𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀦𑀫𑀓𑁆𑀓𑀸𑀭𑀧𑀸𑀴𑀺

𑁧. 𑀲𑀼𑀕𑀢𑀁 𑀲𑀼𑀕𑀢𑀁 𑀲𑁂𑀝𑁆𑀞𑀁, 𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀁;

𑀅𑀫𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀅𑀲𑀫𑀁 𑀅𑀲𑀫𑀁 𑀤𑀤𑀁.

𑀲𑀭𑀡𑀁 𑀲𑀭𑀡𑀁 𑀮𑁄𑀓𑀁, 𑀅𑀭𑀡𑀁 𑀅𑀭𑀡𑀁 𑀓𑀭𑀁;

𑀅𑀪𑀬𑀁 𑀅𑀪𑀬𑀁 𑀞𑀸𑀦𑀁, 𑀦𑀸𑀬𑀓𑀁 𑀦𑀸𑀬𑀓𑀁 𑀦𑀫𑁂.

𑁨. 𑀦𑀬𑀦𑀲𑀼𑀪𑀕𑀓𑀸𑀬𑀗𑁆𑀕𑀁,

𑀫𑀥𑀼𑀭𑀯𑀭𑀲𑀭𑁄𑀧𑁂𑀢𑀁;

𑀅𑀫𑀺𑀢𑀕𑀼𑀡𑀕𑀡𑀸𑀥𑀸𑀭𑀁,

𑀤𑀲𑀩𑀮𑀫𑀢𑀼𑀮𑀁 𑀯𑀦𑁆𑀤𑁂.

𑁩. 𑀬𑁄 𑀩𑀼𑀤𑁆𑀥𑁄 𑀥𑀺𑀢𑀺𑀫𑀸𑀜𑁆𑀜𑀥𑀸𑀭𑀓𑁄,

𑀲𑀁𑀲𑀸𑀭𑁂 𑀅𑀦𑀼𑀪𑁄𑀲𑀺 𑀓𑀸𑀬𑀺𑀓𑀁;

𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀜𑁆𑀘 𑀮𑁄𑀓𑀢𑁄,

𑀢𑀁 𑀯𑀦𑁆𑀤𑁂 𑀦𑀭𑀤𑁂𑀯𑀫𑀗𑁆𑀕𑀮𑀁.

𑁪. 𑀩𑀸𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑀘𑀺𑀢𑁆𑀭𑀤𑁂𑀳𑀁,

𑀤𑁂𑀳𑀚𑁆𑀚𑀼𑀢𑀺𑀦𑀺𑀕𑁆𑀕𑀢𑀧𑀚𑁆𑀚𑀮𑀦𑁆𑀢𑀁;

𑀧𑀜𑁆𑀜𑀸𑀥𑀺𑀢𑀺𑀲𑀻𑀮𑀕𑀼𑀡𑁄𑀖𑀯𑀺𑀦𑁆𑀤𑀁,

𑀯𑀦𑁆𑀤𑁂 𑀫𑀼𑀦𑀺𑀫𑀦𑁆𑀢𑀺𑀫𑀚𑀸𑀢𑀺𑀬𑀼𑀢𑁆𑀢𑀁.

𑁫. 𑀧𑀸𑀢𑁄𑀤𑀬𑀁 𑀩𑀸𑀮𑀤𑀺𑀯𑀸𑀓𑀭𑀁𑀯,

𑀫𑀚𑁆𑀛𑁂 𑀬𑀢𑀻𑀦𑀁 𑀮𑀮𑀺𑀢𑀁 𑀲𑀺𑀭𑀻𑀳𑀺;

𑀧𑀼𑀡𑁆𑀡𑀺𑀦𑁆𑀤𑀼𑀲𑀗𑁆𑀓𑀸𑀲𑀫𑀼𑀔𑀁 𑀅𑀦𑁂𑀚𑀁,

𑀯𑀦𑁆𑀤𑀸𑀫𑀺 𑀲𑀩𑁆𑀩𑀜𑁆𑀜𑀼𑀫𑀳𑀁 𑀫𑀼𑀦𑀺𑀦𑁆𑀤𑀁.

𑁬. 𑀉𑀧𑁂𑀢𑀧𑀼𑀜𑁆𑀜𑁄 𑀯𑀭𑀩𑁄𑀥𑀺𑀫𑀽𑀮𑁂,

𑀲𑀲𑁂𑀦𑀫𑀸𑀭𑀁 𑀲𑀼𑀕𑀢𑁄 𑀚𑀺𑀦𑀺𑀢𑁆𑀯𑀸;

𑀅𑀩𑁄𑀚𑁆𑀛𑀺 𑀩𑁄𑀥𑀺𑀁 𑀅𑀭𑀼𑀡𑁄𑀤𑀬𑀫𑁆𑀳𑀺,

𑀦𑀫𑀸𑀫𑀺 𑀢𑀁 𑀫𑀸𑀭𑀚𑀺𑀦𑀁 𑀅𑀪𑀗𑁆𑀕𑀁.

