𑀧𑀓𑀺𑀡𑁆𑀡𑀓 𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁨𑁯. 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀤𑁆𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀦 𑀉𑀪𑀺𑀦𑁆𑀦𑀁 𑀦𑀺𑀤𑁆𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀸𑀬𑀣𑀸𑀬𑁄𑀕𑀦𑁆𑀢𑀺𑀆𑀤𑀺𑀫𑀸𑀳. 𑀬𑀣𑀸𑀬𑁄𑀕𑀁 𑀲𑀫𑁆𑀧𑀬𑀼𑀢𑁆𑀢𑀸 𑀲𑀪𑀸𑀯𑀢𑁄 𑀢𑁂𑀧𑀜𑁆𑀜𑀸𑀲 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀬𑁂 𑀥𑀫𑁆𑀫𑀸 𑀫𑀬𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀤𑁆𑀤𑀺𑀝𑁆𑀞𑀸. 𑀇𑀤𑀸𑀦𑀺 𑀬𑀣𑀸 𑀭𑀳𑀁 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀲𑀗𑁆𑀕𑀳𑁄𑀦𑀸𑀫 𑀦𑀺𑀬𑁆𑀬𑀢𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀸𑀯𑁄 𑀲𑀪𑀸𑀯𑁄. 𑀥𑀫𑁆𑀫𑀸𑀦𑀁 𑀆𑀯𑁂𑀦𑀺𑀓𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀁 𑀢𑀸𑀯 𑀪𑀽𑀫𑀺𑀚𑀸𑀢𑀺𑀲𑀫𑁆𑀧𑀬𑁄𑀕𑀸𑀤𑀺𑀪𑁂𑀤𑁂𑀦 𑀏𑀓𑀽𑀦 𑀦𑀯𑀼𑀢𑀺𑀯𑀺𑀥𑀁𑀧𑀺 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑀲𑀗𑁆𑀔𑀸𑀢𑁂𑀦 𑀆𑀯𑁂𑀦𑀺𑀓𑀮𑀓𑁆𑀔𑀡𑁂𑀦 𑀏𑀓𑀫𑁂𑀯 𑀳𑁄𑀢𑀺. 𑀨𑀲𑁆𑀲𑁄𑀧𑀺 𑀪𑀽𑀫𑀺𑀚𑀸𑀢𑀺𑀲𑀫𑁆𑀧𑀬𑁄 𑀕𑀸𑀤𑀺𑀪𑁂𑀤𑁂𑀦 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑁄𑀧𑀺 𑀨𑀼𑀲𑀦𑀮𑀓𑁆𑀔𑀡𑁂𑀦 𑀏𑀓𑁄𑀯 𑀳𑁄𑀢𑀺 𑀢𑀣𑀸 𑀯𑁂𑀤𑀦𑀸𑀲𑀜𑁆𑀜𑀸𑀤𑀬𑁄𑀢𑀺 𑀏𑀯𑀁 𑀲𑀪𑀸𑀯𑀢𑁄 𑀢𑁂𑀧𑀜𑁆𑀜𑀸𑀲 𑀏𑀯 𑀳𑁄𑀦𑁆𑀢𑀻𑀢𑀺. 𑀯𑁂𑀤𑀦𑀸𑀳𑁂𑀢𑀼𑀢𑁄 𑀓𑀺𑀘𑁆𑀘𑀤𑁆𑀯𑀸𑀭𑀸𑀮𑀫𑁆𑀩𑀡𑀯𑀢𑁆𑀣𑀼𑀢𑁄 𑀧𑀯𑀢𑁆𑀢𑁄 𑀲𑀗𑁆𑀕𑀳𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀯𑁂𑀤𑀦𑀸𑀳𑁂𑀢𑀼𑀢𑁄𑀢𑀺 𑀯𑁂𑀤𑀦𑀸𑀪𑁂𑀤 𑀳𑁂𑀢𑀼𑀪𑁂𑀤𑀢𑁄. 𑀏𑀯𑀁 𑀓𑀺𑀘𑁆𑀘𑀤𑁆𑀯𑀸𑀭𑀸𑀮𑀫𑁆𑀩𑀡 𑀯𑀢𑁆𑀣𑀼𑀢𑁄𑀢𑀺 𑀏𑀢𑁆𑀣𑀧𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯𑀸𑀢𑀺 𑀘𑀺𑀢𑁆𑀢𑀯𑀲𑁂𑀦𑁂𑀯 𑀦𑀺𑀬𑁆𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀲𑀤𑁆𑀤𑁂𑀦 𑀘𑁂𑀢𑀲𑀺𑀓𑁂 𑀦𑀺𑀯𑀢𑁆𑀢𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀙𑀦𑁆𑀦𑀁 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀸𑀦𑀁 𑀯𑀘𑀦𑀢𑁆𑀣𑁄 𑀇𑀥𑁂𑀯 𑀢𑀸𑀯 𑀣𑁂𑀭𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀺 𑀯𑁂𑀤𑀦𑀸𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀦𑀸𑀲𑀗𑁆𑀕𑀳𑁄, 𑀳𑁂𑀢𑀼𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀳𑁂𑀢𑀼𑀲𑀗𑁆𑀕𑀳𑁄𑀢𑀺𑀆𑀤𑀺𑀦𑀸.

[𑁮𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀤𑁆𑀤𑁂𑀦 𑀘𑁂𑀢𑀲𑀺𑀓𑀥𑀫𑁆𑀫𑁂𑀧𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀦𑀺𑀯𑀢𑁆𑀢𑁂 𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀦 𑀓𑀢𑁆𑀣𑀘𑀺 𑀢𑀁𑀯𑀺𑀭𑀳𑁂𑀦𑀸’’𑀢𑀺 𑀯𑀤𑀢𑀺. 𑀢𑀁 𑀦𑀬𑀼𑀚𑁆𑀚𑀢𑀺𑀬𑁂𑀯.

𑀦 𑀳𑀺 𑀇𑀥 𑀏𑀢𑁆𑀢𑀓𑀸 𑀘𑁂𑀢𑀲𑀺𑀓𑀸 𑀲𑀼𑀔𑀲𑀳𑀕𑀢𑀸, 𑀏𑀢𑁆𑀢𑀓𑀸 𑀤𑀼𑀓𑁆𑀔 𑀲𑀳𑀕𑀢𑀸𑀢𑀺𑀆𑀤𑀺𑀦𑀸 𑀏𑀓𑁄𑀧𑀺 𑀲𑀗𑁆𑀕𑀳𑁄 𑀘𑁂𑀢𑀲𑀺𑀓𑁂𑀳𑀺 𑀦𑀻𑀢𑁄 𑀦𑀸𑀫 𑀅𑀢𑁆𑀣𑀺. 𑀲𑀼𑀔𑀲𑀳𑀕𑀢𑀁 𑀓𑀼𑀲𑀮𑀯𑀺𑀧𑀸𑀓𑀁 𑀓𑀸𑀬𑀯𑀺𑀜𑁆𑀜𑀸𑀡𑀫𑁂𑀓𑀫𑁂𑀯𑀸𑀢𑀺𑀆𑀤𑀺𑀦𑀸 𑀧𑀦 𑀘𑀺𑀢𑁆𑀢𑁂𑀦𑀏𑀯 𑀦𑀻𑀳𑁄𑀢𑀺. 𑀘𑀺𑀢𑁆𑀢𑁂 𑀧𑀦 𑀲𑀺𑀤𑁆𑀥𑁂 𑀘𑁂𑀢 𑀲𑀺𑀓𑀸𑀧𑀺 𑀲𑀺𑀤𑁆𑀥𑀸𑀏𑀯𑀸𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯𑀸𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁩𑁦. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀲𑀗𑁆𑀕𑀳𑁂𑀲𑀼. 𑀯𑁂𑀤𑀦𑀸𑀪𑁂𑀤𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀦𑀸𑀲𑀗𑁆𑀕𑀳𑁄.

[𑁮𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀲𑀼𑀔𑀸𑀤𑀺𑀯𑁂𑀤𑀦𑀸𑀦𑀁 𑀢𑀁𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀜𑁆𑀘 𑀯𑀺𑀪𑀸𑀕𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀦𑀸𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀲𑀤𑁆𑀤𑁂𑀦 𑀯𑁂𑀤𑀦𑀸𑀲𑀗𑁆𑀕𑀳𑁄𑀘 𑀯𑁂𑀤𑀦𑀸𑀲𑀳𑀕𑀢 𑀘𑀺𑀢𑁆𑀢𑀼𑀧𑁆𑀧𑀸𑀤 𑀲𑀗𑁆𑀕𑀳𑁄𑀘𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀯𑁂𑀤𑀦𑀸𑀲𑀗𑁆𑀕𑀳𑁄𑀢𑀺 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀇𑀥 𑀳𑀺 𑀯𑁂𑀤𑀦𑀸𑀪𑁂𑀤𑁄 𑀇𑀫𑀲𑁆𑀲 𑀲𑀗𑁆𑀕𑀳𑀲𑁆𑀲 𑀦𑀺𑀲𑁆𑀲𑀬𑀥𑀫𑁆𑀫𑀧𑀭𑀺𑀕𑁆𑀕𑀳𑀢𑁆𑀣𑀁𑀏𑀯 𑀯𑀼𑀢𑁆𑀢𑁄. 𑀦 𑀯𑁂𑀤𑀦𑀸𑀦𑀁𑀘 𑀯𑀺𑀲𑀼𑀁 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀢𑀢𑁆𑀣𑀢𑀺𑀯𑀺𑀥𑀸 𑀯𑁂𑀤𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀲𑀁𑀬𑀼𑀢𑁆𑀢𑀓𑁂 𑀤𑁆𑀯𑁂𑀧𑀺 𑀢𑀺𑀲𑁆𑀲𑁄𑀧𑀺 𑀧𑀜𑁆𑀘𑀧𑀺 𑀙𑀧𑀺 𑀅𑀝𑁆𑀞𑀸𑀭𑀲𑀧𑀺 𑀙𑀢𑁆𑀢𑀺𑀁𑀲𑀧𑀺 𑀅𑀝𑁆𑀞𑀲𑀢𑀁𑀧𑀺 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺. 𑀲𑀘𑁆𑀘𑀁. 𑀅𑀦𑀼𑀪𑀯𑀦𑀮𑀓𑁆𑀔𑀡𑁂𑀦 𑀧𑀦 𑀯𑁂𑀤𑀦𑀸 𑀢𑀺𑀯𑀺𑀥𑀸𑀏𑀯 𑀳𑁄𑀢𑀺. 𑀬𑁂 𑀳𑀺 𑀓𑁂𑀘𑀺 𑀬𑀁𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀺. 𑀢𑁂 𑀢𑀁 𑀲𑀸𑀢𑀢𑁄𑀯𑀸 𑀅𑀦𑀼𑀪𑀯𑀦𑁆𑀢𑀺 𑀅𑀲𑀸𑀢𑀢𑁄𑀯𑀸 𑀫𑀚𑁆𑀛𑀢𑁆𑀢𑀢𑁄𑀯𑀸. 𑀢𑀢𑁄 𑀅𑀜𑁆𑀜𑁄 𑀧𑀓𑀸𑀭𑁄 𑀦𑀢𑁆𑀣𑀻𑀢𑀺. 𑀅𑀜𑁆𑀜𑁂 𑀧𑀦 𑀧𑀪𑁂𑀤𑀸 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀳𑀺 𑀤𑁆𑀯𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀲𑁂𑀦 𑀯𑀼𑀢𑁆𑀢𑀸. 𑀬𑀣𑀸𑀳-𑀓𑀢𑀫𑀸𑀘 𑀪𑀺𑀓𑁆𑀔𑀯𑁂 𑀤𑁆𑀯𑁂 𑀯𑁂𑀤𑀦𑀸 𑀓𑀸𑀬𑀺𑀓𑀸𑀘 𑀘𑁂𑀢𑀲𑀺𑀓𑀸𑀘𑀸𑀢𑀺. 𑀲𑀼𑀔𑀤𑀼𑀓𑁆𑀔 𑀯𑀲𑁂𑀦𑀯𑀸 𑀉𑀧𑁂𑀓𑁆𑀔𑀁 𑀲𑀼𑀔𑁂 𑀲𑀗𑁆𑀕𑀳𑁂𑀢𑁆𑀯𑀸. 𑀬𑀣𑀸𑀳-𑀤𑁆𑀯𑁂 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸 𑀲𑀼𑀔𑀸𑀯𑁂𑀤𑀦𑀸 𑀤𑀼𑀓𑁆𑀔𑀸𑀯𑁂𑀤𑀦𑀸. 𑀬𑀸𑀬𑀁 𑀪𑀦𑁆𑀢𑁂 𑀅𑀤𑀼𑀓𑁆𑀔 𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀦𑁆𑀢𑀲𑁆𑀫𑀺𑀁 𑀏𑀲𑀸𑀧𑀡𑀻𑀢𑁂 𑀲𑀼𑀔𑁂 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

𑀅𑀦𑀯𑀚𑁆𑀚𑀧𑀓𑁆𑀔𑀺𑀓𑀁 𑀉𑀧𑁂𑀓𑁆𑀔𑀁 𑀲𑀼𑀔𑁂 𑀲𑀸𑀯𑀚𑁆𑀚𑀧𑀓𑁆𑀔𑀺𑀓𑀜𑁆𑀘 𑀤𑀼𑀓𑁆𑀔𑁂 𑀲𑀗𑁆𑀕𑀳𑁂𑀢𑁆𑀯𑀸 𑀤𑁆𑀯𑁂 𑀯𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑀁𑀧𑀺 𑀬𑀼𑀚𑁆𑀚𑀢𑀺𑀬𑁂𑀯.

𑀇𑀦𑁆𑀤𑁆𑀭𑀺𑀬𑀪𑁂𑀤𑀯𑀲𑁂𑀦 𑀧𑀜𑁆𑀘. 𑀨𑀲𑁆𑀲𑀪𑁂𑀤𑀯𑀲𑁂𑀦 𑀙. 𑀉𑀧𑀯𑀺𑀘𑀸𑀭𑀪𑁂𑀤 𑀯𑀲𑁂𑀦 𑀅𑀝𑁆𑀞𑀸𑀭𑀲. 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸𑀦𑀻𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀤𑁆𑀯𑀸𑀤𑀲𑀦𑁆𑀦𑀁 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀸𑀦𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲. 𑀢𑀸𑀬𑁂𑀯 𑀓𑀸𑀮𑀢𑁆𑀢𑀬𑀯𑀲𑁂𑀦 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺. 𑀬𑀜𑁆𑀘 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀳𑁂𑀝𑁆𑀞𑀸 𑀧𑀦 𑀘𑀺𑀢𑁆𑀢𑀦𑀺𑀤𑁆𑀤𑁂𑀲𑁂 𑀘𑀺𑀢𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀪𑁂𑀤𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀓𑀢𑁆𑀯𑀸 𑀇𑀥𑀧𑀺 𑀇𑀦𑁆𑀤𑁆𑀭𑀺𑀬𑀪𑁂𑀤𑀯𑀲𑁂𑀦𑁂𑀯 𑀘𑀺𑀢𑁆𑀢𑀸𑀦𑀺 𑀲𑀗𑁆𑀕𑀳𑁂𑀢𑀼𑀁 𑀧𑀼𑀦 𑀲𑀼𑀔𑀁.𑀮. 𑀧𑀜𑁆𑀘𑀥𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑁂𑀲𑀼 𑀥𑀫𑁆𑀫𑁂𑀲𑀼 𑀆𑀥𑀺 𑀧𑀘𑁆𑀘𑀯𑀲𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀲𑀁 𑀓𑀸𑀬𑀺𑀓 𑀫𑀸𑀦𑀲𑀺𑀓𑀯𑀲𑁂𑀦 𑀤𑀼𑀯𑀺𑀥𑀢𑁆𑀢𑀸 𑀢𑀸𑀦𑀺𑀧𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀦𑀺. 𑀉𑀧𑁂𑀓𑁆𑀔𑀸𑀬 𑀧𑀦 𑀆𑀥𑀺𑀧𑀘𑁆𑀘𑀝𑁆𑀞𑀸𑀦𑀪𑀽𑀢𑀸 𑀥𑀫𑁆𑀫𑀸 𑀫𑀸𑀦𑀲𑀺𑀓𑀸𑀏𑀯 𑀳𑁄𑀦𑁆𑀢𑀻𑀢𑀺𑀲𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀓𑀥𑀸𑀯 𑀯𑀼𑀢𑁆𑀢𑀸𑀢𑀺. 𑀅𑀧𑀺𑀘, 𑀢𑁂𑀧𑀺 𑀧𑀭𑀺𑀬𑀸𑀬𑁂𑀦 𑀤𑀼𑀯𑀺𑀥𑀸 𑀳𑁄𑀦𑁆𑀢𑀺. 𑀘𑀓𑁆𑀔𑀸𑀤𑀺𑀧𑀲𑀸𑀤𑀓𑀸𑀬 𑀦𑀺𑀲𑁆𑀲𑀺𑀢𑀸𑀦𑀁𑀧𑀺 𑀲𑀩𑁆𑀪𑀸𑀯𑀢𑁄. 𑀯𑁂𑀤𑀦𑀸𑀧𑀦 𑀏𑀓𑀭𑀲𑀢𑁆𑀢𑀸 𑀏𑀓𑀥𑀸𑀯 𑀯𑀼𑀢𑁆𑀢𑀸𑀢𑀺.

𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀓𑀸𑀬𑀺𑀓 𑀫𑀸𑀦𑀲𑀺𑀓 𑀲𑀸𑀢𑀪𑁂𑀤𑀢𑁄 𑀲𑀼𑀔𑀤𑀼𑀓𑁆𑀔𑀸𑀦𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀪𑀸𑀯𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀨𑁄𑀝𑁆𑀞𑀩𑁆𑀩𑀸 𑀦𑀼𑀪𑀯𑀦𑀮𑀓𑁆𑀔𑀡𑀸𑀦𑀺 𑀲𑀼𑀔 𑀤𑀼𑀓𑁆𑀔𑀸𑀦𑀺. 𑀲𑀪𑀸𑀯𑀢𑁄𑀯𑀸 𑀧𑀭𑀺𑀓𑀧𑁆𑀧𑀦𑀢𑁄𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀸𑀦𑀼𑀪𑀯𑀦 𑀮𑀓𑁆𑀔𑀡𑀸𑀦𑀺 𑀇𑀢𑀭𑀸𑀦𑀻𑀢𑀺. 𑀲𑁂𑀲𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢 𑀲𑀼𑀔𑀤𑀼𑀓𑁆𑀔𑀢𑁄 𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑁂𑀳𑀺 𑀲𑁂𑀲𑀸𑀦𑀺 𑀩𑀸𑀢𑁆𑀢𑀺𑀁𑀲 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀢𑁂𑀯𑀻𑀲𑀢𑀺 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑀸𑀦𑀺𑀘𑀸𑀢𑀺 𑀲𑀩𑁆𑀩𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑀸𑀦𑀺. 𑀏𑀓𑀢𑁆𑀣𑀸𑀢𑀺 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂. 𑀇𑀢𑀭𑀸 𑀳𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸.

𑁧𑁩𑁧. 𑀳𑁂𑀢𑀽𑀦𑀁 𑀪𑁂𑀤𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦 𑀲𑀗𑁆𑀕𑀳𑁄 𑀳𑁂𑀢𑀼𑀲𑀗𑁆𑀕𑀳𑁄.

