬𑀥𑀫𑁆𑀫𑀸 𑀧𑀦 𑀲𑀩𑁆𑀩 𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀲𑀩𑁆𑀩𑀧𑀭𑀫𑀢𑁆𑀣 𑀥𑀫𑁆𑀫𑀸. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀘𑀢𑀼𑀲𑀘𑁆𑀘𑀸𑀪𑀺 𑀲𑀫𑁆𑀩𑁄𑀥𑁄 𑀥𑀫𑁆𑀫 𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀲𑀺𑀚𑁆𑀛𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀢𑀼𑀲𑀘𑁆𑀘 𑀲𑀫𑁆𑀩𑁄𑀥𑁄 𑀥𑀫𑁆𑀫𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀦𑀲𑀺𑀚𑁆𑀛𑀢𑀺. 𑀢𑀲𑁆𑀫𑀸 𑀢𑁂 𑀲𑀬𑀁 𑀧𑀝𑀺𑀯𑀺𑀤𑁆𑀥𑀁 𑀘𑀢𑀼𑀲𑀘𑁆𑀘 𑀥𑀫𑁆𑀫𑀁 𑀦𑀸𑀫 𑀧𑀜𑁆𑀜𑀢𑁆𑀢𑀺𑀁 𑀦𑀻𑀳𑀭𑀺𑀢𑁆𑀯𑀸 𑀧𑀭𑁂𑀲𑀁 𑀤𑁂𑀲𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀁 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑁄 𑀫𑀽𑀕𑀲𑁆𑀲 𑀲𑀼𑀧𑀺𑀦𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀧𑀜𑁆𑀘 𑀜𑁂𑀬𑁆𑀬 𑀥𑀫𑁆𑀫𑀸 𑀏𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀕𑁄𑀘𑀭𑀸𑀢𑀺 𑀲𑀓𑁆𑀓𑀸𑀯𑀢𑁆𑀢𑀼𑀦𑁆𑀢𑀺.

𑀧𑀭𑀫𑀢𑁆𑀣𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀘𑀺𑀢𑁆𑀢𑀯𑀘𑀦𑀢𑁆𑀣𑁂. 𑀦𑀳𑀺 𑀲𑀸 𑀆𑀭𑀫𑁆𑀫𑀡𑁂𑀦𑀯𑀺𑀦𑀸 𑀮𑀩𑁆𑀪𑀢𑀺. 𑀘𑀺𑀦𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀘𑀺𑀦𑁆𑀢𑁂𑀢𑀺, 𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀏𑀯𑀁 𑀆𑀭𑀫𑁆𑀫𑀡𑀪𑀽𑀢𑁂𑀦 𑀓𑀫𑁆𑀫𑀧𑀤𑁂𑀦 𑀯𑀺𑀦𑀸 𑀅𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀇𑀥 𑀘𑀺𑀦𑁆𑀢𑀦𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀢𑀲𑁆𑀫𑀸 𑀅𑀲𑁆𑀲 𑀦𑀸𑀫𑀁 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀢𑀫𑀬𑀜𑁆𑀜𑀸𑀡𑀁, 𑀘𑀺𑀦𑁆𑀢𑀸𑀫𑀬𑀜𑁆𑀜𑀸𑀡, 𑀦𑁆𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀲𑁆𑀲 𑀪𑀽𑀢𑀲𑀪𑀸𑀯 𑀘𑀺𑀦𑁆𑀢𑀸𑀧𑀺 𑀅𑀢𑁆𑀣𑀺, 𑀲𑀸𑀧𑀜𑁆𑀜𑀸𑀏𑀯𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀆𑀭𑀫𑁆𑀫𑀡…𑀧𑁂… 𑀡𑀽𑀧𑀮𑀤𑁆𑀥𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀁, 𑀫𑀦𑁄, 𑀫𑀸𑀦𑀲𑀁, 𑀯𑀺𑀜𑁆𑀜𑀸𑀡, 𑀦𑁆𑀢𑀺 𑀲𑀩𑁆𑀩𑀁 𑀘𑀺𑀢𑁆𑀢𑀲𑁆𑀲 𑀦𑀸𑀫𑀁. 𑀆𑀭𑀫𑁆𑀫𑀡 𑀧𑀘𑁆𑀘𑀬𑀧𑁆𑀧𑀝𑀺𑀩𑀤𑁆𑀥𑀁 𑀳𑁄𑀢𑀺. 𑀦 𑀅𑀜𑁆𑀜𑀧𑀘𑁆𑀘𑀬𑀧𑁆𑀧𑀝𑀺𑀩𑀤𑁆𑀥𑀁. 𑀦 𑀘 𑀅𑀜𑁆𑀜𑀧𑀘𑁆𑀘𑀬𑁂𑀦 𑀮𑀤𑁆𑀥𑀁 𑀦𑀸𑀫𑀁. 𑀏𑀯𑀭𑀽𑀧𑀲𑁆𑀲 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦 𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀦𑁆𑀢𑀭𑀲𑁆𑀲𑀩𑁄𑀥𑀓𑀁 𑀦𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑁂𑀲𑀼 𑀘𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. ‘‘𑀏𑀢𑁂𑀦𑀸’’𑀢𑀺 𑀇𑀤𑀁 𑀓𑀢𑁆𑀢𑀼𑀦𑁄 𑀓𑀺𑀭𑀺𑀬𑀸𑀲𑀸𑀥𑀦𑁂 𑀅𑀢𑀺𑀲𑁆𑀲𑀬𑀽𑀧𑀓𑀸𑀭𑀓𑀁 𑀓𑀭𑀡 𑀲𑀸𑀥𑀦𑀁 𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀳𑀻’’𑀢𑀺𑀆𑀤𑀺𑀯𑀼𑀢𑁆𑀢𑀁. ‘‘𑀘𑀺𑀦𑁆𑀢𑀦𑀫𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺 𑀅𑀢𑁆𑀣𑁄𑀢𑀺, 𑀢𑁂𑀦 𑀦𑀺𑀯𑀢𑁆𑀢𑀺𑀢𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑁂𑀧𑀺𑀳𑀻’’𑀢𑀺𑀆𑀤𑀺𑀦𑀸. ‘‘𑀯𑀺𑀕𑁆𑀕𑀳𑁄 𑀯𑀸’’𑀢𑀺 𑀲𑀭𑀻𑀭𑀁 𑀯𑀸. 𑀧𑀘𑁆𑀘𑀬𑁂𑀦 𑀆𑀬𑀢𑁆𑀢𑀸 𑀧𑀘𑁆𑀘𑀬𑀸𑀬𑀢𑁆𑀢𑀸. ‘‘𑀆𑀬𑀢𑁆𑀢𑀸’’𑀢𑀺 𑀲𑀫𑁆𑀩𑀦𑁆𑀥𑀸. 𑀯𑀢𑁆𑀢𑀦𑀁 𑀯𑀼𑀢𑁆𑀢𑀺. 𑀉𑀧𑁆𑀧𑀚𑁆𑀚𑀦𑀁 𑀯𑀸 𑀞𑀺𑀢𑀺 𑀯𑀸. 𑀧𑀘𑁆𑀘𑀬𑀸𑀬𑀢𑁆𑀢𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 ‘‘𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀦𑁄’’. ‘‘𑀣𑀸𑀫𑁂𑀦𑀸’’𑀢𑀺𑀆𑀤𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. ‘‘𑀏𑀓𑀁 𑀪𑀸𑀯𑀲𑀸𑀥𑀦𑀫𑁂𑀯 𑀧𑀥𑀸𑀦𑀢𑁄 𑀮𑀩𑁆𑀪𑀢𑀻’’𑀢𑀺 𑀇𑀤𑀁 𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀓𑀺𑀭𑀺𑀬𑀸 𑀫𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀭𑀺𑀬𑀸𑀫𑀢𑁆𑀢𑀪𑀽𑀢𑀸𑀧𑀺 𑀧𑀦 𑀢𑁂 𑀥𑀫𑁆𑀫𑀸𑀲𑀬𑀁 𑀦𑀸𑀦𑀸𑀧𑀘𑁆𑀘𑀬𑀸 𑀯𑀢𑁆𑀣𑀸𑀬𑀁 𑀞𑀺𑀢𑀸 𑀯𑀸 𑀳𑁄𑀦𑁆𑀢𑀺 𑀦𑀸𑀦𑀸𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀯𑀢𑁆𑀣𑀸𑀬𑀁 𑀞𑀺𑀢𑀸 𑀯𑀸. 𑀢𑀲𑁆𑀫𑀸 𑀧𑀭𑀫𑀢𑁆𑀣 𑀧𑀤𑁂𑀲𑀼𑀧𑀺 𑀬𑀣𑀸𑀭𑀳𑀁 𑀢𑀤𑀜𑁆𑀜𑀲𑀸𑀥𑀦𑀸𑀦𑀁 𑀧𑀝𑀺𑀮𑀸𑀪𑁄 𑀅𑀯𑀸𑀭𑀺𑀢𑁄 𑀳𑁄𑀢𑀺. 𑀇𑀢𑀭𑀣𑀸 𑀳𑁂𑀢𑀼 𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺𑀆𑀤𑀻𑀲𑀼 𑀓𑀣𑀁 𑀪𑀸𑀯𑀲𑀸𑀥𑀦𑀁 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺. ‘‘𑀧𑀥𑀸𑀦𑀢𑁄’’𑀢𑀺 𑀫𑀼𑀔𑁆𑀬𑀢𑁄. ‘‘𑀅𑀪𑁂𑀤𑀲𑁆𑀲 𑀘𑀺𑀦𑁆𑀢𑀦𑀲𑁆𑀲𑀪𑁂𑀤𑀓𑀭𑀡’’𑀦𑁆𑀢𑀺 𑀇𑀤𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀦𑁆𑀢𑀺𑀓𑀢𑀁 𑀓𑀢𑁆𑀢𑀼𑀲𑀸𑀥𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲𑀸’’𑀢𑀺 𑀪𑁂𑀲𑀚𑁆𑀚𑀫𑀽𑀮𑀸𑀦𑀁 𑀧𑀺𑀲𑀦𑀲𑀺𑀮𑀸𑀧𑁄𑀢𑀓𑀲𑁆𑀲. 𑀢𑀲𑁆𑀲 𑀲𑀭𑀻𑀭𑀁 𑀦𑀸𑀫 𑀯𑀺𑀲𑀼𑀁 𑀅𑀗𑁆𑀕𑀁 𑀦𑀢𑁆𑀣𑀺. 𑀅𑀪𑀺𑀦𑁆𑀦𑀁𑀧𑀺 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑀼𑀘𑁆𑀘𑀢𑀺 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑀭𑀻𑀭’’𑀦𑁆𑀢𑀺. 𑀇𑀤𑀁 𑀅𑀪𑁂𑀤𑀲𑁆𑀲𑀪𑁂𑀤𑀓𑀭𑀡𑀁 𑀦𑀸𑀫 𑀅𑀪𑀽𑀢𑀭𑀽𑀧𑀁 𑀳𑁄𑀢𑀺. 𑀧𑀬𑁄𑀚𑀦𑁂 𑀲𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀲𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀣𑀸𑀓𑀭𑀡𑀜𑁆𑀘𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀧𑀭𑀧𑀭𑀺𑀓𑀧𑁆𑀧𑀺𑀢𑀲𑁆𑀲𑀸’’𑀢𑀺 𑀧𑀭𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀸 𑀘𑀭𑀺𑀬𑁂𑀳𑀺 𑀧𑀭𑀺𑀘𑀺𑀦𑁆𑀢𑀺𑀢𑀲𑁆𑀲. ‘‘𑀲𑀢𑀺𑀳𑀺…𑀧𑁂… 𑀓𑀧𑁆𑀧𑀦𑀸𑀬𑀸’’𑀢𑀺 𑀲𑀘𑁂 𑀅𑀢𑁆𑀢𑀸 𑀅𑀢𑁆𑀣𑀺, 𑀅𑀢𑁆𑀢𑀸 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀸 𑀘𑀺𑀢𑁆𑀢𑁄𑀦𑀸𑀫𑀸𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁. 𑀦 𑀯𑀢𑁆𑀢𑀩𑁆𑀩𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀦𑁆𑀢𑀺, 𑀘𑀺𑀢𑁆𑀢𑀲𑁆𑀲 𑀓𑀺𑀭𑀺𑀬𑀸𑀫𑀢𑁆𑀢𑀢𑁆𑀢𑀸. 𑀦 𑀧𑀦 𑀅𑀢𑁆𑀢𑀸𑀤𑀺𑀓𑁄 𑀓𑀢𑁆𑀢𑀸 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀸 𑀓𑀺𑀭𑀺𑀬𑀸 𑀫𑀢𑁆𑀢𑀫𑁂𑀯 𑀓𑀢𑁆𑀢𑀸𑀭𑀁 𑀓𑀢𑁆𑀯𑀸 ‘‘𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺𑀮𑁄𑀓𑁂 𑀅𑀢𑁆𑀢𑀸𑀤𑀺𑀓𑁄𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺. 𑀇𑀤𑀁 𑀅𑀪𑁂𑀤𑀲𑁆𑀲𑀪𑁂𑀤 𑀧𑀭𑀺𑀓𑀧𑁆𑀧𑀦𑀸𑀬 𑀧𑀬𑁄𑀚𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑁆𑀢𑀧𑁆𑀧𑀥𑀸𑀦𑁄’’𑀢𑀺 𑀓𑀺𑀭𑀺𑀬𑀸𑀲𑀸𑀥𑀦𑁂 𑀩𑀳𑀽𑀦𑀁𑀓𑀸𑀭𑀓𑀸𑀦𑀁 𑀫𑀚𑁆𑀛𑁂 𑀲𑀬𑀁𑀧𑀥𑀸𑀦𑁄 𑀲𑀬𑀁𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸. ‘‘𑀢𑀁𑀓𑀢𑁆𑀢𑀼𑀪𑀸𑀯’’𑀦𑁆𑀢𑀺 𑀮𑁄𑀓𑁂𑀲𑀺𑀤𑁆𑀥𑀁 𑀓𑀢𑁆𑀢𑀼𑀪𑀸𑀯𑀁. ‘‘𑀧𑀼𑀦 𑀓𑀭𑀡𑀪𑀸𑀯’’𑀦𑁆𑀢𑀺 𑀧𑀼𑀦 𑀮𑁄𑀓𑁂 𑀲𑀺𑀤𑁆𑀥𑀁 𑀓𑀭𑀡𑀪𑀸𑀯𑀁. 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀅𑀪𑀺𑀥𑀸𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀬𑀺𑀤𑀁 𑀬𑁂 𑀇𑀫𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀘𑀺𑀢𑁆𑀢𑀸𑀯𑀺𑀘𑀺𑀢𑁆𑀢𑀸. 𑀏𑀯𑀁 𑀘𑀺𑀢𑁆𑀢𑀁 𑀯𑀺𑀘𑀺𑀢𑁆𑀢𑀁 𑀬𑀁 𑀅𑀜𑁆𑀜𑀁 𑀅𑀢𑁆𑀣𑀺, 𑀢𑀁 𑀅𑀜𑁆𑀜𑀁 𑀏𑀓𑀦𑀺𑀓𑀸𑀬𑀁𑀧𑀺 𑀦𑀲𑀫𑀦𑀼𑀧𑀲𑁆𑀲𑀸𑀫𑀻-𑀢𑀺 𑀬𑁄𑀚𑀦𑀸. ‘‘𑀦𑀺𑀓𑀸𑀬’’𑀦𑁆𑀢𑀺 𑀲𑀢𑁆𑀢𑀚𑀸𑀢𑀺𑀲𑀫𑀽 𑀳𑀁.‘‘𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦’’𑀦𑁆𑀢𑀺 𑀯𑀺𑀪𑀢𑁆𑀢𑀸𑀧𑀸𑀤𑀸𑀦𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀏𑀢𑁂𑀦 𑀢𑀢𑁄 𑀘𑀭𑀡𑀢𑁄 𑀘𑀺𑀢𑁆𑀢𑀢𑁄𑀢𑀺 𑀅𑀢𑁆𑀣𑀁 𑀯𑀤𑀢𑀺. 𑀕𑀸𑀣𑀸𑀬𑀁. ‘‘𑀢𑀁 𑀢𑀁 𑀲𑀪𑀸𑀯𑁄’’𑀢𑀺 𑀯𑀺𑀚𑀸𑀦𑀦𑀨𑀼𑀲𑀦𑀸𑀤𑀺𑀓𑁄 𑀲𑀪𑀸𑀯𑁄, 𑀅𑀕𑁆𑀕𑀺𑀲𑁆𑀲𑀉𑀡𑁆𑀳𑁄𑀯𑀺𑀬. ‘‘𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑁄𑀭𑀲𑁄’’𑀢𑀺 𑀢𑁂𑀦 𑀢𑁂𑀦 𑀥𑀫𑁆𑀫𑁂𑀦 𑀓𑀭𑀡𑀓𑀺𑀘𑁆𑀘𑀜𑁆𑀘, 𑀢𑀁 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀮𑀤𑁆𑀥𑁄 𑀲𑀫𑁆𑀧𑀢𑁆𑀢𑀺𑀕𑀼𑀡𑁄 𑀘. 𑀅𑀕𑁆𑀕𑀺𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀧𑀭𑀺𑀧𑀸𑀘𑀦𑀓𑀺𑀘𑁆𑀘𑀁 𑀯𑀺𑀬, 𑀑𑀪𑀸𑀲𑀦𑀕𑀼𑀡𑁄𑀯𑀺𑀬 𑀘. ‘‘𑀕𑀬𑁆𑀳𑀸𑀓𑀸𑀭𑁄’’𑀢𑀺 𑀜𑀸𑀡𑁂𑀦 𑀕𑀳𑁂𑀢𑀩𑁆𑀩𑁄 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀥𑀚𑀪𑀽𑀢𑁄 𑀆𑀓𑀸𑀭𑁄. 𑀲𑀫𑁆𑀧𑀢𑁆𑀢𑀺 𑀭𑀲𑁄𑀬𑁂𑀯 𑀯𑀼𑀘𑁆𑀘𑀢𑀺. ‘‘𑀨𑀮𑀁𑀯𑀸𑀧𑀻’’𑀢𑀺 𑀓𑀸𑀭𑀺𑀬𑀧𑁆𑀨𑀮𑀁 𑀯𑀸𑀧𑀺, 𑀅𑀕𑁆𑀕𑀺𑀲𑁆𑀲 𑀥𑀽𑀫𑁄𑀯𑀺𑀬. ‘‘𑀆𑀲𑀦𑁆𑀦𑀓𑀸𑀭𑀡’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀓𑀸𑀭𑀡𑀁, 𑀅𑀕𑁆𑀕𑀺𑀲𑁆𑀲 𑀅𑀕𑁆𑀕𑀺𑀓𑀸𑀭𑀓 𑀧𑀼𑀭𑀺𑀲𑁄 𑀯𑀺𑀬. ‘‘𑀅𑀮’’𑀦𑁆𑀢𑀺 𑀲𑀫𑀢𑁆𑀣𑀸. ‘‘𑀯𑀺𑀩𑀼𑀤𑁆𑀥𑀺𑀦𑁄’’𑀢𑀺 𑀯𑀺𑀲𑁂𑀲𑀩𑀼𑀤𑁆𑀥𑀺 𑀲𑀫𑁆𑀧𑀦𑁆𑀦𑀲𑁆𑀲 𑀧𑀡𑁆𑀟𑀺𑀢𑀲𑁆𑀲. ‘‘𑀧𑀼𑀩𑁆𑀩𑀗𑁆𑀕𑀫𑀭𑀲’’𑀦𑁆𑀢𑀺 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀧𑀥𑀸𑀦𑀭𑀲 𑀓𑀺𑀘𑁆𑀘𑀁. ‘‘𑀲𑀦𑁆𑀥𑀸𑀦 𑀧𑀘𑁆𑀘𑀼𑀧𑀝𑁆𑀞𑀸𑀦’’𑀦𑁆𑀢𑀺 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀓𑀸𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀁. ‘‘𑀦𑀸𑀫 𑀭𑀽𑀧𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀨𑀲𑁆𑀲𑀸𑀤𑀺𑀦𑀸𑀫𑀜𑁆𑀘 𑀯𑀢𑁆𑀣𑀼 𑀭𑀽𑀧𑀜𑁆𑀘𑀘𑀺𑀢𑁆𑀢𑀲𑁆𑀲𑀧𑀤𑀝𑁆𑀞𑀸𑀦𑀁.

𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. ‘‘𑀘𑁂𑀢𑀲𑀺 𑀪𑀯’’𑀦𑁆𑀢𑀺 𑀘𑀺𑀢𑁆𑀢𑀲𑁆𑀫𑀺𑀁 𑀧𑀸𑀢𑀼𑀪𑀽𑀢𑀁. ‘‘𑀏𑀢𑁂𑀦 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀸 𑀏𑀯 𑀨𑀲𑁆𑀲𑀸𑀤𑀻𑀦𑀁 𑀚𑀸𑀢𑀺. 𑀬𑀸𑀘𑀺𑀢𑁆𑀢𑀲𑁆𑀲𑀚𑀭𑀸, 𑀲𑀸 𑀏𑀯 𑀨𑀲𑁆𑀲𑀸𑀤𑀻𑀦𑀁𑀚𑀭𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀏𑀓𑀯𑀡𑁆𑀝𑀽𑀧𑀦𑀺 𑀩𑀦𑁆𑀥𑀸𑀦𑀻’’𑀢𑀺 𑀏𑀓𑁂𑀦 𑀯𑀡𑁆𑀝𑀤𑀡𑁆𑀟𑀓𑁂𑀦 𑀉𑀧𑀦𑀺𑀩𑀦𑁆𑀥𑀸𑀦𑀺. ‘‘𑀏𑀓𑀚𑀸𑀢𑀺𑀬𑀸𑀤𑀺 𑀉𑀧𑀦𑀺𑀩𑀦𑁆𑀥𑀸’’𑀢𑀺 𑀏𑀓𑀚𑀸𑀢𑀺𑀓𑀣𑀸 𑀤𑀺𑀯𑀲𑁂𑀦 𑀉𑀧𑀦𑀺𑀩𑀦𑁆𑀥𑀸. ‘‘𑀘𑁂’’𑀢𑀺 𑀘𑁂𑀯𑀤𑁂𑀬𑁆𑀬. ‘‘𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀕𑀸𑀣𑀸𑀬𑀁. ‘‘𑀥𑀫𑁆𑀫𑀸’’𑀢𑀺 𑀦𑀸𑀫𑀓𑁆𑀔𑀦𑁆𑀥 𑀥𑀫𑁆𑀫𑀸. ‘‘𑀫𑀦𑀲𑀸 𑀏𑀯𑀸’’𑀢𑀺 𑀓𑀢𑁆𑀢𑀼𑀪𑀽𑀢𑁂𑀦 𑀫𑀦𑁂𑀦 𑀏𑀯. ‘‘𑀧𑀓𑀢𑀸’’𑀢𑀺 𑀧𑀯𑀢𑁆𑀢𑀺𑀢𑀸. ‘‘𑀦𑀺𑀫𑁆𑀫𑀺𑀢𑀸’’𑀢𑀺 𑀦𑀺𑀧𑁆𑀨𑀸𑀤𑀺𑀢𑀸. ‘‘𑀘𑀺𑀢𑁆𑀢𑀓𑀺𑀭𑀺𑀬𑀸 𑀪𑀽𑀢𑀸 𑀏𑀯𑀸’’𑀢𑀺 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀦𑁆𑀢𑀁 𑀘𑀺𑀢𑁆𑀢𑀁 𑀨𑀼𑀲𑀦𑀸𑀓𑀸𑀭𑀁 𑀚𑀦𑁂𑀢𑁆𑀯𑀸𑀯 𑀯𑀺𑀚𑀸𑀦𑀸𑀢𑀺. 𑀲𑁄 𑀨𑀼𑀲𑀦𑀸𑀓𑀸𑀭𑁄 𑀨𑀲𑁆𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀲𑁂𑀲𑀸 𑀧𑀦 𑀲𑀩𑁆𑀩𑁂𑀧𑀺 𑀘𑁂𑀢𑀲𑀺𑀓𑀥𑀫𑁆𑀫𑀸 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀉𑀧𑀸𑀤𑀸𑀬. 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀉𑀧𑀸𑀤𑀸𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀘𑀺𑀢𑁆𑀢𑀫𑀽𑀮𑀓𑀢𑁆𑀢𑀸 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀢𑁂𑀧𑀺𑀥𑀫𑁆𑀫𑀸 𑀘𑀺𑀢𑁆𑀢𑀓𑀺𑀭𑀺 𑀬𑀸𑀪𑀽𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. ‘‘𑀏𑀢𑁂𑀦𑀸’’𑀢𑀺 𑀏𑀢𑁂𑀦𑀕𑀸𑀣𑀸𑀧𑀤𑁂𑀦. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀏𑀓𑀸𑀮𑀫𑁆𑀩𑀡𑀢𑀸 𑀫𑀢𑁆𑀢𑁂𑀦 𑀯𑀺𑀪𑀸𑀯𑁂𑀢𑀺. 𑀧𑀭𑀺𑀧𑀼𑀡𑁆𑀡𑀸𑀦𑀺 𑀘𑁂 𑀢𑀲𑀺𑀓𑀗𑁆𑀕𑀸𑀦𑀺 𑀉𑀧𑀭𑀺 𑀣𑁂𑀭𑁂𑀦 𑀲𑀬𑀫𑁂𑀯 𑀯𑀓𑁆𑀔𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀧𑀦 𑀧𑀤𑀢𑁆𑀣𑀯𑀺𑀪𑀸𑀯𑀦𑀝𑁆𑀞𑀸𑀦𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑁂𑀳𑀺 𑀅𑀗𑁆𑀕𑁂𑀳𑀺 𑀯𑀺𑀪𑀸𑀯𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀢𑀁 𑀦𑀲𑀼𑀦𑁆𑀤𑀭’’𑀦𑁆𑀢𑀺. ‘‘𑀯𑀢𑁆𑀣𑀼𑀫𑁆𑀳𑀻’’𑀢𑀺 𑀧𑀝𑀓𑁄𑀝𑁆𑀞𑀓𑀸𑀤𑀺𑀫𑁆𑀳𑀺. ‘‘𑀦𑀸𑀦𑀸𑀘𑀺𑀢𑁆𑀢𑀓𑀫𑁆𑀫𑀸𑀦𑀻’’𑀢𑀺 𑀳𑀢𑁆𑀣𑀺 𑀅𑀲𑁆𑀲𑀭𑀽𑀧𑀸𑀤𑀻𑀦𑀺. 𑀯𑀺𑀚𑀸𑀦𑀦𑀫𑀢𑁆𑀢𑀁 𑀘𑀺𑀢𑁆𑀢𑀁, 𑀓𑀼𑀲𑀮𑀦𑁆𑀢𑀺 𑀯𑀸 𑀅𑀓𑀼𑀲𑀮𑀦𑁆𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀦𑀸𑀦𑀸𑀘𑁂𑀢𑀲𑀺𑀓𑁂 𑀳𑀺 𑀬𑀼𑀢𑁆𑀢𑀢𑁆𑀢𑀸 𑀏𑀯 𑀢𑀣𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀯𑀼𑀢𑁆𑀢𑀁𑀳𑁂𑀢𑀁 𑀪𑀕𑀯𑀢𑀸. 𑀧𑀪𑀲𑁆𑀲𑀭𑀫𑀺𑀤𑀁 𑀪𑀺𑀓𑁆𑀔𑀯𑁂 𑀘𑀺𑀢𑁆𑀢𑀁. 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀦𑁆𑀢𑀺. 𑀢𑁂𑀦𑀸𑀳 ‘‘𑀉𑀤𑀓𑀁 𑀯𑀺𑀬𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀁.

𑀘𑁂𑀢𑀲𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀭𑀼𑀧𑁆𑀧𑀢𑀻𑀢𑀺 𑀧𑀤𑀁 𑀓𑀢𑁆𑀢𑀭𑀺𑀯𑀸𑀳𑁂𑀢𑀼𑀓𑀫𑁆𑀫𑀦𑀺𑀯𑀸𑀲𑀺𑀤𑁆𑀥𑀁. 𑀭𑀼𑀧𑁆𑀧𑀦𑀜𑁆𑀘𑀯𑀺𑀓𑀸𑀭𑀸𑀧𑀢𑁆𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑀼𑀡𑁆𑀳𑀸𑀤𑀻𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀥𑀸𑀢𑀽𑀦𑀁 𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀯𑀲𑁂𑀦. 𑀥𑀸𑀢𑀼𑀓𑁆𑀔𑁄 𑀪𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀓𑁂𑀦𑀭𑀼𑀧𑁆𑀧𑀢𑀻’’𑀢𑀺 𑀏𑀢𑁆𑀣 ‘‘𑀓𑁂𑀦𑀸’’𑀢𑀺 𑀳𑁂𑀢𑀼 𑀅𑀢𑁆𑀣𑁂𑀯𑀸 𑀳𑁂𑀢𑀼 𑀓𑀢𑁆𑀢𑀭𑀺𑀯𑀸 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀲𑀻𑀢𑁂𑀦𑀸𑀢𑀺𑀆𑀤𑀻𑀲𑀼𑀧𑀺. 𑀟𑀁𑀲𑀫𑀓𑀲𑀸 𑀦𑀸𑀫 𑀲𑀽𑀘𑀺𑀫𑀼𑀔𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀘𑁂𑀯 𑀫𑀳𑀦𑁆𑀢 𑀫𑀓𑁆𑀔𑀺𑀓𑀸 𑀘. 𑀯𑀸𑀢𑀸 𑀦𑀸𑀫 𑀧𑀼𑀭𑀢𑁆𑀣𑀺𑀫𑀯𑀸𑀢𑀸𑀤𑀬𑁄. 𑀆𑀢𑀧𑁄 𑀦𑀸𑀫 𑀲𑀽𑀭𑀺𑀬𑀸𑀢𑀧𑁄. 𑀲𑀭𑀺𑀁𑀲𑀧𑀸𑀦𑀸𑀫 𑀅𑀳𑀺 𑀯𑀺𑀘𑁆𑀙𑀺𑀓 𑀲𑀢𑀧𑀤𑀺𑀓𑀸𑀤𑀬𑁄. 𑀢𑁂𑀲𑀁 𑀲𑀫𑁆𑀨𑀲𑁆𑀲𑁂𑀳𑀺𑀧𑀺 𑀭𑀼𑀧𑁆𑀧𑀢𑀺. 𑀫𑀭𑀡𑀁 𑀯𑀸 𑀕𑀘𑁆𑀙𑀢𑀺, 𑀫𑀭𑀡 𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. ‘‘𑀬𑁂 𑀥𑀫𑁆𑀫𑀸’’𑀢𑀺 𑀤𑁆𑀯𑀸𑀤𑀲𑀯𑀺𑀥𑀸 𑀲𑀧𑁆𑀧𑀝𑀺𑀖𑀭𑀽𑀧𑀥𑀫𑁆𑀫𑀸. ‘‘𑀅𑀜𑁆𑀜𑁂𑀲’’𑀦𑁆𑀢𑀺 𑀲𑁄𑀴𑀲𑀦𑁆𑀦𑀁 𑀅𑀧𑁆𑀧𑀝𑀺𑀖𑀭𑀽𑀧𑀸𑀦𑀜𑁆𑀘 𑀅𑀭𑀽𑀧𑀥𑀫𑁆𑀫𑀸𑀦𑀜𑁆𑀘. ‘‘𑀢𑁂𑀲𑀽’’𑀢𑀺 𑀦𑀺𑀤𑁆𑀥𑀸𑀭𑀡𑁂𑀪𑀼𑀫𑁆𑀫𑀁. 𑀇𑀤𑀸𑀦𑀺 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀫𑀼𑀔𑁆𑀬𑀭𑀼𑀧𑁆𑀧𑀦𑀁 𑀲𑀁𑀲𑀦𑁆𑀤𑁂𑀦𑁆𑀢𑁄 ‘‘𑀲𑀫𑀸𑀕𑀫𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑀸𑀕𑀫𑁄 𑀘 𑀦𑀸𑀫 𑀅𑀜𑁆𑀜𑀫𑀜𑁆𑀜𑀸𑀪𑀺𑀖𑀝𑁆𑀝𑀦𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀧𑀸𑀢𑀸𑀕𑀫𑀦𑀜𑁆𑀘 𑀆𑀭𑀫𑁆𑀫𑀡𑀓𑀭𑀡𑀜𑁆𑀘 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀫𑀳𑀸𑀪𑀽𑀢𑀸𑀦𑀫𑁂𑀯 𑀯𑀸’’𑀢𑀺 𑀆𑀧𑁄𑀥𑀸𑀢𑀼 𑀯𑀚𑁆𑀚𑀺𑀢𑀸𑀦𑀁 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀫𑁂𑀯 𑀯𑀸. ‘‘𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑀲𑁆𑀫𑀺𑀁 𑀔𑀡𑁂’’𑀢𑀺𑀆𑀤𑀺𑀫𑀸𑀳. ‘‘𑀲𑀬𑀁𑀧𑀺 𑀯𑀺𑀓𑀸𑀭𑀧𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺 𑀢𑁂𑀫𑀳𑀸𑀪𑀽𑀢𑀸𑀲𑀬𑀁𑀧𑀺 𑀧𑀓𑀢𑀺𑀁 𑀯𑀺𑀚𑀳𑀺𑀢𑁆𑀯𑀸 𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀑𑀫𑀢𑁆𑀢𑀸𑀥𑀺𑀫𑀢𑁆𑀢𑀭𑀽𑀧𑀲𑀦𑁆𑀢𑀢𑀻𑀦𑀜𑁆𑀘𑀸’’𑀢𑀺 𑀧𑀭𑀫𑁆𑀧𑀭𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀭𑀽𑀧𑀲𑀦𑁆𑀢𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀴𑀺𑀦𑀬𑁂𑀦 𑀯𑀺𑀧𑀢𑁆𑀢𑀺𑀯𑀲𑁂𑀦 𑀭𑀼𑀧𑁆𑀧𑀦𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀯𑀺𑀧𑀢𑁆𑀢𑀺 𑀯𑀸 𑀳𑁄𑀢𑀼, 𑀲𑀫𑁆𑀧𑀢𑁆𑀢𑀺 𑀯𑀸. 𑀧𑀼𑀭𑀺𑀫𑀧𑀘𑁆𑀙𑀺 𑀫𑀲𑀦𑁆𑀢𑀢𑀻𑀦𑀁 𑀯𑀺𑀲𑀤𑀺𑀲𑀧𑁆𑀧𑀯𑀢𑁆𑀢𑀺𑀪𑀽𑀢𑁄 𑀯𑀺𑀓𑀸𑀭𑁄𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀭𑀼𑀧𑁆𑀧𑀦𑀁𑀦𑀸𑀫𑀸𑀢𑀺 𑀓𑀢𑁆𑀯𑀸 𑀧𑀼𑀦 𑀢𑀁 𑀭𑀼𑀧𑁆𑀧𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀖𑀝𑁆𑀝𑀦𑀯𑀲𑁂𑀦 𑀭𑀼𑀧𑁆𑀧𑀦 𑀥𑀫𑁆𑀫𑀸𑀦 𑀫𑁂𑀯𑀸’’𑀢𑀺 𑀆𑀧𑀸𑀢𑀸𑀕𑀫𑀦𑀸𑀤𑀺𑀯𑀲𑁂𑀦 𑀭𑀼𑀧𑁆𑀧𑀦𑀥𑀫𑁆𑀫𑁂𑀳𑀺𑀯𑀺𑀦𑀸 𑀅𑀪𑀺𑀖𑀝𑁆𑀝𑀦𑀯𑀲𑁂𑀦𑀭𑀼𑀧𑁆𑀧𑀦 𑀲𑀪𑀸𑀯𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀫𑁂𑀯 𑀲𑀺𑀤𑁆𑀥𑀦𑁆𑀢𑀺 𑀧𑀼𑀘𑁆𑀙𑀸. ‘‘𑀲𑀯𑀺𑀕𑁆𑀕𑀳𑀸 𑀳𑁄𑀦𑁆𑀢𑀻’’𑀢𑀺 𑀤𑀩𑁆𑀩 𑀲𑀡𑁆𑀞𑀸𑀦𑀸𑀓𑀸𑀭𑀲𑀳𑀺𑀢𑀸 𑀳𑁄𑀦𑁆𑀢𑀺. 𑀓𑀲𑁆𑀫𑀸, 𑀑𑀴𑀸𑀭𑀺𑀓𑀲𑀪𑀸𑀯𑀢𑁆𑀢𑀸. 𑀩𑀳𑀽𑀦𑀜𑁆𑀘𑀭𑀽𑀧𑀓𑀮𑀸𑀧𑀸𑀦𑀁 𑀏𑀓𑀓𑁆𑀔𑀡𑁂 𑀏𑀓𑀸𑀩𑀤𑁆𑀥𑀪𑀸𑀯𑁂𑀦𑀧𑀯𑀢𑁆𑀢𑀢𑁆𑀢𑀸. 𑀅𑀭𑀽𑀧𑀥𑀫𑁆𑀫𑀸𑀳𑀺 𑀲𑀡𑁆𑀳𑀲𑀼𑀔𑀼𑀫𑀲𑀪𑀸𑀯𑀸 𑀘 𑀳𑁄𑀦𑁆𑀢𑀺. 𑀲𑀘𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀺𑀧𑀺 𑀏𑀓𑀢𑁄 𑀧𑀯𑀢𑁆𑀢𑁂𑀬𑁆𑀬𑀼𑀁. 𑀤𑀩𑁆𑀩𑀲𑀡𑁆𑀞𑀸𑀦𑀪𑀸𑀯𑀁 𑀦𑀕𑀫𑀺𑀲𑁆𑀲𑀦𑁆𑀢𑀺𑀬𑁂𑀯. 𑀏𑀓𑀲𑁆𑀫𑀺𑀜𑁆𑀘 𑀲𑀢𑁆𑀢𑀲𑀦𑁆𑀢𑀸𑀦𑁂 𑀏𑀓𑀓𑁆𑀔𑀡𑁂 𑀏𑀓 𑀓𑀮𑀸𑀧𑁄𑀯 𑀧𑀯𑀢𑁆𑀢𑀢𑀺. 𑀓𑀲𑁆𑀫𑀸, 𑀅𑀦𑀦𑁆𑀢𑀭 𑀧𑀘𑁆𑀘𑀬𑀽𑀧𑀦𑀺𑀩𑀦𑁆𑀥𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸𑀢𑁂 𑀲𑀯𑀺𑀕𑁆𑀕𑀳𑀸𑀦 𑀳𑁄𑀦𑁆𑀢𑀺. 𑀭𑀽𑀧𑀥𑀫𑁆𑀫𑀸 𑀧𑀦 𑀑𑀴𑀸𑀭𑀺𑀓 𑀲𑀪𑀸𑀯𑀸 𑀘 𑀳𑁄𑀦𑁆𑀢𑀺. 𑀩𑀳𑀽𑀦𑀁 𑀲𑀦𑁆𑀦𑀺𑀘𑀬𑁂𑀲𑀢𑀺 𑀤𑀩𑁆𑀩𑀲𑀡𑁆𑀞𑀸𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀓𑀓𑁆𑀔𑀡𑁂 𑀘 𑀩𑀳𑀼𑀓𑀮𑀸𑀧𑀸𑀧𑀺 𑀏𑀓𑀸𑀩𑀤𑁆𑀥𑀸𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀯𑀺𑀕𑁆𑀕𑀳𑀸𑀳𑁄𑀦𑁆𑀢𑀻𑀢𑀺.

‘‘𑀲𑀻𑀢𑀸𑀤𑀺𑀕𑁆𑀕𑀳𑀡𑀲𑀸𑀫𑀢𑁆𑀣𑀺𑀬𑁂𑀦𑀸’’𑀢𑀺 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀻𑀢𑀺𑀆𑀤𑀺𑀦𑀸 𑀮𑁄𑀓𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀧𑀸𑀓𑀝𑀲𑁆𑀲 𑀲𑀻𑀢𑀸𑀤𑀺𑀯𑀘𑀦𑀲𑁆𑀲𑀲𑀸𑀫𑀢𑁆𑀣𑀺𑀬𑁂𑀦. 𑀢𑀜𑁆𑀳𑀺 𑀯𑀘𑀦𑀁 𑀮𑁄𑀓𑀲𑁆𑀲 𑀅𑀧𑀸𑀓𑀝𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀁 𑀇𑀥𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀻𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑁄𑀳𑀸𑀭𑁄 𑀦𑀸𑀫𑀸’’𑀢𑀺 𑀦𑀸𑀫𑀲𑀜𑁆𑀜𑀸 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀮𑁄𑀓𑁄𑀧𑀘𑀸𑀭𑁂𑀦𑀸’’𑀢𑀺 𑀩𑀳𑀼𑀚𑀦𑀲𑁆𑀲 𑀉𑀧𑀘𑀸𑀭𑁂𑀦 𑀯𑁄𑀳𑀸𑀭𑁂𑀦 𑀓𑀣𑀦𑁂𑀦. ‘‘𑀧𑀸𑀓𑀝 𑀦𑀺𑀫𑀺𑀢𑁆𑀢𑀯𑀲𑁂𑀦𑁂𑀯𑀸’’𑀢𑀺 𑀧𑀸𑀓𑀝𑀲𑁆𑀲 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀯𑀲𑁂𑀦𑁂𑀯. ‘‘𑀲𑀻𑀢𑀸𑀤𑀺𑀕𑁆𑀕𑀳𑀡𑁂𑀦 𑀯𑀺𑀦𑀸𑀧𑀻’’𑀢𑀺 𑀧𑀺𑀲𑀤𑁆𑀤𑁂𑀦 𑀲𑀻𑀢𑀸𑀤𑀺𑀕𑁆𑀕𑀳𑀡𑀲𑀸𑀫𑀢𑁆𑀣𑀺𑀬𑁂𑀦𑀧𑀻𑀢𑀺 𑀤𑀻𑀧𑁂𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀸𑀴𑀺𑀲𑀸𑀥𑀓𑀁 𑀦𑀸𑀫 𑀦 𑀲𑀓𑁆𑀓𑀸𑀲𑀩𑁆𑀩𑀢𑁆𑀣 𑀮𑀤𑁆𑀥𑀼𑀁. 𑀧𑀸𑀓𑀝𑀦𑀺𑀫𑀺𑀢𑁆𑀢 𑀯𑀘𑀦𑀫𑁂𑀯 𑀲𑀩𑁆𑀩𑀢𑁆𑀣 𑀲𑀸𑀥𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀻’’𑀢𑀺 𑀢𑀲𑁆𑀲 𑀅𑀭𑀽𑀧𑀥𑀫𑁆𑀫𑀸𑀦𑀁 𑀭𑀽𑀧𑀢𑀸𑀧𑀲𑀗𑁆𑀕𑀲𑁆𑀲 𑀦𑀺𑀯𑀢𑁆𑀢𑀺. ‘‘𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀯𑀲𑀧𑁆𑀧𑀯𑀢𑁆𑀢𑀸’’𑀢𑀺 𑀏𑀢𑁆𑀣 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀦𑀸𑀫𑀇𑀤𑁆𑀥𑀺𑀬𑀸𑀦𑀸𑀦𑀧𑁆𑀧𑀓𑀸𑀭𑀫𑀸𑀧𑀦𑀁. ‘‘𑀭𑀽𑀧𑀢𑀸 𑀲𑀺𑀤𑁆𑀥𑀻’’𑀢𑀺 𑀭𑀽𑀧𑀦𑁆𑀢𑀺 𑀦𑀸𑀫 𑀲𑀜𑁆𑀜𑀸𑀲𑀺𑀤𑁆𑀥𑀺. ‘‘𑀇𑀤𑀁 𑀧𑀦𑀸’’𑀢𑀺 𑀇𑀤𑀁 𑀭𑀽𑀧𑀁 𑀧𑀦. ‘‘𑀅𑀦𑀼𑀕𑁆𑀕𑀳𑀸𑀦𑀁 𑀲𑀻𑀢𑀸𑀤𑀻𑀦𑀁 𑀯𑀲𑁂𑀦𑀸’’𑀢𑀺 𑀓𑀺𑀜𑁆𑀘𑀸𑀧𑀺𑀧𑀸𑀴𑀺𑀬𑀁 𑀲𑀻𑀢𑀸𑀤𑀺𑀯𑀘𑀦𑀁 𑀉𑀧𑀖𑀸𑀢𑀓𑀸𑀦𑀁 𑀲𑀻𑀢𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀘 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺. 𑀅𑀦𑀼𑀕𑁆𑀕𑀸𑀳𑀓𑀸 𑀏𑀯 𑀅𑀢𑁆𑀣𑀺. 𑀢𑁂𑀲𑀁𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀻’’𑀢𑀺 𑀲𑀜𑁆𑀚𑀸𑀦𑀸𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀜𑁆𑀚𑀸𑀦𑀸𑀢𑀺. 𑀦𑀻𑀮𑀁𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀧𑀻𑀢𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻-𑀢𑀺𑀆𑀤𑀺𑀦𑀸 𑀘, 𑀯𑀺𑀚𑀸𑀦𑀸𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀯𑀺𑀚𑀸𑀦𑀸𑀢𑀺. 𑀫𑀥𑀼𑀭𑀁𑀧𑀺 𑀯𑀺𑀚𑀸𑀦𑀸𑀢𑀺, 𑀅𑀫𑁆𑀩𑀺𑀮𑀁𑀧𑀺 𑀯𑀺𑀚𑀸𑀦𑀸𑀢𑀻-𑀢𑀺𑀆𑀤𑀺𑀦𑀸 𑀘-𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀭𑀽𑀧𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀦𑀺𑀩𑁆𑀩𑀸𑀦𑀧𑀤𑁂. ‘‘𑀔𑀦𑁆𑀥𑀸𑀯𑀸’’𑀢𑀺 𑀪𑀯𑀦𑁆𑀢𑀭𑁂 𑀅𑀧𑀸𑀬𑀸𑀤𑀻𑀲𑀼 𑀪𑀯𑀺𑀲𑁆𑀲𑀫𑀸𑀦𑀸 𑀔𑀦𑁆𑀥𑀸𑀯𑀸. 𑀦 𑀳𑀺 𑀅𑀢𑀻𑀢 𑀥𑀫𑁆𑀫𑀸, 𑀦𑀺𑀩𑁆𑀩𑀸𑀬𑀦𑁆𑀢𑀺 𑀦𑀸𑀫, 𑀲𑀢𑁆𑀢𑁂 𑀧𑀻𑀴𑁂𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀥𑀫𑁆𑀫𑀸 𑀏𑀢𑀭𑀳𑀺 𑀧𑀻𑀴𑁂𑀦𑁆𑀢𑀺, 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀸𑀕𑀢𑀥𑀫𑁆𑀫𑀸 𑀘 𑀅𑀦𑀸𑀕𑀢𑁂 𑀧𑀻𑀴𑁂𑀲𑁆𑀲𑀦𑁆𑀢𑀺, 𑀓𑀣𑀁 𑀢𑁂 𑀦𑀺𑀩𑁆𑀩𑀸𑀬𑀦𑁆𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼…𑀧𑁂… 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺. ‘‘𑀯𑀺𑀲𑀬𑁂𑀪𑀼𑀫𑁆𑀫’’𑀦𑁆𑀢𑀺 𑀯𑀺𑀲𑀬𑀸𑀥𑀸𑀭𑁂𑀪𑀼𑀫𑁆𑀫𑀁. 𑀯𑀺𑀲𑀬𑀸𑀥𑀸𑀭𑁄 𑀦𑀸𑀫𑀫𑀦𑀼𑀲𑁆𑀲𑀸𑀪𑀽𑀫𑀺𑀬𑀁 𑀕𑀘𑁆𑀙𑀦𑁆𑀢𑀻𑀢𑀺𑀆𑀤𑀻𑀲𑀼 𑀯𑀺𑀬 𑀫𑀼𑀔𑁆𑀬𑀸𑀥𑀸𑀭𑁄 𑀦𑀳𑁄𑀢𑀺. 𑀢𑁂𑀦 𑀧𑀦 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀢𑀁 𑀓𑀺𑀭𑀺𑀬𑀁 𑀓𑀸𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀆𑀥𑀸𑀭𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀺𑀢𑁄 𑀆𑀥𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀆𑀓𑀸𑀲𑁂’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀬𑀣𑀸 𑀲𑀓𑀼𑀡𑀸𑀦𑀁 𑀧𑀓𑁆𑀔𑀦 𑀓𑀺𑀭𑀺𑀬𑀸 𑀦𑀸𑀫 𑀆𑀓𑀸𑀲𑁂𑀦 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀦𑀲𑀺𑀚𑁆𑀛𑀢𑀺. 𑀢𑀣𑀸 𑀯𑀝𑁆𑀝𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀦𑀺𑀩𑁆𑀩𑀼𑀢𑀺 𑀓𑀺𑀭𑀺𑀬𑀸𑀧𑀺 𑀦𑀺𑀩𑁆𑀩𑀸𑀦𑁂𑀦 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀦𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀳𑀺𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑁂’’𑀢𑀺 𑀬𑁂𑀢𑀺𑀯𑀺𑀥𑀯𑀝𑁆𑀝𑀤𑀼𑀓𑁆𑀔𑀲𑀦𑁆𑀢𑀸𑀧𑀥𑀫𑁆𑀫𑀸. 𑀳𑀺𑀲𑀤𑁆𑀤𑁄𑀦𑀺𑀧𑀸𑀢𑁄. 𑀢𑁂𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄. ‘‘𑀢𑀩𑁆𑀩𑀺𑀦𑀺𑀫𑀼𑀢𑁆𑀢’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀯𑀺𑀦𑀺𑀫𑀼𑀢𑁆𑀢𑀁. 𑀦𑀺𑀩𑁆𑀩𑀼𑀢𑀺𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀢𑁂𑀲𑀁 𑀦𑀺𑀩𑁆𑀩𑀼𑀢𑀺 𑀓𑀺𑀭𑀺𑀬𑀸𑀬 𑀯𑀺𑀲𑀬𑀸 𑀥𑀸𑀭𑁄𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀅𑀬𑀁 𑀧𑀤𑀻𑀧𑁄 𑀦𑀺𑀩𑁆𑀩𑀸𑀬𑀢𑀺. 𑀢𑀣𑀸𑀥𑀻𑀭𑀸 𑀦𑀺𑀩𑁆𑀩𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀁 𑀢𑀁 𑀓𑀺𑀮𑁂𑀲𑀸𑀦𑀁 𑀯𑀸’’𑀢𑀺 𑀢𑁂 𑀲𑀁𑀢𑁂𑀲𑀁𑀓𑀺𑀮𑁂𑀲𑀸𑀦𑀁 𑀯𑀸. ‘‘𑀔𑀦𑁆𑀥𑀸𑀦𑀁 𑀯𑀸’’𑀢𑀺 𑀅𑀦𑀸𑀕𑀢𑀪𑀯𑁂𑀲𑀼 𑀔𑀦𑁆𑀥𑀸𑀦𑀁 𑀯𑀸. ‘‘𑀧𑀼𑀦𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯’’𑀦𑁆𑀢𑀺 𑀲𑀦𑁆𑀢𑀸𑀦𑀲𑁆𑀲 𑀧𑀼𑀦 𑀧𑀝𑀺𑀲𑀦𑁆𑀥𑀸𑀦𑀸𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺 𑀅𑀭𑀺𑀬𑀸 𑀚𑀦𑀸. 𑀬𑀣𑀸 𑀫𑀕𑁆𑀕𑁂 𑀓𑀭𑀡𑀯𑀘𑀦𑀁 𑀤𑀺𑀲𑁆𑀲𑀢𑀺 𑀅𑀤𑁆𑀥𑀸 𑀇𑀫𑀸𑀬𑀧𑀝𑀺𑀧𑀢𑁆𑀢𑀺𑀬𑀸 𑀚𑀭𑀸𑀫𑀭𑀡𑀫𑁆𑀳𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺𑀆𑀤𑀻𑀲𑀼. 𑀦 𑀢𑀣𑀸 𑀦𑀺𑀩𑁆𑀩𑀸𑀦𑁂𑀢𑀺 𑀆𑀳 ‘‘𑀫𑀕𑁆𑀕𑁂𑀯𑀺𑀬𑀸’’𑀢𑀺𑀆𑀤𑀺𑀁. 𑀦𑀺𑀩𑁆𑀩𑀸𑀦𑁂𑀧𑀦𑀪𑀼𑀫𑁆𑀫𑀯𑀘𑀦𑀫𑁂𑀯 𑀤𑀺𑀲𑁆𑀲𑀢𑀺 𑀬𑀢𑁆𑀣𑀦𑀸𑀫𑀜𑁆𑀘𑀭𑀽𑀧𑀜𑁆𑀘. 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻𑀢𑀺𑀆𑀤𑀻𑀲𑀼. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑁂 𑀓𑀭𑀡 𑀯𑀘𑀦𑀁 𑀦 𑀤𑀺𑀲𑁆𑀲𑀢𑀺, 𑀓𑀭𑀡 𑀮𑀓𑁆𑀔𑀡𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀘 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀭𑀡 𑀮𑀓𑁆𑀔𑀡𑀁 𑀦𑀸𑀫𑀓𑀢𑁆𑀢𑀼𑀦𑁄 𑀲𑀳𑀓𑀸𑀭𑀻 𑀧𑀘𑁆𑀘𑀬𑀪𑀸𑀯𑁄. 𑀦𑀦𑀼 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀤𑀺𑀲𑁆𑀲𑀢𑀻𑀢𑀺. 𑀲𑀘𑁆𑀘𑀁, 𑀢𑀢𑁆𑀣 𑀧𑀦 𑀯𑀺𑀲𑁂𑀲𑀦𑁂 𑀓𑀭𑀡 𑀯𑀘𑀦𑀁. 𑀦 𑀓𑀭𑀡𑀓𑀸𑀭𑀓𑁂. 𑀢𑀜𑁆𑀳𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺.

