𑀦𑀫𑀓𑁆𑀓𑀸𑀭𑀝𑀻𑀓𑀸

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀯𑀡𑁆𑀡𑁂𑀳𑀺, 𑀧𑀲𑀢𑁆𑀣𑀜𑁆𑀘 𑀲𑀼𑀔𑀤𑁆𑀤𑀤𑀁;

𑀯𑀦𑁆𑀤𑀦𑁆𑀢𑀸𑀦𑀁 𑀚𑀺𑀦𑀁 𑀦𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀤𑁆𑀥𑀁 𑀕𑀡𑀼𑀢𑁆𑀢𑀫𑀁.

𑁨. 𑀦𑀫𑀓𑁆𑀓𑀸𑀭𑀁 𑀳𑀺𑀢𑀢𑁆𑀣𑀻𑀳𑀺, 𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀺 𑀘;

𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑀁 𑀧𑀼𑀜𑁆𑀜, 𑀩𑀼𑀤𑁆𑀥𑀺𑀬𑀸 𑀢𑁂𑀦 𑀯𑀦𑁆𑀤𑀺𑀦𑀁.

𑁩. 𑀢𑀲𑁆𑀲𑀢𑁆𑀣𑀯𑀡𑁆𑀡𑀦𑀁 𑀓𑀲𑁆𑀲𑀁, 𑀕𑀫𑁆𑀪𑀻𑀭𑀢𑁆𑀣𑀲𑀼𑀩𑁄𑀥𑀦𑀁;

𑀫𑁄𑀯𑀺𑀧𑀼𑀦𑀸𑀫𑁂𑀦 𑀲𑀦𑁆𑀢𑁂𑀦, 𑀲𑀻𑀮𑀼𑀧𑁂𑀢𑁂𑀦 𑀬𑀸𑀘𑀺𑀢𑁄.

𑁪. 𑀯𑀡𑁆𑀡𑀦𑁆𑀢𑁄𑀧𑀺 𑀘 𑀢𑀲𑁆𑀲𑀢𑁆𑀣𑀁, 𑀢𑀁 𑀢𑀁 𑀅𑀝𑁆𑀞𑀓𑀣𑀸𑀤𑀺𑀲𑀼;

𑀯𑀼𑀢𑁆𑀢𑀜𑀸𑀬𑁂𑀦 𑀓𑀲𑁆𑀲𑀸𑀫𑀺, 𑀲𑀤𑁆𑀥𑀸 𑀲𑀼𑀡𑀸𑀣 𑀲𑀸𑀥𑀯𑁄.

𑁫. 𑀦𑀫𑀦𑀁 𑀦𑀫𑀢𑀻𑀢𑀻 𑀯𑀸, 𑀦𑀫𑀢𑀻 𑀢𑁂𑀦 𑀯𑀸 𑀦𑀫𑁄;

𑀢𑀲𑁆𑀲 𑀓𑀸𑀭𑁄𑀦𑁆𑀢𑀺 𑀢𑀸𑀳𑀻𑀢𑀺, 𑀦𑀫𑀓𑁆𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁬. 𑀢𑀜𑁆𑀘 𑀩𑀼𑀤𑁆𑀥𑀖𑁄𑀲𑀸𑀘𑀭𑀺, 𑀬𑁂𑀦 𑀧𑀼𑀩𑁆𑀩𑀲𑀼𑀢𑀁 𑀓𑀢𑀁;

𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀜𑁆𑀘, 𑀢𑀁 𑀢𑀁 𑀧𑀦 𑀓𑀣𑀸𑀤𑀺𑀲𑀼.

𑁭. 𑀦 𑀤𑀺𑀝𑁆𑀞𑀁 𑀓𑀢𑀓𑀸𑀭𑀡𑀁, 𑀢𑀲𑁆𑀫𑀸 𑀳𑀺𑀢𑀢𑁆𑀣𑀺𑀓𑁂𑀳𑀺 𑀘;

𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀻 𑀘, 𑀞𑀧𑀺𑀢𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀁;

𑀢𑀁 𑀓𑀸𑀭𑀡𑀁 𑀯𑀺𑀜𑁆𑀜𑀽𑀳𑀻 𑀘, 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀚𑀸𑀦𑀺𑀢𑀦𑁆𑀢𑀺.

𑁧. 𑀲𑀼𑀕𑀢𑀁 𑀲𑀼𑀕𑀢𑀁 𑀲𑁂𑀝𑁆𑀞𑀁, 𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀁;

𑀅𑀫𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀅𑀲𑀫𑀁 𑀅𑀲𑀫𑀁 𑀤𑀤𑀁.

𑀲𑀭𑀡𑀁 𑀲𑀭𑀡𑀁 𑀮𑁄𑀓𑀁, 𑀅𑀭𑀡𑀁 𑀅𑀭𑀡𑀁 𑀓𑀭𑀁;

𑀅𑀪𑀬𑀁 𑀅𑀪𑀬𑀁 𑀞𑀸𑀦𑀁, 𑀦𑀸𑀬𑀓𑀁 𑀦𑀸𑀬𑀓𑀁 𑀦𑀫𑁂.

𑁧. [𑀓] 𑀇𑀤𑀸𑀦𑀺 𑀧𑀞𑀫𑀁 𑀢𑀸𑀯 𑀲𑀼𑀕𑀢𑀦𑁆𑀢𑁆𑀬𑀸𑀤𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀕𑀼𑀡𑁂𑀳𑀺 𑀣𑁄𑀫𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀦𑁆𑀤𑀺𑀢𑀼𑀓𑀸𑀫𑁂𑀦 𑀲𑀼𑀕𑀢𑀦𑁆𑀢𑀺𑀆𑀤𑀺 𑀕𑀸𑀣𑀸𑀤𑁆𑀯𑀬𑀁 𑀆𑀭𑀤𑁆𑀥𑀁. 𑀅𑀬𑀁 𑀧𑀦 𑀲𑀩𑁆𑀩𑀧𑀸𑀤𑀸𑀤𑀺𑀬𑀫𑀓𑀧𑀣𑁆𑀬𑀸 𑀯𑀢𑁆𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀬𑀫𑀓𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀓𑀺𑀮𑀺𑀝𑁆𑀞𑀤𑁄𑀲𑀦𑁆𑀢𑀺 𑀯𑀼𑀢𑁆𑀢𑀁.

𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀬𑀁 𑀓𑀺𑀮𑀺𑀝𑁆𑀞𑀧𑀤𑀁 𑀫𑀦𑁆𑀤𑀸, 𑀪𑀺𑀥𑁂𑀬𑁆𑀬𑀁 𑀬𑀫𑀓𑀸𑀤𑀺𑀓𑀁;

𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀯, 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀭𑀻𑀬𑀢𑀻’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀢𑁆𑀢𑀸𑀬𑁂𑀯 𑀧𑀲𑀸𑀤𑀕𑀼𑀡 𑀲𑀗𑁆𑀔𑀸𑀢𑁂𑀦 𑀲𑀤𑁆𑀤𑀸𑀮𑀗𑁆𑀓𑀸𑀭𑁂𑀦 𑀲𑀁𑀬𑀼𑀢𑁆𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀬𑀫𑀓𑀁 𑀲𑀼𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀭𑀸𑀲𑀼 𑀬𑀫𑀓𑀕𑀸𑀣𑀸𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦𑀸 𑀮𑀗𑁆𑀓𑀸𑀭𑁂 𑁋

‘‘𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁, 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁;

𑀧𑀲𑀸𑀤𑀕𑀼𑀡𑀲𑀁𑀬𑀼𑀢𑁆𑀢𑀁, 𑀬𑀫𑀓𑀁 𑀫𑀢𑀫𑁂𑀤𑀺𑀲’’𑀦𑁆𑀢𑀺.

𑀢𑀢𑁆𑀣 𑀲𑀼𑀕𑀢𑀦𑁆𑀢𑀺 𑀲𑁄𑀪𑀦𑀕𑀫𑀦𑀢𑁆𑀢𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀢𑀢𑁆𑀢𑀸 𑀲𑀫𑁆𑀫𑀸 𑀕𑀢𑀢𑁆𑀢𑀸 𑀘 𑀲𑀼𑀕𑀢𑁄, 𑀲𑁄 𑀳𑀺 𑀲𑁄𑀪𑀦𑀁 𑀅𑀭𑀺𑀬𑀫𑀕𑁆𑀕𑁂𑀦 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀧𑀼𑀩𑁆𑀩𑁄 𑀕𑀫𑀼𑀥𑀸𑀢𑀼 𑀢. 𑀲𑀼𑀲𑀤𑁆𑀤𑁄 𑀲𑁄𑀪𑀦𑀢𑁆𑀣𑁄. 𑀅𑀭𑀺𑀬𑀫𑀕𑁆𑀕𑀕𑀫𑀦𑁂𑀦 𑀧𑀭𑀺𑀲𑀼𑀤𑁆𑀥𑀁 𑀅𑀦𑀯𑀚𑁆𑀚𑀁 𑀔𑁂𑀫𑀁 𑀤𑀺𑀲𑀁 𑀅𑀲𑀚𑁆𑀚𑀫𑀸𑀦𑁄 𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀕𑀫𑀦𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘𑀸𑀢𑀺. 𑀢𑀢𑁆𑀣 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀲𑁆𑀲 𑀦𑀺𑀧𑁆𑀨𑀸𑀤 𑀦𑀢𑁄 𑀲𑁄𑀪𑀦𑀁 𑀓𑀸𑀬𑁂𑀦 𑀕𑀫𑀦𑀁 𑀓𑀸𑀬𑀕𑀫𑀦𑀁 𑀦𑀸𑀫. 𑀲𑀬𑀫𑁆𑀪𑀽 𑀜𑀸𑀡𑁂𑀦 𑀧𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑀢𑁄 𑀜𑀸𑀡𑁂𑀦 𑀕𑀫𑀦𑀁 𑀜𑀸𑀡𑀕𑀫𑀦𑀁 𑀦𑀸𑀫. 𑀇𑀥 𑀧𑀦 𑀜𑀸𑀡𑀕𑀫𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 𑀧𑀦 ‘‘𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀘𑁂𑀲 𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀲𑀤𑁆𑀤𑁄 𑀲𑀫𑁆𑀫𑀸𑀲𑀤𑁆𑀤𑀢𑁆𑀣𑁄. 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀫𑀸 𑀆𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀪𑀼𑀢𑀺 𑀬𑀸𑀯 𑀩𑁄𑀥𑀺𑀫𑀡𑁆𑀟𑀸 𑀢𑀸𑀯 𑀲𑀫𑀢𑀺𑀁𑀲𑀧𑀸𑀭𑀫𑀺𑀧𑀽𑀭𑀺𑀓𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀫𑁂𑀯 𑀓𑀭𑁄𑀦𑁆𑀢𑁄 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀓𑀸𑀫𑀲𑀼𑀔𑀁 𑀅𑀢𑁆𑀢𑀓𑀺𑀮𑀫𑀣𑀜𑁆𑀘𑀸𑀢𑀺 𑀇𑀫𑁂 𑀘𑀦𑁆𑀢𑁂 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀦 𑀲𑀼𑀕𑀢𑀦𑁆𑀢𑀺 𑀲𑀫𑁆𑀫𑀸 𑀕𑀤𑀢𑁆𑀢𑀸 𑀲𑀼𑀕𑀢𑁄. 𑀲𑁄 𑀳𑀺 𑀲𑀫𑁆𑀫𑀸 𑀕𑀤𑀢𑀺 𑀪𑀸𑀲𑀢𑀻𑀢𑀺 𑀲𑀼𑀕𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀧𑀼𑀩𑁆𑀩𑀕𑀤𑀥𑀸𑀢𑀼 𑀪𑀸𑀲𑀸𑀬𑀁 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁 𑀯𑀸, 𑀢, 𑀤𑀲𑁆𑀲 𑀢𑁄. 𑀙𑀲𑀼 𑀯𑀸𑀘𑀸𑀲𑀼 𑀬𑀼𑀢𑁆𑀢𑀝𑁆𑀞𑀸𑀦𑁂 𑀬𑀼𑀢𑁆𑀢𑀫𑁂𑀯 𑀤𑁆𑀯𑀺𑀯𑀸𑀘𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀧𑀸𑀴𑀺𑀬𑀁 𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑁂 𑁋

𑁧.

.‘‘𑀭𑀸𑀚𑀓𑀼𑀫𑀸𑀭 𑀬𑀁 𑀢𑀣𑀸𑀕𑀢𑁄 𑀢𑀁 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑁨. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸. 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑁩. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸, 𑀢𑀢𑁆𑀭𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬. 𑁪. 𑀬𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀦 𑀢𑀁 𑀢𑀣𑀸𑀕𑀢𑁄 𑀯𑀸𑀘𑀁 𑀪𑀸𑀲𑀢𑀺. 𑁫. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀯𑀸𑀘𑀁 𑀦 𑀪𑀸𑀲𑀢𑀺. 𑁬. 𑀬𑀜𑁆𑀘 𑀔𑁄 𑀢𑀣𑀸𑀕𑀢𑁄 𑀯𑀸𑀘𑀁 𑀚𑀸𑀦𑀸𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀲𑀸 𑀘 𑀧𑀭𑁂𑀲𑀁 𑀧𑀺𑀬𑀸 𑀫𑀦𑀸𑀧𑀸. 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲𑀸 𑀯𑀸𑀘𑀸𑀬 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺.

𑀏𑀢𑁆𑀣 𑀧𑀸𑀴𑀺𑀬𑀁 𑀧𑀦𑁂𑀲𑀸 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀳𑁂𑀲𑀸 𑀅𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀢𑁆𑀣 𑀲𑀁𑀳𑀺𑀢𑀸 𑀅𑀧𑁆𑀧𑀺𑀬𑀸 𑀯𑀸𑀘𑀸 𑀘, 𑀅𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘, 𑀪𑀽𑀢𑀸 𑀅𑀢𑁆𑀣𑀲𑀁𑀳𑀺𑀢𑀸 𑀧𑀺𑀬𑀸 𑀯𑀸𑀘𑀸 𑀘𑀸𑀢𑀺 𑀙𑀩𑁆𑀩𑀺𑀥𑀸 𑀳𑁄𑀢𑀻𑀢𑀺. 𑀢𑀢𑁆𑀣 𑀅𑀘𑁄𑀭𑀁𑀬𑁂𑀯 𑀘𑁄𑀭𑁄 𑀅𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀧𑀞𑀫𑀯𑀸𑀘𑀸 𑀦𑀸𑀫. 𑀘𑁄𑀭𑀁𑀬𑁂𑀯 𑀘𑁄𑀭𑁄 𑀅𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀤𑀼𑀢𑀺𑀬𑀯𑀸𑀘𑀸 𑀦𑀸𑀫. 𑀅𑀓𑀢𑀧𑀼𑀜𑁆𑀜𑀢𑀸𑀬 𑀤𑀼𑀕𑁆𑀕𑀢𑁄 𑀤𑀼𑀩𑁆𑀩𑀡𑁆𑀡𑁄 𑀅𑀧𑁆𑀧𑁂𑀲𑀓𑁆𑀔𑁄, 𑀇𑀥 𑀧𑀦 𑀞𑀢𑁆𑀯𑀸𑀧𑀺 𑀧𑀼𑀦 𑀧𑀼𑀜𑁆𑀜𑀁 𑀦 𑀓𑀭𑁄𑀢𑀺, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀓𑀣𑀁 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁂𑀦 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁂𑀦 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀸𑀭𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀢𑀢𑀺𑀬𑀯𑀸𑀘𑀸 𑀦𑀸𑀫. 𑀏𑀓𑁄 𑀥𑀼𑀢𑁆𑀢𑁄 𑀆𑀳-𑀫𑀬𑁆𑀳𑀁 𑀪𑁄 𑀫𑀸𑀢𑀼 𑀫𑀬𑀺 𑀓𑀼𑀘𑁆𑀙𑀺𑀕𑀢𑁂 𑀓𑀧𑀺𑀝𑁆𑀞𑀨𑀮𑀤𑁄𑀳𑀴𑁄 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀁 𑀓𑀧𑀺𑀝𑁆𑀞𑀳𑀸𑀭𑀓𑀁 𑀅𑀮𑀪𑀫𑀸𑀦𑀸 𑀫𑀁𑀬𑁂𑀯 𑀧𑁂𑀲𑁂𑀲𑀺. 𑀅𑀳𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀫𑀼𑀕𑁆𑀕𑀭𑀁 𑀯𑀺𑀬 𑀭𑀼𑀓𑁆𑀔𑀲𑁆𑀲 𑀉𑀧𑀭𑀺 𑀔𑀺𑀧𑀺𑀁. 𑀅𑀣 𑀲𑀸𑀔𑀢𑁄 𑀲𑀸𑀔𑀁 𑀯𑀺𑀘𑀭𑀦𑁆𑀢𑁄 𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀑𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀆𑀳𑀭𑀺𑀢𑁆𑀯𑀸 𑀑𑀭𑀼𑀬𑁆𑀳 𑀫𑀸𑀢𑀼 𑀲𑀦𑁆𑀢𑀺𑀓𑁂 𑀕𑀦𑁆𑀢𑁆𑀯𑀸 𑀨𑀮𑀸𑀦𑀺 𑀫𑀸𑀢𑀼𑀬𑀸 𑀅𑀤𑀸𑀲𑀺𑀁. 𑀢𑀸𑀦𑀺 𑀧𑀦 𑀫𑀳𑀦𑁆𑀢𑀸𑀦𑀺 𑀳𑁄𑀦𑁆𑀢𑀺 𑀘𑀸𑀝𑀺𑀧𑁆𑀧 𑀫𑀸𑀡𑀸𑀦𑀺. 𑀢𑀢𑁄 𑀫𑁂 𑀫𑀸𑀢𑀭𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀸𑀬 𑀲𑀫𑀲𑀝𑁆𑀞𑀺𑀨𑀮𑀸𑀦𑀺 𑀔𑀸𑀤𑀺𑀢𑀸𑀦𑀻𑀢𑀺. 𑀏𑀯𑀫𑀸𑀤𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀯𑀸𑀘𑀸 𑀘𑀢𑀼𑀢𑁆𑀣𑀯𑀸𑀘𑀸 𑀦𑀸𑀫. 𑀆𑀫𑀺𑀲𑀳𑁂𑀢𑀼 𑀘𑀸𑀝𑀼𑀓𑀫𑁆𑀬𑀢𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀭𑁂𑀲𑀁 𑀣𑁄𑀫𑀦𑀸 𑀯𑀸𑀘𑀸 𑀘𑁂𑀯 𑀭𑀸𑀚𑀓𑀣𑀁 𑀘𑁄𑀭𑀓𑀣𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀓𑀣𑀸 𑀘 𑀧𑀜𑁆𑀘𑀫𑀯𑀸𑀘𑀸 𑀦𑀸𑀫. 𑀅𑀭𑀺𑀬𑀲𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀸 𑀥𑀫𑁆𑀫𑀓𑀣𑀸 𑀙𑀝𑁆𑀞𑀫𑀯𑀸𑀘𑀸 𑀦𑀸𑀫. 𑀢𑀁 𑀧𑀦 𑀯𑀲𑁆𑀲𑀲𑀢𑀫𑁆𑀧𑀺 𑀲𑀼𑀡𑀦𑁆𑀢𑀸 𑀧𑀡𑁆𑀟𑀺𑀢𑀸 𑀦𑁂𑀯 𑀢𑀺𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑀸𑀲𑀼 𑀧𑀦 𑀪𑀕𑀯𑀸 𑀢𑀢𑀺𑀬𑀙𑀝𑁆𑀞𑀫𑀸 𑀤𑁆𑀯𑀺𑀯𑀸𑀘𑀸𑀏𑀯 𑀪𑀸𑀲𑀢𑀺. 𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀸𑀬𑁂𑀯 𑀤𑁆𑀯𑀺𑀯𑀸𑀘𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀅𑀬𑀁 𑀢𑀤𑀝𑁆𑀞𑀓𑀣𑀸𑀬𑀁 𑀆𑀕𑀢𑁄 𑀲𑀗𑁆𑀔𑁂𑀧𑀦𑀬𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕 𑀫𑀳𑀸𑀝𑀻𑀓𑀸𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀻𑀝𑀻𑀓𑀸𑀬𑀜𑁆𑀘 𑀢𑀤𑀜𑁆𑀜𑀸𑀓𑀸𑀭𑁂𑀦 𑀯𑀡𑁆𑀡𑀺𑀢𑁄. 𑀢𑀸𑀲𑀼 𑀧𑀦 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀕𑀳𑀕𑀸𑀣𑀸 𑁋

‘‘𑀬𑁄 𑀪𑀽𑀢𑀫𑀢𑁆𑀣𑀲𑀁𑀳𑀻𑀢𑀁, 𑀧𑀭𑁂𑀲𑀫𑀧𑁆𑀧𑀺𑀬𑀸 𑀯𑀸𑀘𑀁;

𑀪𑀽𑀢𑀫𑀢𑁆𑀣𑀲𑀳𑀻𑀢𑀜𑁆𑀘, 𑀧𑀭𑁂𑀲𑀁 𑀧𑀺𑀬𑀯𑀸𑀘𑀦𑁆𑀢𑀺;

𑀤𑁆𑀯𑀺𑀯𑀸𑀘𑀁 𑀬𑀼𑀢𑁆𑀢𑀝𑁆𑀞𑀸𑀦𑁂𑀯, 𑀯𑀤𑀢𑀻𑀢𑀺 𑀲𑀼𑀕𑀢𑁄𑀢𑀺;

𑀯𑀼𑀘𑁆𑀘𑀢𑀻 𑀘 𑀤𑀓𑀸𑀭𑀲𑁆𑀲, 𑀓𑀢𑁆𑀯𑀸 𑀢𑀓𑀸𑀭𑀯𑀺𑀜𑁆𑀜𑀼𑀦𑀸’’𑀢𑀺.

𑀲𑁂𑀝𑁆𑀞𑀦𑁆𑀢𑀺 𑀕𑀼𑀡𑀫𑀳𑀦𑁆𑀢𑀢𑁆𑀢𑀸 𑀧𑀲𑀢𑁆𑀣𑀢𑀭𑀁. 𑀲𑁄 𑀳𑀺 𑀧𑀲𑀢𑁆𑀣𑀸𑀦𑀁 𑀯𑀺𑀲𑁂𑀲𑁂𑀦 𑀧𑀲𑀢𑁆𑀣𑁄𑀢𑀺 𑀲𑁂𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀲𑀢𑁆𑀣𑀧𑀤𑀁, 𑀯𑀺𑀲𑁂𑀲𑀢𑀤𑁆𑀥𑀺𑀢𑁂 𑀇𑀝𑁆𑀞𑀧𑀘𑁆𑀘𑀬𑁄. 𑀧𑀲𑀢𑁆𑀣𑀲𑀤𑁆𑀤𑀲𑁆𑀲 𑀲𑁄, 𑀧𑀲𑀢𑁆𑀣𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑀸𑀤𑀻𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀤𑀺 𑀕𑀼𑀡𑁂𑀳𑀺 𑀯𑀺𑀲𑁂𑀲𑁂𑀦 𑀧𑀲𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀏𑀲𑀢𑀺 𑀕𑀯𑁂𑀲𑀢𑀺 𑀏𑀲𑀺𑀁 𑀕𑀯𑁂𑀲𑀺𑀦𑁆𑀢𑀺 𑀯𑀸 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄. 𑀲𑀼𑀧𑀼𑀩𑁆𑀩𑁄𑀏𑀲 𑀕𑀯𑁂𑀲𑀦𑁂 𑀢. 𑀢𑀲𑁆𑀲 𑀭𑀝𑁆𑀞𑁄. 𑀲𑀼𑀲𑀤𑁆𑀤𑁄 𑀲𑀼𑀦𑁆𑀤𑀭𑀢𑁆𑀣𑁄. 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀏𑀲𑀺𑀢𑀩𑁆𑀩𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀯𑀸 𑀲𑁂𑀝𑁆𑀞𑁄. 𑀲𑀦𑁆𑀢𑀲𑀤𑁆𑀤𑀽𑀧𑀧𑀤𑁄 𑀇𑀲 𑀕𑀯𑁂𑀲𑀦𑁂 𑀢, 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄, 𑀇𑀓𑀸𑀭𑀲𑁆𑀲𑁂, 𑀢𑀲𑁆𑀲 𑀝𑁆𑀞𑁄. 𑀲𑀦𑁆𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀇𑀘𑁆𑀙𑀺𑀬𑀢𑀺 𑀓𑀦𑁆𑀢𑀺𑀬 𑀢𑀻𑀢𑀺 𑀯𑀸 𑀲𑁂𑀝𑁆𑀞𑁄. 𑀲𑀦𑁆𑀢𑀲𑀤𑁆𑀤𑀽𑀧𑀧𑀤𑁄 𑀇𑀲𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼 𑀢. 𑀅𑀣 𑀯𑀸 𑀲𑀦𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀢𑀻𑀢𑀺 𑀲𑁂𑀝𑁆𑀞𑁄, 𑀩𑀼𑀤𑁆𑀥𑁄. 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀲𑀼𑀦𑁆𑀤𑀭𑁂 𑀲𑀢𑀺𑀧𑀝𑁆𑀞𑀸𑀦𑀸 𑀤𑀺𑀪𑁂𑀤𑁂 𑀥𑀫𑁆𑀫𑁂 𑀏𑀲𑁂𑀢𑀺 𑀩𑀼𑀤𑁆𑀥𑁂𑀢𑀻𑀢𑀺 𑀯𑀸 𑀲𑁂𑀝𑁆𑀞𑁄. 𑀳𑁂𑀢𑀼 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀲𑀼𑀧𑀼𑀩𑁆𑀩𑀏𑀲𑀥𑀸𑀢𑀼 𑀩𑀼𑀤𑁆𑀥𑀺𑀬𑀁 𑀢. 𑀢𑀁 𑀲𑁂𑀝𑁆𑀞𑀁.

𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀦𑁆𑀢𑀺 𑀏𑀢𑁆𑀣 𑀓𑀼𑀲𑀮𑀁 𑀅𑀓𑀼𑀲𑀮𑀁 𑀚𑀳𑀦𑁆𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀓𑀼𑀘𑁆𑀙𑀺𑀢𑀁 𑀧𑀸𑀧𑀥𑀫𑁆𑀫𑀁 𑀲𑀮𑀬𑀢𑀺 𑀘𑀮𑀬𑀢𑀺 𑀓𑀫𑁆𑀧𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀓𑀼𑀲𑀮𑀁, 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀁 𑀮𑀩𑁆𑀪𑀢𑀺. 𑀓𑀼𑀧𑀼𑀩𑁆𑀩𑁄 𑀲𑀮𑀥𑀸𑀢𑀼 𑀅. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀧𑀸𑀧𑀥𑀫𑁆𑀫𑀁 𑀲𑀮𑀬𑀢𑀺 𑀘𑀮𑀬𑀢𑀺, 𑀫𑀳𑀕𑁆𑀕𑀢 𑀓𑀼𑀲𑀮𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀲𑀮𑀬𑀢𑀺 𑀓𑀫𑁆𑀧𑁂𑀢𑀺, 𑀮𑁄𑀓𑀼𑀢𑁆𑀢𑀭 𑀓𑀼𑀲𑀮𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀲𑀮𑀬𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀣 𑀯𑀸 𑀓𑀼𑀘𑁆𑀙𑀺𑀢𑀁 𑀅𑀧𑀸𑀬𑀤𑁆𑀯𑀸𑀭𑀁 𑀲𑀮𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀧𑀺𑀤𑀳𑀦𑁆𑀢𑀺 𑀲𑀸𑀥𑀯𑁄 𑀏𑀢𑁂𑀦𑀸𑀢𑀺 𑀓𑀼𑀲𑀮𑀁, 𑀓𑀭𑀡𑀲𑀸𑀥𑀦𑁄𑀬𑀁. 𑀇𑀥 𑀧𑀦 𑀚𑀳𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀪𑀽𑀫𑀓𑀓𑀼𑀲𑀮𑀫𑁂𑀯𑀸𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀦 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀁, 𑀯𑁄𑀤𑀸𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀇𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭 𑀧𑀤𑀝𑁆𑀞𑀸𑀦𑀁. 𑀦 𑀓𑀼𑀲𑀮𑀁 𑀅𑀓𑀼𑀲𑀮𑀁, 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬 𑀧𑀳𑀸𑀬𑀓𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀓𑀼𑀲𑀮𑀧𑀝𑀺𑀧𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀲𑀸𑀯𑀚𑁆𑀚𑀸𑀦𑀺𑀝𑁆𑀞𑀯𑀺𑀧𑀸𑀓 𑀮𑀓𑁆𑀔𑀡𑀁 𑀯𑀸, 𑀅𑀦𑀢𑁆𑀣𑀚𑀦𑀦𑀭𑀲𑀁, 𑀅𑀦𑀺𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸 𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀓𑀼𑀲𑀮𑀁 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀁𑀓𑀼𑀲𑀮𑀁. 𑀢𑀁 𑀧𑀦 𑀧𑀤𑀁 𑀚𑀳𑀦𑁆𑀢𑀺𑀧𑀤𑁂 𑀓𑀫𑁆𑀫𑀁.

𑀚𑀳𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀚𑀳𑀦𑁆𑀢𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀚𑀳𑀢𑀺 𑀧𑀚𑀳𑀢𑀺, 𑀨𑀮𑀜𑀸𑀡𑁂𑀦 𑀚𑀳𑀺𑀁 𑀧𑀚𑀳𑀺𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀦𑁆𑀢𑀺 𑀯𑀸 𑀚𑀳𑁄, 𑀩𑀼𑀤𑁆𑀥𑁄. 𑀳𑀸𑀥𑀸𑀢𑀼 𑀘𑀸𑀕𑁂 𑀅. 𑀓𑀺𑀜𑁆𑀘𑀸𑀧𑀺 𑀧𑀦𑁂𑀢𑁆𑀣 𑀓𑀼𑀲𑀮𑀁 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀥𑀫𑁆𑀫𑁂 𑀦 𑀯𑀼𑀢𑁆𑀢𑀁, 𑀯𑀝𑁆𑀝𑀫𑀽𑀮𑀪𑀽𑀢𑁂 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀓𑀺𑀮𑁂𑀲𑁂 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕 𑀜𑀸𑀡𑁂𑀦 𑀚𑀳𑀺𑀢𑁂 𑀮𑁄𑀓𑀺𑀬𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀫𑀽𑀮𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀬 𑀅𑀪𑀸𑀯𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀁𑀲𑀸𑀭𑁂 𑀧𑀼𑀦 𑀧𑀝𑀺𑀲𑀦𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀫𑀽𑀮𑀪𑀽𑀢𑁂 𑀓𑀺𑀮𑁂𑀲𑁂 𑀚𑀳𑀺𑀢𑁂 𑀨𑀮𑀽𑀧𑀘𑀸𑀭𑁂𑀦 𑀓𑀼𑀲𑀮𑀫𑁆𑀧𑀺 𑀚𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀭𑀽𑀧𑀁 𑀪𑀺𑀓𑁆𑀔𑀯𑁂 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣𑀸𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀭𑀳𑀦𑁆𑀢𑁂𑀦 𑀳𑀺 𑀅𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀓𑀢𑀫𑁆𑀧𑀺 𑀓𑀼𑀲𑀮𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀓𑁆𑀭𑀺𑀬𑀸𑀢𑀺 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑀺 𑀦𑀺𑀤𑀸𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀔𑀻𑀡𑀸𑀲𑀯𑁂𑀦 𑀳𑀺 𑀓𑀢𑀁 𑀓𑀫𑁆𑀫𑀁 𑀦𑁂𑀯 𑀓𑀼𑀲𑀮𑀁 𑀳𑁄𑀢𑀺 𑀦𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀳𑀼𑀢𑁆𑀯𑀸 𑀓𑁆𑀭𑀺𑀬𑀫𑀢𑁆𑀢𑁂 𑀢𑀺𑀝𑁆𑀞𑀢𑀻’’𑀢𑀺.

𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀘 𑀓𑀼𑀲𑀮𑀸𑀓𑀼𑀲𑀮 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀏𑀯𑀁 𑀢𑁂𑀦 𑀢𑀁 𑀪𑀺𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁.

𑀢𑁂𑀦 𑀯𑀼𑀢𑁆𑀢𑀁 𑀘𑀽𑀴𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 ‘‘𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀏𑀢𑁆𑀣𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺.

𑀅𑀫𑀢𑀦𑁆𑀢𑀺 𑀫𑀭𑀡𑀯𑀺𑀭𑀳𑀺𑀢𑀁. 𑀲𑁄 𑀚𑀺𑀦𑁄 𑀳𑀺 𑀦 𑀫𑀢𑁄 𑀅𑀫𑀢𑁄, 𑀫𑀭𑀡𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀧𑀼𑀦 𑀫𑀭𑀡𑀢𑁄 𑀯𑀺𑀭𑀳𑀺𑀢𑁄𑀢𑀺 𑀯𑀸 𑀅𑀫𑀢𑁄. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀥𑀺𑀕𑀢𑁂 𑀦𑀢𑁆𑀣𑀺 𑀫𑀢𑀁 𑀫𑀭𑀡𑀁 𑀬𑀲𑁆𑀲 𑀚𑀺𑀦𑀲𑁆𑀲𑀸𑀢𑀺 𑀅𑀫𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀚𑀺𑀦𑁂𑀦 𑀳𑀺 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀁 𑀅𑀚𑀺𑀢𑁄𑀧𑀺 𑀓𑀺𑀮𑁂𑀲𑀫𑀸𑀭𑀁 𑀚𑀬𑀺𑀢𑁆𑀯𑀸 𑀢𑁂𑀲𑀁 𑀅𑀯𑀲𑁆𑀲𑀁 𑀚𑀺𑀬𑀫𑀸𑀦𑀢𑁆𑀢𑀸 𑀨𑀮𑀽𑀧𑀘𑀸𑀭𑁂𑀦 𑀅𑀫𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀦 𑀅𑀫𑀢𑀦𑁆𑀢𑀺 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑀦𑁆𑀦𑀸𑀕𑀢𑀁. 𑀦𑀢𑁆𑀣𑀺 𑀫𑀢𑀁 𑀫𑀭𑀡𑀁 𑀏𑀢𑁆𑀣𑀸𑀢𑀺 𑀅𑀫𑀢𑀁, 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀦 𑀲𑀦𑁆𑀢𑀺𑀮𑀓𑁆𑀔𑀡𑀁, 𑀅𑀘𑁆𑀘𑀼𑀢𑀭𑀲𑀁, 𑀅𑀦𑀺𑀫𑀺𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀦𑀺𑀲𑁆𑀲𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀧𑀤𑀝𑁆𑀞𑀸𑀦𑀁 𑀦 𑀮𑀩𑁆𑀪𑀢𑀺.

𑀯𑀼𑀢𑁆𑀢𑀜𑁆𑀳𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 ‘‘𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀫𑀢𑁄, 𑀚𑀺𑀦𑁄. 𑀲𑀤𑁆𑀥𑀸𑀤𑀺𑀢𑁄 𑀡𑀸𑀢𑀺 𑀲𑀼𑀢𑁆𑀢𑁂𑀦 𑀅𑀲𑁆𑀲𑀣𑁆𑀬𑀢𑁆𑀣𑁂 𑀡𑀧𑀘𑁆𑀘𑀬𑁄. 𑀲𑀤𑁆𑀥𑁄 𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀲𑁆𑀲 𑀚𑀺𑀦𑀲𑁆𑀲 𑀘𑀢𑀼𑀫𑀕𑁆𑀕𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀢𑀁 𑀅𑀫𑀢𑀁.

𑀲𑀦𑁆𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑁂𑀳𑀺 𑀘 𑀯𑀝𑁆𑀝𑀤𑀼𑀓𑁆𑀔𑁂𑀳𑀺 𑀘 𑀲𑀼𑀯𑀽𑀧𑀲𑀦𑁆𑀢𑀁. 𑀲𑁄 𑀳𑀺 𑀩𑀼𑀤𑁆𑀥𑁄 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀯𑀝𑁆𑀝𑀤𑀼𑀓𑁆𑀔𑁂𑀳𑀺 𑀲𑀫𑀺𑀢𑁆𑀣 𑀯𑀽𑀧𑀲𑀫𑀺𑀢𑁆𑀣𑀸𑀢𑀺 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀥𑀸𑀢𑀼 𑀉𑀧𑀲𑀫𑁂 𑀢. 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑀁 𑀢𑀧𑀘𑁆𑀘𑀬𑀲𑁆𑀲𑀦𑁆𑀢𑁄𑀆𑀤𑁂𑀲𑀁 𑀓𑀢𑁆𑀯𑀸 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀲𑀸𑀭𑀯𑀝𑁆𑀝𑁂 𑀤𑀭𑀣𑀓𑀸𑀭𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀫𑀡𑁆𑀟𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀲𑀻𑀢𑀺𑀪𑀽𑀢𑁄 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀲𑀦𑁆𑀢𑀁.

𑀅𑀲𑀫𑀦𑁆𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑀁, 𑀲𑁄 𑀳𑀺 𑀩𑀼𑀤𑁆𑀥𑁄 𑀦𑀢𑁆𑀣𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁄 𑀲𑀤𑀺𑀲𑁄 𑀏𑀢𑀲𑁆𑀲𑀸𑀢𑀺 𑀅𑀲𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀲𑀻𑀮 𑀲𑀫𑀸𑀥𑀺𑀧𑀜𑁆𑀜𑀸𑀤𑀺𑀕𑀼𑀡𑁂𑀳𑀺 𑀩𑀼𑀤𑁆𑀥𑁂𑀦 𑀲𑀤𑀺𑀲𑁄 𑀓𑁄𑀘𑀺 𑀫𑀦𑀼𑀲𑁆𑀲𑁄 𑀯𑀸 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀢𑁄 𑀳𑀺 𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢 𑀩𑀸𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀭𑀽𑀧𑀓𑀸𑀬𑁄 𑀘 𑀲𑀩𑁆𑀩𑀸𑀓𑀸𑀭𑁂𑀳𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀕𑀼𑀡 𑀭𑀢𑀦𑀲𑀫𑀺𑀤𑁆𑀥𑁄 𑀥𑀫𑁆𑀫𑀓𑀸𑀬𑁄 𑀘 𑀧𑀼𑀜𑁆𑀜𑀫𑀳𑀢𑁆𑀢𑀣𑀸𑀫𑀫𑀳𑀢𑁆𑀢 𑀇𑀤𑁆𑀥𑀺𑀫𑀳𑀢𑁆𑀢𑀬𑀲𑀫𑀳𑀢𑁆𑀢𑀧𑀜𑁆𑀜𑀸𑀫𑀳𑀢𑁆𑀢𑀸𑀤𑀺𑀕𑀼𑀡𑁂𑀳𑀺 𑀘 𑀧𑀭𑀫𑀼𑀓𑁆𑀓𑀁𑀲𑀕𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀫𑀸 𑀪𑀕𑀯𑀸 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀫𑁄 𑀅𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀫𑀁 𑀤𑀤𑀦𑁆𑀢𑀺 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦 𑀥𑀫𑁆𑀫𑀁 𑀯𑁂𑀦𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 𑀤𑁂𑀲𑀦𑀸𑀜𑀸𑀡𑁂𑀦 𑀤𑀸𑀬𑀓𑀁. 𑀏𑀢𑁆𑀣 𑀘 𑀅𑀲𑀫𑀦𑁆𑀢𑀺 𑀦𑀢𑁆𑀣𑀺 𑀏𑀢𑁆𑀣 𑀏𑀢𑁂𑀲𑀁 𑀯𑀸 𑀲𑀫𑁄 𑀲𑀤𑀺𑀲𑁄 𑀮𑁄𑀓𑀺𑀬𑀥𑀫𑁆𑀫𑁄𑀢𑀺 𑀅𑀲𑀫𑁄, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀁 𑀮𑀩𑁆𑀪𑀢𑀺. 𑀅𑀣 𑀯𑀸 𑀅𑀲𑀫𑀦𑁆𑀢𑀺 𑀅𑀜𑁆𑀜𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀪𑀸𑀯𑀢𑁄 𑀘𑀢𑀼𑀩𑁆𑀩𑀺𑀥𑁂𑀦 𑀅𑀭𑀺𑀬 𑀫𑀕𑁆𑀕𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. 𑀢𑀲𑁆𑀲 𑀧𑀦 𑀧𑀤𑀲𑁆𑀲 𑀤𑀤𑀦𑁆𑀢𑀺𑀧𑀤𑁂𑀦 𑀓𑀫𑁆𑀫𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄. 𑀤𑀤𑀸𑀢𑀻𑀢𑀺 𑀤𑀤𑁄, 𑀩𑀼𑀤𑁆𑀥𑁄. 𑀤𑀸𑀥𑀸𑀢𑀼 𑀅, 𑀲𑁄 𑀓𑁂𑀦𑀘𑀺 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀫𑀁 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀫𑀳𑀸𑀓𑀭𑀼𑀡𑀸𑀧𑁆𑀧𑀥𑀸𑀦𑁂𑀦 𑀅𑀫𑀢𑀸𑀥𑀺𑀕𑀫𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀤𑁂𑀲𑀦𑀸𑀜𑀸𑀡𑁂𑀦 𑀯𑁂𑀦𑁂𑀬𑁆𑀬𑀸𑀦𑀁 𑀲𑀢𑁆𑀢𑀸𑀦𑀁 𑀤𑀸𑀢𑀸𑀢𑀺 𑀅𑀢𑁆𑀣𑁄. 𑀢𑀁 𑀅𑀲𑀫𑀁 𑀤𑀤𑀁.

(𑀔) 𑀤𑀼𑀢𑀺𑀬𑀕𑀸𑀣𑀸𑀬𑀁 𑀧𑀦 𑀲𑀭𑀡𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑁄 𑀧𑀭𑀸𑀬𑀡𑁄 𑀮𑁂𑀡𑁄 𑀢𑀸𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀩𑀼𑀤𑁆𑀥𑁄 𑀲𑀭𑀦𑁆𑀢𑀺 𑀧𑀝𑀺𑀲𑀭𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀮𑁄𑀓𑀸𑀢𑀺 𑀲𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀥𑀸𑀢𑀼 𑀬𑀼. 𑀅𑀣 𑀯𑀸 𑀲𑀭𑀦𑁆𑀢𑀺 𑀑𑀲𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀮𑁄𑀓𑀸𑀢𑀺 𑀲𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀭𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀭𑀡𑀫𑀺𑀤𑀦𑁆𑀢𑀺 𑀲𑀭𑀡𑁄𑀢𑀺 𑀘. 𑀲𑀭𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀏𑀢𑁆𑀣𑀼𑀧𑀕𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀤𑁆𑀥𑀫𑁆𑀫𑀦𑁆𑀢𑀺 𑀲𑀭𑀡𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀭 𑀘𑀺𑀦𑁆𑀢𑀸𑀬𑀁 𑀬𑀼. 𑀲𑀭𑀡𑀕𑀫𑀦𑀝𑁆𑀞𑀸𑀦𑁂 𑀧𑀦 𑀲𑀭𑀢𑀺 𑀳𑀺𑀁𑀲𑀢𑀺 𑀪𑀬𑀁 𑀲𑀦𑁆𑀢𑀸𑀧𑀁 𑀤𑀼𑀓𑁆𑀔𑀁 𑀓𑀺𑀮𑁂𑀲𑀜𑁆𑀘𑀸𑀢𑀺 𑀲𑀭𑀡𑀁. 𑀭𑀢𑀦𑀢𑁆𑀢 𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀲𑀭𑀡𑀁.

𑀧𑀼𑀦 𑀲𑀭𑀡𑀁 𑀮𑁄𑀓𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑁄𑀓𑀸𑀲𑀲𑀗𑁆𑀔𑀢𑀁 𑀮𑁄𑀓𑀁 𑀲𑀭𑀦𑁆𑀢𑀁 𑀚𑀸𑀦𑀦𑁆𑀢𑀁. 𑀏𑀢𑁆𑀣 𑀳𑀺 𑀮𑁄𑀓𑀬𑀢𑀺 𑀧𑀢𑀺𑀝𑁆𑀞𑀬𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀜𑁆𑀘 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀲𑀢𑁆𑀢 𑀮𑁄𑀓𑁄 𑀮𑀩𑁆𑀪𑀢𑀺. 𑀮𑁄𑀓𑀥𑀸𑀢𑀼 𑀧𑀢𑀺𑀝𑁆𑀞𑀸𑀬𑀁 𑀡. 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀲𑀗𑁆𑀔𑀸𑀭𑀮𑁄𑀓𑁄. 𑀮𑀼𑀚𑀥𑀸𑀢𑀼𑀡. 𑀮𑁄𑀓𑀺𑀬𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀤𑀺𑀲𑁆𑀲𑀢𑀻𑀢𑀺 𑀮𑁄𑀓𑁄, 𑀮𑁄𑀓𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀺𑀬𑀦𑁆𑀢𑀺 𑀏𑀢𑁆𑀣 𑀯𑀸 𑀚𑀗𑁆𑀕𑀫𑀸 𑀘 𑀣𑀸𑀯𑀭𑀸 𑀘𑀸𑀢𑀺 𑀮𑁄𑀓𑁄, 𑀘𑀓𑁆𑀓𑀯𑀸𑀴𑀲𑀗𑁆𑀔𑀢𑁄 𑀑𑀓𑀸𑀲𑀮𑁄𑀓𑁄 𑀮𑀩𑁆𑀪𑀢𑀺. 𑀮𑁄𑀓𑀥𑀸𑀢𑀼𑀡. 𑀏𑀢𑁆𑀣 𑀘 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑁄𑀬𑁂𑀯 𑀮𑁄𑀓𑁄 𑀲𑀢𑁆𑀢𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀢𑁆𑀢𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸 𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀯𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀯𑀸 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀺𑀬𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀸𑀏𑀯 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀗𑁆𑀔𑀸𑀭𑀮𑁄𑀓𑁄𑀢𑀺.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄,

𑀏𑀢𑁆𑀣 𑀢𑁂 𑀯𑀢𑁆𑀢𑀢𑀺 𑀯𑀲𑁄’’𑀢𑀺.

𑀆𑀕𑀢𑀝𑁆𑀞𑀸𑀦𑁂 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀅𑀯𑀓𑀲𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀓𑀸𑀲𑁄, 𑀲𑁄𑀬𑁂𑀯 𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲 𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀁 𑀮𑁄𑀓𑀁. 𑀲𑀭𑀢𑀺 𑀚𑀸𑀦𑀸𑀢𑀺 𑀅𑀚𑀸𑀦𑀻𑀢𑀺 𑀯𑀸 𑀲𑀭𑀡𑁄, 𑀩𑀼𑀤𑁆𑀥𑁄. 𑀲𑀭 𑀘𑀺𑀦𑁆𑀢𑀸𑀬𑀁 𑀬𑀼. 𑀮𑁄𑀓𑀁 𑀲𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑁄 𑀧𑀦 𑀲𑀢𑁆𑀢𑀮𑁄𑀓𑀁, 𑀲𑀗𑁆𑀔𑀸𑀭𑀮𑁄𑀓𑀁, 𑀑𑀓𑀸𑀲𑀮𑁄𑀓𑀁, 𑀓𑀺𑀮𑁂𑀲𑀮𑁄𑀓𑀁, 𑀪𑀯𑀮𑁄𑀓𑀁, 𑀇𑀦𑁆𑀤𑁆𑀭𑀺𑀬 𑀮𑁄𑀓𑀁, 𑀔𑀦𑁆𑀥𑀮𑁄𑀓𑀁, 𑀆𑀬𑀢𑀦𑀮𑁄𑀓𑀁 𑀥𑀸𑀢𑀼𑀮𑁄𑀓𑀜𑁆𑀘𑀸𑀢𑀺𑀆𑀤𑀺𑀫𑀦𑁂𑀓𑀮𑁄𑀓𑀁 𑀅𑀦𑀸𑀯𑀭𑀡𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀭𑀡𑀦𑁆𑀢𑀺 𑀦𑀺𑀓𑁆𑀓𑀺𑀮𑁂𑀲𑀁, 𑀓𑀺𑀮𑁂𑀲𑀲𑀗𑁆𑀔𑀸𑀢𑀭𑀡𑀯𑀺𑀭𑀳𑀺𑀢𑀁 𑀯𑀸. 𑀭𑀡𑀲𑀤𑁆𑀤𑁄 𑀘 𑀓𑀺𑀮𑁂𑀲𑁂𑀲𑀼 𑀘 𑀬𑀼𑀤𑁆𑀥𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁂 𑀘 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑁂𑀲𑀼 𑀤𑀺𑀲𑁆𑀲𑀢𑀺. 𑀢𑁂 𑀳𑀺 𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀻𑀢𑀺 𑀭𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

‘‘𑀥𑀦𑀼𑀕𑁆𑀕𑀳𑁄 𑀅𑀲𑀤𑀺𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀭𑀡𑀁 𑀓𑀢𑁆𑀯𑀸, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺.

