𑀓𑀫𑁆𑀫𑀝𑁆𑀞𑀸𑀦 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁭𑁦. 𑀏𑀯𑀁 𑀅𑀝𑁆𑀞𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀲𑀧𑀘𑁆𑀘𑀬𑀧𑀪𑁂𑀤𑀁 𑀦𑀸𑀫𑀭𑀽𑀧 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀤𑀺𑀢𑀦𑀸𑀫𑀭𑀽𑀧 𑀯𑀺𑀪𑀸𑀕𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀯𑀺𑀥𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀺𑀆𑀤𑀺 𑀫𑀸𑀳. 𑀇𑀢𑁄 𑀧𑀘𑁆𑀘𑀬 𑀲𑀗𑁆𑀕𑀳𑀢𑁄 𑀧𑀭𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸𑀦𑀁 𑀤𑀼𑀯𑀺𑀥𑀁𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀬𑀣𑀸𑀓𑁆𑀓𑀫𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀓𑀺𑀮𑁂𑀲𑁂 𑀅𑀜𑁆𑀜𑁂𑀧𑀺𑀯𑀸 𑀯𑀺𑀢𑀓𑁆𑀓𑀸𑀤𑀬𑁄 𑀑𑀴𑀸𑀭𑀺𑀓𑀥𑀫𑁆𑀫𑁂 𑀲𑀫𑁂𑀢𑀻𑀢𑀺 𑀲𑀫𑀣𑁄. 𑀢𑀣𑀸 𑀧𑀯𑀢𑁆𑀢𑁄 𑀏𑀓𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀲𑀫𑀸𑀥𑀺. 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀪𑀸𑀯𑀦𑀸𑀧𑀜𑁆𑀜𑀸. 𑀢𑀸𑀬 𑀳𑀺 𑀬𑁄𑀕𑀺𑀦𑁄 𑀔𑀦𑁆𑀥𑁂𑀲𑀼 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀧𑀲𑁆𑀲𑀺𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀓𑀁 𑀦𑀺𑀘𑁆𑀘𑀲𑀼𑀔𑀸𑀤𑀺𑀓𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀓𑀫𑁂𑀯 𑀧𑀲𑁆𑀲𑀦𑁆𑀢𑀻𑀢𑀺. 𑀪𑀸𑀯𑁂𑀢𑀩𑁆𑀩𑀸𑀢𑀺 𑀪𑀸𑀯𑀦𑀸. 𑀪𑀸𑀯𑁂𑀦𑁆𑀢𑀺𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀏𑀢𑀸𑀳𑀻𑀢𑀺 𑀪𑀸𑀯𑀦𑀸. 𑀓𑀺𑀭𑀺𑀬𑀸 𑀓𑀫𑁆𑀫𑀁. 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁. 𑀓𑀫𑁆𑀫𑀲𑁆𑀲 𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁. 𑀯𑀻𑀭𑀺𑀬𑀸𑀭𑀩𑁆𑀪𑀲𑀗𑁆𑀔𑀸𑀢𑀲𑁆𑀲 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀲𑀺𑀡𑀫𑀡𑁆𑀟𑀮𑀸𑀤𑀺𑀓𑀁 𑀓𑀲𑀺𑀡𑀪𑀸𑀯𑀦𑀸𑀤𑀺𑀓𑀜𑁆𑀘. 𑀆𑀤𑀺𑀫𑀚𑁆𑀛 𑀧𑀭𑀺𑀬𑁄𑀲𑀸𑀦𑀸𑀦𑀜𑁆𑀳𑀺 𑀲𑀫𑀼𑀤𑀸𑀬𑀪𑀽𑀓𑀁 𑀏𑀓𑀫𑁂𑀢𑀁 𑀧𑀣𑀯𑀻𑀓𑀲𑀺𑀡 𑀪𑀸𑀯𑀦𑀸𑀤𑀺𑀓𑀁 𑀪𑀸𑀯𑀦𑀸𑀓𑀫𑁆𑀫𑀁𑀧𑀺 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀲𑁆𑀲 𑀬𑁄𑀕 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀲𑀫𑁆𑀪𑀯𑀢𑀻𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀉𑀢𑁆𑀢𑀭𑀼𑀢𑁆𑀢𑀭 𑀬𑁄𑀕𑀓𑀫𑁆𑀫𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑀁 𑀪𑀸𑀯𑀦𑀸𑀯𑀺𑀥𑀺𑀜𑁆𑀘𑀸𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀬𑀼𑀚𑁆𑀚𑀢𑀺𑀬𑁂𑀯.

𑀬𑁄𑀕𑀓𑀫𑁆𑀫𑀫𑁂𑀯𑀯𑀸 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀼𑀯𑀺𑀥𑁂𑀧𑀺 𑀓𑀫𑁆𑀫𑀝𑁆𑀞𑀸𑀦𑁂. 𑀲𑀫𑀣𑀲𑀗𑁆𑀕𑀳𑁂𑀢𑀺 𑀲𑀫𑀣 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑁂. 𑀤𑀲𑀓𑀲𑀺𑀡𑀸𑀦𑀻𑀢𑀺 𑀤𑀲𑀓𑀲𑀺𑀡𑀫𑀡𑁆𑀟𑀮𑀸𑀦𑀺 𑀓𑀲𑀺𑀡𑀚𑁆𑀛𑀸𑀦𑀸𑀦𑀺𑀘. 𑀢𑀤𑀼𑀪𑀬𑀸𑀦𑀺𑀧𑀺 𑀳𑀺 𑀬𑁄𑀕𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑀲𑁆𑀲 𑀲𑀫𑀣 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀤𑀲𑀅𑀲𑀼𑀪𑀸𑀢𑀺 𑀤𑀲𑀅𑀲𑀼𑀪𑀯𑀢𑁆𑀣𑀽𑀦𑀺 𑀅𑀲𑀼𑀪𑀚𑁆𑀛𑀸𑀦𑀸𑀦𑀺𑀘. 𑀤𑀲𑀅𑀦𑀼𑀲𑁆𑀲𑀢𑀺 𑀬𑁄𑀢𑀺 𑀩𑀼𑀤𑁆𑀥𑀕𑀼𑀡𑀸𑀤𑀻𑀦𑀺 𑀤𑀲𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺 𑀅𑀦𑀼𑀲𑁆𑀲𑀭𑀡𑀲𑀢𑀺 𑀬𑁄𑀘. 𑀲𑁂𑀲𑀸𑀦𑀺𑀧𑀺 𑀬𑀣𑀸𑀦𑀼𑀭𑀽𑀧𑀁 𑀯𑀢𑁆𑀢𑀩𑁆𑀩𑀸𑀦𑀻𑀢𑀺. 𑀘𑀭𑀡𑀁 𑀘𑀭𑀺𑀬𑀸. 𑀲𑀫𑀼𑀤𑀸𑀘𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀩𑀳𑀼𑀮𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀕𑀲𑁆𑀲 𑀘𑀭𑀺𑀬𑀸 𑀭𑀸𑀕𑀘𑀭𑀺𑀬𑀸. 𑀭𑀸𑀕𑀘𑀭𑀺𑀢𑀸𑀢𑀺 𑀧𑀸𑀞𑁄, 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺, 𑀧𑀼𑀕𑁆𑀕𑀮𑀝𑁆𑀞𑀸𑀦𑁂𑀏𑀯 𑀲𑁄 𑀬𑀼𑀢𑁆𑀢𑁄𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺.

[𑁨𑁪𑁩] 𑀬𑁄 𑀧𑀦 𑀯𑀺𑀪𑀸𑀯𑀦𑀺𑀬𑀁

𑀘𑀭𑀺𑀬𑀸𑀦𑀁 𑀲𑀁𑀲𑀕𑁆𑀕𑀪𑁂𑀤𑁄 𑀯𑀼𑀢𑁆𑀢𑁄. 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄.

𑀦𑀳𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀁𑀦𑀸𑀫 𑀲𑀁𑀲𑀕𑁆𑀕𑀘𑀭𑀺𑀢𑀲𑁆𑀲𑀧𑀺 𑀏𑀓𑀲𑁆𑀲 𑀤𑁆𑀯𑁂 𑀢𑀻𑀡𑀺 𑀤𑀸𑀢𑀩𑁆𑀩𑀸𑀦𑀺 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀳𑀺 𑀲𑁄 𑀪𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 𑀦𑀕𑀭𑀼𑀓𑀢𑁄𑀢𑀺. 𑀲𑀩𑁆𑀩𑀸𑀧𑀺 𑀅𑀧𑁆𑀧𑀦𑀸𑀬 𑀧𑀼𑀩𑁆𑀩𑀪𑀸𑀕𑀧𑀯𑀢𑁆𑀢𑀸 𑀓𑀸𑀫𑀸𑀯𑀘𑀭 𑀪𑀸𑀯𑀦𑀸 𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀦𑀸𑀫. 𑀲𑀸 𑀧𑀦 𑀅𑀧𑁆𑀧𑀦𑀸𑀬 𑀆𑀲𑀦𑁆𑀦𑁂 𑀤𑀽𑀭𑁂𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀬𑀸 𑀆𑀲𑀦𑁆𑀦𑁂, 𑀲𑀸 𑀅𑀧𑁆𑀧𑀦𑀁 𑀉𑀧𑁂𑀘𑁆𑀘 𑀲𑀫𑀻𑀧𑁂 𑀞𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀉𑀧𑀘𑀸𑀭𑀪𑀸𑀯𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀭𑀸 𑀧𑀦 𑀧𑀭𑀺𑀓𑀫𑁆𑀫 𑀪𑀸𑀯𑀦𑀸𑀏𑀯𑀦𑀸𑀫. 𑀇𑀢𑀺 𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀧𑀺 𑀲𑀫𑀸𑀦𑀸 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲 𑀧𑀸𑀓𑀝𑀪𑀸𑀯𑀢𑁆𑀣𑀁 𑀅𑀝𑁆𑀞𑀓𑀣𑀸𑀲𑀼 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀧𑀭𑀺𑀓𑀫𑁆𑀫𑀪𑀸𑀯𑀦𑀸.𑀮. 𑀢𑀺𑀲𑁆𑀲𑁄𑀪𑀸𑀯𑀦𑀸𑀢𑀺 𑀢𑀸𑀲𑀁 𑀧𑀦 𑀯𑀺𑀲𑁂𑀲𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀫𑀡𑁆𑀟𑀮𑀸𑀤𑀺𑀦𑀺𑀫𑀺𑀢𑁆𑀢𑀁. 𑀢𑀜𑁆𑀘 𑀢𑀲𑁆𑀲𑀸 𑀆𑀭𑀫𑁆𑀫𑀡 𑀪𑀸𑀯𑁂𑀦 𑀏𑀓𑀁𑀧𑀺 𑀲𑀫𑀸𑀦𑀁 𑀧𑀼𑀩𑁆𑀩𑀸𑀧𑀭𑀯𑀺𑀲𑁂𑀲𑀧𑀸𑀓𑀝𑀪𑀸𑀯𑀢𑁆𑀣𑀁 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀲𑀁𑀧𑀺 𑀯𑀺𑀲𑁂𑀲𑁄 𑀆𑀕𑀫𑀺𑀲𑁆𑀲𑀢𑀺. 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀲𑀗𑁆𑀔𑀸𑀢𑁂𑀦 𑀧𑀭𑀺𑀢𑁆𑀢𑀧𑀫𑀸𑀡𑁂𑀦𑀯𑀸 𑀔𑀮 𑀫𑀡𑁆𑀟𑀮𑀸𑀤𑀺𑀲𑀗𑁆𑀔𑀸𑀢𑁂𑀦 𑀫𑀳𑀦𑁆𑀢𑀧𑀫𑀸𑀡𑁂𑀦𑀯𑀸 𑀓𑀢𑀁 𑀅𑀓𑀢𑀁𑀯𑀸 𑀧𑀣𑀯𑀻 𑀫𑀡𑁆𑀟𑀮𑀢𑀮𑀫𑁂𑀯 𑀅𑀲𑁂𑀲𑀨𑀭𑀺𑀢𑀩𑁆𑀩𑀝𑁆𑀞𑁂𑀦 𑀓𑀲𑀺𑀡𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀁. 𑀲𑀓𑀮𑀲𑀤𑁆𑀤𑀧𑀭𑀺𑀬𑀸𑀬𑁄 𑀳𑀺 𑀓𑀲𑀺𑀡𑀲𑀤𑁆𑀤𑁄. 𑀬𑀣𑀸 𑀓𑀲𑀺𑀡𑁂𑀦 𑀚𑀫𑁆𑀩𑀼𑀤𑀻𑀧𑀲𑁆𑀲𑀸𑀢𑀺. 𑀢𑀲𑁆𑀫𑀸 𑀬𑀢𑁆𑀢𑀓𑁂 𑀧𑀣𑀯𑀻𑀢𑀮𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀢𑀢𑁆𑀢𑀓𑀁 𑀘𑀺𑀢𑁆𑀢𑁂𑀦 𑀅𑀲𑁂𑀲𑀁 𑀨𑀭𑀺𑀢𑁆𑀯𑀸 𑀏𑀯 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺. 𑀦 𑀧𑀦 𑀢𑀲𑁆𑀲 𑀏𑀓𑀤𑁂𑀲𑁂 𑀞𑀢𑁆𑀯𑀸𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑀧𑀣𑀯𑀻𑀫𑀡𑁆𑀟𑀮𑀢𑀮𑀫𑁂𑀯 𑀅𑀲𑁂𑀲𑀨𑀭𑀺𑀢𑀩𑁆𑀩𑀝𑁆𑀞𑁂𑀦 𑀓𑀲𑀺𑀡𑀦𑁆𑀢𑀺 𑀧𑀣𑀯𑀻𑀓𑀲𑀺𑀡𑀦𑁆𑀢𑀺. 𑀏𑀲𑀦𑀬𑁄 𑀲𑁂𑀲𑀓𑀲𑀺𑀡𑁂𑀲𑀼𑀧𑀻𑀢𑀺. 𑀏𑀢𑁆𑀣𑀘, 𑀅𑀯𑀺𑀪𑀽𑀢𑀯𑀡𑁆𑀡𑀸𑀬 𑀧𑀣𑀯𑀺𑀬𑀸 𑀏𑀓 𑀢𑀮𑀪𑀸𑀯𑁂𑀦𑀲𑀦𑁆𑀦𑀺𑀯𑀺𑀝𑁆𑀞𑀸𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺𑀇𑀥𑀧𑀣𑀯𑀻𑀓𑀲𑀺𑀡𑀁𑀦𑀸𑀫. 𑀢𑀣𑀸 𑀆𑀧𑁄𑀓𑀲𑀺𑀡𑀁 𑀢𑁂𑀚𑁄𑀓𑀲𑀺𑀡𑀜𑁆𑀘. 𑀨𑀼𑀝𑁆𑀞𑀝𑁆𑀞𑀸𑀦𑁂 𑀘𑀺𑀢𑁆𑀢𑁂𑀦 𑀲𑀡𑁆𑀞𑀸𑀦𑀁 𑀓𑀢𑁆𑀯𑀸 𑀕𑀳𑀺𑀢𑀸 𑀯𑀸𑀬𑀼𑀯𑀝𑁆𑀝𑀺 𑀯𑀸𑀬𑁄𑀓𑀲𑀺𑀡𑀁𑀦𑀸𑀫. 𑀦𑀻𑀮𑀯𑀡𑁆𑀡𑀯𑀺𑀲𑀺𑀝𑁆𑀞𑀸𑀏𑀓𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀦𑀻𑀮𑀓𑀲𑀺𑀡𑀁𑀦𑀸𑀫. 𑀢𑀣𑀸 𑀧𑀻𑀢𑀮𑁄𑀳𑀺𑀢𑁄 𑀤𑀸𑀢𑀓𑀲𑀺𑀡𑀸𑀦𑀺𑀧𑀺. 𑀘𑀦𑁆𑀤𑀲𑀽𑀭𑀺𑀬𑀅𑀕𑁆𑀕𑁄𑀪𑀸𑀲𑀯𑀺𑀲𑀺𑀝𑁆𑀞𑀸 𑀓𑀢𑁆𑀣𑀘𑀺 𑀤𑀺𑀲𑁆𑀲𑀫𑀸𑀦𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀆𑀮𑁄𑀓𑀓𑀲𑀺𑀡𑀁𑀦𑀸𑀫. 𑀢𑀺𑀢𑁆𑀢𑀺𑀙𑀺𑀤𑁆𑀤𑀯𑀸𑀢 𑀧𑀸𑀦𑀙𑀺𑀤𑁆𑀤𑀸𑀤𑀻𑀲𑀼 𑀤𑀺𑀲𑁆𑀲𑀫𑀸𑀦𑀸 𑀆𑀓𑀸𑀲𑀯𑀺𑀲𑀺𑀝𑁆𑀞𑀸 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺 𑀆𑀓𑀸𑀲𑀓𑀲𑀺𑀡𑀁𑀦𑀸𑀫𑀸𑀢𑀺. 𑀅𑀢𑀺𑀯𑀺𑀬 𑀥𑀼𑀫𑀸𑀢𑀁 𑀲𑀼𑀦𑀪𑀸𑀯𑀁 𑀕𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀁. 𑀢𑀤𑁂𑀯 𑀓𑀼𑀘𑁆𑀙𑀺𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀓𑀁. 𑀢𑀣𑀸𑀪𑀽𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀤𑁂𑀯 𑀧𑀽𑀢𑀺𑀪𑀸𑀯𑀁 𑀕𑀢𑀓𑀸𑀮𑁂 𑀧𑀼𑀭𑀺𑀫𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦 𑀦𑀻𑀮𑀪𑀸𑀯𑀁 𑀧𑀢𑁆𑀢𑀁 𑀯𑀺𑀦𑀻𑀮𑀓𑀁. 𑀢𑀤𑁂𑀯 𑀧𑀼𑀦 𑀧𑀘𑁆𑀘𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀯𑀺𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀬𑀼𑀢𑁆𑀢𑀁 𑀯𑀺𑀧𑀼𑀩𑁆𑀩𑀓𑀁. 𑀬𑀼𑀤𑁆𑀥𑀪𑀽𑀫𑀺𑀬𑀸𑀤𑀻𑀲𑀼 𑀲𑀢𑁆𑀣𑁂𑀦 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀣𑀧𑀺𑀢𑀁 𑀯𑀺𑀭𑀽𑀧𑀙𑀺𑀦𑁆𑀦𑀲𑀭𑀻𑀭𑀁 𑀯𑀺𑀘𑁆𑀙𑀺𑀦𑁆𑀦𑀓𑀁𑀦𑀸𑀫. 𑀲𑁄𑀡 𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀯𑀺𑀯𑀺𑀥𑀸𑀓𑀸𑀭𑁂𑀦 𑀔𑀸𑀬𑀺𑀢𑀧𑀤𑁂𑀲𑀬𑀼𑀢𑁆𑀢𑀁 𑀲𑀭𑀻𑀭𑀁 𑀯𑀺𑀓𑁆𑀔𑀸𑀬𑀺𑀢𑀓𑀁𑀦𑀸𑀫. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀏𑀯 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀅𑀧𑀓𑀟𑁆𑀠𑀺𑀢𑁆𑀯𑀸 𑀢𑀢𑁄 𑀢𑀢𑁄 𑀔𑀺𑀢𑁆𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑀬𑀼𑀢𑁆𑀢𑀁 𑀲𑀭𑀻𑀭𑀁 𑀯𑀺𑀢𑁆𑀢𑀓𑁆𑀔𑀺𑀓𑀁 𑀦𑀸𑀫. 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀢𑁆𑀯𑀸 𑀢𑀢𑁄 𑀢𑀢𑁄 𑀔𑀺𑀢𑁆𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑀬𑀼𑀢𑁆𑀢𑀁 𑀲𑀭𑀻𑀭𑀁 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁𑀦𑀸𑀫. 𑀧𑀕𑁆𑀖𑀭𑀺𑀢 𑀮𑁄𑀳𑀺𑀢𑀲𑀭𑀻𑀭𑀁 𑀮𑁄𑀳𑀺𑀢𑀓𑀁 𑀦𑀸𑀫. 𑀧𑀼𑀴𑀼𑀯𑀧𑀭𑀺𑀧𑀽𑀭𑀁 𑀲𑀭𑀻𑀭𑀁 𑀧𑀼𑀴𑀼𑀯𑀓𑀁. 𑀲𑀓𑀮𑁄 𑀅𑀝𑁆𑀞𑀺𑀲𑀗𑁆𑀖𑀸𑀝𑁄𑀯𑀸 𑀏𑀓𑀫𑁂𑀓𑀁𑀯𑀸 𑀅𑀝𑁆𑀞𑀺 𑀅𑀝𑁆𑀞𑀺𑀓𑀁 𑀦𑀸𑀫. 𑀧𑀼𑀦𑀧𑁆𑀧𑀼𑀦𑀁 𑀦𑀺𑀭𑀦𑁆𑀢𑀭𑀁 𑀲𑀭𑀡𑀁 𑀅𑀦𑀼𑀲𑁆𑀲𑀢𑀺. 𑀩𑀼𑀤𑁆𑀥𑀕𑀼𑀡𑀲𑁆𑀲 𑀅𑀦𑀼𑀲𑁆𑀲𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺. 𑀏𑀲 𑀦𑀬𑁄 𑀲𑁂𑀲𑀸𑀲𑀼𑀧𑀻𑀢𑀺. 𑀢𑀢𑁆𑀣 𑀅𑀭𑀳𑀢𑀸𑀤𑀺𑀕𑀼𑀡𑁄 𑀩𑀼𑀤𑁆𑀥𑀕𑀼𑀡𑁄𑀦𑀸𑀫. 𑀲𑁆𑀯𑀓𑁆𑀔𑀸𑀢𑀢𑀸𑀤𑀺𑀕𑀼𑀡𑁄 𑀥𑀫𑁆𑀫𑀕𑀼𑀡𑁄𑀦𑀸𑀫. 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀕𑀼𑀡𑁄 𑀲𑀗𑁆𑀖𑀕𑀼𑀡𑁄 𑀦𑀸𑀫. 𑀅𑀢𑁆𑀢𑀦𑁄 𑀲𑀻𑀮𑀲𑁆𑀲 𑀅𑀔𑀡𑁆𑀟𑀢𑀸𑀤𑀺 𑀕𑀼𑀡𑁄 𑀲𑀻𑀮𑀕𑀼𑀡𑁄𑀦𑀸𑀫. 𑀅𑀢𑁆𑀢𑀦𑁄 𑀤𑀸𑀦𑀲𑁆𑀲 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀤𑀺 𑀕𑀼𑀡𑁄 𑀘𑀸𑀕𑀕𑀼𑀡𑁄𑀦𑀸𑀫. 𑀅𑀢𑁆𑀢𑀸𑀦𑀁 𑀤𑁂𑀯𑀢𑁆𑀢𑀁𑀯𑀸 𑀲𑀓𑁆𑀓𑀢𑁆𑀢𑀁𑀯𑀸 𑀩𑁆𑀭𑀳𑁆𑀫𑀢𑁆𑀢𑀁𑀯𑀸 𑀯𑀳𑀺𑀢𑀼𑀁 𑀲𑀫𑀢𑁆𑀣𑀸 𑀅𑀢𑁆𑀢𑀦𑁄 𑀲𑀤𑁆𑀥𑀸𑀤𑀺𑀕𑀼𑀡𑀸 𑀤𑁂𑀯𑀢𑀸𑀕𑀼𑀡𑀸𑀦𑀸𑀫. 𑀯𑀢𑁆𑀢 𑀧𑀝𑀺𑀧𑀢𑁆𑀢𑀺𑀯𑀲𑁂𑀦𑀯𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀯𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀘𑀺𑀭𑀁𑀯𑀺𑀓𑀸𑀮𑀁 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀯𑀽𑀧𑀲𑀫𑁄 𑀅𑀢𑁆𑀢𑀦𑀸𑀅𑀥𑀺𑀕𑀢𑀦𑀺𑀩𑁆𑀩𑀸𑀦𑀜𑁆𑀘 𑀉𑀧𑀲𑀫𑁄𑀦𑀸𑀫. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑁄 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀪𑁂𑀤𑁄 𑀫𑀭𑀡𑀁 𑀦𑀸𑀫. 𑀓𑁂𑀲𑀓𑀸𑀬𑀸𑀤𑀻𑀦𑀁 𑀦𑀸𑀦𑀸𑀓𑀸𑀬𑀸𑀦𑀁 𑀲𑀫𑀽𑀳𑀪𑀽𑀢𑁄 𑀅𑀬𑀁 𑀓𑀸𑀬𑁄 𑀓𑀸𑀬𑁄𑀦𑀸𑀫. 𑀅𑀢𑁆𑀢𑀦𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀸 𑀅𑀲𑁆𑀲𑀸𑀲 𑀧𑀲𑁆𑀲𑀸𑀲𑀸 𑀆𑀦𑀸𑀧𑀸𑀡𑀁𑀦𑀸𑀫. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸. 𑀬𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀳𑀺𑀢𑀲𑀼𑀔𑀁 𑀅𑀯𑀺𑀧𑁆𑀧𑀓𑀺𑀡𑁆𑀡𑀁 𑀓𑀢𑁆𑀯𑀸 𑀲𑀗𑁆𑀕𑀡𑁆𑀳𑀢𑀻𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑀲𑁆𑀲𑀯𑀸 𑀏𑀲𑀸 𑀫𑀺𑀢𑁆𑀢𑁂𑀲𑀼𑀯𑀸 𑀪𑀯𑀸𑀢𑀺 𑀫𑁂𑀢𑁆𑀢𑀸. 𑀅𑀢𑁆𑀣𑀢𑁄 𑀧𑀦 𑀧𑀭𑀲𑀢𑁆𑀢𑀸𑀦𑀁 𑀳𑀺𑀢𑀽𑀧𑀲𑀁𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑁄 𑀅𑀤𑁄𑀲𑁄𑀏𑀯. 𑀧𑀭𑀲𑀢𑁆𑀢𑀸𑀦𑀁 𑀳𑀺𑀢𑀽𑀧𑀲𑀁𑀳𑀸𑀭 𑀳𑀺𑀢𑀫𑁄𑀤𑀦 𑀅𑀳𑀺𑀢𑀸𑀧𑀦𑀬𑀦𑀲𑀗𑁆𑀔𑀸𑀢𑀁 𑀩𑁆𑀬𑀸𑀧𑀸𑀭𑀢𑁆𑀢𑀬𑀁 𑀧𑀳𑀸𑀬 𑀢𑁂𑀲𑀁 𑀓𑀫𑁆𑀫𑀲𑀓𑀢𑀸𑀦𑀼𑀩𑁆𑀭𑀽𑀳𑀦𑀯𑀲𑁂𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀧𑁂𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀢𑀣𑀸 𑀧𑀯𑀢𑁆𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀏𑀯. 𑀅𑀧𑁆𑀧𑀫𑀸𑀡𑁂𑀲𑀼𑀲𑀢𑁆𑀢𑁂𑀲𑀼 𑀪𑀯𑀸𑀢𑀺 𑀅𑀧𑁆𑀧𑀫𑀜𑁆𑀜𑀸. 𑀦 𑀳𑀺 𑀏𑀢𑁆𑀢𑀓𑁂𑀲𑀼 𑀏𑀯 𑀲𑀢𑁆𑀢𑁂𑀲𑀼 𑀏𑀢𑀸 𑀧𑀯𑀢𑁆𑀢𑁂𑀢𑀩𑁆𑀩𑀸. 𑀦 𑀢𑀢𑁄 𑀅𑀜𑁆𑀜𑁂𑀲𑀽𑀢𑀺 𑀏𑀯𑀁 𑀏𑀢𑀸𑀲𑀁 𑀯𑀺𑀲𑀬𑀧𑀭𑀺𑀘𑁆𑀙𑁂𑀤𑁄𑀦𑀸𑀫 𑀅𑀢𑁆𑀣𑀻𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀆𑀤𑀺𑀓𑀫𑁆𑀫𑀺 𑀓𑁂𑀦 𑀆𑀤𑀺𑀢𑁄 𑀏𑀓𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀢𑁆𑀢𑀦𑁄 𑀪𑀸𑀯𑀦𑀸𑀘𑀺𑀢𑁆𑀢𑀁 𑀮𑀤𑁆𑀥𑀸𑀲𑁂𑀯𑀦𑀁 𑀮𑀤𑁆𑀥𑀯𑀺𑀲𑁂𑀲𑀜𑁆𑀘 𑀓𑀢𑁆𑀯𑀸 𑀧𑀘𑁆𑀙𑀸 𑀤𑁆𑀯𑀻𑀲𑀼 𑀢𑀻𑀲𑀽𑀢𑀺𑀆𑀤𑀺𑀦𑀸 𑀯𑀟𑁆𑀠𑀺𑀢𑁆𑀯𑀸 𑀲𑀻𑀫𑀲𑀫𑁆𑀪𑁂𑀤𑁄𑀘 𑀑𑀥𑀺𑀲𑁄𑀨𑀭𑀡 𑀅𑀦𑁄𑀥𑀺𑀲𑁄𑀨𑀭𑀡 𑀤𑀺𑀲𑀸𑀨𑀭𑀡𑀸𑀦𑀺𑀯 𑀓𑀢𑁆𑀢𑀩𑁆𑀩𑀸𑀦𑀻𑀢𑀺. 𑀬𑀁 𑀧𑀦 𑀯𑀺𑀪𑀗𑁆𑀕𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂𑀘 𑀲𑀩𑁆𑀩𑁂𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽𑀢𑀺𑀆𑀤𑀺𑀦𑀸 𑀫𑁂𑀢𑁆𑀢𑀸𑀯𑀺𑀥𑀸𑀦𑀁 𑀦𑀸𑀫 𑀯𑀼𑀢𑁆𑀢𑀁. 𑀢𑀁 𑀫𑁂𑀢𑁆𑀢𑀸𑀛𑀸𑀦𑁂 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑀸 𑀧𑀦 𑀯𑀺𑀲𑁂𑀲𑁂𑀦 𑀤𑁄𑀲𑀧𑀓𑁆𑀔𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀪𑀽𑀢𑀸 𑀳𑁄𑀦𑁆𑀢𑀻𑀢𑀺 𑀢𑀁𑀲𑀫𑀗𑁆𑀕𑀺𑀦𑁄𑀘 𑀦𑀺𑀘𑁆𑀘𑀁 𑀲𑁄𑀫𑁆𑀫𑀳𑀤𑀬𑀪𑀸𑀯𑁂𑀦 𑀩𑁆𑀭𑀳𑁆𑀫𑀲𑀤𑀺 𑀲𑀢𑁆𑀢𑀸 𑀩𑁆𑀭𑀳𑁆𑀫𑀸𑀦𑁄𑀦𑀸𑀫. 𑀢𑁂𑀲𑀁 𑀯𑀺𑀳𑀸𑀭𑁄𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄. 𑀲𑁂𑀝𑁆𑀞𑀸𑀦𑀁𑀯𑀸 𑀲𑁂𑀝𑁆𑀞𑀪𑀽𑀢𑁄𑀯𑀸 𑀯𑀺𑀳𑀸𑀭𑁄𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀢𑀺. 𑀆𑀳𑀸𑀭𑁂𑀢𑀺 𑀅𑀲𑀺𑀢 𑀧𑀻𑀢 𑀔𑀸𑀬𑀺𑀢 𑀲𑀸𑀬𑀺𑀢 𑀯𑀲𑁂𑀦 𑀘𑀢𑀼𑀧𑁆𑀧𑀪𑁂𑀤𑁂 𑀅𑀚𑁆𑀛𑁄𑀳𑀝𑀸𑀳𑀸𑀭𑁂. 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀆𑀳𑀸𑀭𑀳𑁂𑀢𑀼 𑀅𑀦𑀼𑀪𑀯𑀺𑀢𑀩𑁆𑀩𑀸𑀦𑀁 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑀯𑀲𑁂𑀦 𑀲𑀭𑀲𑀧𑀝𑀺𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀦𑀯𑀲𑁂𑀦 𑀆𑀲𑀬𑀦𑀺𑀥𑀸𑀦 𑀧𑀓𑁆𑀓𑀸𑀧𑀓𑁆𑀓𑀨𑀮𑀦𑀺𑀲𑁆𑀲𑀦𑁆𑀤𑀧𑀘𑁆𑀘𑀯𑁂𑀓𑁆𑀔𑀦 𑀯𑀲𑁂𑀦 𑀘 𑀢𑀢𑁆𑀣 𑀦𑀺𑀓𑀦𑁆𑀢𑀺 𑀧𑀳𑀸𑀦𑀲𑀜𑁆𑀜𑀸. 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀲𑀭𑀻𑀭𑀕𑀢𑀸𑀦𑀁 𑀧𑀣𑀯𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀥𑀸𑀢𑀽𑀦𑀁 𑀲𑀮𑀓𑁆𑀔𑀡𑀸 𑀤𑀺𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀦𑀁. 𑀢𑀜𑁆𑀳𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀯𑀢𑁆𑀣𑀧𑀺𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀺𑀬𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀲𑀼𑀪𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲𑀧𑀳𑀸𑀦𑀸𑀬𑀸𑀢𑀺 𑀯𑀘𑀦𑀢𑁄 𑀤𑀲𑀅𑀲𑀼𑀪𑀸.𑀮. 𑀭𑀸𑀕𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑁂𑀦 𑀘𑀭𑀢𑀻𑀢𑀺 𑀭𑀸𑀕𑀘𑀭𑀺𑀢𑁄. 𑀲𑁄 𑀳𑀺 𑀓𑀸𑀫𑀁 𑀓𑀤𑀸𑀘𑀺 𑀤𑁄𑀲𑁂𑀦 𑀘𑀭𑀢𑀺. 𑀓𑀤𑀸𑀘𑀺 𑀫𑁄𑀳𑁂𑀦. 𑀓𑀤𑀸𑀘𑀺 𑀲𑀤𑁆𑀥𑀸𑀤𑀻𑀲𑀼𑀧𑀺 𑀅𑀜𑁆𑀜𑀢𑀭𑁂𑀦. 𑀭𑀸𑀕𑁄 𑀧𑀦𑀲𑁆𑀲 𑀉𑀲𑁆𑀲𑀦𑁆𑀦𑁄. 𑀢𑀲𑁆𑀫𑀸 𑀉𑀲𑁆𑀲𑀦𑁆𑀦𑁂𑀦 𑀭𑀸𑀕𑁂𑀦 𑀲𑁄 𑀭𑀸𑀕𑀘𑀭𑀺𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀯𑀘𑀦𑀢𑁄 𑀫𑁂𑀢𑁆𑀢𑀸𑀤𑀻𑀦𑀁 𑀢𑀺𑀡𑁆𑀡𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀬𑀣𑀸𑀓𑁆𑀓𑀫𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸 𑀅𑀭𑀢𑀻𑀦𑀁 𑀦𑀺𑀲𑁆𑀲𑀭𑀡𑀢𑀸𑀯𑀘𑀦𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀜𑁆𑀘 𑀯𑀡𑁆𑀡𑀓𑀲𑀺𑀡𑀸𑀦𑀁 𑀤𑁄𑀲𑀯𑀢𑁆𑀣𑀼𑀢𑁆𑀢𑀸𑀪𑀸𑀯𑀢𑁄 𑀘𑀢𑀲𑁆𑀲𑁄𑀅𑀧𑁆𑀧𑀫𑀜𑁆𑀜𑀸𑀬𑁄.𑀮. 𑀤𑁄𑀲𑀘𑀭𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑁂𑀯𑀸𑀬𑀁 𑀘𑀭𑀺𑀬𑀯𑀺𑀪𑀸𑀕𑁄. 𑀉𑀧𑁂𑀓𑁆𑀔𑀸𑀘 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀦𑀲𑀫𑁆𑀪𑀯𑀢𑀺. 𑀯𑀓𑁆𑀔𑀢𑀺𑀳𑀺 𑀉𑀧𑁂𑀓𑁆𑀔𑀸𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀢𑀺. 𑀢𑀲𑁆𑀫𑀸 𑀬𑀲𑁆𑀲 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀲𑀧𑁆𑀧𑀸𑀬𑀸. 𑀢𑀲𑁆𑀲 𑀢𑀤𑀦𑀼𑀕𑀢𑀺𑀓𑀸 𑀉𑀧𑁂𑀓𑁆𑀔𑀸𑀧𑀺 𑀲𑀧𑁆𑀧𑀸𑀬𑀸𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀣𑀸 𑀦𑀺𑀲𑁆𑀲𑀭𑀡𑀜𑁆𑀳𑁂𑀢𑀁 𑀭𑀸𑀕𑀲𑁆𑀲. 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸 𑀘𑁂𑀢𑁄 𑀯𑀺𑀫𑀼𑀢𑁆𑀢𑀻𑀢𑀺 𑀯𑀘𑀦𑀢𑁄 𑀉𑀧𑁂𑀓𑁆𑀔𑀸 𑀭𑀸𑀕𑀘𑀭𑀺𑀢𑀲𑁆𑀲𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀦𑀻𑀮𑀸𑀤𑀻𑀦𑀺𑀘 𑀘𑀢𑁆𑀢𑀸𑀭𑀺 𑀓𑀲𑀺𑀡𑀸𑀦𑀻𑀢𑀺 𑀇𑀤𑀜𑁆𑀘 𑀫𑀦𑀸𑀧𑀺𑀬𑀭𑀽𑀧𑀸𑀦𑀺 𑀦𑀻𑀮𑀸𑀤𑀻𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀫𑀦𑀸𑀧𑀺𑀬𑀸𑀦𑀺 𑀧𑀦 𑀢𑀸𑀦𑀺 𑀭𑀸𑀕𑀘𑀭𑀺𑀢𑀲𑁆𑀲𑁂𑀯 𑀲𑀧𑁆𑀧𑀸𑀬𑀸𑀦𑀻𑀢𑀺. 𑀆𑀦𑀸𑀧𑀸𑀡𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬𑀸𑀢𑀺 𑀯𑀘𑀦𑀢𑁄 𑀆𑀦𑀸𑀧𑀸𑀡𑀁𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁. 𑀫𑁄𑀳𑀘𑀭𑀺𑀢𑁄 𑀧𑀦 𑀧𑀓𑀢𑀺𑀬𑀸 𑀧𑀫𑀸𑀤𑀩𑀳𑀼𑀮𑁄 𑀳𑁄𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀘. 𑀆𑀦𑀸𑀧𑀸𑀡𑀜𑁆𑀘𑀦𑀸𑀫 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲 𑀲𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀫𑁄𑀳𑀘𑀭𑀺𑀢𑀲𑁆𑀲𑀲𑀧𑁆𑀧𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

[𑁨𑁪𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀩𑀼𑀤𑁆𑀥𑀺𑀯𑀺𑀲𑀬𑀪𑀸𑀯𑁂𑀦 𑀫𑁄𑀳𑀧𑀝𑀺𑀧𑀓𑁆𑀔𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺.

