𑀘𑀺𑀢𑁆𑀢𑀲𑀗𑁆𑀕𑀳-𑀧𑀭𑀫𑀢𑁆𑀣𑀤𑀻𑀧𑀦𑀻

𑁧𑁭. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀘𑀺𑀢𑁆𑀢𑀁 𑀢𑀸𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀅𑀪𑀺𑀥𑀫𑁆𑀫𑀢𑁆𑀣𑁂𑀲𑀼. 𑀢𑀸𑀯 𑀧𑀣𑀫𑀁. 𑀘𑀢𑁆𑀢𑀸𑀭𑁄 𑀯𑀺𑀥𑀸 𑀧𑀓𑀸𑀭𑀸 𑀬𑀲𑁆𑀲 𑀢𑀁 𑀘𑀢𑀼𑀩𑁆𑀩𑀺𑀥𑀁.

𑁧𑁮. 𑀓𑀸𑀫𑀸𑀯𑀘𑀭𑀦𑁆𑀢𑀺 𑀏𑀢𑁆𑀣 𑀓𑀸𑀫𑀻𑀬𑀢𑀻𑀢𑀺 𑀓𑀸𑀫𑁄. 𑀓𑀸𑀫𑁂𑀦𑁆𑀢𑀺𑀯𑀸 𑀏𑀢𑁆𑀣 𑀲𑀢𑁆𑀢𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀸𑀫𑀭𑀸𑀕𑀢𑁆𑀢𑀸 𑀓𑀸𑀫𑀭𑀢𑀺𑀬𑀸𑀏𑀯 𑀭𑀫𑀦𑁆𑀢𑀺. 𑀦 𑀉𑀧𑀭𑀺𑀪𑀽𑀫𑀻𑀲𑀼 𑀯𑀺𑀬 𑀛𑀸𑀦𑀭𑀢𑀺𑀬𑀸𑀢𑀺 𑀓𑀸𑀫𑁄. 𑀏𑀓𑀸𑀤𑀲𑀯𑀺𑀥𑀸 𑀓𑀸𑀫𑀪𑀽𑀫𑀺. 𑀦𑀦𑀼 𑀘𑁂𑀢𑁆𑀣 𑀛𑀸𑀦𑀮𑀸𑀪𑀺𑀦𑁄𑀧𑀺 𑀲𑀦𑁆𑀢𑀻𑀢𑀺. 𑀦 𑀦 𑀲𑀦𑁆𑀢𑀺. 𑀢𑁂𑀧𑀦 𑀓𑀤𑀸𑀘𑀺 𑀤𑁂𑀯𑀸𑀢𑀺 𑀦𑀢𑁆𑀣𑁂𑀢𑁆𑀣 𑀤𑁄𑀲𑁄. 𑀅𑀯𑀻𑀘𑀺𑀦𑀺𑀭𑀬𑀸𑀤𑀬𑁄 𑀓𑀣𑀁 𑀓𑀸𑀫𑀻𑀬𑀦𑁆𑀢𑀺. 𑀓𑀣𑀜𑁆𑀘 𑀢𑀢𑁆𑀣 𑀲𑀢𑁆𑀢𑀸 𑀓𑀸𑀫𑀭𑀢𑀺𑀬𑀸 𑀭𑀫𑀦𑁆𑀢𑀻𑀢𑀺. 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀲𑁂𑀦𑀯𑀸 𑀪𑀯𑀦𑀺𑀓𑀦𑁆𑀢𑀺𑀯𑀲𑁂𑀦𑀯𑀸𑀢𑀺. 𑀫𑀭𑀡𑀓𑀸𑀮𑁂 𑀳𑀺 𑀉𑀧𑀝𑁆𑀞𑀺𑀢𑀸 𑀦𑀺𑀭𑀬𑀕𑁆𑀕𑀺𑀚𑀸𑀮𑀸 𑀲𑀼𑀯𑀡𑁆𑀡𑀯𑀡𑁆𑀡𑀸𑀯𑀺𑀬 𑀔𑀸𑀬𑀦𑁆𑀢𑀺. 𑀏𑀓𑁄 𑀓𑀺𑀭 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀫𑀭𑀡𑀫𑀜𑁆𑀘𑁂 𑀦𑀺𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀲 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑀸 𑀲𑀫𑀻𑀧𑁂 𑀞𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀪𑁄 𑀕𑀘𑁆𑀙𑀸𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀲𑀧𑀦 𑀅𑀯𑀻𑀘𑀺𑀦𑀺𑀭𑀬𑁂 𑀅𑀕𑁆𑀕𑀺𑀚𑀸𑀮𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀤𑀸 𑀲𑁄 𑀪𑁄 𑀆𑀘𑀭𑀺𑀬𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀆𑀳. 𑀏𑀲 𑀪𑁄 𑀩𑁆𑀭𑀳𑁆𑀫𑀮𑁄𑀓𑁄. 𑀢𑀢𑁆𑀣 𑀕𑀘𑁆𑀙𑀸𑀢𑀺 𑀯𑀤𑀦𑁆𑀢𑀺. 𑀲𑁄 𑀓𑀸𑀮𑀗𑁆𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺. 𑀏𑀯𑀁 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀯𑀲𑁂𑀦 𑀢𑁂 𑀓𑀸𑀫𑀻𑀬𑀦𑁆𑀢𑀺. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀦𑀁𑀧𑀺 𑀪𑀯𑀦𑀺𑀓𑀦𑁆𑀢𑀺𑀦𑀸𑀫 𑀳𑁄𑀢𑀻𑀢𑀺. 𑀅𑀧𑀺𑀘, 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀸𑀫𑀭𑀸𑀕𑀸𑀏𑀯 𑀳𑁄𑀦𑁆𑀢𑀺, 𑀑𑀓𑀸𑀲𑁂 𑀲𑀢𑀺 𑀓𑀸𑀫𑀭𑀢𑀺𑀬𑀸 𑀭𑀫𑀺𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺. 𑀢𑀲𑁆𑀫𑀺𑀁 𑀓𑀸𑀫𑁂 𑀅𑀯𑀘𑀭𑀢𑀻𑀢𑀺 𑀓𑀸𑀫𑀸𑀯𑀘𑀭𑀁. 𑀏𑀢𑁆𑀣𑀘 𑀅𑀯𑀘𑀭𑀢𑀻𑀢𑀺 𑀧𑀤𑀲𑁆𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀅𑀢𑁆𑀣𑁄 𑀧𑀸𑀴𑀺𑀬𑀸𑀘 𑀦𑀲𑀫𑁂𑀢𑀺. 𑀦𑀸𑀦𑀸𑀤𑁄𑀲𑀬𑀼𑀢𑁆𑀢𑁄𑀘 𑀳𑁄𑀢𑀻𑀢𑀺. 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀬𑀤𑀺 𑀘𑁂𑀢𑁆𑀣 𑀲𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸. 𑀏𑀯𑀁 𑀲𑀪𑀺 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣𑀼𑀧𑁆𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀦𑀧𑀦 𑀯𑀼𑀢𑁆𑀢𑀁. 𑀦𑀘 𑀧𑀭𑀺𑀬𑀸𑀧𑀦𑁆𑀦𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀲𑀳 𑀲𑀫𑀸𑀦𑀢𑁆𑀣𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀸𑀦𑀺 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀸 𑀦𑀺𑀧𑀺 𑀢𑀢𑁆𑀭 𑀧𑀭𑀺𑀬𑀸𑀧𑀦𑁆𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀢𑀸𑀯 𑀧𑀸𑀴𑀺𑀬𑀸 𑀦𑀲𑀫𑁂𑀢𑀻𑀢𑀺.

𑀬𑀤𑀺𑀘 𑀲𑁄 𑀅𑀢𑁆𑀣𑁄 𑀕𑀳𑀺𑀢𑁄 𑀲𑀺𑀬𑀸. 𑀏𑀯𑀜𑁆𑀘 𑀲𑀢𑀺 𑀢𑀲𑁆𑀫𑀺𑀁 𑀓𑀸𑀫𑁂 𑀬𑁂 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁𑀧𑀺 𑀓𑀸𑀫𑀸 𑀯𑀘𑀭𑀢𑀸𑀧𑀢𑁆𑀢𑀺𑀤𑁄𑀲𑁄 𑀭𑀽𑀧𑀸𑀯𑀘𑀭𑀢𑀸𑀤𑀺 𑀫𑀼𑀢𑁆𑀢𑀺𑀤𑁄𑀲𑁄𑀘 𑀆𑀧𑀚𑁆𑀚𑀢𑀺. 𑀬𑁂𑀘 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀭𑀽𑀧𑀸𑀭𑀽𑀧𑀪𑀽𑀫𑀻𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀜𑁆𑀘 𑀭𑀽𑀧𑀸𑀭𑀽𑀧𑀸 𑀯𑀘𑀭𑀢𑀸 𑀧𑀢𑁆𑀢𑀺𑀤𑁄𑀲𑁄 𑀓𑀸𑀫𑀸𑀯𑀘𑀭𑀢𑀸 𑀫𑀼𑀢𑁆𑀢𑀺𑀤𑁄𑀲𑁄𑀘 𑀆𑀧𑀚𑁆𑀚𑀢𑀻𑀢𑀺. 𑀦𑀦𑀼 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀯𑀲𑁂𑀦𑀧𑀺 𑀓𑁂𑀲𑀜𑁆𑀘𑀺 𑀦𑀸𑀫𑀮𑀸𑀪𑁄 𑀳𑁄𑀢𑀺. 𑀬𑀣𑀸 𑀯𑀦𑀘𑀭𑀓𑁄 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺. 𑀢𑀲𑁆𑀫𑀸 𑀇𑀥𑀧𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀪𑀼𑀫𑁆𑀫𑀻𑀲𑀼 𑀉𑀧𑁆𑀧𑀦𑁆𑀦𑀩𑀳𑀼𑀮𑀢𑁆𑀢𑀸 𑀓𑀸𑀫𑀸𑀯𑀘𑀭𑀸𑀤𑀺 𑀦𑀸𑀫𑀮𑀸𑀪𑁂 𑀲𑀢𑀺 𑀦 𑀓𑁄𑀘𑀺 𑀤𑁄𑀲𑁄𑀢𑀺.𑀦. 𑀏𑀯𑀜𑁆𑀳𑀺 𑀲𑀢𑀺 𑀮𑁄𑀓𑀼𑀢𑁆𑀢𑀭 𑀥𑀫𑁆𑀫𑀸𑀦𑀁 𑀓𑀸𑀫𑀸𑀯𑀘𑀭𑀢𑀸𑀤𑀺 𑀫𑀼𑀘𑁆𑀘𑀦𑀢𑁆𑀣𑀁 𑀬𑁂𑀪𑀼𑀬𑁆𑀬𑁂𑀦 𑀉𑀧𑁆𑀧𑀦𑁆𑀦𑀪𑀽𑀫𑀺 𑀯𑀺𑀲𑀼𑀁 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀦 𑀘 𑀲𑀸 𑀦𑀸𑀫𑀪𑀽𑀫𑀺 𑀅𑀢𑁆𑀣𑀺. 𑀬𑀢𑁆𑀣 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀸 𑀢𑀻𑀲𑀼 𑀪𑀯𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀓𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭𑀢𑀸𑀧𑀢𑁆𑀢𑀺𑀤𑁄𑀲𑁄 𑀤𑀼𑀦𑁆𑀦𑀺𑀯𑀸𑀭𑁄 𑀲𑀺𑀬𑀸𑀢𑀺. 𑀏𑀯𑀁 𑀦𑀸𑀦𑀸𑀤𑁄𑀲𑀬𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀲𑁆𑀲 𑀢𑀣𑀸 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢𑁂𑀦 𑀧𑀸𑀴𑀺𑀦𑀬𑁂𑀦𑁂𑀯𑀲𑁆𑀲 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀓𑀸𑀫𑁂 𑀅𑀯𑀘𑀭𑀢𑀺 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁂𑀦 𑀢𑀲𑁆𑀫𑀺𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑀸𑀫𑀸𑀯𑀘𑀭𑀦𑁆𑀢𑀺. 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄𑀘𑀦𑀸𑀫 𑀅𑀢𑁆𑀢𑀦𑁄 𑀆𑀥𑀸𑀭𑀪𑀽𑀢𑁂𑀦 𑀢𑁂𑀦 𑀓𑀸𑀫𑁂𑀦 𑀲𑀳 𑀲𑀫𑀸𑀦𑀚𑀸𑀢𑀺𑀕𑁄𑀢𑁆𑀢𑀦𑀸𑀫𑀢𑀸 𑀲𑀗𑁆𑀔𑀸𑀢𑁂𑀳𑀺 𑀧𑀭𑀺𑀢𑁄𑀪𑀸𑀕𑁂𑀳𑀺 𑀢𑀲𑁆𑀫𑀺𑀁 𑀓𑀸𑀫𑁂 𑀆𑀧𑀦𑁆𑀦𑀪𑀸𑀯𑁄 𑀅𑀦𑀼𑀧𑁆𑀧𑀯𑀺𑀝𑁆𑀞 𑀪𑀸𑀯𑁄. 𑀅𑀦𑁆𑀢𑁄𑀕𑀥𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀘 𑀢𑀣𑀸 𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄 𑀧𑀭𑀺𑀕𑁆𑀕𑀸𑀳𑀺𑀦𑀺𑀬𑀸 𑀓𑀸𑀫𑀢𑀡𑁆𑀳𑀸𑀬 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀬𑁂𑀥𑀫𑁆𑀫𑀸 𑀭𑀽𑀧𑀸𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦𑀪𑀽𑀢𑀸𑀧𑀺 𑀫𑀬𑁆𑀳𑀁 𑀏𑀢𑁂𑀢𑀺 𑀓𑀸𑀫 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀳𑀺𑀢𑀸 𑀓𑀸𑀫𑁂 𑀧𑀭𑀺𑀬𑀸𑀧𑀦𑁆𑀦𑀸𑀯 𑀳𑁄𑀦𑁆𑀢𑀺. 𑀢𑁂 𑀓𑀸𑀫𑀸𑀯𑀘𑀭𑀸𑀦𑀸𑀫𑀸𑀢𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺. 𑀭𑀽𑀧𑀸𑀭𑀽𑀧𑀸 𑀯𑀘𑀭𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀢𑁂𑀲𑀼𑀧𑀦 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸𑀘 𑀧𑀭𑀺𑀕𑁆𑀕𑀸𑀳𑀺𑀦𑀻 𑀢𑀡𑁆𑀳𑀸 𑀤𑀝𑁆𑀞𑀩𑁆𑀩𑀸.

𑀬𑁂𑀧𑀦 𑀥𑀫𑁆𑀫𑀸 𑀢𑀺𑀡𑁆𑀡𑀁 𑀢𑀡𑁆𑀳𑀸𑀦𑀁 𑀧𑀭𑀺𑀕𑁆𑀕𑀳𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑁂 𑀢𑀻𑀲𑀼 𑀪𑀯𑁂𑀲𑀼 𑀉𑀧𑁆𑀧𑀦𑁆𑀦𑀸𑀧𑀺 𑀢𑀢𑁆𑀭 𑀅𑀧𑀭𑀺𑀬𑀸𑀧𑀦𑁆𑀦𑀸𑀏𑀯 𑀳𑁄𑀦𑁆𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀸 𑀦𑀸𑀫 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀘 𑀧𑀝𑁆𑀞𑀸𑀦𑁂 𑀆𑀭𑀼𑀧𑁆𑀧𑁂 𑀓𑀸𑀫𑀘𑁆𑀙𑀦𑁆𑀤𑀁 𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀦𑁆𑀢𑀺𑀆𑀤𑀺𑀦𑀸 𑀅𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦𑁂𑀧𑀺 𑀓𑀸𑀫𑀘𑁆𑀙𑀦𑁆𑀤𑀲𑀗𑁆𑀔𑀸𑀢𑀸𑀬 𑀓𑀸𑀫𑀢𑀡𑁆𑀳𑀸𑀬 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀭𑀽𑀧𑀸𑀭𑀽𑀧 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀸𑀦𑀁 𑀓𑀸𑀫𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀸𑀳𑀺𑀦𑀻𑀢𑀡𑁆𑀳𑀸 𑀭𑀽𑀧𑀸𑀭𑀽𑀧𑀲𑀢𑁆𑀢𑀲𑀦𑁆𑀢𑀸𑀦 𑀕𑀢𑀸𑀧𑀺 𑀤𑀝𑁆𑀞𑀩𑁆𑀩𑀸. 𑀧𑀸𑀴𑀺𑀬𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑀺 𑀇𑀤𑀁 𑀦𑀻𑀯𑀭𑀡𑀚𑀸𑀢𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀛𑀸𑀦𑀪𑀽𑀫𑀻𑀲𑀼 𑀏𑀓𑀦𑁆𑀢𑀦𑀻𑀯𑀭𑀡𑀓𑀺𑀘𑁆𑀘𑀸𑀦𑀺 𑀦𑀻𑀯𑀭𑀡𑀸𑀦𑀺 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀅𑀢𑁆𑀭 𑀓𑀸𑀫𑀪𑁂𑀤𑁄 𑀯𑀢𑁆𑀢𑀩𑁆𑀩𑁄. 𑀤𑁆𑀯𑁂𑀓𑀸𑀫𑀸 𑀓𑀺𑀮𑁂 𑀲𑀓𑀸𑀫𑁄𑀘, 𑀯𑀢𑁆𑀣𑀼𑀓𑀸𑀫𑁄𑀘𑀸𑀢𑀺. 𑀢𑀢𑁆𑀣 𑀣𑀧𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀭𑀸𑀕𑁂 𑀅𑀜𑁆𑀜𑁄 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀇𑀫𑀲𑁆𑀫𑀺𑀁 𑀘𑀢𑀼𑀩𑁆𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁂 𑀓𑀺𑀮𑁂 𑀲𑀓𑀸𑀫𑁄𑀦𑀸𑀫. 𑀣𑀧𑁂𑀢𑁆𑀯𑀸𑀘 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂 𑀅𑀜𑁆𑀜𑁂 𑀲𑀩𑁆𑀩𑁂𑀧𑀺 𑀢𑀻𑀲𑀼 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀯𑀢𑁆𑀣𑀼𑀓𑀸𑀫𑁄𑀦𑀸𑀫𑀸𑀢𑀺. 𑀬𑀁𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀯𑀢𑁆𑀣𑀼𑀓𑀸𑀫𑁄𑀢𑀺 𑀯𑀼𑀢𑁆𑀢𑀁. 𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑁂𑀦 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦 𑀳𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸 𑀅𑀪𑀺𑀥𑀫𑁆𑀫𑁂 𑀓𑀸𑀫𑀦𑀸𑀫𑁂𑀦 𑀯𑀼𑀢𑁆𑀢𑀸 𑀅𑀢𑁆𑀣𑀻𑀢𑀺. [𑀓𑀸𑀫𑀸𑀯𑀘𑀭𑀧𑀤𑀁]

𑁧𑁯. 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀦𑁆𑀢𑀺 𑀏𑀢𑁆𑀣 𑀭𑀽𑀧𑀸𑀭𑀽𑀧𑀲𑀤𑁆𑀤𑀸 𑀢𑀸𑀲𑀼 𑀪𑀽𑀫𑀻𑀲𑀼 𑀦𑀺𑀭𑀼𑀴𑁆𑀳𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀧𑀺𑀘 𑀤𑁆𑀯𑁂 𑀪𑀽𑀫𑀺𑀬𑁄 𑀭𑀽𑀧𑀪𑀽𑀫𑀺, 𑀅𑀭𑀽𑀧𑀪𑀽𑀫𑀻𑀢𑀺. 𑀢𑀢𑁆𑀣 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁 𑀬𑀢𑁆𑀣 𑀦𑀢𑁆𑀣𑀺, 𑀲𑀸 𑀘𑀢𑀼𑀩𑁆𑀩𑀺𑀥𑀸 𑀪𑀼𑀫𑁆𑀫𑀺 𑀅𑀭𑀽𑀧𑀪𑀽𑀫𑀺𑀦𑀸𑀫. 𑀲𑁂𑀲𑀸 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀸 𑀪𑀼𑀫𑁆𑀫𑀺 𑀭𑀽𑀧𑀪𑀽𑀫𑀺𑀦𑀸𑀫. 𑀢𑀢𑁆𑀣𑀘 𑀳𑁂𑀝𑁆𑀞𑀸 𑀏𑀓𑀸𑀤𑀲𑀯𑀺𑀥𑀸 𑀪𑀼𑀫𑁆𑀫𑀺 𑀑𑀴𑀸𑀭𑀺𑀓𑁂𑀦 𑀓𑀸𑀫𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀓𑀸𑀫 𑀪𑀽𑀫𑀻𑀢𑀺 𑀯𑀼𑀢𑁆𑀢𑀸. 𑀉𑀧𑀭𑀺 𑀲𑁄𑀴𑀲𑀯𑀺𑀥𑀸 𑀪𑀼𑀫𑁆𑀫𑀺 𑀭𑀽𑀧𑀪𑀽𑀫𑀺𑀇𑀘𑁆𑀘𑁂𑀯 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀬𑀢𑁆𑀣𑀧𑀦 𑀢𑀡𑁆𑀳𑀸𑀯𑀸 𑀛𑀸𑀦𑀸𑀦𑀺𑀯𑀸 𑀭𑀽𑀧𑀸𑀭𑀽𑀧𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀦𑀺𑀲𑁆𑀲𑀬𑀲𑁆𑀲𑀦𑀸𑀫𑀁 𑀦𑀺𑀲𑁆𑀲𑀺𑀢𑁂 𑀆𑀭𑁄𑀧𑀦𑀯𑀲𑁂𑀦 𑀦𑀺𑀲𑁆𑀲𑀬𑁄𑀧𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣𑀘 𑀓𑀸𑀫𑀸𑀯𑀘𑀭𑀸𑀤𑀺𑀲𑀤𑁆𑀤𑁂𑀳𑀺 𑀪𑀽𑀫𑀺𑀏𑀯 𑀯𑀼𑀢𑁆𑀢𑀸. 𑀢𑀢𑁆𑀣 𑀦𑀺𑀲𑁆𑀲𑀺𑀢𑀲𑁆𑀲 𑀦𑀸𑀫𑀁 𑀦𑀺𑀲𑁆𑀲𑀬𑁂 𑀆𑀭𑁄𑀧𑀦𑀯𑀲𑁂𑀦 𑀦𑀺𑀲𑁆𑀲𑀺𑀢𑁄 𑀧𑀘𑀸𑀭𑁄𑀢𑀺. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀸𑀫𑀸𑀯𑀘𑀭𑀧𑀤𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀅𑀬𑀫𑁂𑀢𑁆𑀣 𑀢𑁂𑀪𑀽𑀫𑀓 𑀧𑀭𑀺𑀘𑁆𑀙𑁂𑀤𑁂 𑀧𑀸𑀴𑀺𑀅𑀦𑀼𑀕𑀢𑀸 𑀧𑀭𑀫𑀢𑁆𑀣𑀤𑀻𑀧𑀦𑀸. 𑀬𑀣𑀸𑀳 𑁋

𑀓𑀢𑀫𑁂 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁. 𑀇𑀫𑁂𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸. 𑀓𑀢𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀅𑀓𑀦𑀺𑀝𑁆𑀞𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑀸𑀧𑀦𑁆𑀦𑀲𑁆𑀲𑀯𑀸 𑀉𑀧𑀧𑀦𑁆𑀦𑀲𑁆𑀲𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀺𑀲𑁆𑀲𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀸𑀯𑀘𑀭𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸. 𑀳𑁂𑀝𑁆𑀞𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀼𑀧𑀕𑁂 𑀤𑁂𑀯𑁂 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸 𑀬𑀢𑀦𑀼𑀧𑀕𑁂 𑀤𑁂𑀯𑁂 𑀅𑀦𑁆𑀢𑁄 𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂. 𑀮. 𑀇𑀫𑁂 𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀸𑀢𑀺.

[𑁧𑁯] 𑀝𑀻𑀓𑀸𑀲𑀼 𑀧𑀦

𑀬𑀣𑀸𑀯𑀼𑀢𑁆𑀢𑀁 𑀲𑀼𑀯𑀺𑀲𑀤𑀁 𑀧𑀸𑀴𑀺𑀦𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀣𑀸 𑀯𑀘𑀦𑀢𑁆𑀣𑀸𑀘 𑀯𑀺𑀦𑀺𑀘𑁆𑀙𑀬𑀸𑀘 𑀏𑀢𑁆𑀣 𑀯𑀼𑀢𑁆𑀢𑀸. 𑀲𑀩𑁆𑀩𑁂 𑀢𑁂 𑀲𑀸𑀭𑀢𑁄 𑀦 𑀧𑀘𑁆𑀘𑁂𑀢𑀩𑁆𑀩𑀸𑀢𑀺.

𑀦𑀦𑀼 𑀅𑀝𑁆𑀞𑀲𑀸𑀮𑀺𑀦𑀺𑀬𑀫𑁂𑀯 𑀢𑁂𑀘 𑀅𑀜𑁆𑀜𑁂𑀘 𑀅𑀢𑁆𑀣𑀸 𑀯𑀼𑀢𑁆𑀢𑀸𑀢𑀺. 𑀲𑀘𑁆𑀘𑀁. 𑀪𑀽𑀢𑀁𑀧𑀦 𑀲𑀼𑀯𑀺𑀲𑀤𑀁 𑀧𑀸𑀴𑀺𑀅𑀦𑀼𑀕𑀢𑀁 𑀅𑀢𑁆𑀣𑀁 𑀜𑀢𑁆𑀯𑀸 𑀓𑀺𑀁𑀯𑀺𑀓𑁆𑀔𑁂𑀧𑁂𑀦𑀸𑀢𑀺.

𑁨𑁦. 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀏𑀢𑁆𑀣 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀯𑀼𑀘𑁆𑀘𑀢𑀺 𑀬𑀣𑀸𑀯𑀼𑀢𑁆𑀢𑁄 𑀢𑁂𑀪𑀽𑀫𑀓𑀥𑀫𑁆𑀫𑁄. 𑀬𑀣𑀸𑀳 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁𑀧𑀺 𑀦𑀺𑀩𑁆𑀩𑀸𑀦𑀯𑀚𑁆𑀚𑀸𑀦𑀁 𑀮𑁄𑀓𑀢𑀸𑀧𑀢𑁆𑀢𑀺 𑀲𑀺𑀬𑀸. 𑀓𑀲𑁆𑀫𑀸, 𑀢𑁂𑀲𑀁𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀥𑀫𑁆𑀫𑀢𑁆𑀢𑀸𑀢𑀺. 𑀦𑀲𑀺𑀬𑀸. 𑀬𑀢𑁆𑀣 𑀳𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄𑀢𑀺 𑀫𑀳𑀸𑀚𑀦𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄 𑀦𑀺𑀯𑀺𑀲𑀢𑀺. 𑀢𑀢𑁆𑀣𑁂𑀯 𑀢𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 𑀅𑀬𑀁 𑀮𑁄𑀓𑀲𑀫𑀜𑁆𑀜𑀸 𑀦𑀺𑀬𑀫𑀻𑀬𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀫𑀺𑀘𑁆𑀙𑀸𑀕𑀸𑀳𑀯𑀺𑀫𑀼𑀢𑁆𑀢𑀸𑀦𑀁 𑀢𑁂𑀲𑀁 𑀮𑁄𑀓𑀢𑀸𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀬𑁂𑀲𑀁𑀯𑀸 𑀮𑀼𑀚𑁆𑀚𑀦𑀁𑀧𑀮𑀼𑀚𑁆𑀚𑀦𑀜𑁆𑀘 𑀫𑀳𑀸𑀚𑀦𑀲𑁆𑀲 𑀧𑀸𑀓𑀝𑀁. 𑀢𑁂𑀲𑀜𑁆𑀜𑁂𑀯 𑀮𑁄𑀓𑀢𑀸𑀲𑀺𑀤𑁆𑀥𑀻𑀢𑀺 𑀦𑀢𑁆𑀣𑀺 𑀮𑁄𑀓𑀼𑀢𑁆𑀢𑀭𑀸𑀦𑀁 𑀮𑁄𑀓𑀢𑁆𑀢𑀧𑁆𑀧𑀲𑀗𑁆𑀕𑁄𑀢𑀺. 𑀮𑁄𑀓𑀢𑁄 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀫𑀕𑁆𑀕𑀘𑀺𑀢𑁆𑀢𑀁. 𑀢𑀢𑁄 𑀉𑀢𑁆𑀢𑀺𑀡𑁆𑀡𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁. 𑀨𑀮𑀘𑀺𑀢𑁆𑀢𑀁. 𑀦𑀺𑀩𑁆𑀩𑀸𑀦𑀁𑀧𑀦 𑀇𑀥 𑀦𑀮𑀩𑁆𑀪𑀢𑀻𑀢𑀺. 𑀉𑀢𑁆𑀢𑀭𑀡𑀜𑁆𑀘𑁂𑀢𑁆𑀣 𑀢𑀡𑁆𑀳𑀸𑀢𑁆𑀢𑀬𑀕𑁆𑀕𑀸𑀳 𑀯𑀺𑀫𑀼𑀢𑁆𑀢𑀺𑀬𑀸 𑀢𑀻𑀲𑀼 𑀮𑁄𑀓𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄𑀬𑁂𑀯. 𑀲𑁄𑀘 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑁄 𑀓𑁂𑀲𑀁 𑀥𑀫𑁆𑀫𑀸𑀦𑀁 𑀅𑀥𑀺𑀝𑁆𑀞𑀸𑀦 𑀪𑀽𑀢𑁄𑀯𑀺𑀬 𑀕𑀬𑁆𑀳𑀢𑀻𑀢𑀺 𑀯𑀺𑀲𑀼𑀁 𑀏𑀓𑀸 𑀘𑀢𑀼𑀢𑁆𑀣𑀻 𑀅𑀯𑀢𑁆𑀣𑀸𑀪𑀽𑀫𑀺𑀦𑀸𑀫𑀸𑀢𑀺.

𑀘𑀢𑀼𑀩𑁆𑀪𑀽𑀫𑀺𑀯𑀺𑀪𑀸𑀕𑀲𑁆𑀲 𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁧. 𑀏𑀯𑀁 𑀘𑀺𑀢𑁆𑀢𑀁 𑀪𑀽𑀫𑀺𑀪𑁂𑀤𑁂𑀦 𑀳𑀻𑀦𑀧𑀡𑀻𑀢𑀸 𑀦𑀼𑀓𑁆𑀓𑀫𑀢𑁄 𑀘𑀢𑀼𑀥𑀸 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀢𑀤𑁂𑀯 𑀘𑀢𑀼𑀩𑁆𑀩𑀺𑀥𑀁 𑀘𑀺𑀢𑁆𑀢𑀁 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀯𑀺𑀪𑀚𑀦𑁆𑀢𑁄 𑀧𑀣𑀫𑀁 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁. 𑀢𑀢𑁆𑀣𑀘 𑀳𑀻𑀦𑀁 𑀅𑀲𑁄𑀪𑀡𑀘𑀺𑀢𑁆𑀢𑀁. 𑀢𑀢𑁆𑀣𑀘 𑀲𑀩𑁆𑀩𑀳𑀻𑀦𑀁 𑀅𑀓𑀼𑀲𑀮𑀘𑀺𑀢𑁆𑀢𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀲𑁄𑀫𑀦𑀲𑁆𑀲𑀲𑀳 𑀕𑀢𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀘 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀲𑁆𑀲𑀧𑀺 𑀅𑀓𑀼𑀲𑀮𑀸𑀳𑁂𑀢𑀼𑀓 𑀲𑀳𑁂𑀢𑀼𑀓𑀸𑀦𑀼𑀓𑁆𑀓𑀫𑁄 𑀳𑀻𑀦 𑀧𑀡𑀻𑀢𑀸𑀦𑀼𑀓𑁆𑀓𑀫𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

[𑁨𑁦] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀩𑀳𑀽𑀦𑀁 𑀘𑀺𑀢𑁆𑀢𑀸𑀦𑀁 𑀲𑁄𑀪𑀡𑀲𑀜𑁆𑀜𑀸𑀓𑀭𑀡𑀲𑀼𑀔𑀢𑁆𑀣𑀁 𑀅𑀧𑁆𑀧𑀓𑁂 𑀧𑀸𑀧𑀸𑀳𑁂𑀢𑀼𑀓𑁂𑀬𑁂𑀯 𑀧𑀣𑀫𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀢𑀤𑀢𑁆𑀣𑁄 𑀳𑀺 𑀬𑀣𑀸𑀯𑀼𑀢𑁆𑀢𑀳𑀻𑀦𑀸𑀤𑀺𑀓𑁆𑀓𑀫𑁂𑀦𑁂𑀯 𑀲𑀺𑀤𑁆𑀥𑁄𑀢𑀺.

[𑁨𑁧] 𑀬𑀜𑁆𑀘 𑀢𑀢𑁆𑀣

𑀢𑁂𑀲𑀼 𑀢𑁂𑀲𑀼𑀘 𑀪𑀯𑁂𑀲𑀼 𑀕𑀳𑀺𑀢𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀆𑀤𑀺𑀢𑁄 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀮𑁄𑀪𑀲𑀳𑀕𑀢 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦 𑀫𑁂𑀯 𑀲𑀫𑁆𑀪𑀯𑀢𑁄 𑀢𑁂𑀬𑁂𑀯 𑀧𑀣𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦𑀬𑀼𑀚𑁆𑀚𑀢𑀺.

