𑀦𑀺𑀕𑀫 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁭𑁨. 𑀘𑀸𑀭𑀺𑀢𑁆𑀢𑁂𑀦 𑀓𑀼𑀮𑀸𑀘𑀸𑀭𑁂𑀦 𑀲𑁄𑀪𑀺𑀢𑁂 𑀜𑀸𑀢𑀺 𑀫𑀺𑀢𑁆𑀢 𑀥𑀦 𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀲𑀸𑀮𑁂 𑀓𑀼𑀮𑁂 𑀉𑀤𑀬𑁄 𑀯𑀟𑁆𑀠𑀺 𑀬𑀲𑁆𑀲 𑀲𑁄𑀢𑀺 𑀘𑀸𑀭𑀺𑀢𑁆𑀢𑀲𑁄𑀪𑀺𑀢𑀯𑀺𑀲𑀸𑀮𑀓𑀼𑀮𑁄𑀤𑀬𑁄. 𑀢𑁂𑀦. 𑀲𑀤𑁆𑀥𑀸𑀬 𑀅𑀪𑀺𑀯𑀼𑀟𑁆𑀠𑀸𑀦𑀁 𑀧𑀭𑀺𑀲𑀼𑀤𑁆𑀥𑀸𑀦𑀜𑁆𑀘 𑀅𑀢𑁆𑀢𑀦𑁄 𑀲𑀻𑀮𑀲𑀼𑀢𑀘𑀸𑀕𑀸𑀤𑀺𑀕𑀼𑀡𑀸𑀦𑀁 𑀉𑀤𑀬𑁄 𑀯𑀟𑁆𑀠𑀺 𑀏𑀢𑀲𑁆𑀫𑀺𑀦𑁆𑀢𑀺 𑀲𑀤𑁆𑀥𑀸𑀢𑀺𑀯𑀼𑀟𑁆𑀠𑀧𑀭𑀺𑀲𑀼𑀤𑁆𑀥𑀕𑀼𑀡𑁄𑀤𑀬𑁄. 𑀢𑁂𑀦. 𑀦𑀫𑁆𑀧𑀯𑁆𑀳𑀬𑁂𑀦𑀸𑀢𑀺 𑀦𑀫𑁆𑀧𑀦𑀸𑀫𑀓𑁂𑀦 𑀉𑀧𑀸𑀲𑀓𑁂𑀦. 𑀧𑀡𑀺𑀥𑀸𑀬𑀸𑀢𑀺 𑀪𑀼𑀲𑀁 𑀦𑀺𑀥𑀸𑀬 𑀳𑀤𑀬𑁂 𑀣𑀧𑁂𑀢𑁆𑀯𑀸 𑀉𑀧𑀸𑀤𑀸𑀬 𑀧𑀝𑀺𑀘𑁆𑀘. 𑀧𑀭𑀸𑀦𑀼𑀓𑀫𑁆𑀧𑀦𑁆𑀢𑀺 𑀧𑀭𑁂𑀲𑀁 𑀅𑀢𑁆𑀢𑀦𑁄 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀧𑀘𑁆𑀙𑀺𑀫𑀚𑀦𑀸𑀦𑀁 𑀅𑀦𑀼𑀓𑀫𑁆𑀧𑀁 𑀅𑀦𑀼𑀤𑀬𑀁 𑀓𑀸𑀭𑀼𑀜𑁆𑀜𑀁 𑀧𑀡𑀺𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀣𑀺𑀢𑀦𑁆𑀢𑀺 𑀅𑀪𑀺𑀬𑀸𑀘𑀺𑀢𑀁. 