𑁭. 𑀭𑀸𑀕𑀸𑀤𑀺𑀙𑁂𑀤𑀸𑀫𑀮𑀜𑀸𑀡𑀔𑀕𑁆𑀕𑀁,

𑀲𑀢𑀻𑀲𑀫𑀜𑁆𑀜𑀸𑀨𑀮𑀓𑀸𑀪𑀺𑀕𑀸𑀳𑀁;

𑀲𑀻𑀮𑁄𑀖𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀁 𑀢𑀁,

𑀦𑀫𑀸𑀫𑀺𑀪𑀺𑀜𑁆𑀜𑀸𑀯𑀭𑀫𑀺𑀤𑁆𑀥𑀼𑀧𑁂𑀢𑀁.

𑁮. 𑀤𑀬𑀸𑀮𑀬𑀁 𑀲𑀩𑁆𑀩𑀥𑀺 𑀤𑀼𑀓𑁆𑀓𑀭𑀁 𑀓𑀭𑀁,

𑀪𑀯𑀡𑁆𑀡𑀯𑀸𑀢𑀺𑀓𑁆𑀓𑀫𑀫𑀕𑁆𑀕𑀢𑀁 𑀕𑀢𑀁;

𑀢𑀺𑀮𑁄𑀓𑀦𑀸𑀣𑀁 𑀲𑀼𑀲𑀫𑀸𑀳𑀺𑀢𑀁 𑀳𑀺𑀢𑀁,

𑀲𑀫𑀦𑁆𑀢𑀘𑀓𑁆𑀔𑀼𑀁 𑀧𑀡𑀫𑀸𑀫𑀺 𑀢𑀁𑀫𑀺𑀢𑀁.

𑁯. 𑀢𑀳𑀺𑀁 𑀢𑀳𑀺𑀁 𑀧𑀸𑀭𑀫𑀺𑀲𑀜𑁆𑀘𑀬𑀁 𑀘𑀬𑀁,

𑀕𑀢𑀁 𑀕𑀢𑀁 𑀲𑀩𑁆𑀪𑀺 𑀲𑀼𑀔𑀧𑁆𑀧𑀤𑀁 𑀧𑀤𑀁;

𑀦𑀭𑀸𑀦𑀭𑀸𑀦𑀁 𑀲𑀼𑀔𑀲𑀫𑁆𑀪𑀯𑀁 𑀪𑀯𑀁,

𑀦𑀫𑀸𑀦𑀫𑀸𑀦𑀁 𑀚𑀺𑀦𑀧𑀼𑀗𑁆𑀕𑀯𑀁 𑀕𑀯𑀁.

𑁧𑁦. 𑀫𑀕𑁆𑀕𑀗𑁆𑀕𑀦𑀸𑀯𑀁 𑀫𑀼𑀦𑀺𑀤𑀓𑁆𑀔𑀦𑀸𑀯𑀺𑀓𑁄,

𑀈𑀳𑀸𑀨𑀺𑀬𑀁 𑀜𑀸𑀡𑀓𑀭𑁂𑀦 𑀕𑀸𑀳𑀓𑁄;

𑀆𑀭𑀼𑀬𑁆𑀳 𑀬𑁄 𑀢𑀸𑀬 𑀩𑀳𑀽 𑀪𑀯𑀡𑁆𑀡𑀯𑀸,

𑀢𑀸𑀭𑁂𑀲𑀺 𑀢𑀁 𑀩𑀼𑀤𑁆𑀥𑀫𑀖𑀧𑁆𑀧𑀳𑀁 𑀦𑀫𑁂.

𑁧𑁧. 𑀲𑀫𑀢𑀺𑀁𑀲𑀢𑀺𑀧𑀸𑀭𑀫𑀺𑀲𑀫𑁆𑀪𑀭𑀡𑀁,

𑀯𑀭𑀩𑁄𑀥𑀺𑀤𑀼𑀫𑁂 𑀘𑀢𑀼𑀲𑀘𑁆𑀘𑀤𑀲𑀁;

𑀯𑀭𑀫𑀺𑀤𑁆𑀥𑀺𑀕𑀢𑀁 𑀦𑀭𑀤𑁂𑀯𑀳𑀺𑀢𑀁,

𑀢𑀺𑀪𑀯𑀽𑀧𑀲𑀫𑀁 𑀧𑀡𑀫𑀸𑀫𑀺 𑀚𑀺𑀦𑀁.