𑀅𑀲𑀤𑀺𑀲𑀚𑀸𑀢𑀓𑁂 𑀬𑀼𑀤𑁆𑀥𑁂 𑀤𑀺𑀲𑁆𑀲𑀢𑀺. 𑀭𑀡𑀁 𑀓𑀢𑁆𑀯𑀸𑀢𑀺 𑀳𑀺 𑀬𑀼𑀤𑁆𑀥𑀁 𑀓𑀢𑁆𑀯𑀸, 𑀲𑀁𑀬𑀫𑀦𑁆𑀢𑀺 𑀲𑀁𑀬𑀢𑀁 𑀇𑀲𑀺𑀧𑀩𑁆𑀩𑀚𑁆𑀚𑀁 𑀅𑀚𑁆𑀛𑀼𑀧𑀸𑀕𑀫𑀻𑀢𑀺 𑀅𑀢𑁆𑀣𑁄. 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀭𑀡𑀁 𑀓𑀭𑁄𑀦𑁆𑀢𑁄, 𑀥𑀸𑀯𑀺𑀁𑀲𑀼 𑀢𑁂 𑀅𑀝𑁆𑀞𑀤𑀺𑀲𑀸 𑀲𑀫𑀦𑁆𑀢𑀢𑁄𑀢𑀺 𑀙𑀤𑁆𑀤𑀦𑁆𑀢𑀚𑀸𑀢𑀓𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁂 𑀤𑀺𑀲𑁆𑀲𑀢𑀺. 𑀭𑀡𑀁 𑀓𑀭𑁄𑀦𑁆𑀢𑁄𑀢𑀺 𑀳𑀺 𑀘𑀼𑀡𑁆𑀡𑀁 𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑁄. 𑀢𑁂𑀢𑀺 𑀲𑀩𑁆𑀩𑁂 𑀅𑀝𑁆𑀞𑀲𑀳𑀲𑁆𑀲𑀦𑀸𑀕𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀓𑀺𑀮𑁂𑀲𑁂 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀭𑀡𑀦𑁆𑀢𑀺 𑀲𑀢𑁆𑀢𑁂 𑀭𑀸𑀕𑀸𑀤𑀬𑁄 𑀘𑀼𑀡𑁆𑀡𑁂𑀦𑁆𑀢𑀺 𑀧𑀻𑀴𑁂𑀦𑁆𑀢𑀻𑀢𑀺 𑀭𑀡𑀸, 𑀭𑀡𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀳𑀺 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀻𑀢𑀺 𑀯𑀸 𑀭𑀡𑀸, 𑀓𑀺𑀮𑁂𑀲𑀸. 𑀭𑀡𑀥𑀸𑀢𑀼 𑀲𑀤𑁆𑀤𑁂 𑀅. 𑀦𑀢𑁆𑀣𑀺 𑀭𑀡𑀸 𑀓𑀺𑀮𑁂𑀲𑀸 𑀏𑀢𑀲𑁆𑀲𑀸𑀢𑀺 𑀅𑀭𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀚𑀺𑀦𑀲𑁆𑀲 𑀓𑀺𑀮𑁂𑀲𑀫𑀸𑀭𑀲𑁆𑀲 𑀩𑁄𑀥𑀺𑀫𑀽𑀮𑁂 𑀚𑀺𑀬𑀫𑀸𑀦𑀢𑁆𑀢𑀸 𑀭𑀡𑀸 𑀓𑀺𑀮𑁂𑀲𑀸 𑀦 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀅𑀭𑀡𑀁.

𑀅𑀭𑀡𑀁 𑀓𑀭𑀦𑁆𑀢𑀺 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀭𑀡𑀲𑀗𑁆𑀔𑀢𑀓𑀺𑀮𑁂𑀲𑀲𑁆𑀲 𑀅𑀪𑀸𑀯𑀓𑀭𑀡𑀁. 𑀏𑀢𑁆𑀣 𑀘 𑀭𑀡𑀦𑁆𑀢𑀺 𑀏𑀢𑀁 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑀯𑀦𑁆𑀢𑀺 𑀏𑀢𑁂𑀲𑀁 𑀭𑀸𑀕𑀸𑀤𑀻𑀦𑀁 𑀅𑀥𑀺𑀯𑀘𑀦𑀁. 𑀢𑁂𑀲𑀁 𑀅𑀪𑀸𑀯𑀁 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀤𑁂𑀲𑀦𑀸𑀜𑀸𑀡𑁂𑀦 𑀓𑀭𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀭𑁄𑀢𑀻𑀢𑀺 𑀓𑀭𑁄, 𑀩𑀼𑀤𑁆𑀥𑁄. 𑀢𑀁 𑀓𑀭𑀁.

𑀅𑀪𑀬𑀦𑁆𑀢𑀺 𑀚𑀸𑀢𑀺𑀪𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀩𑁆𑀪𑀬𑀁. 𑀏𑀢𑁆𑀣 𑀳𑀺 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁, 𑀜𑀸𑀡𑀪𑀬𑀁, 𑀆𑀭𑀫𑁆𑀫𑀡𑀪𑀬𑀁, 𑀑𑀢𑁆𑀢𑀧𑁆𑀧 𑀪𑀬𑀜𑁆𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀪𑀸𑀬𑀢𑀺 𑀘𑀺𑀢𑁆𑀢𑁂𑀦𑀸𑀢𑀺 𑀪𑀬𑀁, 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁. 𑀜𑀸𑀡𑁂𑀦 𑀢𑀻𑀭𑁂𑀢𑁆𑀯𑀸 𑀪𑀸𑀬𑀢𑀻𑀢𑀺 𑀪𑀬𑀁, 𑀜𑀸𑀡𑀁. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀆𑀭𑀫𑁆𑀫𑀡𑀪𑀬𑀁. 𑀪𑀸𑀬𑀢𑀺 𑀏𑀢𑁂𑀦 𑀧𑀸𑀧𑀢𑁄𑀢𑀺 𑀪𑀬𑀁, 𑀑𑀢𑁆𑀢𑀧𑁆𑀧𑀪𑀬𑀁. 𑀪𑀻𑀥𑀸𑀢𑀼 𑀪𑀬𑁂 𑀡.

𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀁 𑀧𑀦 𑀆𑀕𑀢𑀸𑀦𑀺 𑀚𑀸𑀢𑀺𑀪𑀬𑀁, 𑀚𑀭𑀸𑀪𑀬𑀁, 𑀩𑁆𑀬𑀸𑀥𑀺𑀪𑀬𑀁, 𑀫𑀭𑀡𑀪𑀬𑀁, 𑀭𑀸𑀚𑀪𑀬𑀁, 𑀘𑁄𑀭𑀪𑀬𑀁, 𑀅𑀕𑁆𑀕𑀺𑀪𑀬𑀁, 𑀉𑀤𑀓𑀪𑀬𑀁, 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀁, 𑀧𑀭𑀸𑀦𑀼𑀯𑀸𑀤𑀪𑀬𑀁, 𑀤𑀡𑁆𑀟𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀁, 𑀊𑀫𑀺𑀪𑀬𑀁, 𑀓𑀼𑀫𑁆𑀪𑀻𑀴𑀪𑀬𑀁, 𑀆𑀯𑀝𑁆𑀝𑀪𑀬𑀁, 𑀲𑀼𑀲𑀼𑀓𑀪𑀬𑀁, 𑀆𑀚𑀻𑀯𑀺𑀓𑀪𑀬𑀁, 𑀅𑀲𑀺𑀮𑁄𑀓𑀪𑀬𑀁, 𑀧𑀭𑀺𑀲𑀬𑀲𑀸𑀭𑀚𑁆𑀚𑀪𑀬𑀁, 𑀫𑀤𑀦 𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀦𑁆𑀢𑀺𑀆𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀦𑀢𑁆𑀣𑀺 𑀪𑀬𑀸𑀦𑀺 𑀏𑀢𑀲𑁆𑀲𑀸𑀢𑀺 𑀅𑀪𑀬𑁄, 𑀩𑀼𑀤𑁆𑀥𑁄. 𑀢𑀲𑁆𑀲 𑀪𑀬𑀸𑀦𑀁 𑀓𑀸𑀭𑀡 𑀪𑀽𑀢𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀲𑀩𑁆𑀩𑀪𑀬𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀧𑀼𑀦 𑀅𑀪𑀬𑀁 𑀞𑀸𑀦𑀁 𑀦𑀸𑀬𑀓𑀦𑁆𑀢𑀺 𑀏𑀢𑁆𑀣 𑀅𑀪𑀬𑀦𑁆𑀢𑀺𑀧𑀤𑀁 𑀞𑀸𑀦𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀞𑀸𑀦𑀦𑁆𑀢𑀺𑀧𑀤𑀁 𑀦𑀸𑀬𑀓𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀪𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀦𑀢𑁆𑀣𑀺 𑀲𑀩𑁆𑀩𑀪𑀬𑀁 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂𑀢𑀺 𑀅𑀪𑀬𑀁, 𑀦𑀺𑀩𑁆𑀩𑀸𑀦𑀁. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥 𑀅𑀭𑀳𑀦𑁆𑀢𑀸 𑀞𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀦𑀺𑀩𑁆𑀩𑀸𑀦𑀁. 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑀸𑀬𑀓𑁄, 𑀩𑀼𑀤𑁆𑀥𑁄. 𑀦𑀻𑀥𑀸𑀢𑀼 𑀦𑀬𑀦𑁂 𑀡𑁆𑀯𑀼. 𑀲𑁄 𑀩𑀼𑀤𑁆𑀥𑁄 𑀪𑀩𑁆𑀩𑁂 𑀓𑀼𑀮𑀧𑀼𑀢𑁆𑀢𑁂 𑀫𑀕𑁆𑀕𑀸𑀥𑀺 𑀕𑀫𑀧𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀫𑀕𑁆𑀕𑀨𑀮𑀜𑀸𑀡𑀁 𑀅𑀥𑀺𑀕𑀫𑁂𑀦𑁆𑀢𑁄 𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀦𑁂𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀦𑀸𑀬𑀓𑀁.

𑀧𑀼𑀦 𑀦𑀸𑀬𑀓𑀁 𑀦𑀫𑁂𑀢𑀺 𑀦𑀸𑀬𑀓𑀁 𑀩𑀼𑀤𑁆𑀥𑀁 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀦𑀸𑀬𑀓𑀦𑁆𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀢𑀻𑀢𑀺 𑀦𑀸𑀬𑀓𑁄, 𑀩𑀼𑀤𑁆𑀥𑁄. 𑀲𑁄 𑀳𑀺 𑀬𑀣𑀸 𑀦𑀸𑀯𑀺𑀓𑁄 𑀚𑀦𑁂 𑀦𑀸𑀯𑀸𑀬 𑀑𑀭𑀺𑀫𑀢𑀻𑀭𑀢𑁄 𑀧𑀸𑀭𑀺𑀫𑀢𑀻𑀭𑀁 𑀦𑁂𑀢𑀺, 𑀏𑀯𑀁 𑀲𑀢𑁆𑀢𑁂 𑀫𑀕𑁆𑀕𑀗𑁆𑀕𑀦𑀸𑀯𑀸𑀬 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦 𑀧𑀸𑀭𑀁 𑀦𑁂𑀢𑀺 𑀧𑀸𑀧𑀼𑀡𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀬𑀓𑀦𑁆𑀢𑀺 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀚𑁂𑀝𑁆𑀞𑀪𑀸𑀯𑀕𑀫𑀦𑀢𑁆𑀢𑀸 𑀦𑀸𑀬𑀓𑁄 𑀚𑁂𑀝𑁆𑀞 𑀲𑁂𑀝𑁆𑀞𑀯𑀼𑀟𑁆𑀠𑀢𑀭𑁄. 𑀲𑁄 𑀳𑀺 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀺 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀦𑀸𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀻𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡𑁆𑀯𑀼. 𑀲𑁄 𑀧𑀦 𑀇𑀥 𑀮𑁄𑀓𑁂 𑀅𑀯𑀺𑀚𑁆𑀚𑀡𑁆𑀟𑀕𑀢𑀸𑀦𑀁 𑀲𑀩𑁆𑀩𑀧𑀚𑀸𑀦𑀁 𑀧𑀞𑀫𑀢𑀭𑀁 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀤𑀸𑀮𑁂𑀢𑁆𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑀚𑁂𑀝𑁆𑀞𑀯𑀼𑀟𑁆𑀠𑀢𑀭𑀪𑀸𑀯𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀦𑀸𑀬𑀓𑀁. 𑀦𑀫𑁂𑀢𑀺 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀦𑀫𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀯𑀢𑁆𑀢𑀫𑀸𑀦𑀫𑀺𑀯𑀺𑀪𑀢𑁆𑀢𑀺𑀬𑀸 𑀓𑁆𑀯𑀘𑀺𑀥𑀸𑀢𑀼𑀢𑁆𑀬𑀸𑀤𑀺𑀲𑀼𑀢𑁆𑀢𑁂𑀦 𑀏𑀆𑀤𑁂𑀲𑁄 𑀳𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀸𑀘𑁆𑀘𑀢𑁆𑀣𑀸𑀤𑀺𑀦𑀬𑁄. 𑀦𑀫𑁂𑀢𑀺𑀧𑀤𑀲𑁆𑀲 𑀆𑀔𑁆𑀬𑀸𑀢𑀧𑀤𑀢𑁆𑀢𑀸 𑀯𑀘𑀦𑀢𑁆𑀣𑁄 𑀦 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀤𑁆𑀤𑀯𑀺𑀤𑀽𑀳𑀺 𑁋

‘‘𑀭𑀼𑀴𑁆𑀳𑀻𑀔𑁆𑀬𑀸𑀢𑀁 𑀦𑀺𑀧𑀸𑀢𑀜𑁆𑀘𑀼, 𑀧𑀲𑀕𑁆𑀕𑀸𑀮𑀧𑀦𑀁 𑀢𑀣𑀸;

𑀲𑀩𑁆𑀩𑀦𑀸𑀫𑀦𑁆𑀢𑀺𑀫𑁂𑀢𑁂𑀲𑀼, 𑀦 𑀓𑀢𑁄 𑀯𑀺𑀕𑁆𑀕𑀳𑁄 𑀙𑀲𑀽’’𑀢𑀺.

𑀢𑀁 𑀧𑀦 𑀧𑀤𑀁 𑀦𑀫𑀼𑀥𑀸𑀢𑀼𑀯𑀢𑁆𑀢𑀫𑀸𑀦𑀅𑀫𑁆𑀳𑀬𑁄𑀕𑀧𑀭𑀲𑁆𑀲𑀧𑀤𑀫𑀺𑀯𑀺𑀪𑀢𑁆𑀬𑀦𑁆𑀢𑀁 𑀆𑀔𑁆𑀬𑀸𑀢𑀧𑀤𑀁. 𑀦𑀫𑀼𑀥𑀸𑀢𑀼𑀬𑀸 𑀯𑀸𑀘𑁆𑀘𑀢𑁆𑀣𑁄 𑀦𑀫𑀦𑀓𑁆𑀭𑀺𑀬𑀸 𑀲𑀗𑁆𑀔𑀸𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀫𑀺𑀯𑀺𑀪𑀢𑁆𑀢𑀺𑀬𑀸 𑀯𑀸𑀘𑁆𑀘𑀢𑁆𑀣𑁄 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀉𑀧𑀮𑀓𑁆𑀔𑀺𑀢𑁄 𑀉𑀧𑁆𑀧𑀸𑀤 𑀯𑀦𑁆𑀢𑁄 𑀢𑀤𑀸𑀓𑀸𑀭𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺. 𑀧𑀤𑀲𑀫𑀼𑀤𑀸𑀬𑀲𑁆𑀲 𑀧𑀦 𑀯𑀸𑀘𑁆𑀘𑀢𑁆𑀣𑁄 𑀓𑀢𑁆𑀢𑀼𑀓𑀫𑁆𑀫𑀪𑀸𑀯𑁂𑀲𑀼 𑀓𑀢𑁆𑀢𑀼𑀪𑀽𑀢𑁄 𑀅𑀢𑀻𑀢𑀸𑀤𑀺𑀓𑀸𑀮𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀪𑀽𑀢𑁄 𑀥𑀸𑀢𑁆𑀯𑀢𑁆𑀣 𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀯 𑀮𑀩𑁆𑀪𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄.

𑀯𑀺𑀢𑁆𑀣𑀸𑀭𑁄 𑀧𑀦𑁂𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀦𑀫𑀼𑀥𑀸𑀢𑀼𑀬𑀸 𑀯𑀘𑁆𑀘𑀁 𑀲𑀼𑀕𑀢𑀸𑀤𑀺 𑀩𑀼𑀤𑁆𑀥𑀕𑀼𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀦𑁆𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀓𑀸𑀬𑀯𑀘𑀻 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑁄 𑀲𑀤𑁆𑀥𑀸𑀘𑁂𑀢𑀦𑀸𑀧𑀜𑁆𑀜𑀸𑀧𑀥𑀸𑀦𑁄 𑀓𑀼𑀲𑀮 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀤𑁆𑀯𑁂 𑀯𑀺𑀜𑁆𑀜𑀢𑁆𑀢𑀺𑀬𑁄 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀯𑀦𑁆𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀘 𑀫𑀼𑀔𑁆𑀬𑁂𑀦 𑀮𑀩𑁆𑀪𑀢𑀺. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸 𑀭𑀸𑀤𑀺𑀧𑀼𑀭𑁂𑀘𑀭𑀸𑀦𑀼𑀘𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀨𑀮𑀽𑀧𑀘𑀸𑀭𑁂𑀦. 𑀤𑀺𑀝𑁆𑀞𑀥𑀫𑁆𑀫𑀺 𑀓𑀲𑀫𑁆𑀧𑀭𑀸𑀬𑀺𑀓𑀲𑀗𑁆𑀔𑀸𑀢𑀁 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀨𑀮𑀁 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀁 𑀅𑀪𑀸𑀯𑀜𑁆𑀘 𑀯𑀸 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀲𑀼𑀔𑀜𑁆𑀘 𑀓𑀸𑀭𑀡𑀽𑀧𑀘𑀸𑀭𑁂𑀦, 𑀧𑀼𑀭𑁂 𑀧𑀼𑀭𑁂 𑀯𑀦𑁆𑀤𑀦𑀸 𑀲𑀤𑀺𑀲𑁆𑀬𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦𑀲𑁆𑀲 𑀦𑀸𑀫𑀧𑀜𑁆𑀜𑀢𑁆𑀢𑀺 𑀞𑀸𑀦𑀽𑀧𑀘𑀸𑀭𑁂𑀦, 𑀯𑀢𑁆𑀣𑀼𑀤𑁆𑀯𑀸𑀭𑀸𑀭𑀫𑁆𑀫𑀡𑀁 𑀞𑀸𑀦𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦 𑀕𑀼𑀡𑁂𑀦 𑀮𑀓𑁆𑀔𑀺𑀢𑀁 𑀧𑀼𑀕𑁆𑀕𑀮𑀤𑀩𑁆𑀩𑀁 𑀕𑀼𑀡𑀽𑀧𑀘𑀸𑀭𑁂𑀦. 𑀉𑀓𑁆𑀓𑀝𑁆𑀞𑀫𑀚𑁆𑀛 𑀫𑀼𑀤𑀼𑀢𑁆𑀢𑀫𑀢𑁆𑀢𑀪𑀸𑀯𑁄 𑀕𑀼𑀡𑁆𑀬𑀽𑀧𑀘𑀸𑀭𑁂𑀦, 𑀅𑀯𑀬𑀯𑀪𑀽𑀢𑀸 𑀯𑀦𑁆𑀤𑀦𑀸 𑀏𑀓𑀤𑁂𑀲𑀽𑀧𑀘𑀸𑀭𑁂𑀦. 𑀲𑀫𑀽𑀳𑀪𑀽𑀢𑀸 𑀯𑀦𑁆𑀤𑀦𑀸 𑀏𑀓𑀤𑁂𑀲𑁆𑀬𑀽𑀧𑀘𑀸𑀭𑁂𑀦, 𑀧𑀼𑀩𑁆𑀩𑀧𑀼𑀩𑁆𑀩𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀻𑀧𑀽𑀧𑀘𑀸𑀭𑁂𑀦, 𑀧𑀘𑁆𑀙𑀺𑀫𑀧𑀘𑁆𑀙𑀺𑀫 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀻𑀧𑁆𑀬𑀽𑀧𑀘𑀸𑀭𑁂𑀦, 𑀧𑀡𑀸𑀫𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀪𑀽𑀢𑀸𑀦𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀩𑁆𑀬𑀸𑀧𑀸𑀭𑀪𑀸𑀯𑁄 𑀢𑀤𑁆𑀥𑀫𑁆𑀫𑀽𑀧𑀘𑀸𑀭𑁂𑀦. 𑀢𑁂𑀲𑀁 𑀏𑀯𑀁 𑀥𑀫𑁆𑀫𑀢𑀸𑀪𑀸𑀯𑁄 𑀅𑀢𑀤𑁆𑀥𑀫𑁆𑀫𑀽𑀧𑀘𑀸𑀭𑁂𑀦, 𑀯𑀦𑁆𑀤𑀦𑀸𑀓𑀸𑀭𑁄 𑀅𑀪𑁂𑀤𑀪𑁂𑀤𑀽𑀧𑀘𑀸𑀭𑁂𑀦. 𑀯𑀦𑁆𑀤𑀦𑀲𑀢𑁆𑀢𑀺 𑀪𑁂𑀤𑀅𑀪𑁂𑀤𑀽𑀧𑀘𑀸𑀭𑁂𑀦 𑀮𑀩𑁆𑀪𑀢𑀺. 𑀫𑀺𑀯𑀺𑀪𑀢𑁆𑀢𑀺𑀬𑀸 𑀯𑀸𑀘𑁆𑀘𑀁 𑀢𑀁𑀫𑀼𑀔𑁆𑀬𑀸𑀤𑀻𑀳𑀺 𑀮𑀓𑁆𑀔𑀺𑀢𑁄 𑀓𑀢𑁆𑀢𑀼 𑀓𑁆𑀭𑀺𑀬𑀸𑀯𑀺𑀲𑁂𑀲𑁂𑀦 𑀘 𑀯𑀢𑁆𑀢𑀫𑀸𑀦𑀯𑀺𑀪𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀯𑀺𑀪𑀢𑁆𑀢𑀺𑀯𑀺𑀲𑁂 𑀲𑁂𑀦 𑀘 𑀧𑀭𑀲𑁆𑀲𑀧𑀤𑀲𑀗𑁆𑀔𑀸𑀢𑁂𑀦 𑀧𑀤𑀯𑀺𑀲𑁂𑀲𑁂𑀦 𑀘 𑀉𑀢𑁆𑀢𑀫𑀧𑀼𑀭𑀺𑀲 𑀯𑀺𑀲𑁂𑀲𑁂𑀦 𑀘 𑀅𑀫𑁆𑀳𑀬𑁄𑀕𑀯𑀺𑀲𑁂𑀲𑁂𑀦 𑀘 𑀲𑀩𑁆𑀩𑀥𑀸𑀢𑀼𑀯𑀺𑀲𑁂𑀲𑁂𑀦 𑀘 𑀏𑀓𑀯𑀘𑀦𑀯𑀺𑀲𑁂𑀲𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀺𑀲𑁂𑀲𑁂𑀦 𑀘 𑀥𑀸𑀢𑁆𑀯𑀢𑁆𑀣𑀓𑁆𑀭𑀺𑀬𑀸𑀯𑀺𑀲𑁂𑀲𑁂𑀦 𑀘 𑀅𑀮𑀺𑀗𑁆𑀕 𑀯𑀺𑀲𑁂𑀲𑁂𑀦 𑀘 𑀪𑀽𑀯𑀸𑀤𑀺𑀕𑀡 𑀯𑀺𑀲𑁂𑀲𑁂𑀦 𑀘 𑀦𑁄𑀯𑀺𑀓𑀭𑀡𑀯𑀺𑀲𑁂𑀲𑁂𑀦 𑀘 𑀪𑀸𑀯𑀓𑀫𑁆𑀫𑀓𑀢𑁆𑀢𑀽𑀲𑀼𑀓𑀢𑁆𑀢𑀼𑀯𑀺𑀲𑁂𑀲𑁂𑀦 𑀘 𑀮𑀓𑁆𑀔𑀺𑀢𑁄 𑀅𑀳𑀁𑀲𑀗𑁆𑀔𑀸𑀢𑁄 𑀔𑀦𑁆𑀥𑀲𑀗𑁆𑀔𑀢𑁄 𑀲𑀦𑁆𑀢𑀸𑀦𑁄 𑀅𑀧𑁆𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀓𑁆𑀭𑀺𑀬𑀸𑀧𑀤𑀲𑁆𑀲 𑀓𑁆𑀭𑀺𑀬𑀸𑀬 𑀧𑀥𑀸𑀦𑁂𑀦 𑀯𑀸𑀘𑀓𑀢𑁆𑀢𑀸 𑀥𑀸𑀢𑁆𑀯𑀢𑁆𑀣𑁄𑀯 𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀅𑀧𑀘𑁆𑀘𑀬𑀲𑁆𑀲 𑀯𑀸𑀘𑁆𑀘𑀁 𑀪𑀽𑀯𑀸𑀤𑀺𑀕𑀡𑀚𑁄𑀢𑀓𑀸 𑀭𑀽𑀧𑀲𑀺𑀤𑁆𑀥𑀺𑀫𑀢𑁆𑀢𑀸 𑀧𑀤 𑀲𑀺𑀮𑀺𑀝𑁆𑀞𑀢𑀸 𑀮𑀩𑁆𑀪𑀢𑀺.

