𑀯𑀻𑀣𑀺𑀫𑀼𑀢𑁆𑀢 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁪𑁩. 𑀏𑀯𑀁 𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀆𑀤𑀺𑀕𑀸𑀣 𑀫𑀸𑀳. 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀧𑀯𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑁄𑀦𑀸𑀫 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀉𑀤𑀻𑀭𑀺𑀢𑁄𑀓𑀣𑀺𑀢𑁄. 𑀇𑀤𑀸𑀦𑀺 𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀦𑀸𑀫 𑀯𑀻𑀣𑀺𑀫𑀼𑀢𑁆𑀢 𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀧𑀝𑀺𑀲𑀦𑁆𑀥𑀺𑀬𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀬𑀸 𑀓𑀣𑀺𑀢𑀸𑀬 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀓𑀸𑀮𑁂𑀘 𑀘𑀼𑀢𑀺𑀓𑀸𑀮𑁂𑀘 𑀢𑁂𑀲𑀁 𑀧𑀯𑀢𑁆𑀢𑀺 𑀓𑀣𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑀦𑁆𑀥𑀺𑀬𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁.

[𑁧𑁪𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀭𑀢𑁄 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁 𑀧𑀣𑀫𑀁 𑀘𑀼𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀬𑀸 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥 𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀅𑀢𑀻𑀢𑀸 𑀦𑀦𑁆𑀢𑀭 𑀘𑀼𑀢𑀺𑀧𑀺 𑀕𑀳𑁂𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀢𑀤𑀸𑀲𑀦𑁆𑀦𑀢𑀸𑀬 𑀢𑀁𑀕𑀳𑀡𑁂𑀦𑁂𑀯 𑀕𑀳𑀺𑀢𑀘𑀼𑀢𑀺𑀓𑀸𑀮𑁂𑀘𑀸’’𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯.

𑀯𑀻𑀣𑀺𑀫𑀼𑀢𑁆𑀢𑀸𑀦𑀜𑁆𑀳𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀦𑀸𑀫 𑀅𑀢𑀻𑀢𑀸𑀦𑀦𑁆𑀢𑀭𑀪𑀯𑁂 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁𑀏𑀯 𑀲𑀺𑀤𑁆𑀥𑀸𑀢𑀺 𑀏𑀓𑀲𑁆𑀫𑀺𑀁 𑀪𑀯𑁂 𑀯𑀺𑀲𑀬𑀧𑁆𑀧𑀧𑀢𑁆𑀢𑀺𑀬𑀸 𑀲𑀳 𑀢𑁂𑀲𑀁 𑀧𑀝𑀺𑀲𑀦𑁆𑀥𑀺𑀧𑀫𑀼𑀔𑀸𑀦𑀁 𑀯𑀻𑀣𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁𑀏𑀯 𑀢𑀸𑀬 𑀅𑀢𑀻𑀢𑀸𑀦𑀦𑁆𑀢𑀭𑀘𑀼𑀢𑀺𑀬𑀸 𑀲𑀤𑁆𑀥𑀺𑀁 𑀫𑀭𑀡𑀼𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀣𑁂𑀭𑁂𑀦 𑀤𑀲𑁆𑀲𑀺𑀢𑀦𑁆𑀢𑀺. 𑀪𑀯𑀦𑁆𑀢𑀺 𑀲𑀢𑁆𑀢𑀸 𑀲𑀗𑁆𑀔𑀸𑀭𑀸𑀘 𑀏𑀢𑀸𑀲𑀽𑀢𑀺 𑀪𑀽𑀫𑀺𑀬𑁄. 𑀅𑀬𑁄𑀢𑀺 𑀯𑀟𑁆𑀠𑀺. 𑀅𑀢𑁆𑀣𑀢𑁄 𑀧𑀦 𑀲𑀼𑀔𑀁𑀘 𑀲𑀼𑀔𑀳𑁂𑀢𑀼 𑀲𑀼𑀔𑀧𑀘𑁆𑀘𑀬𑀸𑀘 𑀯𑁂𑀤𑀺𑀢𑀩𑁆𑀩𑀸. 𑀬𑁂𑀪𑀼𑀬𑁆𑀬𑁂𑀦 𑀢𑀢𑁄 𑀅𑀬𑀢𑁄 𑀅𑀧𑀕𑀢𑀸 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸𑀢𑀺 𑀅𑀧𑀸𑀬𑁄. 𑀲𑁄𑀏𑀯 𑀪𑀽𑀫𑀻𑀢𑀺 𑀅𑀧𑀸𑀬𑀪𑀽𑀫𑀺. 𑀑𑀴𑀸𑀭𑀺𑀓𑁂𑀦 𑀓𑀸𑀫𑀭𑀸𑀕𑁂𑀦 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄. 𑀕𑀦𑁆𑀢𑀩𑁆𑀩𑀸 𑀉𑀧𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺. 𑀕𑀘𑁆𑀙𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺𑀯𑀸 𑀕𑀢𑀺. 𑀅𑀦𑁂𑀓𑀯𑀺𑀥𑀲𑀫𑁆𑀧𑀢𑁆𑀢𑀻𑀦𑀁 𑀅𑀥𑀺𑀝𑁆𑀞𑀸𑀦𑀢𑀸𑀬 𑀲𑁄𑀪𑀡𑀸𑀕𑀢𑀺 𑀲𑀼𑀕𑀢𑀺. 𑀓𑀸𑀫𑁄𑀘 𑀲𑁄 𑀲𑀼𑀕𑀢𑀺𑀘𑀸𑀢𑀺 𑀲𑀫𑀸𑀲𑁄. 𑀦𑀢𑁆𑀣𑀺 𑀬𑀣𑀸𑀯𑀼𑀢𑁆𑀢𑁄 𑀅𑀬𑁄 𑀏𑀢𑁆𑀣𑀸𑀢𑀺 𑀦𑀺𑀭𑀬𑁄. 𑀦𑀺𑀘𑁆𑀘𑀁 𑀯𑀸 𑀭𑀬𑀦𑁆𑀢𑀺 𑀓𑀫𑁆𑀧𑀦𑁆𑀢𑀺 𑀨𑀦𑁆𑀤𑀦𑁆𑀢𑀺 𑀲𑀢𑁆𑀢𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀏𑀢𑁆𑀣𑀸𑀢𑀺 𑀦𑀺𑀭𑀬𑁄. 𑀫𑀦𑀼𑀲𑁆𑀲𑀸 𑀯𑀺𑀬 𑀉𑀤𑁆𑀥𑀁 𑀉𑀘𑁆𑀘𑀸 𑀅𑀳𑀼𑀢𑁆𑀯𑀸 𑀢𑀺𑀭𑁄 𑀅𑀜𑁆𑀘𑀺𑀢𑀸 𑀆𑀬𑀢𑀸𑀢𑀺 𑀢𑀺𑀭𑀘𑁆𑀙𑀸𑀦𑀸. 𑀬𑀼𑀯𑀦𑁆𑀢𑀺 𑀦𑀸𑀦𑀸 𑀯𑀡𑁆𑀡𑀲𑀡𑁆𑀞𑀸𑀦𑀸𑀧𑀺 𑀲𑀢𑁆𑀢𑀸 𑀲𑀫𑀸𑀦𑀚𑀸𑀢𑀺𑀢𑀸𑀬 𑀏𑀓𑀻𑀪𑀽𑀢𑀸𑀯𑀺𑀬 𑀳𑁄𑀦𑁆𑀢𑀺 𑀏𑀢𑀸𑀬𑀸𑀢𑀺 𑀬𑁄𑀦𑀺. 𑀚𑀸𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑀁.

𑀢𑀺𑀭𑀘𑁆𑀙𑀸𑀦𑀸𑀦𑀁 𑀬𑁄𑀦𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺. 𑀧𑁂𑀘𑁆𑀘 𑀇𑀢𑀸 𑀕𑀢𑀸𑀢𑀺 𑀧𑁂𑀢𑀸. 𑀇𑀢𑁄 𑀅𑀧𑀓𑁆𑀓𑀫𑁆𑀫 𑀘𑀯𑀺𑀢𑁆𑀯𑀸 𑀪𑀯𑀦𑁆𑀢𑀭𑁂 𑀕𑀢𑀸𑀢𑀺 𑀅𑀢𑁆𑀣𑁄. 𑀬𑁂𑀓𑁂𑀘𑀺 𑀓𑀸𑀮𑀗𑁆𑀓𑀢𑀸. 𑀤𑀺𑀯𑀗𑁆𑀕𑀢𑀸𑀧𑀺 𑀳𑀺 𑀮𑁄𑀓𑁂 𑀓𑀸𑀮𑀗𑁆𑀓𑀢𑀸 𑀧𑁂𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀥 𑀧𑀦 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀧𑁂𑀘𑁆𑀘 𑀧𑀓𑀝𑁆𑀞𑀁 𑀧𑀯𑀸𑀲𑀁 𑀤𑀽𑀭𑀁 𑀕𑀢𑀸𑀢𑀺 𑀅𑀢𑁆𑀣𑁂𑀦 𑀬𑀸𑀯 𑀢𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺. 𑀢𑀸𑀯 𑀦𑀺𑀘𑁆𑀘𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀸 𑀢𑀢𑀻𑀬𑀸 𑀅𑀧𑀸𑀬𑀺𑀓𑀲𑀢𑁆𑀢𑀸 𑀅𑀥𑀺𑀧𑁆𑀧𑁂𑀢𑀸. 𑀧𑁂𑀢𑀸𑀦𑀁 𑀲𑀫𑀽𑀳𑁄 𑀧𑁂𑀢𑁆𑀢𑀺. 𑀧𑁂𑀢𑁆𑀢𑀺𑀬𑀸 𑀯𑀺𑀲𑀬𑁄𑀢𑀺 𑀧𑁂𑀢𑁆𑀢𑀺 𑀯𑀺𑀲𑀬𑁄. 𑀯𑀺𑀲𑀬𑁄𑀢𑀺𑀘 𑀧𑀯𑀢𑁆𑀢𑀺𑀤𑁂𑀲𑁄 𑀯𑀼𑀘𑁆𑀘𑀢𑀺. 𑀅𑀲𑀼𑀭𑀓𑀸𑀬𑁄𑀢𑀺 𑀏𑀢𑁆𑀣 𑀲𑀼𑀭𑀸 𑀯𑀼𑀘𑁆𑀘𑀦𑁆𑀢𑀺 𑀉𑀧𑀭𑀺 𑀤𑁂𑀯𑀸 𑀲𑀼𑀭𑀦𑁆𑀢𑀺 𑀇𑀤𑁆𑀥𑀺𑀯𑀺𑀲𑁂𑀲𑁂𑀳𑀺 𑀤𑀺𑀩𑁆𑀩𑀦𑁆𑀢𑀺, 𑀲𑀼𑀝𑁆𑀞𑀼𑀯𑀸 𑀭𑀫𑀦𑁆𑀢𑀺 𑀓𑀸𑀫𑀲𑀼𑀔𑀭𑀢𑀺𑀁 𑀧𑀘𑁆𑀘𑀦𑀼𑀪𑀯𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀦 𑀲𑀼𑀭𑀸𑀢𑀺 𑀅𑀲𑀼𑀭𑀸. 𑀯𑁂𑀧𑀘𑀺𑀢𑁆𑀢𑀺 𑀧𑀳𑀸𑀭𑀸𑀤𑀸𑀤𑀬𑁄 𑀲𑀦𑁆𑀥𑀸𑀬 𑀲𑀼𑀭𑀧𑀝𑀺𑀧𑀓𑁆𑀔𑀸 𑀲𑀼𑀭 𑀲𑀤𑀺𑀲𑀸𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀬𑀗𑁆𑀓𑀭𑀫𑀸𑀢𑀸 𑀉𑀢𑁆𑀢𑀭𑀫𑀸𑀢𑀸𑀤𑀬𑁄 𑀯𑀺𑀦𑀺 𑀧𑀸𑀢𑀺𑀓𑁂 𑀲𑀦𑁆𑀥𑀸𑀬 𑀔𑀼𑀤𑁆𑀤𑀓𑀲𑀼𑀭𑀸 𑀘𑀽𑀴𑀓𑀲𑀼𑀭𑀸𑀢𑀺 𑀅𑀢𑁆𑀣𑁄. 𑀬𑀫𑀭𑀸𑀚𑀸 𑀤𑀬𑁄 𑀯𑁂𑀫𑀸𑀦𑀺𑀓𑀧𑁂𑀢𑁂 𑀲𑀦𑁆𑀥𑀸𑀬 𑀏𑀓𑀤𑁂𑀲𑁂𑀦 𑀲𑀼𑀭𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀯𑁂𑀫𑀸𑀦𑀺𑀓𑀧𑁂𑀢𑀸𑀧𑀺 𑀳𑀺 𑀓𑀢𑁆𑀣𑀘𑀺 𑀅𑀲𑀼𑀭𑀓𑀸𑀬𑀸𑀢𑀺 𑀆𑀕𑀢𑀸. 𑀮𑁄𑀓𑀦𑁆𑀢𑀭𑀺𑀓 𑀦𑁂𑀭𑀬𑀺𑀓𑁂 𑀲𑀦𑁆𑀥𑀸𑀬 𑀲𑀩𑁆𑀩𑀲𑁄 𑀲𑀼𑀭𑀕𑀼𑀡 𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀧𑀺 𑀳𑀺 𑀩𑀼𑀤𑁆𑀥𑀯𑀁𑀲𑀦𑀺𑀤𑀸𑀦𑀝𑁆𑀞𑀓𑀣𑀸𑀬𑀁 𑀚𑀸𑀢𑀺𑀤𑀼𑀓𑁆𑀔 𑀦𑀺𑀤𑁆𑀤𑁂𑀲𑁂𑀲𑀼𑀘 𑀅𑀲𑀼𑀭𑀓𑀸𑀬𑀸𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀓𑀸𑀮𑀓𑀜𑁆𑀘𑀺𑀓𑀧𑁂𑀢𑁂 𑀲𑀦𑁆𑀥𑀸𑀬 𑀲𑀩𑁆𑀩𑀲𑁄 𑀲𑀼𑀭𑀪𑀸𑀯𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀧𑀜𑁆𑀘𑀦𑁆𑀦𑀁 𑀅𑀲𑀼𑀭𑀸𑀦𑀁 𑀯𑀲𑁂𑀦 𑀅𑀢𑁆𑀣𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀩𑁆𑀩𑀸 𑀯𑀢 𑀪𑁄𑀓𑀸𑀬𑀸 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺, 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺 𑀅𑀲𑀼𑀭𑀓𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂 𑀘𑀢𑁆𑀢𑀸𑀭𑁄𑀧𑀺 𑀅𑀧𑀸𑀬𑀸 𑀅𑀲𑀼𑀭𑀓𑀸𑀬𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀡𑁆𑀡𑀺𑀢𑀸.

𑀢𑀢𑁆𑀣 𑀯𑁂𑀧𑀘𑀺𑀢𑁆𑀢𑀺 𑀧𑀳𑀸𑀭𑀸𑀤𑀸𑀤𑀬𑁄 𑀅𑀲𑀼𑀭𑀸 𑀢𑀸𑀯 𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼 𑀲𑀗𑁆𑀕𑀳𑀺𑀢𑀸. 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑁂𑀲𑀼. 𑀢𑀣𑀸 𑀯𑁂𑀫𑀸𑀦𑀺𑀓𑀧𑁂𑀢𑀸𑀲𑀼𑀭𑀸. 𑀢𑁂𑀧𑀺 𑀳𑀺 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸 𑀯𑀺𑀬 𑀢𑀺𑀳𑁂𑀢𑀼𑀓𑀸𑀧𑀺 𑀤𑀼𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸. 𑀬𑀫𑀭𑀸𑀚𑀸𑀦𑁄 𑀧𑀦 𑀯𑁂𑀲𑁆𑀲𑀪𑀽 𑀦𑁄𑀢𑁆𑀢𑀺𑀘 𑀧𑁂𑀢𑁆𑀢𑀺 𑀭𑀸𑀚𑀸 𑀲𑁄𑀫𑁄 𑀬𑀫𑁄 𑀯𑁂𑀲𑁆𑀲𑀯𑀡𑁄𑀘 𑀭𑀸𑀚𑀸𑀢𑀺 𑀏𑀯𑀁 𑀓𑀣𑀸 𑀯𑀢𑁆𑀣𑀼𑀧𑀸𑀴𑀺𑀬𑀁 𑀆𑀕𑀢𑀸 𑀯𑁂𑀲𑁆𑀲𑀪𑀽𑀆𑀤𑀬𑁄 𑀲𑀬𑀁 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸 𑀯𑁂𑀫𑀸𑀦𑀺𑀓𑀧𑁂𑀢𑀭𑀸𑀚𑀸𑀦𑁄 𑀳𑀼𑀢𑁆𑀯𑀸𑀧𑀺 𑀦𑁂𑀭𑀬𑀺𑀓𑁂𑀲𑀼 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀳𑁂𑀝𑁆𑀞𑀸 𑀦𑀺𑀭𑀬𑀮𑁄𑀓𑁂𑀲𑀼𑀧𑀺 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺𑀬𑁂𑀯. 𑀢𑁂𑀦𑁂𑀯 𑀳𑀺 𑀲𑀩𑁆𑀩𑁂 𑀧𑁂𑀢𑀮𑁄𑀓𑀸𑀧𑀺 𑀦𑀺𑀭𑀬𑀮𑁄𑀓𑀸𑀧𑀺 𑀬𑀫𑀮𑁄 𑀓𑀸𑀢𑀺𑀘 𑀬𑀫𑀯𑀺𑀲𑀬𑀸𑀢𑀺𑀘 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀬𑁂𑀘 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺 𑀬𑀸𑀧𑀦𑁆𑀦𑀸 𑀧𑀸𑀧𑀚𑁆𑀛𑀸𑀲𑀬𑀸 𑀓𑀼𑀭𑀼𑀭𑀓𑀫𑁆𑀫𑀓𑀸𑀭𑀺𑀦𑁄 𑀭𑁂𑀯𑀢𑀺𑀯𑀺𑀫𑀸𑀦𑁂 𑀬𑀓𑁆𑀔𑀸𑀢𑀺 𑀆𑀕𑀢𑀸 𑀲𑀁𑀓𑀺𑀘𑁆𑀘𑀚𑀸𑀢𑀓𑁂 𑀭𑀓𑁆𑀔𑀲𑀸𑀢𑀺 𑀆𑀕𑀢𑀸 𑀬𑀓𑁆𑀔𑀭𑀓𑁆𑀔𑀲𑀸𑀦𑀸𑀫 𑀇𑀢𑁄 𑀕𑀦𑁆𑀢𑁆𑀯𑀸 𑀉𑀲𑁆𑀲𑀤𑀦𑀺𑀭𑀬𑁂𑀲𑀼 𑀦𑁂𑀭𑀬𑀺𑀓𑀸𑀦𑀁 𑀦𑀸𑀦𑀸𑀓𑀫𑁆𑀫 𑀓𑀸𑀭𑀡𑀸𑀬𑁄 𑀓𑀭𑁄𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀢𑁂𑀲𑀁𑀧𑀺 𑀓𑀸𑀮𑁄 𑀉𑀧𑀓𑀸𑀮𑁄𑀢𑀺 𑀏𑀯𑀫𑀸𑀤𑀻𑀳𑀺 𑀦𑀸𑀫𑁂𑀳𑀺 𑀦𑀸𑀭𑀤𑀚𑀸𑀢𑀓𑁂 𑀆𑀕𑀢𑀸𑀦𑀁 𑀦𑀺𑀭𑀬 𑀧𑀸𑀮𑀸𑀦𑀁 𑀉𑀧𑀭𑀺𑀬𑀫𑀭𑀸𑀚𑀸𑀦𑀁 𑀆𑀡𑀸𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺. 𑀮𑁄𑀓𑀦𑁆𑀢𑀭𑀺𑀓𑀸 𑀲𑀼𑀭𑀸 𑀦𑀺𑀭𑀬𑁂 𑀲𑀗𑁆𑀕𑀳𑀺𑀢𑀸. 𑀇𑀥 𑀧𑀦 𑀓𑀸𑀮𑀓𑀜𑁆𑀘𑀺𑀓𑀸𑀤𑀬𑁄 𑀧𑁂𑀢𑀸𑀲𑀼𑀭𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀁 𑀅𑀲𑀼𑀭𑀸𑀦𑀁 𑀓𑀸𑀬𑁄 𑀲𑀫𑀽𑀳𑁄𑀢𑀺 𑀅𑀲𑀼𑀭𑀓𑀸𑀬𑁄. 𑀏𑀢𑁆𑀣𑀘 𑀦𑀺𑀭𑀬𑀪𑀽𑀫𑀺𑀦𑀸𑀫 𑀧𑀘𑁆𑀘𑁂𑀓𑀁 𑀲𑁄𑀴𑀲𑀼𑀲𑁆𑀲𑀤𑀧𑀭𑀺 𑀯𑀸𑀭𑀸𑀦𑀁 𑀅𑀝𑁆𑀞𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀯𑀲𑁂𑀦 𑀅𑀦𑁆𑀢𑁄 𑀧𑀣𑀯𑀺𑀬𑀁 𑀞𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀜𑁆𑀜 𑀧𑀩𑁆𑀩𑀢 𑀲𑀫𑀼𑀤𑁆𑀤 𑀤𑀻𑀧𑀓𑀸𑀤𑀻𑀲𑀼𑀧𑀺 𑀦𑀸𑀦𑀸𑀦𑀺𑀭𑀬 𑀪𑀽𑀫𑀺𑀬𑁄 𑀳𑁄𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀢𑀸𑀤𑀺𑀲𑀲𑁆𑀲 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀲𑁆𑀲 𑀑𑀓𑀸𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀦𑀺𑀭𑀬𑁄𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀲𑁂𑀲𑀸𑀦𑀁 𑀧𑀦 𑀢𑀺𑀲𑁆𑀲𑀦𑁆𑀦𑀁 𑀅𑀧𑀸𑀬𑀪𑀼𑀫𑁆𑀫𑀻𑀦𑀁 𑀢𑀸𑀤𑀺𑀲𑀲𑁆𑀲 𑀑𑀓𑀸𑀲𑀲𑁆𑀲 𑀦𑀢𑁆𑀣𑀺𑀢𑀸𑀬 𑀬𑁄𑀦𑀺 𑀯𑀺𑀲𑀬 𑀓𑀸𑀬 𑀲𑀤𑁆𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀔𑀦𑁆𑀥𑀸𑀯𑀸 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀧𑀤𑁂𑀲𑀸𑀯𑀸 𑀕𑀳𑀺𑀢𑀸𑀢𑀺. [𑀅𑀧𑀸𑀬𑀪𑀽𑀫𑀺]

𑀉𑀲𑁆𑀲𑀺𑀢𑁄 𑀉𑀕𑁆𑀕𑀢𑁄 𑀉𑀲𑁆𑀲𑀦𑁆𑀦𑁄𑀯𑀸 𑀫𑀦𑁄 𑀏𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸. 𑀢𑁂𑀳𑀺 𑀅𑀦𑀦𑁆𑀢𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀇𑀢𑀭𑀪𑀽𑀫𑀺𑀓𑀸𑀦𑀁 𑀲𑀢𑁆𑀢𑀸𑀦𑀁 𑀢𑀺𑀓𑁆𑀔𑀢𑀭𑀲𑀽𑀭 𑀯𑀺𑀘𑀺𑀢𑁆𑀭𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀭𑀺𑀧𑀼𑀡𑁆𑀡𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫 𑀧𑀣𑀸𑀦𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀜𑁆𑀘 𑀏𑀢𑁆𑀣𑁂𑀯 𑀲𑀫𑁆𑀪𑀯𑀢𑁄𑀢𑀺. 𑀢𑁂𑀲𑀼𑀧𑀺 𑀧𑀦 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄𑀏𑀯 𑀅𑀢𑀺𑀲𑀬𑁂𑀦 𑀉𑀲𑁆𑀲𑀺𑀢𑀫𑀦𑀸 𑀳𑁄𑀦𑁆𑀢𑀺. 𑀇𑀢𑀭𑁂 𑀧𑀦 𑀢𑁂𑀳𑀺 𑀲𑀫𑀸𑀦𑀯𑀡𑁆𑀡𑀸𑀤𑀺𑀢𑀸𑀬 𑀫𑀦𑀼𑀲𑁆𑀲𑀸 𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀬𑀣𑀸𑀳-𑀢𑀻𑀳𑀺 𑀪𑀺𑀓𑁆𑀔𑀯𑁂 𑀞𑀸𑀦𑁂 𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺. 𑀤𑁂𑀯𑁂𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺. 𑀲𑀽𑀭𑀸𑀘 𑀲𑀢𑀺 𑀫𑀦𑁆𑀢𑁄𑀘 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀘𑀸𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀯𑀤𑀦𑁆𑀢𑀺 𑀫𑀦𑀽𑀢𑀺 𑀫𑀳𑀸𑀲𑀫𑁆𑀫𑀢𑀭𑀸𑀚𑀸 𑀯𑀼𑀘𑁆𑀘𑀢𑀺. 𑀇𑀫𑁂𑀘 𑀚𑀦𑀸 𑀢𑁂𑀦 𑀣𑀧𑀺𑀢𑁂𑀲𑀼 𑀫𑀭𑀺𑀬𑀸𑀤𑀥𑀫𑁆𑀫𑁂𑀲𑀼 𑀞𑀺𑀢𑀸 𑀢𑀲𑁆𑀲 𑀧𑀼𑀢𑁆𑀢𑀝𑁆𑀞𑀸𑀦𑀺𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀫𑀦𑀼𑀦𑁄 𑀅𑀧𑀘𑁆𑀘𑀸 𑀧𑀼𑀢𑁆𑀢𑀸𑀢𑀺 𑀫𑀦𑀼𑀲𑁆𑀲𑀸𑀢𑀺. 𑀇𑀥 𑀧𑀦 𑀪𑀽𑀫𑀺𑀧𑀭𑀺𑀬𑀸𑀬𑁄𑀢𑀺 𑀓𑀢𑁆𑀯𑀸 𑀫𑀦𑀼𑀲𑁆𑀲𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀏𑀓𑀯𑀘𑀦𑀜𑁆𑀘 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀲𑁂𑀲𑁂 𑀲𑀼𑀧𑀺. 𑀬𑁂𑀲𑀼 𑀧𑀦 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀢𑁂 𑀤𑁂𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀢𑀢𑁆𑀣 𑀥𑀢𑀭𑀝𑁆𑀞𑁄 𑀕𑀦𑁆𑀥𑀧𑁆𑀧𑀸𑀦𑀁 𑀭𑀸𑀚𑀸 𑀳𑁄𑀢𑀺. 𑀯𑀺𑀭𑀼𑀴𑁆𑀳𑀓𑁄 𑀓𑀼𑀫𑁆𑀪𑀡𑁆𑀟𑀸𑀦𑀁. 𑀯𑀺𑀭𑀽𑀧𑀓𑁆𑀔𑁄 𑀦𑀸𑀕𑀸𑀦𑀁. 𑀓𑀼𑀯𑁂𑀭𑁄 𑀬𑀓𑁆𑀔𑀸𑀦𑀁. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀕𑀦𑁆𑀥𑀭𑀼𑀓𑁆𑀔𑁂𑀲𑀼 𑀅𑀧𑁆𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀕𑀦𑁆𑀥𑀧𑁆𑀧𑀸. 𑀕𑀦𑁆𑀥𑀭𑀼𑀓𑁆𑀔𑀸𑀥𑀺𑀯𑀢𑁆𑀣𑀸 𑀤𑁂𑀯𑀸. 𑀢𑁂 𑀫𑀽𑀮𑀕𑀦𑁆𑀥𑀸𑀤𑀺𑀯𑀲𑁂𑀦 𑀤𑀲𑀥𑀸 𑀧𑀸𑀴𑀺𑀬𑀁 𑀆𑀕𑀢𑀸. 𑀓𑀼𑀫𑁆𑀪𑀡𑁆𑀟𑀸𑀢𑀺 𑀤𑀸𑀦𑀯𑀭𑀓𑁆𑀔𑀲𑀸. 𑀦𑀸𑀕𑀸 𑀬𑀓𑁆𑀔𑀸𑀘 𑀧𑀸𑀓𑀝𑀸. 𑀲𑀩𑁆𑀩𑁂 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀧𑀸𑀧𑀚𑁆𑀛𑀸𑀲𑀬𑀸 𑀓𑀼𑀭𑀼𑀭𑀓𑀫𑁆𑀫𑀓𑀸𑀭𑀺𑀦𑁄 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀜𑁆𑀜𑀫𑀜𑁆𑀜𑀁𑀯𑀸 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀯𑀺𑀳𑁂𑀞𑀦𑀢𑁆𑀣𑀸𑀬 𑀢𑁂𑀲𑀼 𑀦𑀸𑀦𑀸𑀭𑀸𑀚𑀸𑀦𑀁𑀯𑀸 𑀦𑀸𑀦𑀸𑀲𑁂𑀦𑀸𑀧𑀢𑀺𑀁𑀯𑀸 𑀣𑀧𑁂𑀲𑀼𑀁.

𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁𑀘𑁂𑀢𑁆𑀣𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀬𑀓𑁆𑀔𑁄𑀬𑀓𑁆𑀔𑀺𑀦𑀻𑀕𑀦𑁆𑀥𑀧𑁆𑀧𑁄 𑀕𑀦𑁆𑀥𑀧𑁆𑀧𑀻 𑀓𑀼𑀫𑁆𑀪𑀡𑁆𑀟𑁄 𑀓𑀼𑀫𑁆𑀪𑀡𑁆𑀟𑀻 𑀦𑀸𑀕𑁄 𑀦𑀸𑀕𑀻𑀢𑀺𑀘𑀢𑀲𑁆𑀲𑁄 𑀅𑀯𑀭𑀼𑀤𑁆𑀥𑀓𑀚𑀸𑀢𑀺𑀬𑁄 𑀆𑀕𑀢𑀸. 𑀢𑀢𑁆𑀣 𑀲𑀭𑀻𑀭𑁄𑀪𑀸𑀲𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁄 𑀅𑀫𑀦𑀼𑀲𑁆𑀲𑁄 𑀬𑀓𑁆𑀔𑁄𑀢𑀺𑀘 𑀤𑁂𑀯𑁄𑀢𑀺𑀘 𑀤𑁂𑀯𑀢𑀸𑀢𑀺𑀘 𑀯𑀼𑀘𑁆𑀘𑀢𑀺. 𑀲𑀭𑀻𑀭𑁄 𑀪𑀸𑀲 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑁄 𑀯𑀺𑀕𑀘𑁆𑀙𑀭𑀽𑀧𑁄 𑀅𑀫𑀦𑀼𑀲𑁆𑀲𑁄 𑀬𑀓𑁆𑀔𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀭𑀼𑀓𑁆𑀔𑀝𑁆𑀞𑀓𑀯𑀺𑀫𑀸𑀦𑁂 𑀚𑀸𑀢𑁄 𑀭𑀼𑀓𑁆𑀔𑀤𑁂𑀯𑀢𑀸𑀦𑀸𑀫. 𑀭𑀼𑀓𑁆𑀔𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑁄 𑀕𑀦𑁆𑀥𑀧𑁆𑀧𑁄𑀦𑀸𑀫. 𑀬𑁄 𑀮𑁄𑀓𑁂 𑀓𑀝𑁆𑀞𑀬𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀦𑀺𑀳𑀻𑀦𑀓𑀫𑁆𑀫𑀓𑀢𑀸 𑀓𑀸𑀘𑀺 𑀕𑀦𑁆𑀥𑀧𑁆𑀧𑀺𑀬𑁄 𑀫𑀦𑀼𑀲𑁆𑀲𑀺𑀢𑁆𑀣𑀻𑀦𑀁 𑀲𑀭𑀻𑀭𑀩𑁆𑀪𑀦𑁆𑀢𑀭𑁂𑀲𑀼𑀧𑀺 𑀚𑀸𑀬𑀦𑁆𑀢𑀺. 𑀬𑀸 𑀯𑁂𑀤𑀕𑀦𑁆𑀣𑁂𑀲𑀼 𑀬𑁄𑀕𑀺𑀦𑀻𑀢𑀺𑀘 𑀮𑁄𑀓𑁂 𑀚𑁄𑀕𑀺𑀦𑀻𑀢𑀺𑀘 𑀯𑀼𑀘𑁆𑀘𑀦𑁆𑀢𑀺. 𑀅𑀪𑀺𑀮𑀓𑁆𑀔𑀺𑀢𑀭𑀢𑁆𑀢𑀻𑀲𑀼 𑀕𑁄𑀘𑀭𑀧𑀲𑀼𑀢 𑀓𑀸𑀮𑁂 𑀚𑀼𑀢𑀺𑀅𑀢𑁆𑀣𑁂𑀦 𑀚𑀼𑀡𑁆𑀳𑀸𑀢𑀺𑀘 𑀯𑀼𑀘𑁆𑀘𑀦𑁆𑀢𑀺, 𑀓𑀼𑀩𑁆𑀪𑀡𑁆𑀟𑀸𑀦𑀸𑀫 𑀫𑀳𑁄𑀤𑀭𑀸 𑀯𑀺𑀲𑀸𑀮𑀓𑁆𑀔𑀸 𑀭𑀓𑁆𑀔𑀲𑀸𑀏𑀯. 𑀬𑁂 𑀮𑁄𑀓𑁂 𑀥𑀦 𑀭𑀓𑁆𑀔𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁂 𑀫𑀡𑀺𑀭𑀢𑀦𑀁 𑀭𑀓𑁆𑀔𑀦𑁆𑀢𑀺. 𑀅𑀦𑁆𑀢𑁄 𑀳𑀺𑀫𑀯𑀦𑁆𑀢𑁂 𑀅𑀩𑁆𑀪𑀦𑁆𑀢𑀭 𑀅𑀫𑁆𑀩𑀭𑀼𑀓𑁆𑀔𑁂 𑀭𑀓𑁆𑀔𑀦𑁆𑀢𑀺. 𑀏𑀯𑀁 𑀭𑀢𑀦𑀝𑁆𑀞𑀸𑀦𑀸𑀦𑀺𑀯𑀸 𑀯𑀦𑀧𑁆𑀧𑀢𑀺 𑀭𑀼𑀓𑁆𑀔𑁂𑀯𑀸 𑀤𑀺𑀩𑁆𑀩𑁄𑀲𑀥𑀭𑀼𑀓𑁆𑀔𑁂𑀯𑀸 𑀤𑀺𑀩𑁆𑀩𑀕𑀦𑁆𑀥𑀭𑀼𑀓𑁆𑀔𑁂𑀯𑀸 𑀉𑀤𑀓𑀲𑀭𑁂𑀯𑀸 𑀭𑀓𑁆𑀔𑀺𑀢𑁆𑀯𑀸 𑀅𑀲𑀦𑁆𑀢𑀺 𑀪𑀓𑁆𑀔𑀦𑁆𑀢𑀺. 𑀢𑀲𑁆𑀫𑀸 𑀭𑀓𑁆𑀔𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦𑀸𑀕𑁄 𑀦𑀸𑀕𑀻𑀢𑀺 𑀏𑀢𑁆𑀣 𑀅𑀦𑁆𑀢𑁄 𑀧𑀩𑁆𑀩𑀢𑁂𑀯𑀸 𑀅𑀦𑁆𑀢𑁄 𑀧𑀣𑀯𑀺𑀬𑀁𑀯𑀸 𑀦𑀺𑀩𑁆𑀩𑀢𑁆𑀢𑀸 𑀯𑀲𑀼𑀦𑁆𑀥𑀭𑀤𑁂𑀯𑀬𑀓𑁆𑀔𑀚𑀸𑀢𑀺𑀬𑁄𑀧𑀺 𑀇𑀥 𑀦𑀸𑀕𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀬𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦 𑀲𑀼𑀢𑁆𑀢𑁂 𑀪𑀽𑀫𑀺𑀘𑀸𑀮𑀲𑀼𑀢𑁆𑀢𑀧𑀤𑁂 𑀧𑀣𑀯𑀻 𑀤𑁂𑀯𑀢𑀸𑀢𑀺 𑀯𑀼𑀢𑁆𑀢𑀸. 𑀬𑀸𑀲𑀁 𑀓𑀻𑀴𑀸𑀧𑀲𑀼𑀢 𑀯𑀲𑁂𑀦 𑀓𑀤𑀸𑀘𑀺 𑀪𑀽𑀫𑀺𑀘𑀸𑀮𑁄 𑀳𑁄𑀢𑀺. 𑀬𑀸𑀲𑀜𑁆𑀘 𑀫𑀦𑁆𑀢𑀧𑀤𑀸𑀦𑀺 𑀯𑀢𑁆𑀣𑀼 𑀯𑀺𑀚𑁆𑀚𑀸𑀢𑀺𑀘 𑀪𑀽𑀫𑀺𑀯𑀺𑀚𑁆𑀚𑀸𑀢𑀺𑀘 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀼𑀘 𑀦𑀸𑀦𑀸 𑀇𑀤𑁆𑀥𑀺𑀫𑀦𑁆𑀢𑀸 𑀅𑀯𑀭𑀼𑀤𑁆𑀥𑀓𑀸 𑀧𑀸𑀧𑀸𑀢𑀺𑀭𑀢𑀸 𑀓𑀺𑀩𑁆𑀩𑀺𑀲𑀓𑀫𑁆𑀫𑀓𑀸𑀭𑀺𑀦𑁄 𑀓𑀻𑀴𑀸 𑀲𑁄𑀡𑁆𑀟𑀯𑀲𑁂𑀦𑀯𑀸 𑀖𑀸𑀲𑀲𑁄𑀡𑁆𑀟𑀯𑀲𑁂𑀦𑀯𑀸 𑀧𑁂𑀢𑁂𑀲𑀼𑀘𑀦𑀺𑀭𑀬𑁂𑀲𑀼𑀘 𑀧𑀓𑀢𑀺 𑀯𑀡𑁆𑀡𑁂𑀦𑀯𑀸 𑀲𑁄𑀡𑀕𑀺𑀚𑁆𑀛𑀓𑀸𑀓𑀸𑀤𑀺𑀯𑀡𑁆𑀡𑁂𑀦𑀯𑀸 𑀲𑀢𑁆𑀢𑁂 𑀯𑀺𑀳𑁂𑀞𑀬𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀲𑀩𑁆𑀩𑀜𑁆𑀘𑁂 𑀢𑀁 𑀲𑀼𑀢𑁆𑀢𑀦𑁆𑀢𑁂𑀲𑀼𑀯𑀸 𑀚𑀸𑀢𑀓𑁂𑀲𑀼𑀯𑀸 𑀯𑁂𑀤𑀕𑀦𑁆𑀣𑁂𑀲𑀼𑀯𑀸 𑀓𑀼𑀲𑀮𑁂𑀳𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀲𑀳 𑀧𑀼𑀜𑁆𑀜𑀓𑀸𑀭𑀺𑀦𑁄 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀫𑀸𑀖𑁂𑀦𑀦𑀸𑀫 𑀚𑁂𑀝𑁆𑀞𑀧𑀼𑀭𑀺𑀲𑁂𑀦 𑀲𑀳 𑀏𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑁂𑀢𑁆𑀢𑀺𑀁𑀲𑀸. 𑀲𑀸𑀏𑀯 𑀢𑀸𑀯𑀢𑀺𑀁𑀲𑀸 𑀦𑀺𑀭𑀼𑀢𑁆𑀢𑀺 𑀦𑀬𑁂𑀦. 𑀓𑀸𑀫𑀜𑁆𑀘𑁂𑀢𑁆𑀣 𑀲𑀩𑁆𑀩𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀅𑀬𑀁 𑀤𑀼𑀢𑀻𑀬𑀤𑁂𑀯 𑀮𑁄𑀓𑁄 𑀚𑀦𑀯𑀲𑀢𑀲𑀼𑀢𑁆𑀢𑁂 𑀆𑀕𑀢 𑀦𑀬𑁂𑀦 𑀲𑀓𑁆𑀓𑀝𑁆𑀞𑀸𑀦𑀺𑀬𑀸𑀦𑀁 𑀧𑀚𑀸𑀧𑀢𑀺 𑀯𑀭𑀼𑀡 𑀈𑀲𑀸𑀦𑀸𑀤𑀻𑀦𑀁 𑀢𑁂𑀢𑁆𑀢𑀺𑀁𑀲 𑀤𑁂𑀯𑀭𑀸𑀚𑀽𑀦𑀁 𑀦𑀺𑀩𑀦𑁆𑀥𑀦𑁄 𑀓𑀸𑀲𑁄 𑀳𑁄𑀢𑀺. 𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁. 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦𑀦𑁆𑀢𑀺 𑀳𑀺 𑀅𑀗𑁆𑀕𑀼𑀢𑁆𑀢𑀭𑁂 𑀯𑀼𑀢𑁆𑀢𑀁. 𑀫𑀸𑀖𑀧𑀼𑀭𑀺𑀲𑀸 𑀧𑀦 𑀢𑁂𑀲𑀼 𑀲𑀫𑀼𑀤𑀸𑀕𑀢𑁂𑀲𑀼 𑀤𑁂𑀯𑀭𑀸𑀚𑀝𑁆𑀞𑀸𑀦𑁂𑀲𑀼 𑀧𑀘𑁆𑀘𑀸𑀚𑀸𑀢𑀸 𑀳𑁄𑀦𑁆𑀢𑀺. 𑀏𑀢𑀭𑀳𑀺 𑀥𑀭𑀫𑀸𑀦𑀸𑀘 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀅𑀬𑀁 𑀯𑀘𑀦𑀢𑁆𑀣𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀭𑁂 𑀧𑀦 𑀬𑀣𑀸 𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸. 𑀢𑀸𑀯 𑀤𑀺𑀲𑁆𑀲𑀦𑁆𑀢𑀺 𑀢𑀺𑀁𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀯𑀺𑀥𑀼𑀭𑀚𑀸𑀢𑀓𑁂 𑀢𑀸𑀯 𑀲𑀤𑁆𑀤𑁄 𑀢𑀺𑀁𑀲𑀲𑀤𑁆𑀤𑀧𑀭𑀺𑀯𑀸𑀭𑀫𑀢𑁆𑀢𑁄 𑀳𑁄𑀢𑀺. 𑀢𑀣𑀸 𑀇𑀥𑀸𑀧𑀻𑀢𑀺 𑀓𑀢𑁆𑀯𑀸 𑀢𑀺𑀁𑀲𑀫𑀢𑁆𑀢𑀸𑀦𑀁 𑀲𑀓𑁆𑀓𑀝𑁆𑀞𑀸𑀦𑀺𑀬𑀸𑀦𑀁 𑀤𑁂𑀯𑀭𑀸𑀚𑀓𑀼𑀮𑀸𑀦𑀁 𑀦𑀺𑀯𑀸𑀲𑀝𑁆𑀞𑀸 𑀦𑀢𑁆𑀢𑀸 𑀢𑀸𑀯𑀢𑀺𑀁𑀲𑀸𑀦𑀸𑀫𑀸𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑀁 𑀦𑀺𑀭𑀼𑀢𑁆𑀢𑀺𑀦𑀬𑀁 𑀓𑀧𑁆𑀧𑁂𑀢𑁆𑀯𑀸 𑀫𑀸𑀖𑀯𑀢𑁆𑀣𑀽𑀲𑀼𑀘 𑀢𑁂𑀲𑀼 𑀢𑁂𑀲𑀼𑀘 𑀞𑀸𑀦𑁂𑀲𑀼 𑀲𑀓𑁆𑀓𑀸𑀦𑀁 𑀢𑁂𑀢𑁆𑀢𑀺𑀁𑀲 𑀲𑀗𑁆𑀔𑀸𑀏𑀯 𑀯𑀼𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺. 𑀧𑀸𑀴𑀺𑀬𑀁𑀏𑀯 𑀩𑁆𑀭𑀳𑁆𑀫𑀸𑀲𑀦𑀗𑁆𑀓𑀼𑀫𑀸𑀭𑁄 𑀢𑁂𑀢𑁆𑀢𑀺𑀁𑀲𑁂 𑀅𑀢𑁆𑀢𑀪𑀸𑀯𑁂 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀮𑁆𑀮𑀗𑁆𑀓𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀸𑀫𑁄𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀇𑀲𑁆𑀲𑀭𑀤𑁂𑀯𑀓𑀼𑀮𑀲𑁆𑀲 𑀦𑀸𑀫𑀁. 𑀢𑀣𑀸 𑀲𑀼𑀬𑀸𑀫𑁄𑀢𑀺𑀘. 𑀢𑀁 𑀲𑀳𑀘𑀭𑀺𑀢𑀢𑁆𑀢𑀸 𑀧𑀦 𑀲𑁄 𑀤𑁂𑀯 𑀮𑁄𑀓𑁄𑀧𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀤𑁂𑀯𑀸𑀧𑀺 𑀬𑀸𑀫𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀧𑀼𑀮𑀸𑀬 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀺𑀘𑁆𑀘𑀁 𑀢𑀼𑀲𑀦𑁆𑀢𑀺 𑀅𑀢𑀺𑀯𑀺𑀬 𑀳𑀝𑁆𑀞𑀢𑀼𑀝𑁆𑀞𑀫𑀼𑀔𑀸 𑀳𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀼𑀲𑀺𑀢𑀸. 𑀬𑀣𑀸𑀭𑀼𑀘𑀺𑀢𑁂 𑀪𑁄𑀕𑁂 𑀲𑀬𑀫𑁂𑀯 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀫𑁆𑀫𑀸𑀦𑀭𑀢𑀻. 𑀅𑀢𑁆𑀢𑀦𑁄 𑀭𑀼𑀘𑀺𑀁 𑀜𑀢𑁆𑀯𑀸 𑀧𑀭𑁂𑀳𑀺 𑀦𑀺𑀫𑁆𑀫𑀺𑀢𑁂𑀲𑀼 𑀪𑁄𑀕𑁂𑀲𑀼 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻. 𑀩𑁆𑀭𑀽𑀳𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀅𑀢𑀺𑀧𑀡𑀻𑀢𑁂𑀳𑀺 𑀛𑀸𑀦𑀸𑀤𑀺 𑀕𑀼𑀡𑁂𑀳𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀸𑀦𑁄. 𑀫𑀳𑀦𑁆𑀢𑀸 𑀩𑁆𑀭𑀳𑁆𑀫𑀸𑀦𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄𑀢𑀺 𑀯𑀢𑁆𑀢𑀩𑁆𑀩𑁂 𑀫𑀳𑀸𑀲𑀤𑁆𑀤𑀲𑁆𑀲 𑀮𑁄𑀧𑁄.