𑁧𑁨. 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀺𑀓𑀁 𑀯𑀺𑀭𑀚𑀁,

𑀕𑀕𑀦𑀽𑀧𑀫𑀥𑀺𑀁 𑀥𑀺𑀢𑀺𑀫𑁂𑀭𑀼𑀲𑀫𑀁;

𑀚𑀮𑀚𑀽𑀧𑀫𑀲𑀻𑀢𑀮𑀲𑀻𑀮𑀬𑀼𑀢𑀁,

𑀧𑀣𑀯𑀻𑀲𑀳𑀦𑀁 𑀧𑀡𑀫𑀸𑀫𑀺 𑀚𑀺𑀦𑀁.

𑁧𑁩. 𑀬𑁄 𑀩𑀼𑀤𑁆𑀥𑁄 𑀲𑀼𑀫𑀢𑀺 𑀤𑀺𑀯𑁂 𑀤𑀺𑀯𑀸𑀓𑀭𑁄𑀯,

𑀲𑁄𑀪𑀦𑁆𑀢𑁄 𑀭𑀢𑀺𑀚𑀦𑀦𑁂 𑀲𑀺𑀮𑀸𑀲𑀦𑀫𑁆𑀳𑀺;

𑀆𑀲𑀻𑀦𑁄 𑀲𑀺𑀯𑀲𑀼𑀔𑀤𑀁 𑀅𑀤𑁂𑀲𑀺 𑀥𑀫𑁆𑀫𑀁,

𑀤𑁂𑀯𑀸𑀦𑀁 𑀢𑀫𑀲𑀤𑀺𑀲𑀁 𑀦𑀫𑀸𑀫𑀺 𑀦𑀺𑀘𑁆𑀘𑀁.

𑁧𑁪. 𑀬𑁄 𑀧𑀸𑀤𑀧𑀗𑁆𑀓𑀚𑀫𑀼𑀤𑀼𑀢𑁆𑀢𑀮𑀭𑀸𑀚𑀺𑀓𑁂𑀳𑀺,

𑀮𑁄𑀓𑁂𑀳𑀺 𑀢𑀻𑀳𑀺𑀯𑀺𑀓𑀮𑁂𑀳𑀺 𑀦𑀺𑀭𑀸𑀓𑀼𑀮𑁂𑀳𑀺;

𑀲𑀫𑁆𑀧𑀸𑀧𑀼𑀡𑁂 𑀦𑀺𑀭𑀼𑀧𑀫𑁂𑀬𑁆𑀬𑀢𑀫𑁂𑀯 𑀦𑀸𑀣𑁄,

𑀢𑀁 𑀲𑀩𑁆𑀩𑀮𑁄𑀓𑀫𑀳𑀺𑀢𑀁 𑀅𑀲𑀫𑀁 𑀦𑀫𑀸𑀫𑀺.

𑁧𑁫. 𑀩𑀼𑀤𑁆𑀥𑀁 𑀦𑀭𑀸𑀦𑀭𑀲𑀫𑁄𑀲𑀭𑀡𑀁 𑀥𑀺𑀢𑀢𑁆𑀢𑀁,

𑀧𑀜𑁆𑀜𑀸𑀧𑀤𑀻𑀧𑀚𑀼𑀢𑀺𑀬𑀸 𑀯𑀺𑀳𑀢𑀦𑁆𑀥𑀓𑀸𑀭𑀁;

𑀅𑀢𑁆𑀣𑀸𑀪𑀺𑀓𑀸𑀫𑀦𑀭𑀤𑁂𑀯𑀳𑀺𑀢𑀸𑀯𑀳𑀁 𑀢𑀁,

𑀯𑀦𑁆𑀤𑀸𑀫𑀺 𑀓𑀸𑀭𑀼𑀡𑀺𑀓𑀫𑀕𑁆𑀕𑀫𑀦𑀦𑁆𑀢𑀜𑀸𑀡𑀁.

𑁧𑁬. 𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑁄 𑀬𑁄 𑀫𑀼𑀦𑀺𑀦𑁆𑀤𑁄𑀧𑀕𑀦𑁆𑀢𑁆𑀯𑀸,

𑀯𑀦𑀫𑀺𑀲𑀺𑀧𑀢𑀦𑀯𑁆𑀳𑀁 𑀲𑀜𑁆𑀜𑀢𑀸𑀦𑀁 𑀦𑀺𑀓𑁂𑀢𑀁;

𑀢𑀳𑀺𑀫𑀓𑀼𑀲𑀮𑀙𑁂𑀤𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁄,

𑀢𑀫𑀢𑀼𑀮𑀫𑀪𑀺𑀓𑀦𑁆𑀢𑀁 𑀯𑀦𑁆𑀤𑀦𑁂𑀬𑁆𑀬𑀁 𑀦𑀫𑀸𑀫𑀺.

