𑀲𑀫𑀼𑀘𑁆𑀘𑀬 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁬𑁨. 𑀏𑀯𑀁 𑀙𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀘𑀢𑁆𑀢𑀸𑀭𑁄 𑀧𑀭𑀫𑀢𑁆𑀣𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀢𑀁𑀢𑀁𑀭𑀸𑀲𑀺𑀲𑀗𑁆𑀔𑀸𑀢𑀁 𑀲𑀫𑀼𑀘𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀤𑀺𑀕𑀸𑀣 𑀫𑀸𑀳. 𑀬𑁂 𑀲𑀮𑀓𑁆𑀔𑀡𑀸 𑀤𑁆𑀯𑀸𑀲𑀢𑁆𑀢𑀢𑀺𑀯𑀺𑀥𑀸 𑀯𑀢𑁆𑀣𑀼𑀥𑀫𑁆𑀫𑀸 𑀫𑀬𑀸 𑀯𑀼𑀢𑁆𑀢𑀸. 𑀇𑀤𑀸𑀦𑀺 𑀢𑁂𑀲𑀁 𑀲𑀫𑀼𑀘𑁆𑀘𑀬𑀁 𑀬𑀣𑀸𑀬𑁄𑀕𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀲𑀮𑀓𑁆𑀔𑀡𑀸𑀯𑀢𑁆𑀣𑀼𑀥𑀫𑁆𑀫𑀸𑀢𑀺 𑀧𑀤𑁂𑀳𑀺 𑀤𑀲𑀯𑀺𑀥𑀸𑀦𑀺 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀢𑀸𑀦𑀺 𑀅𑀢𑁆𑀢𑀦𑁄 𑀆𑀯𑁂𑀦𑀺𑀓𑀪𑀽𑀢𑁂𑀦 𑀲𑀪𑀸𑀯 𑀮𑀓𑁆𑀔𑀡𑁂𑀦 𑀅𑀦𑀺𑀘𑁆𑀘𑀢𑀸𑀤𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦𑀘 𑀲𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀦𑁆𑀢𑀧𑀭𑀫𑀢𑁆𑀣𑀢𑀸𑀬 𑀅𑀪𑀸𑀯𑀢𑁄. 𑀢𑀢𑁄𑀬𑁂𑀯𑀘 𑀯𑀢𑁆𑀣𑀼𑀥𑀫𑁆𑀫𑀸𑀘 𑀦𑀳𑁄𑀦𑁆𑀢𑀺. 𑀲𑀭𑀽𑀧𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸. 𑀤𑀩𑁆𑀩𑀯𑀸𑀘𑀓𑁄 𑀳𑀺 𑀇𑀥 𑀯𑀢𑁆𑀣𑀼𑀲𑀤𑁆𑀤𑁄. 𑀤𑀩𑁆𑀩𑀜𑁆𑀘𑀦𑀸𑀫 𑀇𑀥 𑀲𑀭𑀽𑀧𑀢𑁄 𑀮𑀩𑁆𑀪𑀫𑀸𑀦𑁄 𑀲𑀪𑀸𑀯𑁄 𑀏𑀯. 𑀏𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀫𑀕𑁆𑀕𑀨𑀮 𑀧𑀘𑁆𑀘𑀯𑁂𑀓𑁆𑀔𑀦𑀜𑀸𑀡𑁂𑀲𑀼 𑀲𑀭𑀽𑀧𑀢𑁄 𑀮𑀩𑁆𑀪𑀫𑀸𑀦 𑀲𑀪𑀸𑀯𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀯𑀺𑀬 𑀘 𑀯𑀢𑁆𑀣𑀼𑀥𑀫𑁆𑀫 𑀲𑀦𑁆𑀦𑀺𑀲𑁆𑀲𑀬𑁂𑀦 𑀤𑀺𑀲𑁆𑀲𑀫𑀸𑀦𑀥𑀫𑁆𑀫𑀫𑀢𑁆𑀢𑀪𑀸𑀯𑀁 𑀯𑀸 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀬 𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀫𑀢𑁆𑀢𑀪𑀸𑀯𑀁𑀯𑀸 𑀲𑀲𑀯𑀺𑀲𑀸𑀡 𑀓𑀘𑁆𑀙𑀧𑀮𑁄𑀫𑀸𑀤𑀻𑀦𑀁 𑀯𑀺𑀬 𑀲𑀩𑁆𑀩𑀲𑁄 𑀅𑀪𑀽𑀢 𑀧𑀭𑀺𑀓𑀧𑁆𑀧𑀺𑀢 𑀫𑀢𑁆𑀢𑀪𑀸𑀯𑀁𑀯𑀸 𑀦𑀺𑀯𑀸𑀭𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣𑀘 𑀤𑁆𑀯𑀸𑀲𑀢𑁆𑀢𑀢𑀺𑀯𑀺𑀥𑀸𑀲𑀮𑀓𑁆𑀔𑀡𑀸𑀯𑀢𑁆𑀣𑀼𑀥𑀫𑁆𑀫𑀸𑀢𑀺 𑀯𑀘𑀦𑁂 𑀧𑀬𑁄𑀚𑀦𑀁 𑀦𑀤𑀺𑀲𑁆𑀲𑀢𑀺. 𑀢𑁂𑀲𑀼 𑀳𑀺 𑀤𑁆𑀯𑀸𑀲𑀢𑁆𑀢𑀢𑀺𑀯𑀺𑀥𑁂𑀲𑀼 𑀏𑀓𑀘𑁆𑀘𑁂 𑀏𑀯 𑀥𑀫𑁆𑀫𑀸 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀲𑀗𑁆𑀕𑀳𑁂𑀲𑀼 𑀆𑀕𑀢𑀸. 𑀧𑀘𑁆𑀙𑀺𑀫𑁂𑀘 𑀲𑀩𑁆𑀩𑀲𑀗𑁆𑀕𑀳𑁂 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺𑀧𑀺 𑀅𑀥𑀺𑀧𑁆𑀧𑁂𑀢𑀸𑀦𑀺𑀏𑀯𑀸𑀢𑀺. 𑀏𑀢𑁆𑀣𑀘 𑀯𑀢𑁆𑀣𑀼𑀥𑀫𑁆𑀫𑀸𑀲𑀮𑀓𑁆𑀔𑀡𑀸𑀢𑀺 𑀧𑀤𑁂𑀳𑀺 𑀅𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀁 𑀲𑀮𑀓𑁆𑀔𑀡𑀢𑀸 𑀧𑀝𑀺𑀓𑁆𑀔𑀺𑀧𑀦𑁂 𑀬𑀁 𑀯𑀢𑁆𑀢𑀩𑁆𑀩𑀁. 𑀢𑀁 𑀭𑀽𑀧𑀲𑀫𑀼𑀤𑁆𑀤𑁂𑀲 𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺. 𑀏𑀓𑀦𑁆𑀢𑀸𑀓𑀼𑀲𑀮𑀚𑀸𑀢𑀺𑀬𑀸𑀦𑀁 𑀆𑀲𑀯 𑀘𑀢𑀼𑀓𑁆𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀅𑀓𑀼𑀲𑀮𑀲𑀗𑁆𑀕𑀳𑁄, 𑀦 𑀅𑀓𑀼𑀲𑀮 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀬𑁂𑀯 𑀅𑀓𑀼𑀲𑀮𑀪𑀽𑀢𑀸𑀦𑀁 𑀘𑀺𑀢𑁆𑀢𑀨𑀲𑁆𑀲𑀸𑀤𑀻𑀦𑀦𑁆𑀢𑀺. 𑀓𑀼𑀲𑀮𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀫𑀺𑀲𑁆𑀲𑀓𑀸𑀦𑀁 𑀲𑀗𑁆𑀕𑀳𑁄 𑀫𑀺𑀲𑁆𑀲𑀓𑀲𑀗𑁆𑀕𑀳𑁄.

𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀩𑀼𑀚𑁆𑀛𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀩𑁄𑀥𑀺𑀬𑀸 𑀧𑀓𑁆𑀔𑀸 𑀩𑁄𑀥𑀺𑀧𑀓𑁆𑀔𑀸. 𑀩𑁄𑀥𑀺𑀲𑀫𑁆𑀪𑀸𑀭𑀸𑀢𑀺 𑀅𑀢𑁆𑀣𑁄. 𑀩𑁄𑀥𑀺 𑀧𑀓𑁆𑀔𑁂𑀲𑀼 𑀪𑀯𑀸 𑀅𑀦𑁆𑀢𑁄𑀕𑀥𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸. 𑀢𑁂𑀲𑀁 𑀲𑀗𑁆𑀕𑀳𑁄𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁄. 𑀲𑀩𑁆𑀩𑁂𑀲𑀁 𑀅𑀦𑀯𑀲𑁂𑀲𑀸𑀦𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀲𑀩𑁆𑀩𑀲𑀗𑁆𑀕𑀳𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀦𑀺𑀬𑀝𑁆𑀞𑁂𑀦𑀘 𑀆𑀲𑀯 𑀲𑀤𑀺𑀲𑀢𑁆𑀢𑀸 𑀆𑀲𑀯𑀸. 𑀬𑀤𑀺𑀘 𑀢𑀤𑀼𑀪𑀬𑀝𑁆𑀞𑁂𑀦 𑀆𑀲𑀯𑀸𑀦𑀸𑀫 𑀲𑀺𑀬𑀼𑀁. 𑀇𑀫𑁂 𑀮𑁄𑀪𑀸𑀤𑀬𑁄 𑀏𑀯 𑀆𑀲𑀯𑀸𑀦𑀸𑀫 𑀲𑀺𑀬𑀼𑀁. 𑀧𑀼𑀧𑁆𑀨𑀸𑀲𑀯𑀸𑀤𑀬𑁄 𑀳𑀺 𑀮𑁄𑀓𑁂 𑀙 𑀧𑀜𑁆𑀘 𑀭𑀢𑁆𑀢𑀺𑀫𑀢𑁆𑀢𑀁 𑀯𑀸 𑀲𑀢𑁆𑀢𑀝𑁆𑀞𑀭𑀢𑁆𑀢𑀺𑀫𑀢𑁆𑀢𑀁 𑀯𑀸 𑀲𑀬𑀁𑀧𑀺 𑀓𑀼𑀫𑁆𑀪𑁂𑀲𑀼 𑀧𑀭𑀺𑀯𑀸𑀲𑀁 𑀕𑀡𑁆𑀳𑀦𑁆𑀢𑀺. 𑀓𑀼𑀫𑁆𑀪𑁂𑀘 𑀧𑀭𑀺𑀯𑀸𑀲𑀁 𑀕𑀸𑀳𑀸𑀧𑁂𑀦𑁆𑀢𑀺. 𑀇𑀫𑁂 𑀧𑀦 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀬𑀁𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀧𑀭𑀺𑀯𑀸𑀲𑀁 𑀕𑀡𑁆𑀳𑀦𑁆𑀢𑀺. 𑀲𑀢𑁆𑀢𑀲𑀦𑁆𑀢𑀸𑀦𑀜𑁆𑀘 𑀧𑀭𑀺𑀯𑀸𑀲𑀁 𑀕𑀸𑀳𑀸𑀧𑁂𑀦𑁆𑀢𑀺. 𑀲𑀓𑀮𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀤𑀸 𑀆𑀲𑀯𑀧𑀽𑀭𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸𑀳-𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀢𑁆𑀣 𑀦𑀺𑀯𑀻𑀲𑀫𑀸𑀦𑀸 𑀦𑀺𑀯𑀻𑀲𑀢𑀻𑀢𑀺𑀆𑀤𑀺. 𑀢𑀢𑁆𑀣 𑀏𑀲𑀸 𑀢𑀡𑁆𑀳𑀸 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀏𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀘 𑀧𑀼𑀦 𑀅𑀦𑀼𑀲𑀬𑀪𑀸𑀯𑁂𑀦 𑀧𑀭𑀺𑀯𑀸𑀲𑀁 𑀓𑀢𑁆𑀯𑀸 𑀦𑀺𑀯𑀻𑀲𑀫𑀸𑀦𑀸 𑀏𑀢𑁆𑀣𑁂𑀯 𑀦𑀺𑀯𑀻𑀲𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀯𑀘 𑀅𑀭𑀺𑀬𑀫𑀕𑁆𑀕𑀥𑁄𑀯𑀦𑀁 𑀦𑀮𑀩𑁆𑀪𑀢𑀺. 𑀢𑀸𑀯 𑀲𑀦𑁆𑀢𑀸𑀦𑀁 𑀕𑀽𑀣𑀧𑀽𑀭𑀺𑀢𑀓𑀽𑀧𑀁 𑀯𑀺𑀬 𑀤𑀼𑀩𑁆𑀩𑀺𑀲𑁄𑀥𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀧𑀼𑀧𑁆𑀨𑀸𑀲𑀯𑀸𑀤𑀬𑁄𑀘 𑀫𑀤𑀁 𑀚𑀦𑁂𑀦𑁆𑀢𑀸 𑀫𑀼𑀳𑀼𑀢𑁆𑀢𑀫𑁂𑀯 𑀚𑀦𑁂𑀦𑁆𑀢𑀺. 𑀇𑀫𑁂 𑀧𑀦 𑀬𑀸𑀯 𑀅𑀭𑀺𑀬𑀫𑀕𑁆𑀕𑀁 𑀦𑀮𑀪𑀢𑀺. 𑀢𑀸𑀯 𑀦𑀺𑀘𑁆𑀘𑀫𑀤𑀁 𑀚𑀦𑁂𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀦𑁆𑀢𑁂𑀦 𑀇𑀫𑁂𑀬𑁂𑀯 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁂𑀦 𑀫𑀤𑀦𑀺 𑀬𑀝𑁆𑀞𑁂𑀦𑀘 𑀆𑀲𑀯𑀸𑀦𑀸𑀫 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺.

𑀯𑀺𑀲𑀦𑁆𑀤𑀦𑀝𑁆𑀞𑁂𑀦𑀯𑀸 𑀆𑀲𑀯𑀲𑀤𑀺𑀲𑀢𑁆𑀢𑀸 𑀆𑀲𑀯𑀸, 𑀬𑀣𑀸 𑀳𑀺 𑀓𑀼𑀥𑀺𑀢 𑀓𑀼𑀝𑁆𑀞𑀺𑀦𑁄 𑀫𑀳𑀸𑀯𑀡𑀫𑀼𑀔𑁂𑀳𑀺 𑀬𑀽𑀲𑀲𑀗𑁆𑀔𑀸𑀢𑁄 𑀆𑀲𑀯𑁄 𑀯𑀺𑀲𑀦𑁆𑀤𑀺𑀢𑁆𑀯𑀸 𑀧𑀺𑀮𑁄𑀢𑀺𑀓𑀔𑀡𑁆𑀟𑀸𑀦𑀺 𑀤𑀽𑀲𑁂𑀢𑀺, 𑀏𑀯𑀁 𑀇𑀫𑁂𑀧𑀺 𑀙𑀳𑀺𑀤𑁆𑀯𑀸𑀭𑁂𑀳𑀺 𑀯𑀺𑀲𑀦𑁆𑀤𑀺𑀢𑁆𑀯𑀸 𑀙𑀴𑀸𑀭𑀫𑁆𑀫𑀡𑀸𑀦𑀺𑀤𑀽𑀲𑁂𑀦𑁆𑀢𑀻𑀢𑀺. 𑀆𑀬𑀢𑀁𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀺𑀧𑀲𑀯𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀆𑀲𑀯𑀸. 𑀅𑀣𑀯𑀸, 𑀪𑀯𑀢𑁄 𑀆𑀪𑀯𑀕𑁆𑀕𑀸 𑀥𑀫𑁆𑀫𑀢𑁄 𑀆𑀕𑁄𑀢𑁆𑀭𑀢𑀼𑀫𑁆𑀳𑀸 𑀲𑀯𑀦𑁆𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀆𑀲𑀤𑁆𑀤𑀲𑁆𑀲 𑀅𑀯𑀥𑀺𑀅𑀢𑁆𑀣𑀚𑁄𑀢𑀓𑀢𑁆𑀢𑀸. 𑀅𑀯𑀥𑀺𑀘 𑀤𑀼𑀯𑀺𑀥𑁄 𑀫𑀭𑀺𑀬𑀸𑀤𑀯𑀺𑀲𑀬𑁄 𑀅𑀪𑀺𑀯𑀺𑀥𑀺𑀯𑀺𑀲𑀬𑁄𑀘𑀸𑀢𑀺 𑀢𑀢𑁆𑀣 𑀬𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻𑀓𑁆𑀭𑀺𑀬𑀸 𑀅𑀯𑀥𑀺𑀪𑀽𑀢𑀁 𑀅𑀢𑁆𑀢𑀸𑀦𑀁 𑀩𑀳𑀺𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀲𑁄 𑀫𑀭𑀺𑀬𑀸𑀤𑀯𑀺𑀲𑀬𑁄 𑀦𑀸𑀫. 𑀬𑀣𑀸 𑀆𑀧𑀸𑀢𑀮𑀺𑀧𑀼𑀢𑁆𑀢𑀸 𑀤𑁂𑀯𑁄 𑀯𑀼𑀝𑁆𑀞𑁄𑀢𑀺. 𑀬𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻𑀓𑁆𑀭𑀺𑀬𑀸 𑀅𑀯𑀥𑀺𑀪𑀽𑀢𑀁 𑀅𑀢𑁆𑀢𑀸𑀦𑀁 𑀩𑁆𑀬𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀲𑁄 𑀅𑀪𑀺𑀯𑀺𑀥𑀺𑀯𑀺𑀲𑀬𑁄𑀦𑀸𑀫. 𑀬𑀣𑀸 𑀆𑀩𑁆𑀭𑀳𑁆𑀫𑀮𑁄𑀓𑀸 𑀪𑀕𑀯𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺. 𑀇𑀥 𑀧𑀦 𑀅𑀪𑀺𑀯𑀺𑀥𑀺𑀯𑀺𑀲𑀬𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸 𑀪𑀯𑀕𑁆𑀕𑀜𑁆𑀘 𑀕𑁄𑀢𑁆𑀭𑀪𑀼𑀜𑁆𑀘 𑀩𑁆𑀬𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀓𑀢𑁆𑀯𑀸 𑀲𑀯𑀦𑁆𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

[𑁨𑁦𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀯𑀥𑀺𑀘 𑀫𑀭𑀺𑀬𑀸𑀤𑀅𑀪𑀺𑀯𑀺𑀥𑀺𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀢𑁆𑀣 𑀆𑀧𑀸𑀢𑀮𑀺𑀧𑀼𑀢𑁆𑀢𑀸 𑀤𑁂𑀯𑁄 𑀯𑀼𑀝𑁆𑀞𑁄𑀢𑀺𑀆𑀤𑀻𑀲𑀼𑀯𑀺𑀬 𑀓𑁆𑀭𑀺𑀬𑀁 𑀩𑀳𑀺𑀓𑀢𑁆𑀯𑀸 𑀧𑀯𑀢𑁆𑀢𑁄 𑀫𑀭𑀺𑀬𑀸𑀤𑁄. 𑀆𑀪𑀯𑀕𑁆𑀕𑀸𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺𑀆𑀤𑀻𑀲𑀼𑀯𑀺𑀬 𑀓𑁆𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑁄 𑀅𑀪𑀺𑀯𑀺𑀥𑀻’’𑀢𑀺 𑀯𑀤𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀅𑀯𑀯𑀺𑀥𑀺𑀯𑀺𑀲𑀬𑀪𑀽𑀢𑁄 𑀪𑀯𑀕𑁆𑀕𑁄 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀓𑀁 𑀲𑀤𑁆𑀤𑀲𑁆𑀲 𑀅𑀩𑁆𑀪𑀼𑀕𑁆𑀕𑀫𑀦𑀓𑁆𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀦𑀘 𑀅𑀯𑀥𑀺𑀪𑀽𑀢𑁄 𑀅𑀢𑁆𑀣𑁄 𑀓𑁆𑀭𑀺𑀬𑀁 𑀩𑀳𑀺𑀯𑀸 𑀅𑀦𑁆𑀢𑁄𑀯𑀸 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑁄. 𑀓𑁆𑀭𑀺𑀬𑀸𑀏𑀯 𑀧𑀦 𑀢𑀁 𑀩𑀳𑀺𑀯𑀸 𑀅𑀦𑁆𑀢𑁄𑀯𑀸 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀽𑀮𑀝𑀻𑀓𑀸𑀬𑀁-𑀤𑀼𑀯𑀺𑀥𑁄𑀳𑀺 𑀅𑀯𑀥𑀺 𑀅𑀪𑀺𑀯𑀺𑀥𑀺𑀯𑀺𑀲𑀬𑁄 𑀅𑀦𑀪𑀺𑀯𑀺𑀥𑀺𑀯𑀺𑀲𑀬𑁄𑀘. 𑀅𑀪𑀺𑀯𑀺𑀥𑀺𑀯𑀺𑀲𑀬𑀁 𑀓𑁆𑀭𑀺𑀬𑀸𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀆𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀕𑀢𑁄𑀢𑀺. 𑀇𑀢𑀭𑀁 𑀩𑀳𑀺𑀓𑀢𑁆𑀯𑀸, 𑀆𑀧𑀸𑀢𑀮𑀺𑀧𑀼𑀢𑁆𑀢𑀸 𑀯𑀼𑀝𑁆𑀞𑁄 𑀤𑁂𑀯𑁄𑀢𑀺. 𑀓𑀸𑀫𑁂𑀢𑀺 𑀇𑀘𑁆𑀙𑀢𑀻𑀢𑀺 𑀓𑀸𑀫𑁄. 𑀲𑁄𑀏𑀯 𑀆𑀲𑀯𑁄𑀢𑀺 𑀓𑀸𑀫𑀸𑀲𑀯𑁄. 𑀓𑀸𑀫𑀻𑀬𑀢𑀺𑀯𑀸 𑀑𑀴𑀸𑀭𑀺𑀓𑁂𑀦 𑀓𑀸𑀫𑁂𑀦 𑀇𑀘𑁆𑀙𑀻𑀬𑀢𑀻𑀢𑀺 𑀓𑀸𑀫𑁄. 𑀧𑀜𑁆𑀘𑀓𑀸𑀫𑀕𑀼𑀡𑀫𑀼𑀔𑁂𑀦 𑀤𑁂𑀲𑀺𑀢𑁄 𑀲𑀩𑁆𑀩𑁄 𑀓𑀸𑀫𑀸𑀯𑀘𑀭𑀥𑀫𑁆𑀫𑁄. 𑀇𑀥 𑀧𑀦 𑀢𑀁 𑀦𑀸𑀫𑁂𑀦 𑀢𑀤𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀓𑀸𑀫𑁄𑀏𑀯 𑀆𑀲𑀯𑁄𑀢𑀺 𑀓𑀸𑀫𑀸𑀲𑀯𑁄. 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦 𑀯𑀲𑁂𑀦 𑀧𑀯𑀢𑁆𑀢𑁄 𑀓𑀸𑀫𑀭𑀸𑀕𑁄. 𑀣𑁂𑀭𑁂𑀦 𑀧𑀦 𑀅𑀬𑀫𑀢𑁆𑀣𑁄𑀯 𑀇𑀘𑁆𑀙𑀺𑀢𑁄. 𑀯𑀓𑁆𑀔𑀢𑀺 𑀳𑀺 𑀓𑀸𑀫𑀪𑀯 𑀦𑀸𑀫𑁂𑀦 𑀢𑀩𑁆𑀩𑀢𑁆𑀣𑀼𑀓𑀸 𑀢𑀡𑁆𑀳𑀸 𑀅𑀥𑀺𑀧𑁆𑀧𑁂𑀢𑀸𑀢𑀺.

[𑁨𑁦𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀼𑀭𑀺𑀫𑀢𑁆𑀣𑁄𑀯 𑀯𑀼𑀢𑁆𑀢𑁄. 𑀲𑁄 𑀅𑀦𑀼𑀧𑀧𑀦𑁆𑀦𑁄, 𑀣𑁂𑀭𑀫𑀢𑀸𑀦𑀼𑀕𑀢𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸.

𑀪𑀯𑀸𑀲𑀯𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑁄 𑀪𑀯𑁄 𑀓𑀫𑁆𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄 𑀘. 𑀢𑀢𑁆𑀣 𑀫𑀳𑀕𑁆𑀕𑀢𑀓𑀼𑀲𑀮𑀥𑀫𑁆𑀫𑀸 𑀓𑀫𑁆𑀫𑀪𑀯𑁄. 𑀢𑀁𑀦𑀺𑀩𑁆𑀩𑀢𑁆𑀢𑀸 𑀯𑀺𑀧𑀸𑀓 𑀥𑀫𑁆𑀫𑀸 𑀉𑀧𑀧𑀢𑁆𑀢𑀺𑀪𑀯𑁄. 𑀇𑀥𑀧𑀺 𑀪𑀯𑀲𑀤𑁆𑀤𑁂𑀦 𑀢𑀤𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀪𑀯𑁄𑀏𑀯 𑀆𑀲𑀯𑁄𑀢𑀺 𑀪𑀯𑀸𑀲𑀯𑁄. 𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀪𑀯𑁂 𑀦𑀺𑀓𑀦𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀭𑀽𑀧𑀸𑀭𑀽𑀧𑀭𑀸𑀕𑁄.

[𑁨𑁦𑁬] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀲𑀲𑁆𑀲𑀢 𑀤𑀺𑀝𑁆𑀞𑀺𑀲𑀳𑀕𑀢𑁄𑀘 𑀭𑀸𑀕𑁄 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀢𑁆𑀢𑀁.

𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢 𑀯𑀺𑀧𑁆𑀧𑀬𑀼𑀢𑁆𑀢 𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀳𑀺 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀆𑀕𑀢𑀁. 𑀢𑀢𑁆𑀣𑁂𑀯 𑀲𑀲𑁆𑀲𑀢𑀤𑀺𑀝𑁆𑀞𑀺 𑀲𑀳𑀕𑀢𑁄 𑀭𑀸𑀕𑁄 𑀬𑀸𑀓𑀸𑀘𑀺 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀪𑀯𑀦𑀺𑀓𑀦𑁆𑀢𑀺 𑀬𑀸𑀓𑀸𑀘𑀺 𑀉𑀧𑀧𑀢𑁆𑀢𑀺𑀪𑀯𑀧𑀢𑁆𑀣𑀦𑀸. 𑀲𑀩𑁆𑀩𑀸 𑀪𑀯𑀢𑀡𑁆𑀳𑀸𑀬𑀁 𑀲𑀗𑁆𑀕𑀳𑀺𑀢𑀸𑀢𑀺 𑀬𑀼𑀢𑁆𑀢𑀸. 𑀇𑀥 𑀧𑀦 𑀬𑀣𑀸𑀯𑀼𑀢𑁆𑀢𑀁 𑀪𑀯𑀸𑀲𑀯𑀁 𑀣𑀧𑁂𑀢𑁆𑀯𑀸 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀸𑀲𑀯𑁂 𑀏𑀯 𑀲𑀗𑁆𑀕𑀳𑀺𑀢𑁄𑀢𑀺 𑀬𑀼𑀢𑁆𑀢𑁄𑀢𑀺.

[𑁨𑁦𑁭] 𑀏𑀢𑁂𑀦𑁂𑀯 𑀬𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀁.

‘‘𑀢𑀢𑀺𑀬𑁄 𑀪𑀸𑀤𑀺𑀝𑁆𑀞𑀺𑀲𑀳𑀕𑀢𑁄’’𑀢𑀺. 𑀢𑀁𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀬𑀸𑀓𑀸𑀘𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀸𑀲𑀯𑁄. 𑀬𑁄𑀓𑁄𑀘𑀺 𑀫𑁄𑀳𑁄 𑀅𑀯𑀺𑀚𑁆𑀚𑀸𑀲𑀯𑁄. 𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀇𑀫𑁂 𑀏𑀯 𑀆𑀲𑀯𑀸𑀢𑀺 𑀯𑀼𑀢𑁆𑀢𑀸. 𑀦𑀦𑀼 𑀅𑀜𑁆𑀜𑁂𑀧𑀺 𑀫𑀸𑀦𑀸𑀤𑀬𑁄 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑀸𑀤𑀺𑀬𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀲𑀘𑁆𑀘𑀁. 𑀇𑀫𑁂𑀲𑀼 𑀧𑀦 𑀓𑀸𑀫𑀸𑀲𑀯𑁂 𑀧𑀭𑀺𑀯𑀼𑀝𑁆𑀞𑁂 𑀲𑀢𑀺 𑀲𑀩𑁆𑀩𑁂𑀓𑀸𑀫𑀯𑀺𑀲𑀬𑀸 𑀫𑀸𑀦𑀸𑀤𑀬𑁄 𑀧𑀭𑀺𑀯𑀼𑀝𑁆𑀞𑀸𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑁂 𑀯𑀺𑀫𑀼𑀢𑁆𑀢𑀸𑀏𑀯, 𑀢𑀣𑀸 𑀪𑀯𑀸𑀲𑀯𑁂 𑀧𑀭𑀺𑀯𑀼𑀝𑁆𑀞𑁂 𑀲𑀢𑀺 𑀪𑀯𑀯𑀺𑀲𑀬𑀸. 𑀤𑀺𑀝𑁆𑀞𑀸𑀲𑀯𑁂𑀘 𑀧𑀭𑀺𑀯𑀼𑀝𑁆𑀞𑁂 𑀲𑀢𑀺 𑀤𑀺𑀝𑁆𑀞𑀺𑀯𑀺𑀲𑀬𑀸𑀢𑀺. 𑀅𑀯𑀺𑀚𑁆𑀚𑀸𑀧𑀦 𑀢𑁂𑀲𑀁 𑀢𑀺𑀡𑁆𑀡𑀁𑀧𑀺 𑀫𑀽𑀮𑀪𑀽𑀢𑀸𑀢𑀺. 𑀇𑀢𑀺 𑀇𑀫𑁂 𑀏𑀯 𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑀸𑀤𑀻𑀲𑀼 𑀧𑀥𑀸𑀦𑀪𑀽𑀢𑀸 𑀳𑁄𑀦𑁆𑀢𑀺. 𑀇𑀢𑀭𑁂 𑀧𑀦 𑀢𑀤𑀦𑀼𑀩𑀦𑁆𑀥𑀫𑀢𑁆𑀢𑀸𑀏𑀯 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂 𑀆𑀲𑀯𑀸𑀢𑀺 𑀯𑀺𑀲𑀼𑀁 𑀯𑀢𑁆𑀢𑀼𑀁 𑀅𑀭𑀳𑀦𑁆𑀢𑀻𑀢𑀺. 𑀅𑀢𑁆𑀢𑀦𑀺 𑀧𑀢𑀺𑀢𑀁 𑀚𑀦𑀁 𑀅𑀦𑀲𑁆𑀲𑀸𑀲𑀺𑀓𑀁 𑀓𑀢𑁆𑀯𑀸 𑀅𑀚𑁆𑀛𑁄𑀢𑁆𑀣 𑀭𑀦𑁆𑀢𑁄 𑀳𑀦𑀢𑀺 𑀫𑀸𑀭𑁂𑀢𑀻𑀢𑀺 𑀑𑀖𑁄. 𑀧𑀓𑀢𑀺𑀫𑀳𑁄𑀖𑁄. 𑀢𑀣𑀸 𑀅𑀯𑀳𑀦𑀦𑀝𑁆𑀞𑁂𑀦 𑀤𑀼𑀢𑁆𑀢𑀭𑀝𑁆𑀞𑁂𑀦𑀘 𑀑𑀖𑀲𑀤𑀺𑀲𑀸𑀢𑀺 𑀑𑀖𑀸. 𑀬𑀤𑀺𑀘 𑀅𑀯𑀳𑀜𑁆𑀜𑀦𑀝𑁆𑀞𑁂𑀘 𑀤𑀼𑀢𑁆𑀢𑀭𑀝𑁆𑀞𑁂𑀦𑀘 𑀑𑀖𑀸𑀦𑀸𑀫 𑀲𑀺𑀬𑀼𑀦𑁆𑀢𑀺𑀆𑀤𑀺𑀓𑁄 𑀧𑀲𑀗𑁆𑀕𑁄 𑀫𑀸𑀦𑀸𑀤𑀻𑀦𑀜𑁆𑀘 𑀑𑀖𑀪𑀸𑀯 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀯𑀝𑁆𑀝𑀲𑁆𑀫𑀺𑀁𑀯𑀸 𑀪𑀯𑀬𑀦𑁆𑀢𑀓𑁂𑀯𑀸 𑀲𑀢𑁆𑀢𑁂 𑀬𑁄𑀚𑁂𑀦𑁆𑀢𑀻𑀢𑀺 𑀬𑁄𑀕𑀸. 𑀪𑀯𑀦𑁆𑀢𑀭𑀘𑀼𑀢𑀺𑀬𑀸 𑀲𑀳 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀺𑀁 𑀕𑀦𑁆𑀢𑁂𑀦𑁆𑀢𑀺 𑀖𑀝𑁂𑀦𑁆𑀢𑀻𑀢𑀺 𑀕𑀦𑁆𑀣𑀸. 𑀅𑀪𑀺𑀚𑁆𑀛𑀸𑀢𑀺 𑀲𑀩𑁆𑀩𑀲𑁆𑀲 𑀭𑀸𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀭𑀽𑀧𑀸𑀭𑀽𑀧 𑀭𑀸𑀕𑀸𑀧𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀩𑁆𑀬𑀸𑀧𑀸𑀤𑁄𑀢𑀺𑀧𑀺 𑀲𑀩𑁆𑀩𑁄 𑀤𑁄𑀲𑁄 𑀏𑀯. 𑀇𑀤𑀁 𑀲𑀘𑁆𑀘𑀸𑀢𑀺 𑀦𑀺𑀯𑁂𑀲𑁄𑀢𑀺 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀧𑀯𑀢𑁆𑀢𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄. 𑀯𑀝𑁆𑀝𑀤𑀼𑀓𑁆𑀔𑀢𑁄 𑀯𑀺𑀫𑀼𑀢𑁆𑀢𑀺𑀬𑀸 𑀅𑀫𑀕𑁆𑀕𑀪𑀽𑀢𑀁𑀬𑁂𑀯 𑀕𑁄𑀲𑀻𑀮𑀕𑁄𑀯𑀢𑀸𑀤𑀺𑀓𑀁 𑀧𑀭𑀢𑁄 𑀆𑀫𑀲𑀦𑀁 𑀢𑀣𑀸 𑀢𑀣𑀸 𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀁 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀏𑀢𑁆𑀣𑀘 𑀧𑀭𑀢𑁄𑀢𑀺 𑀪𑀽𑀢𑀲𑀪𑀸𑀯𑀧𑀘𑁆𑀘𑀦𑀺𑀓𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀬𑀲𑀤𑁆𑀤𑁄 𑀧𑀦 𑀲𑀩𑁆𑀩𑀢𑁆𑀣 𑀭𑀽𑀧𑀓𑀸𑀬𑁂 𑀦𑀸𑀫𑀓𑀸𑀬𑁂𑀘 𑀧𑀯𑀢𑁆𑀢𑁄𑀢𑀺 𑀅𑀢𑀺𑀢𑀓𑀸𑀬𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦 𑀓𑀸𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀬𑁂𑀦𑀘 𑀅𑀦𑀸𑀕𑀢𑀓𑀸𑀬𑀁 𑀕𑀦𑁆𑀣𑁂𑀢𑀺 𑀖𑀝𑁂𑀢𑀻𑀢𑀺 𑀓𑀸𑀬𑀕𑀦𑁆𑀣𑁄. 𑀅𑀣𑀯𑀸, 𑀓𑀸𑀬𑁂 𑀕𑀡𑁆𑀞𑁄𑀢𑀺 𑀓𑀸𑀬𑀕𑀡𑁆𑀞𑁄. 𑀅𑀚𑁆𑀛𑀢𑁆𑀢 𑀕𑀡𑁆𑀞𑁄𑀢𑀺 𑀅𑀢𑁆𑀣𑁄. 𑀦𑀺𑀕𑀡𑁆𑀞𑁄𑀦𑀸𑀝𑀧𑀼𑀢𑁆𑀢𑁄𑀢𑀺𑀆𑀤𑀻𑀲𑀼𑀯𑀺𑀬 𑀕𑀡𑁆𑀞𑀲𑀤𑁆𑀤𑁄 𑀕𑀡𑁆𑀞𑀺𑀬𑀁 𑀧𑀯𑀢𑁆𑀢𑁄. 𑀪𑀼𑀲𑀁 𑀆𑀤𑀺𑀬𑀦𑁆𑀢𑀺 𑀅𑀫𑀼𑀜𑁆𑀘𑀦𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸𑀦𑀺. 𑀓𑀺𑀮𑁂𑀲𑀪𑀽𑀢𑁄 𑀓𑀸𑀫𑁄𑀏𑀯 𑀉𑀧𑀸𑀤𑀸𑀦𑀁 𑀓𑀸𑀫𑀼 𑀧𑀸𑀤𑀸𑀦𑀁. 𑀯𑀢𑁆𑀣𑀼𑀪𑀽𑀢𑀁𑀯𑀸 𑀓𑀸𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁.

𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀢𑀺𑀯𑀺𑀥 𑀫𑀳𑀸𑀤𑀺𑀝𑁆𑀞𑀺𑀬𑁄 𑀅𑀜𑁆𑀜𑀸𑀧𑀺𑀯𑀸 𑀲𑀸𑀲𑀦𑁂 𑀮𑁄𑀓𑁂𑀘 𑀲𑀦𑁆𑀤𑀺𑀲𑁆𑀲𑀫𑀸𑀦𑀸 𑀯𑀺𑀧𑀭𑀻𑀢𑀕𑀸𑀳𑀪𑀽𑀢𑀸 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀬𑀣𑀸𑀕𑀳𑀺𑀢𑀁𑀯𑀸 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀉𑀧𑀸𑀤𑀺𑀬𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀕𑁄𑀡𑀓𑀼𑀓𑁆𑀓𑀼𑀭𑀸𑀤𑀻𑀦𑀁 𑀢𑀁𑀢𑀁𑀧𑀓𑀢𑀺𑀘𑀸𑀭𑀺𑀢𑁆𑀢𑀁 𑀲𑀻𑀮𑀁 𑀦𑀸𑀫. 𑀢𑀫𑁂𑀯 𑀲𑀼𑀝𑁆𑀞𑀼𑀁 𑀲𑀫𑀸𑀤𑀺𑀦𑁆𑀦𑀁 𑀯𑀢𑀁𑀦𑀸𑀫. 𑀢𑀤𑀼𑀪𑀬𑀁 𑀲𑀁𑀲𑀸𑀭𑀫𑀼𑀢𑁆𑀢𑀺𑀬𑀸 𑀫𑀕𑁆𑀕𑁄𑀢𑀺 𑀤𑀴𑁆𑀳𑀕𑀳𑀡𑀁 𑀲𑀻𑀮𑀩𑁆𑀩𑀢𑀼 𑀧𑀸𑀤𑀸𑀦𑀁 𑀦𑀸𑀫. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀧𑀭𑀺𑀓𑀧𑁆𑀧𑀩𑀼𑀤𑁆𑀥𑀺𑀬𑀸 𑀕𑀳𑀺𑀢𑁄 𑀏𑀓𑁂𑀓𑀲𑁆𑀫𑀺𑀁 𑀲𑀢𑁆𑀢 𑀲𑀦𑁆𑀢𑀸𑀦𑁂 𑀧𑀥𑀸𑀦𑀺𑀲𑁆𑀲𑀭𑁄. 𑀬𑀁 𑀮𑁄𑀓𑀺𑀬𑀫𑀳𑀸𑀚𑀦𑀸 𑀲𑀢𑁆𑀢𑁄𑀢𑀺𑀯𑀸 𑀧𑀼𑀕𑁆𑀕𑀮𑁄𑀢𑀺𑀯𑀸 𑀚𑀻𑀯𑁄𑀢𑀺𑀯𑀸 𑀢𑀣𑀸𑀕𑀢𑁄𑀢𑀺𑀯𑀸 𑀮𑁄𑀓𑁄𑀢𑀺𑀯𑀸 𑀲𑀜𑁆𑀚𑀸𑀦𑀦𑁆𑀢𑀺. 𑀬𑀜𑁆𑀘 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑀁𑀯𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁𑀯𑀸 𑀅𑀘𑁆𑀘𑀦𑁆𑀢𑀲𑀲𑁆𑀲𑀢𑀁𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀁𑀯𑀸 𑀉𑀘𑁆𑀙𑁂𑀤𑀁𑀯𑀸 𑀧𑀜𑁆𑀜𑀧𑁂𑀦𑁆𑀢𑀻𑀢𑀺. 𑀢𑀁 𑀅𑀢𑁆𑀢𑀸𑀦𑀁 𑀅𑀪𑀺𑀯𑀤𑀦𑁆𑀢𑀺𑀘𑁂𑀯 𑀉𑀧𑀸𑀤𑀺𑀬𑀦𑁆𑀢𑀺𑀘 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸 𑀤𑀼𑀧𑀸𑀤𑀸𑀦𑀁. 𑀯𑀻𑀲𑀢𑀺𑀯𑀺𑀥𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀢𑀢𑁆𑀣 𑀅𑀪𑀺𑀯𑀤𑀦𑁆𑀢𑀻𑀢𑀺 𑀯𑀺𑀲𑀺𑀝𑁆𑀞𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺. 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀤𑀴𑁆𑀳𑀁 𑀆𑀤𑀺𑀬𑀦𑁆𑀢𑀺. 𑀬𑀣𑀸𑀳 𑁋

𑀢𑀢𑁆𑀣 𑀓𑀢𑀫𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁𑀯𑀸 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁. 𑀭𑀽𑀧𑀲𑁆𑀫𑀺𑀁𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸𑀯𑀦𑁆𑀢𑀁𑀯𑀸 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑀺𑀯𑀸 𑀯𑁂𑀤𑀦𑀁. 𑀯𑁂𑀤𑀦𑀸𑀧𑀯𑀸 𑀅𑀢𑁆𑀢𑀸𑀦𑀁. 𑀲𑀜𑁆𑀜𑀁. 𑀲𑀗𑁆𑀔𑀸𑀭𑁂. 𑀯𑀺𑀜𑁆𑀜𑀸𑀡𑀦𑁆𑀢𑀺.

