𑀘𑁂𑀢𑀲𑀺𑀓𑀲𑀗𑁆𑀕𑀳 𑀧𑀭𑀫𑀢𑁆𑀣𑀤𑀻𑀧𑀦𑀻

𑁬𑁮. 𑀏𑀯𑀁 𑀘𑀺𑀢𑁆𑀢𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑀼𑀧𑀢𑁆𑀢𑀁 𑀘𑁂𑀢𑀲𑀺𑀓 𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀽𑀳𑀺 𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑁂𑀳𑀺 𑀲𑀳 𑀯𑀘𑀦𑀢𑁆𑀣𑀜𑁆𑀘 𑀲𑀭𑀽𑀧𑀢𑁆𑀣𑀜𑁆𑀘 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀆𑀤𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀘𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸𑀢𑀺 𑀘𑀢𑀼𑀲𑁆𑀲𑀫𑁆𑀧𑀬𑁄𑀕𑀮𑀓𑁆𑀔𑀡𑀤𑀲𑁆𑀲𑀦𑀁. 𑀘𑁂𑀢𑁄 𑀬𑀼𑀢𑁆𑀢𑀸𑀢𑀺 𑀯𑀘𑀦𑀢𑁆𑀣𑀤𑀲𑁆𑀲𑀦𑀁. 𑀘𑁂𑀢𑀲𑀺𑀬𑀼𑀢𑁆𑀢𑀸 𑀘𑁂𑀢𑀲𑀸𑀯𑀸 𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸𑀢𑀺 𑀤𑀲𑁆𑀲𑀦𑀢𑁄. 𑀤𑁆𑀯𑀺𑀧𑀜𑁆𑀜𑀸𑀲𑀥𑀫𑁆𑀫𑀸𑀢𑀺 𑀲𑀭𑀽𑀧𑀤𑀲𑁆𑀲𑀦𑀁. 𑀘𑁂𑀢𑀲𑀺𑀓𑀸𑀢𑀺 𑀧𑀦 𑀲𑀺𑀤𑁆𑀥𑀧𑀤 𑀤𑀲𑁆𑀲𑀦𑀁. 𑀢𑀢𑁆𑀣 𑀥𑀫𑁆𑀫𑀸𑀦𑀁 𑀅𑀦𑀸𑀕𑀢𑀪𑀸𑀯𑀲𑀗𑁆𑀔𑀸𑀢𑀸 𑀧𑀼𑀩𑁆𑀩𑀦𑁆𑀢𑀢𑁄 𑀉𑀤𑁆𑀥𑀁 𑀧𑀚𑁆𑀚𑀦𑀁 𑀕𑀫𑀦𑀁 𑀲𑀭𑀽𑀧𑀢𑁄 𑀧𑀸𑀢𑀼𑀪𑀯𑀦𑀁 𑀉𑀧𑁆𑀧𑀸𑀤𑁄. 𑀚𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑁂𑀧𑀺𑀳𑀺 𑀲𑀗𑁆𑀔𑀢 𑀥𑀫𑁆𑀫𑀸 𑀅𑀦𑀸𑀕𑀢𑀪𑀸𑀯𑀧𑀼𑀩𑁆𑀩𑀸 𑀏𑀯 𑀳𑁄𑀦𑁆𑀢𑀺. 𑀢𑀢𑁄 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁄 𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀅𑀢𑀻𑀢𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺. 𑀦𑀺𑀭𑀼𑀚𑁆𑀛𑀦𑀁 𑀦𑀺𑀭𑁄𑀥𑁄. 𑀲𑀭𑀽𑀧𑀯𑀺𑀦𑀸𑀲𑁄 𑀪𑀗𑁆𑀕𑁄 𑀅𑀦𑀺𑀘𑁆𑀘𑀢𑀸 𑀫𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀸𑀢𑀺, 𑀲𑀸𑀬𑁂𑀯 𑀨𑀲𑁆𑀲𑀸𑀤𑀻𑀦𑀁. 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀭𑀸, 𑀬𑀁 𑀘𑀺𑀢𑁆𑀢𑀲𑁆𑀲 𑀫𑀭𑀡𑀁, 𑀬𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀯𑀢𑁆𑀣𑀼. 𑀢𑀤𑁂𑀯 𑀨𑀲𑁆𑀲𑀸𑀤𑀻𑀦𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀏𑀓𑁄 𑀉𑀧𑁆𑀧𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀸. 𑀏𑀓𑁄 𑀦𑀺𑀭𑁄𑀥𑁄 𑀏𑀢𑁂𑀲𑀦𑁆𑀢𑀺 𑀏𑀓𑀦𑀺𑀭𑁄𑀥𑀸. 𑀏𑀓𑀼𑀧𑁆𑀧𑀸𑀤𑀸𑀘 𑀢𑁂 𑀏𑀓𑀦𑀺𑀭𑁄𑀥𑀸𑀘𑀸𑀢𑀺 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸. 𑀉𑀢𑁆𑀢𑀭𑀧𑀤𑁂 𑀏𑀓𑀲𑀤𑁆𑀤𑀲𑁆𑀲 𑀮𑁄𑀧𑁄. 𑀏𑀯𑀁 𑀧𑀭𑀢𑁆𑀣𑀧𑀺. 𑀏𑀓𑀁 𑀆𑀮𑀫𑁆𑀩𑀡𑀁 𑀏𑀢𑁂𑀲𑀦𑁆𑀢𑀺 𑀏𑀓𑀸𑀮𑀫𑁆𑀩𑀡𑀸. 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀦𑁆𑀢𑀺 𑀏𑀓𑀯𑀢𑁆𑀣𑀼𑀓𑀸. 𑀏𑀓𑀸𑀮𑀫𑁆𑀩𑀡𑀸𑀘 𑀢𑁂 𑀏𑀓𑀯𑀢𑁆𑀣𑀼𑀓𑀸𑀘𑀸𑀢𑀺 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸. 𑀆𑀮𑀫𑁆𑀩𑀡𑀁 𑀧𑀦𑁂𑀢𑁆𑀣 𑀏𑀓𑀘𑀺𑀢𑁆𑀢𑀲𑁆𑀲𑀧𑀺 𑀩𑀳𑀼𑀤𑁂𑀯 𑀳𑁄𑀢𑀺. 𑀏𑀓𑀢𑁆𑀢𑀁𑀧𑀦 𑀉𑀧𑀦𑁂𑀢𑁆𑀯𑀸 𑀏𑀓𑀁 𑀆𑀮𑀫𑁆𑀩𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

[𑁭𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀏𑀓𑀢𑁄 𑀉𑀧𑁆𑀧𑀸𑀤𑁄𑀘 𑀦𑀺𑀭𑁄𑀥𑁄𑀘 𑀬𑁂𑀲𑀁, 𑀢𑁂 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀏𑀓𑀓𑁆𑀔𑀡𑁂 𑀏𑀓𑀢𑁄 𑀉𑀧𑁆𑀧𑀸𑀤𑀫𑀢𑁆𑀢𑁂𑀦 𑀏𑀓𑀼𑀧𑁆𑀧𑀸𑀤𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀅𑀣𑀔𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀽𑀮𑀝𑀻𑀓𑀸𑀬𑀁 𑁋

𑀏𑀓𑀓𑀮𑀸𑀧𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀭𑀽𑀧𑀸𑀦𑀁𑀲𑀳𑁂𑀯𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀯𑀢𑁆𑀢𑀺𑀢𑁄

𑀏𑀓𑀲𑁆𑀲𑀓𑀮𑀸𑀧𑀲𑁆𑀲𑀉𑀧𑁆𑀧𑀸𑀤𑀸𑀤𑀬𑁄 𑀏𑀓𑁂𑀓𑀸𑀯 𑀳𑁄𑀦𑁆𑀢𑀻𑀢𑀺.

𑀢𑀢𑁆𑀭𑀸𑀬𑀁 𑀬𑁄𑀚𑀦𑀸. 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀘 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸 𑀘 𑀳𑀼𑀢𑁆𑀯𑀸 𑀬𑁂𑀥𑀫𑁆𑀫𑀸 𑀘𑁂𑀢𑁄𑀬𑀼𑀢𑁆𑀢𑀸. 𑀢𑁂 𑀤𑁆𑀯𑀺𑀧𑀜𑁆𑀜𑀸𑀲𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀫𑀢𑀸𑀢𑀺. 𑀪𑀸𑀯𑀧𑀥𑀸𑀦𑀁𑀧𑀺𑀯𑀸 𑀏𑀢𑁆𑀣 𑀬𑀼𑀢𑁆𑀢𑀁. 𑀯𑀺𑀲𑁂𑀲𑀦𑁂𑀘 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀪𑀸𑀯𑁂𑀦 𑀏𑀓𑀸𑀮𑀫𑁆𑀩𑀡 𑀯𑀢𑁆𑀣𑀼𑀓 𑀪𑀸𑀯𑁂𑀦𑀘 𑀬𑁂𑀥𑀫𑁆𑀫𑀸 𑀘𑁂𑀢𑁄𑀬𑀼𑀢𑁆𑀢𑀸. 𑀢𑁂 𑀤𑁆𑀯𑀺𑀧𑀜𑁆𑀜𑀸𑀲𑀥𑀫𑁆𑀫𑀸 𑀘𑁂𑀢𑀲𑀺𑀓𑀸𑀦𑀸𑀫 𑀫𑀢𑀸 𑀜𑀸𑀢𑀸𑀢𑀺. 𑀏𑀢𑁆𑀣𑀘 𑀬𑁂 𑀘𑁂𑀢𑁄𑀬𑀼𑀢𑁆𑀢𑀸. 𑀢𑁂 𑀘𑁂𑀢𑀲𑀺𑀓𑀸𑀢𑀺 𑀯𑀼𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀭𑀽𑀧𑀸𑀦𑀺𑀧𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀏𑀓𑀦𑁆𑀢𑁂𑀦 𑀘𑀺𑀢𑁆𑀢𑀲𑀫𑁆𑀩𑀦𑁆𑀥𑀻𑀦𑀺 𑀳𑀼𑀢𑁆𑀯𑀸 𑀘𑁂𑀢𑁄𑀬𑀼𑀢𑁆𑀢𑀸𑀦𑀺 𑀘𑁂𑀢𑀲𑀺𑀓𑀸𑀦𑀺 𑀦𑀸𑀫 𑀲𑀺𑀬𑀼𑀁. 𑀢𑀲𑁆𑀫𑀸 𑀢𑁂𑀲𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀘, 𑀏𑀓𑀸 𑀮𑀫𑁆𑀩𑀡𑀯𑀢𑁆𑀣𑀼𑀓𑀸𑀢𑀺 𑀯𑀼𑀢𑁆𑀢𑀁. 𑀢𑀸𑀦𑀺𑀳𑀺 𑀘𑀺𑀢𑁆𑀢𑁂𑀦 𑀔𑀡𑀢𑁄 𑀲𑀳𑀼𑀧𑁆𑀧𑀦𑁆𑀦𑀸𑀦𑀺𑀧𑀺 𑀪𑀺𑀦𑁆𑀦𑀲𑀦𑁆𑀢𑀸𑀦𑀢𑁆𑀢𑀸 𑀬𑀸 𑀘𑀺𑀢𑁆𑀢𑀲𑁆𑀲 𑀚𑀸𑀢𑀺, 𑀲𑀸𑀏𑀯 𑀢𑁂𑀲𑀦𑁆𑀢𑀺 𑀇𑀫𑀁 𑀮𑀓𑁆𑀔𑀡𑀁𑀧𑀺 𑀦𑀸𑀦𑀼𑀪𑁄𑀦𑁆𑀢𑀺. 𑀅𑀜𑁆𑀜𑀁𑀳𑀺 𑀭𑀽𑀧𑀲𑀦𑁆𑀢𑀸𑀦𑀁. 𑀅𑀜𑁆𑀜𑀁 𑀅𑀭𑀽𑀧𑀲𑀦𑁆𑀢𑀸𑀦𑀦𑁆𑀢𑀺. 𑀨𑀲𑁆𑀲𑀸𑀤𑀻𑀦𑀁𑀧𑀦 𑀉𑀧𑁆𑀧𑀸𑀤𑀫𑀢𑁆𑀢𑀫𑁂𑀯 𑀘𑀺𑀢𑁆𑀢𑁂𑀦 𑀲𑀳 𑀏𑀓𑀁 𑀦𑀳𑁄𑀢𑀺. 𑀅𑀣𑀔𑁄 𑀦𑀺𑀭𑁄𑀥𑁄𑀧𑀺 𑀆𑀮𑀫𑁆𑀩𑀡𑀁𑀧𑀺 𑀯𑀢𑁆𑀣𑀼𑀧𑀺 𑀲𑀩𑁆𑀩𑀁 𑀏𑀓𑀫𑁂𑀯𑀸𑀢𑀺 𑀜𑀸𑀧𑀦𑀢𑁆𑀣𑀁 𑀏𑀓 𑀦𑀺𑀭𑁄𑀥𑀸𑀤𑀺𑀕𑁆𑀕𑀳𑀡𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀏𑀯𑀁 𑀅𑀯𑀼𑀢𑁆𑀢𑁂 𑀲𑀓𑁆𑀓𑀸 𑀢𑀣𑀸 𑀚𑀸𑀦𑀺𑀢𑀼𑀦𑁆𑀢𑀺. 𑀬𑀲𑁆𑀫𑀸𑀧𑀦 𑀬𑀣𑀸 𑀩𑀳𑀼𑀚𑀦𑀲𑀦𑁆𑀢𑀓𑁄 𑀏𑀓𑁄 𑀕𑁄𑀡𑁄 𑀢𑀺𑀲𑁆𑀲𑀲𑁆𑀲 𑀕𑁄𑀡𑁄 𑀤𑀢𑁆𑀢𑀲𑁆𑀲 𑀕𑁄𑀡𑁄𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁𑀧𑀺 𑀯𑀢𑁆𑀢𑀩𑁆𑀩𑁄𑀬𑁂𑀯 𑀳𑁄𑀢𑀺. 𑀏𑀯𑀫𑁂𑀯𑀁 𑀉𑀧𑁆𑀧𑀸𑀤𑁄 𑀦𑀺𑀭𑁄𑀥𑁄𑀘 𑀏𑀓𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀓𑀮𑀸𑀧𑁂 𑀏𑀓𑁄𑀯𑀲𑀫𑀸𑀦𑁄𑀧𑀺 𑀨𑀲𑁆𑀲𑀲𑁆𑀲 𑀉𑀧𑁆𑀧𑀸𑀤𑁄 𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀣𑀯𑀺𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄 𑀆𑀧𑁄𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁𑀧𑀺 𑀯𑀢𑁆𑀢𑀩𑁆𑀩𑁄𑀬𑁂𑀯. 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑁂𑀲𑀼 𑁋

𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀯𑀬𑁄 𑀧𑀜𑁆𑀜𑀸𑀬𑀢𑀺. 𑀞𑀺𑀓𑀸𑀬 𑀅𑀜𑁆𑀜𑀢𑁆𑀣𑀁 𑀧𑀜𑁆𑀜𑀸𑀬𑀢𑀺. 𑀲𑀜𑁆𑀜𑀸𑀬. 𑀲𑀗𑁆𑀔𑀸𑀭𑀸𑀦𑀁. 𑀯𑀺𑀜𑁆𑀜𑀸𑀡𑀲𑁆𑀲. 𑀮. 𑀧𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀬𑁄 𑀪𑀺𑀓𑁆𑀔𑀯𑁂 𑀧𑀣𑀯𑀺𑀥𑀸𑀢𑀼𑀬𑀸 𑀉𑀧𑁆𑀧𑀸𑀤𑁄 𑀞𑀺𑀢𑀺𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄. 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄 𑀭𑁄𑀕𑀸𑀦𑀁 𑀞𑀺𑀢𑀺 𑀚𑀭𑀸 𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀪𑀺𑀓𑁆𑀔𑀯𑁂 𑀆𑀧𑁄𑀥𑀸𑀢𑀼𑀬𑀸. 𑀬𑁄 𑀪𑀺𑀓𑁆𑀔𑀯𑁂 𑀢𑁂𑀚𑁄 𑀥𑀸𑀢𑀼𑀬𑀸. 𑀬𑁄 𑀪𑀺𑀓𑁆𑀔𑀯𑁂 𑀯𑀸𑀬𑁄𑀥𑀸𑀢𑀼𑀬𑀸. 𑀬𑁄 𑀪𑀺𑀓𑁆𑀔𑀯𑁂 𑀘𑀓𑁆𑀔𑀼𑀲𑁆𑀲.𑀮. 𑀫𑀦𑀲𑁆𑀲 𑀉𑀧𑁆𑀧𑀸𑀤𑁄.𑀮. 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄𑀢𑀺.

𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀣𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀧𑀺 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀩𑀳𑀼𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀬𑁄 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀺 𑀅𑀯𑀝𑁆𑀞𑀺𑀢𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑀺𑀓𑀸𑀭𑀭𑀽𑀧𑀸𑀦𑀁. 𑀲𑀩𑁆𑀩𑁂𑀲𑀁𑀧𑀺𑀯𑀸 𑀘𑀓𑁆𑀔𑀸𑀤𑀻𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀁. 𑀘𑀢𑀼𑀦𑁆𑀦𑀁 𑀘𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀦𑁆𑀢𑀺𑀘 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄𑀢𑀺𑀘 𑀯𑀼𑀢𑁆𑀢𑀦𑁆𑀢𑀺. 𑀓𑀸𑀬𑀮𑀳𑀼𑀢𑀸 𑀘𑀺𑀢𑁆𑀢𑀮𑀳𑀼𑀢𑀸𑀤𑀬𑁄𑀧𑀦 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀦𑀢𑁆𑀣𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀸. 𑀲𑁄𑀘 𑀅𑀢𑁆𑀣𑀯𑀺𑀲𑁂𑀲𑁄𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀬𑀫𑁂𑀢𑁆𑀣𑀧𑀭𑀫𑀢𑁆𑀣𑀤𑀻𑀧𑀦𑀸.

[𑁭𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 ‘‘𑀬𑀤𑀺 𑀏𑀓𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀘𑁂𑀢𑁄𑀬𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀤𑀸 𑀘𑀺𑀢𑁆𑀢𑁂𑀦 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀘𑁂𑀢𑁄𑀬𑀼𑀢𑁆𑀢𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓 𑀦𑀺𑀭𑁄𑀥𑀕𑁆𑀕𑀳𑀡𑀁. 𑀏𑀯𑀫𑁆𑀧𑀺 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑁄 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲 𑀧𑀲𑀗𑁆𑀕𑁄 𑀦𑀲𑀓𑁆𑀓𑀸 𑀦𑀻𑀯𑀸𑀭𑁂𑀢𑀼𑀁. 𑀢𑀣𑀸 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀯𑀸 𑀦𑀺𑀭𑁄𑀥𑁄𑀯𑀸 𑀏𑀢𑁂𑀲𑀦𑁆𑀢𑀺 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀧𑀼𑀭𑁂𑀢𑀭𑀫𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀫𑀸𑀦𑀸𑀦𑀫𑁆𑀧𑀺 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀏𑀓𑀸𑀮𑀫𑁆𑀩𑀡𑀕𑁆𑀕𑀳𑀡𑀁. 𑀬𑁂 𑀏𑀯𑀁 𑀢𑀺𑀯𑀺𑀥𑀮𑀓𑁆𑀔𑀡𑀸. 𑀢𑁂 𑀦𑀺𑀬𑀸𑀫𑀢𑁄 𑀏𑀓𑀯𑀢𑁆𑀣𑀼𑀓𑀸 𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀏𑀓𑀯𑀢𑁆𑀣𑀼𑀓𑀕𑁆𑀕𑀳𑀡𑀦𑁆𑀢𑀺. 𑀅𑀮𑀫𑀢𑀺𑀧𑀧𑀜𑁆𑀘𑁂𑀦𑀸’’𑀢𑀺. 𑀲𑀩𑁆𑀩𑀁 𑀢𑀁 𑀦𑀺𑀭𑀢𑁆𑀣𑀓𑀫𑁂𑀯.

𑁬𑁯. 𑀓𑀣𑀜𑁆𑀘 𑀤𑁆𑀯𑀺𑀧𑀜𑁆𑀜𑀸𑀲 𑀳𑁄𑀦𑁆𑀢𑀻𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀧𑀣𑀫𑀁 𑀤𑁆𑀯𑀺𑀧𑀜𑁆𑀜𑀸𑀲 𑀲𑀭𑀽𑀧𑀁 𑀢𑀻𑀳𑀺 𑀭𑀸𑀲𑀻𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀓𑀣𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄. 𑀨𑀼𑀲𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀨𑀲𑁆𑀲𑁄. 𑀨𑀼𑀲𑀦𑀫𑀢𑁆𑀢𑀫𑁂𑀯𑀯𑀸 𑀏𑀢𑀦𑁆𑀢𑀺 𑀨𑀲𑁆𑀲𑁄. 𑀨𑀼𑀲𑀦𑀜𑁆𑀘𑁂𑀢𑁆𑀣 𑀆𑀭𑀫𑁆𑀫𑀡𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀭𑀲𑀁 𑀆𑀳𑀘𑁆𑀘 𑀉𑀧𑀳𑀘𑁆𑀘 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀢𑁄 𑀢𑀤𑀦𑀼𑀪𑀯𑀦𑁆𑀢𑀺 𑀯𑁂𑀤𑀦𑀸 𑀧𑀸𑀢𑀼𑀪𑀯𑀢𑀺. 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑁆𑀯𑀸𑀬𑀁 𑀨𑀼𑀲𑀦𑀮𑀓𑁆𑀔𑀡𑁄. 𑀦𑀦𑀼𑀘𑀸𑀬𑀁 𑀅𑀭𑀽𑀧𑀥𑀫𑁆𑀫𑁄. 𑀦𑀘 𑀅𑀭𑀽𑀧𑀥𑀫𑁆𑀫𑀸 𑀅𑀧𑁆𑀧𑀝𑀺𑀖𑀲𑀪𑀸𑀯𑀸 𑀓𑀺𑀜𑁆𑀘𑀺 𑀨𑀼𑀲𑀦𑁆𑀢𑀻𑀢𑀺. 𑀲𑀘𑁆𑀘𑀁, 𑀅𑀬𑀁𑀧𑀦 𑀨𑀼𑀲𑀦𑀸 𑀓𑀸𑀭𑁂𑀦𑀘 𑀧𑀯𑀢𑁆𑀢𑀢𑀺. 𑀬𑀜𑁆𑀘 𑀨𑀼𑀲𑀦𑁆𑀢𑁂𑀳𑀺 𑀲𑀸𑀥𑁂𑀢𑀩𑁆𑀩𑀁. 𑀢𑀜𑁆𑀘 𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀢𑀲𑁆𑀫𑀸 𑀅𑀬𑀁 𑀨𑀲𑁆𑀲𑁄𑀢𑀺𑀘 𑀨𑀼𑀲𑀦𑀮𑀓𑁆𑀔𑀡𑁄𑀢𑀺𑀘 𑀯𑀼𑀢𑁆𑀢𑁄. 𑀓𑀺𑀁𑀧𑀦 𑀲𑀸𑀥𑁂𑀢𑀻𑀢𑀺. 𑀆𑀭𑀫𑁆𑀫𑀡𑀭𑀲𑀸𑀦𑀼𑀭𑀽𑀧𑀁 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀧𑀢𑁆𑀢𑀺. 𑀯𑁂𑀤𑀦𑀸𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺𑀁𑀯𑀸. 𑀅𑀬𑀜𑁆𑀘 𑀅𑀢𑁆𑀣𑁄 𑀅𑀫𑁆𑀩𑀺𑀮𑀔𑀸𑀤𑀸𑀤𑀺𑀓𑁂 𑀤𑀺𑀲𑁆𑀯𑀸 𑀅𑀧𑀭𑀲𑁆𑀲 𑀔𑁂𑀴𑀼𑀧𑁆𑀧𑀸𑀤𑀸𑀤𑀻𑀲𑀼 𑀧𑀸𑀓𑀝𑁄𑀢𑀺.

[𑁭𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀔𑁂𑀴𑀼𑀧𑁆𑀧𑀸𑀤𑀸𑀤𑀺𑀯𑀺𑀬 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘𑀲𑀢𑀺 𑀇𑀤𑀁 𑀉𑀧𑀫𑀸 𑀫𑀢𑁆𑀢𑀁 𑀲𑀺𑀬𑀸. 𑀅𑀢𑀺𑀧𑀸𑀓𑀝𑀸𑀬𑀧𑀦 𑀨𑀲𑁆𑀲𑀧𑁆𑀧𑀯𑀢𑁆𑀢𑀺𑀬𑀸 𑀤𑀲𑁆𑀲𑀦 𑀫𑀺𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁭𑁦. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺. 𑀅𑀯𑀺𑀤𑀺𑀢𑀁𑀯𑀸 𑀆𑀭𑀫𑁆𑀫𑀡𑀭𑀲𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀸𑀦𑀁 𑀯𑀸 𑀯𑀺𑀤𑀺𑀢𑀁𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀦𑁆𑀤𑀦𑁆𑀢𑀺𑀯 𑀏𑀢𑀸𑀬 𑀲𑀢𑁆𑀢𑀸 𑀲𑀸𑀢𑀁𑀯𑀸 𑀅𑀲𑀸𑀢𑀁𑀯𑀸 𑀮𑀪𑀦𑁆𑀢𑀻𑀢𑀺 𑀯𑁂𑀤𑀦𑀸. 𑀯𑁂𑀤𑀬𑀺𑀢𑀫𑀢𑁆𑀢𑀫𑁂𑀯𑀯𑀸 𑀏𑀢𑀦𑁆𑀢𑀺 𑀯𑁂𑀤𑀦𑀸. 𑀧𑀸𑀴𑀺𑀬𑀁𑀧𑀦 𑁋

𑀯𑁂𑀤𑀬𑀢𑀺 𑀯𑁂𑀤𑀬𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀯𑁂𑀤𑀦𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀯𑁂𑀤𑀬𑀢𑀺, 𑀲𑀼𑀔𑀁𑀧𑀺 𑀯𑁂𑀤𑀬𑀢𑀺. 𑀤𑀼𑀓𑁆𑀔𑀁𑀧𑀺 𑀯𑁂𑀤𑀬𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁𑀧𑀺 𑀯𑁂𑀤𑀬𑀢𑀻𑀢𑀺 𑀯𑀼𑀢𑁆𑀢𑀁.

𑀦𑀦𑀼 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀧𑁆𑀧 𑀓𑀢𑀺𑀓𑀸𑀏𑀯𑀸𑀢𑀺 𑀢𑁂𑀧𑀺 𑀯𑁂𑀤𑀦𑀸𑀦𑀸𑀫 𑀲𑀺𑀬𑀼𑀦𑁆𑀢𑀺. 𑀦𑀲𑀺𑀬𑀼𑀁. 𑀢𑁂𑀳𑀺 𑀓𑀺𑀘𑁆𑀘𑀦𑁆𑀢𑀭𑀩𑁆𑀬𑀸𑀯𑀝𑀸 𑀳𑁄𑀦𑁆𑀢𑀺. 𑀆𑀭𑀫𑁆𑀫𑀡𑀭𑀲𑀁 𑀉𑀚𑀼𑀁 𑀅𑀦𑀼𑀪𑀯𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀯 𑀏𑀓𑀤𑁂𑀲𑀫𑀢𑁆𑀢𑁂𑀦 𑀅𑀦𑀼𑀪𑀯𑀦𑁆𑀢𑀺. 𑀯𑁂𑀤𑀦𑀸𑀬𑁂𑀯𑀧𑀦 𑀅𑀦𑀜𑁆𑀜𑀓𑀺𑀘𑁆𑀘𑀢𑀸𑀬 𑀅𑀦𑀼𑀪𑀯𑀦𑀓𑀺𑀘𑁆𑀘𑁂 𑀆𑀥𑀺𑀧𑀘𑁆𑀘𑀬𑁄𑀕𑀢𑀸𑀬𑀘 𑀇𑀲𑁆𑀲𑀭𑀪𑀸𑀯𑁂𑀦 𑀅𑀦𑀼𑀪𑀯𑀢𑀻𑀢𑀺 𑀲𑀸𑀏𑀯 𑀯𑁂𑀤𑀦𑀸𑀦𑀸𑀫 𑀪𑀯𑀺𑀢𑀼𑀁 𑀅𑀭𑀳𑀢𑀻𑀢𑀺. 𑀏𑀯𑀜𑁆𑀘𑀓𑀢𑁆𑀯𑀸 𑀭𑀸𑀚𑀕𑁆𑀕𑀪𑁄𑀚𑀦 𑀭𑀲𑀸𑀦𑀼𑀪𑀯𑀦𑁂 𑀢𑁂𑀲𑀁 𑀲𑀽𑀤𑀲𑀤𑀺𑀲𑀢𑀸 𑀯𑁂𑀤𑀦𑀸𑀬𑀏𑀯𑀘 𑀭𑀸𑀚𑀲𑀤𑀺𑀲𑀢𑀸 𑀯𑀼𑀢𑁆𑀢𑀸𑀢𑀺.

𑁭𑁧. 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸. 𑀧𑀼𑀦 𑀚𑀸𑀦𑀦𑀢𑁆𑀣𑀁 𑀲𑀜𑁆𑀜𑀸𑀡𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀧𑀼𑀩𑁆𑀩𑁂 𑀕𑀳𑀺𑀢𑀲𑀜𑁆𑀜𑀸𑀦𑁂𑀦 𑀲𑀜𑁆𑀚𑀸𑀦𑀦𑀓𑀸𑀮𑁂𑀧𑀺 𑀧𑀼𑀦 𑀚𑀸𑀦𑀦𑀢𑁆𑀣𑀁 𑀲𑀜𑁆𑀜𑀸𑀡𑀁 𑀓𑀭𑁄𑀢𑀺𑀬𑁂𑀯𑀸𑀢𑀺. 𑀲𑀸𑀳𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀣𑀺𑀭𑀲𑀜𑁆𑀜𑀸𑀪𑀸𑀯𑀁 𑀧𑀢𑁆𑀯𑀸 𑀬𑀸𑀯𑀢𑀸𑀬𑀼𑀓𑀁𑀧𑀺 𑀪𑀯𑀦𑁆𑀢𑀭𑀁 𑀧𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀅𑀧𑁆𑀧𑀫𑀼𑀝𑁆𑀞𑀪𑀸𑀯𑀁 𑀲𑀸𑀥𑁂𑀢𑀺. 𑀫𑀺𑀘𑁆𑀙𑀸 𑀪𑀺𑀦𑀺𑀯𑁂𑀲𑀲𑀜𑁆𑀜𑀸𑀪𑀸𑀯𑀁 𑀧𑀢𑁆𑀯𑀸𑀘 𑀇𑀫𑁂 𑀲𑀢𑁆𑀢𑁂 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑁂𑀳𑀺𑀧𑀺 𑀩𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀓𑀭𑁄𑀢𑀻𑀢𑀺. 𑀢𑀣𑀸𑀳𑀺 𑀲𑀸 𑀧𑀼𑀦 𑀲𑀜𑁆𑀚𑀸𑀦𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑀓𑀭𑀡𑁂 𑀤𑀸𑀭𑀼𑀢𑀘𑁆𑀙𑀓𑀲𑀤𑀺𑀲𑀸𑀢𑀺𑀘. 𑀬𑀣𑀸𑀕𑀳𑀺𑀢 𑀦𑀺𑀫𑀺𑀢𑁆𑀢𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀓𑀭𑀡𑁂 𑀳𑀢𑁆𑀣𑀺𑀤𑀲𑁆𑀲𑀓 𑀅𑀦𑁆𑀥𑀲𑀤𑀺𑀲𑀸𑀢𑀺𑀘. 𑀉𑀧𑀝𑁆𑀞𑀺𑀢𑀯𑀺𑀲𑀬𑀕𑁆𑀕𑀳𑀡𑁂 𑀢𑀺𑀡𑀧𑀼𑀭𑀺𑀲𑀓𑁂𑀲𑀼 𑀫𑀺𑀕𑀧𑁄𑀢𑀓𑀲𑀤𑀺𑀲𑀸𑀢𑀺𑀘 𑀯𑀼𑀢𑁆𑀢𑀸𑀢𑀺. 𑀧𑀸𑀴𑀺𑀬𑀁𑀧𑀦 𑁋

𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀻𑀢𑀺𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀜𑁆𑀚𑀸𑀦𑀸𑀢𑀺. 𑀦𑀻𑀮𑀁𑀧𑀺 𑀲𑀜𑁆𑀚𑀸𑀦𑀸𑀢𑀺. 𑀧𑀻𑀢𑀓𑀁𑀧𑀺 𑀲𑀜𑁆𑀚𑀸𑀦𑀸𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺.