[𑁮𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀮𑁄𑀪𑀸𑀤𑀺𑀳𑁂𑀢𑀽𑀦𑀁 𑀯𑀺𑀪𑀸𑀕𑀯𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦𑀘 𑀲𑀗𑁆𑀕𑀳𑁄 𑀳𑁂𑀢𑀼𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀳𑁂𑀢𑀽𑀦𑀸𑀫 𑀙𑀩𑁆𑀩𑀺𑀥𑀸 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀳𑁂𑀢𑀼𑀓𑀺𑀘𑁆𑀘𑀁𑀦𑀸𑀫 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯 𑀲𑀸𑀥𑀦𑀁. 𑀬𑀣𑀸 𑀳𑀺 𑀭𑀼𑀓𑁆𑀔𑀲𑁆𑀲 𑀫𑀽𑀮𑀸𑀦𑀺 𑀲𑀬𑀁 𑀅𑀦𑁆𑀢𑁄 𑀧𑀣𑀯𑀺𑀬𑀁 𑀯𑀤𑁆𑀥𑀺𑀢𑁆𑀯𑀸 𑀧𑀣𑀯𑀺𑀭𑀲𑁂𑀘 𑀆𑀧𑁄𑀭𑀲𑁂𑀘 𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀁 𑀬𑀸𑀯 𑀅𑀕𑁆𑀕𑀸 𑀅𑀪𑀺𑀳𑀭𑀦𑁆𑀢𑀺. 𑀯𑀸𑀢𑁂𑀯𑀸 𑀫𑀳𑁄𑀖𑁂𑀯𑀸 𑀆𑀕𑀢𑁂 𑀭𑀼𑀓𑁆𑀔𑀁 𑀲𑀼𑀝𑁆𑀞𑀼 𑀆𑀓𑀟𑁆𑀠𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀁 𑀭𑀼𑀓𑁆𑀔𑁄 𑀯𑀼𑀤𑁆𑀥𑁄 𑀯𑀺𑀭𑀼𑀴𑁆𑀳𑁄 𑀯𑀺𑀧𑀼𑀮𑁄 𑀘𑀺𑀭𑀝𑁆𑀞𑀺𑀢𑀺𑀓𑁄𑀘 𑀳𑁄𑀢𑀺. 𑀏𑀯𑀫𑁂𑀯𑀁 𑀇𑀫𑁂𑀧𑀺 𑀥𑀫𑁆𑀫𑀸 𑀲𑀬𑀁 𑀆𑀭𑀫𑁆𑀫𑀡𑁂𑀲𑀼 𑀣𑀺𑀭𑀧𑀢𑁆𑀢𑀸 𑀳𑀼𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀢𑀢𑁆𑀣 𑀯𑀼𑀤𑁆𑀥𑁂 𑀯𑀺𑀭𑀼𑀴𑁆𑀳𑁂 𑀯𑀺𑀧𑀼𑀮𑁂 𑀘𑀺𑀭𑀝𑁆𑀞𑀺𑀢𑀺𑀓𑁂𑀘 𑀲𑀸𑀥𑁂𑀦𑁆𑀢𑀻𑀢𑀺. 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺𑀧𑀦 𑀚𑀮𑀢𑀮𑁂 𑀅𑀫𑀽𑀮𑀓𑀲𑁂𑀯𑀸 𑀮𑀸𑀦𑀺 𑀯𑀺𑀬 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀭𑁂 𑀧𑀦 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀁 𑀳𑁂𑀢𑀼𑀓𑀺𑀘𑁆𑀘𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁𑀲𑀦𑁆𑀢𑁂 𑀬𑁂𑀲𑀁 𑀲𑀳𑀚𑀸𑀢𑀳𑁂𑀢𑀼 𑀦𑀢𑁆𑀣𑀺. 𑀢𑁂𑀲𑀁 𑀅𑀓𑀼𑀲𑀮𑀪𑀸𑀯𑁄 𑀅𑀩𑁆𑀬𑀸𑀓𑀢𑀪𑀸𑀯𑁄𑀘 𑀦𑀲𑀫𑁆𑀧𑀚𑁆𑀚𑁂𑀬𑁆𑀬. 𑀬𑀸𑀦𑀺𑀘 𑀮𑀤𑁆𑀥𑀳𑁂𑀢𑀼𑀧𑀘𑁆𑀘𑀬𑀸𑀦𑀺 𑀭𑀽𑀧𑀸𑀦𑀺. 𑀢𑁂𑀲𑀜𑁆𑀘 𑀓𑀼𑀲𑀮𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀢𑁆𑀯𑀸 𑀢𑀁𑀯𑀸𑀤𑀁 𑀧𑀝𑀺𑀧𑀓𑁆𑀔𑀺𑀧𑀦𑁆𑀢𑀺. 𑀬𑀣𑀸 𑀧𑀦 𑀮𑁄𑀓𑁂 𑀅𑀦𑁆𑀥𑀓𑀸𑀭𑁄𑀦𑀸𑀫 𑀓𑁂𑀦𑀘𑀺 𑀧𑀘𑁆𑀘𑀬 𑀯𑀺𑀲𑁂𑀲𑁂𑀦 𑀲𑀸𑀥𑁂𑀢𑀩𑁆𑀩𑁄 𑀦 𑀳𑁄𑀢𑀺. 𑀬𑀢𑁆𑀣 𑀆𑀮𑁄𑀓𑁄 𑀦𑀢𑁆𑀣𑀺. 𑀢𑀢𑁆𑀣 𑀲𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀺𑀤𑁆𑀥𑁄 𑀳𑁄𑀢𑀺. 𑀏𑀯𑀫𑁂𑀯𑀁 𑀥𑀫𑁆𑀫𑁂𑀲𑀼 𑀫𑀼𑀬𑁆𑀳𑀦𑀓𑁆𑀭𑀺𑀬𑀸𑀪𑀽𑀢𑁄 𑀫𑁄𑀳𑀦𑁆𑀥𑀓𑀸𑀭𑁄𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯 𑀅𑀓𑀼𑀲𑀮𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀢𑀣𑀸 𑀳𑀺 𑀇𑀘𑁆𑀙𑀸𑀦𑀸𑀫 𑀅𑀢𑁆𑀣𑀺. 𑀲𑀸𑀫𑀼𑀬𑁆𑀳𑀦𑀓𑁆𑀭𑀺𑀬𑀸𑀬 𑀬𑀼𑀢𑁆𑀢𑀸 𑀮𑀕𑁆𑀕𑀦𑀪𑀸𑀯𑀁 𑀧𑀢𑁆𑀯𑀸 𑀮𑁄𑀪𑁄 𑀅𑀓𑀼𑀲𑀮𑁄 𑀦𑀸𑀫 𑀳𑁄𑀢𑀺. 𑀲𑀤𑁆𑀥𑀸𑀬 𑀬𑀼𑀢𑁆𑀢𑀸 𑀧𑀦 𑀥𑀫𑁆𑀫𑀘𑁆𑀙𑀦𑁆𑀤𑀪𑀸𑀯𑀁 𑀧𑀢𑁆𑀯𑀸 𑀓𑀼𑀲𑀮𑀘𑁆𑀙𑀦𑁆𑀤𑁄𑀦𑀸𑀫 𑀳𑁄𑀢𑀺. 𑀢𑀣𑀸 𑀅𑀓𑁆𑀔𑀦𑁆𑀢𑀺𑀦𑀸𑀫 𑀅𑀢𑁆𑀣𑀺. 𑀲𑀸𑀧𑀺 𑀫𑀼𑀬𑁆𑀳𑀦 𑀓𑁆𑀭𑀺𑀬𑀸𑀬 𑀬𑀼𑀢𑁆𑀢𑀸 𑀧𑀝𑀺𑀖𑀪𑀸𑀯𑀁 𑀧𑀢𑁆𑀯𑀸 𑀤𑁄𑀲𑁄 𑀅𑀓𑀼𑀲𑀮𑁄𑀦𑀸𑀫 𑀳𑁄𑀢𑀺. 𑀲𑀤𑁆𑀥𑀸𑀬 𑀬𑀼𑀢𑁆𑀢𑀸 𑀧𑀦 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀧𑀥𑀫𑁆𑀫 𑀧𑀸𑀧𑀸𑀭𑀫𑁆𑀫𑀡 𑀯𑀺𑀭𑁄𑀥𑀪𑀸𑀯𑀁 𑀧𑀢𑁆𑀯𑀸 𑀅𑀮𑁄𑀪𑁄 𑀓𑀼𑀲𑀮𑁄𑀦𑀸𑀫 𑀳𑁄𑀢𑀺. 𑀫𑀼𑀬𑁆𑀳𑀦𑀓𑁆𑀭𑀺𑀬𑀸 𑀧𑀦 𑀅𑀲𑀼𑀓𑁂𑀦 𑀬𑀼𑀢𑁆𑀢𑀸 𑀅𑀓𑀼𑀲𑀮𑁄𑀦𑀸𑀫. 𑀅𑀲𑀼𑀓𑁂𑀦 𑀬𑀼𑀢𑁆𑀢𑀸 𑀓𑀼𑀲𑀮𑁄𑀦𑀸𑀫𑀸𑀢𑀺 𑀦𑀢𑁆𑀣𑀺. 𑀅𑀫𑁆𑀩𑀺𑀮𑀢𑁆𑀣𑀸𑀬 𑀅𑀜𑁆𑀜𑁂𑀦 𑀲𑀁𑀬𑁄𑀕𑀓𑀺𑀘𑁆𑀘𑀭𑀳𑀺𑀢𑁄 𑀚𑀸𑀢𑀺𑀅𑀫𑁆𑀩𑀺𑀮𑀭𑀲𑁄 𑀯𑀺𑀬 𑀏𑀓𑀦𑁆𑀢𑀅𑀓𑀼𑀲𑀮𑀚𑀸𑀢𑀺𑀓𑀸𑀏𑀯 𑀳𑁄𑀢𑀻𑀢𑀺. 𑀬𑁄𑀘 𑀥𑀫𑁆𑀫𑁄 𑀓𑀼𑀲𑀮𑁄 𑀅𑀓𑀼𑀲𑀮𑁄𑀘 𑀦 𑀳𑁄𑀢𑀺. 𑀲𑁄 𑀅𑀩𑁆𑀬𑀸𑀓𑀢𑁄𑀢𑀺 𑀏𑀢𑁆𑀢𑀓𑀫𑁂𑀯 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑀲𑀺𑀤𑁆𑀥𑀺𑀬𑀸 𑀓𑀸𑀭𑀡𑀁. 𑀢𑀲𑁆𑀫𑀸 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀁 𑀭𑀽𑀧𑀦𑀺𑀩𑁆𑀩𑀸𑀦𑀸𑀦𑀜𑁆𑀘 𑀅𑀩𑁆𑀬𑀸𑀓𑀢𑀪𑀸𑀯𑁄𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫 𑀢𑀸𑀬𑀏𑀯 𑀲𑀺𑀤𑁆𑀥𑁄. 𑀢𑀢𑁆𑀣 𑀫𑁄𑀳𑁄 𑀲𑁂𑀲𑀫𑀽𑀮𑀸𑀦𑀁𑀧𑀺 𑀫𑀽𑀮𑀁 𑀳𑁄𑀢𑀺. 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀦𑀺𑀧𑀺 𑀳𑀺 𑀫𑀼𑀬𑁆𑀳𑀦𑀦𑀺𑀲𑀦𑁆𑀤𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀅𑀮𑁄𑀪𑀸𑀤𑀻𑀦𑀜𑁆𑀘 𑀓𑀼𑀲𑀮𑀪𑀸𑀯𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁂𑀦 𑀲𑀳𑁂𑀯 𑀲𑀺𑀤𑁆𑀥𑁄𑀢𑀺. 𑀢𑀸𑀦𑀺 𑀧𑀦 𑀮𑁄𑀪𑀸𑀤𑀻𑀦𑀺 𑀮𑁄𑀪𑀲𑀳𑀕𑀢𑀸𑀤𑀻𑀦𑀁 𑀯𑀺𑀲𑁂𑀲𑀫𑀽𑀮𑀸𑀦𑀺 𑀳𑁄𑀦𑁆𑀢𑀺. 𑀭𑀚𑁆𑀚𑀦𑀸𑀤𑀺 𑀦𑀺𑀲𑀦𑁆𑀤𑀸𑀦𑀺 𑀳𑀺 𑀤𑀺𑀝𑁆𑀞𑀺𑀫𑀸𑀦𑀸𑀤𑀻𑀦𑀺. 𑀅𑀭𑀚𑁆𑀚𑀦𑀸𑀤𑀺𑀦𑀺𑀲𑀦𑁆𑀤𑀸𑀦𑀺 𑀘 𑀲𑀤𑁆𑀥𑀸𑀤𑀻𑀦𑀻𑀢𑀺. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀬𑁄𑀦𑀸𑀫 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀧𑀥𑀸𑀦𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀳𑁂𑀢𑀼𑀓𑀯𑀺𑀧𑀸𑀓𑀓𑁆𑀭𑀺𑀬𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀧𑀦 𑀳𑁂𑀢𑀼 𑀫𑀼𑀔𑁂𑀦𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄.

[𑁮𑁬] 𑀏𑀢𑁆𑀢𑀸𑀯𑀢𑀸 𑀬𑀁 𑀯𑀼𑀢𑁆𑀢𑀁 𑀯𑀺𑀪𑀸𑀯𑀦𑀺𑀬𑀁

‘‘𑀅𑀧𑀭𑁂 𑀧𑀦 𑀓𑀼𑀲𑀮𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑀸𑀥𑀦𑀁 𑀳𑁂𑀢𑀼 𑀪𑀸𑀯𑁄’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀳𑁂𑀢𑀽𑀦𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸 𑀤𑀺𑀪𑀸𑀯𑀲𑀸𑀥𑀦𑁄 𑀅𑀜𑁆𑀜𑁄 𑀳𑁂𑀢𑀼 𑀫𑀕𑁆𑀕𑀺𑀢𑀩𑁆𑀩𑁄 𑀲𑀺𑀬𑀸. 𑀅𑀣 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀢𑁂𑀲𑀁 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀏𑀯𑀫𑁆𑀧𑀺 𑀫𑁄𑀫𑀽𑀳 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀳𑁂𑀢𑀼𑀦𑁄 𑀅𑀓𑀼𑀲𑀮 𑀪𑀸𑀯𑁄 𑀅𑀧𑁆𑀧𑀝𑀺𑀩𑀤𑁆𑀥𑁄 𑀲𑀺𑀬𑀸. 𑀅𑀣 𑀢𑀲𑁆𑀲 𑀲𑀪𑀸𑀯𑀢𑁄 𑀅𑀓𑀼𑀲𑀮𑀪𑀸𑀯𑁄𑀧𑀺 𑀲𑀺𑀬𑀸. 𑀏𑀯𑀁𑀲𑀢𑀺 𑀲𑁂𑀲𑀳𑁂𑀢𑀽𑀦𑀫𑁆𑀧𑀺 𑀲𑀪𑀸𑀯𑀢𑁄 𑀓𑀼𑀲𑀮𑀸𑀤𑀺𑀪𑀸𑀯𑁄𑀢𑀺 𑀢𑁂𑀲𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀫𑁆𑀧𑀺 𑀲𑁄 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀦𑀲𑀺𑀬𑀸, 𑀬𑀤𑀺𑀘 𑀳𑁂𑀢𑀼𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄. 𑀢𑀤𑀸 𑀅𑀳𑁂𑀢𑀼𑀓𑀸𑀦𑀁 𑀅𑀩𑁆𑀬𑀸𑀓𑀢𑀪𑀸𑀯𑁄 𑀦𑀲𑀺𑀬𑀸𑀢𑀺 𑀅𑀮𑀫𑀢𑀺𑀦𑀺𑀧𑁆𑀧𑀻𑀴𑀦𑁂𑀦𑀸𑀢𑀺 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀬𑀣𑀸𑀘 𑀮𑀤𑁆𑀥𑀚𑁆𑀛𑀸𑀦𑀧𑀘𑁆𑀘𑀬𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀛𑀸𑀦𑀗𑁆𑀕𑀸𑀦𑀺 𑀅𑀭𑀽𑀧𑀥𑀫𑁆𑀫𑁂𑀲𑀼𑀏𑀯 𑀉𑀧𑀦𑀺𑀚𑁆𑀛𑀸𑀦𑀝𑁆𑀞𑀁 𑀨𑀭𑀦𑁆𑀢𑀺, 𑀦 𑀭𑀽𑀧𑀥𑀫𑁆𑀫𑁂𑀲𑀼. 𑀢𑁂 𑀧𑀦 𑀛𑀸𑀦𑀥𑀫𑁆𑀫 𑀲𑀫𑀼𑀝𑁆𑀞𑀺 𑀢𑀢𑁆𑀢𑀸𑀏𑀯 𑀛𑀸𑀦𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑀸. 𑀏𑀯𑀫𑁂𑀯 𑀳𑁂𑀢𑀼𑀬𑁄𑀧𑀺 𑀅𑀭𑀽𑀧 𑀥𑀫𑁆𑀫𑁂𑀲𑀼𑀏𑀯 𑀓𑀼𑀲𑀮𑀸𑀤𑀺𑀪𑀸𑀯𑀁 𑀨𑀭𑀦𑁆𑀢𑀺. 𑀦 𑀭𑀽𑀧𑀥𑀫𑁆𑀫𑁂𑀲𑀼. 𑀢𑁂 𑀧𑀦 𑀳𑁂𑀢𑀼 𑀲𑀫𑀼𑀝𑁆𑀞𑀺𑀢𑀢𑁆𑀢𑀸𑀏𑀯 𑀳𑁂𑀢𑀼𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑀸𑀢𑀺 𑀦 𑀢𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀸𑀧𑀢𑁆𑀢𑀺 𑀘𑁄𑀤𑁂𑀢𑀩𑁆𑀩𑀸𑀢𑀺.

[𑁮𑁭] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀓𑀼𑀲𑀮𑀸𑀤𑀺𑀪𑀸𑀯𑁄 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀬𑁄𑀦𑀺𑀲𑁄 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀯𑀺𑀘𑀸𑀭𑁂 𑀢𑀩𑁆𑀩𑀁.

𑀢𑀣𑀸 𑀳𑀺 𑀲𑀽𑀭𑀺𑀬𑀸𑀮𑁄𑀓𑁂 𑀆𑀕𑀢𑁂 𑀤𑀺𑀯𑀸 𑀩𑀮𑀸𑀦𑀁 𑀳𑀁𑀲𑀸𑀤𑀻𑀦𑀁 𑀑𑀓𑀸𑀲𑁄 𑀳𑁄𑀢𑀺. 𑀭𑀢𑁆𑀢𑀦𑁆𑀥𑀓𑀸𑀮𑁂 𑀆𑀕𑀢𑁂 𑀭𑀢𑁆𑀢𑀺𑀩𑀮𑀸𑀦𑀁 𑀉𑀮𑀽𑀓𑀸𑀤𑀻𑀦𑀁 𑀑𑀓𑀸𑀲𑁄 𑀳𑁄𑀢𑀺. 𑀦𑀘 𑀢𑁂 𑀆𑀮𑁄𑀓𑀦𑁆𑀥𑀓𑀸𑀭𑀸 𑀢𑁂𑀲𑀁 𑀯𑀡𑁆𑀡𑀸𑀤𑀺𑀯𑀺𑀲𑁂𑀲𑀁 𑀲𑀸𑀫𑁂𑀦𑁆𑀢𑀺. 𑀢𑀁 𑀧𑀦 𑀢𑁂𑀲𑀁 𑀬𑁄𑀦𑀺𑀬𑁄𑀏𑀯 𑀲𑀸𑀥𑁂𑀦𑁆𑀢𑀺. 𑀢𑀢𑁆𑀣 𑀆𑀮𑁄𑀓𑁄 𑀯𑀺𑀬 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀥𑀓𑀸𑀭𑁄 𑀯𑀺𑀬 𑀇𑀢𑀭𑁄. 𑀢𑁂 𑀲𑀢𑁆𑀢𑀸 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀸. 𑀯𑀡𑁆𑀡𑀸𑀤𑀺𑀯𑀺𑀲𑁂𑀲𑁄 𑀯𑀺𑀬 𑀓𑀼𑀲𑀮𑀸𑀤𑀺𑀪𑀸𑀯𑁄. 𑀬𑁄𑀦𑀺𑀬𑁄 𑀯𑀺𑀬 𑀳𑁂𑀢𑀼𑀬𑁄 𑀤𑀝𑁆𑀞𑀩𑁆𑀩𑀸𑀢𑀺. 𑀅𑀩𑁆𑀬𑀸𑀓𑀢𑀸𑀦𑀁 𑀧𑀦𑀸𑀢𑀺 𑀲𑀩𑁆𑀩𑀁 𑀬𑁄 𑀥𑀫𑁆𑀫𑁄 𑀓𑀼𑀲𑀮𑁄 𑀅𑀓𑀼𑀲𑀮𑁄𑀘 𑀦 𑀳𑁄𑀢𑀺. 𑀲𑁄 𑀅𑀩𑁆𑀬𑀸𑀓𑀢𑁄𑀢𑀺 𑀯𑀼𑀢𑁆𑀢𑀧𑀓𑁆𑀔𑁂 𑀧𑀢𑀢𑀺𑀬𑁂𑀯𑀸𑀢𑀺. 𑀢𑀢𑁆𑀣𑀸𑀢𑀺 𑀳𑁂𑀢𑀼𑀲𑀗𑁆𑀕𑀳𑁂. 𑀲𑀳𑁂𑀢𑀼𑀓𑀸𑀦𑀁 𑀧𑀭𑀺𑀕𑁆𑀕𑀳𑀲𑀼𑀔𑀢𑁆𑀣𑀁 𑀇𑀥 𑀯𑀚𑁆𑀚𑁂𑀢𑀩𑁆𑀩𑀸𑀦𑀺𑀧𑀺 𑀅𑀳𑁂𑀢𑀼𑀓𑀸𑀦𑀺 𑀧𑀣𑀫𑀁 𑀉𑀤𑁆𑀥𑀝𑀸𑀦𑀺. 𑀢𑁂𑀦𑀸𑀳 𑀲𑁂𑀲𑀸𑀦𑀺 𑀧𑀦. 𑀮. 𑀲𑀳𑁂𑀢𑀼𑀓𑀸 𑀦𑁂𑀯𑀸𑀢𑀺. 𑀢𑁂𑀲𑀁𑀯𑀸 𑀅𑀳𑁂𑀢𑀼𑀓𑀦𑀸𑀫𑀁𑀧𑀺 𑀳𑁂𑀢𑀽𑀦𑀁 𑀯𑀲𑁂𑀦𑁂𑀯 𑀯𑀺𑀲𑀼𑀁 𑀲𑀺𑀤𑁆𑀥𑀦𑁆𑀢𑀺 𑀢𑁂𑀲𑀁𑀧𑀺 𑀇𑀥 𑀲𑀗𑁆𑀕𑀳𑀡𑀁 𑀅𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀢𑁂𑀦𑀸𑀳 𑀅𑀳𑁂𑀢𑀼 𑀓𑀸𑀝𑁆𑀞𑀸𑀭𑀲𑁂𑀓𑀸𑀢𑀺𑀆𑀤𑀺. 𑀲𑀪𑀸𑀯 𑀪𑁂𑀤𑁂𑀦 𑀙𑀩𑁆𑀩𑀺𑀥𑀸𑀧𑀺 𑀳𑁂𑀢𑀼𑀬𑁄 𑀓𑀼𑀲𑀮𑀸 𑀓𑀼𑀲𑀮𑀸 𑀩𑁆𑀬𑀸𑀓𑀢𑀚𑀸𑀢𑀺𑀪𑁂𑀤𑁂𑀦 𑀦𑀯𑀥𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀮𑁄𑀪𑁄 𑀤𑁄𑀲𑁄𑀘𑀸𑀢𑀺𑀆𑀤𑀺.

𑁧𑁩𑁨. 𑀘𑀼𑀤𑁆𑀤𑀲𑀦𑁆𑀦𑀁 𑀓𑀺𑀘𑁆𑀘𑀸𑀦𑀁 𑀪𑁂𑀤𑁂𑀦 𑀢𑀁𑀓𑀺𑀘𑁆𑀘𑀯𑀦𑁆𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀓𑀺𑀘𑁆𑀘𑀲𑀗𑁆𑀕𑀳𑁄.