𑀏𑀯𑀜𑁆𑀳𑀺 𑀲𑀢𑀺 𑀲𑁄 𑀩𑀼𑀤𑁆𑀥𑀺𑀘𑀭𑀺𑀢𑁂𑀦 𑀲𑀳 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺. 𑀓𑀸𑀫𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀤𑀬𑁄𑀧𑀺 𑀏𑀓𑀦𑁆𑀢𑁂𑀦 𑀩𑀼𑀤𑁆𑀥𑀺𑀯𑀺𑀲𑀬𑀸𑀏𑀯 𑀳𑁄𑀦𑁆𑀢𑀺. 𑀢𑁂 𑀧𑀦 𑀯𑀺𑀲𑁂𑀲𑀢𑁄 𑀲𑀤𑁆𑀥𑀁 𑀉𑀧𑀩𑁆𑀭𑀽𑀳𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀆𑀤𑀬𑁄.𑀮. 𑀲𑀤𑁆𑀥𑀸𑀘𑀭𑀺𑀢𑀲𑁆𑀲𑀸𑀢𑀺. 𑀧𑀭𑀫𑀢𑁆𑀣𑀢𑁄 𑀲𑀼𑀔𑀼𑀫𑀢𑀭𑀸𑀦𑀺 𑀫𑀭𑀡𑀸𑀤𑀻𑀦𑀺 𑀯𑀺𑀧𑀼𑀮𑀩𑀼𑀤𑁆𑀥𑀻𑀦𑀁 𑀏𑀯 𑀯𑀺𑀲𑀬𑀸𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀫𑀭𑀡. 𑀮. 𑀩𑀼𑀤𑁆𑀥𑀺𑀘𑀭𑀺𑀢𑀲𑁆𑀲𑀸𑀢𑀺. 𑀲𑁂𑀲𑀸𑀦𑀺𑀧𑀦𑀲𑀩𑁆𑀩𑀸𑀦𑀺𑀧𑀻𑀢𑀺 𑀘𑀢𑁆𑀢𑀸𑀭𑀺 𑀪𑀽𑀢 𑀓𑀲𑀺𑀡𑀸𑀦𑀺 𑀤𑁆𑀯𑁂 𑀆𑀮𑁄𑀓𑀸𑀓𑀸𑀲𑀓𑀲𑀺𑀡𑀸𑀦𑀺 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸𑀘𑀸𑀢𑀺 𑀤𑀲𑀯𑀺𑀥𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣𑀸𑀧𑀻𑀢𑀺 𑀢𑁂𑀲𑀼 𑀤𑀲𑀲𑀼 𑀲𑁂𑀲 𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀧𑀺. 𑀧𑀼𑀣𑀼𑀮𑀁 𑀔𑀮𑀫𑀡𑁆𑀟𑀮𑀸𑀤𑀺𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀲𑁆𑀲 𑀲𑀧𑁆𑀧𑀸𑀬𑀁. 𑀲𑀫𑁆𑀩𑀸𑀥𑀲𑁆𑀫𑀺𑀜𑁆𑀳𑀺 𑀑𑀓𑀸𑀲𑁂 𑀘𑀺𑀢𑁆𑀢𑀁 𑀪𑀺𑀬𑁆𑀬𑁄 𑀲𑀁𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺. 𑀔𑀼𑀤𑁆𑀤𑀓𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀧𑀫𑀸𑀡𑀁 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑁂𑀯 𑀲𑀧𑁆𑀧𑀸𑀬𑀁. 𑀫𑀳𑀦𑁆𑀢𑀜𑁆𑀳𑀺 𑀯𑀺𑀢𑀓𑁆𑀓𑀲𑀦𑁆𑀥𑀸𑀯𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀢𑀢𑁆𑀣𑀘 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁄 𑀔𑀼𑀤𑁆𑀤𑀓𑀦𑁆𑀢𑀺𑀧𑀤𑁂 𑀬𑀼𑀚𑁆𑀚𑀢𑀺. 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀔𑀼𑀤𑁆𑀤𑀓𑀫𑁂𑀯 𑀲𑀧𑁆𑀧𑀸𑀬𑀁. 𑀦 𑀧𑀼𑀣𑀼𑀮𑀦𑁆𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀉𑀚𑀼𑀯𑀺𑀧𑀘𑁆𑀘𑀦𑀺𑀓𑀯𑀲𑁂𑀦𑀘𑁂𑀯 𑀅𑀢𑀺𑀲𑀧𑁆𑀧𑀸𑀬𑀢𑀸𑀬𑀘 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀻𑀦𑀁 𑀧𑀦 𑀅𑀯𑀺𑀓𑁆𑀔𑀫𑁆𑀪𑀺𑀓𑀸 𑀲𑀤𑁆𑀥𑀸𑀤𑀻𑀦𑀜𑁆𑀘 𑀅𑀦𑀼𑀧𑀓𑀸𑀭𑀺𑀓𑀸 𑀓𑀼𑀲𑀮𑀪𑀸𑀯𑀦𑀸𑀦𑀸𑀫 𑀦𑀢𑁆𑀣𑀻𑀢𑀺𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀘𑀢𑁆𑀢𑀸𑀮𑀻𑀲 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀮𑀩𑁆𑀪𑀢𑁂𑀯 𑀧𑀭𑀺𑀓𑀫𑁆𑀫𑁂𑀦 𑀯𑀺𑀦𑀸 𑀏𑀓𑀲𑁆𑀲𑀧𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀲𑀫𑁆𑀧𑀚𑁆𑀚𑀦𑀢𑁄. 𑀤𑀲𑀲𑀼𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀉𑀧𑀘𑀸𑀭𑀪𑀸𑀯𑀦𑀸𑀯 𑀲𑀫𑁆𑀧𑀚𑁆𑀚𑀢𑀺 𑀦𑀢𑁆𑀣𑀺 𑀅𑀧𑁆𑀧𑀦𑀸. 𑀓𑀲𑁆𑀫𑀸 𑀇𑀢𑀺 𑀘𑁂. 𑀩𑀼𑀤𑁆𑀥 𑀥𑀫𑁆𑀫 𑀲𑀗𑁆𑀖 𑀲𑀻𑀮 𑀘𑀸𑀕 𑀤𑁂𑀯𑀢𑀸 𑀉𑀧𑀲𑀫 𑀕𑀼𑀡𑀸𑀦𑀁 𑀢𑀸𑀯 𑀕𑀫𑁆𑀪𑀻𑀭𑀢𑀸𑀬 𑀦𑀸𑀦𑀸𑀧𑁆𑀧𑀓𑀸𑀭𑀕𑀼𑀡𑀸 𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬𑀕𑀸𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀫𑁆𑀪𑀻𑀭 𑀢𑀸𑀬𑀸𑀢𑀺 𑀏𑀢𑁂𑀦 𑀏𑀓𑁂𑀓𑀲𑁆𑀲𑀧𑀺 𑀕𑀼𑀡𑀧𑀤𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸 𑀢𑀩𑁆𑀩𑀺𑀲𑀬𑁄 𑀲𑀫𑀸𑀥𑀺 𑀫𑀳𑀸𑀲𑀫𑀼𑀤𑁆𑀤𑁂 𑀲𑀲𑀓𑁄 𑀯𑀺𑀬 𑀢𑀢𑁆𑀣 𑀅𑀧𑁆𑀧𑀦𑀁 𑀧𑀢𑁆𑀯𑀸 𑀦𑀺𑀘𑁆𑀘𑀮𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀦𑀸𑀧𑁆𑀧𑀓𑀸𑀭 𑀕𑀼𑀡𑀸𑀦𑀼𑀲𑁆𑀲𑀭𑀡𑀸𑀥𑀺𑀫𑀼𑀢𑁆𑀢𑀢𑀸𑀬𑀯𑀸𑀢𑀺 𑀏𑀢𑁂𑀦 𑀢𑁂𑀲𑀁 𑀕𑀼𑀡𑀸𑀦𑀁 𑀅𑀢𑀧𑁆𑀧 𑀦𑀺𑀬𑀲𑀪𑀸𑀯𑀢𑁆𑀢𑀸 𑀏𑀢𑁆𑀢𑀓𑁂𑀏𑀯 𑀕𑀼𑀡𑀧𑀤𑁂 𑀞𑀢𑁆𑀯𑀸 𑀅𑀧𑁆𑀧𑀦𑀁 𑀧𑀸𑀧𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀢𑀼𑀁𑀧𑀺 𑀦𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀲𑁂𑀲𑁂𑀲𑀼 𑀧𑀦 𑀫𑀭𑀡𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑁂𑀲𑀼 𑀫𑀭𑀡𑀁 𑀢𑀸𑀯 𑀲𑀪𑀸𑀯 𑀥𑀫𑁆𑀫𑀢𑁆𑀢𑀸 𑀲𑀁𑀯𑁂𑀚𑀦𑀻𑀬𑀥𑀫𑁆𑀫𑀢𑁆𑀢𑀸𑀘 𑀇𑀢𑀭𑀸𑀦𑀺𑀘 𑀤𑁆𑀯𑁂 𑀲𑀪𑀸𑀯𑀥𑀫𑁆𑀫𑀢𑀸𑀬 𑀕𑀫𑁆𑀪𑀻𑀭𑀢𑁆𑀢𑀸 𑀅𑀧𑁆𑀧𑀦𑀸𑀬 𑀧𑀢𑀺𑀝𑁆𑀞𑀸 𑀦𑀳𑁄𑀦𑁆𑀢𑀻𑀢𑀺. 𑀬𑀤𑀺𑀏𑀯𑀁 𑀓𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀸𑀦𑀺 𑀅𑀢𑀺𑀕𑀫𑁆𑀪𑀻𑀭𑁂 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂 𑀲𑀪𑀸𑀯𑀥𑀫𑁆𑀫𑁂 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀤𑀼𑀢𑀻𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺𑀘 𑀧𑀣𑀫𑀢𑀢𑀻𑀬𑀸𑀭𑀼𑀧𑁆𑀧 𑀲𑀗𑁆𑀔𑀸𑀢𑁂 𑀲𑀪𑀸𑀯𑀥𑀫𑁆𑀫𑁂𑀢𑀺. 𑀯𑀼𑀘𑁆𑀘𑀢𑁂, 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀸𑀦𑀺 𑀢𑀸𑀯 𑀯𑀺𑀲𑀼𑀤𑁆𑀥𑀺𑀢𑁄 𑀲𑀫𑁆𑀫𑀲𑀦𑀜𑀸𑀡𑀢𑁄𑀘 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀉𑀧𑀭𑀼𑀧𑀭𑀺𑀧𑀯𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸𑀦𑀁 𑀩𑀮𑁂𑀦 𑀅𑀢𑀺𑀕𑀫𑁆𑀪𑀻𑀭𑁂𑀧𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂 𑀲𑀪𑀸𑀯𑀥𑀫𑁆𑀫𑁂 𑀅𑀧𑁆𑀧𑀦𑀸𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺𑀘 𑀅𑀧𑁆𑀧𑀦𑀸𑀧𑀢𑁆𑀢𑀲𑁆𑀲𑁂𑀯 𑀧𑀜𑁆𑀘𑀫𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲 𑀉𑀤𑀬𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀦𑀫𑀢𑁆𑀢𑀓𑀭𑀡𑁂𑀦 𑀲𑀪𑀸𑀯𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑁂 𑀅𑀧𑁆𑀧𑀦𑀸𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀢𑁆𑀣𑀸𑀧𑀻𑀢𑀺 𑀢𑁂𑀲𑀼 𑀲𑀫𑀢𑀺𑀁𑀲𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀧𑀺. 𑀧𑀜𑁆𑀘𑀓𑀚𑁆𑀛𑀸𑀦𑁂 𑀦𑀺𑀬𑀼𑀢𑁆𑀢𑀸𑀦𑀺 𑀧𑀜𑁆𑀘𑀓𑀚𑁆𑀛𑀸𑀦𑀺 𑀓𑀸𑀦𑀺. 𑀛𑀸𑀦𑀧𑀜𑁆𑀘𑀓𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀬𑁄𑀕𑁆𑀬𑀸𑀦𑀻𑀢𑀺 𑀯𑀼𑀢𑁆𑀢𑀁𑀳𑁄𑀢𑀺. 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀸𑀦𑀺𑀦𑀸𑀫 𑀅𑀢𑀺𑀅𑀦𑀺𑀝𑁆𑀞𑀸𑀦𑀺 𑀮𑀽𑀔𑀸𑀦𑀺 𑀘𑀺𑀢𑁆𑀢𑀭𑀪𑀺𑀚𑀦𑀦𑁂 𑀧𑀭𑀺𑀤𑀼𑀩𑁆𑀩𑀮𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦 𑀢𑀸𑀦𑀺 𑀅𑀢𑁆𑀢𑀦𑀺 𑀘𑀺𑀢𑁆𑀢𑀁 𑀭𑁄𑀘𑁂𑀢𑁆𑀯𑀸 𑀣𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸 𑀘𑀺𑀢𑁆𑀢𑀁 𑀢𑀢𑁆𑀣 𑀏𑀓𑀕𑁆𑀕𑀁 𑀳𑀼𑀢𑁆𑀯𑀸 𑀦 𑀢𑀺𑀝𑁆𑀞𑀢𑀺. 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀤𑀲𑀅𑀲𑀼𑀪𑀸.𑀮. 𑀧𑀣𑀫𑀚𑁆𑀛𑀸𑀦𑀺𑀓𑀸𑀢𑀺. 𑀬𑀤𑀺𑀏𑀯𑀁 𑀓𑀣𑀁 𑀢𑁂𑀲𑀼 𑀲𑁄𑀫𑀦𑀲𑁆𑀲𑀚𑁆𑀛𑀸𑀦𑀁 𑀳𑁄𑀢𑀻𑀢𑀺 𑀦𑀻𑀯𑀭𑀡𑀲𑀦𑁆𑀢𑀸𑀧𑀁 𑀧𑀳𑀸𑀦𑀩𑀮𑁂𑀦𑀘𑁂𑀯 𑀢𑀁 𑀢𑀁 𑀆𑀦𑀺𑀲𑀁𑀲𑀤𑀲𑁆𑀲𑀦 𑀜𑀸𑀡𑀩𑀮𑁂𑀦𑀘. 𑀩𑁆𑀬𑀸𑀥𑀺𑀤𑀼𑀓𑁆𑀔𑀧𑀻𑀴𑀺𑀢𑀲𑁆𑀲 𑀭𑁄𑀕𑀺𑀦𑁄 𑀯𑀫𑀦𑀯𑀺𑀭𑁂𑀘𑀦𑀧𑀯𑀢𑁆𑀢𑀺𑀬𑀁 𑀯𑀺𑀬 𑀩𑀳𑀼𑀁 𑀤𑀸𑀦𑀺 𑀯𑁂𑀢𑁆𑀢𑀦𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄 𑀧𑀼𑀧𑁆𑀨𑀘𑁆𑀙𑀝𑁆𑀝𑀓𑀲𑁆𑀲 𑀕𑀽𑀣𑀭𑀸𑀲𑀺𑀤𑀲𑁆𑀲𑀦𑁂 𑀯𑀺𑀬 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑁂𑀢𑁆𑀢𑀸𑀤𑀬𑁄 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀤𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀸𑀦𑀁 𑀩𑁆𑀬𑀸𑀧𑀸𑀤𑀯𑀺𑀳𑀺𑀁 𑀲𑀸𑀅𑀭𑀢𑀻𑀦𑀁 𑀦𑀺𑀲𑁆𑀲𑀭𑀡𑀪𑀽𑀢𑀸 𑀳𑁄𑀦𑁆𑀢𑀻𑀢𑀺 𑀦 𑀢𑁂 𑀓𑀤𑀸𑀘𑀺 𑀲𑁄𑀫𑀦𑀲𑁆𑀲𑁂𑀦 𑀯𑀺𑀦𑀸 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀫𑁂𑀢𑁆𑀢𑀸𑀤𑀬𑁄 𑀢𑀬𑁄 𑀘𑀢𑀼𑀓𑁆𑀓𑀚𑁆𑀛𑀸𑀦𑀺𑀓𑀸𑀢𑀺. 𑀉𑀧𑁂𑀓𑁆𑀔𑀸 𑀧𑀦 𑀲𑀢𑁆𑀢𑁂𑀲𑀼 𑀲𑀩𑁆𑀩𑀲𑁄 𑀉𑀤𑀸𑀲𑀺𑀦𑀧𑀓𑁆𑀔𑁂 𑀞𑀢𑁆𑀯𑀸 𑀪𑀸𑀯𑀺𑀢𑀩𑁆𑀩𑀢𑁆𑀢𑀸 𑀓𑀤𑀸𑀘𑀺𑀧𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀯𑀺𑀦𑀸 𑀅𑀧𑁆𑀧𑀦𑀁 𑀦𑀧𑀸𑀧𑀼𑀡𑀸𑀢𑀻𑀢𑀺 𑀯𑀼𑀢𑁆𑀢𑀁 𑀉𑀧𑁂𑀓𑁆𑀔𑀸𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀢𑀺. 𑀘𑀢𑁆𑀢𑀸𑀭𑁄𑀧𑀦𑀆𑀭𑀼𑀧𑁆𑀧𑀸𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀆𑀭𑀼𑀧𑁆𑀧𑀸𑀭𑀫𑁆𑀫𑀡𑀸𑀦𑀺. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀁. 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀧𑀭𑀺𑀓𑀫𑁆𑀫𑀁𑀦𑀸𑀫 𑀦 𑀲𑀺𑀚𑁆𑀛𑀢𑀺. 𑀆𑀭𑀫𑁆𑀫𑀡𑀲𑁆𑀲 𑀲𑀼𑀝𑁆𑀞𑀼 𑀤𑀴𑁆𑀳𑀯𑀺𑀪𑀽𑀢𑀕𑀳𑀡𑀲𑀗𑁆𑀔𑀸𑀢𑁂𑀦 𑀉𑀕𑁆𑀕𑀳𑁂𑀦 𑀯𑀺𑀦𑀸 𑀆𑀭𑀫𑁆𑀫𑀡𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀅𑀲𑀢𑀺𑀘 𑀆𑀭𑀫𑁆𑀫𑀡𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀘𑀸𑀭𑀚𑁆𑀛𑀸𑀦𑀁𑀧𑀺 𑀢𑀸𑀯 𑀦 𑀲𑀫𑁆𑀧𑀚𑁆𑀚𑀢𑀺. 𑀧𑀕𑁂𑀯 𑀅𑀧𑁆𑀧𑀦𑀸𑀛𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑀁.𑀮. 𑀮𑀩𑁆𑀪𑀦𑁆𑀢𑁂𑀯𑀸𑀢𑀺. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀬𑀣𑀸𑀭𑀳𑀦𑁆𑀢𑀺 𑀢𑀁𑀢𑀁𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀭𑀽𑀧𑀁. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀤𑀁 𑀧𑀦 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀲𑁆𑀲 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀅𑀯𑀺𑀪𑀽𑀢𑀢𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀧𑀣𑀫𑀁 𑀲𑀪𑀸𑀯𑀥𑀫𑁆𑀫𑀁 𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀙𑀸 𑀢𑀸𑀤𑀺𑀲𑁂 𑀢𑀤𑀸𑀓𑀸𑀭𑁂 𑀢𑀁𑀲𑀡𑁆𑀞𑀸𑀦𑁂 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑁂 𑀉𑀧𑀘𑀸𑀭𑁄𑀯𑀸 𑀅𑀧𑁆𑀧𑀦𑀸𑀯𑀸 𑀧𑀯𑀢𑁆𑀢𑀢𑀺. 𑀢𑀢𑁆𑀣𑁂𑀯 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁𑀦𑀸𑀫 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀧𑀝𑀺𑀪𑀸𑀕 𑀦𑀺𑀫𑀺𑀢𑁆𑀢𑀁𑀧𑀦𑀸𑀢𑀺𑀆𑀤𑀺. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣𑀳𑀻𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀫𑀣𑀓𑀫𑁆𑀫𑁂 𑀧𑀣𑀫𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀸𑀯𑀦𑀸𑀯𑀺𑀥𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑀣𑀦𑁆𑀢𑀺𑀆𑀤𑀺 𑀫𑀸𑀳. 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀬𑀣𑀸 𑀲𑀡𑁆𑀞𑀺𑀢𑀁 𑀆𑀓𑀸𑀭𑀁 𑀘𑀺𑀢𑁆𑀢𑁂 𑀉𑀧𑀭𑀼𑀧𑀭𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲. 𑀲𑀸𑀘𑀪𑀸𑀯𑀦𑀸𑀢𑀺 𑀉𑀕𑁆𑀕𑀳𑀡𑀸𑀓𑀸𑀭𑁂𑀦 𑀧𑀯𑀢𑁆𑀢 𑀚𑀯𑀦𑀯𑀻𑀣𑀺𑀧𑀭𑀁𑀧𑀭𑀲𑀗𑁆𑀔𑀸𑀢𑀸 𑀲𑀸 𑀘𑀺𑀢𑁆𑀢𑀪𑀸𑀯𑀦𑀸 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀦𑀸𑀫. 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀯𑀲𑁂𑀦 𑀯𑀟𑁆𑀠𑀦𑀸𑀓𑀸𑀭𑀲𑀡𑁆𑀞𑀺𑀢𑀢𑁆𑀢𑀸. 𑀲𑀫𑀼𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀬𑀣𑀸 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑀁 𑀲𑀫𑀼𑀕𑁆𑀕𑀳𑀺𑀢𑀁𑀦𑀸𑀫 𑀳𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀘𑀓𑁆𑀔𑀼𑀦𑀸𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀢𑀫𑀸𑀕𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑁄𑀤𑁆𑀯𑀸𑀭𑀲𑁆𑀲𑀆𑀧𑀸𑀢𑀫𑀸𑀕𑀢𑀦𑁆𑀢𑀺 𑀘𑀓𑁆𑀔𑀽𑀦𑀺 𑀦𑀺𑀫𑁆𑀫𑀺𑀮𑀺𑀢𑁆𑀯𑀸𑀯𑀸 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸𑀯𑀸 𑀆𑀯𑀚𑁆𑀚𑀦𑁆𑀢𑀲𑁆𑀲 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀲𑀤𑀺𑀲𑀁 𑀫𑀦𑁄𑀤𑁆𑀯𑀸𑀭𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁𑀦𑀸𑀫. 𑀲𑀼𑀝𑁆𑀞𑀼 𑀅𑀯𑀺𑀦𑀲𑁆𑀲𑀫𑀸𑀦𑀁 𑀓𑀢𑁆𑀯𑀸 𑀕𑀳𑀺𑀢𑀢𑁆𑀢𑀸. 𑀲𑀸𑀘 𑀪𑀸𑀯𑀦𑀸 𑀲𑀫𑀸𑀥𑀺𑀬𑀢𑀺. 𑀦 𑀢𑀸𑀯 𑀪𑀸𑀯𑀦𑀦𑁆𑀢𑀭𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀢𑁂𑀦 𑀫𑀢𑁆𑀣𑀓𑀧𑀢𑁆𑀢𑁂𑀦 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀲𑁆𑀲 𑀏𑀢𑀲𑁆𑀲 𑀬𑁄𑀕𑀺𑀦𑁄. 𑀢𑀢𑁄𑀧𑀭𑀦𑁆𑀢𑀺 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀢𑁄 𑀧𑀭𑀁. 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀘𑀺𑀢𑁆𑀢𑁂 𑀲𑀦𑁆𑀦𑀺𑀲𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀦𑀼𑀬𑀼𑀜𑁆𑀚𑀦𑁆𑀣𑀲𑁆𑀲𑀸𑀢𑀺 𑀦𑀺𑀭𑀦𑁆𑀢𑀭𑀁 𑀧𑀤𑀳𑀦𑁆𑀢𑀲𑁆𑀲. 𑀢𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀲𑀪𑀸𑀯 𑀥𑀫𑁆𑀫𑀪𑀽𑀢𑁂𑀦 𑀢𑁂𑀦 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑁂𑀦 𑀲𑀤𑀺𑀲𑀁. 𑀯𑀢𑁆𑀣𑀼𑀥𑀫𑁆𑀫𑀯𑀺𑀫𑀼𑀘𑁆𑀘𑀺𑀢𑀦𑁆𑀢𑀺 𑀫𑁂𑀖𑀯𑀮𑀸𑀳𑀓𑀦𑁆𑀢𑀭𑀢𑁄𑀯𑀸 𑀭𑀸𑀳𑀼𑀫𑀼𑀔𑀢𑁄𑀯𑀸 𑀦𑀺𑀓𑁆𑀔𑀦𑁆𑀢𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀲𑀪𑀸𑀯𑀥𑀫𑁆𑀫𑀪𑀽𑀢𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀢𑁄 𑀯𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀲𑀼𑀁 𑀉𑀧𑀝𑁆𑀞𑀺𑀢𑀁. 𑀢𑀢𑁄𑀬𑁂𑀯 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀦𑀺𑀫𑀺𑀢𑁆𑀢𑀧𑀜𑁆𑀜𑀢𑁆𑀢𑀺𑀇𑀢𑀺 𑀓𑀣𑀺𑀢𑀁. 𑀪𑀸𑀯𑀦𑀸 𑀫𑀬𑀦𑁆𑀢𑀺 𑀓𑁂𑀯𑀮𑀁 𑀪𑀸𑀯𑀦𑀸𑀘𑀺𑀢𑁆𑀢𑀩𑀮𑁂𑀦 𑀧𑀲𑀺𑀤𑁆𑀥𑀁. 𑀆𑀮𑀫𑁆𑀩𑀡𑀦𑁆𑀢𑀺 𑀢𑀤𑁂𑀯 𑀲𑀫𑀼𑀕𑁆𑀕𑀳𑀺𑀢𑀁 𑀦𑀺𑀫𑀺𑀢𑁆𑀢𑀸𑀮𑀫𑁆𑀩𑀡𑀁 𑀘𑀺𑀢𑁆𑀢𑁂𑀲𑀦𑁆𑀦𑀺𑀲𑀦𑁆𑀦𑀁𑀲𑀫𑀧𑁆𑀧𑀺𑀢𑀁𑀳𑁄𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑀁 𑀦𑀺𑀘𑁆𑀘𑀮𑀪𑀸𑀯𑁂𑀦 𑀲𑀡𑁆𑀞𑀺𑀢𑀁 𑀳𑀼𑀢𑁆𑀯𑀸 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀧𑀯𑁂𑀲𑀺𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀸𑀮𑀫𑁆𑀩𑀡𑀁 𑀧𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀘𑀦𑁆𑀤𑀫𑀡𑁆𑀟𑀮𑀸𑀤𑀺𑀓𑀲𑁆𑀲 𑀯𑀺𑀬 𑀢𑀲𑁆𑀲 𑀦𑀺𑀫𑀺𑀢𑁆𑀢𑀸𑀮𑀫𑁆𑀩𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑁄𑀤𑀸𑀢𑀪𑀸𑀯𑁂𑀦 𑀉𑀧𑀝𑁆𑀞𑀺𑀢𑀢𑀸𑀦𑀸𑀫 𑀓𑀺𑀮𑁂𑀲𑀫𑀮𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑁄𑀤𑀸𑀢𑀪𑀸𑀯𑀁 𑀧𑀢𑁆𑀯𑀸 𑀑𑀪𑀸𑀲𑀚𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦𑁂𑀯 𑀳𑁄𑀢𑀺. 𑀦 𑀢𑀲𑁆𑀲 𑀆𑀮𑀫𑁆𑀩𑀡𑀲𑁆𑀲 𑀯𑀲𑁂𑀦. 𑀦𑀳𑀺 𑀧𑀜𑁆𑀜𑀢𑁆𑀢𑀺 𑀥𑀫𑁆𑀫𑁂 𑀢𑀸𑀤𑀺𑀲𑁄 𑀕𑀼𑀡𑁄𑀦𑀸𑀫 𑀉𑀧𑀮𑀩𑁆𑀪𑀢𑀻𑀢𑀺. 𑀢𑀲𑁆𑀫𑀸 𑀧𑀝𑀺𑀪𑀸𑀕 𑀦𑀺𑀫𑀺𑀢𑁆𑀢𑁂 𑀲𑀫𑀼𑀧𑁆𑀧𑀦𑁆𑀦𑁂 𑀦𑀻𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀩𑀦𑁆𑀥𑀓𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀢𑀢𑁄𑀧𑀝𑁆𑀞𑀸𑀬𑀸𑀢𑀺𑀆𑀤𑀺. 𑀧𑀝𑀺𑀩𑀦𑁆𑀥𑀦𑁆𑀢𑀺 𑀦𑀻𑀯𑀸𑀭𑁂𑀦𑁆𑀢𑀺 𑀦𑀺𑀲𑁆𑀲𑀭𑀡𑀧𑀓𑁆𑀔𑀺𑀓𑀁 𑀘𑀺𑀢𑁆𑀢𑀁 𑀧𑀸𑀢𑁂𑀦𑁆𑀢𑀻𑀢𑀺 𑀧𑀝𑀺𑀩𑀦𑁆𑀥𑀸. 𑀦𑀻𑀯𑀭𑀡 𑀥𑀫𑁆𑀫𑀸. 𑀯𑀺𑀲𑁂𑀲𑁂𑀦 𑀧𑀳𑀻𑀦𑀸 𑀧𑀝𑀺𑀩𑀦𑁆𑀥𑀸 𑀏𑀢𑀸𑀬𑀸𑀢𑀺 𑀧𑀝𑀺𑀩𑀦𑁆𑀥𑀯𑀺𑀧𑁆𑀧𑀳𑀻𑀦𑀸. 𑀲𑀫𑀸𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀆𑀲𑁂𑀯𑀦𑁆𑀢𑀲𑁆𑀲. 𑀲𑀢𑁆𑀢𑀯𑀺𑀥𑀁 𑀦𑀺𑀫𑀺𑀢𑁆𑀢 𑀭𑀓𑁆𑀔𑀡𑀯𑀺𑀥𑀸𑀦𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑀁 𑀯𑀺𑀬 𑀲𑀼𑀝𑁆𑀞𑀼 𑀭𑀓𑁆𑀔𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀦𑀸𑀯𑀲𑁂𑀦 𑀲𑁂𑀯𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄 𑀪𑁄𑀚𑀦𑀁 𑀉𑀢𑀼;

𑀇𑀭𑀺𑀬𑀸𑀧𑀣𑁄𑀢𑀺 𑀲𑀢𑁆𑀢𑁂 𑀢𑁂, 𑀅𑀲𑀧𑁆𑀧𑀸𑀬𑁂 𑀯𑀺𑀯𑀚𑁆𑀚𑀬𑁂.

𑀲𑀧𑁆𑀧𑀸𑀬𑁂 𑀲𑀢𑁆𑀢 𑀲𑁂𑀯𑁂𑀣, 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄;

𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀳𑁄𑀢𑀺 𑀓𑀲𑁆𑀲𑀘𑀺 𑀅𑀧𑁆𑀧𑀦𑀸𑀢𑀺 𑀳𑀺 𑀯𑀼𑀢𑁆𑀢𑀁.

𑀭𑀽𑀧𑀸𑀯𑀘𑀭𑀧𑀣𑀫𑀚𑁆𑀛𑀸𑀦𑀁𑀅𑀧𑁆𑀧𑁂𑀢𑀻𑀢𑀺 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀸𑀢𑀺𑀲𑀬𑀁 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀢𑁄 𑀲𑀢𑀕𑀼𑀡𑁂𑀦𑀯𑀸 𑀲𑀳𑀲𑁆𑀲𑀕𑀼𑀡𑁂𑀦𑀯𑀸 𑀣𑀺𑀭𑀢𑀭𑀚𑁆𑀛𑀸𑀦𑀗𑁆𑀕𑀬𑀼𑀢𑁆𑀢𑀁 𑀭𑀽𑀧𑀸𑀯𑀘𑀭 𑀲𑀗𑁆𑀔𑀸𑀢𑀁 𑀧𑀣𑀫𑀚𑁆𑀛𑀸𑀦𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀧𑀣𑀫𑀚𑁆𑀛𑀸𑀦𑀁 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀘𑀲𑀼 𑀯𑀲𑀻𑀢𑀸𑀲𑀼 𑀧𑀦 𑀧𑀣𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀣𑀫𑀁 𑀯𑀺𑀢𑀓𑁆𑀓𑀁 𑀆𑀯𑀚𑁆𑀚𑀢𑀺. 𑀢𑀢𑁄 𑀯𑀺𑀘𑀸𑀭𑀁. 𑀢𑀢𑁄 𑀧𑀻𑀢𑀺𑀁. 𑀢𑀢𑁄 𑀲𑀼𑀔𑀁. 𑀢𑀢𑁄 𑀲𑀫𑀸𑀥𑀺𑀁. 𑀢𑀢𑁄 𑀧𑀼𑀦 𑀯𑀺𑀢𑀓𑁆𑀓𑀁. 𑀢𑀢𑁄 𑀯𑀺𑀘𑀸𑀭𑀦𑁆𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀛𑀸𑀦𑀗𑁆𑀕𑀸𑀦𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀬𑀤𑀸 𑀢𑀁𑀢𑀁𑀛𑀸𑀦𑀗𑁆𑀕𑀸𑀮𑀫𑁆𑀩𑀡𑀸 𑀘𑀺𑀢𑁆𑀢𑀯𑀸𑀭𑀸 𑀅𑀦𑁆𑀢𑀭𑀦𑁆𑀢𑀭𑀸 𑀓𑀢𑀺𑀧𑀬𑀪𑀯𑀗𑁆𑀕𑁂𑀳𑀺 𑀅𑀦𑁆𑀢𑀭𑀺𑀢𑀸 𑀳𑀼𑀢𑁆𑀯𑀸 𑀦𑀺𑀭𑀦𑁆𑀢𑀭𑀪𑀽𑀢𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀸 𑀆𑀯𑀚𑁆𑀚𑀦 𑀧𑀘𑁆𑀘𑀯𑁂𑀓𑁆𑀔𑀦 𑀯𑀲𑀺𑀢𑀸𑀬𑁄 𑀯𑀲𑀻𑀪𑀽𑀢𑀸𑀦𑀸𑀫 𑀳𑁄𑀦𑁆𑀢𑀺. 𑀏𑀢𑀸 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀬𑀫𑀓𑀧𑀸𑀝𑀺 𑀳𑀸𑀭𑀺𑀬𑀸𑀤𑀺𑀓𑀸𑀮𑁂𑀲𑀼 𑀮𑀳𑀼𑀓𑀧𑀯𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀸𑀦𑀁 𑀢𑀁𑀢𑀁𑀛𑀸𑀦𑀗𑁆𑀕𑀸 𑀭𑀫𑁆𑀫𑀡𑀸𑀘𑀺𑀢𑁆𑀢𑀯𑀸𑀭𑀸𑀧𑀺 𑀘𑀢𑀼𑀧𑀜𑁆𑀘𑀚𑀯𑀦𑀺𑀓𑀸𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀅𑀦𑁆𑀢𑀭𑀪𑀯𑀗𑁆𑀕𑀸𑀦𑀺𑀧𑀺 𑀧𑀘𑁆𑀙𑀺𑀫𑀯𑀸𑀭𑀲𑁆𑀲 𑀉𑀧𑀘𑀸𑀭 𑀪𑀽𑀢𑀸𑀦𑀺 𑀪𑀯𑀗𑁆𑀕 𑀘𑀮𑀦 𑀲𑀗𑁆𑀔𑀸𑀢𑀸𑀦𑀺 𑀤𑁆𑀯𑁂𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀬𑀢𑁆𑀣 𑀅𑀧𑀭𑀁 𑀛𑀸𑀦𑀗𑁆𑀕𑀁 𑀆𑀧𑀸𑀢 𑀫𑀸𑀕𑀘𑁆𑀙𑀢𑀺. 𑀦𑀳𑀺 𑀆𑀭𑀫𑁆𑀫𑀡𑁂 𑀆𑀧𑀸𑀢𑀁 𑀅𑀦𑀸𑀕𑀢𑁂 𑀪𑀯𑀗𑁆𑀕𑀁 𑀘𑀮𑀢𑀺. 𑀦𑀘 𑀯𑀺𑀦𑀸 𑀪𑀯𑀗𑁆𑀕𑀘𑀮𑀦𑁂𑀦 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀦𑀸𑀫 𑀅𑀢𑁆𑀣𑀻𑀢𑀺. 𑀣𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂 𑀅𑀜𑁆𑀜𑁂𑀲𑀁 𑀯𑀲𑀺𑀪𑀸𑀯𑀧𑀢𑁆𑀢𑀸𑀦𑀁𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀪𑀯𑀗𑁆𑀕𑀘𑀸𑀭𑁂 𑀕𑀡𑀦𑀸𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦 𑀅𑀬𑀁 𑀧𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀯𑀲𑀻 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑁂 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀲𑀁𑀯𑀸 𑀏𑀯𑀭𑀽𑀧𑁂 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀲𑁆𑀲 𑀲𑀻𑀖𑀢𑀭𑀁 𑀲𑀫𑀸𑀧𑀚𑁆𑀚𑀦𑀲𑀫𑀢𑁆𑀣𑀢𑀸 𑀲𑀫𑀸𑀧𑀚𑁆𑀚𑀦𑀯𑀲𑀻𑀦𑀸𑀫. 𑀢𑁂𑀦𑁂𑀯 𑀳𑀺 𑀧𑀸𑀴𑀺𑀬𑀁 𑀲𑀫𑀸𑀧𑀚𑁆𑀚𑀦𑁂 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁. 𑀏𑀲𑀦𑀬𑁄 𑀲𑁂𑀲𑀸𑀲𑀼𑀧𑀻𑀢𑀺. 𑀢𑀣𑀸 𑀲𑀫𑀸𑀧𑀚𑁆𑀚𑀺𑀢𑀁 𑀛𑀸𑀦𑀁 𑀅𑀘𑁆𑀙𑀭𑀸𑀫𑀢𑁆𑀢𑀸𑀤𑀺𑀯𑀲𑁂𑀦 𑀅𑀢𑀺𑀧𑀭𑀺𑀢𑁆𑀢𑀓𑀁𑀧𑀺 𑀔𑀡𑀁 𑀣𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀻𑀦𑀸𑀫. 𑀲𑀫𑀸𑀧𑀚𑁆𑀚𑀺𑀢𑀚𑁆𑀛𑀸𑀦𑀢𑁄 𑀲𑀻𑀖𑀢𑀭𑀁 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀻𑀦𑀸𑀫. 𑀧𑀘𑁆𑀘𑀯𑁂𑀓𑁆𑀔𑀦𑀯𑀲𑀻 𑀧𑀦 𑀆𑀯𑀚𑁆𑀚𑀦𑀯𑀲𑀺𑀬𑀸 𑀲𑀺𑀤𑁆𑀥𑀸𑀬 𑀲𑀺𑀤𑁆𑀥𑀸𑀏𑀯 𑀳𑁄𑀢𑀻𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀬𑀢𑁆𑀢𑀓𑀁 𑀓𑀸𑀮𑀁 𑀇𑀘𑁆𑀙𑀢𑀺. 𑀢𑀢𑁆𑀢𑀓𑀁 𑀘𑀺𑀭𑀢𑀭𑀁 𑀛𑀸𑀦𑀁 𑀣𑀧𑁂𑀢𑀼𑀁 𑀲𑀫𑀢𑁆𑀣𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸𑀦𑀸𑀫𑀸𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀣𑀸 𑀧𑀭𑀺𑀘𑁆𑀙𑀺𑀦𑁆𑀦 𑀓𑀸𑀮𑀢𑁄 𑀅𑀦𑁆𑀢𑁄 𑀅𑀯𑀼𑀝𑁆𑀞𑀳𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑁂𑀯 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀢𑀸 𑀯𑀼𑀝𑁆𑀞𑀸𑀦𑀯𑀲𑀺𑀢𑀸𑀦𑀸𑀫𑀸𑀢𑀺. 𑀢𑀁𑀧𑀺 𑀬𑀼𑀚𑁆𑀚𑀢𑀺𑀬𑁂𑀯.