𑀆𑀤𑀺𑀢𑁄 𑀯𑀻𑀣𑀺𑀘𑀺𑀢𑁆𑀢𑀯𑀲𑁂𑀦 𑀫𑀦𑁄𑀤𑁆𑀯𑀸𑀭𑀸 𑀯𑀚𑁆𑀚𑀦𑀲𑁆𑀲𑁂𑀯 𑀲𑀩𑁆𑀩𑀧𑀣𑀫𑀁 𑀉𑀧𑁆𑀧𑀚𑁆𑀚𑀦𑀢𑁄𑀢𑀺. 𑀅𑀓𑀼𑀲𑀮𑁂𑀲𑀼 𑀧𑀦 𑀮𑁄𑀪𑀫𑀽𑀮 𑀘𑀺𑀢𑁆𑀢𑀁 𑀩𑀳𑀼𑀓𑀜𑁆𑀘 𑀳𑁄𑀢𑀺. 𑀤𑁆𑀯𑀻𑀳𑀺 𑀯𑀝𑁆𑀝𑀫𑀽𑀮𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀧𑀥𑀸𑀦𑀁 𑀧𑀸𑀓𑀝𑀜𑁆𑀘 𑀳𑁄𑀢𑀻𑀢𑀺 𑀢𑀤𑁂𑀯 𑀧𑀣𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁨. 𑀢𑀢𑁆𑀣 𑀲𑀼𑀦𑁆𑀤𑀭𑀁 𑀫𑀦𑁄𑀢𑀺 𑀲𑀼𑀫𑀦𑁄. 𑀲𑀺𑀦𑀺𑀤𑁆𑀥𑀘𑀺𑀢𑁆𑀢𑀁. 𑀦 𑀳𑀺 𑀅𑀦𑀯𑀚𑁆𑀚𑀝𑁆𑀞𑁂𑀦 𑀲𑀼𑀦𑁆𑀤𑀭𑀢𑀸 𑀇𑀥 𑀬𑀼𑀢𑁆𑀢𑀸𑀢𑀺. 𑀲𑀼𑀦𑁆𑀤𑀭𑀁 𑀫𑀦𑁄 𑀏𑀢𑀲𑁆𑀲𑀸𑀪𑀺𑀯𑀸 𑀲𑀼𑀫𑀦𑁄. 𑀲𑀺𑀦𑀺𑀤𑁆𑀥𑀘𑀺𑀢𑁆𑀢𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄. 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲. 𑀫𑀸𑀦𑀲𑀺𑀓𑀲𑀼𑀔𑀯𑁂𑀤𑀦𑀸𑀬𑁂𑀢𑀁 𑀦𑀸𑀫𑀁. 𑀏𑀢𑁆𑀣𑀘 𑀲𑀼𑀫𑀦𑀲𑁆𑀲 𑀪𑀸𑀯𑁄𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀧𑀼𑀕𑁆𑀕𑀮𑁂𑀯𑀸 𑀲𑀼𑀫𑀦𑀸𑀪𑀺𑀥𑀸𑀦𑀲𑁆𑀲𑀯𑀸 𑀅𑀬𑀁 𑀲𑁄 𑀲𑀼𑀫𑀦𑁄𑀢𑀺 𑀲𑀼𑀫𑀦𑀩𑀼𑀤𑁆𑀥𑀺𑀬𑀸𑀯𑀸 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀯𑁄𑀢𑀺 𑀳𑀺 𑀅𑀪𑀺𑀥𑀸𑀦𑀩𑀼𑀤𑁆𑀥𑀻𑀦𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀼𑀘𑁆𑀘𑀢𑀺. 𑀪𑀯𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀅𑀪𑀺𑀥𑀸𑀦𑀩𑀼𑀤𑁆𑀥𑀺𑀬𑁄 𑀏𑀢𑀲𑁆𑀫𑀺𑀦𑁆𑀢𑀺 𑀓𑀢𑁆𑀯𑀸. 𑀏𑀢𑀲𑁆𑀫𑀺𑀦𑁆𑀢𑀺 𑀘 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁. 𑀬𑀣𑀸 𑀦𑀸𑀕𑁄 𑀤𑀦𑁆𑀢𑁂𑀲𑀼 𑀳𑀜𑁆𑀜𑀢𑁂𑀢𑀺. 𑀬𑀣𑀸 𑀳𑀺 𑀢𑀢𑁆𑀣 𑀅𑀢𑁆𑀢𑀦𑁄 𑀤𑀦𑁆𑀢𑀦𑀺𑀫𑀺𑀢𑁆𑀢𑀁 𑀤𑀦𑁆𑀢𑀬𑀼𑀢𑁆𑀢𑁂 𑀦𑀸𑀕𑁂 𑀳𑀦𑀦𑀧𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀏𑀯𑀫𑀺𑀥𑀧𑀺 𑀢𑀁 𑀯𑁂𑀤𑀦𑀸𑀦𑀺𑀫𑀺𑀢𑁆𑀢𑀁 𑀯𑁂𑀤𑀦𑀸𑀬𑀼𑀢𑁆𑀢𑁂 𑀫𑀦𑀲𑁆𑀫𑀺𑀁 𑀧𑀼𑀕𑁆𑀕𑀮𑁂𑀯𑀸 𑀅𑀪𑀺𑀥𑀸𑀦𑀩𑀼𑀤𑁆𑀥𑀺𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀪𑀯𑀦𑁆𑀢𑀺 𑀩𑀼𑀤𑁆𑀥𑀺𑀲𑀤𑁆𑀤𑀸 𑀏𑀢𑁂𑀦𑀸𑀢𑀺 𑀪𑀸𑀯𑁄𑀢𑀺𑀘 𑀯𑀤𑀦𑁆𑀢𑀺. 𑀏𑀢𑀲𑁆𑀫𑀸𑀢𑀺 𑀘 𑀅𑀧𑀭𑁂. 𑀲𑁄𑀫𑀦𑀲𑁆𑀲𑁂𑀦 𑀲𑀳 𑀏𑀓𑀢𑁄 𑀕𑀢𑀁 𑀧𑀯𑀢𑁆𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁. 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺. 𑀲𑀸 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀤𑀼𑀯𑀺𑀥𑀸. 𑀇𑀥 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀼𑀢𑁆𑀢𑀸. 𑀅𑀓𑀼𑀲𑀮𑀸𑀥𑀺𑀓𑀸𑀭𑀢𑁆𑀢𑀸. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁. 𑀬𑀣𑀸 𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀦𑁆𑀢𑀺. 𑀤𑀺𑀝𑁆𑀞𑀺𑀕𑀢𑁂𑀦 𑀲𑀫𑀁 𑀧𑀓𑀸𑀭𑁂𑀳𑀺 𑀬𑀼𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀕𑀢 𑀲𑀫𑁆𑀧𑀬𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑁂𑀦 𑀏𑀓𑀼𑀧𑁆𑀧𑀸𑀤𑀢𑀸𑀤𑀻𑀳𑀺 𑀧𑀓𑀸𑀭𑁂𑀳𑀺 𑀲𑀫𑀁 𑀏𑀓𑀻𑀪𑀽𑀢 𑀫𑀺𑀯 𑀬𑀼𑀢𑁆𑀢𑀁 𑀲𑀁𑀲𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀗𑁆𑀔𑀸𑀭𑀺𑀓𑀫𑁂𑀓𑀁 𑀲𑀲𑀗𑁆𑀔𑀸𑀭𑀺𑀓𑀫𑁂𑀓𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑁄𑀢𑀺 𑀧𑀼𑀩𑁆𑀩𑀸𑀢𑀺𑀲𑀗𑁆𑀔𑀸𑀭𑁄. 𑀲𑁄𑀘 𑀤𑀼𑀯𑀺𑀥𑁄 𑀧𑀬𑁄𑀕𑁄, 𑀉𑀧𑀸𑀬𑁄𑀘𑀸𑀢𑀺. 𑀢𑀢𑁆𑀣 𑀆𑀡𑀢𑁆𑀢𑀺𑀬𑀸𑀯𑀸 𑀅𑀚𑁆𑀛𑁂𑀲𑀦𑀸𑀬𑀯𑀸 𑀢𑀚𑁆𑀚𑁂𑀢𑁆𑀯𑀸 𑀯𑀸 𑀇𑀤𑀁 𑀓𑀭𑁄𑀳𑀻𑀢𑀺 𑀧𑀭𑁂𑀳𑀺 𑀓𑀢𑁄 𑀓𑀸𑀬𑀯𑀘𑀻𑀧𑀬𑁄𑀕𑁄 𑀧𑀬𑁄𑀕𑁄𑀦𑀸𑀫. 𑀆𑀡𑀢𑁆𑀢𑀸𑀤𑀺𑀦𑀸𑀧𑀦 𑀯𑀺𑀦𑀸𑀯 𑀓𑀫𑁆𑀫𑀲𑁆𑀲 𑀓𑀭𑀡𑀢𑁆𑀣𑀁 𑀢𑀁 𑀢𑀁 𑀉𑀧𑀸𑀬𑀁 𑀧𑀭𑁂 𑀆𑀘𑀺𑀓𑁆𑀔𑀦𑁆𑀢𑀺. 𑀅𑀓𑀭𑀡𑁂 𑀆𑀤𑀻𑀦𑀯𑀁 𑀓𑀭𑀡𑁂𑀘 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑀺, 𑀓𑀢𑀺𑀓𑀁𑀯𑀸 𑀓𑀭𑁄𑀦𑁆𑀢𑀺, 𑀤𑀡𑁆𑀟𑀁𑀯𑀸 𑀣𑀧𑁂𑀦𑁆𑀢𑀺, 𑀲𑀬𑀫𑁂𑀯 𑀯𑀸 𑀢𑀁 𑀢𑀁 𑀓𑀸𑀭𑀡𑀁 𑀅𑀦𑀼𑀲𑁆𑀲𑀭𑀢𑀺, 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀉𑀧𑀸𑀬𑁄 𑀅𑀦𑁂𑀓𑀯𑀺𑀥𑁄. 𑀲𑁄 𑀤𑀼𑀯𑀺𑀥𑁄𑀧𑀺 𑀇𑀥 𑀲𑀗𑁆𑀔𑀸𑀭𑁄 𑀦𑀸𑀫. 𑀲𑀗𑁆𑀔𑀭𑁄𑀢𑀺 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀓𑀸𑀢𑀼𑀁 𑀅𑀦𑀺𑀘𑁆𑀙𑀫𑀸𑀦𑀁 𑀘𑀺𑀢𑁆𑀢 𑀲𑀦𑁆𑀢𑀸𑀦𑀁 𑀅𑀓𑀸𑀢𑀼𑀁 𑀅𑀤𑀢𑁆𑀯𑀸 𑀓𑀭𑀡𑀢𑁆𑀣𑀸𑀬 𑀲𑀁𑀯𑀺𑀤𑀳𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀧𑀬𑁄𑀚𑁂𑀢𑀻𑀢𑀺 𑀓𑀢𑁆𑀯𑀸. 𑀬𑁄𑀧𑀦 𑀧𑀘𑁆𑀘𑀬𑀕𑀡𑁄 𑀢𑁂𑀦 𑀲𑀗𑁆𑀔𑀸𑀭𑁂𑀦 𑀯𑀺𑀭𑀳𑀺𑀢𑁄 𑀳𑁄𑀢𑀺. 𑀲𑁄 𑀅𑀲𑀗𑁆𑀔𑀸𑀭𑁄. 𑀬𑁄𑀧𑀦 𑀢𑁂𑀦𑀲𑀳𑀺𑀢𑁄 𑀳𑁄𑀢𑀺. 𑀲𑁄 𑀲𑀲𑀗𑁆𑀔𑀸𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

𑀲𑀳 𑀲𑀗𑁆𑀔𑀸𑀭𑁂𑀦𑀸𑀢𑀺 𑀲𑀲𑀗𑁆𑀔𑀸𑀭𑁄. 𑀢𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀲𑀉𑀧𑀸𑀬𑁂𑀦 𑀧𑀘𑁆𑀘𑀬𑀕𑀡𑁂𑀦𑀸𑀢𑀺 𑀅𑀢𑁆𑀣𑁄𑀢𑀺.

𑀏𑀢𑁆𑀣𑀘 𑀧𑀘𑁆𑀘𑀬𑀕𑀡𑁄𑀢𑀺 𑀆𑀭𑀫𑁆𑀫𑀡𑀸𑀤𑀺𑀓𑁄 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬 𑀕𑀡𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀅𑀲𑀸𑀥𑀸𑀭𑀡𑁄𑀧𑀦 𑀓𑀼𑀲𑀮𑀓𑀫𑁆𑀫𑁂𑀲𑀼 𑀲𑀧𑁆𑀧𑀼𑀭𑀺𑀲𑀼𑀧𑀦𑀺𑀲𑁆𑀲𑀬𑀸𑀤𑀺𑀓𑁄 𑀅𑀓𑀼𑀲𑀮𑀓𑀫𑁆𑀫𑁂𑀲𑀼 𑀅𑀲𑀧𑁆𑀧𑀼𑀭𑀺𑀲𑀼𑀧𑀦𑀺𑀲𑁆𑀲𑀬𑀸𑀤𑀺𑀓𑁄 𑀧𑀘𑁆𑀘𑀬𑀕𑀡𑁄 𑀯𑀺𑀲𑁂𑀲𑁂𑀢𑁆𑀯𑀸 𑀬𑁄𑀚𑁂𑀢𑀼𑀁 𑀬𑀼𑀢𑁆𑀢𑁄. 𑀲𑁄𑀧𑀦 𑀬𑀤𑀸 𑀤𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀘𑀺𑀢𑁆𑀢𑀁 𑀅𑀲𑀁𑀲𑀻𑀤𑀫𑀸𑀦𑀁 𑀓𑀢𑁆𑀯𑀸 𑀉𑀝𑁆𑀞𑀸𑀧𑁂𑀢𑀺 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀤𑀸 𑀲𑁄𑀅𑀲𑀗𑁆𑀔𑀸𑀭𑁄𑀦𑀸𑀫. 𑀬𑀤𑀸𑀧𑀦 𑀢𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀘𑀺𑀢𑁆𑀢𑀁 𑀉𑀝𑁆𑀞𑀸𑀧𑁂𑀢𑀼𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀦𑀲𑀓𑁆𑀓𑁄𑀢𑀺, 𑀲𑀗𑁆𑀔𑀸𑀭𑀁 𑀲𑀳𑀸𑀬𑀁 𑀮𑀪𑀺𑀢𑁆𑀯𑀸𑀯 𑀲𑀓𑁆𑀓𑁄𑀢𑀺, 𑀢𑀤𑀸 𑀲𑁄 𑀲𑀲𑀗𑁆𑀔𑀸𑀭𑁄𑀦𑀸𑀫. 𑀇𑀢𑀺 𑀅𑀲𑀗𑁆𑀔𑀸𑀭𑁄 𑀲𑀲𑀗𑁆𑀔𑀸𑀭𑁄𑀢𑀺𑀘 𑀇𑀤𑀁 𑀧𑀘𑁆𑀘𑀬 𑀕𑀡𑀲𑁆𑀲𑁂𑀯 𑀦𑀸𑀫𑀁. 𑀦 𑀘𑀺𑀢𑁆𑀢𑀲𑁆𑀲. 𑀘𑀺𑀢𑁆𑀢𑀁𑀧𑀦 𑀅𑀲𑀗𑁆𑀔𑀸𑀭𑁂𑀦 𑀲𑀼𑀤𑁆𑀥𑁂𑀦 𑀧𑀘𑁆𑀘𑀬𑀕𑀡𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀲𑀗𑁆𑀔𑀸𑀭𑁂𑀦 𑀧𑀘𑁆𑀘𑀬𑀕𑀡𑁂𑀦 𑀉𑀧𑁆𑀧𑀦𑁆𑀦𑀁 𑀲𑀲𑀗𑁆𑀔𑀸𑀭𑀺𑀓𑀁, 𑀉𑀧𑁆𑀧𑀦𑁆𑀦𑀢𑁆𑀣𑁂 𑀳𑀺 𑀅𑀬𑀁 𑀇𑀓𑀧𑀘𑁆𑀘𑀬𑁄𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁 𑀲𑀲𑀗𑁆𑀔𑀸𑀭𑁂𑀦𑀸𑀢𑀺 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣𑀘 𑀲𑀲𑀗𑁆𑀔𑀸𑀭𑁂𑀦 𑀧𑀘𑁆𑀘𑀬𑀕𑀡𑁂𑀦 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀲𑀗𑁆𑀔𑀸𑀭𑀺𑀓𑀲𑀲𑀗𑁆𑀔𑀸𑀭𑀺𑀓𑀧𑀤𑁂𑀲𑀼 𑀧𑀭𑀫𑀢𑁆𑀣𑀤𑀻𑀧𑀦𑀸.

[𑁨𑁨] 𑀝𑀻𑀓𑀸𑀲𑀼 𑀧𑀦

𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀺𑀢𑁆𑀢𑀫𑁂𑀯 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀦𑁆𑀢𑀺 𑀘 𑀕𑀳𑁂𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁, ‘‘𑀦𑀢𑁆𑀣𑀺 𑀲𑀗𑁆𑀔𑀸𑀭𑁄 𑀅𑀲𑁆𑀲𑀸𑀢𑀺 𑀅𑀲𑀗𑁆𑀔𑀸𑀭𑀁. 𑀢𑀤𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀳 𑀲𑀗𑁆𑀔𑀸𑀭𑁂𑀦 𑀯𑀢𑁆𑀢𑀢𑀻𑀢𑀺 𑀲𑀲𑀗𑁆𑀔𑀸𑀭𑀁. 𑀲𑀲𑀗𑁆𑀔𑀸𑀭𑀫𑁂𑀯 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘. 𑀲𑁄 𑀬𑀲𑁆𑀲 𑀦𑀢𑁆𑀣𑀺. 𑀢𑀁 𑀅𑀲𑀗𑁆𑀔𑀸𑀭𑀁. 𑀢𑀤𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀗𑁆𑀔𑀸𑀭𑁂𑀦 𑀲𑀳𑀺𑀢𑀁 𑀲𑀲𑀗𑁆𑀔𑀸𑀭𑀺 𑀓𑀦𑁆𑀢𑀺 𑀘’’. 𑀲𑀩𑁆𑀩𑀫𑁂𑀢𑀁 𑀦 𑀬𑀼𑀚𑁆𑀚𑀢𑀺𑀬𑁂𑀯.

[𑁨𑁩] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

𑀲𑀗𑁆𑀔𑀭𑁄𑀢𑀺 𑀘𑀺𑀢𑁆𑀢𑀁 𑀢𑀺𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑀫𑀡𑁆𑀟𑀦𑀯𑀺𑀲𑁂𑀲𑁂𑀦 𑀲𑀚𑁆𑀚𑁂𑀢𑀺. 𑀲𑀗𑁆𑀔𑀭𑀻𑀬𑀢𑀺𑀯𑀸 𑀢𑀁 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀚𑁆𑀚𑀻𑀬𑀢𑀻𑀢𑀺 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀏𑀯𑀜𑁆𑀳𑀺 𑀲𑀢𑀺 𑀲𑀲𑀗𑁆𑀔𑀸𑀭𑀺𑀓𑀧𑀺 𑀘𑀺𑀢𑁆𑀢𑀁 𑀢𑀺𑀓𑁆𑀔𑀁𑀦𑀸𑀫 𑀲𑀺𑀬𑀸𑀢𑀺.

[𑁨𑁪] 𑀬𑀜𑁆𑀘 𑀢𑀢𑁆𑀣

‘‘𑀲𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀘𑁂𑀯 𑀧𑀭𑀲𑀦𑁆𑀢𑀸𑀦𑁂𑀘 𑀧𑀯𑀢𑁆𑀢𑀢𑀻𑀢𑀺 𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑁆𑀲 𑀢𑀺𑀓𑁆𑀔𑀪𑀸𑀯 𑀲𑀗𑁆𑀔𑀸𑀢𑁄 𑀯𑀺𑀲𑁂𑀲𑁄𑀯 𑀇𑀥 𑀲𑀗𑁆𑀔𑀸𑀭𑁄𑀢𑀺’’ 𑀯𑀼𑀢𑁆𑀢𑀁. 𑀢𑀁𑀧𑀺 𑀅𑀲𑀗𑁆𑀔𑀸𑀭𑀺𑀓 𑀲𑀲𑀗𑁆𑀔𑀸𑀭𑀺𑀓𑀧𑀤𑀸𑀦𑀁 𑀯𑀘𑀦𑀢𑁆𑀣𑁂𑀲𑀼 𑀯𑀺𑀭𑀚𑁆𑀛𑀺𑀢𑁆𑀯𑀸 𑀢𑀤𑀦𑀼 𑀭𑀽𑀧𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦𑀬𑀼𑀢𑁆𑀢𑀫𑁂𑀯.

[𑁨𑁫] 𑀏𑀢𑁂𑀦

𑀧𑀼𑀩𑁆𑀩𑀧𑁆𑀧𑀬𑁄𑀕𑀲𑀫𑁆𑀪𑀽𑀢𑁄, 𑀯𑀺𑀲𑁂𑀲𑁄 𑀘𑀺𑀢𑁆𑀢𑀲𑀫𑁆𑀪𑀧𑀻;

𑀲𑀗𑁆𑀔𑀸𑀭𑁄 𑀢𑀁 𑀯𑀲𑁂𑀦𑁂𑀢𑁆𑀣, 𑀳𑁄𑀢𑁆𑀬𑀸𑀲𑀗𑁆𑀔𑀸𑀭𑀺𑀓𑀸𑀤𑀺𑀢𑀸𑀢𑀺.

𑀲𑀸𑀥𑀓𑀕𑀸𑀣𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀻𑀢𑀺.

[𑁨𑁬] 𑀬𑀜𑁆𑀘 𑀢𑀢𑁆𑀣

‘‘𑀅𑀣𑀯𑀸, 𑀲𑀲𑀗𑁆𑀔𑀸𑀭𑀺𑀓𑀁 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀘𑁂 𑀢𑀁 𑀓𑁂𑀯𑀮𑀁𑀲𑀗𑁆𑀔𑀸𑀭𑀲𑁆𑀲 𑀪𑀸𑀯𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀢𑀲𑁆𑀲 𑀲𑀳𑀧𑀯𑀢𑁆𑀢𑀺𑀲𑀩𑁆𑀪𑀸 𑀯𑀸 𑀪𑀸𑀯𑀢𑁄𑀢𑀺. 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑁆𑀧𑀯𑀢𑁆𑀢𑀺𑀦𑁄𑀧𑀺 𑀲𑀗𑁆𑀔𑀸𑀭𑀲𑁆𑀲 𑀇𑀥𑀫𑀢𑁆𑀣𑀺𑀢𑀸𑀬 𑀢𑀁 𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀁 𑀘𑀺𑀢𑁆𑀢𑀁 𑀲𑀗𑁆𑀔𑀸𑀭𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀲𑀗𑁆𑀔𑀸𑀭𑀺𑀓𑀁. 𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄𑀢𑁆𑀬𑀸𑀤𑀻𑀲𑀼𑀯𑀺𑀬 𑀲𑀳 𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀧𑀭𑀺𑀤𑀻𑀧𑀦𑀢𑁄. 𑀢𑀩𑁆𑀩𑀺𑀧𑀭𑀻𑀢𑀫𑁆𑀧𑀦 𑀢𑀤𑀪𑀸𑀯𑀢𑁄 𑀯𑀼𑀢𑁆𑀢𑀦𑀬𑁂𑀦 𑀅𑀲𑀗𑁆𑀔𑀸𑀭𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀲𑀺𑀤𑁆𑀥𑀁 𑀉𑀚𑀼𑀁 𑀯𑀺𑀲𑀤𑀁 𑀅𑀢𑁆𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀓𑀧𑁆𑀧𑀦𑀸 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀫𑁂𑀯.

𑀏𑀢𑁆𑀣𑀘 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀯𑀺𑀦𑀸 𑀧𑀭𑁂𑀲𑀁 𑀆𑀡𑀢𑁆𑀢𑀺𑀬𑀸𑀯𑀸 𑀅𑀚𑁆𑀛𑁂 𑀲𑀦𑀸𑀬𑀯𑀸 𑀬𑀸𑀘𑀦𑀸𑀬𑀯𑀸 𑀧𑀯𑀢𑁆𑀢𑀺𑀢𑀁 𑀘𑀺𑀢𑁆𑀢𑀁 𑀧𑀬𑁄𑀕𑀲𑀫𑀼𑀝𑁆𑀞𑀺𑀢𑀁 𑀦𑀸𑀫. 𑀢𑀣𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀯𑀺𑀦𑀸 𑀧𑀭𑁂𑀲𑀁 𑀪𑀬𑁂𑀦𑀯𑀸 𑀮𑀚𑁆𑀚𑀸𑀬𑀯𑀸 𑀕𑀸𑀭𑀯𑁂𑀦𑀯𑀸 𑀓𑀣𑀺𑀓𑀸𑀬𑀯𑀸 𑀤𑀡𑁆𑀟𑀪𑀬𑁂𑀦𑀯𑀸 𑀧𑀯𑀢𑁆𑀢𑀺𑀢𑀁 𑀉𑀧𑀸𑀬𑀲𑀫𑀼𑀝𑁆𑀞𑀺𑀢𑀁 𑀦𑀸𑀫. 𑀲𑀬𑀫𑁂𑀯𑀯𑀸 𑀅𑀢𑁆𑀢𑀦𑁄 𑀮𑀻𑀦𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀢𑁂𑀦 𑀢𑁂𑀦 𑀉𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀑𑀯𑀤𑀺𑀢𑁆𑀯𑀸𑀯𑀸 𑀢𑀁 𑀢𑀁 𑀉𑀧𑀸𑀬𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸𑀯𑀸 𑀧𑀯𑀢𑁆𑀢𑀺𑀢𑀁 𑀘𑀺𑀢𑁆𑀢𑀁 𑀉𑀧𑀸𑀬𑀲𑀫𑀼𑀝𑁆𑀞𑀺𑀢𑀁 𑀦𑀸𑀫. 𑀇𑀤𑀜𑁆𑀘 𑀦𑀬𑀤𑀲𑁆𑀲𑀦𑀫𑁂𑀯𑀸𑀢𑀺. 𑀤𑀺𑀝𑁆𑀞𑀺𑀕𑀢𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀁. 𑀉𑀤𑀸𑀲𑀺𑀦𑀪𑀸𑀯𑁂𑀦 𑀧𑁂𑀓𑁆𑀔𑀢𑀺 𑀅𑀦𑀼𑀪𑀯𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑀁 𑀧𑀲𑁆𑀲𑀢𑀻𑀢𑀺 𑀉𑀧𑁂𑀓𑁆𑀔𑀸. 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺𑀯𑀸 𑀉𑀧𑁂𑀓𑁆𑀔𑀸. 𑀬𑀣𑀸𑀳𑀺 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲𑀸𑀦𑀺 𑀆𑀭𑀫𑁆𑀫𑀡𑀁 𑀅𑀥𑀺𑀫𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀺. 𑀬𑀢𑁄 𑀲𑁄𑀫𑀦𑀲𑁆𑀲𑀺𑀢𑁄 𑀧𑀼𑀕𑁆𑀕𑀮𑁄 𑀢𑁂𑀦 𑀆𑀭𑀫𑁆𑀫𑀡𑁂𑀦 𑀯𑀺𑀬𑁄𑀕𑁂 𑀯𑀺𑀓𑀸𑀭𑀧𑀢𑁆𑀢𑁄 𑀳𑁄𑀢𑀺. 𑀤𑁄𑀫𑀦𑀲𑁆𑀲𑀺𑀢𑁄𑀘 𑀢𑁂𑀦 𑀆𑀭𑀫𑁆𑀫𑀡𑁂𑀦 𑀲𑀁𑀬𑁄𑀕𑁂 𑀯𑀺𑀓𑀸𑀭𑀧𑀢𑁆𑀢𑁄 𑀳𑁄𑀢𑀺. 𑀦 𑀢𑀣𑀸 𑀅𑀬𑀁, 𑀅𑀬𑀁 𑀧𑀦 𑀬𑀼𑀢𑁆𑀢𑀺𑀢𑁄𑀯 𑀧𑀲𑁆𑀲𑀢𑀺 𑀦 𑀆𑀭𑀫𑁆𑀫𑀡𑀲𑀁𑀬𑁄𑀕 𑀯𑀺𑀬𑁄𑀕𑀳𑁂𑀢𑀼 𑀧𑀼𑀕𑁆𑀕𑀮𑀁 𑀯𑀺𑀓𑀸𑀭𑀁 𑀧𑀸𑀧𑁂𑀢𑀻𑀢𑀺. 𑀓𑁂𑀘𑀺𑀧𑀦 𑀉𑀧𑀧𑀢𑁆𑀢𑀺𑀢𑁄 𑀬𑀼𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀇𑀤𑀁 𑀇𑀥 𑀦𑀲𑀫𑁆𑀪𑀯𑀢𑀺. 𑀦 𑀳𑀺 𑀅𑀓𑀼𑀲𑀮𑀁 𑀬𑀼𑀢𑁆𑀢𑀭𑀽𑀧𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀧𑁂𑀓𑁆𑀔𑀸𑀬 𑀲𑀳𑀕𑀢𑀦𑁆𑀢𑀺 𑀲𑀫𑀸𑀲𑁄.

𑁨𑁩. 𑀏𑀢𑁆𑀣𑀘 𑀓𑀺𑀜𑁆𑀘𑀸𑀧𑀺 𑀨𑀲𑁆𑀲𑀸𑀤𑀬𑁄 𑀯𑀺𑀢𑀓𑁆𑀓𑀸𑀤𑀬𑁄 𑀫𑁄𑀳𑀸𑀤𑀬𑁄𑀘 𑀥𑀫𑁆𑀫𑀸 𑀇𑀫𑀺𑀦𑀸 𑀲𑀓𑀮𑁂𑀦 𑀅𑀝𑁆𑀞𑀯𑀺𑀥𑁂𑀦 𑀘𑀺𑀢𑁆𑀢𑁂𑀦 𑀲𑀳 𑀕𑀢𑀸 𑀲𑀫𑁆𑀧𑀬𑀼𑀢𑁆𑀢𑀸𑀘 𑀳𑁄𑀦𑁆𑀢𑀺, 𑀦 𑀧𑀦 𑀢𑁂 𑀯𑁂𑀤𑀦𑀸𑀯𑀺𑀬 𑀲𑀬𑀁𑀧𑀺 𑀪𑁂𑀤𑀯𑀦𑁆𑀢𑀸 𑀳𑁄𑀦𑁆𑀢𑀺. 𑀦𑀘 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀬𑀢𑁂𑀲𑀁 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀓𑀢𑁆𑀣𑀘𑀺 𑀳𑁄𑀦𑁆𑀢𑀺 𑀓𑀢𑁆𑀣𑀘𑀺𑀦𑀳𑁄𑀦𑁆𑀢𑀻𑀢𑀺 𑀅𑀬𑀁 𑀯𑀺𑀓𑀧𑁆𑀧𑁄 𑀅𑀢𑁆𑀣𑀺. 𑀢𑀲𑁆𑀫𑀸𑀢𑁂 𑀇𑀫𑀲𑁆𑀲𑀘𑀺𑀢𑁆𑀢𑀲𑁆𑀲 𑀪𑁂𑀤𑀓𑀭𑀸 𑀦𑀳𑁄𑀦𑁆𑀢𑀻𑀢𑀺 𑀇𑀥 𑀦𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀮𑁄𑀪𑁄𑀧𑀦 𑀅𑀜𑁆𑀜𑁂𑀳𑀺 𑀇𑀫𑀲𑁆𑀲 𑀅𑀝𑁆𑀞𑀯𑀺𑀥𑀲𑁆𑀲 𑀪𑁂𑀤𑀓𑀭𑁄 𑀳𑁄𑀢𑀺. 𑀯𑁂𑀤𑀦𑀸𑀤𑀺𑀝𑁆𑀞𑀺 𑀲𑀗𑁆𑀔𑀸𑀭𑀸𑀘 𑀇𑀫𑀲𑁆𑀲 𑀅𑀜𑁆𑀜𑀫𑀜𑁆𑀜𑀲𑁆𑀲 𑀪𑁂𑀤𑀓𑀭𑀸 𑀳𑁄𑀦𑁆𑀢𑀻𑀢𑀺 𑀢𑁂𑀏𑀯 𑀇𑀥 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀦𑀦𑀼 𑀧𑀻𑀢𑀺 𑀫𑀸𑀦 𑀣𑀺𑀦𑀫𑀺𑀤𑁆𑀥𑀸𑀦𑀺𑀧𑀺 𑀪𑁂𑀤𑀓𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺𑀧𑀺 𑀇𑀥 𑀲𑀧𑀻𑀢𑀺𑀓𑀁 𑀅𑀧𑀻𑀢𑀺𑀓𑀦𑁆𑀢𑀺 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀫𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀲𑀫𑁆𑀧𑀬𑀼𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀘 𑀕𑀳𑁂𑀢𑀩𑁆𑀩𑀸 𑀦𑀻𑀢𑀺. 𑀦. 𑀢𑁂𑀲𑀼 𑀳𑀺 𑀲𑁄𑀫𑀦𑀲𑁆𑀲𑁂 𑀕𑀳𑀺𑀢𑁂 𑀧𑀻𑀢𑀺 𑀕𑀳𑀺𑀢𑀸𑀯 𑀳𑁄𑀢𑀺. 𑀇𑀢𑀭𑀸𑀦𑀺𑀘 𑀢𑀻𑀡𑀺 𑀅𑀦𑀺𑀬𑀢𑀬𑁄𑀕𑀻𑀦𑀺𑀘 𑀳𑁄𑀦𑁆𑀢𑀺, 𑀬𑁂𑀯𑀸𑀧𑀦 𑀓𑀸𑀦𑀺𑀘𑀸𑀢𑀺 𑀦𑀕𑀳𑀺𑀢𑀸𑀦𑀻𑀢𑀺.

[𑁨𑁭] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀨𑀲𑁆𑀲𑀸𑀤𑀺𑀯𑀺𑀢𑀓𑁆𑀓𑀸𑀤𑀺𑀫𑁄𑀳𑀸𑀤𑀺𑀥𑀫𑁆𑀫𑀸 𑀇𑀢𑁄 𑀅𑀜𑁆𑀜𑁂𑀳𑀺𑀧𑀺 𑀘𑀺𑀢𑁆𑀢𑁂 𑀳𑀺 𑀬𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀦𑀢𑁂 𑀅𑀜𑁆𑀜𑁂𑀳𑀺 𑀇𑀫𑀲𑁆𑀲 𑀯𑀺𑀲𑁂𑀲𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀇𑀥 𑀦 𑀕𑀳𑀺𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀜𑁆𑀜𑁂𑀲𑀼𑀧𑀺 𑀨𑀲𑁆𑀲𑀸𑀤𑀻𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀤𑀺𑀪𑀸𑀯𑁄𑀯 𑀯𑀼𑀢𑁆𑀢𑁄𑀢𑀺. 𑀲𑁄𑀫𑀦𑀲𑁆𑀲𑀸𑀤𑀻𑀦𑀫𑁂𑀯 𑀅𑀲𑀸𑀥𑀸𑀭𑀡 𑀪𑀸𑀯𑀢𑁄𑀢𑀺. 𑀨𑀲𑁆𑀲𑀸𑀤𑀬𑁄𑀳𑀺 𑀓𑁂𑀘𑀺 𑀲𑀩𑁆𑀩𑀘𑀺𑀢𑁆𑀢 𑀲𑀸𑀥𑀸𑀭𑀡𑀸 𑀓𑁂𑀘𑀺 𑀓𑀼𑀲𑀮𑀸𑀤𑀺 𑀲𑀸𑀥𑀸𑀭𑀡𑀸. 𑀫𑁄𑀳𑀸𑀤𑀬𑁄𑀘 𑀲𑀩𑁆𑀩𑀸 𑀓𑀼𑀲𑀮𑀲𑀸𑀥𑀸𑀭𑀡𑀸𑀢𑀺 𑀦 𑀢𑁂𑀳𑀺 𑀲𑀓𑁆𑀓𑀸 𑀘𑀺𑀢𑁆𑀢𑀁 𑀯𑀺𑀲𑁂𑀲𑁂𑀢𑀼’’𑀦𑁆𑀢𑀺. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀏𑀯𑀜𑁆𑀳𑀺 𑀲𑀢𑀺 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑀸𑀧𑀺 𑀅𑀜𑁆𑀜𑁂𑀲𑀼 𑀤𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀧𑀺 𑀅𑀜𑁆𑀜𑁂𑀳𑀺 𑀇𑀫𑀲𑁆𑀲 𑀯𑀺𑀲𑁂𑀲𑀁 𑀦𑀓𑀭𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀧𑀺 𑀇𑀥 𑀦𑀕𑀳𑁂𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺.