𑀅𑀣 𑀯𑀸 𑀬𑁄 𑀅𑀳𑀁 𑀦𑀫𑀸𑀫𑀻𑀢𑀺 𑀲𑁄 𑀦𑀫𑁂. 𑀲𑀸𑀫𑀜𑁆𑀜𑀢𑁆𑀣 𑀯𑀺𑀕𑁆𑀕𑀳𑁄𑀬𑀁. 𑀯𑀸𑀘𑁆𑀘𑀢𑁆𑀣𑁄 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀫𑀦𑀜𑁆𑀘𑁂𑀢𑁆𑀣 𑀩𑀼𑀤𑁆𑀥𑀲𑁆𑀲 𑀲𑀻𑀮𑀸𑀤𑀺𑀅𑀦𑀦𑁆𑀢𑀕𑀼𑀡𑁂𑀲𑀼 𑀦𑀺𑀦𑁆𑀦𑀧𑀩𑁆𑀪𑀸𑀭𑀢𑀸𑀯𑀲𑁂𑀦 𑀧𑀡𑀸𑀫𑀓𑁆𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸. 𑀲𑀸 𑀘 𑀯𑀦𑁆𑀤𑀦𑁂𑀬𑁆𑀬 𑀯𑀦𑁆𑀤𑀦𑀓𑀸𑀦𑀁 𑀔𑁂𑀢𑁆𑀢𑀚𑁆𑀛𑀸𑀲𑀬𑀲𑀫𑁆𑀧𑀤𑀸𑀳𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦 𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀸𑀦𑀺 𑀉𑀧𑀧𑀻𑀴𑀓𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀸𑀦𑀺 𑀧𑀝𑀺𑀩𑀸𑀳𑀺𑀢𑁆𑀯𑀸 𑀧𑀯𑀢𑁆𑀢𑀺𑀓𑀸𑀮𑁂 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀸𑀦𑀫𑀧𑁆𑀧𑀯𑀢𑁆𑀢𑀺𑀁 𑀲𑀸𑀥𑁂𑀢𑀺. 𑀲𑀫𑁆𑀧𑀭𑀸𑀬𑁂 𑀘 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀪𑀽𑀢𑀸 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀲𑀼𑀔𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀤𑀲𑁆𑀲𑀦𑀢𑁆𑀣𑀦𑀬𑁄. 𑀦𑀫𑁂𑀢𑀺𑀇𑀫𑀺𑀦𑀸 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀸𑀤𑀺𑀕𑀼𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀢𑀺𑀯𑀺𑀥𑀸 𑀧𑀡𑀸𑀫𑀓𑀼𑀲𑀮 𑀘𑁂𑀢𑀦𑀸 𑀫𑀼𑀔𑁆𑀬𑁂𑀦 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑀦𑁂𑀦 𑀢𑀲𑁆𑀲𑀸 𑀓𑀸𑀭𑀡𑀪𑀽𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄 𑀘 𑀘𑀢𑀼𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑀦𑀯𑀫𑀔𑁂𑀢𑁆𑀢𑀜𑁆𑀘 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀁 𑀲𑀤𑁆𑀥𑀸𑀧𑀜𑁆𑀜𑀸𑀧𑀥𑀸𑀦𑀁 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀜𑁆𑀘 𑀨𑀮𑀽𑀧𑀘𑀸𑀭𑁂𑀦 𑀤𑀻𑀧𑁂𑀢𑀺. 𑀢𑀤𑁆𑀤𑀻𑀧𑀦𑁂𑀦 𑀢𑀲𑁆𑀲𑀸 𑀨𑀮𑀪𑀽𑀢𑀁 𑀤𑀺𑀝𑁆𑀞𑀥𑀫𑁆𑀫𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀜𑁆𑀘 𑀲𑀕𑁆𑀕𑀫𑁄𑀓𑁆𑀔 𑀲𑀼𑀔𑀜𑁆𑀘 𑀧𑀞𑀫𑀓𑀸𑀭𑀡𑀽𑀧𑀘𑀸𑀭𑁂𑀦 𑀧𑀓𑀸𑀲𑁂𑀢𑀺. 𑀢𑀧𑁆𑀧𑀓𑀸𑀲𑀦𑁂𑀦 𑀩𑀼𑀤𑁆𑀥𑀲𑁆𑀲 𑀧𑀡𑀸𑀫𑀸𑀭𑀳𑀪𑀸𑀯𑀁 𑀤𑀼𑀢𑀺𑀬𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀺𑀪𑀸𑀯𑁂𑀢𑀺. 𑀢𑀁𑀯𑀺𑀪𑀸𑀯𑀦𑁂𑀦 𑀯𑀦𑁆𑀤𑀓𑀲𑁆𑀲 𑀫𑁂 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀜𑁆𑀘 𑀧𑀡𑀸𑀫𑁂 𑀢𑀩𑁆𑀩𑀪𑀸𑀯𑀜𑁆𑀘 𑀢𑀢𑀺𑀬𑀓𑀸𑀭𑀡𑀽𑀧𑀘𑀸𑀭𑁂𑀦 𑀅𑀦𑀼𑀪𑀸𑀯𑁂𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀮𑀗𑁆𑀓𑀸𑀭𑀦𑀬𑁄. 𑀦𑀫𑁂𑀢𑀺𑀯𑀸𑀘𑀓𑀧𑀤𑀲𑁆𑀲 𑀯𑀸𑀘𑁆𑀘𑀪𑀽𑀢𑀸 𑀢𑀺𑀯𑀺𑀥𑀸 𑀩𑀼𑀤𑁆𑀥𑀧𑀡𑀸𑀫𑀓𑀼𑀲𑀮𑀘𑁂𑀢𑀦𑀸 𑀲𑀫𑀝𑁆𑀞𑀸𑀬𑀻 𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀲𑀭𑀻𑀭𑀢𑁆𑀢𑀸. 𑀅𑀣 𑀯𑀸 𑀢𑀺𑀯𑀺𑀥𑀸𑀬 𑀩𑀼𑀤𑁆𑀥𑀧𑀡𑀸 𑀫𑀓𑀼𑀲𑀮𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺𑀧𑁆𑀧𑀥𑀸𑀦𑁄 𑀫𑀳𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀫𑀝𑁆𑀞𑀸𑀬𑀻𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑁂 𑀏𑀓𑀕𑁆𑀕𑀢𑁆𑀢𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑁆𑀢𑀸 𑀯𑀸. 𑀲𑁄𑀬𑁂𑀯 𑀧𑀦 𑀲𑀦𑁆𑀢𑀭𑀲𑁄 𑀦𑀸𑀫. 𑀓𑀲𑁆𑀫𑀸, 𑀩𑀼𑀤𑁆𑀥𑀧𑀡𑀸𑀫𑀘𑁂𑀢𑀦𑀸 𑀓𑀼𑀲𑀮𑀗𑁆𑀕𑁂𑀦 𑀅𑀓𑀼𑀲𑀮𑀗𑁆𑀕𑀲𑁆𑀲 𑀧𑀳𑀻𑀦𑀢𑁆𑀢𑀸. 𑀩𑀼𑀤𑁆𑀥𑀦𑁆𑀢𑀺𑀧𑀸𑀞𑀲𑁂𑀲 𑀧𑀤𑀲𑁆𑀲 𑀯𑀸𑀘𑁆𑀘𑀪𑀽𑀢𑁄 𑀩𑀼𑀤𑁆𑀥𑀤𑀩𑁆𑀩𑁄 𑀆𑀭𑀫𑁆𑀫𑀡𑀯𑀺𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀢𑀲𑁆𑀲 𑀧𑀡𑀸𑀫𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀉𑀧𑀓𑀸𑀭𑀢𑁆𑀢𑀸. 𑀩𑀼𑀤𑁆𑀥𑀲𑁆𑀲 𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀕𑀼𑀡𑁄 𑀉𑀤𑁆𑀤𑀻𑀧𑀦𑀯𑀺𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀧𑀡𑀸𑀫𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀓𑀸𑀭𑀡𑀪𑀽𑀢𑀁 𑀢𑀁 𑀲𑀫𑀝𑁆𑀞𑀸𑀬𑀻𑀪𑀸𑀯𑀁 𑀉𑀧𑀸𑀤𑀸𑀬 𑀚𑀸𑀦𑀺𑀢𑀩𑁆𑀩𑁄 𑀤𑀺𑀝𑁆𑀞𑀥𑀫𑁆𑀫𑀭𑁄𑀕𑀸 𑀤𑀺𑀅𑀦𑁆𑀢𑀭𑀸𑀬𑀸𑀪𑀸𑀯𑁄 𑀘 𑀲𑀫𑁆𑀧𑀭𑀸𑀬𑁂 𑀲𑀕𑁆𑀕𑀫𑁄𑀓𑁆𑀔𑀲𑀼𑀔𑀲𑀫𑁆𑀧𑀢𑁆𑀢𑀺 𑀘 𑀆𑀦𑀼𑀪𑀸𑀯𑁄 𑀦𑀸𑀫. 𑀓𑀲𑁆𑀫𑀸, 𑀆𑀦𑀺𑀲𑀁𑀲𑀨𑀮𑀢𑁆𑀢𑀸.

𑀢𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀆𑀦𑀼𑀪𑀸𑀯𑀤𑀻𑀧𑀓𑀁 𑀧𑀤𑀁 𑀦𑀢𑁆𑀣𑀺. 𑀓𑀸𑀭𑀡𑀲𑁆𑀲 𑀧𑀦 𑀨𑀮𑁂𑀦 𑀯𑀺𑀦𑀸𑀪𑀸𑀯𑀢𑁄 𑀓𑀸𑀭𑀡𑀲𑁆𑀲 𑀨𑀮𑀁 𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺. 𑀅𑀣 𑀯𑀸 𑀦𑀫𑁂𑀢𑀺𑀧𑀤𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁄 𑀆𑀦𑀼𑀪𑀸𑀯𑁄 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀆𑀯𑀺𑀪𑀽𑀢𑁄 𑀉𑀲𑁆𑀲𑀼𑀓𑁄 𑀘 𑀩𑀼𑀤𑁆𑀥𑀧𑀡𑀸𑀫𑀲𑁆𑀲 𑀆𑀦𑀺𑀲𑀁𑀲𑀧𑀚𑀸𑀦𑀦𑀸 𑀫𑀢𑀺 𑀘 𑀅𑀮𑀲𑀸𑀪𑀸𑀯𑁄 𑀘 𑀘𑀺𑀢𑁆𑀢𑀧𑁆𑀧𑀲𑀸𑀤𑁄 𑀘 𑀲𑀫𑀸𑀥𑀺𑀢𑁆𑀬𑀸𑀤𑀺 𑀘 𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁄 𑀦𑀸𑀫. 𑀮𑁄𑀫𑀳𑀁𑀲𑀸𑀤𑀺𑀪𑀸𑀯𑁄 𑀲𑀢𑁆𑀯𑀁𑀓𑀸𑀪𑀸𑀯𑁄 𑀦𑀸𑀫𑀸𑀢𑀺 𑀅𑀮𑀗𑁆𑀓𑀸𑀭 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀕𑀸𑀣𑀸𑀲𑀽𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀲𑀼𑀕𑀢𑀁 𑀲𑁄𑀪𑀦𑀕𑀢𑀁 𑀲𑀼𑀦𑁆𑀤𑀭𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀕𑀢𑀁 𑀯𑀸 𑀲𑀫𑁆𑀫𑀸 𑀕𑀢𑀁 𑀯𑀸, 𑀲𑀼𑀕𑀢𑀁 𑀲𑀫𑁆𑀫𑀸 𑀯𑀘𑀦𑀁 𑀕𑀤𑀁 𑀪𑀸𑀲𑀦𑀁, 𑀲𑁂𑀝𑁆𑀞𑀁 𑀧𑀲𑀢𑁆𑀣𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀕𑀯𑁂𑀲𑀦𑁆𑀢𑀁 𑀯𑀸 𑀲𑀦𑁆𑀢𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁 𑀯𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀺𑀢𑀁 𑀯𑀸, 𑀓𑀼𑀲𑀮𑀁𑀓𑀼𑀲𑀮𑀁 𑀓𑀼𑀲𑀮𑀁𑀅𑀓𑀼𑀲𑀮𑀁, 𑀚𑀳𑀁 𑀚𑀳𑀺𑀢𑀁, 𑀅𑀫𑀢𑀁 𑀫𑀭𑀡𑀯𑀺𑀭𑀳𑀺𑀢𑀁 𑀅𑀫𑀢𑀁 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑀦𑁆𑀦𑀸 𑀕𑀢𑀁, 𑀲𑀦𑁆𑀢𑀁 𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀁, 𑀅𑀲𑀫𑀁 𑀮𑁄𑀓𑀺𑀬𑀥𑀫𑁆𑀫𑁂𑀦 𑀅𑀲𑀤𑀺𑀲𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀥𑀫𑁆𑀫𑀁. 𑀤𑀤𑀁 𑀤𑀸𑀢𑀁 𑀤𑀸𑀬𑀓𑀁 𑀯𑀸, 𑀲𑀭𑀡𑀁 𑀲𑀩𑁆𑀩𑀲𑀢𑁆𑀢𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀪𑀽𑀢𑀁. 𑀮𑁄𑀓𑀁 𑀲𑀢𑁆𑀢𑀲𑀗𑁆𑀔 𑀭𑁄𑀓𑀸𑀲𑀲𑀗𑁆𑀔𑀢𑀁 𑀢𑀺𑀮𑁄𑀓𑀁, 𑀲𑀭𑀡𑀁 𑀚𑀸𑀦𑀦𑁆𑀢𑀁, 𑀅𑀭𑀡𑀁 𑀦𑀺𑀓𑁆𑀓𑀺𑀮𑁂𑀲𑀁, 𑀓𑀺𑀮𑁂𑀲𑀲𑀗𑁆𑀔𑀸𑀢𑀭𑀡𑀯𑀺𑀭𑀳𑀺𑀢𑀁 𑀯𑀸. 𑀅𑀭𑀡𑀁 𑀲𑀢𑁆𑀢𑁂𑀲𑀼 𑀓𑀺𑀮𑁂𑀲𑀭𑀚𑀲𑁆𑀲𑀸𑀪𑀸𑀯𑀁, 𑀓𑀭𑀁 𑀤𑁂𑀲𑀦𑀸𑀜𑀸𑀡𑁂𑀦 𑀓𑀢𑀁, 𑀅𑀪𑀬𑀁 𑀦𑀺𑀩𑁆𑀪𑀬𑀁, 𑀅𑀪𑀬𑀁 𑀦𑀺𑀩𑁆𑀪𑀬𑀝𑁆𑀞𑀸𑀦𑀁 𑀦𑀺𑀩𑁆𑀩𑀸𑀦𑀤𑀺𑀲𑀁, 𑀦𑀸𑀬𑀓𑀁 𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀦𑁆𑀢𑀁, 𑀦𑀸𑀬𑀓𑀁 𑀢𑀺𑀮𑁄𑀓𑀸𑀦𑀁 𑀚𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀩𑀼𑀤𑁆𑀥𑀁 𑀲𑀓𑁆𑀓𑀘𑁆𑀘𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀅𑀳𑀁 𑀦𑀫𑁂 𑀦𑀫𑀸𑀫𑀻𑀢𑀺.

𑀧𑀞𑀫𑀯𑀦𑁆𑀤𑀦𑀕𑀸𑀣𑀸𑀤𑁆𑀯𑀬𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨. 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀁,

𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀁;

𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀁,

𑀤𑀲𑀩𑀮𑀫𑀢𑀼𑀮𑀁 𑀯𑀦𑁆𑀤𑁂.

𑁨. 𑀏𑀯𑀁 𑀧𑀞𑀫𑀁 𑀕𑀸𑀣𑀸𑀤𑁆𑀯𑀬𑁂𑀦 𑀩𑀼𑀤𑁆𑀥𑀲𑁆𑀲 𑀦𑀫𑀲𑁆𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑁆𑀬𑀸𑀤𑀻𑀳𑀺 𑀧𑀜𑁆𑀘𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀩𑀼𑀤𑁆𑀥𑀁 𑀯𑀦𑁆𑀤𑀺𑀢𑀼𑀁 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑀺𑀆𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀦 𑀦 𑀫𑀕𑀡𑀬𑀼𑀢𑁆𑀢𑀢𑁆𑀢𑀸 𑀦𑀯𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀪𑀼𑀚𑀕𑀲𑀼 𑀲𑀼𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 ‘‘𑀪𑀼𑀚𑀕𑀲𑀼𑀲𑀼𑀫𑀢𑀸 𑀦𑀸𑀫𑁄’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀦𑀸 𑀘 𑀤𑁆𑀯𑁂 𑀦𑀕𑀡𑀸𑀫𑁄 𑀘 𑀫𑀕𑀡𑁄 𑀘 𑀬𑀤𑀺 𑀲𑀺𑀬𑀸. 𑀲𑀸 𑀪𑀼𑀚𑀕𑀲𑀼𑀲𑀼 𑀕𑀸𑀣𑀸𑀢𑀺 𑀫𑀢𑀸 𑀜𑀸𑀢𑀩𑁆𑀩𑀸𑀢𑀺. 𑀢𑀢𑁆𑀣 𑀧𑀦 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀓𑀸𑀬𑀗𑁆𑀕𑁂𑀦𑀲𑀫𑀦𑁆𑀦𑀸𑀕𑀢𑀁. 𑀏𑀢𑁆𑀣 𑀳𑀺 𑀦𑀬𑀦𑀦𑁆𑀢𑀺 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑀬𑀦𑀁, 𑀘𑀓𑁆𑀔𑀼 𑀮𑀩𑁆𑀪𑀢𑀺. 𑀦𑀻𑀥𑀸𑀢𑀼 𑀬𑀼. 𑀲𑀼𑀪𑀁 𑀲𑁄𑀪𑀦𑀁 𑀕𑀘𑁆𑀙𑀢𑀻𑀢𑀺 𑀲𑀼𑀪𑀕𑀁, 𑀓𑀸𑀬𑀗𑁆𑀕𑀁 𑀮𑀩𑁆𑀪𑀢𑀺. 𑀲𑀼𑀪𑀲𑀤𑁆𑀤𑀽𑀧𑀧𑀤𑁄 𑀕𑀫𑀼𑀥𑀸𑀢𑀼 𑀓𑁆𑀯𑀺. 𑀓𑀸𑀬𑀲𑁆𑀲 𑀅𑀗𑁆𑀕𑀁 𑀅𑀯𑀬𑀯𑀁 𑀓𑀸𑀬𑀗𑁆𑀕𑀁. 𑀪𑀕𑀯𑀢𑁄 𑀓𑀸𑀬𑀗𑁆𑀕𑀁 𑀮𑀩𑁆𑀪𑀢𑀺. 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄𑀬𑀁. 𑀦𑀬𑀦𑀲𑁆𑀲 𑀲𑀼𑀪𑀕𑀁 𑀦𑀬𑀦𑀲𑀼𑀪𑀕𑀁, 𑀢𑀁 𑀓𑀸𑀬𑀗𑁆𑀕𑀁 𑀬𑀲𑁆𑀲 𑀩𑀼𑀤𑁆𑀥𑀲𑁆𑀲𑀸𑀢𑀺 𑀦𑀬𑀦𑀲𑀼𑀪𑀕 𑀓𑀸𑀬𑀗𑁆𑀕𑁄, 𑀩𑀼𑀤𑁆𑀥𑁄. 𑀲𑁄 𑀳𑀺 𑀭𑀽𑀧𑀓𑀸𑀬𑀲𑁆𑀲 𑀤𑀲𑁆𑀲𑀦𑀸 𑀦𑀼𑀢𑁆𑀢𑀭𑀺𑀬𑀕𑀼𑀡𑀬𑁄𑀕𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀲𑀸𑀤𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘 𑀅𑀲𑀻𑀢𑁆𑀬𑀸 𑀦𑀼𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑁂𑀳𑀺 𑀘 𑀮𑀓𑁆𑀔𑀺𑀢𑁂𑀦 𑀓𑀸𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀦𑁆𑀢𑀺 𑀧𑀺𑀬𑀧𑁂𑀫𑀦𑀻𑀬𑀉𑀢𑁆𑀢𑀫𑀲𑀤𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀲𑁄 𑀳𑀺 𑀪𑀕𑀯𑀸 𑀫𑀥𑀺𑀬𑀢𑀺 𑀧𑀺𑀬𑀢𑀺 𑀧𑁂𑀫𑀺𑀬𑀢𑀺 𑀯𑀸𑀢𑀺 𑀫𑀥𑀼𑀭𑁄. 𑀫𑀥𑀥𑀸𑀢𑀼 𑀉𑀭𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀝𑀻𑀓𑀸𑀬𑀁 ‘‘𑀫𑀥𑀼𑀭𑁄𑀢𑀺 𑀧𑀺𑀬𑁄 𑀧𑁂𑀫𑀦𑀻𑀬𑁄 𑀅𑀧𑀮𑀺𑀩𑀼𑀤𑁆𑀥𑁄’’𑀢𑀺. 𑀅𑀣 𑀯𑀸 𑀫𑀥𑀺𑀬𑀢𑀺 𑀅𑀲𑁆𑀲𑀸𑀤𑀺𑀬𑀢𑀻𑀢𑀺 𑀫𑀥𑀼𑀭𑁄, 𑀫𑀥𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀻𑀢𑀺𑀁 𑀉𑀦𑁆𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀥𑀼𑀭𑁄, 𑀫𑀥𑀥𑀸𑀢𑀼 𑀉𑀦𑁆𑀤𑁂 𑀉𑀭𑁄. 𑀢𑁂𑀦 𑀯𑀼𑀢𑁆𑀢𑀁 𑀲𑀤𑁆𑀤𑀦𑀻𑀢𑀺𑀬𑀁 ‘‘𑀫𑀥 𑀉𑀦𑁆𑀤𑁂’’𑀢𑀺. 𑀯𑀭𑀺𑀢𑀩𑁆𑀩𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀢𑁆𑀣𑀺𑀢𑀩𑁆𑀩𑁄 𑀯𑀸𑀢𑀺 𑀯𑀭𑁄, 𑀲𑀭𑁄. 𑀯𑀭𑀥𑀸𑀢𑀼 𑀇𑀘𑁆𑀙𑀸𑀬𑀁 𑀅. 𑀲𑀭𑀢𑀺 𑀕𑀘𑁆𑀙𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑀦𑁆𑀢𑀺 𑀲𑀭𑁄, 𑀲𑀤𑁆𑀤𑁄. 𑀲𑀭𑀥𑀸𑀢𑀼 𑀕𑀢𑀺𑀬𑀁 𑀅. 𑀲𑀭𑀢𑀺 𑀕𑀘𑁆𑀙𑀢𑀺 𑀲𑀼𑀬𑁆𑀬𑀫𑀸𑀦𑀢𑀦𑁆𑀢𑀺 𑀯𑀸 𑀲𑀭𑁄, 𑀲𑀭𑀺𑀬𑀢𑀺 𑀲𑀼𑀡𑀺𑀬𑀢𑀻𑀢𑀺 𑀯𑀸 𑀲𑀭𑁄, 𑀪𑀕𑀯𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀤𑁄 𑀮𑀩𑁆𑀪𑀢𑀺. 𑀉𑀧𑀲𑀫𑁆𑀧𑀚𑁆𑀚𑀢𑀻𑀢𑀺 𑀉𑀧𑁂𑀢𑁄, 𑀉𑀧𑀧𑀼𑀩𑁆𑀩𑀇𑀥𑀸𑀢𑀼 𑀢. 𑀫𑀥𑀼𑀭𑁄 𑀘 𑀯𑀭𑁄 𑀘 𑀲𑁄 𑀲𑀭𑁄 𑀘𑀸𑀢𑀺 𑀫𑀥𑀼𑀭𑀯𑀭𑀲𑀭𑁄, 𑀢𑁂𑀦 𑀉𑀧𑁂𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑁄 𑀧𑀦 𑀳𑀤𑀬 𑀯𑀢𑁆𑀣𑀼𑀦𑁄 𑀲𑀼𑀯𑀺𑀲𑀼𑀤𑁆𑀥𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀫𑀥𑀼𑀭𑁂𑀦 𑀧𑀺𑀬𑁂𑀦 𑀫𑀦𑀸𑀧𑀺𑀬𑁂𑀦 𑀯𑀭𑁂𑀦 𑀇𑀘𑁆𑀙𑀺𑀢𑀧𑀢𑁆𑀣𑀺 𑀢𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀲𑀭𑁂𑀦 𑀲𑀤𑁆𑀤𑁂𑀦 𑀉𑀧𑁂𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀲𑀭𑁄𑀧𑁂𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁, 𑀪𑀕𑀯𑀢𑁄 𑀲𑀭𑁄 𑀧𑀦 𑀯𑀺𑀲𑀝𑁆𑀞𑁄 𑀘, 𑀯𑀺𑀜𑁆𑀜𑁂𑀬𑁆𑀬𑁄, 𑀫𑀜𑁆𑀚𑀼, 𑀲𑀯𑀦𑀻𑀬𑁄, 𑀩𑀺𑀦𑁆𑀤𑀼, 𑀅𑀯𑀺𑀲𑀸𑀭𑀻, 𑀕𑀫𑁆𑀪𑀻𑀭𑁄, 𑀦𑀺𑀦𑁆𑀦𑀸𑀤𑀺 𑀘𑀸𑀢𑀺 𑀯𑀺𑀲𑁂𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫 𑀧𑀡𑁆𑀡𑀸𑀲𑁂 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 ‘‘𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀧𑀦𑀲𑁆𑀲 𑀕𑁄𑀢𑀫𑀲𑁆𑀲 𑀫𑀼𑀔𑀢𑁄 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺 𑀯𑀺𑀲𑀝𑁆𑀞𑁄 𑀘, 𑀯𑀺𑀜𑁆𑀜𑁂𑀬𑁆𑀬𑁄 𑀘, 𑀫𑀜𑁆𑀚𑀼 𑀘, 𑀲𑀯𑀦𑀻𑀬𑁄 𑀘, 𑀩𑀺𑀦𑁆𑀤𑀼 𑀘, 𑀅𑀯𑀺𑀲𑀸𑀭𑀻 𑀘, 𑀕𑀫𑁆𑀪𑀻𑀭𑁄 𑀘, 𑀦𑀺𑀦𑁆𑀦𑀸𑀤𑀺 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦 𑀲𑁄 𑀪𑀯𑀁 𑀕𑁄𑀢𑀫𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦 𑀦𑀺𑀘𑁆𑀙𑀭𑀢𑀻’’𑀢𑀺.