𑀦𑀺𑀩𑁆𑀩𑀸𑀦𑀧𑀤𑀯𑀡𑁆𑀡𑀦𑀸.

𑀤𑀼𑀢𑀻𑀬𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀓𑀸𑀫𑀸𑀯𑀘𑀭𑀧𑀤𑁂. ‘‘𑀓𑀸𑀫𑀻𑀬𑀢𑀻’’𑀢𑀺 𑀇𑀘𑁆𑀙𑀻𑀬𑀢𑀺. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀢𑁆𑀣𑀼 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀆𑀕𑀢𑀁. ‘‘𑀢𑁂𑀓𑀸𑀫𑀻𑀬𑀦𑁆𑀢𑀻’’𑀢𑀺 𑀢𑁂 𑀅𑀯𑀻𑀘𑀺𑀦𑀺𑀭𑀬𑀸𑀤𑀬𑁄 𑀇𑀘𑁆𑀙𑀻𑀬𑀦𑁆𑀢𑀺. ‘‘𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀻’’𑀢𑀺 𑀅𑀯𑀻𑀘𑀺𑀦𑀺𑀭𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸𑀦𑀁𑀧𑀺 𑀲𑀢𑁆𑀢𑀸𑀦𑀁. ‘‘𑀪𑀯𑀦𑀺𑀓𑀦𑁆𑀢𑀺 𑀦𑀸𑀫 𑀳𑁄𑀢𑀻’’𑀢𑀺 𑀪𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀔𑀦𑁆𑀥𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄𑀫𑁂 𑀅𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑀻 𑀢𑀡𑁆𑀳𑀸 𑀪𑀯𑀦𑀺𑀓𑀦𑁆𑀢𑀺 𑀦𑀸𑀫. 𑀲𑀸 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁𑀧𑀺 𑀅𑀢𑁆𑀣𑀺𑀬𑁂𑀯. ‘‘𑀓𑀸𑀫𑁂 𑀅𑀯𑀘𑀭𑀢𑀻’’𑀢𑀺 𑀓𑀸𑀫𑁂𑀧𑀭𑀺𑀬𑀸𑀧𑀦𑁆𑀦𑀁 𑀳𑁄𑀢𑀺. 𑀓𑀸𑀫𑁂 𑀅𑀦𑁆𑀢𑁄𑀕𑀥𑀁 𑀳𑁄𑀢𑀺. 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀁𑀧𑀺 𑀭𑀽𑀧𑀸𑀭𑀽𑀧𑀲𑀗𑁆𑀔𑁆𑀬𑀁 𑀦𑀕𑀘𑁆𑀙𑀢𑀺. 𑀓𑀸𑀫𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀓𑀸𑀫𑀕𑀡𑀦𑀫𑁂𑀯𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀻𑀲𑀼𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺𑀧𑀻’’𑀢𑀺 𑀓𑀸𑀫𑀭𑀽𑀧𑀸𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀦 𑀢𑀢𑁆𑀭𑀧𑀭𑀺𑀬𑀸 𑀧𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀭 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀸𑀫𑀸𑀯𑀘𑀭𑀢𑀸𑀧𑀢𑁆𑀢𑀺𑀤𑁄𑀲𑁄’’𑀢𑀺 𑀓𑀸𑀫𑀸𑀯𑀘𑀭 𑀥𑀫𑁆𑀫𑀸𑀢𑀺 𑀯𑀢𑁆𑀢𑀩𑁆𑀩𑀢𑀸 𑀧𑀢𑁆𑀢𑀺𑀤𑁄𑀲𑁄. ‘‘𑀭𑀽𑀧𑀸𑀯𑀘𑀭𑀢𑀸𑀤𑀺𑀫𑀼𑀢𑁆𑀢𑀺𑀤𑁄𑀲𑁄’’𑀢𑀺 𑀇𑀫𑁂 𑀭𑀽𑀧𑀸𑀯𑀘𑀭 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺, 𑀅𑀭𑀽𑀧𑀸𑀯𑀘𑀭 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸 𑀦 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺 𑀤𑁄𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲𑀦𑀬𑁄 ‘‘𑀭𑀽𑀧𑀸𑀭𑀽𑀧𑀸𑀯𑀘𑀭𑀢𑀸𑀧𑀢𑁆𑀢𑀺 𑀤𑁄𑀲𑁄 𑀓𑀸𑀫𑀸𑀯𑀘𑀭𑀢𑀸𑀫𑀼𑀢𑁆𑀢𑀺 𑀤𑁄𑀲𑁄’’ 𑀢𑀺𑀧𑀤𑁂𑀲𑀼. 𑀅𑀯𑀘𑀭𑀲𑀤𑁆𑀤𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀣𑁂 𑀕𑀳𑀺𑀢𑁂𑀧𑀺 𑀏𑀢𑁂𑀤𑁄𑀲𑀸 𑀦𑀸𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸, 𑀮𑁄𑀓𑁂 𑀬𑁂𑀪𑀽𑀬𑁆𑀬𑀦𑀬𑀢𑀩𑁆𑀩𑀳𑀼𑀮𑀦𑀬𑀸𑀦𑀁𑀧𑀺 𑀲𑀩𑁆𑀪𑀸𑀯𑀸𑀢𑀺 𑀇𑀫𑀫𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀦𑀦𑀼𑀬𑁂𑀪𑀽𑀬𑁆𑀬 𑀯𑀼𑀢𑁆𑀢𑀺𑀯𑀲𑁂𑀦𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀓𑁂𑀲𑀜𑁆𑀘𑀻’’𑀢𑀺 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀸. 𑀬𑀣𑀸𑀫𑀺𑀕𑀮𑀼𑀤𑁆𑀤𑀓𑁄 𑀕𑀸𑀫𑁂 𑀘𑀭𑀦𑁆𑀢𑁄𑀧𑀺 𑀯𑀦𑁂 𑀘𑀭𑀡𑀩𑀳𑀼𑀮𑀢𑁆𑀢𑀸 𑀯𑀦𑀘𑀭𑀓𑁄𑀢𑀺 𑀦𑀸𑀫𑀁 𑀮𑀪𑀢𑀺. 𑀭𑀸𑀚𑀳𑀢𑁆𑀣𑀻 𑀅𑀜𑁆𑀜𑀢𑁆𑀣 𑀘𑀭𑀦𑁆𑀢𑁄𑀧𑀺 𑀲𑀗𑁆𑀕𑀸𑀫𑁂 𑀘𑀭𑀡𑀩𑀳𑀼𑀮𑀢𑁆𑀢𑀸 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺 𑀦𑀸𑀫𑀁 𑀮𑀪𑀢𑀺. 𑀅𑀬𑀁 𑀬𑁂𑀪𑀽𑀬𑁆𑀬𑀦𑀬𑁄 𑀦𑀸𑀫. 𑀬𑀲𑁆𑀫𑀺𑀁 𑀯𑀦𑁂 𑀅𑀫𑁆𑀩𑀭𑀼𑀓𑁆𑀔𑀸𑀧𑀺 𑀅𑀢𑁆𑀣𑀺, 𑀅𑀜𑁆𑀜𑀭𑀼𑀓𑁆𑀔𑀸𑀧𑀺 𑀅𑀢𑁆𑀣𑀺. 𑀅𑀫𑁆𑀩𑀭𑀼𑀓𑁆𑀔𑀩𑀳𑀼𑀮𑀢𑁆𑀢𑀸 𑀧𑀦 𑀢𑀁 𑀯𑀦𑀁 𑀅𑀫𑁆𑀩𑀯𑀦𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀏𑀯𑀁 𑀲𑀺𑀫𑁆𑀩𑀮𑀺𑀯𑀦𑀸𑀤𑀻𑀲𑀼. 𑀅𑀬𑀁 𑀢𑀩𑁆𑀩𑀳𑀼𑀮𑀦𑀬𑁄. 𑀇𑀥 𑀧𑀦 𑀪𑀽𑀫𑀺𑀬𑁄 𑀢𑀩𑁆𑀩𑀳𑀼𑀮𑀦𑀬𑁂𑀦 𑀓𑀸𑀫𑀭𑀽𑀧𑀸𑀭𑀽𑀧 𑀦𑀸𑀫𑀁 𑀮𑀪𑀦𑁆𑀢𑀺, 𑀥𑀫𑁆𑀫𑀸 𑀬𑁂𑀪𑀽𑀬𑁆𑀬𑀦𑀬𑁂𑀦 𑀓𑀸𑀫𑀸𑀯𑀘𑀭𑀸𑀤𑀺 𑀦𑀸𑀫𑀁 𑀮𑀪𑀦𑁆𑀢𑀻𑀢𑀺. 𑀏𑀯𑀁 𑀕𑀳𑀺𑀢𑁂 𑀲𑀢𑀺, 𑀢𑁂 𑀤𑁄𑀲𑀸𑀦𑀸 𑀧𑀚𑁆𑀚𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸 𑀇𑀥𑀧𑀺…𑀧𑁂… 𑀤𑁄𑀲𑁄𑀢𑀻’’𑀢𑀺𑀆𑀳. ‘‘𑀦𑀸’’𑀢𑀺 𑀦 𑀓𑁄𑀘𑀺𑀤𑁄𑀲𑁄 𑀦𑀢𑁆𑀣𑀺. 𑀅𑀢𑁆𑀣𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀲𑁆𑀫𑀸𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀸’’𑀢𑀺 𑀅𑀯𑀘𑀭𑀲𑀤𑁆𑀤𑀲𑁆𑀲. ‘‘𑀢𑀣𑀸 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀉𑀧𑁆𑀧𑀚𑁆𑀚𑀦𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸. ‘‘𑀧𑀭𑀺𑀕𑁆𑀕𑀸𑀳𑀺𑀦𑀺𑀬𑀸 𑀓𑀸𑀫𑀢𑀡𑁆𑀳𑀸𑀬 𑀓𑀢𑁄’’𑀢𑀺 𑀢𑀣𑀸 𑀧𑀭𑀺𑀕𑁆𑀕𑀸𑀳𑀺𑀦𑀺𑀬𑀸 𑀓𑀸𑀫𑀢𑀡𑁆𑀳𑀸𑀬 𑀕𑁄𑀘𑀭𑀯𑀺𑀲𑀬𑀢𑁆𑀢𑀸𑀢𑀸𑀬𑀢𑀡𑁆𑀳𑀸𑀬 𑀓𑀢𑁄𑀦𑀸𑀫 𑀳𑁄𑀢𑀺. 𑀏𑀢𑁂𑀦 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀓𑀸𑀫𑀢𑀡𑁆𑀳𑀸. 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀅𑀯𑀘𑀭𑀁. 𑀓𑀸𑀫𑀲𑁆𑀲 𑀅𑀯𑀘𑀭𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀓𑀸𑀫 𑀢𑀡𑁆𑀳𑀸𑀬 𑀕𑁄𑀘𑀭𑀯𑀺𑀲𑀬𑀢𑁆𑀢𑀸 𑀓𑀸𑀫𑀸𑀯𑀘𑀭𑀦𑁆𑀢𑀺 𑀅𑀬𑀫𑀢𑁆𑀣𑁄𑀧𑀺 𑀲𑀺𑀚𑁆𑀛𑀢𑀺.

𑀭𑀽𑀧𑁂𑀅𑀯𑀘𑀭𑀢𑀻𑀢𑀺 𑀭𑀽𑀧𑀸𑀯𑀘𑀭𑀁. ‘‘𑀭𑀽𑀧𑁂’’𑀢𑀺 𑀲𑁄𑀴𑀲𑀯𑀺𑀥𑀸𑀬𑀭𑀽𑀧𑀪𑀽𑀫𑀺𑀬𑀸. ‘‘𑀅𑀯𑀘𑀭𑀢𑀻’’𑀢𑀺 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀢𑀺. 𑀅𑀭𑀽𑀧𑁂 𑀅𑀯𑀘𑀭𑀢𑀻𑀢𑀺 𑀅𑀭𑀽𑀧𑀸𑀯𑀘𑀭𑀁. ‘‘𑀅𑀭𑀽𑀧𑁂’’𑀢𑀺 𑀘𑀢𑀼𑀩𑁆𑀩𑀺𑀥𑀸𑀬 𑀅𑀭𑀽𑀧𑀪𑀽𑀫𑀺𑀬𑀸. ‘‘𑀅𑀯𑀘𑀭𑀢𑀻’’𑀢𑀺 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀇𑀫𑀫𑀢𑁆𑀣𑀁 𑀯𑀤𑀢𑀺 ‘‘𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼𑀧𑀺 𑀅𑀬𑀁𑀦𑀬𑁄 𑀦𑁂𑀢𑀩𑁆𑀩𑁄’’𑀢𑀺. 𑀭𑀽𑀧𑁂 𑀪𑀯𑁄 𑀭𑀽𑀧𑀁. 𑀭𑀽𑀧𑀢𑀡𑁆𑀳𑀸. 𑀅𑀭𑀽𑀧𑁂 𑀪𑀯𑁄 𑀅𑀭𑀽𑀧𑀁, 𑀅𑀭𑀽𑀧𑀢𑀡𑁆𑀳𑀸. 𑀭𑀽𑀧𑀲𑁆𑀲 𑀅𑀯𑀘𑀭𑀁 𑀭𑀽𑀧𑀸𑀯𑀘𑀭𑀁. 𑀅𑀭𑀽𑀧𑀲𑁆𑀲 𑀅𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀦𑀸. ‘‘𑀅𑀢𑁆𑀭𑀸’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀬𑀤𑀺𑀧𑀺 𑀮𑁄𑀪𑁄, 𑀭𑀸𑀕𑁄, 𑀓𑀸𑀫𑁄, 𑀢𑀡𑁆𑀳𑀸, 𑀢𑀺𑀲𑀩𑁆𑀩𑀫𑁆𑀧𑁂𑀢𑀁 𑀮𑁄𑀪𑀲𑁆𑀲𑀯𑁂𑀯𑀘𑀦𑀁 𑀳𑁄𑀢𑀺. 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄𑀢𑀺 𑀧𑀦 𑀯𑀺𑀲𑀼𑀁 𑀯𑀺𑀪𑀢𑁆𑀢𑀢𑁆𑀢𑀸 𑀇𑀥 𑀓𑀸𑀫𑀲𑀤𑁆𑀤𑁂𑀦 𑀢𑀁 𑀤𑀜𑁆𑀜𑁄𑀮𑁄𑀪𑁄 𑀕𑀬𑁆𑀳𑀢𑀺. ‘‘𑀲𑀩𑁆𑀩𑁄𑀧𑀺 𑀮𑁄𑀪𑁄’’𑀢𑀺 𑀏𑀢𑁂𑀦𑀲𑀲𑁆𑀲𑀢𑀼𑀘𑁆𑀙𑁂𑀤 𑀤𑀺𑀝𑁆𑀞𑀺𑀲𑀳𑀕𑀢𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁯. ‘‘𑀭𑀽𑀧𑀸𑀭𑀽𑀧𑀲𑀤𑁆𑀤𑀸 𑀢𑀸𑀲𑀼 𑀪𑀽𑀫𑀻𑀲𑀼 𑀦𑀺𑀭𑀼𑀴𑁆𑀳𑀸’’𑀢𑀺 𑀅𑀦𑀺𑀫𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀭𑀼𑀴𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀲𑀦𑀺𑀫𑀺𑀢𑁆𑀢𑀁 𑀦𑀬𑀁 𑀯𑀤𑀢𑀺 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸. ‘‘𑀦𑀺𑀲𑁆𑀲𑀬𑁄𑀧𑀘𑀸𑀭𑁄’’𑀢𑀺 𑀞𑀸𑀦𑀽𑀧𑀘𑀸𑀭𑁄, 𑀬𑀣𑀸 𑀲𑀩𑁆𑀩𑁄𑀕𑀸𑀫𑁄 𑀆𑀕𑀢𑁄𑀢𑀺. ‘‘𑀦𑀺𑀲𑁆𑀲𑀺𑀢𑁄 𑀧𑀘𑀸𑀭𑁄’’𑀢𑀺 𑀞𑀸𑀦𑁆𑀬𑀽𑀧𑀘𑀸𑀭𑁄. 𑀬𑀣𑀸 𑀥𑀚𑀸 𑀆𑀕𑀘𑁆𑀙𑀦𑁆𑀢𑀻𑀢𑀺. ‘‘𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂’’𑀢𑀺 𑀬𑁂 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀔𑀦𑁆𑀥𑀥𑀸𑀢𑀼 𑀆𑀬𑀢𑀦𑀸. 𑀬𑀁 𑀭𑀽𑀧𑀁, 𑀬𑀸 𑀯𑁂𑀤𑀦𑀸, 𑀬𑀸𑀲𑀜𑁆𑀜𑀸, 𑀬𑁂 𑀲𑀗𑁆𑀔𑀸𑀭𑀸, 𑀬𑀁𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀼𑀯𑀺𑀲𑀤’’𑀦𑁆𑀢𑀺 𑀬𑁂𑀪𑀽𑀬𑁆𑀬𑀸𑀤𑀺 𑀦𑀬𑁂𑀳𑀺 𑀅𑀦𑀸𑀓𑀼𑀮𑀢𑁆𑀢𑀸𑀲𑀼𑀯𑀺𑀲𑀼𑀤𑁆𑀥𑀁. ‘‘𑀓𑀺𑀁 𑀯𑀺𑀓𑁆𑀔𑁂𑀧𑁂𑀦𑀸’’𑀢𑀺 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁂𑀦 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀅𑀢𑁆𑀣𑁄.

𑁨𑁦. ‘‘𑀮𑀼𑀚𑁆𑀚𑀦𑀧𑁆𑀧𑀮𑀼𑀚𑁆𑀚𑀦𑀝𑁆𑀞𑁂𑀦𑀸’’𑀢𑀺 𑀪𑀺𑀚𑁆𑀚𑀦𑀧𑁆𑀧𑀪𑀺𑀚𑁆𑀚𑀦𑀝𑁆𑀞𑁂𑀦. ‘‘𑀬𑀢𑁆𑀣𑀸’’𑀢𑀺 𑀬𑀲𑁆𑀫𑀺𑀁 𑀢𑁂𑀪𑀽𑀫𑀓𑁂 𑀥𑀫𑁆𑀫𑀲𑀫𑀽𑀳𑁂. ‘‘𑀦𑀺𑀯𑀺𑀲𑀢𑀻’’𑀢𑀺 𑀦𑀺𑀘𑁆𑀘𑀁 𑀯𑀺𑀲𑀢𑀺, 𑀉𑀧𑀕𑀘𑁆𑀙𑀢𑀺. ‘‘𑀢𑀲𑁆𑀲𑀸’’𑀢𑀺 𑀫𑀺𑀘𑁆𑀙𑀸𑀕𑁆𑀕𑀸𑀳𑀲𑁆𑀲. ‘‘𑀢𑁂𑀲’’𑀦𑁆𑀢𑀺 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸𑀦𑀁. ‘‘𑀬𑁂𑀲’’𑀦𑁆𑀢𑀺 𑀮𑁄𑀓𑀺𑀬 𑀥𑀫𑁆𑀫𑀸𑀦𑀁. ‘‘𑀮𑀼𑀚𑁆𑀚𑀦’’𑀦𑁆𑀢𑀺 𑀔𑀡𑀺𑀓𑀪𑀗𑁆𑀕𑁂𑀦 𑀪𑀺𑀚𑁆𑀚𑀦𑀁. ‘‘𑀧𑀮𑀼𑀚𑁆𑀚𑀦’’𑀦𑁆𑀢𑀺 𑀲𑀡𑁆𑀞𑀸𑀦𑀪𑁂𑀤𑁂𑀦 𑀲𑀦𑁆𑀢𑀢𑀺𑀘𑁆𑀙𑁂𑀤𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀪𑀺𑀚𑁆𑀚𑀦𑀁. 𑀦𑀺𑀩𑁆𑀩𑀸𑀦𑀁 𑀧𑀦 𑀇𑀥 𑀦 𑀮𑀩𑁆𑀪𑀢𑀺 𑀘𑀺𑀢𑁆𑀢𑀲𑀗𑁆𑀕𑀳𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀘 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄, 𑀯𑀺𑀲𑀼𑀁 𑀏𑀓𑀸𑀘𑀢𑀼𑀢𑁆𑀣𑀻 𑀅𑀯𑀢𑁆𑀣𑀸 𑀪𑀽𑀫𑀺𑀦𑀸𑀫𑀸𑀢𑀺 𑀬𑁄𑀚𑀦𑀸.

𑀘𑀢𑀼𑀩𑁆𑀪𑀽𑀫𑀺𑀯𑀺𑀪𑀸𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. ‘‘𑀳𑀻𑀦’’𑀦𑁆𑀢𑀺 𑀲𑀤𑁆𑀥𑀸𑀲𑀢𑀺𑀆𑀤𑀻𑀳𑀺 𑀲𑁄𑀪𑀡𑀥𑀫𑁆𑀫𑁂𑀳𑀺 𑀅𑀬𑀼𑀢𑁆𑀢𑀢𑁆𑀢𑀸𑀳𑀻𑀦𑀁. ‘‘𑀲𑀩𑁆𑀩𑀳𑀻𑀦’’𑀦𑁆𑀢𑀺 𑀮𑁄𑀪𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀲𑀩𑁆𑀩 𑀘𑀺𑀢𑁆𑀢𑁂𑀳𑀺 𑀳𑀻𑀦𑀢𑀭𑀁. ‘‘𑀢𑀤𑀢𑁆𑀣𑁄’’𑀢𑀺 𑀉𑀧𑀭𑀺𑀫𑀸𑀦𑀁 𑀘𑀺𑀢𑁆𑀢𑀸𑀦𑀁 𑀲𑁄𑀪𑀡𑀲𑀜𑁆𑀜𑀸𑀓𑀭𑀡𑀲𑀼𑀔𑀢𑁆𑀣𑁄. ‘‘𑀆𑀤𑀺𑀢𑁄’’𑀢𑀺𑀆𑀤𑀺𑀫𑁆𑀳𑀺. ‘‘𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀪𑀯𑀦𑀺𑀓𑀦𑁆𑀢𑀺 𑀚𑀯𑀦𑀯𑀻𑀣𑀺𑀘𑀺𑀢𑁆𑀢𑀲𑁆𑀲 𑀯𑀲𑁂𑀦. 𑀏𑀯𑀜𑁆𑀘𑀲𑀢𑀺, 𑀓𑀺𑀁 𑀓𑀸𑀭𑀡𑀁 𑀮𑁄𑀪𑀫𑀽𑀮𑀘𑀺𑀢𑁆𑀢𑀲𑁆𑀲𑀧𑀣𑀫𑀁 𑀯𑀘𑀦𑁂𑀢𑀺 𑀆𑀳 ‘‘𑀅𑀓𑀼𑀲𑀮𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀁.‘‘𑀤𑁆𑀯𑀻𑀳𑀺𑀯𑀝𑁆𑀝𑀫𑀽𑀮𑁂𑀳𑀻’’𑀢𑀺 𑀮𑁄𑀪𑀫𑁄𑀳𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀯𑀝𑁆𑀝𑀫𑀽𑀮𑁂𑀳𑀺.

𑁨𑁨. ‘‘𑀲𑀺𑀦𑀺𑀤𑁆𑀥𑀘𑀺𑀢𑁆𑀢’’𑀦𑁆𑀢𑀺 𑀲𑀸𑀢𑀯𑁂𑀤𑀦𑀸𑀬𑀼𑀢𑁆𑀢𑀢𑁆𑀢𑀸𑀮𑀽𑀔𑀘𑀺𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀫𑀦𑀲𑁆𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑁂 𑀓𑀸𑀬𑀺𑀓𑀲𑀼𑀔𑀯𑁂𑀤𑀦𑀸𑀬𑀧𑀺 𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀦𑀲𑀺𑀓…𑀧𑁂… 𑀦𑀸𑀫’’𑀦𑁆𑀢𑀺. ‘‘𑀲𑀼𑀫𑀦𑀸𑀪𑀺𑀥𑀸𑀦𑀲𑁆𑀲𑀸’’𑀢𑀺 𑀲𑀼𑀫𑀦𑀦𑀸𑀫𑀲𑁆𑀲. ‘‘𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀆𑀲𑀦𑁆𑀦 𑀓𑀸𑀭𑀡𑀁. 𑀓𑀣𑀁 𑀧𑀦 𑀪𑀸𑀯𑁄 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀦𑀸𑀫𑀳𑁄𑀢𑀻𑀢𑀺 𑀆𑀳 ‘‘𑀪𑀯𑀦𑁆𑀢𑀺…𑀧𑁂… 𑀓𑀢𑁆𑀯𑀸’’𑀢𑀺. 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁. 𑀢𑀣𑀸𑀳𑀺 𑀪𑀸𑀯𑁄 𑀦𑀸𑀫 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀦𑀺𑀫𑀺𑀢𑁆𑀢 𑀮𑀓𑁆𑀔𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀧𑀬𑁄𑀕𑁂. ‘‘𑀤𑀦𑁆𑀢 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀤𑀦𑁆𑀢𑀓𑀸𑀭𑀡𑀸. ‘‘𑀢𑀁 𑀯𑁂𑀤𑀦𑀸 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀢𑀁 𑀯𑁂𑀤𑀦𑀸𑀓𑀸𑀭𑀡𑀸. 𑀏𑀢𑁆𑀣 𑀲𑀺𑀬𑀸, ‘‘𑀏𑀢𑀲𑁆𑀫𑀺𑀦𑁆𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁, 𑀦𑀺𑀫𑀺𑀢𑁆𑀢𑀜𑁆𑀘𑀦𑀸𑀫 𑀅𑀓𑀸𑀭𑀓𑀁 𑀅𑀲𑀸𑀥𑀦𑀁, 𑀢𑀁 𑀓𑀣𑀁 𑀲𑀸𑀥𑀦𑀯𑀺𑀕𑁆𑀕𑀳𑁂 𑀬𑀼𑀚𑁆𑀚𑀢𑀻𑀢𑀺. 𑀅𑀥𑀺𑀓𑀭𑀡 𑀲𑀸𑀥𑀦𑀸𑀦𑀼𑀭𑀽𑀧𑀢𑁆𑀢𑀸 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦𑀸𑀢𑀺 𑀘 𑀏𑀢𑀲𑁆𑀫𑀸𑀢𑀺 𑀘 𑀳𑁂𑀢𑀼 𑀅𑀢𑁆𑀣𑁂 𑀉𑀪𑀬𑀯𑀘𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀲𑀦𑁆𑀦𑀳𑁂𑀢𑀼 𑀦𑀸𑀫𑀲𑀸𑀥𑀦𑀭𑀽𑀧𑁄 𑀪𑀯𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀝𑁆𑀞𑀼 𑀓𑀭𑁄𑀢𑀺, 𑀧𑀓𑀢𑀺𑀧𑀘𑁆𑀘𑀬𑁂𑀦 𑀅𑀦𑀺𑀧𑁆𑀨𑀦𑁆𑀦𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀲𑀗𑁆𑀔𑀸𑀭𑁄. ‘‘𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀅𑀪𑀺𑀲𑀗𑁆𑀔𑀸𑀭𑁄. 𑀧𑀬𑁄𑀚𑁂𑀢𑀺 𑀦𑀺𑀬𑁄𑀚𑁂𑀢𑀻𑀢𑀺 𑀧𑀬𑁄𑀕𑁄. 𑀉𑀧𑁂𑀢𑀺 𑀨𑀮𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀉𑀧𑀸𑀬𑁄. ‘‘𑀆𑀡𑀢𑁆𑀢𑀺𑀬𑀸𑀯𑀸’’𑀢𑀺 𑀧𑁂𑀲𑀦𑀸𑀬𑀯𑀸. ‘‘𑀅𑀚𑁆𑀛𑁂𑀲𑀦𑁂𑀦 𑀯𑀸’’𑀢𑀺 𑀆𑀬𑀸𑀘𑀦𑁂𑀦 𑀯𑀸. ‘‘𑀢𑀚𑁆𑀚𑁂𑀢𑁆𑀯𑀸 𑀯𑀸’’𑀢𑀺 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀯𑀸. ‘‘𑀢𑀁 𑀢𑀁 𑀉𑀧𑀸𑀬𑀁 𑀧𑀭𑁂 𑀆𑀘𑀺𑀓𑁆𑀔’’𑀦𑁆𑀢𑀺. 𑀓𑀣𑀁 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀆𑀳 ‘‘𑀅𑀓𑀭𑀡𑁂’’𑀢𑀺𑀆𑀤𑀺𑀁. ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀧𑀬𑁄𑀚𑁂𑀢𑀻𑀢𑀺𑀓𑀢𑁆𑀯𑀸 𑀇𑀥 𑀲𑀗𑁆𑀔𑀸𑀭𑁄 𑀦𑀸𑀫𑀸’’𑀢𑀺 𑀬𑁄𑀚𑀦𑀸. ‘‘𑀧𑀘𑁆𑀘𑀬 𑀕𑀡𑁄’’𑀢𑀺 𑀧𑀓𑀢𑀺𑀧𑀘𑁆𑀘𑀬𑀕𑀡𑁄. ‘‘𑀢𑁂𑀦𑀸’’𑀢𑀺 𑀲𑀗𑁆𑀔𑀸𑀭𑁂𑀦. ‘‘𑀲𑀸𑀥𑀸𑀭𑀡𑁄’’𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀲𑀸𑀥𑀸𑀭𑀡𑁄. ‘‘𑀤𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑁂𑀦𑀸’’𑀢𑀺 𑀧𑀬𑁄𑀕𑁂𑀦 𑀯𑀸 𑀉𑀧𑀸𑀬𑁂𑀦 𑀯𑀸. ‘‘𑀬𑁄 𑀧𑀦 𑀢𑁂𑀦𑀲𑀳𑀺𑀢𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀭𑀦𑁆𑀢𑀭𑁂𑀦𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀲𑁄𑀧𑀦 𑀬𑀤𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀢𑀻’’𑀢𑀺𑀆𑀤𑀺 𑀮𑀤𑁆𑀥𑀕𑀼𑀡 𑀯𑀘𑀦𑀁. ‘‘𑀧𑀘𑁆𑀘𑀬𑀕𑀡𑀲𑁆𑀲𑁂𑀯𑀦𑀸𑀫’’𑀦𑁆𑀢𑀺 𑀧𑀘𑁆𑀘𑀬𑀕𑀡𑀲𑁆𑀲𑁂𑀯 𑀯𑀺𑀲𑁂𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑁆𑀧𑀦𑁆𑀦𑀢𑁆𑀣𑁂 𑀇𑀓𑀧𑀘𑁆𑀘𑀬𑁄𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀁. ‘‘𑀧𑀸𑀴𑀺𑀬’’𑀦𑁆𑀢𑀺 𑀥𑀫𑁆𑀫𑀲𑀗𑁆𑀕𑀡𑀺𑀧𑀸𑀴𑀺𑀬𑀁. ‘‘𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀇𑀘𑁆𑀘𑁂𑀯𑀢𑁆𑀣𑁄. 𑀲𑀩𑁆𑀩𑀫𑁂𑀢𑀁 𑀦𑀬𑀼𑀚𑁆𑀚𑀢𑀺𑀬𑁂𑀯. 𑀓𑀲𑁆𑀫𑀸, 𑀧𑀸𑀴𑀺𑀅𑀝𑁆𑀞𑀓𑀣𑀸𑀳𑀺 𑀅𑀲𑀁𑀲𑀦𑁆𑀤𑀦𑀢𑁆𑀢𑀸, 𑀅𑀢𑁆𑀣𑀬𑀼𑀢𑁆𑀢𑀺𑀩𑁆𑀬𑀜𑁆𑀚𑀦𑀬𑀼𑀢𑁆𑀢𑀻𑀦𑀜𑁆𑀘 𑀅𑀯𑀺𑀲𑀤𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢’’𑀦𑁆𑀢𑀺 𑀘𑀺𑀢𑁆𑀢𑀁. ‘‘𑀏𑀢𑁂𑀦𑀸’’𑀢𑀺 𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀦. ‘‘𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑀫𑀡𑁆𑀟𑀦𑀯𑀺𑀲𑁂𑀲𑁂𑀦. ‘‘𑀲𑁄 𑀧𑀦𑀸’’𑀢𑀺 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀧𑀦. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀢𑁂𑀦 𑀧𑀼𑀩𑁆𑀩𑀧𑁆𑀧𑀬𑁄𑀕𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄. ‘‘𑀯𑀺𑀭𑀚𑁆𑀛𑀺𑀢𑁆𑀯𑀸’’𑀢𑀺 𑀅𑀬𑀼𑀢𑁆𑀢𑀧𑀓𑁆𑀔𑁂𑀧𑀢𑀺𑀢𑁆𑀯𑀸. 𑀏𑀢𑁂𑀦𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀸𑀣𑀸𑀬𑀁. ‘‘𑀘𑀺𑀢𑁆𑀢𑀲𑀫𑁆𑀪𑀯𑀻’’𑀢𑀺 𑀘𑀺𑀢𑁆𑀢𑀲𑁆𑀫𑀺𑀁 𑀲𑀫𑁆𑀪𑀽𑀢𑁄. 𑀯𑀺𑀲𑁂𑀲𑁄 𑀲𑀗𑁆𑀔𑀸𑀭𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀲𑀮𑁄𑀫𑀓𑁄, 𑀲𑀧𑀓𑁆𑀔𑀓𑁄𑀢𑁆𑀬𑀸𑀤𑀻𑀲𑀼𑀯𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀲𑀸𑀲𑀯𑀸 𑀥𑀫𑁆𑀫𑀸, 𑀲𑀸𑀭𑀫𑁆𑀫𑀡𑀸 𑀥𑀫𑁆𑀫𑀸𑀢𑁆𑀬𑀸𑀤𑀻𑀲𑀼𑀯𑀺𑀬𑀸𑀢𑀺 𑀧𑀦 𑀯𑀼𑀢𑁆𑀢𑁂 𑀬𑀼𑀢𑁆𑀢𑀢𑀭𑀁. ‘‘𑀧𑀸𑀴𑀺𑀅𑀝𑁆𑀞𑀓𑀣𑀸 𑀲𑀺𑀤𑁆𑀥’’𑀦𑁆𑀢𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀢𑁄 𑀲𑀺𑀤𑁆𑀥𑀁. 𑀅𑀧𑀺𑀘𑀬𑀢𑁆𑀣𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀅𑀲𑀗𑁆𑀔𑀸𑀭𑀁 𑀘𑀺𑀢𑁆𑀢𑀁, 𑀲𑀲𑀗𑁆𑀔𑀸𑀭𑀁 𑀘𑀺𑀢𑁆𑀢𑀦𑁆𑀢𑀺 𑀆𑀕𑀢𑀁. 𑀢𑀢𑁆𑀣 𑀅𑀬𑀁 𑀧𑀘𑁆𑀙𑀺𑀫𑀦𑀬𑁄 𑀬𑀼𑀢𑁆𑀢𑁄. 𑀉𑀧𑀸𑀬𑀲𑀫𑀼𑀝𑁆𑀞𑀺𑀢𑀲𑁆𑀲 𑀅𑀦𑁂𑀓𑀲𑀢𑀲𑀫𑁆𑀪𑀯𑀢𑁄 ‘‘𑀇𑀤𑀜𑁆𑀘 𑀦𑀬𑀤𑀲𑁆𑀲𑀦𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀉𑀤𑀸𑀲𑀺𑀦𑀪𑀸𑀯𑁂𑀦𑀸’’𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁂𑀦. ‘‘𑀬𑀢𑁄’’𑀢𑀺 𑀬𑀲𑁆𑀫𑀸. 𑀯𑀺𑀓𑀸𑀭𑀧𑀢𑁆𑀢𑁄 𑀳𑁄𑀢𑀺. 𑀢𑀢𑁄 𑀅𑀥𑀺𑀫𑀢𑁆𑀢𑀧𑀲𑁆𑀲𑀦𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸.

𑁨𑁩. 𑀇𑀤𑀸𑀦𑀺 𑀲𑀳𑀕𑀢𑀯𑀘𑀦 𑀲𑀫𑁆𑀧𑀬𑀼𑀢𑁆𑀢𑀯𑀘𑀦𑀸𑀦𑀺 𑀯𑀺𑀘𑀸𑀭𑁂𑀦𑁆𑀢𑁄 ‘‘𑀏𑀢𑁆𑀣𑀘𑀸’’𑀢𑀺𑀆𑀤𑀺𑀫𑀸𑀭𑀪𑀺. ‘‘𑀦 𑀧𑀦 𑀢𑁂 𑀪𑁂𑀤𑀯𑀦𑁆𑀢𑀸 𑀳𑁄𑀦𑁆𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀦𑀼 𑀢𑁂𑀧𑀺𑀘𑀓𑁆𑀔𑀼 𑀲𑀫𑁆𑀨𑀲𑁆𑀲𑁄, 𑀲𑁄𑀢𑀲𑀫𑁆𑀨𑀲𑁆𑀲𑁄, 𑀢𑀺𑀆𑀤𑀺𑀦𑀸 𑀘, 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀢𑀺𑀆𑀤𑀺𑀦𑀸 𑀘, 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡, 𑀦𑁆𑀢𑀺𑀆𑀤𑀺𑀦𑀸𑀘 𑀪𑁂𑀤𑀯𑀦𑁆𑀢𑀸 𑀳𑁄𑀦𑁆𑀢𑀻𑀢𑀺. 𑀲𑀘𑁆𑀘𑀁. 𑀢𑁂 𑀧𑀦 𑀪𑁂𑀤𑀸 𑀇𑀫𑀁 𑀘𑀺𑀢𑁆𑀢𑀁 𑀪𑀺𑀦𑁆𑀦𑀁 𑀦 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀪𑁂𑀤𑀯𑀦𑁆𑀢𑀸𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀦 𑀘 𑀢𑁂𑀲𑀁 𑀅𑀬𑀁 𑀯𑀺𑀓𑀧𑁆𑀧𑁄 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂’’𑀢𑀺 𑀮𑁄𑀪𑀫𑀽𑀮𑀘𑀺𑀢𑁆𑀢𑁂. ‘‘𑀓𑀢𑁆𑀣𑀘𑀻’’𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀘𑀺𑀢𑁆𑀢𑁂. 𑀬𑁂𑀯𑀸𑀧𑀦𑀸𑀢𑀺 𑀯𑀼𑀢𑁆𑀢𑁂 𑀲𑀼𑀥𑀫𑁆𑀫𑁂𑀲𑀼 𑀆𑀕𑀢𑀸𑀦𑀺𑀬𑁂𑀯𑀸𑀧𑀦𑀓𑀸𑀦𑀺. ‘‘𑀅𑀜𑁆𑀜𑁂𑀳𑀻’’𑀢𑀺 𑀤𑁄𑀲𑀫𑀽𑀮𑀫𑁄𑀳𑀫𑀽𑀮𑁂𑀳𑀺. 𑀦𑀦𑀼𑀢𑀸𑀦𑀺𑀧𑀺 𑀇𑀥 𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀸’’𑀢𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑁂𑀲𑀼𑀳𑀻’’𑀢𑀺𑀆𑀤𑀺𑀁. 𑀢𑁂𑀧𑀺 𑀇𑀥 𑀦𑀕𑀳𑁂𑀢𑀩𑁆𑀩𑀸 𑀲𑀺𑀬𑀼𑀁. 𑀦 𑀧𑀦 𑀦 𑀕𑀳𑁂𑀢𑀩𑁆𑀩𑀸. 𑀓𑀲𑁆𑀫𑀸, 𑀯𑁂𑀤𑀦𑀸𑀬 𑀘 𑀲𑀬𑀁 𑀪𑁂𑀤𑀯𑀦𑁆𑀢𑀢𑁆𑀢𑀸, 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑀸𑀦𑀜𑁆𑀘 𑀯𑀺𑀓𑀧𑁆𑀧𑀲𑀩𑁆𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪. ‘‘𑀲𑁄𑀫𑀦𑀲𑁆𑀲𑀲𑁆𑀲𑀓𑀸𑀭𑀡’’𑀦𑁆𑀢𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁. 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑁂 𑀯𑀼𑀢𑁆𑀢𑁂 𑀢𑀁 𑀲𑀳𑀕𑀢 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸𑀧𑀺𑀓𑀸𑀭𑀡𑀁 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑁄𑀫𑀦𑀲𑁆𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑁄𑀳𑀻’’𑀢𑀺𑀆𑀤𑀺𑀁. 𑀳𑀻𑀦𑁂𑀦 𑀯𑀸…𑀧𑁂… 𑀆𑀭𑀫𑁆𑀫𑀡𑁂𑀦 𑀲𑀫𑀸𑀬𑁄𑀕𑁄, 𑀢𑁂𑀦 𑀲𑀫𑀸𑀬𑀼𑀢𑁆𑀢𑀲𑁆𑀲𑀸𑀧𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀩𑁆𑀬𑀲𑀦𑀫𑀼𑀢𑁆𑀢𑀺𑀬𑀁𑀧𑀺. 𑀉𑀧𑁂𑀓𑁆𑀔𑀸𑀓𑀸𑀭𑀡𑁂 ‘‘𑀩𑁆𑀬𑀲𑀦𑀫𑀼𑀢𑁆𑀢𑀻’’𑀢𑀺 𑀇𑀤𑀁 𑀤𑁄𑀫𑀦𑀲𑁆𑀲𑀧𑁆𑀧𑀲𑀗𑁆𑀕𑀧𑀭𑀺𑀳𑀸𑀭𑀯𑀘𑀦𑀁. 𑀅𑀚𑁆𑀛𑀸𑀲𑀬𑁄𑀯𑀼𑀘𑁆𑀘𑀢𑀺 𑀅𑀚𑁆𑀛𑀸𑀯𑀼𑀢𑁆𑀢𑀁 𑀕𑁂𑀳𑀁. 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀅𑀚𑁆𑀛𑀸𑀲𑀬𑁄𑀬𑀲𑁆𑀲𑀸𑀢𑀺 𑀤𑀺𑀝𑁆𑀞𑀚𑁆𑀛𑀸𑀲𑀬𑁄. 𑀢𑀲𑁆𑀲 𑀪𑀸𑀯𑁄 𑀤𑀺𑀝𑁆𑀞𑀚𑁆𑀛𑀸𑀲𑀬𑀢𑀸. ‘‘𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦’’𑀦𑁆𑀢𑀺 𑀅𑀦𑀼𑀧𑀸𑀬𑀢𑁄 𑀆𑀪𑀼𑀚𑀦𑀁, 𑀫𑀦𑀲𑀺𑀓𑀭𑀡𑀁. ‘‘𑀘𑀺𑀦𑁆𑀢𑀸 𑀧𑀲𑀼𑀢𑀯𑀲𑁂𑀦𑀸’’𑀢𑀺 𑀕𑀫𑁆𑀪𑀻𑀭𑁂𑀲𑀼 𑀥𑀫𑁆𑀫𑁂𑀲𑀼 𑀘𑀺𑀦𑁆𑀢𑀸𑀧𑀲𑀯𑀦𑀯𑀲𑁂𑀦, 𑀯𑀻𑀫𑀁𑀲𑀸 𑀯𑀟𑁆𑀠𑀦𑀯𑀲𑁂𑀦. ‘‘𑀤𑀺𑀝𑁆𑀞𑀓𑀸𑀭𑀡𑀫𑁂𑀯𑀸’’𑀢𑀺 𑀤𑀺𑀝𑁆𑀞𑀁 𑀓𑀸𑀭𑀡𑀧𑁆𑀧𑀝𑀺𑀭𑀽𑀧𑀓𑀫𑁂𑀯. 𑀢𑁂𑀦𑀸𑀳 ‘‘𑀲𑀸𑀭𑀢𑁄𑀲𑀘𑁆𑀘𑀢𑁄 𑀉𑀫𑁆𑀫𑀼𑀚𑁆𑀚𑀦’’𑀦𑁆𑀢𑀺. ‘‘𑀢𑀩𑁆𑀩𑀺𑀧𑀭𑀻𑀢𑁂𑀦𑀸’’𑀢𑀺 𑀢𑀢𑁄 𑀯𑀺𑀧𑀭𑀻𑀢𑁂𑀦. 𑀅𑀤𑀺𑀝𑁆𑀞𑀚𑁆𑀛𑀸𑀲𑀬𑀢𑀸, 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀤𑁆𑀥𑀫𑁆𑀫𑀲𑀯𑀦𑀢𑀸, 𑀲𑀫𑁆𑀫𑀸𑀯𑀺𑀢𑀓𑁆𑀓𑀩𑀳𑀼𑀮𑀢𑀸, 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀜𑁆𑀘 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑁄𑀕𑀓𑀸𑀭𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑀁.

‘‘𑀇𑀫𑁂𑀲𑀁 𑀧𑀦 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂𑀔𑀦𑁆𑀥 𑀦𑀺𑀤𑁆𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺𑀢𑀢𑁆𑀣. 𑀬𑀤𑀸 𑀳𑀺𑀦𑀢𑁆𑀣𑀺𑀓𑀸𑀫𑁂𑀲𑀼 𑀆𑀤𑀻𑀦𑀯𑁄𑀢𑀺𑀆𑀤𑀺𑀦𑀸𑀦𑀬𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀓𑀸𑀫𑁂𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀭𑀢𑁄𑀧𑀘𑁆𑀘𑁂𑀢𑀺 𑀲𑀪𑀸𑀯 𑀢𑀺𑀓𑁆𑀔𑁂𑀦 𑀅𑀦𑀼𑀲𑁆𑀲𑀸𑀳𑀺𑀢𑁂𑀦𑀘𑀺𑀢𑁆𑀢𑁂𑀦. 𑀢𑀤𑀸 𑀧𑀣𑀫𑀁 𑀅𑀓𑀼𑀲𑀮 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀢𑀤𑀸𑀤𑀼𑀢𑀻𑀬𑀁. 𑀬𑀤𑀸 𑀫𑀺𑀘𑁆𑀙𑀸 𑀤𑀺𑀝𑁆𑀞𑀺𑀁 𑀅𑀧𑀼𑀭𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀳𑀝𑁆𑀞𑀢𑀼𑀝𑁆𑀞𑁄 𑀫𑁂𑀣𑀼𑀦𑀁 𑀯𑀸 𑀲𑁂𑀯𑀢𑀺, 𑀧𑀭 𑀲𑀫𑁆𑀧𑀢𑁆𑀢𑀺𑀁 𑀯𑀸 𑀅𑀪𑀺𑀚𑁆𑀛𑀸𑀬𑀢𑀺, 𑀧𑀭𑀪𑀡𑁆𑀟𑀁 𑀯𑀸 𑀳𑀭𑀢𑀺 𑀲𑀪𑀸𑀯𑀢𑀺𑀓𑁆𑀔𑁂𑀦𑁂𑀯 𑀅𑀦𑀼𑀲𑁆𑀲𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦. 𑀢𑀤𑀸 𑀢𑀢𑀻𑀬𑀁. 𑀬𑀤𑀸 𑀫𑀦𑁆𑀤𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑁂𑀦𑀘𑀺𑀢𑁆𑀢𑁂𑀦, 𑀢𑀤𑀸 𑀘𑀢𑀼𑀢𑁆𑀣𑀁. 𑀬𑀤𑀸 𑀧𑀦 𑀓𑀸𑀫𑀸𑀦𑀁 𑀯𑀸 𑀅𑀲𑀫𑁆𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑁂𑀦 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸𑀳𑁄𑀦𑁆𑀢𑀺, 𑀢𑀤𑀸𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑀮𑁄𑀪𑀫𑀽𑀮𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁫. 𑀤𑁄𑀲𑀫𑀽𑀮𑀘𑀺𑀢𑁆𑀢𑁂. ‘‘𑀯𑀺𑀭𑀽𑀧’’𑀦𑁆𑀢𑀺 𑀤𑀼𑀝𑁆𑀞𑀁, 𑀮𑀼𑀤𑁆𑀤𑀁. 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄𑀢𑀺 𑀯𑀼𑀢𑁆𑀢𑁂 𑀓𑀸𑀬𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀬𑀧𑀺 𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀦𑀲𑀺𑀓…𑀧𑁂… 𑀦𑀸𑀫’’𑀦𑁆𑀢𑀺. 𑀧𑀝𑀺𑀳𑀜𑁆𑀜𑀢𑀺 𑀩𑀸𑀥𑀢𑀺. ‘‘𑀲𑀦𑁆𑀢𑀢𑁆𑀢𑁂’’𑀢𑀺 𑀲𑀦𑁆𑀢𑀸𑀧𑀺𑀢𑁂.