𑀢𑀢𑁆𑀣 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺. 𑀭𑀽𑀧𑀯𑀦𑁆𑀢𑀁𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀸 𑀫𑁂 𑀭𑀽𑀧𑀯𑀸𑀢𑀺 𑀕𑀡𑁆𑀳𑀸𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀭𑀽𑀧𑀁 𑀢𑀺𑀝𑁆𑀞𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀭𑀽𑀧𑀲𑁆𑀫𑀺𑀁𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀁 𑀧𑀝𑀺𑀘𑁆𑀘 𑀅𑀢𑁆𑀢𑀸 𑀢𑀺𑀝𑁆𑀞𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀓𑀣𑀁 𑀭𑀽𑀧𑀓𑀸𑀬𑀁 𑀉𑀤𑁆𑀤𑀺𑀲𑁆𑀲 𑀅𑀚𑁆𑀚 𑀅𑀳𑀁 𑀣𑀤𑁆𑀥𑁄𑀫𑁆𑀳𑀻𑀢𑀺 𑀯𑀸 𑀅𑀚𑁆𑀚 𑀅𑀳𑀁 𑀫𑀼𑀤𑀼𑀓𑁄𑀫𑁆𑀳𑀻𑀢𑀺𑀯𑀸 𑀯𑀤𑀦𑁆𑀢𑁄 𑀧𑀣𑀯𑀺 𑀲𑀗𑁆𑀔𑀸𑀢𑀁 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺𑀦𑀸𑀫. 𑀅𑀚𑁆𑀚 𑀫𑀫 𑀓𑀸𑀬𑁄 𑀣𑀤𑁆𑀥𑁄𑀢𑀺𑀯𑀸 𑀫𑀼𑀤𑀽𑀢𑀺𑀯𑀸 𑀯𑀤𑀦𑁆𑀢𑁄 𑀲𑁂𑀲𑀥𑀫𑁆𑀫𑁂𑀯𑀸 𑀥𑀫𑁆𑀫𑀫𑀼𑀢𑁆𑀢𑀓𑀁𑀯𑀸 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀢𑁆𑀢𑀸𑀦𑀁 𑀧𑀣𑀯𑀻𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺𑀦𑀸𑀫. 𑀅𑀚𑁆𑀚 𑀣𑀤𑁆𑀥𑀪𑀸𑀯𑁄𑀯𑀸 𑀫𑀼𑀤𑀼𑀪𑀸𑀯𑁄𑀯𑀸 𑀫𑀬𑀺 𑀚𑀸𑀢𑁄𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀺 𑀧𑀣𑀯𑀺𑀁𑀲 𑀫𑀦𑀼𑀧𑀲𑁆𑀲𑀢𑀺𑀦𑀸𑀫. 𑀅𑀚𑁆𑀚𑀸𑀳𑀁 𑀣𑀤𑁆𑀥𑀪𑀸𑀯𑁂 𑀞𑀺𑀢𑁄𑀫𑁆𑀳𑀺 𑀫𑀼𑀤𑀼𑀪𑀸𑀯𑁂 𑀞𑀺𑀢𑁄 𑀫𑁆𑀳𑀻𑀢𑀺 𑀯𑀤𑀦𑁆𑀢𑁄𑀧𑀣𑀯𑀺𑀫𑁆𑀳𑀺 𑀅𑀢𑁆𑀢𑀸𑀦𑀁 𑀲𑀫𑀦𑀼𑀲𑁆𑀲𑀢𑀺𑀦𑀸𑀫. 𑀅𑀬𑀁 𑀧𑀣𑀯𑀺𑀫𑁆𑀳𑀺 𑀘𑀢𑀼𑀭𑀸𑀯𑀢𑁆𑀣𑀺𑀓𑀸𑀬 𑀲𑀁𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀸𑀓𑀸𑀭𑁄. 𑀲𑁂𑀲𑁂𑀲𑀼 𑀲𑀢𑁆𑀢𑀯𑀻𑀲𑀢𑀺𑀭𑀽𑀧𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑁄. 𑀅𑀳𑀁 𑀫𑀭𑀸𑀫𑀺 𑀫𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀳𑀺 𑀅𑀦𑀺𑀘𑁆𑀘𑀢𑀸𑀬𑀁𑀧𑀺 𑀲𑀸𑀤𑀺𑀝𑁆𑀞𑀺 𑀧𑀯𑀢𑁆𑀢𑀢𑀺𑀬𑁂𑀯. 𑀲𑁂𑀲𑀭𑀽𑀧𑁂𑀲𑀼 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀇𑀤𑀁 𑀦𑀸𑀫 𑀅𑀳𑀁 𑀧𑀼𑀩𑁆𑀩𑁂 𑀲𑀁𑀪𑀼𑀜𑁆𑀚𑀺𑀁. 𑀅𑀚𑁆𑀚 𑀲𑀁𑀪𑀼𑀜𑁆𑀚𑀸𑀫𑀺. 𑀧𑀭𑀢𑁄 𑀲𑀁𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺𑀯𑀸 𑀲𑀼𑀔𑀺𑀢𑁄𑀫𑁆𑀳𑀺 𑀤𑀼𑀓𑁆𑀔𑀺𑀢𑁄𑀫𑁆𑀳𑀻𑀢𑀺𑀯𑀸 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀚𑁆𑀚 𑀫𑀫 𑀓𑀸𑀬𑁄 𑀲𑀼𑀔𑀺𑀢𑁄 𑀤𑀼𑀓𑁆𑀔𑀺𑀢𑁄𑀢𑀺𑀯𑀸 𑀫𑀫𑀘𑀺𑀢𑁆𑀢𑀁 𑀲𑀼𑀔𑀺𑀢𑀁 𑀤𑀼𑀓𑁆𑀔𑀺𑀢𑀦𑁆𑀢𑀺𑀯𑀸 𑀅𑀢𑁆𑀢𑀸𑀦𑀁 𑀯𑁂𑀤𑀦𑀸𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀚𑁆𑀚𑀲𑀼𑀔𑀁𑀯𑀸 𑀤𑀼𑀓𑁆𑀔𑀁𑀯𑀸 𑀫𑀬𑀺𑀚𑀸𑀢𑀦𑁆𑀢𑀺 𑀅𑀢𑁆𑀢𑀦𑀺 𑀯𑁂𑀤𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀚𑁆𑀚𑀸𑀳𑀁 𑀲𑀼𑀔𑀺𑀢 𑀪𑀸𑀯𑁂 𑀞𑀺𑀢𑁄𑀫𑁆𑀳𑀺 𑀤𑀼𑀓𑁆𑀔𑀺𑀢𑀪𑀸𑀯𑁂 𑀞𑀺𑀢𑁄𑀫𑁆𑀳𑀻𑀢𑀺 𑀯𑁂𑀤𑀦𑀸𑀬 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺.

𑀲𑀜𑁆𑀜𑀸𑀬 𑀲𑀩𑁆𑀩𑁂𑀲𑀼𑀘 𑀧𑀜𑁆𑀜𑀸𑀲𑀫𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀅𑀳𑀁 𑀧𑀲𑁆𑀲𑀸𑀫𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀤𑀲𑁆𑀲𑀦𑀁 𑀫𑁂𑀢𑀺 𑀅𑀢𑁆𑀢𑀸𑀦𑀁 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀫𑀬𑀺𑀤𑀲𑁆𑀲𑀦𑀁𑀦𑀸𑀫 𑀅𑀢𑁆𑀣𑀻𑀢𑀺 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀳𑀁 𑀤𑀲𑁆𑀲𑀦𑁂 𑀲𑀫𑀢𑁆𑀣𑁄𑀫𑁆𑀳𑀻𑀢𑀺 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀲𑁂 𑀯𑀦𑀬𑁄 𑀲𑁂𑀲𑁂𑀲𑀼 𑀧𑀜𑁆𑀘𑀲𑀼 𑀯𑀺𑀜𑁆𑀜𑀸𑀡𑁂𑀲𑀽𑀢𑀺. 𑀅𑀳 𑀫𑀲𑁆𑀫𑀺 𑀅𑀳𑀁 𑀏𑀓𑁄 𑀲𑀢𑁆𑀢𑁄 𑀏𑀓𑁄𑀧𑀼𑀕𑁆𑀕𑀮𑁄 𑀏𑀓𑁄 𑀚𑀻𑀯𑁄 𑀏𑀓𑁄 𑀮𑁄𑀓𑁄 𑀏𑀓𑁄 𑀦𑀭𑁄 𑀫𑀦𑀼𑀲𑁆𑀲𑁄 𑀤𑁂𑀯𑁄𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀢𑀺𑀯𑀸 𑀅𑀳𑀁𑀕𑀘𑁆𑀙𑀸𑀫𑀺 𑀅𑀳𑀁 𑀢𑀺𑀝𑁆𑀞𑀸𑀫𑀺 𑀅𑀳𑀁 𑀦𑀺𑀲𑀻𑀤𑀸𑀫𑀺 𑀅𑀳𑀁 𑀦𑀺𑀧𑁆𑀧𑀚𑁆𑀚𑀸𑀫𑀺 𑀅𑀳𑀁 𑀲𑀫𑀺𑀜𑁆𑀚𑁂𑀫𑀺 𑀧𑀲𑀸𑀭𑁂𑀫𑀻𑀢𑀺𑀆𑀤𑀺𑀦𑀸 𑀯𑀸 𑀔𑀦𑁆𑀥𑀧𑀜𑁆𑀘𑀓𑀁𑀯𑀸 𑀏𑀓𑀫𑁂𑀓𑀁𑀯𑀸 𑀔𑀦𑁆𑀥𑀁 𑀲𑀫𑀽𑀳𑀢𑁄 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀸. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀜𑁆𑀳𑀺 𑀏𑀓𑀫𑀼𑀳𑀼𑀢𑁆𑀢 𑀫𑀢𑁆𑀢𑁂𑀧𑀺 𑀬𑀁𑀓𑀺𑀜𑁆𑀘𑀺 𑀅𑀢𑁆𑀢𑀦𑁄𑀯𑀸 𑀧𑀭𑀲𑁆𑀲𑀯𑀸 𑀅𑀢𑁆𑀢𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀁 𑀓𑀣𑁂𑀦𑁆𑀢𑀸𑀦𑀁 𑀘𑀺𑀢𑁆𑀢𑀁𑀯𑀸 𑀯𑀘𑀦𑀁𑀯𑀸 𑀬𑀣𑀸𑀯𑀼𑀢𑁆𑀢𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀓𑀤𑀸𑀘𑀺 𑀅𑀢𑁆𑀢𑀢𑁄 𑀉𑀧𑀸𑀤𑀺𑀬𑀺𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀓𑀤𑀸𑀘𑀺 𑀅𑀢𑁆𑀢𑀧𑀭𑀺𑀯𑀸𑀭 𑀪𑀸𑀯𑁂𑀦. 𑀓𑀤𑀸𑀘𑀺 𑀅𑀢𑁆𑀢𑀦𑀺𑀲𑁆𑀲𑀺𑀢𑀪𑀸𑀯𑁂𑀦. 𑀓𑀤𑀸𑀘𑀺 𑀅𑀢𑁆𑀢𑀦𑀺𑀲𑁆𑀲𑀬𑀪𑀸𑀯𑁂𑀦. 𑀓𑀤𑀸𑀘𑀺 𑀏𑀓𑁂𑀓𑀥𑀫𑁆𑀫𑀯𑀲𑁂𑀦. 𑀓𑀤𑀸𑀘𑀺 𑀲𑀫𑀽𑀳𑀥𑀫𑁆𑀫𑀯𑀲𑁂𑀦𑀸𑀢𑀺.

𑀬𑀲𑁆𑀫𑀸 𑀧𑀦 𑀅𑀢𑁆𑀢𑀦𑀺𑀫𑀺𑀢𑁆𑀢𑀁𑀦𑀸𑀫 𑀯𑀲𑀯𑀢𑁆𑀢𑀦𑀸𑀓𑀸𑀭𑀁 𑀧𑀝𑀺𑀘𑁆𑀘 𑀉𑀧𑀝𑁆𑀞𑀸𑀢𑀺. 𑀯𑀲𑀯𑀢𑁆𑀢𑀦𑀸 𑀓𑀸𑀭𑁄𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀓𑀢𑁆𑀢𑀁 𑀔𑀡𑀺 𑀓𑀢𑁆𑀢𑀜𑁆𑀘 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀸𑀦𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀧𑀭𑀺𑀜𑁆𑀜𑀸𑀢𑀯𑀢𑁆𑀢𑀼𑀓𑀸𑀦𑀁 𑀅𑀢𑁆𑀢 𑀧𑀝𑀺𑀲𑀁𑀬𑀼𑀢𑁆𑀢𑀯𑀘𑀦𑀁 𑀓𑀣𑁂𑀦𑁆𑀢𑀸𑀦𑀁𑀧𑀺 𑀘𑀺𑀢𑁆𑀢𑀁 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀮𑀕𑁆𑀕𑀺𑀢𑁆𑀯𑀸𑀏𑀯 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀦𑀼𑀧𑁆𑀧𑀦𑁆𑀦𑁂𑀯𑀸 𑀉𑀧𑁆𑀧𑀸𑀤𑁂𑀢𑀼𑀁 𑀉𑀧𑁆𑀧𑀦𑁆𑀦𑁂𑀯𑀸 𑀯𑀸 𑀲𑁂𑀢𑀼𑀁 𑀅𑀤𑀢𑁆𑀯𑀸 𑀦𑀻𑀯𑀸𑀭𑁂𑀦𑁆𑀢𑀻𑀢𑀺 𑀦𑀻𑀯𑀭𑀡𑀸𑀦𑀺. 𑀓𑀸𑀫𑀦𑀝𑁆𑀞𑁂𑀦 𑀓𑀸𑀫𑁄, 𑀙𑀦𑁆𑀤𑀦𑀝𑁆𑀞𑁂𑀦𑀙𑀦𑁆𑀤𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑁄. 𑀩𑀮𑀯𑀭𑀸𑀕𑁄. 𑀲𑁄𑀏𑀯𑀦𑀻𑀯𑀭𑀡𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀧𑀝𑁆𑀞𑀸𑀦𑁂𑀆𑀭𑀼𑀧𑁆𑀧𑁂𑀓𑀸𑀫𑀘𑁆𑀙𑀦𑁆𑀤𑀁 𑀦𑀻𑀯𑀭𑀡𑀁 𑀧𑀝𑀺𑀘𑁆𑀘𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀣𑀧𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀭𑀸𑀕𑁂 𑀅𑀯𑀲𑁂𑀲𑁄 𑀲𑀩𑁆𑀩𑁄𑀮𑁄𑀪𑁄 𑀓𑀸𑀫𑀘𑁆𑀙𑀦𑁆𑀤𑁂 𑀅𑀲𑀗𑁆𑀕𑀳𑀺𑀢𑁄𑀦𑀸𑀫 𑀦𑀢𑁆𑀣𑀺. 𑀛𑀸𑀦𑀧𑀝𑀺𑀧𑀓𑁆𑀔𑀪𑀸𑀯𑁄𑀧𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀬𑀸𑀧𑀚𑁆𑀚𑀦𑀁 𑀩𑁆𑀬𑀸𑀧𑀸𑀤𑁄. 𑀘𑀺𑀢𑁆𑀢𑀲𑁆𑀲 𑀧𑀽𑀢𑀺𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑁄𑀓𑁄𑀘𑀺𑀤𑁄𑀲𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀣𑀺𑀦𑀫𑀺𑀤𑁆𑀥 𑀦𑀻𑀯𑀭𑀡𑀦𑁆𑀢𑀺 𑀘 𑀉𑀤𑁆𑀥𑀘𑁆𑀘 𑀓𑀼𑀓𑁆𑀓𑀼𑀘𑁆𑀘 𑀦𑀻𑀯𑀭𑀡𑀦𑁆𑀢𑀺 𑀘 𑀤𑁆𑀯𑁂 𑀤𑁆𑀯𑁂 𑀥𑀫𑁆𑀫𑀸 𑀏𑀓𑀁 𑀦𑀻𑀯𑀭𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺. 𑀓𑀺𑀘𑁆𑀘𑀢𑁄 𑀧𑀘𑁆𑀘𑀬𑀢𑁄 𑀧𑀝𑀺𑀧𑀓𑁆𑀔𑀢𑁄𑀘 𑀲𑀤𑀺𑀲𑀢𑁆𑀢𑀸. 𑀢𑀣𑀸 𑀳𑀺 𑀓𑀺𑀘𑁆𑀘𑀢𑁄 𑀢𑀸𑀯 𑀣𑀺𑀦𑀫𑀺𑀤𑁆𑀥𑀤𑁆𑀯𑀬𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀮𑀻𑀦𑀪𑀸𑀯𑀸 𑀧𑀸𑀤𑀦𑀓𑀺𑀘𑁆𑀘𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀤𑁆𑀯𑀬𑀁 𑀅𑀯𑀽𑀧𑀲𑀦𑁆𑀢𑀪𑀸𑀯𑀸𑀧𑀸𑀤𑀦𑀓𑀺𑀘𑁆𑀘𑀁. 𑀧𑀘𑁆𑀘𑀬𑀢𑁄 𑀧𑀼𑀭𑀺𑀫𑀤𑁆𑀯𑀬𑀁 𑀢𑀦𑁆𑀤𑀺𑀯𑀺𑀚𑀫𑁆𑀪𑀺 𑀢𑀢𑀸𑀧𑀘𑁆𑀘𑀬𑀁. 𑀧𑀘𑁆𑀙𑀺𑀫𑀤𑁆𑀯𑀬𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀯𑀺𑀢𑀓𑁆𑀓𑀧𑀘𑁆𑀘𑀬𑀁. 𑀧𑀝𑀺𑀧𑀓𑁆𑀔𑀢𑁄 𑀧𑀼𑀭𑀺𑀫𑀤𑁆𑀯𑀬𑀁 𑀯𑀻𑀭𑀺𑀬𑀧𑀝𑀺𑀧𑀓𑁆𑀔𑀁. 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀫𑀣𑀧𑀝𑀺𑀧𑀓𑁆𑀔𑀦𑁆𑀢𑀺.

𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀅𑀦𑀼 𑀲𑁂𑀦𑁆𑀢𑀻𑀢𑀺𑀯𑀸 𑀅𑀦𑀼𑀲𑀬𑀸. 𑀬𑀸𑀯 𑀫𑀕𑁆𑀕𑀁 𑀦𑀧𑀝𑀺𑀮𑀪𑀢𑀺. 𑀢𑀸𑀯 𑀅𑀦𑁆𑀢𑀭𑀸 𑀅𑀧𑀭𑀺𑀓𑁆𑀔𑀺𑀬𑁆𑀬𑀫𑀸𑀦𑀸 𑀳𑀼𑀢𑁆𑀯𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀚𑁆𑀚𑀦𑀜𑁆𑀘𑁂𑀢𑁆𑀣 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀉𑀧𑁆𑀧𑀚𑁆𑀚𑀦𑀸 𑀭𑀳𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀧𑀦 𑀲𑀭𑀽𑀧𑀢𑁄 𑀉𑀧𑁆𑀧𑀢𑁆𑀢𑀺, 𑀓𑀣𑀁 𑀯𑀺𑀜𑁆𑀜𑀸 𑀬𑀢𑀻𑀢𑀺 𑀘𑁂. 𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲𑁂𑀯 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀢𑁆𑀢𑀧𑀺 𑀅𑀦𑀼𑀲𑀬𑀸 𑀅𑀦𑀼𑀲𑀬𑀯𑀸𑀭𑁂 𑀲𑀳 𑀅𑀦𑀼𑀲𑁂𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀘 𑀅𑀦𑀼𑀲𑁂𑀢𑀺. 𑀓𑀸𑀫𑀭𑀸𑀕. 𑀧𑀝𑀺𑀖. 𑀫𑀸𑀦. 𑀤𑀺𑀝𑁆𑀞𑀺. 𑀯𑀺𑀘𑀺𑀓𑀺𑀘𑁆𑀙𑀸. 𑀪𑀯𑀭𑀸𑀕𑀦𑀼𑀲𑀬𑁄𑀘 𑀅𑀦𑀼𑀲𑁂𑀢𑀻𑀢𑀺. 𑀢𑀣𑀸 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀧𑀻𑀢𑀺.

𑀅𑀧𑀺𑀘, 𑀲𑀭𑀽𑀧𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀧𑀢𑁆𑀯𑀸 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑀸 𑀩𑁆𑀬𑀸𑀓𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀳𑀺 𑀲𑀳 𑀅𑀦𑀼𑀭𑀽𑀧𑀸 𑀅𑀯𑀺𑀭𑀼𑀤𑁆𑀥𑀸 𑀳𑀼𑀢𑁆𑀯𑀸 𑀲𑁂𑀦𑁆𑀢𑀺. 𑀯𑀺𑀲𑀼𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑀸𑀯𑁂𑀦 𑀅𑀯𑀼𑀝𑁆𑀞𑀺𑀢𑀸 𑀳𑀼𑀢𑁆𑀯𑀸 𑀲𑀬𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀦𑀼𑀲𑀬𑀸. 𑀅𑀦𑀼 𑀅𑀦𑀼 𑀲𑁂𑀦𑁆𑀢𑀻𑀢𑀺𑀯𑀸 𑀅𑀦𑀼𑀲𑀬𑀸. 𑀧𑀓𑀢𑀺𑀬𑀸 𑀬𑀣𑀸𑀦𑀼𑀲𑀬𑀺𑀢𑁂𑀲𑀼𑀏𑀯 𑀓𑀸𑀫𑀭𑀸𑀕𑀸𑀤𑀻𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀤𑀺𑀕𑀼𑀡 𑀢𑀺𑀕𑀼𑀡𑀸𑀤𑀺 𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑁂𑀦𑁆𑀢𑀺. 𑀲𑀬𑀦𑀸𑀓𑀸𑀭𑁂𑀦 𑀉𑀧𑀭𑀼𑀧𑀭𑀺 𑀧𑀮𑀺𑀯𑁂𑀞𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀻𑀲𑀼 𑀭𑀸𑀕𑀸𑀤𑀻𑀦𑀁 𑀅𑀯𑀢𑁆𑀣𑀸𑀲𑀼 𑀧𑀣𑀫𑀸𑀯𑀢𑁆𑀣𑀸𑀬 𑀞𑀺𑀢𑀸𑀦𑀁 𑀓𑀸𑀫𑀭𑀸𑀕𑀸 𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀺𑀲𑁆𑀲𑁄 𑀳𑀺 𑀅𑀯𑀢𑁆𑀣𑀸 𑀅𑀦𑀼𑀲𑀬𑀸𑀯𑀢𑁆𑀣𑀸 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸𑀢𑀺. 𑀢𑀢𑁆𑀣 𑀬𑁂 𑀓𑀸𑀫𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀁 𑀘𑀸𑀮𑁂𑀦𑁆𑀢𑀺, 𑀢𑁂𑀲𑀁 𑀢𑀣𑀸𑀧𑀯𑀢𑁆𑀢𑀸 𑀅𑀯𑀢𑁆𑀣𑀸 𑀯𑀻𑀢𑀺𑀓𑁆𑀓𑀫𑀸𑀯𑀢𑁆𑀣𑀸𑀦𑀸𑀫. 𑀬𑁂 𑀫𑀦𑀲𑁆𑀫𑀺𑀁 𑀏𑀯 𑀚𑀯𑀦𑀘𑀺𑀢𑁆𑀢𑀲𑀳𑀚𑀸𑀢𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀢𑀣𑀸𑀧𑀯𑀢𑁆𑀢𑀸 𑀅𑀯𑀢𑁆𑀣𑀸 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸𑀦𑀸𑀫. 𑀬𑁂 𑀧𑀦 𑀚𑀯𑀦𑀲𑀳𑀚𑀸𑀢𑀪𑀸𑀯𑀁𑀧𑀺 𑀅𑀧𑀢𑁆𑀯𑀸 𑀯𑀸𑀲𑀦𑀸𑀥𑀸𑀢𑀼𑀬𑁄 𑀯𑀺𑀬 𑀘𑀺𑀓𑁆𑀓𑀲𑀦𑁆𑀢𑀸𑀦𑀸 𑀦𑀼𑀲𑀬𑀺𑀢𑀸 𑀳𑀼𑀢𑁆𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀬𑀸 𑀩𑀻𑀚𑀪𑀸𑀯𑁂𑀦 𑀢𑀺𑀝𑁆𑀞𑀦𑁆𑀢𑀺, 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑁂𑀘 𑀆𑀭𑀫𑁆𑀫𑀡𑁂 𑀆𑀧𑀸𑀢𑀫𑀸𑀕𑀢𑁂 𑀬𑁂𑀲𑀁 𑀯𑀲𑁂𑀦 𑀆𑀯𑀚𑁆𑀚𑀦𑀁 𑀭𑀸𑀕𑀸𑀤𑀺𑀧𑀸𑀢𑀼𑀪𑀸𑀯𑀢𑁆𑀣𑀸𑀬 𑀅𑀬𑁄𑀦𑀺𑀲𑁄 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑀺, 𑀅𑀪𑀸𑀯𑀺𑀢𑀜𑁆𑀘 𑀘𑀺𑀢𑁆𑀢𑀁 𑀬𑁂𑀲𑀁 𑀯𑀲𑁂𑀦 𑀤𑀫𑀣𑀁 𑀦𑀉𑀧𑁂𑀢𑀺, 𑀢𑁂𑀲𑀁 𑀢𑀣𑀸 𑀧𑀯𑀢𑁆𑀢𑀸 𑀅𑀯𑀢𑁆𑀣𑀸 𑀅𑀦𑀼𑀲𑀬𑀸𑀯𑀢𑁆𑀣𑀸𑀦𑀸𑀫. 𑀢𑀤𑀯𑀢𑁆𑀣𑀺𑀓𑀸 𑀓𑀸𑀫𑀭𑀸𑀕𑀸𑀤𑀬𑁄 𑀅𑀦𑀼𑀲𑀬𑀸𑀦𑀸𑀫. 𑀢𑁂 𑀧𑀦 𑀅𑀧𑀭𑀫𑀢𑁆𑀣𑀪𑀽𑀢𑀸𑀧𑀺 𑀦 𑀳𑁄𑀦𑁆𑀢𑀺. 𑀏𑀓𑀦𑁆𑀢𑀧𑀭𑀫𑀢𑁆𑀣𑀚𑀸𑀢𑀺𑀓𑀢𑁆𑀢𑀸. 𑀦𑀘 𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑀽𑀢𑀸 𑀏𑀓𑀦𑁆𑀢𑀸𑀓𑀼𑀲𑀮𑀚𑀸𑀢𑀺𑀓𑀢𑁆𑀢𑀸. 𑀦𑀸𑀧𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑀺𑀭𑀼𑀤𑁆𑀥𑀸, 𑀯𑀺𑀲𑀼𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑀸𑀯𑁂𑀦 𑀅𑀦𑀼𑀧𑀮𑀤𑁆𑀥𑀢𑁆𑀢𑀸. 𑀦𑀸𑀧𑀺 𑀓𑀸𑀮𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀸, 𑀢𑁂𑀓𑀸𑀮𑀺𑀓𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀤𑀸 𑀧𑀦 𑀢𑁂 𑀲𑀫𑀼𑀝𑁆𑀞 𑀳𑀺𑀢𑁆𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀯𑀺𑀲𑀼𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫 𑀪𑀸𑀯𑀜𑁆𑀘 𑀕𑀘𑁆𑀙𑀦𑁆𑀢𑀺. 𑀲𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁄𑀘 𑀢𑁂𑀲𑀁 𑀧𑀭𑀺𑀩𑁆𑀬𑀢𑁆𑀢𑁄 𑀳𑁄𑀢𑀺. 𑀏𑀢𑀤𑀢𑁆𑀣𑀁 𑀲𑀦𑁆𑀥𑀸𑀬 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀢𑁂𑀲𑀁 𑀲𑀸𑀭𑀫𑁆𑀫𑀡𑀥𑀫𑁆𑀫𑀪𑀸𑀯𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀪𑀸𑀯𑁄𑀘 𑀧𑀢𑀺𑀝𑁆𑀞𑀸𑀧𑀺𑀢𑁄 𑀳𑁄𑀢𑀻𑀢𑀺.

𑀬𑀣𑀸 𑀧𑀦 𑀨𑀮𑀥𑀸𑀭𑀺𑀫𑁆𑀳𑀺 𑀭𑀼𑀓𑁆𑀔𑀫𑁆𑀳𑀺 𑀯𑀺𑀲𑀓𑀡𑁆𑀝𑀓𑁂 𑀤𑀺𑀦𑁆𑀦𑁂 𑀭𑀼𑀓𑁆𑀔𑀸𑀦𑀼𑀲𑀬𑀺𑀢𑁄 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁄 𑀲𑀺𑀦𑁂𑀳𑁄 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀲𑀫𑀬𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑀸𑀦𑀺 𑀨𑀮𑀸𑀦𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀲𑀸𑀦𑀼𑀲𑀬𑁂 𑀘𑀺𑀢𑁆𑀢 𑀲𑀦𑁆𑀢𑀸𑀦𑁂 𑀬𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁄 𑀧𑀸𑀢𑀼𑀪𑀯𑀢𑀺, 𑀢𑀲𑁆𑀫𑀺𑀁 𑀲𑀳𑀫𑀕𑁆𑀕𑀼𑀧𑁆𑀧𑀸𑀤𑀸 𑀲𑁄 𑀲𑁄 𑀅𑀦𑀼𑀲𑀬𑁄 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀧𑀭𑀺𑀓𑁆𑀔𑀻𑀡𑀲𑁆𑀲 𑀧𑀦 𑀧𑀼𑀦 𑀧𑀭𑀺𑀬𑀼𑀝𑁆𑀞𑀸𑀦𑀁𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀯𑀻𑀢𑀺𑀓𑁆𑀓𑀫𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀫𑀕𑁆𑀕𑁄 𑀅𑀦𑀸𑀕𑀢𑀲𑀸𑀫𑀜𑁆𑀜𑀁 𑀓𑀺𑀮𑁂𑀲𑀚𑀸𑀢𑀁 𑀧𑀚𑀳𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑁄. 𑀢𑀢𑁆𑀣 𑀅𑀦𑀸𑀕𑀢𑀲𑀸𑀫𑀜𑁆𑀜𑀦𑁆𑀢𑀺 𑀅𑀦𑀸𑀕𑀢𑀲𑀫𑁆𑀫𑀢𑀁, 𑀦 𑀏𑀓𑀦𑁆𑀢 𑀅𑀦𑀸𑀕𑀢𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀫𑀕𑁆𑀕𑁄 𑀬𑁂𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸𑀓𑀺𑀯𑀸 𑀅𑀦𑀸𑀕𑀢𑀸𑀢𑀺𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺𑀯𑀸 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑀘 𑀫𑀕𑁆𑀕𑁄 𑀓𑀺𑀮𑁂𑀲𑀫𑀼𑀔𑁂𑀦 𑀬𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺𑀘 𑀉𑀧𑀸𑀤𑀺𑀦𑁆𑀦𑀓𑀔𑀦𑁆𑀥𑀧𑀜𑁆𑀘𑀓𑁂𑀘 𑀧𑀚𑀳𑀢𑀺, 𑀢𑁂 𑀅𑀢𑀻𑀢𑀸𑀢𑀺𑀯𑀸𑀅𑀦𑀸𑀕𑀢𑀸𑀢𑀺𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺𑀯𑀸 𑀦𑀯𑀢𑁆𑀢𑀩𑁆𑀩𑀸𑀢𑀺 𑀤𑀻𑀧𑁂𑀢𑀺. 𑀬𑀤𑀺 𑀏𑀯𑀁 𑀫𑀕𑁆𑀕𑁂𑀦 𑀧𑀳𑀻𑀦𑀸 𑀲𑀩𑁆𑀩𑁂 𑀢𑁂𑀪𑀽𑀫𑀓𑀥𑀫𑁆𑀫𑀸 𑀓𑀸𑀮𑀯𑀺𑀫𑀼𑀢𑁆𑀢𑀸𑀦𑀸𑀫 𑀅𑀢𑀗𑁆𑀔𑀢𑀸 𑀦𑀸𑀫 𑀅𑀧𑀘𑁆𑀘𑀬𑀸𑀦𑀸𑀫 𑀲𑀺𑀬𑀼𑀦𑁆𑀢𑀺.𑀦. 𑀢𑁂𑀓𑀸𑀮𑀺𑀓𑀚𑀸𑀢𑀺𑀓𑀢𑁆𑀢𑀸 𑀲𑀗𑁆𑀔𑀢 𑀲𑀧𑀘𑁆𑀘𑀬𑀚𑀸𑀢𑀺𑀓𑀢𑁆𑀢𑀸 𑀘. 𑀢𑁂 𑀳𑀺 𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂 𑀇𑀫𑁂 𑀦𑀸𑀫𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀲𑀗𑁆𑀔𑀢𑀮𑀓𑁆𑀔𑀡𑀁 𑀆𑀳𑀘𑁆𑀘 𑀜𑀸𑀡𑁂𑀦 𑀕𑀳𑀺𑀢𑀢𑁆𑀢𑀸 𑀮𑀓𑁆𑀔𑀡𑀯𑀲𑁂𑀦 𑀢𑁂𑀪𑀽𑀫𑀓𑀸𑀤𑀺𑀪𑀸𑀯𑀁 𑀪𑀚𑀦𑁆𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑀼𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑀸𑀯𑀁 𑀅𑀧𑀢𑁆𑀢𑀸𑀦𑀁 𑀅𑀦𑀼𑀲𑀬𑀸𑀯𑀢𑁆𑀣𑀸𑀬 𑀯𑀸 𑀯𑀸𑀲𑀦𑀸𑀯𑀢𑁆𑀣𑀸𑀬𑀯𑀸 𑀓𑀫𑁆𑀫𑀲𑀫𑀗𑁆𑀕𑀻𑀢𑀸𑀯𑀢𑁆𑀣𑀸𑀬𑀯𑀸 𑀆𑀲𑀬𑀚𑁆𑀛𑀸𑀲𑀬𑀸 𑀥𑀺𑀫𑀼𑀢𑁆𑀢𑀺𑀘𑀭𑀺𑀢𑀯𑀢𑁆𑀣𑀸𑀲𑀼𑀯𑀸 𑀞𑀺𑀢𑀸𑀦𑀁 𑀲𑀪𑀸𑀯𑀸𑀦𑀁 𑀚𑀸𑀢𑀺𑀯𑀲𑁂𑀦 𑀧𑀭𑀫𑀢𑁆𑀣 𑀥𑀫𑁆𑀫𑀢𑀸 𑀅𑀓𑀼𑀲𑀮𑀸𑀤𑀺𑀢𑀸𑀘 𑀧𑀘𑁆𑀘𑁂𑀢𑀩𑁆𑀩𑀸 𑀳𑁄𑀢𑀻𑀢𑀺.

[𑁨𑁦𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸 𑀭𑀳𑀸 𑀲𑀦𑁆𑀢𑀸𑀦𑁂 𑀅𑀦𑀼𑀅𑀦𑀼𑀲𑀬𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀢𑀤𑀯𑀢𑁆𑀣𑀸 𑀅𑀦𑀼𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀸𑀕𑀢 𑀓𑀺𑀮𑁂𑀲𑀸. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀼𑀲𑀬𑀸𑀦𑀸𑀫 𑀲𑀦𑁆𑀢𑀸𑀦𑁂 𑀓𑀤𑀸𑀘𑀺𑀧𑀺 𑀅𑀦𑀼𑀧𑁆𑀧𑀦𑁆𑀦 𑀧𑀼𑀩𑁆𑀩𑀸 𑀅𑀦𑀸𑀕𑀢 𑀓𑀺𑀮𑁂𑀲𑀸 𑀏𑀯𑀸𑀢𑀺 𑀓𑀢𑁆𑀯𑀸 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼𑀲𑀬𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀢𑁂 𑀅𑀦𑀼𑀅𑀦𑀼𑀲𑀬𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀏𑀓𑀦𑁆𑀢𑁂𑀦 𑀅𑀦𑀼𑀲𑀬𑀺𑀢𑀸𑀏𑀯 𑀳𑁄𑀦𑁆𑀢𑀻𑀢𑀺.

[𑁨𑁦𑁯] 𑀬𑀜𑁆𑀘 𑀢𑀢𑁆𑀣

‘‘𑀢𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀸𑀕𑀢𑀓𑀺𑀮𑁂𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀢𑁆𑀢𑀁.