𑁭𑁨. 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀯𑀸 𑀓𑀺𑀘𑁆𑀘𑁂𑀯𑀸 𑀅𑀪𑀺𑀲𑀦𑁆𑀤𑀳𑀢𑀺 𑀧𑀼𑀦𑀧𑁆𑀧𑀼𑀦𑀁 𑀖𑀝𑁂𑀢𑀺, 𑀢𑀢𑁆𑀣 𑀧𑀩𑀦𑁆𑀥𑀯𑀲𑁂𑀦 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀓𑀧𑁆𑀧𑁂𑀢𑀺 𑀯𑀸 𑀢𑁂. 𑀲𑀁𑀯𑀺𑀤𑀳𑀢𑀺 𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑀸𑀬𑀯𑀸 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀆𑀬𑀽𑀳𑀢𑀺𑀯𑀸 𑀢𑁂. 𑀆𑀭𑀫𑁆𑀫𑀡𑁂 𑀲𑀫𑁆𑀧𑀺𑀡𑁆𑀟𑁂𑀢𑀺 𑀏𑀓𑀢𑁄 𑀲𑀫𑁄 𑀲𑀭𑀦𑁆𑀢𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀳𑀺 𑀲𑀸 𑀆𑀬𑀽𑀳𑀦𑀭𑀲𑀸𑀳𑀺𑀘 𑀲𑀁𑀯𑀺𑀥𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺𑀘 𑀯𑀼𑀢𑁆𑀢𑀸. 𑀢𑀸𑀬𑀳𑀺 𑀢𑀲𑁆𑀫𑀺𑀁 𑀦𑀺𑀭𑀦𑁆𑀢𑀭𑀁 𑀉𑀲𑁆𑀲𑀼𑀓𑁆𑀓𑀦 𑀩𑁆𑀬𑀸𑀧𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀢𑀁 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀼𑀭𑀼𑀫𑀸𑀦𑀸 𑀢𑀲𑁆𑀫𑀺𑀁 𑀢𑀣𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦𑁂𑀯 𑀲𑀸 𑀲𑀓𑀺𑀘𑁆𑀘 𑀧𑀭𑀓𑀺𑀘𑁆𑀘 𑀲𑀸𑀥𑀓 𑀚𑁂𑀝𑁆𑀞𑀲𑀺𑀲𑁆𑀲 𑀫𑀳𑀸𑀯𑀟𑁆𑀠𑀓𑀺 𑀆𑀤𑀺𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀸𑀢𑀺.

[𑁭𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀘𑁂𑀢𑁂𑀢𑀺 𑀲𑀗𑁆𑀔𑀢𑀸𑀪𑀺𑀲𑀗𑁆𑀔𑀭𑀡𑁂 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀢𑀻𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀲𑀸𑀥𑀦𑀢𑁆𑀣𑀁 𑀬𑀁 𑀯𑀼𑀢𑁆𑀢𑀁 ‘‘𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁂 𑀲𑀗𑁆𑀔𑀸 𑀭𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑁂𑀦 𑀲𑀗𑁆𑀔𑀢𑀫𑀢𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀢𑀺 𑀯𑀢𑁆𑀯𑀸’’𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁂 𑀲𑀗𑁆𑀔𑀢𑀫 𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀺. 𑀔𑀦𑁆𑀥𑀲𑀁𑀬𑀼𑀢𑁆𑀢𑀓𑁂 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺.

𑁭𑁩. 𑀏𑀓𑀢𑁆𑀢𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑁄 𑀅𑀕𑁆𑀕𑁄 𑀓𑁄𑀝𑁆𑀞𑀸𑀲𑁄 𑀓𑁄𑀝𑀺 𑀯𑀸 𑀏𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀁. 𑀘𑀺𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸. 𑀆𑀭𑀫𑁆𑀫𑀡𑀜𑁆𑀳𑀺 𑀦𑀸𑀫 𑀏𑀓𑀁𑀧𑀺 𑀦𑀸𑀦𑀸𑀲𑀪𑀸𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀏𑀓𑀲𑁆𑀲𑀧𑀺 𑀦𑀸𑀦𑀸𑀲𑀪𑀸𑀯𑁂𑀲𑀼 𑀯𑀺𑀓𑁆𑀔𑁂𑀧𑀁 𑀅𑀧𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀪𑀸𑀯𑁂 𑀔𑀡𑀫𑀢𑁆𑀢𑀁𑀧𑀺 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀬𑁄𑀦𑀺𑀘𑁆𑀘𑀮𑀸𑀓𑀸𑀭𑁄 𑀅𑀢𑁆𑀣𑀺 𑀅𑀬𑀁 𑀢𑀲𑁆𑀫𑀺𑀁 𑀏𑀓𑀕𑁆𑀕𑀸𑀪𑀺𑀥𑀸𑀦𑀲𑁆𑀲 𑀏𑀓𑀕𑁆𑀕𑀩𑀼𑀤𑁆𑀥𑀺𑀬𑀸𑀘 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀕𑀬𑁆𑀳𑀢𑀻𑀢𑀺. 𑀢𑁂 𑀦𑁂𑀯 𑀳𑀺 𑀲𑀸 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀻𑀦𑀁 𑀞𑀺𑀢𑀺𑀯𑀺𑀬 𑀘𑁂𑀢𑀲𑁄 𑀞𑀺𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀢𑀺 𑀯𑀼𑀢𑁆𑀢𑀸.

[𑁭𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀏𑀓𑀁 𑀆𑀭𑀫𑁆𑀫𑀡𑀁 𑀅𑀕𑁆𑀕𑀁 𑀇𑀫𑀲𑁆𑀲𑀸𑀢𑀺 𑀏𑀓𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀧𑀺 𑀅𑀕𑁆𑀕𑀲𑀤𑁆𑀤𑁄 𑀓𑁄𑀝𑁆𑀞𑀸𑀲𑁂𑀯𑀸 𑀓𑁄𑀝𑀺𑀬𑀁𑀯𑀸 𑀧𑀯𑀢𑁆𑀢𑁄𑀢𑀺 𑀬𑀼𑀢𑁆𑀢𑁄. 𑀓𑁂𑀘𑀺𑀧𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀦 𑀳𑀺 𑀅𑀕𑁆𑀕𑀲𑀤𑁆𑀤𑁄 𑀆𑀭𑀫𑁆𑀫𑀡𑀧𑀭𑀺𑀬𑀸𑀬𑁄 𑀓𑀢𑁆𑀣𑀘𑀺 𑀤𑀺𑀝𑁆𑀞𑁄𑀢𑀺.

𑁭𑁪. 𑀚𑀻𑀯𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀥𑀫𑁆𑀫𑀸 𑀏𑀢𑁂𑀦𑀸𑀢𑀺 𑀚𑀻𑀯𑀺𑀢𑀁. 𑀇𑀦𑁆𑀤𑁄𑀢𑀺 𑀇𑀲𑁆𑀲𑀭𑁄. 𑀇𑀥 𑀧𑀦 𑀇𑀲𑁆𑀲𑀭𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀇𑀦𑁆𑀤𑀁 𑀇𑀲𑁆𑀲𑀭𑀪𑀸𑀯𑀁 𑀓𑀸𑀭𑁂𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀁. 𑀚𑀻𑀯𑀺𑀢𑀜𑁆𑀘 𑀢𑀁 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀜𑁆𑀳𑀺 𑀫𑀬𑀸 𑀯𑀺𑀦𑀸 𑀢𑀼𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀚𑀻𑀯𑀦𑀓𑀺𑀘𑁆𑀘𑁂 𑀫𑀁 𑀇𑀲𑁆𑀲𑀭𑀁 𑀓𑀭𑁄𑀣𑀸𑀢𑀺 𑀯𑀤𑀦𑁆𑀢𑀫𑀺𑀯 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀳𑀺 𑀢𑀁 𑀧𑀯𑀢𑁆𑀢𑀲𑀦𑁆𑀢𑀢𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 𑀘 𑀧𑀤𑀼𑀫𑀼𑀧𑁆𑀧 𑀮𑀸𑀦𑀼𑀧𑀸𑀮𑀓𑀫𑀼𑀤𑀓𑀁 𑀯𑀺𑀬𑀸𑀢𑀺𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀘𑀺𑀢𑁆𑀢𑀲𑀦𑁆𑀢𑀢𑀺 𑀧𑀯𑀢𑁆𑀢𑀲𑀦𑁆𑀢𑀢𑀺𑀦𑀸𑀫. 𑀅𑀥𑀺𑀧𑀢𑀺𑀪𑀸𑀯𑁄 𑀆𑀥𑀺𑀧𑀢𑁂𑀬𑁆𑀬𑀁. 𑀧𑀯𑀢𑁆𑀢𑀲𑀦𑁆𑀢𑀢𑀺𑀬𑀁 𑀆𑀥𑀺𑀧𑀢𑁂𑀬𑁆𑀬𑀁 𑀅𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀧𑀼𑀦𑀧𑁆𑀧𑀼𑀦𑀁 𑀦𑀺𑀭𑀼𑀤𑁆𑀥𑀁𑀧𑀺 𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀢𑀲𑁆𑀲 𑀩𑀮𑁂𑀦 𑀧𑀼𑀦𑀧𑁆𑀧𑀼𑀦𑀁 𑀚𑀻𑀯𑀦𑁆𑀢𑀁 𑀳𑀼𑀢𑁆𑀯𑀸 𑀬𑀸𑀯 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀢𑀺𑀬𑁂𑀯.

𑀦 𑀳𑀺 𑀚𑀻𑀯𑀺𑀢𑀭𑀳𑀺𑀢𑁂𑀲𑀼 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀥𑀫𑁆𑀫𑁂𑀲𑀼 𑀢𑀸𑀤𑀺𑀲𑁄 𑀧𑀯𑀢𑁆𑀢𑀲𑀦𑁆𑀢𑀢𑀺 𑀯𑀺𑀲𑁂𑀲𑁄𑀦𑀸𑀫 𑀅𑀢𑁆𑀣𑀻𑀢𑀺.

𑁭𑁫. 𑀫𑀦𑀲𑁆𑀫𑀺𑀁 𑀆𑀭𑀫𑁆𑀫𑀡𑀁 𑀅𑀲𑀼𑀜𑁆𑀜𑀁 𑀫𑀦𑀁𑀯𑀸 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀦𑀺𑀦𑁆𑀦𑀁 𑀓𑀭𑁄𑀢𑀻𑀢𑀺 𑀫𑀦𑀲𑀺𑀓𑀸𑀭𑁄. 𑀲𑁄 𑀧𑀦 𑀢𑀺𑀯𑀺𑀥𑁄 𑀯𑀻𑀣𑀺𑀧𑀝𑀺𑀧𑀸𑀤𑀓𑁄 𑀚𑀯𑀦𑀧𑀝𑀺𑀧𑀸𑀤𑀓𑁄𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄𑀢𑀺. 𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀯𑀻𑀣𑀺 𑀧𑀝𑀺𑀧𑀸𑀤𑀓𑁄 𑀦𑀸𑀫. 𑀢𑀜𑁆𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓 𑀘𑀺𑀢𑁆𑀢𑀲𑀦𑁆𑀢𑀢𑀺𑀁 𑀆𑀭𑀫𑁆𑀫𑀡𑁂 𑀧𑀝𑀺𑀧𑀸𑀤𑁂𑀢𑀺 𑀬𑁄𑀚𑁂𑀢𑀻𑀢𑀺. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀚𑀯𑀦𑀧𑀝𑀺𑀧𑀸𑀤𑀓𑁄 𑀦𑀸𑀫. 𑀢𑀁𑀧𑀺 𑀚𑀯𑀦 𑀲𑀦𑁆𑀢𑀢𑀺𑀁 𑀆𑀭𑀫𑁆𑀫𑀡𑁂 𑀧𑀝𑀺𑀧𑀸𑀤𑁂𑀢𑀺 𑀬𑁄𑀚𑁂𑀢𑀻𑀢𑀺. 𑀇𑀤𑀫𑁂𑀯 𑀤𑁆𑀯𑀬𑀁 𑀢𑀢𑁆𑀣 𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺𑀘 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀢𑀺𑀘 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀓𑀢𑀺𑀬𑀸 𑀲𑀫𑀼𑀤𑀸𑀘𑀺𑀡𑁆𑀡𑀦𑀺𑀦𑁆𑀦𑀦𑀺𑀬𑀸𑀫𑀺𑀢𑀸𑀤𑀻𑀳𑀺 𑀧𑀘𑁆𑀘𑀬𑁂 𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑀁 𑀳𑀼𑀢𑁆𑀯𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀬𑁄𑀦𑀺𑀲𑁄 𑀅𑀬𑁄𑀦𑀺𑀲𑁄𑀯𑀸 𑀆𑀭𑀫𑁆𑀫𑀡𑁂 𑀦𑀺𑀦𑁆𑀦𑀁 𑀓𑀭𑁄𑀢𑀻𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀧𑀦 𑀧𑀝𑁆𑀞𑀸𑀬 𑀧𑀯𑀢𑁆𑀢𑀫𑀸𑀦𑀸 𑀘𑀺𑀢𑁆𑀢𑀲𑀦𑁆𑀢𑀢𑀺 𑀆𑀭𑀫𑁆𑀫𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀢𑁆𑀯𑀸𑀧𑀺 𑀧𑀼𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀢𑀺 𑀅𑀲𑀢𑀺 𑀓𑀸𑀭𑀡𑀯𑀺𑀲𑁂𑀲𑁂. 𑀲𑁄 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑁄𑀦𑀸𑀫. 𑀅𑀬𑀫𑀺𑀥𑀸 𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀳𑀺 𑀆𑀭𑀫𑁆𑀫𑀡𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀁𑀯𑀸 𑀆𑀭𑀫𑁆𑀫𑀡𑁂 𑀧𑀝𑀺𑀧𑀸𑀤𑁂𑀢𑀺 𑀬𑁄𑀚𑁂𑀢𑀻𑀢𑀺. 𑀢𑀣𑀸 𑀳𑀺 𑀅𑀬𑀁 𑀲𑀸𑀭𑀡 𑀮𑀓𑁆𑀔𑀡𑁄𑀢𑀺 𑀘 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀫𑁆𑀫𑀡𑁂𑀦 𑀲𑀁𑀧𑀬𑁄𑀚𑀦𑀭𑀲𑁄𑀢𑀺𑀘 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀭𑀣𑀻𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺𑀘 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀸𑀭𑀡𑀮𑀓𑁆𑀔𑀡𑁄𑀢𑀺 𑀲𑀸𑀭𑀣𑀻𑀯𑀺𑀬 𑀅𑀲𑁆𑀲𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀚𑀼𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀧𑀯𑀢𑁆𑀢𑀬𑀦𑀮𑀓𑁆𑀔𑀡𑁄𑀢𑀺 𑀅𑀢𑁆𑀣𑁄. 𑀲𑀫𑀁 𑀥𑀸𑀭𑁂𑀦𑁆𑀢𑀺𑀢𑀺 𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀸.

𑁭𑁬. 𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑁄. 𑀢𑀣𑀸 𑀢𑀣𑀸 𑀲𑀗𑁆𑀓𑀧𑁆𑀧𑁂𑀢𑁆𑀯𑀸 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀧𑀦 𑀢𑀁 𑀓𑀣𑀸 𑀆𑀭𑁄𑀳𑀦𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀢𑀁 𑀆𑀭𑁄𑀳𑀦𑁆𑀢𑀺. 𑀢𑀤𑀸 𑀲𑁄𑀬𑁂𑀯 𑀢𑁂 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀭𑁄𑀧𑁂𑀦𑁆𑀢𑁄𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀆𑀭𑀫𑁆𑀫𑀡𑀸 𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄. 𑀭𑀸𑀚𑀯𑀮𑁆𑀮𑀪𑀁 𑀦𑀺𑀲𑁆𑀲𑀸𑀬 𑀚𑀦𑀧𑀤𑀕𑀸𑀲𑀺𑀦𑁄 𑀭𑀸𑀚𑀕𑁂𑀳𑀸𑀭𑁄𑀳𑀦𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀅𑀯𑀺𑀢𑀓𑁆𑀓𑀁𑀧𑀺 𑀳𑀺 𑀘𑀺𑀢𑁆𑀢𑀁 𑀲𑀯𑀺𑀢𑀓𑁆𑀓𑀥𑀫𑁆𑀫𑀲𑀦𑁆𑀢𑀸𑀦𑁂 𑀯𑀺𑀢𑀓𑁆𑀓𑁂𑀦 𑀲𑀳 𑀧𑀯𑀢𑁆𑀢𑀧𑀭𑀺𑀘𑀬 𑀩𑀮𑁂𑀦 𑀆𑀭𑁄𑀳𑀦𑀢𑁄 𑀯𑀺𑀢𑀓𑁆𑀓𑁂𑀦 𑀅𑀢𑀺𑀦𑀺𑀭𑁄𑀯𑀺𑀢𑀫𑁂𑀯𑀦𑀸𑀫 𑀳𑁄𑀢𑀻𑀢𑀺. 𑀅𑀧𑀺𑀘, 𑀅𑀯𑀺𑀢𑀓𑁆𑀓𑀁𑀧𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀁 𑀯𑀢𑁆𑀣𑀸𑀭𑀫𑁆𑀫𑀡 𑀲𑀗𑁆𑀖𑀝𑁆𑀝𑀦𑀯𑀲𑁂𑀦 𑀆𑀭𑁄𑀳𑀢𑀺. 𑀤𑀼𑀢𑀻𑀬𑀚𑁆𑀛𑀸𑀦𑀸𑀤𑀻𑀦𑀺𑀘 𑀉𑀧𑀘𑀸𑀭𑀪𑀸𑀯𑀦𑀸𑀯𑀲𑁂𑀦 𑀆𑀭𑁄𑀳𑀦𑁆𑀢𑀺. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀧𑀦 𑀓𑀺𑀁𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀬𑀸𑀢𑀺 𑀯𑀢𑁆𑀯𑀸 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀁𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀆𑀭𑀼𑀳𑀢𑀺𑀬𑁂𑀯. 𑀢𑀲𑁆𑀲 𑀧𑀦 𑀦𑀺𑀘𑁆𑀘𑀁 𑀲𑀳𑀸𑀬𑁄 𑀫𑀦𑀲𑀺𑀓𑀸𑀭𑁄. 𑀢𑀲𑁆𑀫𑀺𑀜𑁆𑀳𑀺 𑀅𑀲𑀢𑀺 𑀢𑀁 𑀦𑀺𑀬𑀸𑀫𑀓𑀭𑀳𑀺 𑀢𑀸 𑀦𑀸𑀯𑀸𑀯𑀺𑀬 𑀬𑀁𑀯𑀸𑀢𑀁𑀯𑀸 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀬𑁆𑀬𑀸𑀢𑀺. 𑀇𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀁 𑀫𑀦𑀲𑀺𑀓𑀸𑀭𑀲𑀳𑀸𑀬𑀁 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀯𑀺𑀚𑀸𑀦𑀦𑀲𑀢𑁆𑀢𑀺𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀧𑀦 𑀘𑀺𑀢𑁆𑀢𑀁𑀧𑀺 𑀮𑁄𑀪𑀸𑀤𑀬𑁄𑀧𑀺 𑀆𑀭𑀫𑁆𑀫𑀡𑀸𑀭𑀼𑀳𑀦𑁂 𑀣𑀸𑀫𑀯𑀢𑀸 𑀏𑀯 𑀳𑁄𑀦𑁆𑀢𑀺. 𑀧𑀸𑀧𑀲𑁆𑀫𑀺𑀁 𑀭𑀫𑀢𑁂 𑀫𑀦𑁄𑀢𑀺 𑀳𑀺 𑀯𑀼𑀢𑁆𑀢𑀁. 𑀤𑀼𑀢𑀻𑀬𑀚𑁆𑀛𑀸𑀦 𑀘𑀺𑀢𑁆𑀢𑀸𑀤𑀻𑀦𑀺𑀘 𑀫𑀦𑀲𑀺𑀓𑀸𑀭 𑀯𑀻𑀭𑀺𑀬𑀲𑁆𑀲𑀢𑀻𑀦𑀁𑀧𑀺 𑀯𑀲𑁂𑀦 𑀆𑀭𑁄𑀳𑀦𑁆𑀢𑀺. 𑀯𑀺𑀢𑀓𑁆𑀓𑁄 𑀧𑀦 𑀢𑀣𑀸 𑀢𑀣𑀸 𑀲𑀗𑁆𑀓𑀧𑁆𑀧𑁂𑀢𑁆𑀯𑀸 𑀅𑀢𑁆𑀢𑀲𑀳𑀺𑀢𑁂 𑀥𑀫𑁆𑀫𑁂 𑀆𑀭𑀫𑁆𑀫𑀡𑀸𑀭𑀼𑀳𑀦𑁂 𑀲𑀼𑀝𑁆𑀞𑀼𑀢𑀭𑀁 𑀩𑀮𑀯𑀦𑁆𑀢𑁂 𑀓𑀭𑁄𑀢𑀺. 𑀇𑀢𑀺 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀅𑀜𑁆𑀜𑁂𑀲𑀁 𑀲𑀸𑀪𑀺𑀲𑀬𑀩𑁆𑀬𑀸𑀧𑀸𑀭𑀢𑀸𑀬𑀏𑀯 𑀅𑀬𑀁 𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑀁. 𑀦𑀦𑀼 𑀅𑀜𑁆𑀜𑁂𑀧𑀺 𑀅𑀭𑀽𑀧𑀥𑀫𑁆𑀫𑀸 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀆𑀭𑀫𑁆𑀫𑀡𑀁 𑀆𑀭𑁄𑀳𑀦𑁆𑀢𑀺. 𑀅𑀣 𑀘 𑀧𑀦 𑀓𑀲𑁆𑀫𑀸 𑀅𑀬𑀫𑁂𑀯 𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀆𑀭𑀼𑀳𑀦𑀁 𑀓𑀺𑀘𑁆𑀘𑀦𑁆𑀢𑀭𑀬𑁄𑀕𑀯𑀲𑁂𑀦𑁂𑀯 𑀲𑀺𑀤𑁆𑀥𑀁. 𑀇𑀫𑀲𑁆𑀲 𑀧𑀦 𑀇𑀢𑁄 𑀅𑀜𑁆𑀜𑀁 𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀬𑀫𑁂𑀯 𑀢𑀣𑀸 𑀯𑀼𑀢𑁆𑀢𑁄𑀢𑀺.

𑁭𑁭. 𑀯𑀺𑀘𑀭𑀢𑀻𑀢𑀺 𑀯𑀺𑀘𑀸𑀭𑁄. 𑀯𑀺𑀘𑀸𑀭𑁂𑀢𑀺𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑁂𑀥𑀫𑁆𑀫𑁂, 𑀢𑁂 𑀯𑀸 𑀥𑀫𑁆𑀫𑀸 𑀯𑀺𑀘𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀺𑀘𑀸𑀭𑁄. 𑀯𑀺𑀘𑀭𑀡𑀜𑁆𑀘𑁂𑀢𑁆𑀣 𑀯𑀺𑀢𑀓𑁆𑀓𑀸 𑀭𑀼𑀴𑁆𑀳𑁂 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀲𑀪𑀸𑀯𑀸𑀓𑀸𑀭𑀧𑀸𑀢𑀼𑀪𑀸𑀯𑀢𑁆𑀣𑀁 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀫𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀦𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀘 𑀯𑀺𑀢𑀓𑁆𑀓𑁄 𑀑𑀴𑀸𑀭𑀺𑀓𑁄 𑀧𑀼𑀩𑁆𑀩𑀗𑁆𑀕𑀫𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀧𑀣𑀫𑀸𑀪𑀺𑀦𑀺𑀧𑀸𑀢𑀪𑀽𑀢𑁄𑀘 𑀳𑁄𑀢𑀻𑀢𑀺 𑀖𑀡𑁆𑀟𑀸𑀪𑀺𑀖𑀸𑀢𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄. 𑀯𑀺𑀘𑀸𑀭𑁄 𑀲𑀼𑀔𑀼𑀫𑁄 𑀅𑀦𑀼𑀘𑀭𑁄 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀦𑀼𑀩𑀦𑁆𑀥𑀦𑀪𑀽𑀢𑁄 𑀘 𑀳𑁄𑀢𑀻𑀢𑀺 𑀖𑀡𑁆𑀟𑀸𑀦𑀼𑀭𑀯𑁄𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺.

𑁭𑁮. 𑀅𑀥𑀺𑀫𑀼𑀘𑁆𑀘𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀆𑀭𑀫𑁆𑀫𑀡𑁂 𑀏𑀯𑀁 𑀦𑀼𑀔𑁄 𑀦𑁄 𑀦𑀼𑀔𑁄𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀲𑀁𑀲𑀧𑁆𑀧𑀦𑀁 𑀅𑀥𑀺𑀪𑀯𑀺𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀓𑁄 𑀫𑀼𑀘𑁆𑀘𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑁄 𑀆𑀭𑀫𑁆𑀫𑀡𑁂 𑀲𑀦𑁆𑀦𑀺𑀝𑁆𑀞𑀸𑀦𑀮𑀓𑁆𑀔𑀡𑁄𑀢𑀺 𑀘 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀇𑀦𑁆𑀤𑀔𑀻𑀮𑀲𑀤𑀺𑀲𑁄𑀢𑀺𑀘 𑀯𑀼𑀢𑁆𑀢𑁄.

𑁭𑁯. 𑀯𑀻𑀭𑀲𑁆𑀲 𑀓𑀫𑁆𑀫𑀲𑀽𑀭𑀲𑁆𑀲 𑀪𑀸𑀯𑁄 𑀓𑀫𑁆𑀫𑀯𑀸 𑀯𑀻𑀭𑀺𑀬𑀁. 𑀢𑀁𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄 𑀳𑀺 𑀓𑀫𑁆𑀫𑀲𑀽𑀭𑁄 𑀳𑁄𑀢𑀺. 𑀫𑀳𑀦𑁆𑀢𑀁𑀧𑀺 𑀓𑀫𑁆𑀫𑀁 𑀅𑀧𑁆𑀧𑀓𑀢𑁄 𑀕𑀡𑁆𑀳𑀸𑀢𑀺. 𑀤𑀼𑀓𑁆𑀓𑀭𑀁𑀧𑀺 𑀲𑀼𑀓𑀭𑀢𑁄, 𑀪𑀸𑀭𑀺𑀬𑀁𑀧𑀺 𑀅𑀪𑀸𑀭𑀺𑀬𑀢𑁄 𑀕𑀡𑁆𑀳𑀸𑀢𑀺. 𑀅𑀢𑁆𑀢𑀓𑀺𑀮𑀫𑀣𑀁 𑀦𑀕𑀡𑁂𑀢𑀺. 𑀓𑀫𑁆𑀫𑀲𑀺𑀤𑁆𑀥𑀺𑀬𑀸 𑀦𑀺𑀘𑁆𑀘𑀁 𑀧𑀕𑁆𑀕𑀳𑀺𑀢 𑀓𑀸𑀬 𑀘𑀺𑀢𑁆𑀢𑁄𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸𑀧𑀯𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄𑀘𑁂𑀯 𑀢𑀣𑀸𑀧𑀯𑀢𑁆𑀢𑀲𑁆𑀲 𑀘 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀸𑀬 𑀘𑀺𑀢𑁆𑀢𑀓𑁆𑀭𑀺𑀬𑀸𑀪𑀽𑀢𑀁 𑀳𑁄𑀢𑀻𑀢𑀺. 𑀯𑀺𑀥𑀺𑀦𑀸𑀯𑀸 𑀦𑀬𑁂𑀦 𑀉𑀧𑀸𑀬𑁂𑀦 𑀯𑀻𑀭𑀺𑀬𑀯𑀢𑁄 𑀓𑀺𑀁 𑀦𑀸𑀫𑀓𑀫𑁆𑀫𑀁 𑀦 𑀲𑀺𑀚𑁆𑀛𑀢𑀻𑀢𑀺𑀆𑀤𑀺𑀓𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑀬𑀺𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁. 𑀯𑀺𑀲𑁂𑀲𑁂𑀦𑀯𑀸 𑀲𑀓𑀧𑀭𑀳𑀺𑀢𑀳𑁂𑀢𑀼 𑀈𑀭𑀦𑁆𑀢𑀺 𑀓𑀫𑁆𑀧𑀦𑁆𑀢𑀺 𑀢𑀁 𑀲𑀫𑀗𑁆𑀕𑀺𑀦𑁄 𑀏𑀢𑁂𑀦𑀸𑀢𑀺 𑀯𑀻𑀭𑀺𑀬𑀁. 𑀏𑀢𑁆𑀣𑀘 𑀯𑀻𑀭𑀺𑀬𑀼 𑀧𑀢𑁆𑀣𑀫𑁆𑀪𑀺𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀲𑀤𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀕𑁆𑀕𑀳𑀺𑀢𑀲𑀻𑀲𑀸𑀯𑀺𑀬 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀘𑁆𑀘𑀁 𑀉𑀲𑁆𑀲𑀸𑀳𑀚𑀸𑀢𑀸𑀯 𑀳𑁄𑀦𑁆𑀢𑀺, 𑀢𑁂𑀲𑀼𑀘 𑀢𑀣𑀸𑀳𑁄𑀦𑁆𑀢𑁂𑀲𑀼 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀸𑀧𑀺 𑀅𑀢𑁆𑀢𑀦𑁄𑀯𑀸 𑀧𑀭𑁂𑀲𑀁𑀯𑀸 𑀳𑀺𑀢𑀳𑁂𑀢𑀼 𑀦𑀺𑀘𑁆𑀘𑀁 𑀩𑁆𑀬𑀸𑀯𑀝𑀓𑀸𑀬𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀈𑀭𑀦𑁆𑀢𑀺 𑀓𑀫𑁆𑀧𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀢𑀣𑀸 𑀳𑀺 𑀢𑀁 𑀉𑀧𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀦𑁆𑀢𑀺 𑀘 𑀧𑀕𑁆𑀕𑀳𑀮𑀓𑁆𑀔𑀡𑀦𑁆𑀢𑀺 𑀘 𑀉𑀲𑁆𑀲𑀸𑀳𑀮𑀓𑁆𑀔𑀡𑀦𑁆𑀢𑀺 𑀘 𑀕𑁂𑀳𑀲𑁆𑀲 𑀣𑀽𑀡𑀽𑀧𑀢𑁆𑀣𑀫𑁆𑀪𑀦 𑀲𑀤𑀺𑀲𑀦𑁆𑀢𑀺 𑀘 𑀲𑀫𑁆𑀫𑀸 𑀆𑀭𑀤𑁆𑀥𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀦𑁆𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺.

𑁮𑁦. 𑀯𑀺𑀦𑀬𑀢𑀺 𑀓𑀸𑀬𑀘𑀺𑀢𑁆𑀢𑀁 𑀢𑀧𑁆𑀧𑁂𑀢𑀺, 𑀢𑀼𑀝𑁆𑀞𑀁 𑀲𑀼𑀳𑀺𑀢𑀁 𑀚𑀦𑁂𑀢𑀺, 𑀲𑀼𑀧𑀼𑀧𑁆𑀨𑀺𑀢𑀧𑀤𑀼𑀫𑀁𑀯𑀺𑀬𑀯𑀸 𑀯𑀟𑁆𑀠𑁂𑀢𑀻𑀢𑀺 𑀧𑀻𑀢𑀺, 𑀯𑀺𑀦𑀦𑁆𑀢𑀺𑀯𑀸 𑀏𑀢𑀸𑀬 𑀢𑀁 𑀲𑀫𑀗𑁆𑀕𑀺𑀦𑁄 𑀧𑀼𑀡𑁆𑀡𑀘𑀦𑁆𑀤𑁄𑀯𑀺𑀬 𑀯𑀺𑀭𑁄𑀘𑀫𑀸𑀦 𑀓𑀸𑀬𑀘𑀺𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀧𑀻𑀢𑀺. 𑀲𑀸 𑀧𑀜𑁆𑀘𑀯𑀺𑀥𑀸 𑀔𑀼𑀤𑁆𑀤𑀺𑀓𑀸 𑀧𑀻𑀢𑀺, 𑀔𑀡𑀺𑀓𑀸𑀧𑀻𑀢𑀺, 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺, 𑀉𑀩𑁆𑀩𑁂𑀕𑀸 𑀧𑀻𑀢𑀺, 𑀨𑀭𑀡𑀸𑀧𑀻𑀢𑀻𑀢𑀺.