𑀧𑀸𑀴𑀺𑀬𑀜𑁆𑀳𑀺 𑀧𑀣𑀫𑀚𑁆𑀛𑀸𑀦𑀁 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀅𑀥𑀺𑀝𑁆𑀞𑀸𑀢𑀺. 𑀅𑀥𑀺𑀝𑁆𑀞𑀸𑀦𑀸𑀬 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦𑀢𑁆𑀣𑀻𑀢𑀺𑀆𑀤𑀺𑀦𑀸 𑀲𑀻𑀖𑀢𑀭𑀁𑀯𑀸 𑀳𑁄𑀢𑀼. 𑀘𑀺𑀭𑀢𑀭𑀁𑀯𑀸. 𑀬𑀢𑁆𑀢𑀓𑀁 𑀓𑀸𑀮𑀁 𑀛𑀸𑀦𑀁 𑀣𑀧𑁂𑀢𑀼𑀁𑀯𑀸 𑀬𑀢𑁆𑀢𑀓𑁂 𑀓𑀸𑀮𑁂 𑀢𑀢𑁄 𑀉𑀝𑁆𑀞𑀸𑀢𑀼𑀁𑀯𑀸 𑀇𑀘𑁆𑀙𑀢𑀺. 𑀢𑀢𑁆𑀢𑀓𑀁 𑀓𑀸𑀮𑀁 𑀅𑀦𑀽𑀦𑀁𑀯𑀸 𑀅𑀦𑀥𑀺𑀓𑀁𑀯𑀸 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀼𑀁𑀯𑀸 𑀯𑀼𑀝𑁆𑀞𑀸𑀢𑀼𑀁𑀯𑀸 𑀲𑀫𑀢𑁆𑀣𑀢𑀸𑀧𑀺 𑀤𑀲𑁆𑀲𑀺𑀢𑀸𑀬𑁂𑀯 𑀳𑁄𑀢𑀻𑀢𑀺. 𑀏𑀯𑀜𑁆𑀘𑀲𑀢𑀺 𑀯𑀼𑀝𑁆𑀞𑀸𑀦𑀯𑀲𑀺𑀢𑀸𑀧𑀺 𑀅𑀥𑀺𑀝𑁆𑀞𑀸𑀦𑀯𑀲𑀺𑀢𑀸𑀬 𑀲𑀺𑀤𑁆𑀥𑀸𑀬 𑀲𑀺𑀤𑁆𑀥𑀸𑀏𑀯𑀸𑀢𑀺 𑀢𑀸𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑀓𑀧𑁆𑀧𑀦𑀸𑀧𑀺 𑀦𑀺𑀧𑁆𑀧𑀬𑁄𑀚𑀦𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀲𑀦𑀁 𑀯𑀲𑀻. 𑀲𑀫𑀢𑁆𑀣𑀢𑀸𑀢𑀺 𑀅𑀢𑁆𑀣𑁄. 𑀇𑀲𑁆𑀲𑀭 𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀻𑀏𑀯 𑀯𑀲𑀺𑀢𑀸. 𑀬𑀣𑀸 𑀤𑁂𑀯𑁄𑀏𑀯 𑀤𑁂𑀯𑀢𑀸𑀢𑀺. 𑀓𑀢𑁆𑀯𑀸 𑀧𑀤𑀳𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀢𑀓𑁆𑀓𑀸𑀤𑀺𑀓𑀁 𑀑𑀴𑀸𑀭𑀺𑀓𑀗𑁆𑀕𑀁 𑀧𑀳𑀸𑀦𑀸𑀬𑀸𑀢𑀺 𑀏𑀢𑁆𑀣 𑀧𑀣𑀫𑀚𑁆𑀛𑀸𑀦𑀁 𑀢𑀸𑀯 𑀯𑀲𑀻𑀪𑀽𑀢𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀯𑀺𑀢𑀓𑁆𑀓𑁄 𑀑𑀴𑀸𑀭𑀺𑀓𑀢𑁄 𑀉𑀧𑀝𑁆𑀞𑀸𑀢𑀺. 𑀢𑀤𑀸 𑀅𑀳𑁄𑀯𑀢𑀫𑁂 𑀅𑀯𑀺𑀢𑀓𑁆𑀓𑀁 𑀛𑀸𑀦𑀁 𑀅𑀲𑁆𑀲𑀸𑀢𑀺 𑀏𑀯𑀫𑀲𑁆𑀲 𑀅𑀚𑁆𑀛𑀸𑀲𑀬𑁄 𑀲𑀡𑁆𑀞𑀸𑀢𑀺. 𑀢𑀤𑀸 𑀅𑀯𑀺𑀢𑀓𑁆𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀧𑀼𑀦 𑀢𑀲𑁆𑀫𑀺𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀲𑀸 𑀪𑀸𑀯𑀦𑀸 𑀯𑀺𑀢𑀓𑁆𑀓𑀯𑀺𑀭𑀸𑀕𑀪𑀸𑀯𑀦𑀸𑀦𑀸𑀫 𑀳𑁄𑀢𑀺. 𑀲𑀸𑀧𑀺 𑀬𑀸𑀯 𑀯𑀺𑀢𑀓𑁆𑀓𑁂 𑀦𑀺𑀓𑀦𑁆𑀢𑀺 𑀦 𑀧𑀭𑀺𑀬𑀸𑀤𑀺𑀬𑀢𑀺, 𑀢𑀸𑀯 𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀦𑀸𑀫. 𑀧𑀭𑀺𑀬𑀸𑀤𑀺𑀦𑁆𑀦𑀸𑀬 𑀧𑀦 𑀯𑀺𑀢𑀓𑁆𑀓𑀦𑀺𑀓𑀦𑁆𑀢𑀺𑀬𑀸 𑀉𑀧𑀘𑀸𑀭 𑀪𑀸𑀯𑀦𑀸𑀦𑀸𑀫 𑀳𑁄𑀢𑀺. 𑀏𑀲𑀦𑀬𑁄 𑀲𑁂𑀲𑀚𑁆𑀛𑀸𑀦𑀼𑀧𑀘𑀸𑀭𑁂𑀲𑀼𑀧𑀺. 𑀏𑀯𑀁 𑀢𑀁𑀢𑀁𑀛𑀸𑀦𑀗𑁆𑀕𑀯𑀺𑀭𑀸𑀕𑀪𑀸𑀯𑀦𑀸𑀩𑀮𑁂𑀦 𑀯𑀺𑀢𑀓𑁆𑀓𑀸𑀤𑀺𑀓𑀲𑁆𑀲 𑀑𑀴𑀸𑀭𑀺𑀓𑀲𑁆𑀲 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀗𑁆𑀕𑀲𑁆𑀲 𑀧𑀚𑀳𑀦𑀢𑁆𑀣𑀸𑀬. 𑀯𑀺𑀘𑀸𑀭𑀸𑀤𑀺𑀲𑀼𑀔𑀼𑀫𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀯𑀺𑀘𑀸𑀭𑀸𑀤𑀻𑀦𑀁 𑀲𑀼𑀔𑀼𑀫𑀸𑀦𑀁 𑀘𑀢𑀼𑀦𑁆𑀦𑀁 𑀢𑀺𑀡𑁆𑀡𑀁 𑀤𑁆𑀯𑀺𑀦𑁆𑀦𑀁 𑀧𑀼𑀦 𑀤𑁆𑀯𑀺𑀦𑁆𑀦𑀁𑀯𑀸 𑀛𑀸𑀦𑀗𑁆𑀕𑀸𑀦𑀁 𑀢𑁂𑀦 𑀢𑁂𑀦 𑀯𑀺𑀢𑀓𑁆𑀓𑀸𑀤𑀺𑀦𑀸 𑀑𑀴𑀸𑀭𑀺𑀓𑁂𑀦 𑀅𑀗𑁆𑀕𑁂𑀦 𑀯𑀺𑀦𑀸 𑀧𑀼𑀦 𑀉𑀧𑁆𑀧𑀢𑁆𑀢𑀺𑀬𑀸. 𑀧𑀸𑀳𑀢𑁄𑀢𑀺 𑀧𑀤𑀳𑀦𑁆𑀢𑀲𑁆𑀲. 𑀧𑀥𑀸𑀦𑀦𑀸𑀫𑀓𑀁 𑀆𑀢𑀸𑀧𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀬𑁄𑀢𑀺 𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀻𑀦𑀺 𑀲𑁂𑀲𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺. 𑀬𑀣𑀸𑀭𑀳𑀦𑁆𑀢𑀺 𑀇𑀤𑀁 𑀤𑁆𑀯𑀸𑀯𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀻𑀦𑀁 𑀅𑀦𑀼𑀭𑀽𑀧𑀸𑀦𑀺 𑀓𑀲𑀺𑀡𑀆𑀦𑀸𑀧𑀸𑀡𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀯𑀲𑁂𑀲𑁂𑀲𑀼 𑀧𑀦 𑀅𑀝𑁆𑀞𑀸𑀭𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑀲𑁆𑀫𑀸 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀦𑀸𑀫 𑀆𑀭𑀫𑁆𑀫𑀡𑀸𑀢𑀺𑀓𑁆𑀓𑀫𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀢𑀤𑀢𑀺𑀓𑁆𑀓𑀫𑀦𑀢𑁆𑀣𑀜𑁆𑀘 𑀓𑀲𑀺𑀡𑀼𑀕𑁆𑀖𑀸𑀝𑀦𑀁𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀬𑁂𑀲𑀼 𑀢𑀤𑀼𑀕𑁆𑀖𑀸𑀝𑀦𑀁 𑀲𑀫𑁆𑀪𑀯𑀢𑀺. 𑀢𑀸𑀦𑀺𑀬𑁂𑀯 𑀓𑀲𑀺𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 𑀆𑀓𑀸𑀲𑀯𑀚𑁆𑀚𑀺𑀢𑀓𑀲𑀺𑀡𑁂𑀲𑀽𑀢𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀓𑀲𑀺𑀡𑀜𑁆𑀳𑀺 𑀉𑀕𑁆𑀖𑀸𑀝𑀻𑀬𑀫𑀸𑀦𑀁𑀧𑀺 𑀆𑀓𑀸𑀲 𑀫𑁂𑀯 𑀳𑁄𑀢𑀻𑀢𑀺 𑀦𑀢𑁆𑀣𑀺 𑀢𑀢𑁆𑀣 𑀢𑀤𑀢𑀺𑀓𑁆𑀓𑀫𑀦𑀲𑀫𑁆𑀪𑀯𑁄𑀢𑀺. 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀬𑀣𑀸𑀤𑀺𑀝𑁆𑀞𑁂 𑀓𑀲𑀺𑀡𑀦𑀺𑀫𑀺𑀢𑁆𑀢𑁂 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑀜𑁆𑀜𑀁 𑀅𑀓𑀢𑁆𑀯𑀸 𑀢𑀢𑁆𑀣 𑀆𑀓𑀸𑀲𑀁 𑀅𑀦𑀦𑁆𑀢𑀁 𑀆𑀓𑀸𑀲𑀁 𑀅𑀦𑀦𑁆𑀢𑀦𑁆𑀢𑀺 𑀆𑀓𑀸𑀲𑀲𑀜𑁆𑀜𑀁 𑀧𑀯𑀢𑁆𑀢𑁂𑀦𑁆𑀢𑀲𑁆𑀲 𑀘𑀺𑀢𑁆𑀢𑁂 𑀢𑀁𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀧𑁆𑀧𑀫𑀸𑀡𑀁 𑀆𑀓𑀸𑀲𑀫𑁂𑀯 𑀉𑀧𑀝𑁆𑀞𑀸𑀢𑀺. 𑀏𑀯𑀁 𑀓𑀲𑀺𑀡𑀲𑀜𑁆𑀜𑀸𑀯𑀺𑀥𑀫𑀦𑁂𑀦 𑀆𑀓𑀸𑀲𑀲𑀜𑁆𑀜𑀸𑀧𑀯𑀢𑁆𑀢𑀦𑁂𑀦𑀘 𑀬𑀁𑀓𑀺𑀜𑁆𑀘𑀺 𑀓𑀲𑀺𑀡𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀺𑀬𑁄𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀁 𑀆𑀓𑀸𑀲𑀁 𑀆𑀭𑀩𑁆𑀪𑀸𑀢𑀺 𑀧𑀸𑀝𑁆𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀏𑀲𑀦𑀬𑁄 𑀧𑀣𑀫𑀸 𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼𑀧𑀺. 𑀅𑀦𑀦𑁆𑀢𑀯𑀲𑁂𑀦𑀸𑀢𑀺 𑀅𑀦𑀦𑁆𑀢𑀁 𑀆𑀓𑀸𑀲𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀯𑀲𑁂𑀦. 𑀲𑀦𑁆𑀢𑀫𑁂𑀢𑀁 𑀧𑀡𑀻𑀢𑀫𑁂𑀢𑀦𑁆𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀣𑀸 𑀲𑀫𑁆𑀪𑀸𑀯𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀆𑀭𑀫𑁆𑀫𑀡𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀉𑀧𑀭𑀺 𑀛𑀸𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀫𑀧𑁆𑀧𑁂𑀢𑀻𑀢𑀺. 𑀧𑀭𑀺𑀓𑀫𑁆𑀫𑀁𑀓𑀢𑁆𑀯𑀸𑀢𑀺 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀦𑁆𑀢𑀺𑀆𑀤𑀺𑀦𑀸 𑀲𑀫𑀦𑀼𑀲𑁆𑀲𑀭𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀩𑀼𑀤𑁆𑀥𑀕𑀼𑀡𑀸𑀤𑀺𑀓𑁂 𑀆𑀮𑀫𑁆𑀩𑀡𑁂. 𑀪𑀽𑀫𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀦𑀺𑀫𑀺𑀢𑁆𑀢𑁂𑀢𑀺 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀓𑀸𑀭𑀲𑀗𑁆𑀔𑀸𑀢𑁂 𑀦𑀺𑀫𑀺𑀢𑁆𑀢𑁂. 𑀪𑀸𑀯𑀮𑀓𑁆𑀔𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀲𑀸𑀥𑀼𑀓𑀫𑀼𑀕𑁆𑀕𑀳𑀺𑀢𑁂𑀢𑀺 𑀆𑀭𑀫𑁆𑀫𑀡𑀲𑁆𑀲 𑀯𑀺𑀪𑀽𑀢𑀢𑀭 𑀯𑀲𑁂𑀦𑀯𑀸 𑀘𑀺𑀢𑁆𑀢𑀲𑁆𑀲 𑀢𑀲𑁆𑀫𑀺𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀯𑀲𑁂𑀦𑀯𑀸 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑁂. 𑀉𑀧𑀘𑀸𑀭𑁄𑀘 𑀲𑀫𑁆𑀧𑀚𑁆𑀚𑀢𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀤𑀺𑀝𑁆𑀞𑀲𑀘𑁆𑀘𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑁂𑀲𑀁𑀧𑀺 𑀯𑀸 𑀫𑀭𑀡𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑁂𑀲𑀽𑀢𑀺. 𑀏𑀢𑁆𑀣𑀘 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑁂𑀦 𑀛𑀸𑀦𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀘𑀉𑀧𑀘𑀸𑀭𑀲𑀫𑁆𑀧𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀘𑀢𑁆𑀢𑀸𑀮𑀻𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼𑀬𑀣𑀸𑀭𑀳𑀁𑀲𑀫𑀣𑀚𑁆𑀛𑀸𑀦𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸𑀇𑀤𑀸𑀦𑀺𑀢𑁂𑀲𑀼𑀲𑀫𑀣𑀚𑁆𑀛𑀸𑀦𑁂𑀲𑀼𑀓𑀲𑀺𑀡𑀚𑁆𑀛𑀸𑀦𑀸𑀦𑀁 𑀦𑀺𑀲𑀦𑁆𑀤𑀪𑀽𑀢𑀁𑀅𑀪𑀺𑀜𑁆𑀜𑀸 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀅𑀪𑀺𑀜𑁆𑀜𑀸𑀯𑀲𑁂𑀦𑀧𑀯𑀢𑁆𑀢𑀫𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀓𑀢𑀸𑀥𑀺𑀓𑀸𑀭𑁄 𑀳𑁄𑀢𑀺. 𑀆𑀲𑀦𑁆𑀦𑀪𑀯𑁂 𑀲𑀫𑀣𑀚𑁆𑀛𑀸𑀦𑁂𑀲𑀼 𑀓𑀢𑀸𑀪𑀺𑀬𑁄𑀕𑁄𑀯𑀸 𑀳𑁄𑀢𑀺, 𑀧𑀽𑀭𑀺𑀢𑀩𑁄𑀥𑀺𑀲𑀫𑁆𑀪𑀸𑀭𑁄 𑀫𑀳𑀸𑀧𑀼𑀭𑀺𑀲 𑀚𑀸𑀢𑀺𑀓𑁄𑀯𑀸. 𑀢𑀲𑁆𑀲 𑀅𑀝𑁆𑀞𑀯𑀺𑀥𑁂𑀲𑀼 𑀦𑀯𑀯𑀺𑀥𑁂𑀲𑀼𑀯𑀸 𑀲𑀫𑀣𑀚𑁆𑀛𑀸𑀦𑁂𑀲𑀼𑀲𑀺𑀚𑁆𑀛 𑀫𑀸𑀦𑁂𑀲𑀼 𑀅𑀪𑀺𑀜𑁆𑀜𑀸𑀧𑀺 𑀲𑀺𑀚𑁆𑀛𑀢𑀺𑀬𑁂𑀯. 𑀭𑀽𑀧𑀚𑁆𑀛𑀸𑀦𑀫𑀢𑁆𑀢𑁂𑀲𑀼𑀧𑀺 𑀲𑀺𑀚𑁆𑀛𑀦𑁆𑀢𑁂𑀲𑀼 𑀲𑀺𑀚𑁆𑀛𑀢𑀺 𑀬𑁂𑀯𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀘 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀁𑀧𑀘𑁆𑀘𑀬𑀪𑀸𑀯𑀁𑀅𑀦𑀼𑀧𑀕𑀢𑀲𑁆𑀲𑀧𑀺𑀆𑀓𑀸𑀲𑀓𑀲𑀺𑀡𑀚𑁆𑀛𑀸𑀦𑀲𑁆𑀲 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑀸𑀲𑀫𑁆𑀪𑀯𑁄 𑀯𑀼𑀢𑁆𑀢𑁄𑀢𑀺. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 𑀦𑀳𑀺 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀡𑁆𑀡𑀯𑀲𑀻𑀪𑀸𑀯𑀁 𑀯𑀺𑀦𑀸 𑀉𑀧𑀭𑀺 𑀅𑀪𑀺𑀜𑁆𑀜𑀸𑀥𑀺𑀕𑀫𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦 𑀣𑀧𑁂𑀢𑁆𑀯𑀸 𑀧𑀼𑀭𑀺𑀲 𑀯𑀺𑀲𑁂𑀲𑁂 𑀅𑀯𑀲𑁂𑀲𑀸𑀦𑀁 𑀩𑀳𑀽𑀦𑀁 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀇𑀫𑁂𑀳𑀺 𑀧𑀦 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀅𑀧𑀭𑀺𑀤𑀫𑁂𑀢𑁆𑀯𑀸 𑀧𑀼𑀩𑁆𑀩𑁂 𑀅𑀪𑀸𑀯𑀺𑀢𑀪𑀸𑀯𑀦𑁄 𑀆𑀤𑀺𑀓𑀫𑁆𑀫𑀺𑀓𑁄 𑀬𑁄𑀕𑀸𑀯𑀘𑀭𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀸𑀤𑀺𑀲𑀸𑀦𑀁 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻𑀪𑀸𑀯𑀸𑀦𑀁 𑀅𑀪𑀺𑀜𑁆𑀜𑀸𑀓𑀫𑁆𑀫𑁂 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀸𑀦𑀁 𑀓𑀲𑀺𑀡𑀸 𑀦𑀼𑀮𑁄𑀫𑀢𑁄 𑀓𑀲𑀺𑀡𑀧𑀝𑀺𑀮𑁄𑀫𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺 𑀘𑀼𑀤𑁆𑀤𑀲𑀳𑀺 𑀆𑀓𑀸𑀭𑁂𑀳𑀺 𑀅𑀢𑁆𑀢𑀦𑁄 𑀭𑀽𑀧𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑀁 𑀧𑀭𑀺𑀤𑀫𑁂𑀢𑁆𑀯𑀸 𑀢𑀺𑀓𑁆𑀔𑀁 𑀲𑀽𑀭𑀁 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀭𑀺𑀲𑁆𑀲𑀸 𑀫𑀻𑀢𑀺 𑀆𑀭𑀪𑀦𑁆𑀢𑀸𑀦𑀁 𑀅𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀧𑀦 𑀭𑀽𑀧𑀸𑀯𑀘𑀭𑀧𑀜𑁆𑀘 𑀫𑀚𑁆𑀛𑀸𑀦𑀁 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀮𑀫𑁆𑀩𑀡𑁂𑀲𑀼 𑀬𑀣𑀸𑀭𑀳𑀁 𑀅𑀧𑁆𑀧𑁂𑀢𑀻𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀜𑁆𑀜𑀸𑀧𑀸𑀤𑀓𑀧𑀜𑁆𑀘𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀧𑀸𑀤𑀓𑀢𑁆𑀣𑀸𑀬 𑀬𑀁𑀅𑀪𑀺𑀜𑁆𑀜𑀸𑀚𑀸𑀢𑀺𑀓𑀁 𑀭𑀽𑀧𑀸𑀯𑀘𑀭𑀧𑀜𑁆𑀘𑀫𑀚𑁆𑀛𑀸𑀦𑀁 𑀲𑀩𑁆𑀩𑀧𑀣𑀫𑀁 𑀲𑀫𑀸𑀧𑀚𑁆𑀚𑀺𑀬𑀢𑀺. 𑀢𑀢𑁄 𑀪𑀯𑀗𑁆𑀕𑀧𑀯𑀢𑁆𑀢𑀺𑀯𑀲𑁂𑀦 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀝𑁆𑀞𑁂𑀬𑁆𑀬𑀁. 𑀲𑀯𑀢𑁆𑀣𑀼𑀓𑀁 𑀲𑀢𑀭𑀽𑀧𑀲𑀳𑀲𑁆𑀲𑀭𑀽𑀧𑀸𑀤𑀺𑀓𑀁 𑀦𑀺𑀫𑁆𑀫𑀺𑀢𑀭𑀽𑀧𑀁. 𑀢𑀁 𑀅𑀥𑀺𑀝𑁆𑀞𑁂𑀬𑁆𑀬𑀁 𑀆𑀤𑀺 𑀬𑀲𑁆𑀲 𑀅𑀯𑀢𑁆𑀣𑀼𑀓𑀲𑁆𑀲 𑀆𑀯𑀺𑀪𑀸𑀯𑀢𑀺𑀭𑁄𑀪𑀸𑀯𑀸𑀤𑀺𑀓𑀲𑁆𑀲 𑀓𑀫𑁆𑀫𑀲𑁆𑀲𑀸𑀢𑀺 𑀅𑀥𑀺𑀝𑁆𑀞𑁂𑀬𑁆𑀬𑀸𑀤𑀺𑀓𑀁. 𑀆𑀯𑀚𑁆𑀚𑀺𑀢𑁆𑀯𑀸 𑀧𑀭𑀺𑀓𑀫𑁆𑀫𑀁𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀇𑀤𑁆𑀥𑀺𑀯𑀺𑀥𑁂 𑀢𑀸𑀯 𑀬𑀁𑀬𑀁𑀲𑀢𑀸𑀤𑀺𑀓𑀁 𑀦𑀺𑀫𑁆𑀫𑀺𑀢𑀭𑀽𑀧𑀁𑀯𑀸 𑀆𑀯𑀺𑀪𑀸𑀯𑀸𑀤𑀺𑀓𑀁 𑀦𑀺𑀫𑁆𑀫𑀺𑀢𑀓𑀫𑁆𑀫𑀁𑀯𑀸 𑀦𑀺𑀧𑁆𑀨𑀸𑀤𑁂𑀢𑀼𑀁 𑀇𑀘𑁆𑀙𑀢𑀺. 𑀢𑀁 𑀢𑀁 𑀅𑀯𑀚𑁆𑀚𑀺𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀢𑀁 𑀳𑁄𑀫𑀺 𑀲𑀳𑀲𑁆𑀲𑀁 𑀳𑁄𑀫𑀻𑀢𑀺𑀯𑀸 𑀲𑀢𑀁 𑀳𑁄𑀢𑀼 𑀲𑀳𑀲𑁆𑀲𑀁 𑀳𑁄𑀢𑀽𑀢𑀺𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀳𑁄𑀢𑀼 𑀏𑀯𑀜𑁆𑀘𑁂𑀯𑀜𑁆𑀘 𑀳𑁄𑀢𑀽𑀢𑀺𑀯𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. 𑀤𑀺𑀩𑁆𑀩𑀲𑁄𑀢𑀸𑀤𑀻𑀲𑀼 𑀧𑀦 𑀬𑀁 𑀬𑀁 𑀆𑀭𑀫𑁆𑀫𑀡𑀁 𑀲𑁄𑀢𑀼𑀁𑀯𑀸 𑀧𑀲𑁆𑀲𑀺𑀢𑀼𑀁𑀯𑀸 𑀚𑀸𑀦𑀺𑀢𑀼𑀁𑀯𑀸 𑀅𑀦𑀼𑀲𑁆𑀲𑀭𑀺𑀢𑀼𑀁𑀯𑀸 𑀇𑀘𑁆𑀙𑀢𑀺. 𑀢𑀁 𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀲𑀼𑀓𑀲𑁆𑀲 𑀅𑀲𑀼𑀓𑀸𑀦𑀁𑀯𑀸 𑀲𑀤𑁆𑀤𑀁 𑀲𑀼𑀡𑁄𑀫𑀻𑀢𑀺𑀆𑀤𑀺𑀦𑀸 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁 𑀆𑀕𑀢𑀫𑁂𑀯. 𑀬𑀣𑀸𑀳 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀲𑀘𑁂 𑀲𑀢𑀁 𑀇𑀘𑁆𑀙𑀢𑀺. 𑀲𑀢𑀁 𑀳𑁄𑀫𑀻𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀢𑀺. 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀳𑁂𑀯 𑀲𑀢𑀁 𑀳𑁄𑀢𑀻𑀢𑀺. 𑀢𑀢𑁆𑀣𑀘 𑀆𑀤𑀺𑀢𑁄 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁 𑀧𑀭𑀺𑀓𑀫𑁆𑀫 𑀘𑀺𑀢𑁆𑀢𑀲𑁆𑀲 𑀲𑀫𑀸𑀤𑀸𑀦𑀢𑁆𑀣𑀸𑀬 𑀳𑁄𑀢𑀺. 𑀧𑀘𑁆𑀙𑀺𑀫𑀁 𑀧𑀦 𑀅𑀪𑀺𑀜𑁆𑀜𑀸𑀬 𑀅𑀦𑀼 𑀩𑀮𑀧𑁆𑀧𑀤𑀸𑀦𑀢𑁆𑀣𑀸𑀬𑀸𑀢𑀺. 𑀢𑀣𑀸 𑀳𑀺 𑀧𑀸𑀤𑀓𑀚𑁆𑀛𑀸𑀦𑀩𑀮𑁂𑀦 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀁 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁𑀦𑀸𑀫 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀕𑀢𑀺𑀓𑀁 𑀳𑁄𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀓𑀸𑀮𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀲𑁆𑀫𑀺𑀁 𑀪𑀯𑁂 𑀅𑀢𑀻𑀢𑀁 𑀥𑀫𑁆𑀫𑀚𑀸𑀢𑀁 𑀬𑀸𑀯 𑀧𑀝𑀺𑀲𑀦𑁆𑀥𑀺𑀬𑀸 𑀚𑀸𑀦𑀸𑀢𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺. 𑀲𑁂𑀲𑀸𑀪𑀺𑀜𑁆𑀜𑀸𑀲𑀼𑀧𑀺 𑀢𑀲𑁆𑀲 𑀜𑀸𑀡𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑁄 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄𑀢𑀺. 𑀣𑁂𑀭𑁂𑀦 𑀧𑀦 𑀧𑀘𑁆𑀙𑀺𑀫𑀁 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁𑀦𑀸𑀫 𑀦 𑀲𑀩𑁆𑀩𑁂𑀲𑀁 𑀳𑁄𑀢𑀺. 𑀦 𑀳𑀺 𑀅𑀪𑀺𑀜𑁆𑀜𑀸𑀲𑀼 𑀯𑀲𑀻𑀪𑀸𑀯𑀧𑀢𑁆𑀢𑀸𑀦𑀁 𑀧𑀼𑀦 𑀧𑀸𑀤𑀓𑀚𑁆𑀛𑀸𑀦𑁂𑀦 𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀢𑀁 𑀇𑀥 𑀦𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀽𑀧𑀸𑀤𑀻𑀲𑀼𑀆𑀮𑀫𑁆𑀩𑀡𑁂𑀲𑀼𑀬𑀣𑀸𑀭𑀳𑀫𑀧𑁆𑀧𑁂𑀢𑀻𑀢𑀺 𑀏𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀢𑀸𑀯 𑀢𑁂𑀓𑀸𑀮𑀺𑀓𑀪𑀽𑀢𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀢𑀺. 𑀢𑀜𑁆𑀳𑀺 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼 𑀬𑀁 𑀬𑀁 𑀦𑀺𑀧𑁆𑀨𑀸𑀤𑁂𑀢𑀺. 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀧𑀦 𑀓𑀸𑀬𑀕𑀢𑀺𑀓𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦𑀓𑀸𑀬𑁂𑀦 𑀆𑀓𑀸𑀲𑁂𑀕𑀫𑀦𑀓𑀸𑀮𑁂 𑀅𑀢𑀻𑀢𑀁 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀓𑀸𑀬𑀁 𑀘𑀺𑀢𑁆𑀢𑀕𑀢𑀺𑀓𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀫𑀦𑀓𑀸𑀮𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀓𑀸𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀢𑀣𑀸𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀦 𑀢𑀲𑁆𑀲 𑀜𑀸𑀡𑀲𑁆𑀲 𑀓𑀺𑀜𑁆𑀘𑀺𑀭𑀽𑀧𑀁 𑀆𑀭𑀫𑁆𑀫𑀡 𑀫𑀢𑁆𑀢𑀁 𑀳𑁄𑀢𑀺. 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁. 𑀓𑀺𑀜𑁆𑀘𑀺 𑀯𑀢𑁆𑀣𑀸𑀭𑀫𑁆𑀫𑀡 𑀧𑀼𑀭𑁂𑀚𑀸𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀸𑀕𑀢𑁂 𑀇𑀤𑀁𑀦𑀸𑀫 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀦 𑀓𑀸𑀮𑁂 𑀅𑀦𑀸𑀕𑀢𑀁 𑀢𑀁𑀢𑀁𑀭𑀽𑀧𑀥𑀫𑁆𑀫𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀲𑀤𑁆𑀤𑁄 𑀤𑀺𑀩𑁆𑀩𑀲𑁄𑀢𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀅𑀢𑀻𑀢𑁂 𑀲𑀢𑁆𑀢𑀤𑀺𑀯𑀲𑀸𑀦𑀺 𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀸𑀦𑀻𑀢𑀺 𑀏𑀢𑁆𑀣𑀦𑁆𑀢𑀭𑁂 𑀓𑀸𑀮𑁂 𑀅𑀢𑀻𑀢𑀸 𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀽𑀢𑀁 𑀧𑀭𑀲𑁆𑀲𑀘𑀺𑀢𑁆𑀢𑀁 𑀘𑀢𑁆𑀢𑀸𑀭𑁄𑀯𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬 𑀜𑀸𑀡𑀲𑁆𑀲. 𑀘𑀺𑀢𑁆𑀢𑀜𑁆𑀳𑀺 𑀚𑀸𑀦𑀦𑁆𑀢𑁄 𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁𑀧𑀺 𑀇𑀘𑁆𑀙𑀦𑁆𑀢𑁄 𑀚𑀸𑀦𑀺𑀲𑁆𑀲𑀢𑀺𑀬𑁂𑀯. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 𑀓𑀼𑀲𑀮𑀸 𑀔𑀦𑁆𑀥𑀸 𑀘𑁂𑀢𑁄 𑀧𑀭𑀺𑀬𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀜𑀸𑀡𑀤𑁆𑀯𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀧𑀭𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀮𑀫𑁆𑀩𑀡𑀢𑀸𑀦𑀸𑀫 𑀲𑀦𑁆𑀢𑀢𑀺𑀯𑀲𑁂𑀦𑀯𑀸 𑀅𑀤𑁆𑀥𑀸 𑀯𑀲𑁂𑀦𑀯𑀸 𑀬𑁄𑀚𑀺𑀢𑀸. 𑀬𑀤𑀺 𑀳𑀺 𑀔𑀡𑀺𑀓𑀯𑀲𑁂𑀦 𑀬𑁄𑀚𑁂𑀬𑁆𑀬. 𑀆𑀯𑀚𑁆𑀚𑀦𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀘𑀺𑀢𑁆𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀦𑀺𑀭𑀼𑀤𑁆𑀥𑁂 𑀚𑀯𑀦𑀸𑀦𑀺𑀧𑀺 𑀢𑀤𑁂𑀯 𑀆𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀤𑁆𑀥𑀁 𑀅𑀢𑀻𑀢𑀁 𑀕𑀡𑁆𑀳𑀦𑁆𑀢𑀻𑀢𑀺 𑀢𑀸𑀦𑀺 𑀓𑀸𑀮𑀢𑁄 𑀆𑀯𑀚𑁆𑀚𑀦𑁂𑀦 𑀲𑀳 𑀪𑀺𑀦𑁆𑀦𑀸𑀮𑀫𑁆𑀩𑀡𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀦𑀘 𑀅𑀦𑀺𑀝𑁆𑀞𑁂 𑀫𑀕𑁆𑀕𑀨𑀮𑀯𑀻𑀣𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀓𑀸𑀮𑀫𑀢𑁆𑀢𑁂𑀦𑀸𑀧𑀺 𑀢𑁂𑀲𑀁 𑀢𑁂𑀦 𑀲𑀳 𑀪𑀺𑀦𑁆𑀦𑀸𑀮𑀫𑁆𑀩𑀡𑀢𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀦𑀼 𑀫𑀢𑀸𑀢𑀺. 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀦𑀸𑀫 𑀲𑀦𑁆𑀢𑀢𑀺𑀯𑀲𑁂𑀦 𑀅𑀤𑁆𑀥𑀸𑀯𑀲𑁂𑀦𑀘 𑀕𑀳𑁂𑀢𑀼𑀁 𑀬𑀼𑀢𑁆𑀢𑀦𑁆𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀔𑀡𑀺𑀓𑀧𑀘𑁆𑀘𑀼𑀧𑁆𑀧𑀦𑁆𑀦 𑀯𑀲𑁂𑀦𑁂𑀯 𑀬𑁄𑀚𑀺𑀢𑀁. 𑀦𑀳𑀺 𑀅𑀪𑀺𑀥𑀫𑁆𑀫𑁂 𑀅𑀢𑀻𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑀁 𑀲𑀦𑁆𑀢𑀢𑀺 𑀅𑀤𑁆𑀥𑀸𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀇𑀢𑀭𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀦 𑀢𑀼 𑀯𑀼𑀢𑁆𑀢𑁄. 𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀘𑁆𑀘𑁂𑀯 𑀧𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀆𑀯𑀚𑁆𑀚𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀺 𑀧𑀘𑁆𑀘𑁂𑀓𑀁 𑀅𑀢𑁆𑀢𑀦𑀸 𑀔𑀡𑀯𑀲𑁂𑀦 𑀲𑀳𑀼𑀧𑁆𑀧𑀦𑁆𑀦𑀸𑀦𑀺 𑀧𑀭𑀲𑁆𑀲 𑀘𑀺𑀢𑁆𑀢𑀸𑀦𑀺𑀕𑀡𑁆𑀳𑀦𑁆𑀢𑀻𑀢𑀺 𑀬𑀼𑀢𑁆𑀢𑀁, 𑀦𑀘 𑀢𑀸𑀦𑀺 𑀥𑀫𑁆𑀫𑀢𑁄 𑀪𑀺𑀦𑁆𑀦𑀸 𑀮𑀫𑁆𑀩𑀡𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀕𑀳𑀡𑀸 𑀓𑀸𑀭𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸. 𑀆𑀯𑀚𑁆𑀚𑀦𑀁𑀧𑀺 𑀳𑀺 𑀘𑀺𑀢𑁆𑀢𑀦𑁆𑀢𑁂𑀯 𑀆𑀯𑀚𑁆𑀚𑀢𑀺. 𑀚𑀯𑀦𑀸𑀦𑀺𑀘 𑀘𑀺𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑁂𑀯 𑀚𑀯𑀦𑁆𑀢𑀺. 𑀢𑀸𑀦𑀺𑀘 𑀲𑀩𑁆𑀩𑀸𑀦𑀺 𑀘𑀺𑀢𑁆𑀢𑀸𑀦𑀺𑀏𑀯 𑀳𑁄𑀦𑁆𑀢𑀻𑀢𑀺. 𑀅𑀢𑀻𑀢𑀸𑀦𑀦𑁆𑀢𑀭 𑀘𑀼𑀢𑀺𑀢𑁄 𑀧𑀦 𑀧𑀝𑁆𑀞𑀸𑀬 𑀅𑀢𑀻𑀢𑀸 𑀔𑀦𑁆𑀥𑀸 𑀔𑀦𑁆𑀥𑀼𑀧𑀦𑀺 𑀩𑀦𑁆𑀥𑀸 𑀦𑀸𑀫 𑀕𑁄𑀢𑁆𑀢𑀓𑀲𑀺𑀡 𑀦𑀺𑀫𑀺𑀢𑁆𑀢𑀸𑀤𑀺𑀓𑀸 𑀧𑀜𑁆𑀜𑀢𑁆𑀢𑀺𑀬𑁄 𑀦𑀺𑀩𑁆𑀩𑀸𑀦𑀜𑁆𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲𑀸𑀢𑀺 𑀏𑀯𑀁 𑀭𑀽𑀧𑀸𑀤𑀻𑀲𑀼 𑀙𑀲𑀼 𑀆𑀮𑀫𑁆𑀩𑀡𑁂𑀲𑀼 𑀬𑀣𑀸𑀭𑀳 𑀫𑀧𑁆𑀧𑁂𑀢𑀻𑀢𑀺. 𑀇𑀤𑀸𑀦𑀺 𑀅𑀪𑀺𑀜𑁆𑀜𑀸𑀯𑀲𑁂𑀦 𑀧𑀯𑀓𑁆𑀔𑀲𑁆𑀲 𑀢𑀲𑁆𑀲 𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲 𑀓𑀺𑀘𑁆𑀘𑀪𑁂𑀤𑁂𑀦 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀇𑀤𑁆𑀥𑀺𑀯𑀺𑀥𑀦𑁆𑀢𑀺𑀆𑀤𑀺𑀕𑀸𑀣 𑀫𑀸𑀳. 𑀢𑀢𑁆𑀣 𑀬𑀁 𑀬𑀁 𑀅𑀥𑀺𑀝𑁆𑀞𑀸𑀢𑀺. 𑀬𑀣𑀸 𑀬𑀣𑀸𑀘 𑀅𑀥𑀺𑀝𑁆𑀞𑀸𑀢𑀺. 𑀢𑀲𑁆𑀲 𑀢𑀲𑁆𑀲 𑀢𑀣𑀸 𑀢𑀣𑀸𑀯𑀸 𑀇𑀚𑁆𑀛𑀦 𑀲𑀗𑁆𑀔𑀸𑀢𑁄 𑀯𑀺𑀥𑁄 𑀓𑁄𑀝𑁆𑀞𑀸𑀲𑁄 𑀧𑀓𑀸𑀭𑁄𑀯𑀸 𑀏𑀢𑀲𑁆𑀲𑀸𑀢𑀺 𑀇𑀤𑁆𑀥𑀺𑀯𑀺𑀥𑀁. 𑀢𑀁 𑀧𑀦 𑀢𑀺𑀯𑀺𑀥𑀁 𑀅𑀥𑀺𑀝𑁆𑀞𑀸 𑀦𑀺𑀤𑁆𑀥𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀫𑀦𑁄𑀫𑀬𑀺𑀤𑁆𑀥𑀺 𑀯𑀲𑁂𑀦. 𑀢𑀢𑁆𑀣 𑀅𑀢𑁆𑀢𑀦𑁄 𑀧𑀓𑀢𑀺𑀯𑀡𑁆𑀡𑀁 𑀅𑀯𑀺𑀚𑀳𑀺𑀢𑁆𑀯𑀸 𑀢𑀲𑁆𑀲𑁂𑀯 𑀲𑀢 𑀲𑀳𑀲𑁆𑀲𑀸𑀤𑀺 𑀩𑀳𑀼𑀪𑀸𑀯 𑀓𑀭𑀡 𑀯𑀲𑁂𑀦𑀯𑀸 𑀆𑀓𑀸𑀲𑀕𑀫𑀦𑀸𑀤𑀺𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀦𑀸𑀦𑀸𑀯𑀡𑁆𑀡 𑀧𑀸𑀝𑀺𑀳𑀸𑀭𑀺𑀬 𑀤𑀲𑁆𑀲𑀦 𑀯𑀲𑁂𑀦𑀯𑀸 𑀧𑀯𑀢𑁆𑀢𑀺𑀢𑀸 𑀇𑀤𑁆𑀥𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀦𑀸𑀫. 𑀧𑀓𑀢𑀺𑀯𑀡𑁆𑀡𑀁 𑀧𑀦 𑀯𑀺𑀚𑀳𑀺𑀢𑁆𑀯𑀸 𑀅𑀢𑁆𑀢𑀸𑀦𑀫𑁂𑀯 𑀓𑀼𑀫𑀸𑀭𑀯𑀡𑁆𑀡𑀦𑀸𑀕𑀯𑀡𑁆𑀡𑀸𑀤𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀦𑀸𑀫. 𑀅𑀢𑁆𑀢𑀦𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀅𑀜𑁆𑀜𑀁 𑀲𑀩𑁆𑀩𑀲𑁄 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀲𑀭𑀻𑀭𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸 𑀇𑀤𑁆𑀥𑀺 𑀫𑀦𑁄𑀫𑀬𑀺𑀤𑁆𑀥𑀺𑀦𑀸𑀫. 𑀤𑀺𑀯𑁂 𑀪𑀯𑀁 𑀤𑀺𑀩𑁆𑀩𑀁. 𑀤𑁂𑀯𑀮𑁄𑀓𑁂 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀩𑁆𑀩𑀜𑁆𑀘 𑀢𑀁 𑀲𑁄𑀢𑀜𑁆𑀘𑀸𑀢𑀺 𑀤𑀺𑀩𑁆𑀩𑀲𑁄𑀢𑀁. 𑀤𑁂𑀯𑀸𑀦𑀁 𑀉𑀴𑀸𑀭𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀤𑀽𑀭𑁂𑀧𑀺 𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀆𑀭𑀫𑁆𑀫𑀡𑀲𑀫𑁆𑀧𑀝𑀺𑀘𑁆𑀙𑀦𑀲𑀫𑀢𑁆𑀣𑀁 𑀧𑀲𑀸𑀤𑀲𑁄𑀢𑀁. 𑀤𑀺𑀩𑁆𑀩𑀲𑁄𑀢𑀲𑀤𑀺𑀲𑀢𑁆𑀢𑀸 𑀧𑀦 𑀇𑀤𑀁 𑀅𑀪𑀺𑀜𑁆𑀜𑀸𑀜𑀸𑀡𑀁𑀧𑀺 𑀤𑀺𑀩𑁆𑀩𑀲𑁄𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀲𑀺𑀡𑀚𑁆𑀛𑀸𑀦 𑀲𑀗𑁆𑀔𑀸𑀢𑁂𑀦𑀯𑀸 𑀤𑀺𑀩𑁆𑀩𑀯𑀺𑀳𑀸𑀭𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀲𑀬𑀜𑁆𑀘 𑀢𑀲𑁆𑀫𑀺𑀁 𑀤𑀺𑀩𑁆𑀩𑀯𑀺𑀳𑀸𑀭𑁂 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀺𑀩𑁆𑀩𑀜𑁆𑀘 𑀢𑀁 𑀲𑁄𑀢𑀜𑁆𑀘𑀸𑀢𑀺 𑀤𑀺𑀩𑁆𑀩𑀲𑁄𑀢𑀁. 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀯𑀺𑀚𑀸𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀁. 𑀢𑀤𑁂𑀯 𑀘𑁂𑀢𑁄𑀧𑀭𑀺𑀬𑀸𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀦𑀺𑀯𑀸𑀲𑁄 𑀯𑀼𑀘𑁆𑀘𑀢𑀺 𑀅𑀢𑀻𑀢𑀪𑀯𑁂𑀲𑀼 𑀅𑀢𑁆𑀢𑀦𑁄 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀁 𑀆𑀕𑀢𑀸 𑀲𑀼𑀝𑁆𑀞𑀼 𑀯𑀺𑀤𑀺𑀢𑀸 𑀥𑀫𑁆𑀫𑀸. 𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀕𑁄𑀘𑀭 𑀦𑀺𑀯𑀸𑀲𑀯𑀲𑁂𑀦 𑀦𑀺𑀯𑀲𑀺𑀁𑀲𑀼 𑀅𑀢𑁆𑀢𑀦𑁄 𑀙𑀤𑁆𑀯𑀸𑀭𑀺𑀓𑀸𑀦𑀺 𑀘𑀺𑀢𑁆𑀢𑀸𑀦𑀺 𑀏𑀢𑁆𑀣𑀸𑀢𑀺 𑀓𑀢𑁆𑀯𑀸. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀧𑀦 𑀧𑀭𑁂𑀲𑀁 𑀙𑀤𑁆𑀯𑀸𑀭𑀕𑀳𑀺𑀢𑀸𑀧𑀺 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀦𑀺𑀯𑀸𑀲𑁄 𑀳𑁄𑀢𑀺𑀬𑁂𑀯, 𑀧𑀼𑀩𑁆𑀩𑁂 𑀦𑀺𑀯𑀸𑀲𑀲𑁆𑀲 𑀅𑀦𑀼𑀲𑁆𑀲𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺. 𑀇𑀥 𑀧𑀦 𑀢𑀁 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼. 𑀢𑀁 𑀲𑀤𑀺𑀲𑀢𑁆𑀢𑀸 𑀇𑀤𑀁 𑀅𑀪𑀺𑀜𑁆𑀜𑀸𑀜𑀸𑀡𑀁𑀧𑀺 𑀤𑀺𑀩𑁆𑀩𑀘𑀓𑁆𑀔𑀽𑀢𑀺 𑀯𑀼𑀘𑁆𑀘𑀢𑀺. 𑀤𑀺𑀩𑁆𑀩𑀯𑀺𑀳𑀸𑀭 𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑁆𑀢𑀸 𑀲𑀬𑀜𑁆𑀘 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀤𑀺𑀩𑁆𑀩𑀜𑁆𑀘 𑀢𑀁 𑀘𑀓𑁆𑀔𑀼𑀘𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼. 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀇𑀫𑀲𑁆𑀲𑁂𑀯 𑀧𑀭𑀺𑀪𑀡𑁆𑀟𑀜𑀸𑀡𑀸𑀦𑀺𑀦𑀸𑀫. 𑀦𑀳𑀺 𑀢𑁂𑀲𑀁 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀲𑀼𑀁 𑀘𑀺𑀢𑁆𑀢𑀧𑀭𑀺𑀤𑀫𑀦𑀧𑀭𑀺𑀓𑀫𑁆𑀫𑀁𑀦𑀸𑀫 𑀅𑀢𑁆𑀣𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀧𑀝𑀺𑀮𑀤𑁆𑀥𑁂 𑀢𑁂𑀲𑀁𑀧𑀺 𑀧𑀝𑀺𑀮𑀤𑁆𑀥𑀢𑁆𑀢𑀸𑀢𑀺. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦𑀺𑀭𑀬𑁂𑀲𑀼 𑀤𑀼𑀓𑁆𑀔𑀁 𑀤𑁂𑀯𑁂𑀲𑀼𑀯𑀸 𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀅𑀢𑀻𑀢𑀁 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑀁 𑀓𑀫𑁆𑀫𑀸𑀭𑀫𑁆𑀫𑀡𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀢𑁄 𑀘𑀯𑀺𑀢𑁆𑀯𑀸 𑀓𑀢𑁆𑀣 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀁 𑀅𑀦𑀸𑀕𑀢𑁂 𑀧𑀯𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀢𑁂𑀲𑀁 𑀅𑀦𑀸𑀕𑀢𑀔𑀦𑁆𑀥𑀸𑀭𑀫𑁆𑀫𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀧𑀼𑀩𑁆𑀩𑁂 𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀜𑀸𑀡𑀁 𑀯𑀺𑀬𑀘 𑀲𑀩𑁆𑀩𑀁𑀧𑀺 𑀅𑀦𑀸𑀕𑀢𑀥𑀫𑁆𑀫𑀚𑀸𑀢𑀁 𑀏𑀢𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺𑀬𑁂𑀯. 𑀏𑀢𑀜𑁆𑀳𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀕𑀢𑀺𑀓𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀦𑀸𑀕𑀢𑁂 𑀲𑀢𑁆𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀥𑀫𑁆𑀫𑀸 𑀤𑀼𑀢𑀻𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀁𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲 𑀯𑀺𑀲𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀫𑁆𑀧𑀺 𑀬𑀼𑀢𑁆𑀢𑀁𑀯𑀺𑀬 𑀤𑀺𑀲𑁆𑀲𑀢𑀺.