[𑁮𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀓𑀺𑀘𑁆𑀘𑀸𑀦𑀁 𑀯𑀺𑀪𑀸𑀕𑀯𑀲𑁂𑀦 𑀢𑀁𑀓𑀺𑀘𑁆𑀘𑀯𑀦𑁆𑀢𑀸𑀦𑀜𑁆𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀗𑁆𑀕𑀳𑁄 𑀓𑀺𑀘𑁆𑀘𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀬𑁂𑀦 𑀏𑀓𑀓𑀫𑁆𑀫𑁂𑀦 𑀏𑀓𑁄 𑀉𑀧𑀧𑀢𑁆𑀢𑀺𑀪𑀯𑁄𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀺𑀁 𑀲𑀭𑀲𑁂𑀦𑀯𑀸 𑀮𑀤𑁆𑀥𑀯𑀺𑀩𑀸𑀥𑀦𑁂𑀦𑀯𑀸 𑀧𑀭𑀺𑀓𑁆𑀔𑀻𑀡𑁂 𑀲𑁄 𑀪𑀯𑁄 𑀦𑀺𑀭𑀼𑀚𑁆𑀛𑀢𑀺. 𑀏𑀓𑀲𑁆𑀲 𑀓𑀫𑁆𑀫𑀲𑁆𑀲 𑀑𑀓𑀸𑀲𑁄 𑀳𑁄𑀢𑀺. 𑀢𑀲𑁆𑀫𑀸 𑀢𑀢𑁄 𑀦𑀺𑀩𑁆𑀩𑀢𑁆𑀢 𑀪𑀯𑀢𑁄 𑀘𑀼𑀢𑀲𑁆𑀲 𑀅𑀦𑁆𑀢𑀭𑀸 𑀔𑀡𑀫𑀢𑁆𑀢𑀁𑀧𑀺 𑀅𑀝𑁆𑀞𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑁂𑀦 𑀏𑀓𑁂𑀦 𑀓𑀫𑁆𑀫𑁂𑀦 𑀧𑀼𑀦 𑀪𑀯𑀦𑁆𑀢𑀭𑀸𑀤𑀺 𑀧𑀝𑀺𑀲𑀦𑁆𑀥𑀸𑀦 𑀯𑀲𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑀁. 𑀢𑀣𑀸 𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀧𑀢𑁆𑀢𑀺𑀪𑀯𑀲𑀦𑁆𑀢𑀸𑀦𑀲𑁆𑀲 𑀬𑀸𑀯 𑀢𑀁 𑀓𑀫𑁆𑀫𑀁 𑀦𑀔𑀺𑀬𑁆𑀬𑀢𑀺. 𑀢𑀸𑀯 𑀅𑀯𑀺𑀘𑁆𑀙𑁂𑀤 𑀧𑀯𑀢𑁆𑀢𑀺𑀧𑀘𑁆𑀘𑀬𑀗𑁆𑀕𑀪𑀸𑀯𑁂𑀦 𑀧𑀯𑀢𑁆𑀢𑀺 𑀪𑀯𑀗𑁆𑀕𑀓𑀺𑀘𑁆𑀘𑀁. 𑀢𑀲𑁆𑀲 𑀳𑀺 𑀢𑀣𑀸 𑀧𑀯𑀢𑁆𑀢𑀺𑀬𑀸 𑀲𑀢𑀺 𑀆𑀬𑀼𑀧𑀩𑀦𑁆𑀥𑀸𑀘 𑀉𑀲𑁆𑀫𑀸 𑀧𑀩𑀦𑁆𑀥𑀸𑀘 𑀧𑀯𑀢𑁆𑀢𑀦𑁆𑀢𑀺𑀬𑁂𑀯𑀸𑀢𑀺 𑀏𑀢𑁂 𑀢𑀬𑁄 𑀥𑀫𑁆𑀫𑀸 𑀇𑀫𑀁 𑀓𑀸𑀬𑀁 𑀅𑀪𑀺𑀚𑁆𑀚𑀫𑀸𑀦𑀁 𑀭𑀓𑁆𑀔𑀦𑁆𑀢𑀻𑀢𑀺. 𑀬𑀣𑀸𑀳 𑁋

𑀆𑀬𑀼 𑀉𑀲𑁆𑀫𑀸𑀘 𑀯𑀺𑀜𑁆𑀜𑀸𑀡𑀁, 𑀬𑀤𑀸 𑀓𑀸𑀬𑀁 𑀚𑀳𑀦𑁆𑀢𑀺 𑀫𑀁;

𑀅𑀧𑀯𑀺𑀤𑁆𑀥𑁄 𑀢𑀤𑀸 𑀲𑁂𑀢𑀺, 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀦𑁆𑀢𑀺.

𑀆𑀯𑀚𑁆𑀚𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀆𑀯𑀝𑁆𑀝𑀦𑀁, 𑀢𑀁𑀯𑀸 𑀆𑀯𑀚𑁆𑀚𑁂𑀢𑀺 𑀆𑀯𑀝𑁆𑀝𑁂𑀢𑀺, 𑀆𑀯𑀝𑁆𑀝𑀢𑀺𑀯𑀸 𑀢𑀁 𑀏𑀢𑁆𑀣 𑀏𑀢𑁂𑀦𑀸𑀢𑀺𑀯𑀸 𑀆𑀯𑀚𑁆𑀚𑀦𑀁. 𑀪𑀯𑀗𑁆𑀕 𑀯𑀻𑀣𑀺𑀢𑁄 𑀑𑀓𑁆𑀓𑀫𑀺𑀢𑁆𑀯𑀸 𑀆𑀭𑀫𑁆𑀫𑀡𑀦𑁆𑀢𑀭𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀆𑀯𑀚𑁆𑀚𑁂𑀢𑀺𑀯𑀸 𑀆𑀭𑀫𑁆𑀫𑀡𑀦𑁆𑀢𑀭𑁂 𑀆𑀪𑁄𑀕𑀁 𑀓𑀭𑁄𑀢𑀻𑀢𑀺 𑀆𑀯𑀚𑁆𑀚𑀦𑀁. 𑀤𑀲𑁆𑀲𑀦𑀸𑀤𑀻𑀦𑀺 𑀧𑀸𑀓𑀝𑀸𑀦𑀺. 𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀯𑀺𑀲𑀼𑀁 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀣𑀧𑀦𑀁 𑀇𑀤𑀁 𑀦𑀻𑀮𑀦𑁆𑀢𑀺𑀯𑀸 𑀧𑀻𑀢𑀓𑀦𑁆𑀢𑀺𑀯𑀸 𑀲𑀼𑀪𑀦𑁆𑀢𑀺𑀯𑀸𑀅𑀲𑀼𑀪𑀦𑁆𑀢𑀺𑀯𑀸 𑀅𑀲𑀗𑁆𑀓𑀭𑀢𑁄𑀣𑀧𑀦𑀁 𑀦𑀺𑀬𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀯𑀦𑀦𑁆𑀢𑀺𑀯𑀸 𑀚𑀯𑁄𑀢𑀺𑀯𑀸 𑀯𑁂𑀕𑁄𑀢𑀺𑀯𑀸 𑀅𑀢𑁆𑀣𑀢𑁄 𑀏𑀓𑀁. 𑀅𑀲𑀦𑀺𑀦𑀺𑀧𑀸𑀢𑁄 𑀯𑀺𑀬 𑀯𑁂𑀕𑀲𑀳𑀺𑀢𑀲𑁆𑀲 𑀏𑀓𑁂𑀓𑀲𑁆𑀲 𑀧𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺 𑀚𑀯𑀦𑀓𑀺𑀘𑁆𑀘𑀁.

[𑁮𑁯] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀆𑀭𑀫𑁆𑀫𑀡𑁂 𑀢𑀁𑀢𑀁𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀏𑀓𑀓𑁆𑀔𑀢𑁆𑀢𑀼𑀁𑀯𑀸 𑀚𑀯𑀫𑀸𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀺 𑀚𑀯𑀦𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀚𑀯𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀏𑀓𑀯𑀸𑀭𑀫𑀢𑁆𑀢𑁂𑀦 𑀦𑀺𑀯𑀢𑁆𑀢𑀺𑀦𑀸𑀫 𑀅𑀢𑁆𑀣𑀺. 𑀫𑀕𑁆𑀕𑀸𑀢𑀺𑀜𑁆𑀜𑀸𑀚𑀯𑀦𑀸𑀦𑀺𑀧𑀺 𑀳𑀺 𑀏𑀓𑀸𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 𑀏𑀓𑀯𑁂𑀕𑁂𑀦 𑀧𑀯𑀢𑁆𑀢𑀚𑀯𑀫𑀸𑀦𑀘𑀺𑀢𑁆𑀢𑀲𑀦𑁆𑀢𑀸𑀦𑀧𑀢𑀺𑀢𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀦 𑀧𑀦 𑀢𑀸𑀦𑀺 𑀯𑀺𑀲𑀼𑀁 𑀲𑀺𑀤𑁆𑀥𑁂𑀦 𑀚𑀯𑁂𑀦 𑀚𑀯𑀦𑁆𑀢𑀻𑀢𑀺.

[𑁯𑁦] 𑀢𑀢𑁆𑀣 𑀘

𑀚𑀯𑀫𑀸𑀦𑀲𑁆𑀲 𑀯𑀺𑀬 𑀧𑀯𑀢𑁆𑀢𑀻𑀢𑀺 𑀏𑀢𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸 𑀦𑀁 𑀔𑀡𑀺𑀓𑀥𑀫𑁆𑀫𑀸𑀦𑀁 𑀲𑀻𑀖𑀕𑀫𑀦𑀲𑀗𑁆𑀔𑀸𑀢𑁄 𑀚𑀯𑁄𑀦𑀸𑀫 𑀯𑀺𑀲𑀼𑀁 𑀦𑀢𑁆𑀣𑀺. 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀦 𑀲𑀻𑀖𑀕𑀘𑁆𑀙𑀦𑁆𑀢𑀧𑀼𑀭𑀺𑀲 𑀲𑀤𑀺𑀲𑀢𑁆𑀢𑀸 𑀏𑀯 𑀚𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀅𑀲𑀦𑀺𑀦𑀺𑀧𑀸𑀢𑁄 𑀯𑀺𑀬 𑀯𑁂𑀕𑀲𑀳𑀺𑀢𑀲𑁆𑀲 𑀏𑀓𑁂𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀚𑀯𑀦𑀓𑀺𑀘𑁆𑀘𑀦𑁆𑀢𑀺 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁. 𑀪𑀯𑀗𑁆𑀕𑀘𑀺𑀢𑁆𑀢𑀜𑁆𑀳𑀺 𑀤𑀻𑀖𑀁 𑀅𑀤𑁆𑀥𑀸𑀦𑀁 𑀧𑀽𑀭𑁂𑀢𑁆𑀯𑀸 𑀧𑀯𑀢𑁆𑀢𑀁𑀧𑀺 𑀦𑀤𑀺𑀲𑁄𑀢𑁂 𑀯𑀼𑀬𑁆𑀳𑀫𑀸𑀦𑀁 𑀲𑀼𑀓𑁆𑀔𑀧𑀡𑁆𑀡𑀁 𑀯𑀺𑀬 𑀯𑁂𑀕𑀭𑀳𑀺𑀢𑀁 𑀳𑁄𑀢𑀺. 𑀚𑀯𑀦𑀘𑀺𑀢𑁆𑀢𑀁 𑀧𑀦 𑀏𑀓𑀫𑁂𑀓𑀁𑀧𑀺 𑀲𑀫𑀸𑀦𑀁 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞 𑀯𑀚𑀺𑀭𑀁 𑀯𑀺𑀬 𑀯𑁂𑀕𑀲𑀳𑀺𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀁. 𑀬𑀁 𑀚𑀯𑀦𑁂𑀦 𑀕𑀳𑀺𑀢𑀁, 𑀢𑀤𑁂𑀯𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀚𑀯𑀦𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀁, 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀢𑀤𑀸𑀭𑀫𑁆𑀫𑀡𑀁 𑀦𑀸𑀫𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀯𑀸 𑀚𑀯𑀦𑀲𑁆𑀲 𑀆𑀭𑀫𑁆𑀫𑀡𑀁 𑀅𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀁. 𑀇𑀥 𑀧𑀦 𑀢𑀤𑀸𑀭𑀫𑁆𑀫𑀡𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀦𑀺𑀩𑁆𑀩𑀢𑁆𑀢𑀫𑀸𑀦𑀪𑀯𑀢𑁄 𑀯𑀘𑀦𑀁 𑀫𑀼𑀘𑁆𑀘𑀦𑀁 𑀧𑀭𑀺𑀕𑀴𑀦𑀁 𑀘𑀼𑀢𑀺. 𑀇𑀤𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀅𑀦𑀺𑀬𑀫𑀢𑁄 𑀦 𑀧𑀯𑀢𑁆𑀢𑀦𑁆𑀢𑀺. 𑀞𑀸𑀦𑀦𑀺𑀬𑀫𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀞𑀸𑀦𑀪𑁂𑀤𑁄 𑀯𑀼𑀢𑁆𑀢𑁄. 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺 𑀢𑀁𑀢𑀁 𑀓𑀺𑀘𑁆𑀘𑀯𑀦𑁆𑀢𑀁 𑀘𑀺𑀢𑁆𑀢𑀁 𑀏𑀢𑁆𑀣𑀸𑀢𑀺 𑀞𑀸𑀦𑀁. 𑀑𑀓𑀸𑀲𑁄. 𑀢𑀁𑀢𑀁 𑀅𑀦𑁆𑀢𑀭𑀸𑀓𑀸𑀮𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀮𑁄𑀧𑀺 𑀳𑀺 𑀓𑀸𑀮𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑀬𑀢𑁆𑀢𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀦𑁆𑀥𑀺𑀬𑀸 𑀞𑀸𑀦𑀁 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀁. 𑀧𑀝𑀺𑀲𑀦𑁆𑀥𑀓𑀸𑀮𑁄 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺.

[𑁯𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀧𑀝𑀺𑀲𑀦𑁆𑀥𑀺𑀬𑀸 𑀞𑀸𑀦𑀁 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀯𑀸 𑀓𑀸𑀫𑀁 𑀧𑀝𑀺𑀲𑀦𑁆𑀥𑀺𑀯𑀺𑀦𑀺 𑀫𑀼𑀢𑁆𑀢𑀁 𑀞𑀸𑀦𑀁𑀦𑀸𑀫 𑀦𑀢𑁆𑀣𑀺. 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀦 𑀲𑀺𑀮𑀸 𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑁂𑀤𑁂𑀧𑀺 𑀪𑁂𑀤𑀧𑀭𑀺𑀓𑀧𑁆𑀧𑀦𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀓𑀸𑀮𑁄 𑀳𑀺 𑀦𑀸𑀫 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀁 𑀆𑀭𑀫𑁆𑀫𑀡𑀪𑀽𑀢𑁄 𑀏𑀓𑁄 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀇𑀫𑁂𑀲𑀁 𑀅𑀝𑁆𑀞𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀁 𑀯𑀺𑀧𑀘𑁆𑀘𑀦𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀸𑀦𑀺 𑀳𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀧𑀘𑁆𑀘𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀬𑀁 𑀪𑀯𑀗𑁆𑀕𑁂 𑀘𑀼𑀢𑀺𑀬𑀁 𑀢𑀤𑀸𑀭𑀫𑁆𑀫𑀡𑁂𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂 𑀧𑀝𑀺𑀲𑀦𑁆𑀥𑀺𑀳𑀼𑀢𑁆𑀯𑀸 𑀯𑀺𑀧𑀘𑁆𑀘𑀦𑁆𑀢𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀁𑀧𑀺 𑀆𑀬𑀼 𑀓𑀸𑀮𑀁 𑀪𑀯𑀗𑁆𑀕𑀁 𑀳𑀼𑀢𑁆𑀯𑀸 𑀫𑀭𑀡 𑀓𑀸𑀮𑁂 𑀘𑀼𑀢𑀺 𑀳𑀼𑀢𑁆𑀯𑀸𑀢𑀺 𑀓𑀸𑀮𑁄𑀯 𑀯𑀼𑀢𑁆𑀢𑁄𑀢𑀺. 𑀇𑀢𑀭𑀣𑀸 𑀓𑀺𑀘𑁆𑀘𑀸𑀦𑀺 𑀯𑀺𑀬 𑀞𑀸𑀦𑀸𑀦𑀺𑀧𑀺 𑀘𑀼𑀤𑁆𑀤𑀲𑀯𑀺𑀥𑀸𑀦𑀺𑀏𑀯 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀦𑁆𑀢𑀺. 𑀞𑀸𑀦𑀸𑀦𑀁 𑀯𑀺𑀢𑁆𑀣𑀸𑀭𑀪𑁂𑀤𑁄 𑀧𑀦 𑀉𑀧𑀭𑀺 𑀤𑁆𑀯𑀻𑀲𑀼 𑀧𑀯𑀢𑁆𑀢𑀺𑀲𑀗𑁆𑀕𑀳𑁂𑀲𑀼 𑀘𑀺𑀢𑁆𑀢𑀧𑀯𑀢𑁆𑀢𑀺𑀯𑀺𑀥𑀸𑀦𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀬𑀲𑁆𑀫𑀸 𑀑𑀫𑀓𑀁 𑀤𑁆𑀯𑀺𑀳𑁂𑀢𑀼𑀓𑀓𑀼𑀲𑀮𑀁 𑀲𑀬𑀁 𑀲𑁄 𑀫𑀦𑀲𑁆𑀲𑀬𑀼𑀢𑁆𑀢𑀁𑀧𑀺 𑀲𑀫𑀸𑀦𑀁 𑀅𑀢𑀺𑀤𑀼𑀩𑁆𑀩𑀮𑀢𑁆𑀢𑀸 𑀲𑁄𑀫𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀁 𑀤𑀸𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀲𑁄𑀫𑀦𑀲𑁆𑀲𑀲𑀦𑁆𑀢𑀻𑀭𑀡𑀁 𑀧𑀝𑀺𑀲𑀦𑁆𑀥𑀺𑀝𑁆𑀞𑀸𑀦𑀁 𑀦𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀤𑁆𑀯𑁂𑀉𑀧𑁂𑀓𑁆𑀔𑀸𑀲𑀳𑀕𑀢𑀲𑀦𑁆𑀢𑀻𑀭𑀡𑀸𑀦𑀺𑀘𑁂𑀯𑀸𑀢𑀺. 𑀢𑀣𑀸 𑀳𑀺 𑀧𑀝𑁆𑀞𑀸𑀦𑁂 𑀧𑀻𑀢𑀺𑀲𑀳𑀕𑀢𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑁂 𑀳𑁂𑀢𑀼𑀧𑀘𑁆𑀘𑀦𑀺𑀓𑁂 𑀢𑀁 𑀧𑀝𑀺 𑀲𑀦𑁆𑀥𑀺𑀝𑁆𑀞𑀸𑀦𑁂𑀦 𑀉𑀤𑁆𑀥𑀝𑀦𑁆𑀢𑀺. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂𑀯𑀸 𑀅𑀯𑀺𑀪𑀽𑀢𑀸 𑀭𑀫𑁆𑀫𑀡𑁂𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀫𑀸𑀦𑀁𑀧𑀺 𑀯𑀺𑀧𑀸𑀓 𑀲𑀦𑁆𑀢𑀸𑀦𑀢𑁄 𑀮𑀤𑁆𑀥𑀧𑀘𑁆𑀘𑀬𑀪𑀸𑀯𑁂𑀦 𑀤𑀼𑀩𑁆𑀩𑀮𑀢𑁆𑀢𑀸 𑀚𑀯𑀦𑀯𑁂𑀕𑀭𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀆𑀯𑀚𑁆𑀚𑀦 𑀤𑁆𑀯𑀬 𑀯𑀚𑁆𑀚𑀺𑀢𑀸𑀦𑀻𑀢𑀺.

[𑁯𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀸 𑀪𑀸𑀯𑀢𑁄’’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅 𑀓𑀸𑀭𑀡𑀁.

𑀦 𑀳𑀺 𑀆𑀭𑀫𑁆𑀫𑀡 𑀭𑀲𑀸𑀦𑀼𑀪𑀯𑀦𑀁 𑀚𑀯𑀦𑀓𑀺𑀘𑁆𑀘 𑀲𑀺𑀤𑁆𑀥𑀺𑀬𑀸 𑀚𑀯𑀦𑀦𑀸𑀫 𑀮𑀸𑀪𑀲𑁆𑀲𑀘 𑀓𑀸𑀭𑀡𑀁 𑀳𑁄𑀢𑀺. 𑀢𑀁 𑀧𑀦 𑀚𑀯𑀦𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀨𑀮𑀫𑁂 𑀯𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀧𑀦 𑀨𑀮𑀘𑀺𑀢𑁆𑀢𑀁 𑀆𑀲𑁂𑀯𑀦𑀪𑀸𑀯𑀭𑀳𑀺𑀢𑀁𑀧𑀺 𑀫𑀕𑁆𑀕 𑀘𑁂𑀢𑀦𑀸𑀬 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀩𑀮𑁂𑀦 𑀘 𑀧𑀯𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑁂 𑀯𑁂𑀕𑀲𑀳𑀺𑀢𑀫𑁂𑀯 𑀧𑀢𑀢𑀻𑀢𑀺 𑀢𑀲𑁆𑀲𑀚𑀯𑀦𑁂𑀲𑀼 𑀕𑀳𑀡𑀁𑀓𑀢𑀁.

[𑁯𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀫𑀕𑁆𑀕𑀸𑀪𑀺𑀜𑁆𑀜𑀸𑀚𑀯𑀦𑀸𑀦𑀁 𑀏𑀓𑀯𑀸𑀭𑀫𑁂𑀯 𑀧𑀯𑀢𑁆𑀢𑀢𑁆𑀢𑀸 𑀚𑀯𑀦𑀓𑀺𑀘𑁆𑀘𑀁 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁𑀧𑀺 𑀮𑁄𑀓𑀼𑀢𑁆𑀢𑀭 𑀫𑀕𑁆𑀕𑀸𑀤𑀺𑀢𑀁 𑀢𑀁𑀲𑀪𑀸𑀯𑀯𑀦𑁆𑀢𑀢𑀸𑀬 𑀚𑀯𑀦𑀓𑀺𑀘𑁆𑀘𑀁 𑀦𑀸𑀫𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄𑀧𑀫𑀸𑀬 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯.