𑁮𑁧. 𑀙𑀦𑁆𑀤𑀦𑀁 𑀙𑀦𑁆𑀤𑁄. 𑀇𑀘𑁆𑀙𑀸 𑀧𑀢𑁆𑀣𑀦𑀸 𑀅𑀪𑀺𑀲𑀦𑁆𑀥𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀧𑀦 𑀤𑀼𑀯𑀺𑀥𑁄 𑀢𑀡𑁆𑀳𑀸𑀙𑀦𑁆𑀤𑁄, 𑀓𑀢𑁆𑀢𑀼𑀓𑀫𑁆𑀬𑀢𑀸 𑀙𑀦𑁆𑀤𑁄𑀢𑀺. 𑀇𑀥 𑀓𑀢𑁆𑀢𑀼𑀓𑀫𑁆𑀬𑀢𑀸 𑀙𑀦𑁆𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀢𑁆𑀣𑀘 𑀓𑀢𑁆𑀢𑀼𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀻𑀢𑀺 𑀓𑀢𑁆𑀢𑀼𑀓𑀸𑀫𑁄. 𑀙𑀦𑁆𑀤𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄. 𑀢𑀲𑁆𑀲 𑀪𑀸𑀯𑁄 𑀓𑀢𑁆𑀢𑀼𑀓𑀫𑁆𑀬𑀁. 𑀢𑀤𑁂𑀯 𑀓𑀢𑁆𑀢𑀼𑀓𑀫𑁆𑀬𑀢𑀸, 𑀬𑀣𑀸 𑀤𑁂𑀯𑁄𑀬𑁂𑀯 𑀤𑁂𑀯𑀢𑀸𑀢𑀺. 𑀏𑀢𑁆𑀣𑀘 𑀓𑀢𑁆𑀢𑀼𑀲𑀤𑁆𑀤𑁄 𑀲𑀩𑁆𑀩𑁂𑀲𑀁 𑀥𑀸𑀢𑀼𑀲𑀤𑁆𑀤𑀸𑀦𑀁 𑀅𑀢𑁆𑀣𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄. 𑀢𑀲𑁆𑀫𑀸 𑀓𑀢𑁆𑀢𑀼𑀓𑀫𑁆𑀬𑀢𑀸𑀢𑀺 𑀏𑀢𑁂𑀦 𑀓𑀣𑁂𑀢𑀼𑀓𑀫𑁆𑀬𑀢𑀸 𑀘𑀺𑀦𑁆𑀢𑁂𑀢𑀼𑀓𑀫𑁆𑀬𑀢𑀸 𑀤𑀝𑁆𑀞𑀼𑀓𑀫𑁆𑀬𑀢𑀸 𑀲𑁄𑀢𑀼𑀓𑀫𑁆𑀬𑀢𑀸𑀢𑀺 𑀏𑀯𑀫𑀸𑀤𑀻𑀦𑀺 𑀲𑀩𑁆𑀩 𑀓𑁆𑀭𑀺𑀬𑀸𑀧𑀤𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄 𑀧𑀦 𑀆𑀭𑀫𑁆𑀫𑀡𑀁 𑀇𑀘𑁆𑀙𑀦𑁆𑀢𑁄𑀧𑀺 𑀢𑀡𑁆𑀳𑀸 𑀯𑀺𑀬 𑀅𑀲𑁆𑀲𑀸𑀤𑀦 𑀭𑀚𑁆𑀚𑀦 𑀮𑀕𑁆𑀕𑀦 𑀯𑀲𑁂𑀦 𑀦𑀇𑀘𑁆𑀙𑀢𑀺. 𑀬𑁂𑀦 𑀬𑁂𑀦 𑀧𑀦 𑀅𑀢𑁆𑀣𑀺𑀓𑁄 𑀳𑁄𑀢𑀺. 𑀢𑀁 𑀢𑀁 𑀅𑀢𑁆𑀣𑀁 𑀆𑀭𑀸𑀥𑁂𑀢𑀼 𑀓𑀸𑀫𑀢𑀸𑀯𑀲𑁂𑀦𑁂𑀯 𑀇𑀘𑁆𑀙𑀢𑀺. 𑀬𑀣𑀸 𑀭𑀜𑁆𑀜𑁄 𑀇𑀲𑁆𑀲𑀸𑀲𑀸 𑀥𑀦𑁂𑀦𑀯𑀸 𑀬𑀲𑁂𑀦𑀯𑀸 𑀅𑀢𑁆𑀣𑀺𑀓𑀸 𑀭𑀸𑀚𑀯𑁂𑀭𑀻𑀦𑀁 𑀯𑀺𑀚𑁆𑀛𑀦𑀯𑀲𑁂𑀦 𑀙𑀟𑁆𑀟𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀧𑀺 𑀲𑀭𑁂 𑀩𑀳𑀽 𑀇𑀘𑁆𑀙𑀦𑁆𑀢𑀺𑀬𑁂𑀯. 𑀏𑀯𑀫𑁂𑀯𑀁 𑀅𑀬𑀁𑀧𑀺 𑀧𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀬𑀼𑀢𑁆𑀢 𑀓𑀸𑀦𑀺𑀧𑀺 𑀤𑀸𑀦𑀯𑀢𑁆𑀣𑀽𑀦𑀺 𑀅𑀮𑀤𑁆𑀥𑀸𑀦𑀺𑀧𑀺 𑀮𑀤𑁆𑀥𑀼𑀁 𑀇𑀘𑁆𑀙𑀢𑀺. 𑀮𑀤𑁆𑀥𑀸𑀦𑀺𑀧𑀺 𑀭𑀓𑁆𑀔𑀺𑀢𑀼𑀁 𑀇𑀘𑁆𑀙𑀢𑀻𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀯𑀺𑀪𑀸𑀯𑀦𑀺𑀬𑀁𑀧𑀺 𑀯𑀼𑀢𑁆𑀢𑁄𑀬𑁂𑀯.

𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣

𑀤𑀸𑀦𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀓𑀸𑀮𑁂𑀧𑀺 𑀘𑁂𑀲 𑀯𑀺𑀲𑁆𑀲𑀚𑁆𑀚𑀺 𑀢𑀩𑁆𑀩𑁂𑀦 𑀢𑁂𑀦 𑀅𑀢𑁆𑀣𑀺𑀓𑁄𑀬𑁂𑀯. 𑀔𑀺𑀧𑀺𑀢𑀩𑁆𑀩𑀉𑀲𑀽𑀦𑀁 𑀕𑀳𑀡𑁂 𑀅𑀢𑁆𑀣𑀺𑀓𑁄 𑀇𑀲𑁆𑀲𑀸𑀲𑁄𑀯𑀺𑀬𑀸𑀢𑀺.

𑀢𑀢𑁆𑀣 𑀬𑀤𑀕𑁆𑀕𑁂𑀦 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀤𑀸𑀦𑀯𑀢𑁆𑀣𑀼𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸 𑀤𑀸𑀦𑀯𑀢𑁆𑀣𑀼𑀯𑀺𑀲𑁆𑀲𑀚𑁆𑀚𑀦 𑀲𑀗𑁆𑀓𑀸𑀢𑁂 𑀤𑀸𑀦𑁂 𑀲𑀗𑁆𑀕𑀳𑀺𑀢𑀸 𑀳𑁄𑀢𑀺. 𑀢𑀤𑀕𑁆𑀕𑁂𑀦 𑀢𑀲𑁆𑀲𑀸 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀬 𑀧𑀯𑀢𑁆𑀢𑀺𑀓𑀸𑀮𑁄 𑀇𑀥 𑀤𑀸𑀦𑀯𑀢𑁆𑀣𑀼 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢 𑀓𑀸𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁂𑀦𑀸𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩 𑀬𑀼𑀢𑁆𑀢𑀓𑁂𑀦. 𑀢𑁂𑀦 𑀅𑀢𑁆𑀣𑀺𑀓𑁄𑀬𑁂𑀯 𑀧𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀺𑀧𑀺𑀢𑀩𑁆𑀩𑀉𑀲𑀽𑀦𑀁 𑀕𑀳𑀡𑁂𑀢𑀺 𑀢𑁂𑀲𑀁 𑀅𑀓𑀢𑀸𑀦𑀁 𑀓𑀭𑀡𑀯𑀲𑁂𑀦 𑀅𑀮𑀤𑁆𑀥𑀸𑀦𑀁 𑀧𑀭𑀺𑀬𑁂𑀲𑀦𑀯𑀲𑁂𑀦 𑀕𑀳𑀡𑁂. 𑀏𑀢𑁆𑀣 𑀧𑀦 𑀓𑁂𑀘𑀺 𑀇𑀲𑁆𑀲𑀸𑀲𑁄 𑀉𑀲𑀽𑀦𑀺𑀔𑀺𑀧𑀺𑀢𑁆𑀯𑀸𑀧𑀺 𑀮𑀪𑀫𑀸𑀦𑁄 𑀢𑁂𑀳𑀺 𑀉𑀲𑀽𑀳𑀺 𑀅𑀢𑁆𑀣𑀺𑀓𑁄𑀬𑁂𑀯𑀸𑀢𑀺 𑀏𑀯 𑀫𑀢𑁆𑀣𑀁 𑀯𑀤𑀦𑁆𑀢𑀺. 𑀲𑁄 𑀦𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀔𑀺𑀧𑀺𑀢𑀉𑀲𑀽𑀦𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀬𑀣𑀸 𑀓𑀣𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺. 𑀢𑀣𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑁂 𑀦𑀸𑀢𑀺 𑀏𑀢𑁆𑀣𑀧𑀻𑀢𑀺. 𑀓𑁂𑀘𑀺 𑀇𑀲𑁆𑀲𑀸𑀲𑁄 𑀉𑀲𑀽𑀳𑀺 𑀅𑀦𑀢𑁆𑀣𑀺𑀓𑁄 𑀔𑀺𑀧𑀦𑁆𑀢𑁄 𑀦𑀳𑁄𑀢𑀺. 𑀅𑀢𑁆𑀣𑀺𑀓𑁄𑀬𑁂𑀯 𑀲𑀫𑀸𑀦𑁄 𑀅𑀜𑁆𑀜𑀁 𑀆𑀦𑀺𑀲𑀁𑀲𑀁 𑀇𑀘𑁆𑀙𑀦𑁆𑀢𑁄 𑀔𑀺𑀧𑀢𑀻𑀢𑀺 𑀏𑀯𑀁 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑁄𑀧𑀺 𑀦𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀉𑀲𑀽𑀳𑀺 𑀅𑀢𑁆𑀣𑀺𑀓𑁄𑀬𑁂𑀯 𑀢𑀸𑀦𑀺 𑀔𑀺𑀧𑀦𑁆𑀢𑁄 𑀇𑀲𑁆𑀲𑀸𑀲𑁄𑀯𑀺𑀬𑀸𑀢𑀺𑀯𑀼𑀢𑁆𑀢𑀁 𑀲𑀺𑀬𑀸𑀢𑀺. 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀪𑀬𑀁𑀧𑀺 𑀅𑀯𑀳𑀲𑀺𑀢𑀩𑁆𑀩𑀫𑁂𑀯 𑀳𑁄𑀢𑀻𑀢𑀺. 𑀬𑀲𑁆𑀫𑀸𑀘 𑀙𑀦𑁆𑀤𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀕𑀡𑁆𑀳𑀦𑁆𑀢𑀁 𑀙𑀦𑁆𑀤𑀯𑀲𑁂𑀦 𑀅𑀢𑀺 𑀇𑀘𑁆𑀙𑀫𑀸𑀦𑀁 𑀯𑀺𑀬 𑀯𑀺𑀮𑀼𑀧𑁆𑀧𑀫𑀸𑀦𑀁 𑀯𑀺𑀬 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀅𑀬𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀘𑁂𑀢𑀲𑁄 𑀳𑀢𑁆𑀣𑀧𑁆𑀧𑀲𑀸𑀭𑀡𑀁𑀯𑀺𑀬𑀸𑀢𑀺 𑀯𑀼𑀢𑁆𑀢𑁄. 𑀏𑀢𑁆𑀣𑀘 𑀳𑀢𑁆𑀣𑀧𑁆𑀧𑀲𑀸𑀭𑀡𑀁𑀯𑀺𑀬𑀸𑀢𑀺 𑀇𑀤𑀁 𑀅𑀪𑀽𑀢𑀧𑀭𑀺𑀓𑀧𑁆𑀧𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀘𑀺𑀢𑁆𑀢𑀲𑁆𑀲 𑀳𑀢𑁆𑀣𑁄𑀦𑀸𑀫 𑀅𑀢𑁆𑀣𑀺. 𑀅𑀢𑁆𑀣𑀯𑀺𑀲𑁂𑀲𑀧𑀸𑀓𑀝𑀢𑁆𑀣𑀁 𑀧𑀦 𑀅𑀪𑀽𑀢𑀁𑀧𑀺 𑀪𑀽𑀢𑀁 𑀯𑀺𑀬 𑀓𑀧𑁆𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘, 𑀅𑀬𑀁 𑀙𑀦𑁆𑀤𑁄𑀦𑀸𑀫 𑀣𑀸𑀫𑀧𑀢𑁆𑀢𑁄 𑀢𑀡𑁆𑀳𑀸𑀬 𑀩𑀮𑀯𑀢𑀭𑁄 𑀳𑁄𑀢𑀺. 𑀢𑀣𑀸 𑀳𑁂𑀲 𑀅𑀥𑀺𑀧𑀢𑀺𑀪𑀽𑀢𑁄 𑀇𑀤𑁆𑀥𑀺𑀧𑀸𑀤𑀪𑀽𑀢𑁄𑀘 𑀳𑁄𑀢𑀻𑀢𑀺. 𑀬𑀤𑀺 𑀳𑀺 𑀲𑁄 𑀢𑀡𑁆𑀳𑀸𑀬 𑀲𑀫𑀸𑀦𑀩𑀮𑁄 𑀲𑀺𑀬𑀸. 𑀇𑀫𑁂 𑀲𑀢𑁆𑀢𑀸 𑀢𑀡𑁆𑀳𑀸𑀬 𑀳𑀢𑁆𑀣𑁂 𑀞𑀺𑀢𑀸 𑀢𑀡𑁆𑀳𑀸 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀥𑀦𑀪𑁄𑀕𑀭𑀚𑁆𑀚𑀲𑀼𑀔𑀸𑀦𑀺𑀯𑀸 𑀤𑀺𑀩𑁆𑀩𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄𑀯𑀸 𑀙𑀟𑁆𑀟𑁂𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀢𑀼𑀁 𑀦𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺.

𑁮𑁨. 𑀲𑁄𑀪𑀡𑀸 𑀲𑁄𑀪𑀡𑁂𑀲𑀼 𑀘𑀺𑀢𑁆𑀢𑁂𑀲𑀼 𑀧𑀓𑀺𑀭𑀦𑁆𑀢𑀻𑀢𑀺 𑀧𑀓𑀺𑀡𑁆𑀡𑀸. 𑀓𑁂𑀏𑀯 𑀧𑀓𑀺𑀡𑁆𑀡𑀓𑀸. 𑀅𑀜𑁆𑀜𑁂𑀳𑀺 𑀅𑀜𑁆𑀜𑁂𑀲𑀁𑀯𑀸 𑀲𑀫𑀸𑀦𑀸 𑀅𑀜𑁆𑀜𑀲𑀫𑀸𑀦𑀸. 𑀬𑀤𑀸 𑀲𑁄𑀪𑀡𑀘𑀺𑀢𑁆𑀢𑁂𑀲𑀼 𑀬𑀼𑀢𑁆𑀢𑀸, 𑀢𑀤𑀸 𑀢𑁂𑀳𑀺 𑀅𑀲𑁄𑀪𑀡𑀢𑁄 𑀅𑀜𑁆𑀜𑁂𑀳𑀺 𑀲𑀫𑀸𑀦𑀸. 𑀬𑀤𑀸 𑀅𑀲𑁄𑀪𑀡𑀘𑀺𑀢𑁆𑀢𑁂𑀲𑀼 𑀬𑀼𑀢𑁆𑀢𑀸, 𑀢𑀤𑀸 𑀢𑁂𑀳𑀺 𑀲𑁄𑀪𑀡𑀢𑁄 𑀅𑀜𑁆𑀜𑁂𑀳𑀺 𑀲𑀫𑀸𑀦𑀸 𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑀲𑀫𑀸𑀦𑀭𑀸𑀲𑀺𑀫𑁆𑀳𑀺 𑀧𑀭𑀫𑀢𑁆𑀣𑀤𑀻𑀧𑀦𑀸.

𑁮𑁩. 𑀇𑀤𑀸𑀦𑀺 𑀅𑀓𑀼𑀲𑀮𑀭𑀸𑀲𑀺𑀁 𑀤𑀲𑁆𑀲𑁂𑀦𑁆𑀢𑁄 𑀫𑁄𑀳𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀫𑀼𑀬𑁆𑀳𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺𑀯𑀸 𑀫𑁄𑀳𑁄. 𑀫𑀼𑀬𑁆𑀳𑀦𑀫𑀢𑁆𑀢𑀁𑀯𑀸 𑀫𑁄𑀳𑁄, 𑀘𑀢𑀼𑀭𑀗𑁆𑀕𑀢𑀫𑀲𑁆𑀲 𑀯𑀺𑀬 𑀘𑀓𑁆𑀔𑀼𑀲𑁆𑀲 𑀲𑀩𑁆𑀩𑀲𑁄 𑀓𑀮𑁆𑀬𑀸𑀡𑀧𑀓𑁆𑀔𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀅𑀦𑁆𑀥𑀪𑀸𑀯𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀧𑀧𑀓𑁆𑀔𑀁 𑀧𑀦 𑀧𑀢𑁆𑀯𑀸 𑀲𑁄 𑀜𑀸𑀡𑀕𑀢𑀺𑀓𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑁂𑀲 𑀧𑀸𑀴𑀺𑀬𑀁 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀲𑀼𑀘 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀧𑀸𑀧𑀓𑁆𑀭𑀺𑀬𑀸𑀲𑀼 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦𑀧𑀯𑀢𑁆𑀢𑁄 𑀫𑁄𑀳𑁄𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀬𑀘 𑀅𑀧𑁆𑀧𑀝𑀺𑀧𑀢𑁆𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀯𑀺𑀥𑀪𑀸𑀯𑁄 𑀯𑀼𑀢𑁆𑀢𑁄. 𑀏𑀢𑁆𑀣𑀘 𑀅𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀓𑀮𑁆𑀬𑀸𑀡𑀧𑀓𑁆𑀔𑁂 𑀅𑀜𑁆𑀜𑀸𑀡𑀫𑁂𑀯 𑀯𑀼𑀘𑁆𑀘𑀢𑀺. 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀢𑀺 𑀧𑀸𑀧𑀧𑀓𑁆𑀔𑁂 𑀫𑀺𑀘𑁆𑀙𑀸𑀜𑀸𑀡𑀫𑁂𑀯 𑀯𑀼𑀘𑁆𑀘𑀢𑀻𑀢𑀺, 𑀢𑀣𑀸 𑀳𑀺 𑀧𑀸𑀧𑀧𑀓𑁆𑀔𑀁 𑀧𑀢𑁆𑀯𑀸 𑀧𑀜𑁆𑀘𑀥𑀫𑁆𑀫𑀸 𑀜𑀸𑀡𑀕𑀢𑀺𑀓𑀸 𑀳𑁄𑀦𑁆𑀢𑀺 𑀫𑁄𑀳𑁄, 𑀮𑁄𑀪𑁄, 𑀤𑀺𑀝𑁆𑀞𑀺, 𑀯𑀺𑀢𑀓𑁆𑀓𑁄, 𑀯𑀺𑀘𑀸𑀭𑁄𑀢𑀺. 𑀘𑀺𑀢𑁆𑀢𑁂𑀦 𑀧𑀦 𑀲𑀤𑁆𑀥𑀺𑀁 𑀙𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀢𑁂𑀳𑀺 𑀧𑀓𑀢𑀺𑀬𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑁂𑀲𑀼 𑀲𑀼𑀢𑀧𑀭𑀺𑀬𑀢𑁆𑀢𑀺𑀲𑀫𑁆𑀧𑀦𑁆𑀦𑁂𑀲𑀼𑀘 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑁆𑀭𑀺𑀬𑀸𑀲𑀼 𑀢𑀁 𑀢𑀁 𑀉𑀧𑀸𑀬𑀤𑀲𑁆𑀲𑀦𑀯𑀲𑁂𑀦 𑀢𑁂𑀲𑀁 𑀢𑀢𑁆𑀣 𑀙𑁂𑀓𑀪𑀸𑀯𑀁 𑀧𑀝𑀺𑀩𑀮𑀪𑀸𑀯𑀜𑁆𑀘 𑀲𑀸𑀥𑁂𑀦𑁆𑀢𑀻𑀢𑀺.

𑁮𑁪. 𑀦𑀳𑀺𑀭𑀺𑀬𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀦𑀮𑀚𑁆𑀚𑀢𑀺 𑀦𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀳𑀺𑀭𑀻. 𑀳𑀺𑀭𑀺𑀧𑁆𑀧𑀝𑀺𑀧𑀓𑁆𑀔𑀸𑀯𑀸 𑀅𑀳𑀺𑀭𑀻, 𑀲𑀸𑀏𑀯 𑀅𑀳𑀺𑀭𑀺𑀓𑀁. 𑀢𑀜𑁆𑀳𑀺 𑀧𑀸𑀧 𑀓𑁆𑀭𑀺𑀬𑀸𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀲𑀼 𑀳𑀺𑀭𑀺𑀬𑀸 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀢𑀸𑀲𑀼 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀳𑀺 𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀅𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀦𑁆𑀢𑀺𑀘 𑀅𑀮𑀚𑁆𑀚𑀸𑀮𑀓𑁆𑀔𑀡𑀦𑁆𑀢𑀺𑀘 𑀯𑀼𑀢𑁆𑀢𑀁.

𑁮𑁫. 𑀦𑀑𑀢𑁆𑀢𑀧𑁆𑀧𑀢𑀻𑀢𑀺 𑀅𑀦𑁄𑀢𑁆𑀢𑀧𑁆𑀧𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀦𑀪𑀸𑀬𑀢𑀺 𑀦𑀉𑀢𑁆𑀭𑀲𑀢𑀻𑀢𑀺 𑀅𑀢𑁆𑀣𑁄. 𑀑𑀢𑁆𑀢𑀧𑁆𑀧𑀧𑁆𑀧𑀝𑀺𑀧𑀓𑁆𑀔𑀁𑀯𑀸 𑀅𑀦𑁄𑀢𑁆𑀢𑀧𑁆𑀧𑀁. 𑀢𑀁𑀧𑀺 𑀳𑀺 𑀢𑀸𑀲𑀼 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀲𑀼 𑀑𑀢𑁆𑀢𑀧𑁆𑀧𑀲𑁆𑀲 𑀑𑀓𑀸𑀲𑀁 𑀅𑀤𑀢𑁆𑀯𑀸 𑀘𑀺𑀢𑁆𑀢𑀁 𑀢𑀸𑀲𑀼 𑀅𑀲𑀸𑀭𑀚𑁆𑀚𑀫𑀸𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀳𑁂𑀢𑀁 𑀓𑀸𑀬𑀤𑀼𑀘𑁆𑀘𑀭𑀺 𑀢𑀸𑀤𑀻𑀳𑀺 𑀅𑀲𑀸𑀭𑀚𑁆𑀚𑀮𑀓𑁆𑀔𑀡𑀦𑁆𑀢𑀺 𑀘 𑀅𑀦𑀼𑀢𑁆𑀢𑀸𑀲𑀮𑀓𑁆𑀔𑀡𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀯𑀼𑀘𑁆𑀘𑀢𑀺 𑀘 𑁋

𑀅𑀚𑁂𑀕𑀼𑀘𑁆𑀙𑀻 𑀅𑀳𑀺𑀭𑀺𑀓𑁄, 𑀧𑀸𑀧𑀸𑀕𑀽𑀣𑀸𑀯 𑀲𑀽𑀓𑀭𑁄;

𑀅𑀪𑀻𑀭𑀼𑀘 𑀅𑀦𑁄𑀢𑁆𑀢𑀧𑁆𑀧𑀻, 𑀲𑀮𑀪𑁄 𑀯𑀺𑀬 𑀧𑀸𑀯𑀓𑀸𑀢𑀺.

𑁮𑁬. 𑀉𑀤𑁆𑀥𑀭𑀢𑀻𑀢𑀺 𑀉𑀤𑁆𑀥𑀝𑀁. 𑀧𑀸𑀲𑀸𑀡𑀧𑀺𑀝𑁆𑀞𑁂 𑀯𑀝𑁆𑀝𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞 𑀕𑁂𑀡𑁆𑀟𑀼𑀓𑁄 𑀯𑀺𑀬 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁, 𑀉𑀤𑁆𑀥𑀝𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀭𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁄 𑀥𑀫𑁆𑀫𑁄 𑀉𑀤𑁆𑀥𑀘𑁆𑀘𑀁. 𑀢𑀁 𑀧𑀦 𑀯𑀸𑀢𑁂𑀭𑀺𑀢𑀁 𑀚𑀮𑀁 𑀯𑀺𑀬 𑀥𑀚𑀧𑀝𑀸𑀓𑀸 𑀯𑀺𑀬𑀘 𑀤𑀝𑁆𑀞𑀩𑁆𑀩𑀁.

𑁮𑁭. 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄, 𑀮𑀼𑀩𑁆𑀪𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀏𑀢𑁂 𑀦𑀸𑀢𑀺 𑀮𑁄𑀪𑁄, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯𑀯𑀸 𑀏𑀢𑀦𑁆𑀢𑀺 𑀮𑁄𑀪𑁄. 𑀏𑀢𑁆𑀣𑀘 𑀮𑀼𑀩𑁆𑀪𑀦𑀁𑀦𑀸𑀫 𑀆𑀭𑀫𑁆𑀫𑀡𑀸𑀪𑀺𑀲𑀚𑁆𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁄𑀧𑀦 𑀆𑀭𑀫𑁆𑀫𑀡𑁂 𑀮𑀕𑁆𑀕 𑀦𑀝𑁆𑀞𑁂𑀦 𑀫𑀓𑁆𑀓𑀝𑀸𑀮𑁂𑀧𑁄𑀯𑀺𑀬 𑀅𑀪𑀺𑀓𑀗𑁆𑀔𑀝𑁆𑀞𑁂𑀦 𑀢𑀢𑁆𑀢𑀓𑀧𑀸𑀮𑁂 𑀔𑀺𑀢𑁆𑀢𑀫𑀁𑀲 𑀧𑁂𑀲𑀺 𑀯𑀺𑀬 𑀅𑀧𑀭𑀺𑀘𑀸𑀕𑀝𑁆𑀞𑁂𑀦 𑀢𑁂𑀮𑀜𑁆𑀚𑀦 𑀭𑀸𑀕𑁄𑀯𑀺𑀬 𑀢𑀡𑁆𑀳𑀸𑀦𑀤𑀺𑀪𑀸𑀯𑁂𑀦 𑀯𑀟𑁆𑀠𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀅𑀧𑀸𑀬𑀸𑀯𑀳𑀝𑁆𑀞𑁂𑀦 𑀲𑀩𑁆𑀩𑀸𑀦𑀺 𑀲𑀼𑀓𑁆𑀔𑀓𑀝𑁆𑀞 𑀲𑀸𑀔𑀸𑀧𑀮𑀸𑀲 𑀢𑀺𑀡𑀓𑀲𑀝𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑀁 𑀯𑀳𑀦𑁆𑀢𑀻 𑀲𑀻𑀖𑀢𑁄𑀢𑀸 𑀦𑀤𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁮𑁮. 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺. 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀪𑀸𑀯𑁂𑀲𑀼 𑀜𑀸𑀡𑀤𑀲𑁆𑀲𑀦𑀁 𑀯𑀺𑀬 𑀢𑁂𑀲𑀫𑁂𑀯 𑀅𑀬𑀸𑀣𑀸𑀯𑀲𑀪𑀸𑀯𑁂𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀳𑀺 𑀏𑀓𑀘𑁆𑀘𑀸𑀦𑀁 𑀧𑀡𑁆𑀟𑀺𑀢𑀫𑀸𑀦𑀻𑀦𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀩𑀳𑀼𑀮𑀸𑀦𑀁 𑀉𑀧𑁆𑀧𑀦𑁆𑀦𑀸 𑀣𑀸𑀫𑀕𑀢𑀸 𑀅𑀬𑀸𑀣𑀸𑀯𑀧𑀓𑁆𑀔𑁂 𑀧𑀝𑀺𑀯𑁂𑀥𑀜𑁆𑀜𑀸𑀡𑀕𑀢𑀺𑀓𑀸 𑀳𑁄𑀢𑀻𑀢𑀺. 𑀲𑀸𑀧𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀮𑀓𑁆𑀔𑀡𑀸 𑀧𑀭𑀫𑀁𑀯𑀚𑁆𑀚𑀦𑁆𑀢𑀺 𑀤𑀝𑁆𑀞𑀩𑁆𑀩𑀸.

𑁮𑁯. 𑀫𑀜𑁆𑀜𑀢𑀻𑀢𑀺 𑀫𑀸𑀦𑁄. 𑀅𑀳𑀁 𑀮𑁄𑀓𑁂 𑀏𑀓𑁄 𑀧𑀼𑀕𑁆𑀕𑀮𑁄 𑀅𑀲𑁆𑀫𑀺. 𑀦 𑀓𑀝𑁆𑀞𑀓𑀮𑀺𑀗𑁆𑀕𑀭𑁄𑀯𑀺𑀬 𑀅𑀯𑀫𑀜𑁆𑀜𑀦𑀸𑀭𑀳𑁄𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀤𑀴𑁆𑀳𑀁 𑀧𑀕𑁆𑀕𑀳𑁂𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁄𑀧𑀦 𑀚𑀸𑀢𑀺 𑀓𑀼𑀮𑀥𑀦 𑀪𑁄𑀕 𑀬𑀲 𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀘𑁂𑀯 𑀲𑀻𑀮 𑀲𑀼𑀢 𑀮𑀸𑀪𑀲𑀓𑁆𑀓𑀸𑀭𑀸 𑀤𑀻𑀳𑀺𑀘 𑀕𑀼𑀡𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀅𑀢𑀺𑀭𑁂𑀓𑀢𑀭𑀁 𑀯𑀤𑁆𑀥𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀚𑀦𑀫𑀚𑁆𑀛𑁂 𑀓𑁂𑀢𑀼𑀁𑀯𑀺𑀬 𑀅𑀘𑁆𑀘𑀼𑀕𑁆𑀕𑀢𑀁 𑀫𑀜𑁆𑀜𑀢𑀺. 𑀢𑀲𑁆𑀫𑀸 𑀲𑁄 𑀉𑀦𑁆𑀦𑀢𑀺𑀮𑀓𑁆𑀔𑀡𑁄𑀢𑀺𑀘 𑀉𑀫𑁆𑀫𑀸𑀤𑁄𑀯𑀺𑀬𑀸𑀢𑀺𑀘 𑀯𑀼𑀢𑁆𑀢𑁄.