𑁨𑁬. ‘‘𑀪𑁂𑀤𑀓𑀭𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑁂𑀲𑀓𑀭𑁄. ‘‘𑀪𑁂𑀤𑀓𑀭𑀸𑀦 𑀳𑁄𑀦𑁆𑀢𑀻’’𑀢𑀺 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑀺𑀲𑁂𑀲𑀓𑀭𑀸𑀦 𑀳𑁄𑀦𑁆𑀢𑀺. 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁 𑀕𑀳𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀧𑀲𑀗𑁆𑀕𑁄𑀢𑀺 𑀘𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀚𑁆𑀚𑀦𑀁 𑀮𑀕𑁆𑀕𑀦𑀁. 𑀓𑀣𑀁 𑀧𑀲𑀗𑁆𑀕𑁄𑀢𑀺 𑀆𑀳 ‘‘𑀬𑀤𑀸𑀳𑀻’’𑀢𑀺𑀆𑀤𑀺𑀁. ‘‘𑀢𑀼𑀝𑁆𑀞𑀺𑀁 𑀧𑀯𑁂𑀤𑁂𑀦𑁆𑀢𑀻’’𑀢𑀺 𑀢𑀼𑀝𑁆𑀞𑀸𑀫𑀬𑀁 𑀇𑀫𑁂𑀲𑀁 𑀫𑀭𑀡𑁂𑀦𑀸𑀢𑀺𑀆𑀤𑀺 𑀘𑀺𑀓𑁆𑀔𑀦𑁆𑀢𑀺. 𑀏𑀯𑀁 𑀲𑀳𑀕𑀢𑀧𑁆𑀧𑀲𑀗𑁆𑀕𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀧𑁆𑀧𑀲𑀗𑁆𑀕𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀧𑀝𑀺𑀖𑀕𑁆𑀕𑀳𑀡𑀁𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀭𑀘𑁆𑀙𑀸𑀦𑀕𑀢𑀧𑀸𑀡𑀯𑀥𑁂 𑀅𑀧𑀼𑀜𑁆𑀜𑀁 𑀦𑀸𑀫 𑀦𑀢𑁆𑀣𑀺. 𑀆𑀤𑀺𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸𑀦𑀁 𑀬𑀣𑀸𑀓𑀸𑀫 𑀧𑀭𑀺𑀪𑁄𑀕𑀢𑁆𑀣𑀸𑀬 𑀮𑁄𑀓𑀺𑀲𑁆𑀲𑀭𑀺𑀬𑁂𑀦𑀣𑀸𑀯𑀭𑀝𑁆𑀞𑀸𑀬𑀺𑀦𑀸 𑀦𑀺𑀫𑁆𑀫𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑀺𑀲𑁆𑀲𑀝𑁆𑀞𑀸’’𑀢𑀺 𑀅𑀦𑀸𑀲𑀗𑁆𑀓𑀸. ‘‘𑀅𑀜𑁆𑀜𑁂𑀯𑀸’’𑀢𑀺 𑀅𑀜𑁆𑀜𑁂 𑀯𑀸 𑀚𑀦𑁂. 𑀯𑀺𑀫𑀢𑀺 𑀏𑀯 𑀯𑁂𑀫𑀢𑀺𑀓𑀁. 𑀯𑁂𑀫𑀢𑀺𑀓𑀁 𑀚𑀸𑀢𑀁 𑀬𑁂𑀲𑀁 𑀢𑁂 𑀯𑁂𑀫𑀢𑀺𑀓𑀚𑀸𑀢𑀸. 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲𑀮𑁄𑀪𑀲𑀳𑀕𑀢𑀪𑀸𑀯𑁄 𑀇𑀫𑀸𑀦𑀺𑀅𑀝𑁆𑀞𑀧𑀺 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀸𑀦𑀺𑀦𑀸𑀫𑀸𑀢𑀺 𑀇𑀫𑀺𑀦𑀸 𑀘𑀽𑀴𑀦𑀺𑀕𑀫𑀦𑁂 𑀦𑁂𑀯 𑀲𑀺𑀤𑁆𑀥𑁄𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀘𑀽𑀴𑀦𑀺𑀕𑀫𑀦𑁂𑀦 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢 𑀪𑀸𑀯𑁂𑀲𑀺𑀤𑁆𑀥𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄𑀧𑀺 𑀢𑁂𑀦𑀲𑀺𑀤𑁆𑀥𑁄 𑀬𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀢𑁂𑀲𑀁 𑀕𑀳𑀡𑀁’’𑀢𑀺 𑀯𑀼𑀢𑁆𑀢𑀁. ‘‘𑀢𑁂𑀲’’𑀦𑁆𑀢𑀺 𑀤𑁄𑀦𑀲𑁆𑀲𑀧𑀝𑀺𑀖𑀸𑀦𑀁. 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀺𑀘𑀣𑀺𑀦𑀫𑀺𑀤𑁆𑀥𑀸𑀦𑀺 𑀘 𑀅𑀦𑀺𑀬𑀢𑀬𑁄𑀕𑀻𑀦𑀺 𑀘 𑀳𑁄𑀦𑁆𑀢𑀺 𑀬𑁂𑀯𑀸𑀧𑀦𑀓𑀸𑀦𑀺 𑀘. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀘𑀺𑀢𑁆𑀢𑁂’’𑀢𑀺𑀆𑀤𑀺𑀁. 𑀤𑁄𑀫𑀦𑀲𑁆𑀲𑀁 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀅𑀢𑁆𑀣𑀺, 𑀅𑀜𑁆𑀜𑀘𑀺𑀢𑁆𑀢𑁂𑀲𑀼 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀲𑀸𑀥𑀸𑀭𑀡 𑀥𑀫𑁆𑀫𑁄 𑀦𑀸𑀫. 𑀅𑀦𑀜𑁆𑀜𑀲𑀸𑀥𑀸𑀭𑀡 𑀥𑀫𑁆𑀫𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀬𑀣𑀸𑀢𑀁’’𑀢𑀺 𑀢𑀁 𑀦𑀺𑀤𑀲𑁆𑀲𑀦𑀁 𑀢𑀤𑀼𑀤𑀸𑀳𑀭𑀡𑀁 𑀬𑀣𑀸 𑀓𑀢𑀫𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀧𑀮𑀓𑁆𑀔𑁂𑀢𑀻’’𑀢𑀺 𑀲𑀜𑁆𑀜𑀸𑀧𑁂𑀢𑀺. 𑀆𑀢𑀧𑀁𑀢𑀸𑀬𑀢𑀺𑀭𑀓𑁆𑀔𑀢𑀻𑀢𑀺 𑀆𑀢𑀧𑀢𑁆𑀢𑀁. 𑀲𑁂𑀢𑀘𑁆𑀙𑀢𑁆𑀢𑀁. 𑀮𑀤𑁆𑀥𑀁 𑀆𑀢𑀧𑀢𑁆𑀢𑀁 𑀬𑁂𑀦𑀸𑀢𑀺 𑀮𑀤𑁆𑀥𑀸𑀢𑀧𑀢𑁆𑀢𑁄. 𑀭𑀸𑀚𑀓𑀼𑀫𑀸𑀭𑁄. 𑀲𑁄 𑀆𑀢𑀧𑀢𑁆𑀢𑀁 𑀮𑀤𑁆𑀥𑁄𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀭𑀸𑀚𑀲𑀫𑁆𑀧𑀢𑁆𑀢𑀺𑀁 𑀮𑀤𑁆𑀥𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀇𑀤𑀁 𑀉𑀧𑀮𑀓𑁆𑀔𑀡 𑀯𑀘𑀦𑀁 𑀚𑀸𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀉𑀪𑀺𑀦𑁆𑀦’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑁄𑀫𑀦𑀲𑁆𑀲 𑀧𑀝𑀺𑀖𑀸𑀦𑀁. 𑀧𑀼𑀩𑁆𑀩𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺 𑀯𑀢𑁆𑀯𑀸 𑀦𑀺𑀕𑀫𑀦𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀇𑀫𑀲𑁆𑀲…𑀧𑁂… 𑀲𑀺𑀤𑁆𑀥𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑁨𑁭. ‘‘𑀅𑀦𑀺𑀝𑁆𑀞𑀮𑁄𑀓𑀥𑀫𑁆𑀫𑁂𑀳𑀻’’𑀢𑀺 𑀅𑀮𑀸𑀪𑁄 𑀘, 𑀅𑀬𑀲𑁄𑀘, 𑀦𑀺𑀦𑁆𑀤𑀸𑀘, 𑀤𑀼𑀓𑁆𑀔𑀜𑁆𑀘𑀸𑀢𑀺 𑀘𑀢𑀽𑀳𑀺 𑀅𑀦𑀺𑀝𑁆𑀞𑀮𑁄𑀓𑀥𑀫𑁆𑀫𑁂𑀳𑀺. ‘‘𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺 𑀅𑀳𑀁 𑀅𑀮𑀸𑀪𑀸𑀤𑀻𑀳𑀺 𑀫𑀸𑀲𑀫𑀸𑀕𑀘𑁆𑀙𑀻𑀢𑀺 𑀧𑀢𑁆𑀣𑁂𑀦𑁆𑀢𑀲𑁆𑀲𑀧𑀺 𑀓𑀼𑀢𑁄𑀫𑁂𑀏𑀢𑁆𑀣𑀮𑁄𑀓𑁂𑀢𑀁 𑀧𑀢𑁆𑀣𑀦𑀸 𑀧𑀽𑀭𑀡𑀁 𑀲𑀩𑁆𑀩𑀓𑀸𑀮𑀁 𑀮𑀩𑁆𑀪𑀸𑀢𑀺 𑀅𑀢𑁆𑀣𑁄. ‘‘𑀮𑀩𑁆𑀪𑀸’’𑀢𑀺 𑀘 𑀓𑀫𑁆𑀫𑀢𑁆𑀣𑀤𑀻𑀧𑀓𑀁 𑀧𑀸𑀝𑀺𑀧𑀤𑀺𑀓𑀧𑀤𑀁. 𑀇𑀫𑁂𑀲𑀁 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀗𑁆𑀔𑁂𑀧𑀢𑁄𑀯 𑀯𑀼𑀢𑁆𑀢𑀁 𑀢𑀲𑁆𑀲 𑀧𑀸𑀡𑀸𑀢𑀺 𑀧𑀸𑀢𑀸𑀤𑀻𑀲𑀼 𑀢𑀺𑀓𑁆𑀔𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀺𑀯𑁂𑀤𑀺𑀢𑀩𑁆𑀩𑀸𑀢𑀺.

𑀤𑁄𑀲𑀫𑀽𑀮𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮. 𑀫𑁄𑀳𑀫𑀽𑀮𑀘𑀺𑀢𑁆𑀢𑁂. ‘‘𑀫𑀽𑀮𑀦𑁆𑀢𑀭𑀯𑀺𑀭𑀳𑁂𑀦𑀸’’𑀢𑀺 𑀅𑀜𑁆𑀜𑀫𑀽𑀮𑀯𑀺𑀭𑀳𑁂𑀦. 𑀲𑀁𑀲𑀧𑁆𑀧𑀢𑀻𑀢𑀺 𑀲𑀁𑀲𑀧𑁆𑀧𑀫𑀸𑀦𑀸. 𑀏𑀯𑀁 𑀦𑀼 𑀔𑁄, 𑀅𑀜𑁆𑀜𑀣𑀸𑀦𑀼 𑀔𑁄𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀏𑀭𑀬𑀢𑀺 𑀓𑀫𑁆𑀧𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀺𑀧𑀢𑀻𑀢𑀺 𑀯𑀺𑀓𑁆𑀔𑀺𑀧𑀫𑀸𑀦𑀁. ‘‘𑀦𑀺𑀬𑀫𑀦𑀢𑁆𑀣’’𑀦𑁆𑀢𑀺 𑀇𑀤𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑀁 𑀦𑀸𑀫𑀸𑀢𑀺 𑀦𑀺𑀬𑀫𑀦𑀢𑁆𑀣𑀁. 𑀇𑀤𑀜𑁆𑀳𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀬 𑀦𑀺𑀕𑀫𑀦𑁂𑀦 𑀲𑀺𑀤𑁆𑀥𑀁 𑀦 𑀳𑁄𑀢𑀺. ‘‘𑀇𑀥 𑀮𑀤𑁆𑀥𑁄𑀓𑀸𑀲𑀁 𑀳𑀼𑀢𑁆𑀯𑀸’’𑀢𑀺 𑀫𑀽𑀮𑀦𑁆𑀢𑀭 𑀯𑀺𑀭𑀳𑀢𑁆𑀢𑀸 𑀏𑀯 𑀇𑀥𑀮𑀤𑁆𑀥𑁄𑀓𑀸𑀲𑀁 𑀳𑀼𑀢𑁆𑀯𑀸. 𑀧𑀓𑀢𑀺 𑀲𑀪𑀸𑀯𑀪𑀽𑀢𑀁, 𑀇𑀢𑀺 𑀢𑀲𑁆𑀫𑀸 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. ‘‘𑀅𑀦𑁄𑀲𑀓𑁆𑀓𑀫𑀸𑀦’’𑀦𑁆𑀢𑀺 𑀧𑀘𑁆𑀙𑀢𑁄 𑀅𑀦𑀺𑀯𑀢𑁆𑀢𑀫𑀸𑀦𑀁. ‘‘𑀅𑀲𑀁𑀲𑀻𑀤𑀫𑀸𑀦’’𑀦𑁆𑀢𑀺 𑀳𑁂𑀝𑁆𑀞𑀢𑁄 𑀅𑀧𑀢𑀫𑀸𑀦𑀁. 𑀉𑀪𑀬𑁂𑀦 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀢𑀺𑀲𑀫𑁆𑀫𑀼𑀴𑁆𑀳𑀢𑀸𑀬𑀸’’𑀢𑀺 𑀫𑀽𑀮𑀦𑁆𑀢𑀭 𑀯𑀺𑀭𑀳𑁂𑀦 𑀫𑁄𑀳𑁂𑀦 𑀅𑀢𑀺𑀲𑀫𑁆𑀫𑀼𑀴𑁆𑀳𑀢𑀸𑀬. ‘‘𑀅𑀢𑀺𑀘𑀜𑁆𑀘𑀮𑀢𑀸𑀬𑀸’’𑀢𑀺 𑀲𑀁𑀲𑀧𑁆𑀧𑀫𑀸𑀦𑀯𑀺𑀓𑁆𑀔𑀺𑀧𑀫𑀸𑀦𑁂𑀳𑀺𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑁂𑀳𑀺 𑀅𑀢𑀺𑀘𑀜𑁆𑀘𑀮𑀢𑀸𑀬. ‘‘𑀲𑀩𑁆𑀩𑀢𑁆𑀣𑀧𑀻’’𑀢𑀺 𑀲𑀩𑁆𑀩𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼. 𑀅𑀝𑁆𑀞𑀓𑀣𑀸𑀬𑀁 𑀲𑀗𑁆𑀔𑀸𑀭 𑀪𑁂𑀤𑁂𑀦 𑀅𑀯𑀺𑀚𑁆𑀚𑀸𑀬 𑀤𑀼𑀯𑀺𑀥𑀪𑀸𑀯𑁄𑀯 𑀯𑀼𑀢𑁆𑀢𑁄. 𑀓𑀣𑀁 𑀯𑀼𑀢𑁆𑀢𑁄. 𑀅𑀯𑀺𑀚𑁆𑀚𑀸 𑀅𑀧𑁆𑀧𑀝𑀺𑀧𑀢𑁆𑀢𑀺 𑀫𑀺𑀘𑁆𑀙𑀸 𑀧𑀝𑀺𑀧𑀢𑁆𑀢𑀺𑀢𑁄 𑀤𑀼𑀯𑀺𑀥𑀸 𑀢𑀣𑀸 𑀲𑀲𑀗𑁆𑀔𑀸 𑀭𑀸𑀲𑀗𑁆𑀔𑀸𑀭𑀢𑁄𑀢𑀺 𑀯𑀼𑀢𑁆𑀢𑁄. ‘‘𑀢𑀺𑀯𑀺𑀥𑀪𑀸𑀯𑁄𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂𑀲𑀗𑁆𑀔𑀸𑀭𑀯𑀺𑀫𑀼𑀢𑁆𑀢𑀸𑀬 𑀅𑀯𑀺𑀚𑁆𑀚𑀸𑀬 𑀲𑀤𑁆𑀥𑀺𑀁 𑀢𑀺𑀯𑀺𑀥𑀪𑀸𑀯𑁄𑀯. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀲𑀗𑁆𑀔𑁂𑀧𑀢𑁄𑀯𑀯𑀼𑀢𑁆𑀢𑀁 𑀢𑀲𑁆𑀲𑀅𑀲𑀦𑁆𑀦𑀺𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑀓𑀸𑀮𑁂𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑁨𑁯. ‘‘𑀲𑀩𑁆𑀩𑀣𑀸𑀧𑀻’’𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸 𑀳𑁄𑀢𑀼 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑁄 𑀯𑀸, 𑀯𑀺𑀲𑀼𑀁 𑀦𑀺𑀧𑀸𑀢𑁄𑀯𑀸𑀢𑀺 𑀏𑀯𑀁 𑀲𑀩𑁆𑀩𑀧𑁆𑀧𑀓𑀸𑀭𑀢𑁄𑀧𑀺. 𑀅𑀓𑀼𑀲𑀮𑀧𑀤𑁂 𑀅𑀓𑀸𑀭𑁄 𑀯𑀺𑀭𑀼𑀤𑁆𑀥𑀢𑁆𑀣𑁄. 𑀬𑀣𑀸 𑀅𑀫𑀺𑀢𑁆𑀢𑁄, 𑀅𑀲𑀼𑀭𑁄, 𑀢𑀺𑀤𑀲𑁆𑀲𑁂𑀢𑀼𑀁 ‘‘𑀅𑀓𑀼𑀲𑀮𑀸𑀦𑀻’’𑀢𑀺𑀆𑀤𑀺𑀫𑀸𑀳. ‘‘𑀧𑀝𑀺𑀯𑀺𑀭𑀼𑀤𑁆𑀥𑀪𑀸𑀯𑁄’’𑀢𑀺 𑀫𑁄𑀳𑀸𑀤𑀻𑀳𑀺 𑀅𑀓𑀼𑀲𑀮𑁂𑀳𑀺 𑀯𑀺𑀭𑀼𑀤𑁆𑀥𑀪𑀸𑀯𑁄. 𑀪𑀸𑀯𑀦𑀁𑀦𑀸𑀭𑀳𑀦𑁆𑀢𑀻𑀢𑀺 ‘‘𑀅𑀪𑀸𑀯𑀦𑀸𑀭𑀳𑀸’’. 𑀓𑀣𑀁 𑀧𑀦 𑀪𑀸𑀯𑀦𑀁𑀦𑀸𑀭𑀳𑀦𑁆𑀢𑀻𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺𑀁. ‘‘𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀸𑀧𑀻’’𑀢𑀺 𑀧𑀜𑁆𑀘𑀸𑀦𑀦𑁆𑀢𑀭𑀺𑀬 𑀓𑀫𑁆𑀫𑀪𑀸𑀯𑁂𑀦 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑁂𑀦 𑀘 𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀸𑀧𑀺. 𑀅𑀧𑀸𑀬𑀁 𑀪𑀚𑀦𑁆𑀢𑀻𑀢𑀺 𑀅𑀧𑀸𑀬𑀪𑀸𑀕𑀺𑀦𑁄. 𑀓𑀫𑁆𑀫𑀓𑀸𑀭𑀓𑀸. 𑀢𑁂𑀲𑀁 𑀪𑀸𑀯𑁄. 𑀢𑀸𑀬. ‘‘𑀯𑀝𑁆𑀝𑀲𑁄𑀢𑀦𑀺𑀬𑀢𑁂’’𑀢𑀺 𑀲𑀁𑀲𑀸𑀭𑀯𑀝𑁆𑀝 𑀲𑁄𑀢𑀲𑁆𑀫𑀺𑀁 𑀦𑀺𑀬𑀢𑁂. ‘‘𑀣𑀺𑀭𑀢𑀭𑀧𑀢𑁆𑀢𑀸’’𑀢𑀺 𑀲𑀫𑀸𑀥𑀺𑀯𑀲𑁂𑀦 𑀣𑀺𑀭𑀢𑀭𑀪𑀸𑀯𑀁 𑀧𑀢𑁆𑀢𑀸. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀧𑀓𑀸𑀭𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀺𑀬𑀼’’𑀦𑁆𑀢𑀺 𑀧𑀤𑀁 𑀥𑀸𑀢𑀼𑀧𑀘𑁆𑀘𑀬𑁂𑀳𑀺 𑀲𑀺𑀤𑁆𑀥𑀁 𑀦𑀺𑀧𑁆𑀨𑀦𑁆𑀦𑀧𑀤𑀁 𑀦𑀸𑀫 𑀦𑀳𑁄𑀢𑀺. 𑀓𑀲𑁆𑀫𑀸, 𑀇𑀥𑀧𑀭𑀺𑀓𑀧𑁆𑀧𑀢𑁆𑀣𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀺𑀧𑀸𑀢𑀧𑀤𑀁 𑀳𑁄𑀢𑀺. 𑀓𑀲𑁆𑀫𑀸, 𑀅𑀦𑁂𑀓𑀢𑁆𑀣𑀢𑀸 𑀲𑀫𑁆𑀪𑀯𑀢𑁄. 𑀇𑀥 𑀧𑀦 𑀪𑀯𑀦𑁆𑀢𑀺 𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀧𑀸𑀢𑀧𑀤𑀁 𑀇𑀥 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀅𑀓𑀼𑀲𑀮𑀯𑀡𑁆𑀡𑀦𑀸.

𑁩𑁦. 𑀅𑀳𑁂𑀢𑀼𑀓𑀘𑀺𑀢𑁆𑀢𑁂. ‘‘𑀲𑀩𑁆𑀩𑀦𑀺𑀳𑀻𑀦’’𑀦𑁆𑀢𑀺 𑀲𑀩𑁆𑀩𑀘𑀺𑀢𑁆𑀢𑁂𑀳𑀺 𑀳𑀻𑀦𑀁. 𑀧𑀼𑀦 ‘‘𑀲𑀩𑁆𑀩𑀦𑀺𑀳𑀻𑀦’’𑀦𑁆𑀢𑀺 𑀲𑀩𑁆𑀩𑀸𑀳𑁂𑀢𑀼𑀓𑁂𑀳𑀺 𑀳𑀻𑀦𑀁. ‘‘𑀢’’𑀦𑁆𑀢𑀺 𑀅𑀓𑀼𑀲𑀮 𑀯𑀺𑀧𑀸𑀓𑀁.

𑁩𑁧. 𑀲𑀼𑀢𑁆𑀢𑀧𑀸𑀴𑀺𑀬𑀁, ‘‘𑀓𑀝𑁆𑀞’’𑀦𑁆𑀢𑀺 𑀲𑀼𑀓𑁆𑀔𑀤𑀸𑀭𑀼𑀁. ‘‘𑀲𑀓𑀮𑀺𑀓’’𑀦𑁆𑀢𑀺 𑀙𑀺𑀦𑁆𑀤𑀺𑀢𑀨𑀸𑀮𑀺𑀢𑀁 𑀓𑀝𑁆𑀞𑀓𑁆𑀔𑀡𑁆𑀟𑀓𑀁. ‘‘𑀣𑀼𑀲’’𑀦𑁆𑀢𑀺 𑀯𑀻𑀳𑀺𑀲𑀼𑀗𑁆𑀓𑀁. ‘‘𑀲𑀗𑁆𑀓𑀸𑀭’’𑀦𑁆𑀢𑀺 𑀓𑀘𑀯𑀭𑀁. 𑀘𑀓𑁆𑀔𑀼𑀜𑁆𑀘𑀭𑀽𑀧𑁂 𑀘 𑀧𑀝𑀺𑀘𑁆𑀘 𑀬𑀁𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 ‘‘𑀭𑀽𑀧𑁂’’𑀢𑀺 𑀭𑀽𑀧𑀸𑀭𑀫𑁆𑀫𑀡𑀸𑀦. ‘‘𑀲𑀤𑁆𑀤𑁂’’𑀢𑀺𑀆𑀤𑀻𑀲𑀼𑀧𑀺 𑀏𑀲𑀦𑀬𑁄. 𑀏𑀢𑁆𑀣 𑀘 𑀯𑀺𑀜𑁆𑀜𑀸𑀡𑀸𑀦𑀺 𑀏𑀓𑀯𑀢𑁆𑀣𑀼 𑀦𑀺𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀯𑀢𑁆𑀣𑀼 𑀤𑁆𑀯𑀸𑀭𑁂𑀲𑀼 𑀏𑀓𑀯𑀘𑀦𑀁 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀸𑀦𑀺 𑀧𑀦 𑀏𑀓𑀯𑀺𑀜𑁆𑀜𑀸𑀡𑁂𑀦𑀸𑀧𑀺 𑀩𑀳𑀽𑀦𑀺 𑀕𑀳𑀺𑀢𑀸𑀦𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑁂𑀲𑀼 𑀩𑀳𑀼𑀯𑀘𑀦𑀁. ‘‘𑀤𑀼𑀓𑁆𑀔𑀬𑀢𑀻’’𑀢𑀺 𑀤𑀼𑀓𑁆𑀔𑀁 𑀓𑀭𑁄𑀢𑀺. 𑀦𑀸𑀫𑀥𑀸𑀢𑀼 𑀧𑀤𑀜𑁆𑀳𑁂𑀢𑀁. 𑀬𑀣𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀯𑀻𑀡𑁂𑀢𑀻𑀢𑀺 𑀲𑀤𑁆𑀤𑀯𑀺𑀤𑀽. 𑀥𑀸𑀢𑀼𑀧𑀸𑀞𑁂𑀲𑀼 𑀧𑀦 𑀲𑀼𑀔𑀤𑀼𑀓𑁆𑀔𑀢𑀓𑁆𑀓𑀺𑀭𑀺𑀬𑀸𑀬𑀁𑀢𑀺 𑀯𑀼𑀢𑁆𑀢𑀁. 𑀢𑀓𑁆𑀓𑀺𑀭𑀺𑀬𑀸𑀢𑀺 𑀘 𑀲𑀼𑀔𑀓𑀺𑀭𑀺𑀬𑀸 𑀤𑀼𑀓𑁆𑀔 𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀸𑀢𑀓𑀺𑀭𑀺𑀬𑀸 𑀅𑀲𑁆𑀲𑀸𑀢𑀓𑀺𑀭𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘 𑀲𑀤𑁆𑀤𑁄 𑀑𑀓𑀸𑀲𑀢𑁆𑀣𑁄𑀢𑀺 𑀓𑀢𑁆𑀯𑀸 ‘‘𑀤𑀼𑀓𑁆𑀓𑀭𑀁 𑀑𑀓𑀸𑀲𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁩𑁨. ‘‘𑀘𑀓𑁆𑀔𑀼𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀢𑀸’’𑀢𑀺 𑀘𑀓𑁆𑀔𑀼𑀧𑀲𑀸𑀤𑀭𑀽𑀧𑀲𑁆𑀲 𑀅𑀪𑀺𑀦𑁆𑀦𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀪𑀺𑀦𑁆𑀦𑁂𑀲𑀢𑀺 𑀅𑀦𑁆𑀥𑀲𑁆𑀲 𑀘𑀓𑁆𑀔𑀼𑀲𑁆𑀲 𑀭𑀽𑀧𑀸𑀦𑀺𑀦𑀼𑀧𑀝𑁆𑀞𑀳𑀦𑁆𑀢𑀻𑀢𑀺. ‘‘𑀲𑁄𑀢𑀲𑁆𑀲𑀅𑀲𑀫𑁆𑀪𑀺𑀦𑁆𑀦𑀢𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑀦𑀬𑁄. ‘‘𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄’’𑀢𑀺 𑀘𑀓𑁆𑀔𑀼 𑀘 𑀆𑀮𑁄𑀓𑁂𑀲𑀢𑀺 𑀓𑀺𑀘𑁆𑀘𑀓𑀸𑀭𑀻 𑀳𑁄𑀢𑀺. 𑀅𑀲𑀢𑀺 𑀦𑀳𑁄𑀢𑀺. 𑀢𑀣𑀸 𑀭𑀽𑀧𑀜𑁆𑀘. 𑀢𑀲𑁆𑀫𑀸 𑀆𑀮𑁄𑀓𑁄 𑀢𑁂𑀲𑀁 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀽𑀧𑀕𑀫𑀦𑁂 𑀲𑀦𑁆𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀲𑁆𑀲 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀧𑀝𑀺𑀮𑀸𑀪𑁄. 𑀏𑀲𑀦𑀬𑁄 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀬𑀸𑀤𑀻𑀲𑀼. 𑀇𑀫𑁂𑀲𑀁 𑀅𑀗𑁆𑀕𑀸𑀦𑀁 𑀬𑀼𑀢𑁆𑀢𑀺 𑀤𑀻𑀧𑀦𑀸 𑀉𑀧𑀭𑀺𑀭𑀽𑀧𑀲𑀗𑁆𑀕𑀳𑁂 𑀆𑀕𑀫𑀺𑀲𑁆𑀲𑀢𑀺. ‘‘𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁. 𑀢𑀢𑁆𑀣 ‘‘𑀢𑀲𑁆𑀫𑀺𑀁 𑀧𑀦 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑁂𑀧𑀺 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑁂 𑀅𑀲𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀢𑀁 𑀯𑀺𑀦𑀸 𑀆𑀮𑁄𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀪𑀸𑀯𑀤𑀲𑁆𑀲𑀦 𑀧𑀭’’𑀦𑁆𑀢𑀺 𑀅𑀪𑀸𑀯𑀤𑀲𑁆𑀲𑀦𑀧𑁆𑀧𑀥𑀸𑀦𑀁.

𑁩𑁩. 𑀯𑀺𑀧𑀸𑀓𑀯𑀘𑀦𑀢𑁆𑀣𑁂. 𑀯𑀺𑀧𑀘𑁆𑀘𑀢𑀻𑀢𑀺 𑀯𑀺𑀧𑀸𑀓𑀁. 𑀯𑀺𑀧𑀘𑁆𑀘𑀢𑀻𑀢𑀺 𑀘 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀢𑀤𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀅𑀬𑀜𑁆𑀘 𑀅𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀆𑀬𑀽𑀳𑀦 𑀲𑀫𑀗𑁆𑀕𑀺𑀢𑀸𑀧𑀺 𑀆𑀕𑀢𑀸. 𑀇𑀥 𑀧𑀦𑀲𑀸 𑀘𑁂𑀢𑀦𑀸 𑀲𑀫𑀗𑁆𑀕𑀺𑀢𑀸𑀬 𑀲𑀗𑁆𑀕𑀳𑀺𑀢𑀸𑀢𑀺 𑀓𑀢𑁆𑀯𑀸 ‘‘𑀘𑀢𑀲𑁆𑀲𑁄 𑀲𑀫𑀗𑁆𑀕𑀺𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀫𑀗𑁆𑀕𑀺𑀢𑀸𑀢𑀺 𑀘 𑀲𑀫𑁆𑀧𑀦𑁆𑀦𑀢𑀸. ‘‘𑀢𑀁 𑀢𑀁 𑀓𑀫𑁆𑀫𑀸𑀬𑀽𑀳𑀦 𑀓𑀸𑀮𑁂’’𑀢𑀺 𑀧𑀸𑀡𑀸𑀢𑀺 𑀧𑀸𑀢𑀸𑀤𑀺𑀓𑀲𑁆𑀲 𑀢𑀩𑁆𑀩𑀺𑀭𑀫𑀡𑀸𑀤𑀺𑀓𑀲𑁆𑀲 𑀘 𑀢𑀲𑁆𑀲 𑀢𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀓𑀫𑁆𑀫𑀲𑁆𑀲 𑀆𑀬𑀽𑀳𑀦𑀓𑀸𑀮𑁂. 𑀲𑀫𑀼𑀘𑁆𑀘𑀺𑀦𑀦𑀓𑀸𑀮𑁂𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑀲𑁄 𑀅𑀪𑀸𑀯𑀁 𑀧𑀢𑁆𑀯𑀸𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀬𑀣𑀸 𑀅𑀩𑁆𑀬𑀸𑀓𑀢 𑀥𑀫𑁆𑀫𑀸𑀦𑀺𑀭𑀼𑀚𑁆𑀛𑀫𑀸𑀦𑀸 𑀲𑀩𑁆𑀩𑀲𑁄 𑀅𑀪𑀸𑀯𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀣𑀸 𑀦𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀩𑁆𑀩𑀸𑀓𑀸𑀭 𑀧𑀭𑀺𑀧𑀽𑀭’’𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀸𑀦𑀼 𑀭𑀽𑀧𑀸𑀩𑀳𑀽𑀓𑀸𑀬 𑀯𑀘𑀻𑀫𑀦𑁄 𑀯𑀺𑀓𑀸𑀭𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀏𑀲𑀦𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼. 𑀏𑀯𑀭𑀽𑀧𑁂𑀳𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭 𑀯𑀺𑀓𑀸𑀭𑁂𑀳𑀺 𑀧𑀭𑀺𑀧𑀽𑀭𑀁. ‘‘𑀦𑀺𑀤𑀳𑀺𑀢𑁆𑀯𑀸 𑀯𑀸’’𑀢𑀺 𑀲𑀡𑁆𑀞𑀧𑁂𑀢𑁆𑀯𑀸 𑀏𑀯. ‘‘𑀬𑀁𑀲𑀦𑁆𑀥𑀸𑀬𑀸’’𑀢𑀺 𑀬𑀁𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀺𑀥𑀸𑀦𑀁 𑀲𑀦𑁆𑀥𑀸𑀬.

𑀕𑀸𑀣𑀸𑀬𑀁. ‘‘𑀲𑀚𑁆𑀚𑀽’’𑀢𑀺 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂. ‘‘𑀔𑀻𑀭𑀁 𑀯𑀫𑀼𑀘𑁆𑀘𑀢𑀻’’𑀢𑀺 𑀬𑀣𑀸 𑀔𑀻𑀭𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀫𑀼𑀘𑁆𑀘𑀢𑀺. 𑀧𑀓𑀢𑀺𑀁 𑀚𑀳𑀢𑀺. 𑀯𑀺𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺. 𑀦 𑀢𑀣𑀸 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀦𑁆𑀢𑀺 𑀬𑁄𑀚𑀦𑀸. 𑀓𑀣𑀁 𑀧𑀦 𑀳𑁄𑀢𑀻𑀢𑀺 𑀆𑀳 ‘‘𑀤𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀻’’𑀢𑀺. ‘‘𑀪𑀲𑁆𑀫𑀸𑀙𑀦𑁆𑀦𑁄𑀯𑀧𑀸𑀯𑀓𑁄’’𑀢𑀺 𑀙𑀸𑀭𑀺𑀓𑀸 𑀙𑀦𑁆𑀦𑁄𑀯𑀺𑀬 𑀅𑀕𑁆𑀕𑀺. ‘‘𑀲𑁄 𑀧𑀦𑀸’’𑀢𑀺 𑀓𑀺𑀭𑀺𑀬𑀸 𑀯𑀺𑀲𑁂𑀲𑁄 𑀧𑀦. ‘‘𑀯𑀺𑀲𑀼𑀁 𑀏𑀓𑁄 𑀧𑀭𑀫𑀢𑁆𑀣 𑀥𑀫𑁆𑀫𑁄𑀢𑀺𑀧𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺 𑀯𑀺𑀲𑀼𑀁 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫 𑀪𑀸𑀯𑁂𑀦 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀳𑀺 𑀓𑀫𑁆𑀫𑀧𑀘𑁆𑀘𑀬𑀥𑀫𑁆𑀫𑀢𑁆𑀢𑀸 𑀧𑀭𑀫𑀢𑁆𑀣 𑀥𑀫𑁆𑀫𑁄 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀅𑀦𑀼𑀲𑀬𑀥𑀸𑀢𑀼𑀬𑁄 𑀯𑀺𑀬𑀸’’𑀢𑀺. ‘‘𑀲𑁄’’𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁄. ‘‘𑀢’’𑀦𑁆𑀢𑀺 𑀓𑀫𑁆𑀫𑀁 𑀯𑀸, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸. ‘‘𑀢𑀤𑀸 𑀑𑀓𑀸𑀲𑀁 𑀮𑀪𑀢𑀻’’𑀢𑀺 𑀯𑀺𑀧𑀘𑁆𑀘𑀦𑀢𑁆𑀣𑀸𑀬 𑀑𑀓𑀸𑀲𑀁 𑀮𑀪𑀢𑀺. 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀢𑁆𑀣𑀸’’𑀢𑀺 𑀢𑀸𑀲𑀼 𑀘 𑀢𑀽𑀲𑀼𑀲𑀫𑀗𑁆𑀕𑀺𑀢𑀸𑀲𑀼. ‘‘𑀇𑀢𑀻’’𑀢𑀺 𑀮𑀤𑁆𑀥𑀕𑀼𑀡𑀯𑀘𑀦𑀁. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀺 𑀧𑀼𑀦 𑀮𑀤𑁆𑀥𑀕𑀼𑀡𑀯𑀘𑀦𑀁. ‘‘𑀧𑀸𑀴𑀺𑀬’’𑀦𑁆𑀢𑀺 𑀥𑀫𑁆𑀫𑀲𑀗𑁆𑀕𑀡𑀺 𑀧𑀸𑀴𑀺𑀬𑀁. ‘‘𑀓𑀫𑁆𑀫𑀲𑀦𑁆𑀢𑀸𑀦𑀢𑁄’’𑀢𑀺 𑀅𑀭𑀽𑀧𑀲𑀦𑁆𑀢𑀸𑀦𑀁 𑀏𑀯 𑀯𑀼𑀘𑁆𑀘𑀢𑀺. ‘‘𑀬𑁂 𑀧𑀦𑀸’’𑀢𑀺 𑀕𑀦𑁆𑀣𑀓𑀸𑀭𑀸 𑀧𑀦. ‘‘𑀢𑁂𑀲’’𑀦𑁆𑀢𑀺 𑀕𑀦𑁆𑀣𑀓𑀸𑀭𑀸𑀦𑀁. 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀯𑀸𑀤𑁂𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀬𑀜𑁆𑀘𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀣𑀸’’𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂. 𑀦 𑀘 𑀦 𑀮𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀤𑀸’’𑀢𑀺 𑀢𑀲𑁆𑀫𑀺𑀁 𑀧𑀭𑀺𑀡𑀢𑀓𑀸𑀮𑁂. ‘‘𑀦𑀸𑀴’’𑀦𑁆𑀢𑀺 𑀧𑀼𑀧𑁆𑀨𑀨𑀮𑀸𑀦𑀁 𑀤𑀡𑁆𑀟𑀓𑀁.

𑁩𑁪. ‘‘𑀲𑀫𑁆𑀪𑀯𑁄’’𑀢𑀺 𑀧𑀲𑀗𑁆𑀕𑀓𑀸𑀭𑀡𑀁. 𑀅𑀪𑀺𑀯𑀺𑀲𑁂𑀲𑁂𑀦 𑀘𑀭𑀡𑀁 𑀧𑀯𑀢𑁆𑀢𑀦𑀁 𑀅𑀪𑀺𑀘𑀸𑀭𑁄. 𑀯𑀺𑀲𑁂𑀲 𑀯𑀼𑀢𑁆𑀢𑀺. 𑀦 𑀅𑀪𑀺𑀘𑀸𑀭𑁄 𑀩𑁆𑀬𑀪𑀺𑀘𑀸𑀭𑁄. 𑀲𑀸𑀫𑀜𑁆𑀜 𑀯𑀼𑀢𑁆𑀢𑀺. 𑀧𑀓𑁆𑀔𑀦𑁆𑀢𑀭𑁂𑀦 𑀲𑀸𑀥𑀸𑀭𑀡𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑁆𑀔𑀦𑁆𑀢𑀭𑁂𑀦 𑀲𑀸𑀥𑀸𑀭𑀡𑀢𑀸 𑀦𑀸𑀫𑀧𑀓𑁆𑀔𑀦𑁆𑀢𑀭𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀚𑁆𑀚𑀦𑀫𑁂𑀯 𑀮𑀕𑁆𑀕𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀩𑁆𑀬𑀪𑀺𑀘𑀸𑀭𑀲𑁆𑀲𑀸𑀢𑀺 𑀧𑀲𑀗𑁆𑀕𑀲𑁆𑀲 𑀇𑀘𑁆𑀘𑁂𑀯𑀢𑁆𑀣𑁄𑀢𑀺. 𑀏𑀢𑁆𑀣𑀘𑀸𑀢𑀺𑀆𑀤𑀺𑀦𑀸 𑀲𑀫𑁆𑀪𑀯𑀩𑁆𑀬𑀪𑀺𑀘𑀸𑀭𑀸𑀦𑀁 𑀅𑀪𑀸𑀯𑀫𑁂𑀯 𑀯𑀤𑀢𑀺. 𑀅𑀓𑀼𑀲𑀮𑀳𑁂𑀢𑀽𑀳𑀺 𑀘 𑀲𑀳𑁂𑀢𑀼𑀓𑀢𑀸 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀲’’𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁. ‘‘𑀅𑀩𑁆𑀬𑀪𑀺𑀘𑀸𑀭𑁄𑀬𑁂𑀯𑀸’’𑀢𑀺 𑀩𑁆𑀬𑀪𑀺𑀘𑀸𑀭𑀭𑀳𑀺𑀢𑁄𑀬𑁂𑀯.

𑁩𑁫. ‘‘𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀯𑀺𑀓𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺𑀁. 𑀏𑀲𑀦𑀬𑁄 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀧𑀺.

𑀬𑀤𑀺 𑀳𑀺 𑀅𑀬𑀫𑀢𑁆𑀣𑁄𑀲𑀺𑀬𑀸, 𑀏𑀯𑀜𑁆𑀘𑀲𑀢𑀺, 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑁂𑀲’’𑀦𑁆𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀁. 𑀉𑀧𑁆𑀧𑀸𑀤𑀲𑀤𑁆𑀤𑁄𑀦𑀺𑀬𑀢𑀧𑀼𑀮𑁆𑀮𑀺𑀗𑁆𑀕𑁄𑀢𑀺 𑀓𑀢𑁆𑀯𑀸 ‘‘𑀝𑀻𑀓𑀸𑀲𑀼 𑀧𑀦…𑀧𑁂… 𑀦𑀺𑀤𑁆𑀤𑀺𑀝𑁆𑀞𑀁’’ 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁. ‘‘𑀯𑀼𑀢𑁆𑀢𑀦𑀬𑁂𑀦𑀸’’𑀢𑀺 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀯𑀺𑀭𑀳𑀢𑁄𑀢𑀺 𑀯𑀼𑀢𑁆𑀢𑀦𑀬𑁂𑀦. 𑀯𑀺𑀧𑀘𑁆𑀘𑀦 𑀓𑀺𑀘𑁆𑀘𑀁 𑀦𑀸𑀫 𑀯𑀺𑀧𑀸𑀓𑀸𑀦𑀁 𑀓𑀺𑀘𑁆𑀘𑀁. 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀓𑀺𑀘𑁆𑀘𑀁 𑀦𑀸𑀫 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀓𑀺𑀘𑁆𑀘𑀁. ‘‘𑀢𑀁 𑀢𑀁 𑀓𑀺𑀭𑀺𑀬𑀸𑀫𑀢𑁆𑀢𑀪𑀽𑀢𑀸𑀦𑀻’’𑀢𑀺 𑀆𑀯𑀚𑁆𑀚𑀦 𑀓𑀺𑀭𑀺𑀬𑀸 𑀳𑀲𑀦𑀓𑀺𑀭𑀺𑀬𑀸𑀫𑀢𑁆𑀢𑀪𑀽𑀢𑀸𑀦𑀺. 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀘𑀺𑀢𑁆𑀢𑀸𑀦𑀺 𑀦𑀸𑀫 𑀓𑁂𑀯𑀮𑀁 𑀓𑀫𑁆𑀫𑀯𑁂𑀕𑀼𑀓𑁆𑀔𑀺𑀢𑁆𑀢𑀪𑀸𑀯𑁂𑀦𑀲𑀦𑁆𑀢𑀸𑀦𑁂𑀧𑀢𑀺𑀢𑀫𑀢𑁆𑀢𑀢𑁆𑀢𑀸 𑀤𑀼𑀩𑁆𑀩𑀮 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺 𑀘 𑀅𑀲𑀸𑀭𑀸𑀦𑀁 𑀅𑀩𑀮𑀸𑀦𑀁 𑀧𑀲𑀸𑀤𑀯𑀢𑁆𑀣𑀽𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀸𑀦𑀺 𑀳𑁄𑀦𑁆𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀼𑀩𑀦𑁆𑀥 𑀫𑀢𑁆𑀢𑀢𑁆𑀢𑀸 𑀤𑀼𑀩𑁆𑀩𑀮 𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑁂𑀦𑀯𑀺𑀦𑀸 𑀓𑁂𑀯𑀮𑀁 𑀯𑀺𑀧𑀘𑁆𑀘𑀦𑀫𑀢𑁆𑀢𑁂𑀦 𑀧𑀯𑀢𑁆𑀢𑀦𑁆𑀢𑀺. ‘‘𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄’’𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀪𑀯𑀗𑁆𑀕𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄 𑀮𑀤𑁆𑀥𑀧𑀘𑁆𑀘𑀬𑀁 𑀳𑁄𑀢𑀺. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀺 𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄 𑀮𑀤𑁆𑀥𑀧𑀘𑁆𑀘𑀬𑀁. ‘‘𑀇𑀢𑀭𑀸𑀦𑀺 𑀧𑀦𑀸’’𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀤𑀻𑀦𑀺. ‘‘𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑁂’’𑀢𑀺 𑀅𑀦𑀼𑀲𑀬𑀭𑀳𑀺𑀢𑁂 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁂. ‘‘𑀉𑀲𑁆𑀲𑀸𑀳𑀭𑀳𑀺𑀢𑀸𑀦𑀺 𑀏𑀯𑀸’’𑀢𑀺 𑀬𑀣𑀸 𑀭𑀼𑀓𑁆𑀔𑀸𑀦𑀁 𑀯𑀸𑀢𑀧𑀼𑀧𑁆𑀨𑀸𑀦𑀺 𑀦𑀸𑀫 𑀅𑀢𑁆𑀣𑀺. 𑀢𑀸𑀦𑀺 𑀨𑀮𑀼𑀧𑁆𑀧𑀸𑀤𑀓𑀲𑀺𑀦𑁂𑀳𑀭𑀳𑀺𑀢𑀢𑁆𑀢𑀸 𑀨𑀮𑀸𑀦𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀣𑀸 𑀢𑀸𑀦𑀺 𑀘 𑀯𑀺𑀧𑀸𑀓𑀼𑀧𑁆𑀧𑀸𑀤𑀓𑀢𑀡𑁆𑀳𑀸𑀲𑀺𑀦𑁂𑀳𑀭𑀳𑀺𑀢𑀢𑁆𑀢𑀸 𑀉𑀲𑁆𑀲𑀸𑀳𑀩𑁆𑀬𑀸𑀧𑀸𑀭 𑀭𑀳𑀺𑀢𑀸𑀦𑀺 𑀏𑀯.

𑁩𑁬. 𑀯𑁂𑀤𑀦𑀸𑀯𑀺𑀘𑀸𑀭𑀡𑀸𑀬𑀁. ‘‘𑀧𑀺𑀘𑀼𑀧𑀺𑀡𑁆𑀟𑀓𑀸𑀦𑀁 𑀯𑀺𑀬𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀸𑀲𑀧𑀺𑀘𑀼𑀧𑀺𑀡𑁆𑀟𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀁 𑀯𑀺𑀬 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀁 𑀤𑀼𑀩𑁆𑀩𑀮𑀫𑁂𑀯𑀸𑀢𑀺 𑀬𑁄𑀚𑀦𑀸. ‘‘𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀸𑀦’’𑀦𑁆𑀢𑀺 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁. ‘‘𑀓𑀸𑀬𑀦𑀺𑀲𑁆𑀲𑀬𑀪𑀽𑀢𑁂𑀲𑀽’’𑀢𑀺 𑀓𑀸𑀬𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑁂𑀲𑀼.‘‘𑀢𑁂𑀳𑀻’’𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀳𑀺. ‘‘𑀧𑀼𑀭𑀺𑀫𑀘𑀺𑀢𑁆𑀢𑁂𑀦𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀢𑁄. ‘‘𑀢’’𑀦𑁆𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀻𑀭𑀡𑀁. 𑀧𑀝𑀺𑀖𑁂𑀦 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀢𑀺. 𑀓𑀲𑁆𑀫𑀸 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀏𑀓𑀦𑁆𑀢𑀸𑀓𑀼𑀲𑀮𑀪𑀽𑀢𑁂𑀦𑀸’’𑀢𑀺𑀆𑀤𑀺𑀁. ‘‘𑀅𑀩𑁆𑀬𑀸𑀓𑀢𑁂𑀲𑀼 𑀅𑀲𑀫𑁆𑀪𑀯𑀢𑁄’’𑀢𑀺 𑀅𑀩𑁆𑀬𑀸𑀓𑀢 𑀘𑀺𑀢𑁆𑀢𑁂𑀲𑀼 𑀬𑀼𑀚𑁆𑀚𑀺𑀢𑀼𑀁 𑀅𑀲𑀫𑁆𑀪𑀯𑀢𑁄. 𑀓𑀫𑁆𑀫𑀸𑀦𑀼𑀪𑀸𑀯𑀢𑁄 𑀘 𑀫𑀼𑀜𑁆𑀘𑀺𑀢𑁆𑀯𑀸 𑀬𑀣𑀸𑀧𑀼𑀭𑀺𑀫𑀁 𑀯𑀺𑀧𑀸𑀓𑀲𑀦𑁆𑀢𑀸𑀦𑀁 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀯𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑁂𑀦𑀘𑀻’’𑀢𑀺 𑀓𑁂𑀦𑀘𑀺 𑀘𑀺𑀢𑁆𑀢𑁂𑀦. ‘‘𑀯𑀺𑀲𑀤𑀺𑀲𑀘𑀺𑀢𑁆𑀢𑀲𑀦𑁆𑀢𑀸𑀦 𑀧𑀭𑀸𑀯𑀝𑁆𑀝𑀦𑀯𑀲𑁂𑀦𑀸’’𑀢𑀺 𑀧𑀼𑀭𑀺𑀫𑁂𑀦𑀯𑀺𑀧𑀸𑀓 𑀘𑀺𑀢𑁆𑀢 𑀲𑀦𑁆𑀢𑀸𑀦𑁂𑀦 𑀯𑀺𑀲𑀤𑀺𑀲𑀁 𑀓𑀼𑀲𑀮𑀸𑀤𑀺 𑀚𑀯𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀭𑀢𑁄 𑀆𑀯𑀝𑁆𑀝𑀸 𑀧𑀦 𑀯𑀲𑁂𑀦. 𑀢𑀣𑀸𑀳𑀺𑀤𑀁 𑀘𑀺𑀢𑁆𑀢𑀤𑁆𑀯𑀬𑀁 𑀧𑀸𑀴𑀺𑀬𑀁 𑀆𑀯𑀝𑁆𑀝𑀦𑀸, 𑀅𑀦𑁆𑀯𑀸𑀯𑀝𑁆𑀝𑀦𑀸, 𑀆𑀪𑁄𑀕𑁄, 𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. ‘‘𑀲𑀩𑁆𑀩𑀢𑁆𑀣𑀸𑀧𑀻’’𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂𑀧𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀧𑀺. ‘‘𑀅𑀢𑁆𑀢𑀦𑁄 𑀧𑀘𑁆𑀙𑀸 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦𑀸’’𑀢𑀺 𑀅𑀢𑁆𑀢𑀦𑁄 𑀧𑀘𑁆𑀙𑀸 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀧𑀝𑀺𑀘𑁆𑀘 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀏𑀯 𑀲𑁄 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀲𑀼 𑀩𑀮𑀯𑀦𑁆𑀢𑁂𑀲𑀼 𑀲𑀢𑀺, 𑀩𑀮𑀯𑀸 𑀳𑁄𑀢𑀺. 𑀤𑀼𑀩𑁆𑀩𑀮𑁂𑀲𑀼 𑀲𑀢𑀺, 𑀤𑀼𑀩𑁆𑀩𑀮𑁄 𑀳𑁄𑀢𑀻𑀢𑀺 𑀲𑀓𑁆𑀓𑀸𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑀺𑀲𑀤𑀺𑀲 𑀘𑀺𑀢𑁆𑀢𑀲𑀦𑁆𑀢𑀸𑀦’’𑀦𑁆𑀢𑀺 𑀯𑁄𑀝𑁆𑀞𑀩𑁆𑀩𑀦𑀓𑀺𑀭𑀺𑀬𑀘𑀺𑀢𑁆𑀢𑀲𑀦𑁆𑀢𑀸𑀦𑀁.