𑀢𑀲𑁆𑀲𑀸𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀲𑀝𑁆𑀞𑁄𑀢𑀺 𑀲𑀺𑀦𑀺𑀤𑁆𑀥𑁄 𑀅𑀧𑀮𑀺𑀩𑀼𑀤𑁆𑀥𑁄. 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀯𑀺𑀜𑁆𑀜𑀸𑀧𑀦𑀻𑀬𑁄 𑀧𑀸𑀓𑀝𑁄. 𑀯𑀺𑀲𑀝𑁆𑀞𑀢𑁆𑀢𑀸𑀬𑁂𑀯 𑀘𑁂𑀲 𑀯𑀺𑀜𑁆𑀜𑁂𑀬𑁆𑀬𑁄 𑀳𑁄𑀢𑀺. 𑀫𑀜𑁆𑀚𑀽𑀢𑀺 𑀫𑀥𑀼𑀭𑁄. 𑀲𑀯𑀦𑀻𑀬𑁄𑀢𑀺 𑀲𑁄𑀢𑀲𑀼𑀔𑁄, 𑀫𑀥𑀼𑀭𑀢𑁆𑀢𑀸𑀬𑁂𑀯 𑀘𑁂𑀲 𑀲𑀯𑀦𑀻𑀬𑁄 𑀳𑁄𑀢𑀺. 𑀩𑀺𑀦𑁆𑀤𑀽𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁄. 𑀅𑀯𑀺𑀲𑀸𑀭𑀻𑀢𑀺 𑀅𑀯𑀺𑀲𑀝𑁄. 𑀩𑀺𑀦𑁆𑀤𑀼𑀢𑁆𑀢𑀸𑀬𑁂𑀯 𑀘𑁂𑀲 𑀅𑀯𑀺𑀲𑀸𑀭𑀻 𑀳𑁄𑀢𑀺. 𑀕𑀫𑁆𑀪𑀻𑀭𑁄𑀢𑀺 𑀕𑀫𑁆𑀪𑀻𑀭𑀲𑀫𑀼𑀝𑁆𑀞𑀺𑀢𑁄. 𑀦𑀺𑀦𑁆𑀦𑀸𑀤𑀻𑀢𑀺 𑀦𑀺𑀦𑁆𑀦𑀤𑀯𑀸. 𑀕𑀫𑁆𑀪𑀻𑀭𑀢𑁆𑀢𑀸𑀬𑁂𑀯 𑀘𑁂𑀲 𑀦𑀺𑀦𑁆𑀦𑀸𑀤𑀺 𑀳𑁄𑀢𑀺. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀧𑀺 𑀏𑀓𑀩𑀤𑁆𑀥𑀁 𑀧𑀭𑀺𑀲𑀁 𑀯𑀺𑀜𑁆𑀜𑀸𑀧𑁂𑀢𑀺. 𑀩𑀳𑀺𑀤𑁆𑀥𑀸𑀢𑀺 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀧𑀭𑀺𑀲𑀢𑁄 𑀩𑀳𑀺𑀤𑁆𑀥𑀸 𑀦 𑀕𑀘𑁆𑀙𑀢𑀺. 𑀓𑀲𑁆𑀫𑀸. 𑀲𑁄 𑀏𑀯𑀭𑀽𑀧𑁄 𑀫𑀥𑀼𑀭𑀲𑀭𑁄 𑀅𑀓𑀸𑀭𑀡𑀸 𑀫𑀸 𑀦𑀲𑁆𑀲𑀻𑀢𑀺. 𑀇𑀢𑀺 𑀪𑀕𑀯𑀢𑁄 𑀖𑁄𑀲𑁄 𑀧𑀭𑀺𑀲𑀸𑀬 𑀫𑀢𑁆𑀢𑀓𑁂𑀦𑁂𑀯 𑀘𑀭𑀢𑀻𑀢𑀺 𑀯𑀡𑁆𑀡𑀺𑀢𑁄𑀢𑀺. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀬𑀜𑁆𑀘 𑀯𑀼𑀢𑁆𑀢𑀸 𑀲𑀗𑁆𑀕𑀳𑀕𑀸𑀣𑀸 𑁋

‘‘𑀯𑀺𑀲𑀝𑁆𑀞𑀫𑀜𑁆𑀚𑀼𑀯𑀺𑀜𑁆𑀜𑁂𑀬𑁆𑀬𑀸, 𑀲𑀯𑀦𑀻𑀬𑀸𑀯𑀺𑀲𑀸𑀭𑀺𑀦𑁄;

𑀩𑀺𑀦𑁆𑀤𑀼𑀕𑀫𑁆𑀪𑀻𑀭𑀦𑀺𑀦𑁆𑀦𑀸𑀤𑀺, 𑀢𑁆𑀬𑁂𑀯𑀫𑀝𑁆𑀞𑀗𑁆𑀕𑀺𑀓𑁄 𑀲𑀭𑁄’’𑀢𑀺.

𑀬𑀣𑀸 𑀳𑀺 𑀩𑁆𑀭𑀳𑁆𑀫𑀼𑀦𑁄 𑀲𑀭𑁄 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀯𑀺𑀲𑀼𑀤𑁆𑀥𑁄 𑀫𑀥𑀼𑀭𑁄 𑀳𑁄𑀢𑀺. 𑀬𑀣𑀸 𑀘 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀩𑀦𑁆𑀥𑀸 𑀥𑀸𑀯𑀦𑁆𑀢𑀸 𑀔𑀼𑀤𑁆𑀤𑀓𑀫𑀺𑀕𑀸 𑀓𑀭𑀯𑀻𑀓𑀲𑀓𑀼𑀡𑀲𑁆𑀲 𑀯𑀺𑀓𑀽𑀚𑀫𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀭𑀲𑁆𑀲 𑀫𑀥𑀼𑀭𑀢𑁆𑀢𑀸 𑀫𑀭𑀡𑀪𑀬𑀁 𑀳𑀺𑀢𑁆𑀯𑀸 𑀅𑀥𑀸𑀯𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀧𑀸𑀤𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀸 𑀲𑀼𑀡𑀦𑁆𑀢𑀺, 𑀏𑀯𑀁 𑀓𑀭𑀯𑀻𑀓𑀲𑁆𑀲 𑀲𑀤𑁆𑀤𑁄 𑀥𑀫𑁆𑀫𑀢𑀸𑀪𑀸𑀯𑁂𑀦 𑀫𑀥𑀼𑀭𑁄 𑀧𑀺𑀬𑁄 𑀫𑀦𑀸𑀧𑁄 𑀳𑁄𑀢𑀺. 𑀏𑀯𑀁 𑀪𑀕𑀯𑀢𑀸 𑀓𑀢𑀁 𑀓𑀫𑁆𑀫𑀁 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀯𑀢𑁆𑀣𑀼𑀲𑁆𑀲 𑀲𑀼𑀤𑁆𑀥𑀢𑁆𑀢𑀸 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀘 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀪𑀕𑀯𑀢𑁄 𑀦𑀸𑀪𑀺𑀢𑁄 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀼𑀯𑀺𑀲𑀼𑀤𑁆𑀥𑁄 𑀅𑀢𑀺𑀫𑀥𑀼𑀭𑁄 𑀅𑀢𑀺𑀧𑀺𑀬𑁄 𑀅𑀢𑀺𑀫𑀦𑀸𑀧𑁄 𑀳𑁄𑀢𑀺. 𑀲𑀸 𑀧𑀦𑁂𑀲𑀸 𑀳𑀻𑀦𑀽𑀧𑀫𑀸 𑀳𑁄𑀢𑀺, 𑀪𑀕𑀯𑀢𑁄 𑀳𑀺 𑀲𑀭𑁄 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀅𑀢𑀺𑀫𑀥𑀼𑀭𑁄 𑀅𑀢𑀺𑀧𑀺𑀬𑁄 𑀅𑀢𑀺𑀫𑀦𑀸𑀧𑁄 𑀳𑁄𑀢𑀺, 𑀢𑀣𑀸 𑀳𑀺 𑀥𑀫𑁆𑀫𑀸𑀲𑁄 𑀓𑀭𑀜𑁆𑀜𑁄 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀤𑁂𑀯𑀻 𑀓𑀭𑀯𑀻𑀓𑀲𑀓𑀼𑀡𑀲𑁆𑀲 𑀫𑀥𑀼𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀇𑀫𑀲𑁆𑀲 𑀢𑀺𑀭𑀘𑁆𑀙𑀸𑀦𑀲𑁆𑀲 𑀫𑀥𑀼𑀭𑁄 𑀲𑀤𑁆𑀤𑁄, 𑀓𑁄 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀺𑀭𑀺𑀁 𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀅𑀢𑀺𑀫𑀥𑀼𑀭𑁄 𑀲𑀤𑁆𑀤𑁄’’𑀢𑀺, 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀢𑁆𑀢𑀳𑀺 𑀚𑀗𑁆𑀖𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀦𑁆𑀢𑀺 𑀅𑀧𑀭𑀺𑀫𑀺𑀡𑀺𑀢𑀩𑁆𑀩𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁. 𑀏𑀢𑁆𑀣 𑀘 𑀲𑀫𑀺𑀢𑁄𑀢𑀺 𑀧𑀭𑀺𑀫𑀺𑀡𑀺𑀢𑀩𑁆𑀩𑁄𑀢𑀺 𑀫𑀺𑀢𑁄, 𑀫𑀸𑀥𑀸𑀢𑀼 𑀧𑀭𑀺𑀫𑀸𑀡𑁂 𑀢, 𑀦 𑀫𑀺𑀢𑁄 𑀅𑀫𑀺𑀢𑁄. 𑀕𑀼𑀡𑁄𑀢𑀺 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸. 𑀢𑁂 𑀳𑀺 𑀕𑀼𑀡𑁂𑀦𑁆𑀢𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀧𑀓𑀸𑀲𑁂𑀦𑁆𑀢𑀻𑀢𑀺 𑀕𑀼𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀼𑀡𑀥𑀸𑀢𑀼 𑀧𑀓𑀸𑀲𑀦𑁂 𑀅. 𑀫𑀡𑀺𑀲𑀸𑀭𑀫𑀜𑁆𑀚𑀽𑀲𑀸𑀝𑀻𑀓𑀸𑀬𑀁 𑀧𑀦 ‘‘𑀕𑀼𑀡𑀦𑁆𑀢𑀺 𑀅𑀢𑁆𑀢𑀦𑁄 𑀆𑀥𑀸𑀭𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀻𑀢𑀺 𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀁.

𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀜𑁆𑀘 ‘‘𑀕𑀼𑀡 𑀆𑀫𑀦𑁆𑀢𑀦𑁂, 𑀕𑀼𑀡𑁄𑀢𑀺 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸, 𑀓𑁂𑀦𑀝𑁆𑀞𑁂𑀦 𑀢𑁂 𑀕𑀼𑀡𑀸, 𑀕𑁄𑀡𑀸𑀧𑀺𑀬𑀢𑀺 𑀆𑀫𑀦𑁆𑀢𑀸𑀧𑀺𑀬𑀢𑀺 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀺𑀢𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀼𑀁 𑀲𑁄𑀢𑀼𑀁 𑀧𑀽𑀚𑀺𑀢𑀼𑀜𑁆𑀘 𑀇𑀘𑁆𑀙𑀦𑁆𑀢𑁂𑀳𑀺 𑀚𑀦𑁂𑀳𑀻𑀢𑀺 𑀕𑀼𑀡𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀻𑀮𑀸𑀤𑀺 𑀥𑀫𑁆𑀫𑀸𑀦𑀁 𑀆𑀫𑀦𑁆𑀢𑀸𑀧𑀦𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀢𑀁𑀳𑁂𑀢𑀼 𑀆𑀫𑀦𑁆𑀢𑀦𑀁 𑀦𑀺𑀫𑀦𑁆𑀢𑀦𑀜𑁆𑀘 𑀢𑁂𑀬𑁂𑀯 𑀓𑀭𑁄𑀦𑁆𑀢𑀺 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦 𑀕𑀼𑀜𑁆𑀚𑀦𑁆𑀢𑁂 𑀅𑀩𑁆𑀬𑀬𑀦𑁆𑀢𑁂 𑀇𑀢𑀺 𑀕𑀼𑀡𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀤𑀦𑀼𑀭𑀽𑀧𑀁 𑀧𑀦 𑀥𑀸𑀢𑀼𑀲𑀤𑁆𑀤𑀁𑀦 𑀧𑀲𑁆𑀲𑀸𑀫. 𑀕𑀼𑀡 𑀆𑀫𑀦𑁆𑀢𑀦𑁂 𑀇𑀘𑁆𑀘𑁂𑀯 𑀧𑀲𑁆𑀲𑀸𑀫. 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀫𑀺𑀢𑁄 𑀕𑀼𑀡𑁄 𑀅𑀫𑀺𑀢𑀕𑀼𑀡𑁄, 𑀢𑁂𑀲𑀁 𑀕𑀡𑁄 𑀲𑀫𑀽𑀳𑁄 𑀅𑀫𑀺𑀢𑀕𑀼𑀡𑀕𑀡𑁄, 𑀢𑁂𑀲𑀁. 𑀆𑀥𑀸𑀭𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑁄, 𑀚𑀺𑀦𑁄 𑀮𑀩𑁆𑀪𑀢𑀺. 𑀲𑁄 𑀧𑀦 𑀲𑀫𑀼𑀤𑁆𑀤𑁄𑀤𑀓𑀁 𑀦𑀸𑀴𑀺𑀧𑀢𑁆𑀢𑁂𑀦 𑀅𑀧𑀭𑀺𑀫𑀺𑀢𑀁 𑀯𑀺𑀬 𑀓𑁂𑀦𑀘𑀺 𑀅𑀧𑀭𑀺𑀫𑀺𑀢𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀆𑀥𑀸𑀭𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑁄𑀢𑀺 𑀅𑀢𑁆𑀣𑁄.

𑀤𑀲𑀩𑀮𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀢𑀣𑀸𑀕𑀢𑀤𑀲𑀩𑀮𑀲𑀫𑁆𑀧𑀦𑁆𑀦𑀁. 𑀏𑀢𑁆𑀣 𑀳𑀺 𑀩𑀮𑀦𑁆𑀢𑀺 𑀓𑁂𑀳𑀺𑀘𑀺 𑀯𑀺𑀭𑀼𑀤𑁆𑀥𑁂𑀳𑀺 𑀓𑀸𑀭𑀡𑁂 𑀳𑀺 𑀩𑀮𑀦𑁆𑀢𑀺 𑀦 𑀓𑀫𑁆𑀧𑁂𑀦𑁆𑀢𑀺 𑀣𑀺𑀭𑀦𑁆𑀢𑀻𑀢𑀺 𑀩𑀮𑀁, 𑀤𑀲 𑀩𑀮𑀸𑀦𑀺 𑀬𑀲𑁆𑀲 𑀲𑁄𑀢𑀺 𑀤𑀲𑀩𑀮𑁄, 𑀩𑀼𑀤𑁆𑀥𑁄. 𑀢𑀁 𑀧𑀦 𑀤𑀼𑀯𑀺𑀥𑀁 𑀳𑁄𑀢𑀺 𑀢𑀣𑀸 𑀕𑀢𑀲𑁆𑀲 𑀤𑀲𑀩𑀮𑀁 𑀓𑀸𑀬𑀤𑀲𑀩𑀮𑀜𑁆𑀘, 𑀜𑀸𑀡𑀤𑀲𑀩𑀮𑀜𑁆𑀘𑀸𑀢𑀺. 𑀢𑁂𑀲𑀼 𑀳𑀺 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀴𑀸 𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥 𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀁 𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.

𑀇𑀫𑀸𑀦𑀺 𑀳𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀴𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁, 𑀢𑀁 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲, 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 𑀕𑀡𑀦𑀸𑀬 𑀳𑀢𑁆𑀣𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁. 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁 𑀳𑁄𑀢𑀺. 𑀇𑀤𑀁 𑀧𑀦 𑀢𑀸𑀲𑀼 𑀢𑀸𑀲𑀼 𑀧𑀸𑀴𑀻𑀲𑀼 𑀦 𑀆𑀕𑀢𑀁. 𑀅𑀝𑁆𑀞𑀓𑀣𑀸𑀲𑀼𑀬𑁂𑀯 𑀆𑀕𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑀤𑀲𑀓 𑀦𑀺𑀧𑀸𑀢 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 ‘‘𑀤𑀲 𑀩𑀮𑀜𑀸𑀡𑀁 𑀧𑀦 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀦 𑀓𑀸𑀬𑀩𑀮𑀁 𑀯𑀺𑀬 𑀅𑀝𑁆𑀞 𑀓𑀣𑀸𑀭𑀽𑀴𑁆𑀳𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀏𑀢𑁆𑀣 𑀘 𑀦𑀸𑀭𑀸𑀬𑀦 𑀲𑀗𑁆𑀖𑀸𑀢 𑀩𑀮𑀦𑁆𑀢𑀺 𑀏𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄, 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀇𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀸𑀬𑀦𑀁, 𑀯𑀚𑀺𑀭𑀁. 𑀢𑀲𑁆𑀫𑀸 𑀦𑀸𑀭𑀸𑀬𑀦𑀲𑀗𑁆𑀖𑀸𑀢 𑀩𑀮𑀦𑁆𑀢𑀺 𑀯𑀚𑀺𑀭𑀲𑀗𑁆𑀖𑀸𑀢𑀩𑀮𑀦𑁆𑀢𑀺 𑀅𑀢𑁆𑀣𑁄𑀢𑀺.

𑀜𑀸𑀡𑀤𑀲𑀩𑀮𑀁 𑀧𑀦 𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀘 𑀫𑀽𑀮𑀧𑀡𑁆𑀡𑀸𑀲𑁂 𑀫𑀳𑀸 𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀤𑀲𑀓𑀦𑀺𑀧𑀸𑀢𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀜𑁆𑀘 𑀯𑀺𑀢𑁆𑀣𑀸𑀭𑁂𑀦 𑀆𑀕𑀢𑀫𑁂𑀯. 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀧𑀦 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑀬𑀺𑀲𑁆𑀲𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁. 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀜𑁆𑀘, 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀯𑀺𑀧𑀸𑀓𑀜𑀸𑀡𑀁, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀜𑀸𑀡𑀁, 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀮𑁄𑀓 𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀁 𑀜𑀸𑀡𑀁, 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀁, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀜𑀸𑀡𑀁, 𑀆𑀲𑀯𑀸𑀦𑀁 𑀔𑀬𑀜𑀸𑀡𑀜𑁆𑀘𑀸𑀢𑀺. 𑀅𑀬𑀁 𑀧𑀦 𑀓𑀫𑁄 𑀅𑀪𑀺𑀥𑀫𑁆𑀫𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀆𑀕𑀢𑀓𑁆𑀓𑀫𑁄.

𑀘𑀼𑀢𑀽𑀧𑀧𑀸𑀢𑀜𑀸𑀡𑀝𑁆𑀞𑀸𑀦𑁂 𑀧𑀦 𑀫𑀽𑀮𑀧𑀡𑁆𑀡𑀸𑀲𑀧𑀸𑀴𑀺𑀬𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀘 𑀤𑀲𑀓𑀦𑀺𑀧𑀸𑀢𑀅𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀕𑀢𑀁. 𑀅𑀢𑁆𑀣𑀢𑁄 𑀧𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀘𑀼𑀢𑀽𑀧𑀧𑀸𑀢𑀲𑁆𑀲 𑀧𑀲𑁆𑀲𑀺𑀢𑀢𑁆𑀢𑀸 𑀲𑀤𑀺𑀲𑀫𑁂𑀯𑀸𑀢𑀺. 𑀢𑀢𑁆𑀣 𑀳𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀦𑁆𑀢𑀺 𑀓𑀸𑀭𑀡𑀸𑀓𑀸𑀭𑀡𑀁 𑀬𑀣𑀸𑀪𑀽𑀢𑀁 𑀚𑀸𑀦𑀦𑀜𑀸𑀡𑀁. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀧𑀯𑀢𑁆𑀢𑀢𑀺 𑀘, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀯𑀺𑀧𑀸𑀓𑀜𑀸𑀡𑀦𑁆𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀁 𑀅𑀢𑀻𑀢𑀸𑀦𑀸𑀕𑀢 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀯𑀺𑀧𑀸𑀓𑀁 𑀦𑀺𑀩𑁆𑀩𑀸𑀦𑀨𑀮𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀩𑁆𑀩𑀢𑁆𑀣 𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀜𑀸𑀡𑀦𑁆𑀢𑀺 𑀲𑀩𑁆𑀩𑀕𑀢𑀺𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀢𑀢𑁆𑀣 𑀘 𑀧𑀝𑀺𑀧𑀤𑀦𑁆𑀢𑀺 𑀧𑀝𑀺𑀧𑀚𑁆𑀚𑀢𑀺 𑀧𑀸𑀧𑀼𑀡𑀸𑀢𑀺 𑀏𑀢𑁂𑀦𑀸𑀢𑀺 𑀧𑀝𑀺𑀧𑀤𑀁, 𑀫𑀕𑁆𑀕𑀁. 𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀭𑀬𑀸𑀤𑀺𑀧𑀜𑁆𑀘𑀕𑀢𑀺𑀕𑀸𑀫𑀺𑀦𑀺𑀁. 𑀅𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀁 𑀲𑀸𑀭𑀺𑀧𑀼𑀢𑁆𑀢 𑀧𑀚𑀸𑀦𑀸𑀫𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺.

𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀅𑀦𑁂𑀓 𑀥𑀸𑀢𑀽𑀢𑀺 𑀘𑀓𑁆𑀔𑀼𑀥𑀸𑀢𑀼𑀆𑀤𑀻𑀳𑀺 𑀓𑀸𑀫𑀥𑀸𑀢𑀽𑀳𑀺 𑀯𑀸 𑀩𑀳𑀼𑀥𑀸𑀢𑀼𑀁. 𑀦𑀸𑀦𑀸𑀥𑀸𑀢𑀽𑀢𑀺 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀯𑀺𑀮𑀓𑁆𑀔𑀡𑀢𑁆𑀢𑀸 𑀯𑀺𑀲𑀤𑀺𑀲 𑀲𑀪𑀸𑀯𑀢𑁆𑀢𑀸 𑀦𑀸𑀦𑀸𑀧𑁆𑀧𑀓𑀸𑀭𑀥𑀸𑀢𑀼𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀬𑀢𑀦 𑀥𑀸𑀢𑀼𑀮𑁄𑀓𑀁. 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀺𑀓𑀢𑀁 𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀳𑀻𑀦𑀸𑀤𑀻𑀳𑀺 𑀅𑀥𑀺𑀫𑀼𑀢𑁆𑀢𑀻𑀳𑀺 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀪𑀸𑀯𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀭𑀲𑀢𑁆𑀢𑀸𑀦𑀦𑁆𑀢𑀺 𑀧𑀥𑀸𑀦𑀲𑀢𑁆𑀢𑀸𑀦𑀁. 𑀧𑀭𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀢𑁄 𑀧𑀭𑁂𑀲𑀁 𑀳𑀻𑀦𑀲𑀢𑁆𑀢𑀸𑀦𑀁. 𑀏𑀓𑀢𑁆𑀣𑀫𑁂𑀯 𑀯𑀸 𑀏𑀢𑀁 𑀧𑀤𑀤𑁆𑀯𑀬𑀁 𑀯𑁂𑀦𑁂𑀬𑁆𑀬𑀯𑀲𑁂𑀦 𑀤𑁆𑀯𑁂𑀥𑀸 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀺𑀜𑀸𑀡𑀦𑁆𑀢𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀪𑀸𑀯𑀁 𑀯𑀟𑁆𑀠𑀜𑁆𑀘 𑀅𑀧𑀭𑀪𑀸𑀯𑀁 𑀳𑀸𑀦𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁.

𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀦𑁆𑀢𑀺 𑀏𑀢𑁆𑀣 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀧𑀞𑀫𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁, 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺𑀆𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁, 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀫𑀸𑀥𑀻𑀦𑀁, 𑀧𑀞𑀫𑀚𑁆𑀛𑀸𑀦 𑀲𑀫𑀸𑀧𑀢𑁆𑀢𑀺𑀆𑀤𑀻𑀦𑀜𑁆𑀘 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀻𑀦𑀁. 𑀲𑀁𑀓𑀺𑀮𑁂𑀲𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀁. 𑀯𑁄𑀤𑀸𑀦𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀁. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀦𑁆𑀢𑀺, 𑀢𑀁 𑀓𑀸𑀭𑀡𑀁. 𑀜𑀸𑀡𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀼𑀲𑁆𑀲𑀭𑀡𑀲𑀗𑁆𑀔𑀸𑀢𑀁 𑀧𑀚𑀸𑀦𑀦𑀜𑀸𑀡𑀁. 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁 𑀜𑀸𑀡𑀦𑁆𑀢𑀺 𑀲𑀢𑁆𑀢𑀸𑀦𑀁 𑀘𑀼𑀢𑀺𑀜𑁆𑀘 𑀉𑀧𑀧𑀸𑀢𑀜𑁆𑀘 𑀧𑀚𑀸𑀦𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀦𑁆𑀢𑀺 𑀓𑀸𑀫𑀸𑀲𑀯𑀸𑀤𑀻𑀦𑀁 𑀔𑀬𑀲𑀗𑁆𑀔𑀸𑀢𑀁 𑀆𑀲𑀯𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦 𑀜𑀸𑀡𑀦𑁆𑀢𑀺. 𑀇𑀫𑀸𑀦𑀺 𑀧𑀦 𑀜𑀸𑀡𑀸𑀦𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀢𑀣𑀸𑀕𑀢𑀲𑁆𑀲 𑀤𑀲𑀩𑀮𑀜𑀸𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀞𑀸𑀦𑀸𑀝𑁆𑀞𑀸𑀦𑀁 𑀯𑀺𑀧𑀸𑀓𑀜𑁆𑀘, 𑀜𑀸𑀡𑀁 𑀧𑀝𑀺𑀧𑀤𑀁 𑀜𑀸𑀡𑀁;

𑀅𑀦𑁂𑀓𑀥𑀸𑀢𑀼𑀮𑁄𑀓𑀜𑁆𑀘, 𑀲𑀢𑁆𑀢𑀸𑀦𑀁 𑀅𑀥𑀺𑀫𑀼𑀢𑁆𑀢𑀺𑀓𑀁. [𑀲𑀸 𑀧𑀦𑁂𑀲𑀸 𑀲𑁂𑀢𑀯𑀯𑀺𑀧𑀼𑀮𑀸𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸;]

𑀇𑀦𑁆𑀤𑁆𑀭𑀺𑀬𑀧𑀭𑀸𑀧𑀭𑀜𑁆𑀘, 𑀛𑀸𑀦𑀸𑀤𑀺𑀦𑀁 𑀲𑀁𑀓𑀺𑀮𑁂𑀲𑀁;

𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀁 𑀜𑀸𑀡𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁;

𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀁, 𑀆𑀲𑀯𑀓𑁆𑀔𑀬𑀁 𑀜𑀸𑀡𑀦𑁆𑀢𑀺;

𑀤𑀲𑀺𑀫𑀸𑀦𑀺 𑀩𑀼𑀤𑁆𑀥𑀲𑁆𑀲 𑀘𑀸, 𑀲𑀸𑀥𑀸𑀭𑀡𑀸𑀦𑀺 𑀜𑀸𑀡𑀸𑀦𑀻’’𑀢𑀺. [𑀲𑀸 𑀧𑀦𑁂𑀲𑀸 𑀲𑀸𑀫𑀜𑁆𑀜𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸;]

𑀦𑀦𑀼 𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑁂𑀯 𑀳𑁄𑀢𑀺, 𑀅𑀣 𑀓𑀲𑁆𑀫𑀸 𑀢𑀁 𑀜𑀸𑀡𑀁 𑀤𑀲𑀪𑁂𑀤𑁂𑀦 𑀯𑀼𑀢𑁆𑀢𑀦𑁆𑀢𑀺. 𑀯𑀼𑀘𑁆𑀘𑀢𑁂. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀤𑀲𑀩𑀮𑀜𑁆𑀳𑀺 𑀲𑀓𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀧𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺. 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭 𑀯𑀺𑀧𑀸𑀓𑀦𑁆𑀢𑀭𑀫𑁂𑀯. 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯. 𑀘𑀢𑀼𑀢𑁆𑀣𑀁 𑀥𑀸𑀢𑀼 𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯. 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯. 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯. 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯. 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯. 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯. 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀧𑀚𑀸𑀦𑀸𑀢𑀺. 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀢𑁂𑀲𑀁 𑀜𑀸𑀡𑀤𑁆𑀯𑀬𑀸𑀦𑀁 𑀯𑀺𑀲𑁂𑀲𑁄𑀢𑀺. 𑀢𑀁 𑀧𑀦 𑀇𑀥 𑀜𑀸𑀡𑀤𑁆𑀯𑀬𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺.

𑀅𑀢𑀼𑀮𑀦𑁆𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀢𑀼𑀮𑀦𑀁 𑀉𑀫𑁆𑀫𑀸𑀦𑀁 𑀢𑀼𑀮𑀸, 𑀢𑀼𑀮 𑀲𑀤𑀺𑀲𑁆𑀬𑀁. 𑀲𑀤𑁆𑀤𑀦𑀻𑀢𑀺𑀬𑀜𑁆𑀳𑀺 ‘‘𑀢𑀼𑀮 𑀉𑀫𑁆𑀫𑀸𑀦𑁂’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀼𑀮𑀺𑀬𑀢𑀺 𑀧𑀫𑀺𑀬𑀢𑀺 𑀏𑀢𑀸𑀬𑀸𑀢𑀺 𑀢𑀼𑀮𑀸, 𑀧𑀓𑀢𑀺𑀢𑀼𑀮𑀸. 𑀢𑀼𑀮𑀸 𑀯𑀺𑀬𑀸𑀢𑀺 𑀢𑀼𑀮𑀸, 𑀜𑀸𑀡𑀁. 𑀢𑀸𑀬 𑀲𑀫𑁆𑀫𑀺𑀢𑁄 𑀢𑀼𑀮𑁄. 𑀲𑀫𑁆𑀫𑀺𑀢 𑀢𑀤𑁆𑀥𑀺𑀢𑁂 𑀅𑀧𑀘𑁆𑀘𑀬𑁄. 𑀢𑀼𑀮𑀲𑀤𑀺𑀲𑀜𑀸𑀡𑁂𑀦 𑀲𑀫𑁆𑀫𑀺𑀢𑁄 𑀧𑀼𑀕𑁆𑀕𑀮𑁄. 𑀦 𑀢𑀼𑀮𑁄 𑀅𑀢𑀼𑀮𑁄. 𑀓𑀫𑁆𑀫𑀥𑀸𑀭𑀬𑀫𑀺𑀲𑁆𑀲𑀓𑀢𑀧𑁆𑀧𑀼𑀭𑀺𑀲 𑀲𑀫𑀸𑀲𑁄𑀬𑀁. 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀅𑀲𑀤𑀺𑀲𑁄 𑀪𑀕𑀯𑀸 𑀮𑀩𑁆𑀪𑀢𑀺. 𑀅𑀣 𑀯𑀸 𑀦𑀢𑁆𑀣𑀺 𑀢𑀼𑀮𑁄 𑀲𑀤𑀺𑀲𑁄 𑀧𑀼𑀕𑁆𑀕𑀮𑁄 𑀏𑀢𑀲𑁆𑀲𑀸𑀢𑀺 𑀅𑀢𑀼𑀮𑁄, 𑀪𑀕𑀯𑀸. 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄𑀬𑀁 𑀩𑀳𑀼𑀩𑁆𑀩𑀻𑀳𑀺. 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑁄 𑀅𑀕𑁆𑀕𑀧𑀼𑀕𑁆𑀕𑀮𑁄𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀪𑀸𑀯𑀢𑁄. 𑀬𑀣𑀸𑀳 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺. 𑀢𑀁 𑀅𑀢𑀼𑀮𑀁 𑀩𑀼𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀦𑁆𑀤𑁂𑀢𑀺 𑀩𑀼𑀤𑁆𑀥𑀲𑁆𑀲 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀸𑀤𑀺𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀅𑀳𑀁 𑀯𑀦𑁆𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀫𑀺𑀯𑀺𑀪𑀢𑁆𑀢𑀺𑀬𑀸 𑀫𑀳𑀸𑀯𑀺𑀲𑀬𑀲𑀼𑀢𑁆𑀢𑁂𑀦 𑀏𑀓𑀸𑀭𑀸 𑀤𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀦𑁆𑀤𑀦𑀸 𑀧𑀦 𑀢𑀺𑀯𑀺𑀥𑀸 𑀳𑁄𑀢𑀺 𑀓𑀸𑀬𑀯𑀘𑀻𑀫𑀦𑁄𑀯𑀦𑁆𑀤𑀦𑀸𑀯𑀲𑁂𑀦𑀸𑀢𑀺. 𑀬𑀣𑀸𑀳 ‘‘𑀢𑀺𑀲𑁆𑀲𑁄 𑀇𑀫𑀸 𑀪𑀺𑀓𑁆𑀔𑀯𑁂 𑀯𑀦𑁆𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄. 𑀓𑀸𑀬𑁂𑀦 𑀯𑀦𑁆𑀤𑀢𑀺, 𑀯𑀸𑀘𑀸𑀬 𑀯𑀦𑁆𑀤𑀢𑀺, 𑀫𑀦𑀲𑀸 𑀯𑀦𑁆𑀤𑀢𑀻’’𑀢𑀺.

𑀢𑀢𑁆𑀣 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀚𑀸𑀡𑀼𑀤𑁆𑀯𑀬𑀓𑀧𑁆𑀧𑀭𑀤𑁆𑀯𑀬𑀦𑀮𑀸𑀝𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀦𑁂𑀬𑁆𑀬𑀸𑀦𑀁 𑀅𑀪𑀺𑀫𑀼𑀔𑀁 𑀦𑀺𑀧𑀢𑀦𑁆𑀢𑁄 𑀓𑀸𑀬𑁂𑀦 𑀯𑀦𑁆𑀤𑀢𑀺 𑀦𑀸𑀫. 𑀬𑀁 𑀲𑀦𑁆𑀥𑀸𑀬 ‘‘𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀅𑀝𑁆𑀞 𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀕𑀼𑀡𑀧𑀤𑀸𑀦𑀺 𑀯𑀸𑀘𑀸𑀬 𑀧𑀯𑀢𑁆𑀢𑁂𑀦𑁆𑀢𑁄 𑀯𑀸𑀘𑀸𑀬 𑀯𑀦𑁆𑀤𑀢𑀺 𑀦𑀸𑀫. 𑀯𑀺𑀧𑀲𑁆𑀲𑀺𑀲𑁆𑀲 𑀦𑀫𑀢𑁆𑀣𑀼, 𑀲𑀺𑀔𑀺𑀲𑁆𑀲𑀸𑀧𑀺 𑀦𑀫𑀢𑁆𑀣𑀼, 𑀯𑁂𑀲𑁆𑀲 𑀪𑀼𑀲𑁆𑀲 𑀦𑀫𑀢𑁆𑀣𑀼, 𑀓𑀓𑀼𑀲𑀦𑁆𑀥𑀲𑁆𑀲 𑀦𑀫𑀢𑁆𑀣𑀼, 𑀓𑁄𑀡𑀸𑀕𑀫𑀦𑀲𑁆𑀲 𑀦𑀫𑀢𑁆𑀣𑀼, 𑀓𑀲𑁆𑀲𑀧𑀲𑁆𑀲 𑀦𑀫𑀢𑁆𑀣𑀼, 𑀅𑀗𑁆𑀕𑀻𑀭𑀲𑁆𑀲𑀲𑁆𑀲 𑀦𑀫𑀢𑁆𑀣𑀼 𑀢𑁆𑀬𑀸𑀤𑀻𑀲𑀼𑀧𑀺 𑀯𑀸𑀘𑀸𑀯𑀦𑁆𑀤𑀦𑀸𑀬𑁂𑀯. 𑀩𑀼𑀤𑁆𑀥𑀸𑀤𑀺 𑀕𑀼𑀡𑀸𑀦𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 𑀫𑀦𑀲𑀸 𑀯𑀦𑁆𑀤𑀢𑀺 𑀦𑀸𑀫𑀸𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀲𑁆𑀲 𑀲𑁄𑀪𑀦𑀁 𑀕𑀢𑁂𑀦 𑀓𑀸𑀬𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀁 𑀧𑀺𑀬𑀧𑁂𑀫𑀦𑀻𑀬𑁂𑀦 𑀅𑀲𑁆𑀲𑀸𑀤𑀺 𑀬𑁂𑀦 𑀉𑀢𑁆𑀢𑀫𑀲𑀤𑁆𑀤𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀁 𑀅𑀧𑀭𑀺𑀫𑀺𑀡𑀺𑀢𑀩𑁆𑀩𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑀸𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀢𑀁, 𑀤𑀲𑀩𑀮𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀢𑀣𑀸𑀕𑀢𑀲𑁆𑀲 𑀓𑀸𑀬𑀜𑀸𑀡𑀤𑀲 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀁, 𑀅𑀢𑀼𑀮𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀓𑁂𑀦𑀘𑀺 𑀅𑀲𑀤𑀺𑀲𑀁 𑀩𑀼𑀤𑁆𑀥𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀤𑀼𑀢𑀺𑀬𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁩. 𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄,

𑀲𑀁𑀲𑀸𑀭𑁂 𑀅𑀦𑀼𑀪𑁄𑀲𑀺 𑀓𑀸𑀬𑀺𑀓𑀁;

𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀜𑁆𑀘 𑀮𑁄𑀓𑀢𑁄,

𑀢𑀁 𑀯𑀦𑁆𑀤𑁂 𑀦𑀭𑀤𑁂𑀯 𑀫𑀗𑁆𑀕𑀮𑀁.

𑁩. 𑀏𑀯𑀁 𑀢𑀢𑀺𑀬𑀕𑀸𑀣𑀸𑀬 𑀩𑀼𑀤𑁆𑀥𑀲𑁆𑀲 𑀯𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀲𑀫𑀸𑀥𑀺 𑀆𑀤𑀻𑀳𑀺 𑀘𑀢𑀽𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑁄 𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄 𑀢𑀺𑀆𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀫𑀲𑀚𑀕𑀡 𑀕𑀭𑀼𑀬𑀼𑀢𑁆𑀢𑀢𑁆𑀢𑀸 𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀲𑀼𑀤𑁆𑀥𑀯𑀺𑀭𑀸 𑀚𑀺𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂-𑀫𑁆𑀲𑀸 𑀚𑁆𑀕𑀸 𑀲𑀼𑀤𑁆𑀥𑀯𑀺𑀭𑀸 𑀚𑀺𑀢𑀁 𑀫𑀢𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀫𑁆𑀲𑀸 𑀫𑀲𑀕𑀡𑀸 𑀘 𑀚𑁆𑀕𑀸 𑀚𑀕𑀡𑀕𑀭𑀼𑀓𑀸 𑀘 𑀘𑁂 𑀲𑀺𑀬𑁆𑀬𑀼𑀁, 𑀢𑀁 𑀯𑀼𑀢𑁆𑀢𑀁 𑀲𑀼𑀤𑁆𑀥𑀯𑀺𑀭𑀸𑀚𑀺𑀢𑀦𑁆𑀢𑀺 𑀫𑀢𑀁 𑀜𑀸𑀢𑀩𑁆𑀩𑀦𑁆𑀢𑀺. 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄 𑀬𑁄 𑀩𑀼𑀤𑁆𑀥𑁄 𑀮𑁄𑀓𑀢𑁄 𑀲𑀁𑀲𑀸𑀭𑁂 𑀓𑀸𑀬𑀺𑀓𑀁 𑀤𑀼𑀓𑁆𑀔𑀜𑁆𑀘 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀜𑁆𑀘 𑀅𑀦𑀼𑀪𑁄𑀲𑀺 𑀦𑀭𑀤𑁂𑀯𑀫𑀗𑁆𑀕𑀮𑀁, 𑀢𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀦𑁆𑀤𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀳𑀺 𑀬𑁄𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄. 𑀬𑁄 𑀬𑀸𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀘 𑀅𑀦𑀺𑀬𑀫𑀯𑀸𑀘𑀓 𑀲𑀩𑁆𑀩𑀦𑀸𑀫𑀧𑀤𑀢𑁆𑀢𑀸 𑀯𑀘𑀦𑀢𑁆𑀣𑁄 𑀦 𑀓𑀸𑀢𑀩𑁆𑀩𑁄. 𑀢𑀲𑁆𑀲 𑀧𑀦 𑀬 𑀑𑀢𑀺 𑀧𑀤𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄. 𑀢𑁂𑀲𑀼 𑀘 𑀬𑀲𑀤𑁆𑀤𑀲𑁆𑀲 𑀯𑀸𑀘𑁆𑀘𑀁 𑀅𑀦𑀺𑀬𑀫𑁄 𑀩𑀼𑀤𑁆𑀥𑀤𑀩𑁆𑀩𑁄 𑀅𑀧𑁆𑀧𑀥𑀸𑀦𑁂𑀦 𑀮𑀩𑁆𑀪𑀢𑀺, 𑀢𑀲𑁆𑀲 𑀬𑀸𑀤𑀺𑀲𑀬𑀼𑀢𑁆𑀢𑀚𑀘𑁆𑀘𑀦𑀸𑀫𑀕𑁄𑀢𑁆𑀢𑀲𑀻𑀮𑀯𑀺𑀳𑀸𑀭𑀻 𑀕𑁄𑀘𑀭𑀲𑀗𑁆𑀔𑀸𑀢𑀁 𑀅𑀦𑀺𑀬𑀫𑀲𑀸𑀫𑀜𑁆𑀜𑀸𑀓𑀸𑀭𑀢𑁆𑀢𑀕𑀼𑀡𑀫𑁂𑀯 𑀧𑀥𑀸𑀦𑁂𑀦 𑀮𑀩𑁆𑀪𑀢𑀺. 𑀧𑀞𑀫𑀸𑀲𑀺𑀯𑀺𑀪𑀢𑁆𑀢𑀺𑀬𑀸 𑀓𑀸𑀭𑀺𑀬𑀪𑀽𑀢𑀲𑁆𑀲 𑀑𑀓𑀸𑀭𑀲𑁆𑀲 𑀯𑀸𑀘𑁆𑀘𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀲𑀗𑁆𑀔𑀸𑀢𑀁 𑀓𑀢𑁆𑀢𑀼𑀓𑀸𑀭𑀓𑁂𑀓𑀯𑀘𑀦𑀲𑀗𑁆𑀔𑁆𑀬𑀁 𑀮𑀩𑁆𑀪𑀢𑀺. 𑀅𑀣 𑀯𑀸 𑀲𑀩𑁆𑀩𑀦𑀸𑀫𑀪𑀸𑀯𑀁 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀬𑁄, 𑀅𑀦𑀺𑀬𑀫𑀯𑀸𑀘𑀓𑀪𑀸𑀯𑀁 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀬𑁄, 𑀲𑀩𑁆𑀩𑀦𑀸𑀫 𑀪𑀸𑀯𑁂𑀦 𑀬𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀬𑁄, 𑀲𑀩𑁆𑀩𑀦𑀸𑀫𑀪𑀸𑀯𑁂𑀦 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄𑀢𑀺 𑀯𑀸 𑀬𑁄, 𑀬𑀸𑀢𑀩𑁆𑀩𑁄 𑀜𑀸𑀢𑀩𑁆𑀩𑁄 𑀏𑀢𑁂𑀦 𑀯𑀸 𑀅𑀦𑀺𑀬𑀫𑀢𑁆𑀣𑁄𑀢𑀺 𑀬𑁄.

𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀦𑀸𑀦𑀸𑀓𑀸𑀭𑀡𑀁 𑀧𑀝𑀺𑀘𑁆𑀘, 𑀥𑀸𑀢𑀼𑀧𑀘𑁆𑀘𑀬𑀯𑀺𑀕𑁆𑀕𑀳𑀁;

𑀘𑀺𑀦𑁆𑀢𑀓𑀸𑀦𑀁 𑀧𑀪𑀸𑀯𑁄𑀯, 𑀧𑀥𑀸𑀦𑀁 𑀳𑁄𑀢𑀺 𑀘𑀺𑀦𑁆𑀢𑀦𑁂’’𑀢𑀺.

𑀩𑀼𑀤𑁆𑀥𑁄𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄. 𑀩𑀼𑀚𑁆𑀛𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀪𑀕𑀯𑀸. 𑀲𑀼𑀤𑁆𑀥𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀩𑀼𑀥𑀥𑀸𑀢𑀼 𑀢. 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀯𑀸 𑀩𑀼𑀤𑁆𑀥𑁄, 𑀳𑁂𑀢𑀼 𑀓𑀢𑁆𑀢𑀼𑀲𑀸𑀥𑀦𑁄𑀬𑀁. 𑀅𑀜𑁆𑀜𑁂𑀲𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑁄𑀥𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀦𑀜𑁆𑀜𑀩𑁄𑀥𑀺𑀢𑁄 𑀳𑀼𑀢𑁆𑀯𑀸 𑀲𑀯𑀸𑀲𑀦𑀸𑀬 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀩𑀼𑀚𑁆𑀛𑀢𑀺 𑀚𑀸𑀕𑀭𑁄𑀢𑀻𑀢𑀺 𑀩𑀼𑀤𑁆𑀥𑁄, 𑀤𑀺𑀦𑀓𑀭𑀓𑀺𑀭𑀡 𑀲𑀫𑀸𑀕𑀫𑁂𑀦 𑀧𑀭𑀫𑀭𑀼𑀘𑀺𑀭𑀲𑀺𑀭𑀻𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀫𑀸𑀕𑀫𑁂𑀦 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀩𑀼𑀚𑁆𑀛𑀢𑀺 𑀯𑀺𑀓𑀲𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄, 𑀦𑀺𑀩𑁆𑀩𑀸𑀦 𑀲𑀗𑁆𑀔𑀸𑀢𑀁 𑀏𑀓𑀸𑀬𑀦𑀫𑀕𑁆𑀕𑀁 𑀩𑀼𑀚𑁆𑀛𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄. 𑀩𑀼𑀥𑀲𑀤𑁆𑀤𑁄 𑀳𑀺 𑀜𑀸𑀡𑀸𑀤𑀻𑀲𑀼 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀯𑀢𑁆𑀢𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀜𑀸𑀡𑁂 𑀯𑀺𑀓𑀲𑀦𑁂 𑀘𑁂𑀯, 𑀕𑀫𑀦𑁂 𑀘𑀸𑀧𑀺 𑀚𑀸𑀕𑀭𑁂;

𑀘𑀢𑀽𑀲𑁆𑀯𑁂𑀢𑁂𑀲𑀼 𑀅𑀢𑁆𑀣𑁂𑀲𑀼, 𑀩𑀼𑀥𑀲𑀤𑁆𑀤𑁄 𑀧𑀯𑀢𑁆𑀢𑀢𑀻’’𑀢𑀺.

𑀅𑀣 𑀯𑀸 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀚𑀸𑀦𑀸𑀢𑀻𑀢𑀺 𑀩𑀼𑀤𑁆𑀥𑁄, 𑀧𑀸𑀭𑀫𑀺 𑀪𑀸𑀯𑀺𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑁂 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀯𑀸 𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸𑀢𑀺 𑀅𑀥𑀺𑀕𑀢𑀜𑀸𑀡𑀕𑀼𑀡𑀯𑀺𑀲𑁂𑀲𑁂𑀳𑀺 𑀩𑀼𑀚𑁆𑀛𑀺𑀢𑀩𑁆𑀩𑁄𑀢𑀺 𑀯𑀸 𑀩𑀼𑀤𑁆𑀥𑁄, 𑀪𑀕𑀯𑀢𑀸 𑀩𑀼𑀚𑁆𑀛𑀺𑀢𑀩𑁆𑀩𑀁 𑀜𑀸𑀢𑀩𑁆𑀩𑀦𑁆𑀢𑀺 𑀩𑀼𑀤𑁆𑀥𑀁. 𑀓𑀺𑀁 𑀢𑀁, 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀩𑀼𑀤𑁆𑀥𑁄, 𑀪𑀕𑀯𑀸. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸 𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢 𑀦𑀺𑀭𑀯𑀲𑁂𑀲𑀓𑁆𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀸𑀤𑀺𑀅𑀧𑀭𑀺 𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺.