𑀦𑀳𑀺 𑀪𑀯𑀦𑁆𑀢𑀭𑁂𑀧𑀺 𑀅𑀦𑀸𑀯𑀢𑀥𑀫𑁆𑀫𑁂 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑀁 𑀏𑀢𑀁 𑀇𑀫𑀲𑁆𑀫𑀺𑀁 𑀪𑀯𑁂 𑀅𑀦𑀸𑀕𑀢𑀥𑀫𑁆𑀫𑁂 𑀦𑀚𑀸𑀦𑀸𑀢𑀻𑀢𑀺 𑀲𑀓𑁆𑀓𑀸 𑀪𑀯𑀺𑀢𑀼𑀁. 𑀬𑀣𑀸 𑀘𑁂𑀢𑀁, 𑀢𑀣𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁𑀧𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀧𑀭𑀲𑀦𑁆𑀢𑀸𑀦𑀕𑀢𑁂 𑀅𑀢𑀻𑀢𑀥𑀫𑁆𑀫𑁂𑀢𑀺. 𑀧𑀸𑀴𑀺𑀬𑀁 𑀧𑀦 𑀅𑀝𑁆𑀞𑀓𑀣𑀸𑀲𑀼𑀘 𑀪𑀯𑀦𑁆𑀢𑀭𑀕𑀢𑀥𑀫𑁆𑀫𑁂𑀳𑀺 𑀏𑀯 𑀜𑀸𑀡𑀤𑁆𑀯𑀬𑀁 𑀬𑁄𑀚𑀺𑀢𑀁. 𑀢𑀁 𑀧𑀦 𑀅𑀲𑀸𑀥𑀸𑀭𑀡𑀓𑀸𑀮𑀯𑀲𑁂𑀦 𑀆𑀦𑀼𑀪𑀸𑀯𑀯𑀺𑀲𑁂𑀲𑀧𑀸𑀓𑀝𑀢𑁆𑀣𑀁 𑀬𑁄𑀚𑀺𑀢𑀦𑁆𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀕𑁄𑀘𑀭𑀪𑁂𑀤𑁄𑀢𑀺 𑀤𑀲𑀓𑀲𑀺𑀡𑀸𑀤𑀻𑀲𑀼 𑀕𑁄𑀘𑀭𑁂𑀲𑀼 𑀲𑀫𑀣𑀚𑁆𑀛𑀸𑀦𑀸𑀦𑀁 𑀧𑀯𑀢𑁆𑀢𑀺𑀪𑁂𑀤𑁄.

𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀦𑀬𑁄.