𑀧𑀼𑀜𑁆𑀜𑁂𑀦 𑀢𑁂𑀦 𑀯𑀺𑀧𑀼𑀮𑁂𑀦𑀸𑀢𑀺 𑀢𑁂𑀦 𑀯𑀺𑀧𑀼𑀮𑁂𑀦 𑀅𑀪𑀺𑀥𑀫𑁆𑀫𑀢𑁆𑀣 𑀲𑀗𑁆𑀕𑀳𑀧𑀓𑀭𑀡𑀲𑁆𑀲 𑀓𑀭𑀡𑀧𑀼𑀜𑁆𑀜𑁂𑀦. 𑀢𑀼𑀫𑀽𑀮𑀲𑁄𑀫𑀦𑁆𑀢𑀺 𑀏𑀯𑀁 𑀦𑀸𑀫𑀓𑀁 𑀯𑀺𑀳𑀸𑀭𑀁. 𑀯𑀼𑀢𑁆𑀢𑀜𑁆𑀳𑀺 𑀔𑀼𑀤𑁆𑀤𑀲𑀺𑀓𑁆𑀔𑀸𑀝𑀻𑀓𑀸𑀬𑀁𑀲𑀻𑀳𑀴𑀤𑀻𑀧𑁂 𑀢𑀼𑀫𑀽𑀮𑀲𑁄𑀫𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀧𑀸𑀓𑀯𑀢𑁆𑀢𑀁𑀧𑀺 𑀢𑀸𑀮 𑀧𑀡𑁆𑀡𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀓𑀭𑀻𑀬𑀢𑀺. 𑀦 𑀳𑀺 𑀢𑀢𑁆𑀣 𑀧𑀡𑁆𑀡𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺. 𑀲𑀩𑁆𑀩𑁂𑀧𑀺 𑀇𑀝𑁆𑀞𑀓𑀘𑁆𑀙𑀦𑁆𑀦𑀸 𑀧𑀸𑀲𑀸𑀤𑀸𑀤𑀬𑁄𑀢𑀺. 𑀏𑀲𑁄 𑀓𑀺𑀭 𑀯𑀺𑀳𑀸𑀭𑁄 𑀆𑀤𑀺𑀢𑁄 𑀅𑀪𑀬𑀕𑀺𑀭𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀪𑀽𑀢𑀸𑀬 𑀲𑁄𑀫𑀤𑁂𑀯𑀺𑀬𑀸 𑀓𑀸𑀭𑀸𑀧𑀺𑀢𑀢𑁆𑀢𑀸 𑀬𑀸𑀯𑀚𑁆𑀚𑀢𑀦𑀸𑀧𑀺 𑀲𑁄𑀫𑀯𑀺𑀳𑀸𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀼𑀫𑀽𑀮𑀲𑀤𑁆𑀤𑁄 𑀧𑀦 𑀯𑀺𑀧𑀼𑀮𑀲𑀤𑁆𑀤𑀧𑀭𑀺𑀬𑀸𑀬𑁄.