𑁯𑁦. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀲𑁄𑀧𑀦 𑀘𑀡𑁆𑀟𑀺𑀓𑁆𑀓𑀝𑁆𑀞𑁂𑀦 𑀧𑀳𑀢𑀸 𑀲𑀺𑀯𑀺𑀲𑁄𑀯𑀺𑀬 𑀯𑀺𑀲𑀧𑁆𑀧𑀦𑀝𑁆𑀞𑁂𑀦 𑀅𑀲𑀦𑀺𑀧𑀸𑀢𑁄𑀯𑀺𑀬 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬 𑀤𑀳𑀦𑀝𑁆𑀞𑁂𑀦 𑀤𑀸𑀯𑀕𑁆𑀕𑀺𑀯𑀺𑀬 𑀤𑀼𑀲𑁆𑀲𑀦𑀝𑁆𑀞𑁂𑀦 𑀮𑀤𑁆𑀥𑁄𑀓𑀸𑀲𑁄 𑀲𑀧𑀢𑁆𑀢𑁄𑀯𑀺𑀬 𑀲𑀩𑁆𑀩𑀲𑁄 𑀅𑀳𑀺𑀢𑀭𑀸𑀲𑀺 𑀪𑀸𑀯𑀝𑁆𑀞𑁂𑀦 𑀯𑀺𑀲 𑀲𑀁𑀲𑀝𑁆𑀞 𑀧𑀽𑀢𑀺𑀫𑀼𑀢𑁆𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁯𑁧. 𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀸. 𑀧𑀭𑀲𑀫𑁆𑀧𑀢𑁆𑀢𑀺𑀁 𑀉𑀲𑁆𑀲𑀽𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀳𑀺 𑀧𑀭𑁂𑀲𑀁 𑀧𑀓𑀢𑀺𑀬𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸𑀯𑀸 𑀦𑀲𑀳𑀢𑀺. 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑀢𑁆𑀢𑀺𑀁 𑀇𑀘𑁆𑀙𑀢𑀺 𑀆𑀓𑀗𑁆𑀔𑀢𑀺. 𑀅𑀲𑀼𑀓𑁄 𑀇𑀤𑀁𑀦𑀸𑀫 𑀮𑀪𑀺𑀲𑁆𑀲𑀢𑀻𑀢𑀺 𑀲𑀼𑀢𑁆𑀯𑀸𑀧𑀺 𑀦𑀲𑀳𑀢𑀺. 𑀢𑀲𑁆𑀲 𑀅𑀮𑀸𑀪𑀁 𑀇𑀘𑁆𑀙𑀢𑀺 𑀆𑀓𑀗𑁆𑀔𑀢𑀺. 𑀢𑀲𑁆𑀫𑀸 𑀲𑀸 𑀧𑀭𑀲𑀫𑁆𑀧𑀢𑁆𑀢𑀻𑀦𑀁 𑀉𑀲𑁆𑀲𑀽𑀬𑀦𑀮𑀓𑁆𑀔𑀡𑀸𑀢𑀺 𑀯𑀼𑀢𑁆𑀢𑀸.

𑁯𑁨. 𑀫𑀫 𑀏𑀯 𑀇𑀤𑀁 𑀕𑀼𑀡𑀚𑀸𑀢𑀁𑀯𑀸 𑀯𑀢𑁆𑀣𑀼𑀯𑀸 𑀳𑁄𑀢𑀼. 𑀫𑀸 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀳𑁂𑀢𑀼 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀯𑀲𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀘𑁆𑀙𑀭𑀁, 𑀢𑀣𑀸 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀫𑀘𑁆𑀙𑀭𑀲𑁆𑀲 𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀇𑀤𑀁𑀘 𑀇𑀲𑁆𑀲𑀸 𑀯𑀺𑀬 𑀤𑀼𑀯𑀺𑀥𑀁 𑀅𑀢𑁆𑀢𑀦𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺 𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺 𑀯𑀲𑁂𑀦. 𑀢𑀢𑁆𑀣 𑀧𑀓𑀢𑀺𑀬𑀸 𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀬𑀁 𑀢𑀸𑀯 𑀢𑀁 𑀧𑀭𑁂𑀳𑀺 𑀲𑀸 𑀥𑀸𑀭𑀡𑀁𑀯𑀸 𑀬𑁂𑀦 𑀓𑁂𑀦𑀘𑀺𑀯𑀸 𑀓𑀸𑀭𑀡𑁂𑀦 𑀅𑀢𑁆𑀢𑀲𑀦𑁆𑀢𑀓𑀪𑀸𑀯𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀭𑁂𑀲𑀁 𑀲𑀦𑁆𑀢𑀓𑀪𑀸𑀯𑀁 𑀕𑀫𑀺𑀲𑁆𑀲𑀫𑀸𑀦𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀳𑁄𑀢𑀺, 𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀁𑀧𑀺 𑀅𑀲𑀼𑀓𑀲𑁆𑀫𑀺𑀁 𑀤𑁂𑀲𑁂 𑀯𑀸𑀓𑀸𑀮𑁂𑀯𑀸 𑀇𑀤𑀁𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀲𑀼𑀢𑁆𑀯𑀸𑀯𑀸 𑀘𑀺𑀦𑁆𑀢𑁂𑀢𑁆𑀯𑀸𑀯𑀸 𑀢𑀁 𑀅𑀢𑁆𑀢𑀦𑀸𑀯 𑀮𑀤𑁆𑀥𑀼𑀁 𑀇𑀘𑁆𑀙𑀢𑀺. 𑀅𑀜𑁆𑀜𑁂𑀲𑀁 𑀮𑀸𑀪𑀁 𑀦𑀇𑀘𑁆𑀙𑀢𑀺. 𑀅𑀜𑁆𑀜𑁂 𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀲𑀼𑀢𑁆𑀯𑀸𑀯𑀸 𑀘𑀺𑀦𑁆𑀢𑁂𑀢𑁆𑀯𑀸𑀯𑀸 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀳𑁄𑀢𑀻𑀢𑀺. 𑀢𑀣𑀸 𑀳𑁂𑀢𑀁 𑀮𑀤𑁆𑀥𑀸𑀦𑀁𑀯𑀸 𑀮𑀪𑀺𑀢𑀩𑁆𑀩𑀸𑀦𑀁𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀻𑀦𑀁 𑀦𑀺𑀕𑁆𑀕𑀼𑀳𑀦𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀮𑀪𑀺𑀢𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀁 𑀬𑀲𑁆𑀲 𑀮𑀸𑀪𑀁 𑀦𑀇𑀘𑁆𑀙𑀢𑀺. 𑀲𑁄𑀮𑀪𑀢𑀻𑀢𑀺𑀯𑀸 𑀮𑀪𑀺𑀲𑁆𑀲𑀢𑀻𑀢𑀺𑀯𑀸 𑀲𑀼𑀢𑁆𑀯𑀸𑀯𑀸 𑀘𑀺𑀦𑁆𑀢𑁂𑀢𑁆𑀯𑀸𑀯𑀸 𑀘𑀺𑀢𑁆𑀢𑀯𑀺𑀖𑀸𑀢𑁄 𑀇𑀲𑁆𑀲𑀸𑀦𑀸𑀫. 𑀬𑀁 𑀬𑀁 𑀅𑀢𑁆𑀢𑀦𑀸 𑀮𑀤𑁆𑀥𑀼𑀁 𑀇𑀘𑁆𑀙𑀢𑀺. 𑀢𑀁 𑀢𑀁 𑀅𑀢𑁆𑀢𑀦𑀸 𑀅𑀮𑀩𑁆𑀪𑀫𑀸𑀦𑀓𑀁 𑀘𑀺𑀦𑁆𑀢𑁂𑀢𑁆𑀯𑀸 𑀘𑀺𑀢𑁆𑀢𑀯𑀺𑀖𑀸𑀢𑁄 𑀫𑀘𑁆𑀙𑀭𑀺𑀬𑀁𑀦𑀸𑀫. 𑀦 𑀳𑀺 𑀏𑀢𑁂 𑀤𑁆𑀯𑁂 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁯𑁩. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸 𑀓𑀢𑀁. 𑀓𑀼𑀘𑁆𑀙𑀺𑀢𑀁 𑀓𑀢𑀦𑁆𑀢𑀺 𑀓𑀼𑀓𑀢𑀁. 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀡𑁆𑀟𑀺𑀢𑁂𑀳𑀺 𑀏𑀓𑀦𑁆𑀢𑁂𑀦 𑀦𑀺𑀦𑁆𑀤𑀺𑀢𑀩𑁆𑀩𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀣𑀢𑁄 𑀧𑀦 𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁 𑀓𑀢𑀁 𑀧𑀸𑀧𑀦𑁆𑀢𑀺 𑀏𑀯𑀁 𑀅𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑁄 𑀓𑀼𑀓𑁆𑀓𑀼𑀘𑁆𑀘 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀬𑁂𑀯, 𑀲𑁄 𑀳𑀺 𑀢𑀣𑀸 𑀧𑀯𑀢𑁆𑀢𑀫𑀸𑀦𑁄𑀧𑀺 𑀧𑀼𑀩𑁆𑀩𑁂 𑀅𑀓𑀢𑀁𑀯𑀸 𑀓𑀮𑁆𑀬𑀸𑀡𑀁 𑀧𑀼𑀦 𑀓𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀼𑀩𑁆𑀩𑁂 𑀓𑀢𑀁 𑀯𑀸 𑀧𑀸𑀧𑀁 𑀧𑀼𑀦 𑀅𑀓𑀢𑀁 𑀓𑀸𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀅𑀣𑀔𑁄 𑀓𑀼𑀲𑀮𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀸𑀬𑀏𑀯 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸 𑀫𑀢𑁆𑀢𑀢𑁆𑀢𑀸 𑀓𑀼𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞 𑀓𑀣𑀸𑀬𑀁 𑀓𑀢𑀸𑀓𑀢𑀲𑁆𑀲 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁆𑀲 𑀅𑀪𑀺𑀫𑀼𑀔𑀕𑀫𑀦𑀁 𑀧𑀝𑀺𑀲𑀸𑀭𑁄𑀦𑀸𑀫. 𑀬𑀲𑁆𑀫𑀸 𑀧𑀦𑁂𑀲𑁄 𑀓𑀢𑀁𑀯𑀸 𑀧𑀸𑀧𑀁 𑀅𑀓𑀢𑀁 𑀦𑀓𑀭𑁄𑀢𑀺. 𑀅𑀓𑀢𑀁𑀯𑀸 𑀓𑀮𑁆𑀬𑀸𑀡𑀁 𑀓𑀢𑀁 𑀦𑀓𑀭𑁄𑀢𑀺. 𑀢𑀲𑁆𑀫𑀸 𑀯𑀺𑀭𑀽𑀧𑁄 𑀓𑀼𑀘𑁆𑀙𑀺𑀢𑁄 𑀯𑀸 𑀧𑀝𑀺𑀲𑀸𑀭𑁄𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺. 𑀏𑀢𑁆𑀣𑀘 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀓𑀼𑀓𑁆𑀓𑀼𑀘𑁆𑀘 𑀫𑁂𑀯. 𑀓𑀼𑀓𑁆𑀓𑀼𑀘𑁆𑀘𑁂𑀘 𑀓𑀼𑀘𑁆𑀙𑀺𑀢𑁂 𑀲𑀢𑀺 𑀢𑀁 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀓𑀼𑀘𑁆𑀙𑀺𑀢𑁄𑀬𑁂𑀯. 𑀬𑁂𑀦𑀘 𑀓𑀸𑀭𑀡𑁂𑀦 𑀓𑀼𑀓𑁆𑀓𑀼𑀘𑁆𑀘𑀁 𑀓𑀼𑀘𑁆𑀙𑀺𑀢𑀁𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀓𑀼𑀘𑁆𑀙𑀺𑀢𑁄𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀲𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯 𑀓𑀼𑀓𑀢𑀧𑀤𑁂 𑀕𑀳𑁂𑀢𑀼𑀁 𑀬𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀤𑀺𑀦𑁆𑀦𑀓𑀡𑁆𑀟𑀝𑁆𑀞𑀓𑀣𑀸𑀬𑀁 𑀧𑀦 𑀅𑀬𑀫𑀢𑁆𑀣𑁄 𑀉𑀚𑀼𑀓𑀢𑁄𑀯 𑀯𑀼𑀢𑁆𑀢𑁄. 𑀬𑀣𑀸𑀳-𑀯𑀺𑀜𑁆𑀜𑀽𑀳𑀺 𑀅𑀓𑀢𑁆𑀢𑀩𑁆𑀩𑀢𑀸𑀬 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸𑀪𑀸𑀯𑀢𑁄 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺.

[𑁭𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 ‘‘𑀓𑀼𑀘𑁆𑀙𑀺𑀢𑀁 𑀓𑀢𑀦𑁆𑀢𑀺 𑀓𑀼𑀓𑀢𑀁. 𑀓𑀢𑀸𑀓𑀢 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢’’𑀦𑁆𑀢𑀺. 𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀏𑀢𑁂𑀦 𑀬𑀜𑁆𑀘 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀓𑀢𑀁𑀧𑀺 𑀳𑀺 𑀓𑀼𑀓𑀢𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀬𑀁 𑀫𑀬𑀸 𑀅𑀓𑀣𑀁. 𑀢𑀁 𑀓𑀼𑀓𑀢𑀦𑁆𑀢𑀺𑀘. 𑀇𑀥 𑀧𑀦 𑀓𑀢𑀸 𑀓𑀢𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀓𑀼𑀓𑀢’’𑀦𑁆𑀢𑀺𑀘. 𑀢𑀁𑀧𑀺 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀻𑀢𑀺.

𑀓𑀼𑀓𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀢𑀣𑀸𑀧𑀯𑀢𑁆𑀢𑀺 𑀳𑁂𑀢𑀼𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀅𑀧𑀺𑀘, 𑀥𑀸𑀢𑀼𑀧𑀸𑀞𑁂𑀲𑀼 𑀓𑀼𑀘𑀲𑀤𑁆𑀤𑀁 𑀲𑀗𑁆𑀓𑁄𑀘𑀦 𑀫𑀦𑁄 𑀯𑀺𑀮𑁂𑀔𑀦𑀢𑁆𑀣𑁂𑀲𑀼 𑀧𑀞𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀓𑀼𑀘𑁆𑀙𑀺𑀢𑁂𑀦 𑀆𑀓𑀸𑀭𑁂𑀦 𑀓𑁄𑀘𑀢𑀺 𑀲𑀗𑁆𑀓𑁄𑀘𑀢𑀺 𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀸𑀓𑀸𑀭𑁂𑀦𑀸𑀢𑀺 𑀓𑀼𑀓𑁆𑀓𑀼𑀘𑁄. 𑀓𑀼𑀘𑁆𑀙𑀺𑀢𑁂𑀦𑀯𑀸 𑀆𑀓𑀸𑀭𑁂𑀦 𑀓𑁄𑀘𑀢𑀺 𑀯𑀺𑀮𑀺𑀔𑀢𑀺 𑀦𑀓𑀺𑀮𑁂𑀲𑀲𑀮𑁆𑀮𑀻𑀔𑀦𑀸 𑀓𑀸𑀭𑁂𑀦𑀸𑀢𑀺 𑀓𑀼𑀓𑁆𑀓𑀼𑀘𑁄. 𑀢𑀣𑀸 𑀧𑀯𑀢𑁆𑀢𑀥𑀫𑁆𑀫𑀲𑀫𑀽𑀳𑁄. 𑀲𑁄𑀳𑀺 𑀓𑀼𑀘𑁆𑀙𑀺𑀢𑁂𑀦 𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁 𑀓𑀢𑀁 𑀧𑀸𑀧𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀅𑀦𑀼𑀢𑁆𑀣𑀼𑀦𑀦𑀸𑀓𑀸𑀭𑁂𑀦 𑀲𑀗𑁆𑀓𑁄𑀘𑀢𑀺. 𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑁂 𑀘𑀺𑀢𑁆𑀢𑀁 𑀦𑀫𑀺𑀢𑀼𑀁𑀧𑀺 𑀦𑀤𑁂𑀢𑀺. 𑀫𑀦𑀁𑀯𑀸 𑀯𑀺𑀮𑁂𑀔𑀢𑀺. 𑀲𑀤𑁆𑀥𑀸𑀤𑀻𑀦𑀁 𑀲𑀸𑀭𑀥𑀫𑁆𑀫𑀸𑀦𑀁 𑀢𑀦𑀼𑀓𑀭𑀡𑁂𑀦 𑀘𑀺𑀢𑁆𑀢𑀁 𑀓𑀼𑀲𑀮𑀥𑀫𑁆𑀫𑀲𑀫𑀸𑀤𑀸𑀦𑁂 𑀧𑀭𑀺𑀬𑀸𑀤𑀺𑀦𑁆𑀦𑀣𑀸𑀫𑀩𑀮𑀁 𑀓𑀭𑁄𑀢𑀺. 𑀢𑀲𑁆𑀫𑀸 𑀓𑀼𑀓𑁆𑀓𑀼𑀘𑁄𑀢𑀺 𑀯𑀼𑀘𑁆𑀘𑀢𑀺. 𑀬𑁂𑀦 𑀧𑀦 𑀥𑀫𑁆𑀫𑁂𑀦 𑀬𑀼𑀢𑁆𑀢𑀢𑁆𑀢𑀸 𑀲𑁄 𑀢𑀣𑀸 𑀧𑀯𑀢𑁆𑀢𑁄 𑀳𑁄𑀢𑀺. 𑀲𑁄 𑀓𑀼𑀓𑁆𑀓𑀼𑀘𑁆𑀘𑀁𑀦𑀸𑀫 𑀓𑀼𑀓𑁆𑀓𑀼𑀘𑀲𑁆𑀲 𑀪𑀸𑀯𑁄𑀢𑀺 𑀓𑀢𑁆𑀯𑀸. 𑀢𑀁 𑀧𑀦 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀅𑀓𑀢𑀜𑁆𑀘 𑀓𑀮𑁆𑀬𑀸𑀡𑀁 𑀓𑀢𑀜𑁆𑀘 𑀧𑀸𑀧𑀁 𑀆𑀭𑀩𑁆𑀪 𑀧𑀘𑁆𑀙𑀸 𑀅𑀦𑀼𑀢𑀸𑀧𑀦𑀯𑀲𑁂𑀦 𑀅𑀦𑀼𑀲𑁄𑀘𑀦𑀯𑀲𑁂𑀦𑀘 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸𑀢𑀁 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀁 𑀓𑀢𑀸𑀓𑀢𑀸𑀦𑀼𑀬𑁄𑀘𑀦 𑀭𑀲𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀏𑀢𑁆𑀣𑀘 𑀧𑀘𑁆𑀙𑀸𑀦𑀼𑀢𑀸𑀧𑀮𑀓𑁆𑀔𑀡𑀦𑁆𑀢𑀺 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀜𑁆𑀘 𑀅𑀓𑀢𑁆𑀯𑀸 𑀧𑀸𑀧𑀜𑁆𑀘 𑀓𑀢𑁆𑀯𑀸 𑀆𑀕𑀢𑀢𑁆𑀢𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀅𑀦𑀼𑀢𑀸𑀧𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀏𑀓𑀦𑁆𑀢𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀸𑀭𑀫𑁆𑀫𑀡𑀢𑀸𑀘 𑀧𑀝𑀺𑀲𑀺𑀤𑁆𑀥𑀸𑀢𑀺. 𑀓𑀢𑀸𑀓𑀢𑀸 𑀦𑀼𑀲𑁄𑀘𑀦𑀭𑀲𑀦𑁆𑀢𑀺 𑀏𑀢𑁆𑀣 𑀓𑀢𑀜𑁆𑀘 𑀧𑀸𑀧𑀁 𑀅𑀓𑀢𑀜𑁆𑀘 𑀓𑀮𑁆𑀬𑀸𑀡𑀦𑁆𑀢𑀺 𑀬𑁄 𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑁋

𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺 𑀓𑀢𑀢𑁆𑀢𑀸 𑀘 𑀅𑀓𑀢𑀢𑁆𑀢𑀸 𑀘. 𑀓𑀣𑀜𑁆𑀘 𑀤𑁆𑀯𑀻𑀳𑀸.𑀮. 𑀅𑀓𑀢𑀢𑁆𑀢𑀸𑀘. 𑀅𑀓𑀢𑀁 𑀫𑁂 𑀓𑀸𑀬𑀲𑀼 𑀘𑀭𑀺𑀢𑀁. 𑀓𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀅𑀓𑀢𑀁 𑀫𑁂 𑀯𑀘𑀻𑀲𑀼𑀘𑀭𑀺𑀢𑀁.𑀮. 𑀓𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀅𑀓𑀢𑀸𑀫𑁂 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻. 𑀓𑀢𑁄 𑀧𑀸𑀡𑀸𑀢𑀺 𑀧𑀸𑀢𑁄𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀁.𑀮. 𑀅𑀓𑀢𑀸 𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀢𑀸 𑀫𑀺𑀘𑁆𑀙𑀸𑀫𑀺𑀝𑁆𑀞𑀻𑀢𑀺 𑀉𑀧𑁆𑀧𑀚𑁆𑀚𑀢𑀺 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺.

𑀏𑀢𑁂𑀦 𑀧𑀦 𑀅𑀓𑀢𑀲𑀼𑀘𑀭𑀺𑀢𑀸 𑀭𑀫𑁆𑀫𑀡𑀢𑀸𑀬 𑀓𑀢𑀤𑀼𑀘𑁆𑀘𑀭𑀺𑀢𑀸 𑀭𑀫𑁆𑀫𑀡𑀢𑀸𑀬𑀘 𑀯𑀲𑁂𑀦 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀤𑁆𑀯𑀺𑀥𑀸𑀪𑀸𑀯𑁄𑀬𑁂𑀯 𑀲𑀺𑀤𑁆𑀥𑁄 𑀳𑁄𑀢𑀺. 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑁄𑀘 𑀔𑁄 𑀧𑀼𑀩𑁆𑀩𑁂 𑀧𑀸𑀧𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀧𑀸𑀬𑀪𑀬𑀢𑀚𑁆𑀚𑀺𑀢𑀸𑀦𑀜𑁆𑀘𑁂𑀯 𑀅𑀧𑀸𑀬𑁂𑀲𑀼 𑀧𑀢𑀺𑀢𑁆𑀯𑀸 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀸𑀦𑀜𑁆𑀘 𑀳𑁄𑀢𑀺. 𑀦𑀅𑀜𑁆𑀜𑁂𑀲𑀁, 𑀅𑀓𑀢𑀁 𑀫𑁂 𑀓𑀸𑀬𑀲𑀼𑀘𑀭𑀺𑀢𑀁. 𑀓𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀬𑀣𑀸 𑀧𑀦 𑀫𑀸𑀦𑁄 𑀤𑀼𑀯𑀺𑀥𑁄 𑀳𑁄𑀢𑀺 𑀬𑀸𑀣𑀸𑀯𑀫𑀸𑀦𑁄 𑀅𑀬𑀸𑀣𑀸𑀯𑀫𑀸𑀦𑁄𑀢𑀺. 𑀢𑀣𑀸 𑀓𑀼𑀓𑁆𑀓𑀼𑀘𑁆𑀘𑀁𑀧𑀺, 𑀬𑀸𑀣𑀸𑀯𑀓𑀼𑀓𑁆𑀓𑀼𑀘𑁆𑀘𑀁, 𑀅𑀬𑀸𑀣𑀸𑀯 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀅𑀬𑀸𑀣𑀸𑀯 𑀓𑀼𑀓𑁆𑀓𑀼𑀘𑁆𑀘𑀁𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑁄 𑀉𑀧𑁆𑀧𑀚𑁆𑀚𑀢𑀺 𑀅𑀓𑀢𑀁 𑀯𑀢 𑀫𑁂 𑀓𑀮𑁆𑀬𑀸𑀡𑀁 𑀓𑀢𑀁 𑀧𑀸𑀧𑀦𑁆𑀢𑀺. 𑀓𑀢𑀫𑀁 𑀧𑀦 𑀢𑀦𑁆𑀢𑀺. 𑀬𑀜𑁆𑀘 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑀓𑀫𑁆𑀫𑁂𑀧𑀺 𑀧𑀸𑀧𑀲𑀜𑁆𑀜𑀻 𑀧𑀸𑀧𑀤𑀺𑀝𑁆𑀞𑀺 𑀅𑀓𑀢𑁆𑀯𑀸 𑀧𑀸𑀧𑀓𑀫𑁆𑀫𑁂𑀧𑀺 𑀓𑀮𑁆𑀬𑀸𑀡𑀲𑀜𑁆𑀜𑀻 𑀓𑀮𑁆𑀬𑀸𑀡𑀤𑀺𑀝𑁆𑀞𑀺 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀦𑀼𑀲𑁄𑀘𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑀜𑁆𑀘 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑁂 𑀓𑀮𑁆𑀬𑀸𑀡𑀲𑀜𑁆𑀜𑀻 𑀓𑀢𑁆𑀯𑀸 𑀧𑀘𑁆𑀙𑀸 𑀧𑀸𑀧𑀲𑀜𑁆𑀜𑀺𑀦𑁄 𑀧𑀸𑀧𑁂𑀘 𑀧𑀸𑀲𑀜𑁆𑀜𑀻 𑀅𑀓𑀢𑁆𑀯𑀸 𑀧𑀘𑁆𑀙𑀸 𑀓𑀮𑁆𑀬𑀸𑀡𑀲𑀜𑁆𑀜𑀺𑀦𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀤𑀁 𑀅𑀬𑀸𑀣𑀸𑀯𑀓𑀼𑀓𑁆𑀓𑀼𑀘𑁆𑀘𑀁𑀦𑀸𑀫. 𑀅𑀦𑀯𑀚𑁆𑀚𑁂 𑀲𑀸𑀯𑀚𑁆𑀚𑀲𑀜𑁆𑀜𑀻, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺𑀬𑀁 𑀆𑀧𑀢𑁆𑀢𑀺𑀲𑀜𑁆𑀜𑀻𑀢𑀺𑀆𑀤𑀺𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀜𑁆𑀘 𑀲𑀩𑁆𑀩𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑁆𑀯𑀻𑀳𑀸 𑀓𑀸𑀭𑁂𑀳𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀤𑁆𑀯𑀻𑀲𑀼𑀏𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦 𑀫𑀳𑀸𑀦𑀺𑀤𑁆𑀤𑁂𑀲𑁂𑀬𑁂𑀯 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀓𑀁𑀧𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀓𑀁𑀧𑀺 𑀓𑀼𑀓𑁆𑀓𑀼𑀘𑁆𑀘𑀁. 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀓𑀁𑀧𑀺 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀁 𑀅𑀲𑀁𑀬𑀢 𑀓𑀼𑀓𑁆𑀓𑀼𑀘𑁆𑀘𑀁𑀦𑀸𑀫. 𑀬𑀁 𑀧𑀦 𑀢𑀁 𑀪𑀺𑀓𑁆𑀔𑀼 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺 𑀯𑀺𑀦𑀬𑁂 𑀆𑀕𑀢𑀁. 𑀬𑀜𑁆𑀘 𑀓𑀣𑀁 𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀓𑀢𑀢𑀸𑀬 𑀆𑀧𑀚𑁆𑀚𑀢𑀺 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀢𑀺 𑀆𑀕𑀢𑀁. 𑀢𑀁 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑀁𑀦𑀸𑀫. 𑀢𑀁𑀧𑀦 𑀯𑀺𑀦𑀬𑀲𑀁𑀲𑀬𑁄𑀏𑀯. 𑀲𑁄𑀘 𑀔𑁄 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂 𑀓𑀧𑁆𑀧𑀢𑀺 𑀦𑀼𑀔𑁄 𑀦𑁄𑀦𑀼𑀔𑁄𑀢𑀺 𑀲𑀁𑀲𑀧𑁆𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀓𑀼𑀲𑀮 𑀓𑁆𑀭𑀺𑀬 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀲𑁄𑀧𑀦 𑀬𑁂𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀲𑀼 𑀬𑁂 𑀲𑀺𑀓𑁆𑀔𑀸𑀓𑀸𑀫𑀸, 𑀢𑁂 𑀢𑀁𑀓𑀫𑁆𑀫𑀁 𑀦𑀓𑀭𑁄𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺 𑀯𑀼𑀢𑁆𑀢𑀁. 𑀬𑁂 𑀧𑀦 𑀓𑀭𑁄𑀦𑁆𑀢𑀺𑀬𑁂𑀯. 𑀢𑁂 𑀓𑀧𑁆𑀧𑀺𑀬𑀯𑀢𑁆𑀣𑀼𑀲𑁆𑀫𑀺𑀁𑀧𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀓𑀢𑀢𑀸𑀬 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁.

𑁯𑁪. 𑀣𑀺𑀬𑀢𑀺𑀘𑀺𑀢𑁆𑀢𑀁 𑀫𑀦𑁆𑀤𑀫𑀦𑁆𑀤𑀁 𑀓𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀣𑀺𑀦𑀁. 𑀣𑀺𑀬𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀦𑁆𑀢𑀺 𑀳𑀺 𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀁.

𑁯𑁫. 𑀫𑁂𑀥𑀢𑀺 𑀘𑁂𑀢𑀲𑀺𑀓𑁂 𑀥𑀫𑁆𑀫𑁂 𑀅𑀓𑀫𑁆𑀫𑀜𑁆𑀜𑀪𑀽𑀢𑁂 𑀓𑀢𑁆𑀯𑀸 𑀯𑀺𑀳𑀺𑀁 𑀲𑀢𑀻𑀢𑀺 𑀫𑀺𑀤𑁆𑀥𑀁. 𑀢𑀣𑀸 𑀳𑀺 𑀆𑀭𑀫𑁆𑀫𑀡𑁂 𑀯𑀺𑀧𑁆𑀨𑀸𑀭𑀯𑀲𑁂𑀦 𑀢𑀁 𑀢𑀁 𑀇𑀭𑀺𑀬𑀸 𑀧𑀣𑀁 𑀲𑀦𑁆𑀥𑀸𑀭𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀯𑀺𑀬 𑀢𑁂 𑀆𑀭𑀫𑁆𑀫𑀡𑀢𑁄 𑀑𑀮𑀺𑀬𑀸𑀧𑁂𑀢𑁆𑀯𑀸 𑀇𑀭𑀺𑀬𑀸𑀧𑀣𑀁𑀧𑀺 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑁂 𑀓𑀢𑁆𑀯𑀸 𑀣𑀺𑀦𑀁 𑀘𑀺𑀢𑁆𑀢𑀁 𑀅𑀪𑀺𑀪𑀯𑀢𑀺. 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑁂𑀢𑀺.

𑁯𑁬. 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀏𑀢𑁆𑀣. 𑀘𑀺𑀓𑀺𑀘𑁆𑀙𑀦𑀁 𑀘𑀺𑀓𑀺𑀘𑁆𑀙𑀸. 𑀜𑀸𑀡𑀧𑁆𑀧𑀝𑀺𑀓𑀸 𑀭𑁄𑀢𑀺 𑀅𑀢𑁆𑀣𑁄. 𑀢𑀺𑀓𑀺𑀘𑁆𑀙𑀺𑀢𑀼𑀁 𑀤𑀼𑀓𑁆𑀓𑀭𑀢𑀸𑀬 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀏𑀢𑀸𑀬𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑀸 𑀓𑀺𑀘𑁆𑀙𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀏𑀢𑀸𑀬𑀸𑀢𑀺𑀯𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀘𑀺𑀓𑀺𑀘𑁆𑀙𑀢𑀺𑀯𑀸 𑀤𑁆𑀯𑁂𑀴𑁆𑀳𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀦𑀻𑀯𑀭𑀡𑀪𑀽𑀢𑀸, 𑀧𑀝𑀺𑀭𑀽𑀧𑀓𑀸𑀢𑀺 𑀤𑀼𑀯𑀺𑀥𑀸. 𑀢𑀢𑁆𑀣 𑀩𑀼𑀤𑁆𑀥𑀸𑀤𑀻𑀲𑀼 𑀅𑀝𑁆𑀞𑀲𑀼 𑀯𑀢𑁆𑀣𑀽𑀲𑀼 𑀯𑀺𑀫𑀢𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀦𑀻𑀯𑀭𑀡𑀪𑀽𑀢𑀸. 𑀢𑀢𑁄 𑀅𑀜𑁆𑀜𑀸𑀧𑀦 𑀅𑀲𑀩𑁆𑀩𑀜𑁆𑀜𑀽𑀦𑀁 𑀢𑁂𑀲𑀼 𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀣𑀁 𑀦𑀼𑀔𑁄 𑀏𑀯𑀁 𑀦𑀼𑀔𑁄 𑀇𑀤𑀁𑀦𑀼𑀔𑁄𑀢𑀺 𑀯𑁂𑀫𑀢𑀺𑀓𑀪𑀸𑀯𑁂𑀦 𑀧𑀯𑀢𑁆𑀢𑀸 𑀲𑀩𑁆𑀩𑀸 𑀯𑀺𑀘𑀺𑀓𑀺𑀘𑁆𑀙𑀸 𑀧𑀝𑀺𑀭𑀽𑀧𑀓𑀸𑀦𑀸𑀫. 𑀲𑀸 𑀧𑀦 𑀓𑀼𑀲𑀮𑀸𑀧𑀺 𑀳𑁄𑀢𑀺, 𑀅𑀓𑀼𑀲𑀮𑀸𑀧𑀺 𑀔𑀻𑀡𑀸 𑀲𑀯𑀸𑀦𑀁 𑀉𑀧𑁆𑀧𑀦𑁆𑀦 𑀓𑁆𑀭𑀺𑀬𑀸𑀩𑁆𑀬𑀸𑀓𑀢𑀸𑀧𑀻𑀢𑀺. 𑀇𑀥 𑀧𑀦 𑀏𑀓𑀦𑁆𑀢𑀸𑀓𑀼𑀲𑀮𑀪𑀽𑀢𑀸 𑀦𑀻𑀯𑀭𑀡𑀯𑀺𑀘𑀺𑀓𑀺𑀘𑁆𑀙𑀸𑀯 𑀅𑀥𑀺𑀧𑁆𑀧𑁂𑀓𑀸𑀢𑀺.