𑀇𑀤𑀸𑀦𑀺 𑀲𑀫𑀸𑀦𑀓𑀺𑀘𑁆𑀘𑀕𑀡𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑁂𑀲𑀼 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀧𑀝𑀺𑀲𑀦𑁆𑀥𑀸𑀤𑀬𑁄 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀲𑀫𑁆𑀩𑀦𑁆𑀥𑁄.

[𑁯𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀦𑀸𑀫𑀓𑀺𑀘𑁆𑀘𑀪𑁂𑀤𑁂𑀦𑀸𑀢𑀺𑀧𑀺 𑀬𑁄𑀚𑁂𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦𑀸𑀫𑀪𑁂𑀤𑀲𑁆𑀲 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺. 𑀏𑀓𑀓𑀺𑀘𑁆𑀘𑀝𑁆𑀞𑀸𑀦 𑀤𑁆𑀯𑀺𑀓𑀺𑀘𑁆𑀘𑀝𑁆𑀞𑀸𑀦 𑀢𑀺𑀓𑀺𑀘𑁆𑀘𑀝𑁆𑀞𑀸𑀦 𑀘𑀢𑀼𑀓𑀺𑀘𑁆𑀘𑀝𑁆𑀞𑀸𑀦 𑀧𑀜𑁆𑀘𑀓𑀺𑀘𑁆𑀘𑀝𑁆𑀞𑀸𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞𑀲𑀝𑁆𑀞𑀺𑀘 𑀢𑀣𑀸 𑀤𑁆𑀯𑁂𑀘 𑀦𑀯𑀘 𑀅𑀝𑁆𑀞𑀘 𑀤𑁆𑀯𑁂𑀘 𑀦𑀺𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸.

𑁧𑁩𑁩. 𑀘𑀓𑁆𑀔𑀸𑀤𑀻𑀦𑀁 𑀤𑁆𑀯𑀸𑀭𑀸𑀦𑀁 𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀤𑁆𑀯𑀸𑀭𑀲𑀗𑁆𑀕𑀳𑁄.

[𑁯𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀤𑁆𑀯𑀸𑀭𑀸𑀦𑀜𑁆𑀘 𑀤𑁆𑀯𑀸𑀭𑀧𑀯𑀢𑁆𑀢𑀘𑀺𑀢𑁆𑀢𑀸𑀦𑀜𑁆𑀘 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀗𑁆𑀕𑀳𑁄 𑀤𑁆𑀯𑀸𑀭𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀤𑁆𑀯𑁂 𑀚𑀦𑀸 𑀅𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑁆𑀯𑀸𑀭𑀁. 𑀦𑀕𑀭𑀲𑁆𑀲 𑀅𑀦𑁆𑀢𑁄 𑀚𑀦𑀸 𑀩𑀳𑀺𑀚𑀦𑀸𑀘 𑀬𑁂𑀦 𑀙𑀺𑀤𑁆𑀤𑀫𑀕𑁆𑀕𑁂𑀦 𑀦𑀺𑀓𑁆𑀔𑀫𑀦𑁆𑀢𑀺 𑀧𑀯𑀺𑀲𑀦𑁆𑀢𑀺𑀘, 𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀤𑁆𑀯𑁂 𑀚𑀦𑀸 𑀅𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀤𑁆𑀯𑀸𑀭𑀦𑁆𑀢𑀺𑀧𑀻 𑀯𑀤𑀦𑁆𑀢𑀺. 𑀅𑀧𑀺𑀘, 𑀤𑀼𑀯𑀺𑀥𑀁 𑀤𑁆𑀯𑀸𑀭𑀁 𑀆𑀓𑀸𑀲𑀤𑁆𑀯𑀸𑀭𑀁 𑀫𑀡𑁆𑀟𑀤𑁆𑀯𑀸𑀭𑀦𑁆𑀢𑀺. 𑀢𑀢𑁆𑀣 𑀆𑀓𑀸𑀲𑀤𑁆𑀯𑀸𑀭𑀁𑀦𑀸𑀫 𑀬𑀣𑀸𑀯𑀼𑀢𑁆𑀢𑁄 𑀙𑀺𑀤𑁆𑀤𑀫𑀕𑁆𑀕𑁄. 𑀫𑀡𑁆𑀟𑀤𑁆𑀯𑀸𑀭𑀁𑀦𑀸𑀫 𑀆𑀤𑀸𑀲 𑀧𑀝𑁆𑀝𑀫𑀬𑁄 𑀆𑀮𑁄𑀓𑀫𑀕𑁆𑀕𑁄. 𑀢𑀁 𑀧𑀦 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀕𑁂𑀳𑁂𑀲𑀼 𑀬𑁄𑀚𑀻𑀬𑀢𑀺. 𑀬𑀣𑀸 𑀘 𑀢𑁂𑀲𑀼, 𑀢𑀣𑀸 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂𑀲𑀼𑀧𑀺 𑀤𑁆𑀯𑁂𑀏𑀯 𑀳𑁄𑀦𑁆𑀢𑀺. 𑀦𑀯𑀤𑁆𑀯𑀸𑀭𑁄 𑀫𑀳𑀸𑀯𑀡𑁄𑀢𑀺 𑀳𑀺 𑀙𑀺𑀤𑁆𑀤𑀤𑁆𑀯𑀸𑀭𑀁 𑀯𑀼𑀢𑁆𑀢𑀁. 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀸 𑀦𑀺𑀧𑀺 𑀙𑀺𑀤𑁆𑀤𑀤𑁆𑀯𑀸𑀭𑀸𑀦𑀺𑀏𑀯. 𑀇𑀥 𑀧𑀦 𑀆𑀤𑀸𑀲𑀧𑀝𑁆𑀝𑀲𑀤𑀺𑀲𑀁 𑀫𑀡𑁆𑀟𑀤𑁆𑀯𑀸𑀭𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁𑀧𑀺 𑀳𑀺 𑀆𑀭𑀫𑁆𑀫𑀡𑀺𑀓𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀥𑀫𑁆𑀫𑀸𑀦𑀜𑁆𑀘 𑀦𑀺𑀕𑁆𑀕𑀫𑀦 𑀧𑀯𑀺𑀲𑀦 𑀫𑀼𑀔𑀧𑀣𑀪𑀸𑀯𑀢𑁄 𑀤𑁆𑀯𑀸𑀭𑀲𑀤𑀺𑀲𑀢𑁆𑀢𑀸 𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑀁 𑀧𑀦 𑀭𑀽𑀧𑀫𑀡𑁆𑀟 𑀤𑁆𑀯𑀸𑀭𑀁 𑀅𑀭𑀽𑀧𑀫𑀡𑁆𑀟𑀤𑁆𑀯𑀸𑀭𑀦𑁆𑀢𑀺 𑀤𑀼𑀯𑀺𑀥𑀁. 𑀭𑀽𑀧𑀫𑀡𑁆𑀟𑀤𑁆𑀯𑀸𑀭𑀁𑀧𑀺 𑀓𑀫𑁆𑀫𑀯𑀺𑀲𑁂𑀲𑀫𑀳𑀸𑀪𑀽𑀢 𑀯𑀺𑀲𑁂𑀲𑀲𑀺𑀤𑁆𑀥𑁂𑀦 𑀫𑀡𑁆𑀟𑀪𑀸𑀯𑀯𑀺𑀲𑁂𑀲𑁂𑀦 𑀧𑀜𑁆𑀘𑀯𑀺𑀥𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀘𑀓𑁆𑀔𑀼𑀤𑁆𑀯𑀸𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀔𑀼𑀫𑁂𑀯𑀘𑀓𑁆𑀔𑀼𑀤𑁆𑀯𑀸𑀭𑀦𑁆𑀢𑀺 𑀬𑀲𑁆𑀫𑀺𑀁 𑀘𑀓𑁆𑀔𑀼𑀫𑁆𑀳𑀺 𑀘𑀦𑁆𑀤 𑀫𑀡𑁆𑀟𑀮𑀸𑀤𑀻𑀦𑀺 𑀭𑀽𑀧 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀆𑀯𑀚𑁆𑀚𑀦𑀸𑀤𑀻𑀦𑀺𑀘 𑀬𑀫𑁆𑀳𑀺 𑀧𑀜𑁆𑀜𑀸𑀢𑀸𑀦𑀺 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀤𑁂𑀯 𑀘𑀓𑁆𑀔𑀼 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑀬𑀯𑀺𑀲 𑀬𑀺𑀪𑀸𑀯𑀼𑀧𑀕𑀫𑀦𑀲𑁆𑀲 𑀫𑀼𑀔𑀧𑀣𑀪𑀽𑀢𑀢𑁆𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀁𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀣𑀯𑀸, 𑀬𑁂𑀦 𑀘𑀓𑁆𑀔𑀼𑀫𑀡𑁆𑀟𑁂𑀦 𑀩𑀳𑀺𑀤𑁆𑀥𑀸 𑀘𑀦𑁆𑀤𑀫𑀡𑁆𑀟𑀮𑀸𑀤𑀻𑀦𑀺 𑀭𑀽𑀧𑀸𑀦𑀺 𑀅𑀦𑁆𑀢𑁄 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀲𑀬𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀬𑁂𑀦𑀘 𑀅𑀦𑁆𑀢𑁄 𑀆𑀯𑀚𑁆𑀚𑀦𑀸𑀤𑀻𑀦𑀺 𑀩𑀳𑀺𑀤𑁆𑀥𑀸 𑀢𑁂𑀲𑀁 𑀭𑀽𑀧𑀸𑀦𑀁 𑀯𑀺𑀲𑀬𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑀫𑁂𑀯 𑀬𑀣𑀸𑀯𑀼𑀢𑁆𑀢 𑀓𑀸𑀭𑀡𑁂𑀦 𑀘𑀓𑁆𑀔𑀼𑀤𑁆𑀯𑀸𑀭𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺.

[𑁯𑁬] 𑀝𑀻𑀓𑀸𑀲𑀼 𑀧𑀦

‘‘𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄 𑀤𑁆𑀯𑀸𑀭𑀲𑀤𑀺𑀲𑀢𑁆𑀢𑀸 𑀤𑁆𑀯𑀸𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁𑀧𑀺 𑀧𑀯𑀢𑁆𑀢𑀺𑀫𑀼𑀔𑀪𑀽𑀢𑀢𑁆𑀢𑀸. 𑀯𑀓𑁆𑀔𑀢𑀺 𑀳𑀺 𑀙𑀩𑁆𑀩𑀺𑀥𑀸 𑀯𑀺𑀲𑀬𑀧𑀯𑀢𑁆𑀢𑀺𑀬𑁄𑀢𑀺. 𑀏𑀢𑁆𑀣𑀘 𑀯𑀺𑀲𑀬𑀸𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁 𑀤𑁆𑀯𑀸𑀭𑁂𑀲𑀼 𑀆𑀧𑀸𑀢𑀸 𑀕𑀫𑀦 𑀲𑀗𑁆𑀔𑀸𑀢𑀸 𑀧𑀯𑀢𑁆𑀢𑀺𑀬𑁄 𑀯𑀺𑀲𑀬𑀧𑀯𑀢𑁆𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀫𑁂𑀯 𑀘𑀓𑁆𑀔𑀼𑀤𑁆𑀯𑀸𑀭𑀦𑁆𑀢𑀺 𑀏𑀢𑁂𑀦 𑀘𑀓𑁆𑀔𑀼𑀲𑁆𑀲 𑀤𑁆𑀯𑀸𑀭𑀁 𑀘𑀓𑁆𑀔𑀼𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀣𑀸 𑀲𑁄𑀢𑀸𑀤𑀬𑁄 𑀲𑁄𑀢 𑀤𑁆𑀯𑀸𑀭𑀸𑀤𑀻𑀦𑀻𑀢𑀺 𑀏𑀢𑁂𑀦 𑀲𑁄𑀢 𑀫𑁂𑀯 𑀲𑁄𑀢𑀤𑁆𑀯𑀸𑀭𑀁.𑀮. 𑀫𑀦𑁄𑀏𑀯 𑀫𑀦𑁄𑀤𑁆𑀯𑀸𑀭𑀁. 𑀦 𑀫𑀦𑀸𑀦𑀁 𑀤𑁆𑀯𑀸𑀭𑀁 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑁆𑀲𑀢𑀺. 𑀢𑀲𑁆𑀲 𑀧𑀦 𑀫𑀦𑀲𑁆𑀲 𑀩𑀳𑀼𑀯𑀺𑀥𑀢𑁆𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 𑀫𑀦𑁄𑀤𑁆𑀯𑀸𑀭𑀁 𑀧𑀦 𑀪𑀯𑀗𑁆𑀕𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁.

[𑁯𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀆𑀯𑀚𑁆𑀚𑀦𑀸𑀤𑀻𑀦𑀁 𑀫𑀦𑀸𑀦𑀁 𑀤𑁆𑀯𑀸𑀭𑀦𑁆𑀢𑀺 𑀫𑀦𑁄𑀤𑁆𑀯𑀸𑀭’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀢𑁆𑀣 𑀲𑀩𑁆𑀩𑀁 𑀏𑀓𑀽𑀦𑀦𑀯𑀼𑀢𑀺𑀯𑀺𑀥𑀁𑀧𑀺 𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭 𑀫𑁂𑀯𑀦𑀸𑀫 𑀳𑁄𑀢𑀺. 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀤𑁆𑀯𑀸𑀭𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑀢𑁆𑀯𑀸 𑀪𑀯𑀗𑁆𑀕𑀦𑁆𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯𑀢𑀸𑀬𑀼𑀓𑀁 𑀦𑀤𑀺𑀲𑁄𑀢𑀫𑀺𑀯 𑀧𑀯𑀢𑁆𑀢𑀫𑀸𑀦𑀁 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯 𑀇𑀥 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄.

[𑁯𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀬𑀣𑀸 𑀕𑀸𑀫𑀲𑁆𑀲 𑀤𑁆𑀯𑀸𑀭𑀁𑀦𑀸𑀫 𑀕𑀸𑀫𑀸𑀦𑀦𑁆𑀢𑀭𑀫𑁂𑀯 𑀳𑁄𑀢𑀺. 𑀏𑀯𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀫𑀦𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀝𑁆𑀞𑁂𑀦 𑀤𑁆𑀯𑀸𑀭𑀁𑀦𑀸𑀫 𑀆𑀯𑀚𑁆𑀚𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀫𑁂𑀯 𑀲𑀺𑀬𑀸. 𑀦 𑀢𑀢𑁄 𑀧𑀼𑀭𑀺𑀫𑀸𑀦𑀺 𑀪𑀯𑀗𑁆𑀕𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀪𑀯𑀗𑁆𑀕𑀦𑁆𑀢𑀺 𑀆𑀯𑀚𑁆𑀚𑀸𑀦𑀸𑀦𑀦𑁆𑀢𑀭𑀁 𑀪𑀯𑀗𑁆𑀕’’𑀦𑁆𑀢𑀺. 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀏𑀯𑀜𑁆𑀳𑀺 𑀲𑀢𑀺 𑀬𑁂𑀲𑀼 𑀘𑀓𑁆𑀔𑀼𑀧𑀲𑀸𑀤𑀸𑀤𑀻𑀲𑀼 𑀭𑀽𑀧𑀸𑀤𑀻𑀦𑀺 𑀆𑀧𑀸𑀢𑀁 𑀦𑀸𑀕𑀘𑁆𑀙𑀦𑁆𑀢𑀺. 𑀢𑀸𑀦𑀺𑀧𑀺 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀻𑀣𑀺𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀸𑀦𑀺 𑀏𑀯 𑀦 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀤𑁆𑀯𑀸𑀭𑀸𑀦𑀺𑀦𑀸𑀫 𑀦𑀲𑀺𑀬𑀼𑀁. 𑀦 𑀘 𑀢𑀣𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀧𑀸𑀴𑀺𑀬𑀫𑁂𑀯 𑀢𑁂𑀲𑀁 𑀤𑁆𑀯𑀸𑀭𑀭𑀽𑀧𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀇𑀥𑀘 𑀯𑀓𑁆𑀔𑀢𑀺 𑀧𑀲𑀸𑀤𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀢𑁆𑀢𑀯𑀺𑀥𑀁𑀧𑀺 𑀤𑁆𑀯𑀸𑀭𑀭𑀽𑀧𑀁𑀦𑀸𑀫𑀸𑀢𑀺.

[𑁯𑁯] 𑀬𑀜𑁆𑀘 𑀢𑀢𑁆𑀣

𑀲𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀦𑁆𑀢𑀼, 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑁋

𑀲𑀸𑀥𑀓𑀯𑀘𑀦𑀁 𑀆𑀳𑀝𑀁; 𑀢𑀁𑀧𑀺 𑀇𑀥 𑀦𑀬𑀼𑀚𑁆𑀚𑀢𑀺𑀬𑁂𑀯.

𑀢𑀜𑁆𑀳𑀺 𑀆𑀯𑀚𑁆𑀚𑀦𑀁𑀧𑀺 𑀫𑀦𑁄𑀤𑁆𑀯𑀸𑀭𑀧𑀓𑁆𑀔𑀺𑀓𑀁 𑀓𑀢𑁆𑀯𑀸 𑀤𑀻𑀧𑁂𑀢𑀻𑀢𑀺. 𑀬𑀢𑁆𑀣 𑀧𑀦 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀲𑁄𑀢𑀜𑁆𑀘. 𑀮. 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯 𑀢𑀁 𑀬𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀘𑀓𑁆𑀔𑀼𑀭𑀽𑀧𑀸𑀦𑀺 𑀏𑀯 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸𑀦𑀻𑀢𑀺 𑀇𑀢𑀭𑁂 𑀆𑀯𑀚𑁆𑀚𑀦𑀜𑁆𑀘 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸 𑀘𑀸𑀢𑀺 𑀤𑁆𑀯𑁂 𑀧𑀘𑁆𑀘𑀬𑀸 𑀘𑀲𑀤𑁆𑀤𑁂𑀦 𑀕𑀳𑀺𑀢𑀸, 𑀏𑀯𑀁 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺. 𑀫𑀦𑁄𑀯𑀺𑀜𑁆𑀜𑀸𑀡𑁂 𑀧𑀦 𑀫𑀦𑀜𑁆𑀘𑀸𑀢𑀺 𑀏𑀢𑁆𑀣 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀳 𑀆𑀯𑀚𑁆𑀚𑀦𑀁 𑀕𑀳𑁂𑀢𑁆𑀯𑀸 𑀘𑀲𑀤𑁆𑀤𑁂𑀦 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸 𑀕𑀳𑀺𑀢𑀸. 𑀏𑀯𑀜𑁆𑀳𑀺 𑀲𑀢𑀺 𑀘𑀢𑁆𑀢𑀸 𑀭𑁄𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀥𑀸𑀢𑀼𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 𑀧𑀝𑀺𑀘𑁆𑀘𑀸𑀢𑀺 𑀦𑀸𑀫 𑀆𑀕𑀢𑀝𑁆𑀞𑀸𑀦𑁂 𑀆𑀯𑀚𑁆𑀚𑀦𑀁 𑀯𑀺𑀲𑀼𑀁 𑀦𑀓𑀸𑀢𑀩𑁆𑀩𑀁. 𑀪𑀯𑀗𑁆𑀕𑀦𑀺𑀲𑁆𑀲𑀺𑀢𑀓𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺. 𑀢𑀲𑁆𑀫𑀸 𑀇𑀥 𑀫𑀦𑁄𑀢𑀺 𑀲𑀳𑀸𑀯𑀚𑁆𑀚𑀦𑀓𑀁 𑀪𑀯𑀗𑁆𑀕𑀁. 𑀫𑀦𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺. 𑀏𑀢𑁆𑀣𑀘 𑀧𑀝𑀺𑀘𑁆𑀘𑀸𑀢𑀺𑀦𑀸𑀫 𑀆𑀕𑀢𑀝𑁆𑀞𑀸𑀦𑁂𑀢𑀺 𑀏𑀢𑁂𑀦 𑀅𑀜𑁆𑀜𑀢𑁆𑀣 𑀧𑀦 𑀆𑀯𑀚𑁆𑀚𑀦𑀁 𑀤𑁆𑀯𑀸𑀭𑀧𑀓𑁆𑀔𑀺𑀓𑀁 𑀦𑀓𑀸𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀧𑀝𑀺𑀘𑁆𑀘𑀸𑀢𑀺 𑀆𑀕𑀢𑀢𑁆𑀢𑀸𑀬𑁂𑀯𑀘 𑀪𑀯𑀗𑁆𑀕𑀁𑀧𑀺 𑀆𑀯𑀚𑁆𑀚𑀦𑀸 𑀦𑀦𑁆𑀢𑀭𑀁 𑀪𑀯𑀗𑁆𑀕𑀤𑁆𑀯𑀬𑀫𑁂𑀯 𑀇𑀫𑀺𑀲𑁆𑀲𑀁 𑀧𑀸𑀴𑀺𑀬𑀁 𑀕𑀳𑁂𑀢𑀩𑁆𑀩𑀁. 𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀸𑀦𑀁 𑀏𑀯 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺. 𑀇𑀥 𑀧𑀦 𑀤𑁆𑀯𑀸𑀭𑀪𑀸𑀯𑀸 𑀭𑀳𑀲𑁆𑀲 𑀲𑀩𑁆𑀩𑀲𑁆𑀲 𑀉𑀧𑀧𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑀁 𑀪𑀯𑀗𑁆𑀕𑀁 𑀅𑀥𑀺𑀧𑁆𑀧𑁂𑀢𑀁. 𑀦 𑀳𑀺 𑀓𑀺𑀜𑁆𑀘𑀺 𑀪𑀯𑀗𑁆𑀕𑀁 𑀦𑀸𑀫 𑀅𑀢𑁆𑀣𑀺. 𑀬𑀁 𑀫𑀦𑁄𑀤𑁆𑀯𑀸𑀭𑀪𑀸𑀯𑀸𑀭𑀳𑀁 𑀦 𑀲𑀺𑀬𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀢𑁂𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀘𑀓𑁆𑀔𑀼 𑀤𑁆𑀯𑀸𑀭𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀭𑀳𑀦𑁆𑀢𑀺 𑀆𑀭𑀫𑁆𑀫𑀡𑀪𑀽𑀫𑀺𑀧𑀼𑀕𑁆𑀕𑀮𑀫𑀦𑀲𑀺𑀓𑀸𑀭𑀸 𑀤𑀻𑀦𑀁 𑀅𑀦𑀼𑀭𑀽𑀧𑀯𑀲𑁂𑀦. 𑀲𑀩𑁆𑀩𑀣𑀸𑀧𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀙𑀘𑀢𑁆𑀢𑀸𑀮𑀻𑀲 𑀪𑁂𑀤𑀲𑀗𑁆𑀔𑀸𑀢𑁂𑀦 𑀲𑀩𑁆𑀩𑀧𑀓𑀸𑀭𑁂𑀦𑀧𑀺 𑀅𑀕𑀳𑀺𑀢 𑀕𑀳𑀡 𑀯𑀲𑁂𑀦, 𑀘𑀢𑀼𑀧𑀜𑁆𑀜𑀸 𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀣𑀸𑀧𑀻𑀢𑀺𑀯𑀸 𑀆𑀯𑀚𑁆𑀚𑀦𑀸𑀤𑀺 𑀢𑀤𑀸𑀭𑀫𑁆𑀫𑀡 𑀧𑀭𑀺𑀬𑁄 𑀲𑀸𑀦𑀯𑀲𑁂𑀦 𑀅𑀦𑁂𑀓𑀓𑀺𑀘𑁆𑀘𑀪𑁂𑀤𑀬𑀼𑀢𑁆𑀢𑁂𑀦 𑀲𑀩𑁆𑀩𑀧𑀓𑀸𑀭𑁂𑀦𑀧𑀺, 𑀓𑀸𑀫𑀸𑀯𑀘𑀭𑀸𑀦𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀦𑀺 𑀆𑀯𑀚𑁆𑀚𑀦𑀸𑀤𑀻𑀦𑀺 𑀓𑀺𑀘𑁆𑀘𑀸𑀦𑀺 𑀤𑁆𑀯𑀸𑀭𑀯𑀺𑀓𑀸𑀭𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀓𑀺𑀘𑁆𑀘𑀯𑀦𑁆𑀢𑀸𑀦𑀺𑀏𑀯 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁂𑀦 𑀤𑁆𑀯𑀸𑀭𑀺𑀓𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕 𑀘𑀼𑀢𑀺 𑀓𑀺𑀘𑁆𑀘𑀸𑀦𑀺𑀧𑀦 𑀤𑁆𑀯𑀸𑀭𑀯𑀺𑀓𑀸𑀭𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀓𑀫𑁆𑀫𑀯𑀲𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀢𑀁𑀓𑀺𑀘𑁆𑀘𑀯𑀦𑁆𑀢𑀸𑀦𑀺 𑀤𑁆𑀯𑀸𑀭𑀺𑀓𑀸𑀦𑀺𑀦𑀸𑀫 𑀦𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀏𑀓𑀽𑀦.𑀮. 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀘 𑀤𑁆𑀯𑀸𑀭𑀯𑀺𑀓𑀸𑀭𑁄𑀦𑀸𑀫 𑀅𑀢𑁆𑀢𑀦𑀺 𑀆𑀭𑀫𑁆𑀫𑀡𑀸𑀦𑀁 𑀆𑀧𑀸𑀢𑀸𑀕𑀫𑀦𑀯𑀲𑁂𑀦 𑀪𑀯𑀗𑁆𑀕𑀲𑁆𑀲 𑀘𑀮𑀦𑀁, 𑀘𑀓𑁆𑀔𑀸𑀤𑀻𑀦𑀜𑁆𑀘 𑀅𑀢𑁆𑀢𑀦𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀸𑀤𑀦 𑀲𑀢𑁆𑀢𑀺𑀯𑀺𑀲𑁂𑀲 𑀬𑁄𑀕𑁄 𑀤𑀝𑁆𑀞𑀩𑁆𑀩𑁄.