𑁨𑁪. 𑀏𑀢𑁆𑀣𑀘 𑀲𑁄𑀫𑀦𑀲𑁆𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑀸, 𑀅𑀕𑀫𑁆𑀪𑀻𑀭𑀧𑁆𑀧𑀓𑀢𑀺𑀢𑀸, 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄, 𑀩𑁆𑀬𑀲𑀦𑀫𑀼𑀢𑁆𑀢𑀺𑀘 𑀲𑁄𑀫𑀦𑀲𑁆𑀲𑀲𑁆𑀲 𑀓𑀸𑀭𑀡𑀁. 𑀲𑁄𑀫𑀦𑀲𑁆𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑁄𑀳𑀺 𑀲𑀤𑀸 𑀪𑀯𑀗𑁆𑀕𑀲𑁄𑀫𑀦𑀲𑁆𑀲𑁂𑀦 𑀧𑀭𑀺𑀪𑀸𑀯𑀺𑀢 𑀲𑀦𑁆𑀢𑀸𑀦𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀕𑀫𑁆𑀪𑀻𑀭𑀧𑁆𑀧𑀓𑀢𑀺𑀓𑁄𑀘 𑀳𑀻𑀦𑀚𑁆𑀛𑀸𑀲𑀬𑁄 𑀅𑀧𑁆𑀧𑀓𑀁𑀧𑀺 𑀫𑀳𑀦𑁆𑀢𑀁 𑀫𑀜𑁆𑀜𑀢𑀺. 𑀳𑀻𑀦𑀁𑀧𑀺 𑀧𑀡𑀻𑀢𑀁 𑀫𑀜𑁆𑀜𑀢𑀺. 𑀢𑀲𑁆𑀫𑀸 𑀢𑀲𑁆𑀲𑀧𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑁄𑀢𑀻𑀢𑀺. 𑀇𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄𑀢𑀺 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑁂𑀦 𑀳𑀻𑀦𑁂𑀦𑀯𑀸 𑀧𑀡𑀻𑀢𑁂𑀦𑀯𑀸 𑀆𑀭𑀫𑁆𑀫𑀡𑁂𑀦 𑀲𑀫𑀸𑀬𑁄𑀕𑁄. 𑀩𑁆𑀬𑀲𑀦𑀫𑀼𑀢𑁆𑀢𑀻𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀢𑁄 𑀫𑀼𑀢𑁆𑀢𑀺. 𑀉𑀧𑁂𑀓𑁆𑀔𑀸𑀧𑀝𑀺𑀲𑀦𑁆𑀥𑀺𑀓𑀢𑀸, 𑀕𑀫𑁆𑀪𑀻𑀭𑀧𑁆𑀧𑀓𑀢𑀺𑀢𑀸, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄, 𑀩𑁆𑀬𑀲𑀦𑀫𑀼𑀢𑁆𑀢𑀺𑀘 𑀉𑀧𑁂𑀓𑁆𑀔𑀸𑀬 𑀓𑀸𑀭𑀡𑀁. 𑀏𑀢𑁆𑀣𑀘 𑀕𑀫𑁆𑀪𑀻𑀭𑀧𑁆𑀧𑀓𑀪𑀺𑀢𑀸𑀦𑀸𑀫 𑀫𑀳𑀚𑁆𑀛𑀸𑀲𑀬𑀢𑀸. 𑀢𑀸𑀤𑀺𑀲𑁄 𑀳𑀺 𑀧𑀼𑀕𑁆𑀕𑀮𑁄 𑀫𑀳𑀦𑁆𑀢𑀁𑀧𑀺 𑀅𑀧𑁆𑀧𑀓𑀁 𑀫𑀜𑁆𑀜𑀢𑀺, 𑀧𑀡𑀻𑀢𑀁𑀧𑀺 𑀳𑀻𑀦𑀁 𑀫𑀜𑁆𑀜𑀢𑀻𑀢𑀺. 𑀤𑀺𑀝𑁆𑀞𑀚𑁆𑀛𑀸𑀲𑀬𑀢𑀸, 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑀧𑀼𑀕𑁆𑀕𑀮𑀲𑁂𑀯𑀦𑀸, 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀢𑀸, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀩𑀳𑀼𑀮𑀢𑀸, 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀜𑁆𑀘 𑀤𑀺𑀝𑁆𑀞𑀺𑀬𑀸 𑀓𑀸𑀭𑀡𑀁. 𑀢𑀢𑁆𑀣 𑀤𑀺𑀝𑁆𑀞𑀚𑁆𑀛𑀸𑀲𑀬𑀢𑀸𑀢𑀺 𑀓𑀸𑀡𑀸𑀭𑀺𑀝𑁆𑀞𑀲𑁆𑀲𑀯𑀺𑀬 𑀲𑀼𑀦𑀓𑁆𑀔𑀢𑁆𑀢𑀲𑁆𑀲𑀯𑀺𑀬𑀘 𑀧𑀼𑀭𑀺𑀫𑀪𑀯𑁂 𑀤𑀺𑀝𑁆𑀞𑀺 𑀕𑀢𑀺𑀓𑀪𑀸𑀯𑁂𑀦 𑀆𑀕𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀪𑀯𑁂𑀧𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀲𑀬 𑀪𑀸𑀯𑁄. 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀢𑀸𑀢𑀺 𑀘𑀺𑀭𑀁𑀧𑀺 𑀓𑀸𑀮𑀁 𑀲𑀤𑁆𑀥𑀫𑁆𑀫𑁂𑀦 𑀯𑀺𑀦𑀸 𑀆𑀕𑀢𑀢𑀸. 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀩𑀳𑀼𑀮𑀢𑀸𑀢𑀺 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂𑀲𑀼 𑀲𑀩𑁆𑀩𑀜𑁆𑀜𑀼𑀯𑀺𑀲𑀬𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀅𑀚𑀸𑀦𑀺𑀢𑁆𑀯𑀸 𑀘𑀺𑀦𑁆𑀢𑀸𑀧𑀲𑀼𑀢𑀯𑀲𑁂𑀦 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀩𑀳𑀼𑀮𑀪𑀸𑀯𑁄. 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀦𑁆𑀢𑀺 𑀅𑀢𑁆𑀢𑀦𑀸𑀤𑀺𑀝𑁆𑀞𑀓𑀸𑀭𑀡𑀫𑁂𑀯 𑀲𑀸𑀭𑀢𑁄 𑀲𑀘𑁆𑀘𑀢𑁄 𑀉𑀫𑁆𑀫𑀼𑀚𑁆𑀚𑀦𑀁. 𑀢𑀩𑁆𑀩𑀺𑀧𑀭𑀻𑀢𑁂𑀦 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀚𑀦𑀺𑀢𑀧𑁆𑀧𑀝𑀺𑀲𑀦𑁆𑀥𑀺 𑀓𑀢𑀸, 𑀓𑀮𑁆𑀮𑀓𑀸𑀬 𑀘𑀺𑀢𑁆𑀢𑀢𑀸, 𑀔𑀦𑁆𑀢𑀺 𑀩𑀳𑀼𑀮𑀢𑀸, 𑀧𑀼𑀭𑀺𑀲𑀓𑀸𑀭𑁂𑀲𑀼 𑀤𑀺𑀝𑁆𑀞𑀸𑀦𑀺𑀲𑀁𑀲𑀢𑀸, 𑀓𑀫𑁆𑀫𑀧𑁆𑀧𑀲𑀼𑀢𑀢𑀸, 𑀉𑀢𑀼𑀪𑁄𑀚𑀦𑀸𑀤𑀺 𑀲𑀧𑁆𑀧𑀸𑀬 𑀮𑀸𑀪𑁄𑀢𑀺 𑀇𑀤𑀁 𑀅𑀲𑀗𑁆𑀔𑀸𑀭𑀺𑀓𑀓𑀸𑀭𑀡𑀁. 𑀢𑀢𑁆𑀣 𑀔𑀦𑁆𑀢𑀺𑀩𑀳𑀼𑀮𑀢𑀸𑀢𑀺 𑀲𑀻𑀢𑀼𑀡𑁆𑀳𑀸𑀤𑀻𑀦𑀁 𑀔𑀫𑀦𑀩𑀳𑀼𑀮𑀢𑀸. 𑀧𑀼𑀭𑀺𑀲𑀓𑀸𑀭𑁂𑀲𑀽𑀢𑀺 𑀧𑀼𑀭𑀺𑀲𑁂𑀳𑀺 𑀓𑀢𑁆𑀢𑀩𑁆𑀩𑁂𑀲𑀼 𑀓𑀫𑁆𑀫𑁂𑀲𑀼. 𑀓𑀫𑁆𑀫𑀧𑁆𑀧𑀲𑀼𑀢𑀪𑀸𑀢𑀺 𑀓𑀫𑁆𑀫𑁂𑀲𑀼 𑀘𑀺𑀡𑁆𑀡𑀯𑀲𑀺𑀢𑀸. 𑀢𑀩𑁆𑀩𑀺𑀧𑀭𑀻 𑀢𑁂𑀦 𑀲𑀲𑀗𑁆𑀔𑀸𑀭𑀺𑀓𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂𑀲𑀁𑀧𑀦 𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀁. 𑀅𑀝𑁆𑀞𑀧𑀻𑀢𑀺 𑀧𑀺𑀲𑀤𑁆𑀤𑁂𑀦 𑀦𑁂𑀲𑀁 𑀮𑀩𑁆𑀪𑀫𑀸𑀦𑀓𑀫𑁆𑀫𑀧𑀣𑀪𑁂𑀤𑀢𑁄 𑀓𑀸𑀮 𑀲𑀦𑁆𑀢𑀸𑀦𑀸 𑀭𑀫𑁆𑀫𑀡𑀸𑀤𑀺 𑀪𑁂𑀤𑀢𑁄𑀘 𑀅𑀦𑁂𑀓𑀯𑀺𑀥𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺.

𑀮𑁄𑀪𑀫𑀽𑀮𑀘𑀺𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀤𑀺𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁫. 𑀤𑁄𑀲𑀫𑀽𑀮𑀘𑀺𑀢𑁆𑀢𑁂 𑀤𑀼𑀝𑁆𑀞𑀼𑀫𑀦𑁄𑀪𑀺 𑀤𑀼𑀫𑁆𑀫𑀦𑁄. 𑀯𑀺𑀭𑀽𑀧𑀁 𑀘𑀺𑀢𑁆𑀢𑀁. 𑀤𑀼𑀝𑁆𑀞𑀼𑀫𑀦𑁄 𑀏𑀢𑀲𑁆𑀲𑀸𑀢𑀺𑀯𑀸 𑀤𑀼𑀫𑁆𑀫𑀦𑁄. 𑀯𑀺𑀭𑀽𑀧𑀘𑀺𑀢𑁆𑀢𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀤𑀼𑀫𑁆𑀫𑀦𑀲𑁆𑀲 𑀪𑀸𑀯𑁄 𑀤𑁄𑀫𑀦𑀲𑁆𑀲𑀁. 𑀫𑀸𑀦𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀳𑀺 𑀅𑀢𑁆𑀢𑀦𑀸 𑀲𑀳𑀕𑀢𑁂 𑀘𑀺𑀢𑁆𑀢𑁂𑀯𑀸 𑀢𑀁 𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁂𑀯𑀸 𑀤𑀼𑀫𑁆𑀫𑀦𑀸 𑀪𑀺𑀥𑀸𑀦𑀲𑁆𑀲𑀯𑀸 𑀅𑀬𑀁 𑀲𑁄 𑀤𑀼𑀫𑁆𑀫𑀦𑁄𑀢𑀺 𑀤𑀼𑀫𑁆𑀫𑀦𑀩𑀼𑀤𑁆𑀥𑀺𑀬𑀸𑀯𑀸 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀳𑁄𑀢𑀻𑀢𑀺. 𑀲𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀤𑁄𑀫𑀦𑀲𑁆𑀲𑁂𑀦 𑀲𑀳 𑀕𑀢𑀦𑁆𑀢𑀺 𑀲𑀫𑀸𑀲𑁄. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀖𑁄. 𑀤𑁄𑀲𑁄. 𑀲𑁄𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀧𑀺 𑀧𑀝𑀺𑀳𑀦𑀢𑀺. 𑀮𑀽𑀔𑁂 𑀲𑀦𑁆𑀢𑀢𑁆𑀢𑁂 𑀓𑀭𑁄𑀢𑀺. 𑀅𑀢𑁆𑀢𑀦𑁄 𑀯𑀢𑁆𑀣𑀼𑀫𑁆𑀧𑀺 𑀧𑀝𑀺𑀳𑀦𑀢𑀺. 𑀳𑀤𑀬𑀧𑁆𑀧𑀤𑁂𑀲𑀁 𑀤𑀳𑀢𑀺. 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀫𑁆𑀫𑀼𑀔𑀁 𑀓𑀭𑁄𑀢𑀺, 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁𑀧𑀺 𑀧𑀝𑀺𑀳𑀦𑀢𑀺. 𑀢𑀁 𑀩𑀸𑀥𑀬 𑀫𑀸𑀦𑁄 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀧𑀝𑀺𑀖𑁄𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁨𑁬. 𑀏𑀢𑁆𑀣 𑀲𑀺𑀬𑀸. 𑀲𑀗𑁆𑀔𑀸𑀭𑁄 𑀢𑀸𑀯 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑁂𑀤 𑀓𑀭𑁄𑀢𑀺 𑀢𑀲𑁆𑀲 𑀇𑀥 𑀕𑀳𑀡𑀁 𑀬𑀼𑀢𑁆𑀢𑀁. 𑀯𑁂𑀤𑀦𑀸 𑀧𑀝𑀺𑀖𑀸𑀧𑀦 𑀪𑁂𑀤𑀓𑀭𑀸 𑀦 𑀳𑁄𑀦𑁆𑀢𑀻𑀢𑀺 𑀢𑁂 𑀇𑀥 𑀦 𑀕𑀳𑁂𑀢𑀩𑁆𑀩𑀸𑀢𑀺. 𑀯𑀼𑀘𑁆𑀘𑀢𑁂, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀢𑀸𑀯 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀓𑀤𑀸𑀘𑀺 𑀅𑀜𑁆𑀜𑀯𑁂𑀤𑀦𑀸𑀬𑁄𑀕𑀢𑀸 𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀦𑁆𑀢𑀺. 𑀬𑀤𑀸𑀳𑀺 𑀭𑀸𑀚𑀸𑀦𑁄 𑀳𑀲𑀫𑀸𑀦𑀸𑀬𑁂𑀯 𑀘𑁄𑀭𑀯𑀥𑀁 𑀧𑁂𑀲𑁂𑀦𑁆𑀢𑀺. 𑀬𑀤𑀸𑀘 𑀚𑀦𑀸 𑀅𑀢𑁆𑀢𑀦𑁄 𑀯𑁂𑀭𑀻𑀦𑀁 𑀫𑀭𑀡𑁂 𑀢𑀼𑀝𑁆𑀞𑀺𑀁 𑀧𑀯𑁂𑀤𑁂𑀦𑁆𑀢𑀺. 𑀫𑀭𑀡𑀁 𑀅𑀪𑀺𑀦𑀦𑁆𑀤𑀦𑁆𑀢𑀺. 𑀬𑀤𑀸𑀘 𑀩𑀸𑀮𑀚𑀦𑀸 𑀳𑀲𑀫𑀸𑀦𑀸𑀯 𑀫𑀺𑀕𑀧𑀓𑁆𑀔𑀺𑀦𑁄 𑀫𑀸𑀭𑁂𑀦𑁆𑀢𑀺. 𑀢𑀤𑀸 𑀇𑀤𑀁 𑀦𑀼𑀔𑁄 𑀲𑁄𑀫𑀦𑀲𑁆𑀲𑁂𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁂𑀯 𑀧𑀲𑀗𑁆𑀕𑁄. 𑀉𑀧𑁂𑀓𑁆𑀔𑀸𑀬𑁄𑀕𑁂𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑀦𑁆𑀢𑀺. 𑀧𑀝𑀺𑀖𑀕𑁆𑀕𑀳𑀡𑀁𑀧𑀺 𑀅𑀜𑁆𑀜𑀥𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀢𑀸 𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁. 𑀢𑀣𑀸𑀳𑀺 𑀬𑁂 𑀦𑀢𑁆𑀣𑀺𑀓𑀸𑀳𑁂𑀢𑀼𑀓𑀸 𑀓𑀺𑀭𑀺𑀬𑀫𑀺𑀘𑁆𑀙𑀸 𑀤𑀺𑀝𑁆𑀞𑀺𑀓𑀸 𑀧𑀸𑀡𑀯𑀥𑁂 𑀅𑀧𑀼𑀜𑁆𑀜𑀁𑀦𑀸𑀫 𑀦𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀬𑁂𑀘 𑀫𑀦𑀼𑀲𑁆𑀲𑀧𑀸𑀡 𑀯𑀥𑁂𑀏𑀯 𑀅𑀧𑀼𑀜𑁆𑀜𑀁 𑀳𑁄𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑀧𑀸𑀡𑀯𑀥𑁂 𑀅𑀧𑀼𑀜𑁆𑀜𑀁 𑀦𑀢𑁆𑀣𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀬𑁂𑀘 𑀧𑀸𑀡𑀯𑀥𑀁 𑀓𑀢𑁆𑀯𑀸 𑀬𑀜𑁆𑀜𑀁 𑀬𑀚𑀦𑁆𑀢𑀸𑀦𑀁 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀳𑁄𑀢𑀺, 𑀤𑀺𑀩𑁆𑀩𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀕𑀡𑁆𑀳𑀦𑁆𑀢𑀺. 𑀢𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀲𑁆𑀲𑀝𑁆𑀞𑀸 𑀧𑀸𑀡𑀯𑀥𑀁 𑀲𑀬𑀁𑀯𑀸 𑀓𑀭𑁄𑀦𑁆𑀢𑀺. 𑀅𑀜𑁆𑀜𑁂𑀯𑀸 𑀧𑁂𑀲𑁂𑀦𑁆𑀢𑀺. 𑀢𑀤𑀸 𑀇𑀤𑀁 𑀤𑀺𑀝𑁆𑀞𑀺𑀬𑀸𑀧𑀺 𑀲𑀫𑁆𑀧𑀬𑀼𑀢𑁆𑀢𑀁 𑀲𑀺𑀬𑀸𑀢𑀺 𑀧𑀲𑀗𑁆𑀕𑁄 𑀳𑁄𑀢𑀺𑀬𑁂𑀯. 𑀬𑁂𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂𑀲𑀼 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸, 𑀢𑁂 𑀓𑀤𑀸𑀘𑀺 𑀢𑁂𑀲𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀦𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀸𑀡𑀁 𑀯𑀥𑀦𑁆𑀢𑀸 𑀆𑀤𑀺𑀢𑁄 𑀯𑁂𑀫𑀢𑀺𑀓𑀚𑀸𑀢𑀸𑀯 𑀳𑁄𑀦𑁆𑀢𑀺. 𑀢𑀤𑀸𑀢𑁂𑀲𑀁 𑀇𑀤𑀁 𑀯𑀺𑀘𑀺𑀓𑀺𑀘𑁆𑀙𑀸𑀬𑀧𑀺 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺 𑀧𑀲𑀗𑁆𑀕𑁄 𑀳𑁄𑀢𑀺. 𑀢𑀧𑁆𑀧𑀲𑀗𑁆𑀕 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀝𑀺𑀖𑀕𑁆𑀕𑀳𑀡𑀦𑁆𑀢𑀺. 𑀇𑀢𑀭𑀣𑀸 𑀧𑀼𑀭𑀺𑀫 𑀘𑀺𑀢𑁆𑀢𑀲𑁆𑀲 𑀮𑁄𑀪𑀲𑀳𑀕𑀢𑀪𑀸𑀯𑁄𑀯𑀺𑀬 𑀇𑀫𑀲𑁆𑀲 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄 𑀘𑀽𑀴𑀦𑀺𑀕𑀫𑁂𑀦𑁂𑀯 𑀲𑀺𑀤𑁆𑀥𑁄𑀢𑀺 𑀢𑁂𑀲𑀁 𑀕𑀳𑀡𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺. 𑀏𑀢𑁆𑀣𑀘 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀣𑀺𑀦𑀫𑀺𑀤𑁆𑀥𑀲𑁆𑀲𑀘 𑀅𑀕𑁆𑀕𑀳𑀡𑀁 𑀧𑀼𑀭𑀺𑀫𑀘𑀺𑀢𑁆𑀢𑁂 𑀫𑀸𑀦𑀣𑀺𑀦𑀫𑀺𑀤𑁆𑀥𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀧𑀭𑀫𑀢𑁆𑀣𑀤𑀻𑀧𑀦𑀸.

[𑁨𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀫𑀳𑀸𑀝𑀻𑀓𑀸𑀬𑀜𑁆𑀘

‘‘𑀅𑀲𑀸𑀥𑀸𑀭𑀡 𑀥𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀣𑀁 𑀤𑁄𑀫𑀦𑀲𑁆𑀲𑀕𑁆𑀕𑀳𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑀸𑀥𑀸𑀭𑀡𑀥𑀫𑁆𑀫𑀯𑀲𑁂𑀦𑀸𑀢𑀺 𑀇𑀤𑀁 𑀢𑀸𑀯 𑀦𑀬𑀼𑀚𑁆𑀚𑀢𑀺.

[𑁨𑁯] 𑀲𑀢𑀺𑀧𑀺 𑀇𑀫𑀲𑁆𑀲 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀪𑀸𑀯𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦𑁂𑀯 𑀤𑁄𑀫𑀦𑀲𑁆𑀲𑁂𑀦 𑀇𑀫𑀲𑁆𑀲 𑀉𑀧𑀮𑀓𑁆𑀔𑀡𑀢𑁆𑀣𑀦𑁆𑀢𑀺 𑀅𑀢𑁆𑀣𑀲𑁆𑀲 𑀆𑀧𑀚𑁆𑀚𑀦𑀢𑁄. 𑀬𑀣𑀸𑀢𑀁 𑀲𑀢𑀺𑀧𑀺 𑀧𑀼𑀭𑀺𑀫𑀲𑁆𑀲 𑀇𑀫𑀲𑁆𑀲𑀘 𑀘𑀺𑀢𑁆𑀢𑀲𑁆𑀲 𑀫𑁄𑀳𑀲𑀳𑀕𑀢𑀪𑀸𑀯𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦𑁂𑀯 𑀮𑁄𑀪𑁂𑀦 𑀧𑀝𑀺𑀖𑁂𑀦𑀘 𑀉𑀧𑀮𑀓𑁆𑀔𑀡𑀢𑁆𑀣𑀁 𑀮𑁄𑀪𑀲𑀳𑀕𑀢𑀧𑀝𑀺𑀖 𑀲𑀫𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑀦𑁆𑀢𑀺. 𑀉𑀧𑀮𑀓𑁆𑀔𑀡𑀢𑁆𑀣𑀦𑁆𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁.

𑀏𑀯𑀜𑁆𑀳𑀺 𑀲𑀢𑀺 𑀧𑀸𑀓𑀝𑁂𑀦 𑀤𑁄𑀫𑀦𑀲𑁆𑀲𑁂𑀦 𑀅𑀧𑀸𑀓𑀝𑀸𑀦𑀁 𑀅𑀜𑁆𑀜𑀯𑁂𑀤𑀦𑀸 𑀦𑀁𑀧𑀺 𑀇𑀥 𑀮𑀤𑁆𑀥𑀪𑀸𑀯𑀁 𑀉𑀧𑀮𑀓𑁆𑀔𑁂𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑀣𑀸 𑀮𑀤𑁆𑀥𑀸𑀢𑀧𑀢𑁆𑀢𑁄 𑀭𑀸𑀚𑀓𑀼𑀫𑀸𑀭𑁄𑀢𑀺.

[𑁩𑁦] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁄𑀧𑀦 𑀉𑀪𑀺𑀦𑁆𑀦𑀁 𑀏𑀓𑀦𑁆𑀢 𑀲𑀳𑀘𑀸𑀭𑀺𑀢𑀸 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀦 𑀲𑀼𑀦𑁆𑀤𑀭𑀁.

𑀇𑀫𑀲𑁆𑀲 𑀘𑀽𑀴𑀦𑀺𑀕𑀫𑁂𑀦𑁂𑀯 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄𑀢𑀺.

𑁨𑁭. 𑀏𑀢𑁆𑀣𑀘 𑀤𑁄𑀲𑀚𑁆𑀛𑀸𑀲𑀬𑀢𑀸, 𑀅𑀕𑀫𑁆𑀪𑀻𑀭𑀧𑁆𑀧𑀓𑀢𑀺𑀢𑀸, 𑀅𑀧𑁆𑀧𑀲𑁆𑀲𑀼𑀓𑀢𑀸, 𑀆𑀖𑀸𑀢𑀯𑀢𑁆𑀣𑀼𑀲𑀫𑀸𑀬𑁄𑀕𑁄𑀯𑀸, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄 𑀕𑁄𑀯𑀸 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀖𑀲𑁆𑀲𑀘 𑀓𑀸𑀭𑀡𑀁. 𑀢𑀢𑁆𑀣 𑀤𑁄𑀲 𑀩𑀳𑀼𑀮 𑀪𑀸𑀯𑀢𑁄 𑀆𑀕𑀢𑀯𑀲𑁂𑀦 𑀤𑁄𑀲𑀚𑁆𑀛𑀸𑀲𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀕𑀫𑁆𑀪𑀻𑀭𑀧𑁆𑀧𑀓𑀢𑀺𑀢𑀸 𑀳𑀻𑀦𑀚𑁆𑀛𑀸𑀲𑀬𑀢𑀸. 𑀅𑀧𑁆𑀧𑀲𑁆𑀲𑀼𑀢𑀲𑁆𑀲𑀘 𑀅𑀦𑀺𑀝𑁆𑀞 𑀮𑁄𑀓 𑀥𑀫𑁆𑀫𑁂𑀳𑀺𑀨𑀼𑀝𑁆𑀞𑀲𑁆𑀲 𑀢𑀁𑀓𑀼𑀢𑁂𑀢𑁆𑀣𑀮𑀩𑁆𑀪𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑀸 𑀦𑀢𑁆𑀣𑀻𑀢𑀺. 𑀇𑀫𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀁. 𑀧𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄𑀧𑀺 𑀯𑀼𑀢𑁆𑀢𑀦𑀬𑁄𑀏𑀯𑀸𑀢𑀺.

𑀤𑁄𑀲𑀫𑀽𑀮𑀘𑀺𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀤𑀺𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮. 𑀫𑁄𑀳𑀫𑀽𑀮𑀘𑀺𑀢𑁆𑀢𑁂 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀸𑀦𑀁 𑀧𑀤𑀢𑁆𑀣𑁄 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺. 𑀬𑀲𑁆𑀫𑀸𑀧𑀦 𑀇𑀤𑀁 𑀘𑀺𑀢𑁆𑀢𑀁 𑀫𑀽𑀮𑀦𑁆𑀢𑀭𑀯𑀺𑀭𑀳𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀲𑀼𑀝𑁆𑀞𑀼𑀩𑀮𑀯𑀦𑁆𑀢𑁂𑀦 𑀫𑁄𑀳𑁂𑀦𑀘𑁂𑀯 𑀲𑀁𑀲𑀧𑁆𑀧𑀫𑀸𑀦𑀯𑀺𑀓𑁆𑀔𑀺𑀧𑀫𑀸𑀦𑁂𑀳𑀺 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑁂𑀳𑀺 𑀘 𑀬𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀇𑀥 𑀯𑁂𑀤𑀦𑀸𑀧𑀺 𑀆𑀭𑀫𑁆𑀫𑀡𑀁 𑀅𑀥𑀺𑀫𑀢𑁆𑀢𑀢𑁄 𑀅𑀦𑀼𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀯 𑀬𑀼𑀢𑁆𑀢𑀸 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀤𑀁 𑀘𑀺𑀢𑁆𑀢𑀁 𑀲𑁄𑀫𑀦𑀲𑁆𑀲 𑀤𑁄𑀫𑀦𑀲𑁆𑀲 𑀲𑀳𑀕𑀢𑀸𑀦𑀁𑀧𑀺 𑀅𑀦𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀯𑁂𑀤𑀦𑀸𑀳𑀺𑀧𑀺 𑀇𑀤𑀁 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺 𑀧𑀲𑀗𑁆𑀕𑁄 𑀳𑁄𑀢𑀻𑀢𑀺 𑀢𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁 𑀇𑀥 𑀉𑀧𑁂𑀓𑁆𑀔𑀸𑀕𑀳𑀡𑀁 𑀓𑀢𑀁. 𑀅𑀦𑀜𑁆𑀜𑀘𑀺𑀢𑁆𑀢𑀲𑀸𑀥𑀸𑀭𑀡𑁂𑀦 𑀥𑀫𑁆𑀫𑁂𑀦 𑀘𑀺𑀢𑁆𑀢𑀲𑁆𑀲 𑀦𑀺𑀬𑀫𑀦𑀢𑁆𑀣𑀁 𑀯𑀺𑀘𑀺𑀓𑀺𑀘𑁆𑀙𑀸𑀕𑀳𑀡𑀁. 𑀉𑀤𑁆𑀥𑀘𑁆𑀘𑀁 𑀧𑀦 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀬𑀼𑀢𑁆𑀢𑀁𑀧𑀺 𑀇𑀥 𑀮𑀤𑁆𑀥𑁄𑀓𑀸𑀲𑀁 𑀳𑀼𑀢𑁆𑀯𑀸 𑀲𑀼𑀝𑁆𑀞𑀼 𑀩𑀮𑀯𑀁 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀥𑁂𑀯 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀳𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁂 𑀉𑀤𑁆𑀥𑀘𑁆𑀘𑀁 𑀅𑀜𑁆𑀜𑁂𑀲𑀼 𑀧𑀸𑀧𑀘𑀺𑀢𑁆𑀢𑁂𑀲𑀼 𑀲𑀭𑀽𑀧𑀢𑁄 𑀅𑀦𑀼𑀤𑁆𑀥𑀭𑀺𑀢𑁆𑀯𑀸 𑀬𑁂𑀯𑀸𑀧𑀦𑀓𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀅𑀦𑁆𑀢𑀺𑀫𑀘𑀺𑀢𑁆𑀢𑁂𑀏𑀯 𑀲𑀭𑀽𑀧𑀢𑁄 𑀉𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸𑀘 𑀇𑀤𑀁𑀘𑀺𑀢𑁆𑀢𑀤𑁆𑀯𑀬𑀁 𑀲𑀢𑁆𑀢𑀸𑀦𑀁 𑀧𑀓𑀢𑀺𑀲𑀪𑀸𑀯𑀪𑀽𑀢𑀦𑁆𑀢𑀺 𑀧𑀬𑁄𑀕𑁂𑀦 𑀯𑀸 𑀉𑀧𑀸𑀬𑁂𑀦 𑀯𑀸 𑀓𑁂𑀦𑀘𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑀓𑀸𑀮𑀫𑁆𑀧𑀺 𑀪𑀯𑀗𑁆𑀕𑀘𑀺𑀢𑁆𑀢𑀁𑀯𑀺𑀬 𑀅𑀦𑁄𑀲𑀓𑁆𑀓𑀫𑀸𑀦𑀁 𑀅𑀲𑀁𑀲𑀻𑀤𑀫𑀸𑀦𑀁 𑀅𑀓𑀺𑀘𑁆𑀙𑁂𑀦 𑀅𑀓𑀲𑀺𑀭𑁂𑀦 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀏𑀓𑀦𑁆𑀢𑁂𑀦 𑀅𑀲𑀗𑁆𑀔𑀸𑀭𑀺𑀓𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀇𑀥 𑀲𑀗𑁆𑀔𑀸𑀭𑀪𑁂𑀤𑁄 𑀦 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀘 𑀧𑀸𑀴𑀺𑀬𑀁𑀧𑀺 𑀧𑀼𑀭𑀺𑀫𑀘𑀺𑀢𑁆𑀢𑁂𑀲𑀼𑀯𑀺𑀬 𑀇𑀥 𑀲𑀲𑀗𑁆𑀔𑀸𑀭𑁂𑀦𑀸𑀢𑀺 𑀤𑀼𑀢𑀻𑀬𑀘𑀺𑀢𑁆𑀢𑀯𑀸𑀭𑁄 𑀦𑀯𑀼𑀢𑁆𑀢𑁄𑀢𑀺. 𑀅𑀬𑀫𑁂𑀢𑁆𑀣 𑀧𑀭𑀫𑀢𑁆𑀣𑀤𑀻𑀧𑀦𑀸.

[𑁩𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀇𑀫𑀸𑀦𑀺 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀅𑀢𑀺𑀲𑀫𑁆𑀫𑀼𑀴𑁆𑀳𑀢𑀸𑀬 𑀅𑀢𑀺𑀘𑀜𑁆𑀘𑀮𑀢𑀸𑀬 𑀘 𑀲𑀩𑁆𑀩𑀢𑁆𑀣𑀧𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀭𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀉𑀧𑁂𑀓𑁆𑀔𑀸 𑀲𑀳𑀕𑀢𑀸𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀭𑀚𑁆𑀚𑀦 𑀲𑀳𑀺𑀢𑀸𑀦𑀁𑀧𑀺 𑀮𑁄𑀪𑀫𑀽𑀮 𑀘𑀺𑀢𑁆𑀢𑀸𑀦𑀁 𑀉𑀧𑁂𑀓𑁆𑀔𑀸 𑀬𑁄𑀕𑀲𑁆𑀲 𑀤𑀺𑀝𑁆𑀞𑀢𑁆𑀢𑀸𑀢𑀺.