𑀅𑀓𑀼𑀲𑀮𑀭𑀸𑀲𑀺𑀫𑁆𑀳𑀺 𑀧𑀭𑀫𑀢𑁆𑀣𑀤𑀻𑀧𑀦𑀸.

𑁯𑁭. 𑀲𑀤𑁆𑀤𑀳𑀢𑀻𑀢𑀺 𑀲𑀤𑁆𑀥𑀸. 𑀬𑀣𑀸 𑀅𑀘𑁆𑀙𑀁 𑀧𑀲𑀦𑁆𑀦𑀁 𑀦𑀺𑀲𑀺𑀦𑁆𑀦𑀁 𑀉𑀤𑀓𑀁 𑀘𑀦𑁆𑀤 𑀲𑀽𑀭𑀺𑀬𑀸𑀤𑀻𑀦𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀺 𑀲𑀼𑀝𑁆𑀞𑀼 𑀅𑀢𑁆𑀢𑀦𑀺 𑀤𑀳𑀢𑀺. 𑀏𑀯𑀁 𑀅𑀬𑀁 𑀩𑀼𑀤𑁆𑀥𑀕𑀼𑀡𑀸 𑀤𑀻𑀦𑀺 𑀲𑀼𑀝𑁆𑀞𑀼 𑀅𑀢𑁆𑀢𑀦𑀺 𑀤𑀳𑀢𑀺 𑀥𑀸𑀭𑁂𑀢𑀺 𑀣𑀧𑁂𑀢𑀺𑀯𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀦𑁆𑀢𑀺𑀯𑀸 𑀏𑀢𑀸𑀬𑀸𑀢𑀺 𑀲𑀤𑁆𑀥𑀸. 𑀲𑀤𑁆𑀤𑀳𑀦𑀫𑀢𑁆𑀢𑀫𑁂𑀯𑀯𑀸 𑀏𑀢𑀦𑁆𑀢𑀺 𑀲𑀤𑁆𑀥𑀸. 𑀲𑀸𑀧𑀺 𑀩𑀼𑀤𑁆𑀥𑀸 𑀤𑀻𑀲𑀼 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀽𑀲𑀼 𑀅𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀏𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀢𑁄 𑀅𑀜𑁆𑀜𑀸𑀧𑀦 𑀢𑀺𑀢𑁆𑀣𑀺𑀬𑁂𑀲𑀼𑀯𑀸 𑀢𑀺𑀢𑁆𑀣𑀺𑀬𑀥𑀫𑁆𑀫𑁂𑀲𑀼 𑀯𑀸 𑀏𑀯𑀭𑀽𑀧𑁂𑀲𑀼 𑀅𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀽𑀲𑀼 𑀲𑀤𑁆𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑀸 𑀑𑀓𑀧𑁆𑀧𑀦𑀸 𑀲𑀤𑁆𑀥𑀸 𑀧𑀝𑀺𑀭𑀽𑀧𑀓𑀸𑀦𑀸𑀫 𑀳𑁄𑀢𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄 𑀬𑁂𑀯𑀸𑀢𑀺. 𑀬𑀣𑀸 𑀧𑀦 𑀫𑀦𑀼𑀲𑁆𑀲𑀸 𑀳𑀢𑁆𑀣𑁂 𑀅𑀲𑀢𑀺 𑀭𑀢𑀦𑀸𑀦𑀺 𑀤𑀺𑀲𑁆𑀯𑀸 𑀧𑀺-𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀯𑀺𑀢𑁆𑀢𑁂 𑀅𑀲𑀢𑀺 𑀢𑁂𑀲𑀁 𑀲𑀩𑁆𑀩𑀪𑁄𑀕𑀸 𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀩𑀻𑀚𑁂 𑀅𑀲𑀢𑀺 𑀲𑀲𑁆𑀲𑀸𑀤𑀻𑀦𑀺 𑀦𑀲𑀫𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀲𑀤𑁆𑀥𑀸𑀬 𑀅𑀲𑀢𑀺 𑀧𑀼𑀜𑁆𑀜𑀓𑁆𑀭𑀺𑀬𑀸𑀯𑀢𑁆𑀣𑀽𑀦𑀺 𑀦𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀏𑀲𑀸 𑀳𑀢𑁆𑀣𑀯𑀺𑀢𑁆𑀢𑀩𑀻𑀚 𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀸.

𑁯𑁮. 𑀲𑀭𑀢𑀻𑀢𑀺 𑀲𑀢𑀺. 𑀅𑀢𑁆𑀢𑀦𑀸 𑀓𑀢𑀸𑀦𑀺 𑀓𑀢𑁆𑀢𑀩𑁆𑀩𑀸𑀦𑀺 𑀘 𑀓𑀮𑁆𑀬𑀸𑀡𑀓𑀫𑁆𑀫𑀸𑀯𑀸 𑀩𑀼𑀤𑁆𑀥𑀕𑀼𑀡𑀸𑀤𑀻𑀦𑀺𑀯𑀸 𑀅𑀧𑁆𑀧𑀫𑀚𑁆𑀚𑀦𑀯𑀲𑁂𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀺 𑀲𑀫𑁆𑀫𑀸𑀲𑀢𑀺 𑀫𑀺𑀘𑁆𑀙𑀸𑀲𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀸𑀲𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀇𑀢𑀭𑀸 𑀧𑀦 𑀲𑀢𑀺𑀬𑁂𑀯 𑀦 𑀳𑁄𑀢𑀺. 𑀓𑀢𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲𑀘 𑀧𑀸𑀧𑀓𑀫𑁆𑀫𑀲𑁆𑀲 𑀅𑀧𑁆𑀧𑀫𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀢𑀺𑀧𑀝𑀺𑀭𑀽𑀧𑀓𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀬𑁂𑀯. 𑀬𑀲𑁆𑀫𑀸 𑀧𑀦𑁂𑀲𑀸 𑀘𑀺𑀢𑁆𑀢𑀁 𑀲𑀩𑁆𑀩𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑁂𑀳𑀺𑀘 𑀭𑀓𑁆𑀔𑀺𑀢𑀼𑀁 𑀓𑀼𑀲𑀮𑀥𑀫𑁆𑀫𑁂𑀳𑀺𑀘 𑀬𑁄𑀚𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀲𑀸 𑀭𑀜𑁆𑀜𑁄 𑀲𑀩𑁆𑀩𑀓𑀫𑁆𑀫𑀺𑀓 𑀫𑀳𑀸𑀅𑀫𑀘𑁆𑀘𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺. 𑀲𑀢𑀺𑀁𑀔𑁆𑀯𑀸𑀳𑀁 𑀪𑀺𑀓𑁆𑀔𑀯𑁂 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻𑀢𑀺 𑀳𑀺 𑀯𑀼𑀢𑁆𑀢𑀁.

𑁯𑁯. 𑀳𑀺𑀭𑀺𑀬𑀢𑀻𑀢𑀺 𑀳𑀺𑀭𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀮𑀚𑁆𑀚𑀢𑀺 𑀚𑀺𑀕𑀼𑀘𑁆𑀙𑀢𑀺 𑀉𑀓𑁆𑀓𑀡𑁆𑀞𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁦. 𑀢𑁂𑀳𑀺𑀬𑁂𑀯 𑀑𑀢𑁆𑀢𑀧𑁆𑀧𑀢𑀻𑀢𑀺 𑀑𑀢𑁆𑀢𑀧𑁆𑀧𑀁. 𑀉𑀩𑁆𑀩𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀧𑀺 𑀳𑀺𑀭𑀺𑀑𑀢𑁆𑀢𑀧𑁆𑀧𑀧𑁆𑀧𑀝𑀺𑀭𑀽𑀧𑀓𑀸𑀦𑀸𑀫 𑀅𑀢𑁆𑀣𑀺, 𑀯𑀼𑀢𑁆𑀢𑀜𑁆𑀳𑀺 𑁋

𑀮𑀚𑁆𑀚𑀺𑀢𑀩𑁆𑀩𑁂 𑀦𑀮𑀚𑁆𑀚𑀦𑁆𑀢𑀺, 𑀅𑀮𑀚𑁆𑀚𑀺𑀬𑁂𑀲𑀼 𑀮𑀚𑁆𑀚𑀭𑁂𑀢𑀺 𑀘;

𑀪𑀸𑀬𑀺𑀢𑀩𑁆𑀩𑁂 𑀦𑀪𑀸𑀬𑀦𑁆𑀢𑀺, 𑀅𑀪𑀬𑁂 𑀪𑀬𑀤𑀲𑁆𑀲𑀺𑀦𑁄𑀢𑀺 𑀘.

𑀬𑀲𑁆𑀫𑀸 𑀧𑀦 𑀲𑀧𑁆𑀧𑀼𑀭𑀺𑀲𑀸 𑀳𑀺𑀭𑀺𑀬𑀸 𑀅𑀢𑁆𑀢𑀦𑀺 𑀑𑀢𑁆𑀢𑀧𑁆𑀧𑁂𑀦𑀘 𑀧𑀭𑁂𑀲𑀼 𑀆𑀭𑀓𑁆𑀔𑀤𑁂𑀯𑀢𑀸𑀤𑀻𑀲𑀼 𑀕𑀸𑀭𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀸𑀧𑀢𑁄 𑀯𑀚𑁆𑀚𑁂𑀢𑁆𑀯𑀸 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀺. 𑀢𑀲𑁆𑀫𑀸 𑀇𑀫𑁂 𑀤𑁆𑀯𑁂 𑀮𑁄𑀓𑀧𑀸𑀮𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸.

𑁧𑁦𑁧. 𑀮𑁄𑀪𑀧𑁆𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄. 𑀲𑁄 𑀳𑀺 𑀬𑁂𑀲𑀼 𑀅𑀢𑁆𑀢𑀦𑁄 𑀳𑀺𑀢𑀲𑀜𑁆𑀜𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀮𑁄𑀪𑁄 𑀮𑀕𑁆𑀕𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑁂𑀲𑁆𑀯𑁂𑀯 𑀢𑀁 𑀮𑁄𑀪𑀁 𑀯𑀺𑀥𑀫𑀺𑀢𑁆𑀯𑀸 𑀮𑁄𑀪𑀯𑀢𑁆𑀣𑀼𑀪𑀽𑀢𑀸 𑀪𑀯𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀕𑀽𑀣𑀭𑀸𑀲𑀺𑀁𑀯𑀺𑀬 𑀳𑀻𑀴𑁂𑀢𑁆𑀯𑀸 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀏𑀓𑀸𑀦𑁂𑀓𑁆𑀔𑀫𑁆𑀫 𑀥𑀸𑀢𑀼𑀦𑀸𑀫 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺.

𑁧𑁦𑁨. 𑀤𑁄𑀲𑀧𑁆𑀧𑀝𑀺𑀧𑀓𑁆𑀔𑁄 𑀅𑀤𑁄𑀲𑁄. 𑀲𑁄𑀧𑀺 𑀳𑀺 𑀬𑁂𑀲𑀼 𑀅𑀢𑁆𑀢𑀦𑁄 𑀅𑀳𑀺𑀢𑀲𑀜𑁆𑀜𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀤𑁄𑀲𑁄 𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺. 𑀢𑁂𑀲𑁆𑀯𑁂𑀯 𑀢𑀁𑀤𑁄𑀲𑀁 𑀯𑀺𑀥𑀫𑀺𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑁂𑀲𑀼 𑀲𑀢𑁆𑀢𑁂𑀲𑀼 𑀧𑀼𑀡𑁆𑀡𑀘𑀦𑁆𑀤𑀲𑀤𑀺𑀲𑀁 𑀲𑁄𑀫𑁆𑀫𑀳𑀤𑀬𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀏𑀓𑀸 𑀅𑀩𑁆𑀬𑀸𑀧𑀸𑀤𑀥𑀸𑀢𑀼 𑀦𑀸𑀫 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺. 𑀅𑀬𑀫𑁂𑀯𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀫𑁂𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀅𑀫𑁄𑀳𑁄𑀧𑀺 𑀇𑀥 𑀯𑀢𑁆𑀢𑀩𑁆𑀩𑁄. 𑀫𑁄𑀳𑀧𑁆𑀧𑀝𑀺𑀧𑀓𑁆𑀔𑁄 𑀅𑀫𑁄𑀳𑁄. 𑀲𑁄𑀧𑀺 𑀳𑀺 𑀬𑁂𑀲𑀼 𑀥𑀫𑁆𑀫𑁂𑀲𑀼𑀯𑀸 𑀅𑀢𑁆𑀣𑁂𑀲𑀼𑀯𑀸 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼𑀯𑀸 𑀫𑁄𑀳𑁄 𑀅𑀦𑁆𑀥𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑁂𑀲𑁆𑀯𑁂𑀯 𑀢𑀁 𑀫𑁄𑀳𑀁 𑀯𑀺𑀥𑀫𑀺𑀢𑁆𑀯𑀸 𑀘𑀦𑁆𑀤𑀲𑀽𑀭𑀺𑀬𑀲𑀳𑀲𑁆𑀲𑀁 𑀉𑀝𑁆𑀞𑀸𑀧𑁂𑀦𑁆𑀢𑁄𑀯𑀺𑀬 𑀯𑀺𑀚𑁆𑀚𑀸𑀦𑀸𑀫 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺.

𑁧𑁦𑁩. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀢𑀺 𑀏𑀢𑁆𑀣 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀲𑀪𑀸𑀯𑁄. 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀻𑀦𑀁 𑀉𑀪𑀺𑀦𑁆𑀦𑀁 𑀯𑀺𑀲𑀫𑀧𑀓𑁆𑀔𑀸𑀦𑀁 𑀫𑀚𑁆𑀛𑁂 𑀧𑀯𑀢𑁆𑀢𑁄 𑀅𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀫𑀚𑁆𑀛𑀢𑁆𑀢𑀸. 𑀲𑀫𑀧𑁆𑀧𑀯𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑁄. 𑀢𑀲𑁆𑀲 𑀪𑀸𑀯𑁄 𑀫𑀚𑁆𑀛𑀓𑁆𑀓𑀢𑀸. 𑀢𑁂𑀲𑀼 𑀢𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀤𑀺𑀲𑁆𑀲𑀫𑀸𑀦𑀸 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸 𑀢𑁂𑀲𑀼 𑀢𑁂𑀲𑀼𑀯𑀸 𑀳𑀺𑀢𑀓𑀫𑁆𑀫𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀫𑀚𑁆𑀛𑀢𑁆𑀢𑀢𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸. 𑀢𑀣𑀸 𑀳𑀺 𑀲𑀸 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀲𑀫𑀧𑁆𑀧𑀯𑀢𑁆𑀢𑀸𑀦𑀁 𑀆𑀚𑀸𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀲𑀸𑀭𑀣𑀻𑀯𑀺𑀬 𑀤𑀝𑁆𑀞𑀩𑁆𑀩𑀸𑀢𑀺 𑀯𑀼𑀢𑁆𑀢𑀸. 𑀅𑀬𑀫𑁂𑀯𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀉𑀧𑁂𑀓𑁆𑀔𑀸𑀢𑀺 𑀯𑀼𑀢𑁆𑀢𑀸.

𑁧𑁦𑁪. 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀸𑀤𑀻𑀲𑀼 𑀓𑀸𑀬𑁄𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬 𑀲𑀗𑁆𑀔𑀸𑀢𑁄 𑀘𑁂𑀢𑀲𑀺𑀓𑀲𑀫𑀽𑀳𑁄 𑀯𑀼𑀘𑁆𑀘𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀲𑁄𑀪𑀡𑀘𑀺𑀢𑁆𑀢𑀁. 𑀓𑀸𑀬𑀲𑁆𑀲 𑀧𑀲𑁆𑀲𑀤𑁆𑀥𑀺 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀲𑁆𑀲 𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀻𑀢𑀺𑀆𑀤𑀺𑀦𑀸 𑀲𑀫𑀸𑀲𑁄. 𑀧𑀲𑁆𑀲𑀫𑁆𑀪𑀦𑀁 𑀧𑀲𑁆𑀲𑀤𑁆𑀥𑀺. 𑀲𑀦𑁆𑀢𑀲𑀻𑀢𑀮𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀇𑀤𑀁 𑀤𑁆𑀯𑀬𑀁 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀢𑁂 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀘𑀺𑀢𑁆𑀢𑀲𑀼𑀔𑀁 𑀦𑀧𑀺𑀦𑁆𑀤𑀦𑁆𑀢𑀺. 𑀩𑀳𑀺𑀤𑁆𑀥𑀸𑀏𑀯 𑀦𑁂𑀲𑀁 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀲𑀦𑁆𑀢𑀢𑁆𑀢𑁂 𑀧𑀸𑀲𑀸𑀡𑀧𑀺𑀝𑁆𑀞𑁂 𑀣𑀧𑀺𑀢𑀫𑀘𑁆𑀙𑁄𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁 𑀳𑁄𑀢𑀺. 𑀢𑁂𑀬𑁂𑀯 𑀢𑀢𑁆𑀣 𑀢𑀁 𑀯𑀺𑀦𑁆𑀤𑀦𑁆𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀁 𑀲𑀻𑀢𑀮𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢 𑀫𑀘𑁆𑀙𑁄 𑀯𑀺𑀬 𑀳𑁄𑀢𑀺.

𑁧𑁦𑁫. 𑀮𑀳𑀼𑀪𑀸𑀯𑁄 𑀮𑀳𑀼𑀢𑀸. 𑀅𑀕𑀭𑀼𑀢𑀸 𑀅𑀤𑀦𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀇𑀤𑀁 𑀤𑀼𑀩𑁆𑀩𑀮𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀦𑀧𑀲𑀸𑀭𑁂𑀢𑀺 𑀲𑀗𑁆𑀓𑁄𑀘𑀢𑀺. 𑀢𑀢𑁆𑀢𑀧𑀸𑀲𑀸𑀡𑁂 𑀧𑀓𑁆𑀔𑀺𑀢𑁆𑀢𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀢𑀢𑁆𑀣 𑀧𑀲𑀸𑀭𑁂𑀢𑀺. 𑀲𑀻𑀢𑀮𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢 𑀧𑀤𑀼𑀫𑀧𑀼𑀧𑁆𑀨𑀁 𑀯𑀺𑀬 𑀳𑁄𑀢𑀺.

𑁧𑁦𑁬. 𑀫𑀼𑀤𑀼𑀪𑀸𑀯𑁄 𑀫𑀼𑀤𑀼𑀢𑀸. 𑀬𑁂𑀲𑀁 𑀇𑀤𑀁 𑀤𑀼𑀩𑁆𑀩𑀮𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀣𑀤𑁆𑀥𑀁 𑀳𑁄𑀢𑀺. 𑀯𑁂𑀭𑀻𑀦𑀁 𑀫𑀚𑁆𑀛𑁂 𑀕𑀢𑀫𑀳𑀸𑀬𑁄𑀥𑁄𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀢𑀢𑁆𑀣 𑀫𑀼𑀤𑀼 𑀳𑁄𑀢𑀺. 𑀯𑀺𑀬𑀜𑁆𑀜𑀸𑀢𑀻𑀦𑀁 𑀫𑀚𑁆𑀛𑁂 𑀕𑀢𑀫𑀳𑀸𑀬𑁄𑀥𑁄 𑀯𑀺𑀬 𑀳𑁄𑀢𑀺.

𑁧𑁦𑁭. 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁. 𑀢𑀤𑁂𑀯 𑀓𑀫𑁆𑀫𑀜𑁆𑀜𑀢𑀸. 𑀬𑁂𑀲𑀁 𑀇𑀤𑀁 𑀤𑀼𑀩𑁆𑀩𑀮𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀬𑀣𑀺𑀘𑁆𑀙𑀺𑀢𑀁 𑀣𑀧𑁂𑀢𑀼𑀁 𑀦𑀮𑀩𑁆𑀪𑀢𑀺, 𑀯𑀺𑀓𑁆𑀓𑀺𑀭𑀢𑀺. 𑀧𑀝𑀺𑀯𑀸𑀢𑁂 𑀔𑀺𑀢𑁆𑀢𑀣𑀼𑀲𑀫𑀼𑀝𑁆𑀞𑀺𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁. 𑀢𑁂𑀲𑀁𑀬𑁂𑀯 𑀢𑀁 𑀢𑀢𑁆𑀣 𑀬𑀣𑀺𑀘𑁆𑀙𑀺𑀢𑀁 𑀣𑀧𑁂𑀢𑀼𑀁 𑀮𑀩𑁆𑀪𑀢𑀺 𑀦𑀯𑀺𑀓𑁆𑀓𑀺𑀭𑀢𑀺. 𑀧𑀝𑀺𑀯𑀸𑀢𑁂 𑀔𑀺𑀢𑁆𑀢𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄𑀯𑀺𑀬 𑀳𑁄𑀢𑀺.

𑁧𑁦𑁮. 𑀧𑀕𑀼𑀡𑀲𑁆𑀲 𑀪𑀸𑀯𑁄 𑀧𑀸𑀕𑀼𑀜𑁆𑀜𑀁. 𑀢𑀤𑁂𑀯 𑀧𑀸𑀕𑀼𑀜𑁆𑀜𑀢𑀸. 𑀬𑁂𑀲𑀁 𑀇𑀤𑀁 𑀤𑀼𑀩𑁆𑀩𑀮𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀯𑀺𑀓𑀫𑁆𑀧𑀢𑀺 𑀯𑀺𑀳𑀜𑁆𑀜𑀢𑀺. 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀔𑀺𑀢𑁆𑀢𑀯𑀸𑀦𑀭𑁄𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁, 𑀢𑁂 𑀲𑀁 𑀢𑀁 𑀢𑀢𑁆𑀣 𑀦𑀯𑀺𑀓𑀫𑁆𑀧𑀢𑀺 𑀦𑀯𑀺𑀳𑀜𑁆𑀜𑀢𑀺. 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀔𑀺𑀢𑁆𑀢 𑀓𑀼𑀫𑁆𑀪𑀺𑀮𑁄 𑀯𑀺𑀬 𑀳𑁄𑀢𑀺.

𑁧𑁦𑁯. 𑀉𑀚𑀼𑀏𑀯 𑀉𑀚𑀼𑀓𑀁, 𑀉𑀚𑀼𑀓𑀲𑁆𑀲 𑀪𑀸𑀯𑁄 𑀉𑀚𑀼𑀓𑀢𑀸. 𑀬𑁂𑀲𑀁 𑀇𑀤𑀁 𑀤𑀼𑀩𑁆𑀩𑀮𑀁. 𑀢𑁂𑀲𑀁 𑀘𑀺𑀢𑁆𑀢𑀁 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀯𑀺𑀲𑀫𑀕𑀳𑀺𑀓𑀁 𑀳𑁄𑀢𑀺. 𑀓𑀤𑀸𑀘𑀺 𑀮𑀻𑀦𑀁. 𑀓𑀤𑀸𑀘𑀺 𑀉𑀤𑁆𑀥𑀝𑀁. 𑀓𑀤𑀸𑀘𑀺 𑀑𑀦𑀢𑀁. 𑀓𑀤𑀸𑀘𑀺 𑀉𑀦𑁆𑀦𑀢𑀁. 𑀲𑀼𑀭𑀸𑀫𑀤𑀫𑀢𑁆𑀢𑀲𑁆𑀲 𑀫𑀕𑁆𑀕𑀕𑀫𑀦𑀁 𑀯𑀺𑀬 𑀳𑁄𑀢𑀺. 𑀬𑁂𑀲𑀁 𑀧𑀦 𑀩𑀮𑀯𑀁, 𑀢𑁂𑀲𑀁 𑀢𑀁 𑀯𑀼𑀢𑁆𑀢𑀯𑀺𑀧𑀭𑀺𑀬 𑀬𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁧𑁧𑁦. 𑀏𑀢𑁆𑀣𑀘 𑀲𑀺𑀤𑁆𑀥𑁂𑀲𑀼𑀧𑀺 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀸𑀤𑀺𑀓𑁂𑀲𑀼 𑀯𑀼𑀢𑁆𑀢𑁂𑀲𑀼 𑀯𑀺𑀲𑀼𑀁 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀸𑀤𑀻𑀦𑀁 𑀯𑀘𑀦𑀁 𑀢𑁂𑀲𑀁 𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲𑀧𑀺 𑀧𑀲𑁆𑀲𑀤𑁆𑀥𑀸𑀤𑀺 𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀢𑀁 𑀢𑀁 𑀲𑀼𑀢𑁆𑀢𑀦𑁆𑀢𑀁 𑀲𑀼𑀢𑁆𑀯𑀸 𑀕𑁂𑀮𑀜𑁆𑀜𑀯𑀼𑀝𑁆𑀞𑀸 𑀦𑀸𑀤𑀻𑀲𑀼 𑀭𑀽𑀧𑀓𑀸𑀬𑀲𑁆𑀲 𑀧𑀲𑁆𑀲𑀤𑁆𑀥𑀪𑀸𑀯𑁄 𑀧𑀸𑀓𑀝𑁄 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀬𑀸 𑀆𑀓𑀸𑀲𑀕𑀫𑀦𑀸𑀤𑀻𑀲𑀼 𑀮𑀳𑀼 𑀪𑀸𑀯𑁄. 𑀓𑀸𑀬𑀁 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀓𑀢𑁆𑀯𑀸 𑀦𑀺𑀫𑁆𑀫𑀺𑀦𑀦𑁂𑀲𑀼 𑀫𑀼𑀤𑀼𑀪𑀸𑀯𑁄. 𑀅𑀦𑁆𑀢𑁄𑀧𑀣𑀯𑀺𑀬𑀁𑀯𑀸 𑀅𑀦𑁆𑀢𑁄𑀧𑀩𑁆𑀩𑀢𑁂 𑀲𑀼𑀯𑀸 𑀅𑀲𑀚𑁆𑀚𑀫𑀸𑀦𑀁 𑀓𑀢𑁆𑀯𑀸 𑀕𑀫𑀦𑀸𑀤𑀻𑀲𑀼 𑀓𑀫𑁆𑀫𑀜𑁆𑀜𑀪𑀸𑀯𑁄. 𑀦𑀸𑀕𑀯𑀡𑁆𑀡𑀁𑀯𑀸 𑀕𑀭𑀼𑀴𑀯𑀡𑁆𑀡𑀁𑀯𑀸 𑀓𑀢𑁆𑀯𑀸 𑀦𑀺𑀫𑁆𑀫𑀺𑀦𑀦𑀸𑀤𑀻𑀲𑀼 𑀧𑀕𑀼𑀡𑀪𑀸𑀯𑁄 𑀢𑁂𑀲𑁆𑀯𑁂𑀯 𑀲𑀩𑁆𑀩𑁂𑀲𑀼 𑀬𑀣𑀸𑀦𑀺𑀫𑁆𑀫𑀺𑀢𑀯𑀲𑁂𑀦 𑀘𑀺𑀭𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀲𑀼 𑀉𑀚𑀼𑀓𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀲𑀸𑀥𑀸𑀭𑀡𑀸, 𑀲𑀩𑁆𑀩𑁂𑀳𑀺 𑀲𑁄𑀪𑀡𑀘𑀺𑀢𑁆𑀢𑁂𑀳𑀺, 𑀢𑁂𑀲𑀁𑀯𑀸 𑀲𑀸𑀥𑀸𑀭𑀡𑀸 𑀲𑁄𑀪𑀡 𑀲𑀸𑀥𑀸𑀭𑀡𑀸.