𑁧𑁭. 𑀲𑀼𑀘𑀺𑀧𑀭𑀺𑀯𑀸𑀭𑀺𑀢𑀁 𑀲𑀼𑀭𑀼𑀘𑀺𑀭𑀧𑁆𑀧𑀪𑀸𑀳𑀺 𑀭𑀢𑁆𑀢𑀁,

𑀲𑀺𑀭𑀺𑀯𑀺𑀲𑀭𑀸𑀮𑀬𑀁 𑀕𑀼𑀧𑀺𑀢𑀫𑀺𑀦𑁆𑀤𑁆𑀭𑀺𑀬𑁂𑀳𑀼𑀧𑁂𑀢𑀁;

𑀭𑀯𑀺𑀲𑀲𑀺𑀫𑀡𑁆𑀟𑀮𑀧𑁆𑀧𑀪𑀼𑀢𑀺𑀮𑀓𑁆𑀔𑀡𑁄𑀧𑀘𑀺𑀢𑁆𑀢𑀁,

𑀲𑀼𑀭𑀦𑀭𑀧𑀽𑀚𑀺𑀢𑀁 𑀲𑀼𑀕𑀢𑀫𑀸𑀤𑀭𑀁 𑀦𑀫𑀸𑀫𑀺.

𑁧𑁮. 𑀫𑀕𑁆𑀕𑁄𑀴𑀼𑀫𑁆𑀧𑁂𑀦 𑀫𑀼𑀳𑀧𑀝𑀺𑀖𑀸𑀲𑀸𑀤𑀺𑀉𑀮𑁆𑀮𑁄𑀮𑀯𑀻𑀘𑀺𑀁,

𑀲𑀁𑀲𑀸𑀭𑁄𑀖𑀁 𑀢𑀭𑀺 𑀢𑀫𑀪𑀬𑀁 𑀧𑀸𑀭𑀧𑀢𑁆𑀢𑀁 𑀧𑀚𑀸𑀦𑀁;

𑀢𑀸𑀡𑀁 𑀮𑁂𑀡𑀁 𑀅𑀲𑀫𑀲𑀭𑀡𑀁 𑀏𑀓𑀢𑀺𑀢𑁆𑀣𑀁 𑀧𑀢𑀺𑀝𑁆𑀞𑀁,

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀧𑀭𑀫𑀲𑀼𑀔𑀤𑀁 𑀥𑀫𑁆𑀫𑀭𑀸𑀚𑀁 𑀦𑀫𑀸𑀫𑀺.

𑁧𑁯. 𑀓𑀡𑁆𑀟𑀫𑁆𑀩𑀁𑀫𑀽𑀮𑁂 𑀧𑀭𑀳𑀺𑀢𑀓𑀭𑁄 𑀬𑁄 𑀫𑀼𑀦𑀺𑀦𑁆𑀤𑁄 𑀦𑀺𑀲𑀺𑀦𑁆𑀦𑁄,

𑀅𑀘𑁆𑀙𑁂𑀭𑀁 𑀲𑀻𑀖𑀁 𑀦𑀬𑀦𑀲𑀼𑀪𑀕𑀁 𑀆𑀓𑀼𑀮𑀡𑁆𑀡𑀕𑁆𑀕𑀺𑀚𑀸𑀮𑀁;

𑀤𑀼𑀚𑁆𑀚𑀸𑀮𑀤𑁆𑀥𑀁𑀲𑀁 𑀫𑀼𑀦𑀺𑀪𑀺𑀚𑀳𑀺𑀢𑀁 𑀧𑀸𑀝𑀺𑀳𑁂𑀭𑀁 𑀅𑀓𑀸𑀲𑀺,

𑀯𑀦𑁆𑀤𑁂 𑀢𑀁 𑀲𑁂𑀝𑁆𑀞𑀁 𑀧𑀭𑀫𑀭𑀢𑀺𑀚𑀁 𑀇𑀤𑁆𑀥𑀺𑀥𑀫𑁆𑀫𑁂𑀳𑀼𑀧𑁂𑀢𑀁.

𑁨𑁦. 𑀫𑀼𑀦𑀺𑀦𑁆𑀤𑀓𑁆𑀓𑁄 𑀬𑁆𑀯𑁂𑀓𑁄 𑀤𑀬𑀼𑀤𑀬𑀭𑀼𑀡𑁄 𑀜𑀸𑀡𑀯𑀺𑀢𑁆𑀣𑀺𑀡𑁆𑀡𑀩𑀺𑀫𑁆𑀩𑁄,

𑀯𑀺𑀦𑁂𑀬𑁆𑀬𑀧𑁆𑀧𑀸𑀡𑁄𑀖𑀁 𑀓𑀫𑀮𑀓𑀣𑀺𑀢𑀁 𑀥𑀫𑁆𑀫𑀭𑀁𑀲𑀻𑀯𑀭𑁂𑀳𑀺;