𑀧𑀭𑀺𑀲𑀢𑀺 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸. 𑀧𑀭𑀺𑀲𑀸𑀲𑀼 𑀚𑀸𑀢𑀸𑀢𑀺𑀯𑀸 𑀧𑀸𑀭𑀺𑀲𑀚𑁆𑀚𑀸. 𑀧𑀭𑀺𑀘𑀸𑀭𑀺𑀓𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀸𑀭𑀺𑀲𑀚𑁆𑀚𑀸𑀢𑀺 𑀩𑁆𑀭𑀳𑁆𑀫 𑀧𑀸𑀭𑀺𑀲𑀚𑁆𑀚𑀸. 𑀧𑀼𑀭𑁂 𑀉𑀘𑁆𑀘𑁂 𑀞𑀸𑀦𑁂 𑀑𑀤𑀳𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀼𑀭𑁄𑀳𑀺𑀢𑀸. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀼𑀭𑁄𑀳𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸. 𑀫𑀳𑀦𑁆𑀢𑀸 𑀩𑁆𑀭𑀳𑁆𑀫𑀸𑀦𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀲𑀳𑀲𑁆𑀲𑁄𑀩𑁆𑀭𑀳𑁆𑀫𑀸 𑀤𑁆𑀯𑀺𑀲𑀳𑀲𑁆𑀲𑁄𑀩𑁆𑀭𑀳𑁆𑀫𑀸. 𑀢𑀺𑀲𑀳𑀲𑁆𑀲𑁄𑀩𑁆𑀭𑀳𑁆𑀫𑀸𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑁂 𑀆𑀕𑀢𑀸 𑀅𑀥𑀺𑀧𑀢𑀺𑀩𑁆𑀭𑀳𑁆𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀳𑀲𑁆𑀲𑁄𑀩𑁆𑀭𑀳𑁆𑀫𑀸𑀢𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀫𑁆𑀳𑀺 𑀇𑀲𑁆𑀲𑀭𑁄 𑀩𑁆𑀭𑀳𑁆𑀫𑀸. 𑀤𑁆𑀯𑀺𑀲𑀳𑀲𑁆𑀲𑁄𑀢𑀺 𑀤𑁆𑀯𑀻𑀲𑀼 𑀘𑀓𑁆𑀓𑀯𑀸𑀴 𑀲𑀳𑀲𑁆𑀲𑁂𑀲𑀼 𑀇𑀲𑁆𑀲𑀭𑁄𑀢𑀺 𑀅𑀢𑁆𑀣𑁄. 𑀢𑀬𑁄𑀧𑁂𑀢𑁂 𑀏𑀓𑀢𑀮 𑀯𑀸𑀲𑀺𑀦𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀮𑁄𑀓𑁂 𑀫𑀳𑀸𑀚𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀼𑀮𑀤𑁂𑀯𑀢𑀸𑀬𑁄𑀦𑀸𑀫 𑀉𑀧𑀝𑁆𑀞𑀳𑀦𑁆𑀢𑀺. 𑀓𑁂𑀘𑀺 𑀫𑀳𑀸𑀤𑁂𑀯𑀁𑀦𑀸𑀫 𑀉𑀧𑀝𑁆𑀞𑀳𑀦𑁆𑀢𑀺. 𑀓𑁂𑀘𑀺 𑀯𑀸𑀲𑀼𑀤𑁂𑀯𑀁𑀦𑀸𑀫. 𑀓𑁂𑀘𑀺 𑀫𑀳𑁂𑀲𑀭𑀁𑀦𑀸𑀫. 𑀓𑁂𑀘𑀺 𑀧𑀭𑀫𑁂𑀲𑁆𑀯𑀸𑀭𑀁 𑀦𑀸𑀫𑀸𑀢𑀺. 𑀖𑀭𑀤𑁂𑀯𑀢𑀸 𑀕𑀸𑀫𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸𑀤𑀬𑁄𑀧𑀺 𑀢𑁂𑀲𑀁 𑀫𑀳𑀸𑀤𑁂𑀯𑀭𑀸𑀚𑀸𑀦𑀁 𑀉𑀧𑀝𑁆𑀞𑀓𑀸𑀏𑀯 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀤𑁂𑀯𑀭𑀸 𑀚𑀸𑀦𑁄𑀯𑀺𑀬 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀤𑀝𑁆𑀞𑀩𑁆𑀩𑀸. 𑀖𑀭𑀤𑁂𑀯𑀢𑀸𑀤𑀬𑁄𑀯𑀺𑀬 𑀩𑁆𑀭𑀳𑁆𑀫 𑀧𑀼𑀭𑁄𑀳𑀺𑀢𑀸𑀤𑀝𑁆𑀞𑀩𑁆𑀩𑀸, 𑀫𑀦𑀼𑀲𑁆𑀲𑀸𑀯𑀺𑀬 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣𑀘 𑀖𑀭 𑀤𑁂𑀯𑀢𑀸𑀤𑀬𑁄 𑀫𑀳𑀸𑀤𑁂𑀯𑀭𑀸 𑀚𑀸𑀦𑁄 𑀅𑀤𑀺𑀲𑁆𑀯𑀸𑀯 𑀉𑀧𑀝𑁆𑀞𑀳𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀘 𑀢𑁂𑀉𑀪𑁄𑀧𑀺 𑀅𑀤𑀺𑀲𑁆𑀯𑀸𑀯 𑀉𑀧𑀝𑁆𑀞𑀳𑀦𑁆𑀢𑀺. 𑀏𑀯𑀫𑁂𑀯𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄𑀧𑀺 𑀦𑀧𑀲𑁆𑀲𑀦𑁆𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁𑀧𑀺 𑀦𑀚𑀸𑀦𑀦𑁆𑀢𑀺. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀉𑀪𑁄𑀧𑀺 𑀦𑀧𑀲𑁆𑀲𑀦𑁆𑀢𑀺. 𑀉𑀪𑀺𑀦𑁆𑀦𑀁𑀦𑀺𑀯𑀸𑀲𑀝𑁆𑀞𑀸𑀦𑀁𑀧𑀺 𑀦𑀚𑀸𑀦𑀦𑁆𑀢𑀺. 𑀬𑀤𑀸 𑀧𑀦 𑀑𑀴𑀸𑀭𑀺𑀓𑀁 𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀺. 𑀢𑀤𑀸 𑀏𑀯 𑀧𑀲𑁆𑀲𑀦𑁆𑀢𑀺. 𑀏𑀲𑀦𑀬𑁄 𑀉𑀧𑀭𑀺𑀪𑀽𑀫𑀻𑀲𑀼𑀧𑀺. 𑀬𑀁 𑀧𑀦 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦 𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀩𑁆𑀭𑀳𑁆𑀫𑀸𑀦𑀁 𑀧𑀓𑀢𑀺𑀭𑀽𑀧𑀁 𑀓𑀲𑁆𑀲𑀘𑀺 𑀆𑀧𑀸𑀢𑀁 𑀦 𑀕𑀘𑁆𑀙𑀢𑀻𑀢𑀺. 𑀢𑀁 𑀩𑁆𑀭𑀳𑁆𑀫𑀧𑀼𑀭𑁄 𑀳𑀺𑀢𑀸 𑀤𑀻𑀦𑀁 𑀉𑀧𑀭𑀺𑀫𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀧𑀓𑀢𑀺𑀭𑀽𑀧𑀁 𑀓𑀲𑁆𑀲𑀘𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀦𑁄𑀯𑀸 𑀤𑁂𑀯𑀲𑁆𑀲𑀯𑀸 𑀫𑀦𑀼𑀲𑁆𑀲𑀲𑁆𑀲𑀯𑀸𑀆𑀧𑀸𑀢𑀁 𑀦𑀕𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀸𑀦𑀁 𑀧𑀦 𑀧𑀓𑀢𑀺𑀭𑀽𑀧𑀁 𑀉𑀧𑀭𑀺𑀫𑀲𑁆𑀲 𑀆𑀧𑀸𑀢𑀁 𑀆𑀕𑀘𑁆𑀙𑀺𑀲𑁆𑀲𑀢𑀺𑀬𑁂𑀯. 𑀢𑁂𑀦𑁂𑀯 𑀳𑀺 𑀚𑀦𑀯𑀲𑀪𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀸𑀳𑀺 𑀤𑁂𑀯𑀸 𑀉𑀧𑀭𑀺𑀫𑀤𑁂𑀯𑀸𑀦𑀁 𑀑𑀴𑀸𑀭𑀺𑀓𑀁 𑀓𑀢𑁆𑀯𑀸 𑀫𑀸𑀧𑀺𑀢𑀫𑁂𑀯 𑀅𑀢𑁆𑀢𑀪𑀸𑀯𑀁 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀤𑀼𑀢𑀻𑀬𑀢𑀮𑁂 𑀧𑀭𑀺𑀢𑁆𑀢𑀸𑀪𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀏𑀯. 𑀅𑀧𑁆𑀧𑀫𑀸𑀡𑀸𑀪𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀏𑀯. 𑀆𑀪𑀲𑁆𑀲𑀭𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀦𑁄𑀏𑀯. 𑀢𑀲𑁆𑀫𑀺𑀁 𑀢𑀮𑁂 𑀅𑀥𑀺𑀧𑀢𑀺 𑀩𑁆𑀭𑀳𑁆𑀫𑀸𑀦𑁄𑀏𑀯𑀸𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀺𑀫𑀢𑀮𑀢𑁄 𑀧𑀦 𑀯𑀺𑀲𑁂𑀲 𑀓𑀭𑀡𑀢𑁆𑀣𑀁 𑀆𑀪𑀸𑀯𑀲𑁂𑀦 𑀦𑀸𑀫𑀕𑀳𑀡𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀧𑀭𑀺𑀢𑁆𑀢𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀪𑀸. 𑀅𑀧𑁆𑀧𑀫𑀸𑀡𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀪𑀸. 𑀆𑀪𑀸𑀲𑀭𑀦𑁆𑀢𑀺 𑀦𑀺𑀘𑁆𑀙𑀭𑀦𑁆𑀢𑀺 𑀏𑀢𑁂𑀲𑀽𑀢𑀺 𑀆𑀪𑀲𑁆𑀲𑀭𑀸𑀢𑀺. 𑀢𑀢𑀻𑀬𑀢𑀮𑁂 𑀧𑀭𑀺𑀢𑁆𑀢𑀲𑀼𑀪𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀏𑀯. 𑀅𑀧𑁆𑀧𑀫𑀸𑀡𑀲𑀼𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀏𑀯. 𑀲𑀼𑀢𑀓𑀺𑀡𑁆𑀡𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀦𑁄𑀏𑀯. 𑀢𑀲𑁆𑀫𑀺𑀁 𑀢𑀮𑁂 𑀅𑀥𑀺𑀧𑀢𑀺𑀩𑁆𑀭𑀳𑁆𑀫𑀸𑀦𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀼𑀪𑀸𑀢𑀺 𑀏𑀓𑀕𑁆𑀖𑀦𑀸 𑀅𑀘𑀮𑀲𑀡𑁆𑀞𑀺𑀢𑀸 𑀆𑀪𑀸𑀏𑀯 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀺𑀢𑁆𑀢𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸. 𑀅𑀧𑁆𑀧𑀫𑀸𑀡𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸. 𑀲𑀼𑀢𑁂𑀳𑀺 𑀆𑀓𑀺𑀡𑁆𑀡𑀸𑀢𑀺 𑀲𑀼𑀪𑀸𑀓𑀺𑀡𑁆𑀡𑀸. 𑀲𑀼𑀪𑀓𑀺𑀡𑁆𑀳𑀸𑀢𑀺𑀧𑀺 𑀧𑀞𑀦𑁆𑀢𑀺. 𑀢𑁂𑀲𑀁 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄 𑀅𑀦𑁆𑀢𑀺𑀫𑀡𑀓𑀸𑀭𑀲𑁆𑀲 𑀘 𑀳𑀓𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀢𑀮𑁂𑀲𑀼 𑀧𑀓𑀢𑀺𑀓𑀸𑀬𑀧𑁆𑀧𑀪𑀸 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀯𑀲𑁂𑀦 𑀧𑀭𑀺𑀢𑁆𑀢𑀸𑀪𑀸𑀢𑀺𑀆𑀤𑀺𑀓𑀁 𑀦𑀸𑀫𑀁 𑀲𑀺𑀤𑁆𑀥𑀁. 𑀦 𑀩𑁆𑀭𑀳𑁆𑀫𑀧𑀸𑀭𑀺 𑀲𑀚𑁆𑀚𑀸𑀢𑀺𑀆𑀤𑀺𑀓𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑁂𑀭𑀜𑁆𑀚𑀲𑀼𑀢𑁆𑀢𑁂 𑀧𑀣𑀫𑀢𑀮𑀯𑀸𑀲𑀺𑀦𑁄 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸𑀢𑀺 𑀆𑀕𑀢𑀸. 𑀤𑀼𑀢𑀻𑀬𑀢𑀮𑀯𑀸𑀲𑀺𑀦𑁄 𑀆𑀪𑀸𑀤𑁂𑀯𑀸𑀢𑀺. 𑀢𑀢𑀻𑀬𑀢𑀮𑀯𑀸𑀲𑀺𑀦𑁄 𑀲𑀼𑀪𑀸𑀤𑁂𑀯𑀸𑀢𑀺 𑀘𑀢𑀼𑀢𑁆𑀣𑀢𑀮𑁂 𑀯𑀺𑀧𑀼𑀮𑀁 𑀨𑀮𑀁 𑀏𑀢𑁂𑀲𑀦𑁆𑀢𑀺 𑀯𑁂𑀳𑀧𑁆𑀨𑀮𑀸. 𑀅𑀣𑀯𑀸 𑀇𑀜𑁆𑀚𑀦𑀚𑀸𑀢𑀺𑀓𑁂𑀳𑀺 𑀲𑁄𑀫𑀦𑀲𑁆𑀲𑀚𑁆𑀛𑀸𑀦𑁂𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀳𑁂𑀝𑁆𑀞𑀺𑀫𑀢𑀮𑀸𑀦𑀁 𑀢𑁂𑀚𑁄𑀲𑀁 𑀯𑀝𑁆𑀝𑀸𑀤𑀺𑀓𑁂𑀦 𑀅𑀦𑁆𑀢𑀭𑀸𑀬𑁂𑀦 𑀪𑀽𑀫𑀺𑀢𑀮𑁂𑀦 𑀲𑀳 𑀆𑀬𑀼𑀓𑀧𑁆𑀧𑀦𑀺𑀯𑀢𑁆𑀢𑀺𑀯𑀲𑁂𑀦 𑀇𑀜𑁆𑀚𑀺𑀢𑀁 𑀧𑀼𑀜𑁆𑀜𑀨𑀮𑀁 𑀅𑀢𑁆𑀣𑀺. 𑀢𑁂𑀲𑀼 𑀳𑀺 𑀬𑀁 𑀲𑀼𑀪𑀸𑀓𑀺𑀡𑁆𑀡𑀸𑀦𑀁 𑀤𑁂𑀯𑀸𑀦𑀁 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀢𑀲𑁆𑀫𑀺𑀁 𑀢𑀮𑁂 𑀆𑀤𑀺𑀓𑀧𑁆𑀧𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀘𑁆𑀙𑀺𑀫𑀺𑀓𑀸𑀦𑀁 𑀧𑀦 𑀢𑁂𑀲𑀝𑁆𑀞𑀺𑀓𑀧𑁆𑀧 𑀤𑁆𑀯𑀸𑀲𑀝𑁆𑀞𑀺𑀓𑀧𑁆𑀧 𑀏𑀓𑀲𑀝𑁆𑀞𑀺 𑀓𑀧𑁆𑀧𑀸𑀤𑀺 𑀯𑀲𑁂𑀦 𑀇𑀜𑁆𑀚𑀺𑀢𑀁 𑀧𑀝𑀺𑀮𑀻𑀦𑀁 𑀧𑀼𑀜𑁆𑀜𑀨𑀮𑀁 𑀳𑁄𑀢𑀻𑀢𑀺. 𑀆𑀦𑁂𑀜𑁆𑀚𑀚𑀸𑀢𑀺𑀓𑁂𑀦 𑀉𑀧𑁂𑀓𑁆𑀔𑀸𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀦 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀢𑀸𑀤𑀺𑀲𑀁 𑀇𑀜𑁆𑀚𑀺𑀢𑀁 𑀧𑀼𑀜𑁆𑀜𑀨𑀮𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀛𑀸𑀦 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀯𑀺𑀲𑁂𑀲𑁂𑀦 𑀈𑀳𑀺𑀢𑀁 𑀅𑀪𑀺𑀯𑀟𑁆𑀠𑀺𑀢𑀁 𑀧𑀼𑀜𑁆𑀜𑀨𑀮𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀯𑁂𑀳𑀧𑁆𑀨𑀮𑀸.

𑀦𑀢𑁆𑀣𑀺 𑀲𑀜𑁆𑀜𑀸𑀫𑀼𑀔𑁂𑀦 𑀕𑀳𑀺𑀢𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀏𑀢𑁂𑀲𑀦𑁆𑀢𑀺 𑀅𑀲𑀜𑁆𑀜𑀸. 𑀅𑀲𑀜𑁆𑀜𑀸𑀘 𑀢𑁂 𑀲𑀢𑁆𑀢𑀸𑀘𑀸𑀢𑀺 𑀅𑀲𑀜𑁆𑀜𑀲𑀢𑁆𑀢𑀸. 𑀘𑀺𑀢𑁆𑀢𑀘𑁂 𑀢𑀲𑀺𑀓𑀸𑀦𑀁 𑀧𑀦 𑀦𑀢𑁆𑀣𑀺𑀢𑀸𑀬 𑀢𑁂𑀲𑀁 𑀅𑀲𑀢𑁆𑀢𑀧𑀲𑀗𑁆𑀕𑀢𑀸 𑀲𑀫𑁆𑀪𑀯𑀢𑀻𑀢𑀺 𑀲𑀢𑁆𑀢𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂 𑀤𑁆𑀯𑁂𑀧𑀺 𑀏𑀓𑀢𑀮𑀯𑀸𑀲𑀺𑀦𑁄 𑀏𑀯 𑀳𑁄𑀦𑁆𑀢𑀺. 𑀏𑀢𑁆𑀣𑀧𑀺 𑀦𑀺𑀩𑁆𑀩𑀢𑁆𑀢𑀓𑀚𑁆𑀛𑀸𑀦𑀲𑁆𑀲 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀢𑀸 𑀯𑀺𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀢𑀤𑀦𑀼𑀭𑀽𑀧𑀁 𑀩𑁆𑀭𑀳𑁆𑀫𑀸𑀦𑀁𑀧𑀺 𑀧𑀸𑀭𑀺𑀲𑀚𑁆𑀚 𑀧𑀼𑀭𑁄𑀳𑀺𑀢 𑀫𑀳𑀸𑀩𑁆𑀭𑀳𑁆𑀫𑀢𑁆𑀢 𑀯𑀺𑀲𑁂𑀲𑁄 𑀲𑀫𑁆𑀪𑀯𑀢𑀺𑀬𑁂𑀯. 𑀆𑀬𑀼𑀯𑁂𑀫𑀢𑁆𑀢𑀢𑀸𑀬 𑀧𑀦 𑀅𑀜𑁆𑀜𑀫𑀜𑁆𑀜 𑀅𑀤𑀲𑁆𑀲𑀦𑀸𑀤𑀻𑀦𑀜𑁆𑀘 𑀦𑀢𑁆𑀣𑀺𑀢𑀸𑀬 𑀧𑀸𑀭𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀪𑀽𑀫𑀺𑀯𑀺𑀪𑀸𑀕𑁄 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀅𑀯𑀺𑀳𑀸𑀤𑀻𑀲𑀼𑀧𑀺. 𑀑𑀴𑀸𑀭𑀺𑀓𑀸𑀦𑀁 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀦𑀢𑁆𑀣𑀺𑀢𑀸𑀬 𑀲𑀼𑀤𑁆𑀥𑀸𑀦𑀁 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀫𑁂𑀯 𑀆𑀯𑀸𑀲𑀸𑀢𑀺 𑀲𑀼𑀤𑁆𑀥𑀸𑀯𑀸𑀲𑀸. 𑀢𑀢𑁆𑀣 𑀧𑀣𑀫𑀪𑀽𑀫𑀺𑀯𑀸𑀲𑀺𑀦𑁄 𑀅𑀧𑁆𑀧𑀓𑁂𑀦 𑀓𑀸𑀮𑁂𑀦 𑀅𑀢𑁆𑀢𑀦𑁄 𑀞𑀸𑀦𑀁 𑀦𑀯𑀺𑀚𑀳𑀦𑁆𑀢𑀻𑀢𑀺 𑀅𑀯𑀺𑀳𑀸. 𑀅𑀣𑀯𑀸, 𑀑𑀴𑀸𑀭𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲 𑀯𑀺𑀳𑀜𑁆𑀜𑀦𑀁 𑀲𑀫𑀣𑀯𑀺𑀧𑀲𑁆𑀲 𑀦𑀸𑀥𑀫𑁆𑀫𑁂𑀲𑀼 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀧𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀅𑀯𑀺𑀳𑀸. 𑀤𑀼𑀢𑀻𑀬𑀪𑀽𑀫𑀺 𑀯𑀸𑀲𑀺𑀦𑁄 𑀦 𑀓𑁂𑀦𑀘𑀺 𑀘𑀺𑀢𑁆𑀢𑀧𑀭𑀺𑀴𑀸𑀳𑁂𑀦 𑀢𑀧𑁆𑀧𑀦𑁆𑀢𑀻𑀢𑀺 𑀅𑀢𑀧𑁆𑀧𑀸. 𑀢𑀢𑀻𑀬 𑀢𑀮𑀯𑀸𑀲𑀺𑀦𑁄 𑀧𑀭𑀺𑀲𑀼𑀤𑁆𑀥𑁂𑀳𑀺 𑀧𑀲𑀸𑀤𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀼 𑀧𑀜𑁆𑀜𑀸 𑀘𑀓𑁆𑀔𑀽𑀳𑀺 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀻𑀢𑀺 𑀲𑀼𑀤𑀲𑁆𑀲𑀸. 𑀘𑀢𑀼𑀢𑁆𑀣𑀪𑀽𑀫𑀺𑀯𑀸𑀲𑀺𑀦𑁄 𑀧𑀦 𑀢𑀢𑁄 𑀅𑀢𑀺𑀲𑀬𑁂𑀦 𑀲𑀼𑀝𑁆𑀞𑀼 𑀤𑀲𑁆𑀲𑀦𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀲𑀼𑀤𑀲𑁆𑀲𑀺𑀦𑁄. 𑀅𑀢𑀺𑀲𑀬𑀢𑁆𑀣𑁂 𑀳𑀺 𑀅𑀬𑀁 𑀈𑀓𑀸𑀭𑁄𑀢𑀺. 𑀧𑀜𑁆𑀘𑀫𑀪𑀽𑀫𑀺 𑀯𑀸𑀲𑀺𑀦𑁄 𑀉𑀧𑀭𑀺 𑀅𑀜𑁆𑀜𑀲𑁆𑀲 𑀪𑀽𑀫𑀦𑁆𑀢𑀭𑀕𑀢𑀲𑁆𑀲 𑀭𑀽𑀧𑀺𑀩𑁆𑀭𑀳𑁆𑀫𑀼𑀦𑁄 𑀦𑀢𑁆𑀣𑀺𑀢𑀸𑀬 𑀦𑀢𑁆𑀣𑀺 𑀭𑀽𑀧𑀻𑀦𑀁 𑀲𑀢𑁆𑀢𑀸𑀦𑀁 𑀫𑀚𑁆𑀛𑁂 𑀓𑁂𑀦𑀘𑀺 𑀕𑀼𑀡𑁂𑀦 𑀓𑀦𑀺𑀝𑁆𑀞𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀅𑀓𑀦𑀺𑀝𑁆𑀞𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀻𑀢𑀺 𑀏𑀢𑁆𑀣 𑀬𑀢𑁆𑀢𑀓𑀁 𑀆𑀓𑀸𑀲𑀧𑀤𑁂𑀲𑀁 𑀨𑀭𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦 𑀲𑀜𑁆𑀜𑀺𑀢𑀸 𑀘𑀢𑀼𑀓𑁆𑀔𑀦𑁆𑀥𑀸 𑀧𑀯𑀢𑁆𑀢𑀦𑁆𑀢𑀺. 𑀲𑁄 𑀔𑀦𑁆𑀥𑀲𑀳𑀺𑀢𑁄 𑀆𑀓𑀸𑀲𑀧𑀤𑁂𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀬𑀦𑀪𑀽𑀫𑀺. 𑀏𑀯𑀁 𑀲𑁂𑀲𑀸𑀲𑀼. 𑀧𑀼𑀣𑀼𑀚𑁆𑀚𑀦𑀸 𑀲𑁄𑀢𑀸𑀧𑀦𑁆𑀦𑀸 𑀲𑀓𑀤𑀸𑀕𑀸𑀫𑀺𑀦𑁄𑀘𑀸𑀧𑀺 𑀧𑀼𑀕𑁆𑀕𑀮𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀲𑀩𑁆𑀩𑀣𑀸 𑀲𑀩𑁆𑀩𑀧𑀓𑀸𑀭𑁂𑀦𑀧𑀺 𑀦𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀲𑀓𑀤𑀸𑀕𑀸𑀫𑀻𑀦𑀁 𑀧𑀝𑀺𑀓𑁆𑀔𑁂𑀧𑁂𑀦 𑀅𑀦𑀸𑀕𑀸𑀫𑀺 𑀫𑀕𑁆𑀕𑀝𑁆𑀞𑀲𑁆𑀲𑀧𑀺 𑀢𑀢𑁆𑀣 𑀧𑀝𑀺𑀓𑁆𑀔𑁂𑀧𑁄 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀉𑀧𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀅𑀭𑀺𑀬𑀸𑀦𑀫𑁂𑀯 𑀢𑀢𑁆𑀣 𑀧𑀝𑀺𑀮𑀸𑀪𑁄 𑀇𑀫𑀸𑀬 𑀕𑀸𑀣𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀝𑁆𑀞𑀸𑀦𑁂𑀲𑀽𑀢𑀺 𑀧𑀜𑁆𑀘𑀲𑀼𑀤𑁆𑀥𑀸𑀯𑀸𑀲𑀢𑁄 𑀅𑀲𑀜𑁆𑀜𑀸𑀧𑀸𑀬𑀢𑁄𑀘 𑀅𑀯𑀲𑁂𑀲𑁂𑀲𑀼 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼, 𑀅𑀦𑀭𑀺𑀬𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. [𑀪𑀽𑀫𑀺𑀘𑀢𑀼𑀓𑁆𑀓𑀁]

𑁧𑁪𑁪. 𑀑𑀓𑁆𑀓𑀦𑁆𑀢𑀺𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀧𑀝𑀺𑀲𑀦𑁆𑀥𑀺𑀳𑀺 𑀪𑀯𑀦𑁆𑀢𑀭𑁂 𑀑𑀓𑁆𑀓𑀫𑀦𑀁 𑀅𑀦𑀼𑀧𑀯𑀺𑀲𑀦𑀦𑁆𑀣𑀺 𑀅𑀢𑁆𑀣𑁂𑀦 𑀑𑀓𑁆𑀓𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀺 𑀧𑀦 𑀪𑀯𑀗𑁆𑀕𑀧𑀭𑀺𑀬𑁄𑀲𑀸𑀦𑁂𑀢𑀺 𑀧𑀞𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺. 𑀚𑀸𑀢𑀺𑀬𑀸 𑀅𑀦𑁆𑀥𑁄 𑀚𑀘𑁆𑀘𑀦𑁆𑀥𑁄. 𑀆𑀤𑀺𑀲𑀤𑁆𑀤𑁂𑀦 𑀚𑀸𑀢𑀺 𑀩𑀥𑀺𑀭 𑀚𑀘𑁆𑀘𑀖𑀸𑀦𑀓 𑀚𑀸𑀢𑀺𑀫𑀽𑀕 𑀚𑀘𑁆𑀘𑁂𑀴 𑀚𑀘𑁆𑀘𑀼𑀫𑁆𑀫𑀢𑁆𑀢𑀓 𑀧𑀡𑁆𑀟𑀓 𑀉𑀪𑀢𑁄 𑀩𑁆𑀬𑀜𑁆𑀚𑀦𑀓 𑀦𑀧𑀼𑀁𑀲𑀓 𑀫𑀫𑁆𑀫𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀬𑀲𑁆𑀲 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀮𑀤𑁆𑀥𑀸. 𑀲𑁄 𑀚𑀘𑁆𑀘𑀦𑁆𑀥𑁄 𑀦𑀸𑀫. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀧𑀲𑀸𑀤𑀲𑁄𑀢 𑀭𑀳𑀺𑀢𑁄 𑀚𑀸𑀢𑀺𑀩𑀥𑀺𑀭𑁄 𑀦𑀸𑀫. 𑀧𑀲𑀸𑀤 𑀖𑀸𑀦𑀭𑀳𑀺𑀢𑁄 𑀚𑀘𑁆𑀘 𑀖𑀸𑀦𑀓𑁄 𑀦𑀸𑀫. 𑀧𑀲𑀸𑀤𑀚𑀺𑀯𑁆𑀳𑀸𑀭𑀳𑀺𑀢𑁄 𑀦𑀸𑀫 𑀦𑀢𑁆𑀣𑀺. 𑀯𑀘𑀦𑀭𑀳𑀺𑀢𑁄 𑀚𑀸𑀢𑀺𑀫𑀽𑀕𑁄𑀦𑀸𑀫. 𑀤𑀺𑀲𑀸𑀯𑀺𑀤𑀺𑀲𑀸𑀫𑀢𑁆𑀢𑀁𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀚𑀸𑀢𑀺𑀏𑀴𑁄 𑀦𑀸𑀫. 𑀲𑀩𑁆𑀩𑀓𑀸𑀮𑀁𑀧𑀺 𑀯𑀺𑀧𑀮𑁆𑀮𑀝𑁆𑀞𑀘𑀺𑀢𑁆𑀢𑁄 𑀚𑀘𑁆𑀘𑀼𑀫𑁆𑀫𑀢𑁆𑀢𑀓𑁄𑀦𑀸𑀫. 𑀓𑀸𑀫𑀳𑁂𑀢𑀼 𑀆𑀲𑀺𑀢𑁆𑀢𑀓𑀸𑀤𑀺𑀪𑀸𑀯𑁂𑀦 𑀯𑀺𑀧𑁆𑀧𑀓𑀸𑀭𑀧𑀢𑁆𑀢𑁄 𑀧𑀡𑁆𑀟𑀓𑁄𑀦𑀸𑀫. 𑀤𑁆𑀯𑀻𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀪𑀢𑁄 𑀩𑁆𑀬𑀜𑁆𑀚𑀦𑀓𑁄𑀦𑀸𑀫. 𑀪𑀸𑀯𑀤𑁆𑀯𑀬 𑀭𑀳𑀺𑀢𑁄 𑀦𑀧𑀼𑀁𑀲𑀓𑁄𑀦𑀸𑀫. 𑀧𑀓𑀢𑀺𑀯𑀘𑀦𑁂𑀧𑀺 𑀏𑀓𑀫𑁂𑀓𑀁 𑀅𑀓𑁆𑀔𑀭𑀁 𑀫𑀳𑀼𑀲𑁆𑀲𑀸𑀳𑁂𑀦 𑀉𑀧𑁆𑀧𑀸𑀤𑁂𑀦𑁆𑀢𑁄 𑀯𑀺𑀩𑀘𑁆𑀙𑀯𑀘𑀦𑁄 𑀫𑀫𑁆𑀫𑁄𑀦𑀸𑀫. 𑀏𑀢𑁆𑀣𑀘 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁂𑀦 𑀓𑀫𑁆𑀫𑁂𑀦 𑀮𑀤𑁆𑀥𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂 𑀢𑀁𑀯𑀸 𑀅𑀜𑁆𑀜𑀁𑀯𑀸 𑀓𑀫𑁆𑀫𑀁 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀲𑀫𑀢𑁆𑀣𑁂𑀦𑀓𑀫𑁆𑀫𑁂𑀦 𑀮𑀤𑁆𑀥𑀧𑀝𑀺𑀲𑀦𑁆𑀥𑀺 𑀓𑀲𑁆𑀲 𑀧𑀦 𑀯𑀢𑁆𑀣𑀼𑀯𑀺𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂 𑀅𑀜𑁆𑀜𑀁𑀧𑀺 𑀓𑀫𑁆𑀫𑀁 𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁𑀧𑀺 𑀚𑀘𑁆𑀘𑀦𑁆𑀥𑀪𑀸𑀯𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲𑀦𑀬𑁄 𑀲𑁂𑀲𑁂𑀲𑀼 𑀚𑀸𑀢𑀺 𑀩𑀥𑀺𑀭𑀸𑀤𑀻𑀲𑀼. 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄 𑀚𑀸𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀭𑀳𑀓𑀸𑀮𑁄 𑀘𑀓𑁆𑀔𑀼𑀲𑁆𑀲 𑀚𑀸𑀢𑀺𑀓𑀸𑀮𑁄𑀦𑀸𑀫. 𑀢𑀤𑀸 𑀅𑀦𑀼𑀧𑁆𑀧𑀦𑁆𑀦 𑀘𑀓𑁆𑀔𑀼𑀓𑁄 𑀚𑀘𑁆𑀘𑀦𑁆𑀥𑁄𑀦𑀸𑀫𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑁆𑀧𑀚𑁆𑀚𑀦𑀸𑀭𑀳 𑀓𑀸𑀮𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀆𑀬𑀢𑀦𑀲𑁆𑀲 𑀚𑀸𑀢𑀺𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺𑀲𑀢𑀺 𑀚𑀸𑀢𑀺𑀫𑀽𑀕𑀸𑀤𑀬𑁄𑀧𑀺 𑀉𑀧𑀧𑀦𑁆𑀦𑁄 𑀳𑁄𑀦𑁆𑀢𑀻𑀢𑀺𑀘 𑀯𑀤𑀦𑁆𑀢𑀺. 𑀯𑀺𑀪𑀸𑀯𑀦𑀺 𑀬𑀁𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺.

[𑁧𑁪𑁨] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀅𑀧𑀭𑁂 𑀧𑀦 𑀚𑀘𑁆𑀘𑀦𑁆𑀥𑁄𑀢𑀺 𑀧𑀲𑀼𑀢𑀺𑀬𑀁𑀬𑁂𑀯 𑀅𑀦𑁆𑀥𑁄. 𑀫𑀸𑀢𑀼 𑀓𑀼𑀘𑁆𑀙𑀺𑀬𑀁 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀤𑀼𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀲𑁆𑀲 𑀅𑀯𑀺𑀧𑀚𑁆𑀚𑀦𑀁 𑀲𑀺𑀤𑁆𑀥𑀦𑁆𑀢𑀺 𑀯𑀤𑀦𑁆𑀢𑀻𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀢𑁆𑀢𑀁.

𑀮𑁄𑀓𑁂 𑀫𑀸𑀢𑀼𑀓𑀼𑀘𑁆𑀙𑀺𑀬𑀁𑀬𑁂𑀯 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀲𑁆𑀲𑀧𑀺 𑀏𑀓𑀘𑁆𑀘𑀲𑁆𑀲 𑀢𑀁 𑀢𑀁 𑀲𑀺𑀧𑁆𑀧𑀯𑀺𑀚𑁆𑀚𑀸𑀞𑀸𑀦𑁂𑀲𑀼 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀪𑀸𑀯𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀣𑀧𑁂𑀢𑁆𑀯𑀸 𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁂𑀘 𑀧𑀘𑁆𑀙𑀺𑀫𑀪𑀯𑀺𑀓𑁂 𑀲𑀢𑁆𑀢𑁂 𑀅𑀯𑀲𑁂𑀲𑀸𑀦𑀁 𑀤𑁆𑀯𑀺𑀳𑁂𑀢𑀼𑀓 𑀢𑀺𑀳𑁂𑀢𑀼𑀓𑀸𑀦𑀁𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀭𑀽𑀧𑀓𑁆𑀓𑀫𑁂𑀦𑀯𑀸 𑀫𑀸𑀢𑀼𑀬𑀸 𑀯𑀺𑀲𑀫𑀧𑀬𑁄𑀕𑁂𑀦𑀯𑀸 𑀦𑀸𑀦𑀸𑀩𑀸𑀥𑁂𑀦𑀯𑀸 𑀉𑀧𑁆𑀧𑀦𑁆𑀦𑀸𑀦𑀁𑀧𑀺 𑀘𑀓𑁆𑀔𑀼𑀲𑁄𑀢𑀸𑀦𑀁 𑀯𑀺𑀧𑀢𑁆𑀢𑀺𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀦𑀺𑀬𑀫𑁂𑀢𑀼𑀦𑁆𑀢𑀺. 𑀪𑀼𑀫𑁆𑀫𑀲𑁆𑀲𑀺𑀢𑀸𑀦𑀜𑁆𑀘 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀦𑁆𑀢𑀺 𑀏𑀢𑁆𑀣 𑀪𑀽𑀫𑀺𑀬𑀁 𑀚𑀸𑀢𑀸𑀢𑀺 𑀪𑀼𑀫𑁆𑀫𑀸. 𑀪𑀽𑀫𑀺𑀲𑀫𑁆𑀩𑀦𑁆𑀥𑁂𑀲𑀼 𑀭𑀼𑀓𑁆𑀔𑀝𑁆𑀞𑀓 𑀧𑀩𑁆𑀩𑀢𑀝𑁆𑀞𑀓 𑀯𑀺𑀫𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀆𑀴𑀯𑀓 𑀲𑀸𑀢𑀸𑀕𑀺𑀭 𑀳𑁂𑀫𑀯𑀢𑀸𑀤𑀬𑁄 𑀫𑀳𑀺𑀤𑁆𑀥𑀺𑀓𑀸 𑀪𑀼𑀫𑁆𑀫𑀸𑀤𑁂𑀯𑀸. 𑀬𑁂 𑀮𑁄𑀓𑁂 𑀩𑀮𑀺𑀳𑀭𑀡 𑀯𑀲𑁂𑀦 𑀧𑀽𑀚𑀦𑀻𑀬𑀝𑁆𑀞𑁂𑀦 𑀬𑀓𑁆𑀔𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀬𑁂 𑀧𑀦 𑀪𑀼𑀫𑁆𑀫𑀤𑁂𑀯𑀚𑀸𑀢𑀺𑀓𑀸𑀧𑀺 𑀲𑀫𑀸𑀦𑀸 𑀅𑀢𑁆𑀢𑀦𑁄 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀪𑁄𑀕𑀲𑀼𑀔𑀲𑁆𑀲 𑀅𑀪𑀸𑀯𑀸 𑀓𑀺𑀘𑁆𑀙𑀚𑀻𑀯𑀺 𑀓𑀧𑁆𑀧𑀢𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑁂 𑀢𑁂𑀲𑀁 𑀫𑀳𑀺𑀤𑁆𑀥𑀺𑀓𑀸𑀦𑀁 𑀪𑀼𑀫𑁆𑀫𑀤𑁂𑀯𑀸𑀦𑀁 𑀧𑀭𑀁𑀧𑀭 𑀧𑀸𑀭𑀺𑀲𑀚𑁆𑀚𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀪𑀼𑀫𑁆𑀫𑁂 𑀤𑁂𑀯𑁂 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁂𑀦 𑀪𑀼𑀫𑁆𑀫𑀲𑁆𑀲𑀺𑀢𑀸𑀦𑀸𑀫 𑀳𑁄𑀦𑁆𑀢𑀺. 𑀪𑀼𑀫𑁆𑀫𑀺𑀲𑁆𑀲𑀺𑀢𑀸𑀢𑀺𑀧𑀺 𑀧𑀸𑀞𑁄. 𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸 𑀭𑀼𑀓𑁆𑀔𑀕𑀼𑀫𑁆𑀩𑀮𑁂𑀡𑀕𑀼𑀳𑀸𑀲𑀼𑀲𑀸𑀦𑀸 𑀤𑀻𑀲𑀼 𑀯𑀺𑀯𑀺𑀢𑁆𑀢𑁂𑀲𑀼 𑀪𑀽𑀫𑀺𑀧𑀤𑁂𑀲𑁂𑀲𑀼 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀬𑁂𑀯 𑀯𑀺𑀭𑀽𑀧𑀸 𑀳𑀼𑀢𑁆𑀯𑀸 𑀪𑀯𑀦𑁆𑀢𑀭𑁂 𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑀺𑀓𑀸. 𑀯𑀺𑀦𑀺𑀧𑀸𑀢𑀺𑀓𑀸𑀘 𑀢𑁂 𑀳𑁂𑀝𑁆𑀞𑀸𑀯𑀼𑀢𑁆𑀢𑀝𑁆𑀞𑁂𑀦 𑀅𑀲𑀼𑀭𑀸𑀘𑀸𑀢𑀺 𑀯𑀺𑀦𑀺𑀧𑀸𑀢𑀺𑀓𑀸 𑀲𑀼𑀭𑀸. 𑀢𑁂 𑀧𑀦 𑀕𑀸𑀫𑀲𑀫𑀻𑀧𑁂𑀯𑀸 𑀅𑀦𑁆𑀢𑁄𑀕𑀸𑀫𑁂𑀯𑀸 𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑁂𑀲𑀼 𑀯𑀲𑀺𑀢𑁆𑀯𑀸 𑀕𑀸𑀫𑀯𑀸𑀲𑀻𑀳𑀺 𑀙𑀟𑁆𑀟𑀺𑀢𑀸𑀦𑀺 𑀪𑀢𑁆𑀢𑀲𑀺𑀢𑁆𑀣𑀧𑀽𑀯𑀔𑀚𑁆𑀚𑀫𑀘𑁆𑀙𑀫𑀁𑀲𑀸𑀤𑀻𑀦𑀺 𑀧𑀭𑀺𑀬𑁂𑀲𑀺𑀢𑁆𑀯𑀸𑀯𑀸 𑀢𑀸𑀦𑀺 𑀅𑀮𑀪𑀺𑀢𑁆𑀯𑀸 𑀤𑀸𑀭𑀓𑁂𑀯𑀸 𑀕𑀺𑀮𑀸𑀦𑁂𑀯𑀸 𑀧𑀻𑀴𑁂𑀢𑁆𑀯𑀸𑀯𑀸 𑀲𑀓𑁆𑀓𑁄𑀦𑁆𑀢𑀸 𑀧𑀦 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑁂 𑀢𑀸𑀲𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺. 𑀢𑁂𑀲𑀁 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀁. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀲𑀩𑁆𑀩𑁂 𑀯𑀺𑀦𑀺𑀧𑀸𑀢𑀺𑀓𑀸 𑀲𑀼𑀭𑀸𑀦𑀸𑀫 𑀅𑀳𑁂𑀢𑀼 𑀓𑀸𑀏𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀸𑀦𑀁𑀧𑀺 𑀲𑀩𑁆𑀪𑀸𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑁂𑀲𑀁 𑀏𑀓𑀘𑁆𑀘𑀸𑀦𑀁 𑀧𑀺𑀬𑀗𑁆𑀓𑀭𑀫𑀸𑀢𑀸 𑀉𑀢𑁆𑀢𑀭𑀫𑀸𑀢𑀸 𑀥𑀫𑁆𑀫𑀕𑀼𑀢𑁆𑀢𑀸 𑀨𑀼𑀲𑁆𑀲𑀫𑀺𑀢𑁆𑀢𑀸𑀤𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀧𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄𑀢𑀺. 𑀏𑀓𑀘𑁆𑀘𑁂 𑀬𑀓𑁆𑀔𑀚𑀸𑀢𑀺𑀓𑀸𑀧𑀺 𑀭𑀓𑁆𑀔𑀲𑀚𑀸𑀢𑀺𑀓𑀸𑀧𑀺 𑀯𑁂𑀫𑀸𑀦𑀺𑀓𑀧𑁂𑀢𑀸𑀧𑀺 𑀧𑀭𑀤𑀢𑁆𑀢𑀼𑀧𑀚𑀻𑀯𑀺 𑀧𑁂𑀢𑀸𑀧𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀢𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑀧𑀝𑀺𑀲𑀦𑁆𑀥𑀺 𑀬𑀼𑀢𑁆𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀬𑀲𑁆𑀫𑀸 𑀆𑀬𑀼𑀧𑀭𑀺𑀘𑁆𑀙𑁂𑀤𑁄𑀦𑀸𑀫 𑀏𑀓𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀲𑁂𑀲𑀲𑀸 𑀥𑀸𑀭𑀡𑀦𑀺𑀬𑀫𑀧𑀭𑀺𑀫𑀸𑀡𑀯𑀲𑁂𑀦 𑀧𑀯𑀢𑁆𑀢𑁄. 𑀅𑀧𑀸𑀬𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀪𑀼𑀫𑁆𑀫 𑀤𑁂𑀯𑀸𑀦𑀜𑁆𑀘 𑀢𑀸𑀤𑀺𑀲𑁄 𑀦𑀺𑀬𑀫𑀧𑀭𑀺𑀫𑀸𑀡𑁄𑀦𑀸𑀫 𑀦𑀢𑁆𑀣𑀺. 𑀦 𑀳𑀺 𑀲𑀓𑀮𑀘𑀓𑁆𑀓 𑀯𑀸𑀴𑀧𑀭𑀺𑀬𑀸𑀧𑀦𑁆𑀦𑀸 𑀏𑀓𑀪𑀽𑀫𑀓𑀸 𑀲𑀩𑁆𑀩𑀦𑀺𑀭𑀬𑀸 𑀏𑀓𑀆𑀬𑀼𑀧𑀭𑀺𑀘𑁆𑀙𑁂𑀤𑀸 𑀳𑁄𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀦𑁆𑀢𑀺𑀆𑀤𑀺. 𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦𑀁 𑀆𑀧𑀸𑀬𑀺𑀓𑀧𑀼𑀕𑁆𑀕𑀮𑀸𑀦𑀁 𑀆𑀬𑀼𑀧𑁆𑀧𑀫𑀸𑀡 𑀕𑀡𑀦𑀸𑀬 𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀓𑀫𑁆𑀫𑀧𑀫𑀸𑀡𑀢𑁆𑀢𑀸. 𑀢𑀢𑁆𑀣 𑀦𑀺𑀭𑀬𑁂𑀲𑀼 𑀅𑀩𑁆𑀩𑀼𑀤𑀸𑀤𑀻𑀦𑀁 𑀤𑀲𑀦𑁆𑀦𑀁 𑀦𑀺𑀭𑀬𑀸𑀦𑀁 𑀪𑀕𑀯𑀢𑀸 𑀯𑀼𑀢𑁆𑀢𑁄 𑀆𑀬𑀼𑀧𑀭𑀺𑀘𑁆𑀙𑁂𑀤𑁄𑀧𑀺 𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀓𑁂𑀦 𑀓𑀫𑁆𑀫𑁂𑀦𑁂𑀯𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀇𑀤𑀁 𑀚𑀫𑁆𑀩𑀼𑀤𑀻𑀧𑀕𑀸𑀲𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂 𑀲𑀜𑁆𑀜𑁂𑀯 𑀳𑀺 𑀆𑀬𑀼𑀓𑀧𑁆𑀧𑀲𑁆𑀲 𑀆𑀭𑁄𑀳𑀡𑀁 𑀑𑀭𑁄𑀳𑀡𑀜𑁆𑀘 𑀅𑀢𑁆𑀣𑀺. 𑀦 𑀇𑀢𑀭𑀤𑀻𑀧𑀯𑀸𑀲𑀻𑀦𑀁. 𑀢𑁂𑀲𑀼 𑀳𑀺 𑀉𑀢𑁆𑀢𑀭𑀓𑀼𑀭𑀼𑀯𑀸𑀲𑀻𑀦𑀁 𑀦𑀺𑀬𑀫𑀢𑁄 𑀯𑀲𑁆𑀲 𑀲𑀳𑀲𑁆𑀲𑀁 𑀳𑁄𑀢𑀺. 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀜𑁆𑀘𑀯𑀲𑁆𑀲 𑀲𑀢𑀸𑀦𑀻𑀢𑀺𑀘 𑀯𑀤𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀼 𑀤𑀻𑀧𑁂𑀲𑀼 𑀆𑀤𑀺𑀓𑀧𑁆𑀧𑀺𑀓𑀸𑀦𑀁𑀧𑀺 𑀲𑁄𑀏𑀯 𑀧𑀭𑀺𑀘𑁆𑀙𑁂𑀤𑁄𑀢𑀺 𑀆𑀧𑀚𑁆𑀚𑀢𑀺. 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀧𑀦 𑀲𑀫𑀯𑀺𑀲𑀫𑀸𑀘𑀸𑀭𑀦𑀺𑀲𑀦𑁆𑀤𑀪𑀽𑀢𑀸 𑀘𑀦𑁆𑀤𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀤𑀻𑀦𑀁 𑀯𑀺𑀲𑀫𑀲𑀫𑀕𑀢𑀺𑀫𑀽𑀮𑀺𑀓𑀸𑀉𑀢𑀼𑀆𑀳𑀸𑀭𑀸𑀦𑀁 𑀲𑀫𑁆𑀧𑀢𑁆𑀢𑀺 𑀯𑀺𑀧𑀢𑁆𑀢𑀺𑀬𑁄 𑀢𑁂𑀲𑀁𑀧𑀺 𑀲𑀸𑀥𑀸𑀭𑀡𑀸𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀼𑀧𑀺 𑀆𑀬𑀼𑀧𑀭𑀺𑀘𑁆𑀙𑁂𑀤𑀸𑀦𑀁 𑀆𑀭𑁄𑀳𑀡𑀁 𑀑𑀭𑁄𑀳𑀡𑀜𑁆𑀘 𑀦𑀢𑁆𑀣𑀻𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀦𑀺𑀲𑀦𑁆𑀤𑀫𑀢𑁆𑀢𑀢𑁆𑀢𑀸 𑀚𑀫𑁆𑀩𑀼𑀤𑀻𑀧𑀕𑀢𑀺𑀬𑀸 𑀏𑀓𑀕𑀢𑀺𑀓𑀸 𑀦𑀳𑁄𑀦𑁆𑀢𑀻𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀉𑀢𑁆𑀢𑀭𑀓𑀼𑀭𑀼𑀓𑀸 𑀫𑀦𑀼𑀲𑁆𑀲𑀸 𑀅𑀫𑀫𑀸 𑀅𑀧𑀭𑀺𑀕𑁆𑀕𑀳𑀸. 𑀦𑀺𑀬𑀢𑀸𑀬𑀼𑀓𑀸 𑀅𑀯𑀲𑁂𑀲𑀸𑀬𑀼𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀲𑁂𑀲𑀸𑀬𑀼𑀦𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀢𑁄 𑀑𑀭𑁄𑀳𑀺𑀢𑁆𑀯𑀸 𑀦𑀺𑀘𑁆𑀘𑀮𑀁 𑀞𑀺𑀢𑁂𑀦 𑀯𑀲𑁆𑀲𑀲𑀳𑀲𑁆𑀲𑁂𑀦𑀸𑀢𑀺 𑀅𑀢𑁆𑀣𑁄𑀢𑀺.

𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀦𑁆𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁂𑀲𑀁𑀧𑀺 𑀫𑀳𑁂𑀲𑀓𑁆𑀔𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑀸𑀦𑀜𑁆𑀘 𑀪𑀼𑀫𑁆𑀫𑀤𑁂𑀯𑀸𑀦𑀁 𑀯𑁂𑀫𑀸𑀦𑀺𑀓𑀧𑁂𑀢𑀸𑀤𑀻𑀦𑀜𑁆𑀘 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀁𑀧𑀺 𑀓𑀫𑁆𑀫𑀫𑁂𑀯 𑀧𑀫𑀸𑀡𑀦𑁆𑀢𑀺. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁𑀧𑀦𑀤𑁂𑀯𑀸𑀦𑀦𑁆𑀢𑀺 𑀇𑀤𑀁 𑀉𑀧𑀭𑀺𑀫𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀸𑀦𑀻𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀲𑀺𑀤𑁆𑀥𑀸𑀦𑀺. 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀻𑀢𑀺 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀓𑀲𑁆𑀲𑀧𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀪𑀽𑀢𑀸 𑀲𑁄𑀢𑀸𑀧𑀦𑁆𑀦𑀤𑁂𑀯 𑀧𑀼𑀢𑁆𑀢𑀸 𑀆𑀓𑀸𑀲𑀝𑁆𑀞𑀓 𑀯𑀺𑀫𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀬𑀸𑀯 𑀦𑀺𑀫𑀺𑀭𑀸𑀚𑀓𑀸𑀮𑀸𑀧𑀺 𑀢𑀺𑀝𑁆𑀞𑀦𑁆𑀢𑀻𑀢𑀺 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀓𑁂𑀲𑀜𑁆𑀘𑀺 𑀆𑀓𑀸𑀲𑀝𑁆𑀞𑀓𑀤𑁂𑀯𑀸𑀦𑀁𑀧𑀺 𑀓𑀫𑁆𑀫𑀧𑀫𑀸𑀡𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀘𑁂𑀢𑁆𑀣 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀺 𑀘𑀺𑀦𑁆𑀢𑁂𑀢𑀩𑁆𑀩𑀸. 𑀦 𑀳𑀺 𑀲𑁄𑀢𑀸 𑀧𑀦𑁆𑀦𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀢𑁄 𑀧𑀭𑀁 𑀓𑀸𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀦𑀸𑀫 𑀅𑀢𑁆𑀣𑀺. 𑀦 𑀘 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀧𑀺 𑀢𑀢𑁆𑀢𑀓𑀁 𑀓𑀸𑀮𑀁 𑀲𑀁𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀫𑀦𑀼𑀲𑁆𑀲𑀕𑀡𑀦𑀸𑀬𑀸𑀢𑀺 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑀕𑀡𑀦𑀸𑀬. 𑀫𑀦𑀼𑀲𑁆𑀲𑀮𑁄𑀓𑁂 𑀳𑀺 𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀏𑀓𑁄 𑀤𑀺𑀩𑁆𑀩𑀭𑀢𑁆𑀢𑀺𑀤𑀺𑀯𑁄 𑀳𑁄𑀢𑀺. 𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑀸 𑀏𑀓𑁄 𑀤𑀺𑀩𑁆𑀩𑀫𑀸𑀲𑁄. 𑀤𑁆𑀯𑀸𑀤𑀲𑀫𑀸𑀲𑀸 𑀏𑀓𑀁 𑀤𑀺𑀩𑁆𑀩𑀯𑀲𑁆𑀲𑀁. 𑀢𑁂𑀦 𑀤𑀺𑀩𑁆𑀩𑀯𑀲𑁆𑀲𑁂𑀦 𑀢𑁂𑀲𑀁 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀫𑀦𑀼𑀲𑁆𑀲𑀕𑀡𑀦𑀸𑀬 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀳𑁄𑀢𑀻𑀢𑀺. 𑀢𑀢𑁄𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀢𑁄. 𑀘𑀢𑀼𑀕𑀼𑀡𑀦𑁆𑀢𑀺 𑀆𑀬𑀼𑀧𑀫𑀸𑀡𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸𑀘𑁂𑀯 𑀤𑀺𑀩𑁆𑀩𑀲𑁆𑀲 𑀭𑀢𑁆𑀢𑀺𑀤𑀺𑀯𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸𑀘 𑀯𑀲𑁂𑀦 𑀘𑀢𑀽𑀳𑀺 𑀪𑀸𑀕𑁂𑀳𑀺 𑀕𑀼𑀡𑀺𑀢𑀁 𑀯𑀟𑁆𑀠𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀆𑀬𑀼𑀧𑀫𑀸𑀡𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺𑀦𑀸𑀫 𑀳𑁂𑀝𑁆𑀞𑀺𑀫𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑀫𑀸𑀡𑀢𑁄 𑀉𑀧𑀭𑀺𑀫𑀸𑀦𑀁 𑀤𑁂𑀯𑀸𑀦𑀁 𑀆𑀬𑀼𑀧𑀫𑀸𑀡𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺. 𑀏𑀢𑁂𑀦 𑀢𑀸𑀯𑀢𑀺𑀁𑀲𑀸𑀦𑀁 𑀤𑀺𑀩𑁆𑀩𑀁 𑀏𑀓𑀁 𑀯𑀲𑁆𑀲𑀲𑀳𑀲𑁆𑀲𑀁. 𑀬𑀸𑀫𑀸𑀦𑀁 𑀤𑁆𑀯𑁂𑀯𑀲𑁆𑀲𑀲𑀳𑀲𑁆𑀲𑀸𑀦𑀺. 𑀢𑀼𑀲𑀺𑀢𑀸𑀦𑀁 𑀘𑀢𑁆𑀢𑀸𑀭𑀺, 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀅𑀝𑁆𑀞. 𑀯𑀲𑀯𑀢𑁆𑀢𑀻𑀦𑀁 𑀤𑀺𑀩𑁆𑀩𑀸𑀦𑀺 𑀲𑁄𑀴𑀲𑀯𑀲𑁆𑀲 𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑀤𑀺𑀩𑁆𑀩𑀲𑁆𑀲 𑀭𑀢𑁆𑀢𑀺𑀤𑀺𑀯𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺𑀦𑀸𑀫 𑀳𑁂𑀝𑁆𑀞𑀺𑀫𑀸𑀦𑀁 𑀤𑁂𑀯𑀸𑀦𑀁 𑀭𑀢𑁆𑀢𑀺𑀤𑀺𑀯𑀢𑁄 𑀉𑀧𑀭𑀺𑀫𑀸𑀦𑀁 𑀭𑀢𑁆𑀢𑀺𑀤𑀺𑀯𑀲𑁆𑀲 𑀤𑀺𑀕𑀼𑀡𑀯𑀼𑀤𑁆𑀥𑀺. 𑀏𑀢𑁂𑀦 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀁 𑀯𑀲𑁆𑀲𑀲𑀢𑀁 𑀢𑀸𑀯𑀢𑀺𑀁𑀲𑁂 𑀏𑀓𑁄 𑀤𑀺𑀩𑁆𑀩𑀭𑀢𑁆𑀢𑀺𑀤𑀺𑀯𑁄. 𑀤𑁆𑀯𑁂𑀯𑀲𑁆𑀲𑀲𑀢𑀸𑀦𑀺 𑀬𑀸𑀫𑁂. 𑀘𑀢𑁆𑀢𑀸𑀭𑀺 𑀢𑀼𑀲𑀺𑀢𑁂. 𑀅𑀝𑁆𑀞 𑀦𑀺𑀫𑁆𑀫𑀸𑀦𑀭𑀢𑀺𑀬𑀁. 𑀲𑀳𑀲𑁆𑀲𑀁 𑀙 𑀘𑀯𑀲𑁆𑀲𑀲𑀢𑀸𑀦𑀺 𑀯𑀲𑀯𑀢𑁆𑀢𑀺𑀬𑀁 𑀏𑀓𑁄 𑀤𑀺𑀩𑁆𑀩𑀭𑀢𑁆𑀢𑀺𑀤𑀺𑀯𑁄𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀭𑀢𑁆𑀢𑀺𑀤𑀺𑀯𑀸𑀦𑀜𑁆𑀘 𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸 𑀲𑀺𑀤𑁆𑀥𑀸𑀬 𑀫𑀸𑀲𑀲𑀁𑀯𑀘𑁆𑀙𑀭𑀸𑀦𑀁𑀧𑀺 𑀤𑀺𑀕𑀼𑀡𑀯𑀼𑀤𑁆𑀥𑀺 𑀲𑀺𑀤𑁆𑀥𑀸𑀯 𑀳𑁄𑀢𑀻𑀢𑀺. 𑀏𑀯𑀜𑁆𑀘𑀲𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀢𑀸𑀯𑀢𑀺𑀁𑀲𑀸𑀤𑀻𑀦𑀁 𑀤𑀺𑀩𑁆𑀩𑀯𑀲𑁆𑀲𑀲𑀳𑀲𑁆𑀲𑀸𑀤𑀺𑀦𑀺𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀤𑀺𑀯𑀫𑀸𑀲𑀲𑀁𑀯𑀘𑁆𑀙𑀭𑁂𑀢𑀺𑀏𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀣𑀸𑀘 𑀲𑀢𑀺 𑀉𑀧𑀭𑀺𑀫𑀸𑀦𑀁 𑀆𑀬𑀼𑀧𑀭𑀺𑀫𑀸𑀡𑀸𑀦𑀺 𑀳𑁂𑀝𑁆𑀞𑀺𑀫𑀸𑀦𑀁 𑀆𑀬𑀼𑀧𑀭𑀺𑀫𑀸𑀡𑀢𑁄 𑀘𑀢𑀼𑀕𑀼𑀡𑀸𑀦𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁. 𑀢𑀢𑁄 𑀘𑀢𑀼𑀕𑀼𑀡𑀁 𑀢𑀸𑀯𑀢𑀺𑀁𑀲𑀸𑀦𑀁. 𑀢𑀢𑁄 𑀘𑀢𑀼𑀕𑀼𑀡𑀁 𑀬𑀸𑀫𑀸𑀦𑀦𑁆𑀢𑀺𑀆𑀤𑀺. 𑀤𑀺𑀩𑁆𑀩𑀕𑀡𑀦𑀸𑀬 𑀘 𑀢𑀣𑀸 𑀲𑀺𑀤𑁆𑀥𑀸𑀬 𑀲𑀢𑀺 𑀫𑀦𑀼𑀲𑁆𑀲𑀕𑀡𑀦𑀸𑀬𑀧𑀺 𑀘𑀢𑀼𑀕𑀼𑀡𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀕𑀡𑀦𑀸𑀬𑀧𑀺 𑀳𑁂𑀝𑁆𑀞𑀺𑀫𑀸𑀦𑀁 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀤𑀻𑀦𑀺 𑀘𑀢𑀽𑀳𑀺 𑀉𑀧𑀭𑀽𑀧𑀭𑀺𑀕𑀼𑀡𑀺𑀢𑀸𑀦𑀺 𑀉𑀧𑀭𑀺𑀫𑀸𑀦𑀁 𑀢𑀺𑀓𑁄𑀝𑀺𑀲𑀝𑁆𑀞𑀺𑀯𑀲𑁆𑀲𑀲𑀢 𑀲𑀳𑀲𑁆𑀲𑀸𑀤𑀺𑀦𑀺 𑀪𑀯𑀦𑁆𑀢𑀻𑀢𑀺 𑀓𑀢𑁆𑀯𑀸 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀆𑀤𑀺𑀅𑀦𑁆𑀢𑀤𑀲𑁆𑀲𑀦 𑀯𑀲𑁂𑀦 𑀦𑀺𑀤𑁆𑀤𑀺𑀲𑀦𑁆𑀢𑁄 𑀦𑀯𑀲𑀢𑀦𑁆𑀢𑀺 𑀕𑀸𑀣𑀫𑀸𑀳. 𑀯𑀲𑁆𑀲𑀸𑀦𑀁 𑀦𑀯𑀲𑀢𑀁 𑀓𑁄𑀝𑀺𑀬𑁄 𑀘 𑀏𑀓𑀯𑀻𑀲 𑀓𑁄𑀝𑀺𑀬𑁄 𑀘 𑀢𑀣𑀸𑀲𑀝𑁆𑀞𑀺𑀯𑀲𑁆𑀲 𑀲𑀢𑀲𑀳𑀲𑁆𑀲𑀸𑀦𑀺 𑀘 𑀯𑀲𑀯𑀢𑁆𑀢𑀻𑀲𑀼 𑀤𑁂𑀯𑁂𑀲𑀼 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀬𑀲𑁆𑀫𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀛𑀸𑀦𑀁 𑀑𑀴𑀸𑀭𑀺𑀓𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀲𑀫𑀢𑀺𑀓𑁆𑀓𑀫𑀸 𑀧𑀣𑀫𑀚𑁆𑀛𑀸𑀦𑀢𑁄 𑀲𑀼𑀝𑁆𑀞𑀼𑀩𑀮𑀯𑀁 𑀳𑁄𑀢𑀺. 𑀢𑀢𑁄𑀬𑁂𑀯 𑀢𑀢𑀻𑀬𑀚𑁆𑀛𑀸𑀦𑀢𑁄𑀧𑀺 𑀦𑀸𑀢𑀺𑀤𑀼𑀩𑁆𑀩𑀮𑀜𑁆𑀘 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀢𑀢𑀻𑀬𑀚𑁆𑀛𑀸𑀦𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑀢𑀮𑁂 𑀪𑀽𑀫𑀦𑁆𑀢𑀭𑁂 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 𑀤𑀼𑀢𑀻𑀬𑀚𑁆𑀛𑀸𑀦𑀯𑀺𑀧𑀸𑀓𑀁 𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀜𑁆𑀘 𑀤𑀼𑀢𑀻𑀬𑀚𑁆𑀛𑀸𑀦𑀪𑀽𑀫𑀺𑀬𑀦𑁆𑀢𑀺. 𑀢𑁂𑀦𑁂𑀯𑀘 𑀪𑀽𑀫𑀻𑀦𑀁 𑀞𑀺𑀢𑀺𑀓𑁆𑀓𑀫𑁄𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦 𑀯𑀲𑁂𑀦𑁂𑀯 𑀲𑀺𑀤𑁆𑀥𑁄. 𑀣𑁂𑀭𑁂𑀦 𑀧𑀦 𑀳𑁂𑀝𑁆𑀞𑀸 𑀧𑀜𑁆𑀘𑀓𑀦𑀬𑀯𑀲𑁂𑀦𑁂𑀯 𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀇𑀥𑀧𑀺 𑀢𑁂𑀦𑁂𑀯 𑀦𑀬𑁂𑀦 𑀯𑀺𑀧𑀸𑀓𑀸𑀦𑀺 𑀕𑀳𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀧𑀸𑀓𑀁 𑀢𑀢𑀻𑀬𑀚𑁆𑀛𑀸𑀦𑀪𑀽𑀫𑀺𑀬𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀽𑀢𑀺 𑀢𑀸𑀳𑀺 𑀙𑀳𑀺 𑀧𑀝𑀺𑀲𑀦𑁆𑀥𑀻𑀢𑀺 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑁂𑀲𑀼. 𑀓𑀧𑁆𑀧𑀲𑁆𑀲𑀸𑀢𑀺 𑀇𑀤𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀢𑀼𑀩𑁆𑀩𑀺𑀥𑀸 𑀳𑀺 𑀓𑀧𑁆𑀧𑀸𑀫𑀳𑀸𑀓𑀧𑁆𑀧𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀅𑀦𑁆𑀢𑀭𑀓𑀧𑁆𑀧𑁄 𑀆𑀬𑀼𑀓𑀧𑁆𑀧𑁄𑀢𑀺, 𑀢𑀢𑁆𑀣 𑀆𑀬𑀼𑀓𑀧𑁆𑀧𑁄𑀦𑀸𑀫 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀁𑀢𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀯𑀼𑀘𑁆𑀘𑀢𑀺. 𑀅𑀦𑁆𑀢𑀭𑀓𑀧𑁆𑀧𑁄𑀦𑀸𑀫 𑀏𑀓𑀲𑁆𑀲𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀓𑀧𑁆𑀧𑀲𑁆𑀲 𑀳𑀸𑀬𑀦𑀯𑀟𑁆𑀠𑀦𑀯𑀲𑁂𑀦 𑀤𑀺𑀲𑁆𑀲𑀫𑀸𑀦𑀦𑁆𑀢𑀭𑀸 𑀘𑀢𑀼𑀲𑀝𑁆𑀞𑀺𑀧𑀪𑁂𑀤𑀸 𑀘𑀽𑀴𑀓𑀧𑁆𑀧𑀸 𑀯𑀼𑀘𑁆𑀘𑀦𑁆𑀢𑀺. 𑀧𑀻𑀲𑀢𑀺𑀪𑁂𑀤𑀸𑀢𑀺 𑀓𑁂𑀘𑀺. 𑀅𑀲𑀻𑀢𑀺𑀪𑁂𑀤𑀸𑀢𑀺 𑀅𑀧𑀭𑁂. 𑀘𑀼𑀤𑁆𑀤𑀲𑀧𑁆𑀧 𑀪𑁂𑀤𑀸𑀢𑀺 𑀯𑁂𑀤𑀯𑀺𑀤𑀼. 𑀬𑁂 𑀮𑁄𑀓𑁂 𑀫𑀦𑁆𑀯𑀦𑁆𑀢𑀭𑀓𑀧𑁆𑀧𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀓𑀫𑁂𑀓𑁂𑀦 𑀫𑀦𑀼𑀦𑀸𑀫𑀓𑁂𑀦 𑀫𑀳𑀸𑀲𑀫𑁆𑀫𑀢𑀭𑀸𑀚𑁂𑀦 𑀉𑀧𑀮𑀓𑁆𑀔𑀺𑀢𑀸 𑀅𑀦𑁆𑀢𑀭𑀓𑀧𑁆𑀧𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀘𑀺 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀫𑁆𑀳𑀺 𑀫𑀳𑀸𑀲𑀫𑁆𑀫𑀢𑀭𑀸 𑀚𑀸𑀦𑀁 𑀏𑀓𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑀸 𑀧𑀦 𑀏𑀓𑁄 𑀅𑀲𑀗𑁆𑀔𑁆𑀬𑁂 𑀓𑀧𑁆𑀧𑁄𑀦𑀸𑀫. 𑀲𑁄 𑀘𑀢𑀼𑀩𑁆𑀩𑀺𑀥𑁄 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀯𑀺𑀯𑀝𑁆𑀝𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺. 𑀢𑀢𑁆𑀣 𑀯𑀺𑀦𑀲𑁆𑀲𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑁄. 𑀬𑀣𑀸 𑀯𑀺𑀦𑀝𑁆𑀞𑀁 𑀢𑀺𑀝𑁆𑀞𑀫𑀸𑀦𑁄 𑀓𑀧𑁆𑀧𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻. 𑀯𑀟𑁆𑀠𑀫𑀸𑀦𑁄 𑀓𑀧𑁆𑀧𑁄 𑀯𑀺𑀯𑀝𑁆𑀝𑁄. 𑀬𑀣𑀸 𑀯𑀺𑀯𑀝𑁆𑀝𑀁 𑀢𑀺𑀝𑁆𑀞𑀫𑀸𑀦𑁄 𑀓𑀧𑁆𑀧𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀧𑀦 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸 𑀏𑀓𑁄 𑀫𑀳𑀸𑀓𑀧𑁆𑀧𑁄𑀦𑀸𑀫. 𑀏𑀢𑁆𑀣𑀘 𑀬𑁄 𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑁂 𑀲𑁂𑀢𑀲𑀸𑀲𑀧𑀭𑀸𑀲𑀺𑀫𑁆𑀳𑀺 𑀯𑀲𑁆𑀲𑀲𑀢 𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀏𑀓𑁂𑀓𑀩𑀻𑀚𑀳𑀭𑀡𑁂𑀦 𑀧𑀭𑀺𑀓𑁆𑀔𑀻𑀡𑁂𑀧𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀧𑀭𑀺𑀓𑁆𑀔𑀬𑀁 𑀦𑀕𑀘𑁆𑀙𑀢𑀺. 𑀏𑀯𑀁 𑀤𑀺𑀖𑁄 𑀫𑀳𑀸𑀓𑀧𑁆𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀬𑀤𑀸 𑀓𑀧𑁆𑀧𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺. 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀅𑀕𑁆𑀕𑀺𑀦𑀸 𑀤𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺. 𑀲𑀼𑀪𑀸𑀓𑀺𑀡𑁆𑀡𑀢𑁄 𑀳𑁂𑀝𑁆𑀞𑀸 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺. 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀯𑀸𑀢𑁂𑀦 𑀯𑀺𑀤𑁆𑀥𑀁𑀲𑀢𑀻𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀅𑀬𑀁 𑀮𑁄𑀓𑁄 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺. 𑀅𑀝𑁆𑀞𑀫𑁂 𑀯𑀸𑀭𑁂 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀺. 𑀧𑀼𑀦 𑀲𑀢𑁆𑀢𑀲𑀼 𑀅𑀕𑁆𑀕𑀺𑀦𑀸. 𑀅𑀝𑁆𑀞𑀫𑁂 𑀉𑀤𑀓𑁂𑀦𑀸𑀢𑀺 𑀏𑀯𑀁 𑀅𑀝𑁆𑀞𑀦𑁆𑀦𑀁 𑀅𑀝𑁆𑀞𑀓𑀸𑀦𑀁 𑀯𑀲𑁂𑀦 𑀘𑀢𑀼𑀲𑀝𑁆𑀞𑀺𑀯𑀸𑀭𑁂𑀲𑀼 𑀅𑀦𑁆𑀢𑀺𑀫𑁂 𑀉𑀤𑀓𑀯𑀸𑀭𑁂 𑀉𑀤𑀓𑀁 𑀧𑀳𑀸𑀬 𑀯𑀸𑀢𑀯𑀸𑀭𑁄 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀓𑀣𑀁. 𑀬𑀁 𑀯𑀼𑀢𑁆𑀢𑀁 𑀆𑀪𑀲𑁆𑀲𑀭𑀸𑀦𑀁 𑀅𑀝𑁆𑀞𑀓𑀧𑁆𑀧𑀸𑀦𑀻𑀢𑀺. 𑀏𑀢𑁂𑀦 𑀅𑀝𑁆𑀞𑀫𑁂 𑀯𑀸𑀭𑁂 𑀆𑀧𑁄𑀲𑀁𑀯𑀝𑁆𑀝𑁄 𑀳𑁄𑀢𑀺. 𑀅𑀦𑁆𑀢𑀭𑀸 𑀲𑀢𑁆𑀢𑀲𑀼 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀢𑁂𑀚𑁄𑀲𑀁𑀯𑀝𑁆𑀝𑀸 𑀳𑁄𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀜𑁆𑀘 𑀯𑀼𑀢𑁆𑀢𑀁 𑀲𑀼𑀪𑀸𑀓𑀺𑀡𑁆𑀡𑀸𑀦𑀁 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀦𑀻𑀢𑀺. 𑀏𑀢𑁂𑀦 𑀘𑀢𑀼𑀲𑀝𑁆𑀞𑀺𑀫𑁂 𑀘𑀢𑀼𑀲𑀝𑁆𑀞𑀺𑀫𑁂 𑀯𑀸𑀭𑁂 𑀯𑀸𑀢𑀲𑀁𑀯𑀝𑁆𑀝𑁄𑀳𑁄𑀢𑀺. 𑀅𑀦𑁆𑀢𑀭𑀸 𑀢𑁂𑀲𑀝𑁆𑀞𑀺𑀬𑀸 𑀯𑀸𑀭𑁂𑀲𑀼 𑀢𑁂𑀚𑁄𑀲𑀁𑀯𑀝𑁆𑀝𑀸 𑀆𑀧𑁄𑀲𑀁𑀯𑀝𑁆𑀝𑀸𑀘 𑀳𑁄𑀦𑁆𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

𑀅𑀕𑁆𑀕𑀺𑀦𑀸 𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀸𑀓𑀺𑀡𑁆𑀡𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀺.

𑀲𑀢𑁆𑀢𑀲𑀢𑁆𑀢𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀸𑀭𑁄 𑀲𑀺𑀬𑀸𑀢𑀺.

𑀏𑀯𑀜𑁆𑀘 𑀯𑀺𑀦𑀝𑁆𑀞𑁂 𑀮𑁄𑀓𑁂 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀧𑀺 𑀧𑀣𑀫𑀚𑁆𑀛𑀸𑀦𑀪𑀽𑀫𑀺 𑀅𑀯𑀺𑀦𑀝𑁆𑀞𑀸𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁𑀤𑁂𑀯𑀸𑀦𑀁 𑀓𑀧𑁆𑀧𑀲𑁆𑀲𑀢𑀢𑀻𑀬𑁄 𑀪𑀸𑀕𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁𑀉𑀧𑀟𑁆𑀠𑀓𑀧𑁆𑀧𑁄, 𑀫𑀳𑀸 𑀩𑁆𑀭𑀳𑁆𑀫𑀸𑀦𑀁𑀏𑀓𑁄𑀓𑀧𑁆𑀧𑁄𑀢𑀺 𑀏𑀢𑁆𑀣 𑀅𑀲𑀗𑁆𑀔𑁆𑀬𑁂𑀬𑁆𑀬 𑀓𑀧𑁆𑀧𑁄𑀯 𑀲𑀫𑁆𑀪𑀯𑀢𑀺. 𑀦𑀫𑀳𑀸𑀓𑀧𑁆𑀧𑁄. 𑀢𑁂𑀦 𑀯𑀼𑀢𑁆𑀢𑀁 𑀓𑀧𑁆𑀧𑀲𑁆𑀲𑀸𑀢𑀺 𑀇𑀤𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀢𑁂𑀚𑁄𑀲𑀁𑀯𑀝𑁆𑀝𑀓𑀧𑁆𑀧𑁂𑀲𑀼 𑀳𑀺 𑀧𑀣𑀫𑀚𑁆𑀛𑀸𑀦𑀢𑀮𑀁 𑀯𑀺𑀯𑀝𑁆𑀝𑀫𑀸𑀦𑀁 𑀲𑀩𑁆𑀩𑀧𑀣𑀫𑀁 𑀯𑀺𑀯𑀝𑁆𑀝𑀢𑀺. 𑀲𑀁𑀯𑀝𑁆𑀝𑀫𑀸𑀦𑀁 𑀲𑀩𑁆𑀩𑀧𑀘𑁆𑀙𑀸 𑀲𑀁𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀯𑀺𑀯𑀝𑁆𑀝𑀲𑁆𑀲 𑀧𑀘𑁆𑀙𑀺𑀫𑀟𑁆𑀠𑁂𑀦 𑀲𑀁𑀯𑀝𑁆𑀝𑀲𑁆𑀲𑀘 𑀧𑀼𑀩𑁆𑀩𑀟𑁆𑀠𑁂𑀦 𑀲𑀳 𑀏𑀓𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀓𑀧𑁆𑀧𑀁 𑀕𑀳𑁂𑀢𑁆𑀯𑀸 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀢𑀲𑁆𑀫𑀺𑀁 𑀢𑀮𑁂 𑀏𑀓𑁄 𑀆𑀬𑀼𑀓𑀧𑁆𑀧𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀤𑀼𑀢𑀻𑀬 𑀢𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀫𑀳𑀸𑀓𑀧𑁆𑀧𑁄𑀯 𑀕𑀳𑁂𑀢𑀩𑁆𑀩𑁄. 𑀅𑀧𑁆𑀧𑀓𑀁 𑀊𑀦𑀓𑀁𑀯𑀸 𑀅𑀥𑀺𑀓𑀁𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀉𑀧𑀟𑁆𑀠𑁂𑀳𑀺 𑀲𑀳 𑀲𑀢𑁆𑀢𑀓𑀧𑁆𑀧𑀸𑀦𑀺 𑀲𑀦𑁆𑀥𑀸𑀬 𑀆𑀪𑀲𑁆𑀲𑀭𑀸𑀦𑀁 𑀅𑀝𑁆𑀞𑀓𑀧𑁆𑀧𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀦𑀻𑀢𑀺 𑀏𑀢𑁆𑀣𑀧𑀻𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀯𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀼𑀧𑀕𑀸, 𑀢𑁂𑀲𑀁. 𑀏𑀓𑁄𑀯 𑀯𑀺𑀲𑀬𑁄 𑀆𑀭𑀫𑁆𑀫𑀡𑀁 𑀬𑀲𑁆𑀲 𑀢𑀁 𑀏𑀓𑀯𑀺𑀲𑀬𑀁. 𑀏𑀓𑀚𑀸𑀢𑀺𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀪𑀯𑁂. [𑀧𑀝𑀺𑀲𑀦𑁆𑀥𑀺𑀘𑀢𑀼𑀓𑁆𑀓𑀁.]

𑁧𑁪𑁫. 𑀚𑀦𑁂𑀢𑀻𑀢𑀺 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀁. 𑀉𑀧𑀧𑀻𑀴𑁂𑀢𑀻𑀢𑀺 𑀉𑀧𑀧𑀻𑀴𑀓𑀁. 𑀉𑀧𑀖𑀸𑀢𑁂𑀢𑀻𑀢𑀺 𑀉𑀧𑀖𑀸𑀢𑀓𑀁. 𑀢𑀢𑁆𑀣 𑀚𑀦𑀓𑀁 𑀦𑀸𑀫 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀯𑀺𑀧𑀸𑀓𑀓𑁆𑀔𑀦𑁆𑀥 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀓𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀺𑀓𑀸 𑀓𑀫𑁆𑀫𑀧𑀣𑀧𑀢𑁆𑀢𑀸𑀯 𑀤𑀝𑁆𑀞𑀩𑁆𑀩𑀸. 𑀧𑀯𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀺𑀓𑀸 𑀧𑀦 𑀓𑀫𑁆𑀫𑀧𑀣𑀁 𑀧𑀢𑁆𑀢𑀸𑀧𑀺 𑀅𑀧𑀢𑁆𑀢𑀸𑀧𑀺 𑀅𑀦𑁆𑀢𑀫𑀲𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀘𑁂𑀢𑀦𑀸𑀧𑀺 𑀲𑀼𑀧𑀺𑀦𑀦𑁆𑀢𑁂 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀧𑀻𑀢𑀺. 𑀉𑀧𑀢𑁆𑀣𑀫𑁆𑀪𑀓𑀁𑀦𑀸𑀫 𑀯𑀺𑀧𑀘𑁆𑀘𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑀸𑀯𑀸 𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀯𑀸 𑀲𑀩𑁆𑀩𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸. 𑀲𑀸 𑀳𑀺 𑀚𑀦𑀓𑀪𑀽𑀢𑀸𑀧𑀺 𑀲𑀫𑀸𑀦𑀸 𑀅𑀢𑁆𑀢𑀦𑁄𑀯𑀺𑀧𑀸𑀓𑀯𑀸𑀭𑀢𑁄 𑀧𑀼𑀭𑁂𑀯𑀸 𑀧𑀘𑁆𑀙𑀸𑀯𑀸 𑀲𑀪𑀸𑀗𑁆𑀕𑀁 𑀓𑀫𑁆𑀫𑀦𑁆𑀢 𑀭𑀁𑀯𑀸𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀁𑀯𑀸𑀉𑀧𑀢𑁆𑀣𑀫𑁆𑀪𑀫𑀸𑀦𑀸 𑀧𑀯𑀢𑁆𑀢𑀢𑀺. 𑀬𑀣𑀸 𑀕𑀦𑁆𑀣𑀸𑀭𑀩𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀘𑁂𑀢𑀦𑀸𑀢𑀺. 𑀬𑀁 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀉𑀧𑀢𑁆𑀣𑀫𑁆𑀪𑀓𑀁 𑀧𑀦 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀲𑀢𑀺 𑀓𑀺𑀜𑁆𑀘𑀺𑀓𑀫𑁆𑀫𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀲𑁆𑀲𑀧𑀺 𑀅𑀚𑀦𑀓𑀁𑀦𑀸𑀫 𑀅𑀢𑁆𑀣𑀻𑀢𑀺. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀭𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀁𑀦𑀸𑀫 𑀅𑀮𑀤𑁆𑀥𑁄𑀓𑀸𑀲𑀲𑁆𑀲 𑀅𑀜𑁆𑀜𑀲𑁆𑀲 𑀚𑀦𑀓𑀓𑀫𑁆𑀫𑀲𑁆𑀲 𑀑𑀓𑀸𑀲𑀓𑀭𑀡𑀁. 𑀢𑀁 𑀧𑀦 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀸𑀓𑀝𑀁. 𑀢𑀤𑀸 𑀳𑀺 𑀓𑀼𑀲𑀮𑁂 𑀚𑀯𑀺𑀢𑁂 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀼𑀲𑀮𑀓𑀫𑁆𑀫𑀁 𑀑𑀓𑀸𑀲𑀁 𑀮𑀪𑀢𑀺. 𑀅𑀓𑀼𑀲𑀮𑁂 𑀚𑀯𑀺𑀢𑁂 𑀅𑀜𑁆𑀜𑀁 𑀅𑀓𑀼𑀲𑀮𑀓𑀫𑁆𑀫𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀇𑀢𑀺 𑀯𑀼𑀢𑁆𑀢𑀓𑁂 𑁋

𑀇𑀫𑀲𑁆𑀫𑀺𑀁 𑀘𑀸𑀬𑀁 𑀲𑀫𑀬𑁂, 𑀓𑀸𑀮𑀗𑁆𑀓𑀭𑀺𑀬𑀸𑀣 𑀧𑀼𑀕𑁆𑀕𑀮𑁄;

𑀲𑀕𑁆𑀕𑀫𑁆𑀳𑀺 𑀉𑀧𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀜𑁆𑀳𑀺𑀲𑁆𑀲 𑀧𑀲𑀸𑀤𑀺𑀢𑀁.

𑀇𑀫𑀲𑁆𑀫𑀺𑀁 𑀘𑀸𑀬𑀁 𑀲𑀫𑀬𑁂, 𑀓𑀸𑀮𑀗𑁆𑀓𑀭𑀺𑀬𑀸𑀣 𑀧𑀼𑀕𑁆𑀕𑀮𑁄;

𑀦𑀺𑀭𑀬𑁂 𑀉𑀧𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀜𑁆𑀳𑀺𑀲𑁆𑀲 𑀧𑀤𑀽𑀲𑀺𑀢𑀦𑁆𑀢𑀺.

𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀏𑀢𑀁 𑀩𑀳𑀼𑀮𑀁 𑀮𑀩𑁆𑀪𑀢𑀺𑀬𑁂𑀯. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀁𑀦𑀸𑀫 𑀅𑀜𑁆𑀜𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀓𑀼𑀲𑀮𑀓𑀫𑁆𑀫𑁂𑀦𑀯𑀸 𑀅𑀓𑀼𑀲𑀮𑀓𑀫𑁆𑀫𑁂𑀦𑀯𑀸 𑀦𑀺𑀩𑁆𑀩𑀢𑁆𑀢𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀚𑀻𑀯𑀺𑀢𑀦𑁆𑀢𑀭𑀸𑀬𑁂 𑀅𑀧𑀦𑁂𑀢𑁆𑀯𑀸 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁂 𑀲𑀫𑀼𑀤𑀸𑀦𑁂𑀢𑁆𑀯𑀸 𑀘𑀺𑀭𑀢𑀭 𑀧𑀯𑀢𑁆𑀢𑀺𑀓𑀭𑀡𑀁. 𑀬𑀣𑀸𑀳 𑁋

𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀤𑁆𑀥𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮𑀦𑁆𑀢𑀺.

𑀏𑀢𑁆𑀣 𑀧𑀦 𑀓𑀼𑀲𑀮𑀁𑀧𑀺 𑀅𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀅𑀓𑀼𑀲𑀮𑀁𑀧𑀺 𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀁𑀦𑀸𑀫 𑀦𑀢𑁆𑀣𑀻𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀅𑀓𑀼𑀲𑀮 𑀓𑀫𑁆𑀫 𑀦𑀺𑀩𑁆𑀩𑀢𑁆𑀢𑀲𑁆𑀲𑀧𑀺 𑀳𑀺 𑀫𑀳𑀺𑀤𑁆𑀥𑀺𑀓𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂 𑀧𑀼𑀩𑁆𑀩𑀓𑀢𑀁 𑀓𑀼𑀲𑀮𑀁 𑀯𑀼𑀢𑁆𑀢𑀦𑀬𑁂𑀦 𑀉𑀧𑀩𑁆𑀭𑀽𑀳𑀦𑀁 𑀓𑀭𑁄𑀢𑀺𑀬𑁂𑀯. 𑀢𑀣𑀸𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲𑀧𑀺 𑀓𑁂𑀲𑀜𑁆𑀘𑀺 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀤𑀻𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀧𑀯𑀢𑁆𑀢𑀺𑀓𑀸𑀮𑁂 𑀧𑀼𑀩𑁆𑀩𑀓𑀢𑀁 𑀅𑀓𑀼𑀲𑀮𑀁 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀁 𑀓𑀭𑁄𑀢𑀺𑀬𑁂𑀯𑀸𑀢𑀺. 𑀉𑀧𑀧𑀻𑀴𑀓𑀉𑀧𑀖𑀸𑀢𑀓𑀸𑀦𑀺𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀓𑀼𑀲𑀮𑀸𑀓𑀼𑀲𑀮 𑀘𑁂𑀢𑀦𑀸𑀬𑁄𑀏𑀯. 𑀢𑀸𑀧𑀺 𑀳𑀺 𑀚𑀦𑀓𑀪𑀽𑀢𑀸𑀧𑀺 𑀲𑀫𑀸𑀦𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀯𑀸𑀭𑀢𑁄 𑀧𑀼𑀭𑁂𑀯𑀸 𑀧𑀘𑁆𑀙𑀸 𑀯𑀸 𑀯𑀺𑀧𑀸𑀓𑀯𑀸𑀭 𑀕𑀳𑀡 𑀓𑀸𑀮𑁂𑀧𑀺 𑀯𑀸 𑀓𑀫𑁆𑀫𑀦𑁆𑀢𑀭𑀁𑀯𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢 𑀔𑀦𑁆𑀥𑀲𑀦𑁆𑀢𑀸𑀦𑀁𑀯𑀸 𑀤𑀼𑀩𑁆𑀩𑀮𑀢𑀭𑀁 𑀓𑀢𑁆𑀯𑀸𑀯𑀸 𑀯𑀺𑀩𑀸𑀥𑀬𑀫𑀸𑀦𑀸 𑀲𑀩𑁆𑀩𑀲𑁄𑀯𑀸 𑀉𑀧𑀘𑁆𑀙𑀺𑀦𑁆𑀤𑀫𑀸𑀦𑀸 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀢𑀢𑁆𑀣 𑀉𑀧𑀧𑀻𑀴𑀓𑁂 𑀢𑀸𑀯 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀩𑀸𑀥𑀦𑀁𑀦𑀸𑀫 𑀅𑀜𑁆𑀜𑀲𑁆𑀲 𑀚𑀦𑀓𑀓𑀫𑁆𑀫𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑀓𑀭𑀡𑀁. 𑀓𑀫𑁆𑀫𑀜𑁆𑀳𑀺 𑀦𑀸𑀫 𑀆𑀬𑀽𑀳𑀦𑀓𑀸𑀮𑁂 𑀩𑀮𑀯𑀦𑁆𑀢𑀁𑀧𑀺 𑀧𑀘𑁆𑀙𑀸 𑀓𑀢𑁂𑀦 𑀉𑀚𑀼𑀧𑀝𑀺𑀧𑀓𑁆𑀔𑁂𑀦 𑀓𑀫𑁆𑀫𑀦𑁆𑀢𑀭𑁂𑀦 𑀯𑀺𑀩𑀸𑀥𑀺𑀬𑀫𑀸𑀦𑀁 𑀧𑀼𑀦 𑀯𑀺𑀳𑀢𑀲𑀸𑀫𑀢𑁆𑀣𑀺𑀬𑀁 𑀳𑁄𑀢𑀺. 𑀉𑀧𑀭𑀺𑀪𑀽𑀫𑀺 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀲𑀫𑀸𑀦𑀁 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀫𑀳𑁂𑀲𑀓𑁆𑀔𑁂𑀲𑀼 𑀫𑀳𑀺𑀤𑁆𑀥𑀺𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀲𑀫𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑁂𑀲𑀼 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑀣𑀸 𑀉𑀘𑁆𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀦𑀻𑀘𑀓𑀼𑀮𑁂𑀲𑀼. 𑀤𑀻𑀖𑀸𑀬𑀼𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀅𑀧𑁆𑀧𑀸𑀬𑀼𑀓𑁂𑀲𑀼. 𑀫𑀳𑀸𑀪𑁄𑀕𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀅𑀧𑁆𑀧𑀪𑁄𑀕𑁂𑀲𑀼. 𑀧𑀼𑀭𑀺𑀲𑀢𑁆𑀢 𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀲𑀫𑀸𑀦𑀁 𑀇𑀢𑁆𑀣𑀢𑁆𑀢𑀪𑀸𑀯𑀁𑀯𑀸 𑀦𑀧𑀼𑀁𑀲𑀓𑀪𑀸𑀯𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀤𑀼𑀩𑁆𑀩𑀡𑁆𑀡𑀪𑀸𑀯𑀁. 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀅𑀦𑁆𑀥𑀁𑀯𑀸 𑀩𑀥𑀺𑀭𑀁𑀯𑀸 𑀬𑀁𑀓𑀺𑀜𑁆𑀘𑀺 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀁. 𑀅𑀗𑁆𑀕𑀧𑀘𑁆𑀘𑀗𑁆𑀕 𑀲𑀫𑁆𑀧𑀢𑁆𑀢𑀺𑀚𑀦𑀓𑀁𑀧𑀺 𑀳𑀢𑁆𑀣𑀧𑀸𑀤𑀸𑀤𑀺 𑀅𑀗𑁆𑀕𑀯𑁂𑀓𑀮𑁆𑀮𑀁 𑀚𑀦𑁂𑀢𑀺. 𑀢𑀣𑀸 𑀆𑀬𑀽𑀳𑀦𑀓𑀸𑀮𑁂 𑀫𑀳𑀸𑀦𑀺𑀭𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀅𑀓𑀼𑀲𑀮𑀁 𑀧𑀘𑁆𑀙𑀸𑀓𑀢𑁂𑀦 𑀩𑀮𑀯𑀓𑀼𑀲𑀮𑁂𑀦 𑀯𑀺𑀩𑀸𑀥𑀺𑀬𑀫𑀸𑀦𑀁 𑀉𑀲𑁆𑀲𑀤𑁂𑀲𑀼𑀯𑀸 𑀧𑁂𑀢𑁂𑀲𑀼𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑀸𑀢𑀲𑀢𑁆𑀢𑀼 𑀭𑀸𑀚𑀸 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀉𑀲𑁆𑀲𑀤𑁂𑀲𑀼 𑀦𑀺𑀩𑁆𑀩𑀢𑁆𑀢𑀓𑀁𑀧𑀺 𑀧𑁂𑀢𑁂𑀲𑀼𑀯𑀸 𑀢𑀺𑀭𑀘𑁆𑀙𑀸 𑀦𑁂𑀲𑀼𑀯𑀸𑀢𑀺 𑀆𑀤𑀺𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁.

𑀉𑀧𑀢𑁆𑀣𑀫𑁆𑀪𑀓𑀁𑀧𑀺 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀫𑁂𑀯. 𑀢𑀣𑀸 𑀳𑀺 𑀓𑀫𑁆𑀫𑀁 𑀦𑀸𑀫 𑀓𑀢𑀓𑀸𑀮𑁂𑀤𑀼𑀩𑁆𑀩𑀮𑀁𑀧𑀺𑀲𑀫𑀸𑀦𑀁 𑀧𑀘𑁆𑀙𑀸𑀲𑀪𑀸𑀕𑁂𑀦𑀩𑀮𑀯𑀢𑀸𑀓𑀼𑀲𑀮𑁂𑀦𑀯𑀸 𑀅𑀓𑀼𑀲𑀮𑁂𑀦𑀯𑀸 𑀉𑀧𑀢𑁆𑀣𑀫𑁆𑀪𑀻𑀬𑀫𑀸𑀦𑀁 𑀲𑀼𑀝𑁆𑀞𑀼 𑀩𑀮𑀯𑀁 𑀳𑁄𑀢𑀻𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀯𑀺𑀩𑀸𑀥𑀦𑀁𑀦𑀸𑀫 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀤𑀸𑀓𑀤𑀸𑀘𑀺 𑀲𑀭𑀻𑀭𑁂 𑀦𑀸𑀦𑀸𑀅𑀦𑁆𑀢𑀭𑀸𑀬𑁂 𑀉𑀧𑁆𑀧𑀸𑀤𑁂𑀢𑁆𑀯𑀸𑀯𑀸 𑀞𑀸𑀦𑀦𑁆𑀢𑀭𑀔𑁂𑀢𑁆𑀢𑀯𑀢𑁆𑀣𑀼 𑀕𑁄𑀫𑀳𑀺𑀁𑀲 𑀥𑀦 𑀥𑀜𑁆𑀜𑀪𑁄𑀕 𑀲𑀫𑁆𑀧𑀢𑁆𑀢𑀻𑀦𑀁 𑀧𑀼𑀢𑁆𑀢𑀤𑀸𑀭𑀜𑀸𑀢𑀺 𑀫𑀺𑀢𑁆𑀢𑀸𑀦𑀜𑁆𑀘 𑀯𑀺𑀧𑀢𑁆𑀢𑀺𑀁 𑀓𑀢𑁆𑀯𑀸𑀯𑀸 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀓𑀭𑀡𑀁. 𑀤𑀼𑀯𑀺𑀥𑀜𑁆𑀳𑀺 𑀓𑀫𑁆𑀫𑀨𑀮𑀁𑀦𑀸𑀫 𑀯𑀺𑀧𑀸𑀓𑀨𑀮𑀁 𑀦𑀺𑀲𑀦𑁆𑀤𑀨𑀮𑀦𑁆𑀢𑀺. 𑀢𑀢𑁆𑀣 𑀯𑀺𑀧𑀸𑀓𑀨𑀮𑀁𑀦𑀸𑀫 𑀓𑀫𑁆𑀫𑀓𑀸𑀭𑀓𑀲𑁆𑀲𑁂𑀯 𑀳𑁄𑀢𑀺. 𑀦 𑀅𑀜𑁆𑀜𑀲𑁆𑀲. 𑀦𑀺𑀲𑀦𑁆𑀤 𑀨𑀮𑀁 𑀧𑀦 𑀅𑀜𑁆𑀜𑁂𑀲𑀁𑀧𑀺 𑀲𑀸𑀥𑀸𑀭𑀡𑀫𑁂𑀯. 𑀥𑀫𑁆𑀫𑀧𑀤𑁂 𑀆𑀦𑀦𑁆𑀤𑀲𑁂𑀝𑁆𑀞𑀺𑀯𑀢𑁆𑀣𑀼 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀘𑀓𑁆𑀔𑀸𑀤𑀻𑀲𑀼 𑀧𑀦 𑀓𑀫𑁆𑀫𑀚𑀲𑀦𑁆𑀢𑀣𑀺𑀲𑀻𑀲𑁂𑀲𑀼 𑀬𑁂𑀦 𑀓𑀫𑁆𑀫𑁂𑀦 𑀬𑀁𑀓𑀺𑀜𑁆𑀘𑀺 𑀏𑀓𑀁𑀯𑀸 𑀤𑁆𑀯𑁂𑀯𑀸 𑀢𑀻𑀡𑀺𑀯𑀸 𑀲𑀩𑁆𑀩𑀲𑁄 𑀪𑀺𑀚𑁆𑀚𑀦𑁆𑀢𑀺. 𑀘𑀓𑁆𑀔𑀼𑀧𑀸𑀮𑀢𑁆𑀣𑁂 𑀭𑀸𑀤𑀻𑀦𑀁 𑀯𑀺𑀬. 𑀢𑀁 𑀓𑀫𑁆𑀫𑀁 𑀉𑀧𑀖𑀸𑀢𑀓𑁂 𑀲𑀗𑁆𑀕𑀳𑀺𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀉𑀧𑀖𑀸 𑀢𑀓𑀦𑁆𑀢𑀺 𑀧𑀦 𑀉𑀧𑀘𑁆𑀙𑁂𑀤𑀓𑀦𑁆𑀢𑀺𑀘 𑀅𑀢𑁆𑀣𑀢𑁄 𑀏𑀓𑀁. 𑀢𑀣𑀸 𑀳𑀺 𑀫𑀚𑁆𑀛𑀺𑀫𑀝𑁆𑀞 𑀓𑀣𑀸𑀬𑀁 𑀧𑀣𑀫𑀁 𑀉𑀧𑀘𑁆𑀙𑁂𑀤𑀓𑀦𑀸𑀫𑁂𑀦 𑀯𑀢𑁆𑀯𑀸 𑀉𑀧𑀖𑀸𑀢𑀓𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀣𑀫𑀁 𑀉𑀧𑀖𑀸𑀢𑀓𑀦𑀸𑀫𑁂𑀦 𑀯𑀢𑁆𑀯𑀸 𑀉𑀧𑀘𑁆𑀙𑁂𑀤𑀓𑀦𑁆𑀢𑀺𑀧𑀺 𑀢𑀲𑁆𑀲𑁂𑀯𑁂𑀢𑀁 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑁂𑀧𑀺 𑀫𑀭𑀡𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀢𑀤𑁂𑀯 𑀓𑀫𑁆𑀫𑀼𑀧𑀘𑁆𑀙𑁂𑀤𑀓𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀘 𑀧𑀭𑀢𑁄 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀼𑀦𑀸𑀢𑀺 𑀯𑀓𑁆𑀔𑀢𑀺.

𑀇𑀫𑀲𑁆𑀲𑀧𑀺 𑀓𑀫𑁆𑀫𑀦𑁆𑀢𑀭𑀼𑀧𑀘𑁆𑀙𑁂𑀤𑀦𑀁 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀧𑀸𑀓𑀝𑀁. 𑀢𑀤𑀸𑀳𑀺 𑀧𑀣𑀫𑀁 𑀧𑀸𑀧𑀓𑀫𑁆𑀫𑀩𑀮𑁂𑀦 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑁂 𑀉𑀧𑀝𑁆𑀞𑀳𑀦𑁆𑀢𑁂 𑀧𑀼𑀦 𑀓𑀮𑁆𑀬𑀸𑀡 𑀓𑀫𑁆𑀫𑀁 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀓𑀮𑁆𑀬𑀸𑀡𑀓𑀫𑁆𑀫𑀩𑀮𑁂𑀦 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑁂 𑀉𑀧𑀝𑁆𑀞𑀳𑀦𑁆𑀢𑁂 𑀧𑀼𑀦 𑀧𑀸𑀧𑀓𑀫𑁆𑀫𑀁 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀤𑀼𑀝𑁆𑀞 𑀕𑀸𑀫𑀡𑀺𑀭𑀜𑁆𑀜𑁄 𑀲𑁄𑀡𑀢𑁆𑀣𑁂𑀭𑀧𑀺𑀢𑀼𑀘 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀓𑁆𑀔𑀬 𑀓𑀭𑀲𑁆𑀲 𑀫𑀕𑁆𑀕𑀓𑀫𑁆𑀫𑀲𑁆𑀲𑀧𑀺 𑀓𑀫𑁆𑀫𑀦𑁆𑀢𑀭𑀼𑀧𑀘𑁆𑀙𑁂𑀤𑀓𑀳𑀸 𑀯𑀼𑀢𑁆𑀢𑀸. 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬𑀸𑀢𑀺. 𑀇𑀫𑀲𑁆𑀫𑀺𑀁 𑀪𑀯𑁂 𑀮𑀤𑁆𑀥𑀸𑀦𑀺 𑀫𑀳𑀕𑁆𑀕𑀢𑀓𑀫𑁆𑀫𑀸𑀦𑀺 𑀬𑁂𑀦 𑀅𑀓𑀼𑀲𑀮𑁂𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀢𑀲𑁆𑀲𑀧𑀺 𑀓𑀫𑁆𑀫𑀦𑁆𑀢𑀭𑀼𑀧𑀘𑁆𑀙𑁂𑀤𑀓𑁂 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄. 𑀤𑁂𑀯𑀤𑀢𑁆𑀢𑀲𑁆𑀲 𑀯𑀺𑀬𑀸𑀢𑀺. 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀔𑀦𑁆𑀥𑀲𑀦𑁆𑀢𑀸𑀦𑀼𑀧𑀘𑁆𑀙𑁂𑀤𑀦𑀁 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀆𑀬𑀼 𑀓𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀮𑀤𑁆𑀥𑁄𑀓𑀸𑀲𑀲𑁆𑀲 𑀓𑀲𑁆𑀲𑀘𑀺 𑀅𑀧𑀭𑀸𑀥𑀓𑀫𑁆𑀫𑀲𑁆𑀲 𑀩𑀮𑁂𑀦 𑀓𑀮𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀸𑀯 𑀓𑁂𑀦𑀘𑀺𑀭𑁄𑀕𑁂𑀦𑀯𑀸 𑀪𑀬𑁂𑀦𑀯𑀸 𑀉𑀧𑀓𑁆𑀓𑀫𑁂𑀦𑀯𑀸 𑀫𑀭𑀦𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀘 𑀓𑀫𑁆𑀫𑀦𑁆𑀢𑀭𑀲𑁆𑀲𑀯𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲𑀯𑀸 𑀉𑀧𑀢𑁆𑀣𑀫𑁆𑀪𑀦𑀸 𑀤𑀻𑀦𑀺 𑀲𑀦𑁆𑀥𑀸𑀬 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁𑀧𑀺 𑀓𑀫𑁆𑀫𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑁄. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲𑁂𑀯 𑀉𑀧𑀢𑁆𑀣𑀫𑁆𑀪𑀦𑀸𑀤𑀻𑀦𑀺 𑀲𑀦𑁆𑀥𑀸𑀬 𑀉𑀧𑀢𑁆𑀣𑀫𑁆𑀪𑀓𑀲𑁆𑀲 𑀓𑀼𑀲𑀮𑀪𑀸𑀯𑁄 𑀉𑀧𑀧𑀻𑀴𑀓𑀉𑀧𑀖𑀸𑀢𑀓𑀸𑀦𑀁 𑀅𑀓𑀼𑀲𑀮𑀪𑀸𑀯𑁄 𑀯𑀼𑀢𑁆𑀢𑁄. 𑀲𑁄 𑀧𑀦 𑀫𑀚𑁆𑀛𑀺𑀫𑀝𑀻𑀓𑀸𑀬𑀁 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀜𑁆𑀘 𑀅𑀭𑀼𑀘𑁆𑀘𑀫𑀸𑀦𑁄 𑀯𑀺𑀬 𑀯𑀼𑀢𑁆𑀢𑁄. 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀲𑁄 𑀓𑁂𑀘𑀺 𑀯𑀸𑀤𑁄𑀧𑀺 𑀓𑀢𑁄. 𑀢𑀢𑁆𑀣𑀧𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑀼𑀁 𑀧𑀸𑀴𑀺𑀦𑀬𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀘 𑀓𑁂𑀘𑀺𑀯𑀸𑀤𑁄 𑀓𑀢𑁆𑀢𑀩𑁆𑀩𑁄. 𑀲𑀼𑀢𑁆𑀢𑀲𑁆𑀫𑀺𑀁𑀳𑀺 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀸𑀏𑀲𑀸 𑀫𑀸𑀡𑀯𑀧𑀝𑀺𑀧𑀤𑀸, 𑀬𑀤𑀺𑀤𑀁 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀻𑀢𑀺𑀆𑀤𑀺𑀦𑀸 𑀉𑀧𑀖𑀸𑀢𑀓𑀁 𑀧𑀸𑀡𑀸𑀢𑀺𑀧𑀸𑀢𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀉𑀧𑀧𑀻𑀴𑀓𑀜𑁆𑀘 𑀩𑀢𑁆𑀯𑀸𑀩𑀸𑀥𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸 𑀫𑀸𑀡𑀯 𑀧𑀝𑀺𑀧𑀤𑀸, 𑀬𑀤𑀺𑀤𑀁 𑀲𑀢𑁆𑀢𑀸𑀦𑀁 𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀯𑀺𑀳𑀺𑀁𑀲𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀓𑀜𑁆𑀘 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸 𑀫𑀸𑀡𑀯 𑀧𑀝𑀺𑀧𑀤𑀸. 𑀬𑀤𑀺𑀤𑀁 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀢𑀲𑁆𑀲𑁂𑀯 𑀲𑀢𑁆𑀢𑀲𑁆𑀲 𑀯𑀲𑁂𑀦𑀸𑀢𑀺 𑀏𑀯𑀁 𑀯𑀺𑀲𑀼𑀁 𑀧𑀸𑀴𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀜𑁆𑀘 𑀓𑀫𑁆𑀫𑀦𑁆𑀢𑀭𑀼𑀧𑀢𑁆𑀣𑀫𑁆𑀪𑀦𑀸𑀤𑀻𑀦𑀺 𑀅𑀦𑀺𑀘𑁆𑀙𑀦𑁆𑀢𑁂𑀳𑀺 𑀚𑀦𑀓𑀸𑀤𑀺𑀪𑀸𑀯𑁄𑀦𑀸𑀫 𑀯𑀺𑀧𑀸𑀓𑀁 𑀧𑀝𑀺𑀇𑀘𑁆𑀙𑀺𑀢𑀩𑁆𑀩𑁄. 𑀦𑀓𑀫𑁆𑀫𑀦𑁆𑀢𑀺 𑀯𑀺𑀧𑀸𑀓𑀲𑁆𑀲𑁂𑀯 𑀉𑀧𑀖𑀸𑀢𑀓𑀢𑀸 𑀬𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁.

𑀓𑀺𑀘𑁆𑀘𑀯𑀲𑁂𑀦𑀸𑀢𑀺 𑀚𑀦𑀦𑀁 𑀉𑀧𑀢𑁆𑀣𑀫𑁆𑀪𑀦𑀁 𑀉𑀧𑀧𑀻𑀴𑀦𑀁 𑀉𑀧𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀯𑀲𑁂𑀦. 𑀢𑀢𑁆𑀣 𑀏𑀓𑀸 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀢𑀺. 𑀲𑀸 𑀳𑀺 𑀬𑀸𑀯 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀦𑀮𑀪𑀢𑀺. 𑀢𑀸𑀯 𑀉𑀧𑀢𑁆𑀣𑀫𑁆𑀪𑀦𑀸𑀤𑀻𑀲𑀼 𑀢𑀻𑀲𑀼 𑀓𑀺𑀘𑁆𑀘𑁂𑀲𑀼 𑀬𑀁𑀓𑀺𑀜𑁆𑀘𑀺 𑀮𑀤𑁆𑀥𑀧𑀘𑁆𑀘𑀬𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀬𑀤𑀸 𑀯𑀺𑀧𑀘𑁆𑀘𑀺𑀢𑀼𑀁 𑀑𑀓𑀸𑀲𑀁 𑀮𑀪𑀢𑀺. 𑀢𑀤𑀸 𑀏𑀓𑀸𑀬 𑀘𑁂𑀢𑀦𑀸𑀬 𑀏𑀓𑀸𑀏𑀯 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻𑀢𑀺 𑀏𑀯𑀁 𑀲𑀸𑀓𑁂𑀢𑀧𑀜𑁆𑀳𑁂 𑀯𑀼𑀢𑁆𑀢𑀦𑀬𑁂𑀦 𑀏𑀓𑀁 𑀅𑀧𑀸𑀬𑀪𑀯𑀁 𑀚𑀦𑁂𑀢𑀺. 𑀢𑀢𑁄 𑀧𑀭𑀁 𑀧𑀦 𑀧𑀝𑀺𑀲𑀦𑁆𑀥𑀺𑀚𑀦𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀯𑀢𑁆𑀢𑀺 𑀯𑀺𑀧𑀸𑀓𑀚𑀦𑀦𑁂𑀦 𑀲𑀳 𑀇𑀢𑀭𑀸𑀦𑀺 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀪𑀯𑀲𑀢𑀲𑀳𑀲𑁆𑀲𑁂𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀧𑀺 𑀲𑀸𑀥𑁂𑀢𑀺𑀬𑁂𑀯. 𑀥𑀫𑁆𑀫𑀤𑀺𑀦𑁆𑀦𑀸𑀬𑀦𑀸𑀫 𑀉𑀕𑁆𑀕𑀲𑁂𑀦 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀯𑀢𑁆𑀣𑀼 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀲𑀸 𑀧𑀦 𑀬𑀤𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀯𑀸𑀭𑀢𑁄 𑀧𑀼𑀭𑁂 𑀅𑀭𑀺𑀬𑀪𑀽𑀢𑀲𑁆𑀲𑀯𑀸 𑀧𑀼𑀣𑀼𑀚𑁆𑀚𑀦𑀪𑀽𑀢𑀲𑁆𑀲𑀧𑀺 𑀓𑀮𑁆𑀬𑀸𑀡 𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄𑀯𑀸 𑀉𑀧𑀘𑁆𑀙𑁂𑀤𑀦𑀁 𑀓𑀭𑁄𑀢𑀺. 𑀢𑀤𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀫𑁆𑀫𑀦𑁆𑀢 𑀭𑀲𑁆𑀲𑁂𑀯 𑀑𑀓𑀸𑀲𑀁 𑀓𑀭𑁄𑀢𑀺. 𑀲𑀬𑀁 𑀯𑀺𑀧𑀸𑀓𑀁 𑀦𑀚𑀦𑁂𑀢𑀺. 𑀬𑀤𑀸 𑀧𑀦 𑀧𑀸𑀧𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀔𑀦𑁆𑀥𑀲𑀦𑁆𑀢𑀸𑀦𑀁 𑀉𑀧𑀘𑁆𑀙𑀺𑀦𑁆𑀤𑀢𑀺. 𑀢𑀤𑀸𑀏𑀯 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀲𑀓𑀺𑀁 𑀮𑀤𑁆𑀥𑀧𑀝𑀺𑀲𑀦𑁆𑀥𑀺𑀯𑀸𑀭𑀢𑁄 𑀧𑀦 𑀧𑀝𑁆𑀞𑀸𑀬 𑀅𑀦𑁂𑀓𑁂𑀲𑀼 𑀅𑀢𑁆𑀢𑀪𑀸𑀯 𑀲𑀢𑀲𑀳𑀲𑁆𑀲𑁂𑀲𑀼𑀧𑀺 𑀉𑀧𑀘𑁆𑀙𑁂𑀤𑀦𑀸𑀤𑀻𑀦𑀺𑀬𑁂𑀯 𑀓𑀭𑁄𑀢𑀺. 𑀏𑀢𑁆𑀣 𑀫𑀳𑀸𑀫𑁄𑀕𑁆𑀕𑀮𑀸𑀦 𑀢𑁆𑀣𑁂𑀭 𑀯𑀢𑁆𑀣𑀼 𑀲𑀸𑀫𑀸𑀯𑀢𑀺 𑀯𑀢𑁆𑀣𑀼 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼 𑀯𑀢𑁆𑀣𑀼 𑀤𑀼𑀲𑁆𑀲𑀺𑀫𑀸𑀭 𑀓𑀮𑀸𑀩𑀼𑀭𑀸𑀚𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺. 𑀬𑀲𑁆𑀫𑀸 𑀧𑀦 𑀇𑀤𑀁 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀩𑀳𑀼𑀮𑀁 𑀮𑀩𑁆𑀪𑀢𑀺. 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀩𑀮𑀯𑀁 𑀅𑀓𑀼𑀲𑀮𑀓𑀫𑁆𑀫𑀁 𑀤𑀼𑀩𑁆𑀩𑀮𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲𑀯𑀸 𑀅𑀓𑀼𑀲𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲𑀯𑀸 𑀉𑀧𑀘𑁆𑀙𑁂𑀤𑀓𑀁𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀩𑀳𑀼𑀓𑀲𑁆𑀫𑀺𑀜𑁆𑀳𑀺 𑀅𑀓𑀼𑀲𑀮𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀩𑀮𑀯𑀓𑀫𑁆𑀫𑀁 𑀤𑀼𑀩𑁆𑀩𑀮 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀅𑀧𑀺𑀘 𑀧𑀯𑀢𑁆𑀢𑀺𑀬𑀁𑀧𑀺 𑀓𑀫𑁆𑀫𑀦𑁆𑀢𑀭𑀚𑀦𑀺𑀢𑀁 𑀪𑀯𑀗𑁆𑀕𑀲𑀦𑁆𑀢𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀲𑀼 𑀘𑀓𑁆𑀔𑀼 𑀲𑁄𑀢 𑀖𑀸𑀦 𑀚𑀺𑀯𑁆𑀳𑀸 𑀪𑀸𑀯 𑀤𑀲𑀓 𑀲𑀗𑁆𑀔𑀸𑀢𑁂𑀲𑀼 𑀲𑀦𑁆𑀢𑀢𑀺 𑀲𑀻𑀲𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 𑀲𑀦𑁆𑀢𑀢𑀺𑀲𑀻𑀲𑀲𑁆𑀲 𑀲𑀩𑁆𑀩𑀲𑁄 𑀉𑀧𑀘𑁆𑀙𑀺𑀦𑁆𑀤𑀦𑀁𑀧𑀺 𑀇𑀫𑀲𑁆𑀲𑁂𑀯 𑀓𑀺𑀘𑁆𑀘𑀦𑁆𑀢𑀺 𑀬𑀼𑀢𑁆𑀢𑀁. 𑀬𑀁 𑀧𑀦 𑀫𑀳𑀸𑀝𑀻𑀓𑀸𑀬𑀁 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀜𑁆𑀘 𑀉𑀧𑀧𑀻𑀴𑀺𑀓𑀁 𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀙𑀺𑀦𑁆𑀤𑀢𑀺. 𑀦 𑀲𑀬𑀁 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀚𑀦𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀲𑀼𑀔𑀤𑀼𑀓𑁆𑀔𑀁 𑀧𑀻𑀴𑁂𑀢𑀺, 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀇𑀤𑀁 𑀤𑀺𑀲𑁆𑀯𑀸 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀤𑁆𑀥𑀸𑀦𑀁 𑀧𑀯𑀢𑁆𑀢𑀺𑀢𑀼𑀁 𑀦𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀼𑀔𑀲𑀦𑁆𑀢𑀸𑀦𑀁𑀯𑀸 𑀤𑀼𑀓𑁆𑀔𑀲𑀦𑁆𑀢𑀸𑀦𑀁𑀯𑀸 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀺𑀢𑀼𑀁 𑀦𑀤𑁂𑀢𑀺 𑀇𑀘𑁆𑀘𑁂𑀯𑀢𑁆𑀣𑁄. 𑀦 𑀧𑀦 𑀉𑀧𑀖𑀸𑀢𑀓𑀁 𑀯𑀺𑀬 𑀪𑀯𑀗𑁆𑀕𑀲𑀦𑁆𑀢𑀸𑀦𑁂𑀦 𑀲𑀳 𑀅𑀜𑁆𑀜𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀙𑀺𑀦𑁆𑀤𑀢𑀻𑀢𑀺.