𑁧𑁧𑁧. 𑀲𑀫𑁆𑀫𑀸𑀯𑀸𑀘𑀸𑀢𑀺 𑀏𑀢𑁆𑀣 𑀢𑀺𑀯𑀺𑀥𑀸 𑀲𑀫𑁆𑀫𑀸𑀯𑀸𑀘𑀸 𑀓𑀣𑀸, 𑀘𑁂𑀢𑀦𑀸, 𑀯𑀺𑀭𑀢𑀺𑀯𑀲𑁂𑀦, 𑀢𑀢𑁆𑀣 𑀅𑀢𑁆𑀣𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸 𑀓𑀣𑀸 𑀲𑀫𑁆𑀫𑀸𑀯𑀸𑀘𑀸𑀦𑀸𑀫. 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀼𑀲𑀮𑀓𑁆𑀭𑀺𑀬𑀘𑁂𑀢𑀦𑀸 𑀘𑁂𑀢𑀦𑀸𑀲𑀫𑁆𑀫𑀸𑀯𑀸𑀘𑀸𑀦𑀸𑀫. 𑀬𑀸 𑀧𑀦 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑀯𑀸 𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀯𑀸 𑀧𑀸𑀧𑀯𑀺𑀭𑀫𑀡𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺. 𑀅𑀬𑀁 𑀯𑀺𑀭𑀢𑀺 𑀲𑀫𑁆𑀫𑀸𑀯𑀸𑀘𑀸𑀦𑀸𑀫. 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀫𑁆𑀫𑀸 𑀯𑀤𑀦𑁆𑀢𑀺 𑀏𑀢𑀸 𑀬𑀸𑀢𑀺 𑀲𑀫𑁆𑀫𑀸𑀯𑀸𑀘𑀸. 𑀏𑀢𑀸𑀬𑀸𑀢𑀺 𑀘𑁂𑀢𑁆𑀣 𑀓𑀭𑀡𑀢𑁆𑀣𑁂 𑀳𑁂𑀢𑀼𑀅𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀯𑀸𑀘𑀸𑀬 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀲𑀫𑀸𑀤𑀸𑀦𑀯𑀘𑀦𑀸𑀦𑀺 𑀲𑀦𑁆𑀥𑀸𑀬 𑀓𑀭𑀡𑀢𑁆𑀣𑁄 𑀳𑁂𑀢𑀼𑀅𑀢𑁆𑀣𑁄 𑀘 𑀬𑀼𑀚𑁆𑀚𑀢𑀺. 𑀢𑀢𑁄 𑀬𑀣𑀸𑀲𑀫𑀸𑀤𑀺𑀦𑁆𑀦𑀸𑀦𑀺𑀯𑀸 𑀬𑀣𑀸𑀥𑀺𑀝𑁆𑀞𑀺𑀢𑀸𑀦𑀺𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀼𑀝𑁆𑀞𑀼𑀭𑀓𑁆𑀔𑀸𑀫𑀸𑀢𑀺 𑀬𑀸𑀦𑀺 𑀅𑀦𑀯𑀚𑁆𑀚𑀸𑀦𑀺𑀏𑀯 𑀯𑀘𑀦𑀸𑀦𑀺 𑀯𑀤𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀢𑀸𑀦𑀺 𑀲𑀦𑁆𑀥𑀸𑀬 𑀓𑀭𑀡𑀢𑁆𑀣𑀸𑀦𑀼𑀓𑀽𑀮𑁄 𑀳𑁂𑀢𑀼 𑀅𑀢𑁆𑀣𑁄𑀬𑁂𑀯 𑀬𑀼𑀚𑁆𑀚𑀢𑀻𑀢𑀺. 𑀅𑀣𑀯𑀸, 𑀢𑀣𑀸 𑀯𑀤𑀦𑁆𑀢𑀼𑀯𑀸 𑀫𑀸𑀯𑀸. 𑀅𑀬𑀁𑀧𑀦 𑀯𑀤𑀫𑀸𑀦𑁂𑀲𑀼 𑀲𑀢𑀺 𑀢𑁂𑀲𑀁 𑀲𑀫𑁆𑀫𑀸 𑀯𑀢𑁆𑀢𑀼𑀁𑀏𑀯 𑀤𑁂𑀢𑀺. 𑀦𑀫𑀺𑀘𑁆𑀙𑀸 𑀯𑀢𑁆𑀢𑀼𑀦𑁆𑀢𑀺 𑀓𑀢𑁆𑀯𑀸 𑀲𑀫𑁆𑀫𑀸 𑀯𑀸𑀘𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀺𑀘, 𑀅𑀬𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀯𑀘𑀻𑀤𑁆𑀯𑀸𑀭𑀲𑀼𑀤𑁆𑀥𑀺𑀬𑀸 𑀏𑀯 𑀳𑁄𑀢𑀻𑀢𑀺 𑀲𑀫𑁆𑀫𑀸𑀯𑀸𑀘𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁧𑁧𑁨. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄𑀧𑀺 𑀢𑀺𑀯𑀺𑀥𑁄 𑀓𑁆𑀭𑀺𑀬𑀸, 𑀘𑁂𑀢𑀦𑀸, 𑀯𑀺𑀭𑀢𑀺 𑀯𑀲𑁂𑀦. 𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀅𑀦𑀯𑀚𑁆𑀚𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀺𑀓𑀓𑁆𑀭𑀺𑀬𑀸 𑀓𑁆𑀭𑀺𑀬𑀸𑀓𑀫𑁆𑀫𑀦𑁆𑀢𑁄𑀦𑀸𑀫. 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀘𑁂𑀢𑀦𑀸𑀓𑀫𑁆𑀫𑀦𑁆𑀢𑁄 𑀦𑀸𑀫. 𑀬𑀸 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀸𑀤𑀻𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺 𑀬𑀦𑁆𑀢𑀲𑁆𑀲𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑀯𑀸 𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀯𑀸 𑀧𑀸𑀧𑀯𑀺𑀭𑀫𑀡𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺. 𑀅𑀬𑀁 𑀯𑀺𑀭𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀸𑀫. 𑀲𑀫𑁆𑀫𑀸 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀓𑀫𑁆𑀫𑀁, 𑀢𑀤𑁂𑀯 𑀲𑀫𑁆𑀫𑀸 𑀓𑀫𑁆𑀫𑀦𑁆𑀢𑁄 𑀲𑀼𑀢𑁆𑀢𑀦𑁆𑀢𑁄 𑀯𑀦𑀦𑁆𑀢𑁄𑀯𑀺𑀬. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁧𑁩. 𑀲𑀫𑁆𑀫𑀸𑀆𑀚𑀻𑀯𑁄𑀧𑀺 𑀯𑀻𑀭𑀺𑀬, 𑀯𑀺𑀭𑀢𑀺𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀧𑀓𑀢𑀺𑀬𑀸 𑀅𑀦𑀯𑀚𑁆𑀚𑀸𑀦𑀺 𑀓𑀲𑀺𑀓𑀫𑁆𑀫𑀸𑀤𑀻𑀦𑀺𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀸𑀤𑀻𑀦𑀺𑀯𑀸 𑀓𑀢𑁆𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀸𑀦𑀁 𑀉𑀝𑁆𑀞𑀸𑀦𑀩𑀮𑀲𑀗𑁆𑀔𑀸𑀢𑁄 𑀯𑀸𑀬𑀸𑀫𑁄 𑀯𑀻𑀭𑀺𑀬𑀲𑀫𑁆𑀫𑀸𑀆𑀚𑀻𑀯𑁄𑀦𑀸𑀫. 𑀬𑀸 𑀧𑀦 𑀆𑀚𑀻𑀯𑀲𑀼𑀤𑁆𑀥𑀺𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀚𑀻𑀯𑀲𑀻𑀮𑀯𑀺𑀧𑀢𑁆𑀢𑀺𑀓𑀸𑀭𑀡𑀸𑀦𑀺 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀚𑀳𑀦𑁆𑀢𑀸𑀦𑀁 𑀧𑀸𑀧𑀯𑀺𑀭𑀫𑀡𑀸𑀓𑀸𑀭𑁂𑀦 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺. 𑀅𑀬𑀁 𑀯𑀺𑀭𑀢𑀺 𑀆𑀚𑀻𑀯𑁄𑀦𑀸𑀫. 𑀅𑀬𑀫𑀺𑀥𑀸𑀥𑀺𑀧𑁆𑀧𑁂𑀢𑁄. 𑀲𑀫𑁆𑀫𑀸 𑀆𑀚𑀻𑀯𑀦𑁆𑀢𑀺 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀆𑀚𑀻𑀯𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑁧𑁧𑁪. 𑀏𑀓𑁂𑀓𑀸𑀧𑀺 𑀘𑁂𑀢𑁆𑀣 𑀲𑀫𑁆𑀧𑀢𑁆𑀢 𑀯𑀺𑀭𑀢𑀺, 𑀲𑀫𑀸𑀤𑀸𑀦 𑀯𑀺𑀭𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀯𑀲𑁂𑀦 𑀢𑀺𑀯𑀺𑀥𑀸. 𑀢𑀢𑁆𑀣 𑀬𑀸 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀲𑀫𑀸 𑀤𑀺𑀬𑀺𑀢𑁆𑀯𑀸𑀯𑀸 𑀲𑀫𑀸𑀤𑀺𑀦𑁆𑀦𑀸𑀦𑀺𑀧𑀺𑀯𑀸 𑀢𑀸𑀦𑀺 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀳𑀺𑀭𑀺 𑀑𑀢𑁆𑀢𑀧𑁆𑀧𑀩𑀮𑁂𑀦𑁂𑀯 𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺. 𑀅𑀬𑀁 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀦𑀸𑀫. 𑀲𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀬𑁂𑀯. 𑀧𑀜𑁆𑀘𑀲𑀺𑀓𑁆𑀔𑀸 𑀧𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀳𑀺 𑀯𑀼𑀢𑁆𑀢𑀁. 𑀬𑀸 𑀧𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺 𑀬𑀦𑁆𑀢𑀲𑁆𑀲𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑀯𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀸𑀦𑀺𑀯𑀸 𑀬𑀣𑀸𑀥𑀺𑀝𑁆𑀞𑀺𑀢𑀸𑀦𑀺 𑀯𑀸 𑀲𑀼𑀝𑁆𑀞𑀼𑀭𑀓𑁆𑀔𑀸𑀫𑀻𑀢𑀺 𑀲𑀫𑁆𑀧𑀢𑁆𑀢 𑀯𑀢𑁆𑀣𑀼𑀁 𑀅𑀧𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀯𑀸 𑀉𑀧𑁆𑀧𑀦𑁆𑀦𑀸. 𑀅𑀬𑀁 𑀲𑀫𑀸𑀤𑀸𑀦𑀯𑀺𑀭𑀢𑀺𑀦𑀸𑀫. 𑀲𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀯𑀸 𑀳𑁄𑀢𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀸𑀯𑀸. 𑀢𑀣𑀸 𑀳𑀺 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀢𑀺 𑀇𑀤𑀁 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁 𑀧𑀘𑁆𑀘𑀬𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀦𑀸𑀫. 𑀲𑀸 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀏𑀯. 𑀨𑀮𑀯𑀺𑀭𑀢𑀺𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸𑀢𑀺. 𑀢𑀢𑁆𑀣 𑀮𑁄𑀓𑀺𑀬𑀯𑀺𑀭𑀢𑀺𑀬𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀽𑀦𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀽𑀦𑀺 𑀧𑀚𑀳𑀦𑁆𑀢𑀺. 𑀮𑁄𑀓𑀼𑀢𑁆𑀢𑀭𑀯𑀺𑀭𑀢𑀺𑀬𑁄 𑀧𑀦 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑀸𑀦𑀺𑀬𑁂𑀯 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀽𑀦𑀺 𑀧𑀚𑀳𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧𑁫. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀸𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀭𑀢𑀺𑀯𑀸 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺, 𑀓𑀺𑀡𑀸𑀢𑀺𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀻𑀢𑀺 𑀓𑀭𑀼𑀡𑀸. 𑀓𑀺𑀭𑀻𑀬𑀢𑀺 𑀤𑀼𑀓𑁆𑀔𑀺𑀢𑁂𑀲𑀼 𑀧𑀲𑀸𑀭𑀻𑀬𑀢𑀻𑀢𑀺𑀯𑀸 𑀓𑀭𑀼𑀡𑀸. 𑀅𑀧𑀺𑀘 𑀓𑀮𑀺 𑀉𑀡𑀸𑀢𑀺 𑀙𑁂𑀤𑁄. 𑀓𑀮𑀻𑀢𑀺 𑀤𑀼𑀓𑁆𑀔𑀁 𑀯𑀼𑀘𑁆𑀘𑀢𑀺, 𑀬𑀣𑀸-𑀓𑀮𑀺 𑀲𑀫𑁆𑀪𑀯𑁂 𑀪𑀯𑁂𑀢𑀺. 𑀓𑀮𑀻𑀢𑀺𑀯𑀸 𑀧𑀸𑀧𑀧𑀺 𑀧𑀭𑀸𑀚𑀬𑁄𑀧𑀺 𑀯𑀼𑀘𑁆𑀘𑀢𑀺. 𑀧𑀸𑀧𑁂 𑀓𑀮𑀺 𑀧𑀭𑀸𑀚𑀬𑁂𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀓𑀸𑀭𑀼𑀡𑀺𑀓𑀸 𑀦𑀁 𑀓𑀸𑀭𑀼𑀜𑁆𑀜𑀳𑁂𑀢𑀼𑀪𑀽𑀢𑀫𑁂𑀯 𑀳𑁄𑀢𑀺. 𑀇𑀢𑀺 𑀓𑀮𑀺𑀁 𑀤𑀼𑀓𑁆𑀔𑀁𑀯𑀸 𑀧𑀸𑀧𑀁𑀯𑀸 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀸𑀚𑀬𑀁𑀯𑀸 𑀲𑀢𑁆𑀢𑁂𑀳𑀺 𑀅𑀯𑀦𑁆𑀢𑀺 𑀭𑀓𑁆𑀔𑀦𑁆𑀢𑀺, 𑀲𑀢𑁆𑀢𑁂𑀯𑀸 𑀢𑀢𑁄 𑀯𑀺𑀥𑀓𑀮𑀺𑀢𑁄 𑀅𑀯𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀓𑀸𑀭𑀼𑀡𑀺𑀓𑀸 𑀚𑀦𑀸 𑀏𑀢𑀸𑀬𑀸𑀢𑀺 𑀓𑀭𑀼𑀡𑀸.

𑁧𑁧𑁬. 𑀧𑀭𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀫𑁄𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀫𑀼𑀤𑀺𑀢𑀸. 𑀦𑀢𑁆𑀣𑀺 𑀧𑀫𑀸𑀡𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸, 𑀲𑀢𑁆𑀢𑀸. 𑀅𑀧𑁆𑀧𑀫𑀸𑀡𑁂𑀲𑀼 𑀪𑀯𑀸𑀢𑀺 𑀅𑀧𑁆𑀧𑀫𑀜𑁆𑀜𑀸. 𑀏𑀢𑀸𑀳𑀺 𑀏𑀢𑁆𑀢𑀓𑁂𑀲𑀼𑀬𑁂𑀯 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑁂𑀢𑀩𑁆𑀩𑀸. 𑀦 𑀇𑀢𑁄 𑀅𑀜𑁆𑀜𑁂𑀲𑀽𑀢𑀺 𑀏𑀯𑀁 𑀧𑀭𑀺𑀘𑁆𑀙𑁂𑀤𑀧𑁆𑀧𑀫𑀸𑀡𑀲𑁆𑀲 𑀅𑀪𑀸𑀯𑀸 𑀏𑀓𑀲𑁆𑀫𑀺𑀁 𑀲𑀢𑁆𑀢𑁂 𑀧𑀯𑀢𑁆𑀢𑀸𑀧𑀺 𑀅𑀧𑁆𑀧𑀫𑀜𑁆𑀜𑀸𑀏𑀯𑀦𑀸𑀫 𑀳𑁄𑀦𑁆𑀢𑀻𑀢𑀺.

[𑁭𑁭] 𑀝𑀻𑀓𑀸𑀲𑀼 𑀧𑀦

𑀅𑀧𑁆𑀧𑀫𑀸𑀡𑀲𑀢𑁆𑀢𑀸 𑀭𑀫𑁆𑀫𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑀸. 𑀢𑀸𑀏𑀯 𑀅𑀧𑁆𑀧𑀫𑀜𑁆𑀜𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑁧𑁧𑁭. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀅𑀫𑁄𑀳𑁄𑀏𑀯. 𑀲𑁄 𑀳𑀺 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀅𑀥𑀺𑀧𑀢𑀺𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀓𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀲𑁄𑀪𑀡𑀭𑀸𑀲𑀺𑀫𑁆𑀳𑀺 𑀧𑀭𑀫𑀢𑁆𑀣𑀤𑀻𑀧𑀦𑀸.

𑁧𑁧𑁮. 𑀏𑀢𑁆𑀢𑀸𑀯𑀢𑀸𑀢𑀺𑀆𑀤𑀺 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀲𑀗𑁆𑀕𑀳𑁄. 𑀏𑀯𑀁 𑀤𑁆𑀯𑀺𑀧𑀜𑁆𑀜𑀸𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀘𑁂𑀢𑁄𑀬𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀢𑁂𑀲𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑁄 𑀘𑁂𑀢𑀲𑀺𑀓𑀸𑀦𑀁 𑀲𑀭𑀽𑀧𑀤𑀲𑁆𑀲𑀦𑀢𑁄 𑀧𑀭𑀁 𑀢𑁂𑀲𑀁 𑀘𑀺𑀢𑁆𑀢𑀸𑀯𑀺𑀬𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑁂𑀦 𑀅𑀯𑀺𑀬𑀼𑀢𑁆𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀘𑁆𑀘𑁂𑀓𑀁 𑀲𑀫𑁆𑀧𑀬𑁄𑀕𑁄 𑀢𑀣𑀸𑀬𑁄𑀕𑀁 𑀯𑀼𑀘𑁆𑀘𑀢𑁂𑀢𑀺 𑀬𑁄𑀚𑀦𑀸. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀽𑀢𑀺 𑀘𑀺𑀢𑁆𑀢𑁂𑀲𑀼 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀢𑀲𑀺𑀓𑀸 𑀏𑀢𑁂𑀲𑀽𑀢𑀺 𑀉𑀧𑁆𑀧𑀸𑀤𑀸. 𑀘𑀺𑀢𑁆𑀢𑀸𑀦𑀺𑀏𑀯 𑀉𑀧𑁆𑀧𑀸𑀤𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀢𑀺 𑀓𑀢𑁆𑀯𑀸. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀲𑀩𑁆𑀩𑀤𑀼𑀩𑁆𑀩𑀮𑀢𑁆𑀢𑀸 𑀢𑁂𑀲𑀼 𑀙 𑀧𑀓𑀺𑀡𑁆𑀡𑀓𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀪𑀸𑀯𑀦𑀸𑀩𑀮𑁂𑀦 𑀧𑀳𑀻𑀦𑀢𑁆𑀢𑀸 𑀯𑀺𑀢𑀓𑁆𑀓𑁄 𑀤𑀼𑀢𑀻𑀬𑀚𑁆𑀛𑀸𑀦𑀺𑀓𑀸𑀤𑀻𑀲𑀼, 𑀯𑀺𑀘𑀸𑀭𑁄 𑀢𑀢𑀻𑀬𑀚𑁆𑀛𑀸𑀦𑀺𑀓𑀸𑀤𑀻𑀲𑀼, 𑀧𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀤𑀻𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀲𑀪𑀸𑀯𑀢𑁆𑀢𑀸 𑀅𑀥𑀺𑀫𑁄𑀓𑁆𑀔𑁄 𑀅𑀲𑀦𑁆𑀦𑀺𑀝𑁆𑀞𑀸𑀦𑀲𑀪𑀸𑀯𑁂 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑁂 𑀦𑀼𑀧𑁆𑀧𑀚𑁆𑀚𑀢𑀺. 𑀯𑀻𑀭𑀺𑀬𑀁 𑀩𑀮𑀦𑀸𑀬𑀓𑀢𑁆𑀢𑀸 𑀤𑀼𑀩𑁆𑀩𑀮𑁂𑀲𑀼 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀸 𑀤𑀻𑀲𑀼 𑀲𑁄𑀴𑀲𑀘𑀺𑀢𑁆𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀧𑀻𑀢𑀺 𑀲𑀫𑁆𑀧𑀺𑀬𑀸𑀬𑀦𑀲𑀪𑀸𑀯𑀢𑁆𑀢𑀸 𑀤𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸 𑀲𑀳𑀕𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀙𑀦𑁆𑀤𑁄 𑀇𑀘𑁆𑀙𑀸𑀲𑀪𑀸𑀯𑀢𑁆𑀢𑀸 𑀇𑀘𑁆𑀙𑀸𑀭𑀳𑀺𑀢𑁂𑀲𑀼 𑀅𑀳𑁂𑀢𑀼𑀓𑁂𑀲𑀼 𑀫𑁄𑀫𑀽𑀳𑀘𑀺𑀢𑁆𑀢𑁂𑀲𑀼𑀘 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 𑀧𑀓𑀺𑀡𑁆𑀡𑀓𑁂𑀲𑀼𑀧𑀦 𑀯𑀺𑀢𑀓𑁆𑀓𑁄.𑀮. 𑀫𑁄𑀫𑀽𑀳𑀯𑀚𑁆𑀚𑀺𑀢𑀘𑀺𑀢𑁆𑀢𑁂𑀲𑀽𑀢𑀺. 𑀢𑁂 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀺𑀡𑁆𑀡𑀓𑀯𑀺𑀯𑀚𑁆𑀚𑀺𑀢𑀸 𑀲𑀧𑀓𑀺𑀡𑁆𑀡𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁯. 𑀅𑀓𑀼𑀲𑀮𑁂𑀲𑀽𑀢𑀺 𑀅𑀓𑀼𑀲𑀮𑀘𑁂𑀢𑀲𑀺𑀓𑁂𑀲𑀼. 𑀲𑀩𑁆𑀩𑀸𑀓𑀼𑀲𑀮 𑀲𑀸𑀥𑀸𑀭𑀡𑀸𑀦𑀸𑀫. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀼𑀧𑀺 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸.

[𑁭𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑀲𑁆𑀲 𑀲𑀫𑀢𑁆𑀣𑀦𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀇𑀤𑀜𑁆𑀳𑀺 𑀞𑀸𑀦𑀁 𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀢𑀸𑀤𑀲𑁆𑀲𑀦𑀧𑀥𑀸𑀦𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑀸𑀦𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀯𑀺𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀦 𑀳𑀺 𑀢𑀸𑀦𑀺 𑀧𑀸𑀧𑁂𑀲𑀼 𑀆𑀤𑀻𑀦𑀯𑀁 𑀧𑀲𑁆𑀲𑀺𑀢𑁆𑀯𑀸 𑀞𑀺𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀦𑀘 𑀢𑁂𑀳𑀺 𑀮𑀚𑁆𑀚𑀸𑀬𑀯𑀸 𑀪𑀬𑁂𑀦𑀯𑀸 𑀉𑀓𑁆𑀓𑀡𑁆𑀞𑀺𑀢𑀸𑀦𑀁. 𑀦𑀸𑀧𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑀸𑀳𑀺𑀢𑀸𑀦𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀲𑀼 𑀢𑁂𑀲𑀼 𑀮𑀩𑁆𑀪𑀦𑁆𑀢𑀻𑀢𑀺. 𑀬𑀲𑁆𑀫𑀸𑀘 𑀤𑀺𑀝𑁆𑀞𑀺𑀫𑀸𑀦𑀸 𑀔𑀦𑁆𑀥𑁂𑀲𑀼 𑀅𑀲𑁆𑀲𑀸𑀤𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀢𑁂𑀲𑀼 𑀢𑀣𑀸 𑀢𑀣𑀸 𑀆𑀫𑀲𑀺𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀮𑁄𑀪𑀫𑀽𑀮𑀘𑀺𑀢𑁆𑀢𑁂𑀲𑁆𑀯𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀧𑀦 𑀢𑁂𑀲𑀼 𑀤𑀺𑀝𑁆𑀞𑀺 𑀔𑀦𑁆𑀥𑁂𑀲𑀼 𑀅𑀢𑁆𑀢𑀕𑁆𑀕𑀸𑀳𑀁 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀢𑁆𑀢𑀁 𑀦𑀺𑀘𑁆𑀘𑀢𑀸𑀤𑀻𑀳𑀺 𑀫𑀺𑀘𑁆𑀙𑀸𑀲𑀪𑀸𑀯𑁂𑀳𑀺𑀏𑀯 𑀧𑀭𑀸𑀫𑀲𑀦𑁆𑀢𑀻 𑀧𑀯𑀢𑁆𑀢𑀢𑀺. 𑀫𑀸𑀦𑁄 𑀧𑀦 𑀔𑀦𑁆𑀥𑁂 𑀅𑀳𑀦𑁆𑀢𑀺 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀢𑀁 𑀕𑀳𑀺𑀢𑀸𑀓𑀸𑀭𑀁 𑀲𑁂𑀬𑁆𑀬 𑀢𑀸𑀤𑀻𑀳𑀺𑀏𑀯 𑀆𑀫𑀲𑀦𑁆𑀢𑁄 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑁂 𑀆𑀫𑀲𑀦𑀸𑀓𑀸𑀭𑀢𑁄 𑀅𑀲𑀤𑀺𑀲𑀯𑀼𑀢𑁆𑀢𑀺𑀦𑁄𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳. 𑀤𑀺𑀝𑁆𑀞𑀺𑀘𑀢𑀽𑀲𑀼.𑀮. 𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀽𑀢𑀺. 𑀬𑁂 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀸 𑀤𑀺𑀝𑁆𑀞𑀺𑀬𑀸 𑀬𑀣𑀸𑀕𑀳𑀺𑀢𑀁 𑀅𑀢𑁆𑀢𑀸𑀦𑀫𑁂𑀯 𑀅𑀳𑀦𑁆𑀢𑀺 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀁𑀧𑀺 𑀤𑀺𑀝𑁆𑀞𑀺𑀫𑀸𑀦𑀸 𑀆𑀫𑀲𑀦𑀸𑀓𑀸𑀭𑀁 𑀧𑀢𑁆𑀯𑀸 𑀅𑀲𑀤𑀺𑀲𑀯𑀼𑀢𑁆𑀢𑀺𑀓𑀸𑀏𑀯 𑀳𑁄𑀦𑁆𑀢𑀺. 𑀦 𑀳𑀺 𑀫𑀸𑀦𑀲𑁆𑀲 𑀯𑀺𑀬 𑀤𑀺𑀝𑁆𑀞𑀺𑀬𑀸 𑀅𑀢𑁆𑀢 𑀲𑀁𑀧𑀕𑁆𑀕𑀳𑀡𑁂 𑀩𑁆𑀬𑀸𑀧𑀸𑀭𑁄 𑀅𑀢𑁆𑀣𑀺. 𑀦 𑀘 𑀤𑀺𑀝𑁆𑀞𑀺𑀬𑀸 𑀯𑀺𑀬 𑀫𑀸𑀦𑀲𑁆𑀲 𑀥𑀫𑁆𑀫𑀸𑀦𑀁 𑀅𑀬𑀸𑀣𑀸𑀯𑀧𑀓𑁆𑀔𑀧𑀭𑀺𑀓𑀧𑁆𑀧𑀦𑁂𑀢𑀺. 𑀢𑁂𑀦𑁂𑀯 𑀳𑀺 𑀅𑀳𑀁𑀕𑀸𑀳𑁄 𑀫𑀸𑀦𑁄 𑀅𑀦𑀸𑀕𑀸𑀫𑀻𑀦𑀁𑀧𑀺 𑀧𑀯𑀢𑁆𑀢𑀢𑀺. 𑀅𑀢𑁆𑀢𑀕𑁆𑀕𑀸𑀳𑀪𑀽𑀢𑀸 𑀧𑀦 𑀤𑀺𑀝𑁆𑀞𑀺 𑀧𑀼𑀣𑀼𑀚𑁆𑀚𑀦𑀸𑀦 𑀫𑁂𑀯𑀸𑀢𑀺.

[𑁭𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀫𑀸𑀦𑁄𑀧𑀺 𑀅𑀳𑀁𑀫𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀤𑀺𑀝𑁆𑀞𑀺𑀲𑀤𑀺𑀲𑁄𑀯 𑀧𑀯𑀢𑁆𑀢𑀢𑀻𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀦𑀧𑀯𑀢𑁆𑀢𑀢𑀻’’𑀢𑀺 𑀯𑀢𑁆𑀯𑀸 𑀓𑁂𑀲𑀭 𑀲𑀻𑀳𑁄 𑀧𑀫𑀸𑀬 𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀲𑀤𑀺𑀲𑀧𑁆𑀧𑀯𑀢𑁆𑀢𑀺 𑀳𑀺 𑀦𑀸𑀫 𑀲𑀳𑀧𑀯𑀢𑁆𑀢𑀺𑀬𑀸 𑀏𑀯 𑀓𑀸𑀭𑀡𑀦𑁆𑀢𑀺. 𑀫𑀘𑁆𑀙𑀭𑀺𑀬𑀁 𑀧𑀦 𑀅𑀢𑁆𑀢𑀲𑀫𑁆𑀧𑀢𑁆𑀢𑀻𑀲𑀼 𑀮𑀕𑁆𑀕𑀦𑀮𑁄𑀪𑀲𑀫𑀼𑀝𑁆𑀞𑀺𑀢𑀁𑀧𑀺 𑀢𑀸𑀲𑀁 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑁆𑀢𑀸 𑀏𑀓𑀦𑁆𑀢𑁂𑀦 𑀧𑀝𑀺𑀖𑀲𑀫𑁆𑀧 𑀬𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀤𑁄𑀲𑁄.𑀮. 𑀘𑀺𑀢𑁆𑀢𑁂𑀲𑀽𑀢𑀺. 𑀅𑀓𑀫𑁆𑀫𑀜𑁆𑀜 𑀮𑀓𑁆𑀔𑀡𑀁 𑀣𑀺𑀦𑀫𑀺𑀤𑁆𑀥𑀁 𑀓𑀫𑁆𑀫𑀜𑁆𑀜𑀲𑀪𑀸𑀯𑁂𑀲𑀼 𑀅𑀲𑀗𑁆𑀔𑀸𑀭𑀺𑀓𑁂𑀲𑀼 𑀦𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓 𑀘𑀺𑀢𑁆𑀢𑁂𑀲𑀽𑀢𑀺. 𑀘𑀢𑁆𑀢𑀸𑀭𑁄 𑀲𑀩𑁆𑀩𑀸 𑀓𑀼𑀲𑀮𑀲𑀸𑀥𑀸𑀭𑀡𑀸. 𑀢𑀬𑁄 𑀮𑁄𑀪 𑀤𑀺𑀝𑁆𑀞𑀺𑀫𑀸𑀦𑀸. 𑀘𑀢𑁆𑀢𑀸𑀭𑁄 𑀤𑁄𑀲𑀸𑀤𑀬𑁄. 𑀤𑁆𑀯𑀬𑀁 𑀣𑀺𑀦𑀫𑀺𑀤𑁆𑀥𑀁. 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑁂𑀘𑀸𑀢𑀺 𑀘𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀯𑀺𑀘𑀺𑀓𑀺𑀘𑁆𑀙𑀸𑀘𑀺𑀢𑁆𑀢𑁂𑀏𑀯𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀤𑁆𑀤𑀲 𑀅𑀓𑀼𑀲𑀮 𑀘𑁂𑀢𑀲𑀺𑀓𑀸.