𑁩𑁭. 𑀲𑀗𑁆𑀔𑀸𑀭 𑀯𑀺𑀘𑀸𑀭𑀡𑀸𑀬𑀁 ‘‘𑀯𑀺𑀧𑀸𑀓𑀼𑀤𑁆𑀥𑀸𑀭𑁂’’𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀺𑀧𑀸𑀓𑀼𑀤𑁆𑀥𑀸𑀭 𑀓𑀣𑀸𑀬𑀁. ‘‘𑀉𑀪𑀬𑀓𑀫𑁆𑀫𑁂𑀦𑀧𑀻’’𑀢𑀺 𑀲𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺, 𑀅𑀲𑀗𑁆𑀔𑀸𑀭𑀺𑀓 𑀓𑀫𑁆𑀫𑁂𑀦𑀧𑀺. ‘‘𑀣𑁂𑀭𑁂𑀦𑀸’’𑀢𑀺 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑁂𑀦. ‘‘𑀢𑀤𑀼𑀪𑀬𑀪𑀸𑀯𑀸𑀪𑀸𑀯𑁄’’𑀢𑀺 𑀲𑀲𑀗𑁆𑀔𑀸𑀭𑀺𑀓 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀸𑀦𑀁 𑀅𑀪𑀸𑀯𑁄. ‘‘𑀢𑀸𑀦𑀺𑀧𑀺 𑀳𑀺 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸𑀦𑀺𑀬𑁂𑀯𑀸’’𑀢𑀺 𑀏𑀢𑁆𑀣 𑀆𑀯𑀚𑁆𑀚𑀦 𑀤𑁆𑀯𑀬𑀁 𑀚𑀯𑀦𑀸𑀦𑀁 𑀧𑀼𑀭𑁂𑀘𑀸𑀭𑀺𑀓 𑀓𑀺𑀘𑁆𑀘𑀢𑁆𑀢𑀸 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀁 𑀳𑁄𑀢𑀼. 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁 𑀧𑀦 𑀚𑀯𑀦𑀓𑀺𑀘𑁆𑀘𑀢𑁆𑀢𑀸 𑀓𑀣𑀁 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀁 𑀪𑀯𑁂𑀬𑁆𑀬𑀸𑀢𑀺. 𑀢𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀼𑀘𑀸𑀭𑀺𑀓𑀫𑀢𑁆𑀢𑀢𑁆𑀢𑀸 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀁 𑀦𑀸𑀫 𑀳𑁄𑀢𑀻𑀢𑀺. ‘‘𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑁂𑀲𑀼 𑀯𑀺𑀬 𑀯𑀢𑁆𑀢𑀩𑁆𑀩𑁄’’𑀢𑀺 𑀫𑀳𑀸𑀯𑀺𑀧𑀸𑀓𑀸𑀦𑀁 𑀲𑀲𑀗𑁆𑀔𑀸𑀭𑀺𑀓𑀸 𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀧𑀼𑀭𑀺𑀫𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀆𑀭𑀫𑁆𑀫𑀡𑀸𑀦𑀁 𑀧𑀬𑁄𑀕𑁂𑀦 𑀲𑀳 𑀯𑀸 𑀯𑀺𑀦𑀸 𑀯𑀸 𑀉𑀧𑀝𑁆𑀞𑀸𑀦𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑁄, 𑀢𑀣𑀸 𑀯𑀢𑁆𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁮. ‘‘𑀤𑀼𑀩𑁆𑀩𑀮 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂𑀲𑀽’’𑀢𑀺 𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕 𑀘𑀼𑀢𑀺𑀓𑀺𑀘𑁆𑀘𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀤𑀼𑀩𑁆𑀩𑀮𑀯𑀢𑁆𑀣𑀼 𑀓𑀺𑀘𑁆𑀘𑀝𑁆𑀞𑀸𑀦𑁂𑀲𑀽’’𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼𑀓𑁂𑀲𑀼 𑀆𑀯𑀚𑁆𑀚𑀦𑀸𑀤𑀺 𑀤𑀼𑀩𑁆𑀩𑀮𑀓𑀺𑀘𑁆𑀘 𑀤𑀼𑀩𑁆𑀩𑀮𑀝𑁆𑀞𑀸𑀦𑀺𑀓𑁂𑀲𑀼. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺. 𑀢𑀢𑁆𑀣 ‘‘𑀯𑀺𑀓𑁆𑀔𑁂𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑁂𑀦 𑀉𑀤𑁆𑀥𑀘𑁆𑀘𑁂𑀦𑀬𑀼𑀢𑁆𑀢𑀁 𑀳𑀼𑀢𑁆𑀯𑀸. ‘‘𑀓𑀧𑁆𑀧𑀝𑁆𑀞𑀺𑀢𑀺𑀓𑀁’’ 𑀦𑀸𑀫 𑀲𑀗𑁆𑀖𑀪𑁂𑀤𑀓𑀫𑁆𑀫𑀁. 𑀙𑀲𑀼𑀯𑀢𑁆𑀣𑀼 𑀭𑀽𑀧𑁂𑀲𑀼 𑀳𑀤𑀬𑀯𑀢𑁆𑀣𑀼𑀫𑁂𑀯 𑀲𑀼𑀯𑀡𑁆𑀡𑀭𑀚𑀢𑀁 𑀯𑀺𑀬 𑀲𑀸𑀭𑀯𑀢𑁆𑀣𑀼 𑀳𑁄𑀢𑀺. 𑀇𑀢𑀭𑀸𑀦𑀺 𑀨𑀮𑀺𑀓𑀸𑀦𑀺𑀯𑀺𑀬 𑀧𑀲𑀸𑀤𑀫𑀢𑁆𑀢𑀢𑁆𑀢𑀸 𑀅𑀲𑀸𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀸𑀤𑀻𑀲𑀼 𑀤𑀼𑀩𑁆𑀩𑀮𑀯𑀢𑁆𑀣𑀽𑀲𑀽’’𑀢𑀺. 𑀤𑀲𑁆𑀲𑀦𑀸𑀤𑀻𑀦𑀺 𑀘 𑀓𑀺𑀘𑁆𑀘𑀸𑀦𑀺 𑀚𑀯𑀦 𑀓𑀺𑀘𑁆𑀘𑀲𑁆𑀲 𑀧𑀼𑀭𑁂𑀘𑀭𑀢𑁆𑀢𑀸 𑀔𑀼𑀤𑁆𑀤𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀲𑁆𑀲𑀦𑀸𑀤𑀻𑀲𑀽’’𑀢𑀺𑀆𑀤𑀺𑀁.

𑁩𑁯. 𑀇𑀥 𑀤𑀻𑀧𑀦𑀺𑀬𑀁 𑀇𑀘𑁆𑀘𑁂𑀯𑀦𑁆𑀢𑀺 𑀧𑀤𑀁 𑀅𑀝𑁆𑀞𑀸𑀭𑀲𑀸𑀢𑀺𑀧𑀤𑀲𑁆𑀲𑀯𑀺𑀲𑁂𑀲𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀲𑀩𑁆𑀩𑀣𑀸𑀧𑀻𑀢𑀺 𑀧𑀤𑀲𑁆𑀲…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀢𑀁 𑀲𑀩𑁆𑀩𑀣𑀸𑀧𑀻𑀢𑀺 𑀧𑀤𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀲𑀩𑁆𑀩𑀣𑀸 𑀧𑀻𑀢𑀺𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀪𑁂𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀅𑀳𑁂𑀢𑀼𑀓𑀘𑀺𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁦. 𑀲𑁄𑀪𑀡𑀘𑀺𑀢𑁆𑀢𑁂𑀲𑀼. 𑀅𑀯𑀼𑀢𑁆𑀢𑀸𑀧𑀺 𑀲𑀺𑀤𑁆𑀥𑀸 𑀳𑁄𑀢𑀺. 𑀬𑀣𑀸 𑀅𑀝𑁆𑀞𑀘𑀺𑀢𑁆𑀢𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀘 𑀯𑀼𑀢𑁆𑀢𑁂 𑀅𑀯𑀼𑀢𑁆𑀢𑁂𑀧𑀺𑀲𑀺𑀚𑁆𑀛𑀦𑁆𑀢𑀺 𑀲𑁂𑀲𑀘𑀺𑀢𑁆𑀢𑀸𑀦𑀺 𑀮𑁄𑀓𑀺𑀬𑀸𑀦𑀻𑀢𑀺 𑀘 𑀲𑀉𑀢𑁆𑀢𑀭𑀸𑀦𑀻𑀢𑀺 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀢𑀲𑀫𑀗𑁆𑀕𑀻𑀦𑁄’’𑀢𑀺 𑀅𑀢𑁆𑀢𑀦𑀸 𑀧𑀸𑀧𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁂. ‘‘𑀅𑀦𑀺𑀘𑁆𑀙𑀦𑁆𑀢𑁂 𑀬𑁂𑀯𑀸’’𑀢𑀺 𑀲𑀘𑁂𑀧𑀺 𑀅𑀯𑀻𑀘𑀺𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀢𑁆𑀣𑀼 𑀯𑀺𑀬 𑀓𑁂𑀘𑀺 𑀇𑀘𑁆𑀙𑀦𑁆𑀢𑀼. 𑀅𑀚𑀸𑀦𑀦𑁆𑀢𑀸𑀦𑀁 𑀧𑀦 𑀇𑀘𑁆𑀙𑀸 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑁄𑀪𑀕𑁆𑀕 𑀧𑀢𑁆𑀢𑀺𑀬𑀸’’𑀢𑀺 𑀏𑀢𑁆𑀣 𑀲𑀼𑀪𑀕𑀲𑁆𑀲 𑀪𑀸𑀯𑁄 𑀲𑁄𑀪𑀕𑁆𑀕𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀲𑀼𑀪𑀕𑀲𑁆𑀲𑀸𑀢𑀺 𑀘 𑀲𑀼𑀲𑀺𑀭𑀺𑀓𑀲𑁆𑀲.

𑁪𑁧. ‘‘𑀬𑀸𑀣𑀸𑀯𑀢𑁄’’𑀢𑀺 𑀬𑀣𑀸 𑀲𑀪𑀸𑀯𑀢𑁄. 𑀏𑀢𑁆𑀣 𑀲𑀺𑀬𑀸 𑀚𑀸𑀦𑀸𑀢𑀻𑀢𑀺 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀺𑀁 𑀲𑀩𑁆𑀩𑀁 𑀜𑀸𑀡𑀁 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀻𑀢𑀺. 𑀓𑀺𑀜𑁆𑀘𑁂𑀢𑁆𑀣. 𑀬𑀤𑀺 𑀲𑀩𑁆𑀩𑀁 𑀜𑀸𑀡𑀁 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺. 𑀏𑀯𑀁 𑀲𑀢𑀺, 𑀜𑀸𑀡𑁂𑀦 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀅𑀚𑀸𑀦𑀦𑀁 𑀦𑀸𑀫 𑀦𑀢𑁆𑀣𑀺, 𑀯𑀺𑀭𑀚𑁆𑀛𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺. 𑀅𑀣 𑀲𑀩𑁆𑀩𑀁 𑀜𑀸𑀡𑀁 𑀬𑀸𑀣𑀸𑀯𑀢𑁄 𑀦 𑀚𑀸𑀦𑀸𑀢𑀺, 𑀓𑀢𑁆𑀣𑀘𑀺 𑀚𑀸𑀦𑀸𑀢𑀺, 𑀓𑀢𑁆𑀣𑀘𑀺 𑀦 𑀚𑀸𑀦𑀸𑀢𑀺. 𑀏𑀯𑀜𑁆𑀘𑀲𑀢𑀺, 𑀬𑀢𑁆𑀣 𑀚𑀸𑀦𑀸𑀢𑀺, 𑀢𑀢𑁆𑀣𑁂𑀯 𑀢𑀁 𑀜𑀸𑀡𑀁 𑀳𑁄𑀢𑀺. 𑀬𑀢𑁆𑀣 𑀦 𑀚𑀸𑀦𑀸𑀢𑀺, 𑀢𑀢𑁆𑀣 𑀢𑀁 𑀜𑀸𑀡𑀫𑁂𑀯 𑀦 𑀳𑁄𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀜𑀸𑀡𑁂𑀦 𑀘𑀺𑀦𑁆𑀢𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁𑀧𑀺 𑀬𑀢𑁆𑀣 𑀬𑀢𑁆𑀣 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁 𑀦 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀜𑀸𑀡 𑀯𑀺𑀧𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑀁 𑀳𑁄𑀢𑀺. 𑀜𑀸𑀡𑀧𑁆𑀧𑀝𑀺 𑀭𑀽𑀧𑀓𑀸 𑀘 𑀥𑀫𑁆𑀫𑀸 𑀅𑀢𑁆𑀣𑀺 𑀘𑀺𑀢𑁆𑀢𑀜𑁆𑀘 𑀯𑀺𑀢𑀓𑁆𑀓𑁄 𑀘, 𑀯𑀺𑀘𑀸𑀭𑁄 𑀘, 𑀤𑀺𑀝𑁆𑀞𑀺 𑀘. 𑀏𑀢𑁂𑀳𑀺 𑀘𑀺𑀦𑁆𑀢𑁂𑀦𑁆𑀢𑀸𑀧𑀺 𑀅𑀳𑀁 𑀜𑀸𑀡𑁂𑀦 𑀘𑀺𑀦𑁆𑀢𑁂𑀫𑀻𑀢𑀺 𑀫𑀜𑁆𑀜𑀦𑁆𑀢𑀺. ‘‘𑀤𑁂𑀬𑁆𑀬 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓 𑀲𑀫𑁆𑀧𑀢𑁆𑀢𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫 𑀯𑀢𑁆𑀣𑀼 𑀲𑀫𑁆𑀧𑀢𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓 𑀧𑀼𑀕𑁆𑀕𑀮 𑀲𑀫𑁆𑀧𑀢𑁆𑀢𑀺. ‘‘𑀅𑀩𑁆𑀬𑀸𑀧𑀚𑁆𑀚𑀮𑁄𑀓𑀽𑀧𑀧𑀢𑁆𑀢𑀺𑀢𑀸’’𑀢𑀺 𑀏𑀢𑁆𑀣 𑀅𑀩𑁆𑀬𑀸𑀧𑀚𑁆𑀚𑀮𑁄𑀓𑁄 𑀦𑀸𑀫 𑀓𑀸𑀬𑀺𑀓𑀤𑀼𑀓𑁆𑀔 𑀘𑁂𑀢𑀲𑀺𑀓 𑀤𑀼𑀓𑁆𑀔 𑀭𑀳𑀺𑀢𑁄 𑀉𑀧𑀭𑀺𑀤𑁂𑀯𑀮𑁄𑀓𑁄 𑀯𑀸 𑀩𑁆𑀭𑀳𑁆𑀫𑀮𑁄𑀓𑁄 𑀯𑀸. 𑀉𑀧𑀧𑀚𑁆𑀚𑀦𑀁 𑀉𑀧𑀧𑀢𑁆𑀢𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀉𑀧𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀬𑀸𑀧𑀚𑁆𑀚𑀮𑁄𑀓𑀁 𑀉𑀧𑀧𑀢𑁆𑀢𑀺 𑀬𑀲𑁆𑀲 𑀲𑁄 𑀅𑀩𑁆𑀬𑀸𑀧𑀚𑁆𑀚 𑀮𑁄𑀓𑀽𑀧𑀧𑀢𑁆𑀢𑀺. 𑀢𑀲𑁆𑀲 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀓𑀺𑀮𑁂𑀲 𑀤𑀽𑀭𑀢𑀸’’𑀢𑀺 𑀲𑀫𑀸𑀧𑀢𑁆𑀢𑀺 𑀩𑀮𑁂𑀦 𑀯𑀸, 𑀅𑀜𑁆𑀜𑀢𑀭𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸, 𑀯𑀺𑀓𑁆𑀔𑀫𑁆𑀪𑀺𑀢 𑀓𑀺𑀮𑁂𑀲𑀢𑀸 𑀯𑀸, 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦 𑀓𑀺𑀮𑁂𑀲𑀢𑀸 𑀯𑀸.

𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀏𑀯𑀁 𑀯𑀼𑀢𑁆𑀢𑀁. 𑀬𑀤𑀸𑀳𑀺 𑀤𑁂𑀬𑁆𑀬𑀥𑀫𑁆𑀫 𑀧𑀝𑀺𑀕𑁆𑀕𑀸𑀳𑀓𑀸𑀤𑀺 𑀲𑀫𑁆𑀧𑀢𑁆𑀢𑀺𑀁 𑀅𑀜𑁆𑀜𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀼𑀁 𑀆𑀕𑀫𑁆𑀫 𑀳𑀝𑁆𑀞𑀢𑀼𑀝𑁆𑀞𑁄 𑀅𑀢𑁆𑀣𑀺𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀺𑀢𑁆𑀯𑀸 𑀅𑀲𑀁𑀲𑀻𑀤𑀦𑁆𑀢𑁄 𑀅𑀦𑀼𑀲𑁆𑀲𑀸𑀳𑀺𑀢𑁄𑀧𑀭𑁂𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀅𑀲𑀗𑁆𑀔𑀸𑀭𑀁 𑀳𑁄𑀢𑀺. 𑀬𑀤𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀳𑀝𑁆𑀞𑀢𑀼𑀝𑁆𑀞𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑁂𑀓𑁆𑀔𑀺𑀢𑁆𑀯𑀸 𑀅𑀫𑀼𑀢𑁆𑀢 𑀘𑀸 𑀕𑀢𑀸𑀤𑀺𑀯𑀲𑁂𑀦 𑀲𑀁𑀲𑀻𑀤𑀫𑀸𑀦𑁄 𑀯𑀸 𑀧𑀭𑁂𑀳𑀺 𑀯𑀸 𑀉𑀲𑁆𑀲𑀸𑀳𑀺𑀢𑁄 𑀓𑀭𑁄𑀢𑀺, 𑀢𑀤𑀸𑀲𑁆𑀲 𑀢𑀤𑁂𑀯 𑀘𑀺𑀢𑁆𑀢𑀁 𑀲𑀲𑀗𑁆𑀔𑀸𑀭𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀗𑁆𑀔𑀸𑀭𑁄𑀢𑀺 𑀏𑀢𑀁 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑁆𑀲𑀸𑀥𑀺𑀯𑀘𑀦𑀁. 𑀬𑀤𑀸 𑀧𑀦 𑀜𑀸𑀢𑀺 𑀚𑀦𑀲𑁆𑀲 𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀦𑁂𑀦 𑀚𑀸𑀢𑀧𑀭𑀺𑀘𑀬𑀸𑀩𑀸𑀮𑀤𑀸𑀭𑀓𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲 𑀚𑀸𑀢𑀸𑀲𑀳𑀲𑀸 𑀓𑀺𑀜𑁆𑀘𑀺 𑀤𑁂𑀯 𑀳𑀢𑁆𑀣𑀕𑀢𑀁 𑀤𑀤𑀦𑁆𑀢𑀺 𑀯𑀸 𑀯𑀦𑁆𑀤𑀦𑁆𑀢𑀺 𑀯𑀸, 𑀢𑀤𑀸 𑀢𑀢𑀻𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀣𑀯𑀦𑁆𑀤𑀣𑀸𑀢𑀺 𑀜𑀸𑀢𑀻𑀳𑀺 𑀉𑀲𑁆𑀲𑀸𑀳𑀺𑀢𑀸 𑀏𑀯𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀘𑀢𑀼𑀢𑁆𑀣𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀤𑁂𑀬𑁆𑀬𑀥𑀫𑁆𑀫 𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀦𑀁 𑀅𑀲𑀫𑁆𑀧𑀢𑁆𑀢𑀺𑀁 𑀅𑀜𑁆𑀜𑁂𑀲𑀁 𑀯𑀸 𑀲𑁄𑀫𑀦𑀲𑁆𑀲𑀳𑁂𑀢𑀽𑀦𑀁 𑀅𑀪𑀸𑀯𑀁 𑀆𑀕𑀫𑁆𑀫 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀲𑁄𑀫𑀦𑀲𑁆𑀲𑀭𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀤𑀸 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁪𑁨. 𑀅𑀝𑁆𑀞𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀇𑀫𑀸𑀦𑀺 𑀘𑀺𑀢𑁆𑀢𑀸𑀦𑀺 𑀦 𑀓𑁂𑀯𑀮𑀁 𑀅𑀝𑁆𑀞𑁂𑀯 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑀢𑁄 𑀩𑀳𑀽𑀦𑀺𑀧𑀺 𑀩𑀳𑀼𑀢𑀭𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀇𑀫𑀁 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀤𑀲𑀲𑀼 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀢𑁆𑀣𑀽𑀲𑀼 𑀤𑀺𑀝𑁆𑀞𑀼𑀚𑀼 𑀓𑀫𑁆𑀫𑀁 𑀦𑀸𑀫 𑀜𑀸𑀡 𑀓𑀺𑀘𑁆𑀘𑀁. 𑀢𑀁 𑀓𑀣𑀁 𑀜𑀸𑀡 𑀯𑀺𑀧𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑁂𑀳𑀺 𑀓𑀭𑁄𑀦𑁆𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀜𑀸𑀡 𑀲𑀫𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑁂𑀳𑀺 𑀤𑀺𑀝𑁆𑀞𑀺𑀁 𑀉𑀚𑀼𑀁𑀓𑀭𑁄𑀦𑁆𑀢𑀸 𑀢𑁂𑀲𑀁 𑀅𑀦𑁆𑀢𑀭𑀦𑁆𑀢𑀭𑀸 𑀜𑀸𑀡𑀲𑁄𑀢𑁂 𑀧𑀢𑀺𑀢𑀯𑀲𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢 𑀘𑀺𑀢𑁆𑀢𑁂𑀳𑀺𑀧𑀺 𑀓𑀭𑁄𑀦𑁆𑀢𑀺𑀬𑁂𑀯. 𑀲𑀩𑁆𑀩𑁂𑀲𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀸𑀢𑀺𑀆𑀤𑀺𑀦𑀸, 𑀩𑀼𑀤𑁆𑀥𑁄 𑀲𑁄𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀲𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑁄 𑀲𑀗𑁆𑀖𑁄, 𑀢𑀺𑀆𑀤𑀺𑀦𑀸 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀇𑀫𑀸𑀦𑀺 𑀅𑀝𑁆𑀞 𑀘𑀺𑀢𑁆𑀢𑀸𑀦𑀻’’𑀢𑀺𑀆𑀤𑀺𑀁. 𑀢𑀢𑁆𑀣 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀦𑀸𑀫 ‘𑀤𑀸𑀦𑀁, 𑀲𑀻𑀮𑀁, 𑀪𑀸𑀯𑀦𑀸, 𑀅𑀧𑀘𑀸𑀬𑀦𑀁, 𑀯𑁂𑀬𑁆𑀬𑀸𑀯𑀘𑁆𑀘𑀁, 𑀧𑀢𑁆𑀢𑀺𑀤𑀸𑀦𑀁, 𑀧𑀢𑁆𑀢𑀸𑀦𑀼𑀫𑁄𑀤𑀦𑀁, 𑀥𑀫𑁆𑀫𑀲𑁆𑀲𑀯𑀦𑀸, 𑀥𑀫𑁆𑀫𑀤𑁂𑀲𑀦𑀸, 𑀤𑀺𑀝𑁆𑀞𑀼𑀚𑀼 𑀓𑀫𑁆𑀫𑀁,. 𑀢𑁂𑀳𑀺 𑀕𑀼𑀡𑀺𑀢𑀸𑀦𑀺 𑀯𑀟𑁆𑀠𑀺𑀢𑀸𑀦𑀺. 𑀢𑀸𑀦𑀺 𑀘 𑀅𑀝𑁆𑀞𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀻𑀡𑀺 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀢𑁂 𑀳𑁂𑀯 𑀅𑀝𑁆𑀞𑀳𑀺 𑀓𑀭𑁄𑀦𑁆𑀢𑀺. 𑀢𑀸𑀦𑀺𑀬𑁂𑀯 𑀘 𑀲𑀩𑁆𑀩𑀸𑀦𑀺 𑀅𑀢𑁆𑀣𑀺 𑀳𑀻𑀦𑀸𑀦𑀺, 𑀅𑀢𑁆𑀣𑀺 𑀫𑀚𑁆𑀛𑀺𑀫𑀸𑀦𑀺, 𑀅𑀢𑁆𑀣𑀺 𑀧𑀡𑀻𑀢𑀸𑀦𑀺. 𑀢𑀲𑁆𑀫𑀸 𑀧𑀼𑀦 𑀅𑀦𑀼𑀓𑁆𑀓𑀫𑁂𑀦 𑀆𑀭𑀫𑁆𑀫𑀡𑀸𑀤𑀻𑀳𑀺 𑀯𑀟𑁆𑀠𑀦𑀁 𑀓𑀭𑁄𑀢𑀺. 𑀢𑀢𑁆𑀣 ‘‘𑀢𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀻’’𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀼𑀤𑁆𑀥𑀺𑀓𑀸𑀦𑀻’’𑀢𑀺 𑀅𑀥𑀺𑀧𑀢𑀻𑀳𑀺 𑀅𑀫𑀺𑀲𑁆𑀲𑀺𑀢𑀸𑀦𑀺. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀇𑀢𑀺 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀢𑀣𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂𑀲𑀳𑀲𑁆𑀲𑀸𑀦𑀺 𑀲𑀢𑀁 𑀲𑀝𑁆𑀞𑀺 𑀘 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀯𑀻𑀫𑀁𑀲𑀸𑀯𑀚𑁆𑀚𑀺𑀢𑁂𑀳𑀻’’𑀢𑀺 𑀯𑀻𑀫𑀁𑀲𑀸𑀥𑀺𑀧𑀢𑀺 𑀯𑀚𑁆𑀚𑀺𑀢𑁂𑀳𑀺. ‘‘𑀢𑀣𑀸𑀕𑀼𑀡𑀺𑀢𑀸𑀦𑀻’’𑀢𑀺 𑀲𑀩𑁆𑀩𑀸𑀦𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀤𑀻𑀳𑀺 𑀲𑀫𑀁 𑀕𑀼𑀡𑀺𑀢𑀸𑀦𑀺. ‘‘𑀓𑁄𑀲𑀮𑁆𑀮𑁂𑀦𑀸’’𑀢𑀺 𑀓𑁄𑀲𑀮𑁆𑀮𑀲𑀗𑁆𑀔𑀸𑀢𑁂𑀦. ‘‘𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬’’𑀦𑁆𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢 𑀯𑀻𑀣𑀻𑀳𑀺 𑀯𑀺𑀲𑀼𑀁 𑀪𑀽𑀢𑀸𑀬 𑀆𑀯𑀚𑁆𑀚𑀦𑀸𑀬 𑀬𑀼𑀢𑁆𑀢 𑀯𑀻𑀣𑀺𑀬𑀁. ‘‘𑀢𑁂𑀦𑁂𑀯𑀸’’𑀢𑀺 𑀯𑀻𑀫𑀁𑀲𑀸𑀥𑀺𑀧𑀢𑀺𑀪𑀽𑀢𑁂𑀦 𑀢𑁂𑀦𑁂𑀯 𑀉𑀧𑀦𑀺𑀲𑁆𑀲𑀬𑀜𑁆𑀜𑀸𑀡𑁂𑀦. 𑀏𑀯𑀁 𑀲𑀦𑁆𑀢𑁂𑀧𑀺 𑀦 𑀲𑀓𑁆𑀓𑀸𑀪𑀯𑀺𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁩. 𑀯𑀘𑀦𑀢𑁆𑀣𑁂 ‘‘𑀭𑀼𑀚𑁆𑀚𑀦𑀝𑁆𑀞𑁂𑀦𑀸’’𑀢𑀺 𑀢𑀼𑀤𑀦𑀝𑁆𑀞𑁂𑀦. ‘‘𑀅𑀳𑀺𑀢𑀝𑁆𑀞𑁂𑀦𑀸’’𑀢𑀺 𑀳𑀺𑀢𑀯𑀺𑀭𑀼𑀤𑁆𑀥𑀝𑁆𑀞𑁂𑀦. ‘‘𑀅𑀦𑀺𑀧𑀼𑀡𑀝𑁆𑀞𑁂𑀦𑀸’’𑀢𑀺 𑀅𑀲𑀡𑁆𑀳𑀸 𑀲𑀼𑀔𑀼𑀫𑀝𑁆𑀞𑁂𑀦. ‘‘𑀅𑀦𑀺𑀝𑁆𑀞𑀯𑀺𑀧𑀸𑀓𑀝𑁆𑀞𑁂𑀦𑀸’’𑀢𑀺 𑀅𑀦𑀺𑀝𑁆𑀞𑀁 𑀯𑀺𑀧𑀸𑀓𑀁 𑀏𑀢𑁂𑀲𑀦𑁆𑀢𑀺 𑀅𑀦𑀺𑀝𑁆𑀞 𑀯𑀺𑀧𑀸𑀓𑀸𑀦𑀺. 𑀢𑁂𑀲𑀁 𑀪𑀸𑀯𑁄 𑀅𑀦𑀺𑀝𑁆𑀞 𑀯𑀺𑀧𑀸𑀓𑀝𑁆𑀞𑁄. 𑀢𑁂𑀦 𑀅𑀦𑀺𑀝𑁆𑀞 𑀯𑀺𑀧𑀸𑀓𑀝𑁆𑀞𑁂𑀦. ‘‘𑀢𑀧𑁆𑀧𑀝𑀺 𑀧𑀓𑁆𑀔𑀢𑁆𑀢𑀸’’𑀢𑀺 𑀭𑀸𑀕𑀸𑀤𑀻𑀳𑀺 𑀧𑀝𑀺𑀧𑀓𑁆𑀔𑀢𑁆𑀢𑀸. 𑀏𑀯𑀁 𑀧𑀭𑀺𑀬𑀸𑀬𑀢𑁆𑀣 𑀲𑀗𑁆𑀔𑀸𑀢𑀁 𑀅𑀪𑀺𑀥𑀸𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀁 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 𑀓𑀼𑀘𑁆𑀙𑀺𑀢𑁂𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀓𑀼𑀘𑁆𑀙𑀺𑀢𑁂’’𑀢𑀺 𑀚𑁂𑀕𑀼𑀘𑁆𑀙𑀺𑀢𑀩𑁆𑀩𑁂, 𑀦𑀺𑀦𑁆𑀤𑀺 𑀢𑀩𑁆𑀩𑁂 𑀯𑀸. 𑀘𑀸𑀮𑁂𑀦𑁆𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦, 𑀓𑀫𑁆𑀧𑁂𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦, 𑀯𑀺𑀤𑁆𑀥𑀁𑀲𑁂𑀦𑁆𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦. ‘‘𑀢𑀦𑀼𑀓𑀭𑀡𑀝𑁆𑀞𑁂𑀦𑀸’’𑀢𑀺 𑀲𑀮𑁆𑀮𑀺𑀔𑀦𑀝𑁆𑀞𑁂𑀦. ‘‘𑀅𑀦𑁆𑀢𑀓𑀭𑀡𑀝𑁆𑀞𑁂𑀦𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀓𑀭𑀡𑀝𑁆𑀞𑁂𑀦. ‘‘𑀅𑀧𑀺 𑀘𑀸’’𑀢𑀺𑀆𑀤𑀺 𑀤𑀻𑀧𑀦𑀻𑀦𑀬𑀤𑀲𑁆𑀲𑀦𑀁. ‘‘𑀓𑁄𑀲𑀮𑁆𑀮 𑀲𑀫𑁆𑀪𑀽𑀢𑀝𑁆𑀞𑁂𑀦𑀸’’𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁄. 𑀢𑀢𑁆𑀣, 𑀓𑀼𑀲𑀮𑀲𑁆𑀲 𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀏𑀓𑀸𑀲𑀮𑁆𑀮𑀁. 𑀜𑀸𑀡𑀁. 𑀢𑁂𑀦 𑀲𑀫𑁆𑀪𑀽𑀢𑀁 𑀲𑀜𑁆𑀚𑀸𑀢𑀁 𑀓𑁄𑀲𑀮𑁆𑀮 𑀲𑀫𑁆𑀪𑀽𑀢𑀁 𑀢𑀺𑀯𑀺𑀕𑁆𑀕𑀳𑁄.

𑁪𑁪. ‘‘𑀩𑀮𑀯𑀓𑀫𑁆𑀫𑁂𑀦𑀸’’𑀢𑀺 𑀢𑀺𑀳𑁂𑀢𑀼 𑀓𑀼𑀓𑁆𑀓𑀝𑁆𑀞 𑀓𑀫𑁆𑀫𑁂𑀦. ‘‘𑀤𑀼𑀩𑁆𑀩𑀮 𑀓𑀫𑁆𑀫𑁂𑀦𑀸’’𑀢𑀺 𑀢𑀺𑀳𑁂𑀢𑀼𑀓𑁄𑀫𑀓𑁂𑀦 𑀯𑀸 𑀤𑁆𑀯𑀺𑀳𑁂𑀢𑀼𑀓 𑀓𑀼𑀲𑀮 𑀓𑀫𑁆𑀫𑁂𑀦 𑀯𑀸. ‘‘𑀓𑁂𑀳𑀺𑀘𑀺 𑀆𑀘𑀭𑀺𑀬𑁂𑀳𑀻’’𑀢𑀺 𑀫𑁄𑀭𑀯𑀸𑀧𑀺 𑀯𑀸𑀲𑀻 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀗𑁆𑀕𑀳𑀓𑀸𑀭𑁂𑀦𑀸’’𑀢𑀺 𑀪𑀤𑁆𑀤𑀦𑁆𑀢 𑀩𑀼𑀤𑁆𑀥𑀖𑁄𑀲𑀢𑁆𑀣𑁂𑀭𑁂𑀦. ‘‘𑀲𑀦𑁆𑀦𑀺𑀳𑀺𑀢 𑀧𑀘𑁆𑀘𑀬𑀯𑀲𑁂𑀦𑀸’’𑀢𑀺 𑀆𑀲𑀦𑁆𑀦𑁂 𑀲𑀡𑁆𑀞𑀺𑀢𑀧𑀘𑁆𑀘𑀬 𑀯𑀲𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦 𑀧𑀘𑁆𑀘𑀬𑀯𑀲𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀝𑁆𑀞𑀺𑀢𑀸𑀦𑀺 𑀓𑀫𑁆𑀫𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀧𑀯𑀢𑁆𑀢𑀸𑀦𑀺 𑀫𑀳𑀸𑀯𑀺𑀧𑀸𑀓𑀸𑀦𑀺. ‘‘𑀅𑀯𑀺𑀧𑀸𑀓 𑀲𑀪𑀸𑀯𑀢𑁄’’𑀢𑀺 𑀅𑀯𑀺𑀧𑀘𑁆𑀘𑀦𑀲𑀪𑀸𑀯𑀢𑁄. 𑀅𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀝𑁆𑀞𑀓𑀣𑀸𑀬’’𑀦𑁆𑀢𑀺 𑀥𑀫𑁆𑀫𑀲𑀗𑁆𑀕𑀡𑀺𑀝𑁆𑀞𑀓𑀣𑀸𑀬𑀁. ‘‘𑀇𑀥𑀸’’𑀢𑀺 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂. ‘‘𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀬𑀸 𑀘𑀸’’𑀢𑀺 𑀤𑀸𑀦𑀸𑀤𑀺𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘.

𑁪𑁫. 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂. ‘‘𑀉𑀧𑀭𑀻’’𑀢𑀺 𑀯𑀻𑀣𑀺𑀲𑀗𑁆𑀕𑀳𑁂 𑀢𑀤𑀸 𑀭𑀫𑁆𑀫𑀡 𑀦𑀺𑀬𑀫𑁂. ‘‘𑀲𑀬𑀫𑁂𑀯𑀸’’𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦𑁂𑀯. ‘‘𑀯𑀓𑁆𑀔𑀢𑀻’’𑀢𑀺 𑀯𑀼𑀘𑁆𑀘𑀺𑀲𑁆𑀲𑀢𑀺. ‘‘𑀬𑀣𑀸𑀭𑀳’’𑀦𑁆𑀢𑀺 𑀔𑀻𑀡𑀸𑀲𑀯𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀁 𑀫𑀳𑀸𑀓𑀺𑀭𑀺𑀬𑀸𑀦𑀁 𑀅𑀭𑀳𑀸𑀦𑀼𑀭𑀽𑀧𑀁. 𑀪𑀽𑀢𑀓𑀣𑀦 𑀯𑀺𑀲𑁂𑀲𑀦𑀁 𑀢𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀁’’𑀢𑀺 𑀲𑀳𑁂𑀢𑀼𑀓𑀕𑁆𑀕𑀳𑀡𑀁. ‘‘𑀩𑁆𑀬𑀯𑀘𑁆𑀙𑁂𑀤𑀓𑀯𑀺𑀲𑁂𑀲𑀦’’𑀦𑁆𑀢𑀺 𑀅𑀳𑁂𑀢𑀼𑀓 𑀯𑀺𑀧𑀸𑀓𑀓𑀺𑀭𑀺𑀬 𑀘𑀺𑀢𑁆𑀢𑀸𑀦𑀜𑁆𑀘 𑀲𑀩𑁆𑀪𑀸𑀯𑀸𑀢𑀧𑁆𑀧𑀲𑀗𑁆𑀕𑀲𑁆𑀲 𑀅𑀯𑀘𑁆𑀙𑁂𑀤𑀓𑀁 𑀯𑀺𑀲𑁂𑀲𑀦𑀁. ‘‘𑀬𑀣𑀸 𑀲𑀓𑁆𑀔𑀭 𑀓𑀣𑀮𑀺𑀓𑀁𑀧𑀺 𑀫𑀘𑁆𑀙𑀕𑀼𑀫𑁆𑀩𑀁𑀧𑀺 𑀢𑀺𑀝𑁆𑀞𑀦𑁆𑀢𑀁𑀧𑀺 𑀘𑀭𑀦𑁆𑀢𑀁𑀧𑀺 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑁂 𑀲𑀓𑁆𑀔𑀭 𑀓𑀣𑀮𑀺𑀓𑀁 𑀢𑀺𑀝𑁆𑀞𑀦𑁆𑀢𑀁, 𑀫𑀘𑁆𑀙𑀕𑀼𑀫𑁆𑀩𑀁 𑀢𑀺𑀝𑁆𑀞𑀦𑁆𑀢𑀁𑀧𑀺 𑀘𑀭𑀦𑁆𑀢𑀁𑀧𑀺 𑀧𑀲𑁆𑀲𑀢𑀻𑀢𑀺 𑀏𑀯𑀁 𑀬𑀣𑀸 𑀮𑀸𑀪 𑀬𑁄𑀚𑀦𑀸 𑀳𑁄𑀢𑀺. 𑀢𑀣𑀸 𑀇𑀥 𑀧𑀻𑀢𑀺.

𑁪𑁬. ‘‘𑀬𑀤𑀺𑀤’’𑀦𑁆𑀢𑀺 𑀬𑀸 𑀅𑀬𑀁 𑀤𑀻𑀧𑀦 𑀲𑀫𑀢𑁆𑀣𑀢𑀸, ‘‘𑀇𑀤𑀁 𑀲𑀸𑀫𑀢𑁆𑀣𑀺𑀬’’𑀦𑁆𑀢𑀺 𑀬𑁄𑀚𑀦𑀸. 𑀅𑀬𑀁 𑀲𑀫𑀢𑁆𑀣 𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀪𑁂𑀤𑀯𑀘𑀦𑁂 𑀘𑁄𑀤𑀦𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀘𑀦𑀸𑀕𑀸𑀣𑀸𑀬𑀁. ‘‘𑀏𑀢𑀸𑀦𑀻’’𑀢𑀺 𑀲𑁄𑀪𑀡 𑀓𑀸𑀫𑀸𑀯𑀘𑀭 𑀘𑀺𑀢𑁆𑀢𑀸𑀦𑀺. ‘‘𑀧𑀼𑀜𑁆𑀜 𑀧𑀸𑀧 𑀓𑁆𑀭𑀺𑀬𑀸𑀪𑁂𑀤𑀸’’𑀢𑀺 𑀧𑀼𑀜𑁆𑀜 𑀧𑀸𑀧 𑀓𑁆𑀭𑀺𑀬𑀪𑁂𑀤𑁂𑀦.

𑁪𑁭. 𑀓𑀢𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢 𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀇𑀥𑀓𑀸𑀫𑀲𑀤𑁆𑀤𑁂𑀦 𑀲𑀳𑁄𑀓𑀸𑀲𑀸𑀓𑀸𑀫𑀪𑀽𑀫𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀸𑀫𑁂 𑀓𑀸𑀫𑀪𑀽𑀫𑀺𑀬’’𑀦𑁆𑀢𑀺. 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀸𑀞𑀲𑁂𑀲𑁄. ‘‘𑀓𑁆𑀭𑀺𑀬𑀸 𑀘𑀸’’𑀢𑀺 𑀏𑀢𑁆𑀣 𑀘 𑀲𑀤𑁆𑀤𑁄 𑀧𑀦 𑀲𑀤𑁆𑀤𑀢𑁆𑀣𑁄. 𑀇𑀢𑀺 𑀲𑀤𑁆𑀤𑁄 𑀇𑀘𑁆𑀘𑁂𑀯𑀁 𑀲𑀤𑁆𑀤𑀢𑁆𑀣𑁄. 𑀏𑀢𑁂𑀦 𑀧𑀝𑀺𑀲𑀺𑀤𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀥𑀸’’𑀢𑀺 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑀲𑀗𑁆𑀕𑀳𑁂. ‘‘𑀢𑀲𑁆𑀲𑀸’’𑀢𑀺 𑀲𑀩𑁆𑀩𑀣𑀸𑀲𑀤𑁆𑀤𑀲𑁆𑀲. 𑀪𑀯𑁄 𑀦𑀸𑀫 𑀇𑀦𑁆𑀤𑁆𑀭𑀺𑀬 𑀩𑀤𑁆𑀥𑀲𑀦𑁆𑀢𑀸𑀦𑀕𑀢𑁄 𑀥𑀫𑁆𑀫 𑀲𑀫𑀽𑀳𑁄 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸𑀢𑀺 𑀧𑀤𑁂 𑀓𑀸𑀫𑀲𑀤𑁆𑀤𑁄. 𑀲𑁄 𑀘 𑀧𑀣𑀯𑀺 𑀧𑀩𑁆𑀩𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀁 𑀓𑀸𑀫𑀪𑀽𑀫𑀺𑀁 𑀯𑀤𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀽𑀫𑀺𑀧𑀭𑀺𑀬𑀸𑀬𑁄 𑀘𑀸’’𑀢𑀺𑀆𑀤𑀺. ‘‘𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥 𑀥𑀫𑁆𑀫 𑀲𑀫𑀽𑀳𑁄’’𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥 𑀥𑀫𑁆𑀫 𑀲𑀫𑀽𑀳𑁄 𑀲𑀢𑁆𑀢𑀲𑀦𑁆𑀢𑀸𑀦𑀸𑀕𑀢𑁄, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥 𑀥𑀫𑁆𑀫 𑀲𑀫𑀽𑀳𑁄 𑀧𑀣𑀯𑀺 𑀧𑀩𑁆𑀩𑀢𑀸𑀤𑀺 𑀕𑀢𑁄. 𑀢𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀅𑀦𑀸𑀩𑀤𑁆𑀥𑁄 𑀅𑀦𑀸𑀬𑀢𑁆𑀢𑁄 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁄𑀢𑀺.

𑀇𑀢𑀺𑀓𑀸𑀫𑀘𑀺𑀢𑁆𑀢𑀲𑀗𑁆𑀕𑀳𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁮. 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂. ‘‘𑀲𑀫𑀼𑀤𑀺𑀢𑁂𑀦𑀸’’𑀢𑀺 𑀧𑀜𑁆𑀘𑀗𑁆𑀕 𑀲𑀫𑀼𑀤𑀺𑀢𑁂𑀦. 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀏𑀓𑀢𑁄 𑀲𑀸𑀫𑀕𑁆𑀕𑀺𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀏𑀓𑀢𑁄 𑀲𑀸𑀫𑀕𑁆𑀕𑀺𑀬𑀁 𑀲𑀢𑀺𑀬𑁂𑀯 𑀅𑀧𑁆𑀧𑀦𑀸 𑀳𑁄𑀢𑀺, 𑀦𑁄 𑀅𑀲𑀢𑀺. 𑀲𑀸𑀫𑀕𑁆𑀕𑀺𑀬𑀦𑁆𑀢𑀺 𑀘 𑀲𑀼𑀝𑁆𑀞𑀼 𑀩𑀮𑀯𑀢𑀸𑀬 𑀲𑀫𑀕𑁆𑀕𑀪𑀸𑀯𑁂𑀢𑀺 𑀅𑀢𑁆𑀣𑁄. ‘‘𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸’’𑀢𑀺 𑀧𑀢𑁆𑀢𑀩𑁆𑀩𑀢𑁆𑀢𑀸. 𑀛𑀸𑀦𑀁 𑀤𑀼𑀯𑀺𑀥𑀁 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀜𑁆𑀘 𑀮𑀓𑁆𑀔𑀡𑀽 𑀧𑀦𑀺𑀚𑁆𑀛𑀸𑀦𑀜𑁆𑀘𑀸𑀢𑀺 𑀆𑀳 ‘‘𑀓𑀲𑀺𑀡𑀸𑀤𑀺𑀓𑀲𑁆𑀲𑀸’’𑀢𑀺𑀆𑀤𑀺𑀁. 𑀇𑀥 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀘 𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀆𑀭𑀫𑁆𑀫𑀡𑀁 𑀘𑁂𑀢𑀲𑀸 𑀉𑀧𑀕𑀦𑁆𑀢𑁆𑀯𑀸𑀦𑀺𑀚𑁆𑀛𑀸𑀦𑀁 𑀑𑀮𑁄𑀓𑀦𑀁. 𑀛𑀸𑀦𑀲𑀤𑁆𑀤𑀲𑁆𑀲𑀛𑀸𑀧𑀦𑀢𑁆𑀣𑁄𑀧𑀺 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀦𑀻𑀓 𑀥𑀫𑁆𑀫𑀸𑀦𑀜𑁆𑀘 𑀛𑀸𑀧𑀦𑀢𑁄’’𑀢𑀺. 𑀅𑀕𑁆𑀕𑀺𑀦𑀸 𑀯𑀺𑀬 𑀓𑀝𑁆𑀞𑀸𑀦𑀁 𑀓𑀺𑀮𑁂𑀲𑀸𑀦𑀁 𑀤𑀬𑁆𑀳𑀦𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀕𑁆𑀕𑀢𑀸 𑀏𑀯 𑀲𑀸𑀢𑀺𑀲𑁆𑀲𑀬 𑀬𑀼𑀢𑁆𑀢𑀸 𑀅𑀧𑁆𑀧𑀦𑀸𑀧𑀢𑁆𑀢𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑀪𑀸𑀕𑁂 𑀧𑀦 𑀧𑀣𑀫𑀚𑁆𑀛𑀸𑀦𑁂 𑀯𑀺𑀢𑀓𑁆𑀓𑀲𑁆𑀲 𑀩𑀮𑀯𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄. ‘‘𑀲𑀸𑀳𑀻’’𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺. 𑀲𑀸𑀳𑀺 𑀏𑀓𑀕𑁆𑀕𑀢𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀅𑀢𑁆𑀢𑀸𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀆𑀭𑀫𑁆𑀫𑀡𑀫𑀲𑁆𑀲𑀸𑀢𑀺 𑀏𑀓𑀢𑁆𑀢𑀸 𑀭𑀫𑁆𑀫𑀡𑀸. 𑀏𑀓𑀕𑁆𑀕𑀢𑀸. 𑀢𑀲𑁆𑀲 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄.