[𑁧𑁪𑁩] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀚𑀦𑀓𑀁 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀯 𑀯𑀺𑀧𑀸𑀓𑀁 𑀚𑀦𑁂𑀢𑀺. 𑀉𑀧𑀖𑀸𑀢𑀓𑀁 𑀉𑀧𑀘𑁆𑀙𑁂𑀤𑀦𑀧𑀼𑀩𑁆𑀩𑀓𑀦𑁆𑀢𑀺 𑀇𑀤𑀁 𑀢𑀸𑀯 𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁’’. 𑀢𑀁 𑀦 𑀲𑀼𑀦𑁆𑀤𑀭𑀁.

𑀇𑀥 𑀧𑀼𑀩𑁆𑀩𑀓𑀢𑁂𑀦 𑀉𑀧𑀘𑁆𑀙𑁂𑀤𑀦𑀓𑀓𑀫𑁆𑀫𑁂𑀦 𑀫𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀢𑁆𑀣𑀽𑀦𑀁 𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀆𑀕𑀢𑀢𑁆𑀢𑀸𑀢𑀺.

[𑁧𑁪𑁪] 𑀬𑀜𑁆𑀘 𑀢𑀢𑁆𑀣

𑀅𑀧𑀭𑁂 𑀧𑀦 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻𑀢𑀺𑀆𑀤𑀺𑀦𑀸 𑀉𑀧𑀖𑀸𑀢𑀓𑀲𑁆𑀲 𑀲𑀬𑀁 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸 𑀪𑀸𑀯𑀯𑀘𑀦𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀢𑁂𑀦𑁂𑀯 𑀓𑀫𑁆𑀫𑁂𑀦 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑀼𑀲𑁆𑀲𑀺𑀫𑀸𑀭 𑀓𑀮𑀸𑀩𑀼𑀭𑀸𑀚𑀸 𑀤𑀻𑀦𑀁 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀲𑀼 𑀆𑀕𑀢𑀢𑁆𑀢𑀸𑀢𑀺. [𑀚𑀦𑀓𑀘𑀢𑀼𑀓𑁆𑀓𑀁]

𑁧𑁪𑁬. 𑀕𑀭𑀼𑀓𑀦𑁆𑀢𑀺 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀼𑀲𑀮𑀧𑀓𑁆𑀔𑁂 𑀫𑀳𑀕𑁆𑀕𑀢𑀓𑀫𑁆𑀫𑀁 𑀅𑀓𑀼𑀲𑀮𑀧𑀓𑁆𑀔𑁂 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀳 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀁. 𑀏𑀢𑁆𑀣 𑀲𑀺𑀬𑀸. 𑀫𑀳𑀕𑁆𑀕𑀢𑀓𑀫𑁆𑀫𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀫𑀸𑀤𑀯𑀲𑁂𑀦𑀯𑀸 𑀦𑀻𑀯𑀭𑀡𑀥𑀫𑁆𑀫𑀧𑀯𑀢𑁆𑀢𑀺𑀬𑀸𑀯𑀸 𑀧𑀭𑀺𑀳𑀸𑀬𑀺𑀬𑀫𑀸𑀦𑀁 𑀦𑀺𑀓𑀦𑁆𑀢𑀺𑀩𑀮𑁂𑀦𑀯𑀸 𑀧𑀝𑀺𑀩𑀸𑀳𑀺𑀬𑀫𑀸𑀦𑀁 𑀯𑀺𑀧𑀸𑀓𑀁 𑀦 𑀤𑁂𑀢𑀻𑀢𑀺. 𑀢𑀣𑀸 𑀏𑀓𑀲𑁆𑀲 𑀩𑀳𑀽𑀲𑀼 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀲𑀼 𑀓𑀢𑁂𑀲𑀼 𑀏𑀓𑀲𑁆𑀫𑀺𑀁 𑀯𑀺𑀧𑀘𑁆𑀘𑀦𑁆𑀢𑁂 𑀲𑁂𑀲𑀸𑀦𑀺 𑀦 𑀯𑀺𑀧𑀘𑁆𑀘𑀦𑁆𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀫𑀳𑀕𑁆𑀕𑀢𑀓𑀫𑁆𑀫𑀁 𑀢𑀸𑀯𑀣𑀧𑁂𑀢𑁆𑀯𑀸 𑀧𑀫𑀸𑀤𑀥𑀫𑁆𑀫𑀦𑀻𑀯𑀭𑀡𑀥𑀫𑁆𑀫𑀦𑀺𑀓𑀦𑁆𑀢𑀺𑀥𑀫𑁆𑀫𑁂 𑀅𑀢𑁆𑀢𑀦𑁄 𑀩𑀮𑀯𑀢𑀭𑀜𑁆𑀘 𑀫𑀳𑀕𑁆𑀕𑀢𑀓𑀫𑁆𑀫𑀦𑁆𑀢𑀭𑀁 𑀅𑀜𑁆𑀜𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀅𑀧𑁆𑀧𑀝𑀺𑀩𑀸𑀳𑀦𑀺𑀬𑀝𑁆𑀞𑁂𑀦 𑀕𑀭𑀼𑀓𑀁 𑀦𑀸𑀫 𑀳𑁄𑀢𑀺. 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀧𑀦 𑀣𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀯𑀢𑀭𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀅𑀧𑁆𑀧𑀝𑀺𑀩𑀸𑀳𑀦𑀺𑀬𑀝𑁆𑀞𑁂𑀦𑀸𑀢𑀺 𑀏𑀯𑀁 𑀬𑀣𑀸𑀭𑀳𑀁 𑀢𑁂𑀲𑀁 𑀕𑀭𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀆𑀲𑀦𑁆𑀦𑀦𑁆𑀢𑀺 𑀫𑀭𑀡𑀓𑀸𑀮𑁂 𑀅𑀦𑀼𑀲𑁆𑀲𑀭𑀺𑀢𑀁 𑀢𑀤𑀸 𑀓𑀢𑀜𑁆𑀘. 𑀢𑀢𑁆𑀣 𑀢𑀤𑀸𑀓𑀢𑀦𑁆𑀢𑀺 𑀅𑀦𑁆𑀢𑀺𑀫 𑀚𑀯𑀦𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀆𑀲𑀦𑁆𑀦𑁂 𑀓𑀢𑀁 𑀬𑀁𑀓𑀺𑀜𑁆𑀘𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀁 𑀧𑀦 𑀯𑀺𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀜𑁆𑀘 𑀅𑀦𑁆𑀢𑀺𑀫𑀚𑀯𑀦𑀯𑀻𑀲𑀺𑀬𑀁𑀧𑀺 𑀓𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀣𑀸𑀳-𑀫𑀭𑀡𑀓𑀸𑀮𑁂 𑀯𑀸𑀲𑁆𑀲 𑀳𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸𑀢𑀺. 𑀏𑀢𑁂𑀦 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀢𑁄 𑀅𑀜𑁆𑀜𑀁 𑀅𑀦𑁆𑀢𑀺𑀫𑀚𑀯𑀦𑀯𑀻𑀣𑀺𑀬𑀁 𑀧𑀯𑀢𑁆𑀢𑀁 𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺. 𑀆𑀘𑀺𑀡𑁆𑀡𑀦𑁆𑀢𑀺 𑀤𑀻𑀖𑀭𑀢𑁆𑀢𑀁 𑀅𑀪𑀺𑀡𑁆𑀳𑀲𑁄 𑀓𑀢𑀁. 𑀲𑀓𑀺𑀁 𑀓𑀭𑀺𑀢𑁆𑀯𑀸𑀧𑀺𑀯𑀸 𑀧𑀘𑁆𑀙𑀸 𑀧𑀼𑀦𑀧𑁆𑀧𑀼𑀦𑀁 𑀲𑁄𑀫𑀦𑀲𑁆𑀲𑀚𑀦𑀓𑀁 𑀲𑀦𑁆𑀢𑀸𑀧𑀚𑀦𑀓𑀜𑁆𑀘. 𑀓𑀝𑀢𑁆𑀢𑀸𑀓𑀫𑁆𑀫𑀦𑁆𑀢𑀺 𑀓𑀸𑀭𑀺𑀬𑀺𑀢𑁆𑀣𑀸𑀢𑀺 𑀓𑀫𑁆𑀫𑀦𑁆𑀢𑀺 𑀏𑀯𑀁 𑀓𑀢𑀓𑀸𑀭𑀡𑀸𑀏𑀯 𑀓𑀫𑁆𑀫𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀕𑀭𑀼𑀓𑀸𑀤𑀺𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀓𑀢𑀸𑀦𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀸𑀦𑀺𑀏𑀯. 𑀓𑀝𑀢𑁆𑀢𑀸𑀓𑀫𑁆𑀫𑀁 𑀧𑀦 𑀅𑀢𑀻𑀢𑀪𑀯𑁂𑀲𑀼 𑀓𑀢𑁂𑀳𑀺 𑀅𑀧𑀭𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑁂𑀳𑀺 𑀲𑀳 𑀇𑀫𑀲𑁆𑀫𑀺𑀁 𑀪𑀯𑁂 𑀓𑀢𑀁 𑀕𑀭𑀼𑀓𑀸 𑀲𑀦𑁆𑀦𑀸𑀘𑀺𑀡𑁆𑀡𑀪𑀸𑀯𑀭𑀳𑀺𑀢𑀁 𑀓𑀫𑁆𑀫𑀧𑀣𑀧𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀓𑀫𑁆𑀫𑀁. 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀓𑀝𑀢𑁆𑀢𑀸𑀓𑀫𑁆𑀫𑀁 𑀧𑀼𑀭𑀺𑀫 𑀚𑀸𑀢𑀻𑀲𑀼 𑀓𑀢𑀁𑀏𑀯 𑀕𑀳𑀺𑀢𑀁. 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀏𑀢𑁂𑀳𑀺 𑀧𑀦 𑀢𑀻𑀳𑀺 𑀫𑀼𑀢𑁆𑀢𑀁 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀁 𑀓𑀝𑀢𑁆𑀢𑀸𑀯𑀸 𑀧𑀦 𑀓𑀫𑁆𑀫𑀁𑀦𑀸𑀫 𑀳𑁄𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀦 𑀘 𑀅𑀢𑀻𑀢𑀪𑀯𑁂𑀲𑀼 𑀓𑀢𑀸𑀦𑀺 𑀫𑀸𑀢𑀼𑀖𑀸𑀢𑀓𑀸𑀤𑀻𑀦𑀺𑀧𑀺 𑀅𑀧𑀭𑀧𑀭𑀺𑀬𑀸𑀬 𑀓𑀫𑁆𑀫𑀸𑀦𑀺 𑀏𑀢𑁂𑀳𑀺 𑀢𑀻𑀳𑀺 𑀫𑀼𑀢𑁆𑀢𑀸𑀦𑀻𑀢𑀺𑀯𑀸 𑀅𑀫𑀼𑀢𑁆𑀢𑀸𑀦𑀻𑀢𑀺𑀯𑀸 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀸𑀲𑁂𑀯𑀦𑀸𑀦𑀻𑀢𑀺𑀯𑀸 𑀅𑀮𑀤𑁆𑀥𑀸𑀲𑁂𑀯𑀦𑀸𑀦𑀻𑀢𑀺𑀯𑀸 𑀲𑀓𑁆𑀓𑀸 𑀯𑀺𑀲𑁂𑀲𑁂𑀢𑀼𑀁. 𑀢𑀤𑀸 𑀳𑀺 𑀢𑀸𑀦𑀺 𑀕𑀭𑀼𑀓 𑀓𑀫𑁆𑀫𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀆𑀲𑀦𑁆𑀦𑀯𑀘𑀺𑀡𑁆𑀡𑀓𑀫𑁆𑀫𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀺𑀧𑀻𑀢𑀺.

𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 𑀏𑀢𑁂𑀳𑀺 𑀧𑀦 𑀢𑀻𑀳𑀺 𑀫𑀼𑀢𑁆𑀢𑀁 𑀅𑀜𑁆𑀜𑀸𑀡𑀯𑀲𑁂𑀦𑀓𑀢𑀁 𑀓𑀝𑀢𑁆𑀢𑀸𑀯𑀸 𑀧𑀦 𑀓𑀫𑁆𑀫𑀁𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀦 𑀢𑀸𑀦𑀺 𑀅𑀜𑁆𑀜𑀸𑀡𑀯𑀲𑁂𑀦 𑀓𑀪𑀸𑀦𑀻𑀢𑀺 𑀲𑀓𑁆𑀓𑀸 𑀯𑀺𑀲𑁂𑀲𑁂𑀢𑀼𑀁. 𑀢𑀸𑀦𑀺 𑀳𑀺 𑀧𑀼𑀭𑀺𑀫𑀪𑀯𑁂𑀲𑀼 𑀅𑀜𑁆𑀜𑀸𑀡 𑀯𑀲𑁂𑀦 𑀓𑀢𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀜𑀸𑀡𑀯𑀲𑁂𑀦 𑀓𑀢𑀸𑀦𑀺𑀧𑀻𑀢𑀺. 𑀢𑀸𑀦𑀺 𑀧𑀦 𑀯𑀺𑀲𑁂𑀲𑀦𑀸𑀦𑀺 𑀇𑀫𑀲𑁆𑀫𑀺𑀁 𑀪𑀯𑁂 𑀓𑀢𑀸𑀦𑀁 𑀕𑀭𑀼𑀓𑀸𑀤𑀻𑀳𑀺 𑀢𑀻𑀳𑀺 𑀫𑀼𑀢𑁆𑀢𑀸𑀦𑀁 𑀲𑀢𑁆𑀢𑀫𑀚𑀯𑀦 𑀓𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀢𑁂𑀳𑀺 𑀲𑀳 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀢𑀸𑀦𑀺 𑀅𑀧𑀭𑀧𑀭𑀺𑀬𑀸𑀬 𑀓𑀫𑁆𑀫𑀸𑀦𑀺 𑀓𑀝𑀢𑁆𑀢𑀸 𑀓𑀫𑁆𑀫𑀁𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀢𑁆𑀣 𑀢𑀁𑀧𑀼𑀩𑁆𑀩𑀓𑀢𑀁 𑀓𑀫𑁆𑀫𑀦𑁆𑀢𑀺 𑀆𑀕𑀢𑀁. 𑀢𑀢𑁆𑀣𑀧𑀺 𑀇𑀫𑀲𑁆𑀫𑀺𑀁 𑀪𑀯𑁂𑀯𑀸 𑀅𑀢𑀻𑀢𑀪𑀯𑁂𑀲𑀼𑀯𑀸 𑀧𑀼𑀩𑁆𑀩𑀓𑀸𑀮𑁂 𑀓𑀢𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀕𑀭𑀼𑀓𑀫𑁂𑀯 𑀅𑀦𑀦𑁆𑀢𑀭𑁂 𑀪𑀯𑁂 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀕𑀭𑀼𑀓𑁂 𑀅𑀲𑀢𑀺 𑀆𑀲𑀦𑁆𑀦𑀁. 𑀆𑀲𑀦𑁆𑀦𑁂 𑀅𑀲𑀢𑀺 𑀆𑀘𑀺𑀡𑁆𑀡𑀁. 𑀆𑀘𑀺𑀡𑁆𑀡𑁂 𑀅𑀲𑀢𑀺 𑀓𑀝𑀢𑁆𑀢𑀸𑀓𑀫𑁆𑀫𑀁. 𑀢𑁂𑀦𑀸𑀳 𑀧𑀸𑀓𑀤𑀸𑀦𑀧𑀭𑀺𑀬𑀸𑀬𑁂𑀦𑀸𑀢𑀺. 𑀧𑀸𑀓𑀤𑀸𑀦𑀯𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀲𑀺𑀬𑀸. 𑀓𑀲𑁆𑀫𑀸 𑀇𑀥 𑀆𑀲𑀦𑁆𑀦𑀁 𑀆𑀘𑀺𑀡𑁆𑀡𑀢𑁄 𑀧𑀣𑀫𑀁 𑀯𑀼𑀢𑁆𑀢𑀁. 𑀦𑀦𑀼 𑀧𑀸𑀴𑀺𑀬𑀁 𑀆𑀲𑀦𑁆𑀦𑀢𑁄 𑀆𑀘𑀺𑀡𑁆𑀡𑀫𑁂𑀯 𑀧𑀣𑀫𑀁 𑀯𑀼𑀢𑁆𑀢𑀁. 𑀬𑀣𑀸𑀳-𑀬𑀁 𑀕𑀭𑀼𑀓𑀁 𑀬𑀁 𑀩𑀳𑀼𑀮𑀁. 𑀬𑀤𑀸𑀲𑀦𑁆𑀦𑀁. 𑀓𑀝𑀢𑁆𑀢𑀸𑀯𑀸 𑀧𑀦 𑀓𑀫𑁆𑀫𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼𑀘 𑀢𑁂𑀦𑁂𑀯 𑀓𑀫𑁂𑀦 𑀧𑀸𑀓𑀤𑀸𑀦𑀯𑀸𑀭𑁄 𑀯𑀺𑀳𑀺𑀢𑁄𑀢𑀺. 𑀯𑀼𑀘𑁆𑀘𑀢𑁂, 𑀲𑀪𑀸𑀯𑀢𑁄 𑀩𑀮𑀯𑀤𑀼𑀩𑁆𑀩𑀮𑀓𑁆𑀓𑀫𑁂𑀦 𑀧𑀸𑀴𑀺𑀬𑀁 𑀆𑀘𑀺𑀡𑁆𑀡𑀁 𑀧𑀣𑀫𑀁 𑀯𑀼𑀢𑁆𑀢𑀁. 𑀲𑁄 𑀧𑀦 𑀓𑀫𑁄 𑀓𑀤𑀸𑀘𑀺 𑀧𑀸𑀓𑀤𑀸𑀦𑀧𑀭𑀺𑀬𑀸𑀬𑁄𑀧𑀺 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀲𑀼 𑀢𑁂𑀦𑁂𑀯 𑀓𑀫𑁂𑀦 𑀧𑀸𑀓𑀤𑀸𑀦𑀯𑀸𑀭𑁄 𑀯𑀺𑀳𑀺𑀢𑁄. 𑀆𑀲𑀦𑁆𑀦𑀁𑀧𑀺 𑀳𑀺𑀲𑀫𑀸𑀦𑀁 𑀘𑀺𑀢𑁆𑀢𑀁 𑀢𑁄𑀲𑁂𑀢𑀼𑀁𑀯𑀸 𑀲𑀦𑁆𑀢𑀸𑀧𑁂𑀢𑀼𑀁𑀯𑀸 𑀅𑀲𑀓𑁆𑀓𑁄𑀦𑁆𑀢𑀁 𑀳𑀼𑀢𑁆𑀯𑀸 𑀤𑀼𑀩𑁆𑀩𑀮𑀁 𑀩𑀮𑀯𑀢𑁄 𑀆𑀘𑀺𑀡𑁆𑀡𑀲𑁆𑀲 𑀦𑀺𑀯𑀢𑁆𑀢𑀓𑀁 𑀦 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀧𑀦 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑁂 𑀧𑀼𑀩𑁆𑀩𑁂𑀯𑀸𑀲𑁆𑀲𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁. 𑀧𑀘𑁆𑀙𑀸𑀯𑀸𑀲𑁆𑀲𑀢𑀁 𑀓𑀢𑀁 𑀳𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁. 𑀫𑀭𑀡𑀓𑀸𑀮𑁂𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸𑀢𑀺 𑀏𑀯𑀁 𑀆𑀘𑀺𑀡𑁆𑀡𑀤𑀼𑀘𑁆𑀘𑀭𑀺𑀢𑀲𑁆𑀲𑀧𑀺 𑀏𑀓𑀘𑁆𑀘𑀲𑁆𑀲 𑀆𑀲𑀦𑁆𑀦𑁂𑀦 𑀓𑀮𑁆𑀬𑀸𑀡 𑀓𑀫𑁆𑀫𑁂𑀦 𑀲𑀕𑁆𑀕𑀕𑀫𑀦𑀁 𑀯𑀼𑀢𑁆𑀢𑀁. 𑀢𑀣𑀸 𑀧𑀼𑀩𑁆𑀩𑁂𑀯𑀸𑀲𑁆𑀲𑀢𑀁 𑀓𑀢𑀁 𑀳𑁄𑀢𑀺 𑀧𑀸𑀧𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀁.𑀮. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸𑀢𑀺 𑀏𑀯𑀁 𑀆𑀘𑀺𑀡𑁆𑀡 𑀲𑀼𑀘𑀭𑀺𑀢𑀲𑁆𑀲𑀧𑀺 𑀏𑀓𑀘𑁆𑀘𑀲𑁆𑀲 𑀆𑀲𑀦𑁆𑀦𑁂𑀦 𑀧𑀸𑀧𑀓𑀫𑁆𑀫𑁂𑀦 𑀅𑀧𑀸𑀬𑀕𑀫𑀦𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸𑀘 𑀉𑀪𑀺𑀦𑁆𑀦𑀁𑀧𑀺 𑀩𑀮𑀯𑀪𑀸𑀯𑁂 𑀲𑀢𑀺 𑀆𑀲𑀦𑁆𑀦𑀫𑁂𑀯 𑀧𑀭𑀺𑀬𑀢𑁆𑀢𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀲𑁆𑀫𑀸 𑀇𑀥 𑀣𑁂𑀭𑁂𑀦 𑀆𑀲𑀦𑁆𑀦𑀫𑁂𑀯 𑀧𑀣𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀧𑀼𑀩𑁆𑀩𑁂𑀯𑀸𑀲𑁆𑀲𑀓𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀆𑀲𑀦𑁆𑀦𑀸𑀦𑀼𑀲𑁆𑀲𑀭𑀺𑀢𑀓𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀫𑁆𑀩𑀤𑀸𑀞𑀺𑀓𑀦𑀸𑀫𑀲𑁆𑀲 𑀘𑁄𑀭𑀖𑀸𑀢𑀓𑀲𑁆𑀲 𑀫𑀳𑀸𑀯𑀸𑀢𑀓𑀸𑀮𑀦𑀸𑀫𑀲𑁆𑀲𑀘 𑀉𑀧𑀸𑀲𑀓𑀲𑁆𑀲 𑀯𑀢𑁆𑀣𑀼 𑀏𑀢𑁆𑀣 𑀓𑀣𑁂𑀢𑀩𑁆𑀩𑀦𑁆𑀢𑀺.

[𑁧𑁪𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁 𑀚𑀭𑀕𑁆𑀕𑀯𑁄𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀆𑀲𑀦𑁆𑀦𑀫𑁂𑀯 𑀧𑀣𑀫𑀁 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀏𑀓𑀁𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀏𑀯𑀁 𑀏𑀓𑀁𑀲𑁂𑀦 𑀯𑀼𑀢𑁆𑀢𑀁. 𑀦𑀘 𑀉𑀝𑁆𑀞𑀸𑀢𑀼𑀁𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀲𑁄 𑀚𑀭𑀕𑁆𑀕𑀯𑁄 𑀧𑀚𑀤𑁆𑀯𑀸𑀭𑀲𑁆𑀲 𑀆𑀲𑀦𑁆𑀦𑁂 𑀞𑀺𑀢𑁄𑀧𑀺 𑀧𑀣𑀫𑀢𑀭𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀻𑀢𑀺. [𑀕𑀭𑀼𑀓𑀘𑀢𑀼𑀓𑁆𑀓𑀁]

𑁧𑁪𑁭. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀪𑀸𑀯𑁄. 𑀯𑁂𑀤𑀺𑀢𑀩𑁆𑀩𑀁 𑀅𑀦𑀼 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑁂𑀤𑀦𑀻𑀬𑀁. 𑀨𑀮𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀯𑁂𑀤𑀦𑀻𑀬𑀁 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁.

[𑁧𑁪𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀤𑀺𑀝𑁆𑀞𑀥𑀫𑁆𑀫𑁂 𑀯𑁂𑀤𑀺𑀢𑀩𑁆𑀩𑀁 𑀯𑀺𑀧𑀸𑀓𑀸𑀦𑀼𑀪𑀯𑀦 𑀯𑀲𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀏𑀢𑁂𑀦 𑀇𑀥 𑀯𑁂𑀤𑀦𑀻𑀬𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄 𑀯𑀺𑀧𑀸𑀓𑀸𑀢𑀺𑀥𑁂𑀬𑁆𑀬𑁄𑀘 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀘 𑀲𑀢𑀺 𑀇𑀥 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀏𑀯 𑀮𑀩𑁆𑀪𑀢𑀺. 𑀦 𑀉𑀢𑁆𑀢𑀭𑀧𑀤𑀢𑁆𑀣𑀲𑀫𑀸𑀲𑁄𑀢𑀺. 𑀤𑀺𑀝𑁆𑀞𑀥𑀫𑁆𑀫𑀁 𑀉𑀧𑁂𑀘𑁆𑀘 𑀢𑀲𑁆𑀲 𑀅𑀦𑀦𑁆𑀢𑀭𑁂 𑀧𑀚𑁆𑀚𑀺𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀉𑀧𑀧𑀚𑁆𑀚 𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀉𑀧𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀧𑀤𑁂𑀲𑀼 𑀧𑀦 𑀉𑀧𑀧𑀚𑁆𑀚𑁂𑀯𑀸𑀢𑀺 𑀧𑀸𑀞𑁄 𑀤𑀺𑀝𑁆𑀞𑁄. 𑀢𑀲𑁆𑀫𑀸 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀲𑀫𑀻𑀧𑁂 𑀅𑀦𑀦𑁆𑀢𑀭𑁂 𑀧𑀚𑁆𑀚𑀺𑀢𑀩𑁆𑀩𑁄 𑀕𑀦𑁆𑀢𑀩𑁆𑀩𑁄𑀢𑀺 𑀉𑀧𑀧𑀚𑁆𑀚𑁄. 𑀤𑀼𑀢𑀻𑀬𑁄 𑀅𑀢𑁆𑀢𑀪𑀸𑀯𑁄 𑀉𑀧𑀧𑀚𑁆𑀚𑁂𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀦𑁆𑀢𑀺 𑀏𑀯𑀫𑀢𑁆𑀣𑁄 𑀧𑀸𑀞𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀧𑀚𑁆𑀚𑀸𑀢𑀺𑀯𑀸 𑀅𑀦𑀦𑁆𑀢𑀭𑁂 𑀪𑀯𑁂 𑀧𑀯𑀢𑁆𑀢𑁄 𑀏𑀓𑁄 𑀦𑀺𑀧𑀸𑀢𑁄. 𑀬𑀣𑀸 𑀧𑀘𑁆𑀘𑀸𑀢𑀺.

[𑁧𑁪𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀤𑀺𑀝𑁆𑀞𑀥𑀫𑁆𑀫𑀢𑁄 𑀅𑀦𑀦𑁆𑀢𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀉𑀧𑀯𑀚𑁆𑀚𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀉𑀧𑀧𑀚𑁆𑀚𑀯𑀸 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀬𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀢𑀻𑀢𑀺 𑀧𑀭𑀺𑀬𑀸𑀬𑁄. 𑀅𑀧𑀭𑁄𑀘 𑀲𑁄 𑀧𑀭𑀺𑀬𑀸 𑀬𑁄𑀘𑀸𑀢𑀺 𑀅𑀧𑀭𑀧𑀭𑀺𑀬𑀸𑀬𑁄. 𑀤𑀺𑀝𑁆𑀞𑀥𑀫𑁆𑀫𑀸 𑀦𑀸𑀕𑀢𑀸 𑀦𑀦𑁆𑀢𑀭 𑀪𑀯𑁂𑀳𑀺 𑀅𑀜𑁆𑀜𑁄 𑀅𑀢𑁆𑀢 𑀪𑀸𑀯 𑀧𑀭𑀺𑀯𑀢𑁆𑀢𑁄. 𑀢𑁂 𑀦𑁂𑀯 𑀳𑀺 𑀫𑀳𑀸𑀝𑀻𑀓𑀸𑀬𑀁 𑀅𑀗𑁆𑀕𑀼𑀢𑁆𑀢 𑀭𑀝𑀻𑀓𑀸𑀬𑀜𑁆𑀘 𑀅𑀧𑀭𑀧𑀭𑀺𑀬𑀸𑀬𑁂𑀢𑀺 𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀭𑀸𑀦𑀸𑀕𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂 𑀅𑀢𑁆𑀢𑀪𑀸𑀯𑀧𑀭𑀺𑀯𑀢𑁆𑀢𑁂𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀧𑀤𑁂𑀲𑀼 𑀧𑀦 𑀅𑀧𑀭𑁂𑀯𑀸 𑀧𑀭𑀺𑀬𑀸𑀬𑁂𑀢𑀺𑀘 𑀅𑀧𑀭𑀸𑀧𑀭𑁂𑀯𑀸 𑀧𑀭𑀺𑀬𑀸𑀬𑁂𑀢𑀺𑀘 𑀤𑁆𑀯𑀺𑀥𑀸 𑀧𑀸𑀞𑁄 𑀤𑀺𑀝𑁆𑀞𑁄. 𑀢𑀢𑁆𑀣 𑀧𑀘𑁆𑀙𑀺𑀫𑀲𑁆𑀫𑀺𑀁 𑀧𑀸𑀞𑁂𑀲𑀢𑀺 𑀇𑀥 𑀫𑀚𑁆𑀛𑁂 𑀏𑀓𑀲𑁆𑀲 𑀅𑀧𑀭𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀲𑀗𑁆𑀕𑀳𑀧𑁄𑀝𑁆𑀞𑀓𑁂𑀲𑀼 𑀧𑀦 𑀫𑀚𑁆𑀛𑁂 𑀤𑀻𑀖𑁄 𑀬𑀸𑀓𑀸𑀭𑀦𑀝𑁆𑀞𑁄𑀘 𑀅𑀧𑀭𑀸𑀧𑀭𑀺𑀬𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀲𑁄 𑀩𑀳𑀽𑀲𑀼 𑀅𑀝𑁆𑀞𑀓𑀣𑀸𑀲𑀼 𑀦𑀢𑁆𑀣𑀺. 𑀧𑀸𑀴𑀺𑀬𑀸𑀘 𑀦 𑀲𑀫𑁂𑀢𑀺.

[𑁧𑁪𑁮] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀅𑀧𑀭𑁂 𑀅𑀧𑀭𑁂 𑀤𑀺𑀝𑁆𑀞𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀫𑀺𑀁 𑀬𑀢𑁆𑀣𑀓𑀢𑁆𑀣𑀘𑀺 𑀅𑀢𑁆𑀢𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑀁 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬 𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀢𑁄𑀢𑀺 𑀇𑀤𑀁 𑀢𑀸𑀯 𑀦𑀬𑀼𑀚𑁆𑀚𑀢𑀺.

𑀦 𑀳𑀺 𑀫𑀚𑁆𑀛𑁂 𑀉𑀧𑀧𑀚𑁆𑀚𑀪𑀯𑀁 𑀯𑀚𑁆𑀚𑁂𑀢𑁆𑀯𑀸 𑀧𑀣𑀫𑁄 𑀤𑀺𑀝𑁆𑀞𑀥𑀫𑁆𑀫𑁄𑀯 𑀇𑀥 𑀢𑀢𑀻𑀬𑁂 𑀧𑀤𑁂 𑀅𑀥𑀺𑀓𑀢𑁄𑀢𑀺 𑀬𑀼𑀢𑁆𑀢𑁄.

[𑁧𑁪𑁯] 𑀅𑀢𑁆𑀣𑀢𑁄 𑀧𑀦 𑀩𑁆𑀬𑀜𑁆𑀚𑀦𑀢𑁄𑀘 𑀲𑀩𑁆𑀩𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺.

𑀅𑀧𑀭𑁂𑀯𑀸 𑀧𑀭𑀺𑀬𑀸𑀬𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀅𑀧𑀭𑀸𑀧𑀭𑁂𑀯𑀸 𑀧𑀭𑀺𑀬𑀸𑀬𑁂𑀢𑀺𑀯𑀸. 𑀅𑀳𑁄𑀲𑀺𑀦𑀸𑀫𑀓𑀁 𑀓𑀫𑁆𑀫𑀁 𑀅𑀳𑁄𑀲𑀺𑀓𑀫𑁆𑀫𑀁. 𑀅𑀳𑁄𑀲𑀺𑀓𑀫𑁆𑀫𑀁. 𑀪𑀯𑀺𑀲𑁆𑀲𑀢𑀺𑀓𑀫𑁆𑀫𑀁. 𑀅𑀢𑁆𑀣𑀺𑀓𑀫𑁆𑀫𑀁. 𑀦𑀢𑀲𑁆𑀲 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀯𑀼𑀢𑁆𑀢𑀧𑀸𑀞𑀯𑀲𑁂𑀦 𑀆𑀘𑀭𑀺𑀬𑁂𑀳𑀺 𑀢𑀣𑀸𑀕𑀳𑀺𑀢𑀦𑀸𑀫 𑀥𑁂𑀬𑁆𑀬𑀁 𑀲𑀩𑁆𑀩𑀲𑁄 𑀅𑀮𑀤𑁆𑀥𑀯𑀺𑀧𑀸𑀓𑀯𑀸𑀭𑀁 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀢𑁆𑀢𑀲𑀼 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑁂𑀲𑀼 𑀧𑀣𑀫𑀚𑀯𑀦𑀘𑁂𑀢𑀦𑀸 𑀤𑀺𑀝𑁆𑀞𑀥𑀫𑁆𑀫𑀯𑁂 𑀤𑀦𑀻𑀬𑀁𑀦𑀸𑀫. 𑀲𑀸 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀲𑀩𑁆𑀩𑀤𑀼𑀩𑁆𑀩𑀮𑀢𑁆𑀢𑀸 𑀅𑀘𑀺𑀭𑀝𑁆𑀞𑀺 𑀢𑀺𑀓𑀸𑀘 𑀳𑁄𑀢𑀺 𑀅𑀧𑁆𑀧𑀢𑀭𑀯𑀺𑀧𑀸𑀓𑀸𑀘𑀸𑀢𑀺. 𑀧𑀘𑁆𑀘𑀬𑀁 𑀮𑀤𑁆𑀥𑀸 𑀤𑀺𑀝𑁆𑀞𑀥𑀫𑁆𑀫𑁂𑀏𑀯 𑀅𑀳𑁂𑀢𑀼𑀓𑀫𑀢𑁆𑀢𑀁 𑀨𑀮𑀁 𑀤𑀢𑁆𑀯𑀸 𑀯𑀺𑀕𑀘𑁆𑀙𑀢𑀺. 𑀦 𑀏𑀓𑀁𑀧𑀺 𑀫𑀭𑀡𑀓𑀸𑀮𑀁 𑀅𑀢𑀺𑀓𑁆𑀓𑀫𑁆𑀫 𑀲𑀦𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀘𑁆𑀘𑀬𑀁 𑀧𑀦 𑀅𑀮𑀪𑀫𑀸𑀦𑀸 𑀅𑀳𑁄𑀲𑀺𑀓𑀁𑀦𑀸𑀫 𑀳𑁄𑀢𑀺. 𑀧𑀘𑁆𑀘𑀬𑁄𑀢𑀺𑀘 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀤𑀸𑀬𑀓𑁄 𑀦𑀸𑀦𑀸 𑀇𑀭𑀺𑀬𑀸𑀧𑀣𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸 𑀕𑀫𑀸𑀤𑀺𑀓𑁄 𑀬𑁄𑀓𑁄𑀘𑀺 𑀧𑀘𑁆𑀘𑀬𑁄𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀝𑀻𑀓𑀸𑀲𑀼 𑀧𑀦 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬𑀸𑀢𑀺𑀆𑀤𑀺𑀦𑀸 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄. 𑀲𑁄 𑀓𑀸𑀓𑀯𑀮𑀺𑀬𑀸𑀤𑀻𑀦𑀁 𑀯𑀺𑀬 𑀧𑀸𑀓𑀝𑀢𑀭𑀨𑀮𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀳𑀺 𑀓𑀫𑁆𑀫𑀧𑀣𑀚𑀯𑀦𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀫𑀸𑀦𑀸 𑀇𑀢𑀭𑀸𑀧𑀺𑀯𑀸 𑀧𑀣𑀫𑀚𑀯𑀦𑀘𑁂𑀢𑀦𑀸 𑀇𑀝𑁆𑀞𑀸𑀦𑀺𑀝𑁆𑀞𑀲𑀫𑀸𑀬𑁄𑀕𑀯𑀲𑁂𑀦𑀧𑀺 𑀮𑀤𑁆𑀥 𑀧𑀘𑁆𑀘𑀬𑀸 𑀓𑀸𑀘𑀺 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑀁 𑀨𑀮𑀁 𑀦 𑀤𑁂𑀢𑀻𑀢𑀺 𑀅𑀢𑁆𑀣𑀺. 𑀦𑀘𑀢𑀸𑀬 𑀤𑀺𑀬𑁆𑀬𑀫𑀸𑀦𑀁 𑀲𑀩𑁆𑀩𑀁𑀧𑀺 𑀨𑀮𑀁 𑀫𑀳𑀸𑀚𑀦𑀲𑁆𑀲𑀯𑀸 𑀓𑀫𑁆𑀫𑀓𑀸𑀭𑀓𑀲𑁆𑀲𑁂𑀯 𑀯𑀸𑀧𑀸𑀓𑀝𑀫𑁂𑀯 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀬𑀁 𑀧𑀦 𑀜𑀸𑀡𑀯𑀺𑀪𑀗𑁆𑀕𑀝𑁆𑀞 𑀓𑀣𑀸𑀬𑀁 𑀏𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀺𑀧𑀸𑀓𑀁 𑀤𑁂𑀢𑀺. 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀮𑀤𑁆𑀥𑀧𑀘𑁆𑀘𑀬𑀸𑀦𑀺 𑀲𑁂𑀲𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀏𑀓𑁄 𑀤𑀺𑀝𑁆𑀞𑀥𑀫𑁆𑀫𑁄 𑀏𑀓𑀲𑁆𑀲𑁂𑀯 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻 𑀬𑀲𑁆𑀲 𑀑𑀓𑀸𑀲𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀅𑀢𑁆𑀣𑀲𑀸𑀥𑀺𑀓𑀸 𑀧𑀦 𑀲𑀦𑁆𑀦𑀺𑀝𑁆𑀞𑀸𑀧𑀓𑀪𑀽𑀢𑀸 𑀲𑀢𑁆𑀣𑀫𑀚𑀯𑀦𑀘𑁂𑀢𑀦𑀸 𑀉𑀧𑀧𑀚𑁆𑀚 𑀯𑁂𑀤𑀦𑀻𑀬𑀁𑀦𑀸𑀫. 𑀲𑀸 𑀳𑀺 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀣𑁄𑀓𑀁 𑀲𑀸𑀭𑀪𑀽𑀢𑀸 𑀳𑁄𑀢𑀻𑀢𑀺 𑀧𑀣𑀫𑀘𑁂𑀢𑀦𑀸 𑀯𑀺𑀬 𑀲𑀻𑀖𑀢𑀭𑀁 𑀯𑀺𑀧𑀘𑁆𑀘𑀺𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀩𑀮𑀯𑀢𑀻𑀘 𑀳𑁄𑀢𑀻𑀢𑀺 𑀏𑀓𑀁 𑀪𑀯𑀁 𑀚𑀦𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀢𑀺𑀢 𑀚𑀯 𑀦𑁂𑀲𑀼 𑀧𑀦 𑀅𑀦𑁆𑀢𑀺𑀫𑀚𑀯𑀦𑀢𑀸𑀬 𑀫𑀚𑁆𑀛𑀺𑀫𑀘𑁂𑀢𑀦𑀸𑀬𑁄 𑀯𑀺𑀬 𑀘𑀺𑀭𑀝𑁆𑀞𑀺𑀢𑀺𑀓𑀸 𑀦 𑀳𑁄𑀢𑀻𑀢𑀺 𑀧𑀘𑁆𑀘𑀬𑀁 𑀮𑀤𑁆𑀥𑀸 𑀅𑀦𑀦𑁆𑀢𑀭𑁂 𑀏𑀯 𑀪𑀯𑁂 𑀧𑀝𑀺𑀲𑀦𑁆𑀥𑀺𑀁𑀯𑀸 𑀧𑀯𑀢𑁆𑀢𑀺 𑀨𑀮𑀫𑁂𑀯𑀯𑀸 𑀤𑀢𑁆𑀯𑀸 𑀯𑀺𑀕𑀘𑁆𑀙𑀢𑀺. 𑀅𑀮𑀤𑁆𑀥𑀸 𑀧𑀦 𑀅𑀳𑁄𑀲𑀺𑀓𑀫𑁆𑀫𑀫𑁂𑀯 𑀳𑁄𑀢𑀺. 𑀦 𑀤𑀼𑀢𑀻𑀬𑀁 𑀫𑀭𑀡𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀁𑀧𑀦 𑀜𑀸𑀡𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀏𑀓𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺. 𑀲𑁂𑀲𑀸𑀦𑀺 𑀅𑀯𑀺𑀧𑀸𑀓𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀸𑀦𑀺𑀧𑀺 𑀳𑀺 𑀬𑀸𑀯 𑀤𑀼𑀢𑀻𑀬𑀘𑀼𑀢𑀺 𑀦𑀸𑀕𑀘𑁆𑀙𑀢𑀺. 𑀢𑀸𑀯 𑀮𑀤𑁆𑀥𑀧𑀘𑁆𑀘𑀬𑀸𑀦𑀺 𑀧𑀯𑀢𑁆𑀢𑀺 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺𑀬𑁂𑀯. 𑀇𑀥 𑀫𑀺𑀲𑁆𑀲𑀓 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀅𑀦𑀦𑁆𑀢𑀭𑀪𑀯𑁂 𑀫𑀺𑀲𑁆𑀲𑀓𑀓𑀫𑁆𑀫𑀨𑀮𑀁 𑀅𑀦𑀼𑀪𑁄𑀦𑁆𑀢𑀸𑀦𑀺 𑀯𑁂𑀫𑀸𑀦𑀺𑀓 𑀧𑁂𑀢𑀯𑀢𑁆𑀣𑀽𑀦𑀺 𑀅𑀜𑁆𑀜𑀸𑀦𑀺𑀘 𑀢𑀁𑀢𑀁𑀓𑀫𑁆𑀫𑀁 𑀓𑀢𑁆𑀯𑀸 𑀅𑀦𑀦𑁆𑀢𑀭𑀪𑀯𑁂 𑀏𑀯 𑀲𑀼𑀕𑀢𑀺 𑀬𑀁 𑀓𑀩𑁆𑀩𑀺𑀧𑀸𑀓𑀪𑀽𑀢𑀁 𑀯𑀺𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸𑀦𑀺 𑀤𑀼𑀕𑁆𑀕𑀢𑀺𑀬𑀁𑀯𑀸 𑀢𑀩𑁆𑀩𑀺𑀧𑀸𑀓𑀪𑀽𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸𑀦𑀺 𑀅𑀦𑁂𑀓𑀸𑀦𑀺 𑀯𑀢𑁆𑀣𑀼𑀲𑀢𑀸𑀦𑀺 𑀏𑀢𑁆𑀣 𑀓𑀣𑁂 𑀢𑀩𑁆𑀩𑀸𑀦𑀻𑀢𑀺.

[𑁧𑁫𑁦] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀲𑀸𑀘 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸𑀯 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀅𑀤𑀺𑀦𑁆𑀦𑀸𑀬 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀽𑀳𑀺 𑀲𑀤𑁆𑀥𑀺𑀁 𑀯𑀺𑀭𑀼𑀚𑁆𑀛𑀦𑀢𑁄.

[𑁧𑁫𑁧] 𑀬𑀜𑁆𑀘 𑀢𑀢𑁆𑀣

‘‘𑀘𑀼𑀢𑀺 𑀅𑀦𑀦𑁆𑀢𑀭𑀜𑁆𑀳𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀑𑀓𑀸𑀲𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀓𑀸𑀭𑀡𑀁.

𑀧𑀼𑀢𑀺𑀅𑀦𑀦𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁𑀧𑀺 𑀑𑀓𑀸𑀲𑀲𑀫𑁆𑀪𑀯𑀢𑁄.

[𑁧𑁫𑁨] 𑀬𑀜𑁆𑀘 𑀢𑀢𑁆𑀣

‘‘𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀤𑀺𑀦𑁆𑀦𑀸𑀬 𑀚𑀸𑀢𑀺𑀲𑀢𑁂𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀻𑀢𑀺 𑀯𑀼𑀢𑁆𑀢𑀁’’. 𑀢𑀁𑀧𑀺 𑀦 𑀕𑀳𑁂𑀢𑀩𑁆𑀩𑀁.

𑀓𑀫𑁆𑀫𑀲𑀗𑁆𑀓𑀭𑀸𑀧𑀢𑁆𑀢𑀺𑀢𑁄. 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀅𑀧𑀭𑀧𑀭𑀺𑀬𑀸𑀬 𑀯𑁂𑀤𑀦𑀻𑀬𑀦𑁆𑀢𑀺 𑀢𑁂𑀲𑀁 𑀲𑀗𑁆𑀓𑀫𑀦𑀁 𑀦𑀢𑁆𑀣𑀺. 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀤𑀢𑁆𑀣𑀲𑀸𑀥𑀓𑀲𑁆𑀲 𑀅𑀝𑁆𑀞𑀓𑀣𑀸𑀧𑀤𑁂𑀲𑀲𑁆𑀲𑀯𑀸 𑀯𑀢𑁆𑀣𑀼𑀲𑁆𑀲𑀯𑀸 𑀬𑀼𑀢𑁆𑀢𑀺𑀬𑀸𑀯𑀸 𑀅𑀪𑀸𑀯𑀢𑁄𑀢𑀺. 𑀫𑀚𑁆𑀛𑁂 𑀧𑀦 𑀧𑀜𑁆𑀘𑀚𑀯𑀦 𑀘𑁂𑀢𑀦𑀸 𑀅𑀧𑀭𑀧𑀭𑀺𑀬𑀸𑀬 𑀯𑁂𑀤𑀦𑀻𑀬𑀁𑀦𑀸𑀫. 𑀏𑀢𑀸 𑀳𑀺 𑀲𑀼𑀝𑁆𑀞𑀼 𑀩𑀮𑀯𑀦𑁆𑀢𑀻 𑀲𑀸𑀭𑀪𑀽𑀢𑀸𑀘 𑀳𑁄𑀦𑁆𑀢𑀻𑀢𑀺 𑀦 𑀲𑀻𑀖𑀁 𑀯𑀺𑀧𑀘𑁆𑀘𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀘𑀺𑀭𑀝𑁆𑀞𑀺𑀢𑀺𑀓𑀸 𑀧𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀢𑀻𑀬𑀪𑀯𑀢𑁄 𑀧𑀝𑁆𑀞𑀸𑀬 𑀬𑀤𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀢𑀤𑀸 𑀧𑀜𑁆𑀘𑀯𑀸𑀭𑁂 𑀧𑀝𑀺𑀲𑀦𑁆𑀥𑀺𑀁 𑀤𑀢𑁆𑀯𑀸 𑀲𑀁𑀲𑀸𑀭𑀧𑀯𑀢𑁆𑀢𑀺𑀬𑀸 𑀲𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀦𑁆𑀢𑀻𑀢𑀺. 𑀇𑀫𑀸𑀦𑀺𑀬𑁂𑀯 𑀧𑀦 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀔𑁂𑀢𑁆𑀢𑁂 𑀲𑀩𑁆𑀩𑀲𑁄 𑀯𑀺𑀧𑀸𑀓𑀯𑀸𑀭𑀁 𑀅𑀮𑀪𑀫𑀸𑀦𑀸𑀦𑀺 𑀅𑀳𑁄𑀲𑀺𑀓𑀫𑁆𑀫𑀁𑀦𑀸𑀫. 𑀔𑁂𑀢𑁆𑀢𑀜𑁆𑀘 𑀦𑁂𑀲𑀁 𑀧𑀣𑀫𑀲𑁆𑀲 𑀤𑀺𑀝𑁆𑀞 𑀥𑀫𑁆𑀫𑀘𑀼𑀢𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀤𑀼𑀢𑀻𑀬𑀲𑁆𑀲 𑀅𑀦𑀸𑀕𑀢𑀸𑀦𑀦𑁆𑀢𑀭𑀪𑀯𑀘𑀼𑀢𑀺𑀬𑀸. 𑀢𑀢𑀻𑀬𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀘𑀼𑀢𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. [𑀤𑀺𑀝𑁆𑀞𑀥𑀫𑁆𑀫𑀘𑀢𑀼𑀓𑁆𑀓𑀁]

𑁧𑁪𑁮. 𑀧𑀸𑀓𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀅𑀧𑀸𑀬𑀸𑀤𑀺𑀓𑀲𑁆𑀲 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀲𑁆𑀲 𑀯𑀲𑁂𑀦 𑀢𑀣𑀸 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀓𑀼𑀲𑀮𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼. 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦𑀸𑀢𑀺 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀅𑀗𑁆𑀕𑀪𑀽𑀢𑀸𑀦𑀁 𑀓𑀸𑀬𑀸𑀤𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀯𑀲𑁂𑀦. 𑀧𑀸𑀡𑀁 𑀅𑀢𑀺𑀧𑀸𑀢𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄. 𑀅𑀢𑀺𑀧𑀸𑀢𑀦𑀜𑁆𑀘𑁂𑀢𑁆𑀣 𑀲𑀭𑀲𑀢𑁄 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑁆𑀢𑀭𑀸𑀏𑀯 𑀧𑀬𑁄𑀕𑀩𑀮𑁂𑀦 𑀧𑀸𑀢𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀅𑀕𑀫𑀦𑀻 𑀬𑀯𑀢𑁆𑀣𑀼𑀲𑀗𑁆𑀔𑀸𑀢𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄. 𑀢𑀢𑁆𑀣 𑀧𑀭𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀼𑀧𑀘𑁆𑀙𑁂𑀤𑀓𑀲𑁆𑀲 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄𑀦𑀸𑀫. 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀸𑀢𑁂𑀦𑁆𑀢𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄𑀦𑀸𑀫 𑀦𑀢𑁆𑀣𑀺. 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀢𑁄 𑀯𑀺𑀬𑁄𑀕𑀓𑀸𑀭𑀡𑀲𑁆𑀲 𑀓𑀸𑀬 𑀯𑀘𑀻𑀧𑀬𑁄𑀕𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀘𑁆𑀙𑀺𑀦𑁆𑀤𑀓𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁𑀦𑀸𑀫. 𑀅𑀕𑀫𑀦𑀻𑀬𑀯𑀢𑁆𑀣𑀽𑀲𑀼 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀸𑀤𑀓𑀲𑁆𑀲 𑀓𑀸𑀬𑀧𑀬𑁄𑀕𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀲𑁆𑀲𑀸𑀤𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄𑀦𑀸𑀫. 𑀓𑁂𑀘𑀺 𑀧𑀦𑀏𑀢𑁆𑀣𑀧𑀺 𑀅𑀕𑀫𑀦𑀻𑀬 𑀯𑀢𑁆𑀣𑀼𑀲𑀜𑁆𑀜𑀺𑀦𑁄𑀢𑀺 𑀧𑀤𑀁 𑀇𑀘𑁆𑀙𑀦𑁆𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀅𑀕𑀫𑀬𑀦𑀻𑀯𑀢𑁆𑀣𑀼 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀦𑁆𑀢𑀺 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀏𑀢𑁂𑀦 𑀅𑀕𑀫𑀦𑀻𑀬𑀯𑀢𑁆𑀣𑀼𑀫𑁆𑀳𑀺 𑀲𑀢𑀺 𑀕𑀫𑀦𑀻𑀬 𑀲𑀜𑁆𑀜𑀸𑀬𑀯𑀸 𑀅𑀕𑀫𑀦𑀻𑀬 𑀲𑀜𑁆𑀜𑀸𑀬𑀯𑀸 𑀲𑁂𑀯𑀦𑁆𑀢𑀲𑁆𑀲 𑀓𑀫𑁆𑀫𑀧𑀣𑁄 𑀳𑁄𑀢𑀺 𑀬𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀇𑀢𑀭𑀣𑀸 𑀅𑀕𑀫𑀦𑀻𑀬𑀯𑀢𑁆𑀣𑀼 𑀢𑀣𑀸 𑀲𑀜𑁆𑀜𑀺𑀢𑀸 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺.