𑁧𑁨𑁦. 𑀲𑁄𑀪𑀡𑁂𑀲𑀽𑀢𑀺 𑀲𑁄𑀪𑀡𑀘𑁂𑀢𑀲𑀺𑀓𑁂𑀲𑀼. 𑀮𑁄𑀓𑀼𑀢𑁆𑀢𑀭𑁂 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁂 𑀢𑀻𑀲𑀼 𑀔𑀦𑁆𑀥𑁂𑀲𑀼 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦𑀸𑀫 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀙𑀺𑀫𑀓𑁄𑀯 𑀳𑁄𑀢𑀺. 𑀢𑀲𑁆𑀫𑀸 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀢𑀲𑁆𑀫𑀺𑀁 𑀅𑀲𑀢𑀺𑀧𑀺 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀧𑀭𑀺𑀳𑀸𑀬𑀢𑀺. 𑀲𑀻𑀮𑀲𑀫𑀸𑀥𑀺𑀓𑁆𑀔𑀦𑁆𑀥𑀥𑀫𑁆𑀫𑁂𑀲𑀼 𑀧𑀦 𑀏𑀓𑁄 𑀏𑀓𑀲𑁆𑀲 𑀓𑀺𑀘𑁆𑀘𑀁 𑀦𑀲𑀸𑀥𑁂𑀢𑀺. 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭 𑀫𑀕𑁆𑀕𑁄 𑀲𑀢𑁆𑀢𑀗𑁆𑀕𑀺𑀓𑀢𑁄 𑀳𑁂𑀝𑁆𑀞𑀸 𑀦𑀧𑀯𑀢𑁆𑀢𑀢𑀻𑀢𑀺 𑀆𑀳 𑀯𑀺𑀭𑀢𑀺𑀬𑁄 𑀧𑀦 𑀢𑀺𑀲𑁆𑀲𑁄𑀧𑀺.𑀮. 𑀮𑀩𑁆𑀪𑀦𑁆𑀢𑀻𑀢𑀺. 𑀦𑀺𑀬𑀢𑀸𑀯 𑀏𑀓𑀢𑁄𑀯 𑀲𑀩𑁆𑀩𑀣𑀸𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀦𑀺𑀬𑀢𑀸𑀯𑀸𑀢𑀺 𑀦 𑀮𑁄𑀓𑀺𑀬𑁂𑀲𑀼𑀯𑀺𑀬 𑀓𑀤𑀸𑀘𑀺𑀏𑀯 𑀮𑀩𑁆𑀪𑀦𑁆𑀢𑀺. 𑀅𑀣𑀔𑁄 𑀲𑀩𑁆𑀩𑀤𑀸𑀧𑀺 𑀦𑀺𑀬𑀢𑀸 𑀳𑀼𑀢𑁆𑀯𑀸𑀯 𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀁 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀦 𑀳𑀺 𑀢𑁂 𑀮𑁄𑀓𑀺𑀬𑀸 𑀯𑀺𑀬 𑀓𑀤𑀸𑀘𑀺 𑀤𑀸𑀦𑀯𑀲𑁂𑀦 𑀓𑀤𑀸𑀘𑀺 𑀲𑀼𑀢𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀓𑀤𑀸𑀘𑀺 𑀓𑀲𑀺𑀡𑀪𑀸𑀯𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀏𑀓𑀢𑁄 𑀯𑀸𑀢𑀺 𑀦𑀮𑁄𑀓𑀺𑀬𑁂𑀲𑀼 𑀯𑀺𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀮𑀩𑁆𑀪𑀦𑁆𑀢𑀺. 𑀅𑀣𑀔𑁄 𑀢𑀺𑀲𑁆𑀲𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸𑀯 𑀮𑀩𑁆𑀪𑀦𑁆𑀢𑀺. 𑀓𑀲𑁆𑀫𑀸, 𑀅𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸. 𑀦 𑀳𑀺 𑀢𑁂 𑀮𑁄𑀓𑀺𑀬𑀸 𑀯𑀺𑀬 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀲𑀗𑁆𑀔𑀸𑀢𑀸𑀦𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀦𑀸𑀦𑀸𑀭𑀫𑁆𑀫𑀡𑀸𑀦𑀺 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺. 𑀏𑀓𑀁𑀧𑀦 𑀦𑀺𑀩𑁆𑀩𑀸𑀦𑀫𑁂𑀯 𑀆𑀭𑀩𑁆𑀪𑀧𑀯𑀢𑁆𑀢𑀦𑁆𑀢𑀻𑀢𑀺. 𑀲𑀩𑁆𑀩𑀣𑀸𑀧𑀻𑀢𑀺 𑀦 𑀮𑁄𑀓𑀺𑀬𑁂𑀲𑀼 𑀯𑀺𑀬 𑀏𑀓𑀤𑁂 𑀲𑀧𑁆𑀧𑀳𑀸𑀦𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀅𑀣𑀔𑁄 𑀢𑀺𑀲𑁆𑀲𑁄𑀧𑀺 𑀅𑀦𑀯𑀲𑁂𑀲 𑀤𑀼𑀘𑁆𑀘𑀭𑀺𑀢 𑀤𑀼𑀭𑀸𑀚𑀻𑀯𑀧𑁆𑀧𑀳𑀸𑀦𑀸𑀓𑀸𑀭𑁂𑀦 𑀮𑀩𑁆𑀪𑀦𑁆𑀢𑀺. 𑀮𑁄𑀓𑀺𑀬𑁂𑀲𑀼𑀳𑀺 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀲𑀫𑁆𑀫𑀸𑀯𑀸𑀘𑀸 𑀘𑀢𑀼𑀩𑁆𑀩𑀺𑀥𑀸𑀦𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀩𑁆𑀩𑀸𑀦𑀺 𑀏𑀓𑀢𑁄 𑀧𑀚𑀳𑀺𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀫𑀼𑀲𑀸𑀯𑀸𑀤𑀯𑀺𑀭𑀢𑀺 𑀫𑀼𑀲𑀸𑀯𑀸𑀤𑀫𑁂𑀯 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀇𑀢𑀭𑀸𑀦𑀺. 𑀫𑀼𑀲𑀸𑀯𑀸𑀤𑀁𑀧𑀺 𑀲𑀫𑀽𑀮𑀁 𑀲𑀸𑀦𑀼𑀲𑀬𑀁 𑀧𑀚𑀳𑀺𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸 𑀯𑀺𑀭𑀢𑀺 𑀧𑀺𑀲𑀼𑀡𑀯𑀸𑀘𑀫𑁂𑀯 𑀧𑀚𑀳𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦 𑀇𑀢𑀭𑀸𑀦𑀺. 𑀧𑀺𑀲𑀼𑀡𑀯𑀸𑀘𑀁𑀧𑀺 𑀲𑀫𑀽𑀮𑀁 𑀲𑀸𑀦𑀼𑀲𑀬𑀁 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀮𑁄𑀓𑀼𑀢𑁆𑀢𑀭𑁂𑀲𑀼 𑀧𑀦 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀲𑀫𑁆𑀫𑀸𑀯𑀸𑀘𑀸 𑀲𑀩𑁆𑀩𑀸𑀦𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀫𑀽𑀮𑀸𑀦𑀺 𑀲𑀸𑀦𑀼𑀲𑀬𑀸𑀦𑀺 𑀧𑀚𑀳𑀢𑀺. 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀩𑁆𑀩𑀸𑀦𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀫𑀽𑀮𑀸𑀦𑀺 𑀲𑀸𑀦𑀼𑀲𑀬𑀸𑀦𑀺 𑀧𑀚𑀳𑀢𑀺. 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀩𑁆𑀩𑀸𑀦𑀺 𑀆𑀚𑀻𑀯𑀳𑁂𑀢𑀼𑀓𑀸𑀦𑀺 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀫𑀽𑀮𑀸𑀦𑀺 𑀲𑀸𑀦𑀼𑀲𑀬𑀸𑀦𑀺 𑀧𑀚𑀳𑀢𑀺. 𑀇𑀢𑀺 𑀢𑀺𑀲𑁆𑀲𑁄 𑀮𑁄𑀓𑀼𑀢𑁆𑀢𑀭𑁂𑀲𑀼𑀏𑀯 𑀲𑀩𑁆𑀩𑀣𑀸𑀧𑀺 𑀮𑀩𑁆𑀪𑀦𑁆𑀢𑀻𑀢𑀺. 𑀯𑀺𑀲𑀤𑁆𑀤𑁄 𑀅𑀯𑀬𑀯𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀲𑀓𑀺𑀁 𑀉𑀧𑁆𑀧𑀦𑁆𑀦𑀸 𑀏𑀓𑀸 𑀲𑀫𑁆𑀫𑀸𑀯𑀸𑀘𑀸 𑀫𑀼𑀲𑀸𑀯𑀸𑀤𑀧𑁆𑀧𑀳𑀸𑀦𑀯𑀲𑁂𑀦𑀸𑀧𑀺 𑀮𑀩𑁆𑀪𑀢𑀺. 𑀦𑀓𑁂𑀯𑀮𑀜𑁆𑀘 𑀢𑀧𑁆𑀧𑀳𑀸𑀦𑀯𑀲𑁂𑀦𑁂𑀯. 𑀅𑀣𑀔𑁄 𑀧𑀺𑀲𑀼𑀡𑀯𑀸𑀘𑀸𑀧𑀳𑀸𑀦𑀯𑀲𑁂𑀦𑀧𑀺 𑀮𑀩𑁆𑀪𑀢𑀻𑀢𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀣𑀘 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀫𑀽𑀮𑀸𑀦𑀺 𑀲𑀸𑀦𑀼𑀲𑀬𑀸𑀦𑀻𑀢𑀺 𑀏𑀢𑁆𑀣 𑀓𑀸𑀬𑀯𑀘𑀻𑀘𑁄𑀧𑀦 𑀪𑀸𑀕𑀺𑀬𑀸𑀦𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸𑀦𑀺 𑀓𑀺𑀮𑁂𑀲𑀚𑀸𑀢𑀸𑀦𑀺 𑀅𑀭𑀽𑀧𑀲𑁂𑀓𑁆𑀔𑀸𑀦𑀁𑀧𑀺 𑀲𑀦𑁆𑀢𑀺𑀬𑁂𑀯. 𑀓𑀸𑀫𑀭𑀽𑀧𑀲𑁂𑀓𑁆𑀔𑀸𑀦𑀁 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀲𑀁 𑀧𑀚𑀳𑀦𑀯𑀲𑁂𑀦 𑀉𑀧𑀭𑀺𑀫𑀕𑁆𑀕 𑀨𑀮𑀯𑀺𑀭𑀢𑀻𑀦𑀁 𑀤𑀼𑀘𑁆𑀘𑀭𑀺𑀢𑀧𑁆𑀧𑀳𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑁆𑀯𑁂𑀯, 𑀦𑀧𑀦 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀓𑁆𑀭𑀺𑀬𑀘𑀺𑀢𑁆𑀢𑁂𑀲𑀼, 𑀦𑀸𑀧𑀺𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀲𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼𑀧𑀺 𑀓𑀸𑀫𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑁂𑀲𑀼𑀏𑀯, 𑀦𑀭𑀽𑀧𑀸𑀭𑀽𑀧𑀪𑀽𑀫𑀺𑀬𑀁 𑀉𑀧𑁆𑀧𑀦𑁆𑀦𑁂𑀲𑀼. 𑀦 𑀳𑀺 𑀩𑁆𑀭𑀳𑁆𑀫𑀸𑀦𑀁 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀼 𑀲𑀗𑁆𑀔𑀸𑀢𑀸𑀦𑀺 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺𑀦𑀸𑀫 𑀅𑀢𑁆𑀣𑀺. 𑀦𑀘 𑀮𑁄𑀓𑀺𑀬𑀯𑀺𑀭𑀢𑀺𑀬𑁄 𑀯𑀺𑀭𑀫𑀺𑀢𑀩𑁆𑀩 𑀯𑀢𑁆𑀣𑀼𑀭𑀳𑀺𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀉𑀧𑀭𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑁂 𑀲𑀼𑀧𑀺 𑀦𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀯𑀺𑀘𑀸𑀭𑀺𑀢𑀫𑁂𑀯. 𑀬𑀤𑀺 𑀏𑀯𑀁 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀢𑀻𑀲𑀼 𑀳𑁂𑀝𑁆𑀞𑀺𑀫𑀨𑀮𑀝𑁆𑀞𑁂𑀲𑀼 𑀢𑀸𑀲𑀁 𑀅𑀧𑁆𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀺. 𑀦 𑀳𑀺 𑀢𑁂𑀲𑀁𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀽𑀦𑀺𑀦𑀸𑀫 𑀅𑀢𑁆𑀣𑀻𑀢𑀺. 𑀲𑀘𑁆𑀘𑀁, 𑀇𑀥 𑀧𑀦 𑀲𑀢𑁆𑀢𑀯𑀺𑀥𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀧𑀺 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀼𑀝𑁆𑀞𑀸𑀦𑁂 𑀞𑀺𑀢𑀸. 𑀢𑀣𑀸 𑀢𑀺𑀯𑀺𑀥𑀓𑀼𑀳𑀦𑀯𑀢𑁆𑀣𑀽𑀦𑀺𑀘. 𑀢𑀸𑀦𑀺𑀘 𑀓𑀸𑀦𑀺𑀘𑀺 𑀢𑁂𑀲𑀁 𑀨𑀮𑀝𑁆𑀞𑀸𑀦𑀁𑀧𑀺 𑀲𑀸𑀥𑀸𑀭𑀡𑀸𑀦𑀺𑀏𑀯. 𑀫𑀦𑀼𑀲𑁆𑀲𑀸𑀦𑀜𑁆𑀘 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀲𑁆𑀲 𑀢𑀲𑁆𑀲 𑀲𑀫𑀸𑀤𑀺𑀦𑁆𑀦𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀢𑁆𑀣𑀽𑀦𑀺𑀧𑀺 𑀯𑀺𑀭𑀫𑀺𑀢𑀩𑁆𑀩𑀯𑀢𑁆𑀣𑀽𑀦𑀺𑀏𑀯. 𑀬𑀸𑀦𑀺𑀧𑀺 𑀓𑀸𑀫𑀲𑁂𑀓𑁆𑀔𑀸𑀦𑀁 𑀓𑀸𑀬𑀯𑀸𑀘𑀸 𑀯𑀺𑀧𑁆𑀨𑀦𑁆𑀤𑀦𑀓𑀭𑀸𑀦𑀺 𑀓𑀺𑀮𑁂𑀲𑀚𑀸𑀢𑀸𑀦𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀦𑀁 𑀯𑀢𑁆𑀣𑀼𑀪𑀽𑀢𑀸𑀦𑀺 𑀲𑀦𑁆𑀢𑀺. 𑀢𑀸𑀦𑀺 𑀢𑁂𑀲𑀁 𑀢𑀤𑀗𑁆𑀕 𑀯𑀺𑀭𑀢𑀻𑀦𑀁𑀧𑀺 𑀯𑀢𑁆𑀣𑀽𑀦𑀺𑀏𑀯𑀸𑀢𑀺. 𑀓𑀤𑀸𑀘𑀺 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑀸𑀤𑀸𑀦𑀲𑀫𑁆𑀧𑀢𑁆𑀢𑀯𑀺𑀭𑀢𑀻𑀦𑀁 𑀅𑀜𑁆𑀜𑀢𑀭𑀯𑀲𑁂𑀦 𑀧𑀯𑀢𑁆𑀢𑀓𑀸𑀮𑁂𑀏𑀯 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀦𑁆𑀤𑀺𑀲𑁆𑀲 𑀫𑀸𑀦𑀸𑀧𑀺 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 𑀦𑀏𑀓𑀢𑁄 𑀳𑀼𑀢𑁆𑀯𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺. 𑀯𑀺𑀲𑀼𑀁𑀯𑀺𑀲𑀼𑀁 𑀲𑀦𑁆𑀤𑀺𑀲𑁆𑀲𑀫𑀸𑀦𑀸𑀧𑀺 𑀏𑀓𑁂𑀓𑀤𑀼𑀘𑁆𑀘𑀭𑀺𑀢𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. 𑀦 𑀮𑁄𑀓𑀼𑀢𑁆𑀢𑀭𑁂𑀲𑀼 𑀯𑀺𑀬 𑀲𑀩𑁆𑀩𑀣𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁨𑁧. 𑀅𑀧𑁆𑀧𑀦𑀸𑀧𑀢𑁆𑀢𑀸𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀯𑀚𑁆𑀚𑀺𑀢𑀫𑀳𑀕𑁆𑀕𑀢𑀘𑀺𑀢𑁆𑀢𑁂𑀲𑀽𑀢𑀺. 𑀏𑀢𑀸𑀳𑀺 𑀧𑀭𑀲𑀢𑁆𑀢𑀸𑀦𑀁 𑀳𑁂𑀢𑀼 𑀅𑀥𑀺𑀫𑀢𑁆𑀢𑀩𑁆𑀬𑀸𑀧𑀸𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀢𑀺𑀲𑀦𑁆𑀢𑀸𑀬 𑀦𑀺𑀩𑁆𑀬𑀸𑀧𑀸𑀭𑀸𑀬 𑀧𑀜𑁆𑀘𑀫𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬 𑀲𑀳 𑀦𑀧𑀯𑀢𑁆𑀢𑀦𑁆𑀢𑀻𑀢𑀺. 𑀅𑀧𑁆𑀧𑀦𑀸𑀧𑀼𑀩𑁆𑀩𑀪𑀸𑀕𑀪𑀽𑀢𑀸𑀦𑀁 𑀧𑀦 𑀢𑀸𑀲𑀁 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑀧𑀺 𑀲𑀫𑁆𑀧𑀬𑁄𑀕𑁄 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀓𑀸𑀫𑀸𑀯𑀘𑀭.𑀮. 𑀘𑀺𑀢𑁆𑀢𑁂𑀲𑀼𑀘𑀸𑀢𑀺. 𑀓𑀤𑀸𑀘𑀻𑀢𑀺 𑀓𑀸𑀭𑀼𑀜𑁆𑀜𑀧𑁆𑀧𑀓𑀢𑀺𑀓𑀲𑁆𑀲 𑀅𑀦𑀺𑀲𑁆𑀲𑀼𑀓𑀺𑀦𑁄𑀘 𑀧𑀭𑁂𑀲𑀁 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀓𑀸𑀮𑁂. 𑀦𑀸𑀦𑀸𑀳𑀼𑀢𑁆𑀯𑀸 𑀚𑀸𑀬𑀦𑁆𑀢𑀻𑀢𑀺 𑀢𑁂𑀲𑀁 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀓𑀸𑀮𑁂 𑀅𑀦𑀼𑀓𑀫𑁆𑀧𑀦𑀯𑀲𑁂𑀦 𑀓𑀭𑀼𑀡𑀸 𑀏𑀯 𑀚𑀸𑀬𑀢𑀺, 𑀦𑀫𑀼𑀤𑀺𑀢𑀸. 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀓𑀸𑀮𑁂 𑀧𑀦 𑀫𑁄𑀤𑀦𑀯𑀲𑁂𑀦 𑀫𑀼𑀤𑀺𑀢𑀸𑀯 𑀚𑀸𑀬𑀢𑀺, 𑀦𑀓𑀭𑀼𑀡𑀸𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀳𑀼𑀢𑁆𑀯𑀸 𑀚𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑀸 𑀤𑁄𑀲𑀲𑀫𑀼𑀝𑁆𑀞𑀺𑀢𑀸𑀦𑀁 𑀯𑀺𑀳𑀺𑀁𑀲𑀸 𑀅𑀭𑀢𑀻𑀦𑀁 𑀦𑀺𑀲𑁆𑀲𑀭𑀡𑀪𑀽𑀢𑀸𑀢𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀼𑀢𑁆𑀢𑀸. 𑀤𑁄𑀫𑀦𑀲𑁆𑀲𑀧𑀝𑀺𑀧𑀓𑁆𑀔𑀜𑁆𑀘𑀲𑁄 𑀫𑀦𑀲𑁆𑀲𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀢𑀸𑀲𑀁 𑀅𑀧𑁆𑀧𑀦𑀸𑀧𑀼𑀩𑁆𑀩𑀪𑀸𑀕𑀪𑀽𑀢𑀸𑀦𑀁𑀧𑀺 𑀦𑀺𑀘𑁆𑀘𑀁 𑀲𑁄𑀫𑀦𑀲𑁆𑀲𑀬𑁄𑀕𑀫𑁂𑀯 𑀓𑁂𑀘𑀺 𑀇𑀘𑁆𑀙𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀲𑀼.𑀮. 𑀓𑁂𑀘𑀺 𑀯𑀤𑀦𑁆𑀢𑀻𑀢𑀺. 𑀲𑁄 𑀧𑀦 𑀢𑁂𑀲𑀁 𑀯𑀸𑀤𑁄 𑀅𑀝𑁆𑀞𑀓𑀣𑀸𑀬𑀧𑀺 𑀲𑀳 𑀯𑀺𑀭𑀼𑀤𑁆𑀥𑁄. 𑀢𑀲𑁆𑀫𑀸 𑀢𑀁 𑀩𑀳𑀽 𑀯𑀺𑀜𑁆𑀜𑀼𑀦𑁄 𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻𑀢𑀺 𑀓𑀢𑁆𑀯𑀸 𑀲𑁄𑀯𑀸𑀤𑁄 𑀣𑁂𑀭𑁂𑀦 𑀓𑁂𑀘𑀺𑀯𑀸𑀤𑁄𑀦𑀸𑀫 𑀓𑀢𑁄. 𑀬𑀲𑁆𑀫𑀸𑀘 𑀲𑀩𑁆𑀩𑁂𑀲𑀁𑀧𑀺 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕 𑀪𑀸𑀯𑀦𑀸 𑀦𑀸𑀫 𑀅𑀧𑁆𑀧𑀦𑀸𑀲𑀦𑁆𑀦𑀓𑀸𑀮𑁂𑀏𑀯 𑀲𑁄𑀫𑀦𑀲𑁆𑀲𑀚𑁆𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑁄𑀦𑁆𑀢𑀺. 𑀉𑀧𑁂𑀓𑁆𑀔𑀸𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑁄𑀦𑁆𑀢𑀺. 𑀅𑀦𑀸𑀲𑀦𑁆𑀦𑀓𑀸𑀮𑁂 𑀧𑀦 𑀲𑀩𑁆𑀩𑁂𑀲𑀁𑀧𑀺 𑀢𑁂𑀲𑀁 𑀧𑀼𑀩𑁆𑀩𑀪𑀸𑀕𑀸 𑀓𑀤𑀸𑀘𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸, 𑀓𑀤𑀸𑀘𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀯𑀸𑀤𑁄 𑀓𑁂𑀘𑀺𑀯𑀸𑀤𑁄𑀯 𑀓𑀸𑀢𑀼𑀁 𑀬𑀼𑀢𑁆𑀢𑁄𑀢𑀺. 𑀏𑀢𑁆𑀣𑀘 𑀲𑀩𑁆𑀩𑀸𑀦𑀺𑀧𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀘𑀺𑀢𑁆𑀢𑀸𑀦𑀺𑀦𑀸𑀫 𑀆𑀤𑀺𑀫𑁆𑀳𑀺 𑀬𑁂𑀪𑀼𑀬𑁆𑀬𑁂𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺𑀏𑀯 𑀪𑀯𑁂𑀬𑁆𑀬𑀼𑀁, 𑀬𑀤𑀺𑀬𑀺 𑀢𑀸𑀦𑀺 𑀆𑀤𑀺𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑁄𑀫𑀦𑀲𑁆𑀲𑀲𑀳𑀚𑀸𑀢𑀸𑀦𑀺 𑀲𑀺𑀬𑀼𑀁. 𑀢𑀤𑀸 𑀇𑀫𑁂 𑀲𑀢𑁆𑀢𑀸 𑀲𑁄 𑀫𑀦𑀲𑁆𑀲𑀚𑀸𑀢𑁂𑀲𑀼 𑀓𑀫𑁆𑀫𑁂𑀲𑀼 𑀅𑀦𑀪𑀺𑀭𑀢𑀸𑀦𑀸𑀫 𑀦𑀢𑁆𑀣𑀻𑀢𑀺 𑀅𑀜𑁆𑀜𑀁 𑀓𑀫𑁆𑀫𑀁 𑀙𑀟𑁆𑀟𑁂𑀢𑁆𑀯𑀸 𑀪𑀸𑀯𑀦𑀸𑀓𑀫𑁆𑀫𑀫𑁂𑀯 𑀅𑀦𑀼𑀬𑀼𑀜𑁆𑀚𑁂𑀬𑁆𑀬𑀼𑀦𑁆𑀢𑀺. 𑀧𑀘𑁆𑀙𑀸 𑀧𑀦 𑀅𑀢𑁆𑀢𑀦𑁄 𑀪𑀸𑀯𑀦𑀸𑀬 𑀧𑀼𑀩𑁆𑀩𑀸𑀧𑀭𑀺𑀬𑀯𑀺𑀲𑁂𑀲𑀤𑀲𑁆𑀲𑀦𑀓𑀸𑀮𑁂𑀏𑀯 𑀲𑁄𑀫𑀦𑀲𑁆𑀲 𑀲𑀳𑀚𑀸𑀢𑀸𑀦𑀺 𑀪𑀯𑀦𑁆𑀢𑀺. 𑀧𑀝𑀺𑀓𑀽𑀮𑀸 𑀭𑀫𑁆𑀫𑀡𑁂𑀲𑀼 𑀧𑀦 𑀅𑀲𑀼𑀪𑀪𑀸𑀯𑀦𑀸𑀘𑀺𑀢𑁆𑀢𑁂𑀲𑀼 𑀤𑀼𑀓𑁆𑀔𑀺𑀢𑀲𑀢𑁆𑀢𑀸𑀭𑀫𑁆𑀫𑀡𑁂𑀲𑀼𑀘 𑀓𑀭𑀼𑀡𑀸𑀪𑀸𑀯𑀦𑀸𑀘𑀺𑀢𑁆𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀧𑀺𑀘 𑀇𑀫𑀸 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀸𑀫 𑀧𑀓𑀢𑀺𑀓𑀸𑀮𑁂𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯. 𑀢𑀸𑀲𑀼 𑀧𑀦 𑀫𑀼𑀤𑀺𑀢𑀸 𑀢𑀸𑀯 𑀇𑀝𑁆𑀞𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀸𑀢𑀺 𑀲𑀸𑀬𑁂𑀪𑀼𑀬𑁆𑀬𑁂𑀦 𑀲𑁄𑀫𑀦𑀲𑁆𑀲 𑀲𑀳𑀚𑀸𑀢𑀸𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀓𑀭𑀼𑀡𑀸 𑀧𑀦 𑀅𑀦𑀺𑀝𑁆𑀞𑀯𑀺𑀧𑀢𑁆𑀢𑀺𑀯𑀺𑀲𑀬𑀸𑀢𑀺 𑀲𑀸 𑀬𑁂𑀪𑀼𑀬𑁆𑀬𑁂𑀦 𑀉𑀧𑁂𑀓𑁆𑀔𑀸𑀲𑀳𑀚𑀸𑀢𑀸 𑀏𑀯 𑀲𑀺𑀬𑀸. 𑀦𑀘 𑀏𑀢𑀸 𑀧𑀭𑀲𑀢𑁆𑀢𑀳𑁂𑀢𑀼 𑀅𑀥𑀺𑀫𑀢𑁆𑀢 𑀩𑁆𑀬𑀸𑀧𑀸𑀭𑀸𑀢𑀺 𑀓𑀢𑁆𑀯𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬 𑀲𑀳 𑀯𑀺𑀭𑀼𑀤𑁆𑀥𑀸𑀏𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀸 𑀳𑀺 𑀅𑀧𑁆𑀧𑀦𑀁 𑀅𑀧𑀢𑁆𑀢𑀸 𑀯𑁂𑀤𑀦𑀼𑀧𑁂𑀓𑁆𑀔𑀸𑀦𑀸𑀫 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑁂𑀏𑀯 𑀦𑀺𑀩𑁆𑀬𑀸𑀧𑀸𑀭𑀸𑀳𑁄𑀢𑀺. 𑀦 𑀅𑀜𑁆𑀜𑀓𑀺𑀘𑁆𑀘𑁂𑀲𑀼. 𑀢𑀣𑀸 𑀳𑀺 𑀲𑀢𑁆𑀢𑀸 𑀉𑀧𑁂𑀓𑁆𑀔𑀸𑀲𑀳𑀕𑀢 𑀘𑀺𑀢𑁆𑀢𑁂𑀳𑀺 𑀅𑀤𑀺𑀦𑁆𑀦𑀁𑀧𑀺 𑀆𑀤𑀺𑀬𑀦𑁆𑀢𑀺, 𑀤𑀸𑀦𑀁𑀧𑀺 𑀤𑁂𑀦𑁆𑀢𑀺, 𑀅𑀜𑁆𑀜𑀸𑀦𑀺𑀧𑀺 𑀫𑀳𑀦𑁆𑀢𑀸𑀦𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺. 𑀢𑀲𑁆𑀫𑀸 𑀅𑀧𑁆𑀧𑀦𑀸 𑀧𑀢𑁆𑀢𑀸𑀦𑀜𑁆𑀜𑁂𑀯 𑀢𑀸𑀲𑀁 𑀯𑁂𑀤𑀦𑀼𑀧𑁂𑀓𑁆𑀔𑀸𑀬 𑀲𑀳 𑀯𑀺𑀭𑀼𑀤𑁆𑀥𑀪𑀸𑀯𑁄 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄𑀢𑀺.

[𑁮𑁦] 𑀏𑀢𑁆𑀢𑀸𑀯𑀢𑀸 𑀬𑀁 𑀯𑀼𑀢𑁆𑀢𑀁 𑀯𑀺𑀪𑀸𑀯𑀦𑀺𑀬𑀁

‘‘𑀓𑀭𑀼𑀡𑀸𑀫𑀼𑀤𑀺𑀢𑀸 𑀪𑀸𑀯𑀦𑀸𑀓𑀸𑀮𑁂 𑀅𑀧𑁆𑀧𑀦𑀸𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀧𑀭𑀺𑀘𑀬𑀯𑀲𑁂𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑁂𑀳𑀺𑀧𑀺 𑀧𑀭𑀺𑀓𑀫𑁆𑀫𑀁 𑀳𑁄𑀢𑀺. 𑀬𑀣𑀸𑀢𑀁 𑀧𑀕𑀼𑀡𑀕𑀦𑁆𑀣𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀓𑀤𑀸𑀘𑀺 𑀅𑀜𑁆𑀜𑀯𑀺𑀳𑀺 𑀢𑀲𑁆𑀲𑀸𑀧𑀺 𑀲𑀚𑁆𑀛𑀸𑀬𑀦𑀁, 𑀬𑀣𑀸𑀘 𑀧𑀕𑀼𑀡𑀯𑀺𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲𑀓𑀤𑀸𑀘𑀺 𑀧𑀭𑀺𑀘𑀬𑀩𑀮𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺𑀧𑀺 𑀲𑀫𑁆𑀫𑀲𑀦𑀦𑁆𑀢𑀺 𑀉𑀧𑁂𑀓𑁆𑀔𑀸 𑀲𑀳𑀕𑀢𑀓𑀸𑀫𑀸𑀯𑀘𑀭𑁂𑀲𑀼 𑀓𑀭𑀼𑀡𑀸 𑀫𑀼𑀤𑀺𑀢𑀸𑀦𑀁 𑀅𑀲𑀫𑁆𑀪𑀯𑀯𑀸𑀤𑁄 𑀓𑁂𑀘𑀺𑀯𑀸𑀤𑁄 𑀓𑀢𑁄’’𑀢𑀺. 𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀺𑀜𑁆𑀘𑀸𑀧𑀺 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀅𑀕𑀫𑁆𑀪𑀻𑀭𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀢𑀣𑀸𑀧𑀺 𑀬𑁄𑀕𑀓𑀫𑁆𑀫𑀩𑀮𑁂𑀦 𑀘𑀺𑀢𑁆𑀢𑀲𑀫𑀸𑀥𑀸𑀦𑀩𑀮𑁂𑀦 𑀓𑀺𑀮𑁂𑀲 𑀤𑀽𑀭𑀻𑀪𑀸𑀯𑁂𑀦𑀘 𑀢𑀤𑀸𑀭𑀫𑁆𑀫𑀡𑁂𑀲𑀼 𑀛𑀸𑀦𑀘𑀺𑀢𑁆𑀢𑁂𑀲𑀼 𑀜𑀸𑀡𑀁 𑀏𑀓𑀦𑁆𑀢𑁂𑀦 𑀧𑀯𑀢𑁆𑀢 𑀢𑀺𑀬𑁂𑀯𑀸𑀢𑀺 𑀆𑀳 𑀲𑀩𑁆𑀩𑁂𑀲𑀼𑀧𑀺 𑀧𑀜𑁆𑀘.𑀮. 𑀘𑀺𑀢𑁆𑀢𑁂𑀲𑀼𑀘𑀸𑀢𑀺.

𑁧𑁨𑁨. 𑀢𑀬𑁄 𑀯𑀺𑀭𑀢𑀺𑀥𑀫𑁆𑀫𑀸. 𑀤𑁆𑀯𑀬𑀁 𑀅𑀧𑁆𑀧𑀫𑀜𑁆𑀜𑀸𑀬𑀼𑀕𑀴𑀁. 𑀏𑀯𑀁 𑀲𑁄 𑀪𑀡𑀘𑁂𑀢𑀲𑀺𑀓𑀸 𑀲𑁄𑀪𑀡𑁂𑀲𑁆𑀯𑁂𑀯 𑀘𑀺𑀢𑁆𑀢𑁂𑀲𑀼 𑀘𑀢𑀼𑀥𑀸 𑀘𑀢𑀽𑀳𑀺 𑀧𑀓𑀸𑀭𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀇𑀤𑀸𑀦𑀺 𑀲𑀩𑁆𑀩𑁂𑀲𑀁𑀧𑀺 𑀘𑁂𑀢𑁄 𑀬𑀼𑀢𑁆𑀢𑀸𑀦𑀁 𑀦𑀺𑀬𑀢𑀸 𑀦𑀺𑀬𑀢𑀬𑁄𑀕𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 𑀇𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀓𑀭𑀼𑀡𑀸 𑀆𑀤𑀺 𑀬𑀲𑁆𑀲𑀸𑀢𑀺 𑀓𑀭𑀼𑀡𑀸𑀤𑀺. 𑀅𑀧𑁆𑀧𑀫𑀜𑁆𑀜𑀸 𑀤𑁆𑀯𑀬𑀁. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀸𑀦𑀺𑀘 𑀯𑀺𑀭𑀢𑀺𑀬𑁄𑀘 𑀓𑀭𑀼𑀡𑀸𑀤𑀺𑀘 𑀇𑀲𑁆𑀲𑀸𑀫𑀘𑁆𑀙𑁂 𑀭𑀓𑀼𑀓𑁆𑀓𑀼𑀘𑁆𑀘𑀯𑀺𑀭𑀢𑀺𑀓𑀭𑀼𑀡𑀸𑀤𑀬𑁄. 𑀢𑁂 𑀦𑀸𑀦𑀸𑀘 𑀚𑀸𑀬𑀦𑁆𑀢𑀺, 𑀓𑀤𑀸𑀘𑀺𑀘 𑀚𑀸𑀬𑀦𑁆𑀢𑀺. 𑀫𑀸𑀦𑁄𑀘 𑀓𑀤𑀸𑀘𑀺𑀏𑀯 𑀚𑀸𑀬𑀢𑀺. 𑀣𑀺𑀦𑀫𑀺𑀤𑁆𑀥𑀜𑁆𑀘 𑀢𑀣𑀸 𑀓𑀤𑀸𑀘𑀺 𑀏𑀯 𑀚𑀸𑀬𑀢𑀺. 𑀚𑀸𑀬𑀫𑀸𑀦𑀁 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀳𑁂𑀯 𑀚𑀸𑀬𑀢𑀺. 𑀦𑀦𑀸𑀦𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀅𑀧𑁆𑀧𑀫𑀜𑁆𑀜𑀸𑀯𑀺𑀭𑀢𑀻𑀦𑀁 𑀦𑀸𑀦𑀸 𑀓𑀤𑀸𑀘𑀺 𑀬𑁄𑀕𑁄 𑀳𑁂𑀝𑁆𑀞𑀸𑀘 𑀯𑀼𑀢𑁆𑀢𑁄. 𑀉𑀧𑀭𑀺𑀘 𑀯𑀓𑁆𑀔𑀢𑀺. 𑀇𑀲𑁆𑀲𑀸𑀤𑀻𑀦𑀁𑀘 𑀉𑀧𑀭𑀺 𑀯𑀓𑁆𑀔𑀢𑀺. 𑀫𑀸𑀦𑀣𑀺𑀦𑀫𑀺𑀤𑁆𑀥𑀸𑀦𑀁 𑀧𑀦 𑀇𑀥 𑀯𑀢𑁆𑀢𑀩𑁆𑀩𑁄𑀢𑀺. 𑀢𑀢𑁆𑀣 𑀫𑀸𑀦𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑁄𑀧𑀺 𑀓𑀤𑀸𑀘𑀺 𑀢𑁂𑀲𑀁 𑀲𑁂𑀬𑁆𑀬𑁄 𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀓𑀸𑀮𑁂𑀏𑀯 𑀮𑀩𑁆𑀪𑀢𑀺, 𑀦𑀅𑀜𑁆𑀜𑀤𑀸. 𑀣𑀺𑀦𑀫𑀺𑀤𑁆𑀥𑀁 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀮𑀩𑁆𑀪𑀫𑀸𑀦𑀁𑀧𑀺 𑀓𑀤𑀸𑀘𑀺 𑀢𑁂𑀲𑀁 𑀦𑀺𑀤𑁆𑀤𑀸𑀢𑀺𑀪𑀽𑀢𑀯𑀲𑁂𑀦 𑀅𑀓𑀫𑁆𑀫𑀜𑁆𑀜𑀢𑀸𑀬 𑀧𑀯𑀢𑁆𑀢𑀺𑀓𑀸𑀮𑁂𑀏𑀯 𑀮𑀩𑁆𑀪𑀢𑀺. 𑀦 𑀅𑀜𑁆𑀜𑀤𑀸. 𑀢𑀤𑀸 𑀮𑀩𑁆𑀪𑀫𑀸𑀦𑀁𑀧𑀦 𑀤𑁆𑀯𑀬𑀁 𑀲𑀳𑁂𑀯 𑀮𑀩𑁆𑀪𑀢𑀺. 𑀦 𑀦𑀸𑀦𑀸𑀢𑀺.