𑀅𑀕𑁆𑀕𑀲𑀤𑁆𑀤𑁄 𑀓𑁄𑀝𑀺 𑀅𑀢𑁆𑀣𑁄. 𑀓𑁄𑀝𑁆𑀞𑀸𑀲𑀝𑁆𑀞𑁄𑀯𑀸. ‘‘𑀢𑀣𑀸 𑀧𑀯𑀢𑁆𑀢𑀦𑁂’’𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀁. ‘‘𑀆𑀥𑀺𑀧𑁆𑀧𑀘𑁆𑀘𑀕𑀼𑀡𑀬𑁄𑀕𑁂𑀦𑀸’’𑀢𑀺 𑀅𑀥𑀺𑀧𑀢𑀺𑀪𑀸𑀯𑀕𑀼𑀡𑀬𑁄𑀕𑁂𑀦. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀕𑀼𑀡𑀬𑁄𑀕𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀬𑁂𑀯 𑀏𑀓𑀕𑁆𑀕𑀢𑀸 𑀏𑀓𑀕𑁆𑀕𑀢𑀸, 𑀲𑀫𑀸𑀥𑀻,𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀫𑀸𑀥𑀻’’𑀢𑀺 𑀧𑀤𑀲𑁆𑀲-𑀲𑀁-𑀆𑀥𑀻-𑀢𑀺-𑀯𑀸, 𑀲𑀫𑀆𑀥𑀻𑀢𑀺-𑀯𑀸, 𑀤𑁆𑀯𑀺𑀥𑀸 𑀧𑀤𑀘𑁆𑀙𑁂𑀤𑁄. 𑀢𑀢𑁆𑀣 𑀲𑀁𑀉𑀧𑀲𑀕𑁆𑀕𑁄 𑀲𑀫𑁆𑀫𑀸𑀲𑀤𑁆𑀤𑀢𑁆𑀣𑁄. 𑀲𑀫𑀲𑀤𑁆𑀤𑁄 𑀧𑀦 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀻𑀢𑀺𑀆𑀤𑀻𑀲𑀼 𑀯𑀺𑀬 𑀦𑀸𑀫𑀺𑀓𑀲𑀤𑁆𑀤𑁄𑀢𑀺 𑀤𑁆𑀯𑀺𑀥𑀸 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀬𑁂𑀯 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸𑀬𑁂𑀯 𑀘𑀺𑀢𑁆𑀢𑀁-𑀲𑀫𑁆𑀫𑀸 𑀘 𑀆𑀥𑀺𑀬𑀢𑀻𑀢𑀺 𑀲𑀫𑀸𑀥𑀺, 𑀲𑀸𑀬𑁂𑀯 𑀘𑀺𑀢𑁆𑀢𑀁-𑀲𑀫𑀜𑁆𑀘 𑀆𑀥𑀺𑀬𑀢𑀻𑀢𑀺 𑀲𑀫𑀸𑀥𑀻𑀢𑀺 𑀤𑁆𑀯𑀺𑀥𑀸 𑀯𑀺𑀓𑀧𑁆𑀧𑁄. 𑀢𑀢𑁆𑀣 𑀲𑀫𑁆𑀫𑀸 𑀘𑀸𑀢𑀺 𑀲𑀼𑀦𑁆𑀤𑀭𑁂𑀦. 𑀆𑀥𑀺𑀬𑀢𑀻𑀢𑀺 𑀆𑀤𑀳𑀢𑀺. 𑀆𑀤𑀳𑀦𑀜𑁆𑀘 𑀞𑀧𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀞𑀧𑁂𑀢𑀻’’𑀢𑀺. 𑀲𑀫𑀜𑁆𑀘𑀸𑀢𑀺 𑀅𑀯𑀺𑀲𑀫𑀜𑁆𑀘. ‘‘𑀢𑀢𑁆𑀣𑁂𑀯𑀸’’𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀏𑀯. ‘‘𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑀸 𑀧𑀸𑀤𑀦𑁂𑀦𑀸’’𑀢𑀺 𑀮𑀻𑀦𑀲𑁆𑀲 𑀘 𑀉𑀤𑁆𑀥𑀘𑁆𑀘𑀲𑁆𑀲 𑀘 𑀅𑀪𑀸𑀯𑁄 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑁄. 𑀢𑀲𑁆𑀲 𑀆𑀧𑀸𑀤𑀦𑀁 𑀆𑀧𑀚𑁆𑀚𑀸𑀧𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀯𑀺𑀥𑁂𑀦 𑀘𑀺𑀢𑁆𑀢𑀲𑁆𑀲 𑀲𑀁𑀳𑀭𑀡𑀁 𑀯𑀺𑀲𑀸𑀳𑀸𑀭𑁄. 𑀦 𑀯𑀺𑀲𑀸𑀳𑀸𑀭𑁄 𑀅𑀯𑀺𑀲𑀸𑀳𑀸𑀭𑁄. 𑀲𑀸𑀬𑁂𑀯 𑀘 𑀦𑀺𑀤𑁆𑀤𑀺𑀝𑁆𑀞𑀸. 𑀇𑀢𑀺 𑀏𑀯𑀁 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀏𑀓𑀕𑁆𑀕𑀢𑀸 𑀏𑀯 𑀲𑀸𑀢𑀺𑀲𑁆𑀲𑀬𑀬𑀼𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀧𑀦 𑀲𑀢𑀺, 𑀏𑀓𑀕𑁆𑀕𑀢𑀸 𑀏𑀯 𑀛𑀸𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀸, 𑀦 𑀯𑀺𑀢𑀓𑁆𑀓𑀸𑀤𑀬𑁄𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀯𑀺𑀢𑀓𑁆𑀓𑀸𑀤𑀬𑁄𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀧𑀦𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑁄. 𑀢𑀲𑁆𑀲𑀸 𑀏𑀓𑀕𑁆𑀕𑀢𑀸𑀬. ‘‘𑀲𑀸 𑀢𑀺𑀲𑁆𑀲𑀬’’𑀦𑁆𑀢𑀺 𑀅𑀢𑀺𑀲𑁆𑀲𑀬𑁂𑀦 𑀲𑀳. ‘‘𑀑𑀲𑀓𑁆𑀓𑀺𑀢𑀼’’𑀦𑁆𑀢𑀺 𑀲𑀁𑀲𑀻𑀤𑀺𑀢𑀼𑀁. ‘‘𑀦𑀁’’𑀢𑀺 𑀘𑀺𑀢𑁆𑀢𑀁. ‘‘𑀲𑀁𑀲𑀧𑁆𑀧𑀺𑀢𑀼’’𑀦𑁆𑀢𑀺 𑀏𑀯𑀁 𑀦𑀼 𑀔𑁄 𑀅𑀜𑁆𑀜𑀣𑀸𑀦𑀼 𑀔𑁄𑀢𑀺 𑀤𑁆𑀯𑀺𑀥𑀸 𑀘𑀜𑁆𑀘𑀮𑀺𑀢𑀼𑀁. ‘‘𑀉𑀓𑁆𑀓𑀡𑁆𑀞𑀺𑀢𑀼’’𑀦𑁆𑀢𑀺 𑀅𑀜𑁆𑀜𑀸𑀪𑀺𑀫𑀼𑀔𑀻 𑀪𑀯𑀺𑀢𑀼𑀁. 𑀆𑀭𑀫𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀤𑁆𑀥𑀁 𑀲𑀸𑀢𑀁 𑀬𑁂𑀦𑀸𑀢𑀺 𑀮𑀤𑁆𑀥𑀲𑁆𑀲𑀸𑀢𑀁. ‘‘𑀲𑀸𑀢𑀁’’𑀢𑀺 𑀲𑀸𑀭𑀢𑁆𑀢𑀁. ‘‘𑀉𑀧𑀩𑁆𑀭𑀽𑀳𑀺𑀢𑀁’’𑀢𑀺 𑀪𑀼𑀲𑀁𑀯𑀟𑁆𑀠𑀺𑀢𑀁. ‘‘𑀲𑀦𑁆𑀢 𑀲𑀪𑀸𑀯𑀢𑁆𑀢𑀸’’𑀢𑀺 𑀉𑀧𑀲𑀦𑁆𑀢 𑀲𑀪𑀸𑀯𑀢𑁆𑀢𑀸. ‘‘𑀢𑀣𑀸 𑀅𑀦𑀼𑀕𑁆𑀕𑀳𑀺𑀢𑀸’’𑀢𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀓𑀭𑀡𑀸𑀤𑀺𑀯𑀲𑁂𑀦 𑀅𑀦𑀼𑀕𑁆𑀕 𑀳𑀺𑀢𑀸. 𑀲𑀫𑀸𑀥𑀺𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 ‘‘𑀲𑀬𑀁…𑀧𑁂… 𑀦𑀻𑀯𑀸𑀭𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀘𑁆𑀘𑀮𑀁𑀞𑀢𑁆𑀯𑀸’’𑀢𑀺 𑀅𑀧𑁆𑀧𑀦𑀸𑀓𑀺𑀘𑁆𑀘𑀫𑀸𑀳.

𑀏𑀯𑀁 𑀉𑀧𑀦𑀺𑀚𑁆𑀛𑀸𑀦𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀛𑀸𑀧𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀢𑀧𑁆𑀧𑀘𑁆𑀘𑀦𑀻𑀓𑀸’’𑀢𑀺 𑀢𑁂𑀲𑀁 𑀛𑀸𑀦𑀗𑁆𑀕 𑀥𑀫𑁆𑀫𑀸𑀦𑀁 𑀧𑀘𑁆𑀘𑀦𑀻𑀓𑀸 𑀧𑀝𑀺𑀧𑀓𑁆𑀔𑀸. ‘‘𑀫𑀦𑀲𑁆𑀫𑀺𑀁 𑀧𑀻’’𑀢𑀺 𑀫𑀦𑁄𑀤𑁆𑀯𑀸𑀭𑁂𑀧𑀺. 𑀧𑀕𑁂𑀯 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀽𑀢𑀺 𑀏𑀯𑀁 𑀲𑀫𑁆𑀪𑀸𑀯𑀦𑀢𑁆𑀣𑁄 𑀘𑁂𑀢𑁆𑀣 𑀧𑀺𑀲𑀤𑁆𑀤𑁄. 𑀅𑀧𑀺𑀲𑀤𑁆𑀤𑁄𑀧𑀺 𑀬𑀼𑀚𑁆𑀚𑀢𑀺. ‘‘𑀛𑀸𑀧𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻’’𑀢𑀺 𑀛𑀸𑀦𑀗𑁆𑀕 𑀥𑀫𑁆𑀫𑀕𑁆𑀕𑀻𑀳𑀺 𑀤𑀟𑁆𑀠𑀸𑀦𑀸𑀫 𑀳𑁄𑀦𑁆𑀢𑀺. ‘‘𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀲𑀫𑀼𑀤𑀸𑀬𑁂 𑀏𑀯 𑀛𑀸𑀦 𑀯𑁄𑀳𑀸𑀭𑁄 𑀲𑀺𑀤𑁆𑀥𑁄’’𑀢𑀺 𑀬𑁄𑀚𑀦𑀸. ‘‘𑀥𑀫𑁆𑀫 𑀲𑀸𑀫𑀕𑁆𑀕𑀺𑀧𑀥𑀸𑀦’’𑀦𑁆𑀢𑀺 𑀛𑀸𑀦𑀝𑁆𑀞𑀸𑀦𑁂 𑀛𑀸𑀦𑀗𑁆𑀕 𑀥𑀫𑁆𑀫𑀸𑀦𑀁 𑀫𑀕𑁆𑀕𑀝𑁆𑀞𑀸𑀦𑁂 𑀫𑀕𑁆𑀕𑀗𑁆𑀕 𑀥𑀫𑁆𑀫𑀸𑀦𑀁 𑀩𑁄𑀥𑀺𑀝𑁆𑀞𑀸𑀦𑁂 𑀩𑁄𑀚𑁆𑀛𑀗𑁆𑀕 𑀥𑀫𑁆𑀫𑀸𑀦𑀁 𑀲𑀫𑀕𑁆𑀕𑀪𑀸𑀯𑀧𑁆𑀧𑀥𑀸𑀦𑀁.

𑀏𑀯𑀁 𑀲𑀗𑁆𑀕𑀳𑀓𑀸𑀭𑀸𑀦𑀁 𑀫𑀢𑀺𑀬𑀸 𑀛𑀸𑀦𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀲𑀸𑀦𑀁 𑀫𑀢𑀺𑀬𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁂’’𑀢𑀺𑀆𑀤𑀺𑀫𑀸𑀳. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 ‘‘𑀬𑀣𑀸 𑀲𑀓𑀁𑀓𑀺𑀘𑁆𑀘𑀸𑀦𑀻’’𑀢𑀺 𑀲𑀲𑁆𑀲 𑀇𑀤𑀁 𑀲𑀓𑀁. 𑀲𑀲𑁆𑀲𑀸𑀢𑀺 𑀅𑀢𑁆𑀢𑀦𑁄. 𑀇𑀤𑀦𑁆𑀢𑀺 𑀲𑀦𑁆𑀢𑀓𑀁. 𑀬𑀸𑀦𑀺𑀬𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀧𑀝𑁆𑀞𑀸𑀦𑁂 𑀛𑀸𑀦𑀧𑀘𑁆𑀘𑀬𑀁 𑀧𑀢𑁆𑀯𑀸…𑀧𑁂… 𑀲𑀸𑀥𑁂𑀦𑁆𑀢𑀺𑀬𑁂𑀯’’. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣. 𑀛𑀸𑀦𑀧𑀘𑁆𑀘𑀬𑁄𑀢𑀺 𑀛𑀸𑀦𑀗𑁆𑀕𑀸𑀦𑀺𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀫𑀕𑁆𑀕𑀧𑀘𑁆𑀘𑀬𑁄𑀢𑀺 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀢𑀁 𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. ‘‘𑀧𑀜𑁆𑀘𑀲𑀫𑀼𑀤𑀺𑀢𑀸𑀤𑀻𑀦𑀻’’𑀢𑀺 𑀧𑀜𑁆𑀘𑀲𑀫𑀽𑀳 𑀤𑀲𑀲𑀫𑀽𑀳𑀸𑀦𑀺. ‘‘𑀧𑀣𑀫𑀚𑁆𑀛𑀸𑀦𑀸𑀤𑀺𑀪𑀸𑀯𑀲𑁆𑀲𑁂𑀯𑀘𑀸’’𑀢𑀺 𑀧𑀣𑀫𑀚𑁆𑀛𑀸𑀦𑀸𑀤𑀺 𑀦𑀸𑀫𑀮𑀸𑀪𑀲𑁆𑀲𑁂𑀯𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀛𑀸𑀦𑀪𑀸𑀯𑀲𑁆𑀲𑀸’’𑀢𑀺 𑀛𑀸𑀦𑀦𑀸𑀫𑀮𑀸𑀪𑀲𑁆𑀲. ‘‘𑀢𑀣𑀸𑀯𑀺𑀥𑀓𑀺𑀘𑁆𑀘𑀯𑀺𑀲𑁂𑀲𑀸𑀪𑀸𑀯𑀸’’𑀢𑀺 𑀢𑀣𑀸𑀯𑀺𑀥𑀸𑀦𑀁 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀸𑀤𑀻𑀦𑀁 𑀓𑀺𑀘𑁆𑀘 𑀯𑀺𑀲𑁂𑀲𑀸𑀦𑀁 𑀅𑀪𑀸𑀯𑀢𑁄.

𑁪𑁯. ‘‘𑀏𑀢𑁆𑀣 𑀲𑀺𑀬𑀸’’𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀧𑀼𑀘𑁆𑀙𑀸𑀲𑀺𑀬𑀸. ‘‘𑀅𑀗𑁆𑀕 𑀪𑁂𑀤𑁄’’𑀢𑀺 𑀧𑀣𑀫𑀚𑁆𑀛𑀸𑀦𑁂 𑀧𑀜𑁆𑀘 𑀅𑀗𑁆𑀕𑀸𑀦𑀺, 𑀤𑀼𑀢𑀻𑀬𑀚𑁆𑀛𑀸𑀦𑁂 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀻 𑀢𑀺𑀆𑀤𑀺𑀓𑁄 𑀅𑀗𑁆𑀕𑀪𑁂𑀤𑁄. ‘‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦𑀸’’𑀢𑀺 𑀧𑀼𑀕𑁆𑀕𑀮𑀲𑁆𑀲 𑀇𑀘𑁆𑀙𑀸𑀯𑀺𑀲𑁂𑀲𑁂𑀦. 𑀇𑀢𑀺 𑀅𑀬𑀁 𑀯𑀺𑀲𑀚𑁆𑀚𑀦𑀸. ‘‘𑀲𑁄’’𑀢𑀺 𑀲𑁄 𑀧𑀼𑀕𑁆𑀕𑀮𑁄. ‘‘𑀳𑀻’’𑀢𑀺 𑀯𑀺𑀢𑁆𑀣𑀸𑀭 𑀚𑁄𑀢𑀓𑁄. 𑀯𑀺𑀢𑀓𑁆𑀓𑁄 𑀲𑀳𑀸𑀬𑁄 𑀬𑀲𑁆𑀲𑀸𑀢𑀺 𑀯𑀺𑀢𑀓𑁆𑀓𑀲𑀳𑀸𑀬𑁄. ‘‘𑀯𑀺𑀢𑀓𑁆𑀓𑁂 𑀦𑀺𑀩𑁆𑀩𑀺𑀦𑁆𑀤𑀢𑀻’’𑀢𑀺 𑀑𑀴𑀸𑀭𑀺𑀓𑁄𑀯𑀢𑀸𑀬𑀁 𑀯𑀺𑀢𑀓𑁆𑀓𑁄, 𑀦𑀻𑀯𑀭𑀡𑀸𑀦𑀁 𑀆𑀲𑀦𑁆𑀦𑁂 𑀞𑀺𑀢𑁄𑀢𑀺 𑀏𑀯𑀁 𑀯𑀺𑀢𑀓𑁆𑀓𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀲 𑀅𑀚𑁆𑀛𑀸𑀲𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀢𑀓𑁆𑀓𑀁 𑀯𑀺𑀭𑀸𑀚𑁂𑀢𑀺 𑀯𑀺𑀕𑀫𑁂𑀢𑀺 𑀅𑀢𑀺𑀓𑁆𑀓𑀫𑀸𑀧𑁂𑀢𑀻𑀢𑀺 𑀯𑀺𑀢𑀓𑁆𑀓𑀯𑀺𑀭𑀸𑀕𑁄. 𑀯𑀺𑀢𑀓𑁆𑀓𑀯𑀺𑀭𑀸𑀕𑁄 𑀘 𑀲𑁄 𑀪𑀸𑀯𑀦𑀸 𑀘𑀸𑀢𑀺 𑀲𑀫𑀸𑀲𑁄. ‘‘𑀉𑀢𑁆𑀢𑀭𑀼𑀢𑁆𑀢𑀭𑀚𑁆𑀛𑀸𑀦𑀸𑀥𑀺𑀕𑀫𑀦𑁂’’𑀢𑀺 𑀉𑀢𑁆𑀢𑀭𑀺 𑀉𑀢𑁆𑀢𑀭𑀺𑀛𑀸𑀦𑀧𑁆𑀧𑀝𑀺𑀮𑀸𑀪𑁂. 𑀅𑀚𑁆𑀛𑀸𑀲𑀬 𑀩𑀮𑁂𑀦 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑁂𑀢𑁄𑀧𑀡𑀺𑀥𑀺 𑀇𑀚𑁆𑀛𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀢𑀸.

𑁫𑁦. 𑀲𑀗𑁆𑀔𑀸𑀭 𑀪𑁂𑀤𑀯𑀺𑀘𑀸𑀭𑀡𑀸𑀬𑀁. ‘‘𑀲𑀗𑁆𑀔𑀸𑀭 𑀪𑁂𑀤𑁄 𑀦 𑀯𑀼𑀢𑁆𑀢𑁄’’𑀢𑀺 𑀧𑀣𑀫𑀚𑁆𑀛𑀸𑀦 𑀓𑀼𑀲𑀮 𑀘𑀺𑀢𑁆𑀢𑀁 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁, 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺𑀆𑀤𑀺𑀦𑀸 𑀦 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑁄’’𑀢𑀺 𑀲𑀗𑁆𑀔𑀸𑀭 𑀪𑁂𑀤𑁄. ‘‘𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀲𑀗𑁆𑀔𑀸𑀭 𑀪𑁂𑀤𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀓𑀣𑀁 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺𑀁. 𑀲𑀼𑀔𑀸 𑀧𑀝𑀺𑀧𑀤𑀸 𑀬𑁂𑀲𑀁 𑀢𑀸𑀦𑀺 𑀲𑀼𑀔𑀧𑁆𑀧𑀝𑀺𑀧𑀤𑀸𑀦𑀺. 𑀢𑁂𑀲𑀁 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀬𑁄’’𑀢𑀺 𑀬𑁄𑀕𑀻𑀧𑀼𑀕𑁆𑀕𑀮𑁄. ‘‘𑀆𑀤𑀺𑀢𑁄’’𑀢𑀺𑀆𑀤𑀺𑀫𑁆𑀳𑀺. ‘‘𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄’’𑀢𑀺 𑀯𑀺𑀫𑁄𑀘𑁂𑀦𑁆𑀢𑁄 𑀯𑀺𑀬𑁄𑀕𑀁 𑀓𑀭𑁄𑀦𑁆𑀢𑁄. 𑀤𑀼𑀓𑁆𑀔𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀸𑀫𑀸𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀦𑀸’’𑀢𑀺 𑀅𑀗𑁆𑀕𑀸𑀭𑀓𑀸𑀲𑀽 𑀧𑀫𑀸𑀓𑀸𑀫𑀸𑀩𑀳𑀼𑀤𑀼𑀓𑁆𑀔𑀸𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣𑀪𑀺𑀬𑁆𑀬𑁄𑀢𑀺𑀆𑀤𑀺𑀦𑀸 𑀓𑀸𑀫𑁂𑀲𑀼𑀆𑀤𑀻𑀦𑀯𑀁 𑀤𑀺𑀲𑁆𑀯𑀸. 𑀆𑀤𑀺𑀲𑀤𑁆𑀤𑁂𑀦 𑀯𑀺𑀢𑀓𑁆𑀓𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀁 𑀲𑀗𑁆𑀕𑀬𑁆𑀳𑀢𑀺. ‘‘𑀢𑁂𑀦𑁂𑀯𑀸’’𑀢𑀺 𑀓𑀸𑀫𑀸𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀦𑀸 𑀏𑀯. 𑀏𑀢𑁆𑀣 𑀅𑀪𑀺𑀜𑁆𑀜𑀸𑀪𑁂𑀤𑁂𑀦 𑀲𑀗𑁆𑀔𑀸𑀭 𑀪𑁂𑀤𑁄 𑀦 𑀯𑀢𑁆𑀢𑀩𑁆𑀩𑁄, 𑀧𑀝𑀺𑀧𑀤𑀸 𑀪𑁂𑀤𑁂𑀦𑁂𑀯 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀔𑀺𑀧𑁆𑀧𑀸𑀪𑀺𑀜𑁆𑀜𑀚𑁆𑀛𑀸𑀦𑀸𑀦𑀁𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣, 𑀅𑀪𑀺𑀚𑀸𑀦𑀦𑀁 𑀅𑀪𑀺𑀜𑁆𑀜𑀸. 𑀔𑀺𑀧𑁆𑀧𑀸𑀲𑀻𑀖𑀸 𑀅𑀪𑀺𑀜𑁆𑀜𑀸 𑀬𑁂𑀲𑀁 𑀢𑀸𑀦𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀦𑀺. 𑀤𑀦𑁆𑀥𑀸 𑀅𑀲𑀻𑀖𑀸 𑀅𑀪𑀺𑀜𑁆𑀜𑀸 𑀬𑁂𑀲𑀁 𑀢𑀸𑀦𑀺 𑀤𑀦𑁆𑀥𑀸𑀪𑀺𑀜𑁆𑀜𑀸𑀦𑀺. 𑀛𑀸𑀦𑀸𑀦𑀺. ‘‘𑀬𑀤𑀺 𑀏𑀯’’𑀦𑁆𑀢𑀺 𑀏𑀯𑀁 𑀧𑀝𑀺𑀧𑀤𑀸 𑀪𑁂𑀤𑁂𑀦 𑀲𑀗𑁆𑀔𑀸𑀭 𑀪𑁂𑀤𑁄 𑀬𑀤𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. ‘‘𑀯𑀴𑀜𑁆𑀚𑀦𑀓𑀸𑀮𑁂’’𑀢𑀺 𑀲𑀫𑀸𑀧𑀢𑁆𑀢𑀺 𑀲𑀫𑀸𑀧𑀚𑁆𑀚𑀦𑀓𑀸𑀮𑁂. 𑀧𑀝𑀺𑀩𑀦𑁆𑀥𑀓𑀸 𑀦𑀸𑀫 𑀅𑀦𑁆𑀢𑀭𑀸𑀬𑀺𑀓𑀸. ‘‘𑀲𑀦𑁆𑀦𑀺𑀳𑀺𑀢𑀸𑀲𑀦𑁆𑀦𑀺𑀳𑀺𑀢𑀯𑀲𑁂𑀦𑀸’’𑀢𑀺 𑀆𑀲𑀦𑁆𑀦𑁂 𑀲𑀡𑁆𑀞𑀺𑀢𑀸𑀲𑀡𑁆𑀞𑀺𑀢𑀯𑀲𑁂𑀦. 𑀲𑀼𑀤𑁆𑀥𑀁 𑀯𑀺𑀧𑀲𑁆𑀲𑀦𑀸𑀬𑀸𑀦𑀁 𑀬𑁂𑀲𑀁 𑀢𑁂 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸. ‘‘𑀲𑀼𑀤𑁆𑀥𑀁’’𑀢𑀺 𑀲𑀫𑀣𑀚𑁆𑀛𑀸𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀁. ‘‘𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸’’𑀢𑀺 𑀧𑀭𑁂 𑀦 𑀲𑀢𑁆𑀣𑁂𑀦 𑀳𑀦𑀦𑀢𑁄 𑀙𑀺𑀦𑁆𑀤𑀦𑀢𑁄. ‘‘𑀲𑀳𑀲𑀸’’𑀢𑀺 𑀲𑀻𑀖𑀢𑀭𑁂𑀦. ‘‘𑀫𑀭𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀁’’𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀉𑀧𑁆𑀧𑀦𑁆𑀦𑀁𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀕𑀸𑀫𑀺𑀦𑁄 𑀳𑀺 𑀲𑀼𑀤𑁆𑀥 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸𑀧𑀺 𑀲𑀫𑀸𑀦𑀸 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀦𑀸𑀫 𑀳𑁄𑀦𑁆𑀢𑀺. 𑀇𑀘𑁆𑀙𑀦𑁆𑀢𑁂 𑀲𑀼𑀲𑀢𑀺 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪𑀫𑀦𑀲𑀺𑀓𑀸𑀭 𑀫𑀢𑁆𑀢𑁂𑀦𑀧𑀺 𑀛𑀸𑀦𑀁 𑀇𑀚𑁆𑀛𑀢𑀺. 𑀢𑁂𑀦𑀸𑀳 ‘‘𑀢𑀁𑀧𑀺 𑀫𑀕𑁆𑀕𑀲𑀺𑀤𑁆𑀥𑀕𑀢𑀺𑀓’’𑀦𑁆𑀢𑀺. ‘‘𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂’’𑀢𑀺 𑀇𑀤𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁𑀧𑀺 𑀢𑀢𑁆𑀣 𑀧𑀸𑀓𑀢𑀺𑀓𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁂 𑀧𑀦 𑀏𑀓𑀸 𑀏𑀯 𑀲𑀫𑀸𑀧𑀢𑁆𑀢𑀺 𑀧𑀸𑀓𑀢𑀺𑀓𑀸𑀲𑀫𑁆𑀪𑀯𑀢𑀺. 𑀉𑀧𑀧𑀢𑁆𑀢𑀺𑀲𑀺𑀤𑁆𑀥𑀚𑁆𑀛𑀸𑀦𑀸𑀦𑀁 𑀪𑀯𑀦𑁆𑀢𑀭𑁂 𑀲𑀦𑁆𑀦𑀺𑀳𑀺𑀢 𑀧𑀘𑁆𑀘𑀬𑀪𑁂𑀤𑁂𑀦 𑀲𑀗𑁆𑀔𑀸𑀭 𑀪𑁂𑀤𑁄 𑀯𑀼𑀢𑁆𑀢𑁄, 𑀲𑁄 𑀓𑀣𑀁 𑀧𑀘𑁆𑀘𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀪𑀯𑁂𑀧𑀺…𑀧𑁂… 𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺. 𑀏𑀓𑀲𑁆𑀫𑀺𑀁 𑀪𑀯𑁂𑀲𑀩𑁆𑀩𑀧𑁆𑀧𑀣𑀫𑀁 𑀮𑀤𑁆𑀥𑀓𑀸𑀮𑁂 𑀲𑀗𑁆𑀔𑀸𑀭 𑀪𑁂𑀤𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀯𑀴𑀜𑁆𑀚𑀦𑀓𑀸𑀮𑁂𑀧𑀺 𑀲𑁄 𑀏𑀯 𑀲𑀗𑁆𑀔𑀸𑀭 𑀪𑁂𑀤𑁄 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀲𑀫𑁆𑀪𑀯𑀢𑁄 𑀇𑀤𑀁 𑀯𑀼𑀢𑁆𑀢𑀁. 𑀢𑁂𑀦 𑀪𑀯𑀦𑁆𑀢𑀭𑁂 𑀉𑀧𑀧𑀢𑁆𑀢𑀺 𑀲𑀺𑀤𑁆𑀥𑀚𑁆𑀛𑀸𑀦𑀸𑀦𑀁 𑀲𑀦𑁆𑀦𑀺𑀳𑀺𑀢 𑀧𑀘𑁆𑀘𑀬𑀪𑁂𑀤𑁂𑀦 𑀲𑀗𑁆𑀔𑀸𑀭𑀪𑁂𑀤𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀸𑀦𑀺 𑀫𑀕𑁆𑀕 𑀲𑀺𑀤𑁆𑀥𑀚𑁆𑀛𑀸𑀦 𑀉𑀧𑀧𑀢𑁆𑀢𑀺 𑀲𑀺𑀤𑁆𑀥𑀚𑁆𑀛𑀸𑀦𑀸𑀦𑀺 𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡 𑀉𑀧𑀧𑀢𑁆𑀢𑀺𑀓𑁆𑀔𑀡𑁂𑀲𑀼 𑀲𑀺𑀤𑁆𑀥𑀓𑀸𑀮𑁂 𑀛𑀸𑀦𑀼𑀧𑁆𑀧𑀢𑁆𑀢𑀺 𑀧𑀝𑀺𑀧𑀤𑀸𑀬 𑀏𑀯 𑀲𑀩𑁆𑀩𑀲𑁄 𑀅𑀪𑀸𑀯𑀁 𑀕𑀳𑁂𑀢𑁆𑀯𑀸 𑀅𑀧𑀭𑀁 𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀛𑀸𑀦𑀼𑀧𑁆𑀧𑀢𑁆𑀢𑀺 𑀧𑀝𑀺𑀧𑀤𑀸 𑀭𑀳𑀺𑀢𑀢𑁆𑀢𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀫𑀳𑀕𑁆𑀕𑀢𑀛𑀸𑀦𑀸𑀦𑀁 𑀅𑀝𑁆𑀞𑀓𑀣𑀸𑀯𑀲𑁂𑀦 𑀲𑀺𑀤𑁆𑀥𑀁 𑀲𑀗𑁆𑀔𑀸𑀭 𑀪𑁂𑀤𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀸𑀴𑀺𑀯𑀲𑁂𑀦𑀸𑀧𑀺 𑀲𑁄 𑀲𑀺𑀤𑁆𑀥𑁄 𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀸𑀧𑀼𑀩𑁆𑀩𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀦𑁆𑀥𑀸𑀪𑀺𑀜𑁆𑀜𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑀫𑀸𑀥𑀻𑀦𑀁. ‘‘𑀏𑀢𑁆𑀢𑀸𑀯𑀢𑀸’’𑀢𑀺 𑀏𑀢𑀁 𑀧𑀭𑀺𑀫𑀸𑀡𑀁 𑀅𑀲𑁆𑀲𑀸𑀢𑀺 𑀏𑀢𑁆𑀢𑀸𑀯𑀁. 𑀏𑀢𑁆𑀢𑀸𑀯𑀦𑁆𑀢𑁂𑀦. 𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀇𑀥 𑀲𑀗𑁆𑀔𑀸𑀭𑀪𑁂𑀤𑁄 𑀦 𑀯𑀼𑀢𑁆𑀢𑁄𑀢𑀺𑀆𑀤𑀺𑀦𑀸 𑀯𑀘𑀦𑀓𑁆𑀓𑀫𑁂𑀦 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑁫𑁧. 𑀯𑀺𑀪𑀸𑀯𑀦𑀺𑀧𑀸𑀞𑁂. 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀧𑀣𑀯𑀻, 𑀧𑀣𑀯𑀻, 𑀆𑀧𑁄, 𑀆𑀧𑁄-𑀢𑀺𑀆𑀤𑀺𑀓𑀁, 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀭𑀽𑀧𑀁 𑀤𑀼𑀓𑁆𑀔𑀁, 𑀭𑀽𑀧𑀁 𑀅𑀦𑀢𑁆𑀢𑀸-𑀢𑀺𑀆𑀤𑀺𑀓𑀜𑁆𑀘𑀪𑀸𑀯𑀦𑀸𑀧𑀭𑀺𑀓𑀫𑁆𑀫𑀁 𑀅𑀥𑀺𑀓𑀸𑀭𑁄 𑀦𑀸𑀫 𑀧𑀼𑀩𑁆𑀩𑀪𑀯𑁂𑀓𑀢𑀪𑀸𑀯𑀦𑀸𑀓𑀫𑁆𑀫𑀁. 𑀧𑀼𑀩𑁆𑀩𑀪𑀯𑁂𑀛𑀸𑀦𑀫𑀕𑁆𑀕𑀨𑀮𑀸𑀦𑀺𑀧𑀢𑁆𑀣𑁂𑀢𑁆𑀯𑀸 𑀓𑀢𑀁 𑀤𑀸𑀦𑀲𑀻𑀮𑀸𑀤𑀺 𑀧𑀼𑀜𑁆𑀜𑀓𑀫𑁆𑀫𑀜𑁆𑀘. ‘‘𑀇𑀤𑀁 𑀢𑀸𑀯𑀦𑀬𑀼𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀢𑀸𑀯𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀸𑀧𑁂𑀓𑁆𑀔𑀦𑁂 𑀦𑀺𑀧𑀸𑀢𑁄. 𑀢𑁂𑀦 𑀅𑀧𑀭𑀁𑀧𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀤𑀼𑀯𑀺𑀥𑁄 𑀧𑀓𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄, 𑀧𑀬𑁄𑀕𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀢𑀢𑁆𑀣 𑀧𑀭𑀺𑀓𑀫𑁆𑀫 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀧𑀓𑀢𑀺 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫, 𑀅𑀬𑀁 𑀧𑀓𑀢𑀺 𑀧𑀘𑁆𑀘𑀬𑀕𑀡𑁄 𑀏𑀯. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀧𑀼𑀩𑁆𑀩𑀧𑁆𑀧𑀬𑁄𑀕𑁄 𑀧𑀬𑁄𑀕𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫. 𑀲𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀅𑀦𑁆𑀢𑀫𑀲𑁄’’𑀢𑀺 𑀅𑀦𑁆𑀢𑀺𑀫 𑀧𑀭𑀺𑀘𑁆𑀙𑁂𑀤𑁂𑀦. ‘‘𑀆𑀮𑁄𑀧𑀪𑀺𑀓𑁆𑀔𑀸’’ 𑀦𑀸𑀫 𑀏𑀓𑀸 𑀮𑁄𑀧𑀪𑀺𑀓𑁆𑀔𑀸. 𑀲𑁄 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄. 𑀛𑀸𑀦𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀻’’𑀢𑀺 𑀢𑀲𑁆𑀫𑀸. ‘‘𑀲𑁄’’𑀢𑀺 𑀪𑀸𑀯𑀦𑀸𑀪𑀺𑀲𑀗𑁆𑀔𑀸𑀭𑁄. ‘‘𑀢𑁂𑀲𑀁’’𑀢𑀺 𑀲𑀩𑁆𑀩𑁂𑀲𑀁𑀧𑀺 𑀛𑀸𑀦𑀸𑀦𑀁. 𑀦 𑀳𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺 𑀦𑀸𑀫…𑀧𑁂… 𑀅𑀢𑁆𑀣𑀺, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀩𑁆𑀩𑀓𑀧𑁆𑀧𑁂𑀲𑀼𑀧𑀺 𑀓𑀧𑁆𑀧𑀯𑀺𑀦𑀸𑀲𑀓𑀸𑀮𑁂 𑀛𑀸𑀦𑀸𑀦𑀺 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓 𑀧𑀭𑀸𑀬𑀦𑀢𑀸 𑀲𑀩𑁆𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀼𑀩𑁆𑀩𑁂 𑀲𑀫𑀣𑀓𑀫𑁆𑀫𑁂𑀲𑀼 𑀓𑀢𑀸𑀥𑀺𑀓𑀸𑀭𑀲𑁆𑀲𑀸’’𑀢𑀺 𑀆𑀲𑀦𑁆𑀦𑀪𑀯𑁂𑀓𑀢𑀸𑀥𑀺𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀽𑀭𑀪𑀯𑁂 𑀧𑀦 𑀲𑀫𑀣𑀓𑀫𑁆𑀫𑁂𑀲𑀼 𑀅𑀓𑀢𑀸𑀥𑀺𑀓𑀸𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺. ‘‘𑀏𑀯𑀫𑁂𑀯𑀸’’𑀢𑀺 𑀏𑀯𑀁 𑀏𑀯. 𑀯𑀺𑀧𑀸𑀓𑀚𑁆𑀛𑀸𑀦𑁂𑀲𑀼 𑀲𑀗𑁆𑀔𑀸𑀭 𑀪𑁂𑀤𑀲𑁆𑀲 𑀧𑀼𑀩𑁆𑀩 𑀓𑀫𑁆𑀫𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮 𑀓𑁆𑀭𑀺𑀬𑀚𑁆𑀛𑀸𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁. ‘‘𑀅𑀣𑀯𑀸𑀢𑀺𑀆𑀤𑀺𑀓𑁄 𑀧𑀘𑁆𑀙𑀺𑀫 𑀯𑀺𑀓𑀧𑁆𑀧𑁄 𑀦𑀸𑀫’’ 𑀅𑀣𑀯𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀦𑀓𑀤𑀸𑀘𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘, 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀯𑀺𑀓𑀧𑁆𑀧𑁄. 𑀢𑀢𑁆𑀣 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀩𑁆𑀬𑀪𑀺𑀘𑀸𑀭𑀸 𑀪𑀸𑀯𑀢𑁄’’𑀢𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁂𑀦 𑀧𑀲𑀗𑁆𑀕𑀸𑀪𑀸𑀯𑀢𑁄. 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀁. 𑀬𑀤𑀺 𑀯𑀼𑀘𑁆𑀘𑁂𑀬𑁆𑀬. 𑀦𑀺𑀭𑀢𑁆𑀣 𑀓𑀫𑁂𑀯𑀢𑀁𑀪𑀯𑁂𑀬𑁆𑀬. 𑀓𑀲𑁆𑀫𑀸, 𑀲𑀫𑁆𑀪𑀯 𑀩𑁆𑀬𑀪𑀺𑀘𑀸𑀭𑀸𑀦𑀁 𑀅𑀪𑀸𑀯𑀢𑁄. 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘. 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀦 𑀘 𑀦𑀺𑀭𑀢𑁆𑀣𑀓𑀯𑀘𑀦𑀁 𑀧𑀡𑁆𑀟𑀺𑀢𑀸 𑀯𑀤𑀦𑁆𑀢𑀺. 𑀓𑀲𑁆𑀫𑀸, 𑀅𑀧𑀡𑁆𑀟𑀺𑀢𑀮𑀓𑁆𑀔𑀡𑀢𑁆𑀢𑀸. 𑀲𑀢𑀺 𑀧𑀦 𑀲𑀫𑁆𑀪𑀯𑁂 𑀘 𑀩𑁆𑀬𑀪𑀺𑀘𑀸𑀭𑁂 𑀘, 𑀢𑀣𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸, 𑀲𑀸𑀢𑁆𑀣𑀓𑀢𑁆𑀢𑀸. 𑀲𑀸𑀢𑁆𑀣𑀓𑀫𑁂𑀯 𑀧𑀡𑁆𑀟𑀺𑀢𑀸 𑀯𑀤𑀦𑁆𑀢𑀺. 𑀓𑀲𑁆𑀫𑀸, 𑀧𑀡𑁆𑀟𑀺𑀢 𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁨. 𑀧𑀝𑀺𑀧𑀤𑀸 𑀅𑀪𑀺𑀜𑁆𑀜𑀸𑀯𑀯𑀢𑁆𑀣𑀸𑀦𑁂. ‘‘𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀢𑁄’’𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀢𑁄. 𑀲𑀼𑀔𑀸𑀧𑀦 𑀧𑀝𑀺𑀧𑀤𑀸, 𑀧𑀘𑁆𑀙𑀸𑀤𑀦𑁆𑀥𑀁 𑀯𑀸 𑀔𑀺𑀧𑁆𑀧𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀛𑀸𑀦𑀁 𑀲𑀼𑀔𑀧𑁆𑀧𑀝𑀺𑀧𑀤𑀁 𑀦𑀸𑀫 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀼𑀩𑁆𑀩𑀪𑀯𑁂’’𑀢𑀺 𑀆𑀲𑀦𑁆𑀦𑁂 𑀧𑀼𑀩𑁆𑀩𑀪𑀯𑁂. 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑀸 𑀦𑀸𑀫 ‘𑀓𑀺𑀮𑁂𑀲𑀦𑁆𑀢𑀭𑀸𑀬𑀺𑀓𑁄 𑀘, 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑁄 𑀘, 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑁄 𑀘, 𑀧𑀜𑁆𑀜𑀢𑁆𑀢𑀺 𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁄 𑀘, 𑀅𑀭𑀺𑀬𑀽𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑁄 𑀘. 𑀢𑀢𑁆𑀣 𑀢𑀺𑀲𑁆𑀲𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄𑀓𑀺𑀮𑁂𑀲𑀦𑁆𑀢𑀭𑀸𑀬𑀺𑀓𑁄 𑀦𑀸𑀫. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬 𑀓𑀫𑁆𑀫𑀸𑀦𑀺 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑁄 𑀦𑀸𑀫. 𑀅𑀳𑁂𑀢𑀼𑀓 𑀤𑁆𑀯𑀺𑀳𑁂𑀢𑀼𑀓𑀧𑁆𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀸 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑁄 𑀦𑀸𑀫. 𑀪𑀺𑀓𑁆𑀔𑀼 𑀪𑀸𑀯𑁂𑀞𑀺𑀢𑀸𑀦𑀁 𑀯𑀺𑀦𑀬 𑀧𑀜𑁆𑀜𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀓𑀢𑀧𑁆𑀧𑀝𑀺𑀓𑀫𑁆𑀫𑁄 𑀯𑀻𑀢𑀺𑀓𑁆𑀓𑀫𑁄 𑀧𑀜𑁆𑀜𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁄 𑀦𑀸𑀫. 𑀧𑀝𑀺𑀓𑀫𑁆𑀫𑁂𑀧𑀦𑀓𑀢𑁂 𑀅𑀦𑁆𑀢𑀭𑀸𑀬𑀺𑀓𑁄 𑀦 𑀳𑁄𑀢𑀺. 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀚𑀸𑀢𑀺𑀆𑀤𑀻𑀳𑀺 𑀉𑀧𑀯𑀤𑀺𑀢𑁆𑀯𑀸 𑀅𑀓𑁆𑀓𑁄𑀲𑀺𑀢𑁆𑀯𑀸 𑀅𑀓𑀢𑀧𑁆𑀧𑀝𑀺𑀓𑀫𑁆𑀫𑀁 𑀅𑀓𑁆𑀓𑁄𑀲𑀦𑀁 𑀅𑀭𑀺𑀬𑀽𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑁄 𑀦𑀸𑀫. 𑀇𑀥𑀧𑀺 𑀧𑀝𑀺𑀓𑀫𑁆𑀫𑁂 𑀓𑀢𑁂 𑀅𑀦𑁆𑀢𑀭𑀸𑀬𑀺𑀓𑁄 𑀦 𑀳𑁄𑀢𑀺. 𑀲𑁂𑀲𑁂𑀲𑀼 𑀢𑀻𑀲𑀼 𑀧𑀝𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺. 𑀇𑀫𑁂 𑀥𑀫𑁆𑀫𑀸 𑀇𑀫𑀲𑁆𑀫𑀺𑀁 𑀪𑀯𑁂 𑀛𑀸𑀦𑀫𑀕𑁆𑀕𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀅𑀦𑁆𑀢𑀭𑀸𑀬𑀺𑀓 𑀥𑀫𑁆𑀫 𑀯𑀺𑀫𑀼𑀢𑁆𑀢𑁄 𑀦𑀸𑀫. ‘‘𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄’’𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀺 𑀆𑀤𑀺𑀓𑀸𑀬 𑀓𑀮𑁆𑀬𑀸𑀡𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀧𑀭𑀺𑀧𑀽𑀭𑀡 𑀯𑀲𑁂𑀦 𑀞𑀺𑀢𑁄. ‘‘𑀙𑀺𑀦𑁆𑀦𑀧𑀮𑀺𑀩𑁄𑀥𑁄’’𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀸𑀤𑀻𑀦𑀺 𑀤𑀲𑀯𑀺𑀥𑀸𑀦𑀺 𑀧𑀮𑀺𑀩𑁄𑀥𑀓𑀫𑁆𑀫𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑁄. ‘‘𑀧𑀳𑀺𑀢𑀢𑁆𑀢𑁄’’𑀢𑀺, 𑀬𑀦𑁆𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁, 𑀦 𑀢𑀁 𑀅𑀧𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀲𑀫𑁆𑀫𑀧𑁆𑀧𑀥𑀸𑀦 𑀯𑀻𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀳𑀺 𑀧𑀳𑀺𑀢𑁄 𑀧𑁂𑀲𑀺𑀢𑁄 𑀅𑀦𑀧𑁂𑀓𑁆𑀔𑀺𑀢𑁄 𑀅𑀢𑁆𑀢𑀪𑀸𑀯𑁄 𑀅𑀦𑁂𑀦𑀸𑀢𑀺 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀦𑀲𑀫𑁆𑀧𑀚𑁆𑀚𑀢𑀻𑀢𑀺 𑀦𑀢𑁆𑀣𑀺’’. 𑀲𑀘𑁂 𑀧𑀜𑁆𑀘𑀧𑀥𑀸𑀦𑀺𑀬𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘𑀧𑀥𑀸𑀦𑀺𑀬𑀗𑁆𑀕𑀸𑀦𑀺 𑀦𑀸𑀫 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀢𑀸, 𑀅𑀲𑀸𑀞𑁂𑀬𑁆𑀬𑀁, 𑀆𑀭𑁄𑀕𑁆𑀬𑀁, 𑀅𑀮𑀻𑀦𑀯𑀻𑀭𑀺𑀬𑀢𑀸, 𑀧𑀜𑁆𑀜𑀯𑀦𑁆𑀢𑀢𑀸,𑀢𑀺.

𑁫𑁨. 𑀯𑀺𑀧𑀸𑀓𑀚𑁆𑀛𑀸𑀦𑁂. ‘‘𑀫𑀼𑀤𑀼𑀪𑀽𑀢𑀁’’𑀢𑀺 𑀪𑀸𑀯𑀦𑀸 𑀩𑀮𑀧𑀭𑀺𑀢𑁆𑀢𑀢𑁆𑀢𑀸𑀫𑀦𑁆𑀤𑀪𑀽𑀢𑀁. 𑀫𑀦𑁆𑀤𑀪𑀽𑀢𑀢𑁆𑀢𑀸 𑀘 𑀤𑀼𑀩𑁆𑀩𑀮𑀁. ‘‘𑀦𑀸𑀦𑀸 𑀓𑀺𑀘𑁆𑀘𑀝𑁆𑀞𑀸𑀦𑁂𑀲𑀼 𑀘𑀸’’𑀢𑀺 𑀤𑀲𑁆𑀲𑀦𑀲𑀯𑀦𑀸𑀤𑀻𑀲𑀼. ‘‘𑀳𑀻𑀦𑁂𑀲𑀼𑀧𑀺 𑀅𑀢𑁆𑀢𑀪𑀸𑀯𑁂𑀲𑀽’’𑀢𑀺 𑀅𑀳𑁂𑀢𑀼𑀓 𑀤𑁆𑀯𑀺𑀳𑁂𑀢𑀼𑀓𑀧𑀼𑀕𑁆𑀕𑀮𑁂𑀲𑀼𑀧𑀺. ‘‘𑀅𑀲𑀤𑀺𑀲𑀁𑀧𑀻’’𑀢𑀺 𑀢𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑀁𑀧𑀺 𑀓𑀫𑁆𑀫𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀁𑀧𑀺 𑀚𑀦𑁂𑀢𑀻𑀢𑀺𑀆𑀤𑀺𑀦𑀸 𑀅𑀲𑀤𑀺𑀲𑀁𑀧𑀺 𑀯𑀺𑀧𑀸𑀓𑀁 𑀚𑀦𑁂𑀢𑀺. ‘‘𑀪𑀯𑀗𑁆𑀕𑀝𑁆𑀞𑀸𑀦𑁂𑀲𑀼 𑀬𑁂𑀯𑀸’’𑀢𑀺 𑀏𑀢𑁆𑀣 𑀪𑀯𑀗𑁆𑀕 𑀲𑀤𑁆𑀤𑁂𑀦 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦 𑀘𑀼𑀢𑀺𑀝𑁆𑀞𑀸𑀦𑀸𑀦𑀺𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. ‘‘𑀓𑀼𑀲𑀮𑀲𑀤𑀺𑀲𑀫𑁂𑀯𑀸’’𑀢𑀺 𑀧𑀣𑀫𑀚𑁆𑀛𑀸𑀦𑀓𑀼𑀲𑀮𑀁 𑀧𑀣𑀫𑀚𑁆𑀛𑀸𑀦 𑀯𑀺𑀧𑀸𑀓𑀫𑁂𑀯 𑀚𑀦𑁂𑀢𑀺, 𑀤𑀼𑀢𑀻𑀬𑀚𑁆𑀛𑀸𑀦 𑀓𑀼𑀲𑀮𑀁 𑀤𑀼𑀢𑀻𑀬𑀚𑁆𑀛𑀸𑀦 𑀯𑀺𑀧𑀸𑀓𑀫𑁂𑀯 𑀚𑀦𑁂𑀢𑀻𑀢𑀺𑀆𑀤𑀺𑀦𑀸 𑀓𑀼𑀲𑀮 𑀲𑀤𑀺𑀲𑀫𑁂𑀯 𑀯𑀺𑀧𑀸𑀓𑀁 𑀚𑀦𑁂𑀢𑀺. ‘‘𑀓𑀼𑀲𑀮𑀫𑁂𑀯…𑀧𑁂… 𑀓𑁆𑀭𑀺𑀬𑀚𑁆𑀛𑀸𑀦𑀁 𑀦𑀸𑀫 𑀳𑁄𑀢𑀺’’ 𑀅𑀪𑁂𑀤𑀽 𑀧𑀘𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑁂𑀤𑀫𑁆𑀧𑀺 𑀅𑀪𑁂𑀤𑀁 𑀓𑀢𑁆𑀯𑀸 𑀉𑀧𑀘𑀸𑀭𑁄 𑀯𑁄𑀳𑀸𑀭𑁄 𑀅𑀪𑁂𑀤𑀽 𑀧𑀘𑀸𑀭𑁄.