𑀅𑀣𑁂𑀢𑁆𑀣 𑀯𑀢𑁆𑀢𑀢𑀺 𑀲𑀤𑁆𑀤𑁄, 𑀢𑀼𑀫𑀽𑀮𑁄 𑀪𑁂𑀭𑀯𑁄 𑀫𑀳𑀸;

𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁂𑀢𑀺.

𑀆𑀤𑀻𑀲𑀼

𑀯𑀺𑀬. 𑀲𑁄𑀘 𑀯𑀺𑀳𑀸𑀭𑁄 𑀲𑀝𑁆𑀞𑀺𑀫𑀢𑁆𑀢𑁂𑀳𑀺 𑀫𑀳𑀸𑀧𑀭𑀺𑀯𑁂𑀡𑁂𑀳𑀺 𑀲𑀡𑁆𑀞𑀺𑀢𑁄 𑀳𑁄𑀢𑀻𑀢𑀺 𑀅𑀢𑀺𑀯𑀺𑀬 𑀯𑀺𑀧𑀼𑀮𑁄 𑀫𑀳𑀦𑁆𑀢𑁄 𑀯𑀺𑀢𑁆𑀣𑀺𑀡𑁆𑀡𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀯𑀺𑀧𑀼𑀮𑀢𑁆𑀢𑀸 𑀫𑀳𑀦𑁆𑀢𑀢𑁆𑀢𑀸 𑀯𑀺𑀢𑁆𑀣𑀺𑀡𑁆𑀡𑀢𑁆𑀢𑀸 𑀢𑀼𑀫𑀽𑀮 𑀲𑁄𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀢𑀼𑀫𑀽𑀮𑀲𑁄𑀫𑀁. 𑀅𑀢𑁆𑀣𑀢𑁄 𑀫𑀳𑀸𑀲𑁄𑀫 𑀯𑀺𑀳𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀣𑁂𑀭𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀁𑀲𑀲𑁆𑀲 𑀯𑀲𑀦 𑀯𑀺𑀳𑀸𑀭𑀁 𑀓𑀺𑀢𑁆𑀢𑁂𑀢𑀺. 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀦 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀓𑀺𑀢𑁆𑀢𑀺𑀢𑀁. 𑀥𑀜𑁆𑀜𑀸𑀥𑀺𑀯𑀸𑀲𑀦𑁆𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀤𑀺𑀓𑀫𑁆𑀫𑀺𑀓𑀪𑀽𑀢 𑀫𑀳𑀺𑀦𑁆𑀤𑀢𑁆𑀣𑁂𑀭𑀸𑀤𑀻𑀦𑀁 𑀧𑀼𑀜𑁆𑀜𑀯𑀦𑁆𑀢𑀢𑁆𑀣𑁂𑀭𑀸𑀦𑀁 𑀅𑀚𑁆𑀛𑀸𑀯𑀼𑀝𑁆𑀞𑀪𑀽𑀢𑀁. 𑀤𑀻𑀧𑀧𑀲𑀸𑀤𑀓 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀳𑀺 𑀯𑀁𑀲𑁂 𑀚𑀸𑀢𑀢𑁆𑀢𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀤𑀺𑀓𑀫𑁆𑀫𑀺𑀓𑀪𑀽𑀢𑁄 𑀫𑀳𑀸𑀣𑁂𑀭𑁄𑀧𑀺 𑀫𑀳𑀺𑀦𑁆𑀤𑀢𑁆𑀣𑁂𑀭𑁄𑀦𑀸𑀫𑀸𑀢𑀺 𑀥𑀸𑀢𑀼𑀯𑀁𑀲𑁂 𑀯𑀼𑀢𑁆𑀢𑁄. 