𑀲𑀼𑀩𑁄𑀥𑁂𑀲𑀻 𑀲𑀼𑀤𑁆𑀥𑁂 𑀢𑀺𑀪𑀯𑀓𑀼𑀳𑀭𑁂 𑀩𑁆𑀬𑀸𑀧𑀺𑀢𑀓𑁆𑀓𑀺𑀢𑁆𑀢𑀺𑀦𑀜𑁆𑀘,

𑀢𑀺𑀮𑁄𑀓𑁂𑀓𑀘𑁆𑀘𑀓𑁆𑀔𑀼𑀁 𑀤𑀼𑀔𑀫𑀲𑀳𑀦𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑁨𑁧. 𑀬𑁄 𑀚𑀺𑀦𑁄 𑀅𑀦𑁂𑀓𑀚𑀸𑀢𑀺𑀬𑀁 𑀲𑀧𑀼𑀢𑁆𑀢𑀤𑀸𑀭𑀫𑀗𑁆𑀕𑀚𑀻𑀯𑀺𑀢𑀫𑁆𑀧𑀺,

𑀩𑁄𑀥𑀺𑀧𑁂𑀫𑀢𑁄 𑀅𑀮𑀕𑁆𑀕𑀫𑀸𑀦𑀲𑁄 𑀅𑀤𑀸𑀲𑀺𑀬𑁂𑀯 𑀅𑀢𑁆𑀣𑀺𑀓𑀲𑁆𑀲;

𑀤𑀸𑀦𑀧𑀸𑀭𑀫𑀺𑀁 𑀢𑀢𑁄 𑀧𑀭𑀁 𑀅𑀧𑀽𑀭𑀺 𑀲𑀻𑀮𑀧𑀸𑀭𑀫𑀸𑀤𑀺𑀓𑀫𑁆𑀧𑀺,

𑀢𑀸𑀲𑀫𑀺𑀤𑁆𑀥𑀺𑀬𑁄𑀧𑀬𑀸𑀢𑀫𑀕𑁆𑀕𑀢𑀁 𑀢𑀫𑁂𑀓𑀤𑀻𑀧𑀓𑀁 𑀦𑀫𑀸𑀫𑀺.

𑁨𑁨. 𑀤𑁂𑀯𑀸𑀤𑁂𑀯𑀸𑀢𑀺𑀤𑁂𑀯𑀁 𑀦𑀺𑀥𑀦𑀯𑀧𑀼𑀥𑀭𑀁 𑀫𑀸𑀭𑀪𑀗𑁆𑀕𑀁 𑀅𑀪𑀗𑁆𑀕𑀁,

𑀤𑀻𑀧𑀁 𑀤𑀻𑀧𑀁 𑀧𑀚𑀸𑀦𑀁 𑀚𑀬𑀯𑀭𑀲𑀬𑀦𑁂 𑀩𑁄𑀥𑀺𑀧𑀢𑁆𑀢𑀁𑀥𑀺𑀧𑀢𑁆𑀢𑀁;

𑀩𑁆𑀭𑀳𑁆𑀫𑀸𑀩𑁆𑀭𑀳𑁆𑀫𑀸𑀕𑀢𑀸𑀦𑀁 𑀯𑀭𑀕𑀺𑀭𑀓𑀣𑀺𑀓𑀁 𑀧𑀸𑀧𑀳𑀻𑀦𑀁 𑀧𑀳𑀻𑀦𑀁,

𑀮𑁄𑀓𑀸𑀮𑁄𑀓𑀸𑀪𑀺𑀭𑀸𑀫𑀁 𑀲𑀢𑀢𑀫𑀪𑀺𑀦𑀫𑁂 𑀢𑀁 𑀫𑀼𑀦𑀺𑀦𑁆𑀤𑀁 𑀫𑀼𑀦𑀺𑀦𑁆𑀤𑀁.

𑁨𑁩. 𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀩𑀺𑀫𑁆𑀩𑁄 𑀫𑀼𑀤𑀼𑀓𑀭𑀘𑀭𑀡𑁄 𑀩𑁆𑀭𑀳𑁆𑀫𑀖𑁄𑀲𑁂𑀡𑀺𑀚𑀗𑁆𑀖𑁄,

𑀓𑁄𑀲𑀘𑁆𑀙𑀸𑀤𑀗𑁆𑀕𑀚𑀸𑀢𑁄 𑀧𑀼𑀦𑀭𑀧𑀺 𑀲𑀼𑀕𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄;

𑀫𑀽𑀤𑁄𑀤𑀸𑀢𑀼𑀡𑁆𑀡𑀮𑁄𑀫𑁄 𑀅𑀣𑀫𑀧𑀺 𑀲𑀼𑀕𑀢𑁄 𑀩𑁆𑀭𑀳𑁆𑀫𑀼𑀚𑀼𑀕𑁆𑀕𑀢𑁆𑀢𑀪𑀸𑀯𑁄,

𑀦𑀻𑀮𑀓𑁆𑀔𑀻 𑀤𑀻𑀖𑀧𑀡𑁆𑀳𑀻 𑀲𑀼𑀔𑀼𑀫𑀫𑀮𑀙𑀯𑀻 𑀣𑁄𑀫𑁆𑀬𑀭𑀲𑀕𑁆𑀕𑀲𑀕𑁆𑀕𑀻.

