𑀧𑀘𑁆𑀘𑀬 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁬𑁬. 𑀏𑀯𑀁 𑀲𑀢𑁆𑀢𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀧𑀣𑀫𑀲𑁆𑀲 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤 𑀜𑀸𑀡𑀲𑁆𑀲 𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀢𑀻𑀬𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀜𑀸𑀡𑀲𑁆𑀲 𑀯𑀺𑀥𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂𑀲𑀁𑀲𑀗𑁆𑀔𑀢𑀥𑀫𑁆𑀫𑀸𑀦𑀦𑁆𑀢𑀺𑀆𑀤𑀺 𑀫𑀸𑀳. 𑀇𑀤𑀸𑀦𑀺 𑀬𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀪𑀽𑀢𑀸 𑀬𑁂𑀥𑀫𑁆𑀫𑀸 𑀬𑀣𑀸 𑀬𑁂𑀳𑀺 𑀳𑁂𑀢𑀸𑀤𑀻𑀳𑀺 𑀧𑀘𑁆𑀘𑀬𑀸𑀓𑀸𑀭𑁂𑀳𑀺 𑀧𑀘𑁆𑀘𑀬𑀸 𑀉𑀧𑀓𑀸𑀭𑀓𑀸 𑀳𑁄𑀦𑁆𑀢𑀺. 𑀢𑀁 𑀯𑀺𑀪𑀸𑀕𑀁 𑀢𑁂𑀲𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀁 𑀯𑀺𑀪𑀸𑀕𑀜𑁆𑀘 𑀢𑁂𑀲𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀯𑀺𑀪𑀸𑀕𑀜𑁆𑀘 𑀢𑁂𑀲𑀁𑀧𑀘𑁆𑀘𑀬𑀸𑀓𑀸𑀭𑀸𑀦𑀁 𑀇𑀳 𑀯𑀺𑀪𑀸𑀕𑀜𑁆𑀘 𑀇𑀫𑀲𑁆𑀫𑀺𑀁 𑀯𑀼𑀘𑁆𑀘𑀫𑀸𑀦𑁂 𑀧𑀘𑁆𑀘𑀬𑀲𑀗𑁆𑀕𑀳𑁂 𑀬𑀣𑀸𑀭𑀳𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸.

[𑁨𑁨𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀘𑁆𑀘𑀬𑁂 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀁 𑀯𑀺𑀪𑀸𑀕𑀦𑁆𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺.

[𑁨𑁨𑁫] 𑀬𑀜𑁆𑀘 𑀢𑀢𑁆𑀣

‘‘𑀇𑀳 𑀇𑀫𑀲𑁆𑀫𑀺𑀁 𑀲𑀫𑀼𑀘𑁆𑀘𑀬 𑀲𑀗𑁆𑀕𑀳𑀸𑀦𑀦𑁆𑀢𑀭𑁂 𑀞𑀸𑀦𑁂’’𑀢𑀺 𑀇𑀳 𑀲𑀤𑁆𑀤𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀦𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺.

𑀏𑀢𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀲𑀢𑀺 𑀇𑀤𑀸𑀦𑀺 𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑁄 𑀳𑁄𑀢𑀻𑀢𑀺, 𑀧𑀝𑀺𑀘𑁆𑀘 𑀨𑀮𑀁 𑀲𑀫𑀼𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀢𑀢𑁆𑀣 𑀧𑀝𑀺𑀘𑁆𑀘𑀸𑀢𑀺 𑀅𑀯𑀺𑀦𑀸, 𑀅𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀥𑀫𑁆𑀫𑁄𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀅𑀣𑀯𑀸, 𑀲𑀫𑀼𑀧𑁆𑀧𑀚𑁆𑀚𑀦𑀁 𑀲𑀫𑀼𑀧𑁆𑀧𑀸𑀤𑁄. 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀲𑀳𑁂𑀯 𑀓𑀮𑀸𑀧𑀯𑀲𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀲𑀓𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀢𑁂𑀦 𑀅𑀯𑀺𑀦𑀸𑀪𑀸𑀯𑀻𑀳𑀼𑀢𑁆𑀯𑀸 𑀲𑀫𑀼𑀧𑁆𑀧𑀸𑀤𑁄 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁄, 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀁 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀲𑀗𑁆𑀔𑀸𑀢𑀁 𑀲𑀩𑁆𑀩𑀲𑀗𑁆𑀔𑀢𑀲𑀸𑀥𑀸𑀭𑀡𑀁 𑀏𑀓𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀬𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺𑀘 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀘 𑀇𑀤𑀧𑁆𑀧𑀘𑁆𑀘𑀬 𑀢𑀸𑀢𑀺 𑀅𑀬𑀁 𑀇𑀫𑀲𑁆𑀲 𑀧𑀘𑁆𑀘𑀬𑁄 𑀅𑀬𑀁 𑀇𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀅𑀬𑀁 𑀧𑀘𑁆𑀘𑀬𑁄 𑀏𑀢𑁂𑀲𑀦𑁆𑀢𑀺 𑀇𑀤𑀧𑁆𑀧𑀘𑁆𑀘𑀬𑀸. 𑀲𑀗𑁆𑀔𑀢𑀥𑀫𑁆𑀫𑀸. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀪𑀸𑀯𑁄 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀬𑀣𑀸𑀯𑀼𑀢𑁆𑀢 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀏𑀯𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀝𑀺𑀘𑁆𑀘 𑀨𑀮𑀁 𑀲𑀫𑀼𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀯𑀺𑀚𑁆𑀚𑀸𑀤𑀺𑀓𑁄 𑀧𑀘𑁆𑀘𑀬𑀥𑀫𑁆𑀫𑁄𑀢𑀺𑀘 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸. 𑀇𑀤𑀧𑁆𑀧𑀘𑁆𑀘𑀬𑀸𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺𑀘. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 𑀲𑀫𑀼𑀧𑁆𑀧𑀚𑁆𑀚𑀦𑀁 𑀲𑀫𑀼𑀧𑁆𑀧𑀸𑀤𑁄𑀢𑀺 𑀅𑀬𑀫𑀢𑁆𑀣𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀧𑀸𑀴𑀺𑀬𑀁 𑀧𑀦 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀣𑀸𑀳 𑁋

𑀓𑀢𑀫𑁄𑀘 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀚𑀸𑀢𑀺𑀧𑀘𑁆𑀘𑀬𑀸 𑀪𑀺𑀓𑁆𑀔𑀯𑁂 𑀚𑀭𑀸𑀫𑀭𑀡𑀁, 𑀉𑀧𑁆𑀧𑀸𑀤𑀸𑀯𑀸 𑀢𑀣𑀸𑀕𑀢𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀯𑀸 𑀢𑀣𑀸𑀕𑀢𑀸𑀦𑀁 𑀞𑀺𑀢𑀸𑀯 𑀲𑀸 𑀥𑀸𑀢𑀼, 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺.𑀮. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀸𑀤𑀸𑀯𑀸.𑀮. 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀢𑁆𑀭 𑀢𑀣𑀢𑀸 𑀅𑀯𑀺𑀢𑀣𑀢𑀸 𑀅𑀦𑀜𑁆𑀜𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺.

𑀏𑀢𑁆𑀣 𑀳𑀺 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺𑀆𑀤𑀺𑀦𑀸 𑀢𑀢𑁆𑀭 𑀢𑀣𑀢𑀸 𑀅𑀯𑀺𑀢𑀣𑀢𑀸𑀢𑀺𑀆𑀤𑀺𑀦𑀸𑀘 𑀬𑀣𑀸𑀯𑀼𑀢𑁆𑀢𑀁 𑀇𑀤𑀧𑁆𑀧𑀘𑁆𑀘𑀬𑀢𑀸 𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜 𑀮𑀓𑁆𑀔𑀡𑀫𑁂𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀪𑀸𑀯𑀲𑀸𑀥𑀦𑁂 𑀓𑀢𑁂 𑀲𑀢𑀺 𑀧𑀝𑀺𑀘𑁆𑀘𑀲𑀤𑁆𑀤𑁂𑀦 𑀲𑀳 𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑀲𑁆𑀲 𑀅𑀲𑀫𑀸𑀦𑀓𑀢𑁆𑀢𑀼𑀢𑀸𑀲𑀗𑁆𑀔𑀸𑀢𑁄 𑀩𑁆𑀬𑀜𑁆𑀚𑀦𑀬𑀼𑀢𑁆𑀢𑀺𑀯𑀺𑀭𑁄𑀥𑁄 𑀅𑀢𑁆𑀣𑀺. 𑀬𑁄 𑀧𑀝𑀺𑀘𑁆𑀘 𑀓𑁆𑀭𑀺𑀬𑀸𑀬 𑀓𑀢𑁆𑀢𑀸, 𑀢𑀲𑁆𑀲𑁂𑀯 𑀲𑀫𑀼𑀧𑁆𑀧𑀸𑀤𑀓𑁆𑀭𑀺𑀬𑀸𑀬𑀧𑀺 𑀓𑀢𑁆𑀢𑀼𑀢𑀸 𑀲𑀫𑁆𑀪𑀯𑀢𑁄. 𑀦 𑀳𑀺 𑀓𑁆𑀭𑀺𑀬𑀸𑀦𑀸𑀫 𑀓𑀢𑁆𑀢𑀼𑀭𑀳𑀺𑀢𑀸𑀲𑀫𑁆𑀪𑀯𑀢𑀻𑀢𑀺. 𑀲𑀗𑁆𑀔𑀢𑀥𑀫𑁆𑀫𑁂𑀲𑀼𑀘 𑀕𑀫𑁆𑀪𑀻𑀭𑁂𑀲𑀼 𑀲𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀁 𑀯𑀺𑀬 𑀇𑀤𑀁𑀧𑀺 𑀲𑀗𑁆𑀔𑀢𑀮𑀓𑁆𑀔𑀡𑀁 𑀕𑀫𑁆𑀪𑀻𑀭𑀫𑁂𑀯 𑀳𑁄𑀢𑀻𑀢𑀺 𑀦𑀬𑀺𑀥 𑀕𑀫𑁆𑀪𑀻𑀭𑀯𑀘𑀦𑀯𑀺𑀭𑁄𑀥𑁄 𑀲𑀫𑁆𑀪𑀯𑀢𑀺. 𑀅𑀣𑀔𑁄 𑀲𑀗𑁆𑀔𑀢𑀥𑀫𑁆𑀫𑀢𑁄 𑀲𑀗𑁆𑀔𑀢𑀮𑀓𑁆𑀔𑀡𑀫𑁂𑀯 𑀕𑀫𑁆𑀪𑀻𑀭𑀢𑀭𑀁 𑀳𑁄𑀢𑀻𑀢𑀺. 𑀢𑀸𑀤𑀺𑀲𑁂𑀦 𑀧𑀦 𑀲𑀸𑀫𑀜𑁆𑀜𑀮𑀓𑁆𑀔𑀡𑁂𑀦 𑀲𑀫𑁆𑀧𑀦𑁆𑀦𑀸 𑀬𑀣𑀸𑀯𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀤𑀬𑁄 𑀲𑀗𑁆𑀔𑀢𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀦𑀸𑀫. 𑀬𑀣𑀸𑀳-𑀓𑀢𑀫𑁂𑀘 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀥𑀫𑁆𑀫𑀸 𑀚𑀭𑀸𑀫𑀭𑀡𑀁 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁.𑀮. 𑀅𑀯𑀺𑀚𑁆𑀚𑀸 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸𑀢𑀺. 𑀇𑀢𑀺 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀪𑀽𑀢𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀸 𑀲𑀢𑁆𑀢 𑀯𑀼𑀢𑁆𑀢𑀺𑀢𑀸𑀲𑀗𑁆𑀔𑀸𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀘 𑀲𑁄 𑀦𑀻𑀬𑀢𑀺 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀓𑀢𑁆𑀯𑀸 𑀦𑀬𑁄𑀘𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄. 𑀧𑀞𑀧𑁂𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 𑀦𑀸𑀦𑀸𑀧𑀓𑀸𑀭𑁂𑀳𑀺 𑀧𑀘𑁆𑀘𑀬𑀪𑁂𑀤𑁂𑀳𑀺 𑀧𑀯𑀢𑁆𑀢𑁂𑀢𑀺 𑀤𑁂𑀲𑁂𑀢𑀺 𑀏𑀢𑁆𑀣𑀸𑀢𑀺 𑀧𑀝𑁆𑀞𑀸𑀦𑀁. 𑀫𑀳𑀸𑀧𑀓𑀭𑀡𑀁. 𑀧𑀝𑁆𑀞𑀸𑀦𑁂 𑀤𑁂𑀲𑀺𑀢𑁄 𑀦𑀬𑁄 𑀧𑀝𑁆𑀞𑀸𑀦𑀦𑀬𑁄.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀘𑁆𑀘𑀬𑀥𑀫𑁆𑀫𑁂 𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑀺 𑀢𑁂 𑀢𑁂 𑀪𑀯𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀢𑀩𑁆𑀪𑀸𑀯𑀪𑀸𑀯𑀺𑀦𑁄. 𑀲𑀗𑁆𑀔𑀢𑀥𑀫𑁆𑀫𑀸. 𑀢𑁂𑀲𑀁 𑀪𑀸𑀯𑁄 𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑁄, 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺. 𑀇𑀫𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀲𑀗𑁆𑀔𑀢𑀥𑀫𑁆𑀫𑀦𑀺𑀬𑀸𑀫𑁄. 𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑁄𑀏𑀯 𑀆𑀓𑀸𑀭𑁄 𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑀸𑀓𑀸𑀭𑁄. 𑀲𑁄 𑀏𑀯 𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑀸𑀓𑀸𑀭𑀫𑀢𑁆𑀢𑀁. 𑀫𑀢𑁆𑀢𑀲𑀤𑁆𑀤𑁂𑀦 𑀳𑁂𑀢𑀸𑀤𑀺𑀧𑀘𑁆𑀘𑀬 𑀲𑀢𑁆𑀢𑀺𑀦𑀺𑀬𑀫𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀉𑀧𑀮𑀓𑁆𑀔𑀺𑀢𑁄 𑀦𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀦𑀬𑁄. 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀺𑀁 𑀆𑀭𑀩𑁆𑀪𑀸𑀢𑀺 𑀏𑀢𑁆𑀣 𑀳𑁂𑀢𑀼 𑀆𑀭𑀫𑁆𑀫𑀡𑀸 𑀤𑀺𑀯𑀲𑁂𑀦 𑀢𑀣𑀸𑀢𑀣𑀸 𑀉𑀧𑀓𑀸𑀭𑀓𑀢𑀸𑀲𑀗𑁆𑀔𑀸𑀢𑁄 𑀧𑀘𑁆𑀘𑀬𑀲𑀢𑁆𑀢𑀺 𑀯𑀺𑀲𑁂𑀲𑁄 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀺𑀦𑀸𑀫. 𑀲𑁄 𑀳𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀯𑀺𑀬 𑀧𑀘𑁆𑀘𑀬𑀥𑀫𑁆𑀫𑀼𑀤𑁆𑀥𑀸𑀭𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀳𑁂𑀢𑀼𑀧𑀘𑁆𑀘𑀬𑁄 𑀆𑀭𑀫𑁆𑀫𑀡𑀧𑀘𑁆𑀘𑀳𑁄𑀢𑀺𑀆𑀤𑀺𑀦𑀸 𑀧𑀘𑁆𑀘𑀬𑀲𑀢𑁆𑀢𑀺 𑀯𑀺𑀲𑁂𑀲𑀼𑀤𑁆𑀥𑀸𑀭𑀯𑀲𑁂𑀦 𑀆𑀳𑀘𑁆𑀘 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀆𑀳𑀘𑁆𑀘𑀧𑀘𑁆𑀘𑀬𑀝𑁆𑀞𑀺𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀪𑀺𑀲𑀗𑁆𑀔𑀭𑀡 𑀓𑀺𑀘𑁆𑀘𑀁 𑀧𑀢𑁆𑀯𑀸 𑀅𑀦𑁄𑀲𑀓𑁆𑀓𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀆𑀭𑀩𑁆𑀪𑀸𑀢𑀺 𑀧𑀝𑀺𑀘𑁆𑀘. 𑀯𑀼𑀘𑁆𑀘𑀢𑀻𑀢𑀺 𑀪𑀕𑀯𑀢𑀸 𑀓𑀣𑀻𑀬𑀢𑀺.

𑀉𑀪𑀬𑀁 𑀧𑀦 𑀯𑁄𑀫𑀺𑀲𑁆𑀲𑀺𑀢𑁆𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸𑀢𑀺 𑀇𑀤𑀁 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀁 𑀧𑀧𑀜𑁆𑀘𑁂𑀦𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀳𑀺 𑀢𑀁 𑀧𑀧𑀜𑁆𑀘𑀬𑀦𑁆𑀢𑀸 𑀧𑀝𑁆𑀞𑀸𑀦 𑀦𑀬𑀁𑀧𑀺 𑀆𑀳𑀭𑀺𑀢𑁆𑀯𑀸 𑀧𑀧𑀜𑁆𑀘𑁂𑀦𑁆𑀢𑀻𑀢𑀺. 𑀬𑀣𑀸 𑀲𑀽𑀭𑀺𑀬𑁄 𑀉𑀤𑀬𑀦𑁆𑀢𑁄 𑀅𑀦𑁆𑀥𑀓𑀸𑀭𑁂 𑀯𑀺𑀥𑀫𑁂𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑁂 𑀓𑀭𑁄𑀢𑀺. 𑀏𑀯𑀫𑁂𑀯𑀁 𑀉𑀧𑁆𑀧𑀦𑁆𑀦𑀁 𑀘𑀢𑀼𑀲𑀘𑁆𑀘𑀜𑀸𑀡𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀘𑀢𑀼𑀲𑀘𑁆𑀘 𑀥𑀫𑁆𑀫𑀁 𑀯𑀺𑀤𑀢𑀺 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀯𑀺𑀚𑁆𑀚𑀸. 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀫𑁄𑀳𑁄 𑀅𑀯𑀺𑀚𑁆𑀚𑀸𑀦𑀸𑀫. 𑀲𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀥𑀫𑁆𑀫𑁂𑀲𑀼 𑀅𑀜𑁆𑀜𑀸𑀡𑀅𑀤𑀲𑁆𑀲𑀦 𑀲𑀗𑁆𑀔𑀸𑀢𑀁 𑀅𑀦𑁆𑀥𑀓𑀸𑀭𑀁 𑀚𑀦𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀘𑁆𑀘 𑀨𑀮𑀁 𑀏𑀢𑀺 𑀆𑀕𑀘𑁆𑀙𑀢𑀺 𑀏𑀢𑀲𑁆𑀫𑀸 𑀏𑀢𑁂𑀦𑀸𑀢𑀺 𑀯𑀸 𑀧𑀘𑁆𑀘𑀬𑁄. 𑀅𑀯𑀺𑀚𑁆𑀚𑀸𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀗𑁆𑀔𑀢𑀁 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀻𑀢𑀺 𑀲𑀗𑁆𑀔𑀸𑀭𑀸. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀯𑀺𑀚𑀸𑀦𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀜𑁆𑀜𑀸𑀡𑀁. 𑀆𑀭𑀫𑁆𑀫𑀡𑁂 𑀦𑀫𑀢𑀻𑀢𑀺 𑀦𑀸𑀫𑀁. 𑀭𑀼𑀧𑁆𑀧𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀻𑀢𑀺 𑀭𑀽𑀧𑀁. 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀆𑀬𑀢𑀦𑀁. 𑀤𑁂𑀯𑀸𑀦𑀁 𑀤𑁂𑀯𑀸𑀬𑀢𑀦𑀫𑀺𑀯. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀨𑀼𑀲𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀯𑀸 𑀨𑀲𑁆𑀲𑁄. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀯𑁂𑀤𑀬𑀦𑁆𑀢𑀺 𑀧𑀘𑁆𑀘𑀦𑀼𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺𑀯𑀸 𑀯𑁂𑀤𑀦𑀸. 𑀢𑀲𑁆𑀲𑀢𑀺 𑀧𑀭𑀺𑀢𑀲𑁆𑀲𑀢𑀻𑀢𑀺 𑀢𑀡𑁆𑀳𑀸. 𑀦𑀺𑀘𑁆𑀘𑀧𑀺𑀧𑀸𑀲𑀯𑀲𑁂𑀦 𑀆𑀭𑀫𑁆𑀫𑀡𑀳𑁂𑀢𑀼 𑀦𑀺𑀘𑁆𑀘𑀁 𑀘𑀜𑁆𑀘𑀮𑀢𑀺 𑀧𑀢𑁆𑀣𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀦𑁆𑀢𑀺 𑀧𑀭𑀺𑀢𑀲𑁆𑀲𑀦𑁆𑀢𑀺 𑀘𑀜𑁆𑀘𑀮𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺 𑀯𑀸 𑀢𑀡𑁆𑀳𑀸. 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀁. 𑀅𑀫𑀼𑀜𑁆𑀘𑀕𑀸𑀳𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀺𑀬𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀯𑀸 𑀉𑀧𑀸𑀤𑀸𑀦𑀁.

𑀪𑀯𑀢𑀺 𑀯𑀟𑁆𑀠𑀢𑀻𑀢𑀺 𑀪𑀯𑁄. 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀏𑀢𑁂𑀦𑀸𑀢𑀺 𑀯𑀸 𑀪𑀯𑁄. 𑀚𑀦𑀦𑀁 𑀚𑀸𑀢𑀺. 𑀚𑀸𑀬𑀦𑁆𑀢𑀺 𑀧𑀸𑀢𑀼𑀪𑀯𑀦𑁆𑀢𑀺 𑀲𑀗𑁆𑀔𑀢 𑀥𑀫𑁆𑀫𑀸 𑀏𑀢𑀸𑀬𑀸𑀢𑀺 𑀯𑀸 𑀚𑀸𑀢𑀺. 𑀚𑀻𑀭𑀡𑀁 𑀚𑀭𑀸. 𑀚𑀻𑀭𑀦𑁆𑀢𑀺 𑀚𑀺𑀡𑁆𑀡𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀚𑀭𑀸. 𑀲𑁄𑀘𑀦𑀁 𑀲𑁄𑀓𑁄. 𑀲𑁄𑀘𑀦𑁆𑀢𑀺 𑀘𑀺𑀢𑁆𑀢𑀧𑀭𑀺𑀴𑀸𑀳𑀁 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀲𑁄𑀓𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄. 𑀢𑀁 𑀢𑀁 𑀧𑀯𑀢𑁆𑀢𑀺𑀁 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀯𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀧𑀭𑀺𑀤𑁂𑀯𑁄. 𑀔𑀫𑀺𑀢𑀼𑀁 𑀲𑀳𑀺𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀤𑀼𑀓𑁆𑀔𑀁. 𑀤𑀼𑀫𑁆𑀫𑀦𑀲𑁆𑀲 𑀯𑀺𑀭𑀽𑀧𑀘𑀺𑀢𑁆𑀢𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀪𑀼𑀲𑁄 𑀆𑀬𑀸𑀲𑀦𑀁 𑀉𑀧𑀸𑀬𑀸𑀲𑁄. 𑀆𑀬𑀸𑀲𑀦𑀦𑁆𑀢𑀺 𑀅𑀦𑀲𑁆𑀲𑀸𑀲𑀦𑀁. 𑀯𑀺𑀲𑀻𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦. 𑀅𑀯𑀺𑀚𑁆𑀚𑀸𑀤𑀺 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀧𑀭𑀁𑀧𑀭𑀯𑀺𑀥𑀺𑀦𑀸 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀲𑁆𑀲𑀓𑁂𑀯𑀮𑀲𑁆𑀲𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀏𑀢𑀲𑁆𑀲 𑀲𑀓𑀮𑀲𑁆𑀲 𑀤𑀼𑀓𑁆𑀔𑀭𑀸𑀲𑀺𑀲𑁆𑀲 𑀓𑁂𑀦𑀘𑀺 𑀲𑀼𑀔𑁂𑀦 𑀅𑀲𑀁𑀫𑀺𑀲𑁆𑀲𑀲𑁆𑀲 𑀯𑀸 𑀤𑀼𑀓𑁆𑀔𑀭𑀸𑀲𑀺𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀘 𑀤𑀼𑀯𑀺𑀥𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁄 𑀅𑀪𑀺𑀥𑀫𑁆𑀫𑀦𑀬𑁄𑀢𑀺. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦 𑀢𑀸𑀯 𑀅𑀯𑀺𑀚𑁆𑀚𑀸 𑀘𑀢𑀼𑀩𑁆𑀩𑀺𑀥𑀸 𑀤𑀼𑀓𑁆𑀔𑀧𑀝𑀺𑀘𑁆𑀙𑀸𑀤𑀺𑀓𑀸 𑀲𑀫𑀼𑀤𑀬𑀧𑀝𑀺𑀘𑁆𑀙𑀸𑀤𑀺𑀓𑀸 𑀦𑀺𑀭𑁄𑀥𑀧𑀝𑀺𑀘𑁆𑀙𑀸𑀤𑀺𑀓𑀸 𑀫𑀕𑁆𑀕𑀧𑀝𑀺𑀘𑁆𑀙𑀸𑀤𑀺𑀓𑀸𑀘𑀸𑀢𑀺. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀧𑀼𑀩𑁆𑀩𑀦𑁆𑀢𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀧𑀭𑀦𑁆𑀢 𑀧𑀝𑀺𑀘𑁆𑀙𑀸𑀤𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀧𑀝𑀺𑀘𑁆𑀙𑀸𑀤𑀺𑀓𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀘𑀢𑀽𑀳𑀺 𑀲𑀤𑁆𑀥𑀺𑀁 𑀅𑀝𑁆𑀞 𑀯𑀺𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀔𑀸𑀭𑀸 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦 𑀲𑀸𑀲𑀯𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀆𑀦𑁂𑀜𑁆𑀚𑀸 𑀪𑀺𑀲𑀗𑁆𑀔𑀸𑀭𑁄𑀢𑀺 𑀧𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀅𑀧𑀼𑀜𑁆𑀜𑀸𑀢𑀺 𑀲𑀗𑁆𑀔𑀸𑀭𑁄𑀦𑀸𑀫. 𑀓𑀸𑀫𑀭𑀽𑀧 𑀓𑀼𑀲𑀮𑀘𑁂𑀢𑀦𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀦𑀸𑀫. 𑀅𑀭𑀽𑀧𑀓𑀼𑀲𑀮𑀘𑁂𑀢𑀦𑀸 𑀆𑀦𑁂𑀜𑁆𑀚𑀸𑀢𑀺𑀲𑀗𑁆𑀔𑀸𑀭𑁄𑀦𑀸𑀫. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀲𑀩𑁆𑀩𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑀽𑀢𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀲𑀗𑁆𑀔𑀸𑀭𑀸𑀦𑀸𑀫. 𑀓𑀺𑀭𑀺𑀬𑀘𑁂𑀢𑀦𑀸 𑀧𑀦 𑀲𑀩𑁆𑀩𑀸𑀧𑀺 𑀯𑀺𑀪𑀗𑁆𑀕𑁂 𑀦𑀕𑀳𑀺𑀢𑀸. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀧𑀦 𑀬𑀲𑁆𑀫𑀸 𑀦𑁂𑀯 𑀅𑀯𑀺𑀚𑁆𑀚𑀸 𑀦 𑀓𑀼𑀲𑀮𑀸 𑀓𑀼𑀲𑀮𑀫𑀽𑀮𑀸𑀦𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀁 𑀮𑀪𑀦𑁆𑀢𑀺. 𑀢𑀲𑁆𑀫𑀸 𑀓𑀺𑀭𑀺𑀬𑀯𑀲𑁂𑀦 𑀧𑀘𑁆𑀘𑀬𑀸𑀓𑀸𑀭𑁄 𑀦𑀯𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀘 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸 𑀦𑀺𑀘 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀓𑀺𑀭𑀺𑀬𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀬𑀁 𑀦𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀬𑀼𑀢𑁆𑀢𑁂𑀧𑀺 𑀬𑀢𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀸 𑀧𑀳𑀻𑀦𑀸 𑀳𑁄𑀢𑀺. 𑀯𑀺𑀚𑁆𑀚𑀸𑀉𑀧𑁆𑀧𑀦𑁆𑀦𑀸. 𑀲𑁄 𑀅𑀯𑀺𑀚𑁆𑀚𑀸 𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀦𑁂𑀯 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀦 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁. 𑀦 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀧𑀘𑁆𑀘𑀬𑀯𑀲𑁂𑀦 𑀧𑀦 𑀢𑁂𑀲𑀁𑀧𑀺 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁄 𑀅𑀯𑀸𑀭𑀺𑀢𑁄𑀬𑁂𑀯. 𑀦𑀳𑀺 𑀓𑁄𑀘𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀭𑀳𑀺𑀢𑁄 𑀲𑀗𑁆𑀔𑀢𑀥𑀫𑁆𑀫𑁄𑀦𑀸𑀫 𑀅𑀢𑁆𑀣𑀻𑀢𑀺. 𑀏𑀲 𑀦𑀬𑁄 𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀻𑀢𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀩𑀸𑀢𑁆𑀢𑀺𑀁𑀲𑀯𑀺𑀥𑀁 𑀮𑁄𑀓𑀺𑀬𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀓𑀺𑀭𑀺𑀬𑀘𑀺𑀢𑁆𑀢𑀯𑀚𑁆𑀚𑀺𑀢𑀁 𑀏𑀓𑀽𑀦𑀲𑀢𑁆𑀢𑀢𑀺𑀯𑀺𑀥𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀜𑁆𑀜𑀸𑀡𑀁. 𑀦𑀸𑀫𑀭𑀽𑀧𑀦𑁆𑀢𑀺 𑀮𑁄𑀓𑀺𑀬 𑀯𑀺𑀜𑁆𑀜𑀸𑀡 𑀲𑀳𑀚𑀸𑀢𑀁 𑀯𑁂𑀤𑀦𑀸𑀤𑀺𑀔𑀦𑁆𑀥𑀢𑁆𑀢𑀬𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀁 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢𑀚 𑀭𑀽𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀲𑀩𑁆𑀩𑀁 𑀓𑀼𑀲𑀮𑀸𑀓𑀼𑀲𑀮 𑀯𑀺𑀧𑀸𑀓𑀲𑀫𑁆𑀧𑀬𑀼𑀢𑁆𑀢𑀁 𑀔𑀦𑁆𑀥𑀢𑁆𑀢𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀭𑀽𑀧𑀜𑁆𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀮𑀤𑁆𑀥𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀁 𑀲𑀩𑁆𑀩𑀁𑀧𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀕𑀳𑀺𑀢𑀫𑁂𑀯.

[𑁨𑁨𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀢𑀤𑀼𑀪𑀬𑀁𑀧𑀺 𑀇𑀥 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀳𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀧𑀧𑀦𑁆𑀦𑀁.

𑀲𑀴𑀸𑀬𑀢𑀦𑀦𑁆𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀏𑀯 𑀲𑀩𑁆𑀩𑀢𑁆𑀣 𑀧𑀸𑀴𑀺𑀬𑀁 𑀯𑀺𑀪𑀢𑁆𑀢𑀸𑀦𑀺. 𑀏𑀓𑀘𑁆𑀘𑁂 𑀧𑀦 𑀆𑀘𑀭𑀺𑀬𑀸 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀨𑀲𑁆𑀲𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑀸𑀦𑀺𑀧𑀺 𑀇𑀥 𑀕𑀡𑁆𑀳𑀦𑁆𑀢𑀺. 𑀢𑀁𑀧𑀺 𑀦𑀺𑀤𑀸𑀦𑀯𑀕𑁆𑀕 𑀧𑀸𑀴𑀺𑀬𑀸 𑀲𑀫𑁂𑀢𑀺𑀬𑁂𑀯. 𑀬𑀣𑀸𑀳 𑁋

𑀓𑀢𑀫𑁄𑀘 𑀪𑀺𑀓𑁆𑀔𑀯𑁂 𑀮𑁄𑀓𑀲𑁆𑀲 𑀲𑀫𑀼𑀤𑀬𑁄. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄. 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸. 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸.𑀮. 𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀬𑀁 𑀮𑁄𑀓𑀲𑁆𑀲 𑀲𑀫𑀼𑀤𑀬𑁄. 𑀲𑁄𑀢𑀜𑁆𑀘.𑀮. 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄.𑀮. 𑀮𑁄𑀓𑀲𑁆𑀲 𑀲𑀫𑀼𑀤𑀬𑁄𑀢𑀺.