𑀏𑀢𑁆𑀣 𑀘 𑀩𑀼𑀤𑁆𑀥𑁄 𑀦𑀸𑀫 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥, 𑀧𑀘𑁆𑀘𑁂𑀓𑀩𑀼𑀤𑁆𑀥, 𑀘𑀢𑀼𑀲𑀘𑁆𑀘𑀩𑀼𑀤𑁆𑀥, 𑀲𑀼𑀢 𑀩𑀼𑀤𑁆𑀥𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀬𑀫𑁆𑀪𑀽𑀧𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀅𑀯𑀲𑁂𑀲𑀸 𑀔𑀻𑀡𑀸𑀲𑀯𑀸 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄 𑀦𑀸𑀫. 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀩𑀼𑀤𑁆𑀥𑁄 𑀦𑀸𑀫. 𑀇𑀥 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀅𑀥𑀺𑀧𑁆𑀧𑁂𑀢𑁄.

𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄𑀢𑀺 𑀏𑀢𑁆𑀣 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀥𑀺𑀢𑀺𑀫𑀸𑀢𑀺 𑀲𑀫𑀸𑀥𑀺𑀯𑀦𑁆𑀢𑁄, 𑀲𑀫𑁆𑀧𑀬𑀼𑀢𑁆𑀢 𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀥𑀸𑀭𑁂𑀢𑀻𑀢𑀺 𑀥𑀺𑀢𑀺, 𑀲𑀫𑀸𑀥𑀺. 𑀥𑀸𑀥𑀸𑀢𑀼𑀢𑀺. 𑀆𑀓𑀸𑀭𑀲𑁆𑀲 𑀇𑀓𑀸𑀭𑀸𑀤𑁂𑀲𑁄. 𑀥𑀺𑀬𑀢𑀺 𑀞𑀧𑁂𑀢𑀺 𑀏𑀓𑀸𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀢𑀺 𑀥𑀺𑀢𑀺, 𑀘𑀺𑀢𑁆𑀢𑁂𑀦 𑀬𑁄𑀕𑁂𑀦𑁂𑀯𑁂𑀲𑁄 𑀏𑀓𑀸 𑀭𑀫𑁆𑀫𑀡𑁂 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀥𑀺𑀢𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀥𑀺𑀢𑀺𑀫𑀸, 𑀩𑀼𑀤𑁆𑀥𑁄. 𑀲𑁄 𑀳𑀺 𑀬𑀣𑀸 𑀫𑀳𑀸𑀫𑁂𑀭𑀼 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀪𑀼𑀲𑀁 𑀆𑀕𑀢𑁂𑀳𑀺 𑀯𑀸𑀢𑁂𑀳𑀺 𑀦 𑀲𑀫𑀺𑀜𑁆𑀚𑀢𑀺, 𑀏𑀯𑀁 𑀧𑀝𑀺𑀧𑀓𑁆𑀔𑁂𑀳𑀺 𑀫𑀺𑀘𑁆𑀙𑀸𑀯𑀸𑀤 𑀯𑀸𑀢𑁂𑀳𑀺 𑀘 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂𑀳𑀺 𑀘 𑀮𑀸𑀪𑀸𑀮𑀸𑀪 𑀬𑀲𑀸𑀬𑀲 𑀦𑀺𑀦𑁆𑀤𑀸 𑀧𑀲𑀁𑀲 𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀘 𑀦 𑀲𑀫𑀺𑀜𑁆𑀚𑀢𑀺, 𑀲𑀫𑀸𑀥𑀺𑀯𑀦𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀜𑁆𑀜𑀥𑀸𑀭𑀓𑁄𑀢𑀺 𑀅𑀭𑀳𑀢𑁆𑀢𑀨𑀮𑀳𑀸𑀭𑀓𑁄. 𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀨𑀮𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀯𑀸. 𑀚𑀸𑀦𑀸𑀢𑀺 𑀧𑀞𑀫 𑀫𑀕𑁆𑀕𑁂𑀦 𑀤𑀺𑀝𑁆𑀞𑀲𑀘𑁆𑀘𑀲𑁆𑀲 𑀆𑀫𑀭𑀺𑀬𑀸𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸𑀢𑀺 𑀅𑀜𑁆𑀜𑀁, 𑀅𑀭𑀳𑀢𑁆𑀢𑀨𑀮𑀁. 𑀆𑀧𑀼𑀩𑁆𑀩𑀜𑀸𑀥𑀸𑀢𑀼 𑀓𑁆𑀯𑀺. 𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄. 𑀲𑀁𑀬𑁄𑀕𑀧𑀭𑀢𑁆𑀢𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄, 𑀢𑀁 𑀥𑀸𑀭𑁂𑀢𑀻𑀢𑀺 𑀅𑀜𑁆𑀜𑀥𑀸𑀭𑀓𑁄. 𑀅𑀜𑁆𑀜𑀲𑀤𑁆𑀤𑀽𑀧𑀧𑀤𑀥𑀭𑀥𑀸𑀢𑀼 𑀡𑁆𑀯𑀼. 𑀲𑀁𑀲𑀸𑀭𑁂𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑁂 𑀲𑀁𑀲𑀸𑀭𑀯𑀝𑁆𑀝𑁂.

𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑁂𑀦 𑀲𑀁𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀁𑀲𑀸𑀭𑁄. 𑀲𑀁𑀧𑀼𑀩𑁆𑀩𑀲𑀭𑀥𑀸𑀢𑀼 𑀕𑀢𑀺𑀫𑁆𑀳𑀺 𑀡. 𑀅𑀣 𑀯𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄 𑀲𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀲𑀸𑀭𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀺𑀁. 𑀅𑀦𑀼𑀪𑁄𑀲𑀻𑀢𑀺 𑀅𑀦𑀼𑀧𑀼𑀦𑀧𑁆𑀧𑀼𑀦𑀁 𑀅𑀪𑀼𑀜𑁆𑀚𑀺, 𑀅𑀯𑁂𑀤𑀬𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑁂 𑀲𑀭𑀻𑀭𑁂 𑀧𑀯𑀢𑁆𑀢𑀁 𑀓𑀸𑀬𑀺𑀓𑀁. 𑀘𑁂𑀢𑀲𑀺𑀓𑀦𑁆𑀢𑀺 𑀘𑁂𑀢𑀲𑀺 𑀧𑀯𑀢𑁆𑀢𑀁 𑀘𑁂𑀢𑀲𑀺𑀓𑀁. 𑀢𑀁 𑀧𑀦 𑀧𑀤𑀤𑁆𑀯𑀬𑀁 𑀤𑀼𑀓𑁆𑀔𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀤𑀼𑀓𑁆𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁. 𑀤𑀼𑀓𑁆𑀔𑀦𑀁 𑀤𑀼𑀓𑁆𑀔𑀁, 𑀅𑀣 𑀯𑀸 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀥𑀸𑀢𑀼 𑀅. 𑀇𑀤𑀁 𑀧𑀦 𑀦𑀺𑀩𑁆𑀩𑀘𑀦𑀁 𑀓𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀢𑁄𑀢𑀺 𑀲𑀢𑁆𑀢𑀮𑁄𑀓𑀳𑁂𑀢𑀼. 𑀮𑁄𑀓𑀺𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄. 𑀮𑁄𑀓𑀥𑀸𑀢𑀼 𑀡. 𑀅𑀣 𑀯𑀸 𑀓𑀼𑀲𑀮𑀸𑀤𑀻𑀦𑀺 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀮𑁄𑀓𑁄. 𑀮𑀸𑀥𑀸𑀢𑀼 𑀑𑀓𑀧𑀘𑁆𑀘𑀬𑁄. 𑀲𑀢𑁆𑀢 𑀮𑁄𑀓𑁄𑀯 𑀮𑀩𑁆𑀪𑀢𑀺. 𑀥𑀺𑀢𑀺𑀫𑀸 𑀅𑀜𑁆𑀜𑀥𑀸𑀭𑀓𑁄 𑀬𑁄 𑀩𑀼𑀤𑁆𑀥𑁄 𑀲𑀁𑀲𑀸𑀭𑀯𑀝𑁆𑀝𑁂 𑀦𑀺𑀫𑀼𑀕𑁆𑀕𑀸𑀦𑀁 𑀲𑀢𑁆𑀢𑀸𑀦𑀫𑀦𑀼𑀤𑀬𑀸𑀬 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀫𑁄𑀘𑁂𑀢𑀼𑀓𑀸𑀫𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀜𑁆𑀘 𑀫𑀳𑀸 𑀧𑀭𑀺𑀘𑁆𑀘𑀸𑀕𑁂 𑀘 𑀓𑀭𑁄𑀦𑁆𑀢𑁄 𑀲𑀢𑁆𑀢𑀮𑁄𑀓𑀳𑁂𑀢𑀼 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀁 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀁 𑀅𑀦𑀼𑀪𑀯𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀦𑁆𑀢𑀺 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁. 𑀯𑀦𑁆𑀤𑁂𑀢𑀺 𑀯𑀦𑁆𑀤𑀸𑀫𑀺.

𑀦𑀭𑀤𑁂𑀯𑀫𑀗𑁆𑀕𑀮𑀦𑁆𑀢𑀺 𑀦𑀭𑀤𑁂𑀯𑀸𑀦𑀁 𑀫𑀗𑁆𑀕𑀮𑀪𑀽𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀢𑁄. 𑀦𑀺𑀭𑀬𑀁 𑀦𑁂𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀦𑀭𑁄, 𑀫𑀦𑀼𑀲𑁆𑀲𑁄. 𑀦𑀺𑀥𑀸𑀢𑀼 𑀧𑀸𑀧𑀼𑀦𑀦𑁂 𑀅𑀭𑁄. 𑀅𑀭𑀺𑀬𑀫𑀦𑀼𑀲𑁆𑀲𑁄 𑀧𑀦 𑀪𑀽𑀢𑀧𑀼𑀩𑁆𑀩𑀕𑀢𑀺𑀓 𑀦𑀬𑁂𑀦 𑀦𑀭𑁄 𑀦𑀸𑀫𑀸𑀢𑀺. 𑀅𑀣 𑀯𑀸 𑀲𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄, 𑀉𑀢𑁆𑀢𑀫𑀁 𑀧𑀩𑁆𑀩𑀚𑁆𑀚𑀁 𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀧𑀦 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀪𑀢𑁆𑀢𑀼𑀪𑀽𑀢𑁄 𑀇𑀢𑀭𑀸𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑀳𑀸𑀝𑀻𑀓𑀸𑀬𑀁 𑀧𑀦 𑀦𑀭𑀢𑀻𑀢𑀺 𑀦𑀭𑁄, 𑀧𑀼𑀭𑀺𑀲𑁄. 𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑀺𑀉𑀘𑁆𑀘𑁂 𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀦𑀬𑀦𑀝𑁆𑀞𑁂𑀦 𑀦𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀢𑁆𑀢𑀪𑀸𑀢𑀼 𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀧𑀕𑁂𑀯 𑀇𑀢𑀭𑀸 𑀇𑀢𑀭𑀸𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀥 𑀧𑀦 𑀦𑀭𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀫𑁆𑀧𑀺 𑀯𑀺𑀲𑁂𑀲𑁂𑀦 𑀧𑀼𑀭𑀺𑀲𑀦𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺 𑀧𑀥𑀸𑀦𑀦𑀬𑁂𑀦 𑀕𑀳𑀡𑀲𑁆𑀲 𑀬𑀼𑀢𑁆𑀢𑀢𑁆𑀢𑀸. 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡 𑀛𑀸𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀯𑀼𑀥𑀸𑀢𑀼 𑀡. 𑀅𑀣 𑀯𑀸 𑀲𑀭𑀻𑀭𑀸𑀮𑀗𑁆𑀓𑀸𑀭𑀚𑀼𑀢𑀺𑀬𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀤𑁂𑀯𑀸 𑀘 𑀦𑀸𑀫 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀘𑀸𑀢𑀺. 𑀢𑀢𑁆𑀣 𑀫𑀳𑀸𑀲𑀫𑁆𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂𑀦 𑀤𑁂𑀯𑀸𑀢𑀺 𑀲𑀫𑁆𑀫𑀢𑀢𑁆𑀢𑀸 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀭𑀸𑀚𑀓𑀼𑀫𑀸𑀭𑀸 𑀘 𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫. 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫. 𑀇𑀥 𑀧𑀦 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀫𑀗𑁆𑀕𑀮𑀦𑁆𑀢𑀺 𑀫𑀗𑁆𑀕𑀮𑀪𑀽𑀢𑀁. 𑀢𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀁. 𑀫𑀗𑁆𑀕𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀲𑀢𑁆𑀢𑀸𑀦𑀁 𑀏𑀢𑁂𑀦𑀸𑀢𑀺 𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀫𑀗𑁆𑀕𑀮 𑀥𑀸𑀢𑀼 𑀯𑀟𑁆𑀠𑀦𑁂 𑀅𑀮𑁄. 𑀅𑀣 𑀯𑀸 𑀫𑀗𑁆𑀕𑀁 𑀯𑀼𑀘𑁆𑀘𑀢𑀺 𑀧𑀸𑀧𑀁, 𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀤𑁂𑀲𑀦𑀸𑀬 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀫𑀗𑁆𑀕𑀲𑀤𑁆𑀤𑀽𑀧𑀧𑀤𑀮𑀼𑀥𑀸𑀢𑀼 𑀓𑁆𑀯𑀺. 𑀦𑀭𑀸 𑀘 𑀤𑁂𑀯𑀸 𑀘 𑀦𑀭𑀤𑁂𑀯𑀸, 𑀢𑁂𑀲𑀁 𑀫𑀗𑁆𑀕𑀮𑁄 𑀦𑀭𑀤𑁂𑀯𑀫𑀗𑁆𑀕𑀮𑁄, 𑀩𑀼𑀤𑁆𑀥𑁄. 𑀲𑁄 𑀧𑀦 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀲𑀗𑁆𑀔𑁂, 𑀘𑀓𑁆𑀓𑀁, 𑀧𑀼𑀡𑁆𑀡𑀓𑀼𑀫𑁆𑀪𑁄, 𑀕𑀭𑀸, 𑀲𑀺𑀭𑀻, 𑀲𑁂𑀢𑀘𑁆𑀙𑀢𑁆𑀢𑀁, 𑀅𑀗𑁆𑀓𑀼𑀲𑁄, 𑀥𑀚𑀁, 𑀲𑁄𑀯𑀢𑁆𑀢𑀺𑀓𑀜𑁆𑀘𑀸𑀢𑀺 𑀅𑀝𑁆𑀞𑀳𑀺 𑀮𑁄𑀓𑀺𑀬𑀫𑀗𑁆𑀕𑀮𑁂𑀳𑀺 𑀲𑁂𑀝𑁆𑀞𑀢𑁆𑀢𑀸 𑀉𑀢𑁆𑀢𑀫𑀢𑁆𑀢𑀸 𑀘 𑀫𑀗𑁆𑀕𑀮𑁄 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀦𑀭𑀤𑁂𑀯𑀫𑀗𑁆𑀕𑀮𑀦𑁆𑀢𑀺 𑀣𑁄𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀥𑀺𑀢𑀺𑀫𑀸 𑀲𑀫𑀸𑀥𑀺𑀯𑀦𑁆𑀢𑁄 𑀅𑀜𑁆𑀜𑀥𑀸𑀭𑀓𑁄 𑀅𑀭𑀳𑀢𑁆𑀢𑀨𑀮𑀥𑀸𑀭𑀓𑁄 𑀅𑀭𑀳𑀢𑁆𑀢𑀨𑀮𑀲𑁂 𑀢𑀘𑁆𑀙𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀯𑀸, 𑀬𑁄 𑀬𑀸𑀤𑀺𑀲𑁄 𑀩𑀼𑀤𑁆𑀥𑁄, 𑀲𑀁𑀲𑀸𑀭𑁂 𑀲𑀁𑀲𑀸𑀭𑀯𑀝𑁆𑀝𑁂, 𑀓𑀸𑀬𑀺𑀓𑀁 𑀓𑀸𑀬𑁂 𑀧𑀯𑀢𑁆𑀢𑀁 𑀤𑀼𑀓𑁆𑀔𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀘𑁂𑀢𑀲𑀺 𑀧𑀯𑀢𑁆𑀢𑀁 𑀤𑀼𑀓𑁆𑀔𑀜𑁆𑀘 𑀯𑀝𑁆𑀝𑀤𑀼𑀓𑁆𑀔𑀜𑁆𑀘, 𑀮𑁄𑀓𑀢𑁄 𑀮𑁄𑀓𑀳𑁂𑀢𑀼, 𑀅𑀦𑀼𑀪𑁄𑀲𑀺 𑀧𑀼𑀦𑀧𑁆𑀧𑀼𑀦𑀁 𑀅𑀪𑀯𑀲𑀺 𑀅𑀯𑁂𑀤𑀬𑀺, 𑀦𑀭𑀤𑁂𑀯𑀫𑀗𑁆𑀕𑀮𑀁 𑀦𑀭𑀤𑁂𑀯𑀸𑀦𑀁 𑀫𑀗𑁆𑀕𑀮𑀪𑀽𑀢𑀁, 𑀢𑀁 𑀢𑀸𑀤𑀺𑀲𑀁 𑀩𑀼𑀤𑁆𑀥𑀁 𑀅𑀳𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀢𑀢𑀺𑀬𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁪. 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀁,

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀁;

𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑀁,

𑀯𑀦𑁆𑀤𑁂 𑀫𑀼𑀦𑀺𑀫𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁.

𑁪. 𑀏𑀯𑀁 𑀢𑀢𑀺𑀬𑀕𑀸𑀣𑀸𑀬 𑀩𑀼𑀤𑁆𑀥𑀲𑁆𑀲 𑀦𑀢𑁆𑀯𑀸 𑀇𑀤𑀸𑀦𑀺 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀦𑁆𑀢𑁆𑀬𑀸𑀤𑀻𑀳𑀺 𑀙𑀳𑀺 𑀕𑀼𑀡𑁂𑀳𑀺 𑀣𑁄𑀫𑀺𑀢𑁆𑀯𑀸 𑀫𑀼𑀦𑀺𑀦𑁄 𑀯𑀦𑁆𑀤𑀺𑀢𑀼𑀓𑀸𑀫𑁄 𑀩𑀸𑀢𑁆𑀢𑀺𑀁𑀲𑀢𑀺 𑀮𑀓𑁆𑀔𑀡 𑀘𑀺𑀢𑁆𑀭 𑀤𑁂𑀳 𑀦𑁆𑀢𑁆𑀬𑀸𑀤𑀺𑀕𑀸𑀣𑀫𑀸𑀳. 𑀅𑀬𑀁 𑀧𑀦 𑀢 𑀚 𑀚 𑀕𑀡 𑀕𑀭𑀼𑀤𑁆𑀯𑀬 𑀬𑀼𑀢𑁆𑀢𑀢𑁆𑀢𑀸 𑀏𑀓𑀸𑀤𑀲𑀓𑁆𑀔𑀭𑁂𑀳𑀺 𑀮𑀓𑁆𑀔𑀺𑀢𑀸 𑀉𑀧𑀝𑁆𑀞𑀺𑀢𑀸 𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑁄𑀤𑀬𑁂 𑀢𑁆𑀚𑀸 𑀚𑁆𑀕𑀸 𑀕𑀭𑀼𑀦𑀸𑀬𑀫𑀼𑀧𑀝𑁆𑀞𑀺𑀢𑀸 𑀲𑀸’’𑀢𑀺. 𑀢𑀲𑁆𑀲𑀢𑁆𑀣𑁄. 𑀬𑀲𑁆𑀲𑀁 𑀧𑀝𑀺𑀧𑀸𑀤𑀁 𑀢𑁆𑀚𑀸 𑀢𑀚𑀕𑀡𑀸 𑀘 𑀚𑁆𑀕𑀸𑀚𑀕𑀡𑀕𑀭𑀽 𑀘 𑀕𑀭𑀼𑀦𑀸 𑀧𑀸𑀤𑀦𑁆𑀢𑀕𑀭𑀼𑀦𑀸 𑀘𑁂 𑀬𑀼𑀢𑁆𑀢𑀸, 𑀲𑀸 𑀅𑀬𑀁 𑀕𑀸𑀣𑀸 𑀉𑀧𑀝𑁆𑀞𑀺𑀢𑀸 𑀦𑀸𑀫𑀸𑀢𑀺. 𑀏𑀢𑁆𑀣 𑀘 𑀏𑀓 𑀕𑀭𑀼𑀓𑁂 𑀲𑀢𑀺𑀧𑀺 𑀤𑁆𑀯𑀺𑀕𑀭𑀼𑀓𑁂𑀧𑀺 𑀮𑀓𑁆𑀔𑀡𑀲𑀫𑀸𑀦𑀢𑁆𑀢𑀸 𑀉𑀧𑀝𑁆𑀞𑀺𑀢𑀸 𑀕𑀸𑀣𑀸 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀩𑀸𑀢𑁆𑀢𑀺𑀁𑀲𑀢𑀺 𑀮𑀓𑁆𑀔𑀡 𑀘𑀺𑀢𑁆𑀭 𑀤𑁂𑀳𑀦𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀁 𑀲𑀭𑀻𑀭𑀯𑀦𑁆𑀢𑀁. 𑀏𑀢𑁆𑀣 𑀘 𑀤𑁆𑀯𑀻𑀳𑀺 𑀅𑀥𑀺𑀓𑀁 𑀢𑀺𑀁𑀲𑀁 𑀩𑀸𑀢𑁆𑀢𑀺𑀁𑀲𑀢𑀺. 𑀤𑁆𑀯𑀺𑀲𑀤𑁆𑀤𑀲𑁆𑀲 𑀩𑀸𑀤𑁂𑀲𑁄. 𑀮𑀓𑁆𑀔𑀺𑀬𑀢𑀺 𑀮𑀓𑁆𑀔𑀺𑀢𑀩𑁆𑀩𑀁 𑀩𑀼𑀤𑁆𑀥𑀲𑀭𑀻𑀭𑀁 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀁. 𑀤𑀺𑀳𑀢𑀺 𑀉𑀧𑀘𑀬𑀢𑀺 𑀯𑀟𑁆𑀠𑀢𑀺 𑀯𑀸 𑀏𑀢𑁆𑀣 𑀓𑀼𑀲𑀮𑀸 𑀓𑀼𑀲𑀮𑀦𑁆𑀢𑀺 𑀤𑁂𑀳𑀁, 𑀲𑀭𑀻𑀭𑀁. 𑀤𑀺𑀳𑀥𑀸𑀢𑀼 𑀉𑀧𑀘𑀬𑁂 𑀯𑀟𑁆𑀠𑀦𑁂 𑀯𑀸 𑀡. 𑀩𑀸𑀢𑁆𑀢𑀺𑀁𑀲𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀘𑀺𑀢𑁆𑀭𑀁 𑀯𑀺𑀘𑀺𑀢𑁆𑀭𑀁 𑀤𑁂𑀳𑀁 𑀲𑀭𑀻𑀭𑀁 𑀬𑀲𑁆𑀲 𑀲𑁄𑀢𑀺 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑁄, 𑀫𑀼𑀦𑀺 𑀮𑀩𑁆𑀪𑀢𑀺.

𑀇𑀤𑀁 𑀧𑀦𑁂𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀭𑀽𑀧𑀲𑁆𑀲 𑀲𑀗𑁆𑀔𑁂𑀧 𑀤𑀲𑁆𑀲𑀦𑀁. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀘, 𑀆𑀬𑀢𑀧𑀡𑁆𑀳𑀺, 𑀤𑀻𑀖𑀗𑁆𑀕𑀼𑀮𑀺, 𑀫𑀼𑀤𑀼𑀢 𑀮𑀼𑀡𑀳𑀢𑁆𑀣𑀧𑀸𑀤𑁄, 𑀚𑀸𑀮𑀳𑀢𑁆𑀣𑀧𑀸𑀤𑁄, 𑀉𑀲𑁆𑀲𑀗𑁆𑀔𑀧𑀸𑀤𑁄, 𑀏𑀡𑀺𑀚𑀗𑁆𑀖𑁄, 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀸𑀡𑀼 𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺, 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄, 𑀲𑀼𑀯𑀡𑁆𑀡 𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄, 𑀲𑀼𑀔𑀼𑀫𑀘𑁆𑀙𑀯𑀻, 𑀏𑀓𑁂𑀓𑀮𑁄𑀫𑁄, 𑀉𑀤𑁆𑀥𑀕𑁆𑀕𑀮𑁄𑀫𑁄, 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀲𑀢𑁆𑀢𑀼𑀲𑁆𑀲𑀤𑁄, 𑀲𑀻𑀳𑀧𑀼𑀩𑁆𑀩𑀤𑁆𑀥 𑀓𑀸𑀬𑁄, 𑀘𑀺𑀢𑀦𑁆𑀢𑀭𑀁𑀲𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄, 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄, 𑀭𑀲𑀕𑁆𑀕𑀭𑀲𑀻, 𑀲𑀻𑀳𑀳𑀦𑀼, 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄, 𑀲𑀫𑀤𑀦𑁆𑀢𑁄, 𑀅𑀯𑀺𑀭𑀴𑀤𑀦𑁆𑀢𑁄, 𑀲𑀼𑀲𑀼𑀓𑁆𑀓𑀤𑀸𑀞𑁄, 𑀧𑀳𑀽𑀢𑀚𑀺𑀯𑁆𑀳𑁄, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀭𑀯𑀻𑀓𑀪𑀸𑀡𑀺, 𑀅𑀢𑀺𑀦𑀻𑀮𑀦𑁂𑀢𑁆𑀢𑁄, 𑀕𑁄𑀧𑀔𑀼𑀫𑁄, 𑀉𑀡𑁆𑀡𑀸 𑀪𑀫𑀼 𑀓𑀦𑁆𑀢𑀭𑁂 𑀚𑀸𑀢𑁄, 𑀉𑀡𑁆𑀳𑀻𑀲𑀲𑀻𑀲𑁄 𑀘𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀯𑀺𑀥𑀸𑀦𑀺 𑀳𑁄𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺.