𑁨𑁪. 𑀘𑀢𑁆𑀢𑀸𑀮𑀻𑀲𑀕𑁆𑀕𑀤𑀦𑁆𑀢𑁄 𑀲𑀫𑀓𑀮𑀧𑀦𑀚𑁄 𑀅𑀦𑁆𑀢𑀭𑀁𑀲𑀧𑁆𑀧𑀧𑀻𑀦𑁄,

𑀘𑀓𑁆𑀓𑁂𑀦𑀗𑁆𑀓𑀺𑀢𑀧𑀸𑀤𑁄 𑀅𑀯𑀺𑀭𑀴𑀤𑀲𑀦𑁄 𑀫𑀸𑀭𑀚𑀼𑀲𑁆𑀲𑀗𑁆𑀔𑀧𑀸𑀤𑁄.

𑀢𑀺𑀝𑁆𑀞𑀦𑁆𑀢𑁄 𑀦𑁄𑀦𑀫𑀦𑁆𑀢𑁄𑀪𑀬𑀓𑀭𑀫𑀼𑀤𑀼𑀦𑀸 𑀚𑀡𑁆𑀡𑀼𑀓𑀸𑀦𑀸𑀫𑀲𑀦𑁆𑀢𑁄,

𑀯𑀝𑁆𑀝𑀓𑁆𑀔𑀦𑁆𑀥𑁄 𑀚𑀺𑀦𑁄 𑀕𑁄𑀢𑀭𑀼𑀡𑀧𑀔𑀼𑀫𑀓𑁄 𑀲𑀻𑀳𑀧𑀼𑀩𑁆𑀩𑀟𑁆𑀠𑀓𑀸𑀬𑁄.

𑁨𑁫. 𑀲𑀢𑁆𑀢𑀧𑁆𑀧𑀻𑀦𑁄 𑀘 𑀤𑀻𑀖𑀗𑁆𑀕𑀼𑀮𑀺 𑀫𑀣 𑀲𑀼𑀕𑀢𑁄 𑀮𑁄𑀫𑀓𑀽𑀧𑁂𑀓𑀮𑁄𑀫𑁄,

𑀲𑀫𑁆𑀧𑀦𑁆𑀦𑁄𑀤𑀸𑀢𑀤𑀸𑀞𑁄 𑀓𑀦𑀓𑀲𑀫𑀢𑀘𑁄 𑀦𑀻𑀮𑀫𑀼𑀤𑁆𑀥𑀕𑁆𑀕𑀮𑁄𑀫𑁄.

𑀲𑀫𑁆𑀩𑀼𑀤𑁆𑀥𑁄 𑀣𑀽𑀮𑀚𑀺𑀯𑁆𑀳𑁄 𑀅𑀣 𑀲𑀻𑀳𑀳𑀦𑀼𑀓𑁄 𑀚𑀸𑀮𑀺𑀓𑀧𑁆𑀧𑀸𑀤𑀳𑀢𑁆𑀣𑁄,

𑀦𑀸𑀣𑁄 𑀉𑀡𑁆𑀳𑀻𑀲𑀲𑀻𑀲𑁄 𑀇𑀢𑀺𑀕𑀼𑀡𑀲𑀳𑀺𑀢𑀁 𑀢𑀁 𑀫𑀳𑁂𑀲𑀺𑀁 𑀦𑀫𑀸𑀫𑀺.

𑁨𑁬. 𑀩𑀼𑀤𑁆𑀥𑁄𑀩𑀼𑀤𑁆𑀥𑁄𑀢𑀺𑀖𑁄𑀲𑁄 𑀅𑀢𑀺𑀤𑀼𑀮𑀪𑀢𑀭𑁄 𑀓𑀸 𑀓𑀣𑀸 𑀩𑀼𑀤𑁆𑀥𑀪𑀸𑀯𑁄,

𑀮𑁄𑀓𑁂 𑀢𑀲𑁆𑀫𑀸 𑀯𑀺𑀪𑀸𑀯𑀻 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀲𑀸𑀥𑀯𑁄 𑀧𑀢𑁆𑀣𑀬𑀦𑁆𑀢𑀸.