𑀅𑀧𑀭𑁂 𑀧𑀦 𑀲𑀬𑀁 𑀧𑀬𑁄𑀕𑀁 𑀓𑀢𑁆𑀯𑀸 𑀅𑀢𑁆𑀢𑀦𑀺 𑀧𑀭𑁂𑀦 𑀓𑀭𑀻𑀬𑀫𑀸𑀦𑀁 𑀫𑀕𑁆𑀕𑁂𑀦 𑀫𑀕𑁆𑀕𑀧𑀝𑀺𑀧𑀸𑀤𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺𑀧𑀺 𑀦𑀢𑁆𑀣𑀺 𑀓𑀫𑁆𑀫𑀧𑁆𑀧𑀣𑀪𑁂𑀤𑁄. 𑀧𑀬𑁄𑀕𑀲𑁆𑀲 𑀅𑀪𑀸𑀯𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀯𑀦𑀘𑀺𑀢𑁆𑀢𑁂 𑀧𑀦 𑀲𑀢𑀺 𑀧𑀬𑁄𑀕𑁄 𑀅𑀧𑁆𑀧𑀫𑀸𑀡𑀦𑁆𑀢𑀺 𑀏𑀓𑁂. 𑀏𑀯𑀜𑁆𑀘 𑀲𑀢𑀺 𑀢𑀺𑀬𑀗𑁆𑀕𑀺𑀓𑁄𑀯 𑀫𑀺𑀘𑁆𑀙𑀸𑀘𑀸𑀭𑁄, 𑀦 𑀘𑀢𑀼𑀭𑀗𑁆𑀕𑀺𑀓𑁄𑀢𑀺 𑀆𑀧𑀚𑁆𑀚𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑁂𑀯𑀦 𑀧𑀬𑁄𑀕𑁂𑀦 𑀲𑀳 𑀘𑀢𑀼𑀭𑀗𑁆𑀕𑀺𑀓𑁄𑀯 𑀯𑀼𑀢𑁆𑀢𑁄𑀢𑀺 𑀅𑀜𑁆𑀜𑁂. 𑀲𑁂𑀯𑀦𑀧𑀬𑁄𑀕𑁄 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀮𑀩𑁆𑀪𑀫𑀸𑀦𑀢𑁆𑀢𑀸𑀬𑁂𑀯 𑀯𑀼𑀢𑁆𑀢𑁄. 𑀦 𑀧𑀦 𑀏𑀓𑀦𑁆𑀢𑀅𑀗𑁆𑀕𑀪𑀸𑀯𑀢𑁄. 𑀇𑀢𑀭𑀣𑀸 𑀇𑀢𑁆𑀣𑀻𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀬𑁄𑀕𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀢𑀸𑀲𑀁 𑀫𑀺𑀘𑁆𑀙𑀸𑀘𑀸𑀭𑁄 𑀤𑀼𑀮𑁆𑀮𑀪𑁄 𑀲𑀺𑀬𑀸𑀢𑀺 𑀘 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀤𑀽𑀲𑀦𑀁𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀲𑀸 𑀳𑀺 𑀭𑀓𑁆𑀔𑀺𑀢𑀸𑀲𑀼 𑀲𑀗𑁆𑀕𑀳𑀺𑀢𑀸𑀢𑀺. 𑀝𑀻𑀓𑀸𑀲𑀼 𑀧𑀦 𑀲𑀸 𑀥𑀫𑁆𑀫𑀭𑀓𑁆𑀔𑀺𑀢𑀸𑀧𑀺 𑀦 𑀳𑁄𑀢𑀺. 𑀓𑀼𑀢𑁄 𑀫𑀸𑀢𑀸𑀤𑀺𑀭𑀓𑁆𑀔𑀺𑀢𑀸. 𑀥𑀫𑁆𑀫𑁄𑀢𑀺 𑀳𑀺 𑀇𑀥 𑀧𑀸𑀲𑀡𑁆𑀟𑀺𑀬𑀥𑀫𑁆𑀫𑁄𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀲𑀸𑀲𑀦𑀥𑀫𑁆𑀫𑁄𑀧𑀺 𑀦𑀦 𑀬𑀼𑀢𑁆𑀢𑁄. 𑀲𑀩𑁆𑀭𑀳𑁆𑀫𑀘𑀸𑀭𑀺 𑀦𑀺𑀬𑁄𑀧𑀺 𑀉𑀧𑀚𑁆𑀛𑀸𑀬𑀺𑀦𑀻 𑀆𑀤𑀺𑀓𑀸 𑀢𑀲𑁆𑀲𑀸 𑀫𑀸𑀢𑀸𑀤𑀺𑀝𑁆𑀞𑀸𑀦𑀺𑀬𑀸𑀏𑀯 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀫𑀺𑀘𑁆𑀙𑀸𑀘𑀸𑀭𑁄𑀧𑀺 𑀤𑀼𑀲𑁆𑀲𑀻𑀮𑀸𑀬.𑀮. 𑀲𑀸𑀫𑀡𑁂𑀭𑀺𑀬𑀸, 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑀺𑀬𑀸, 𑀲𑁄𑀢𑀸𑀧𑀦𑁆𑀦𑀸𑀬, 𑀲𑀓𑀤𑀸𑀕𑀸𑀫𑀺𑀦𑀺𑀬𑀸, 𑀢𑀢𑁄 𑀅𑀦𑀸𑀕𑀸𑀫𑀺𑀦𑀺𑀬𑀸 𑀯𑀻𑀢𑀺𑀓𑁆𑀓𑀫𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀔𑀻𑀡𑀸𑀲𑀯𑀸𑀬 𑀧𑀦 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑁄𑀯𑀸𑀢𑀺 𑀯𑀼𑀢𑁆𑀢𑀁.

𑀓𑀲𑁆𑀫𑀸𑀧𑀦𑁂𑀢𑁆𑀣 𑀲𑀼𑀭𑀸𑀧𑀸𑀦𑀁 𑀦𑀕𑀳𑀺 𑀢𑀁. 𑀢𑀁𑀧𑀺𑀳𑀺 𑀅𑀧𑀸𑀬𑀲𑀁𑀯𑀢𑁆𑀢𑀦𑀺 𑀓𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀳-𑀲𑀼𑀭𑀸𑀫𑁂𑀭𑀬𑀧𑀸𑀦𑀁 𑀪𑀺𑀓𑁆𑀔𑀯𑁂 𑀆𑀲𑁂𑀯𑀺𑀢𑀁 𑀪𑀸𑀯𑀺𑀢𑀁 𑀩𑀳𑀼𑀮𑀻𑀓𑀢𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀲𑀁𑀯𑀢𑁆𑀢𑀦𑀺𑀓𑀁 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑀁. 𑀬𑁄𑀘 𑀲𑀩𑁆𑀩𑀮𑀳𑀼𑀓𑁄 𑀲𑀼𑀭𑀸𑀫𑁂𑀭𑀬 𑀧𑀸𑀦𑀲𑁆𑀲 𑀯𑀺𑀧𑀸𑀓𑁄. 𑀲𑁄 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻𑀢𑀺. 𑀅𑀝𑁆𑀞𑀓𑀣𑀸𑀲𑀼𑀧𑀺 𑀓𑁄𑀝𑁆𑀞𑀸𑀲𑀢𑁄 𑀧𑀜𑁆𑀘𑀧𑀺 𑀧𑀸𑀡𑀸𑀢𑀺𑀧𑀸𑀢𑀸 𑀤𑀬𑁄 𑀓𑀫𑁆𑀫𑀧𑀣𑀸𑀏𑀯𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀯𑀼𑀘𑁆𑀘𑀢𑁂, 𑀫𑀽𑀮𑀝𑀻𑀓𑀸𑀬𑀁 𑀢𑀸𑀯 𑀢𑀲𑁆𑀲 𑀲𑀪𑀸𑀕𑀢𑁆𑀢𑁂𑀦 𑀫𑀺𑀘𑁆𑀙𑀸𑀘𑀸𑀭𑁂 𑀉𑀧𑀓𑀸𑀭𑀓𑀢𑁆𑀢𑁂𑀦 𑀤𑀲𑀲𑀼𑀧𑀺 𑀓𑀫𑁆𑀫𑀧𑀣𑁂𑀲𑀼 𑀅𑀦𑀼𑀧𑀯𑁂𑀲𑁄𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀕𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀦𑀺𑀬𑀁 𑀲𑀼𑀭𑀸𑀧𑀸𑀦𑀁𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑀤𑀦𑁆𑀢𑀺 𑀭𑀲𑀲𑀗𑁆𑀔𑀸𑀢𑁂𑀲𑀼 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁. 𑀉𑀧𑀓𑀸𑀭𑀓𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑀻𑀓𑀸𑀬𑀁 𑀓𑀼𑀲𑀮𑀸𑀓𑀼𑀲𑀮𑀸𑀧𑀺𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀬𑁂𑀯 𑀓𑀫𑁆𑀫𑀧𑀣𑀸𑀢𑀺 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀅𑀦𑁂𑀓𑀦𑁆𑀢𑀺 𑀓𑀢𑁆𑀢𑀸 𑀓𑀫𑁆𑀫 𑀧𑀣𑀸𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀇𑀫𑀲𑁆𑀲 𑀯𑀸𑀓𑁆𑀬𑀲𑁆𑀲 𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸𑀯𑀲𑁂 𑀲𑀸𑀢𑀺 𑀲𑀼𑀭𑀸𑀧𑀸𑀦𑀸𑀤𑀬𑁄 𑀢𑀩𑁆𑀩𑀺𑀭𑀫𑀡𑀸𑀤𑀬𑁄𑀘. 𑀲𑀼𑀭𑀸𑀧𑀸𑀦𑀜𑁆𑀳𑀺 𑀫𑀤𑀲𑁆𑀲 𑀧𑀘𑁆𑀘𑀬𑁄. 𑀫𑀤𑁄 𑀅𑀧𑀼𑀜𑁆𑀜𑀧𑀣𑀲𑁆𑀲. 𑀢𑀩𑁆𑀩𑀺𑀭𑀢𑀺𑀧𑀺 𑀦𑀺𑀫𑁆𑀫𑀤𑀢𑀸𑀬. 𑀲𑀸𑀘 𑀧𑀼𑀜𑁆𑀜𑀧𑀣𑀲𑁆𑀲𑀸𑀢𑀺 𑀓𑀫𑁆𑀫𑀧𑀣𑀽𑀧𑀦𑀺𑀲𑁆𑀲𑀬𑀸𑀦𑀺 𑀢𑀸𑀦𑀺 𑀢𑀤𑀸𑀲𑀦𑁆𑀦𑀓𑀫𑁆𑀫𑀯𑀲𑁂𑀦 𑀲𑀦𑁆𑀥𑀺𑀚𑀦𑀓𑀸𑀦𑀺𑀧𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀸𑀲𑀦𑁆𑀦𑀓𑀫𑁆𑀫𑀯𑀲𑁂𑀦𑀸𑀢𑀺 𑀢𑀲𑁆𑀲 𑀲𑀼𑀭𑀸𑀧𑀸𑀦𑀲𑁆𑀲𑀯𑀸 𑀲𑀼𑀭𑀸𑀧𑀸𑀦𑀯𑀺𑀭𑀢𑀺𑀬𑀸𑀯𑀸 𑀆𑀲𑀦𑁆𑀦𑁂 𑀧𑀯𑀢𑁆𑀢𑀸𑀦𑀁 𑀢𑀫𑁆𑀫𑀽𑀮𑀓𑀸𑀦𑀁 𑀅𑀧𑀼𑀜𑁆𑀜𑀓𑀫𑁆𑀫𑀸𑀦𑀁𑀯𑀸 𑀧𑀼𑀜𑁆𑀜𑀓𑀫𑁆𑀫𑀸𑀦𑀁𑀯𑀸 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺-𑀬𑁄 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀲𑀼𑀭𑀸𑀫𑀤𑀳𑁂𑀢𑀼 𑀧𑀸𑀡𑀸 𑀧𑀸𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀲𑀼𑀭𑀸𑀧𑀸𑀦𑀁 𑀢𑀲𑁆𑀲𑀢𑀺 𑀓𑀫𑁆𑀫𑀲𑁆𑀲 𑀩𑀮𑀯𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺 𑀧𑀼𑀩𑁆𑀩𑀘𑁂𑀢𑀦𑀸𑀞𑀸𑀦𑀺𑀬𑀜𑁆𑀘. 𑀢𑀤𑁂𑀯 𑀯𑀺𑀲𑀼𑀁 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀺, 𑀦 𑀇𑀢𑀭𑀦𑁆𑀢𑀺. 𑀬𑀣𑀸 𑀳𑀺 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸 𑀬𑁄𑀧𑀺 𑀓𑀫𑁆𑀫𑀧𑀣𑀧𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸𑀏𑀯 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀦𑁆𑀢𑀺, 𑀦 𑀇𑀢𑀭𑀸. 𑀏𑀯𑀫𑀺𑀤𑀁𑀧𑀻𑀢𑀺. 𑀦 𑀳𑀺 𑀓𑀫𑁆𑀫𑀧𑀣𑀲𑀼𑀢𑁆𑀢𑁂𑀲𑀼 𑀲𑀭𑀽𑀧𑀢𑁄 𑀆𑀕𑀢𑀸𑀦𑀺𑀏𑀯 𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀦𑁆𑀢𑀺. 𑀦 𑀇𑀢𑀭𑀸𑀦𑀻𑀢𑀺 𑀲𑀓𑁆𑀓𑀸 𑀦𑀺𑀬𑀫𑁂𑀢𑀼𑀁. 𑀬𑀸𑀦𑀺 𑀧𑀦 𑀏𑀓𑀦𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀚𑀦𑀦𑀲𑀸𑀫𑀢𑁆𑀣𑀺𑀬 𑀬𑀼𑀢𑁆𑀢𑀸𑀦𑀺, 𑀢𑀸𑀦𑁂𑀯 𑀢𑀢𑁆𑀣 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸𑀦𑀺. 𑀬𑀸𑀦𑀺𑀧𑀦 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀅𑀦𑁂𑀓𑀦𑁆𑀢𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀢𑀢𑁆𑀣𑀲𑀭𑀽𑀧𑀢𑁄 𑀦 𑀯𑀼𑀢𑁆𑀢𑀸𑀦𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀣𑀸 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀓𑀼𑀲𑀮𑀸𑀓𑀼𑀲𑀮𑀸𑀧𑀺𑀘 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀬𑁂𑀯 𑀓𑀫𑁆𑀫𑀧𑀣𑀸𑀢𑀺 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀅𑀦𑁂𑀓𑀦𑁆𑀢𑀺 𑀓𑀢𑁆𑀢𑀸 𑀓𑀫𑁆𑀫𑀧𑀣𑀸𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀤𑀁𑀧𑀺 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀢𑀢𑁆𑀣 𑀲𑀭𑀽𑀧𑀢𑁄 𑀦 𑀯𑀼𑀢𑁆𑀢𑀦𑁆𑀢𑀺𑀘. 𑀬𑀁 𑀢𑀤𑀸 𑀲𑀦𑁆𑀦𑀓𑀫𑁆𑀫𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀚𑀦𑀓𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁. 𑀢𑀁 𑀢𑀢𑁆𑀣 𑀲𑀭𑀽𑀧𑀢𑁄 𑀯𑀼𑀢𑁆𑀢𑁂𑀲𑀼 𑀢𑀤𑀸 𑀲𑀦𑁆𑀦𑀓𑀫𑁆𑀫𑁂𑀲𑀼 𑀅𑀦𑀼𑀧𑀯𑀺𑀝𑁆𑀞𑀦𑁆𑀢𑀺𑀘 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀲𑁆𑀲 𑀧𑀦 𑀤𑀼𑀯𑀺𑀥𑀁 𑀓𑀺𑀘𑁆𑀘𑀁 𑀧𑀝𑀺𑀲𑀦𑁆𑀥𑀺𑀚𑀦𑀦𑀁 𑀓𑀫𑁆𑀫𑀚𑀦𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀧𑀝𑀺𑀚𑀦𑀦𑀢𑁄 𑀓𑀫𑁆𑀫𑀚𑀦𑀦𑀫𑁂𑀯𑀲𑁆𑀲 𑀫𑀳𑀦𑁆𑀢𑀁 𑀫𑀳𑀸𑀯𑀺𑀧𑁆𑀨𑀸𑀭𑀜𑁆𑀘 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀓𑀼𑀫𑁆𑀪𑀚𑀸𑀢𑀓𑁂 𑁋

𑀬𑀁 𑀯𑁂 𑀯𑀺𑀯𑀺𑀢𑁆𑀯𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺,

𑀓𑀸𑀬𑁂𑀦 𑀯𑀸𑀘𑀸𑀬 𑀘𑁂𑀢𑀲𑀸𑀘;

𑀦𑀺𑀭𑀬𑀁 𑀯𑀚𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸,

𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣𑀸𑀢𑀺.

𑀏𑀯𑀁 𑀢𑀤𑀸𑀲𑀦𑁆𑀦𑀓𑀫𑁆𑀫𑀯𑀲𑁂𑀦𑁂𑀯 𑀢𑀲𑁆𑀲 𑀅𑀧𑀸𑀬𑀕𑀸𑀫𑀺𑀢𑀸 𑀯𑀼𑀢𑁆𑀢𑀸. 𑀢𑀤𑀼𑀪𑀬𑀁 𑀧𑀦𑀲𑁆𑀲 𑀓𑀺𑀘𑁆𑀘𑀁 𑀕𑀳𑁂𑀢𑁆𑀯𑀸 𑀲𑀼𑀭𑀸𑀫𑁂𑀭𑀬𑀧𑀸𑀦𑀁 𑀪𑀺𑀓𑁆𑀔𑀯𑁂 𑀆𑀲𑁂𑀯𑀺𑀢𑀁.𑀮. 𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀅𑀗𑁆𑀕𑀼𑀢𑁆𑀢𑀭𑁂 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺𑀲𑀼𑀢𑁆𑀢𑀧𑀤𑁂𑀲𑀼 𑀥𑀫𑁆𑀫𑀢𑀸. 𑀬𑀤𑀺𑀤𑀁 𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀬𑀣𑀸𑀮𑀸𑀪𑀬𑁄𑀚𑀦𑀸𑀢𑀺. 𑀢𑀣𑀸𑀳𑀺 𑀫𑀽𑀮𑀝𑀻𑀓𑀸𑀬𑀁𑀧𑀼𑀦𑀩𑁆𑀪𑀯𑀁𑀤𑁂𑀢𑀺𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑁂𑀢𑀻𑀢𑀺 𑀧𑀸𑀞𑁂 𑀓𑀫𑁆𑀫𑀲𑀳𑀚𑀸𑀢𑀸 𑀧𑀼𑀦𑀩𑁆𑀪𑀯𑀁𑀤𑁂𑀢𑀺. 𑀓𑀫𑁆𑀫𑀲𑀳𑀸𑀬𑀪𑀽𑀢𑀸 𑀅𑀓𑀫𑁆𑀫𑀲𑀳𑀚𑀸 𑀢𑀸𑀧𑀼𑀦𑀩𑁆𑀪𑀯𑀁 𑀲𑀁𑀯𑀢𑁆𑀢𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀇𑀫𑀫𑀢𑁆𑀣𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀇𑀫𑀸𑀬 𑀧𑀸𑀴𑀺𑀬𑀸 𑀢𑀲𑁆𑀲 𑀯𑀺𑀲𑀼𑀁 𑀏𑀓𑀦𑁆𑀢𑀓𑀫𑁆𑀫𑀧𑀣𑀪𑀸𑀯𑀁 𑀫𑀜𑁆𑀜𑀦𑁆𑀢𑀺. 𑀬𑀁 𑀧𑀦 𑀓𑁄𑀝𑁆𑀞𑀸𑀲𑀢𑁄 𑀧𑀜𑁆𑀘𑀧𑀺 𑀓𑀫𑁆𑀫𑀧𑀣𑀸𑀏𑀯𑀸𑀢𑀺 𑀅𑀝𑁆𑀞𑀓𑀣𑀸𑀯𑀸𑀓𑁆𑀬𑀁. 𑀢𑀢𑁆𑀣 𑀏𑀯𑀲𑀤𑁆𑀤𑁂𑀦 𑀢𑁂𑀲𑀁 𑀘𑁂𑀢𑀦𑀸𑀥𑀫𑁆𑀫𑀢𑁆𑀢𑀸 𑀛𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀺𑀓𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀘𑁂𑀢𑀦𑀸 𑀳𑀺 𑀓𑀫𑁆𑀫𑀧𑀣𑀁 𑀧𑀢𑁆𑀢𑀸𑀧𑀺 𑀅𑀧𑀢𑁆𑀢𑀸𑀧𑀺 𑀓𑁄𑀝𑁆𑀞𑀸𑀲𑀢𑁄 𑀓𑀫𑁆𑀫 𑀧𑀣𑀓𑁄𑀝𑁆𑀞𑀸𑀲𑀺𑀓𑀸𑀏𑀯 𑀳𑁄𑀢𑀻𑀢𑀺. 𑀢𑁂𑀦𑁂𑀯 𑀫𑀽𑀮𑀝𑀻𑀓𑀸𑀬𑀁 𑀓𑀫𑁆𑀫𑀧𑀣𑀸 𑀏𑀯𑀸𑀢𑀺 𑀓𑀫𑁆𑀫𑀧𑀣𑀓𑁄𑀝𑁆𑀞𑀸𑀲𑀺𑀓𑀸𑀏𑀯𑀸𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀝𑀻𑀓𑀸𑀬𑀜𑁆𑀘 𑀓𑀫𑁆𑀫 𑀧𑀣𑀓𑁄𑀝𑁆𑀞𑀸𑀲𑀺𑀓𑀸𑀏𑀯. 𑀦 𑀛𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑀺𑀓𑀸𑀢𑀺 𑀯𑀼𑀢𑁆𑀢𑀁. 𑀓𑁂𑀘𑀺𑀧𑀦 𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀇𑀫𑀺𑀦𑀸 𑀯𑀸𑀓𑁆𑀬𑁂𑀦 𑀢𑀲𑁆𑀲 𑀯𑀺𑀲𑀼𑀁 𑀓𑀫𑁆𑀫𑀧𑀣𑀪𑀸𑀯𑀁 𑀯𑀤𑀦𑁆𑀢𑀺.

𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀁 𑀧𑀦 𑀲𑀩𑁆𑀩𑁂𑀦𑀲𑀩𑁆𑀩𑀁 𑀢𑀲𑁆𑀲 𑀓𑀫𑁆𑀫𑀧𑀣𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯, 𑀢𑀢𑁆𑀣 𑀳𑀺 𑀧𑀼𑀭𑀺𑀫𑀸𑀦𑀁 𑀘𑀢𑀼𑀦𑁆𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀜𑁆𑀘 𑀓𑀫𑁆𑀫𑀧𑀣𑀪𑀸𑀯𑀜𑁆𑀘 𑀯𑀺𑀲𑀼𑀁 𑀯𑀢𑁆𑀯𑀸 𑀲𑀼𑀭𑀸𑀧𑀸𑀦𑀁𑀧𑀢𑁆𑀯𑀸 𑀓𑀸𑀬𑀓𑀫𑁆𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀯𑀘𑀻𑀓𑀫𑁆𑀫𑀪𑀸𑀯𑀜𑁆𑀘 𑀓𑀫𑁆𑀫𑀧𑀣𑀪𑀸𑀯𑀜𑁆𑀘 𑀧𑀝𑀺𑀓𑁆𑀔𑀺𑀧𑀢𑀻𑀢𑀺. 𑀥𑀸𑀢𑀼𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸 𑀬𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀬𑀣𑀸𑀳-𑀢𑀢𑀻𑀬𑀁𑀧𑀜𑁆𑀘𑀓𑀫𑁆𑀫𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀁 𑀲𑀢𑁆𑀢𑀓𑀫𑁆𑀫𑀧𑀣𑀯𑀲𑁂𑀦 𑀧𑀜𑁆𑀘𑀫𑀁 𑀤𑀲 𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺. 𑀢𑀢𑁆𑀣 𑀳𑀺 𑀢𑀢𑀻𑀬𑁂 𑀲𑀼𑀭𑀸𑀧𑀸𑀦𑀫𑀺𑀲𑁆𑀲𑀓𑀢𑁆𑀢𑀸 𑀧𑀜𑁆𑀘𑀓𑀫𑁆𑀫𑀯𑀲𑁂𑀦 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦 𑀧𑀜𑁆𑀘𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺. 𑀏𑀢𑀸𑀲𑀼𑀧𑀺𑀘 𑀧𑀝𑀺𑀲𑀦𑁆𑀥𑀺𑀚𑀦𑀦𑁂 𑀅𑀦𑁂𑀓𑀦𑁆𑀢𑀺 𑀓𑀢𑁆𑀢𑀸𑀏𑀯 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦 𑀦𑀲𑀓𑁆𑀓𑀸 𑀯𑀢𑁆𑀢𑀼𑀁 𑀏𑀯𑀜𑁆𑀳𑀺 𑀲𑀢𑀺 𑀲𑀩𑁆𑀩𑀸 𑀧𑀸𑀴𑀺𑀝𑁆𑀞𑀓𑀣𑀸𑀝𑀻𑀓𑀸𑀬𑁄 𑀲𑀁𑀲𑀦𑁆𑀤𑀺𑀢𑀸 𑀳𑁄𑀦𑁆𑀢𑀻𑀢𑀺. 𑀓𑀸𑀬𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀸𑀬𑁄 𑀢𑀺𑀯𑀺𑀥𑁄 𑀲𑀲𑀫𑁆𑀪𑀸𑀭𑀓𑀸𑀬𑁄 𑀧𑀲𑀸𑀤𑀓𑀸𑀬𑁄 𑀘𑁄𑀧𑀦𑀓𑀸𑀬𑁄𑀢𑀺. 𑀇𑀥 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀘𑁄𑀧𑀦𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂𑀢𑀺. 𑀘𑁄𑀧𑀦𑀓𑀸𑀬𑁄 𑀳𑀺 𑀓𑀤𑀸𑀘𑀺 𑀓𑀸𑀬𑀗𑁆𑀕𑁂𑀦 𑀅𑀢𑁆𑀢𑀦𑁄𑀅𑀥𑀺𑀧𑁆𑀧𑀸𑀬𑀁 𑀧𑀭𑀲𑁆𑀲 𑀯𑀺𑀜𑁆𑀜𑀸 𑀧𑀦𑀢𑁆𑀣𑀸𑀬𑀧𑀺 𑀓𑀭𑀻𑀬𑀢𑀻𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑁄 𑀬𑁂𑀯𑀘 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀢𑁆𑀢𑀸 𑀤𑁆𑀯𑀸𑀭𑀦𑁆𑀢𑀺 𑀓𑀸𑀬𑀤𑁆𑀯𑀸𑀭𑀁. 𑀢𑀲𑁆𑀫𑀺𑀜𑁆𑀳𑀺 𑀢𑁂𑀦 𑀢𑁂𑀦 𑀉𑀧𑀓𑁆𑀓𑀫 𑀓𑀺𑀘𑁆𑀘𑁂𑀦 𑀧𑀯𑀢𑁆𑀢𑀫𑀸𑀦𑁂𑀏𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀸𑀤𑀺𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀢𑀁𑀚𑀦 𑀓𑀲𑁆𑀲 𑀘𑁂𑀢𑀦𑀸𑀥𑀫𑁆𑀫𑀲𑁆𑀲 𑀆𑀬𑀽𑀳𑀦 𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺𑀘 𑀓𑀸𑀬𑀓𑀫𑁆𑀫𑀦𑀸𑀫 𑀮𑀸𑀪𑁄𑀘 𑀳𑁄𑀢𑀻𑀢𑀺. 𑀢𑀲𑁆𑀫𑀺𑀁 𑀓𑀸𑀬𑀤𑁆𑀯𑀸𑀭𑁂. 𑀏𑀢𑁆𑀣𑀘 𑀬𑀲𑁆𑀫𑀸𑀲𑀩𑁆𑀩𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀫𑀦𑁂𑀦 𑀯𑀺𑀦𑀸 𑀦𑀲𑀺𑀚𑁆𑀛𑀦𑁆𑀢𑀺. 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸. 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀘𑁂𑀢𑁆𑀣 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀫𑀦𑁄𑀤𑁆𑀯𑀸𑀭𑀁 𑀲𑀩𑁆𑀩𑀓𑀫𑁆𑀫𑀲𑀸𑀥𑀸𑀭𑀡𑀢𑁆𑀢𑀸 𑀓𑀫𑁆𑀫𑀸𑀦𑀺 𑀯𑀺𑀲𑁂𑀲𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀅𑀲𑀸𑀥𑀸𑀭𑀡𑀪𑀽𑀢𑀸 𑀧𑀦 𑀓𑀸𑀬𑀯𑀘𑀻𑀬𑁄 𑀏𑀯 𑀲𑀓𑁄𑀦𑁆𑀢𑀺. 𑀬𑀲𑁆𑀫𑀸𑀘 𑀧𑀼𑀭𑀺𑀫𑀸𑀦𑀺 𑀲𑀢𑁆𑀢𑀯𑀺𑀥𑀸𑀦𑀺 𑀓𑀫𑁆𑀫𑀸𑀦𑀺 𑀓𑁂𑀯𑀮𑀁 𑀫𑀦𑁄𑀫𑀢𑁆𑀢𑁂𑀦 𑀦𑀲𑀺𑀚𑁆𑀛𑀦𑁆𑀢𑀺. 𑀢𑀁𑀲𑀫𑀼𑀝𑁆𑀞𑀺𑀢𑁂𑀳𑀺 𑀧𑀦 𑀓𑀸𑀬 𑀯𑀘𑀻𑀧𑀬𑁄𑀕𑁂𑀳𑀺 𑀏𑀯 𑀲𑀺𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀏𑀯 𑀢𑁂𑀲𑀁 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀓𑀸𑀬𑀤𑁆𑀯𑀸𑀭𑁂𑀢𑀺. 𑀧𑀭𑀢𑁄 𑀯𑀘𑀻𑀤𑁆𑀯𑀸𑀭𑁂𑀢𑀺 𑀘.

𑀬𑀲𑁆𑀫𑀸 𑀧𑀦 𑀓𑀸𑀬𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀯𑀘𑀻𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄 𑀯𑀘𑀻𑀓𑀫𑁆𑀫𑀁𑀦𑀸𑀫𑀸𑀢𑀺 𑀏𑀢𑁆𑀢𑀓𑀫𑀢𑁆𑀢𑁂 𑀯𑀼𑀢𑁆𑀢𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀢𑀻𑀡𑀺 𑀓𑀸𑀬𑀓𑀫𑁆𑀫𑀁𑀦𑀸𑀫. 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀯𑀘𑀻𑀓𑀫𑁆𑀫𑀁𑀦𑀸𑀫𑀸𑀢𑀺 𑀏𑀯𑀁 𑀤𑁆𑀯𑀸𑀭𑁂𑀦 𑀓𑀫𑁆𑀫𑀸𑀦𑀁 𑀦𑀸𑀫𑀯𑀯𑀢𑁆𑀣𑀸𑀦𑀁 𑀅𑀲𑀺𑀤𑁆𑀥𑀁 𑀲𑀺𑀬𑀸. 𑀓𑀣𑀁. 𑀬𑀤𑀸 𑀳𑀺 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀆𑀡𑀢𑁆𑀢𑀺𑀯𑀲𑁂𑀦 𑀅𑀧𑁆𑀧𑀓𑁂𑀦 𑀯𑀘𑀻𑀤𑁆𑀯𑀸𑀭𑁂 𑀪𑀺𑀚𑁆𑀛𑀦𑁆𑀢𑀺. 𑀢𑀤𑀸 𑀢𑀸𑀦𑀺 𑀓𑀸𑀬𑀓𑀫𑁆𑀫𑀦𑁆𑀢𑀺 𑀦𑀸𑀫𑀁 𑀚𑀳𑁂𑀬𑁆𑀬𑀼𑀁. 𑀯𑀘𑀻𑀓𑀫𑁆𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑁂𑀬𑁆𑀬𑀼𑀁 𑀓𑀲𑁆𑀫𑀸 𑀯𑀘𑀻𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄 𑀯𑀘𑀻𑀓𑀫𑁆𑀫𑀁𑀦𑀸𑀫𑀸𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀤𑁆𑀯𑁂𑀯𑀸 𑀦𑁂𑀲𑀁 𑀦𑀸𑀫𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀉𑀪𑀬𑀤𑁆𑀯𑀸𑀭𑁂𑀲𑀼𑀧𑀺 𑀲𑀦𑁆𑀤𑀺𑀲𑁆𑀲𑀦𑀢𑁄. 𑀬𑀤𑀸𑀧𑀦 𑀫𑀚𑁆𑀛𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀳𑀢𑁆𑀣𑀫𑀼𑀝𑁆𑀞𑀸𑀤𑀺𑀯𑀲𑁂𑀦 𑀅𑀧𑁆𑀧𑀓𑁂𑀦 𑀓𑀸𑀬𑀤𑁆𑀯𑀸𑀭𑁂 𑀲𑀺𑀚𑁆𑀛𑀦𑁆𑀢𑀺. 𑀢𑀤𑀸 𑀢𑀸𑀦𑀺𑀧𑀺 𑀯𑀘𑀻𑀓𑀫𑁆𑀫𑀦𑁆𑀢𑀺 𑀦𑀸𑀫𑀁 𑀚𑀳𑁂𑀬𑁆𑀬𑀼𑀁. 𑀓𑀸𑀬𑀓𑀫𑁆𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀓𑀲𑁆𑀫𑀸 𑀓𑀸𑀬𑀤𑁆𑀯𑀸𑀭𑁂 𑀯𑀼𑀢𑁆𑀢𑀺𑀢𑁄 𑀓𑀸𑀬𑀓𑀫𑁆𑀫𑀁𑀦𑀸𑀫𑀸𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀤𑁆𑀯𑁂𑀯𑀸 𑀦𑁂𑀲𑀁 𑀦𑀸𑀫𑀸𑀦𑀺 𑀪𑀯𑁂𑀬𑁆𑀬𑀼𑀁. 𑀉𑀪𑀬𑀤𑁆𑀯𑀸𑀭𑁂𑀲𑀼𑀧𑀺 𑀲𑀦𑁆𑀤𑀺𑀲𑁆𑀲𑀦𑀢𑁄. 𑀏𑀯𑀜𑁆𑀘𑀲𑀢𑀺 𑀧𑀸𑀡𑀸𑀢𑀺𑀧𑀸𑀢𑁄.𑀮. 𑀫𑀺𑀘𑁆𑀙𑀸𑀘𑀸𑀭𑁄𑀘𑁂𑀢𑀺 𑀓𑀸𑀬𑀓𑀫𑁆𑀫𑀁𑀦𑀸𑀫𑀸𑀢𑀺 𑀇𑀤𑀁 𑀯𑀯𑀢𑁆𑀣𑀸𑀦𑀫𑁂𑀯 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀢𑀣𑀸 𑀧𑀭𑀢𑁄 𑀫𑀼𑀲𑀸𑀯𑀸𑀤𑁄.𑀮. 𑀧𑁆𑀧𑀮𑀸𑀧𑁄𑀘𑁂𑀢𑀺 𑀯𑀘𑀻𑀓𑀫𑁆𑀫𑀁𑀦𑀸𑀫𑀸𑀢𑀺. 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑁂𑀧𑀦 𑀏𑀓𑀫𑁂𑀓𑁂𑀦 𑀩𑀸𑀳𑀼𑀮𑁆𑀮𑀲𑀤𑁆𑀤𑁂𑀦 𑀙𑀩𑁆𑀩𑀺𑀥𑀸𑀦𑀺 𑀢𑀸𑀦𑀺 𑀯𑀚𑁆𑀚𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑁆𑀯𑀸𑀭𑁂𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁 𑀲𑀺𑀤𑁆𑀥𑀁 𑀪𑀯𑀢𑀺. 𑀬𑀣𑀸 𑀯𑀦𑀘𑀭𑀓𑁄 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺.

𑀫𑀦𑁄𑀓𑀫𑁆𑀫𑀸𑀦𑀺 𑀧𑀦 𑀤𑁆𑀯𑀸𑀭𑀦𑁆𑀢𑀭𑁂𑀲𑀼 𑀘𑀭𑀦𑁆𑀢𑀸𑀦𑀺𑀧𑀺 𑀘𑀭𑀡𑀫𑀢𑁆𑀢𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀦 𑀤𑁆𑀯𑀸𑀭𑀦𑁆𑀢𑀭𑀸𑀦𑀺 𑀢𑁂𑀲𑀁 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀅𑀗𑁆𑀕𑀁 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀯𑀺𑀲𑀼𑀁 𑀓𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀓𑀸𑀬𑀤𑁆𑀯𑀸𑀭𑀲𑁆𑀲 𑀓𑀸𑀬𑁄𑀢𑀺 𑀦𑀸𑀫𑀁 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀳𑀲𑁆𑀲𑁂𑀲𑀼 𑀲𑀬𑀫𑁂𑀯 𑀲𑀺𑀤𑁆𑀥𑀁 𑀧𑀸𑀓𑀝𑀜𑁆𑀘. 𑀢𑀣𑀸 𑀯𑀘𑀻𑀤𑁆𑀯𑀸𑀭𑀲𑁆𑀲 𑀯𑀸𑀘𑀸𑀢𑀺 𑀦𑀸𑀫𑀁. 𑀓𑀼𑀲𑀮𑀸𑀓𑀼𑀲𑀮 𑀚𑀯𑀦𑀘𑀺𑀢𑁆𑀢𑀲𑀗𑁆𑀔𑀸𑀓𑀲𑁆𑀲 𑀫𑀦𑁄𑀤𑁆𑀯𑀸𑀭𑀲𑁆𑀲𑀘 𑀫𑀦𑁄𑀢𑀺 𑀦𑀸𑀫𑀁. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀓𑀸𑀬𑀤𑁆𑀯𑀸𑀭𑀁 𑀯𑀘𑀻𑀤𑁆𑀯𑀸𑀭𑀁 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀯𑀼𑀢𑁆𑀢𑁂 𑀓𑀫𑁆𑀫𑁂𑀦 𑀤𑁆𑀯𑀸𑀭𑀲𑁆𑀲 𑀯𑀯𑀢𑁆𑀣𑀸𑀦 𑀓𑀺𑀘𑁆𑀘𑀁𑀦𑀸𑀫 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀁 𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀁 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀆𑀕𑀢𑀁. 𑀢𑀢𑁆𑀣𑁂𑀯 𑀤𑁆𑀯𑀸𑀭𑀓𑀣𑀸𑀤𑀻𑀲𑀼 𑀓𑀫𑁆𑀫𑁂𑀦 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁𑀧𑀺 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

[𑁧𑁫𑁩] 𑀏𑀢𑁂𑀦 𑀬𑀁 𑀯𑀼𑀢𑁆𑀢𑀁 𑀯𑀺𑀪𑀸𑀯𑀦𑀺𑀬𑀁

‘‘𑀓𑀸𑀬𑀓𑀫𑁆𑀫𑀲𑁆𑀲𑀘 𑀧𑀯𑀢𑁆𑀢𑀺𑀫𑀼𑀔𑀪𑀽𑀢𑀁 𑀓𑀸𑀬𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺’’. 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

[𑁧𑁫𑁪] 𑀬𑀜𑁆𑀘 𑀢𑀢𑁆𑀣

‘‘𑀢𑀣𑀸 𑀫𑀼𑀲𑀸𑀯𑀸𑀤𑀸𑀤𑀺𑀁 𑀓𑀸𑀬𑀯𑀺𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲 𑀯𑀘𑀻𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀓𑀫𑁆𑀫𑁂𑀦 𑀤𑁆𑀯𑀸𑀭𑀯𑀯𑀢𑁆𑀣𑀸𑀦𑀁𑀧𑀺 𑀦𑀲𑀺𑀬𑀸𑀢𑀺’’ 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀓𑀸𑀬𑀯𑀺𑀓𑀸𑀭𑁂𑀦 𑀓𑀭𑀻𑀬𑀫𑀸𑀦𑀁 𑀯𑀘𑀻𑀓𑀫𑁆𑀫𑀁 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑀁𑀧𑀺 𑀢𑀲𑁆𑀲 𑀤𑁆𑀯𑀸𑀭𑀲𑁆𑀲 𑀦𑀸𑀫𑀁 𑀪𑀺𑀦𑁆𑀤𑀺𑀢𑀼𑀁𑀯𑀸 𑀅𑀢𑁆𑀢𑀦𑁄 𑀦𑀸𑀫𑀁 𑀤𑀸𑀢𑀼𑀁𑀯𑀸 𑀲𑀓𑁆𑀓𑁄𑀢𑀺. 𑀲𑀪𑀸𑀯 𑀲𑀺𑀤𑁆𑀥𑀢𑁆𑀢𑀸 𑀢𑀲𑁆𑀲 𑀦𑀸𑀫𑀲𑁆𑀲𑀸𑀢𑀺.

[𑁧𑁫𑁫] 𑀏𑀢𑁂𑀦𑁂𑀯 𑀬𑀜𑁆𑀘 𑀢𑀢𑁆𑀣

𑀯𑀼𑀢𑁆𑀢𑀁 ‘‘𑀢𑀣𑀸 𑀓𑀸𑀬𑀓𑀫𑁆𑀫𑀫𑁂𑀯 𑀬𑁂𑀪𑀼𑀬𑁆𑀬𑁂𑀦 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺. 𑀦 𑀇𑀢𑀭𑀸𑀦𑀺. 𑀢𑀲𑁆𑀫𑀸 𑀓𑀸𑀬𑀓𑀫𑁆𑀫𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀏𑀢𑁆𑀣𑁂𑀯 𑀧𑀯𑀢𑁆𑀢𑀦𑀢𑁄 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑁄 𑀲𑀺𑀤𑁆𑀥𑁄. 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀻𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀸𑀤𑀺 𑀪𑀸𑀯𑁄𑀯𑀺𑀬𑀸𑀢𑀺’’. 𑀢𑀁𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀦 𑀳𑀺 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀦𑀸𑀫𑀁 𑀇𑀥 𑀯𑀼𑀢𑁆𑀢𑀁 𑀅𑀢𑁆𑀣𑀻𑀢𑀺. [𑀓𑀸𑀬𑀓𑀫𑁆𑀫𑀁]

𑁧𑁪𑁯. 𑀫𑀼𑀲𑀸𑀢𑀺 𑀅𑀪𑀽𑀢𑀢𑁆𑀣𑁂 𑀦𑀺𑀧𑀸𑀢𑁄. 𑀫𑀼𑀲𑀸 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀼𑀲𑀸𑀯𑀸𑀤𑁄. 𑀯𑀺𑀲𑀢𑀺 𑀧𑀭𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀫𑁄𑀤𑀪𑀸𑀯𑀲𑀗𑁆𑀔𑀸𑀢𑀁 𑀲𑀸𑀫𑀕𑁆𑀕𑀺𑀭𑀲𑀁 𑀲𑀁𑀘𑀼𑀡𑁆𑀡𑁂𑀢𑀺 𑀧𑀭𑀺𑀪𑀺𑀦𑁆𑀤𑀢𑀺 𑀫𑀺𑀣𑀼 𑀪𑁂𑀤𑀁 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺 𑀧𑀺𑀲𑀼𑀡𑀸. 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑁂𑀲𑀜𑁆𑀘 𑀫𑀺𑀢𑁆𑀢𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺𑀯𑀸 𑀧𑀺𑀲𑀼𑀡𑀸. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸𑀘𑀸. 𑀧𑀺𑀲𑀼𑀡𑀸𑀘 𑀲𑀸 𑀯𑀸𑀘𑀸𑀘𑀸𑀢𑀺 𑀧𑀺𑀲𑀼𑀡𑀯𑀸𑀘𑀸. 𑀬𑁂𑀦 𑀲𑀼𑀬𑁆𑀬𑀢𑀺, 𑀢𑀲𑁆𑀲 𑀳𑀤𑀬𑀁 𑀨𑀭𑀫𑀸𑀦𑀸 𑀉𑀲𑀢𑀺 𑀤𑀳𑀢𑀻𑀢𑀺 𑀨𑀭𑀼𑀲𑀸. 𑀨𑀭𑀼𑀲𑀸𑀘 𑀲𑀸 𑀯𑀸𑀘𑀸𑀘𑀸𑀢𑀺 𑀨𑀭𑀼𑀲𑀯𑀸𑀘𑀸. 𑀲𑀸𑀥𑀼𑀚𑀦𑁂𑀳𑀺 𑀅𑀥𑀺𑀕𑀦𑁆𑀢𑀩𑁆𑀩𑀁 𑀲𑀁𑀲𑀼𑀔𑀁 𑀳𑀺𑀢𑀜𑁆𑀘 𑀨𑀮𑀢𑀺 𑀯𑀺𑀲𑀭𑀢𑀺 𑀯𑀺𑀦𑀸𑀲𑁂𑀢𑀺 𑀳𑀺𑀢𑀲𑀼𑀔𑀫𑀕𑁆𑀕𑀁 𑀪𑀺𑀦𑁆𑀤𑀢𑀻𑀢𑀺 𑀲𑀫𑁆𑀨𑀁. 𑀢𑀁𑀯𑀸 𑀨𑀮𑀢𑀺 𑀪𑀺𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀨𑀁. 𑀅𑀢𑁆𑀣𑀥𑀫𑁆𑀫𑀸𑀧𑀕𑀢𑀲𑁆𑀲 𑀧𑀝𑀺𑀪𑀸𑀡𑀘𑀺𑀢𑁆𑀢𑀲𑁆𑀲 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀸 𑀤𑀺𑀓𑀲𑁆𑀲 𑀯𑀸𑀘𑀸 𑀯𑀢𑁆𑀣𑀼𑀫𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀩𑀼𑀤𑁆𑀥𑀺𑀬𑀸𑀯𑀸 𑀲𑀫𑁆𑀧𑀭𑀸𑀬𑀺𑀓 𑀳𑀺𑀢𑀩𑀼𑀤𑁆𑀥𑀺𑀬𑀸𑀯𑀸 𑀉𑀧𑀸𑀬𑀤𑀻𑀧𑀓𑀁 𑀓𑀺𑀜𑁆𑀘𑀺 𑀅𑀢𑁆𑀣𑀥𑀫𑁆𑀫𑀯𑀺𑀦𑀬𑀧𑀤𑀁 𑀦𑀢𑁆𑀣𑀺. 𑀲𑀫𑁆𑀨𑀁 𑀧𑀮𑀧𑀦𑁆𑀢𑀺𑀧𑀓𑀸𑀭𑁂𑀦 𑀓𑀣𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀧𑁆𑀨𑀧𑁆𑀧𑀮𑀸𑀧𑁄. 𑀢𑀢𑁆𑀣 𑀧𑀭𑀲𑁆𑀲𑀯𑀺𑀲𑀁 𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑁂𑀦 𑀯𑀺𑀲𑀁 𑀯𑀸𑀤𑀓 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀧𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄𑀯 𑀓𑀫𑁆𑀫𑀧𑀣𑀪𑁂𑀤𑁄. 𑀇𑀢𑀭𑁄 𑀓𑀫𑁆𑀫𑀫𑁂𑀯. 𑀏𑀢𑁆𑀣 𑀘 𑀓𑀫𑁆𑀫 𑀧𑀣𑁄𑀢𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀁 𑀓𑀫𑁆𑀫𑀸𑀦𑀁 𑀉𑀝𑁆𑀞𑀸𑀦𑀫𑀼𑀔𑀫𑀕𑁆𑀕𑁄 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀭𑀚𑀸𑀦𑀁 𑀉𑀝𑁆𑀞𑀸𑀦𑀧𑀤𑁂𑀲𑁄 𑀭𑀚𑀧𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀮𑁄𑀓𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑁂𑀲𑀼 𑀲𑀢𑁆𑀢𑀸𑀦𑀁 𑀓𑀸𑀬𑀯𑀘𑀻𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂𑀲𑀼𑀬𑁂𑀳𑀺 𑀓𑀺𑀘𑁆𑀘𑁂𑀳𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀺 𑀓𑀫𑁆𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀬𑁂𑀲𑀼𑀯𑀸 𑀓𑀺𑀘𑁆𑀘𑁂𑀲𑀼 𑀢𑀸𑀦𑀺 𑀉𑀝𑁆𑀞𑀳𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀦𑀺 𑀓𑀸𑀬𑀯𑀘𑀻𑀘𑀺𑀢𑁆𑀢𑀸 𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑀸𑀦𑀺 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀁 𑀓𑀫𑁆𑀫𑀸𑀦𑀁 𑀉𑀝𑁆𑀞𑀸𑀦𑀫𑀼𑀔𑀫𑀕𑁆𑀕𑀢𑁆𑀢𑀸 𑀓𑀫𑁆𑀫𑀧𑀣𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑀫𑀸𑀦𑀺 𑀧𑀦 𑀢𑀸𑀦𑀻𑀢𑀺. 𑀅𑀗𑁆𑀕𑀲𑀫𑁆𑀧𑀦𑁆𑀦𑀸𑀦𑀺 𑀅𑀓𑀼𑀲𑀮𑁂𑀲𑀼 𑀧𑀸𑀡𑀖𑀸𑀢 𑀓𑀺𑀘𑁆𑀘𑀸𑀤𑀻𑀦𑀺 𑀓𑀼𑀲𑀮𑁂𑀲𑀼 𑀢𑀩𑁆𑀩𑀺𑀭𑀫𑀡𑀓𑀺𑀘𑁆𑀘𑀸𑀤𑀻𑀦𑀺 𑀤𑀲𑀯𑀺𑀥𑀸𑀦𑀺 𑀓𑀺𑀘𑁆𑀘𑀸𑀦𑀻𑀢𑀺. 𑀓𑀫𑁆𑀫𑀸𑀦𑀺𑀬𑁂𑀯 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁 𑀢𑀤𑀼𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀧𑀣𑀪𑀽𑀢𑀢𑁆𑀢𑀸 𑀓𑀫𑁆𑀫𑀧𑀣𑁄𑀦𑀸𑀫𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀧𑀭𑀲𑁆𑀲 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑁂𑀦 𑀪𑁂𑀤𑀓𑀓𑀸𑀬𑀕𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸 𑀧𑀺𑀓𑀸 𑀲𑀁𑀓𑀺𑀮𑀺𑀝𑁆𑀞𑀘𑁂𑀢𑀦𑀸 𑀧𑀺𑀲𑀼𑀡𑀸𑀯𑀸𑀘𑀸. 𑀲𑀸𑀧𑀺 𑀧𑀭𑁂 𑀪𑀺𑀦𑁆𑀦𑁂𑀬𑁂𑀯 𑀓𑀫𑁆𑀫𑀧𑀣𑀪𑁂𑀤𑁄. 𑀅𑀪𑀺𑀦𑁆𑀦𑁂 𑀓𑀫𑁆𑀫𑀫𑁂𑀯. 𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬 𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀤𑀼𑀝𑁆𑀞𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀏𑀢𑁆𑀣𑀘 𑀫𑀭𑀦𑁆𑀢𑀺 𑀲𑀢𑁆𑀢𑀸, 𑀫𑀭𑀡𑀫𑀢𑁆𑀢𑀁𑀯𑀸 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺 𑀏𑀢𑀲𑁆𑀫𑀺𑀁 𑀖𑀝𑁆𑀝𑀺𑀬𑀫𑀸𑀦𑁂𑀢𑀺 𑀫𑀫𑁆𑀫𑀁. 𑀤𑀼𑀝𑁆𑀞𑀯𑀡𑁄. 𑀫𑀫𑁆𑀫𑀁 𑀙𑀺𑀦𑁆𑀤𑀢𑀺 𑀪𑀺𑀦𑁆𑀤𑀢𑀺 𑀖𑀝𑁆𑀝𑁂𑀢𑀻𑀢𑀺 𑀫𑀫𑁆𑀫𑀘𑁆𑀙𑁂𑀤𑀓𑁄. 𑀯𑀡𑀖𑀝𑁆𑀝𑀦𑀧𑀬𑁄𑀕𑁄. 𑀇𑀥 𑀧𑀦 𑀫𑀫𑁆𑀫𑀁𑀯𑀺𑀬𑀸𑀢𑀺 𑀫𑀫𑁆𑀫𑀁. 𑀚𑀸𑀢𑀺𑀆𑀤𑀻𑀲𑀼 𑀤𑀲𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺. 𑀫𑀫𑁆𑀫𑀘𑁆𑀙𑁂𑀤𑀓𑁄𑀢𑀺 𑀚𑀸𑀢𑀺𑀆𑀤𑀻𑀲𑀼 𑀖𑀝𑁆𑀝𑀦 𑀯𑀲𑁂𑀦 𑀧𑀯𑀢𑁆𑀢𑁄 𑀨𑀭𑀼𑀲 𑀓𑀸𑀬𑀯𑀘𑀻 𑀧𑀬𑁄𑀕𑁄. 𑀅𑀬 𑀫𑀢𑁆𑀣𑁄 𑀲𑀻𑀮𑀓𑁆𑀔𑀦𑁆𑀥 𑀝𑀻𑀓𑀸 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀣𑀯𑀸. 𑀫𑀫𑀸𑀬𑀢𑀻𑀢𑀺 𑀫𑀫𑁄. 𑀫𑀺𑀢𑁆𑀢𑁄. 𑀫𑀫𑀲𑁆𑀲 𑀪𑀸𑀯𑁄 𑀫𑀫𑁆𑀫𑀁. 𑀫𑁂𑀢𑁆𑀢𑀸𑀘𑀺𑀢𑁆𑀢𑀁. 𑀫𑀫𑁆𑀫𑀁 𑀙𑀺𑀦𑁆𑀤𑀢𑀻𑀢𑀺 𑀫𑀫𑁆𑀫𑀘𑁆𑀙𑁂𑀤𑀓𑁄. 𑀅𑀬𑀁𑀧𑀺 𑀅𑀓𑁆𑀓𑁄𑀲𑀺𑀢𑀩𑁆𑀩𑀲𑁆𑀲 𑀲𑀫𑁆𑀫𑀼𑀔𑀸𑀏𑀯 𑀓𑀫𑁆𑀫𑀧𑀣𑀪𑁂𑀤𑁄𑀢𑀺 𑀓𑁂𑀘𑀺. 𑀧𑀭𑀫𑁆𑀫𑀼𑀔𑀸𑀧𑀻𑀢𑀺 𑀅𑀧𑀭𑁂. 𑀬𑀣𑀸 𑀧𑀦 𑀧𑀭𑀁 𑀅𑀓𑁆𑀓𑁄𑀲𑀺𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀲𑁆𑀲 𑀔𑀫𑀸𑀧𑀦𑀓𑀫𑁆𑀫𑀁 𑀧𑀭𑀲𑁆𑀲 𑀤𑀽𑀭𑁂 𑀞𑀺𑀢𑀲𑁆𑀲𑀧𑀺 𑀫𑀢𑀲𑁆𑀲𑀧𑀺 𑀲𑀫𑁆𑀧𑀚𑁆𑀚𑀢𑀺. 𑀏𑀯𑀁 𑀅𑀓𑁆𑀓𑁄𑀲𑀦𑀓𑀫𑁆𑀫𑀁𑀧𑀻𑀢𑀺 𑀤𑀻𑀖𑀫𑀚𑁆𑀛𑀺𑀫𑀝𑀻𑀓𑀸𑀓𑀸𑀭𑀸 𑀇𑀘𑁆𑀙𑀦𑁆𑀢𑀺. 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦 𑀘𑀡𑁆𑀟𑀸 𑀫𑀳𑀺𑀁𑀲𑀻 𑀢𑀁 𑀅𑀦𑀼𑀩𑀦𑁆𑀥𑀢𑀽𑀢𑀺𑀯𑀸 𑀘𑁄𑀭𑀸 𑀢𑀁 𑀔𑀡𑁆𑀟𑀸 𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽𑀢𑀺𑀯𑀸 𑀫𑀼𑀤𑁆𑀥𑀸 𑀢𑁂 𑀨𑀮𑀢𑀼 𑀲𑀢𑁆𑀢𑀥𑀸𑀢𑀺𑀯𑀸 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀭𑀁 𑀅𑀪𑀺𑀲𑀧𑀦𑁆𑀢𑀲𑁆𑀲𑀧𑀺 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺𑀬𑁂𑀯𑀸𑀢𑀺𑀘 𑀯𑀤𑀦𑁆𑀢𑀺.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦 𑀓𑀸𑀬𑀯𑀘𑀻𑀧𑀬𑁄𑀕 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀸𑀧𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀲𑁄𑀧𑀺 𑀪𑀸𑀭𑀢𑀬𑀼𑀤𑁆𑀥 𑀲𑀻𑀢𑀸𑀳𑀭𑀡𑀸𑀤𑀺𑀓𑁂𑀲𑀼 𑀧𑀝𑀺𑀪𑀸𑀡𑀘𑀺𑀢𑁆𑀢𑁂𑀲𑀼 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑁂𑀲𑀼𑀏𑀯 𑀓𑀫𑁆𑀫𑀧𑀣𑀪𑁂𑀤𑁄. 𑀲𑁄𑀘𑀔𑁄 𑀧𑀭𑁂 𑀢𑀁 𑀅𑀦𑀢𑁆𑀣𑀁 𑀲𑀘𑁆𑀘𑀢𑁄 𑀕𑀡𑁆𑀳𑀦𑁆𑀢𑁂𑀬𑁂𑀯. 𑀅𑀕𑀡𑁆𑀳𑀦𑁆𑀢𑁂 𑀧𑀦 𑀓𑀫𑁆𑀫𑀫𑁂𑀯. 𑀢𑀣𑀸 𑀭𑀸𑀚𑀓𑀣𑀸𑀤𑀻𑀲𑀼 𑀤𑁆𑀯𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦 𑀓𑀣𑀸𑀧𑀪𑁂𑀤𑁂𑀲𑀼𑀧𑀺 𑀓𑀫𑁆𑀫𑀫𑁂𑀯. 𑀢𑀜𑁆𑀘 𑀔𑁄 𑀢𑀤𑀲𑁆𑀲𑀸𑀤𑀯𑀲𑁂𑀦 𑀓𑀣𑁂𑀦𑁆𑀢𑀲𑁆𑀲𑁂𑀯. 𑀅𑀢𑁆𑀣𑀥𑀫𑁆𑀫𑀯𑀺𑀦𑀬𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲 𑀧𑀦 𑀲𑀩𑁆𑀩𑀁𑀧𑀺 𑀲𑀢𑁆𑀣𑀓𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀘𑀻𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀯𑀘𑀻𑀢𑀺 𑀯𑀸𑀘𑀸𑀬𑁂𑀯. 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀲𑀤𑁆𑀤𑀯𑀸𑀘𑀸 𑀯𑀺𑀭𑀢𑀺𑀯𑀸𑀘𑀸 𑀘𑁂𑀢𑀦𑀸𑀯𑀸𑀘𑀸 𑀘𑁄𑀧𑀦𑀯𑀸𑀘𑀸𑀢𑀺. 𑀇𑀥 𑀧𑀦 𑀲𑀤𑁆𑀤𑀲𑀳𑀺𑀢𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸 𑀘𑁄𑀧𑀦 𑀯𑀸𑀘𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂𑀢𑀺. 𑀘𑁄𑀧𑀦𑀯𑀸𑀘𑀸 𑀳𑀺 𑀓𑀤𑀸𑀘𑀺 𑀯𑀸𑀘𑀗𑁆𑀕𑁂𑀦 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀭𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬𑀧𑀺 𑀓𑀭𑀻𑀬𑀢𑀻𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀸𑀬𑁂𑀯𑀘 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀫𑀼𑀔𑀢𑁆𑀢𑀸 𑀤𑁆𑀯𑀸𑀭𑀦𑁆𑀢𑀺 𑀯𑀘𑀻𑀤𑁆𑀯𑀸𑀭𑀁. 𑀢𑀸𑀬 𑀳𑀺 𑀢𑀁𑀢𑀁𑀯𑀘𑀻𑀧𑀬𑁄𑀕𑀓𑀺𑀘𑁆𑀘𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀏𑀯 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀢𑀁𑀲𑀫𑀼𑀝𑁆𑀞𑀸𑀧𑀓𑀲𑁆𑀲 𑀘𑁂𑀢𑀦𑀸𑀥𑀫𑁆𑀫𑀲𑁆𑀲 𑀆𑀬𑀽𑀳𑀦𑀓𑁆𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀘 𑀯𑀘𑀻𑀓𑀫𑁆𑀫𑀦𑀸𑀫𑀮𑀸𑀪𑁄𑀘 𑀳𑁄𑀢𑀻𑀢𑀺. 𑀢𑀲𑁆𑀫𑀺𑀁 𑀯𑀘𑀻𑀤𑁆𑀯𑀸𑀭𑁂. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀸𑀬𑀓𑀫𑁆𑀫𑁂 𑀯𑀼𑀢𑁆𑀢𑀫𑁂𑀯𑀸𑀢𑀺. [𑀯𑀘𑀻𑀓𑀫𑁆𑀫𑀁]