[𑁩𑁨] 𑀬𑀜𑁆𑀘 𑀢𑀢𑁆𑀣 𑀫𑀳𑀸𑀝𑀻𑀓𑀸𑀬𑀜𑁆𑀘

‘‘𑀢𑀢𑁄𑀬𑁂𑀯𑀘 𑀲𑀪𑀸𑀯𑀢𑀺𑀓𑁆𑀔𑀢𑀸𑀬 𑀉𑀲𑁆𑀲𑀸𑀳𑁂𑀢𑀩𑁆𑀩𑀢𑀸𑀬𑀘 𑀅𑀪𑀸𑀯𑀢𑁄 𑀲𑀗𑁆𑀔𑀸𑀭𑀪𑁂𑀤𑁄𑀧𑀺 𑀦𑁂𑀲𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀪𑀸𑀯𑀢𑀺𑀓𑁆𑀔𑀢𑀸𑀬 𑀅𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀇𑀫𑀲𑁆𑀲 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀉𑀲𑁆𑀲𑀸𑀳𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀤𑀼𑀪𑀬𑁂 𑀧𑀦 𑀇𑀤𑀁 𑀘𑀺𑀢𑁆𑀢𑀤𑁆𑀯𑀬𑀁 𑀲𑀩𑁆𑀩𑀲𑁄 𑀲𑀗𑁆𑀔𑀸𑀭𑀯𑀺𑀫𑀼𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬𑀧𑀺 𑀢𑀸𑀯 𑀦 𑀲𑀫𑁂𑀢𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀅𑀝𑁆𑀞𑀓𑀣𑀸𑀬𑀜𑁆𑀳𑀺 𑀲𑀗𑁆𑀔𑀸𑀭𑀪𑁂𑀤𑁂𑀦 𑀅𑀯𑀺𑀚𑁆𑀚𑀸𑀬 𑀤𑀼𑀯𑀺𑀥𑀪𑀸𑀯𑁄𑀯 𑀯𑀼𑀢𑁆𑀢𑁄. 𑀬𑀤𑀺𑀘 𑀇𑀤𑀁𑀤𑁆𑀯𑀬𑀁 𑀲𑀗𑁆𑀔𑀸𑀭𑀫𑀼𑀢𑁆𑀢𑀁 𑀲𑀺𑀬𑀸. 𑀏𑀯𑀁 𑀲𑀢𑀺 𑀇𑀥 𑀫𑁄𑀳𑁄𑀧𑀺 𑀲𑀗𑁆𑀔𑀸𑀭𑀫𑀼𑀢𑁆𑀢𑁄 𑀲𑀺𑀬𑀸. 𑀲𑁄𑀘 𑀅𑀯𑀺𑀚𑁆𑀚𑀸𑀬𑁂𑀯𑀸𑀢𑀺 𑀢𑀺𑀯𑀺𑀥𑀪𑀸𑀯𑁄𑀯 𑀅𑀯𑀺𑀚𑁆𑀚𑀸𑀬 𑀢𑀢𑁆𑀣 𑀯𑀢𑁆𑀢𑀩𑁆𑀩𑁄. 𑀦𑀘 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬 𑀦𑀲𑀫𑁂𑀢𑀺.

[𑁩𑁩] 𑀬𑀲𑁆𑀫𑀸𑀘 𑀇𑀥 𑀢𑀺𑀓𑁆𑀔𑀪𑀸𑀯𑁄𑀦𑀸𑀫 𑀯𑀺𑀦𑀸 𑀲𑀗𑁆𑀔𑀸𑀭𑁂𑀦 𑀓𑁂𑀯𑀮𑀁 𑀧𑀓𑀢𑀺 𑀧𑀘𑁆𑀘𑀬 𑀕𑀡 𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀯𑀼𑀘𑁆𑀘𑀢𑀺. 𑀇𑀤𑀜𑁆𑀘 𑀘𑀺𑀢𑁆𑀢𑀁 𑀢𑀣𑁂𑀯 𑀧𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀇𑀤𑀁 𑀲𑀪𑀸𑀯𑀢𑀺𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀮𑀤𑁆𑀥𑁄𑀓𑀸𑀲𑁂𑀦 𑀫𑁄𑀳𑁂𑀦 𑀲𑀼𑀝𑁆𑀞𑀼 𑀫𑀼𑀬𑁆𑀳𑀦𑁆𑀢𑀻𑀢𑀺 𑀫𑁄𑀳𑀫𑀽𑀳𑀸𑀦𑀻𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀦𑀬𑁂𑀦 𑀫𑁄𑀫𑀽𑀳𑀸𑀦𑀻𑀢𑀺 𑀯𑀼𑀢𑁆𑀢𑀁.

𑁨𑁯. 𑀇𑀘𑁆𑀘𑁂𑀯𑀦𑁆𑀢𑀺𑀆𑀤𑀺 𑀫𑀳𑀸𑀦𑀺𑀕𑀫𑀦𑀁. 𑀢𑀢𑁆𑀣 𑀇𑀘𑁆𑀘𑁂𑀯𑀦𑁆𑀢𑀺 𑀇𑀢𑀺 𑀏𑀯𑀁. 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀳𑁂𑀲. 𑀧𑀘𑁆𑀙𑀺𑀫𑁄𑀯𑀸 𑀏𑀯𑀁 𑀲𑀤𑁆𑀤𑁄 𑀧𑀼𑀭𑀺𑀫𑀲𑁆𑀲 𑀇𑀢𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀯𑀘𑀦𑁄. 𑀇𑀘𑁆𑀘𑁂𑀯𑀦𑁆𑀢𑀺𑀯𑀸 𑀯𑀺𑀲𑀼𑀁 𑀏𑀓𑁄 𑀦𑀺𑀧𑀸𑀢𑁄. 𑀲𑀩𑁆𑀩𑀣𑀸𑀧𑀺 𑀇𑀫𑀺𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀜𑁆𑀘 𑀤𑁆𑀯𑀸𑀤𑀲𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀣𑀸𑀧𑀻𑀢𑀺 𑀥𑀫𑁆𑀫𑀲𑀗𑁆𑀕𑀡𑀻𑀬𑀁 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀧𑀺 𑀤𑁆𑀯𑀸𑀤𑀲𑁂𑀯. 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀧𑀺 𑀤𑁆𑀯𑀸𑀤𑀲𑁂𑀯. 𑀥𑀸𑀢𑀼𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀧𑀺 𑀤𑁆𑀯𑀸𑀤𑀲𑁂𑀯. 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀧𑀺 𑀤𑁆𑀯𑀸𑀤𑀲𑁂𑀯. 𑀓𑀸𑀮𑀤𑁂𑀲 𑀲𑀦𑁆𑀢𑀸𑀦𑀸𑀤𑀺 𑀪𑁂𑀤𑀪𑀺𑀦𑁆𑀦𑁂𑀦 𑀧𑀓𑀸𑀭𑁂𑀦𑀸𑀧𑀺 𑀤𑁆𑀯𑀸𑀤𑀲𑁂𑀯. 𑀓𑀣𑀁 𑀤𑁆𑀯𑀸𑀤𑀲𑁂𑀯𑀸𑀢𑀺. 𑀇𑀘𑁆𑀘𑁂𑀯𑀁 𑀤𑁆𑀯𑀸𑀤𑀲𑁂𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

[𑁩𑁪] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀲𑀫𑁆𑀧𑀬𑁄𑀕𑀸𑀤𑀺 𑀆𑀓𑀸𑀭𑁄𑀯 𑀯𑀺𑀪𑀸𑀯𑀺𑀢𑁄. 𑀲𑁄𑀧𑀦 𑀇𑀘𑁆𑀘𑁂𑀯𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄𑀢𑀺.

𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀻𑀢𑀺 𑀓𑀼𑀲𑀮𑀧𑀝𑀺𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸 𑀏𑀯𑀁 𑀮𑀤𑁆𑀥𑀦𑀸 𑀫𑀸𑀦𑀺 𑀘𑀺𑀢𑁆𑀢𑀸𑀦𑀺. 𑀏𑀢𑁆𑀣𑀘 𑀏𑀓𑀦𑁆𑀢𑁂𑀦 𑀲𑀤𑁆𑀥𑀸𑀤𑀬𑁄𑀏𑀯 𑀓𑀼𑀲𑀮𑀸𑀦𑀸𑀫. 𑀫𑁄𑀳𑀸𑀤𑀬𑁄𑀏𑀯 𑀅𑀓𑀼𑀲𑀮𑀸 𑀦𑀸𑀫. 𑀘𑀺𑀢𑁆𑀢𑀁𑀧𑀦 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀅𑀜𑁆𑀜𑀲𑀫𑀸𑀦𑀫𑁂𑀯 𑀳𑁄𑀢𑀺, 𑀦 𑀳𑀺 𑀆𑀭𑀫𑁆𑀫𑀡 𑀯𑀺𑀚𑀸𑀦𑀦𑀁𑀯𑀸 𑀏𑀓𑀦𑁆𑀢𑁂𑀦 𑀫𑀼𑀬𑁆𑀳𑀦𑀸𑀤𑀺𑀯𑀺𑀬 𑀲𑀸𑀯𑀚𑁆𑀚𑀁𑀯𑀸 𑀳𑁄𑀢𑀺. 𑀲𑀤𑁆𑀤𑀳𑀦𑀸𑀤𑀺𑀯𑀺𑀬 𑀅𑀦𑀯𑀚𑁆𑀚𑀁𑀯𑀸𑀢𑀺. 𑀢𑀁𑀧𑀦 𑀅𑀓𑀼𑀲𑀮𑁂𑀳𑀺 𑀬𑀼𑀢𑁆𑀢𑀁 𑀅𑀓𑀼𑀲𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀲𑀮𑁂𑀳𑀺 𑀬𑀼𑀢𑁆𑀢𑀁 𑀓𑀼𑀲𑀮𑀦𑁆𑀢𑀺. 𑀲𑀤𑁆𑀥𑀸𑀤𑀻𑀦𑀁𑀧𑀦 𑀫𑁄𑀳𑀸𑀤𑀻𑀦𑀜𑁆𑀘 𑀧𑀝𑀺𑀯𑀺𑀭𑀼𑀤𑁆𑀥𑀪𑀸𑀯𑁄 𑀬𑀣𑀸𑀓𑁆𑀓𑀫𑀁 𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀓𑀼𑀲𑀮𑀥𑀫𑁆𑀫𑀸𑀳𑀺 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀲𑀼𑀯𑀡𑁆𑀡𑀧𑁆𑀧𑀝𑀺𑀭𑀽𑀧𑀓𑀸𑀯𑀺𑀬 𑀨𑁂𑀕𑁆𑀕𑀼𑀪𑀽𑀢𑀸 𑀅𑀪𑀸𑀯𑀦𑀸𑀭𑀳𑀸 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀻𑀬𑀫𑀸𑀦𑀸𑀧𑀺 𑀘𑀜𑁆𑀘𑀮𑀦𑁆𑀢𑀺𑀬𑁂𑀯 𑀯𑀺𑀓𑁆𑀓𑀺𑀭𑀦𑁆𑀢𑀺𑀬𑁂𑀯. 𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀸𑀧𑀺 𑀏𑀓𑀲𑁆𑀫𑀺𑀁𑀪𑀯𑁂 𑀏𑀯 𑀅𑀧𑀸𑀬𑀪𑀸𑀕𑀺𑀢𑀸𑀬 𑀑𑀓𑁆𑀓𑀫𑀦𑁆𑀢𑀺. 𑀦𑀧𑀦 𑀓𑀼𑀲𑀮𑀫𑀽𑀮𑀸𑀦𑀺 𑀲𑀩𑁆𑀩𑀲𑁄 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑁂 𑀯𑀝𑁆𑀝𑀲𑁄𑀢𑀦𑀺𑀬𑀢𑁂 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀓𑀼𑀲𑀮𑀥𑀫𑁆𑀫𑀸𑀧𑀦 𑀩𑀮𑀯𑀦𑁆𑀢𑀸 𑀳𑁄𑀦𑁆𑀢𑀺. 𑀚𑀸𑀢𑀺𑀲𑀼𑀯𑀡𑁆𑀡𑀸𑀯𑀺𑀬 𑀲𑀸𑀭𑀪𑀽𑀢𑀸 𑀪𑀸𑀯𑀦𑀸𑀭𑀳𑀸 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀻𑀬𑀫𑀸𑀦𑀸 𑀣𑀺𑀭𑀢𑀭𑀧𑀢𑁆𑀢𑀸 𑀮𑁄𑀓𑀺𑀬𑁂𑀲𑀼 𑀬𑀸𑀯 𑀇𑀤𑁆𑀥𑀺𑀯𑀺𑀥𑀸𑀦𑀸 𑀮𑁄𑀓𑀼𑀢𑁆𑀢𑀭𑁂𑀲𑀼𑀘 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀯𑀼𑀤𑁆𑀥𑀺𑀯𑀺𑀭𑀼𑀴𑁆𑀳𑀻𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀸 𑀅𑀧𑀸𑀬𑀲𑁄𑀢𑀁𑀯𑀸 𑀯𑀝𑁆𑀝𑀲𑁄 𑀢𑀁𑀯𑀸 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀪𑀸𑀕𑀺𑀢𑀸𑀬 𑀑𑀓𑁆𑀓𑀫𑀦𑁆𑀢𑀺. 𑀢𑀲𑁆𑀫𑀸 𑀓𑀼𑀲𑀮 𑀥𑀫𑁆𑀫𑀸𑀏𑀯 𑀧𑀳𑀸𑀬𑀓𑀸𑀦𑀸𑀫. 𑀇𑀢𑀭𑁂𑀧𑀦 𑀧𑀳𑀸𑀢𑀩𑁆𑀩𑀸𑀏𑀯 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑀓𑀼𑀲𑀮𑀥𑀫𑁆𑀫𑀸𑀦𑀸𑀫 𑀅𑀦𑁆𑀢𑀫𑀲𑁄 𑀆𑀮𑁄𑀧𑀪𑀺𑀓𑁆𑀔𑀸 𑀤𑀸𑀦𑀫𑀢𑁆𑀢𑀸𑀧𑀺 𑀮𑁄𑀓𑁂𑀪𑁂𑀲𑀚𑁆𑀚𑀯𑀺𑀥𑀸𑀦𑀸𑀦𑀺𑀯𑀺𑀬𑀅𑀓𑀼𑀲𑀮𑀧𑁆𑀧𑀳𑀸𑀦𑀸𑀬 𑀏𑀯 𑀧𑀡𑁆𑀟𑀺𑀢𑁂𑀳𑀺𑀧𑀜𑁆𑀜𑀧𑀻𑀬𑀦𑁆𑀢𑀺 𑀓𑀭𑀻𑀬𑀦𑁆𑀢𑀺 𑀘, 𑀢𑀲𑁆𑀫𑀸 𑀢𑁂𑀏𑀯 𑀧𑀳𑀸𑀬𑀓𑀸. 𑀅𑀓𑀼𑀲𑀮𑀥𑀫𑁆𑀫𑀸𑀧𑀦 𑀮𑁄𑀓𑁂 𑀦𑀸𑀦𑀸𑀭𑁄𑀕𑀚𑀸𑀢𑀺𑀬𑁄𑀯𑀺𑀬 𑀲𑀓𑀮𑀮𑁄𑀓𑀲𑁆𑀲 𑀧𑀓𑀢𑀺𑀲𑀪𑀸𑀯𑀪𑀽𑀢𑀸𑀏𑀯 𑀳𑁄𑀦𑁆𑀢𑀻𑀢𑀺 𑀢𑁂 𑀧𑀳𑀸𑀢𑀩𑁆𑀩𑀸𑀏𑀯𑀸𑀢𑀺. 𑀲𑀫𑀦𑁆𑀢𑀢𑁄 𑀅𑀦𑀯𑀲𑁂𑀲𑀢𑁄 𑀆𑀤𑀺𑀬𑀺𑀁𑀲𑀼 𑀕𑀡𑁆𑀳𑀺𑀬𑀺𑀁𑀲𑀽𑀢𑀺 𑀲𑀫𑀢𑁆𑀢𑀸𑀦𑀺. 𑀅𑀧𑀺𑀘 𑀲𑀫𑀢𑁆𑀢𑀸𑀦𑀻𑀢𑀺 𑀦𑀺𑀝𑁆𑀞𑀺𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺𑀯𑀸. 𑀅𑀝𑁆𑀞𑀥𑀸𑀢𑀺𑀆𑀤𑀺𑀲𑀗𑁆𑀕𑀳𑀕𑀸𑀣𑀸. 𑀮𑁄𑀪𑁄𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀲𑀫𑀸𑀲𑁄. 𑀤𑁆𑀯𑀸𑀤𑀲𑀸 𑀓𑀼𑀲𑀮𑀸 𑀲𑀺𑀬𑀼𑀦𑁆𑀢𑀺 𑀏𑀢𑁆𑀣 𑀲𑀺𑀬𑀼𑀦𑁆𑀢𑀺 𑀦𑀺𑀧𑀸𑀢𑀧𑀤𑀁 𑀇𑀥 𑀤𑀝𑁆𑀞𑀩𑁆𑀩𑀁. 𑀅𑀓𑀼𑀲𑀮 𑀘𑀺𑀢𑁆𑀢𑀸𑀦𑀺 𑀤𑁆𑀯𑀸𑀤𑀲 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲

𑀧𑀭𑀫𑀢𑁆𑀣𑀤𑀺𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁩𑁧. 𑀏𑀯𑀁 𑀲𑀩𑁆𑀩𑀦𑀺𑀳𑀻𑀦𑀁 𑀅𑀓𑀼𑀲𑀮𑀁 𑀲𑀗𑁆𑀕𑀳𑁂𑀢𑁆𑀯𑀸 𑀇𑀤𑀸𑀦𑀺 𑀅𑀳𑁂𑀢𑀼𑀓𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀢𑀢𑁆𑀣𑀘 𑀲𑀩𑁆𑀩𑀦𑀺𑀳𑀻𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺𑀆𑀤𑀺𑀫𑀸𑀳.

[𑁩𑁫] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑀁 𑀅𑀓𑀼𑀲𑀮 𑀯𑀺𑀧𑀸𑀓𑀢𑁆𑀢𑀸𑀬𑁂𑀯 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀧𑀣𑀫𑀁 𑀤𑀲𑁆𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀅𑀓𑀼𑀲𑀮𑀯𑀺𑀧𑀸𑀓𑀸 𑀤𑀺𑀯𑀲𑁂𑀦 𑀢𑀺𑀯𑀺𑀥𑀪𑀸𑀯𑁂𑀧𑀺 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀅𑀓𑀼𑀲𑀮𑀯𑀺𑀧𑀸𑀓𑁂𑀬𑁂𑀯 𑀯𑀺𑀪𑀚𑀺𑀢𑀼’’𑀦𑁆𑀢𑀺. 𑀢𑀁 𑀦 𑀲𑀼𑀦𑁆𑀤𑀭𑀁.

𑀏𑀯𑀜𑁆𑀳𑀺 𑀲𑀢𑀺 𑀓𑀼𑀲𑀮𑀯𑀺𑀧𑀸𑀓𑀸𑀦𑀺𑀧𑀺 𑀓𑀼𑀲𑀮𑀸 𑀦𑀦𑁆𑀢𑀭𑁂𑀏𑀯 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀦𑁆𑀢𑀺.

𑁩𑁧. 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀧𑀤𑀢𑁆𑀣𑁄 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁. 𑀬𑀣𑀸𑀳-𑀯𑀺𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀘𑀓𑁆𑀔𑀼𑀁 𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀦𑀸𑀯𑀸 𑀧𑀘𑁆𑀘𑀬𑀪𑀽𑀢𑁂𑀦 𑀚𑀦𑀺𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀓𑀫𑁆𑀫𑁂𑀦𑀯𑀸 𑀘𑀓𑁆𑀔𑀼𑀲𑁆𑀲 𑀉𑀧𑀦𑀻𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀢𑁄𑀯𑀸 𑀚𑀸𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀲𑁆𑀲𑀯𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑁂𑀦 𑀲𑀸𑀫𑀺 𑀪𑀽𑀢𑀲𑁆𑀲 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀲𑁆𑀫𑀺𑀁𑀯𑀸 𑀉𑀧𑁆𑀧𑀦𑁆𑀦𑀁𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀏𑀲𑀦𑀬𑁄 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺. 𑀧𑀸𑀴𑀺𑀬𑀁𑀧𑀦 𑀫𑀳𑀸 𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑁂 𑁋

𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀓𑀝𑁆𑀞𑀕𑁆𑀕𑀻𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑀓𑀮𑀺𑀓𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀲𑀓𑀮𑀺 𑀓𑀕𑁆𑀕𑀻𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀺𑀡𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀢𑀺𑀡𑀕𑁆𑀕𑀻 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀕𑁄𑀫𑀬𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀕𑁄𑀫𑀬𑀕𑁆𑀕𑀻𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀣𑀼𑀲𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀣𑀼𑀲𑀕𑁆𑀕𑀻𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑀗𑁆𑀓𑀸𑀭𑀜𑁆𑀘 𑀧𑀝𑀺𑀘𑁆𑀘 𑀅𑀕𑁆𑀕𑀺 𑀚𑀮𑀢𑀺. 𑀲𑀗𑁆𑀓𑀸𑀭𑀕𑁆𑀕𑀻𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀔𑁄 𑀪𑀺𑀓𑁆𑀔𑀯𑁂 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀖𑀸𑀦𑀜𑁆𑀘 𑀧𑀝𑀺𑀘𑁆𑀘 𑀕𑀦𑁆𑀥𑁂𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀖𑀸𑀦𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀸𑀬𑀜𑁆𑀘 𑀧𑀝𑀺𑀘𑁆𑀘 𑀨𑁄𑀝𑁆𑀞𑀩𑁆𑀩𑁂𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀓𑀸𑀬𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂𑀘 𑀉𑀧𑁆𑀧𑀚𑁆𑀚𑀢𑀺 𑀯𑀺𑀜𑁆𑀜𑀸𑀡𑀁. 𑀫𑀦𑁄 𑀯𑀺𑀜𑁆𑀜𑀸𑀡𑀦𑁆𑀢𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁.

𑀢𑀣𑀸𑀢𑀺 𑀇𑀫𑀺𑀦𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀧𑀤𑀁 𑀆𑀓𑀟𑁆𑀠𑀢𑀺. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀢𑀁 𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀁𑀯𑀸 𑀩𑀸𑀥𑀢𑀺 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼𑀯𑀸 𑀔𑀦𑀢𑀺 𑀓𑀸𑀬𑀺𑀓𑀲𑀼𑀔𑀦𑁆𑀢𑀺 𑀤𑀼𑀓𑁆𑀔𑀁. 𑀤𑀼𑀓𑁆𑀓𑀭𑁂𑀦𑀯𑀸 𑀔𑀫𑀺𑀢𑀩𑁆𑀩𑀦𑁆𑀢𑀺 𑀤𑀼𑀓𑁆𑀔𑀁. 𑀤𑀼𑀓𑁆𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺𑀯𑀸 𑀤𑀼𑀓𑁆𑀔𑀁. 𑀓𑀸𑀬𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀬𑁂𑀯 𑀦𑀸𑀫𑀁. 𑀲𑀼𑀝𑁆𑀞𑀼 𑀧𑀝𑀺𑀫𑀼𑀔𑀜𑁆𑀘 𑀇𑀘𑁆𑀙𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀁. 𑀲𑀼𑀝𑁆𑀞𑀽𑀢𑀺 𑀅𑀫𑀼𑀜𑁆𑀘𑀫𑀸𑀦𑀁. 𑀧𑀝𑀺𑀫𑀼𑀔𑀦𑁆𑀢𑀺 𑀅𑀦𑀜𑁆𑀜𑀸𑀧𑁂𑀓𑁆𑀔𑀁. 𑀇𑀘𑁆𑀙𑀢𑀻𑀢𑀺 𑀓𑀸𑀫𑁂𑀢𑀺 𑀅𑀪𑀺𑀦𑀦𑁆𑀤𑀢𑀺 𑀧𑀝𑀺𑀕𑁆𑀕𑀡𑁆𑀳𑀢𑀺. 𑀢𑁂𑀦𑁂𑀯𑀳𑀺 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 𑀏𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀺𑀁 𑀲𑀽𑀢𑀺 𑀯𑀡𑁆𑀡𑀬𑀺𑀁𑀲𑀼. 𑀲𑀼𑀝𑁆𑀞𑀼 𑀢𑀻𑀭𑁂𑀢𑀺 𑀢𑀼𑀮𑁂𑀢𑀺 𑀯𑀺𑀘𑀸𑀭𑁂𑀢𑀻𑀢𑀺 𑀲𑀦𑁆𑀢𑀻𑀭𑀡𑀁. 𑀝𑀻𑀓𑀸𑀬𑀁 𑀢𑀻𑀭𑁂𑀢𑀺 𑀦𑀺𑀝𑁆𑀞𑀸𑀧𑁂𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀪𑀸𑀯𑀦𑀺𑀬𑀁 𑀢𑀻𑀭𑁂𑀢𑀺 𑀯𑀻𑀫𑀁𑀲𑀢𑀻𑀢𑀺 𑀯𑀼𑀢𑁆𑀢𑀁.

𑁩𑁨. 𑀏𑀢𑁆𑀣𑀘 𑀘𑀓𑁆𑀔𑀼𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀢𑀸, 𑀆𑀮𑁄𑀓 𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄, 𑀭𑀽𑀧𑀸𑀦𑀁 𑀆𑀧𑀸𑀢𑀸𑀕𑀫𑀦𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀲𑁄𑀢𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀢𑀸 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄, 𑀲𑀤𑁆𑀤𑀸𑀦𑀁 𑀆𑀧𑀸𑀢𑀸𑀕𑀫𑀦𑀁 𑀫𑀦𑀲𑀺𑀓𑀸𑀭𑁄𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲. 𑀖𑀸𑀦𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀢𑀸, 𑀯𑀸𑀲𑀼𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄, 𑀕𑀦𑁆𑀥𑀸𑀦𑀁 𑀆𑀧𑀸𑀢𑀸𑀕𑀫𑀦𑀁 𑀫𑀦𑀲𑀺𑀓𑀸𑀭𑁄𑀢𑀺 𑀖𑀸𑀦𑀯𑀺𑀜𑁆𑀜𑀸𑀡𑀲𑁆𑀲. 𑀚𑀺𑀯𑁆𑀳𑀸𑀬 𑀅𑀲𑀫𑁆𑀪𑀺𑀦𑁆𑀦𑀢𑀸 𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄. 𑀭𑀲𑀸𑀦𑀁 𑀆𑀧𑀸𑀢𑀸𑀕𑀫𑀦𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀲𑁆𑀲. 𑀓𑀸𑀬𑀲𑁆𑀲 𑀅𑀲𑀫𑁆𑀪𑀺𑀦𑁆𑀦𑀢𑀸, 𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀬𑀧𑁆𑀧𑀝𑀺𑀮𑀸𑀪𑁄, 𑀢𑀺𑀡𑁆𑀡𑀁 𑀨𑁄𑀝𑁆𑀞𑀩𑁆𑀩𑀸𑀦𑀁 𑀅𑀜𑁆𑀜𑀢𑀭𑀲𑁆𑀲 𑀆𑀧𑀸𑀢𑀸𑀕𑀫𑀦𑀁, 𑀫𑀦𑀲𑀺𑀓𑀸𑀭𑁄𑀢𑀺 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺. 𑀏𑀢𑁆𑀣𑀘 𑀆𑀮𑁄𑀓 𑀆𑀓𑀸𑀲𑀸𑀤𑀻𑀦𑀁 𑀲𑀦𑁆𑀦𑀺𑀲𑁆𑀲𑀬𑀸𑀦𑀁 𑀕𑀳𑀡𑀁 𑀢𑁂𑀳𑀺 𑀯𑀺𑀦𑀸 𑀭𑀽𑀧𑀸𑀤𑀻𑀦𑀁 𑀧𑀲𑀸𑀤𑁂𑀲𑀼 𑀆𑀧𑀸𑀢𑀸𑀕𑀫𑀦𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀳𑀺 𑀆𑀮𑁄𑀓𑁂 𑀲𑀢𑀺 𑀭𑀽𑀧𑀸𑀦𑀺 𑀲𑀦𑁆𑀦𑀺𑀳𑀺𑀢𑀸𑀦𑀺𑀧𑀺 𑀘𑀓𑁆𑀔𑀼𑀫𑁆𑀳𑀺 𑀆𑀧𑀸𑀢𑀫𑀸𑀕𑀘𑁆𑀙𑀦𑁆𑀢𑀺. 𑀏𑀲𑀦𑀬𑁄 𑀲𑁂𑀲𑁂𑀲𑀼𑀧𑀻𑀢𑀺. 𑀬𑀁𑀧𑀦 𑀅𑀝𑁆𑀞𑀓𑀣𑀸𑀬𑀁 -

𑀘𑀓𑁆𑀔𑀼𑀲𑁆𑀫𑀺𑀁𑀧𑀦 𑀅𑀲𑀫𑁆𑀪𑀺𑀦𑁆𑀦𑁂𑀧𑀺 𑀩𑀳𑀺𑀤𑁆𑀥𑀸𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀢𑀁 𑀅𑀦𑀸 𑀕𑀘𑁆𑀙𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀧𑀦 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑁂𑀧𑀺 𑀆𑀮𑁄𑀓𑀲𑀦𑁆𑀦𑀺𑀲𑁆𑀲𑀬𑁂 𑀅𑀲𑀢𑀺 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁.

𑀢𑀁 𑀯𑀺𑀦𑀸 𑀆𑀮𑁄𑀓𑁂𑀦 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀤𑀲𑁆𑀲𑀦𑀧𑀭𑀁. 𑀦𑀧𑀦 𑀆𑀧𑀸𑀓𑀸𑀕𑀫𑀦𑀁𑀦𑀸𑀫 𑀆𑀮𑁄𑀓𑁂 𑀅𑀲𑀢𑀺𑀧𑀺 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑀦𑀧𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀣𑀸 𑀭𑀢𑁆𑀢𑀦𑁆𑀥𑀓𑀸𑀭𑁂𑀧𑀺 𑀭𑀽𑀧𑀸𑀦𑀺 𑀘𑀓𑁆𑀔𑀼𑀫𑁆𑀳𑀺 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸𑀦𑀺 𑀅𑀓𑀼𑀲𑀮 𑀯𑀺𑀧𑀸𑀓𑀸𑀦𑀺.

𑁩𑁩. 𑀏𑀢𑁆𑀣𑀸 𑀓𑁂𑀦𑀝𑁆𑀞𑁂𑀦 𑀯𑀺𑀧𑀸𑀓𑀁𑀦𑀸𑀫𑀸𑀢𑀺. 𑀯𑀺𑀧𑀘𑁆𑀘𑀦𑀝𑁆𑀞𑁂𑀦. 𑀓𑀺𑀜𑁆𑀘 𑀯𑀺𑀧𑀘𑁆𑀘𑀦𑀦𑁆𑀢𑀺. 𑀬𑀣𑀸 𑀮𑁄𑀓𑁂 𑀅𑀫𑁆𑀩𑀨𑀮𑀸𑀤𑀻𑀦𑀁 𑀢𑀭𑀼𑀡𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀺𑀡𑀢𑀪𑀸𑀯𑀧𑁆𑀧𑀢𑁆𑀢𑀺𑀯𑀺𑀧𑀘𑁆𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯𑀁 𑀇𑀥𑀧𑀺 𑀯𑀺𑀧𑀘𑁆𑀘𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀘𑀢𑀽𑀳𑀺 𑀲𑀫𑀗𑁆𑀕𑀻𑀢𑀸𑀳𑀺 𑀤𑀻𑀧𑁂𑀢𑀩𑁆𑀩𑁄. 𑀘𑀢𑀲𑁆𑀲𑁄𑀳𑀺 𑀲𑀫𑀗𑁆𑀕𑀻𑀢𑀸𑀦𑀸𑀫 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸, 𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸, 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸𑀢𑀺. 𑀢𑀢𑁆𑀣 𑀧𑀼𑀩𑁆𑀩𑁂 𑀢𑀁 𑀢𑀁 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁂𑀬𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀸. 𑀅𑀬𑀁 𑀘𑁂𑀢𑀦𑀸𑀲𑀫𑀗𑁆𑀕𑀻𑀢𑀸𑀦𑀸𑀫. 𑀲𑀸𑀧𑀦 𑀘𑁂𑀢𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀲𑀩𑁆𑀩𑀲𑁄 𑀅𑀪𑀸𑀯𑀁 𑀧𑀢𑁆𑀯𑀸 𑀦𑀦𑀺𑀭𑀼𑀚𑁆𑀛𑀢𑀺. 𑀆𑀬𑀢𑀺𑀁𑀧𑀦 𑀯𑀺𑀧𑀸𑀓𑀧𑀸𑀢𑀼𑀪𑀸𑀯𑀸𑀬 𑀅𑀢𑁆𑀢𑀦𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀓𑁆𑀭𑀺𑀬𑀸𑀯𑀺𑀲𑁂𑀲𑀁 𑀢𑀲𑁆𑀫𑀺𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀦𑀺𑀤𑀳𑀺𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀘 𑀓𑁆𑀭𑀺𑀬𑀸𑀯𑀺𑀲𑁂𑀲𑁄 𑀬𑀸𑀯 𑀑𑀓𑀸𑀲𑀁 𑀦𑀮𑀪𑀢𑀺. 𑀢𑀸𑀯 𑀓𑀧𑁆𑀧𑀲𑀁𑀢𑀲𑀳𑀲𑁆𑀲𑀁𑀧𑀺 𑀢𑀁𑀲𑀦𑁆𑀢𑀸𑀦𑀁 𑀅𑀦𑀼𑀕𑀢𑁄𑀬𑁂𑀯 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀥𑀫𑁆𑀫𑀧𑀤𑁂 𑁋

𑀦 𑀳𑀺 𑀧𑀸𑀧𑀁 𑀓𑀢𑀁 𑀓𑀫𑁆𑀫𑀁, 𑀲𑀚𑁆𑀚𑀼𑀔𑀻𑀭𑀁𑀯 𑀫𑀼𑀘𑁆𑀘𑀢𑀺;

𑀤𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀸 𑀙𑀦𑁆𑀦𑁄𑀯 𑀧𑀸𑀯𑀓𑁄𑀢𑀺 𑀯𑀼𑀢𑁆𑀢𑀁.