𑀉𑀤𑀺𑀢𑁄𑀤𑀺𑀢𑀦𑁆𑀢𑀺 𑀅𑀢𑀺𑀯𑀺𑀬 𑀉𑀤𑀺𑀢𑀁. 𑀦𑀪𑀫𑀚𑁆𑀛𑁂 𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀬 𑀲𑀓𑀮𑀲𑀻𑀳𑀴𑀤𑀻𑀧𑁂 𑀅𑀢𑀺𑀯𑀺𑀬 𑀉𑀕𑁆𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀯𑀲𑁂𑀦 𑀧𑀭𑀺𑀬𑀢𑁆𑀢𑀺𑀯𑁂𑀲𑀸𑀭𑀚𑁆𑀚𑀸𑀤𑀺 𑀧𑀜𑁆𑀜𑀸𑀯𑀲𑁂𑀦𑀯𑀸 𑀅𑀯𑀤𑀸𑀢𑁂𑀳𑀺 𑀧𑀭𑀺𑀬𑁄𑀤𑀸𑀢𑁂𑀳𑀺 𑀕𑀼𑀡𑁂𑀳𑀺 𑀲𑁄𑀢𑀺𑀢𑀸𑀢𑀺 𑀧𑀜𑁆𑀜𑀸𑀯𑀤𑀸𑀢𑀕𑀼𑀡𑀲𑁄𑀢𑀺𑀢𑀸. 𑀢𑁂 𑀏𑀯 𑀮𑀚𑁆𑀚𑀻𑀧𑀸𑀧𑀕𑀭𑀳𑀺𑀦𑁄. 𑀫𑀜𑁆𑀜𑀦𑁆𑀢𑀽𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀼. 𑀧𑀼𑀜𑁆𑀜𑀯𑀺𑀪𑀸𑀯𑁄𑀤𑀬 𑀫𑀗𑁆𑀕𑀮𑀸𑀬𑀸𑀢𑀺 𑀯𑀺𑀧𑀼𑀮𑀸𑀦𑀁 𑀧𑀼𑀜𑁆𑀜𑀸𑀦𑀁 𑀯𑀟𑁆𑀠𑀺𑀲𑀗𑁆𑀔𑀸𑀢 𑀫𑀗𑁆𑀕𑀮𑀢𑁆𑀣𑀸𑀬. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸, 𑀧𑀼𑀜𑁆𑀜𑁂𑀦 𑀢𑁂𑀦 𑀯𑀺𑀧𑀼𑀮𑁂𑀦 𑀥𑀜𑁆𑀜𑀸𑀥𑀺𑀯𑀸𑀲𑀁 𑀉𑀤𑀺𑀢𑁄𑀤𑀺𑀢𑀁 𑀢𑀼𑀫𑀽𑀮𑀲𑁄𑀫 𑀯𑀺𑀳𑀸𑀭𑀜𑁆𑀘 𑀢𑀢𑁆𑀣 𑀦𑀺𑀧𑀸𑀲𑀺𑀦𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑀸𑀤𑀺𑀓𑁂 𑀧𑀜𑁆𑀜𑀸𑀯𑀤𑀸𑀢 𑀕𑀼𑀡𑀲𑁄𑀪𑀺𑀢𑁂 𑀮𑀚𑁆𑀚𑀺𑀪𑀽𑀢𑁂 𑀪𑀺𑀓𑁆𑀔𑀽𑀘 𑀧𑀼𑀜𑁆𑀜𑀯𑀺𑀪𑀯𑁄𑀤𑀬𑀫𑀗𑁆𑀕𑀮𑀸𑀬 𑀆𑀬𑀼𑀓𑀦𑁆𑀢𑀁 𑀫𑀜𑁆𑀜𑀦𑁆𑀢𑀼 𑀧𑀘𑁆𑀙𑀺𑀫𑀸 𑀚𑀦𑀸𑀢𑀺. 𑀅𑀣𑀯𑀸, 𑀢𑀁𑀯𑀺𑀳𑀸𑀭𑀁 𑀅𑀜𑁆𑀜𑁂 𑀧𑀜𑁆𑀜𑀸𑀯𑀤𑀸𑀢 𑀕𑀼𑀡𑀲𑁄𑀪𑀺𑀢 𑀮𑀚𑁆𑀚𑀻 𑀪𑀺𑀓𑁆𑀔𑀽 𑀫𑀜𑁆𑀜𑀦𑁆𑀢𑀽𑀢𑀺 𑀬𑁄𑀚𑀦𑀸. 𑀏𑀢𑁂𑀦 𑀣𑁂𑀭𑁄 𑀧𑀘𑁆𑀙𑀺𑀫𑀚𑀦𑀸𑀦𑀁 𑀙𑀲𑀼 𑀅𑀦𑀼𑀢𑁆𑀢𑀭𑀺𑀬𑀥𑀫𑁆𑀫𑁂𑀲𑀼 𑀅𑀦𑀼𑀲𑁆𑀲𑀢𑀸𑀦𑀼𑀢𑁆𑀢𑀭𑀺𑀬𑀲𑀗𑁆𑀔𑀸𑀢𑀁 𑀧𑀼𑀜𑁆𑀜𑀯𑀺𑀲𑁂𑀲𑀜𑁆𑀘 𑀫𑀬𑀁𑀧𑀺 𑀢𑀸𑀤𑀺𑀲𑀕𑀼𑀡𑀪𑀸𑀕𑀺𑀦𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀉𑀲𑁆𑀲𑀸𑀳𑀦𑀼𑀧𑀸𑀬𑀜𑁆𑀘 𑀧𑀝𑀺𑀧𑀸𑀤𑁂𑀲𑀻𑀢𑀺.