𑀦 𑀳𑀺 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸 𑀅𑀦𑀼𑀲𑀬𑀸 𑀅𑀦𑀸𑀕𑀢𑀸𑀦𑀸𑀫 𑀳𑁄𑀦𑁆𑀢𑀺. 𑀧𑀳𑀻𑀦𑀸𑀧𑀺𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀸𑀕𑀢𑀸𑀢𑀺 𑀦𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀦𑀸𑀕𑀢 𑀲𑀸𑀫𑀜𑁆𑀜𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺. 𑀏𑀢𑁂𑀦 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀢𑀁𑀲𑀪𑀸𑀯𑀢𑁆𑀢𑀸𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀤𑀁𑀯𑀺𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀅𑀧𑀺𑀘, 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕 𑀧𑀢𑁆𑀢𑀸𑀦𑀁𑀏𑀯 𑀏𑀓𑀦𑁆𑀢𑁂𑀦 𑀢𑁂𑀓𑀸𑀮𑀺𑀓𑀢𑀸 𑀳𑁄𑀢𑀻𑀢𑀺 𑀢𑀤𑀧𑀢𑁆𑀢𑀸𑀦𑀁 𑀅𑀦𑀼𑀲𑀬𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀧𑀭𑀺𑀬𑀸𑀬𑁄𑀯 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀬𑀲𑁆𑀲 𑀓𑀸𑀫𑀭𑀸𑀕𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀺𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑁄 𑀉𑀧𑁆𑀧𑀸𑀤𑀯𑀸𑀭𑁄 𑀏𑀯 𑀯𑀼𑀢𑁆𑀢𑁄, 𑀦 𑀦𑀺𑀭𑁄𑀥𑀯𑀸𑀭𑁄, 𑀦𑀘 𑀅𑀢𑀻𑀢𑀸𑀦𑀸𑀕𑀢 𑀯𑀸𑀭𑀸𑀢𑀺. 𑀬𑀁 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀢𑁂𑀦 𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁, 𑀫𑀼𑀴𑁆𑀳𑁄 𑀫𑁄𑀳𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑀢𑁆𑀢𑀸𑀦𑀁 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀪𑀼𑀢𑁆𑀯𑀸 𑀯𑀺𑀕𑀢𑀼𑀧𑁆𑀧𑀦𑁆𑀦𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀉𑀧𑁆𑀧𑀦𑁆𑀦𑀁 𑀦 𑀫𑀕𑁆𑀕𑀯𑀚𑁆𑀛𑀁. 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀸 𑀥𑀺𑀕𑁆𑀕𑀳𑀺 𑀢𑀼𑀧𑁆𑀧𑀦𑁆𑀦𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁 𑀅𑀲𑀫𑀼𑀕𑁆𑀖𑀸𑀝𑀺𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀯𑀚𑁆𑀛𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁 𑀲𑀫𑀼𑀤𑀸 𑀘𑀸𑀭𑀼𑀧𑁆𑀧𑀦𑁆𑀦𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯. 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁 𑀅𑀢𑀻𑀢𑀫𑁂𑀯. 𑀑𑀓𑀸𑀲 𑀓𑀢𑀼𑀧𑁆𑀧𑀦𑁆𑀦𑀁 𑀅𑀦𑀸𑀕𑀢𑀫𑁂𑀯. 𑀢𑀤𑀼𑀪𑀬𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑀢𑁆𑀢𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑀻𑀧𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁𑀦𑀸𑀫 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀅𑀦𑀼𑀲𑀬𑀺𑀢𑀸𑀦𑀁 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸𑀦𑀁 𑀅𑀦𑀼𑀲𑀬𑀸𑀦𑀁𑀏𑀯 𑀦𑀸𑀫𑀁. 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑁂 𑀆𑀭𑀫𑁆𑀫𑀡𑁂 𑀲𑀓𑀺𑀁 𑀚𑀯𑀺𑀢𑁆𑀯𑀸 𑀬𑀸𑀯 𑀢𑀫𑁆𑀫𑀽𑀮𑀓𑁄 𑀧𑀭𑀺𑀬𑀼𑀝𑁆𑀞𑀸𑀦𑀯𑁂𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀢𑀸𑀯 𑀅𑀥𑀺𑀫𑀢𑁆𑀢𑀣𑀸𑀫𑀕𑀢 𑀪𑀸𑀯𑁂𑀦 𑀞𑀺𑀢𑀸𑀦𑀁 𑀢𑁂𑀲𑀜𑁆𑀜𑁂𑀯 𑀦𑀸𑀫𑀁. 𑀅𑀦𑀼𑀲𑀬𑀸 𑀳𑀺 𑀦𑀸𑀫 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀉𑀧𑀭𑀼𑀧𑀭𑀺 𑀣𑀺𑀭 𑀢𑀭 𑀤𑀴𑁆𑀳𑀢𑀭 𑀧𑀢𑁆𑀢𑀺𑀬𑀸 𑀧𑀓𑀢𑀺𑀬𑀸𑀧𑀺 𑀣𑀸𑀫𑀕𑀢𑀸𑀏𑀯𑀦𑀸𑀫 𑀳𑁄𑀦𑁆𑀢𑀺. 𑀦 𑀬𑁂𑀦𑀯𑀸 𑀢𑁂𑀦𑀯𑀸 𑀯𑀸𑀬𑀸𑀫𑁂𑀦 𑀧𑀚𑀳𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑀸 𑀬𑁄 𑀬𑁄 𑀅𑀦𑀼𑀲𑀬𑁄 𑀧𑀘𑁆𑀘𑀬𑀮𑀸𑀪𑁂𑀦 𑀧𑀭𑀺𑀬𑀼𑀝𑁆𑀞𑀸𑀦 𑀩𑀳𑀼𑀮𑁄 𑀳𑁄𑀢𑀺, 𑀢𑀤𑀸 𑀲𑁄 𑀲𑁄 𑀯𑀺𑀲𑁂𑀲𑁂𑀦 𑀅𑀥𑀺𑀫𑀢𑁆𑀢𑀣𑀸𑀫 𑀕𑀢𑀪𑀸𑀯𑀁 𑀧𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺. 𑀬𑀤𑀸 𑀬𑁄 𑀬𑁄 𑀧𑀝𑀺𑀧𑀓𑁆𑀔𑀥𑀫𑁆𑀫 𑀲𑀫𑀸𑀤𑀸𑀦𑁂𑀦 𑀦𑀺𑀕𑁆𑀕𑀳𑀧𑀢𑁆𑀢𑁄 𑀳𑁄𑀢𑀺, 𑀢𑀤𑀸 𑀲𑁄 𑀲𑁄 𑀫𑀦𑁆𑀤𑀣𑀸𑀫 𑀕𑀢𑀪𑀸𑀯𑀁 𑀧𑀢𑁆𑀯𑀸 𑀞𑀺𑀢𑁄 𑀳𑁄𑀢𑀻𑀢𑀺. 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑀁𑀦𑀸𑀫 𑀲𑀫𑀣 𑀯𑀺𑀧𑀲𑁆𑀲𑀦𑀸𑀳𑀺 𑀲𑀼𑀝𑁆𑀞𑀼𑀅𑀦𑀺𑀕𑁆𑀕𑀳𑀺𑀢𑀸𑀦𑀁 𑀢𑁂𑀲𑀜𑁆𑀜𑁂𑀯 𑀦𑀸𑀫𑀁. 𑀅𑀲𑀫𑀼𑀕𑁆𑀖𑀸𑀝𑀺 𑀢𑀼𑀧𑁆𑀧𑀦𑁆𑀦𑀁𑀦𑀸𑀫 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀸𑀦𑀁 𑀪𑀽𑀫𑀺𑀮𑀤𑁆𑀥𑀸𑀦𑀁 𑀢𑁂𑀲𑀁𑀏𑀯 𑀦𑀸𑀫𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀸𑀫 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑀸 𑀳𑁄𑀦𑁆𑀢𑀻𑀢𑀺 𑀳𑁂𑀝𑁆𑀞𑀺𑀫𑀸 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀸 𑀲𑁂𑀓𑁆𑀔𑀸 𑀅𑀢𑁆𑀢𑀦𑁄 𑀫𑀕𑁆𑀕𑀨𑀮𑀓𑁆𑀔𑀡𑁂𑀲𑀼 𑀉𑀧𑀭𑀺 𑀫𑀕𑁆𑀕𑀸𑀚𑁆𑀛𑁂𑀳𑀺𑀧𑀺 𑀅𑀦𑀼𑀲𑀬𑁂𑀳𑀺 𑀲𑀸𑀦𑀼𑀲𑀬𑀸𑀢𑀺𑀯𑀸 𑀦𑀺𑀭𑀸𑀦𑀼𑀲𑀬𑀸𑀢𑀺𑀯𑀸 𑀣𑀸𑀫𑀯𑀢𑀸𑀢𑀺𑀯𑀸 𑀅𑀣𑀸𑀫𑀕𑀢𑀸𑀢𑀺𑀯𑀸 𑀦𑀯𑀢𑁆𑀢𑀩𑁆𑀩𑀸. 𑀢𑀲𑁆𑀫𑀸 𑀅𑀦𑀼𑀲𑀬𑀸𑀦𑀁 𑀢𑀸𑀤𑀺𑀲𑁂 𑀧𑀘𑁆𑀘𑀼𑀧𑁆𑀧𑀦𑁆𑀦 𑀪𑀸𑀯𑁂 𑀲𑀢𑀺𑀧𑀺 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺. 𑀢𑁂𑀦𑀳𑀺 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀻𑀢𑀺 𑀯𑀼𑀢𑁆𑀢 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀓𑀸𑀫𑀭𑀸𑀕𑁄𑀏𑀯 𑀅𑀦𑀼𑀲𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄.

𑀲𑀁𑀬𑁄𑀚𑁂𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺, 𑀢𑀸𑀦𑀺 𑀧𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄𑀢𑀺 𑀧𑀜𑁆𑀘 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀢𑀺 𑀧𑀜𑁆𑀘 𑀉𑀤𑁆𑀥𑀁𑀪𑀸𑀕𑀺𑀬𑀸𑀦𑀻𑀢𑀺 𑀲𑀼𑀢𑁆𑀢𑀦𑁆𑀢𑁂 𑀅𑀪𑀺𑀥𑀫𑁆𑀫𑁂𑀘 𑀤𑀲𑀲𑀁𑀬𑁄𑀚𑀦𑀸𑀦𑀺 𑀆𑀕𑀢𑀸𑀦𑀺. 𑀇𑀢𑀭𑀸𑀦𑀺 𑀧𑀦 𑀅𑀪𑀺𑀥𑀫𑁆𑀫𑁂𑀏𑀯 𑀆𑀕𑀢𑀸𑀦𑀻𑀢𑀺 𑀢𑀢𑁄 𑀯𑀺𑀲𑁂𑀲𑀓𑀭𑀡𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑁂𑀢𑀺 𑀯𑀼𑀢𑁆𑀢𑀁. 𑀓𑀫𑁄 𑀧𑀦 𑀤𑁆𑀯𑀺𑀦𑁆𑀦𑀁𑀧𑀺 𑀧𑀸𑀴𑀺𑀬𑀸 𑀦𑀲𑀫𑁂𑀢𑀺. 𑀲𑀪𑀸𑀕 𑀥𑀫𑁆𑀫𑀲𑀗𑁆𑀕𑀳𑀯𑀲𑁂𑀦 𑀧𑀦 𑀇𑀥 𑀅𑀜𑁆𑀜𑀣𑀸 𑀓𑀫𑁄 𑀯𑀼𑀢𑁆𑀢𑁄 𑀲𑀺𑀬𑀸𑀢𑀺. 𑀘𑀺𑀢𑁆𑀢𑀁 𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀺𑀘𑀸𑀢𑀺 𑀓𑀺𑀮𑁂𑀲𑀸. 𑀓𑀺𑀮𑀺𑀲𑁆𑀲𑀦𑁆𑀢𑀺𑀯𑀸 𑀫𑀮𑀻𑀦𑀪𑀸𑀯𑀁 𑀦𑀺𑀳𑀻𑀦𑀪𑀸𑀯𑀜𑁆𑀘 𑀕𑀘𑁆𑀙𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀻𑀢𑀺 𑀓𑀺𑀮𑁂𑀲𑀸. 𑀓𑀸𑀫𑀪𑀯𑀦𑀸𑀫𑁂𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑀤𑀻𑀧𑀓𑁂𑀦 𑀓𑀸𑀫𑀦𑀸𑀫𑁂𑀦 𑀭𑀽𑀧𑀸𑀭𑀽𑀧𑀪𑀯𑀤𑀻𑀧𑀓𑁂𑀦 𑀘 𑀪𑀯𑀦𑀸𑀫𑁂𑀦. 𑀢𑀸𑀤𑀺𑀲𑀁 𑀓𑀸𑀫 𑀪𑀯𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀪𑀽𑀢𑀁 𑀯𑀢𑁆𑀣𑀼 𑀏𑀢𑀺𑀲𑁆𑀲𑀸𑀢𑀺 𑀢𑀩𑁆𑀩𑀢𑁆𑀣𑀼𑀓𑀸. 𑀢𑀣𑀸 𑀧𑀯𑀢𑁆𑀢𑀦𑁆𑀢𑀺 𑀲𑀻𑀮𑀩𑁆𑀩𑀢𑀸𑀦𑀺 𑀧𑀭𑀢𑁄 𑀆𑀫𑀲𑀦𑀸𑀓𑀸𑀭𑁂𑀦 𑀇𑀤𑀁 𑀫𑁂 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑀸𑀓𑀸𑀭𑁂𑀦 𑀔𑀦𑁆𑀥𑁂𑀲𑀼 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀓𑀸𑀭𑁂𑀦𑀘 𑀧𑀯𑀢𑁆𑀢𑀁. 𑀯𑀢𑁆𑀣𑀼𑀢𑁄𑀢𑀺 𑀲𑀪𑀸𑀯𑀥𑀫𑁆𑀫𑀢𑁄. 𑀅𑀬𑀁 𑀧𑀸𑀧𑀲𑀗𑁆𑀕𑀳𑁄 𑀅𑀓𑀼𑀲𑀮𑀗𑁆𑀕𑀳𑁄 𑀦𑀯𑀥𑀸 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. [𑀅𑀓𑀼𑀲𑀮𑀲𑀗𑁆𑀕𑀳𑁄]

𑁧𑁬𑁩. 𑀫𑀺𑀲𑁆𑀲𑀓 𑀲𑀗𑁆𑀕𑀳𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀧𑀸𑀧𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸𑀦𑀁𑀧𑀺 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀉𑀚𑀼𑀓𑀭𑀡𑀁𑀦𑀸𑀫 𑀛𑀸𑀦𑁂𑀦 𑀯𑀺𑀦𑀸 𑀦 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀲𑀢𑁆𑀢𑀛𑀸𑀦𑀗𑁆𑀕𑀸𑀦𑀻𑀢𑀺. 𑀓𑀮𑁆𑀬𑀸𑀡𑁂𑀯𑀸 𑀧𑀸𑀧𑀓𑁂𑀯𑀸 𑀆𑀭𑀫𑁆𑀫𑀡𑁂 𑀉𑀚𑀼𑀓𑀁 𑀘𑀺𑀢𑁆𑀢𑀧𑀝𑀺𑀧𑀸𑀤𑀦𑀲𑀗𑁆𑀔𑀸𑀢𑀲𑁆𑀲 𑀉𑀧𑀦𑀺𑀚𑁆𑀛𑀸𑀬𑀦 𑀓𑀺𑀘𑁆𑀘𑀲𑁆𑀲 𑀅𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑁄𑀫𑀦𑀲𑁆𑀲𑀁 𑀅𑀓𑀼𑀲𑀮𑀚𑁆𑀛𑀸𑀦𑀗𑁆𑀕𑀁. 𑀲𑁂𑀲𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀻𑀢𑀺. 𑀓𑀮𑁆𑀬𑀸𑀡𑀓𑀫𑁆𑀫 𑀧𑀸𑀧𑀓𑀫𑁆𑀫𑀲𑀗𑁆𑀔𑀸𑀢𑀸𑀲𑀼 𑀲𑀼𑀕𑀢𑀺 𑀤𑀼𑀕𑁆𑀕𑀢𑀺 𑀯𑀺𑀯𑀝𑁆𑀝𑀲𑀗𑁆𑀔𑀸𑀢𑀸𑀲𑀼𑀘 𑀦𑀸𑀦𑀸𑀤𑀺𑀲𑀸𑀲𑀼 𑀢𑀁𑀢𑀁𑀤𑀺𑀲𑀸𑀢𑀺 𑀫𑀼𑀔𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀲𑁆𑀲 𑀕𑀢𑀺𑀦𑀸𑀫 𑀲𑀫𑁆𑀫𑀸𑀯𑀸 𑀫𑀺𑀘𑁆𑀙𑀸𑀯𑀸 𑀧𑀯𑀢𑁆𑀢𑁂𑀳𑀺 𑀤𑀲𑁆𑀲𑀦𑀸𑀤𑀻𑀳𑀺 𑀏𑀯 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀕𑁆𑀕𑀗𑁆𑀕𑀸𑀦𑀻𑀢𑀺. 𑀘𑀺𑀢𑁆𑀢𑀲𑁆𑀲 𑀉𑀚𑀼𑀕𑀢𑀺𑀬𑀸𑀯𑀸 𑀯𑀗𑁆𑀓𑀕𑀢𑀺𑀬𑀸𑀯𑀸 𑀕𑀫𑀦𑀲𑁆𑀲 𑀧𑀣𑀗𑁆𑀕𑀸𑀦𑀺 𑀉𑀧𑀸𑀬𑀗𑁆𑀕𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧 𑀫𑀺𑀘𑁆𑀙𑀸𑀯𑀸𑀬𑀸𑀫 𑀫𑀺𑀘𑁆𑀙𑀸𑀲𑀫𑀸𑀥𑀬𑁄 𑀧𑀸𑀧𑀓𑀫𑁆𑀫 𑀤𑀼𑀕𑁆𑀕𑀢𑀺𑀪𑀯 𑀲𑀗𑁆𑀔𑀸𑀢𑀸𑀲𑀼 𑀅𑀳𑀺𑀢𑀤𑀺𑀲𑀸𑀲𑀼 𑀘𑀺𑀢𑁆𑀢𑀲𑁆𑀲 𑀯𑀗𑁆𑀓𑀕𑀢𑀺𑀬𑀸 𑀕𑀫𑀦𑀲𑁆𑀲 𑀉𑀧𑀸𑀬𑀗𑁆𑀕𑀸𑀦𑀺, 𑀇𑀢𑀭𑀸𑀦𑀺 𑀓𑀮𑁆𑀬𑀸𑀡𑀓𑀫𑁆𑀫 𑀲𑀼𑀕𑀢𑀺𑀪𑀯 𑀯𑀺𑀯𑀝𑁆𑀝𑀥𑀫𑁆𑀫𑀲𑀗𑁆𑀔𑀸𑀢𑀸𑀲𑀼 𑀳𑀺𑀢𑀤𑀺𑀲𑀸𑀲𑀼 𑀉𑀚𑀼𑀕𑀢𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑁂 𑀯𑀺𑀢𑀓𑁆𑀓 𑀯𑀺𑀘𑀸𑀭 𑀤𑁄𑀫𑀦𑀲𑁆𑀲𑁂𑀓𑀕𑁆𑀕𑀢𑀸 𑀲𑀗𑁆𑀔𑀸𑀢𑀁 𑀘𑀢𑀼𑀭𑀗𑁆𑀕𑀺𑀓𑀚𑁆𑀛𑀸𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧 𑀫𑀺𑀘𑁆𑀙𑀸𑀯𑀸𑀬𑀸𑀫 𑀫𑀺𑀘𑁆𑀙𑀸𑀲𑀫𑀸𑀥𑀺 𑀲𑀗𑁆𑀔𑀸𑀢𑁄 𑀢𑀺𑀬𑀗𑁆𑀕𑀻𑀓𑀫𑀕𑁆𑀕𑁄𑀘 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑁂𑀲𑁂𑀲𑀼 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑁂𑀲𑀼 𑀛𑀸𑀦𑀫𑀕𑁆𑀕𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀯𑀺𑀪𑀗𑁆𑀕𑁂 𑀧𑀦 𑀲𑀼𑀢𑁆𑀢𑀦𑁆𑀢𑁂𑀲𑀼𑀘 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀲𑀢𑀻𑀢𑀺 𑀇𑀫𑁂𑀧𑀺 𑀘𑀢𑁆𑀢𑀸𑀭𑁄 𑀆𑀕𑀢𑀸. 𑀇𑀫𑁂 𑀧𑀦 𑀯𑀺𑀲𑀼𑀁 𑀘𑁂𑀢𑀲𑀺𑀓𑀥𑀫𑁆𑀫𑀸 𑀦𑀳𑁄𑀦𑁆𑀢𑀺. 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀇𑀥 𑀦𑀕𑀳𑀺𑀢𑀸.

[𑁨𑁧𑁦] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀲𑀼𑀕𑀢𑀺 𑀤𑀼𑀕𑁆𑀕𑀢𑀻𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀅𑀪𑀺𑀫𑀼𑀔𑀁 𑀧𑀸𑀧𑀦𑀢𑁄 𑀫𑀕𑁆𑀕𑀸; 𑀢𑁂𑀲𑀁 𑀧𑀣𑀪𑀽𑀢𑀸𑀦𑀺 𑀅𑀗𑁆𑀕𑀸𑀦𑀺 𑀫𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁; 𑀢𑀁 𑀦 𑀲𑀼𑀦𑁆𑀤𑀭𑀁;

𑀦 𑀳𑀺 𑀅𑀗𑁆𑀕𑀸𑀦𑀺 𑀫𑀕𑁆𑀕𑀸𑀦𑀁 𑀧𑀣𑀪𑀽𑀢𑀸𑀦𑀺𑀦𑀸𑀫 𑀳𑁄𑀦𑁆𑀢𑀺; 𑀫𑀕𑁆𑀕𑀲𑀤𑁆𑀤𑁄𑀬𑁂𑀯 𑀧𑀣𑀧𑀭𑀺𑀬𑀸𑀬𑁄 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄 𑀦 𑀅𑀗𑁆𑀕𑀲𑀤𑁆𑀤𑁄𑀢𑀺;

[𑁨𑁧𑁧] 𑀬𑀜𑁆𑀘 𑀢𑀢𑁆𑀣

‘‘𑀫𑀕𑁆𑀕𑀲𑁆𑀲𑀯𑀸 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀅𑀗𑁆𑀕𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀦𑀼𑀧𑀧𑀦𑁆𑀦𑀁.

𑀇𑀥 𑀳𑀺 𑀓𑀢𑁆𑀣𑀘𑀺 𑀘𑀺𑀢𑁆𑀢𑁂 𑀢𑀺𑀬𑀗𑁆𑀕𑀺𑀓𑁄 𑀓𑀢𑁆𑀣𑀘𑀺 𑀘𑀢𑀼𑀭𑀗𑁆𑀕𑀺𑀓𑁄𑀢𑀺𑀆𑀤𑀺𑀦𑀸 𑀦𑀸𑀦𑀸𑀫𑀕𑁆𑀕𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀺𑀜𑁆𑀘 𑀆𑀥𑀺𑀧𑀘𑁆𑀘𑀁. 𑀅𑀢𑁆𑀢𑀸𑀥𑀻𑀦𑀯𑀼𑀢𑁆𑀢𑀺𑀓𑁂 𑀥𑀫𑁆𑀫𑁂 𑀅𑀢𑁆𑀢𑀦𑁄 𑀕𑀢𑀺𑀬𑀁 𑀲𑀩𑁆𑀩𑀲𑁄 𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑁄. 𑀇𑀢𑀺 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀅𑀢𑁆𑀢𑀦𑁄 𑀆𑀥𑀺𑀧𑀘𑁆𑀘𑀲𑀗𑁆𑀔𑀸𑀢𑀁 𑀇𑀦𑁆𑀤𑀝𑁆𑀞𑀁 𑀓𑀭𑁄𑀦𑁆𑀢𑀺 𑀲𑀸𑀥𑁂𑀦𑁆𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀦𑁆𑀢𑀻𑀢𑀺𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀇𑀲𑁆𑀲𑀭𑀸 𑀅𑀥𑀺𑀧𑀢𑀺𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀧𑀜𑁆𑀘𑀘𑀓𑁆𑀔𑀸𑀤𑀻𑀦𑀺 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑁂𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀇𑀲𑁆𑀲𑀭𑀸𑀳𑁄𑀦𑁆𑀢𑀺. 𑀩𑀮𑀯𑀤𑀼𑀩𑁆𑀩𑀮𑀫𑀦𑁆𑀤 𑀢𑀺𑀓𑁆𑀔𑀸𑀤𑀻𑀲𑀼 𑀅𑀢𑁆𑀢𑀸𑀓𑀸𑀭𑀸𑀦𑀼𑀯𑀢𑁆𑀢𑀸𑀧𑀦𑀢𑁄. 𑀪𑀸𑀯𑀤𑁆𑀯𑀬𑀁 𑀇𑀢𑁆𑀣𑀸𑀓𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀸𑀦𑀁 𑀲𑀓𑀮𑀔𑀦𑁆𑀥𑀧𑀜𑁆𑀘𑀓𑀲𑁆𑀲𑁂𑀯 𑀯𑀸 𑀇𑀲𑁆𑀲𑀭𑁄 𑀳𑁄𑀢𑀺. 𑀅𑀜𑁆𑀜𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄. 𑀢𑀣𑀸 𑀳𑀺 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀝𑀺𑀲𑀦𑁆𑀥𑀺𑀬𑀁 𑀇𑀢𑁆𑀣𑀺𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀺𑀁 𑀲𑀩𑁆𑀩𑁂 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀦𑁆𑀢𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸 𑀇𑀢𑁆𑀣𑀸𑀓𑀸𑀭𑀲𑀳𑀺𑀢𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀦𑁄 𑀅𑀜𑁆𑀜𑀣𑀸. 𑀙𑀦𑁆𑀤𑀘𑀺𑀢𑁆𑀢𑀸𑀥𑀺𑀧𑁆𑀧𑀸𑀬𑀸𑀧𑀺 𑀢𑀲𑁆𑀫𑀺𑀁 𑀫𑀦𑁆𑀤𑀸𑀓𑀸𑀭𑀲𑀳𑀺𑀢𑀸𑀯 𑀧𑀯𑀢𑁆𑀢𑀦𑁆𑀢𑀺. 𑀢𑀩𑁆𑀩𑀺𑀧𑀭𑀻𑀢𑁂𑀦 𑀧𑀼𑀭𑀺𑀲𑀲𑀦𑁆𑀢𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀚𑀻𑀯𑀺𑀢𑀤𑁆𑀯𑀬𑀁 𑀭𑀽𑀧𑀸 𑀭𑀽𑀧𑀲𑀦𑁆𑀢𑀢𑀻𑀦𑀁 𑀭𑀢𑁆𑀢𑀺 𑀤𑀺𑀯 𑀫𑀸𑀲 𑀲𑀁𑀯𑀘𑁆𑀙𑀭𑀸𑀦𑀼𑀓𑁆𑀓𑀫𑁂𑀦 𑀅𑀤𑁆𑀥𑀸𑀦𑀨𑀭𑀡𑁂 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀇𑀲𑁆𑀲𑀭𑁄 𑀳𑁄𑀢𑀺. 𑀢𑁂𑀲𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺 𑀓𑀢𑁆𑀢𑀸. 𑀫𑀦𑁄 𑀯𑀺𑀚𑀸𑀦𑀦𑀓𑀺𑀘𑁆𑀘𑁂. 𑀯𑁂𑀤𑀦𑀸𑀧𑀜𑁆𑀘𑀓𑀁 𑀢𑀣𑀸 𑀢𑀣𑀸 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑁂. 𑀲𑀤𑁆𑀥𑀸 𑀆𑀭𑀫𑁆𑀫𑀡𑀸𑀯𑀻𑀫𑀼𑀘𑁆𑀘𑀦𑁂. 𑀯𑀻𑀭𑀺𑀬𑀁 𑀓𑀫𑁆𑀫𑀦𑀺 𑀅𑀮𑀻𑀦 𑀯𑀼𑀢𑁆𑀢𑀺𑀪𑀸𑀯𑁂. 𑀲𑀢𑀺 𑀆𑀭𑀫𑁆𑀫𑀡𑀼𑀧𑀝𑁆𑀞𑀸𑀦𑁂. 𑀲𑀫𑀸𑀥𑀺 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀝𑁆𑀞𑀺 𑀢𑀺𑀬𑀁. 𑀧𑀜𑁆𑀜𑀸 𑀅𑀲𑀫𑁆𑀫𑁄𑀳𑀓𑀺𑀘𑁆𑀘𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀲𑁆𑀲𑀭𑁄 𑀳𑁄𑀢𑀺. 𑀅𑀦𑀜𑁆𑀜𑀸𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀣𑀸 𑀳𑀺 𑀲𑀺𑀮𑀸𑀬𑀁 𑀧𑀣𑀯𑀻 𑀲𑀳𑀚𑀸𑀢𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀸 𑀳𑁄𑀢𑀺. 𑀅𑀢𑁆𑀢𑀦𑀸𑀯𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀲𑀼𑀁 𑀅𑀯𑀺𑀚𑁆𑀚𑀫𑀸𑀦𑁂𑀯𑀺𑀬 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀬𑀣𑀸 𑀘 𑀉𑀤𑀓𑁂 𑀆𑀧𑁄 𑀅𑀕𑁆𑀕𑀺𑀫𑁆𑀳𑀺 𑀢𑁂𑀚𑁄 𑀯𑀸𑀢𑁂 𑀯𑀸𑀬𑁄. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑀸𑀬𑀺𑀢𑁆𑀣 𑀧𑀝𑀺𑀯𑀺𑀚𑁆𑀛𑀺𑀢𑁆𑀣𑀸𑀢𑀺 𑀅𑀜𑁆𑀜𑀸𑀢𑀁. 𑀦 𑀅𑀜𑁆𑀜𑀸𑀢𑀁 𑀅𑀦𑀜𑁆𑀜𑀸𑀢𑀁. 𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀅𑀫𑀢𑀁𑀯𑀸 𑀧𑀤𑀁. 𑀅𑀦𑀜𑁆𑀜𑀸𑀢𑀁 𑀜𑀲𑁆𑀲𑀸𑀫𑀺 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀺. 𑀆𑀔𑁆𑀬𑀸𑀢𑀺𑀓𑀁𑀧𑀺 𑀳𑀺 𑀧𑀤𑀁 𑀲𑀜𑁆𑀜𑀸𑀲𑀤𑁆𑀤𑀪𑀸𑀯𑁂 𑀞𑀺𑀢𑀁 𑀦𑀸𑀫𑀺𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀬𑀣𑀸 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀏𑀳𑀺𑀧𑀲𑁆𑀲𑀺 𑀓𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀢𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀳 𑀲𑀫𑀸𑀲𑀪𑀸𑀯𑁄 𑀦𑀯𑀺𑀭𑀼𑀚𑁆𑀛𑀢𑀻𑀢𑀺. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀁 𑀅𑀦𑀜𑁆𑀜𑀸 𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀆𑀤𑀺𑀫𑀦𑀲𑀺𑀓𑀸𑀭𑀢𑁄 𑀧𑀝𑁆𑀞𑀸𑀬 𑀢𑀸𑀤𑀺𑀲𑁂𑀦 𑀉𑀲𑁆𑀲𑀸𑀳𑁂𑀦 𑀲𑀳 𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀉𑀲𑁆𑀲𑀸𑀳𑁂 𑀅𑀧𑀝𑀺𑀧𑀲𑁆𑀲𑀤𑁆𑀥𑁂𑀬𑁂𑀯 𑀲𑁄𑀢𑀸𑀫𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀦𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀁. 𑀢𑀫𑁂𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀣𑀫𑀫𑀕𑁆𑀕𑁂𑀦 𑀅𑀦𑀜𑁆𑀜𑀸𑀢𑀁 𑀜𑀢𑁆𑀯𑀸𑀧𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀺𑀘𑁆𑀘𑀲𑁆𑀲 𑀅𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸 𑀢𑀲𑁆𑀲 𑀚𑀸𑀦𑀦𑀓𑀺𑀘𑁆𑀘𑀲𑁆𑀲 𑀯𑀺𑀧𑁆𑀧𑀓𑀢𑀪𑀸𑀯𑁂𑀦 𑀬𑀣𑀸 𑀤𑀺𑀝𑁆𑀞𑁂 𑀢𑀲𑁆𑀫𑀺𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀫𑀢𑀧𑀤𑁂𑀏𑀯 𑀯𑀸 𑀧𑀼𑀦𑀧𑁆𑀧𑀼𑀦𑀁 𑀚𑀸𑀦𑀦𑀓𑀺𑀘𑁆𑀘 𑀬𑀼𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸 𑀢𑀸𑀯𑀺𑀦𑁄 𑀧𑀭𑀺𑀦𑀺𑀝𑁆𑀞𑀺𑀢 𑀆𑀚𑀸𑀦𑀦 𑀓𑀺𑀘𑁆𑀘𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀺𑀯𑀺𑀥𑀁 𑀧𑁂𑀢𑀁 𑀢𑀣𑀸𑀭𑀽𑀧𑁂 𑀚𑀸𑀦𑀦𑁂 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀇𑀲𑁆𑀲𑀭𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀸𑀓𑀝𑁂 𑀭𑀽𑀧𑀓𑀸𑀬𑁂 𑀅𑀢𑁆𑀢𑀕𑀸𑀳𑀤𑀴𑁆𑀳𑀢𑁆𑀢𑀁 𑀢𑀩𑁆𑀩𑀺𑀫𑀼𑀢𑁆𑀢𑀺𑀘 𑀇𑀫𑁂𑀲𑀁 𑀅𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀼𑀁 𑀆𑀤𑀺𑀢𑁄 𑀧𑀜𑁆𑀘 𑀧𑀲𑀸𑀤𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀲 𑀅𑀢𑁆𑀢𑀲𑁆𑀲 𑀇𑀢𑁆𑀣𑀺𑀧𑀼𑀫 𑀢𑀸𑀪𑁂𑀤𑁄 𑀇𑀫𑁂𑀲𑀁 𑀯𑀲𑁂𑀦 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀸 𑀇𑀢𑁆𑀣𑀺𑀧𑀼𑀭𑀺𑀲 𑀕𑀸𑀳𑁄 𑀢𑀩𑁆𑀩𑀺𑀫𑀼𑀢𑁆𑀢𑀺𑀘 𑀇𑀫𑁂𑀲𑀁 𑀅𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀼𑀁 𑀓𑀤𑀦𑀦𑁆𑀢𑀭𑀁 𑀪𑀸𑀯𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀲𑁄𑀘 𑀅𑀢𑁆𑀢𑀸 𑀇𑀫𑀲𑁆𑀲 𑀯𑀲𑁂𑀦 𑀚𑀻𑀯𑀲𑀜𑁆𑀜𑀁 𑀮𑀪𑀢𑀺. 𑀢𑀲𑁆𑀫𑀺𑀁𑀯𑀸 𑀚𑀻𑀯𑀕𑀸𑀳𑁄 𑀢𑀩𑁆𑀩𑀺𑀫𑀼𑀢𑁆𑀢𑀺𑀘 𑀇𑀫𑀲𑁆𑀲 𑀅𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀼𑀁 𑀢𑀤𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀪𑀸𑀯𑀺𑀦𑁆𑀤𑁆𑀭𑀺𑀬𑀢𑁄 𑀧𑀼𑀭𑁂 𑀯𑀢𑁆𑀢𑀩𑁆𑀩𑀁𑀧𑀺 𑀭𑀽𑀧𑀸𑀭𑀽𑀧 𑀫𑀺𑀲𑁆𑀲𑀓𑀢𑁆𑀢𑀸 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀸𑀫𑀓𑀸𑀬𑁂 𑀅𑀢𑁆𑀢𑀕𑀸𑀳𑀤𑀴𑁆𑀳𑀢𑁆𑀢𑀁 𑀢𑀩𑁆𑀩𑀺𑀫𑀼𑀢𑁆𑀢𑀺𑀘 𑀇𑀫𑀲𑁆𑀲 𑀅𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀼𑀁 𑀦𑀸𑀫𑀺𑀦𑁆𑀤𑁆𑀭𑀺𑀬𑁂𑀲𑀼 𑀫𑀦𑀺𑀦𑁆𑀤𑁆𑀭𑀺𑀬𑀁 𑀆𑀤𑀺𑀢𑁄 𑀯𑀼𑀢𑁆𑀢𑀁. 𑀲𑁄𑀘 𑀅𑀭𑀽𑀧𑀻 𑀅𑀢𑁆𑀢𑀸 𑀇𑀫𑁂𑀲𑀁 𑀯𑀲𑁂𑀦 𑀲𑀁𑀓𑀺𑀮𑀺𑀝𑁆𑀞𑁄 𑀯𑀺𑀧𑁆𑀨𑀦𑁆𑀤𑀺𑀢𑁄𑀘 𑀳𑁄𑀢𑀺. 𑀢𑀲𑁆𑀫𑀺𑀁𑀯𑀸 𑀲𑀼𑀔𑀺𑀢𑀤𑀼𑀓𑁆𑀔𑀺𑀢𑀕𑀸𑀳𑁄 𑀢𑀩𑁆𑀩𑀺𑀫𑀼𑀢𑁆𑀢𑀺𑀘 𑀇𑀫𑁂𑀲𑀁 𑀅𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬𑀘 𑀳𑁄𑀢𑀻𑀢𑀺 𑀤𑀻𑀧𑁂𑀢𑀼𑀁 𑀢𑀤𑀦𑀦𑁆𑀢𑀭𑀁 𑀧𑁂𑀤𑀦𑀺𑀦𑁆𑀤𑁆𑀭𑀺𑀬𑀧𑀜𑁆𑀘𑀓𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀲𑁆𑀲 𑀯𑁄𑀤𑀸𑀦𑀧𑁆𑀧𑀢𑁆𑀢𑀺𑀬𑀸 𑀢𑀁𑀢𑀁𑀕𑀸𑀳𑀯𑀺𑀫𑀼𑀢𑁆𑀢𑀺𑀬𑀸𑀯𑀸 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀤𑁆𑀥𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑁄𑀤𑀸𑀦𑀧𑁆𑀧𑀢𑁆𑀢𑀺 𑀬𑀸 𑀆𑀤𑀺 𑀫𑀚𑁆𑀛 𑀧𑀭𑀺𑀬𑁄𑀲𑀸𑀦 𑀤𑀲𑁆𑀲𑀦𑀢𑁆𑀣𑀁 𑀅𑀦𑁆𑀢𑁂 𑀢𑀻𑀡𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺.

[𑁨𑁧𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀜𑁆𑀜𑁂𑀲𑀁 𑀅𑀕𑀳𑀡𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦𑀳𑀺 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀇𑀦𑁆𑀤𑁆𑀭𑀺𑀬𑀪𑀸𑀯𑀸𑀭𑀳𑁂𑀲𑀼 𑀥𑀫𑁆𑀫𑁂𑀲𑀼 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀢𑁂𑀲𑀁 𑀅𑀜𑁆𑀜𑁂𑀲𑀁 𑀪𑀕𑀯𑀢𑁄 𑀣𑁂𑀭𑀲𑁆𑀲𑀘 𑀅𑀕𑀳𑀡𑀦𑁆𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀇𑀦𑁆𑀤𑁆𑀭𑀺𑀬𑀪𑀸𑀯𑀸𑀭𑀳𑀲𑁆𑀲 𑀅𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀬𑀤𑀺 𑀳𑀺 𑀲𑀫𑁆𑀪𑀯𑁂𑀬𑁆𑀬, 𑀲𑀢𑀁𑀧𑀺 𑀲𑀳𑀲𑁆𑀲𑀁𑀧𑀺 𑀕𑀡𑁆𑀳𑀺𑀲𑁆𑀲𑀢𑀺𑀬𑁂𑀯𑀸𑀢𑀺. 𑀩𑀮𑀺𑀬𑀦𑁆𑀢𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀲𑀳𑀦𑁆𑀢𑀺 𑀫𑀤𑁆𑀤𑀦𑁆𑀢𑀻𑀢𑀺 𑀩𑀮𑀸𑀦𑀺. 𑀬𑀣𑀸 𑀅𑀩𑀮𑀸𑀦𑀁 𑀩𑀮𑀺𑀬𑀦𑁆𑀢𑀺. 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸𑀢𑀺. 𑀏𑀢𑁆𑀣𑀘 𑀅𑀩𑀮𑀸𑀢𑀺 𑀤𑀼𑀩𑁆𑀩𑀮𑀸. 𑀦𑀦𑁆𑀢𑀺 𑀳𑀻𑀦𑀯𑀻𑀭𑀺𑀬𑀁 𑀚𑀦𑀁. 𑀩𑀮𑀺𑀬𑀦𑁆𑀢𑀻𑀢𑀺 𑀩𑀮𑀲𑀸 𑀓𑀭𑁄𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺. 𑀧𑀭𑀺𑀲𑁆𑀲𑀬𑀸𑀢𑀺 𑀅𑀩𑀮𑀸 𑀭𑀸𑀕𑀸𑀤𑀺 𑀧𑀭𑀺𑀲𑁆𑀲𑀬𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘, 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀅𑀓𑁆𑀔𑁄 𑀪𑀡𑀺𑀬𑀝𑁆𑀞𑁂𑀦 𑀩𑀮𑀸𑀦𑀺𑀦𑀸𑀫. 𑀢𑀲𑁆𑀫𑀸 𑀅𑀲𑁆𑀲𑀤𑁆𑀥𑀺𑀬𑀲𑀗𑁆𑀔𑀸𑀢𑁂𑀦 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀦 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸 𑀲𑀤𑁆𑀥𑀸𑀩𑀮𑀁𑀦𑀸𑀫. 𑀓𑁄𑀲𑀚𑁆𑀚𑀲𑀗𑁆𑀔𑀸𑀢𑁂𑀦 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸 𑀯𑀻𑀭𑀺𑀬𑀩𑀮𑀁𑀦𑀸𑀫. 𑀫𑀼𑀝𑁆𑀞𑀲𑀘𑁆𑀘𑁂𑀦 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀲𑀢𑀺𑀩𑀮𑀁𑀦𑀸𑀫. 𑀉𑀤𑁆𑀥𑀘𑁆𑀘𑁂𑀦 𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀲𑀫𑀸𑀥𑀺𑀩𑀮𑀁𑀦𑀸𑀫. 𑀅𑀯𑀺𑀚𑁆𑀚𑀸𑀬𑀓𑀫𑁆𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸 𑀧𑀜𑁆𑀜𑀸𑀩𑀮𑀁 𑀦𑀸𑀫. 𑀲𑁂𑀲𑀤𑀼𑀓𑀤𑁆𑀯𑀬𑀁 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀧𑀓𑁆𑀔𑁂𑀦𑀬𑁄𑀚𑁂𑀢𑀩𑁆𑀩𑀁.