𑀢𑁂𑀦 𑀯𑀼𑀢𑁆𑀢𑀁 𑀧𑀸𑀣𑁂𑀬𑁆𑀬𑀯𑀕𑁆𑀕𑁂 𑀮𑀓𑁆𑀔𑀡𑀲𑀼𑀢𑁆𑀢𑁂 ‘‘𑀓𑀢𑀫𑀸𑀦𑀺 𑀢𑀸𑀦𑀺 𑀪𑀺𑀓𑁆𑀔𑀯𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀕𑀢𑀺𑀬𑁄 𑀪𑀯𑀦𑁆𑀢𑀺, 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀺…𑀧𑁂… 𑀲𑀘𑁂 𑀔𑁄𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸 𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑁧. 𑀇𑀥 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄 𑀳𑁄𑀢𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸 𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺 𑁨. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀳𑁄𑀦𑁆𑀢𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸 𑀓𑀸𑀭𑀧𑀭𑀺𑀧𑀽𑀭𑀸𑀦𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲 𑀮𑀓𑁆𑀔𑀡𑀁 𑀪𑀯𑀢𑀺 𑁩. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀆𑀬𑀢𑀧𑀡𑁆𑀳𑀻 𑀳𑁄𑀢𑀺 𑁪. 𑀤𑀻𑀖𑀗𑁆𑀕𑀼𑀮𑀻 𑀳𑁄𑀢𑀺 𑁫. 𑀫𑀼𑀤𑀼𑀢𑀮𑀼𑀡 𑀳𑀢𑁆𑀣𑀧𑀸𑀤𑁄 𑀳𑁄𑀢𑀺 𑁬. 𑀚𑀸𑀮𑀳𑀢𑁆𑀣𑀧𑀸𑀤𑁄 𑀳𑁄𑀢𑀺 𑁭. 𑀉𑀲𑁆𑀲𑀗𑁆𑀔𑀧𑀸𑀤𑁄 𑀳𑁄𑀢𑀺 𑁮. 𑀏𑀡𑀺𑀚𑀗𑁆𑀖𑁄 𑀳𑁄𑀢𑀺 𑁯. 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀸𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺 𑁧𑁦. 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄 𑀳𑁄𑀢𑀺 𑁧𑁧. 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄 𑁧𑁨. 𑀲𑀼𑀔𑀼𑀫𑀘𑁆𑀙𑀯𑀻 𑀳𑁄𑀢𑀺 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺 𑁧𑁩. 𑀏𑀓𑁂𑀓𑀮𑁄𑀫𑁄 𑀳𑁄𑀢𑀺, 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸𑀦𑀺 𑁧𑁪. 𑀉𑀤𑁆𑀥𑀕𑁆𑀕𑀮𑁄𑀫𑁄 𑀳𑁄𑀢𑀺. 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸 𑀯𑀢𑁆𑀢𑀸𑀦𑀺 𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀓𑀚𑀸𑀢𑀸𑀦𑀺 𑁧𑁫. 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄 𑀳𑁄𑀢𑀺 𑁧𑁬. 𑀲𑀢𑁆𑀢𑀼𑀲𑁆𑀲𑀤𑁄 𑀳𑁄𑀢𑀺 𑁧𑁭. 𑀲𑀻𑀳𑀧𑀼𑀩𑁆𑀩𑀤𑁆𑀥 𑀓𑀸𑀬𑁄 𑀳𑁄𑀢𑀺 𑁧𑁮. 𑀘𑀺𑀢𑀦𑁆𑀢𑀭𑀁𑀲𑁄 𑀳𑁄𑀢𑀺 𑁧𑁯. 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀳𑁄𑀢𑀺, 𑀬𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀢𑀸𑀯 𑀢𑀓𑁆𑀯𑀲𑁆𑀲 𑀓𑀸𑀬𑁄 𑁨𑁦. 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄 𑀳𑁄𑀢𑀺 𑁨𑁧. 𑀭𑀲𑀕𑁆𑀕 𑀲𑀕𑁆𑀕𑀻 𑀳𑁄𑀢𑀺 𑁨𑁨. 𑀲𑀻𑀳𑀳𑀦𑀼 𑀳𑁄𑀢𑀺 𑁨𑁩. 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑀳𑁄𑀢𑀺 𑁨𑁪. 𑀲𑀫𑀤𑀦𑁆𑀢𑁄 𑀳𑁄𑀢𑀺 𑁨𑁫. 𑀅𑀯𑀺𑀭𑀴𑀤𑀦𑁆𑀢𑁄 𑀳𑁄𑀢𑀺 𑁨𑁬. 𑀲𑀼𑀲𑀼𑀓𑁆𑀓𑀤𑀸𑀞𑁄 𑀳𑁄𑀢𑀺 𑁨𑁭. 𑀧𑀳𑀽𑀢𑀚𑀺𑀯𑁆𑀳𑁄 𑀳𑁄𑀢𑀺 𑁨𑁮. 𑀩𑁆𑀭𑀳𑁆𑀫𑀲𑁆𑀲𑀭𑁄 𑀳𑁄𑀢𑀺 𑀓𑀭𑀯𑀻𑀓𑀪𑀸𑀡𑀺 𑁨𑁯. 𑀅𑀢𑀺𑀦𑀻𑀮𑀦𑁂𑀢𑁆𑀢𑁄 𑀳𑁄𑀢𑀺 𑁩𑁦. 𑀕𑁄𑀧𑀔𑀼𑀫𑁄 𑀳𑁄𑀢𑀺 𑁩𑁧. 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮 𑀲𑀦𑁆𑀦𑀺𑀪𑀸. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀳𑁄𑀢𑀺 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺 𑁩𑁨. 𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺. 𑀬𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑁄 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺. 𑀇𑀤𑀫𑁆𑀧𑀺 𑀪𑀺𑀓𑁆𑀔𑀯𑁂 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺. 𑀇𑀫𑀸𑀦𑀺 𑀔𑁄 𑀢𑀸𑀦𑀺 𑀪𑀺𑀓𑁆𑀔𑀯𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲 𑀮𑀓𑁆𑀔𑀡𑀸𑀦𑀻’’𑀢𑀺. 𑀏𑀢𑁂𑀲𑀁 𑀧𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀁 𑀅𑀢𑁆𑀣𑁄 𑀧𑀘𑁆𑀙𑀸 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺.

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀦𑁆𑀢𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑀢𑁄 𑀦𑀺𑀓𑁆𑀔𑀦𑁆𑀢𑁂𑀳𑀺 𑀙𑀩𑁆𑀩𑀡𑁆𑀡𑀭𑀁𑀲𑀻𑀲𑀗𑁆𑀔𑀸𑀢𑁂𑀳𑀺 𑀑𑀪𑀸𑀲𑁂𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀯𑀦𑁆𑀢𑀁. 𑀚𑀯𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀼𑀢𑀺. 𑀚𑀼𑀥𑀸𑀢𑀼𑀢𑀺. 𑀦𑀺𑀕𑀘𑁆𑀙𑀢𑀺 𑀦𑀺𑀘𑁆𑀙𑀭𑀢𑀻𑀢𑀺 𑀦𑀺𑀕𑁆𑀕𑀢𑀸, 𑀭𑀲𑁆𑀫𑀺. 𑀦𑀺𑀧𑀼𑀩𑁆𑀩𑀕𑀫𑀼𑀥𑀸𑀢𑀼 𑀢. 𑀧𑀓𑀸𑀭𑁂𑀦 𑀚𑀮𑀢𑁂 𑀤𑀺𑀩𑁆𑀩𑀢𑁂 𑀧𑀚𑁆𑀚𑀮𑀦𑁆𑀢𑀁. 𑀏𑀢𑁆𑀣 𑀘 𑀤𑁂𑀳𑀦𑀺𑀕𑁆𑀕𑀢𑀚𑀼𑀢𑀻𑀢𑀺 𑀯𑀢𑁆𑀢𑀩𑁆𑀩𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀤𑀯𑀺𑀧𑀭𑀺𑀬𑀸𑀬𑁂𑀦 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀤𑁂𑀳𑀢𑁄 𑀦𑀺𑀕𑁆𑀕𑀢𑀸 𑀚𑀼𑀢𑀻𑀢𑀺 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀤𑁂𑀳𑀢𑁄 𑀭𑀽𑀧𑀓𑀸𑀬𑀢𑁄 𑀦𑀺𑀕𑁆𑀕𑀢𑁂𑀳𑀺 𑀦𑀺𑀘𑁆𑀙𑀭𑁂𑀳𑀺 𑀚𑀼𑀢𑀻𑀳𑀺 𑀭𑀁𑀲𑀻𑀳𑀺 𑀧𑀚𑁆𑀚𑀮𑀦𑁆𑀢𑀁 𑀬𑀲𑁆𑀲 𑀲𑁄𑀢𑀺 𑀤𑁂𑀳𑀚𑁆𑀚𑀼𑀢𑀺 𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑁄, 𑀫𑀼𑀦𑀺 𑀮𑀩𑁆𑀪𑀢𑀺. 𑀫𑀼𑀦𑀺𑀦𑁄 𑀳𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕 𑀳𑁂𑀲𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀯𑀸𑀫𑀳𑀢𑁆𑀣𑀢𑁄 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀯𑀢𑁆𑀢𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀳𑁂𑀝𑁆𑀞𑀸𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺, 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀓𑀜𑁆𑀘𑀦𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀦𑀺𑀘𑁆𑀙𑀭𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀚𑀸𑀮𑀸 𑀯𑀺𑀬 𑀘𑀢𑀼𑀤𑁆𑀤𑀻𑀧𑀺𑀓 𑀫𑀳𑀸𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀥𑀸𑀯𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀦𑁆𑀢𑀺 𑀣𑁄𑀫𑁂𑀢𑀻𑀢𑀺.

𑀧𑀜𑁆𑀜𑀸𑀥𑀺𑀢𑀺 𑀲𑀻𑀮 𑀕𑀼𑀡𑁄𑀖𑀯𑀺𑀦𑁆𑀤𑀦𑁆𑀢𑀺 𑀏𑀢𑁆𑀣 𑀧𑀜𑁆𑀜𑀸𑀢𑀺 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁. 𑀥𑀺𑀢𑀻𑀢𑀺 𑀛𑀸𑀦𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑀲𑀫𑀸𑀥𑀺. 𑀲𑀻𑀮𑀦𑁆𑀢𑀺 𑀧𑀘𑁆𑀘𑁂𑀓 𑀩𑀼𑀤𑁆𑀥𑀸𑀭𑀺𑀬𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀲𑀼𑀯𑀺𑀲𑀼𑀤𑁆𑀥𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀑𑀖𑀦𑁆𑀢𑀺 𑀲𑀫𑀽𑀳𑀁. 𑀯𑀺𑀦𑁆𑀤𑀦𑁆𑀢𑀺 𑀮𑀤𑁆𑀥𑀁. 𑀧𑀓𑀸𑀭𑁂𑀦 𑀬𑀣𑀸𑀲𑀪𑀸𑀯𑀁 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀯𑀸 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀧𑀜𑁆𑀜𑀸. 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑀁. 𑀧𑀧𑀼𑀩𑁆𑀩𑀜𑀸𑀥𑀸𑀢𑀼 𑀅. 𑀲𑀸 𑀧𑀦𑁂𑀲𑀸 𑀧𑀚𑀸𑀦𑀦𑀮𑀓𑁆𑀔𑀡𑀸 𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀑𑀪𑀸𑀲𑀦𑀮𑀓𑁆𑀔𑀡𑀸 𑀘, 𑀯𑀺𑀲𑀬𑁄𑀪𑀸𑀲 𑀭𑀲𑀸, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸. 𑀥𑀺𑀢𑀺𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀻𑀮𑀢𑀻𑀢𑀺 𑀲𑀻𑀮𑀁. 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀫𑁆𑀫𑀸 𑀤𑀳𑀢𑀺 𑀲𑀫𑁆𑀫𑀸 𑀞𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀻𑀮𑀢𑀺 𑀲𑀫𑀸𑀥𑀺𑀬𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀺𑀮𑁆𑀬 𑀪𑀸𑀯𑁂𑀦 𑀦 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀲𑀻𑀮𑀁, 𑀲𑀻𑀮𑀦𑁆𑀢𑀺 𑀲𑀫𑀸𑀤𑀳𑀦𑁆𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀯𑀸 𑀲𑀻𑀮𑀁, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀻𑀮𑀥𑀸𑀢𑀼 𑀅. 𑀇𑀤𑀁 𑀧𑀦 𑀧𑀢𑀺𑀝𑁆𑀞𑀸𑀧𑀦𑀮𑀓𑁆𑀔𑀡𑀁, 𑀤𑀼𑀲𑁆𑀲𑀺𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁 𑀅𑀦𑀯𑀚𑁆𑀚𑀭𑀲𑀁 𑀯𑀸, 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀳𑀺𑀭𑀺𑀑𑀢𑁆𑀢𑀧𑁆𑀧𑀧𑀤𑀝𑁆𑀞𑀸𑀦𑀁. 𑀕𑀼𑀡𑀲𑀤𑁆𑀤𑀲𑁆𑀲 𑀯𑀘𑀦𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀉𑀳𑀦𑀢𑀺 𑀲𑀫𑀽𑀳𑀁 𑀓𑀭𑁄𑀢𑀺 𑀏𑀢𑁆𑀣 𑀅𑀯𑀬𑀯𑀦𑁆𑀢𑀺 𑀑𑀖𑁄, 𑀲𑀫𑀽𑀳𑁄. 𑀉𑀧𑀼𑀩𑁆𑀩𑀳𑀦𑀥𑀸𑀢𑀼 𑀡. 𑀉𑀲𑁆𑀲 𑀑. 𑀳𑀦𑀲𑁆𑀲 𑀖𑁄. 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸𑀬𑀁 𑀧𑀦 ‘‘𑀅𑀯𑀬𑀯𑀁 𑀩𑁆𑀬𑀧𑀺𑀬𑀢𑀺 𑀕𑀘𑁆𑀙𑀢𑀻𑀢𑀺 𑀑𑀖𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑁆𑀤𑀦𑀁𑀮𑀪𑀦𑀁 𑀯𑀺𑀦𑁆𑀤𑀁, 𑀯𑀺𑀦𑁆𑀤𑀺𑀬𑀺𑀢𑁆𑀣 𑀮𑀩𑁆𑀪𑀺𑀢𑁆𑀣𑀸𑀢𑀺 𑀯𑀸 𑀯𑀺𑀦𑁆𑀤𑀁, 𑀧𑀜𑁆𑀜𑀸 𑀘 𑀥𑀺𑀢𑀺 𑀘 𑀲𑀻𑀮𑀜𑁆𑀘 𑀢𑀁 𑀕𑀼𑀡𑀜𑁆𑀘𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑀸, 𑀢𑁂𑀲𑀁 𑀑𑀖𑁄 𑀲𑀫𑀽𑀳𑁄𑀢𑀺 𑀢𑀣𑀸, 𑀢𑀁 𑀯𑀺𑀦𑁆𑀤𑀁 𑀮𑀪𑀦𑀁 𑀬𑀲𑁆𑀲𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑁄, 𑀫𑀼𑀦𑀺. 𑀅𑀣 𑀯𑀸 𑀯𑀺𑀦𑁆𑀤𑀁 𑀮𑀪𑀺𑀢𑀩𑁆𑀩𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀁 𑀬𑁂𑀦𑀸𑀢𑀺 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑁄. 𑀢𑀢𑀺𑀬𑀸𑀩𑀳𑀼𑀩𑁆𑀩𑀻𑀳𑀺 𑀲𑀫𑀸𑀲𑁄𑀬𑀁. 𑀯𑀺𑀦𑁆𑀤𑀸𑀦𑀁 𑀮𑀪𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮 𑀲𑀗𑁆𑀔𑀸𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀁.

𑀯𑀦𑁆𑀤𑁂𑀢𑀺 𑀅𑀳𑀁 𑀯𑀦𑁆𑀤𑀸𑀫𑀺. 𑀫𑀼𑀦𑀺𑀦𑁆𑀢𑀺 𑀩𑀼𑀤𑁆𑀥𑀁. 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀯𑀸 𑀳𑀺𑀢𑀸𑀳𑀺𑀢𑀦𑁆𑀢𑀺 𑀫𑀼𑀦𑀺, 𑀩𑀼𑀤𑁆𑀥𑁄. 𑀫𑀼𑀦𑀥𑀸𑀢𑀼 𑀜𑀸𑀡𑁂 𑀇. 𑀅𑀣 𑀯𑀸 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀉𑀪𑁄 𑀅𑀢𑁆𑀣𑁂𑀢𑀺 𑀫𑀼𑀦𑀺, 𑀔𑀦𑁆𑀥𑀸𑀤𑀺 𑀮𑁄𑀓𑁂 𑀢𑀼𑀮𑀁 𑀆𑀭𑁄𑀧𑁂𑀢𑁆𑀯𑀸 𑀫𑀺𑀦𑀦𑁆𑀢𑁄 𑀯𑀺𑀬 𑀇𑀫𑁂 𑀅𑀚𑁆𑀛𑀢𑁆𑀢𑀺𑀓𑀸 𑀔𑀦𑁆𑀥𑀸 𑀇𑀫𑁂 𑀩𑀸𑀳𑀺𑀭𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀥𑀮𑁄𑀓𑀢𑁆𑀣𑀜𑁆𑀘 𑀧𑀭𑀮𑁄𑀓𑀢𑁆𑀣𑀜𑁆𑀘 𑀪𑀕𑀯𑀸 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑁂𑀲 𑀅𑀕𑀸𑀭𑀺𑀬𑀫𑀼𑀦𑀺, 𑀅𑀦𑀸𑀕𑀸𑀭𑀺𑀬𑀫𑀼𑀦𑀺, 𑀲𑁂𑀔𑀫𑀼𑀦𑀺, 𑀅𑀲𑁂𑀔𑀫𑀼𑀦𑀺, 𑀧𑀘𑁆𑀘𑁂𑀓𑀫𑀼𑀦𑀺, 𑀫𑀼𑀦𑀺𑀫𑀼𑀦𑀺 𑀘𑀸𑀢𑀺 𑀅𑀦𑁂𑀓𑀯𑀺𑀥𑁄. 𑀢𑀢𑁆𑀣 𑀅𑀕𑀸𑀭𑀺𑀬𑀫𑀼𑀦𑀻𑀢𑀺 𑀕𑀺𑀳𑀺𑀧𑀺 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀅𑀦𑀸𑀕𑀸𑀭𑀺𑀬𑀫𑀼𑀦𑀻𑀢𑀺 𑀢𑀣𑀸𑀭𑀽𑀧𑁄𑀯 𑀧𑀩𑁆𑀩𑀚𑀺𑀢𑁄. 𑀲𑁂𑀔𑀫𑀼𑀦𑀻𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀲𑁂𑀔𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑁄. 𑀧𑀘𑁆𑀘𑁂𑀓𑀫𑀼𑀦𑀻𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀫𑀼𑀦𑀺𑀫𑀼𑀦𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑁂𑀲𑀼 𑀧𑀦 𑀇𑀥 𑀫𑀼𑀦𑀺𑀫𑀼𑀦𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀁 𑀫𑀼𑀦𑀺𑀁. 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀦𑁆𑀢𑀺 𑀅𑀦𑁆𑀢𑀺𑀫𑁂𑀦 𑀘𑀭𑀺𑀫𑀪𑀯𑁂𑀦 𑀬𑀼𑀢𑁆𑀢𑀁. 𑀅𑀯𑀲𑀸𑀦𑀁 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀁. 𑀅𑀫𑀥𑀸𑀢𑀼 𑀢. 𑀫𑀲𑁆𑀲 𑀦𑁄. 𑀅𑀦𑁆𑀢𑁂 𑀪𑀯𑁄 𑀅𑀦𑁆𑀢𑀺𑀫𑁄, 𑀘𑀭𑀺𑀫𑀪𑀯𑁄. 𑀚𑀸𑀦𑀦𑀁 𑀦𑀺𑀩𑁆𑀩𑀢𑁆𑀢𑀦𑀁 𑀚𑀸𑀢𑀺, 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺. 𑀓𑀫𑁆𑀫𑁂𑀦 𑀚𑀦𑀺𑀬𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑀢𑀻𑀢𑀺 𑀯𑀸 𑀚𑀸𑀢𑀺. 𑀉𑀧𑀧𑀢𑁆𑀢𑀺𑀪𑀯𑁄 𑀮𑀩𑁆𑀪𑀢𑀺. 𑀚𑀸𑀦𑀺𑀥𑀸𑀢𑀼𑀢𑀺. 𑀥𑀸𑀢𑁆𑀯𑀦𑁆𑀢 𑀮𑁄𑀧𑁄. 𑀅𑀦𑁆𑀢𑀺𑀫𑀚𑀸𑀢𑀺𑀬𑀸 𑀬𑀼𑀢𑁆𑀢𑁄𑀢𑀺 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑁄, 𑀫𑀼𑀦𑀺. 𑀆𑀬𑀢𑀺𑀜𑁆𑀳𑀺 𑀢𑀻𑀲𑀼 𑀪𑀯𑁂𑀲𑀼 𑀧𑀝𑀺𑀲𑀦𑁆𑀥𑀺𑀚𑀦𑀓𑀸𑀦𑀁 𑀲𑀩𑁆𑀩 𑀓𑀺𑀮𑁂𑀲𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀢𑁆𑀢𑀸 𑀪𑀕𑀯𑀢𑁄 𑀅𑀦𑀸𑀕𑀢𑁂 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀬𑀁 𑀅𑀭𑀺𑀬𑀚𑀸𑀢𑀺 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑁂 𑁋

‘‘𑀜𑀸𑀡𑀜𑁆𑀘 𑀫𑁂𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀬𑁄𑀚𑀦𑀸. 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀁 𑀤𑁂𑀳𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀯𑀺𑀘𑀺𑀢𑁆𑀭𑀁 𑀭𑀽𑀧𑀓𑀸𑀬𑀯𑀦𑁆𑀢𑀁, 𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢 𑀧𑀚𑁆𑀚𑀮𑀦𑁆𑀢𑀁 𑀭𑀽𑀧𑀓𑀸𑀬𑀢𑁄 𑀦𑀺𑀕𑁆𑀕𑀢𑁂𑀳𑀺 𑀙𑀩𑁆𑀩𑀡𑁆𑀡𑀭𑀁 𑀲𑀻𑀳𑀺 𑀧𑀭𑀺𑀲𑀫𑀦𑁆𑀢𑀢𑁄 𑀯𑀺𑀚𑁆𑀚𑁄𑀢𑀯𑀦𑁆𑀢𑀁, 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄 𑀖𑀯𑀺𑀦𑁆𑀤𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀲𑀗𑁆𑀔𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑀁 𑀮𑀪𑀦𑀯𑀦𑁆𑀢𑀁, 𑀯𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀲𑀗𑁆𑀔𑀸𑀢𑀸𑀦𑀁 𑀕𑀼𑀡𑀸𑀦𑀁 𑀲𑀫𑀽𑀳𑀯𑀦𑁆𑀢𑀁 𑀯𑀸, 𑀅𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁 𑀘𑀭𑀺𑀫𑀪𑀯𑁂𑀦 𑀘𑀭𑀺𑀫𑀢𑁆𑀢𑀪𑀸𑀯𑁂𑀦 𑀯𑀸 𑀬𑀼𑀢𑁆𑀢𑀁 𑀫𑀼𑀦𑀺𑀁 𑀩𑀼𑀤𑁆𑀥𑀁 𑀅𑀳𑀁 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑁂 𑀯𑀦𑁆𑀤𑀸𑀫𑀻𑀢𑀺.

𑀘𑀢𑀼𑀢𑁆𑀣𑀯𑀦𑁆𑀤𑀦𑀕𑀸𑀣𑀸𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.