𑀲𑁄𑀧𑀦 𑀯𑀺𑀲𑀼𑀁 𑀏𑀓𑁄 𑀧𑀭𑀫𑀢𑁆𑀣𑀥𑀫𑁆𑀫𑁄𑀢𑀺𑀧𑀺 𑀲𑀗𑁆𑀔𑁆𑀬𑀁 𑀦𑀕𑀘𑁆𑀙𑀢𑀺, 𑀅𑀦𑀼𑀲𑀬𑀥𑀸𑀢𑀼𑀬𑁄𑀯𑀺𑀬𑀸𑀢𑀺. 𑀅𑀬𑀁 𑀓𑀫𑁆𑀫𑀲𑀫𑀗𑁆𑀕𑀺𑀢𑀸𑀦𑀸𑀫. 𑀲𑁄𑀧𑀦 𑀬𑀤𑀸 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂 𑀧𑀘𑁆𑀘𑀬𑁂 𑀮𑀪𑀢𑀺. 𑀢𑀤𑀸 𑀯𑀺𑀧𑀘𑁆𑀘𑀦𑀢𑁆𑀣𑀸𑀬 𑀑𑀓𑀸𑀲𑀁 𑀓𑀭𑁄𑀢𑀺. 𑀓𑀣𑀁 𑀓𑀭𑁄𑀢𑀻𑀢𑀺. 𑀲𑁄 𑀆𑀲𑀦𑁆𑀦𑀫𑀭𑀡𑀲𑁆𑀲 𑀲𑀢𑁆𑀢𑀲𑁆𑀲 𑀅𑀢𑁆𑀢𑀸𑀦𑀁𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺. 𑀅𑀢𑁆𑀢𑀦𑁄 𑀦𑀺𑀫𑀺𑀢𑁆𑀢𑀁𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺. 𑀕𑀢𑀺𑀦𑀺𑀫𑀺𑀢𑁆𑀢𑀁𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑀺. 𑀲𑁄𑀘 𑀲𑀢𑁆𑀢𑁄 𑀢𑀁 𑀅𑀫𑀼𑀜𑁆𑀘𑀫𑀸𑀦𑁄 𑀬𑀤𑀺 𑀕𑀡𑁆𑀳𑀸𑀢𑀺. 𑀢𑀤𑀸 𑀑𑀓𑀸𑀲𑀁 𑀮𑀪𑀢𑀺. 𑀅𑀬𑀁 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸𑀦𑀸𑀫. 𑀢𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀘𑀼𑀢𑀲𑁆𑀲𑀧𑀦 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀲𑁄 𑀓𑀫𑁆𑀫𑀲𑀗𑁆𑀔𑀸𑀢𑁄 𑀓𑁆𑀭𑀺𑀬𑀸 𑀯𑀺𑀲𑁂𑀲𑁄 𑀯𑀺𑀲𑀼𑀁 𑀏𑀓𑁄 𑀲𑀲𑀫𑁆𑀧𑀬𑀼𑀢𑁆𑀢𑁄 𑀧𑀭𑀫𑀢𑁆𑀣𑀥𑀫𑁆𑀫𑀭𑀸𑀲𑀺 𑀳𑀼𑀢𑁆𑀯𑀸 𑀏𑀓𑀁 𑀪𑀯𑀁 𑀧𑀽𑀭𑀬𑀫𑀸𑀦𑁄 𑀯𑀺𑀧𑀘𑁆𑀘𑀢𑀺, 𑀏𑀓𑀁 𑀪𑀯𑀁 𑀧𑀽𑀭𑀬𑀫𑀸𑀦𑁄𑀢𑀺𑀘 𑀬𑀸𑀯 𑀢𑀸𑀬𑀼𑀓𑀁 𑀪𑀯𑀗𑁆𑀕𑀓𑀺𑀘𑁆𑀘𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀢𑀁 𑀢𑀁 𑀤𑁆𑀯𑀸𑀭𑀺𑀓𑀯𑀺𑀧𑀸𑀓𑀓𑀺𑀘𑁆𑀘𑀸𑀦𑀺 𑀧𑀭𑀺𑀬𑁄𑀲𑀸𑀦𑁂 𑀘𑀼𑀢𑀺𑀓𑀺𑀘𑁆𑀘𑀜𑁆𑀘 𑀲𑀸𑀥𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀲𑀫𑀗𑁆𑀕𑀻𑀢𑀸 𑀢𑀭𑀼𑀡𑀸 𑀯𑀢𑁆𑀣𑀸𑀦𑀸𑀫 𑀳𑁄𑀦𑁆𑀢𑀺. 𑀧𑀘𑁆𑀙𑀺𑀫𑀸 𑀯𑀺𑀧𑀸𑀓𑀲𑀫𑀗𑁆𑀕𑀻𑀢𑀸 𑀧𑀭𑀺𑀡𑀢𑀸𑀯𑀢𑁆𑀣𑀸𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀯𑀺𑀧𑀘𑁆𑀘𑀦𑁆𑀢𑀻𑀢𑀺 𑀯𑀺𑀧𑀸𑀓𑀸𑀦𑀺 𑀫𑀼𑀤𑀼𑀢𑀭𑀼𑀡𑀸𑀯𑀢𑁆𑀣𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀡𑀓𑀸𑀯𑀢𑁆𑀣𑀲𑀗𑁆𑀔𑀸𑀢𑀁 𑀯𑀺𑀧𑀓𑁆𑀓𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀁𑀧𑀺 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀯𑀺𑀧𑀸𑀓𑀧𑀤𑁂 𑀅𑀕𑁆𑀕𑀳𑀡𑀁 𑀳𑁄𑀢𑀻𑀢𑀺. 𑀢𑀸𑀦𑀺𑀳𑀺 𑀓𑀫𑁆𑀫𑀲𑀦𑁆𑀢𑀸𑀦𑀢𑁄 𑀯𑀺𑀲𑀼𑀁 𑀲𑀺𑀤𑁆𑀥𑀢𑁆𑀢𑀸 𑀯𑀺𑀲𑀼𑀁 𑀓𑀫𑁆𑀫𑀢𑁄 𑀚𑀸𑀢𑀸𑀦𑀺𑀬𑁂𑀯 𑀦𑀸𑀫 𑀳𑁄𑀦𑁆𑀢𑀺, 𑀦𑀯𑀺𑀧𑀓𑁆𑀓𑀸𑀦𑀺 𑀦𑀸𑀫𑀸𑀢𑀺. 𑀅𑀜𑁆𑀜𑀁𑀳𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀦𑁆𑀢𑀸𑀦𑀁. 𑀅𑀜𑁆𑀜𑀁 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀧𑀸𑀓𑀧𑀤𑁂 𑀧𑀭𑀫𑀢𑁆𑀣𑀤𑀻𑀧𑀦𑀸.

𑀬𑁂𑀧𑀦 𑀅𑀭𑀽𑀧𑀪𑀸𑀯𑁂𑀦 𑀲𑀸𑀭𑀫𑁆𑀫𑀡𑀪𑀸𑀯𑁂𑀦𑀘 𑀓𑀫𑁆𑀫𑁂𑀦 𑀲𑀤𑀺𑀲 𑀢𑀸𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀯 𑀯𑀺𑀧𑀸𑀓𑀢𑁆𑀢𑀁 𑀲𑀸𑀥𑁂𑀦𑁆𑀢𑀺. 𑀢𑁂𑀲𑀁 𑀯𑀺𑀧𑀸𑀓𑀲𑀤𑁆𑀤𑁄 𑀅𑀭𑀽𑀧𑀥𑀫𑁆𑀫𑁂𑀲𑀼 𑀭𑀼𑀴𑁆𑀳𑀻𑀯𑀲𑁂𑀦 𑀧𑀯𑀢𑁆𑀢𑁄𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀬𑀜𑁆𑀘 𑀢𑀢𑁆𑀣 𑀲𑀸𑀮𑀺𑀩𑀻𑀚𑀦𑀺𑀩𑁆𑀩𑀢𑁆𑀢𑁂𑀲𑀼 𑀦𑀸𑀴𑀧𑀢𑁆𑀢𑀧𑀼𑀧𑁆𑀨𑀨𑀮𑁂𑀲𑀼 𑀩𑀻𑀚𑀲𑀤𑀺𑀲𑀸𑀦𑀁 𑀨𑀮𑀸𑀦𑀫𑁂𑀯 𑀲𑀸𑀮𑀺𑀨𑀮𑀲𑀸𑀮𑀺𑀧𑀓𑁆𑀓𑀦𑀸𑀫𑀁 𑀲𑀺𑀤𑁆𑀥𑀁 𑀯𑀺𑀬𑀸𑀢𑀺 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑀺, 𑀲𑀸𑀧𑀺 𑀦𑀲𑀫𑁂𑀢𑀺. 𑀦 𑀳𑀺 𑀨𑀮𑀸𑀦𑀺𑀧𑀺 𑀢𑀭𑀼𑀡𑀓𑀸𑀮𑁂 𑀧𑀸𑀓𑀦𑀸𑀫𑀁 𑀮𑀪𑀦𑁆𑀢𑀺. 𑀦𑀘 𑀦𑀸𑀴𑀧𑀢𑁆𑀢𑀧𑀼𑀧𑁆𑀨𑀸𑀦𑀺𑀧𑀺 𑀧𑀭𑀺𑀡𑀢𑀓𑀸𑀮𑁂 𑀧𑀸𑀓𑀦𑀸𑀫𑀁 𑀦𑀮𑀪𑀦𑁆𑀢𑀻𑀢𑀺. 𑀢𑀸𑀦𑀺 𑀧𑀺𑀳𑀺 𑀢𑀤𑀸 𑀦𑀸𑀴𑀁 𑀧𑀓𑁆𑀓𑀁, 𑀧𑀢𑁆𑀢𑀁 𑀧𑀓𑁆𑀓𑀁, 𑀧𑀼𑀧𑁆𑀨𑀁 𑀧𑀓𑁆𑀓𑀦𑁆𑀢𑀺 𑀦 𑀦𑀯𑀼𑀘𑁆𑀘𑀦𑁆𑀢𑀻𑀢𑀺. 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁𑀯𑀸 𑀮𑀤𑁆𑀥𑀲𑀸𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁪. 𑀲𑀼𑀝𑁆𑀞𑀼𑀯𑀸 𑀔𑀦𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀁. 𑀲𑀼𑀔𑁂𑀦𑀘 𑀔𑀫𑀺𑀢𑀩𑁆𑀩𑀁. 𑀲𑀼𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀲𑁆𑀲𑀸𑀢𑀺𑀯𑀸 𑀲𑀼𑀔𑀁. 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀸𑀦𑀺 𑀲𑀫𑁆𑀧𑀬𑀼𑀢𑁆𑀢 𑀳𑁂𑀢𑀼𑀯𑀺𑀭𑀳𑀢𑁄 𑀅𑀳𑁂𑀢𑀼𑀓𑀸𑀦𑀺𑀘𑀸𑀢𑀺 𑀓𑀼𑀲𑀮𑀯𑀺𑀧𑀸𑀓𑀸 𑀳𑁂𑀢𑀼𑀓 𑀘𑀺𑀢𑁆𑀢𑀸𑀦𑀺.

[𑁩𑁬] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀼𑀩𑁆𑀩𑀓𑀫𑁆𑀫𑀲𑀳𑀚𑀸𑀢𑁂𑀦 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀦𑀸𑀧𑀺 𑀇𑀥 𑀯𑀺𑀧𑀸𑀓𑀲𑁆𑀲 𑀲𑀳𑁂𑀢𑀼𑀓𑀢𑀸𑀧𑀲𑀗𑁆𑀕𑁄𑀓𑀢𑁄. 𑀲𑁄 𑀦 𑀲𑀼𑀦𑁆𑀤𑀭𑁄.

𑀦 𑀳𑀺 𑀅𑀪𑀺𑀥𑀫𑁆𑀫𑁂 𑀓𑀢𑁆𑀣𑀘𑀺 𑀧𑀼𑀩𑁆𑀩𑀓𑀫𑁆𑀫𑀲𑀳𑀚𑀸𑀢𑁂𑀦 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀦𑀸 𑀯𑀺𑀧𑀸𑀓𑀲𑁆𑀲 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀢𑀸 𑀲𑀫𑁆𑀪𑀯𑁄𑀦𑀸𑀫 𑀅𑀢𑁆𑀣𑀺. 𑀅𑀲𑀢𑀺𑀘 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑀲𑁆𑀲𑀧𑀺 𑀅𑀪𑀸𑀯𑀢𑁄 𑀲𑁄 𑀧𑀲𑀗𑁆𑀕𑁄 𑀦𑀺𑀭𑀢𑁆𑀣𑀓𑁄𑀯𑀸𑀢𑀺. 𑀢𑀢𑁆𑀣 𑀩𑁆𑀬𑀪𑀺𑀘𑀸𑀭𑀲𑁆𑀲𑀸𑀢𑀺 𑀧𑀲𑀗𑁆𑀕𑀲𑁆𑀲 𑀇𑀘𑁆𑀘𑁂𑀯𑀢𑁆𑀣𑁄. 𑀏𑀢𑁆𑀣𑀘 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀲𑀬𑀁 𑀅𑀩𑁆𑀬𑀸𑀓𑀢𑀥𑀫𑁆𑀫𑀢𑁆𑀢𑀸 𑀮𑁄𑀪𑀸𑀤𑀻𑀳𑀺 𑀅𑀓𑀼𑀲𑀮𑀳𑁂𑀢𑀽𑀳𑀺𑀘 𑀲𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀢𑁆𑀢𑀸 𑀅𑀮𑁄𑀪𑀸𑀤𑀻𑀳𑀺 𑀅𑀦𑀯𑀚𑁆𑀚𑀳𑁂𑀢𑀽𑀳𑀺𑀘 𑀲𑀳𑁂𑀢𑀼𑀓𑀢𑀸 𑀲𑀫𑁆𑀪𑀯𑁄 𑀦𑀢𑁆𑀣𑀺. 𑀅𑀲𑀢𑀺 𑀘 𑀢𑀁 𑀲𑀫𑁆𑀪𑀯𑁂 𑀢𑁂𑀲𑀁 𑀅𑀳𑁂𑀢𑀼𑀓𑀪𑀸𑀯𑁄 𑀅𑀩𑁆𑀬𑀪𑀺𑀘𑀸𑀭𑁄𑀬𑁂𑀯 𑀳𑁄𑀢𑀻𑀢𑀺 𑀢𑀢𑁆𑀣 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀦 𑀓𑀢𑀁. 𑀓𑀼𑀲𑀮𑀯𑀺𑀧𑀸𑀓𑀸𑀦𑀁 𑀧𑀦 𑀲𑀬𑀁 𑀓𑀼𑀲𑀮𑀯𑀺𑀧𑀸𑀓𑀢𑁆𑀢𑀸𑀬𑁂𑀯 𑀅𑀮𑁄𑀪𑀸𑀤𑀻𑀳𑀺 𑀓𑀼𑀲𑀮𑀸 𑀩𑁆𑀬𑀸𑀓𑀢𑀬𑁄𑀕𑀻𑀳𑀺 𑀅𑀦𑀯𑀚𑁆𑀚𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀢𑀸 𑀲𑀫𑁆𑀪𑀯𑁄 𑀅𑀢𑁆𑀣𑀺𑀬𑁂𑀯. 𑀲𑀢𑀺𑀘 𑀢𑀲𑁆𑀫𑀺𑀁 𑀲𑀫𑁆𑀪𑀯𑁂 𑀢𑁂𑀲𑀁 𑀅𑀳𑁂𑀢𑀼𑀓𑀪𑀸𑀯𑁄 𑀩𑁆𑀬𑀪𑀺𑀘𑀸𑀭𑀲𑀳𑀺𑀢𑁄 𑀳𑁄𑀢𑀻𑀢𑀺 𑀢𑀢𑁆𑀣𑁂𑀯 𑀅𑀳𑁂𑀢𑀼𑀓𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁫. 𑀘𑀓𑁆𑀔𑀸𑀤𑀺𑀓𑁂 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀁 𑀆𑀯𑀚𑁆𑀚𑀦𑀁 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁, 𑀢𑀜𑁆𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀖𑀝𑁆𑀝𑀺𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀪𑀯𑀗𑁆𑀕𑀲𑀗𑁆𑀔𑀸𑀢𑁂 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀁 𑀆𑀯𑀚𑁆𑀚𑀦𑀁 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁. 𑀢𑀜𑁆𑀳𑀺 𑀢𑀲𑁆𑀫𑀺𑀁 𑀆𑀧𑀸𑀢𑀁 𑀆𑀕𑀘𑁆𑀙𑀦𑁆𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑁆𑀢𑀁 𑀧𑀯𑀢𑁆𑀢𑀢𑀻𑀢𑀺. 𑀏𑀢𑁆𑀣𑀘 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀲𑀓𑀮𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

[𑁩𑁭] 𑀬𑀁𑀧𑀦 𑀝𑀻𑀓𑀸𑀬𑀁

𑀢𑀸𑀯 ‘‘𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀏𑀢𑁆𑀣 𑀆𑀯𑀚𑁆𑀚𑀦𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑀪𑀽𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀯 𑀤𑁆𑀯𑀸𑀭𑀁 𑀆𑀯𑀚𑁆𑀚𑀦𑀚𑀯𑀦𑀸𑀤𑀺 𑀣𑀺𑀘𑀺𑀢𑁆𑀢 𑀧𑀯𑀢𑁆𑀢𑀺𑀬𑀸 𑀫𑀼𑀔𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

‘‘𑀆𑀯𑀚𑁆𑀚𑀦𑀲𑁆𑀲 𑀅𑀦𑀦𑁆𑀢𑀭 𑀧𑀘𑁆𑀘𑀬𑀪𑀽𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀁, 𑀧𑀻𑀣𑀺𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀫𑀼𑀔𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁𑀧𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯.

𑀬𑀤𑀺𑀳𑀺 𑀬𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀁 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀤𑁂𑀯 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀺𑀫𑀼𑀔𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀁𑀦𑀸𑀫 𑀳𑁄𑀢𑀺. 𑀦 𑀢𑀢𑁄 𑀧𑀼𑀭𑀺𑀫𑀸𑀦𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀬𑀸. 𑀏𑀯𑀜𑁆𑀘𑀲𑀢𑀺 𑀬𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸 𑀤𑀻𑀦𑀁 𑀖𑀝𑁆𑀝𑀺𑀢𑀢𑁆𑀢𑀸 𑀆𑀯𑀚𑁆𑀚𑀦𑀸𑀤𑀻𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺. 𑀢𑀸𑀦𑁂𑀯 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀺𑀫𑀼𑀔𑀢𑁆𑀢𑀸 𑀤𑁆𑀯𑀸𑀭𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀦 𑀢𑀢𑁄 𑀅𑀜𑁆𑀜𑀸𑀦𑀻𑀢𑀺 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀺. 𑀦𑀘 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀦𑀸𑀫 𑀅𑀢𑁆𑀣𑀺. 𑀬𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀤𑁆𑀯𑀸𑀭𑀭𑀽𑀧𑀸𑀦𑀺𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺. 𑀲𑀩𑁆𑀩𑀫𑁂𑀢𑀁 𑀉𑀧𑀭𑀺 𑀤𑁆𑀯𑀸𑀭 𑀲𑀗𑁆𑀕𑀳𑁂 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺. 𑀳𑀲𑀦𑀁 𑀳𑀲𑀺𑀢𑀁. 𑀫𑀼𑀔𑀲𑁆𑀲 𑀧𑀳𑀝𑁆𑀞𑀸𑀓𑀸𑀭𑀧𑁆𑀧𑀯𑀢𑁆𑀢𑀺. 𑀢𑀁 𑀉𑀧𑁆𑀧𑀸𑀤𑁂𑀢𑀺 𑀚𑀦𑁂𑀢𑀻𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑁄. 𑀢𑀁𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀺 𑀔𑀻𑀡𑀸𑀲𑀯𑀸 𑀏𑀢𑁂𑀦𑀸𑀢𑀺 𑀳𑀲𑀺𑀪𑀼𑀧𑁆𑀧𑀸𑀤𑁄. 𑀢𑀁𑀯𑀸 𑀉𑀧𑁆𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀳𑀲𑀺𑀢𑀼𑀧𑁆𑀧𑀸𑀤𑁄. 𑀲𑁄𑀏𑀯 𑀘𑀺𑀢𑁆𑀢𑀦𑁆𑀢𑀺 𑀲𑀫𑀸𑀲𑁄. 𑀔𑀻𑀡𑀸𑀲𑀯𑀸𑀦𑀁 𑀅𑀦𑁄𑀴𑀸𑀭𑀺𑀓𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀺𑀢𑀁 𑀧𑀸𑀢𑀼𑀓𑀭𑁄𑀦𑁆𑀢𑀺, 𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀦 𑀳𑀺 𑀔𑀻𑀡𑀸𑀲𑀯𑀸 𑀮𑁄𑀓𑀺𑀬 𑀫𑀳𑀸 𑀚𑀦𑀸𑀯𑀺𑀬 𑀭𑀚𑁆𑀚𑀦𑀻𑀬𑀸𑀤𑀺 𑀪𑀸𑀯𑁂𑀦 𑀑𑀴𑀸𑀭𑀺𑀓𑁂𑀲𑀼 𑀳𑀲𑀦𑀺𑀬 𑀯𑀢𑁆𑀣𑀽𑀲𑀼 𑀳𑀲𑀦𑁆𑀢𑀻𑀢𑀺. 𑀝𑀻𑀓𑀸𑀲𑀼 𑀧𑀦 𑀘𑀺𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀳𑀲𑀺𑀢𑀼𑀧𑁆𑀧𑀸𑀤𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁 𑀲𑀺𑀬𑀸𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀅𑀳𑁂𑀢𑀼𑀓𑀸𑀦𑀺𑀘 𑀢𑀸𑀦𑀺 𑀯𑀺𑀧𑀘𑁆𑀘𑀦 𑀯𑀺𑀧𑀸𑀓𑀼𑀧𑁆𑀧𑀸𑀤𑀦 𑀓𑀺𑀘𑁆𑀘𑀭𑀳𑀺𑀢𑀢𑁆𑀢𑀸 𑀢𑀁 𑀢𑀁 𑀓𑁆𑀭𑀺𑀬𑀸𑀫𑀢𑁆𑀢𑀪𑀽𑀢𑀸𑀦𑀺 𑀘𑀺𑀢𑁆𑀢𑀸𑀦𑀺𑀘𑀸𑀢𑀺 𑀅𑀳𑁂𑀢𑀼𑀓𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺. 𑀏𑀢𑁆𑀣𑀘 𑀯𑀻𑀣𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀺 𑀓𑀺𑀘𑁆𑀘𑀤𑀼𑀩𑁆𑀩𑀮𑀢𑁆𑀢𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀯𑀢𑁆𑀣𑀼𑀤𑀼𑀩𑁆𑀩𑀮𑀢𑁆𑀢𑀸 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺𑀘 𑀓𑀺𑀘𑁆𑀘𑀝𑁆𑀞𑀸𑀦𑀤𑀼𑀩𑁆𑀩𑀮𑀢𑁆𑀢𑀸 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀯𑀺𑀧𑀘𑁆𑀘𑀦𑀫𑀢𑁆𑀢𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀯𑀺𑀧𑀸𑀓𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀬𑀸𑀦𑀺𑀧𑀦 𑀩𑀮𑀯𑀓𑀺𑀘𑁆𑀘𑀢𑁆𑀢𑀸 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀆𑀬𑀢𑀺𑀁𑀘 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀢𑁆𑀣𑀁 𑀉𑀲𑁆𑀲𑀸𑀳𑀲𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀬𑀸𑀦𑀺 𑀧𑀦 𑀘𑀺𑀢𑁆𑀢𑀸𑀦𑀺 𑀯𑀺𑀧𑀘𑁆𑀘𑀦𑀫𑀢𑁆𑀢𑀁 𑀅𑀢𑀺𑀓𑁆𑀓𑀫𑁆𑀫 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀆𑀯𑀚𑁆𑀚𑀦𑀤𑁆𑀯𑀬𑀁 𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄 𑀮𑀤𑁆𑀥𑀧𑀘𑁆𑀘𑀬𑀢𑁆𑀢𑀸 𑀣𑁄𑀓𑀁 𑀤𑀼𑀩𑁆𑀩𑀮𑀪𑀸𑀯𑀢𑁄 𑀇𑀢𑀭𑀸𑀦𑀺𑀘 𑀦𑀺𑀭𑀸𑀦𑀼𑀲𑀬𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀢𑁆𑀣𑀁 𑀉𑀲𑁆𑀲𑀸𑀳𑀭𑀳𑀺𑀢𑀸𑀦𑀺𑀏𑀯 𑀳𑁄𑀦𑁆𑀢𑀻𑀢𑀺 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀓𑁆𑀭𑀺𑀬𑀸𑀦𑀺𑀦𑀸𑀫 𑀚𑀸𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁬. 𑀇𑀤𑀸𑀦𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑁂𑀤𑀦𑀸𑀯𑀺𑀘𑀸𑀭𑀡𑀸 𑀯𑀼𑀘𑁆𑀘𑀢𑀺. 𑀢𑀣𑀸𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀢𑀸𑀯 𑀯𑀢𑁆𑀣𑀽𑀦𑀺𑀘 𑀆𑀭𑀫𑁆𑀫𑀡𑀸𑀦𑀺𑀘 𑀉𑀧𑀸𑀤𑀸𑀭𑀽𑀧𑀸𑀦𑁂𑀯 𑀳𑁄𑀦𑁆𑀢𑀺, 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀯𑀺𑀘𑀼𑀧𑀺𑀡𑁆𑀟𑀓𑀸𑀦𑀁𑀯𑀺𑀬 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀁 𑀤𑀼𑀩𑁆𑀩𑀮𑀫𑁂𑀯𑀸𑀢𑀺 𑀢𑀸𑀦𑀺 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂𑀘 𑀆𑀭𑀫𑁆𑀫𑀡𑁂 𑀉𑀧𑁂𑀓𑁆𑀔𑀸 𑀲𑀳𑀕𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺. 𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲𑀧𑀦 𑀆𑀭𑀫𑁆𑀫𑀡𑀸𑀦𑀺 𑀫𑀳𑀸𑀪𑀽𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀬𑀣𑀸 𑀅𑀥𑀺𑀓𑀭𑀡𑀺𑀫𑀢𑁆𑀣𑀓𑁂 𑀣𑀧𑀺𑀢𑀁 𑀧𑀺𑀘𑀼𑀧𑀺𑀡𑁆𑀟𑀓𑀁 𑀅𑀬𑁄𑀓𑀽𑀝𑁂𑀦 𑀧𑀳𑀭𑀦𑁆𑀢𑀸𑀦𑀁 𑀅𑀬𑁄𑀓𑀽𑀝𑀲𑁆𑀲 𑀧𑀺𑀘𑀼𑀧𑀺𑀡𑁆𑀟𑀓𑀁 𑀅𑀢𑀺𑀓𑁆𑀓𑀫𑁆𑀫 𑀅𑀔𑀺𑀓𑀭𑀡𑀺𑀖𑀝𑁆𑀝𑀦𑀁 𑀩𑀮𑀯𑀢𑀭𑀁 𑀳𑁄𑀢𑀺. 𑀢𑀣𑀸 𑀢𑁂𑀲𑀁 𑀆𑀭𑀫𑁆𑀫𑀪𑀽𑀢𑀸𑀦𑀁 𑀓𑀸𑀬𑀯𑀢𑁆𑀣𑀼𑀁 𑀅𑀢𑀺𑀓𑁆𑀓𑀫𑁆𑀫 𑀓𑀸𑀬𑀦𑀺𑀲𑁆𑀲𑀬 𑀪𑀽𑀢𑁂𑀲𑀼 𑀲𑀗𑁆𑀖𑀝𑁆𑀝𑀦𑀁 𑀩𑀮𑀯𑀢𑀭𑀁. 𑀢𑀲𑁆𑀫𑀸 𑀓𑀸𑀬𑀯𑀺𑀜𑁆𑀜𑀸𑀡𑀁 𑀇𑀝𑁆𑀞𑁂 𑀲𑀼𑀔𑀲𑀳𑀕𑀢𑀁 𑀅𑀦𑀺𑀝𑁆𑀞𑁂 𑀤𑀼𑀔𑀲𑀳𑀕𑀢𑀁 𑀳𑁄𑀢𑀻𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀘𑀺𑀢𑁆𑀢𑀁𑀧𑀦 𑀲𑀩𑁆𑀩𑀤𑀼𑀩𑁆𑀩𑀮𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀘𑁆𑀘𑀁 𑀤𑀼𑀩𑁆𑀩𑀮𑀁 𑀳𑀼𑀢𑁆𑀯𑀸 𑀲𑀩𑁆𑀩𑀢𑁆𑀣 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯𑀸𑀢𑀺. 𑀯𑀺𑀪𑀸𑀯𑀦𑀺𑀬𑀁 𑀧𑀦 𑀅𑀲𑀫𑀸𑀦𑀦𑀺𑀲𑁆𑀲𑀬𑁂 𑀳𑀺 𑀢𑁂𑀳𑀺 𑀮𑀤𑁆𑀥𑀧𑀘𑁆𑀘𑀬𑀢𑀸𑀯𑀲𑁂𑀦 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄, 𑀲𑀦𑁆𑀢𑀻𑀭𑀡𑀁𑀧𑀦 𑀲𑀬𑀁𑀧𑀺 𑀩𑀮𑀯𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀢𑀸𑀤𑀺𑀲𑁂𑀦𑀘 𑀩𑀮𑀯𑀯𑀢𑁆𑀣𑀼𑀦𑀺𑀲𑁆𑀲𑀬𑁂𑀦 𑀧𑀼𑀭𑀺𑀫𑀘𑀺𑀢𑁆𑀢𑁂𑀦 𑀮𑀤𑁆𑀥𑀧𑀘𑁆𑀘𑀬𑀁 𑀳𑁄𑀢𑀻𑀢𑀺 𑀣𑁄𑀓𑀁 𑀩𑀮𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀓𑀼𑀲𑀮𑀯𑀺𑀧𑀸𑀓𑀁 𑀇𑀝𑁆𑀞𑁂 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀅𑀪𑀺𑀇𑀝𑁆𑀞𑁂 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀳𑁄𑀢𑀺. 𑀅𑀓𑀼𑀲𑀮𑀯𑀺𑀧𑀸𑀓𑀁𑀧𑀦 𑀅𑀦𑀺𑀝𑁆𑀞𑁂𑀧𑀺 𑀅𑀪𑀺𑀅𑀦𑀺𑀝𑁆𑀞𑁂𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸 𑀇𑀢𑀺𑀘𑁂. 𑀬𑀤𑀺𑀳𑀺 𑀢𑀁 𑀅𑀢𑀺𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦 𑀯𑁂𑀤𑀦𑀸 𑀪𑁂𑀤𑀬𑀼𑀢𑁆𑀢𑀁 𑀲𑀺𑀬𑀸. 𑀤𑀼𑀓𑁆𑀔𑁂𑀦𑀯𑀸 𑀤𑁄𑀫𑀦𑀲𑁆𑀲𑁂𑀦𑀯𑀸 𑀬𑀼𑀢𑁆𑀢𑀁 𑀲𑀺𑀬𑀸. 𑀢𑀢𑁆𑀣 𑀤𑀼𑀓𑁆𑀔𑁂𑀦 𑀢𑀸𑀯 𑀦 𑀬𑀼𑀚𑁆𑀚𑀢𑀺, 𑀓𑀲𑁆𑀫𑀸, 𑀏𑀓𑀦𑁆𑀢𑀓𑀸𑀬𑀺𑀓𑀢𑁆𑀢𑀸 𑀤𑀼𑀓𑁆𑀔𑀲𑁆𑀲𑀸𑀢𑀺. 𑀤𑁄𑀫𑀦𑀲𑁆𑀲𑁂𑀦𑀧𑀺 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸, 𑀧𑀝𑀺𑀖𑁂𑀦 𑀧𑀝𑀺𑀳𑀜𑁆𑀜𑀢𑁆𑀢𑀸𑀏𑀯 𑀤𑁄𑀫𑀦𑀲𑁆𑀲𑀪𑀸𑀯𑀁 𑀧𑀢𑁆𑀢𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀧𑀝𑀺𑀖𑁂𑀦 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀢𑀻𑀢𑀺. 𑀏𑀓𑀦𑁆𑀢𑀸𑀓𑀼𑀲𑀮𑀪𑀽𑀢𑁂𑀦 𑀧𑀝𑀺𑀖𑁂𑀦 𑀦𑀺𑀘𑁆𑀘𑀬𑁄𑀕𑀺𑀦𑁄 𑀤𑁄𑀫𑀦𑀲𑁆𑀲𑀲𑁆𑀲 𑀅𑀩𑁆𑀬𑀸𑀓𑀢𑁂𑀲𑀼 𑀅𑀲𑀫𑁆𑀪𑀯𑀢𑁄𑀢𑀺. 𑀆𑀯𑀚𑁆𑀚𑀦𑀤𑁆𑀯𑀬𑀁𑀧𑀦 𑀲𑀦𑁆𑀢𑀻𑀭𑀡𑀢𑁄𑀧𑀺 𑀣𑁄𑀓𑀁 𑀩𑀮𑀯𑀁 𑀳𑁄𑀢𑀺. 𑀯𑀺𑀧𑀸𑀓𑀸𑀦𑀜𑁆𑀳𑀺 𑀧𑀯𑀢𑁆𑀢𑀺𑀢𑀼𑀁𑀧𑀺 𑀅𑀢𑁆𑀢𑀦𑁄 𑀉𑀲𑁆𑀲𑀸𑀳𑀩𑀮𑀁𑀦𑀸𑀫 𑀦𑀢𑁆𑀣𑀺. 𑀩𑀮𑀯𑀦𑁆𑀢𑁂𑀳𑀺𑀧𑀦 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑁂𑀳𑀺 𑀚𑀸𑀢𑀸𑀦𑀺 𑀩𑀮𑀯𑀦𑁆𑀢𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀤𑀼𑀩𑁆𑀩𑀮𑁂𑀳𑀺 𑀚𑀸𑀢𑀸𑀦𑀺 𑀤𑀼𑀩𑁆𑀩𑀮𑀸𑀦𑀺 𑀦𑀸𑀫𑀸𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀆𑀯𑀚𑁆𑀚𑀦𑀤𑁆𑀯𑀬𑀁 𑀓𑀫𑁆𑀫𑀸𑀦𑀼𑀪𑀸𑀯𑀢𑁄𑀘 𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀧𑀸𑀓𑀲𑀦𑁆𑀢𑀸𑀦𑀢𑁄𑀘 𑀧𑀘𑁆𑀘𑀬𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀺𑀢𑀢𑁆𑀢𑀸 𑀤𑀼𑀩𑁆𑀩𑀮𑀫𑁂𑀯 𑀳𑁄𑀢𑀻𑀢𑀺 𑀲𑀤𑀸𑀧𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑁂𑀯𑀸𑀢𑀺.