𑁧𑁭𑁧. 𑀲𑀩𑁆𑀩𑀮𑁄𑀓𑀺𑀬𑀫𑀳𑀸𑀚𑀦𑁂𑀳𑀺 𑀬𑀣𑀸𑀤𑀺𑀝𑁆𑀞𑀁 𑀧𑀼𑀕𑁆𑀕𑀮𑀲𑀢𑁆𑀢𑀇𑀢𑁆𑀣𑀺 𑀧𑀼𑀭𑀺𑀲𑀸𑀤𑀺𑀓𑀁 𑀦𑀺𑀘𑁆𑀘 𑀥𑀼𑀯 𑀲𑀼𑀔 𑀅𑀢𑁆𑀢 𑀦𑀺𑀫𑀺𑀢𑁆𑀢𑀜𑁆𑀘 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀓𑀺𑀭𑀺𑀬𑀸 𑀓𑀫𑁆𑀫𑀁. 𑀪𑀸𑀯𑀦𑀸𑀧𑀬𑁄𑀕𑁄. 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀁. 𑀯𑀺𑀧𑀲𑁆𑀲𑀦𑀸 𑀏𑀯 𑀯𑀸 𑀓𑀫𑁆𑀫𑀦𑁆𑀢𑀺 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀁. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀲𑁆𑀲 𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀪𑀼𑀫𑀻𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀔𑀦𑁆𑀥𑀸𑀤𑀺𑀥𑀫𑁆𑀫𑀚𑀸𑀢𑀁. 𑀯𑀺𑀧𑀲𑁆𑀲𑀦𑀸 𑀓𑀫𑁆𑀫𑀫𑁂𑀯 𑀯𑀸 𑀉𑀢𑁆𑀢𑀭𑀼𑀢𑁆𑀢𑀭𑀲𑁆𑀲 𑀪𑀸𑀯𑀦𑀸 𑀯𑀺𑀲𑁂𑀲𑀲𑁆𑀲 𑀆𑀦𑀺𑀲𑀁𑀲𑀯𑀺𑀲𑁂𑀲𑀲𑁆𑀲𑀯𑀸 𑀞𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑁆𑀢𑀯𑀺𑀥𑁂𑀦 𑀯𑀺𑀲𑀼𑀤𑁆𑀥𑀺 𑀲𑀗𑁆𑀕𑀳𑁄 𑀢𑀻𑀡𑀺 𑀮𑀓𑁆𑀔𑀡𑀸𑀦𑀻𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀦𑀺𑀘𑁆𑀘𑀲𑀻𑀮𑀫𑁂𑀯 𑀲𑀬𑀜𑁆𑀘 𑀤𑀼𑀲𑁆𑀲𑀺𑀮𑁆𑀬𑀫𑀮𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀓𑀸𑀬𑀁 𑀯𑀸𑀘𑀜𑁆𑀘 𑀢𑀢𑁄 𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀻𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀺. 𑀲𑀼𑀪𑀸𑀯𑀺𑀢 𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑁂𑀯 𑀲𑀬𑀜𑁆𑀘 𑀦𑀻𑀯𑀭𑀡𑀫𑀮𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀜𑁆𑀘 𑀢𑀢𑁄 𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀻𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀥𑀫𑁆𑀫𑀯𑀯𑀢𑁆𑀣𑀸𑀦𑀜𑀸𑀡𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀏𑀯 𑀢𑀁 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑀮𑀢𑁄 𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀻𑀢𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀲𑁄𑀴𑀲𑀯𑀺𑀥𑀁 𑀅𑀝𑁆𑀞𑀯𑀺𑀥𑀁 𑀓𑀗𑁆𑀔𑀁 𑀯𑀺𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀸. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀜𑀸𑀡𑀁. 𑀲𑀸 𑀏𑀯 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁 𑀅𑀳𑁂𑀢𑀼 𑀤𑀺𑀝𑁆𑀞𑀺 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀳𑀺 𑀲𑀤𑁆𑀥𑀺𑀁 𑀬𑀣𑀸𑀯𑀼𑀢𑁆𑀢𑀸𑀳𑀺 𑀤𑀼𑀯𑀺𑀥𑀸𑀳𑀺 𑀓𑀗𑁆𑀔𑀸𑀳𑀺 𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀻𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺. 𑀫𑀕𑁆𑀕𑁄𑀘 𑀅𑀫𑀕𑁆𑀕𑁄𑀘 𑀫𑀕𑁆𑀕𑀸𑀫𑀕𑁆𑀕𑀸. 𑀢𑀢𑁆𑀣 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀸𑀥𑀺𑀕𑀫𑀦𑀲𑁆𑀲 𑀉𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑀯𑀺𑀥𑀺𑀯𑀸 𑀅𑀭𑀺𑀬𑀫𑀕𑁆𑀕𑁄𑀯𑀸 𑀫𑀕𑁆𑀕𑁄𑀦𑀸𑀫. 𑀢𑀲𑁆𑀲 𑀅𑀦𑀼𑀧𑀸𑀬𑀪𑀽𑀢𑁄 𑀫𑀦𑀲𑀺𑀓𑀸𑀭𑁄𑀯𑀸 𑀅𑀥𑀺𑀫𑀸𑀦𑀯𑀢𑁆𑀣𑀽𑀦𑀺𑀯𑀸 𑀅𑀫𑀕𑁆𑀕𑁄𑀦𑀸𑀫. 𑀫𑀕𑁆𑀕𑀲𑁆𑀲 𑀫𑀕𑁆𑀕𑀢𑁄 𑀅𑀫𑀕𑁆𑀕𑀲𑁆𑀲𑀘 𑀅𑀫𑀕𑁆𑀕𑀢𑁄 𑀚𑀸𑀦𑀦𑀁 𑀤𑀲𑁆𑀲𑀦𑀜𑁆𑀘 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀁. 𑀢𑀫𑁂𑀯 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬 𑀯𑀺𑀲𑁄𑀥𑀦𑀢𑁄 𑀯𑀺𑀲𑀼𑀤𑁆𑀥𑀻𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫. 𑀉𑀧𑀭𑀺 𑀯𑀺𑀲𑁂𑀲𑀁 𑀧𑀝𑀺𑀧𑀚𑁆𑀚𑀦𑁆𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸. 𑀯𑀺𑀧𑀲𑁆𑀲𑀦𑀸𑀧𑀭𑀁𑀧𑀭𑀲𑀗𑁆𑀔𑀸𑀢𑁄 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄. 𑀧𑀝𑀺𑀧𑀤𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀁. 𑀢𑀫𑁂𑀯 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀯𑀺𑀲𑀼𑀤𑁆𑀥𑀻𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀸𑀫, 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢 𑀜𑀸𑀡𑀤𑀲𑁆𑀲𑀦𑀫𑁂𑀯 𑀲𑀫𑁆𑀫𑁄𑀳𑀫𑀮𑀢𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀯𑀺𑀲𑀼𑀤𑁆𑀥𑀻𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀸𑀫. 𑀏𑀢𑁆𑀣𑀘 𑀲𑀼𑀢𑀫𑀬𑀸𑀤𑀺𑀯𑀲𑁂𑀦 𑀲𑀺𑀤𑁆𑀥𑀁 𑀅𑀦𑀼𑀫𑀸𑀦 𑀜𑀸𑀡𑀁𑀧𑀺 𑀜𑀸𑀡𑀫𑁂𑀯𑀸𑀢𑀺 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑀧𑀘𑁆𑀘𑀓𑁆𑀔𑀜𑀸𑀡𑀫𑁂𑀯 𑀕𑀳𑁂𑀢𑀼𑀁 𑀲𑀩𑁆𑀩𑀢𑁆𑀣 𑀤𑀲𑁆𑀲𑀦𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑀓𑁆𑀔𑀻𑀬𑀦𑁆𑀢𑀺 𑀲𑀮𑁆𑀮𑀓𑁆𑀔𑀻𑀬𑀦𑁆𑀢𑀺 𑀇𑀫𑁂 𑀅𑀦𑀺𑀘𑁆𑀘𑀸𑀏𑀯𑀸𑀢𑀺 𑀏𑀓𑀦𑁆𑀢𑁂𑀦 𑀯𑀺𑀦𑀺𑀘𑁆𑀙𑀻𑀬𑀦𑁆𑀢𑀺 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁 𑀅𑀦𑀺𑀘𑁆𑀘𑀢𑀸 𑀏𑀯 𑀮𑀓𑁆𑀔𑀡𑀦𑁆𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀧𑀼𑀩𑁆𑀩𑀧𑀤𑁂 𑀪𑀸𑀯𑀧𑀘𑁆𑀘𑀬𑀮𑁄𑀧𑁄. 𑀅𑀜𑁆𑀜𑁄𑀳𑀺 𑀅𑀦𑀺𑀘𑁆𑀘𑁄, 𑀅𑀜𑁆𑀜𑀸 𑀅𑀦𑀺𑀘𑁆𑀘𑀢𑀸𑀢𑀺. 𑀢𑀢𑁆𑀣 𑀬𑀣𑀸𑀕𑀫𑀦𑀓𑁆𑀭𑀺𑀬𑀸𑀬𑁄𑀕𑁂𑀦 𑀧𑀼𑀭𑀺𑀲𑁄 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀦 𑀧𑀦 𑀕𑀫𑀦 𑀓𑁆𑀭𑀺𑀬𑀸 𑀧𑀼𑀭𑀺𑀲𑁄. 𑀦𑀘 𑀧𑀼𑀭𑀺𑀲𑁄 𑀕𑀫𑀦𑀓𑁆𑀭𑀺𑀬𑀸. 𑀅𑀜𑁆𑀜𑀸 𑀳𑀺 𑀓𑁆𑀭𑀺𑀬𑀸, 𑀅𑀜𑁆𑀜𑁄 𑀧𑀼𑀭𑀺𑀲𑁄. 𑀢𑀣𑀸 𑀅𑀦𑀺𑀘𑁆𑀘𑀢𑀸𑀬𑁄𑀕𑁂𑀦 𑀲𑀩𑁆𑀩𑁄 𑀲𑀗𑁆𑀔𑀢𑀥𑀫𑁆𑀫𑁄 𑀅𑀦𑀺𑀘𑁆𑀘𑁄𑀢𑀺 𑀯𑀼𑀘𑁆𑀘𑀢𑀺. 𑀦 𑀧𑀦 𑀅𑀦𑀺𑀘𑁆𑀘𑀢𑀸 𑀲𑁄 𑀥𑀫𑁆𑀫𑁄, 𑀦𑀘 𑀲𑁄 𑀥𑀫𑁆𑀫𑁄 𑀅𑀦𑀺𑀘𑁆𑀘𑀢𑀸. 𑀅𑀜𑁆𑀜𑀸 𑀳𑀺 𑀅𑀦𑀺𑀘𑁆𑀘𑀢𑀸, 𑀅𑀜𑁆𑀜𑁄 𑀲𑁄 𑀥𑀫𑁆𑀫𑁄𑀢𑀺. 𑀓𑀢𑀫𑀸 𑀧𑀦 𑀲𑀸 𑀅𑀦𑀺𑀘𑁆𑀘𑀢𑀸𑀢𑀺. 𑀯𑀺𑀧𑀭𑀺𑀡𑀸𑀫𑀸 𑀓𑀸𑀭𑁄. 𑀚𑀻𑀭𑀡𑀸𑀓𑀸𑀭𑁄 𑀪𑀺𑀚𑁆𑀚𑀦𑀸𑀓𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀦 𑀆𑀓𑀸𑀭𑀁 𑀤𑀺𑀲𑁆𑀯𑀸 𑀢𑀤𑀸𑀓𑀸𑀭𑀯𑀦𑁆𑀢𑁂 𑀥𑀫𑁆𑀫𑁂 𑀜𑀸𑀡𑀁 𑀧𑀯𑀢𑁆𑀢𑀢𑀺 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀘𑁆𑀘𑁄𑀢𑀺. 𑀢𑀲𑁆𑀫𑀸 𑀲𑀸 𑀅𑀦𑀺𑀘𑁆𑀘𑀢𑀸𑀬𑁂𑀯 𑀇𑀥 𑀮𑀓𑁆𑀔𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺 𑀤𑁆𑀯𑀻𑀲𑀼. 𑀢𑀢𑁆𑀣 𑀧𑀦 𑀅𑀪𑀺𑀡𑁆𑀳𑀲𑀁𑀧𑀝𑀺𑀧𑀻𑀴𑀦𑀸𑀓𑀸𑀭𑁄 𑀤𑀼𑀓𑁆𑀔𑀢𑀸𑀦𑀸𑀫. 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀅𑀦𑀢𑁆𑀢𑀢𑀸𑀦𑀸𑀫𑀸𑀢𑀺. 𑀬𑀣𑀸𑀯𑀼𑀢𑁆𑀢𑀸𑀬 𑀧𑀦 𑀅𑀦𑀺𑀘𑁆𑀘𑀢𑀸𑀬 𑀲𑀳 𑀅𑀦𑀺𑀘𑁆𑀘𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑁂𑀦 𑀯𑀸 𑀥𑀫𑁆𑀫𑁂𑀦 𑀲𑀳 𑀅𑀦𑀺𑀘𑁆𑀘𑀢𑀸𑀬 𑀅𑀦𑀼𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀏𑀲 𑀦𑀬𑁄 𑀲𑁂𑀲𑀸𑀲𑀼𑀧𑀺 𑀤𑁆𑀯𑀻𑀲𑀼. 𑀬𑀸𑀯 𑀲𑀭𑀻𑀭𑁂 𑀥𑀫𑁆𑀫𑀸𑀦𑀁 𑀢𑀺𑀯𑀺𑀥𑀮𑀓𑁆𑀔𑀡𑀬𑀼𑀢𑁆𑀢𑀢𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀜𑁆𑀜𑀸𑀬𑀢𑀺. 𑀢𑀸𑀯 𑀢𑁂𑀲𑀼 𑀢𑀺𑀯𑀺𑀥𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀫𑀲𑀦𑀁 𑀆𑀫𑀲𑀦𑀁 𑀲𑀫𑁆𑀫𑀲𑀦𑀁. 𑀲𑀫𑁆𑀫𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁 𑀲𑀫𑁆𑀫𑀲𑀦𑀜𑀸𑀡𑀁. 𑀉𑀤𑀬𑁄 𑀯𑀼𑀘𑁆𑀘𑀢𑀺 𑀢𑀁𑀢𑀁 𑀔𑀡𑀸𑀦𑀼𑀭𑀽𑀧𑀁 𑀢𑀁𑀢𑀁 𑀧𑀘𑁆𑀘𑀬𑀸𑀦𑀼𑀭𑀽𑀧𑀜𑁆𑀘 𑀦𑀯𑀦𑀯𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼 𑀪𑀸𑀯𑁄 𑀘𑁂𑀯 𑀉𑀧𑀭𑀼𑀧𑀭𑀺 𑀯𑀟𑁆𑀠𑀦𑀜𑁆𑀘. 𑀯𑀬𑁄 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀬𑀢𑁆𑀣 𑀮𑀤𑁆𑀥𑀧𑀘𑁆𑀘𑀬𑀸 𑀦𑀯𑀦𑀯𑀸 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺 𑀘𑁂𑀯 𑀯𑀟𑁆𑀠𑀦𑁆𑀢𑀺𑀘. 𑀢𑀢𑁆𑀣 𑀢𑀢𑁆𑀣 𑀅𑀮𑀤𑁆𑀥𑀧𑀘𑁆𑀘𑀬𑀸𑀦𑀁 𑀧𑀼𑀭𑀸𑀡𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀥𑀸𑀦𑀁. 𑀲𑀫𑀽𑀳 𑀲𑀦𑁆𑀢𑀢𑀺𑀯𑀲𑁂𑀦 𑀧𑀦 𑀉𑀤𑀬𑀧𑀓𑁆𑀔𑀲𑁆𑀲𑀯𑀸 𑀯𑀬𑀧𑀓𑁆𑀔𑀲𑁆𑀲𑀯𑀸 𑀲𑀫𑀦𑀼𑀧𑀲𑁆𑀲𑀦𑀜𑀸𑀡𑀁 𑀉𑀤𑀬𑀩𑁆𑀩𑀬𑀜𑀸𑀡𑀁. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀓𑁆𑀔𑁂𑀲𑀼 𑀉𑀤𑀬𑀓𑁄𑀝𑁆𑀞𑀸𑀲𑁄𑀦𑀸𑀫 𑀉𑀧𑀭𑀼𑀧𑀭𑀺 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀯𑀬𑀓𑁄𑀝𑁆𑀞𑀸𑀲𑁄 𑀧𑀦 𑀅𑀧𑀸𑀓𑀝𑁄. 𑀲𑁄 𑀏𑀯 𑀘 𑀅𑀦𑀺𑀘𑁆𑀘𑀢𑀸𑀬 𑀧𑀭𑀫𑀸 𑀓𑁄𑀝𑀻𑀢𑀺 𑀢𑀲𑁆𑀲𑁂𑀯 𑀲𑀼𑀝𑁆𑀞𑀼𑀢𑀭𑀁 𑀲𑀫𑀦𑀼𑀧𑀲𑁆𑀲𑀦𑀜𑀸𑀡𑀁 𑀪𑀗𑁆𑀕𑀜𑀸𑀡𑀁. 𑀪𑀗𑁆𑀕𑁂 𑀤𑀺𑀝𑁆𑀞𑁂 𑀏𑀯𑀁 𑀪𑀺𑀚𑁆𑀚𑀦𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀲𑁄𑀓 𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑁂𑀦 𑀢𑀣𑀸 𑀢𑀣𑀸 𑀪𑀸𑀬𑀺𑀢𑀩𑁆𑀩𑀧𑀓𑀸𑀭𑀲𑀫𑀦𑀼𑀧𑀲𑁆𑀲𑀦𑀜𑀸𑀡𑀁 𑀪𑀬𑀜𑀸𑀡𑀁 𑀦𑀸𑀫. 𑀮𑁄𑀓𑁂 𑀧𑀦 𑀓𑀺𑀜𑁆𑀘𑀺 𑀪𑀬𑀯𑀢𑁆𑀣𑀼𑀁 𑀧𑀲𑁆𑀲𑀦𑁆𑀢𑀸𑀧𑀺 𑀆𑀲𑀦𑁆𑀦𑁂 𑀅𑀜𑁆𑀜𑀲𑁆𑀫𑀺𑀁 𑀧𑀝𑀺𑀲𑀭𑀡𑁂 𑀲𑀢𑀺 𑀦 𑀪𑀸𑀬𑀦𑁆𑀢𑀺. 𑀅𑀲𑀢𑀺 𑀏𑀯 𑀪𑀸𑀬𑀦𑁆𑀢𑀺. 𑀏𑀯𑀁 𑀪𑀸𑀬𑀺𑀢𑀩𑁆𑀩𑀸𑀦𑀁 𑀢𑁂𑀲𑀁 𑀲𑀩𑁆𑀩𑀲𑁄 𑀅𑀜𑁆𑀜𑀧𑀝𑀺𑀲𑀭𑀡𑀸𑀪𑀸𑀯𑀤𑀲𑁆𑀲𑀦𑀁 𑀆𑀤𑀻𑀦𑀯𑀜𑀸𑀡𑀁 𑀦𑀸𑀫. 𑀓𑀼𑀢𑁄𑀘𑀺 𑀧𑀝𑀺𑀲𑀭𑀡𑀸𑀪𑀸𑀯𑁂𑀦 𑀢𑁂𑀳𑀺 𑀉𑀓𑁆𑀓𑀡𑁆𑀞𑀢𑀸𑀓𑀸𑀭 𑀲𑀳𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀦𑀺𑀩𑁆𑀩𑀺𑀤𑀸𑀜𑀸𑀡𑀁𑀦𑀸𑀫. 𑀦𑀺𑀩𑁆𑀩𑀺𑀦𑁆𑀤𑀻𑀬𑀫𑀸𑀦𑁂𑀳𑀺 𑀢𑁂𑀳𑀺 𑀅𑀢𑁆𑀢𑀸𑀦𑀁 𑀯𑀺𑀫𑀼𑀘𑁆𑀘𑀺𑀢𑀼𑀁 𑀅𑀚𑁆𑀛𑀸𑀲𑀬𑀲𑀳𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀦𑀸𑀫. 𑀲𑀼𑀝𑁆𑀞𑀼 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀦𑁆𑀢𑀲𑁆𑀲 𑀲𑀻𑀖𑀁 𑀫𑀼𑀘𑁆𑀘𑀦𑀢𑁆𑀣𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑁂𑀓𑀸𑀤𑀻𑀦𑀯𑀭𑀸𑀲𑀺 𑀪𑀸𑀯 𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦 𑀲𑀼𑀝𑁆𑀞𑀼𑀯𑀺𑀧𑁆𑀨𑀸𑀭𑀢𑀭𑀁 𑀧𑀯𑀢𑁆𑀢𑀫𑀸𑀦𑀁 𑀯𑀺𑀧𑀲𑁆𑀲𑀦𑀸 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀜𑀸𑀡𑀁 𑀦𑀸𑀫. 𑀢𑁂𑀲𑀁 𑀧𑀦 𑀅𑀦𑁂𑀓𑀸𑀤𑀻𑀦𑀯𑀭𑀸𑀲𑀺𑀪𑀸𑀯𑁂 𑀲𑀼𑀝𑁆𑀞𑀼 𑀤𑀺𑀝𑁆𑀞𑁂 𑀲𑀗𑁆𑀔𑀸𑀭𑁂𑀲𑀼 𑀦𑀺𑀓𑀦𑁆𑀢𑀺𑀬𑀸 𑀧𑀭𑀺𑀬𑀸𑀤𑀺𑀦𑁆𑀦𑀸𑀬 𑀇𑀤𑀸𑀦𑀺 𑀫𑀼𑀘𑁆𑀘𑀦𑀼𑀧𑀸𑀬𑁄 𑀮𑀤𑁆𑀥𑁄𑀢𑀺 𑀅𑀥𑀺𑀫𑀢𑁆𑀢𑀩𑁆𑀬𑀸𑀧𑀸𑀭𑀁 𑀅𑀓𑀢𑁆𑀯𑀸 𑀲𑀫𑁂𑀦 𑀯𑀸𑀬𑀸𑀫𑁂𑀦 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑁂 𑀫𑀚𑁆𑀛𑀢𑁆𑀢𑀸𑀓𑀸𑀭𑀲𑀳𑀺𑀢𑀁 𑀲𑀗𑁆𑀔𑀸𑀭𑁂𑀲𑀼𑀯𑀸 𑀪𑀬𑀜𑁆𑀘 𑀦𑀦𑁆𑀤𑀺𑀜𑁆𑀘 𑀧𑀳𑀸𑀬 𑀉𑀤𑀸𑀲𑀺𑀦𑀪𑀸𑀯𑀲𑀳𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁𑀦𑀸𑀫. 𑀉𑀧𑀭𑀺 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀁 𑀯𑀳𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀮𑁄𑀫𑁂𑀳𑀺 𑀣𑀸𑀫𑀩𑀮𑁂𑀳𑀺 𑀲𑀫𑁆𑀧𑀦𑁆𑀦𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀦𑀼𑀮𑁄𑀫𑀜𑀸𑀡𑀁 𑀦𑀸𑀫. 𑀳𑁂𑀝𑁆𑀞𑀺𑀫𑀸𑀦𑀁𑀯𑀸 𑀜𑀸𑀡𑀸𑀦𑀁𑀢𑀁 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀲𑀼𑀝𑁆𑀞𑀼𑀢𑀭𑀁 𑀯𑀺𑀪𑀸𑀯𑀦𑀢𑁄. 𑀉𑀧𑀭𑀺𑀫𑀕𑁆𑀕𑀲𑁆𑀲𑀯𑀸 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀢𑀲𑁆𑀲 𑀧𑀭𑀺𑀓𑀫𑁆𑀫𑀪𑀸𑀯𑀢𑁄, 𑀧𑀤𑀝𑁆𑀞𑀸𑀦𑀢𑁆𑀢𑀸𑀘𑀸𑀢𑀺𑀧𑀺 𑀅𑀦𑀼𑀮𑁄𑀫𑀜𑀸𑀡𑀁 𑀦𑀸𑀫𑀸𑀢𑀺. 𑀅𑀢𑁆𑀢 𑀚𑀻𑀯𑀲𑀼𑀜𑁆𑀜𑀢𑀸𑀤𑀲𑁆𑀲𑀦 𑀩𑀮𑁂𑀦 𑀔𑀦𑁆𑀥𑁂𑀲𑀼 𑀓𑀺𑀮𑁂𑀲𑀩𑀦𑁆𑀥𑀦𑀢𑁄 𑀯𑀺𑀫𑀼𑀘𑁆𑀘𑀫𑀸𑀦𑁄 𑀫𑀕𑁆𑀕𑁄 𑀲𑀼𑀜𑁆𑀜𑀢𑀸𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀲𑀗𑁆𑀔𑀸𑀭𑀸𑀦𑀁 𑀬𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀺𑀮𑁂𑀲𑀸𑀦𑀁 𑀅𑀯𑀲𑁆𑀲𑀬𑁄 𑀳𑁄𑀢𑀺. 𑀢𑀸𑀦𑀺 𑀯𑀺𑀥𑀫𑀺𑀢𑁆𑀯𑀸 𑀲𑀩𑁆𑀩𑀲𑁄 𑀥𑀫𑁆𑀫𑀸𑀦𑀁 𑀅𑀦𑀸𑀣 𑀪𑀸𑀯 𑀤𑀲𑁆𑀲𑀦 𑀩𑀮𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑁄 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄𑀯𑀺𑀫𑁄𑀓𑁆𑀔𑁄 𑀦𑀸𑀫. 𑀲𑀗𑁆𑀔𑀸𑀭𑁂𑀲𑀼 𑀲𑀩𑁆𑀩𑀲𑁄 𑀅𑀲𑁆𑀲𑀸𑀲𑀸𑀪𑀸𑀯 𑀤𑀲𑁆𑀲𑀦𑀩𑀮𑁂𑀦 𑀯𑀺𑀫𑀼𑀘𑁆𑀘𑀫𑀸𑀦𑁄 𑀫𑀕𑁆𑀕𑁄 𑀅𑀧𑁆𑀧𑀡𑀺𑀳𑀺𑀢𑁄𑀯𑀺𑀫𑁄𑀓𑁆𑀔𑁄𑀦𑀸𑀫. 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀲𑀫𑀽𑀳𑀖𑀦 𑀲𑀦𑁆𑀢𑀢𑀺𑀖𑀦 𑀓𑀺𑀘𑁆𑀘𑀖𑀦 𑀆𑀭𑀫𑁆𑀫𑀡𑀖𑀦𑁂𑀲𑀼 𑀢𑀁𑀢𑀁𑀖𑀦 𑀯𑀺𑀦𑀺𑀩𑁆𑀪𑀼𑀚𑁆𑀚𑀦 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀢𑁆𑀢𑀸 𑀇𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀲𑀸𑀭𑀲𑁆𑀲 𑀅𑀪𑀸𑀯𑀸𑀦𑀼𑀧𑀲𑁆𑀲𑀦𑀢𑁄 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀫𑀺𑀢𑁆𑀢𑀸 𑀦𑀼𑀧𑀲𑁆𑀲𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀲𑀸𑀧𑀺 𑀳𑀺 𑀲𑀦𑁆𑀢𑀢𑀺 𑀯𑀺𑀘𑁆𑀙𑁂𑀤𑀦 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀳𑀦𑁆𑀢𑀺 𑀕𑀳𑀺𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀥𑀫𑀦𑀢𑁄 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀤𑀼𑀓𑁆𑀔𑀸 𑀦𑀼𑀧𑀲𑁆𑀲𑀦𑀸. 𑀲𑀸𑀧𑀺 𑀳𑀺 𑀫𑀳𑀸𑀆𑀤𑀻𑀦𑀯𑀭𑀸𑀲𑀺 𑀪𑀸𑀯 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀇𑀤𑀁 𑀫𑀫 𑀏𑀢𑀁 𑀫𑀫𑀸𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀧𑀡𑀺𑀳𑀺𑀢 𑀕𑀼𑀡𑀲𑁆𑀲 𑀅𑀪𑀸𑀯𑀸𑀦𑀼𑀧𑀲𑁆𑀲𑀦𑀢𑁄 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀦𑁆𑀢𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀻𑀮𑀁. 𑀢𑀜𑁆𑀳𑀺 𑀲𑀩𑁆𑀩𑀮𑁄 𑀓𑀺𑀬𑀲𑀻𑀮𑀸𑀦𑀁 𑀚𑁂𑀝𑁆𑀞𑀓𑀢𑁆𑀢𑀸 𑀧𑀢𑀺𑀘 𑀳𑁄𑀢𑀺. 𑀘𑀢𑀼𑀪𑀽𑀫𑀓𑀓𑀼𑀲𑀮𑀸𑀦𑀁 𑀆𑀤𑀺𑀧𑀪𑀯𑀪𑀽𑀢𑀢𑁆𑀢𑀸 𑀫𑀼𑀔𑀜𑁆𑀘. 𑀇𑀢𑀺 𑀧𑀢𑀺𑀫𑀼𑀔𑀝𑁆𑀞𑁂𑀦 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀫𑁂𑀯𑀘 𑀤𑀼𑀲𑁆𑀲𑀺𑀮𑁆𑀬𑀫𑀕𑁆𑀕𑀲𑁆𑀲 𑀲𑀁𑀯𑀭𑀡𑀢𑁄 𑀧𑀺𑀤𑀳𑀦𑀢𑁄 𑀲𑀁𑀯𑀭𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀨𑀦𑁆𑀤𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀮𑁄𑀮𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀦𑀼𑀩𑀦𑁆𑀥𑀸𑀘 𑀅𑀓𑀼𑀲𑀮𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺 𑀫𑀕𑁆𑀕𑀲𑁆𑀲 𑀲𑀁𑀯𑀭𑀡𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀲𑀢𑀺 𑀇𑀦𑁆𑀤𑁆𑀭𑀺𑀬 𑀲𑀁𑀯𑀭𑁄𑀦𑀸𑀫. 𑀲𑁄 𑀏𑀯 𑀲𑀻𑀮𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁. 𑀆𑀚𑀻𑀯𑀦𑁆𑀢𑀺 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀚𑀻𑀯𑁄. 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀯𑀸𑀬𑀸𑀫𑁄. 𑀲𑁄𑀬𑁂𑀯 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑁂𑀳𑀺 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀫𑀺𑀘𑁆𑀙𑀸𑀧𑀬𑁄𑀕𑁂𑀳𑀺 𑀢𑀺𑀯𑀺𑀥𑀓𑀼𑀳𑀦𑀯𑀢𑁆𑀣𑀼𑀳𑀺𑀘 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀦𑀸𑀫. 𑀲𑀸 𑀏𑀯 𑀲𑀻𑀮𑀦𑁆𑀢𑀺 𑀲𑀫𑀸𑀲𑁄. 𑀢𑀣𑀸𑀭𑀽𑀧𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀪𑀺𑀓𑁆𑀔𑀸𑀘𑀸𑀭𑀸𑀤𑀺𑀦𑀸 𑀧𑀬𑁄𑀕𑁂𑀦 𑀧𑀝𑀺𑀮𑀤𑁆𑀥𑀸𑀦𑀁 𑀧𑀘𑁆𑀘𑀬𑀸𑀦𑀁 𑀧𑀝𑀺𑀕𑁆𑀕𑀳𑀡 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁂𑀲𑀼 𑀲𑀫𑁆𑀫𑁄𑀳𑀲𑁆𑀲 𑀕𑁂𑀥𑀲𑁆𑀲 𑀫𑀤𑀲𑁆𑀲 𑀧𑀫𑀸𑀤𑀲𑁆𑀲𑀘 𑀧𑀳𑀸𑀦𑀢𑁆𑀣𑀁 𑀢𑀁𑀢𑀁𑀧𑀬𑁄𑀚𑀦𑀫𑀭𑀺𑀬𑀸𑀤𑀁𑀯𑀸 𑀧𑀝𑀺𑀓𑀽𑀮𑀮𑀓𑁆𑀔𑀡𑀁𑀯𑀸 𑀥𑀸𑀢𑀼𑀫𑀢𑁆𑀢𑀮𑀓𑁆𑀔𑀡𑀁𑀯𑀸 𑀧𑀭𑀺𑀕𑁆𑀕𑀳𑀡 𑀧𑀘𑁆𑀘𑀯𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀘𑁆𑀘𑀬𑀲𑁂𑀯𑀦𑁂 𑀧𑀝𑀺𑀲𑀗𑁆𑀔𑀸𑀜𑀸𑀡𑀁 𑀧𑀘𑁆𑀘𑀬 𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀁𑀦𑀸𑀫. 𑀧𑀭𑀺𑀲𑀼𑀚𑁆𑀛𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀺. 𑀧𑀭𑀺𑀲𑀼𑀤𑁆𑀥𑀺𑀏𑀯 𑀧𑀸𑀭𑀺𑀲𑀼𑀤𑁆𑀥𑀺. 𑀲𑀸 𑀏𑀯 𑀲𑀻𑀮𑀦𑁆𑀢𑀺 𑀲𑀫𑀸𑀲𑁄. 𑀘𑀢𑁆𑀢𑀸𑀭𑀺 𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀻𑀢𑀺 𑀘𑀢𑀼𑀧𑀸𑀭𑀺 𑀲𑀼𑀤𑁆𑀥𑀺𑀲𑀻𑀮𑀁. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀢𑀺 𑀏𑀢𑁆𑀣 𑀘𑀺𑀢𑁆𑀢𑀲𑀤𑁆𑀤𑁂𑀦 𑀲𑀫𑀸𑀥𑀺 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀤𑀼𑀯𑀺𑀥𑁄𑀧𑀺𑀲𑀫𑀸𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀦𑀸𑀫𑀸𑀢𑀺. 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀲𑀪𑀸𑀯𑁄 𑀮𑀓𑁆𑀔𑀡𑀁𑀦𑀸𑀫. 𑀅𑀕𑁆𑀕𑀺𑀲𑁆𑀲 𑀉𑀡𑁆𑀳𑀢𑁆𑀢𑀁 𑀯𑀺𑀬. 𑀢𑁂𑀦 𑀲𑀪𑀸𑀯𑁂𑀦 𑀲𑀸𑀥𑁂𑀢𑀩𑁆𑀩𑀁 𑀓𑀺𑀘𑁆𑀘𑀁𑀯𑀸 𑀲𑀸𑀥𑀦𑀧𑀘𑁆𑀘𑀬𑀸 𑀧𑀝𑀺𑀮𑀤𑁆𑀥𑀕𑀼𑀡𑀲𑀗𑁆𑀔𑀸𑀢𑀸 𑀲𑀫𑁆𑀧𑀢𑁆𑀢𑀺𑀯𑀸 𑀭𑀲𑁄𑀦𑀸𑀫. 𑀅𑀕𑁆𑀕𑀺𑀲𑁆𑀲 𑀧𑀭𑀺𑀯𑀸𑀘𑀦 𑀚𑁄𑀢𑀦𑀸𑀦𑀺 𑀯𑀺𑀬. 𑀲𑀸 𑀏𑀯 𑀲𑀫𑁆𑀧𑀢𑁆𑀢𑀺𑀯𑀸 𑀓𑀸𑀭𑀺𑀬𑀲𑀗𑁆𑀔𑀸𑀢𑀁 𑀨𑀮𑀁𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁𑀦𑀸𑀫. 𑀅𑀕𑁆𑀕𑀺𑀲𑁆𑀲 𑀥𑀽𑀫𑁄 𑀯𑀺𑀬. 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀅𑀲𑀸𑀥𑀸𑀭𑀡𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀆𑀲𑀦𑁆𑀦𑀓𑀸𑀭𑀡𑀁 𑀧𑀤𑀝𑁆𑀞𑀸𑀦𑀁𑀦𑀸𑀫. 𑀢𑁂𑀲𑀁 𑀯𑀲𑁂𑀦 𑀦𑀸𑀫𑀲𑁆𑀲𑀘 𑀭𑀽𑀧𑀲𑁆𑀲𑀘 𑀧𑀭𑀺𑀕𑁆𑀕𑀳𑁄 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀦𑀸𑀫. 𑀏𑀢𑁆𑀣𑀘 𑀧𑀭𑀺𑀕𑁆𑀕𑀳𑁄 𑀤𑀼𑀯𑀺𑀥𑁄 𑀲𑀗𑁆𑀔𑁂𑀧 𑀧𑀭𑀺𑀕𑁆𑀕𑀳𑁄 𑀯𑀺𑀢𑁆𑀣𑀸𑀭𑀧𑀭𑀺𑀕𑁆𑀕𑀳𑁄𑀢𑀺. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀇𑀤𑀁 𑀦𑀸𑀫𑀫𑁂𑀯, 𑀦 𑀭𑀽𑀧𑀁. 𑀇𑀤𑀁 𑀭𑀽𑀧𑀫𑁂𑀯, 𑀦 𑀦𑀸𑀫𑀁. 𑀅𑀜𑁆𑀜𑀁 𑀦𑀸𑀫𑀁 𑀅𑀜𑁆𑀜𑀁 𑀭𑀽𑀧𑀁. 𑀢𑀤𑀼𑀪𑀬𑀢𑁄𑀘 𑀅𑀜𑁆𑀜𑁄 𑀅𑀢𑁆𑀢𑀸𑀯𑀸 𑀚𑀻𑀯𑁄𑀯𑀸 𑀲𑀢𑁆𑀢𑁄𑀯𑀸 𑀧𑀼𑀕𑁆𑀕𑀮𑁄𑀯𑀸 𑀫𑀦𑀼𑀲𑁆𑀲𑁄𑀯𑀸 𑀤𑁂𑀯𑁄𑀯𑀸 𑀩𑁆𑀭𑀳𑁆𑀫𑀸𑀯𑀸 𑀦𑀢𑁆𑀣𑀻𑀢𑀺 𑀏𑀯𑀁 𑀧𑀘𑁆𑀘𑀓𑁆𑀔𑀢𑁄 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀗𑁆𑀔𑁂𑀧𑀧𑀭𑀺𑀕𑁆𑀕𑀳𑁄𑀦𑀸𑀫. 𑀜𑀸𑀡𑀼𑀢𑁆𑀢𑀭𑀺𑀓𑁄𑀳𑀺 𑀧𑀼𑀕𑁆𑀕𑀮𑁄 𑀏𑀢𑁆𑀢𑀓𑀫𑀢𑁆𑀢𑁂𑀦𑀧𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺 𑀲𑀤𑁆𑀥𑀺𑀁 𑀲𑀜𑁆𑀜𑀸 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀳𑀻𑀢𑀺. 𑀢𑀬𑁄 𑀳𑀺 𑀯𑀺𑀧𑀮𑁆𑀮𑀸𑀲𑀸. 𑀬𑀣𑀸𑀳-𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺. 𑀢𑀢𑁆𑀣 𑀲𑀢𑁆𑀣𑀼𑀲𑀸𑀲𑀦𑀥𑀫𑁆𑀫𑁂 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑁂𑀦 𑀲𑀤𑁆𑀥𑀸𑀫𑀢𑁆𑀢𑁂𑀦𑀧𑀺 𑀤𑀺𑀝𑁆𑀞𑀺 𑀯𑀺𑀧𑀮𑁆𑀮𑀸𑀲𑁄 𑀯𑀺𑀓𑁆𑀔𑀫𑁆𑀪𑀺𑀢𑁄 𑀳𑁄𑀢𑀺. 𑀇𑀢𑀭𑁂 𑀧𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁂 𑀓𑀢𑁂𑀬𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺. 𑀬𑀸𑀯𑀘 𑀏𑀢𑁂 𑀤𑁆𑀯𑁂 𑀅𑀯𑀺𑀓𑁆𑀔𑀫𑁆𑀪𑀺𑀢𑀸 𑀳𑁄𑀦𑁆𑀢𑀺. 𑀢𑀸𑀯 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄𑀘 𑀅𑀧𑀭𑀺𑀲𑀼𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀢𑀁𑀫𑀽𑀮𑀺𑀓𑀸𑀘 𑀓𑀺𑀮𑁂𑀲𑀥𑀫𑁆𑀫𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀅𑀧𑀺𑀘. 𑀘𑀢𑀼𑀦𑁆𑀦𑀁 𑀆𑀳𑀸𑀭𑀸𑀦𑀁 𑀯𑀲𑁂𑀦 𑀘𑀢𑀼𑀥𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀧𑀜𑁆𑀘𑀥𑀸, 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀙𑀥𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂 𑀢𑀩𑁆𑀩𑀫𑁂𑀯. 𑀢𑀢𑁆𑀣 𑀙 𑀥𑀸𑀢𑀼𑀬𑁄𑀦𑀸𑀫 𑀧𑀣𑀯𑀺𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀼 𑀆𑀓𑀸𑀲𑀥𑀸𑀢𑀼 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄. 𑀧𑀓𑁆𑀓𑀼𑀲𑀸𑀢𑀺 𑀓𑀼𑀮𑀧𑀼𑀢𑁆𑀢𑁄 𑀳𑀺 𑀇𑀫𑀸 𑀙 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀘𑀧𑀺𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀬𑀢𑁆𑀢𑀓𑁂 𑀯𑀸 𑀧𑀦 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀢𑁆𑀢𑀸 𑀫𑁂𑀢𑀺 𑀧𑀯𑀢𑁆𑀢𑀫𑀸𑀦𑁂 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺 𑀯𑀺𑀧𑀮𑁆𑀮𑀸𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀢𑁆𑀢𑀓𑀸𑀧𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀸 𑀬𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀗𑁆𑀕𑀳𑀧𑀓𑀭𑀡𑁂 𑀬𑁄 𑀬𑁄 𑀘𑀺𑀢𑁆𑀢𑀘𑁂𑀢𑀲𑀺𑀓 𑀯𑀺𑀪𑀸𑀕𑁄 𑀭𑀽𑀧𑀯𑀺𑀪𑀸𑀕𑁄𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀯𑀲𑁂𑀦 𑀦𑀸𑀫𑀭𑀽𑀧𑀲𑁆𑀲 𑀧𑀭𑀺𑀕𑁆𑀕𑀡𑁆𑀳𑀦𑀁 𑀯𑀺𑀢𑁆𑀣𑀸𑀭𑀧𑀭𑀺𑀕𑁆𑀕𑀳𑁄𑀦𑀸𑀫. 𑀅𑀬𑀁𑀧𑀦 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀯𑀺𑀲𑀬𑁄. 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀦𑀁 𑀧𑀦 𑀆𑀪𑀺𑀥𑀫𑁆𑀫𑀺𑀓𑀢𑁆𑀣𑁂𑀭𑀸𑀦𑀁 𑀏𑀯 𑀯𑀺𑀲𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀧𑀦 𑀦𑀸𑀫𑀭𑀽𑀧 𑀫𑀢𑁆𑀢𑀢𑁄 𑀉𑀤𑁆𑀥𑀁 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀤𑀲𑁆𑀲𑀦𑀢𑁄𑀘 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀚𑀻𑀯𑀲𑀜𑁆𑀜𑀺𑀢𑁄 𑀅𑀢𑁆𑀢𑀸 𑀅𑀢𑁆𑀣𑀺. 𑀲𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀲𑀁𑀲𑀭𑀢𑀺, 𑀲𑀦𑁆𑀥𑀸𑀯𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀧𑀳𑀻𑀬𑀢𑀺. 𑀲𑀼𑀤𑁆𑀥𑁂 𑀦𑀸𑀫𑁂 𑀏𑀯𑀯𑀸𑀭𑀽𑀧𑁂 𑀏𑀯𑀯𑀸 𑀧𑀼𑀕𑁆𑀕𑀮𑀲𑀢𑁆𑀢𑀓𑁆𑀭𑀺𑀬𑀲𑀜𑁆𑀜𑀺𑀢𑀸𑀦𑀁 𑀈𑀳𑀸𑀩𑁆𑀬𑀸𑀧𑀸𑀭𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀤𑀲𑁆𑀲𑀦𑀢𑁄 𑀢𑀤𑀼𑀪𑀬𑀲𑀁𑀬𑁄𑀕𑁂𑀏𑀯 𑀢𑁂𑀲𑀁 𑀮𑀩𑁆𑀪𑀫𑀸𑀦𑀢𑀸 𑀤𑀲𑁆𑀲𑀦𑀢𑁄𑀘 𑀢𑀤𑀼𑀪𑀬𑀁𑀯𑀸 𑀏𑀓𑀫𑁂𑀓𑀁𑀯𑀸 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀸𑀢𑀺 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀧𑀳𑀻𑀬𑀢𑀺. 𑀅𑀢𑁆𑀢𑀸 𑀚𑀻𑀯𑁄 𑀲𑀢𑁆𑀢𑁄 𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑁄 𑀤𑁂𑀯𑁄 𑀩𑁆𑀭𑀳𑁆𑀫𑀸𑀢𑀺 𑀏𑀯𑀫𑀸𑀤𑀻𑀲𑀼 𑀯𑁄𑀳𑀸𑀭𑁂𑀲𑀼𑀘 𑀯𑁄𑀳𑀸𑀭 𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀅𑀢𑁆𑀢𑀸𑀦𑀸𑀫 𑀏𑀓𑀦𑁆𑀢𑀢𑁄 𑀅𑀢𑁆𑀣𑀺 𑀚𑀻𑀯𑁄𑀦𑀸𑀫 𑀏𑀓𑀦𑁆𑀢𑀢𑁄 𑀅𑀢𑁆𑀣𑀻𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀢𑀺𑀥𑀸𑀯𑀦𑀜𑁆𑀘 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀤𑀢𑁆𑀣𑀸𑀪𑀺𑀦𑀺𑀯𑁂𑀲𑁄𑀢𑀺𑀘 𑀅𑀢𑁆𑀢𑀸𑀦𑀸𑀫 𑀅𑀢𑁆𑀣𑀺 𑀚𑀻𑀯𑁄𑀦𑀸𑀫 𑀅𑀢𑁆𑀣𑀻𑀢𑀺𑀆𑀤𑀺𑀦𑀸 𑀤𑀴𑁆𑀳𑀢𑀭𑀁 𑀅𑀪𑀺𑀦𑀺𑀯𑁂𑀲𑁄. 𑀅𑀢𑀺𑀥𑀸𑀯𑀦𑀦𑁆𑀢𑀺 𑀦𑀸𑀫𑀭𑀽𑀧𑀁 𑀅𑀢𑁆𑀢𑀸𑀢𑀺𑀆𑀤𑀺𑀦𑀸 𑀕𑀳𑀡𑀁. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄𑀢𑀺 𑀏𑀢𑁆𑀣𑀧𑀺 𑀤𑀼𑀯𑀺𑀥𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀲𑀗𑁆𑀔𑁂𑀧𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺. 𑀢𑀢𑁆𑀣 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀦𑀸𑀫𑀲𑁆𑀲 𑀘𑀺𑀢𑁆𑀢𑁄𑀢𑀼𑀓𑀸𑀳𑀸𑀭𑀯𑀲𑁂𑀦 𑀭𑀽𑀧𑀲𑁆𑀲 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀯𑀲𑁂𑀦 𑀢𑀤𑀼𑀪𑀬𑀲𑁆𑀲𑀘 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀗𑁆𑀔𑁂𑀧𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺𑀦𑀸𑀫. 𑀳𑁂𑀝𑁆𑀞𑀸 𑀧𑀘𑁆𑀘𑀬𑀲𑀗𑁆𑀕𑀳𑁂 𑀯𑀺𑀪𑀢𑁆𑀢𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬 𑀧𑀝𑁆𑀞𑀸𑀦𑀦𑀬𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀺𑀢𑁆𑀣𑀸𑀭𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺𑀦𑀸𑀫. 𑀏𑀢𑁆𑀣𑀧𑀺 𑀧𑀝𑁆𑀞𑀸𑀦𑀦𑀬𑁂𑀦 𑀧𑀭𑀺𑀕𑁆𑀕𑀳𑁄 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀯𑀺𑀲𑀬𑁄𑀏𑀯. 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀧𑀦 𑀬𑀣𑀸𑀯𑀯𑀢𑁆𑀣𑀺𑀢𑀲𑁆𑀲 𑀲𑀩𑁆𑀩𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀲𑀩𑁆𑀩𑀲𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀢𑀸𑀤𑀲𑁆𑀲𑀦𑀢𑁄 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀧𑀳𑀻𑀬𑀢𑀺. 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀯𑀺𑀦𑀸 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀢𑁄 𑀇𑀲𑁆𑀲𑀭𑀦𑀺𑀫𑁆𑀫𑀸𑀦 𑀓𑀸𑀮𑀦𑀺𑀫𑁆𑀫𑀸𑀦𑀸𑀤𑀺𑀓𑀸 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺𑀘 𑀧𑀳𑀻𑀬𑀢𑀺. 𑀳𑁂𑀢𑀼𑀲𑀫𑁆𑀪𑀸𑀭𑀧𑀘𑁆𑀘𑀬𑁂𑀳𑀺 𑀓𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀬𑀸𑀘 𑀅𑀜𑁆𑀜𑀲𑁆𑀲 𑀓𑀫𑁆𑀫𑀓𑀸𑀭𑀓𑀲𑁆𑀲𑀯𑀸 𑀯𑀺𑀧𑀸𑀓 𑀯𑁂𑀤𑀓𑀲𑁆𑀲𑀯𑀸 𑀓𑀢𑁆𑀢𑀼𑀦𑁄 𑀅𑀪𑀸𑀯𑀤𑀲𑁆𑀲𑀦𑀢𑁄 𑀓𑀸𑀭𑀓 𑀯𑁂𑀤𑀓 𑀤𑀺𑀝𑁆𑀞𑀺 𑀧𑀳𑀻𑀬𑀢𑀺. 𑀅𑀦𑀫𑀢𑀕𑁆𑀕𑁂𑀘 𑀲𑀁𑀲𑀸𑀭𑁂 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀳𑁂𑀢𑀼𑀨𑀮 𑀧𑀭𑀁𑀧𑀭𑀸𑀯𑀲𑁂𑀦 𑀓𑁂𑀯𑀮𑀲𑁆𑀲 𑀦𑀸𑀫𑀭𑀽𑀧𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄 𑀅𑀳𑁄𑀲𑀺𑀁 𑀦𑀼𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀸𑀬 𑀧𑀼𑀕𑁆𑀕𑀮𑀲𑀢𑁆𑀢 𑀯𑀺𑀲𑀬𑀸𑀬 𑀲𑁄𑀴𑀲𑀯𑀺𑀥𑀸𑀬 𑀓𑀗𑁆𑀔𑀸𑀬𑀘 𑀅𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀲𑀪𑀸𑀯𑀥𑀫𑁆𑀫𑀧𑀯𑀢𑁆𑀢𑀺𑀬𑀸𑀘 𑀲𑀼𑀝𑁆𑀞𑀼 𑀤𑀺𑀝𑁆𑀞𑀸𑀬 𑀤𑁂𑀲𑀦𑀸𑀥𑀫𑁆𑀫𑀲𑁆𑀲 𑀲𑀼𑀥𑀫𑁆𑀫𑀢𑀸 𑀤𑀲𑁆𑀲𑀦𑀢𑁄 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀜𑁆𑀘 𑀤𑀺𑀲𑁆𑀯𑀸 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀥𑀫𑁆𑀫𑁂 𑀓𑀗𑁆𑀔𑀢𑀻𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸 𑀅𑀝𑁆𑀞𑀯𑀺𑀥𑀸𑀧𑀺 𑀓𑀗𑁆𑀔𑀸 𑀧𑀳𑀻𑀬𑀢𑀻𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀲𑀗𑁆𑀔𑀢𑀸𑀦𑀁𑀧𑀺 𑀲𑀢𑀁 𑀅𑀲𑀫𑁆𑀫𑀲𑀦𑀼𑀧𑀕𑀢𑁆𑀢𑀸 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀽𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀲𑀬𑀲𑀫𑀽𑀳𑀦𑀢𑁆𑀣𑀜𑁆𑀘 𑀲𑀫𑁆𑀫𑀲𑀦𑀦𑁆𑀢𑀺 𑀓𑀢𑁆𑀯𑀸 𑀬𑀢𑁆𑀣 𑀓𑀸𑀫𑀭𑀸𑀕𑀸𑀤𑀬𑁄 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺. 𑀢𑁂𑀬𑁂𑀯 𑀥𑀫𑁆𑀫𑀸 𑀲𑀫𑁆𑀫𑀲𑀦𑀸𑀭𑀳𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀽𑀢𑀺. 𑀇𑀫𑀲𑁆𑀲 𑀘 𑀧𑀤𑀲𑁆𑀲 𑀮𑀓𑁆𑀔𑀡𑀢𑁆𑀢𑀬𑀁 𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀽𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀻𑀳𑀺 𑀏𑀓𑀸𑀤𑀲𑀳𑀺 𑀪𑁂𑀤𑁂𑀳𑀺 𑀪𑀺𑀦𑁆𑀦𑁂𑀲𑀼. 𑀔𑀦𑁆𑀥𑀸𑀤𑀺𑀦𑀬𑀁𑀆𑀭𑀩𑁆𑀪𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀯𑀺𑀪𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀤𑁆𑀯𑀸𑀭𑀙𑀓𑁆𑀓𑀁 𑀆𑀭𑀫𑁆𑀫𑀡𑀙𑀓𑁆𑀓𑀁 𑀯𑀺𑀜𑁆𑀜𑀸𑀡𑀙𑀓𑁆𑀓𑀁 𑀨𑀲𑁆𑀲𑀙𑀓𑁆𑀓𑀁 𑀯𑁂𑀤𑀦𑀸𑀙𑀓𑁆𑀓𑀁 𑀲𑀜𑁆𑀜𑀸𑀙𑀓𑁆𑀓𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀲𑀫𑁆𑀫𑀲𑀦𑀪𑀽𑀫𑀺𑀯𑀺𑀪𑀸𑀕𑀦𑀬𑀁 𑀆𑀭𑀩𑁆𑀪 𑀅𑀦𑀼𑀕𑀦𑁆𑀢𑁆𑀯𑀸 𑀢𑀁𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀦 𑀢𑁂𑀯𑀻𑀲𑀢𑀺𑀬𑀸 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀬𑀲𑁆𑀲 𑀬𑁄 𑀓𑁄𑀝𑁆𑀞𑀸𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦 𑀢𑀁 𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑀁 𑀆𑀭𑀪𑀺𑀢𑀩𑁆𑀩𑀁. 𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀲𑀩𑁆𑀩𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀭𑀪𑀺𑀢𑀩𑁆𑀩𑀫𑁂𑀯. 𑀓𑀮𑀸𑀧𑀯𑀲𑁂𑀦𑀲𑀁𑀔𑀺𑀧𑀺𑀢𑁆𑀯𑀸𑀢𑀺 𑀔𑀦𑁆𑀥𑀧𑀜𑁆𑀘𑀓𑁂𑀦 𑀬𑁂 𑀭𑀽𑀧𑀁 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀁𑀧𑀺 𑀲𑀫𑀸𑀦𑀁 𑀲𑀩𑁆𑀩𑀁 𑀏𑀓𑀭𑀽𑀧𑀧𑀺𑀡𑁆𑀟𑀪𑀸𑀯𑁂𑀦 𑀲𑀁𑀔𑀺𑀧𑀺𑀢𑁆𑀯𑀸 𑀏𑀲 𑀦𑀬𑁄 𑀯𑁂𑀤𑀦𑀸 𑀤𑀻𑀲𑀼𑀧𑀻𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄. 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁𑀯𑀸 𑀩𑀳𑀺𑀤𑁆𑀥𑀸𑀯𑀸 𑀑𑀴𑀸𑀭𑀺𑀢𑀁𑀯𑀸 𑀲𑀼𑀔𑀼𑀫𑀁𑀯𑀸 𑀳𑀻𑀦𑀁𑀯𑀸 𑀧𑀡𑀻𑀢𑀁𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂𑀯𑀸. 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦. 𑀬𑀸𑀓𑀸𑀘𑀺 𑀯𑁂𑀤𑀦𑀸.𑀮. 𑀬𑀸𑀓𑀸𑀘𑀺 𑀲𑀜𑁆𑀜𑀸.𑀮. 𑀬𑁂𑀓𑁂𑀘𑀺 𑀲𑀗𑁆𑀔𑀸𑀭𑀸.𑀮. 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁.𑀮. 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦. 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺. 𑀏𑀢𑁆𑀣𑀘 𑀲𑀩𑁆𑀩𑀁 𑀭𑀽𑀧𑀁.𑀮. 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀕𑀳𑀡𑀫𑁂𑀯 𑀓𑀮𑀸𑀧𑀯𑀲𑁂𑀦 𑀲𑀗𑁆𑀔𑀺𑀧𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀺𑀘𑁆𑀘𑀁𑀔𑀬𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦. 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸. 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸. 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸. 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑁆𑀫𑀲𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀕𑁆𑀕𑀳𑁂𑀦 𑀲𑀳𑁂𑀯 𑀲𑀫𑁆𑀫𑀲𑀦𑀁 𑀓𑀸𑀢𑀩𑁆𑀩𑀁. 𑀇𑀢𑀭𑀣𑀸 𑀲𑀫𑁆𑀫𑀲𑀦𑀁 𑀦 𑀭𑀼𑀳𑀢𑀺. 𑀢𑀤𑀢𑁆𑀣𑀲𑁆𑀲 𑀧𑀦 𑀧𑀸𑀓𑀝𑀢𑁆𑀢𑀸 𑀇𑀥 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀦𑀧𑀤𑀫𑁂𑀯 𑀣𑁂𑀭𑁂𑀦 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸𑀢𑀺 𑀢𑀁𑀢𑀁𑀭𑀽𑀧𑀁 𑀜𑀸𑀡𑁂𑀦 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀧𑀣𑀯𑀺𑀥𑀸𑀢𑀼 𑀅𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦. 𑀅𑀬𑀁 𑀆𑀧𑁄𑀥𑀸𑀢𑀼 𑀅𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀦𑀁 𑀓𑀸𑀢𑀩𑁆𑀩𑀁. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀲𑀩𑁆𑀩𑀁 𑀣𑀤𑁆𑀥𑀓𑁆𑀭𑀺𑀬𑀸𑀫𑀢𑁆𑀢𑀁 𑀧𑀣𑀯𑀻𑀦𑀸𑀫. 𑀲𑀸𑀘 𑀓𑁆𑀭𑀺𑀬𑀸 𑀲𑀻𑀢𑀼𑀡𑁆𑀳𑀧𑀭𑀺𑀯𑀢𑁆𑀢𑀺𑀬𑀸𑀯𑀸 𑀧𑀭𑀺𑀯𑀢𑁆𑀢𑀢𑀺. 𑀦𑀸𑀦𑀸𑀳𑀸𑀭𑀧𑀭𑀺𑀯𑀢𑁆𑀢𑀺𑀬𑀸 𑀯𑀸 𑀦𑀸𑀦𑀸𑀘𑀺𑀢𑁆𑀢𑀧𑀭𑀺𑀯𑀢𑁆𑀢𑀺𑀬𑀸𑀯𑀸 𑀦𑀸𑀦𑀺𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀺𑀬𑀸𑀯𑀸 𑀦𑀸𑀦𑀸 𑀓𑀸𑀬𑀺𑀓𑀓𑁆𑀭𑀺𑀬𑀸 𑀧𑀭𑀺𑀯𑀢𑁆𑀢𑀺𑀬𑀸𑀯𑀸 𑀧𑀭𑀺𑀯𑀢𑁆𑀢𑀢𑀺. 𑀦𑀸𑀦𑀸𑀲𑀦𑁆𑀢𑀢𑀺 𑀲𑀗𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀦𑀯𑀦𑀯𑀸𑀲𑀼 𑀓𑁆𑀭𑀺𑀬𑀸𑀲𑀦𑁆𑀢𑀢𑀻𑀲𑀼 𑀧𑀸𑀢𑀼𑀪𑁄𑀦𑁆𑀢𑀻𑀲𑀼 𑀧𑀼𑀩𑁆𑀩𑀧𑀼𑀩𑁆𑀩𑀓𑁆𑀭𑀺𑀬𑀸𑀲𑀦𑁆𑀢𑀢𑀺𑀬𑁄 𑀦𑀲𑁆𑀲𑀦𑁆𑀢𑀺. 𑀬𑀲𑁆𑀫𑀸𑀘 𑀲𑀦𑁆𑀢𑀢𑀺 𑀦𑀸𑀫 𑀥𑀫𑁆𑀫𑀢𑁄 𑀯𑀺𑀲𑀼𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀯𑀦𑀯𑀲𑀦𑁆𑀢𑀢𑀻𑀦𑀁 𑀧𑀸𑀢𑀼𑀪𑀸𑀯𑁄𑀦𑀸𑀫 𑀦𑀯𑀦𑀯𑀓𑁆𑀭𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀏𑀯. 𑀧𑀼𑀩𑁆𑀩𑀧𑀼𑀩𑁆𑀩𑀲𑀦𑁆𑀢𑀢𑀻𑀦𑀁 𑀦𑀲𑁆𑀲𑀦𑀁𑀦𑀸𑀫 𑀧𑀼𑀩𑁆𑀩𑀧𑀼𑀩𑁆𑀩 𑀓𑁆𑀭𑀺𑀬𑀸𑀦𑀁 𑀪𑀺𑀚𑁆𑀚𑀦𑀫𑁂𑀯𑀸𑀢𑀺. 𑀏𑀯𑀁 𑀅𑀢𑁆𑀢𑀦𑁄 𑀓𑀸𑀬𑁂 𑀦𑀸𑀦𑀸𑀣𑀤𑁆𑀥𑀓𑁆𑀭𑀺𑀬𑀸𑀦𑀁 𑀧𑀭𑀺𑀯𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀧𑀣𑀯𑀺𑀥𑀸𑀢𑀼𑀬𑀸 𑀔𑀬𑀯𑀬𑀁 𑀧𑀲𑁆𑀲𑀢𑀺. 𑀢𑀜𑁆𑀘 𑀧𑀲𑁆𑀲𑀦𑁆𑀢𑁄 𑀢𑀁𑀲𑀳𑀚𑀸𑀢𑀸𑀦𑀁 𑀭𑀽𑀧𑀸𑀦𑀁 𑀔𑀬𑀯𑀬𑀁 𑀧𑀲𑁆𑀲𑀢𑀺𑀬𑁂𑀯. 𑀆𑀧𑁄 𑀦𑀸𑀫 𑀆𑀩𑀦𑁆𑀥𑀦𑀓𑁆𑀭𑀺𑀬𑀸𑀫𑀢𑁆𑀢𑀁. 𑀢𑁂𑀚𑁄𑀦𑀸𑀫 𑀲𑀻𑀢𑀓𑁆𑀭𑀺𑀬𑀸𑀫𑀢𑁆𑀢𑀁 𑀉𑀡𑁆𑀳 𑀓𑁆𑀭𑀺𑀬𑀸𑀫𑀢𑁆𑀢𑀜𑁆𑀘. 𑀯𑀸𑀬𑁄𑀦𑀸𑀫 𑀯𑀺𑀢𑁆𑀣𑀫𑁆𑀪𑀦𑀓𑁆𑀭𑀺𑀬𑀸𑀫𑀢𑁆𑀢𑀁. 𑀇𑀫𑀸𑀘 𑀓𑁆𑀭𑀺𑀬𑀸 𑀔𑀡𑁂 𑀔𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀺𑀬𑁂𑀯. 𑀇𑀫𑀸𑀲𑀜𑁆𑀘, 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀦𑁆𑀢𑀢𑀺𑀧𑀭𑀺𑀯𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑁄 𑀆𑀧𑀸𑀤𑀻𑀦𑀁 𑀢𑀁𑀲𑀳𑀚𑀸𑀢𑀭𑀽𑀧𑀸𑀦𑀜𑁆𑀘 𑀔𑀬𑀯𑀬𑀁 𑀧𑀲𑁆𑀲𑀢𑀺. 𑀲𑀦𑁆𑀢𑀢𑀺𑀧𑀭𑀺𑀯𑀢𑁆𑀢𑀺𑀁 𑀧𑀦 𑀩𑀳𑀺𑀤𑁆𑀥𑀸 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀚𑀸𑀦𑀸𑀢𑀺, 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀧𑀦 𑀓𑀸𑀬𑀲𑀁𑀨𑀲𑁆𑀲𑁂𑀦 𑀚𑀸𑀦𑀸𑀢𑀺. 𑀲𑀦𑁆𑀢𑀢𑀺𑀲𑀭𑀻𑀭𑀪𑀽𑀢𑀸𑀦𑀁 𑀧𑀦 𑀥𑀸𑀢𑀽𑀦𑀁 𑀔𑀬𑀯𑀬𑀁 𑀜𑀸𑀡𑁂𑀦𑀏𑀯 𑀧𑀲𑁆𑀲𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀭𑀻𑀭𑀩𑁆𑀪𑀦𑁆𑀢𑀭𑁂 𑀢𑀁𑀢𑀁𑀲𑀦𑁆𑀢𑀢𑀺 𑀧𑀭𑀺𑀯𑀢𑁆𑀢𑀺𑀁 𑀜𑀢𑁆𑀯𑀸𑀯𑀸 𑀢𑀣𑀸 𑀢𑀣𑀸 𑀓𑀧𑁆𑀧𑁂𑀢𑁆𑀯𑀸 𑀯𑀸 𑀭𑀽𑀧𑀥𑀸𑀢𑀽𑀦𑀁 𑀅𑀦𑀺𑀘𑁆𑀘𑀢𑁆𑀢𑀁 𑀜𑀸𑀡𑁂𑀦 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑁆𑀫𑀲𑀺𑀢𑀩𑁆𑀩𑀁. 𑀲𑁂𑀲𑀔𑀦𑁆𑀥𑁂𑀲𑀼𑀧𑀺 𑀢𑀁𑀢𑀁𑀲𑀦𑁆𑀢𑀢𑀺𑀦𑀸𑀦𑀸𑀢𑁆𑀢𑀁 𑀜𑀢𑁆𑀯𑀸 𑀯𑁂𑀤𑀦𑀸𑀤𑀻𑀦𑀁 𑀔𑀬𑀯𑀬𑀁 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀲𑀫𑁆𑀫𑀲𑀦𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦. 𑀬𑀜𑁆𑀳𑀺 𑀅𑀦𑀺𑀘𑁆𑀘𑀁 𑀳𑁄𑀢𑀺. 𑀔𑀡𑀫𑀢𑁆𑀢𑁂𑀧𑀺 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁. 𑀢𑀁 𑀏𑀓𑀦𑁆𑀢𑁂𑀦 𑀪𑀸𑀬𑀺𑀢𑀩𑁆𑀩𑀫𑁂𑀯. 𑀓𑀲𑁆𑀫𑀸, 𑀢𑀜𑁆𑀳𑀺 𑀬𑁄 𑀅𑀪𑀸𑀬𑀺𑀢𑁆𑀯𑀸 𑀯𑀺𑀲𑁆𑀲𑀸𑀲𑀁 𑀓𑀭𑁄𑀢𑀺. 𑀏𑀢𑀁 𑀫𑁂𑀢𑀺 𑀅𑀢𑁆𑀢𑀦𑁄 𑀅𑀗𑁆𑀕𑀁 𑀓𑀢𑁆𑀯𑀸 𑀧𑀭𑀺𑀳𑀭𑀢𑀺. 𑀢𑀁 𑀅𑀧𑀭𑀺𑀬𑀦𑁆𑀢𑁂𑀳𑀺 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀅𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑁂𑀳𑀺𑀯𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀳𑀺𑀯𑀸 𑀅𑀪𑀺𑀡𑁆𑀳𑀁 𑀧𑀻𑀴𑁂𑀢𑀺. 𑀩𑀸𑀥𑀢𑀺. 𑀇𑀢𑀺 𑀦𑀸𑀦𑀸𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀅𑀪𑀺𑀡𑁆𑀳𑀁 𑀲𑀫𑁆𑀧𑀝𑀺𑀧𑀻𑀴𑀦𑀲𑀪𑀸𑀯𑀢𑁆𑀢𑀸 𑀏𑀓𑀦𑁆𑀢𑁂𑀦 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀤𑀼𑀓𑁆𑀔𑀁𑀦𑀸𑀫𑀸𑀢𑀺. 𑀅𑀢𑁆𑀢𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀦𑀢𑁆𑀢𑀸. 𑀬𑁄 𑀳𑀺 𑀇𑀢𑁄 𑀉𑀤𑁆𑀥𑀁 𑀫𑀬𑁆𑀳𑀁 𑀅𑀩𑁆𑀪𑀦𑁆𑀢𑀭𑀺𑀫𑀢𑀭𑁄𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀧𑀭𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑁄 𑀳𑁄𑀢𑀺. 𑀲𑁄 𑀅𑀢𑁆𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀢𑀫𑁄 𑀧𑀦 𑀢𑀣𑀸𑀧𑀭𑀺𑀕𑁆𑀕𑀳𑀺 𑀢𑀩𑁆𑀩𑁄𑀢𑀺. 𑀬𑁄 𑀅𑀢𑁆𑀢𑀦𑁄 𑀯𑀲𑁂 𑀲𑀩𑁆𑀩𑀲𑁄 𑀯𑀢𑁆𑀢𑀢𑀺. 𑀬𑀣𑀸 𑀯𑀼𑀢𑁆𑀢𑁂𑀳𑀺 𑀅𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀳𑀺 𑀯𑀺𑀦𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀙𑀦𑁆𑀤𑁂𑀦𑀯𑀸 𑀯𑀲𑁂𑀦𑀯𑀸 𑀅𑀚𑁆𑀛𑀸𑀲𑀬𑁂𑀦𑀯𑀸 𑀆𑀡𑀸𑀯𑀺𑀥𑀸𑀦𑁂𑀦𑀯𑀸 𑀦𑀺𑀘𑁆𑀘𑀁 𑀅𑀯𑀺𑀭𑀚𑁆𑀛𑀫𑀸𑀦𑁄 𑀧𑀯𑀢𑁆𑀢𑀢𑀺. 𑀲𑁄 𑀢𑀣𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺. 𑀢𑀣𑀸𑀭𑀽𑀧𑁄 𑀏𑀯 𑀳𑀺 𑀥𑀫𑁆𑀫𑁄 𑀦𑀺𑀘𑁆𑀘𑀁 𑀲𑀼𑀔𑀓𑀸𑀫𑀸𑀦𑀁 𑀤𑀼𑀓𑁆𑀔𑀧𑀝𑀺𑀓𑀽𑀮𑀸𑀦𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀢𑀺 𑀦𑀸𑀫𑀸𑀢𑀺. 𑀬𑁄 𑀧𑀦 𑀦𑀺𑀘𑁆𑀘𑀁 𑀲𑀼𑀔𑀓𑀸𑀫𑀸𑀦𑀁 𑀢𑁂𑀲𑀁 𑀬𑀣𑀸𑀧𑀯𑀢𑁆𑀢𑀁 𑀲𑀼𑀔𑀁 𑀯𑀺𑀤𑁆𑀥𑀁𑀲𑁂𑀢𑀺 𑀯𑀺𑀓𑀺𑀭𑁂𑀢𑀺. 𑀤𑀼𑀓𑁆𑀔𑀧𑀝𑀺𑀓𑀽𑀮𑀸𑀦𑀁 𑀢𑁂𑀲𑀁 𑀅𑀪𑀺𑀲𑀗𑁆𑀔𑀭𑀡𑀸𑀤𑀺 𑀫𑀽𑀮𑀓𑀁 𑀦𑀸𑀦𑀸𑀤𑀼𑀓𑁆𑀔𑀁 𑀚𑀦𑁂𑀢𑀺 𑀯𑀟𑁆𑀠𑁂𑀢𑀺. 𑀲𑁄 𑀅𑀢𑁆𑀢𑀧𑀝𑀺𑀧𑀓𑁆𑀔𑁄𑀏𑀯 𑀳𑁄𑀢𑀺. 𑀇𑀤𑀜𑁆𑀘 𑀭𑀽𑀧𑀁 𑀏𑀤𑀺𑀲𑀫𑁂𑀯 𑀳𑁄𑀢𑀺. 𑀇𑀢𑀺 𑀅𑀢𑁆𑀢𑀓𑀺𑀘𑁆𑀘𑀲𑁆𑀲 𑀅𑀓𑀭𑀡𑀢𑁄 𑀅𑀢𑁆𑀢𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀲𑁆𑀲 𑀓𑀭𑀡𑀢𑁄𑀘 𑀭𑀽𑀧𑀁 𑀅𑀦𑀢𑁆𑀢𑀸𑀦𑀸𑀫𑀸𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀦𑀯𑀢𑁆𑀢𑀢𑀺 𑀅𑀢𑁆𑀢𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺 𑀅𑀢𑁆𑀢𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀆𑀳 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺. 𑀢𑀢𑁆𑀣 𑀲𑀸𑀭𑁄𑀦𑀸𑀫 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀯𑀺𑀦𑀸 𑀓𑁂𑀯𑀮𑀁 𑀅𑀚𑁆𑀛𑀸𑀲𑀬𑀫𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀘 𑀧𑀘𑁆𑀘𑀬𑀼𑀧𑀢𑁆𑀣𑀫𑁆𑀪𑁂𑀦 𑀯𑀺𑀦𑀸 𑀬𑀤𑀺𑀘𑁆𑀙𑀓𑀁 𑀧𑀢𑀺𑀝𑁆𑀞𑀸𑀢𑀼𑀁 𑀯𑀸 𑀲𑀫𑀢𑁆𑀣𑀪𑀸𑀯𑀲𑀗𑁆𑀔𑀸𑀢𑁄 𑀣𑀸𑀫𑀩𑀮𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺. 𑀭𑀽𑀧𑀁 𑀧𑀦 𑀲𑀬𑀁𑀧𑀺 𑀏𑀯𑀭𑀽𑀧𑁄 𑀲𑀸𑀭𑁄𑀦𑀸𑀫 𑀦 𑀳𑁄𑀢𑀺. 𑀦𑀘 𑀏𑀯𑀭𑀽𑀧𑁂𑀦 𑀲𑀸𑀭𑁂𑀦 𑀬𑀼𑀢𑁆𑀢𑀦𑁆𑀢𑀺. 𑀦𑀳𑀺 𑀢𑀲𑁆𑀲 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀯𑀺𑀦𑀸 𑀉𑀧𑁆𑀧𑀚𑁆𑀚𑀺𑀢𑀼𑀁𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀧𑀘𑁆𑀘𑀬𑀼𑀧𑀢𑁆𑀣𑀫𑁆𑀪𑁂𑀦 𑀯𑀺𑀦𑀸 𑀔𑀡𑀫𑀢𑁆𑀢𑀁𑀧𑀺 𑀧𑀢𑀺𑀝𑁆𑀞𑀸𑀢𑀼𑀁𑀯𑀸 𑀣𑀸𑀫𑁄𑀯𑀸 𑀩𑀮𑀁𑀯𑀸 𑀅𑀢𑁆𑀣𑀺. 𑀬𑀜𑁆𑀘 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀩𑀮𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺 𑀩𑀮𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀧𑀘𑁆𑀘𑀬𑀼𑀧𑀢𑁆𑀣𑀫𑁆𑀪𑁂𑀦𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀢𑀁 𑀅𑀦𑁂𑀓 𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀬𑀸𑀪𑀺𑀲𑀗𑁆𑀔𑀭𑀡𑀤𑀼𑀓𑁆𑀔𑀸𑀦𑀺 𑀚𑀦𑁂𑀢𑁆𑀯𑀸 𑀏𑀓𑀦𑁆𑀢𑁂𑀦 𑀦𑀺𑀘𑁆𑀘𑀁 𑀅𑀢𑁆𑀢𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀧𑀻𑀴𑁂𑀢𑀺, 𑀩𑀸𑀥𑀢𑀺𑀬𑁂𑀯𑀸𑀢𑀺. 𑀏𑀲𑀦𑀬𑁄 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦𑀸𑀢𑀺𑀆𑀤𑀻𑀲𑀼. 𑀇𑀢𑀺 𑀮𑀓𑁆𑀔𑀡𑀢𑁆𑀢𑀬𑀁 𑀲𑀫𑁆𑀫 𑀲𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑁆𑀥𑀸𑀦𑀯𑀲𑁂𑀦𑀸𑀢𑀺 𑀏𑀓𑁂𑀓𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀧𑀯𑀢𑁆𑀢𑀓𑀸𑀮𑀲𑁆𑀲 𑀯𑀲𑁂𑀦. 𑀦𑀳𑀺 𑀪𑀯𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀁 𑀔𑀦𑁆𑀥𑀧𑀜𑁆𑀘𑀓𑀁 𑀅𑀜𑁆𑀜𑀁 𑀪𑀯𑀦𑁆𑀢𑀭𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂𑀏𑀯 𑀅𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀅𑀧𑀺𑀘, 𑀏𑀓𑀲𑁆𑀫𑀺𑀁 𑀪𑀯𑁂𑀧𑀺 𑀢𑀺𑀡𑁆𑀡𑀁 𑀯𑀬𑀸𑀦𑀁 𑀫𑀦𑁆𑀤𑀸𑀤𑀻𑀦𑀁 𑀤𑀲𑀦𑁆𑀦𑀁 𑀤𑀲𑀓𑀸𑀦𑀁 𑀲𑀁𑀯𑀘𑁆𑀙𑀭𑀉𑀢𑀼 𑀫𑀸𑀲 𑀧𑀓𑁆𑀔𑀢𑀺𑀣𑀺 𑀅𑀳𑁄𑀭𑀢𑁆𑀢𑀺 𑀬𑀸𑀫 𑀧𑀳𑀸𑀭𑀸𑀤𑀻𑀦𑀜𑁆𑀘 𑀯𑀲𑁂𑀦 𑀅𑀤𑁆𑀥𑀸𑀦𑀪𑁂𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀲𑀪𑀸𑀕𑁂𑀓𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀭𑀽𑀧𑀲𑀦𑁆𑀢𑀢𑀺𑀬𑀸𑀯𑀸 𑀅𑀭𑀽𑀧 𑀲𑀦𑁆𑀢𑀢𑀺𑀬𑀸𑀯𑀸 𑀯𑀲𑁂𑀦. 𑀔𑀡𑀯𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀆𑀬𑀼 𑀧𑀭𑀺𑀫𑀸𑀡𑀲𑀗𑁆𑀔𑀸𑀢𑀲𑁆𑀲 𑀔𑀡𑀲𑁆𑀲 𑀯𑀲𑁂𑀦. 𑀏𑀢𑁆𑀣𑀘 𑀔𑀡𑀯𑀲𑁂𑀦 𑀲𑀫𑁆𑀫𑀲𑀦𑀁𑀦𑀸𑀫 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀏𑀯 𑀯𑀺𑀲𑀬𑁄 𑀲𑀺𑀬𑀸, 𑀦 𑀲𑀸𑀯𑀓𑀸𑀦𑀁. 𑀦𑀳𑀺 𑀢𑁂 𑀏𑀯𑀁 𑀧𑀭𑀺𑀢𑁆𑀢𑀓𑁂 𑀔𑀡𑁂 𑀉𑀧𑁆𑀧𑀸𑀤𑀁𑀯𑀸 𑀦𑀺𑀭𑁄𑀥𑀁𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦 𑀲𑀫𑁆𑀫𑀲𑀦𑀫𑁂𑀯 𑀇𑀥𑀸 𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑀓𑁆𑀔𑀡𑀢𑁆𑀢𑀬𑀁𑀲𑀫𑁆𑀫𑀲𑀦𑁆𑀢𑀲𑁆𑀲𑀸𑀢𑀺 𑀢𑁂𑀲𑀼 𑀢𑁂𑀪𑀽𑀫𑀓 𑀲𑀗𑁆𑀔𑀸𑀭𑁂𑀲𑀼 𑀥𑀫𑁆𑀫𑁂𑀲𑀼 𑀢𑀺𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀢𑁂 𑀥𑀫𑁆𑀫𑁂 𑀧𑀼𑀦𑀧𑁆𑀧𑀼𑀦𑀁 𑀆𑀫𑀲𑀦𑁆𑀢𑀲𑁆𑀲 𑀧𑀭𑀺𑀫𑀚𑁆𑀚𑀦𑁆𑀢𑀲𑁆𑀲. 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘 𑀚𑀸𑀢𑀺𑀓𑀢𑀁𑀯𑀸 𑀤𑀼𑀓𑁆𑀔𑀚𑀸𑀢𑀺𑀓𑀢𑀁𑀯𑀸 𑀅𑀦𑀢𑁆𑀢𑀚𑀸𑀢𑀺𑀓𑀢𑀁𑀯𑀸 𑀜𑀸𑀡𑁂 𑀲𑀼𑀝𑁆𑀞𑀼 𑀧𑀸𑀓𑀝𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀢𑁄 𑀧𑀦 𑀇𑀫𑀲𑁆𑀫𑀺𑀁 𑀜𑀸𑀡𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀤𑀲𑁆𑀲𑀦𑀫𑁂𑀯 𑀧𑀥𑀸𑀦𑀁. 𑀢𑀲𑁆𑀫𑀺𑀁 𑀤𑀺𑀝𑁆𑀞𑁂𑀬𑁂𑀯 𑀇𑀢𑀭𑀸𑀦𑀺 𑀓𑀫𑁂𑀦 𑀤𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺. 𑀅𑀤𑀺𑀝𑁆𑀞𑁂𑀘 𑀅𑀤𑀺𑀝𑁆𑀞𑀸𑀦𑀻𑀢𑀺. 𑀢𑀲𑁆𑀫𑀸 𑀆𑀤𑀺𑀢𑁄 𑀅𑀦𑀺𑀘𑁆𑀘𑀮𑀓𑁆𑀔𑀡𑀲𑁆𑀲𑁂𑀯 𑀲𑀼𑀝𑁆𑀞𑀼 𑀧𑀸𑀓𑀝𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺. 𑀢𑁂𑀲𑁆𑀯𑁂𑀯𑀸𑀢𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀼 𑀏𑀯. 𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑁂 𑀢𑀸𑀯 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀸𑀳𑀸𑀭𑀲𑀗𑁆𑀔𑀸𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦. 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑁂𑀲𑀼 𑀧𑀦 𑀆𑀳𑀸𑀭𑀝𑁆𑀞𑀸𑀦𑁂 𑀨𑀲𑁆𑀲𑁄 𑀯𑀢𑁆𑀢𑀩𑁆𑀩𑁄. 𑀯𑀺𑀜𑁆𑀜𑀸𑀡𑁂𑀘 𑀦𑀸𑀫𑀭𑀽𑀧𑀁. 𑀢𑀢𑁆𑀭𑀸𑀬𑀁 𑀦𑀬𑁄. 𑀅𑀢𑀻𑀢𑀸𑀦𑀦𑁆𑀢𑀭𑀪𑀯𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦 𑀓𑀫𑁆𑀫𑁂𑀲𑀼 𑀅𑀧𑁆𑀧𑀳𑀻𑀦𑀯𑀲𑁂𑀦 𑀲𑀫𑀼𑀤𑀺𑀢𑁂𑀲𑀼 𑀇𑀫𑀲𑁆𑀫𑀺𑀁 𑀪𑀯𑁂 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀭𑀽𑀧𑀲𑀦𑁆𑀢𑀢𑀺𑀬𑁄 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭 𑀯𑀺𑀜𑁆𑀜𑀸𑀡𑀲𑀦𑁆𑀢𑀢𑀺𑀬𑁄𑀘 𑀲𑀫𑀼𑀤𑁂𑀦𑁆𑀢𑀺. 𑀬𑀸𑀯 𑀫𑀭𑀡𑀓𑀸𑀮𑀸 𑀔𑀡𑁂 𑀔𑀡𑁂 𑀦𑀸𑀦𑀸𑀓𑀮𑀸𑀧𑀯𑀲𑁂𑀦 𑀉𑀤𑁂𑀦𑁆𑀢𑀺 𑀧𑀲𑀯𑀦𑁆𑀢𑀺. 𑀢𑁂𑀲𑀼 𑀧𑀦 𑀢𑀲𑁆𑀫𑀺𑀁 𑀪𑀯𑁂 𑀏𑀯 𑀧𑀳𑀻𑀦𑀯𑀲𑁂𑀦 𑀦𑀺𑀭𑀼𑀤𑁆𑀥𑁂𑀲𑀼 𑀢𑀸 𑀭𑀽𑀧𑀸𑀭𑀽𑀧𑀲𑀦𑁆𑀢𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀪𑀯𑀦𑁆𑀢𑀭𑁂 𑀧𑀼𑀦 𑀅𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀦𑀺𑀭𑁄𑀥𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀢𑁆𑀣 𑀧𑀦 𑀬𑀣𑀸 𑀉𑀤𑀓𑁂 𑀲𑀢𑀺 𑀫𑀘𑁆𑀙𑀸𑀦𑀸𑀫 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺. 𑀏𑀯𑀁 𑀓𑀫𑁆𑀫𑀚𑁂𑀲𑀼 𑀦𑀸𑀫𑀭𑀽𑀧𑁂𑀲𑀼 𑀲𑀢𑀺 𑀇𑀢𑀭𑀸𑀦𑀺 𑀦𑀸𑀫𑀭𑀽𑀧𑀸𑀦𑀺 𑀳𑁄𑀦𑁆𑀢𑀺. 𑀅𑀲𑀢𑀺 𑀦 𑀳𑁄𑀦𑁆𑀢𑀻𑀢𑀺 𑀇𑀢𑀭𑀸𑀦𑀺 𑀲𑀩𑁆𑀩𑀸𑀦𑀺 𑀓𑀫𑁆𑀫𑀚𑁂𑀲𑀼 𑀲𑀗𑁆𑀕𑀳𑁂𑀢𑁆𑀯𑀸 𑀓𑀫𑁆𑀫𑀯𑀲𑁂𑀦 𑀉𑀤𑀬𑀩𑁆𑀩𑀬𑀯𑀺𑀥𑀸𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀩𑁆𑀩𑀬𑀧𑀯𑀢𑁆𑀢𑀺 𑀳𑁄𑀢𑀻𑀢𑀺. 𑀓𑀫𑁆𑀫𑀯𑀲𑁂𑀦 𑀧𑀦 𑀇𑀫𑀲𑁆𑀫𑀺𑀁 𑀪𑀯𑁂 𑀲𑀫𑀼𑀤𑁂𑀦𑁆𑀢𑀸𑀦𑀺𑀧𑀺 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀔𑀡𑁂 𑀔𑀡𑁂 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀢𑁆𑀣𑀫𑁆𑀪𑀦𑀁 𑀮𑀤𑁆𑀥𑀸 𑀏𑀯 𑀬𑀣𑀸 𑀧𑀯𑀢𑁆𑀢𑀭𑀽𑀧𑀲𑀦𑁆𑀢𑀢𑀺𑀬𑁄 𑀅𑀦𑀼𑀩𑀦𑁆𑀥 𑀫𑀸𑀦𑀸 𑀦𑀯𑀦𑀯𑀸 𑀭𑀽𑀧𑀲𑀦𑁆𑀢𑀢𑀺𑀬𑁄 𑀲𑀫𑀼𑀤𑁂𑀦𑁆𑀢𑀺. 𑀅𑀮𑀤𑁆𑀥𑀸 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀁 𑀲𑀦𑁆𑀢𑀢𑀺𑀬𑀁 𑀧𑀼𑀦 𑀅𑀦𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀏𑀓𑀪𑀯𑀦𑀺𑀭𑁄𑀥𑀁 𑀧𑀸𑀧𑀼𑀡𑀦𑁆𑀢𑀺, 𑀬𑀣𑀸 𑀧𑀯𑀢𑁆𑀢𑀲𑀦𑁆𑀢𑀢𑀺𑀬𑁄 𑀯𑀸 𑀙𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺.

𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀧𑀦 𑀩𑀳𑀺𑀤𑁆𑀥𑀸 𑀆𑀭𑀫𑁆𑀫𑀡𑁂𑀲𑀼 𑀆𑀧𑀸𑀢𑀸𑀕𑀢𑁂𑀲𑀼 𑀆𑀭𑀫𑁆𑀫𑀡𑀲𑀫𑁆𑀨𑀲𑁆𑀲𑀁 𑀮𑀤𑁆𑀥𑀸𑀏𑀯 𑀙𑀤𑁆𑀯𑀸𑀭𑀺𑀓𑀸 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓 𑀓𑁆𑀭𑀺𑀬𑀪𑀽𑀢𑀸 𑀲𑀫𑀼𑀤𑁂𑀦𑁆𑀢𑀺. 𑀦𑀯𑀦𑀯𑀸 𑀲𑀦𑁆𑀢𑀢𑀺𑀬𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀅𑀮𑀤𑁆𑀥𑀸 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑀦𑁆𑀢𑀢𑀺𑀁 𑀦 𑀖𑀝𑁂𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁𑀘 𑀲𑀳𑀚𑀸𑀢 𑀦𑀸𑀫𑁂𑀘 𑀯𑀢𑁆𑀣𑀼𑀭𑀽𑀧𑁂𑀘 𑀧𑀯𑀢𑁆𑀢𑀫𑀸𑀦𑁂𑀏𑀯 𑀧𑀯𑀢𑁆𑀢𑀢𑀺. 𑀦𑀺𑀯𑀢𑁆𑀢𑀫𑀸𑀦𑁂 𑀦𑀺𑀯𑀢𑁆𑀢𑀢𑀻𑀢𑀺. 𑀔𑀡𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀘𑁆𑀘𑀬𑁂 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀦𑀸𑀫𑀭𑀽𑀧𑀸𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑀯𑀲𑁂𑀦. 𑀔𑀡𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀫𑁆𑀫𑀲𑀦𑀜𑀸𑀡𑁂 𑀯𑀼𑀢𑁆𑀢𑀭𑀽𑀧𑀲𑀦𑁆𑀢𑀢𑀺 𑀦𑀸𑀫𑀲𑀦𑁆𑀢𑀢𑀺𑀬𑁄𑀧𑀺 𑀕𑀳𑁂𑀢𑀩𑁆𑀩𑀸. 𑀦𑀳𑀺 𑀲𑀸𑀯𑀓𑀸𑀦𑀁 𑀜𑀸𑀡𑀁 𑀔𑀡𑀯𑀲𑁂𑀦 𑀦𑀸𑀫𑀭𑀽𑀧𑀸𑀦𑀁 𑀉𑀤𑀬𑀁𑀯𑀸 𑀯𑀬𑀁 𑀯𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺. 𑀬𑀣𑀸 𑀧𑀦 𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀦𑁆𑀢𑁄 𑀮𑁂𑀡𑁂 𑀫𑀳𑀦𑁆𑀢𑁄 𑀢𑀫𑁄𑀔𑀦𑁆𑀥𑁄 𑀚𑀸𑀬𑀢𑀺. 𑀤𑀻𑀧𑀁 𑀚𑀸𑀮𑁂𑀦𑁆𑀢𑀲𑁆𑀲 𑀧𑀦 𑀤𑀻𑀧𑁄𑀪𑀸𑀲𑁄 𑀏𑀓𑀓𑁆𑀔𑀡𑁂 𑀏𑀯 𑀲𑀓𑀮𑀁 𑀅𑀦𑁆𑀢𑁄𑀮𑁂𑀡𑀁 𑀨𑀭𑀫𑀸𑀦𑁄 𑀉𑀤𑁂𑀢𑀺. 𑀢𑀫𑁄𑀔𑀦𑁆𑀥𑁄 𑀯𑁂𑀢𑀺. 𑀆𑀮𑁄𑀓𑀲𑁆𑀲 𑀉𑀤𑀬𑁄 𑀳𑁄𑀢𑀺. 𑀢𑀫𑁄𑀔𑀦𑁆𑀥𑀲𑁆𑀲 𑀯𑀬𑁄. 𑀧𑀼𑀦 𑀤𑀻𑀧𑁂 𑀦𑀺𑀩𑁆𑀩𑀸𑀧𑀻𑀬𑀫𑀸𑀦𑁂 𑀢𑀫𑁄𑀔𑀦𑁆𑀥𑀲𑁆𑀲 𑀉𑀤𑀬𑁄 𑀳𑁄𑀢𑀺. 𑀆𑀮𑁄𑀓𑀲𑁆𑀲 𑀯𑀬𑁄. 𑀏𑀯 𑀫𑁂𑀯𑀁 𑀲𑀭𑀻𑀭𑁂 𑀦𑀸𑀦𑀸𑀉𑀢𑀼𑀯𑀲𑁂𑀦𑀯𑀸 𑀦𑀸𑀦𑀸𑀳𑀸𑀭𑀯𑀲𑁂𑀦𑀯𑀸 𑀦𑀸𑀦𑀸𑀘𑀺𑀢𑁆𑀢 𑀯𑀲𑁂𑀦𑀯𑀸 𑀦𑀸𑀦𑀺𑀭𑀺𑀬𑀸𑀧𑀣𑀯𑀲𑁂𑀦𑀯𑀸 𑀦𑀸𑀦𑀸𑀧𑀬𑁄𑀕𑀯𑀲𑁂𑀦𑀯𑀸 𑀉𑀤𑀬𑀧𑀓𑁆𑀔𑀸𑀦𑀁 𑀯𑀬𑀧𑀓𑁆𑀔𑀸𑀦𑀜𑁆𑀘 𑀦𑀸𑀦𑀸𑀲𑀦𑁆𑀢𑀢𑀻𑀦𑀁 𑀉𑀤𑀬𑀜𑁆𑀘 𑀉𑀤𑀬𑀢𑁄 𑀯𑀬𑀜𑁆𑀘 𑀯𑀬𑀢𑁄 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀧𑀦 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀪𑀸𑀯𑀁 𑀧𑀢𑁆𑀢𑀲𑁆𑀲 𑀉𑀤𑀬𑀩𑁆𑀩𑀬 𑀜𑀸𑀡𑁂 𑀢𑀺𑀓𑁆𑀔𑁂 𑀲𑀽𑀭𑁂 𑀯𑀳𑀦𑁆𑀢𑁂 𑀤𑀲𑀯𑀺𑀥𑀸 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑀸 𑀧𑀸𑀭𑀺𑀧𑀦𑁆𑀣𑀓𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀤𑀲𑁆𑀲𑁂𑀢𑀼𑀁 𑀑𑀪𑀸𑀲𑁄𑀢𑀺𑀆𑀤𑀺𑀕𑀸𑀣 𑀫𑀸𑀳. 𑀢𑀢𑁆𑀣 𑀑𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑁄 𑀲𑀭𑀻𑀭𑁄𑀪𑀸𑀲𑁄. 𑀧𑀻𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀤𑀼𑀯𑀺𑀥𑀸𑀧𑀲𑁆𑀲𑀤𑁆𑀥𑀺. 𑀅𑀥𑀺𑀫𑁄𑀓𑁆𑀔𑁄𑀢𑀺 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁄. 𑀧𑀕𑁆𑀕𑀳𑁄𑀢𑀺 𑀯𑀻𑀭𑀺𑀬𑀁. 𑀲𑀼𑀔𑀦𑁆𑀢𑀺 𑀲𑁄𑀫𑀦𑀲𑁆𑀲𑀁. 𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸 𑀜𑀸𑀡𑀁. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺. 𑀉𑀧𑁂𑀓𑁆𑀔𑀸𑀢𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘𑁂𑀯 𑀆𑀯𑀚𑁆𑀚𑀦𑀼𑀧𑁂𑀓𑁆𑀔𑀸 𑀘. 𑀦𑀺𑀓𑀦𑁆𑀢𑀻𑀢𑀺 𑀑𑀪𑀸𑀲𑀸𑀤𑀻𑀳𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀆𑀮𑀬𑀁 𑀓𑀼𑀭𑀼𑀫𑀸𑀦𑀸 𑀲𑀼𑀔𑀼𑀫𑀸 𑀢𑀡𑁆𑀳𑀸. 𑀅𑀬𑀫𑁂𑀯 𑀧𑀦 𑀏𑀓𑀦𑁆𑀢𑀢𑁄 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺. 𑀑𑀪𑀸𑀲𑀸𑀤𑀬𑁄 𑀧𑀦 𑀢𑀲𑁆𑀲𑀸 𑀯𑀢𑁆𑀣𑀼𑀪𑀽𑀢𑀢𑁆𑀢𑀸 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀼 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀦 𑀯𑀢 𑀫𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑁄 𑀑𑀪𑀸𑀲𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑁄. 𑀏𑀯𑀭𑀽𑀧𑀸 𑀧𑀻𑀢𑀺.𑀮. 𑀉𑀧𑁂𑀓𑁆𑀔𑀸 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸 𑀅𑀤𑁆𑀥𑀸 𑀫𑀕𑁆𑀕𑀁 𑀧𑀢𑁆𑀢𑁄𑀲𑁆𑀫𑀺. 𑀨𑀮𑀁 𑀧𑀢𑁆𑀢𑁄𑀲𑁆𑀫𑀻𑀢𑀺 𑀏𑀯𑀁 𑀅𑀲𑁆𑀲𑀸𑀤𑀲𑀳𑀺𑀢𑀸 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸 𑀅𑀨𑀮𑁂 𑀨𑀮𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀤𑀸 𑀓𑁄𑀘𑀺 𑀅𑀩𑁆𑀬𑀢𑁆𑀢𑁄 𑀬𑁄𑀕𑀸𑀯𑀘𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀥𑀺𑀫𑀸𑀦𑀯𑀲𑁂𑀦 𑀯𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀘𑀭𑀢𑀻𑀢𑀺. 𑀩𑁆𑀬𑀢𑁆𑀢𑁄 𑀧𑀦 𑀢𑀸𑀯𑀤𑁂𑀯 𑀲𑀪𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀫𑀫 𑀏𑀢𑁂𑀲𑀼 𑀑𑀪𑀸𑀲𑀸𑀤𑀻𑀲𑀼 𑀏𑀢𑀁 𑀫𑀫 𑀏𑀲𑁄 𑀳 𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀦𑀺𑀓𑀸𑀫𑀦𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀦𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀦𑀸𑀫 𑀈𑀤𑀺𑀲𑀲𑁆𑀲 𑀦𑀺𑀓𑀸𑀫𑀦𑀲𑁆𑀲 𑀯𑀢𑁆𑀣𑀼. 𑀅𑀤𑁆𑀥𑀸 𑀫𑀫 𑀲𑀁𑀓𑀺𑀮𑁂𑀲𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄. 𑀲𑁄 𑀯𑀟𑁆𑀠𑀫𑀸𑀦𑁄 𑀫𑀁 𑀦𑀺𑀬𑁆𑀬𑀸𑀦𑀫𑀼𑀔𑀢𑁄 𑀧𑀸𑀢𑁂𑀢𑁆𑀯𑀸 𑀯𑀝𑁆𑀝𑀫𑀼𑀔𑁂 𑀬𑁄𑀚𑁂𑀲𑁆𑀲𑀢𑀺. 𑀳𑀦𑁆𑀤 𑀢𑁂𑀲𑁆𑀯𑁂𑀯 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀓𑀦𑁆𑀢𑀺𑀁 𑀲𑁄𑀥𑁂𑀢𑁆𑀯𑀸 𑀬𑀣𑀸𑀧𑀯𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀢𑁂 𑀑𑀪𑀸𑀲𑀸𑀤𑀬𑁄 𑀏𑀯 𑀢𑀸𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀫𑁂 𑀑𑀪𑀸𑀲𑁄 𑀅𑀦𑀺𑀘𑁆𑀘𑁄 𑀔𑀬𑀝𑁆𑀞𑁂𑀦 𑀤𑀼𑀓𑁆𑀔𑁄 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀢𑁂 𑀑𑀪𑀸𑀲𑀸𑀤𑀺𑀓𑁂 𑀯𑀺𑀧𑀲𑁆𑀲𑀦𑀸𑀬 𑀉𑀧𑀓𑁆𑀓𑀺𑀮𑁂𑀲𑀪𑀽𑀢𑁂 𑀧𑀭𑀺𑀧𑀦𑁆𑀣 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀧𑁆𑀧𑀭𑀺𑀕𑁆𑀕𑀳𑀯𑀲𑁂𑀦 𑀢𑁂𑀲𑀼 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺 𑀬𑀺𑀢𑁆𑀯𑀸 𑀞𑀺𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀫𑀕𑁆𑀕𑀸𑀫𑀕𑁆𑀕𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀜𑀸𑀡𑀁 𑀫𑀕𑁆𑀕𑀸𑀫𑀕𑁆𑀕𑀜𑀸𑀡 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀸𑀫. 𑀅𑀫𑀕𑁆𑀕𑁂𑀲𑀼 𑀑𑀪𑀸𑀲𑀸𑀤𑀻𑀲𑀼 𑀫𑀕𑁆𑀕𑀲𑀜𑁆𑀜𑀸𑀫𑀮𑀢𑁄 𑀬𑀣𑀸 𑀯𑀼𑀢𑁆𑀢𑀦𑀺𑀓𑀦𑁆𑀢𑀺𑀫𑀮𑀢𑁄𑀘 𑀯𑀺𑀲𑀼𑀤𑁆𑀥𑀢𑁆𑀢𑀸. 𑀢𑀜𑁆𑀳𑀺 𑀜𑀸𑀡𑀁 𑀢𑁂𑀲𑀼 𑀦𑀺𑀓𑀦𑁆𑀢𑀺𑀬𑀸𑀧𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀬 𑀏𑀯 𑀑𑀪𑀸𑀲𑀸𑀤𑀺𑀧𑀝𑀺𑀩𑀦𑁆𑀥𑀢𑁄 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀁𑀦𑀸𑀫 𑀳𑁄𑀢𑀻𑀢𑀺.