[𑁨𑁧𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀸𑀧𑀩𑀮𑀤𑀼𑀓𑀁 𑀧𑀝𑀺𑀧𑀓𑁆𑀔𑁂𑀦 𑀬𑁄𑀚𑁂𑀢𑀼𑀁 𑀦𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁆𑀯𑀬𑀁 𑀧𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂 𑀦𑁂𑀯𑀸𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀢𑀺𑀘 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀢𑀸 𑀢𑀺𑀘 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑀢𑁄𑀢𑀺. 𑀯𑀻𑀭𑀺𑀬𑀲𑀫𑀸𑀥𑀺𑀩𑀮𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀺. 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀦𑀺 𑀅𑀓𑀼𑀲𑀮𑀩𑀮𑀸𑀦𑀺. 𑀲𑁂𑀲𑀸𑀦𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀻𑀢𑀺. 𑀅𑀥𑀺𑀧𑀢𑀻𑀢𑀺 𑀏𑀢𑁆𑀣 𑀧𑀢𑀻𑀢𑀺 𑀲𑀸𑀫𑀺 𑀇𑀲𑁆𑀲𑀭𑁄. 𑀲𑁄 𑀧𑀦 𑀧𑀤𑁂𑀲 𑀇𑀲𑁆𑀲𑀭𑁄 𑀲𑀓𑀮𑀺𑀲𑁆𑀲𑀭𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑁂𑀲𑀁 𑀯𑀺𑀲𑀬𑁂 𑀲𑀬𑀁 𑀧𑀭𑀯𑀲𑁂 𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀲𑀬𑁂𑀏𑀯 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀧𑀤𑁂𑀲𑀺𑀲𑁆𑀲𑀭𑀸 𑀦𑀸𑀫. 𑀧𑀼𑀩𑁆𑀩𑀸𑀢𑀺 𑀲𑀗𑁆𑀔𑀸𑀭𑀯𑀲𑁂𑀦 𑀧𑀼𑀩𑁆𑀩𑀸𑀕𑀫𑀦𑀯𑀲𑁂𑀦 𑀯𑀸 𑀯𑀺𑀲𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀧𑀢𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀧𑀦 𑀅𑀜𑁆𑀜𑁄 𑀤𑀼𑀢𑀺𑀬𑁄 𑀇𑀲𑁆𑀲𑀭𑁄𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀥𑀺𑀓𑁄 𑀧𑀢𑀻𑀢𑀺 𑀅𑀥𑀺𑀧𑀢𑀺. 𑀅𑀢𑁆𑀢𑀸 𑀥𑀻𑀦𑀯𑀼𑀢𑁆𑀢𑀻𑀦𑀁 𑀧𑀢𑀻𑀢𑀺 𑀅𑀥𑀺𑀧𑀢𑀻𑀢𑀺𑀘 𑀯𑀤𑀦𑁆𑀢𑀺.

𑀙𑀦𑁆𑀤𑁄𑀏𑀯 𑀅𑀥𑀺𑀧𑀢𑀻𑀢𑀺 𑀙𑀦𑁆𑀤𑀸𑀥𑀺𑀧𑀢𑀺. 𑀙𑀦𑁆𑀤𑀯𑀢𑁄 𑀓𑀺𑀁𑀦𑀸𑀫 𑀓𑀫𑁆𑀫𑀁 𑀦𑀲𑀺𑀚𑁆𑀛𑀢𑀻𑀢𑀺 𑀏𑀯𑀁 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀯𑀸 𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂𑀲𑀼 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀙𑀦𑁆𑀤𑀸𑀕𑀫𑀦𑀯𑀲𑁂𑀦𑀯𑀸 𑀢𑁂𑀲𑀼 𑀢𑁂𑀲𑀼 𑀓𑀮𑁆𑀬𑀸𑀡 𑀧𑀸𑀧𑀓𑀫𑁆𑀫𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀫𑀳𑁄𑀖𑁄𑀯𑀺𑀬 𑀢𑀺𑀡𑀧𑀡𑁆𑀡𑀓𑀲𑀝𑁂 𑀅𑀢𑁆𑀢𑀧𑀭𑀸𑀥𑀻𑀦𑁂 𑀦𑀺𑀘𑁆𑀘𑀁 𑀧𑀕𑁆𑀕𑀳𑀺𑀢𑀥𑀼𑀭𑁂 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀓𑀢𑁆𑀢𑀼𑀓𑀫𑁆𑀬𑀢𑀸 𑀙𑀦𑁆𑀤𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀦𑀦𑀼 𑀘𑁂𑀢𑁆𑀣 𑀧𑀘𑁆𑀙𑀺𑀫𑀸 𑀢𑀬𑁄 𑀥𑀫𑁆𑀫𑀸 𑀅𑀥𑀺𑀧𑀢𑀺𑀪𑀸𑀯𑀁 𑀕𑀡𑁆𑀳𑀦𑁆𑀢𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀁 𑀅𑀯𑀺𑀚𑀳𑀺𑀢𑁆𑀯𑀸𑀯 𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀧𑀢𑀺𑀪𑀽𑀢𑀸𑀯 𑀲𑀫𑀸𑀦𑀸 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀯𑀲𑁂𑀦 𑀧𑀭𑀯𑀲𑁂𑀧𑀺 𑀯𑀢𑁆𑀢𑀦𑁆𑀢𑀻𑀢𑀺. 𑀲𑀘𑁆𑀘𑀁, 𑀅𑀜𑁆𑀜𑀁 𑀧𑀦 𑀅𑀥𑀺𑀧𑀢𑀺𑀓𑀺𑀘𑁆𑀘𑀁, 𑀅𑀜𑁆𑀜𑀁 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀦𑁆𑀢𑀺 𑀦𑀢𑁆𑀣𑁂𑀢𑁆𑀣 𑀤𑁄𑀲𑁄𑀢𑀺. 𑀬𑀣𑀸 𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀓𑀲𑁆𑀲 𑀅𑀢𑁆𑀢𑀦𑁄 𑀧𑀼𑀭𑁄𑀳𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀏𑀓𑀁 𑀤𑀺𑀩𑁆𑀩𑀯𑀺𑀚𑁆𑀚𑀁 𑀕𑀡𑁆𑀳𑀸𑀢𑀺. 𑀦 𑀏𑀢𑁆𑀢𑀸𑀯𑀢𑀸 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺𑀦𑀸𑀫 𑀦𑀳𑁄𑀢𑀺. 𑀦𑀘 𑀯𑀺𑀚𑁆𑀚𑀸𑀳𑁂𑀢𑀼 𑀅𑀜𑁆𑀜𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺. 𑀅𑀜𑁆𑀜𑀜𑁆𑀳𑀺 𑀘𑀓𑁆𑀓𑀯𑀢𑁆𑀢𑀺 𑀭𑀚𑁆𑀚𑀓𑀺𑀘𑁆𑀘𑀁, 𑀅𑀜𑁆𑀜𑀁 𑀯𑀺𑀚𑁆𑀚𑀸𑀕𑀳𑀡 𑀓𑀺𑀘𑁆𑀘𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀥𑀺𑀧𑀢𑀺𑀓𑀺𑀘𑁆𑀘𑀁𑀦𑀸𑀫 𑀢𑀁𑀢𑀁𑀓𑀺𑀘𑁆𑀘 𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑀼𑀮𑁆𑀬𑀩𑀮𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳𑀚𑀸𑀢 𑀥𑀫𑁆𑀫𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀦𑀺𑀯𑀢𑁆𑀢𑀫𑀸𑀦𑁂 𑀓𑀢𑁆𑀯𑀸 𑀥𑀼𑀭 𑀯𑀸𑀳𑀺𑀢𑀸. 𑀇𑀦𑁆𑀤𑁆𑀭𑀺𑀬𑀓𑀺𑀘𑁆𑀘𑀁 𑀧𑀦 𑀯𑀺𑀚𑀸𑀦𑀦𑀸𑀤𑀺𑀓𑀺𑀘𑁆𑀘𑀁 𑀆𑀭𑀩𑁆𑀪 𑀧𑀯𑀼𑀘𑁆𑀘𑀢𑀻𑀢𑀺.

𑀆𑀳𑀭𑀦𑁆𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀲𑀸𑀫𑀜𑁆𑀜𑀢𑁄 𑀅𑀢𑀺𑀭𑁂𑀓𑁂𑀦 𑀅𑀲𑀸𑀥𑀸𑀭𑀡𑀧𑀘𑁆𑀘𑀬𑀲𑀢𑁆𑀢𑀺𑀯𑀺𑀲𑁂𑀲𑁂𑀦 𑀳𑀭𑀦𑁆𑀢𑀺 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀆𑀳𑀸𑀭𑀸. 𑀆𑀳𑀭𑀦𑁆𑀢𑀺𑀯𑀸 𑀅𑀚𑁆𑀛𑀢𑁆𑀢𑀲𑀫𑁆𑀪𑀽𑀢𑀸 𑀢𑁂 𑀢𑁂 𑀧𑀘𑁆𑀘𑀬𑀥𑀫𑁆𑀫𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀘 𑀅𑀢𑁆𑀢𑀸𑀦𑀜𑁆𑀘𑁂𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀓𑀺𑀘𑁆𑀘𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑀺𑀘𑁆𑀘𑀜𑁆𑀘 𑀲𑀼𑀝𑁆𑀞𑀼 𑀳𑀭𑀦𑁆𑀢𑀺 𑀯𑀳𑀦𑁆𑀢𑀺 𑀏𑀢𑁂𑀳𑀻𑀢𑀺 𑀆𑀳𑀸𑀭𑀸. 𑀬𑀣𑀸𑀳𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺. 𑀏𑀢𑁆𑀣𑀘 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀏𑀢𑁂𑀦 𑀲𑀩𑁆𑀩𑁂 𑀅𑀚𑁆𑀛𑀢𑁆𑀢𑀲𑀫𑁆𑀪𑀽𑀢𑀸 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸. 𑀬𑀣𑀸𑀭𑀳𑀁 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑁂𑀳𑀺 𑀞𑀺𑀢𑀺𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦𑀦𑀼𑀘𑁂𑀢𑁆𑀣 𑀧𑀘𑁆𑀘𑀬𑀸𑀳𑀸𑀭𑁄𑀯 𑀯𑀼𑀢𑁆𑀢𑁄. 𑀦 𑀆𑀳𑀸𑀭𑀧𑀘𑁆𑀘𑀬𑁄. 𑀇𑀥 𑀧𑀦 𑀘𑀢𑀼𑀩𑁆𑀩𑀺𑀥𑁄 𑀆𑀳𑀸𑀭𑀧𑀘𑁆𑀘𑀬𑀥𑀫𑁆𑀫𑁄𑀯 𑀯𑀼𑀢𑁆𑀢𑁄𑀢𑀺. 𑀲𑀘𑁆𑀘𑀁, 𑀧𑀘𑁆𑀘𑀬𑀝𑁆𑀞𑁂𑀦 𑀧𑀦 𑀆𑀳𑀸𑀭𑀦𑀸𑀫𑀓𑀸𑀦𑀁 𑀲𑀩𑁆𑀩𑁂𑀲𑀁 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀫𑀚𑁆𑀛𑁂 𑀬𑁂𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀢𑁂 𑀢𑁂𑀲𑀁 𑀧𑀘𑁆𑀘𑀬𑀸𑀳𑀸𑀭𑀸𑀦𑀁𑀧𑀺 𑀆𑀳𑀸𑀭𑀪𑀽𑀢𑀸𑀢𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀫𑀳𑀦𑁆𑀢 𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺.

𑀢𑀢𑁆𑀣 𑀬𑀣𑀸 𑀬𑀯𑀩𑀻𑀚𑀸𑀦𑀁𑀯𑀸 𑀲𑀸𑀮𑀺𑀩𑀻𑀚𑀸𑀦𑀁𑀯𑀸 𑀆𑀦𑀼𑀪𑀸𑀯𑁄 𑀦𑀸𑀫 𑀓𑀴𑀺𑀭𑀗𑁆𑀓𑀼𑀭𑀸𑀦𑀁 𑀉𑀧𑁆𑀧𑀸𑀤𑀸𑀦 𑀧𑀥𑀸𑀦𑀁 𑀳𑁄𑀢𑀺. 𑀢𑀢𑁄𑀧𑀭𑀁 𑀧𑀦 𑀲𑀲𑁆𑀲𑀪𑀸𑀯𑀁 𑀧𑀢𑁆𑀯𑀸 𑀙 𑀧𑀜𑁆𑀘 𑀫𑀸𑀲𑁂 𑀯𑀟𑁆𑀠𑀺𑀬𑀸𑀯𑀸 𑀞𑀺𑀢𑀺𑀬𑀸𑀯𑀸 𑀧𑀣𑀯𑀺 𑀭𑀲𑀆𑀧𑁄𑀭𑀲𑀸𑀦𑀁 𑀆𑀦𑀼𑀪𑀸𑀯𑁄 𑀧𑀥𑀸𑀦𑀁 𑀳𑁄𑀢𑀺. 𑀏𑀯𑀫𑁂𑀯𑀁 𑀓𑀩𑀴𑀻 𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀻𑀦𑀁 𑀓𑀸𑀫𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁄𑀦𑀸𑀫 𑀧𑀝𑀺𑀲𑀦𑁆𑀥𑀺𑀭𑀽𑀧𑀼𑀧𑁆𑀧𑀸𑀤𑀦𑁂 𑀧𑀥𑀸𑀦𑀁 𑀳𑁄𑀢𑀺. 𑀢𑀢𑁄𑀧𑀭𑀁 𑀧𑀦 𑀬𑀸𑀯𑀢𑀸𑀬𑀼𑀓𑀁 𑀯𑀟𑁆𑀠𑀻𑀬𑀸𑀯𑀸𑀞𑀺𑀢𑀺𑀬𑀸𑀯𑀸 𑀉𑀢𑀼𑀆𑀳𑀸𑀭𑀸𑀦𑀁 𑀆𑀦𑀼𑀪𑀸𑀯𑁄 𑀧𑀥𑀸𑀦𑀁 𑀳𑁄𑀢𑀺. 𑀓𑀫𑁆𑀫𑀚𑀭𑀽𑀧𑀸𑀦𑀺 𑀳𑀺 𑀬𑀸𑀯 𑀆𑀲𑀦𑁆𑀦𑀫𑀭𑀡𑀸 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺 𑀉𑀢𑀼𑀆𑀳𑀸𑀭𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸𑀦𑀺𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀉𑀢𑀼𑀘 𑀆𑀳𑀸𑀭𑀼 𑀧𑀢𑁆𑀣𑀫𑁆𑀪𑀺𑀢𑁄𑀬𑁂𑀯 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀅𑀦𑀼𑀧𑀢𑁆𑀣𑀫𑁆𑀪𑀻𑀬𑀫𑀸𑀦𑀁 𑀘𑀺𑀭𑀁 𑀦𑀧𑀯𑀢𑁆𑀢𑀢𑀺. 𑀉𑀧𑀢𑁆𑀣𑀫𑁆𑀪𑀻𑀬𑀫𑀸𑀦𑀁𑀏𑀯 𑀬𑀸𑀯𑀢𑀸𑀬𑀼𑀓𑀁 𑀧𑀯𑀢𑁆𑀢𑀢𑀺. 𑀬𑀣𑀸𑀘 𑀲𑀓𑀼𑀡𑀸𑀯𑀸 𑀟𑀁𑀲𑀫𑀓𑀲𑀸 𑀤𑀬𑁄𑀯𑀸 𑀢𑀼𑀡𑁆𑀟𑁂𑀦 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀧𑁄𑀲𑁂𑀦𑁆𑀢𑀺. 𑀢𑀼𑀡𑁆𑀟𑁂 𑀅𑀲𑀦𑁆𑀢𑁂 𑀆𑀳𑀸𑀭𑀁 𑀅𑀮𑀪𑀦𑁆𑀢𑀸 𑀫𑀭𑀦𑁆𑀢𑀺. 𑀏𑀯𑀫𑁂𑀯 𑀇𑀫𑁂 𑀲𑀢𑁆𑀢𑀸 𑀨𑀲𑁆𑀲𑁂𑀦 𑀆𑀭𑀫𑁆𑀫𑀡𑁂𑀲𑀼 𑀭𑀲𑀁 𑀕𑀳𑁂𑀢𑁆𑀯𑀸 𑀯𑁂𑀤𑀦𑀸𑀲𑀗𑁆𑀔𑀸𑀢𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀡𑁆𑀳𑀸𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀢𑀺𑀯𑀺𑀥𑀁 𑀯𑀝𑁆𑀝𑀁 𑀧𑀽𑀭𑁂𑀢𑁆𑀯𑀸 𑀬𑀸𑀯𑀚𑁆𑀚𑀢𑀦𑀸𑀧𑀺 𑀯𑀝𑁆𑀝𑁂 𑀅𑀦𑀼𑀓𑀡𑁆𑀞𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺.

𑀬𑀤𑀺 𑀳𑀺 𑀨𑀲𑁆𑀲𑁄𑀦𑀸𑀫 𑀦 𑀲𑀺𑀬𑀸, 𑀆𑀭𑀫𑁆𑀫𑀡𑀭𑀲𑀁 𑀅𑀮𑀪𑀺𑀢𑁆𑀯𑀸 𑀯𑁂𑀤𑀦𑀸 𑀧𑀭𑀺𑀪𑁄𑀕𑀭𑀳𑀺𑀢𑁂𑀦 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀢𑀺𑀯𑀺𑀥𑀯𑀝𑁆𑀝𑀫𑁂𑀯 𑀦𑀲𑀺𑀬𑀸𑀢𑀺. 𑀬𑀣𑀸𑀘 𑀢𑁂 𑀲𑀓𑀼𑀡𑀸𑀤𑀬𑁄 𑀧𑀓𑁆𑀔𑁂 𑀯𑀺𑀬𑀽𑀳𑀺𑀢𑁆𑀯𑀸 𑀅𑀦𑁆𑀢𑀭𑀸 𑀅𑀧𑀢𑀫𑀸𑀦𑀸 𑀭𑀼𑀓𑁆𑀔𑀢𑁄 𑀭𑀼𑀓𑁆𑀔𑀁 𑀯𑀦𑀢𑁄 𑀯𑀦𑀁 𑀯𑀺𑀘𑀭𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀬𑀸𑀧𑁂𑀦𑁆𑀢𑀺. 𑀧𑀓𑁆𑀔𑁂𑀲𑀼 𑀅𑀲𑀦𑁆𑀢𑁂𑀲𑀼 𑀕𑀫𑀦𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀸 𑀧𑀢𑀺𑀢𑁆𑀯𑀸 𑀫𑀭𑀦𑁆𑀢𑀺. 𑀏𑀯𑀫𑁂𑀯𑀁 𑀇𑀫𑁂 𑀲𑀢𑁆𑀢𑀸 𑀆𑀬𑀽𑀳𑀦𑀮𑀓𑁆𑀔𑀡𑀸𑀬 𑀘𑁂𑀢𑀦𑀸𑀬 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀲𑀫𑀗𑁆𑀕𑀺𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀯𑀢𑁄 𑀪𑀯𑀁 𑀯𑀺𑀘𑀭𑀺𑀢𑁆𑀯𑀸 𑀬𑀸𑀯𑀚𑁆𑀚𑀢𑀦𑀸 𑀯𑀝𑁆𑀝𑁂 𑀲𑀁𑀲𑀭𑀦𑁆𑀢𑀺. 𑀬𑀤𑀺 𑀳𑀺 𑀘𑁂𑀢𑀦𑀸𑀦𑀸𑀫 𑀦 𑀲𑀺𑀬𑀸, 𑀓𑀫𑁆𑀫𑀯𑀝𑁆𑀝𑀲𑁆𑀲 𑀅𑀪𑀸𑀯𑁄. 𑀢𑀤𑀪𑀸𑀯𑁂𑀘 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀅𑀪𑀸𑀯𑁄. 𑀢𑀤𑀪𑀸𑀯𑁂𑀘 𑀢𑀤𑀦𑀼𑀲𑀬𑀺𑀢𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀅𑀪𑀸𑀯𑁄𑀢𑀺 𑀯𑀝𑁆𑀝𑀁𑀦𑀸𑀫 𑀦 𑀲𑀺𑀬𑀸𑀢𑀺. 𑀬𑀣𑀸𑀘 𑀢𑁂 𑀲𑀓𑀼𑀡𑀸𑀤𑀬𑁄 𑀘𑀓𑁆𑀔𑀼𑀦𑀸 𑀕𑁄𑀘𑀭𑀝𑁆𑀞𑀸𑀦𑀁𑀯𑀸 𑀢𑀁𑀢𑀁𑀤𑀺𑀲𑀸𑀪𑀸𑀕𑀁𑀯𑀸 𑀯𑀺𑀪𑀸𑀯𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀢𑁆𑀢𑀸𑀦𑀁 𑀬𑀸𑀧𑁂𑀦𑁆𑀢𑀺. 𑀘𑀓𑁆𑀔𑀼𑀲𑁆𑀫𑀺𑀁 𑀅𑀲𑀦𑁆𑀢𑁂 𑀓𑀺𑀜𑁆𑀘𑀺𑀕𑀳𑁂𑀢𑀩𑁆𑀩𑀯𑀢𑁆𑀣𑀼𑀁𑀯𑀸 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁𑀯𑀸 𑀅𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀫𑀭𑀦𑁆𑀢𑀺. 𑀏𑀯𑀫𑁂𑀯𑀁 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀯𑀺𑀚𑀸𑀦𑀮𑀓𑁆𑀔𑀡𑁂𑀦 𑀯𑀺𑀜𑁆𑀜𑀸𑀡𑁂𑀦 𑀢𑀁𑀢𑀁𑀆𑀭𑀫𑁆𑀫𑀡𑀁 𑀮𑀪𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀨𑀲𑁆𑀲𑀸𑀤𑀬𑁄 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀺𑀯𑀺𑀥𑀁 𑀯𑀝𑁆𑀝𑀁 𑀯𑀝𑁆𑀝𑁂𑀦𑁆𑀢𑀺. 𑀬𑀤𑀺 𑀳𑀺 𑀯𑀺𑀜𑁆𑀜𑀸𑀡𑀁𑀦𑀸𑀫 𑀦 𑀲𑀺𑀬𑀸, 𑀨𑀲𑁆𑀲𑀸𑀤𑀻𑀦𑀁 𑀆𑀭𑀫𑁆𑀫𑀡𑀮𑀸𑀪𑁄𑀬𑁂𑀯 𑀦𑀢𑁆𑀣𑀻𑀢𑀺 𑀯𑀝𑁆𑀝𑀫𑁂𑀯 𑀦 𑀲𑀺𑀬𑀸𑀢𑀺. 𑀢𑁂𑀦𑀸𑀳 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸.𑀮. 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀦𑁆𑀢𑀺. 𑀲𑀁𑀬𑀼𑀢𑁆𑀢𑀓𑁂𑀘 𑁋

𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁𑀯𑀸 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀳𑀸𑀬 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄𑀯𑀸 𑀲𑀼𑀔𑀼𑀫𑁄𑀯𑀸, 𑀨𑀲𑁆𑀲𑁄 𑀤𑀼𑀢𑀻𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀻𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀪𑀽𑀢𑀸𑀦𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸𑀦𑀁. 𑀲𑀫𑁆𑀪𑀯𑁂𑀲𑀻𑀦𑀦𑁆𑀢𑀺 𑀓𑀮𑀮𑀸𑀤𑀺 𑀓𑀸𑀮𑁂 𑀞𑀺𑀢𑀸𑀦𑀁. 𑀘𑀢𑀼𑀦𑁆𑀦𑀁𑀧𑀦 𑀆𑀳𑀸𑀭𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂𑀯𑀸 𑀞𑀺𑀢𑀺𑀬𑀸𑀯𑀸 𑀅𑀦𑀼𑀕𑁆𑀕𑀳𑀸𑀬𑀯𑀸 𑀧𑀯𑀢𑁆𑀢𑀺 𑀆𑀓𑀸𑀭𑁄 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑁄𑀧𑀦𑁂𑀢𑁆𑀣 𑀆𑀳𑀸𑀭𑁄. 𑀓𑀺𑀁 𑀆𑀳𑀸𑀭𑁂𑀢𑀻𑀢𑀺. 𑀓𑀩𑀴𑀻𑀓𑀸𑀭𑀸 𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀸𑀭𑁂𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂. 𑀯𑀺𑀜𑁆𑀜𑀸𑀡𑀸 𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀸𑀓𑀝𑀨𑀮𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀑𑀚𑀝𑁆𑀞𑀫𑀓𑀭𑀽𑀧𑀼𑀧𑁆𑀧𑀸𑀤𑀦𑀁 𑀧𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀫𑀳𑀦𑁆𑀢𑀁 𑀓𑀺𑀘𑁆𑀘𑀁 𑀦𑀳𑁄𑀢𑀺. 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀼𑀧𑀢𑁆𑀣𑀫𑁆𑀪𑀦𑀫𑁂𑀯 𑀫𑀳𑀦𑁆𑀢𑀁. 𑀢𑁂𑀦𑁂𑀯 𑀳𑀺 𑀧𑀸𑀴𑀺𑀬𑀁 𑀞𑀺𑀢𑀺𑀬𑀸𑀢𑀺𑀘 𑀅𑀦𑀼𑀕𑁆𑀕𑀳𑀸𑀬𑀸𑀢𑀺𑀘 𑀯𑀼𑀢𑁆𑀢𑀁.

𑀅𑀧𑀺𑀘 𑀬𑀣𑀸 𑀉𑀧𑀦𑀺𑀲𑁆𑀲𑀬𑀸𑀲𑁂𑀯𑀦𑀧𑀘𑁆𑀘𑀬𑀸 𑀲𑀼𑀢𑁆𑀢𑀦𑁆𑀢𑀺 𑀓𑀧𑀭𑀺𑀬𑀸𑀬𑀸 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑀸𑀢𑀺𑀘 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀣𑀸 𑀆𑀳𑀸𑀭𑀧𑀘𑁆𑀘𑀬𑁄𑀧𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄𑀪𑀯𑁂𑀢𑀺. 𑀢𑀁 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀳𑀺 𑀧𑀝𑁆𑀞𑀸𑀦𑁂 𑀅𑀭𑀽𑀧𑀸 𑀳𑀸𑀭𑀸 𑀅𑀲𑀳𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀳𑀸𑀭𑀝𑁆𑀞𑁂𑀦 𑀧𑀘𑁆𑀘𑀬𑀸𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀛𑀸𑀦𑀗𑁆𑀕𑀸𑀦𑀺 𑀦𑀮𑀩𑁆𑀪𑀦𑁆𑀢𑀺. 𑀢𑀸𑀦𑀺 𑀳𑀺 𑀤𑀼𑀩𑁆𑀩𑀮𑀓𑀺𑀘𑁆𑀘𑀝𑁆𑀞𑀸𑀦𑀯𑀢𑁆𑀣𑀼𑀓𑀢𑁆𑀢𑀸 𑀭𑀽𑀧𑀸𑀤𑀻𑀲𑀼 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦 𑀢𑁂𑀲𑀼 𑀯𑀺𑀚𑁆𑀚𑀫𑀸𑀦𑀸 𑀯𑁂𑀤𑀦𑀸 𑀏𑀓𑀕𑁆𑀕𑀢𑀸 𑀛𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻𑀢𑀺. 𑀯𑀺𑀢𑀓𑁆𑀓𑀧𑀘𑁆𑀙𑀺𑀫𑀓𑀁 𑀛𑀸𑀦𑀦𑁆𑀢𑀺𑀘 𑀯𑀼𑀢𑁆𑀢𑀁. 𑀛𑀸𑀦𑀗𑁆𑀕𑀸𑀦𑀁 𑀦𑀸𑀬𑀓𑀪𑀽𑀢𑁄𑀘 𑀯𑀺𑀢𑀓𑁆𑀓𑁄 𑀢𑁂𑀲𑀼 𑀦𑀢𑁆𑀣𑀻𑀢𑀺 𑀢𑀢𑁆𑀣 𑀢𑀸𑀯𑁂𑀤𑀦𑀸 𑀏𑀓𑀕𑁆𑀕𑀢𑀸𑀬𑁄 𑀢𑀁 𑀦 𑀲𑀸𑀥𑁂𑀦𑁆𑀢𑀻𑀢𑀺. 𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑀭𑀳𑀺𑀢𑀸 𑀥𑀫𑁆𑀫𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸 𑀦𑀳𑁄𑀦𑁆𑀢𑀻𑀢𑀺 𑀅𑀯𑀻𑀭𑀺𑀬𑁂𑀲𑀼 𑀲𑁄𑀴𑀲𑀸𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀲𑀫𑀸𑀥𑀺𑀩𑀮𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀯𑀻𑀭𑀺𑀬𑀧𑀘𑁆𑀙𑀺𑀫𑀓𑀁 𑀩𑀮𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀅𑀯𑀻𑀭𑀺𑀬𑁂𑀲𑀼 𑀩𑀮𑀸𑀦𑀺 𑀦𑀮𑀩𑁆𑀪𑀦𑁆𑀢𑀻𑀢𑀺. 𑀳𑁂𑀢𑀼𑀭𑀳𑀺𑀢𑀸 𑀘 𑀥𑀫𑁆𑀫𑀸 𑀯𑀝𑁆𑀝𑀲𑁆𑀲 𑀯𑀺𑀯𑀝𑁆𑀝𑀲𑁆𑀲𑀘 𑀧𑀢𑁆𑀢𑀺𑀬𑀸 𑀧𑀣𑀪𑀸𑀯𑀁 𑀦𑀕𑀘𑁆𑀙𑀦𑁆𑀢𑀺. 𑀳𑁂𑀢𑀼𑀧𑀘𑁆𑀙𑀺𑀫𑀓𑁄 𑀫𑀕𑁆𑀕𑁄𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀅𑀳𑁂𑀢𑀼𑀓𑁂𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁂𑀘𑀺𑀢𑁆𑀢𑁂 𑀏𑀓𑀕𑁆𑀕𑀢𑀸 𑀅𑀥𑀺𑀫𑁄𑀓𑁆𑀔𑀭𑀳𑀺 𑀢𑀢𑁆𑀢𑀸 𑀏𑀓𑀦𑁆𑀢𑁂𑀦 𑀲𑀁𑀲𑀧𑁆𑀧𑀦𑀲𑀪𑀸𑀯𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀪𑀺𑀪𑀽𑀢𑀢𑁆𑀢𑀸 𑀘 𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀩𑀮𑀪𑀸𑀯𑀸𑀬 𑀩𑀮𑀯𑀢𑀻 𑀦𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑁂 𑀏𑀓𑀕𑁆𑀕𑀢𑀸 𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀩𑀮𑀪𑀸𑀯𑀁 𑀦 𑀕𑀘𑁆𑀙𑀢𑀻𑀢𑀺. 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓 𑀚𑀯𑀦𑁂𑀲𑁆𑀯𑁂𑀯𑀸𑀢𑀺 𑀏𑀢𑁆𑀣 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓𑀲𑀤𑁆𑀤𑁂𑀦 𑀫𑁄𑀫𑀽𑀳𑀤𑁆𑀯𑀬𑀳𑀲𑀦𑀚𑀯𑀦𑀸𑀦𑀺 𑀦𑀺𑀯𑀢𑁆𑀢𑁂𑀢𑀺. 𑀚𑀯𑀦𑀲𑀤𑁆𑀤𑁂𑀦 𑀢𑀺𑀪𑀽𑀫𑀓𑀸𑀦𑀺 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀺 𑀦𑀺𑀯𑀢𑁆𑀢𑁂𑀢𑀺.

[𑁨𑁧𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀕𑀳𑀡𑁂𑀦 𑀏𑀓𑀳𑁂𑀢𑀼𑀓𑁂𑀲𑀼 𑀅𑀥𑀺𑀧𑀢𑀻𑀦𑀁 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀚𑀯𑀦𑀪𑀸𑀯𑀲𑀸𑀫𑀜𑁆𑀜𑀢𑁆𑀢𑀸 𑀧𑀦 𑀳𑀲𑀦𑀘𑀺𑀢𑁆𑀢𑁂𑀧𑀺 𑀢𑁂𑀲𑀁 𑀅𑀪𑀸𑀯𑁄 𑀤𑀲𑁆𑀲𑁂𑀢𑀩𑁆𑀩𑁄𑀬𑁂𑀯 𑀳𑁄𑀢𑀻𑀢𑀺.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀮𑀤𑁆𑀥𑀧𑀼𑀩𑁆𑀩𑀸𑀢𑀺 𑀲𑀗𑁆𑀔𑀸𑀭𑀲𑁆𑀲 𑀮𑀤𑁆𑀥𑀧𑀼𑀩𑁆𑀩𑀸𑀕𑀫𑀲𑁆𑀲 𑀘 𑀏𑀓𑁂𑀓𑀲𑁆𑀲 𑀅𑀥𑀺𑀧𑀢𑀺𑀦𑁄 𑀲𑀫𑁆𑀪𑀯𑀸𑀦𑀼𑀭𑀽𑀧𑀁 𑀏𑀓𑁄𑀯 𑀮𑀩𑁆𑀪𑀢𑀺. 𑀦 𑀤𑀼𑀢𑀺𑀬𑁄. 𑀇𑀢𑀭𑀣𑀸 𑀅𑀥𑀺𑀧𑀢𑀺𑀏𑀯 𑀦𑀲𑀺𑀬𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 𑀬𑀣𑀸 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀅𑀭𑀽𑀧𑀺𑀦𑁄𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁𑀥𑀫𑁆𑀫𑀸𑀦𑀁 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁. 𑀦 𑀢𑀣𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀯𑀺𑀪𑀗𑁆𑀕𑁂. 𑀢𑀢𑁆𑀣 𑀧𑀦 𑀙𑀦𑁆𑀤𑀸𑀥𑀺𑀧𑀢𑀺 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺𑀆𑀤𑀺𑀦𑀸 𑀏𑀓𑁂𑀓𑀸𑀥𑀺𑀧𑀢𑀺 𑀯𑀺𑀪𑀸𑀕𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀅𑀥𑀺𑀧𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺. 𑀦𑀯𑁂𑀭𑀺𑀢𑀸𑀢𑀺 𑀦𑀯 𑀈𑀭𑀺𑀢𑀸 𑀓𑀣𑀺𑀢𑀸. 𑀓𑀼𑀲𑀮𑀸 𑀓𑀼𑀲𑀮𑀸 𑀩𑁆𑀬𑀸𑀓𑀢𑁂𑀳𑀺 𑀲𑀫𑀸𑀓𑀺𑀡𑁆𑀡𑁄 𑀓𑀼𑀲𑀮𑀸𑀤𑀺 𑀲𑀫𑀸𑀓𑀺𑀡𑁆𑀡𑁄. [𑀫𑀺𑀲𑁆𑀲𑀓𑀲𑀗𑁆𑀕𑀳𑁄]

𑁧𑁬𑁪. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺. 𑀩𑀼𑀚𑁆𑀛𑀦𑁆𑀢𑀺𑀯𑀸 𑀢𑀸𑀦𑀺 𑀢𑀁 𑀲𑀫𑀗𑁆𑀕𑀺𑀦𑁄 𑀏𑀢𑀸𑀬𑀸𑀢𑀺 𑀩𑁄𑀥𑀺. 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸 𑀦𑀺𑀤𑁆𑀤𑁂𑀲𑁂 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼-𑀜𑀸𑀡𑀦𑁆𑀢𑀺. 𑀧𑀓𑁆𑀔𑁄𑀢𑀺 𑀓𑁄𑀝𑁆𑀞𑀸𑀲𑁄 𑀲𑀫𑁆𑀪𑀸𑀭𑁄. 𑀩𑁄𑀥𑀺𑀬𑀸 𑀧𑀓𑁆𑀔𑁂 𑀪𑀯𑀸𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀸. 𑀅𑀥𑀺𑀲𑀻𑀮𑀸 𑀥𑀺𑀘𑀺𑀢𑁆𑀢𑀸 𑀥𑀺𑀧𑀜𑁆𑀜𑀸 𑀲𑀗𑁆𑀔𑀸𑀢𑀸𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀢𑁆𑀣𑀼𑀲𑀸𑀲𑀦𑀥𑀫𑁆𑀫𑀸𑀦𑀁 𑀏𑀢𑀁𑀦𑀸𑀫𑀁. 𑀢𑁂 𑀧𑀦 𑀓𑁄𑀝𑁆𑀞𑀸𑀲𑀢𑁄 𑀲𑀢𑁆𑀢 𑀯𑀺𑀥𑀸 𑀳𑁄𑀦𑁆𑀢𑀻𑀢𑀺 𑀆𑀳 𑀘𑀢𑁆𑀢𑀸𑀭𑁄𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀺. 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂𑀲𑀼 𑀧𑀫𑀼𑀔𑀸 𑀧𑀥𑀸𑀦𑀸 𑀳𑀼𑀢𑁆𑀯𑀸 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀺𑀝𑁆𑀞𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀕𑀫𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑁂𑀲𑁆𑀯𑁂𑀯 𑀓𑀸𑀬𑀸𑀤𑀻𑀲𑀼 𑀘𑀺𑀢𑁆𑀢 𑀦𑀺𑀩𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀝𑁆𑀞𑀸𑀦𑀸𑀦𑀺. 𑀲𑀢𑀺𑀏𑀯 𑀧𑀝𑁆𑀞𑀸𑀦𑀸𑀦𑀻𑀢𑀺 𑀲𑀢𑀺 𑀧𑀝𑁆𑀞𑀸𑀦𑀸𑀦𑀺. 𑀘𑀢𑁆𑀢𑀸𑀭𑀺𑀲𑀢𑀺𑀧𑀝𑁆𑀞𑀸𑀦𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑁂 𑀥𑀫𑁆𑀫𑀪𑀸𑀯𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀲𑀢𑀺𑀧𑀝𑁆𑀞𑀸𑀦𑀸 𑀢𑀺𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀬𑁂𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀸 𑀦𑀼𑀧𑀲𑁆𑀲𑀦𑀸. 𑀭𑀽𑀧𑀓𑀸𑀬𑁂 𑀭𑀽𑀧𑀲𑀫𑀽𑀳𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑀲𑁆𑀲 𑀅𑀯𑀬𑀯𑀓𑀸𑀬𑀲𑁆𑀲 𑀢𑀁𑀢𑀁𑀓𑀸𑀬𑀪𑀸𑀯𑁂𑀦𑀯𑀸 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦𑀯𑀸 𑀬𑀸𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀬𑁂 𑀲𑀫𑁆𑀫𑁄𑀳𑁄 𑀧𑀳𑀺𑀬𑁆𑀬𑀢𑀺. 𑀢𑀸𑀯 𑀧𑀼𑀦𑀧𑁆𑀧𑀼𑀦𑀁 𑀦𑀺𑀭𑀦𑁆𑀢𑀭𑀁 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀅𑀢𑁆𑀣𑁄. 𑀦𑀯𑀧𑁆𑀧𑀪𑁂𑀤𑀸𑀲𑀼 𑀯𑁂𑀤𑀦𑀸𑀲𑀼 𑀲𑀼𑀔𑀯𑁂𑀤𑀦𑀸𑀤𑀺 𑀓𑀸𑀬𑀅𑀯𑀬𑀯𑀯𑁂𑀤𑀦𑀸𑀬 𑀢𑀁𑀢𑀁 𑀯𑁂𑀤𑀦𑀸𑀪𑀸𑀯𑁂𑀦 𑀉𑀤𑀬𑀩𑁆𑀩𑀬𑀯𑀲𑁂𑀦 𑀘 𑀅𑀦𑀼𑀧𑀲𑁆𑀲𑀦𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸. 𑀲𑁄𑀴𑀲 𑀧𑀪𑁂𑀤𑁂𑀲𑀼 𑀲𑀭𑀸𑀕𑀸 𑀤𑀻𑀲𑀼 𑀘𑀺𑀢𑁆𑀢𑁂𑀲𑀼 𑀲𑀭𑀸𑀕𑀸𑀤𑀺𑀓𑀲𑁆𑀲 𑀅𑀯𑀬𑀯𑀘𑀺𑀢𑁆𑀢𑀲𑁆𑀲 𑀢𑀁𑀢𑀁 𑀘𑀺𑀢𑁆𑀢𑀪𑀸𑀯𑁂𑀦 𑀉𑀤𑀬𑀩𑁆𑀩𑀬𑀯𑀲𑁂𑀦𑀘 𑀅𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀧𑀜𑁆𑀘𑀧𑀪𑁂𑀤𑁂𑀲𑀼 𑀦𑀻𑀯𑀭𑀡𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀓𑀲𑁆𑀲 𑀅𑀯𑀬𑀯𑀥𑀫𑁆𑀫𑀲𑁆𑀲 𑀢𑀁 𑀢𑀁 𑀥𑀫𑁆𑀫𑀪𑀸𑀯𑁂𑀦 𑀉𑀤𑀬𑀩𑁆𑀩𑀬𑀯𑀲𑁂𑀦𑀘 𑀅𑀦𑀼𑀧𑀲𑁆𑀲𑀦𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸.