[𑁧𑁦𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀅𑀧𑀯𑀢𑁆𑀢𑀦𑀢𑁄 𑀫𑀦𑁄𑀤𑁆𑀯𑀸𑀭𑀲𑀗𑁆𑀔𑀸𑀢 𑀪𑀯𑀗𑁆𑀕𑀢𑁄 𑀆𑀭𑀫𑁆𑀫𑀡𑀦𑁆𑀢𑀭𑀕𑀳𑀡𑀯𑀲𑁂𑀦 𑀅𑀧𑀯𑀢𑁆𑀢𑀺𑀢𑁄𑀘 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀧𑀺 𑀲𑀳 𑀦𑀲𑀫𑁂𑀢𑀺.

𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕 𑀘𑀼𑀢𑀺 𑀯𑀲𑁂𑀦𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀓𑀺𑀘𑁆𑀘𑀲𑀻𑀲𑁂𑀦𑁂𑀯 𑀘𑀺𑀢𑁆𑀢𑀸𑀦𑀁 𑀤𑁆𑀯𑀸𑀭𑀺𑀓 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀪𑀸𑀕𑁄 𑀣𑁂𑀭𑁂𑀦 𑀤𑀲𑁆𑀲𑀺𑀢𑁄. 𑀢𑁂𑀦𑁂𑀯 𑀳𑀺 𑀳𑁂𑀝𑁆𑀞𑀸𑀧𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦.𑀮. 𑀢𑀤𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀓𑀺𑀘𑁆𑀘𑀲𑀻𑀲𑁂𑀦𑁂𑀯 𑀘𑀺𑀢𑁆𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄𑀢𑀺. 𑀦𑀦𑀼 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑁂𑀲𑀼 𑀅𑀧𑀯𑀢𑁆𑀢𑀦𑀢𑁄𑀢𑀺 𑀇𑀫𑀺𑀦𑀸 𑀏𑀢𑀤𑀢𑁆𑀣𑁄𑀯 𑀯𑀼𑀢𑁆𑀢𑁄𑀢𑀺 𑀘𑁂. 𑀦. 𑀅𑀥𑀺𑀧𑁆𑀧𑁂𑀢𑀢𑁆𑀣𑀯𑀺𑀭𑀳𑀲𑁆𑀲 𑀅𑀧𑀲𑀗𑁆𑀕 𑀦𑀺𑀯𑀢𑁆𑀢𑀓𑀲𑁆𑀲𑀘 𑀲𑀁𑀯𑀡𑁆𑀡𑀦𑀸 𑀯𑀸𑀓𑁆𑀬𑀲𑁆𑀲 𑀧𑀬𑁄𑀚𑀦𑀸𑀪𑀸𑀯𑀢𑁄𑀢𑀺. 𑀙𑀤𑁆𑀯𑀸𑀭𑀺𑀓𑀸𑀦𑀺𑀘𑁂𑀯 𑀲𑀦𑁆𑀢𑀻𑀭𑀡 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀸𑀦𑀁 𑀯𑀲𑁂𑀦 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺𑀘 𑀧𑀝𑀺𑀲𑀦𑁆𑀥𑀸𑀤𑀺𑀓𑀺𑀘𑁆𑀘𑀸𑀦𑀁 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀦𑀺𑀘 𑀙𑀤𑁆𑀯𑀸𑀭𑀺𑀓𑀸𑀦𑀺𑀘 𑀧𑀜𑁆𑀘𑀙𑀤𑁆𑀯𑀸𑀭𑀺𑀓𑀸𑀦𑀺. 𑀓𑀤𑀸𑀘𑀺 𑀙𑀤𑁆𑀯𑀸𑀭𑀺𑀓𑀸𑀦𑀺𑀘𑁂𑀯 𑀢𑀸𑀦𑀺 𑀓𑀤𑀸𑀘𑀺 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺𑀘𑀸𑀢𑀺 𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀺. 𑀤𑁆𑀯𑀸𑀭𑀲𑀤𑁆𑀤𑁄 𑀘𑁂𑀢𑁆𑀣𑀅𑀥𑀺𑀓𑀸𑀭𑀯𑀲𑁂𑀦 𑀬𑁄𑀚𑀻𑀬𑀢𑀺.

[𑁧𑁦𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀙𑀤𑁆𑀯𑀸𑀭𑀺𑀓𑀸𑀦𑀺𑀘 𑀙𑀤𑁆𑀯𑀸𑀭𑀺𑀓𑀯𑀺𑀫𑀼𑀢𑁆𑀢𑀸𑀦𑀺𑀘𑀸’’𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀳𑁂𑀝𑁆𑀞𑀸 𑀘𑀼𑀡𑁆𑀡𑀺𑀬𑀯𑀸𑀓𑁆𑀬𑁂 𑀢𑀣𑀸 𑀅𑀲𑀼𑀢𑀢𑁆𑀢𑀸𑀢𑀺. 𑀏𑀓𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺. 𑀮. 𑀲𑀩𑁆𑀩𑀣𑀸 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀺𑀘 𑀬𑀣𑀸𑀓𑁆𑀓𑀫𑀁 𑀙𑀢𑁆𑀢𑀺𑀁𑀲𑀢𑀺.𑀮. 𑀦𑀯𑀥𑀸 𑀘𑁂𑀢𑀺 𑀧𑀜𑁆𑀘𑀥𑀸 𑀧𑀭𑀺𑀤𑀻𑀧𑀬𑁂𑀢𑀺 𑀬𑁄𑀚𑀦𑀸.

𑁧𑁩𑁪. 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁 𑀪𑁂𑀤𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀗𑁆𑀕𑀳𑁄 𑀆𑀭𑀫𑁆𑀫𑀡𑀲𑀗𑁆𑀕𑀳𑁄.

[𑁧𑁦𑁨] 𑀝𑀻𑀓𑀸𑀲𑀼 𑀧𑀦

‘‘𑀆𑀭𑀫𑁆𑀫𑀡𑀸𑀦𑀁 𑀲𑀭𑀽𑀧𑀢𑁄 𑀯𑀺𑀪𑀸𑀕𑀢𑁄 𑀢𑀁𑀯𑀺𑀲𑀬𑀘𑀺𑀢𑁆𑀢𑀢𑁄 𑀘 𑀲𑀗𑁆𑀕𑀳𑁄 𑀆𑀭𑀫𑁆𑀫𑀡𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀅𑀬𑀜𑁆𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀏𑀯 𑀲𑀗𑁆𑀕𑀳𑁄. 𑀦 𑀆𑀭𑀫𑁆𑀫𑀡𑀸𑀦𑀦𑁆𑀢𑀺. 𑀭𑀽𑀧𑀸𑀤𑀻𑀦𑀁 𑀯𑀘𑀦𑀢𑁆𑀣𑁄 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺. 𑀤𑀼𑀩𑁆𑀩𑀮𑀧𑀼𑀭𑀺𑀲𑁂𑀦 𑀤𑀡𑁆𑀟𑀸𑀤𑀺𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀻𑀬𑀢𑀺 𑀅𑀫𑀼𑀜𑁆𑀘𑀫𑀸𑀦𑁂𑀳𑀺 𑀕𑀡𑁆𑀳𑀻𑀬𑀢𑀻𑀢𑀺 𑀆𑀮𑀫𑁆𑀩𑀡𑀁. 𑀆𑀭𑀫𑁆𑀫𑀡𑀲𑀤𑁆𑀤𑁂 𑀧𑀦 𑀲𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀺 𑀆𑀕𑀦𑁆𑀢𑁆𑀯𑀸 𑀏𑀢𑁆𑀣 𑀭𑀫𑀦𑁆𑀢𑀻𑀢𑀺 𑀆𑀭𑀫𑁆𑀫𑀡𑀁.

[𑁧𑁦𑁩] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀤𑀼𑀩𑁆𑀩𑀮𑀧𑀼𑀭𑀺𑀲𑁂𑀦 𑀤𑀡𑁆𑀟𑀸𑀤𑀺𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀻𑀬𑀢𑀺. 𑀢𑀸𑀦𑀺𑀯𑀸 𑀆𑀕𑀦𑁆𑀢𑁆𑀯𑀸 𑀏𑀢𑁆𑀣 𑀭𑀫𑀦𑁆𑀢𑀻𑀢𑀺 𑀆𑀮𑀫𑁆𑀩𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀯𑀺𑀲𑀼𑀁 𑀲𑀺𑀤𑁆𑀥𑀸𑀦𑀺 𑀳𑀺 𑀏𑀢𑀸𑀦𑀺 𑀧𑀤𑀸𑀦𑀻𑀢𑀺. 𑀭𑀽𑀧𑀫𑁂𑀯𑀸𑀢𑀺 𑀯𑀡𑁆𑀡𑀸𑀬𑀢𑀦𑀫𑁂𑀯. 𑀧𑀜𑁆𑀘𑀸𑀭𑀫𑁆𑀫𑀡𑀯𑀺𑀫𑀼𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀯𑀺𑀚𑁆𑀚𑀫𑀸𑀦𑀁𑀧𑀺𑀅𑀯𑀺𑀚𑁆𑀚𑀫𑀸𑀦𑀁𑀧𑀺 𑀪𑀽𑀢𑀁𑀧𑀺 𑀅𑀪𑀽𑀢𑀁𑀧𑀺 𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯. 𑀢𑀁 𑀧𑀦 𑀲𑀪𑀸𑀕 𑀓𑁄𑀝𑁆𑀞𑀸𑀲𑀢𑁄 𑀲𑀗𑁆𑀕𑀬𑁆𑀳𑀫𑀸𑀦𑀁 𑀙𑀩𑁆𑀩𑀺𑀥𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀧𑀦.𑀮. 𑀙𑀥𑀸 𑀲𑀗𑁆𑀕𑀬𑁆𑀳𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀙𑀲𑀼. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀖𑀝𑁆𑀝𑀬𑀫𑀸𑀦 𑀭𑀽𑀧𑀸𑀦𑀼𑀲𑀸𑀭𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀺 𑀅𑀜𑁆𑀜𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀆𑀮𑀫𑁆𑀩𑀺𑀢𑀼𑀁 𑀦𑀮𑀪𑀦𑁆𑀢𑀺. 𑀭𑀽𑀧𑀸𑀦𑀺𑀧𑀺 𑀖𑀝𑁆𑀝𑀦𑀭𑀳𑀺𑀢𑀸𑀦𑀺 𑀅𑀢𑀻𑀢𑀸𑀦𑀸𑀕𑀢𑀸𑀦𑀺 𑀆𑀮𑀫𑁆𑀩𑀺𑀢𑀼𑀁 𑀦𑀮𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁𑀧𑀺 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁. 𑀢𑀜𑁆𑀳 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺. 𑀲𑁄𑀢𑀤𑁆𑀯𑀸𑀭𑀺𑀓𑀸 𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄. 𑀢𑀢𑁆𑀣 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀯𑀢𑁆𑀢𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀙𑀩𑁆𑀩𑀺𑀥𑀁𑀧𑀻𑀢𑀺 𑀭𑀽𑀧𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀁𑀧𑀺. 𑀅𑀢𑀺𑀓𑁆𑀓𑀦𑁆𑀢𑀪𑀸𑀯𑀁 𑀇𑀢𑀁 𑀕𑀢𑀁 𑀧𑀯𑀢𑁆𑀢𑀦𑁆𑀢𑀺 𑀅𑀢𑀻𑀢𑀁. 𑀆𑀕𑀘𑁆𑀙𑀢𑀺 𑀆𑀕𑀘𑁆𑀙𑀺𑀢𑁆𑀣𑀸𑀢𑀺 𑀆𑀕𑀢𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀅𑀢𑀻𑀢𑀜𑁆𑀘. 𑀦 𑀆𑀕𑀢𑀦𑁆𑀢𑀺 𑀅𑀦𑀸𑀕𑀢𑀁. 𑀉𑀧𑁆𑀧𑀸𑀤𑀚𑀸𑀢𑀺𑀓𑀸 𑀲𑀗𑁆𑀔𑀢𑀥𑀫𑁆𑀫𑀸𑀏𑀯 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀦𑀼𑀧𑀢𑀦𑁆𑀢𑀺. 𑀢𑀲𑁆𑀫𑀸 𑀉𑀧𑁆𑀧𑀸𑀤𑀭𑀳𑀺𑀢𑀸 𑀅𑀲𑀗𑁆𑀔𑀢𑀪𑀽𑀢𑀸 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀬𑁄 𑀓𑀸𑀮𑀯𑀺𑀫𑀼𑀢𑁆𑀢𑀁𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

[𑁧𑁦𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀺𑀦𑀸𑀲𑀸𑀪𑀸𑀯𑀢𑁄 𑀅𑀢𑀻𑀢𑀸𑀤𑀺𑀓𑀸𑀮𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀢𑁆𑀢𑀺𑀘 𑀓𑀸𑀮𑀯𑀺𑀫𑀼𑀢𑁆𑀢𑀁𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀲𑀩𑁆𑀩𑁂𑀧𑀺 𑀳𑀺 𑀲𑀗𑁆𑀔𑀢𑀥𑀫𑁆𑀫𑀸 𑀅𑀦𑀸𑀕𑀢𑀪𑀸𑀯 𑀧𑀼𑀩𑁆𑀩𑀓𑀸𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀬𑀤𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩𑀧𑀓𑁆𑀔𑁂 𑀢𑀺𑀝𑁆𑀞𑀦𑁆𑀢𑀺, 𑀢𑀤𑀸 𑀅𑀦𑀸𑀕𑀢𑀸𑀦𑀸𑀫. 𑀬𑀤𑀸 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸, 𑀬𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀫. 𑀬𑀤𑀸 𑀦𑀺𑀭𑀼𑀤𑁆𑀥𑀸, 𑀢𑀤𑀸 𑀅𑀢𑀻𑀢𑀸𑀦𑀸𑀫. 𑀏𑀯𑀁 𑀉𑀧𑁆𑀧𑀸𑀤𑀚𑀸𑀢𑀺𑀓𑀸𑀦𑀜𑁆𑀜𑁂𑀯 𑀉𑀧𑁆𑀧𑀸𑀤𑀫𑀽𑀮𑀺𑀓𑀸 𑀢𑁂𑀓𑀸𑀮𑀺𑀓𑀢𑀸 𑀲𑀺𑀤𑁆𑀥𑀸. 𑀉𑀧𑁆𑀧𑀸𑀤𑀭𑀳𑀺𑀢𑀸𑀦𑀁 𑀧𑀦 𑀅𑀦𑀸𑀕𑀢𑀸𑀯𑀢𑁆𑀣𑀸𑀧𑀺 𑀦𑀢𑁆𑀣𑀺. 𑀓𑀼𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸 𑀯𑀢𑁆𑀣𑀸𑀢𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀻𑀦𑀁 𑀓𑀸𑀮𑀢𑁆𑀢𑀬 𑀯𑀺𑀫𑀼𑀢𑁆𑀢𑀢𑀸 𑀳𑁄𑀢𑀻𑀢𑀺. 𑀯𑀺𑀦𑀸𑀲𑀸𑀪𑀸𑀯𑀢𑁄𑀢𑀺 𑀇𑀤𑀁 𑀧𑀦 𑀅𑀢𑀻𑀢𑀓𑀸𑀮𑀯𑀺𑀫𑀼𑀢𑁆𑀢𑀺𑀬𑀸𑀏𑀯 𑀓𑀸𑀭𑀡𑀦𑁆𑀢𑀺 𑀦 𑀢𑁂𑀦 𑀢𑀸𑀲𑀁 𑀇𑀢𑀭𑀓𑀸𑀮𑀯𑀺𑀫𑀼𑀢𑁆𑀢𑀺𑀁 𑀲𑀸𑀥𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀭𑀳𑀯𑀺𑀪𑀸𑀕𑁄 𑀧𑀦 𑀇𑀥𑁂𑀯 𑀢𑁂𑀲𑀽𑀢𑀺𑀆𑀤𑀺𑀦𑀸 𑀧𑀘𑁆𑀙𑀸 𑀆𑀕𑀫𑀺𑀲𑁆𑀲𑀢𑀺. 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀸𑀦𑀜𑁆𑀘 𑀙𑀩𑁆𑀩𑀺𑀥𑀁𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀧𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀪𑀯𑀦𑁆𑀢𑀭𑁂𑀧𑀺 𑀇𑀫𑀲𑁆𑀫𑀺𑀁 𑀪𑀯𑁂𑀧𑀺 𑀧𑀼𑀭𑀺𑀫𑀪𑀸𑀕𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀕𑀳𑀺𑀢𑀁𑀧𑀺 𑀅𑀕𑀳𑀺𑀢𑀁𑀧𑀺 𑀳𑁄𑀢𑀺. 𑀦 𑀢𑀣𑀸 𑀇𑀫𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀪𑀯𑀦𑁆𑀢𑀭𑁂 𑀙𑀤𑁆𑀯𑀸𑀭𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀯𑀺𑀲𑁂𑀲𑀜𑁆𑀳𑀺 𑀧𑀢𑁆𑀣𑁂𑀢𑁆𑀯𑀸 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀪𑀯𑀦𑁆𑀢𑀭𑁂𑀧𑀺 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀕𑀳𑀺𑀢𑀁𑀧𑀺 𑀳𑁄𑀢𑀺 𑀬𑁂𑀯𑀸𑀢𑀺.