𑀧𑀭𑀫𑀢𑁆𑀣𑀤𑀻𑀧𑀦𑀻 𑀦𑀺𑀕𑀫𑀓𑀣𑀸

𑀏𑀢𑁆𑀢𑀸𑀯𑀢𑀸𑀘 𑁋

𑀦𑀕𑀭𑁂 𑀤𑀻𑀧𑀭𑀗𑁆𑀕𑀫𑁆𑀳𑀺, 𑀕𑀸𑀫𑁂 𑀢𑀺 𑀦𑀸𑀫𑀓𑁂;

𑀅𑀝𑁆𑀞𑀲𑀼𑀜𑁆𑀜𑀤𑁆𑀯𑀬𑁂𑀓𑀫𑁆𑀳𑀺, 𑀲𑀸𑀓𑁂 𑀚𑀸𑀢𑁂𑀦 𑀬𑀸 𑀫𑀬𑀸.

𑀫𑀼𑀁𑀭𑁆𑀯𑀸𑀕𑀸𑀫𑁂 𑀅𑀭𑀜𑁆𑀜𑀫𑁆𑀳𑀺, 𑀮𑀗𑁆𑀖𑀢𑀻𑀢𑀺 𑀯𑀺𑀲𑁆𑀲𑀼𑀢𑀸𑀮𑀬𑁂;

𑀯𑀲𑀢𑀸 𑀫𑀳𑀢𑁄 𑀪𑀺𑀓𑁆𑀔𑀼, 𑀕𑀡𑀲𑁆𑀲 𑀳𑀺𑀢𑀓𑀸𑀭𑀺𑀦𑀸.

𑀧𑀭𑀫𑀢𑁆𑀣𑀤𑀻𑀧𑀦𑀻𑀦𑀸𑀫, 𑀲𑀗𑁆𑀔𑀢𑀸 𑀲𑀸𑀭𑀤𑀲𑁆𑀲𑀺𑀦𑀸;

𑀲𑀸𑀭𑁂𑀲𑀻𑀦𑀁 𑀳𑀺𑀢𑀢𑁆𑀣𑀸𑀬, 𑀲𑀸𑀭𑀸𑀲𑀸𑀭𑀯𑀺𑀯𑁂𑀓𑀺𑀦𑀁.

𑀲𑀼𑀦𑀺𑀝𑁆𑀞𑀺𑀢𑀸 𑀅𑀬𑀁 𑀝𑀻𑀓𑀸, 𑀦𑀺𑀩𑁆𑀪𑀬𑀸 𑀦𑀺𑀭𑀼𑀧𑀤𑁆𑀤𑀯𑀸;

𑀦𑀯𑀧𑀜𑁆𑀘𑀤𑁆𑀯𑀬𑁂𑀓𑀫𑁆𑀳𑀺, 𑀲𑀸𑀓𑁂 𑀓𑁄𑀫𑀼𑀤𑀲𑀸𑀭𑀤𑁂.

𑀢𑀣𑀸 𑀓𑀮𑁆𑀬𑀸𑀡𑀲𑀗𑁆𑀓𑀧𑁆𑀧𑀸, 𑀲𑀸𑀥𑀽𑀦𑀁 𑀅𑀫𑀢𑀧𑁆𑀨𑀮𑀸;

𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑀼 𑀲𑀩𑁆𑀩𑁂𑀧𑀺, 𑀦𑀺𑀩𑁆𑀪𑀬𑀸 𑀦𑀺𑀭𑀼𑀧𑀤𑁆𑀤𑀯𑀸.

𑀬𑀣𑀸 𑀮𑁄𑀓𑀫𑁆𑀳𑀺 𑀚𑁄𑀢𑀦𑁆𑀢𑀺, 𑀉𑀪𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸;

𑀢𑀣𑁂𑀯 𑀧𑀭𑀫𑀢𑁆𑀣𑁂𑀲𑀼, 𑀅𑀬𑀁 𑀧𑀭𑀫𑀢𑁆𑀣𑀤𑀻𑀧𑀦𑀻.

𑀧𑀸𑀴𑀺𑀬𑀢𑁆𑀢𑁂𑀲𑀼 𑀲𑀸 𑀲𑀼𑀪𑀸, 𑀲𑀤𑁆𑀤𑀦𑀺𑀭𑀼𑀢𑁆𑀢𑀺𑀤𑀻𑀧𑀦𑀻;

𑀉𑀪𑁄 𑀮𑁄𑀓𑀫𑁆𑀳𑀺 𑀚𑁄𑀢𑀦𑁆𑀢𑀼, 𑀲𑀤𑁆𑀥𑀫𑁆𑀫𑁄 𑀬𑀸𑀯 𑀢𑀺𑀝𑁆𑀞𑀢𑀻𑀢𑀺.

𑀢𑀢𑁆𑀣 𑀦𑀕𑀭𑁂 𑀤𑀻𑀧𑀭𑀗𑁆𑀕𑀫𑁆𑀳𑀻𑀢𑀺 𑀤𑀻𑀧𑀯𑀸𑀲𑀺𑀫𑀳𑀸𑀚𑀦𑀁 𑀭𑀜𑁆𑀚𑁂𑀢𑀻𑀢𑀺 𑀤𑀻𑀧𑀭𑀗𑁆𑀕𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀦𑀕𑀭𑁂. 𑀕𑀸𑀫𑁂 𑀦𑀸𑀫𑀓𑁂𑀢𑀺 𑀭𑁄𑀳𑀺𑀢𑀫𑀺𑀕𑀸𑀦𑀁 𑀦𑀺𑀯𑀸𑀲𑀪𑀽𑀫𑀺𑀢𑀮𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯𑀁𑀦𑀸𑀫𑀓𑁂 𑀫𑀳𑀸𑀕𑀸𑀫𑁂. 𑀲𑀸𑀓𑁂𑀢𑀺 𑀓𑀮𑀺𑀬𑀼𑀕𑁂. 𑀬𑀸 𑀫𑀬𑀸𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀻𑀦𑀸𑀫 𑀬𑀸𑀝𑀻𑀓𑀸 𑀫𑀬𑀸 𑀲𑀗𑁆𑀔𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀗𑁆𑀖𑀢𑀻𑀢𑀺 𑀯𑀺𑀲𑁆𑀲𑀼𑀢𑀸𑀮𑀬𑁂𑀢𑀺 𑀏𑀯𑀁𑀯𑀺𑀲𑁆𑀲𑀼𑀢𑁂 𑀅𑀭𑀜𑁆𑀜𑀯𑀺𑀳𑀸𑀭𑁂. 𑀲𑀸𑀭𑁂𑀲𑀻𑀦𑀦𑁆𑀢𑀺 𑀲𑀸𑀭𑀕𑀯𑁂𑀲𑀻𑀦𑀁. 𑀲𑀸𑀭𑀸𑀲𑀸𑀭𑀯𑀺𑀯𑁂𑀓𑀺𑀦𑀦𑁆𑀢𑀺 𑀅𑀬𑀁 𑀲𑀸𑀭𑁄 𑀅𑀬𑀁 𑀅𑀲𑀸𑀭𑁄𑀢𑀺 𑀏𑀯𑀁 𑀲𑀸𑀭𑀜𑁆𑀘 𑀅𑀲𑀸𑀭𑀜𑁆𑀘𑀯𑀺𑀯𑁂 𑀘𑁂𑀢𑁆𑀯𑀸 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑀸𑀦𑀁. 𑀲𑀸𑀓𑁂𑀢𑀺 𑀓𑀮𑀺𑀬𑀼𑀕𑁂. 𑀓𑁄𑀫𑀼𑀤𑀲𑀸𑀭 𑀤𑁂𑀢𑀺 𑀓𑀼𑀫𑀼𑀤𑀧𑀼𑀧𑁆𑀨𑀬𑀼𑀢𑁆𑀢𑁂 𑀲𑀭𑀤𑀉𑀢𑀼 𑀧𑀭𑀺𑀬𑀸𑀧𑀦𑁆𑀦𑁂𑀧𑀘𑁆𑀙𑀺 𑀫𑀓𑀢𑁆𑀢𑀺𑀓𑀫𑀸𑀲𑁂. 𑀅𑀫𑀢𑀧𑁆𑀨𑀮𑀸𑀢𑀺 𑀦𑀺𑀩𑁆𑀩𑀸𑀦𑀧𑀬𑁄𑀚𑀦𑀸. 𑀲𑀼𑀪𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑁄𑀪𑀡𑀸. 𑀲𑀤𑁆𑀥𑀫𑁆𑀫𑁄𑀢𑀺 𑀢𑀺𑀯𑀺𑀥𑀁 𑀲𑀢𑁆𑀣𑀼𑀲𑀸𑀲𑀦𑀁 𑀯𑀼𑀘𑁆𑀘𑀢𑀻𑀢𑀺.

𑀇𑀢𑀺 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀧𑀓𑀭𑀡𑀲𑁆𑀲 𑀘𑀢𑀼𑀢𑁆𑀣𑀲𑀁𑀯𑀡𑁆𑀡𑀦𑀸

𑀪𑀽𑀢𑀸 𑀧𑀭𑀫𑀢𑁆𑀣𑀤𑀻𑀧𑀦𑀻𑀦𑀸𑀫𑀸 𑀬𑀁𑀝𑀻𑀓𑀸

𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.