[𑁨𑁪𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀑𑀪𑀸𑀲𑀸𑀤𑀺 𑀧𑀝𑀺𑀩𑀦𑁆𑀥𑀧𑀭𑀺𑀕𑁆𑀕𑀳𑀁 𑀯𑀺𑀲𑀼𑀁 𑀅𑀯𑀢𑁆𑀯𑀸 𑀫𑀕𑁆𑀕𑀸𑀫𑀕𑁆𑀕𑀚𑀸𑀦𑀦𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀸𑀫 𑀯𑀼𑀢𑁆𑀢𑀸. 𑀲𑀸 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺.

𑀢𑀣𑀸 𑀧𑀭𑀺𑀧𑀦𑁆𑀣𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀢𑀣𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁄 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀧𑀭𑀺𑀧𑀦𑁆𑀣𑀢𑁄 𑀯𑀺𑀫𑀼𑀢𑁆𑀢𑀲𑁆𑀲 𑀬𑀸𑀯𑀸𑀦𑀼𑀮𑁄𑀫𑀸𑀢𑀺 𑀬𑀸𑀯𑀅𑀦𑀼𑀮𑁄𑀫𑀜𑀸𑀡𑀸. 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀧𑀲𑁆𑀲𑀦𑀸𑀧𑀭𑀺𑀧𑀸𑀓𑀁𑀆𑀕𑀫𑁆𑀫𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑀁 𑀧𑀢𑁆𑀯𑀸 𑀢𑀺𑀯𑀺𑀥 𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀘𑁂𑀯 𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀲𑁆𑀲 𑀧𑀘𑁆𑀘𑀬 𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘. 𑀇𑀤𑀸𑀦𑀺 𑀅𑀧𑁆𑀧𑀦𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀯𑀢𑁆𑀢𑀩𑁆𑀩𑀓𑁆𑀔𑀡𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑁆𑀧𑀦𑀸 𑀢𑀺𑀘 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀅𑀧𑁆𑀧𑀦𑀸. 𑀤𑁆𑀯𑁂𑀢𑀻𑀡𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀦𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀤𑁆𑀯𑁂 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀦𑀺. 𑀫𑀦𑁆𑀤𑀧𑀜𑁆𑀜𑀲𑁆𑀲 𑀢𑀻𑀡𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀦𑀺. 𑀬𑀁𑀓𑀺𑀜𑁆𑀘𑀻𑀢𑀺 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀅𑀜𑁆𑀜𑀢𑀭𑀁 𑀬𑀁𑀓𑀺𑀜𑁆𑀘𑀺. 𑀬𑀸𑀲𑀺𑀔𑀸𑀧𑀢𑁆𑀢𑀸𑀲𑀸𑀦𑀼𑀮𑁄𑀫𑀸𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀢𑀺 𑀫𑀢𑁆𑀣𑀓𑀧𑀢𑁆𑀢𑀸 𑀅𑀦𑀼𑀮𑁄𑀫𑀜𑀸𑀡𑀲𑀳𑀺𑀢𑀸 𑀬𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀅𑀢𑁆𑀣𑀺. 𑀲𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀢𑀺𑀘 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀅𑀦𑀼𑀮𑁄𑀫𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺 𑀯𑀺𑀧𑀲𑁆𑀲𑀦𑀸𑀦𑀸𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀧𑀦 𑀧𑀭𑀺𑀧𑀸𑀓𑀕𑀢𑀯𑀺𑀧𑀲𑁆𑀲𑀦𑀸 𑀤𑀲𑁆𑀲𑀦𑀯𑀘𑀦𑀁. 𑀏𑀢𑁆𑀣𑀘 𑀯𑀼𑀝𑁆𑀞𑀸𑀦𑀦𑁆𑀢𑀺 𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀽𑀢 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀢𑁄𑀯𑀸 𑀲𑀬𑀁 𑀲𑀁𑀬𑁄𑀚𑀦𑀯𑀢𑁆𑀣𑀼𑀪𑀸𑀯𑀢𑁄𑀯𑀸 𑀯𑀼𑀝𑁆𑀞𑀸𑀢𑀺. 𑀢𑀁 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁𑀯𑀸 𑀧𑀼𑀣𑀼𑀚𑁆𑀚𑀦𑀪𑀸𑀯𑀢𑁄 𑀲𑀫𑀼𑀤𑀬𑀧𑀳𑀸𑀦𑀯𑀲𑁂𑀦 𑀯𑀝𑁆𑀝 𑀧𑀯𑀢𑁆𑀢𑀢𑁄𑀘 𑀯𑀼𑀝𑁆𑀞𑀸𑀧𑁂𑀢𑀺. 𑀢𑀲𑁆𑀫𑀸 𑀯𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀲𑁆𑀲𑀁 𑀯𑀼𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀯𑀼𑀝𑁆𑀞𑀸𑀦 𑀕𑀸𑀫𑀺𑀦𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁄𑀧𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁𑀯𑀸 𑀢𑀺𑀡𑁆𑀡𑀁𑀯𑀸 𑀯𑀺𑀧𑀲𑁆𑀲𑀦𑀸 𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀬𑀸 𑀧𑀭𑀁 𑀦𑀺𑀩𑁆𑀩𑀸𑀦𑀁 𑀆𑀮𑀫𑁆𑀩𑀺𑀢𑁆𑀯𑀸𑀢𑀺 𑀫𑀕𑁆𑀕𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀁 𑀳𑀼𑀢𑁆𑀯𑀸 𑀢𑀲𑁆𑀲 𑀧𑀼𑀭𑁂𑀘𑀭𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀢𑀢𑁄 𑀬𑁂𑀯𑀘 𑀢𑀁 𑀯𑀺𑀧𑀲𑁆𑀲𑀦𑀸𑀦𑀸𑀫𑀁 𑀦𑀮𑀪𑀢𑀻𑀢𑀺. 𑀧𑀼𑀣𑀼𑀚𑁆𑀚𑀦 𑀕𑁄𑀢𑁆𑀢𑀫𑀪𑀺𑀪𑀯𑀦𑁆𑀢𑀦𑁆𑀢𑀺 𑀏𑀢𑁂𑀦 𑀕𑁄𑀢𑁆𑀢𑀁 𑀪𑀯𑀢𑀺 𑀅𑀪𑀺𑀪𑀯𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀕𑁄𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀧𑀭𑀺𑀧𑀼𑀡𑁆𑀡𑀓𑀺𑀮𑁂𑀲 𑀲𑀫𑀸𑀬𑁄𑀕𑁂𑀦 𑀅𑀦𑀭𑀺𑀬𑀪𑀸𑀯𑀲𑀗𑁆𑀔𑀸𑀢𑀸 𑀧𑀼𑀣𑀼𑀚𑁆𑀚𑀦𑀚𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀭𑀺𑀬𑀕𑁄𑀢𑁆𑀢𑀫𑀪𑀺𑀲𑀫𑁆𑀪𑁄𑀦𑁆𑀢𑀜𑁆𑀘𑀸𑀢𑀺 𑀏𑀢𑁂𑀦 𑀕𑁄𑀢𑁆𑀢𑀁 𑀪𑀯𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀕𑁄𑀢𑁆𑀭𑀪𑀼. 𑀕𑁄𑀢𑁆𑀢𑀦𑁆𑀢𑀺𑀘 𑀢𑀁𑀢𑀁 𑀓𑀺𑀮𑁂𑀲 𑀯𑀺𑀲𑀼𑀤𑁆𑀥𑀪𑀸𑀯 𑀲𑀗𑁆𑀔𑀸𑀢𑀸 𑀅𑀭𑀺𑀬𑀚𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀕𑁆𑀕𑁄 𑀅𑀧𑁆𑀧𑀦𑀸 𑀯𑀻𑀣𑀺𑀁 𑀑𑀢𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀓𑁆𑀔𑀲𑀘𑁆𑀘𑀁𑀧𑀭𑀺𑀚𑀸𑀦𑀦𑁆𑀢𑁄𑀢𑀺 𑀢𑁂𑀪𑀽𑀫𑀓 𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑀤𑀼𑀓𑁆𑀔𑀪𑀸𑀯𑀁 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁆𑀢𑁄. 𑀧𑀭𑀺𑀚𑀸𑀦𑀦𑀜𑁆𑀘𑁂𑀢𑁆𑀣 𑀢𑁂𑀲𑀁 𑀤𑀼𑀓𑁆𑀔𑀪𑀸𑀯 𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀧𑀳𑀸𑀦𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀲𑀫𑀼𑀤𑀬 𑀲𑀘𑁆𑀘𑀁𑀧𑀚𑀳𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀲𑀫𑀼𑀤𑀬𑀲𑀘𑁆𑀘𑀁 𑀏𑀓𑀤𑁂𑀲𑁂𑀦𑀯𑀸 𑀅𑀦𑀯𑀲𑁂𑀲𑁂𑀦𑀯𑀸 𑀅𑀧𑀘𑁆𑀙𑀸𑀯𑀢𑁆𑀢𑀺𑀓𑀁 𑀓𑀢𑁆𑀯𑀸 𑀧𑀚𑀳𑀦𑁆𑀢𑁄. 𑀦𑀺𑀭𑁄𑀥𑀲𑀘𑁆𑀘𑀁𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀢𑀺 𑀘𑀓𑁆𑀔𑀼𑀫𑀸 𑀯𑀺𑀬 𑀦𑀪𑀫𑀚𑁆𑀛𑁂 𑀯𑀺𑀭𑁄𑀘𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀏𑀓𑀤𑁂𑀲𑀲𑁆𑀲𑀯𑀸 𑀲𑀓𑀮𑀲𑁆𑀲𑀯𑀸 𑀓𑀺𑀮𑁂𑀲 𑀯𑀝𑁆𑀝𑀲𑁆𑀲𑀯𑀸 𑀆𑀬𑀢𑀺𑀁 𑀪𑀸𑀯𑀺𑀦𑁄 𑀯𑀺𑀧𑀸𑀓𑀯𑀝𑁆𑀝𑀲𑁆𑀲𑀁𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀼𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀪𑀸𑀧𑀢𑁆𑀢𑀺𑀯𑀲𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀦𑁆𑀢𑁄. 𑀫𑀕𑁆𑀕𑀲𑀘𑁆𑀘𑀁𑀪𑀸𑀯𑀦𑀸𑀯𑀲𑁂𑀦𑀸𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀦𑀲𑀗𑁆𑀔𑀸𑀢𑀸𑀬 𑀪𑀸𑀯𑀦𑀸𑀬 𑀯𑀲𑁂𑀦. 𑀫𑀕𑁆𑀕𑀘𑁂𑀢𑀦𑀸𑀬 𑀧𑀦 𑀆𑀦𑀦𑁆𑀢𑀭𑀺𑀓𑀨𑀮𑀢𑁆𑀢𑀸 𑀢𑀗𑁆𑀔𑀡𑁂 𑀅𑀧𑀦𑀻𑀢𑀕𑁆𑀕𑀺𑀓𑁂 𑀧𑀤𑁂𑀲𑁂 𑀧𑀼𑀦 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀯𑀺𑀬 𑀫𑀕𑁆𑀕𑀸𑀦𑀼𑀓𑀽𑀮𑀧𑀯𑀢𑁆𑀢𑀺𑀯𑀲𑁂𑀦 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀅𑀦𑀼𑀓𑀼𑀩𑁆𑀩𑀦𑁆𑀢𑀸𑀦𑀺 𑀢𑀢𑁄𑀧𑀭𑀁 𑀤𑁆𑀯𑁂𑀯𑀸 𑀢𑀻𑀡𑀺𑀯𑀸 𑀨𑀮𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁄𑀧𑀭𑀁 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀢𑁄𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀧𑀦 𑀧𑀲𑀸𑀤𑀘𑀓𑁆𑀔𑀼𑀦𑀸𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀯𑀸 𑀓𑀺𑀜𑁆𑀘𑀺𑀭𑀽𑀧𑀁 𑀧𑀲𑁆𑀲𑀦𑁆𑀢𑀲𑁆𑀲 𑀢𑀸𑀦𑀺 𑀘𑀓𑁆𑀔𑀽𑀦𑀺 𑀢𑀁 𑀭𑀽𑀧𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀧𑀺 𑀧𑀘𑁆𑀘𑀓𑁆𑀔𑀢𑁄 𑀧𑀸𑀢𑀼𑀪𑀽𑀢𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀦 𑀢𑀸𑀯 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀢𑀁 𑀭𑀽𑀧𑀁 𑀢𑀲𑁆𑀲 𑀅𑀳𑀁 𑀇𑀤𑀁𑀦𑀸𑀫 𑀧𑀲𑁆𑀲𑀸𑀫𑀻𑀢𑀺 𑀧𑀸𑀓𑀝𑀁 𑀳𑁄𑀢𑀺. 𑀧𑀘𑁆𑀙𑀸 𑀧𑀦 𑀧𑀘𑁆𑀘𑀯𑁂𑀓𑁆𑀔𑀦 𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼𑀏𑀯 𑀢𑀁𑀭𑀽𑀧𑀁 𑀢𑀤𑀦𑀼𑀩𑀦𑁆𑀥𑀸𑀘 𑀦𑀸𑀦𑀸𑀓𑀸𑀭𑀸 𑀢𑀲𑁆𑀲 𑀧𑀸𑀢𑀼𑀪𑀽𑀢𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀯𑀁 𑀇𑀥𑀧𑀺 𑀧𑀘𑁆𑀘𑀯𑁂𑀓𑁆𑀔𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑀫𑀸𑀦𑁂𑀲𑀼𑀏𑀯 𑀦𑀺𑀩𑁆𑀩𑀸𑀦𑀜𑁆𑀘 𑀢𑀤𑀦𑀼𑀩𑀦𑁆𑀥𑀸𑀦𑀺 𑀫𑀕𑁆𑀕𑀨𑀮𑀸𑀤𑀻𑀦𑀺𑀘 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀧𑀼𑀦𑀪𑀯𑀗𑁆𑀕𑀁.𑀮. 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀇𑀤𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑀜𑀸𑀡𑀲𑁆𑀲 𑀪𑀽𑀫𑀺𑀁 𑀤𑀲𑁆𑀲𑁂𑀢𑀼𑀁 𑀫𑀕𑁆𑀕𑀁𑀨𑀮𑀜𑁆𑀘𑀦𑀺𑀩𑁆𑀩𑀸𑀦𑀦𑁆𑀢𑀺𑀆𑀤𑀺𑀕𑀸𑀣 𑀫𑀸𑀳. 𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀨𑀮𑀝𑁆𑀞𑁄. 𑀳𑀻𑀦𑁂𑀢𑀺 𑀧𑀳𑀻𑀦𑁂. 𑀲𑁂𑀲𑁂𑀢𑀺 𑀅𑀧𑀳𑀻𑀦𑁂 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂. 𑀇𑀫𑀸𑀦𑀺 𑀧𑀦 𑀤𑁆𑀯𑁂 𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀺 𑀓𑁂𑀲𑀜𑁆𑀘𑀺 𑀚𑀻𑀯𑀺𑀢𑀲𑀫𑀲𑀻𑀲𑀺𑀧𑀼𑀕𑁆𑀕𑀮𑀸𑀦𑀁 𑀓𑀺𑀮𑁂𑀲 𑀯𑀺𑀪𑀸𑀕𑁂𑀲𑀼 𑀅𑀓𑁄𑀯𑀺𑀤𑀸𑀦𑀜𑁆𑀘 𑀦𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑀺𑀯𑀸𑀦𑀯𑀸𑀢𑀺. 𑀏𑀢𑁆𑀣𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀢𑀸𑀯 𑀲𑀩𑁆𑀩𑀧𑀣𑀫𑀁 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀦𑀁 𑀯𑀼𑀢𑁆𑀢𑀁. 𑀢𑀢𑁄 𑀨𑀮𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀁. 𑀅𑀯𑀲𑀸𑀦𑁂 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀦𑀁 𑀯𑀼𑀢𑁆𑀢𑀁. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀧𑀦 𑀲𑀩𑁆𑀩𑀧𑀣𑀫𑀁 𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀦𑁂𑀲𑀼 𑀧𑀣𑀫𑀁 𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀁 𑀳𑁄𑀢𑀺. 𑀢𑀢𑁄 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀻𑀢𑀺. 𑀢𑀁 𑀧𑀦 𑀧𑀸𑀴𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀦 𑀜𑀸𑀡𑀲𑁆𑀲 𑀦𑀺𑀤𑁆𑀤𑁂𑀲𑀢𑁄 𑀧𑀼𑀩𑁆𑀩𑁂 𑀧𑀣𑀫𑀁 𑀙𑀺𑀦𑁆𑀦𑀫𑀦𑀼𑀧𑀲𑁆𑀲𑀦𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀜𑀸𑀡𑀦𑁆𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀲𑁆𑀲 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀺𑀦𑁆𑀦𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀁 𑀓𑀺𑀮𑁂𑀲𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀴𑀺 𑀅𑀦𑀼 𑀲𑀸𑀭𑁂𑀦 𑀯𑀼𑀘𑁆𑀘𑀫𑀸𑀦𑁂 𑀧𑀦 𑀧𑀣𑀫𑀁 𑀧𑀳𑀻𑀦𑀁 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀧𑀘𑁆𑀘𑁂𑀓𑀁 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀨𑀮𑀥𑀫𑁆𑀫𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑀁. 𑀢𑀢𑁄 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀧𑀸𑀴𑀺𑀬𑀜𑁆𑀳𑀺 𑀧𑀘𑁆𑀘𑀯𑁂𑀓𑁆𑀔𑀦𑀜𑀸𑀡𑀦𑀺𑀤𑁆𑀤𑁂𑀲𑁂 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀯𑀸𑀭𑁂𑀧𑀺 𑀨𑀮𑀯𑀸𑀭𑁂𑀧𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀕𑀢𑀦𑁆𑀢𑀺. 𑀇𑀢𑀺 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀦𑀁 𑀦𑀸𑀫 𑀇𑀢𑀭𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀁 𑀆𑀤𑀺𑀫𑁆𑀳𑀺𑀯𑀸 𑀫𑀚𑁆𑀛𑁂 𑀅𑀦𑁆𑀢𑀭𑀦𑁆𑀢𑀭𑀸𑀯𑀸 𑀅𑀯𑀲𑀸𑀦𑁂𑀯𑀸 𑀬𑀢𑁆𑀣𑀓𑀢𑁆𑀣𑀘𑀺 𑀧𑀯𑀢𑁆𑀢𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀣𑀸 𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀦𑀁𑀧𑀺 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀁 𑀆𑀤𑀺𑀫𑁆𑀳𑀺𑀯𑀸 𑀧𑀘𑁆𑀙𑀸𑀯𑀸𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀫𑀕𑁆𑀕𑀁 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀬𑀁 𑀕𑀸𑀣𑀸𑀧𑀺 𑀅𑀯𑀺𑀭𑀼𑀤𑁆𑀥𑀸 𑀳𑁄𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀥𑀺𑀫𑀸𑀦𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀲𑀼 𑀲𑁄 𑀳𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦 𑀧𑀳𑀻𑀦 𑀓𑀺𑀮𑁂𑀲𑀸 𑀯𑀲𑀺𑀝𑁆𑀞𑀓𑀺𑀮𑁂𑀲 𑀧𑀘𑁆𑀘𑀯𑁂𑀓𑁆𑀔𑀦𑁂𑀦 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀅𑀭𑀺𑀬𑀕𑀼𑀡𑀧𑀝𑀺𑀯𑁂𑀥𑁂 𑀦𑀺𑀓𑁆𑀓𑀗𑁆𑀔𑁄𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀜𑁆𑀘. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀜𑁆𑀘. 𑀅𑀭𑀳𑀢𑁄 𑀧𑀦 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑁄𑀦𑀸𑀫 𑀦𑀢𑁆𑀣𑀻𑀢𑀺 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀇𑀤𑀜𑁆𑀘 𑀧𑀭𑀺𑀧𑀼𑀡𑁆𑀡 𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑀭𑀺𑀧𑀼𑀡𑁆𑀡𑀁𑀧𑀺 𑀧𑀦 𑀳𑁄𑀢𑀺𑀬𑁂𑀯. 𑀢𑀣𑀸 𑀳𑀺 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀅𑀝𑁆𑀞𑀓𑀣𑀸𑀬𑀁 𑀲𑀸 𑀧𑀦 𑀦 𑀲𑀩𑁆𑀩𑁂𑀲𑀁 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺. 𑀏𑀓𑁄 𑀳𑀺 𑀧𑀳𑀻𑀦𑀓𑀺𑀮𑁂𑀲𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀏𑀓𑁄 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀫𑁂𑀯. 𑀏𑀓𑁄 𑀫𑀕𑁆𑀕𑀫𑁂𑀯. 𑀏𑀓𑁄 𑀨𑀮𑀫𑁂𑀯. 𑀏𑀓𑁄𑀦𑀺𑀩𑁆𑀩𑀸𑀦𑀫𑁂𑀯. 𑀇𑀫𑀸𑀲𑀼 𑀧𑀦 𑀧𑀜𑁆𑀘𑀲𑀼𑀧𑀘𑁆𑀘𑀯𑁂𑀓𑁆𑀔𑀦𑀸𑀲𑀼 𑀏𑀓𑀁𑀯𑀸𑀤𑁆𑀯𑁂𑀯𑀸 𑀦𑁄 𑀮𑀤𑁆𑀥𑀼𑀁 𑀦𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀙𑀩𑁆𑀩𑀺𑀲𑀼𑀤𑁆𑀥𑀺𑀓𑀫𑁂𑀦 𑀪𑀸𑀯𑁂𑀢𑀩𑁆𑀩𑁄 𑀘𑀢𑀼𑀩𑁆𑀩𑀺𑀥𑁄 𑀫𑀕𑁆𑀕𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀕𑁆𑀕𑀲𑀤𑁆𑀤𑁂𑀦 𑀘𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑀁 𑀫𑀕𑁆𑀕𑀜𑀸𑀡𑀁 𑀢𑀤𑀦𑀼𑀓𑀽𑀮𑀧𑀯𑀢𑁆𑀢𑀺𑀯𑀲𑁂𑀦 𑀨𑀮𑀜𑀸𑀡𑀜𑁆𑀘 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀦𑀼𑀧𑀲𑁆𑀲𑀦𑀸 𑀫𑀕𑁆𑀕𑀨𑀮𑁂𑀲𑀼. 𑀅𑀪𑀺𑀦𑀺𑀯𑀺𑀲𑀦𑀁 𑀅𑀪𑀺𑀦𑀺𑀯𑁂𑀲𑁄. 𑀳𑁂𑀝𑁆𑀞𑀸 𑀲𑀺𑀮𑀸𑀧𑀣𑀯𑀺𑀬𑀁 𑀦𑀺𑀔𑀸𑀢𑀲𑀺𑀦𑁂𑀭𑀼𑀧𑀸𑀤𑀲𑁆𑀲 𑀯𑀺𑀬 𑀅𑀚𑁆𑀛𑀢𑁆𑀢𑀔𑀦𑁆𑀥𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸 𑀇𑀢𑀺 𑀅𑀪𑀺𑀦𑀺𑀯𑁂𑀲𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄. 𑀢𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀁. 𑀫𑀼𑀜𑁆𑀘𑀦𑁆𑀢𑀻𑀢𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀦𑀁 𑀓𑁂𑀯𑀮𑀁 𑀧𑀘𑁆𑀘𑀬𑀸𑀬𑀢𑁆𑀢 𑀯𑀼𑀢𑁆𑀢𑀺𑀢𑀸𑀬 𑀔𑀡𑀪𑀗𑁆𑀕𑀲𑁆𑀲𑀘 𑀅𑀤𑀺𑀝𑁆𑀞𑀢𑁆𑀢𑀸 𑀲𑁄 𑀅𑀪𑀺𑀦𑀺𑀯𑁂𑀲𑁄 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀁 𑀤𑁆𑀯𑀬𑀁 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀭𑀽𑀧𑀁 𑀅𑀦𑀢𑁆𑀢𑀸 𑀯𑁂𑀤𑀦𑀸 𑀅𑀦𑀢𑁆𑀢𑀸𑀢𑀺𑀆𑀤𑀺𑀦𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀁 𑀅𑀪𑀺𑀦𑀺𑀯𑁂𑀲𑀁 𑀯𑀺𑀫𑁄𑀘𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁄𑀓𑁆𑀔𑀫𑀼𑀔𑀁 𑀳𑁄𑀢𑀺, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔 𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀨𑀮𑀲𑁆𑀲𑀘 𑀧𑀯𑁂𑀲𑀦𑀤𑁆𑀯𑀸𑀭𑀪𑀽𑀢𑀢𑁆𑀢𑀸, 𑀯𑀺𑀧𑀮𑁆𑀮𑀸𑀲 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀺𑀧𑀭𑀻𑀢𑀯𑀲𑁂𑀦 𑀆𑀲𑀦𑀁 𑀉𑀧𑀕𑀫𑀦𑀁 𑀧𑀯𑀢𑁆𑀢𑀦𑀁𑀯𑀸 𑀯𑀺𑀧𑀮𑁆𑀮𑀸𑀲𑁄. 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀉𑀧𑀕𑀫𑀦𑀁 𑀧𑀯𑀢𑁆𑀢𑀦𑀁𑀯𑀸𑀢𑀺 𑀅𑀢𑁆𑀣𑁄. 𑀲𑁄 𑀏𑀯 𑀓𑀺𑀮𑁂 𑀲𑀼𑀧𑁆𑀧𑀢𑁆𑀢𑀺𑀬𑀸 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀦𑀺𑀫𑀺𑀢𑁆𑀢𑀁. 𑀫𑀼𑀜𑁆𑀘𑀦𑁆𑀢𑀻𑀢𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀦𑀁 𑀔𑀡𑀪𑀗𑁆𑀕𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀢𑀁𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀔𑀡𑀪𑀗𑁆𑀕𑀁 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸𑀢𑀺𑀆𑀤𑀺𑀦𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀁𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀘𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀧𑀡𑀺𑀥𑀺𑀦𑁆𑀢𑀺 𑀢𑀡𑁆𑀳𑀸𑀏𑀯 𑀅𑀪𑀺𑀲𑀗𑁆𑀕𑀯𑀲𑁂𑀦 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀧𑀡𑀺𑀤𑀳𑀦𑀢𑁄 𑀤𑀴𑁆𑀳𑀁 𑀣𑀧𑀦𑀢𑁄 𑀧𑀡𑀺𑀥𑀻𑀢𑀺 𑀢𑀡𑁆𑀳𑀸𑀧𑀡𑀺𑀥𑀺. 𑀢𑀁𑀢𑀡𑁆𑀳𑀸 𑀧𑀡𑀺𑀥𑀺𑀁. 𑀫𑀼𑀜𑁆𑀘𑀦𑁆𑀢𑀻𑀢𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀦𑀁 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀪𑀸𑀯𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀲𑁄𑀧𑀡𑀺𑀥𑀺 𑀳𑁄𑀢𑀻𑀢𑀺 𑀢𑁂𑀲𑀁 𑀫𑀳𑀸𑀆𑀤𑀻𑀦𑀯𑀭𑀸𑀲𑀺𑀪𑀸𑀯𑀁 𑀲𑀼𑀤𑀺𑀝𑁆𑀞𑀁 𑀓𑀢𑁆𑀯𑀸 𑀭𑀽𑀧𑀁𑀤𑀼𑀓𑁆𑀔𑀁 𑀯𑁂𑀤𑀦𑀸𑀤𑀼𑀓𑁆𑀔𑀸𑀢𑀺𑀆𑀤𑀺𑀦𑀸 𑀧𑀼𑀦𑀧𑁆𑀧𑀼𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀁𑀧𑀡𑀺𑀥𑀺𑀁 𑀯𑀺𑀫𑁄𑀘𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑀸 𑀯𑀺𑀫𑁄𑀓𑁆𑀔𑀫𑀼𑀔𑀪𑀽𑀢𑀸 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀏𑀯𑀁 𑀯𑀺𑀲𑁂𑀲 𑀦𑀸𑀫𑀺𑀓𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸. 𑀬𑀲𑁆𑀫𑀸 𑀲𑀗𑁆𑀔𑀸𑀭𑁂𑀲𑀼 𑀲𑀼𑀜𑁆𑀜𑀢𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀦𑀸𑀫 𑀓𑁂𑀯𑀮𑀁 𑀅𑀢𑁆𑀢𑀸𑀓𑀺𑀦𑀺𑀯𑁂𑀲𑀪𑀽𑀢𑀲𑁆𑀲 𑀤𑀺𑀝𑁆𑀞𑀺𑀕𑀸𑀳𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀲𑁆𑀲 𑀜𑀸𑀡𑀲𑁆𑀲𑁂𑀯 𑀆𑀦𑀼𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀣𑀸 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸 𑀯𑀺𑀫𑀼𑀜𑁆𑀘𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀲𑀳𑀚𑀸𑀢𑀜𑀸𑀡 𑀓𑀺𑀘𑁆𑀘𑁂𑀦 𑀦𑀸𑀫𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀬𑀤𑀺𑀯𑀼𑀝𑁆𑀞𑀸𑀦.𑀮. 𑀲𑀼𑀜𑁆𑀜𑀢𑁄𑀯𑀺𑀫𑁄𑀓𑁆𑀔𑁄 𑀦𑀸𑀫𑀳𑁄𑀢𑀺𑀫𑀕𑁆𑀕𑁄𑀢𑀺. 𑀅𑀦𑀺𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀦𑀸𑀫 𑀦𑀺𑀫𑀺𑀢𑁆𑀢𑀸𑀢𑀺 𑀦𑀺𑀯𑁂𑀲𑀪𑀽𑀢𑀲𑁆𑀲 𑀫𑀸𑀦𑀕𑀸𑀳𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀤𑁆𑀥𑀸𑀬𑀧𑀺 𑀆𑀦𑀼𑀪𑀸𑀯𑁄. 𑀢𑀲𑁆𑀫𑀸 𑀢𑀣𑀸 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀲𑀳𑀚𑀸𑀢𑀲𑀤𑁆𑀥𑀸 𑀓𑀺𑀘𑁆𑀘𑁂𑀦 𑀦𑀸𑀫𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁 𑀬𑀤𑀺𑀅𑀦𑀺𑀘𑁆𑀘𑀢𑁄.𑀮. 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄𑀦𑀸𑀫𑀸𑀢𑀺. 𑀤𑀼𑀓𑁆𑀔𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀲𑀺𑀤𑁆𑀥𑀺𑀦𑀸𑀫 𑀧𑀡𑀺𑀥𑀺𑀲𑀗𑁆𑀔𑀸𑀢 𑀢𑀡𑁆𑀳𑀸𑀕𑀸𑀳𑀧𑀝𑀺𑀧𑀓𑁆𑀔𑀪𑀽𑀢𑀲𑁆𑀲 𑀲𑀫𑀸𑀥𑀺𑀲𑁆𑀲𑀧𑀺 𑀆𑀦𑀼𑀪𑀸𑀯𑁄. 𑀢𑀲𑁆𑀫𑀸 𑀢𑀣𑀸 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀲𑀳𑀚𑀸𑀢𑀲𑀫𑀸𑀥𑀺𑀓𑀺𑀘𑁆𑀘𑁂𑀦 𑀦𑀸𑀫𑀁 𑀮𑀪𑀢𑀻𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀤𑀼𑀓𑁆𑀔𑀢𑁄. 𑀮. 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄𑀦𑀸𑀫𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀻𑀢𑀺. 𑀫𑀕𑁆𑀕𑁂 𑀧𑀦 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀯𑀺𑀲𑁂𑀲𑁄𑀦𑀸𑀫 𑀯𑀺𑀧𑀲𑁆𑀲𑀦𑀸𑀕𑀫𑀦𑀯𑀲𑁂𑀦𑁂𑀯 𑀲𑀺𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀫𑀕𑁆𑀕𑁄. 𑀮. 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺. 𑀢𑀢𑁆𑀣 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀸𑀫 𑀳𑁄𑀢𑀺. 𑀫𑀚𑁆𑀛𑁂 𑀙𑀲𑀼 𑀫𑀕𑁆𑀕𑀨𑀮𑀓𑁆𑀔𑀡𑁂𑀲𑀼 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀦𑀸𑀫. 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀦𑀸𑀫. 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀸𑀫. 𑀉𑀧𑀭𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀦𑀸𑀫. 𑀅𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄 𑀧𑀦 𑀅𑀝𑁆𑀞𑀲𑀼𑀧𑀺 𑀞𑀸𑀦𑁂𑀲𑀼 𑀓𑀸𑀬𑀲𑀓𑁆𑀔𑀺𑀦𑀸𑀫. 𑀲𑁄𑀬𑁂𑀯 𑀅𑀭𑀽𑀧𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑁄 𑀅𑀭𑀳𑀢𑁆𑀢𑀨𑀮𑁂 𑀞𑀺𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫𑀸𑀢𑀺 𑀏𑀢𑁆𑀢𑀸𑀯𑀢𑀸 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀧𑀭𑀺𑀧𑀸𑀓𑀫𑀸𑀕𑀫𑁆𑀫𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀪𑀸𑀯𑀁 𑀧𑀢𑁆𑀯𑀸 𑀢𑀺𑀯𑀺𑀥𑀯𑀺𑀫𑁄𑀓𑁆𑀔𑀫𑀼𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀘𑁂𑀯 𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑀧𑁆𑀧𑀢𑁆𑀢𑀺𑀬𑀸𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀆𑀕𑀫𑁆𑀫 𑀧𑀝𑀺𑀘𑁆𑀘𑀸𑀢𑀺. 𑀢𑀁 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀻𑀢𑀺. 𑀫𑀕𑁆𑀕𑀯𑀻𑀣𑀺𑀬𑀁 𑀨𑀮𑀜𑁆𑀘 𑀫𑀕𑁆𑀕𑀸𑀕𑀫𑀦 𑀯𑀲𑁂𑀦 𑀢𑀣𑀸 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀬𑀤𑀺 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀨𑀮𑀝𑁆𑀞𑀸𑀦𑀁 𑀧𑀼𑀕𑁆𑀕𑀮𑀸𑀦𑀁. 𑀬𑀣𑀸𑀲𑀓𑀁𑀨𑀮𑀦𑁆𑀢𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀨𑀮𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀽𑀢𑀁 𑀬𑀁 𑀬𑀁 𑀨𑀮𑀁 𑀯𑀺𑀧𑀲𑁆𑀲𑀦𑀸𑀕𑀫𑀦 𑀯𑀲𑁂𑀦𑁂𑀯 𑀲𑀼𑀜𑁆𑀜𑀢𑀸𑀤𑀺𑀯𑀺𑀫𑁄𑀓𑁆𑀔𑁄𑀢𑀺𑀘 𑀯𑀼𑀘𑁆𑀘𑀢𑀺. 𑀦𑀫𑀕𑁆𑀕𑀸𑀕𑀫𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀘 𑀯𑀺𑀧𑀲𑁆𑀲𑀦𑀸𑀕𑀫𑀦 𑀯𑀲𑁂𑀦 𑀫𑀕𑁆𑀕𑀲𑁆𑀲 𑀅𑀦𑀺𑀫𑀺𑀢𑁆𑀢 𑀦𑀸𑀫𑀮𑀸𑀪𑁄𑀦𑀸𑀫 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄. 𑀅𑀪𑀺𑀥𑀫𑁆𑀫𑁂 𑀧𑀦 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫𑀫𑀕𑁆𑀕𑁄 𑀦𑀆𑀕𑀢𑁄. 𑀦𑀳𑀺 𑀲𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀺𑀫𑀺𑀢𑁆𑀢𑁄𑀦𑀸𑀫 𑀳𑁄𑀢𑀺. 𑀳𑀻𑀦𑀧𑀡𑀻𑀢𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺𑀲𑁆𑀲 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸 𑀪𑀺𑀜𑁆𑀜𑀸𑀤𑀺𑀯𑀲𑁂𑀦𑀯𑀸 𑀧𑀸𑀭𑀫𑀺𑀥𑀫𑁆𑀫𑀸𑀦𑀁 𑀧𑀭𑀺𑀢𑁆𑀢𑀫𑀳𑀦𑁆𑀢𑀸𑀤𑀺𑀯𑀲𑁂𑀦𑀯𑀸 𑀳𑀻𑀦 𑀧𑀡𑀻𑀢 𑀧𑀡𑀻𑀢𑀢𑀭 𑀧𑀡𑀻𑀢𑀢𑀫 𑀯𑀺𑀪𑀸𑀕𑁄 𑀲𑀦𑁆𑀤𑀺𑀲𑁆𑀲𑀢𑀻𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑁂𑀲𑀼 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀸𑀫 𑀲𑀫𑀸𑀦𑀸𑀧𑀺 𑀲𑀬𑀁 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑀦𑁆𑀢𑁂𑀦 𑀅𑀢𑁆𑀢𑀦𑁄𑀦𑀸𑀫𑀁 𑀫𑀕𑁆𑀕𑀲𑁆𑀲 𑀤𑀸𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀫𑀕𑁆𑀕𑁄 𑀅𑀪𑀺𑀥𑀫𑁆𑀫 𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑀦𑀸𑀫𑀁 𑀦𑀮𑀪𑀢𑀻𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀧𑀦 𑀬𑀣𑀸 𑀧𑀣𑀯𑀺𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀧𑀣𑀯𑀺𑀓𑀲𑀺𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀦𑀺 𑀫𑀕𑁆𑀕𑀨𑀮𑀸𑀦𑀺𑀧𑀺 𑀆𑀭𑀫𑁆𑀫𑀡𑀯𑀲𑁂𑀦𑀧𑀺 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀁 𑀮𑀪𑀦𑁆𑀢𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀦 𑀲𑀫𑁆𑀧𑀬𑁄𑀕𑀯𑀲𑁂𑀦𑀯𑀸 𑀧𑀮𑀺𑀩𑁄𑀥𑀓𑀭𑀸𑀘 𑀦𑀺𑀫𑀺𑀢𑁆𑀢𑀓𑀭𑀸𑀘 𑀧𑀡𑀺𑀥𑀺𑀓𑀭𑀸𑀘 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀥𑀫𑁆𑀫𑀸 𑀢𑁂𑀲𑀼 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀸𑀦𑀺 𑀅𑀜𑁆𑀜𑀁 𑀆𑀕𑀫𑀦𑀁𑀯𑀸 𑀆𑀭𑀫𑁆𑀫𑀡𑀁𑀯𑀸 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑀧𑀺 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀁 𑀮𑀪𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀭𑀲𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦. 𑀦𑀸𑀫𑀢𑁆𑀢𑀬𑀦𑁆𑀢𑀺 𑀲𑀼𑀜𑁆𑀜𑀢𑀸𑀤𑀺 𑀦𑀸𑀫𑀢𑁆𑀢𑀺𑀓𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀲𑀼 𑀫𑀕𑁆𑀕𑀯𑀻𑀣𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀻𑀲𑀼. 𑀲𑀩𑁆𑀩𑁂𑀲𑀁𑀧𑀻𑀢𑀺 𑀲𑀩𑁆𑀩𑁂𑀲𑀁𑀧𑀺 𑀫𑀕𑁆𑀕𑀨𑀮𑀸𑀦𑀁. 𑀲𑀫𑀫𑁂𑀯𑀸𑀢𑀺 𑀲𑀫𑀸𑀦𑀫𑁂𑀯. 𑀲𑀤𑀺𑀲𑀫𑁂𑀯. 𑀏𑀢𑁆𑀣𑀧𑀦𑀸𑀢𑀺 𑀏𑀢𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀕𑁆𑀕𑀨𑀮𑁂𑀲𑀼. 𑀬𑀲𑁆𑀫𑀸 𑀲𑀩𑁆𑀩𑀸𑀤𑀺𑀝𑁆𑀞𑀺𑀬𑁄𑀘 𑀲𑁄𑀴𑀲𑀯𑀺𑀥𑀸 𑀯𑀺𑀘𑀺𑀓𑀺𑀘𑁆𑀙𑀸𑀘 𑀅𑀢𑁆𑀢𑀤𑀺𑀝𑁆𑀞𑀺𑀫𑀽𑀮𑀺𑀓𑀸 𑀏𑀯 𑀳𑁄𑀦𑁆𑀢𑀺. 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀦𑀺𑀭𑀼𑀤𑁆𑀥𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺 𑀲𑀩𑁆𑀩𑀸𑀦𑀺𑀘 𑀅𑀧𑀸𑀬𑀕𑀸𑀫𑀺 𑀓𑀫𑁆𑀫𑀸𑀦𑀺𑀦𑀸𑀫 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀲𑀢𑀺𑀬𑀸𑀏𑀯 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀲𑀢𑀺𑀬𑀸 𑀦 𑀯𑀺𑀧𑀘𑁆𑀘𑀦𑁆𑀢𑀺. 𑀤𑀺𑀝𑁆𑀞𑀲𑀘𑁆𑀘𑀸𑀦𑀜𑁆𑀘 𑀲𑀸 𑀤𑀺𑀝𑁆𑀞𑀺 𑀲𑀩𑁆𑀩𑀲𑁄 𑀧𑀳𑀻𑀦𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁.𑀮. 𑀧𑀳𑀻𑀦𑀸𑀧𑀸𑀬 𑀕𑀫𑀦𑁄𑀢𑀺 𑀯𑀼𑀢𑁆𑀢𑀁. 𑀅𑀧𑀸𑀬𑀁 𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀧𑀸𑀬𑀕𑀫𑀦𑀸𑀦𑀺. 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀧𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀥𑀫𑁆𑀫𑀸𑀘𑁂𑀯 𑀧𑀼𑀩𑁆𑀩𑁂𑀓𑀢𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀸𑀦𑀺𑀘. 𑀧𑀳𑀻𑀦𑀸𑀦𑀺 𑀅𑀧𑀸𑀬𑀕𑀫𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀳𑀻𑀦𑀸𑀧𑀸𑀬𑀕𑀫𑀦𑁄. 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸𑀦𑀁 𑀧𑀳𑀻𑀦𑀅𑀢𑁆𑀢𑀤𑀺𑀝𑁆𑀞𑀻𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀏𑀓𑀦𑁆𑀢𑁂𑀦 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑀧𑀓𑁆𑀔𑁂 𑀞𑀺𑀢𑀸 𑀳𑁄𑀦𑁆𑀢𑀺. 𑀓𑀺𑀮𑁂𑀲𑀥𑀫𑁆𑀫𑀸 𑀧𑀦 𑀳𑀸𑀬𑀦𑀧𑀓𑁆𑀔𑁂. 𑀢𑀲𑁆𑀫𑀸 𑀢𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀉𑀧𑀭𑀺𑀫 𑀓𑁄𑀝𑀺𑀬𑀸 𑀲𑀢𑁆𑀢𑀳𑀺 𑀪𑀯𑁂𑀳𑀺 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀲𑁄𑀢𑀸𑀧𑀦𑁆𑀦𑁄𑀦𑀸𑀫 𑀳𑁄𑀢𑀻𑀢𑀺, 𑀢𑀢𑁆𑀣 𑀲𑀢𑁆𑀢𑀓𑁆𑀔𑀢𑁆𑀢𑀼𑀲𑀤𑁆𑀤𑁂𑀦 𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀕𑀳𑀡𑀯𑀸𑀭𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀫𑁄𑀢𑀺 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑁄. 𑀇𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀫𑁄 𑀏𑀢𑀲𑁆𑀲𑀸𑀢𑀺. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄. 𑀲𑁄 𑀧𑀦 𑀤𑁂𑀯𑁂𑀲𑀼 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄, 𑀫𑀦𑀼𑀲𑁆𑀲𑁂𑀲𑀼 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄, 𑀉𑀪𑀬𑀢𑁆𑀣 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀬𑀣𑀸𑀳 𑁋