[𑁧𑁦𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀢𑀁 𑀧𑀦 𑀦𑁂𑀲𑀁 𑀆𑀭𑀫𑁆𑀫𑀡𑀁 𑀦 𑀆𑀯𑀚𑁆𑀚𑀦𑀲𑁆𑀲 𑀯𑀺𑀬 𑀓𑁂𑀦𑀘𑀺 𑀅𑀕𑀳𑀺𑀢𑀫𑁂𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀙𑀤𑁆𑀯𑀸𑀭 𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀧𑀜𑁆𑀘𑀤𑁆𑀯𑀸𑀭𑀸 𑀯𑀚𑁆𑀚𑀦𑀲𑁆𑀲𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀤𑁆𑀯𑀸𑀭𑀦𑁆𑀢𑀭𑁂𑀦 𑀕𑀳𑀺𑀢𑀁𑀧𑀺 𑀅𑀕𑀳𑀺𑀢𑀁𑀧𑀺 𑀳𑁄𑀢𑀺𑀬𑁂𑀯. 𑀢𑀣𑀸 𑀳𑀺 𑀇𑀤𑀁 𑀦𑀸𑀫 𑀮𑀪𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀺 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀧𑀼𑀩𑁆𑀩𑁂 𑀕𑀳𑀺𑀢𑀁 𑀧𑀘𑁆𑀙𑀸 𑀆𑀯𑀚𑁆𑀚𑀦𑀲𑁆𑀲 𑀆𑀭𑀫𑁆𑀫𑀡𑀁 𑀦 𑀦 𑀳𑁄𑀢𑀻𑀢𑀺. 𑀦𑀘 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀘𑀺𑀢𑁆𑀢𑁂𑀦 𑀅𑀕𑀳𑀺𑀢𑀪𑀸𑀯𑁄 𑀇𑀥 𑀧𑀫𑀸𑀡𑀦𑁆𑀢𑀺. 𑀬𑀣𑀸 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀏𑀓𑀦𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀬𑀣𑀸 𑀘 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀢𑁂𑀓𑀸𑀮𑀺𑀓𑀁𑀯𑀸 𑀓𑀸𑀮𑀯𑀺𑀫𑀼𑀢𑁆𑀢𑀲𑀸 𑀫𑀜𑁆𑀜𑀁𑀯𑀸 𑀳𑁄𑀢𑀺. 𑀦 𑀢𑀣𑀸 𑀇𑀫𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀧𑀜𑁆𑀜𑀢𑁆𑀢𑀺𑀪𑀽𑀢𑀁𑀯𑀸𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑀁 𑀆𑀕𑀫𑀲𑀺𑀤𑁆𑀥𑀯𑁄𑀳𑀸𑀭𑀬𑀼𑀢𑁆𑀢𑀁𑀧𑀺 𑀢𑀩𑁆𑀩𑁄𑀳𑀸𑀭𑀯𑀺𑀦𑀺𑀫𑀼𑀢𑁆𑀢𑀁𑀧𑀺 𑀳𑁄𑀢𑀺. 𑀦 𑀢𑀣𑀸 𑀇𑀫𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀓𑀫𑁆𑀫 𑀓𑀫𑁆𑀫 𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢 𑀲𑀫𑁆𑀫𑀢𑀦𑁆𑀢𑀺 𑀯𑀼𑀢𑁆𑀢𑀁.

[𑁧𑁦𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀦𑀸𑀧𑀺 𑀦𑁂𑀲𑀁 𑀆𑀭𑀫𑁆𑀫𑀡𑀁 𑀫𑀭𑀡𑀸𑀲𑀦𑁆𑀦𑀢𑁄 𑀧𑀼𑀭𑀺𑀫𑀪𑀸𑀕𑀚𑀯𑀦𑀸𑀦𑀁 𑀯𑀺𑀬 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀆𑀕𑀫𑀲𑀺𑀤𑁆𑀥𑀯𑁄𑀳𑀸𑀭𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀓𑀫𑁆𑀫.𑀮. 𑀲𑀫𑁆𑀫𑀢𑀦𑁆𑀢𑀺 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀫𑀭𑀡𑀸 𑀲𑀦𑁆𑀦𑀢𑁄 𑀧𑀼𑀭𑀺𑀫𑀪𑀸𑀕𑁂𑀧𑀺 𑀳𑀺 𑀲𑀢𑁆𑀢𑀸 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁𑀯𑀸 𑀘𑁂𑀢𑀺𑀬𑀸𑀤𑀻𑀦𑀺 𑀓𑀫𑁆𑀫, 𑀧𑀓𑀭𑀡𑀸𑀦𑀺𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀢𑀤𑀸𑀧𑀺 𑀳𑀺 𑀓𑀫𑁆𑀫𑀁 𑀓𑀫𑁆𑀫𑀫𑁂𑀯, 𑀓𑀫𑁆𑀫𑀼𑀧𑀓𑀭𑀡𑀸𑀦𑀺𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀺𑀬𑁂𑀯. 𑀓𑀫𑁆𑀫 𑀲𑀺𑀤𑁆𑀥𑀺𑀬𑀸𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀢𑁆𑀯𑀸. 𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸 𑀯𑀺𑀬𑀘 𑀲𑀼𑀧𑀺𑀦𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺𑀧𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀭𑀸𑀚𑀸 𑀳𑀺 𑀤𑁆𑀯𑀻𑀲𑀼 𑀪𑀯𑁂𑀲𑀼 𑀧𑀺𑀢𑀭𑀁 𑀫𑀸𑀭𑁂𑀢𑀺. 𑀫𑀸𑀭𑀺𑀢𑀓𑀸𑀮𑀢𑁄𑀘 𑀧𑀝𑁆𑀞𑀸𑀬 𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀻𑀢𑀺. 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀢𑀁 𑀢𑀁 𑀧𑀝𑀺𑀲𑀦𑁆𑀥𑀸𑀤𑀻𑀦𑀁 𑀙𑀤𑁆𑀯𑀸𑀭𑀕𑀳𑀺𑀢𑀸𑀤𑀺𑀯𑀲𑁂𑀦 𑀲𑀫𑁆𑀪𑀯𑀦𑁆𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀭𑀽𑀧𑀢𑁄. 𑀬𑀣𑀸𑀲𑀫𑁆𑀪𑀯𑀯𑀺𑀪𑀸𑀕𑁄 𑀧𑀦 𑀉𑀧𑀭𑀺 𑀫𑀭𑀡𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀫𑀺𑀲𑁆𑀲𑀢𑀺. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀩𑀸𑀳𑀼𑀮𑁆𑀮𑁂𑀦. 𑀪𑀯𑀦𑁆𑀢𑀭𑁂𑀢𑀺 𑀅𑀢𑀻𑀢𑀸𑀦𑀦𑁆𑀢𑀭𑀪𑀯𑁂 𑀢𑀢𑁆𑀣𑀘 𑀫𑀭𑀡𑀸𑀲𑀦𑁆𑀦𑀓𑀸𑀮𑁂. 𑀙𑀤𑁆𑀯𑀸𑀭 𑀕𑀳𑀺𑀢𑀦𑁆𑀢𑀺 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀫𑀭𑀡𑀸𑀲𑀦𑁆𑀦𑀚𑀯𑀦𑁂𑀳𑀺 𑀕𑀳𑀺𑀢𑀁. 𑀏𑀢𑁆𑀣 𑀘 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀏𑀢𑁂𑀦 𑀪𑀯𑀦𑁆𑀢𑀭𑁂 𑀙𑀤𑁆𑀯𑀸𑀭𑀕𑀳𑀺𑀢𑀦𑁆𑀢𑀺 𑀇𑀫𑀲𑁆𑀲 𑀯𑀺𑀥𑀸𑀦𑀲𑁆𑀲 𑀅𑀦𑁂𑀓𑀁𑀲𑀪𑀸𑀯𑀁 𑀯𑀺𑀲𑁂𑀲𑁂𑀢𑀺. 𑀓𑀲𑁆𑀫𑀸. 𑀅𑀕𑀳𑀺𑀢𑀲𑁆𑀲𑀧𑀺 𑀲𑀫𑁆𑀪𑀯𑀢𑁄. 𑀬𑀜𑁆𑀳𑀺 𑀅𑀲𑀜𑁆𑀜𑀺𑀪𑀯𑀢𑁄 𑀘𑀼𑀢𑀸𑀦𑀁 𑀓𑀫𑁆𑀫 𑀓𑀫𑁆𑀫𑀦𑀺𑀫𑀺𑀢𑁆𑀢 𑀕𑀢𑀺𑀦𑀺𑀫𑀺𑀢𑁆𑀢 𑀲𑀫𑁆𑀫𑀢𑀁 𑀅𑀭𑀽𑀧𑀪𑀯𑀢𑁄 𑀘𑀼𑀢𑀸𑀦𑀜𑁆𑀘 𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀁 𑀓𑀸𑀫𑀧𑀝𑀺𑀲𑀦𑁆𑀥𑀺 𑀪𑀯𑀗𑁆𑀕𑀘𑀼𑀢𑀻𑀦𑀁 𑀆𑀭𑀫𑁆𑀫𑀡𑀁. 𑀢𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑀳𑀺𑀢 𑀫𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀣𑀘 𑀬𑀲𑁆𑀫𑀸 𑀧𑀝𑁆𑀞𑀸𑀦𑁂 𑀅𑀭𑀽𑀧𑀪𑀯𑁂 𑀤𑀼𑀯𑀺𑀥𑁄𑀧𑀺 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀧𑀝𑀺𑀲𑀺𑀤𑁆𑀥𑁄. 𑀅𑀝𑁆𑀞𑀓𑀣𑀸𑀲𑀼𑀘 𑀢𑀢𑁄 𑀘𑀼𑀢𑀸𑀦𑀁 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀧𑀺 𑀯𑀼𑀢𑁆𑀢𑀸. 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀫𑁂𑀯 𑀤𑀻𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸𑀧𑀺 𑀕𑀢𑀺𑀦𑀺𑀫𑀺𑀢𑁆𑀢𑀲𑀫𑁆𑀫𑀢𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘, 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀓𑀫𑁆𑀫𑀩𑀮𑁂𑀦 𑀓𑀫𑁆𑀫𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀁𑀦𑀸𑀫 𑀬𑁂𑀪𑀼𑀬𑁆𑀬𑁂𑀦 𑀲𑀁𑀫𑀼𑀴𑁆𑀳𑀫𑀭𑀡𑁂𑀦 𑀫𑀭𑀦𑁆𑀢𑀸𑀦𑀫𑁂𑀯 𑀳𑁄𑀢𑀺. 𑀇𑀢𑀭𑁂𑀲𑀁 𑀧𑀦 𑀧𑀭𑁂𑀲𑀁 𑀧𑀬𑁄𑀕𑀩𑀮𑁂𑀦𑀧𑀺 𑀅𑀢𑁆𑀢𑀦𑀸 𑀧𑀓𑀢𑀺𑀬𑀸 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑀸𑀦𑀁 𑀅𑀦𑀼𑀲𑁆𑀲𑀭𑀡𑀩𑀮𑁂𑀦𑀧𑀺 𑀥𑀫𑁆𑀫𑀺𑀓𑀉𑀧𑀸𑀲𑀓𑀸𑀤𑀻𑀦𑀁 𑀯𑀺𑀬 𑀤𑁂𑀯𑀮𑁄𑀓𑀢𑁄 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀸𑀦𑀁 𑀤𑁂𑀯𑀸𑀦𑀁 𑀆𑀦𑀼𑀪𑀸𑀯𑁂𑀦𑀧𑀺 𑀳𑁄𑀢𑀺𑀬𑁂𑀯. 𑀦𑀺𑀭𑀬𑀧𑀸𑀮𑀸𑀧𑀺 𑀦𑀺𑀭𑀬𑀢𑁄 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺𑀬𑁂𑀯. 𑀭𑁂𑀯𑀢𑀺𑀯𑀺𑀫𑀸𑀦𑀜𑁆𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀢𑀜𑁆𑀳𑀺 𑀤𑁆𑀯𑁂 𑀦𑀺𑀭𑀬𑀧𑀸𑀮𑀸 𑀕𑀳𑁂𑀢𑁆𑀯𑀸 𑀧𑀣𑀫𑀁 𑀢𑀸𑀯𑀢𑀺𑀁𑀲𑀸𑀪𑀯𑀦𑀁 𑀦𑁂𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑀬𑀁 𑀦𑀬𑀺𑀁𑀲𑀼. 𑀢𑁂 𑀳𑀺 𑀬𑀓𑁆𑀔 𑀚𑀸𑀢𑀺𑀓𑀢𑁆𑀢𑀸 𑀯𑁂𑀲𑁆𑀲𑀯𑀡𑀧𑀭𑀺𑀲𑀸𑀯𑀺𑀬 𑀢𑀸𑀯𑀢𑀺𑀁𑀲𑀸 𑀪𑀯𑀦𑀁𑀧𑀺 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺𑀬𑁂𑀯. 𑀬𑀫𑀲𑁆𑀲 𑀤𑀽𑀢𑀸 𑀤𑁆𑀯𑁂 𑀬𑀓𑁆𑀔𑀸𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀯𑁂𑀲𑁆𑀲𑀯𑀡𑀤𑀽𑀢𑀸 𑀇𑀥 𑀬𑀫𑀲𑁆𑀲 𑀤𑀽𑀢𑀸𑀢𑀺 𑀯𑀼𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀬𑁂 𑀓𑀲𑀺𑀡𑀸𑀲𑀼𑀪𑀸𑀤𑀻𑀦𑀺 𑀲𑀫𑀣𑀦𑀺𑀫𑀺𑀢𑁆𑀢𑀸𑀦𑀺 𑀲𑀼𑀝𑁆𑀞𑀼 𑀆𑀲𑁂𑀯𑀺𑀢𑁆𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑁂 𑀞𑀢𑁆𑀯𑀸 𑀢𑀸𑀦𑁂𑀯 𑀦𑀺𑀫𑀺𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀫𑀭𑀦𑁆𑀢𑀺. 𑀢𑁂𑀲𑀁𑀧𑀺 𑀓𑀸𑀫𑀧𑀝𑀺𑀲𑀦𑁆𑀥𑀺𑀬𑀸 𑀆𑀭𑀫𑁆𑀫𑀡𑀁 𑀪𑀯𑀦𑁆𑀢𑀭𑁂 𑀓𑁂𑀦𑀘𑀺 𑀤𑁆𑀯𑀸𑀭𑁂𑀦 𑀅𑀕𑀳𑀺𑀢𑀫𑁂𑀯 𑀲𑀺𑀬𑀸. 𑀉𑀧𑀘𑀸𑀭𑀚𑁆𑀛𑀸𑀦𑀩𑀮𑁂𑀦𑁂𑀯 𑀩𑁆𑀭𑀳𑁆𑀫𑀮𑁄𑀓𑀢𑁄 𑀇𑀥𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁𑀧𑀺 𑀏𑀲𑁂𑀯𑀦𑀬𑁄𑀢𑀺.

𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀓𑁂𑀯𑀮𑀁 𑀓𑀫𑁆𑀫𑀩𑀮𑁂𑀦𑁂𑀯 𑀢𑁂𑀲𑀁 𑀅𑀲𑀜𑁆𑀜𑀺𑀪𑀯𑀢𑁄 𑀘𑀼𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀓𑀁 𑀆𑀭𑀫𑁆𑀫𑀡𑀁 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀓𑀫𑁆𑀫𑀁𑀧𑀺 𑀕𑀳𑁂𑀢𑀩𑁆𑀩 𑀫𑁂𑀯. 𑀦 𑀳𑀺 𑀢𑀲𑁆𑀲 𑀅𑀕𑀳𑀡𑁂 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺. 𑀢𑀸𑀦𑀺 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀓𑁂𑀯𑀮𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑁆𑀲 𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀬𑀁 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀸𑀕𑀢𑀁 𑀧𑀦 𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀳𑀫𑀸𑀦𑀁 𑀕𑀢𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑀺𑀬𑀸. 𑀦𑀘 𑀢𑀲𑁆𑀲 𑀯𑀺𑀲𑀼𑀁 𑀉𑀧𑀝𑁆𑀞𑀸𑀢𑀩𑁆𑀩𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦 𑀕𑀢𑀺𑀦𑀺𑀫𑀺𑀢𑁆𑀢𑁂 𑀲𑀺𑀤𑁆𑀥𑁂 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀧𑀜𑁆𑀜𑀢𑁆𑀢𑀺 𑀪𑀽𑀢𑀁𑀯𑀸𑀢𑀺.

[𑁧𑁦𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀅𑀦𑀸𑀕𑀢𑀁𑀦𑀸𑀫 𑀅𑀢𑀻𑀢𑀁 𑀯𑀺𑀬 𑀅𑀦𑀼𑀪𑀽𑀢𑀜𑁆𑀘 𑀦 𑀳𑁄𑀢𑀺. 𑀦𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀺𑀬 𑀆𑀧𑀸𑀢𑀫𑀸𑀕𑀢’’𑀦𑁆𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀁 𑀅𑀓𑀸𑀭𑀡𑀁.

𑀧𑀲𑀗𑁆𑀕𑀲𑁆𑀲 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸. 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀳𑀺 𑀦𑀸𑀫 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀧𑀺 𑀅𑀦𑀼𑀪𑀽𑀢𑀁 𑀦 𑀳𑁄𑀢𑀺. 𑀢𑀁𑀧𑀺 𑀓𑀫𑁆𑀫𑀩𑀮𑁂𑀦𑁂𑀯 𑀆𑀧𑀸𑀢𑀫𑀸𑀕𑀢𑀁. 𑀏𑀯𑀁𑀲𑀦𑁆𑀢𑁂 𑀅𑀦𑀸𑀕𑀢𑀁𑀧𑀺 𑀓𑀫𑁆𑀫𑀩𑀮𑁂𑀦 𑀆𑀧𑀸𑀢𑀫𑀸𑀕𑀢𑀫𑁂𑀯 𑀲𑀺𑀬𑀸𑀢𑀺 𑀅𑀬𑀁 𑀧𑀲𑀗𑁆𑀕𑁄 𑀧𑀸𑀓𑀢𑀺𑀓𑁄𑀏𑀯 𑀳𑁄𑀢𑀻𑀢𑀺. 𑀢𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀆𑀭𑀫𑁆𑀫𑀡𑀺𑀓𑀘𑀺𑀢𑁆𑀢𑁂𑀲𑀼. 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀏𑀓𑁂𑀓𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀲𑁄. 𑀭𑀽𑀧𑀸𑀤𑀻𑀦𑀺 𑀧𑀜𑁆𑀘 𑀆𑀭𑀫𑁆𑀫𑀡𑀸𑀦𑀺 𑀏𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀲𑁂𑀲𑀸𑀦𑀻𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦 𑀤𑁆𑀯𑀬𑀢𑁄 𑀲𑁂𑀲𑀸𑀦𑀺 𑀲𑀦𑁆𑀢𑀻𑀭𑀡 𑀫𑀳𑀸𑀯𑀺𑀧𑀸𑀓𑀸𑀦𑀺. 𑀲𑀩𑁆𑀩𑀣𑀸𑀧𑀺 𑀓𑀸𑀫𑀸𑀯𑀘𑀭𑀸 𑀮𑀫𑁆𑀩𑀡𑀸𑀦𑁂𑀯𑀸𑀢𑀺 𑀧𑀝𑀺𑀲𑀦𑁆𑀥𑀸𑀤𑀻𑀳𑀺 𑀦𑀸𑀦𑀸𑀓𑀺𑀘𑁆𑀘𑁂𑀳𑀺 𑀭𑀽𑀧𑀸𑀤𑀻𑀲𑀼 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑁂𑀦 𑀲𑀩𑁆𑀩 𑀧𑀓𑀸𑀭𑁂𑀦𑀧𑀺 𑀓𑀸𑀫𑀸𑀯𑀘𑀭𑀸𑀮𑀫𑁆𑀩𑀡𑀺𑀓𑀸𑀦𑀺𑀬𑁂𑀯. 𑀢𑀸𑀦𑀺 𑀳𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀯𑀺𑀓𑀧𑁆𑀧𑀲𑀢𑁆𑀢𑀺𑀭𑀳𑀺𑀢𑀢𑁆𑀢𑀸 𑀅𑀯𑀺𑀚𑁆𑀚𑀫𑀸𑀦𑁂 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀘 𑀲𑀼𑀔𑀼𑀫𑁂 𑀫𑀳𑀕𑁆𑀕𑀢𑀥𑀫𑁆𑀫𑁂𑀘 𑀕𑀫𑁆𑀪𑀻𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀘 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀢𑀢𑁆𑀣 𑀲𑀦𑁆𑀢𑀻𑀭𑀡𑀢𑁆𑀢𑀬𑀁 𑀢𑀸𑀯 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀯𑀲𑁂𑀦 𑀭𑀽𑀧𑀸𑀤𑀺𑀧𑀜𑁆𑀘𑀸𑀮𑀫𑁆𑀩𑀡𑁂 𑀧𑀯𑀢𑁆𑀢𑀢𑀺. 𑀢𑀤𑀸𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀏𑀓𑀸𑀤𑀲𑀯𑀺𑀧𑀸𑀓𑀸𑀦𑀺 𑀙𑀲𑀼 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀦𑁆𑀢𑀻𑀢𑀺.