[𑁨𑁧𑁫] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀓𑀼𑀘𑁆𑀙𑀺𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀆𑀬𑁄𑀢𑀺 𑀓𑀸𑀬𑁄. 𑀅𑀲𑁆𑀲𑀸𑀲 𑀧𑀲𑁆𑀲𑀸𑀲𑀸𑀦𑀁𑀯𑀸 𑀲𑀫𑀽𑀳𑁄 𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭 𑀫𑁂𑀯.

[𑁨𑁧𑁬] 𑀬𑀜𑁆𑀘 𑀢𑀢𑁆𑀣

‘‘𑀓𑀸𑀬𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀢𑀺 𑀅𑀬𑀫𑀢𑁆𑀣𑁄𑀯 𑀧𑀥𑀸𑀦𑀢𑁄 𑀤𑀲𑁆𑀲𑀺𑀢𑁄𑀢𑀺.

[𑁨𑁧𑁭] 𑀬𑀜𑁆𑀘 𑀢𑀢𑁆𑀣

‘‘𑀯𑁂𑀤𑀦𑀸𑀦𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀧𑀤𑁂𑀧𑀺.

[𑁨𑁧𑁮] 𑀬𑀁𑀧𑀺 𑀢𑀢𑁆𑀣

‘‘𑀲𑀜𑁆𑀜𑀸𑀲𑀗𑁆𑀔𑀸𑀭𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀦𑁆𑀦𑀮𑀓𑁆𑀔𑀡𑀸𑀦𑀫𑁂𑀯 𑀅𑀦𑀼𑀧𑀲𑁆𑀲𑀦𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀫𑁂𑀯.

𑀦 𑀳𑀺 𑀓𑀢𑁆𑀣𑀘𑀺 𑀧𑀸𑀴𑀺𑀬𑀁 𑀲𑀜𑁆𑀜𑀸𑀲𑀗𑁆𑀔𑀸𑀭𑀸𑀯 𑀯𑀺𑀲𑁂𑀲𑁂𑀢𑁆𑀯𑀸 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸 𑀅𑀢𑁆𑀣𑀻𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀙𑀦𑀻𑀯𑀭𑀡𑀸 𑀧𑀣𑀫𑀁 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸. 𑀢𑀢𑁄 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑀢𑁄 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀢𑀢𑁄 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸. 𑀢𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺. 𑀬𑀤𑀺𑀏𑀯𑀁 𑀏𑀓𑀸𑀬 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀯𑀼𑀢𑁆𑀢𑀸𑀬 𑀇𑀢𑀭𑀸𑀧𑀺 𑀲𑀺𑀤𑁆𑀥𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀁 𑀏𑀓𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀘𑀢𑁆𑀢𑀸𑀭𑁄𑀢𑀺.𑀦. 𑀬𑁄 𑀳𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀲𑁄 𑀭𑀼𑀧𑁆𑀧𑀦𑀮𑀓𑁆𑀔𑀡𑀸𑀦𑀼𑀧𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀭𑀼𑀧𑁆𑀧𑀦𑀮𑀓𑁆𑀔𑀡𑀜𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑀭 𑀫𑀢𑁆𑀣𑀥𑀫𑁆𑀫𑁄. 𑀲𑁄𑀘 𑀢𑀣𑀸 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀲𑁂𑀲𑀢𑁄 𑀲𑀼𑀔𑀼𑀫𑀲𑁆𑀲 𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀳𑀸𑀦𑀸𑀬 𑀳𑁄𑀢𑀻𑀢𑀺. 𑀓𑀸𑀬𑁄𑀢𑀺 𑀧𑀦 𑀢𑀁𑀢𑀁 𑀲𑀫𑀽𑀳𑀪𑀽𑀢𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀭𑀼𑀧𑁆𑀧𑀦𑀮𑀓𑁆𑀔𑀡𑀯𑀲𑁂𑀦. 𑀦𑀘 𑀢𑀁𑀢𑀁 𑀓𑀸𑀬𑀪𑀸𑀯𑁂𑀦 𑀕𑀳𑀺𑀢𑁄 𑀢𑀁𑀢𑀁 𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀦𑀺𑀩𑁆𑀩𑀢𑁆𑀢𑀺𑀢 𑀧𑀭𑀫𑀢𑁆𑀣𑀥𑀫𑁆𑀫𑁄𑀦𑀸𑀫 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀺𑀫𑀺𑀲𑁆𑀲𑀓𑀢𑁆𑀢𑀸. 𑀲𑁄𑀘 𑀢𑀣𑀸 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀲𑁂𑀲𑀢𑁄 𑀑𑀴𑀸𑀭𑀺𑀓𑀲𑁆𑀲 𑀲𑀼𑀪𑀸𑀤𑀺 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀳𑀸𑀦𑀸𑀬 𑀳𑁄𑀢𑀻𑀢𑀺. 𑀢𑀣𑀸 𑀯𑁂𑀤𑀦𑀸𑀘𑀺𑀢𑁆𑀢𑁂𑀲𑀼𑀧𑀺 𑀑𑀴𑀸𑀭𑀺𑀓𑀯𑀺𑀧𑀮𑁆𑀮𑀸𑀲𑁄 𑀲𑀼𑀔𑀼𑀫𑀯𑀺𑀧𑀮𑁆𑀮𑀸𑀲𑁄𑀢𑀺 𑀤𑁆𑀯𑁂 𑀤𑁆𑀯𑁂 𑀯𑀺𑀧𑀮𑁆𑀮𑀸𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀢𑀼𑀧𑀦𑀺𑀩𑀦𑁆𑀥𑀸 𑀦𑀺𑀘𑁆𑀘𑀲𑀼𑀔 𑀯𑀺𑀧𑀮𑁆𑀮𑀸𑀲𑀸 𑀑𑀴𑀸𑀭𑀺𑀓𑀸. 𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀲𑀼𑀔𑀼𑀫𑁄. 𑀢𑀢𑁆𑀣 𑀯𑁂𑀤𑀦𑀸 𑀘𑀺𑀢𑁆𑀢𑀸 𑀦𑀼𑀧𑀲𑁆𑀲𑀦𑀸 𑀑𑀴𑀸𑀭𑀺𑀓𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀳𑀸𑀦𑀸𑀬 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀥𑀫𑁆𑀫𑁂𑀲𑀼 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸 𑀲𑀼𑀔𑀼𑀫 𑀯𑀺𑀧𑀮𑁆𑀮𑀸𑀲 𑀧𑀳𑀸𑀦𑀸𑀬𑀸𑀢𑀺. 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄𑀯 𑀲𑀢𑀺𑀧𑀝𑁆𑀞𑀸𑀦𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀲𑀫𑁆𑀫𑀸 𑀧𑀤𑀳𑀦𑁆𑀢𑀺 𑀏𑀢𑁂𑀳𑀻𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺. 𑀓𑀸𑀫𑀁 𑀢𑀘𑁄𑀘 𑀦𑁆𑀳𑀸𑀭𑀼𑀘, 𑀅𑀝𑁆𑀞𑀺𑀘 𑀅𑀯𑀲𑀺𑀲𑁆𑀲𑀢𑀼. 𑀉𑀧𑀲𑁆𑀲𑀼𑀲𑁆𑀲𑀢𑀼 𑀫𑁂 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢𑀁. 𑀬𑀦𑁆𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁. 𑀦 𑀢𑀁 𑀅𑀧𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀦𑀺𑀯𑀢𑁆𑀢𑀦𑀯𑀼𑀢𑁆𑀢𑀺 𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀏𑀢𑀁 𑀦𑀸𑀫𑀁. 𑀲𑁄 𑀧𑀦 𑀢𑀣𑀸 𑀧𑀯𑀢𑁆𑀢𑁄 𑀏𑀓𑁄𑀧𑀺 𑀲𑀫𑀸𑀦𑁄 𑀓𑀺𑀘𑁆𑀘𑀲𑀺𑀤𑁆𑀥𑀺𑀯𑀲𑁂𑀦 𑀘𑀢𑀼𑀥𑀸 𑀳𑁄𑀢𑀻𑀢𑀺. 𑀯𑀼𑀢𑁆𑀢𑀁 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺𑀆𑀤𑀺.

𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁𑀧𑀸𑀧𑀓𑀸𑀦𑀦𑁆𑀢𑀺 𑀅𑀲𑀼𑀓𑀲𑁆𑀫𑀺𑀁 𑀓𑀸𑀮𑁂 𑀤𑁂𑀲𑁂 𑀞𑀸𑀦𑁂 𑀯𑀸 𑀅𑀳𑀁 𑀇𑀤𑀜𑁆𑀘𑀺𑀤𑀜𑁆𑀘 𑀦𑀸𑀫 𑀧𑀸𑀧𑀁 𑀅𑀓𑀸𑀲𑀺𑀁, 𑀇𑀤𑀜𑁆𑀘𑀺𑀤𑀜𑁆𑀘𑀦𑀸𑀫 𑀫𑀬𑁆𑀳𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀺𑀤𑀺𑀢𑀸𑀦𑀁 𑀅𑀓𑀼𑀲𑀮𑀸𑀦𑀁. 𑀧𑀳𑀸𑀦𑀸𑀬𑀸𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀚𑁆𑀚𑀢𑀕𑁆𑀕𑁂 𑀬𑀸𑀯𑀧𑀭𑀺𑀦𑀺𑀩𑁆𑀩𑀸𑀦𑀸𑀧𑀼𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀸𑀧𑀸𑀤𑀦𑀓𑀭𑀡𑀢𑁆𑀣𑀁. 𑀯𑀸𑀬𑀸𑀫𑁄𑀢𑀺 𑀲𑀻𑀮 𑀧𑀽𑀭𑀡 𑀲𑀫𑀣 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀓𑀫𑁆𑀫𑁂𑀲𑀼 𑀤𑀴𑁆𑀳𑀁 𑀯𑀸𑀬𑀸𑀫𑁄. 𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀅𑀯𑀺𑀤𑀺𑀢𑀸𑀦𑀁 𑀧𑀭𑀲𑀦𑁆𑀢𑀸𑀦𑁂𑀲𑀼𑀯𑀸 𑀲𑀼𑀢𑁆𑀢𑀦𑁆𑀢𑁂𑀲𑀼𑀯𑀸 𑀤𑀺𑀲𑁆𑀯𑀸𑀯𑀸 𑀲𑀼𑀢𑁆𑀯𑀸𑀯𑀸 𑀯𑀺𑀤𑀺𑀢𑀸𑀦𑀁. 𑀅𑀦𑀼𑀧𑁆𑀧𑀸𑀤𑀸𑀬𑀸𑀢𑀺 𑀬𑁂𑀲𑀁 𑀅𑀓𑀼𑀲𑀮 𑀫𑀽𑀮𑀸𑀦𑀁 𑀅𑀢𑁆𑀣𑀺𑀢𑀸𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀈𑀤𑀺𑀲𑀸𑀦𑀺 𑀓𑀺𑀮𑁂𑀲𑀚𑀸𑀢𑀸𑀦𑀺 𑀯𑀸 𑀧𑀸𑀧𑀓𑀫𑁆𑀫𑀸𑀦𑀺𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀫𑀬𑀺 𑀯𑀺𑀚𑁆𑀚𑀦𑁆𑀢𑀺𑀏𑀯. 𑀅𑀳𑀁𑀧𑀺 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺𑀯𑀸 𑀓𑀫𑁆𑀫𑁂𑀳𑀺𑀯𑀸 𑀅𑀧𑀭𑀺𑀫𑀼𑀢𑁆𑀢𑁄𑀬𑁂𑀯. 𑀅𑀳𑀁𑀧𑀺 𑀲𑁆𑀯𑁂𑀯𑀸 𑀧𑀭𑀲𑀼𑀯𑁂𑀯𑀸 𑀪𑀯𑀦𑁆𑀢𑀭𑁂𑀲𑀼𑀯𑀸 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀲𑁆𑀲𑀸 𑀫𑀺𑀬𑁂𑀯𑀸𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀢𑁂𑀲𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁𑀓𑀼𑀲𑀮𑀸𑀦𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀪𑁂𑀤𑁂𑀲𑀼 𑀇𑀫𑁂𑀦𑀸𑀫 𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑀸 𑀫𑀬𑀸 𑀅𑀧𑁆𑀧𑀢𑁆𑀢𑀸 𑀅𑀦𑀥𑀺𑀕𑀢𑀸𑀏𑀯 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀜𑀢𑁆𑀯𑀸 𑀲𑀫𑀬𑁂 𑀅𑀦𑀢𑀺𑀓𑁆𑀓𑀦𑁆𑀢𑁂𑀏𑀯 𑀅𑀧𑁆𑀧𑀢𑁆𑀢𑀸𑀦𑀁 𑀅𑀦𑀥𑀺𑀕𑀢𑀸𑀦𑀁 𑀉𑀧𑀭𑀺 𑀯𑀺𑀲𑀼𑀤𑁆𑀥𑀺𑀥𑀫𑁆𑀫𑀸𑀦𑀁 𑀅𑀥𑀺𑀕𑀫𑀦𑀢𑁆𑀣𑀸𑀬.

𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀪𑀺𑀬𑁆𑀬𑁄 𑀪𑀸𑀯𑀸𑀬𑀸𑀢𑀺 𑀬𑀸𑀦𑀺 𑀲𑀻𑀮𑀸𑀤𑀻𑀦𑀺 𑀓𑀼𑀲𑀮𑀸𑀦𑀺 𑀫𑀬𑀺 𑀉𑀧𑁆𑀧𑀦𑁆𑀦𑀸𑀦𑀺. 𑀢𑀸𑀦𑀺 𑀬𑀸𑀯 𑀦𑀺𑀬𑀸𑀫𑀁 𑀦𑀑𑀓𑁆𑀓𑀫𑀦𑁆𑀢𑀺, 𑀢𑀸𑀯 𑀫𑀬𑁆𑀳𑀁 𑀏𑀢𑀸𑀦𑀻𑀢𑀺 𑀯𑀢𑁆𑀢𑀼𑀁 𑀦𑀸𑀭𑀳𑀦𑁆𑀢𑀺. 𑀲𑁆𑀯𑁂𑀯𑀸 𑀧𑀭𑀲𑀼𑀯𑁂𑀯𑀸 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸𑀯𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀁 𑀢𑁂𑀲𑀁 𑀲𑀩𑁆𑀩𑀲𑁄 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀧𑀸𑀤𑀦𑀯𑀲𑁂𑀦 𑀲𑀼𑀝𑁆𑀞𑀼𑀢𑀭𑀁 𑀯𑀟𑁆𑀠𑀦𑀢𑁆𑀣𑀸𑀬. 𑀏𑀢𑁂𑀲𑀼 𑀧𑀦 𑀘𑀢𑀽𑀲𑀼 𑀫𑀼𑀔𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀏𑀓𑁂𑀦 𑀫𑀼𑀔𑁂𑀦 𑀉𑀧𑁆𑀧𑀦𑁆𑀦𑁄 𑀯𑀸𑀬𑀸𑀫𑁄 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑁄𑀏𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀕𑁆𑀕𑀓𑁆𑀔𑀡𑁂 𑀏𑀯 𑀏𑀓𑀲𑁆𑀲 𑀢𑀲𑁆𑀲 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑀸 𑀯𑀼𑀢𑁆𑀢𑀸𑀢𑀺.

𑀇𑀚𑁆𑀛𑀦𑀁 𑀇𑀤𑁆𑀥𑀺, 𑀢𑀲𑁆𑀲 𑀢𑀲𑁆𑀲 𑀬𑁄𑀕𑀓𑀫𑁆𑀫𑀲𑁆𑀲 𑀲𑀺𑀤𑁆𑀥𑀺 𑀲𑀫𑀺𑀤𑁆𑀥𑀺 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀲𑀗𑁆𑀔𑁂𑀧𑀢𑁄 𑀅𑀪𑀺𑀜𑁆𑀜𑁂𑀬𑁆𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀲𑀺𑀤𑁆𑀥𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀧𑀭𑀺𑀜𑁆𑀜𑀸𑀲𑀺𑀤𑁆𑀥𑀺, 𑀧𑀳𑀸𑀢𑀩𑁆𑀩𑀸𑀦𑀁 𑀧𑀳𑀸𑀦𑀲𑀺𑀤𑁆𑀥𑀺, 𑀲𑀘𑁆𑀙𑀺𑀓𑀸 𑀢𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀡𑀲𑀺𑀤𑁆𑀥𑀺, 𑀪𑀸𑀯𑁂𑀢𑀩𑁆𑀩𑀸𑀦𑀁 𑀪𑀸𑀯𑀦𑀸𑀲𑀺𑀤𑁆𑀥𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀇𑀚𑁆𑀛𑀢𑀻𑀢𑀺𑀯𑀸 𑀇𑀤𑁆𑀥𑀺 𑀲𑀢𑁆𑀣𑀼𑀲𑀸𑀲𑀦𑁂 𑀬𑁄𑀕𑀓𑀫𑁆𑀫𑁂𑀦 𑀇𑀚𑁆𑀛𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀦𑀸𑀫𑀁. 𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑁄. 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄. 𑀇𑀤𑁆𑀥𑀺𑀧𑀢𑁆𑀢𑀺𑀬𑀸 𑀩𑀮𑀯𑀼𑀧𑀸𑀬𑁄 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀧𑀦 𑀘𑀢𑀼𑀦𑁆𑀦𑀁 𑀅𑀥𑀺𑀧𑀢𑀺𑀥𑀫𑁆𑀫𑀸𑀦𑀁 𑀯𑀲𑁂𑀦 𑀘𑀢𑀼𑀥𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺𑀆𑀤𑀺. 𑀅𑀥𑀺𑀧𑀢𑀺𑀪𑀽𑀢𑁄 𑀙𑀦𑁆𑀤𑁄𑀯 𑀇𑀤𑁆𑀥𑀺𑀧𑀸𑀤𑁄𑀢𑀺 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀻𑀢𑀺. 𑀏𑀢𑁆𑀣𑀘 𑀲𑀩𑁆𑀩𑁂 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀪𑀽𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲 𑀥𑀫𑁆𑀫𑀸𑀦𑀸𑀫 𑀦𑀧𑀸𑀓𑀢𑀺𑀓𑁂𑀦 𑀙𑀦𑁆𑀤𑁂𑀦𑀯𑀸 𑀯𑀻𑀭𑀺𑀬𑁂𑀦𑀯𑀸 𑀘𑀺𑀢𑁆𑀢𑁂𑀦𑀯𑀸 𑀧𑀜𑁆𑀜𑀸𑀬 𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀬𑁂𑀦 𑀓𑁂𑀦𑀘𑀺 𑀧𑀮𑀺𑀩𑁄𑀥𑁂𑀦 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂𑀦 𑀅𑀥𑀺𑀧𑀢𑀺𑀪𑀸𑀯𑀧𑀢𑁆𑀢𑁂𑀦 𑀙𑀦𑁆𑀤𑀸𑀤𑀺𑀦𑀸𑀏𑀯 𑀅𑀥𑀺𑀕𑀦𑁆𑀢𑀩𑁆𑀩𑀸. 𑀢𑀲𑁆𑀫𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀅𑀥𑀺𑀧𑀢𑀺𑀪𑀽𑀢𑀸𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀝𑁆𑀞𑀩𑁆𑀩𑀸𑀢𑀺.

[𑁨𑁧𑁯] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀇𑀚𑁆𑀛𑀢𑀺 𑀅𑀥𑀺𑀝𑁆𑀞𑀸𑀦𑀸𑀤𑀺𑀓𑀁 𑀏𑀢𑀸𑀬𑀸𑀢𑀺 𑀇𑀤𑁆𑀥𑀺, 𑀇𑀤𑁆𑀥𑀺𑀯𑀺𑀥𑀜𑁆𑀜𑀸𑀡𑀁. 𑀇𑀤𑁆𑀥𑀺𑀬𑀸 𑀧𑀸𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀁𑀬𑀼𑀢𑁆𑀢𑀓𑁂 𑀓𑀢𑀫𑀸𑀘 𑀪𑀺𑀓𑁆𑀔𑀯𑁂 𑀇𑀤𑁆𑀥𑀺. 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺.𑀮. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂 𑀇𑀤𑁆𑀥𑀻𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀇𑀥 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯.

𑀯𑀺𑀪𑀗𑁆𑀕𑁂 𑀧𑀦 𑀧𑀣𑀫𑀯𑀸𑀭𑁂 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀘𑀺𑀢𑁆𑀢 𑀘𑁂𑀢𑀲𑀺𑀓𑀭𑀸𑀲𑀻𑀏𑀯 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀼𑀢𑁆𑀢𑀸. 𑀅𑀝𑁆𑀞𑀓𑀣𑀸𑀬𑀜𑁆𑀘-𑀧𑀣𑀫𑀚𑁆𑀛𑀸𑀦 𑀧𑀭𑀺𑀓𑀫𑁆𑀫𑀁𑀳𑀺 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀧𑀣𑀫𑀚𑁆𑀛𑀸𑀦𑀁 𑀇𑀤𑁆𑀥𑀺𑀦𑀸𑀫.𑀮. 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀧𑀭𑀺𑀓𑀫𑁆𑀫𑀁 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀬𑀢𑀦𑀚𑁆𑀛𑀸𑀦𑀁 𑀇𑀤𑁆𑀥𑀺𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀇𑀤𑁆𑀥𑀺𑀦𑀸𑀫.𑀮. 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺𑀦𑀸𑀫𑀸𑀢𑀺𑀘. 𑀧𑀣𑀫𑀚𑁆𑀛𑀸𑀦𑀁 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺𑀦𑀸𑀫. 𑀮. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁 𑀇𑀤𑁆𑀥𑀺 𑀧𑀸𑀤𑁄𑀦𑀸𑀫. 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸 𑀬𑀢𑀦𑀚𑁆𑀛𑀸𑀦𑀁 𑀇𑀤𑁆𑀥𑀺𑀦𑀸𑀫. 𑀲𑁄𑀢𑀸 𑀧𑀢𑁆𑀢𑀺𑀫𑀕𑁆𑀕𑁄 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁄 𑀇𑀤𑁆𑀥𑀺𑀦𑀸𑀫.𑀮. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺𑀦𑀸𑀫𑀸𑀢𑀺 𑀘 𑀯𑀼𑀢𑁆𑀢𑀁. 𑀢𑀁𑀢𑀁 𑀧𑀸𑀤𑀓𑀚𑁆𑀛𑀸𑀦𑀁 𑀇𑀤𑁆𑀥𑀺𑀧𑀸𑀤𑁄𑀦𑀸𑀫. 𑀢𑀢𑁄 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀇𑀤𑁆𑀥𑀺𑀦𑀸𑀫𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀇𑀥 𑀧𑀦 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀺𑀬𑁂 𑀆𑀕𑀢𑀦𑀬𑁂𑀦 𑀘𑀢𑁆𑀢𑀸𑀭𑁄 𑀅𑀥𑀺𑀧𑀢𑀺𑀥𑀫𑁆𑀫𑀸𑀏𑀯 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀼𑀢𑁆𑀢𑀸.

𑀢𑀢𑁆𑀣 𑀧𑀦 𑀮𑁄𑀓𑀼𑀢𑁆𑀢𑀭𑀪𑀽𑀢𑀸𑀏𑀯 𑀅𑀥𑀺𑀧𑁆𑀧𑁂𑀢𑀸. 𑀇𑀥 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭 𑀫𑀺𑀲𑁆𑀲𑀓𑀪𑀽𑀢𑀸𑀢𑀺. 𑀇𑀦𑁆𑀤𑁆𑀭𑀺𑀬𑀩𑀮𑀸𑀦𑀺 𑀅𑀢𑁆𑀣𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑁂𑀯. 𑀧𑀸𑀓𑀝𑀝𑁆𑀞𑀸𑀦𑀢𑁄 𑀧𑀦 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀲𑀤𑁆𑀥𑀸𑀬 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳-𑀓𑀢𑁆𑀣 𑀪𑀺𑀓𑁆𑀔𑀯𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀏𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀯𑀻𑀭𑀺𑀬𑀲𑁆𑀲. 𑀬𑀣𑀸𑀳-𑀓𑀢𑁆𑀣 𑀪𑀺𑀓𑁆𑀔𑀯𑁂 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀏𑀢𑁆𑀣 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀢𑀺𑀬𑀸. 𑀬𑀣𑀸𑀳-𑀓𑀢𑁆𑀣 𑀪𑀺𑀓𑁆𑀔𑀯𑁂𑀲𑀢𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼𑀏𑀢𑁆𑀣 𑀲𑀢𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀲𑀫𑀸𑀥𑀺𑀲𑁆𑀲. 𑀬𑀣𑀸𑀳-𑀓𑀢𑁆𑀣 𑀪𑀺𑀓𑁆𑀔𑀯𑁂 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀏𑀢𑁆𑀣 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀜𑁆𑀜𑀸𑀬 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀳-𑀓𑀢𑁆𑀣 𑀪𑀺𑀓𑁆𑀔𑀯𑁂 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀢𑁆𑀣 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀲𑀫𑁆𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀲𑀫𑀦𑁆𑀢𑀢𑁄 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀩𑀼𑀚𑁆𑀛𑀦𑁆𑀢𑀺 𑀯𑀸 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀲𑀸 𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀩𑀼𑀚𑁆𑀛𑀫𑀸𑀦𑀸 𑀏𑀓𑀓𑁆𑀔𑀡𑁂 𑀲𑁄𑀴𑀲𑀳𑀺 𑀅𑀢𑁆𑀣𑁂𑀳𑀺 𑀲𑀤𑁆𑀥𑀺𑀁 𑀲𑀫𑀦𑁆𑀢𑀢𑁄 𑀩𑀼𑀚𑁆𑀛𑀢𑀺, 𑀦 𑀏𑀓𑀤𑁂𑀲 𑀢𑁄𑀢𑀺 𑀢𑀲𑁆𑀲𑀸 𑀲𑀫𑁆𑀩𑁄𑀥𑀺𑀬𑀸 𑀲𑀫𑀼𑀝𑁆𑀞𑀸𑀧𑀦𑀝𑁆𑀞𑁂𑀦 𑀲𑀫𑁆𑀩𑁄𑀥𑀺𑀬𑀸 𑀅𑀗𑁆𑀕𑁄 𑀲𑀳𑀓𑀸𑀭𑀻𑀩𑀮𑀯𑀧𑀘𑁆𑀘𑀬𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀢𑀺𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀸 𑀳𑀺 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀅𑀢𑁆𑀢𑀦𑁄 𑀕𑁄𑀘𑀭𑁂𑀲𑀼 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼𑀲𑀁𑀯𑀟𑁆𑀠𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀧𑀫𑀸𑀤 𑀧𑀓𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀁 𑀅𑀧𑁆𑀧𑀫𑀸𑀤𑀧𑀓𑁆𑀔𑀜𑁆𑀘 𑀧𑀽𑀭𑁂𑀢𑁆𑀯𑀸 𑀘𑀢𑀼𑀫𑀕𑁆𑀕𑀜𑁆𑀜𑀸𑀡 𑀲𑀗𑁆𑀔𑀸𑀢𑀁 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺. 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺𑀪𑀽𑀢𑁂 𑀅𑀚𑁆𑀛𑀢𑁆𑀢 𑀩𑀳𑀺𑀤𑁆𑀥𑀸𑀥𑀫𑁆𑀫𑁂 𑀯𑀺𑀘𑀺𑀦𑀸𑀢𑀺 𑀓𑀓𑁆𑀔𑀴𑀢𑁆𑀢𑀨𑀼𑀲𑀦𑀸𑀤𑀻𑀳𑀺 𑀅𑀦𑀺𑀘𑁆𑀘𑀢𑀸𑀤𑀻𑀳𑀺𑀘 𑀯𑀺𑀯𑀺𑀥𑀸 𑀓𑀸𑀭𑁂𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀼𑀭𑀼𑀫𑀸𑀦𑁄𑀯𑀺𑀬 𑀢𑁂𑀲𑀼 𑀤𑀝𑁆𑀞𑀩𑁆𑀩𑀸𑀓𑀸𑀭𑀁 𑀅𑀲𑁂𑀲𑀁 𑀉𑀧𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀲𑁄𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀥𑀫𑁆𑀫𑀯𑀺𑀘𑀬 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑁄𑀧𑀺 𑀳𑀺 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼𑀲𑀁𑀯𑀟𑁆𑀠𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀁𑀲𑀫𑁆𑀫𑁄𑀳 𑀧𑀓𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀁 𑀅𑀲𑀫𑁆𑀫𑁄𑀳𑀧𑀓𑁆𑀔𑀁 𑀧𑀽𑀭𑁂𑀢𑁆𑀯𑀸 𑀲𑀬𑀁 𑀘𑀢𑀼𑀫𑀕𑁆𑀕𑀜𑀸𑀡 𑀲𑀫𑁆𑀩𑁄𑀥𑀺 𑀳𑀼𑀢𑁆𑀯𑀸 𑀲𑀫𑀼𑀝𑁆𑀞𑀳𑀢𑀻𑀢𑀺. 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀫𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀫𑁆𑀧𑀺 𑀳𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀅𑀢𑁆𑀢𑀦𑁄 𑀕𑁄𑀘𑀭𑁂𑀲𑀼 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼 𑀲𑀁𑀯𑀟𑁆𑀠𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀮𑀻𑀦𑀲𑀗𑁆𑀓𑁄𑀘 𑀓𑁄𑀲𑀚𑁆𑀚𑀧𑀓𑁆𑀔𑀁 𑀓𑀺𑀮𑁂𑀲𑀚𑀸𑀢𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀁 𑀥𑀼𑀭𑀲𑀁𑀧𑀕𑁆𑀕𑀳𑀧𑀓𑁆𑀔𑀁 𑀧𑀽𑀭𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸 𑀧𑁂𑀢𑀻𑀢𑀺.

𑀧𑀻𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀻𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀸𑀧𑀺 𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀕𑁄𑀘𑀭𑁂𑀲𑀼 𑀲𑀼𑀝𑁆𑀞𑀼 𑀲𑀁𑀯𑀟𑁆𑀠𑀫𑀸𑀦𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀩𑁆𑀩𑀁 𑀘𑀺𑀢𑁆𑀢𑀲𑁆𑀲 𑀅𑀭𑀢𑀺𑀉𑀓𑁆𑀓𑀡𑁆𑀞𑀧𑀓𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀁 𑀥𑀫𑁆𑀫𑀭𑀢𑀺 𑀥𑀫𑁆𑀫𑀦𑀦𑁆𑀤𑀺𑀥𑀫𑁆𑀫𑀸𑀭𑀸𑀫 𑀧𑀓𑁆𑀔𑀁 𑀧𑀽𑀭𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀧𑀲𑁆𑀲𑀤𑁆𑀥𑀺𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀲𑁆𑀲𑀤𑁆𑀥𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀸𑀧𑀺 𑀳𑀺 𑀯𑀼𑀢𑁆𑀢𑀧𑀓𑀸𑀭𑁂𑀲𑀼 𑀕𑁄𑀘𑀭𑁂𑀲𑀼 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼 𑀲𑀁𑀯𑀟𑁆𑀠𑀫𑀸𑀦𑀸 𑀲𑀩𑁆𑀩𑀁 𑀘𑀺𑀢𑁆𑀢𑀲𑁆𑀲 𑀲𑀸𑀭𑀫𑁆𑀪 𑀤𑀭𑀣𑀧𑀓𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀲𑀩𑁆𑀩𑀁 𑀯𑀽𑀧𑀲𑀦𑁆𑀢𑀲𑀻𑀢𑀮𑀧𑀓𑁆𑀔𑀁 𑀧𑀽𑀭𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑀸𑀥𑀺𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀫𑀸𑀥𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀢𑀲𑁆𑀲 𑀲𑀫𑁆𑀩𑁄𑀥𑀺𑀲𑀫𑀼𑀝𑁆𑀞𑀸𑀧𑀦𑀢𑀸 𑀧𑀸𑀓𑀝𑀸. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀲𑀗𑁆𑀔𑀸𑀢𑀸 𑀉𑀧𑁂𑀓𑁆𑀔𑀸𑀏𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀉𑀧𑁂𑀓𑁆𑀔𑀸 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀸𑀧𑀺𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀲𑀢𑀺𑀆𑀤𑀻𑀦𑀁 𑀕𑁄𑀘𑀭𑁂𑀲𑀼 𑀪𑀸𑀯𑀦𑀸𑀯𑀲𑁂𑀦 𑀲𑀼𑀝𑁆𑀞𑀼 𑀲𑀁𑀯𑀟𑁆𑀠𑀫𑀸𑀦𑀸 𑀲𑀩𑁆𑀩𑀁 𑀘𑀺𑀢𑁆𑀢𑀲𑁆𑀲 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀁 𑀯𑀺𑀥𑀫𑁂𑀢𑁆𑀯𑀸 𑀲𑀫𑀯𑀸𑀳𑀺𑀢𑀧𑀓𑁆𑀔𑀁 𑀧𑀽𑀭𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀫𑁆𑀩𑁄𑀥𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀢𑁄 𑀤𑀲𑁆𑀲𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀸 𑀧𑀦 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄 𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀬 𑀜𑀸𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀢𑁄 𑀲𑀁𑀓𑀧𑁆𑀧𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀝𑁆𑀞𑀩𑁆𑀩𑀲𑀪𑀸𑀯𑁂𑀲𑀼 𑀨𑀭𑀫𑀸𑀦𑀸 𑀧𑀯𑀢𑁆𑀢𑀢𑀺 𑀢𑀣𑀸 𑀢𑀲𑁆𑀲𑀸 𑀲𑀁𑀯𑀺𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 𑀲𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑁄𑀢𑀺. 𑀬𑀣𑀸𑀳-𑀬𑀸𑀘𑀸𑀯𑀼𑀲𑁄 𑀯𑀺𑀲𑀸𑀔 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸𑀢𑀺. 𑀲𑀫𑁆𑀫𑀸𑀯𑀸𑀘𑀸 𑀤𑀬𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀬𑁂𑀯. 𑀲𑀫𑁆𑀫𑀸 𑀯𑀸𑀬𑀫𑀦𑁆𑀢𑀺 𑀏𑀓𑁂𑀦𑀸𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀁 𑀲𑀫𑁆𑀫𑀧𑁆𑀧𑀥𑀸𑀦 𑀯𑀻𑀭𑀺𑀬𑀁. 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁 𑀧𑀲𑁆𑀲𑀤𑁆𑀥𑀺𑀲𑀸𑀫𑀜𑁆𑀜𑁂𑀦 𑀏𑀓𑀁 𑀓𑀢𑁆𑀯𑀸 𑀘𑀼𑀤𑁆𑀤𑀲𑁂𑀢𑁂 𑀲𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀥𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀘𑀢𑀼𑀓𑁆𑀓 𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀲𑀢𑁆𑀢𑀥𑀸. 𑀇𑀤𑀸𑀦𑀺 𑀢𑁂𑀲𑀁 𑀘𑀼𑀤𑁆𑀤𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀞𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀓𑀧𑁆𑀧𑀧𑀲𑁆𑀲𑀤𑁆𑀥𑀺𑀘𑀸𑀢𑀺𑀆𑀤𑀺𑀫𑀸𑀳.