[𑁩𑁮] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀅𑀕𑁆𑀕𑀳𑀺𑀢𑁂 𑀆𑀭𑀫𑁆𑀫𑀡𑁂 𑀏𑀓𑀯𑀸 𑀭𑀫𑁂𑀯 𑀧𑀯𑀢𑁆𑀢𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀜𑁆𑀘 𑀯𑀺𑀲𑀤𑀺𑀲𑀘𑀺𑀢𑁆𑀢𑀲𑀦𑁆𑀢𑀸𑀦𑀧𑀭𑀸𑀯𑀢𑁆𑀢𑀦𑀯𑀲𑁂𑀦 𑀩𑁆𑀬𑀸𑀧𑀸𑀭𑀦𑁆𑀢𑀭𑀲𑀸𑀧𑁂𑀓𑁆𑀔𑀢𑁆𑀢𑀸 𑀆𑀭𑀫𑁆𑀫𑀡𑀭𑀲𑀁 𑀅𑀥𑀺𑀫𑀢𑁆𑀢𑀢𑁄 𑀅𑀦𑀼𑀪𑀯𑀺𑀢𑀼𑀁 𑀦𑀲𑀓𑁆𑀓𑁄𑀢𑀻𑀢𑀺 𑀲𑀩𑁆𑀩𑀢𑁆𑀣𑀧𑀺 𑀫𑀚𑁆𑀛𑀢𑁆𑀢 𑀯𑁂𑀤𑀦𑀸𑀬𑀼𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀬𑀸𑀧𑀸𑀭𑀦𑁆𑀢𑀭𑀲𑀸𑀧𑁂𑀓𑁆𑀔𑀢𑁆𑀢𑀸𑀢𑀺 𑀇𑀤𑀁 𑀦 𑀬𑀼𑀚𑁆𑀚𑀢𑀺.

𑀦 𑀳𑀺 𑀘𑀺𑀢𑁆𑀢𑀸𑀦𑀁 𑀩𑀮𑀯𑀤𑀼𑀩𑁆𑀩𑀮𑀢𑀸𑀯𑀺𑀲𑁂𑀲𑁄𑀅𑀢𑁆𑀢𑀦𑁄𑀧𑀘𑁆𑀙𑀸 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀅𑀢𑁆𑀢𑀦𑁄𑀧𑀦 𑀧𑀘𑁆𑀘𑀬𑁂𑀳𑀺𑀏𑀯 𑀲𑁄 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀇𑀢𑀭𑀣𑀸 𑀲𑀦𑁆𑀢𑀻𑀭𑀡𑀲𑁆𑀲𑀧𑀺 𑀩𑁆𑀬𑀸𑀧𑀸𑀭𑀦𑁆𑀢𑀭𑀲𑀸𑀧𑁂𑀓𑁆𑀔𑀢𑀸 𑀲𑀺𑀬𑀸. 𑀢𑀁𑀧𑀺 𑀳𑀺 𑀯𑀺𑀲𑀤𑀺𑀲𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀢𑁆𑀢𑀦𑀸𑀧𑀭𑀁 𑀯𑀢𑁆𑀢𑁂𑀢𑀺 𑀬𑁂𑀯𑀸𑀢𑀺.

𑁩𑁭. 𑀇𑀫𑀸𑀦𑀺 𑀘𑀺𑀢𑁆𑀢𑀸𑀦𑀺 𑀅𑀢𑁆𑀢𑀦𑁄 𑀧𑀓𑀢𑀺 𑀧𑀘𑁆𑀘𑀬𑀕𑀡𑀲𑀫𑀸𑀬𑁄𑀕𑁂 𑀲𑀢𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀲𑀗𑁆𑀔𑀸𑀭𑀺𑀓𑀸𑀦𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀯𑀺𑀧𑀸𑀓𑀼𑀤𑁆𑀥𑀸𑀭𑁂 𑁋

𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁆𑀢𑀸 𑀲𑀲𑀗𑁆𑀔𑀸𑀭𑀺𑀓 𑀓𑀫𑁆𑀫 𑀯𑀺𑀭𑀼𑀤𑁆𑀥𑁄 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄𑀧𑀺 𑀦𑀢𑁆𑀣𑀺. 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀯𑀺𑀭𑀼𑀤𑁆𑀥𑁄 𑀲𑀲𑀗𑁆𑀔𑀸𑀭𑀺𑀓𑀓𑀸𑀯𑁄𑀧𑀺 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀲𑀁 𑀉𑀪𑀬𑀓𑀫𑁆𑀫𑁂𑀦𑀧𑀺 𑀉𑀧𑁆𑀧𑀢𑁆𑀢𑀺 𑀣𑁂𑀭𑁂𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀯𑀼𑀢𑁆𑀢𑀁.

𑀏𑀢𑁂𑀦 𑀢𑀺𑀡𑁆𑀡𑀁 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀁𑀧𑀺 𑀢𑀤𑀼𑀪𑀬𑀪𑀸𑀯𑀸𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀢𑀸𑀦𑀺𑀧𑀺𑀳𑀺 𑀅𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀸𑀦𑀺𑀬𑁂𑀯𑀸𑀢𑀺. 𑀅𑀣𑀯𑀸. 𑀭𑀽𑀧𑀤𑀲𑁆𑀲 𑀦 𑀲𑀤𑁆𑀤𑀲𑁆𑀲𑀯𑀦𑀸𑀤𑀻𑀦𑀺 𑀲𑀢𑁆𑀢𑀸 𑀓𑀤𑀸𑀘𑀺 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀓𑀭𑁄𑀦𑁆𑀢𑀺. 𑀓𑀤𑀸𑀘𑀺 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑀸 𑀓𑀭𑁄𑀦𑁆𑀢𑀻𑀢𑀺 𑀧𑀘𑁆𑀘𑀓𑁆𑀔𑀢𑁄𑀯 𑀲𑀺𑀤𑁆𑀥𑀫𑁂𑀢𑀁. 𑀢𑀢𑁆𑀣 𑀬𑀤𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀓𑀭𑁄𑀦𑁆𑀢𑀺. 𑀢𑀤𑀸 𑀧𑀜𑁆𑀘𑀤𑁆𑀯𑀸𑀭𑀸𑀯𑀚𑁆𑀚𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀅𑀲𑀗𑁆𑀔𑀸𑀭𑀺𑀓𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀬𑀤𑀸 𑀧𑀭𑁂𑀳𑀺 𑀉𑀲𑁆𑀲𑀸𑀳𑀺𑀢𑀸 𑀓𑀭𑁄𑀦𑁆𑀢𑀺. 𑀢𑀤𑀸 𑀲𑀲𑀗𑁆𑀔𑀸𑀭𑀺𑀓𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀤𑁆𑀯𑀸𑀭 𑀯𑀺𑀫𑀼𑀢𑁆𑀢𑁂𑀲𑀼𑀧𑀦 𑀤𑁆𑀯𑀻𑀲𑀼 𑀉𑀧𑁂𑀓𑁆𑀔𑀸𑀲𑀦𑁆𑀢𑀻𑀭𑀡𑁂𑀲𑀼 𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑁂𑀲𑀼𑀯𑀺𑀬 𑀯𑀢𑁆𑀢𑀩𑁆𑀩𑁄. 𑀇𑀢𑀺 𑀲𑀩𑁆𑀩𑀸𑀦𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀲𑀗𑁆𑀔𑀸𑀭𑀪𑁂𑀤𑁂𑀦 𑀧𑀘𑁆𑀘𑁂𑀓𑀁 𑀪𑀺𑀦𑁆𑀦𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀧𑀭𑀺 𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁆𑀢𑀸𑀬𑁂𑀯 𑀢𑁂𑀲𑀁 𑀲𑀗𑁆𑀔𑀸𑀭𑀪𑁂𑀤𑁄 𑀧𑀸𑀴𑀺𑀬𑀁 𑀦𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁮. 𑀬𑀲𑁆𑀫𑀸𑀧𑀦 𑀳𑁂𑀢𑀼𑀬𑁄𑀦𑀸𑀫 𑀫𑀳𑀦𑁆𑀢𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀤𑀼𑀩𑁆𑀩𑀮𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂𑀲𑀼 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀺𑀘𑁆𑀘𑀝𑁆𑀞𑀸𑀦𑁂𑀲𑀼𑀘 𑀇𑀫𑁂𑀲𑀼 𑀘𑀺𑀢𑁆𑀢𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀁 𑀧𑀸𑀧𑀓𑀫𑁆𑀫𑀁 𑀯𑀺𑀓𑁆𑀔𑁂𑀧𑀬𑀼𑀢𑁆𑀢𑀁 𑀲𑀬𑀁𑀧𑀺 𑀘𑀜𑁆𑀘𑀮𑀢𑀺 𑀤𑀼𑀩𑁆𑀩𑀮𑀁 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀓𑀧𑁆𑀧𑀝𑁆𑀞𑀺𑀢𑀺𑀓𑀁𑀧𑀺 𑀲𑀫𑀸𑀦𑀁 𑀓𑀸𑀮𑀦𑁆𑀢𑀭𑁂 𑀳𑁂𑀢𑀼𑀬𑀼𑀢𑁆𑀢𑀁 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀢𑀺𑀳𑁂𑀢𑀼𑀓𑀓𑀫𑁆𑀫𑀁𑀧𑀺 𑀲𑀫𑀸𑀦𑀁 𑀤𑀼𑀩𑁆𑀩𑀮𑁂𑀲𑀼 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀲𑀼𑀘 𑀤𑀲𑁆𑀲𑀦𑀸𑀤𑀻𑀲𑀼 𑀓𑀺𑀘𑁆𑀘𑀝𑁆𑀞𑀸𑀦𑁂𑀲𑀼𑀘 𑀳𑁂𑀢𑀼𑀬𑀼𑀢𑁆𑀢𑀁 𑀯𑀺𑀧𑀸𑀓𑀁 𑀚𑀦𑁂𑀢𑀼𑀁 𑀦𑀲𑀓𑁆𑀓𑁄𑀢𑀺. 𑀆𑀯𑀚𑁆𑀚𑀦𑀳𑀲𑀦𑀓𑀺𑀘𑁆𑀘𑀸 𑀦𑀺𑀘 𑀤𑀼𑀩𑁆𑀩𑀮𑀓𑀺𑀘𑁆𑀘𑀸𑀦𑀺𑀏𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀭𑀳𑀺𑀢𑀸𑀦𑀺 𑀚𑀸𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁯. 𑀲𑀩𑁆𑀩𑀣𑀸𑀧𑀻𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

[𑁩𑁯] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀩𑁆𑀩𑀣𑀸𑀧𑀻𑀢𑀺 𑀅𑀓𑀼𑀲𑀮𑀯𑀺𑀧𑀸𑀓 𑀓𑀼𑀲𑀮𑀯𑀺𑀧𑀸𑀓 𑀓𑁆𑀭𑀺𑀬𑀪𑁂𑀤𑁂 𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀼𑀦𑁆𑀤𑀭𑀁.

𑀲𑁄𑀳𑀺 𑀪𑁂𑀤𑁄 𑀇𑀘𑁆𑀘𑁂𑀯𑀦𑁆𑀢𑀺 𑀇𑀫𑀺𑀦𑀸𑀯 𑀕𑀳𑀺𑀢𑁄𑀢𑀺. 𑀲𑀗𑁆𑀕𑀳𑀕𑀸𑀣𑀸𑀬𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀺 𑀯𑀢𑁆𑀣𑀼𑀓𑀺𑀘𑁆𑀘𑀪𑁂𑀤𑁂𑀦 𑀲𑀢𑁆𑀢, 𑀧𑀼𑀜𑁆𑀜𑀧𑀸𑀓𑀸𑀦𑀺 𑀯𑀢𑁆𑀣𑀼𑀓𑀺𑀘𑁆𑀘𑀯𑁂𑀤𑀦𑀸𑀪𑁂𑀤𑁂𑀦 𑀅𑀝𑁆𑀞𑀥𑀸, 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀓𑀺𑀘𑁆𑀘𑀤𑁆𑀯𑀸𑀭𑀪𑁂𑀤𑁂𑀦 𑀢𑀻𑀡𑀻𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀸𑀦𑀺 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀘 𑀧𑀼𑀜𑁆𑀜𑀧𑀸𑀓𑁂𑀲𑀼 𑀯𑁂𑀤𑀦𑀸𑀪𑁂𑀤𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀇𑀢𑀭𑀣𑀸 𑀲𑀦𑁆𑀢𑀻𑀭𑀡𑀲𑁆𑀲 𑀅𑀪𑁂𑀤𑁄 𑀲𑀺𑀬𑀸. 𑀢𑀣𑀸 𑀓𑁆𑀭𑀺𑀬𑀸𑀲𑀼 𑀤𑁆𑀯𑀸𑀭𑀪𑁂𑀤𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀆𑀯𑀚𑁆𑀚𑀦𑀲𑁆𑀲 𑀅𑀪𑁂𑀤𑁄 𑀲𑀺𑀬𑀸𑀢𑀺. 𑀝𑀻𑀓𑀸𑀲𑀼𑀧𑀦 𑀲𑁄 𑀦 𑀯𑀼𑀢𑁆𑀢𑁄𑀢𑀺.

𑀅𑀳𑁂𑀢𑀼𑀓𑀘𑀺𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀤𑀻𑀧𑀦𑀸.

𑁪𑁦. 𑀇𑀤𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀁 𑀅𑀲𑁄𑀪𑀡𑀦𑀸𑀫𑀁 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀜𑁆𑀘 𑀲𑁄𑀪𑀡𑀦𑀸𑀫𑀁 𑀣𑀧𑁂𑀦𑁆𑀢𑁄 𑀕𑀸𑀣𑀫𑀸𑀳. 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀜𑁆𑀳𑀺 𑀲𑁄𑀪𑀡𑀢𑁆𑀢𑁂 𑀯𑀼𑀢𑁆𑀢𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀅𑀲𑁄𑀪𑀡𑀢𑀸 𑀅𑀯𑀼𑀢𑁆𑀢𑀸𑀧𑀺 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺. 𑀢𑀢𑁆𑀣 𑀧𑀸𑀧𑀸𑀳𑁂𑀢𑀼𑀓𑀫𑀼𑀢𑁆𑀢𑀸𑀦𑀻𑀢𑀺 𑀧𑀸𑀧𑁂𑀳𑀺 𑀅𑀳𑁂𑀢𑀼𑀓𑁂𑀳𑀺𑀘 𑀫𑀼𑀢𑁆𑀢𑀸𑀦𑀺 𑀏𑀓𑀽𑀦𑀲𑀝𑁆𑀞𑀺𑀘𑀺𑀢𑁆𑀢𑀸𑀦𑀺. 𑀅𑀣𑀯𑀸. 𑀏𑀓𑀦𑀯𑀼𑀢𑀺𑀘𑀺𑀢𑁆𑀢𑀸𑀦𑀺𑀧𑀺 𑀲𑁄𑀪𑀡𑀸𑀦𑀻𑀢𑀺 𑀯𑀼𑀘𑁆𑀘𑀭𑁂 𑀯𑀼𑀘𑁆𑀘𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀧𑀸𑀧𑁂𑀳𑀻𑀢𑀺 𑀅𑀓𑀼𑀲𑀮𑁂𑀳𑀺. 𑀅𑀓𑀼𑀲𑀮𑀸𑀦𑀺𑀳𑀺 𑀅𑀢𑁆𑀢𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑁂 𑀅𑀦𑀺𑀘𑁆𑀙𑀦𑁆𑀢𑁂𑀬𑁂𑀯 𑀅𑀧𑀸𑀬𑀁 𑀧𑀸𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀧𑀸𑀧𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀧𑀼𑀜𑁆𑀜𑀸𑀦𑀁𑀧𑀺 𑀲𑀼𑀕𑀢𑀺𑀧𑀸𑀧𑀦𑀝𑁆𑀞𑁂𑀦 𑀧𑀸𑀧𑀢𑀸 𑀧𑀲𑀗𑁆𑀕𑁄 𑀦𑀺𑀯𑀢𑁆𑀢𑀺𑀢𑁄 𑀳𑁄𑀢𑀺. 𑀦 𑀳𑀺 𑀇𑀘𑁆𑀙𑀦𑁆𑀢𑀸𑀦𑀁 𑀧𑀸𑀧𑀦𑁂 𑀧𑀸𑀧𑀦𑀩𑁆𑀬𑀸𑀧𑀸𑀭𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺. 𑀮𑀸𑀫𑀓𑀝𑁆𑀞𑁂𑀦𑀯𑀸 𑀢𑀸𑀦𑀺𑀬𑁂𑀯 𑀧𑀸𑀧𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀲𑁄𑀪𑀡𑁂𑀳𑀺 𑀲𑀤𑁆𑀥𑀸𑀤𑀺𑀕𑀼𑀡𑀥𑀫𑁆𑀫𑁂𑀳𑀺 𑀬𑀼𑀢𑁆𑀢𑀺𑀬𑀸 𑀢𑀢𑁄𑀬𑁂𑀯 𑀘 𑀲𑀬𑀁𑀧𑀺 𑀲𑁄𑀪𑀕𑁆𑀕𑀧𑀢𑁆𑀢𑀺𑀬𑀸 𑀲𑁄𑀪𑀡𑀸𑀦𑀻𑀢𑀺.

𑁪𑁧. 𑀇𑀤𑀸𑀦𑀺 𑀢𑀸𑀦𑀺 𑀲𑁄𑀪𑀡𑀸𑀦𑀺 𑀳𑀻𑀦 𑀧𑀡𑀻𑀢𑀸 𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑁂𑀦𑁆𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀲𑀫𑀸𑀲𑁄. 𑀦𑀢𑁆𑀣𑀺 𑀲𑀗𑁆𑀔𑀸𑀭𑁄 𑀅𑀲𑁆𑀲𑀸𑀢𑀺 𑀅𑀲𑀗𑁆𑀔𑀸𑀭𑁄. 𑀲𑀁𑀯𑀺𑀚𑁆𑀚𑀢𑀺 𑀲𑀗𑁆𑀔𑀸𑀭𑁄 𑀅𑀲𑁆𑀲𑀸𑀢𑀺 𑀲𑀲𑀗𑁆𑀔𑀸𑀭𑁄. 𑀲𑀧𑁆𑀧𑀼𑀭𑀺𑀲𑀼𑀧𑀦𑀺𑀲𑁆𑀲 𑀬𑀸𑀤𑀺𑀓𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀧𑀘𑁆𑀘𑀬𑀕𑀡𑁄. 𑀲𑁄𑀳𑀺 𑀬𑀤𑀸 𑀤𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀓𑀼𑀲𑀮𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀤𑀸 𑀅𑀲𑀗𑁆𑀔𑀸𑀭𑁄𑀦𑀸𑀫. 𑀲𑁄𑀬𑁂𑀯 𑀬𑀤𑀸 𑀅𑀢𑁆𑀢𑀦𑁄 𑀩𑀮𑁂𑀦 𑀓𑀼𑀲𑀮𑀘𑀺𑀢𑁆𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀗𑁆𑀔𑀸𑀭𑀲𑀳𑀸𑀬𑀁 𑀮𑀪𑀺𑀢𑁆𑀯𑀸𑀯 𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀤𑀸 𑀲𑀲𑀗𑁆𑀔𑀸𑀭𑁄𑀦𑀸𑀫. 𑀅𑀲𑀗𑁆𑀔𑀸𑀭𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀸𑀭𑀺𑀓𑀁. 𑀲𑀲𑀗𑁆𑀔𑀸𑀭𑁂𑀦 𑀉𑀧𑁆𑀧𑀦𑁆𑀦𑀁 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀏𑀢𑁆𑀣𑀘 𑀲𑁄𑀫𑀦𑀲𑁆𑀲𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀧𑀺𑀘 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺 𑀤𑁂𑀬𑁆𑀬𑀥𑀫𑁆𑀫 𑀧𑀝𑀺𑀕𑁆𑀕𑀸𑀳𑀓 𑀲𑀫𑁆𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀺 𑀲𑁄𑀫𑀦𑀲𑁆𑀲𑀓𑀸𑀭𑀡𑀁, 𑀢𑀩𑁆𑀩𑀺𑀧𑀭𑀻𑀢𑀁 𑀉𑀧𑁂𑀓𑁆𑀔𑀸𑀓𑀸𑀭𑀡𑀁. 𑀬𑀸𑀦𑀺𑀘 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲𑀘 𑀓𑀸𑀭𑀡𑀸𑀦𑀺𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺𑀧𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀢𑁆𑀢𑀩𑁆𑀩𑀸𑀦𑀻𑀢𑀺. 𑀧𑀜𑁆𑀜𑀸 𑀲𑀁𑀯𑀢𑁆𑀢𑀦𑀺𑀓 𑀓𑀫𑁆𑀫𑀼𑀧𑀦𑀺𑀲𑁆𑀲𑀬𑀢𑀸, 𑀅𑀩𑁆𑀬𑀸𑀧𑀚𑁆𑀚𑀮𑁄𑀓𑀼𑀧𑀧𑀢𑁆𑀢𑀺𑀢𑀸 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀢𑀸, 𑀓𑀺𑀮𑁂𑀲𑀤𑀽𑀭𑀢𑀸𑀘 𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁. 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑀸, 𑀅𑀫𑁄𑀳𑀚𑁆𑀛𑀸𑀲𑀬𑀢𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸. 𑀲𑀼𑀢𑀘𑀺𑀦𑁆𑀢𑀸𑀧𑀲𑀼𑀢𑀸𑀢𑀺𑀧𑀺𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀬𑀸𑀦𑀺𑀘𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀓𑀸𑀭𑀡𑀸𑀦𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺𑀧𑀺 𑀇𑀥 𑀯𑀢𑁆𑀢𑀩𑁆𑀩𑀸𑀦𑀺. 𑀢𑀩𑁆𑀩𑀺𑀧𑀭𑀻𑀢𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀸𑀭𑀡𑀁. 𑀲𑀗𑁆𑀔𑀸𑀭𑀓𑀸𑀭𑀡𑀁𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯. 𑀬𑀸𑀦𑀺𑀘 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲𑀘 𑀓𑀸𑀭𑀡𑀸𑀦𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺𑀧𑀺 𑀇𑀥 𑀯𑀢𑁆𑀢𑀩𑁆𑀩𑀸𑀦𑀻𑀢𑀺. 𑀇𑀫𑁂𑀲𑀁𑀧𑀺 𑀉𑀧𑁆𑀧𑀢𑁆𑀢𑀺 𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀕𑀳𑁂𑀢𑀩𑁆𑀩𑀦𑁆𑀢𑀺.

𑁪𑁨. 𑀅𑀝𑁆𑀞𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀇𑀫𑁂𑀲𑀁 𑀇𑀥 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀅𑀜𑁆𑀜𑁂𑀳𑀺 𑀧𑀓𑀸𑀭𑁂𑀳𑀺 𑀅𑀦𑁂𑀓𑀯𑀺𑀥𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑀢𑁆𑀭𑀸𑀬𑀁 𑀦𑀬𑁄. 𑀇𑀫𑀸𑀦𑀺 𑀅𑀝𑁆𑀞𑀘𑀺𑀢𑁆𑀢𑀸𑀦𑀺 𑀤𑀲𑀳𑀺 𑀧𑀼𑀜𑁆𑀜𑀓𑁆𑀭𑀺𑀬𑀸𑀯𑀢𑁆𑀣𑀽𑀳𑀺 𑀕𑀼𑀡𑀺𑀢𑀸𑀦𑀺 𑀅𑀲𑀻𑀢𑀺 𑀳𑁄𑀦𑁆𑀢𑀺. 𑀧𑀼𑀦 𑀢𑀸𑀦𑀺 𑀙𑀳𑀺 𑀆𑀭𑀫𑁆𑀫𑀡𑁂𑀳𑀺 𑀕𑀼𑀡𑀺𑀢𑀸𑀦𑀺 𑀘𑀢𑁆𑀢𑀸𑀭𑀺𑀲𑀢𑀸𑀦𑀺𑀘𑁂𑀯 𑀅𑀲𑀻𑀢𑀺 𑀘 𑀳𑁄𑀦𑁆𑀢𑀺. 𑀧𑀼𑀦 𑀢𑀸𑀦𑀺 𑀢𑀻𑀳𑀺 𑀓𑀫𑁆𑀫𑁂𑀳𑀺 𑀕𑀼𑀡𑀺𑀢𑀸𑀦𑀺 𑀲𑀳𑀲𑁆𑀲𑀁 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁𑀘 𑀳𑁄𑀦𑁆𑀢𑀺. 𑀧𑀼𑀦 𑀢𑀸𑀦𑀺 𑀢𑀻𑀳𑀺 𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑁂𑀳𑀺 𑀕𑀼𑀡𑀺𑀢𑀸𑀦𑀺 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀯𑀻𑀲𑀢𑀺𑀘 𑀳𑁄𑀦𑁆𑀢𑀺. 𑀢𑀸𑀦𑀺 𑀇𑀫𑀸𑀦𑀺 𑀲𑀼𑀤𑁆𑀥𑀺𑀓𑀸𑀦𑀻𑀢𑀺 𑀓𑀢𑁆𑀯𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀣𑀧𑁂𑀢𑀩𑁆𑀩𑀸𑀦𑀺. 𑀢𑀢𑁄 𑀏𑀓𑀁 𑀞𑀸𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑀺𑀥𑀸 𑀓𑀭𑁄𑀦𑁆𑀢𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀤𑁆𑀯𑁂𑀲𑀳𑀲𑁆𑀲𑀸𑀦𑀺 𑀲𑀢𑀁 𑀲𑀝𑁆𑀞𑀺𑀘 𑀳𑁄𑀦𑁆𑀢𑀺. 𑀢𑀣𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀻𑀢𑀺. 𑀧𑀼𑀦 𑀢𑀢𑁆𑀣 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀢𑀽𑀳𑀺 𑀅𑀥𑀺𑀧𑀢𑀻𑀳𑀺 𑀕𑀼𑀡𑀺𑀢𑀸𑀦𑀺 𑀅𑀝𑁆𑀞𑀲𑀳𑀲𑁆𑀲𑀸𑀦𑀺 𑀙𑀲𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀁𑀘 𑀳𑁄𑀦𑁆𑀢𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺𑀧𑀦 𑀯𑀻𑀫𑀁𑀲𑀸𑀯𑀚𑁆𑀚𑀺𑀢𑁂𑀳𑀺 𑀢𑀻𑀳𑀺 𑀅𑀥𑀺𑀧𑀢𑀻𑀳𑀺 𑀕𑀼𑀡𑀺𑀢𑀸𑀦𑀺 𑀙𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺𑀲𑀢𑀸𑀦𑀺 𑀅𑀲𑀻𑀢𑀺𑀘 𑀳𑁄𑀦𑁆𑀢𑀺. 𑀧𑀼𑀦 𑀢𑀤𑀼𑀪𑀬𑀸𑀦𑀺 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺 𑀤𑀲𑀲𑀳𑀲𑁆𑀲𑀁 𑀧𑀜𑁆𑀘𑀲𑀳𑀲𑁆𑀲𑀸𑀦𑀺 𑀲𑀢𑀁 𑀯𑀻𑀲𑀢𑀺𑀘 𑀳𑁄𑀦𑁆𑀢𑀺. 𑀧𑀼𑀦 𑀢𑀸𑀦𑀺 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀣𑀧𑀺𑀢𑁂𑀳𑀺 𑀲𑀼𑀤𑁆𑀥𑀺𑀓𑁂𑀳𑀺 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺 𑀤𑀲𑀲𑀳𑀲𑁆𑀲𑀁 𑀦𑀯𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀘𑀢𑁆𑀢𑀸𑀮𑀻𑀲𑀜𑁆𑀘 𑀳𑁄𑀦𑁆𑀢𑀻𑀢𑀺. 𑀬𑀁𑀧𑀦 𑀝𑀻𑀓𑀸𑀬𑀁 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀲𑀼𑀤𑁆𑀥𑀺𑀓𑀸𑀦𑀺𑀘 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀘 𑀯𑀺𑀲𑀼𑀁 𑀅𑀓𑀢𑁆𑀯𑀸 𑀲𑀩𑁆𑀩𑀸𑀦𑀺 𑀧𑀼𑀜𑁆𑀜𑀓𑁆𑀭𑀺𑀬𑀸𑀤𑀻𑀳𑀺 𑀲𑀫𑀁 𑀕𑀼𑀡𑀺𑀢𑀸𑀦𑀺 𑀲𑀢𑁆𑀢𑀭𑀲 𑀲𑀳𑀲𑁆𑀲𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺 𑀅𑀲𑀻𑀢𑀺𑀘 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁.

[𑁪𑁦] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

𑀲𑀼𑀤𑁆𑀥𑀺𑀓𑀸𑀦𑀺 𑀯𑀺𑀲𑀼𑀁 𑀅𑀓𑀢𑁆𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺𑀏𑀯 𑀯𑀺𑀲𑀼𑀁 𑀓𑀢𑁆𑀯𑀸 𑀢𑀣𑀸 𑀕𑀼𑀡𑀺𑀢𑀸𑀦𑀺 𑀯𑀻𑀲 𑀲𑀢𑀸𑀥𑀺𑀓 𑀧𑀦𑁆𑀦𑀭𑀲 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀩𑁆𑀩𑀁 𑀦 𑀬𑀼𑀢𑁆𑀢𑀁.

𑀏𑀯𑀜𑁆𑀳𑀺 𑀲𑀢𑀺 𑀇𑀫𑀸𑀦𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀺 𑀦𑀺𑀘𑁆𑀘𑀁 𑀲𑀸𑀥𑀺𑀧𑀢𑀺𑀓𑀸𑀦𑀺 𑀳𑀼𑀢𑁆𑀯𑀸 𑀦𑀺𑀬𑀢𑀸𑀥𑀺𑀧𑀢𑀺𑀓𑀸𑀦𑀺𑀦𑀸𑀫 𑀪𑀯𑁂𑀬𑁆𑀬𑀼𑀁. 𑀦𑀘 𑀇𑀫𑀸𑀦𑀺 𑀉𑀧𑀭𑀺 𑀫𑀳𑀕𑁆𑀕𑀢 𑀓𑀼𑀲𑀮𑀸𑀦𑀺 𑀯𑀺𑀬 𑀮𑁄𑀓𑀼𑀢𑁆𑀢𑀭𑀸𑀦𑀺 𑀯𑀺𑀬 𑀘 𑀦𑀺𑀬𑀢𑀸 𑀥𑀺𑀧𑀢𑀺𑀓𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀝𑀻𑀓𑀸𑀦𑀬𑁂𑀦𑀧𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀯𑀻𑀫𑀁𑀲𑀸𑀲𑀳𑀕𑀢𑀸𑀦𑀻𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀬𑀣𑀸𑀯𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀸𑀢𑀺𑀏𑀢𑁆𑀣 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺𑀧𑀺 𑀓𑁄𑀲𑀮𑁆𑀮𑁂𑀦 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀯𑀢𑁆𑀢𑁂𑀦 𑀉𑀧𑀦𑀺𑀲𑁆𑀲𑀬𑀜𑀸𑀡𑁂𑀦 𑀲𑀫𑁆𑀪𑀽𑀢𑀢𑁆𑀢𑀸 𑀓𑀼𑀲𑀮𑀸𑀦𑀺 𑀏𑀯 𑀦𑀸𑀫 𑀳𑁄𑀦𑁆𑀢𑀺. 𑀏𑀯𑀫𑀺𑀥𑀧𑀺 𑀢𑀸𑀦𑀺 𑀢𑁂𑀦𑁂𑀯 𑀯𑀻𑀫𑀁𑀲𑀸𑀥𑀺𑀧𑀢𑀺𑀪𑀽𑀢𑁂𑀦 𑀲𑀫𑁆𑀪𑀽𑀢𑀢𑁆𑀢𑀸 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀸𑀦𑀺𑀧𑀺 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀦 𑀦𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀢𑀸𑀦𑀺 𑀯𑀺𑀲𑀼𑀁 𑀅𑀓𑀢𑀸𑀦𑀺 𑀲𑀺𑀬𑀼𑀦𑁆𑀢𑀺. 𑀏𑀯𑀁𑀲𑀦𑁆𑀢𑁂𑀧𑀺 𑀓𑀸𑀫𑀓𑀼𑀲𑀮𑀸𑀦𑀺𑀦𑀸𑀫 𑀅𑀥𑀺𑀧𑀢𑀺𑀯𑀺𑀫𑀼𑀢𑁆𑀢𑀸𑀦𑀺 𑀏𑀯 𑀩𑀳𑀼𑀢𑀭𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦𑀲𑀓𑁆𑀓𑀸 𑀲𑀩𑁆𑀩𑀸𑀦𑀺 𑀓𑀸𑀫𑀓𑀼𑀲𑀮𑀸𑀦𑀺 𑀯𑀻𑀫𑀁𑀲𑀸𑀥𑀺𑀧𑀢𑀺𑀫𑀽𑀮𑀺𑀓𑀸𑀦𑀺 𑀪𑀯𑀺𑀢𑀼𑀦𑁆𑀢𑀺.

𑁪𑁩. 𑀓𑀸𑀫𑀸𑀯𑀘𑀭𑀸𑀦𑀺𑀘 𑀢𑀸𑀦𑀺 𑀓𑀼𑀲𑀮𑀸𑀦𑀺 𑀘𑀺𑀢𑁆𑀢𑀸𑀦𑀺𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀢𑀢𑁆𑀣 𑀓𑁂𑀦𑀝𑁆𑀞𑁂𑀦 𑀓𑀼𑀲𑀮𑀸𑀦𑀻𑀢𑀺. 𑀆𑀭𑁄𑀕𑁆𑀬𑀝𑁆𑀞𑁂𑀦, 𑀲𑀼𑀦𑁆𑀤𑀭𑀝𑁆𑀞𑁂𑀦, 𑀙𑁂𑀓𑀝𑁆𑀞𑁂𑀦, 𑀅𑀦𑀯𑀚𑁆𑀚𑀝𑁆𑀝𑁂𑀦, 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦𑀘𑀸𑀢𑀺. 𑀭𑀸𑀕𑀸𑀤𑀬𑁄𑀳𑀺 𑀥𑀫𑁆𑀫𑀸 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀭𑀼𑀚𑁆𑀚𑀦𑀝𑁆𑀞𑁂𑀦 𑀭𑁄𑀕𑀸𑀦𑀸𑀫. 𑀅𑀳𑀺𑀢𑀝𑁆𑀞𑁂𑀦 𑀅𑀲𑀼𑀦𑁆𑀤𑀭𑀸 𑀦𑀸𑀫. 𑀅𑀦𑀺𑀧𑀼𑀡𑀝𑁆𑀞𑁂𑀦 𑀅𑀙𑁂𑀓𑀸𑀦𑀸𑀫. 𑀕𑀸𑀭𑀬𑁆𑀳𑀝𑁆𑀞𑁂𑀦 𑀯𑀚𑁆𑀚𑀸𑀦𑀸𑀫. 𑀅𑀦𑀺𑀝𑁆𑀞 𑀯𑀺𑀧𑀸𑀓𑀝𑁆𑀞𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀸𑀫 𑀳𑁄𑀦𑁆𑀢𑀺. 𑀇𑀫𑀸𑀦𑀺𑀧𑀦 𑀢𑁂𑀳𑀺 𑀯𑀼𑀝𑁆𑀞𑀺𑀢𑀢𑁆𑀢𑀸 𑀓𑀼𑀲𑀮𑀸𑀦𑀺𑀦𑀸𑀫 𑀅𑀭𑁄𑀕𑀸𑀦𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸𑀘 𑀲𑀼𑀦𑁆𑀤𑀭𑀸𑀦𑀺 𑀙𑁂𑀓𑀸𑀦𑀺 𑀅𑀦𑀯𑀚𑁆𑀚𑀸𑀦𑀺 𑀲𑀼𑀔𑀯𑀺𑀧𑀸𑀓𑀸𑀦𑀺 𑀘 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀘𑀸𑀮𑁂𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺. 𑀓𑀼𑀘𑁆𑀙𑀺𑀢𑁂𑀦𑀯𑀸 𑀆𑀓𑀸𑀭𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑁂𑀦𑁆𑀢𑀺 𑀅𑀦𑀼𑀲𑁂𑀦𑁆𑀢𑀻𑀢𑀺 𑀓𑀼𑀲𑀸. 𑀭𑀸𑀕𑀸𑀤𑀬𑁄. 𑀢𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺. 𑀓𑀼𑀲𑀁𑀯𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀓𑀼𑀘𑁆𑀙𑀺𑀢𑀸𑀦𑀁 𑀲𑀸𑀦𑀝𑁆𑀞𑁂𑀦 𑀢𑀦𑀼𑀓𑀭𑀡𑀝𑁆𑀞𑁂𑀦 𑀅𑀦𑁆𑀢𑀓𑀭𑀡𑀝𑁆𑀞𑁂𑀦𑀯𑀸. 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸𑀦𑀻𑀢𑀺 𑀓𑀼𑀲𑀮𑀸𑀦𑀺. 𑀓𑀼𑀲𑀸𑀯𑀺𑀬 𑀳𑀢𑁆𑀣𑀧𑁆𑀧𑀤𑁂𑀲𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀦𑁆𑀢𑀻𑀢𑀺𑀯𑀸 𑀓𑀼𑀲𑀮𑀸𑀦𑀺. 𑀅𑀧𑀺𑀘, 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀭𑀦𑁆𑀢𑀺 𑀳𑀺𑀁𑀲𑀦𑁆𑀢𑀻𑀢𑀺 𑀓𑀼𑀲𑀮𑀸𑀦𑀺. 𑀭𑀓𑀸𑀭𑀲𑁆𑀲 𑀮𑀓𑀸𑀭𑁄. 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦𑀯𑀸 𑀓𑀼𑀲𑀮𑀸𑀦𑀻𑀢𑀺.