𑁫𑁪. 𑀲𑀗𑁆𑀕𑀳𑀕𑀸𑀣𑀸 𑀯𑀡𑁆𑀡𑀦𑀸𑀬𑀁. 𑀛𑀸𑀦𑀸𑀦𑀁 𑀪𑁂𑀤𑁄 𑀛𑀸𑀦𑀪𑁂𑀤𑁄. 𑀅𑀢𑁆𑀣𑀢𑁄 𑀧𑀦 𑀛𑀸𑀦𑁂𑀳𑀺 𑀲𑀫𑁆𑀧𑀬𑁄𑀕𑀪𑁂𑀤𑁄 𑀛𑀸𑀦𑀪𑁂𑀤𑁄𑀢𑀺 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀛𑀸𑀦𑁂𑀳𑀺 𑀲𑀫𑁆𑀧𑀬𑁄𑀕𑀪𑁂𑀤𑁂𑀦𑀸’’𑀢𑀺. 𑀧𑀣𑀫𑀚𑁆𑀛𑀸𑀦𑀺𑀓𑀁 𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀢𑀫𑁂𑀯𑀸’’𑀢𑀺 𑀭𑀽𑀧𑀸𑀯𑀘𑀭 𑀫𑀸𑀦𑀲𑀫𑁂𑀯. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀉𑀧𑀭𑀺𑀲𑀗𑁆𑀕𑀳𑀕𑀸𑀣𑀸𑀬𑀁 𑀛𑀸𑀦𑀗𑁆𑀕 𑀬𑁄𑀕𑀪𑁂𑀤𑁂𑀦, 𑀓𑀢𑁆𑀯𑁂𑀓𑁂𑀓𑀦𑁆𑀢𑀼 𑀧𑀜𑁆𑀘𑀥𑀸𑀢𑀺 𑀯𑀘𑀦𑀁 𑀤𑀺𑀲𑁆𑀯𑀸 𑀇𑀥 𑀛𑀸𑀦 𑀪𑁂𑀤𑁂𑀦𑀸𑀢𑀺 𑀛𑀸𑀦𑀗𑁆𑀕𑁂𑀳𑀺 𑀲𑀫𑁆𑀧𑀬𑁄𑀕𑀪𑁂𑀤𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥 𑀛𑀸𑀦𑀪𑁂𑀤𑀲𑁆𑀲 𑀯𑀺𑀲𑀼𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀜𑁆𑀜𑁄𑀳𑀺 𑀛𑀸𑀦𑀪𑁂𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀤𑀻𑀧𑀦𑀺𑀬𑀸𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁫𑁫. 𑀅𑀭𑀽𑀧𑀘𑀺𑀢𑁆𑀢𑀤𑀻𑀧𑀦𑀺𑀬𑀁. ‘‘𑀪𑀼𑀲𑁄’’𑀢𑀺 𑀅𑀢𑀺𑀭𑁂𑀓𑀢𑀭𑀁. ‘‘𑀲𑀭𑀽𑀧𑀢𑁄’’𑀢𑀺 𑀧𑀭𑀫𑀢𑁆𑀣 𑀲𑀪𑀸𑀯𑀢𑁄. 𑀦𑀢𑁆𑀣𑀺 𑀚𑀝𑀸 𑀏𑀢𑁆𑀣𑀸𑀢𑀺 𑀅𑀚𑀝𑁄. 𑀅𑀚𑀝𑁄 𑀆𑀓𑀸𑀲𑁄𑀢𑀺 𑀅𑀚𑀝𑀸𑀓𑀸𑀲𑁄. ‘‘𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑁄’’𑀢𑀺 𑀤𑁆𑀯𑀸𑀭𑀘𑁆𑀙𑀺𑀤𑁆𑀤𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑀸𑀤𑀺𑀓𑁄 𑀆𑀓𑀸𑀲𑁄, 𑀬𑀢𑁆𑀣 𑀆𑀓𑀸𑀲 𑀓𑀲𑀺𑀡 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀓𑀲𑀺𑀡 𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀮𑀤𑁆𑀥𑁄 𑀆𑀓𑀸𑀲𑁄 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄, 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀦 𑀦𑀺𑀩𑁆𑀩𑀢𑁆𑀢𑁄 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑁄𑀢𑀺 𑀓𑀢𑁆𑀯𑀸. 𑀭𑀽𑀧𑀓𑀮𑀸𑀧𑀸𑀦𑀁 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑀪𑀽𑀢𑁄 𑀆𑀓𑀸𑀲𑁄 𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁄. ‘‘𑀅𑀦𑀦𑁆𑀢𑀪𑀸𑀯𑁂𑀦 𑀨𑀭𑀻𑀬𑀢𑀻’’𑀢𑀺 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁄𑀧𑀺𑀲𑁄 𑀅𑀦𑀦𑁆𑀢 𑀦𑀸𑀫𑀁 𑀓𑀢𑁆𑀯𑀸 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀨𑀭𑀻𑀬𑀢𑀺. ‘‘𑀤𑁂𑀯𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀢𑁆𑀣𑀽’’𑀢𑀺 𑀫𑀳𑀺𑀤𑁆𑀥𑀺𑀓𑀸𑀦𑀁 𑀕𑀸𑀫𑀦𑀕𑀭 𑀤𑁂𑀯𑀸𑀦𑀁 𑀩𑀮𑀺𑀧𑁆𑀧𑀝𑀺𑀕𑁆𑀕𑀳𑀡𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺, 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀲𑀫𑀬𑁂 𑀓𑀼𑀮 𑀤𑁂𑀯𑀢𑀸𑀦𑀁 𑀩𑀮𑀺𑀁 𑀅𑀪𑀺𑀳𑀭𑀦𑁆𑀢𑀺. ‘‘𑀩𑀮𑀺𑀁’’𑀢𑀺 𑀧𑀽𑀚𑀦𑀻𑀬 𑀯𑀢𑁆𑀣𑀼 𑀯𑀼𑀘𑁆𑀘𑀢𑀺. ‘‘𑀢𑀲𑁆𑀫𑀺𑀁’’𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂. ‘‘𑀢𑀤𑁂𑀯𑀸’’𑀢𑀺 𑀢𑀁 𑀆𑀭𑀫𑁆𑀫𑀡𑀫𑁂𑀯. 𑀓𑀼𑀲𑀮𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲𑀯𑀸, 𑀯𑀺𑀧𑀸𑀓𑀚𑁆𑀛𑀸𑀦𑁂𑀦 𑀉𑀧𑀧𑀦𑁆𑀦𑀲𑁆𑀲𑀯𑀸, 𑀓𑁆𑀭𑀺𑀬𑀚𑁆𑀛𑀸𑀦𑁂𑀦 𑀤𑀺𑀝𑁆𑀞𑀥𑀫𑁆𑀫 𑀲𑀼𑀔 𑀯𑀺𑀳𑀸𑀭𑀺𑀲𑁆𑀲𑀯𑀸, 𑀢𑀺𑀬𑁄𑀚𑁂𑀢𑀩𑁆𑀩𑀁. 𑀅𑀦𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸𑀧𑀣𑀯𑀻𑀓𑀲𑀺𑀡𑁂 𑀧𑀯𑀢𑁆𑀢𑀦𑀢𑁄 𑀛𑀸𑀦𑀁 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. ‘‘𑀏𑀓𑀤𑁂𑀲𑁂’’𑀢𑀺 𑀉𑀧𑁆𑀧𑀸𑀤𑁂𑀯𑀸 𑀞𑀺𑀢𑀺𑀬𑀁 𑀯𑀸 𑀪𑀗𑁆𑀕𑁂𑀯𑀸. 𑀅𑀦𑁆𑀢𑀭𑀳𑀺𑀢𑀢𑁆𑀢𑀸 𑀅𑀦𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀦𑀦𑁆𑀢 𑀲𑀜𑁆𑀜𑀺𑀢𑁂’’𑀢𑀺 𑀅𑀦𑀦𑁆𑀢 𑀦𑀸𑀫𑀓𑁂. ‘‘𑀅𑀦𑀦𑁆𑀢𑀦𑁆𑀢𑀺 𑀪𑀸𑀯𑀦𑀸𑀬 𑀧𑀯𑀢𑁆𑀢𑀢𑁆𑀢𑀸’’𑀢𑀺 𑀇𑀤𑀁 𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀦𑁆𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕 𑀪𑀸𑀯𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. ‘‘𑀅𑀢𑁆𑀢𑀦𑁄 𑀨𑀭𑀡𑀸𑀓𑀸𑀭 𑀯𑀲𑁂𑀦𑀸’’𑀢𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀺𑀭𑀼𑀢𑁆𑀢𑀺 𑀦𑀬𑁂𑀦𑀸’’𑀢𑀺 𑀲𑀓𑀢𑁆𑀣𑁂 𑀬𑀧𑀘𑁆𑀘𑀬𑀁 𑀓𑀢𑁆𑀯𑀸 𑀦𑀓𑀸𑀭𑀲𑁆𑀲𑀮𑁄𑀧𑁂𑀦. ‘‘𑀧𑀸𑀴𑀺𑀬𑀸 𑀦𑀲𑀫𑁂𑀢𑀻’’𑀢𑀺 𑀯𑀺𑀪𑀗𑁆𑀕 𑀧𑀸𑀴𑀺𑀬𑀸𑀦𑀲𑀫𑁂𑀢𑀺. ‘‘𑀅𑀦𑀦𑁆𑀢𑀁 𑀨𑀭𑀢𑀻’’𑀢𑀺 𑀅𑀦𑀦𑁆𑀢𑀁 𑀅𑀦𑀦𑁆𑀢𑀦𑁆𑀢𑀺 𑀨𑀭𑀢𑀺. ‘‘𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑁄’’𑀢𑀺 𑀢𑀲𑁆𑀲 𑀅𑀪𑀸𑀯 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁. ‘‘𑀦𑁂𑀯𑀢𑁆𑀣𑀻’’𑀢𑀺 𑀦𑀢𑁆𑀣𑀺. ‘‘𑀅𑀲𑁆𑀲𑀸’’𑀢𑀺 𑀘𑀢𑀼𑀢𑁆𑀣𑀸 𑀭𑀼𑀧𑁆𑀧𑀚𑁆𑀛𑀸𑀦𑀲𑁆𑀲. 𑀅𑀣𑀯𑀸𑀢𑀺𑀆𑀤𑀻𑀲𑀼 ‘‘𑀧𑀝𑀼𑀲𑀜𑁆𑀜𑀸 𑀓𑀺𑀘𑁆𑀘𑀲𑁆𑀲𑀸’’𑀢𑀺 𑀩𑁆𑀬𑀢𑁆𑀢𑀲𑀜𑁆𑀜𑀸 𑀓𑀺𑀘𑁆𑀘𑀲𑁆𑀲. ‘‘𑀲𑀗𑁆𑀔𑀸𑀭𑀸𑀯𑀲𑁂𑀲 𑀲𑀼𑀔𑀼𑀫𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀢𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀏𑀢𑁆𑀣𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀫𑀼𑀤𑁆𑀥𑀪𑀽𑀢𑀁’’𑀢𑀺 𑀫𑀢𑁆𑀣𑀓𑀧𑀢𑁆𑀢𑀁. ‘‘𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁’’𑀢𑀺 𑀭𑀸𑀚𑀸 𑀆𑀕𑀘𑁆𑀙𑀢𑀻𑀢𑀺𑀆𑀤𑀻𑀲𑀼 𑀯𑀺𑀬 𑀧𑀥𑀸𑀦 𑀓𑀣𑀸𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀢𑀲𑁆𑀲𑁂𑀯𑀸’’𑀢𑀺 𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲𑁂𑀯. 𑀓𑀼𑀲𑀮𑀪𑀽𑀢𑀁 𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀲𑁂𑀓𑁆𑀔𑀸𑀦𑀜𑁆𑀘 𑀓𑀼𑀲𑀮𑀪𑀽𑀢𑀲𑁆𑀲 𑀤𑀼𑀢𑀻𑀬𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀭𑀳𑀸 𑀧𑀦 𑀢𑀺𑀯𑀺𑀥𑁄. 𑀢𑀢𑁆𑀣, 𑀏𑀓𑁄𑀧𑀣𑀫𑀸 𑀭𑀼𑀧𑁆𑀧𑁂𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀣𑀫𑀸𑀭𑀼𑀧𑁆𑀧𑀁 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀤𑀼𑀢𑀻𑀬𑀸 𑀭𑀼𑀧𑁆𑀧𑀁 𑀉𑀧𑁆𑀧𑀸𑀤𑁂𑀢𑀺. 𑀢𑀲𑁆𑀲 𑀓𑀼𑀲𑀮𑀪𑀽𑀢𑀁 𑀧𑀣𑀫𑀸 𑀭𑀼𑀧𑁆𑀧𑀁 𑀓𑁆𑀭𑀺𑀬𑀪𑀽𑀢𑀲𑁆𑀲 𑀤𑀼𑀢𑀻𑀬𑀸 𑀭𑀼𑀧𑁆𑀧𑀲𑁆𑀲 𑀆𑀭𑀫𑁆𑀫𑀡𑀁. 𑀏𑀓𑁄𑀧𑀣𑀫𑀸 𑀭𑀼𑀧𑁆𑀧𑁂𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀦 𑀢𑀫𑁂𑀯 𑀧𑀣𑀫𑀸 𑀭𑀼𑀧𑁆𑀧𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀢𑀻𑀬𑀸 𑀭𑀼𑀧𑁆𑀧𑀁 𑀉𑀧𑁆𑀧𑀸𑀤𑁂𑀢𑀺. 𑀏𑀓𑁄 𑀤𑀼𑀢𑀻𑀬𑀸 𑀭𑀼𑀧𑁆𑀧𑁂𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀘𑁆𑀙𑀢𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑁆𑀭𑀺𑀬𑀪𑀽𑀢𑀁 𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀓𑁆𑀭𑀺𑀬𑀪𑀽𑀢𑀲𑁆𑀲𑁂𑀯 𑀤𑀼𑀢𑀻𑀬𑀸𑀭𑀼𑀧𑁆𑀧𑀲𑁆𑀲 𑀆𑀭𑀫𑁆𑀫𑀡𑀁. 𑀢𑁂𑀦𑀸𑀳 ‘‘𑀯𑀺𑀜𑁆𑀜𑀸𑀡𑀁 𑀦𑀸𑀫𑀸’’𑀢𑀺𑀆𑀤𑀺𑀁.

𑀅𑀭𑀽𑀧𑀘𑀺𑀢𑁆𑀢𑀸𑀦𑀼𑀤𑀻𑀧𑀦𑀸.

𑁫𑁭. 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑁂. ‘‘𑀚𑀮𑀧𑁆𑀧𑀯𑀸𑀳𑁄’’𑀢𑀺 𑀉𑀤𑀓𑀥𑀸𑀭𑀸𑀲𑀗𑁆𑀖𑀸𑀝𑁄. ‘‘𑀧𑀪𑀯𑀢𑁄’’𑀢𑀺𑀆𑀤𑀺𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁄. ‘‘𑀬𑀣𑀸𑀳𑀸’’𑀢𑀺 𑀓𑀣𑀁 𑀧𑀸𑀴𑀺𑀬𑀁 𑀆𑀳. ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺 𑀲𑁄 𑀓𑀢𑀫𑁄. ‘‘𑀅𑀬𑀁 𑀧𑀻’’𑀢𑀺 𑀅𑀬𑀁 𑀅𑀭𑀺𑀬𑀫𑀕𑁆𑀕𑁄𑀧𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀅𑀭𑀺𑀬𑀫𑀕𑁆𑀕𑁄, 𑀓𑀣𑀁 𑀬𑀸𑀯 𑀅𑀦𑀼𑀧𑀸𑀤𑀺𑀲𑁂𑀲 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀲𑀯𑀢𑀺 𑀲𑀦𑁆𑀤𑀢𑀻𑀢𑀺 𑀆𑀳 ‘‘𑀆𑀦𑀼𑀪𑀸𑀯𑀧𑁆𑀨𑀭𑀡𑀯𑀲𑁂𑀦𑀸’’𑀢𑀺. 𑀧𑀸𑀴𑀺𑀬𑀁 𑀕𑀗𑁆𑀕𑀸𑀤𑀻𑀦𑀺 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀦𑀸𑀫𑀸𑀦𑀺. ‘‘𑀲𑀫𑀼𑀤𑁆𑀤 𑀦𑀺𑀦𑁆𑀦𑀸’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑀁 𑀦𑀺𑀦𑁆𑀦𑀸 𑀦𑀫𑀺𑀢𑀸. ‘‘𑀧𑁄𑀡𑀸’’𑀢𑀺 𑀅𑀦𑀼𑀧𑀢𑀺𑀢𑀸. ‘‘𑀧𑀩𑁆𑀪𑀸𑀭𑀸’’𑀢𑀺 𑀅𑀥𑁄𑀯𑀸𑀳𑀺𑀢𑀸. ‘‘𑀓𑀺𑀮𑁂𑀲𑀸𑀦𑀁’’𑀢𑀺 𑀅𑀦𑀼𑀧𑀕𑀫𑀦𑁂 𑀓𑀫𑁆𑀫𑀧𑀤𑀁. 𑀧𑀸𑀴𑀺𑀬𑀁 ‘‘𑀖𑀝𑁄’’𑀢𑀺 𑀉𑀤𑀓 𑀧𑀼𑀡𑁆𑀡𑀖𑀝𑁄. ‘‘𑀦𑀺𑀓𑀼𑀚𑁆𑀚𑁄’’𑀢𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑁄. ‘‘𑀦𑁄𑀧𑀘𑁆𑀘𑀸𑀯 𑀫𑀢𑀻’’𑀢𑀺 𑀧𑀼𑀦 𑀦𑁄𑀕𑀺𑀮𑀢𑀺. ‘‘𑀦 𑀧𑀼𑀦𑁂𑀢𑀻’’𑀢𑀺 𑀦 𑀧𑀼𑀦 𑀏𑀢𑀺 𑀦𑀼𑀧𑀕𑀘𑁆𑀙𑀢𑀺 𑀅𑀭𑀺𑀬𑀲𑀸𑀯𑀓𑁄. ‘‘𑀦 𑀧𑀘𑁆𑀘𑁂𑀢𑀻’’𑀢𑀺 𑀦 𑀧𑀝𑀺 𑀏𑀢𑀺. 𑀢𑀤𑀢𑁆𑀣𑀁 𑀯𑀤𑀢𑀺 ‘‘𑀦 𑀧𑀘𑁆𑀘𑀸𑀕𑀘𑁆𑀙𑀢𑀻’’𑀢𑀺. 𑀏𑀯𑀁 𑀢𑀁 𑀅𑀦𑀺𑀯𑀢𑁆𑀢𑀕𑀫𑀦𑀁 𑀧𑀸𑀴𑀺𑀲𑀸𑀥𑀓𑁂𑀳𑀺 𑀤𑀻𑀧𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀺𑀲𑀸𑀥𑀓𑁂𑀳𑀺 𑀧𑀓𑀸𑀲𑁂𑀢𑀼𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀬𑀢𑁄’’𑀢𑀺 𑀬𑀁 𑀓𑀸𑀭𑀡𑀸. ‘‘𑀢𑁂’’𑀢𑀺 𑀧𑀼𑀣𑀼𑀚𑁆𑀚𑀦𑀸. ‘‘𑀤𑀼𑀲𑁆𑀲𑀻𑀮𑀸’’𑀢𑀺 𑀦𑀺𑀲𑁆𑀲𑀻𑀮𑀸. ‘‘𑀉𑀫𑁆𑀫𑀢𑁆𑀢𑀓𑀸’’𑀢𑀺 𑀧𑀺𑀢𑁆𑀢𑀼𑀫𑁆𑀫𑀢𑁆𑀢𑀓𑀸. ‘‘𑀔𑀺𑀢𑁆𑀢 𑀘𑀺𑀢𑁆𑀢𑀸’’𑀢𑀺 𑀙𑀝𑁆𑀝𑀺𑀢𑀧𑀓𑀢𑀺 𑀘𑀺𑀢𑁆𑀢𑀸𑀬𑀓𑁆𑀔𑀼𑀫𑁆𑀫𑀢𑁆𑀢𑀓𑀸. ‘‘𑀤𑀼𑀧𑁆𑀧𑀜𑁆𑀜𑀸’’𑀢𑀺 𑀦𑀺𑀧𑁆𑀧𑀜𑁆𑀜𑀸. ‘‘𑀏𑀴𑀫𑀽𑀕𑀸’’𑀢𑀺 𑀤𑀼𑀧𑁆𑀧𑀜𑁆𑀜𑀢𑀸𑀬 𑀏𑀯 𑀧𑀕𑁆𑀖𑀭𑀺𑀢𑀮𑀸𑀮 𑀫𑀼𑀔 𑀫𑀽𑀕𑀸. ‘‘𑀢𑀲𑁆𑀫𑀺𑀁 𑀫𑀕𑁆𑀕𑁂 𑀏𑀯𑀸’’𑀢𑀺 𑀅𑀝𑁆𑀞𑀗𑁆𑀕𑀻𑀓𑁂 𑀅𑀭𑀺𑀬𑀫𑀕𑁆𑀕𑁂 𑀏𑀯. 𑀲𑁄 𑀧𑀦 𑀫𑀕𑁆𑀕𑁄 𑀧𑀣𑀫 𑀫𑀕𑁆𑀕𑁄, 𑀤𑀼𑀢𑀻𑀬 𑀫𑀕𑁆𑀕𑁄, 𑀢𑀢𑀻𑀬 𑀫𑀕𑁆𑀕𑁄, 𑀘𑀢𑀼𑀢𑁆𑀣 𑀫𑀕𑁆𑀕𑁄,𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. ‘‘𑀆𑀤𑀺𑀢𑁄 𑀧𑀚𑁆𑀚𑀦𑀁’’𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀆𑀤𑀺𑀫𑁆𑀳𑀺 𑀧𑀣𑀫 𑀫𑀕𑁆𑀕𑀲𑁄𑀢𑀲𑁆𑀲 𑀧𑀚𑁆𑀚𑀦𑀁 𑀕𑀫𑀦𑀁. 𑀧𑀝𑀺𑀮𑀸𑀪𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑁄𑀢𑀸𑀧𑀢𑁆𑀢𑀺𑀬𑀸’’𑀢𑀺 𑀲𑁄𑀢𑀲𑁆𑀲 𑀆𑀧𑀚𑁆𑀚𑀦𑁂𑀦. ‘‘𑀅𑀥𑀺𑀕𑀫𑁆𑀫𑀫𑀸𑀦𑁄’’𑀢𑀺 𑀧𑀝𑀺𑀮𑀩𑁆𑀪𑀫𑀸𑀦𑁄. 𑀲𑀩𑁆𑀩𑁂 𑀩𑁄𑀥𑀺𑀧𑀓𑁆𑀔𑀺𑀬 𑀥𑀫𑁆𑀫𑀸 𑀅𑀦𑀺𑀯𑀢𑁆𑀢 𑀕𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸 𑀲𑁄𑀢𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁. 𑀉𑀧𑀭𑀺𑀲𑀫𑁆𑀩𑁄𑀥𑀺 𑀏𑀯 𑀧𑀭𑀸𑀬𑀦𑀁 𑀬𑁂𑀲𑀁 𑀢𑁂 𑀉𑀧𑀭𑀺𑀲𑀫𑁆𑀩𑁄𑀥𑀺 𑀧𑀭𑀸𑀬𑀦𑀸. 𑀧𑀭𑀸𑀬𑀦𑀦𑁆𑀢𑀺 𑀘 𑀧𑀝𑀺𑀲𑀭𑀡𑀁. 𑀓𑀣𑀁 𑀲𑁄𑀢𑀸𑀧𑀢𑁆𑀢𑀺 𑀯𑀘𑀦𑀁 𑀫𑀕𑁆𑀕𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀣𑀫 𑀫𑀕𑁆𑀕 𑀲𑀗𑁆𑀔𑀸𑀢𑀸𑀬 𑀲𑁄𑀢𑀸𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺. ‘‘𑀫𑀕𑁆𑀕𑁂𑀢𑀻’’𑀢𑀺 𑀕𑀯𑁂𑀲𑀢𑀺. 𑀫𑀸𑀭𑁂𑀦𑁆𑀢 𑀕𑀫𑀦𑁄𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀫𑀕𑁆𑀕𑁄𑀢𑀺 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄’’𑀢𑀺.

𑁫𑁮. 𑀲𑀓𑀤𑀸𑀕𑀸𑀫𑀺 𑀫𑀕𑁆𑀕𑁂. ‘‘𑀲𑀓𑀺𑀁 𑀆𑀕𑀘𑁆𑀙𑀢𑀻’’𑀢𑀺 𑀇𑀢𑁄𑀕𑀦𑁆𑀢𑁆𑀯𑀸 𑀧𑀼𑀦 𑀇𑀥 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀻𑀮𑁂𑀦𑀸’’𑀢𑀺 𑀧𑀓𑀢𑀺𑀲𑀪𑀸𑀯𑁂𑀦. 𑀓𑀸𑀫𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀓𑀸𑀫𑀮𑁄𑀓𑀸𑀕𑀫𑀦𑀸. 𑀓𑀺𑀮𑁂𑀲𑀸. 𑀢𑁂𑀲𑀁 𑀲𑀩𑁆𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀪𑀸𑀯𑁂𑀦. 𑀧𑀸𑀴𑀺𑀬𑀁 ‘‘𑀏𑀓𑀘𑁆𑀘𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀓𑀢𑁆𑀢𑀼 𑀅𑀢𑁆𑀣𑁂𑀲𑀸𑀫𑀺𑀯𑀘𑀦𑀁. 𑀏𑀓𑀘𑁆𑀘𑁂𑀦 𑀧𑀼𑀕𑁆𑀕𑀮𑁂𑀦 𑀅𑀧𑁆𑀧𑀳𑀻𑀦𑀸 𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀳𑀩𑁆𑀬𑀢𑀁’’𑀢𑀺 𑀲𑀳𑀸𑀬𑀪𑀸𑀯𑀁. ‘‘𑀆𑀕𑀸𑀫𑀻𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀤𑀢𑀺 ‘‘𑀆𑀕𑀦𑁆𑀢𑁆𑀯𑀸 𑀇𑀢𑁆𑀣𑀢𑁆𑀢’’𑀦𑁆𑀢𑀺. 𑀆𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀆𑀕𑀦𑁆𑀢𑁆𑀯𑀸. 𑀇𑀢𑁆𑀣𑀁 𑀪𑀸𑀯𑁄 𑀇𑀢𑁆𑀣𑀢𑁆𑀢𑀁. 𑀇𑀫𑀁 𑀓𑀸𑀫𑀢𑁆𑀢𑀪𑀸𑀯𑀁 𑀆𑀕𑀦𑁆𑀢𑁆𑀯𑀸, 𑀢𑀲𑁆𑀫𑀸 𑀆𑀕𑀸𑀫𑀻 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀅𑀬𑀜𑁆𑀘 𑀅𑀢𑁆𑀣𑁄’’𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺𑀆𑀤𑀺𑀓𑁄 𑀅𑀢𑁆𑀣𑁄. ‘‘𑀓𑀺𑀮𑁂𑀲 𑀕𑀢𑀺𑀯𑀲𑁂𑀦𑀸’’𑀢𑀺 𑀓𑀸𑀫𑀮𑁄𑀓𑀸 𑀕𑀫𑀦 𑀓𑀺𑀮𑁂𑀲 𑀕𑀢𑀺𑀯𑀲𑁂𑀦. 𑀫𑀕𑁆𑀕𑀲𑀳𑀸𑀬𑁂𑀦 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦 𑀕𑀢𑀺𑀓𑀸 𑀳𑁄𑀦𑁆𑀢𑀺. 𑀅𑀬𑀁 𑀫𑀕𑁆𑀕𑀲𑀳𑀸𑀬𑁄𑀛𑀸𑀦𑀸𑀦𑀼𑀪𑀸𑀯𑁄 𑀦𑀸𑀫. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺𑀁. ‘‘𑀤𑁂𑀯𑀮𑁄𑀓𑀢𑁄’’𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁄𑀧𑀺 𑀲𑀗𑁆𑀕𑀳𑀺𑀢𑁄. 𑀧𑀘𑁆𑀙𑀺𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀆𑀕𑀫𑀦𑀲𑀻𑀮𑁄 𑀆𑀕𑀦𑁆𑀢𑁆𑀯𑀸. 𑀦 𑀆𑀕𑀦𑁆𑀢𑁆𑀯𑀸 𑀅𑀦𑀸𑀕𑀦𑁆𑀢𑁆𑀯𑀸. ‘‘𑀢𑁂𑀦𑀸’’𑀢𑀺 𑀅𑀦𑀸𑀕𑀫𑀦𑁂𑀦. ‘‘𑀦𑀸𑀦𑀢𑁆𑀣𑀸 𑀲𑀫𑁆𑀪𑀯𑀢𑁄’’𑀢𑀺 𑀤𑁆𑀯𑀻𑀲𑀼 𑀇𑀢𑁆𑀣𑀢𑁆𑀢𑀲𑀤𑁆𑀤𑁂𑀲𑀼 𑀏𑀓𑀲𑁆𑀫𑀺𑀁 𑀇𑀫𑀁 𑀓𑀸𑀫𑀸𑀯𑀘𑀭 𑀮𑁄𑀓𑀦𑁆𑀢𑀺 𑀏𑀓𑀲𑁆𑀫𑀺𑀁 𑀇𑀫𑀁 𑀫𑀦𑀼𑀲𑁆𑀲 𑀮𑁄𑀓𑀦𑁆𑀢𑀺 𑀏𑀯𑀁 𑀦𑀸𑀦𑀢𑁆𑀣𑀸𑀦𑀁 𑀅𑀲𑀫𑁆𑀪𑀯𑀢𑁄. 𑀧𑀸𑀴𑀺𑀬𑀁 ‘‘𑀲𑀩𑁆𑀬𑀸 𑀩𑀚𑁆𑀛𑁄’’𑀢𑀺 𑀘𑁂𑀢𑁄𑀤𑀼𑀓𑁆𑀔 𑀲𑀗𑁆𑀔𑀸𑀢𑁂𑀦 𑀘𑁂𑀢𑀲𑀺𑀓𑀭𑁄𑀕𑀸 𑀩𑀸𑀥𑁂𑀦 𑀲𑀳𑀺𑀢𑁄. 𑀢𑁂𑀦𑀸𑀳 ‘‘𑀢𑁂𑀳𑀺 𑀧𑀝𑀺𑀖𑀸𑀦𑀼𑀲𑀬𑀲𑁆𑀲𑀸’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀢𑁂’’𑀢𑀺 𑀧𑀼𑀣𑀼𑀚𑁆𑀚𑀦 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄. 𑀲𑀩𑁆𑀬𑀸 𑀩𑀚𑁆𑀛𑀸𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀘𑁆𑀙𑀺𑀫𑀲𑁆𑀲 𑀯𑀸𑀓𑁆𑀬𑀲𑁆𑀲𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄 𑀢𑁂𑀦 𑀤𑀝𑁆𑀞𑀩𑁆𑀩𑀸𑀢𑀺 𑀯𑀸𑀓𑁆𑀬𑀲𑁆𑀲. ‘‘𑀤𑁆𑀯𑀻𑀲𑀼 𑀲𑀓𑀤𑀸𑀕𑀸𑀫𑀻𑀲𑀽’’𑀢𑀺 𑀆𑀕𑀦𑁆𑀢𑁆𑀯𑀸 𑀇𑀢𑁆𑀣𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦 𑀅𑀢𑁆𑀣𑁂𑀦 𑀲𑀓𑀤𑀸𑀕𑀸𑀫𑀺𑀦𑀸𑀫𑀓𑁂𑀲𑀼 𑀤𑁆𑀯𑀻𑀲𑀼 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀻𑀲𑀼. ‘‘𑀧𑀼𑀭𑀺𑀫𑀲𑁆𑀲𑀸’’𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲. ‘‘𑀅𑀦𑀜𑁆𑀜 𑀲𑀸𑀥𑀸𑀭𑀡𑁂 𑀦𑁂𑀯𑀸’’𑀢𑀺 𑀤𑀼𑀢𑀻𑀬 𑀨𑀮𑀝𑁆𑀞𑀸𑀤𑀻𑀳𑀺 𑀅𑀲𑀸𑀫𑀜𑁆𑀜𑁂𑀦𑁂𑀯. 𑀩𑁆𑀭𑀳𑁆𑀫𑀮𑁄𑀓𑁂𑀞𑀺𑀢𑀸𑀦𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫 𑀢𑀸𑀤𑀺𑀪𑀸𑀯𑁄 𑀦𑀢𑁆𑀣𑀺 𑀯𑀺𑀬 𑀤𑀼𑀢𑀻𑀬 𑀨𑀮𑀝𑁆𑀞𑀸𑀦𑀁 𑀲𑀓𑀤𑀸𑀕𑀸𑀫𑀺 𑀪𑀸𑀯𑁄𑀧𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀧𑀣𑀫 𑀤𑀼𑀢𑀻𑀬 𑀨𑀮𑀝𑁆𑀞𑀸𑀧𑀻’’𑀢𑀺𑀆𑀤𑀺𑀁. ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀯𑀘𑀦𑀁. ‘‘𑀇𑀢𑀺 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. ‘‘𑀳𑁂𑀝𑁆𑀞𑀽 𑀧𑀭𑀽𑀧𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀉𑀧𑀭𑀺𑀢𑁄 𑀆𑀕𑀦𑁆𑀢𑁆𑀯𑀸 𑀳𑁂𑀝𑁆𑀞𑀽𑀧𑀧𑀢𑁆𑀢𑀺 𑀘, 𑀳𑁂𑀝𑁆𑀞𑀢𑁄 𑀆𑀕𑀦𑁆𑀢𑁆𑀯𑀸 𑀉𑀧𑀭𑀽𑀧𑀧𑀢𑁆𑀢𑀺 𑀘𑀸𑀢𑀺 𑀏𑀯𑀁 𑀳𑁂𑀝𑁆𑀞𑀽𑀧𑀭𑀽𑀧𑀧𑀢𑁆𑀢𑀺𑀯𑀲𑁂𑀦. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀺 𑀤𑀼𑀢𑀻𑀬 𑀮𑀤𑁆𑀥 𑀕𑀼𑀡𑀯𑀘𑀦𑀁. ‘‘𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸’’𑀢𑀺 𑀧𑀜𑁆𑀘𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀇𑀥 𑀓𑀸𑀫𑀮𑁄𑀓𑁂 𑀦𑀺𑀝𑁆𑀞𑀸 𑀅𑀦𑀼𑀧𑀸𑀤𑀺𑀲𑁂𑀲 𑀦𑀺𑀩𑁆𑀩𑀸𑀦𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑁄 𑀧𑀦𑀸’’𑀢𑀺 𑀲𑀓𑀤𑀸𑀕𑀸𑀫𑀺 𑀧𑀼𑀕𑁆𑀕𑀮𑁄 𑀧𑀦. 𑀬𑁂𑀲𑀁 𑀧𑀦 𑀅𑀝𑁆𑀞𑀓𑀣𑀸 𑀘𑀭𑀺𑀬𑀸𑀦𑀁 𑀅𑀢𑁆𑀣𑁄, 𑀢𑁂𑀲𑀁 𑀅𑀢𑁆𑀣𑁂𑀲𑁄 𑀲𑀓𑀤𑀸𑀕𑀸𑀫𑀺 𑀧𑀼𑀕𑁆𑀕𑀮𑁄 𑀧𑀜𑁆𑀘𑀯𑀺𑀥𑁄𑀯 𑀯𑀼𑀢𑁆𑀢𑁄, 𑀦 𑀙𑀝𑁆𑀞𑁄 𑀧𑀼𑀕𑁆𑀕𑀮𑁄𑀢𑀺 𑀬𑁄𑀚𑀦𑀸. 𑀬𑁂𑀲𑀁 𑀧𑀦 𑀇𑀫𑀁 𑀮𑁄𑀓𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀲𑀁 𑀅𑀢𑁆𑀣𑁂 𑀙𑀝𑁆𑀞𑁄𑀧𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦…𑀧𑁂… 𑀆𑀕𑀢𑁄 𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀓𑀺𑀁 𑀆𑀕𑀫𑀦𑀝𑁆𑀞𑁂𑀦 𑀆𑀕𑀢𑁄 𑀬𑁂𑀯𑀸’’𑀢𑀺 𑀲𑀓𑀺𑀁 𑀆𑀕𑀫𑀦𑀝𑁆𑀞𑁂𑀦 𑀲𑀓𑀤𑀸𑀕𑀸𑀫𑀻𑀲𑀼 𑀆𑀕𑀢𑁄𑀬𑁂𑀯. 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀧𑀺 𑀧𑀣𑀫 𑀨𑀮𑀝𑁆𑀞 𑀪𑀽𑀢𑀸 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀢𑀸𑀬𑀁 𑀲𑀡𑁆𑀞𑀺𑀢𑀸 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀬𑀁’’𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀪𑀸𑀯𑁂. 𑀇𑀤𑀜𑁆𑀘 𑀦𑀺𑀤𑀲𑁆𑀲𑀦 𑀯𑀘𑀦𑀫𑀢𑁆𑀢𑀁. 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑀸𑀧𑀺 𑀤𑀼𑀢𑀻𑀬 𑀨𑀮𑀝𑁆𑀞𑀪𑀽𑀢𑀸 𑀲𑀓𑀺𑀁 𑀆𑀕𑀫𑀦𑀧𑁆𑀧𑀓𑀢𑀺𑀬𑀁 𑀲𑀡𑁆𑀞𑀺𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀓𑀲𑁆𑀫𑀸, 𑀢𑀲𑁆𑀫𑀺𑀁 𑀔𑀡𑁂 𑀢𑀁 𑀲𑀪𑀸𑀯𑀸𑀦𑀢𑀺 𑀯𑀢𑁆𑀢𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑁄𑀧𑀺 𑀲𑁄 𑀙𑀩𑁆𑀩𑀻𑀥𑁄 𑀧𑀼𑀕𑁆𑀕𑀮𑁄 𑀇𑀥…𑀧𑁂… 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀦 𑀬𑀁 𑀯𑀼𑀢𑁆𑀢𑀁 𑀯𑀺𑀪𑀸𑀯𑀦𑀺𑀬𑀁 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀧𑀜𑁆𑀘𑀫𑀓𑁄𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺. 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸, 𑀧𑀜𑁆𑀘𑀫𑀓𑁄 𑀏𑀯 𑀇𑀥 𑀲𑀓𑀤𑀸𑀕𑀸𑀫𑀺𑀧𑀤𑁂 𑀅𑀥𑀺𑀧𑁆𑀧𑁂𑀢𑁂𑀲𑀢𑀺 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀓𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 𑀲𑀺𑀬𑀼𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀚𑀦𑀓𑀪𑀽𑀢𑁄 𑀲𑀫𑀸𑀦𑁄. ‘‘𑀜𑀸𑀬𑀸𑀕𑀢𑀸 𑀏𑀯𑀸’’𑀢𑀺 𑀬𑀼𑀢𑁆𑀢𑀺𑀢𑁄 𑀧𑀭𑀫𑁆𑀧𑀭𑀸𑀕𑀢𑀸 𑀏𑀯. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺𑀁. ‘‘𑀅𑀯𑀺𑀭𑀼𑀤𑁆𑀥𑁄’’𑀢𑀺 𑀜𑀸𑀬𑁂𑀦 𑀅𑀯𑀺𑀭𑀼𑀤𑁆𑀥𑁄.

𑁫𑁯. 𑀑𑀭𑀫𑁆𑀪𑀸𑀕𑁄 𑀦𑀸𑀫 𑀳𑁂𑀝𑁆𑀞𑀸𑀪𑀸𑀕𑁄 𑀓𑀸𑀫𑀮𑁄𑀓𑁄. 𑀑𑀭𑀫𑁆𑀪𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀓𑀸𑀫𑀭𑀸𑀕 𑀩𑁆𑀬𑀸𑀧𑀸𑀤 𑀲𑀁𑀬𑁄𑀚𑀦𑀸𑀤𑀻𑀦𑀺. ‘‘𑀲𑁄’’𑀢𑀺 𑀅𑀦𑀸𑀕𑀸𑀫𑀺 𑀧𑀼𑀕𑁆𑀕𑀮𑁄.

𑁬𑁦. 𑀫𑀳𑀧𑁆𑀨𑀮𑀁 𑀓𑀭𑁄𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀳𑀧𑁆𑀨𑀮 𑀓𑀸𑀭𑀺𑀦𑁄. 𑀢𑁂𑀲𑀁 𑀪𑀸𑀯𑁄 ‘‘𑀫𑀳𑀧𑁆𑀨𑀮 𑀓𑀸𑀭𑀺𑀢𑀸’’. 𑀲𑀻𑀮𑀸𑀤𑀺 𑀕𑀼𑀡𑁄. ‘‘𑀅𑀭𑀳𑀢𑀻’’𑀢𑀺 𑀧𑀝𑀺𑀕𑁆𑀕𑀳𑀺𑀢𑀼𑀁 𑀅𑀭𑀳𑀢𑀺. ‘‘𑀅𑀭𑀳𑀢𑁄’’𑀢𑀺 𑀅𑀭𑀳𑀦𑁆𑀢𑀲𑁆𑀲. ‘‘𑀦𑀺𑀩𑁆𑀩𑀘𑀦𑀁’’𑀢𑀺 𑀦𑀺𑀭𑀼𑀢𑁆𑀢𑀺. 𑀯𑀺𑀕𑁆𑀕𑀳 𑀯𑀸𑀓𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀸𑀬 𑀢𑀣𑀸 𑀦 𑀯𑀘𑀺𑀢𑁆𑀢𑀸𑀦𑀺, 𑀲𑀼𑀜𑁆𑀜𑀢𑀧𑁆𑀧𑀝𑀺𑀧𑀤𑀸𑀬 𑀢𑀣𑀸 𑀦 𑀯𑀘𑀺𑀢𑁆𑀢𑀸𑀦𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 ‘‘𑀲𑀼𑀤𑁆𑀥𑀺𑀓 𑀲𑀼𑀜𑁆𑀜𑀢𑀸𑀬𑀸’’𑀢𑀺 𑀲𑀼𑀤𑁆𑀥𑀺𑀓𑀲𑀼𑀜𑁆𑀜𑀢𑀯𑀸𑀭𑁂. ‘‘𑀲𑀼𑀜𑁆𑀜𑀢𑀧𑁆𑀧𑀝𑀺𑀧𑀤𑀸𑀬𑀸’’𑀢𑀺 𑀲𑀼𑀜𑁆𑀜𑀢𑀧𑁆𑀧𑀝𑀺𑀧𑀤𑀸𑀯𑀸𑀭𑁂. ‘‘𑀲𑀘𑁆𑀘 𑀲𑀢𑀺𑀧𑀝𑁆𑀞𑀸𑀦 𑀯𑀺𑀪𑀗𑁆𑀕𑁂𑀲𑀼 𑀧𑀦𑀸’’𑀢𑀺 𑀲𑀘𑁆𑀘 𑀯𑀺𑀪𑀗𑁆𑀕 𑀲𑀢𑀺𑀧𑀝𑁆𑀞𑀸𑀦 𑀯𑀺𑀪𑀗𑁆𑀕𑁂𑀲𑀼 𑀧𑀦, 𑀲𑀩𑁆𑀩𑀁 𑀘𑀺𑀢𑁆𑀢 𑀯𑀟𑁆𑀠𑀦𑀁 𑀧𑀸𑀴𑀺 𑀅𑀝𑁆𑀞𑀓𑀣𑀸𑀲𑀼 𑀤𑁂𑀲𑀦𑀸𑀯𑀸𑀭𑁂 𑀯𑀺𑀘𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑁬𑁧. 𑀨𑀮𑀘𑀺𑀢𑁆𑀢𑁂. 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀥𑀺𑀕𑀢𑀁 𑀨𑀮𑀁 𑀲𑁄𑀢𑀸𑀧𑀢𑁆𑀢𑀺 𑀨𑀮𑀁. 𑀢𑀢𑁆𑀣 ‘‘𑀅𑀥𑀺𑀕𑀢𑀁’’𑀢𑀺 𑀧𑀝𑀺𑀮𑀤𑁆𑀥𑀁. 𑀅𑀝𑁆𑀞𑀗𑁆𑀕𑀻𑀓 𑀨𑀮𑀁 𑀲𑀦𑁆𑀥𑀸𑀬 ‘‘𑀢𑁂𑀦 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀭𑀼𑀢𑁆𑀢𑀻’’𑀢𑀺 𑀯𑀺𑀕𑁆𑀕𑀳𑁄.

𑁬𑁨. 𑀢𑀦𑀼𑀪𑀽𑀢𑁂𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀼𑀁. ‘‘𑀢𑀸𑀦𑀻’’𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. ‘‘𑀧𑀝𑀽 𑀦𑀻’’𑀢𑀺𑀢𑀺𑀓𑁆𑀔𑀸𑀦𑀺. ‘‘𑀲𑁄’’𑀢𑀺 𑀘𑀢𑀼𑀢𑁆𑀣 𑀫𑀕𑁆𑀕𑁄. ‘‘𑀢𑀸 𑀘𑀸’’𑀢𑀺 𑀭𑀽𑀧𑀭𑀸𑀕, 𑀅𑀭𑀽𑀧𑀭𑀸𑀕, 𑀫𑀸𑀦, 𑀉𑀤𑁆𑀥𑀘𑁆𑀘, 𑀅𑀯𑀺𑀚𑁆𑀚𑀸𑀤𑀬𑁄 𑀘. ‘‘𑀅𑀜𑁆𑀜𑁂 𑀘𑀸’’𑀢𑀺 𑀢𑁂𑀳𑀺 𑀤𑀲𑀳𑀺 𑀲𑀁𑀬𑁄𑀚𑀦𑁂𑀳𑀺 𑀅𑀜𑁆𑀜𑁂 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀺𑀓𑁂, 𑀲𑀩𑁆𑀩𑁂𑀧𑀺 𑀧𑀸𑀧 𑀥𑀫𑁆𑀫𑁂 𑀘.

𑁬𑁩. 𑀓𑀺𑀭𑀺𑀬 𑀘𑀺𑀢𑁆𑀢 𑀯𑀺𑀘𑀸𑀭𑀡𑀸𑀬𑀁. 𑀦 𑀕𑀳𑀺𑀢𑀁 𑀇𑀢𑀺 𑀅𑀬𑀁 𑀧𑀼𑀘𑁆𑀙𑀸. 𑀅𑀪𑀸𑀯𑀸 𑀇𑀢𑀺 𑀅𑀬𑀁 𑀯𑀺𑀲𑀚𑁆𑀚𑀦𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀲𑁆𑀲𑀸’’𑀢𑀺 𑀓𑀺𑀭𑀺𑀬𑀸𑀦𑀼𑀢𑁆𑀢𑀭𑀲𑁆𑀲. ‘‘𑀦𑀺𑀭𑀦𑀼𑀲𑀬𑀲𑀦𑁆𑀢𑀸𑀦𑁂𑀧𑀻’’𑀢𑀺 𑀅𑀦𑀼𑀲𑀬 𑀭𑀳𑀺𑀢𑁂 𑀅𑀭𑀳𑀦𑁆𑀢 𑀲𑀦𑁆𑀢𑀸𑀦𑁂𑀧𑀺. ‘‘𑀇𑀢𑀻’’𑀢𑀺 𑀯𑀸𑀓𑁆𑀬 𑀧𑀭𑀺𑀲𑀫𑀸𑀧𑀦𑀫𑀢𑁆𑀢𑀁. ‘‘𑀯𑀼𑀘𑁆𑀘𑀢𑁂’’𑀢𑀺 𑀯𑀺𑀲𑀚𑁆𑀚𑀦𑀸 𑀓𑀣𑀻𑀬𑀢𑁂. 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀦𑀁 𑀅𑀦𑀼𑀧𑁆𑀧𑀸𑀤𑁄. 𑀅𑀦𑀼𑀧𑁆𑀧𑀸𑀤𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀬𑁂𑀲𑀁 𑀢𑁂 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀸. 𑀢𑁂𑀲𑀁 𑀪𑀸𑀯𑁄𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀧𑀸𑀓𑀜𑁆𑀘 𑀚𑀦𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀚𑀦𑁂𑀢𑀻𑀢𑀺 𑀆𑀳 ‘‘𑀓𑀼𑀲𑀮…𑀧𑁂… 𑀓𑀢𑁆𑀯𑀸’’𑀢𑀺. 𑀢𑀢𑁆𑀣, ‘‘𑀓𑀢𑁆𑀯𑀸’’𑀢𑀺 𑀲𑀸𑀥𑁂𑀢𑁆𑀯𑀸. 𑀲𑀘𑁂𑀧𑀺 𑀓𑀭𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. ‘‘𑀓𑁄𑀘𑀻’’𑀢𑀺 𑀅𑀩𑁆𑀬𑀢𑁆𑀢𑁄 𑀓𑁄𑀘𑀺 𑀅𑀭𑀺𑀬𑀲𑀸𑀯𑀓𑁄. 𑀢𑀤𑀸 𑀨𑀮 𑀘𑀺𑀢𑁆𑀢𑀫𑁂𑀯 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄’’𑀢𑀺 𑀅𑀧𑁆𑀧𑀝𑀺𑀩𑀸𑀳𑀺𑀬𑁄 𑀆𑀦𑀼𑀪𑀸𑀯𑁄 𑀅𑀲𑁆𑀲𑀸𑀢𑀺 𑀲𑀫𑀸𑀲𑁄.