[𑁨𑁨𑁦] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀲𑀢𑁆𑀢𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀓𑀧𑁆𑀧𑀧𑀲𑁆𑀲𑀤𑁆𑀥𑀺𑀘𑀸𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀢𑀢𑁆𑀣 𑀲𑀢𑁆𑀢 𑀲𑀭𑀽𑀧𑀁 𑀮𑀩𑁆𑀪𑀢𑀻𑀢𑀺. 𑀲𑀗𑁆𑀓𑀧𑁆𑀧𑁄 𑀯𑀺𑀭𑀢𑀺𑀢𑁆𑀢𑀬𑀜𑁆𑀘 𑀏𑀓𑀁 𑀫𑀕𑁆𑀕𑀗𑁆𑀕𑀝𑁆𑀞𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀧𑀲𑁆𑀲𑀤𑁆𑀥𑀺𑀘 𑀧𑀻𑀢𑀺𑀘 𑀉𑀧𑁂𑀓𑁆𑀔𑀸𑀘 𑀏𑀓𑀁 𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀁. 𑀙𑀦𑁆𑀤𑁄𑀘 𑀘𑀺𑀢𑁆𑀢𑀜𑁆𑀘 𑀏𑀓𑀁 𑀇𑀤𑁆𑀥𑀺𑀧𑀸𑀤𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀦𑀯𑀥𑀫𑁆𑀫𑀸 𑀏𑀓𑀝𑁆𑀞𑀸𑀦𑀺𑀓𑀸 𑀳𑁄𑀦𑁆𑀢𑀺. 𑀏𑀓𑀁 𑀯𑀻𑀭𑀺𑀬𑀁 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦 𑀇𑀤𑁆𑀥𑀺 𑀧𑀸𑀤𑀺𑀦𑁆𑀤𑁆𑀭𑀺𑀬 𑀩𑀮𑀩𑁄𑀚𑁆𑀛𑀗𑁆𑀕 𑀫𑀕𑁆𑀕𑀗𑁆𑀕 𑀯𑀲𑁂𑀦 𑀦𑀯𑀝𑁆𑀞𑀸𑀦𑀺𑀓𑀁. 𑀏𑀓𑀸 𑀲𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦 𑀇𑀦𑁆𑀤𑁆𑀭𑀺𑀬 𑀩𑀮 𑀩𑁄𑀚𑁆𑀛𑀗𑁆𑀕 𑀫𑀕𑁆𑀕𑀗𑁆𑀕 𑀯𑀲𑁂𑀦 𑀅𑀝𑁆𑀞𑀝𑁆𑀞𑀸𑀦𑀺𑀓𑀸. 𑀏𑀓𑁄 𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬 𑀩𑀮 𑀩𑁄𑀚𑁆𑀛𑀗𑁆𑀕 𑀫𑀕𑁆𑀕𑀗𑁆𑀕 𑀯𑀲𑁂𑀦 𑀘𑀢𑀼𑀝𑁆𑀞𑀸𑀦𑀺𑀓𑁄. 𑀏𑀓𑀸𑀧𑀜𑁆𑀜𑀸 𑀇𑀤𑁆𑀥𑀺𑀧𑀸𑀤𑀺𑀦𑁆𑀤𑁆𑀭𑀺𑀬 𑀩𑀮 𑀩𑁄𑀚𑁆𑀛𑀗𑁆𑀕 𑀫𑀕𑁆𑀕𑀗𑁆𑀕 𑀯𑀲𑁂𑀦 𑀧𑀜𑁆𑀘𑀝𑁆𑀞𑀸𑀦𑀺𑀓𑀸. 𑀏𑀓𑀸 𑀲𑀤𑁆𑀥𑀸 𑀇𑀦𑁆𑀤𑁆𑀭𑀺𑀬 𑀩𑀮 𑀯𑀲𑁂𑀦 𑀤𑀼𑀝𑁆𑀞𑀸𑀦𑀺𑀓𑀸𑀢𑀺. 𑀢𑁂 𑀧𑀦 𑀲𑀢𑁆𑀢𑀢𑀺𑀁𑀲 𑀧𑀪𑁂𑀤𑀸 𑀥𑀫𑁆𑀫𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀭𑀫𑁆𑀫𑀡𑀸 𑀦𑀸𑀦𑀸𑀔𑀡𑀺𑀓𑀸𑀘 𑀳𑁄𑀦𑁆𑀢𑀺. 𑀫𑀕𑁆𑀕𑀨𑀮𑁂𑀲𑀼 𑀧𑀦 𑀦𑀯𑀝𑁆𑀞𑀸𑀦𑀺𑀓𑀁 𑀯𑀻𑀭𑀺𑀬𑀁 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁𑀓𑀢𑁆𑀯𑀸 𑀦𑀯𑀲𑀼𑀞𑀸𑀦𑁂𑀲𑀼 𑀅𑀢𑁆𑀢 𑀧𑀝𑀺𑀧𑀓𑁆𑀔𑀸𑀦𑀁 𑀧𑀸𑀧 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬 𑀬𑀫𑀼𑀕𑁆𑀖𑀸𑀢𑀯𑀲𑁂𑀦 𑀦𑀯 𑀓𑀺𑀘𑁆𑀘𑀸𑀦𑀺 𑀲𑀸𑀥𑀬𑀫𑀸𑀦𑀁 𑀏𑀓𑀫𑁂𑀯 𑀧𑀯𑀢𑁆𑀢𑀢𑀺. 𑀏𑀲 𑀦𑀬𑁄 𑀅𑀝𑁆𑀞𑀝𑁆𑀞𑀸𑀦𑀺𑀓𑀸𑀤𑀻𑀲𑀼. 𑀢𑀲𑁆𑀫𑀸 𑀢𑁂 𑀏𑀓𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀲𑀩𑁆𑀩𑁂 𑀏𑀓𑀢𑁄 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀲𑀩𑁆𑀩𑁂 𑀮𑁄𑀓𑀼𑀢𑁆𑀢𑀭𑁂 𑀳𑁄𑀦𑁆𑀢𑀻𑀢𑀺. 𑀦𑀯𑀸𑀲𑀗𑁆𑀓𑀧𑁆𑀧 𑀧𑀻𑀢𑀺𑀬𑁄𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀓𑁆𑀯𑀘𑀺 𑀲𑀤𑁆𑀤𑀢𑁆𑀣𑁄. 𑀲𑀗𑁆𑀓𑀧𑁆𑀧𑁄 𑀓𑁆𑀯𑀘𑀺 𑀤𑀼𑀢𑀻𑀬𑀚𑁆𑀛𑀸𑀦𑀺𑀓𑀸 𑀤𑀺𑀓𑁂𑀧𑀻𑀢𑀺𑀘 𑀓𑁆𑀯𑀘𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀤𑀺𑀓𑁂 𑀮𑁄𑀓𑀼𑀢𑁆𑀢𑀭𑁂 𑀦𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀮𑁄𑀓𑀺𑀬𑁂𑀧𑀻𑀢𑀺 𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂 𑀓𑀸𑀫𑀸 𑀯𑀘𑀭𑀓𑀼𑀲𑀮𑀸𑀤𑀺𑀓𑁂 𑀮𑁄𑀓𑀺𑀬𑀓𑀼𑀲𑀮 𑀓𑁆𑀭𑀺𑀬𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀧𑀺. 𑀬𑀣𑀸 𑀬𑁄𑀕𑀦𑁆𑀢𑀺 𑀲𑀻𑀮𑀯𑀺𑀲𑁄𑀥𑀦𑀓𑀫𑁆𑀫 𑀲𑀫𑀣𑀓𑀫𑁆𑀫𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺𑀓𑀫𑁆𑀫𑁂𑀲𑀼 𑀬𑀼𑀚𑁆𑀚𑀺𑀢𑀩𑁆𑀩𑀸𑀦𑀁 𑀯𑀺𑀭𑀢𑀺𑀢𑁆𑀢𑀬𑀸𑀤𑀻𑀦𑀁 𑀅𑀦𑀼𑀭𑀽𑀧𑀁. 𑀙𑀩𑁆𑀩𑀺𑀲𑀼𑀤𑁆𑀥𑀺𑀧𑀯𑀢𑁆𑀢𑀺𑀬𑀦𑁆𑀢𑀺 𑀲𑀻𑀮 𑀯𑀺𑀲𑀼𑀤𑁆𑀥𑀸𑀤𑀻𑀦𑀁 𑀙𑀦𑁆𑀦𑀁 𑀯𑀺𑀲𑀼𑀤𑁆𑀥𑀻𑀦𑀁 𑀅𑀦𑀼𑀓𑁆𑀓𑀫𑁂𑀦 𑀧𑀯𑀢𑁆𑀢𑀺𑀓𑀸𑀮𑁂. 𑀏𑀢𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀫𑀕𑁆𑀕𑀨𑀮𑀧𑀢𑀺𑀝𑁆𑀞𑀸𑀪𑀸𑀯𑀢𑁆𑀣𑀸𑀬 𑀧𑀽𑀭𑀺𑀢𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺 𑀲𑀻𑀮𑁂𑀧𑀺 𑀲𑀤𑁆𑀥𑀸𑀲𑀢𑀺𑀆𑀤𑀬𑁄 𑀩𑁄𑀥𑀺𑀧𑀓𑁆𑀔𑀺𑀬𑁂𑀲𑀼 𑀲𑀗𑁆𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀢𑀣𑀸 𑀫𑀕𑁆𑀕𑀧𑀸𑀤𑀓𑀢𑁆𑀣𑀸𑀬 𑀉𑀧𑁆𑀧𑀸𑀤𑀺𑀢𑁂𑀲𑀼 𑀫𑀳𑀕𑁆𑀕𑀢𑀚𑁆𑀛𑀸𑀦𑁂𑀲𑀼 𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀓𑁂 𑁋

𑀏𑀯𑀁 𑀪𑀸𑀯𑀺𑀢𑁄 𑀔𑁄 𑀓𑀼𑀡𑁆𑀟𑀮𑀺𑀬 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀺. 𑀏𑀯𑀁 𑀪𑀸𑀯𑀺𑀢𑀸𑀦𑀺 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀏𑀯𑀁 𑀪𑀸𑀯𑀺𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁.

𑀅𑀝𑁆𑀞𑀓𑀣𑀸𑀬𑀁𑀧𑀺 𑀦𑀓𑁂𑀯𑀮𑀁 𑀩𑀮𑀯𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀨𑀮𑁂𑀲𑀼𑀏𑀯 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓 𑀓𑀲𑀺𑀡𑀚𑁆𑀛𑀸𑀦 𑀆𑀦𑀸𑀧𑀸𑀡𑀸 𑀲𑀼𑀓 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂𑀲𑀼𑀧𑀺 𑀉𑀤𑁆𑀥𑀭𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. [𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁄]

𑁧𑁬𑁫. 𑀲𑀩𑁆𑀩𑀲𑀗𑁆𑀕𑀳𑁂 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀜𑁆𑀘 𑀭𑀸𑀲𑀬𑁄. 𑀅𑀢𑀻𑀢𑀸𑀤𑀺 𑀪𑁂𑀤 𑀪𑀺𑀦𑁆𑀦𑀸𑀦𑀁 𑀭𑀽𑀧𑀸𑀦𑀁 𑀔𑀦𑁆𑀥𑁄 𑀭𑀸𑀲𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑁄. 𑀏𑀓𑀲𑁆𑀫𑀺𑀁 𑀭𑀼𑀧𑁆𑀧𑀦 𑀮𑀓𑁆𑀔𑀡𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑀺𑀢𑀸 𑀭𑀽𑀧𑀥𑀫𑁆𑀫𑀸𑀏𑀯. 𑀢𑀣𑀸 𑀏𑀓𑀲𑁆𑀫𑀺𑀁 𑀯𑁂𑀤𑀬𑀺𑀢𑀮𑀓𑁆𑀔𑀡𑁂 𑀲𑀜𑁆𑀚𑀸𑀦𑀦 𑀮𑀓𑁆𑀔𑀡𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀭𑀺𑀕𑁆𑀕𑀳𑀺𑀢𑀸 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀯𑁂𑀤𑀦𑀸𑀲𑀜𑁆𑀜𑀸𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀘𑀦𑀸𑀫. 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸. 𑀨𑀲𑁆𑀲 𑀘𑁂𑀢𑀦𑀸 𑀤𑀬𑁄. 𑀢𑁂𑀳𑀺 𑀙𑀲𑀼𑀯𑀸 𑀉𑀧𑀧𑀢𑁆𑀢𑀺𑀤𑁆𑀯𑀸𑀭𑁂𑀲𑀼 𑀢𑀻𑀲𑀼𑀯𑀸 𑀓𑀫𑁆𑀫𑀤𑁆𑀯𑀸𑀭𑁂𑀲𑀼 𑀏𑀓𑀢𑁄 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀨𑀼𑀲𑀦𑀘𑁂𑀢𑀬𑀺𑀢𑀸𑀤𑀻𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀳𑀺 𑀤𑀲𑁆𑀲𑀦𑀲𑀯𑀦𑀸𑀤𑀻𑀦𑀺 𑀲𑀸𑀥𑀸𑀭𑀡𑀓𑀺𑀘𑁆𑀘𑀸𑀦𑀺𑀯𑀸 𑀓𑀸𑀬𑀺𑀓 𑀯𑀸𑀘𑀲𑀺𑀓𑀫𑀸𑀦𑀲𑀺𑀓𑀸𑀦𑀺𑀯𑀸 𑀲𑀬𑀦 𑀦𑀺𑀲𑀚𑁆𑀚𑀝𑁆𑀞𑀸𑀦 𑀕𑀫𑀦 𑀓𑀣𑀦 𑀘𑀺𑀦𑁆𑀢𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺 𑀯𑀺𑀤𑀳𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀲𑀁𑀬𑀼𑀢𑁆𑀢𑀓𑁂 𑁋

𑀓𑀺𑀜𑁆𑀘 𑀪𑀺𑀓𑁆𑀔𑀯𑁂 𑀲𑀗𑁆𑀔𑀸𑀭𑁂 𑀯𑀤𑁂𑀣. 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀺𑀜𑁆𑀘 𑀲𑀗𑁆𑀔𑀢𑀁 𑀅𑀪𑀺 𑀲𑀗𑁆𑀔𑀭𑁄𑀦𑁆𑀢𑀺, 𑀭𑀽𑀧𑀁 𑀭𑀽𑀧𑀢𑁆𑀣𑀸𑀬 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀯𑁂𑀤𑀦𑀁 𑀯𑁂𑀤𑀦𑀢𑁆𑀣𑀸𑀬 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀲𑀜𑁆𑀜𑀁 𑀲𑀜𑁆𑀜𑀢𑁆𑀣𑀸𑀬 𑀲𑀗𑁆𑀔𑀢 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀲𑀗𑁆𑀔𑀸𑀭𑁂 𑀲𑀗𑁆𑀔𑀸𑀭𑀢𑁆𑀣𑀸𑀬 𑀲𑀗𑁆𑀔𑀢 𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀢𑁆𑀣𑀸𑀬 𑀲𑀗𑁆𑀔𑀢 𑀫𑀪𑀺 𑀲𑀗𑁆𑀔𑀭𑁄𑀦𑁆𑀢𑀻𑀢𑀺. 𑀲𑀗𑁆𑀔𑀢 𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑀢𑀢𑁆𑀣 𑀭𑀽𑀧𑀁 𑀭𑀽𑀧𑀢𑁆𑀣𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀬𑀦 𑀦𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀬𑀸 𑀬𑀸 𑀭𑀽𑀧𑀯𑀺𑀓𑀢𑀺 𑀇𑀘𑁆𑀙𑀻𑀬𑀢𑀺, 𑀢𑀲𑁆𑀫𑀺𑀁𑀢𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀲𑀸 𑀢𑀲𑁆𑀲𑀸 𑀭𑀽𑀧𑀯𑀺𑀓𑀢𑀺𑀬𑀸 𑀚𑀸𑀢𑀢𑁆𑀣𑀸𑀬 𑀇𑀭𑀺𑀬𑀸𑀧𑀣 𑀧𑀭𑀺𑀯𑀢𑁆𑀢𑀦𑀸𑀤𑀺 𑀯𑀲𑁂𑀦 𑀢𑀁 𑀢𑀁 𑀭𑀽𑀧𑀯𑀺𑀓𑀢𑀺𑀁 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀓𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀓𑀁 𑀫𑀜𑁆𑀘 𑀧𑀻𑀞 𑀕𑁂𑀳 𑀭𑀣𑀸𑀤𑀺𑀓𑀁 𑀲𑀩𑁆𑀩𑀁 𑀉𑀧𑀪𑁄𑀕 𑀧𑀭𑀺𑀪𑁄𑀕𑀪𑀽𑀢𑀁 𑀩𑀸𑀳𑀺𑀭 𑀭𑀽𑀧𑀁𑀧𑀺 𑀕𑀳𑁂𑀢𑁆𑀯𑀸 𑀬𑁄𑀚𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀯𑁂𑀤𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀲𑀩𑁆𑀩𑀁𑀧𑀺 𑀯𑁂𑀤𑀦𑀁. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑁂𑀤𑀦𑀁 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸 𑀘𑀺𑀢𑁆𑀢𑀓𑀫𑁆𑀫𑀦𑀘𑁆𑀘𑀕𑀻𑀢𑀸𑀤𑀻𑀦𑀺 𑀢𑀁 𑀢𑀁 𑀯𑁂𑀤𑀦𑀼𑀧𑀓𑀭𑀡𑀸𑀦𑀺 𑀲𑀫𑁆𑀧𑀸𑀤𑀦 𑀯𑀲𑁂𑀦 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸 𑀫𑀸𑀦𑀼𑀲𑀓𑀁𑀯𑀸 𑀤𑀺𑀩𑁆𑀩𑀁𑀯𑀸 𑀢𑀁𑀢𑀁 𑀯𑁂𑀤𑀦𑀁 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦 𑀲𑀻𑀮𑀸𑀤𑀺 𑀲𑀫𑁆𑀧𑀸𑀤𑀦 𑀯𑀲𑁂𑀦 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀨𑀲𑁆𑀲𑀁 𑀨𑀲𑁆𑀲𑀢𑁆𑀣𑀸𑀬 𑀘𑁂𑀢𑀦𑀁 𑀘𑁂𑀢𑀦𑀢𑁆𑀣𑀸𑀬𑀸𑀢𑀺𑀆𑀤𑀺𑀦𑀸 𑀤𑀸𑀦𑀁 𑀤𑀸𑀦𑀢𑁆𑀣𑀸𑀬 𑀲𑀻𑀮𑀁 𑀲𑀻𑀮𑀢𑁆𑀣𑀸𑀬 𑀧𑀸𑀡𑀸𑀢𑀺𑀧𑀸𑀢𑀁 𑀧𑀸𑀡𑀸𑀢𑀺𑀧𑀸𑀢𑀢𑁆𑀣𑀸𑀬𑀸𑀢𑀺𑀆𑀤𑀺𑀦𑀸 𑀯𑀸 𑀲𑀩𑁆𑀩𑀁 𑀮𑁄𑀓𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀢𑀺. 𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀲𑀗𑁆𑀔𑀸𑀭𑁂𑀲𑀼 𑀧𑀸𑀓𑀝𑀸 𑀘𑁂𑀢𑀦𑀸𑀤𑀬𑁄 𑀯𑀺𑀢𑀓𑁆𑀓𑀸𑀤𑀬𑁄 𑀮𑁄𑀪𑀸𑀤𑀬𑁄 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀤𑀬𑁄𑀘 𑀥𑀫𑁆𑀫𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀔𑀦𑁆𑀥𑀪𑀸𑀯𑁂𑀦 𑀅𑀯𑀢𑁆𑀯𑀸 𑀯𑁂𑀤𑀦𑀸𑀲𑀜𑁆𑀜𑀸𑀯 𑀯𑀼𑀢𑁆𑀢𑀸𑀢𑀺. 𑀯𑀼𑀘𑁆𑀘𑀢𑁂.

𑀬𑀣𑀸 𑀳𑀺 𑀙𑁂𑀓𑁄 𑀫𑀳𑀸𑀪𑀺𑀲𑀓𑁆𑀓𑁄 𑀪𑁂𑀲𑀚𑁆𑀚𑀫𑀽𑀮𑀸𑀦𑀺 𑀕𑀳𑁂𑀢𑁆𑀯𑀸 𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀢𑁂𑀲𑀼 𑀫𑀽𑀮𑁂𑀲𑀼 𑀇𑀫𑀸𑀦𑀺 𑀣𑀽𑀮𑀸𑀦𑀺𑀧𑀺 𑀫𑀼𑀤𑀽𑀦𑀺 𑀳𑁄𑀦𑁆𑀢𑀺. 𑀇𑀫𑀸𑀦𑀺 𑀔𑀼𑀤𑁆𑀤𑀓𑀸𑀦𑀺𑀧𑀺 𑀓𑀓𑁆𑀔𑀴𑀸𑀦𑀺 𑀳𑁄𑀦𑁆𑀢𑀻𑀢𑀺 𑀜𑀢𑁆𑀯𑀸 𑀢𑀢𑁄 𑀧𑀣𑀫𑀢𑀭𑀁 𑀓𑀓𑁆𑀔𑀴𑀸𑀦𑀺 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑀼𑀝𑁆𑀞𑀼 𑀓𑁄𑀝𑁆𑀝𑁂𑀢𑁆𑀯𑀸 𑀘𑀼𑀡𑁆𑀡𑀁 𑀓𑀭𑁄𑀢𑀺. 𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺 𑀫𑀼𑀤𑀽𑀦𑀺 𑀏𑀓𑀢𑁄 𑀓𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀘𑀼𑀡𑁆𑀡𑀁 𑀓𑀭𑁄𑀢𑀺. 𑀢𑀢𑁄 𑀉𑀪𑀬𑀸𑀦𑀺 𑀫𑀺𑀲𑁆𑀲𑁂𑀢𑁆𑀯𑀸 𑀲𑀺𑀮𑀸𑀬𑀁 𑀧𑀺𑀲𑁂𑀢𑁆𑀯𑀸 𑀪𑁂𑀲𑀚𑁆𑀚𑀓𑀫𑁆𑀫𑁂 𑀉𑀧𑀦𑁂𑀢𑀺. 𑀏𑀯𑀁 𑀓𑀭𑁄𑀦𑁆𑀢𑁄 𑀦𑀓𑀺𑀮𑀫𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀸𑀧𑀺 𑀦𑀸𑀫𑀭𑀽𑀧𑀥𑀫𑁆𑀫𑁂𑀲𑀼 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀘𑁆𑀘𑀲𑀼𑀔𑀅𑀢𑁆𑀢 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀳𑀸𑀦𑀢𑁆𑀣𑀸𑀬 𑀅𑀦𑀼𑀬𑀼𑀜𑁆𑀚𑀦𑁆𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀯𑀺𑀪𑀸𑀕𑁂 𑀅𑀓𑀢𑁂 𑀢𑀻𑀲𑀼 𑀥𑀫𑁆𑀫𑁂𑀲𑀼 𑀓𑀺𑀮𑀫𑀺𑀲𑁆𑀲𑀦𑁆𑀢𑀻𑀢𑀺 𑀜𑀢𑁆𑀯𑀸 𑀦𑀸𑀫𑀥𑀫𑁆𑀫𑁂𑀲𑀼 𑀯𑁂𑀤𑀦𑀸𑀲𑀜𑁆𑀜𑀸𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀢𑀬𑁄 𑀥𑀫𑁆𑀫𑁂 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀏𑀓𑀫𑁂𑀓𑀁 𑀔𑀦𑁆𑀥𑀁 𑀦𑀸𑀫 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀢𑀣𑀸 𑀳𑀺 𑀬𑀣𑀸 𑀫𑀘𑁆𑀙𑀸𑀦𑀸𑀫 𑀉𑀤𑀓𑁂 𑀲𑀢𑀺 𑀉𑀓𑁆𑀓𑀡𑁆𑀞𑀺𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀲𑀢𑀺 𑀧𑀦 𑀏𑀓𑀦𑁆𑀢𑁂𑀦 𑀉𑀓𑁆𑀓𑀡𑁆𑀞𑀺𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀬𑀣𑀸𑀯𑀸 𑀫𑀥𑀼𑀓𑀭𑀸𑀯𑀸 𑀪𑀫𑀭𑀸𑀯𑀸 𑀬𑀲𑁆𑀫𑀺𑀁 𑀯𑀦𑁂 𑀧𑀼𑀧𑁆𑀨𑀭𑀲 𑀨𑀮𑀭𑀲𑁂 𑀮𑀪𑀦𑁆𑀢𑀺, 𑀢𑀢𑁆𑀣 𑀉𑀓𑁆𑀓𑀡𑁆𑀞𑀺𑀢𑀸𑀦𑀸𑀫 𑀦𑀢𑁆𑀣𑀺. 𑀅𑀮𑀪𑀫𑀸𑀦𑀸 𑀧𑀦 𑀏𑀓𑀦𑁆𑀢𑁂𑀦 𑀉𑀓𑁆𑀓𑀡𑁆𑀞𑀺𑀢𑀸𑀏𑀯 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀲𑀼𑀔 𑀲𑀜𑁆𑀜𑀺𑀢𑁂𑀲𑀼 𑀧𑀢𑀺𑀲𑀭𑀡𑁂𑀲𑀼 𑀯𑁂𑀤𑀦𑀸𑀲𑀤𑀺𑀲𑀁 𑀧𑀢𑀺𑀲𑀭𑀡𑀁𑀦𑀸𑀫 𑀦𑀢𑁆𑀣𑀺. 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀅𑀲𑁆𑀲𑀸𑀤𑁂𑀦𑁆𑀢𑀸𑀧𑀺 𑀲𑀼𑀔𑀯𑁂𑀤𑀦𑀢𑁆𑀣𑀸𑀬𑀏𑀯 𑀅𑀲𑁆𑀲𑀸𑀤𑁂𑀦𑁆𑀢𑀺. 𑀬𑀤𑀺𑀘 𑀢𑀸𑀳𑀺 𑀯𑀺𑀦𑀸 𑀬𑀣𑀺𑀘𑁆𑀙𑀺𑀢𑀁 𑀲𑀼𑀔𑀯𑁂𑀤𑀦𑀁 𑀮𑀪𑁂𑀬𑁆𑀬𑀼𑀁. 𑀓𑁄𑀦𑀸𑀫 𑀢𑀸 𑀲𑀸𑀤𑀺𑀬𑀺𑀲𑁆𑀲𑀢𑀺. 𑀢𑀣𑀸 𑀨𑀲𑁆𑀲𑀘𑁂𑀢𑀦𑀸𑀤𑀻𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀯𑀻𑀭𑀺𑀬𑀸𑀤𑀻𑀳𑀺 𑀮𑁄𑀪𑀤𑁄𑀲𑀸𑀤𑀻𑀳𑀺 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀤𑀻𑀳𑀺 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀬𑀁𑀓𑀺𑀜𑁆𑀘𑀺 𑀲𑀗𑁆𑀔𑀢𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸𑀧𑀺 𑀲𑀼𑀔𑀯𑁂𑀤𑀦𑀢𑁆𑀣𑀸𑀬𑀏𑀯 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺. 𑀬𑀤𑀺𑀘 𑀢𑀸𑀤𑀺𑀲𑁂𑀦 𑀅𑀪𑀺𑀲𑀗𑁆𑀔𑀭𑀡𑁂𑀦 𑀯𑀺𑀦𑀸𑀧𑀺 𑀬𑀣𑀺𑀘𑁆𑀙𑀺𑀢𑀁 𑀲𑀼𑀔𑀁 𑀮𑀪𑁂𑀬𑁆𑀬𑀼𑀁, 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀢𑁆𑀣𑁄 𑀦𑀢𑁆𑀣𑀻𑀢𑀺 𑀓𑁄𑀦𑀸𑀫 𑀢𑁂 𑀥𑀫𑁆𑀫𑁂 𑀅𑀪𑀺𑀲𑀗𑁆𑀔𑀭𑀺𑀲𑁆𑀲𑀢𑀻𑀢𑀺.

𑀇𑀢𑀺 𑀲𑀼𑀔𑀲𑀜𑁆𑀜𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑁂𑀤𑀦𑀸𑀦𑀸𑀫 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀲𑀼𑀔𑀲𑀜𑁆𑀜𑀺𑀢𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀁 𑀯𑀺𑀲𑀼𑀁 𑀏𑀓𑀁 𑀔𑀦𑁆𑀥𑀁 𑀓𑀢𑁆𑀯𑀸 𑀔𑀦𑁆𑀥𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺. 𑀢𑀣𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀲𑀜𑁆𑀜𑀺𑀢𑁂𑀲𑀼 𑀧𑀢𑀺𑀲𑀭𑀡𑁂𑀲𑀼 𑀲𑀜𑁆𑀜𑀸𑀲𑀤𑀺𑀲𑀁 𑀧𑀢𑀺𑀲𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀉𑀧𑁆𑀧𑀦𑁆𑀦𑀸 𑀢𑁂 𑀢𑁂 𑀲𑀢𑁆𑀢𑀸 𑀅𑀢𑁆𑀢𑀸𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂𑀲𑀼 𑀲𑀩𑁆𑀩𑀁 𑀚𑀸𑀦𑀺𑀢𑀩𑁆𑀩𑀁 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀯𑀺𑀜𑁆𑀜𑀼𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀸 𑀬𑀢𑁆𑀢𑀓𑀁 𑀧𑀭𑁂 𑀚𑀸𑀦𑀦𑁆𑀢𑀺. 𑀢𑀢𑁆𑀢𑀓𑀁 𑀫𑀬𑀁𑀧𑀺 𑀚𑀸𑀦𑀸𑀫. 𑀓𑁄 𑀅𑀫𑁆𑀳𑀸𑀓𑀁 𑀉𑀢𑁆𑀢𑀭𑀺𑀢𑀭𑁄𑀢𑀺 𑀏𑀯𑀁 𑀮𑁄𑀓𑁂 𑀜𑀸𑀡𑀲𑀫𑁆𑀫𑀪𑀁 𑀲𑀜𑁆𑀜𑀁 𑀧𑀭𑀫𑀁 𑀅𑀢𑁆𑀢𑀸𑀦𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀇𑀢𑀺 𑀅𑀢𑁆𑀢𑀲𑀜𑁆𑀜𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀜𑁆𑀜𑀸𑀦𑀸𑀫 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁 𑀲𑀕𑀢𑀁 𑀅𑀢𑁆𑀢𑀲𑀜𑁆𑀜𑀺𑀢𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸𑀢𑀁𑀧𑀺 𑀯𑀺𑀲𑀼𑀁 𑀏𑀓𑀁 𑀔𑀦𑁆𑀥𑀁 𑀓𑀢𑁆𑀯𑀸 𑀔𑀦𑁆𑀥𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺. 𑀢𑀣𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀦𑀺𑀘𑁆𑀘𑀲𑀜𑁆𑀜𑀺𑀢𑁂𑀲𑀼 𑀧𑀢𑀺𑀲𑀭𑀡𑁂𑀲𑀼 𑀘𑀺𑀢𑁆𑀢𑀲𑀤𑀺𑀲𑀁 𑀧𑀢𑀺𑀲𑀁𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀣𑀸 𑀳𑀺 𑀲𑀢𑁆𑀢𑀸 𑀲𑀼𑀔𑀁 𑀤𑀼𑀓𑁆𑀔𑀁𑀦𑀸𑀫 𑀅𑀦𑀺𑀘𑁆𑀘𑀁 𑀲𑀼𑀔𑀧𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀦𑀢𑁆𑀣𑀺. 𑀤𑀼𑀓𑁆𑀔 𑀧𑀢𑁆𑀢𑀸𑀦𑀁 𑀲𑀼𑀔𑀁 𑀦𑀢𑁆𑀣𑀻𑀢𑀺𑀯𑀸. 𑀲𑀜𑁆𑀜𑀸𑀦𑀸𑀫 𑀅𑀦𑀺𑀘𑁆𑀘𑀸, 𑀓𑀤𑀸𑀘𑀺 𑀧𑀫𑀼𑀲𑁆𑀲𑀢𑀺 𑀓𑀤𑀸𑀘𑀺 𑀦𑀧𑀫𑀼𑀲𑁆𑀲𑀢𑀻𑀢𑀺𑀯𑀸. 𑀯𑀻𑀭𑀺𑀬𑀁𑀦𑀸𑀫 𑀅𑀦𑀺𑀘𑁆𑀘𑀁. 𑀓𑀤𑀸𑀘𑀺 𑀆𑀭𑀪𑀢𑀺, 𑀓𑀤𑀸𑀘𑀺 𑀦 𑀆𑀭𑀪𑀢𑀻𑀢𑀺𑀯𑀸. 𑀮𑁄𑀪𑁄𑀦𑀸𑀫 𑀅𑀦𑀺𑀘𑁆𑀘𑁄. 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀤𑀸𑀘𑀺 𑀦𑀉𑀧𑁆𑀧𑀚𑁆𑀚𑀢𑀻𑀢𑀺𑀯𑀸. 𑀤𑁄𑀲𑁄𑀦𑀸𑀫 𑀅𑀦𑀺𑀘𑁆𑀘𑁄. 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀤𑀸𑀘𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺𑀯𑀸. 𑀲𑀤𑁆𑀥𑀸𑀦𑀸𑀫 𑀅𑀦𑀺𑀘𑁆𑀘𑀸. 𑀓𑀤𑀸𑀘𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺, 𑀓𑀤𑀸𑀘𑀺 𑀅𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀻𑀢𑀺𑀯𑀸. 𑀧𑀜𑁆𑀜𑀸𑀦𑀸𑀫 𑀅𑀦𑀺𑀘𑁆𑀘𑀸. 𑀚𑀸𑀦𑀺𑀢𑀩𑁆𑀩𑀁𑀧𑀺 𑀓𑀤𑀸𑀘𑀺 𑀚𑀸𑀦𑀸𑀢𑀺, 𑀓𑀤𑀸𑀘𑀺 𑀦 𑀚𑀸𑀦𑀸𑀢𑀻𑀢𑀺𑀯𑀸 𑀏𑀯𑀁 𑀘𑁂𑀢𑀲𑀺𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘 𑀪𑀸𑀯𑁄𑀦𑀸𑀫 𑀓𑁂𑀲𑀜𑁆𑀘𑀺 𑀮𑁄𑀓𑀺𑀬𑀚𑀦𑀸𑀦𑀁𑀧𑀺 𑀧𑀸𑀓𑀝𑁄 𑀳𑁄𑀢𑀺. 𑀦 𑀧𑀦 𑀘𑀺𑀢𑁆𑀢𑀲𑁆𑀲. 𑀦 𑀳𑀺 𑀲𑀢𑁆𑀢𑀸 𑀘𑀺𑀢𑁆𑀢𑀁𑀦𑀸𑀫 𑀅𑀦𑀺𑀘𑁆𑀘𑀁. 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀓𑀤𑀸𑀘𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀢𑀁 𑀧𑀦 𑀲𑀬𑀁 𑀦𑀺𑀘𑁆𑀘𑀁 𑀧𑀯𑀢𑁆𑀢𑀫𑀸𑀦𑀁 𑀳𑀼𑀢𑁆𑀯𑀸 𑀓𑀤𑀸𑀘𑀺 𑀲𑀼𑀔𑁂𑀦 𑀬𑀼𑀢𑁆𑀢𑀁 𑀳𑁄𑀢𑀺, 𑀓𑀤𑀸𑀘𑀺 𑀤𑀼𑀓𑁆𑀔𑁂𑀦𑀸𑀢𑀺𑀆𑀤𑀺𑀦𑀸 𑀢𑀲𑁆𑀫𑀺𑀁 𑀦𑀺𑀘𑁆𑀘𑀲𑀜𑁆𑀜𑀫𑁂𑀯 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺. 𑀇𑀢𑀺 𑀘𑀺𑀢𑁆𑀢𑀁𑀦𑀸𑀫 𑀦𑀺𑀘𑁆𑀘𑀲𑀜𑁆𑀜𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀧𑀭𑀫𑀼𑀓𑁆𑀓𑀁 𑀲𑀕𑀢𑀁 𑀦𑀺𑀘𑁆𑀘𑀲𑀜𑁆𑀜𑀺𑀢𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀁𑀧𑀺 𑀯𑀺𑀲𑀼𑀁 𑀏𑀓𑀁 𑀔𑀦𑁆𑀥𑀁 𑀓𑀢𑁆𑀯𑀸 𑀔𑀦𑁆𑀥𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺.

[𑁨𑁨𑁧] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀪𑀸𑀚𑀦 𑀪𑁄𑀚𑀦 𑀩𑁆𑀬𑀜𑁆𑀚𑀦 𑀪𑀢𑁆𑀢𑀓𑀸𑀭𑀓 𑀪𑀼𑀜𑁆𑀚𑀓 𑀯𑀺𑀓𑀧𑁆𑀧𑀯𑀲𑁂𑀦 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀪𑀸𑀯𑀦𑁆𑀢𑁂𑀦 ‘‘𑀭𑀽𑀧𑀜𑁆𑀳𑀺 𑀯𑁂𑀤𑀦𑀸 𑀦𑀺𑀲𑁆𑀲𑀬𑀢𑁆𑀢𑀸 𑀪𑀸𑀚𑀦𑀝𑁆𑀞𑀸𑀦𑀺𑀬𑀁. 𑀯𑁂𑀤𑀦𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁆𑀢𑀸 𑀪𑁄𑀚𑀦𑀝𑁆𑀞𑀸𑀦𑀺𑀬𑀸. 𑀲𑀜𑁆𑀜𑀸 𑀯𑁂𑀤𑀦𑀲𑁆𑀲𑀸𑀤 𑀮𑀸𑀪 𑀳𑁂𑀢𑀼𑀢𑁆𑀢𑀸 𑀩𑁆𑀬𑀜𑁆𑀚𑀦𑀝𑁆𑀞𑀸𑀦𑀺𑀬𑀸. 𑀲𑀗𑁆𑀔𑀸𑀭𑀸 𑀅𑀪𑀺𑀲𑀗𑁆𑀔𑀭𑀡𑀢𑁄 𑀪𑀢𑁆𑀢𑀓𑀸𑀭𑀓𑀝𑁆𑀞𑀸𑀦𑀺𑀬𑀸. 𑀯𑀺𑀜𑁆𑀜𑀸𑀡𑀁 𑀉𑀧𑀪𑀼𑀜𑁆𑀚𑀓𑀢𑁆𑀢𑀸 𑀪𑀼𑀜𑁆𑀚𑀓𑀝𑁆𑀞𑀸𑀦𑀺𑀬𑀁. 𑀏𑀢𑁆𑀢𑀸𑀯𑀢𑀸𑀘 𑀅𑀥𑀺𑀧𑁆𑀧𑁂 𑀢𑀢𑁆𑀣𑀲𑀺𑀤𑁆𑀥𑀻𑀢𑀺 𑀧𑀜𑁆𑀘𑁂𑀯 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀸𑀭𑀢𑁄 𑀦𑀤𑀝𑁆𑀞𑀩𑁆𑀩𑀁.

𑀦 𑀳𑀺 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀏𑀢𑀧𑁆𑀧𑀭𑀫𑀯𑀺𑀦𑀺𑀘𑁆𑀙𑀬𑁂 𑀆𑀕𑀢𑀁. 𑀉𑀧𑀫𑀸𑀤𑀻𑀧𑀦𑁂𑀏𑀯 𑀆𑀕𑀢𑀁. 𑀦 𑀘 𑀪𑀕𑀯𑀢𑀸 𑀪𑀸𑀚𑀦𑀸𑀤𑀺𑀯𑀺𑀓𑀧𑁆𑀧𑀲𑀺𑀤𑁆𑀥𑀺𑀫𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀯𑀼𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸𑀲𑀺𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀧𑀬𑁄𑀚𑀦𑀸𑀪𑀸𑀯𑀢𑁄𑀢𑀺.

[𑁨𑁨𑁨] 𑀬𑀜𑁆𑀘 𑀢𑀢𑁆𑀣

‘‘𑀤𑁂𑀲𑀦𑀸𑀓𑁆𑀓𑀫𑁂𑀧𑀺 𑀇𑀤𑀫𑁂𑀯 𑀓𑀸𑀭𑀡𑀁. 𑀬𑀢𑁆𑀣 𑀪𑀼𑀜𑁆𑀚𑀢𑀺, 𑀬𑀜𑁆𑀘 𑀪𑀼𑀜𑁆𑀚𑀢𑀺, 𑀬𑁂𑀦𑀘 𑀪𑀼𑀜𑁆𑀚𑀢𑀺, 𑀬𑁄𑀘 𑀪𑁄𑀚𑀓𑁄, 𑀬𑁄𑀘 𑀪𑀼𑀜𑁆𑀚𑀺𑀢𑀸. 𑀢𑁂𑀲𑀁 𑀅𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀲𑀸𑀭𑀁.

𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀯𑀺𑀲𑀬𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀲𑀩𑁆𑀩 𑀲𑀪𑀸𑀕𑀥𑀫𑁆𑀫 𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀲𑀸𑀲𑀯𑀸 𑀅𑀦𑀸𑀲𑀯𑀸𑀘 𑀥𑀫𑁆𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀯𑀼𑀢𑁆𑀢𑀸, 𑀯𑀺𑀧𑀲𑁆𑀲𑀦𑀸 𑀪𑀽𑀫𑀺𑀧𑀭𑀺𑀕𑁆𑀕𑀳𑀯𑀲𑁂𑀦 𑀲𑀸𑀲𑀯𑀸𑀏𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀯𑀼𑀢𑁆𑀢𑀸. 𑀆𑀬𑀢𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀪𑀼𑀲𑀁 𑀉𑀲𑁆𑀲𑀳𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀬𑀢𑀦𑀸𑀦𑀺. 𑀆𑀬𑀢𑀦𑀲𑀤𑁆𑀤𑁄 𑀧𑀦 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀤𑁆𑀯𑀸𑀭𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑁄 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦, 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀫𑀸𑀦𑁄 𑀲𑀫𑁄𑀲𑀭𑀡𑀝𑁆𑀞𑁂𑀦, 𑀉𑀪𑀬𑀢𑁆𑀣𑀧𑀺 𑀓𑀸𑀭𑀡𑀝𑁆𑀞𑁂𑀦 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀏𑀓𑀲𑁆𑀫𑀺𑀁𑀯𑀸 𑀪𑀯𑁂 𑀅𑀦𑀫𑀢𑀕𑁆𑀕𑁂𑀯𑀸 𑀲𑀁𑀲𑀸𑀭𑁂 𑀧𑀼𑀦𑀧𑁆𑀧𑀼𑀦𑀁 𑀲𑀳 𑀚𑀸𑀬𑀫𑀸𑀦𑀸 𑀘𑀓𑁆𑀔𑀸𑀤𑀻𑀲𑀼 𑀙𑀲𑀼 𑀤𑁆𑀯𑀸𑀭𑀧𑀤𑁂𑀲𑁂𑀲𑀼𑀏𑀯 𑀚𑀸𑀬𑀦𑁆𑀢𑀺, 𑀦 𑀅𑀜𑁆𑀜𑀢𑁆𑀣. 𑀲𑀦𑁆𑀢𑀸𑀦𑀸𑀦𑀼𑀩𑀦𑁆𑀥𑀯𑀲𑁂𑀦 𑀦𑀺𑀯𑀲𑀦𑁆𑀢𑀸𑀧𑀺 𑀢𑁂𑀲𑁆𑀯𑁂𑀯 𑀦𑀺𑀯𑀲𑀦𑁆𑀢𑀺, 𑀦 𑀅𑀜𑁆𑀜𑀢𑁆𑀣. 𑀆𑀓𑀺𑀭𑀺𑀢𑁆𑀯𑀸 𑀣𑀧𑀺𑀢𑀸 𑀯𑀺𑀬 𑀧𑀯𑀢𑁆𑀢𑀫𑀸𑀦𑀸𑀧𑀺 𑀢𑁂𑀲𑁆𑀯𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀦 𑀅𑀜𑁆𑀜𑀢𑁆𑀣. 𑀢𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀺 𑀙𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦 𑀦𑀺𑀯𑀸𑀲𑀝𑁆𑀞𑀸𑀦𑀝𑁆𑀞𑁂𑀦 𑀆𑀓𑀭𑀝𑁆𑀞𑁂𑀦𑀘 𑀆𑀬𑀢𑀦𑀸𑀦𑀺𑀦𑀸𑀫. 𑀤𑁂𑀯𑀸𑀬𑀢𑀦𑀁 𑀯𑀺𑀬 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀬𑀣𑀸𑀘 𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑀨𑀮𑁂𑀲𑀼 𑀔𑁂𑀫𑁂𑀲𑀼 𑀭𑀼𑀓𑁆𑀔𑁂𑀲𑀼 𑀢𑀢𑁄 𑀢𑀢𑁄 𑀧𑀓𑁆𑀔𑀺𑀦𑁄 𑀦𑀺𑀮𑀺𑀦𑀢𑁆𑀣𑀸𑀬 𑀆𑀳𑀸𑀭𑀢𑁆𑀣𑀸𑀬𑀘 𑀦𑀺𑀘𑁆𑀘𑀁 𑀲𑀫𑁄𑀲𑀭𑀦𑁆𑀢𑀺. 𑀏𑀯𑀁 𑀭𑀽𑀧𑀸𑀤𑀻𑀲𑀼 𑀙𑀲𑀼𑀞𑀸𑀦𑁂𑀲𑀼 𑀢𑀢𑁄 𑀢𑀢𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀓𑀭𑀡𑀢𑁆𑀣𑀸𑀬 𑀦𑀺𑀘𑁆𑀘𑀁 𑀲𑀫𑁄𑀲𑀭𑀦𑁆𑀢𑀺. 𑀢𑀲𑁆𑀫𑀸 𑀭𑀽𑀧𑀸𑀤𑀻𑀦𑀺 𑀙 𑀲𑀫𑁄𑀲𑀭𑀡𑀝𑁆𑀞𑁂𑀦 𑀆𑀬𑀢𑀦𑀸𑀦𑀺𑀦𑀸𑀫. 𑀢𑀤𑀼𑀪𑀬𑀸𑀦𑀺 𑀧𑀦 𑀢𑁂𑀲𑀁 𑀘𑀺𑀢𑁆𑀢 𑀘𑁂𑀢𑀲𑀺𑀓𑀸𑀦𑀁 𑀓𑀸𑀭𑀡𑀝𑁆𑀞𑁂𑀦 𑀆𑀬𑀢𑀦𑀸𑀦𑀺𑀦𑀸𑀫. 𑀘𑀓𑁆𑀔𑀼𑀘 𑀢𑀁 𑀆𑀬𑀢𑀦𑀜𑁆𑀘𑀸𑀢𑀺 𑀘𑀓𑁆𑀔𑀸𑀬𑀢𑀦𑀁. 𑀏𑀯𑀁 𑀲𑁂𑀲𑀸𑀦𑀺. 𑀢𑀢𑁆𑀣 𑀘𑀓𑁆𑀔𑀼𑀲𑁄𑀢𑀸𑀦𑀺 𑀲𑀢𑁆𑀢𑀸𑀦𑀁 𑀳𑀺𑀢𑀓𑁆𑀭𑀺𑀬𑀸𑀲𑀼 𑀩𑀳𑀼𑀧𑀓𑀸𑀭𑀢𑁆𑀢𑀸 𑀓𑀸𑀫𑀭𑀽𑀧 𑀩𑁆𑀬𑀸𑀧𑀺𑀢𑀢𑁆𑀢𑀸 𑀘 𑀧𑀸𑀓𑀝𑀸𑀦𑀻𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀳𑀺 𑀆𑀲𑀦𑁆𑀦𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀖𑀸𑀦𑀁. 𑀢𑀢𑁄 𑀚𑀺𑀯𑁆𑀳𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑁂𑀲𑀸𑀬𑀢𑀦𑀸𑀦𑀺𑀦𑀸𑀫. 𑀢𑀢𑁄 𑀲𑀓𑀮𑀓𑀸𑀬𑀩𑁆𑀬𑀸𑀧𑀓𑁄 𑀓𑀸𑀬𑁄. 𑀢𑀢𑁄 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀕𑁄𑀘𑀭𑀯𑀺𑀲𑀬𑀕𑁆𑀕𑀸𑀳𑀓𑀁 𑀫𑀦𑁄𑀢𑀺. 𑀲𑁂𑀲𑀸𑀦𑀺 𑀧𑀦 𑀢𑁂𑀲𑀁 𑀯𑀺𑀲𑀬𑀢𑁆𑀢𑀸 𑀢𑀤𑀦𑀼𑀓𑁆𑀓𑀫𑁂𑀦𑁂𑀯 𑀯𑀼𑀢𑁆𑀢𑀸𑀦𑀻𑀢𑀺.

𑀓𑀲𑁆𑀲𑀘𑀺 𑀧𑀦 𑀧𑀼𑀕𑁆𑀕𑀮𑀲𑁆𑀲𑀯𑀸 𑀲𑀢𑁆𑀢𑀲𑁆𑀲𑀯𑀸 𑀫𑀦𑀼𑀲𑁆𑀲𑀲𑁆𑀲𑀯𑀸 𑀤𑁂𑀯𑀲𑁆𑀲𑀯𑀸 𑀩𑁆𑀭𑀳𑁆𑀫𑀼𑀦𑁄𑀯𑀸 𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄𑀏𑀯 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀲𑀪𑀸𑀯𑀢𑁆𑀢𑀸𑀯𑀸 𑀬𑀣𑀸𑀲𑀪𑀸𑀯𑀁 𑀥𑀸𑀭𑀻𑀬𑀦𑁆𑀢𑀺 𑀲𑀮𑁆𑀮𑀓𑁆𑀔𑀻𑀬𑀦𑁆𑀢𑀺 𑀯𑀯𑀢𑁆𑀣𑀧𑀻𑀬𑀦𑁆𑀢𑀻𑀢𑀺 𑀥𑀸𑀢𑀼𑀬𑁄. 𑀅𑀧𑀺𑀘, 𑀦𑀺𑀲𑁆𑀲𑀢𑁆𑀢 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼𑀬𑁄. 𑀢𑀢𑁆𑀣 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦𑀸𑀢𑀺 𑀲𑀢𑁆𑀢𑀸𑀓𑀸𑀭𑀸 𑀪𑀸𑀯𑀝𑁆𑀞𑁂𑀦 𑀲𑀢𑁆𑀢𑀓𑀺𑀘𑁆𑀘𑀸𑀪𑀸𑀯𑀝𑁆𑀞𑁂𑀦. 𑀓𑁄 𑀧𑀦𑁂𑀢𑁆𑀣 𑀲𑀢𑁆𑀢𑀸𑀓𑀸𑀭𑁄 𑀓𑀺𑀁 𑀲𑀢𑁆𑀢𑀓𑀺𑀘𑁆𑀘𑀦𑁆𑀢𑀺. 𑀚𑀻𑀯𑀬𑁄𑀕𑁄 𑀲𑀢𑁆𑀢𑀸𑀓𑀸𑀭𑁄. 𑀈𑀳𑀸𑀘 𑀩𑁆𑀬𑀸𑀧𑀸𑀭𑁄 𑀘 𑀲𑀢𑁆𑀢𑀓𑀺𑀘𑁆𑀘𑀁. 𑀦𑀺𑀚𑁆𑀚𑀻𑀯𑀝𑁆𑀞𑁂𑀦𑀸𑀢𑀺 𑀏𑀓𑀲𑁆𑀫𑀺𑀁 𑀪𑀯𑁂 𑀬𑀸𑀯 𑀦𑀫𑀭𑀢𑀺. 𑀪𑀯𑀧𑀭𑀁𑀧𑀭𑀸𑀬𑀯𑀸 𑀬𑀸𑀯 𑀲𑀁𑀲𑀸𑀭𑁄 𑀦 𑀦𑀺𑀯𑀢𑁆𑀢𑀢𑀺. 𑀢𑀸𑀯 𑀅𑀪𑀺𑀚𑁆𑀚𑀫𑀸𑀦𑁄 𑀅𑀘𑁆𑀙𑀺𑀚𑁆𑀚𑀫𑀸𑀦𑁄 𑀏𑀓𑁄𑀯 𑀯𑀢𑁆𑀢𑀢𑀻𑀢𑀺 𑀏𑀯𑀁 𑀕𑀳𑀺𑀢𑀲𑁆𑀲 𑀚𑀻𑀯𑀲𑁆𑀲 𑀅𑀪𑀸𑀯𑀝𑁆𑀞𑁂𑀦. 𑀘𑀓𑁆𑀔𑀸𑀤𑀬𑁄𑀘 𑀥𑀫𑁆𑀫𑀸 𑀲𑀩𑁆𑀩𑀲𑁄 𑀲𑀢𑁆𑀢𑀸𑀓𑀸𑀭𑀭𑀳𑀺𑀢𑀸 𑀲𑀢𑁆𑀢 𑀓𑀺𑀘𑁆𑀘𑀭𑀳𑀺𑀢𑀸𑀘 𑀳𑁄𑀦𑁆𑀢𑀺. 𑀦𑀘 𑀲𑀬𑀁 𑀚𑀻𑀯𑀸𑀦𑀸𑀫 𑀳𑁄𑀦𑁆𑀢𑀺. 𑀦𑀸𑀧𑀺 𑀚𑀻𑀯𑀬𑁄𑀕𑀸𑀢𑀺. 𑀇𑀢𑀺 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀦𑀺𑀚𑁆𑀚𑀻𑀯𑀝𑁆𑀞𑁂𑀦𑀘𑀢𑁂𑀥𑀸𑀢𑀼𑀬𑁄𑀦𑀸𑀫𑀸𑀢𑀺. 𑀢𑁂𑀲𑀁 𑀧𑀦 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀬𑀣𑀸𑀳-𑀪𑁂𑀭𑀺𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼 𑀤𑀝𑁆𑀞𑀩𑁆𑀩𑀸. 𑀤𑀡𑁆𑀟𑁄 𑀯𑀺𑀬 𑀭𑀽𑀧𑀥𑀸𑀢𑀼. 𑀲𑀤𑁆𑀤𑁄𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀆𑀤𑀸𑀲𑀢𑀮𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼. 𑀫𑀼𑀔𑀁 𑀯𑀺𑀬 𑀭𑀽𑀧𑀥𑀸𑀢𑀼. 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀅𑀣𑀯𑀸, 𑀉𑀘𑁆𑀙𑀼𑀬𑀦𑁆𑀢 𑀓𑀺𑀮𑀬𑀦𑁆𑀢𑀁 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼. 𑀬𑀦𑁆𑀢𑀘𑀓𑁆𑀓𑀬𑀝𑁆𑀞𑀺 𑀯𑀺𑀬 𑀭𑀽𑀧𑀥𑀸𑀢𑀼. 𑀉𑀘𑁆𑀙𑀼𑀭𑀲 𑀢𑁂𑀮𑀸𑀦𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀣𑀸 𑀅𑀥𑀭𑀸𑀭𑀡𑀺 𑀯𑀺𑀬 𑀘𑀓𑁆𑀔𑀼𑀥𑀸𑀢𑀼. 𑀉𑀢𑁆𑀢𑀭𑀸𑀭𑀡𑀺 𑀯𑀺𑀬 𑀭𑀽𑀧𑀥𑀸𑀢𑀼. 𑀅𑀕𑁆𑀕𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀲𑀦𑀬𑁄 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀲𑀼. 𑀫𑀦𑁄𑀥𑀸𑀢𑀼 𑀧𑀦 𑀬𑀣𑀸𑀲𑀫𑁆𑀪𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀥𑀫𑁆𑀫𑀥𑀸𑀢𑀼𑀬𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀮𑁆𑀮𑀫𑀺𑀯 𑀲𑀽𑀮𑀫𑀺𑀯𑀘 𑀤𑀝𑁆𑀞𑀩𑁆𑀩𑁄. 𑀲𑀜𑁆𑀜𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀯𑁂𑀤𑀦𑀸𑀲𑀮𑁆𑀮 𑀲𑀽𑀮𑀬𑁄𑀕𑀸 𑀆𑀢𑀼𑀭𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀁𑀯𑀸 𑀲𑀜𑁆𑀜𑀸 𑀆𑀲𑀸 𑀤𑀼𑀓𑁆𑀔𑀚𑀦𑀦𑀢𑁄 𑀭𑀺𑀢𑁆𑀢𑀫𑀼𑀝𑁆𑀞𑀺 𑀯𑀺𑀬 𑀅𑀬𑀣𑀸𑀪𑀼𑀘𑁆𑀘𑀦𑀺𑀫𑀺𑀢𑁆𑀢𑀕𑀸𑀳𑀢𑁄 𑀯𑀦𑀫𑀺𑀕𑁄𑀯𑀺𑀬. 𑀲𑀗𑁆𑀔𑀸𑀭𑀸 𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀢𑁄 𑀅𑀗𑁆𑀕𑀸𑀭𑀓𑀸𑀲𑀼𑀬𑀁 𑀔𑀺𑀧𑀦𑀧𑀼𑀭𑀺𑀲𑀸 𑀯𑀺𑀬. 𑀚𑀸𑀢𑀺𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑁄 𑀭𑀸𑀚𑀧𑀼𑀭𑀺𑀲𑀸𑀦𑀼𑀩𑀦𑁆𑀥𑀘𑁄𑀭𑁄 𑀯𑀺𑀬. 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀳𑁂𑀢𑀼𑀢𑁄 𑀯𑀺𑀲𑀭𑀼𑀓𑁆𑀔𑀩𑀻𑀚𑀸𑀦𑀺 𑀯𑀺𑀬. 𑀭𑀽𑀧𑀁 𑀦𑀸𑀦𑀸𑀯𑀺𑀥𑀼𑀧𑀤𑁆𑀤𑀯𑀦𑀺𑀫𑀺𑀢𑁆𑀢𑀢𑁄 𑀔𑀼𑀭 𑀘𑀓𑁆𑀓𑀁𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀅𑀲𑀗𑁆𑀔𑀢𑀸𑀧𑀺𑀥𑀸𑀢𑀼 𑀅𑀫𑀢𑀢𑁄 𑀲𑀦𑁆𑀢𑀢𑁄 𑀔𑁂𑀫𑀢𑁄 𑀘 𑀤𑀝𑁆𑀞𑀩𑁆𑀩𑀸. 𑀓𑀲𑁆𑀫𑀸, 𑀲𑀩𑁆𑀩𑀸𑀦𑀢𑁆𑀣𑀧𑀝𑀺𑀧𑀓𑁆𑀔𑀪𑀽𑀢𑀢𑁆𑀢𑀸. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀕𑀳𑀺𑀢𑀸𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀯𑀦𑀫𑀓𑁆𑀓𑀝𑁄 𑀯𑀺𑀬, 𑀤𑀼𑀤𑁆𑀤𑀫𑀦𑀢𑁄 𑀅𑀲𑁆𑀲𑀔𑀮𑀼𑀗𑁆𑀕𑁄 𑀯𑀺𑀬, 𑀬𑀢𑁆𑀣 𑀓𑀸𑀫𑀦𑀺𑀧𑀸𑀢𑀺𑀢𑁄 𑀯𑁂𑀳𑀸𑀲𑀁 𑀔𑀺𑀢𑁆𑀢𑀤𑀡𑁆𑀟𑁄 𑀯𑀺𑀬, 𑀮𑁄𑀪𑀤𑁄𑀲𑀸𑀤𑀺 𑀦𑀸𑀦𑀸𑀧𑁆𑀧𑀓𑀸𑀭 𑀓𑀺𑀮𑁂𑀲𑀬𑁄𑀕𑀢𑁄 𑀭𑀗𑁆𑀕𑀦𑀝𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺. 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀏𑀢𑁆𑀣 𑀲𑀦𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀪𑀸𑀯𑁄 𑀲𑀘𑁆𑀘𑀁. 𑀲𑀦𑁆𑀢𑀲𑁆𑀲𑀸𑀢𑀺 𑀪𑀽𑀢𑀲𑁆𑀲 𑀢𑀣𑀲𑁆𑀲 𑀅𑀯𑀺𑀧𑀭𑀻𑀢𑀲𑁆𑀲. 𑀅𑀧𑀺𑀘, 𑀓𑁂𑀦𑀝𑁆𑀞𑁂𑀦 𑀲𑀘𑁆𑀘𑀦𑁆𑀢𑀺. 𑀢𑀣𑀝𑁆𑀞𑁂𑀦 𑀅𑀯𑀺𑀢𑀣𑀝𑁆𑀞𑁂𑀦 𑀅𑀦𑀜𑁆𑀜𑀣𑀝𑁆𑀞𑁂𑀦. 𑀬𑀜𑁆𑀳𑀺 𑀘𑀓𑁆𑀔𑀼𑀲𑁆𑀲 𑀤𑀼𑀓𑁆𑀔𑀢𑁆𑀢𑀁, 𑀢𑀁 𑀢𑀣𑀁 𑀳𑁄𑀢𑀺 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁. 𑀤𑀼𑀓𑁆𑀔𑀤𑀼𑀓𑁆𑀔 𑀲𑀗𑁆𑀔𑀸𑀭𑀤𑀼𑀓𑁆𑀔 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔 𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀤𑀼𑀓𑁆𑀔𑁂𑀳𑀺 𑀢𑀁 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀲𑁆𑀲 𑀅𑀪𑀺𑀡𑁆𑀳𑀧𑀻𑀴𑀦𑀢𑁄. 𑀢𑀢𑁆𑀣 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀦𑀸𑀫 𑀓𑀫𑁆𑀫𑀚𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀕𑁂𑀯 𑀢𑀁𑀢𑀁𑀓𑀫𑁆𑀫𑀸 𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑀁. 𑀢𑀣𑀸 𑀉𑀢𑀼𑀚𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀕𑁂𑀯 𑀢𑀁𑀢𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑀁.

𑀘𑀓𑁆𑀔𑀼 𑀳𑀺 𑀦𑀸𑀫 𑀭𑀽𑀧𑀺𑀩𑁆𑀭𑀳𑁆𑀫𑀸𑀦𑀁𑀧𑀺 𑀧𑀼𑀭𑀺𑀫𑀪𑀯𑁂 𑀛𑀸𑀦𑀪𑀸𑀯𑀦𑀸 𑀲𑀗𑁆𑀔𑀸𑀢𑀁 𑀫𑀳𑀦𑁆𑀢𑀁 𑀓𑀫𑁆𑀫𑀸𑀪𑀺𑀲𑀗𑁆𑀔𑀭𑀡 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸𑀦𑀁𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀦𑁄 𑀅𑀜𑁆𑀜𑀣𑀸. 𑀓𑀸𑀫𑀲𑀢𑁆𑀢𑀸𑀦𑀁 𑀧𑀦 𑀧𑀼𑀭𑀺𑀫𑀪𑀯𑁂 𑀓𑀫𑁆𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀁𑀧𑀺 𑀬𑀸𑀯𑀚𑀻𑀯𑀁 𑀧𑀯𑀢𑁆𑀢𑀺𑀬𑀸 𑀆𑀳𑀸𑀭𑀸𑀤𑀺𑀲𑀗𑁆𑀔𑀸𑀭𑀤𑀼𑀓𑁆𑀔𑀜𑁆𑀘 𑀧𑀝𑀺𑀚𑀕𑁆𑀕𑀦 𑀤𑀼𑀓𑁆𑀔𑀜𑁆𑀘 𑀅𑀦𑀼𑀪𑀯𑀦𑁆𑀢𑀸𑀦𑀜𑁆𑀜𑁂𑀯 𑀧𑀯𑀢𑁆𑀢𑀢𑀺, 𑀦𑁄 𑀅𑀜𑁆𑀜𑀣𑀸. 𑀧𑀯𑀢𑁆𑀢𑀫𑀸𑀦𑀜𑁆𑀘 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀯𑀸 𑀚𑀸𑀢𑁂 𑀅𑀦𑁆𑀢𑀭𑀸𑀬𑁂𑀯𑀸 𑀆𑀕𑀢𑁂 𑀬𑀤𑀸𑀓𑀤𑀸𑀘𑀺 𑀪𑀺𑀚𑁆𑀚𑀢𑀺. 𑀫𑀭𑀡𑀓𑀸𑀮𑀁 𑀧𑀢𑁆𑀯𑀸 𑀧𑀦 𑀏𑀓𑀦𑁆𑀢𑁂𑀦 𑀪𑀺𑀚𑁆𑀚𑀢𑀺𑀬𑁂𑀯. 𑀢𑀲𑁆𑀫𑀸 𑀢𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀢𑀤𑀢𑁆𑀣𑀸𑀬 𑀓𑀫𑁆𑀫𑀁𑀯𑀸 𑀆𑀳𑀸𑀭𑀸𑀤𑀺𑀧𑀘𑁆𑀘𑀬𑀁𑀯𑀸 𑀧𑀝𑀺𑀚𑀕𑁆𑀕𑀦𑀁 𑀯𑀸 𑀲𑀗𑁆𑀔𑀭𑁄𑀦𑁆𑀢𑀸𑀦𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑀦𑁆𑀢𑁄𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼 𑀅𑀧𑀭𑀺𑀬𑀦𑁆𑀢𑁂𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦 𑀧𑀼𑀕𑁆𑀕𑀮𑀁 𑀅𑀪𑀺𑀡𑁆𑀳𑀁 𑀧𑀻𑀴𑁂𑀢𑀺𑀬𑁂𑀯. 𑀇𑀤𑀫𑀲𑁆𑀲 𑀲𑀗𑁆𑀔𑀸𑀭𑀤𑀼𑀓𑁆𑀔𑀁. 𑀇𑀤𑀁 𑀘𑀓𑁆𑀔𑀼 𑀦𑀸𑀫 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀯𑀸 𑀚𑀸𑀢𑁂 𑀅𑀦𑁆𑀢𑀭𑀸𑀬𑁂𑀯𑀸 𑀆𑀕𑀢𑁂 𑀬𑀤𑀸 𑀓𑀤𑀸𑀘𑀺 𑀪𑀺𑀚𑁆𑀚𑀦𑀚𑀸𑀢𑀺𑀓𑀁. 𑀢𑀲𑁆𑀫𑀸 𑀢𑀲𑁆𑀲 𑀪𑀺𑀚𑁆𑀚𑀦𑀪𑀬𑁂𑀦 𑀧𑀕𑁂𑀯 𑀧𑀘𑁆𑀘𑀬 𑀲𑀫𑁆𑀧𑀸𑀤𑀦𑀤𑀼𑀓𑁆𑀔𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀲𑀁𑀯𑀺𑀥𑀸𑀦𑀤𑀼𑀓𑁆𑀔𑀁 𑀪𑀺𑀚𑁆𑀚𑀦𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀯𑀸 𑀪𑀺𑀚𑁆𑀚𑀫𑀸𑀦𑁂𑀯𑀸 𑀪𑀺𑀦𑁆𑀦𑁂𑀯𑀸 𑀲𑁄𑀘𑀦𑀧𑀭𑀺𑀤𑁂𑀯𑀦𑀸𑀤𑀺𑀤𑀼𑀓𑁆𑀔𑀜𑁆𑀘 𑀯𑀺𑀧𑀭𑀺𑀡𑀸𑀫 𑀤𑀼𑀓𑁆𑀔𑀁𑀦𑀸𑀫. 𑀇𑀢𑀺 𑀲𑀩𑁆𑀩𑀁 𑀘𑀓𑁆𑀔𑀼 𑀅𑀧𑀭𑀺𑀬𑀦𑁆𑀢𑁂𑀦 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦 𑀧𑀼𑀕𑁆𑀕𑀮𑀁 𑀅𑀪𑀺𑀡𑁆𑀳𑀁 𑀧𑀻𑀴𑁂𑀢𑀺𑀬𑁂𑀯. 𑀇𑀤𑀫𑀲𑁆𑀲 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁. 𑀤𑀼𑀓𑁆𑀔𑀤𑀼𑀓𑁆𑀔𑀁 𑀧𑀦 𑀢𑀤𑀼𑀪𑀬𑁂𑀦 𑀤𑀼𑀓𑁆𑀔𑁂𑀦 𑀲𑀳𑁂𑀯 𑀲𑀺𑀚𑁆𑀛𑀢𑀺. 𑀏𑀯𑀁 𑀘𑀓𑁆𑀔𑀼 𑀤𑀼𑀓𑁆𑀔𑀤𑀼𑀓𑁆𑀔 𑀲𑀗𑁆𑀔𑀸𑀭 𑀤𑀼𑀓𑁆𑀔 𑀯𑀺𑀧𑀭𑀺𑀡𑀸𑀫 𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀤𑀼𑀓𑁆𑀔𑁂𑀳𑀺 𑀢𑀁 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀅𑀪𑀺𑀡𑁆𑀳𑀁 𑀧𑀻𑀴𑁂𑀢𑀺𑀬𑁂𑀯. 𑀬𑀜𑁆𑀘 𑀢𑀲𑁆𑀲 𑀢𑀣𑀸𑀧𑀻𑀴𑀦𑀁, 𑀢𑀁 𑀢𑀣𑀁 𑀳𑁄𑀢𑀺, 𑀅𑀯𑀺𑀢𑀣𑀁, 𑀅𑀦𑀜𑁆𑀜𑀣𑀁. 𑀢𑀲𑁆𑀫𑀸 𑀘𑀓𑁆𑀔𑀼 𑀤𑀼𑀓𑁆𑀔𑀲𑀘𑁆𑀘𑀁𑀦𑀸𑀫. 𑀏𑀲 𑀦𑀬𑁄 𑀲𑁄𑀢𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼.

𑀲𑁂𑀲𑀲𑀘𑁆𑀘𑁂𑀲𑀼𑀧𑀺 𑀬𑀁 𑀮𑁄𑀪𑀲𑁆𑀲𑁂𑀯 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀁. 𑀬𑀁 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥𑀢𑁆𑀢𑀁. 𑀬𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥𑀫𑀕𑁆𑀕𑀢𑁆𑀢𑀁 𑀢𑀁 𑀓𑀣𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀬𑀸𑀯𑀘 𑀮𑁄𑀪𑁄 𑀦 𑀧𑀳𑀺𑀬𑁆𑀬𑀢𑀺. 𑀢𑀸𑀯 𑀘𑀓𑁆𑀔𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀢𑀺𑀬𑁂𑀯. 𑀬𑀸𑀯𑀘 𑀢𑀸𑀦𑀺 𑀅𑀲𑁆𑀲𑀸𑀤𑁂𑀢𑀺. 𑀢𑀸𑀯 𑀢𑁂𑀲𑀁 𑀧𑀯𑀢𑁆𑀢𑀺𑀬𑀸 𑀓𑀫𑁆𑀫𑀸𑀤𑀻𑀦𑀺 𑀲𑀗𑁆𑀔𑀭𑁄𑀦𑁆𑀢𑀺𑀬𑁂𑀯. 𑀬𑀸𑀯𑀘 𑀓𑀫𑁆𑀫𑀸𑀤𑀻𑀦𑀺 𑀲𑀗𑁆𑀔𑀭𑁄𑀦𑁆𑀢𑀺. 𑀢𑀸𑀯 𑀘𑀓𑁆𑀔𑀸𑀤𑀻𑀦𑀺 𑀧𑀯𑀢𑁆𑀢𑀦𑁆𑀢𑀺𑀬𑁂𑀯. 𑀬𑀸𑀯𑀘𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀯 𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀲𑀗𑁆𑀔𑀸𑀭 𑀤𑀼𑀓𑁆𑀔𑀸𑀤𑀻𑀳𑀺 𑀦𑀫𑀼𑀘𑁆𑀘𑀢𑀺𑀬𑁂𑀯. 𑀢𑀲𑁆𑀫𑀸 𑀮𑁄𑀪𑀲𑁆𑀲 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀁 𑀢𑀣𑀁 𑀳𑁄𑀢𑀺. 𑀘𑀓𑁆𑀔𑀸𑀤𑀻𑀲𑀼𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀆𑀕𑀘𑁆𑀙𑀢𑀺𑀬𑁂𑀯. 𑀅𑀧𑀯𑀢𑁆𑀢𑀫𑀸𑀦𑁂𑀲𑀼 𑀦𑀸𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀧𑀯𑀢𑁆𑀢𑀺𑀦𑀺𑀭𑁄𑀥𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥𑀢𑁆𑀢𑀁 𑀢𑀣𑀁 𑀳𑁄𑀢𑀺. 𑀢𑀣𑀸 𑀮𑁄𑀪𑀧𑀳𑀸𑀦𑀢𑁄 𑀅𑀜𑁆𑀜𑁄 𑀤𑀼𑀓𑁆𑀔𑀫𑀼𑀢𑁆𑀢𑀺𑀫𑀕𑁆𑀕𑁄𑀦𑀸𑀫 𑀦𑀢𑁆𑀣𑀺. 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁄𑀘 𑀉𑀧𑁆𑀧𑀚𑁆𑀚 𑀫𑀸𑀦𑁄 𑀏𑀓𑀦𑁆𑀢𑁂𑀦 𑀢𑀁 𑀧𑀚𑀳𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑁆𑀲𑁂𑀯 𑀤𑀼𑀓𑁆𑀔𑀦𑀺𑀭𑁄𑀥𑀫𑀕𑁆𑀕𑀢𑁆𑀢𑀁 𑀢𑀣𑀁 𑀳𑁄𑀢𑀺, 𑀅𑀯𑀺𑀢𑀣𑀁, 𑀅𑀦𑀜𑁆𑀜𑀣𑀦𑁆𑀢𑀺.

𑀏𑀯𑀁𑀲𑀦𑁆𑀢𑁂𑀧𑀺 𑀲𑀘𑁆𑀘𑀲𑀤𑁆𑀤𑁄 𑀧𑀭𑀺𑀬𑀸𑀬 𑀲𑀘𑁆𑀘𑁂𑀲𑀼𑀧𑀺 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀘𑀢𑁆𑀢𑀸𑀭𑀺𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺. 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑁂 𑀢𑀸𑀯 𑀲𑀓𑁆𑀓𑀸𑀬𑀧𑀭𑀺𑀬𑀸 𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀏𑀯 𑀅𑀭𑀺𑀬𑀲𑀘𑁆𑀘𑀁𑀦𑀸𑀫. 𑀢𑁂𑀬𑁂𑀯 𑀳𑀺 𑀅𑀲𑁆𑀫𑀺𑀫𑀸𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀳𑀼𑀢𑁆𑀯𑀸 𑀬𑀸𑀯𑀢𑀁 𑀫𑀸𑀦𑀁 𑀦 𑀲𑀫𑀽𑀳𑀦𑀢𑀺. 𑀢𑀸𑀯 𑀤𑀼𑀓𑁆𑀔𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀘𑀦𑀸𑀫 𑀬𑀸𑀯𑀤𑁂𑀯 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬 𑀳𑁄𑀢𑀺. 𑀅𑀲𑁆𑀫𑀺𑀫𑀸𑀦𑁄𑀘 𑀢𑁂𑀲𑁆𑀯𑁂𑀯 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀼 𑀦𑀺𑀯𑀺𑀲𑀢𑀻𑀢𑀺 𑀢𑁂𑀲𑀼 𑀧𑀭𑀺𑀜𑁆𑀜𑀸𑀢𑁂𑀲𑀼 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺. 𑀢𑀩𑁆𑀩𑀺𑀧𑀭𑀻 𑀢𑁂𑀦 𑀧𑀦 𑀅𑀦𑀺𑀦𑁆𑀤𑁆𑀭𑀺𑀬 𑀩𑀤𑁆𑀥𑀥𑀫𑁆𑀫𑀸 𑀫𑀕𑁆𑀕𑀨𑀮𑀥𑀫𑁆𑀫𑀸𑀘 𑀅𑀝𑁆𑀞𑀗𑁆𑀕𑀺𑀓𑀯𑀚𑁆𑀚𑀸 𑀉𑀤𑀬𑀩𑁆𑀩𑀬 𑀧𑀻𑀴𑀦𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀳𑀺𑀘 𑀅𑀧𑀭𑀺𑀫𑀼𑀢𑁆𑀢𑀢𑁆𑀢𑀸 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫. 𑀲𑀫𑀼𑀤𑀬𑀲𑀘𑁆𑀘𑁂 𑀏𑀓𑁄 𑀮𑁄𑀪𑁄𑀬𑁂𑀯 𑀅𑀭𑀺𑀬𑀲𑀘𑁆𑀘𑀁𑀦𑀸𑀫. 𑀲𑁄𑀳𑀺 𑀅𑀢𑁆𑀢𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑁂 𑀅𑀢𑁆𑀢𑀦𑀺𑀘 𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼𑀘 𑀅𑀲𑁆𑀲𑀸𑀤𑀁 𑀚𑀦𑀬𑀺𑀢𑁆𑀯𑀸 𑀦𑀺𑀘𑁆𑀘𑀁 𑀯𑀝𑁆𑀝𑀤𑀼𑀓𑁆𑀔𑀢𑁄 𑀅𑀦𑀼𑀓𑁆𑀓𑀡𑁆𑀞𑀫𑀸𑀦𑁂 𑀓𑀭𑁄𑀢𑀻𑀢𑀺 𑀢𑁂𑀲𑀁 𑀮𑁄𑀪𑀲𑀤𑀺𑀲𑁄 𑀅𑀜𑁆𑀜𑁄 𑀜𑀸𑀢𑀺𑀯𑀸 𑀫𑀺𑀢𑁆𑀢𑁄𑀯𑀸 𑀲𑀳𑀸𑀬𑁄𑀯𑀸 𑀅𑀢𑁆𑀢𑀸𑀯𑀸 𑀅𑀢𑁆𑀢𑀦𑀺𑀬𑀁𑀯𑀸 𑀦𑀢𑁆𑀣𑀺𑀯𑀺𑀬 𑀔𑀸𑀬𑀢𑀺. 𑀢𑀲𑁆𑀫𑀸 𑀢𑀁𑀲𑀤𑀺𑀲𑁄 𑀅𑀜𑁆𑀜𑁄 𑀓𑁄𑀘𑀺 𑀯𑀝𑁆𑀝𑀤𑀼𑀓𑁆𑀔𑀲𑀁𑀯𑀺𑀥𑀸𑀬𑀓𑁄𑀦𑀸𑀫 𑀦𑀢𑁆𑀣𑀺. 𑀢𑀜𑁆𑀘 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀅𑀜𑁆𑀜𑁄 𑀤𑀼𑀚𑁆𑀚𑀳𑁄𑀦𑀸𑀫 𑀦𑀢𑁆𑀣𑀺. 𑀅𑀯𑀲𑁂𑀲𑀸𑀧𑀦 𑀲𑀩𑁆𑀩𑁂𑀧𑀺 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁𑀦𑀸𑀫.

𑀏𑀢𑁆𑀣 𑀲𑀺𑀬𑀸, 𑀦𑀦𑀼 𑀅𑀯𑀺𑀚𑁆𑀚𑀸𑀧𑀺 𑀲𑀩𑁆𑀩𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀲𑀸𑀧𑀺 𑀲𑀫𑀼𑀤𑀬𑁂 𑀅𑀭𑀺𑀬𑀲𑀘𑁆𑀘𑁂𑀏𑀯 𑀯𑀢𑁆𑀢𑀩𑁆𑀩𑀸𑀢𑀺. 𑀯𑀼𑀘𑁆𑀘𑀢𑁂, 𑀬𑀣𑀸𑀳𑀺 𑀏𑀓𑁄 𑀙𑁂𑀓𑁄 𑀉𑀬𑁆𑀬𑀸𑀦𑀧𑀸𑀮𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁 𑀪𑀽𑀫𑀺 𑀪𑀸𑀕𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦 𑀪𑀽𑀫𑀺𑀪𑀸𑀕𑀜𑁆𑀘 𑀦𑀸𑀦𑀸𑀩𑀻𑀚𑀸𑀦𑀺𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀦𑀦𑁆𑀤𑀦𑀲𑀤𑀺𑀲𑀁 𑀉𑀬𑁆𑀬𑀸𑀦𑀁 𑀫𑀸𑀧𑁂𑀲𑀺. 𑀢𑀢𑁆𑀣 𑀪𑀽𑀫𑀺 𑀉𑀬𑁆𑀬𑀸𑀦 𑀧𑀸𑀮𑀲𑁆𑀲 𑀩𑀻𑀚𑀸𑀦𑀁 𑀭𑀼𑀓𑁆𑀔𑀸𑀦𑀜𑁆𑀘 𑀧𑀢𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀩𑀻𑀚𑀸𑀦𑀺𑀘 𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺, 𑀉𑀬𑁆𑀬𑀸𑀦𑀧𑀸𑀮𑁄𑀬𑁂𑀯 𑀧𑀦 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀢𑀺. 𑀲𑁄 𑀳𑀺 𑀪𑀽𑀫𑀺𑀬𑀁 𑀩𑀻𑀚𑁂𑀲𑀼 𑀭𑀼𑀓𑁆𑀔𑁂𑀲𑀼𑀘 𑀬𑀁𑀬𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀁 𑀲𑀩𑁆𑀩𑀁 𑀓𑀭𑁄𑀢𑀺. 𑀫𑀫𑁂𑀢𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀭𑀓𑁆𑀔𑀢𑀺. 𑀢𑀢𑁄 𑀉𑀧𑁆𑀧𑀦𑁆𑀦𑁂 𑀪𑁄𑀕𑁂 𑀪𑀼𑀜𑁆𑀚𑀢𑀺. 𑀢𑀲𑁆𑀫𑀸 𑀓𑁄 𑀇𑀤𑀁 𑀫𑀸𑀧𑁂𑀲𑀺, 𑀓𑀲𑁆𑀲𑁂𑀤𑀁 𑀉𑀬𑁆𑀬𑀸𑀦𑀦𑁆𑀢𑀺 𑀯𑀼𑀢𑁆𑀢𑁂 𑀉𑀬𑁆𑀬𑀸𑀦𑀧𑀸𑀮𑁄𑀬𑁂𑀯 𑀫𑀸𑀧𑁂𑀲𑀺. 𑀢𑀲𑁆𑀲𑁂𑀤𑀁 𑀉𑀬𑁆𑀬𑀸𑀦𑀁 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀦 𑀪𑀽𑀫𑀺𑀁 𑀫𑀸𑀧𑁂𑀲𑀺. 𑀩𑀻𑀚𑀸𑀦𑀺 𑀫𑀸𑀧𑁂𑀦𑁆𑀢𑀺. 𑀢𑁂𑀲𑀁 𑀇𑀤𑀁 𑀉𑀬𑁆𑀬𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀸 𑀧𑀦 𑀉𑀬𑁆𑀬𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀧𑀭𑀁𑀧𑀭𑀸𑀢𑀺 𑀯𑀼𑀢𑁆𑀢𑁂 𑀧𑀦 𑀪𑀽𑀫𑀺𑀏𑀯 𑀆𑀤𑀺𑀢𑁄 𑀯𑀢𑁆𑀢𑀩𑁆𑀩𑀸. 𑀦 𑀉𑀬𑁆𑀬𑀸𑀦𑀧𑀸𑀮𑁄. 𑀦𑀘 𑀩𑀻𑀚𑀸𑀦𑀻𑀢𑀺. 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀦𑀬𑀜𑁆𑀳𑀺 𑀧𑀢𑁆𑀯𑀸 𑀧𑀘𑁆𑀘𑀬𑀧𑀭𑀁 𑀧𑀭𑀯𑀲𑁂𑀦 𑀤𑀼𑀓𑁆𑀔 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀦𑀺𑀯𑀢𑁆𑀢𑀺𑀯𑀺𑀥𑀸𑀦𑁂 𑀅𑀯𑀺𑀚𑁆𑀚𑀸𑀏𑀯 𑀆𑀤𑀺 𑀧𑀪𑀯𑀧𑀥𑀸𑀦𑀪𑀽𑀢𑀸 𑀳𑁄𑀢𑀺, 𑀦 𑀢𑀡𑁆𑀳𑀸. 𑀲𑀘𑁆𑀘𑀤𑁂𑀲𑀦𑀸𑀬𑀁 𑀧𑀦 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀓𑀥𑀫𑁆𑀫𑀯𑀺𑀥𑀸𑀦𑁂 𑀢𑀡𑁆𑀳𑀸𑀏𑀯 𑀲𑀸𑀫𑀺𑀚𑁂𑀝𑁆𑀞𑀓 𑀧𑀥𑀸𑀦𑀪𑀽𑀢𑀸 𑀳𑁄𑀢𑀺. 𑀦 𑀅𑀯𑀺𑀚𑁆𑀚𑀸𑀢𑀺 𑀦𑀢𑁆𑀣𑀺 𑀲𑀫𑀼𑀤𑀬𑀸𑀭𑀺𑀬𑀲𑀘𑁆𑀘𑀪𑀸𑀯𑁂 𑀅𑀯𑀺𑀚𑁆𑀚𑀸𑀬 𑀑𑀓𑀸𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀓𑀺𑀮𑁂𑀲𑀸𑀦𑀁 𑀢𑀤𑀗𑁆𑀕𑀦𑀺𑀭𑁄𑀥𑀯𑀺𑀓𑁆𑀔𑀫𑁆𑀪𑀦 𑀦𑀺𑀭𑁄𑀥𑀸 𑀦𑀺𑀭𑁄𑀥𑀲𑀘𑁆𑀘𑀁𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀸𑀭𑀺𑀬𑀲𑀘𑁆𑀘𑀁𑀦𑀸𑀫. 𑀙𑀲𑀼 𑀮𑁄𑀓𑀺𑀬𑀯𑀺𑀲𑀼𑀤𑁆𑀥𑀻𑀲𑀼 𑀫𑀕𑁆𑀕𑀗𑁆𑀕𑀸𑀦𑀺 𑀫𑀕𑁆𑀕𑀲𑀘𑁆𑀘𑀁 𑀦𑀸𑀫. 𑀅𑀝𑁆𑀞𑀗𑁆𑀕𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀏𑀯 𑀫𑀕𑁆𑀕𑀅𑀭𑀺𑀬𑀲𑀘𑁆𑀘𑀁𑀦𑀸𑀫𑀸𑀢𑀺.