[𑁧𑁦𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀺𑀧𑀸𑀓𑀸𑀦𑀺 𑀢𑀸𑀯 𑀲𑀦𑁆𑀢𑀻𑀭𑀡𑀸𑀤𑀺𑀯𑀲𑁂𑀦 𑀭𑀽𑀧𑀸𑀤𑀺𑀧𑀜𑁆𑀘𑀸𑀮𑀫𑁆𑀩𑀡𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑁆𑀢𑀻𑀭𑀡𑀸𑀤𑀺𑀯𑀲𑁂𑀦𑀸𑀢𑀺 𑀦𑀯𑀢𑁆𑀢𑀩𑁆𑀩𑀁. 𑀲𑀦𑁆𑀢𑀻𑀭𑀡𑀯𑀲𑁂𑀦 𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀬𑁄 𑀧𑀦𑁂𑀢𑁆𑀣 𑀘𑀺𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑁄 𑀯𑀢𑁆𑀢𑀩𑁆𑀩𑁄. 𑀲𑁄 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀕𑀳𑁂𑀢𑀩𑁆𑀩𑁄. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀅𑀢𑀺𑀕𑀫𑁆𑀪𑀻𑀭𑀢𑁆𑀢𑀸 𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑀪𑀽𑀢𑀸𑀢𑀺 𑀯𑀼𑀢𑁆𑀢𑀁. 𑀅𑀓𑀼𑀲𑀮.𑀮. 𑀮𑁄𑀓𑀼𑀢𑁆𑀢𑀭 𑀯𑀚𑁆𑀚𑀺𑀢 𑀲𑀩𑁆𑀩𑀸 𑀭𑀫𑁆𑀫𑀡𑀸𑀦𑀻𑀢𑀺. 𑀢𑀢𑁆𑀣 𑀢𑀸𑀦𑀺 𑀮𑀤𑁆𑀥𑀲𑀫𑀸𑀧𑀢𑁆𑀢𑀻𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁂𑀏𑀯 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀦𑀺. 𑀢𑁂𑀲𑀼𑀘 𑀤𑁆𑀯𑁂 𑀤𑁄𑀲𑀫𑀽𑀮𑀘𑀺𑀢𑁆𑀢𑀸𑀦𑀺 𑀧𑀭𑀺𑀳𑀻𑀦𑀚𑁆𑀛𑀸𑀦𑀸𑀦𑀺 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀓𑀸𑀮𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀜𑀸𑀡𑀁𑀧𑀺 𑀅𑀦𑀥𑀺𑀕𑀢𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀼𑀢𑁆𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢.𑀮. 𑀯𑀚𑁆𑀚𑀺𑀢𑀲𑀩𑁆𑀩𑀸 𑀭𑀫𑁆𑀫𑀡𑀸𑀦𑀻𑀢𑀺. 𑀢𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀓𑀼𑀲𑀮𑀸𑀦𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀅𑀚𑁆𑀛𑀸𑀦𑀮𑀸𑀪𑀻𑀦𑀁 𑀉𑀧𑁆𑀧𑀦𑁆𑀦𑀓𑀸𑀮𑁂 𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀓𑀸𑀫𑀸𑀯𑀘𑀭𑀸𑀭𑀫𑁆𑀫𑀡𑀸𑀦𑀺. 𑀢𑀸𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁄 𑀧𑀼𑀭𑁂 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀺. 𑀛𑀸𑀦𑀮𑀸𑀪𑀻𑀦𑀁 𑀢𑀸𑀦𑁂𑀯 𑀅𑀪𑀺𑀜𑁆𑀜𑀸𑀓𑀼𑀲𑀮𑀜𑁆𑀘 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸𑀦𑀺𑀧𑀺. 𑀳𑁂𑀝𑁆𑀞𑀺𑀫𑀨𑀮𑀝𑁆𑀞𑀸𑀦𑀁 𑀅𑀢𑁆𑀢𑀦𑀸 𑀅𑀥𑀺𑀕𑀢 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸 𑀭𑀫𑁆𑀫𑀡𑀸𑀦𑀺𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀘𑁂𑀢𑁆𑀣 𑀅𑀭𑀺𑀬𑀸 𑀅𑀢𑁆𑀢𑀦𑀸 𑀅𑀥𑀺𑀕𑀢 𑀫𑀕𑁆𑀕𑀨𑀮𑀸𑀦𑀺𑀬𑁂𑀯 𑀆𑀮𑀫𑁆𑀩𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀣𑀸 𑀛𑀸𑀦𑀮𑀸𑀪𑀺𑀦𑁄𑀧𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀚𑁆𑀛𑀸𑀦𑀸𑀦𑀺𑀏𑀯 𑀆𑀮𑀫𑁆𑀩𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀲𑀺𑀬𑀸-𑀬𑁂 𑀘 𑀛𑀸𑀦𑀸𑀦𑀺 𑀧𑀢𑁆𑀣𑁂𑀦𑁆𑀢𑀺. 𑀛𑀸𑀦𑀧𑀭𑀺𑀓𑀫𑁆𑀫𑀁𑀧𑀺 𑀓𑀭𑁄𑀦𑁆𑀢𑀺. 𑀬𑁂𑀘 𑀛𑀸𑀦𑀲𑀼𑀢𑁆𑀢𑀸𑀦𑀺 𑀲𑀁𑀯𑀡𑁆𑀡𑁂𑀦𑁆𑀢𑀺. 𑀢𑁂 𑀅𑀮𑀸𑀪𑀺𑀦𑁄 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺 𑀆𑀮𑀫𑁆𑀩𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦𑀲𑀓𑁆𑀓𑁄𑀦𑁆𑀢𑀻𑀢𑀺. 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂 𑀳𑀺 𑀛𑀸𑀦𑀸𑀦𑀺𑀦𑀸𑀫 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀦𑀺 𑀏𑀯𑀁 𑀫𑀳𑀸𑀦𑀺𑀲𑀁𑀲𑀸𑀦𑀻𑀢𑀺 𑀲𑀼𑀢𑁆𑀯𑀸𑀯𑀸 𑀲𑀼𑀢𑀧𑀭𑀺𑀬𑀢𑁆𑀢𑀺𑀩𑀮𑁂𑀦 𑀲𑀺𑀤𑁆𑀥𑁂 𑀆𑀓𑀸𑀭 𑀲𑀮𑁆𑀮𑀓𑁆𑀔𑀡𑀜𑁆𑀜𑀸𑀡𑁂 𑀞𑀢𑁆𑀯𑀸 𑀯𑀸 𑀅𑀦𑀼𑀫𑀸𑀦𑀯𑀲𑁂𑀦𑁂𑀯 𑀢𑀸𑀦𑀺 𑀧𑀢𑁆𑀣𑁂𑀦𑁆𑀢𑀺. 𑀧𑀭𑀺𑀓𑀫𑁆𑀫𑀁𑀧𑀺 𑀓𑀭𑁄𑀦𑁆𑀢𑀺. 𑀲𑀼𑀢𑁆𑀢𑀸𑀦𑀺𑀧𑀺 𑀲𑀁𑀯𑀡𑁆𑀡𑁂𑀦𑁆𑀢𑀻𑀢𑀺. 𑀇𑀢𑀭𑀣𑀸 𑀧𑀼𑀣𑀼𑀚𑁆𑀚𑀦𑀸𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀢𑁆𑀣𑁂𑀦𑁆𑀢𑀺, 𑀫𑀕𑁆𑀕𑀧𑀭𑀺𑀓𑀫𑁆𑀫𑀁𑀧𑀺 𑀓𑀭𑁄𑀦𑁆𑀢𑀺. 𑀫𑀕𑁆𑀕𑀨𑀮 𑀦𑀺𑀩𑁆𑀩𑀸𑀦𑀯𑀘𑀦𑀸𑀦𑀺𑀯𑀺𑀓𑀣𑁂𑀦𑁆𑀢𑀺 𑀲𑀁𑀯𑀡𑁆𑀡𑁂𑀦𑁆𑀢𑀻𑀢𑀺 𑀢𑁂𑀲𑀁𑀧𑀺 𑀢𑁂 𑀆𑀭𑀫𑁆𑀫𑀡𑀪𑀽𑀢𑀸 𑀏𑀯 𑀲𑀺𑀬𑀼𑀦𑁆𑀢𑀺. 𑀢𑁂𑀲𑀁 𑀧𑀦 𑀘𑀺𑀢𑁆𑀢𑀸𑀦𑀺 𑀛𑀸𑀦𑀸𑀤𑀻𑀦𑀁 𑀧𑀜𑁆𑀜𑀢𑁆𑀢𑀺𑀕𑀼𑀡𑁂 𑀏𑀯 𑀅𑀦𑀼𑀪𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀡𑀻𑀢𑀥𑀫𑁆𑀫𑀸𑀦𑀜𑁆𑀳𑀺 𑀧𑀜𑁆𑀜𑀢𑁆𑀢𑀺𑀬𑁄𑀧𑀺 𑀧𑀡𑀺𑀢𑀭𑀽𑀧𑀸𑀏𑀯 𑀳𑁄𑀦𑁆𑀢𑀻𑀢𑀺. 𑀫𑀳𑀺𑀤𑁆𑀥𑀺𑀓𑁄 𑀳𑀺 𑀧𑀭𑀘𑀺𑀢𑁆𑀢𑀯𑀺𑀤𑀽. 𑀫𑀸𑀭𑁄 𑀤𑁂𑀯 𑀧𑀼𑀢𑁆𑀢𑁄𑀧𑀺 𑀭𑀽𑀧𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀫𑁂𑀯 𑀧𑀲𑁆𑀲𑀢𑀺. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀦 𑀧𑀲𑁆𑀲𑀢𑀺. 𑀅𑀭𑀽𑀧𑀚𑁆𑀛𑀸𑀦𑀘𑀺𑀢𑁆𑀢𑀁 𑀧𑀦 𑀯𑀝𑁆𑀝𑀦𑀺𑀲𑁆𑀲𑀺𑀢𑀁𑀧𑀺 𑀦𑀧𑀲𑁆𑀲𑀢𑀻𑀢𑀺 𑀅𑀗𑁆𑀕𑀼𑀢𑁆𑀢𑀭𑁂 𑀦𑀯𑀦𑀺𑀧𑀸𑀢𑁂 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀬𑁂 𑀧𑀦 𑀅𑀕𑁆𑀕𑀫𑀕𑁆𑀕𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑁂𑀲𑀁 𑀉𑀧𑁆𑀧𑀦𑁆𑀦𑀸𑀦𑀺𑀜𑁆𑀜𑀡𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀓𑁆𑀭𑀺𑀬𑀚𑀯𑀦𑀸𑀦𑀺 𑀓𑁆𑀭𑀺𑀬𑀸𑀪𑀺𑀜𑁆𑀜𑀸𑀚𑀯𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀺𑀬𑀸 𑀲𑀳 𑀘𑀢𑀼𑀩𑁆𑀪𑀽𑀫𑀓𑀥𑀫𑁆𑀫𑁂𑀲𑀼 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀓𑀸𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀻𑀢𑀺 𑀦𑀢𑁆𑀣𑀺. 𑀢𑀣𑀸 𑀢𑁂𑀲𑀁 𑀧𑀼𑀭𑁂𑀘𑀸𑀭𑀺 𑀓𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀞𑀸𑀡𑀲𑀫𑁆𑀧𑀬𑀼𑀢𑁆𑀢.𑀮. 𑀲𑀩𑁆𑀩𑀣𑀸𑀧𑀺𑀲𑀩𑁆𑀩𑀸 𑀭𑀫𑁆𑀫𑀡𑀸𑀦𑀻𑀢𑀺. 𑀢𑀢𑁆𑀣 𑀲𑀩𑁆𑀩𑀣𑀸𑀧𑀻𑀢𑀺 𑀲𑀩𑁆𑀩𑀓𑀸𑀫𑀸𑀯𑀘𑀭 𑀲𑀩𑁆𑀩𑀫𑀳𑀕𑁆𑀕𑀢 𑀲𑀩𑁆𑀩𑀮𑁄𑀓𑀼𑀢𑁆𑀢𑀭 𑀲𑀩𑁆𑀩𑀧𑀜𑁆𑀜𑀢𑁆𑀢𑀺 𑀲𑀩𑁆𑀩𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺 𑀧𑀓𑀸𑀭𑁂𑀦𑀧𑀻𑀢𑀺𑀅𑀢𑁆𑀣𑁄. 𑀇𑀤𑀜𑁆𑀘 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀢𑀭𑀸𑀦𑀺 𑀧𑀦 𑀧𑀘𑁆𑀘𑁂𑀓 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀧𑀤𑁂𑀲𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀢𑀸𑀦𑀺 𑀳𑀺 𑀏𑀓𑀁 𑀧𑀣𑀯𑀺𑀥𑀸𑀢𑀼𑀁𑀧𑀺 𑀲𑀩𑁆𑀩𑁂𑀳𑀺 𑀅𑀦𑀯𑀲𑁂𑀲𑀧𑀓𑀸𑀭𑁂𑀳𑀺 𑀚𑀸𑀦𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀻𑀢𑀺. 𑀆𑀭𑀼𑀧𑁆𑀧𑁂𑀲𑀼 𑀤𑀼𑀢𑀻𑀬𑀘𑀢𑀼𑀢𑁆𑀣𑀸𑀦𑀺 𑀧𑀣𑀫𑀢𑀢𑀻𑀬𑀸𑀭𑀼𑀧𑁆𑀧 𑀯𑀺𑀜𑁆𑀜𑀸𑀡𑀸 𑀭𑀫𑁆𑀫𑀡𑀢𑁆𑀢𑀸 𑀫𑀳𑀕𑁆𑀕𑀢𑀸 𑀭𑀫𑁆𑀫𑀡𑀸𑀦𑀺. 𑀲𑁂𑀲𑀸𑀦𑀻𑀢𑀺 𑀅𑀪𑀺𑀜𑁆𑀜𑀸 𑀤𑁆𑀯𑀬 𑀤𑀼𑀢𑀻𑀬𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂𑀳𑀺 𑀅𑀯𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀏𑀓𑀯𑀻𑀲𑀢𑀺𑀯𑀺𑀥𑀸𑀦𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀸𑀦𑀺 𑀓𑀲𑀺𑀡𑀸𑀤𑀺 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀯𑀻𑀲𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦 𑀢𑁂𑀯𑀻𑀲𑀢𑀺 𑀓𑀸𑀫𑀯𑀺𑀧𑀸𑀓 𑀳𑀲𑀦𑀘𑀺𑀢𑁆𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀫𑁆𑀳𑀻𑀢𑀺 𑀓𑀸𑀫𑀸𑀯𑀘𑀭𑀸 𑀮𑀫𑁆𑀩𑀡𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑁄 𑀧𑀝𑀺𑀩𑀦𑁆𑀥𑀓𑀥𑀫𑁆𑀫𑁂𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀤𑀻𑀬𑀢𑀺 𑀅𑀯𑀔𑀡𑁆𑀟𑀻𑀬𑀢𑀺 𑀦𑀺𑀢𑁆𑀢𑁂𑀚𑀪𑀸𑀯𑀁 𑀧𑀸𑀧𑀻𑀬𑀢𑀻𑀢𑀺 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁩𑁫. 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀪𑁂𑀤𑁂𑀦 𑀢𑀩𑁆𑀩𑀢𑁆𑀣𑀼𑀓𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺 𑀓𑀸𑀦𑀁 𑀲𑀗𑁆𑀕𑀳𑁄 𑀯𑀢𑁆𑀣𑀼𑀲𑀗𑁆𑀕𑀳𑁄.

[𑁧𑁦𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀯𑀢𑁆𑀣𑀼𑀯𑀺𑀪𑀸𑀕𑀢𑁄 𑀢𑀩𑁆𑀩𑀢𑁆𑀣𑀼𑀓𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀘 𑀲𑀗𑁆𑀕𑀳𑁄 𑀯𑀢𑁆𑀣𑀼𑀲𑀗𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀯𑀲𑀦𑁆𑀢𑀺𑀧𑀢𑀺𑀝𑁆𑀞𑀳𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀏𑀢𑁂𑀲𑀽𑀢𑀺𑀯𑀢𑁆𑀣𑀽𑀦𑀺, 𑀘𑀓𑁆𑀔𑀼𑀯𑀢𑁆𑀣𑀼𑀘. 𑀮. 𑀓𑀸𑀬𑀯𑀢𑁆𑀣𑀼𑀘𑀳𑀤𑀬𑀯𑀢𑁆𑀣𑀼𑀘𑀸𑀢𑀺𑀬𑁄𑀚𑀦𑀸. 𑀘𑀓𑁆𑀔𑀼𑀫𑁂𑀯 𑀘𑀓𑁆𑀔𑀼𑀯𑀢𑁆𑀣𑀼 𑀢𑀣𑀸 𑀲𑁄𑀢𑀸𑀤𑀻𑀦𑀺𑀬𑁂𑀯 𑀲𑁄𑀢𑀯𑀢𑁆𑀣𑀸𑀤𑀻𑀦𑀺. 𑀯𑀸𑀓𑁆𑀬𑀲𑀗𑁆𑀔𑁂𑀧𑁄 𑀳𑁂𑀲 𑀧𑀸𑀞𑁄. 𑀧𑁂𑀬𑁆𑀬𑀸𑀮𑀦𑀬𑁄𑀢𑀺𑀧𑀺 𑀅𑀦𑁆𑀢𑀤𑀻𑀧𑀓𑀦𑀬𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀓𑁂𑀘𑀺 𑀧𑀦 𑀤𑁆𑀯𑀦𑁆𑀤𑀲𑀫𑀸𑀲𑀁 𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀘𑀲𑀤𑁆𑀤𑁄 𑀦𑀬𑀼𑀚𑁆𑀚𑀢𑀺. 𑀧𑀭𑀢𑁄 𑀯𑀢𑁆𑀣𑀼𑀲𑀤𑁆𑀤𑁄 𑀘𑀲𑀤𑁆𑀤𑁄𑀘 𑀧𑀼𑀩𑁆𑀩𑀧𑀤𑁂𑀲𑀼 𑀆𑀦𑁂𑀢𑀩𑁆𑀩𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀳𑀤𑀬𑀯𑀢𑁆𑀣𑀽𑀢𑀺 𑀲𑀫𑀸𑀲𑀧𑀤𑀁 𑀦𑀬𑀼𑀚𑁆𑀚𑀢𑀺. 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄𑀢𑀺𑀧𑀺 𑀅𑀧𑀭𑁂. 𑀢𑀸𑀦𑀺 𑀓𑀸𑀫𑀮𑁄𑀓𑁂 𑀲𑀩𑁆𑀩𑀸𑀦𑀺𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀓𑀸𑀫𑀢𑀡𑁆𑀳𑀸 𑀥𑀺𑀦 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑀸𑀦𑀁𑀏𑀯 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀢𑀸 𑀲𑀫𑁆𑀪𑀯𑀢𑁄 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀙 𑀯𑀢𑁆𑀣𑀽𑀦𑀺 𑀓𑀸𑀫𑀮𑁄𑀓𑁂𑀏𑀯 𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀳𑀺 𑀘𑀓𑁆𑀔𑀸𑀤𑀻𑀲𑀼 𑀯𑀢𑁆𑀣𑀽𑀲𑀼 𑀲𑀦𑁆𑀢𑁂𑀲𑀼 𑀏𑀯𑀭𑀽𑀧𑀸𑀤𑀻𑀦𑀁 𑀧𑀭𑀺𑀪𑁄𑀕𑁄 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀭𑀽𑀧𑀸𑀤𑀻𑀲𑀼 𑀓𑀸𑀫𑀯𑀢𑁆𑀣𑀽𑀲𑀼 𑀅𑀪𑀺𑀭𑀢𑀸 𑀓𑀸𑀫𑀢𑀡𑁆𑀳𑀸 𑀲𑀤𑀸 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀢𑁆𑀣𑀽𑀦𑀁𑀧𑀺 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑀺𑀬𑁂𑀯. 𑀬𑀣𑀸𑀘 𑀲𑀩𑁆𑀩𑀓𑀫𑁆𑀫𑀺𑀓𑁄 𑀅𑀫𑀘𑁆𑀘𑁄 𑀲𑀤𑀸 𑀭𑀜𑁆𑀜𑁄 𑀇𑀘𑁆𑀙𑀫𑁂𑀯 𑀧𑀽𑀭𑀬𑀫𑀸𑀦𑁄 𑀲𑀩𑁆𑀩𑀸𑀦𑀺 𑀭𑀸𑀚𑀓𑀫𑁆𑀫𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀏𑀯𑀫𑁂𑀯 𑀓𑀸𑀫𑀸𑀯𑀘𑀭𑀓𑀫𑁆𑀫𑀁𑀧𑀺 𑀲𑀤𑀸 𑀓𑀸𑀫𑀢𑀡𑁆𑀳𑀸𑀬 𑀇𑀘𑁆𑀙𑀫𑁂𑀯 𑀧𑀽𑀭𑀬𑀫𑀸𑀦𑀁 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀁 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀓𑀸𑀫𑀢𑀡𑁆𑀳𑀸𑀥𑀺𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀓𑀸𑀫𑀲𑀢𑁆𑀢𑀸𑀏𑀯 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀻𑀢𑀺. 𑀬𑀣𑀸 𑀘 𑀤𑀲𑁆𑀲𑀦𑀲𑀯𑀦𑀸𑀦𑀼𑀢𑁆𑀢𑀭𑀺𑀬 𑀥𑀫𑁆𑀫𑀪𑀽𑀢𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀦𑀺 𑀩𑀼𑀤𑁆𑀥𑀤𑀲𑁆𑀲𑀦 𑀥𑀫𑁆𑀫𑀲𑁆𑀲𑀯𑀦𑀸 𑀤𑀺𑀯𑀲𑁂𑀦 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀧𑀺 𑀳𑁄𑀦𑁆𑀢𑀺, 𑀦 𑀢𑀣𑀸 𑀖𑀸𑀦𑀸𑀤𑀺𑀢𑁆𑀢𑀬𑀁. 𑀢𑀁 𑀧𑀦 𑀓𑁂𑀯𑀮𑀁 𑀓𑀸𑀫𑀧𑀭𑀺𑀪𑁄𑀕𑀢𑁆𑀣𑀸𑀬𑀏𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀓𑀸𑀫𑀯𑀺𑀭𑀸𑀕𑀪𑀸𑀯𑀦𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂𑀲𑀼 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀲𑀼 𑀦𑀉𑀧𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 𑀭𑀽𑀧𑀮𑁄𑀓𑁂 𑀧𑀦 𑀖𑀸𑀦𑀸𑀤𑀺𑀢𑁆𑀢𑀬𑀁 𑀦𑀢𑁆𑀣𑀻𑀢𑀺. 𑀇𑀤𑀜𑁆𑀘 𑀧𑀲𑀸𑀤𑀭𑀽𑀧𑀢𑁆𑀢𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀲𑀫𑁆𑀪𑀸𑀭𑀖𑀸𑀦 𑀚𑀺𑀯𑁆𑀳𑀸 𑀓𑀸𑀬 𑀲𑀡𑁆𑀞𑀸𑀦𑀸𑀦𑀺𑀧𑀦 𑀲𑀼𑀝𑁆𑀞𑀼𑀧𑀭𑀺𑀧𑀼𑀡𑁆𑀡𑀸𑀦𑀺𑀏𑀯 𑀳𑁄𑀦𑁆𑀢𑀻𑀢𑀺. 𑀅𑀭𑀽𑀧𑀮𑁄𑀓𑁂𑀧𑀦 𑀲𑀩𑁆𑀩𑀸𑀦𑀺𑀧𑀺 𑀦𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀭𑀽𑀧𑀯𑀺𑀭𑀸𑀕 𑀪𑀸𑀯𑀦𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂 𑀢𑀲𑁆𑀫𑀺𑀁 𑀮𑁄𑀓𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀦𑁆𑀢𑀸𑀦𑁂𑀲𑀼𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀭𑀽𑀧𑀧𑀯𑀢𑁆𑀢𑀺𑀬𑀸𑀏𑀯 𑀅𑀪𑀸𑀯𑀢𑁄. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀸 𑀳𑀺 𑀲𑀢𑁆𑀢𑀸 𑀲𑀼𑀤𑁆𑀥𑁂 𑀆𑀓𑀸𑀲𑀢𑀮𑁂𑀏𑀯 𑀘𑀺𑀢𑁆𑀢𑀧𑀩𑀦𑁆𑀥𑀫𑀢𑁆𑀢𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀗𑁆𑀕𑀳𑁂 𑀧𑀦 𑀘𑀺𑀢𑁆𑀢𑀸𑀦𑀺 𑀲𑀢𑁆𑀢𑀯𑀺𑀜𑁆𑀜𑀸𑀡 𑀥𑀸𑀢𑀼𑀯𑀲𑁂𑀦 𑀕𑀳𑁂𑀢𑀼𑀁 𑀢𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀙𑀲𑀼 𑀯𑀢𑁆𑀣𑀽𑀲𑀼. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀏𑀯 𑀦𑀺𑀲𑀢𑁆𑀢𑀦𑀺𑀚𑀻𑀯𑀝𑁆𑀞𑁂𑀦 𑀥𑀸𑀢𑀼𑀬𑁄𑀢𑀺 𑀯𑀺𑀕𑁆𑀕𑀳𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀯𑀺𑀚𑀸𑀦𑀦𑀓𑀺𑀘𑁆𑀘𑀸𑀪𑀸𑀯𑀢𑁄 𑀫𑀦𑀦𑀫𑀢𑁆𑀢𑀸 𑀥𑀸𑀢𑀽𑀢𑀺 𑀫𑀦𑁄𑀥𑀸𑀢𑀼. 𑀧𑀜𑁆𑀘𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀫𑀢𑁆𑀢 𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢 𑀓𑀺𑀘𑁆𑀘𑀸𑀦𑀺 𑀳𑀺 𑀯𑀺𑀲𑁂𑀲𑀚𑀸𑀦𑀦 𑀓𑀺𑀘𑁆𑀘𑀸𑀦𑀺 𑀦𑀳𑁄𑀦𑁆𑀢𑀻𑀢𑀺. 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀧𑀦 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀣𑁄𑀓𑀁 𑀯𑀺𑀲𑁂𑀲𑀚𑀸𑀦𑀦𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀅𑀯𑀲𑁂𑀲𑀸 𑀧𑀦 𑀲𑀦𑁆𑀢𑀻𑀭𑀡𑀸𑀤𑀬𑁄 𑀆𑀭𑀫𑁆𑀫𑀡𑀲𑀪𑀸𑀯 𑀯𑀺𑀘𑀸𑀭𑀡𑀸 𑀤𑀺𑀯𑀲𑁂𑀦 𑀅𑀢𑀺𑀭𑁂𑀓 𑀯𑀺𑀲𑀺𑀝𑁆𑀞𑀚𑀸𑀦𑀦𑀓𑀺𑀘𑁆𑀘𑀬𑀼𑀢𑁆𑀢𑀢𑁆𑀢𑀸 𑀦 𑀫𑀦𑁄𑀥𑀸𑀢𑀼𑀬𑁄 𑀯𑀺𑀬 𑀫𑀦𑀦𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀦𑀸𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀯𑀺𑀬 𑀯𑀺𑀚𑀸𑀦𑀦 𑀫𑀢𑁆𑀢𑀸. 𑀅𑀣𑀔𑁄 𑀫𑀦𑀦𑀝𑁆𑀞𑁂𑀦 𑀫𑀦𑁄𑀘 𑀢𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀓𑀢𑁆𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀦𑀸𑀫. 𑀅𑀢𑀺𑀲𑀬 𑀯𑀺𑀲𑁂𑀲𑀚𑀸𑀦𑀦 𑀥𑀸𑀢𑀼𑀬𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀬𑀧𑀤𑀸𑀦𑀜𑁆𑀳𑀺 𑀯𑀺𑀲𑁂𑀲𑀦 𑀲𑀫𑀸𑀲𑁂 𑀅𑀢𑀺𑀲𑀬𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀧𑀤𑀝𑁆𑀞𑀸𑀦𑀦𑁆𑀢𑀺.