𑁪𑁪. 𑀫𑀳𑀸𑀯𑀺𑀧𑀸𑀓𑁂𑀲𑀼 𑀧𑀤𑀢𑁆𑀣𑀢𑁄 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀯𑁂𑀤𑀦𑀸𑀪𑁂𑀤𑁄 𑀆𑀭𑀫𑁆𑀫𑀡𑀯𑀲𑁂𑀦 𑀯𑀢𑁆𑀢𑀩𑁆𑀩𑁄. 𑀢𑀸𑀦𑀺𑀳𑀺 𑀅𑀢𑀺𑀇𑀝𑁆𑀞𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑁂 𑀘 𑀆𑀭𑀫𑁆𑀫𑀡𑁂 𑀬𑀣𑀸𑀓𑁆𑀓𑀫𑀁 𑀲𑁄𑀫𑀦𑀲𑁆𑀲𑁂𑀦 𑀉𑀧𑁂𑀓𑁆𑀔𑀸𑀬 𑀘 𑀬𑀼𑀢𑁆𑀢𑀸𑀦𑀻𑀢𑀺. 𑀲𑀫𑁆𑀧𑀬𑁄𑀕𑀪𑁂𑀤𑁄 𑀓𑀫𑁆𑀫𑀯𑀲𑁂𑀦 𑀚𑀯𑀦𑀯𑀲𑁂𑀦𑀘 𑀯𑀢𑁆𑀢𑀩𑁆𑀩𑁄. 𑀢𑀸𑀦𑀺𑀳𑀺 𑀩𑀮𑀯𑀓𑀫𑁆𑀫𑁂𑀦 𑀚𑀦𑀺𑀢𑀸𑀦𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀤𑀼𑀩𑁆𑀩𑀮𑀓𑀫𑁆𑀫𑁂𑀦 𑀚𑀦𑀺𑀢𑀸𑀦𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺. 𑀓𑀤𑀸𑀘𑀺𑀧𑀦 𑀢𑀤𑀸𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀓𑀸𑀮𑁂 𑀬𑁂𑀪𑀼𑀬𑁆𑀬𑁂𑀦 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀭𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀻𑀢𑀺. 𑀲𑀗𑁆𑀔𑀸𑀭𑀪𑁂𑀤𑁄𑀧𑀺 𑀓𑁂𑀳𑀺𑀘𑀺 𑀆𑀘𑀭𑀺𑀬𑁂𑀳𑀺 𑀓𑀫𑁆𑀫𑀯𑀲𑁂𑀦𑁂𑀯 𑀓𑀣𑀺𑀢𑁄. 𑀅𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀚𑀦𑀺𑀢𑀸𑀦𑀺 𑀅𑀲𑀗𑁆𑀔𑀸𑀭𑀺𑀓𑀸𑀦𑀺. 𑀲𑀲𑀗𑁆𑀔𑀸𑀭𑀺𑀓𑀓𑀫𑁆𑀫𑀚𑀦𑀺𑀢𑀸𑀦𑀺 𑀲𑀲𑀗𑁆𑀔𑀸𑀭𑀺𑀓𑀸𑀦𑀻𑀢𑀺. 𑀲𑀗𑁆𑀕𑀳𑀓𑀸𑀭𑁂𑀦𑀧𑀦 𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀸𑀦𑀺𑀳𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀼𑀭𑀺𑀫𑀪𑀯𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀜𑀸𑀢𑀓𑀸𑀤𑀻𑀳𑀺 𑀢𑁂𑀦 𑀢𑁂𑀦 𑀧𑀬𑁄𑀕𑁂𑀦 𑀉𑀧𑀝𑁆𑀞𑀸𑀧𑀺𑀢𑀸𑀦𑀺 𑀓𑀫𑁆𑀫𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀦𑀺 𑀲𑀲𑀗𑁆𑀔𑀸𑀭𑀺𑀓𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀤𑀺𑀲𑁂𑀦 𑀧𑀬𑁄𑀕𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀓𑀫𑁆𑀫𑀩𑀮𑁂𑀦 𑀉𑀧𑀝𑁆𑀞𑀺𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀦𑀺 𑀅𑀲𑀗𑁆𑀔𑀸𑀭𑀺𑀓𑀸𑀦𑀺𑀦𑀸𑀫 𑀳𑁄𑀦𑁆𑀢𑀺. 𑀢𑀤𑀸𑀭𑀫𑁆𑀫𑀡 𑀓𑀸𑀮𑁂𑀧𑀦 𑀅𑀲𑀗𑁆𑀔𑀸𑀭𑀺𑀓𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀺 𑀅𑀲𑀗𑁆𑀔𑀸𑀭𑀺𑀓𑀸𑀦𑀺𑀦𑀸𑀫. 𑀲𑀲𑀗𑁆𑀔𑀸𑀭𑀺𑀓 𑀚𑀯𑀦𑀸𑀦𑀼𑀩𑀦𑁆𑀥𑀸𑀦𑀺 𑀲𑀲𑀗𑁆𑀔𑀸𑀭𑀺𑀓𑀸𑀦𑀺 𑀦𑀸𑀫𑀸𑀢𑀺. 𑀏𑀢𑁆𑀣𑀧𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀯𑀺𑀲𑀤𑁆𑀤𑁄. 𑀢𑁂𑀦 𑀆𑀭𑀫𑁆𑀫𑀡𑀙𑀓𑁆𑀓 𑀳𑀻𑀦𑀢𑁆𑀢𑀺𑀓𑀯𑀲𑁂𑀦𑁂𑀯 𑀓𑀸𑀮𑀤𑁂𑀲 𑀲𑀦𑁆𑀢𑀸𑀦𑀸𑀤𑀺𑀯𑀲𑁂𑀦𑀘 𑀢𑁂𑀲𑀁 𑀅𑀦𑁂𑀓𑀪𑁂𑀤𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀲𑁆𑀫𑀸 𑀧𑀦𑁂𑀢𑀸𑀦𑀺 𑀤𑀸𑀦𑀸𑀤𑀺𑀯𑀲𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀙𑀦𑁆𑀤𑀸𑀤𑀻𑀦𑀺 𑀥𑀼𑀭𑀁 𑀓𑀢𑁆𑀯𑀸 𑀘 𑀦 𑀧𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀸𑀦𑀺 𑀧𑀼𑀜𑁆𑀜𑀓𑁆𑀭𑀺𑀬𑀸𑀯𑀢𑁆𑀣𑀽𑀦𑀁 𑀓𑀫𑁆𑀫𑀸𑀥𑀺𑀧𑀢𑀻𑀦𑀜𑁆𑀘 𑀯𑀲𑁂𑀦 𑀯𑀟𑁆𑀠𑀦𑀁 𑀦𑀮𑀪𑀦𑁆𑀢𑀻𑀢𑀺.

[𑁪𑁧] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀇𑀫𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀸𑀪𑀸𑀯𑀢𑁄 𑀓𑀫𑁆𑀫𑀤𑁆𑀯𑀸𑀭 𑀯𑀲𑁂𑀦 𑀦 𑀧𑀯𑀢𑁆𑀢𑀦𑁆𑀢𑀺. 𑀅𑀯𑀺𑀧𑀸𑀓𑀲𑀪𑀸𑀯𑀢𑁄𑀘 𑀓𑀫𑁆𑀫𑀯𑀲𑁂𑀦 𑀦𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀳𑁂𑀝𑁆𑀞𑀸𑀳𑀺 𑀓𑀼𑀲𑀮𑁂𑀲𑀼 𑀓𑀫𑁆𑀫𑀢𑁆𑀢𑀺𑀓𑀯𑀲𑁂𑀦𑁂𑀯 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁. 𑀦𑀧𑀦 𑀯𑀺𑀲𑀼𑀁 𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦. 𑀓𑀫𑁆𑀫𑀢𑁆𑀢𑀺𑀓𑀜𑁆𑀘𑀦𑀸𑀫 𑀢𑀺𑀯𑀺𑀥 𑀓𑀫𑁆𑀫𑀤𑁆𑀯𑀸𑀭 𑀯𑀲𑁂𑀦𑁂𑀯 𑀲𑀺𑀤𑁆𑀥𑀦𑁆𑀢𑀺. 𑀦𑀦𑀼 𑀅𑀝𑁆𑀞𑀓𑀣𑀸𑀬𑀁 𑀬𑁄𑀳𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑁂𑀲𑀼 𑀓𑀫𑁆𑀫𑀤𑁆𑀯𑀸𑀭 𑀓𑀫𑁆𑀫𑀧𑀣 𑀧𑀼𑀜𑁆𑀜𑀓𑁆𑀭𑀺𑀬𑀸𑀯𑀢𑁆𑀣𑀼𑀪𑁂𑀤𑁄 𑀯𑀼𑀢𑁆𑀢𑁄. 𑀲𑁄 𑀇𑀥 𑀦𑀢𑁆𑀣𑀺. 𑀓𑀲𑁆𑀫𑀸. 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁄 𑀅𑀯𑀺𑀧𑀸𑀓 𑀥𑀫𑁆𑀫𑀢𑁄 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀬𑀸𑀘𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀲𑀘𑁆𑀘𑀁. 𑀢𑀢𑁆𑀣 𑀧𑀦 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁄 𑀓𑀫𑁆𑀫𑀤𑁆𑀯𑀸𑀭 𑀪𑁂𑀤𑁄 𑀇𑀥 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀏𑀯𑀁 𑀪𑁂𑀤𑀲𑁆𑀲 𑀅𑀪𑀸𑀯𑀁 𑀯𑀤𑀢𑀺. 𑀅𑀯𑀺𑀧𑀸𑀓𑀥𑀫𑁆𑀫𑀢𑁄 𑀓𑀫𑁆𑀫𑀧𑀣𑀪𑁂𑀤𑁄 𑀇𑀥 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀤𑀲𑀯𑀺𑀥𑀲𑁆𑀲 𑀓𑀫𑁆𑀫𑀧𑀣𑀪𑁂𑀤𑀲𑁆𑀲 𑀅𑀪𑀸𑀯𑀁 𑀯𑀤𑀢𑀺. 𑀇𑀥𑀧𑀦 𑀓𑀼𑀲𑀮𑁂𑀲𑀼𑀧𑀺 𑀓𑀫𑁆𑀫𑀧𑀣𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭 𑀪𑁂𑀤𑀪𑀺𑀦𑁆𑀦𑀁 𑀓𑀫𑁆𑀫𑀢𑁆𑀢𑀺𑀓𑀫𑁂𑀯 𑀕𑀳𑀺𑀢𑀁. 𑀢𑀜𑁆𑀘 𑀯𑀺𑀜𑁆𑀜𑀢𑁆𑀢𑀺 𑀲𑀫𑀼𑀝𑁆𑀞𑀸𑀧𑀦𑀸 𑀪𑀸𑀯𑀢𑁄 𑀢𑀺𑀯𑀺𑀥𑀓𑀫𑁆𑀫𑀤𑁆𑀯𑀸𑀭𑀯𑀲𑁂𑀦 𑀦𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑀁. 𑀬𑀤𑀺𑀘 𑀳𑁂𑀝𑁆𑀞𑀸 𑀓𑀼𑀲𑀮𑁂𑀲𑀼𑀧𑀺 𑀤𑀲𑀯𑀺𑀥𑀓𑀫𑁆𑀫𑀧𑀣𑀪𑁂𑀤𑀯𑀲𑁂𑀦 𑀯𑀺𑀲𑀼𑀁 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁 𑀲𑀺𑀬𑀸. 𑀏𑀯𑀁𑀲𑀢𑀺 𑀇𑀥𑀧𑀺 𑀅𑀯𑀺𑀧𑀸𑀓𑀲𑀪𑀸𑀯𑀢𑁄 𑀓𑀫𑁆𑀫𑀧𑀣𑀯𑀲𑁂𑀦 𑀦𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺.

𑁪𑁫. 𑀫𑀳𑀸𑀓𑁆𑀭𑀺𑀬𑀘𑀺𑀢𑁆𑀢𑁂𑀲𑀼𑀧𑀺 𑀫𑀳𑀸𑀯𑀺𑀧𑀸𑀓𑁂𑀲𑀼𑀯𑀺𑀬 𑀆𑀭𑀫𑁆𑀫𑀡 𑀯𑀲𑁂𑀦𑁂𑀯 𑀯𑁂𑀤𑁂𑀦𑀸𑀪𑁂𑀤𑁄 𑀉𑀧𑀭𑀺 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢, 𑀯𑀺𑀧𑁆𑀧𑀬𑀼𑀢𑁆𑀢, 𑀅𑀲𑀗𑁆𑀔𑀸𑀭𑀺𑀓, 𑀲𑀲𑀗𑁆𑀔𑀸𑀭𑀺𑀓𑀪𑁂𑀤𑁄𑀧𑀦 𑀬𑀣𑀸𑀭𑀳𑀁 𑀓𑀼𑀲𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

[𑁪𑁨] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀢𑀣𑀸 𑀅𑀯𑀺𑀘𑀸𑀭𑁂𑀢𑁆𑀯𑀸 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀁𑀧𑀺 𑀓𑀼𑀲𑀮𑁂 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀭𑀳𑀁 𑀲𑁄𑀫𑀦𑀲𑁆𑀲 𑀲𑀳𑀕𑀢𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀬𑀼𑀚𑁆𑀚𑀢𑀺.

𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀻𑀢𑀺 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀳𑁂𑀢𑀼𑀓 𑀓𑀸𑀫𑀸𑀯𑀘𑀭 𑀓𑀼𑀲𑀮 𑀯𑀺𑀧𑀸𑀓 𑀓𑁆𑀭𑀺𑀬 𑀘𑀺𑀢𑁆𑀢𑀸𑀦𑀻𑀢𑀺 𑀏𑀢𑁆𑀣 𑀲𑀳𑁂𑀢𑀼 𑀓𑀕𑁆𑀕𑀳𑀡𑀁 𑀓𑀼𑀲𑀮 𑀲𑀤𑁆𑀤 𑀲𑀫𑁆𑀩𑀦𑁆𑀥𑁂 𑀪𑀽𑀢𑀓𑀣𑀦 𑀯𑀺𑀲𑁂𑀲𑀦𑀁. 𑀢𑁂𑀦𑁂𑀯𑀳𑀺 𑀢𑀁 𑀓𑀼𑀲𑀮𑀘𑀺𑀢𑁆𑀢𑀸𑀦𑀁 𑀘𑀽𑀴𑀦𑀺𑀕𑀫𑁂𑀦 𑀕𑀳𑀺𑀢𑀁. 𑀯𑀺𑀧𑀸𑀓 𑀓𑁆𑀭𑀺𑀬 𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀧𑀦 𑀩𑁆𑀬𑀯𑀘𑁆𑀙𑁂𑀤𑀓𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁.

[𑁪𑁩] 𑀯𑀺𑀪𑀸𑀯𑀦𑀺𑀬𑀁 𑀧𑀦

𑀲𑀓𑁆𑀔𑀭𑀓𑀣𑀮𑀺𑀓𑀁𑀧𑀺 𑀫𑀘𑁆𑀙𑀕𑀼𑀫𑁆𑀩𑀁𑀧𑀺 𑀢𑀺𑀝𑁆𑀞𑀦𑁆𑀢𑀁𑀧𑀺 𑀘𑀭𑀦𑁆𑀢𑀁𑀧𑀺 𑀧𑀲𑁆𑀲𑀢𑀻𑀢𑀺 𑀲𑀼𑀢𑁆𑀢𑀧𑀤𑁂 𑀯𑀺𑀬 𑀇𑀥 𑀬𑀣𑀸𑀮𑀸𑀪 𑀬𑁄𑀚𑀦𑀸𑀢𑀺 𑀯𑀼𑀢𑁆𑀢𑀁. 𑀢𑀁 𑀦 𑀲𑀫𑁂𑀢𑀺. 𑀢𑀢𑁆𑀣𑀳𑀺 𑀲𑀓𑁆𑀔𑀭𑀓𑀣𑀮𑀺𑀓𑀁𑀦𑀸𑀫 𑀦𑀘𑀭𑀢𑀻𑀢𑀺 𑀬𑀼𑀢𑁆𑀢𑀁. 𑀇𑀥𑀧𑀦 𑀓𑀼𑀲𑀮𑀁 𑀲𑀳𑁂𑀢𑀼𑀓𑀁 𑀦𑀳𑁄𑀢𑀻𑀢𑀺 𑀦𑀬𑀼𑀢𑁆𑀢𑀫𑁂𑀢𑀦𑁆𑀢𑀺.

𑁪𑁬. 𑀲𑀗𑁆𑀕𑀳𑀕𑀸𑀣𑀸𑀬𑀁 𑀯𑁂𑀤𑀦𑀸 𑀜𑀸𑀡 𑀲𑀗𑁆𑀔𑀸𑀭 𑀪𑁂𑀤𑁂𑀦𑀸𑀢𑀺 𑀯𑁂𑀤𑀦𑀸𑀪𑁂𑀤𑁂𑀦, 𑀜𑀸𑀡𑀪𑁂𑀤𑁂𑀦, 𑀲𑀗𑁆𑀔𑀸𑀭𑀪𑁂𑀤𑁂𑀦𑀘. 𑀢𑀢𑁆𑀣 𑀯𑁂𑀤𑀦𑀸 𑀪𑁂𑀤𑁂𑀦𑀸𑀢𑀺 𑀯𑁂𑀤𑀦𑀸𑀪𑁂𑀤𑀲𑀺𑀤𑁆𑀥𑁂𑀦 𑀘𑀺𑀢𑁆𑀢𑀪𑁂𑀤𑁂𑀦, 𑀜𑀸𑀡𑀪𑁂𑀤𑁂𑀦𑀸𑀢𑀺 𑀜𑀸𑀡𑀬𑁄𑀕𑀸 𑀬𑁄𑀕𑀲𑀺𑀤𑁆𑀥𑁂𑀦𑀘𑀺𑀢𑁆𑀢𑀪𑁂𑀤𑁂𑀦. 𑀲𑀗𑁆𑀔𑀸𑀭𑀪𑁂𑀤𑁂𑀦𑀸𑀢𑀺 𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀲𑀳𑀘 𑀧𑀯𑀢𑁆𑀢𑀧𑀘𑁆𑀘𑀬𑀕𑀡𑀪𑁂𑀤𑀲𑀺𑀤𑁆𑀥𑁂𑀦 𑀘𑀺𑀢𑁆𑀢𑀪𑁂𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀲𑀫𑀸𑀲𑀧𑀤𑀸𑀦𑀁 𑀲𑀸𑀫𑀢𑁆𑀣𑀺𑀬𑀁, 𑀬𑀤𑀺𑀤𑀁 𑀲𑀼𑀯𑀺𑀜𑁆𑀜𑀸𑀢𑀸𑀦𑀁 𑀦𑀸𑀦𑀸𑀧𑁆𑀧𑀓𑀸𑀭𑀸𑀦𑀁 𑀧𑀤𑀢𑁆𑀣𑀸𑀦𑀁 𑀅𑀧𑁆𑀧𑀓𑁂𑀦 𑀩𑁆𑀬𑀜𑁆𑀚𑀦𑁂𑀦 𑀤𑀻𑀧𑀦𑀲𑀫𑀢𑁆𑀣𑀢𑀸𑀢𑀺.

[𑁪𑁪] 𑀏𑀢𑁂𑀦 𑀯𑀺𑀪𑀸𑀯𑀦𑀺𑀬𑀁

𑀲𑀬𑀁 𑀅𑀪𑀺𑀦𑁆𑀦𑀸𑀦𑀁 𑀜𑀸𑀡𑀲𑀗𑁆𑀔𑀸𑀭𑀸𑀦𑀁 𑀪𑁂𑀤𑀯𑀘𑀦𑁂 𑀘𑀺𑀢𑁆𑀢𑀲𑁆𑀲 𑀪𑁂𑀤𑀓𑀭 𑀪𑀸𑀯𑁂 𑀘 𑀘𑁄𑀤𑀦𑀸𑀬 𑀅𑀦𑁄𑀓𑀸𑀲𑀢𑀸 𑀲𑀸𑀥𑀺𑀢𑀸 𑀳𑁄𑀢𑀻𑀢𑀺.

𑀢𑀢𑁆𑀭𑀸𑀬𑀁 𑀬𑁄𑀚𑀦𑀸. 𑀲𑀳𑁂𑀢𑀼 𑀓𑀸𑀫𑀸𑀯𑀘𑀭 𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸 𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭𑀪𑁂𑀤𑁂𑀦 𑀬𑀣𑀸𑀓𑁆𑀓𑀫𑀁 𑀙𑀘 𑀤𑁆𑀯𑀸𑀤𑀲𑀘 𑀘𑀢𑀼𑀯𑀻𑀲𑀢𑀺 𑀘 𑀫𑀢𑀸𑀢𑀺. 𑀏𑀢𑁆𑀣𑀘 𑁋

𑀯𑁂𑀤𑀦𑀸𑀜𑀸𑀡𑀲𑀗𑁆𑀔𑀸𑀭, 𑀪𑁂𑀤𑁂𑀦𑁂𑀢𑀸𑀦𑀺 𑀅𑀝𑁆𑀞𑀥𑀸;

𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑀸, 𑀘𑀢𑀼𑀯𑀻𑀲𑀢𑀺𑀯𑀺𑀥𑀸 𑀫𑀓𑀸 𑀢𑀺𑀧𑀺.

𑀯𑀢𑁆𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀲𑀢𑀺 𑀅𑀢𑁆𑀣𑀕𑀢𑀺𑀘 𑀯𑀺𑀲𑀤𑀸 𑀳𑁄𑀢𑀺. 𑀉𑀧𑀭𑀺 𑀯𑀓𑁆𑀔, 𑀫𑀸𑀦𑀸𑀳𑀺𑀘 𑀲𑀗𑁆𑀕𑀳𑀕𑀸𑀣𑀸𑀳𑀺 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺.

𑁪𑁭. 𑀓𑀸𑀫𑁂𑀢𑀺𑀆𑀤𑀺 𑀲𑀩𑁆𑀩𑁂𑀲𑀁 𑀓𑀸𑀫𑀘𑀺𑀢𑁆𑀢𑀸𑀦𑀁 𑀲𑀗𑁆𑀕𑀳𑀕𑀸𑀣𑀸. 𑀢𑀢𑁆𑀣 𑀓𑀸𑀫𑁂 𑀓𑀸𑀫𑀪𑀽𑀫𑀺𑀬𑀁 𑀧𑀸𑀓𑀸𑀦𑀺 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀲𑀩𑁆𑀩𑀸𑀦𑀺 𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀢𑁂𑀯𑀻𑀲. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀓𑀼𑀲𑀮𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺𑀘 𑀯𑀻𑀲𑀢𑀺. 𑀓𑁆𑀭𑀺𑀬𑀸𑀘 𑀲𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀲𑁂𑀦 𑀲𑀩𑁆𑀩𑀸𑀦𑀺 𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀧𑀦 𑀏𑀓𑀸𑀤𑀲 𑀳𑁄𑀦𑁆𑀢𑀺. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑀘𑀢𑀼𑀧𑁆𑀧𑀜𑁆𑀜𑀸𑀲 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀣𑀸𑀢𑀺 𑀘𑁂𑀢𑁆𑀣 𑀯𑀺𑀲𑀤𑁆𑀤𑁄 𑀮𑀼𑀢𑁆𑀢 𑀦𑀺𑀤𑁆𑀤𑀺𑀝𑁆𑀞𑁄. 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀘𑀢𑀼𑀧𑁆𑀧𑀜𑁆𑀜𑀸𑀲𑀏𑀯. 𑀯𑀺𑀪𑀗𑁆𑀕𑁂 𑀯𑀺𑀪𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺 𑀘𑀢𑀼𑀧𑁆𑀧𑀜𑁆𑀜𑀸𑀲 𑀏𑀯𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯𑀸𑀢𑀺.

[𑁪𑁫] 𑀏𑀢𑁂𑀦 𑀯𑀺𑀪𑀸𑀯𑀦𑀺𑀬𑀁

𑀇𑀥 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀸𑀤𑀻𑀦𑀁 𑀅𑀦𑁆𑀢𑁄𑀕𑀥𑀪𑁂𑀤𑀯𑀲𑁂𑀦 𑀢𑀲𑁆𑀲 𑀅𑀢𑁆𑀣𑀯𑀺𑀪𑀸𑀯𑀦𑀸 𑀧𑀝𑀺𑀲𑀺𑀤𑁆𑀥𑀸 𑀳𑁄𑀢𑀺.

[𑁪𑁬] 𑀬𑀜𑁆𑀘 𑀯𑀺𑀪𑀸𑀯𑀦𑀺𑀬𑀁

𑀓𑀸𑀫𑁂 𑀪𑀯𑁂𑀢𑀺 𑀯𑀼𑀢𑁆𑀢𑀁. 𑀢𑀁𑀧𑀺 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀪𑀯𑀲𑀤𑁆𑀤𑁄 𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀲𑀼 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁂𑀲𑀼𑀘 𑀯𑀺𑀧𑀸𑀓 𑀓𑀝𑀢𑁆𑀢𑀸𑀭𑀽𑀧𑁂𑀲𑀼 𑀯𑀢𑁆𑀢𑀫𑀸𑀦𑁄 𑀅𑀪𑀺𑀥𑀫𑁆𑀫𑁂 𑀤𑀺𑀝𑁆𑀞𑁄. 𑀦 𑀢𑀤𑀜𑁆𑀜𑁂𑀲𑀼 𑀦𑀸𑀫𑀭𑀽𑀧𑀥𑀫𑁆𑀫𑁂𑀲𑀽𑀣𑀺. 𑀪𑀽𑀫𑀺𑀧𑀭𑀺𑀬𑀸𑀬𑁄𑀘 𑀇𑀥 𑀓𑀸𑀫𑀲𑀤𑁆𑀤𑁄. 𑀪𑀽𑀫𑀻𑀢𑀺𑀘 𑀲𑀳𑁄𑀓𑀸𑀲𑁄 𑀇𑀦𑁆𑀤𑁆𑀭𑀺𑀬𑀸 𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀥𑀫𑁆𑀫𑀲𑀫𑀽𑀳𑁄 𑀯𑀼𑀘𑁆𑀘𑀢𑀻𑀢𑀺 𑀓𑀸𑀫𑁂 𑀓𑀸𑀫𑀪𑀽𑀫𑀺𑀬𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀯𑁄𑀢𑀺𑀯𑀸 𑀪𑀽𑀫𑀺𑀏𑀯 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀲𑀗𑁆𑀔𑀸𑀭𑀸𑀘𑀸𑀢𑀺 𑀓𑀢𑁆𑀯𑀸. 𑀏𑀲𑀦𑀬𑁄 𑀧𑀭𑀢𑁆𑀣𑀧𑀻𑀢𑀺.

𑀇𑀢𑀺 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸𑀦𑀸𑀫 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀲𑁆𑀲

𑀘𑀢𑀼𑀢𑁆𑀣𑀯𑀡𑁆𑀡𑀦𑀸𑀬 𑀓𑀸𑀫𑀘𑀺𑀢𑁆𑀢𑀲𑁆𑀲

𑀧𑀭𑀫𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁮. 𑀏𑀯𑀁 𑀓𑀸𑀫𑀘𑀺𑀢𑁆𑀢𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀦𑀼𑀧𑁆𑀧𑀢𑁆𑀢𑀁 𑀭𑀽𑀧𑀘𑀺𑀢𑁆𑀢𑀲𑀗𑁆𑀕𑀳𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀲𑀳𑀺𑀢𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀢𑀓𑁆𑀓𑁄𑀘 𑀯𑀺𑀘𑀸𑀭𑁄𑀘 𑀧𑀻𑀢𑀺𑀘 𑀲𑀼𑀔𑀜𑁆𑀘 𑀏𑀓𑀕𑁆𑀕𑀢𑀸𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀢𑀸𑀳𑀺 𑀲𑀳𑀺𑀢𑀦𑁆𑀢𑀺 𑀲𑀫𑀸𑀲𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂 𑀓𑀕𑁆𑀕𑀢𑀸 𑀲𑀗𑁆𑀔𑀸𑀢𑁂𑀦𑀲𑀫𑀼𑀤𑀺𑀢𑁂𑀦𑀧𑀣𑀫𑀚𑁆𑀛𑀸𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁𑀓𑀼𑀲𑀮𑀘𑀺𑀢𑁆𑀢𑀁 𑀧𑀣𑀫𑀚𑁆𑀛𑀸𑀦𑀓𑀼𑀲𑀮𑀘𑀺𑀢𑁆𑀢𑀁. 𑀢𑀢𑁆𑀣 𑀓𑁂𑀦𑀝𑁆𑀞𑁂𑀦𑀧𑀣𑀫𑀁, 𑀓𑁂𑀦𑀝𑁆𑀞𑁂𑀦𑀘 𑀛𑀸𑀦𑀦𑁆𑀢𑀺. 𑀆𑀤𑀺𑀢𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀧𑀣𑀫𑀁. 𑀓𑀲𑀺𑀡𑀸𑀤𑀺𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀲𑁆𑀲𑀘 𑀉𑀧𑀦𑀺𑀚𑁆𑀛𑀸𑀬𑀦𑀢𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀜𑁆𑀘 𑀛𑀸𑀧𑀦𑀢𑁄 𑀤𑀬𑁆𑀳𑀦𑀢𑁄 𑀛𑀸𑀦𑀁. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀏𑀓𑀕𑁆𑀕𑀢𑀸𑀏𑀯 𑀲𑀸𑀢𑀺 𑀲𑀬𑀬𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀸𑀳𑀺 𑀏𑀓𑀢𑁆𑀢𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑁄 𑀏𑀓𑁄 𑀅𑀕𑁆𑀕𑁄𑀓𑁄𑀝𑀺𑀓𑁄𑀝𑁆𑀞𑀸𑀲𑁄𑀯𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁂𑀦 𑀏𑀓𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀣𑀸𑀧𑀯𑀢𑁆𑀢𑀦𑁂 𑀆𑀥𑀺𑀧𑀘𑁆𑀘𑀕𑀼𑀡𑀬𑁄𑀕𑁂𑀦 𑀏𑀓𑀕𑁆𑀕𑀢𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀸𑀬𑁂𑀯 𑀘𑀺𑀢𑁆𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀏𑀓𑀲𑁆𑀫𑀺𑀁 𑀬𑁂𑀯𑀸𑀭𑀫𑁆𑀫𑀡𑁂 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀫𑁆𑀫𑀸𑀘 𑀆𑀥𑀺𑀬𑀢𑀺 𑀣𑀧𑁂𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀪𑀸𑀯𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀮𑀻𑀦𑀼𑀤𑁆𑀥𑀘𑁆𑀘𑀸𑀪𑀸𑀯𑀸𑀧𑀸𑀤𑀦𑁂𑀦 𑀲𑀫𑀜𑁆𑀘 𑀆𑀥𑀺𑀬𑀢𑀺 𑀣𑀧𑁂𑀢𑀻𑀢𑀺 𑀅𑀢𑁆𑀣𑁂𑀦 𑀲𑀫𑀸𑀥𑀻𑀢𑀺𑀘 𑀯𑀼𑀘𑁆𑀘𑀢𑀺. 𑀲𑀸𑀬𑁂𑀯𑀘 𑀧𑀸𑀴𑀺𑀬𑀁 𑀅𑀯𑀺𑀓𑁆𑀔𑁂𑀧𑁄 𑀅𑀯𑀺𑀲𑀸𑀳𑀸𑀭𑁄 𑀲𑀡𑁆𑀞𑀺𑀢𑀺 𑀅𑀯𑀝𑁆𑀞𑀺𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑀸𑀢𑀺. 𑀯𑀺𑀢𑀓𑁆𑀓𑀸𑀤𑀬𑁄𑀧𑀺 𑀧𑀦 𑀢𑀲𑁆𑀲𑀸 𑀲𑀸𑀢𑀺𑀲𑀬𑀁 𑀉𑀧𑀓𑀸𑀭𑀓𑀢𑁆𑀢𑀸 𑀛𑀸𑀦𑀦𑁆𑀢𑁂𑀯 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀯𑀺𑀢𑀓𑁆𑀓𑁄 𑀢𑀸𑀯 𑀘𑀺𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀯𑀲𑁂𑀦 𑀑𑀲𑀓𑁆𑀓𑀺𑀢𑀼𑀁 𑀅𑀤𑀢𑁆𑀯𑀸 𑀤𑀴𑁆𑀳𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀫𑁂𑀯 𑀓𑀭𑁄𑀢𑀺. 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦 𑀮𑀓𑁆𑀔𑀡𑁄𑀳𑀺 𑀯𑀺𑀢𑀓𑁆𑀓𑁄. 𑀣𑀺𑀦 𑀫𑀺𑀤𑁆𑀥𑀦𑀻𑀯𑀭𑀡𑀲𑁆𑀲𑀘 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑁄𑀢𑀺. 𑀯𑀺𑀘𑀸𑀭𑁄𑀘 𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀲𑀁𑀲𑀧𑁆𑀧𑀺𑀢𑀼𑀁 𑀅𑀤𑀢𑁆𑀯𑀸 𑀤𑀴𑁆𑀳𑀁 𑀆𑀭𑀫𑁆𑀫𑀡𑀸𑀦𑀼𑀩𑀦𑁆𑀥𑀫𑁂𑀯 𑀓𑀭𑁄𑀢𑀺. 𑀆𑀭𑀫𑁆𑀫𑀡𑀸𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀳𑀺 𑀯𑀺𑀘𑀸𑀭𑁄 𑀧𑀜𑁆𑀜𑀸𑀧𑀓𑀢𑀺𑀓𑁄. 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀲𑁆𑀲𑀘 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑁄𑀢𑀺. 𑀧𑀻𑀢𑀺𑀘 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑀯𑀲𑁂𑀦 𑀉𑀓𑁆𑀓𑀡𑁆𑀞𑀺𑀢𑀼𑀁 𑀅𑀤𑀢𑁆𑀯𑀸 𑀆𑀭𑀫𑁆𑀫𑀡𑁂 𑀧𑀭𑀺𑀢𑀼𑀝𑁆𑀞𑀫𑁂𑀯 𑀓𑀭𑁄𑀢𑀺. 𑀆𑀭𑀫𑁆𑀫𑀡𑀲𑀁𑀧𑀺 𑀬𑀸𑀬𑀦𑀮𑀓𑁆𑀔𑀡𑀸 𑀳𑀺 𑀧𑀻𑀢𑀺. 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀲𑁆𑀲𑀘 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀸𑀢𑀺. 𑀢𑀣𑀸 𑀲𑀼𑀔𑀜𑁆𑀘 𑀦𑀁 𑀉𑀤𑁆𑀥𑀘𑁆𑀘 𑀓𑀼𑀓𑁆𑀓𑀼𑀘𑁆𑀘𑀯𑀲𑁂𑀦 𑀅𑀯𑀽𑀧𑀲𑀫𑀺𑀢𑀼𑀁 𑀅𑀤𑀢𑁆𑀯𑀸 𑀆𑀭𑀫𑁆𑀫𑀡𑁂 𑀮𑀤𑁆𑀥𑀲𑀸𑀢𑀁 𑀉𑀧𑀩𑁆𑀭𑀽𑀳𑀺𑀢𑀁 𑀓𑀭𑁄𑀢𑀺. 𑀲𑀸𑀓𑀮𑀓𑁆𑀔𑀡𑀜𑁆𑀳𑀺 𑀲𑀼𑀔𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀲𑁆𑀲𑀘 𑀉𑀚𑀼𑀧𑁆𑀧𑀝𑀺𑀧𑀓𑁆𑀔𑀦𑁆𑀢𑀺.