𑀅𑀭𑀺𑀬𑀲𑀤𑁆𑀤𑁄 𑀘𑁂𑀢𑁆𑀣 𑀓𑀢𑁆𑀣𑀘𑀺 𑀓𑀤𑀸𑀘𑀺 𑀓𑁂𑀲𑀜𑁆𑀘𑀺 𑀓𑀼𑀢𑁄𑀘𑀺 𑀓𑀣𑀜𑁆𑀘𑀺 𑀅𑀯𑀺𑀢𑀣𑀪𑀸𑀯𑁂𑀦 𑀉𑀢𑁆𑀢𑀫𑀢𑁆𑀣𑀯𑀸𑀘𑀓𑁄𑀢𑀺. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀘𑁆𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄 𑀤𑀼𑀓𑁆𑀔𑀁𑀅𑀭𑀺𑀬 𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀢𑁆𑀣𑁂𑀳𑀺 𑀘𑀓𑁆𑀔𑀸𑀤𑀺𑀓𑀲𑁆𑀲 𑀏𑀓𑁂𑀓𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀲𑀗𑁆𑀔𑀢𑀝𑁆𑀞 𑀯𑀺𑀧𑀭𑀺𑀡𑀸𑀫𑀝𑁆𑀞𑀸 𑀧𑀼𑀩𑁆𑀩𑁂 𑀲𑀗𑁆𑀔𑀸𑀭 𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀲𑀼 𑀯𑀼𑀢𑁆𑀢𑀦𑀬𑀸𑀏𑀯. 𑀧𑀤𑀢𑁆𑀣𑀢𑁄𑀧𑀦 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀻𑀬𑀢𑀻𑀢𑀺 𑀲𑀗𑁆𑀔𑀢𑁄. 𑀧𑀕𑁂𑀯 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑁂𑀦 𑀯𑀺𑀦𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀭𑀽𑀧𑁄 𑀳𑀼𑀢𑁆𑀯𑀸 𑀧𑀭𑀺𑀡𑀸𑀫𑁄 𑀯𑀺𑀧𑀭𑀺𑀡𑀸𑀫𑁄. 𑀧𑀭𑀺𑀳𑀸𑀦𑀺𑀘𑁂𑀯 𑀧𑀭𑀺𑀪𑁂𑀤𑁄𑀘. 𑀧𑀻𑀴𑀦𑀝𑁆𑀞𑁄𑀢𑀺 𑀏𑀢𑁆𑀣 𑀧𑀻𑀴𑀺𑀢𑀩𑁆𑀩𑀦𑁆𑀢𑀺 𑀧𑀻𑀴𑀦𑀁. 𑀧𑀻𑀴𑁂𑀢𑀻𑀢𑀺 𑀧𑀻𑀴𑀦𑀁. 𑀧𑀻𑀴𑀻𑀬𑀢𑁂 𑀧𑀻𑀴𑀦𑀁. 𑀅𑀢𑁆𑀣𑁄𑀢𑀺 𑀲𑀪𑀸𑀯𑁄. 𑀧𑀻𑀴𑀦𑀁 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀬𑀣𑀸 𑀏𑀓𑀺𑀲𑁆𑀲𑀸 𑀤𑀼𑀕𑁆𑀕𑀢𑀺𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄𑀘 𑀦𑀸𑀦𑀸𑀭𑁄𑀕𑁂𑀳𑀺 𑀲𑀬𑀁 𑀦𑀺𑀘𑁆𑀘𑀁 𑀧𑀻𑀴𑀺𑀢𑁄 𑀳𑀼𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑀤𑀼𑀓𑁆𑀔𑁂𑀳𑀺 𑀫𑀸𑀢𑀭𑀜𑁆𑀘 𑀦𑀺𑀘𑁆𑀘𑀁 𑀧𑀻𑀴𑁂𑀢𑀺𑀬𑁂𑀯. 𑀬𑀜𑁆𑀘 𑀢𑀲𑁆𑀲𑀸 𑀓𑀼𑀘𑁆𑀙𑀺𑀫𑁆𑀳𑀺 𑀢𑀸𑀤𑀺𑀲𑀲𑁆𑀲 𑀧𑀼𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀁, 𑀢𑀜𑁆𑀘 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀻𑀴𑀦𑀓𑀺𑀘𑁆𑀘𑀫𑁂𑀯 𑀳𑁄𑀢𑀺. 𑀏𑀯𑀫𑁂𑀯𑀁 𑀬𑁂 𑀘𑀓𑁆𑀔𑀸𑀤𑀬𑁄 𑀥𑀫𑁆𑀫𑀸 𑀚𑀭𑀸𑀫𑀭𑀡𑁂𑀳𑀺 𑀦𑀺𑀘𑁆𑀘𑀁 𑀧𑀻𑀴𑀻𑀬𑀦𑁆𑀢𑀺, 𑀢𑁂 𑀧𑀝𑀺𑀚𑀕𑁆𑀕𑀦𑀤𑀼𑀓𑁆𑀔𑁂𑀳𑀺 𑀢𑀁 𑀲𑀫𑀗𑁆𑀕𑀻𑀦𑀁 𑀧𑀼𑀕𑁆𑀕𑀮𑀁 𑀦𑀺𑀘𑁆𑀘𑀁 𑀧𑀻𑀴𑁂𑀦𑁆𑀢𑀺𑀬𑁂𑀯. 𑀬𑀜𑁆𑀘 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀢𑁂𑀲𑀁 𑀉𑀧𑁆𑀧𑀚𑁆𑀚𑀦𑀁, 𑀢𑀜𑁆𑀘 𑀢𑀲𑁆𑀲 𑀧𑀻𑀴𑀦𑀓𑀺𑀘𑁆𑀘𑀫𑁂𑀯𑀸𑀢𑀺. 𑀬𑀣𑀸𑀳𑀬𑁄 𑀪𑀺𑀓𑁆𑀔𑀯𑁂 𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄. 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄. 𑀭𑁄𑀕𑀸𑀦𑀁 𑀞𑀺𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀪𑀺𑀓𑁆𑀔𑀯𑁂 𑀲𑁄𑀢𑀲𑁆𑀲 𑀖𑀸𑀦𑀲𑁆𑀲 𑀚𑀺𑀯𑁆𑀳𑀸𑀬 𑀓𑀸𑀬𑀲𑁆𑀲 𑀫𑀦𑀲𑁆𑀲 𑀉𑀧𑁆𑀧𑀸𑀤𑁄𑀢𑀺𑀆𑀤𑀺.

𑀲𑀦𑁆𑀢𑀸𑀧𑀝𑁆𑀞𑁄𑀢𑀺 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀪𑀼𑀲𑀁 𑀧𑀭𑀺𑀤𑀬𑁆𑀳𑀦𑀝𑁆𑀞𑁄. 𑀬𑀣𑀸𑀳 𑁋

𑀘𑀓𑁆𑀔𑀼𑀁 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁. 𑀭𑀸𑀕𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁. 𑀤𑁄𑀲𑀕𑁆𑀕𑀺𑀦𑀸. 𑀫𑁄𑀳𑀕𑁆𑀕𑀺𑀦𑀸. 𑀚𑀸𑀢𑀺𑀬𑀸. 𑀚𑀭𑀸𑀬. 𑀫𑀭𑀡𑁂𑀦. 𑀲𑁄𑀓𑁂𑀦. 𑀧𑀭𑀺𑀤𑁂𑀯𑁂𑀦. 𑀤𑀼𑀓𑁆𑀔𑁂𑀦. 𑀤𑁄𑀫𑀦𑀲𑁆𑀲𑁂𑀦. 𑀉𑀧𑀸𑀬𑀸𑀲𑁂𑀦 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀺. 𑀲𑁄𑀢𑀁 𑀆𑀤𑀺𑀢𑁆𑀢𑀁. 𑀖𑀸𑀦𑀁 𑀆𑀤𑀺𑀢𑁆𑀢𑀁. 𑀚𑀺𑀯𑁆𑀳𑀸 𑀆𑀤𑀺𑀢𑁆𑀢𑀸. 𑀓𑀸𑀬𑁄 𑀆𑀤𑀺𑀢𑁆𑀢𑁄. 𑀫𑀦𑁄 𑀆𑀤𑀺𑀢𑁆𑀢𑁄𑀢𑀺.

𑀆𑀤𑀺𑀧𑀦𑀁 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀬𑁆𑀳𑀦𑀦𑁆𑀢𑀺 𑀇𑀥 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺. 𑀏𑀢𑁆𑀣 𑀲𑀺𑀬𑀸, 𑀅𑀭𑀺𑀬𑀫𑀕𑁆𑀕𑁄𑀧𑀺 𑀘𑀺𑀭𑀓𑀸𑀮𑀁 𑀧𑀸𑀭𑀫𑀺𑀢𑀸𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑁂𑀦 𑀅𑀦𑁆𑀢𑀺𑀫𑀪𑀯𑁂𑀘 𑀲𑀻𑀮𑀸𑀤𑀺𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑁂𑀦 𑀧𑀼𑀕𑁆𑀕𑀮𑀁 𑀲𑀼𑀲𑀁 𑀧𑀻𑀴𑁂𑀢𑀺𑀬𑁂𑀯. 𑀢𑀣𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀘. 𑀢𑀲𑁆𑀫𑀸 𑀲𑁄𑀧𑀺 𑀧𑀺𑀴𑀦𑀸𑀤𑀺𑀅𑀢𑁆𑀣𑁂𑀦 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀕𑀳𑁄 𑀲𑀺𑀬𑀸𑀢𑀺.𑀦. 𑀲𑀩𑁆𑀩𑀤𑀼𑀓𑁆𑀔𑀲𑀦𑁆𑀢𑀺 𑀯𑀁𑀳𑀢𑁆𑀢𑀸. 𑀲𑁄 𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑀁 𑀧𑀭𑀺𑀧𑀼𑀡𑁆𑀡𑀁 𑀅𑀦𑀼𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀓𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀩𑁆𑀩𑀁 𑀓𑀺𑀮𑁂𑀲𑀚𑀸𑀢𑀁 𑀔𑁂𑀧𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀦𑀺𑀭𑀼𑀚𑁆𑀛𑀫𑀸𑀦𑁄𑀘 𑀲𑀩𑁆𑀩𑀁 𑀆𑀬𑀢𑀺𑀁 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀝𑁆𑀝𑀤𑀼𑀓𑁆𑀔𑀁 𑀯𑀽𑀧𑀲𑀫𑁂𑀦𑁆𑀢𑁄 𑀦𑀺𑀭𑀼𑀚𑁆𑀛𑀢𑀺. 𑀯𑀽𑀧𑀲𑀦𑁆𑀢𑀁𑀘 𑀅𑀦𑀸𑀕𑀢 𑀤𑀼𑀓𑁆𑀔𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑀁 𑀕𑀡𑀦𑀼𑀧𑀕𑀁 𑀦𑀳𑁄𑀢𑀺. 𑀪𑀺𑀚𑁆𑀚𑀦𑁆𑀢𑁄𑀘 𑀅𑀦𑀼𑀢𑁆𑀢𑀭𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀤𑀢𑁆𑀯𑀸𑀯 𑀪𑀺𑀚𑁆𑀚𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀧𑀘𑁆𑀘𑀬𑀸𑀧𑀺 𑀧𑀼𑀕𑁆𑀕𑀮𑀲𑁆𑀲 𑀓𑀸𑀘𑀺 𑀳𑀸𑀦𑀺𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀲𑁄 𑀤𑀼𑀓𑁆𑀔𑀲𑀘𑁆𑀘𑀲𑀗𑁆𑀕𑀳𑁄𑀢𑀺. 𑀮𑁄𑀓𑀺𑀬𑀥𑀫𑁆𑀫𑀸 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀯𑀢𑁆𑀢 𑀫𑀸𑀦𑀸𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀳𑀺 𑀪𑀼𑀲𑀁 𑀧𑀻𑀴𑁂𑀢𑁆𑀯𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺𑀘. 𑀦𑀺𑀭𑀼𑀚𑁆𑀛𑀫𑀸𑀦𑀸 𑀫𑀳𑀦𑁆𑀢𑀁 𑀧𑀭𑀺𑀴𑀸𑀳𑀤𑀼𑀓𑁆𑀔𑀁 𑀚𑀦𑁂𑀢𑁆𑀯𑀸 𑀅𑀧𑀭𑀺𑀬𑀦𑁆𑀢𑁂 𑀔𑀼𑀭𑀘𑀓𑁆𑀓𑀲𑀤𑀺𑀲𑁂 𑀯𑀝𑁆𑀝𑀤𑀼𑀓𑁆𑀔𑀬𑀦𑁆𑀢𑁂 𑀧𑀼𑀕𑁆𑀕𑀮𑀁 𑀬𑁄𑀚𑁂𑀦𑁆𑀢𑀸𑀯 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀏𑀯 𑀧𑀻𑀴𑀦𑀸𑀤𑀺𑀅𑀢𑁆𑀣𑁂𑀳𑀺 𑀏𑀓𑀦𑁆𑀢𑀤𑀼𑀓𑁆𑀔𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁂𑀦 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀲𑀫𑁆𑀧𑀸𑀧𑀓𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀭𑀡𑀮𑁂𑀲𑀁 𑀕𑀳𑁂𑀢𑁆𑀯𑀸 𑀤𑀼𑀓𑁆𑀔𑀲𑀘𑁆𑀘𑀢𑁆𑀢𑀧𑀲𑀗𑁆𑀕𑁄 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀻𑀢𑀺.

𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀪𑀯𑀸𑀪𑀯𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀲𑀫𑀼𑀤𑁂𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀉𑀤𑀬𑀢𑀺 𑀉𑀝𑁆𑀞𑀸𑀧𑁂𑀢𑀺 𑀯𑀟𑁆𑀠𑁂𑀢𑀺𑀯𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄, 𑀧𑀮𑀺𑀩𑁄𑀥𑀝𑁆𑀞𑁄𑀢𑀺 𑀘𑀢𑀽𑀳𑀺 𑀅𑀢𑁆𑀣𑁂𑀳𑀺 𑀮𑁄𑀪𑀲𑁆𑀲 𑀤𑀼𑀓𑁆𑀔𑀲𑀫𑀼𑀤𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀆𑀬𑀽𑀳𑀦𑀝𑁆𑀞𑁄𑀢𑀺 𑀪𑀯𑀸𑀪𑀯 𑀲𑀗𑁆𑀔𑀸𑀢𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀪𑀯𑁂𑀧𑀺 𑀯𑀢𑁆𑀣𑀼𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀪𑀺𑀬𑁆𑀬𑁄 𑀧𑀭𑀺𑀩𑁆𑀬𑀽𑀳𑀦𑀝𑁆𑀞𑁄 𑀭𑀸𑀲𑀺𑀓𑀭𑀡𑀝𑁆𑀞𑁄 𑀦𑀺𑀤𑀸𑀦𑀝𑁆𑀞𑁄𑀢𑀺 𑀢𑀤𑁂𑀯 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀤𑀸𑀦𑀝𑁆𑀞𑁄 𑀦𑀺𑀬𑁆𑀬𑀸𑀢𑀦𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀬𑁄𑀕𑀝𑁆𑀞𑁄𑀢𑀺 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀫𑀺𑀁𑀏𑀯 𑀤𑀴𑁆𑀳𑀁 𑀩𑀦𑁆𑀥𑀦𑀝𑁆𑀞𑁄. 𑀧𑀮𑀺𑀩𑁄𑀥𑀝𑁆𑀞𑁄𑀢𑀺 𑀢𑀢𑁄 𑀢𑀲𑁆𑀲 𑀢𑀲𑁆𑀲 𑀫𑀼𑀘𑁆𑀘𑀦𑀼𑀧𑀸𑀬𑀲𑁆𑀲 𑀦𑀻𑀯𑀸𑀭𑀡 𑀯𑀲𑁂𑀦 𑀧𑀮𑀺𑀩𑀼𑀦𑁆𑀥𑀦𑀝𑁆𑀞𑁄 𑀉𑀧𑀭𑀼𑀦𑁆𑀥𑀦𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑀺𑀭𑁄𑀥𑁄 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀦𑀺𑀭𑀼𑀚𑁆𑀛𑀦𑀁 𑀅𑀦𑀼𑀧𑁆𑀧𑀸𑀤 𑀥𑀫𑁆𑀫𑀢𑀸𑀧𑀢𑁆𑀢𑀺 𑀯𑀲𑁂𑀦 𑀔𑀺𑀬𑁆𑀬𑀸𑀦𑀁 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀤𑀼𑀓𑁆𑀔𑀁 𑀯𑀸 𑀦𑀺𑀭𑀼𑀚𑁆𑀛𑀢𑀺 𑀦𑀧𑀯𑀢𑁆𑀢𑀢𑀺 𑀏𑀢𑀲𑁆𑀫𑀺𑀦𑁆𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀦𑀺𑀲𑁆𑀲𑀭𑀡𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄𑀢𑀺 𑀘𑀢𑀽𑀳𑀺 𑀅𑀢𑁆𑀣𑁂𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀦𑀺𑀲𑁆𑀲𑀭𑀡𑀝𑁆𑀞𑁄𑀢𑀺 𑀦𑀺𑀲𑁆𑀲𑀭𑀡 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀘𑁆𑀘𑀦𑀝𑁆𑀞𑁄. 𑀯𑀺𑀯𑁂𑀓𑀝𑁆𑀞𑁄𑀢𑀺 𑀯𑀝𑁆𑀝𑀤𑀼𑀓𑁆𑀔𑀧𑀮𑀺𑀩𑁄𑀥𑀢𑁄 𑀯𑀺𑀯𑀺𑀘𑁆𑀘𑀦𑀝𑁆𑀞𑁄. 𑀅𑀲𑀗𑁆𑀔𑀢𑀝𑁆𑀞𑁄𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀝𑁆𑀞𑁄. 𑀅𑀫𑀢𑀝𑁆𑀞𑁄𑀢𑀺 𑀫𑀭𑀡𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑀝𑁆𑀞𑁄𑀢𑀺.

𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀫𑁂𑀢𑀺 𑀲𑀫𑁆𑀧𑀸𑀧𑁂𑀢𑀻𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻. 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀝𑀺𑀮𑀸𑀪𑀓𑀭𑀡 𑀯𑀲𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀧𑀝𑀺𑀧𑀤𑀸. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀘 𑀲𑀸 𑀧𑀝𑀺𑀧𑀤𑀸 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑁆𑀯𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄𑀢𑀺 𑀘𑀢𑀽𑀳𑀺 𑀅𑀢𑁆𑀣𑁂𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑁆𑀲 𑀤𑀼𑀓𑁆𑀔𑀦𑀺𑀭𑁄𑀥𑀫𑀕𑁆𑀕𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀦𑀺𑀬𑁆𑀬𑀸𑀦𑀝𑁆𑀞𑁄𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀓𑀁 𑀯𑀝𑁆𑀝𑀲𑁄𑀢𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺𑀆𑀤𑀺𑀓𑀁 𑀯𑀝𑁆𑀝𑀧𑀝𑀺𑀲𑁄𑀢𑀁 𑀅𑀪𑀺𑀫𑀼𑀔𑀁 𑀦𑀺𑀕𑁆𑀕𑀫𑀦𑀝𑁆𑀞𑁄. 𑀳𑁂𑀢𑁆𑀯𑀝𑁆𑀞𑁄𑀢𑀺 𑀲𑀩𑁆𑀩𑁂𑀲𑀁 𑀅𑀭𑀺𑀬𑀕𑀼𑀡𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯 𑀲𑀸𑀥𑀦𑀝𑁆𑀞𑁄. 𑀤𑀲𑁆𑀲𑀦𑀝𑁆𑀞𑁄𑀢𑀺 𑀅𑀜𑁆𑀜𑀸𑀡𑀅𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀧𑀳𑀸𑀦 𑀯𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁄. 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄𑀢𑀺 𑀢𑀡𑁆𑀳𑀸 𑀤𑀸𑀲𑀩𑁆𑀬𑀯𑀺𑀫𑀼𑀢𑁆𑀢𑀺𑀬𑀸 𑀪𑀽𑀚𑀺𑀲𑁆𑀲𑀪𑀸𑀯𑀧𑀢𑁆𑀢𑀺𑀯𑀲𑁂𑀦 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀯𑀺𑀭𑁄𑀘𑀦𑀝𑁆𑀞𑁄. 𑀮𑁄𑀓𑀺𑀬𑀫𑀕𑁆𑀕𑀸 𑀳𑀺 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀸𑀯𑁂 𑀞𑀺𑀢𑀸 𑀢𑀡𑁆𑀳𑀸𑀤𑀸𑀲𑀩𑁆𑀬𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀇𑀫𑁂 𑀲𑀢𑁆𑀢𑀸𑀦𑀸𑀫 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀪𑀻𑀭𑀼𑀓𑀸. 𑀬𑁂𑀘 𑀅𑀢𑁆𑀢𑀦𑀺 𑀤𑀼𑀓𑁆𑀔𑀁 𑀚𑀦𑁂𑀦𑁆𑀢𑀺. 𑀢𑁂𑀲𑀼 𑀯𑁂𑀭𑀺𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀅𑀢𑁆𑀢𑀦𑁄 𑀧𑀦 𑀏𑀓𑀦𑁆𑀢𑀤𑀼𑀓𑁆𑀔𑀁𑀯𑀸 𑀏𑀓𑀦𑁆𑀢𑀤𑀼𑀓𑁆𑀔𑀚𑀦𑀓𑀁𑀯𑀸 𑀢𑁂 𑀦𑀚𑀸𑀦𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀅𑀢𑁆𑀢𑀦𑁄 𑀤𑀼𑀓𑁆𑀔𑀫𑀼𑀢𑁆𑀢𑀺𑀬𑀸 𑀬𑀁 𑀬𑀁 𑀓𑀫𑁆𑀫𑀁 𑀆𑀬𑀽𑀳𑀦𑁆𑀢𑀺. 𑀢𑀁 𑀢𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀯𑀟𑁆𑀠𑀺𑀬𑀸𑀏𑀯 𑀲𑀫𑁆𑀧𑀚𑁆𑀚𑀢𑀺. 𑀓𑀺𑀁 𑀧𑀦 𑀏𑀓𑀦𑁆𑀢𑀤𑀼𑀓𑁆𑀔𑀁, 𑀓𑀺𑀁𑀘 𑀏𑀓𑀦𑁆𑀢 𑀤𑀼𑀓𑁆𑀔𑀚𑀦𑀓𑀦𑁆𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀳𑀸𑀯𑀧𑀭𑀺𑀬𑀸𑀧𑀦𑁆𑀦𑀸 𑀢𑁂𑀪𑀽𑀫𑀓𑀥𑀫𑁆𑀫𑀸𑀏𑀯 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀏𑀓𑀦𑁆𑀢𑀤𑀼𑀓𑁆𑀔𑀸𑀦𑀸𑀫. 𑀓𑀲𑁆𑀫𑀸, 𑀢𑁂𑀳𑀺 𑀫𑀼𑀢𑁆𑀢𑁂𑀏𑀯 𑀲𑀩𑁆𑀩𑀤𑀼𑀓𑁆𑀔𑁂𑀳𑀺 𑀫𑀼𑀘𑁆𑀘𑀦𑀢𑁄, 𑀅𑀫𑀼𑀢𑁆𑀢𑁂𑀘 𑀅𑀫𑀼𑀘𑁆𑀘𑀦𑀢𑁄𑀢𑀺. 𑀅𑀢𑁆𑀢𑀦𑁄 𑀢𑀡𑁆𑀳𑀸𑀏𑀯 𑀅𑀢𑁆𑀢𑀦𑁄 𑀏𑀓𑀦𑁆𑀢𑀤𑀼𑀓𑁆𑀔𑀚𑀦𑀓𑀁𑀦𑀸𑀫. 𑀓𑀲𑁆𑀫𑀸, 𑀢𑀸𑀬 𑀧𑀳𑀻𑀦𑀸𑀬𑀏𑀯 𑀏𑀓𑀦𑁆𑀢 𑀤𑀼𑀓𑁆𑀔𑁂𑀳𑀺 𑀫𑀼𑀘𑁆𑀘𑀦𑀢𑁄, 𑀅𑀧𑀳𑀻𑀦𑀸𑀬𑀘 𑀅𑀫𑀼𑀘𑁆𑀘𑀦𑀢𑁄𑀢𑀺.

𑀢𑀣𑀸 𑀇𑀫𑁂 𑀲𑀢𑁆𑀢𑀸 𑀏𑀓𑀦𑁆𑀢𑁂𑀦 𑀲𑀼𑀔𑀓𑀸𑀫𑀸 𑀳𑁄𑀦𑁆𑀢𑀺 𑀲𑀼𑀔𑀸𑀪𑀺𑀦𑀦𑁆𑀤𑀺𑀦𑁄. 𑀬𑁂𑀘 𑀅𑀢𑁆𑀢𑀦𑀺 𑀲𑀼𑀔𑀁 𑀚𑀦𑁂𑀦𑁆𑀢𑀺. 𑀢𑁂𑀲𑀼 𑀧𑀺𑀬𑀫𑀺𑀢𑁆𑀢𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀅𑀢𑁆𑀢𑀦𑁄𑀧𑀦 𑀏𑀓𑀦𑁆𑀢𑀲𑀼𑀔𑀁𑀯𑀸 𑀏𑀓𑀦𑁆𑀢𑀲𑀼𑀔𑀫𑀕𑁆𑀕𑀁𑀯𑀸𑀢𑁂 𑀦𑀚𑀸𑀦𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀅𑀢𑁆𑀢𑀦𑁄 𑀲𑀼𑀔𑀯𑀟𑁆𑀠𑀺𑀬𑀸 𑀬𑀁 𑀬𑀁 𑀓𑀫𑁆𑀫𑀁 𑀆𑀬𑀽𑀳𑀦𑁆𑀢𑀺. 𑀢𑀁 𑀢𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀯𑀟𑁆𑀠𑀺𑀬𑀸𑀏𑀯 𑀲𑀫𑁆𑀧𑀚𑁆𑀚𑀢𑀺. 𑀓𑀺𑀁 𑀧𑀦 𑀏𑀓𑀦𑁆𑀢𑀲𑀼𑀔𑀁 𑀓𑁄𑀘 𑀏𑀓𑀦𑁆𑀢 𑀲𑀼𑀔𑀫𑀕𑁆𑀕𑁄𑀢𑀺. 𑀏𑀓𑀦𑁆𑀢𑀤𑀼𑀓𑁆𑀔𑀥𑀫𑁆𑀫𑀲𑁆𑀲 𑀅𑀪𑀸𑀯𑁄𑀏𑀯 𑀅𑀢𑁆𑀢𑀦𑁄 𑀏𑀓𑀦𑁆𑀢 𑀲𑀼𑀔𑀁𑀦𑀸𑀫. 𑀏𑀓𑀦𑁆𑀢𑀤𑀼𑀓𑁆𑀔𑀚𑀦𑀓𑀲𑁆𑀲 𑀧𑀳𑀸𑀦𑀫𑀕𑁆𑀕𑁄𑀏𑀯 𑀅𑀢𑁆𑀢𑀦𑁄 𑀏𑀓𑀦𑁆𑀢 𑀲𑀼𑀔𑀫𑀕𑁆𑀕𑁄𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀸𑀦𑀺 𑀘𑀢𑀼𑀲𑀘𑁆𑀘𑀧𑀤𑀸𑀦𑀺 𑀓𑀣𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

[𑁨𑁨𑁩] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀏𑀢𑁆𑀣 𑀏𑀢𑁂𑀦𑀸𑀢𑀺𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀢𑁂𑀦𑀸𑀢𑀺 𑀇𑀤𑀁 𑀦𑀬𑀼𑀚𑁆𑀚𑀢𑀺.

𑀦 𑀳𑀺 𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥 𑀓𑁆𑀭𑀺𑀬𑀸𑀲𑀸𑀥𑀦𑁂 𑀤𑀼𑀓𑁆𑀔𑁂𑀦 𑀲𑀳𑀓𑀸𑀭𑀻 𑀓𑀸𑀭𑀡𑀁 𑀳𑁄𑀢𑀻𑀢𑀺. 𑀲𑁂𑀲𑀘𑁂𑀢𑀲𑀺𑀓𑀸𑀢𑀺 𑀯𑁂𑀤𑀦𑀸 𑀲𑀜𑁆𑀜𑀸𑀳𑀺 𑀲𑁂𑀲𑀸 𑀧𑀜𑁆𑀜𑀸𑀲 𑀘𑁂𑀢𑀲𑀺𑀓𑀸. 𑀅𑀢𑀻𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥 𑀪𑀺𑀦𑁆𑀦𑀸𑀦𑀁 𑀅𑀚𑁆𑀛𑀢𑁆𑀢𑀸𑀤𑀺 𑀑𑀴𑀸𑀭𑀺𑀓𑀸𑀤𑀺 𑀳𑀻𑀦𑀸𑀤𑀺 𑀤𑀽𑀭𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑀪𑀺𑀦𑁆𑀦𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀯𑁄𑀳𑀸𑀭𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀢𑀸𑀤𑀺 𑀲𑁄 𑀪𑁂𑀤𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀪𑁂𑀤𑀸𑀪𑀸𑀯𑁂𑀦𑀸𑀢𑀺𑀆𑀤𑀺. 𑀢𑀜𑁆𑀳𑀺 𑀅𑀢𑀻𑀢𑀸𑀤𑀺𑀓𑁂 𑀢𑀺𑀯𑀺𑀥𑀪𑁂𑀤𑁂 𑀏𑀓𑀁𑀧𑀺 𑀦 𑀳𑁄𑀢𑀺. 𑀓𑀲𑁆𑀫𑀸. 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩 𑀥𑀫𑁆𑀫𑀢𑁆𑀢𑀸. 𑀢𑀜𑁆𑀳𑀺 𑀢𑁂𑀓𑀸𑀮𑀺𑀓𑀥𑀫𑁆𑀫𑀸𑀦𑀁 𑀔𑀬𑀯𑀺𑀭𑀸𑀕𑀦𑀺𑀭𑁄𑀥𑀪𑀽𑀢𑁄 𑀅𑀦𑀺𑀫𑀺𑀢𑁆𑀢 𑀥𑀫𑁆𑀫𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀇𑀤𑀁 𑀅𑀢𑀻𑀢𑁂 𑀅𑀲𑀼𑀓𑀩𑀼𑀤𑁆𑀥𑀓𑀸𑀮𑁂 𑀦𑀺𑀩𑁆𑀩𑀸𑀦𑀁. 𑀇𑀤𑀁 𑀅𑀦𑀸𑀕𑀢𑁂. 𑀇𑀤𑀁 𑀏𑀢𑀭𑀳𑀻𑀢𑀺 𑀏𑀯𑀁 𑀓𑀸𑀮𑀪𑁂𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀦𑀳𑁄𑀢𑀺. 𑀢𑀣𑀸 𑀤𑀺𑀲𑀸 𑀤𑁂𑀲𑀞𑀸𑀦𑀪𑁂𑀤𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀧𑀼𑀕𑁆𑀕𑀮𑀪𑁂𑀤𑁂𑀦 𑀘. 𑀓𑁂𑀯𑀮𑀁 𑀧𑀦 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀬𑀢𑁆𑀢𑀓𑀸𑀦𑀺 𑀅𑀦𑀢𑁆𑀣 𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑀲𑀺𑀤𑁆𑀥𑁂𑀳𑀺 𑀕𑀼𑀡𑀧𑀤𑁂𑀳𑀺𑀏𑀯 𑀢𑀁 𑀓𑀣𑁂 𑀢𑀩𑁆𑀩𑀦𑁆𑀢𑀺. 𑀤𑀼𑀓𑁂𑀲𑀼 𑀧𑀦 𑀅𑀚𑁆𑀛𑀢𑁆𑀢𑀤𑀼𑀓𑀁 𑀧𑀢𑁆𑀯𑀸 𑀢𑀁 𑀩𑀳𑀺𑀤𑁆𑀥𑀸𑀏𑀯 𑀳𑁄𑀢𑀺. 𑀦 𑀅𑀚𑁆𑀛𑀢𑁆𑀢𑀁. 𑀑𑀴𑀸𑀭𑀺𑀓𑀤𑀼𑀓𑀁 𑀧𑀢𑁆𑀯𑀸 𑀲𑀼𑀔𑀼𑀫𑀫𑁂𑀯 𑀳𑁄𑀢𑀺, 𑀦 𑀑𑀴𑀸𑀭𑀺𑀓𑀁. 𑀳𑀻𑀦𑀤𑀼𑀓𑀁 𑀧𑀢𑁆𑀯𑀸 𑀧𑀡𑀻𑀢𑀫𑁂𑀯 𑀳𑁄𑀢𑀺, 𑀦 𑀳𑀻𑀦𑀁. 𑀤𑀽𑀭𑁂 𑀤𑀼𑀓𑀁 𑀧𑀢𑁆𑀯𑀸 𑀤𑀽𑀭𑁂𑀏𑀯 𑀳𑁄𑀢𑀺, 𑀦 𑀲𑀦𑁆𑀢𑀺𑀓𑁂𑀢𑀺. 𑀔𑀦𑁆𑀥𑀲𑀗𑁆𑀕𑀳𑀦𑀺𑀲𑁆𑀲𑀝𑀦𑁆𑀢𑀺 𑀔𑀦𑁆𑀥𑀲𑀗𑁆𑀕𑀳𑀢𑁄 𑀯𑀺𑀫𑀼𑀢𑁆𑀢𑀁.

𑀤𑁆𑀯𑀸𑀭𑀸𑀮𑀫𑁆𑀩𑀡𑀪𑁂𑀤𑁂𑀦𑀸𑀢𑀺 𑀤𑁆𑀯𑀸𑀭𑀙𑀓𑁆𑀓 𑀆𑀭𑀫𑁆𑀫𑀡𑀙𑀓𑁆𑀓𑀸𑀦𑀁 𑀪𑁂𑀤𑁂𑀦. 𑀆𑀬𑀢𑀦𑀸𑀦𑀺 𑀤𑁆𑀯𑀸𑀤𑀲 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀤𑁆𑀯𑀸𑀭𑀙𑀓𑁆𑀓𑀁 𑀥𑀫𑁆𑀫𑀸𑀭𑀫𑁆𑀫𑀡𑀁𑀏𑀯𑀸𑀢𑀺 𑀲𑁂𑀲𑀥𑀫𑁆𑀫𑀸𑀮𑀫𑁆𑀩𑀡𑀁 𑀲𑀦𑁆𑀥𑀸𑀬 𑀆𑀭𑀫𑁆𑀫𑀡𑀙𑀓𑁆𑀓𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀸𑀭𑀸.𑀮. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀙𑀦𑁆𑀦𑀁 𑀆𑀮𑀫𑁆𑀩𑀡𑀸𑀦𑀁 𑀢𑁂𑀲𑀼 𑀤𑁆𑀯𑀸𑀭𑀸𑀮𑀫𑁆𑀩𑀡𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀜𑁆𑀜𑀸𑀡𑀸𑀦𑀜𑁆𑀘 𑀓𑀫𑁂𑀦 𑀥𑀸𑀢𑀼𑀬𑁄 𑀅𑀝𑁆𑀞𑀸𑀭𑀲 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀧𑀺 𑀤𑁆𑀯𑀸𑀭𑀙𑀓𑁆𑀓𑁂 𑀫𑀦𑁄𑀤𑁆𑀯𑀸𑀭𑀁 𑀯𑀺𑀜𑁆𑀜𑀸𑀡𑁂𑀓𑀤𑁂𑀲𑀫𑁂𑀯 𑀳𑁄𑀢𑀺. 𑀤𑁆𑀯𑀸𑀭𑀙𑀓𑁆𑀓𑀁 𑀯𑀺𑀜𑁆𑀜𑀸𑀡𑀲𑀢𑁆𑀢𑀓𑀜𑁆𑀘 𑀥𑀫𑁆𑀫𑀸 𑀮𑀫𑁆𑀩𑀡𑁂𑀓𑀤𑁂𑀲𑀫𑁂𑀯𑀸𑀢𑀺. 𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑁄 𑀫𑀕𑁆𑀕𑁄𑀦𑀸𑀫 𑀫𑀢𑁄𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀬𑀼𑀢𑁆𑀢𑀸 𑀏𑀓𑀽𑀦𑀢𑀺𑀁𑀲𑀥𑀫𑁆𑀫𑀸 𑀨𑀮𑀪𑀽𑀢𑀸𑀘 𑀲𑀢𑁆𑀢𑀢𑀺𑀁𑀲 𑀥𑀫𑁆𑀫𑀸 𑀘𑀢𑀼𑀲𑀘𑁆𑀘 𑀯𑀺𑀦𑀺𑀲𑁆𑀲𑀝𑀸 𑀘𑀢𑀽𑀳𑀺 𑀅𑀭𑀺𑀬𑀲𑀘𑁆𑀘𑁂𑀳𑀺 𑀯𑀺𑀦𑀺𑀲𑁆𑀲𑀝𑀸 𑀯𑀺𑀫𑀼𑀢𑁆𑀢𑀸. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀲𑀫𑀼𑀘𑁆𑀘𑀬 𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.