𑀇𑀝𑁆𑀞𑀁 𑀅𑀢𑁆𑀣𑀁 𑀯𑀳𑀦𑁆𑀢𑀁 𑀲𑀼𑀭𑀦𑀭𑀫𑀳𑀺𑀢𑀁 𑀦𑀺𑀩𑁆𑀪𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀁,

𑀮𑁄𑀓𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀁 𑀤𑀲𑀩𑀮𑀫𑀲𑀫𑀁 𑀢𑀁 𑀦𑀫𑀲𑁆𑀲𑀦𑁆𑀢𑀼 𑀦𑀺𑀘𑁆𑀘𑀁.

𑁨𑁭. 𑀧𑀼𑀜𑁆𑀜𑁂𑀦𑁂𑀢𑁂𑀦 𑀲𑁄𑀳𑀁 𑀦𑀺𑀧𑀼𑀡𑀫𑀢𑀺 𑀲𑀢𑁄 𑀲𑀫𑁆𑀧𑀭𑀸𑀬𑁂 𑀘 𑀢𑀺𑀢𑁆𑀢𑁄,

𑀤𑀓𑁆𑀔𑁄 𑀤𑀺𑀝𑁆𑀞𑀼𑀚𑁆𑀚𑀼𑀧𑀜𑁆𑀜𑁄 𑀅𑀯𑀺𑀓𑀮𑀯𑀻𑀭𑀺𑀬𑁄 𑀪𑁄𑀕𑀯𑀸 𑀲𑀁𑀯𑀺𑀪𑀸𑀕𑀻.

𑀢𑀺𑀓𑁆𑀔𑁄 𑀲𑀽𑀭𑁄 𑀥𑀺𑀢𑀢𑁆𑀢𑁄 𑀲𑀧𑀭𑀳𑀺𑀢𑀘𑀭𑁄 𑀤𑀻𑀖𑀚𑀻𑀯𑀻 𑀅𑀭𑁄𑀕𑁄,

𑀥𑀜𑁆𑀜𑁄 𑀯𑀡𑁆𑀡𑁄 𑀬𑀲𑀲𑁆𑀲𑀻 𑀅𑀢𑀺𑀩𑀮𑀯𑀥𑀭𑁄 𑀓𑀺𑀢𑁆𑀢𑀺𑀫𑀸 𑀔𑀦𑁆𑀢𑀼𑀧𑁂𑀢𑁄.

𑁨𑁮. 𑀲𑀤𑁆𑀥𑁄 𑀤𑀸𑀢𑀗𑁆𑀕𑀼𑀧𑁂𑀢𑁄 𑀧𑀭𑀫𑀲𑀺𑀭𑀺𑀥𑀭𑁄 𑀤𑀺𑀝𑁆𑀞𑀥𑀫𑁆𑀫𑁂 𑀯𑀺𑀭𑀢𑁆𑀢𑁄,

𑀮𑀚𑁆𑀚𑀻 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀪𑀺𑀭𑀢𑀓𑀼𑀲𑀮𑁄 𑀧𑀜𑁆𑀘𑀲𑀻𑀮𑀸𑀤𑀺𑀭𑀓𑁆𑀔𑁄.

𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀓𑁄𑀥𑁄 𑀅𑀢𑀺𑀯𑀼𑀚𑀼𑀳𑀤𑀬𑁄 𑀇𑀤𑁆𑀥𑀺𑀫𑀸 𑀅𑀧𑁆𑀧𑀫𑁂𑀬𑁆𑀬𑁄,

𑀧𑀸𑀲𑀁𑀲𑁄 𑀧𑁂𑀫𑀯𑀸𑀘𑁄 𑀲𑀼𑀚𑀦𑀕𑀼𑀡𑀯𑀺𑀤𑀽 𑀫𑀸𑀫𑀓𑁄 𑀲𑁄 𑀪𑀯𑁂𑀬𑁆𑀬𑀁.

𑁨𑁯. 𑀇𑀢𑁆𑀣𑀁 𑀅𑀲𑀗𑁆𑀔𑀬𑁂 𑀦𑀸𑀣, 𑀕𑀼𑀡𑁂 𑀮𑀓𑁆𑀔𑀡𑀤𑀻𑀧𑀺𑀢𑁂;

𑀕𑀸𑀣𑀸𑀲𑀼 𑀲𑀽𑀘𑀓𑀸𑀲𑁆𑀯𑁂𑀓, 𑀕𑀸𑀣𑀫𑁆𑀧𑀺 𑀲𑀭𑀢𑁂 𑀩𑀼𑀥𑁄.