𑀉𑀧𑁂𑀓𑁆𑀔𑀸𑀘 𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀲𑀼𑀔𑁂𑀏𑀯 𑀲𑀗𑁆𑀕𑀳𑀺𑀢𑀸𑀢𑀺. 𑀏𑀯𑀁 𑀓𑀭𑁄𑀦𑁆𑀢𑀸𑀘 𑀢𑁂 𑀥𑀫𑁆𑀫𑀸 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀼𑀝𑁆𑀞𑀼 𑀏𑀓𑀕𑁆𑀕𑀪𑀸𑀯𑀢𑁆𑀣𑀸𑀬𑀘 𑀳𑁄𑀦𑁆𑀢𑀺. 𑀏𑀓𑀕𑁆𑀕𑀪𑀸𑀯𑁄𑀢𑀺𑀘 𑀏𑀓𑀕𑁆𑀕𑀢𑀸𑀬𑁂𑀯. 𑀲𑀸𑀘 𑀏𑀓𑀕𑁆𑀕𑀢𑀸 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀢𑀣𑀸 𑀅𑀦𑀼𑀕𑁆𑀕𑀳𑀺𑀢𑀸 𑀲𑀼𑀝𑁆𑀞𑀼 𑀩𑀮𑀯𑀢𑀻 𑀳𑀼𑀢𑁆𑀯𑀸 𑀲𑀬𑀁 𑀓𑀸𑀫𑀘𑁆𑀙𑀦𑁆𑀤𑀯𑀲𑁂𑀦 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀯𑀺𑀥𑀸𑀯𑀦𑀁 𑀦𑀻𑀯𑀸𑀭𑁂𑀢𑁆𑀯𑀸 𑀓𑀲𑀺𑀡𑀦𑀺𑀫𑀺𑀢𑁆𑀢𑀸𑀤𑀺𑀓𑁂 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀁 𑀞𑀢𑁆𑀯𑀸 𑀢𑀁𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀚𑁆𑀛𑀸𑀬𑀢𑀺 𑀑𑀮𑁄𑀓𑁂𑀢𑀺. 𑀢𑀲𑁆𑀫𑀸 𑀢𑁂 𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀉𑀧𑀦𑀺𑀚𑁆𑀛𑀸𑀬𑀦𑀝𑁆𑀞𑁂𑀦𑀧𑀺 𑀛𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀢𑁂𑀲𑀼𑀘 𑀢𑀣𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑀧𑁆𑀧𑀘𑁆𑀘𑀦𑀻𑀓𑀸 𑀦𑀻𑀯𑀭𑀡𑀥𑀫𑁆𑀫𑀸 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀫𑀦𑀲𑁆𑀫𑀺𑀁𑀧𑀺 𑀧𑀭𑀺𑀬𑀼𑀝𑁆𑀞𑀺𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺. 𑀛𑀸𑀧𑀺𑀢𑀸𑀦𑀸𑀫 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀧𑀘𑁆𑀘𑀦𑀻𑀓𑀚𑁆𑀛𑀸𑀧𑀦𑀝𑁆𑀞𑁂𑀦𑀧𑀺 𑀛𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀛𑀸𑀦 𑀫𑀕𑁆𑀕 𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀥𑀫𑁆𑀫𑀲𑀸𑀫𑀕𑁆𑀕𑀻 𑀧𑀥𑀸𑀦𑀁 𑀳𑁄𑀢𑀺. 𑀅𑀗𑁆𑀕𑀸𑀦𑀁 𑀲𑀫𑀕𑁆𑀕𑀪𑀸𑀯𑁂𑀏𑀯 𑀅𑀧𑁆𑀧𑀦𑀸𑀧𑀢𑁆𑀢𑀺𑀯𑀲𑁂𑀦 𑀉𑀧𑀦𑀺𑀚𑁆𑀛𑀸𑀬 𑀦𑀸𑀤𑀺 𑀓𑀺𑀘𑁆𑀘𑀲𑀁𑀲𑀺𑀤𑁆𑀥𑀺𑀢𑁄. 𑀬𑀲𑁆𑀫𑀸𑀘 𑀏𑀢𑁂 𑀥𑀫𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀼𑀁𑀯𑀺𑀲𑀼𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀧𑀺 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀧𑁆𑀧𑀯𑀢𑁆𑀢𑀺 𑀲𑀗𑁆𑀔𑀸𑀢𑀁 𑀏𑀓𑀫𑁂𑀯 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺. 𑀢𑀲𑁆𑀫𑀸 𑀭𑀣𑀗𑁆𑀕𑀸𑀦𑀁 𑀲𑀫𑀼𑀤𑀸𑀬𑁂𑀏𑀯 𑀭𑀣𑀯𑁄𑀳𑀸𑀭𑁄𑀯𑀺𑀬 𑀢𑁂𑀲𑀁 𑀲𑀫𑀼𑀤𑀸𑀬𑁂𑀏𑀯 𑀛𑀸𑀦 𑀯𑁄𑀳𑀸𑀭𑁄 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀭𑁂𑀧𑀦 𑀧𑀜𑁆𑀘𑀦𑁆𑀦𑀁𑀧𑀺 𑀢𑁂𑀲𑀁 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀸𑀤𑀻𑀦𑀺 𑀬𑀣𑀸𑀲𑀓𑀁 𑀓𑀺𑀘𑁆𑀘𑀸𑀦𑀺𑀬𑁂𑀯 𑀯𑀺𑀲𑀼𑀁 𑀯𑀺𑀲𑀼𑀁 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀸𑀦𑀺𑀦𑀸𑀫 𑀳𑁄𑀦𑁆𑀢𑀻𑀢𑀺 𑀧𑀝𑁆𑀞𑀸𑀦𑁂 𑀛𑀸𑀦𑀧𑀘𑁆𑀘𑀬𑀁 𑀧𑀢𑁆𑀯𑀸 𑀲𑀩𑁆𑀩𑁂𑀧𑁂𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀛𑀸𑀦𑀧𑀘𑁆𑀘𑀬𑀁 𑀲𑀸𑀥𑁂𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀢𑁂 𑀯𑀺𑀲𑀼𑀁 𑀯𑀺𑀲𑀼𑀁𑀧𑀺 𑀛𑀸𑀦𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀬𑀣𑀸𑀘 𑀧𑀜𑁆𑀘𑀗𑁆𑀕𑀺𑀓𑀁 𑀲𑀻𑀮𑀁 𑀤𑀲𑀗𑁆𑀕𑀺𑀓𑀁 𑀲𑀻𑀮𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀲𑀫𑀼𑀤𑀺𑀢𑀸𑀤𑀻𑀦𑀺 𑀢𑁂𑀲𑀁 𑀲𑀻𑀮𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀸 𑀤𑀺𑀦𑀸𑀫𑀮𑀸𑀪𑀲𑁆𑀲𑁂𑀯 𑀓𑀸𑀭𑀡𑀸𑀦𑀺 𑀳𑁄𑀦𑁆𑀢𑀺. 𑀦 𑀲𑀻𑀮𑀪𑀸𑀯𑀲𑁆𑀲. 𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀸𑀤𑀺𑀓𑀁 𑀏𑀓𑀁𑀧𑀺 𑀲𑀫𑀸𑀦𑀁 𑀲𑀻𑀮𑀁𑀦𑀸𑀫 𑀦 𑀳𑁄𑀢𑀻𑀢𑀺. 𑀏𑀯𑀫𑁂𑀯𑀁 𑀇𑀥𑀧𑀺 𑀧𑀜𑁆𑀘𑀲𑀫𑀼𑀤𑀺𑀢𑀸𑀤𑀻𑀦𑀺 𑀧𑀜𑁆𑀘𑀗𑁆𑀕𑀺𑀓𑀸𑀤𑀺 𑀪𑀸𑀯𑀲𑁆𑀲𑁂𑀯 𑀧𑀣𑀫𑀚𑁆𑀛𑀸𑀦𑀸𑀤𑀺 𑀪𑀸𑀯𑀲𑁆𑀲𑁂𑀯𑀘 𑀓𑀸𑀭𑀡𑀸𑀦𑀺. 𑀦𑀧𑀦 𑀛𑀸𑀦𑀪𑀸𑀯𑀲𑁆𑀲𑀸𑀢𑀺 𑀦𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀇𑀢𑀭𑀣𑀸 𑀛𑀸𑀦𑀧𑀘𑁆𑀘𑀬𑁂 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀦𑀺𑀬𑀸𑀦𑀺𑀬𑁂𑀯 𑀲𑀺𑀬𑀼𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀢𑀺𑀧𑀺 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀨𑀲𑁆𑀲𑀸𑀤𑀻𑀳𑀺𑀧𑀺 𑀲𑀳𑀺𑀢𑀪𑀸𑀯𑁂 𑀢𑁂𑀲𑀁 𑀢𑀣𑀸𑀯𑀺𑀥𑀓𑀺𑀘𑁆𑀘𑀯𑀺𑀲𑁂𑀲𑀸𑀪𑀸𑀯𑀸 𑀇𑀥 𑀅𑀕𑁆𑀕𑀳𑀡𑀦𑁆𑀢𑀺𑀧𑀺 𑀲𑀺𑀤𑁆𑀥𑀁 𑀦𑀳𑁄𑀢𑀻𑀢𑀺. 𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸 𑀲𑀗𑁆𑀔𑀸𑀢𑁂𑀦 𑀤𑀼𑀢𑀻𑀬𑀚𑁆𑀛𑀸𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀤𑀼𑀢𑀻𑀬𑀚𑁆𑀛𑀸𑀦 𑀓𑀼𑀲𑀮𑀘𑀺𑀢𑁆𑀢𑀁, 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑁪𑁯. 𑀏𑀢𑁆𑀣 𑀲𑀺𑀬𑀸. 𑀓𑁂𑀦𑀧𑀦 𑀇𑀫𑁂𑀲𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑁂𑀤𑁄 𑀓𑀢𑁄𑀢𑀺. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀓𑀢𑁄𑀢𑀺. 𑀬𑁄𑀳𑀺 𑀯𑀺𑀢𑀓𑁆𑀓𑀲𑀳𑀸𑀬𑁄 𑀳𑀼𑀢𑁆𑀯𑀸 𑀧𑀜𑁆𑀘𑀗𑁆𑀕𑀺𑀓𑀁 𑀧𑀣𑀫𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀯𑀲𑀻𑀪𑀸𑀯𑀁 𑀓𑀢𑁆𑀯𑀸 𑀧𑀼𑀦𑀯𑀺𑀢𑀓𑁆𑀓𑁂 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀢𑀲𑁆𑀲 𑀯𑀺𑀢𑀓𑁆𑀓𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀯𑀺𑀢𑀓𑁆𑀓𑀁 𑀘𑀢𑀼𑀭𑀗𑁆𑀕𑀺𑀓𑀁 𑀛𑀸𑀦𑀁 𑀅𑀥𑀺𑀕𑀦𑁆𑀢𑀼𑀁 𑀅𑀚𑁆𑀛𑀸𑀲𑀬𑁄 𑀲𑀡𑁆𑀞𑀸𑀢𑀺. 𑀢𑀤𑀸 𑀲𑁄 𑀢𑀫𑁂𑀯 𑀧𑀣𑀫𑀚𑁆𑀛𑀸𑀦𑀁 𑀧𑀸𑀤𑀓𑀪𑀸𑀯𑀢𑁆𑀣𑀸𑀬 𑀤𑀴𑁆𑀳𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑁂𑀦 𑀅𑀚𑁆𑀛𑀸𑀲𑀬𑁂𑀦 𑀲𑀳𑁂𑀯 𑀧𑀼𑀦𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀯𑀺𑀢𑀓𑁆𑀓𑀁 𑀘𑀢𑀼𑀭𑀗𑁆𑀕𑀺𑀓𑀁 𑀛𑀸𑀦𑀁 𑀅𑀥𑀺𑀕𑀘𑁆𑀙𑀢𑀺. 𑀢𑀢𑁆𑀣 𑀲𑀸 𑀪𑀸𑀯𑀦𑀸𑀲𑀬𑀁 𑀯𑀺𑀢𑀓𑁆𑀓𑀬𑀼𑀢𑁆𑀢𑀸𑀧𑀺 𑀢𑁂𑀦 𑀅𑀚𑁆𑀛𑀸𑀲𑀬𑁂𑀦 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀭𑀸𑀕 𑀪𑀸𑀯𑀦𑀸𑀦𑀸𑀫 𑀳𑁄𑀢𑀺. 𑀢𑀲𑁆𑀲𑀸 𑀪𑀸𑀯𑀦𑀸𑀬. 𑀩𑀮𑁂𑀦 𑀢𑀁 𑀛𑀸𑀦𑀁 𑀉𑀧𑁆𑀧𑀚𑁆𑀚 𑀫𑀸𑀦𑀁 𑀅𑀯𑀺𑀢𑀓𑁆𑀓𑀁 𑀘𑀢𑀼𑀭𑀗𑁆𑀕𑀺𑀓𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀚𑁆𑀛𑀸𑀦𑀸𑀥𑀺𑀕𑀫𑁂𑀲𑀼𑀧𑀺 𑀏𑀲𑁂𑀯𑀦𑀬𑁄𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀢𑁂𑀲𑀁 𑀛𑀸𑀦𑀸𑀦𑀁 𑀅𑀗𑁆𑀕𑀪𑁂𑀤𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀘 𑀉𑀢𑁆𑀢𑀭𑀼𑀢𑁆𑀢𑀭𑀚𑁆𑀛𑀸𑀦𑀸 𑀥𑀺𑀕𑀫𑀦𑁂 𑀧𑀸𑀤𑀓𑀪𑀸𑀯𑀢𑁆𑀣𑀸𑀬 𑀧𑀼𑀭𑀺𑀫𑀧𑀼𑀭𑀺𑀫𑀚𑁆𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀅𑀯𑀲𑁆𑀲𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀧𑀕𑀼𑀡𑀚𑁆𑀛𑀸𑀦𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀤𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀚𑁆𑀛𑀸𑀲𑀬𑀩𑀮𑁂𑀦𑀧𑀦 𑀉𑀢𑁆𑀢𑀭𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑀁 𑀦𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀢𑁄𑀳𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄𑀯 𑀩𑀮𑀯𑀢𑀭𑁄. 𑀢𑁂𑀦𑀸𑀳 𑀪𑀕𑀯𑀸 𑀇𑀚𑁆𑀛𑀢𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀉𑀧𑀭𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀁 𑀧𑀢𑁆𑀯𑀸 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺.

𑁫𑁦. 𑀏𑀢𑁆𑀣 𑀲𑀺𑀬𑀸. 𑀓𑀲𑁆𑀫𑀸 𑀇𑀥 𑀲𑀗𑁆𑀔𑀸𑀭𑀪𑁂𑀤𑁄 𑀦𑀯𑀼𑀢𑁆𑀢𑁄𑀢𑀺. 𑀧𑀸𑀴𑀺𑀬𑀫𑁂𑀯 𑀅𑀯𑀼𑀢𑁆𑀢𑀢𑁆𑀢𑀸. 𑀓𑀲𑁆𑀫𑀸𑀘 𑀲𑁄 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑁄𑀢𑀺. 𑀧𑀝𑀺𑀧𑀤𑀸 𑀪𑁂𑀤𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸𑀢𑀺. 𑀢𑀣𑀸𑀳𑀺 𑀲𑀩𑁆𑀩𑁂𑀲𑀁𑀧𑀺 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀸𑀦𑀁 𑀲𑀼𑀔𑀧𑁆𑀧𑀝𑀺𑀧𑀤𑀪𑀸𑀯𑁂 𑀲𑀺𑀤𑁆𑀥𑁂 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀺. 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀪𑀸𑀯𑁂𑀘 𑀲𑀺𑀤𑁆𑀥𑁂 𑀢𑁂𑀲𑀁 𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯 𑀳𑁄𑀢𑀻𑀢𑀺. 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁂. 𑀅𑀝𑁆𑀞𑀓𑀣𑀸𑀤𑀲𑁆𑀲𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 -

𑀬𑁄 𑀆𑀤𑀺𑀢𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀢𑀲𑁆𑀲 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀬𑁄 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀼𑀔𑁂𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀢𑀲𑁆𑀲 𑀲𑀼𑀔𑀸𑀧𑀝𑀺𑀧𑀤𑀸 𑀳𑁄𑀢𑀻𑀢𑀺.

𑀢𑀣𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀻 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀲𑀼𑀧𑀻𑀢𑀺. 𑀏𑀢𑁆𑀣𑀘 𑀧𑀼𑀩𑁆𑀩𑀯𑀸𑀓𑁆𑀬𑁂 𑀤𑀼𑀓𑁆𑀔𑁂𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦𑀸𑀢𑀺 𑀤𑀺𑀝𑁆𑀞𑀢𑁆𑀢𑀸 𑀧𑀭𑀯𑀸𑀓𑁆𑀬𑁂𑀧𑀺 𑀲𑀼𑀔𑁂 𑀦 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦𑀸𑀢𑀺 𑀲𑀗𑁆𑀔𑀸𑀭𑀧𑁆𑀧𑀬𑁄𑀕𑀲𑀳𑀺𑀢𑁂𑀦 𑀓𑀸𑀫𑀸𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀦𑀸 𑀧𑀘𑁆𑀘𑀬𑀕𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀩𑁆𑀩𑁂𑀲𑀁 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀚𑁆𑀛𑀸𑀦𑀸𑀦𑀁 𑀲𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦𑀸𑀢𑀺 𑀲𑀗𑁆𑀔𑀸𑀭𑀧𑁆𑀧𑀬𑁄𑀕𑀭𑀳𑀺𑀢𑁂𑀦 𑀢𑁂𑀦𑁂𑀯 𑀧𑀘𑁆𑀘𑀬𑀕𑀡𑁂𑀦. 𑀏𑀢𑁂𑀦 𑀲𑀩𑁆𑀩𑁂𑀲𑀁 𑀲𑀼𑀔𑀧𑁆𑀧𑀝𑀺𑀧𑀤𑀚𑁆𑀛𑀸𑀦𑀸𑀦𑀁 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺. 𑀔𑀺𑀧𑁆𑀧𑀸𑀪𑀺𑀜𑁆𑀜𑀚𑁆𑀛𑀸𑀦𑀸𑀦𑀁𑀧𑀺𑀳𑀺 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀪𑀸𑀯𑁂 𑀲𑀢𑀺 𑀲𑀲𑀗𑁆𑀔𑀸𑀭𑀺𑀓𑀢𑀸𑀯 𑀯𑀺𑀜𑁆𑀜𑀸𑀬𑀢𑀺. 𑀤𑀦𑁆𑀥𑀪𑀺𑀜𑁆𑀜𑀚𑁆𑀛𑀸𑀦𑀸𑀦𑀁𑀧𑀺 𑀲𑀼𑀔𑀧𑁆𑀧𑀝𑀺𑀧𑀤𑀪𑀸𑀯𑁂 𑀲𑀢𑀺 𑀅𑀲𑀗𑁆𑀔𑀸𑀭𑀺𑀓𑀢𑀸𑀯 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀬𑀤𑀺𑀏𑀯𑀁 𑀧𑀝𑀺𑀧𑀤𑀸𑀭𑀳𑀺𑀢𑀸𑀦𑀁 𑀫𑀕𑁆𑀕 𑀲𑀺𑀤𑁆𑀥𑀉𑀧𑀧𑀢𑁆𑀢𑀺𑀲𑀺𑀤𑁆𑀥𑀚𑁆𑀛𑀸𑀦𑀸𑀦𑀁 𑀓𑀣𑀁 𑀲𑀗𑁆𑀔𑀸𑀭𑀪𑁂𑀤𑁄 𑀲𑀺𑀤𑁆𑀥𑁄𑀢𑀺. 𑀢𑁂𑀲𑀁𑀧𑀺 𑀯𑀴𑀜𑁆𑀚𑀦𑀓𑀸𑀮𑁂 𑀲𑀫𑀸𑀧𑀢𑁆𑀢𑀺𑀧𑁆𑀧𑀝𑀺𑀩𑀦𑁆𑀥𑀓𑀸𑀦𑀁 𑀧𑀘𑁆𑀘𑀬𑀸𑀦𑀁 𑀲𑀦𑁆𑀦𑀺𑀳𑀺𑀢𑀸 𑀲𑀦𑁆𑀦𑀺𑀳𑀺𑀢𑀯𑀲𑁂𑀦 𑀤𑀼𑀓𑁆𑀔𑀲𑀼𑀔𑀧𑁆𑀧𑀝𑀺𑀧𑀤𑀪𑀸𑀯𑀲𑀫𑁆𑀪𑀯𑁄 𑀳𑁄𑀢𑀺𑀬𑁂𑀯𑀸𑀢𑀺. 𑀢𑀢𑁆𑀣 𑀫𑀕𑁆𑀕𑀲𑀺𑀤𑁆𑀥𑀚𑁆𑀛𑀸𑀦𑀁𑀦𑀸𑀫 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀮𑀸𑀪𑁂𑀦 𑀲𑀳𑁂𑀯 𑀲𑀺𑀤𑁆𑀥𑀚𑁆𑀛𑀸𑀦𑀁. 𑀢𑀁 𑀤𑀼𑀯𑀺𑀥𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀺𑀤𑁆𑀥𑀁, 𑀅𑀭𑀳𑀢𑁆𑀢𑀫𑀕𑁆𑀕𑀲𑀺𑀤𑁆𑀥𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀲𑀫𑀬𑀲𑀼𑀢𑁆𑀢𑁂 𑀆𑀕𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀛𑀸𑀦𑀁 𑀳𑁂𑀝𑁆𑀞𑀺𑀫 𑀫𑀕𑁆𑀕𑀲𑀺𑀤𑁆𑀥𑀁. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀛𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀲𑀺𑀤𑁆𑀥𑀁. 𑀬𑀁𑀧𑀺 𑀅𑀦𑀸𑀕𑀸𑀫𑀻𑀦𑀁 𑀅𑀚𑀸𑀦𑀦𑁆𑀢𑀸𑀦𑀜𑁆𑀜𑁂𑀯 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀲𑀳𑀲𑀸 𑀫𑀭𑀦𑁆𑀢𑀸𑀦𑀁 𑀉𑀧𑁆𑀧𑀦𑁆𑀦𑀁. 𑀢𑀁𑀧𑀺 𑀫𑀕𑁆𑀕𑀲𑀺𑀤𑁆𑀥𑀕𑀢𑀺𑀓𑀁. 𑀬𑁄𑀧𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀪𑀸𑀯𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀽𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀢𑀸 𑀲𑀫𑀸𑀧𑀢𑁆𑀢𑀺 𑀬𑁄 𑀢𑀢𑁆𑀣 𑀧𑀸𑀓𑀢𑀺𑀓𑀸𑀏𑀯 𑀳𑁄𑀦𑁆𑀢𑀺. 𑀇𑀤𑀁 𑀉𑀧𑀧𑀢𑁆𑀢𑀺𑀲𑀺𑀤𑁆𑀥𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀪𑀯𑁂𑀧𑀺 𑀳𑀺 𑀮𑀤𑁆𑀥𑀚𑁆𑀛𑀸𑀦𑀸𑀦𑀺 𑀯𑀴𑀜𑁆𑀚𑀦𑀓𑀸𑀮𑁂 𑀲𑀦𑁆𑀦𑀺𑀳𑀺𑀢𑀧𑀘𑁆𑀘𑀬𑀯𑀲𑁂𑀦 𑀦𑀸𑀦𑀸𑀧𑀝𑀺𑀧𑀤𑀸𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀛𑀸𑀦𑀼𑀧𑁆𑀧𑀢𑁆𑀢𑀺𑀧𑁆𑀧𑀝𑀺𑀧𑀤𑀸 𑀭𑀳𑀺𑀢𑀢𑁆𑀢𑀸𑀯𑀸 𑀅𑀲𑀗𑁆𑀔𑀸𑀭𑀺𑀓𑀚𑁆𑀛𑀸𑀦𑁂𑀲𑀼 𑀢𑁂𑀲𑀁 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄 𑀲𑀺𑀬𑀸𑀢𑀺. 𑀅𑀧𑀺𑀘, 𑀦𑁂𑀢𑁆𑀢𑀺𑀧𑀸𑀴𑀺𑀬𑀁 𑀲𑀩𑁆𑀩𑁂𑀲𑀁 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀻𑀦𑀁 𑀲𑀗𑁆𑀔𑀸𑀭𑀪𑁂𑀤𑁄 𑀲𑀭𑀽𑀧𑀢𑁄𑀯 𑀦𑀺𑀤𑁆𑀤𑀺𑀝𑁆𑀞𑁄. 𑀬𑀣𑀸𑀳-𑀤𑁆𑀯𑁂 𑀲𑀫𑀸𑀥𑀬𑁄 𑀲𑀲𑀗𑁆𑀔𑀸𑀭𑁄 𑀲𑀫𑀸𑀥𑀺 𑀅𑀲𑀗𑁆𑀔𑀸𑀭𑁄 𑀲𑀫𑀸𑀥𑀻𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 𑀲𑀼𑀔𑀧𑁆𑀧𑀝𑀺𑀧𑀤𑀸 𑀧𑀼𑀩𑁆𑀩𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀦𑁆𑀥𑀸𑀪𑀺𑀜𑁆𑀜𑀔𑀺𑀧𑁆𑀧𑀸𑀪𑀺𑀜𑁆𑀜𑀲𑀫𑀸𑀥𑀻𑀦𑀁 𑀅𑀲𑀗𑁆𑀔𑀸𑀭𑀪𑀸𑀯𑁄 𑀤𑀼𑀓𑁆𑀔𑀧𑁆𑀧𑀝𑀺𑀧𑀤𑀸 𑀧𑀼𑀩𑁆𑀩𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀲𑀗𑁆𑀔𑀸𑀭𑀪𑀸𑀯𑁄𑀘 𑀯𑀼𑀢𑁆𑀢𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑁂𑀲𑀁 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀘𑀺𑀢𑁆𑀢𑀸𑀦𑀁 𑀅𑀲𑀗𑁆𑀔𑀸𑀭𑀺𑀓 𑀲𑀲𑀗𑁆𑀔𑀸𑀭𑀺𑀓𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀤𑀼𑀯𑀺𑀥𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀬𑀲𑁆𑀫𑀸𑀧𑀦 𑀅𑀬𑀁 𑀲𑀗𑁆𑀔𑀸𑀭𑀯𑁄𑀳𑀸𑀭𑁄 𑀅𑀓𑀼𑀲𑀮𑀸𑀦𑀁𑀧𑀺 𑀲𑀸𑀥𑀸𑀭𑀡𑁄. 𑀧𑀝𑀺𑀧𑀤𑀸𑀯𑁄𑀳𑀸𑀭𑁄𑀧𑀦 𑀯𑀺𑀲𑁂𑀲𑁂𑀦 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀲𑁆𑀯𑁂𑀯 𑀧𑀸𑀓𑀝𑁄. 𑀫𑀳𑀕𑁆𑀕𑀢 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀘 𑀏𑀓𑀦𑁆𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀸𑀏𑀯. 𑀢𑀲𑁆𑀫𑀸 𑀢𑁂𑀲𑀁 𑀪𑁂𑀤𑀁 𑀲𑀗𑁆𑀔𑀸𑀭𑀯𑀲𑁂𑀦 𑀅𑀯𑀢𑁆𑀯𑀸 𑀧𑀝𑀺𑀧𑀤𑀸𑀯𑀲𑁂𑀦𑁂𑀯 𑀥𑀫𑁆𑀫𑀲𑀗𑁆𑀕𑀡𑀺 𑀧𑀸𑀴𑀺𑀬𑀁𑀧𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀧𑀭𑀫𑀢𑁆𑀣𑀤𑀻𑀧𑀦𑀸.

𑁫𑁧. [𑁪𑁭] 𑀬𑀁𑀧𑀦 𑀯𑀺𑀪𑀸𑀯𑀦𑀺𑀬𑀁

‘‘𑀲𑀩𑁆𑀩𑀲𑁆𑀲𑀧𑀺 𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀅𑀥𑀺𑀓𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺𑀧𑀺. 𑀅𑀥𑀺𑀓𑀸𑀭𑁂𑀦𑀘 𑀯𑀺𑀦𑀸 𑀓𑁂𑀯𑀮𑀁 𑀧𑀭𑀺𑀓𑀫𑁆𑀫𑀸𑀪𑀺𑀲𑀗𑁆𑀓𑀸𑀭𑀯𑀲𑁂𑀦𑁂𑀯 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀲𑀲𑀗𑁆𑀔𑀸𑀭𑀺𑀓𑀦𑁆𑀢𑀺𑀧𑀺 𑀦𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢.𑀮. 𑀅𑀲𑀗𑁆𑀔𑀸𑀭𑀺𑀓𑀦𑁆𑀢𑀺𑀧𑀺 𑀦𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀇𑀤𑀁 𑀢𑀸𑀯 𑀦𑀬𑀼𑀚𑁆𑀚𑀢𑀺.

𑀦 𑀳𑀺 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄 𑀇𑀫𑀲𑁆𑀫𑀺𑀁 𑀲𑀗𑁆𑀔𑀸𑀭𑀪𑁂𑀤𑁂 𑀲𑀗𑁆𑀔𑀸𑀭𑁄 𑀏𑀯𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸, 𑀛𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀧𑀘𑁆𑀘𑀬 𑀪𑀽𑀢𑀢𑁆𑀢𑀸, 𑀢𑀣𑀸𑀳𑀺 𑀮𑁄𑀓𑁂 𑀲𑀸𑀲𑀦𑁂𑀘 𑀲𑀩𑁆𑀩𑀁𑀧𑀺 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀉𑀧𑁆𑀧𑀦𑁆𑀦𑀁𑀦𑀸𑀫 𑀦𑀢𑁆𑀣𑀺. 𑀅𑀦𑁆𑀢𑀫𑀲𑁄 𑀆𑀮𑁄𑀧𑀪𑀺𑀓𑁆𑀔𑀸𑀤𑀸𑀦𑀫𑀢𑁆𑀢𑀁𑀧𑀻𑀢𑀺. 𑀬𑀜𑁆𑀘 𑀘𑀺𑀢𑁆𑀢𑀁 𑀬𑁂𑀦 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢𑀧𑀼𑀩𑁆𑀩𑀸 𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀦 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀓𑀢𑀺𑀧𑀘𑁆𑀘𑀬𑀕𑀡𑁂𑀏𑀯𑀅𑀦𑁆𑀢𑁄 𑀕𑀥𑁄 𑀳𑁄𑀢𑀺. 𑀛𑀸𑀦𑀸𑀦𑀺𑀘 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭 𑀪𑀽𑀢𑀸𑀦𑀺 𑀲𑀩𑁆𑀩𑀸𑀦𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀦 𑀧𑀭𑀺𑀓𑀫𑁆𑀫𑀲𑀗𑁆𑀔𑀸𑀢 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀪𑀺𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀉𑀧𑁆𑀧𑀦𑁆𑀦𑀸𑀦𑀺𑀦𑀸𑀫 𑀦𑀢𑁆𑀣𑀻𑀢𑀺 𑀲𑁄 𑀢𑁂𑀲𑀁 𑀧𑀓𑀢𑀺𑀧𑀘𑁆𑀘𑀬𑀕𑀡𑁂𑀲𑀼𑀏𑀯 𑀅𑀦𑁆𑀢𑁄𑀕𑀥𑁄 𑀳𑁄𑀢𑀻𑀢𑀺. 𑀇𑀢𑀭𑀣𑀸 𑀲𑀩𑁆𑀩𑀁𑀧𑀺 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀁 𑀅𑀲𑀗𑁆𑀔𑀸𑀭𑀺𑀓𑀁 𑀦𑀸𑀫𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀻𑀢𑀺.

[𑁪𑁮] 𑀬𑀜𑁆𑀘 𑀢𑀢𑁆𑀣