𑁬𑁪. ‘‘𑀆𑀤𑀺 𑀅𑀦𑁆𑀢 𑀧𑀤𑁂𑀲𑁆𑀯𑁂 𑀯𑀸’’𑀢𑀺𑀆𑀤𑀺𑀫𑁆𑀳𑀺 𑀤𑁆𑀯𑀸𑀤𑀲𑀸 𑀓𑀼𑀲𑀮𑀸𑀦𑀻𑀢𑀺 𑀘, 𑀅𑀦𑁆𑀢𑁂 𑀓𑁆𑀭𑀺𑀬 𑀘𑀺𑀢𑁆𑀢𑀸𑀦𑀺 𑀯𑀻𑀲𑀢𑀻𑀢𑀺 𑀘 𑀧𑀤𑁂𑀲𑀼. 𑀭𑀽𑀧𑁂 𑀧𑀭𑀺𑀬𑀸 𑀧𑀦𑁆𑀦𑀸𑀦𑀺 𑀘𑀺𑀢𑁆𑀢𑀸𑀦𑀺. 𑀅𑀭𑀽𑀧𑁂 𑀧𑀭𑀺𑀬𑀸 𑀧𑀦𑁆𑀦𑀸𑀦𑀺 𑀘𑀺𑀢𑁆𑀢𑀸𑀦𑀺. ‘‘𑀧𑀣𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸’’𑀢𑀺 𑀧𑀣𑀫𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑀼𑀁. ‘‘𑀲𑀸𑀫𑀜𑁆𑀜 𑀨𑀮𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀼𑀢𑁆𑀢𑀁’’ 𑀅𑀝𑁆𑀞𑀲𑀸𑀮𑀺𑀦𑀺𑀬𑀁. 𑀅𑀢𑁆𑀣𑀢𑁄 𑀧𑀦 𑀥𑀫𑁆𑀫 𑀯𑀺𑀲𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕 𑀨𑀮 𑀦𑀺𑀩𑁆𑀩𑀸𑀦 𑀲𑀗𑁆𑀔𑀸𑀢𑁄 𑀥𑀫𑁆𑀫 𑀯𑀺𑀲𑁂𑀲𑁄 𑀮𑁄𑀓𑀼𑀢𑁆𑀢𑀭𑀪𑀽𑀫𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀯𑀢𑁆𑀣𑀸 𑀪𑀽𑀫𑀺 𑀏𑀯 𑀦𑀺𑀧𑁆𑀧𑀭𑀺𑀬𑀸𑀬𑀪𑀽𑀫𑀺. 𑀓𑀲𑁆𑀫𑀸, 𑀅𑀯𑀢𑁆𑀣𑀸 𑀯𑀦𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀭𑀽𑀧𑀢𑁄 𑀮𑀤𑁆𑀥𑀢𑁆𑀢𑀸. 𑀇𑀢𑀭𑀸 𑀑𑀓𑀸𑀲𑀪𑀽𑀫𑀺 𑀦𑀺𑀧𑁆𑀧𑀭𑀺𑀬𑀸𑀬 𑀪𑀽𑀫𑀺 𑀦 𑀳𑁄𑀢𑀺. 𑀓𑀲𑁆𑀫𑀸, 𑀧𑀜𑁆𑀜𑀢𑁆𑀢𑀺𑀬𑀸 𑀫𑀺𑀲𑁆𑀲𑀓𑀢𑁆𑀢𑀸. ‘‘𑀥𑀫𑁆𑀫𑀸𑀦𑀁 𑀢𑀁 𑀢𑀁 𑀅𑀯𑀢𑁆𑀣𑀸 𑀯𑀺𑀲𑁂𑀲𑀯𑀲𑁂𑀦𑁂𑀯 𑀲𑀺𑀤𑁆𑀥𑀸’’𑀢𑀺 𑀏𑀢𑁂𑀦 𑀅𑀯𑀢𑁆𑀣𑀸 𑀪𑀽𑀫𑀺 𑀏𑀯 𑀧𑀥𑀸𑀦 𑀪𑀽𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑁄 𑀑𑀴𑀸𑀭𑀺𑀓𑀸𑀓𑀸𑀭𑁄 𑀓𑀸𑀫𑀸𑀯𑀘𑀭𑀢𑀸 𑀦𑀸𑀫. 𑀪𑀯𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑁄 𑀫𑀚𑁆𑀛𑀺𑀫𑀸𑀓𑀸𑀭𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑀢𑀸 𑀦𑀸𑀫. 𑀢𑀸𑀲𑀁 𑀢𑀡𑁆𑀳𑀸𑀦𑀁 𑀅𑀯𑀺𑀲𑀬𑀪𑀽𑀢𑁄 𑀲𑀡𑁆𑀳 𑀲𑀼𑀔𑀼𑀫𑀸𑀓𑀸𑀭𑁄 𑀮𑁄𑀓𑀼𑀢𑁆𑀢𑀭𑀢𑀸 𑀦𑀸𑀫. 𑀳𑀻𑀦𑀸𑀦𑀁 𑀅𑀓𑀼𑀲𑀮 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀳𑀻𑀦𑀸 𑀅𑀧𑀸𑀬𑀪𑀽𑀫𑀺𑀬𑁄. 𑀧𑀡𑀻𑀢𑀸𑀦𑀁 𑀓𑀼𑀲𑀮 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀧𑀡𑀻𑀢𑀸 𑀲𑀼𑀕𑀢𑀺 𑀪𑀽𑀫𑀺𑀬𑁄. 𑀢𑀢𑁆𑀣 𑀘 𑀦𑀸𑀦𑀸 𑀅𑀓𑀼𑀲𑀮 𑀓𑀫𑁆𑀫𑀸𑀦𑀁 𑀯𑀸 𑀦𑀸𑀦𑀸 𑀓𑀼𑀲𑀮 𑀓𑀫𑁆𑀫𑀸𑀦𑀁 𑀯𑀸 𑀑𑀴𑀸𑀭𑀺𑀓 𑀲𑀼𑀔𑀼𑀫𑀢𑀸 𑀯𑀲𑁂𑀦 𑀦𑀸𑀦𑀸 𑀤𑀼𑀕𑁆𑀕𑀢𑀺 𑀪𑀽𑀫𑀺𑀬𑁄 𑀦𑀸𑀦𑀸 𑀲𑀼𑀕𑀢𑀺 𑀪𑀽𑀫𑀺𑀬𑁄 𑀘 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳.

𑁬𑁫. 𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑀁 𑀦𑀸𑀫-𑀇𑀢𑁆𑀣 𑀫𑁂𑀓𑀽𑀦 𑀦𑀯𑀼𑀢𑀺, 𑀧𑁆𑀧𑀪𑁂𑀤𑀁 𑀧𑀦 𑀫𑀸𑀦𑀲𑀦𑁆𑀢𑀺 𑀧𑀸𑀤𑀤𑁆𑀯𑀬𑀁. 𑀅𑀧𑀭𑀤𑁆𑀥𑀁 𑀦𑀸𑀫 𑀏𑀓𑀯𑀻𑀲𑀲𑀢𑀁𑀯𑀸𑀣, 𑀯𑀺𑀪𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸𑀢𑀺 𑀧𑀸𑀤𑀤𑁆𑀯𑀬𑀁. 𑀢𑀁 𑀇𑀫𑀺𑀦𑀸 𑀦 𑀲𑀫𑁂𑀢𑀺. 𑀓𑀣𑀁 𑀦 𑀲𑀫𑁂𑀢𑀺. 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀓𑀮𑀫𑁆𑀧𑀺 𑀕𑀸𑀣𑀁 𑀏𑀓𑀽𑀦 𑀦𑀯𑀼𑀢𑀺𑀧𑁆𑀧𑀪𑁂𑀤𑀁 𑀫𑀸𑀦𑀲𑀁 𑀏𑀓𑀯𑀻𑀲 𑀲𑀢𑀁 𑀓𑀢𑁆𑀯𑀸 𑀯𑀺𑀪𑀚𑀦𑁆𑀢𑀻-𑀢𑀺 𑀏𑀯𑀁 𑀏𑀓𑀯𑀸𑀓𑁆𑀬𑀁 𑀓𑀢𑁆𑀯𑀸 𑀬𑁄𑀚𑀦𑀁 𑀜𑀸𑀧𑁂𑀢𑀺. ‘‘𑀧𑀣𑀫𑀚𑁆𑀛𑀸𑀦 𑀲𑀤𑀺𑀲𑀝𑁆𑀞𑁂𑀦𑀸’’𑀢𑀺 𑀮𑁄𑀓𑀺𑀬 𑀧𑀣𑀫𑀚𑁆𑀛𑀸𑀦 𑀲𑀤𑀺𑀲𑀝𑁆𑀞𑁂𑀦. 𑀬𑀁 𑀘𑀢𑀼𑀭𑀗𑁆𑀕𑀻𑀓𑀁, 𑀢𑀁 𑀲𑀬𑀫𑁂𑀯 𑀤𑀼𑀢𑀻𑀬𑀚𑁆𑀛𑀸𑀦𑀦𑁆𑀢𑀺 𑀲𑀺𑀤𑁆𑀥𑀁. 𑀬𑀁 𑀢𑀺𑀬𑀗𑁆𑀕𑀻𑀓𑀁, 𑀢𑀁 𑀲𑀬𑀫𑁂𑀯 𑀢𑀢𑀻𑀬𑀚𑁆𑀛𑀸𑀦𑀦𑁆𑀢𑀺 𑀲𑀺𑀤𑁆𑀥𑀁. 𑀬𑀁 𑀤𑀼𑀯𑀗𑁆𑀕𑀻𑀓𑀁, 𑀢𑀁 𑀲𑀬𑀫𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺 𑀲𑀺𑀤𑁆𑀥𑀁. 𑀬𑀁 𑀧𑀼𑀦 𑀤𑀼𑀯𑀗𑁆𑀕𑀻𑀓𑀁, 𑀢𑀁 𑀲𑀬𑀫𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀦𑁆𑀢𑀺 𑀲𑀺𑀤𑁆𑀥𑀁. ‘‘𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀺𑀪𑀸𑀯𑀦𑀺𑀬𑀁 𑀛𑀸𑀦𑀗𑁆𑀕𑀯𑀲𑁂𑀦 𑀧𑀣𑀫𑀚𑁆𑀛𑀸𑀦 𑀲𑀤𑀺𑀲𑀢𑁆𑀢𑀸 𑀧𑀣𑀫𑀚𑁆𑀛𑀸𑀦𑀜𑁆𑀘𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀸𑀤𑀺 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀧𑀜𑁆𑀘𑀥𑀸 𑀯𑀺𑀪𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀇𑀢𑀭𑀸𑀦𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺 𑀲𑀸𑀢𑀺𑀲𑁆𑀲𑀬𑀢𑁄 𑀛𑀸𑀦𑀸𑀦𑀺 𑀦𑀸𑀫 𑀲𑀺𑀬𑀼𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑀸𑀦𑀺 𑀳𑀻’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀢𑀸𑀦𑀻’’𑀢𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀦𑀺. ‘‘𑀉𑀧𑁂𑀘𑁆𑀘𑀸’’𑀢𑀺 𑀉𑀧𑀕𑀦𑁆𑀢𑁆𑀯𑀸. ‘‘𑀛𑀸𑀧𑁂𑀦𑁆𑀢𑀻’’𑀢𑀺 𑀤𑀳𑀦𑁆𑀢𑀺. 𑀧𑀓𑀢𑀺𑀬𑀸 𑀏𑀯 𑀲𑀺𑀤𑁆𑀥𑁄 𑀳𑁄𑀢𑀺, 𑀦 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀲𑀺𑀤𑁆𑀥𑁄. ‘‘𑀓𑀺𑀘𑁆𑀘’’𑀦𑁆𑀢𑀺 𑀧𑀜𑁆𑀘𑀗𑁆𑀕𑀻𑀓 𑀪𑀸𑀯𑀢𑁆𑀣𑀸𑀬 𑀓𑀢𑁆𑀢𑀩𑁆𑀩 𑀓𑀺𑀘𑁆𑀘𑀁. ‘‘𑀢𑁂𑀦 𑀧𑀘𑁆𑀘𑀬 𑀯𑀺𑀲𑁂𑀲𑁂𑀦𑀸’’𑀢𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀦𑀸 𑀧𑀘𑁆𑀘𑀬 𑀯𑀺𑀲𑁂𑀲𑁂𑀦. ‘‘𑀢𑀲𑁆𑀫𑀺𑀁’’𑀢𑀺 𑀧𑀘𑁆𑀘𑀬 𑀯𑀺𑀲𑁂𑀲𑁂. 𑀬𑀣𑀸𑀮𑁄𑀓𑀺𑀬𑀚𑁆𑀛𑀸𑀦𑁂𑀲𑀼 𑀉𑀧𑀘𑀸𑀭𑀪𑀽𑀢𑀸 𑀪𑀸𑀯𑀦𑀸 𑀓𑀸𑀘𑀺 𑀯𑀺𑀢𑀓𑁆𑀓 𑀯𑀺𑀭𑀸𑀕 𑀪𑀸𑀯𑀦𑀸 𑀦𑀸𑀫 𑀳𑁄𑀢𑀺…𑀧𑁂… 𑀓𑀸𑀘𑀺 𑀭𑀽𑀧 𑀯𑀺𑀭𑀸𑀕 𑀪𑀸𑀯𑀦𑀸 𑀦𑀸𑀫. 𑀅𑀲𑀜𑁆𑀜𑀺 𑀕𑀸𑀫𑀻𑀦𑀁 𑀧𑀦 𑀲𑀜𑁆𑀜𑀸 𑀯𑀺𑀭𑀸𑀕 𑀪𑀸𑀯𑀦𑀸 𑀦𑀸𑀫 𑀳𑁄𑀢𑀺. 𑀏𑀯𑀫𑁂𑀯𑀦𑁆𑀢𑀺 𑀬𑁄𑀚𑀦𑀸. ‘‘𑀲𑀸’’𑀢𑀺 𑀉𑀧𑀘𑀸𑀭 𑀪𑀸𑀯𑀦𑀸.‘‘𑀉𑀧𑁂𑀓𑁆𑀔𑀸 𑀲𑀳𑀕𑀢𑀁 𑀯𑀸’’𑀢𑀺 𑀏𑀢𑁆𑀣 𑀯𑀸 𑀲𑀤𑁆𑀤𑁂𑀦 𑀭𑀽𑀧𑀲𑀫𑀢𑀺𑀓𑁆𑀓𑀫𑀁 𑀯𑀸 𑀲𑀜𑁆𑀜𑀸 𑀲𑀫𑀢𑀺𑀓𑁆𑀓𑀫𑀁 𑀯𑀸𑀢𑀺 𑀅𑀯𑀼𑀢𑁆𑀢𑀁 𑀯𑀺𑀓𑀧𑁆𑀧𑁂𑀢𑀺. 𑀆𑀤𑀺𑀓𑀫𑁆𑀫𑀺𑀓𑀓𑀸𑀮𑁂 𑀏𑀯𑀁 𑀳𑁄𑀢𑀼, 𑀯𑀲𑀺𑀪𑀽𑀢𑀓𑀸𑀮𑁂 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀛𑀸𑀦𑁂𑀲𑀽’’𑀢𑀺𑀆𑀤𑀺𑀁. 𑀦𑀸𑀦𑀸𑀲𑀢𑁆𑀢𑀺𑀬𑀼𑀢𑁆𑀢𑀸 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀦𑀸𑀦𑀸𑀲𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀺 ‘‘𑀓𑀸𑀘𑀻’’𑀢𑀺𑀆𑀤𑀺𑀦𑀸. 𑀬𑀸 𑀉𑀧𑀘𑀸𑀭 𑀪𑀸𑀯𑀦𑀸. ‘‘𑀯𑀺𑀢𑀓𑁆𑀓𑀁 𑀯𑀺𑀭𑀸𑀚𑁂𑀢𑀼𑀁’’𑀢𑀺 𑀯𑀺𑀢𑀓𑁆𑀓𑀁 𑀯𑀺𑀕𑀫𑁂𑀢𑀼𑀁. 𑀅𑀢𑁆𑀢𑀦𑁄 𑀛𑀸𑀦𑀁 𑀅𑀯𑀺𑀢𑀓𑁆𑀓𑀁 𑀓𑀸𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑀺𑀓𑁆𑀓𑀸𑀫𑁂𑀢𑀼𑀁’’𑀢𑀺. 𑀲𑀸 𑀉𑀧𑀘𑀸𑀭 𑀪𑀸𑀯𑀦𑀸. 𑀲𑁂𑀲𑀸𑀲𑀼𑀧𑀺 𑀉𑀧𑀘𑀸𑀭 𑀪𑀸𑀯𑀦𑀸𑀲𑀼.

𑁬𑁬. (𑀓) ‘‘𑀲𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸. ‘‘𑀯𑀺𑀧𑀲𑁆𑀲𑀦𑀸 𑀧𑀸𑀓𑀢𑀺𑀓𑀸 𑀏𑀯𑀸’’𑀢𑀺𑀓𑀸𑀘𑀺 𑀯𑀺𑀭𑀸𑀕 𑀪𑀸𑀯𑀦𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀺𑀬𑀸𑀫𑁂𑀢𑀼𑀁’’𑀢𑀺 𑀅𑀯𑀺𑀢𑀓𑁆𑀓𑀫𑁂𑀯 𑀳𑁄𑀢𑀽𑀢𑀺 𑀯𑀤𑀫𑀸𑀦𑀸 𑀯𑀺𑀬 𑀯𑀯𑀢𑁆𑀣𑀧𑁂𑀢𑀼𑀁. ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀧𑀸𑀤𑀓𑀯𑀸𑀤𑀺𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀫𑁆𑀫𑀲𑀻𑀬𑀢𑀻’’𑀢𑀺 𑀇𑀤𑀁 𑀛𑀸𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀲𑀫𑁆𑀫𑀲𑀻𑀬𑀢𑀺 𑀲𑀫𑀦𑀼𑀧𑀲𑁆𑀲𑀻𑀬𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣. 𑀬𑀢𑁄 𑀬𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀬𑁂 𑀬𑁂 𑀲𑀫𑀸𑀧𑀢𑁆𑀢𑀺 𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑁄𑀢𑀺. 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺 𑀲𑀤𑀺𑀲𑁄𑀯 𑀳𑁄𑀢𑀺. 𑀲𑀫𑁆𑀫𑀲𑀺𑀢𑀲𑀫𑀸𑀧𑀢𑁆𑀢𑀺 𑀲𑀤𑀺𑀲𑁄𑀢𑀺 𑀅𑀢𑁆𑀣𑁄𑀢𑀺. 𑀏𑀢𑁆𑀣 𑀳𑀺 ‘‘𑀬𑀢𑁄 𑀬𑀢𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺 𑀏𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺. ‘‘𑀧𑀸𑀤𑀓𑀚𑁆𑀛𑀸𑀦𑁂 𑀲𑀢𑀻’’𑀢𑀺 𑀏𑀢𑁂𑀦 𑀅𑀬𑀁 𑀯𑀸𑀤𑁄𑀧𑀺 𑀧𑀸𑀤𑀓𑀚𑁆𑀛𑀸𑀦𑁂𑀦 𑀯𑀺𑀦𑀸 𑀦𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀧𑀲𑁆𑀲𑀦𑀸𑀧𑀺…𑀧𑁂… 𑀧𑀢𑁆𑀢𑀸 𑀳𑁄𑀢𑀻’’𑀢𑀺 𑀏𑀢𑁂𑀦 𑀇𑀫𑀲𑁆𑀫𑀺𑀁 𑀯𑀸𑀤𑁂𑀧𑀺 𑀯𑀺𑀧𑀲𑁆𑀲𑀦𑀸 𑀦𑀺𑀬𑀸𑀫𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀮𑁄𑀓𑀺𑀬𑀚𑁆𑀛𑀸𑀦𑁂𑀲𑀽’’𑀢𑀺𑀆𑀤𑀺𑀁. 𑀓𑀸𑀫𑀜𑁆𑀘𑁂𑀢𑁆𑀣…𑀧𑁂… 𑀅𑀯𑀺𑀭𑁄𑀥𑁄 𑀯𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀣𑀁. 𑀧𑀜𑁆𑀘𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀳𑀺 𑀧𑀣𑀫𑀚𑁆𑀛𑀸𑀦𑀸𑀤𑀻𑀦𑀺 𑀲𑀫𑁆𑀫𑀲𑀢𑁄 𑀉𑀧𑁆𑀧𑀦𑁆𑀦𑀫𑀕𑁆𑀕𑁄 𑀧𑀣𑀫𑀢𑁆𑀣𑁂𑀭𑀯𑀸𑀤𑁂𑀦 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑁄, 𑀤𑀼𑀢𑀻𑀬 𑀯𑀸𑀤𑁂𑀦 𑀧𑀣𑀫𑀸𑀤𑀺𑀚𑁆𑀛𑀸𑀦𑀺𑀓𑁄 𑀆𑀧𑀚𑁆𑀚𑀢𑀻𑀢𑀺 𑀤𑁆𑀯𑁂𑀧𑀺 𑀯𑀸𑀤𑀸 𑀯𑀺𑀭𑀼𑀚𑁆𑀛𑀦𑁆𑀢𑀺. 𑀢𑀢𑀻𑀬 𑀯𑀸𑀤𑁂𑀦 𑀧𑀦𑁂𑀢𑁆𑀣 𑀬𑀁 𑀇𑀘𑁆𑀙𑀢𑀺, 𑀢𑀁 𑀛𑀸𑀦𑀺𑀓𑁄 𑀳𑁄𑀢𑀻𑀢𑀺 𑀢𑁂 𑀘 𑀯𑀸𑀤𑀸 𑀦 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀅𑀚𑁆𑀛𑀸𑀲𑀬𑁄 𑀘 𑀲𑀸𑀢𑁆𑀣𑀓𑁄 𑀳𑁄𑀢𑀻𑀢𑀺 𑀏𑀯𑀁 𑀅𑀯𑀺𑀭𑀼𑀤𑁆𑀥𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀧𑀦 𑀬𑀁 𑀇𑀘𑁆𑀙𑀢𑀺, 𑀢𑀁 𑀛𑀸𑀦𑀺𑀓𑁄 𑀳𑁄𑀢𑀺. 𑀇𑀘𑁆𑀙𑀸𑀬 𑀧𑀦 𑀅𑀲𑀢𑀺, 𑀯𑀺𑀭𑁄𑀥𑁄𑀬𑁂𑀯. 𑀢𑁂𑀦𑀸𑀳 ‘‘𑀇𑀫𑁂 𑀧𑀦 𑀯𑀸𑀤𑀸. …𑀧𑁂…. 𑀯𑀺𑀭𑁄𑀥𑁄 𑀧𑀭𑀺𑀳𑀭𑀺𑀢𑀼𑀁’’𑀢𑀺. 𑀧𑀸𑀴𑀺𑀬𑀁 ‘‘𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂𑀢𑀁 𑀢𑀁 𑀛𑀸𑀦𑀜𑁆𑀘 𑀛𑀸𑀦𑀲𑀳𑀕𑀢𑀜𑁆𑀘 𑀔𑀦𑁆𑀥 𑀧𑀜𑁆𑀘𑀓𑀁 𑀦𑀺𑀘𑁆𑀘 𑀲𑀼𑀔 𑀅𑀢𑁆𑀢 𑀚𑀻𑀯𑀢𑁄 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺. ‘‘𑀦 𑀧𑀓𑁆𑀔𑀦𑁆𑀤𑀢𑀻’’𑀢𑀺 𑀦 𑀧𑀯𑀺𑀲𑀢𑀺. ‘‘𑀲𑀦𑁆𑀦𑀺𑀲𑀸𑀤𑁂𑀢𑀩𑁆𑀩𑀁’’𑀢𑀺 𑀲𑀦𑁆𑀦𑀺𑀲𑀺𑀦𑁆𑀦𑀁 𑀓𑀸𑀢𑀩𑁆𑀩𑀁. ‘‘𑀏𑀓𑁄𑀤𑀺𑀓𑀸𑀢𑀩𑁆𑀩𑀁’’𑀢𑀺 𑀏𑀓𑀫𑀼𑀔𑀁 𑀓𑀸𑀢𑀩𑁆𑀩𑀁. ‘‘𑀲𑀫𑀸𑀤𑀳𑀸𑀢𑀩𑁆𑀩𑀁’’𑀢𑀺 𑀲𑀼𑀝𑁆𑀞𑀼 𑀞𑀧𑁂𑀢𑀩𑁆𑀩𑀁. ‘‘𑀦𑀺𑀲𑁆𑀲𑀸𑀬𑀸’’𑀢𑀺 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁭. (𑀓) 𑀯𑀸𑀤𑀯𑀺𑀘𑀸𑀭𑀡𑀸𑀬𑀁. 𑀉𑀧𑀘𑀸𑀭 𑀪𑀸𑀯𑀦𑀸 𑀏𑀯 𑀉𑀧𑀭𑀺𑀚𑁆𑀛𑀸𑀦𑁂 𑀛𑀸𑀦𑀗𑁆𑀕𑀁 𑀦𑀺𑀬𑀸𑀫𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀧𑀦 𑀅𑀚𑁆𑀛𑀸𑀲𑀬𑁄 𑀏𑀯 𑀉𑀧𑀭𑀺𑀚𑁆𑀛𑀸𑀦𑁂 𑀛𑀸𑀦𑀗𑁆𑀕𑀁 𑀦𑀺𑀬𑀸𑀫𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀚𑁆𑀛𑀸𑀲𑀬𑁄 𑀏𑀯𑀸’’𑀢𑀺 𑀏𑀯 𑀲𑀤𑁆𑀤𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀦𑀺𑀯𑀢𑁆𑀢𑁂𑀢𑀺. ‘‘𑀇𑀥 𑀉𑀧𑀘𑀸𑀭 𑀪𑀸𑀯𑀦𑀸 𑀏𑀯𑀸’’𑀢𑀺 𑀏𑀯 𑀲𑀤𑁆𑀤𑁂𑀦 𑀅𑀚𑁆𑀛𑀸𑀲𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀏𑀢𑁂𑀲𑀼 𑀳𑀺 𑀤𑁆𑀯𑀻𑀲𑀼 𑀲𑀳 𑀪𑀸𑀯𑀻𑀲𑀼 𑀉𑀧𑀘𑀸𑀭 𑀪𑀸𑀯𑀦𑀸 𑀏𑀯 𑀧𑀥𑀸𑀦𑀁 𑀳𑁄𑀢𑀺. 𑀅𑀚𑁆𑀛𑀸𑀲𑀬𑁄 𑀧𑀦 𑀢𑀲𑁆𑀲 𑀦𑀸𑀦𑀸 𑀲𑀢𑁆𑀢𑀺𑀬𑁄𑀕𑀁 𑀲𑀸𑀥𑁂𑀢𑀺. ‘‘𑀅𑀚𑁆𑀛𑀸𑀲𑀬 𑀲𑀸𑀫𑀜𑁆𑀜𑀁 𑀲𑀡𑁆𑀞𑀸𑀢𑀻’’𑀢𑀺 𑀫𑀕𑁆𑀕𑁂 𑀬𑀁 𑀮𑀤𑁆𑀥𑀩𑁆𑀩𑀁 𑀳𑁄𑀢𑀺, 𑀢𑀁 𑀮𑀩𑁆𑀪𑀢𑀼, 𑀫𑀬𑁆𑀳𑀁 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬 𑀲𑀸𑀫𑀜𑁆𑀜𑀁 𑀲𑀡𑁆𑀞𑀸𑀢𑀺. ‘‘𑀢𑀲𑁆𑀫𑀺’’𑀦𑁆𑀢𑀺 𑀅𑀚𑁆𑀛𑀸𑀲𑀬 𑀯𑀺𑀲𑁂𑀲𑁂. ‘‘𑀲𑁄’’𑀢𑀺 𑀅𑀚𑁆𑀛𑀸𑀲𑀬 𑀯𑀺𑀲𑁂𑀲𑁄. 𑀓𑀲𑁆𑀫𑀸 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀘𑁆𑀙𑀺 𑀢𑀺𑀘𑁆𑀙𑀺𑀢…𑀧𑁂… 𑀦𑀺𑀩𑁆𑀩𑀢𑁆𑀢𑀦𑀁’’𑀢𑀺. ‘‘𑀲𑀩𑁆𑀩𑀚𑁆𑀛𑀸𑀦𑁂𑀲𑀼 𑀘𑀺𑀡𑁆𑀡𑀯𑀲𑀺𑀪𑀽𑀢𑀸𑀦𑀁’’𑀢𑀺 𑀇𑀤𑀁 𑀲𑀫𑀸𑀧𑀚𑁆𑀚𑀦𑀦𑁆𑀢𑀺 𑀘 𑀦𑀺𑀩𑁆𑀩𑀢𑁆𑀢𑀦𑀦𑁆𑀢𑀺 𑀘 𑀧𑀤 𑀤𑁆𑀯𑀬𑁂 𑀲𑀫𑁆𑀩𑀦𑁆𑀥 𑀯𑀘𑀦𑀁. ‘‘𑀯𑀺𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁆𑀣𑀸𑀬 𑀏𑀯𑀸’’𑀢𑀺 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸 𑀯𑀺𑀲𑁂𑀲𑀢𑁆𑀣𑀸𑀬 𑀏𑀯. 𑀬𑀲𑁆𑀫𑀸 𑀧𑀦 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑁂𑀓𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀬 𑀯𑀼𑀝𑁆𑀞𑀺𑀢 𑀲𑀫𑀸𑀧𑀢𑁆𑀢𑀺 𑀥𑀫𑁆𑀫 𑀲𑀫𑁆𑀫𑀲𑀦𑀁 𑀆𑀕𑀢𑀁, 𑀦 𑀧𑀦 𑀅𑀜𑁆𑀜𑀚𑁆𑀛𑀸𑀦 𑀲𑀫𑁆𑀫𑀲𑀦𑀁. 𑀢𑀲𑁆𑀫𑀸 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀧𑀤𑁂𑀲𑀼 ‘‘𑀕𑀳𑀧𑀢𑀻’’𑀢𑀺 𑀆𑀮𑀧𑀦 𑀯𑀘𑀦𑀁. ‘‘𑀯𑀺𑀯𑀺𑀘𑁆𑀘𑁂𑀯𑀸’’𑀢𑀺 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀏𑀯. 𑀯𑀺𑀯𑀺𑀢𑁆𑀢𑁄 𑀯𑀺𑀕𑀢𑁄 𑀳𑀼𑀢𑁆𑀯𑀸 𑀏𑀯. ‘‘𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 𑀲𑀼𑀝𑁆𑀞𑀼 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸. ‘‘𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. ‘‘𑀅𑀪𑀺𑀲𑀜𑁆𑀘𑁂𑀢𑀬𑀺𑀢’’𑀦𑁆𑀢𑀺 𑀲𑀼𑀲𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀲𑀁𑀯𑀺𑀤𑀳𑀺𑀢𑀁. ‘‘𑀢𑀢𑁆𑀣 𑀞𑀺𑀢𑁄’’𑀢𑀺 𑀢𑀲𑁆𑀫𑀺𑀁 𑀧𑀣𑀫𑀚𑁆𑀛𑀸𑀦𑁂 𑀅𑀧𑀭𑀺𑀳𑀻𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄. ‘‘𑀫𑁂𑀢𑁆𑀢𑀸𑀘𑁂𑀢𑁄 𑀯𑀺𑀫𑀼𑀢𑁆𑀢𑀻’’𑀢𑀺 𑀫𑁂𑀢𑁆𑀢𑀸𑀛𑀸𑀦𑀲𑀗𑁆𑀔𑀸𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀜𑁆𑀜𑀢𑁆𑀣 𑀅𑀮𑀕𑁆𑀕𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺. 𑀢𑀣𑀸 𑀓𑀭𑀼𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀫𑀼𑀤𑀺𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. ‘‘𑀯𑀺𑀯𑁂𑀓𑀚’’𑀦𑁆𑀢𑀺 𑀓𑀸𑀬𑀯𑀺𑀯𑁂𑀓 𑀘𑀺𑀢𑁆𑀢𑀯𑀺𑀯𑁂𑀓𑀸𑀦𑀁 𑀯𑀲𑁂𑀦 𑀚𑀸𑀢𑀁. ‘‘𑀧𑀻𑀢𑀺 𑀲𑀼𑀔𑀁’’𑀢𑀺 𑀧𑀻𑀢𑀺𑀬𑀸 𑀘 𑀲𑀼𑀔𑁂𑀦 𑀘 𑀲𑀫𑁆𑀧𑀦𑁆𑀦𑀁. 𑀅𑀣𑀯𑀸, 𑀯𑀺𑀯𑁂𑀓𑁂𑀳𑀺 𑀚𑀸𑀢𑀸𑀦𑀺 𑀧𑀻𑀢𑀺 𑀲𑀼𑀔𑀸𑀦𑀺 𑀅𑀲𑁆𑀲𑀸𑀢𑀺 𑀯𑀺𑀯𑁂𑀓𑀚𑀁 𑀧𑀻𑀢𑀺 𑀲𑀼𑀔𑀁. 𑀫𑀚𑁆𑀛𑁂 𑀦𑀺𑀕𑁆𑀕𑀳𑀺𑀢𑀸𑀕𑀫𑁄. 𑀭𑀽𑀧𑀫𑁂𑀯 𑀭𑀽𑀧𑀕𑀢𑀁, 𑀯𑁂𑀤𑀦𑀸 𑀏𑀯 𑀯𑁂𑀤𑀦𑀸 𑀕𑀢𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀲𑁄. 𑀕𑀢𑀲𑀤𑁆𑀤𑁄 𑀘 𑀧𑀤𑀧𑀽𑀭𑀡𑀫𑀢𑁆𑀢𑁂 𑀤𑀝𑁆𑀞𑀩𑁆𑀩𑁄. ‘‘𑀢𑁂𑀦𑁂𑀯 𑀥𑀫𑁆𑀫 𑀭𑀸𑀕𑁂𑀦 𑀢𑀸𑀬𑀥𑀫𑁆𑀫𑀦𑀦𑁆𑀤𑀺𑀬𑀸’’𑀢𑀺 𑀯𑀺𑀧𑀲𑁆𑀲𑀦𑀸𑀦𑀺 𑀓𑀦𑁆𑀢𑀺𑀫𑀸𑀳. 𑀲𑀳𑀢𑁆𑀣𑁂 𑀘 𑀓𑀭𑀡 𑀯𑀘𑀦𑀁. 𑀑𑀧𑀧𑀸𑀢𑀺𑀓𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀅𑀯𑀲𑁆𑀲𑀁 𑀧𑀭𑀺𑀦𑀺𑀩𑁆𑀩𑀸𑀬 𑀦 𑀥𑀫𑁆𑀫𑁄. 𑀢𑁂𑀦𑀸𑀳 ‘‘𑀅𑀦𑀸𑀯𑀢𑁆𑀢𑀺 𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸’’𑀢𑀺. ‘‘𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀫𑀸𑀡’’𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀫𑀕𑁆𑀕𑁂𑀛𑀸𑀦𑀗𑁆𑀕𑀁 𑀦𑀺𑀬𑀸𑀫𑁂𑀲𑁆𑀲𑀢𑀺, 𑀦 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀸𑀤𑀓𑀁 𑀅𑀓𑀢𑁆𑀯𑀸’’𑀢𑀺 𑀆𑀲𑀦𑁆𑀦𑁂 𑀅𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑀁 𑀬𑀁 𑀛𑀸𑀦𑀁 𑀇𑀘𑁆𑀙𑀦𑁆𑀢𑀻’’𑀢𑀺 𑀫𑀕𑁆𑀕𑁂 𑀇𑀘𑁆𑀙𑀦𑁆𑀢𑀺.

𑁬𑁬. (𑀔) ‘‘𑀢𑀣𑀸 𑀯𑀺𑀥𑁄’’𑀢𑀺 𑀢𑀣𑀸 𑀧𑀓𑀸𑀭𑁄. 𑀆𑀲𑀦𑁆𑀦𑁂 𑀯𑀼𑀝𑁆𑀞𑀺𑀢𑀲𑁆𑀲𑁂𑀯 𑀛𑀸𑀦𑀲𑁆𑀲. ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀯𑀺𑀲𑁂𑀲𑁂𑀢𑀼𑀁’’𑀢𑀺 𑀲𑀘𑁂 𑀧𑀸𑀤𑀓𑀚𑁆𑀛𑀸𑀦𑀁 𑀧𑀣𑀫𑀚𑁆𑀛𑀸𑀦𑀁 𑀳𑁄𑀢𑀺, 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀯𑀺𑀢𑀓𑁆𑀓𑁂 𑀦𑀺𑀦𑁆𑀦𑀁 𑀳𑁄𑀢𑀺, 𑀯𑀺𑀢𑀓𑁆𑀓𑁂 𑀧𑀓𑁆𑀔𑀦𑁆𑀤𑀢𑀺. 𑀅𑀣 𑀧𑀸𑀤𑀓𑀚𑁆𑀛𑀸𑀦𑀁 𑀤𑀼𑀢𑀻𑀬𑀚𑁆𑀛𑀸𑀦𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀯𑀺𑀘𑀸𑀭𑁂 𑀦𑀺𑀦𑁆𑀦𑀁 𑀳𑁄𑀢𑀺, 𑀯𑀺𑀘𑀸𑀭𑁂 𑀧𑀓𑁆𑀔𑀦𑁆𑀤𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀯𑀺𑀲𑁂𑀲𑁂𑀢𑀼𑀁. ‘‘𑀬𑀁 𑀢𑀢𑁆𑀣 𑀯𑀼𑀢𑁆𑀢𑀁’’ 𑀢𑀺𑀬𑀁 𑀯𑀺𑀪𑀸𑀯𑀦𑀺𑀬𑀁 𑀯𑀼𑀢𑁆𑀢𑀁.

𑀯𑁂𑀤𑀦𑀸 𑀯𑀺𑀘𑀸𑀭𑀡𑀸𑀬𑀁. ‘‘𑀦 𑀲𑀺𑀤𑁆𑀥𑁄’’𑀢𑀺 𑀲𑀺𑀤𑁆𑀥𑁄 𑀦 𑀳𑁄𑀢𑀺. ‘‘𑀅𑀜𑁆𑀜𑀣𑀸’’𑀢𑀺 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦. 𑀕𑀳𑀺𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀁 𑀯𑀲𑁂𑀦 𑀲𑀺𑀤𑁆𑀥𑁄𑀢𑀺 𑀕𑀳𑀺𑀢𑁂 𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀬𑀸𑀬 𑀓𑀸𑀬 𑀘𑀺 𑀯𑁂𑀤𑀦𑀸𑀬 𑀬𑀼𑀢𑁆𑀢𑀸 𑀳𑀼𑀢𑁆𑀯𑀸’’𑀢𑀺 𑀲𑁄𑀫𑀦𑀲𑁆𑀲 𑀯𑁂𑀤𑀦𑀸𑀬 𑀯𑀸𑀬𑀼𑀢𑁆𑀢𑀸 𑀳𑀼𑀢𑁆𑀯𑀸 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀬 𑀯𑀸 𑀬𑀼𑀢𑁆𑀢𑀸 𑀳𑀼𑀢𑁆𑀯𑀸. ‘‘𑀢𑁂𑀳𑀺 𑀦𑀺𑀬𑀫𑀺𑀢𑀸𑀬 𑀏𑀓𑁂𑀓𑀸𑀬 𑀫𑀕𑁆𑀕 𑀯𑁂𑀤𑀦𑀸𑀬𑀸’’𑀢𑀺 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀳𑀺 𑀦𑀺𑀬𑀫𑀺𑀢𑀸𑀬 𑀫𑀕𑁆𑀕𑁂 𑀲𑁄𑀫𑀦𑀲𑁆𑀲 𑀯𑁂𑀤𑀦𑀸𑀬 𑀏𑀯 𑀯𑀸𑀲𑀤𑁆𑀥𑀺𑀁 𑀖𑀝𑀺𑀬𑁂𑀬𑁆𑀬 𑀫𑀕𑁆𑀕𑁂 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀬 𑀏𑀯 𑀯𑀸𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸 𑀦𑀸𑀫 𑀏𑀓𑀁 𑀛𑀸𑀦𑀗𑁆𑀕𑀁 𑀳𑁄𑀢𑀺. 𑀢𑀲𑁆𑀫𑀸 𑀫𑀕𑁆𑀕𑁂𑀛𑀸𑀦𑀗𑁆𑀕 𑀦𑀺𑀬𑀫𑁂 𑀲𑀺𑀤𑁆𑀥𑁂 𑀫𑀕𑁆𑀕𑁂 𑀯𑁂𑀤𑀦𑀸 𑀦𑀺𑀬𑀫𑁄𑀧𑀺 𑀲𑀺𑀤𑁆𑀥𑁄. 𑀢𑀸𑀦𑀺 𑀧𑀦 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀺 𑀫𑀚𑁆𑀛𑁂 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸𑀬𑀁 𑀦𑀓𑀺𑀜𑁆𑀘𑀺𑀦𑀺𑀬𑀸𑀫𑁂𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺, 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀳𑀺 𑀦𑀺𑀬𑀫𑀺𑀢𑀸𑀬 𑀫𑀕𑁆𑀕𑁂 𑀏𑀓𑁂𑀓𑀸𑀬 𑀯𑁂𑀤𑀦𑀸𑀬 𑀲𑀤𑁆𑀥𑀺𑀁 𑀤𑁆𑀯𑁂 𑀤𑁆𑀯𑁂 𑀯𑀺𑀧𑀲𑁆𑀲𑀦𑀸 𑀯𑁂𑀤𑀦𑀸𑀬𑁄 𑀖𑀝𑀺𑀬𑁂𑀬𑁆𑀬𑀼𑀁. 𑀫𑀕𑁆𑀕𑁂 𑀲𑁄𑀫𑀦𑀲𑁆𑀲 𑀯𑁂𑀤𑀦𑀸𑀬 𑀯𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀯𑀺𑀧𑀲𑁆𑀲𑀦𑀸 𑀯𑁂𑀤𑀦𑀸𑀬𑁄 𑀖𑀝𑀺𑀬𑁂𑀬𑁆𑀬𑀼𑀁. 𑀫𑀕𑁆𑀕𑁂 𑀉𑀧𑁂𑀓𑁆𑀔𑀸 𑀯𑁂𑀤𑀦𑀸𑀬 𑀯𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀯𑀺𑀧𑀲𑁆𑀲𑀦𑀸 𑀯𑁂𑀤𑀦𑀸𑀬𑁄 𑀖𑀝𑀺𑀬𑁂𑀬𑁆𑀬𑀼𑀁𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘𑀲𑀢𑀺 𑀏𑀓𑀯𑀻𑀣𑀺𑀬𑀁 𑀚𑀯𑀦𑀸𑀦𑀺 𑀪𑀺𑀦𑁆𑀦 𑀯𑁂𑀤𑀦𑀸𑀦𑀺 𑀲𑀺𑀬𑀼𑀁. 𑀢𑀜𑁆𑀘 𑀦 𑀬𑀼𑀚𑁆𑀚𑀢𑀺. 𑀢𑀲𑁆𑀫𑀸 𑀫𑀕𑁆𑀕𑁂 𑀯𑁂𑀤𑀦𑀸 𑀦𑀺𑀬𑀫𑁄 𑀧𑀸𑀤𑀓𑀚𑁆𑀛𑀸𑀦𑀸𑀤𑀺 𑀦𑀺𑀬𑀫𑁂𑀦 𑀲𑀺𑀤𑁆𑀥𑁄 𑀦 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀦𑁂𑀯 𑀲𑀺𑀤𑁆𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀦𑀺 𑀧𑀦 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀺 𑀫𑀚𑁆𑀛𑁂 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸𑀬𑀁 𑀦 𑀓𑀺𑀜𑁆𑀘𑀺 𑀦 𑀦𑀺𑀬𑀸𑀫𑁂𑀦𑁆𑀢𑀺. 𑀯𑁂𑀤𑀦𑀁 𑀦𑀺𑀬𑀸𑀫𑁂𑀦𑁆𑀢𑀺 𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁𑀧𑀺 𑀦 𑀬𑀼𑀚𑁆𑀚𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀁 𑀯𑀲𑁂𑀦𑁂𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸’’𑀢𑀺 𑀏𑀓𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀼 𑀧𑁂𑀓𑁆𑀔𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑁄𑀫𑀦𑀲𑁆𑀲𑀸𑀦𑀺 𑀧𑀚𑀳𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸 𑀦𑀸𑀫 𑀳𑁄𑀢𑀺. ‘‘𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀻’’𑀢𑀺 𑀏𑀓𑀁 𑀯𑀧𑀣𑀫𑀚𑁆𑀛𑀸𑀦 𑀲𑁄𑀫𑀦𑀲𑁆𑀲𑀁 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀧𑀚𑀳𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀣𑀫𑀸𑀤𑀻𑀦𑀺 𑀘 𑀢𑀻𑀡𑀺 𑀛𑀸𑀦𑀸𑀦𑀻’’𑀢𑀺 𑀘𑀢𑀼𑀓𑁆𑀓𑀦𑀬𑁂 𑀢𑀻𑀡𑀺 𑀲𑁄𑀫𑀦𑀲𑁆𑀲 𑀛𑀸𑀦𑀸𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸. ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀘 𑀧𑀸𑀤𑀓𑁂𑀓𑀢𑁆𑀯𑀸’’𑀢𑀺 𑀆𑀭𑀫𑁆𑀫𑀡 𑀪𑀸𑀯𑁂𑀦 𑀧𑀸𑀤𑀓𑁂𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀘 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀁 𑀯𑀲𑁂𑀦 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸𑀬𑀜𑁆𑀘 𑀫𑀕𑁆𑀕𑁂 𑀘 𑀯𑁂𑀤𑀦𑀸 𑀧𑀭𑀺𑀡𑀸𑀫𑁄 𑀅𑀝𑁆𑀞𑀲𑀸𑀮𑀺𑀦𑀺𑀬𑀁𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑁄. ‘‘𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀻’’𑀢𑀺 𑀫𑀦𑀼𑀲𑁆𑀲𑀸𑀦𑀁 𑀕𑁂𑀳𑀲𑁆𑀲𑀺𑀢𑀭𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀢𑁆𑀢𑀸 𑀅𑀫𑀸𑀦𑀼𑀲𑀻 𑀦𑀸𑀫 𑀭𑀢𑀺 𑀳𑁄𑀢𑀺. ‘‘𑀲𑀫𑁆𑀫𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺 𑀲𑀫𑁆𑀫𑀸 𑀅𑀦𑀺𑀘𑁆𑀘 𑀮𑀓𑁆𑀔𑀡 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁭. (𑀔) ‘‘𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀛𑀸𑀦𑀬𑁄𑀕𑀪𑁂𑀤𑁄 𑀧𑀦 𑀅𑀥𑀺𑀧𑁆𑀧𑁂𑀢𑁄. ‘‘𑀧𑀜𑁆𑀘 𑀯𑀺𑀥𑁂𑀛𑀸𑀦 𑀓𑁄𑀝𑁆𑀞𑀸𑀲𑁂’’𑀢𑀺 𑀧𑀜𑁆𑀘𑀓 𑀦𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀥 𑀘𑀺𑀢𑁆𑀢 𑀪𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀛𑀸𑀦𑀪𑁂𑀤𑁂𑀢𑀺 𑀘 𑀛𑀸𑀦𑀦𑁆𑀢𑀺 𑀘 𑀯𑀼𑀢𑁆𑀢𑁂𑀧𑀺 𑀘𑀺𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀸𑀣𑀸𑀬𑁄𑀚𑀦𑀸𑀲𑀼. ‘‘𑀅𑀧𑀭𑀸𑀧𑀺 𑀬𑁄𑀚𑀦𑀸 𑀯𑀼𑀢𑁆𑀢𑀸’’𑀢𑀺 𑀅𑀣𑀯𑀸 𑀭𑀽𑀧𑀸𑀯𑀘𑀭𑀁 𑀘𑀺𑀢𑁆𑀢𑀁 𑀅𑀦𑀼𑀢𑁆𑀢𑀭𑀜𑁆𑀘 𑀧𑀣𑀫𑀸𑀤𑀺𑀚𑁆𑀛𑀸𑀦 𑀪𑁂𑀤𑁂𑀦 𑀬𑀣𑀸 𑀕𑀬𑁆𑀳𑀢𑀺, 𑀢𑀣𑀸 𑀆𑀭𑀼𑀧𑁆𑀧𑀜𑁆𑀘𑀸𑀧𑀺 𑀧𑀜𑁆𑀘𑀫𑁂𑀛𑀸𑀦𑁂 𑀕𑀬𑁆𑀳𑀢𑀻𑀢𑀺 𑀏𑀯𑀁 𑀅𑀧𑀭𑀸𑀧𑀺 𑀬𑁄𑀚𑀦𑀸 𑀯𑀼𑀢𑁆𑀢𑀸. ‘‘𑀧𑀞𑀺𑀢𑀢𑁆𑀢𑀸’’𑀢𑀺 𑀉𑀘𑁆𑀘𑀸𑀭𑀺𑀢𑀢𑁆𑀢𑀸. 𑀅𑀦𑁆𑀢𑀺𑀫𑀕𑀸𑀣𑀸 𑀯𑀡𑁆𑀡𑀦𑀸𑀬𑀁. ‘‘𑀬𑀣𑀸’’𑀢𑀺 𑀬𑁂𑀦 𑀧𑀓𑀸𑀭𑁂𑀦. ‘‘𑀢𑀁 𑀲𑀗𑁆𑀕𑀳𑀁’’𑀢𑀺 𑀏𑀓 𑀯𑀻𑀲𑀲𑀢𑀲𑀗𑁆𑀕𑀳𑀁. 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑀼𑀥𑀸. ‘‘𑀆𑀳𑀸’’𑀢𑀺 𑀘 ‘‘𑀆𑀳𑀽’’𑀢𑀺 𑀘 𑀯𑀢𑁆𑀢𑀫𑀸𑀦𑀓𑀸𑀮𑁂𑀧𑀺 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽𑀢𑀺 𑀯𑀼𑀢𑁆𑀢𑀁 ‘‘𑀓𑀣𑁂𑀦𑁆𑀢𑀺 𑀯𑀸’’𑀢𑀺. 𑀇𑀤𑀜𑁆𑀘 𑀯𑀘𑀦𑀁 𑀧𑀼𑀩𑁆𑀩𑁂 ‘‘𑀇𑀢𑁆𑀣𑀫𑁂𑀓𑀽𑀦 𑀦𑀯𑀼𑀢𑀺…𑀧𑁂… 𑀯𑀺𑀪𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸’’𑀢𑀺 𑀕𑀸𑀣𑀸𑀬 𑀦𑀺𑀕𑀫𑀦𑀦𑁆𑀢𑀺 𑀜𑀸𑀧𑀦𑀢𑁆𑀣𑀁 ‘‘𑀯𑀺𑀪𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀢𑀺𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫𑀝𑀻𑀓𑀸𑀬𑀅𑀦𑀼𑀤𑀻𑀧𑀦𑀺𑀬𑀁

𑀘𑀺𑀢𑁆𑀢𑀲𑀗𑁆𑀕𑀳𑀲𑁆𑀲𑀅𑀦𑀼𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑁂𑀢𑀲𑀺𑀓𑀲𑀗𑁆𑀕𑀳𑀅𑀦𑀼𑀤𑀻𑀧𑀦𑀸