𑀨𑀲𑁆𑀲𑀯𑁂𑀤𑀦𑀸𑀤𑀬𑁄𑀧𑀺 𑀦𑀬𑀤𑁆𑀯𑀬𑁂 𑀢𑀁 𑀢𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀧𑀸𑀓𑀝𑀸𑀦𑀺. 𑀪𑀯𑁄 𑀤𑀼𑀯𑀺𑀥𑁄 𑀓𑀫𑁆𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄𑀘. 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀪𑀽𑀢𑀸 𑀘𑁂𑀢𑀦𑀸𑀘. 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀅𑀦𑀪𑀺𑀚𑁆𑀛𑀸𑀤𑀬𑁄𑀘 𑀓𑀫𑁆𑀫𑀪𑀯𑁄. 𑀬𑀣𑀸𑀳-𑀲𑀩𑁆𑀩𑀁𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀧𑀦 𑀲𑀩𑁆𑀩𑁂𑀧𑀺 𑀮𑁄𑀓𑀺𑀬𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀲𑀩𑁆𑀩𑀸𑀦𑀺𑀘 𑀓𑀫𑁆𑀫𑀚𑀭𑀽𑀧𑀸𑀦𑀺 𑀉𑀧𑀧𑀢𑁆𑀢𑀺𑀪𑀯𑁄 𑀲𑀼𑀢𑁆𑀢𑀦𑁆𑀢𑀺𑀓𑀦𑀬𑁂𑀦. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀮𑁄𑀓𑀼𑀢𑁆𑀢𑀭 𑀔𑀦𑁆𑀥𑀸𑀧𑀺 𑀯𑀺𑀪𑀗𑁆𑀕𑁂 𑀆𑀕𑀢𑀸𑀏𑀯. 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀲𑀩𑁆𑀩𑁂𑀲𑀁 𑀲𑀗𑁆𑀔𑀢 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀧𑀢𑁆𑀢𑀸𑀦𑀺. 𑀲𑁄𑀓𑀸𑀤𑀻𑀲𑀼 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀨𑀼𑀝𑁆𑀞𑀲𑁆𑀲 𑀲𑁄𑀘𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑁄𑀓𑁄𑀦𑀸𑀫. 𑀭𑁄𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀅𑀦𑀺𑀝𑁆𑀞𑁄 𑀘𑀺𑀢𑁆𑀢𑀚𑀲𑀤𑁆𑀤𑁄 𑀧𑀭𑀺𑀤𑁂𑀯𑁄𑀦𑀸𑀫. 𑀓𑀸𑀬𑀺𑀓𑀸 𑀤𑀼𑀓𑁆𑀔𑀯𑁂𑀤𑀦𑀸 𑀤𑀼𑀓𑁆𑀔𑀁𑀦𑀸𑀫. 𑀘𑁂𑀢𑀲𑀺𑀓𑀸 𑀤𑀼𑀓𑁆𑀔𑀯𑁂𑀤𑀦𑀸 𑀤𑁄𑀫𑀦𑀲𑁆𑀲𑀁𑀦𑀸𑀫. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀲𑀁𑀲𑀻𑀤𑀦𑀯𑀺𑀲𑀻𑀤𑀦𑀸𑀓𑀸𑀭𑀧𑀯𑀢𑁆𑀢𑁄 𑀤𑁄𑀲𑁄 𑀉𑀧𑀸𑀬𑀸𑀲𑁄𑀦𑀸𑀫. 𑀅𑀬𑀫𑁂𑀢𑁆𑀣 𑀯𑀺𑀪𑀸𑀕𑁄. 𑀬𑁂𑀲𑀁 𑀧𑀦 𑀔𑀦𑁆𑀥𑀤𑀼𑀓𑁆𑀔𑁂 𑀅𑀯𑀺𑀚𑁆𑀚𑀸 𑀅𑀧𑁆𑀧𑀳𑀻𑀦𑀸 𑀳𑁄𑀢𑀺. 𑀢𑁂𑀲𑀁 𑀇𑀢𑀭𑀲𑀘𑁆𑀘𑁂𑀲𑀼𑀧𑀺 𑀲𑀸 𑀅𑀧𑁆𑀧𑀳𑀻𑀦𑀸𑀏𑀯 𑀳𑁄𑀢𑀻𑀢𑀺 𑀢𑁂 𑀔𑀦𑁆𑀥𑀧𑀯𑀢𑁆𑀢𑀺𑀬𑀁𑀏𑀯 𑀲𑀼𑀔𑀲𑀜𑁆𑀜𑀁 𑀮𑀪𑀦𑁆𑀢𑀺. 𑀔𑀦𑁆𑀥𑀦𑀺𑀭𑁄𑀥𑁂 𑀤𑀼𑀓𑁆𑀔𑀲𑀜𑁆𑀜𑀁. 𑀔𑀦𑁆𑀥𑀧𑀯𑀢𑁆𑀢𑀺𑀫𑀕𑁆𑀕𑁂𑀏𑀯 𑀲𑀼𑀔𑀫𑀕𑁆𑀕𑀲𑀜𑁆𑀜𑀁 𑀮𑀪𑀦𑁆𑀢𑀺. 𑀔𑀦𑁆𑀥𑀦𑀺𑀭𑁄𑀥𑀫𑀕𑁆𑀕𑁂 𑀤𑀼𑀓𑁆𑀔𑀫𑀕𑁆𑀕𑀲𑀜𑁆𑀜𑀁. 𑀢𑀲𑁆𑀫𑀸 𑀔𑀦𑁆𑀥𑀧𑀯𑀢𑁆𑀢𑀺𑀧𑀘𑁆𑀘𑀬𑀪𑀽𑀢𑀸 𑀧𑀼𑀜𑁆𑀜𑀸 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀥𑀫𑁆𑀫𑀸𑀏𑀯 𑀢𑁂𑀲𑀁 𑀅𑀯𑀺𑀚𑁆𑀚𑀸𑀦𑀺𑀯𑀼𑀝𑀸𑀦𑀁 𑀲𑀼𑀔𑀓𑀸𑀫𑀸𑀦𑀁 𑀤𑀼𑀓𑁆𑀔𑀧𑀝𑀺𑀓𑀽𑀮𑀸𑀦𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀭𑀡𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀅𑀯𑀺𑀚𑁆𑀚𑀸𑀧𑀘𑁆𑀘 𑀬𑀸𑀲𑀗𑁆𑀔𑀸𑀭𑀸𑀢𑀺. 𑀏𑀢𑁆𑀣𑀘 𑀯𑀺𑀲𑁂𑀲𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀤𑀼𑀘𑁆𑀘𑀭𑀺𑀢𑀪𑀽𑀢𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀺. 𑀅𑀦𑀸𑀕𑀢 𑀔𑀦𑁆𑀥𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀅𑀯𑀺𑀚𑁆𑀚𑀸𑀬 𑀲𑀼𑀘𑀭𑀺𑀢𑀪𑀽𑀢𑀸 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀔𑀸𑀭𑁂𑀲𑀼 𑀲𑀢𑀺 𑀅𑀧𑁆𑀧𑀳𑀻𑀦𑀪𑀯𑀢𑀡𑁆𑀳𑀸𑀦𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀅𑀦𑀦𑁆𑀢𑀭𑀁 𑀧𑀼𑀦𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀓𑁄𑀘𑀺 𑀯𑀺𑀩𑀦𑁆𑀥𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀁 𑀲𑀴𑀸𑀬𑀢𑀦𑀁 𑀨𑀲𑁆𑀲𑁄 𑀯𑁂𑀤𑀦𑀸𑀢𑀺 𑀇𑀫𑁂 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀸 𑀧𑀜𑁆𑀘𑀥𑀫𑁆𑀫𑀸 𑀪𑀯𑀦𑁆𑀢𑀭𑁂 𑀧𑀸𑀢𑀼 𑀪𑀯𑀦𑁆𑀢𑀺. 𑀢𑀢𑁆𑀣 𑀧𑀦 𑀯𑀺𑀜𑁆𑀜𑀸𑀡𑀫𑁂𑀯 𑀧𑀥𑀸𑀦𑀁 𑀚𑁂𑀝𑁆𑀞𑀓𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑁂𑀘 𑀲𑀢𑀺 𑀢𑀲𑁆𑀲 𑀉𑀤𑀬𑀪𑀽𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑁄𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀦𑀸𑀫 𑀭𑀽𑀧𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀸𑀫𑀜𑁆𑀜𑀢𑁄 𑀧𑀭𑀺𑀧𑀼𑀡𑁆𑀡𑁄𑀦𑀸𑀫 𑀓𑀸𑀬𑁄 𑀭𑀽𑀧 𑀓𑀸𑀬𑁄𑀘 𑀯𑀼𑀢𑁆𑀢𑁄 𑀳𑁄𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀓𑀸𑀬𑁂𑀲𑀼 𑀬𑁂𑀥𑀫𑁆𑀫𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀧𑀥𑀸𑀦𑀗𑁆𑀕𑀪𑀽𑀢𑀸 𑀳𑁄𑀦𑁆𑀢𑀺. 𑀬𑁂𑀳𑀺𑀘 𑀨𑀲𑁆𑀲𑀸 𑀤𑀻𑀦𑀺 𑀉𑀧𑀭𑀺 𑀅𑀗𑁆𑀕𑀸𑀦𑀺 𑀆𑀕𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁂𑀲𑀼𑀘 𑀲𑀢𑁆𑀢𑀸 𑀅𑀢𑁆𑀢𑀕𑀸𑀳𑀁 𑀤𑀴𑁆𑀳𑀢𑀭𑀁 𑀕𑀡𑁆𑀳𑀦𑁆𑀢𑀺. 𑀢𑁂 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀸𑀫𑀭𑀽𑀧𑁂 𑀲𑀢𑀺 𑀢𑁂𑀲𑀁𑀧𑀺 𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑁄 𑀦𑀢𑁆𑀣𑀺𑀬𑁂𑀯. 𑀲𑀴𑀸𑀬𑀢𑀦𑀲𑀫𑀼𑀝𑁆𑀞𑀺𑀢𑁄𑀘 𑀨𑀲𑁆𑀲𑁄 𑀲𑀴𑀸𑀬𑀢𑀦𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀲𑀴𑀸𑀬𑀢𑀦𑀧𑀘𑁆𑀘𑀬𑀸𑀨𑀲𑁆𑀲𑁄𑀢𑀺. 𑀨𑀲𑁆𑀲𑀲𑀫𑀼𑀝𑁆𑀞𑀺𑀢𑀸𑀘 𑀯𑁂𑀤𑀦𑀸 𑀨𑀲𑁆𑀲𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀲𑀫𑁆𑀪𑀯𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀨𑀲𑁆𑀲𑀧𑀘𑁆𑀘𑀬𑀸𑀯𑁂𑀤𑀦𑀸𑀢𑀺. 𑀲𑀼𑀔𑀯𑁂𑀤𑀦𑀸𑀲𑀤𑀺𑀲𑁄 𑀢𑀡𑁆𑀳𑀸𑀬 𑀅𑀯𑀲𑁆𑀲𑀬𑁄𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀯𑁂𑀤𑀦𑀸𑀧𑀘𑁆𑀘𑀬𑀸𑀢𑀡𑁆𑀳𑀸𑀢𑀺. 𑀓𑀸𑀫𑀼𑀧𑀸𑀤𑀸𑀦𑀜𑁆𑀘𑀦𑀸𑀫 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀼𑀦𑀧𑁆𑀧𑀼𑀦𑀁 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀤𑀴𑁆𑀳𑀢𑁆𑀢𑀧𑁆𑀧𑀢𑁆𑀢𑀸 𑀢𑀡𑁆𑀳𑀸𑀏𑀯, 𑀤𑀺𑀝𑁆𑀞𑀺𑀬𑁄𑀘 𑀅𑀢𑁆𑀢𑀦𑀺𑀘 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑁂𑀲𑀼𑀘 𑀅𑀲𑁆𑀲𑀸𑀤𑀦 𑀔𑀫𑀦 𑀭𑁄𑀘𑀦 𑀪𑀽𑀢𑀸𑀬 𑀢𑀡𑁆𑀳𑀸𑀬 𑀯𑀲𑁂𑀦 𑀤𑀴𑁆𑀳𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀢𑀡𑁆𑀳𑀸𑀧𑀘𑁆𑀘𑀬𑀸𑀉𑀧𑀸𑀤𑀸𑀦𑀦𑁆𑀢𑀺. 𑀉𑀧𑀸𑀤𑀺𑀬𑀦𑁆𑀢𑀸𑀘 𑀢𑀲𑁆𑀲 𑀢𑀲𑁆𑀲 𑀉𑀧𑀸𑀤𑀸𑀦𑀺𑀬𑀲𑁆𑀲 𑀅𑀢𑁆𑀣𑀲𑁆𑀲 𑀳𑀺𑀢𑀯𑀼𑀟𑁆𑀠𑀺𑀲𑀜𑁆𑀜𑀺𑀢𑀁 𑀢𑀁𑀢𑀁 𑀓𑀫𑁆𑀫𑀪𑀯𑀁 𑀆𑀬𑀽𑀳𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀪𑀯𑁄𑀢𑀺. 𑀪𑀯𑀲𑀤𑁆𑀤𑁄 𑀳𑁂𑀢𑁆𑀣 𑀯𑀟𑁆𑀠𑀺𑀧𑀭𑀺𑀬𑀸𑀬𑁄. 𑀬𑀣𑀸 𑁋

𑀲𑀼𑀯𑀺𑀚𑀸𑀦𑁄 𑀪𑀯𑀁 𑀳𑁄𑀢𑀺, 𑀤𑀼𑀯𑀺𑀚𑀸𑀦𑁄 𑀧𑀭𑀸𑀪𑀯𑁄𑀢𑀺.

𑀓𑀫𑁆𑀫𑀪𑀯𑁂 𑀲𑀢𑀺 𑀏𑀓𑀦𑁆𑀢𑁂𑀦 𑀧𑀼𑀦𑀪𑀯𑁄𑀧𑀺 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀪𑀯𑀧𑀘𑁆𑀘𑀬𑀸𑀚𑀸𑀢𑀻𑀢𑀺. 𑀚𑀸𑀢𑀺𑀬𑀸𑀘 𑀲𑀢𑀺 𑀏𑀓𑀦𑁆𑀢𑁂𑀦 𑀚𑀭𑀸𑀫𑀭𑀡𑀁 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀚𑀸𑀢𑀺𑀧𑀘𑁆𑀘𑀬𑀸𑀚𑀭𑀸𑀫𑀭𑀡𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑀯𑀺𑀥𑀺. 𑀲𑁄𑀓𑀸𑀤𑀺𑀯𑀘𑀦𑀜𑁆𑀘𑁂𑀢𑁆𑀣 𑀈𑀤𑀺𑀲𑁂𑀦 𑀢𑀩𑁆𑀪𑀸𑀯 𑀪𑀸𑀯𑀺𑀪𑀸𑀯𑁂𑀦 𑀧𑀯𑀢𑁆𑀢𑀲𑁆𑀲 𑀲𑀓𑀮𑀲𑁆𑀲 𑀯𑀝𑁆𑀝𑀥𑀫𑁆𑀫𑀲𑁆𑀲 𑀆𑀤𑀻𑀦𑀯𑀭𑀸𑀲𑀺𑀤𑀲𑁆𑀲 𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀲𑀗𑁆𑀕𑀳𑁂. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁂. 𑀅𑀤𑁆𑀥𑀸𑀦𑀯𑀦𑁆𑀢𑁂 𑀥𑀫𑁆𑀫𑁂 𑀪𑀼𑀲𑁄 𑀥𑀸𑀭𑁂𑀢𑀻𑀢𑀺 𑀅𑀤𑁆𑀥𑀸. 𑀓𑀸𑀮𑁄. 𑀲𑁄 𑀳𑀺 𑀢𑁂𑀓𑀸𑀮𑀺𑀓𑁂 𑀥𑀫𑁆𑀫𑁂 𑀲𑀦𑁆𑀢𑀸𑀦𑀸𑀦𑀼𑀧𑀩𑀦𑁆𑀥𑀯𑀲𑁂𑀦 𑀓𑀧𑁆𑀧𑀧𑀭𑀁𑀧𑀭𑀸 𑀯𑀲𑁆𑀲 𑀉𑀢𑀼 𑀫𑀸𑀲 𑀧𑀓𑁆𑀔 𑀭𑀢𑁆𑀢𑀺 𑀤𑀺𑀯 𑀧𑀭𑀁𑀧𑀭𑀸𑀘 𑀳𑀼𑀢𑁆𑀯𑀸 𑀅𑀧𑀢𑀫𑀸𑀦𑁂 𑀥𑀸𑀭𑁂𑀦𑁆𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀻𑀢𑀺. 𑀅𑀣𑀯𑀸, 𑀪𑀼𑀲𑁄 𑀤𑀳𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀢𑁂𑀓𑀸𑀮𑀺𑀓𑀸 𑀥𑀫𑁆𑀫𑀸 𑀏𑀢𑁆𑀣𑀸𑀢𑀺 𑀅𑀤𑁆𑀥𑀸. 𑀓𑀸𑀮𑁄𑀬𑁂𑀯. 𑀲𑁄 𑀧𑀦 𑀲𑀬𑀁 𑀅𑀪𑀺𑀦𑁆𑀦𑁄𑀧𑀺 𑀪𑁂𑀤𑀯𑀦𑁆𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀪𑀺𑀦𑁆𑀦𑁄 𑀯𑀺𑀬 𑀉𑀧𑀘𑀭𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀢𑀬𑁄𑀅𑀤𑁆𑀥𑀸𑀢𑀺.

[𑁨𑁨𑁭] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀅𑀢𑀢𑀺 𑀲𑀢𑀢𑀁 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀤𑁆𑀥𑀸𑀢𑀺 𑀯𑀼𑀢𑁆𑀢𑀁’’. 𑀢𑀁 𑀦 𑀲𑀼𑀦𑁆𑀤𑀭𑀁.

𑀏𑀯𑀜𑁆𑀳𑀺 𑀲𑀢𑀺 𑀅𑀤𑁆𑀥𑀸𑀦𑀦𑁆𑀢𑀺 𑀦𑀲𑀺𑀚𑁆𑀛𑀢𑀺. 𑀬𑀣𑀸 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺. 𑀅𑀗𑁆𑀕𑀸𑀦𑀻𑀢𑀺 𑀅𑀯𑀬𑀯𑀧𑀥𑀸𑀦𑀗𑁆𑀕𑀸𑀦𑀺. 𑀧𑀥𑀸𑀦𑀲𑀫𑁆𑀪𑀸𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀓𑀸𑀭𑀸𑀢𑀺 𑀅𑀯𑀬𑀯𑀓𑁄𑀝𑁆𑀞𑀸𑀲𑀸. 𑀓𑁄𑀝𑁆𑀞𑀸𑀲𑀢𑁆𑀣𑁄 𑀳𑁂𑀢𑁆𑀣 𑀆𑀓𑀸𑀭𑀲𑀤𑁆𑀤𑁄. 𑀬𑀣𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀢𑀺. 𑀆𑀓𑀺𑀭𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀓𑀺𑀭𑀺𑀢𑁆𑀯𑀸 𑀣𑀧𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀓𑀸𑀭𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀦𑁆𑀥𑀻𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀔𑁂𑀧𑀸𑀦𑀁 𑀲𑀗𑁆𑀖𑀝𑀦𑀝𑁆𑀞𑀸𑀦𑀁. 𑀲𑀗𑁆𑀔𑁂𑀧𑀸𑀢𑀺 𑀧𑀥𑀸𑀦𑀥𑀫𑁆𑀫𑀲𑀗𑁆𑀕𑀳𑀸. 𑀯𑀝𑁆𑀝𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀝𑁆𑀝𑀦𑁆𑀢𑀻𑀢𑀺 𑀯𑀝𑁆𑀝𑀸𑀦𑀺. 𑀫𑀽𑀮𑀬𑀦𑁆𑀢𑀺 𑀲𑀩𑁆𑀩𑁂𑀧𑀺 𑀯𑀝𑁆𑀝𑀥𑀫𑁆𑀫𑀸 𑀏𑀢𑁆𑀣 𑀢𑀺𑀝𑁆𑀞𑀦𑁆𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀫𑀽𑀮𑀸𑀦𑀺. 𑀧𑀢𑀺𑀝𑁆𑀞𑀸. 𑀧𑀪𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀏𑀓𑁄 𑀧𑀼𑀭𑀺𑀲𑁄 𑀏𑀓𑀸𑀬 𑀅𑀗𑁆𑀕𑀼𑀮𑀺𑀬𑀸 𑀲𑀫𑀼𑀤𑁆𑀤𑁄 𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀲𑁆𑀲 𑀮𑁄𑀡𑀪𑀸𑀯𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀯𑀺𑀬 𑀪𑀕𑀯𑀸𑀧𑀺 𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀦𑀸 𑀏𑀓𑀫𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀁 𑀧𑀭𑀺𑀧𑀼𑀡𑁆𑀡𑀁 𑀤𑁂𑀲𑁂𑀢𑁆𑀯𑀸 𑀅𑀦𑀫𑀢𑀕𑁆𑀕𑀲𑁆𑀲 𑀲𑀓𑀮𑀲𑁆𑀲 𑀲𑀁𑀲𑀸𑀭𑀯𑀝𑁆𑀝𑀲𑁆𑀲 𑀧𑀯𑀢𑁆𑀢𑀺𑀁 𑀜𑀸𑀧𑁂𑀲𑀺. 𑀧𑀭𑀺𑀧𑀼𑀡𑁆𑀡𑀁 𑀤𑁂𑀲𑁂𑀦𑁆𑀢𑁂𑀦𑀘 𑀦𑀸𑀫 𑀢𑀲𑁆𑀲 𑀏𑀓𑀲𑁆𑀲 𑀪𑀯𑀲𑁆𑀲 𑀳𑁂𑀢𑀼𑀘 𑀤𑁂𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀨𑀮𑀜𑁆𑀘 𑀤𑁂𑀲𑁂𑀢𑀩𑁆𑀩𑀁 𑀳𑁄𑀢𑀺. 𑀢𑀢𑁆𑀣 𑀳𑁂𑀢𑀽 𑀦𑀸𑀫 𑀧𑀼𑀭𑀺𑀫𑀪𑀯𑁂 𑀲𑀺𑀤𑁆𑀥𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸. 𑀨𑀮𑀁𑀦𑀸𑀫 𑀅𑀦𑀸𑀕𑀢𑀪𑀯𑁂 𑀚𑀸𑀢𑀺. 𑀇𑀢𑀺 𑀏𑀓𑀪𑀯𑀯𑀺𑀲𑀬𑀸𑀧𑀺 𑀅𑀬𑀁 𑀤𑁂𑀲𑀦𑀸 𑀏𑀓𑀤𑁂𑀲𑁂𑀦 𑀅𑀢𑀻𑀢𑀸𑀦𑀸𑀕𑀢 𑀲𑀸𑀥𑀸𑀭𑀡𑀸𑀘 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀅𑀢𑀻𑀢𑁄𑀅𑀤𑁆𑀥𑀸𑀢𑀺𑀆𑀤𑀺. 𑀏𑀢𑁆𑀣𑀘 𑀅𑀤𑁆𑀥𑀼𑀦𑁄 𑀅𑀤𑁆𑀥𑀸𑀯𑀦𑁆𑀢𑀸𑀦𑀜𑁆𑀘 𑀅𑀪𑁂𑀤𑀁 𑀯𑀺𑀬 𑀓𑀢𑁆𑀯𑀸 𑀯𑀘𑀦𑀁 𑀥𑀫𑁆𑀫𑀢𑁄 𑀯𑀺𑀲𑀼𑀁 𑀅𑀤𑁆𑀥𑀸𑀲𑀗𑁆𑀔𑀸𑀢𑀲𑁆𑀲 𑀓𑀸𑀮𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀓𑀸𑀮𑁄𑀬𑁂𑀯 𑀮𑁄𑀓𑀁 𑀧𑀯𑀢𑁆𑀢𑁂𑀢𑀺 𑀦𑀺𑀯𑀢𑁆𑀢𑁂𑀢𑀻𑀢𑀺 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀯𑀸𑀤𑀜𑁆𑀘 𑀦𑀻𑀯𑀸𑀭𑁂𑀢𑀺. 𑀦 𑀳𑀺 𑀲𑀬𑀁 𑀅𑀪𑀸𑀯𑀪𑀽𑀢𑁄 𑀓𑀸𑀮𑁄 𑀓𑀲𑁆𑀲𑀘𑀺 𑀧𑀯𑀢𑁆𑀢𑀓𑁄 𑀦𑀺𑀯𑀢𑁆𑀢𑀓𑁄𑀘 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀏𑀓𑀫𑁂𑀓𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀅𑀢𑀻𑀢𑀪𑀯𑁂 𑀳𑁂𑀢𑀼𑀜𑁆𑀘 𑀅𑀦𑀸𑀕𑀢𑀪𑀯𑁂 𑀨𑀮𑀜𑁆𑀘 𑀤𑀲𑁆𑀲𑁂𑀢𑀻𑀢𑀺. 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁 𑀦𑀻𑀯𑀸𑀭𑀡𑀢𑁆𑀣𑀁 𑀅𑀢𑀻𑀢𑀳𑁂𑀢𑀼 𑀤𑀲𑁆𑀲𑀦𑀁. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀻𑀯𑀸𑀭𑀡𑀢𑁆𑀣𑀁 𑀅𑀦𑀸𑀕𑀢𑀨𑀮𑀤𑀲𑁆𑀲𑀦𑀁. 𑀲𑀲𑁆𑀲𑀢 𑀤𑀺𑀝𑁆𑀞𑀺𑀦𑀻𑀯𑀸𑀭𑀡𑀢𑁆𑀣𑀁 𑀉𑀪𑀬𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀳𑁂𑀢𑀼 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀧𑀯𑀢𑁆𑀢𑀦𑁆𑀢𑀺 𑀦𑀺𑀯𑀢𑁆𑀢𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀻𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀅𑀳𑁂𑀢𑀼𑀤𑀺𑀝𑁆𑀞𑀺𑀦𑀸𑀫. 𑀩𑁆𑀭𑀳𑁆𑀫𑀸 𑀧𑀚𑀸𑀧𑀢𑀺 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀯𑀲𑁂𑀦 𑀅𑀪𑀽𑀢 𑀳𑁂𑀢𑀼𑀤𑀲𑁆𑀲𑀦𑀁 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺𑀦𑀸𑀫. 𑀲𑀢𑁆𑀢𑀸 𑀫𑀭𑀡𑁂 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀅𑀦𑀸𑀕𑀢𑁂 𑀚𑀸𑀢𑀺𑀦𑀸𑀫 𑀦𑀢𑁆𑀣𑀻𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑀸𑀫. 𑀅𑀢𑁆𑀢𑀸𑀦𑀺𑀘𑁆𑀘𑁄 𑀥𑀼𑀯𑁄, 𑀲𑁄𑀯 𑀪𑀯𑀢𑁄 𑀪𑀯𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑀸𑀫. 𑀏𑀯𑀁 𑀦𑀺𑀘𑁆𑀘𑁄 𑀳𑀼𑀢𑁆𑀯𑀸 𑀲𑀦𑁆𑀥𑀸𑀯𑀦𑁆𑀢𑁄𑀧𑀦 𑀅𑀯𑀺𑀚𑁆𑀚𑀸𑀤𑀻𑀳𑀺 𑀲𑀸𑀥𑁂𑀢𑀩𑁆𑀩𑁄 𑀦𑀳𑁄𑀢𑀺. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀳𑀺 𑀪𑀯𑀦𑁆𑀢𑀭𑁂 𑀧𑀼𑀦 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀯𑀤𑀦𑁆𑀢𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦𑀻𑀯𑀸𑀭𑀺𑀢𑀸 𑀳𑁄𑀢𑀻𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑁄𑀓𑀸𑀤𑀬𑁄 𑀅𑀗𑁆𑀕𑁂𑀲𑀼 𑀦𑀕𑀳𑀺𑀢𑀸𑀢𑀺. 𑀚𑀸𑀢𑀺𑀬𑀸 𑀲𑀢𑀺 𑀲𑁄𑀓𑀸𑀤𑀬𑁄 𑀏𑀓𑀦𑁆𑀢𑁂𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀏𑀯𑀁 𑀢𑀩𑁆𑀪𑀸𑀯 𑀪𑀸𑀯𑀺𑀪𑀸𑀯 𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀢𑁄. 𑀲𑀢𑀺𑀧𑀺 𑀳𑀺 𑀚𑀸𑀢𑀺𑀬𑀸 𑀭𑀽𑀧 𑀮𑁄𑀓𑁂 𑀅𑀭𑀽𑀧𑀮𑁄𑀓𑁂𑀘 𑀢𑁂 𑀦 𑀲𑀫𑁆𑀪𑀯𑀦𑁆𑀢𑀺. 𑀓𑀸𑀫𑀮𑁄𑀓𑁂𑀧𑀺 𑀓𑁂𑀲𑀜𑁆𑀘𑀺 𑀦 𑀲𑀫𑁆𑀪𑀯𑀦𑁆𑀢𑀺𑀬𑁂𑀯𑀸𑀢𑀺. 𑀬𑀤𑀺𑀏𑀯𑀁 𑀓𑀺𑀫𑀢𑁆𑀣𑀁 𑀢𑁂𑀲𑀁 𑀯𑀘𑀦𑀦𑁆𑀢𑀺. 𑀚𑀸𑀢𑀺𑀬𑀸𑀯𑀸 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀲𑀓𑀮𑀲𑁆𑀲 𑀯𑀝𑁆𑀝𑀧𑀯𑀢𑁆𑀢𑀲𑁆𑀲 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀲𑁄𑀓𑀸𑀤𑀺𑀯𑀘𑀦𑀁 𑀧𑀦𑁂𑀢𑁆𑀣 𑀦𑀺𑀲𑁆𑀲𑀦𑁆𑀤 𑀨𑀮𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀲𑁆𑀲𑀦𑁆𑀤𑀨𑀮𑀦𑀺𑀤𑀲𑁆𑀲𑀦𑀦𑁆𑀢𑀺 𑀚𑀸𑀢𑀺𑀬𑀸 𑀫𑀳𑀸𑀆𑀤𑀻𑀦𑀯 𑀭𑀸𑀲𑀺𑀲𑀗𑁆𑀔𑀸𑀢𑀲𑁆𑀲 𑀉𑀤𑀬𑀨𑀮𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀇𑀫𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦 𑀪𑀯𑀲𑁆𑀲 𑀅𑀢𑀻𑀢𑀧𑀘𑁆𑀘𑀬𑀸 𑀤𑁆𑀯𑁂 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀏𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸. 𑀓𑀺𑀁 𑀧𑀦 𑀢𑁂 𑀏𑀯 𑀤𑁆𑀯𑁂 𑀇𑀫𑀲𑁆𑀲 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀅𑀜𑁆𑀜𑁂𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀅𑀣 𑀓𑀲𑁆𑀫𑀸 𑀢𑁂 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑀸𑀢𑀺. 𑀅𑀯𑀼𑀢𑁆𑀢𑀸𑀦𑀁𑀧𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀮𑀤𑁆𑀥𑀢𑁆𑀢𑀸𑀢𑀺. 𑀓𑀣𑀜𑁆𑀘 𑀢𑁂 𑀅𑀯𑀼𑀢𑁆𑀢𑀸𑀧𑀺 𑀮𑀤𑁆𑀥𑀸𑀢𑀺. 𑀢𑀩𑁆𑀪𑀸𑀯 𑀪𑀸𑀯𑀺𑀪𑀸𑀯𑀮𑀓𑁆𑀔𑀡𑁂𑀦 𑀢𑀤𑀯𑀺𑀦𑀸𑀪𑀸𑀯𑀺𑀪𑀸𑀯𑀮𑀓𑁆𑀔𑀡𑁂𑀦𑀘 𑀮𑀤𑁆𑀥𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦𑀸𑀢𑀺𑀆𑀤𑀺 𑀫𑀸𑀳. 𑀏𑀲 𑀦𑀬𑁄 𑀧𑀭𑀢𑁆𑀣𑀧𑀺. 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦𑀸𑀢𑀺 𑀧𑀸𑀴𑀺𑀬𑀁 𑀆𑀤𑀺𑀢𑁄 𑀯𑀼𑀢𑁆𑀢𑁂𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭 𑀯𑀘𑀦𑁂𑀦. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸𑀧𑀺 𑀕𑀳𑀺𑀢𑀸 𑀪𑀯𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸𑀪𑀸𑀯𑁂 𑀪𑀸𑀯𑀢𑁄, 𑀅𑀪𑀸𑀯𑁂𑀘 𑀅𑀪𑀸𑀯𑀢𑁄 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑀺 𑀪𑀯𑀦𑁆𑀢𑀺. 𑀲𑀗𑁆𑀔𑀸𑀭𑀪𑀸𑀯𑁂𑀘 𑀪𑀸𑀯𑀢𑁄, 𑀅𑀪𑀸𑀯𑁂𑀘 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀓𑀫𑁆𑀫𑀪𑀯𑁄𑀧𑀺 𑀕𑀳𑀺𑀢𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀓𑀺𑀮𑁂𑀲𑀪𑀸𑀯𑀲𑀸𑀫𑀜𑁆𑀜𑀢𑁄 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺. 𑀓𑀫𑁆𑀫𑀪𑀸𑀯 𑀲𑀸𑀫𑀜𑁆𑀜𑀢𑁄 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀓𑀫𑁆𑀫𑀪𑀯𑁄 𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀬𑀼𑀚𑁆𑀚𑀢𑀺.

𑀢𑀣𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸 𑀕𑀳𑀺𑀢𑀸 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑀯𑀺𑀦𑀸 𑀪𑀸𑀯𑀺𑀪𑀸𑀯𑁂𑀦 𑀢𑀡𑁆𑀳𑀼𑀧𑀸𑀤𑀸𑀦𑀯𑀘𑀦𑁂𑀦 𑀅𑀯𑀺𑀚𑁆𑀚𑀸𑀘 𑀪𑀯𑀯𑀘𑀦𑁂𑀦 𑀲𑀗𑁆𑀔𑀸𑀭𑀸𑀘 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀥𑀫𑁆𑀫𑀸𑀦𑀁 𑀮𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑁂𑀳𑀺 𑀅𑀯𑀺𑀦𑀸𑀪𑀸𑀯𑀺𑀪𑀸𑀯𑀢𑁄 𑀢𑀤𑀯𑀺𑀦𑀸𑀪𑀸𑀯𑀺𑀪𑀸𑀯𑁂𑀦 𑀚𑀸𑀢𑀺𑀚𑀭𑀸.𑀮. 𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀺𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀯𑀻𑀲𑀢𑀸𑀓𑀸𑀭𑀸 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀣𑀫𑀁 𑀳𑁂𑀢𑀼𑀧𑀜𑁆𑀘𑀓𑀁 𑀏𑀓𑁄 𑀲𑀗𑁆𑀔𑁂𑀧𑁄. 𑀤𑀼𑀢𑀻𑀬𑀁 𑀨𑀮𑀧𑀜𑁆𑀘𑀓𑀁 𑀏𑀓𑁄. 𑀢𑀢𑀻𑀬𑀁 𑀳𑁂𑀢𑀼𑀧𑀜𑁆𑀘𑀓𑀁 𑀏𑀓𑁄. 𑀘𑀢𑀼𑀢𑁆𑀣𑀁 𑀨𑀮𑀧𑀜𑁆𑀘𑀓𑀁 𑀏𑀓𑁄 𑀲𑀗𑁆𑀔𑁂𑀧𑁄𑀢𑀺 𑀘𑀢𑀼𑀲𑀗𑁆𑀔𑁂𑀧𑀸 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀲𑀗𑁆𑀕𑀳𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀽𑀲𑀼 𑀧𑀦 𑀲𑀗𑁆𑀔𑁂𑀧𑁂𑀲𑀼 𑀲𑀺𑀤𑁆𑀥𑁂𑀲𑀼 𑀧𑀣𑀫𑁂𑀦 𑀤𑀼𑀢𑀻𑀬𑀲𑁆𑀲 𑀤𑀼𑀢𑀻𑀬𑁂𑀦 𑀢𑀢𑀻𑀬𑀲𑁆𑀲 𑀢𑀢𑀻𑀬𑁂𑀦 𑀘𑀢𑀼𑀢𑁆𑀣𑀲𑁆𑀲𑀸𑀢𑀺 𑀏𑀯𑀁 𑀢𑀺𑀲𑁆𑀲𑁄 𑀲𑀦𑁆𑀥𑀺𑀬𑁄𑀧𑀺 𑀲𑀺𑀚𑁆𑀛𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑀸𑀘 𑀪𑀯𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀳𑁂𑀢𑀼𑀧𑀜𑁆𑀘𑀓𑀁 𑀨𑀮𑀧𑀜𑁆𑀘𑀓𑀦𑁆𑀢𑀺 𑀏𑀢𑀁 𑀮𑁄𑀓𑀲𑁆𑀲 𑀧𑀸𑀓𑀝𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀳𑁂𑀢𑀼𑀨𑀮 𑀲𑀤𑁆𑀤𑀸 𑀧𑀦 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀭𑀺𑀬𑀸𑀬𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀤𑀼𑀢𑀻𑀬𑀧𑀜𑁆𑀘𑀓𑀲𑁆𑀲 𑀧𑀣𑀫𑀁 𑀉𑀧𑀸𑀤𑀸𑀬 𑀨𑀮𑀧𑀜𑁆𑀘𑀓𑀢𑀸 𑀢𑀢𑀻𑀬𑀁 𑀉𑀧𑀸𑀤𑀸𑀬 𑀳𑁂𑀢𑀼𑀧𑀜𑁆𑀘𑀓𑀢𑀸𑀘 𑀦 𑀦 𑀲𑀫𑁆𑀪𑀯𑀢𑀺. 𑀢𑀣𑀸 𑀢𑀢𑀻𑀬𑀲𑁆𑀲𑀧𑀺 𑀘𑀢𑀼𑀢𑁆𑀣𑀁 𑀉𑀧𑀸𑀤𑀸𑀬 𑀳𑁂𑀢𑀼𑀧𑀜𑁆𑀘𑀓𑀢𑀸 𑀤𑀼𑀢𑀻𑀬𑀁 𑀉𑀧𑀸𑀤𑀸𑀬 𑀨𑀮𑀧𑀜𑁆𑀘𑀓𑀢𑀸𑀘𑀸𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀳𑁂𑀢𑀼𑀢𑁄 𑀨𑀮𑀫𑁂𑀯 𑀲𑀺𑀬𑀸. 𑀦 𑀨𑀮𑀢𑁄 𑀳𑁂𑀢𑀽𑀢𑀺 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸𑀏𑀯 𑀳𑁄𑀢𑀻𑀢𑀺. 𑀤𑁆𑀯𑀻𑀲𑀼 𑀧𑀦 𑀳𑁂𑀢𑀼𑀧𑀜𑁆𑀘𑀓𑁂𑀲𑀼 𑀲𑀗𑁆𑀔𑀸𑀭𑀓𑀫𑁆𑀫𑀪𑀯𑀸𑀦𑀁 𑀯𑀺𑀲𑁂𑀲𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸𑀳-𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑀸𑀲𑀁𑀧𑀺 𑀲𑀁𑀯𑀘𑁆𑀙𑀭𑀁𑀧𑀺 𑀤𑀸𑀦𑀼𑀧𑀓𑀭𑀡𑀸𑀦𑀺 𑀲𑀚𑁆𑀚𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄 𑀆𑀬𑀽𑀳𑀦𑀲𑀗𑁆𑀔𑀸𑀭𑀸𑀦𑀸𑀫. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀦 𑀳𑀢𑁆𑀣𑁂 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀦𑁆𑀦𑀸 𑀘𑁂𑀢𑀦𑀸 𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸𑀯𑀚𑁆𑀚𑀦𑁂𑀲𑀼𑀯𑀸 𑀙𑀲𑀼 𑀚𑀯𑀦𑁂𑀲𑀼 𑀘𑁂𑀢𑀦𑀸 𑀆𑀬𑀽𑀳𑀦 𑀲𑀗𑁆𑀔𑀸𑀭𑀸𑀦𑀸𑀫. 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀪𑀯𑁄. 𑀬𑀸𑀓𑀸𑀘𑀺𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦 𑀲𑀗𑁆𑀔𑀸𑀭𑀸𑀦𑀸𑀫𑀸𑀢𑀺. 𑀓𑀫𑁆𑀫𑀪𑀯𑁄 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀤𑁆𑀯𑁂 𑀪𑀯𑀸 𑀤𑁆𑀯𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀏𑀓𑀲𑁆𑀲𑁂𑀯 𑀪𑀯 𑀅𑀗𑁆𑀕𑀲𑁆𑀲 𑀅𑀯𑀬𑀯𑀸𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀓𑀫𑁆𑀫𑀪𑀯𑀲𑀗𑁆𑀔𑀸𑀢𑁄𑀪𑀯𑁂 𑀓𑀤𑁂𑀲𑁄𑀢𑀺𑀆𑀤𑀺. 𑀏𑀢𑁆𑀣𑀘 𑀲𑀗𑁆𑀔𑀸𑀭𑀓𑀫𑁆𑀫𑀪𑀯𑀸𑀦𑀁 𑀯𑀺𑀲𑁂𑀲𑁄 𑀯𑀼𑀢𑁆𑀢 𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

[𑁨𑁨𑁮] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀓𑀫𑁆𑀫𑀪𑀯𑀲𑀗𑁆𑀔𑀸𑀢𑁄 𑀪𑀯𑁂𑀓𑀤𑁂𑀲𑁄𑀢𑀺 𑀏𑀢𑁆𑀣 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀘𑁂𑀢𑀦𑀸 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀇𑀥 𑀦 𑀬𑀼𑀚𑁆𑀚𑀢𑀺.

𑀢𑁂𑀲𑀁 𑀤𑁆𑀯𑀺𑀦𑁆𑀦𑀁𑀧𑀺 𑀤𑁆𑀯𑀻𑀲𑀼 𑀳𑁂𑀢𑀼𑀧𑀜𑁆𑀘𑀓𑁂𑀲𑀼 𑀲𑀗𑁆𑀕𑀳𑀺𑀢𑀢𑁆𑀢𑀸𑀢𑀺. 𑀬𑀣𑀸 𑀭𑀼𑀢𑀧𑀸𑀴𑀺𑀦𑀬𑁂𑀦𑀯𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀲𑁂𑀲𑀸𑀘𑀸𑀢𑀺 𑀇𑀤𑀁 𑀚𑀸𑀢𑀺𑀚𑀭𑀸𑀫𑀭𑀡𑁂𑀳𑀺 𑀲𑀤𑁆𑀥𑀺𑀁 𑀯𑀺𑀜𑁆𑀜𑀸𑀡𑀸𑀤𑀺𑀨𑀮𑀧𑀜𑁆𑀘𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀬𑀤𑁂𑀢𑀁 𑀧𑀼𑀩𑁆𑀩𑁂 𑀚𑀸𑀢𑀺𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀸𑀤𑀺 𑀨𑀮 𑀧𑀜𑁆𑀘𑀓𑀁 𑀕𑀳𑀺𑀢𑀁. 𑀢𑀁 𑀅𑀢𑁆𑀣𑀢𑁄 𑀉𑀧𑀧𑀢𑁆𑀢𑀺𑀪𑀯𑁄𑀏𑀯. 𑀦𑀳𑀺 𑀨𑀮𑀧𑀜𑁆𑀘𑀓𑀢𑁄 𑀅𑀜𑁆𑀜𑁄 𑀉𑀧𑀧𑀢𑁆𑀢𑀺𑀪𑀯𑁄𑀦𑀸𑀫 𑀅𑀢𑁆𑀣𑀻𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀫𑁆𑀫𑀯𑀺𑀪𑀸𑀕 𑀭𑀓𑁆𑀔𑀡𑀢𑁆𑀣𑀁 𑀉𑀧𑀧𑀢𑁆𑀢𑀺𑀪𑀯𑀲𑀤𑁆𑀤𑁂𑀦 𑀘𑀢𑀼𑀢𑁆𑀣𑀧𑀜𑁆𑀘𑀓𑀁 𑀕𑀳𑀺𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀤𑁆𑀯𑀸𑀤𑀲𑀲𑀼 𑀅𑀗𑁆𑀕𑁂𑀲𑀼 𑀅𑀯𑀺𑀚𑁆𑀚𑀸𑀦𑀸𑀫 𑀫𑁄𑀳𑁄. 𑀲𑁄𑀘 𑀅𑀓𑀼𑀲𑀮𑀫𑀽𑀮𑀁. 𑀢𑀡𑁆𑀳𑀸𑀦𑀸𑀫 𑀮𑁄𑀪𑁄. 𑀲𑁄𑀘 𑀅𑀓𑀼𑀲𑀮 𑀫𑀽𑀮𑀦𑁆𑀢𑀺 𑀯𑀼𑀢𑁆𑀢𑀁 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀯𑀲𑁂𑀦 𑀤𑁆𑀯𑁂 𑀫𑀽𑀮𑀸𑀦𑀻𑀢𑀺. 𑀅𑀣𑀯𑀸, 𑀫𑀽𑀮𑀦𑁆𑀢𑀺 𑀲𑀻𑀲𑀁. 𑀤𑁆𑀯𑁂 𑀯𑀝𑁆𑀝𑀲𑀻𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀼𑀭𑀺𑀫𑀁 𑀧𑀜𑁆𑀘𑀓𑀤𑁆𑀯𑀬𑀁 𑀏𑀓𑀁 𑀪𑀯𑀘𑀓𑁆𑀓𑀁 𑀧𑀘𑁆𑀙𑀺𑀫𑀁 𑀧𑀜𑁆𑀘𑀓𑀤𑁆𑀯𑀬𑀁 𑀏𑀓𑀁 𑀪𑀯𑀘𑀓𑁆𑀓𑀦𑁆𑀢𑀺 𑀓𑀢𑁆𑀯𑀸 𑀧𑀼𑀭𑀺𑀫𑀁 𑀅𑀯𑀺𑀚𑁆𑀚𑀸𑀫𑀽𑀮𑀁. 𑀢𑀜𑁆𑀘 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁𑀯𑀸 𑀅𑀧𑀸𑀬𑀕𑀸𑀫𑀻𑀦𑀁𑀯𑀸 𑀘𑀓𑁆𑀓𑀁. 𑀧𑀘𑁆𑀙𑀺𑀫𑀁 𑀢𑀡𑁆𑀳𑀸𑀫𑀽𑀮𑀁. 𑀢𑀜𑁆𑀘 𑀭𑀸𑀕𑀘𑀭𑀺𑀢𑀸𑀦𑀁𑀯𑀸 𑀲𑀼𑀕𑀢𑀺𑀕𑀸𑀫𑀻𑀦𑀁𑀯𑀸 𑀘𑀓𑁆𑀓𑀦𑁆𑀢𑀺 𑀤𑀲𑁆𑀲𑀺𑀢𑀁. 𑀘𑀓𑁆𑀓𑀦𑁆𑀢𑀺 𑀧𑀦 𑀬𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀲𑀦𑁆𑀢𑀸𑀦𑀲𑁆𑀲 𑀆𑀭𑀩𑁆𑀪𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀼𑀦 𑀆𑀕𑀢𑁂𑀏𑀯 𑀘𑀓𑁆𑀓𑀁𑀦𑀸𑀫 𑀲𑀺𑀬𑀸. 𑀢𑀲𑁆𑀫𑀸 𑀇𑀥 𑀤𑀼𑀢𑀻𑀬𑁂𑀦 𑀳𑁂𑀢𑀼𑀨𑀮 𑀬𑀼𑀕𑀴𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀁 𑀏𑀓𑀫𑁂𑀯 𑀘𑀓𑁆𑀓𑀦𑁆𑀢𑀺 𑀬𑀼𑀢𑁆𑀢𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀆𑀕𑀫𑀦𑀲𑀫𑁆𑀪𑀸𑀭𑁂𑀲𑀼 𑀅𑀯𑀺𑀚𑁆𑀚𑀸𑀏𑀯 𑀲𑀻𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸. 𑀕𑀫𑀦𑀲𑀫𑁆𑀪𑀸𑀭𑁂𑀲𑀼𑀘 𑀢𑀡𑁆𑀳𑀸𑀏𑀯. 𑀦𑀦𑀼 𑀉𑀪𑀬𑀢𑁆𑀣 𑀉𑀪𑀬𑀁𑀧𑀺 𑀲𑀻𑀲𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀯𑀼𑀘𑁆𑀘𑀢𑁂, 𑀲𑀼𑀔𑀯𑁂𑀤𑀦𑀸𑀲𑀤𑀺𑀲𑁄 𑀳𑀺 𑀢𑀡𑁆𑀳𑀸𑀬 𑀆𑀳𑀸𑀭𑁄𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀯𑁂𑀤𑀦𑀗𑁆𑀕𑀢𑁄 𑀧𑀭𑀁 𑀯𑀝𑁆𑀝𑀗𑁆𑀕𑀁 𑀖𑀝𑁂𑀦𑁆𑀢𑁂𑀦 𑀯𑁂𑀤𑀦𑀸 𑀦𑀼𑀭𑀽𑀧𑀸𑀢𑀡𑁆𑀳𑀸𑀏𑀯 𑀯𑀢𑁆𑀢𑀩𑁆𑀩𑀸. 𑀦 𑀅𑀯𑀺𑀚𑁆𑀚𑀸𑀢𑀺 𑀕𑀫𑀦𑀲𑀫𑁆𑀪𑀸𑀭𑁂𑀲𑀼 𑀢𑀸𑀯 𑀅𑀯𑀺𑀚𑁆𑀚𑀸𑀬 𑀑𑀓𑀸𑀲𑁄 𑀦𑀢𑁆𑀣𑀺. 𑀲𑀩𑁆𑀩𑀧𑀣𑀫𑀁 𑀆𑀭𑀩𑁆𑀪𑀝𑁆𑀞𑀸𑀦𑁂𑀘 𑀲𑀩𑁆𑀩𑀧𑀥𑀸𑀦𑀸 𑀅𑀯𑀺𑀚𑁆𑀚𑀸𑀏𑀯 𑀯𑀢𑁆𑀢𑀩𑁆𑀩𑀸 𑀳𑁄𑀢𑀺. 𑀲𑀸𑀘 𑀲𑀗𑁆𑀔𑀸𑀭𑀼𑀧𑁆𑀧𑀸𑀤𑀦𑁂 𑀅𑀯𑀺𑀭𑀚𑁆𑀛𑀦𑀓𑀗𑁆𑀕𑀪𑀽𑀢𑀸𑀢𑀺 𑀦 𑀢𑁂𑀲𑀁 𑀅𑀦𑁆𑀢𑀭𑁂 𑀏𑀓𑀲𑁆𑀲 𑀅𑀗𑁆𑀕𑀲𑁆𑀲 𑀅𑀢𑁆𑀣𑀸𑀬 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀆𑀕𑀫𑀦𑀲𑀫𑁆𑀪𑀸𑀭𑁂𑀲𑀼 𑀢𑀡𑁆𑀳𑀸𑀬 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺. 𑀅𑀬𑀜𑁆𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀦𑀸𑀫 𑀧𑀥𑀸𑀦𑀗𑁆𑀕𑀧𑀭𑀺𑀕𑁆𑀕𑀳 𑀯𑀲𑁂𑀦 𑀧𑀯𑀢𑁆𑀢𑀸. 𑀦 𑀮𑀩𑁆𑀪𑀫𑀸𑀦 𑀲𑀩𑁆𑀩𑀥𑀫𑁆𑀫 𑀧𑀭𑀺𑀕𑁆𑀕𑀳 𑀯𑀲𑁂𑀦𑀸𑀢𑀺.

𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

𑀧𑀼𑀩𑁆𑀩𑀦𑁆𑀢𑀲𑁆𑀲 𑀅𑀯𑀺𑀚𑁆𑀚𑀸𑀫𑀽𑀮𑀁. 𑀅𑀧𑀭𑀦𑁆𑀢𑀲𑁆𑀲 𑀢𑀡𑁆𑀳𑀸𑀫𑀽𑀮𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀧𑀼𑀩𑁆𑀩𑀦𑁆𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑀲𑁆𑀲 𑀳𑁂𑀢𑀼𑀨𑀮𑀓𑁄𑀝𑁆𑀞𑀸𑀲𑀲𑁆𑀲. 𑀅𑀧𑀭𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀲𑁆𑀲 𑀳𑁂𑀢𑀼𑀨𑀮 𑀓𑁄𑀝𑁆𑀞𑀸𑀲𑀲𑁆𑀲𑀸𑀢𑀺 𑀅𑀢𑁆𑀣𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀸𑀦𑀺 𑀤𑁆𑀯𑁂𑀫𑀽𑀮𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 𑁋

𑀢𑁂𑀲𑀫𑁂𑀯𑀘 𑀫𑀽𑀮𑀸𑀦𑀁, 𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀢𑁂𑀲𑀁 𑀲𑀫𑀼𑀤𑀬𑁂𑀦 𑀲𑀓𑀮𑀯𑀝𑁆𑀝𑀁 𑀲𑀫𑀼𑀤𑁂𑀢𑀺. 𑀦𑀺𑀭𑁄𑀥𑁂𑀦𑀘 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀤𑁆𑀯𑁂𑀫𑀽𑀮𑀸𑀦𑀺𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀧𑀦 𑀧𑀝𑀺𑀮𑁄𑀫 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀤𑀲𑁆𑀲𑀦𑀫𑁂𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀮𑁄𑀫 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑁄𑀦𑀸𑀫 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺𑀆𑀤𑀺𑀓𑁄 𑀦𑀺𑀭𑁄𑀥𑀯𑀸𑀭𑁄. 𑀇𑀤𑀸𑀦𑀺 𑀲𑁄𑀓𑀸𑀤𑀺 𑀯𑀘𑀦𑀁 𑀦 𑀓𑁂𑀯𑀮𑀁 𑀦𑀺𑀲𑁆𑀲𑀦𑁆𑀤𑀨𑀮 𑀦𑀺𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑁄𑀢𑀺. 𑀅𑀣𑀔𑁄 𑀚𑀭𑀸𑀫𑀭𑀡𑁂𑀦 𑀲𑀤𑁆𑀥𑀺𑀁 𑀏𑀓𑀁 𑀅𑀗𑁆𑀕𑀁 𑀳𑀼𑀢𑁆𑀯𑀸 𑀉𑀧𑀭𑀺 𑀯𑀝𑁆𑀝𑀫𑀽𑀮𑀥𑀫𑁆𑀫𑀧𑀝𑀺𑀧𑀸𑀤𑀓𑀸𑀦𑀁 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀦𑀺𑀤𑀲𑁆𑀲𑀦𑀢𑁆𑀣𑀁𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀚𑀭𑀸𑀫𑀭𑀡 𑀫𑀼𑀘𑁆𑀙𑀸𑀬𑀸𑀢𑀺𑀆𑀤𑀺 𑀫𑀸𑀳. 𑀢𑀢𑁆𑀣 𑀫𑀼𑀘𑁆𑀙𑀸𑀲𑀤𑁆𑀤𑁂𑀦 𑀲𑁄𑀓𑀸𑀤𑀻𑀦𑀁 𑀕𑀳𑀡𑀁. 𑀢𑁂𑀧𑀺 𑀳𑀺 𑀲𑀬𑀁 𑀆𑀲𑀯𑀲𑀫𑁆𑀪𑀽𑀢𑀸 𑀳𑀼𑀢𑁆𑀯𑀸 𑀧𑀼𑀦 𑀆𑀲𑀯𑀼𑀧𑁆𑀧𑀸𑀤𑀸𑀬 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀏𑀢𑁂𑀦 𑀢𑁂𑀲𑀁 𑀚𑀭𑀸𑀫𑀭𑀡𑀗𑁆𑀕𑁂 𑀕𑀳𑀡𑀁 𑀲𑀺𑀤𑁆𑀥𑀁 𑀪𑀯𑀢𑀺. 𑀚𑀭𑀸𑀫𑀭𑀡𑀫𑀼𑀘𑁆𑀙𑀸𑀬 𑀅𑀪𑀺𑀡𑁆𑀳𑀲𑁄 𑀧𑀻𑀴𑀺𑀢𑀸𑀦𑀁 𑀩𑀸𑀮𑀸𑀦𑀁 𑀆𑀲𑀯𑀸 𑀅𑀪𑀺𑀡𑁆𑀳𑀲𑁄 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀺. 𑀆𑀲𑀯𑀸𑀦𑀁𑀲𑀫𑀼𑀧𑁆𑀧𑀸𑀤𑀸𑀅𑀯𑀺𑀚𑁆𑀚𑀸𑀘 𑀧𑀯𑀟𑁆𑀠𑀢𑀺. 𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀧𑀼𑀦 𑀆𑀩𑀦𑁆𑀥𑀫𑁂𑀯 𑀯𑀝𑁆𑀝𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀘 𑁋

𑀦𑀸𑀦𑀸 𑀩𑁆𑀬𑀲𑀦𑀨𑀼𑀝𑁆𑀞𑀲𑁆𑀲, 𑀲𑁄𑀓𑀸𑀤𑀻𑀦𑀁 𑀧𑀯𑀢𑁆𑀢𑀺𑀢𑁄;

𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀯𑀟𑁆𑀠𑀦𑁆𑀢𑀺, 𑀬𑀢𑁄 𑀯𑀝𑁆𑀝𑀁 𑀧𑀯𑀢𑁆𑀢𑀢𑀻 𑀢𑀺𑀧𑀺.

𑀯𑀢𑁆𑀢𑀩𑁆𑀩𑀁. 𑀬𑀣𑀸𑀳-𑀓𑀢𑀫𑁄𑀘 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀲𑁆𑀲 𑀯𑀺𑀧𑀸𑀓𑁄. 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀁 𑀯𑀸𑀳𑀁 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀁 𑀯𑀤𑀸𑀫𑀺. 𑀧𑀭𑀺𑀬𑁂𑀝𑁆𑀞𑀺𑀯𑁂𑀧𑀓𑁆𑀓𑀁𑀯𑀸𑀢𑀺 𑀢𑀢𑁆𑀣 𑀲𑀫𑁆𑀫𑁄𑀳𑁄 𑀅𑀯𑀺𑀚𑁆𑀚𑀸. 𑀧𑀭𑀺𑀬𑁂𑀝𑁆𑀞𑀺 𑀢𑀡𑁆𑀳𑀸. 𑀢𑀤𑀼𑀪𑀬𑀁 𑀯𑀺𑀧𑀸𑀓𑀁 𑀏𑀢𑀲𑁆𑀲𑀸𑀢𑀺 𑀓𑀢𑁆𑀯𑀸𑀚𑀭𑀸𑀫𑀭𑀡𑀲𑁄𑀓𑀸𑀤𑀺𑀓𑀁 𑀤𑀼𑀓𑁆𑀔𑀁 𑀲𑀫𑁆𑀫𑁄𑀳𑀯𑁂𑀧𑀓𑁆𑀓𑀁 𑀧𑀭𑀺𑀬𑁂𑀝𑁆𑀞𑀺𑀯𑁂𑀧𑀓𑁆𑀓𑀦𑁆𑀢𑀺𑀘 𑀯𑀼𑀘𑁆𑀘𑀢𑀻𑀢𑀺. 𑀢𑀢𑁆𑀣 𑀲𑀫𑁆𑀫𑁄𑀳𑁄𑀦𑀸𑀫 𑀜𑀸𑀢𑀺𑀩𑁆𑀬𑀲𑀦𑀸 𑀤𑀺𑀦𑀸 𑀨𑀼𑀝𑁆𑀞𑁄𑀲𑁄𑀘𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑀸𑀴𑀺 𑀓𑀦𑁆𑀤𑀢𑀺, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀆𑀕𑀢𑁄 𑀲𑀫𑁆𑀫𑁄𑀳𑁄. 𑀧𑀭𑀺𑀬𑀺𑀝𑁆𑀞𑀺𑀦𑀸𑀫 𑀬𑀣𑀸 𑀚𑀺𑀕𑀘𑁆𑀙𑀸𑀢𑀺 𑀧𑀻𑀴𑀺𑀢𑁄. 𑀪𑁄𑀚𑀦𑀁 𑀧𑀢𑁆𑀣𑁂𑀢𑀺 𑀧𑀭𑀺𑀬𑁂𑀲𑀢𑀺 𑀧𑀺𑀧𑀸𑀲𑀸𑀪𑀺𑀧𑀻𑀴𑀺𑀢𑁄. 𑀧𑀸𑀡𑀺𑀬𑀁 𑀧𑀢𑁆𑀣𑁂𑀢𑀺 𑀧𑀭𑀺𑀬𑁂𑀲𑀢𑀺, 𑀏𑀯𑀁 𑀓𑁂𑀦𑀘𑀺 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑁄 𑀲𑀼𑀔𑀁 𑀧𑀢𑁆𑀣𑁂𑀢𑀺 𑀧𑀭𑀺𑀬𑁂𑀲𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀭𑀺𑀬𑀺𑀝𑁆𑀞𑀺𑀢𑀡𑁆𑀳𑀸. 𑀏𑀢𑁆𑀣 𑀧𑀦 𑀬𑀲𑁆𑀫𑀸 𑀚𑀭𑀸𑀫𑀭𑀡𑀲𑀤𑀺𑀲𑀁 𑀫𑀳𑀦𑁆𑀢𑀁 𑀯𑀺𑀲𑀝𑀁 𑀦𑀺𑀬𑀢𑀜𑁆𑀘 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀤𑀼𑀓𑁆𑀔𑀝𑁆𑀞𑀸𑀦𑀁𑀦𑀸𑀫 𑀦𑀢𑁆𑀣𑀺. 𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀜𑁆𑀘 𑀲𑀢𑁆𑀣𑀼𑀲𑀸𑀲𑀦𑀁. 𑀢𑀲𑁆𑀫𑀸 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸 𑀚𑀭𑀸𑀫𑀭𑀡𑀦𑀺𑀤𑀸𑀦𑀸 𑀳𑁄𑀢𑀺. 𑀬𑀣𑀸𑀳-𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀚𑀸𑀬𑀢𑀺𑀘 𑀚𑀺𑀬𑁆𑀬𑀢𑀺𑀘 𑀫𑀺𑀬𑁆𑀬𑀢𑀺𑀘 𑀘𑀯𑀢𑀺𑀘 𑀉𑀧𑀧𑀚𑁆𑀚𑀢𑀺𑀘. 𑀅𑀣𑀘 𑀧𑀦𑀺𑀫𑀲𑁆𑀲𑀁 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑁆𑀲𑀸𑀢𑀺𑀆𑀤𑀺. 𑀬𑁂𑀲𑀼 𑀧𑀦 𑀅𑀗𑁆𑀕𑁂𑀲𑀼 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀜𑀸𑀢𑁂𑀲𑀼 𑀚𑀭𑀸𑀫𑀭𑀡𑀁 𑀲𑀫𑀽𑀮𑀁 𑀔𑀦𑀺𑀢𑁆𑀯𑀸 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀚𑀸𑀢𑀺𑀆𑀤𑀻𑀦𑀺 𑀧𑀼𑀭𑀺𑀫𑀸𑀦𑀺 𑀅𑀗𑁆𑀕𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀅𑀧𑀺𑀘. 𑀏𑀓𑀲𑁆𑀫𑀺𑀁 𑀪𑀯𑁂 𑀞𑀢𑁆𑀯𑀸 𑀆𑀕𑀫𑀦𑀲𑀫𑁆𑀪𑀸𑀭𑁂𑀳𑀺𑀘 𑀕𑀫𑀦𑀲𑀫𑁆𑀪𑀸𑀭𑁂𑀳𑀺𑀘 𑀆𑀕𑀢𑀺𑀬𑀸𑀘 𑀕𑀢𑀺𑀬𑀸𑀘 𑀲𑀤𑁆𑀥𑀺𑀁 𑀅𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀺𑀬𑀸 𑀤𑀲𑁆𑀲𑀺𑀢𑀸𑀬 𑀅𑀢𑀻𑀢𑁂 𑀅𑀦𑀸𑀕𑀢𑁂𑀘 𑀲𑀓𑀮𑀲𑀁𑀲𑀸𑀭𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀤𑀲𑁆𑀲𑀺𑀢𑀸𑀏𑀯 𑀳𑁄𑀢𑀺. 𑀲𑀩𑁆𑀩𑀸𑀦𑀺𑀘 𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀺𑀯𑀢𑁆𑀢𑀺𑀢𑀸𑀦𑀺. 𑀪𑀯𑀘𑀓𑁆𑀓𑀜𑁆𑀘 𑀅𑀦𑀸𑀤𑀺𑀫𑀦𑁆𑀢𑀁 𑀳𑀼𑀢𑁆𑀯𑀸 𑀆𑀩𑀦𑁆𑀥𑀢𑀺𑀬𑁂𑀯. 𑀢𑀲𑁆𑀫𑀸 𑀚𑀭𑀸𑀫𑀭𑀡𑀯𑀘𑀦𑁂𑀦𑀯𑀸 𑀲𑁄𑀓𑀸𑀤𑀺𑀯𑀘𑀦𑁂𑀦𑀯𑀸 𑀅𑀯𑀺𑀚𑁆𑀚𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀯𑀝𑁆𑀝𑀧𑀯𑀢𑁆𑀢𑀲𑁆𑀲 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀤𑀲𑁆𑀲𑀦𑀫𑁂𑀯 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺. 𑀇𑀘𑁆𑀘𑁂𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀇𑀘𑁆𑀘𑁂𑀯𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀞𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀘𑁆𑀘𑁂𑀯𑀁 𑀆𑀩𑀦𑁆𑀥𑀁 𑀅𑀦𑀸𑀤𑀺𑀓𑀁 𑀢𑁂𑀪𑀽𑀫𑀓𑀁 𑀯𑀝𑁆𑀝𑀦𑁆𑀢𑀺𑀧𑀺 𑀬𑁄𑀚𑁂𑀦𑁆𑀢𑀺.

𑀢𑀢𑁆𑀣 𑀇𑀘𑁆𑀘𑁂𑀯𑀁 𑀆𑀩𑀦𑁆𑀥𑀦𑁆𑀢𑀺 𑀚𑀭𑀸𑀫𑀭𑀡𑀫𑀼𑀘𑁆𑀙𑀸𑀬𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢 𑀦𑀬𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀩𑀦𑁆𑀥𑀁. 𑀅𑀦𑀸𑀤𑀺𑀓𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀅𑀯𑀺𑀚𑁆𑀚𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸𑀢𑀺. 𑀯𑀼𑀘𑁆𑀘𑀢𑁂, 𑀯𑀝𑁆𑀝𑀲𑁆𑀲 𑀆𑀤𑀺𑀪𑀽𑀢𑀢𑁆𑀢𑀸 𑀲𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸 𑀦 𑀳𑁄𑀢𑀺. 𑀯𑀝𑁆𑀝𑀓𑀣𑀸𑀬 𑀲𑀻𑀲 𑀪𑀽𑀢𑀢𑁆𑀢𑀸𑀏𑀯 𑀲𑀸 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸. 𑀏𑀯𑀁 𑀯𑀼𑀢𑁆𑀢𑀸𑀬 𑀧𑀦 𑀢𑀸𑀬 𑀯𑀝𑁆𑀝𑀲𑁆𑀲 𑀅𑀦𑀸𑀤𑀺𑀓𑀪𑀸𑀯𑁄𑀧𑀺 𑀤𑀲𑁆𑀲𑀺𑀢𑁄. 𑀅𑀯𑀺𑀚𑁆𑀚𑀸 𑀳𑀺 𑀦𑀸𑀫 𑀩𑀳𑀺𑀤𑁆𑀥𑀸 𑀦 𑀮𑀩𑁆𑀪𑀢𑀺. 𑀲𑀢𑁆𑀢𑀲𑀦𑁆𑀢𑀸𑀦𑁂 𑀏𑀯 𑀮𑀩𑁆𑀪𑀢𑀻𑀢𑀺 𑀧𑀘𑁆𑀘𑀓𑁆𑀔𑀢𑁄𑀯 𑀲𑀺𑀤𑁆𑀥𑀫𑁂𑀢𑀁. 𑀢𑀲𑁆𑀫𑀸 𑀇𑀥 𑀅𑀢𑀻𑀢𑀪𑀯𑁂 𑀅𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀸𑀬 𑀢𑀲𑁆𑀲𑀸𑀅𑀥𑀺𑀝𑁆𑀞𑀸𑀦𑀪𑀽𑀢𑁄 𑀅𑀢𑁆𑀢𑀪𑀸𑀯𑁄𑀧𑀺 𑀢𑀲𑁆𑀫𑀺𑀁 𑀪𑀯𑁂 𑀲𑀺𑀚𑁆𑀛𑀢𑀺𑀬𑁂𑀯. 𑀲𑀺𑀚𑁆𑀛𑀦𑁆𑀢𑁄 𑀘 𑀇𑀫𑀲𑁆𑀲𑀁 𑀤𑀲𑀦𑁄𑀬𑀁 𑀯𑀼𑀢𑁆𑀢 𑀦𑀬𑁂𑀦 𑀅𑀜𑁆𑀜𑀸𑀬 𑀅𑀯𑀺𑀚𑁆𑀚𑀸𑀬 𑀏𑀯 𑀲𑀺𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸. 𑀏𑀯𑀜𑁆𑀘 𑀲𑀪𑀺 𑀧𑀼𑀦 𑀢𑀲𑁆𑀲𑀧𑀺 𑀅𑀥𑀺𑀝𑁆𑀞𑀸𑀦𑀪𑀽𑀢𑁄 𑀅𑀢𑁆𑀢𑀪𑀸𑀯𑁄 𑀲𑀺𑀚𑁆𑀛𑀢𑀺𑀬𑁂𑀯𑀸𑀢𑀺 𑀅𑀯𑀺𑀚𑁆𑀚𑀸 𑀅𑀢𑁆𑀢𑀪𑀸𑀯𑁄𑀘𑀸𑀢𑀺 𑀉𑀪𑀬𑀁 𑀧𑁂𑀢𑀁 𑀅𑀦𑀯𑀝𑁆𑀞𑀺𑀢𑀁 𑀅𑀦𑀸𑀤𑀺𑀓𑀫𑁂𑀯 𑀳𑁄𑀢𑀻𑀢𑀺. 𑀯𑀝𑁆𑀝𑀲𑁆𑀲 𑀧𑀦 𑀢𑀺𑀯𑀺𑀥𑀲𑁆𑀲𑀧𑀺 𑀧𑀥𑀸𑀦𑀧𑀘𑁆𑀘𑀬𑀪𑀽𑀢𑀢𑁆𑀢𑀸 𑀲𑀸 𑀯𑀝𑁆𑀝𑀓𑀣𑀸𑀬 𑀲𑀻𑀲𑀪𑀽𑀢𑀸 𑀳𑁄𑀢𑀺. 𑀬𑀤𑀺 𑀲𑀸 𑀯𑀝𑁆𑀝𑀲𑁆𑀲 𑀆𑀤𑀺𑀪𑀽𑀢𑀸 𑀦 𑀳𑁄𑀢𑀺. 𑀅𑀣 𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑁄 𑀯𑀢𑁆𑀢𑀩𑁆𑀩𑁄𑀢𑀺. 𑀲𑀘𑁆𑀘𑀁. 𑀢𑀲𑁆𑀲𑀸 𑀧𑀦 𑀧𑀘𑁆𑀘𑀬𑁂 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲𑀧𑀺 𑀧𑀘𑁆𑀘𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀆𑀕𑀘𑁆𑀙𑀢𑀺𑀬𑁂𑀯. 𑀏𑀯𑀜𑁆𑀘 𑀲𑀢𑀺 𑀢𑀲𑁆𑀲 𑀢𑀲𑁆𑀲𑀸𑀢𑀺 𑀦𑀺𑀝𑁆𑀞𑀸𑀦𑀫𑁂𑀯 𑀦𑀧𑀜𑁆𑀜𑀸 𑀬𑁂𑀬𑁆𑀬𑀸𑀢𑀺. 𑀅𑀜𑁆𑀜𑀢𑁆𑀣 𑀧𑀦 𑀯𑀼𑀢𑁆𑀢𑁄𑀬𑁂𑀯. 𑀬𑀣𑀸𑀳-𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄𑀢𑀺. 𑀬𑀣𑀸𑀘𑀸𑀳-𑀅𑀯𑀺𑀚𑁆𑀚𑀁 𑀧𑀸𑀳𑀁 𑀪𑀺𑀓𑁆𑀔𑀯𑁂 𑀲𑀸𑀳𑀸𑀭𑀁 𑀲𑀦𑀺𑀤𑀸𑀦𑀁 𑀯𑀤𑀸𑀫𑀺. 𑀓𑁄𑀘𑀲𑁆𑀲𑀸 𑀆𑀳𑀸𑀭𑁄. 𑀧𑀜𑁆𑀘𑀦𑀻𑀯𑀭𑀡𑀸 𑀢𑀺𑀲𑁆𑀲 𑀯𑀘𑀦𑀻𑀬𑀦𑁆𑀢𑀺. 𑀬𑀣𑀸𑀘𑀸𑀳-𑀅𑀯𑀺𑀚𑁆𑀚𑀸 𑀧𑀘𑁆𑀘𑀬𑁄, 𑀲𑀗𑁆𑀔𑀸𑀭𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸. 𑀉𑀪𑀬𑀫𑁂𑀢𑀁 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺. 𑀧𑀞𑀧𑁂𑀲𑀻𑀢𑀺 𑀧𑀜𑁆𑀜𑀸𑀧𑁂𑀲𑀺 𑀤𑁂𑀲𑁂𑀲𑀻𑀢𑀺 𑀅𑀢𑁆𑀣𑁄. [𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑁄.]

𑁧𑁬𑁭. 𑀇𑀤𑀸𑀦𑀺 𑀧𑀝𑁆𑀞𑀸𑀦𑀦𑀬𑀁 𑀤𑀲𑁆𑀲𑁂𑀢𑀼𑀁 𑀳𑁂𑀢𑀼𑀧𑀘𑁆𑀘𑀬𑁄𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣𑀳𑁂𑀢𑀼𑀘 𑀲𑁄 𑀧𑀘𑁆𑀘𑀬𑁄𑀘𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁄, 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀳𑁂𑀢𑀽𑀢𑀺 𑀫𑀽𑀮𑀝𑁆𑀞𑁂𑀦, 𑀓𑁄𑀘 𑀫𑀽𑀮𑀝𑁆𑀞𑁄𑀢𑀺. 𑀭𑀼𑀓𑁆𑀔𑀸𑀦𑀁 𑀭𑀼𑀓𑁆𑀔𑀫𑀽𑀮𑀲𑁆𑀲 𑀯𑀺𑀬 𑀪𑀽𑀫𑀺𑀬𑀁 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺 𑀢𑀪𑀸𑀯𑀲𑀸𑀥𑀦𑀝𑁆𑀞𑁄 𑀫𑀽𑀮𑀝𑁆𑀞𑁄𑀦𑀸𑀫. 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺 𑀪𑀸𑀯𑀲𑀸𑀥𑀦𑀝𑁆𑀞𑁄 𑀫𑀽𑀮𑀝𑁆𑀞𑁄𑀦𑀸𑀫𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀳𑀺𑀦𑁄𑀦𑁆𑀢𑀺 𑀯𑀼𑀤𑁆𑀥𑀺𑀯𑀺𑀭𑀼𑀴𑁆𑀳𑀺𑀯𑁂𑀧𑀼𑀮𑁆𑀮𑀧𑀢𑁆𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀳𑀦𑁆𑀢𑀺 𑀲𑀳𑀚𑀸𑀢𑀥𑀫𑁆𑀫𑀸 𑀏𑀢𑁆𑀣 𑀏𑀢𑁂𑀦𑀯𑀸 𑀆𑀭𑀫𑁆𑀫𑀡𑁂 𑀤𑀴𑁆𑀳𑀦𑀺𑀧𑀸𑀢𑀺𑀦𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀳𑁂𑀢𑀼. 𑀧𑀘𑁆𑀘𑀬 𑀲𑀤𑁆𑀤𑁄 𑀧𑀦 𑀉𑀧𑀓𑀸𑀭𑀓𑀝𑁆𑀞𑁄. 𑀉𑀧𑀓𑀸𑀭𑀓𑁄𑀢𑀺𑀘 𑀲𑀬𑀁 𑀬𑀸𑀤𑀺𑀲𑁂𑀦 𑀲𑀪𑀸𑀯𑁂𑀦 𑀉𑀧𑀮𑀩𑁆𑀪𑀫𑀸𑀦𑁂 𑀅𑀦𑀼𑀧𑁆𑀧𑀦𑁆𑀦𑀸𑀯𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀦𑁆𑀦𑀸𑀯𑀸 𑀢𑀺𑀝𑁆𑀞𑀦𑁆𑀢𑀺 𑀞𑀺𑀢𑀸𑀯𑀸 𑀉𑀧𑀭𑀼𑀧𑀭𑀺𑀯𑀼𑀤𑁆𑀥𑀺𑀯𑀺𑀭𑀼𑀴𑁆𑀳𑀺𑀬𑀸 𑀧𑀘𑁆𑀘𑀬𑀢𑁆𑀢𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀸𑀤𑀺 𑀲𑁂𑀦𑀲𑀪𑀸𑀯𑁂𑀦 𑀉𑀧𑀮𑀤𑁆𑀥𑀺𑀬𑁂𑀯. 𑀦𑀳𑀺 𑀲𑀪𑀸𑀯𑀥𑀫𑁆𑀫𑁂𑀲𑀼 𑀈𑀳𑀸𑀯𑀸 𑀩𑁆𑀬𑀸𑀧𑀸𑀭𑁄𑀯𑀸 𑀉𑀧𑀮𑀩𑁆𑀪𑀢𑀺. 𑀬𑁂𑀦 𑀓𑀢𑁆𑀢𑀸𑀯𑀸 𑀓𑀸𑀭𑁂𑀢𑀸𑀯𑀸 𑀉𑀧𑀮𑀩𑁆𑀪𑁂𑀬𑁆𑀬𑀸𑀢𑀺. 𑀢𑀣𑀸 𑀉𑀧𑀮𑀤𑁆𑀥𑀺𑀬𑀁 𑀧𑀦 𑀲𑀢𑀺 𑀅𑀦𑀼𑀭𑀽𑀧𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀉𑀧𑁆𑀧𑀦𑁆𑀦𑀸𑀦𑀁𑀯𑀸 𑀞𑀺𑀢𑀺𑀪𑀸𑀯𑀧𑀢𑁆𑀢𑀺𑀢𑁄 𑀞𑀺𑀢𑀸𑀦𑀁 𑀯𑀸 𑀉𑀧𑀭𑀼𑀧𑀭𑀺𑀯𑀼𑀤𑁆𑀥𑀺𑀯𑀺𑀭𑀼𑀴𑁆𑀳𑀺𑀬𑀸 𑀧𑀘𑁆𑀘𑀬𑀢𑁆𑀢𑀼𑀧𑀕𑀫𑀦𑀢𑁄 𑀲𑀼𑀝𑁆𑀞𑀼 𑀓𑀭𑀸𑀦𑁆𑀢𑁄 𑀯𑀺𑀬 𑀲𑀸𑀥𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀉𑀧𑀓𑀸𑀭𑀓𑁄 𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺. 𑀇𑀢𑀺 𑀆𑀭𑀫𑁆𑀫𑀡𑁂 𑀣𑀺𑀭𑀪𑀸𑀯𑀯𑀼𑀤𑁆𑀥𑀺 𑀯𑀺𑀭𑀼𑀴𑁆𑀳𑀺𑀪𑀸𑀯𑀲𑀸𑀥𑀦 𑀲𑀗𑁆𑀔𑀸𑀢𑁂𑀦 𑀫𑀽𑀮𑀪𑀸𑀯𑁂𑀦 𑀉𑀧𑀓𑀸𑀭𑀓𑀸 𑀙𑀳𑁂𑀢𑀼𑀥𑀫𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑁄 𑀦𑀸𑀫.

𑀆𑀭𑀫𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑀼𑀝𑁆𑀞𑀼 𑀭𑀢𑀺𑀁 𑀅𑀦𑀼𑀪𑀯𑀦𑁆𑀢𑀸 𑀯𑀺𑀬 𑀅𑀚𑁆𑀛𑁄𑀮𑀫𑁆𑀩𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑀁. 𑀆𑀭𑀫𑁆𑀫𑀡𑀪𑀸𑀦𑁂𑀯 𑀉𑀧𑀓𑀸𑀭𑀓𑀸 𑀙𑀴𑀸𑀭𑀫𑁆𑀫𑀡𑀥𑀫𑁆𑀫𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁄. 𑀅𑀥𑀺𑀧𑀢𑀺 𑀲𑀤𑁆𑀤𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀥𑀺𑀧𑀢𑀺 𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀥𑀺𑀧𑀢𑀺𑀧𑀘𑁆𑀘𑀬𑁄. 𑀲𑁄 𑀤𑀼𑀯𑀺𑀥𑁄 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀲𑀳𑀸𑀚𑀸𑀢𑀸𑀥𑀺𑀧𑀢𑀺𑀯𑀲𑁂𑀦. 𑀆𑀭𑀫𑁆𑀫𑀡𑀥𑀫𑁆𑀫𑀸𑀧𑀺 𑀳𑀺 𑀓𑁂𑀘𑀺 𑀕𑀭𑀼𑀓𑀢𑀸 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀺𑀓𑀥𑀫𑁆𑀫𑁂 𑀲𑀸𑀫𑀺𑀦𑁄 𑀯𑀺𑀬 𑀤𑀸𑀲𑁂 𑀅𑀢𑁆𑀢𑀦𑁄 𑀯𑀲𑁂𑀯𑀢𑁆𑀢𑀬𑀫𑀸𑀦𑀸 𑀅𑀢𑁆𑀢𑀦𑀺 𑀦𑀺𑀘𑁆𑀘𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑁂𑀏𑀯 𑀓𑀭𑁄𑀦𑁆𑀢𑀻𑀢𑀺. 𑀦𑀢𑁆𑀣𑀺 𑀅𑀦𑁆𑀢𑀭𑀁 𑀏𑀢𑀲𑁆𑀲𑀸𑀢𑀺 𑀅𑀦𑀦𑁆𑀢𑀭𑁄, 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄. 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄. 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀥𑀫𑁆𑀫𑀢𑁄 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀅𑀢𑁆𑀣𑀢𑁄 𑀧𑀦 𑀧𑀼𑀭𑀺𑀫𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑁂𑀧𑀺 𑀧𑀘𑁆𑀙𑀸 𑀲𑀦𑁆𑀢𑀸𑀦𑀁 𑀉𑀘𑁆𑀙𑀺𑀚𑁆𑀚𑀺𑀢𑀼𑀁 𑀅𑀤𑀢𑁆𑀯𑀸 𑀲𑀦𑁆𑀢𑀸𑀦𑀸𑀦𑀼𑀩𑀦𑁆𑀥𑀯𑀲𑁂𑀦 𑀲𑀸𑀭𑀫𑁆𑀫𑀡𑀥𑀫𑁆𑀫 𑀪𑀸𑀯𑁂𑀦 𑀅𑀢𑁆𑀢𑀲𑀤𑀺𑀲𑀲𑁆𑀲 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸. 𑀥𑀫𑁆𑀫𑀦𑁆𑀢𑀭𑁂 𑀉𑀧𑁆𑀧𑀸𑀤𑀺𑀬𑀫𑀸𑀦𑁂𑀧𑀺 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀘𑀺𑀢𑁆𑀢𑀦𑀺𑀬𑀸𑀫𑀁 𑀦𑀸𑀫 𑀲𑀸𑀥𑁂𑀢𑁆𑀯𑀸 𑀅𑀦𑀼𑀭𑀽𑀧𑀲𑁆𑀲𑁂𑀯 𑀥𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑁆𑀧𑀸𑀤𑀦𑀁 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀅𑀲𑀜𑁆𑀜𑀲𑀢𑁆𑀢𑀸 𑀘𑀯𑀦𑁆𑀢𑀲𑁆𑀲𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀕𑀧𑀯𑀢𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁𑀧𑀺 𑀅𑀦𑀦𑁆𑀢𑀭𑀢𑀸 𑀲𑀫𑀦𑀦𑁆𑀢𑀭𑀢𑀸𑀘 𑀉𑀧𑀧𑀦𑁆𑀦𑀸 𑀳𑁄𑀢𑀻𑀢𑀺. 𑀦𑀳𑀺 𑀅𑀪𑀸𑀯 𑀪𑀽𑀢𑁄 𑀅𑀦𑁆𑀢𑀭𑁂 𑀓𑀸𑀮𑁄 𑀢𑁂𑀲𑀁 𑀅𑀦𑁆𑀢𑀭𑀁 𑀓𑀭𑁄𑀢𑀺𑀦𑀸𑀫. 𑀦𑀘 𑀅𑀜𑁆𑀜𑀲𑀦𑁆𑀢𑀸𑀦𑀪𑀽𑀢𑁄 𑀅𑀦𑁆𑀢𑀭𑁂 𑀭𑀽𑀧𑀥𑀫𑁆𑀫𑁄. 𑀅𑀜𑁆𑀜𑀜𑁆𑀳𑀺 𑀭𑀽𑀧𑀲𑀦𑁆𑀢𑀸𑀦𑀁, 𑀅𑀜𑁆𑀜𑀁 𑀅𑀭𑀽𑀧𑀲𑀦𑁆𑀢𑀸𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀸𑀮𑀸𑀦𑀦𑁆𑀢𑀭𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀡𑁆𑀞𑀸𑀦𑀸𑀪𑀸𑀯𑀢𑁄 𑀲𑀼𑀝𑁆𑀞𑀼 𑀅𑀦𑀦𑁆𑀢𑀭𑀸𑀢𑀺 𑀲𑀫𑀦𑀦𑁆𑀢𑀭𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀬𑀣𑀸𑀲𑀡𑁆𑀞𑀸𑀦𑀯𑀦𑁆𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀢𑀸𑀦𑀸𑀫 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀲𑀳𑀺𑀢𑀸𑀬𑁂𑀯 𑀳𑁄𑀢𑀺. 𑀦 𑀢𑀣𑀸 𑀲𑀡𑁆𑀞𑀸𑀦𑀭𑀳𑀺𑀢𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁. 𑀢𑀲𑁆𑀫𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀢𑁂𑀲𑀁 𑀏𑀓𑀻𑀪𑀽𑀢𑀸𑀦𑀁 𑀯𑀺𑀬 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀢𑀸𑀦𑀸𑀫. 𑀢𑀣𑀸 𑀧𑀯𑀢𑁆𑀢𑀦 𑀲𑀫𑀢𑁆𑀣𑀢𑀸 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀬𑁂 𑀧𑀦 𑀥𑀫𑁆𑀫𑀸 𑀅𑀢𑁆𑀢𑀦𑀺 𑀚𑀸𑀢𑁂 𑀏𑀯 𑀚𑀸𑀬𑀦𑁆𑀢𑀺, 𑀦𑁄 𑀅𑀚𑀸𑀢𑁂. 𑀅𑀢𑁆𑀢𑀦𑀸 𑀲𑀳𑁂𑀯𑀘 𑀚𑀸𑀬𑀦𑁆𑀢𑀺, 𑀦𑁄 𑀧𑀼𑀭𑁂 𑀧𑀘𑁆𑀙𑀸𑀘, 𑀢𑁂𑀲𑀁 𑀚𑀸𑀢𑀢𑁆𑀣𑀸𑀬 𑀯𑀺𑀬 𑀲𑀬𑀁 𑀢𑁂𑀳𑀺 𑀲𑀳 𑀚𑀸𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀧𑀓𑀸𑀲𑀲𑁆𑀲 𑀧𑀤𑀻𑀧𑁄 𑀯𑀺𑀬. 𑀧𑀤𑀻𑀧𑀚𑀸𑀮𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀓𑀸𑀲𑀲𑀗𑁆𑀔𑀸𑀢𑁂𑀦 𑀆𑀮𑁄𑀓𑁂𑀦 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀦𑁆𑀢𑀁 𑀢𑀺𑀤𑀡𑁆𑀟𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄. 𑀏𑀯𑀜𑁆𑀘 𑀲𑀢𑀺 𑀇𑀫𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀼𑀭𑀺𑀫𑁂𑀦 𑀲𑀳 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀦𑀳𑀺 𑀲𑀳 𑀚𑀸𑀢𑀲𑀤𑁆𑀤𑁄 𑀏𑀯𑀭𑀽𑀧𑀁 𑀅𑀜𑁆𑀜𑀫𑀜𑁆𑀜𑁄𑀧𑀢𑁆𑀣𑀫𑁆𑀪𑀦𑀁 𑀩𑁄𑀥𑁂𑀢𑀻𑀢𑀺. 𑀦𑀺𑀲𑁆𑀲𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀲𑁆𑀲𑀬𑁄. 𑀦𑀺𑀲𑁆𑀲𑀬𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀺𑀲𑁆𑀲𑀬𑀧𑀘𑁆𑀘𑀬𑁄. 𑀲𑁄 𑀧𑀦 𑀲𑀳𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢 𑀦𑀺𑀲𑁆𑀲𑀬𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀲𑀳𑀚𑀸𑀢𑁄𑀯 𑀲𑀫𑀸𑀦𑁄 𑀧𑀝𑀓𑁄𑀝𑁆𑀞𑀓𑁄 𑀯𑀺𑀬 𑀘𑀺𑀢𑁆𑀢𑀓𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀳𑀚𑀸𑀢𑀦𑀺𑀲𑁆𑀲𑀬𑁄. 𑀧𑀣𑀯𑀻 𑀯𑀺𑀬 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀧𑀼𑀭𑁂 𑀚𑀸𑀢𑁄 𑀳𑀼𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢 𑀦𑀺𑀲𑁆𑀲𑀬𑁄. 𑀩𑀮𑀯𑀢𑀭𑁄 𑀧𑀦 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄. 𑀬𑀣𑀸 𑀳𑀺 𑀲𑀸𑀮𑀺𑀪𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀲𑀽𑀤𑁄𑀯𑀸 𑀉𑀓𑁆𑀔𑀮𑀺𑀯𑀸𑀓𑀝𑁆𑀞𑀁𑀯𑀸 𑀅𑀕𑁆𑀕𑀺𑀯𑀸𑀦𑀺𑀲𑁆𑀲𑀬𑁄 𑀏𑀯 𑀳𑁄𑀢𑀺, 𑀦 𑀉𑀧𑀦𑀺𑀲𑁆𑀲𑀬𑁄. 𑀲𑀸𑀮𑀺𑀔𑁂𑀢𑁆𑀢𑀯𑀼𑀝𑁆𑀞𑀺𑀥𑀸𑀭𑀸 𑀏𑀯 𑀧𑀦 𑀉𑀧𑀦𑀺𑀲𑁆𑀲𑀬𑁄, 𑀦 𑀳𑀺 𑀢𑀸𑀲𑀼𑀅𑀲𑀢𑀺 𑀪𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀲𑀽𑀤𑀸𑀤𑀻𑀦𑀁𑀧𑀺 𑀣𑀸𑀫𑁄𑀦𑀸𑀫 𑀅𑀢𑁆𑀣𑀻𑀢𑀺. 𑀢𑀣𑀸 𑀬𑀳𑀺𑀁 𑀧𑀘𑁆𑀘𑀬𑁂 𑀅𑀲𑀢𑀺 𑀦𑀺𑀲𑁆𑀲𑀬𑀥𑀫𑁆𑀫𑀸𑀧𑀺 𑀦𑀢𑁆𑀣𑀺. 𑀓𑀼𑀢𑁄 𑀦𑀺𑀲𑁆𑀲𑀺𑀢𑀥𑀫𑁆𑀫𑀸. 𑀲𑁄 𑀧𑀘𑁆𑀘𑀬𑁄 𑀦𑀺𑀲𑁆𑀲𑀬𑀢𑁄𑀧𑀺 𑀩𑀮𑀯𑀢𑀭𑀝𑁆𑀞𑁂𑀦 𑀉𑀧𑀦𑀺𑀲𑁆𑀲𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀲𑁄 𑀧𑀦 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁄 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀕𑀭𑀼𑀓𑀢𑀸 𑀆𑀭𑀫𑁆𑀫𑀡 𑀥𑀫𑁆𑀫𑀸 𑀕𑀭𑀼𑀓𑀢𑀢𑁆𑀢𑀸𑀏𑀯 𑀅𑀥𑀺𑀧𑀢𑀺𑀪𑀽𑀢𑀸 𑀩𑀮𑀯 𑀦𑀺𑀲𑁆𑀲𑀬𑀪𑀽𑀢𑀸𑀘 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀭𑀧𑀘𑁆𑀘𑀬𑀥𑀫𑁆𑀫𑀸𑀘 𑀢𑁂𑀳𑀺 𑀯𑀺𑀦𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀧𑀯𑀢𑁆𑀢𑀺𑀬𑀸 𑀏𑀯 𑀅𑀪𑀸𑀯𑀢𑁄 𑀩𑀮𑀯𑀦𑀺𑀲𑁆𑀲𑀬𑀸𑀏𑀯 𑀳𑁄𑀦𑁆𑀢𑀺. 𑀧𑀓𑀢𑀽𑀧𑀦𑀺𑀲𑁆𑀲𑀬𑁄𑀢𑀺 𑀏𑀢𑁆𑀣 𑀧𑀦 𑀧𑀓𑀢𑁄 𑀉𑀧𑀦𑀺𑀲𑁆𑀲𑀬𑁄𑀢𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄. 𑀧𑀓𑀢𑁄𑀢𑀺𑀘 𑀬𑀣𑀸 𑀓𑀢𑁂 𑀲𑀢𑀺 𑀅𑀦𑀼𑀭𑀽𑀧𑁂 𑀓𑀸𑀮𑁂 𑀢𑀲𑁆𑀫𑀺𑀁𑀲𑀦𑁆𑀢𑀸𑀦𑁂 𑀏𑀓𑀦𑁆𑀢𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀣𑀸 𑀲𑀼𑀝𑁆𑀞𑀼 𑀓𑀢𑁄𑀢𑀺 𑀅𑀢𑁆𑀣𑁄. 𑀓𑀭𑀡𑀜𑁆𑀘𑁂𑀢𑁆𑀣 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸𑀢𑀺𑀘 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀧𑀢𑁆𑀣𑀦𑀸𑀢𑀺𑀘 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀩𑁆𑀩𑀪𑀸𑀕𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀼𑀝𑁆𑀞𑀼 𑀉𑀧𑁆𑀧𑀸𑀤𑀦𑀁. 𑀓𑀸𑀬𑀺𑀓𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀧𑀼𑀕𑁆𑀕𑀮𑁄 𑀉𑀢𑀼 𑀪𑁄𑀚𑀦𑀁 𑀲𑁂𑀦𑀸𑀲𑀦𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀼𑀝𑁆𑀞𑀼 𑀉𑀧𑀲𑁂𑀯𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀭𑁂𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄. 𑀲𑁄 𑀤𑀼𑀯𑀺𑀥𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢 𑀦𑀺𑀲𑁆𑀲𑀬 𑀧𑀼𑀭𑁂𑀚𑀸𑀢 𑀯𑀲𑁂𑀦. 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀥𑀫𑁆𑀫𑀸 𑀏𑀯 𑀳𑀺 𑀓𑁂𑀘𑀺 𑀧𑀼𑀭𑁂𑀚𑀸𑀢 𑀢𑀸𑀫𑀢𑁆𑀢𑀯𑀺𑀲𑀺𑀝𑁆𑀞𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀸𑀢𑀺. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀦 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀸𑀓𑀸𑀭𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀼𑀭𑁂𑀚𑀸𑀢𑀸𑀓𑀸𑀭𑁂𑀦 𑀉𑀧𑀓𑀸𑀭𑀓𑀢𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀭𑁂 𑀚𑀸𑀢𑀢𑀸𑀯𑀺𑀲𑀺𑀝𑁆𑀞𑁂𑀳𑀺 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀲𑀢𑁆𑀢𑀺𑀯𑀺𑀲𑁂𑀲𑁂𑀳𑀺 𑀅𑀜𑁆𑀜𑁄 𑀯𑀺𑀲𑀼𑀁 𑀧𑀼𑀭𑁂𑀚𑀸𑀢𑀲𑀢𑁆𑀢𑀺𑀯𑀺𑀲𑁂𑀲𑁄𑀦𑀸𑀫 𑀦𑀤𑀺𑀲𑁆𑀲𑀢𑀺𑀬𑁂𑀯. 𑀧𑀼𑀭𑁂 𑀭𑁄𑀧𑁂𑀢𑁆𑀯𑀸 𑀚𑀸𑀢𑀸𑀦𑀁 𑀭𑀼𑀓𑁆𑀔𑀧𑁄𑀢𑀓𑀸𑀦𑀁 𑀯𑀺𑀬 𑀧𑀘𑁆𑀙𑀸 𑀆𑀲𑀺𑀜𑁆𑀘𑀺𑀬𑀫𑀸𑀦𑀁 𑀉𑀤𑀓𑀁 𑀧𑀼𑀭𑁂 𑀚𑀸𑀢𑀸𑀦𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀼𑀤𑁆𑀥𑀯𑀺𑀭𑀼𑀴𑁆𑀳𑀪𑀸𑀯𑀜𑁆𑀘 𑀧𑀘𑁆𑀙𑀸𑀧𑀺 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀜𑁆𑀘 𑀧𑀸𑀧𑁂𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀉𑀧𑀓𑀸𑀭𑀓𑁄 𑀧𑀘𑁆𑀙𑀸𑀚𑀸𑀢𑁄 𑀅𑀭𑀽𑀧𑀥𑀫𑁆𑀫𑁄 𑀧𑀘𑁆𑀙𑀸 𑀚𑀸𑀢𑀧𑀘𑁆𑀘𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀕𑀺𑀚𑁆𑀛𑀧𑁄𑀢𑀓𑀲𑀭𑀻𑀭𑀸𑀦𑀁 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸𑀯𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀫𑀽𑀮𑀝𑀻𑀓𑀸𑀬𑀜𑁆𑀘 𑀏𑀢𑁂𑀦 𑀫𑀦𑁄𑀲𑀜𑁆𑀘𑁂 𑀢𑀦𑀸𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂𑀳𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀺𑀢 𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀆𑀳𑀸𑀭𑀸𑀲𑀸 𑀯𑀺𑀬𑀸𑀢𑀺 𑀅𑀯𑀢𑁆𑀯𑀸 𑀘𑁂𑀢𑀦𑀸𑀕𑀳𑀡𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀧𑀘𑁆𑀙𑀸𑀚𑀸𑀢𑀸 𑀲𑀲𑀫𑁆𑀧𑀬𑀼𑀢𑁆𑀢𑀸 𑀆𑀳𑀸𑀭𑀸𑀲𑀸 𑀘𑁂𑀢𑀦𑀸 𑀧𑀼𑀭𑁂𑀚𑀸𑀢𑀸𑀦𑀁 𑀢𑁂𑀲𑀁 𑀕𑀺𑀚𑁆𑀛𑀲𑀭𑀻𑀭𑀭𑀽𑀧𑀸𑀦𑀁 𑀘𑀺𑀭𑀓𑀸𑀮𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀯𑀺𑀦𑀸𑀧𑀺 𑀅𑀫𑀺𑀮𑀸𑀢 𑀪𑀸𑀯𑀁 𑀉𑀧𑀭𑀽𑀧𑀭𑀺𑀘 𑀯𑀼𑀤𑁆𑀥𑀯𑀺𑀭𑀼𑀴𑁆𑀳𑀭𑀽𑀧𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀁 𑀧𑀸𑀧𑁂𑀢𑁆𑀯𑀸 𑀉𑀧𑀢𑁆𑀣𑀫𑁆𑀪𑀢𑀺𑀬𑁂𑀯. 𑀬𑀲𑁆𑀫𑀸 𑀲𑀼𑀧𑀸𑀓𑀝𑁂𑀦 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀓 𑀤𑁂𑀲𑁂𑀦 𑀲𑀓𑀮𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑀲𑁆𑀲 𑀲𑀸𑀥𑀦𑀢𑁆𑀣𑀸𑀬 𑀅𑀬𑀁 𑀉𑀧𑀫𑀸 𑀇𑀥 𑀯𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀘𑁂𑀢𑀦𑀸 𑀕𑀳𑀡𑀜𑁆𑀘 𑀧𑀘𑁆𑀙𑀸𑀚𑀸𑀢 𑀧𑀘𑁆𑀘𑀬𑀁 𑀧𑀢𑁆𑀯𑀸𑀧𑀺 𑀘𑁂𑀢𑀦𑀸𑀏𑀯 𑀧𑀥𑀸𑀦𑀸 𑀚𑀸𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀦𑁆𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀏𑀯𑀜𑁆𑀳𑀺 𑀲𑀢𑀺 𑀧𑀘𑁆𑀙𑀸𑀚𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀙𑀸 𑀚𑀸𑀢𑀸𑀬 𑀏𑀯 𑀉𑀧𑀫𑀸𑀬 𑀲𑀸𑀥𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢 𑀝𑀻𑀓𑀸𑀧𑀸𑀞𑁂𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺𑀬𑁂𑀯.

𑀆𑀲𑁂𑀯𑀦𑁆𑀢𑀺 𑀢𑀁 𑀲𑀼𑀝𑁆𑀞𑀼 𑀪𑀚𑀦𑁆𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀥𑀫𑁆𑀫𑀸 𑀲𑀼𑀝𑁆𑀞𑀼 𑀲𑁂𑀯𑀫𑀸𑀦𑀸 𑀯𑀺𑀬 𑀪𑀚𑀫𑀸𑀦𑀸 𑀯𑀺𑀬 𑀢𑀲𑁆𑀲 𑀧𑀼𑀭𑀺𑀫𑀲𑁆𑀲 𑀲𑀩𑁆𑀩𑀧𑀸𑀭𑀺𑀧𑀽𑀭𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀏𑀯 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑁂𑀯𑀦𑀁. 𑀆𑀲𑁂𑀯𑁂𑀢𑀺𑀯𑀸 𑀢𑁂 𑀥𑀫𑁆𑀫𑁂 𑀅𑀢𑁆𑀢𑀦𑁄 𑀧𑀭𑀺𑀯𑀸𑀲𑀁 𑀲𑀼𑀝𑁆𑀞𑀼 𑀕𑀸𑀳𑀸𑀧𑁂𑀢𑀺. 𑀯𑀟𑁆𑀠𑁂𑀢𑀻𑀢𑀺𑀯𑀸 𑀆𑀲𑁂𑀯𑀦𑀁. 𑀅𑀧𑀺𑀘 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀅𑀢𑁆𑀢𑀦𑀸 𑀲𑀤𑀺𑀲𑀲𑁆𑀲 𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲 𑀅𑀦𑀦𑁆𑀢𑀭𑀥𑀫𑁆𑀫𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀧𑀯𑀢𑁆𑀢𑀦𑀁 𑀅𑀢𑁆𑀢𑀲𑀤𑀺𑀲𑀲𑁆𑀲𑀯𑀸 𑀅𑀢𑁆𑀢𑀲𑀤𑀺𑀲𑀪𑀸𑀯𑀸𑀧𑀸𑀤𑀦𑀁 𑀯𑀸𑀲𑀦𑀁 𑀆𑀲𑁂𑀯𑀦𑀝𑁆𑀞𑁄𑀢𑀺 𑀫𑀽𑀮𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀬𑁄𑀕𑁂𑀦 𑀓𑀭𑀡𑀻𑀬𑀲𑁆𑀲𑀸𑀢𑀺 𑀏𑀢𑁂𑀦 𑀆𑀯𑀚𑁆𑀚𑀦𑀤𑁆𑀯𑀬𑀜𑁆𑀘 𑀲𑀩𑁆𑀩𑀯𑀺𑀧𑀸𑀓𑀥𑀫𑁆𑀫𑁂𑀘 𑀦𑀺𑀯𑀢𑁆𑀢𑁂𑀢𑀺. 𑀦𑀳𑀺 𑀆𑀯𑀚𑁆𑀚𑀦 𑀤𑁆𑀯𑀬𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀫𑀸𑀦𑀲𑁆𑀲𑀧𑀺 𑀯𑀟𑁆𑀠𑁂𑀢𑀼𑀁𑀯𑀸 𑀳𑀸𑀧𑁂𑀢𑀼𑀁𑀯𑀸 𑀧𑀬𑁄𑀕𑁂𑀦 𑀓𑀭𑀡𑀻𑀬𑀢𑀸𑀦𑀸𑀫 𑀅𑀢𑁆𑀣𑀺 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸. 𑀯𑀺𑀧𑀸𑀓𑁂𑀲𑀼𑀘 𑀅𑀭𑀺𑀬𑀨𑀮𑀸𑀦𑀺 𑀧𑀭𑀺𑀓𑀫𑁆𑀫𑀧𑀬𑁄𑀕𑁂𑀦 𑀓𑀭𑀡𑀻𑀬𑀸𑀦𑀺𑀧𑀺 𑀫𑀕𑁆𑀕𑀘𑁂𑀢𑀦𑀸𑀦𑀼𑀪𑀸𑀯𑁂𑀦 𑀯𑀺𑀦𑀸 𑀓𑁂𑀯𑀮𑁂𑀦 𑀢𑁂𑀦 𑀧𑀬𑁄𑀕𑁂𑀦𑁂𑀯 𑀲𑀸𑀥𑁂𑀢𑀩𑁆𑀩𑀸𑀦𑀺 𑀦 𑀳𑁄𑀦𑁆𑀢𑀺. 𑀓𑁂𑀯𑀮𑀁 𑀓𑀫𑁆𑀫𑀯𑁂𑀕𑁂𑀦 𑀲𑀦𑁆𑀢𑀸𑀦𑁂 𑀧𑀸𑀢𑀺𑀢𑁂𑀲𑀼 𑀮𑁄𑀓𑀺𑀬𑀯𑀺𑀧𑀸𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀧𑀯𑀢𑁆𑀢𑀦𑀦𑁆𑀢𑀺 𑀉𑀧𑀭𑀼𑀧𑀭𑀺 𑀧𑀕𑀼𑀡 𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀲𑀳 𑀧𑀯𑀢𑁆𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫 𑀯𑀺𑀚𑁆𑀚𑀸𑀲𑀺𑀧𑁆𑀧𑀼𑀕𑁆𑀕𑀳𑀡𑁂𑀲𑀼 𑀧𑀼𑀭𑀺𑀫𑀸𑀪𑀺𑀬𑁄𑀕𑁄 𑀯𑀺𑀬 𑀆𑀲𑁂𑀯𑀦𑀝𑁆𑀞𑁂𑀦 𑀅𑀦𑀦𑁆𑀢𑀭𑁂 𑀧𑀯𑀢𑁆𑀢𑀸𑀦𑀁 𑀲𑀚𑀸𑀢𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑀸𑀬 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀦𑀸𑀫𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺.

𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑀺𑀢𑁆𑀢𑀗𑁆𑀕𑀸𑀪𑀺𑀲𑀗𑁆𑀔𑀭𑀡𑀪𑀽𑀢𑁂𑀦 𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁂 𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀓𑀫𑁆𑀫𑀧𑀘𑁆𑀘𑀬𑁄. 𑀲𑁄 𑀤𑀼𑀯𑀺𑀥𑁄 𑀲𑀳𑀚𑀸𑀢𑀦𑀸𑀦𑀸𑀓𑁆𑀔𑀡𑀺𑀓𑀯𑀲𑁂𑀦. 𑀢𑀢𑁆𑀣 𑀚𑁂𑀝𑁆𑀞𑀲𑀺𑀲𑁆𑀲 𑀫𑀳𑀸 𑀯𑀟𑁆𑀠𑀓𑀺𑀆𑀤𑀬𑁄 𑀯𑀺𑀬 𑀲𑀓𑀺𑀘𑁆𑀘𑀧𑀭𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀩𑁆𑀩𑀸𑀧𑀺 𑀲𑀳𑀚𑀸𑀢𑀘𑁂𑀢𑀦𑀸 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀬𑀣𑀸 𑀧𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀓𑀺𑀁 𑀲𑀦𑁆𑀦𑀺𑀧𑀸𑀢𑀧𑁆𑀧𑀬𑁄𑀕𑁄 𑀓𑀸𑀫𑀲𑀼𑀔𑀸𑀦𑀼𑀪𑀯𑀦𑀓𑀺𑀘𑁆𑀘𑀜𑁆𑀘 𑀓𑀸𑀮𑀦𑁆𑀢𑀭𑁂 𑀧𑀼𑀢𑁆𑀢𑀧𑀸𑀢𑀼𑀪𑀸𑀯𑀢𑁆𑀣𑀸𑀬𑀯𑀢𑁆𑀣𑀼𑀫𑁆𑀳𑀺 𑀩𑀻𑀚𑀦𑀺𑀥𑀸𑀦 𑀓𑀺𑀘𑁆𑀘𑀜𑁆𑀘 𑀲𑀫𑁆𑀧𑀸𑀤𑁂𑀢𑀺. 𑀏𑀯𑀫𑁂𑀯𑀁 𑀬𑀣𑀸𑀯𑀼𑀢𑁆𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀜𑁆𑀘 𑀢𑀤𑀪𑀺𑀲𑀗𑁆𑀔𑀭𑀡𑀯𑁂𑀕𑀚𑀦𑀺𑀢𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀧𑀸𑀢𑀼𑀪𑀸𑀯𑀢𑁆𑀣𑀸𑀬 𑀲𑀦𑁆𑀢𑀸𑀦𑁂 𑀓𑀺𑀭𑀺𑀬𑀸 𑀯𑀺𑀲𑁂𑀲𑀦𑀺𑀥𑀸𑀦 𑀓𑀺𑀘𑁆𑀘𑀜𑁆𑀘 𑀲𑀫𑁆𑀧𑀸𑀤𑁂𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀓𑀼𑀲𑀮𑀸𑀓𑀼𑀲𑀮 𑀘𑁂𑀢𑀦𑀸 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄𑀦𑀸𑀫. 𑀯𑀺𑀧𑀘𑁆𑀘𑀦𑀫𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀯𑀺𑀧𑀸𑀓𑀧𑀘𑁆𑀘𑀬𑁄. 𑀯𑀺𑀧𑀘𑁆𑀘𑀦 𑀪𑀸𑀯𑁄𑀘 𑀦𑀸𑀫 𑀮𑁄𑀓𑁂 𑀲𑀩𑁆𑀩𑁂𑀲𑀁 𑀧𑀼𑀧𑁆𑀨𑀨𑀮𑀸𑀤𑀻𑀦𑀁 𑀲𑀼𑀝𑁆𑀞𑀼 𑀯𑀺𑀧𑀓𑁆𑀓𑀪𑀸𑀯𑀁 𑀧𑀢𑁆𑀢𑀓𑀸𑀮𑁂 𑀲𑀩𑁆𑀩𑀸𑀓𑀸𑀭𑁂𑀦 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺. 𑀏𑀯𑀁 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢 𑀪𑀸𑀯𑀲𑀗𑁆𑀔𑀸𑀓𑁂𑀦 𑀫𑀦𑁆𑀤𑀫𑀦𑁆𑀤𑀸𑀓𑀸𑀭𑁂𑀦 𑀲𑀦𑁆𑀢𑀸𑀦𑁂 𑀧𑀸𑀢𑀼𑀪𑀸𑀯𑁄. 𑀢𑀢𑁄𑀬𑁂𑀯𑀘 𑀯𑀺𑀧𑀸𑀓𑀸𑀦𑀁 𑀧𑀯𑀢𑁆𑀢𑀺 𑀅𑀯𑀺𑀪𑀽𑀢𑀸 𑀳𑁄𑀢𑀺. 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑁂 𑀓𑀫𑁆𑀫𑀸𑀤𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀦𑀺𑀧𑀺 𑀢𑀸𑀦𑀺 𑀯𑀼𑀝𑁆𑀞𑀺𑀢𑀓𑀸𑀮𑁂 𑀓𑀺𑀜𑁆𑀘𑀺𑀚𑀸𑀦𑀦𑀘𑀺𑀢𑁆𑀢 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸 𑀦𑀳𑁄𑀦𑁆𑀢𑀻𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀧𑀦 𑀧𑀘𑁆𑀙𑀸𑀚𑀸𑀦𑀦𑀘𑀺𑀢𑁆𑀢 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀸𑀦𑀺𑀧𑀺 𑀯𑀢𑁆𑀣𑀸𑀭𑀫𑁆𑀫𑀡 𑀖𑀝𑁆𑀝𑀦𑀸𑀦𑀼𑀪𑀸𑀯 𑀩𑀮𑁂𑀦 𑀲𑀳𑁂𑀯 𑀳𑁄𑀦𑁆𑀢𑀺. 𑀦 𑀢𑁂𑀲𑀁 𑀉𑀲𑁆𑀲𑀸𑀳𑀩𑁆𑀬𑀸𑀧𑀸𑀭𑀫𑀢𑁆𑀢 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀭𑀽𑀧𑀺𑀦𑁄 𑀢𑀬𑁄 𑀆𑀳𑀸𑀭𑀸 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀚𑀦𑀦𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦𑀘, 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀧𑀦 𑀇𑀫𑀲𑁆𑀲 𑀘𑀢𑀼𑀲𑀫𑀼𑀝𑁆𑀞𑀸𑀦𑀺 𑀓𑀲𑁆𑀲 𑀓𑀸𑀬𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦𑁂𑀯 𑀉𑀧𑀓𑀸𑀭𑀓𑀢𑀸 𑀆𑀳𑀸𑀭𑀧𑀘𑁆𑀘𑀬𑁄. 𑀅𑀧𑀺𑀘, 𑀆𑀳𑀸𑀭𑀝𑁆𑀞𑁄𑀦𑀸𑀫 𑀉𑀧𑀢𑁆𑀣𑀫𑁆𑀪𑀦𑀧𑁆𑀧𑀥𑀸𑀦𑁄 𑀳𑁄𑀢𑀺. 𑀢𑁂𑀦𑁂𑀯 𑀳𑀺 𑀧𑀸𑀴𑀺𑀬𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀯𑀢𑁆𑀯𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀭𑀽𑀧𑀸𑀳𑀸𑀭𑀸𑀦𑀁𑀧𑀺 𑀆𑀳𑀸𑀭𑀝𑁆𑀞𑁄 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀚𑀦𑀬𑀦𑁆𑀢𑀸𑀧𑀺 𑀳𑀺 𑀆𑀳𑀸𑀭𑀸 𑀅𑀢𑁆𑀢𑀦𑀸 𑀚𑀦𑀺𑀢𑀸𑀦𑀜𑁆𑀘 𑀢𑀤𑀜𑁆𑀜𑁂𑀲𑀜𑁆𑀘𑀲𑀦𑁆𑀢𑀸𑀦𑀝𑁆𑀞𑀺𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁆𑀣𑀸𑀬 𑀉𑀧𑀢𑁆𑀣𑀫𑁆𑀪𑀦𑁂𑀦 𑀲𑀳𑁂𑀯 𑀚𑀦𑁂𑀦𑁆𑀢𑀻𑀢𑀺.

𑀇𑀲𑁆𑀲𑀭𑀺𑀬𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀲𑁄 𑀢𑀺𑀯𑀺𑀥𑁄 𑀲𑀳𑀚𑀸𑀢𑀸𑀤𑀺𑀯𑀲𑁂𑀦. 𑀢𑀢𑁆𑀣 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀇𑀲𑁆𑀲𑀭𑀪𑀽𑀢𑀸 𑀅𑀭𑀽𑀧𑀺𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀲𑀳𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀧𑀘𑁆𑀙𑀸 𑀚𑀸𑀢𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡 𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀸𑀤𑀺 𑀓𑀺𑀘𑁆𑀘𑁂𑀲𑀼 𑀇𑀲𑁆𑀲𑀭𑀪𑀽𑀢𑀸 𑀧𑀼𑀭𑁂 𑀚𑀸𑀢𑀸 𑀧𑀜𑁆𑀘𑀧𑀲𑀸𑀤𑀺𑀦𑁆𑀤𑁆𑀭𑀺𑀬𑀥𑀫𑁆𑀫𑀸 𑀧𑀼𑀭𑁂 𑀚𑀸𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀲𑀳𑀚𑀸𑀢𑀸𑀦𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀘𑀺𑀭𑀢𑀭𑀧𑀯𑀢𑁆𑀢𑀺𑀬𑀁 𑀇𑀲𑁆𑀲𑀭𑀪𑀽𑀢𑀁 𑀭𑀽𑀧𑀚𑀻𑀯𑀺𑀢𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀸𑀯𑀺𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀇𑀥 𑀦 𑀕𑀳𑀺𑀢𑀦𑁆𑀢𑀺. 𑀯𑀼𑀘𑁆𑀘𑀢𑁂, 𑀬𑀲𑁆𑀲 𑀚𑀦𑀓𑀢𑁆𑀢𑀁𑀯𑀸 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁𑀯𑀸 𑀅𑀦𑀼𑀧𑀸𑀮𑀓𑀢𑁆𑀢𑀁𑀯𑀸 𑀅𑀢𑁆𑀣𑀺. 𑀲𑁄 𑀧𑀘𑁆𑀘𑀬𑀥𑀫𑁆𑀫𑁄𑀦𑀸𑀫. 𑀪𑀸𑀯𑀤𑁆𑀯𑀬𑀲𑁆𑀲 𑀧𑀦 𑀲𑀳𑀚𑀸𑀢 𑀥𑀫𑁆𑀫𑀸𑀦𑀁 𑀅𑀢𑁆𑀣𑀸𑀬 𑀏𑀢𑀁 𑀢𑀬𑀁𑀧𑀺 𑀦𑀢𑁆𑀣𑀺. 𑀓𑁂𑀯𑀮𑀁 𑀧𑀦 𑀢𑀁𑀲𑀳𑀺𑀢𑁂 𑀲𑀦𑁆𑀢𑀸𑀦𑁂 𑀓𑀫𑁆𑀫𑀸𑀤𑀻𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀸𑀦𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀥𑀫𑁆𑀫𑀸𑀦𑀁 𑀇𑀢𑁆𑀣𑀸𑀓𑀸𑀭𑀸𑀤𑀺𑀯𑀲𑁂𑀦𑁂𑀯 𑀬𑁄 𑀧𑀯𑀢𑁆𑀢𑀺𑀦𑀺𑀬𑀫𑁄 𑀅𑀢𑁆𑀣𑀺, 𑀲𑁄 𑀪𑀸𑀯𑀭𑀽𑀧𑀸 𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑁄. 𑀢𑀲𑁆𑀫𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀸𑀤𑀺𑀲𑁂 𑀦𑀺𑀬𑀸𑀫𑀓𑀺𑀘𑁆𑀘𑁂 𑀇𑀲𑁆𑀲𑀭𑀢𑁆𑀢𑀸𑀬𑁂𑀯 𑀤𑁆𑀯𑀬𑀁 𑀇𑀦𑁆𑀤𑁆𑀭𑀺𑀬𑀁𑀦𑀸𑀫 𑀳𑁄𑀢𑀺. 𑀦 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑁆𑀢𑁂 𑀦𑀸𑀢𑀺 𑀢𑀁 𑀇𑀥 𑀦𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀪𑀼𑀲𑀁 𑀤𑀴𑁆𑀳𑀁 𑀦𑀺𑀧𑀢𑀺𑀢𑁆𑀯𑀸 𑀯𑀺𑀬 𑀛𑀸𑀬𑀦𑀝𑁆𑀞𑁂𑀦 𑀑𑀮𑁄𑀓𑀦𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀛𑀸𑀦𑀧𑀘𑁆𑀘𑀬𑁄. 𑀤𑀼𑀕𑁆𑀕𑀢𑀺 𑀲𑀼𑀕𑀢𑀺 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀝𑁆𑀞𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀫𑀕𑁆𑀕𑀧𑀘𑁆𑀘𑀬𑁄. 𑀏𑀢𑁆𑀣𑀘 𑀬𑁂𑀦𑀬𑁂𑀦 𑀲𑀫𑁆𑀫𑀸𑀤𑀲𑁆𑀲𑀦𑀸𑀤𑀺𑀦𑀸 𑀮𑀓𑁆𑀔𑀡𑀯𑀺𑀲𑁂𑀲𑁂𑀦 𑀲𑀫𑁆𑀧𑀦𑁆𑀦𑀢𑁆𑀢𑀸 𑀓𑀼𑀲𑀮𑀪𑀽𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀸𑀤𑀬𑁄 𑀲𑀼𑀕𑀢𑀺 𑀦𑀺𑀩𑁆𑀩𑀸𑀦 𑀲𑀫𑁆𑀧𑀸𑀧𑀓𑀝𑁆𑀞𑁂𑀦 𑀫𑀕𑁆𑀕𑀧𑀘𑁆𑀘𑀬𑀸𑀦𑀸𑀫 𑀳𑁄𑀦𑁆𑀢𑀺. 𑀅𑀩𑁆𑀬𑀸𑀓𑀢𑀪𑀽𑀢𑀸𑀦𑀁𑀧𑀺 𑀢𑁂𑀲𑀁 𑀲𑁄 𑀲𑁄 𑀮𑀓𑁆𑀔𑀡𑀯𑀺𑀲𑁂𑀲𑁄 𑀅𑀢𑁆𑀣𑀺𑀬𑁂𑀯𑀸𑀢𑀺 𑀢𑁂𑀲𑀫𑁆𑀧𑀺 𑀢𑁂𑀦𑁂𑀯𑀝𑁆𑀞𑁂𑀦 𑀫𑀕𑁆𑀕𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀢𑀺𑀧𑀺 𑀫𑀕𑁆𑀕𑀗𑁆𑀕𑀸𑀦𑀁 𑀢𑀁𑀢𑀁 𑀲𑀫𑁆𑀧𑀸𑀧𑀓𑀝𑁆𑀞𑁂𑀦𑀘 𑀉𑀧𑀓𑀸𑀭𑀓𑀢𑁆𑀢𑁂 𑀢𑀁𑀲𑀫𑀼𑀝𑁆𑀞𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀲𑁄 𑀅𑀢𑁆𑀣𑁄 𑀦 𑀧𑀸𑀧𑀼𑀡𑀸𑀢𑀺. 𑀢𑁂𑀲𑀁 𑀧𑀦 𑀫𑀕𑁆𑀕𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀲𑀫𑀼𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀫𑀕𑁆𑀕𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀧𑀘𑁆𑀘𑁂𑀢𑀩𑁆𑀩𑀸. 𑀏𑀲𑀦𑀬𑁄 𑀳𑁂𑀢𑀼𑀓𑀫𑁆𑀫𑀺𑀦𑁆𑀤𑁆𑀭𑀺𑀬𑀛𑀸𑀦 𑀧𑀘𑁆𑀘𑀬𑁂𑀲𑀼𑀧𑀻𑀢𑀺.

𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀲𑀫𑀁 𑀏𑀓𑀻𑀪𑀽𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀬𑀼𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀲𑀫𑀸𑀦𑁂𑀧𑀺 𑀲𑀳𑀚𑀸𑀢𑀪𑀸𑀯𑁂𑀦 𑀦𑀺𑀲𑁆𑀲𑀬 𑀦𑀺𑀲𑁆𑀲𑀺𑀢 𑀪𑀸𑀯𑁂𑀦𑀘 𑀬𑀼𑀢𑁆𑀢𑀪𑀸𑀯𑁂 𑀏𑀓𑀼𑀧𑁆𑀧𑀸𑀤𑀢𑀸𑀤𑀺𑀓𑀲𑁆𑀲 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀲𑁆𑀲 𑀯𑀺𑀭𑀳𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄. 𑀬𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀸 𑀲𑀗𑁆𑀓𑀸 𑀲𑀫𑁆𑀪𑀯𑀢𑀺, 𑀢𑀢𑁆𑀣𑁂𑀯 𑀢𑀤𑀸𑀲𑀗𑁆𑀓𑀸 𑀯𑀺𑀕𑀫𑀦𑀢𑁆𑀣𑀁 𑀅𑀬𑀁 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄𑀦𑀸𑀫 𑀯𑀼𑀢𑁆𑀢𑁄𑀢𑀺 𑀢𑀤𑀸𑀲𑀗𑁆𑀔𑀸 𑀭𑀳𑀺𑀢𑁂𑀲𑀼 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀸𑀤𑀻𑀲𑀼 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀧𑀲𑀗𑁆𑀕𑁄 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀳𑁂𑀝𑁆𑀞𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀏𑀯 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀬𑁄 𑀬𑁄 𑀅𑀢𑁆𑀣𑀺𑀢𑀸 𑀲𑀗𑁆𑀔𑀸𑀢𑁂𑀦 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦 𑀲𑀫𑀗𑁆𑀕𑀺𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦 𑀲𑀫𑀗𑁆𑀕𑀺𑀦𑁄 𑀥𑀫𑁆𑀫𑀲𑁆𑀲 𑀲𑀳𑀚𑀸𑀢𑀸𑀤𑀺𑀯𑀲𑁂𑀦 𑀉𑀧𑀓𑀸𑀭𑀓𑁄 𑀲𑁄 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑁄. 𑀬𑀲𑁆𑀫𑀺𑀁 𑀯𑀺𑀚𑁆𑀚𑀸𑀫𑀸𑀦𑁂 𑀲𑀢𑀺 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀑𑀓𑀸𑀲𑀁 𑀦𑀮𑀪𑀢𑀺. 𑀲𑁄 𑀢𑀲𑁆𑀲 𑀅𑀜𑁆𑀜𑀲𑁆𑀲 𑀑𑀓𑀸𑀲𑀤𑀸𑀦 𑀲𑀗𑁆𑀔𑀸𑀢𑁂𑀦 𑀲𑀬𑀁 𑀅𑀦𑁆𑀢𑀭𑀳𑀺𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀦𑀢𑁆𑀣𑀺𑀧𑀘𑁆𑀘𑀬𑁄. 𑀅𑀬𑀁𑀧𑀺 𑀯𑀺𑀲𑀼𑀁 𑀲𑀢𑁆𑀢𑀺𑀯𑀺𑀲𑁂𑀲𑁄 𑀦 𑀳𑁄𑀢𑀺. 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀕𑀘𑁆𑀙𑀢𑀺 𑀦𑀺𑀲𑀻𑀤𑀢𑀺 𑀢𑀺𑀝𑁆𑀞𑀢𑀻𑀢𑀺𑀆𑀤𑀺𑀦𑀸 𑀧𑀘𑁆𑀙𑀺𑀫𑀘𑀺𑀢𑁆𑀢𑁂 𑀞𑀺𑀢𑀸𑀦𑀁𑀧𑀺 𑀧𑀼𑀭𑀺𑀫𑀘𑀺𑀢𑁆𑀢𑀁 𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀮𑁄𑀓𑀲𑁆𑀲 𑀅𑀪𑀺𑀫𑀸𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀅𑀢𑁆𑀣𑀺𑀢𑀸𑀲𑀗𑁆𑀓𑀸 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀢𑀤𑀸𑀲𑀗𑁆𑀓𑀸 𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀬𑀁 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀦𑀸𑀲𑀁 𑀕𑀢𑁄 𑀯𑀺𑀕𑀢𑁄. 𑀬𑀲𑁆𑀫𑀺𑀁 𑀅𑀯𑀺𑀕𑀢𑁂 𑀅𑀜𑁆𑀜𑁄 𑀉𑀧𑁆𑀧𑀚𑁆𑀚𑀺𑀢𑀼𑀁 𑀑𑀓𑀸𑀲𑀁 𑀦𑀮𑀪𑀢𑀺, 𑀲𑁄 𑀢𑀲𑁆𑀲 𑀑𑀓𑀸𑀲𑀤𑀸𑀦𑀲𑀗𑁆𑀔𑀸𑀢𑁂𑀦 𑀲𑀬𑀁 𑀯𑀺𑀕𑀢𑀪𑀸𑀯𑁂𑀦 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀯𑀺𑀕𑀢𑀧𑀘𑁆𑀘𑀬𑁄. 𑀯𑀢𑁆𑀢𑀫𑀸𑀦𑀢𑀸 𑀲𑀗𑁆𑀔𑀸𑀢𑁂𑀦 𑀅𑀯𑀺𑀕𑀢𑀪𑀸𑀯𑁂𑀦 𑀢𑀸𑀤𑀺𑀲𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑀓𑀸𑀭𑀓𑁄 𑀥𑀫𑁆𑀫𑁄 𑀅𑀯𑀺𑀕𑀢𑀧𑀘𑁆𑀘𑀬𑁄. 𑀧𑀼𑀭𑀺𑀫𑀧𑀘𑁆𑀘𑀬 𑀤𑀼𑀓𑀫𑁂𑀯 𑀘𑁂𑀢𑁆𑀣 𑀦𑀸𑀦𑀢𑁆𑀣 𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁 𑀜𑀸𑀡𑀯𑀺𑀲𑀤𑀢𑁆𑀣𑀜𑁆𑀘 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀺𑀕𑀢𑀤𑀼𑀓𑀁𑀦𑀸𑀫 𑀓𑀢𑁆𑀯𑀸 𑀤𑁂𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄. 𑀦𑀢𑁆𑀣𑀻𑀢𑀺 𑀅𑀬𑀁 𑀤𑀼𑀢𑀻𑀬𑁄 𑀅𑀦𑁆𑀢𑁄𑀢𑀺𑀆𑀤𑀺𑀦𑀸 𑀦𑀸𑀦𑀸𑀅𑀢𑁆𑀣𑀤𑀻𑀧𑀓𑀸 𑀅𑀢𑁆𑀣𑀺 𑀦𑀢𑁆𑀣𑀺 𑀲𑀤𑁆𑀤𑀸 𑀲𑀸𑀲𑀦𑁂 𑀮𑁄𑀓𑁂𑀘 𑀤𑀺𑀲𑁆𑀲𑀦𑁆𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲𑁂𑀯 𑀘 𑀅𑀢𑁆𑀣𑀲𑁆𑀲 𑀧𑀼𑀦 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀘𑀦𑀁 𑀲𑁄𑀢𑀽𑀦𑀁 𑀜𑀸𑀡𑀯𑀺𑀲𑀤𑀢𑁆𑀣𑀸𑀬 𑀳𑁄𑀢𑀻𑀢𑀺. 𑀝𑀻𑀓𑀸𑀓𑀸𑀭𑀸 𑀧𑀦 𑀩𑀳𑀼𑀁 𑀢𑁂𑀲𑀁 𑀧𑀘𑁆𑀘𑀬 𑀤𑀼𑀓𑀸𑀦𑀁 𑀦𑀸𑀦𑀢𑁆𑀣𑀲𑀫𑁆𑀪𑀯𑀁 𑀯𑀡𑁆𑀡𑁂𑀦𑁆𑀢𑀺𑀬𑁂𑀯𑀸𑀢𑀺. [𑀧𑀘𑁆𑀘𑀬𑀼𑀤𑁆𑀤𑁂𑀲𑁄]

𑁧𑁬𑁮. 𑀇𑀤𑀸𑀦𑀺 𑀬𑀣𑀸 𑀉𑀤𑁆𑀤𑀺𑀝𑁆𑀞𑁂 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑁂 𑀧𑀣𑀫𑀁 𑀙𑀳𑀺 𑀭𑀸𑀲𑀻𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀧𑀼𑀦 𑀭𑀸𑀲𑀻𑀦𑀁 𑀅𑀦𑀼𑀓𑁆𑀓𑀫𑁂𑀦 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀦𑀺𑀤𑁆𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀙𑀥𑀸𑀦𑀸𑀫𑀦𑁆𑀢𑀼𑀦𑀸𑀫𑀲𑁆𑀲𑀸𑀢𑀺 𑀕𑀸𑀣𑀸𑀤𑁆𑀯𑀬 𑀫𑀸𑀳. 𑀦𑀸𑀫𑀁 𑀦𑀸𑀫𑀲𑁆𑀲 𑀙𑀥𑀸 𑀙𑀩𑁆𑀩𑀺𑀥𑁂𑀳𑀺 𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀸𑀫𑀁 𑀦𑀸𑀫𑀭𑀽𑀧𑀻𑀦𑀁 𑀧𑀜𑁆𑀘𑀥𑀸. 𑀧𑀼𑀦 𑀦𑀸𑀫𑀁 𑀭𑀽𑀧𑀲𑁆𑀲 𑀏𑀓𑀥𑀸, 𑀭𑀽𑀧𑀁 𑀦𑀸𑀫𑀲𑁆𑀲 𑀏𑀓𑀥𑀸𑀏𑀯. 𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀺 𑀦𑀸𑀫𑀲𑁆𑀲 𑀤𑀼𑀯𑀺𑀥𑀸, 𑀤𑁆𑀯𑀬𑀁 𑀦𑀸𑀫𑀭𑀽𑀧𑀁 𑀤𑁆𑀯𑀬𑀲𑁆𑀲𑁂𑀯 𑀦𑀸𑀫𑀭𑀽𑀧𑀲𑁆𑀲 𑀦𑀯𑀥𑀸𑀢𑀺 𑀏𑀯𑀁 𑀙𑀓𑁆𑀓𑀧𑀜𑁆𑀘𑀓𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀸 𑀙𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀓𑀣𑀁 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

[𑁨𑁨𑁯] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀧𑀜𑁆𑀜𑀢𑁆𑀢𑀺𑀦𑀸𑀫𑀭𑀽𑀧𑀸𑀦𑀺 𑀦𑀸𑀫𑀲𑁆𑀲 𑀤𑁆𑀯𑀺𑀥𑀸 𑀤𑁆𑀯𑀺𑀧𑀓𑀸𑀭𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁’’. 𑀢𑀁 𑀦 𑀲𑀼𑀦𑁆𑀤𑀭𑀁.

𑀧𑀘𑁆𑀘𑀬𑀓𑀣𑀸 𑀳𑀺 𑀦𑀸𑀫 𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀧𑀘𑁆𑀘𑀬𑀲𑀢𑁆𑀢𑀺𑀢𑁄𑀢𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀯𑀼𑀢𑁆𑀢𑀸𑀬𑁂𑀯 𑀲𑀼𑀯𑀼𑀢𑁆𑀢𑀸 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸𑀦𑀸𑀫 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑀸𑀬 𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀼𑀓𑁆𑀓𑀫𑀧𑀝𑀺𑀧𑀸𑀤𑀦𑀸𑀬 𑀏𑀯 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀬𑁄𑀓𑁄𑀘𑀺 𑀥𑀫𑁆𑀫𑁄 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀭𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀅𑀦𑀦𑁆𑀢𑀭𑀦𑀺𑀭𑀼𑀤𑁆𑀥𑀸𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀥𑀫𑁆𑀫𑀸𑀢𑀺𑀆𑀤𑀺. 𑀢𑀢𑁆𑀣 𑀅𑀯𑀺𑀭𑀼𑀤𑁆𑀥𑀲𑁆𑀲𑀸𑀢𑀺𑀏𑀢𑁂𑀦 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑁆𑀢𑀭 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀧𑀼𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀝𑀺𑀧𑀸𑀝𑀺𑀬𑀸 𑀉𑀧𑁆𑀧𑀦𑁆𑀦𑀸𑀦𑀁𑀯𑀸. 𑀧𑀼𑀦𑀧𑁆𑀧𑀼𑀦𑀁 𑀲𑀦𑁆𑀢𑀸𑀦𑀧𑀭𑀺𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀆𑀲𑁂𑀯𑀦𑀧𑀘𑁆𑀘𑀬𑁄𑀦𑀸𑀫, 𑀓𑁂𑀯𑀮𑀁 𑀧𑀬𑁄𑀕𑀲𑀸𑀥𑀦𑀻𑀬𑁂𑀲𑀼 𑀚𑀯𑀯𑁂𑀕 𑀲𑀳𑀺𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀏𑀯 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀸𑀦𑀺 𑀚𑀯𑀦𑀸𑀦𑀻𑀢𑀺𑀆𑀤𑀺. 𑀢𑀢𑁆𑀣 𑀚𑀯𑀦𑀸𑀦𑀻𑀢𑀺 𑀫𑀕𑁆𑀕𑀨𑀮𑀚𑀯𑀦𑀯𑀚𑁆𑀚𑀸𑀦𑀺 𑀮𑁄𑀓𑀺𑀬 𑀓𑀼𑀲𑀮𑀸 𑀓𑀼𑀲𑀮𑀓𑁆𑀭𑀺𑀬𑀚𑀯𑀦𑀸𑀦𑀺 𑀧𑀘𑁆𑀙𑀺𑀫𑀸𑀦𑀁𑀚𑀯𑀦𑀸𑀦𑀦𑁆𑀢𑀺 𑀨𑀮𑀚𑀯𑀦𑀯𑀚𑁆𑀚𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑁆𑀭𑀺𑀬𑀚𑀯𑀦𑀸𑀦𑀁. 𑀪𑀺𑀦𑁆𑀦𑀚𑀸𑀢𑀺𑀓𑀸 𑀳𑀺 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀁 𑀲𑀩𑁆𑀩𑀸𑀓𑀸𑀭𑀧𑀸𑀭𑀺𑀧𑀽𑀭𑀁 𑀧𑀭𑀺𑀯𑀸𑀲𑀁𑀦𑀸𑀫 𑀕𑀳𑁂𑀢𑀼𑀁𑀯𑀸 𑀕𑀸𑀳𑀸𑀧𑁂𑀢𑀼𑀁𑀧𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀤𑀺 𑀲𑀓𑁆𑀓𑀼𑀡𑁂𑀬𑁆𑀬𑀼𑀁, 𑀚𑀸𑀢𑀺𑀫𑀢𑁆𑀢𑁂𑀦𑀧𑀺 𑀥𑀫𑁆𑀫𑀸 𑀧𑀼𑀩𑁆𑀩𑀸𑀧𑀭𑀁 𑀅𑀪𑀺𑀦𑁆𑀦𑀸𑀏𑀯 𑀲𑀺𑀬𑀼𑀦𑁆𑀢𑀺. 𑀢𑀲𑁆𑀫𑀸 𑀪𑀺𑀦𑁆𑀦𑀚𑀸𑀢𑀺𑀓𑀁 𑀨𑀮𑀚𑀯𑀦𑀁 𑀫𑀕𑁆𑀕𑀢𑁄 𑀧𑀭𑀺𑀯𑀸𑀲𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀕𑁆𑀕𑁄𑀧𑀺 𑀅𑀢𑁆𑀢𑀦𑁄 𑀧𑀭𑀺𑀯𑀸𑀲𑀁 𑀨𑀮𑀲𑁆𑀲 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀨𑀮𑀘𑀺𑀢𑁆𑀢𑀸𑀦𑀺𑀘 𑀧𑀭𑀺𑀓𑀫𑁆𑀫𑀧𑀬𑁄𑀕𑀩𑀮𑁂𑀦 𑀚𑀯𑀦 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀯𑀸𑀲𑀤𑀸𑀦 𑀕𑀳𑀡 𑀩𑀮𑁂𑀦𑀸𑀢𑀺. 𑀬𑀲𑁆𑀫𑀸 𑀓𑀸𑀫𑀸𑀯𑀘𑀭𑀪𑀸𑀯𑀢𑁄 𑀫𑀳𑀕𑁆𑀕𑀢𑀸 𑀦𑀼𑀢𑁆𑀢𑀭 𑀪𑀸𑀯𑀧𑁆𑀧𑀢𑁆𑀢𑀺𑀦𑀸𑀫 𑀆𑀲𑁂𑀯𑀦𑀩𑀮𑁂𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑁄𑀢𑁆𑀭𑀪𑀼 𑀛𑀸𑀦 𑀫𑀕𑁆𑀕𑀸𑀦𑀁 𑀪𑀽𑀫𑀺 𑀪𑁂𑀤𑁄 𑀇𑀥 𑀅𑀧𑁆𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀳𑁂𑀢𑀼.𑀮. 𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀫𑀕𑁆𑀕𑀗𑁆𑀕𑀸𑀦𑀺 𑀅𑀳𑁂𑀢𑀼𑀓𑀯𑀚𑁆𑀚𑀺𑀢𑀸𑀦𑀁, 𑀛𑀸𑀦𑀗𑁆𑀕𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀸𑀦𑀁 𑀲𑀳𑀚𑀸𑀢𑀸𑀦𑀁 𑀦𑀸𑀫𑀭𑀽𑀧𑀸𑀦𑀁. 𑀲𑀳𑀚𑀸𑀢𑀭𑀽𑀧𑀮𑀓𑁆𑀔𑀡𑀁 𑀧𑀦 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀘𑁂𑀢𑀦𑀸𑀦𑀸𑀫 𑀧𑀯𑀢𑁆𑀢𑀫𑀸𑀦𑀸 𑀤𑁆𑀯𑁂 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀢𑀺 𑀲𑀳𑀚𑀸𑀢𑀸𑀦𑀁 𑀲𑀁𑀯𑀺𑀥𑀸𑀦𑀜𑁆𑀘 𑀆𑀬𑀢𑀺𑀁 𑀯𑀺𑀧𑀸𑀓𑀧𑀸𑀢𑀼 𑀪𑀸𑀯𑀢𑁆𑀣𑀸𑀬 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀢𑁆𑀢𑀦𑁄 𑀧𑀯𑀢𑁆𑀢𑀸 𑀓𑀸𑀭𑀲𑀗𑁆𑀔𑀸𑀢 𑀩𑀻𑀚𑀦𑀺𑀥𑀸𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀲𑀁𑀯𑀺𑀥𑀸𑀦𑀓𑀺𑀘𑁆𑀘𑀁 𑀲𑀩𑁆𑀩𑀘𑁂𑀢𑀦𑀸 𑀲𑀸𑀥𑀸𑀭𑀡𑀁 𑀳𑁄𑀢𑀺. 𑀩𑀻𑀚𑀦𑀺𑀥𑀸𑀦𑀓𑀺𑀘𑁆𑀘𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀧𑁆𑀧𑀢𑁆𑀢𑀸𑀬𑀏𑀯 𑀘𑁂𑀢𑀦𑀸𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀲𑀳𑀚𑀸𑀢𑀸𑀘𑁂𑀢𑀦𑀸𑀢𑀺𑀆𑀤𑀺. 𑀢𑀢𑁆𑀣 𑀲𑀳𑀚𑀸𑀢𑀸𑀘𑁂𑀢𑀦𑀸𑀢𑀺 𑀅𑀦𑁆𑀢𑀫𑀲𑁄 𑀧𑀜𑁆𑀘𑀯𑀺𑀜𑁆𑀜𑀸𑀡 𑀲𑀳𑀚𑀸𑀢𑀸𑀧𑀺 𑀘𑁂𑀢𑀦𑀸. 𑀲𑀸𑀧𑀺 𑀳𑀺 𑀲𑀳𑀚𑀸𑀢𑀸𑀦𑀁 𑀲𑀁𑀯𑀺𑀤𑀳𑀦𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸 𑀓𑀫𑁆𑀫𑀁𑀏𑀯𑀦𑀸𑀫 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀧𑀯𑀢𑁆𑀢𑀸𑀓𑀸𑀭𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑀸𑀓𑀩𑀻𑀚𑀲𑁆𑀲 𑀦𑀺𑀤𑀳𑀦𑀁𑀦𑀸𑀫, 𑀦 𑀢𑀸𑀯𑀤𑁂𑀯 𑀩𑀻𑀚𑀓𑀺𑀘𑁆𑀘𑀁 𑀲𑀫𑁆𑀧𑀸𑀤𑁂𑀢𑀺. 𑀅𑀫𑁆𑀩𑀩𑀻𑀚𑀸𑀤𑀻𑀦𑀺 𑀯𑀺𑀬 𑀧𑀭𑀺𑀡𑀢𑀪𑀸𑀯𑀁 𑀧𑀢𑁆𑀯𑀸 𑀔𑀡𑀦𑁆𑀢𑀭𑁂𑀏𑀯 𑀲𑀫𑁆𑀧𑀸𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀦𑀸𑀦𑀸𑀓𑁆𑀔𑀡𑀺𑀓𑀸 𑀘𑁂𑀢𑀦𑀸𑀢𑀺𑀆𑀤𑀺. 𑀢𑀢𑁆𑀣 𑀦𑀸𑀦𑀸𑀓𑁆𑀔𑀡𑀺𑀓𑀸𑀘𑁂𑀢𑀦𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫 𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀯𑀺𑀲𑀼𑀁 𑀪𑀽𑀢𑁂 𑀅𑀢𑀻𑀢𑀓𑀸𑀮𑁂 𑀲𑀺𑀤𑁆𑀥𑀸 𑀓𑀼𑀲𑀮𑀸 𑀓𑀼𑀲𑀮𑀘𑁂𑀢𑀦𑀸. 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀢𑀺𑀯𑀸 𑀧𑀸𑀞𑁄 𑀲𑀺𑀬𑀸.

𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀅𑀜𑁆𑀜𑀫𑀜𑁆𑀜𑀁𑀲𑀳𑀚𑀸𑀢𑀸𑀦𑀁𑀭𑀽𑀧𑀸𑀦𑀦𑁆𑀢𑀺 𑀏𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲𑀘 𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀸𑀫 𑀧𑀼𑀭𑁂 𑀚𑀸𑀢𑀸 𑀲𑀸𑀮𑀭𑀼𑀓𑁆𑀔𑀧𑁄𑀢𑀓𑀸 𑀧𑀘𑁆𑀙𑀸 𑀅𑀦𑀼𑀯𑀲𑁆𑀲𑀁 𑀯𑀲𑁆𑀲𑀦𑁆𑀢𑀸𑀦𑀁 𑀯𑀼𑀝𑁆𑀞𑀺𑀥𑀸𑀭𑀸𑀦𑀁 𑀯𑀲𑁂𑀦 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀬𑀸𑀯𑀓𑀧𑁆𑀧𑀸𑀯𑀲𑀸𑀦𑀸𑀧𑀺 𑀫𑀳𑀦𑁆𑀢𑀲𑁆𑀲 𑀲𑀸𑀮𑀯𑀦𑀲𑀡𑁆𑀟𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑁂𑀲𑀼 𑀉𑀧𑁆𑀧𑀦𑁆𑀦𑀸 𑀲𑀓𑀮𑀲𑀭𑀻𑀭𑁂 𑀓𑀫𑁆𑀫𑀚𑀓𑀸𑀬𑁄 𑀘𑀺𑀢𑁆𑀢𑀚𑀓𑀸𑀬𑁄 𑀉𑀢𑀼𑀚𑀓𑀸𑀬𑁄 𑀆𑀳𑀸𑀭𑀚 𑀓𑀸𑀬𑁄𑀢𑀺 𑀲𑀩𑁆𑀩𑁂 𑀲𑀓𑀮𑀲𑀭𑀻𑀭𑀝𑁆𑀞𑀓𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀸𑀚𑀸𑀢𑀸𑀦𑀁 𑀧𑀣𑀫𑀪𑀯𑀗𑁆𑀕𑀸𑀤𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀯𑀲𑁂𑀦 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸 𑀉𑀧𑀭𑀼𑀧𑀭𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀧𑀭𑀁𑀧𑀭𑀸𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀢𑁆𑀢𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸𑀢𑀺𑀆𑀤𑀺. 𑀢𑀢𑁆𑀣 𑀧𑀼𑀭𑁂𑀚𑀸𑀢𑀲𑁆𑀲𑀸𑀢𑀺 𑀆𑀢𑀻𑀢𑀸𑀦𑀦𑁆𑀢𑀭𑀘𑀺𑀢𑁆𑀢𑁂 𑀚𑀸𑀢𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. 𑀬𑀸𑀯 𑀅𑀝𑁆𑀞𑀫𑀘𑀺𑀢𑁆𑀢𑀸𑀯𑀸 𑀧𑀼𑀭𑁂𑀚𑀸𑀢𑀲𑁆𑀲. 𑀏𑀢𑁆𑀢𑀓𑁄 𑀳𑀺 𑀓𑀸𑀮𑁄 𑀭𑀽𑀧𑀥𑀫𑁆𑀫𑀸𑀦𑀁 𑀯𑀟𑁆𑀠𑀦𑀓𑀸𑀮𑁄𑀦𑀸𑀫. 𑀢𑀢𑁄𑀧𑀭𑀁 𑀳𑀸𑀬𑀦𑀓𑀸𑀮𑁂 𑀧𑀘𑁆𑀙𑀸𑀚𑀸𑀢𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺. 𑀬𑀸𑀯 𑀲𑁄𑀴𑀲𑀫𑀘𑀺𑀢𑁆𑀢𑀸 𑀏𑀯 𑀯𑀸 𑀧𑀼𑀭𑁂𑀚𑀸𑀢𑀲𑁆𑀲. 𑀬𑀤𑀕𑁆𑀕𑁂𑀦 𑀳𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀯𑀢𑁆𑀣𑀼𑀭𑀽𑀧𑀁 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀁 𑀉𑀧𑀕𑀘𑁆𑀙𑀢𑀺. 𑀢𑀤𑀕𑁆𑀕𑁂𑀦 𑀘𑀼𑀢𑀺𑀘𑀺𑀢𑁆𑀢𑀁𑀧𑀺 𑀢𑀲𑁆𑀲 𑀯𑀢𑁆𑀣𑀼𑀭𑀽𑀧𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑁄. 𑀢𑀣𑀸 𑀲𑁂𑀲𑀭𑀽𑀧𑀸𑀦𑀜𑁆𑀘. 𑀬𑀣𑀸 𑀳𑀺 𑀉𑀧𑀢𑁆𑀣𑀫𑁆𑀪𑀦𑁆𑀢𑁄 𑀆𑀳𑀸𑀭𑁄 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀫𑁂𑀯 𑀉𑀧𑀢𑁆𑀣𑀫𑁆𑀪𑀢𑀺. 𑀳𑀸𑀬𑀦𑀧𑀓𑁆𑀔𑁂 𑀞𑀺𑀢𑀁 𑀦𑀼𑀧𑀢𑁆𑀣𑀫𑁆𑀪𑀢𑀻𑀢𑀺 𑀦𑀢𑁆𑀣𑀺. 𑀢𑀤𑀸𑀧𑀺 𑀢𑀤𑀦𑀼𑀭𑀽𑀧𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀏𑀯𑀫𑀬𑀁𑀧𑀻𑀢𑀺.

𑀅𑀭𑀽𑀧𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁄𑀦𑀸𑀫 𑀫𑀳𑀸𑀯𑀺𑀧𑁆𑀨𑀸𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑁂 𑀓𑀸𑀬𑁂𑀓𑀤𑁂𑀲𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑀸𑀧𑀺 𑀲𑀓𑀮𑀁 𑀇𑀫𑀁 𑀘𑀢𑀼𑀚𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀇𑀫𑀲𑁆𑀲𑀓𑀸𑀬𑀲𑁆𑀲𑀸𑀢𑀺. 𑀘𑀓𑁆𑀔𑀸𑀤𑀻𑀦𑀺 𑀧𑀲𑀸𑀤𑀯𑀢𑁆𑀣𑀽𑀦𑀺 𑀭𑀽𑀧𑀸𑀤𑀻𑀳𑀺 𑀲𑀳𑀮𑀤𑁆𑀥𑀖𑀝𑁆𑀝𑀦𑀸𑀦𑀺𑀏𑀯 𑀯𑀺𑀜𑁆𑀜𑀸𑀡𑀲𑁆𑀲 𑀆𑀥𑀸𑀭𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀖𑀝𑁆𑀝𑀦𑀜𑁆𑀘 𑀞𑀺𑀢𑀺𑀧𑀢𑁆𑀢𑀓𑀸𑀮𑁂𑀏𑀯𑀸𑀢𑀺 𑀢𑁂𑀲𑀁 𑀦𑀺𑀘𑁆𑀘𑀓𑀸𑀮𑀁𑀧𑀺 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀢𑀸 𑀲𑀺𑀤𑁆𑀥𑀺 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀦𑀸𑀫 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀯𑀢𑁆𑀣𑀼𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦𑀲𑀓𑁆𑀓𑁄𑀢𑀻𑀢𑀺, 𑀬𑀤𑀸 𑀧𑀼𑀭𑁂𑀚𑀸𑀢𑀁𑀯𑀸 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀁𑀯𑀸 𑀯𑀢𑁆𑀣𑀼𑀁 𑀦 𑀮𑀪𑀢𑀺, 𑀢𑀤𑀸 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀯𑀸 𑀫𑀭𑀡𑀸𑀲𑀦𑁆𑀦𑀓𑀸𑀮𑁂𑀯𑀸 𑀬𑀁 𑀬𑀁 𑀮𑀪𑀢𑀺, 𑀢𑀁 𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀬𑀤𑀸 𑀧𑀦 𑀧𑀼𑀭𑁂 𑀚𑀸𑀢𑀁 𑀲𑀼𑀝𑁆𑀞𑀼 𑀩𑀮𑀯𑀦𑁆𑀢𑀜𑁆𑀘 𑀯𑀢𑁆𑀣𑀼𑀁 𑀮𑀪𑀢𑀺, 𑀢𑀤𑀸 𑀢𑀤𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀢𑀜𑁆𑀘 𑀦𑀺𑀬𑀫𑀢𑁄 𑀧𑀯𑀢𑁆𑀢𑀺𑀓𑀸𑀮𑁂𑀏𑀯 𑀮𑀩𑁆𑀪𑀢𑀺, 𑀦𑁄 𑀧𑀝𑀺𑀲𑀦𑁆𑀥𑀺𑀓𑀸𑀮𑁂. 𑀦𑀳𑀺 𑀢𑀤𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀁 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁 𑀙𑀯𑀢𑁆𑀣𑀽𑀦𑀺 𑀧𑀯𑀢𑁆𑀢𑀺𑀬𑀦𑁆𑀢𑀺.

𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺𑀘 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀇𑀤𑀁 𑀦𑀺𑀬𑀫𑀲𑀺𑀤𑁆𑀥𑀺𑀕𑀳𑀡 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑀺 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀺 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀦𑀺 𑀫𑀦𑁄𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺𑀬𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺. 𑀲𑁄𑀢𑀁, 𑀖𑀸𑀦𑀁, 𑀚𑀺𑀯𑁆𑀳𑀁, 𑀓𑀸𑀬𑀁, 𑀭𑀽𑀧𑁂, 𑀲𑀤𑁆𑀤𑁂, 𑀕𑀦𑁆𑀥𑁂, 𑀭𑀲𑁂, 𑀨𑁄𑀝𑁆𑀞𑀩𑁆𑀩𑁂, 𑀯𑀢𑁆𑀣𑀼𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀉𑀧𑁆𑀧𑀸𑀤𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀺𑀧𑀢𑁆𑀢𑀁 𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀫𑁂𑀯 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣𑀘 𑀓𑀺𑀜𑁆𑀘𑀸𑀧𑀺 𑀧𑀝𑁆𑀞𑀸𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀪𑀯𑀗𑁆𑀕𑀲𑁆𑀲𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀺 𑀓𑀫𑁆𑀫𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀺 𑀓𑀸𑀮𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀸𑀦𑀁𑀧𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀮𑀩𑁆𑀪𑀫𑀸𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀦𑀺𑀬𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀧𑀸𑀓𑀸 𑀩𑁆𑀬𑀸𑀓𑀢𑁄 𑀏𑀓𑁄 𑀔𑀦𑁆𑀥𑁄𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁𑀏𑀯 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀏𑀢𑁆𑀣𑀘 𑀆𑀭𑀼𑀧𑁆𑀧𑁂 𑀯𑀺𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀧𑀺 𑀯𑀢𑁆𑀣𑀼𑀧𑀼𑀭𑁂 𑀚𑀸𑀢𑀲𑁆𑀲 𑀅𑀪𑀸𑀯𑀸 𑀅𑀧𑀭𑀺𑀩𑁆𑀬𑀢𑁆𑀢𑀢𑁆𑀢𑀸𑀯𑀸 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀭𑀫𑁆𑀫𑀡𑀫𑀢𑁆𑀢𑀪𑀸𑀯𑁂𑀏𑀯 𑀞𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. 𑀆𑀭𑀫𑁆𑀫𑀡𑀫𑁂𑀯𑀕𑀭𑀼𑀓𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑀯𑀲𑁂𑀦 𑀅𑀲𑁆𑀲𑀸𑀤𑀦𑀸𑀤𑀺𑀯𑀲𑁂𑀦𑀘 𑀕𑀭𑀼𑀓𑀢𑀁 𑀇𑀝𑁆𑀞𑀸𑀭𑀫𑁆𑀫𑀡 𑀫𑀸𑀳. 𑀢𑀜𑁆𑀘 𑀔𑁄 𑀢𑀲𑁆𑀲𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀘𑁆𑀙𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀕𑀽𑀣𑀓𑀼𑀡𑀧𑀸𑀤𑀻𑀦𑀺𑀧𑀺 𑀳𑀺 𑀢𑀤𑀪𑀺𑀦𑀦𑁆𑀤𑀦𑁆𑀢𑀸𑀦𑀁 𑀓𑀺𑀫𑀺𑀫𑀓𑁆𑀔𑀺𑀓 𑀲𑀼𑀦𑀔 𑀕𑀺𑀚𑁆𑀛 𑀓𑀸𑀓𑀸𑀤𑀻𑀦𑀁 𑀕𑀭𑀼𑀓𑀢𑀸𑀦𑀺𑀏𑀯 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀻𑀢𑀺.

[𑁨𑁩𑁦] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀕𑀭𑀼𑀓𑀢𑀦𑁆𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀅𑀦𑀼𑀧𑀧𑀦𑁆𑀦𑀁.

𑀘𑀓𑁆𑀔𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻𑀢𑀺𑀆𑀤𑀺𑀦𑀸 𑀅𑀲𑁆𑀲𑀸 𑀤𑀦𑀸𑀤𑀺𑀯𑀲𑁂𑀦𑀧𑀺 𑀅𑀲𑁆𑀲 𑀦𑀺𑀤𑁆𑀤𑁂𑀲𑀲𑁆𑀲 𑀧𑀯𑀢𑁆𑀢𑀢𑁆𑀢𑀸𑀢𑀺. 𑀭𑀸𑀕𑀸𑀤𑀬𑁄 𑀧𑀦 𑀥𑀫𑁆𑀫𑀸𑀢𑀺 𑀏𑀢𑁂𑀦 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀫𑀸𑀦𑁄 𑀤𑀺𑀝𑁆𑀞𑀺 𑀧𑀢𑁆𑀣𑀦𑀸𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀳 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀜𑁆𑀘𑀅𑀦𑀦𑁆𑀢𑀭𑀺𑀬 𑀓𑀫𑁆𑀫𑀸𑀦𑀺𑀘 𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀦𑀦𑁆𑀢𑀭𑀺𑀬𑀯𑀚𑁆𑀚𑀸𑀦𑀺 𑀢𑀸𑀦𑀺 𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦 𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀁 𑀲𑀩𑁆𑀩𑁂𑀲𑀁 𑀘𑀢𑀼𑀪𑀽𑀫𑀓 𑀓𑀼𑀲𑀮𑀸𑀦𑀁 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀧𑀦 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀢𑀸𑀦𑀺𑀬𑁂𑀯𑀘 𑀲𑀩𑁆𑀩𑀸𑀦𑀺 𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸𑀘 𑀭𑀸𑀕𑀸𑀤𑀻𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀜𑁆𑀘 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀸𑀦𑀁 𑀓𑀸𑀬𑀺𑀓𑀲𑀼𑀔𑀤𑀼𑀓𑁆𑀔𑀸𑀤𑀻𑀦𑀜𑁆𑀘 𑀅𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯 𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀲𑀤𑁆𑀥𑀸𑀤𑀬𑁄𑀢𑀺 𑀏𑀢𑁂𑀦 𑀲𑀤𑁆𑀥𑀸 𑀲𑀻𑀮𑀁 𑀲𑀼𑀢𑀁 𑀘𑀸𑀕𑁄 𑀧𑀜𑁆𑀜𑀸𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀳 𑀲𑀩𑁆𑀩𑁂 𑀤𑀸𑀦𑀲𑀻𑀮𑀸𑀤𑀬𑁄 𑀘𑀢𑀼𑀪𑀽𑀫𑀓𑀓𑀼 𑀲𑀮𑀸𑀦𑀁 𑀭𑀸𑀕𑀸𑀤𑀺 𑀅𑀓𑀼𑀲𑀮𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀤𑀺𑀘𑀢𑀼𑀪𑀽𑀫𑀓 𑀅𑀩𑁆𑀬𑀸𑀓𑀢𑀸 𑀦𑀜𑁆𑀘 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀲𑀼𑀔𑀁 𑀤𑀼𑀓𑁆𑀔𑀁 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼𑀲𑁂𑀦𑀸𑀲𑀦𑀦𑁆𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀯𑀚𑁆𑀚𑀸 𑀲𑀩𑁆𑀩𑁂 𑀘𑀢𑀼𑀪𑀽𑀫𑀓𑀸 𑀩𑁆𑀬𑀸𑀓𑀢𑀸 𑀕𑀳𑀺𑀢𑀸, 𑀢𑁂𑀧𑀺 𑀳𑀺 𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸𑀘 𑀓𑀼𑀲𑀮𑀸𑀓𑀼𑀲𑀮𑀸 𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀓𑀫𑁆𑀫𑀁𑀯𑀺𑀧𑀸𑀓𑀸𑀦𑀦𑁆𑀢𑀺 𑀏𑀢𑁆𑀣 𑀲𑀼𑀝𑁆𑀞𑀼 𑀩𑀮𑀯𑀁 𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀤𑀼𑀩𑁆𑀩𑀮𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀭𑀽𑀧𑀥𑀫𑁆𑀫𑀸 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀦 𑀕𑀳𑀺𑀢𑀸. 𑀦𑀦𑀼 𑀢𑁂𑀲𑀁𑀧𑀺 𑀩𑀳𑀺𑀤𑁆𑀥𑀸 𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀁 𑀯𑀼𑀤𑁆𑀥𑀺𑀯𑀺𑀭𑀼𑀴𑁆𑀳𑀺 𑀯𑁂𑀧𑀼𑀮𑁆𑀮𑀢𑁆𑀣𑀸𑀬 𑀅𑀚𑁆𑀛𑀢𑁆𑀢𑀜𑁆𑀘 𑀆𑀭𑁄𑀕𑁆𑀬𑀸𑀤𑀺𑀅𑀢𑁆𑀣𑀸𑀬 𑀧𑀣𑀯𑀺𑀭𑀲 𑀆𑀧𑁄𑀭𑀲 𑀯𑀲𑁆𑀲𑁄𑀤𑀓 𑀩𑀺𑀚𑀫𑀽𑀮𑀪𑁂𑀲𑀚𑁆𑀚𑀸𑀤𑀬𑁄 𑀩𑀮𑀯𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀫𑀽𑀮𑀝𑀻𑀓𑀸𑀬𑀁 𑀓𑀣𑀺𑀢𑁄𑀬𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

𑀦𑀳𑀺 𑀭𑀽𑀧𑀸𑀩𑁆𑀬𑀸𑀓𑀢𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀁 𑀮𑀪𑀢𑀺. 𑀅𑀘𑁂𑀢𑀦𑁂𑀦 𑀭𑀽𑀧𑀲𑀦𑁆𑀢𑀸𑀦𑁂𑀦 𑀧𑀓𑀢𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀬𑀣𑀸 𑀳𑀺 𑀅𑀭𑀽𑀧𑀲𑀦𑁆𑀢𑀸𑀦𑁂𑀦 𑀓𑀢𑁆𑀢𑀼𑀪𑀽𑀢𑁂𑀦 𑀲𑀤𑁆𑀥𑀸𑀤𑀬𑁄 𑀦𑀺𑀧𑁆𑀨𑀸𑀤𑀺𑀢𑀸 𑀉𑀢𑀼𑀪𑁄𑀚𑀦𑀸𑀤𑀬𑁄𑀘 𑀉𑀧𑀲𑁂𑀯𑀺𑀢𑀸. 𑀦 𑀏𑀯𑀁 𑀭𑀽𑀧𑀲𑀦𑁆𑀢𑀸𑀦𑁂𑀦. 𑀬𑀲𑁆𑀫𑀺𑀜𑁆𑀘 𑀉𑀢𑀼𑀩𑀻𑀚𑀸𑀤𑀺𑀓𑁂 𑀓𑀫𑁆𑀫𑀸𑀤𑀺𑀓𑁂𑀘 𑀲𑀢𑀺 𑀭𑀽𑀧𑀁 𑀧𑀯𑀢𑁆𑀢𑀢𑀺. 𑀦 𑀢𑀁 𑀢𑁂𑀦 𑀭𑀽𑀧𑁂𑀦 𑀧𑀓𑀢𑀁 𑀳𑁄𑀢𑀺. 𑀲𑀘𑁂𑀢𑀦𑀲𑁆𑀲𑁂𑀯 𑀳𑀺 𑀉𑀧𑁆𑀧𑀸𑀤𑀦𑀼𑀧𑀲𑁂𑀯𑀦𑀧𑀬𑁄𑀕𑀯𑀲𑁂𑀦 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀧𑀓𑀭𑀡𑀁. 𑀭𑀽𑀧𑀜𑁆𑀘 𑀅𑀘𑁂𑀢𑀦𑀦𑁆𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀤𑀼𑀯𑀺𑀥𑀁 𑀲𑀦𑁆𑀢𑀸𑀦𑀁 𑀭𑀽𑀧𑀲𑀦𑁆𑀢𑀸𑀦𑀁 𑀅𑀭𑀽𑀧𑀲𑀦𑁆𑀢𑀸𑀦𑀦𑁆𑀢𑀺. 𑀢𑀢𑁆𑀣 𑀬𑁂𑀦 𑀲𑀦𑁆𑀢𑀸𑀦𑁂𑀦 𑀧𑀼𑀩𑁆𑀩𑁂 𑀓𑀺𑀜𑁆𑀘𑀺 𑀲𑀼𑀝𑁆𑀞𑀼𑀉𑀧𑁆𑀧𑀸𑀤𑀺𑀢𑀁𑀯𑀸 𑀳𑁄𑀢𑀺 𑀉𑀧𑀲𑁂𑀯𑀺𑀢𑀁𑀯𑀸, 𑀢𑀲𑁆𑀲𑁂𑀯 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀼𑀧𑀲𑁂𑀯𑀺𑀢𑀸 𑀥𑀫𑁆𑀫𑀸 𑀓𑀸𑀮𑀦𑁆𑀢𑀭𑁂 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀓𑀭𑀡𑀲𑀗𑁆𑀔𑀸𑀢𑀜𑁆𑀘 𑀢𑀣𑀸 𑀉𑀧𑁆𑀧𑀸𑀤𑀦𑀼𑀧𑀲𑁂𑀯𑀦𑀁𑀦𑀸𑀫 𑀲𑀘𑁂𑀢𑀦𑁂 𑀅𑀭𑀽𑀧𑀲𑀦𑁆𑀢𑀸𑀦𑁂𑀏𑀯 𑀮𑀩𑁆𑀪𑀢𑀺, 𑀦 𑀅𑀘𑁂𑀢𑀦𑁂 𑀭𑀽𑀧𑀲𑀦𑁆𑀢𑀸𑀦𑁂𑀢𑀺. 𑀢𑀲𑁆𑀫𑀸 𑀭𑀽𑀧𑀥𑀫𑁆𑀫𑀸 𑀉𑀧𑀦𑀺𑀲𑁆𑀲𑀬𑀁𑀦𑀸𑀫 𑀦𑀮𑀩𑁆𑀪𑀦𑁆𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀦 𑀉𑀧𑀦𑀺𑀲𑁆𑀲𑀬𑁄 𑀦𑀸𑀫 𑀭𑀽𑀧𑀥𑀫𑁆𑀫𑀸𑀦𑀁 𑀫𑀚𑁆𑀛𑁂𑀧𑀺 𑀯𑀢𑁆𑀢𑀩𑁆𑀩𑁄𑀬𑁂𑀯𑀸𑀢𑀺.

[𑁨𑁩𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀬𑀣𑀸𑀭𑀳𑀁 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸𑀘 𑀭𑀸𑀕𑀸𑀤𑀬𑁄.𑀮. 𑀲𑁂𑀦𑀸𑀲𑀦𑀜𑁆𑀘𑀸𑀢𑀺’’ 𑀯𑀺𑀬𑁄𑀚𑁂𑀢𑁆𑀯𑀸 ‘‘𑀭𑀸𑀕𑀸𑀤𑀬𑁄 𑀳𑀺 𑀅𑀚𑁆𑀛𑀢𑁆𑀢𑀁 𑀦𑀺𑀧𑁆𑀨𑀸𑀤𑀺𑀓𑀸. 𑀧𑀼𑀕𑁆𑀕𑀮𑀸𑀤𑀬𑁄 𑀩𑀳𑀺𑀤𑁆𑀥𑀸 𑀲𑁂𑀯𑀺𑀢𑀸𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲𑀘 𑀉𑀧𑁆𑀧𑀦𑁆𑀦𑀸 𑀭𑀸𑀕𑀸𑀤𑀬𑁄 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘 𑀲𑀦𑁆𑀢𑀸𑀦𑁂 𑀭𑀸𑀕𑀸𑀤𑀻𑀦𑀁 𑀩𑀮𑀯𑀦𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀫𑀸𑀦𑀘𑁆𑀙𑀦𑁆𑀤𑀸𑀦𑀁 𑀇𑀢𑁆𑀣𑀺 𑀧𑀼𑀭𑀺𑀲𑀸𑀤𑀻𑀦𑀁 𑀫𑀦𑁄𑀧𑀤𑁄𑀲𑀺𑀓 𑀤𑁂𑀯𑀸𑀤𑀻𑀦𑀜𑁆𑀘𑁂𑀢𑁆𑀣 𑀭𑀸𑀕𑀸𑀤𑀬𑁄 𑀦𑀺𑀤𑀲𑁆𑀲𑀦𑀁.

[𑁨𑁩𑁨] 𑀬𑀸𑀘 𑀢𑀢𑁆𑀣

‘‘𑀬𑀣𑀸𑀞𑀺𑀢𑀯𑀲𑁂𑀦 𑀬𑁄𑀚𑀦𑀁’’ 𑀓𑀢𑁆𑀯𑀸 ‘‘𑀅𑀢𑁆𑀢𑀦𑁄𑀳𑀺 𑀭𑀸𑀕𑀸𑀤𑀬𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀯𑀺𑀪𑀸𑀯𑀦𑀸 𑀓𑀢𑀸. 𑀲𑀸𑀧𑀺 𑀅𑀦𑀼𑀧𑀧𑀦𑁆𑀦𑀸𑀬𑁂𑀯.

𑀢𑀸𑀬 𑀳𑀺 𑀅𑀢𑁆𑀢𑀦𑁄 𑀭𑀸𑀕𑀸𑀤𑀬𑁄 𑀲𑀤𑁆𑀥𑀸𑀤𑀬𑁄𑀘 𑀅𑀚𑁆𑀛𑀢𑁆𑀢𑀁 𑀓𑀼𑀲𑀮𑀸𑀤𑀻𑀦𑀁 𑀅𑀢𑁆𑀢𑀦𑁄 𑀲𑀤𑁆𑀥𑀸𑀬𑁄 𑀧𑀦 𑀩𑀳𑀺𑀤𑁆𑀥𑀸 𑀓𑀼𑀲𑀮𑀲𑁆𑀲𑀸𑀢𑀺 𑀏𑀯𑀁 𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸𑀢𑀺.

[𑁨𑁩𑁩] 𑀬𑀜𑁆𑀘

‘𑀢𑀢𑁆𑀣𑀸’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄𑀭𑀸𑀕𑀸𑀤𑀬𑁄𑀦𑀺𑀲𑁆𑀲𑀸𑀬𑀅𑀚𑁆𑀛𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁂𑀯 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀦𑀼𑀧𑀧𑀦𑁆𑀦𑀫𑁂𑀯.

𑀦𑀬𑀤𑀲𑁆𑀲𑀦𑀫𑀢𑁆𑀢𑀪𑀽𑀢𑀁𑀧𑀺 𑀳𑀺 𑀲𑀁𑀯𑀡𑁆𑀡𑀦𑀸𑀯𑀸𑀓𑁆𑀬𑀁𑀦𑀸𑀫 𑀦𑀬𑀫𑀼𑀔𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺. 𑀕𑀭𑀼𑀓𑀢𑀁𑀆𑀭𑀫𑁆𑀫𑀡𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀁 𑀮𑁄𑀓𑀺𑀬𑀓𑀼𑀲𑀮𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀘 𑀓𑀸𑀫𑀸𑀯𑀘𑀭 𑀓𑀼𑀲𑀮𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀘𑀢𑀼𑀦𑁆𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀫𑀳𑀸𑀓𑁆𑀭𑀺𑀬𑀚𑀯𑀦𑀸𑀦𑀁. 𑀦𑀺𑀩𑁆𑀩𑀸𑀦𑀁 𑀅𑀝𑁆𑀞𑀯𑀺𑀥𑀮𑁄𑀓𑀼𑀢𑁆𑀢𑀭𑀲𑁆𑀲 𑀣𑀧𑁂𑀢𑁆𑀯𑀸 𑀧𑀝𑀺𑀖𑀤𑁆𑀯𑀬 𑀫𑁄𑀫𑀽𑀳 𑀤𑁆𑀯𑀬 𑀤𑀼𑀓𑁆𑀔𑀲𑀳𑀕𑀢 𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺 𑀅𑀯𑀲𑁂𑀲𑀁 𑀲𑀩𑁆𑀩𑀁 𑀮𑁄𑀓𑀺𑀬 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀚𑀸𑀢𑀁 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀯𑀁 𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

[𑁨𑁩𑁪] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀕𑀭𑀼𑀓 𑀢𑀁𑀆𑀮𑀫𑁆𑀩𑀡𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑀅𑀲𑁆𑀲𑀸𑀤𑀸𑀤𑀺𑀦𑀸 𑀕𑀭𑀼𑀓𑀢𑀁 𑀆𑀭𑀫𑁆𑀫𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀪𑀸𑀯𑁂𑀦𑁆𑀢𑁂𑀦 ‘‘𑀢𑀜𑁆𑀳𑀺 𑀛𑀸𑀦𑀫𑀕𑁆𑀕 𑀨𑀮𑀯𑀺𑀧𑀲𑁆𑀲𑀦𑀸 𑀦𑀺𑀩𑁆𑀩𑀸𑀦𑀸𑀤𑀺𑀪𑁂𑀤𑀁 𑀧𑀘𑁆𑀘𑀯𑁂𑀓𑁆𑀔𑀦 𑀅𑀲𑁆𑀲𑀸𑀤𑀸𑀤𑀺𑀫𑀕𑁆𑀕𑀨𑀮𑀸𑀤𑀺𑀥𑀫𑁆𑀫𑁂 𑀅𑀢𑁆𑀢𑀸𑀥𑀻𑀦𑁂 𑀓𑀭𑁄𑀢𑀻𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀤𑀸𑀦 𑀲𑀻𑀮 𑀉𑀧𑁄𑀲𑀣𑀓𑀫𑁆𑀫 𑀧𑀼𑀩𑁆𑀩𑁂 𑀲𑀼𑀘𑀺𑀡𑁆𑀡𑀕𑁄𑀢𑁆𑀭𑀪𑀼 𑀯𑁄𑀤𑀸𑀦 𑀫𑀕𑁆𑀕𑀨𑀮 𑀦𑀺𑀩𑁆𑀩𑀸𑀦𑀸𑀦𑀺𑀘𑁂𑀯 𑀭𑀸𑀕𑀤𑀺𑀝𑁆𑀞𑀺𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺𑀘𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀢𑀺𑀘 𑀇𑀤𑀁 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀦𑀘 𑀢𑀸𑀦𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀺 𑀯𑀺𑀧𑀲𑁆𑀲𑀦𑀸𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀲𑀳𑀚𑀸𑀢𑀸𑀦𑀁𑀦𑀸𑀫𑀭𑀽𑀧𑀸𑀦𑀦𑁆𑀢𑀺 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓 𑀚𑀯𑀦𑀲𑀳 𑀚𑀸𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑀸𑀢 𑀭𑀽𑀧𑀸𑀦𑀜𑁆𑀘𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀬𑀁 𑀘𑀺𑀢𑁆𑀢 𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀜𑁆𑀘. 𑀏𑀲 𑀦𑀬𑁄 𑀧𑀭𑀢𑁆𑀣𑀧𑀺. 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀺𑀜𑁆𑀜𑀸𑀡𑀁 𑀯𑀢𑁆𑀣𑀼𑀦𑀸 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀦𑀮𑀪𑀢𑀺. 𑀯𑀢𑁆𑀣𑀼𑀘𑀢𑁂𑀦 𑀯𑀺𑀦𑀸 𑀧𑀢𑀺𑀝𑁆𑀞𑀁 𑀦𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀯𑀺𑀧𑀸𑀓𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂 𑀬𑁄 𑀅𑀢𑁆𑀢𑀦𑁄 𑀉𑀧𑀢𑁆𑀣𑀫𑁆𑀪𑀓𑀁 𑀧𑀘𑁆𑀘𑀼𑀧𑀢𑁆𑀣𑀫𑁆𑀪𑀢𑀺. 𑀲𑁄𑀏𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀁 𑀕𑀘𑁆𑀙𑀢𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦 𑀭𑀽𑀧𑀸𑀦𑀺𑀘 𑀘𑀺𑀢𑁆𑀢𑀁 𑀓𑀺𑀜𑁆𑀘𑀺 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺. 𑀢𑀣𑀸 𑀉𑀧𑀸𑀤𑀸𑀭𑀽𑀧𑀸𑀦𑀺𑀘 𑀫𑀳𑀸𑀪𑀽𑀢𑁂𑀢𑀺 𑀯𑀼𑀢𑁆𑀢𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀥𑀫𑁆𑀫𑀸𑀅𑀜𑁆𑀜𑀫𑀜𑁆𑀜𑀦𑁆𑀢𑀺𑀆𑀤𑀺.

[𑁨𑁩𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀬𑀲𑁆𑀫𑀸 𑀧𑀦 𑀅𑀜𑁆𑀜𑀫𑀜𑁆𑀜𑀼𑀯𑀢𑁆𑀣𑀫𑁆𑀪𑀦𑀯𑀲𑁂𑀦𑁂𑀯 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸. 𑀦 𑀲𑀳𑀚𑀸𑀢𑀫𑀢𑁆𑀢𑀢𑁄𑀢𑀺 𑀧𑀯𑀢𑁆𑀢𑀺𑀬𑀁 𑀭𑀽𑀧𑀁 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀢𑁆𑀣 𑀦 𑀲𑀳𑀚𑀸𑀢𑀫𑀢𑁆𑀢𑀢𑁄𑀢𑀺 𑀏𑀢𑁂𑀦 𑀬𑀤𑀺 𑀲𑀳𑀚𑀸𑀢𑀫𑀢𑁆𑀢𑀢𑁄 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀲𑀺𑀬𑀸. 𑀏𑀯𑀁𑀲𑀢𑀺 𑀧𑀯𑀢𑁆𑀢𑀺𑀬𑀁 𑀭𑀽𑀧𑀁 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁄 𑀲𑀺𑀬𑀸𑀢𑀺 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀲𑀳𑀚𑀸𑀢𑀧𑀘𑁆𑀘𑀬𑁂𑀧𑀺 𑀧𑀦 𑀧𑀯𑀢𑁆𑀢𑀺𑀬𑀁 𑀭𑀽𑀧𑀁 𑀦𑀸𑀫𑀸𑀦𑀁 𑀧𑀘𑁆𑀘𑀬𑁄 𑀦𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀫𑁂𑀢𑀦𑁆𑀢𑀺.

𑀙𑀯𑀢𑁆𑀣𑀽𑀦𑀺 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀦𑁆𑀢𑀺 𑀏𑀢𑁆𑀣 𑀯𑀢𑁆𑀣𑀼𑀲𑀳𑀚𑀸𑀢 𑀦𑀺𑀲𑁆𑀲𑀬𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄𑀢𑀺 𑀢𑀺𑀯𑀺𑀥𑁄 𑀯𑀢𑁆𑀣𑀼𑀦𑀺𑀲𑁆𑀲𑀬𑁄. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀯𑀢𑁆𑀣𑀼𑀲𑀳𑀚𑀸𑀢𑀦𑀺𑀲𑁆𑀲𑀬𑁄. 𑀬𑀁 𑀧𑀦 𑀧𑀯𑀢𑁆𑀢𑀺𑀬𑀁 𑀧𑀼𑀭𑁂𑀚𑀸𑀢𑀁, 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄𑀦𑀸𑀫. 𑀬𑀁 𑀧𑀦 𑀧𑀼𑀭𑁂𑀚𑀸𑀢𑀁 𑀯𑀢𑁆𑀣𑀼 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑁄𑀘𑁂𑀯 𑀳𑁄𑀢𑀺 𑀆𑀭𑀫𑁆𑀫𑀡𑀜𑁆𑀘, 𑀢𑀁 𑀢𑀲𑁆𑀲 𑀯𑀢𑁆𑀣𑀸𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑁄𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂 𑀆𑀭𑀫𑁆𑀫𑀡 𑀦𑀺𑀲𑁆𑀲𑀬 𑀧𑀼𑀭𑁂𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢 𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀢𑀻𑀡𑀻𑀢𑀺. 𑀓𑀣𑀜𑁆𑀘 𑀢𑀁 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑁄𑀘 𑀆𑀭𑀫𑁆𑀫𑀡𑀜𑁆𑀘 𑀳𑁄𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪 𑀲𑀫𑁆𑀫𑀲𑀦𑀯𑀲𑁂𑀦𑀯𑀸 𑀅𑀲𑁆𑀲𑀸𑀤𑀦𑀸𑀤𑀺𑀯𑀲𑁂𑀦𑀯𑀸 𑀇𑀤𑁆𑀥𑀺𑀯𑀺𑀥𑀓𑀺𑀘𑁆𑀘𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑀯𑀸 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀢𑀁 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑁄𑀘 𑀆𑀭𑀫𑁆𑀫𑀡𑀜𑁆𑀘 𑀳𑁄𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂-𑀅𑀚𑁆𑀛𑀢𑁆𑀢𑀁 𑀯𑀢𑁆𑀣𑀼𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀲𑁆𑀲𑀸𑀤𑁂𑀢𑀺. 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀏𑀢𑁆𑀣 𑀧𑀦 𑀆𑀘𑀭𑀺𑀬𑀸 𑀇𑀫𑀁 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬𑀁𑀦𑀸𑀫 𑀫𑀭𑀡𑀸𑀲𑀦𑁆𑀦𑀓𑀸𑀮𑁂𑀏𑀯 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀬𑀺𑀁𑀲𑀼. 𑀅𑀬𑀁𑀧𑀦𑁂𑀢𑁆𑀣 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀅𑀦𑀺𑀝𑁆𑀞𑁂 𑀞𑀸𑀦𑁂 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺 𑀧𑀝𑀺𑀲𑀺𑀤𑁆𑀥𑀸 𑀳𑁄𑀢𑀺. 𑀢𑀣𑀸 𑀏𑀓𑀸𑀯𑀚𑁆𑀚𑀦𑀯𑀻𑀣𑀺 𑀬𑀜𑁆𑀘 𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁𑀦𑀸𑀫 𑀥𑀫𑁆𑀫𑀢𑁄𑀘 𑀓𑀸𑀮𑀢𑁄𑀘 𑀅𑀪𑀺𑀦𑁆𑀦𑀫𑁂𑀯 𑀇𑀘𑁆𑀙𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀧𑀓𑀢𑀺𑀓𑀸𑀮𑁂𑀘 𑀘𑀺𑀢𑁆𑀢𑀸𑀦𑀺𑀦𑀸𑀫 𑀧𑀘𑁆𑀘𑁂𑀓 𑀯𑀢𑁆𑀣𑀼𑀦𑀺𑀲𑁆𑀲𑀬𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀢𑁆𑀣𑀼𑀁 𑀆𑀭𑀩𑁆𑀪𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑁆𑀢𑀺, 𑀏𑀢𑀁 𑀫𑀫𑀸𑀢𑀺𑀯𑀸 𑀅𑀲𑁆𑀲𑀸𑀤𑁂𑀦𑁆𑀢𑀺, 𑀢𑀤𑀸𑀬𑀁 𑀯𑀢𑁆𑀣𑀼 𑀆𑀯𑀚𑁆𑀚𑀺𑀢𑀁 𑀳𑁄𑀢𑀺. 𑀚𑀯𑀦𑀸𑀦𑀺𑀧𑀺 𑀢𑀤𑁂𑀯 𑀕𑀡𑁆𑀳𑀦𑁆𑀢𑀺. 𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀺. 𑀬𑀤𑀺 𑀳𑀺 𑀢𑀸𑀦𑀺𑀯𑀸 𑀅𑀜𑁆𑀜𑀁𑀯𑀸 𑀆𑀭𑀫𑁆𑀫𑀡𑀁 𑀕𑀡𑁆𑀳𑁂𑀬𑁆𑀬𑀼𑀁. 𑀦𑀺𑀭𑀸𑀯𑀚𑁆𑀚𑀦𑀸𑀦𑀺𑀦𑀸𑀫 𑀚𑀯𑀦𑀸𑀦𑀺 𑀳𑁄𑀦𑁆𑀢𑀺. 𑀓𑀲𑁆𑀫𑀸, 𑀆𑀯𑀚𑁆𑀚𑀦𑁂𑀦 𑀆𑀯𑀚𑁆𑀚𑀺𑀢𑀁 𑀅𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄𑀢𑀺. 𑀪𑀺𑀦𑁆𑀦𑀸 𑀭𑀫𑁆𑀫𑀡𑀸𑀦𑀺𑀘𑀦𑀸𑀫 𑀳𑁄𑀦𑁆𑀢𑀺. 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀸𑀦𑀺 𑀧𑀘𑁆𑀘𑁂𑀓𑀯𑀢𑁆𑀣𑀽𑀦𑀺𑀯𑀸 𑀅𑀜𑁆𑀜𑀁𑀯𑀸 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄𑀢𑀺. 𑀦𑀘 𑀢𑀣𑀸 𑀲𑀓𑁆𑀓𑀸 𑀪𑀯𑀺𑀢𑀼𑀁 𑀅𑀝𑁆𑀞𑀓𑀣𑀸 𑀯𑀺𑀭𑁄𑀥𑀢𑁄. 𑀢𑀲𑁆𑀫𑀸 𑀲𑁄 𑀯𑀢𑁆𑀣𑀸𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀓𑀢𑀺 𑀓𑀸𑀮𑁂 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀦 𑀲𑀩𑁆𑀩𑀸𑀦𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀘𑀺𑀢𑁆𑀢𑀸𑀦𑀺 𑀏𑀓𑀫𑁂𑀯 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸𑀦𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀢𑁂𑀲𑀁 𑀢𑀤𑁂𑀯 𑀯𑀢𑁆𑀣𑀼𑀘 𑀆𑀭𑀫𑁆𑀫𑀡𑀜𑁆𑀘 𑀳𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀢𑁂𑀲𑀁 𑀦𑀺𑀭𑀸𑀯𑀚𑁆𑀚𑀦𑀢𑀸𑀯𑀸 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀯𑀸 𑀦𑀢𑁆𑀣𑀻𑀢𑀺 𑀅𑀬𑀁 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀢𑀢𑁆𑀣 𑀧𑀦 𑀬𑀤𑀺 𑀆𑀯𑀚𑁆𑀚𑀦𑁂𑀦 𑀆𑀯𑀚𑁆𑀚𑀺𑀢𑀁 𑀯𑀢𑁆𑀣𑀼𑀁 𑀅𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀯𑀢𑁆𑀣𑀽𑀦𑀺 𑀕𑀡𑁆𑀳𑁂𑀬𑁆𑀬𑀼𑀁. 𑀦𑀺𑀭𑀸𑀯𑀚𑁆𑀚𑀦𑀸𑀦𑀺𑀦𑀸𑀫 𑀚𑀯𑀦𑀸𑀦𑀺 𑀪𑀯𑁂𑀬𑁆𑀬𑀼𑀦𑁆𑀢𑀺 𑀇𑀤𑀁 𑀢𑀸𑀯 𑀦 𑀬𑀼𑀚𑁆𑀚𑀢𑀺. 𑀆𑀯𑀚𑁆𑀚𑀦𑁂𑀦 𑀆𑀯𑀚𑁆𑀚𑀺 𑀢𑀧𑁆𑀧𑀓𑀸𑀭𑀲𑁆𑀲𑁂𑀯 𑀕𑀳𑀡𑀢𑁄. 𑀬𑀣𑀸 𑀳𑀺 𑀆𑀯𑀚𑁆𑀚𑀦𑀁𑀧𑀺 𑀯𑀢𑁆𑀣𑀼𑀦𑁆𑀢𑁆𑀯𑁂𑀯 𑀆𑀯𑀚𑁆𑀚𑀢𑀺. 𑀢𑀣𑀸 𑀚𑀯𑀦𑀸𑀦𑀺𑀘 𑀯𑀢𑁆𑀣𑀼𑀦𑁆𑀢𑁆𑀯𑁂𑀯 𑀚𑀯𑀦𑁆𑀢𑀺. 𑀦𑁄 𑀅𑀜𑁆𑀜𑀣𑀸𑀢𑀺 𑀦𑀢𑁆𑀣𑀺 𑀚𑀯𑀦𑀸𑀦𑀁 𑀦𑀺𑀭𑀸𑀯𑀚𑁆𑀚𑀦𑀢𑀸𑀢𑀺. 𑀬𑀣𑀸 𑀘 𑀦𑀺𑀭𑀸𑀯𑀚𑁆𑀚𑀦𑀢𑀸 𑀦𑀢𑁆𑀣𑀺, 𑀢𑀣𑀸 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀧𑀺 𑀢𑁂𑀲𑀁 𑀦𑀢𑁆𑀣𑀺𑀬𑁂𑀯. 𑀓𑀲𑁆𑀫𑀸, 𑀯𑀺𑀪𑀸𑀕𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀳𑀺 𑀲𑀦𑁆𑀢𑀢𑀺𑀖𑀦𑀯𑀲𑁂𑀦 𑀏𑀓𑀻𑀪𑀽𑀢𑀫𑀺𑀯 𑀧𑀼𑀩𑁆𑀩𑀸𑀧𑀭𑀁 𑀧𑀯𑀢𑁆𑀢 𑀫𑀸𑀦𑁂𑀲𑀼 𑀩𑀳𑀽𑀲𑀼 𑀯𑀢𑁆𑀣𑀼𑀲𑀼 𑀏𑀓𑀫𑁂𑀓𑀁 𑀯𑀢𑁆𑀣𑀼𑀁 𑀇𑀤𑀫𑁂𑀯𑀸𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀆𑀯𑀚𑁆𑀚𑀦𑀁𑀯𑀸𑀚𑀯𑀦𑀸𑀦𑀺𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀦𑀘 𑀢𑀣𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑁂𑀲𑀼 𑀞𑀸𑀦𑁂𑀲𑀼 𑀏𑀓𑀦𑁆𑀢𑁂𑀦 𑀥𑀫𑁆𑀫𑀢𑁄𑀯𑀸 𑀓𑀸𑀮𑀢𑁄𑀯𑀸 𑀪𑀺𑀦𑁆𑀦𑀸 𑀭𑀫𑁆𑀫𑀡𑀢𑀸𑀦𑀸𑀫 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺 𑀇𑀢𑀺 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀧𑀺 𑀢𑁂𑀲𑀁 𑀦𑀢𑁆𑀣𑀺 𑀬𑁂𑀯𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀦𑀺𑀲𑁆𑀲𑀬 𑀯𑀺𑀥𑀸𑀦𑀲𑁆𑀲 𑀧𑀓𑀢𑀺𑀓𑀸𑀮𑁂𑀧𑀺 𑀮𑀩𑁆𑀪𑀫𑀸𑀦𑀢𑀸 𑀲𑀸𑀥𑀺𑀢𑀸 𑀳𑁄𑀢𑀻𑀢𑀺.

𑀅𑀧𑀺𑀘, 𑀲𑀩𑁆𑀩𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀁 𑀆𑀭𑀩𑁆𑀪 𑀭𑀽𑀧𑀁 𑀫𑁂 𑀅𑀦𑀺𑀘𑁆𑀘𑀦𑁆𑀢𑀺𑀯𑀸 𑀏𑀢𑀁 𑀫𑀫𑀸𑀢𑀺𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀸𑀦𑀁 𑀅𑀚𑁆𑀛𑀢𑁆𑀢𑀭𑀽𑀧𑁂𑀲𑀼 𑀇𑀤𑀁 𑀦𑀸𑀫𑀭𑀽𑀧𑀁 𑀢𑀲𑁆𑀲𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀦𑀳𑁄𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀆𑀭𑀫𑁆𑀫𑀡 𑀪𑀽𑀢𑁂𑀲𑀼 𑀧𑀦 𑀢𑁂𑀲𑀼 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀫𑀢𑁆𑀢𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀓𑀺𑀜𑁆𑀘𑀺 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀳𑁄𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀓𑀩𑀴𑀻 𑀓𑀸𑀭𑁄 𑀆𑀳𑀸𑀭𑁄𑀢𑀺 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓 𑀭𑀽𑀧𑀸𑀳𑀸𑀭𑁄𑀘𑁂𑀯 𑀩𑀳𑀺𑀤𑁆𑀥𑀸𑀳𑀸𑀭𑁄𑀘. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀳𑀺 𑀬𑀸𑀯 𑀫𑀸𑀢𑀼𑀬𑀸 𑀆𑀳𑀸𑀭𑀨𑀭𑀡𑀁 𑀦𑀮𑀩𑁆𑀪𑀢𑀺, 𑀢𑀸𑀯 𑀓𑀮𑀮𑀸𑀤𑀺𑀓𑀸𑀮𑁂𑀲𑀼 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑁄 𑀅𑀚𑁆𑀛𑀢𑁆𑀢𑀸𑀳𑀸𑀭𑁄𑀬𑁂𑀯 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂-𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺, 𑀑𑀚𑀝𑁆𑀞𑀫𑀓𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀁 𑀧𑀦𑀲𑁆𑀲 𑀩𑀳𑀺𑀤𑁆𑀥𑀸𑀳𑀸𑀭𑀼𑀧𑀢𑁆𑀣𑀫𑁆𑀪𑀦𑀁 𑀮𑀤𑁆𑀥𑀓𑀸𑀮𑁂𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺𑀏𑀯𑀁 𑁋

𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀺 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁. 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀢𑀺𑀭𑁄𑀢𑀺

𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺. 𑀧𑀸𑀓𑀝𑀸𑀳𑀸𑀭𑁂𑀦 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀩𑁄𑀥𑀦𑀢𑁆𑀣𑀦𑁆𑀢𑀺. 𑀇𑀫𑀲𑁆𑀲𑀓𑀸𑀬𑀲𑁆𑀲𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀢𑀸𑀯 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀏𑀓𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀺 𑀓𑀲𑁆𑀲 𑀢𑀢𑁄𑀧𑀭𑀁 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲 𑀑𑀚𑀸𑀨𑀭𑀡𑀓𑀸𑀮𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀲𑁆𑀲𑀘 𑀓𑀸𑀬𑀲𑁆𑀲. 𑀇𑀢𑀭𑁂𑀲𑀁𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑀁. 𑀭𑀽𑀧𑀮𑁄𑀓𑁂 𑀧𑀦 𑀯𑀺𑀦𑀸𑀧𑀺 𑀤𑀼𑀯𑀺𑀥𑁂𑀦 𑀑𑀚𑀸𑀳𑀸𑀭𑀓𑀺𑀘𑁆𑀘𑁂𑀦 𑀅𑀧𑁆𑀧𑀦𑀸𑀧𑀢𑁆𑀢 𑀓𑀫𑁆𑀫𑀯𑀺𑀲𑁂𑀲𑁂𑀦 𑀲𑀺𑀤𑁆𑀥𑀲𑁆𑀲 𑀲𑀼𑀘𑀺𑀭𑀁𑀧𑀺 𑀅𑀤𑁆𑀥𑀸𑀦𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲 𑀭𑀽𑀧 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀢𑀣𑀸𑀭𑀽𑀧𑀸𑀦𑀜𑁆𑀘 𑀪𑀯𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀭𑀽𑀧𑀸𑀳𑀸𑀭𑀸𑀦𑀁 𑀯𑀲𑁂𑀦 𑀅𑀦𑁂𑀓𑀓𑀧𑁆𑀧𑀸𑀦𑀺𑀧𑀺 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀓𑀫𑁆𑀫𑀚𑀓𑀸𑀬𑀩𑀳𑀼𑀢𑀭𑁂𑀲𑀼 𑀤𑁂𑀯𑁂𑀲𑀼 𑀧𑁂𑀢𑀦𑀺𑀭𑀬𑁂𑀲𑀼𑀘 𑀲𑀼𑀘𑀺𑀭𑀁𑀧𑀺 𑀓𑀸𑀮𑀁 𑀩𑀳𑀺𑀤𑁆𑀥𑀸𑀳𑀸𑀭𑁂𑀦 𑀯𑀺𑀦𑀸 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀺 𑀯𑀢𑁆𑀢𑀩𑁆𑀩𑀸. 𑀢𑁂𑀲𑀼 𑀧𑀦 𑀅𑀚𑁆𑀛𑀢𑁆𑀢𑀸𑀳𑀸𑀭𑁄𑀧𑀺 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀓𑀺𑀜𑁆𑀘𑀸𑀧𑀺 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀧𑀺 𑀯𑀢𑁆𑀣𑀼𑀲𑁆𑀲 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑁂 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀥𑀫𑁆𑀫𑀸 𑀲𑀳𑀚𑀸𑀢𑀭𑀽𑀧𑀸𑀦𑀦𑁆𑀢𑀺 𑀏𑀢𑁆𑀣 𑀲𑀗𑁆𑀕𑀬𑁆𑀳𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀯𑀢𑁆𑀣𑀼𑀯𑀺𑀧𑀸𑀓𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀣𑀸𑀢𑀺 𑀲𑀩𑁆𑀩𑀧𑀓𑀸𑀭𑀁 𑀲𑀳𑀚𑀸𑀢𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀧𑀓𑀸𑀭𑁄𑀘 𑀢𑀺𑀯𑀺𑀥𑁄 𑀳𑁄𑀢𑀺 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺𑀆𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀚𑀻𑀯𑀺𑀢𑀫𑀺𑀘𑁆𑀘𑀬𑀦𑁆𑀢𑀺 𑀏𑀯𑀁 𑀧𑁄𑀭𑀸𑀡𑁂𑀳𑀺 𑀯𑀼𑀢𑁆𑀢𑁄 𑀅𑀬𑀁 𑀅𑀢𑁆𑀣𑀺𑀧𑀘𑁆𑀘𑀬𑁄 𑀅𑀯𑀺𑀕𑀢𑀧𑀘𑁆𑀘𑀬𑁄𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀦𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑁂 𑀲𑀗𑁆𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀢𑀺𑀯𑀺𑀥𑁄𑀯 𑀅𑀢𑁆𑀣𑀺𑀧𑀘𑁆𑀘𑀬𑁄 𑀲𑀺𑀬𑀸𑀢𑀺.𑀦. 𑀲𑀳𑀚𑀦𑀦𑀲𑀗𑁆𑀔𑀸𑀢𑀲𑁆𑀲 𑀲𑀳𑀼𑀧𑁆𑀧𑀸𑀤𑀦𑀮𑀓𑁆𑀔𑀡𑀲𑁆𑀲 𑀅𑀪𑀸𑀯𑀸. 𑀲𑀳𑀼𑀧𑁆𑀧𑀸𑀤𑀦𑀮𑀓𑁆𑀔𑀡𑁄 𑀳𑀺 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀘 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀉𑀧𑁆𑀧𑀸𑀤𑁂𑀦𑁆𑀢𑁄𑀧𑀺 𑀅𑀢𑁆𑀢𑀦𑁄 𑀞𑀺𑀢𑀺𑀓𑁆𑀔𑀡𑁂𑀏𑀯 𑀉𑀧𑁆𑀧𑀸𑀤𑁂𑀢𑀺, 𑀦𑁄 𑀉𑀧𑁆𑀧𑀸𑀤𑀓𑁆𑀔𑀡𑁂. 𑀬𑀣𑀸𑀘 𑀫𑀳𑀸𑀪𑀽𑀢𑀸 𑀲𑀳𑀚𑀸𑀢𑀭𑀽𑀧𑀸𑀦𑀺 𑀉𑀧𑀢𑁆𑀣𑀫𑁆𑀪𑀦𑁆𑀢𑀸 𑀅𑀢𑁆𑀢𑀦𑀸 𑀲𑀳 𑀉𑀧𑁆𑀧𑀸𑀤𑀦𑀧𑀼𑀩𑁆𑀩𑀓𑀸𑀏𑀯 𑀉𑀧𑀢𑁆𑀣𑀫𑁆𑀪𑀦𑁆𑀢𑀺, 𑀦 𑀢𑀣𑀸 𑀲𑁄 𑀆𑀳𑀸𑀭𑁄. 𑀲𑁄 𑀧𑀦 𑀯𑀺𑀦𑀸𑀯 𑀲𑀳𑀼𑀧𑁆𑀧𑀸𑀤𑀦𑀓𑀺𑀘𑁆𑀘𑁂𑀦 𑀲𑀳𑀚𑀸𑀢𑀸𑀦𑀺𑀧𑀺 𑀅𑀲𑀳𑀚𑀸𑀢𑀸𑀦𑀺𑀧𑀺 𑀉𑀧𑀢𑁆𑀣𑀫𑁆𑀪𑀢𑀻𑀢𑀺 𑀭𑀽𑀧𑀚𑀻𑀯𑀺𑀢𑀁𑀧𑀺 𑀲𑀳 𑀉𑀧𑁆𑀧𑀸𑀤𑀦𑀓𑀺𑀘𑁆𑀘𑁂𑀦 𑀯𑀺𑀦𑀸𑀯 𑀲𑀳 𑀚𑀸𑀢𑀭𑀽𑀧𑀸𑀦𑀺 𑀅𑀦𑀼𑀧𑀸𑀮𑁂𑀢𑀺. 𑀇𑀢𑀺 𑀇𑀫𑁂 𑀤𑁆𑀯𑁂𑀧𑀺 𑀥𑀫𑁆𑀫𑀸 𑀲𑀳𑀚𑀸𑀢 𑀮𑀓𑁆𑀔𑀡𑀸𑀪𑀸𑀯𑀸𑀏𑀯 𑀲𑀳𑀚𑀸𑀢𑀧𑀘𑁆𑀘𑀬𑁂 𑀅𑀲𑀗𑁆𑀕𑀳𑀺𑀢𑀸. 𑀇𑀤𑀸𑀦𑀺 𑀲𑀩𑁆𑀩𑁂𑀧𑀺 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸 𑀲𑀗𑁆𑀕𑀬𑁆𑀳𑀫𑀸𑀦𑀸 𑀘𑀢𑁆𑀢𑀸𑀭𑁄𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬.𑀮. 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀲𑀫𑁄𑀥𑀸𑀦𑀯𑀺𑀥𑀺, 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀅𑀥𑀺𑀧𑀢𑀺 𑀧𑀘𑁆𑀘𑀬𑁄 𑀢𑀸𑀯 𑀤𑀼𑀯𑀺𑀥𑁄 𑀆𑀭𑀫𑁆𑀫𑀡𑀲𑀳𑀚𑀸𑀢𑀯𑀲𑁂𑀦. 𑀢𑀢𑁆𑀣 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀢𑀻𑀲𑀼 𑀓𑀫𑁆𑀫𑀯𑀚𑁆𑀚𑁂𑀲𑀼 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀺. 𑀆𑀭𑀫𑁆𑀫𑀡 𑀫𑀢𑁆𑀢𑀁𑀧𑀺 𑀳𑀺 𑀓𑀫𑁆𑀫𑁂𑀦 𑀲𑀳 𑀲𑀫𑁄𑀥𑀸𑀦𑀁 𑀦𑀕𑀘𑁆𑀙𑀢𑀺. 𑀓𑀼𑀢𑁄 𑀅𑀥𑀺𑀧𑀢𑀺 𑀪𑀽𑀢𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀆𑀭𑀫𑁆𑀫𑀡𑀫𑀢𑁆𑀢𑀁𑀧𑀺.𑀮. 𑀦 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀓𑀫𑁆𑀫𑀸𑀭𑀫𑁆𑀫𑀡𑀸𑀧𑀺 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀺𑀬𑁄 𑀳𑁄𑀦𑁆𑀢𑀻𑀢𑀺. 𑀲𑀘𑁆𑀘𑀁. 𑀏𑀢𑁆𑀣 𑀧𑀦 𑀫𑀽𑀮𑀝𑀻𑀓𑀸𑀬𑀁 𑀓𑀫𑁆𑀫𑀁 𑀧𑀦 𑀢𑀲𑁆𑀫𑀺𑀁 𑀓𑀢𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀢𑀽𑀧𑀘𑀺𑀢 𑀪𑀸𑀯𑁂𑀦 𑀓𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺. 𑀦 𑀆𑀭𑀫𑁆𑀫𑀡𑀸𑀓𑀸𑀭𑁂𑀦. 𑀯𑀺𑀲𑀬 𑀫𑀢𑁆𑀢𑀢𑀸𑀯𑀲𑁂𑀦𑀘 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺. 𑀦 𑀲𑀦𑁆𑀢𑀸𑀦𑀯𑀺𑀲𑁂𑀲𑀦𑀁 𑀓𑀢𑁆𑀯𑀸 𑀨𑀮𑀼𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑁂𑀦. 𑀢𑀲𑁆𑀫𑀸 𑀢𑁂 𑀧𑀘𑁆𑀘𑀬𑀸𑀓𑀸𑀭𑀯𑀺𑀲𑀪𑀸𑀕𑀢𑁆𑀢𑀸 𑀲𑀳 𑀖𑀝𑀦𑀁 𑀦𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀲𑀚𑁆𑀚𑀺𑀢𑀦𑁆𑀢𑀺. 𑀲𑀳𑀚𑀸𑀢𑀸𑀥𑀺𑀧𑀢𑀺 𑀧𑀦 𑀅𑀢𑁆𑀣𑀺𑀧𑀘𑁆𑀘𑀬𑁂. 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀢𑀺𑀯𑀺𑀥𑁄 𑀲𑀳𑀚𑀸𑀢𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂 𑀅𑀢𑁆𑀣𑀺𑀧𑀘𑁆𑀘𑀬𑁂, 𑀧𑀘𑁆𑀙𑀺𑀫𑁄 𑀧𑀦 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑀢𑁆𑀣𑀺 𑀧𑀘𑁆𑀘𑀬𑁂𑀲𑀼. 𑀲𑁄 𑀘𑁂 𑀕𑀭𑀼𑀓𑀢𑁄 𑀳𑁄𑀢𑀺 𑀉𑀧𑀦𑀺𑀲𑁆𑀲𑀬𑁂𑀧𑀻𑀢𑀺. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀢𑀺𑀯𑀺𑀥𑁄 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀯𑀢𑁆𑀣𑀼𑀧𑀼𑀭𑁂 𑀚𑀸𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁂. 𑀇𑀢𑀭𑁂 𑀤𑁆𑀯𑁂 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑀢𑁆𑀣𑀺𑀧𑀘𑁆𑀘𑀬𑁂𑀲𑀼. 𑀢𑁂𑀘𑁂 𑀕𑀭𑀼𑀓𑀢𑀸 𑀳𑁄𑀦𑁆𑀢𑀺. 𑀉𑀧𑀦𑀺𑀲𑁆𑀲𑀬𑁂𑀧𑀻𑀢𑀺. 𑀓𑀫𑁆𑀫𑀧𑀘𑁆𑀘𑀬𑁄 𑀤𑀼𑀯𑀺𑀥𑁄 𑀲𑀳𑀚𑀸𑀢𑁄 𑀦𑀸𑀦𑀸𑀓𑁆𑀔𑀡𑀺𑀓𑁄𑀢𑀺. 𑀢𑀢𑁆𑀣 𑀲𑀳𑀚𑀸𑀢𑁄 𑀅𑀢𑁆𑀣𑀺𑀧𑀘𑁆𑀘𑀬𑁂. 𑀦𑀸𑀦𑀸𑀓𑁆𑀔𑀡𑀺𑀓𑁄 𑀧𑀦 𑀤𑀼𑀯𑀺𑀥𑁄 𑀩𑀮𑀯𑀸 𑀤𑀼𑀩𑁆𑀩𑀮𑁄𑀘. 𑀢𑀢𑁆𑀣𑀘 𑀩𑀮𑀯𑀸 𑀤𑀼𑀯𑀺𑀥𑁄 𑀅𑀓𑀸𑀮𑀺𑀓𑁄 𑀓𑀸𑀮𑀺𑀓𑁄𑀘, 𑀢𑀤𑀼𑀪𑀬𑀸𑀧𑀺 𑀉𑀧𑀦𑀺𑀲𑁆𑀲𑀬𑁂. 𑀤𑀼𑀩𑁆𑀩𑀮𑁄 𑀧𑀦 𑀯𑀺𑀲𑀼𑀁 𑀓𑀫𑁆𑀫𑀧𑀘𑁆𑀘𑀬𑁄𑀬𑁂𑀯. 𑀲𑀩𑁆𑀩𑁄 𑀆𑀳𑀸𑀭𑀧𑀘𑁆𑀘𑀬𑁄 𑀲𑀩𑁆𑀩𑁄𑀘 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀣𑀺𑀧𑀘𑁆𑀘𑀬𑁂.

𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀘𑀢𑀼𑀩𑁆𑀩𑀺𑀥𑁄 𑀲𑀳𑀚𑀸𑀢𑁄 𑀯𑀢𑁆𑀣𑀼𑀧𑀼𑀭𑁂𑀚𑀸𑀢𑁄 𑀯𑀢𑁆𑀣𑀸𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑁄 𑀧𑀘𑁆𑀙𑀸𑀚𑀸𑀢𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸 𑀤𑁆𑀯𑁂 𑀧𑀘𑁆𑀙𑀺𑀫𑁄𑀘 𑀅𑀢𑁆𑀣𑀺𑀧𑀘𑁆𑀘𑀬𑁂. 𑀢𑀢𑀻𑀬𑁄 𑀧𑀦 𑀤𑁆𑀯𑀻𑀲𑀼 𑀆𑀭𑀫𑁆𑀫𑀡𑀢𑁆𑀣𑀺 𑀧𑀘𑁆𑀘𑀬𑁂𑀲𑀼. 𑀲𑁄 𑀘𑁂 𑀕𑀭𑀼𑀓𑀢𑁄 𑀳𑁄𑀢𑀺, 𑀉𑀧𑀦𑀺𑀲𑁆𑀲𑀬𑁂𑀧𑀻𑀢𑀺. 𑀲𑁂𑀲𑁂𑀲𑀼 𑀧𑀦 𑀲𑀢𑁆𑀢𑀭𑀲𑀧𑀘𑁆𑀘𑀬𑁂𑀲𑀼 𑀳𑁂𑀢𑀼, 𑀲𑀳𑀚𑀸𑀢, 𑀅𑀜𑁆𑀜𑀫𑀜𑁆𑀜, 𑀯𑀺𑀧𑀸𑀓, 𑀛𑀸𑀦, 𑀫𑀕𑁆𑀕, 𑀲𑀫𑁆𑀧𑀬𑀼𑀢𑁆𑀢, 𑀅𑀯𑀺𑀕𑀢𑀯𑀲𑁂𑀦 𑀅𑀝𑁆𑀞𑀧𑀘𑁆𑀘𑀬𑀸 𑀧𑀘𑁆𑀙𑀸 𑀚𑀸𑀢𑁄𑀘 𑀅𑀢𑁆𑀣𑀺𑀧𑀘𑁆𑀘𑀬𑁂. 𑀅𑀦𑀦𑁆𑀢𑀭 𑀲𑀫𑀦𑀦𑁆𑀢𑀭 𑀆𑀲𑁂𑀯𑀦 𑀦𑀢𑁆𑀣𑀺 𑀯𑀺𑀕𑀢 𑀯𑀲𑁂𑀦 𑀧𑀜𑁆𑀘𑀧𑀘𑁆𑀘𑀬𑀸 𑀉𑀧𑀦𑀺𑀲𑁆𑀲𑀬𑁂𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸 𑀲𑀪𑀸𑀕𑀲𑀗𑁆𑀕𑀳𑀯𑀲𑁂𑀦 𑀲𑀁𑀔𑀺𑀧𑁆𑀧𑀫𑀸𑀦𑀸 𑀆𑀭𑀫𑁆𑀫𑀡𑀸𑀤𑀻𑀲𑀼 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺.

[𑁨𑁩𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑁂𑀲𑀼 𑀘𑀢𑀽𑀲𑀼 𑀏𑀓𑁂𑀓𑀲𑁆𑀫𑀺𑀁𑀧𑀺 𑀲𑀩𑁆𑀩𑁂 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀦𑀳𑀺 𑀲𑁄 𑀓𑁄𑀘𑀺𑀧𑀘𑁆𑀘𑀬𑁄𑀢𑀺’’𑀆𑀤𑀺. 𑀢𑀁 𑀲𑀩𑁆𑀩𑀁𑀧𑀺 𑀆𑀘𑀭𑀺𑀬𑀲𑁆𑀲 𑀫𑀢𑀺𑀫𑀢𑁆𑀢𑀫𑁂𑀯.

[𑁨𑁩𑁭] 𑀬𑀜𑁆𑀳𑀺 𑀢𑀢𑁆𑀣

‘‘𑀦𑀳𑀺 𑀲𑁄 𑀓𑁄𑀘𑀺𑀧𑀘𑁆𑀘𑀬𑁄 𑀅𑀢𑁆𑀣𑀺. 𑀬𑁄 𑀘𑀺𑀢𑁆𑀢𑀘𑁂𑀢𑀲𑀺 𑀓𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀁 𑀦𑀕𑀘𑁆𑀙𑁂𑀬𑁆𑀬𑀸𑀢𑀺’’ 𑀯𑀼𑀢𑁆𑀢𑀁, 𑀢𑀁 𑀢𑀸𑀯 𑀦 𑀬𑀼𑀚𑁆𑀚𑀢𑀺. 𑀦𑀳𑀺 𑀇𑀥 𑀥𑀫𑁆𑀫𑀲𑀭𑀽𑀧𑀫𑀢𑁆𑀢𑁂𑀦 𑀲𑀫𑁄𑀥𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀘𑁆𑀘𑀬𑀝𑁆𑀞𑁂𑀦 𑀲𑀳𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀦𑀘 𑀳𑁂𑀢𑀸𑀤𑀺𑀧𑀘𑁆𑀘𑀬𑀝𑁆𑀞𑁄 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀝𑁆𑀞𑁄 𑀳𑁄𑀢𑀻𑀢𑀺. 𑀏𑀲𑀦𑀬𑁄 ‘‘𑀲𑀓 𑀲𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲𑀘 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀦𑀕𑀘𑁆𑀙𑀢𑀻𑀢𑀺’’ 𑀏𑀢𑁆𑀣𑀸𑀧𑀺.

𑀏𑀢𑁆𑀣 𑀧𑀦 𑀬𑁄 𑀲𑀓𑀲𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀦𑀕𑀘𑁆𑀙𑀢𑀺. 𑀦𑀳𑀺 𑀲𑁄 𑀓𑁄𑀘𑀺 𑀧𑀘𑁆𑀘𑀬𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

[𑁨𑁩𑁮] 𑀬𑀜𑁆𑀘 𑀢𑀢𑁆𑀣

‘‘𑀓𑀫𑁆𑀫𑀳𑁂𑀢𑀼𑀓𑀢𑁆𑀢𑀸𑀘 𑀮𑁄𑀓𑀧𑁆𑀧𑀯𑀢𑁆𑀢𑀺𑀬𑀸 𑀨𑀮𑀳𑁂𑀢𑀽𑀧𑀘𑀸𑀭 𑀯𑀲𑁂𑀦 𑀲𑀩𑁆𑀩𑁂𑀧𑀺 𑀓𑀫𑁆𑀫𑀲𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺’’ 𑀯𑀼𑀢𑁆𑀢𑀁.

[𑁨𑁩𑁯] 𑀬𑀜𑁆𑀘

‘‘𑀢𑁂𑀘 𑀧𑀭𑀫𑀢𑁆𑀣𑀢𑁄 𑀮𑁄𑀓𑀲𑀫𑁆𑀫𑀼𑀢𑀺𑀯𑀲𑁂𑀦𑀘 𑀯𑀺𑀚𑁆𑀚𑀫𑀸𑀦𑀸 𑀬𑁂𑀯𑀸𑀢𑀺’’ 𑀯𑀼𑀢𑁆𑀢𑀁. 𑀢𑀤𑀼𑀪𑀬𑀁 𑀧𑀦 𑀲𑀩𑁆𑀩𑀲𑁄 𑀲𑀸𑀲𑀦𑀬𑀼𑀢𑁆𑀢𑀺 𑀬𑀸𑀧𑀺 𑀯𑀺𑀭𑀼𑀤𑁆𑀥𑀫𑁂𑀯𑀸𑀢𑀺.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀝𑁆𑀞𑀸𑀦𑀦𑀬𑁂. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼 𑀲𑀳 𑀚𑀸𑀢𑀲𑀪𑀸𑀕𑁂𑀲𑀼 𑀧𑀘𑁆𑀘𑀬𑁂𑀲𑀼. 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁𑀦𑀸𑀫 𑀦𑀸𑀫𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀤𑁆𑀥𑀑𑀓𑀸𑀲𑁂 𑀘𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀲𑀓𑀮𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀪𑀯𑀲𑁆𑀲 𑀲𑀻𑀲𑀪𑀽𑀢𑀁 𑀩𑀻𑀚𑀪𑀽𑀢𑀜𑁆𑀘 𑀳𑁄𑀢𑀺. 𑀬𑀢𑁄 𑀲𑀓𑀮𑀓𑀸𑀬𑀪𑀽𑀢𑀲𑁆𑀲 𑀦𑀸𑀦𑀸𑀭𑀽𑀧𑀸𑀭𑀽𑀧𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀩𑀻𑀚𑀢𑁄 𑀯𑀺𑀬 𑀫𑀳𑀸𑀭𑀼𑀓𑁆𑀔𑀲𑁆𑀲. 𑀬𑀣𑀸𑀳 𑁋

𑀯𑀺𑀜𑁆𑀜𑀸𑀡𑀜𑁆𑀘 𑀳𑀺 𑀆𑀦𑀦𑁆𑀤 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦 𑀑𑀓𑁆𑀓𑀫𑀺𑀲𑁆𑀲𑀣. 𑀅𑀧𑀺𑀦𑀼𑀔𑁄 𑀦𑀸𑀫𑀭𑀽𑀧𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑀼𑀘𑁆𑀘𑀺𑀲𑁆𑀲𑀣𑀸𑀢𑀺. 𑀦𑁄 𑀳𑁂𑀢𑀁 𑀪𑀦𑁆𑀢𑁂. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺 𑀆𑀦𑀦𑁆𑀤 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑁄𑀓𑁆𑀓𑀫𑀺𑀲𑁆𑀲𑀣. 𑀅𑀧𑀺𑀦𑀼𑀔𑁄 𑀦𑀸𑀫𑀭𑀽𑀧𑀁 𑀇𑀢𑁆𑀣𑀢𑁆𑀢𑀸𑀬 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀣𑀸𑀢𑀺. 𑀦𑁄𑀳𑁂𑀢𑀁 𑀪𑀦𑁆𑀢𑁂. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺 𑀆𑀦𑀦𑁆𑀤 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀯𑁄𑀘𑁆𑀙𑀺𑀚𑁆𑀚𑀺𑀲𑁆𑀲𑀣 𑀓𑀼𑀫𑀸𑀭𑀲𑁆𑀲𑀯𑀸 𑀓𑀼𑀫𑀸𑀭𑀺𑀓𑀸𑀬𑀯𑀸. 𑀅𑀧𑀺𑀦𑀼𑀔𑁄 𑀦𑀸𑀫𑀭𑀽𑀧𑀁 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣𑀸𑀢𑀺. 𑀦𑁄𑀳𑁂𑀢𑀁 𑀪𑀦𑁆𑀢𑁂. 𑀢𑀲𑁆𑀫𑀸 𑀳𑀺 𑀆𑀦𑀦𑁆𑀤 𑀏𑀲𑁂𑀯 𑀳𑁂𑀢𑀼 𑀏𑀲 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀦𑀸𑀫𑀭𑀽𑀧𑀲𑁆𑀲. 𑀬𑀤𑀺𑀤𑀁 𑀯𑀺𑀜𑁆𑀜𑀸𑀡𑀦𑁆𑀢𑀺.

𑀢𑀢𑁆𑀣 𑀲𑀫𑀼𑀘𑁆𑀘𑀺𑀲𑁆𑀲𑀣𑀸𑀢𑀺 𑀯𑀟𑁆𑀠𑀺𑀲𑁆𑀲𑀣. 𑀦𑀸𑀫𑀭𑀽𑀧𑀜𑁆𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀯𑀟𑁆𑀠𑀺𑀬𑁂𑀯𑀸𑀢𑀺. 𑀯𑁄𑀓𑁆𑀓𑀫𑀺𑀲𑁆𑀲𑀣𑀸𑀢𑀺 𑀪𑀺𑀚𑁆𑀚𑀺𑀲𑁆𑀲𑀣. 𑀇𑀢𑁆𑀣𑀢𑁆𑀣𑀸𑀬𑀸𑀢𑀺 𑀈𑀤𑀺𑀲𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀦𑁆𑀢𑀺 𑀧𑀣𑀫𑀯𑀬𑀯𑀲𑁂𑀦 𑀯𑀼𑀤𑁆𑀥𑀺𑀁. 𑀫𑀚𑁆𑀛𑀺𑀫𑀯𑀬𑀯𑀲𑁂𑀦 𑀯𑀺𑀭𑀼𑀴𑁆𑀳𑀺𑀁. 𑀧𑀘𑁆𑀙𑀺𑀫𑀯𑀬𑀯𑀲𑁂𑀦 𑀯𑁂𑀧𑀼𑀮𑁆𑀮𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀉𑀧𑁆𑀧𑀦𑁆𑀦𑀜𑁆𑀘 𑀧𑀦𑁂𑀢𑀁 𑀧𑀝𑀺𑀲𑀦𑁆𑀥𑀺𑀭𑀽𑀧𑀁 𑀧𑀼𑀦 𑀲𑀬𑀁 𑀢𑀲𑁆𑀫𑀺𑀁 𑀪𑀯𑁂 𑀬𑀸𑀯 𑀘𑀼𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀩𑁆𑀩𑀸𑀲𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀲𑀦𑁆𑀢𑀢𑀻𑀦𑀁 𑀲𑀺𑀢 𑀪𑀽𑀢𑀁 𑀩𑀻𑀚𑀪𑀽𑀢𑀜𑁆𑀘 𑀳𑁄𑀢𑀺. 𑀅𑀢𑀺𑀩𑀮𑀯𑀦𑁆𑀢𑀁𑀧𑀺 𑀳𑀺 𑀘𑀺𑀢𑁆𑀢𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀭𑀽𑀧𑀧𑀯𑁂𑀡𑀺𑀬𑀸 𑀅𑀲𑀢𑀺 𑀭𑀽𑀧𑀁 𑀚𑀦𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀏𑀯𑀁 𑀉𑀢𑀼 𑀆𑀳𑀸𑀭𑀸𑀧𑀻𑀢𑀺. 𑀢𑀢𑁄𑀬𑁂𑀯 𑀳𑀺 𑀅𑀭𑀽𑀧𑀪𑀯𑁂 𑀓𑀸𑀫𑀸𑀯𑀘𑀭𑀸𑀤𑀻𑀦𑀺 𑀭𑀽𑀧𑀚𑀦𑀓𑀘𑀺𑀢𑁆𑀢𑀸𑀦𑀺𑀧𑀺 𑀢𑀢𑁆𑀣 𑀭𑀽𑀧𑀁 𑀦𑀚𑀦𑁂𑀦𑁆𑀢𑀻𑀢𑀺. 𑀅𑀲𑀜𑁆𑀜𑀲𑀢𑁆𑀢𑁂𑀧𑀺 𑀉𑀢𑀼 𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀦𑁆𑀢𑀢𑀺𑀬𑁄 𑀧𑀣𑀫𑀼𑀧𑁆𑀧𑀦𑁆𑀦𑀸𑀬 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀯𑀺𑀚𑁆𑀚 𑀫𑀸𑀦𑀢𑁆𑀢𑀸𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀪𑀗𑁆𑀕𑀝𑀻𑀓𑀸𑀬𑀁 𑀅𑀭𑀽𑀧𑀁 𑀧𑀦 𑀭𑀽𑀧𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀭𑀽𑀧𑁂 𑀲𑀢𑀺 𑀘𑀺𑀢𑁆𑀢𑀁 𑀅𑀜𑁆𑀜𑀁 𑀭𑀽𑀧𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀢𑀤𑁂𑀯 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀭𑀽𑀧𑀲𑁆𑀲𑀸𑀧𑀺 𑀳𑀺 𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺 𑀧𑀼𑀢𑁆𑀢𑀲𑁆𑀲 𑀧𑀺𑀢𑀺𑀲𑀤𑀺𑀲𑀢𑀸𑀤𑀲𑁆𑀲𑀦𑀢𑁄𑀢𑀺. 𑀏𑀢𑁆𑀣𑀘 𑀧𑀼𑀢𑁆𑀢𑀲𑁆𑀲 𑀧𑀺𑀢𑀺𑀲𑀤𑀺𑀲𑀢𑀸𑀤𑀲𑁆𑀲𑀦𑀢𑁄𑀢𑀺 𑀏𑀢𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀢𑀺𑀡𑀭𑀼𑀓𑁆𑀔𑀸𑀦𑀁 𑀩𑀻𑀚𑀪𑀸𑀯𑀲𑀗𑁆𑀔𑀸𑀢𑀁 𑀦𑀺𑀬𑀸𑀫𑀭𑀽𑀧𑀁𑀦𑀸𑀫 𑀅𑀢𑁆𑀣𑀺. 𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀸𑀢𑀺𑀡𑀭𑀼𑀓𑁆𑀔𑀸 𑀯𑀟𑁆𑀠𑀦𑁆𑀢𑀸 𑀬𑀣𑀸𑀯𑀸 𑀢𑀣𑀸𑀯𑀸 𑀅𑀯𑀟𑁆𑀠𑀺𑀢𑁆𑀯𑀸𑀅𑀢𑁆𑀢𑀦𑀸 𑀲𑀫𑀸𑀦𑀩𑀻𑀚𑁂𑀳𑀺𑀏𑀯 𑀢𑀺𑀡𑀭𑀼𑀓𑁆𑀔𑁂𑀳𑀺 𑀲𑀩𑁆𑀩𑀲𑁄 𑀲𑀤𑀺𑀲𑀸 𑀓𑀸𑀭𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑀦𑁆𑀢𑀺. 𑀏𑀯𑀫𑁂𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑀢𑁆𑀢𑀸𑀦𑀁 𑀬𑁄𑀦𑀺 𑀪𑀸𑀯𑀲𑀗𑁆𑀔𑀸𑀢𑀁 𑀦𑀺𑀬𑀸𑀫 𑀭𑀽𑀧𑀁𑀦𑀸𑀫 𑀅𑀢𑁆𑀣𑀺. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑁂 𑀲𑀫𑀸𑀦 𑀚𑀸𑀢𑀺𑀓𑁂𑀳𑀺𑀏𑀯 𑀓𑀼𑀮𑁂𑀳𑀺 𑀯𑀺𑀲𑁂𑀲𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀏𑀯 𑀲𑀩𑁆𑀩𑀲𑁄 𑀲𑀤𑀺𑀲𑀭𑀽𑀧𑀲𑀡𑁆𑀞𑀸𑀦𑀸 𑀳𑁄𑀦𑁆𑀢𑀺. 𑀇𑀢𑀺 𑀩𑀻𑀚𑀦𑀺𑀬𑀸𑀫𑁄 𑀯𑀺𑀬 𑀬𑁄𑀦𑀺𑀦𑀺𑀬𑀸𑀫𑁄𑀧𑀺 𑀳𑁄𑀢𑀺. 𑀲𑁄𑀘 𑀧𑀝𑀺𑀲𑀦𑁆𑀥𑀺𑀭𑀽𑀧𑀲𑁆𑀲𑁂𑀯 𑀆𑀦𑀼𑀪𑀸𑀯𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘, 𑀅𑀬𑀁 𑀬𑁄𑀦𑀺𑀦𑀺𑀬𑀸𑀫𑁄𑀦𑀸𑀫 𑀓𑀮𑀮𑀓𑀸𑀮𑀸𑀤𑀻𑀲𑀼 𑀧𑀼𑀢𑁆𑀢𑀸𑀦𑀁 𑀲𑀭𑀻𑀭𑁂𑀲𑀼 𑀫𑀸𑀢𑀸𑀧𑀺𑀢𑀽𑀳𑀺 𑀲𑀫𑀼𑀤𑀸𑀕𑀢𑀁 𑀉𑀢𑀼𑀚𑀭𑀽𑀧𑀲𑀦𑁆𑀢𑀸𑀦𑀁𑀏𑀯. 𑀬𑀲𑁆𑀲 𑀆𑀦𑀼𑀪𑀸𑀯𑁂𑀦 𑀢𑀁𑀲𑀦𑁆𑀢𑀸𑀦𑀁 𑀲𑀫𑀸𑀦𑀚𑀸𑀢𑀺𑀓𑀲𑀢𑁆𑀢𑀲𑀡𑁆𑀞𑀸𑀦𑀲𑀤𑀺𑀲𑀁 𑀅𑀢𑁆𑀢𑀦𑁄 𑀜𑀸𑀢𑀺𑀓𑀼𑀮𑀲𑀤𑀺𑀲𑀜𑁆𑀘 𑀳𑁄𑀢𑀺. 𑀬𑀣𑀸𑀳𑀺𑀇𑀢𑁆𑀣𑀺𑀪𑀸𑀯𑀸𑀤𑀺𑀭𑀽𑀧𑀁 𑀲𑀢𑁆𑀢𑀸𑀦𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀩𑀻𑀚𑀭𑀽𑀧𑀜𑁆𑀘 𑀢𑀺𑀡𑀭𑀼𑀓𑁆𑀔𑀸𑀦𑀁 𑀢𑀁𑀢𑀁𑀯𑀡𑁆𑀡𑀲𑀡𑁆𑀞𑀸𑀦𑀸 𑀤𑀻𑀦𑀺 𑀦𑀺𑀬𑀸𑀫𑁂𑀢𑀺. 𑀏𑀯𑀁 𑀬𑁄𑀦𑀺𑀭𑀽𑀧𑀁 𑀦𑀸𑀦𑀸𑀚𑀸𑀢𑀺𑀯𑀲𑁂𑀦 𑀲𑀢𑁆𑀢𑀸𑀦𑀁 𑀦𑀺𑀬𑀸𑀫𑀓𑀁 𑀯𑀯𑀢𑁆𑀣𑀸𑀧𑀓𑀁 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀯𑀢𑁆𑀢𑀺𑀬𑀁 𑀣𑀧𑁂𑀢𑁆𑀯𑀸 𑀘𑀺𑀢𑁆𑀢𑀚𑀭𑀽𑀧𑀁 𑀲𑀩𑁆𑀩𑁂𑀲𑀁 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀦𑀺𑀭𑀧𑁂𑀓𑁆𑀔𑀢𑀸 𑀧𑀼𑀭𑀺𑀫𑀼𑀧𑁆𑀧𑀦𑁆𑀦 𑀭𑀽𑀧𑀧𑀯𑁂𑀡𑀺 𑀧𑀝𑀺𑀩𑀤𑁆𑀥𑀢𑀸𑀘 𑀲𑀸𑀥𑀺𑀢𑀸 𑀳𑁄𑀢𑀺. 𑀢𑁂𑀦𑁂𑀯𑀘 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀪𑀗𑁆𑀕𑀓𑁆𑀔𑀡𑁂𑀲𑀼𑀧𑀺 𑀘𑀺𑀢𑁆𑀢𑀭𑀳𑀺𑀢𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀓𑀸𑀮𑁂𑀧𑀺 𑀉𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀳𑀚𑀸𑀢𑀭𑀽𑀧𑀦𑁆𑀢𑀺 𑀧𑀦𑁂𑀢𑁆𑀣𑀸𑀢𑀺𑀆𑀤𑀺. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀢𑀢𑁆𑀣 𑀲𑀫𑁆𑀪𑀯𑀁𑀢𑀺 𑀬𑀣𑀸 𑀲𑀫𑁆𑀪𑀯𑀁. 𑀲𑀫𑁆𑀪𑀯𑀸𑀢𑀺𑀯𑀸 𑀲𑀫𑁆𑀪𑀽𑀢𑀸. 𑀅𑀚𑁆𑀛𑀢𑁆𑀢𑀜𑁆𑀘𑀸𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑀸𑀘. 𑀩𑀳𑀺𑀤𑁆𑀥𑀸𑀘𑀸𑀢𑀺 𑀩𑀳𑀺𑀤𑁆𑀥𑀸𑀪𑀽𑀢𑀸𑀘. 𑀲𑀗𑁆𑀔𑀢𑀸𑀢𑀺 𑀲𑀗𑁆𑀔𑀢𑀪𑀽𑀢𑀸. 𑀅𑀲𑀗𑁆𑀔𑀢𑀸𑀢𑀺 𑀅𑀲𑀗𑁆𑀔𑀢𑀪𑀽𑀢𑀸. 𑀏𑀯𑀁 𑀢𑁂𑀓𑀸𑀮𑀺𑀓𑀸𑀘 𑀓𑀸𑀮𑀫𑀼𑀢𑁆𑀢𑀸𑀘 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀫𑁆𑀪𑀽𑀢𑀸𑀘. 𑀢𑀣𑀸 𑀲𑀗𑁆𑀔𑀢𑀸𑀲𑀗𑁆𑀔𑀢𑀪𑀽𑀢𑀸𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫𑀭𑀽𑀧𑀸𑀦𑀁 𑀯𑀲𑁂𑀦 𑀢𑀺𑀯𑀺𑀥𑀸 𑀞𑀺𑀢𑀸 𑀥𑀫𑁆𑀫𑀸 𑀧𑀝𑁆𑀞𑀸𑀦𑁂 𑀲𑀩𑁆𑀩𑀣𑀸 𑀘𑀢𑀼𑀯𑀻𑀲𑀢𑀺 𑀧𑀘𑁆𑀘𑀬𑀸𑀦𑀸𑀫 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀢𑀺𑀯𑀺𑀥𑀸 𑀞𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀢𑁂𑀓𑀸𑀮𑀺𑀓𑀸𑀤𑀺𑀪𑀸𑀯𑁂 𑀲𑀢𑀺 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬𑀸𑀦𑀁𑀧𑀺 𑀬𑀣𑀸𑀲𑀫𑁆𑀪𑀯𑀁 𑀢𑁂𑀓𑀸𑀮𑀺𑀓𑀸𑀤𑀺𑀪𑁂𑀤𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀅𑀥𑀺𑀧𑀢𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀢𑁂𑀓𑀸𑀮𑀺𑀓𑀸 𑀓𑀸𑀮𑀫𑀼𑀢𑁆𑀢𑀸𑀘 𑀳𑁄𑀦𑁆𑀢𑀺.

[𑁨𑁪𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀆𑀭𑀫𑁆𑀫𑀡𑀅𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀦𑀁 𑀢𑀺𑀓𑀸𑀮𑀺𑀓𑀸𑀦𑀦𑁆𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀧𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀦𑀁𑀧𑀺 𑀓𑀸𑀮𑀫𑀼𑀢𑁆𑀢𑀸𑀦𑀁 𑀢𑁂𑀲𑀼 𑀧𑀯𑀺𑀝𑁆𑀞𑀢𑁆𑀢𑀸𑀢𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀪𑀺𑀦𑀯𑀸𑀦𑀁 𑀥𑀦𑀥𑀜𑁆𑀜𑀪𑁄𑀕𑀸𑀦𑀁𑀯𑀸 𑀯𑀺𑀚𑁆𑀚𑀸𑀲𑀺𑀧𑁆𑀧𑀲𑀼𑀢𑀧𑀭𑀺 𑀬𑀢𑁆𑀢𑀻𑀦𑀁𑀯𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀦𑀁𑀯𑀸 𑀪𑀯𑀦𑁆𑀢𑀭𑁂 𑀪𑀯𑀲𑀫𑁆𑀧𑀢𑁆𑀢𑀺𑀪𑁄𑀕 𑀲𑀫𑁆𑀧𑀢𑁆𑀢𑀺 𑀫𑀕𑁆𑀕𑀨𑀮𑀲𑀫𑁆𑀧𑀢𑁆𑀢𑀻𑀦𑀁𑀯𑀸 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀼𑀩𑁆𑀩𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀕𑀢𑀸𑀦𑀁 𑀢𑀸𑀲𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀝𑁆𑀞𑀸𑀦𑁂 𑀧𑀦 𑀅𑀦𑀸𑀕𑀢𑀁 𑀘𑀓𑁆𑀔𑀼𑀲𑀫𑁆𑀧𑀤𑀁 𑀧𑀢𑁆𑀣𑀬𑀫𑀸𑀦𑁄 𑀲𑁄𑀢, 𑀖𑀸𑀦, 𑀚𑀺𑀯𑁆𑀳𑀸, 𑀓𑀸𑀬𑀲𑀫𑁆𑀧𑀤𑀁, 𑀯𑀡𑁆𑀡𑀲𑀫𑁆𑀧𑀤𑀁, 𑀲𑀤𑁆𑀤, 𑀕𑀦𑁆𑀥, 𑀭𑀲, 𑀨𑁄𑀝𑁆𑀞𑀩𑁆𑀩𑀲𑀫𑁆𑀧𑀤𑀁 𑀧𑀢𑁆𑀣𑀬𑀫𑀸𑀦𑁄 𑀅𑀦𑀸𑀕𑀢𑁂 𑀔𑀦𑁆𑀥𑁂 𑀧𑀢𑁆𑀣𑀬𑀫𑀸𑀦𑁄 𑀤𑀸𑀦𑀁 𑀤𑁂𑀢𑀺 𑀲𑀻𑀮𑀁 𑀲𑀫𑀸𑀤𑀺𑀬𑀢𑀻𑀢𑀺𑀆𑀤𑀺𑀦𑀸 𑀪𑀯𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀸𑀏𑀯 𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸. 𑀢𑀸 𑀧𑀦 𑀤𑀸𑀦𑀸𑀤𑀻𑀦𑀁 𑀓𑀫𑁆𑀫𑀸𑀦𑀁 𑀅𑀦𑀼𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀫𑁆𑀫𑀧𑀘𑁆𑀘𑀬𑁄 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀲𑁂𑀦 𑀤𑁆𑀯𑀺𑀓𑀸𑀮𑀺𑀓𑁄. 𑀅𑀦𑀦𑁆𑀢𑀭 𑀲𑀫𑀦𑀦𑁆𑀢𑀭 𑀆𑀲𑁂𑀯𑀦 𑀦𑀢𑁆𑀣𑀺 𑀯𑀺𑀕𑀢 𑀧𑀘𑁆𑀘𑀬𑀸 𑀅𑀢𑀻𑀢𑀓𑀸𑀮𑀺𑀓𑀸. 𑀲𑁂𑀲𑀸 𑀧𑀦𑁆𑀦𑀭𑀲 𑀧𑀘𑁆𑀘𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑀸𑀢𑀺. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀼𑀓𑁂 𑀆𑀭𑀫𑁆𑀫𑀡𑀸 𑀥𑀺𑀧𑀢𑀺 𑀲𑀳𑀚𑀸𑀢 𑀅𑀜𑁆𑀜𑀫𑀜𑁆𑀜 𑀦𑀺𑀲𑁆𑀲𑀬 𑀉𑀧𑀦𑀺𑀲𑁆𑀲𑀬 𑀧𑀼𑀭𑁂𑀚𑀸𑀢 𑀆𑀳𑀸𑀭 𑀅𑀢𑁆𑀣𑀺 𑀅𑀯𑀺𑀕𑀢𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀲𑁂𑀲𑀸 𑀘𑀼𑀤𑁆𑀤𑀲 𑀧𑀘𑁆𑀘𑀬𑀸 𑀅𑀚𑁆𑀛𑀢𑁆𑀢𑀸𑀯. 𑀆𑀭𑀫𑁆𑀫𑀡 𑀅𑀥𑀺𑀧𑀢𑀺 𑀉𑀧𑀦𑀺𑀲𑁆𑀲𑀬𑀸 𑀲𑀗𑁆𑀔𑀢𑀸 𑀅𑀲𑀗𑁆𑀔𑀢𑀸𑀘 𑀳𑁄𑀦𑁆𑀢𑀺. 𑀲𑁂𑀲𑀸 𑀲𑀗𑁆𑀔𑀢𑀸𑀯𑀸𑀢𑀺. 𑀧𑀜𑁆𑀘𑀯𑀺𑀥𑀁𑀧𑀺𑀅𑀭𑀽𑀧𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸, 𑀓𑀤𑀸𑀘𑀺𑀧𑀺 𑀭𑀽𑀧𑀲𑀗𑁆𑀔𑀸𑀢𑀁 𑀲𑀡𑁆𑀞𑀸𑀦𑀢𑁆𑀣𑀁 𑀅𑀦𑀼𑀧𑀕𑀫𑀦𑀢𑁄 𑀦𑀸𑀫𑀦𑁆𑀢𑀺𑀘 𑀧𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸, 𑀅𑀥𑀺𑀯𑀘𑀦𑀲𑀗𑁆𑀔𑀸𑀢𑀦𑀸𑀫𑀸𑀪𑀺𑀥𑀸𑀦𑀯𑀲𑁂𑀦𑁂𑀯 𑀲𑀼𑀡𑀦𑁆𑀢𑁂𑀳𑀺 𑀕𑀳𑁂𑀢𑀩𑁆𑀩𑀪𑀸𑀯𑀼𑀧𑀕𑀫𑀦𑀢𑁄𑀢𑀺.

𑁧𑁬𑁯. 𑀧𑀜𑁆𑀜𑀧𑀻𑀬𑀢𑀻𑀢𑀺 𑀧𑀜𑁆𑀜𑀢𑁆𑀢𑀺. 𑀅𑀬𑀁𑀧𑀺 𑀏𑀓𑁄 𑀯𑀘𑀦𑀢𑁆𑀣𑁄𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁂𑀳𑀺 𑀣𑀧𑀻𑀬𑀢𑀺. 𑀯𑁄𑀳𑀭𑀻𑀬𑀢𑀺 𑀘𑁂𑀯 𑀲𑀫𑁆𑀧𑀝𑀺𑀘𑁆𑀙𑀻 𑀬𑀢𑀺𑀘𑀸𑀢𑀺 𑀅𑀢𑁆𑀣𑁄. 𑀬𑁄𑀓𑁄𑀘𑀺 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀽𑀢𑁄 𑀩𑁆𑀬𑀜𑁆𑀚𑀦𑀢𑁆𑀣𑁄. 𑀢𑀣𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑀸 𑀅𑀢𑁆𑀣𑀸 𑀧𑀜𑁆𑀜𑀧𑀻𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺. 𑀩𑁆𑀬𑀜𑁆𑀚𑀦𑀢𑁆𑀣𑀚𑁄𑀢𑀓𑁄 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑁄𑀢𑀺 𑀏𑀯𑀁 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀢𑀢𑁄𑀅𑀯𑀲𑁂𑀲𑀸.𑀮. 𑀤𑀼𑀯𑀺𑀥𑀸𑀳𑁄𑀢𑀻𑀢𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀻𑀬𑀢𑁆𑀢𑀸 𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣 𑀧𑀜𑁆𑀜𑀢𑁆𑀢𑀺𑀫𑀸𑀳. 𑀧𑀜𑁆𑀜𑀸𑀧𑀦𑀢𑁄𑀧𑀜𑁆𑀜𑀢𑁆𑀢𑀻𑀢𑀺 𑀲𑀤𑁆𑀤𑀧𑀜𑁆𑀜𑀢𑁆𑀢𑀺𑀁. 𑀢𑀁𑀢𑀁𑀪𑀽𑀢𑀯𑀺𑀧𑀭𑀺𑀡𑀸𑀫𑀸𑀓𑀸𑀭𑀦𑁆𑀢𑀺 𑀧𑀣𑀯𑀺𑀬𑀸𑀤𑀻𑀦𑀁 𑀢𑁂𑀲𑀁 𑀢𑁂𑀲𑀁 𑀫𑀳𑀸𑀪𑀽𑀢𑀸𑀦𑀁 𑀅𑀥𑀺𑀫𑀢𑁆𑀢𑀪𑀸𑀯𑀧𑁆𑀧𑀓𑀸𑀭𑀲𑀗𑁆𑀔𑀸𑀢𑀁 𑀢𑀣𑀸 𑀢𑀣𑀸 𑀧𑀭𑀺𑀡𑀸 𑀫𑀸𑀓𑀸𑀭𑀁. 𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀸𑀬𑀸𑀢𑀺 𑀧𑀝𑀺𑀘𑁆𑀘. 𑀦𑀺𑀲𑁆𑀲𑀸𑀬. 𑀧𑀣𑀫𑀁 𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀣𑀸 𑀧𑀜𑁆𑀜𑀢𑁆𑀢𑀸𑀢𑀺 𑀅𑀬𑀁 𑀧𑀣𑀯𑀻𑀦𑀸𑀫 𑀅𑀬𑀁 𑀧𑀩𑁆𑀩𑀢𑁄𑀦𑀸𑀫𑀸𑀢𑀺 𑀏𑀯𑀫𑀸𑀤𑀺 𑀦𑀬𑁂𑀦 𑀫𑀳𑀸𑀚𑀦𑁂𑀦 𑀧𑀜𑁆𑀜𑀢𑁆𑀢𑀸, 𑀓𑀣𑀺𑀢𑀸, 𑀯𑁄𑀳𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀣𑀯𑀺𑀧𑀩𑁆𑀩𑀢𑀸𑀤𑀺𑀓𑀸𑀢𑀺𑀆𑀤𑀺𑀲𑀤𑁆𑀤𑁂𑀦 𑀦𑀤𑀺 𑀲𑀫𑀼𑀤𑁆𑀤𑀸𑀤𑀺𑀓𑀸𑀬𑁄 𑀲𑀗𑁆𑀕𑀡𑁆𑀳𑀢𑀺. 𑀅𑀬𑀁 𑀲𑀫𑀽𑀳𑀧𑀜𑁆𑀜𑀢𑁆𑀢𑀺𑀦𑀸𑀫.

[𑁨𑁪𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀻𑀢𑀺’’ 𑀯𑀼𑀢𑁆𑀢𑀸. 𑀲𑀸 𑀬𑀼𑀢𑁆𑀢𑀸 𑀯𑀺𑀬 𑀦𑀤𑀺𑀲𑁆𑀲𑀢𑀺.

𑀦𑀳𑀺 𑀇𑀥 𑀲𑀡𑁆𑀞𑀸𑀦𑀁 𑀧𑀥𑀸𑀦𑀁 𑀳𑁄𑀢𑀻𑀢𑀺. 𑀲𑀫𑁆𑀪𑀸𑀭𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀦𑁆𑀢𑀺 𑀓𑀝𑁆𑀞𑀸𑀤𑀻𑀦𑀁 𑀲𑀫𑁆𑀪𑀸𑀭𑀸𑀦𑀁 𑀢𑀣𑀸 𑀢𑀣𑀸 𑀲𑀦𑁆𑀦𑀺𑀯𑁂𑀲𑀸𑀓𑀸𑀭𑀁. 𑀏𑀢𑁆𑀣𑀸𑀧𑀺 𑀆𑀤𑀺𑀲𑀤𑁆𑀤𑁂𑀦 𑀦𑀸𑀯𑀸𑀤𑀬𑁄 𑀲𑀗𑁆𑀕𑀡𑁆𑀳𑀢𑀺. 𑀅𑀬𑀁 𑀲𑀡𑁆𑀞𑀸𑀦 𑀧𑀜𑁆𑀜𑀢𑁆𑀢𑀺. 𑀓𑀝𑁆𑀞𑀸𑀤𑀬𑁄 𑀏𑀯 𑀳𑀺 𑀕𑁂𑀳𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀸 𑀕𑁂𑀳𑀦𑁆𑀢𑀺 𑀭𑀣𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀸 𑀭𑀣𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

[𑁨𑁪𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀲𑀫𑀽𑀳𑀧𑀜𑁆𑀜𑀢𑁆𑀢𑀻𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦𑀳𑀺 𑀇𑀥 𑀲𑀫𑀽𑀳𑁄 𑀧𑀥𑀸𑀦𑀦𑁆𑀢𑀺. 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀤𑀺𑀓𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀘𑀦𑁆𑀤𑀸𑀯𑀝𑁆𑀝𑀦𑀸𑀤𑀺𑀓𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀦𑀁 𑀲𑀺𑀦𑁂𑀭𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀯𑀝𑁆𑀝𑀦𑀸𑀤𑀺𑀓𑀁. 𑀬𑀢𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀤𑁂𑀦𑁆𑀢𑀺, 𑀲𑀸 𑀧𑀼𑀩𑁆𑀩𑀤𑀺𑀲𑀸𑀦𑀸𑀫. 𑀧𑀼𑀩𑁆𑀩𑀢𑀭𑀁 𑀮𑀤𑁆𑀥𑀧𑁆𑀧𑀓𑀸𑀲𑀢𑁆𑀢𑀸. 𑀬𑀢𑁆𑀣 𑀧𑀦 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺, 𑀲𑀸 𑀧𑀘𑁆𑀙𑀺𑀫𑀤𑀺𑀲𑀸𑀦𑀸𑀫. 𑀧𑀘𑁆𑀙𑀸𑀮𑀤𑁆𑀥𑀧𑀓𑀸𑀲𑀢𑁆𑀢𑀸. 𑀢𑀸𑀲𑀁 𑀤𑀓𑁆𑀔𑀺𑀡𑀧𑀲𑁆𑀲𑀸 𑀤𑀺𑀲𑀸 𑀯𑀼𑀟𑁆𑀠𑀺𑀅𑀢𑁆𑀣𑁂𑀦 𑀤𑀓𑁆𑀔𑀺𑀡𑀤𑀺𑀲𑀸𑀦𑀸𑀫. 𑀇𑀢𑀭𑀸 𑀧𑀦 𑀉𑀘𑁆𑀘𑀢𑀭𑀝𑁆𑀞𑁂𑀦 𑀉𑀢𑁆𑀢𑀭𑀸𑀤𑀺𑀲𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸 𑀲𑀽𑀭𑀺𑀬𑁄 𑀉𑀤𑁂𑀢𑀺, 𑀢𑀤𑀸 𑀲𑀓𑀮𑀲𑁆𑀲 𑀅𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀧𑀼𑀩𑁆𑀩𑀦𑁆𑀳𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀫𑀸𑀤𑀺𑀓𑀸 𑀤𑀺𑀲𑀸 𑀧𑀜𑁆𑀜𑀢𑁆𑀢𑀺 𑀓𑀸𑀮𑀧𑀜𑁆𑀜𑀢𑁆𑀢𑀺𑀬𑁄𑀦𑀸𑀫. 𑀆𑀤𑀺𑀲𑀤𑁆𑀤𑁂𑀦 𑀣𑀮𑀦𑀺𑀦𑁆𑀦𑀸𑀤𑀺𑀓𑀸 𑀤𑁂𑀲𑀧𑀜𑁆𑀜𑀢𑁆𑀢𑀺 𑀲𑀗𑁆𑀕𑀳𑀺𑀢𑀸𑀢𑀺. 𑀅𑀲𑀫𑁆𑀨𑀼𑀝𑁆𑀞𑀸𑀓𑀸𑀭𑀦𑁆𑀢𑀺 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀨𑀼𑀲𑀦𑀸𑀓𑀸𑀭𑀁. 𑀅𑀬𑀁 𑀆𑀓𑀸𑀲𑀧𑀜𑁆𑀜𑀢𑁆𑀢𑀺𑀦𑀸𑀫. 𑀢𑀁 𑀢𑀁 𑀪𑀽𑀢𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀓𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀓𑀜𑁆𑀘 𑀪𑀽𑀢𑀦𑀺𑀫𑀺𑀢𑁆𑀢𑀁. 𑀦𑀻𑀮𑀓𑀲𑀺𑀡𑀸𑀤𑀺𑀓𑀁 𑀯𑀡𑁆𑀡𑀦𑀺𑀫𑀺𑀢𑁆𑀢𑀜𑁆𑀘 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀪𑀸𑀯𑀦𑀸 𑀯𑀺𑀲𑁂𑀲𑀦𑁆𑀢𑀺 𑀧𑀭𑀺𑀓𑀫𑁆𑀫𑀸𑀤𑀺𑀓𑀁 𑀪𑀸𑀯𑀦𑀸𑀯𑀺𑀲𑁂𑀲𑀁𑀘. 𑀏𑀢𑁂𑀦 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢 𑀉𑀕𑁆𑀕𑀳𑀦𑀺𑀫𑀺𑀢𑁆𑀢 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀲𑀺𑀤𑁆𑀥𑀓𑀸𑀭𑀡𑀁 𑀯𑀤𑀢𑀺. 𑀅𑀬𑀁 𑀦𑀺𑀫𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀦𑀸𑀫.

𑀏𑀯𑀫𑀸𑀤𑀺𑀪𑁂𑀤𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀧𑀻𑀢𑀺 𑀏𑀢𑁂𑀦 𑀲𑀫𑁆𑀫𑀼𑀢𑀺𑀢𑁄 𑀮𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀳𑀺 𑀢𑀸𑀲𑀁 𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑀣𑀸 𑀢𑀣𑀸 𑀯𑁄𑀳𑀭𑀦𑁆𑀢𑀸𑀦𑀁 𑀫𑀼𑀲𑀸𑀯𑀸𑀤𑁄𑀦𑀸𑀫 𑀦𑀳𑁄𑀢𑀻𑀢𑀺. 𑀅𑀢𑁆𑀣𑀘𑁆𑀙𑀸𑀬𑀸𑀓𑀸𑀭𑁂𑀦𑀸𑀢𑀺 𑀢𑀁 𑀢𑀁 𑀪𑀽𑀢𑀸𑀤𑀻𑀦𑀁 𑀧𑀭𑀫𑀢𑁆𑀣𑀸𑀦𑀁 𑀲𑀫𑀽𑀳𑀲𑀡𑁆𑀞𑀸𑀦𑀸𑀤𑀺𑀙𑀸𑀬𑀸𑀓𑀸𑀭𑁂𑀦. 𑀅𑀢𑁆𑀣𑀘𑁆𑀙𑀸 𑀬𑀸𑀓𑀸𑀭𑁂𑀦𑀸𑀢𑀺𑀯𑀸 𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀤𑀩𑁆𑀩𑀧𑀝𑀺𑀩𑀺𑀫𑁆𑀩𑀸𑀓𑀸𑀭𑁂𑀦 𑀲𑀯𑀺𑀕𑁆𑀕𑀳𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄, 𑀢𑀁𑀢𑀁𑀉𑀧𑀸𑀤𑀸𑀬𑀸𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀢𑀁𑀢𑀁𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀉𑀧𑀸𑀤𑀸𑀬. 𑀉𑀧𑀦𑀺𑀥𑀸𑀬𑀸𑀢𑀺 𑀑𑀮𑀼𑀫𑁆𑀩𑀺𑀬. 𑀧𑀭𑀺𑀓𑀧𑁆𑀧𑀺𑀬𑀫𑀸𑀦𑀸𑀢𑀺 𑀧𑀭𑀺𑀓𑀧𑁆𑀧𑀩𑀼𑀤𑁆𑀥𑀺𑀬𑀸 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀕𑀬𑁆𑀳𑀫𑀸𑀦𑀸. 𑀏𑀢𑁆𑀣 𑀧𑀦 𑀏𑀯𑀫𑀸𑀤𑀺𑀧𑀪𑁂𑀤𑀸 𑀆𑀮𑀫𑁆𑀩𑀡𑀪𑀽𑀢𑀸 𑀧𑀭𑀺𑀓𑀧𑁆𑀧𑀺𑀬𑀫𑀸𑀦𑀸 𑀲𑀩𑁆𑀩𑀸 𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀅𑀢𑁆𑀣𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀔𑀸𑀬𑀢𑀻𑀢𑀺 𑀕𑀡𑀻𑀬𑀢𑀺. 𑀕𑀡𑀦𑀼𑀧𑀕𑀁 𑀓𑀢𑁆𑀯𑀸 𑀣𑀧𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀫𑀦𑁆𑀦𑀻𑀬𑀢𑀺. 𑀦𑀸𑀫𑀁, 𑀦𑀸𑀫𑀓𑀫𑁆𑀫𑀁, 𑀦𑀸𑀫𑀥𑁂𑀬𑁆𑀬𑀁, 𑀦𑀺𑀭𑀼𑀢𑁆𑀢𑀺, 𑀩𑁆𑀬𑀜𑁆𑀚𑀦𑀁, 𑀅𑀪𑀺𑀮𑀸𑀧𑁄𑀢𑀺 𑀇𑀫𑁂 𑀙 𑀦𑀸𑀫 𑀦𑀸𑀫𑀓𑀫𑁆𑀫𑀸. 𑀢𑀢𑁆𑀣 𑀅𑀢𑁆𑀣𑁂 𑀦𑀫𑀢𑀻𑀢𑀺 𑀦𑀸𑀫𑀁. 𑀅𑀢𑁆𑀣𑀯𑀺𑀲𑀬𑀁 𑀏𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀺𑀘 𑀅𑀢𑁆𑀣𑀁 𑀦𑀸𑀫𑁂𑀢𑀻𑀢𑀺 𑀦𑀸𑀫𑀁. 𑀧𑀺𑀝𑀓𑀢𑁆𑀢𑀬𑀲𑀗𑁆𑀔𑀸𑀢𑁂 𑀳𑀺 𑀦𑀸𑀫𑁂 𑀲𑀢𑀺 𑀢𑀤𑀼𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀲𑀩𑁆𑀩𑁂 𑀢𑀤𑀢𑁆𑀣𑀸 𑀧𑀤𑁂𑀧𑀤𑁂 𑀯𑀸𑀓𑁆𑀬𑁂𑀯𑀸𑀓𑁆𑀬𑁂 𑀆𑀕𑀘𑁆𑀙𑀦𑁆𑀢𑀺 𑀬𑁂𑀯𑀸𑀢𑀺.

𑀅𑀧𑀺𑀘 𑀲𑀼𑀡𑀦𑁆𑀢𑀸𑀦𑀁 𑀜𑀸𑀡𑀁 𑀢𑀁𑀢𑀁𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀸𑀫𑁂𑀢𑀻𑀢𑀺 𑀦𑀸𑀫𑀁 𑀦𑀸𑀫𑀕𑀳𑀡𑀯𑀲𑁂𑀦 𑀓𑀢𑁆𑀢𑀩𑁆𑀩𑀢𑁆𑀢𑀸 𑀦𑀸𑀫𑀫𑁂𑀯 𑀓𑀫𑁆𑀫𑀦𑁆𑀢𑀺 𑀦𑀸𑀫𑀓𑀫𑁆𑀫𑀁. 𑀥𑀻𑀬𑀢𑀺 𑀥𑀸𑀭𑀻𑀬𑀢𑀻𑀢𑀺 𑀥𑁂𑀬𑁆𑀬𑀁. 𑀦𑀸𑀫𑀫𑁂𑀯 𑀥𑁂𑀬𑁆𑀬𑀦𑁆𑀢𑀺 𑀦𑀸𑀫𑀥𑁂𑀬𑁆𑀬𑀁. 𑀅𑀯𑀺𑀤𑀺𑀢𑀧𑀓𑁆𑀔𑁂 𑀞𑀺𑀢𑁄 𑀅𑀢𑁆𑀣𑁄 𑀏𑀢𑀸𑀬 𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀻𑀢𑀺 𑀦𑀺𑀭𑀼𑀢𑁆𑀢𑀺. 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀧𑀸𑀓𑀝𑀓𑀭𑀡𑀢𑁄 𑀩𑁆𑀬𑀜𑁆𑀚𑀦𑀁. 𑀅𑀪𑀺𑀩𑁆𑀬𑀢𑁆𑀢𑀁 𑀓𑀢𑁆𑀯𑀸 𑀮𑀧𑀻𑀬𑀢𑀺 𑀓𑀣𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀅𑀪𑀺𑀮𑀸𑀧𑁄. 𑀏𑀢𑁆𑀣𑀘 𑀯𑀡𑁆𑀡𑀧𑀜𑁆𑀜𑀢𑁆𑀢𑀺, 𑀅𑀓𑁆𑀔𑀭𑀧𑀜𑁆𑀜𑀢𑁆𑀢𑀺, 𑀲𑀭𑀧𑀜𑁆𑀜𑀢𑁆𑀢𑀺, 𑀤𑀻𑀖𑀧𑀜𑁆𑀜𑀢𑁆𑀢𑀺, 𑀭𑀲𑁆𑀲 𑀧𑀜𑁆𑀜𑀢𑁆𑀢𑀺. 𑀩𑁆𑀬𑀜𑁆𑀚𑀦𑀯𑀕𑁆𑀕𑀖𑁄𑀲𑀸𑀖𑁄𑀲𑀧𑀜𑁆𑀜𑀢𑁆𑀢𑀺, 𑀮𑀺𑀗𑁆𑀕𑀧𑀜𑁆𑀜𑀢𑁆𑀢𑀺. 𑀧𑀤𑀧𑀜𑁆𑀜𑀢𑁆𑀢𑀺, 𑀯𑀸𑀓𑁆𑀬𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀏𑀢𑀲𑁆𑀲𑁂𑀯 𑀧𑀪𑁂𑀤𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀣𑁂𑀲𑀼 𑀧𑀯𑀢𑁆𑀢𑀸 𑀧𑀜𑁆𑀜𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀅𑀯𑀺𑀚𑁆𑀚 𑀫𑀸𑀦𑁂𑀲𑀼 𑀪𑀽𑀫𑀺𑀧𑀩𑁆𑀩𑀢𑀸𑀤𑀻𑀲𑀼 𑀧𑀯𑀢𑁆𑀢𑀸 𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀏𑀢𑀸 𑀏𑀯 𑀲𑀫𑀸𑀲𑀝𑁆𑀞𑀸𑀦𑀁 𑀧𑀢𑁆𑀯𑀸 𑀤𑁆𑀯𑀺𑀧𑀤𑀲𑀁𑀬𑁄𑀕𑀯𑀲𑁂𑀦 𑀇𑀢𑀭𑀸 𑀘𑀢𑀲𑁆𑀲𑁄𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑀸𑀬 𑀧𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀏𑀢𑁂𑀦 𑀯𑀺𑀚𑁆𑀚𑀫𑀸𑀦𑀁 𑀅𑀢𑁆𑀣𑀁 𑀧𑀜𑁆𑀜𑀧𑁂𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀯𑀤𑀢𑀺. 𑀏𑀲𑀦𑀬𑁄 𑀧𑀭𑀢𑁆𑀣𑀧𑀺. 𑀙 𑀅𑀪𑀺𑀜𑁆𑀜𑀸 𑀅𑀲𑁆𑀲𑀸𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀓𑀢𑁆𑀯𑀸 𑀯𑀺𑀲𑁂𑀲𑀦𑀪𑀽𑀢𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀺𑀲𑁂𑀲𑀺𑀢𑀩𑁆𑀩𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀙𑀴 𑀪𑀺𑀜𑁆𑀜𑁄𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀇𑀢𑁆𑀣𑀻 𑀅𑀯𑀺𑀚𑁆𑀚𑀫𑀸𑀦𑀸 𑀲𑀤𑁆𑀤𑁄 𑀯𑀺𑀚𑁆𑀚𑀫𑀸𑀦𑁄𑀢𑀺 𑀇𑀢𑁆𑀣𑀺𑀬𑀸𑀲𑀤𑁆𑀤𑁄 𑀇𑀢𑁆𑀣𑀺𑀲𑀤𑁆𑀤𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦 𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀘𑀓𑁆𑀔𑀼𑀘 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀘 𑀉𑀪𑀬𑀁𑀧𑀺 𑀯𑀺𑀚𑁆𑀚𑀸𑀫𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑁂𑀦𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀭𑀸𑀚𑀸𑀘 𑀧𑀼𑀢𑁆𑀢𑁄𑀘 𑀤𑁆𑀯𑁂𑀧𑀺 𑀅𑀯𑀺𑀚𑁆𑀚𑀫𑀸𑀦𑀸𑀏𑀯𑀸𑀢𑀺 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀦𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀉𑀪𑀺𑀦𑁆𑀦𑀦𑁆𑀢𑀺𑀆𑀤𑀺𑀫𑀸𑀳.

𑀏𑀢𑁆𑀣 𑀧𑀦 𑀯𑀘𑀦𑀢𑁄 𑀘 𑀯𑀘𑀦𑀢𑁆𑀣𑀢𑁄𑀘 𑀯𑀺𑀦𑀺𑀫𑀼𑀢𑁆𑀢𑀸 𑀲𑀤𑁆𑀤𑀲𑀪𑀸𑀯𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀦𑀸𑀫 𑀯𑀺𑀲𑀼𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺. 𑀅𑀢𑁆𑀣𑀚𑁄𑀢𑀓 𑀪𑀸𑀯𑁂𑀦 𑀯𑀺𑀲𑀼𑀁 𑀲𑀺𑀤𑁆𑀥𑀢𑁆𑀢𑀸. 𑀲𑀤𑁆𑀤𑁄 𑀳𑀺 𑀦𑀸𑀫 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀪𑀸𑀯𑀁 𑀉𑀧𑀕𑀢𑁄𑀬𑁂𑀯 𑀅𑀢𑁆𑀣𑀚𑁄𑀢𑀦𑁂 𑀲𑀫𑀢𑁆𑀣𑁄 𑀳𑁄𑀢𑀺. 𑀧𑀭𑀫𑀢𑁆𑀣 𑀲𑀤𑁆𑀤𑁄𑀘 𑀔𑀡𑀺𑀓𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀽𑀢𑁄 𑀢𑀩𑁆𑀪𑀸𑀯𑀁 𑀉𑀧𑀕𑀢𑁄 𑀦𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀲𑀤𑁆𑀤𑀲𑀪𑀸𑀯𑀸𑀦𑀸𑀫 𑀧𑀜𑁆𑀜𑀢𑁆𑀢𑀺𑀦𑀸𑀫 𑀯𑀺𑀲𑀼𑀁 𑀅𑀢𑁆𑀣𑀺𑀬𑁂𑀯. 𑀅𑀢𑁆𑀣𑀺𑀪𑀸𑀯𑁄𑀘𑀲𑁆𑀲𑀸 𑀯𑀘𑀦𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀦𑀦𑁆𑀢𑀭𑁂 𑀅𑀓𑁆𑀔𑀭 𑀧𑀤 𑀩𑁆𑀬𑀜𑁆𑀚𑀦𑀕𑁄𑀘𑀭𑀘𑀺𑀢𑁆𑀢𑀲𑁆𑀲 𑀢𑀤𑀦𑀦𑁆𑀢𑀭𑁂𑀘 𑀢𑀤𑀢𑁆𑀣𑀯𑀺𑀚𑀸𑀦𑀦𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀧𑀸𑀓𑀝𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀕𑀸𑀣𑀸𑀤𑁆𑀯𑀬𑀁 𑀆𑀳. 𑀢𑀢𑁆𑀣 𑀯𑀘𑀻𑀖𑁄𑀲𑀸 𑀦𑀼𑀲𑀸𑀭𑁂𑀦𑀸𑀢𑀺 𑀉𑀘𑁆𑀘𑀸𑀭𑀺𑀬𑀫𑀸𑀦𑀲𑀤𑁆𑀤𑀲𑀗𑁆𑀔𑀸𑀢𑀲𑁆𑀲 𑀯𑀘𑀻𑀖𑁄𑀲𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀲𑀸𑀭𑁂𑀦 𑀉𑀧𑁆𑀧𑀦𑁆𑀦𑀸𑀬 𑀲𑁄𑀢𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑁆𑀲 𑀕𑁄𑀘𑀭 𑀪𑀽𑀢𑀸 𑀲𑀸𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀻𑀤𑀺𑀲𑀻 𑀧𑀦 𑀲𑀸𑀬𑀁 𑀧𑀜𑁆𑀜𑀢𑁆𑀢𑀻𑀢𑀺 𑀆𑀳 𑀅𑀢𑁆𑀣𑀸𑀬𑀲𑁆𑀲𑀸.𑀮. 𑀢𑀢𑁄𑀧𑀭𑀦𑁆𑀢𑀺. 𑀢𑀢𑁆𑀣 𑀢𑀢𑁄𑀧𑀭𑀦𑁆𑀢𑀺 𑀢𑀢𑁄 𑀦𑀸𑀫𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀧𑀭𑀁 𑀅𑀢𑁆𑀣𑀸 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀲𑀸𑀭𑁂𑀦 𑀧𑀭𑀫𑀢𑁆𑀣𑀧𑀜𑁆𑀜𑀢𑁆𑀢𑀺𑀪𑀽𑀢𑀸 𑀅𑀢𑁆𑀣𑀸 𑀯𑀺𑀜𑁆𑀜𑀸𑀬𑀦𑁆𑀢𑀺. 𑀲𑀸 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀮𑁄𑀓𑀲𑀗𑁆𑀓𑁂𑀢𑀦𑀺𑀫𑁆𑀫𑀺𑀢𑀸𑀢𑀺 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀏𑀢𑁆𑀣𑀘 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀏𑀢𑁆𑀣 𑀅𑀢𑀻𑀢𑀲𑀤𑁆𑀤𑀫𑀢𑁆𑀢𑀸 𑀭𑀫𑁆𑀫𑀡𑀸 𑀢𑀤𑀦𑀼𑀯𑀢𑁆𑀢𑀺𑀓𑀸𑀦𑀸𑀫 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁-𑀢𑁂𑀦 𑀯𑀼𑀢𑁆𑀢𑀯𑀘𑀦𑁂 𑀬𑀢𑁆𑀢𑀓𑀸𑀦𑀺 𑀅𑀓𑁆𑀔𑀭𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀏𑀓𑀫𑁂𑀓𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀢𑀻𑀢𑀜𑁆𑀘 𑀕𑀳𑁂𑀢𑁆𑀯𑀸 𑀲𑁄𑀢 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀅𑀯𑀲𑀸𑀦𑁂 𑀢𑀸𑀦𑀺 𑀅𑀓𑁆𑀔𑀭𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀓𑁆𑀔𑀭𑀲𑀫𑀽𑀳𑀁 𑀕𑀳𑁂𑀢𑁆𑀯𑀸 𑀏𑀓𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀤𑀦𑀦𑁆𑀢𑀭𑀁 𑀅𑀬𑀁 𑀅𑀓𑁆𑀔𑀭𑀲𑀫𑀽𑀳𑁄 𑀏𑀢𑀲𑁆𑀲 𑀦𑀸𑀫𑀦𑁆𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀕𑀳𑀡𑀯𑀲𑁂𑀦 𑀅𑀧𑀭𑀸𑀬 𑀫𑀦𑁄𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸𑀬 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀸𑀬 𑀫𑀦𑁄𑀯𑀺𑀜𑁆𑀜𑀸𑀡 𑀯𑀻𑀣𑀺𑀬𑀸 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀧𑀓𑀢𑀺𑀬𑀸 𑀢𑀤𑀢𑁆𑀣𑀯𑀺𑀚𑀸𑀦𑀦𑀁 𑀲𑀫𑁆𑀪𑀯𑀢𑀻𑀢𑀺. 𑀫𑀡𑀺𑀲𑀸𑀭𑀫𑀜𑁆𑀚𑀽𑀲𑀸𑀬𑀁 𑀧𑀦 𑀢𑀤𑀦𑀼𑀯𑀢𑁆𑀢𑀺𑀓𑀯𑀻𑀣𑀺𑀢𑁄 𑀧𑀭𑀁 𑀏𑀓𑀁 𑀯𑀺𑀦𑀺𑀘𑁆𑀙𑀬𑀯𑀻𑀣𑀺𑀁 𑀯𑀺𑀜𑁆𑀜𑀢𑁆𑀢𑀺𑀕𑀳𑀡𑀯𑀻𑀣𑀺𑀜𑁆𑀘 𑀯𑀤𑀢𑀺. 𑀢𑀢𑁄 𑀧𑀭𑀁 𑀏𑀓𑀓𑁆𑀔𑀭𑁂 𑀲𑀤𑁆𑀤𑁂 𑀏𑀓𑀢𑁆𑀣𑀚𑁄𑀢𑀺𑀓𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑀡𑀁 𑀳𑁄𑀢𑀺. 𑀬𑀸 𑀯𑀤𑀦𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑁄 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑁄𑀦𑀸𑀫 𑀯𑀼𑀘𑁆𑀘𑀢𑀺. 𑀢𑀢𑁄𑀧𑀭𑀁 𑀢𑀤𑀢𑁆𑀣𑀕𑀳𑀡𑀦𑁆𑀢𑀺. 𑀈𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀚𑀯𑀦𑀯𑀻𑀣𑀺𑀯𑀸𑀭𑀸𑀦𑀁 𑀧𑀝𑀺𑀧𑀸𑀝𑀺𑀓𑀣𑀦𑀁𑀦𑀸𑀫 𑀧𑀥𑀸𑀦𑀧𑀸𑀓𑀝𑀕𑀳𑀡𑀯𑀲𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀘𑁆𑀙𑀭𑀓𑁆𑀔𑀡𑁂 𑀅𑀦𑁂𑀓 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑁋

𑀏𑀓𑀫𑀢𑁆𑀢𑁄 𑀪𑀯𑁂 𑀭𑀲𑁆𑀲𑁄, 𑀤𑁆𑀯𑀺𑀫𑀢𑁆𑀢𑁄 𑀤𑀻𑀖𑀫𑀼𑀘𑁆𑀘𑀢𑁂;

𑀢𑀺𑀫𑀢𑁆𑀢𑁄𑀢𑀼𑀧𑁆𑀮𑀼𑀢𑁄 𑀜𑁂𑀬𑁆𑀬𑁄, 𑀩𑁆𑀬𑀜𑁆𑀚𑀦𑀁 𑀅𑀤𑁆𑀥𑀫𑀢𑁆𑀢𑀺𑀓𑀦𑁆𑀢𑀺𑀘𑀁.

𑀦 𑀘 𑀧𑀭𑀫𑀢𑁆𑀣𑀲𑀤𑁆𑀤𑀲𑀗𑁆𑀖𑀸𑀝𑀸𑀦𑀁 𑀲𑀢𑀲𑀳𑀲𑁆𑀲𑀁𑀧𑀺 𑀏𑀓𑀓𑁆𑀔𑀭𑀁𑀦𑀸𑀫 𑀪𑀯𑀺𑀢𑀼𑀁 𑀧𑀳𑁄𑀢𑀺. 𑀢𑀲𑁆𑀫𑀸 𑀇𑀥 𑀩𑀳𑀼𑀁 𑀯𑀺𑀘𑀸𑀭𑀡𑀸 𑀅𑀫𑁆𑀳𑁂𑀳𑀺 𑀦𑀓𑀢𑀸𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀅𑀝𑁆𑀞𑀫𑀲𑁆𑀲 𑀧𑀘𑁆𑀘𑀬𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.