𑀓𑀢𑀫𑁄𑀘 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺, 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄, 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄, 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀘 𑀫𑀦𑀼𑀲𑁆𑀲𑁂𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄𑀢𑀺.

𑀏𑀢𑁆𑀣 𑀳𑀺 𑀘 𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀏𑀢𑁂𑀦 𑀬𑁄𑀘 𑀤𑁂𑀯𑁂𑀏𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀢𑀺. 𑀬𑁄𑀘 𑀫𑀦𑀼𑀲𑁆𑀲𑁂𑀏𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀢𑀺. 𑀬𑁄𑀘 𑀤𑁂𑀯𑁂𑀘 𑀫𑀦𑀼𑀲𑁆𑀲𑁂𑀘 𑀫𑀺𑀲𑁆𑀲𑀓𑀪𑀯 𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀢𑀺. 𑀢𑀺𑀯𑀺𑀥𑁄 𑀧𑁂𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑁄𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀺𑀲𑁆𑀲𑀓𑀪𑀯 𑀯𑀲𑁂𑀦𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀢𑁆𑀣𑀘 𑀬𑀲𑁆𑀫𑀸 𑀫𑀳𑀕𑁆𑀕𑀢𑀚𑁆𑀛𑀸𑀦𑀲𑁆𑀲𑀘 𑀉𑀧𑀭𑀺𑀫𑀕𑁆𑀕 𑀯𑀺𑀧𑀲𑁆𑀲𑀦𑀸 𑀬𑀘 𑀆𑀦𑀼𑀪𑀸𑀯𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀇𑀫𑀲𑁆𑀲 𑀫𑀕𑁆𑀕𑀲𑁆𑀲 𑀆𑀦𑀼𑀪𑀸𑀯𑀕𑀢𑀺𑀬𑀸 𑀏𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀦𑀸𑀫 𑀯𑀼𑀢𑁆𑀢𑁄. 𑀲𑁄𑀘 𑀧𑀸𑀴𑀺𑀬𑀁 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀇𑀥 𑀦𑀺𑀝𑁆𑀞𑀸. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀲𑁆𑀲 𑀓𑁄𑀮𑀁 𑀓𑁄𑀮𑀲𑁆𑀲 𑀏𑀓𑀩𑀻𑀚𑀺𑀲𑁆𑀲 𑀲𑀓𑀤𑀸𑀕𑀸𑀫𑀺𑀲𑁆𑀲 𑀬𑁄𑀘 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀅𑀭𑀳𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀫𑀪𑀯𑁂𑀏𑀯 𑀛𑀸𑀦𑀭𑀳𑀺𑀢𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄𑀯𑀸 𑀧𑀭𑀺𑀳𑀻𑀦𑀚𑁆𑀛𑀸𑀦𑁄𑀯𑀸 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀘 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞 𑀓𑀣𑀸𑀬𑀁 𑀢𑀬𑁄𑀧𑀺 𑀇𑀫𑁂 𑀲𑁄𑀢𑀸𑀧𑀦𑁆𑀦𑀸 𑀓𑀸𑀫𑀪𑀯𑀯𑀲𑁂𑀦 𑀯𑀼𑀢𑁆𑀢𑀸. 𑀭𑀽𑀧𑀸𑀭𑀽𑀧𑀪𑀯𑁂 𑀧𑀦 𑀩𑀳𑀼𑀓𑀸𑀧𑀺 𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 𑀅𑀝𑁆𑀞𑀫𑀁 𑀪𑀯𑀦𑁆𑀢𑀺 𑀓𑀸𑀫𑀪𑀯𑁂 𑀅𑀝𑁆𑀞𑀫𑀁 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑁂 𑀓𑀸𑀫𑀪𑀯𑁂𑀬𑁂𑀯 𑀲𑀢𑁆𑀢𑀯𑀸𑀭𑀢𑁄 𑀑𑀭𑀁𑀯𑀸 𑀤𑀺𑀝𑁆𑀞𑀥𑀫𑁆𑀫𑁂 𑀬𑁂𑀯𑀯𑀸 𑀉𑀧𑀭𑀺𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀁 𑀢𑀣𑀸𑀭𑀽𑀧𑁄 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀉𑀧𑀭𑀺 𑀫𑀕𑁆𑀕𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀺𑀬𑀸𑀫𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀬𑁂 𑀧𑀦 𑀤𑀺𑀝𑁆𑀞𑀥𑀫𑁆𑀫𑁂𑀯𑀸 𑀲𑀓𑁆𑀓𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀺𑀲𑀸𑀔𑀸𑀤𑀬𑁄 𑀯𑀺𑀬 𑀲𑀢𑁆𑀢𑀲𑀼 𑀪𑀯𑁂𑀲𑀼 𑀬𑀢𑁆𑀣𑀓𑀢𑁆𑀣𑀘𑀺 𑀪𑀯𑁂𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀦𑁆𑀢𑀺. 𑀬𑁂𑀘 𑀩𑁆𑀭𑀳𑁆𑀫𑀮𑁄𑀓𑁂𑀬𑁂𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑁂𑀲𑀁 𑀢𑀣𑀸𑀭𑀽𑀧𑁄 𑀧𑀯𑀢𑁆𑀢𑀺 𑀯𑀺𑀲𑁂𑀲𑁄 𑀫𑀳𑀕𑁆𑀕𑀢𑀚𑁆𑀛𑀸𑀦𑀩𑀮𑁂𑀦 𑀲𑀺𑀤𑁆𑀥𑁄𑀢𑀺. 𑀬𑀲𑁆𑀫𑀸𑀘 𑀧𑀸𑀴𑀺𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀘𑀸𑀢𑀺 𑀏𑀢𑁂𑀦 𑀓𑀸𑀫𑀪𑀯𑁂 𑀲𑀢𑁆𑀢 𑀑𑀧𑀧𑀸𑀢𑀺𑀓 𑀧𑀝𑀺𑀲𑀦𑁆𑀥𑀺𑀬𑁄 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑁂𑀘𑀸𑀢𑀺 𑀏𑀢𑁂𑀦 𑀲𑀢𑁆𑀢 𑀕𑀩𑁆𑀪𑀲𑁂𑀬𑁆𑀬𑀓𑀧𑀝𑀺𑀲𑀦𑁆𑀥𑀺𑀬𑁄 𑀤𑀲𑁆𑀲𑁂𑀢𑀻𑀢𑀺 𑀉𑀪𑀬𑁂𑀦 𑀘𑀼𑀤𑁆𑀤𑀲 𑀧𑀝𑀺𑀲𑀦𑁆𑀥𑀺𑀬𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀮𑀩𑁆𑀪𑀫𑀸𑀦𑁂 𑀘𑀼𑀤𑁆𑀤𑀲𑀪𑀯𑁂 𑀲𑀦𑁆𑀥𑀸𑀬 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂 𑁋

𑀇𑀢𑁄 𑀲𑀢𑁆𑀢 𑀢𑀢𑁄 𑀲𑀢𑁆𑀢, 𑀲𑀁𑀲𑀭𑀸𑀦𑀺 𑀘𑀢𑀼𑀤𑁆𑀤𑀲𑀸𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀅𑀗𑁆𑀕𑀼𑀢𑁆𑀢𑀭𑁂𑀘 𑀢𑀺𑀓𑀦𑀺𑀧𑀸𑀢𑁂 𑀲𑀘𑁂 𑀉𑀤𑀸𑀬𑀺 𑀆𑀦𑀦𑁆𑀤𑁄 𑀅𑀯𑀺𑀢𑀭𑀸𑀕𑁄 𑀓𑀸𑀮𑀁 𑀓𑀭𑁂𑀬𑁆𑀬, 𑀢𑁂𑀦 𑀘𑀺𑀢𑁆𑀢𑀧𑀲𑀸𑀤𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂𑀲𑀼 𑀤𑁂𑀯𑀭𑀚𑁆𑀚𑀁 𑀓𑀭𑁂𑀬𑁆𑀬. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀇𑀫𑀲𑁆𑀫𑀺𑀁𑀬𑁂𑀯 𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀭𑀚𑁆𑀚𑀁 𑀓𑀭𑁂𑀬𑁆𑀬. 𑀅𑀧𑀺𑀘 𑀉𑀤𑀸𑀬𑀺 𑀆𑀦𑀦𑁆𑀤𑁄 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸 𑀬𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀇𑀫𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀓𑀸𑀫𑀪𑀯𑁂 𑀘𑀼𑀤𑁆𑀤𑀲 𑀧𑀝𑀺𑀲𑀦𑁆𑀥𑀺𑀬𑁄 𑀇𑀘𑁆𑀙𑀦𑁆𑀢𑀺. 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀝𑀻𑀓𑀸𑀬𑀜𑁆𑀘 𑀓𑁂𑀘𑀺 𑀧𑀦 𑀓𑀸𑀫𑀪𑀯𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀪𑀗𑁆𑀕𑁂 𑀧𑀦 𑀢𑀢𑁆𑀣 𑀢𑀢𑁆𑀣 𑀅𑀝𑁆𑀞𑀸𑀦𑀲𑀼𑀢𑁆𑀢𑁂𑀲𑀼𑀘 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺𑀘, 𑀅𑀗𑁆𑀕𑀼𑀢𑁆𑀢𑀭𑁂 𑀙𑀓𑁆𑀓𑀦𑀺𑀧𑀸𑀢𑁂 𑀅𑀪𑀩𑁆𑀩𑁄 𑀤𑀺𑀝𑁆𑀞𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞𑀫𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀦𑁆𑀢𑀺 𑀘, 𑀫𑀳𑀸𑀦𑀺𑀤𑁆𑀤𑁂𑀲𑁂 𑀅𑀚𑀺𑀢𑀧𑀜𑁆𑀳𑁂 𑀲𑁄𑀳𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲, 𑀦𑀺𑀭𑁄𑀥𑁂𑀦 𑀲𑀢𑁆𑀢𑀪𑀯𑁂 𑀣𑀧𑁂𑀢𑁆𑀯𑀸 𑀅𑀦𑀫 𑀢𑀕𑁆𑀕𑁂𑀲𑀁𑀲𑀸𑀭𑁂 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀯𑀽𑀧𑀲𑀫𑀦𑁆𑀢𑀺. 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺. 𑀧𑀝𑀺𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺𑀘, 𑀏𑀯𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁂𑀲𑀁 𑀲𑀼𑀢𑁆𑀢𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀭𑀸𑀕𑀤𑁄𑀲𑀫𑁄𑀳𑀸𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀢𑀤𑁂𑀓𑀝𑁆𑀞𑀫𑁄𑀳𑀲𑁆𑀲𑀘. 𑀢𑀦𑀼𑀓𑀭𑀢𑁆𑀢𑀸𑀢𑀺 𑀬𑀣𑀸 𑀲𑁄𑀢𑀸𑀧𑀦𑁆𑀦𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀸 𑀥𑀫𑁆𑀫𑀺𑀓𑁂𑀲𑀼 𑀓𑀸𑀫𑀯𑀢𑁆𑀣𑀽𑀲𑀼 𑀩𑀮𑀯𑀦𑁆𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀢𑁄 𑀢𑁂𑀲𑀁 𑀫𑁂𑀣𑀼𑀦𑀯𑀢𑁆𑀣𑀼𑀲𑀫𑀸𑀬𑁄𑀕𑁄𑀧𑀺 𑀧𑀯𑀢𑁆𑀢𑀢𑀺, 𑀢𑀣𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀲𑀫𑀢𑁆𑀣𑁂 𑀓𑀢𑁆𑀯𑀸 𑀲𑀁𑀮𑀺𑀔𑀦𑀯𑀲𑁂𑀦 𑀢𑀦𑀼𑀓𑀭𑀡𑀢𑁄. 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀘 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀯𑀲𑁂𑀦𑀘 𑀢𑀦𑀼𑀓𑀪𑀸𑀯𑀁 𑀲𑀸𑀥𑀦𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀓𑀤𑀸𑀘𑀺 𑀘𑀺𑀭𑁂𑀦 𑀉𑀧𑁆𑀧𑀢𑁆𑀢𑀺𑀯𑀲𑁂𑀦. 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬𑀸𑀢𑀺 𑀘𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁𑀧𑀺 𑀫𑀦𑁆𑀤𑀢𑀭𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦. 𑀫𑀳𑀸𑀲𑀺𑀯𑀢𑁆𑀣𑁂𑀭𑁂𑀦 𑀧𑀦 𑀢𑁂𑀲𑀁𑀧𑀺 𑀫𑁂𑀣𑀼𑀦𑀯𑀢𑁆𑀣𑀼 𑀲𑀫𑀸𑀬𑁄𑀕𑁄 𑀇𑀘𑁆𑀙𑀺𑀢𑁄. 𑀲𑁄 𑀫𑀳𑀸𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀬𑀜𑁆𑀘 𑀙𑀓𑁆𑀓𑀦𑀺𑀧𑀸𑀢𑁂 𑀫𑀺𑀕𑀸𑀲𑀸𑀮𑀯𑀢𑁆𑀣𑀼𑀫𑁆𑀳𑀺 𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀧𑀺 𑀇𑀲𑀺𑀤𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀓𑀤𑀸𑀕𑀸𑀫𑀺𑀢𑁆𑀢𑀁 𑀪𑀕𑀯𑀢𑀸 𑀩𑁆𑀬𑀸𑀓𑀢𑀁, 𑀢𑀁𑀧𑀺 𑀢𑀲𑁆𑀲 𑀆𑀲𑀦𑁆𑀦𑀫𑀭𑀡𑀓𑀸𑀮𑁂 𑀅𑀥𑀺𑀕𑀫𑀯𑀲𑁂𑀦 𑀩𑁆𑀬𑀸𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀓𑀺𑀁𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀆𑀕𑀫𑀦𑀢𑁄 𑀲𑀓𑀤𑀸𑀕𑀸𑀫𑀻𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀧𑀣𑀫𑀧𑀭𑀺𑀘𑁆𑀙𑁂𑀤𑁂 𑀯𑀼𑀢𑁆𑀢𑀫𑁂𑀯. 𑀅𑀭𑀳𑀢𑁆𑀢𑀁𑀪𑀸𑀯𑁂𑀢𑁆𑀯𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸𑀔𑀻𑀡𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀬𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑁄. 𑀤𑀓𑁆𑀔𑀺𑀡𑀸 𑀯𑀼𑀘𑁆𑀘𑀢𑀺 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀆𑀬𑀢𑀺𑀁 𑀨𑀮𑀧𑀝𑀺𑀮𑀸𑀪𑀢𑁆𑀣𑀸𑀬 𑀤𑀺𑀦𑁆𑀦𑀤𑀸𑀦𑀁. 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀢𑀸𑀬 𑀧𑀦 𑀤𑀓𑁆𑀔𑀺𑀡𑀸𑀬 𑀯𑀺𑀧𑀢𑁆𑀢𑀺𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄 𑀲𑀫𑁆𑀧𑀢𑁆𑀢𑀺𑀓𑀭𑀸𑀦𑀜𑁆𑀘 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡𑀸𑀦𑀁 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀅𑀕𑁆𑀕𑁄 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀢𑀁𑀤𑀓𑁆𑀔𑀺𑀡𑀁 𑀧𑀝𑀺𑀕𑁆𑀕𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄. 𑀧𑀼𑀕𑁆𑀕𑀮𑀪𑁂𑀤𑁄𑀢𑀺 𑀘𑀢𑀼𑀦𑁆𑀦𑀁 𑀨𑀮𑀝𑁆𑀞𑀧𑀼𑀕𑁆𑀕𑀮𑀸𑀦𑀁 𑀲𑀗𑁆𑀔𑁂𑀧𑀪𑁂𑀤𑁄. 𑀯𑀺𑀢𑁆𑀣𑀸𑀭𑀪𑁂𑀤𑁄 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀅𑀝𑁆𑀞𑀓𑀣𑀸𑀲𑀼 𑀢𑀸𑀯 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸, 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀺𑀦𑁄, 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁄𑀢𑀺 𑀨𑀮𑀝𑁆𑀞𑀸𑀦𑀁 𑀙𑀦𑁆𑀦𑀯𑀼𑀢𑀺𑀪𑁂𑀤𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑁂 𑀲𑁄𑀢𑀸𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀘𑀸𑀢𑀺 𑀢𑀻𑀳𑀺 𑀕𑀼𑀡𑀺𑀢𑀸 𑀙. 𑀧𑀼𑀦 𑀘𑀢𑀽𑀳𑀺 𑀧𑀝𑀺𑀧𑀤𑀸𑀳𑀺 𑀕𑀼𑀡𑀺𑀢𑀸 𑀘𑀢𑀼𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀢𑀺𑀯𑀺𑀥 𑀯𑀺𑀫𑁄𑀓𑁆𑀔𑀘𑀢𑀼𑀧𑀝𑀺𑀧𑀤𑀸𑀦𑀁 𑀧𑀦 𑀪𑁂𑀤𑁂𑀦 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁄𑀘 𑀳𑁄𑀦𑁆𑀢𑀺. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀅𑀯𑀺𑀳𑁂𑀲𑀼 𑀢𑀸𑀯 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄, 𑀏𑀓𑁄 𑀉𑀧𑀳𑀘𑁆𑀘 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁 𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘. 𑀢𑁂𑀬𑁂𑀯 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀘𑀸𑀢𑀺 𑀤𑁆𑀯𑀻𑀳𑀺 𑀕𑀼𑀡𑀺𑀢𑀸 𑀤𑀲. 𑀢𑀣𑀸 𑀅𑀢𑀧𑁆𑀧𑀲𑀼 𑀤𑀲𑁆𑀲𑀲𑀼𑀤𑀲𑁆𑀲𑀻𑀲𑀼 𑀢𑀺𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀅𑀓𑀦𑀺𑀝𑁆𑀞𑁂 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀦𑀸𑀫 𑀦𑀢𑁆𑀣𑀻𑀢𑀺 𑀘𑀢𑁆𑀢𑀸𑀭𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄𑀢𑀺 𑀅𑀝𑁆𑀞𑀸𑀢𑀺. 𑀲𑀩𑁆𑀩𑁂 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀻𑀢𑀺. 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀧𑀦 𑀤𑁆𑀯𑀸𑀤𑀲 𑀲𑁄𑀢𑀸𑀧𑀦𑁆𑀦𑀸, 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀘𑀢𑀼𑀯𑀻𑀲𑀢𑀺 𑀅𑀦𑀸𑀕𑀸𑀫𑀺𑀦𑁄, 𑀤𑁆𑀯𑁂 𑀅𑀭𑀳𑀦𑁆𑀢𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸𑀢𑀺 𑀘𑀢𑀼𑀧𑀜𑁆𑀜𑀸𑀲 𑀳𑁄𑀦𑁆𑀢𑀺. 𑀢𑁂𑀬𑁂𑀯 𑀲𑀤𑁆𑀥𑀸𑀥𑀼𑀭 𑀧𑀜𑁆𑀜𑀸𑀥𑀼𑀭 𑀯𑀲𑁂𑀦 𑀤𑁆𑀯𑀻𑀳𑀺 𑀕𑀼𑀡𑀺𑀢𑀸 𑀅𑀝𑁆𑀞𑀲𑀢𑀁 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀻𑀢𑀺 𑀆𑀕𑀢𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑀪𑁂𑀤𑁂. 𑀲𑀩𑁆𑀩𑁂𑀲𑀁𑀧𑀻𑀢𑀺 𑀘𑀢𑀼𑀦𑁆𑀦𑀁 𑀨𑀮𑀝𑁆𑀞𑀸𑀦𑀁𑀧𑀺 𑀲𑀸𑀥𑀸𑀭𑀡𑀸𑀯. 𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀯𑀺𑀬 𑀏𑀓𑀘𑁆𑀘𑀸𑀦𑀁𑀏𑀯 𑀲𑀸𑀥𑀸𑀭𑀡𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑀺𑀯𑀺𑀬 𑀫𑀫𑀸𑀬𑀺𑀢𑀲𑁆𑀲 𑀅𑀪𑀺𑀦𑀺𑀦𑁆𑀤𑀺 𑀢𑀲𑁆𑀲 𑀅𑀚𑁆𑀛𑁄𑀲𑀺𑀢𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀧𑀯𑀢𑁆𑀢𑀺𑀓𑀭𑀡𑀁 𑀦𑀸𑀫 𑀩𑀳𑀮𑀭𑀸𑀕𑀯𑀺𑀫𑀼𑀢𑁆𑀢𑀸𑀦𑀁𑀏𑀯 𑀲𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁, 𑀅𑀦𑀸𑀕𑀸𑀫𑀻𑀦𑀜𑁆𑀘𑁂𑀯 𑀅𑀭𑀳𑀦𑁆𑀢𑀸𑀦𑀜𑁆𑀘𑀮𑀩𑁆𑀪𑀢𑀻𑀢𑀺. 𑀢𑁂𑀲𑀁𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻𑀦𑀁 𑀓𑀸𑀫𑀭𑀽𑀧𑀪𑀯𑀕𑀢𑀸𑀦𑀜𑁆𑀜𑁂𑀯 𑀇𑀥 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀩𑀮𑁂𑀦𑁂𑀯 𑀕𑀦𑁆𑀢𑀩𑁆𑀩𑀢𑁆𑀢𑀸. 𑀢𑁂𑀦𑀸𑀳 𑀢𑀢𑁆𑀣𑀸𑀢𑀺𑀆𑀤𑀺. 𑀢𑀢𑁆𑀭𑀸𑀬𑀁 𑀯𑀺𑀥𑀺, 𑀧𑀣𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀕𑀢𑁂 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀤𑀼𑀢𑀻𑀬𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣𑀕𑀢𑁂 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀢𑀢𑀻𑀬𑀁 𑀛𑀸𑀦𑀁. 𑀢𑀢𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀢𑀢𑁄 𑀧𑀜𑁆𑀘𑀫𑀁 𑀛𑀸𑀦𑀁. 𑀢𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀢𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸 𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣𑀕𑀢𑁂 𑀲𑀗𑁆𑀔𑀸𑀭𑁂 𑀢𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀢𑀢𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀦𑀸𑀦𑀸𑀩𑀤𑁆𑀥𑀅𑀯𑀺𑀓𑁄𑀧𑀦𑀁 𑀲𑀗𑁆𑀖𑀧𑀢𑀺𑀫𑀸𑀦𑀦𑀁 𑀲𑀢𑁆𑀣𑀼𑀧𑀓𑁆𑀓𑁄𑀲𑀦𑀁 𑀅𑀤𑁆𑀥𑀸𑀦 𑀧𑀭𑀺𑀘𑁆𑀙𑁂𑀤𑁄𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀢𑀢𑁄 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀏𑀓𑀁𑀯𑀸 𑀤𑁆𑀯𑁂𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀺 𑀦𑀺𑀭𑁄𑀥𑀁 𑀨𑀼𑀲𑀢𑀻𑀢𑀺. 𑀢𑀢𑁆𑀣𑀢𑀢𑁆𑀣𑁂𑀯𑀸𑀢𑀺 𑀢𑀢𑁄 𑀢𑀢𑁄 𑀛𑀸𑀦𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀼𑀝𑁆𑀞𑀺𑀢𑀓𑀸𑀮𑁂𑀏𑀯. 𑀯𑀺𑀧𑀲𑁆𑀲𑀦𑁆𑀢𑁄𑀢𑀺 𑀦𑀺𑀭𑁄𑀥𑀲𑁆𑀲 𑀲𑀫𑀣 𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀦𑁆𑀥𑀩𑀮𑁂𑀦𑁂𑀯 𑀧𑀢𑁆𑀢𑀩𑁆𑀩𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀩𑀮𑁂𑀦𑀧𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀸 𑀧𑀸𑀤𑀦𑀢𑁆𑀣𑀁 𑀇𑀤𑀁 𑀧𑀣𑀫𑀚𑁆𑀛𑀸𑀦𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑁆𑀢𑁄. 𑀬𑀸𑀯𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁𑀕𑀦𑁆𑀢𑁆𑀯𑀸𑀢𑀺 𑀬𑀸𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀁, 𑀢𑀸𑀯 𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑀦𑁆𑀢𑁆𑀯𑀸. 𑀆𑀯𑀚𑁆𑀚𑀦𑀸𑀥𑀺𑀝𑁆𑀞𑀸𑀦 𑀧𑀘𑁆𑀘𑀯𑁂𑀓𑁆𑀔𑀦𑀸𑀦𑀺𑀧𑁂𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸𑀦𑀺𑀬𑁂𑀯. 𑀢𑁂𑀦𑁂𑀯 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀜𑁆𑀘𑀯𑀺𑀥𑀸 𑀯𑀲𑀺𑀬𑁄 𑀦𑀺𑀭𑁄𑀥𑀧𑀭𑀺𑀓𑀫𑁆𑀫𑁂𑀲𑀼 𑀯𑀼𑀢𑁆𑀢𑀸𑀢𑀺. 𑀢𑀢𑁄𑀧𑀭𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀕𑀢𑁂 𑀲𑀗𑁆𑀔𑀸𑀭𑁂𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀭𑀁, 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀝𑁆𑀞𑁂𑀬𑁆𑀬𑀁. 𑀅𑀢𑁆𑀢𑀦𑁄 𑀲𑀭𑀻𑀭𑀸𑀩𑀦𑁆𑀥𑁂 𑀧𑀭𑀺𑀓𑁆𑀔𑀸𑀭𑁂 𑀣𑀧𑁂𑀢𑁆𑀯𑀸 𑀦𑀸𑀦𑀸𑀩𑀦𑁆𑀥𑀸𑀦𑀺 𑀘𑀺𑀯𑀭𑀸𑀤𑀻𑀦𑀺 𑀧𑀭𑀺𑀓𑁆𑀔𑀸𑀭𑀸𑀦𑀺 𑀅𑀕𑁆𑀕𑀺𑀆𑀤𑀺𑀦𑀸 𑀧𑀭𑀺𑀲𑁆𑀲𑀬𑁂𑀦 𑀫𑀸𑀯𑀺𑀦𑀲𑁆𑀲𑀦𑁆𑀢𑀽𑀢𑀺𑀯𑀸, 𑀏𑀓𑀲𑀻𑀫𑀸𑀬𑀁 𑀲𑀗𑁆𑀖𑀓𑀫𑁆𑀫𑁂 𑀓𑀭𑀻𑀬𑀫𑀸𑀦𑁂 𑀲𑀗𑁆𑀖𑁄 𑀫𑀁 𑀧𑀪𑀺𑀫𑀸𑀦𑁂𑀲𑁆𑀲𑀢𑀺, 𑀢𑀤𑀸 𑀯𑀼𑀝𑁆𑀞𑀳𑀸𑀫𑀻𑀢𑀺𑀯𑀸, 𑀲𑀢𑁆𑀣𑀸 𑀫𑀁 𑀓𑁂𑀦𑀘𑀺𑀓𑀸𑀭𑀡𑁂𑀦 𑀧𑀓𑁆𑀓𑁄𑀲𑀸 𑀧𑁂𑀲𑁆𑀲𑀢𑀺, 𑀢𑀤𑀸 𑀯𑀼𑀝𑁆𑀞𑀳𑀸𑀫𑀻𑀢𑀺𑀯𑀸 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁. 𑀆𑀤𑀺𑀲𑀤𑁆𑀤𑁂𑀦 𑀦𑀺𑀭𑁄𑀥𑀩𑁆𑀪𑀦𑁆𑀢𑀭𑁂𑀏𑀯 𑀫𑀭𑀡𑀁 𑀦𑀼𑀔𑁄 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀅𑀤𑁆𑀥𑀸𑀦 𑀧𑀭𑀺𑀘𑁆𑀙𑁂𑀤𑁄 𑀕𑀳𑀺𑀢𑁄. 𑀤𑁆𑀯𑀺𑀦𑁆𑀦𑀁.𑀮. 𑀯𑁄𑀘𑁆𑀙𑀺𑀚𑁆𑀚𑀢𑀺𑀘𑀺𑀢𑁆𑀢𑀲𑀦𑁆𑀢𑀢𑀺 𑀢𑀤𑀢𑁆𑀣𑀸𑀬 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀢𑀣𑀸𑀭𑀽𑀧𑀲𑁆𑀲 𑀧𑀬𑁄𑀕𑀯𑀺𑀲𑁂𑀲𑀲𑁆𑀲 𑀲𑀼𑀝𑁆𑀞𑀼 𑀓𑀢𑀢𑁆𑀢𑀸. 𑀢𑀢𑁄𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀅𑀦𑀸𑀕𑀸𑀫𑀺𑀦𑁄 𑀅𑀦𑀸𑀕𑀸𑀫𑀺 𑀨𑀮𑀘𑀺𑀢𑁆𑀢𑀁 𑀦𑀺𑀭𑀸𑀯𑀚𑁆𑀚𑀦𑀁𑀧𑀺 𑀦𑀺𑀧𑁆𑀧𑀭𑀺𑀓𑀫𑁆𑀫𑀁𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀢𑀁 𑀯𑀺𑀧𑀲𑁆𑀲𑀦𑀸𑀧𑀭𑀺𑀓𑀫𑁆𑀫𑀫𑁂𑀯 𑀢𑀲𑁆𑀲 𑀧𑀭𑀺𑀓𑀫𑁆𑀫𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀦 𑀯𑀺𑀲𑀼𑀁 𑀆𑀲𑀦𑁆𑀦𑀧𑀭𑀺𑀓𑀫𑁆𑀫𑀁 𑀦𑀸𑀫 𑀅𑀢𑁆𑀣𑀻𑀢𑀺. 𑀧𑀘𑁆𑀘𑀯𑁂𑀓𑁆𑀔𑀦𑀦𑁆𑀢𑀺 𑀨𑀮𑀧𑀘𑁆𑀘𑀯𑁂𑀓𑁆𑀔𑀦𑀁. 𑀏𑀯𑀁 𑀤𑀼𑀯𑀺𑀥𑀁 𑀓𑀫𑁆𑀫𑀝𑁆𑀞𑀸𑀦𑀦𑀬𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀲𑁄 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀢𑀤𑀢𑁆𑀣𑁂 𑀲𑁄𑀢𑀼𑀚𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀪𑀸𑀯𑁂 𑀢𑀩𑁆𑀩𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀧𑀝𑀺𑀧𑀢𑁆𑀢𑀺. 𑀧𑀝𑀺𑀧𑀚𑁆𑀚𑀦𑁆𑀢𑀺𑀯𑀸 𑀏𑀢𑀸𑀬 𑀉𑀧𑀭𑀼𑀧𑀭𑀺 𑀯𑀺𑀲𑁂𑀲𑀦𑁆𑀢𑀺 𑀧𑀝𑀺𑀧𑀢𑁆𑀢𑀺. 𑀲𑀻𑀮𑀸𑀤𑀺𑀥𑀫𑁆𑀫𑁄. 𑀭𑀲𑀻𑀬𑀢𑀺 𑀦𑀺𑀭𑀸𑀫𑀺𑀲𑀲𑀼𑀔𑀸𑀦𑀼𑀪𑀯𑀦𑀯𑀲𑁂𑀦 𑀅𑀦𑀼𑀪𑀯𑀻𑀬𑀢𑀻𑀢𑀺 𑀭𑀲𑁄. 𑀛𑀸𑀦𑀫𑀕𑁆𑀕 𑀨𑀮𑀪𑀽𑀢𑁄 𑀅𑀥𑀺𑀕𑀫𑀥𑀫𑁆𑀫𑁄. 𑀅𑀭𑀳𑀢𑁆𑀢 𑀨𑀮𑀫𑁂𑀯𑀯𑀸. 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑀫𑁂𑀯𑀯𑀸. 𑀧𑀝𑀺𑀧𑀢𑁆𑀢𑀺𑀬𑀸 𑀭𑀲𑁄 𑀧𑀝𑀺𑀧𑀢𑁆𑀢𑀺 𑀭𑀲𑁄. 𑀲𑁄𑀏𑀯 𑀅𑀲𑁆𑀲𑀸𑀤𑀺𑀢𑀩𑁆𑀩𑀝𑁆𑀞𑁂𑀦 𑀅𑀲𑁆𑀲𑀸𑀤𑁄 𑀘𑀸𑀢𑀺 𑀧𑀝𑀺𑀧𑀢𑁆𑀢𑀺 𑀭𑀲𑀲𑁆𑀲𑀸𑀤𑁄. 𑀲𑀸𑀲𑀦𑁂 𑀧𑀝𑀺𑀧𑀢𑁆𑀢𑀺𑀭𑀲𑀲𑁆𑀲𑀸𑀤𑀁 𑀧𑀢𑁆𑀣𑀬𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀇𑀘𑁆𑀘𑁂𑀯𑀁 𑀫𑀬𑀸 𑀦𑀺𑀤𑁆𑀤𑀺𑀝𑁆𑀞𑀁 𑀉𑀢𑁆𑀢𑀫𑀁 𑀪𑀸𑀯𑀦𑀸𑀤𑁆𑀯𑀬𑀁 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀺𑀧𑀦𑀸 𑀦𑀺𑀝𑁆𑀞𑀺𑀢𑀸.