[𑁮𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

‘‘𑀣𑀺𑀦𑀫𑀺𑀤𑁆𑀥𑀁 𑀓𑀤𑀸𑀘𑀺 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑁂𑀳𑀺𑀘𑁂𑀯 𑀫𑀸𑀦𑁂𑀦𑀘 𑀲𑀳 𑀚𑀸𑀬𑀢𑀺. 𑀓𑀤𑀸𑀘𑀺 𑀢𑁂𑀳𑀺 𑀢𑁂𑀦𑀘 𑀦𑀸𑀦𑀸 𑀚𑀸𑀬𑀢𑀻’’𑀢𑀺 𑀬𑁄𑀚𑀦𑀸 𑀯𑀼𑀢𑁆𑀢𑀸. 𑀲𑀸 𑀲𑀸𑀭𑀢𑁄 𑀦 𑀧𑀘𑁆𑀘𑁂𑀢𑀩𑁆𑀩𑀸.

𑀦 𑀳𑀺 𑀢𑁂𑀳𑀺 𑀢𑁂𑀦𑀘 𑀢𑀲𑁆𑀲 𑀲𑀳𑀪𑀸𑀯𑁄 𑀦𑀸𑀦𑀸𑀪𑀸𑀯𑁄𑀘 𑀓𑀺𑀘𑁆𑀘𑀸𑀭𑀫𑁆𑀫𑀡𑀯𑀺𑀭𑁄𑀥𑀸𑀯𑀺𑀭𑁄𑀥𑀪𑀸𑀯𑁂𑀦 𑀲𑀺𑀤𑁆𑀥𑁄𑀢𑀺.

𑀬𑀸𑀘 𑀝𑀻𑀓𑀸𑀬𑀁

𑀫𑀸𑀦𑁄𑀘 𑀣𑀺𑀦𑀫𑀺𑀤𑁆𑀥𑀜𑁆𑀘 𑀓𑀤𑀸𑀘𑀺 𑀦𑀸𑀦𑀸 𑀚𑀸𑀬𑀢𑀺. 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀬𑁄𑀚𑀦𑀸 𑀯𑀼𑀢𑁆𑀢𑀸. 𑀲𑀸𑀧𑀺 𑀦 𑀲𑀼𑀦𑁆𑀤𑀭𑀸. 𑀓𑀤𑀸𑀘𑀺 𑀲𑀳𑀚𑀸𑀬𑀢𑀻𑀢𑀺.

𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸𑀢𑀺 𑀲𑀢𑁆𑀢𑀲𑀩𑁆𑀩𑀢𑁆𑀣𑀬𑀼𑀚𑁆𑀚𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀦𑀼𑀲𑀸𑀭𑁂𑀦 𑀲𑁂𑀲𑀸𑀢𑀺 𑀏𑀓𑀸𑀤𑀲𑀳𑀺 𑀅𑀦𑀺𑀬𑀢 𑀬𑁄𑀕𑀻𑀳𑀺 𑀅𑀯𑀲𑁂𑀲𑀸 𑀏𑀓𑀘𑀢𑁆𑀢𑀸𑀮𑀻𑀲𑀥𑀫𑁆𑀫𑀸. 𑀢𑁂 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀅𑀢𑁆𑀢𑀦𑀸 𑀮𑀩𑁆𑀪𑀫𑀸𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀅𑀦𑀺𑀬𑀢𑀬𑁄𑀕𑀺𑀦𑁄 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑁧𑁨𑁩. 𑀏𑀯𑀁 𑀘𑁂𑀢𑀲𑀺𑀓𑀸𑀦𑀁 𑀬𑁄𑀕𑀝𑁆𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀲𑀫𑁆𑀧𑀬𑁄𑀕𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀥𑀫𑁆𑀫𑀭𑀸𑀲𑀺𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀲𑀗𑁆𑀕𑀳 𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 𑀲𑀗𑁆𑀕𑀳𑀜𑁆𑀘𑀸𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀢𑁂𑀲𑀁 𑀲𑀗𑁆𑀕𑀳𑀜𑁆𑀘 𑀬𑀣𑀸𑀭𑀳𑀁 𑀧𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀙𑀢𑁆𑀢𑀺𑀁𑀲𑀸𑀢𑀺𑀆𑀤𑀺 𑀲𑀗𑁆𑀕𑀳𑀦𑀬𑀲𑁆𑀲 𑀉𑀤𑁆𑀤𑁂𑀲𑀕𑀸𑀣𑀸. 𑀲𑀢𑁆𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸 𑀅𑀧𑁆𑀧𑀫𑀜𑁆𑀜𑀸 𑀦𑀺𑀩𑁆𑀩𑀸𑀦𑀸 𑀭𑀫𑁆𑀫𑀡𑁂𑀲𑀼 𑀦𑀮𑀩𑁆𑀪𑀦𑁆𑀢𑀺𑀢𑀺 𑀯𑀼𑀢𑁆𑀢𑀁 𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀺𑀢𑀸𑀢𑀺 𑀢𑀣𑀸 𑀅𑀝𑁆𑀞𑀲𑀼 𑀤𑀼𑀢𑀻𑀬𑀚𑁆𑀛𑀸𑀦𑀺𑀓𑀘𑀺𑀢𑁆𑀢𑁂𑀲𑀼 𑀯𑀺𑀢𑀓𑁆𑀓𑀯𑀚𑁆𑀚𑀸 𑀅𑀜𑁆𑀜𑀲𑀫𑀸𑀦𑀸 𑀤𑁆𑀯𑀸𑀤𑀲𑀘𑁂𑀢 𑀲𑀺𑀓𑀸 𑀅𑀧𑁆𑀧𑀫𑀜𑁆𑀜𑀸𑀯𑀚𑁆𑀚𑀺𑀢𑀸 𑀢𑁂𑀯𑀻𑀲𑀢𑀺 𑀲𑁄𑀪𑀡𑀘𑁂𑀢𑀲𑀺𑀓𑀸𑀘𑁂𑀢𑀺 𑀧𑀜𑁆𑀘𑀢𑁆𑀢𑀺𑀁𑀲 𑀥𑀫𑁆𑀫𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺𑀆𑀤𑀺𑀦𑀬𑀁 𑀢𑀣𑀸𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀢𑀺. 𑀢𑁂𑀏𑀯𑀸𑀢𑀺 𑀯𑀺𑀢𑀓𑁆𑀓 𑀯𑀺𑀘𑀸𑀭 𑀧𑀻𑀢𑀺𑀲𑀼𑀔𑀯𑀚𑁆𑀚𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀢𑁂 𑀏𑀯 𑀢𑁂𑀢𑁆𑀢𑀺𑀁𑀲𑀥𑀫𑁆𑀫𑀸. 𑀅𑀝𑁆𑀞𑀲𑀽𑀢𑀺 𑀏𑀢𑁆𑀣 𑀅𑀝𑁆𑀞𑀘 𑀅𑀝𑁆𑀞𑀘 𑀅𑀝𑁆𑀞𑀸𑀢𑀺 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄, 𑀯𑀺𑀘𑁆𑀙𑀸𑀮𑁄𑀧𑀦𑀺𑀤𑁆𑀤𑁂𑀲𑁄𑀯𑀸 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀘𑀓𑀚𑁆𑀛𑀸𑀦 𑀯𑀲𑁂𑀦𑀸𑀢𑀺 𑀧𑀸𑀴𑀺𑀬𑀁 𑀧𑀜𑁆𑀘𑀓𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀛𑀸𑀦𑀪𑁂𑀤𑀲𑁆𑀲 𑀯𑀲𑁂𑀦, 𑀘𑀢𑀼𑀓𑁆𑀓𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀛𑀸𑀦𑀪𑁂𑀤𑀲𑁆𑀲 𑀯𑀲𑁂𑀦 𑀧𑀦 𑀘𑀢𑀼𑀥𑀸𑀯 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑀻𑀲𑀼 𑀭𑀽𑀧𑀧𑀣𑀫𑀚𑁆𑀛𑀸𑀦𑀮𑀸𑀪𑀻𑀲𑀼 𑀤𑀼𑀢𑀻𑀬𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀲𑀼 𑀫𑀦𑁆𑀤𑁄 𑀯𑀺𑀢𑀓𑁆𑀓𑀫𑁄 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀘𑀢𑀼𑀭𑀗𑁆𑀕𑀺𑀓𑀁 𑀤𑀼𑀢𑀻𑀬𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀺𑀓𑁆𑀔𑀧𑀜𑁆𑀜𑁄 𑀧𑀦 𑀯𑀺𑀢𑀓𑁆𑀓 𑀯𑀺𑀘𑀸𑀭𑁂 𑀏𑀓𑀢𑁄 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀢𑀺𑀬𑀗𑁆𑀕𑀺𑀓𑀁 𑀤𑀼𑀢𑀻𑀬𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀦𑀬𑀸𑀦𑀁 𑀯𑀺𑀲𑁂𑀲𑁄.

𑁧𑁨𑁪. 𑀓𑀺𑀘𑁆𑀘𑀸𑀭𑀫𑁆𑀫𑀡𑀯𑀺𑀭𑀼𑀤𑁆𑀥𑀢𑁆𑀢𑀸 𑀯𑀺𑀭𑀢𑀺𑀬𑁄 𑀫𑀳𑀕𑁆𑀕𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 𑀯𑀺𑀭𑀢𑀺𑀢𑁆𑀢𑀬𑀯𑀚𑁆𑀚𑀺𑀢𑀸𑀢𑀺. 𑀯𑀺𑀭𑀢𑀺𑀬𑁄 𑀳𑀺 𑀓𑀸𑀬𑀯𑀘𑀻 𑀯𑀺𑀲𑁄𑀥𑀦𑀓𑀺𑀘𑁆𑀘𑀸 𑀳𑁄𑀦𑁆𑀢𑀺. 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺 𑀧𑀦 𑀲𑀼𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻 𑀧𑀬𑁄𑀕𑀲𑁆𑀲𑁂𑀯 𑀘𑀺𑀢𑁆𑀢𑀯𑀺𑀲𑁄𑀥𑀦𑀓𑀺𑀘𑁆𑀘𑀸𑀦𑀺. 𑀯𑀺𑀭𑀢𑀺𑀬𑁄𑀘 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩 𑀯𑀢𑁆𑀣𑀼𑀁𑀯𑀸 𑀦𑀺𑀩𑁆𑀩𑀸𑀦𑀁𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀦𑁆𑀢𑀺. 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺 𑀧𑀦 𑀧𑀜𑁆𑀜𑀢𑁆𑀢𑀺 𑀬𑁄𑀯𑀸 𑀫𑀳𑀕𑁆𑀕𑀢𑀥𑀫𑁆𑀫𑁂𑀯𑀸𑀢𑀺.

𑁧𑁨𑁫. 𑀓𑀺𑀘𑁆𑀘𑀸𑀭𑀫𑁆𑀫𑀡𑀯𑀺 𑀭𑀼𑀤𑁆𑀥𑀢𑁆𑀢𑀸𑀬𑁂𑀯 𑀯𑀺𑀭𑀢𑀺𑀅𑀧𑁆𑀧𑀫𑀜𑁆𑀜𑀸𑀬𑁄 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂 𑀤𑁆𑀯𑁂 𑀦𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀜𑁆𑀜𑀸 𑀯𑀺𑀭𑀢𑀺𑀬𑁄 𑀧𑀦𑁂𑀢𑁆𑀣.𑀮. 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀯𑀺𑀭𑀢𑀺𑀬𑁄 𑀏𑀓𑀦𑁆𑀢𑁂𑀦 𑀤𑀼𑀲𑁆𑀲𑀺𑀮𑁆𑀬𑀧𑁆𑀧𑀳𑀸𑀦 𑀓𑀺𑀘𑁆𑀘𑀢𑁆𑀢𑀸 𑀢𑀧𑁆𑀧𑀳𑀸𑀦 𑀓𑀺𑀘𑁆𑀘𑀭𑀳𑀺𑀢𑁂𑀲𑀼 𑀮𑁄𑀓𑀺𑀬𑀸𑀩𑁆𑀬𑀸𑀓𑀢𑁂𑀲𑀼 𑀦𑀮𑀩𑁆𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀯𑀺𑀭𑀢𑀺𑀯𑀚𑁆𑀚𑀺𑀢𑀸𑀢𑀺. 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸 𑀓𑀼𑀲𑀮𑀸𑀬𑁂𑀯𑀸𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀮𑁄𑀓𑀺𑀬𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀫𑀜𑁆𑀜𑀸𑀦𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀫𑀳𑀸𑀯𑀺𑀧𑀸𑀓𑀸𑀦𑀜𑁆𑀘 𑀏𑀓𑀦𑁆𑀢 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀢𑀸𑀲𑀁 𑀢𑁂𑀲𑀼 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀅𑀧𑁆𑀧𑀫𑀜𑁆𑀜𑀸 𑀯𑀺𑀭𑀢𑀺𑀯𑀚𑁆𑀚𑀺𑀢𑀸𑀢𑀺. 𑀦𑀦𑀼 𑀓𑀸𑀫𑀓𑀼𑀲𑀮𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀸𑀤𑀺 𑀆𑀭𑀫𑁆𑀫𑀡𑀁𑀧𑀺 𑀳𑁄𑀢𑀻𑀢𑀺 𑀢𑀩𑁆𑀩𑀺𑀧𑀸𑀓𑁂𑀦𑀧𑀺 𑀢𑁂𑀦 𑀲𑀤𑀺𑀲𑀸 𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀦. 𑀯𑀺𑀓𑀧𑁆𑀧𑀭𑀳𑀺𑀢𑀢𑁆𑀢𑀸. 𑀧𑀜𑁆𑀜𑀢𑁆𑀢𑀺𑀬𑁄 𑀳𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀥𑀫𑁆𑀫𑀸𑀘 𑀲𑀡𑁆𑀳𑀲𑀼𑀔𑀼𑀫𑀥𑀫𑁆𑀫𑀢𑁆𑀢𑀸 𑀢𑀣𑀸 𑀢𑀣𑀸 𑀯𑀺𑀓𑀧𑁆𑀧𑁂𑀢𑁆𑀯𑀸𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀯𑀸 𑀕𑀡𑁆𑀳𑀦𑁆𑀢𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀏𑀯 𑀆𑀭𑀫𑁆𑀫𑀡𑀪𑀽𑀢𑀸 𑀳𑁄𑀦𑁆𑀢𑀺. 𑀓𑀸𑀫𑀯𑀺𑀧𑀸𑀓𑀸𑀦𑀺 𑀧𑀦 𑀲𑀬𑀁 𑀅𑀢𑀺𑀤𑀼𑀩𑁆𑀩𑀮𑀢𑀸𑀬 𑀆𑀭𑀫𑁆𑀫𑀡𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀕𑀳𑁂𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺, 𑀓𑀼𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀳𑁂𑀢𑀼𑀁. 𑀢𑀲𑁆𑀫𑀸 𑀢𑀸𑀦𑀺 𑀧𑀜𑁆𑀜𑀢𑁆𑀢𑀺𑀬𑁄𑀯𑀸 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀥𑀫𑁆𑀫𑁂𑀯𑀸 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀺 𑀧𑀦 𑀯𑀺𑀓𑀧𑁆𑀧𑀭𑀳𑀺𑀢𑀸𑀦𑀺𑀧𑀺 𑀅𑀧𑁆𑀧𑀦𑀸𑀧𑀢𑁆𑀢𑀓𑀫𑁆𑀫𑀯𑀺𑀲𑁂 𑀲𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀩𑀮𑀦𑀺𑀫𑁆𑀫𑀺𑀢𑀸𑀦𑀺 𑀧𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑀸𑀦𑀺 𑀆𑀮𑀫𑁆𑀩𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺.

[𑁮𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀓𑀸𑀫𑀢𑀡𑁆𑀳𑀸𑀥𑀺𑀦𑀓𑀫𑁆𑀫𑀚𑀦𑀺𑀢𑀢𑁆𑀢𑀸 𑀓𑀸𑀫𑀯𑀺𑀧𑀸𑀓𑀸𑀦𑀺 𑀓𑀸𑀫𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀽𑀢𑁂 𑀓𑀸𑀫𑀥𑀫𑁆𑀫𑁂𑀏𑀯 𑀆𑀮𑀫𑁆𑀩𑀺𑀢𑀼𑀁 𑀮𑀪𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀸𑀫𑀢𑀡𑁆𑀳𑀸𑀥𑀺𑀦𑀲𑁆𑀲 𑀨𑀮𑀪𑀽𑀢𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀤𑀸𑀲𑀺𑀧𑀼𑀢𑁆𑀢𑁄𑀧𑀫𑀸𑀬 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀏𑀯𑀜𑁆𑀳𑀺 𑀲𑀢𑀺 𑀫𑀳𑀕𑁆𑀕𑀢𑀯𑀺𑀧𑀸𑀓𑀸𑀦𑀺𑀧𑀺 𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀥𑀺𑀦 𑀓𑀫𑁆𑀫𑀚𑀦𑀺𑀢𑀸𑀦𑀺 𑀏𑀯 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺𑀧𑀺 𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁂 𑀫𑀳𑀕𑁆𑀕𑀢 𑀥𑀫𑁆𑀫𑁂𑀏𑀯 𑀆𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺. 𑀅𑀧𑀺𑀘, 𑀓𑀸𑀫𑀢𑀡𑁆𑀳𑀸𑀧𑀺 𑀓𑀸𑀫𑀥𑀫𑁆𑀫𑁂𑀏𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀦 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑁂𑀢𑀺 𑀦𑀢𑁆𑀣𑀺. 𑀦𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀳𑀢𑁆𑀣 𑀧𑀸𑀤𑀸𑀤𑀺 𑀧𑀜𑁆𑀜𑀢𑁆𑀢𑀻𑀲𑀼 𑀅𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸 𑀦𑀸𑀫 𑀦𑀳𑁄𑀢𑀻𑀢𑀺 𑀅𑀢𑁆𑀣𑀺. 𑀲𑀼𑀪𑁂𑀢𑀺 𑀓𑀼𑀲𑀮𑁂. 𑀫𑀦𑁂𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀲𑀼𑀪𑁂 𑀓𑁆𑀭𑀺𑀬𑁂 𑀧𑀸𑀓𑁂𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑀁 𑀤𑀝𑁆𑀞𑀩𑁆𑀩𑀁. 𑀲𑀳𑁂𑀢𑀼. 𑀮. 𑀫𑀦𑁂 𑀤𑁆𑀯𑀸𑀤𑀲𑀥𑀸𑀯 𑀲𑀗𑁆𑀕𑀳𑁄𑀢𑀺𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀦𑀯𑀺𑀚𑁆𑀚𑀦𑁆𑀢𑁂𑀢𑁆𑀣𑀸𑀢𑀺 𑀯𑀚𑁆𑀚𑀺𑀢𑀸𑀦𑀁 𑀲𑀗𑁆𑀕𑀳𑁄. 𑀏𑀢𑁆𑀣𑀸𑀢𑀺 𑀲𑁄𑀪𑀡𑀘𑀺𑀢𑁆𑀢𑁂𑀲𑀼. 𑀤𑁆𑀯𑀬𑀦𑁆𑀢𑀺 𑀯𑀺𑀭𑀢𑀺𑀅𑀧𑁆𑀧𑀫𑀜𑁆𑀜𑀸𑀤𑀼𑀓𑀁. 𑀅𑀦𑀼𑀢𑁆𑀢𑀭𑁂𑀢𑀺 𑀯𑀺𑀲𑁂𑀲𑀓𑀸𑀦𑀁 𑀲𑀗𑁆𑀕𑀳𑁄. 𑀛𑀸𑀦 𑀥𑀫𑁆𑀫𑀸𑀢𑀺 𑀯𑀺𑀢𑀓𑁆𑀓𑀸𑀤𑀬𑁄. 𑀫𑀚𑁆𑀛𑀺𑀫𑁂 𑀫𑀳𑀕𑁆𑀕𑀢𑁂 𑀅𑀧𑁆𑀧𑀫𑀜𑁆𑀜𑀸𑀘 𑀛𑀸𑀦𑀥𑀫𑁆𑀫𑀸 𑀘. 𑀧𑀭𑀺𑀢𑁆𑀢𑁂𑀲𑀼 𑀓𑀸𑀫𑀲𑁄𑀪𑀡𑁂𑀲𑀼 𑀅𑀧𑁆𑀧𑀫𑀜𑁆𑀜𑀸𑀘 𑀯𑀺𑀭𑀢𑀺 𑀜𑀸𑀡𑀧𑀻𑀢𑀺 𑀬𑁄𑀘 𑀯𑀺𑀲𑁂𑀲𑀓𑀸, 𑀲𑀗𑁆𑀕𑀳𑀦𑀬 𑀪𑁂𑀤𑀓𑀸𑀭𑀓𑀸𑀢𑀺 𑀅𑀢𑁆𑀣𑁄.

𑁧𑁨𑁬. 𑀲𑀢𑁆𑀢𑀭𑀲𑀥𑀫𑁆𑀫𑀸 𑀮𑁄𑀪𑀤𑀺𑀝𑁆𑀞𑀻𑀳𑀺 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺 𑀳𑀼𑀢𑁆𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀻𑀢𑀺𑀯𑀚𑁆𑀚𑀺𑀢𑀸 𑀅𑀜𑁆𑀜𑀲𑀫𑀸𑀦𑀸 𑀤𑁆𑀯𑀸𑀤𑀲 𑀘𑁂𑀢𑀲𑀺𑀓𑀸 𑀅𑀓𑀼𑀲𑀮𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄𑀘𑀸𑀢𑀺 𑀲𑁄𑀴𑀲𑀥𑀫𑁆𑀫𑀸 𑀮𑁄𑀪𑀤𑀺𑀝𑁆𑀞𑀻𑀳𑀺 𑀲𑀳 𑀅𑀝𑁆𑀞𑀸𑀭𑀲 𑀳𑀼𑀢𑁆𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀦𑀺 𑀓𑀺𑀘𑁆𑀘𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀇𑀲𑁆𑀲𑀸.𑀮. 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺. 𑀲𑀩𑁆𑀩𑁂𑀲𑀼𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀥𑀫𑁆𑀫𑀢𑁄 𑀅𑀲𑀤𑀺𑀲𑀸𑀏𑀯 𑀳𑁄𑀦𑁆𑀢𑀺. 𑀕𑀡𑀦𑀢𑁄 𑀧𑀦 𑀏𑀓𑀘𑁆𑀘𑁂 𑀏𑀓𑀘𑁆𑀘𑁂𑀳𑀺 𑀲𑀤𑀺𑀲𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀤𑁆𑀯𑀸𑀤𑀲.𑀮. 𑀲𑀗𑁆𑀕𑀳𑀺𑀢𑀸𑀪𑀯𑀦𑁆𑀢𑀻𑀢𑀺. 𑀏𑀢𑁆𑀣𑀘 𑀧𑀜𑁆𑀘𑀲𑀼 𑀅𑀲𑀗𑁆𑀔𑀸𑀭𑀺𑀓𑁂𑀲𑀼 𑀧𑀣𑀫𑀤𑀼𑀢𑀻𑀬𑁂𑀲𑀼 𑀏𑀓𑀽𑀦𑀯𑀻𑀲𑀢𑀺. 𑀢𑀢𑀻𑀬𑀘𑀢𑀼𑀢𑁆𑀣𑁂𑀲𑀼 𑀅𑀝𑁆𑀞𑀸𑀭𑀲. 𑀧𑀜𑁆𑀘𑀫𑁂 𑀯𑀻𑀲𑀢𑀺. 𑀧𑀜𑁆𑀘𑀲𑀼 𑀲𑀲𑀗𑁆𑀔𑀸𑀭𑀺𑀓𑁂𑀲𑀼 𑀧𑀣𑀫𑀤𑀼𑀢𑀻𑀬𑁂𑀲𑀼 𑀏𑀓𑀯𑀻𑀲𑀢𑀺. 𑀢𑀢𑀻𑀬𑀘𑀢𑀼𑀢𑁆𑀣𑁂𑀲𑀼 𑀯𑀻𑀲𑀢𑀺. 𑀧𑀜𑁆𑀘𑀫𑁂 𑀤𑁆𑀯𑀸𑀯𑀻𑀲𑀢𑀺. 𑀫𑁄𑀫𑀽𑀳𑀤𑁆𑀯𑀬𑁂 𑀧𑀦𑁆𑀦𑀭𑀲𑀸𑀢𑀺 𑀏𑀯𑀁 𑀅𑀓𑀼𑀲𑀮𑁂𑀲𑀼 𑀲𑀢𑁆𑀢 𑀲𑀗𑁆𑀕𑀳𑀸 𑀪𑀯𑀦𑁆𑀢𑀺. 𑀢𑁂𑀦𑀸𑀳 𑀏𑀓𑀽𑀦𑀯𑀻𑀲𑀸𑀢𑀺𑀆𑀤𑀺𑀁. 𑀲𑀸𑀥𑀸𑀭𑀡𑀸𑀢𑀺 𑀲𑀩𑁆𑀩𑀸 𑀓𑀼𑀲𑀮𑀲𑀸𑀥𑀸𑀭𑀡𑀸. 𑀲𑀫𑀸𑀦𑀸𑀢𑀺 𑀅𑀜𑁆𑀜𑀲𑀫𑀸𑀦𑀸. 𑀅𑀧𑀭𑁂𑀢𑀺 𑀙𑀦𑁆𑀤𑀧𑀻𑀢𑀺𑀅𑀥𑀺𑀫𑁄𑀓𑁆𑀔𑁂 𑀣𑀧𑁂𑀢𑁆𑀯𑀸 𑀏𑀓𑀘𑁆𑀘𑁂.

𑁧𑁨𑁭. 𑀳𑀲𑀦𑀘𑀺𑀢𑁆𑀢𑁂𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂. 𑀯𑁄𑀝𑁆𑀞𑀩𑁆𑀩𑀦𑁂𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂. 𑀲𑀼𑀔𑀲𑀦𑁆𑀢𑀻𑀭𑀡𑁂𑀢𑀺 𑀲𑁄𑀫𑀦𑀲𑁆𑀲 𑀲𑀦𑁆𑀢𑀻𑀭𑀡𑁂. 𑀫𑀦𑁄 𑀥𑀸𑀢𑀼𑀢𑁆𑀢𑀺𑀓𑀸 𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺 𑀬𑀼𑀕𑀴𑁂𑀢𑀺 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦 𑀲𑀫𑁆𑀧𑀝𑀺𑀘𑁆𑀙𑀦𑀤𑁆𑀯𑀬𑀲𑀗𑁆𑀔𑀸𑀢𑁂 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑁂𑀘𑁂𑀯 𑀉𑀧𑁂𑀓𑁆𑀔𑀸 𑀲𑀦𑁆𑀢𑀻𑀭𑀡 𑀤𑁆𑀯𑀬𑀲𑀗𑁆𑀔𑀸𑀢𑁂 𑀅𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀬𑀼𑀕𑀴𑁂𑀘. 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀅𑀳𑁂𑀢𑀼𑀓𑁂𑀲𑀼 𑀲𑀢𑁆𑀢, 𑀢𑀢𑁄 𑀲𑁂𑀲𑀸 𑀧𑀓𑀺𑀡𑁆𑀡𑀓𑀸 𑀧𑀦 𑀬𑀣𑀸𑀭𑀳𑀁 𑀬𑀼𑀚𑁆𑀚𑀦𑁆𑀢𑀺, 𑀇𑀢𑀺 𑀢𑁂𑀢𑁆𑀢𑀺𑀁𑀲 𑀯𑀺𑀥𑀲𑀗𑁆𑀕𑀳𑁄 𑀫𑀬𑀸 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑁧𑁨𑁮. 𑀇𑀤𑀸𑀦𑀺 𑀅𑀬𑀁 𑀘𑁂𑀢𑀲𑀺𑀓𑀦𑀺𑀤𑁆𑀤𑁂𑀲𑁄𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑀺𑀬 𑀏𑀓𑀲𑁆𑀲𑀧𑀺 𑀘𑁂𑀢𑀲𑀺𑀓𑀲𑁆𑀲 𑀪𑀽𑀫𑀺𑀚𑀸𑀢𑀺 𑀲𑀫𑁆𑀧𑀬𑁄𑀕𑀸𑀤𑀺 𑀪𑁂𑀤𑁂𑀦 𑀯𑀺𑀪𑀸𑀕𑁄 𑀓𑀣𑁂𑀢𑀩𑁆𑀩𑁄𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀦𑁆𑀢𑀺𑀫𑀕𑀸𑀣𑀫𑀸𑀳. 𑀇𑀢𑁆𑀣𑀁 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀸𑀯𑀺𑀬𑀼𑀢𑁆𑀢𑀸𑀦𑀁 𑀘𑁂𑀢𑀲𑀺𑀓𑀸𑀦𑀁 𑀲𑁄𑀴𑀲𑀯𑀺𑀥𑀁 𑀲𑀫𑁆𑀧𑀬𑁄𑀕𑀜𑁆𑀘 𑀢𑁂𑀢𑁆𑀢𑀺𑀁𑀲𑀯𑀺𑀥𑀁 𑀲𑀗𑁆𑀕𑀳𑀜𑁆𑀘 𑀜𑀢𑁆𑀯𑀸 𑀢𑁂𑀲𑀁 𑀬𑀣𑀸 𑀬𑁄𑀕𑀁 𑀘𑀺𑀢𑁆𑀢𑁂𑀦 𑀲𑀫𑀁 𑀪𑁂𑀤𑀁 𑀉𑀤𑁆𑀤𑀺𑀲𑁂𑀢𑀺 𑀬𑁄𑀚𑀦𑀸. 𑀨𑀲𑁆𑀲𑁄 𑀢𑀸𑀯 𑀏𑀓𑀽𑀦𑀦𑀯𑀼𑀢𑀺𑀬𑀸 𑀏𑀓𑀯𑀻𑀲𑀲𑀢𑁂𑀲𑀼𑀯𑀸 𑀘𑀺𑀢𑁆𑀢𑁂𑀲𑀼 𑀬𑀼𑀢𑁆𑀢𑀢𑁆𑀢𑀸 𑀏𑀓𑀽𑀦𑀦𑀯𑀼𑀢𑀺 𑀏𑀓𑀯𑀻𑀲𑀲𑀢𑀯𑀺𑀥𑁂𑀯𑀸𑀢𑀺 𑀏𑀯𑀁 𑀤𑁆𑀯𑀺𑀧𑀜𑁆𑀜𑀸𑀲𑀘𑁂𑀢𑀲𑀺𑀓𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑀣𑀸𑀬𑁄𑀕𑀁 𑀪𑀽𑀫𑀺𑀚𑀸𑀢𑀺𑀲𑀫𑁆𑀧𑀬𑁄𑀕𑀸𑀤𑀺𑀪𑁂𑀤𑁂𑀳𑀺 𑀢𑁂𑀲𑀁 𑀯𑀺𑀪𑀸𑀕𑀁 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀘𑁂𑀢𑀲𑀺𑀓 𑀲𑀗𑁆𑀕𑀳𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.