𑁬𑁮. 𑀏𑀯𑀁 𑀘𑀺𑀢𑁆𑀢 𑀲𑀗𑁆𑀕𑀳𑀲𑁆𑀲 𑀤𑀻𑀧𑀦𑀺𑀁 𑀓𑀢𑁆𑀯𑀸 𑀘𑁂𑀢𑀲𑀺𑀓 𑀲𑀗𑁆𑀕𑀳𑀲𑁆𑀲 𑀤𑀻𑀧𑀦𑀺𑀁 𑀓𑀭𑁄𑀦𑁆𑀢𑁄 𑀧𑀣𑀫𑀁 𑀧𑀼𑀩𑁆𑀩𑀸𑀧𑀭𑀸𑀦𑀼 𑀲𑀦𑁆𑀥𑀺𑀜𑁆𑀘 𑀆𑀤𑀺𑀕𑀸𑀣𑀸𑀬 𑀧𑀬𑁄𑀚𑀦 𑀲𑀫𑁆𑀩𑀦𑁆𑀥𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁’’𑀢𑀺𑀆𑀤𑀺 𑀫𑀸𑀭𑀤𑁆𑀥𑁄. 𑀢𑀢𑁆𑀣 ‘‘𑀅𑀦𑀼𑀧𑀢𑁆𑀢’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀫𑀺𑀢𑀺𑀲𑀩𑁆𑀩𑀣𑀸𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀢𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑀼𑀧𑀢𑁆𑀢𑀁. 𑀳𑁂𑀢𑀼 𑀯𑀺𑀲𑁂𑀲𑀦𑀜𑁆𑀘𑁂𑀢𑀁. 𑀬𑀲𑁆𑀫𑀸 𑀘𑀺𑀢𑁆𑀢𑀲𑀗𑁆𑀕𑀳𑀸𑀦𑀦𑁆𑀢𑀭𑀁 𑀘𑁂𑀢𑀲𑀺𑀓 𑀲𑀗𑁆𑀕𑀳𑁄 𑀅𑀦𑀼𑀧𑀢𑁆𑀢𑁄, 𑀢𑀲𑁆𑀫𑀸 𑀇𑀤𑀸𑀦𑀺 𑀢𑀁 𑀲𑀗𑁆𑀕𑀳𑀁 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀘𑀢𑁆𑀢𑀸𑀭𑀺 𑀲𑀫𑁆𑀧𑀬𑁄𑀕 𑀮𑀓𑁆𑀔𑀡𑀸𑀦𑀺 ‘𑀏𑀓𑀼𑀧𑁆𑀧𑀸𑀤𑀢𑀸, 𑀏𑀓 𑀦𑀺𑀭𑁄𑀥𑀢𑀸, 𑀏𑀓𑀸 𑀭𑀫𑁆𑀫𑀡𑀢𑀸, 𑀏𑀓 𑀯𑀢𑁆𑀣𑀼𑀓𑀢𑀸,𑀢𑀺. ‘‘𑀘𑁂𑀢𑀲𑀺 𑀬𑀼𑀢𑁆𑀢𑀸’’𑀢𑀺 𑀘𑀺𑀢𑁆𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑀸. 𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. ‘‘𑀘𑁂𑀢𑀲𑀸 𑀯𑀸𑀬𑀼𑀢𑁆𑀢𑀸’’𑀢𑀺 𑀘𑀺𑀢𑁆𑀢𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸. 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀻𑀪𑀸𑀯𑀁 𑀕𑀢𑀸𑀢𑀺 𑀅𑀢𑁆𑀣𑁄. ‘‘𑀲𑀭𑀽𑀧𑀤𑀲𑁆𑀲𑀦’’𑀦𑁆𑀢𑀺 𑀲𑀗𑁆𑀔𑁆𑀬𑀸𑀲𑀭𑀽𑀧𑀤𑀲𑁆𑀲𑀦𑀁. 𑀲𑀺𑀤𑁆𑀥𑀧𑀤𑀁 𑀦𑀸𑀫 𑀧𑀓𑀢𑀺 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀦𑁆𑀦 𑀧𑀤𑀁. ‘‘𑀧𑀼𑀩𑁆𑀩𑀦𑁆𑀢𑀢𑁄’’𑀢𑀺 𑀏𑀓𑀲𑁆𑀲𑀲𑀗𑁆𑀔𑀢 𑀥𑀫𑁆𑀫𑀲𑁆𑀲 𑀧𑀣𑀫 𑀪𑀸𑀕𑀢𑁄. 𑀉𑀤𑁆𑀥𑀁 𑀧𑀚𑁆𑀚𑀦𑀁 𑀦𑀸𑀫 𑀓𑀢𑀫𑀦𑁆𑀢𑀺 𑀆𑀳 ‘‘𑀲𑀭𑀽𑀧𑀢𑁄 𑀧𑀸𑀢𑀼𑀪𑀯𑀦’’𑀦𑁆𑀢𑀺. 𑀥𑀸𑀢𑀼 𑀧𑀸𑀞𑁂𑀲𑀼-𑀚𑀦𑀺𑀧𑀸𑀢𑀼𑀪𑀸𑀯𑁂-𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀚𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. ‘‘𑀲𑀭𑀽𑀧 𑀯𑀺𑀦𑀸𑀲𑁄’’𑀢𑀺 𑀲𑀭𑀽𑀧𑀢𑁄 𑀧𑀸𑀢𑀼𑀪𑀯𑀦𑁆𑀢𑀲𑁆𑀲 𑀪𑀸𑀯𑀲𑁆𑀲 𑀯𑀺𑀦𑀸𑀲𑁄 𑀅𑀦𑁆𑀢𑀭𑀥𑀸𑀦𑀁. ‘‘𑀏𑀯𑀁 𑀧𑀭𑀢𑁆𑀣 𑀧𑀻’’𑀢𑀺 𑀧𑀭𑀲𑁆𑀫𑀺𑀁 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸𑀤𑀺𑀧𑀤𑁂𑀧𑀺. ‘‘𑀏𑀓 𑀘𑀺𑀢𑁆𑀢𑀲𑁆𑀲𑀧𑀺 𑀩𑀳𑀼𑀤𑁂𑀯𑀸’’𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁 𑀭𑀽𑀧𑀁 𑀧𑀲𑁆𑀲𑀦𑁆𑀢𑀁 𑀏𑀓𑀫𑁂𑀯 𑀭𑀽𑀧𑀁 𑀧𑀲𑁆𑀲𑀢𑀻𑀢𑀺 𑀦𑀢𑁆𑀣𑀺. 𑀅𑀦𑁂𑀓𑀸𑀦𑀺 𑀏𑀯𑀭𑀽𑀧𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀧𑀲𑁆𑀲𑀢𑀺. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀴𑀺𑀬𑀁. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀤𑁆𑀯𑀸𑀭𑁂𑀲𑀼 𑀏𑀓𑀯𑀘𑀦𑀁 𑀯𑀢𑁆𑀯𑀸 𑀆𑀭𑀫𑁆𑀫𑀡𑁂𑀲𑀼 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺. ‘‘𑀏𑀓𑀢𑁆𑀢𑀁 𑀉𑀧𑀦𑁂𑀢𑁆𑀯𑀸’’𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑁂 𑀩𑀳𑀽𑀦𑀺𑀧𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀢𑀸 𑀲𑀫𑀜𑁆𑀜𑁂𑀦 𑀏𑀓𑀻𑀪𑀸𑀯𑀁 𑀓𑀢𑁆𑀯𑀸 𑀏𑀓𑀁 𑀆𑀭𑀫𑁆𑀫𑀡𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀦 𑀲𑀼𑀦𑁆𑀤𑀭𑀁. 𑀓𑀲𑁆𑀫𑀸. 𑀅𑀢𑁆𑀣 𑀯𑀺𑀲𑁂𑀲𑀲𑁆𑀲 𑀅𑀯𑀺𑀜𑁆𑀜𑀸𑀧𑀦𑀢𑁄. 𑀓𑁄𑀧𑀦𑀸𑀬𑀁 𑀅𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀬𑀸𑀘𑀺𑀢𑁆𑀢𑀲𑁆𑀲 𑀚𑀸𑀢𑀺, 𑀲𑀸𑀬𑁂𑀯 𑀨𑀲𑁆𑀲𑀸𑀤𑀻𑀦𑀦𑁆𑀢𑀺𑀆𑀤𑀺𑀓𑁄 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺𑀁. 𑀅𑀥𑀺𑀧𑁆𑀧𑁂𑀢𑀸 𑀏𑀓𑀼𑀧𑁆𑀧𑀸𑀤𑀢𑀸. 𑀏𑀲 𑀦𑀬𑁄 𑀏𑀓 𑀦𑀺𑀭𑁄𑀥𑀢𑀸𑀤𑀻𑀲𑀼. ‘‘𑀫𑀽𑀮𑀝𑀻𑀓𑀸𑀬’’𑀦𑁆𑀢𑀺 𑀭𑀽𑀧𑀓𑀡𑁆𑀟𑀫𑀽𑀮𑀝𑀻𑀓𑀸𑀬𑀁. ‘‘𑀲𑀳𑁂𑀯𑀸’’𑀢𑀺 𑀏𑀓𑀢𑁄 𑀏𑀯. ‘‘𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺 𑀉𑀧𑁆𑀧𑀸𑀤𑀲𑁆𑀲 𑀘 𑀚𑀻𑀭𑀡𑀲𑁆𑀲 𑀘 𑀦𑀺𑀭𑁄𑀥𑀲𑁆𑀲 𑀘 𑀧𑀯𑀢𑁆𑀢𑀺𑀢𑁄. ‘‘𑀉𑀧𑁆𑀧𑀸𑀤𑀸𑀤𑀬𑁄’’𑀢𑀺 𑀉𑀧𑁆𑀧𑀸𑀤 𑀚𑀻𑀭𑀡 𑀦𑀺𑀭𑁄𑀥𑀸. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀘𑁂𑀢𑀲𑀺𑀓𑀸𑀫𑀢𑀸’’𑀢𑀺 𑀘𑁂𑀢𑀲𑀺𑀓𑀸 𑀇𑀢𑀺 𑀯𑀺𑀜𑁆𑀜𑀸𑀢𑀸. ‘‘𑀪𑀸𑀯𑀧𑁆𑀧𑀥𑀸𑀦𑀁’’𑀢𑀺 𑀏𑀓𑀼𑀧𑁆𑀧𑀸𑀤 𑀪𑀸𑀯𑁄 𑀏𑀓𑀼𑀧𑁆𑀧𑀸𑀤𑁄𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀏𑀓 𑀦𑀺𑀭𑁄𑀥𑀸𑀤𑀻𑀲𑀼. 𑀬𑀣𑀸 𑀇𑀤𑀁𑀧𑀺 𑀲𑀗𑁆𑀖𑁂𑀭𑀢𑀦𑀁 𑀧𑀡𑀻𑀢-𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀭𑀢𑀦 𑀪𑀸𑀯𑁄 𑀧𑀡𑀻𑀢𑁄𑀢𑀺 𑀳𑁂𑀢𑁆𑀣 𑀅𑀢𑁆𑀣𑁄. ‘‘𑀬𑁂’’𑀢𑀺 𑀬𑁂 𑀥𑀫𑁆𑀫𑀸. ‘‘𑀲𑀳𑀚𑀸𑀢 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀭𑀽𑀧𑀸𑀦𑀺 𑀧𑀻’’𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑀢𑁄 𑀉𑀧𑁆𑀧𑀦𑁆𑀦𑀸𑀦𑀺 𑀭𑀽𑀧𑀸𑀦𑀺𑀧𑀺. 𑀘𑁂𑀢𑀲𑀺𑀓𑀸𑀦𑀺 𑀦𑀸𑀫 𑀲𑀺𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀢𑀤𑀸 𑀬𑀢𑁆𑀢 𑀯𑀼𑀢𑁆𑀢𑀺𑀢𑀸𑀬𑀸’’𑀢𑀺 𑀘𑀺𑀢𑁆𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀬𑀸𑀬. ‘‘𑀘𑁂𑀢𑁄𑀬𑀼𑀢𑁆𑀢𑀸𑀦𑀻’’𑀢𑀺 𑀳𑁂𑀢𑀼 𑀯𑀺𑀲𑁂𑀲𑀦𑀁. 𑀢𑀤𑁂𑀯 𑀳𑁂𑀢𑀼𑀫𑀦𑁆𑀢 𑀯𑀺𑀲𑁂𑀲𑀦𑀦𑁆𑀢𑀺 𑀘 𑀳𑁂𑀢𑀼 𑀅𑀦𑁆𑀢𑁄 𑀦𑀻𑀢𑀯𑀺𑀲𑁂𑀲𑀦𑀦𑁆𑀢𑀺 𑀘 𑀳𑁂𑀢𑀼 𑀅𑀦𑁆𑀢𑁄 𑀕𑀥𑀯𑀺𑀲𑁂𑀲𑀦𑀦𑁆𑀢𑀺 𑀘 𑀯𑀤𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀁. ‘‘𑀦𑀸𑀦𑀼𑀪𑁄𑀦𑁆𑀢𑀻’’𑀢𑀺 𑀦𑀧𑀸𑀧𑀼𑀡𑀦𑁆𑀢𑀺. ‘‘𑀦 𑀳𑀺 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁’’𑀢𑀺 𑀏𑀢𑁂𑀦 𑀪𑀽𑀢𑀓𑀣𑀦 𑀯𑀺𑀲𑁂𑀲𑀦𑀸𑀦𑀺 𑀏𑀢𑀸𑀦𑀻𑀢𑀺 𑀤𑀻𑀧𑁂𑀢𑀺. 𑀪𑀽𑀢𑀓𑀣𑀦𑀁𑀧𑀺 𑀲𑀫𑀸𑀦𑀁 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀩𑁆𑀬𑀯𑀘𑁆𑀙𑁂𑀤𑀓𑀁𑀧𑀺 𑀲𑀫𑁆𑀪𑀯𑀢𑀺. ‘‘𑀯𑀬𑁄𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀺𑀦𑀸𑀲𑁄 𑀧𑀓𑀸𑀲𑀢𑀺. ‘‘𑀞𑀺𑀢𑀸𑀬𑀸’’𑀢𑀺 𑀢𑀺𑀝𑁆𑀞 𑀫𑀸𑀦𑀸𑀬 𑀯𑁂𑀤𑀦𑀸𑀬. 𑀅𑀜𑁆𑀜𑁄 𑀧𑀓𑀸𑀭𑁄 𑀅𑀜𑁆𑀜𑀣𑀸. 𑀅𑀜𑁆𑀜𑀣𑀸 𑀪𑀸𑀯𑁄 𑀅𑀜𑁆𑀜𑀣𑀢𑁆𑀢𑀁. 𑀚𑀭𑀸𑀯𑀲𑁂𑀦 𑀧𑀭𑀺𑀡𑀸𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄, 𑀬𑀸 𑀞𑀺𑀢𑀺, 𑀬𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀬𑁄 𑀧𑀸𑀢𑀼𑀪𑀸𑀯𑁄. 𑀏𑀲𑁄 𑀤𑀼𑀓𑁆𑀔𑀲𑁆𑀲 𑀉𑀧𑁆𑀧𑀸𑀤𑁄, 𑀏𑀲𑀸 𑀭𑁄𑀕𑀸𑀦𑀁 𑀞𑀺𑀢𑀺, 𑀏𑀲𑁄 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄𑀢𑀺 𑀬𑁄𑀚𑀦𑀸. ‘‘𑀇𑀢𑀭𑀣𑀸’’𑀢𑀺 𑀇𑀢𑁄 𑀅𑀜𑁆𑀜𑀣𑀸 𑀕𑀳𑀺𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀓𑀮𑀸𑀧𑁂 𑀦𑀸𑀦𑀸 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀩𑀳𑀽𑀲𑀼 𑀉𑀧𑁆𑀧𑀸𑀤𑁂𑀲𑀼 𑀘 𑀦𑀺𑀭𑁄𑀥𑁂𑀲𑀼 𑀘 𑀕𑀳𑀺𑀢𑁂𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀯𑀺𑀓𑀸𑀭𑀭𑀽𑀧𑀸𑀦𑀁’’𑀢𑀺 𑀯𑀺𑀜𑁆𑀜𑀢𑁆𑀢𑀺 𑀤𑁆𑀯𑀬 𑀮𑀳𑀼𑀢𑀸𑀤𑀺𑀢𑁆𑀢𑀬𑀸𑀦𑀁. 𑀲𑀩𑁆𑀩𑀸𑀦𑀺𑀧𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑁆𑀢𑀸 𑀫𑀳𑀸𑀪𑀽𑀢 𑀕𑀡𑀦𑀸𑀬 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀲𑀺𑀬𑀼𑀁𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀯𑀸’’𑀢𑀺𑀆𑀤𑀺𑀯𑀼𑀢𑁆𑀢𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀘𑀓𑁆𑀔𑀸𑀤𑀻𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁 𑀏𑀓𑁂𑀓𑀲𑁆𑀫𑀺𑀁 𑀓𑀮𑀸𑀧𑁂 𑀩𑀳𑀼𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺 𑀬𑁄𑀚𑀦𑀸. 𑀓𑀲𑁆𑀫𑀸 𑀩𑀳𑀼𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦’’𑀦𑁆𑀢𑀺𑀆𑀤𑀺𑀁.

𑀬𑀤𑀺 𑀏𑀯𑀁, 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀮𑀳𑀼𑀢𑀸𑀤𑀻𑀦𑀺𑀧𑀺 𑀏𑀓𑁂𑀓𑀸𑀦𑀺 𑀏𑀯 𑀲𑀺𑀬𑀼𑀁, 𑀅𑀣 𑀓𑀺𑀫𑀢𑁆𑀣𑀁 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢 𑀮𑀳𑀼𑀢𑀸𑀤𑀬𑁄𑀧𑀦𑀸’’𑀢𑀺𑀆𑀤𑀺𑀁. ‘‘𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀈𑀤𑀺𑀲𑀁 𑀯𑀺𑀦𑀺𑀘𑁆𑀙𑀬𑀢𑁆𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀸𑀯𑀦𑀺𑀧𑀸𑀞𑁂 ‘‘𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄’’𑀢𑀺 𑀏𑀢𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀳𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀘𑀺𑀢𑁆𑀢𑀁 𑀅𑀦𑀼𑀧𑀭𑀺𑀯𑀢𑁆𑀢𑀺𑀲𑁆𑀲. ‘‘𑀧𑀲𑀗𑁆𑀕𑀸’’𑀢𑀺 𑀘𑁂𑀢𑀲𑀺𑀓𑀢𑀸 𑀧𑀲𑀗𑁆𑀕𑁄. ‘‘𑀧𑀼𑀭𑁂𑀢𑀭𑀫𑀼𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺 𑀧𑀼𑀭𑁂𑀢𑀭𑀁 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀘𑀺𑀢𑁆𑀢𑀲𑁆𑀲𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀅𑀜𑁆𑀜𑀲𑁆𑀲 𑀲𑀢𑁆𑀢𑀭 𑀲𑀫 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂. 𑀢𑀣𑀸 𑀭𑀽𑀧𑀥𑀫𑁆𑀫𑀸𑀦𑀁 𑀧𑀲𑀗𑁆𑀕𑁄 𑀦 𑀲𑀓𑁆𑀓𑀸 𑀦𑀻𑀯𑀸𑀭𑁂𑀢𑀼𑀁 𑀢𑀺𑀬𑁄𑀚𑀦𑀸. ‘‘𑀧𑀲𑀗𑁆𑀕𑁄’’𑀢𑀺 𑀘𑁂𑀢𑀲𑀺𑀓𑀢𑀸 𑀧𑀲𑀗𑁆𑀕𑁄. ‘‘𑀅𑀮𑀫𑀢𑀺 𑀧𑀧𑀜𑁆𑀘𑁂𑀦𑀸’’𑀢𑀺 𑀅𑀪𑀺𑀥𑀫𑁆𑀫𑁂 𑀯𑁂𑀤𑀦𑀸𑀢𑁆𑀢𑀺𑀓𑁂𑀝𑀻𑀓𑀸𑀲𑀼 𑀯𑀺𑀬 𑀅𑀢𑀺 𑀯𑀺𑀢𑁆𑀣𑀸𑀭𑁂𑀦 𑀦𑀺𑀭𑀢𑁆𑀣𑀓𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀺𑀭𑀢𑁆𑀣𑀓𑀁’’𑀢𑀺 𑀯𑀺𑀪𑀸𑀯𑀦𑀺𑀬𑀁 𑀧𑀧𑀜𑁆𑀘𑁄 𑀦𑀺𑀭𑀢𑁆𑀣𑀓𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁯. 𑀨𑀲𑁆𑀲𑀯𑀘𑀦𑀢𑁆𑀣𑁂. ‘‘𑀨𑀼𑀲𑀢𑀻’’𑀢𑀺 𑀆𑀭𑀫𑁆𑀫𑀡𑀁 𑀆𑀳𑀦𑀢𑀺, 𑀲𑀗𑁆𑀖𑀝𑁆𑀝𑁂𑀢𑀺. 𑀢𑀜𑁆𑀘 𑀲𑀗𑁆𑀖𑀝𑁆𑀝 𑀦𑀁 𑀦𑀤𑁄𑀲𑀧𑀝𑀺𑀖𑀲𑁆𑀲 𑀯𑀺𑀬 𑀆𑀭𑀫𑁆𑀫𑀡𑀲𑁆𑀲 𑀯𑀺𑀩𑀸𑀥𑀦𑀁 𑀳𑁄𑀢𑀺, 𑀅𑀣 𑀔𑁄 𑀪𑀫𑀭𑀲𑁆𑀲 𑀧𑀤𑀼𑀫 𑀧𑀼𑀧𑁆𑀨𑁂𑀲𑀼 𑀧𑀼𑀧𑁆𑀨𑀭 𑀲𑀕𑁆𑀕𑀳𑀡𑀁 𑀯𑀺𑀬 𑀯𑀺𑀚𑀸𑀦𑀦 𑀫𑀢𑁆𑀢𑁂 𑀅𑀞𑀢𑁆𑀯𑀸 𑀆𑀭𑀫𑁆𑀫𑀡 𑀭𑀲𑀧𑀸𑀢𑀼𑀪𑀸𑀯𑀢𑁆𑀣𑀁 𑀬𑀣𑀸𑀭𑀫𑁆𑀫𑀡𑀁 𑀲𑀁𑀳𑀦𑀦 𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀨𑀼𑀲𑀦𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. ‘‘𑀆𑀳𑀘𑁆𑀘𑀸’’𑀢𑀺 𑀆𑀳𑀦𑀺𑀢𑁆𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸. ‘‘𑀉𑀧𑀳𑀘𑁆𑀘𑀸’’𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀬𑀫𑀢𑁆𑀣𑁄 𑀓𑀣𑀁 𑀧𑀸𑀓𑀝𑁄𑀢𑀺 𑀆𑀳 ‘‘𑀬𑀢𑁄’’𑀢𑀺𑀆𑀤𑀺𑀁. 𑀢𑀢𑁆𑀣 ‘‘𑀬𑀢𑁄’’𑀢𑀺 𑀬𑀁 𑀓𑀸𑀭𑀡𑀸. ‘‘𑀢𑀤𑀦𑀼𑀪𑀯𑀦𑁆𑀢𑀻’’𑀢𑀺 𑀢𑀁 𑀆𑀭𑀫𑁆𑀫𑀡 𑀭𑀲𑀁 𑀅𑀦𑀼𑀪𑀯𑀦𑁆𑀢𑀻, 𑀯𑁂𑀤𑀦𑀸 𑀧𑀸𑀢𑀼𑀪𑀯𑀢𑀺, 𑀯𑁂𑀤𑀦𑀸 𑀧𑀸𑀢𑀼𑀪𑀸𑀯𑀁 𑀤𑀺𑀲𑁆𑀯𑀸 𑀆𑀭𑀫𑁆𑀫𑀡𑀧𑁆𑀨𑀼𑀲𑀦𑀁 𑀜𑀸𑀡𑁂 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁆𑀯𑀸𑀬𑀁 𑀨𑀼𑀲𑀦 𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄, 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀧𑀸𑀢𑀸 𑀕𑀢𑀯𑀺𑀲𑀬 𑀧𑀤𑀝𑁆𑀞𑀸𑀦𑁄. 𑀢𑀢𑁆𑀣 𑀲𑀦𑁆𑀦𑀺𑀧𑀸𑀢𑁄 𑀦𑀸𑀫 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀤𑁆𑀯𑀸𑀭𑀸 𑀭𑀫𑁆𑀫𑀡 𑀯𑀺𑀜𑁆𑀜𑀸𑀡𑀸𑀦𑀁 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀲𑀫𑁄𑀥𑀸𑀦𑀁. 𑀢𑀣𑀸𑀳𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼 𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄 𑀢𑀺𑀆𑀤𑀺. ‘‘𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺 𑀆𑀭𑀫𑁆𑀫𑀡𑁂 𑀲𑀫𑁆𑀫𑀤𑁂𑀯 𑀖𑀝𑁆𑀝𑀦 𑀓𑀺𑀘𑁆𑀘𑁄. 𑀲𑀗𑁆𑀖𑀝𑁆𑀝𑀦 𑀓𑀺𑀘𑁆𑀘𑀢𑁆𑀢𑀸 𑀏𑀯 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫 𑀘𑀺𑀦𑁆𑀢𑀸𑀜𑀸𑀡𑀲𑁆𑀲 𑀧𑀝𑀺𑀫𑀼𑀔𑀁 𑀉𑀧𑀝𑁆𑀞𑀸𑀢𑀺 𑀧𑀓𑀸𑀲𑀢𑀻𑀢𑀺. ‘‘𑀲𑀦𑁆𑀦𑀺𑀧𑀸𑀢 𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’. 𑀧𑀘𑁆𑀘𑀼𑀧𑀝𑁆𑀞𑀸𑀦𑀦𑁆𑀢𑀺 𑀯𑀸 𑀧𑀜𑁆𑀜𑀸𑀡𑀁 𑀯𑀼𑀘𑁆𑀘𑀢𑀺 𑀥𑀚𑁄𑀭𑀣𑀲𑁆𑀲 𑀧𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀯𑀺𑀬. 𑀲𑀦𑁆𑀦𑀺𑀧𑀸𑀢𑀸𑀓𑀸𑀭𑁄 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲𑀸𑀢𑀺 𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀯𑁂𑀤𑀦𑀸𑀧𑀘𑁆𑀘𑀼 𑀧𑀝𑁆𑀞𑀸𑀦𑁄 𑀯𑀸. 𑀥𑀽𑀫𑁄𑀯𑀺𑀬 𑀅𑀕𑁆𑀕𑀺𑀲𑁆𑀲. 𑀯𑁂𑀤𑀦𑀸𑀨𑀮𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄 𑀢𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸 𑀯𑀸𑀤𑁄𑀢𑀸𑀯 𑀤𑀲𑁆𑀲𑀺𑀢𑁄. 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑀢𑁆𑀢𑀸. 𑀆𑀭𑀫𑁆𑀫𑀡𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸 𑀨𑀲𑁆𑀲𑁄 𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀧𑀣𑀫𑀁 𑀯𑀼𑀢𑁆𑀢𑁄. 𑀨𑀲𑁆𑀲𑁂𑀦 𑀨𑀼𑀲𑁆𑀲𑀺𑀢𑁆𑀯𑀸 𑀯𑁂𑀤𑀦𑀸𑀬 𑀯𑁂𑀤𑀬𑀢𑀺. 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀺. 𑀘𑁂𑀢𑀦𑀸𑀬 𑀘𑁂𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀨𑀼𑀝𑁆𑀞𑁄 𑀪𑀺𑀓𑁆𑀔𑀯𑁂 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻𑀢𑀺. 𑀅𑀧𑀺 𑀘 𑀅𑀬𑀁 𑀨𑀲𑁆𑀲𑁄 𑀦𑀸𑀫 𑀬𑀣𑀸𑀧𑀸𑀲𑀸𑀤𑀁 𑀧𑀢𑁆𑀯𑀸 𑀣𑀫𑁆𑀪𑁄 𑀦𑀸𑀫 𑀲𑁂𑀲𑀤𑀩𑁆𑀩 𑀲𑀫𑁆𑀪𑀸𑀭𑀸𑀦𑀁 𑀩𑀮𑀯𑀧𑀘𑁆𑀘𑀬𑁄. 𑀏𑀯𑀫𑁂𑀯 𑀲𑀳𑀚𑀸𑀢 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀩𑀮𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺. 𑀲𑀗𑁆𑀕𑀳𑀓𑀸𑀭𑁂𑀦 𑀧𑀦 𑀇𑀤𑀁 𑀧𑀦 𑀅𑀓𑀸𑀭𑀡𑀁, 𑀏𑀓𑀓𑁆𑀔𑀡𑀲𑁆𑀫𑀺𑀜𑁆𑀳𑀺 𑀉𑀧𑁆𑀧𑀦𑁆𑀦 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑁄 𑀅𑀬𑀁 𑀧𑀘𑁆𑀙𑀸𑀢𑀺 𑀇𑀤𑀁 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀸. 𑀩𑀮𑀯𑀧𑀘𑁆𑀘𑀬𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲𑀓𑀸𑀭𑀡𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀏𑀯𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑁂𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑀤𑁂𑀲𑀦𑀸 𑀯𑀸𑀭𑁂𑀦𑁂𑀯 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺. 𑀢𑀢𑁆𑀣 ‘‘𑀤𑁂𑀲𑀦𑀸𑀯𑀸𑀭𑁂 𑀦𑁂𑀯𑀸’’𑀢𑀺 𑀤𑁂𑀲𑀦𑀓𑁆𑀓𑀫𑁂𑀦𑁂𑀯, 𑀢𑀢𑁄 𑀅𑀜𑁆𑀜𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼 𑀫𑀳𑀸𑀅𑀝𑁆𑀞𑀓𑀣𑀸 𑀯𑀸𑀤𑁄 𑀏𑀯 𑀬𑀼𑀢𑁆𑀢𑁄. 𑀬𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑁄 𑀳𑀼𑀢𑁆𑀯𑀸𑀢𑀺. 𑀢𑀢𑁆𑀣 𑀧𑀣𑀫𑀸𑀪𑀺𑀦𑀺𑀧𑀸𑀢𑁄𑀢𑀺 𑀇𑀤𑀁 𑀓𑀺𑀘𑁆𑀘𑀧𑁆𑀧𑀥𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀧𑀦𑀜𑁆𑀜𑁂𑀳𑀺 𑀘𑁂𑀢𑀲𑀺𑀓𑁂𑀳𑀺 𑀯𑀺𑀦𑀸 𑀯𑀺𑀲𑀼𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀬𑀣𑀸 𑀢𑀁 𑀬𑁂 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸. 𑀲𑀩𑁆𑀩𑁂 𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸, 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀣𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀺𑀘𑁆𑀘𑀧𑁆𑀧𑀥𑀸𑀦𑀢𑁆𑀢𑀸 𑀫𑀦𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀣𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀧𑀦 𑀲𑀩𑁆𑀩𑀘𑁂𑀢𑀲𑀺𑀓𑁂𑀳𑀺 𑀯𑀺𑀦𑀸 𑀯𑀺𑀲𑀼𑀁 𑀧𑀣𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀮𑀯𑀧𑀘𑁆𑀘𑀬 𑀪𑀸𑀯𑁂𑀧𑀺 𑀨𑀲𑁆𑀲𑀲𑁆𑀲𑀓𑀸𑀭𑀡𑀁 𑀤𑀺𑀲𑁆𑀲𑀢𑀺𑀬𑁂𑀯. 𑀨𑀲𑁆𑀲𑁄𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸 𑀧𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸 𑀦𑀸𑀬. 𑀨𑀲𑁆𑀲𑁄 𑀳𑁂𑀢𑀼 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀨𑀲𑁆𑀲𑀧𑁆𑀧𑀥𑀸𑀦𑀢𑁆𑀢𑀸 𑀏𑀯 𑀨𑀲𑁆𑀲 𑀩𑀮𑀯𑀧𑀘𑁆𑀘𑀬𑀢𑁆𑀢𑀸 𑀏𑀯 𑀘 𑀨𑀲𑁆𑀲𑁄 𑀧𑀣𑀫𑀁 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑀝𑁆𑀞𑁂𑀦 𑀨𑀲𑁆𑀲𑀸𑀤𑀻𑀦𑀁 𑀲𑀩𑁆𑀩𑀘𑁂𑀢𑀲𑀺𑀓 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀳𑁄𑀢𑀺, 𑀧𑀥𑀸𑀦𑀁, 𑀚𑁂𑀝𑁆𑀞𑀓𑀁. 𑀨𑀲𑁆𑀲𑁄 𑀧𑀦 𑀆𑀭𑀫𑁆𑀫𑀡 𑀲𑀗𑁆𑀖𑀝𑁆𑀝𑀦𑀝𑁆𑀞𑁂𑀦 𑀲𑀩𑁆𑀩𑁂𑀲𑀁 𑀘𑁂𑀢𑀲𑀺𑀓 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺, 𑀧𑀥𑀸𑀦𑁄, 𑀚𑁂𑀝𑁆𑀞𑀓𑁄𑀢𑀺 𑀅𑀬𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄𑀢𑀺. 𑀏𑀢𑁆𑀣 𑀘𑁄𑀤𑀓𑁄 𑀨𑀼𑀲𑀦𑀁 𑀦𑀸𑀫 𑀲𑀧𑁆𑀧𑀝𑀺𑀖𑀭𑀽𑀧𑀸𑀦𑀁 𑀏𑀯 𑀓𑀺𑀘𑁆𑀘𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀦𑀦𑀼𑀘𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. ‘‘𑀦𑀦𑀼𑀘𑀸’’𑀢𑀺 𑀘𑁄𑀤𑁂𑀥𑀻𑀢𑀺 𑀤𑀻𑀧𑁂𑀢𑀺. ‘‘𑀅𑀧𑁆𑀧𑀝𑀺𑀖𑀲𑀪𑀸𑀯𑀸’’𑀢𑀺 𑀳𑁂𑀢𑀼𑀯𑀺𑀲𑁂𑀲𑀦𑀁. ‘‘𑀓𑀺𑀜𑁆𑀘𑀻’’𑀢𑀺 𑀓𑀺𑀜𑁆𑀘𑀺𑀯𑀢𑁆𑀣𑀼𑀁. 𑀅𑀬𑀁 𑀧𑀦 𑀨𑀲𑁆𑀲𑁄. ‘‘𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀸 𑀧𑀢𑁆𑀢𑀺𑀁’’𑀢𑀺 𑀘𑀮𑀦 𑀓𑀫𑁆𑀧𑀦 𑀣𑀫𑁆𑀪𑀦 𑀚𑁂𑀕𑀼𑀘𑁆𑀙 𑀪𑀬 𑀢𑀸𑀲 𑀙𑀫𑁆𑀪𑀺𑀢𑀢𑁆𑀢𑀸 𑀤𑀺𑀯𑀲𑁂𑀦 𑀯𑀺𑀓𑀸𑀭𑀸 𑀧𑀚𑁆𑀚𑀦𑀁. ‘‘𑀯𑁂𑀤𑀦𑀸 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀁’’𑀢𑀺 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀲𑀼𑀔𑀯𑁂𑀤𑀦𑀸, 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀤𑀼𑀓𑁆𑀔 𑀯𑁂𑀤𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀨𑀲𑁆𑀲 𑀯𑀺𑀲𑁂𑀲𑀸𑀦𑀼𑀭𑀽𑀧𑀁 𑀯𑁂𑀤𑀦𑀸 𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀁 𑀲𑀸𑀥𑁂𑀢𑀺. 𑀏𑀢𑁆𑀣 𑀘 𑀨𑀼𑀲𑀦𑀁 𑀦𑀸𑀫 𑀤𑀼𑀯𑀺𑀥𑀁 𑀭𑀽𑀧𑀧𑁆𑀨𑀼𑀲𑀦𑀁, 𑀦𑀸𑀫𑀧𑁆𑀨𑀼𑀲𑀦, 𑀦𑁆𑀢𑀺. 𑀢𑀢𑁆𑀣 𑀭𑀽𑀧𑀧𑁆𑀨𑀼𑀲𑀦𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩 𑀥𑀸𑀢𑀽𑀦𑀁 𑀓𑀺𑀘𑁆𑀘𑀁. 𑀦𑀸𑀫𑀧𑁆𑀨𑀼𑀲𑀦𑀁 𑀤𑀼𑀯𑀺𑀥𑀁 𑀨𑀲𑁆𑀲𑀧𑁆𑀨𑀼𑀲𑀦𑀁, 𑀜𑀸𑀡𑀧𑁆𑀨𑀼𑀲𑀦, 𑀦𑁆𑀢𑀺. 𑀢𑀢𑁆𑀣 𑀜𑀸𑀡𑀧𑁆𑀨𑀼𑀲𑀦𑀁 𑀦𑀸𑀫 𑀜𑀸𑀡𑀧𑁆𑀧𑀝𑀺𑀯𑁂𑀥𑁄. 𑀅𑀧𑀺 𑀘 𑀛𑀸𑀦𑀫𑀕𑁆𑀕 𑀨𑀮 𑀦𑀺𑀩𑁆𑀩𑀸𑀦𑀸𑀦𑀁 𑀧𑀝𑀺𑀮𑀸𑀪𑁄𑀧𑀺 𑀨𑀼𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑀺 𑀥𑀻𑀭𑀸 𑀦𑀺𑀩𑁆𑀩𑀸𑀦𑀁. 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁. 𑀨𑀼𑀲𑀸𑀫𑀺 𑀦𑁂𑀓𑁆𑀔𑀫𑀁 𑀲𑀼𑀔𑀁. 𑀅𑀧𑀼𑀣𑀼𑀚𑁆𑀚𑀦 𑀲𑁂𑀯𑀺𑀢𑀦𑁆𑀢𑀺-𑀆𑀤𑀻𑀲𑀼. 𑀇𑀤𑀁 𑀉𑀧𑀫𑀸 𑀫𑀢𑁆𑀢𑀁 𑀲𑀺𑀬𑀸, 𑀓𑀲𑁆𑀲𑀘𑀺 𑀫𑀦𑁆𑀤 𑀧𑀜𑁆𑀜𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀤’’𑀦𑁆𑀢𑀺 𑀔𑁂𑀴𑀼𑀧𑁆𑀧𑀸𑀤 𑀯𑀘𑀦𑀁. 𑀯𑀺𑀜𑁆𑀜𑀼𑀲𑁆𑀲 𑀧𑀦 𑀅𑀢𑀺𑀧𑀸𑀓𑀝 𑀨𑀲𑁆𑀲 𑀦𑀺𑀤𑀲𑁆𑀲𑀦𑁂𑀦 𑀅𑀧𑁆𑀧𑀸𑀓𑀝 𑀨𑀲𑁆𑀲 𑀯𑀺𑀪𑀸𑀯𑀦𑀁 𑀬𑀼𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀅𑀢𑀺𑀧𑀸𑀓𑀝𑀸𑀬 𑀧𑀦𑀸’’𑀢𑀺𑀆𑀤𑀺𑀁.

𑁭𑁦. 𑀯𑁂𑀤𑀦𑀸𑀯𑀘𑀦𑀢𑁆𑀣𑁂. ‘‘𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀸𑀦𑀁 𑀯𑀸’’𑀢𑀺 𑀯𑁂𑀤𑀦𑀸 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀸𑀦𑀁 𑀯𑀸. ‘‘𑀲𑀸𑀢𑀁 𑀯𑀸’’𑀢𑀺 𑀲𑀸𑀥𑀼𑀭𑀲𑀁 𑀯𑀸. ‘‘𑀅𑀲𑁆𑀲𑀸𑀢𑀁 𑀯𑀸’’𑀢𑀺 𑀅𑀲𑀸𑀥𑀼𑀭𑀲𑀁 𑀯𑀸. ‘‘𑀓𑀺𑀁 𑀯𑁂𑀤𑀬𑀢𑀻’’𑀢𑀺 𑀓𑀢𑀫𑀁 𑀯𑁂𑀤𑀬𑀢𑀺. ‘‘𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀻’’𑀢𑀺 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀅𑀣𑀯𑀸 ‘‘𑀓𑀺𑀜𑁆𑀘𑀯𑁂𑀤𑀬𑀢𑀻’’𑀢𑀺 𑀓𑀣𑀜𑁆𑀘𑀯𑁂𑀤𑀬𑀢𑀺. ‘‘𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀻’’𑀢𑀺 𑀲𑀼𑀔𑀁 𑀳𑀼𑀢𑁆𑀯𑀸𑀧𑀺 𑀯𑁂𑀤𑀬𑀢𑀺. 𑀲𑀼𑀔 𑀪𑀸𑀯𑁂𑀦 𑀯𑁂𑀤𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺. ‘‘𑀓𑀺𑀘𑁆𑀘𑀦𑁆𑀢𑀭𑀩𑁆𑀬𑀸𑀯𑀝𑀸’’𑀢𑀺 𑀅𑀜𑁆𑀜𑀓𑀺𑀘𑁆𑀘𑀩𑁆𑀬𑀸𑀯𑀝𑀸. 𑀅𑀥𑀺𑀧𑀢𑀺 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁. 𑀇𑀦𑁆𑀤𑁆𑀭𑀺𑀬 𑀓𑀺𑀘𑁆𑀘𑀁. ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺 𑀮𑀤𑁆𑀥𑀕𑀼𑀡𑀯𑀘𑀦𑀁. 𑀭𑀸𑀚𑀸𑀭𑀳 𑀪𑁄𑀚𑀦𑀁 𑀭𑀸𑀚𑀕𑁆𑀕𑀪𑁄𑀚𑀦𑀁. ‘‘𑀲𑀽𑀤𑀲𑀤𑀺𑀲𑀢𑀸’’𑀢𑀺 𑀭𑀜𑁆𑀜𑁄𑀪𑀢𑁆𑀢𑀓𑀸𑀭𑀲𑀤𑀺𑀲𑀢𑀸. 𑀢𑀢𑁆𑀣 𑀲𑀽𑀤𑁄 𑀭𑀜𑁆𑀜𑁄𑀪𑀢𑁆𑀢𑀁 𑀧𑀘𑀦𑁆𑀢𑁄 𑀭𑀲𑀚𑀸𑀦𑀦𑀢𑁆𑀣𑀁 𑀣𑁄𑀓𑀁 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀢𑁆𑀯𑀸 𑀭𑀲𑀁 𑀯𑀻𑀫𑀁𑀲𑀢𑀺. 𑀬𑀣𑀺𑀘𑁆𑀙𑀺𑀢𑀁 𑀧𑀦 𑀪𑀼𑀜𑁆𑀚𑀺𑀢𑀼𑀁 𑀅𑀦𑀺𑀲𑁆𑀲𑀭𑁄. 𑀭𑀸𑀚𑀸 𑀏𑀯 𑀬𑀣𑀺𑀘𑁆𑀙𑀺𑀢𑀁 𑀪𑀼𑀜𑁆𑀚𑀺𑀢𑀼𑀁 𑀇𑀲𑁆𑀲𑀭𑁄. 𑀭𑀸𑀚𑀸 𑀯𑀺𑀬 𑀯𑁂𑀤𑀦𑀸. 𑀲𑀽𑀤𑁄 𑀯𑀺𑀬 𑀲𑁂𑀲𑀘𑁂𑀢𑀲𑀺𑀓 𑀥𑀫𑁆𑀫𑀸.

𑁭𑁧. 𑀲𑀜𑁆𑀜𑀸𑀯𑀘𑀦𑀢𑁆𑀣𑁂. ‘‘𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀲𑀼𑀝𑁆𑀞𑀼 𑀚𑀸𑀦𑀸𑀢𑀺. 𑀲𑀼𑀝𑁆𑀞𑀼𑀚𑀸𑀦𑀦𑀜𑁆𑀘 𑀦𑀸𑀫 𑀦 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀬 𑀯𑀺𑀯𑀺𑀥𑀚𑀸𑀦𑀦𑀁 𑀳𑁄𑀢𑀺. 𑀦 𑀘 𑀧𑀜𑁆𑀜𑀸𑀬 𑀯𑀺𑀬 𑀬𑀣𑀸𑀪𑀽𑀢𑀚𑀸𑀦𑀦𑀁 𑀳𑁄𑀢𑀺. 𑀅𑀣 𑀔𑁄 𑀪𑀽𑀢𑀁 𑀯𑀸 𑀳𑁄𑀢𑀼, 𑀅𑀪𑀽𑀢𑀁 𑀯𑀸. 𑀬𑀁 𑀬𑀁 𑀙 𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀚𑀸𑀦𑀸𑀢𑀺, 𑀧𑀜𑁆𑀜𑀸𑀬 𑀯𑀸 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀙𑀸 𑀅𑀧𑁆𑀧𑀫𑀼𑀲𑁆𑀲𑀓𑀭𑀡 𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀦𑀚𑀸𑀦𑀦𑀢𑁆𑀣𑀁 𑀲𑀜𑁆𑀜𑀸𑀡𑀁 𑀓𑀭𑁄𑀢𑀻’’𑀢𑀺. 𑀢𑀢𑁆𑀣 ‘‘𑀲𑀜𑁆𑀜𑀸𑀡’’𑀦𑁆𑀢𑀺 𑀦𑀺𑀫𑀺𑀢𑁆𑀢 𑀓𑀭𑀡𑀁. 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸𑀧𑀺 𑀅𑀧𑁆𑀧𑀫𑀼𑀝𑁆𑀞𑀪𑀸𑀯𑀁 𑀲𑀸𑀥𑁂𑀢𑀺 𑀑𑀧𑀧𑀸𑀢𑀺𑀓 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀳𑀺 𑀧𑀼𑀭𑀺𑀫𑀁 𑀅𑀢𑁆𑀢𑀦𑁄 𑀪𑀯𑀁 𑀚𑀸𑀦𑀦𑁆𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀧𑀺 𑀓𑁂𑀘𑀺 𑀧𑀼𑀭𑀺𑀫𑀁 𑀪𑀯𑀁 𑀚𑀸𑀦𑀦𑁆𑀢𑀺, 𑀬𑁂𑀚𑀸𑀢𑀺𑀲𑁆𑀲𑀭 𑀧𑀼𑀕𑁆𑀕𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 ‘‘𑀅𑀧𑁆𑀧𑀫𑀼𑀝𑁆𑀞𑀪𑀸𑀯’’𑀦𑁆𑀢𑀺 𑀅𑀦𑀝𑁆𑀞𑀪𑀸𑀯𑀁. 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲 𑀲𑀜𑁆𑀜𑀸 𑀦𑀸𑀫 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀧𑁆𑀧𑀯𑀢𑁆𑀢𑀸 𑀲𑀜𑁆𑀜𑀸. ‘‘𑀩𑁄𑀥𑁂𑀢𑀼’’𑀦𑁆𑀢𑀺 𑀩𑀼𑀚𑁆𑀛𑀸𑀧𑁂𑀢𑀼𑀁. ‘‘𑀤𑀸𑀭𑀼𑀢𑀘𑁆𑀙𑀓𑀲𑀤𑀺𑀲𑀸𑀢𑀺 𑀘 𑀯𑀼𑀢𑁆𑀢𑀸’’𑀢𑀺 𑀤𑀸𑀭𑀼𑀢𑀘𑁆𑀙𑀓𑁄 𑀦𑀸𑀫 𑀓𑀝𑁆𑀞𑀯𑀟𑁆𑀠𑀓𑀻. 𑀲𑁄 𑀓𑀝𑁆𑀞𑀓𑁆𑀔𑀦𑁆𑀥𑁂𑀲𑀼 𑀦𑀺𑀫𑀺𑀢𑁆𑀢𑀓𑀸𑀭𑀻𑀳𑁄𑀢𑀺. 𑀲𑀼𑀢𑀘𑁆𑀙𑀺𑀢𑀙𑀺𑀦𑁆𑀤𑀺𑀢𑁂𑀲𑀼 𑀓𑀝𑁆𑀞𑁂𑀲𑀼 𑀦𑀺𑀫𑀺𑀢𑁆𑀢𑀸𑀦𑀺 𑀓𑀢𑁆𑀯𑀸 𑀞𑀧𑁂𑀢𑀺. 𑀧𑀘𑁆𑀙𑀸𑀢𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀓𑀝𑁆𑀞𑀸𑀦𑀺 𑀓𑀫𑁆𑀫𑁂 𑀉𑀧𑀦𑁂𑀢𑀺. ‘‘𑀳𑀢𑁆𑀣𑀺 𑀤𑀲𑁆𑀲𑀓 𑀅𑀦𑁆𑀥𑀲𑀤𑀺𑀲𑀸’’𑀢𑀺 𑀏𑀢𑁆𑀣 𑀏𑀓𑁄 𑀓𑀺𑀭 𑀭𑀸𑀚𑀸 𑀓𑁂𑀴𑀺𑀧𑁆𑀧𑀲𑀼𑀢𑁄 𑀳𑁄𑀢𑀺. 𑀲𑁄 𑀚𑀘𑁆𑀘𑀦𑁆𑀥𑀸𑀦𑀁𑀞𑀸𑀦𑁂 𑀏𑀓𑀁 𑀳𑀢𑁆𑀣𑀺𑀁 𑀆𑀦𑁂𑀢𑁆𑀯𑀸𑀞𑀧𑁂𑀦𑁆𑀢𑁄 𑀚𑀘𑁆𑀘𑀦𑁆𑀥𑁂 𑀆𑀳 𑀚𑀸𑀦𑀸𑀣 𑀪𑁄 𑀢𑀼𑀫𑁆𑀳𑁂 𑀳𑀢𑁆𑀣𑀺𑀦𑁆𑀢𑀺. 𑀢𑁂 𑀳𑀢𑁆𑀣𑀺𑀁 𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀧𑀭𑀸𑀫𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀸𑀫𑀲𑀺𑀢𑀁 𑀢𑀁 𑀢𑀁 𑀅𑀗𑁆𑀕𑀫𑀯𑀳𑀢𑁆𑀣𑀻𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀤𑀴𑁆𑀳𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺. 𑀧𑀼𑀦 𑀭𑀸𑀚𑀸 𑀢𑁂 𑀧𑀼𑀘𑁆𑀙𑀺 𑀓𑀻𑀤𑀺𑀲𑁄 𑀪𑁄 𑀳𑀢𑁆𑀣𑀻𑀢𑀺. 𑀢𑁂 𑀭𑀜𑁆𑀜𑁄 𑀳𑀢𑁆𑀣𑀺𑀲𑀡𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑀸 𑀯𑀺𑀯𑀸𑀤𑀁 𑀆𑀧𑀚𑁆𑀚𑀦𑁆𑀢𑀺. 𑀆𑀘𑀺𑀓𑁆𑀔𑀦𑀫𑁂𑀯 𑀭𑀜𑁆𑀜𑁄𑀳𑀢𑁆𑀣𑀺𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 𑀢𑁂 𑀳𑀢𑁆𑀣𑀺𑀤𑀲𑁆𑀲𑀓 𑀅𑀦𑁆𑀥𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀧𑀝𑁆𑀞𑀺𑀢𑀯𑀺𑀲𑀬𑀕𑁆𑀕𑀳𑀡𑁂’’𑀢𑀺 𑀭𑀢𑁆𑀢𑀺𑀬𑀁 𑀅𑀦𑁆𑀥𑀓𑀸𑀭𑁂 𑀭𑀚𑁆𑀚𑀼𑀓𑁆𑀔𑀡𑁆𑀟𑀁 𑀧𑀲𑁆𑀲𑀦𑁆𑀢𑀲𑁆𑀲 𑀲𑀧𑁆𑀧𑀲𑀡𑁆𑀞𑀸𑀦𑀁 𑀉𑀧𑀝𑁆𑀞𑀸𑀢𑀺. 𑀲𑁄 𑀉𑀧𑀝𑁆𑀞𑀺𑀢𑀁 𑀲𑀡𑁆𑀞𑀸𑀦𑀫𑀢𑁆𑀢𑀁 𑀲𑀧𑁆𑀧𑁄𑀢𑀺 𑀕𑀡𑁆𑀳𑀸𑀢𑀺. 𑀏𑀯𑀁 𑀉𑀧𑀝𑁆𑀞𑀺𑀢𑀯𑀺𑀲𑀬𑀕𑁆𑀕𑀳𑀡𑀁 𑀳𑁄𑀢𑀺. 𑀫𑀺𑀕𑀧𑁄𑀢𑀓𑀸𑀦𑀜𑁆𑀘 𑀅𑀭𑀜𑁆𑀜𑁂𑀔𑁂𑀢𑁆𑀢𑀫𑀚𑁆𑀛𑁂𑀧𑀼𑀭𑀺𑀲𑀲𑀡𑁆𑀞𑀸𑀦𑀁 𑀢𑀺𑀡 𑀭𑀽𑀧𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀼𑀭𑀺𑀲𑀲𑀡𑁆𑀞𑀸 𑀦𑀁 𑀉𑀧𑀝𑁆𑀞𑀸𑀢𑀺. 𑀢𑁂 𑀉𑀧𑀝𑁆𑀞𑀺𑀢𑀁 𑀲𑀡𑁆𑀞𑀸𑀦𑀫𑀢𑁆𑀢𑀁 𑀧𑀼𑀭𑀺𑀲𑁄𑀢𑀺 𑀕𑀡𑁆𑀳𑀺𑀢𑁆𑀯𑀸 𑀲𑁄 𑀅𑀫𑁆𑀳𑁂 𑀧𑀳𑀭𑁂𑀬𑁆𑀬𑀸𑀢𑀺 𑀧𑀮𑀸𑀬𑀦𑁆𑀢𑀺. 𑀯𑀼𑀢𑁆𑀢𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁.