𑀯𑀻𑀣𑀺 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁩𑁬. 𑀏𑀯𑀁 𑀘𑀺𑀢𑁆𑀢𑀧𑁆𑀧𑀪𑁂𑀤 𑀲𑀗𑁆𑀕𑀳𑁄, 𑀘𑁂𑀢𑀲𑀺𑀓𑀧𑁆𑀧𑀪𑁂𑀤 𑀲𑀗𑁆𑀕𑀳𑁄, 𑀉𑀪𑀬𑀧𑁆𑀧𑀪𑁂𑀤 𑀲𑀗𑁆𑀕𑀳𑁄𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀓𑀬𑁄𑀧𑀪𑁂𑀤 𑀲𑀗𑁆𑀕𑀳𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀯𑀻𑀣𑀺𑀫𑀼𑀢𑁆𑀢 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀲𑀗𑁆𑀕𑀳𑁄𑀢𑀺 𑀢𑁂 𑀲𑀜𑁆𑀜𑁂𑀯 𑀤𑁆𑀯𑁂 𑀧𑀯𑀢𑁆𑀢𑀺𑀲𑀗𑁆𑀕𑀳𑁂 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑀺𑀘𑁆𑀘𑁂𑀯𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑀸. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀜𑁆𑀜𑀲𑁆𑀲 𑀅𑀲𑀼 𑀢𑀢𑁆𑀢𑀸𑀘𑀺𑀢𑁆𑀢𑁂 𑀇𑀘𑁆𑀘𑁂𑀯 𑀮𑀩𑁆𑀪𑀢𑀺. 𑀇𑀢𑀺 𑀘𑀺𑀢𑁆𑀢𑀜𑁆𑀘 𑀘𑀺𑀢𑁆𑀢𑁂𑀉𑀧𑁆𑀧𑀸𑀤𑀸𑀘𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀇𑀘𑁆𑀘𑁂𑀯𑀦𑁆𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀗𑁆𑀕𑀳𑀫𑀼𑀢𑁆𑀢𑀭𑀦𑁆𑀢𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁄 𑀬𑀁. 𑀉𑀢𑁆𑀢𑀭𑁂 𑀉𑀢𑁆𑀢𑀫𑁂 𑀢𑀬𑁄 𑀧𑀪𑁂𑀤𑀲𑀗𑁆𑀕𑀳𑁂 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀽𑀫𑀺𑀧𑀼𑀕𑁆𑀕𑀮𑀪𑁂𑀤𑁂𑀦𑀸𑀢𑀺 𑀲𑀳𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀓𑀸𑀫𑀸𑀯𑀘𑀭𑀸𑀤𑀺𑀪𑀽𑀫𑀺𑀪𑁂𑀤𑁂𑀦 𑀤𑀼𑀳𑁂𑀢𑀼𑀓𑀸𑀤𑀺 𑀧𑀼𑀕𑁆𑀕𑀮𑀪𑁂𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀸𑀧𑀭𑀦𑀺𑀬𑀸𑀫𑀺𑀢𑀦𑁆𑀢𑀺 𑀆𑀯𑀚𑁆𑀚𑀦𑀸𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀧𑀼𑀩𑁆𑀩 𑀘𑀺𑀢𑁆𑀢𑀸𑀧𑀭𑀘𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀦𑀺𑀬𑀸𑀫𑀺𑀢𑀁 𑀯𑀯𑀢𑁆𑀣𑀺𑀢𑀁. 𑀧𑀯𑀢𑁆𑀢𑀺𑀲𑀗𑁆𑀕𑀳𑀁𑀦𑀸𑀫𑀸𑀢𑀺𑀧𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁄𑀬𑁂𑀯. 𑀏𑀯𑀁 𑀦𑀸𑀫𑀓𑁂 𑀤𑁆𑀯𑁂 𑀧𑀯𑀢𑁆𑀢𑀺𑀲𑀗𑁆𑀕𑀳𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼. 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀳𑁂𑀲. 𑀧𑀝𑀺𑀲𑀦𑁆𑀥𑀺𑀓𑀸𑀮𑁂𑀧𑀯𑀢𑁆𑀢𑀺𑀓𑀸𑀮𑁂𑀘𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀧𑀯𑀢𑁆𑀢𑀺𑀲𑀗𑁆𑀕𑀳𑀜𑁆𑀘 𑀧𑀯𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀺𑀲𑀗𑁆𑀕𑀳𑀜𑁆𑀘𑀸𑀢𑀺 𑀤𑁆𑀯𑁂 𑀲𑀗𑁆𑀕𑀳𑁂𑀧𑀯𑀢𑁆𑀢𑀺 𑀧𑀯𑀓𑁆𑀔𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀭𑀺𑀲𑀗𑁆𑀕𑀳𑁂 𑀆𑀭𑀩𑁆𑀪 𑀕𑀸𑀣𑀸𑀬 𑀧𑀸𑀓𑀝𑁄. 𑀓𑁂𑀘𑀺 𑀧𑀦 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁𑀲𑀢𑀺 𑀉𑀧𑀭𑀺 𑀲𑀗𑁆𑀕𑀳𑁄 𑀧𑀝𑀺𑀲𑀦𑁆𑀥𑀺𑀲𑀗𑁆𑀕𑀳𑁄𑀦𑀸𑀫 𑀲𑀺𑀬𑀸. 𑀦 𑀧𑀯𑀢𑁆𑀢𑀺 𑀲𑀗𑁆𑀕𑀳𑁄 𑀦𑀸𑀫. 𑀏𑀯𑀜𑁆𑀘 𑀲𑀢𑀺 𑀉𑀧𑀭𑀺 𑀯𑀻𑀣𑀺𑀫𑀼𑀢𑁆𑀢𑀲𑀗𑁆𑀕𑀳𑁂 𑀆𑀭𑀩𑁆𑀪 𑀕𑀸𑀣𑀸𑀬𑀁 𑀲𑀦𑁆𑀥𑀺𑀬𑀁 𑀧𑀯𑀢𑁆𑀢𑀺𑀲𑀗𑁆𑀕𑀳𑁄𑀦𑀸𑀫 𑀇𑀤𑀸𑀦𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺.

[𑁧𑁧𑁫] 𑀝𑀻𑀓𑀸𑀲𑀼 𑀧𑀦

‘‘𑀉𑀢𑁆𑀢𑀭𑀁 𑀯𑁂𑀤𑀦𑀸𑀲𑀗𑁆𑀕𑀳𑀸𑀤𑀺𑀯𑀺𑀪𑀸𑀕𑀢𑁄 𑀉𑀢𑁆𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀏𑀯𑀜𑁆𑀳𑀺 𑀲𑀢𑀺 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑁄𑀯 𑀇𑀥 𑀲𑀗𑁆𑀕𑀳𑀲𑀤𑁆𑀤𑁂𑀦 𑀕𑀳𑀺𑀢𑁄 𑀲𑀺𑀬𑀸𑀢𑀺. 𑀬𑀲𑁆𑀫𑀸𑀧𑀦 𑀢𑀺𑀡𑁆𑀡𑀁 𑀤𑁆𑀯𑀺𑀦𑁆𑀦𑀜𑁆𑀘 𑀧𑀪𑁂𑀤𑀲𑀗𑁆𑀕𑀳𑀸𑀦𑀁 𑀫𑀚𑁆𑀛𑁂 𑀞𑀢𑁆𑀯𑀸 𑀅𑀬𑀁 𑀅𑀦𑀼𑀲𑀦𑁆𑀥𑀺𑀕𑀸𑀣𑀸 𑀧𑀯𑀢𑁆𑀢𑀸. 𑀢𑀲𑁆𑀫𑀸 𑀧𑀼𑀩𑁆𑀩𑁂 𑀢𑀬𑁄𑀧𑀺 𑀧𑀪𑁂𑀤𑀲𑀗𑁆𑀕𑀳𑀸 𑀇𑀥 𑀲𑀗𑁆𑀕𑀳𑀲𑀤𑁆𑀤𑁂𑀦 𑀕𑀳𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀬𑀁 𑀧𑀦 𑀧𑀯𑀢𑁆𑀢𑀺𑀲𑀗𑁆𑀕𑀳𑁄 𑀯𑀢𑁆𑀣𑀼𑀤𑁆𑀯𑀸𑀭𑀸𑀮𑀫𑁆𑀩𑀡𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑁄 𑀲𑀼𑀯𑀼𑀢𑁆𑀢𑁄𑀢𑀺 𑀢𑀸𑀦𑀺 𑀢𑀻𑀡𑀺 𑀙𑀓𑁆𑀓𑀸𑀦𑀺𑀧𑀺 𑀧𑀼𑀦 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀦𑀺.

[𑁧𑁧𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀢𑁆𑀣𑀼𑀤𑁆𑀯𑀸𑀭𑀸𑀮𑀫𑁆𑀩𑀡 𑀲𑀗𑁆𑀕𑀳𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀧𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀦𑀺𑀓𑁆𑀔𑀺𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀲𑀓𑀮𑀸 𑀯𑀢𑁆𑀣𑀼𑀤𑁆𑀯𑀸𑀭𑀸𑀮𑀫𑁆𑀩𑀡𑀲𑀗𑁆𑀕𑀳𑀸 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀢𑀺. 𑀯𑀺𑀲𑀬𑀸𑀦𑀁 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑀺𑀲𑀬𑀧𑀯𑀢𑁆𑀢𑀺. 𑀏𑀢𑁆𑀣𑀘 𑀧𑀯𑀢𑁆𑀢𑀻𑀢𑀺 𑀆𑀧𑀸𑀢𑀸𑀕𑀫𑀦𑀫𑁂𑀯 𑀯𑀼𑀘𑁆𑀘𑀢𑀺. 𑀯𑀓𑁆𑀔𑀢𑀺 𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸 𑀢𑀻𑀢𑀸𑀦𑀺𑀯𑀸𑀢𑀺𑀆𑀤𑀺𑀁. 𑀲𑀸 𑀧𑀦 𑀓𑀸𑀘𑀺 𑀲𑀻𑀖𑀢𑀫𑀸, 𑀓𑀸𑀘𑀺 𑀲𑀻𑀖𑀢𑀭𑀸, 𑀲𑀻𑀖𑀸, 𑀤𑀦𑁆𑀥𑀸, 𑀤𑀦𑁆𑀥𑀢𑀭𑀸, 𑀤𑀦𑁆𑀥𑀢𑀫𑀸𑀢𑀺 𑀙𑀥𑀸 𑀳𑁄𑀢𑀻𑀢𑀺. 𑀓𑀫𑁆𑀫𑀸𑀤𑀻𑀦𑀁 𑀯𑀺𑀲𑀬𑀸𑀦𑀁 𑀤𑁆𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀆𑀧𑀸𑀢𑀸𑀕𑀫𑀦𑀁 𑀯𑀺𑀲𑀬𑀧𑁆𑀧𑀯𑀢𑁆𑀢𑀺. 𑀯𑀓𑁆𑀔𑀢𑀺 𑀳𑀺 𑀓𑀫𑁆𑀫𑀁𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀁𑀯𑀸 𑀕𑀢𑀺𑀦𑀺𑀫𑀺𑀢𑁆𑀢𑀁𑀯𑀸 𑀓𑀫𑁆𑀫𑀩𑀮𑁂𑀦 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀢𑀻𑀢𑀺.

[𑁧𑁧𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀺𑀲𑀬𑁂𑀲𑀼𑀘 𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀻’’𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀏𑀯𑀜𑁆𑀳𑀺 𑀲𑀢𑀺 𑀅𑀢𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀦𑀸𑀫 𑀅𑀦𑀼𑀧𑀧𑀦𑁆𑀦𑀸 𑀆𑀧𑀚𑁆𑀚𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀓𑁆𑀓𑁂𑀲𑀼. 𑀥𑀸𑀢𑀼𑀪𑁂𑀤𑀁 𑀧𑀢𑁆𑀯𑀸𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀫𑀸𑀡𑀦𑁆𑀢𑀺 𑀫𑀦𑀦𑀁 𑀯𑀺𑀚𑀸𑀦𑀦𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀫𑀦𑁄𑀥𑀸𑀢𑀼 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀯𑀺𑀜𑁆𑀜𑀸𑀡𑀪𑁂𑀤𑀁 𑀧𑀢𑁆𑀯𑀸 𑀧𑀦 𑀬𑀁𑀓𑀺𑀜𑁆𑀘𑀺 𑀫𑀦𑀦𑀁 𑀯𑀺𑀚𑀸𑀦𑀦𑁂 𑀅𑀦𑁆𑀢𑁄 𑀕𑀥𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁.𑀮. 𑀙𑀯𑀺𑀜𑁆𑀜𑀸𑀡𑀸𑀦𑀻𑀢𑀺 𑀙𑀯𑀻𑀣𑀺𑀬𑁄 𑀧𑀦 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀘𑀺𑀢𑁆𑀢𑀧𑀯𑀢𑁆𑀢𑀺𑀬𑁄 𑀬𑁄𑀚𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀯𑀻𑀣𑀺 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀺. 𑀘𑀓𑁆𑀔𑀼𑀤𑁆𑀯𑀸𑀭𑀯𑀺𑀓𑀸𑀭𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑁄 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼. 𑀅𑀲𑀸𑀥𑀸𑀭𑀡𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀉𑀧𑀮𑀓𑁆𑀔𑀺𑀢𑀸 𑀯𑀻𑀣𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺. 𑀲𑀼𑀤𑁆𑀥𑁄 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀧𑀩𑀦𑁆𑀥𑁄 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀩𑀦𑁆𑀥𑀺𑀦𑀻 𑀯𑀻𑀣𑀺 𑀢𑁂𑀦 𑀲𑀳 𑀏𑀓𑀸𑀭𑀫𑁆𑀫𑀡 𑀏𑀓 𑀤𑁆𑀯𑀸𑀭𑀺𑀓𑀢𑀸𑀬 𑀲𑀳 𑀘𑀭𑀡𑀪𑀸𑀯𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡 𑀯𑀻𑀣𑀻’’𑀢𑀺 𑀯𑀼𑀢𑁆𑀢𑀁.

𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸𑀢𑀺 𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸. 𑀢𑀁 𑀢𑀁 𑀤𑁆𑀯𑀸𑀭𑀯𑀺𑀓𑀸𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑁄𑀢𑀺 𑀘𑀺𑀢𑁆𑀢𑀧𑀩𑀦𑁆𑀥𑀸. 𑀅𑀢𑀺𑀫𑀳𑀦𑁆𑀢𑀦𑁆𑀢𑀺 𑀲𑀸𑀫𑀺 𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀢𑀺𑀫𑀳𑀦𑁆𑀢𑀲𑁆𑀲 𑀧𑀜𑁆𑀘𑀸𑀮𑀫𑁆𑀩𑀡𑀲𑁆𑀲 𑀧𑀯𑀢𑁆𑀢𑀺.𑀮. 𑀅𑀢𑀺𑀧𑀭𑀺𑀢𑁆𑀢𑀲𑁆𑀲 𑀧𑀜𑁆𑀘𑀸𑀮𑀫𑁆𑀩𑀡𑀲𑁆𑀲 𑀧𑀯𑀢𑁆𑀢𑀺𑀘𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀘𑀢𑀼𑀥𑀸. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀯𑀺𑀪𑀽𑀢𑀲𑁆𑀲 𑀙𑀴𑀸𑀭𑀫𑁆𑀫𑀡𑀲𑁆𑀲 𑀧𑀯𑀢𑁆𑀢𑀺 𑀅𑀯𑀺𑀪𑀽𑀢𑀲𑁆𑀲 𑀙𑀴𑀸𑀭𑀫𑁆𑀫𑀡𑀲𑁆𑀲 𑀧𑀯𑀢𑁆𑀢𑀺𑀘𑀸𑀢𑀺 𑀤𑁆𑀯𑀺𑀥𑀸𑀢𑀺 𑀙𑀥𑀸𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀅𑀢𑀺𑀫𑀳𑀦𑁆𑀢𑀸𑀤𑀺𑀪𑀸𑀯𑁄 𑀘𑁂𑀢𑁆𑀣 𑀆𑀮𑁄𑀓𑀸𑀤𑀺 𑀧𑀘𑁆𑀘𑀬 𑀯𑀲𑁂𑀦𑀯𑀸 𑀯𑀢𑁆𑀣𑀼 𑀅𑀢𑀺𑀫𑀳𑀦𑁆𑀢𑀸𑀤𑀺𑀯𑀲𑁂𑀦𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀡𑁆𑀳𑀲𑀼𑀔𑀼𑀫𑀁𑀧𑀺 𑀤𑀽𑀭𑀁𑀧𑀺 𑀭𑀽𑀧𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀯𑀢𑁆𑀣𑀼𑀦𑀸𑀫 𑀆𑀮𑁄𑀓𑀸𑀤𑀺 𑀧𑀘𑁆𑀘𑀬 𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀅𑀢𑀺𑀫𑀳𑀦𑁆𑀢𑀫𑁂𑀯. 𑀢𑀣𑀸 𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀣𑀫𑀸𑀢𑀺 𑀦𑀻𑀳𑀸𑀭𑀓𑀸𑀮𑀸𑀤𑀻𑀲𑀼 𑀮𑁄𑀓 𑀯𑀺𑀯𑀭𑀡 𑀧𑀸𑀝𑀺𑀳𑀸𑀭𑀺𑀬𑀧𑀯𑀢𑁆𑀢𑀺 𑀓𑀸𑀮𑁂 𑀅𑀯𑀻𑀘𑀺𑀦𑀺𑀭𑀬𑁂𑀧𑀺 𑀅𑀓𑀦𑀺𑀝𑁆𑀞𑁂𑀧𑀺 𑀧𑀭𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀲𑀡𑁆𑀳𑀲𑀼𑀔𑀼𑀫𑀸𑀦𑀺𑀘 𑀤𑀽𑀭𑀸𑀦𑀺𑀘 𑀭𑀽𑀧𑀸𑀦𑀺 𑀇𑀥 𑀞𑀺𑀢𑀸𑀯 𑀧𑀲𑁆𑀲𑀦𑁆𑀢𑀺. 𑀢𑀤𑀸 𑀳𑀺 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀲𑁆𑀲 𑀯𑀲𑁂𑀦 𑀲𑀩𑁆𑀩𑁂𑀧𑀺 𑀧𑀣𑀯𑀺𑀲𑀺𑀦𑁂𑀭𑀼 𑀘𑀓𑁆𑀓𑀯𑀸𑀴 𑀲𑀺𑀮𑀼𑀘𑁆𑀘𑀬𑀸𑀤𑀬𑁄 𑀚𑀸𑀢𑀺𑀨𑀮𑀺𑀓𑀓𑁆𑀔𑀦𑁆𑀥𑀸 𑀯𑀺𑀬 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀫𑀳𑀦𑁆𑀢𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑀫𑁆𑀫𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀉𑀧𑀧𑀢𑁆𑀢𑀺𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀦𑀁 𑀧𑀦 𑀧𑀲𑀸𑀤𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀑𑀪𑀸𑀲𑀚𑀸𑀢𑀢𑀸𑀬𑀧𑀺 𑀧𑀣𑀯𑀺𑀧𑀩𑁆𑀩𑀢𑀸𑀤𑀬𑁄 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀅𑀦𑁆𑀢𑀭𑀁 𑀓𑀸𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀣𑀸 𑀤𑀽𑀭𑁂𑀧𑀺 𑀧𑀩𑁆𑀩𑀢𑀸𑀤𑀺𑀭𑀽𑀧𑀸𑀦𑀺 𑀯𑀢𑁆𑀣𑀼 𑀅𑀢𑀺𑀫𑀳𑀦𑁆𑀢𑀢𑀸𑀬 𑀘𑀦𑁆𑀤𑀲𑀽𑀭𑀺𑀬 𑀢𑀸𑀭𑀓𑀸𑀤𑀺 𑀭𑀽𑀧𑀸𑀦𑀺 𑀯𑀺𑀲𑀬 𑀯𑀢𑁆𑀣𑀼 𑀫𑀳𑀦𑁆𑀢𑀢𑀸𑀬 𑀑𑀪𑀸𑀲 𑀚𑀸𑀢𑀢𑀸𑀬 𑀘 𑀅𑀢𑀺 𑀫𑀳𑀦𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀆𑀮𑁄𑀓𑀸𑀤𑀺𑀧𑀘𑁆𑀘𑀬𑀸𑀦𑀁 𑀧𑀦 𑀅𑀥𑀺𑀝𑁆𑀞𑀸𑀦𑀯𑀢𑁆𑀣𑀽𑀦𑀜𑁆𑀘 𑀤𑀼𑀩𑁆𑀩𑀮 𑀤𑀼𑀩𑁆𑀩𑀮𑀢𑀭 𑀤𑀼𑀩𑁆𑀩𑀮𑀢𑀫𑀸𑀦𑀼𑀓𑁆𑀓𑀫𑁂𑀦 𑀫𑀳𑀦𑁆𑀢𑀸𑀤𑀺𑀪𑀸𑀯𑁄 𑀯𑀢𑁆𑀢𑀩𑁆𑀩𑁄𑀢𑀺. 𑀬𑀸𑀦𑀺 𑀧𑀦 𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑁆𑀫 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑀸𑀦𑀺𑀦𑀸𑀫. 𑀬𑀸𑀦𑀺 𑀤𑁆𑀯𑀢𑁆𑀢𑀺𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀺𑀓𑁆𑀓𑀫𑁆𑀫, 𑀢𑀸𑀦𑀺 𑀫𑀳𑀦𑁆𑀢𑀸𑀭𑀫𑁆𑀫𑀡𑀸𑀦𑀺. 𑀬𑀸𑀦𑀺 𑀘𑀢𑀼 𑀧𑀜𑁆𑀘 𑀙 𑀲𑀢𑁆𑀢 𑀅𑀝𑁆𑀞 𑀦𑀯 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀺𑀓𑁆𑀓𑀫𑁆𑀫, 𑀢𑀸𑀦𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺. 𑀬𑀸𑀦𑀺𑀧𑀦 𑀤𑀲𑁂𑀓𑀸𑀤𑀲𑀤𑁆𑀯𑀸𑀤𑀲 𑀢𑁂𑀭𑀲 𑀘𑀼𑀤𑁆𑀤𑀲 𑀧𑀦𑁆𑀦𑀭𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀸𑀦𑀺 𑀅𑀢𑀺𑀧𑀭𑀺𑀢𑁆𑀢𑀸 𑀭𑀫𑁆𑀫𑀡𑀸𑀦𑀻𑀢𑀺. 𑀧𑀓𑁆𑀔𑀢𑀺𑀘 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺𑀯𑀸𑀢𑀺𑀆𑀤𑀺. 𑀯𑀺𑀪𑀽𑀢𑀲𑁆𑀲𑀸𑀢𑀺 𑀧𑀸𑀓𑀝𑀲𑁆𑀲, 𑀅𑀯𑀺𑀪𑀽𑀢𑀲𑁆𑀲𑀸𑀢𑀺 𑀅𑀧𑀸𑀓𑀝𑀲𑁆𑀲. 𑀏𑀯𑀁 𑀙𑀙𑀓𑁆𑀓𑀸𑀦𑀺 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀏𑀓𑀢𑁄 𑀬𑁄𑀚𑁂𑀢𑁆𑀯𑀸 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀓𑀣𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀸𑀦𑀁 𑀢𑀸𑀯 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀼𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀻𑀢𑀺𑀆𑀤𑀺 𑀫𑀸𑀳. 𑀢𑀢𑁆𑀣 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄.

[𑁧𑁧𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀅𑀢𑀺𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀯𑀺𑀲𑀬 𑀯𑀯𑀢𑁆𑀣𑀸𑀦𑀁 𑀳𑁄𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦 𑀢𑀁 𑀧𑀓𑀸𑀲𑁂𑀢𑀼𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀻𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺.

𑀏𑀯𑀜𑁆𑀳𑀺 𑀲𑀢𑀺𑀆𑀤𑀺𑀢𑁄 𑀧𑀜𑁆𑀘𑀦𑁆𑀦𑀁 𑀙𑀓𑁆𑀓𑀸𑀦𑀁 𑀑𑀓𑀸𑀲𑁄𑀦𑀸𑀫 𑀦𑀲𑀺𑀬𑀸. 𑀦𑀘 𑀉𑀧𑁆𑀧𑀸𑀤𑀝𑁆𑀞𑀺𑀢𑀺.𑀮. 𑀭𑀽𑀧𑀥𑀫𑁆𑀫𑀸𑀦𑀫𑀸𑀬𑀽𑀢𑀺 𑀇𑀤𑀁 𑀯𑀺𑀲𑀬 𑀯𑀯𑀢𑁆𑀣𑀸𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀸𑀤𑁄. 𑀲𑀪𑀸𑀯 𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀣𑁄. 𑀞𑀸𑀦𑀁 𑀞𑀺𑀢𑀺. 𑀬𑀣𑀸𑀮𑀤𑁆𑀥𑀲𑀪𑀸𑀯𑀲𑁆𑀲 𑀅𑀦𑀺𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀜𑁆𑀚𑀦𑀁 𑀪𑀗𑁆𑀕𑁄. 𑀢𑀲𑁆𑀲 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀘𑀺𑀢𑁆𑀢𑀓𑁆𑀔𑀡𑀁𑀦𑀸𑀫𑀸𑀢𑀺 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀔𑀡𑁄𑀦𑀸𑀫. 𑀲𑁄 𑀧𑀦 𑀔𑀡𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀓𑁆𑀔𑀡𑀲𑁆𑀲 𑀅𑀓𑁆𑀔𑀺𑀦𑀺𑀫𑁆𑀫𑀺𑀮𑀦𑀓𑁆𑀔𑀡𑀲𑁆𑀲𑀘 𑀅𑀦𑁂𑀓𑀓𑁄𑀝𑀺 𑀲𑀢𑀲𑀳𑀲𑁆𑀲𑀪𑀸𑀕𑁄 𑀤𑀝𑁆𑀞𑀩𑁆𑀩𑁄. 𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀓𑁆𑀔𑀡𑁂 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑀫𑀢𑁂𑀦 𑀧𑀦𑁂𑀢𑁆𑀣 𑀉𑀧𑁆𑀧𑀸𑀤𑀪𑀗𑁆𑀕 𑀯𑀲𑁂𑀦𑀔𑀡𑀤𑁆𑀯𑀬𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀁𑀦𑀸𑀫𑀸𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀮𑁄𑀓𑁂 𑀯𑀺𑀚𑁆𑀚𑀼𑀦𑀸𑀫 𑀯𑀤𑁆𑀥𑀦𑀸𑀦𑀦𑁆𑀢𑀭𑀫𑁂𑀯 𑀪𑀺𑀚𑁆𑀚𑀢𑀺. 𑀦 𑀧𑀦𑀲𑁆𑀲𑀸 𑀯𑀤𑁆𑀥𑀦𑀲𑁆𑀲 𑀪𑀺𑀚𑁆𑀚𑀦𑀲𑁆𑀲𑀘 𑀅𑀦𑁆𑀢𑀭𑀸 𑀞𑀺𑀢𑀺𑀦𑀸𑀫 𑀯𑀺𑀲𑀼𑀁 𑀧𑀜𑁆𑀜𑀸𑀬𑀢𑀺. 𑀬𑀣𑀸 𑀘 𑀉𑀤𑁆𑀥𑀁 𑀉𑀚𑀼𑀁 𑀔𑀺𑀢𑁆𑀢𑀁 𑀮𑁂𑀟𑁆𑀟𑀼 𑀉𑀧𑁆𑀧𑀢𑀺𑀢𑁆𑀯𑀸 𑀧𑀢𑀢𑀺. 𑀦 𑀧𑀦 𑀉𑀧𑁆𑀧𑀢𑀦𑀲𑁆𑀲 𑀧𑀢𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀞𑀺𑀢𑀺𑀦𑀸𑀫 𑀯𑀺𑀲𑀼𑀁 𑀤𑀺𑀲𑁆𑀲𑀢𑀺. 𑀢𑀣𑀸 𑀘𑀺𑀢𑁆𑀢𑀁𑀧𑀺. 𑀢𑀁𑀧𑀺 𑀳𑀺 𑀉𑀤𑀬 𑀪𑀸𑀕𑀸𑀦𑀦𑁆𑀢𑀭𑀫𑁂𑀯 𑀯𑀬𑀪𑀸𑀕𑁂 𑀧𑀢𑀢𑀺. 𑀦 𑀧𑀦𑀲𑁆𑀲 𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀸𑀕𑀸𑀦𑀁 𑀫𑀚𑁆𑀛𑁂 𑀯𑀺𑀲𑀼𑀁 𑀏𑀓𑁄 𑀕𑀡𑀦𑀽𑀧𑀕𑁄 𑀞𑀺𑀢𑀺𑀪𑀸𑀕𑁄𑀦𑀸𑀫 𑀉𑀧𑀮𑀩𑁆𑀪𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀬𑀫𑀓𑁂𑀲𑀼 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀪𑀗𑁆𑀕𑀸𑀯 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀢𑁄 𑀧𑀦 𑀘𑀺𑀢𑁆𑀢𑀬𑀫𑀓𑁂 𑀉𑀧𑁆𑀧𑀦𑁆𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀦𑁆𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁. 𑀦𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀜𑁆𑀘𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘𑀸𑀢𑀺𑀆𑀤𑀺𑀦𑀸 𑀪𑀗𑁆𑀕𑀼𑀧𑁆𑀧𑀸𑀤𑀸𑀯 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀸. 𑀓𑀣𑀸𑀯𑀢𑁆𑀣𑀼𑀫𑁆𑀳𑀺𑀘 𑀏𑀓𑀁 𑀘𑀺𑀢𑁆𑀢𑀁 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻𑀢𑀺 𑀆𑀫𑀦𑁆𑀢𑀸. 𑀉𑀧𑀤𑁆𑀥𑀤𑀺𑀯𑀲𑁄 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀉𑀧𑀤𑁆𑀥𑀤𑀺𑀯𑀲𑁄 𑀯𑀬𑀓𑁆𑀔𑀡𑁄𑀢𑀺. 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀏𑀓𑀁 𑀘𑀺𑀢𑁆𑀢𑀁 𑀤𑁆𑀯𑁂 𑀤𑀺𑀯𑀲𑁂 𑀢𑀺𑀝𑁆𑀞𑀢𑀻𑀢𑀺 𑀆𑀫𑀦𑁆𑀢𑀸. 𑀏𑀓𑁄 𑀤𑀺𑀯𑀲𑁄 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀏𑀓𑁄 𑀤𑀺𑀯𑀲𑁄 𑀯𑀬𑀓𑁆𑀔𑀡𑁄𑀢𑀺 𑀦𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀏𑀓𑀁 𑀘𑀺𑀢𑁆𑀢𑀁 𑀘𑀢𑁆𑀢𑀸𑀭𑁄 𑀤𑀺𑀯𑀲𑁂 𑀢𑀺𑀝𑁆𑀞𑀢𑀻𑀢𑀺 𑀆𑀫𑀦𑁆𑀢𑀸. 𑀤𑁆𑀯𑁂 𑀤𑀺𑀯𑀲𑀸 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀤𑁆𑀯𑁂 𑀤𑀺𑀯𑀲𑀸 𑀯𑀬𑀓𑁆𑀔𑀡𑁄𑀢𑀺 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂.𑀮. 𑀫𑀸𑀲𑀁. 𑀤𑁆𑀯𑁂 𑀫𑀸𑀲𑁂. 𑀘𑀢𑁆𑀢𑀸𑀭𑁄𑀫𑀸𑀲𑁂.𑀮. 𑀲𑀁𑀯𑀘𑁆𑀙𑀭𑀁, 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀘𑀢𑁆𑀢𑀸𑀭𑀺 𑀲𑀁𑀯𑀘𑁆𑀙𑀭𑀸𑀦𑀺.𑀮. 𑀓𑀧𑁆𑀧𑀁. 𑀤𑁆𑀯𑁂 𑀓𑀧𑁆𑀧𑁂. 𑀘𑀢𑁆𑀢𑀸𑀭𑁄 𑀓𑀧𑁆𑀧𑁂𑀢𑀺𑀆𑀤𑀺𑀦𑀸 𑀤𑁆𑀯𑁂 𑀉𑀧𑁆𑀧𑀸𑀤𑀯𑀬𑀪𑀸𑀕𑀸𑀯 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀸. 𑀦 𑀞𑀺𑀢𑀺𑀪𑀸𑀕𑁄. 𑀬𑀤𑀺 𑀲𑁄 𑀯𑀺𑀲𑀼𑀁 𑀉𑀧𑀮𑀩𑁆𑀪𑁂𑀬𑁆𑀬. 𑀏𑀓𑀁 𑀘𑀺𑀢𑁆𑀢𑀁 𑀤𑀺𑀯𑀲𑀁 𑀢𑀺𑀝𑁆𑀞𑀢𑀻𑀢𑀺 𑀆𑀫𑀦𑁆𑀢𑀸. 𑀤𑀺𑀯𑀲𑀲𑁆𑀲 𑀧𑀣𑀫𑁄 𑀪𑀸𑀕𑁄 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀤𑀼𑀢𑀻𑀬𑁄 𑀞𑀺𑀢𑀺𑀓𑁆𑀔𑀡𑁄. 𑀢𑀢𑀻𑀬𑁄 𑀯𑀬𑀓𑁆𑀔𑀡𑁄𑀢𑀺 𑀏𑀯𑀁 𑀫𑀳𑀸𑀣𑁂𑀭𑁂𑀦 𑀯𑀺𑀘𑀸𑀭𑀺𑀢𑁄 𑀲𑀺𑀬𑀸. 𑀢𑀬𑁄 𑀤𑀺𑀯𑀲𑁂 𑀢𑀬𑁄 𑀫𑀸𑀲𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀢𑀬𑁄 𑀓𑀧𑁆𑀧𑁂𑀢𑀺 𑀇𑀫𑀸𑀦𑀺𑀧𑀺 𑀅𑀯𑀚𑁆𑀚𑁂 𑀢𑀩𑁆𑀩𑀸𑀦𑀺𑀏𑀯 𑀲𑀺𑀬𑀼𑀦𑁆𑀢𑀺. 𑀏𑀢𑁆𑀣 𑀲𑀺𑀬𑀸, 𑀦𑀦𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀢𑀻𑀡𑀺 𑀫𑀸𑀦𑀺 𑀪𑀺𑀓𑁆𑀔𑀯𑁂 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢 𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺𑀢𑀻𑀡𑀺, 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸𑀬𑀢𑀺. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸𑀬𑀢𑀺. 𑀞𑀺𑀢𑀸𑀬 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀲𑀜𑁆𑀜𑀸𑀬. 𑀲𑀗𑁆𑀔𑀸𑀭𑀸𑀦𑀁. 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄.𑀮. 𑀧𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀘𑀺𑀢𑁆𑀢𑀲𑁆𑀲 𑀢𑀢𑀻𑀬𑁄 𑀞𑀺𑀢𑀺𑀪𑀸𑀕𑁄 𑀯𑀺𑀲𑀼𑀁 𑀉𑀧𑀮𑀩𑁆𑀪𑀢𑀺 𑀬𑁂𑀯𑀸𑀢𑀺.𑀦. 𑀧𑀩𑀦𑁆𑀥𑀞𑀺𑀢𑀺𑀬𑀸 𑀏𑀯 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂, 𑀉𑀧𑁆𑀧𑀸𑀤𑀯𑀬𑁂 𑀧𑀣𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀧𑀼𑀦 𑀯𑀺𑀲𑀼𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀇𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺. 𑀇𑀢𑀭𑀣𑀸 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀦𑀦𑀼 𑀧𑀩𑀦𑁆𑀥𑀞𑀺𑀢𑀺 𑀦𑀸𑀫 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀲𑀸𑀘 𑀅𑀲𑀗𑁆𑀔𑀢𑀸, 𑀲𑀼𑀢𑁆𑀢𑀦𑁆𑀢𑀸𑀦𑀺𑀘 𑀲𑀗𑁆𑀔𑀢 𑀮𑀓𑁆𑀔𑀡 𑀯𑀺𑀲𑀬𑀸𑀦𑀺. 𑀢𑀲𑁆𑀫𑀸 𑀲𑀸 𑀧𑀩𑀦𑁆𑀥𑀝𑁆𑀞𑀺𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸𑀢𑀺 𑀦𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀘𑁂. 𑀦 𑀦 𑀲𑀓𑁆𑀓𑀸. 𑀅𑀪𑀺𑀥𑀫𑁆𑀫𑁂𑀧𑀺 𑀲𑀗𑁆𑀔𑀢𑀥𑀫𑁆𑀫𑀦𑀺𑀤𑁆𑀤𑁂𑀲𑁂𑀲𑀼 𑀲𑀫𑀽𑀳 𑀲𑀡𑁆𑀞𑀸𑀦 𑀲𑀦𑁆𑀢𑀢𑀺 𑀧𑀜𑁆𑀜𑀢𑁆𑀢𑀻𑀳𑀺𑀧𑀺 𑀦𑀺𑀤𑁆𑀤𑁂𑀲𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀢𑀣𑀸 𑀳𑀺 𑀭𑀽𑀧𑀸𑀬𑀢𑀦𑀦𑀺𑀤𑁆𑀤𑁂𑀲𑀸𑀤𑀻𑀲𑀼 𑀤𑀻𑀖𑀁 𑀭𑀲𑁆𑀲𑀁 𑀲𑀡𑁆𑀳𑀁 𑀣𑀼𑀮𑀁 𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀲𑁆𑀲𑀁 𑀙𑀴𑀁𑀲𑀁 𑀅𑀝𑁆𑀞𑀁𑀲𑀁 𑀲𑁄𑀴𑀲𑀁𑀲𑀁 𑀦𑀺𑀦𑁆𑀦𑀁 𑀣𑀮𑀦𑁆𑀢𑀺𑀆𑀤𑀺𑀦𑀸, 𑀯𑀺𑀪𑀗𑁆𑀕𑁂 𑀘 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸𑀢𑀺𑀆𑀤𑀺𑀦𑀸 𑀧𑀜𑁆𑀜𑀢𑁆𑀢𑀺𑀲𑀺𑀲𑁂𑀦 𑀲𑀗𑁆𑀔𑀢𑀥𑀫𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸𑀢𑀺. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀧𑀺 𑀤𑁂𑀲𑀦𑀸 𑀲𑀗𑁆𑀔𑀢𑀥𑀫𑁆𑀫𑀫𑁂𑀯 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀢𑀲𑁆𑀫𑀸 𑀬𑀣𑀸 𑀉𑀧𑁆𑀧𑀸𑀤𑀪𑀗𑁆𑀕𑀸𑀦𑀁 𑀧𑀘𑁆𑀘𑁂𑀓𑀁 𑀏𑀓𑁂𑀓𑁄 𑀔𑀡𑁄 𑀘𑀺𑀢𑁆𑀢𑀲𑁆𑀲 𑀮𑀩𑁆𑀪𑀢𑀺. 𑀦 𑀢𑀣𑀸 𑀞𑀺𑀢𑀺𑀬𑀸𑀢𑀺. 𑀅𑀬𑀁 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂 𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀘 𑀯𑀸𑀤𑁄 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀏𑀯 𑀆𑀕𑀢𑁄. 𑀲𑁄𑀘 𑀲𑀗𑁆𑀕𑀳𑀓𑀸𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣, 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺. 𑀅𑀭𑀽𑀧𑀥𑀫𑁆𑀫𑀸𑀦𑀁 𑀚𑀭𑀸𑀔𑀡𑁄𑀦𑀸𑀫 𑀦𑀲𑀓𑁆𑀓𑀸 𑀧𑀜𑁆𑀜𑀧𑁂𑀢𑀼𑀁. 𑀲𑀫𑁆𑀫𑀸 𑀲𑀫𑁆𑀩𑀼𑀤𑁆𑀥𑁄𑀘 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸𑀬𑀢𑀺. 𑀞𑀺𑀢𑀸𑀬 𑀅𑀜𑁆𑀜𑀣𑀢𑁆𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀯𑀤𑀦𑁆𑀢𑁄 𑀅𑀭𑀽𑀧𑀥𑀫𑁆𑀫𑀸𑀦𑀁𑀧𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀧𑀜𑁆𑀜𑀧𑁂𑀢𑀺. 𑀪𑀸𑀦𑀺𑀅𑀢𑁆𑀣𑀺𑀓𑁆𑀔𑀡𑀁 𑀉𑀧𑀸𑀤𑀸𑀬 𑀮𑀩𑁆𑀪𑀦𑁆𑀢𑀻𑀢𑀺 𑀯𑀢𑁆𑀯𑀸 𑁋

𑀅𑀢𑁆𑀣𑀺𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀞𑀺𑀢𑀺𑀦𑀸𑀫 𑀧𑀯𑀼𑀘𑁆𑀘𑀢𑀺;

𑀢𑀲𑁆𑀲𑁂𑀯 𑀪𑁂𑀤𑁄 𑀫𑀭𑀡𑀁; 𑀲𑀩𑁆𑀩𑀤𑀸 𑀲𑀩𑁆𑀩𑀧𑀸𑀡𑀺𑀦𑀦𑁆𑀢𑀺.

𑀇𑀫𑀸𑀬 𑀆𑀘𑀭𑀺𑀬𑀕𑀸𑀣𑀸𑀬 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀺. 𑀅𑀣𑀯𑀸, 𑀲𑀦𑁆𑀢𑀢𑀺𑀯𑀲𑁂𑀦 𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺𑀘 𑀯𑀤𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀅𑀬𑀁 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀆𑀘𑀭𑀺𑀬𑀕𑀸𑀣𑀸𑀬 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑁂𑀢𑁆𑀯𑀸 𑀲𑀼𑀢𑁆𑀢𑀫𑁂𑀯 𑀧𑀫𑀸𑀡𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀚𑀭𑀸𑀔𑀡𑁄𑀦𑀸𑀫 𑀉𑀧𑁆𑀧𑀸𑀤𑀓𑁆𑀔𑀡𑀪𑀗𑁆𑀕𑀓𑁆𑀔𑀡𑀸𑀦𑀁 𑀫𑀚𑁆𑀛𑁂 𑀯𑀺𑀲𑀼𑀁 𑀚𑀭𑀸𑀬 𑀔𑁂𑀢𑁆𑀢𑀪𑀽𑀢𑁄 𑀞𑀻𑀢𑀺𑀓𑁆𑀔𑀡𑁄 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀚𑀭𑀸𑀏𑀯. 𑀅𑀢𑁆𑀣𑀺𑀓𑁆𑀔𑀡𑀦𑁆𑀢𑀺 𑀔𑀡𑀤𑁆𑀯𑀬𑀫𑁂𑀯. 𑀧𑀝𑀺𑀓𑁆𑀔𑀺𑀢𑁆𑀢𑁄𑀧𑀺 𑀧𑀦 𑀅𑀬𑀁 𑀯𑀸𑀤𑁄 𑀓𑀣𑀸𑀯𑀢𑁆𑀣𑀼 𑀧𑀸𑀴𑀺𑀬𑀸 𑀲𑀤𑁆𑀥𑀺𑀁 𑀲𑀼𑀝𑁆𑀞𑀼 𑀲𑀫𑁂𑀢𑀺𑀬𑁂𑀯. 𑀅𑀧𑀺𑀘, 𑀉𑀤𑁆𑀥𑀁 𑀉𑀧𑁆𑀧𑀢𑀺𑀢𑀲𑁆𑀲 𑀮𑁂𑀝𑁆𑀝𑀼𑀲𑁆𑀲 𑀉𑀧𑁆𑀧𑀢𑀦𑀦𑀺𑀯𑀢𑁆𑀢𑀺 𑀯𑀺𑀬 𑀬𑀸 𑀘𑀺𑀢𑁆𑀢𑀲𑁆𑀲 𑀉𑀤𑀬𑀲𑀗𑁆𑀔𑀸𑀢𑀲𑁆𑀲 𑀯𑀟𑁆𑀠𑀦𑀲𑁆𑀲 𑀦𑀺𑀯𑀢𑁆𑀢𑀺𑀦𑀸𑀫 𑀅𑀢𑁆𑀣𑀺. 𑀦 𑀳𑀺 𑀉𑀤𑀬𑁂 𑀅𑀦𑀺𑀯𑀢𑁆𑀢𑀦𑁆𑀢𑁂 𑀯𑀬𑁄𑀦𑀸𑀫 𑀲𑀫𑁆𑀪𑀯𑀢𑀺𑀢𑀻. 𑀲𑀸 𑀏𑀯 𑀉𑀤𑀬 𑀧𑀭𑀺𑀬𑀦𑁆𑀢𑀫𑀢𑁆𑀢𑀪𑀽𑀢𑀸 𑀇𑀥 𑀞𑀺𑀢𑀺𑀧𑀭𑀺𑀬𑀸𑀬𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑁄 𑀧𑀦 𑀯𑀺𑀲𑀼𑀁 𑀕𑀡𑀦𑀽𑀧𑀕𑁄 𑀏𑀓𑁄 𑀔𑀡𑁄𑀦𑀸𑀫 𑀦𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑁂 𑀤𑁆𑀯𑁂𑀏𑀯 𑀔𑀡𑀸 𑀘𑀺𑀢𑁆𑀢𑀲𑁆𑀲 𑀯𑀼𑀢𑁆𑀢𑀸. 𑀉𑀤𑀬𑀪𑀸𑀕𑀲𑁆𑀲 𑀧𑀦 𑀆𑀤𑀺 𑀓𑁄𑀝𑀺𑀁 𑀯𑀬𑀪𑀸𑀕𑀲𑁆𑀲𑀅𑀦𑁆𑀢𑀓𑁄𑀝𑀺𑀜𑁆𑀘 𑀣𑀧𑁂𑀢𑁆𑀯𑀸 𑀫𑀚𑁆𑀛𑁂𑀪𑀸𑀕𑀤𑁆𑀯𑀬𑀦𑀺𑀲𑁆𑀲𑀺𑀢𑀸 𑀧𑀭𑀺𑀧𑀘𑁆𑀘𑀦 𑀮𑀓𑁆𑀔𑀡𑀸 𑀚𑀭𑀸𑀦𑀸𑀫 𑀅𑀭𑀽𑀧𑀥𑀫𑁆𑀫𑀸𑀦𑀁𑀧𑀺 𑀮𑀩𑁆𑀪𑀢𑀺𑀬𑁂𑀯. 𑀢𑀁 𑀲𑀦𑁆𑀥𑀸𑀬 𑀥𑀸𑀢𑀼𑀓𑀣𑀸𑀬𑀁 𑀚𑀭𑀸𑀤𑁆𑀯𑀻𑀳𑀺𑀔𑀦𑁆𑀥𑁂𑀳𑀺𑀲𑀗𑁆𑀕𑀳𑀺𑀢𑀸𑀢𑀺𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

[𑁧𑁧𑁯] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀉𑀧𑁆𑀧𑀸𑀤𑀪𑀗𑁆𑀕𑀸𑀯𑀢𑁆𑀣𑀸𑀳𑀺 𑀪𑀺𑀦𑁆𑀦𑀸 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀲𑀸 𑀞𑀺𑀢𑀺𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀸 𑀲𑀳 𑀦 𑀲𑀫𑁂𑀢𑀺.

𑀉𑀧𑀤𑁆𑀥𑀤𑀺𑀯𑀲𑁄 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀉𑀧𑀤𑁆𑀥𑀤𑀺𑀯𑀲𑁄 𑀯𑀬𑀓𑁆𑀔𑀡𑁄. 𑀧𑀣𑀫𑁄 𑀤𑀺𑀯𑀲𑁄 𑀉𑀧𑁆𑀧𑀸𑀤𑀓𑁆𑀔𑀡𑁄. 𑀤𑀼𑀢𑀻𑀬𑁄 𑀯𑀬𑀓𑁆𑀔𑀡𑁄𑀢𑀺 𑀳𑀺 𑀯𑀺𑀘𑀸𑀭𑁂𑀦𑁆𑀢𑁂𑀦 𑀉𑀧𑁆𑀧𑀸𑀤𑀪𑀗𑁆𑀕𑀸𑀯𑀢𑁆𑀣𑀸 𑀳𑀺 𑀪𑀺𑀦𑁆𑀦𑀸 𑀢𑀢𑀻𑀬𑀸 𑀅𑀯𑀢𑁆𑀣𑀸 𑀢𑀲𑁆𑀲𑀁 𑀧𑀸𑀴𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀸𑀬𑁂𑀯 𑀳𑁄𑀢𑀻𑀢𑀺.

[𑁧𑁨𑁦] 𑀏𑀢𑁂𑀦 𑀬𑀜𑁆𑀘 𑀢𑀢𑁆𑀣

‘‘𑀧𑀸𑀴𑀺𑀬𑀁 𑀧𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸 𑀦𑀼𑀭𑁄𑀫𑀢𑁄 𑀦𑀬𑀤𑀲𑁆𑀲𑀦𑀯𑀲𑁂𑀦 𑀲𑀸 𑀦 𑀯𑀼𑀢𑁆𑀢𑀸. 𑀅𑀢𑀺𑀥𑀫𑁆𑀫𑀤𑁂𑀲𑀦𑀸𑀧𑀺 𑀳𑀺 𑀓𑀤𑀸𑀘𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀢𑀺. 𑀬𑀣𑀸, 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀉𑀧𑀘𑀬𑁄 𑀲𑀦𑁆𑀢𑀢𑀻𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀸𑀕𑀸𑀭𑀳𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀯𑀺𑀪𑀸𑀕𑀓𑀭𑀡𑀁𑀦𑀸𑀫 𑀯𑁂𑀦𑁂𑀬𑁆𑀬𑀯𑀲𑁂𑀦𑀸𑀢𑀺𑀧𑀺 𑀥𑀫𑁆𑀫𑀯𑀲𑁂𑀦𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀯𑀺𑀚𑁆𑀚𑀫𑀸𑀦𑁂 𑀲𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀺𑀥𑀫𑁆𑀫𑁂 𑀅𑀯𑀘𑀦𑀁 𑀧𑀦 𑀯𑁂𑀦𑁂𑀬𑁆𑀬𑀯𑀲𑁂𑀦𑀸𑀢𑀺 𑀦 𑀬𑀼𑀢𑁆𑀢𑀫𑁂𑀢𑀦𑁆𑀢𑀺.

[𑁧𑁨𑁧] 𑀬𑀫𑁆𑀧𑀺 𑀢𑀢𑁆𑀣

‘‘𑀲𑀼𑀢𑁆𑀢𑁂𑀘 𑀢𑀻𑀡𑀺 𑀫𑀸𑀦𑀺 𑀪𑀺𑀓𑁆𑀔𑀯𑁂 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺. 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸 𑀬𑀢𑀺. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀲𑁆𑀲𑁂𑀯 𑀮𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀸𑀤𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀦𑀲𑀓𑁆𑀓𑀸 𑀧𑀩𑀦𑁆𑀥𑀲𑁆𑀲 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀲𑁆𑀲 𑀅𑀲𑀗𑁆𑀔𑀢𑀲𑁆𑀲 𑀞𑀺𑀢𑀺 𑀢𑀢𑁆𑀣 𑀯𑀼𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀕𑀳𑁂𑀢𑀩𑁆𑀩𑀁.

𑀅𑀪𑀺𑀥𑀫𑁆𑀫𑁂𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀲𑀻𑀲𑁂𑀦 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀦𑀺𑀤𑁆𑀤𑁂𑀲𑀲𑁆𑀲 𑀤𑀺𑀝𑁆𑀞𑀢𑁆𑀢𑀸𑀢𑀺.

[𑁧𑁨𑁨] 𑀬𑀫𑁆𑀧𑀺 𑀢𑀢𑁆𑀣

‘‘𑀉𑀧𑀲𑀕𑁆𑀕𑀲𑁆𑀲𑀘 𑀥𑀸𑀢𑁆𑀯𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀦𑀢𑁄 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑀲𑁆𑀲 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀬𑀼𑀢𑁆𑀢𑀁.

𑀬𑀣𑀸𑀦𑀼𑀮𑁄𑀫𑀲𑀸𑀲𑀦𑀜𑁆𑀳𑀺 𑀲𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀦𑀁 𑀲𑀼𑀝𑁆𑀞𑀼 𑀧𑀜𑁆𑀜𑀸𑀬𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀅𑀭𑀽𑀧𑀁 𑀅𑀭𑀽𑀧𑀺𑀲𑀪𑀸𑀯𑀢𑁆𑀢𑀸 𑀮𑀳𑀼𑀧𑀭𑀺𑀡𑀸𑀫𑀁. 𑀭𑀽𑀧𑀁 𑀧𑀦 𑀭𑀽𑀧𑀺𑀥𑀫𑁆𑀫𑀢𑁆𑀢𑀸𑀬𑁂𑀯 𑀤𑀦𑁆𑀥𑀧𑀭𑀺𑀡𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀢𑀸𑀦𑀺𑀧𑀦.𑀮. 𑀭𑀽𑀧𑀥𑀫𑁆𑀫𑀸𑀦 𑀫𑀸𑀬𑀽𑀢𑀺.

[𑁧𑁨𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀕𑀸𑀳𑀓𑀕𑀳𑁂𑀢𑀩𑁆𑀩 𑀪𑀸𑀯𑀲𑁆𑀲 𑀢𑀁𑀢𑀁 𑀔𑀡𑀯𑀲𑁂𑀦 𑀦𑀺𑀧𑁆𑀧𑀚𑁆𑀚𑀦𑀢𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅𑀓𑀸𑀭𑀡𑀁.

𑀦 𑀳𑀺 𑀕𑀸𑀳𑀓𑀁 𑀅𑀭𑀽𑀧𑀁 𑀕𑀳𑁂𑀢𑀩𑁆𑀩𑀜𑁆𑀘 𑀭𑀽𑀧𑀁 𑀕𑀳𑀡𑀲𑀫𑁆𑀧𑀚𑁆𑀚𑀦𑀢𑁆𑀣𑀁 𑀮𑀳𑀼𑀁 𑀧𑀭𑀺𑀡𑀫𑀢𑀺 𑀕𑀭𑀼𑀁 𑀧𑀭𑀺𑀡𑀧𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀸𑀦𑀺 𑀢𑀸𑀤𑀺𑀲𑀸𑀦𑀺 𑀲𑀢𑁆𑀢𑀭𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀔𑀡𑀸𑀦𑀺 𑀲𑀢𑁆𑀢𑀭𑀲𑀯𑀸 𑀢𑀸𑀦𑀺 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀭𑀽𑀧 𑀥𑀫𑁆𑀫𑀸𑀦𑀫𑀸𑀬𑀽𑀢𑀺 𑀬𑁄𑀚𑀦𑀸. 𑀲𑀢𑁆𑀢𑀭𑀲 𑀘𑀺𑀢𑁆𑀢𑀓𑁆𑀔𑀡𑀲𑀫𑀧𑀫𑀸𑀡𑀸𑀦𑀺 𑀔𑀡𑀸𑀦𑀺 𑀯𑀺𑀜𑁆𑀜𑀢𑁆𑀢𑀺 𑀭𑀽𑀧𑀮𑀓𑁆𑀔𑀡 𑀭𑀽𑀧𑀯𑀚𑁆𑀚𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀆𑀬𑀼𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀡𑀫𑀢𑁆𑀢𑀢𑁄 𑀧𑀦 𑀅𑀝𑁆𑀞𑀓𑀣𑀸𑀦𑀬𑁂𑀦 𑀏𑀓𑀧𑀜𑁆𑀜𑀸𑀲𑀔𑀡𑀸𑀦𑀺 𑀳𑁄𑀦𑁆𑀢𑀺, 𑀫𑀽𑀮𑀝𑀻𑀓𑀸𑀦𑀬𑁂𑀦 𑀤𑁆𑀯𑀢𑁆𑀢𑀺𑀁𑀲𑀔𑀡𑀸𑀦𑀺. 𑀢𑀢𑁆𑀣𑀘 𑀆𑀤𑀺𑀫𑁆𑀳𑀺 𑀤𑁆𑀯𑁂 𑀔𑀡𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀁 𑀏𑀓𑀁 𑀉𑀧𑁆𑀧𑀸𑀤𑀓𑁆𑀔𑀡𑀫𑁂𑀯. 𑀅𑀦𑁆𑀢𑁂 𑀤𑁆𑀯𑁂 𑀏𑀓𑀁 𑀪𑀗𑁆𑀕𑀓𑁆𑀔𑀡𑀫𑁂𑀯. 𑀫𑀚𑁆𑀛𑁂 𑀅𑀝𑁆𑀞𑀯𑀻𑀲 𑀔𑀡𑀸𑀦𑀺 𑀢𑁂𑀲𑀁 𑀏𑀓𑀁 𑀞𑀺𑀢𑀺𑀓𑁆𑀔𑀡𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀤𑀦𑁆𑀥𑀧𑀭𑀺𑀡𑀢𑀸𑀦𑀁 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀪𑀗𑁆𑀕𑀸𑀧𑀺 𑀘𑀺𑀢𑁆𑀢𑀲𑁆𑀲 𑀯𑀺𑀬 𑀮𑀳𑀼𑀓𑀸 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺. 𑀢𑀢𑁆𑀣 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁. 𑀉𑀧𑀘𑀬𑀲𑀦𑁆𑀢𑀢𑀺𑀬𑁄 𑀉𑀧𑁆𑀧𑀸𑀤𑀫𑀢𑁆𑀢𑀸 𑀅𑀦𑀺𑀘𑁆𑀘𑀢𑀸 𑀪𑀗𑁆𑀕𑀫𑀢𑁆𑀢𑀸. 𑀚𑀭𑀢𑀸 𑀭𑀽𑀧 𑀥𑀫𑁆𑀫𑀸𑀦𑀁 𑀞𑀺𑀢𑀺𑀓𑁆𑀔𑀡𑀫𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀽𑀮𑀝𑀻𑀓𑀸𑀦𑀬𑁂𑀦 𑀧𑀦𑁂𑀢𑁆𑀣 𑀢𑀸𑀦𑀺 𑀧𑀦 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀭𑀽𑀧𑀥𑀫𑁆𑀫𑀸𑀦𑀫𑀸𑀬𑀽𑀢𑀺 𑀯𑀢𑁆𑀢𑀩𑁆𑀩𑀁. 𑀝𑀻𑀓𑀸𑀘𑀭𑀺𑀬𑁄 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀆𑀕𑀢𑀁 𑀫𑀳𑀸𑀝𑁆𑀞𑀓𑀣𑀸𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀪𑀸𑀯𑀁 𑀲𑀫𑁆𑀪𑀸𑀯𑁂𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀔𑀦𑁆𑀥 𑀯𑀺𑀪𑀗𑁆𑀕𑁂𑀬𑁂𑀯 𑀢𑀸𑀯 𑀭𑀽𑀧𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀺𑀥𑀸𑀦𑀲𑁆𑀲 𑀫𑀳𑀸𑀅𑀝𑁆𑀞𑀓𑀣𑀸 𑀯𑀸𑀤𑀲𑁆𑀲 𑀬𑀫𑀓𑀧𑀸𑀴𑀺𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀕𑀳𑀓𑀸𑀭𑁂𑀦 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀦 𑀲𑀓𑁆𑀓𑀸 𑀢𑀁 𑀧𑀢𑀺𑀝𑁆𑀞𑀧𑁂𑀢𑀼𑀦𑁆𑀢𑀺. 𑀢𑀲𑁆𑀫𑀺𑀁 𑀯𑀸𑀤𑁂 𑀳𑀺 𑀧𑀝𑀺𑀲𑀺𑀤𑁆𑀥𑁂 𑀢𑀢𑁆𑀣 𑀆𑀕𑀢𑀸 𑀲𑁄𑀴𑀲𑀸𑀬𑀼𑀓𑀢𑀸𑀯𑀸 𑀅𑀢𑀺𑀭𑁂𑀓𑀲𑁄𑀴𑀲𑀸𑀬𑀼𑀓𑀢𑀸𑀯𑀸 𑀧𑀝𑀺𑀲𑀺𑀤𑁆𑀥𑀸𑀬𑁂𑀯 𑀳𑁄𑀢𑀻𑀢𑀺.

[𑁧𑁨𑁪] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

𑀢𑀁 𑀝𑀻𑀓𑀸𑀦𑀬𑀁 𑀢𑀬𑀺𑀤𑀫𑀲𑀸𑀭𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀤𑀢𑁆𑀣𑀁 𑀲𑀸 𑀥𑁂𑀦𑁆𑀢𑁂𑀦 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀭𑀽𑀧𑀁 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀭𑀲𑀫𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀭𑀽𑀧𑀁 𑀅𑀝𑁆𑀞𑀸𑀭𑀲𑀫𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀫𑁂𑀯 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀆𑀕𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀬𑀜𑁆𑀳𑀺 𑀲𑀗𑁆𑀕𑀳𑀓𑀸𑀭𑀲𑁆𑀲 𑀲𑀢𑁆𑀢𑀭𑀲𑀸𑀬𑀼𑀓𑀯𑀘𑀦𑀁 𑀝𑀻𑀓𑀸𑀓𑀸𑀭𑁂𑀦 𑀯𑀺𑀘𑀸𑀭𑀺𑀢𑀁. 𑀢𑀤𑁂𑀯 𑀤𑀲𑁆𑀲𑁂𑀢𑁆𑀯𑀸 𑀝𑀻𑀓𑀸𑀦𑀬𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦 𑀬𑀼𑀢𑁆𑀢𑀫𑁂 𑀢𑀦𑁆𑀢𑀺. 𑀏𑀓𑀘𑀺𑀢𑁆𑀢𑀲𑁆𑀲 𑀔𑀡𑀁 𑀯𑀺𑀬 𑀔𑀡𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀁. 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀁𑀧𑀺 𑀳𑀺 𑀔𑀡𑀁 𑀇𑀤𑀁 𑀘𑀺𑀢𑁆𑀢𑀲𑁆𑀲 𑀇𑀤𑀁 𑀭𑀽𑀧𑀸𑀦𑀦𑁆𑀢𑀺 𑀓𑀧𑁆𑀧𑀦𑀸𑀯𑀲𑁂𑀦 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀻𑀬𑀢𑀻𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀅𑀢𑀻𑀢𑀁 𑀏𑀢𑁂𑀲𑀦𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺. 𑀅𑀢𑀺𑀫𑀳𑀦𑁆𑀢𑀪𑀽𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺.

[𑁧𑁨𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀏𑀢𑀸𑀦𑀺𑀯𑀸 𑀢𑀁 𑀅𑀢𑀻𑀢𑀸𑀦𑀻𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻 𑀓𑀸𑀦𑀻’’𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀦𑀺𑀭𑀼𑀤𑁆𑀥𑀥𑀫𑁆𑀫𑀯𑀺𑀲𑀬𑁄 𑀅𑀢𑀻𑀢𑀲𑀤𑁆𑀤𑁄 𑀓𑀺𑀜𑁆𑀘𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀤𑁆𑀥𑀁 𑀆𑀕𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀺 𑀤𑀻𑀧𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀩𑀳𑀽𑀦𑀺 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺 𑀏𑀢𑁂𑀲𑀦𑁆𑀢𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺. 𑀫𑀳𑀦𑁆𑀢𑀸𑀤𑀺 𑀪𑀽𑀢𑀸𑀦𑀺 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀺. 𑀭𑀽𑀧𑀥𑀫𑁆𑀫𑀸𑀦𑀁 𑀧𑀦 𑀭𑀽𑀧𑀥𑀫𑁆𑀫𑁂𑀲𑁆𑀯𑁂𑀯 𑀆𑀧𑀸𑀢𑀸𑀕𑀫𑀦𑁂 𑀣𑁄𑀓𑀁 𑀩𑀮𑀯𑀦𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀘 𑀞𑀺𑀢𑀺𑀓𑁆𑀔𑀡𑁂𑀬𑁂𑀯 𑀧𑀭𑀺𑀧𑀼𑀡𑁆𑀡𑀧𑀘𑁆𑀘𑀬𑀼𑀧𑀮𑀤𑁆𑀥𑀸 𑀳𑀼𑀢𑁆𑀯𑀸 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀞𑀺𑀢𑀺𑀧𑀢𑁆𑀢𑀸𑀦𑁂𑀯𑀸𑀢𑀺. 𑀏𑀯𑀲𑀤𑁆𑀤𑁂𑀦 𑀝𑀻𑀓𑀸𑀓𑀸𑀭𑀲𑁆𑀲 𑀯𑀸𑀤𑀁 𑀦𑀻𑀯𑀸𑀭𑁂𑀢𑀺. 𑀲𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀭𑀽𑀧𑀁 𑀧𑀲𑀸𑀤𑁂 𑀖𑀝𑁆𑀝𑁂𑀢𑀻𑀢𑀺 𑀇𑀘𑁆𑀙𑀢𑀻𑀢𑀺. 𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺 𑀧𑀜𑁆𑀘𑀤𑁆𑀯𑀸𑀭𑁂 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀭𑀽𑀧𑀲𑀤𑁆𑀤𑀸𑀭𑀫𑁆𑀫𑀡𑀸𑀦𑀺 𑀅𑀲𑀫𑁆𑀧𑀢𑁆𑀢 𑀯𑀲𑁂𑀦 𑀇𑀢𑀭𑀸𑀦𑀺𑀘 𑀲𑀫𑁆𑀧𑀢𑁆𑀢𑀯𑀲𑁂𑀦 𑀕𑁄𑀘𑀭𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀅𑀬𑀜𑁆𑀘 𑀯𑀺𑀲𑁂𑀲𑁄𑀖𑀝𑁆𑀝𑀦𑀯𑀺𑀲𑁂𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀸𑀦𑀺𑀳𑀺 𑀤𑁆𑀯𑁂 𑀦𑀺𑀫𑀺𑀢𑁆𑀢𑀯𑀲𑁂𑀦𑁂𑀯 𑀖𑀝𑁆𑀝𑁂𑀦𑁆𑀢𑀺. 𑀦 𑀯𑀢𑁆𑀣𑀼𑀯𑀲𑁂𑀦. 𑀧𑀘𑁆𑀙𑀺𑀫𑀸𑀦𑀺 𑀧𑀦 𑀢𑀻𑀡𑀺𑀯𑀢𑁆𑀣𑀼𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀦 𑀦𑀺𑀫𑀺𑀢𑁆𑀢𑀫𑀢𑁆𑀢𑀯𑀲𑁂𑀦 𑀦𑀺𑀫𑀺𑀢𑁆𑀢𑀖𑀝𑁆𑀝𑀦𑀜𑁆𑀘𑀦𑀸𑀫 𑀅𑀲𑀫𑁆𑀧𑀢𑁆𑀢𑀸𑀦𑀜𑁆𑀜𑁂𑀯 𑀦 𑀲𑀫𑁆𑀧𑀢𑁆𑀢𑀸𑀦𑀁. 𑀯𑀢𑁆𑀣𑀼𑀖𑀝𑁆𑀝𑀦𑀁 𑀧𑀦 𑀲𑀫𑁆𑀧𑀢𑁆𑀢𑀸𑀦𑀜𑁆𑀜𑁂𑀯. 𑀦𑁄 𑀅𑀲𑀫𑁆𑀧𑀢𑁆𑀢𑀸 𑀳𑁄𑀢𑀺. 𑀦𑀦𑁆𑀢𑀺. 𑀬𑀣𑀸 𑀳𑀺 𑀢𑀻𑀭𑁂 𑀕𑀘𑁆𑀙𑀦𑁆𑀢𑀸𑀦𑀁𑀲𑀭𑀻𑀭𑀦𑀺𑀫𑀺𑀢𑁆𑀢𑀸𑀦𑀺 𑀧𑁄𑀓𑁆𑀔𑀭𑀡𑀺 𑀬𑀸𑀉𑀤𑀓𑁂 𑀤𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀺𑀁 𑀉𑀤𑀓𑁂 𑀑𑀭𑁄𑀳𑀦𑁆𑀢𑀸𑀦𑀁 𑀧𑀦 𑀢𑀸𑀦𑀺 𑀢𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺. 𑀏𑀯𑀫𑁂𑀯 𑀲𑀫𑁆𑀧𑀢𑁆𑀢𑀸𑀦𑀺 𑀭𑀽𑀧𑀲𑀤𑁆𑀤𑀸𑀭𑀫𑁆𑀫𑀡𑀸𑀦𑀺 𑀦𑀖𑀝𑁆𑀝𑁂𑀦𑁆𑀢𑀺. 𑀓𑀲𑁆𑀫𑀸, 𑀯𑀺𑀲𑀬𑀯𑀺𑀲𑀬𑀻𑀦𑀁 𑀫𑀚𑁆𑀛𑁂 𑀆𑀮𑁄𑀓𑀲𑁆𑀲 𑀆𑀓𑀸𑀲𑀲𑁆𑀲𑀘 𑀅𑀪𑀸𑀯𑁂𑀦 𑀦𑀺𑀫𑀺𑀢𑁆𑀢𑁄𑀓𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀅𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀧𑀦 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀧𑀦𑀯𑀲𑁂𑀦 𑀖𑀝𑁆𑀝𑁂𑀦𑁆𑀢𑀺. 𑀓𑀲𑁆𑀫𑀸, 𑀦𑀺𑀫𑀺𑀢𑁆𑀢𑁄𑀓𑀸𑀲𑀲𑁆𑀲 𑀮𑀤𑁆𑀥𑀢𑁆𑀢𑀸. 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀬𑀣𑀸𑀚𑀸𑀢𑀯𑀢𑁆𑀣𑀼𑀯𑀲𑁂𑀦𑁂𑀯 𑀖𑀝𑁆𑀝𑁂𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀖𑀝𑁆𑀝𑁂𑀦𑁆𑀢𑀺. 𑀦𑁄 𑀅𑀲𑀫𑁆𑀧𑀢𑁆𑀢𑀸𑀦𑀻𑀢𑀺. 𑀢𑀢𑁆𑀣 𑀬𑀸𑀦𑀺 𑀅𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀳𑀼𑀢𑁆𑀯𑀸 𑀖𑀝𑁆𑀝𑁂𑀦𑁆𑀢𑀺. 𑀢𑀸𑀦𑀺 𑀲𑀬𑀁 𑀤𑀽𑀭𑁂 𑀞𑀢𑁆𑀯𑀸 𑀦𑀺𑀫𑀺𑀢𑁆𑀢 𑀅𑀧𑁆𑀧𑀦𑀸𑀯𑀲𑁂𑀦 𑀖𑀝𑁆𑀝𑀺𑀢𑀢𑁆𑀢𑀸 𑀏𑀓𑁂𑀓𑀲𑁆𑀫𑀺𑀁 𑀧𑀲𑀸𑀤𑁂 𑀘𑀦𑁆𑀤𑀫𑀡𑁆𑀟𑀮 𑀲𑀽𑀭𑀺𑀬 𑀫𑀡𑁆𑀟𑀮𑀸𑀤𑀺𑀯𑀲𑁂𑀦 𑀅𑀲𑀦𑀺𑀲𑀤𑁆𑀤𑀫𑀡𑁆𑀟𑀮 𑀫𑁂𑀡𑁆𑀟𑀲𑀤𑁆𑀤𑀫𑀡𑁆𑀟𑀮𑀸𑀤𑀺𑀯𑀲𑁂𑀦 𑀘 𑀫𑀳𑀦𑁆𑀢𑀸𑀦𑀺𑀧𑀺 𑀩𑀳𑀽𑀦𑀺𑀧𑀺 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀺𑀬𑁂𑀯. 𑀇𑀢𑀭𑀸𑀦𑀺 𑀧𑀦 𑀢𑀻𑀡𑀺 𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀖𑀝𑁆𑀝𑁂𑀦𑁆𑀢𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀲𑀸𑀤𑁂 𑀏𑀓𑁂𑀓𑀫𑁂𑀯 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀜𑁆𑀘 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀦𑁄 𑀤𑁆𑀯𑀸𑀭𑁂 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀆𑀭𑀫𑁆𑀫𑀡𑀸𑀦𑀺 𑀅𑀲𑀫𑁆𑀧𑀢𑁆𑀢𑀸𑀦𑀺𑀬𑁂𑀯 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀧𑀜𑁆𑀘𑀤𑁆𑀯𑀸𑀭𑁂𑀢𑀺 𑀇𑀤𑀁 𑀅𑀲𑀸𑀥𑀸𑀭𑀡 𑀤𑁆𑀯𑀸𑀭𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀸𑀦𑀺 𑀧𑀦 𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺 𑀬𑀤𑀸𑀲𑀓𑀲𑀓𑀤𑁆𑀯𑀸𑀭𑁂 𑀖𑀝𑁆𑀝𑁂𑀦𑁆𑀢𑀺. 𑀢𑀤𑀸 𑀫𑀦𑁄𑀤𑁆𑀯𑀸𑀭𑁂𑀧𑀺 𑀅𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀺𑀬𑁂𑀯. 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀅𑀧𑀸𑀢 𑀫𑀸𑀕𑀘𑁆𑀙𑀢𑀻𑀢𑀺 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀬𑀤𑀸 𑀘𑀦𑁆𑀤𑀁𑀯𑀸 𑀲𑀽𑀭𑀺𑀬𑀁𑀯𑀸 𑀧𑀩𑁆𑀩𑀢𑀁𑀯𑀸 𑀭𑀼𑀓𑁆𑀔𑀁𑀯𑀸 𑀬𑀁𑀓𑀺𑀜𑁆𑀘𑀺𑀯𑀸 𑀧𑀲𑁆𑀲𑀦𑁆𑀢𑀺. 𑀢𑀤𑀸 𑀏𑀓𑁂𑀓𑀲𑁆𑀫𑀺𑀁 𑀘𑀓𑁆𑀔𑀼𑀧𑀲𑀸𑀤𑁂 𑀏𑀓𑁂𑀓𑀸𑀦𑀺 𑀫𑀦𑁄𑀤𑁆𑀯𑀸𑀭𑁂 𑀏𑀓𑀦𑁆𑀢𑀺 𑀅𑀦𑁂𑀓𑀸𑀦𑀺 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀦𑀺 𑀏𑀓𑀓𑁆𑀔𑀡𑁂 𑀉𑀧𑀝𑁆𑀞𑀳𑀦𑁆𑀢𑀺, 𑀏𑀯𑀁 𑀲𑁂𑀲𑀸𑀭𑀫𑁆𑀫𑀡𑁂 𑀲𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀸𑀢𑀸𑀕𑀫𑀦𑀜𑁆𑀘𑁂𑀢𑁆𑀣 𑀮𑀜𑁆𑀙𑀓𑀸𑀦𑀁 𑀢𑀸𑀮𑀧𑀡𑁆𑀡𑁂 𑀮𑀜𑁆𑀙𑀦𑀔𑀦𑁆𑀥𑀁 𑀣𑀧𑁂𑀢𑁆𑀯𑀸 𑀫𑀼𑀕𑁆𑀕𑀭𑁂𑀦 𑀧𑀳𑀭𑀡𑀓𑀸𑀮𑁂 𑀮𑀜𑁆𑀙𑀦𑀔𑀦𑁆𑀥𑀲𑁆𑀲 𑀢𑀸𑀮𑀧𑀡𑁆𑀡𑁂 𑀆𑀧𑀸𑀢𑁂𑀢𑁆𑀯𑀸 𑀅𑀓𑁆𑀔𑀭𑀼𑀧𑀝𑁆𑀞𑀸𑀧𑀦𑀁 𑀯𑀺𑀬 𑀤𑀝𑁆𑀞𑀩𑁆𑀩𑀁. 𑀬𑀢𑁄 𑀤𑁆𑀯𑀸𑀭𑀸𑀦𑀁 𑀯𑀺𑀓𑀸𑀭𑀧𑁆𑀧𑀢𑁆𑀢𑀺 𑀳𑁄𑀢𑀻𑀢𑀺.

[𑁧𑁨𑁬] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀆𑀪𑁄𑀕𑀸𑀦𑀼𑀭𑀽𑀧𑀁 𑀅𑀦𑁂𑀓𑀓𑀮𑀸𑀧𑀕𑀢𑀸𑀦𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀪𑁄𑀕𑀸𑀦𑀼𑀭𑀽𑀧𑀦𑁆𑀢𑀺 𑀇𑀤𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀬𑀢𑁆𑀢𑀓𑀸𑀦𑀺 𑀳𑀺 𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺 𑀘𑀓𑁆𑀔𑀸𑀤𑀺𑀧𑀣𑁂 𑀆𑀮𑁄𑀓𑀸𑀤𑀺 𑀲𑀳𑀺𑀢𑀸𑀦𑀺 𑀳𑀼𑀢𑁆𑀯𑀸 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀢𑀓𑀸𑀦𑀺 𑀲𑀩𑁆𑀩𑀸𑀦𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀺 𑀯𑀺𑀲𑀜𑁆𑀜𑀺 𑀪𑀽𑀢𑀲𑁆𑀲𑀧𑀺 𑀅𑀜𑁆𑀜𑀯𑀺𑀳𑀺𑀢𑀲𑁆𑀲𑀧𑀺 𑀬𑀁𑀓𑀺𑀜𑁆𑀘𑀺 𑀛𑀸𑀦𑀁𑀯𑀸 𑀨𑀮𑀁𑀯𑀸 𑀦𑀺𑀭𑁄𑀥𑀁𑀯𑀸 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲𑀧𑀺 𑀆𑀪𑁄𑀕𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀺𑀬𑁂𑀯. 𑀦𑀓𑁂𑀯𑀮𑀁 𑀅𑀢𑁆𑀢𑀦𑁄𑀤𑁆𑀯𑀸𑀭𑁂𑀲𑀼 𑀏𑀯. 𑀅𑀣𑀔𑁄 𑀫𑀦𑁄𑀤𑁆𑀯𑀸𑀭𑁂𑀧𑀺. 𑀦𑀓𑁂𑀯𑀮𑀁 𑀪𑀯𑀗𑁆𑀕𑀫𑀦𑁄𑀤𑁆𑀯𑀸𑀭𑁂𑀏𑀯. 𑀆𑀯𑀚𑁆𑀚𑀦𑀸𑀤𑀻𑀲𑀼 𑀧𑀦 𑀘𑀢𑀼𑀩𑁆𑀪𑀽𑀫𑀓 𑀯𑀻𑀣𑀺𑀘𑀺𑀢𑁆𑀢𑁂𑀲𑀼𑀧𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀅𑀬𑀁𑀦𑀸𑀫 𑀫𑀦𑁄 𑀫𑀦𑁄𑀤𑁆𑀯𑀸𑀭𑀁 𑀦𑀳𑁄𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑁄𑀢𑀺 𑀳𑀺 𑀤𑁆𑀯𑀸𑀭𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀧𑀣𑀫𑀚𑁆𑀛𑀸𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄𑀢𑀺 𑀇𑀫𑀺𑀦𑀸 𑀧𑀸𑀞𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀧𑀣𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀳𑀺 𑀲𑀤𑁆𑀤𑁄 𑀲𑁄𑀢𑀫𑁆𑀳𑀺 𑀖𑀝𑁆𑀝𑁂𑀢𑁆𑀯𑀸 𑀛𑀸𑀦𑀘𑀺𑀢𑁆𑀢𑀲𑀗𑁆𑀔𑀸𑀢𑁂 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀢𑀫𑀸𑀕𑀘𑁆𑀙𑀢𑀺. 𑀢𑀤𑀸 𑀛𑀸𑀦𑀘𑀺𑀢𑁆𑀢 𑀲𑀦𑁆𑀢𑀢𑀺 𑀘𑀮𑀺𑀢𑁆𑀯𑀸 𑀯𑁄𑀘𑁆𑀙𑀺𑀚𑁆𑀚𑀢𑀺. 𑀛𑀸𑀦𑀸 𑀯𑀼𑀝𑁆𑀞𑀸𑀢𑀺. 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀺. 𑀢𑀁 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀻𑀣𑀺𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺. 𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀻𑀦𑀺 𑀲𑀫𑀸𑀧𑀚𑁆𑀚𑀦𑁆𑀢𑁄 𑀧𑀦 𑀅𑀧𑁆𑀧𑀓𑁂𑀦 𑀲𑀤𑁆𑀤𑁂𑀦 𑀦𑀯𑀼𑀝𑁆𑀞𑀸𑀢𑀺. 𑀅𑀥𑀺𑀫𑀢𑁆𑀢𑀲𑀤𑁆𑀤𑁂𑀦 𑀧𑀦 𑀯𑀼𑀝𑁆𑀞𑀸𑀢𑀺𑀬𑁂𑀯. 𑀦 𑀳𑀺 𑀢𑀸𑀦𑀺 𑀆𑀦𑁂𑀜𑁆𑀚𑀧𑀢𑁆𑀢𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀅𑀭𑀽𑀧𑀚𑁆𑀛𑀸𑀦𑀸𑀦𑀺𑀏𑀯 𑀧𑀦 𑀆𑀦𑁂𑀜𑁆𑀚𑀧𑀢𑁆𑀢𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀲𑀫𑀸𑀧𑀚𑁆𑀚𑀦𑁆𑀢𑁄 𑀅𑀥𑀺𑀫𑀢𑁆𑀢𑀲𑀤𑁆𑀤𑁂𑀦𑀧𑀺 𑀦𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺. 𑀢𑁂𑀲𑀼 𑀧𑀦 𑀢𑀣𑀸 𑀆𑀧𑀸𑀢𑀫𑀸𑀕𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺𑀬𑁂𑀯𑀸𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀪𑀯𑀗𑁆𑀕 𑀲𑀦𑁆𑀢𑀢𑀺𑀬𑀸𑀯𑀸 𑀚𑀯𑀦𑀲𑀦𑁆𑀢𑀢𑀺𑀬𑀸𑀯𑀸 𑀯𑁄𑀘𑁆𑀙𑀺𑀦𑁆𑀦𑀸𑀬 𑀧𑀯𑀢𑁆𑀢𑀦𑁆𑀢𑀺. 𑀅𑀯𑁄𑀘𑁆𑀙𑀺𑀦𑁆𑀦𑀸𑀬 𑀦𑀧𑀯𑀢𑁆𑀢𑀦𑁆𑀢𑀺. 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺 𑀆𑀭𑀫𑁆𑀫𑀡𑀸 𑀥𑀺𑀫𑀢𑁆𑀢𑀸𑀤𑀺𑀯𑀲𑁂𑀦 𑀮𑀤𑁆𑀥𑀧𑀘𑁆𑀘𑀬𑀯𑀺𑀲𑁂𑀲𑁂 𑀏𑀓𑁂𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀏𑀯 𑀧𑀯𑀢𑁆𑀢𑀦𑁆𑀢𑀺. 𑀦 𑀏𑀓𑀓𑁆𑀔𑀡𑁂 𑀧𑀜𑁆𑀘𑀲𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺 𑀧𑀭𑀺𑀡𑀸𑀫𑁄𑀢𑀺 𑀓𑀢𑁆𑀯𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺 𑀞𑀺𑀢𑀺𑀧𑀢𑁆𑀢𑀸𑀦𑁂𑀯 𑀧𑀜𑁆𑀘𑀸 𑀮𑀫𑁆𑀩𑀡𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂 𑀞𑀺𑀢𑀺𑀧𑁆𑀧𑀢𑁆𑀢𑁂 𑀏𑀯 𑀧𑀜𑁆𑀘𑀤𑁆𑀯𑀸𑀭𑁂 𑀩𑀳𑀼 𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂𑀢𑀺 𑀬𑁄𑀚𑁂𑀢𑀩𑁆𑀩𑀁.

[𑁧𑁨𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀢𑁂 𑀧𑀦 𑀧𑀲𑀸𑀤𑀸 𑀪𑀯𑀗𑁆𑀕𑀘𑀮𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑁂𑀦 𑀪𑀯𑀗𑁆𑀕𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀧𑀦 𑀲𑀢𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺𑀧𑀺 𑀧𑀜𑁆𑀘𑀸𑀮𑀫𑁆𑀩𑀡𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂𑀏𑀯 𑀧𑀜𑁆𑀘𑀤𑁆𑀯𑀸𑀭𑁂 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀏𑀢 𑀭𑀳𑀺 𑀧𑀦 𑀏𑀓𑀓𑁆𑀔𑀡𑁂 𑀲𑀳𑀼𑀧𑁆𑀧𑀦𑁆𑀦𑀸𑀦𑀜𑁆𑀜𑁂𑀯 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀖𑀝𑁆𑀝𑀦𑀁 𑀇𑀘𑁆𑀙𑀦𑁆𑀢𑀺. 𑀲𑀳𑀼𑀧𑁆𑀧𑀦𑁆𑀦𑀸𑀦𑀺𑀯𑀸 𑀧𑀦 𑀳𑁄𑀦𑁆𑀢𑀼 𑀦𑀸𑀦𑀼𑀧𑁆𑀧𑀦𑁆𑀦𑀸𑀦𑀺𑀯𑀸, 𑀩𑀮𑀯𑀪𑀸𑀯𑁄𑀬𑁂𑀯 𑀧𑀫𑀡𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀲𑀩𑁆𑀩𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

[𑁧𑁨𑁮] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀆𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀏𑀯𑀜𑁆𑀳𑀺 𑀲𑀢𑀺 𑀅𑀜𑁆𑀜𑀤𑁂𑀯 𑀧𑀜𑁆𑀘𑀸𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸𑀕𑀫𑀦𑀯𑀢𑁆𑀣𑀼. 𑀅𑀜𑁆𑀜𑀤𑁂𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀦𑀺𑀲𑁆𑀲𑀬𑀯𑀢𑁆𑀣𑀽𑀢𑀺 𑀏𑀯𑀁 𑀯𑀺𑀭𑀼𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀆𑀧𑀚𑁆𑀚𑀦𑀢𑁄𑀢𑀺. 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑁂 𑀯𑀺𑀲𑀬𑀧𑀯𑀢𑁆𑀢𑀺𑀬𑀸 𑀆𑀤𑀺𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑀧𑀸𑀭𑀺𑀧𑀽𑀭𑀁 𑀯𑀺𑀲𑀬𑀧𑀯𑀢𑁆𑀢𑀺𑀯𑀺𑀪𑀸𑀕𑀁 𑀯𑀻𑀣𑀺𑀘𑀺𑀢𑁆𑀢𑀧𑀯𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁄𑀢𑀺 𑀢𑀲𑁆𑀫𑀸 𑀘𑀓𑁆𑀔𑀼𑀲𑁆𑀲 𑀆𑀧𑀸𑀢𑀸𑀕𑀫𑀦𑀧𑀘𑁆𑀘𑀬𑀸. 𑀘𑀓𑁆𑀔𑀼𑀲𑁆𑀲 𑀆𑀧𑀸𑀢𑀸𑀕𑀫𑀦𑁂𑀦 𑀲𑀳𑁂𑀯 𑀪𑀯𑀗𑁆𑀕𑀲𑁆𑀲𑀧𑀺 𑀆𑀧𑀸𑀢𑀁 𑀆𑀕𑀘𑁆𑀙𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁𑀪𑀯𑀗𑁆𑀕𑁂𑀘𑀮𑀺𑀢𑁂𑀢𑀺. 𑀘𑀮𑀦𑀜𑁆𑀘𑁂𑀢𑁆𑀣 𑀬𑀣𑀸 𑀕𑀳𑀺𑀢𑀁 𑀓𑀫𑁆𑀫𑀸𑀤𑀺 𑀆𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀁 𑀅𑀪𑀺𑀦𑀯𑀸𑀭𑀫𑁆𑀫𑀡𑀁 𑀕𑀳𑁂𑀢𑀼𑀁 𑀉𑀲𑁆𑀲𑀸𑀳𑀚𑀸𑀢𑀲𑁆𑀲 𑀯𑀺𑀬 𑀪𑀯𑀗𑁆𑀕𑀲𑀦𑁆𑀢𑀸𑀦𑀲𑁆𑀲 𑀯𑀺𑀓𑀸𑀭𑀧𑁆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀘𑀓𑁆𑀔𑀼𑀲𑁆𑀲 𑀆𑀧𑀸𑀢𑀸𑀕𑀫𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀏𑀯 𑀓𑀸𑀭𑀡𑀁. 𑀦 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀸. 𑀪𑀯𑀗𑁆𑀕𑀲𑁆𑀲 𑀆𑀧𑀸𑀢𑀸𑀕𑀫𑀦𑀫𑁂𑀯 𑀧𑀦 𑀆𑀯𑀚𑁆𑀚𑀦𑀼𑀧𑁆𑀧𑀢𑁆𑀢𑀺𑀬𑀸𑀧𑀺 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

[𑁧𑁨𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀢𑀸𑀕𑀫𑀦𑀁 𑀯𑀺𑀲𑀼𑀁 𑀅𑀧𑀢𑁆𑀯𑀸 𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀸𑀤𑀺𑀲𑀼 𑀖𑀝𑁆𑀝𑀦𑀁𑀦𑀸𑀫 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑀁 𑀏𑀯. 𑀢𑀫𑁂𑀯𑀘 𑀪𑀯𑀗𑁆𑀕𑀼 𑀧𑀘𑁆𑀙𑁂𑀤𑀲𑁆𑀲𑀧𑀺 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀧𑀜𑁆𑀘𑀲𑀼 𑀳𑀺 𑀧𑀲𑀸𑀤𑁂𑀲𑀼 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦 𑀯𑀲𑁂𑀦 𑀆𑀭𑀫𑁆𑀫𑀡𑁂 𑀖𑀝𑁆𑀝𑀺𑀢𑁂 𑀧𑀲𑀸𑀤𑀖𑀝𑁆𑀝𑀦𑀸𑀦𑀼𑀪𑀸𑀯𑁂𑀦 𑀪𑀯𑀗𑁆𑀕𑀲𑀦𑁆𑀢𑀢𑀺 𑀯𑁄𑀘𑁆𑀙𑀺𑀚𑁆𑀚𑀫𑀸𑀦𑀸𑀢𑀺𑀆𑀤𑀺’’ 𑀯𑀼𑀢𑁆𑀢𑀁. 𑀢𑀁 𑀢𑀣𑀸 𑀦 𑀤𑀝𑁆𑀞𑀩𑁆𑀩𑀁.

𑀦 𑀳𑀺 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑀫𑁂𑀯 𑀖𑀝𑁆𑀝𑀦𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑁄𑀕𑁆𑀬𑀤𑁂𑀲𑁂𑀧𑀦 𑀞𑀢𑁆𑀯𑀸 𑀦𑀺𑀫𑀺𑀢𑁆𑀢𑀖𑀝𑁆𑀝𑀦𑀯𑀲𑁂𑀦 𑀯𑀢𑁆𑀣𑀼𑀖𑀝𑁆𑀝𑀦𑀯𑀲𑁂𑀦𑀘 𑀅𑀲𑀦𑀺 𑀦𑀺𑀧𑀸𑀢𑁄𑀯𑀺𑀬 𑀧𑀲𑀸𑀤𑁂𑀲𑀼 𑀬𑀼𑀚𑁆𑀛𑀦𑀁 𑀫𑀦𑁆𑀣𑀦𑀁 𑀔𑁄𑀪𑀓𑀭𑀡𑀁 𑀖𑀝𑁆𑀝𑀦𑀦𑁆𑀢𑀺 𑀘 𑀆𑀧𑀸𑀢𑀸𑀕𑀫𑀦𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀏𑀢𑁆𑀣𑀘 𑀅𑀬𑀁𑀧𑀺 𑀏𑀓𑁄 𑀥𑀫𑁆𑀫𑀦𑀺𑀬𑀸𑀫𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀦𑀸𑀦𑀸 𑀞𑀸𑀦𑀺𑀬𑁂𑀲𑀼 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀳𑁂𑀯 𑀆𑀧𑀸𑀢𑀸𑀕𑀫𑀦𑀁 𑀧𑀘𑁆𑀘𑁂𑀢𑀩𑁆𑀩𑀁. 𑀭𑀽𑀧𑀸𑀤𑀺𑀦𑀸 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀢𑀁 𑀦𑀺𑀲𑁆𑀲𑀺𑀢𑀲𑁆𑀲𑁂𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑁆𑀲 𑀘𑀮𑀦𑀁 𑀲𑀺𑀬𑀸. 𑀓𑀣𑀁 𑀧𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺 𑀦 𑀘𑁄𑀤𑁂𑀢𑀩𑁆𑀩𑀦𑁆𑀢𑀺.

[𑁧𑁩𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑀫𑁂𑀯 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀦𑁆𑀢𑀢𑀺 𑀯𑀲𑁂𑀦 𑀏𑀓𑀸𑀩𑀤𑁆𑀥𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀲𑀡𑁆𑀞𑀸𑀦𑀯𑀲𑁂𑀦𑀸𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀲𑀸𑀭𑀢𑁄 𑀦 𑀧𑀘𑁆𑀘𑁂𑀢𑀩𑁆𑀩𑀁.

𑀓𑀲𑁆𑀫𑀸, 𑀢𑀸𑀤𑀺𑀲𑀲𑁆𑀲 𑀅𑀦𑀼𑀓𑁆𑀓𑀫𑀘𑀮𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀫𑁂𑀯 𑀤𑀴𑁆𑀳𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀫𑀸𑀕𑀘𑁆𑀙𑀢𑀻𑀢𑀺. 𑀭𑀽𑀧𑀸𑀭𑀫𑁆𑀫𑀡𑀜𑁆𑀳𑀺 𑀘𑀓𑁆𑀔𑀼𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀢𑀗𑁆𑀔𑀡𑁂𑀬𑁂𑀯 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀢𑀁 𑀆𑀕𑀘𑁆𑀙𑀢𑀺. 𑀪𑀯𑀗𑁆𑀕𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤 𑀕𑀦𑁆𑀥 𑀭𑀲 𑀨𑁄𑀝𑁆𑀞𑀩𑁆𑀩𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀳𑀺 𑀲𑀓𑀼𑀡𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀕𑁆𑀕𑁂 𑀦𑀺𑀮𑀻𑀬𑀫𑀸𑀦𑁄𑀯 𑀭𑀼𑀓𑁆𑀔𑀲𑀸𑀔𑀜𑁆𑀘 𑀖𑀝𑁆𑀝𑁂𑀢𑀺. 𑀙𑀸𑀬𑀸𑀘𑀲𑁆𑀲 𑀧𑀣𑀯𑀺𑀬𑀁 𑀧𑀝𑀺𑀳𑀜𑁆𑀜𑀢𑀺. 𑀲𑀸𑀔𑀸𑀖𑀝𑁆𑀝𑀦 𑀙𑀸𑀬𑀸𑀨𑀭𑀡𑀸𑀦𑀺 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂𑀬𑁂𑀯 𑀪𑀯𑀦𑁆𑀢𑀺. 𑀏𑀯𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀸𑀤𑀻𑀦𑀁 𑀘𑀓𑁆𑀔𑀼𑀧𑀲𑀸𑀤𑀸𑀤𑀺𑀖𑀝𑁆𑀝𑀦𑀜𑁆𑀘 𑀪𑀯𑀗𑁆𑀕𑀘𑀸𑀮𑀦 𑀲𑀫𑀢𑁆𑀣𑀢𑀸𑀬𑀫𑀦𑁄𑀤𑁆𑀯𑀸𑀭𑁂𑀆𑀧𑀸𑀢𑀸𑀕𑀫𑀦𑀜𑁆𑀘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂𑀬𑁂𑀯 𑀳𑁄𑀢𑀻𑀢𑀺. 𑀏𑀯𑀁 𑀲𑀓𑀼𑀡𑁄𑀧𑀫𑀸𑀬 𑀲𑀳𑀢𑀗𑁆𑀔𑀡𑁂𑀬𑁂𑀯𑀸𑀢𑀺 𑀘 𑀅𑀧𑀼𑀩𑁆𑀩𑀁𑀅𑀘𑀭𑀺𑀫𑀁 𑀏𑀓𑀓𑁆𑀔𑀡𑁂 𑀬𑁂𑀯𑀸𑀢𑀺𑀘 𑀯𑀢𑁆𑀯𑀸 𑀤𑀴𑁆𑀳𑀁 𑀧𑀝𑀺𑀪𑀺𑀤𑁆𑀥𑀢𑁆𑀢𑀸 𑀢𑀁 𑀅𑀦𑀼𑀓𑁆𑀓𑀫𑀘𑀮𑀦𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀦𑀺𑀬𑀸𑀫𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑀘𑀮𑀦𑀫𑁂𑀯 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺. 𑀪𑀯𑀗𑁆𑀕𑀲𑁄𑀢𑀁𑀯𑁄𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀪𑀯𑀗𑁆𑀕𑀧𑀯𑀸𑀳𑀁 𑀲𑀩𑁆𑀩𑀲𑁄 𑀅𑀯𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸. 𑀆𑀯𑀚𑁆𑀚𑀦𑁆𑀢𑀦𑁆𑀢𑀺 𑀅𑀤𑀺𑀲𑁆𑀯𑀸𑀯 𑀓𑀺𑀁𑀦𑀸𑀫𑁂𑀢𑀦𑁆𑀢𑀺 𑀆𑀯𑀚𑁆𑀚 𑀫𑀸𑀦𑀁. 𑀧𑀲𑁆𑀲𑀦𑁆𑀢𑀦𑁆𑀢𑀺 𑀅𑀢𑁆𑀢 𑀧𑀘𑁆𑀘𑀓𑁆𑀔𑀁 𑀓𑀼𑀭𑀼𑀫𑀸𑀦𑀁. 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀦𑁆𑀢𑀺 𑀫𑀼𑀜𑁆𑀘𑀺𑀢𑀼𑀁 𑀅𑀤𑀢𑁆𑀯𑀸 𑀬𑀣𑀸𑀤𑀺𑀝𑁆𑀞𑀁 𑀭𑀽𑀧𑀁 𑀧𑀝𑀺 𑀕𑀡𑁆𑀳𑀦𑁆𑀢𑀁. 𑀲𑀦𑁆𑀢𑀻𑀭𑀬𑀫𑀸𑀦𑀦𑁆𑀢𑀺 𑀲𑀼𑀝𑁆𑀞𑀼 𑀢𑀻𑀭𑁂𑀦𑁆𑀢𑀁𑀯𑀺𑀘𑀸𑀭𑁂𑀦𑁆𑀢𑀁. 𑀯𑀯𑀢𑁆𑀣𑀧𑁂𑀦𑁆𑀢𑀦𑁆𑀢𑀺 𑀲𑀼𑀝𑁆𑀞𑀼 𑀅𑀲𑀗𑁆𑀓𑀭𑀢𑁄 𑀣𑀧𑁂𑀦𑁆𑀢𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀮𑀤𑁆𑀥𑁄𑀧𑀘𑁆𑀘𑀬𑁄 𑀬𑁂𑀦𑀸𑀢𑀺 𑀮𑀤𑁆𑀥𑀧𑀘𑁆𑀘𑀬𑀁. 𑀬𑀁𑀓𑀺𑀜𑁆𑀘𑀺 𑀚𑀯𑀦𑀁 𑀚𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀦 𑀚𑀯𑀦𑀁 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀓𑀸𑀮𑁂𑀯𑀸 𑀫𑀼𑀘𑁆𑀙𑀸 𑀫𑀭𑀡𑀸𑀲𑀦𑁆𑀦𑀓𑀸𑀮𑁂𑀲𑀼𑀯𑀸 𑀙𑀓𑁆𑀔𑀢𑁆𑀢𑀼𑀁 𑀯𑀸 𑀧𑀜𑁆𑀘𑀓𑁆𑀔𑀢𑁆𑀢𑀼𑀫𑁂𑀯𑀯𑀸 𑀚𑀯𑀢𑀻𑀢𑀺 𑀯𑀼𑀢𑁆𑀢𑀁 𑀬𑁂𑀪𑀼𑀬𑁆𑀬𑁂𑀦𑀸𑀢𑀺. 𑀚𑀯𑀢𑀻𑀢𑀺 𑀅𑀲𑀦𑀺𑀦𑀺𑀧𑀸𑀢𑀲𑀤𑀺𑀲𑁂𑀦 𑀚𑀯𑁂𑀦 𑀧𑀯𑀢𑁆𑀢𑀢𑀺. 𑀢𑀢𑁆𑀣 𑀧𑀣𑀫𑀚𑀯𑀦𑀁 𑀅𑀮𑀤𑁆𑀥𑀸 𑀲𑁂𑀯𑀦𑀢𑁆𑀢𑀸 𑀲𑀩𑁆𑀩𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀢𑀢𑁄 𑀤𑀼𑀢𑀻𑀬𑀁 𑀩𑀮𑀯𑀁. 𑀢𑀢𑁄 𑀢𑀢𑀻𑀬𑀁. 𑀢𑀢𑁄 𑀘𑀢𑀼𑀢𑁆𑀣𑀁. 𑀇𑀤𑀁 𑀧𑀦 𑀲𑀩𑁆𑀩𑀩𑀮𑀯𑀁 𑀫𑀼𑀤𑁆𑀥𑀧𑀢𑁆𑀢𑀁 𑀳𑁄𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀳𑀸𑀬𑀫𑀸𑀦𑀁 𑀧𑀯𑀢𑁆𑀢𑀢𑀺. 𑀲𑀢𑁆𑀢𑀫𑀯𑀸𑀭𑁂 𑀕𑀢𑁂 𑀧𑀭𑀺𑀓𑁆𑀔𑀻𑀡𑀚𑀯𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀯𑀦𑀸 𑀦𑀼𑀩𑀦𑁆𑀥𑀸𑀦𑀺𑀢𑀺 𑀬𑀣𑀸 𑀧𑀝𑀺𑀲𑁄𑀢𑀁 𑀕𑀘𑁆𑀙𑀦𑁆𑀢𑀺𑀁 𑀦𑀸𑀯𑀁 𑀉𑀤𑀓𑀁 𑀣𑁄𑀓𑀁 𑀅𑀦𑀼𑀩𑀦𑁆𑀥𑀢𑀺 𑀅𑀦𑀼𑀕𑀘𑁆𑀙𑀢𑀺. 𑀏𑀯𑀁 𑀚𑀯𑀦𑀁 𑀅𑀦𑀼𑀩𑀦𑁆𑀥𑀸𑀦𑀺. 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀧𑀸𑀓𑀸𑀦𑀻𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀬𑀣𑀸𑀭𑀳𑀦𑁆𑀢𑀺 𑀆𑀭𑀫𑁆𑀫𑀡𑀚𑀯𑀦 𑀲𑀢𑁆𑀢𑀸𑀦𑀼𑀭𑀽𑀧𑀁. 𑀪𑀯𑀗𑁆𑀕𑀧𑀸𑀢𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑀺𑀳𑀦𑁆𑀢𑀸𑀭𑀫𑁆𑀫𑀡𑁂 𑀆𑀯𑀚𑁆𑀚𑀦𑀢𑁄 𑀧𑀣𑀫𑀪𑀯𑀗𑁆𑀕𑀘𑀮𑀦𑀢𑁄𑀬𑁂𑀯𑀯𑀸 𑀧𑀝𑁆𑀞𑀸𑀬 𑀉𑀝𑁆𑀞𑀺𑀢𑀁 𑀲𑀫𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀬𑀸𑀯𑀘𑀢𑀼𑀢𑁆𑀣𑀚𑀯𑀦𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀜𑁆𑀘𑀫𑀚𑀯𑀦𑀢𑁄 𑀧𑀝𑁆𑀞𑀸𑀬 𑀧𑀢𑀺𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀫𑀼𑀝𑁆𑀞𑀺𑀢𑀯𑁂𑀕𑀲𑁆𑀲 𑀲𑀩𑁆𑀩𑀲𑁄 𑀅𑀧𑀭𑀺𑀓𑁆𑀔𑀻𑀡𑀢𑀸𑀬 𑀧𑀢𑀺𑀢𑀦𑁆𑀢𑀺 𑀦𑀯𑀼𑀘𑁆𑀘𑀢𑀺. 𑀤𑀼𑀢𑀻𑀬𑀢𑀤𑀸𑀭𑀫𑁆𑀫𑀡𑀢𑁄 𑀧𑀭𑀁 𑀧𑀦 𑀲𑀫𑀼𑀝𑁆𑀞𑀺𑀢𑀯𑁂𑀕𑀲𑁆𑀲 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀢𑀤𑀸 𑀏𑀯 𑀢𑀁𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀧𑀢𑀺𑀢𑀁𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀧𑀢𑀦𑀁 𑀧𑀸𑀢𑁄. 𑀪𑀯𑀗𑁆𑀕𑀪𑀸𑀯𑁂𑀦𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀸𑀢𑁄 𑀪𑀯𑀗𑁆𑀕𑀧𑀸𑀢𑁄, 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀧𑀸𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀯𑀗𑁆𑀕𑀓𑀺𑀘𑁆𑀘𑁂 𑀪𑀯𑀗𑁆𑀕𑀝𑁆𑀞𑀸𑀦𑁂 𑀪𑀯𑀗𑁆𑀕𑀸𑀭𑀫𑁆𑀫𑀡𑁂𑀘 𑀧𑀸𑀢𑁄 𑀪𑀯𑀗𑁆𑀕𑀧𑀸𑀢𑁄𑀢𑀺𑀯𑀸. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁄𑀯𑀸𑀭𑀺𑀓𑁄𑀧𑀫𑀸, 𑀕𑀸𑀫𑀺𑀮𑁆𑀮𑁄𑀧𑀫𑀸, 𑀅𑀫𑁆𑀩𑁄𑀧𑀫𑀸𑀘 𑀯𑀢𑁆𑀢𑀩𑁆𑀩𑀸. 𑀢𑀸𑀲𑀩𑁆𑀩𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 𑀕𑀳𑁂𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢𑀭𑀲𑁆𑀲 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀧𑀭𑀺𑀧𑀽𑀭𑁂𑀧𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀘 𑀙𑀙𑀓𑁆𑀓𑀬𑁄𑀚𑀦𑀸 𑀯𑀢𑁆𑀢𑀩𑁆𑀩𑀸. 𑀬𑀢𑁆𑀣 𑀳𑀺 𑀭𑀽𑀦𑁆𑀢𑀻 𑀭𑀫𑁆𑀫𑀡𑀁 𑀖𑀝𑁆𑀝𑁂𑀢𑀺. 𑀢𑀁 𑀘𑀓𑁆𑀔𑀼𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑀢𑁆𑀣 𑀖𑀝𑁆𑀝𑀺𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀭𑀸𑀦𑀺 𑀧𑀦 𑀆𑀯𑀚𑁆𑀚𑀦𑀸𑀤𑀻𑀦𑀺 𑀫𑀦𑁄 𑀯𑀺𑀜𑁆𑀜𑀸𑀡𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀢𑀻𑀢𑀸𑀦𑀦𑁆𑀢𑀭𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑀫𑁂𑀯𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭 𑀫𑀦𑁄𑀤𑁆𑀯𑀸𑀭𑀸𑀦𑀺 𑀲𑀩𑁆𑀩𑁂𑀲𑀁𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀤𑁆𑀯𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺. 𑀅𑀬𑀜𑁆𑀘 𑀯𑀻𑀣𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀻𑀢𑀺𑀘 𑀯𑀼𑀘𑁆𑀘𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀁 𑀅𑀢𑀺𑀓𑁆𑀓𑀫𑁆𑀫 𑀖𑀝𑁆𑀝𑀦𑀲𑀫𑀢𑁆𑀣𑁂 𑀅𑀢𑀺𑀩𑀮𑀯𑀸 𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡 𑀯𑀻𑀣𑀻𑀢𑀺𑀘 𑀯𑀼𑀘𑁆𑀘𑀢𑀻𑀢𑀺. 𑀏𑀢𑁆𑀣𑀘 𑀬𑀢𑁆𑀢𑀓𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀦𑀺 𑀘𑀓𑁆𑀔𑀼𑀧𑀣𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀢𑀢𑁆𑀢𑀓𑀸𑀦𑀺 𑀞𑀺𑀢𑀺𑀧𑁆𑀧𑀢𑁆𑀢𑁂𑀲𑀼 𑀧𑀼𑀩𑁆𑀩𑀸𑀧𑀭𑀪𑀽𑀢𑁂𑀲𑀼 𑀏𑀓𑀽𑀦 𑀧𑀜𑁆𑀜𑀸𑀲𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀔𑀼𑀧𑀲𑀸𑀤𑁂𑀲𑀼 𑀓𑀺𑀲𑁆𑀫𑀺𑀁𑀘𑀺 𑀦𑀖𑀝𑁆𑀝𑁂𑀦𑁆𑀢𑀻𑀢𑀺 𑀦𑀯𑀢𑁆𑀢𑀩𑁆𑀩𑀸𑀦𑀺. 𑀢𑁂𑀲𑀼 𑀧𑀦 𑀬𑀤𑁂𑀯 𑀏𑀓𑀁 𑀘𑀓𑁆𑀔𑀼 𑀇𑀫𑀺𑀲𑁆𑀲𑀸 𑀯𑀻𑀣𑀺𑀬𑀸 𑀬𑀣𑀸𑀭𑀳𑀁 𑀯𑀢𑁆𑀣𑀼𑀪𑀸𑀯𑀁 𑀤𑁆𑀯𑀸𑀭𑀪𑀸𑀯𑀜𑁆𑀘 𑀲𑀸𑀥𑁂𑀢𑀺. 𑀬𑀢𑁆𑀣𑀘 𑀖𑀝𑁆𑀝𑀺𑀢𑀁 𑀭𑀽𑀧𑀁 𑀆𑀭𑀩𑁆𑀪 𑀅𑀬𑀁 𑀯𑀻𑀣𑀺 𑀧𑀯𑀢𑁆𑀢𑀢𑀺. 𑀏𑀢𑀤𑁂𑀯 𑀓𑀺𑀘𑁆𑀘 𑀲𑀸𑀥𑀦𑀁 𑀦𑀸𑀫 𑀳𑁄𑀢𑀺. 𑀬𑀁 𑀫𑀚𑁆𑀛𑀺𑀫𑀸𑀬𑀼𑀓𑀦𑁆𑀢𑀺 𑀯𑀤𑀦𑁆𑀢𑀺, 𑀇𑀢𑀭𑀸𑀦𑀺 𑀧𑀦 𑀫𑁄𑀖 𑀯𑀢𑁆𑀣𑀽𑀦𑀺𑀦𑀸𑀫 𑀳𑁄𑀦𑁆𑀢𑀺, 𑀬𑀸𑀦𑀺𑀫𑀦𑁆𑀤𑀸𑀬𑀼𑀓𑀸𑀦𑀻𑀢𑀺𑀅𑀫𑀦𑁆𑀤𑀸𑀬𑀼𑀓𑀸𑀦𑀻𑀢𑀺𑀘 𑀯𑀤𑀦𑁆𑀢𑀺. 𑀢𑀸𑀦𑀺𑀧𑀦 𑀬𑀣𑀸𑀯𑀼𑀢𑁆𑀢 𑀓𑀺𑀘𑁆𑀘 𑀲𑀸𑀥𑀦𑀢𑁄 𑀧𑀼𑀭𑀺𑀫𑀸𑀦𑀺 𑀧𑀘𑁆𑀙𑀺𑀫𑀸𑀦𑀻𑀢𑀺 𑀤𑀼𑀯𑀺𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀤𑀼𑀪𑀬𑀸𑀦𑀺𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀞𑀺𑀢𑀺𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀅𑀯𑀲𑁂𑀲𑀸𑀦𑀺 𑀧𑀦 𑀢𑀢𑁄 𑀧𑀼𑀭𑀺𑀫𑀢𑀭𑀸𑀦𑀺 𑀧𑀘𑁆𑀙𑀺𑀫𑀓𑀭𑀸𑀦𑀺𑀘 𑀮𑀤𑁆𑀥𑀖𑀝𑁆𑀝𑀦𑀸𑀦𑀺𑀧𑀺 𑀯𑀢𑁆𑀣𑀼𑀤𑁆𑀯𑀸𑀭𑀓𑀺𑀘𑁆𑀘𑀲𑀺𑀤𑁆𑀥𑀺𑀪𑀸𑀯𑁂 𑀅𑀦𑀸𑀲𑀗𑁆𑀓𑀺𑀢𑀩𑁆𑀩𑀢𑁆𑀢𑀸 𑀇𑀥 𑀦𑀕𑀳𑀺𑀢𑀸𑀦𑀻𑀢𑀺. 𑀏𑀢𑁆𑀣 𑀲𑀺𑀬𑀸 𑀇𑀫𑀸𑀬 𑀯𑀻𑀣𑀺𑀬𑀸 𑀉𑀧𑁆𑀧𑀢𑁆𑀢𑀺𑀲𑀫𑀬𑁂 𑀲𑁄 𑀧𑀼𑀕𑁆𑀕𑀮𑁄 𑀅𑀳𑀁 𑀇𑀤𑀁 𑀦𑀸𑀫 𑀧𑀲𑁆𑀲𑀸𑀫𑀻𑀢𑀺 𑀚𑀸𑀦𑀸𑀢𑀺, 𑀦 𑀚𑀸𑀦𑀸𑀢𑀻𑀢𑀺. 𑀦𑀚𑀸𑀦𑀸𑀢𑀺. 𑀓𑀤𑀸 𑀧𑀦 𑀚𑀸𑀦𑀸𑀢𑀻𑀢𑀺. 𑀲𑀮𑁆𑀮𑀓𑁆𑀔𑀡𑀯𑀻𑀣𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬. 𑀢𑀣𑀸 𑀳𑀺 𑀲𑀩𑁆𑀩𑀧𑀣𑀫𑀁 𑀘𑀓𑁆𑀔𑀼𑀤𑁆𑀯𑀸𑀭𑀯𑀻𑀣𑀺 𑀧𑀯𑀢𑁆𑀢𑀢𑀺. 𑀢𑀢𑁄 𑀢𑀤𑀦𑀼𑀯𑀢𑁆𑀢𑀺𑀓𑀸 𑀫𑀦𑁄𑀤𑁆𑀯𑀸𑀭𑀯𑀻𑀣𑀺. 𑀢𑀢𑁄 𑀲𑀫𑀼𑀤𑀸𑀬𑀕𑀸𑀳𑀺𑀓𑀸. 𑀢𑀢𑁄 𑀯𑀡𑁆𑀡𑀲𑀮𑁆𑀮𑀓𑁆𑀔𑀡𑀸. 𑀢𑀢𑁄 𑀯𑀢𑁆𑀣𑀼𑀕𑀸𑀳𑀺𑀢𑀸. 𑀢𑀢𑁄 𑀯𑀢𑁆𑀣𑀼𑀲𑀮𑁆𑀮𑀓𑁆𑀔𑀡𑀸 𑀢𑀢𑁄 𑀦𑀸𑀫𑀕𑀸𑀳𑀺𑀓𑀸. 𑀢𑀢𑁄 𑀦𑀸𑀫𑀲𑀮𑁆𑀮𑀓𑁆𑀔𑀡𑀸𑀢𑀺. 𑀢𑀢𑁆𑀣 𑀯𑀡𑁆𑀡𑀲𑀮𑁆𑀮𑀓𑁆𑀔𑀡𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 𑀅𑀳𑀁 𑀦𑀻𑀮𑀯𑀡𑁆𑀡𑀁 𑀧𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀯𑀡𑁆𑀡𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀯𑀢𑁆𑀣𑀼𑀲𑀮𑁆𑀮𑀓𑁆𑀔𑀡𑀸𑀬 𑀲𑀡𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀦𑀸𑀫 𑀲𑀮𑁆𑀮𑀓𑁆𑀔𑀡𑀸𑀬 𑀦𑀸𑀫𑀁 𑀲𑀮𑁆𑀮𑀓𑁆𑀔𑁂𑀢𑀻𑀢𑀺. 𑀇𑀢𑀺 𑀢𑀁𑀢𑀁 𑀲𑀮𑁆𑀮𑀓𑁆𑀔𑀡𑀯𑀻𑀣𑀺 𑀬𑀸 𑀧𑀯𑀢𑁆𑀢𑀫𑀸𑀦𑀸𑀬𑀏𑀯 𑀢𑀁𑀢𑀁𑀧𑀲𑁆𑀲𑀸𑀫𑀻𑀢𑀺 𑀚𑀸𑀦𑀸𑀢𑀻𑀢𑀺. 𑀏𑀢𑁆𑀣𑀘 𑀅𑀮𑀸𑀢𑀘𑀓𑁆𑀓𑀲𑁆𑀲 𑀕𑀸𑀳𑀺𑀓𑀸𑀯𑀺𑀬 𑀧𑀼𑀭𑀺𑀫𑀸𑀳𑀺 𑀤𑁆𑀯𑀻𑀳𑀺 𑀯𑀻𑀣𑀻𑀳𑀺 𑀧𑀼𑀦𑀧𑁆𑀧𑀼𑀦𑀁 𑀕𑀳𑀺𑀢𑀸𑀦𑀁 𑀭𑀽𑀧𑀸𑀦𑀁 𑀲𑀫𑀼𑀤𑀸𑀬𑀢𑁄 𑀕𑀸𑀳𑀺𑀓𑀸 𑀢𑀢𑀻𑀬𑀸 𑀫𑀦𑁄𑀤𑁆𑀯𑀸𑀭𑀯𑀻𑀣𑀺 𑀲𑀫𑀼𑀤𑀸𑀬 𑀕𑀸𑀳𑀺𑀓𑀸𑀦𑀸𑀫, 𑀦 𑀳𑀺 𑀲𑀫𑀼𑀤𑀸𑀬𑀕𑀳𑀡𑁂𑀦 𑀯𑀺𑀦𑀸 𑀧𑀭𑀺𑀩𑁆𑀬𑀢𑁆𑀢𑀯𑀡𑁆𑀡𑀕𑀳𑀡𑀁 𑀲𑀫𑁆𑀪𑀯𑀢𑀻𑀢𑀺. 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑀸 𑀧𑀦 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑀸 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀻𑀢𑀤𑁆𑀯𑀢𑁆𑀢𑀺𑀘𑀺𑀢𑁆𑀢𑀓𑁆𑀔𑀡𑀺𑀓𑀁. 𑀬𑀲𑁆𑀲 𑀳𑀺 𑀤𑁆𑀯𑁂𑀯𑀸 𑀢𑀻𑀡𑀺𑀯𑀸 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀸𑀯 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑀸 𑀧𑀯𑀢𑁆𑀢𑀺𑀢𑀼𑀁 𑀦𑀧𑁆𑀧𑀳𑁄𑀢𑀺 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀅𑀧𑁆𑀧𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀻𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀸𑀢𑀫𑀸𑀕𑀢𑀦𑁆𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂𑀘 𑀆𑀧𑀸𑀢𑀁 𑀆𑀕𑀢𑀁. 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀢𑀺 𑀏𑀢𑁆𑀣 𑀬𑀲𑁆𑀲 𑀢𑀻𑀡𑀺 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀲 𑀘𑀼𑀤𑁆𑀤𑀲 𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀸𑀯𑀲𑁂 𑀲𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀲𑀢𑁆𑀢𑀫𑀚𑀯𑀦𑁂𑀦 𑀲𑀳𑁂𑀯 𑀦𑀺𑀭𑀼𑀤𑁆𑀥𑀢𑁆𑀢𑀸 𑀢𑀲𑁆𑀫𑀺𑀁 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀦 𑀳𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀘𑀺𑀢𑁆𑀢𑀸𑀦𑀺 𑀥𑀫𑁆𑀫𑀯𑀲𑁂𑀦 𑀯𑀺𑀬 𑀓𑀸𑀮𑀯𑀲𑁂𑀦𑀸𑀧𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀇𑀘𑁆𑀙𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑁂 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺. 𑀢𑀲𑁆𑀫𑀺𑀁 𑀲𑀢𑁆𑀢𑀫𑀚𑀯𑀦𑀢𑁄 𑀧𑀭𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀸𑀯𑀲𑁂𑀲𑁂 𑀆𑀭𑀫𑁆𑀫𑀡𑁂 𑀏𑀓𑁂𑀦 𑀢𑀤𑀸𑀭𑀫𑁆𑀫𑀡𑁂𑀦 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀘𑁂.𑀦. 𑀦 𑀳𑀺 𑀢𑀸𑀤𑀺𑀲𑀁 𑀦𑀺𑀭𑁄𑀥𑀸 𑀲𑀦𑁆𑀦𑀁 𑀆𑀭𑀫𑁆𑀫𑀡𑀁 𑀏𑀓𑀯𑀸𑀭𑀁𑀧𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺. 𑀢𑀣𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀺𑀧𑀸𑀓𑀼𑀤𑁆𑀥𑀸𑀭𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀢𑀤𑀸𑀭𑀫𑁆𑀫𑀡𑀸𑀦𑀺 𑀤𑁆𑀯𑁂𑀢𑀺 𑀤𑁆𑀯𑁂𑀏𑀯 𑀢𑀤𑀸𑀭𑀫𑁆𑀫𑀡 𑀯𑀸𑀭𑀸 𑀆𑀕𑀢𑀸𑀢𑀺.

𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁂𑀯 𑀳𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀧𑀸𑀴𑀺𑀬𑀁 𑀦𑀺𑀬𑀫𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀴𑀺𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀢𑀦𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀲𑀸 𑀦𑀸𑀫 𑀧𑀸𑀴𑀺 𑀅𑀢𑁆𑀣𑀺, 𑀬𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀤𑀸 𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀦𑀺𑀬𑀫𑀺𑀢𑀸𑀢𑀺.

𑀫𑀚𑁆𑀛𑀺𑀫𑀪𑀸𑀡𑀓𑀸𑀧𑀦 𑀢𑀤𑀸𑀭𑀫𑁆𑀫𑀡𑀁 𑀏𑀓𑀁𑀧𑀺 𑀇𑀘𑁆𑀙𑀦𑁆𑀢𑀺. 𑀲𑀗𑁆𑀕𑀳𑀓𑀸𑀭𑁂𑀦 𑀧𑀦 𑀢𑀁 𑀧𑀝𑀺𑀲𑀺𑀤𑁆𑀥𑀦𑁆𑀢𑀺 𑀇𑀥𑀧𑀺 𑀢𑀁 𑀣𑁂𑀭𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀭𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁂 𑀲𑀓𑀺𑀁𑀤𑁆𑀯𑁂𑀯𑀸 𑀢𑀤𑀸𑀮𑀫𑁆𑀩𑀦𑁆𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀏𑀓𑀁𑀧𑀺 𑀇𑀘𑁆𑀙𑀢𑀺𑀬𑁂𑀯. 𑀬𑀣𑀸 𑀳𑀺 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀏𑀓𑀁 𑀧𑀯𑀢𑁆𑀢𑀢𑀺. 𑀢𑀣𑀸 𑀢𑀤𑀸𑀭𑀫𑁆𑀫𑀡𑀁𑀧𑀺 𑀏𑀓𑀁 𑀦𑀧𑀯𑀢𑁆𑀢𑀢𑀻𑀢𑀺 𑀦𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑀜𑁆𑀘 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀕𑀡𑀦𑀸𑀬𑀁 𑀢𑀤𑀸𑀭𑀫𑁆𑀫𑀡𑀸𑀦𑀺 𑀤𑁆𑀯𑁂𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺, 𑀦 𑀦𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀬𑀸𑀯 𑀚𑀯𑀦𑀼𑀧𑁆𑀧𑀸𑀤𑀸𑀧𑀺 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀸𑀢𑀻𑀢𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀳𑀺 𑀆𑀭𑀫𑁆𑀫𑀡𑀲𑁆𑀲 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀙 𑀲𑀢𑁆𑀢 𑀅𑀝𑁆𑀞𑀦𑀯 𑀯𑀸 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀸𑀯 𑀚𑀯𑀦𑀼𑀧𑁆𑀧𑀸𑀤𑀸 𑀧𑀯𑀢𑁆𑀢𑀺𑀢𑀼𑀁 𑀦𑀧𑁆𑀧𑀳𑁄𑀢𑀺. 𑀏𑀯𑀁 𑀅𑀧𑁆𑀧𑀳𑁄𑀦𑁆𑀢𑀁 𑀳𑀼𑀢𑁆𑀯𑀸 𑀅𑀢𑀻𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀚𑀯𑀦𑀁𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀚𑀯𑀦𑀲𑁆𑀲𑀧𑀺 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀅𑀬𑀜𑁆𑀳𑀺 𑀢𑁆𑀯𑀸𑀧𑀘𑁆𑀘𑀬𑁄 𑀪𑀸𑀯𑀢𑁆𑀣𑁂𑀏𑀯 𑀤𑀝𑁆𑀞𑀩𑁆𑀩𑁄. 𑀦 𑀓𑀢𑁆𑀢𑀼𑀅𑀢𑁆𑀣𑁂. 𑀓𑀲𑁆𑀫𑀸. 𑀅𑀢𑁆𑀢𑀦𑁄 𑀧𑀥𑀸𑀦𑀓𑁆𑀭𑀺𑀬𑀸𑀬 𑀲𑀫𑀸𑀦𑀓𑀢𑁆𑀢𑀼𑀓𑀢𑀸𑀬 𑀅𑀪𑀸𑀯𑀢𑁄𑀢𑀺.

[𑁧𑁩𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀳𑁂𑀢𑀼𑀫𑁆𑀳𑀺𑀘𑀸𑀬𑀁 𑀢𑁆𑀯𑀸𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀩𑀸𑀳𑀺𑀭𑀢𑁆𑀣𑀪𑀽𑀢𑁄 𑀳𑁂𑀢𑀼𑀅𑀢𑁆𑀣𑁄 𑀓𑀺𑀢𑀓𑀧𑀘𑁆𑀘𑀬𑀸𑀦𑀁 𑀯𑀺𑀲𑀬𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀇𑀥 𑀪𑀸𑀯𑀢𑁆𑀣𑁂𑀏𑀯 𑀢𑁆𑀯𑀸𑀧𑀘𑁆𑀘𑀬𑁄. 𑀢𑀢𑁄𑀘 𑀳𑁂𑀢𑀼𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦 𑀬𑀸 𑀮𑀓𑁆𑀔𑀡𑁂 𑀳𑁂𑀢𑀼𑀫𑁆𑀳𑀺𑀘𑀫𑀸𑀦𑀦𑁆𑀢𑀧𑀘𑁆𑀘𑀬𑀸𑀦𑀁𑀧𑀺 𑀧𑀯𑀢𑁆𑀢𑀺 𑀓𑀢𑁆𑀣𑀘𑀺 𑀯𑀼𑀢𑁆𑀢𑀸. 𑀲𑀸𑀧𑀺𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺. 𑀦𑀳𑀺 𑀩𑀸𑀳𑀺𑀭𑀢𑁆𑀣𑀪𑀽𑀢𑀸 𑀮𑀓𑁆𑀔𑀡𑀳𑁂𑀢𑀼𑀬𑁄 𑀢𑁂𑀲𑀁 𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀦𑀯𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀲 𑀅𑀯𑀲𑁂𑀲 𑀅𑀝𑁆𑀞𑀘𑀺𑀢𑁆𑀢𑀓𑁆𑀔𑀡𑀸 𑀬𑀼𑀓𑀲𑁆𑀲 𑀤𑀼𑀢𑀻𑀬 𑀯𑁄𑀝𑁆𑀞𑀩𑁆𑀩𑀦𑁂𑀦 𑀲𑀳𑁂𑀯 𑀦𑀺𑀭𑀼𑀤𑁆𑀥𑀢𑁆𑀢𑀸 𑀢𑀲𑁆𑀫𑀺𑀁 𑀚𑀯𑀦𑀁𑀧𑀺 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀬𑀲𑁆𑀲 𑀧𑀦 𑀘𑀢𑁆𑀢𑀸𑀭𑀺.𑀮. 𑀅𑀝𑁆𑀞𑀯𑀸 𑀘𑀺𑀢𑁆𑀢𑀓𑁆𑀔𑀡𑀸𑀦𑀺 𑀅𑀢𑀻𑀢𑀸𑀦𑀺. 𑀢𑀲𑁆𑀫𑀺𑀁 𑀚𑀯𑀦𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁂.𑀦. 𑀅𑀯𑀲𑁂𑀲𑀙𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀚𑀯𑀦𑀜𑁆𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑀼𑀁 𑀧𑀳𑁄𑀦𑀓𑁂 𑀆𑀭𑀫𑁆𑀫𑀡𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺. 𑀧𑀓𑀢𑀺𑀦𑀺𑀬𑀸𑀫𑁂𑀦 𑀚𑀯𑀦𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼 𑀧𑀭𑀫𑀢𑀸𑀬 𑀲𑀫𑁆𑀪𑀯𑀢𑁄𑀢𑀺. 𑀏𑀢𑁆𑀣 𑀧𑀦 𑀬𑀣𑀸 𑀯𑀺𑀲𑀜𑁆𑀜𑀺𑀓𑀸𑀮 𑀫𑀼𑀘𑁆𑀙𑀸𑀓𑀸𑀮 𑀫𑀭𑀡𑀓𑀸𑀮𑁂𑀲𑀼 𑀯𑀢𑁆𑀣𑀼𑀲𑁆𑀲 𑀅𑀯𑀺𑀲𑀤𑀢𑀸𑀬 𑀤𑀼𑀩𑁆𑀩𑀮𑀢𑀸 𑀬𑀘 𑀚𑀯𑀦𑀁 𑀙𑀧𑀜𑁆𑀘𑀯𑀸𑀭𑁂𑀧𑀺 𑀧𑀯𑀢𑁆𑀢𑀢𑀺. 𑀢𑀣𑀸 𑀧𑀓𑀢𑀺𑀓𑀸𑀮𑁂𑀧𑀺 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂 𑀲𑀢𑀺 𑀙𑀧𑀜𑁆𑀘𑀯𑀸𑀭𑁂𑀧𑀺 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺. 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁𑀯𑀸 𑀢𑀺𑀓𑁆𑀔𑀢𑁆𑀢𑀼𑀁𑀯𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑁄𑀝𑁆𑀞𑀩𑁆𑀩𑀦𑁂 𑀞𑀢𑁆𑀯𑀸 𑀏𑀓𑀁𑀯𑀸 𑀤𑁆𑀯𑁂𑀯𑀸 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁄 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀼𑀦 𑀪𑀯𑀗𑁆𑀕𑀁 𑀑𑀢𑀭𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀢𑀢𑁄 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸𑀢𑀺 𑀏𑀢𑁂𑀦 𑀢𑀢𑀻𑀬𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀇𑀢𑀭𑀣𑀸 𑀏𑀓𑀁𑀯𑀸 𑀤𑁆𑀯𑁂𑀯𑀸 𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁄 𑀪𑀯𑀗𑁆𑀕𑀁 𑀑𑀢𑀭𑀢𑀻𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀏𑀓𑀁𑀯𑀸𑀢𑀺 𑀧𑀦 𑀯𑀸𑀘𑀸 𑀲𑀺𑀮𑀺𑀝𑁆𑀞𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸 𑀤𑀺𑀭𑀢𑁆𑀢 𑀢𑀺𑀭𑀢𑁆𑀢𑀁𑀢𑀺. 𑀅𑀣𑀯𑀸, 𑀢𑀢𑁄𑀢𑀺 𑀏𑀓𑀘𑀺𑀢𑁆𑀢𑀢𑁄𑀯𑀸 𑀤𑁆𑀯𑀺𑀘𑀺𑀢𑁆𑀢𑀢𑁄𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀣𑀫𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀤𑀼𑀢𑀻𑀬𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺. 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸𑀢𑀺 𑀇𑀤𑀁 𑀧𑀦 𑀉𑀧𑀘𑀸𑀭𑀯𑀘𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀢𑀸 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀸𑀢𑀺. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀦𑁂𑀢𑁆𑀣 𑀯𑁄𑀝𑁆𑀞𑀩𑁆𑀩𑀦𑀢𑁄 𑀧𑀭𑀁 𑀘𑀢𑀼𑀧𑀜𑁆𑀘 𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑁂𑀲𑁂 𑀆𑀭𑀫𑁆𑀫𑀡𑁂 𑀘𑀢𑀼𑀧𑀜𑁆𑀘𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀏𑀯 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀯𑀸𑀭𑁄 𑀇𑀘𑁆𑀙𑀺𑀢𑁄. 𑀦 𑀯𑁄𑀝𑁆𑀞𑀩𑁆𑀩𑀦 𑀧𑀭𑀺𑀬𑁄𑀲𑀸𑀦𑀯𑀲𑁂𑀦. 𑀧𑀝𑁆𑀞𑀸𑀦𑁂𑀳𑀺 𑀪𑀯𑀗𑁆𑀕𑀁 𑀆𑀯𑀚𑁆𑀚𑀦𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀢𑁆𑀯𑁂𑀯𑀯𑀼𑀢𑁆𑀢𑁄. 𑀦 𑀧𑀦 𑀯𑀼𑀢𑁆𑀢𑁄 𑀆𑀯𑀚𑁆𑀚𑀦𑀸 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺. 𑀬𑀣𑀸 𑀘 𑀫𑀼𑀘𑁆𑀙𑀸𑀫𑀭𑀡𑀓𑀸𑀮𑁂𑀲𑀼 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑀸𑀬 𑀙 𑀧𑀜𑁆𑀘𑀚𑀯𑀦𑀯𑀸𑀭𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀣𑀸 𑀇𑀥𑀧𑀺 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀏𑀢𑁆𑀣 𑀘 𑀲𑀦𑁆𑀢𑀻𑀭𑀡𑀢𑁄 𑀧𑀭𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀸 𑀯𑀲𑁂𑀲𑁂 𑀆𑀭𑀫𑁆𑀫𑀡𑁂 𑀏𑀓𑀁 𑀯𑁄𑀝𑁆𑀞𑀩𑁆𑀩𑀦𑀁 𑀤𑁆𑀯𑀺𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑁂𑀲𑁂 𑀤𑁆𑀯𑁂 𑀢𑀤𑀼𑀢𑁆𑀢𑀭𑀺 𑀢𑀻𑀡𑀻𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀏𑀢𑀭𑀳𑀺 𑀧𑀦 𑀤𑁆𑀯𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀸 𑀙𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀯𑀻𑀣𑀺𑀬𑁄𑀢𑀺 𑀯𑁄𑀝𑁆𑀞𑀩𑁆𑀩𑀦𑀺𑀓𑀸 𑀧𑀜𑁆𑀘𑀸𑀢𑀺 𑀬𑁄𑀚𑁂𑀲𑀼𑀁. 𑀏𑀯𑀁 𑀲𑀦𑁆𑀢𑁂 𑀓𑀻𑀤𑀺𑀲𑁂 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀤𑁆𑀯𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀸, 𑀓𑀻𑀤𑀺𑀲𑁂 𑀢𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀸𑀢𑀺 𑀯𑀺𑀘𑀸𑀭𑁂𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺. 𑀬𑀁 𑀧𑀦 𑀆𑀭𑀫𑁆𑀫𑀡𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁𑀯𑁄𑀝𑁆𑀞𑀩𑁆𑀩𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀳𑁄𑀦𑀓𑀁 𑀳𑁄𑀢𑀺. 𑀢𑀁 𑀆𑀯𑀚𑁆𑀚𑀦𑀧𑁆𑀧𑀢𑁆𑀢𑀺𑀬𑀸𑀧𑀺 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀪𑀯𑀗𑁆𑀕𑀘𑀮𑀦𑀫𑁂𑀯 𑀳𑁄𑀢𑀺. 𑀦𑀢𑁆𑀣𑀺 𑀯𑀻𑀣𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺. 𑀢𑀢𑁆𑀣 𑀪𑀯𑀗𑁆𑀕𑀘𑀮𑀦𑀫𑁂𑀯𑀸𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑀲𑁆𑀲 𑀘𑀮𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀇𑀘𑁆𑀘𑁂𑀯𑀁 𑀘𑀓𑁆𑀔𑀼𑀤𑁆𑀯𑀸𑀭𑁂𑀢𑀺 𑀇𑀢𑀺 𑀏𑀯𑀁 𑀬𑀤𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀓𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲 𑀅𑀧𑀸𑀢𑀫𑀸𑀕𑀘𑁆𑀙𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀯𑀲𑁂𑀦 𑀘𑀢𑀼𑀥𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀘𑀸𑀢𑀺𑀬𑁄𑀚𑀦𑀸. 𑀲𑀩𑁆𑀩𑀣𑀸𑀧𑀺 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁𑀧𑀺 𑀆𑀧𑀸𑀢𑀸𑀕𑀢𑀫𑀢𑁆𑀢𑁂𑀦 𑀫𑁄𑀖𑀯𑀸𑀭𑀲𑁆𑀲 𑀆𑀭𑀫𑁆𑀫𑀡𑀁𑀦𑀸𑀫 𑀳𑁄𑀢𑀺. 𑀦 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦. 𑀇𑀢𑀭𑀸𑀦𑀺 𑀧𑀦 𑀉𑀪𑀬𑀣𑀸𑀧𑀺 𑀇𑀢𑀭𑁂𑀲𑀁 𑀯𑀸𑀭𑀸𑀦𑀁 𑀆𑀭𑀫𑁆𑀫𑀡𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀬𑀣𑀸𑀓𑁆𑀓𑀫𑀁 𑀆𑀭𑀫𑁆𑀫𑀡𑀪𑀽𑀢𑀸𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀆𑀭𑀫𑁆𑀫𑀡𑀪𑀽𑀢𑀸𑀢𑀺 𑀇𑀫𑀲𑁆𑀲 𑀅𑀢𑀺𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀧𑀘𑁆𑀘𑀬𑀪𑀽𑀢𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀜𑁆𑀳𑀺 𑀫𑁄𑀖𑀯𑀸𑀭 𑀧𑀜𑁆𑀜𑀸 𑀧𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺.

𑀧𑀜𑁆𑀘𑀤𑁆𑀯𑀸𑀭𑁂𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀁 𑀓𑀺𑀘𑁆𑀘𑀯𑀲𑁂𑀦 𑀲𑀢𑁆𑀢𑁂𑀯. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀔𑀡𑀯𑀲𑁂𑀦 𑀘𑀢𑀼𑀤𑁆𑀤𑀲. 𑀯𑀺𑀢𑁆𑀣𑀸𑀭𑀸 𑀘𑀺𑀢𑁆𑀢𑀲𑀭𑀽𑀧𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀧𑀜𑁆𑀜𑀸𑀲𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑁂.

𑁧𑁩𑁭. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀆𑀭𑀫𑁆𑀫𑀡𑀥𑀫𑁆𑀫𑀸 𑀧𑀭𑀺𑀢𑁆𑀢𑀔𑀡𑀸𑀧𑀺 𑀅𑀢𑀻𑀢𑀸𑀦𑀸𑀕𑀢𑀸𑀧𑀺 𑀓𑀸𑀮𑀯𑀺𑀫𑀼𑀢𑁆𑀢𑀸𑀧𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀢𑀢𑁆𑀣 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺𑀯𑀸 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀸𑀦𑀺𑀯𑀸 𑀞𑀺𑀢𑀺𑀧𑁆𑀧𑀢𑁆𑀢𑀸𑀦𑁂𑀯 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀻𑀢𑀺 𑀇𑀤𑀁 𑀯𑀺𑀥𑀸𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑁂𑀧𑀦 𑀬𑀤𑀺𑀯𑀺𑀪𑀽𑀢𑀫𑀸𑀮𑀫𑁆𑀩𑀡𑀁 𑀆𑀧𑀸𑀢𑀫𑀸𑀕𑀘𑁆𑀙𑀢𑀻𑀢𑀺. 𑀢𑀢𑁆𑀣 𑀫𑀦𑁄𑀤𑁆𑀯𑀸𑀭𑁂𑀢𑀺 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂. 𑀘𑀓𑁆𑀔𑀸𑀤𑀻𑀲𑀼 𑀳𑀺 𑀖𑀝𑁆𑀝𑀦𑁂𑀦 𑀲𑀳𑁂𑀯 𑀬𑀢𑁆𑀣 𑀅𑀧𑀸𑀢𑀫𑀸𑀕𑀘𑁆𑀙𑀢𑀺. 𑀢𑀁 𑀫𑀺𑀲𑁆𑀲𑀓𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀲𑀼𑀤𑁆𑀥𑀫𑁂𑀯𑀸 𑀥𑀺𑀧𑁆𑀧𑁂𑀢𑀦𑁆𑀢𑀺. 𑀢𑀁𑀧𑀺 𑀧𑀜𑁆𑀘𑀤𑁆𑀯𑀸𑀭𑀸𑀦𑀼𑀩𑀦𑁆𑀥𑀓𑀁 𑀯𑀺𑀲𑀼𑀁 𑀲𑀺𑀤𑁆𑀥𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀖𑀡𑁆𑀟𑁂 𑀤𑀡𑁆𑀟𑀓𑁂𑀦 𑀏𑀓𑀯𑀸𑀭𑀁 𑀧𑀳𑀝𑁂 𑀖𑀡𑁆𑀟𑀲𑀭𑀻𑀭𑀪𑀽𑀢𑀸 𑀭𑀽𑀧 𑀓𑀮𑀸𑀧𑀸 𑀘𑀺𑀭𑀁𑀧𑀺 𑀓𑀸𑀮𑀁 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑁂𑀢𑁆𑀯𑀸 𑀅𑀦𑀼𑀭𑀯𑀲𑀤𑁆𑀤𑀲𑀦𑁆𑀢𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀺. 𑀢𑀣𑀸 𑀧𑀜𑁆𑀘𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑁂𑀦 𑀏𑀓𑀯𑀸𑀭𑀁 𑀖𑀝𑁆𑀝𑀺𑀢𑁂 𑀧𑀜𑁆𑀘 𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑀸 𑀦𑀺𑀭𑀼𑀤𑁆𑀥𑀸𑀬𑀧𑀺 𑀅𑀢𑀻𑀢𑀁 𑀧𑀜𑁆𑀘𑀸𑀮𑀫𑁆𑀩𑀡𑀁 𑀫𑀦𑁄𑀤𑁆𑀯𑀸𑀭𑁂 𑀬𑀣𑀸 𑀧𑀸𑀢𑀸𑀕𑀢𑀫𑁂𑀯 𑀳𑀼𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀸𑀦𑀺𑀧𑀺 𑀫𑀦𑁄𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢 𑀲𑀦𑁆𑀢𑀸𑀦𑀸𑀦𑀺 𑀧𑀯𑀢𑁆𑀢𑁂𑀢𑀺𑀬𑁂𑀯. 𑀢𑁂𑀲𑀁 𑀧𑀦 𑀤𑁆𑀯𑀸𑀭𑀪𑀽𑀢𑀁 𑀪𑀯𑀗𑁆𑀕𑀲𑀦𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀓𑀁𑀦𑀸𑀫 𑀳𑁄𑀢𑀺. 𑀢𑀸𑀦𑀺𑀘 𑀘𑀺𑀢𑁆𑀢𑀸𑀦𑀺 𑀅𑀦𑀼𑀩𑀦𑁆𑀥𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀬𑀢𑁆𑀣 𑀧𑀦 𑀧𑀜𑁆𑀘𑀤𑁆𑀯𑀸𑀭𑀖𑀝𑁆𑀝𑀦𑀸 𑀦𑀼𑀩𑀦𑁆𑀥𑀪𑀸𑀯𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀢𑀣𑀸 𑀢𑀣𑀸 𑀙𑀴𑀸𑀭𑀫𑁆𑀫𑀡𑀥𑀫𑁆𑀫𑀸 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀁 𑀯𑀺𑀲𑀼𑀁 𑀲𑀺𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀓𑀣𑀁 𑀧𑀦 𑀢𑀲𑁆𑀫𑀺𑀁 𑀯𑀺𑀲𑀼𑀁 𑀲𑀺𑀤𑁆𑀥𑁂 𑀫𑀦𑁄𑀤𑁆𑀯𑀸𑀭𑁂 𑀆𑀭𑀫𑁆𑀫𑀡 𑀥𑀫𑁆𑀫𑀸 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺. 𑀯𑀼𑀘𑁆𑀘𑀢𑁂. 𑀤𑀺𑀝𑁆𑀞𑀢𑁄 𑀤𑀺𑀝𑁆𑀞𑀲𑀫𑁆𑀩𑀦𑁆𑀥𑀢𑁄 𑀲𑀼𑀢𑀢𑁄 𑀲𑀼𑀢𑀲𑀫𑁆𑀩𑀦𑁆𑀥𑀢𑁄 𑀲𑀤𑁆𑀥𑀸𑀬 𑀭𑀼𑀘𑀺𑀬𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀔𑀦𑁆𑀢𑀺𑀬𑀸 𑀦𑀸𑀦𑀸𑀓𑀫𑁆𑀫𑀩𑀮𑁂𑀦 𑀦𑀸𑀦𑀸𑀇𑀤𑁆𑀥𑀺𑀩𑀮𑁂𑀦 𑀥𑀸𑀢𑀼𑀓𑁆𑀔𑁄𑀢 𑀯𑀲𑁂𑀦 𑀤𑁂𑀯𑀢𑁄𑀧𑀲𑀁𑀳𑀸𑀭𑀯𑀲𑁂𑀦 𑀅𑀦𑀼𑀩𑁄𑀥𑀯𑀲𑁂𑀦 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀁𑀦𑀸𑀫 𑀧𑀼𑀩𑁆𑀩𑁂 𑀧𑀜𑁆𑀘𑀳𑀺𑀤𑁆𑀯𑀸𑀭𑁂𑀳𑀺 𑀕𑀳𑀺𑀢𑀁 𑀧𑀜𑁆𑀘𑀸𑀮𑀫𑁆𑀩𑀡𑀁. 𑀢𑀁𑀧𑀺 𑀓𑀸𑀮𑀦𑁆𑀢𑀭𑁂 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀲𑀼𑀤𑁆𑀥𑁂 𑀫𑀦𑁄𑀤𑁆𑀯𑀸𑀭𑁂 𑀆𑀧𑀸𑀢𑀁 𑀆𑀕𑀘𑁆𑀙𑀢𑀺𑀬𑁂𑀯. 𑀤𑀺𑀝𑁆𑀞𑀲𑀫𑁆𑀩𑀦𑁆𑀥𑀁𑀦𑀸𑀫 𑀤𑀺𑀝𑁆𑀞𑀲𑀤𑀺𑀲𑀁 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀳𑀺 𑀓𑀺𑀜𑁆𑀘𑀺 𑀤𑀺𑀲𑁆𑀯𑀸 𑀅𑀜𑁆𑀜𑀁 𑀬𑀁𑀓𑀺𑀜𑁆𑀘𑀺 𑀅𑀦𑀼𑀫𑀸𑀦𑁂𑀦𑁆𑀢𑀲𑁆𑀲 𑀅𑀤𑀺𑀝𑁆𑀞𑀁𑀧𑀺 𑀢𑀁𑀲𑀤𑀺𑀲𑀁 𑀅𑀢𑀻𑀢𑀁𑀧𑀺 𑀅𑀦𑀸𑀕𑀢𑀁𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀧𑀺 𑀩𑀳𑀼𑀆𑀧𑀸𑀢𑀁 𑀆𑀕𑀘𑁆𑀙𑀢𑀺𑀬𑁂𑀯. 𑀲𑀼𑀢𑀁𑀦𑀸𑀫 𑀧𑀭𑀢𑁄 𑀲𑀼𑀢𑁆𑀯𑀸 𑀕𑀳𑀺𑀢𑀁 𑀙𑀴𑀸𑀭𑀫𑁆𑀫𑀡𑀁. 𑀢𑀁 𑀧𑀦 𑀫𑀳𑀸𑀯𑀺𑀲𑀬𑀁 𑀳𑁄𑀢𑀺. 𑀲𑀩𑁆𑀩𑀜𑁆𑀜𑀼𑀤𑁂𑀲𑀦𑀁 𑀲𑀼𑀢𑁆𑀯𑀸 𑀕𑀳𑀺𑀢𑀁 𑀦 𑀓𑀺𑀜𑁆𑀘𑀺 𑀅𑀦𑀸𑀭𑀫𑁆𑀫𑀡𑀁𑀦𑀸𑀫 𑀅𑀢𑁆𑀣𑀻𑀢𑀺. 𑀲𑀼𑀢𑀲𑀫𑁆𑀩𑀦𑁆𑀥𑀁𑀦𑀸𑀫 𑀲𑀼𑀢𑀲𑀤𑀺𑀲𑀁. 𑀲𑀤𑁆𑀥𑀸𑀦𑀸𑀫 𑀧𑀭𑀲𑁆𑀲 𑀲𑀤𑁆𑀤𑀳𑀦𑀸. 𑀭𑀼𑀘𑀺𑀦𑀸𑀫 𑀅𑀢𑁆𑀢𑀦𑁄 𑀫𑀢𑀺. 𑀆𑀓𑀸𑀭 𑀧𑀭𑀺𑀯𑀺𑀢𑀓𑁆𑀓𑁄 𑀦𑀸𑀫 𑀅𑀢𑁆𑀣𑀘𑁆𑀙𑀸𑀬𑀁 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀁 𑀓𑀸𑀭𑀡𑀘𑁆𑀙𑀸𑀬𑀜𑁆𑀘 𑀦𑀺𑀲𑁆𑀲𑀸𑀬 𑀢𑀣𑀸 𑀢𑀣𑀸 𑀧𑀭𑀺𑀯𑀺𑀢𑀓𑁆𑀓𑀦𑀁. 𑀤𑀺𑀝𑁆𑀞𑀺𑀦𑀺𑀚𑁆𑀚𑀸𑀦𑀔𑀦𑁆𑀢𑀺𑀦𑀸𑀫 𑀧𑀜𑁆𑀜𑀸𑀬𑀯𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸𑀯𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀏𑀯𑀫𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀧𑀸𑀧𑁂𑀢𑁆𑀯𑀸 𑀕𑀳𑀡𑀁. 𑀲𑁂𑀲𑀁 𑀧𑀸𑀓𑀝𑀫𑁂𑀯. 𑀏𑀢𑁆𑀣𑀘 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬 𑀧𑀘𑁆𑀘𑀬𑀪𑀸𑀯𑁄𑀦𑀸𑀫 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀫𑀳𑀸𑀯𑀺𑀧𑁆𑀨𑀸𑀭𑁄 𑀳𑁄𑀢𑀺. 𑀲𑀓𑀺𑀁𑀧𑀺 𑀆𑀭𑀫𑁆𑀫𑀡𑀁 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀲𑀢𑁂𑀧𑀺 𑀯𑀲𑁆𑀲𑀲𑀳𑀲𑁆𑀲𑁂𑀧𑀺 𑀪𑀯𑀦𑁆𑀢𑀭𑁂𑀧𑀺 𑀢𑀁𑀆𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀪𑀯𑀗𑁆𑀕 𑀘𑀮𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀺𑀢𑁆𑀢𑀜𑁆𑀘𑀦𑀸𑀫 𑀤𑀺𑀝𑁆𑀞𑀸𑀤𑀻𑀳𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀳𑀺 𑀲𑀁𑀯𑀤𑁆𑀥𑀺𑀢𑀁 𑀫𑀳𑀸𑀯𑀺𑀧𑁆𑀨𑀸𑀭𑀁 𑀳𑁄𑀢𑀺. 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀮𑀪𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀔𑀡𑁂 𑀅𑀦𑁂𑀓𑀲𑀳𑀲𑁆𑀲𑁂𑀲𑀼𑀧𑀺 𑀤𑀺𑀝𑁆𑀞𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀨𑀭𑀫𑀸𑀦𑀁 𑀧𑀯𑀢𑁆𑀢𑀢𑀺. 𑀢𑁂𑀳𑀺𑀘 𑀓𑀸𑀭𑀡𑁂𑀳𑀺 𑀦𑀺𑀘𑁆𑀘𑀁 𑀘𑁄𑀤𑀻𑀬𑀫𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀸𑀬𑀕𑁂𑀮𑀜𑁆𑀜𑀸𑀤𑀺𑀓𑁂 𑀘𑀺𑀢𑁆𑀢𑀤𑀼𑀩𑁆𑀩𑀮𑀧𑀘𑁆𑀘𑀬𑁂 𑀅𑀲𑀢𑀺 𑀦𑀺𑀘𑁆𑀘𑀓𑀸𑀮𑀁𑀧𑀺 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀢𑀼𑀁 𑀅𑀚𑁆𑀛𑀸𑀲𑀬𑀬𑀼𑀢𑁆𑀢𑀁 𑀳𑁄𑀢𑀺. 𑀦 𑀳𑀺 𑀘𑀺𑀢𑁆𑀢𑀁𑀦𑀸𑀫 𑀅𑀯𑀺𑀪𑀽𑀢𑁂 𑀆𑀭𑀫𑁆𑀫𑀡𑁂 𑀭𑀫𑀢𑀺. 𑀯𑀺𑀪𑀽𑀢𑁂𑀏𑀯 𑀭𑀫𑀢𑀺. 𑀢𑀲𑁆𑀫𑀸 𑀪𑀯𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀫𑀦𑀲𑀺𑀓𑀸𑀭𑁄 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑀁 𑀘𑀸𑀮𑁂𑀢𑁆𑀯𑀸 𑀮𑀤𑁆𑀥𑀧𑀘𑁆𑀘𑀬𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑀦𑀁 𑀦𑀺𑀬𑁄𑀚𑁂𑀢𑀺𑀬𑁂𑀯. 𑀢𑀤𑀸 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀢𑀤𑀪𑀺𑀦𑀺𑀦𑁆𑀦𑀸𑀓𑀸𑀭 𑀧𑀯𑀢𑁆𑀢𑀫𑀦𑀲𑀺𑀓𑀸𑀭 𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀪𑀯𑀗𑁆𑀕 𑀘𑀺𑀢𑁆𑀢𑀲𑁆𑀲 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀦 𑀳𑀺 𑀅𑀜𑁆𑀜𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀭𑁂 𑀅𑀪𑀺𑀦𑀺𑀦𑁆𑀦𑀸𑀓𑀸𑀭𑁄𑀦𑀸𑀫 𑀦𑀢𑁆𑀣𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀢𑀤𑀸𑀭𑀫𑁆𑀫𑀡𑀧𑀸𑀓𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀤𑀁 𑀓𑀸𑀫𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀭𑀽𑀧𑀸𑀭𑀽𑀧𑀲𑀢𑁆𑀢𑀸𑀦𑀁 𑀧𑀦 𑀯𑀺𑀪𑀽𑀢𑀸𑀭𑀫𑁆𑀫𑀡𑁂𑀧𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄 𑀦𑀢𑁆𑀣𑀺𑀬𑁂𑀯. 𑀬𑀣𑀸 𑀘𑁂𑀢𑁆𑀣. 𑀏𑀯𑀁 𑀧𑀜𑁆𑀘𑀤𑁆𑀯𑀸𑀭𑁂𑀧𑀺 𑀭𑀽𑀧𑀲𑀢𑁆𑀢𑀸𑀦𑀁 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂𑀲𑀼 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄 𑀦𑀢𑁆𑀣𑀻𑀢𑀺. 𑀅𑀯𑀺𑀪𑀽𑀢𑁂 𑀧𑀦𑀸 𑀮𑀫𑁆𑀩𑀡𑁂 𑀚𑀯𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻𑀢𑀺 𑀇𑀤𑀜𑁆𑀘 𑀉𑀓𑁆𑀓𑀝𑁆𑀞 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀜𑀸𑀡𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀧𑀦 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑁄𑀝𑁆𑀞𑀩𑁆𑀩𑀦𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀅𑀯𑀺𑀪𑀼𑀢𑁂 𑀆𑀮𑀫𑁆𑀩𑀡𑁂 𑀯𑁄𑀝𑁆𑀞𑀩𑁆𑀩𑀦𑀯𑀸𑀭𑁄𑀧𑀺 𑀆𑀕𑀢𑁄. 𑀬𑁄𑀘 𑀧𑀜𑁆𑀘𑀤𑁆𑀯𑀸𑀭𑁂𑀪𑀯𑀗𑁆𑀕𑀘𑀮𑀦𑀫𑀢𑁆𑀢𑀯𑀲𑁂𑀦 𑀫𑁄𑀖𑀯𑀸𑀭𑁄 𑀦𑀸𑀫 𑀘𑀢𑀼𑀢𑁆𑀣𑁄 𑀯𑀸𑀭𑁄 𑀯𑀼𑀢𑁆𑀢𑁄. 𑀲𑁄𑀧𑀺 𑀇𑀥 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀲𑀼𑀤𑁆𑀥𑀫𑀦𑁄𑀤𑁆𑀯𑀸𑀭𑁂𑀧𑀺 𑀳𑀺 𑀆𑀭𑀫𑁆𑀫𑀡𑁂 𑀆𑀧𑀸𑀢𑀫𑀸𑀕𑀢𑁂 𑀯𑀻𑀣𑀺𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀯𑀗𑁆𑀕𑁂 𑀘𑀮𑀺𑀢𑁂 𑀦𑀺𑀯𑀢𑁆𑀢𑀦𑀓𑀯𑀸𑀭𑀸𑀦𑀁 𑀧𑀫𑀸𑀡𑀁 𑀦𑀪𑀯𑀺𑀲𑁆𑀲𑀢𑀺𑀬𑁂𑀯, 𑀯𑀺𑀲𑀬𑁂𑀘 𑀆𑀧𑀸𑀢𑀸𑀕𑀢𑁂 𑀪𑀯𑀗𑁆𑀕𑁂𑀘 𑀘𑀮𑀺𑀢𑁂 𑀲𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀦𑀸𑀫 𑀦 𑀦 𑀳𑁄𑀢𑀻𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀢𑀤𑀸𑀭𑀫𑁆𑀫𑀡 𑀚𑀯𑀦 𑀯𑁄𑀝𑁆𑀞𑀩𑁆𑀩𑀦 𑀫𑁄𑀖𑀯𑀸𑀭 𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀸𑀭𑀸𑀦𑀁 𑀬𑀣𑀸𑀓𑁆𑀓𑀫𑀁 𑀆𑀭𑀡𑀪𑀽𑀢𑀸 𑀯𑀺𑀲𑀬𑀧𑁆𑀧𑀯𑀢𑁆𑀢𑀺 𑀘𑀢𑀼𑀥𑀸 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀢𑀤𑀸𑀭𑀫𑁆𑀫𑀡𑀯𑀸𑀭𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀸 𑀅𑀪𑀺𑀯𑀺𑀪𑀽𑀢𑀸𑀦𑀸𑀫 𑀚𑀯𑀦 𑀯𑀸𑀭𑀲𑁆𑀲 𑀯𑀺𑀪𑀽𑀢𑀸𑀦𑀸𑀫. 𑀯𑁄𑀝𑁆𑀞𑀩𑁆𑀩𑀦𑀯𑀸𑀭𑀲𑁆𑀲 𑀅𑀯𑀺𑀪𑀽𑀢𑀸𑀦𑀸𑀫. 𑀫𑁄𑀖𑀯𑀸𑀭𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀸 𑀅𑀢𑀺𑀅𑀯𑀺𑀪𑀽𑀢𑀸𑀦𑀸𑀫𑀸𑀢𑀺 𑀬𑁄𑀚𑁂𑀢𑀩𑁆𑀩𑀸.

𑀏𑀢𑁆𑀣𑀘 𑀆𑀭𑀫𑁆𑀫𑀡𑀲𑁆𑀲𑀯𑀸 𑀘𑀺𑀢𑁆𑀢𑀲𑁆𑀲𑀯𑀸 𑀅𑀢𑀺𑀩𑀮𑀯𑀢𑀸𑀬 𑀅𑀪𑀺𑀯𑀺𑀪𑀽𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀩𑁆𑀩𑀮𑁂𑀧𑀺 𑀳𑀺 𑀘𑀺𑀢𑁆𑀢𑁂 𑀧𑀣𑀯𑀺𑀧𑀩𑁆𑀩𑀢𑀸𑀤𑀺𑀯𑀲𑁂𑀦 𑀅𑀢𑀺𑀩𑀮𑀯𑀦𑁆𑀢𑀁 𑀆𑀭𑀫𑁆𑀫𑀡𑀁 𑀅𑀢𑀺𑀯𑀺𑀪𑀽𑀢𑀁𑀦𑀸𑀫 𑀳𑁄𑀢𑀺. 𑀅𑀢𑀺𑀩𑀮𑀯𑀦𑁆𑀢𑁂 𑀘 𑀘𑀺𑀢𑁆𑀢𑁂 𑀅𑀢𑀺𑀲𑀼𑀔𑀼𑀫𑀁𑀧𑀺 𑀦𑀺𑀩𑁆𑀩𑀸𑀦𑀁 𑀅𑀢𑀺𑀯𑀺𑀪𑀽𑀢𑀁𑀦𑀸𑀫 𑀳𑁄𑀢𑀻𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀻𑀢𑀺. 𑀯𑀸𑀭𑀪𑁂𑀤𑁄 𑀧𑀦𑁂𑀢𑁆𑀣 𑀅𑀦𑀼𑀩𑀦𑁆𑀥𑀓𑁄, 𑀯𑀺𑀲𑀼𑀁 𑀲𑀺𑀤𑁆𑀥𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀅𑀦𑀼𑀩𑀦𑁆𑀥𑀓𑁄 𑀘𑀓𑁆𑀔𑀼𑀤𑁆𑀯𑀸𑀭𑀸𑀦𑀼𑀩𑀦𑁆𑀥𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀏𑀓𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 𑀅𑀢𑀻𑀢𑀕𑀳𑀡𑀁, 𑀲𑀫𑀼𑀤𑀸𑀬 𑀕𑀳𑀡𑀁, 𑀯𑀢𑁆𑀣𑀼𑀕𑀳𑀡𑀁, 𑀦𑀸𑀫𑀕𑀳𑀡𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀯𑀸𑀭𑀸. 𑀢𑁂𑀲𑀼𑀘 𑀢𑀤𑀸𑀭𑀫𑁆𑀫𑀡𑀯𑀸𑀭𑀸𑀤𑀬𑁄 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀲𑀼𑀁 𑀲𑀺𑀤𑁆𑀥𑁄 𑀧𑀦 𑀤𑀺𑀝𑁆𑀞 𑀯𑀸𑀭𑁄, 𑀤𑀺𑀝𑁆𑀞𑀲𑀫𑁆𑀩𑀦𑁆𑀥𑀯𑀸𑀭𑁄, 𑀲𑀼𑀢𑀯𑀸𑀭𑁄, 𑀲𑀼𑀢𑀲𑀫𑁆𑀩𑀦𑁆𑀥𑀯𑀸𑀭𑁄, 𑀯𑀺𑀜𑁆𑀜𑀸𑀢𑀯𑀸𑀭𑁄, 𑀯𑀺𑀜𑁆𑀜𑀸𑀢𑀲𑀫𑁆𑀩𑀦𑁆𑀥𑀯𑀸𑀭𑁄𑀢𑀺 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀏𑀢𑁆𑀣𑀘 𑀲𑀤𑁆𑀥𑀸 𑀭𑀼𑀘𑀺 𑀆𑀓𑀸𑀭 𑀧𑀭𑀺𑀯𑀺𑀢𑀓𑁆𑀓𑀸𑀤𑀺 𑀯𑀲𑁂𑀦 𑀧𑀯𑀢𑁆𑀢𑀯𑀸𑀭𑀸 𑀯𑀺𑀜𑁆𑀜𑀸𑀢𑀯𑀸𑀭𑁄, 𑀯𑀺𑀜𑁆𑀜𑀸𑀢 𑀲𑀫𑁆𑀩𑀦𑁆𑀥𑀯𑀸𑀭𑁄𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀲𑀤𑁆𑀥𑀸𑀭𑀼𑀘𑀺𑀬𑀸𑀤𑀺𑀯 𑀲𑁂𑀦𑀕𑀳𑀺𑀢𑀁 𑀆𑀭𑀫𑁆𑀫𑀡𑀁 𑀢𑀣𑀸𑀧𑀺 𑀳𑁄𑀢𑀺. 𑀅𑀜𑁆𑀜𑀣𑀸𑀧𑀺 𑀳𑁄𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀦 𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀯𑀸 𑀳𑁄𑀢𑀼 𑀅𑀜𑁆𑀜𑀣𑀸𑀯𑀸. 𑀯𑀻𑀣𑀺𑀘𑀺𑀢𑁆𑀢𑀧𑀯𑀢𑁆𑀢𑀺𑀬𑀸 𑀲𑀢𑀺 𑀕𑀳𑁂𑀢𑀩𑁆𑀩𑀫𑁂𑀯. 𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁𑀯𑀸𑀭𑁂 𑀢𑀤𑀸𑀭𑀫𑁆𑀫𑀡𑀯𑀸𑀭𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀯𑀸𑀭𑀸. 𑀢𑁂𑀲𑀼𑀘 𑀓𑀸𑀫 𑀫𑀳𑀕𑁆𑀕𑀢𑀸 𑀦𑀼𑀢𑁆𑀢𑀭 𑀧𑀜𑁆𑀜𑀢𑁆𑀢𑀺 𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀦𑀸𑀕𑀢𑀓𑀸𑀮 𑀯𑀺𑀫𑀼𑀢𑁆𑀢𑀯𑀲𑁂𑀦𑀘 𑀆𑀭𑀫𑁆𑀫𑀡𑀥𑀫𑁆𑀫𑀸 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀏𑀢𑀭𑀳𑀺 𑀧𑀦 𑀅𑀢𑀻𑀢𑀪𑀯𑀗𑁆𑀕𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀘 𑀯𑀸𑀭𑀪𑁂𑀤𑀁 𑀓𑀧𑁆𑀧𑁂𑀦𑁆𑀢𑀺. 𑀢𑀢𑁆𑀣 𑀅𑀢𑀻𑀢𑀪𑀯𑀗𑁆𑀕𑀯𑀲𑁂𑀦 𑀯𑀸𑀭𑀪𑁂𑀤𑀓𑀧𑁆𑀧𑀦𑀁 𑀦𑀺𑀭𑀢𑁆𑀣𑀓𑀁. 𑀦 𑀳𑀺 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀘𑀤𑁆𑀯𑀸𑀭𑁂 𑀯𑀺𑀬 𑀆𑀭𑀫𑁆𑀫𑀡𑀸𑀦𑀁 𑀔𑀡𑀯𑀲𑁂𑀦 𑀩𑀮𑀯 𑀤𑀼𑀩𑁆𑀩𑀮𑀢𑀸 𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀢𑀤𑀸 𑀅𑀯𑀺𑀚𑁆𑀚𑀫𑀸𑀦𑀸𑀦𑀁𑀧𑀺 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀓𑀸𑀮𑀯𑀺𑀫𑀼𑀢𑁆𑀢𑀸𑀦𑀜𑁆𑀘 𑀢𑀢𑁆𑀣 𑀆𑀧𑀸𑀢𑀸𑀕𑀫𑀦𑀢𑁄𑀢𑀺. 𑀏𑀢𑁆𑀣 𑀲𑀺𑀬𑀸, 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀁𑀦𑀸𑀫 𑀥𑀫𑁆𑀫𑀢𑁄𑀘 𑀓𑀸𑀮𑀢𑁄𑀘 𑀅𑀪𑀺𑀦𑁆𑀦 𑀫𑁂𑀯 𑀇𑀘𑁆𑀙𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀇𑀫𑁂𑀘 𑀲𑀢𑁆𑀢𑀸 𑀢𑀁 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀦𑁆𑀢𑀺𑀬𑁂𑀯. 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄 𑀧𑀦 𑀤𑁂𑀯𑀢𑀸 𑀆𑀓𑀸𑀭𑀲𑀮𑁆𑀮𑀓𑁆𑀔𑀡𑁂𑀦 𑀯𑀺𑀦𑀸𑀧𑀺 𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀦𑀓𑀸𑀮𑁂 𑀆𑀯𑀚𑁆𑀚𑀦𑀁 𑀪𑀸𑀯𑀬𑀁 𑀧𑀭𑀲𑁆𑀲 𑀘𑀺𑀢𑁆𑀢𑀁 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀁. 𑀢𑀁 𑀯𑀸 𑀆𑀯𑀚𑁆𑀚𑀢𑀺. 𑀉𑀤𑀸𑀳𑀼 𑀧𑀭𑀢𑁄 𑀢𑀁 𑀢𑀁 𑀚𑀯𑀦𑁂𑀦 𑀲𑀳𑀼𑀧𑁆𑀧𑀦𑁆𑀦𑀁𑀯𑀸. 𑀚𑀯𑀦𑀸𑀦𑀺𑀘 𑀬𑀁 𑀆𑀯𑀚𑁆𑀚𑀦𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀢𑀁 𑀯𑀸 𑀚𑀸𑀦𑀦𑁆𑀢𑀺, 𑀧𑀘𑁆𑀘𑁂𑀓𑀁 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀁𑀯𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣, 𑀬𑀤𑀺 𑀢𑀸𑀯 𑀆𑀯𑀚𑁆𑀚𑀦𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀆𑀯𑀚𑁆𑀚𑀢𑀺 𑀚𑀸𑀦𑀦𑁆𑀢𑀺𑀘. 𑀏𑀯𑀁 𑀲𑀢𑀺 𑀥𑀫𑁆𑀫𑀢𑁄 𑀅𑀪𑀺𑀦𑁆𑀦𑀁 𑀳𑁄𑀢𑀺. 𑀓𑀸𑀮𑀢𑁄 𑀪𑀺𑀦𑁆𑀦𑀁. 𑀢𑀜𑁆𑀳𑀺 𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀚𑀯𑀦𑀸𑀦𑀁 𑀧𑀦 𑀅𑀢𑀻𑀢𑀦𑁆𑀢𑀺. 𑀅𑀣 𑀧𑀘𑁆𑀘𑁂𑀓𑀁 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀁 𑀆𑀯𑀚𑁆𑀚𑀢𑀺 𑀚𑀸𑀦𑀦𑁆𑀢𑀺𑀘. 𑀏𑀯𑀜𑁆𑀘 𑀲𑀢𑀺 𑀓𑀸𑀮𑀢𑁄 𑀅𑀪𑀺𑀦𑁆𑀦𑀁 𑀳𑁄𑀢𑀺. 𑀥𑀫𑁆𑀫𑀢𑁄 𑀪𑀺𑀦𑁆𑀦𑀫𑁂𑀯. 𑀅𑀣𑀧𑀺 𑀬𑀁 𑀧𑀘𑁆𑀘𑁂𑀓𑀁 𑀲𑀳𑀼𑀧𑁆𑀧𑀦𑁆𑀦𑀁 𑀚𑀸𑀦𑀦𑁆𑀢𑀺. 𑀢𑀤𑁂𑀯 𑀆𑀯𑀚𑁆𑀚𑀢𑀺. 𑀏𑀯𑀁𑀧𑀺 𑀪𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀬𑀁 𑀆𑀯𑀚𑁆𑀚𑀦𑁂𑀦 𑀲𑀳𑀼𑀧𑁆𑀧𑀦𑁆𑀦𑀁. 𑀢𑀤𑁂𑀯 𑀆𑀯𑀚𑁆𑀚𑀢𑀺 𑀚𑀸𑀦𑀦𑁆𑀢𑀺𑀘𑀸𑀢𑀺 𑀥𑀫𑁆𑀫𑀢𑁄 𑀅𑀪𑀺𑀦𑁆𑀦𑀁 𑀯𑀢𑁆𑀯𑀸 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀤𑁆𑀥𑀁𑀧𑀺 𑀅𑀤𑁆𑀥𑀸𑀯𑀲𑁂𑀦 𑀲𑀦𑁆𑀢𑀢𑀺𑀯𑀲𑁂𑀦𑀘 𑀕𑀳𑀺𑀢𑀁 𑀚𑀯𑀦𑀸𑀦𑀁𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀺𑀢𑀁. 𑀆𑀘𑀭𑀺𑀬𑀸𑀦𑀦𑁆𑀤𑀫𑀢𑁂𑀦 𑀧𑀦 𑀧𑀭𑀲𑁆𑀲 𑀢𑀁 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀁 𑀢𑀁 𑀅𑀥𑀺𑀧𑁆𑀧𑀸𑀬𑀚𑀸𑀦𑀦𑀓𑀸𑀮𑁂 𑀆𑀯𑀚𑁆𑀚𑀦𑀚𑀯𑀦𑀸𑀦𑀺 𑀧𑀘𑁆𑀘𑁂𑀓𑀁 𑀅𑀢𑁆𑀢𑀦𑀸 𑀲𑀳𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀆𑀯𑀚𑁆𑀚𑀢𑀺 𑀚𑀸𑀦𑀦𑁆𑀢𑀺 𑀘. 𑀦 𑀘𑁂𑀢𑁆𑀣 𑀥𑀫𑁆𑀫𑀢𑁄 𑀓𑀸𑀮𑀢𑁄𑀘 𑀪𑀺𑀦𑁆𑀦𑀁𑀦𑀸𑀫 𑀳𑁄𑀢𑀺. 𑀲𑀩𑁆𑀩𑁂𑀲𑀁𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀘𑀺𑀢𑁆𑀢𑀫𑁂𑀯 𑀳𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘𑀸𑀢𑀺. 𑀦𑀘 𑀚𑀯𑀦𑀸𑀦𑀺 𑀦𑀺𑀭𑀸𑀯𑀚𑁆𑀚𑀦𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀆𑀯𑀚𑁆𑀚𑀦𑁂𑀦𑀧𑀺 𑀳𑀺 𑀘𑀺𑀢𑁆𑀢𑀦𑁆𑀢𑁂𑀯 𑀆𑀯𑀚𑁆𑀚𑀺𑀢𑀁 𑀳𑁄𑀢𑀺. 𑀚𑀯𑀦𑀸𑀦𑀺𑀘 𑀘𑀺𑀢𑁆𑀢𑀦𑁆𑀢𑁂𑀯 𑀚𑀸𑀦𑀦𑁆𑀢𑀻𑀢𑀺. 𑀬𑀤𑀺 𑀧𑀦 𑀆𑀯𑀚𑁆𑀚𑀦𑁂 𑀦 𑀘𑀺𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀺𑀢𑁂 𑀚𑀯𑀦𑀸𑀦𑀺 𑀭𑀽𑀧𑀦𑁆𑀢𑀺 𑀚𑀸𑀦𑀦𑁆𑀢𑀺. 𑀭𑀽𑀧𑀦𑁆𑀢𑀺𑀯𑀸 𑀆𑀯𑀚𑁆𑀚𑀺𑀢𑁂 𑀘𑀺𑀢𑁆𑀢𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀦𑀻𑀮𑀦𑁆𑀢𑀺𑀯𑀸 𑀆𑀯𑀚𑁆𑀚𑀺𑀢𑁂 𑀧𑀻𑀢𑀦𑁆𑀢𑀺 𑀚𑀸𑀦𑀦𑁆𑀢𑀺. 𑀏𑀯𑀁 𑀲𑀢𑀺 𑀚𑀯𑀦𑀸𑀦𑀺 𑀥𑀫𑁆𑀫𑀢𑁄 𑀦𑀺𑀭𑀸𑀯𑀚𑁆𑀚𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀣𑀸 𑀅𑀢𑀻𑀢𑀦𑁆𑀢𑀺 𑀆𑀯𑀚𑁆𑀚𑀺𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀢𑀸𑀦𑀺 𑀓𑀸𑀮𑀢𑁄 𑀦𑀺𑀭𑀸𑀯𑀚𑁆𑀚𑀦𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀬𑀲𑁆𑀫𑀸 𑀘 𑀅𑀢𑀻𑀢𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀇𑀥 𑀔𑀡𑀯𑀲𑁂𑀦𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀦 𑀅𑀤𑁆𑀥𑀸𑀲𑀦𑁆𑀢𑀢𑀺 𑀯𑀲𑁂𑀦𑀸𑀢𑀺. 𑀇𑀢𑀭𑀣𑀸 𑀲𑀩𑁆𑀩 𑀯𑀻𑀣𑀺𑀘𑀺𑀢𑁆𑀢𑀯𑀸𑀭𑁂𑀲𑀼𑀧𑀺 𑀆𑀭𑀫𑁆𑀫𑀡𑀸𑀦𑀁 𑀅𑀢𑀻𑀢𑀸𑀤𑀺𑀪𑀸𑀯𑁄 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸𑀢𑀺. 𑀕𑀸𑀣𑀸𑀬𑀁 𑀢𑀻𑀡𑁂𑀯𑀸𑀢𑀺 𑀓𑀺𑀘𑁆𑀘𑀯𑀲𑁂𑀦 𑀢𑀻𑀡𑀺 𑀏𑀯. 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁂𑀭𑀺𑀢𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑁆𑀔𑀡𑀯𑀲𑁂𑀦 𑀤𑀲 𑀈𑀭𑀺𑀢𑀸𑀦𑀺 𑀓𑀣𑀺𑀢𑀸𑀦𑀺. 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀘𑀺𑀢𑁆𑀢𑀲𑀭𑀽𑀧𑀯𑀺𑀢𑁆𑀣𑀸𑀭𑁂𑀦. 𑀏𑀢𑁆𑀣𑀸𑀢𑀺 𑀫𑀦𑁄𑀤𑁆𑀯𑀸𑀭𑁂. 𑀏𑀓𑀘𑀢𑁆𑀢𑀸𑀮𑀻𑀲𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀦𑁄𑀥𑀸𑀢𑀽𑀳𑀺 𑀯𑀚𑁆𑀚𑀺𑀢𑀸𑀦𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀁 𑀯𑀲𑁂𑀦 𑀏𑀓𑀘𑀢𑁆𑀢𑀸𑀮𑀻𑀲𑀁. 𑀏𑀢𑁆𑀣𑀸𑀢𑀺 𑀧𑀭𑀺𑀢𑁆𑀢𑀚𑀯𑀦𑀯𑀸𑀭𑁂. [𑀧𑀭𑀺𑀢𑁆𑀢𑀯𑀸𑀭𑁄]

𑁧𑁩𑁮. 𑀯𑀺𑀪𑀽𑀢𑀸𑀯𑀺𑀪𑀽𑀢𑀪𑁂𑀤𑁄 𑀦𑀢𑁆𑀣𑀺 𑀏𑀓𑀁 𑀯𑀺𑀪𑀽𑀢𑀫𑁂𑀯 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀅𑀯𑀺𑀪𑀽𑀢𑁂 𑀆𑀭𑀫𑁆𑀫𑀡𑁂 𑀅𑀧𑁆𑀧𑀦𑀸𑀦𑀸𑀫 𑀲𑀫𑁆𑀪𑀯𑀢𑀻𑀢𑀺. 𑀢𑀣𑀸 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀘 𑀦𑀢𑁆𑀣𑀺. 𑀦 𑀳𑀺 𑀅𑀢𑀺𑀲𑀦𑁆𑀢𑀢𑀭𑀁 𑀅𑀧𑁆𑀧𑀦𑀸𑀚𑀯𑀦𑀁 𑀢𑀤𑀸𑀭𑀫𑁆𑀫𑀡𑀁 𑀅𑀦𑀼𑀩𑀦𑁆𑀥𑀢𑀻𑀢𑀺. 𑀢𑀢𑁆𑀣 𑀳𑀺 𑀙𑀩𑁆𑀩𑀻𑀲𑀢𑀺 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭 𑀚𑀯𑀦𑁂𑀲𑀼 𑀬𑀁𑀓𑀺𑀜𑁆𑀘𑀺 𑀚𑀯𑀦𑀁 𑀅𑀧𑁆𑀧𑀦𑀸𑀯𑀻𑀣𑀺𑀫𑁄𑀢𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀸𑀡𑀭𑀳𑀺𑀢𑀁 𑀤𑁆𑀯𑀺𑀳𑁂𑀢𑀼𑀓𑀚𑀯𑀦𑀁 𑀅𑀣𑀺𑀭𑀲𑀪𑀸𑀯𑀢𑁆𑀢𑀸 𑀅𑀧𑁆𑀧𑀦𑀸𑀬 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀦𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀫𑀝𑁆𑀞𑀦𑁆𑀦𑀦𑁆𑀢𑀺. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀢𑀼𑀦𑀸𑀫𑁂𑀦𑀸𑀢𑀺 𑀏𑀢𑁆𑀣 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀤𑀻𑀳𑀺 𑀧𑀭𑀺𑀢𑁄𑀪𑀸𑀕𑁂𑀳𑀺 𑀅𑀧𑁆𑀧𑀦𑀸 𑀓𑀭𑀻𑀬𑀢𑀺 𑀲𑀚𑁆𑀚𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀓𑀫𑁆𑀫𑀁. 𑀅𑀧𑁆𑀧𑀦𑀁 𑀉𑀧𑁂𑀘𑁆𑀘 𑀘𑀭𑀢𑀻𑀢𑀺 𑀉𑀧𑀘𑀸𑀭𑁄. 𑀲𑀫𑀻𑀧𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀲𑀫𑀻𑀧𑀘𑀭𑀡𑀜𑁆𑀘𑁂𑀢𑁆𑀣 𑀆𑀲𑀦𑁆𑀦𑁂𑀓𑀸𑀮𑁂 𑀅𑀧𑁆𑀧𑀦𑀸𑀯𑀳𑀲𑀫𑀢𑁆𑀣𑀪𑀸𑀯𑁂𑀦 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀲 𑀧𑀯𑀢𑁆𑀢𑀺𑀬𑀸 𑀅𑀘𑀺𑀭𑀁 𑀓𑀸𑀮𑀁 𑀅𑀧𑁆𑀧𑀦𑀸 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺. 𑀅𑀦𑀼𑀮𑁄𑀫𑀦𑁆𑀢𑀺 𑀅𑀧𑁆𑀧𑀦𑀸𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑀯𑀺𑀥𑀫𑀦𑁂𑀦 𑀅𑀧𑁆𑀧𑀦𑀸𑀬 𑀅𑀦𑀼𑀓𑀽𑀮𑀁 𑀅𑀧𑁆𑀧𑀦𑀸𑀳𑀺𑀢𑀁 𑀅𑀧𑁆𑀧𑀦𑀸 𑀯𑀳𑀦𑁆𑀢𑀺𑀘𑁆𑀘𑁂𑀯 𑀅𑀢𑁆𑀣𑁄, 𑀬𑀲𑁆𑀲 𑀧𑀯𑀢𑁆𑀢𑀺𑀬𑀸 𑀅𑀧𑁆𑀧𑀦𑀸 𑀯𑀺𑀩𑀦𑁆𑀥𑀓𑁄 𑀧𑀘𑁆𑀘𑀦𑀻 𑀓𑁄𑀦𑀸𑀫 𑀦𑀢𑁆𑀣𑀻𑀢𑀺. 𑀕𑀫𑀻𑀬𑀢𑀺 𑀩𑀼𑀚𑁆𑀛𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺𑀯𑁄. 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺𑀘. 𑀢𑀁 𑀤𑀼𑀯𑀺𑀥𑀁𑀧𑀺 𑀕𑀯𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀧𑀭𑀺𑀢𑁆𑀢 𑀚𑀸𑀢𑀺𑀲𑀗𑁆𑀔𑀸𑀢𑁄 𑀅𑀦𑁆𑀯𑀬𑁄. 𑀕𑁄𑀢𑁆𑀢𑀁 𑀅𑀪𑀺𑀪𑀼𑀬𑁆𑀬𑀢𑀺 𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀕𑁄𑀢𑁆𑀭𑀪𑀼. 𑀏𑀢𑁆𑀣 𑀘 𑀘𑀢𑁆𑀢𑀸𑀭𑀺𑀧𑀺 𑀚𑀯𑀦𑀸𑀦𑀺 𑀧𑀭𑀺𑀓𑀫𑁆𑀫𑀚𑀯𑀦𑀸𑀦𑀻𑀢𑀺 𑀯𑀸 𑀉𑀧𑀘𑀸𑀭𑀚𑀯𑀦𑀸𑀦𑀺𑀢𑀺𑀯𑀸 𑀅𑀦𑀼𑀮𑁄𑀫𑀚𑀯𑀦𑀸𑀦𑀻𑀢𑀺𑀯𑀸 𑀯𑀼𑀘𑁆𑀘𑀦𑁆𑀢𑀺𑀬𑁂𑀯. 𑀕𑁄𑀢𑁆𑀭𑀪𑀽𑀢𑀺 𑀧𑀦 𑀧𑀘𑁆𑀙𑀺𑀫𑀲𑁆𑀲𑁂𑀯 𑀦𑀸𑀫𑀁. 𑀇𑀥 𑀧𑀦 𑀘𑀢𑀼𑀦𑁆𑀦𑀁𑀧𑀺 𑀦𑀸𑀫𑀸𑀦𑀁 𑀲𑀗𑁆𑀕𑀳𑀡𑀢𑁆𑀣𑀁 𑀧𑀭𑀺𑀓𑀫𑁆𑀫𑁄 𑀧𑀘𑀸𑀭𑀸𑀦𑀼𑀮𑁄𑀫 𑀕𑁄𑀢𑁆𑀭𑀪𑀼𑀦𑀸𑀫𑁂𑀦𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀲𑁆𑀫𑀸 𑀧𑀣𑀫𑀫𑁂𑀯 𑀧𑀭𑀺𑀓𑀫𑁆𑀫𑀁𑀦𑀸𑀫. 𑀦𑀦𑀼 𑀇𑀢𑀭𑀸𑀦𑀺𑀧𑀺 𑀅𑀧𑁆𑀧𑀦𑀁 𑀧𑀭𑀺𑀲𑀗𑁆𑀔𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀏𑀯𑀫𑀸𑀤𑀺𑀓𑀸 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸 𑀳𑁄𑀢𑀻𑀢𑀺. 𑀘𑀢𑀼𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀫𑁂𑀯𑀯𑀸𑀢𑀺 𑀘𑀢𑀼𑀓𑁆𑀔𑀢𑁆𑀢𑀼𑀫𑁂𑀯𑀯𑀸 𑀢𑀺𑀓𑁆𑀔𑀢𑁆𑀢𑀼𑀫𑁂𑀯𑀯𑀸. 𑀢𑀢𑁆𑀣 𑀧𑀣𑀫𑁂𑀦 𑀏𑀯 𑀲𑀤𑁆𑀤𑁂𑀦 𑀧𑀜𑁆𑀘𑀫𑀁 𑀕𑁄𑀢𑁆𑀭𑀪𑀼𑀲𑀫𑁆𑀪𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀢𑀤𑀸 𑀳𑀺 𑀚𑀯𑀦𑀁 𑀧𑀢𑀺𑀢𑀁𑀦𑀸𑀫 𑀳𑁄𑀢𑀺. 𑀧𑀯𑁂𑀥𑀢𑀺 𑀓𑀫𑁆𑀧𑀢𑀺. 𑀓𑀸𑀫𑀕𑁄𑀢𑁆𑀢𑀁 𑀅𑀪𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀭𑀺𑀪𑀽𑀫𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺. 𑀤𑀼𑀢𑀻𑀬𑁂𑀦 𑀤𑀼𑀢𑀻𑀬𑀁 𑀕𑁄𑀢𑁆𑀭𑀪𑀼 𑀲𑀫𑁆𑀪𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀢𑀤𑀸 𑀳𑀺 𑀅𑀮𑀤𑁆𑀥𑀸𑀲𑁂𑀯𑀦𑀁 𑀅𑀦𑀼𑀮𑁄𑀫𑀁 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑁂 𑀘𑀺𑀢𑁆𑀢𑀁 𑀕𑁄𑀢𑁆𑀭𑀪𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺. 𑀏𑀢𑁂𑀦𑁂𑀯 𑀧𑀜𑁆𑀘𑀫𑀢𑁄 𑀧𑀭𑀁 𑀘𑀢𑀼𑀢𑁆𑀣𑀢𑁄𑀘 𑀑𑀭𑀁 𑀅𑀧𑁆𑀧𑀦𑀸𑀬 𑀅𑀲𑀫𑁆𑀪𑀯𑁄 𑀲𑀸𑀥𑀺𑀢𑁄 𑀳𑁄𑀢𑀻𑀢𑀺. 𑀯𑀸𑀲𑀤𑁆𑀤𑁂𑀦 𑀧𑀦 𑀫𑀦𑁆𑀤𑀧𑀜𑁆𑀜𑀲𑁆𑀲 𑀘𑀢𑀼𑀓𑁆𑀔𑀢𑁆𑀢𑀼𑀫𑁂𑀯. 𑀦 𑀢𑀺𑀓𑁆𑀔𑀢𑁆𑀢𑀼𑀁. 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀫𑁂𑀯. 𑀦 𑀘𑀢𑀼𑀓𑁆𑀔𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀧𑀦 𑀫𑀦𑁆𑀤𑀫𑀚𑁆𑀛𑀺𑀫 𑀫𑀳𑀸𑀧𑀜𑁆𑀜𑀯𑀲𑁂𑀦 𑀢𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀓𑁆𑀔𑀢𑁆𑀢𑀼𑀁𑀧𑀺 𑀧𑀭𑀺𑀓𑀫𑁆𑀫𑀚𑀯𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀦𑀼𑀜𑁆𑀜𑀸𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀇𑀢𑀭𑀝𑁆𑀞𑀓𑀣𑀸𑀲𑀼 𑀧𑀦 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀲𑀸 𑀦 𑀕𑀳𑁂𑀢𑀩𑁆𑀩𑀸𑀯𑀸𑀢𑀺.

𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀙𑀝𑁆𑀞𑀁 𑀲𑀢𑁆𑀢𑀫𑀁 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦 𑀧𑀧𑀸𑀢𑀸𑀲𑀦𑁆𑀦𑀧𑀼𑀭𑀺𑀲𑁄 𑀯𑀺𑀬 𑀅𑀧𑁆𑀧𑀦𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀪𑀯𑀗𑁆𑀕𑀲𑁆𑀲 𑀆𑀲𑀦𑁆𑀦𑀪𑀸𑀯𑁂𑀦𑀸𑀢𑀺 𑀪𑀯𑀗𑁆𑀕𑀪𑀸𑀯𑀲𑁆𑀲 𑀆𑀲𑀦𑁆𑀦 𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀚𑀯𑀦𑀢𑁄 𑀳𑀺 𑀧𑀝𑁆𑀞𑀸𑀬 𑀚𑀯𑀦𑀲𑀦𑁆𑀢𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀓𑁆𑀔𑀻𑀡𑀚𑀯𑀁 𑀳𑁄𑀢𑀺. 𑀪𑀯𑀗𑁆𑀕𑀪𑀸𑀯𑀢𑁆𑀣𑀸𑀬 𑀧𑀭𑀺𑀡𑀫𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀧𑀸𑀢𑀸𑀲𑀦𑁆𑀦𑀧𑀼𑀭𑀺𑀲𑁄𑀧𑀫𑀸𑀧𑀺 𑀉𑀧𑀧𑀦𑁆𑀦𑀸 𑀳𑁄𑀢𑀻𑀢𑀺. 𑀦𑀺𑀭𑀼𑀤𑁆𑀥𑀸𑀦𑀦𑁆𑀢𑀭𑀫𑁂𑀯𑀸𑀢𑀺 𑀦𑀺𑀭𑀼𑀤𑁆𑀥𑁂 𑀅𑀦𑀦𑁆𑀢𑀭𑀫𑁂𑀯𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀓𑀲𑁆𑀲 𑀅𑀦𑀦𑁆𑀢𑀭𑀦𑁆𑀢𑀺, 𑀅𑀜𑁆𑀜𑀲𑁆𑀲 𑀅𑀲𑀼𑀢𑀢𑁆𑀢𑀸 𑀦𑀺𑀭𑀼𑀤𑁆𑀥𑀲𑁆𑀲𑀸𑀢𑀺 𑀅𑀢𑁆𑀣𑀢𑁄 𑀮𑀤𑁆𑀥𑀫𑁂𑀯𑀸𑀢𑀺. 𑀬𑀲𑁆𑀫𑀸 𑀧𑀦 𑀅𑀧𑁆𑀧𑀦𑀸𑀦𑀸𑀫 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀢𑀼𑀢𑁆𑀣𑀢𑁄𑀯𑀸 𑀧𑀜𑁆𑀘𑀫𑀢𑁄𑀯𑀸 𑀧𑀝𑁆𑀞𑀸𑀬 𑀉𑀧𑁆𑀧𑀚𑁆𑀚𑀢𑀺. 𑀦 𑀙𑀝𑁆𑀞𑀢𑁄𑀯𑀸 𑀲𑀢𑁆𑀢𑀫𑀢𑁄𑀯𑀸. 𑀲𑀸𑀳𑀺 𑀯𑀲𑀻𑀪𑀽𑀢𑀸𑀧𑀺 𑀘𑀢𑀼𑀢𑁆𑀣 𑀧𑀜𑁆𑀘𑀫𑁂𑀲𑀼 𑀉𑀧𑁆𑀧𑀢𑁆𑀢𑀺𑀁 𑀅𑀮𑀪𑀫𑀸𑀦𑀸 𑀲𑀩𑁆𑀩𑀲𑁄 𑀦𑀼𑀧𑁆𑀧𑀚𑁆𑀚𑀢𑀺𑀬𑁂𑀯. 𑀮𑀪𑀫𑀸𑀦𑀸 𑀧𑀦 𑀤𑀺𑀯𑀲𑀁𑀧𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀢𑀺𑀬𑁂𑀯. 𑀢𑀲𑁆𑀫𑀸 𑀘𑀢𑀼𑀢𑁆𑀣𑀁𑀯𑀸 𑀧𑀜𑁆𑀘𑀫𑀁𑀯𑀸𑀢𑀺 𑀇𑀤𑀁 𑀆𑀤𑀺𑀫𑀢𑁆𑀢𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀅𑀧𑁆𑀧𑀦𑀸𑀯𑀻𑀣𑀺𑀫𑁄𑀢𑀭𑀢𑀻𑀢𑀺 𑀘 𑀢𑀢𑁄𑀧𑀭𑀁 𑀅𑀧𑁆𑀧𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻𑀢𑀺 𑀘 𑀯𑀓𑁆𑀔𑀢𑀻𑀢𑀺. 𑀬𑀤𑀺 𑀧𑀦 𑀧𑀜𑁆𑀘𑀫𑀢𑁄 𑀧𑀝𑁆𑀞𑀸𑀬 𑀚𑀯𑀦𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀢𑀦𑀔𑁂𑀢𑁆𑀢𑁂 𑀅𑀧𑁆𑀧𑀦𑀸𑀚𑀯𑀦𑀁 𑀧𑀯𑀢𑁆𑀢𑀢𑀻𑀢𑀺. 𑀯𑀼𑀘𑁆𑀘𑀢𑁂, 𑀳𑀢𑁆𑀣𑁂 𑀣𑀧𑀺𑀢𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀔𑁂𑀢𑁆𑀢𑀁𑀦𑀸𑀫 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀳𑀢𑁆𑀣𑀩𑀮𑁂𑀦 𑀔𑀺𑀧𑀺𑀢𑀁 𑀮𑁂𑀟𑁆𑀟𑀼 𑀤𑀽𑀭𑀁𑀧𑀺 𑀕𑀘𑁆𑀙𑀢𑀺𑀬𑁂𑀯. 𑀏𑀢𑁆𑀣 𑀘 𑀮𑁂𑀟𑁆𑀟𑀼𑀲𑁆𑀲 𑀚𑀯𑁄𑀦𑀸𑀫 𑀳𑀢𑁆𑀣𑀚𑀯𑀫𑀽𑀮𑀓𑁄 𑀳𑁄𑀢𑀺. 𑀳𑀢𑁆𑀣𑀚𑀯𑁄𑀘 𑀲𑀭𑀻𑀭𑀩𑀮𑀫𑀽𑀮𑀓𑁄. 𑀢𑀢𑁆𑀣 𑀮𑁂𑀟𑁆𑀟𑀼 𑀯𑀺𑀬 𑀅𑀧𑁆𑀧𑀦𑀸𑀚𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀔𑁂𑀢𑁆𑀢𑀁 𑀯𑀺𑀬 𑀘𑀢𑀼𑀢𑁆𑀣𑀢𑁄 𑀧𑀘𑁆𑀙𑀸𑀓𑀸𑀮𑁄. 𑀳𑀢𑁆𑀣𑀚𑀯𑁄𑀯𑀺𑀬 𑀕𑁄𑀢𑁆𑀭𑀪𑀼𑀚𑀯𑁄. 𑀲𑀭𑀻𑀭𑀩𑀮𑀁 𑀯𑀺𑀬 𑀧𑀼𑀭𑀺𑀫𑀸𑀦𑀁 𑀧𑀭𑀺𑀓𑀫𑁆𑀫𑀚𑀯𑀦𑀸𑀦𑀁 𑀩𑀮𑀁 𑀤𑀝𑁆𑀞𑀩𑁆𑀩𑀁. 𑀉𑀢𑁆𑀢𑀸𑀦𑀲𑁂𑀬𑁆𑀬𑀲𑁆𑀲 𑀩𑀸𑀮𑀤𑀸𑀭𑀓𑀲𑁆𑀲 𑀩𑀮𑀁 𑀯𑀺𑀬 𑀆𑀤𑀺𑀓𑀫𑁆𑀫𑀺𑀓𑀯𑀻𑀣𑀺𑀬𑀁 𑀓𑀸𑀫𑀚𑀯𑀦𑀸𑀦𑀁 𑀩𑀮𑀁. 𑀯𑀼𑀤𑁆𑀥𑀺𑀧𑀢𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀩𑀮𑀁 𑀯𑀺𑀬 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀓𑀸𑀫𑀚𑀯𑀦𑀸𑀦𑀁 𑀩𑀮𑀁. 𑀬𑀣𑀸 𑀘 𑀩𑀸𑀮𑀤𑀸𑀭𑀓𑁂𑀦 𑀔𑀺𑀢𑁆𑀢𑀁 𑀮𑁂𑀟𑁆𑀟𑀼 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂𑀧𑀺 𑀧𑀢𑀢𑀺. 𑀏𑀯𑀁 𑀆𑀤𑀺𑀓𑀫𑁆𑀫𑀺𑀓𑀯𑀻𑀣𑀺𑀬𑀁 𑀅𑀧𑁆𑀧𑀦𑀸𑀚𑀯𑀦𑀁 𑀏𑀓𑀯𑀸𑀭𑀁 𑀚𑀯𑀺𑀢𑁆𑀯𑀸 𑀧𑀢𑀢𑀺. 𑀬𑀣𑀸𑀯𑀼𑀤𑁆𑀥𑀺𑀧𑀢𑁆𑀢𑁂𑀦 𑀔𑀺𑀢𑁆𑀢𑀁 𑀮𑁂𑀟𑁆𑀟𑀼 𑀧𑀢𑀦𑀔𑁂𑀢𑁆𑀢𑁂𑀧𑀺 𑀅𑀧𑀢𑀺𑀢𑁆𑀯𑀸 𑀤𑀽𑀭𑀁𑀧𑀺 𑀤𑀽𑀭𑀢𑀭𑀁𑀧𑀺 𑀕𑀘𑁆𑀙𑀢𑀺. 𑀢𑀣𑀸 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀅𑀧𑁆𑀧𑀦𑀸𑀚𑀯𑀦𑀁 𑀘𑀺𑀭𑀁𑀧𑀺 𑀘𑀺𑀭𑀢𑀭𑀁𑀧𑀺 𑀧𑀯𑀢𑁆𑀢𑀢𑀻𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀅𑀧𑁆𑀧𑀦𑀸𑀚𑀯𑀦𑀁 𑀧𑀢𑀦𑀔𑁂𑀢𑁆𑀢𑁂 𑀧𑀯𑀢𑁆𑀢𑀁𑀧𑀺 𑀪𑀽𑀫𑀦𑁆𑀢𑀭𑀧𑀢𑁆𑀢𑀺𑀬𑀸𑀯𑀸 𑀆𑀭𑀫𑁆𑀫𑀡𑀦𑁆𑀢𑀭𑀮𑀤𑁆𑀥𑀺𑀬𑀸𑀯𑀸 𑀧𑀢𑀺𑀢𑀁𑀦𑀸𑀫 𑀦𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀲𑀺𑀬𑀸, 𑀓𑀲𑁆𑀫𑀸 𑀧𑀜𑁆𑀘𑀫𑀢𑁄 𑀧𑀝𑁆𑀞𑀸𑀬 𑀚𑀯𑀦𑀁 𑀧𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀅𑀧𑀢𑀺 𑀢𑀢𑁆𑀢𑀸 𑀏𑀯 𑀲𑀼𑀝𑁆𑀞𑀼 𑀩𑀮𑀯𑀪𑀸𑀯𑀢𑁄 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸 𑀲𑀻𑀖𑀁 𑀅𑀦𑀦𑁆𑀢𑀭𑁂 𑀪𑀯𑁂 𑀯𑀺𑀧𑀸𑀓𑀤𑀸𑀬𑀺𑀦𑀻𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘 𑀳𑁄𑀢𑀺. 𑀫𑀚𑁆𑀛𑁂 𑀧𑀜𑁆𑀘𑀘𑁂𑀢𑀦𑀸 𑀢𑀣𑀸 𑀩𑀮𑀯𑀪𑀸𑀯𑀸𑀪𑀸𑀯𑀢𑁄 𑀘𑀺𑀭𑁂𑀦 𑀢𑀢𑀻𑀬𑀪𑀯𑀸𑀤𑀻𑀲𑀼 𑀯𑀺𑀧𑀸𑀓𑀤𑀸𑀬𑀺𑀦𑀻𑀘 𑀳𑁄𑀦𑁆𑀢𑀺, 𑀅𑀦𑀦𑁆𑀢𑀭𑀺𑀬𑀪𑀸𑀯𑀜𑁆𑀘 𑀦 𑀕𑀘𑁆𑀙𑀦𑁆𑀢𑀻𑀢𑀺. 𑀦𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀳𑀺 𑀲𑀻𑀖𑀁 𑀯𑀺𑀧𑀸𑀓𑀤𑀸𑀦𑀢𑀸𑀬 𑀩𑀮𑀯𑀢𑀻𑀦𑀸𑀫 𑀲𑀺𑀬𑀸. 𑀏𑀯𑀁𑀲𑀢𑀺 𑀧𑀞𑀫𑀘𑁂𑀢𑀦𑀸 𑀲𑀩𑁆𑀩𑀩𑀮𑀯𑀢𑀻𑀦𑀸𑀫 𑀲𑀺𑀬𑀸. 𑀲𑀸 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀪𑀯𑁂 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀏𑀓 𑀯𑀲𑁆𑀲𑀚𑀻𑀯𑀻𑀦𑀁 𑀢𑀺𑀡𑀭𑀼𑀓𑁆𑀔𑀸𑀦𑀁 𑀧𑀭𑀺𑀡𑀸𑀫𑁄𑀯𑀺𑀬 𑀧𑀣𑀫𑀘𑁂𑀢𑀦𑀸𑀬 𑀧𑀭𑀺𑀡𑀸𑀫𑁄 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀺𑀯𑀲𑁆𑀲𑀚𑀻𑀯𑀻𑀦𑀁 𑀯𑀺𑀬 𑀲𑀢𑁆𑀢𑀫𑀘𑁂𑀢𑀦𑀸𑀬. 𑀫𑀳𑀸𑀲𑀸𑀮𑀸𑀦𑀁 𑀯𑀺𑀬 𑀫𑀚𑁆𑀛𑀺𑀫𑀘𑁂𑀢𑀦𑀸𑀦𑀦𑁆𑀢𑀺. 𑀢𑀢𑁆𑀣 𑀏𑀓𑀯𑀲𑁆𑀲𑀚𑀻𑀯𑀺𑀦𑁄 𑀢𑀺𑀡𑀭𑀼𑀓𑁆𑀔𑀸𑀦𑀸𑀫 𑀅𑀲𑀸𑀭𑀸 𑀳𑁄𑀦𑁆𑀢𑀺. 𑀅𑀲𑀸𑀭𑀢𑁆𑀢𑀸𑀘 𑀤𑀼𑀩𑁆𑀩𑀮𑀸 𑀅𑀦𑀤𑁆𑀥𑀦𑀺𑀬𑀸 𑀅𑀘𑀺𑀭𑀝𑁆𑀞𑀺𑀓𑀸. 𑀢𑀲𑁆𑀫𑀸 𑀢𑁂𑀲𑀁 𑀲𑀻𑀖𑀢𑀭𑀧𑀭𑀺𑀡𑀸𑀫𑁄 𑀳𑁄𑀢𑀺. 𑀢𑁂 𑀳𑀺 𑀲𑀻𑀖𑀢𑀭𑀁 𑀭𑀼𑀳𑀦𑁆𑀢𑀺. 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀻𑀖𑀢𑀭𑀁 𑀧𑀼𑀧𑁆𑀨𑀦𑁆𑀢𑀺 𑀨𑀮𑀦𑁆𑀢𑀺 𑀧𑀢𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀏𑀓𑀁 𑀦𑀺𑀤𑀸𑀖𑀲𑀫𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺. 𑀤𑀼𑀢𑀻𑀬𑀁 𑀯𑀲𑁆𑀲𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀏𑀢𑁆𑀣𑀘 𑀦𑀺𑀤𑀸𑀖𑀲𑀫𑀬𑁄 𑀯𑀺𑀬 𑀫𑀭𑀡𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺𑀯𑀲𑁆𑀲𑀚𑀻𑀯𑀺𑀦𑁄 𑀧𑀦 𑀣𑁄𑀓𑀁 𑀲𑀸𑀭𑀪𑀽𑀢𑀸 𑀳𑁄𑀦𑁆𑀢𑀺. 𑀲𑀸𑀭𑀪𑀽𑀢𑀢𑁆𑀢𑀸𑀘 𑀣𑁄𑀓𑀁 𑀩𑀮𑀯𑀦𑁆𑀢𑀸 𑀅𑀤𑁆𑀥𑀦𑀺𑀬𑀸. 𑀢𑀢𑁄 𑀬𑁂𑀯𑀘𑀢𑁂𑀲𑀁 𑀘𑀺𑀭𑀧𑀭𑀺𑀡𑀸𑀫𑁄 𑀳𑁄𑀢𑀺. 𑀢𑁂 𑀳𑀺 𑀧𑀣𑀫𑀁 𑀯𑀲𑁆𑀲𑀁 𑀭𑀼𑀳𑀦𑁆𑀢𑀺 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀧𑀼𑀧𑁆𑀨𑀺𑀢𑀼𑀁𑀯𑀸 𑀨𑀮𑀺𑀢𑀼𑀁𑀯𑀸 𑀦𑀲𑀓𑁆𑀓𑁄𑀦𑁆𑀢𑀺. 𑀤𑀼𑀢𑀻𑀬𑀯𑀲𑁆𑀲𑁂𑀏𑀯 𑀧𑀼𑀧𑁆𑀨𑀦𑁆𑀢𑀺 𑀨𑀮𑀦𑁆𑀢𑀺 𑀧𑀢𑀦𑁆𑀢𑀺 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀤𑀼𑀢𑀻𑀬𑀁 𑀧𑀦 𑀦𑀺𑀤𑀸𑀖 𑀲𑀫𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀢𑀻𑀬𑀁 𑀯𑀲𑁆𑀲𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀫𑀳𑀸𑀲𑀸𑀮𑀸 𑀧𑀦 𑀲𑀩𑁆𑀩𑀲𑀸𑀭𑀪𑀽𑀢𑀸 𑀳𑁄𑀦𑁆𑀢𑀺. 𑀩𑀮𑀯𑀦𑁆𑀢𑀸 𑀘𑀺𑀭𑀢𑀭𑀝𑁆𑀞𑀸𑀬𑀺𑀦𑁄. 𑀢𑀲𑁆𑀫𑀸 𑀢𑁂 𑀲𑀡𑀺𑀓𑀫𑁂𑀯 𑀧𑀭𑀺𑀡𑀸𑀫𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀳𑀺 𑀏𑀓 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀯𑀺𑀤𑀢𑁆𑀣𑀺𑀭𑀢𑀦𑀫𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀦𑀸𑀧𑀚𑁆𑀚𑀦𑁆𑀢𑀺. 𑀧𑀼𑀧𑁆𑀨𑀺𑀢𑀼𑀁𑀯𑀸 𑀨𑀮𑀺𑀢𑀼𑀁𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀢𑀺𑀘𑀺𑀭𑀝𑁆𑀞𑀸𑀬𑀺𑀦𑁄 𑀧𑀦 𑀳𑁄𑀦𑁆𑀢𑀺. 𑀙 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀞𑀢𑁆𑀯𑀸𑀯 𑀧𑀢𑀦𑁆𑀢𑀺. 𑀏𑀯𑀫𑁂𑀯 𑀧𑀣𑀫𑀚𑀯𑀦𑀘𑁂𑀢𑀦𑀸 𑀲𑀩𑁆𑀩𑀲𑁄 𑀅𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀅𑀲𑀸𑀭𑀸 𑀅𑀩𑀮𑀸 𑀳𑁄𑀢𑀺. 𑀯𑀺𑀲𑀼𑀁 𑀏𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀏𑀓𑀜𑁆𑀘 𑀫𑀭𑀡𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀲𑁆𑀫𑀺𑀁 𑀪𑀯𑁂𑀏𑀯 𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀅𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀔𑀺𑀬𑁆𑀬𑀢𑀺. 𑀲𑀢𑁆𑀢𑀫 𑀚𑀯𑀦𑀘𑁂𑀢𑀦𑀸 𑀧𑀦 𑀮𑀤𑁆𑀥𑀸𑀲𑁂𑀯𑀦𑀢𑀸𑀬 𑀣𑁄𑀓𑀁 𑀲𑀸𑀭𑀪𑀽𑀢𑀸 𑀳𑁄𑀢𑀺. 𑀯𑀺𑀲𑀼𑀁 𑀏𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀸𑀭𑀪𑀽𑀢𑀢𑁆𑀢𑀸 𑀬𑁂𑀯𑀘 𑀲𑀡𑀺𑀓𑀫𑁂𑀯 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀺. 𑀇𑀫𑀲𑁆𑀫𑀺𑀁 𑀪𑀯𑁂 𑀯𑀺𑀧𑀘𑁆𑀘𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸𑀯 𑀯𑀺𑀧𑀘𑁆𑀘𑀢𑀺. 𑀧𑀢𑀺𑀢𑀚𑀯𑀦𑁂𑀲𑀼 𑀧𑀦 𑀅𑀦𑁆𑀢𑀺𑀫 𑀚𑀯𑀦𑀢𑀸𑀬 𑀤𑀼𑀩𑁆𑀩𑀮𑀢𑁆𑀢𑀸 𑀤𑀼𑀢𑀻𑀬𑀁 𑀫𑀭𑀡𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑀼𑀢𑀻𑀬𑀪𑀯𑁂𑀏𑀯 𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀅𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀔𑀺𑀬𑁆𑀬𑀢𑀺. 𑀅𑀯𑀲𑁂𑀲𑀸𑀦𑀁 𑀧𑀦 𑀧𑀜𑁆𑀘𑀦𑁆𑀦𑀁 𑀫𑀚𑁆𑀛𑀺𑀫𑀘𑁂𑀢𑀦𑀸𑀦𑀁 𑀲𑀼𑀝𑁆𑀞𑀼 𑀮𑀤𑁆𑀥𑀸𑀲𑁂𑀯𑀦𑀸𑀦𑀁 𑀲𑀡𑀺𑀓 𑀢𑀭 𑀧𑀭𑀺𑀡𑀢𑀪𑀸𑀯𑁄 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀦𑀁 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀺𑀡 𑀭𑀼𑀓𑁆𑀔𑁄 𑀧𑀫𑀸𑀬 𑀧𑀸𑀡𑁄𑀧𑀫𑀸𑀬𑀸𑀧𑀺 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀬𑁂𑀳𑀺𑀓𑁂𑀘𑀺 𑀕𑀩𑁆𑀪𑀲𑁂𑀬𑁆𑀬𑀓𑀸 𑀧𑀸𑀡𑀸 𑀅𑀧𑁆𑀧𑀸𑀬𑀼𑀓𑀚𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀢𑁂 𑀲𑀻𑀖𑀢𑀭𑀁 𑀕𑀩𑁆𑀪𑀯𑀸𑀲𑀁 𑀯𑀲𑀦𑁆𑀢𑀺, 𑀲𑀻𑀖𑀢𑀭𑀁 𑀯𑀺𑀚𑀸𑀬𑀦𑁆𑀢𑀺. 𑀅𑀗𑁆𑀕𑀫𑀗𑁆𑀕𑀸𑀦𑀺𑀘 𑀦𑁂𑀲𑀁 𑀲𑀻𑀖𑀢𑀭𑀁 𑀣𑀸𑀫𑀕𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀺𑀘 𑀲𑀻𑀖𑀢𑀭𑀁 𑀧𑀭𑀺𑀧𑀸𑀓𑀕𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀳𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀲𑀻𑀖𑀢𑀭𑀁 𑀯𑀺𑀜𑁆𑀜𑀼𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀲𑀻𑀖𑀢𑀭𑀁 𑀚𑀺𑀡𑁆𑀡𑀸 𑀳𑁄𑀦𑁆𑀢𑀺 𑀫𑀭𑀦𑁆𑀢𑀺. 𑀤𑀻𑀖𑀸𑀬𑀼𑀓𑀚𑀸𑀢𑀺𑀓𑀸𑀦𑀁 𑀧𑀦 𑀕𑀩𑁆𑀪𑀯𑀸𑀲𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀡𑀺𑀓 𑀫𑁂𑀯 𑀲𑀺𑀚𑁆𑀛𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀫𑀳𑀕𑁆𑀕𑀢 𑀓𑀼𑀲𑀮𑀸𑀦𑀺 𑀲𑀢𑁆𑀢𑀫 𑀚𑀯𑀦𑀝𑁆𑀞𑀸𑀦𑁂 𑀞𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀭𑀺𑀓𑀫𑁆𑀫𑀚𑀯𑀦𑀸𑀦𑀺 𑀳𑀺 𑀘𑀺𑀭𑀝𑁆𑀞𑀺𑀢𑀺𑀓𑀝𑁆𑀞𑁂𑀦 𑀲𑀼𑀧𑀓𑁆𑀓 𑀲𑀸𑀮𑀺𑀥𑀜𑁆𑀜𑀲𑀤𑀺𑀲𑀸𑀦𑀺. 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀅𑀘𑀺𑀭𑀝𑁆𑀞𑀺𑀢𑀺𑀓𑀝𑁆𑀞𑁂𑀦 𑀲𑀼𑀧𑀓𑁆𑀓 𑀲𑀸𑀮𑀺𑀪𑀢𑁆𑀢𑀲𑀤𑀺𑀲𑀸𑀦𑀻𑀢𑀺 𑀢𑀸𑀦𑀺𑀧𑀺 𑀅𑀘𑀺𑀭𑀢𑀭𑀝𑁆𑀞𑀺𑀢𑀺𑀓𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀤𑀼𑀢𑀻𑀬𑁂 𑀪𑀯𑁂 𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀅𑀯𑀺𑀧𑀘𑁆𑀘𑀺𑀢𑁆𑀯𑀸𑀯𑀸 𑀔𑀺𑀬𑁆𑀬𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀪𑀯𑁂𑀧𑀺 𑀅𑀧𑁆𑀧𑀓𑁂𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀦 𑀧𑀝𑀺𑀩𑀸𑀳𑀺𑀢𑀸𑀦𑀺 𑀲𑀩𑁆𑀩𑀲𑁄 𑀅𑀯𑀺𑀧𑀸𑀓𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸𑀢𑀸𑀦𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀤𑀼𑀩𑁆𑀩𑀮𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺.

𑀬𑀲𑁆𑀫𑀸 𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀁 𑀨𑀮𑀤𑀸𑀦𑀦𑀺𑀬𑀢𑀢𑀸𑀦𑀸𑀫 𑀓𑀸𑀮𑀦𑀺𑀬𑀫𑁂𑀦 𑀯𑀺𑀦𑀸 𑀦 𑀲𑀫𑁆𑀪𑀯𑀢𑀺. 𑀓𑀸𑀮𑀦𑀺𑀬𑀫𑁄𑀘𑀦𑀸𑀫 𑀏𑀓𑀦𑁆𑀢𑁂𑀦 𑀲𑀢𑁆𑀢𑀫𑀚𑀯𑀦𑀲𑁆𑀲𑁂𑀯 𑀳𑁄𑀢𑀺. 𑀦 𑀫𑀚𑁆𑀛𑀺𑀫𑀚𑀯𑀦𑀸𑀦𑀁. 𑀢𑁂𑀲𑀜𑁆𑀳𑀺 𑀅𑀲𑀼𑀓𑀲𑁆𑀫𑀺𑀁 𑀪𑀯𑁂𑀏𑀯 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀏𑀯𑀁 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺. 𑀢𑀲𑁆𑀫𑀸 𑀤𑀼𑀯𑀺𑀥𑀲𑁆𑀲 𑀦𑀺𑀬𑀫𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀏𑀯 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸𑀬 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀦 𑀩𑀮𑀯𑀢𑀭𑀢𑀸𑀬𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀕𑀦𑁆𑀢𑀩𑁆𑀩𑀦𑁆𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀦𑀦𑀼𑀘 𑀲𑀢𑁆𑀢𑀫𑀚𑀯𑀦𑀘𑁂𑀢𑀦𑀸𑀬 𑀩𑀮𑀯𑀢𑀸𑀬 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀸𑀯𑁄 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀢𑀸𑀧𑀻𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸. 𑀧𑀝𑀺𑀲𑀦𑁆𑀥𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀺𑀦𑁄 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑁆𑀢𑀺𑀫𑀚𑀯𑀦𑀘𑁂𑀢𑀦𑀸𑀬 𑀲𑀼𑀲𑀗𑁆𑀔𑀢𑀢𑁆𑀢𑀸𑀲𑀸 𑀲𑀢𑁆𑀢𑀫𑀚𑀕𑀦𑀘𑁂𑀢𑀦𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀆𑀦𑀦𑁆𑀢𑀭𑀺𑀬𑀓𑀸𑀘 𑀳𑁄𑀢𑀺. 𑀦 𑀅𑀧𑀢𑀺𑀢𑀚𑀯𑀦𑀘𑁂𑀢𑀦𑀸 𑀯𑀺𑀬 𑀩𑀮𑀯𑀢𑀸𑀬𑀸𑀢𑀺 𑀉𑀢𑁆𑀢𑀭𑀁 𑀯𑀤𑀢𑀺. 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀧𑀣𑀫𑀚𑀯𑀦𑀘𑁂𑀢𑀦𑀸 𑀓𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦 𑀲𑀼𑀲𑀗𑁆𑀔𑀢𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀸𑀫 𑀚𑀸𑀢𑀸𑀢𑀺 𑀯𑀢𑁆𑀢𑀩𑁆𑀩𑀸 𑀳𑁄𑀢𑀻𑀢𑀺. 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀤𑀼𑀩𑁆𑀩𑀮𑀸𑀧𑀺 𑀅𑀦𑁆𑀢𑀺𑀫𑀚𑀯𑀦 𑀘𑁂𑀢𑀦𑀸 𑀲𑀦𑁆𑀦𑀺𑀝𑁆𑀞𑀸𑀦𑀓𑀺𑀘𑁆𑀘𑀯𑀺𑀲𑁂𑀲𑀬𑀼𑀢𑁆𑀢𑀢𑀸𑀬 𑀨𑀮𑀯𑀺𑀧𑀘𑁆𑀘𑀦𑁂 𑀲𑀢𑁆𑀢𑀺𑀯𑀺𑀲𑁂 𑀲𑀬𑀼𑀢𑁆𑀢𑀸 𑀳𑁄𑀢𑀻𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀆𑀦𑀦𑁆𑀢𑀭𑀺𑀬𑀓𑀸𑀘 𑀲𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀭𑀳𑀦𑁆𑀢𑀺 𑀢𑀁 𑀢𑀁 𑀧𑀼𑀕𑁆𑀕𑀮𑀸𑀦𑀼𑀭𑀽𑀧𑀁. 𑀬𑀣𑀸𑀪𑀺𑀦𑀻𑀳𑀸𑀭 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀓𑀫𑁆𑀫𑀪𑀸𑀯𑀦𑀸 𑀘𑀺𑀢𑁆𑀢𑀲𑁆𑀲 𑀓𑀲𑀺𑀡𑀦𑀺𑀫𑀺𑀢𑁆𑀢𑀸 𑀤𑀻𑀲𑀼𑀯𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼𑀯𑀸 𑀅𑀪𑀺𑀦𑀻𑀳𑀭𑀡𑀸𑀦𑀼𑀭𑀽𑀧𑀁. 𑀅𑀧𑁆𑀧𑀦𑀸𑀯𑀻𑀣𑀺𑀦𑁆𑀢𑀺 𑀅𑀧𑁆𑀧𑀦𑀸𑀧𑀩𑀦𑁆𑀥𑀁. 𑀇𑀤𑀜𑁆𑀘 𑀅𑀦𑁂𑀓𑀯𑀸𑀭𑁂 𑀧𑀯𑀢𑁆𑀢𑀸𑀦𑀁 𑀅𑀧𑁆𑀧𑀦𑀸𑀚𑀯𑀦𑀸𑀦𑀁 𑀲𑀗𑁆𑀕𑀳𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑀢𑀢𑁄𑀧𑀭𑀁 𑀅𑀧𑁆𑀧𑀦𑀸𑀯𑀲𑀸𑀦𑁂 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀻𑀢𑀺. 𑀢𑀢𑁆𑀣 𑀢𑀢𑁄𑀢𑀺 𑀘𑀢𑀼𑀢𑁆𑀣𑀢𑁄𑀯𑀸 𑀧𑀜𑁆𑀘𑀫𑀢𑁄 𑀯𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑀺 𑀧𑀜𑁆𑀘𑀫𑁂𑀯𑀸 𑀙𑀝𑁆𑀞𑁂𑀯𑀸 𑀏𑀓𑀦𑁆𑀢𑁂𑀦 𑀪𑀯𑀗𑁆𑀕𑀧𑀸𑀢𑁄 𑀳𑁄𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀧𑀼𑀦 𑀅𑀧𑁆𑀧𑀦𑀸𑀯𑀲𑀸𑀦𑁂𑀢𑀺 𑀯𑀼𑀢𑁆𑀢𑀁. 𑀪𑀯𑀗𑁆𑀕𑀧𑀸𑀢𑁄𑀯𑀳𑁄𑀢𑀺. 𑀦𑀢𑁆𑀣𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀸𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀓𑀢𑁆𑀣𑀘𑀺 𑀅𑀧𑁆𑀧𑀦𑀸𑀯𑀸𑀭𑁂 𑀲𑀢𑁆𑀢𑀚𑀯𑀦 𑀧𑀭𑀺𑀧𑀽𑀭𑀡𑀢𑁆𑀣𑀁 𑀅𑀧𑁆𑀧𑀦𑀸𑀯𑀲𑀸𑀦𑁂𑀧𑀺 𑀓𑀸𑀫𑀸𑀯𑀘𑀭𑀚𑀯𑀦𑀧𑁆𑀧𑀯𑀢𑁆𑀢𑀺𑀁 𑀯𑀤𑀦𑁆𑀢𑀸𑀦𑀁 𑀦𑀺𑀓𑀸𑀬𑀦𑁆𑀢𑀭𑀺𑀓𑀸𑀦𑀁 𑀯𑀸𑀤𑁄 𑀇𑀥 𑀏𑀯𑀲𑀤𑁆𑀤𑁂𑀦 𑀦𑀺𑀯𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀧𑁆𑀧𑀦𑀸𑀚𑀯𑀦𑀯𑀸𑀭𑁂. 𑀦𑀺𑀭𑀦𑁆𑀢𑀭𑀧𑀯𑀢𑁆𑀢𑀸𑀦𑀁 𑀚𑀯𑀦𑀸𑀦𑀁 𑀪𑀺𑀦𑁆𑀦𑀯𑁂𑀤𑀦𑀢𑀸𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀲𑁄𑀫𑀦𑀲𑁆𑀲𑀲𑀳𑀕𑀢 𑀚𑀯𑀦𑀸 𑀦𑀦𑁆𑀢𑀭𑀦𑁆𑀢𑀺𑀆𑀤𑀺.

[𑁧𑁩𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀪𑀺𑀦𑁆𑀦𑀯𑁂𑀤𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸’’𑀢𑀺𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀇𑀥 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀧𑀫𑀸𑀡𑀁. 𑀓𑀲𑁆𑀫𑀸, 𑀆𑀲𑁂𑀯𑀦 𑀧𑀘𑁆𑀘𑀦𑀺𑀓𑀸𑀦𑀁 𑀨𑀮𑀚𑀯𑀦𑀸𑀦𑀁𑀧𑀺 𑀧𑀭𑀺𑀓𑀫𑁆𑀫𑀚𑀯𑀦𑁂𑀳𑀺 𑀅𑀜𑁆𑀜𑀫𑀜𑁆𑀜𑀜𑁆𑀘 𑀅𑀪𑀺𑀦𑁆𑀦𑀯𑁂𑀤𑀦𑀢𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸𑀢𑀺. 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀢𑀺 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀸.

[𑁧𑁩𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀲𑀁𑀲𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀢𑀸𑀤𑀺𑀲𑁄 𑀲𑀁𑀯𑀡𑁆𑀡𑀦𑀸𑀧𑀤𑁂𑀲𑁄 𑀤𑀺𑀲𑁆𑀲𑀢𑀻𑀢𑀺. 𑀅𑀭𑀳𑀢𑁆𑀢 𑀨𑀮𑁂 𑀫𑀕𑁆𑀕𑀯𑀻𑀣𑀺𑀬𑀁 𑀫𑀕𑁆𑀕𑀓𑀼𑀲𑀮𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑁂𑀧𑀺 𑀅𑀬𑀁 𑀧𑀼𑀩𑁆𑀩𑀸𑀧𑀭 𑀦𑀺𑀬𑀫𑁄 𑀧𑀭𑀺𑀓𑀫𑁆𑀫𑀚𑀯𑀦𑁂𑀳𑀺 𑀏𑀯 𑀲𑀳 𑀅𑀧𑁆𑀧𑀦𑀸𑀚𑀯𑀦𑀸𑀦𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀨𑀮𑀜𑁆𑀘𑀸𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀧𑀼𑀜𑁆𑀜𑀫𑁆𑀳𑀸 𑀧𑀭𑀁 𑀤𑁆𑀯𑀢𑁆𑀢𑀺𑀁𑀲 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀺. 𑀉𑀧𑁂𑀓𑁆𑀔𑀓𑀸 𑀧𑀼𑀜𑁆𑀜𑀫𑁆𑀳𑀸 𑀧𑀭𑀁 𑀤𑁆𑀯𑀸𑀤𑀲, 𑀲𑀼𑀔𑀺𑀢𑀓𑁆𑀭𑀺𑀬𑀢𑁄 𑀧𑀭𑀁 𑀅𑀝𑁆𑀞. 𑀉𑀧𑁂𑀓𑁆𑀔𑀓𑀸 𑀓𑁆𑀭𑀺𑀬𑀢𑁄 𑀧𑀭𑀁 𑀙 𑀅𑀧𑁆𑀧𑀦𑀸𑀚𑀯𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀩𑁆𑀩𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀭𑀽𑀧𑀓𑀼𑀲𑀮𑀸𑀦𑀁 𑀲𑁄𑀴𑀲𑀦𑁆𑀦𑀁 𑀫𑀕𑁆𑀕𑀓𑀼𑀲𑀮𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀳𑁂𑀝𑁆𑀞𑀺𑀫𑀨𑀮𑀸𑀦𑀜𑁆𑀘 𑀯𑀲𑁂𑀦 𑀤𑁆𑀯𑀢𑁆𑀢𑀺𑀁𑀲. 𑀤𑁆𑀯𑀸𑀤𑀲𑀸𑀢𑀺 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀭𑀽𑀧𑀸𑀭𑀽𑀧𑀫𑀕𑁆𑀕𑀓𑀼𑀲𑀮𑀸𑀦𑀁 𑀳𑁂𑀝𑁆𑀞𑀺𑀫𑀨𑀮𑀸𑀦𑀜𑁆𑀘 𑀯𑀲𑁂𑀦 𑀤𑁆𑀯𑀸𑀤𑀲. 𑀅𑀝𑁆𑀞𑀸𑀢𑀺 𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀭𑀽𑀧𑀓𑁆𑀭𑀺𑀬𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀳𑀢𑁆𑀢𑀨𑀮𑀸𑀦𑀜𑁆𑀘 𑀯𑀲𑁂𑀦 𑀅𑀝𑁆𑀞. 𑀙𑀸𑀢𑀺 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀭𑀽𑀧𑀸𑀭𑀽𑀧𑀓𑁆𑀭𑀺𑀬𑀸𑀦𑀁 𑀅𑀭𑀳𑀢𑁆𑀢𑀨𑀮𑀲𑁆𑀲𑀘 𑀯𑀲𑁂𑀦 𑀙. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑁂𑀓𑁆𑀔𑀸𑀦𑀜𑁆𑀘 𑀓𑀸𑀫𑀧𑀼𑀜𑁆𑀜𑀢𑀺𑀳𑁂𑀢𑀼𑀢𑁄 𑀧𑀭𑀁 𑀘𑀢𑀼𑀘𑀢𑁆𑀢𑀸𑀮𑀻𑀲 𑀅𑀧𑁆𑀧𑀦𑀸 𑀲𑀫𑁆𑀪𑀯𑀦𑁆𑀢𑀺. 𑀯𑀻𑀢𑀭𑀸𑀕𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀢𑀺𑀳𑁂𑀢𑀼𑀓𑀸𑀫𑀓𑁆𑀭𑀺𑀬𑀢𑁄 𑀧𑀭𑀁 𑀘𑀼𑀤𑁆𑀤𑀲 𑀅𑀧𑁆𑀧𑀦𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁧𑁩𑁯. 𑀲𑀩𑁆𑀩𑀣𑀸𑀧𑀻𑀢𑀺 𑀅𑀢𑀺𑀫𑀳𑀦𑁆𑀢𑀸𑀤𑀺𑀦𑀸 𑀲𑀩𑁆𑀩𑀧𑀓𑀸𑀭𑁂𑀦𑀧𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀤𑁆𑀯𑀸𑀭 𑀫𑀦𑁄𑀤𑁆𑀯𑀸𑀭𑁂𑀲𑀼. 𑀲𑀩𑁆𑀩𑀢𑁆𑀣𑀸𑀧𑀺 𑀧𑀦 𑀅𑀦𑀺𑀝𑁆𑀞𑁂 𑀢𑀺𑀯𑀸 𑀧𑀸𑀞𑁄. 𑀢𑁂𑀦𑁂𑀯 𑀝𑀻𑀓𑀸𑀲𑀼 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀧𑀜𑁆𑀘𑀤𑁆𑀯𑀸𑀭 𑀫𑀦𑁄𑀤𑁆𑀯𑀸𑀭𑁂𑀧𑀻𑀢𑀺 𑀯𑀼𑀢𑁆𑀢𑀁. 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀇𑀝𑁆𑀞𑀁. 𑀓𑁂𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀮𑁄𑀓𑀺𑀬𑀫𑀳𑀸𑀚𑀦𑁂𑀦. 𑀢𑀢𑁆𑀣 𑀘 𑀅𑀢𑀺𑀉𑀓𑁆𑀓𑀝𑁆𑀞𑁂 𑀅𑀢𑀺𑀤𑀼𑀕𑁆𑀕𑀢𑁂𑀘 𑀚𑀦𑁂 𑀅𑀕𑀳𑁂𑀢𑁆𑀯𑀸 𑀫𑀚𑁆𑀛𑀺𑀫𑀓𑁂𑀦 𑀫𑀳𑀸𑀚𑀦𑁂𑀦. 𑀏𑀯𑀜𑁆𑀳𑀺 𑀲𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀁 𑀲𑀼𑀝𑁆𑀞𑀼𑀯𑀯𑀢𑁆𑀣𑀸𑀦𑀁 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀓𑀼𑀲𑀮 𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑁂𑀯 𑀇𑀝𑁆𑀞𑀁𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑁂𑀯 𑀅𑀦𑀺𑀝𑁆𑀞𑀁𑀦𑀸𑀫. 𑀦 𑀳𑀺 𑀲𑀓𑁆𑀓𑀸 𑀇𑀝𑁆𑀞𑀁𑀯𑀸 𑀅𑀦𑀺𑀝𑁆𑀞𑀁𑀯𑀸 𑀆𑀭𑀫𑁆𑀫𑀡𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀯𑀜𑁆𑀘𑁂𑀢𑀼𑀦𑁆𑀢𑀺𑀘. 𑀅𑀧𑀺𑀘 𑀤𑁆𑀯𑀸𑀭𑀯𑀲𑁂𑀦𑀸𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑀕𑀢𑁂 𑀏𑀓𑁂 𑀓𑀲𑁆𑀫𑀺𑀁 𑀭𑀽𑀧𑀓𑀮𑀸𑀧𑁂 𑀯𑀡𑁆𑀡𑀸𑀤𑀻𑀲𑀼 𑀭𑀽𑀧𑁂𑀲𑀼 𑀓𑀺𑀜𑁆𑀘𑀺 𑀇𑀝𑁆𑀞𑀁 𑀳𑁄𑀢𑀺. 𑀓𑀺𑀜𑁆𑀘𑀺 𑀅𑀦𑀺𑀝𑁆𑀞𑀁. 𑀓𑀤𑀸𑀘𑀺 𑀇𑀝𑁆𑀞𑀁 𑀳𑁄𑀢𑀺. 𑀓𑀤𑀸𑀘𑀺 𑀅𑀦𑀺𑀝𑁆𑀞𑀁, 𑀢𑀢𑁆𑀣 𑀓𑀺𑀜𑁆𑀘𑀺 𑀇𑀝𑁆𑀞𑀁 𑀳𑁄𑀢𑀺 𑀓𑀺𑀜𑁆𑀘𑀺 𑀅𑀦𑀺𑀝𑁆𑀞𑀦𑁆𑀢𑀺 𑀬𑀣𑀸 𑀓𑀺𑀁𑀲𑁆𑀫𑀺𑀁𑀘𑀺 𑀏𑀓𑀲𑁆𑀫𑀺𑀁 𑀧𑀼𑀧𑁆𑀨𑁂 𑀯𑀡𑁆𑀡𑁄 𑀇𑀝𑁆𑀞𑁄. 𑀕𑀦𑁆𑀥𑁄 𑀅𑀦𑀺𑀝𑁆𑀞𑁄, 𑀭𑀲𑁄 𑀅𑀦𑀺𑀝𑁆𑀞𑁄, 𑀨𑁄𑀝𑁆𑀞𑀩𑁆𑀩𑁄 𑀅𑀦𑀺𑀝𑁆𑀞𑁄, 𑀔𑀭𑀲𑀫𑁆𑀨𑀲𑁆𑀲𑁄. 𑀓𑀺𑀁𑀲𑁆𑀫𑀺𑀁𑀘𑀺 𑀯𑀡𑁆𑀡𑁄𑀧𑀺 𑀇𑀝𑁆𑀞𑁄, 𑀕𑀦𑁆𑀥𑁄𑀧𑀺 𑀇𑀝𑁆𑀞𑁄, 𑀭𑀲𑀸𑀤𑀬𑁄 𑀅𑀦𑀺𑀝𑁆𑀞𑀸𑀬𑁂𑀯. 𑀢𑀣𑀸 𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀕𑀢𑁂𑀧𑀺 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀯𑀡𑁆𑀡𑁄 𑀇𑀝𑁆𑀞𑁄 𑀳𑁄𑀢𑀺. 𑀕𑀦𑁆𑀥𑁄 𑀅𑀦𑀺𑀝𑁆𑀞𑁄. 𑀫𑀢𑀓𑀡𑁆𑀳𑀲𑀼𑀦𑀔𑀲𑁆𑀲 𑀉𑀤𑁆𑀥𑀼𑀫𑀸𑀢𑀲𑀭𑀻𑀭𑁂𑀧𑀺 𑀯𑀡𑁆𑀡𑁄 𑀇𑀝𑁆𑀞𑁄 𑀳𑁄𑀢𑀺. 𑀕𑀦𑁆𑀥𑁄 𑀅𑀦𑀺𑀝𑁆𑀞𑁄. 𑀲𑁄 𑀳𑀺 𑀯𑀡𑁆𑀡𑁄 𑀬𑀤𑀺 𑀦𑀺𑀯𑀢𑁆𑀣𑀧𑀸𑀭𑀼𑀢𑀲𑁆𑀲 𑀯𑀢𑁆𑀣𑀲𑁆𑀲 𑀪𑀯𑁂𑀬𑁆𑀬. 𑀢𑀁 𑀯𑀢𑁆𑀣𑀁 𑀫𑀳𑀕𑁆𑀖𑀁 𑀳𑁄𑀢𑀻𑀢𑀺. 𑀓𑀤𑀸𑀘𑀺 𑀇𑀝𑁆𑀞𑀁 𑀓𑀤𑀸𑀘𑀺 𑀅𑀦𑀺𑀝𑁆𑀞𑀦𑁆𑀢𑀺 𑀅𑀕𑁆𑀕𑀺𑀦𑀸𑀫 𑀳𑁂𑀫𑀦𑁆𑀢𑁂 𑀇𑀝𑁆𑀞𑁄 𑀲𑀼𑀔𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑁄. 𑀕𑀺𑀫𑁆𑀳𑁂 𑀅𑀦𑀺𑀝𑁆𑀞𑁄 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲 𑀧𑀘𑁆𑀘𑀬𑁄. 𑀲𑀻𑀢𑀼𑀤𑀓𑀁 𑀕𑀺𑀫𑁆𑀳𑁂 𑀇𑀝𑁆𑀞𑀁. 𑀳𑁂𑀫𑀦𑁆𑀢𑁂 𑀅𑀦𑀺𑀝𑁆𑀞𑀁. 𑀢𑀣𑀸 𑀲𑀼𑀔 𑀲𑀫𑁆𑀨𑀲𑁆𑀲𑀁 𑀯𑀢𑁆𑀣𑀁 𑀧𑀓𑀢𑀺𑀓𑀸𑀬𑁂 𑀇𑀝𑁆𑀞𑀁 𑀳𑁄𑀢𑀺. 𑀯𑀡𑀁 𑀧𑀢𑁆𑀯𑀸 𑀅𑀦𑀺𑀝𑁆𑀞𑀁. 𑀢𑁂𑀦𑀯𑀸 𑀲𑀡𑀺𑀓𑀁 𑀨𑀼𑀲𑀦𑁆𑀢𑀲𑁆𑀲 𑀇𑀝𑁆𑀞𑀁, 𑀕𑀸𑀴𑁆𑀳𑀁 𑀨𑀼𑀲𑀦𑁆𑀢𑀲𑁆𑀲 𑀅𑀦𑀺𑀝𑁆𑀞𑀦𑁆𑀢𑀺. 𑀦𑀇𑀝𑁆𑀞𑀦𑁆𑀢𑀺 𑀅𑀦𑀺𑀝𑁆𑀞𑀁. 𑀢𑀲𑁆𑀫𑀺𑀁 𑀅𑀦𑀺𑀝𑁆𑀞𑁂. 𑀇𑀝𑁆𑀞𑁂𑀢𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑁂, 𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡 𑀲𑀫𑁆𑀧𑀝𑀺𑀘𑁆𑀙𑀦 𑀲𑀦𑁆𑀢𑀻𑀭𑀡 𑀢𑀤𑀸𑀭𑀫𑁆𑀫𑀡𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀢𑀻𑀭𑀡 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺𑀏𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑁂𑀦𑁂𑀯𑀸𑀳 𑀅𑀢𑀺𑀇𑀝𑁆𑀞𑁂𑀧𑀦𑀸𑀢𑀺𑀆𑀤𑀺. 𑀢𑀢𑁆𑀣 𑀅𑀪𑀺𑀇𑀝𑁆𑀞𑁂𑀢𑀺 𑀲𑀼𑀯𑀡𑁆𑀡 𑀭𑀚𑀢 𑀫𑀡𑀺𑀯𑀡𑁆𑀡𑀸𑀤𑀺𑀓𑁂 𑀳𑀭𑀺𑀢𑀸𑀮𑀯𑀡𑁆𑀡𑀸𑀤𑀺𑀓𑁂 𑀓𑁄𑀲𑁂𑀬𑁆𑀬 𑀯𑀢𑁆𑀣𑀯𑀡𑁆𑀡𑀸𑀤𑀺 𑀓𑁂 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀸𑀤𑀺𑀓𑁂𑀘 𑀅𑀢𑀺𑀯𑀺𑀬 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀇𑀘𑁆𑀙𑀺𑀢𑀩𑁆𑀩𑁂 𑀙𑀴𑀸𑀭𑀫𑁆𑀫𑀡𑁂. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀦𑀺𑀝𑁆𑀞𑀸𑀭𑀫𑁆𑀫𑀡 𑀲𑀫𑀸𑀬𑁄𑀕𑁄 𑀅𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯 𑀯𑀺𑀧𑀘𑁆𑀘𑀦𑁄𑀓𑀸𑀲𑁄 𑀳𑁄𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄𑀘 𑀓𑀼𑀲𑀮𑀓𑀫𑁆𑀫𑀲𑁆𑀲𑁂𑀯, 𑀢𑀲𑁆𑀫𑀸 𑀅𑀦𑀺𑀝𑁆𑀞𑁂 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑁂𑀯. 𑀇𑀝𑁆𑀞𑁂 𑀓𑀼𑀲𑀮𑀯𑀺𑀧𑀸𑀓𑀸𑀦𑁂𑀯𑀸𑀢𑀺 𑀅𑀬𑀁 𑀦𑀺𑀬𑀫𑁄 𑀲𑀺𑀤𑁆𑀥𑁄. 𑀯𑁂𑀤𑀦𑀸𑀦𑀺𑀬𑀫𑁄 𑀧𑀦 𑀆𑀤𑀸𑀲𑁂 𑀫𑀼𑀔𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀬 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳 𑀩𑀮𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀓𑀫𑁆𑀫𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀺𑀧𑀸𑀓𑀸𑀦𑀁 𑀧𑀭𑀺𑀤𑀼𑀩𑁆𑀩𑀮𑀢𑁆𑀢𑀸 𑀢𑀣𑀸 𑀢𑀣𑀸 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀸 𑀪𑀸𑀯𑀢𑁄 𑀬𑀣𑀸𑀭𑀫𑁆𑀫𑀡𑀫𑁂𑀯 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀓𑁂𑀯𑀮𑀜𑁆𑀘 𑀯𑀺𑀧𑀸𑀓𑀸𑀦𑀁 𑀏𑀯. 𑀅𑀣𑀔𑁄 𑀯𑀺𑀧𑀮𑁆𑀮𑀸𑀲𑀭𑀳𑀺𑀢𑁂 𑀔𑀺𑀡𑀸𑀲𑀯𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀦𑀁 𑀓𑀸𑀫𑀓𑁆𑀭𑀺𑀬𑀚𑀯𑀦𑀸𑀦𑀁 𑀯𑀺𑀬𑀣𑀸𑀭𑀫𑁆𑀫𑀡𑀫𑁂𑀯 𑀯𑁂𑀤𑀦𑀸𑀬𑁄𑀕𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀢𑀢𑁆𑀣𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢 𑀓𑁆𑀭𑀺𑀬𑀚𑀯𑀦𑀸𑀯𑀲𑀸𑀦𑁂 𑀢𑀺𑀆𑀤𑀺. 𑀢𑀢𑁆𑀣𑀸𑀧𑀻𑀢𑀺 𑀢𑁂𑀲𑀼 𑀯𑀺𑀧𑀸𑀓𑁂𑀲𑀼𑀧𑀺. 𑀲𑁄𑀫𑀦𑀲𑁆𑀲𑀲𑀳𑀕𑀢 𑀓𑁆𑀭𑀺𑀬 𑀚𑀯𑀦𑀸 𑀯𑀲𑀸𑀦𑁂𑀢𑀺 𑀩𑀼𑀤𑁆𑀥𑀯𑀡𑁆𑀡𑀸𑀤𑀺𑀓𑁂 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀦𑀁 𑀲𑁄𑀫𑀦𑀲𑁆𑀲 𑀲𑀳𑀕𑀢 𑀓𑁆𑀭𑀺𑀬𑀚𑀯𑀦𑀸𑀦𑀁 𑀅𑀯𑀲𑀸𑀦𑁂. 𑀉𑀧𑁂𑀓𑁆𑀔𑀸𑀲𑀳𑀕𑀢 𑀓𑁆𑀭𑀺𑀬 𑀚𑀯𑀦𑀸 𑀯𑀲𑀸𑀦𑁂𑀢𑀺 𑀅𑀦𑀺𑀝𑁆𑀞𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑁂𑀘 𑀧𑀯𑀢𑁆𑀢𑀸𑀦𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀓𑁆𑀭𑀺𑀬𑀚𑀯𑀦𑀸𑀦𑀁 𑀅𑀯𑀲𑀸𑀦𑁂. 𑀅𑀬𑀜𑁆𑀘 𑀓𑁆𑀭𑀺𑀬𑀚𑀯𑀦𑀸𑀯𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄 𑀅𑀝𑁆𑀞𑀓𑀣𑀸𑀬𑀁𑀧𑀺 𑀯𑀼𑀢𑁆𑀢𑁄𑀬𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀓𑀸𑀫𑀸𑀯𑀘𑀭 𑀢𑀺𑀳𑁂𑀢𑀼𑀓 𑀲𑁄𑀫𑀦𑀲𑁆𑀲 𑀲𑀳𑀕𑀢𑀓𑁆𑀭𑀺𑀬𑀤𑁆𑀯𑀬𑀁 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢 𑀯𑀺𑀧𑀸𑀓𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺𑀆𑀤𑀺. 𑀇𑀤𑀜𑁆𑀘 𑀧𑀓𑀢𑀺𑀦𑀻𑀳𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀓𑁆𑀭𑀺𑀬𑀚𑀯𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀭𑀽𑀧𑁂𑀦 𑀧𑀦 𑀘𑀺𑀢𑁆𑀢𑀸𑀢𑀺𑀲𑀗𑁆𑀔𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀓𑁆𑀭𑀺𑀬𑀚𑀯𑀦𑀸𑀦𑀁 𑀇𑀝𑁆𑀞𑁂𑀧𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑁄𑀕𑁄 𑀅𑀦𑀺𑀝𑁆𑀞𑁂𑀧𑀺 𑀲𑁄𑀫𑀦𑀲𑁆𑀲 𑀯𑁂𑀤𑀦𑀸𑀬𑁄𑀕𑁄 𑀳𑁄𑀢𑀺𑀬𑁂𑀯. 𑀬𑀣𑀸𑀳 𑁋

𑀓𑀣𑀜𑁆𑀘𑀸𑀦𑀦𑁆𑀤 𑀅𑀭𑀺𑀬𑁄 𑀳𑁄𑀢𑀺 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄. 𑀇𑀥𑀸𑀦𑀦𑁆𑀤 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁. 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀁. 𑀲𑁄 𑀲𑀘𑁂 𑀆𑀓𑀗𑁆𑀔𑀢𑀺 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬𑀦𑁆𑀢𑀺. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮 𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬𑀦𑁆𑀢𑀺. 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺.

𑀲𑀩𑁆𑀩𑀁 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀁 𑀆𑀳𑀭𑀺𑀢𑀩𑁆𑀩𑀁. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀁 𑀉𑀧𑁆𑀧𑀚𑁆𑀚𑀢𑀺 𑀅𑀫𑀦𑀸𑀧𑀁. 𑀉𑀧𑁆𑀧𑀚𑁆𑀚𑀢𑀺 𑀫𑀦𑀸𑀧𑀸𑀫𑀦𑀸𑀧𑀦𑁆𑀢𑀺 𑀏𑀢𑁂𑀦 𑀔𑀻𑀡𑀸𑀲𑀯𑀸𑀦𑀁 𑀓𑀸𑀫𑀓𑁆𑀭𑀺𑀬𑀚𑀯𑀦𑀸𑀦𑀁 𑀧𑀓𑀢𑀺𑀦𑀻𑀳𑀸𑀭𑁂𑀦 𑀇𑀝𑁆𑀞𑁂 𑀲𑁄 𑀫𑀦𑀲𑁆𑀲𑀬𑁄𑀕𑁄 𑀅𑀦𑀺𑀝𑁆𑀞𑁂 𑀉𑀧𑁂𑀓𑁆𑀔𑀸 𑀬𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀲𑁄𑀲𑀘𑁂 𑀆𑀓𑀗𑁆𑀔𑀢𑀺 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬𑀦𑁆𑀢𑀺. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺𑀆𑀤𑀺𑀦𑀸 𑀧𑀦 𑀢𑁂𑀲𑀁 𑀢𑀣𑀸𑀭𑀽𑀧𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑁂 𑀲𑀢𑀺 𑀇𑀝𑁆𑀞𑁂𑀧𑀺 𑀉𑀧𑁂𑀓𑁆𑀔𑀸𑀬𑁄𑀕𑁄 𑀅𑀦𑀺𑀝𑁆𑀞𑁂𑀧𑀺𑀲𑁄𑀫𑀦𑀲𑁆𑀲 𑀬𑁄𑀕𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀬𑀁 𑀧𑀦 𑀔𑀻𑀡𑀸𑀲𑀯𑀸𑀦𑀁 𑀲𑀢𑀢𑀯𑀺𑀳𑀸𑀭𑀲𑀼𑀢𑁆𑀢𑁂 𑀇𑀥 𑀪𑀺𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺. 𑀦 𑀤𑀼𑀫𑁆𑀫𑀦𑁄. 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺𑀆𑀤𑀺𑀦𑀸 𑀙𑀲𑀼𑀤𑁆𑀯𑀸𑀭𑁂𑀲𑀼 𑀲𑁄𑀫𑀦𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀢𑁂𑀲𑀁 𑀢𑀣𑀸 𑀭𑀽𑀧𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀩𑀸𑀳𑀼𑀮𑁆𑀮𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀯𑀸 𑀔𑀻𑀡𑀸𑀮𑀯𑀸𑀧𑀺 𑀩𑀼𑀤𑁆𑀥𑀭𑀽𑀧𑀤𑀲𑁆𑀲𑀦𑀸𑀤𑀻𑀲𑀼 𑀧𑀥𑀸𑀦𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑀤𑀲𑁆𑀲𑀦𑀸𑀤𑀻𑀲𑀼 𑀘 𑀲𑁄𑀫𑀦𑀲𑁆𑀲𑀺𑀢𑀸 𑀳𑁄𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀓𑁂𑀯𑀮𑀁 𑀭𑀸𑀕𑀸𑀤𑀺𑀯𑀢𑁆𑀣𑀼 𑀪𑀽𑀢𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀦𑀺 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀬𑀼𑀢𑁆𑀢𑀁. 𑀏𑀢𑁆𑀣 𑀘. 𑀓𑀣𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬𑀯𑀸 𑀨𑀭𑀢𑀺. 𑀥𑀸𑀢𑀼𑀢𑁄𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬𑀯𑀸 𑀨𑀭𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀻𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀦𑀬𑁂𑀦 𑀇𑀥 𑀢𑀣𑀸𑀭𑀽𑀧𑁄 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀫 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺-𑀔𑀻𑀡𑀸𑀲𑀯𑀸 𑀬𑀤𑀸 𑀤𑁂𑀯𑀘𑁆𑀙𑀭𑀸 𑀯𑀡𑁆𑀡𑀸𑀤𑀺𑀓𑀁 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑀁 𑀆𑀧𑀸𑀢𑀫𑀸 𑀕𑀘𑁆𑀙𑀢𑀺. 𑀢𑀤𑀸 𑀢𑀢𑁆𑀣 𑀅𑀲𑀼𑀪𑀸𑀬𑀯𑀸𑀨𑀭𑀦𑁆𑀢𑀺. 𑀅𑀦𑀺𑀘𑁆𑀘𑀢𑁄𑀯𑀸 𑀉𑀧𑀲𑀁𑀳𑀭𑀦𑁆𑀢𑀺 𑀢𑀢𑁆𑀣 𑀅𑀦𑀺𑀝𑁆𑀞𑀪𑀽𑀢𑀁 𑀅𑀲𑀼𑀪 𑀮𑀓𑁆𑀔𑀡𑀁𑀯𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁𑀯𑀸 𑀉𑀧𑁂𑀓𑁆𑀔𑀸 𑀓𑁆𑀭𑀺𑀬 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀦 𑀅𑀢𑀺𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀁 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀸𑀤𑀺𑀓𑀁.

𑀢𑀣𑀸 𑀬𑀤𑀸 𑀓𑀼𑀥𑀺𑀪𑀓𑀼𑀝𑁆𑀞𑀲𑀭𑀻𑀭𑀸𑀤𑀺𑀓𑀁 𑀅𑀢𑀺𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀆𑀧𑀸𑀢𑀫𑀸𑀕𑀘𑁆𑀙𑀢𑀺. 𑀢𑀤𑀸 𑀢𑀢𑁆𑀣 𑀫𑁂𑀢𑁆𑀢𑀸𑀬𑀯𑀸 𑀨𑀭𑀦𑁆𑀢𑀺. 𑀥𑀸𑀢𑀼𑀢𑁄𑀯𑀸 𑀉𑀧𑀲𑀁𑀳𑀭𑀦𑁆𑀢𑀺. 𑀢𑀢𑁆𑀣 𑀇𑀝𑁆𑀞𑀪𑀽𑀢𑀁 𑀅𑀯𑁂𑀭𑀢𑀸𑀯𑀸𑀤𑀺𑀮𑀓𑁆𑀔𑀡𑀫𑁂𑀯 𑀲𑁄𑀫𑀦𑀲𑁆𑀲𑀓𑁆𑀭𑀺𑀬𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺. 𑀦 𑀅𑀢𑀺𑀅𑀦𑀺𑀝𑁆𑀞𑀪𑀽𑀢𑀁 𑀓𑀼𑀥𑀺𑀢 𑀓𑀼𑀝𑁆𑀞𑀲𑀭𑀻𑀭𑀸𑀤𑀺𑀓𑀁. 𑀢𑀲𑁆𑀫𑀸 𑀢𑀸𑀦𑀺 𑀚𑀯𑀦𑀸𑀦𑀺 𑀓𑀸𑀫𑀯𑀺𑀧𑀸𑀓𑀸𑀦𑀺𑀯𑀺𑀬 𑀲𑀩𑁆𑀩𑀤𑀸𑀧𑀺 𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀫𑁂𑀯 𑀯𑁂𑀤𑀦𑀸𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀢𑀁 𑀦𑀬𑀼𑀚𑁆𑀚𑀢𑀺. 𑀦 𑀳𑀺 𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀸𑀤𑀻𑀳𑀺 𑀯𑀺𑀦𑀸 𑀯𑀺𑀲𑀼𑀁 𑀮𑀩𑁆𑀪𑀦𑁆𑀢𑀺. 𑀢𑁂𑀳𑀺 𑀧𑀦 𑀲𑀳𑁂𑀯 𑀮𑀩𑁆𑀪𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀪𑀸𑀯𑀦𑀸𑀬 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑀤𑀲𑁆𑀲𑀦𑁂𑀦𑀘 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀅𑀢𑀺 𑀅𑀦𑀺𑀝𑁆𑀞𑁂𑀲𑀼𑀧𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀬𑀣𑀸𑀘 𑀫𑀳𑀸 𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀲𑁆𑀲 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀤𑀲𑁆𑀲𑀦𑁂𑀦 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦𑀘 𑀅𑀦𑀺𑀝𑁆𑀞𑀪𑀽𑀢𑁂𑀧𑀺 𑀅𑀝𑁆𑀞𑀺𑀓𑀗𑁆𑀓𑀮𑀺𑀓𑀧𑁂𑀢𑀭𑀽𑀧𑁂 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸. 𑀬𑀣𑀸 𑀘 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀢𑀣𑀸𑀭𑀽𑀧𑁂𑀦 𑀘𑀺𑀢𑁆𑀢𑀸𑀪𑀺 𑀲𑀗𑁆𑀔𑀸𑀭𑁂𑀦 𑀓𑀼𑀝𑁆𑀞𑀺𑀦𑁄 𑀳𑀢𑁆𑀣𑀢𑁄 𑀮𑀤𑁆𑀥𑁂 𑀅𑀦𑀺𑀝𑁆𑀞𑀪𑀽𑀢𑁂 𑀧𑀽𑀢𑀺𑀓𑀼𑀫𑁆𑀫𑀸𑀲𑁂𑀧𑀺 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀏𑀯𑀫𑁂𑀯𑀁 𑀇𑀥𑀧𑀺 𑀅𑀲𑀼𑀪𑀨𑀭𑀡𑀸𑀤𑀺𑀓𑁄 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑁄 𑀅𑀢𑀺𑀇𑀝𑁆𑀞𑁂 𑀉𑀧𑁂𑀓𑁆𑀔𑀸𑀚𑀯𑀦𑀸𑀦𑀁 𑀅𑀢𑀺𑀅𑀦𑀺𑀝𑁆𑀞𑁂𑀘 𑀲𑁄𑀫𑀦𑀲𑁆𑀲𑀚𑀯𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀳𑀺 𑀆𑀭𑀫𑁆𑀫𑀡𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁄𑀦𑀸𑀫 𑀮𑁄𑀓𑀺𑀬𑀫𑀳𑀸𑀚𑀦𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀲𑀺𑀤𑁆𑀥𑁄 𑀳𑁄𑀢𑀺 𑀅𑀕𑀫𑁆𑀪𑀻𑀭𑁄 𑀯𑀺𑀧𑀮𑁆𑀮𑀸𑀲𑀥𑀫𑁆𑀫𑀸𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀯𑀢𑁆𑀣𑀼𑀪𑀽𑀢𑁄. 𑀬𑀣𑀸𑀳-𑀢𑀢𑁆𑀣 𑀓𑀢𑀫𑀁 𑀭𑀽𑀧𑀁 𑀳𑀻𑀦𑀁. 𑀬𑀁 𑀭𑀽𑀧𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀜𑁆𑀜𑀸𑀢𑀁 𑀅𑀯𑀜𑁆𑀜𑀸𑀢𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀳𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀏𑀢𑁂𑀦 𑀆𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁄 𑀦𑀸𑀫 𑀮𑁄𑀓𑀺𑀬𑀫𑀳𑀸𑀚𑀦 𑀲𑀫𑁆𑀫𑀼𑀢𑀺𑀬𑀸 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀬𑀜𑁆𑀘 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸𑀦𑀁 𑀮𑁄𑀓𑀺𑀬𑀫𑀳𑀸𑀚𑀦𑀸𑀦𑀁 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀸 𑀤𑀻𑀲𑀼 𑀅𑀢𑀺 𑀇𑀝𑁆𑀞𑁂𑀲𑀼 𑀅𑀢𑀺𑀇𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀁. 𑀬𑀜𑁆𑀘 𑀩𑀼𑀤𑁆𑀥𑀯𑀡𑁆𑀡𑀸 𑀤𑀻𑀲𑀼 𑀅𑀢𑀺𑀇𑀝𑁆𑀞𑁂𑀲𑀼 𑀅𑀦𑀺𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀁. 𑀢𑀤𑀼𑀪𑀬𑀁𑀧𑀺 𑀢𑁂𑀲𑀁 𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑁂𑀯 𑀳𑁄𑀢𑀺. 𑀬𑀁𑀧𑀦 𑀧𑀜𑁆𑀜𑀯𑀦𑁆𑀢𑀸𑀦𑀁 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀤𑁂𑀯𑀘𑁆𑀙𑀭𑀸𑀯𑀡𑁆𑀡𑀸𑀤𑀻𑀲𑀼 𑀅𑀦𑀺𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀁. 𑀬𑀜𑁆𑀘 𑀩𑀼𑀤𑁆𑀥𑀯𑀡𑁆𑀡𑀸𑀤𑀻𑀲𑀼 𑀅𑀢𑀺𑀇𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑀁. 𑀢𑀤𑀼𑀪𑀬𑀁𑀧𑀺 𑀧𑀜𑁆𑀜𑀸𑀩𑀮𑁂𑀦𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

[𑁧𑁩𑁪] 𑀬𑀁 𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁂𑀲𑀼 𑀲𑀦𑁆𑀢𑀸𑀦𑁂𑀲𑀼 𑀧𑀯𑀢𑁆𑀢𑀺𑀬𑀸 𑀅𑀢𑀺𑀇𑀝𑁆𑀞𑁂𑀧𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑀸𑀓𑀸𑀭𑀢𑁄 𑀅𑀦𑀺𑀝𑁆𑀞𑁂𑀧𑀺 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀓𑀸𑀭𑀢𑁄 𑀕𑀳𑀡𑀁 𑀳𑁄𑀢𑀻𑀢𑀺’’ 𑀯𑀼𑀢𑁆𑀢𑀁.

𑀬𑀜𑁆𑀘 𑀢𑀢𑁆𑀣

‘‘𑀔𑀻𑀡𑀸𑀲𑀯𑀸𑀦𑀁 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀸𑀪𑀸𑀯𑁂𑀦 𑀓𑁆𑀭𑀺𑀬𑀚𑀯𑀦𑀸𑀦𑀺𑀧𑀺 𑀬𑀣𑀸𑀭𑀫𑁆𑀫𑀡𑀫𑁂𑀯 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀯.

𑀬𑁂 𑀳𑀺 𑀢𑁂 𑀥𑀫𑁆𑀫 𑀘𑀓𑁆𑀔𑀼𑀭𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀬𑁂𑀯 𑀯𑀺𑀧𑀮𑁆𑀮𑀸𑀲 𑀯𑀲𑁂𑀦 𑀘𑀺𑀢𑁆𑀢𑀯𑀲𑀸𑀦𑀼𑀕𑀸 𑀆𑀭𑀫𑁆𑀫𑀡𑀯𑀲𑀸𑀦𑀼𑀕𑀸𑀘 𑀳𑁄𑀦𑁆𑀢𑀻𑀢𑀺 𑀓𑀼𑀲𑀮𑀸 𑀓𑀼𑀲𑀮𑀸𑀦𑀺𑀬𑁂𑀯 𑀬𑁂𑀪𑀼𑀬𑁆𑀬𑁂𑀦 𑀬𑀣𑀸𑀭𑀫𑁆𑀫𑀡𑀁 𑀧𑀯𑀢𑁆𑀢𑀦𑁆𑀢𑀺. 𑀦 𑀧𑀦 𑀓𑁆𑀭𑀺𑀬 𑀚𑀯𑀦𑀸𑀦𑀺. 𑀦 𑀳𑀺 𑀔𑀻𑀡𑀸𑀲𑀯𑀸 𑀮𑁄𑀓𑀺𑀬𑀫𑀳𑀸𑀚𑀦𑀲𑀫𑁆𑀫𑀢𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀘𑀺𑀢𑁆𑀢𑀯𑀲𑀸𑀦𑀼𑀕𑀸 𑀆𑀭𑀫𑁆𑀫𑀡𑀯𑀲𑀸𑀦𑀼𑀕𑀸𑀘 𑀳𑁄𑀦𑁆𑀢𑀻𑀢𑀺. 𑀬𑀣𑀸𑀳 𑁋

𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸, 𑀨𑁄𑀝𑁆𑀞𑀩𑁆𑀩𑀸𑀘 𑀫𑀦𑁄𑀭𑀫𑀸;

𑀇𑀝𑁆𑀞𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀘, 𑀦 𑀧𑀯𑁂𑀥𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺.

𑀢𑀲𑁆𑀫𑀸 𑀲𑁄𑀫𑀦𑀲𑁆𑀲 𑀓𑁆𑀭𑀺𑀬 𑀚𑀯𑀦𑀸𑀦𑀦𑁆𑀢𑀭𑀁𑀧𑀺 𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸 𑀯𑁂𑀤𑀦𑀸𑀬𑀼𑀢𑁆𑀢𑀸𑀦𑀺 𑀏𑀯 𑀲𑀺𑀬𑀼𑀁. 𑀢𑀣𑀸 𑀉𑀧𑁂𑀓𑁆𑀔𑀸𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁𑀧𑀻𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦𑁂𑀢𑁆𑀣 𑀧𑀝𑁆𑀞𑀸𑀦𑁂-𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀓𑀼𑀲𑀮𑀸𑀦𑀦𑁆𑀢𑀭𑀁 𑀏𑀯 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀦 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀭𑀁 𑀦𑀘 𑀓𑀢𑁆𑀣𑀘𑀺 𑀓𑁆𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀺. 𑀯𑀺𑀚𑁆𑀚𑀫𑀸𑀦𑁂𑀘 𑀢𑀲𑁆𑀫𑀺𑀁 𑀅𑀯𑀘𑀦𑁂 𑀓𑀸𑀭𑀡𑀁𑀦𑀢𑁆𑀣𑀺. 𑀪𑀯𑀗𑁆𑀕𑀜𑁆𑀘𑀦𑀸𑀫𑁂𑀢𑀁 𑀦𑀤𑀺𑀲𑁄𑀢𑁄𑀯𑀺𑀬 𑀧𑀝𑀺𑀲𑁄𑀢𑀕𑀸𑀫𑀺𑀦𑀸𑀯𑀁 𑀲𑀯𑀺𑀧𑁆𑀨𑀸𑀭𑀺𑀓𑀁 𑀏𑀯𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀻𑀢𑀺 𑀬𑀼𑀢𑁆𑀢𑀁. 𑀦 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀔𑀻𑀡𑀸𑀲𑀯𑀲𑁆𑀲 𑀲𑀦𑁆𑀢𑀯𑀼𑀢𑁆𑀢𑀺𑀓𑁆𑀭𑀺𑀬𑀚𑀯𑀦𑀁. 𑀢𑀲𑁆𑀫𑀸 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀯𑀺𑀥𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑁆𑀞𑀸𑀦𑁂 𑀧𑀦 𑀓𑀼𑀲𑀮𑀢𑁆𑀢𑀺𑀓𑁂 𑀧𑀜𑁆𑀳𑀸 𑀯𑀸𑀭𑁂 𑀆𑀭𑀫𑁆𑀫𑀡𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀢𑀻𑀲𑀼 𑀅𑀩𑁆𑀬𑀸𑀓𑀢𑀧𑀤𑀸𑀯𑀲𑀸𑀦𑀯𑀸𑀭𑁂𑀲𑀼 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀢𑀤𑀸𑀭𑀫𑁆𑀫𑀡𑀫𑁂𑀯 𑀧𑀥𑀸𑀦𑀁 𑀳𑁄𑀢𑀺. 𑀦 𑀓𑀼𑀲𑀮𑀸 𑀓𑀼𑀲𑀮𑀚𑀯𑀦𑀁. 𑀢𑀲𑁆𑀫𑀸 𑀤𑁆𑀯𑀻𑀲𑀼𑀧𑀺 𑀯𑀸𑀭𑁂𑀲𑀼 𑀲𑁂𑀓𑁆𑀔𑀸𑀯𑀸 𑀧𑀼𑀣𑀼𑀚𑁆𑀚𑀦𑀸𑀯𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀯𑀺𑀧𑀲𑁆𑀲𑀦𑁆𑀢𑀺 𑀓𑀼𑀲𑀮𑀁 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺𑀆𑀤𑀺𑀓𑀁 𑀯𑀢𑁆𑀯𑀸 𑀧𑀼𑀦𑀘 𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀅𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁄 𑀧𑀦 𑀚𑀯𑀦𑀁𑀧𑀺 𑀢𑀤𑀸𑀭𑀫𑁆𑀫𑀡𑀁𑀧𑀺 𑀧𑀥𑀸𑀦 𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀅𑀭𑀳𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦𑀧𑀦 𑀯𑀼𑀢𑁆𑀢𑀁 𑀓𑁆𑀭𑀺𑀬𑀸𑀩𑁆𑀬𑀸𑀓𑀢𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀬𑀤𑀺 𑀘𑁂𑀢𑀁 𑀯𑀼𑀘𑁆𑀘𑁂𑀬𑁆𑀬 𑀢𑀤𑀸𑀭𑀫𑁆𑀫𑀡𑀫𑁂𑀯 𑀧𑀥𑀸𑀦𑀁 𑀓𑀢𑀁𑀦𑀸𑀫 𑀲𑀺𑀬𑀸. 𑀅𑀯𑀼𑀢𑁆𑀢𑁂𑀧𑀺𑀘 𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀢𑀤𑀸𑀭𑀫𑁆𑀫𑀡𑀁𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 𑀧𑀝𑁆𑀞𑀸𑀦𑁂 𑀓𑀼𑀲𑀮𑀸.𑀮. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀭𑀫𑁂𑀯 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁. 𑀦 𑀅𑀩𑁆𑀬𑀸𑀓𑀢𑀸𑀦𑀦𑁆𑀢𑀭𑀦𑁆𑀢𑀺𑀘. 𑀯𑀺𑀚𑁆𑀚𑀫𑀸𑀦𑁂𑀘 𑀢𑀲𑁆𑀫𑀺𑀁 𑀅𑀯𑀘𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀘 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀺𑀪𑀗𑁆𑀕𑁂𑀲𑀼 𑀧𑀦 𑀓𑀼𑀲𑀮𑀁 𑀯𑀼𑀝𑁆𑀞𑀸𑀦𑀲𑁆𑀲 𑀅𑀓𑀼𑀲𑀮𑀁 𑀯𑀼𑀝𑁆𑀞𑀸𑀦𑀲𑁆𑀲 𑀓𑁆𑀭𑀺𑀬𑀁 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺𑀘 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀔𑀦𑁆𑀥𑀸 𑀯𑀼𑀝𑁆𑀞𑀸𑀦𑀲𑁆𑀲 𑀦𑁂𑀯𑀯𑀺𑀧𑀸𑀓 𑀦𑀸𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀔𑀦𑁆𑀥𑀸 𑀯𑀼𑀝𑁆𑀞𑀸𑀦𑀲𑁆𑀲𑀸𑀢𑀺𑀘 𑀏𑀯𑀫𑀸𑀤𑀺𑀦𑀸 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑁂𑀦 𑀲𑀳 𑀢𑀤𑀸𑀭𑀫𑁆𑀫𑀡𑀲𑁆𑀲𑀧𑀺 𑀯𑀼𑀝𑁆𑀞𑀸𑀦𑀦𑀸𑀫𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀜𑁆𑀘 𑀯𑀼𑀢𑁆𑀢𑀁 𑀦 𑀓𑀢𑁆𑀣𑀘𑀺 𑀓𑁆𑀭𑀺𑀬𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀻𑀢𑀺. 𑀢𑀁𑀧𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀦𑀘 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯 𑀢𑁄 𑀔𑀻𑀡𑀸𑀲𑀯𑀲𑁆𑀲 𑀲𑀦𑁆𑀢𑀯𑀼𑀢𑁆𑀢𑀺𑀧𑀺 𑀓𑁆𑀭𑀺𑀬𑀚𑀯𑀦𑀁 𑀲𑀯𑀺𑀧𑁆𑀨𑀸𑀭𑀺𑀓𑀁 𑀦 𑀳𑁄𑀢𑀺. 𑀓𑀼𑀲𑀮𑀚𑀯𑀦𑀲𑁆𑀲 𑀯𑀺𑀬 𑀢𑀲𑁆𑀲𑀧𑀺 𑀑𑀴𑀸𑀭𑀺𑀓𑀓𑀸𑀬𑀯𑀘𑀻 𑀧𑀬𑁄𑀕𑀲𑀫𑀼𑀝𑁆𑀞𑀸 𑀧𑀦𑀢𑁄𑀢𑀺.

[𑁧𑁩𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀝𑀻𑀓𑀸𑀯𑀸𑀤𑀲𑁆𑀲 𑀉𑀢𑁆𑀢𑀭𑀁 𑀯𑀤𑀦𑁆𑀢𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀬𑀤𑀺 𑀅𑀩𑁆𑀬𑀸𑀓𑀢𑀸 𑀦𑀦𑁆𑀢𑀭𑀁𑀧𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀘𑁆𑀘𑁂𑀬𑁆𑀬. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂 𑀯𑁄𑀝𑁆𑀞𑀩𑁆𑀩𑀦𑀸 𑀦𑀦𑁆𑀢𑀭𑀁𑀧𑀺 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀓𑁆𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸 𑀭𑀫𑁆𑀫𑀡𑀁 𑀦 𑀯𑀼𑀢𑁆𑀢’’𑀦𑁆𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀧𑀝𑁆𑀞𑀸𑀦𑁂 𑀇𑀫𑀲𑁆𑀫𑀺𑀁 𑀯𑀼𑀢𑁆𑀢𑁂 𑀇𑀤𑀁𑀦𑀸𑀫 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀅𑀯𑀼𑀢𑁆𑀢𑀁𑀦𑀸𑀫 𑀅𑀢𑁆𑀣𑀺. 𑀦 𑀘 𑀅𑀭𑀳𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀦𑀸𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀧𑀜𑁆𑀘𑀤𑁆𑀯𑀸𑀭𑀺𑀓 𑀧𑀭𑀺𑀢𑁆𑀢𑀸𑀭𑀫𑁆𑀫𑀡 𑀯𑀸𑀭𑀧𑀲𑀗𑁆𑀕𑁄 𑀅𑀢𑁆𑀣𑀻𑀢𑀺. 𑀤𑁄𑀫𑀦𑀲𑁆𑀲.𑀮. 𑀉𑀧𑁂𑀓𑁆𑀔𑀸 𑀲𑀳𑀕𑀢𑀸𑀦𑁂𑀯 𑀪𑀯𑀦𑁆𑀢𑀺. 𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀦𑀺. 𑀓𑀲𑁆𑀫𑀸, 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀢𑁆𑀢𑀸. 𑀢𑁂𑀦𑁂𑀯 𑀳𑀺 𑀧𑀝𑁆𑀞𑀸𑀦𑁂 𑀢𑁂𑀲𑀁 𑀇𑀢𑀭𑀻𑀢𑀭𑀸𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀦𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣𑀘 𑀓𑁆𑀭𑀺𑀬𑀚𑀯𑀦 𑀤𑁄𑀫𑀦𑀲𑁆𑀲𑀚𑀯𑀦𑀸𑀦 𑀫𑁂𑀯 𑀅𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡 𑀦𑀺𑀬𑀫𑀁 𑀤𑀲𑁆𑀲𑁂𑀦𑁆𑀢𑁂𑀦 𑀣𑁂𑀭𑁂𑀦 𑀇𑀢𑀭𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀧𑀦 𑀢𑀸𑀤𑀺𑀲𑁄 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀦𑁆𑀦𑀁 𑀓𑀸𑀫𑀓𑀼𑀲𑀮𑀸𑀦𑀁 𑀅𑀝𑁆𑀞𑀦𑁆𑀦𑀁 𑀮𑁄𑀪𑀫𑀽𑀮𑀸𑀦𑀁 𑀤𑁆𑀯𑀺𑀦𑁆𑀦𑀁 𑀫𑁄𑀳𑀫𑀽𑀮𑀸𑀦𑀦𑁆𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀚𑀯𑀦𑀸𑀦𑀁 𑀅𑀦𑀦𑁆𑀢𑀭𑀁 𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀁 𑀲𑀩𑁆𑀩𑀸𑀦𑀺 𑀢𑀤𑀸𑀭𑀫𑁆𑀫𑀡𑀸𑀦𑀺 𑀪𑀯𑀗𑁆𑀕𑀸𑀦𑀺 𑀘 𑀧𑀯𑀢𑁆𑀢𑀦𑁆𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀅𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀁 𑀅𑀳𑁂𑀢𑀼𑀓𑀫𑁂𑀯. 𑀤𑁆𑀯𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀁 𑀤𑁆𑀯𑀺𑀳𑁂𑀢𑀼𑀓𑀫𑁂𑀯. 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀁 𑀢𑀺𑀳𑁂𑀢𑀼𑀓𑀫𑁂𑀯𑀸𑀢𑀺 𑀅𑀬𑀁 𑀬𑁂𑀪𑀼𑀬𑁆𑀬𑀦𑀺𑀬𑀫𑁄. 𑀬𑀲𑁆𑀲 𑀧𑀦 𑀤𑁆𑀯𑀺𑀳𑁂𑀢𑀼𑀓𑀸𑀦𑀺𑀯𑀸 𑀢𑀺𑀳𑁂𑀢𑀼𑀓𑀸𑀦𑀺𑀯𑀸 𑀓𑀼𑀲𑀮𑀚𑀯𑀦𑀸𑀦𑀺 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀓𑀤𑀸𑀘𑀺 𑀅𑀓𑀼𑀲𑀮𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀅𑀓𑀼𑀲𑀮𑀸𑀦𑀦𑁆𑀢𑀭𑀁𑀧𑀺 𑀤𑁆𑀯𑀺𑀳𑁂𑀢𑀼𑀓𑀸𑀦𑀺𑀯𑀸 𑀢𑀺𑀳𑁂𑀢𑀼𑀓𑀸𑀦𑀺𑀯𑀸𑀢𑀤𑀸𑀭𑀫𑁆𑀫𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀬𑀲𑁆𑀲 𑀅𑀓𑀼𑀲𑀮𑀚𑀯𑀦𑀸𑀦𑀺 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀢𑀲𑁆𑀲 𑀓𑀤𑀸𑀘𑀺 𑀤𑁆𑀯𑀺𑀳𑁂𑀢𑀼𑀓𑁂𑀲𑀼𑀯𑀸 𑀢𑀺𑀳𑁂𑀢𑀼𑀓𑁂𑀲𑀼𑀯𑀸 𑀓𑀼𑀲𑀮𑀚𑀯𑀦𑁂𑀲𑀼 𑀚𑀯𑀺𑀢𑁂𑀲𑀼 𑀓𑀼𑀲𑀮𑀸𑀦𑀦𑁆𑀢𑀭𑀁𑀧𑀺 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑁆𑀞𑀸𑀦𑁂-𑀅𑀳𑁂𑀢𑀼𑀓𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄.𑀮. 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀲𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸 𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀏𑀓𑀸𑀦𑀺𑀳𑀺 𑀢𑀤𑀸𑀭𑀫𑁆𑀫𑀡𑀸𑀦𑀺𑀦𑀸𑀫 𑀧𑀝𑀺𑀲𑀦𑁆𑀥𑀺𑀚𑀦𑀓𑁂𑀦 𑀏𑀓𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺𑀧𑀺 𑀦𑀸𑀦𑀸𑀯𑀻𑀣𑀻𑀲𑀼 𑀦𑀸𑀦𑀸𑀧𑁆𑀧𑀓𑀸𑀭𑀸𑀦𑀺 𑀳𑁄𑀦𑁆𑀢𑀺. 𑀧𑀯𑀢𑁆𑀢𑀺 𑀯𑀺𑀧𑀸𑀓𑀚𑀦𑀓𑁂𑀳𑀺 𑀧𑀦 𑀦𑀸𑀦𑀸𑀓𑀫𑁆𑀫𑁂𑀳𑀺 𑀦𑀺𑀩𑁆𑀩𑀢𑁆𑀣𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸𑀢𑀺 𑀘𑀢𑀽𑀲𑀼 𑀲𑁄𑀫𑀦𑀲𑁆𑀲𑀫𑀳𑀸 𑀯𑀺𑀧𑀸𑀓𑁂𑀲𑀼 𑀏𑀓𑀫𑁂𑀓𑁂𑀦 𑀕𑀳𑀺𑀢 𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀲𑀢𑁆𑀢𑀲𑁆𑀲. 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄𑀢𑀺 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀓𑀸𑀭𑀡𑀁. 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀬𑁂𑀯𑀯𑀸. 𑀬𑀁𑀓𑀺𑀜𑁆𑀘𑀻𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀪𑀽𑀢𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺. 𑀧𑀭𑀺𑀘𑀺𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀲𑁆𑀫𑀺𑀁 𑀪𑀯𑁂𑀬𑁂𑀯 𑀢𑀗𑁆𑀔𑀡𑀢𑁄 𑀧𑀼𑀭𑀺𑀫𑀔𑀡𑁂𑀲𑀼 𑀕𑀳𑀡 𑀩𑀳𑀼𑀮𑀢𑀸 𑀯𑀲𑁂𑀦 𑀧𑀭𑀺𑀘𑀺𑀢𑀁. 𑀅𑀪𑀺𑀡𑁆𑀳𑀲𑁂𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀧𑀭𑀺𑀢𑁆𑀢𑀥𑀫𑁆𑀫𑀪𑀽𑀢𑀁 𑀆𑀭𑀫𑁆𑀫𑀡𑀁. 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸. 𑀉𑀧𑁂𑀓𑁆𑀔𑀸𑀲𑀳𑀕𑀢 𑀲𑀦𑁆𑀢𑀻𑀭𑀡𑀦𑁆𑀢𑀺 𑀤𑁆𑀯𑀻𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻 𑀭𑀡𑁂𑀲𑀼 𑀇𑀝𑁆𑀞𑁂 𑀓𑀼𑀲𑀮𑀯𑀺𑀧𑀸𑀓𑀁 𑀅𑀦𑀺𑀝𑁆𑀞𑁂 𑀅𑀓𑀼𑀲𑀮𑀯𑀺𑀧𑀸𑀓𑀁 𑀉𑀧𑁂𑀓𑁆𑀔𑀸 𑀲𑀳𑀕𑀢 𑀲𑀦𑁆𑀢𑀻𑀭𑀡𑀁. 𑀬𑁂𑀲𑀁 𑀧𑀦 𑀧𑀓𑀢𑀺𑀬𑀸 𑀇𑀢𑀭𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑁂𑀓𑁆𑀔𑀸𑀲𑀳𑀕𑀢 𑀯𑀺𑀧𑀸𑀓𑀸𑀦𑀺 𑀩𑀳𑀼𑀮𑀁 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀲𑀁 𑀢𑀸𑀦𑀺𑀧𑀺 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀦𑀳𑁄𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀯𑀸𑀤𑁂 𑀬𑁂𑀪𑀼𑀬𑁆𑀬𑀦𑀺𑀬𑀫𑀲𑁄𑀢𑁂 𑀧𑀢𑀺𑀢𑀢𑁆𑀢𑀸 𑀅𑀓𑀼𑀲𑀮𑀚𑀯𑀦𑀸𑀦𑀼𑀭𑀽𑀧𑀁 𑀅𑀳𑁂𑀢𑀼𑀓𑀁 𑀉𑀧𑁂𑀓𑁆𑀔𑀸 𑀲𑀦𑁆𑀢𑀻𑀭𑀡 𑀤𑁆𑀯𑀬 𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀧𑀭𑀢𑁄 𑀣𑁂𑀭𑀯𑀸𑀤𑀸𑀦𑀁 𑀯𑀺𑀘𑀸𑀭𑀺𑀢𑀝𑁆𑀞𑀸𑀦𑁂 𑀅𑀓𑀼𑀲𑀮𑀚𑀯𑀦𑀸𑀦𑀦𑁆𑀢𑀭𑀁 𑀅𑀳𑁂𑀢𑀼𑀓 𑀢𑀤𑀸𑀭𑀫𑁆𑀫𑀡 𑀫𑁂𑀯 𑀤𑀻𑀧𑁂𑀦𑁆𑀢𑀲𑁆𑀲 𑀢𑀲𑁆𑀲 𑀣𑁂𑀭𑀯𑀸𑀤𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀯𑀸𑀤𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀬𑀤𑀸 𑀓𑀼𑀲𑀮𑀚𑀯𑀦𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀅𑀓𑀼𑀲𑀮𑀁 𑀚𑀯𑀢𑀺, 𑀢𑀤𑀸 𑀓𑀼𑀲𑀮𑀸𑀯𑀲𑀸𑀦𑁂 𑀆𑀘𑀺𑀡𑁆𑀡 𑀲𑀤𑀺𑀲𑀫𑁂𑀯 𑀅𑀓𑀼𑀲𑀮𑀸𑀯𑀲𑀸𑀦𑁂 𑀲𑀳𑁂𑀢𑀼𑀓𑀁 𑀢𑀤𑀸𑀭𑀫𑁆𑀫𑀡𑀁 𑀬𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀤𑀸𑀭𑀫𑁆𑀫𑀡𑁂𑀘𑀬𑀼𑀢𑁆𑀢𑁂 𑀏𑀢𑀁𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀢𑀲𑁆𑀫𑀸 𑀙𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀺𑀧𑀸𑀓𑀸𑀦𑀺 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀳𑁄𑀦𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀉𑀧𑁂𑀓𑁆𑀔𑀸𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀢𑀸𑀯 𑀅𑀢𑀺𑀫𑀳𑀦𑁆𑀢𑀸𑀢𑀺 𑀯𑀺𑀪𑀽𑀢𑁂𑀲𑀼𑀧𑀺 𑀩𑀼𑀤𑁆𑀥𑀯𑀡𑁆𑀡𑀸𑀤𑀻𑀲𑀼 𑀅𑀪𑀺𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀤𑁄𑀫𑀦𑀲𑁆𑀲 𑀚𑀯𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀧𑀸𑀢𑁄𑀯 𑀳𑁄𑀢𑀺. 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀦 𑀲𑀩𑁆𑀩𑁂𑀲𑀼𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀪𑀽𑀢𑁂𑀲𑀼 𑀫𑀳𑀦𑁆𑀢𑁂𑀲𑀼 𑀅𑀯𑀺𑀪𑀽𑀢𑁂𑀲𑀼𑀘 𑀙𑀴𑀸𑀭𑀫𑁆𑀫𑀡𑁂𑀲𑀼 𑀤𑁄𑀫𑀦𑀲𑁆𑀲 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀦𑁂𑀯 𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄 𑀅𑀢𑁆𑀣𑀺. 𑀦𑀘𑀫𑀽𑀮𑀪𑀯𑀗𑁆𑀕 𑀲𑀫𑁆𑀪𑀯𑁄𑀢𑀺 𑀓𑀢𑁆𑀯𑀸 𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀭𑀁 𑀙𑀲𑀼 𑀉𑀧𑁂𑀓𑁆𑀔𑀸𑀲𑀳𑀕𑀢𑀯𑀺𑀧𑀸𑀓𑁂𑀲𑀼 𑀬𑀣𑀸𑀭𑀳𑀁 𑀏𑀓𑀁 𑀆𑀕𑀦𑁆𑀢𑀼𑀓 𑀪𑀯𑀗𑁆𑀕𑀪𑀸𑀯𑁂𑀦 𑀧𑀯𑀢𑁆𑀢𑀢𑀺. 𑀢𑀣𑀸 𑀢𑀲𑁆𑀲𑁂𑀯 𑀩𑀼𑀤𑁆𑀥𑀯𑀡𑁆𑀡𑀸𑀤𑀻𑀲𑀼 𑀅𑀢𑀺𑀇𑀝𑁆𑀞𑀪𑀽𑀢𑁂𑀲𑀼 𑀅𑀢𑀺𑀫𑀳𑀦𑁆𑀢𑁂𑀲𑀼 𑀅𑀢𑀺𑀯𑀺𑀪𑀽𑀢𑁂𑀲𑀼𑀘 𑀙𑀴𑀸𑀭𑀫𑁆𑀫𑀡𑁂𑀲𑀼𑀯𑀸 𑀫𑀳𑀕𑁆𑀕𑀢𑀧𑀜𑁆𑀜𑀢𑁆𑀢𑀻𑀲𑀼𑀯𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀪𑀺𑀥𑀫𑁆𑀫𑁂 𑀥𑀸𑀢𑀼𑀯𑀺𑀪𑀗𑁆𑀕𑁂 𑀲𑀩𑁆𑀩𑀥𑀫𑁆𑀫𑁂𑀲𑀼𑀯𑀸 𑀧𑀦 𑀧𑀣𑀫 𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫 𑀲𑀼𑀢𑁆𑀢𑁂𑀘 𑀅𑀚𑁆𑀛𑀢𑁆𑀢𑀺 𑀓𑀜𑁆𑀘𑁂𑀯 𑀆𑀯𑀼𑀲𑁄 𑀘𑀓𑁆𑀔𑀼 𑀅𑀧𑀭𑀺𑀪𑀺𑀦𑁆𑀦𑀁 𑀳𑁄𑀢𑀺. 𑀩𑀸𑀳𑀺𑀭𑀸𑀘 𑀭𑀽𑀧𑀸𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀦𑁄𑀘 𑀢𑀚𑁆𑀚𑁄 𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀦𑁂𑀯 𑀢𑀸𑀯 𑀢𑀚𑁆𑀚𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀬𑀢𑁄𑀘 𑀔𑁄 𑀆𑀯𑀼𑀲𑁄 𑀅𑀚𑁆𑀛𑀢𑁆𑀢𑀺𑀓𑀜𑁆𑀘𑁂𑀯 𑀘𑀓𑁆𑀔𑀼 𑀅𑀧𑀭𑀺𑀪𑀺𑀦𑁆𑀦𑀁 𑀳𑁄𑀢𑀺. 𑀩𑀸𑀳𑀺𑀭𑀸𑀘 𑀭𑀽𑀧𑀸 𑀆𑀧𑀸𑀢 𑀫𑀸𑀕𑀘𑁆𑀙𑀦𑁆𑀢𑀺. 𑀢𑀚𑁆𑀚𑁄𑀘 𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀏𑀯𑀁 𑀢𑀚𑁆𑀚𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀺𑀓𑀜𑁆𑀘𑁂𑀯 𑀆𑀯𑀼𑀲𑁄 𑀲𑁄𑀢𑀁.𑀮. 𑀖𑀸𑀦𑀁.𑀮. 𑀚𑀺𑀯𑁆𑀳𑀸.𑀮. 𑀓𑀸𑀬𑁄.𑀮. 𑀫𑀦𑁄 𑀅𑀧𑀭𑀺𑀪𑀺𑀦𑁆𑀦𑁄 𑀳𑁄𑀢𑀺. 𑀩𑀸𑀳𑀺𑀭𑀸𑀘 𑀥𑀫𑁆𑀫𑀸 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀦𑁄𑀘 𑀢𑀚𑁆𑀚𑁄 𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀦𑁂𑀯 𑀢𑀸𑀯 𑀢𑀚𑁆𑀚𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. 𑀬𑀢𑁄𑀘 𑀔𑁄 𑀆𑀯𑀼𑀲𑁄 𑀅𑀚𑁆𑀛𑀢𑁆𑀢𑀺𑀓𑁄𑀘𑁂𑀯 𑀫𑀦𑁄 𑀅𑀧𑀭𑀺𑀪𑀺𑀦𑁆𑀦𑁄 𑀳𑁄𑀢𑀺. 𑀩𑀸𑀳𑀺𑀭𑀸𑀘 𑀥𑀫𑁆𑀫𑀸 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀚𑁆𑀚𑁄𑀘 𑀲𑀫𑀦𑁆𑀦𑀸𑀳𑀸𑀭𑁄 𑀳𑁄𑀢𑀺. 𑀏𑀯𑀁 𑀢𑀚𑁆𑀚𑀲𑁆𑀲 𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀺𑀦𑀸𑀫 𑀆𑀯𑀚𑁆𑀚𑀦𑁂𑀦𑀯𑀺𑀦𑀸𑀦𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀘𑁂 𑀆𑀯𑀚𑁆𑀚𑀦𑁂𑀦 𑀥𑀫𑁆𑀫𑀢𑁄𑀯𑀸 𑀓𑀸𑀮𑀪𑁄𑀯𑀸 𑀬𑀁𑀬𑀁 𑀦𑀺𑀬𑀫𑁂𑀢𑁆𑀯𑀸 𑀆𑀯𑀚𑁆𑀚𑀺𑀢𑀁 𑀳𑁄𑀢𑀺. 𑀢𑀁 𑀢𑀤𑁂𑀯 𑀢𑀸𑀦𑀺𑀧𑀺 𑀕𑀡𑁆𑀳𑀦𑁆𑀢𑀺. 𑀬𑀤𑀺 𑀅𑀦𑀺𑀬𑀫𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀆𑀯𑀚𑁆𑀚𑀺𑀢𑀁 𑀳𑁄𑀢𑀺. 𑀢𑀸𑀦𑀺𑀧𑀺 𑀆𑀯𑀚𑁆𑀚𑀺 𑀢𑀧𑁆𑀧𑀓𑀸𑀭𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀦 𑀧𑀦 𑀏𑀓𑀸𑀯𑀚𑁆𑀚𑀦 𑀯𑀻𑀣𑀺𑀬𑀁 𑀲𑀩𑁆𑀩𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀆𑀯𑀚𑁆𑀚𑀦𑁂𑀦𑀯𑀸 𑀅𑀜𑁆𑀜𑀫𑀜𑁆𑀜𑀁𑀯𑀸 𑀥𑀫𑁆𑀫𑀢𑁄𑀯𑀸 𑀓𑀸𑀮𑀢𑁄𑀯𑀸 𑀪𑀺𑀦𑁆𑀦𑀸 𑀮𑀫𑁆𑀩𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸. 𑀬𑀤𑀺 𑀘𑁂 𑀢𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀏𑀓𑀯𑀻𑀣𑀺𑀬𑀁 𑀆𑀤𑀺𑀫𑁆𑀳𑀺 𑀆𑀯𑀚𑁆𑀚𑀦𑁂𑀦 𑀆𑀯𑀚𑁆𑀚𑀺𑀢𑀁 𑀆𑀭𑀫𑁆𑀫𑀡𑀁 𑀅𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀧𑀭𑀺𑀘𑀺𑀢𑀧𑀼𑀩𑁆𑀩𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀲𑀢𑀺 𑀦𑀺𑀭𑀸𑀯𑀚𑁆𑀚𑀦𑀁𑀦𑀸𑀫 𑀏𑀢𑀁 𑀲𑀺𑀬𑀸. 𑀆𑀯𑀚𑁆𑀚𑀦𑀸𑀤𑀻𑀳𑀺𑀘 𑀲𑀤𑁆𑀥𑀺𑀁 𑀥𑀫𑁆𑀫𑀢𑁄 𑀓𑀸𑀮𑀢𑁄 𑀘 𑀪𑀺𑀦𑁆𑀦𑀸𑀭𑀫𑁆𑀫𑀡𑀁𑀦𑀸𑀫 𑀲𑀺𑀬𑀸𑀢𑀺. 𑀲𑀘𑁆𑀘𑀁, 𑀬𑀣𑀸 𑀧𑀦 𑀫𑀕𑁆𑀕𑀯𑀻𑀣𑀺𑀬𑀁 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀸𑀦𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀨𑀮𑀸𑀦𑀺 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀳𑀦𑁆𑀢𑀲𑁆𑀲𑀘 𑀨𑀮𑀘𑀺𑀢𑁆𑀢𑀁 𑀦𑀺𑀭𑀸𑀯𑀚𑁆𑀚𑀦𑀫𑁂𑀯 𑀳𑁄𑀦𑁆𑀢𑀺 𑀪𑀺𑀦𑁆𑀦𑀸𑀭𑀫𑁆𑀫𑀡𑀜𑁆𑀘. 𑀏𑀯𑀫𑁂𑀢𑀲𑁆𑀲𑀧𑀺 𑀦𑀢𑁆𑀣𑀺 𑀦𑀺𑀭𑀸𑀯𑀚𑁆𑀚𑀦𑀢𑀸𑀬 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀬𑀘 𑀤𑁄𑀲𑁄𑀢𑀺. 𑀬𑀜𑁆𑀘 𑀏𑀓𑀲𑁆𑀫𑀺𑀁𑀪𑀯𑁂 𑀪𑀯𑀗𑁆𑀕𑀲𑁆𑀲 𑀧𑀝𑀺𑀲𑀦𑁆𑀥𑀺𑀬𑀸 𑀲𑀳 𑀥𑀫𑁆𑀫𑀢𑁄𑀘 𑀆𑀭𑀫𑁆𑀫𑀡 𑀢𑁄𑀘 𑀅𑀪𑀺𑀦𑁆𑀦𑀢𑁆𑀢𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁. 𑀢𑀁𑀧𑀺 𑀫𑀽𑀮𑀪𑀯𑀗𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀦𑁆𑀢𑀺 𑀦𑀢𑁆𑀣𑀺 𑀤𑁄𑀲𑁄𑀢𑀺. 𑀢𑀫𑀦𑀦𑁆𑀢𑀭𑀺𑀢𑁆𑀯𑀸𑀢𑀺 𑀢𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸. 𑀧𑀸𑀴𑀺𑀬𑀁 𑀧𑀦 𑀫𑀳𑀸𑀅𑀝𑁆𑀞𑀓𑀣𑀸𑀬𑀁𑀘 𑀏𑀢𑀁 𑀯𑀺𑀥𑀸𑀦𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀸𑀯𑀘𑀭𑀚𑀯𑀦𑀸𑀯𑀲𑀸𑀦𑁂𑀬𑁂𑀯 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺. 𑀦 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀚𑀯𑀦𑀸𑀯𑀲𑀸𑀦𑁂. 𑀓𑀲𑁆𑀫𑀸 𑀇𑀢𑀺 𑀘𑁂. 𑀓𑀸𑀫𑀸𑀯𑀘𑀭 𑀚𑀯𑀦𑀸𑀦𑀁 𑀏𑀯 𑀲𑀯𑀺𑀧𑁆𑀨𑀦𑁆𑀤𑀦𑀢𑁆𑀢𑀸. 𑀇𑀢𑀭𑁂𑀲𑀜𑁆𑀘 𑀅𑀯𑀺𑀧𑁆𑀨𑀦𑁆𑀤𑀦𑀢𑁆𑀢𑀸.

[𑁧𑁩𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀓𑀸𑀫𑀢𑀡𑁆𑀳𑀸 𑀦𑀺𑀤𑀸𑀦 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅𑀓𑀸𑀭𑀡𑀁.

𑀅𑀧𑀺𑀘 𑀅𑀪𑀺𑀜𑁆𑀜𑀸𑀯𑀚𑁆𑀚𑀺𑀢𑀸𑀦𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀚𑀯𑀦𑀸𑀦𑀺 𑀅𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀤𑀸𑀭𑀫𑁆𑀫𑀡𑀸𑀦𑀺 𑀧𑀦 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑁂𑀯𑀸𑀢𑀺 𑀦𑀢𑁂𑀲𑀁 𑀅𑀯𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀧𑀲𑀗𑁆𑀕𑁄 𑀅𑀢𑁆𑀣𑀺. 𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀺𑀘 𑀓𑀸𑀦𑀺𑀘𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀺𑀧𑀺 𑀲𑀦𑁆𑀢𑀢𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁𑀧𑀺 𑀅𑀯𑀲𑀸𑀦𑁂 𑀢𑀤𑀼𑀧𑁆𑀧𑀢𑁆𑀢𑀺 𑀦𑀢𑁆𑀣𑀺𑀬𑁂𑀯𑀸𑀢𑀺.

[𑁧𑁩𑁭] 𑀏𑀢𑁂𑀦

𑀅𑀚𑀦𑀓𑀢𑁆𑀢𑀸 𑀚𑀦𑀓 𑀲𑀫𑀸𑀦𑀢𑁆𑀢𑀸𑀪𑀸𑀯𑀢𑁄𑀢𑀺𑀆𑀤𑀺𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀁𑀏𑀯 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺. 𑀦 𑀭𑀽𑀧𑀸𑀭𑀽𑀧𑀲𑀢𑁆𑀢𑀸𑀦𑀁. 𑀦 𑀳𑀺 𑀢𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁𑀧𑀺 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀁 𑀅𑀯𑀲𑀸𑀦𑁂 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀢𑀤𑀸𑀭𑀫𑁆𑀫𑀡𑀽𑀧 𑀦𑀺𑀲𑁆𑀲𑀬𑀲𑁆𑀲 𑀓𑀸𑀫 𑀪𑀯𑀗𑁆𑀕𑀲𑁆𑀲 𑀅𑀪𑀸𑀯𑀢𑁄 𑀫𑀳𑀕𑁆𑀕𑀢 𑀪𑀯𑀗𑁆𑀕𑀲𑁆𑀲 𑀘 𑀲𑀦𑁆𑀢 𑀢𑀭𑀲𑁆𑀲 𑀢𑀤𑀸𑀭𑀫𑁆𑀫𑀡 𑀓𑀺𑀘𑁆𑀘𑀸 𑀪𑀸𑀯𑀢𑁄𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡 𑀲𑁄𑀢 𑀯𑀺𑀜𑁆𑀜𑀸𑀡𑀸𑀦𑀺 𑀧𑀦 𑀭𑀽𑀧𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁄𑀢𑀇𑀦𑁆𑀤𑁆𑀭𑀺𑀬 𑀧𑀯𑀢𑁆𑀢𑀺𑀆𑀦𑀼𑀪𑀸𑀯𑀢𑁄 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀸𑀦𑀺𑀘 𑀤𑁆𑀯𑀸𑀭𑀯𑀻𑀣𑀺𑀪𑁂𑀤𑁂 𑀘𑀺𑀢𑁆𑀢𑀦𑀺𑀬𑀫𑀲𑀺𑀤𑁆𑀥𑀺𑀢𑁄 𑀭𑀽𑀧𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑀦𑁆𑀢𑀺 𑀬𑁂𑀯𑀸𑀢𑀺. 𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑁆𑀯𑁂𑀯 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀢𑀤𑀸𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑀺, 𑀦 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀲𑀼. 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀸𑀦𑀁. 𑀢𑁂𑀲𑀁 𑀧𑀦 𑀏𑀓𑀦𑁆𑀢𑀧𑀭𑀺𑀢𑁆𑀢𑀸 𑀭𑀫𑁆𑀫𑀡𑀪𑀸𑀯𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺.

[𑁧𑁩𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀅𑀧𑀭𑀺𑀘𑀺𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅𑀓𑀸𑀭𑀡𑀁.

𑀘𑀺𑀢𑁆𑀢𑀜𑁆𑀳𑀺 𑀦𑀸𑀫 𑀯𑀺𑀓𑀧𑁆𑀧𑀩𑀮𑁂𑀯𑀸 𑀅𑀧𑁆𑀧𑀦𑀸𑀧𑀢𑁆𑀢𑀪𑀸𑀯𑀦𑀸𑀓𑀫𑁆𑀫𑀯𑀺𑀲𑁂𑀲𑁂 𑀯𑀸 𑀲𑀢𑀺 𑀦𑀺𑀩𑁆𑀩𑀸𑀦𑁂 𑀯𑀺𑀬 𑀅𑀧𑀭𑀺𑀘𑀺𑀢𑁂𑀧𑀺 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺.

[𑁧𑁩𑁯] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀓𑀸𑀫𑀢𑀡𑁆𑀳𑀸𑀬𑀢𑁆𑀢𑀓𑀫𑁆𑀫𑀚𑀦𑀺𑀢𑀢𑁆𑀢𑀸𑀧𑀻’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁𑀧𑀺 𑀳𑁂𑀝𑁆𑀞𑀸 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀓𑀺𑀁𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬𑀸𑀢𑀺 𑀯𑀢𑁆𑀯𑀸 𑀲𑀩𑁆𑀩𑀸𑀦𑀺 𑀯𑀺𑀪𑀸𑀯𑀦𑀺𑀬𑀁 𑀯𑀼𑀢𑁆𑀢 𑀓𑀸𑀭𑀡𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺.

𑀓𑀸𑀫𑁂 𑀚𑀯𑀦 𑀲𑀢𑁆𑀢𑀸𑀮𑀫𑁆𑀩𑀡𑀸𑀦𑀁 𑀦𑀺𑀬𑀫𑁂𑀲𑀢𑀻𑀢𑀺 𑀓𑀸𑀫𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀚𑀯𑀦𑀸𑀦𑀁 𑀲𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀯𑀲𑁂𑀦 𑀢𑀺𑀯𑀺𑀥𑁂 𑀦𑀺𑀬𑀫𑁂 𑀲𑀢𑀺. 𑀯𑀺𑀪𑀽𑀢𑁂 𑀢𑀺𑀫𑀳𑀦𑁆𑀢𑁂𑀘 𑀢𑀤𑀸𑀭𑀫𑁆𑀫𑀡𑀫𑀻𑀭𑀺𑀢𑀦𑁆𑀢𑀺 𑀏𑀢𑁂𑀦 𑀢𑀤𑀸𑀭𑀫𑁆𑀫𑀡𑀁𑀦𑀸𑀫 𑀧𑀯𑀢𑁆𑀢𑀫𑀸𑀦𑀁 𑀯𑀺𑀪𑀽𑀢𑀸𑀭𑀫𑁆𑀫𑀡𑁂𑀯𑀸 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑁂 𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀬𑀫𑁂𑀯 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄. 𑀦 𑀧𑀦 𑀬𑀢𑁆𑀣 𑀢𑀤𑀸 𑀭𑀫𑁆𑀫𑀡𑀁 𑀧𑀯𑀢𑁆𑀢𑀢𑀺. 𑀏𑀢𑀤𑁂𑀯 𑀯𑀺𑀪𑀽𑀢𑀜𑁆𑀘 𑀅𑀢𑀺𑀫𑀳𑀦𑁆𑀢𑀜𑁆𑀘 𑀦𑀸𑀫𑀸𑀢𑀺 𑀦𑀺𑀬𑀫𑁄. 𑀢𑀲𑁆𑀫𑀸 𑀉𑀴𑀸𑀭𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀲𑀼𑀯𑀺𑀲𑀤𑀯𑀢𑁆𑀣𑀼𑀓𑀸𑀦𑀁 𑀭𑀽𑀧𑀩𑁆𑀭𑀳𑁆𑀫𑀸𑀦𑀁 𑀉𑀧𑁆𑀧𑀦𑁆𑀦𑀸𑀯𑀻𑀣𑀺𑀬𑁄 𑀬𑁂𑀪𑀼𑀬𑁆𑀬𑁂𑀦 𑀯𑀺𑀪𑀽𑀢𑀸𑀭𑀫𑁆𑀫𑀡𑀸𑀏𑀯 𑀅𑀢𑀺𑀫𑀳𑀦𑁆𑀢𑀸 𑀭𑀫𑁆𑀫𑀡𑀸𑀏𑀯𑀘 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 𑀧𑀦 𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀯𑀺𑀪𑀽𑀢𑀸𑀭𑀫𑁆𑀫𑀡𑀯𑀻𑀣𑀺𑀬𑁄 𑀅𑀢𑀺𑀫𑀳𑀦𑁆𑀢𑀸𑀭𑀫𑁆𑀫𑀡𑀯𑀻𑀣𑀺𑀬𑁄𑀘 𑀦𑀮𑀩𑁆𑀪𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. [𑀢𑀤𑀸𑀭𑀫𑁆𑀫𑀡𑀦𑀺𑀬𑀫𑁄].

𑁧𑁪𑁦. 𑀚𑀯𑀦𑁂𑀲𑀼𑀘𑀸𑀢𑀺 𑀘𑀲𑀤𑁆𑀤𑁄 𑀧𑀦 𑀲𑀤𑁆𑀤𑀢𑁆𑀣𑁄. 𑀙𑀓𑁆𑀔𑀢𑁆𑀢𑀼 𑀫𑁂𑀯𑀯𑀸 𑀚𑀯𑀦𑁆𑀢𑀺. 𑀧𑀓𑀢𑀺𑀓𑀸𑀮𑁂𑀧𑀺 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀬𑀁𑀧𑀺 𑀳𑀺 𑀧𑀓𑀢𑀺𑀓𑀸𑀮𑁂 𑀆𑀭𑀫𑁆𑀫𑀡𑀤𑀼𑀩𑁆𑀩 𑀮𑀝𑁆𑀞𑀸𑀦𑁂𑀏𑀯 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀁 𑀙𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀓𑁂𑀘𑀺 𑀧𑀦 𑀙𑀓𑁆𑀔𑀢𑁆𑀢𑀼𑀦𑁆𑀢𑀺 𑀇𑀤𑀁 𑀫𑀼𑀘𑁆𑀙𑀸𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀫𑀜𑁆𑀜𑀦𑁆𑀢𑀺. 𑀫𑀦𑁆𑀤𑀯𑀢𑁆𑀢𑀺𑀬𑀦𑁆𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑀓𑀲𑁆𑀲 𑀯𑀢𑁆𑀣𑀼𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀸 𑀇𑀢𑀭𑀓𑀸𑀮𑁂𑀲𑀼𑀘 𑀫𑀼𑀤𑀼𑀢𑀭𑀪𑀸𑀯𑁂𑀦 𑀓𑁂𑀦𑀘𑀺 𑀉𑀧𑀤𑁆𑀤𑀼𑀢 𑀪𑀸𑀯𑁂𑀦 𑀅𑀚𑁆𑀛𑁄𑀢𑁆𑀣𑀝𑀪𑀸𑀯𑁂𑀦𑀘 𑀯𑀢𑁆𑀣𑀼𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀸𑀦𑀁 𑀚𑀯𑀦𑀸𑀦𑀁 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑀸 𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂. 𑀫𑀭𑀡𑀓𑀸𑀮𑀸𑀤𑀻𑀲𑀽𑀢𑀺 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀫𑀼𑀘𑁆𑀙𑀸𑀓𑀸𑀮𑁂 𑀯𑀺𑀲𑀜𑁆𑀜𑀺𑀪𑀽𑀢 𑀓𑀸𑀮𑁂 𑀅𑀢𑀺𑀢𑀭𑀼𑀡𑀓𑀸𑀮𑁂𑀘, 𑀢𑀢𑁆𑀣 𑀫𑀼𑀘𑁆𑀙𑀸𑀓𑀸𑀮𑁄𑀦𑀸𑀫 𑀅𑀲𑀬𑁆𑀳 𑀭𑀽𑀧𑁂𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀅𑀢𑀺𑀪𑀽𑀢𑀸𑀦𑀁 𑀅𑀥𑀺𑀫𑀢𑁆𑀢𑀢𑁄 𑀓𑀭𑀚𑀓𑀸𑀬𑀲𑁆𑀲 𑀯𑀺𑀳𑀜𑁆𑀜𑀧𑁆𑀧𑀢𑁆𑀢𑀺𑀓𑀸𑀮𑁄. 𑀯𑀺𑀲𑀜𑁆𑀜𑀺 𑀪𑀽𑀢𑀓𑀸𑀮𑁄𑀦𑀸𑀫 𑀧𑀻𑀢𑀺𑀯𑁂𑀕𑁂𑀦𑀯𑀸 𑀦𑀺𑀤𑁆𑀤𑀸𑀪𑀺𑀪𑀽𑀢𑀢𑀸𑀬𑀯𑀸 𑀬𑀓𑁆𑀔𑀕𑀳𑀡𑁂𑀦𑀯𑀸 𑀲𑀼𑀭𑀸𑀫𑀤𑀸𑀤𑀺 𑀯𑀲𑁂𑀦𑀯𑀸 𑀧𑀓𑀢𑀺𑀲𑀜𑁆𑀜𑀸𑀬 𑀯𑀺𑀕𑀢𑀓𑀸𑀮𑁄. 𑀅𑀢𑀺𑀢𑀭𑀼𑀡𑀓𑀸𑀮𑁄𑀦𑀸𑀫 𑀕𑀩𑁆𑀪𑀕𑀢𑀲𑁆𑀲𑀯𑀸 𑀲𑀫𑁆𑀧𑀢𑀺𑀚𑀸𑀢𑀲𑁆𑀲𑀯𑀸 𑀤𑀸𑀭𑀓𑀲𑁆𑀲 𑀅𑀚𑁆𑀛𑀢𑁆𑀢 𑀯𑀢𑁆𑀣𑀽𑀦𑀁 𑀅𑀢𑀺𑀫𑀼𑀤𑀼𑀓𑀸𑀮𑁄. 𑀢𑀸𑀤𑀺𑀲𑁂𑀲𑀼 𑀳𑀺 𑀓𑀸𑀮𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀙𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑁄 𑀧𑀯𑀢𑁆𑀢𑀫𑀸𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀧𑀼𑀡𑁆𑀡𑀚𑀯𑀦𑀯𑀸𑀭𑀸 𑀦 𑀧𑀯𑀢𑁆𑀢𑀦𑁆𑀢𑀺. 𑀤𑁆𑀯𑀢𑁆𑀢𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀸𑀯𑀸 𑀘𑀢𑀼𑀧𑀜𑁆𑀘𑀚𑀯𑀦𑀺𑀓𑀸𑀏𑀯𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀤𑁆𑀯𑀢𑁆𑀢𑀺𑀯𑁄𑀝𑁆𑀞𑀩𑁆𑀩𑀦𑀺𑀓𑀯𑀸𑀭𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀘𑀢𑀼𑀧𑀜𑁆𑀘 𑀚𑀯𑀦𑀺𑀓𑀯𑀸𑀭𑀸 𑀫𑀽𑀮𑀝𑀻𑀓𑀸𑀬𑀁 𑀯𑀼𑀢𑁆𑀢𑀸. 𑀧𑀜𑁆𑀘𑀯𑀸𑀭𑀫𑁂𑀯𑀸𑀢𑀺 𑀇𑀤𑀁 𑀧𑀦 𑀫𑀭𑀡𑀸 𑀲𑀦𑁆𑀦𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀫𑀼𑀘𑁆𑀙𑀸𑀓𑀸𑀮𑀸𑀤𑀺𑀯𑀲𑁂𑀦. 𑀢𑀜𑁆𑀘 𑀔𑁄𑀧𑀸𑀓𑀢𑀺𑀓𑀲𑀢𑁆𑀢𑀸𑀦𑀁 𑀯𑀲𑁂𑀦𑁂𑀯. 𑀬𑁂 𑀧𑀦 𑀛𑀸𑀦𑀲𑀫𑀦𑀦𑁆𑀢𑀭𑀁𑀯𑀸 𑀧𑀘𑁆𑀘𑀯𑁂𑀓𑁆𑀔𑀡 𑀲𑀫𑀦𑀦𑁆𑀢𑀭𑀁𑀯𑀸 𑀅𑀪𑀺𑀜𑁆𑀜𑀸𑀲𑀫𑀦𑀦𑁆𑀢𑀭𑀁𑀯𑀸 𑀘𑀯𑀦𑁆𑀢𑀺𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺𑀯𑀸. 𑀢𑁂𑀲𑀁 𑀛𑀸𑀦𑀸𑀤𑀻𑀦𑀺𑀬𑁂𑀯 𑀧𑀜𑁆𑀘𑀯𑀸𑀭𑀢𑁄 𑀅𑀥𑀺𑀓𑀸𑀦𑀺𑀯𑀸 𑀊𑀦𑀸𑀦𑀺𑀯𑀸 𑀫𑀭𑀡𑀸 𑀲𑀦𑁆𑀦𑀚𑀯𑀦𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀭𑀺 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺. 𑀪𑀕𑀯𑀢𑁄 𑀧𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬 𑀓𑀸𑀮𑀸𑀤𑀻𑀲𑀽𑀢𑀺 𑀏𑀢𑁆𑀣 𑀅𑀜𑁆𑀜𑁂𑀲𑀁𑀧𑀺 𑀫𑀳𑀸𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑀸𑀤𑀻𑀦𑀁 𑀏𑀯𑀭𑀽𑀧𑁄 𑀮𑀳𑀼𑀧𑁆𑀧𑀯𑀢𑁆𑀢𑀺𑀓𑀸𑀮𑁄 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀬𑀁 𑀧𑀦 𑀫𑀢𑁆𑀣𑀓𑀧𑀢𑁆𑀢𑀸 𑀯𑀲𑀻 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀮𑀩𑁆𑀪𑀢𑀺. 𑀅𑀜𑁆𑀜𑁂𑀲𑀁𑀯𑀸 𑀏𑀯𑀭𑀽𑀧𑁂 𑀓𑀸𑀮𑁂𑀢𑀺. 𑀲𑀓𑀮𑁂𑀦 𑀧𑀦 𑀯𑀸𑀓𑁆𑀬𑁂𑀦 𑀣𑀧𑁂𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀁 𑀮𑀳𑀼𑀓 𑀧𑀯𑀢𑁆𑀢𑀺𑀓𑀸𑀮𑀁 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀢𑁄𑀧𑀺 𑀙𑀯𑀸 𑀲𑀢𑁆𑀢𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑁆𑀢𑀸𑀭𑀺 𑀧𑀜𑁆𑀘𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀻𑀢𑀺 𑀏𑀢𑁆𑀣𑀧𑀺 𑀪𑀕𑀯𑀢𑁄𑀧𑀺 𑀮𑀳𑀼𑀓𑀧𑁆𑀧𑀯𑀢𑁆𑀢𑀺𑀬𑀁 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀺. 𑀮𑀳𑀼𑀓𑀢𑀭𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑀻𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀺𑀬𑁂𑀯.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀪𑀕𑀯𑀢𑁄 𑀘𑀢𑁆𑀢𑀸𑀭𑀺 𑀅𑀜𑁆𑀜𑁂𑀲𑀁 𑀧𑀜𑁆𑀘𑀧𑀻𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀉𑀤𑀓 𑀥𑀸𑀭𑀸𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀁 𑀧𑀯𑀢𑁆𑀢𑀦𑀢𑁆𑀣𑀁 𑀧𑀣𑀫𑀁 𑀢𑁂𑀚𑁄𑀓𑀲𑀺𑀡𑁂 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀤𑁆𑀯𑁂 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺. 𑀢𑀢𑁄 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀢𑁄 𑀢𑀲𑁆𑀫𑀺𑀁𑀬𑁂𑀯 𑀓𑀲𑀺𑀡𑁂 𑀅𑀪𑀺𑀜𑁆𑀜𑀁 𑀲𑀫𑀸𑀧𑀚𑁆𑀚𑀺. 𑀅𑀪𑀺𑀜𑁆𑀜𑀸𑀯𑀲𑁂𑀦 𑀉𑀧𑀭𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺. 𑀢𑀢𑁄 𑀆𑀧𑁄𑀓𑀲𑀺𑀡𑁂 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀤𑁆𑀯𑁂 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺. 𑀢𑀢𑁄 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀢𑁄 𑀢𑀲𑁆𑀫𑀺𑀁𑀬𑁂𑀯 𑀓𑀲𑀺𑀡𑁂 𑀅𑀪𑀺𑀜𑁆𑀜𑀁 𑀲𑀫𑀸𑀧𑀚𑁆𑀚𑀺. 𑀅𑀪𑀺𑀜𑁆𑀜𑀸𑀯𑀲𑁂𑀦 𑀳𑁂𑀝𑁆𑀞𑀺𑀫 𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀲𑁂𑀲𑀬𑀫𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣𑀘 𑀮𑀳𑀼𑀓𑀧𑁆𑀧𑀯𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸 𑀤𑁆𑀯𑁂 𑀤𑁆𑀯𑁂 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘𑀢𑀼𑀧𑀜𑁆𑀘𑀚𑀯𑀦𑀺𑀓𑀸𑀏𑀯 𑀪𑀯𑀦𑁆𑀢𑀺. 𑀤𑁆𑀯𑀺𑀦𑁆𑀦𑀜𑁆𑀘 𑀚𑀯𑀦𑀯𑀸𑀭𑀸𑀦𑀁 𑀅𑀦𑁆𑀢𑀭𑀸 𑀤𑁆𑀯𑁂 𑀏𑀯 𑀪𑀯𑀗𑁆𑀕𑀸𑀦𑀺 𑀪𑀯𑀦𑁆𑀢𑀺. 𑀢𑀸𑀦𑀺𑀘 𑀤𑁆𑀯𑁂 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀲𑁆𑀲𑀦𑁆𑀢𑀸𑀦𑀁 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀯𑀢𑁆𑀢𑀸𑀦𑀺 𑀯𑀺𑀬 𑀧𑀜𑁆𑀜𑀸𑀬𑀦𑁆𑀢𑀻𑀢𑀺. 𑀏𑀢𑀭𑀳𑀺 𑀧𑀦 𑀓𑁂𑀘𑀺 𑀆𑀤𑀺𑀓𑀫𑁆𑀫𑀺𑀓𑀚𑁆𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂𑀲𑀼𑀧𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘𑀯𑀸𑀚𑀯𑀦𑀸𑀦𑀺 𑀯𑀤𑀦𑁆𑀢𑀺. 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀬𑁄𑀕𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀆𑀤𑀺𑀫𑁆𑀳𑀺 𑀦𑀺𑀬𑀼𑀢𑁆𑀢𑀲𑁆𑀲. 𑀧𑀣𑀫𑀁 𑀉𑀧𑁆𑀧𑀦𑁆𑀦𑀸 𑀅𑀧𑁆𑀧𑀦𑀸 𑀧𑀣𑀫𑀓𑀧𑁆𑀧𑀦𑀸. 𑀢𑀲𑁆𑀲𑀁 𑀧𑀣𑀫𑀓𑀧𑁆𑀧𑀦𑀸𑀬𑀁. 𑀆𑀤𑀺𑀓𑀫𑁆𑀫𑀺𑀓𑀅𑀧𑁆𑀧𑀦𑀸𑀯𑀻𑀣𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀸 𑀳𑀺 𑀲𑀩𑁆𑀩𑀸𑀦𑀺𑀧𑀺 𑀫𑀳𑀕𑁆𑀕𑀢𑀚𑀯𑀦𑀸𑀦𑀺 𑀧𑀼𑀦 𑀆𑀲𑁂𑀯𑀦𑀸𑀪𑀸𑀯𑀢𑁄 𑀧𑀭𑀺𑀤𑀼𑀩𑁆𑀩𑀮𑀸𑀦𑀺 𑀳𑁄𑀦𑁆𑀢𑀻𑀢𑀺 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀻𑀢𑀺. 𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀺 𑀧𑀦 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀤𑀺. 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸𑀏𑀯 𑀧𑀬𑀼𑀢𑁆𑀢𑀸𑀦𑀻𑀢𑀺 𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄 𑀆𑀤𑀺𑀓𑀫𑁆𑀫𑀺𑀓𑀓𑀸𑀮𑁂𑀧𑀺 𑀯𑀲𑀻𑀪𑀽𑀢𑀓𑀸𑀮𑁂𑀧𑀺 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀅𑀪𑀺𑀜𑁆𑀜𑀸𑀚𑀯𑀦𑀸𑀦𑀺𑀘 𑀲𑀩𑁆𑀩𑀤𑀸𑀧𑀻𑀢𑀺. 𑀬𑀣𑀸𑀘 𑀅𑀪𑀺𑀜𑁆𑀜𑀸𑀚𑀯𑀦𑀸𑀤𑀺 𑀏𑀯𑀁 𑀫𑀕𑁆𑀕𑀚𑀯𑀦𑀸𑀦𑀺𑀧𑀺 𑀢𑀁 𑀢𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀸 𑀪𑀸𑀯𑀢𑁄 𑀏𑀓𑀯𑀸𑀭𑀫𑁂𑀯 𑀚𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀘𑀢𑁆𑀢𑀸𑀭𑁄 𑀧𑀦.𑀮. 𑀏𑀓 𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀯𑀸𑀢𑀺. 𑀅𑀣𑀯𑀸, 𑀫𑀕𑁆𑀕𑀘𑁂𑀢𑀦𑀸𑀬 𑀅𑀦𑀦𑁆𑀢𑀭𑀺𑀓𑀨𑀮𑀢𑁆𑀢𑀸 𑀲𑀓𑀺𑀁 𑀉𑀧𑁆𑀧𑀦𑁆𑀦𑁂𑀬𑁂𑀯 𑀫𑀕𑁆𑀕𑁂 𑀨𑀮𑀲𑁆𑀲𑀯𑀸𑀭𑁄 𑀆𑀯𑀢𑁄𑀢𑀺 𑀦𑀢𑁆𑀣𑀺 𑀫𑀕𑁆𑀕𑀘𑀺𑀢𑁆𑀢𑀲𑁆𑀲 𑀧𑀼𑀦𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑁄𑀢𑀺 𑀯𑀼𑀢𑁆𑀢𑀁 𑀘𑀢𑁆𑀢𑀸𑀭𑁄 𑀧𑀦.𑀮. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀯𑀸𑀢𑀺. 𑀚𑀯𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀬𑀸 𑀲𑀢𑁆𑀢𑀓𑁆𑀔𑀼𑀧𑀭𑀫𑀢𑁆𑀢𑀸 𑀫𑀦𑁆𑀤𑀲𑁆𑀲 𑀧𑀜𑁆𑀘𑀫𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑀢𑁄 𑀧𑀭𑀁 𑀤𑁆𑀯𑁂 𑀨𑀮𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀺𑀓𑁆𑀔𑀲𑁆𑀲 𑀘𑀢𑀼𑀢𑁆𑀣𑀁 𑀉𑀧𑁆𑀧𑀦𑁆𑀦𑀫𑀕𑁆𑀕𑀢𑁄 𑀧𑀭𑀁 𑀢𑀻𑀡𑀻𑀢𑀺 𑀯𑀼𑀢𑁆𑀢𑀁 𑀢𑀢𑁄 𑀧𑀭𑀁.𑀮. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀦 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀢𑀸𑀤𑀺 𑀲𑀲𑁆𑀲 𑀧𑀬𑁄𑀕𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀓𑀢𑀢𑁆𑀢𑀸 𑀤𑁆𑀯𑀺𑀦𑁆𑀦𑀁 𑀯𑀸𑀭𑀸𑀦𑀁 𑀉𑀧𑀭𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀦𑀺𑀭𑁄𑀥.𑀮. 𑀚𑀯𑀢𑀻𑀢𑀺. 𑀏𑀢𑁆𑀣𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀁𑀯𑀸 𑀤𑁆𑀯𑁂𑀯𑀸 𑀘𑀺𑀢𑁆𑀢𑀯𑀸𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀘𑀺𑀢𑁆𑀢𑀓𑁄 𑀳𑁄𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀦𑁄 𑀓𑀼𑀲𑀮𑀪𑀽𑀢𑀁 𑀅𑀭𑀳𑀢𑁄 𑀓𑁆𑀭𑀺𑀬𑀪𑀽𑀢𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸 𑀬𑀢𑀦 𑀚𑀯𑀦𑀁. 𑀯𑀼𑀝𑁆𑀞𑀸𑀦𑀓𑀸𑀮𑁂𑀘 𑀦𑀺𑀭𑁄𑀥𑀲𑁆𑀲 𑀦𑀺𑀲𑀦𑁆𑀤𑀫𑀢𑁆𑀢𑀢𑁆𑀢𑀸 𑀏𑀓𑀯𑀸𑀭𑀫𑁂𑀯 𑀯𑀚𑀦𑀁 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀯𑀼𑀝𑁆𑀞𑀸𑀦𑀓𑀸𑀮𑁂𑀘𑀸𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀸𑀕𑀸𑀫𑀺 𑀨𑀮𑀁𑀯𑀸 𑀅𑀭𑀳𑀢𑁆𑀢𑀨𑀮𑀁𑀯𑀸𑀢𑀺 𑀅𑀦𑀸𑀕𑀸𑀫𑀺𑀨𑀮𑁂𑀯𑀸 𑀅𑀭𑀳𑀢𑁆𑀢𑀨𑀮𑁂𑀯𑀸. 𑀪𑀸𑀯𑁂𑀦 𑀪𑀸𑀯𑀮𑀓𑁆𑀔𑀡𑁂 𑀳𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑁂𑀦𑀸𑀳 𑀦𑀺𑀭𑀼𑀤𑁆𑀥𑁂𑀢𑀺. 𑀲𑀩𑁆𑀩𑀢𑁆𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀦𑁆𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀓𑀮𑀸𑀬𑀧𑀺 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁. 𑀪𑀯𑀗𑁆𑀕𑀲𑁄𑀢𑁄𑀯𑀺𑀬 𑀯𑀻𑀣𑀺𑀦𑀺𑀬 𑀫𑁄 𑀦𑀢𑁆𑀣𑀻𑀢𑀺 𑀇𑀤𑀁 𑀘𑀺𑀡𑁆𑀡𑀯𑀲𑀻𑀪𑀽𑀢𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀓𑀢𑀸 𑀥𑀺𑀓𑀸𑀭𑀲𑁆𑀲 𑀧𑀦 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀻𑀢𑀺𑀆𑀤𑀺𑀦𑀸 𑀛𑀸𑀦𑀚𑀯𑀦𑀸𑀦𑀺 𑀅𑀦𑀼𑀓𑁆𑀓𑀫𑁂𑀦 𑀯𑀤𑁆𑀥𑀫𑀸𑀦𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀓𑀢𑀸 𑀥𑀺𑀓𑀸𑀭𑀸𑀦𑀁 𑀧𑀦 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑀸𑀦𑀁 𑀧𑀝𑀺𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀺𑀡𑁆𑀡𑀯𑀲𑀻𑀪𑀸𑀯𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀣𑀸 𑀨𑀮𑀚𑀯𑀦𑀸𑀦𑀺𑀘 𑀲𑀩𑁆𑀩𑁂𑀲𑀁𑀧𑀺 𑀨𑀮𑀝𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀳𑀽𑀦𑀺𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀆𑀤𑀺𑀓𑀫𑁆𑀫𑀺𑀓𑀓𑀸𑀮𑀸𑀤𑀻𑀲𑀼 𑀏𑀓𑀯𑀸𑀭𑀸𑀤𑀺𑀯𑀲𑁂𑀦𑀧𑀺 𑀅𑀯𑀲𑁂𑀲𑀸𑀦𑀁 𑀧𑀯𑀢𑁆𑀢𑀺𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺. [𑀚𑀸𑀦𑀦𑀺𑀬𑀫𑁄].

𑁧𑁪𑁧. 𑀏𑀯𑀁 𑀧𑀼𑀩𑁆𑀩𑀸𑀧𑀭𑀦𑀺𑀬𑀸𑀫𑀯𑀲𑁂𑀦 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀕𑁆𑀕𑀮𑀪𑁂𑀤𑀯𑀲𑁂𑀦 𑀪𑀽𑀫𑀺𑀪𑁂𑀤𑀯𑀲𑁂𑀦𑀘 𑀢𑁂𑀲𑀁 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀳𑁂𑀢𑀼𑀓𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀤𑁆𑀯𑁂 𑀳𑁂𑀢𑀼𑀬𑁄 𑀏𑀢𑁂𑀲𑀦𑁆𑀢𑀺 𑀤𑀼𑀳𑁂𑀢𑀼𑀓𑀸. 𑀘𑀢𑀽𑀳𑀺 𑀜𑀸𑀡𑀯𑀺𑀧𑁆𑀧 𑀬𑀼𑀢𑁆𑀢𑀫𑀳𑀸𑀯𑀺𑀧𑀸𑀓𑁂𑀳𑀺 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀸. 𑀤𑁆𑀯𑀻𑀳𑀺 𑀧𑀦 𑀅𑀳𑁂𑀢𑀼𑀓 𑀯𑀺𑀧𑀸𑀓𑁂𑀳𑀺 𑀕𑀳𑀺𑀢 𑀧𑀝𑀺𑀲𑀦𑁆𑀥𑀺𑀓𑀸 𑀅𑀳𑁂𑀢𑀼𑀓𑀸 𑀦𑀢𑁆𑀣𑀺 𑀧𑀝𑀺𑀲𑀦𑁆𑀥𑀺𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀓𑀢𑁆𑀯𑀸. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁𑀧𑀺 𑀯𑀺𑀧𑀸𑀓𑀸𑀯𑀭𑀡𑀲𑀩𑁆𑀪𑀸𑀯𑀢𑁄 𑀫𑀳𑀕𑁆𑀕 𑀢𑀚𑁆𑀛𑀸𑀦𑀸𑀦𑀺𑀧𑀺 𑀢𑀸𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀓𑀼𑀢𑁄 𑀮𑁄𑀓𑀼𑀢𑁆𑀢𑀭𑀸𑀦𑀺. 𑀓𑁆𑀭𑀺𑀬𑀚𑀯𑀦𑀸𑀦𑀺 𑀧𑀦 𑀔𑀻𑀡𑀸𑀲𑀯𑀸𑀦𑀫𑁂𑀯 𑀆𑀯𑁂𑀦𑀺𑀓 𑀪𑀽𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀓𑁆𑀭𑀺𑀬𑀚𑀯𑀦𑀸𑀦𑀺 𑀘𑁂𑀯𑀅𑀧𑁆𑀧𑀦𑀸𑀚𑀯𑀦𑀸𑀦𑀺𑀘 𑀦 𑀮𑀩𑁆𑀪𑀦𑁆𑀢𑀻𑀢𑀺. 𑀢𑀢𑁆𑀣 𑀯𑀺𑀧𑀸𑀓𑀸 𑀯𑀭𑀡𑀁 𑀦𑀸𑀫 𑀅𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀓𑀢𑀸 𑀤𑁆𑀯𑀺𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀓𑀢𑀸𑀘. 𑀢𑀣𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺𑀘 𑀲𑀼𑀕𑀢𑀺𑀬𑀦𑁆𑀢𑀺 𑀲𑀼𑀕𑀢𑀺 𑀪𑀯𑁂 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀢𑀣𑀸 𑀜𑀸𑀡𑀫𑁆𑀧𑀬𑀼𑀢𑁆𑀢𑀫𑀳𑀸𑀯𑀺𑀧𑀸𑀓𑀸𑀦𑀺𑀘 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀘 𑀲𑀼𑀕𑀢𑀺𑀬𑀦𑁆𑀢𑀺 𑀏𑀢𑁂𑀦 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀅𑀳𑁂𑀢𑀼𑀓 𑀧𑀼𑀕𑁆𑀕𑀮𑁂 𑀦𑀺𑀯𑀢𑁆𑀢𑁂𑀢𑀺. 𑀦 𑀳𑀺 𑀢𑁂𑀲𑀁 𑀇𑀫𑀲𑁆𑀫𑀺𑀁 𑀯𑀸𑀓𑁆𑀬𑁂 𑀇𑀢𑀭𑁂𑀲𑀁 𑀅𑀦𑀼𑀜𑁆𑀜𑀸𑀢𑀸𑀦𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀻𑀢𑀺. 𑀢𑁂𑀦𑀸𑀳 𑀤𑀼𑀕𑁆𑀕𑀢𑀺 𑀬𑀁 𑀧𑀦𑀸𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀕𑁆𑀕𑀢𑀺𑀬𑀁 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀳𑁂𑀢𑀼𑀓𑀸𑀦𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺𑀘 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀫𑀳𑀸𑀯𑀺𑀧𑀸𑀓𑀸𑀦𑀺𑀘 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀧𑀭𑀺𑀧𑀼𑀡𑁆𑀡 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀲𑀺𑀬𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀳𑁂𑀢𑀼𑀓𑀸𑀦𑀁 𑀘𑀢𑁆𑀢𑀸𑀭𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀯𑀺𑀧𑀸𑀓𑀸𑀦𑀺 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀜𑁆𑀘 𑀅𑀝𑁆𑀞𑀧𑀺 𑀲𑀳𑁂𑀢𑀼𑀓 𑀫𑀳𑀸𑀯𑀺𑀧𑀸𑀓𑀸𑀦𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀧𑀝𑁆𑀞𑀸𑀦𑁂 𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀏𑀓𑀲𑁆𑀫𑀺𑀁 𑀪𑀯𑁂 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲 𑀓𑀤𑀸𑀘𑀺 𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀓𑀤𑀸𑀘𑀺 𑀅𑀳𑁂𑀢𑀼𑀓𑀁 𑀪𑀯𑀗𑁆𑀕𑀦𑁆𑀢𑀺 𑀏𑀯𑀁 𑀫𑀽𑀮𑀪𑀯𑀗𑁆𑀕𑁂 𑀧𑀯𑀢𑁆𑀢𑀺𑀪𑁂𑀤𑁄 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀦𑁆𑀢𑀺 𑀇𑀤𑀁 𑀢𑀤𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀆𑀕𑀦𑁆𑀢𑀼𑀓𑀪𑀯𑀗𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀳𑁂𑀢𑀼𑀓𑀦𑁆𑀢𑀺𑀘 𑀲𑀸𑀫𑀜𑁆𑀜𑀯𑀘𑀦𑀢𑁆𑀢𑀸 𑀤𑁆𑀯𑀺𑀳𑁂𑀢𑀼𑀓𑀁 𑀢𑀺𑀳𑁂𑀢𑀼𑀓𑀜𑁆𑀘 𑀢𑀤𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀳𑁄𑀢𑀺. 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺 𑀇𑀥 𑀧𑀦 𑀢𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀁 𑀫𑀽𑀮𑀪𑀯𑀗𑁆𑀕𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀇𑀥𑀧𑀺 𑀲𑀸𑀫𑀜𑁆𑀜𑀯𑀘𑀦𑀢𑁆𑀢𑀸 𑀤𑁆𑀯𑀻𑀲𑀼 𑀅- 𑀅𑀳𑁂𑀢𑀼𑀓𑀪𑀯𑀗𑁆𑀕𑁂𑀲𑀼 𑀬𑀁𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀅𑀳𑁂𑀢𑀼𑀓𑀸𑀦𑀁𑀧𑀺 𑀅𑀝𑁆𑀞𑀲𑀳𑁂𑀢𑀼𑀓 𑀢𑀤𑀸𑀭𑀫𑁆𑀫𑀡𑀸𑀦𑀺𑀧𑀺 𑀮𑀩𑁆𑀪𑀫𑀸𑀦𑀸𑀦𑀺𑀏𑀯 𑀲𑀺𑀬𑀼𑀁. 𑀤𑀼𑀳𑁂𑀢𑀼𑀓𑀸𑀦𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀯𑀼𑀘𑁆𑀘𑀢𑁂, 𑀅𑀳𑁂𑀢𑀼 𑀓𑁂𑀲𑀼 𑀢𑀸𑀯 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀲𑀫𑁆𑀪𑀯𑁄 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀢𑀲𑁆𑀫𑀸 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲𑀸𑀢𑀺 𑀇𑀤𑀁 𑀓𑀼𑀲𑀮𑀯𑀺𑀧𑀸𑀓𑀪𑀽𑀢𑀁 𑀅𑀳𑁂𑀢𑀼𑀓𑀪𑀯𑀗𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀧𑀝𑁆𑀞𑀸𑀦𑁂 𑀥𑀫𑁆𑀫𑀢𑀸. 𑀬𑀤𑀺𑀤𑀁 𑀬𑀣𑀸𑀮𑀸𑀪𑀕𑀳𑀡𑀦𑁆𑀢𑀺. 𑀇𑀢𑀭𑀣𑀸 𑀲𑀩𑁆𑀩𑀅𑀝𑁆𑀞𑀓𑀣𑀸𑀯𑀺𑀭𑁄𑀥𑁄 𑀲𑀺𑀬𑀸𑀢𑀺. 𑀬𑀣𑀸𑀘 𑀓𑀼𑀲𑀮𑀸𑀦𑀁 𑀬𑁄𑀕𑀲𑀸𑀥𑀦𑀻𑀬𑀢𑁆𑀢𑀸 𑀧𑀯𑀢𑁆𑀢𑀺𑀬𑀁𑀧𑀺 𑀬𑁄𑀕𑀓𑀫𑁆𑀫𑀯𑀲𑁂𑀦 𑀜𑀸𑀡𑀬𑁄𑀕𑁄 𑀳𑁄𑀢𑀺. 𑀦 𑀢𑀣𑀸 𑀯𑀺𑀧𑀸𑀓𑀸𑀦𑀁. 𑀢𑁂𑀲𑀁 𑀧𑀦 𑀅𑀬𑁄𑀕𑀲𑀸𑀥𑀦𑀻 𑀬𑀢𑁆𑀢𑀸 𑀧𑀯𑀢𑁆𑀢𑀺𑀬𑀁 𑀪𑀯𑀗𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀦 𑀉𑀧𑀦𑀺𑀲𑁆𑀲𑀬𑀜𑁆𑀜𑀸𑀡𑁂𑀦 𑀯𑀺𑀦𑀸 𑀜𑀸𑀡𑀬𑁄𑀕𑁄 𑀦 𑀲𑀫𑁆𑀪𑀯𑀢𑀺. 𑀢𑀲𑁆𑀫𑀸 𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀦𑁆𑀢𑀺 𑀇𑀥𑀧𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀪𑀽𑀢𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁂𑀯 𑀕𑀳𑁂𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀅𑀳𑁂𑀢𑀼𑀓𑀸𑀦𑀜𑁆𑀘 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀤𑀸𑀭𑀫𑁆𑀫𑀡 𑀧𑀝𑀺𑀓𑁆𑀔𑁂𑀧𑁄 𑀣𑁂𑀭𑁂𑀦 𑀓𑀢𑁄𑀢𑀺. 𑀆𑀘𑀭𑀺𑀬𑀩𑀼𑀤𑁆𑀥𑀤𑀢𑁆𑀢𑀢𑁆𑀣𑁂𑀭𑁂𑀦 𑀧𑀦 𑀬𑁂𑀦 𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦 𑀲𑀤𑀺𑀲𑀁 𑀯𑀸 𑀢𑀢𑁄 𑀳𑀻𑀦𑀁 𑀯𑀸 𑀢𑀤𑀸𑀭𑀫𑁆𑀫𑀡𑀁 𑀢𑁂𑀲𑀁 𑀲𑀫𑁆𑀪𑀯𑀢𑀺. 𑀦 𑀧𑀡𑀻𑀢𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑀺𑀦𑁆𑀦𑀁𑀧𑀺 𑀅𑀳𑁂𑀢𑀼𑀓𑀸𑀦𑀁 𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀢𑀺𑀁𑀲𑀘𑀺𑀢𑁆𑀢𑀧𑀝𑀺 𑀮𑀸𑀪𑁄 𑀯𑀼𑀢𑁆𑀢𑁄. 𑀲𑁄 𑀧𑀦 𑀬𑀣𑀸 𑀯𑀼𑀢𑁆𑀢𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀅𑀧𑀭𑁂 𑀧𑀦 𑀬𑀣𑀸 𑀅𑀳𑁂𑀢𑀼𑀓𑀸𑀦𑀁 𑀲𑀼𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀤𑁆𑀯𑀺𑀳𑁂𑀢𑀼𑀓 𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀏𑀯𑀁 𑀤𑁆𑀯𑀺𑀳𑁂𑀢𑀼𑀓𑀸𑀦𑀁𑀧𑀺 𑀢𑀺𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀲𑀫𑁆𑀪𑀯𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀬𑀼𑀢𑁆𑀢𑀁𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀓𑀢𑁆𑀣𑀘𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁𑀧𑀺 𑀅𑀯𑀺𑀲𑁂𑀲𑁂𑀦 𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡 𑀲𑀳𑀕𑀢𑀸 𑀢𑀬𑁄 𑀳𑁂𑀢𑀽 𑀏𑀢𑁂𑀲𑀦𑁆𑀢𑀺 𑀢𑀺𑀳𑁂𑀢𑀼𑀓𑀸. 𑀢𑁂 𑀧𑀦 𑀓𑀸𑀫𑀭𑀽𑀧𑀸𑀭𑀽𑀧𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀅𑀝𑁆𑀞𑀅𑀭𑀺𑀬𑀸𑀘𑀸𑀢𑀺 𑀦𑀯𑀯𑀺𑀥𑀸. 𑀢𑁂𑀲𑀼 𑀔𑀻𑀡𑀸𑀲𑀯𑀸𑀦𑀁 𑀓𑀼𑀲𑀮𑀸𑀓𑀼𑀲𑀮 𑀚𑀯𑀦𑀸𑀦𑀺𑀘 𑀦𑀮𑀩𑁆𑀪𑀦𑁆𑀢𑀺. 𑀲𑀩𑁆𑀩𑀲𑁄 𑀅𑀦𑀼𑀲𑀬𑀧𑀳𑀸𑀦𑁂𑀦 𑀲𑀩𑁆𑀩𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀳 𑀦𑀺𑀭𑀼𑀤𑁆𑀥𑀢𑁆𑀢𑀸 𑀅𑀦𑀼𑀲𑀬 𑀧𑀝𑀺𑀩𑀤𑁆𑀥𑁄 𑀳𑀺 𑀢𑁂𑀲𑀁 𑀢𑀩𑁆𑀪𑀸𑀯𑁄𑀢𑀺. 𑀢𑀣𑀸𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑀢𑁆𑀣𑁄. 𑀅𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑀸𑀬 𑀲𑀺𑀓𑁆𑀔𑀦𑀲𑀻𑀮𑀬𑀼𑀢𑁆𑀢𑀸 𑀲𑀢𑁆𑀢𑀅𑀭𑀺𑀬𑀸 𑀲𑁂𑀓𑁆𑀔𑀸𑀦𑀸𑀫. 𑀇𑀥 𑀧𑀦 𑀢𑀬𑁄 𑀳𑁂𑀝𑁆𑀞𑀺𑀫𑀨𑀮𑀝𑁆𑀞𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀜𑁆𑀳𑀺 𑀆𑀤𑀺𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀳𑀻𑀦𑀢𑁆𑀢𑀸 𑀢𑀁 𑀲𑀳𑀕𑀢𑀸𑀦𑀺 𑀧𑀜𑁆𑀘𑀚𑀯𑀦𑀸𑀦𑀺 𑀦𑀮𑀩𑁆𑀪𑀦𑁆𑀢𑀻𑀢𑀺. 𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑀸𑀦𑀁 𑀧𑀦 𑀧𑀝𑀺𑀖𑀚𑀯𑀦𑀸𑀦𑀺𑀘 𑀦 𑀮𑀩𑁆𑀪𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀧𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸. 𑀘𑀢𑀼𑀦𑁆𑀦𑀁 𑀫𑀕𑁆𑀕𑀝𑁆𑀞𑀸𑀦𑀁 𑀧𑀘𑁆𑀘𑁂𑀓𑀁 𑀬𑀣𑀸𑀲𑀓𑀁 𑀫𑀕𑁆𑀕𑀚𑀯𑀦𑀸𑀦𑀺𑀏𑀯 𑀮𑀩𑁆𑀪𑀦𑁆𑀢𑀺. 𑀉𑀧𑀭𑀺𑀫𑀸𑀦𑀜𑁆𑀘 𑀨𑀮𑀸𑀦𑀁 𑀳𑁂𑀝𑁆𑀞𑀺𑀫𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀅𑀦𑀫𑀺𑀕𑀢𑀢𑁆𑀢𑀸 𑀳𑁂𑀝𑁆𑀞𑀺𑀫𑀸𑀦𑀜𑁆𑀘 𑀉𑀧𑀭𑀺𑀫𑁂𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀘𑀢𑀼𑀦𑁆𑀦𑀁 𑀨𑀮𑀝𑁆𑀞𑀸𑀦𑀁𑀧𑀺 𑀧𑀘𑁆𑀘𑁂𑀓𑀁 𑀬𑀣𑀸𑀲𑀓𑀁 𑀨𑀮𑀚𑀯𑀦𑀸𑀦𑀺𑀏𑀯 𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀮𑁄𑀓𑀼𑀢𑁆𑀢𑀭.𑀮. 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀉𑀧𑀭𑀺𑀫𑀕𑁆𑀕𑁂 𑀆𑀕𑀢𑁂 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀦𑀼𑀪𑀸𑀯𑀲𑁆𑀲 𑀲𑀩𑁆𑀩𑀲𑁄 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀉𑀧𑀭𑀺𑀫𑀸𑀦𑀁 𑀧𑀼𑀕𑁆𑀕𑀮𑀦𑁆𑀢𑀭𑀢𑀸𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀸𑀭𑀺𑀲𑁂𑀲𑀢𑁄 𑀮𑀩𑁆𑀪𑀫𑀸𑀦𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀕𑀸𑀣𑀫𑀸𑀳. 𑀧𑀭𑀺𑀦𑀺𑀝𑁆𑀞𑀺 𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸 𑀦𑀢𑁆𑀣𑀺 𑀲𑀺𑀓𑁆𑀔𑀺𑀢𑀩𑁆𑀩𑀓𑀺𑀘𑁆𑀘𑀁 𑀏𑀢𑁂𑀲𑀦𑁆𑀢𑀺 𑀅𑀲𑁂𑀓𑁆𑀔𑀸. 𑀔𑀻𑀡𑀸𑀲𑀯𑀸. 𑀢𑁂𑀲𑀁 𑀢𑁂𑀯𑀻𑀲𑀢𑀺𑀓𑀸𑀫𑀯𑀺𑀧𑀸𑀓 𑀯𑀻𑀲𑀢𑀺𑀓𑁆𑀭𑀺𑀬 𑀅𑀭𑀳𑀢𑁆𑀢𑀨𑀮 𑀯𑀲𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀸 𑀬𑀣𑀸𑀲𑀫𑁆𑀪𑀯𑀁 𑀉𑀤𑁆𑀤𑀺𑀲𑁂. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀚𑀯𑀦𑀯𑀚𑁆𑀚𑀺𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀅𑀓𑀼𑀲𑀮𑀸𑀦𑀁 𑀏𑀓𑀯𑀻𑀲𑀢𑀺𑀬𑀸 𑀓𑀼𑀲𑀮𑀸𑀦𑀁 𑀢𑁂𑀯𑀻𑀲𑀢𑀺𑀬𑀸 𑀓𑀸𑀫𑀯𑀺𑀧𑀸𑀓𑀸𑀦𑀁 𑀢𑀺𑀡𑁆𑀡𑀁 𑀳𑁂𑀝𑁆𑀞𑀺𑀫𑀨𑀮𑀸𑀦𑀁 𑀆𑀯𑀚𑁆𑀚𑀦𑀤𑁆𑀯𑀬𑀲𑁆𑀲𑀘 𑀯𑀲𑁂𑀦 𑀙𑀧𑀜𑁆𑀜𑀸𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀸 𑀉𑀤𑁆𑀤𑀺𑀲𑁂. 𑀅𑀯𑀲𑁂𑀲𑀸𑀦𑀁 𑀘𑀢𑀼𑀦𑁆𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀓𑀸𑀫𑀯𑀺𑀧𑀸𑀓 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀮𑀸𑀯𑀚𑁆𑀚𑀦 𑀤𑁆𑀯𑀬𑀯𑀲𑁂𑀦 𑀘𑀢𑀼𑀧𑀜𑁆𑀜𑀸𑀲 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀫𑁆𑀪𑀯𑀸 𑀉𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸. 𑀧𑀼𑀕𑁆𑀕𑀮 𑀪𑁂𑀤𑁂𑀦 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀪𑁂𑀤𑁄 𑀧𑀼𑀕𑁆𑀕𑀮𑀪𑁂𑀤𑁄.

𑁧𑁪𑁨. 𑀲𑀩𑁆𑀩𑀸𑀦𑀺𑀧𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑀮𑀩𑁆𑀪𑀦𑁆𑀢𑀺 𑀧𑀼𑀕𑁆𑀕𑀮𑀸𑀦𑀁 𑀤𑁆𑀯𑀸𑀭𑀸𑀦𑀜𑁆𑀘 𑀏𑀢𑁆𑀣𑁂𑀯 𑀧𑀭𑀺𑀧𑀼𑀡𑁆𑀡𑀲𑀫𑁆𑀪𑀯𑀢𑁄. 𑀬𑀣𑀸𑀭𑀳𑀦𑁆𑀢𑀺 𑀢𑀁 𑀢𑀁 𑀪𑀽𑀫𑀺𑀧𑀼𑀕𑁆𑀕𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀅𑀭𑀳𑀸𑀦𑀼𑀭𑀽𑀧𑀁. 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀯𑀚𑁆𑀚𑀺𑀢𑀩𑁆𑀩𑁂𑀲𑀼 𑀲𑁄𑀴𑀲𑀯𑀻𑀣𑀺 𑀘𑀺𑀢𑁆𑀢𑁂𑀲𑀼 𑀙𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺𑀯𑀸𑀓𑁆𑀬𑁂 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀧𑀝𑀺𑀖𑀚𑀯𑀦 𑀢𑀤𑀸𑀭𑀫𑁆𑀫𑀡 𑀯𑀚𑁆𑀚𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀧𑀣𑀫𑀫𑀕𑁆𑀕 𑀭𑀽𑀧𑀸𑀯𑀘𑀭𑀳𑀲𑀦 𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸𑀦𑀺 𑀧𑀝𑀺𑀖𑀚𑀯𑀦 𑀢𑀤𑀸𑀭𑀫𑁆𑀫𑀡𑀯𑀚𑁆𑀚𑀺𑀢𑀸𑀦𑀺𑀘 𑀯𑀻𑀣𑀺 𑀘𑀺𑀢𑁆𑀢𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀧𑀺 𑀯𑀚𑁆𑀚𑀺𑀢𑀩𑁆𑀩𑁂𑀲𑀼 𑀅𑀝𑁆𑀞𑀢𑀺𑀁𑀲 𑀯𑀻𑀣𑀺𑀘𑀺𑀢𑁆𑀢𑁂𑀲𑀼 𑀲𑁄𑀴𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺𑀯𑀼𑀘𑁆𑀘𑀫𑀸𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑀸𑀲𑀼𑀧𑀺 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼. 𑀢𑀁𑀢𑀁 𑀧𑀲𑀸𑀤𑀭𑀳𑀺𑀢𑀸𑀦𑀁 𑀢𑀁𑀢𑀁𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀦 𑀮𑀩𑁆𑀪𑀦𑁆𑀢𑁂𑀯𑀸𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀢𑀸𑀯 𑀖𑀸𑀦𑀸𑀤𑀺𑀢𑁆𑀢𑀬𑀁 𑀦𑀢𑁆𑀣𑀻𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀧𑀲𑀸𑀤 𑀭𑀳𑀺𑀢𑀸𑀦𑀁 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑀁 𑀖𑀸𑀦 𑀚𑀺𑀯𑁆𑀳𑀸𑀓𑀸𑀬𑀤𑁆𑀯𑀸𑀭𑀺𑀓𑀸𑀦𑀺 𑀙 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀦𑀮𑀩𑁆𑀪𑀦𑁆𑀢𑁂𑀯. 𑀬𑀸𑀦𑀺 𑀲𑀦𑁆𑀥𑀸𑀬 𑀙𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺𑀯𑀸𑀓𑁆𑀬𑁂 𑀯𑀼𑀘𑁆𑀘𑀫𑀸𑀦𑀢𑁆𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁. 𑀅𑀭𑀽𑀧𑀪𑀽𑀫𑀺𑀬𑀁 𑀧𑀦 𑀧𑀜𑁆𑀘𑀧𑀺 𑀧𑀲𑀸𑀤𑀸 𑀦𑀢𑁆𑀣𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡 𑀫𑀦𑁄𑀥𑀸 𑀢𑀼𑀢𑁆𑀢𑀺𑀓 𑀲𑀦𑁆𑀢𑀻𑀭𑀡𑀢𑁆𑀢𑀬𑀯𑀲𑁂𑀦 𑀲𑁄𑀴𑀲𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀦𑀮𑀩𑁆𑀪𑀦𑁆𑀢𑁂𑀯. 𑀬𑀸𑀦𑀺 𑀲𑀦𑁆𑀥𑀸𑀬 𑀲𑁄𑀴𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀢𑀸𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀪𑀽𑀫𑀺𑀬𑀁 𑀧𑀦 𑀢𑀁𑀢𑀁 𑀧𑀲𑀸𑀤𑀭𑀳𑀺𑀢𑀢𑀸 𑀚𑀘𑁆𑀘𑀦𑁆𑀥𑀸𑀤𑀻𑀦𑀁 𑀯𑀲𑁂𑀦 𑀬𑁄 𑀚𑁂𑀢𑀩𑁆𑀩𑀸. 𑀓𑀸𑀫𑁂 𑀅𑀲𑀻𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀬𑀣𑀸𑀭𑀳𑀁 𑀮𑀩𑁆𑀪𑀭𑁂 𑀮𑀩𑁆𑀪𑀦𑁆𑀢𑀺. 𑀭𑀽𑀧𑁂 𑀘𑀢𑀼𑀲𑀝𑁆𑀞𑀺 𑀢𑀣𑀸 𑀬𑀣𑀸𑀭𑀳𑀁 𑀮𑀩𑁆𑀪𑀭𑁂. 𑀅𑀭𑀽𑀧𑁂 𑀤𑁆𑀯𑁂 𑀘𑀢𑁆𑀢𑀸𑀮𑀻𑀲 𑀬𑀣𑀸𑀭𑀳𑀁 𑀮𑀩𑁆𑀪𑀭𑁂𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀩𑁆𑀭𑀳𑁆𑀫𑀮𑁄𑀓𑁂𑀯𑀸 𑀉𑀧𑀭𑀺 𑀙𑀓𑀸𑀫𑀸𑀯𑀘𑀭 𑀤𑁂𑀯𑀮𑁄𑀓𑁂𑀲𑀼𑀯𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁 𑀘𑀢𑀼𑀦𑁆𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀮𑀩𑁆𑀪𑀫𑀸𑀦𑀢𑀸𑀯𑀘𑀦𑀁 𑀢𑀢𑁆𑀣 𑀞𑀢𑁆𑀯𑀸𑀯𑀸 𑀇𑀥 𑀆𑀕𑀦𑁆𑀢𑁆𑀯𑀸𑀯𑀸 𑀇𑀥 𑀅𑀦𑀝𑁆𑀞𑁂𑀳𑀺 𑀭𑀽𑀧𑀲𑀤𑁆𑀤𑁂𑀳𑀺 𑀲𑀫𑀸𑀕𑀘𑁆𑀙𑀦𑁆𑀢𑀸𑀦𑀁 𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 𑀇𑀥 𑀆𑀕𑀢𑀸𑀦𑀁𑀬𑁂𑀯 𑀩𑁆𑀭𑀳𑁆𑀫𑀸𑀦𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄 𑀳𑁄𑀢𑀻𑀢𑀺 𑀣𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀪𑀽𑀫𑀺𑀬𑀁 𑀮𑀤𑁆𑀥𑀸𑀦𑀺𑀦𑀸𑀫 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀲𑀝𑁆𑀞𑀺𑀬𑁂𑀯 𑀯𑀻𑀣𑀺𑀘𑀺𑀢𑁆𑀢𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺. 𑀇𑀥 𑀆𑀕𑀢𑀸𑀦𑀁𑀬𑁂𑀯 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀸𑀦𑀺 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀦𑀘 𑀢𑀢𑁆𑀣 𑀞𑀺𑀢𑀸𑀧𑀺 𑀇𑀥 𑀅𑀦𑀺𑀝𑁆𑀞𑀸𑀦𑀺 𑀦𑀕𑀡𑁆𑀳𑀦𑁆𑀢𑀺. 𑀤𑀽𑀭𑁂𑀧𑀺 𑀆𑀭𑀫𑁆𑀫𑀡𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀩𑁆𑀭𑀳𑁆𑀫𑀸𑀦𑀦𑁆𑀢𑀺.

[𑁧𑁪𑁦] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

𑀢𑀲𑁆𑀲 𑀯𑀸𑀤𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀇𑀥 𑀧𑀦 𑀢𑀢𑁆𑀣 𑀞𑀢𑁆𑀯𑀸𑀧𑀺 𑀇𑀫𑀁 𑀮𑁄𑀓𑀁 𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀅𑀲𑀫𑁆𑀪𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺. 𑀢𑁂𑀦 𑀢𑀢𑁆𑀣 𑀞𑀢𑁆𑀯𑀸 𑀇𑀫𑀁 𑀮𑁄𑀓𑀁 𑀧𑀲𑁆𑀲𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀘𑀺𑀢𑁆𑀢𑀸𑀦𑀺 𑀢𑀢𑁆𑀣 𑀮𑀤𑁆𑀥𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀇𑀥 𑀆𑀕𑀢𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺 𑀇𑀥 𑀮𑀤𑁆𑀥𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀺. 𑀢𑀜𑁆𑀘 𑀦 𑀬𑀼𑀢𑁆𑀢𑀁.

𑀢𑀁 𑀢𑀁 𑀪𑀽𑀫𑀺𑀧𑀭𑀺𑀬𑀸𑀧𑀦𑁆𑀦𑁂 𑀲𑀢𑁆𑀢𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀺𑀏𑀯 𑀢𑀁𑀢𑀁𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑀸𑀦𑀻𑀢𑀺 𑀲𑀺𑀤𑁆𑀥𑀢𑁆𑀢𑀸. 𑀇𑀘𑁆𑀘𑁂𑀯𑀦𑁆𑀢𑀺𑀆𑀤𑀺 𑀫𑀳𑀸𑀦𑀺𑀕𑀫𑀦𑀁. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀢𑀁 𑀢𑀁 𑀪𑀽𑀫𑀺𑀧𑀼𑀕𑁆𑀕𑀮𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀲𑀼 𑀲𑀫𑁆𑀪𑀯𑀸𑀦𑀼𑀭𑀽𑀧𑀁. 𑀪𑀯𑀗𑁆𑀕𑁂𑀦 𑀅𑀦𑁆𑀢𑀭𑀺𑀢𑀸 𑀪𑀯𑀗𑁆𑀕𑀦𑁆𑀢𑀭𑀺𑀢𑀸. 𑀬𑀸𑀯𑀢𑀸𑀬𑀼𑀓𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀪𑀯𑀦𑀺𑀓𑀦𑁆𑀢𑀺 𑀯𑀻𑀣𑀺𑀢𑁄 𑀧𑀝𑁆𑀞𑀸𑀬 𑀬𑀢𑁆𑀢𑀓𑀁 𑀓𑀸𑀮𑀁 𑀚𑀻𑀯𑀺𑀢𑀲𑀦𑁆𑀢𑀸𑀦𑀁 𑀧𑀯𑀢𑁆𑀢𑀢𑀺. 𑀢𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑀸 𑀧𑀯𑀢𑁆𑀢𑀢𑀺 𑀅𑀲𑀢𑀺 𑀦𑀺𑀭𑁄𑀥 𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀯𑀻𑀣𑀺 𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.