𑁧𑁫𑁦. 𑀅𑀪𑀺𑀚𑁆𑀛𑀸𑀬𑀦𑁆𑀢𑀺 𑀅𑀲𑁆𑀲𑀸𑀤𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀧𑀭𑀪𑀡𑁆𑀟𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀯𑀲𑁂𑀦 𑀅𑀢𑀺𑀭𑁂𑀓𑀢𑀭𑀁 𑀛𑀸𑀬𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸. 𑀩𑁆𑀬𑀸𑀧𑀸𑀤𑁂𑀦𑁆𑀢𑀺 𑀧𑀭𑀲𑀢𑁆𑀢𑁂 𑀯𑀺𑀦𑀸𑀲𑀁 𑀆𑀧𑀦𑁆𑀦𑁂 𑀓𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀏𑀢𑁆𑀣 𑀫𑀺𑀘𑁆𑀙𑀸𑀢𑀺 𑀯𑀺𑀧𑀭𑀻𑀢𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀢𑁆𑀣𑀺𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀁 𑀲𑀩𑁆𑀩𑀁 𑀲𑀧𑁆𑀧𑀼𑀭𑀺𑀲 𑀫𑀕𑁆𑀕𑀁 𑀲𑀧𑁆𑀧𑀼𑀭𑀺𑀲𑀧𑀜𑁆𑀜𑀢𑁆𑀢𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀬𑁂𑀦 𑀢𑀩𑁆𑀩𑀺𑀧𑀭𑀻 𑀢𑀢𑁄 𑀧𑀲𑁆𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀢𑀢𑁆𑀣 𑀧𑀭𑀲𑀦𑁆𑀢𑀓𑀁 𑀤𑀺𑀲𑁆𑀯𑀸 𑀓𑁂𑀯𑀮𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀭𑀚𑁆𑀚𑀦𑀫𑀢𑁆𑀢𑁂𑀲𑀼 𑀅𑀝𑁆𑀞𑀢𑁆𑀯𑀸 𑀅𑀳𑁄𑀯𑀢 𑀇𑀤𑀁 𑀫𑀫𑀲𑁆𑀲𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦 𑀧𑀭𑀺𑀡𑀸𑀫𑁂𑀦𑁆𑀢𑀲𑁆𑀲𑁂𑀯 𑀅𑀪𑀺𑀚𑁆𑀛𑀸𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺. 𑀧𑀭𑀲𑀦𑁆𑀢𑀓𑀪𑀸𑀯𑁂𑀬𑁂𑀯 𑀣𑀧𑁂𑀢𑁆𑀯𑀸 𑀮𑀸𑀪𑀸𑀯𑀢𑀺𑀫𑁂. 𑀬𑁂 𑀈𑀤𑀺𑀲𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀳𑁄𑀯𑀢𑀸𑀳𑀁𑀧𑀺 𑀢𑀸𑀯𑀓𑀸𑀮𑀺𑀓𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀁. 𑀬𑀸𑀘𑀺𑀢𑁆𑀯𑀸𑀯𑀸 𑀓𑀺𑀡𑀺𑀢𑁆𑀯𑀸𑀯𑀸 𑀅𑀢𑁆𑀢𑀦𑁄 𑀓𑀭𑁂𑀬𑁆𑀬𑀁. 𑀅𑀜𑁆𑀜𑀁𑀯𑀸 𑀈𑀤𑀺𑀲𑀁 𑀮𑀪𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀓𑀫𑁆𑀫𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺. 𑀬𑀸𑀯 𑀦 𑀅𑀳𑁄𑀯𑀢 𑀇𑀤𑀁 𑀫𑀫𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀻𑀢𑀺. 𑀅𑀦𑁆𑀢𑀫𑀲𑁄 𑀟𑀁𑀲𑀫𑀓𑀲𑀸𑀤𑀺𑀓𑁂𑀧𑀺 𑀆𑀭𑀩𑁆𑀪 𑀇𑀫𑁂 𑀦𑀲𑁆𑀲𑀦𑁆𑀢𑀼 𑀯𑀺𑀦𑀲𑁆𑀲𑀦𑁆𑀢𑀼. 𑀅𑀳𑁄𑀯𑀢𑀺𑀫𑁂 𑀦𑀲𑁆𑀲𑁂𑀬𑁆𑀬𑀼𑀁 𑀯𑀺𑀦𑀲𑁆𑀲𑁂𑀬𑁆𑀬𑀼𑀁. 𑀅𑀯𑀟𑁆𑀠𑀺𑀢𑀸𑀯𑀸 𑀪𑀯𑁂𑀬𑁆𑀬𑀼𑀁 𑀘𑀺𑀭𑀁𑀯𑀸 𑀦𑀢𑀺𑀝𑁆𑀞𑁂𑀬𑁆𑀬𑀼𑀁. 𑀓𑀤𑀸𑀯𑀸 𑀦𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀧𑀭 𑀲𑀢𑁆𑀢𑀲𑁆𑀲 𑀔𑀦𑁆𑀥𑀚𑀻𑀯𑀯𑀺𑀦𑀸𑀲𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑁂𑀯 𑀩𑁆𑀬𑀸𑀧𑀸𑀤𑁄. 𑀇𑀢𑀭𑁄 𑀓𑀫𑁆𑀫𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺. 𑀬𑀸𑀯 𑀦 𑀅𑀳𑁄𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀸𑀲𑁂𑀬𑁆𑀬𑀸𑀢𑀺 𑀢𑀲𑁆𑀲 𑀯𑀺𑀦𑀸𑀲𑀁 𑀘𑀺𑀦𑁆𑀢𑁂𑀢𑀻𑀢𑀺. 𑀓𑀫𑁆𑀫𑀲𑁆𑀲𑀯𑀸 𑀓𑀫𑁆𑀫𑀯𑀺𑀧𑀸𑀓𑀲𑁆𑀲𑀯𑀸 𑀲𑀩𑁆𑀩𑀲𑁄 𑀧𑀝𑀺𑀩𑀸𑀳𑀺𑀓𑀸 𑀦𑀢𑁆𑀣𑀺𑀓𑀸𑀳𑁂 𑀢𑀼𑀓𑀸𑀓𑁆𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑀸 𑀦𑀺𑀬𑀢 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀏𑀯 𑀓𑀫𑁆𑀫𑀧𑀣𑀪𑁂𑀤𑁄. 𑀤𑀲𑀯𑀢𑁆𑀣𑀼𑀓𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀧𑀪𑁂𑀤𑀸𑀏𑀯. 𑀲𑀩𑁆𑀩𑀜𑁆𑀜𑀼𑀤𑁂𑀲𑀦𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀯𑀢𑁆𑀢𑀸 𑀅𑀭𑀺𑀝𑁆𑀞𑀓𑀡𑁆𑀝𑀓𑀸𑀤𑀻𑀦𑀁 𑀤𑀺𑀝𑁆𑀞𑀺𑀬𑁄𑀧𑀺 𑀓𑀫𑁆𑀫𑀧𑀣𑀸𑀏𑀯𑀸𑀢𑀺 𑀯𑀤𑀦𑁆𑀢𑀺. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀺𑀯𑀸𑀓𑀫𑁆𑀫𑀫𑁂𑀯𑀸𑀢𑀺.

𑀦𑀺𑀬𑀢𑀸𑀢𑀺 𑀘𑁂𑀢𑁆𑀣 𑀬𑀣𑀸 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀬𑀢𑁆𑀢𑀓𑀁 𑀧𑀲𑁆𑀲𑀺𑀢𑁆𑀯𑀸 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀨𑀮𑀤𑀸𑀦𑀦𑀺𑀬𑀫𑁂𑀦 𑀦𑀺𑀬𑀢𑁄 𑀳𑁄𑀢𑀺. 𑀢𑀢𑁆𑀢𑀓𑀁 𑀧𑀲𑁆𑀲𑀦𑁆𑀢𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀻𑀢𑀺 𑀯𑀼𑀢𑁆𑀢𑁄. 𑀢𑀣𑀸𑀤𑀺𑀝𑁆𑀞𑀺𑀝𑁆𑀞𑀸 𑀦𑀸𑀦𑀺 𑀓𑀸𑀭𑀡 𑀧𑀝𑀺𑀭𑀽𑀧𑀓𑀸𑀦𑀺 𑀬𑀢𑁆𑀢𑀓𑀁 𑀧𑀲𑁆𑀲𑀺𑀢𑁆𑀯𑀸 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀘𑀼𑀢𑀺𑀅𑀦𑀦𑁆𑀢𑀭𑁂𑀨𑀮𑀤𑀸𑀦𑀦𑀺𑀬𑀫𑁂𑀦 𑀦𑀺𑀬𑀢𑁄 𑀳𑁄𑀢𑀺. 𑀢𑀢𑁆𑀢𑀓𑀁 𑀧𑀲𑁆𑀲𑀺𑀢𑁆𑀯𑀸 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺, 𑀅𑀢𑁂𑀓𑀺𑀘𑁆𑀙𑁄𑀦𑀸𑀫 𑀳𑁄𑀢𑀺. 𑀢𑀣𑀸 𑀧𑀦 𑀅𑀧𑀲𑁆𑀲𑀺𑀢𑁆𑀯𑀸 𑀓𑁂𑀯𑀮𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑀫𑀢𑁆𑀢𑁂𑀦 𑀏𑀯𑀫𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀓𑀁 𑀆𑀘𑀭𑀺𑀬𑀓𑀁 𑀲𑀫𑀬𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀞𑀺𑀢𑁄 𑀅𑀢𑁂𑀓𑀺𑀘𑁆𑀙𑁄𑀦𑀸𑀫 𑀦𑀳𑁄𑀢𑀺. 𑀓𑀲𑁆𑀫𑀸, 𑀨𑀮𑀤𑀸𑀦 𑀦𑀺𑀬𑀫𑀸𑀪𑀸𑀯𑀸𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀫𑀺𑀘𑁆𑀙𑀢𑁆𑀢𑀢𑁆𑀢𑀺𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀨𑀮𑀤𑀸𑀦 𑀦𑀺𑀬𑀫𑀯𑀲𑁂𑀦𑁂𑀯 𑀉𑀪𑀺𑀦𑁆𑀦𑀁𑀧𑀺 𑀲𑀫𑁆𑀫𑀢𑁆𑀢𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸𑀦𑀁 𑀦𑀺𑀬𑀢𑀲𑀜𑁆𑀜𑀸𑀧𑀝𑀺𑀮𑀸𑀪𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺. 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸𑀲𑀼 𑀧𑀦 𑀕𑀳𑀡𑀦𑀺𑀬𑀫𑀯𑀲𑁂𑀦𑀸𑀧𑀺 𑀢𑀲𑁆𑀲𑀸 𑀦𑀺𑀬𑀢𑀪𑀸𑀯𑁄 𑀯𑀼𑀢𑁆𑀢𑁄𑀢𑀺.

𑀅𑀜𑁆𑀜𑀢𑁆𑀭𑀸𑀧𑀺𑀯𑀺𑀜𑁆𑀜𑀢𑁆𑀢𑀺𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑁂𑀦 𑀯𑀺𑀦𑀸𑀧𑀺. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸𑀧𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀲𑀤𑁆𑀤𑁂𑀦 𑀧𑀦 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑁂𑀦 𑀲𑀳𑀸𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀸𑀦𑀺 𑀳𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀬𑀤𑀸 𑀓𑀸𑀬𑀗𑁆𑀕𑀯𑀸 𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑀲𑁆𑀫𑀺𑀁𑀏𑀯 𑀲𑀺𑀚𑁆𑀛𑀦𑁆𑀢𑀺. 𑀢𑀤𑀸𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀦𑀸𑀯 𑀧𑀯𑀢𑁆𑀢𑀦𑁆𑀢𑀺. 𑀬𑀤𑀸 𑀧𑀦 𑀢𑀸𑀦𑀺 𑀘𑁄𑀧𑁂𑀢𑁆𑀯𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀲𑀺𑀚𑁆𑀛𑀦𑁆𑀢𑀺, 𑀢𑀤𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀢𑁂𑀦 𑀇𑀫𑁂𑀲𑀁 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀇𑀫𑀸𑀦𑀺 𑀫𑀦𑁄𑀤𑁆𑀯𑀸𑀭𑁂𑀏𑀯 𑀩𑀳𑀼𑀮𑀁 𑀧𑀯𑀢𑁆𑀢𑀦𑁆𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀧𑀦 𑀅𑀧𑁆𑀧𑀓𑀫𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀫𑀦𑀲𑁆𑀫𑀺𑀁𑀬𑁂𑀯𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄𑀢𑀺. 𑀢𑀢𑁆𑀣 𑀫𑀦𑀲𑁆𑀫𑀺𑀁 𑀬𑁂𑀯𑀸𑀢𑀺 𑀓𑀼𑀲𑀮𑀸 𑀓𑀼𑀲𑀮𑀚𑀯𑀦𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀫𑀦𑁄𑀤𑁆𑀯𑀸𑀭𑁂𑀏𑀯. 𑀏𑀢𑁂𑀦 𑀧𑀼𑀭𑀺𑀫𑁂𑀲𑀼𑀧𑀺 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂𑀢𑀺 𑀧𑀤𑁂𑀲𑀼 𑀏𑀯𑀲𑀤𑁆𑀤𑀲𑀫𑁆𑀪𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀢𑀢𑁆𑀣𑀧𑀺 𑀤𑁆𑀯𑀸𑀭𑁂𑀦 𑀓𑀫𑁆𑀫𑀯𑀯𑀢𑁆𑀣𑀸𑀦𑀁 𑀲𑀼𑀝𑁆𑀞𑀼𑀢𑀭𑀁 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. 𑀇𑀢𑀭𑀣𑀸 𑀉𑀧𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀅𑀢𑁆𑀣𑀦𑁆𑀢𑀭𑀧𑀲𑀗𑁆𑀕𑁄𑀧𑀺 𑀲𑀺𑀬𑀸𑀢𑀺. 𑀅𑀧𑀺𑀘, 𑀇𑀥 𑀏𑀯𑀲𑀤𑁆𑀤𑁂𑀦 𑀅𑀬𑀁𑀧𑀺 𑀯𑀺𑀲𑁂𑀲𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀧𑀸𑀡𑀯𑀥𑀸𑀤𑀻𑀲𑀼 𑀳𑀺 𑀯𑀥𑀸𑀫𑀺 𑀦𑀁 𑀅𑀯𑀳𑀭𑀸𑀫𑀺 𑀦 𑀦𑁆𑀢𑀺𑀆𑀤𑀺𑀦𑀸 𑀲𑀁𑀯𑀺𑀥𑀸𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀘𑁂𑀢𑀬𑀺𑀢𑀓𑁆𑀭𑀺𑀬𑀸𑀏𑀯 𑀧𑀥𑀸𑀦𑀁 𑀳𑁄𑀢𑀺. 𑀲𑀸𑀘 𑀓𑀸𑀬𑀯𑀘𑀻𑀧𑀬𑁄𑀕𑁂𑀳𑀺 𑀯𑀺𑀦𑀸 𑀦𑀲𑀺𑀚𑁆𑀛𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀓𑀸𑀬 𑀯𑀘𑀻 𑀧𑀬𑁄𑀕𑀸 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀏𑀓𑀁 𑀅𑀗𑁆𑀕𑀁 𑀳𑁄𑀦𑁆𑀢𑀺. 𑀢𑀁 𑀲𑀳𑀚𑀸𑀢𑀸𑀘 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀏𑀯 𑀳𑀼𑀢𑁆𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀧𑀭𑀪𑀡𑁆𑀟𑀸 𑀪𑀺𑀚𑁆𑀛𑀸𑀬𑀦𑀸𑀤𑀻𑀲𑀼 𑀧𑀦 𑀅𑀪𑀺𑀚𑁆𑀛𑀸𑀤𑀻𑀦𑀁 𑀅𑀢𑁆𑀢𑀧𑀥𑀸𑀦𑀸𑀦𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀸𑀦𑀁𑀧𑀺 𑀓𑀸𑀬 𑀯𑀘𑀻𑀧𑀬𑁄𑀕𑀸𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀅𑀗𑁆𑀕𑀫𑁂𑀯 𑀦𑀳𑁄𑀦𑁆𑀢𑀺. 𑀢𑀣𑀸 𑀘𑀺𑀦𑁆𑀢𑀸𑀧𑀯𑀢𑁆𑀢𑀺 𑀫𑀢𑁆𑀢𑁂𑀦𑁂𑀯 𑀢𑀢𑁆𑀣 𑀓𑀫𑁆𑀫𑀲𑀺𑀤𑁆𑀥𑀺𑀢𑁄. 𑀇𑀢𑀺 𑀇𑀫𑁂𑀲𑀼 𑀓𑀫𑁆𑀫𑁂𑀲𑀼 𑀓𑀸𑀬 𑀯𑀘𑀻𑀤𑁆𑀯𑀸𑀭𑀸𑀦𑀁 𑀲𑀩𑁆𑀩𑁂𑀦𑀲𑀩𑁆𑀩𑀁 𑀅𑀗𑁆𑀕𑀪𑀸𑀯𑀧𑀝𑀺𑀓𑁆𑀔𑀺𑀧𑀦𑀢𑁆𑀣𑀁 𑀫𑀦𑀲𑁆𑀫𑀺𑀁 𑀬𑁂𑀯𑀸𑀢𑀺 𑀏𑀯 𑀕𑀳𑀡𑀁 𑀇𑀥𑁂𑀯 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀧𑀦 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺𑀫𑀢𑁆𑀢 𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 𑀩𑀸𑀳𑀼𑀮𑁆𑀮𑀲𑀤𑁆𑀤𑁄𑀧𑀺 𑀇𑀥 𑀕𑀳𑀺𑀢𑁄𑀢𑀺.

[𑁧𑁫𑁬] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀯 𑀳𑁄𑀦𑁆𑀢𑀻𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀇𑀥 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀓𑁂𑀯𑀮𑀁 𑀫𑀦𑁄𑀓𑀫𑁆𑀫 𑀓𑀺𑀘𑁆𑀘𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀳𑁄𑀦𑁆𑀢𑀺. 𑀘𑁂𑀢𑀦𑀸𑀏𑀯 𑀧𑀦 𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀸 𑀳𑁄𑀢𑀻𑀢𑀺. [𑀫𑀦𑁄𑀓𑀫𑁆𑀫𑀁]

𑁧𑁫𑁧. 𑀏𑀢𑁆𑀣 𑀘 𑀤𑀲𑀦𑁆𑀦𑀁𑀧𑀺 𑀇𑀫𑁂𑀲𑀁 𑀓𑀫𑁆𑀫𑀧𑀣𑀸𑀦𑀁 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀬𑁄 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑁂 𑀅𑀦𑁂𑀓𑀦𑁆𑀢𑀺𑀓𑀧𑀓𑁆𑀔𑀁 𑀕𑀢𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑀝𑀻𑀓𑀸𑀬𑀁 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀸𑀧𑀺 𑀇𑀫𑀁 𑀲𑀢𑁆𑀢𑀁 𑀫𑀸𑀭𑁂𑀲𑁆𑀲𑀸𑀫𑀺 𑀇𑀫𑀁 𑀪𑀡𑁆𑀟𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀸 𑀩𑀮𑀯𑀧𑀘𑁆𑀘𑀬𑁂 𑀮𑀤𑁆𑀥𑀸 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀦𑁆𑀢𑀺. 𑀅𑀮𑀤𑁆𑀥𑀸 𑀦𑀸𑀓𑀟𑁆𑀠𑀦𑁆𑀢𑀻𑀢𑀺 𑀬𑀼𑀢𑁆𑀢𑀸. 𑀬𑀸𑀦𑀺 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀓𑀫𑁆𑀫𑀧𑀣𑀪𑁂𑀤𑀁 𑀅𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀬𑀤𑁆𑀯𑀸𑀭𑁂 𑀤𑀺𑀲𑁆𑀲𑀫𑀸𑀦𑀸𑀦𑀺 𑀓𑀸𑀬𑀓𑀫𑁆𑀫𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀤𑀺𑀲𑁆𑀲𑀫𑀸𑀦𑀸𑀦𑀺 𑀯𑀘𑀻𑀓𑀫𑁆𑀫𑀸𑀦𑀺𑀦𑀸𑀫. 𑀲𑀼𑀤𑁆𑀥𑁂 𑀫𑀦𑁄𑀤𑁆𑀯𑀸𑀭𑁂 𑀤𑀺𑀲𑁆𑀲𑀫𑀸𑀦𑀸𑀦𑀺 𑀫𑀦𑁄𑀓𑀫𑁆𑀫𑀸𑀦𑀺𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀤𑁄𑀲𑀫𑀽𑀮𑁂𑀦𑀸𑀢𑀺 𑀤𑁄𑀲𑀲𑀗𑁆𑀔𑀸𑀢𑀫𑀽𑀮𑁂𑀦 𑀤𑁄𑀲𑀫𑀽𑀮𑀓𑀘𑀺𑀢𑁆𑀢𑁂𑀦𑀸𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀢𑀢𑁆𑀣 𑀧𑀼𑀭𑀺𑀫𑁄 𑀩𑁆𑀬𑀸𑀧𑀸𑀤𑀯𑀚𑁆𑀚𑁂𑀳𑀺 𑀤𑁆𑀯𑀻𑀳𑀺 𑀬𑀼𑀚𑁆𑀚𑀢𑀺, 𑀧𑀘𑁆𑀙𑀺𑀫𑁄 𑀢𑀻𑀳𑀺𑀧𑀺. 𑀮𑁄𑀪𑀫𑀽𑀮𑁂𑀦𑀸𑀢𑀺 𑀏𑀢𑁆𑀣 𑀏𑀲𑀦𑀬𑁄. 𑀢𑀢𑁆𑀣𑀸𑀧𑀺𑀢𑀺 𑀧𑀼𑀭𑀺𑀫𑁄 𑀅𑀪𑀺𑀚𑁆𑀛𑀸𑀯𑀚𑁆𑀚𑁂𑀳𑀺 𑀤𑁆𑀯𑀻𑀳𑀺 𑀬𑀼𑀚𑁆𑀚𑀢𑀺. 𑀧𑀘𑁆𑀙𑀺𑀫𑁄 𑀢𑀻𑀳𑀻𑀢𑀺. 𑀤𑁆𑀯𑀻𑀳𑀺 𑀫𑀽𑀮𑁂𑀳𑀻𑀢𑀺 𑀓𑀤𑀸𑀘𑀺 𑀤𑁄𑀲𑀫𑀽𑀮𑁂𑀦 𑀓𑀤𑀸𑀘𑀺 𑀮𑁄𑀪𑀫𑀽𑀮𑁂𑀦𑀸𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀫𑀽𑀮𑁂𑀳𑀺 𑀲𑀫𑁆𑀪𑀯𑀦𑁆𑀢𑀺. 𑀫𑁄𑀳𑁄 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀯𑀺𑀲𑁂𑀲𑀓𑀭𑁄 𑀦 𑀳𑁄𑀢𑀻𑀢𑀺 𑀇𑀥 𑀦 𑀕𑀳𑀺𑀢𑁄.

[𑁧𑁫𑁭] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀦𑀺𑀥𑀺𑀧𑀸𑀞𑀓𑀧𑀫𑀸𑀡𑀢𑁄 𑀤𑀼𑀝𑁆𑀞𑀦𑀺𑀕𑁆𑀕𑀳𑀢𑁆𑀣𑀁 𑀧𑀭𑀲𑀦𑁆𑀢𑀓𑀁 𑀳𑀭𑀦𑁆𑀢𑀸𑀦𑀁 𑀭𑀸𑀚𑀽𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀲𑀩𑁆𑀩𑀫𑀺𑀤𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀭𑀸𑀚𑀽𑀳𑀺 𑀤𑀺𑀦𑁆𑀦𑀁. 𑀢𑁂𑀲𑀁 𑀧𑀦 𑀲𑀩𑁆𑀩𑀤𑀼𑀩𑁆𑀩𑀮𑀪𑀸𑀯𑁂𑀦 𑀅𑀜𑁆𑀜𑁂 𑀪𑀼𑀜𑁆𑀚𑀦𑁆𑀢𑀺. 𑀅𑀢𑁆𑀢𑀲𑀦𑁆𑀢𑀓𑀫𑁂𑀯 𑀩𑁆𑀭𑀸𑀳𑁆𑀫𑀡𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀯𑀢𑁆𑀯𑀸 𑀲𑀓𑀲𑀜𑁆𑀜𑀸𑀬 𑀏𑀯 𑀬𑀁𑀓𑀺𑀜𑁆𑀘𑀺 𑀳𑀭𑀦𑁆𑀢𑀸𑀦𑀁 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀸𑀧𑀯𑀸𑀤𑀻𑀦𑀜𑁆𑀘 𑀫𑁄𑀳𑀫𑀽𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀇𑀥 𑀦 𑀬𑀼𑀚𑁆𑀚𑀢𑀺.

𑀲𑀳𑀚𑀸𑀢𑀫𑀽𑀮𑀜𑁆𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀅𑀲𑀸𑀥𑀸𑀭𑀡𑀪𑀽𑀢𑀜𑁆𑀘. 𑀢𑁂𑀲𑀜𑁆𑀘 𑀢𑀣𑀸𑀳𑀭𑀦𑁆𑀢𑀸𑀦𑀁 𑀳𑀭𑀡𑀁 𑀳𑀭𑀡𑀓𑀸𑀮𑁂 𑀓𑀤𑀸𑀘𑀺𑀤𑁄𑀲𑀫𑀽𑀮𑁂𑀦 𑀓𑀤𑀸𑀘𑀺 𑀮𑁄𑀪𑀫𑀽𑀮𑁂𑀦𑀸𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀫𑀽𑀮𑁂𑀳𑀺 𑀏𑀯 𑀲𑀫𑁆𑀪𑀯𑀢𑀻𑀢𑀺. 𑀬𑁄 𑀧𑀦 𑀫𑁄𑀳𑁄 𑀫𑀳𑀸𑀲𑀫𑁆𑀫𑀢𑀸𑀤𑀻𑀦𑀁𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀓𑀸𑀮𑁂 𑀧𑀯𑀢𑁆𑀢𑀁 𑀧𑁄𑀭𑀸𑀡𑀓 𑀦𑀺𑀥𑀺𑀲𑀢𑁆𑀣𑀁 𑀣𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀥𑀫𑁆𑀫𑀺𑀓𑀸𑀦𑀁𑀭𑀸𑀚𑀽𑀦𑀁 𑀓𑀸𑀮𑁂 𑀧𑀯𑀢𑁆𑀢𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀅𑀥𑀫𑁆𑀫𑀺𑀓𑁂𑀲𑀼 𑀥𑀫𑁆𑀫𑀲𑀢𑁆𑀣 𑀭𑀸𑀚𑀲𑀢𑁆𑀣 𑀲𑀗𑁆𑀔𑀸𑀢𑁂𑀲𑀼 𑀦𑀺𑀥𑀺𑀧𑀸𑀞𑁂𑀲𑀼 𑀥𑀫𑁆𑀫𑀺𑀓𑀲𑀜𑁆𑀜𑀻𑀦𑀁 𑀭𑀸𑀚𑀽𑀦𑀁 𑀉𑀧𑁆𑀧𑀦𑁆𑀦𑁄. 𑀬𑁄𑀘 𑀭𑀸𑀚𑀽𑀦𑀁 𑀅𑀪𑀺𑀲𑁂𑀓𑀓𑀸𑀮𑁂 𑀤𑀺𑀦𑁆𑀦𑀜𑁆𑀜𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁𑀢𑀺𑀡𑀓𑀝𑁆𑀞𑁄𑀤𑀓𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑀫𑀺𑀤𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀭𑀸𑀚𑀽𑀳𑀺 𑀤𑀺𑀦𑁆𑀦𑀦𑁆𑀢𑀺 𑀏𑀯𑀁 𑀲𑀜𑁆𑀜𑀻𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑁆𑀧𑀦𑁆𑀦𑁄. 𑀬𑁄𑀘 𑀦𑀢𑁆𑀣𑀺 𑀲𑀼𑀓𑀢 𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀤𑀺𑀝𑁆𑀞𑀺𑀓𑀸𑀦𑀁 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀸 𑀧𑀯𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑁄. 𑀲𑁄𑀲𑀩𑁆𑀩𑁄𑀧𑀺 𑀉𑀧𑀦𑀺𑀲𑁆𑀲𑀬𑀫𑁄𑀳𑁄 𑀦𑀸𑀫 𑀳𑁄𑀢𑀺. 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄. 𑀇𑀢𑀭𑀣𑀸 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸𑀢𑀺 𑀯𑀘𑀦𑀢𑁄 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀓𑀫𑁆𑀫 𑀧𑀣𑀸𑀢𑀺 𑀫𑀽𑀮𑀓𑀸𑀏𑀯 𑀇𑀥 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺. 𑀏𑀯𑀁𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀓𑀫𑁆𑀫𑁂𑀲𑀼𑀘 𑀓𑀫𑁆𑀫𑀨𑀮𑁂𑀲𑀼𑀘 𑀲𑀜𑁆𑀚𑀸𑀢𑀓𑀗𑁆𑀔𑀸𑀦𑀁 𑀚𑀦𑀸𑀦𑀁 𑀓𑀗𑁆𑀔𑀸 𑀧𑀭𑀺𑀬𑀼𑀝𑁆𑀞𑀸𑀦 𑀘𑀺𑀢𑁆𑀢𑁂𑀦𑀲𑀳𑁂𑀯𑀢𑀤𑀦𑀼𑀭𑀽𑀧𑀸𑀦𑀺𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸𑀦𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀲𑀼𑀤𑁆𑀥𑁂𑀦 𑀫𑁄𑀳𑀫𑀽𑀮𑁂𑀦 𑀚𑀸𑀬𑀦𑁆𑀢𑀻𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀧𑀭𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀚𑀦𑀓𑁂𑀲𑀼 𑀕𑀳𑀡𑀁𑀧𑀺 𑀉𑀧𑀧𑀦𑁆𑀦𑀁 𑀳𑁄𑀢𑀻𑀢𑀺. [𑀅𑀓𑀼𑀲𑀮𑀓𑀫𑁆𑀫𑀁].

𑁧𑁫𑁨. 𑀓𑀸𑀫𑀸𑀯𑀘𑀭𑀓𑀼𑀲𑀮𑀁𑀧𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬 𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀤𑁆𑀯𑁂 𑀧𑀭𑀺𑀬𑀸𑀬𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁, 𑀯𑀓𑁆𑀔𑀫𑀸𑀦𑁂𑀲𑀼 𑀳𑀺 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀽𑀲𑀼 𑀬𑀁𑀓𑀺𑀜𑁆𑀘𑀺 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼𑀁 𑀓𑀸𑀬𑀗𑁆𑀕𑀁 𑀘𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀯𑀸𑀘𑀗𑁆𑀕𑀁 𑀘𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀓𑀸𑀬𑀗𑁆𑀕 𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀏𑀯 𑀧𑀯𑀢𑁆𑀢𑀺𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫𑀸𑀢𑀺 𑀅𑀬𑀫𑁂𑀓𑁄 𑀧𑀭𑀺𑀬𑀸𑀬𑁄. 𑀅𑀬𑀁 𑀧𑀦 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺𑀘𑁂𑀯 𑀭𑀳𑁄 𑀘. 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺𑀘𑁂𑀯 𑀭𑀳𑁄𑀘. 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺𑀘𑁂𑀯 𑀭𑀳𑁄𑀘𑀸𑀢𑀺𑀘. 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀁. 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀁. 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺 𑀘.

𑀧𑀤𑀓𑁆𑀔𑀺𑀡𑀁 𑀓𑀸𑀬𑀓𑀫𑁆𑀫𑀁, 𑀯𑀸𑀘𑀸𑀓𑀫𑁆𑀫𑀁 𑀧𑀤𑀓𑁆𑀔𑀺𑀡𑀁;

𑀧𑀤𑀓𑁆𑀔𑀺𑀡𑀁 𑀫𑀦𑁄𑀓𑀫𑁆𑀫𑀁, 𑀧𑀡𑀻𑀳𑀺𑀢𑁂 𑀧𑀤𑀓𑁆𑀔𑀺𑀡𑁂 𑀢𑀺𑀘.

𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀆𑀕𑀢𑁄. 𑀅𑀧𑀺𑀘, 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀓𑀮𑀸𑀬 𑀦𑀯𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀬 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀤𑀸𑀦𑀫𑀬𑀁𑀧𑀺 𑀓𑀸𑀬𑀯𑀘𑀻 𑀫𑀦𑁄𑀓𑀫𑁆𑀫𑀯𑀲𑁂𑀦 𑀢𑀺𑀥𑀸 𑀯𑀺𑀪𑀢𑁆𑀢𑀁. 𑀢𑀣𑀸 𑀲𑀻𑀮𑀫𑀬𑀁 𑀪𑀸𑀯𑀦𑀸𑀫𑀬𑀜𑁆𑀘𑀸𑀢𑀺. 𑀬𑀲𑁆𑀫𑀺𑀁 𑀧𑀦 𑀤𑀼𑀲𑁆𑀲𑀺𑀮𑁆𑀬𑁂 𑀧𑀯𑀢𑁆𑀢𑀫𑀸𑀦𑁂 𑀓𑀸𑀬𑁄 𑀅𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀓𑀸𑀬𑀲𑀁𑀯𑀭𑁄 𑀪𑀺𑀚𑁆𑀚𑀢𑀺. 𑀬𑀁 𑀧𑀦 𑀓𑀼𑀲𑀮𑀁 𑀧𑀯𑀢𑁆𑀢𑀫𑀸𑀦𑀁 𑀢𑀤𑀗𑁆𑀕𑀧𑀳𑀸𑀦𑀸𑀤𑀺𑀯𑀲𑁂𑀦 𑀢𑀁 𑀤𑀼𑀲𑁆𑀲𑀺𑀮𑁆𑀬𑀁 𑀧𑀚𑀳𑀺𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑀁 𑀲𑁄𑀥𑀬𑀫𑀸𑀦𑀁 𑀓𑀸𑀬𑀲𑀁𑀯𑀭𑀁 𑀧𑀽𑀭𑀬𑀫𑀸𑀦𑀁 𑀧𑀯𑀢𑁆𑀢𑀢𑀺. 𑀢𑀁 𑀓𑀸𑀬𑀘𑁄𑀧𑀦 𑀭𑀳𑀺𑀢𑀁𑀧𑀺 𑀓𑀸𑀬𑀗𑁆𑀕 𑀲𑀁𑀯𑀭𑀡 𑀓𑀺𑀘𑁆𑀘𑀢𑁆𑀢𑀸 𑀓𑀺𑀘𑁆𑀘𑀲𑀻𑀲𑁂𑀦 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁𑀦𑀸𑀫. 𑀓𑀸𑀬𑀲𑀼𑀘𑀭𑀺𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣𑀘 𑀢𑀁 𑀤𑀼𑀲𑁆𑀲𑀺𑀮𑁆𑀬𑀁 𑀧𑀚𑀳𑀺𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀧𑀸𑀡𑀖𑀸𑀢𑀸𑀤𑀺𑀓𑀁 𑀓𑀸𑀬𑀤𑀼𑀲𑁆𑀲𑀺𑀮𑁆𑀬𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀢𑀁 𑀓𑀸𑀬𑀤𑀼𑀲𑁆𑀲𑀺𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀓𑀸𑀬𑀤𑁆𑀯𑀸𑀭𑀁 𑀲𑁄𑀥 𑀬𑀫𑀸𑀦𑀦𑁆𑀢𑀺 𑀬𑀲𑁆𑀫𑀺𑀁 𑀤𑀼𑀲𑁆𑀲𑀺𑀮𑁆𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀓𑀸𑀬𑀗𑁆𑀕𑀁 𑀅𑀲𑀼𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀓𑀸𑀬𑀤𑁆𑀯𑀸𑀭𑀁 𑀲𑁄𑀥𑀬𑀫𑀸𑀦𑀁. 𑀓𑀸𑀬𑀲𑀁𑀯𑀭𑀁 𑀧𑀽𑀭𑀬𑀫𑀸𑀦𑀦𑁆𑀢𑀺 𑀲𑀬𑀁 𑀓𑀸𑀬𑀗𑁆𑀕𑀲𑀁𑀯𑀭𑀡𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑁂𑀦 𑀓𑀸𑀬𑀲𑀁𑀯𑀭𑀁 𑀧𑀽𑀭𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀘𑀻𑀓𑀫𑁆𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀬𑁂𑀲𑀁 𑀧𑀦 𑀲𑀩𑁆𑀩𑀁𑀧𑀺 𑀓𑀮𑁆𑀬𑀸𑀡𑀓𑀫𑁆𑀫𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀁𑀧𑀺 𑀫𑀦𑁄𑀤𑁆𑀯𑀸𑀭𑀁𑀏𑀯 𑀲𑁄𑀥𑀬𑀫𑀸𑀦𑀁 𑀫𑀦𑁄𑀲𑀁𑀯𑀭𑀁𑀏𑀯 𑀧𑀽𑀭𑀬𑀫𑀸𑀦𑀁 𑀧𑀯𑀢𑁆𑀢𑀢𑀻𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀁 𑀫𑀦𑁄𑀓𑀫𑁆𑀫𑀁𑀦𑀸𑀫. 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀓𑁄 𑀧𑀭𑀺𑀬𑀸𑀬𑁄. 𑀅𑀬𑀁 𑀧𑀦 𑀅𑀦𑁂𑀓𑀲𑀢𑁂𑀲𑀼 𑀓𑀫𑁆𑀫𑀧𑀣𑀲𑀼𑀢𑁆𑀢𑁂𑀲𑀼 𑀆𑀕𑀢𑁄. 𑀅𑀧𑀺𑀘, 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀓𑀮𑀸𑀬 𑀤𑁆𑀯𑀸𑀭𑀓𑀣𑀸𑀓 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄𑀢𑀺. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀭𑀺𑀬𑀸𑀬𑁂𑀲𑀼 𑀲𑀢𑁆𑀢𑀼𑀲𑀸𑀲𑀦𑁂 𑀓𑀮𑁆𑀬𑀸𑀡𑀥𑀫𑁆𑀫𑀧𑀽𑀭𑀡𑀁𑀦𑀸𑀫 𑀬𑀸𑀯𑀤𑁂𑀯 𑀧𑀸𑀧𑀥𑀫𑁆𑀫𑀧𑀳𑀸𑀦𑀢𑁆𑀣𑀸𑀬 𑀏𑀯 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑁄𑀬𑁂𑀯 𑀧𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀤𑀺𑀬𑁆𑀬𑀢𑀺 𑀏𑀢𑁂𑀦𑀸𑀢𑀺 𑀤𑀸𑀦𑀁. 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀲𑀻𑀮𑀬𑀢𑀻𑀢𑀺 𑀲𑀻𑀮𑀁. 𑀓𑀸𑀬 𑀯𑀘𑀻𑀓𑀫𑁆𑀫𑀸𑀦𑀺 𑀲𑀸𑀯𑀚𑁆𑀚𑀸𑀦𑀺 𑀦𑀻𑀯𑀸𑀭𑁂𑀢𑁆𑀯𑀸 𑀅𑀦𑀯𑀚𑁆𑀚𑀸𑀦𑀺 𑀲𑀼𑀲𑀫𑀸𑀳𑀺𑀢𑀸𑀦𑀺 𑀓𑀢𑁆𑀯𑀸 𑀲𑀫𑁆𑀫𑀸𑀤𑀳𑀢𑀺 𑀣𑀧𑁂𑀢𑀺, 𑀉𑀧𑀭𑀺𑀫𑁂 𑀓𑀼𑀲𑀮𑀥𑀫𑁆𑀫𑁂𑀘 𑀉𑀧𑀥𑀸𑀭𑁂𑀢𑀺. 𑀢𑁂𑀲𑀁 𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑁂𑀦𑁆𑀢𑀺 𑀏𑀢𑀸𑀬𑀸𑀢𑀺 𑀪𑀸𑀯𑀦𑀸. 𑀅𑀥𑀺𑀓𑀼𑀲𑀮𑀥𑀫𑁆𑀫𑁂 𑀅𑀦𑀼𑀧𑁆𑀧𑀦𑁆𑀦𑁂𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀺 𑀉𑀧𑁆𑀧𑀦𑁆𑀦𑁂𑀯𑀸 𑀯𑀟𑁆𑀠𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀘𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀧𑀘𑀸𑀬𑀦𑀁. 𑀧𑀽𑀚𑁂𑀦𑁆𑀢𑀺 𑀓𑀸𑀬𑀯𑀸𑀘𑀸𑀳𑀺 𑀅𑀢𑁆𑀢𑀸𑀦𑀁 𑀦𑀻𑀘𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀲𑁂𑀲𑁂𑀦 𑀆𑀯𑀭𑀦𑁆𑀢𑀺 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀩𑁆𑀬𑀸𑀯𑀝𑀸𑀦𑀁 𑀪𑀸𑀯𑁄 𑀓𑀫𑁆𑀫𑀁𑀯𑀸 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀧𑀚𑁆𑀚𑀺𑀢𑁆𑀣𑀸𑀢𑀺 𑀧𑀢𑁆𑀢𑀺. 𑀅𑀢𑁆𑀢𑀦𑀺 𑀮𑀤𑁆𑀥𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀲𑁆𑀲 𑀦𑀸𑀫𑀁. 𑀧𑀸𑀧𑀻𑀬𑀢𑀻𑀢𑀺𑀯𑀸 𑀧𑀢𑁆𑀢𑀺. 𑀧𑀭𑁂𑀳𑀺 𑀅𑀦𑀼𑀫𑁄𑀤𑀦𑁆𑀢𑁂𑀳𑀺 𑀮𑀤𑁆𑀥𑀩𑁆𑀩𑀲𑁆𑀲 𑀧𑀼𑀜𑁆𑀜𑀸𑀦𑀺𑀲𑀦𑁆𑀤𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀢𑁆𑀢𑀺𑀁 𑀤𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀺𑀤𑀸𑀦𑀁. 𑀢𑀤𑁂𑀯 𑀧𑀭𑁂𑀳𑀺 𑀤𑀺𑀦𑁆𑀦𑀁 𑀅𑀦𑀼𑀫𑁄𑀤𑀦𑁆𑀢𑀺. 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀢𑁆𑀢𑀸𑀦𑀼𑀫𑁄𑀤𑀦𑀁. 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀥𑀫𑁆𑀫𑀲𑀯𑀦𑀁. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺 𑀏𑀢𑀸𑀬𑀸𑀢𑀺 𑀥𑀫𑁆𑀫𑀤𑁂𑀲𑀦𑀸. 𑀅𑀢𑁆𑀣𑀺 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀬𑀺𑀝𑁆𑀞𑀁, 𑀅𑀢𑁆𑀣𑀺 𑀳𑀼𑀢𑀁, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄𑀢𑀺𑀆𑀤𑀺𑀦𑀸 𑀤𑀲𑀯𑀢𑁆𑀣𑀼𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀉𑀚𑀼𑀁 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁. 𑀲𑀩𑁆𑀩𑀸𑀦𑀺 𑀧𑀦 𑀢𑀸𑀦𑀺 𑀧𑀼𑀦𑁂𑀦𑁆𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀲𑁄𑀥𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 𑀧𑀼𑀜𑁆𑀜𑀸𑀦𑀺. 𑀧𑀽𑀚𑀦𑀻𑀬𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀧𑀼𑀜𑁆𑀜𑀸𑀦𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀸𑀦𑀺𑀏𑀯 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀝𑁆𑀞𑁂𑀦 𑀓𑁆𑀭𑀺𑀬𑀸𑀦𑀺𑀘𑀸𑀢𑀺 𑀧𑀼𑀜𑁆𑀜𑀓𑁆𑀭𑀺𑀬𑀸𑀦𑀺. 𑀢𑀸𑀦𑀺𑀬𑁂𑀯 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀽𑀦𑀺𑀘𑀸𑀢𑀺 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀽𑀦𑀻𑀢𑀺. 𑀏𑀢𑁆𑀣 𑀏𑀓𑀫𑁂𑀓𑀁 𑀢𑀺𑀯𑀺𑀥𑀁 𑀳𑁄𑀢𑀺 𑀧𑀼𑀭𑀺𑀫𑀁 𑀫𑀚𑁆𑀛𑀺𑀫𑀁 𑀧𑀘𑁆𑀙𑀺𑀫𑀦𑁆𑀢𑀺. 𑀢𑀢𑁆𑀣 𑀤𑀸𑀦𑁂 𑀢𑀸𑀯 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀧𑀭𑀺𑀘𑁆𑀘𑀸𑀕𑀓𑀭𑀡𑀁 𑀫𑀚𑁆𑀛𑀺𑀫𑀁𑀦𑀸𑀫. 𑀢𑀢𑁄 𑀧𑀼𑀩𑁆𑀩𑁂 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀆𑀭𑀩𑁆𑀪 𑀤𑀸𑀦𑀁 𑀉𑀤𑁆𑀤𑀺𑀲𑁆𑀲 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀸 𑀓𑀼𑀲𑀮𑀘𑁂𑀢𑀦𑀸 𑀧𑀼𑀭𑀺𑀫𑀁𑀦𑀸𑀫. 𑀧𑀘𑁆𑀙𑀸 𑀪𑀸𑀕𑁂 𑀧𑀦 𑀅𑀢𑁆𑀢𑀦𑀸 𑀤𑀺𑀦𑁆𑀦𑀤𑀸𑀦𑀁 𑀆𑀭𑀩𑁆𑀪 𑀧𑀼𑀦𑀧𑁆𑀧𑀼𑀦𑀁 𑀅𑀢𑁆𑀢𑀫𑀦𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸 𑀓𑀼𑀲𑀮𑀘𑁂𑀢𑀦𑀸 𑀧𑀘𑁆𑀙𑀺𑀫𑀁𑀦𑀸𑀫𑀁. 𑀲𑀩𑁆𑀩𑀁𑀧𑀺 𑀘𑁂𑀢𑀁 𑀅𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀩𑀮𑀯𑀧𑀘𑁆𑀘𑀬𑁂 𑀮𑀤𑁆𑀥𑀸 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀅𑀮𑀤𑁆𑀥𑀸 𑀦 𑀤𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀦 𑀳𑀻𑀦 𑀫𑀚𑁆𑀛𑀺𑀫𑀧𑀡𑀻𑀢𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀻𑀦𑁂𑀦 𑀙𑀦𑁆𑀤𑁂𑀦 𑀘𑀺𑀢𑁆𑀢𑁂𑀦 𑀯𑀻𑀭𑀺𑀬𑁂𑀦 𑀯𑀻𑀫𑀁𑀲𑀸𑀬𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁, 𑀫𑀚𑁆𑀛𑀺𑀫𑁂𑀦 𑀙𑀦𑁆𑀤𑀸𑀤𑀺𑀦𑀸 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁, 𑀧𑀡𑀻𑀢𑁂𑀦 𑀧𑀡𑀻𑀢𑀁. 𑀬𑀲𑀓𑀸𑀫𑀢𑀸𑀬𑀯𑀸 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁. 𑀧𑀼𑀜𑁆𑀜𑀨𑀮𑀓𑀸𑀫𑀢𑀸𑀬𑀯𑀸 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁. 𑀓𑀢𑁆𑀢𑀩𑁆𑀩𑀫𑁂 𑀯𑀺𑀤𑀦𑁆𑀢𑀺 𑀅𑀭𑀺𑀬𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁. 𑀅𑀢𑁆𑀢𑀼𑀓𑁆𑀓𑀁𑀲𑀦 𑀧𑀭𑀯𑀫𑁆𑀪𑀦𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀁𑀯𑀸 𑀳𑀻𑀦𑀁. 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀁 𑀮𑁄𑀓𑀺𑀬𑀲𑀼𑀔𑀪𑀸𑀕𑀺𑀢𑀸𑀬 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁. 𑀫𑀕𑁆𑀕𑀨𑀮𑀲𑀼𑀔𑀪𑀸𑀕𑀺𑀢𑀸𑀬 𑀧𑀯𑀢𑁆𑀢𑀺𑀢𑀁 𑀧𑀡𑀻𑀢𑀁. 𑀢𑀡𑁆𑀳𑀸𑀯𑀲𑁂𑀦𑀯𑀸 𑀪𑀯𑀪𑁄𑀕𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀳𑀻𑀦𑀁. 𑀅𑀢𑁆𑀢𑀦𑁄 𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀫𑀚𑁆𑀛𑀺𑀫𑀁. 𑀲𑀩𑁆𑀩𑀲𑀢𑁆𑀢𑀯𑀺𑀫𑁄𑀓𑁆𑀔𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀧𑀸𑀭𑀫𑀺𑀢𑀸𑀤𑀸𑀦𑀁 𑀧𑀡𑀻𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀻𑀮𑀦𑀺𑀤𑁆𑀤𑁂𑀲𑀁 𑀦𑀺𑀲𑁆𑀲𑀸𑀬 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑁂𑀲𑀼𑀧𑀺𑀬𑀣𑀸 𑀲𑀫𑁆𑀪𑀯𑀁 𑀢𑀺𑀓𑀤𑁆𑀯𑀬𑀁 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀲𑀻𑀮𑀁 𑀦𑀸𑀫𑀪𑀺𑀓𑁆𑀔𑀼𑀲𑀻𑀮𑀁, 𑀪𑀺𑀓𑁆𑀔𑀼𑀦𑀺𑀲𑀻𑀮𑀁, 𑀲𑀸𑀫𑀡𑁂𑀭𑀲𑀻𑀮𑀁, 𑀕𑀳𑀝𑁆𑀞𑀲𑀻𑀮𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀫𑀸𑀤𑀸𑀦𑀓𑀺𑀘𑁆𑀘𑀁 𑀓𑀫𑁆𑀫𑀯𑀸𑀘𑀸𑀬 𑀲𑀺𑀤𑁆𑀥𑀁𑀳𑁄𑀢𑀺. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑁂𑀦𑀯𑀸 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦𑀯𑀸 𑀓𑀫𑁆𑀫𑀯𑀸𑀘𑀸𑀬 𑀪𑀺𑀦𑁆𑀦𑀸𑀬 𑀲𑀩𑁆𑀩𑀁 𑀲𑀫𑀸𑀤𑀸𑀦𑀁 𑀪𑀺𑀦𑁆𑀦𑀁 𑀳𑁄𑀢𑀺. 𑀲𑀩𑁆𑀩𑀸𑀦𑀺 𑀉𑀧𑀲𑀫𑁆𑀧𑀦𑁆𑀦 𑀲𑀻𑀮𑀸𑀦𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀸 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀁 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀤𑀼𑀲𑁆𑀲𑀻𑀮𑁄𑀦𑀸𑀫 𑀳𑁄𑀢𑀺. 𑀣𑀧𑁂𑀢𑁆𑀯𑀸𑀧𑀦 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀜𑁆𑀜𑀲𑀺𑀓𑁆𑀔𑀸 𑀧𑀤𑀸𑀦𑀺 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀬𑀁 𑀯𑀻𑀢𑀺𑀓𑁆𑀓𑀫𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀲𑀁𑀯𑀭𑀪𑁂𑀤𑁄 𑀳𑁄𑀢𑀺. 𑀦 𑀲𑀫𑀸𑀤𑀸𑀦 𑀪𑁂𑀤𑁄. 𑀦 𑀳𑀺 𑀢𑀁 𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀲𑀫𑀸𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀻𑀢𑀺. 𑀧𑀝𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀲𑀁𑀯𑀭𑁄 𑀧𑀸𑀓𑀢𑀺𑀓𑁄 𑀳𑁄𑀢𑀺. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀯𑀸 𑀧𑀝𑀺𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄𑀯𑀸 𑀅𑀮𑀚𑁆𑀚𑀻𑀦𑀸𑀫 𑀳𑁄𑀢𑀺. 𑀦 𑀤𑀼𑀲𑁆𑀲𑀻𑀮𑁄𑀢𑀺. 𑀏𑀲𑀦𑀬𑁄 𑀲𑀸𑀫𑀡𑁂𑀭𑀲𑀻𑀮𑁂𑀧𑀺. 𑀢𑀢𑁆𑀣 𑀧𑀦 𑀲𑀭𑀡𑀕𑀫𑀦𑁂𑀦𑁂𑀯 𑀲𑀫𑀸𑀤𑀸𑀦𑀁𑀲𑀺𑀤𑁆𑀥𑀁 𑀳𑁄𑀢𑀺. 𑀮𑀺𑀗𑁆𑀕𑀦𑀸𑀲𑀦𑀗𑁆𑀕𑀁 𑀓𑀢𑁆𑀯𑀸 𑀲𑀭𑀡𑀕𑀫𑀦𑁂 𑀪𑀺𑀦𑁆𑀦𑁂 𑀲𑀩𑁆𑀩𑀁 𑀲𑀫𑀸𑀤𑀸𑀦𑀁 𑀪𑀺𑀚𑁆𑀚𑀢𑀺. 𑀇𑀢𑀭𑁂𑀲𑀼 𑀧𑀦 𑀬𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀲𑀁𑀯𑀭𑀪𑁂𑀤𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀳𑀝𑁆𑀞𑀲𑀻𑀮𑁂 𑀧𑀦 𑀧𑀓𑀢𑀺 𑀕𑀳𑀝𑁆𑀞𑀸𑀦𑀁 𑀕𑀳𑀡𑀯𑀲𑁂𑀦𑁂𑀯 𑀲𑀫𑀸𑀤𑀸𑀦𑀁 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀓𑀢𑁄𑀕𑀡𑁆𑀳𑀦𑁆𑀢𑁂 𑀲𑀩𑁆𑀩𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀲𑁆𑀫𑀺𑀁𑀘 𑀪𑀺𑀦𑁆𑀦𑁂 𑀲𑀩𑁆𑀩𑀸𑀦𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀲𑀩𑁆𑀩𑀸𑀦𑀺 𑀧𑀼𑀦 𑀲𑀫𑀸𑀤𑀸𑀢𑀩𑁆𑀩𑀸𑀦𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀡𑁆𑀳𑀦𑁆𑀢𑁂 𑀧𑀦 𑀬𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀏𑀢𑀤𑁂𑀯𑀪𑀺𑀚𑁆𑀚𑀢𑀺. 𑀢𑀤𑁂𑀯 𑀧𑀼𑀦 𑀲𑀫𑀸𑀤𑀸𑀢𑀩𑁆𑀩𑀁 𑀳𑁄𑀢𑀻𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸 𑀢𑀺𑀓𑁆𑀓𑀫𑀦𑁂 𑀧𑀦 𑀲𑀩𑁆𑀩𑀁 𑀲𑀫𑀸𑀤𑀸𑀦𑀁 𑀯𑀽𑀧𑀲𑀫𑁆𑀫𑀢𑀺𑀬𑁂𑀯. 𑀤𑀼𑀲𑁆𑀲𑀻𑀮𑀪𑀸𑀯𑁄 𑀧𑀦𑁂𑀢𑁆𑀣 𑀧𑀜𑁆𑀘𑀦𑁆𑀦𑀁 𑀦𑀺𑀘𑁆𑀘𑀲𑀻𑀮𑀸𑀦𑀁 𑀪𑁂𑀤𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀘𑁆𑀘𑀸𑀦𑀺𑀘𑁆𑀘𑁂𑀲𑀼 𑀧𑀦 𑀬𑀁 𑀦𑀺𑀘𑁆𑀘𑀫𑁂𑀯 𑀯𑀝𑁆𑀝𑀢𑀺. 𑀅𑀦𑀺𑀘𑁆𑀘𑀁 𑀦𑀯𑀝𑁆𑀝𑀢𑀺 𑀲𑀸𑀯𑀚𑁆𑀚𑀁 𑀳𑁄𑀢𑀺. 𑀢𑀁 𑀦𑀺𑀘𑁆𑀘𑀲𑀻𑀮𑀁 𑀦𑀸𑀫. 𑀬𑀁 𑀧𑀦 𑀦𑀺𑀘𑁆𑀘𑀁𑀧𑀺 𑀯𑀝𑁆𑀝𑀢𑀺. 𑀫𑀳𑀦𑁆𑀢𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀳𑁄𑀢𑀺. 𑀅𑀦𑀺𑀘𑁆𑀘𑀁𑀧𑀺 𑀯𑀝𑁆𑀝𑀢𑀺 𑀲𑀸𑀯𑀚𑁆𑀚𑀁 𑀦 𑀳𑁄𑀢𑀺. 𑀢𑀁 𑀅𑀦𑀺𑀘𑁆𑀘𑀲𑀻𑀮𑀁𑀦𑀸𑀫. 𑀢𑀢𑁆𑀣 𑀪𑀺𑀓𑁆𑀔𑀼 𑀪𑀸𑀯𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀻𑀮𑀁 𑀲𑀸𑀫𑀡𑁂𑀭𑀪𑀸𑀯𑁂 𑀞𑀺𑀢𑀲𑁆𑀲 𑀲𑀸𑀫𑀡𑁂𑀭𑀲𑀻𑀮𑀁 𑀧𑀓𑀢𑀺𑀕𑀳𑀝𑁆𑀞𑀸𑀦𑀁𑀧𑀜𑁆𑀘𑀲𑀻𑀮𑀁 𑀧𑀩𑁆𑀩𑀚𑀺𑀢𑀲𑀗𑁆𑀔𑁂𑀧𑀕𑀢𑀸𑀦𑀁 𑀉𑀧𑀸𑀲𑀓𑀸𑀦𑀁 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀜𑁆𑀘 𑀤𑀲𑀲𑀻𑀮𑀁 𑀦𑀺𑀘𑁆𑀘𑀲𑀻𑀮𑀁𑀦𑀸𑀫. 𑀢𑁂𑀲𑀜𑁆𑀳𑀺 𑀢𑀁 𑀢𑀁 𑀬𑀣𑀸𑀲𑀓𑀁 𑀲𑀻𑀮𑀁 𑀦𑀺𑀘𑁆𑀘𑀁 𑀲𑀼𑀤𑁆𑀥𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀅𑀭𑀓𑁆𑀔𑀦𑁆𑀢𑀸𑀦𑀁 𑀪𑀺𑀓𑁆𑀔𑀼𑀪𑀸𑀯𑀸𑀤𑀺𑀓𑁄 𑀲𑀸𑀯𑀚𑁆𑀚𑁄 𑀳𑁄𑀢𑀺 𑀅𑀲𑀼𑀤𑁆𑀥𑁄. 𑀓𑀲𑁆𑀫𑀸, 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀲𑁆𑀲 𑀆𑀘𑀸𑀭𑀲𑁆𑀲 𑀯𑀺𑀧𑀢𑁆𑀢𑀺𑀢𑁄. 𑀧𑀓𑀢𑀺𑀕𑀳𑀝𑁆𑀞𑀸𑀦𑀁 𑀧𑀦 𑀅𑀝𑁆𑀞𑀗𑁆𑀕𑀼𑀧𑁄𑀲𑀣𑀲𑀻𑀮𑀁 𑀅𑀦𑀺𑀘𑁆𑀘𑀲𑀻𑀮𑀁𑀦𑀸𑀫. 𑀢𑀜𑁆𑀳𑀺 𑀢𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀦𑀺𑀘𑁆𑀘𑀁𑀧𑀺 𑀯𑀝𑁆𑀝𑀢𑀺. 𑀅𑀦𑀺𑀘𑁆𑀘𑀁𑀧𑀺 𑀯𑀝𑁆𑀝𑀢𑀺. 𑀢𑀣𑀸 𑀤𑀲𑀲𑀻𑀮𑀜𑁆𑀘. 𑀢𑀜𑁆𑀳𑀺 𑀧𑀓𑀢𑀺 𑀕𑀳𑀝𑁆𑀞𑀸𑀦𑀁 𑀅𑀦𑀺𑀘𑁆𑀘𑀲𑀻𑀮𑀫𑁂𑀯 𑀳𑁄𑀢𑀺. 𑀕𑀺𑀳𑀺𑀦𑀺𑀯𑀢𑁆𑀣𑀁 𑀧𑀳𑀸𑀬 𑀓𑀸𑀲𑀸𑀬𑀯𑀢𑁆𑀣𑀥𑀸𑀭𑀡𑁂𑀦 𑀧𑀩𑁆𑀩𑀚𑀺𑀢𑀲𑀗𑁆𑀔𑁂𑀧𑀕𑀢𑀸𑀦𑀁 𑀏𑀯 𑀦𑀺𑀘𑁆𑀘𑀲𑀻𑀮𑀁. 𑀬𑀣𑀸 𑀳𑀺 𑀧𑀓𑀢𑀺𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀘𑀲𑀻𑀮𑀁 𑀲𑀫𑀸𑀤𑀺𑀦𑁆𑀦𑀁𑀧𑀺 𑀅𑀲𑀫𑀸𑀤𑀺𑀦𑁆𑀦𑀁𑀧𑀺 𑀦𑀺𑀘𑁆𑀘𑀁 𑀭𑀓𑁆𑀔𑀺𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀦𑀯𑀝𑁆𑀝𑀢𑀺. 𑀢𑀣𑀸 𑀧𑀩𑁆𑀩𑀚𑀺𑀢𑀯𑁂𑀲𑀥𑀸𑀭𑀻𑀦𑀁 𑀤𑀲𑀲𑀻𑀮𑀁 𑀲𑀫𑀸𑀤𑀺𑀦𑁆𑀦𑀁𑀧𑀺 𑀅𑀲𑀫𑀸𑀤𑀺𑀦𑁆𑀦𑀁𑀧𑀺 𑀦𑀺𑀘𑁆𑀘𑀁 𑀭𑀓𑁆𑀔𑀺𑀢𑀼𑀫𑁂𑀯 𑀯𑀝𑁆𑀝𑀢𑀺. 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀦𑀯𑀝𑁆𑀝𑀢𑀺. 𑀯𑁂𑀲𑀥𑀸𑀭𑀡𑁂𑀦 𑀲𑀳 𑀲𑀺𑀤𑁆𑀥𑀢𑁆𑀢𑀸𑀢𑀺.

𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀼𑀯𑀺𑀥𑀸 𑀪𑀸𑀯𑀦𑀸 𑀪𑀸𑀯𑀦𑀸𑀦𑀸𑀫. 𑀲𑀸 𑀇𑀥 𑀅𑀧𑁆𑀧𑀦𑀁 𑀅𑀧𑀢𑁆𑀢𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀥𑀫𑁆𑀫𑀯𑀺𑀦𑀬𑀧𑀭𑀺 𑀬𑀢𑁆𑀢𑀺𑀬𑀸 𑀲𑀳 𑀅𑀦𑀯𑀚𑁆𑀚𑀓𑀫𑁆𑀫𑀲𑀺𑀧𑁆𑀧𑀯𑀺𑀚𑁆𑀚𑀸𑀞𑀸𑀦𑁂𑀲𑀼 𑀧𑀭𑀺𑀘𑀬𑀓𑀭𑀡 𑀘𑁂𑀢𑀦𑀸𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀬𑁆𑀳𑀢𑀺. 𑀭𑀢𑀦𑀢𑁆𑀢𑀬𑁂 𑀧𑀦 𑀫𑀸𑀢𑀸𑀧𑀺𑀢𑀽𑀲𑀼 𑀓𑀼𑀮𑁂𑀚𑁂𑀝𑁆𑀞𑁂𑀲𑀼 𑀆𑀘𑀭𑀺𑀬𑁂𑀲𑀼 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀜𑁆𑀜𑁂𑀲𑀼𑀘 𑀕𑀼𑀡𑀯𑀬𑀯𑀼𑀤𑁆𑀥𑁂𑀲𑀼 𑀬𑀣𑀸𑀭𑀳𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀯𑀦𑁆𑀤𑀦𑀁 𑀅𑀜𑁆𑀚𑀮𑀺𑀓𑀭𑀡𑀁 𑀲𑀸𑀫𑀺𑀘𑀺𑀓𑀭𑀡𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀺𑀲𑀩𑁆𑀩𑀁 𑀅𑀧𑀘𑀸𑀬𑀦𑀁𑀦𑀸𑀫. 𑀢𑁂𑀲𑀜𑁆𑀜𑁂𑀯 𑀅𑀜𑁆𑀜𑁂𑀲𑀜𑁆𑀘 𑀆𑀕𑀦𑁆𑀢𑀼𑀓𑀕𑀫𑀺𑀓𑀅𑀤𑁆𑀥𑀺𑀓𑀸𑀦𑀁 𑀕𑀺𑀮𑀸𑀦𑀸𑀦𑀁 𑀚𑀺𑀡𑁆𑀡𑀸𑀦𑀁 𑀓𑀺𑀘𑁆𑀘 𑀓𑀭𑀡𑀻𑀬𑁂𑀲𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀧𑀭𑁂𑀲𑀁 𑀢𑀁𑀢𑀁𑀧𑀼𑀜𑁆𑀜 𑀓𑀫𑁆𑀫𑁂𑀲𑀼𑀘 𑀧𑀭𑀺𑀲𑀼𑀤𑁆𑀥𑁂𑀦 𑀳𑀺𑀢𑀨𑀭𑀡𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄𑀓𑀺𑀘𑁆𑀘𑁂𑀲𑀼 𑀯𑀺𑀬 𑀓𑀸𑀬𑀯𑀸𑀘𑀸𑀳𑀺 𑀯𑀸𑀬𑀸𑀫𑀓𑀭𑀡𑀁 𑀯𑁂𑀬𑁆𑀬𑀸𑀯𑀘𑁆𑀘𑀁𑀦𑀸𑀫. 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀬𑀲𑁆𑀲𑀓𑀲𑁆𑀲𑀘𑀺 𑀧𑀼𑀜𑁆𑀜𑀲𑁆𑀲 𑀧𑀭𑁂𑀳𑀺 𑀲𑀸𑀥𑀸𑀭𑀡𑀓𑀭𑀡𑀁 𑀧𑀢𑁆𑀢𑀺𑀤𑀸𑀦𑀁𑀦𑀸𑀫. 𑀧𑀭𑁂𑀳𑀺 𑀤𑀺𑀦𑁆𑀦𑀸𑀬 𑀧𑀢𑁆𑀢𑀺𑀬𑀸 𑀅𑀦𑀼𑀫𑁄𑀤𑀦𑀁 𑀅𑀢𑁆𑀢𑀫𑀦𑀢𑀸𑀧𑀯𑁂𑀤𑀦𑀁 𑀧𑀢𑁆𑀢𑀸 𑀦𑀼𑀫𑁄𑀤𑀦𑀁𑀦𑀸𑀫. 𑀅𑀤𑀺𑀦𑁆𑀦𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀦𑀼𑀫𑁄𑀤𑀦𑀁 𑀧𑀦 𑀅𑀦𑀼𑀫𑁄𑀤𑀦𑀫𑁂𑀯 𑀳𑁄𑀢𑀺. 𑀦 𑀧𑀢𑁆𑀢𑀸𑀦𑀼𑀫𑁄𑀤𑀦𑀁. 𑀧𑀢𑁆𑀢𑀺𑀬𑀸𑀏𑀯 𑀅𑀪𑀸𑀯𑀢𑁄. 𑀧𑀢𑁆𑀢𑀺𑀘 𑀤𑀼𑀯𑀺𑀥𑀸 𑀉𑀤𑁆𑀤𑀺𑀲𑀺𑀓𑀸 𑀅𑀦𑀼𑀤𑁆𑀤𑀺𑀲𑀺𑀓𑀸𑀢𑀺. 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀓𑀁 𑀅𑀦𑀼𑀫𑁄𑀤𑀦𑁆𑀢𑀲𑁆𑀲𑁂𑀯 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀚𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦 𑀤𑁆𑀯𑀬𑀁 𑀤𑀸𑀦𑀧𑀼𑀜𑁆𑀜𑁂𑀲𑀼𑀏𑀯 𑀯𑀺𑀲𑁂𑀲𑀢𑁄 𑀧𑀸𑀓𑀝𑀁. 𑀢𑀜𑁆𑀳𑀺 𑀉𑀤𑁆𑀤𑀺𑀲𑀓𑀁 𑀓𑀢𑁆𑀯𑀸 𑀤𑁂𑀯𑀢𑀸𑀦𑀁𑀯𑀸 𑀧𑀭𑀤𑀢𑁆𑀢𑀼𑀧𑀚𑀻𑀯𑀺𑀧𑁂𑀢𑀸𑀦𑀁𑀯𑀸 𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀁𑀯𑀸 𑀯𑀺𑀦𑀺𑀧𑀸𑀢𑀺𑀓𑀸𑀲𑀼𑀭𑀸𑀦𑀁𑀯𑀸 𑀤𑀺𑀦𑁆𑀦𑀁 𑀅𑀦𑀼𑀫𑁄𑀤𑀺𑀢𑀜𑁆𑀘 𑀢𑁂𑀲𑀁 𑀢𑀗𑁆𑀔𑀡𑁂𑀏𑀯 𑀤𑀺𑀝𑁆𑀞𑀥𑀫𑁆𑀫 𑀯𑁂𑀤𑀦𑀻𑀬𑀁 𑀚𑀸𑀢𑀦𑁆𑀢𑀺. 𑀅𑀢𑁆𑀣𑀳𑀺𑀢 𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀓𑀣𑀸𑀬 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀞𑀢𑁆𑀯𑀸 𑀲𑀯𑀦𑀜𑁆𑀘 𑀓𑀣𑀦𑀜𑁆𑀘 𑀥𑀫𑁆𑀫𑀲𑀯𑀦𑀁 𑀥𑀫𑁆𑀫 𑀤𑁂𑀲𑀦𑀸𑀘𑀦𑀸𑀫. 𑀦𑀺𑀭𑀯𑀚𑁆𑀚𑀓𑀫𑁆𑀫𑀲𑀺𑀧𑁆𑀧𑀯𑀺𑀚𑁆𑀚𑀸𑀞𑀸𑀦𑀸𑀦𑀁 𑀲𑀯𑀦𑀓𑀣𑀦𑀘𑁂𑀢𑀦𑀸𑀘 𑀏𑀢𑁆𑀣𑁂𑀯𑀲𑀗𑁆𑀕𑀬𑁆𑀳𑀦𑁆𑀢𑀺.

𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺𑀬𑀺𑀝𑁆𑀞𑀦𑁆𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸𑀬 𑀤𑀲𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀸 𑀤𑀺𑀝𑁆𑀞𑀺𑀬𑀸𑀯𑀸 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀺𑀤𑀺𑀝𑁆𑀞𑀺𑀬𑀸𑀯𑀸 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀤𑀺𑀝𑁆𑀞𑀺𑀬𑀸𑀯𑀸 𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀢𑁂𑀳𑀺 𑀢𑁂𑀳𑀺 𑀯𑀢𑁆𑀣𑀽𑀳𑀺𑀯𑀸 𑀬𑀼𑀢𑁆𑀢𑀻𑀳𑀺𑀯𑀸 𑀓𑀸𑀭𑀡𑁂𑀳𑀺𑀯𑀸 𑀓𑀫𑁆𑀫𑀲𑀓𑀢𑀸 𑀜𑀸𑀡𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑁄𑀤𑀸𑀦𑀓𑀭𑀡𑀁 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀁𑀦𑀸𑀫𑀸𑀢𑀺. 𑀬𑀢𑁆𑀣 𑀧𑀦 𑀢𑀺𑀯𑀺𑀥𑀫𑁂𑀯 𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀼 𑀆𑀕𑀢𑀁. 𑀢𑀢𑁆𑀣 𑀧𑀢𑁆𑀢𑀺𑀤𑀸𑀦𑀸𑀦𑀼𑀫𑁄𑀤𑀦𑀸𑀦𑀺 𑀤𑀸𑀦𑁂 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀇𑀲𑁆𑀲𑀸𑀫𑀘𑁆𑀙𑁂𑀭𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀢𑀁 𑀲𑀪𑀸𑀯𑀢𑁆𑀢𑀸. 𑀅𑀧𑀘𑀸𑀬𑀦𑀯𑁂𑀬𑁆𑀬𑀸𑀯𑀘𑁆𑀘𑀸𑀦𑀺 𑀲𑀻𑀮𑁂 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂𑀲𑀁 𑀘𑀸𑀭𑀺𑀢𑁆𑀢 𑀲𑀻𑀮𑀢𑁆𑀢𑀸. 𑀲𑁂𑀲𑀸𑀦𑀺 𑀢𑀻𑀡𑀺 𑀪𑀸𑀯𑀦𑀸𑀫𑀬𑁂 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀁 𑀲𑀪𑀸𑀯𑀢𑁆𑀢𑀸. 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑁄 𑀥𑀫𑁆𑀫𑁄𑀦𑀸𑀫 𑀦𑀢𑁆𑀣𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀜𑁆𑀘 𑀜𑀸𑀡 𑀯𑀟𑁆𑀠𑀦𑀫𑁂𑀯𑀸𑀢𑀺. 𑀢𑀻𑀲𑁆𑀯𑁂𑀯𑀯𑀸 𑀏𑀢𑀁 𑀲𑀗𑁆𑀕𑀬𑁆𑀳𑀢𑀺. 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀁 𑀲𑀩𑁆𑀩𑁂𑀲𑀁 𑀦𑀺𑀬𑀫 𑀮𑀓𑁆𑀔𑀡𑀦𑁆𑀢𑀺𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀢𑀺𑀬𑁂𑀯 𑀳𑀺 𑀓𑀫𑁆𑀫𑀲𑀓𑀢𑀸𑀜𑀸𑀡𑁂 𑀤𑀸𑀦𑀸𑀤𑀻𑀦𑀺 𑀢𑀻𑀡𑀺 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺. 𑀫𑀦𑁄𑀓𑀫𑁆𑀫𑀫𑁂𑀯𑀸𑀢𑀺 𑀫𑀦𑀲𑁆𑀫𑀺𑀁𑀏𑀯 𑀓𑀫𑁆𑀫𑀧𑀣 𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀫𑀦𑁄𑀓𑀫𑁆𑀫𑀁𑀏𑀯.

[𑁧𑁫𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀸 𑀪𑀸𑀯𑁂𑀦 𑀓𑀸𑀬 𑀤𑁆𑀯𑀸𑀭𑀸𑀤𑀻𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀁 𑀅𑀪𑀺𑀜𑁆𑀜𑀸𑀓𑀼𑀲𑀮𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑀁𑀧𑀺 𑀓𑀸𑀬𑀯𑀘𑀻𑀓𑀫𑁆𑀫𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀓𑀸𑀬𑀯𑀸𑀘𑀸𑀦𑀁 𑀓𑀫𑁆𑀫𑀧𑀣 𑀅𑀗𑁆𑀕𑀪𑀸𑀯𑀸𑀲𑀫𑁆𑀪𑀯𑀢𑁄𑀢𑀺. 𑀢𑀜𑁆𑀘 𑀪𑀸𑀯𑀦𑀸𑀫𑀬𑀦𑁆𑀢𑀺 𑀤𑀸𑀦𑀲𑀻𑀮𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀓𑁂𑀯𑀮𑀁 𑀪𑀸𑀯𑀦𑀸𑀓𑀫𑁆𑀫𑀯𑀺𑀲𑁂𑀲𑀢𑁆𑀢𑀸 𑀢𑀜𑁆𑀘 𑀫𑀳𑀕𑁆𑀕𑀢 𑀓𑀼𑀲𑀮𑀁 𑀪𑀸𑀯𑀦𑀸𑀓𑀫𑁆𑀫 𑀫𑁂𑀯 𑀳𑁄𑀢𑀺. 𑀬𑀁 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸 𑀫𑀕𑁆𑀕𑁂 𑀧𑀣𑀫𑀚𑁆𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁. 𑀤𑀼𑀢𑀻𑀬𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁. 𑀢𑀢𑀻𑀬𑁂𑀦 𑀧𑀻𑀢𑀺𑀬𑀸. 𑀘𑀢𑀼𑀢𑁆𑀣𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀳𑀸𑀦𑀁 𑀲𑀻𑀮𑀁. 𑀯𑁂𑀭𑀫𑀡𑀺 𑀲𑀻𑀮𑀁. 𑀘𑁂𑀢𑀦𑀸 𑀲𑀻𑀮𑀁. 𑀲𑀁𑀯𑀭𑁄 𑀲𑀻𑀮𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀦𑀸𑀧𑀢𑁆𑀢𑀦𑁆𑀢𑀺 𑀪𑀸𑀯𑀦𑀸 𑀩𑀮𑁂𑀦 𑀆𑀭𑀫𑁆𑀫𑀡𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀘𑀮𑀝𑁆𑀞𑀺𑀢𑀺𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀅𑀧𑁆𑀧𑀦𑀸𑀧𑀢𑁆𑀢𑀁 𑀓𑀫𑁆𑀫𑀁 𑀳𑁄𑀢𑀺.

[𑁧𑁫𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀼𑀩𑁆𑀩𑀪𑀸𑀕𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀪𑀸𑀯𑀢𑁄𑀢𑀺’’ 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀢𑁂𑀲𑀁 𑀓𑀸𑀫𑀸𑀯𑀘𑀭𑀢𑀸𑀫𑀢𑁆𑀢𑀁 𑀅𑀧𑁆𑀧𑀦𑀸𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀻𑀢𑀺. 𑀛𑀸𑀦𑀗𑁆𑀕𑀪𑁂𑀤𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀪𑁂𑀤𑁂𑀦𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀛𑀸𑀦𑀗𑁆𑀕𑀪𑁂𑀤𑁂𑀦𑀸𑀢𑀺𑀯𑀸 𑀛𑀸𑀦𑀗𑁆𑀕𑀲𑀫𑀼𑀤𑀸𑀬𑀪𑁂𑀤𑁂𑀦𑀸𑀢𑀺 𑀅𑀢𑁆𑀣𑁄, 𑀛𑀸𑀦𑀪𑁂𑀤𑁂𑀦 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀼𑀲𑀮𑀓𑀫𑁆𑀫𑀁

𑁧𑁫𑁩. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀸𑀓𑀝𑁆𑀞𑀸𑀦𑀘𑀢𑀼𑀓𑁆𑀓𑁂. 𑀉𑀤𑁆𑀥𑀘𑁆𑀘𑀭𑀳𑀺𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸𑀯𑀚𑁆𑀚𑀺𑀢𑀁. 𑀓𑀲𑁆𑀫𑀸 𑀧𑀦 𑀉𑀤𑁆𑀥𑀘𑁆𑀘𑀘𑁂𑀢𑀦𑀸 𑀇𑀥 𑀧𑀚𑁆𑀚𑀺𑀢𑀸𑀢𑀺. 𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂. 𑀥𑀫𑁆𑀫𑀲𑀗𑁆𑀕𑀳𑁂 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀢𑀁 𑀅𑀯𑀢𑁆𑀯𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁂𑀲𑀼 𑀏𑀯 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸𑀳-𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀇𑀫𑁂 𑀥𑀫𑁆𑀫𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀺𑀘, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀇𑀫𑁂𑀥𑀫𑁆𑀫𑀸 𑀪𑀸𑀯𑀦𑀸𑀬𑀧𑀳𑀸 𑀢𑀩𑁆𑀩𑀸𑀢𑀺𑀘, 𑀲𑁂𑀲𑀸 𑀧𑀦 𑀘𑀢𑁆𑀢𑀸𑀭𑁄 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑁆𑀯𑁂 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀘 𑀲𑀺𑀬𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀲𑀺𑀬𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸. 𑀓𑀣𑀜𑁆𑀘 𑀯𑀺𑀜𑁆𑀜𑀸𑀬𑀢𑀺. 𑀬𑁄 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀦 𑀯𑀼𑀢𑁆𑀢𑁄, 𑀲𑁄 𑀅𑀓𑀼𑀲𑀮𑀥𑀫𑁆𑀫𑁄 𑀧𑀝𑀺𑀲𑀦𑁆𑀥𑀺𑀁 𑀦𑀸𑀓𑀟𑁆𑀠𑀢𑀻𑀢𑀺. 𑀧𑀝𑁆𑀞𑀸𑀦𑁂 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀥𑀫𑁆𑀫𑁂𑀲𑀼𑀏𑀯 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀇𑀢𑀭𑀢𑁆𑀣 𑀢𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸𑀢𑀺. 𑀬𑀣𑀸𑀳-𑀲𑀳𑀚𑀸𑀢𑀸 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦𑀧𑀘𑁆𑀘𑀬𑁄. 𑀦𑀸𑀦𑀸𑀓𑁆𑀔𑀡𑀺𑀓𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀘 𑀲𑀳𑀚𑀸𑀢𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁𑀥𑀫𑁆𑀫𑀸𑀦𑀁 𑀘𑀺𑀢𑁆𑀢𑀸𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺𑀘. 𑀦𑀘 𑀦𑀸𑀦𑀸𑀓𑁆𑀔𑀡𑀺𑀓 𑀓𑀫𑁆𑀫𑀧𑀘𑁆𑀘𑀬𑀲𑀢𑁆𑀢𑀺𑀬𑀸 𑀯𑀺𑀦𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁𑀦𑀸𑀫 𑀅𑀢𑁆𑀣𑀻𑀢𑀺. 𑀬𑀤𑀺𑀏𑀯𑀁 𑀲𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀁𑀧𑀺 𑀦𑀚𑀦𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺𑀘𑁂.𑀦. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 𑀢𑀲𑁆𑀲𑀸 𑀯𑀺𑀧𑀸𑀓𑀲𑁆𑀲 𑀉𑀤𑁆𑀥𑀝𑀢𑁆𑀢𑀸. 𑀬𑀣𑀸𑀳-𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀉𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁𑀯𑀸.𑀮. 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺. 𑀢𑁂𑀦𑀸𑀳 𑀧𑀯𑀢𑁆𑀢𑀺𑀬𑀁 𑀧𑀦 𑀲𑀩𑁆𑀩𑀁𑀧𑀺 𑀤𑁆𑀯𑀸𑀤𑀲𑀯𑀺𑀥𑀦𑁆𑀢𑀺𑀆𑀤𑀺.

[𑁧𑁬𑁦] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑁂𑀦 𑀲𑀩𑁆𑀩𑀤𑀼𑀩𑁆𑀩𑀮𑀁𑀧𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺. 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀬𑁄𑀕𑁂𑀦 𑀢𑀢𑁄 𑀩𑀮𑀯𑀦𑁆𑀢𑀁𑀧𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀦𑀸𑀓𑀟𑁆𑀠𑀢𑀻𑀢𑀺’’ 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀥𑀺𑀫𑁄𑀓𑁆𑀔𑀯𑀺𑀭𑀳𑀫𑀢𑁆𑀢𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀲𑀩𑁆𑀩𑀤𑀼𑀩𑁆𑀩𑀮𑀦𑁆𑀢𑀺𑀘 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀬𑁄𑀕𑀫𑀢𑁆𑀢𑁂𑀦 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀢𑀢𑁄 𑀩𑀮𑀯𑀦𑁆𑀢𑀦𑁆𑀢𑀺𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀥𑀫𑁆𑀫𑁂 𑀓𑀗𑁆𑀔𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀫𑀳𑀸𑀳𑀢𑁆𑀣𑀺𑀦𑀸𑀕𑀲𑁆𑀲 𑀯𑀺𑀬 𑀩𑀮𑀯𑀢𑀭𑀢𑁆𑀢𑀸 𑀅𑀢𑀺𑀯𑀺𑀬 𑀓𑀸𑀴𑀓𑀥𑀫𑁆𑀫𑀢𑁆𑀢𑀸𑀘𑀸𑀢𑀺. 𑀢𑀣𑀸 𑀳𑀺𑀲𑀸 𑀏𑀓𑀦𑁆𑀢𑁂𑀦 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑁂𑀲𑀼 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀢𑀢𑁄𑀬𑁂𑀯𑀘 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀁𑀧𑀺 𑀢𑀲𑁆𑀲𑀸 𑀯𑀺𑀜𑁆𑀜𑀸𑀢𑀩𑁆𑀩𑀁 𑀳𑁄𑀢𑀻𑀢𑀺. 𑀲𑀪𑀸𑀯𑀯𑀺𑀭𑀼𑀤𑁆𑀥𑀢𑁆𑀢𑀸𑀬𑁂𑀯 𑀧𑀦 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁 𑀅𑀥𑀺𑀫𑁄𑀓𑁆𑀔𑀭𑀳𑀺𑀢𑀁 𑀳𑁄𑀢𑀻𑀢𑀺 𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀫𑁂𑀯 𑀲𑀩𑁆𑀩𑀤𑀼𑀩𑁆𑀩𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀲𑀩𑁆𑀩𑀲𑁆𑀫𑀺𑀁𑀧𑀺. 𑀬𑀣𑀸𑀭𑀳𑀦𑁆𑀢𑀺 𑀢𑁂𑀲𑀼 𑀮𑁄𑀓𑁂𑀲𑀼 𑀮𑀤𑁆𑀥𑀯𑀢𑁆𑀣𑀼𑀤𑁆𑀯𑀸𑀭𑀸𑀦𑀼𑀭𑀽𑀧𑀁. 𑀯𑀺𑀧𑀘𑁆𑀘𑀢𑀻𑀢𑀺 𑀯𑀺𑀧𑀸𑀘𑁂𑀢𑀺 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀸𑀤𑁂𑀢𑀺. 𑀲𑀩𑁆𑀩𑀁𑀧𑀺𑀯𑀸𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀓𑀫𑁆𑀫𑀁 𑀲𑀢𑁆𑀢𑀸 𑀓𑀼𑀲𑀮𑀧𑀸𑀓𑀸𑀦𑀺 𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀢𑀺, 𑀯𑀺𑀧𑀓𑁆𑀓𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀬𑀲𑁆𑀫𑀸 𑀓𑀼𑀲𑀮𑀓𑀫𑁆𑀫𑀸𑀦𑀺 𑀅𑀧𑀸𑀬𑀪𑀽𑀫𑀺𑀬𑀁𑀧𑀺 𑀧𑀯𑀢𑁆𑀢𑀺𑀬𑀁 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀺𑀤𑁆𑀥𑀺𑀓𑀸𑀦𑀁 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀁 𑀲𑀦𑁆𑀢𑀸𑀦𑁂 𑀲𑀬𑀫𑁂𑀯 𑀅𑀢𑁆𑀢𑀦𑁄𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀢𑁆𑀯𑀸 𑀲𑀼𑀔𑀯𑀺𑀧𑀸𑀓𑀁 𑀚𑀦𑀬𑀦𑁆𑀢𑀺. 𑀅𑀜𑁆𑀜𑁂𑀲𑀁𑀧𑀺 𑀆𑀧𑀸𑀬𑀺𑀓𑀸𑀦𑀁 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀇𑀝𑁆𑀞𑀸𑀭𑀫𑁆𑀫𑀡 𑀲𑀫𑀸𑀬𑁄𑀕𑁂 𑀲𑀢𑀺 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀲𑀼𑀔𑀯𑀺𑀧𑀸𑀓𑀁 𑀚𑀦𑀬𑀦𑁆𑀢𑀺. 𑀢𑀲𑁆𑀫𑀸 𑀢𑀣𑀸𑀧𑀯𑀢𑁆𑀢𑀺𑀬𑀜𑁆𑀘𑀸𑀢𑀺𑀆𑀤𑀺 𑀫𑀸𑀳. 𑀦 𑀳𑀺 𑀢𑀸𑀦𑀺 𑀲𑀼𑀔𑀯𑀺𑀧𑀸𑀓𑀸𑀦𑀺 𑀅𑀓𑀼𑀲𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀦𑀺 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀺. 𑀯𑀼𑀢𑁆𑀢𑁂𑀜𑁆𑀳𑁂𑀢𑀁 𑀯𑀺𑀪𑀗𑁆𑀕𑁂 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺𑀆𑀤𑀺. 𑀢𑀢𑁆𑀣 𑀫𑀳𑀸𑀯𑀺𑀧𑀸𑀓𑀸𑀦𑀺 𑀲𑀼𑀕𑀢𑀺 𑀓𑀸𑀫𑀮𑁄𑀓𑁂 𑀅𑀳𑁂𑀢𑀼𑀓𑀸𑀦𑀺 𑀅𑀝𑁆𑀞𑀧𑀺 𑀲𑀩𑁆𑀩𑀲𑁆𑀫𑀺𑀁 𑀓𑀸𑀫𑀮𑁄𑀓𑁂 𑀢𑁂𑀲𑀼𑀘 𑀧𑀜𑁆𑀘𑀘𑀓𑁆𑀔𑀼𑀯𑀺𑀜𑁆𑀜𑀸𑀡 𑀲𑁄𑀢𑀯𑀺𑀜𑁆𑀜𑀸𑀡 𑀲𑀫𑁆𑀧𑀝𑀺𑀘𑁆𑀙𑀦 𑀲𑀦𑁆𑀢𑀻𑀭𑀡 𑀬𑀼𑀕𑀴𑀸𑀦𑀺 𑀭𑀽𑀧𑀮𑁄𑀓𑁂 𑀯𑀺𑀧𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 𑀬𑀣𑀸𑀭𑀳𑀁 𑀯𑀺𑀧𑀘𑁆𑀘𑀢𑀻𑀢𑀺. 𑀭𑀽𑀧𑀸𑀯𑀘𑀭 𑀓𑀼𑀲𑀮𑀜𑁆𑀳𑀺 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀸𑀦𑀺 𑀚𑀦𑀬𑀦𑁆𑀢𑀁𑀧𑀺 𑀲𑀬𑀁 𑀯𑀺𑀧𑀘𑁆𑀘𑀫𑀸𑀦𑀁 𑀆𑀭𑀫𑁆𑀫𑀡𑀦𑁆𑀢𑀭𑁂 𑀅𑀜𑁆𑀜𑀪𑀽𑀫𑀺𑀓 𑀯𑀺𑀧𑀸𑀓𑀪𑀸𑀯𑁂𑀦 𑀦𑀯𑀺𑀧𑀘𑁆𑀘𑀢𑀺. 𑀓𑀸𑀫𑀯𑀺𑀭𑀸𑀕𑀪𑀸𑀯𑀦𑀸𑀪𑀸𑀯𑁂𑀦 𑀧𑀦 𑀅𑀧𑁆𑀧𑀦𑀸𑀧𑀢𑁆𑀢 𑀓𑀫𑁆𑀫 𑀯𑀺𑀲𑁂𑀲𑀢𑁆𑀢𑀸 𑀓𑀸𑀫𑀢𑀡𑁆𑀳𑀸𑀬 𑀅𑀯𑀺𑀲𑀬𑀪𑀽𑀢𑁂 𑀦𑀺𑀫𑀺𑀢𑁆𑀢𑀸 𑀭𑀫𑁆𑀫𑀡𑁂 𑀅𑀢𑁆𑀢𑀦𑀸 𑀲𑀩𑁆𑀩𑀲𑁄 𑀲𑀤𑀺𑀲𑁂𑀦 𑀫𑀳𑀕𑁆𑀕𑀢𑀪𑀸𑀯𑀧𑀢𑁆𑀢𑁂𑀦 𑀭𑀽𑀧 𑀯𑀺𑀧𑀸𑀓𑀪𑀸𑀯𑁂𑀦𑁂𑀯 𑀯𑀺𑀧𑀘𑁆𑀘𑀢𑀺. 𑀢𑀲𑁆𑀫𑀸 𑀭𑀽𑀧𑀮𑁄𑀓𑁂𑀧𑀺 𑀢𑀸𑀦𑀺 𑀧𑀜𑁆𑀘𑀯𑀺𑀧𑀸𑀓𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀤𑁆𑀯𑀻𑀲𑀼 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑁂𑀲𑀼 𑀧𑀝𑀺𑀲𑀦𑁆𑀥𑀺𑀦𑀸𑀫 𑀫𑀳𑀦𑁆𑀢𑀁𑀞𑀸𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀤𑀸 𑀯𑀺𑀧𑀘𑁆𑀘𑀦𑁆𑀢𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀦𑀸𑀢𑀺𑀳𑀻𑀦𑀁 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀯𑀢𑁆𑀢𑀺𑀬𑀁 𑀧𑀦 𑀦𑀸𑀦𑀸𑀞𑀸𑀦𑁂𑀲𑀼 𑀦𑀸𑀦𑀸𑀓𑀺𑀘𑁆𑀘𑁂𑀳𑀺 𑀯𑀺𑀧𑀘𑁆𑀘𑀢𑀺. 𑀢𑀲𑁆𑀫𑀸 𑀢𑀤𑀸 𑀯𑀺𑀧𑀘𑁆𑀘𑀦𑁆𑀢𑀁 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀲𑀸𑀫𑀢𑁆𑀣𑀺𑀬𑀸𑀦𑀼𑀭𑀽𑀧𑀁 𑀯𑀺𑀧𑀘𑁆𑀘𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑀝𑁆𑀞𑀸𑀦𑀸𑀤𑀻𑀲𑀼 𑀧𑀭𑀺𑀢𑁆𑀢𑀓𑁂𑀲𑀼 𑀯𑀺𑀧𑀘𑁆𑀘𑀫𑀸𑀦𑀁 𑀞𑀸𑀦𑀸 𑀦𑀼𑀭𑀽𑀧𑀁 𑀯𑀺𑀧𑀘𑁆𑀘𑀢𑀺. 𑀢𑀤𑀸𑀭𑀫𑁆𑀫𑀡𑀝𑁆𑀞𑀸𑀦𑁂 𑀯𑀺𑀧𑀘𑁆𑀘𑀫𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀚𑀯𑀦𑀸 𑀦𑀼𑀭𑀽𑀧𑀁 𑀯𑀺𑀧𑀘𑁆𑀘𑀢𑀺. 𑀢𑀲𑁆𑀫𑀸 𑀲𑁄𑀴𑀲𑀓𑀫𑀕𑁆𑀕𑁄 𑀤𑁆𑀯𑀸𑀤𑀲𑀓𑀫𑀕𑁆𑀕𑁄 𑀅𑀳𑁂𑀢𑀼 𑀓𑀝𑁆𑀞𑀓𑀦𑁆𑀢𑀺 𑀏𑀯𑀁𑀏𑀓𑁂𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀧𑁆𑀧𑀪𑁂𑀤𑁄 𑀧𑀯𑀢𑁆𑀢𑁄𑀢𑀺𑀢𑀁 𑀧𑀪𑁂𑀤𑀁𑀤𑀲𑁆𑀲𑁂𑀢𑀼𑀁 𑀢𑀢𑁆𑀣𑀸𑀧𑀻𑀢𑀺𑀆𑀤𑀺𑀫𑀸𑀳.