[𑁧𑁧𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀫𑀦𑁄𑀬𑁂𑀯 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸. 𑀫𑀦𑀲𑁄 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀦𑁄𑀬𑁂𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀤𑀁 𑀢𑀸𑀯 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑁂𑀢𑁆𑀯𑀸 𑀅𑀪𑀺𑀭𑁂𑀓𑀝𑁆𑀞𑀤𑀻𑀧𑀓𑁂 𑀧𑀤𑀝𑁆𑀞𑀸𑀦𑀦𑁆𑀢𑀺𑀆𑀤𑀺𑀓𑁂 𑀯𑀺𑀲𑁂𑀲𑀦𑀲𑀫𑀸𑀲𑁂 𑀅𑀯𑀥𑀸𑀭𑀡 𑀯𑀺𑀕𑁆𑀕𑀳𑁄 𑀓𑀢𑁆𑀣𑀘𑀺 𑀤𑀺𑀲𑁆𑀲𑀢𑀺 𑀬𑀼𑀚𑁆𑀚𑀢𑀺𑀘𑀸𑀢𑀺.

[𑁧𑁧𑁧] 𑀫𑀦𑀲𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀤𑀁𑀧𑀺 𑀦𑀬𑀼𑀚𑁆𑀚𑀢𑀺𑀬𑁂𑀯.

𑀫𑀦𑀲𑁄𑀢𑀺 𑀳𑀺 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀲𑀗𑁆𑀔𑀸𑀢𑀲𑁆𑀲 𑀫𑀦𑀲𑁆𑀲. 𑀢𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀁 𑀲𑀦𑁆𑀢𑀻𑀭𑀡𑀸𑀤𑀺𑀓𑀲𑁆𑀲 𑀫𑀦𑁄𑀯𑀺𑀜𑁆𑀜𑀸𑀡𑀧𑀩𑀦𑁆𑀥𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀳𑁄𑀢𑀺. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀦 𑀧𑀭𑀢𑁄 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀫𑀸𑀦𑀁 𑀢𑀲𑁆𑀲𑁂𑀯 𑀫𑀦𑁄𑀯𑀺𑀜𑁆𑀜𑀸𑀡𑀧𑀩𑀦𑁆𑀥𑀲𑁆𑀲 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀁 𑀳𑁄𑀢𑀻𑀢𑀺𑀓𑀢𑁆𑀯𑀸 𑀆𑀤𑀺𑀫𑁆𑀳𑀺 𑀧𑀘𑁆𑀘𑀬𑀪𑀽𑀢𑀲𑁆𑀲 𑀘𑁂𑀯 𑀅𑀦𑁆𑀢𑁂 𑀤𑁆𑀯𑀸𑀭𑀦𑁆𑀢𑀭𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀘 𑀫𑀦𑀲𑁆𑀲 𑀲𑀫𑁆𑀩𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀣𑀯𑀸, 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺 𑀫𑀦𑀦𑀓𑀺𑀘𑁆𑀘𑀢𑁆𑀢𑀸 𑀫𑀦𑁄𑀦𑀸𑀫. 𑀆𑀭𑀫𑁆𑀫𑀡𑁂 𑀧𑀦 𑀅𑀪𑀺𑀦𑀺𑀧𑀸𑀢 𑀫𑀢𑁆𑀢𑀸𑀦𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀫𑀦𑀦𑀓𑀺𑀘𑁆𑀘𑀸𑀦𑀺 𑀦𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀸𑀤𑀻𑀦𑀺 𑀏𑀯 𑀦𑀸𑀫. 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀫𑀦𑀢𑁄 𑀚𑀸𑀢𑀁𑀧𑀺 𑀫𑀦𑀲𑁆𑀲 𑀧𑀘𑁆𑀘𑀬𑁄 𑀦𑀳𑁄𑀢𑀺. 𑀤𑀲𑁆𑀲𑀦𑀸𑀤𑀻𑀦𑀁 𑀏𑀯 𑀧𑀘𑁆𑀘𑀬𑁄. 𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀜𑁆𑀘 𑀫𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁𑀧𑀺 𑀫𑀦𑀢𑁄 𑀚𑀸𑀢𑀁 𑀦𑀳𑁄𑀢𑀺. 𑀤𑀲𑁆𑀲𑀦𑀸𑀤𑀺𑀢𑁄 𑀏𑀯 𑀚𑀸𑀢𑀁. 𑀲𑀦𑁆𑀢𑀻𑀭𑀡𑀸𑀤𑀻𑀦𑀺 𑀧𑀦 𑀅𑀢𑁆𑀢𑀦𑁄 𑀧𑀼𑀭𑁂 𑀧𑀘𑁆𑀙𑀸𑀧𑀯𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀫𑀦𑀸𑀦𑀁 𑀏𑀯 𑀫𑀚𑁆𑀛𑁂 𑀚𑀸𑀢𑀸𑀦𑀻𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀫𑀦𑀲𑁆𑀲 𑀲𑀫𑁆𑀩𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀲𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀁𑀧𑀺 𑀤𑁆𑀯𑀺𑀦𑁆𑀦𑀁 𑀫𑀦𑁄𑀥𑀸𑀢𑀽𑀦𑀁 𑀅𑀦𑁆𑀢𑀭𑁂 𑀧𑀯𑀢𑁆𑀢𑀢𑁆𑀢𑀸 𑀫𑀦𑀲𑁄 𑀧𑀘𑁆𑀘𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀲𑁆𑀲 𑀲𑀫𑁆𑀩𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀲𑀺𑀬𑀸𑀢𑀺.

[𑁧𑁧𑁨] 𑀝𑀻𑀓𑀸𑀬𑀁 𑀧𑀦

𑀫𑀦𑀢𑁄 𑀚𑀸𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀯𑀼𑀢𑁆𑀢𑀦𑀬𑁂𑀦 𑀦𑀬𑀼𑀚𑁆𑀚𑀢𑀺𑀬𑁂𑀯.

𑀅𑀯𑀲𑁂𑀲𑀸 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀸𑀘 𑀲𑀦𑁆𑀢𑀻𑀭𑀡.𑀮. 𑀧𑀦𑁆𑀦𑀭𑀲𑀭𑀽𑀧𑀸𑀯𑀘𑀭𑀯𑀲𑁂𑀦 𑀢𑀺𑀁𑀲𑀥𑀫𑁆𑀫𑀸 𑀳𑀤𑀬𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀘𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀯𑀲𑁂𑀲𑀸𑀦𑀁 𑀙𑀲𑀢𑁆𑀢𑀢𑀺 𑀥𑀫𑁆𑀫𑀸𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀁 𑀲𑀫𑁆𑀪𑀸𑀯𑁂𑀢𑀺.

[𑁧𑁧𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀦 𑀓𑁂𑀯𑀮𑀁 𑀫𑀦𑁄𑀥𑀸𑀢𑀼𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀏𑀯𑀜𑁆𑀳𑀺 𑀲𑀢𑀺 𑀅𑀯𑀲𑁂𑀲𑀸𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀸𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺.

[𑁧𑁧𑁪] 𑀬𑀸𑀘 𑀝𑀻𑀓𑀸𑀲𑀼

𑀲𑀦𑁆𑀢𑀻𑀭𑀡.𑀮. 𑀭𑀽𑀧𑀸𑀯𑀘𑀭𑀯𑀲𑁂𑀦 𑀧𑀯𑀢𑁆𑀢𑀸, 𑀅𑀯𑀲𑁂𑀲𑀸 𑀫𑀦𑁄𑀯𑀺𑀜𑁆𑀜𑀸𑀡 𑀥𑀸𑀢𑀼𑀲𑀗𑁆𑀔𑀸𑀢𑀸𑀘 𑀢𑀺𑀁𑀲 𑀥𑀫𑁆𑀫𑀸𑀢𑀺 𑀬𑁄𑀚𑀦𑀸. 𑀲𑀸𑀧𑀺 𑀦 𑀲𑀼𑀦𑁆𑀤𑀭𑀸.

𑀅𑀢𑁆𑀣𑀕𑀢𑀺𑀬𑀸 𑀅𑀯𑀺𑀲𑀤𑀢𑁆𑀢𑀸𑀢𑀺. 𑀢𑀢𑁆𑀣 𑀓𑀲𑁆𑀫𑀸 𑀢𑁂 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀆𑀭𑀼𑀧𑁆𑀧𑁂𑀲𑀼 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀓𑀲𑁆𑀫𑀸𑀘 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑁂. 𑀲𑀦𑁆𑀢𑀻𑀭𑀡𑀫𑀳𑀸𑀯𑀺𑀧𑀸𑀓𑀸𑀦𑀺 𑀢𑀸𑀯 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀸𑀦𑀜𑁆𑀘 𑀢𑀢𑁆𑀣 𑀅𑀪𑀸𑀯𑀢𑁄. 𑀧𑀝𑀺𑀖𑀘𑀺𑀢𑁆𑀢𑀤𑁆𑀯𑀬𑀁𑀧𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀅𑀦𑀻𑀯𑀭𑀡𑀸𑀯𑀢𑁆𑀣𑀲𑁆𑀲 𑀧𑀝𑀺𑀖𑀲𑁆𑀲 𑀅𑀪𑀸𑀯𑀢𑁄. 𑀏𑀓𑀦𑁆𑀢 𑀦𑀻𑀯𑀭𑀡𑀸𑀦𑀜𑁆𑀘 𑀛𑀸𑀦𑀪𑀽𑀫𑀻𑀲𑀼 𑀅𑀲𑀫𑁆𑀪𑀯𑀢𑁄. 𑀏𑀢𑁆𑀣 𑀧𑀦 𑀬𑀤𑀺 𑀅𑀦𑀻𑀯𑀭𑀡𑀸𑀯𑀢𑁆𑀣𑁄 𑀧𑀝𑀺𑀖𑁄 𑀦𑀢𑁆𑀣𑀺. 𑀧𑀸𑀴𑀺𑀬𑀁 𑀤𑀼𑀢𑀻𑀬𑀚𑁆𑀛𑀸𑀦𑁂𑀏𑀯 𑀤𑁄𑀫𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀧𑀭𑀺𑀲𑁂𑀲𑀦𑀺𑀭𑁄𑀥𑀯𑀘𑀦𑀁 𑀅𑀝𑁆𑀞𑀓𑀣𑀸𑀲𑀼𑀘 𑀤𑀼𑀢𑀻𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀯𑀘𑀦𑀁 𑀯𑀺𑀭𑀼𑀤𑁆𑀥𑀁 𑀲𑀺𑀬𑀸. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀳𑀸𑀬𑀧𑀘𑁆𑀘𑀬 𑀪𑀽𑀢𑀲𑁆𑀲 𑀑𑀴𑀸𑀭𑀺𑀓𑀲𑁆𑀲 𑀓𑀸𑀫𑀭𑀸𑀕𑀲𑁆𑀲 𑀛𑀸𑀦𑀪𑀽𑀫𑀻𑀲𑀼 𑀅𑀪𑀸𑀯𑀢𑁄 𑀧𑀝𑀺𑀖𑀘𑀺𑀢𑁆𑀢𑀤𑁆𑀯𑀬𑀁 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀬𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀝𑀻𑀓𑀸𑀓𑀸𑀭𑀸𑀧𑀦 𑀤𑀼𑀢𑀻𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯 𑀯𑀘𑀦𑀁 𑀧𑀭𑀺𑀓𑀧𑁆𑀧𑀯𑀘𑀦𑀫𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀧𑀼𑀭𑀺𑀫𑀓𑀸𑀭𑀡𑀫𑁂𑀯 𑀇𑀘𑁆𑀙𑀦𑁆𑀢𑀺. 𑀬𑀤𑀺 𑀧𑀦𑁂𑀢𑀁 𑀧𑀭𑀺𑀓𑀧𑁆𑀧𑀯𑀘𑀦𑀫𑀢𑁆𑀢𑀁 𑀲𑀺𑀬𑀸 𑀧𑀸𑀴𑀺𑀯𑀘𑀦𑀁𑀧𑀺 𑀧𑀭𑀺𑀓𑀧𑁆𑀧𑀯𑀘𑀦𑀫𑀢𑁆𑀢𑀫𑁂𑀯 𑀲𑀺𑀬𑀸. 𑀢𑀲𑁆𑀫𑀸 𑀧𑀘𑁆𑀙𑀺𑀫𑀓𑀸 𑀭𑀡𑀫𑁂𑀯 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀳𑀲𑀦𑀘𑀺𑀢𑁆𑀢𑀁𑀧𑀺 𑀦𑀼𑀧𑁆𑀧𑀚𑁆𑀚𑀢𑀺 𑀅𑀭𑀽𑀧𑀻𑀦𑀁 𑀳𑀲𑀦𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀢𑁄. 𑀓𑀸𑀬𑀸𑀪𑀸𑀯𑀢𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁𑀧𑀺 𑀦𑀼𑀧𑁆𑀧𑀚𑁆𑀚𑀢𑀺. 𑀧𑀭𑀢𑁄𑀖𑁄𑀲𑀸𑀪𑀸𑀯𑁂𑀦 𑀢𑀢𑁆𑀣𑀼𑀧𑁆𑀧𑀦𑁆𑀦𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑀸𑀪𑀸𑀯𑀢𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀢𑁂𑀦𑁂𑀯 𑀳𑀺 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀧𑀼𑀣𑀼𑀚𑁆𑀚𑀦𑁄 𑀅𑀝𑁆𑀞𑀲𑀼 𑀅𑀓𑁆𑀔𑀡𑀬𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑁄𑀢𑀺. 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀸𑀦𑀺𑀧𑀺 𑀢𑀢𑁆𑀣 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀬 𑀭𑀽𑀧𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀢𑁂𑀲𑀁 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸𑀢𑀺.

𑀅𑀯𑀲𑁂𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀗𑁆𑀔𑀸𑀢𑀸 𑀓𑀼𑀲𑀮𑀸𑀓𑀼𑀲𑀮𑀓𑁆𑀭𑀺𑀬𑀸𑀦𑀼𑀢𑁆𑀢𑀭𑀯𑀲𑁂𑀦 𑀤𑁆𑀯𑁂 𑀘𑀢𑁆𑀢𑀸𑀮𑀻𑀲𑀥𑀫𑁆𑀫𑀸 𑀳𑀤𑀬𑀁 𑀦𑀺𑀲𑁆𑀲𑀸𑀬𑀯𑀸 𑀅𑀦𑀺𑀲𑁆𑀲𑀸𑀬𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀲𑁆𑀲𑀸𑀬𑀯𑀸 𑀧𑀜𑁆𑀘𑀯𑁄𑀓𑀸𑀭𑁂 𑀅𑀦𑀺𑀲𑁆𑀲𑀸𑀬𑀯𑀸 𑀘𑀢𑀼𑀯𑁄𑀓𑀸𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑀸𑀦𑀺𑀘 𑀅𑀓𑀼𑀲𑀮𑀸𑀦𑀺𑀘 𑀓𑁆𑀭𑀺𑀬𑀸𑀦𑀺𑀘 𑀅𑀦𑀼𑀢𑁆𑀢𑀭𑀸𑀦𑀺𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀓𑀼𑀲𑀮𑀸𑀦𑀻𑀢𑀺 𑀧𑀜𑁆𑀘𑀭𑀽𑀧 𑀓𑀼𑀲𑀮𑀢𑁄 𑀅𑀯𑀲𑁂𑀲𑀸𑀦𑀺 𑀤𑁆𑀯𑀸𑀤𑀲𑀮𑁄𑀓𑀺𑀬𑀓𑀼𑀲𑀮𑀸𑀦𑀺. 𑀅𑀓𑀼𑀲𑀮𑀸𑀦𑀻𑀢𑀺 𑀧𑀝𑀺𑀖𑀤𑁆𑀯𑀬𑀢𑁄 𑀅𑀯𑀲𑁂𑀲𑀸𑀦𑀺 𑀤𑀲𑀅𑀓𑀼𑀲𑀮𑀸𑀦𑀺. 𑀓𑁆𑀭𑀺𑀬𑀸𑀦𑀻𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦 𑀳𑀲𑀦 𑀧𑀜𑁆𑀘𑀭𑀽𑀧𑀓𑁆𑀭𑀺𑀢𑁄 𑀅𑀯𑀲𑁂𑀲𑀸𑀦𑀺 𑀢𑁂𑀭𑀲𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺. 𑀅𑀦𑀼𑀢𑁆𑀢𑀭𑀸𑀦𑀻𑀢𑀺 𑀧𑀣𑀫𑀫𑀕𑁆𑀕𑀢𑁄 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢𑀅𑀦𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺. 𑀓𑀸𑀫𑁂 𑀙𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸 𑀲𑀢𑁆𑀢𑀥𑀸𑀢𑀼𑀬𑁄 𑀫𑀢𑀸. 𑀭𑀽𑀧𑁂 𑀢𑀺𑀯𑀢𑁆𑀣𑀼𑀁 𑀦𑀺𑀲𑁆𑀲𑀺𑀢𑀸 𑀘𑀢𑀼𑀩𑁆𑀩𑀺𑀥𑀸 𑀥𑀸𑀢𑀼𑀬𑁄 𑀫𑀢𑀸. 𑀆𑀭𑀼𑀧𑁆𑀧𑁂 𑀓𑀺𑀜𑁆𑀘𑀺𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀺𑀢𑀸 𑀏𑀓𑀸 𑀥𑀸𑀢𑀼 𑀫𑀢𑀸𑀢𑀺 𑀬𑁄𑀚𑀦𑀸. 𑀢𑁂𑀘𑀢𑁆𑀢𑀸𑀮𑀻𑀲𑀸𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀢𑀻𑀭𑀡𑀸𑀤𑀺𑀓𑁂 𑀢𑀺𑀁𑀲𑀥𑀫𑁆𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀧𑀓𑀺𑀡𑁆𑀡𑀓𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.