𑀓𑀼𑀲𑀮𑀁 𑀤𑀼𑀯𑀺𑀥𑀁 𑀲𑀫𑁆𑀧𑀚𑀸𑀦𑀓𑀢𑀁 𑀅𑀲𑀫𑁆𑀧𑀚𑀸𑀦𑀓𑀢𑀦𑁆𑀢𑀺. 𑀢𑀢𑁆𑀣 𑀓𑀫𑁆𑀫𑀸 𑀬𑀽𑀳𑀦𑀓𑀸𑀮𑁂 𑀅𑀦𑁆𑀢𑀫𑀲𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀜𑀸𑀡𑀁𑀧𑀺 𑀲𑀼𑀝𑁆𑀞𑀼 𑀬𑁄𑀚𑁂𑀢𑁆𑀯𑀸 𑀓𑀢𑀁 𑀲𑀫𑁆𑀧𑀚𑀸𑀦𑀓𑀢𑀁𑀦𑀸𑀫. 𑀬𑀣𑀸𑀳-𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸 𑀓𑀢𑀁 𑀲𑀫𑁆𑀧𑀚𑀸𑀦𑀓𑀢𑀁 𑀦𑀸𑀫𑀸𑀢𑀺. 𑀤𑀺𑀝𑁆𑀞𑀼𑀚𑀼𑀓𑀫𑁆𑀫𑀜𑀸𑀡 𑀫𑀢𑁆𑀢𑀁𑀧𑀺 𑀅𑀬𑁄𑀚𑁂𑀢𑁆𑀯𑀸 𑀢𑀁 𑀅𑀲𑀫𑁆𑀧𑀚𑀸𑀦𑀓𑀢𑀁 𑀦𑀸𑀫. 𑀬𑀣𑀸𑀳-𑀓𑀫𑁆𑀫𑀁𑀧𑀺 𑀓𑀫𑁆𑀫𑀨𑀮𑀫𑁆𑀧𑀺 𑀅𑀚𑀸𑀦𑀺𑀢𑁆𑀯𑀸 𑀓𑀢𑀁 𑀅𑀲𑀫𑁆𑀧𑀚𑀸𑀦𑀓𑀢𑀁 𑀦𑀸𑀫𑀸𑀢𑀺. 𑀢𑀢𑁆𑀣 𑀲𑀫𑁆𑀧𑀚𑀸𑀦𑀓𑀢𑀁 𑀢𑀺𑀳𑁂𑀢𑀼𑀓𑀁 𑀳𑁄𑀢𑀺. 𑀅𑀲𑀫𑁆𑀧𑀚𑀸𑀦𑀓𑀢𑀁 𑀤𑀼𑀳𑁂𑀢𑀼𑀓𑀁. 𑀬𑀣𑀸𑀳-𑀲𑀫𑁆𑀧𑀚𑀸𑀦𑀓𑀭𑀡𑀁 𑀧𑀦 𑀘𑀢𑀼𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀳𑁄𑀢𑀺. 𑀅𑀲𑀫𑁆𑀧𑀚𑀸𑀦 𑀓𑀭𑀡𑀁 𑀘𑀢𑀽𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀻𑀢𑀺. 𑀢𑀢𑁆𑀣 𑀏𑀓𑀫𑁂𑀓𑀁 𑀉𑀓𑁆𑀓𑀝𑁆𑀞𑀁 𑀑𑀫𑀓𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀓𑀼𑀲𑀮𑀲𑀫𑀬𑁂 𑀧𑀭𑀺𑀬𑀼𑀝𑁆𑀞𑀺𑀢𑁂 𑀦𑀻𑀯𑀭𑀡𑀥𑀫𑁆𑀫𑁂𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀦 𑀧𑀭𑀯𑀫𑁆𑀪𑀦𑀸𑀤𑀺𑀓𑁂 𑀧𑀸𑀧𑀥𑀫𑁆𑀫𑁂𑀯𑀸 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀓𑀢𑀁 𑀉𑀓𑁆𑀓𑀝𑁆𑀞𑀁 𑀦𑀸𑀫. 𑀅𑀲𑁄𑀥𑁂𑀢𑁆𑀯𑀸 𑀓𑀢𑀁 𑀢𑁂𑀳𑀺𑀯𑁄𑀓𑀺𑀡𑁆𑀡𑀁 𑀑𑀫𑀓𑀁𑀦𑀸𑀫. 𑀅𑀧𑀺𑀘, 𑀬𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀮𑀸𑀪𑀸 𑀯𑀢 𑀫𑁂. 𑀦𑀘 𑀯𑀢 𑀫𑁂 𑀅𑀮𑀸𑀪𑀸. 𑀲𑀼𑀮𑀤𑁆𑀥𑀁 𑀯𑀢 𑀫𑁂. 𑀦𑀘 𑀯𑀢 𑀫𑁂 𑀤𑀼𑀮𑁆𑀮𑀤𑁆𑀥𑀁. 𑀬𑀲𑁆𑀲 𑀫𑁂 𑀈𑀤𑀺𑀲𑀁 𑀧𑀼𑀜𑁆𑀜𑀁 𑀧𑀲𑀼𑀢𑀦𑁆𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀫𑁄𑀤𑀺𑀢𑀁. 𑀢𑀁 𑀉𑀓𑁆𑀓𑀝𑁆𑀞𑀁. 𑀬𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀬𑁂𑀦𑀓𑁂𑀦𑀘𑀺 𑀓𑀸𑀭𑀡𑁂𑀦 𑀤𑀼𑀝𑁆𑀞𑀼𑀓𑀢𑀁 𑀫𑀬𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀁𑀑𑀫𑀓𑀁. 𑀏𑀯𑀁 𑀘𑀢𑀼𑀩𑁆𑀩𑀺𑀥𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀯𑀺𑀧𑀸𑀓 𑀓𑁄𑀝𑁆𑀞𑀸𑀲𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀣𑀸𑀧𑀻𑀢𑀺𑀆𑀤𑀺 𑀫𑀸𑀳. 𑀢𑀢𑁆𑀣𑀸𑀧𑀻𑀢𑀺 𑀢𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀧𑀺. 𑀢𑀺𑀳𑁂𑀢𑀼𑀓𑀫𑀼𑀓𑁆𑀓𑀝𑁆𑀞𑀦𑁆𑀢𑀺 𑀉𑀓𑁆𑀓𑀝𑁆𑀞𑀪𑀽𑀢𑀁 𑀧𑀡𑀻𑀢𑀪𑀽𑀢𑀁 𑀘𑀢𑀼𑀩𑁆𑀩𑀺𑀥𑀁 𑀢𑀺𑀳𑁂𑀢𑀼𑀓𑀁. 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀢𑀺𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀁. 𑀏𑀢𑁆𑀣𑀘 𑀏𑀓𑀘𑁂𑀢𑀦𑀸 𑀏𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺. 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀧𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼𑀧𑀺 𑀪𑀯𑁂𑀲𑀼 𑀤𑁂𑀢𑀺𑀬𑁂𑀯. 𑀏𑀢𑁆𑀣 𑀲𑀺𑀬𑀸 𑁋

𑀏𑀓𑀧𑀼𑀧𑁆𑀨𑀁 𑀬𑀚𑀺𑀢𑁆𑀯𑀸𑀦, 𑀲𑀳𑀲𑁆𑀲𑀓𑀧𑁆𑀧𑀓𑁄𑀝𑀺𑀬𑁄;

𑀤𑁂𑀯𑁂𑀲𑀼𑀘 𑀫𑀦𑀼𑀲𑁆𑀲𑁂𑀲𑀼, 𑀲𑁂𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀳𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀸 𑀏𑀓𑀸 𑀘𑁂𑀢𑀦𑀸 𑀏𑀓𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀻𑀢𑀺 𑀇𑀤𑀁 𑀦 𑀬𑀼𑀚𑁆𑀚𑀢𑀻𑀢𑀺. 𑀦 𑀦 𑀬𑀼𑀚𑁆𑀚𑀢𑀺. 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀳𑀺 𑀲𑀤𑁆𑀥𑀺𑀁 𑀲𑀳𑀲𑁆𑀲𑀓𑀧𑁆𑀧 𑀓𑁄𑀝𑀺 𑀧𑀭𑀺𑀫𑀸𑀡𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀘𑀺𑀢𑁆𑀢𑀜𑁆𑀳𑀺𑀦𑀸𑀫 𑀏𑀓𑀘𑁆𑀙𑀭𑀓𑁆𑀔𑀡𑁂𑀧𑀺 𑀅𑀦𑁂𑀓𑀲𑀢 𑀲𑀳𑀲𑁆𑀲 𑀓𑁄𑀝𑀺𑀲𑀗𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄𑀘𑀺𑀭𑀢𑀭𑁂𑀓𑀸𑀮𑁂𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀲𑀳𑀲𑁆𑀲 𑀓𑀧𑁆𑀧𑀓𑁄𑀝𑀺𑀬𑁄𑀢𑀺 𑀘 𑀲𑀳𑀲𑁆𑀲𑀆𑀬𑀼𑀓𑀧𑁆𑀧𑀓𑁄𑀝𑀺𑀬𑁄 𑀲𑀳𑀲𑁆𑀲 𑀅𑀢𑁆𑀢𑀪𑀸𑀯𑀓𑁄𑀝𑀺𑀬𑁄𑀢𑀺 𑀦𑁂𑀢𑁆𑀢𑀺𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀤𑀸𑀦𑀪𑀸𑀯𑁄 𑀓𑁄𑀲𑀮𑀲𑀁𑀬𑀼𑀢𑁆𑀢𑀓𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀏𑀓𑀧𑀺𑀡𑁆𑀟𑀧𑀸𑀢𑀤𑀸𑀦𑀲𑁆𑀫𑀺𑀁𑀳𑀺 𑀏𑀓𑀸𑀘𑁂𑀢𑀦𑀸𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄 𑀦 𑀤𑁂𑀢𑀺. 𑀧𑀼𑀩𑁆𑀩𑀧𑀘𑁆𑀙𑀺𑀫𑀘𑁂𑀢𑀦𑀸𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀕𑁆𑀕𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀳𑀺 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀺𑀳𑁂𑀢𑀼 𑀓𑀁𑀧𑀺 𑀓𑀫𑁆𑀫𑀁 𑀧𑀝𑀺𑀧𑀓𑁆𑀔𑁂𑀳𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀁 𑀯𑀺𑀳𑀢𑀲𑀸𑀫𑀢𑁆𑀣𑀺𑀬𑀁 𑀳𑀼𑀢𑁆𑀯𑀸 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀘 𑀢𑀁 𑀅𑀢𑀺𑀤𑀼𑀩𑁆𑀩𑀮𑀁𑀧𑀺 𑀲𑀫𑀸𑀦𑀁 𑀓𑁄𑀲𑀮𑁆𑀮𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀬𑀼𑀢𑁆𑀢𑀢𑁆𑀢𑀸 𑀅𑀢𑀺𑀩𑁆𑀬𑀸𑀫𑀼𑀴𑁆𑀳𑀧𑀘𑁆𑀘𑀬 𑀪𑀽𑀳𑀁 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀲𑀳𑀺𑀢𑀁 𑀅𑀳𑁂𑀢𑀼𑀓𑀯𑀺𑀧𑀸𑀓𑀁 𑀚𑀦𑁂𑀢𑀻𑀢𑀺 𑀯𑀼𑀢𑁆𑀢𑀁 𑀢𑀺𑀳𑁂𑀢𑀼𑀓𑀫𑁄𑀫𑀓𑀦𑁆𑀢𑀺𑀆𑀤𑀺. 𑀤𑁆𑀯𑀸𑀤𑀲𑀯𑀺𑀧𑀸𑀓𑀸𑀦𑀺𑀯𑀺𑀧𑀘𑁆𑀘𑀢𑀺. 𑀅𑀬𑀁 𑀤𑁆𑀯𑀸𑀤 𑀲𑀓𑀫𑀕𑁆𑀕𑁄𑀦𑀸𑀫 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑁂𑀯 𑀯𑀺𑀧𑀘𑁆𑀘𑀢𑀺. 𑀇𑀤𑀁 𑀅𑀳𑁂𑀢𑀼 𑀓𑀝𑁆𑀞𑀓𑀁𑀦𑀸𑀫. 𑀏𑀯𑀁 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑀯𑀲𑁂𑀦 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑁄𑀭𑀯𑀸𑀧𑀺𑀯𑀸𑀲𑀺 𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳. 𑀲𑁄 𑀳𑀺 𑀣𑁂𑀭𑁄𑀯𑀺𑀧𑀸𑀓𑀸𑀦𑀁 𑀅𑀲𑀗𑁆𑀔𑀸𑀭𑀺𑀓𑀢𑀸 𑀲𑀲𑀗𑁆𑀔𑀸𑀭𑀺𑀓𑀢𑀸𑀘 𑀓𑀫𑁆𑀫𑀯𑀲𑁂𑀦𑁂𑀯 𑀲𑀺𑀤𑁆𑀥𑀸𑀧𑀺 𑀓𑀢𑁆𑀯𑀸 𑀅𑀲𑀗𑁆𑀔𑀸𑀭𑀁 𑀓𑀫𑁆𑀫𑀁 𑀲𑀲𑀗𑁆𑀔𑀸𑀭𑀯𑀺𑀧𑀸𑀓𑀸𑀦𑀺 𑀦 𑀧𑀘𑁆𑀘𑀢𑀺. 𑀲𑀲𑀗𑁆𑀔𑀸𑀭𑀁𑀓𑀫𑁆𑀫𑀁 𑀅𑀲𑀗𑁆𑀔𑀸𑀭𑀯𑀺𑀧𑀸𑀓𑀸𑀦𑀺 𑀦𑀯𑀘𑁆𑀘𑀢𑀻𑀢𑀺 𑀯𑀤𑀢𑀺.

𑀬𑀣𑀸 𑀫𑀼𑀔𑀦𑀺𑀫𑀺𑀢𑁆𑀢𑀁 𑀦𑀸𑀫 𑀫𑀼𑀔𑁂 𑀲𑀦𑁆𑀦𑀺𑀲𑀺𑀦𑁆𑀦𑁂 𑀲𑀦𑁆𑀦𑀺𑀲𑀻𑀤𑀢𑀺. 𑀘𑀮𑀦𑁆𑀢𑁂 𑀘𑀮𑀢𑀺. 𑀏𑀯𑀁 𑀧𑀬𑁄𑀕𑁂𑀦 𑀅𑀲𑀸𑀥𑀦𑀻𑀬𑀸𑀦𑀁 𑀯𑀺𑀧𑀸𑀓𑀸𑀦𑀁 𑀢𑀺𑀓𑁆𑀔𑀫𑀦𑁆𑀤𑀢𑀸 𑀯𑀺𑀲𑁂𑀲𑀪𑀽𑀢𑁄 𑀲𑀗𑁆𑀔𑀸𑀭𑀪𑁂𑀤𑁄 𑀓𑀫𑁆𑀫𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑁄. 𑀦 𑀧𑀬𑁄𑀕𑀯𑀲𑁂𑀦. 𑀇𑀢𑀭𑀣𑀸 𑀓𑀫𑁆𑀫𑀯𑀺𑀲𑁂𑀲𑁂𑀦 𑀢𑀺𑀓𑁆𑀔𑀫𑀦𑁆𑀤𑀚𑀸𑀢𑀸𑀦𑀁 𑀢𑁂𑀲𑀁 𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀫𑀢𑁆𑀢𑁂𑀦 𑀫𑀦𑁆𑀤𑀢𑀺𑀓𑁆𑀔𑀢𑀸𑀧𑀢𑁆𑀢𑀺𑀦𑀸𑀫 𑀲𑀺𑀬𑀸𑀢𑀺. 𑀅𑀳𑁂𑀢𑀼 𑀓𑀯𑀺𑀧𑀸𑀓𑀸𑀦𑀁 𑀧𑀦 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸 𑀅𑀧𑀭𑀺𑀩𑁆𑀬𑀢𑁆𑀢𑁄𑀯 𑀢𑀺𑀓𑁆𑀔𑀫𑀦𑁆𑀤𑀢𑀸 𑀯𑀺𑀲𑁂𑀲𑁄𑀢𑀺 𑀉𑀪𑀬𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀲𑀲𑀗𑁆𑀔𑀸𑀭𑀸𑀲𑀗𑁆𑀔𑀸𑀭𑀪𑀸𑀯𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀯𑀸 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑀯𑀸 𑀉𑀧𑁆𑀧𑀢𑁆𑀢𑀺𑀓𑀸𑀮𑁂 𑀧𑀼𑀩𑁆𑀩𑀧𑀬𑁄𑀕𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀯𑀺𑀲𑁂𑀲𑀲𑁆𑀲 𑀪𑀸𑀯𑀸𑀪𑀸𑀯𑁂𑀦 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄. 𑀦 𑀓𑀫𑁆𑀫𑀸𑀕𑀫𑀦𑀯𑀲𑁂𑀦, 𑀦 𑀳𑀺 𑀓𑀫𑁆𑀫𑀪𑀯𑁂 𑀲𑀗𑁆𑀔𑀸𑀭𑁄 𑀪𑀯𑀦𑁆𑀢𑀭𑁂 𑀯𑀺𑀧𑀸𑀓𑀸𑀦𑀺 𑀯𑀺𑀲𑁂𑀲𑁂𑀢𑀼𑀁 𑀬𑀼𑀢𑁆𑀢𑁄. 𑀢𑀲𑁆𑀫𑀸 𑀇𑀫𑀁 𑀯𑀸𑀤𑀁 𑀓𑁂𑀘𑀺𑀯𑀸𑀤𑀁𑀦𑀸𑀫 𑀓𑀭𑁄𑀦𑁆𑀢𑁄 𑀓𑁂𑀘𑀦𑀸𑀢𑀺 𑀆𑀳.

𑀇𑀫𑀲𑁆𑀫𑀺𑀁 𑀓𑁂𑀘𑀺𑀯𑀸𑀤𑁂 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑁂 𑀲𑀲𑀗𑁆𑀔𑀸𑀭𑀺𑀓 𑀯𑀺𑀧𑀸𑀓𑀸𑀦𑀺 𑀲𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑁂𑀘 𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀘𑀢𑀽𑀲𑀼 𑀢𑀺𑀳𑁂 𑀢𑀼𑀓𑀼𑀓𑁆𑀓𑀝𑁆𑀞𑁂𑀲𑀼 𑀓𑀫𑁆𑀫𑁂𑀲𑀼 𑀅𑀲𑀗𑁆𑀔𑀸𑀭𑀺𑀓𑀤𑁆𑀯𑀬𑁂 𑀯𑀺𑀧𑀸𑀓𑀸𑀦𑀺 𑀧𑀝𑀺𑀲𑀦𑁆𑀥𑀺𑀬𑀁 𑀤𑁆𑀯𑁂, 𑀧𑀯𑀢𑁆𑀢𑀺𑀬𑀁 𑀤𑁆𑀯𑀸𑀤𑀲. 𑀲𑀲𑀗𑁆𑀔𑀸𑀭𑀺𑀓𑀤𑁆𑀯𑀬𑁂 𑀧𑀝𑀺𑀲𑀦𑁆𑀥𑀺𑀬𑀁 𑀤𑁆𑀯𑁂, 𑀧𑀯𑀢𑁆𑀢𑀺𑀬𑀁 𑀤𑁆𑀯𑀸𑀤𑀲. 𑀘𑀢𑀽𑀲𑀼 𑀤𑁆𑀯𑀺𑀳𑁂𑀢𑀼𑀓𑁄𑀫𑀓𑀓𑀫𑁆𑀫𑁂𑀲𑀼 𑀅𑀲𑀗𑁆𑀔𑀸𑀭𑀺𑀓𑀤𑁆𑀯𑀬𑁂 𑀧𑀝𑀺𑀲𑀦𑁆𑀥𑀺𑀬𑀁 𑀤𑁆𑀯𑁂, 𑀧𑀯𑀢𑁆𑀢𑀺𑀬𑀁 𑀤𑀲. 𑀲𑀲𑀗𑁆𑀔𑀸𑀭𑀺𑀓𑀤𑁆𑀯𑀬𑁂 𑀧𑀝𑀺𑀲𑀦𑁆𑀥𑀺𑀬𑀁 𑀤𑁆𑀯𑁂, 𑀧𑀯𑀢𑁆𑀢𑀺𑀬𑀁 𑀤𑀲. 𑀢𑀣𑀸 𑀘𑀢𑀽𑀲𑀼 𑀤𑁆𑀯𑀺𑀳𑁂𑀢𑀼𑀓𑀼𑀓𑁆𑀓𑀝𑁆𑀞𑁂𑀲𑀼. 𑀘𑀢𑀽𑀲𑀼 𑀤𑁆𑀯𑀺𑀳𑁂𑀢𑀼𑀓𑁄𑀫𑀓𑁂𑀲𑀼 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁 𑀏𑀓𑀁 𑀅𑀳𑁂𑀢𑀼𑀓𑀁 𑀧𑀯𑀢𑁆𑀢𑀺𑀬𑀁 𑀅𑀝𑁆𑀞𑀅𑀳𑁂𑀢𑀼𑀓𑀸𑀦𑀻𑀢𑀺 𑀏𑀯𑀁 𑀯𑀺𑀧𑀸𑀓𑀸𑀦𑀁 𑀤𑁆𑀯𑁂 𑀤𑁆𑀯𑀸𑀤𑀲𑀓𑀫𑀕𑁆𑀕𑀸 𑀘𑀢𑁆𑀢𑀸𑀭𑁄 𑀤𑀲𑀓𑀫𑀕𑁆𑀕𑀸 𑀏𑀓𑀁 𑀅𑀳𑁂𑀢𑀼𑀓𑀝𑁆𑀞𑀓𑀜𑁆𑀘 𑀳𑁄𑀦𑁆𑀢𑀺, 𑀢𑀁𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑁂𑀲𑀦𑁆𑀢𑀺 𑀕𑀸𑀣𑀫𑀸𑀳.

𑀢𑁂𑀲𑀦𑁆𑀢𑀺 𑀢𑁂𑀲𑀁 𑀓𑁂𑀲𑀜𑁆𑀘𑀺 𑀣𑁂𑀭𑀸𑀦𑀁 𑀯𑀸𑀤𑁂. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺𑀢𑀺𑀳𑁂𑀢𑀼𑀓𑀸𑀯 𑀳𑁄𑀢𑀺. 𑀦 𑀤𑀼𑀳𑁂𑀢𑀼𑀓𑀸 𑀦𑀘𑀅𑀳𑁂𑀢𑀼𑀓𑀸. 𑀤𑀼𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀤𑀼𑀳𑁂𑀢𑀼𑀓𑀸𑀧𑀺 𑀳𑁄𑀢𑀺 𑀅𑀳𑁂𑀢𑀼𑀓𑀸𑀧𑀺. 𑀢𑀺𑀳𑁂𑀢𑀼𑀓𑀸 𑀧𑀦 𑀦𑀳𑁄𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄𑀧𑀺 𑀆𑀕𑀢𑁄. 𑀢𑀢𑁆𑀣 𑀬𑀣𑀸 𑀤𑀼𑀳𑁂𑀢𑀼𑀓𑁂𑀦 𑀳𑀻𑀦𑁂𑀦 𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸 𑀳𑁄𑀢𑀺. 𑀢𑀣𑀸 𑀢𑀺𑀳𑁂𑀢𑀼𑀓𑁂𑀦𑀧𑀺 𑀳𑀻𑀦𑁂𑀦 𑀓𑀫𑁆𑀫𑁂𑀦 𑀤𑀼𑀳𑁂𑀢𑀼𑀓𑀸𑀧𑀺 𑀧𑀝𑀺𑀲𑀦𑁆𑀥𑀺 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀇𑀥 𑀅𑀬𑀁𑀯𑀸𑀤𑁄 𑀣𑁂𑀭𑁂𑀦 𑀦 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦-𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀅𑀝𑁆𑀞𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀓𑀼𑀲𑀮𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀓𑀼𑀲𑀮𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀬𑁄 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸𑀢𑀺𑀘 𑀕𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡 𑀯𑀺𑀧𑁆𑀧𑀬𑀼𑀢𑁆𑀢𑁂 𑀙𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸 𑀉𑀧𑀧𑀢𑁆𑀢𑀺 𑀳𑁄𑀳𑀺. 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀚𑀯𑀦𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀓𑀼𑀲𑀮𑀸. 𑀦𑀺𑀓𑀦𑁆𑀢𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀓𑀼𑀲𑀮𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀤𑁆𑀯𑁂 𑀳𑁂𑀢𑀽 𑀅𑀩𑁆𑀬𑀸𑀓𑀢𑀸𑀢𑀺𑀘 𑀏𑀯𑀁 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀧𑀝𑀺𑀲𑀦𑁆𑀥𑀺 𑀢𑀺𑀳𑁂𑀢𑀼𑀓𑀸𑀯 𑀯𑀼𑀢𑁆𑀢𑀸. 𑀤𑁆𑀯𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀳𑁂𑀢𑀼𑀓𑀸𑀯. 𑀦 𑀧𑀦 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂 𑀲𑀢𑁆𑀢𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸𑀢𑀺𑀆𑀤𑀺𑀦𑀸 𑀢𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺 𑀯𑀼𑀢𑁆𑀢𑀸. 𑀦𑀘 𑀘𑀢𑀼𑀦𑁆𑀦𑀁 𑀳𑁂𑀢𑀽𑀦𑀁 𑀧𑀘𑁆𑀘𑀬𑀸𑀢𑀺𑀆𑀤𑀺𑀦𑀸 𑀤𑁆𑀯𑀺𑀳𑁂𑀢𑀼𑀓𑁂𑀦 𑀓𑀫𑁆𑀫𑁂𑀦 𑀅𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀻𑀢𑀺.

𑀢𑀢𑁆𑀣 𑀧𑀦 𑀢𑀻𑀲𑀼 𑀔𑀡𑁂𑀲𑀼 𑀲𑀳𑀚𑀸𑀢 𑀳𑁂𑀢𑀽𑀦𑀁 𑀯𑀲𑁂𑀦 𑀳𑁂𑀢𑀼 𑀫𑀽𑀮𑀓𑁄𑀯 𑀅𑀬𑀁 𑀤𑁂𑀲𑀦𑀸𑀯𑀸𑀭𑁄𑀢𑀺 𑀓𑀢𑁆𑀯𑀸 𑀅𑀦𑁄𑀓𑀸𑀲𑀢𑀸𑀬 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀢𑀢𑁆𑀣 𑀦𑀯𑀼𑀢𑁆𑀢𑀸. 𑀦 𑀧𑀦 𑀅𑀮𑀩𑁆𑀪𑀫𑀸𑀦𑀢𑀸𑀬. 𑀤𑁆𑀯𑀺𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺 𑀧𑀦 𑀅𑀦𑁄𑀓𑀸𑀲𑀸𑀬𑁂𑀯 𑀦𑀳𑁄𑀢𑀺. 𑀅𑀮𑀩𑁆𑀪 𑀫𑀸𑀦𑀢𑁆𑀢𑀸𑀬𑁂𑀯 𑀲𑀸 𑀦𑀯𑀼𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀲𑁆𑀫𑀸 𑀬𑀼𑀢𑁆𑀢𑀺𑀢𑁄 𑀧𑀸𑀴𑀺𑀬𑁂𑀯 𑀩𑀮𑀯𑀢𑀭𑀸𑀢𑀺 𑀓𑀢𑁆𑀯𑀸 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄𑀯 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀝𑀻𑀓𑀸𑀓𑀸𑀭𑀸 𑀧𑀦 𑀓𑀫𑁆𑀫𑀲𑀭𑀺𑀓𑁆𑀔𑀓 𑀯𑀺𑀧𑀸𑀓𑀤𑀲𑁆𑀲𑀦𑀢𑁆𑀣𑀁 𑀲𑀸𑀯𑀲𑁂𑀲 𑀧𑀸𑀞𑁄𑀯 𑀫𑀳𑀸𑀣𑁂𑀭𑁂𑀦 𑀯𑀼𑀢𑁆𑀢𑁄𑀢𑀺 𑀇𑀘𑁆𑀙𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀝𑁆𑀞𑀲𑀸𑀮𑀺𑀦𑀺𑀬𑀁𑀧𑀺 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁄𑀯 𑀧𑀫𑀸𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀇𑀤𑀸𑀦𑀺 𑀏𑀓𑀸𑀬 𑀘𑁂𑀢𑀦𑀸𑀬 𑀤𑁆𑀯𑀸𑀤𑀲𑀯𑀺𑀧𑀸𑀓𑀸𑀦𑀺 𑀏𑀢𑁆𑀣𑁂𑀯 𑀤𑀲𑀓𑀫𑀕𑁆𑀕𑁄𑀧𑀺 𑀅𑀳𑁂𑀢𑀼𑀓𑀝𑁆𑀞𑀓𑀫𑁆𑀧𑀺𑀢𑀺 𑀆𑀕𑀢𑀲𑁆𑀲 𑀫𑁄𑀭𑀯𑀸𑀧𑀺𑀯𑀸𑀲𑀺 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲𑀸𑀢𑀺 𑀧𑀸𑀞𑁄.

𑀫𑁄𑀭𑀯𑀸𑀧𑀺𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀲𑁆𑀲𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄. 𑀫𑀳𑀸𑀥𑀫𑁆𑀫 𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁄𑀧𑀺 𑀧𑀦 𑀏𑀢𑁆𑀣 𑀏𑀓𑀤𑁂𑀲𑁂𑀦 𑀲𑀗𑁆𑀕𑀳𑀺𑀢𑁄𑀬𑁂𑀯. 𑀢𑀲𑁆𑀫𑀺𑀁𑀧𑀺 𑀳𑀺 𑀅𑀲𑀗𑁆𑀔𑀸𑀭𑀺𑀓𑀁 𑀓𑀫𑁆𑀫𑀁 𑀅𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀫𑁂𑀯 𑀤𑁂𑀢𑀺. 𑀦𑁄 𑀲𑀲𑀗𑁆𑀔𑀸𑀭𑀺𑀓𑀁. 𑀲𑀲𑀗𑁆𑀔𑀸𑀭𑀺𑀓𑀁 𑀓𑀫𑁆𑀫𑀁 𑀲𑀲𑀗𑁆𑀔𑀸𑀭𑀺𑀓𑀯𑀺𑀧𑀸𑀓𑀫𑁂𑀯 𑀤𑁂𑀢𑀺. 𑀦𑁄 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀆𑀕𑀢𑀫𑁂𑀯𑀸𑀢𑀺. [𑀓𑀸𑀫𑀸𑀯𑀘𑀭𑀓𑀫𑁆𑀫𑀁]

𑁧𑁫𑁪. 𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀧𑀭𑀺𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁 𑀧𑀭𑀺𑀢𑁆𑀢𑀁 𑀅𑀧𑀕𑀼𑀡𑀢𑀸 𑀬𑀯𑀸 𑀳𑀻𑀦𑀢𑀸𑀬𑀯𑀸. 𑀢𑀢𑁆𑀣 𑀬𑀁 𑀧𑀡𑀻𑀢𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀬𑀼𑀢𑁆𑀢𑀁𑀧𑀺 𑀅𑀪𑀸𑀯𑀺𑀢𑀁 𑀳𑁄𑀢𑀺 𑀧𑀝𑀺𑀮𑀤𑁆𑀥𑀫𑀢𑁆𑀢𑀁, 𑀢𑀁 𑀅𑀧𑀕𑀼𑀡𑀢𑀸𑀬 𑀧𑀭𑀺𑀢𑁆𑀢𑀁𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀬𑀁 𑀅𑀧𑀕𑀼𑀡𑀁 𑀳𑁄𑀢𑀺, 𑀉𑀧𑀭𑀺 𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑀁 𑀧𑀭𑀺𑀢𑁆𑀢𑀁𑀦𑀸𑀫𑀸𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁. 𑀬𑀁 𑀧𑀦 𑀲𑀼𑀪𑀸𑀯𑀺𑀢𑀁𑀧𑀺 𑀲𑀫𑀸𑀦𑀁 𑀳𑀻𑀦𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀬𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀳𑀻𑀦𑀢𑀸𑀬 𑀧𑀭𑀺𑀢𑁆𑀢𑀁𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀬𑀲𑁆𑀲 𑀆𑀬𑀽𑀳𑀦𑀓𑁆𑀔𑀡𑁂 𑀙𑀦𑁆𑀤𑁄𑀯𑀸 𑀳𑀻𑀦𑁄 𑀳𑁄𑀢𑀺. 𑀯𑀻𑀭𑀺𑀬𑀁𑀯𑀸, 𑀘𑀺𑀢𑁆𑀢𑀁𑀯𑀸, 𑀯𑀻𑀫𑀁𑀲𑀸𑀯𑀸, 𑀢𑀁 𑀳𑀻𑀦𑀁𑀦𑀸𑀫𑀸𑀢𑀺 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀁𑀧𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀦𑀸𑀢𑀺𑀧𑀕𑀼𑀡 𑀢𑀸𑀬 𑀫𑀚𑁆𑀛𑀺𑀫𑀁 𑀲𑀦𑁆𑀥𑀸𑀬 𑀦𑀸𑀢𑀺𑀲𑀼𑀪𑀸𑀯𑀺𑀢𑁄 𑀫𑀚𑁆𑀛𑀺𑀫𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀬𑀼𑀢𑁆𑀢𑀢𑀸𑀬 𑀫𑀚𑁆𑀛𑀺𑀫𑀁 𑀲𑀦𑁆𑀥𑀸𑀬 𑀬𑀲𑁆𑀲 𑀆𑀬𑀽𑀳𑀦𑀓𑁆𑀔𑀡𑁂 𑀢𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸 𑀳𑁄𑀦𑁆𑀢𑀺. 𑀢𑀁 𑀫𑀚𑁆𑀛𑀺𑀫𑀦𑁆𑀢𑀺 𑀅𑀝𑁆𑀞 𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁. 𑀧𑀡𑀻𑀢𑀁𑀧𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀅𑀢𑀺𑀧𑀕𑀼𑀡𑀢𑀸𑀬 𑀧𑀡𑀻𑀢𑀁 𑀲𑀦𑁆𑀥𑀸𑀬 𑀲𑀼𑀪𑀸𑀯𑀺𑀢𑁄 𑀯𑀲𑀺𑀧𑁆𑀧𑀢𑁆𑀢𑁄 𑀧𑀡𑀻𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀧𑀡𑀻𑀢𑁂𑀳𑀺 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀬𑀼𑀢𑁆𑀢𑀢𑀸𑀬 𑀧𑀡𑀻𑀢𑀁 𑀲𑀦𑁆𑀥𑀸𑀬 𑀬𑀲𑁆𑀲 𑀆𑀬𑀽𑀳𑀦𑀓𑁆𑀔𑀡𑁂 𑀢𑁂 𑀥𑀫𑁆𑀫𑀸 𑀧𑀡𑀻𑀢𑀸 𑀳𑁄𑀦𑁆𑀢𑀺. 𑀢𑀁 𑀧𑀡𑀻𑀢𑀦𑁆𑀢𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀦𑀺 𑀅𑀧𑀕𑀼𑀡𑀢𑀸𑀤𑀺 𑀯𑀲𑁂𑀦 𑀧𑀭𑀺𑀢𑁆𑀢𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺. 𑀬𑀸𑀦𑀺 𑀧𑀦 𑀳𑀻𑀦𑀸𑀤𑀻𑀳𑀺 𑀙𑀦𑁆𑀤𑀸𑀤𑀻𑀳𑀺 𑀬𑀼𑀢𑁆𑀢𑀢𑀸𑀬 𑀧𑀭𑀺𑀢𑁆𑀢𑀸𑀤𑀻𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺. 𑀇𑀫𑀸𑀦𑁂𑀯 𑀳𑀺 𑀢𑀺𑀯𑀺𑀥𑀸𑀲𑀼 𑀪𑀽𑀫𑀻𑀲𑀼 𑀢𑀺𑀯𑀺𑀥𑀁 𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀺𑀪𑁂𑀤𑀁 𑀲𑀸𑀥𑁂𑀦𑁆𑀢𑀻𑀢𑀺. 𑀇𑀢𑁆𑀣𑀻𑀦𑀁 𑀛𑀸𑀦𑁂𑀲𑀼 𑀯𑀲𑀻𑀧𑀢𑁆𑀢𑀸𑀦𑀁𑀧𑀺 𑀙𑀦𑁆𑀤𑀸𑀤𑀻𑀦𑀁 𑀅𑀧𑀡𑀻𑀢𑀢𑀸𑀬 𑀫𑀳𑀸𑀩𑁆𑀭𑀳𑁆𑀫𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀢𑁂𑀦𑁂𑀯𑀘 𑀅𑀝𑁆𑀞𑀓𑀣𑀸𑀬𑀁 𑀙𑀦𑁆𑀤𑀸𑀤𑀺𑀯𑀲𑁂𑀦 𑀲𑀺𑀤𑁆𑀥𑀸𑀦𑀺 𑀳𑀻𑀦 𑀫𑀚𑁆𑀛𑀺𑀫 𑀧𑀡𑀻𑀢𑀸𑀦𑀺 𑀅𑀝𑁆𑀞𑀸𑀭𑀲𑀧𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀫𑀸𑀦𑀺 𑀅𑀝𑁆𑀞𑀸𑀭𑀲 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀦𑀸𑀫 𑀇𑀫𑁂𑀳𑀺 𑀧𑀪𑀸𑀯𑀺𑀢𑀢𑁆𑀢𑀸 𑀇𑀫𑁂𑀲𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲𑀔𑀢𑁆𑀢𑀺𑀬𑀸 𑀅𑀝𑁆𑀞𑀸𑀭𑀲 𑀩𑁆𑀭𑀸𑀳𑁆𑀫𑀡𑀸 𑀅𑀝𑁆𑀞𑀸𑀭𑀲 𑀯𑁂𑀲𑁆𑀲𑀸 𑀅𑀝𑁆𑀞𑀸𑀭𑀲 𑀲𑀼𑀤𑁆𑀤𑀸 𑀅𑀝𑁆𑀞𑀘𑀢𑁆𑀢𑀸 𑀮𑀻𑀲 𑀕𑁄𑀢𑁆𑀢 𑀘𑀭𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀤𑁂𑀯𑀸𑀦𑀁𑀧𑀺 𑀩𑁆𑀭𑀳𑁆𑀫𑀽𑀦𑀁𑀧𑀺 𑀮𑀩𑁆𑀪𑀫𑀸𑀦𑀁 𑀉𑀧𑀧𑀢𑁆𑀢𑀺𑀪𑁂𑀤𑀁 𑀉𑀧𑀮𑀓𑁆𑀔𑁂𑀢𑀻𑀢𑀺.

[𑁧𑁬𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀅𑀦𑀸𑀲𑁂𑀯𑀺𑀢𑀁 𑀧𑀭𑀺𑀢𑁆𑀢𑀦𑁆𑀢𑀺 𑀅𑀯𑀺𑀲𑁂𑀲𑀢𑁄𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀣𑀸 𑀦𑀸𑀢𑀺 𑀲𑀼𑀪𑀸𑀯𑀺𑀢𑀁 𑀅𑀫𑀭𑀺𑀧𑀼𑀡𑁆𑀡𑀯𑀲𑀻𑀪𑀸𑀯𑀁 𑀫𑀚𑁆𑀛𑀺𑀫𑀁. 𑀅𑀢𑀺𑀯𑀺𑀬𑀲𑀼𑀪𑀸𑀯𑀺𑀢𑀁 𑀧𑀦 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡 𑀯𑀲𑀻𑀪𑀸𑀯𑀁 𑀧𑀡𑀻𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀇𑀥 𑀦𑀬𑀼𑀚𑁆𑀚𑀢𑀺𑀬𑁂𑀯.

𑀢𑀜𑁆𑀳𑀺 𑀉𑀧𑀭𑀺 𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸𑀲𑀫𑀢𑁆𑀣𑀁𑀯𑀸 𑀳𑀸𑀦 𑀪𑀸𑀕𑀺𑀬𑀢𑀸𑀤𑀺 𑀯𑀺𑀲𑁂𑀲𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀧𑀦 𑀉𑀧𑀧𑀢𑁆𑀢𑀺 𑀪𑁂𑀤𑀚𑀦𑀓 𑀯𑀺𑀲𑁂𑀲𑀦𑁆𑀢𑀺.

[𑁧𑁬𑁨] 𑀬𑀜𑁆𑀘 𑀢𑀢𑁆𑀣

‘‘𑀆𑀘𑀭𑀺𑀬𑁂𑀦 𑀧𑀦𑁂𑀢𑁆𑀣 𑀧𑀭𑀺𑀢𑁆𑀢𑀁𑀧𑀺 𑀈𑀲𑀓𑀁 𑀮𑀤𑁆𑀥𑀸𑀲𑁂𑀯𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀸𑀦𑁂𑀦 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂-

𑀲𑀫𑀸𑀦𑀸𑀲𑁂𑀯𑀦𑁂 𑀮𑀤𑁆𑀥𑁂, 𑀯𑀺𑀚𑁆𑀚𑀫𑀸𑀦𑁂 𑀫𑀳𑀩𑁆𑀩𑀮𑁂;

𑀅𑀮𑀤𑁆𑀥𑀸 𑀢𑀸𑀤𑀺𑀲𑀁 𑀳𑁂𑀢𑀼, 𑀫𑀪𑀺𑀜𑁆𑀜𑀸 𑀦 𑀯𑀺𑀧𑀘𑁆𑀘𑀢𑀻𑀢𑀺.

𑀲𑀫𑀸𑀦𑀪𑀽𑀫𑀺𑀓𑀢𑁄𑀯 𑀆𑀲𑁂𑀯𑀦 𑀮𑀸𑀪𑁂𑀦 𑀩𑀮𑀯 𑀪𑀸𑀯𑀢𑁄 𑀫𑀳𑀕𑁆𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀤𑀸𑀦𑀁 𑀯𑀢𑁆𑀯𑀸 𑀢𑀤𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀬 𑀅𑀯𑀺𑀧𑀘𑁆𑀘𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯.

𑀬𑀣𑀸 𑀳𑀺 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸 𑀅𑀢𑁆𑀢𑀦𑀸 𑀲𑀫𑀸𑀦𑀪𑀽𑀫𑀓𑀚𑀯𑀦𑀢𑁄 𑀅𑀮𑀤𑁆𑀥𑀸𑀲𑁂𑀯𑀦𑀸𑀧𑀺 𑀲𑀫𑀸𑀦𑀸 𑀯𑀺𑀧𑀸𑀓𑀁 𑀦 𑀤𑁂𑀢𑀻𑀢𑀺 𑀦𑀢𑁆𑀣𑀺. 𑀢𑀣𑀸 𑀆𑀤𑀺 𑀓𑀫𑁆𑀫𑀺𑀓𑀯𑀻𑀣𑀺𑀬𑀁 𑀏𑀓𑀯𑀸𑀭𑀫𑀢𑁆𑀢𑀪𑀽𑀢𑀸 𑀲𑀩𑁆𑀩𑀲𑀫𑀸𑀧𑀢𑁆𑀢𑀺 𑀯𑀻𑀣𑀻𑀲𑀼𑀘 𑀲𑀩𑁆𑀩𑀧𑀣 𑀫𑀪𑀽𑀢𑀸 𑀫𑀳𑀕𑁆𑀕𑀢𑀘𑁂𑀢𑀦𑀸𑀧𑀺 𑀲𑀫𑀸𑀦𑀪𑀽𑀫𑀓𑀥𑀫𑁆𑀫𑀢𑁄 𑀅𑀮𑀤𑁆𑀥𑀸𑀲𑁂𑀯𑀦 𑀢𑀸𑀬 𑀤𑀼𑀩𑁆𑀩𑀮𑀢𑁆𑀢𑀸 𑀯𑀺𑀧𑀸𑀓𑀁 𑀦𑀤𑁂𑀢𑀻𑀢𑀺 𑀦𑀢𑁆𑀣𑀻𑀢𑀺 𑀦 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀏𑀢𑁆𑀣 𑀲𑀺𑀬𑀸- 𑀢𑀲𑁆𑀲𑁂𑀯 𑀭𑀽𑀧𑀸𑀯𑀘𑀭𑀲𑁆𑀲 𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀯𑀺𑀧𑀸𑀓𑀁.𑀮. 𑀧𑀣𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁. 𑀦 𑀘 𑀲𑀸 𑀘𑁂𑀢𑀦𑀸 𑀉𑀧𑀘𑀺𑀢𑀸𑀦𑀸𑀫 𑀳𑁄𑀢𑀺. 𑀲𑀫𑀸𑀦𑀪𑀽𑀫𑀓 𑀥𑀫𑁆𑀫𑀢𑁄 𑀅𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸𑀢𑀺.𑀦. 𑀫𑀕𑁆𑀕𑀘𑁂𑀢𑀦𑀸𑀬𑀧𑀺 𑀅𑀯𑀺𑀧𑀸𑀓𑀢𑀸𑀧𑀢𑁆𑀢𑀺𑀢𑁄. 𑀲𑀸𑀧𑀺𑀳𑀺 𑀢𑀲𑁆𑀲𑁂𑀯 𑀮𑁄𑀓𑀼𑀢𑁆𑀢𑀭𑀲𑁆𑀲 𑀓𑀼𑀲𑀮𑀲𑁆𑀲 𑀛𑀸𑀦𑀲𑁆𑀲 𑀓𑀢𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸 𑀯𑀺𑀧𑀸𑀓𑀁. 𑀮. 𑀧𑀣𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀸. 𑀦𑀘 𑀲𑀸𑀧𑀺 𑀲𑀫𑀸𑀦𑀪𑀽𑀫𑀓𑀥𑀫𑁆𑀫𑀢𑁄 𑀮𑀤𑁆𑀥𑀸𑀲𑁂𑀯𑀦𑀸 𑀳𑁄𑀢𑀻𑀢𑀺. 𑀉𑀪𑀬𑀢𑁆𑀣 𑀧𑀦 𑀧𑀣𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀉𑀧𑀘𑀺𑀦𑀺𑀢𑁆𑀯𑀸 𑀪𑀸𑀯𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀅𑀲𑀫𑀸𑀦𑀪𑀽𑀫𑀺𑀓 𑀚𑀯𑀦𑁂𑀳𑀺𑀧𑀺 𑀮𑀤𑁆𑀥𑀸𑀲𑁂𑀯𑀦 𑀪𑀸𑀯𑀁 𑀧𑀝𑀺𑀘𑁆𑀘 𑀉𑀧𑀘𑀺𑀢𑀢𑀸 𑀪𑀸𑀯𑀺𑀢𑀢𑀸𑀘 𑀯𑀼𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀲𑁆𑀫𑀸 𑀆𑀤𑀺 𑀓𑀫𑁆𑀫𑀺𑀓𑀪𑀽𑀢𑀸𑀧𑀺 𑀫𑀳𑀕𑁆𑀕𑀢𑀘𑁂𑀢𑀦𑀸 𑀫𑀭𑀡𑀸 𑀲𑀦𑁆𑀦𑁂 𑀮𑀤𑁆𑀥𑀸 𑀅𑀩𑁆𑀪𑀼𑀡𑁆𑀳𑀸 𑀆𑀲𑀦𑁆𑀦𑀓𑀫𑁆𑀫𑀪𑀽𑀢𑀸 𑀯𑀺𑀧𑀸𑀓𑀁 𑀦𑀤𑁂𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀘 𑀲𑀫𑀸𑀦𑀪𑀽𑀫𑀓𑁂𑀳𑀺𑀧𑀺 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀚𑀯𑀦𑁂𑀳𑀺 𑀲𑀼𑀝𑁆𑀞𑀼𑀢𑀭𑀁 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸 𑀢𑀺𑀓𑁆𑀔𑀢𑀭𑀪𑀽𑀢𑀸 𑀓𑀣𑀁 𑀤𑀼𑀩𑁆𑀩𑀮𑀸𑀦𑀸𑀫 𑀲𑀺𑀬𑀸. 𑀢𑁂𑀦𑁂𑀯 𑀅𑀬𑀁 𑀯𑀸𑀤𑁄 𑀅𑀦𑀼𑀝𑀻𑀓𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀓𑁂𑀘𑀺 𑀧𑀦 𑀲𑀫𑀸𑀦 𑀪𑀽𑀫𑀓𑀢𑁄 𑀆𑀲𑁂𑀯𑀦𑀮𑀸𑀪𑁂𑀦 𑀩𑀮𑀯𑀦𑁆𑀢𑀸𑀦𑀺 𑀛𑀸𑀦𑀸𑀦𑀻𑀢𑀺 𑀢𑀸𑀦𑀺 𑀯𑀺𑀧𑀸𑀓𑀁 𑀤𑁂𑀦𑁆𑀢𑀺. 𑀅𑀪𑀺𑀜𑁆𑀜𑀸 𑀧𑀦 𑀲𑀢𑀺𑀧𑀺 𑀛𑀸𑀦𑀪𑀸𑀯𑁂 𑀢𑀤𑀪𑀸𑀯𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀕𑀦𑁆𑀢𑀼𑀓𑀢𑁆𑀢𑀸𑀯𑀸 𑀤𑀼𑀩𑁆𑀩𑀮𑀸. 𑀢𑀲𑁆𑀫𑀸 𑀯𑀺𑀧𑀸𑀓𑀁 𑀦 𑀤𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁. 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀪𑀺𑀜𑁆𑀜𑀸 𑀬𑀧𑀺 𑀯𑀲𑀻𑀪𑀸𑀯𑀲𑀫𑁆𑀪𑀯𑀢𑁄𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲 𑀧𑀦 𑀆𑀦𑀺𑀲𑀁𑀲𑀪𑀽𑀢𑀸 𑀅𑀪𑀺𑀜𑁆𑀜𑀸𑀘𑁂𑀢𑀦𑀸 𑀢𑀲𑁆𑀲 𑀨𑀮𑀲𑀤𑀺𑀲𑀸 𑀨𑀮𑀝𑁆𑀞𑀸𑀦𑁂 𑀞𑀺𑀢𑀸, 𑀢𑀲𑁆𑀫𑀸 𑀲𑀸 𑀯𑀺𑀧𑀸𑀓𑀁 𑀦𑀤𑁂𑀢𑀻𑀢𑀺 𑀇𑀘𑁆𑀙𑀦𑁆𑀢𑀺 𑀝𑀻𑀓𑀸𑀓𑀸𑀭𑀸. 𑀢𑀲𑁆𑀲 𑀧𑀦 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀦𑀸𑀤𑀺𑀓𑀺𑀘𑁆𑀘𑀁 𑀯𑀺𑀧𑀘𑁆𑀘𑀦𑀓𑀺𑀘𑁆𑀘𑀢𑁄𑀧𑀺 𑀫𑀳𑀦𑁆𑀢𑀢𑀭𑀁 𑀳𑁄𑀢𑀺. 𑀲𑀩𑁆𑀩𑀣𑀸 𑀫𑁂𑀦𑀘 𑀯𑀺𑀓𑀼𑀩𑁆𑀩𑀦𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀯𑀺𑀧𑀘𑁆𑀘𑀦𑀣𑀸𑀫𑁂𑀧𑀺 𑀢𑁂𑀦 𑀣𑀸𑀫𑁂𑀦 𑀲𑀳 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑀸 𑀧𑀼𑀦 𑀯𑀺𑀧𑀸𑀓𑀁 𑀦𑀤𑁂𑀢𑀻𑀢𑀺𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀧𑀜𑁆𑀘𑀫𑀚𑁆𑀛𑀸𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀪𑀸𑀯𑀁 𑀅𑀧𑀢𑁆𑀢𑀁 𑀧𑀭𑀺𑀢𑁆𑀢𑀸𑀤𑀺𑀪𑁂𑀤𑁂𑀦 𑀢𑀺𑀯𑀺𑀥𑀁 𑀧𑀜𑁆𑀘𑀫𑀚𑁆𑀛𑀸𑀦𑀁. 𑀢𑀤𑁂𑀯𑀸𑀢𑀺 𑀧𑀜𑁆𑀘𑀫𑀛𑀸𑀦𑀫𑁂𑀯. 𑀲𑀜𑁆𑀜𑀸𑀯𑀺𑀭𑀸𑀕𑀁 𑀪𑀸𑀯𑁂𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀲𑀢𑀺 𑀭𑀚𑁆𑀚𑀦 𑀤𑀼𑀲𑁆𑀲𑀦 𑀫𑀼𑀬𑁆𑀳𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀅𑀲𑀢𑀺 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀘𑀺𑀢𑁆𑀢𑁂 𑀏𑀯 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀘𑀺𑀢𑁆𑀢𑀓𑀪𑀯𑀧𑀢𑁆𑀣𑀦𑀸 𑀲𑀳𑀺𑀢𑀁 𑀯𑀸𑀬𑁄𑀓𑀲𑀺𑀡𑁂𑀯𑀸 𑀓𑁂𑀲𑀜𑁆𑀘𑀺 𑀫𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲 𑀓𑀲𑀺𑀡𑁂𑀯𑀸 𑀲𑀜𑁆𑀜𑀸𑀯𑀺𑀭𑀸𑀕𑀁 𑀪𑀸𑀯𑁂𑀢𑁆𑀯𑀸. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑁂𑀦 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀇𑀥 𑀫𑀭𑀦𑁆𑀢𑀺, 𑀢𑁂𑀦𑁂𑀯 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀺𑀢𑀺𑀢𑁆𑀣𑀺𑀬𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀅𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀻𑀦𑀁 𑀛𑀸𑀦𑀪𑀸𑀯𑀦𑀸 𑀦𑀸𑀫 𑀅𑀢𑁆𑀣𑀻𑀢𑀺. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀧𑀦 𑀅𑀦𑀸𑀕𑀸𑀫𑀺𑀦𑁄 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀅𑀜𑁆𑀜𑁂 𑀲𑀓𑀤𑀸𑀕𑀸𑀫𑀺𑀆𑀤𑀬𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀅𑀦𑀸𑀕𑀸𑀫𑀻𑀦𑀁 𑀅𑀜𑁆𑀜𑀲𑁆𑀫𑀺𑀁𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀢𑁆𑀢𑀺 𑀅𑀧𑁆𑀧𑀝𑀺𑀲𑀺𑀤𑁆𑀥𑀸 𑀳𑁄𑀢𑀺. 𑀅𑀦𑀸𑀕𑀸𑀫𑀻𑀲𑀼𑀘 𑀲𑀤𑁆𑀥𑀸𑀥𑀺𑀓𑁄 𑀅𑀯𑀺𑀳𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀯𑀻𑀭𑀺𑀬𑀸𑀥𑀺𑀓𑁄 𑀅𑀢𑀧𑁆𑀧𑁂𑀲𑀼. 𑀲𑀢𑀸𑀥𑀺𑀓𑁄 𑀲𑀼𑀤𑀲𑁆𑀲𑁂𑀲𑀼. 𑀲𑀫𑀸𑀥𑀸𑀥𑀺𑀓𑁄 𑀲𑀼𑀤𑀲𑁆𑀲𑀻𑀲𑀼. 𑀧𑀜𑁆𑀜𑀸𑀥𑀺𑀓𑁄 𑀅𑀓𑀦𑀺𑀝𑁆𑀞𑁂𑀲𑀽𑀢𑀺. 𑀬𑀣𑀸𑀓𑁆𑀓𑀫𑀁 𑀪𑀸𑀯𑁂𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀅𑀭𑀽𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀧𑀣𑀫𑀚𑁆𑀛𑀸𑀦𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸𑀢𑀺𑀆𑀤𑀺 𑀲𑀩𑁆𑀩𑀁 𑀧𑀣𑀫𑀚𑁆𑀛𑀸𑀦𑀸𑀤𑀻𑀦𑀁 𑀬𑀣𑀸 𑀲𑀓𑀁 𑀯𑀺𑀧𑀘𑁆𑀘𑀦𑀪𑀽𑀫𑀺 𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀧𑀦 𑀧𑀼𑀣𑀼𑀚𑁆𑀚𑀦 𑀲𑁄𑀢𑀸𑀧𑀦𑁆𑀦 𑀲𑀓𑀤𑀸𑀕𑀸𑀫𑀺𑀦𑁄 𑀅𑀢𑁆𑀢𑀦𑀸 𑀮𑀤𑁆𑀥𑀲𑀫𑀸𑀧𑀢𑁆𑀢𑀻𑀦𑀁 𑀯𑀺𑀧𑀘𑁆𑀘𑀦𑀪𑀽𑀫𑀻𑀲𑀼 𑀇𑀘𑁆𑀙𑀺𑀢𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑁄 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀓𑀸𑀫𑀮𑁄𑀓𑁂𑀧𑀺 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀇𑀢𑀭𑁂 𑀧𑀦 𑀛𑀸𑀦𑁂 𑀅𑀧𑀭𑀺 𑀳𑀻𑀦𑁂 𑀲𑀢𑀺 𑀓𑀸𑀫𑀮𑁄𑀓𑁂𑀧𑀺 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀇𑀢𑀭𑁂 𑀧𑀦 𑀛𑀸𑀦𑁂 𑀅𑀧𑀭𑀺𑀳𑀻𑀦𑁂 𑀲𑀢𑀺 𑀓𑀸𑀫𑀪𑀯𑁂 𑀦𑀺𑀓𑀦𑁆𑀢𑀺𑀦𑀸𑀫 𑀢𑁂𑀲𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀧𑀭𑀺𑀳𑀻𑀦𑀚𑁆𑀛𑀸𑀦𑀸𑀏𑀯 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

[𑁧𑁬𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑁂𑀲𑀁𑀧𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁 𑀦𑀺𑀓𑀦𑁆𑀢𑀺𑀯𑀲𑁂𑀦 𑀓𑀸𑀫𑀪𑀯𑁂𑀦𑀺𑀩𑁆𑀩𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑁂𑀦 ‘‘𑀢𑀣𑀸 𑀓𑀸𑀫𑀪𑀯𑁂𑀧𑀺 𑀓𑀸𑀫𑀸𑀯𑀘𑀭 𑀓𑀫𑁆𑀫𑀩𑀮𑁂𑀦. 𑀇𑀚𑁆𑀛𑀢𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.