𑁩𑁦. 𑀘𑀢𑀼𑀭𑀸𑀧𑀸𑀬𑀫𑀼𑀢𑁆𑀢𑁄 𑀲𑁄, 𑀲𑀸𑀥𑀓𑀢𑁆𑀣𑀤𑁆𑀯𑀬𑀲𑁆𑀲 𑀘;

𑀳𑀢𑀽𑀧𑀤𑁆𑀤𑀯𑀚𑀸𑀮𑁄 𑀘, 𑀮𑀸𑀪𑀻 𑀳𑀺𑀢𑀲𑀼𑀔𑀲𑁆𑀲 𑀘.

𑁩𑁧. 𑀅𑀥𑀺𑀧𑁄 𑀦𑀭𑀤𑁂𑀯𑀸𑀦𑀁, 𑀘𑀢𑀼𑀤𑀻𑀧𑀺𑀲𑁆𑀲𑀭𑁄𑀧𑀺 𑀯𑀸;

𑀪𑀯𑁂𑀬𑁆𑀬 𑀅𑀦𑁆𑀢𑀺𑀫𑁂 𑀤𑁂𑀳𑁂, 𑀢𑀫𑀜𑁆𑀜𑀁 𑀲𑁂𑀢𑀙𑀢𑁆𑀢𑀓𑀁.

𑁩𑁨. 𑀪𑀸𑀯𑀦𑀸𑀬𑀸𑀦𑀫𑀸𑀭𑀼𑀬𑁆𑀳, 𑀲𑀫𑀫𑁂𑀲𑁆𑀲𑀢𑀺 𑀲𑀼𑀩𑁆𑀩𑀢𑁄;

𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂𑀧𑀺, 𑀅𑀭𑁄𑀕𑁄 𑀤𑀻𑀖𑀚𑀻𑀯𑀺𑀓𑁄.

𑁩𑁩. 𑀧𑀽𑀚𑀺𑀢𑁄 𑀲𑀩𑁆𑀩𑀮𑁄𑀓𑁂𑀳𑀺, 𑀪𑀸𑀯𑀦𑀸𑀪𑀺𑀭𑀢𑀻𑀫𑀦𑁄;

𑀚𑀦𑀧𑁆𑀧𑀺𑀬𑁄 𑀫𑀦𑀸𑀧𑁄 𑀘, 𑀓𑀸 𑀓𑀣𑀸𑀔𑀺𑀮𑀥𑀸𑀭𑀡𑁂.

𑀦𑀫𑀓𑁆𑀓𑀸𑀭𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.

𑀦𑀫𑀓𑁆𑀓𑀸𑀭𑀝𑀻𑀓𑀸

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀲𑀼𑀕𑀢𑀦𑁆𑀢𑁆𑀬𑀸𑀤𑀺𑀯𑀡𑁆𑀡𑁂𑀳𑀺, 𑀧𑀲𑀢𑁆𑀣𑀜𑁆𑀘 𑀲𑀼𑀔𑀤𑁆𑀤𑀤𑀁;

𑀯𑀦𑁆𑀤𑀦𑁆𑀢𑀸𑀦𑀁 𑀚𑀺𑀦𑀁 𑀦𑀢𑁆𑀯𑀸, 𑀥𑀫𑁆𑀫𑀁 𑀲𑀼𑀤𑁆𑀥𑀁 𑀕𑀡𑀼𑀢𑁆𑀢𑀫𑀁.

𑁨. 𑀦𑀫𑀓𑁆𑀓𑀸𑀭𑀁 𑀳𑀺𑀢𑀢𑁆𑀣𑀻𑀳𑀺, 𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀺 𑀘;

𑀮𑀺𑀔𑀺𑀢𑁆𑀯𑀸 𑀞𑀧𑀺𑀢𑀁 𑀧𑀼𑀜𑁆𑀜, 𑀩𑀼𑀤𑁆𑀥𑀺𑀬𑀸 𑀢𑁂𑀦 𑀯𑀦𑁆𑀤𑀺𑀦𑀁.

𑁩. 𑀢𑀲𑁆𑀲𑀢𑁆𑀣𑀯𑀡𑁆𑀡𑀦𑀁 𑀓𑀲𑁆𑀲𑀁, 𑀕𑀫𑁆𑀪𑀻𑀭𑀢𑁆𑀣𑀲𑀼𑀩𑁄𑀥𑀦𑀁;

𑀫𑁄𑀯𑀺𑀧𑀼𑀦𑀸𑀫𑁂𑀦 𑀲𑀦𑁆𑀢𑁂𑀦, 𑀲𑀻𑀮𑀼𑀧𑁂𑀢𑁂𑀦 𑀬𑀸𑀘𑀺𑀢𑁄.

𑁪. 𑀯𑀡𑁆𑀡𑀦𑁆𑀢𑁄𑀧𑀺 𑀘 𑀢𑀲𑁆𑀲𑀢𑁆𑀣𑀁, 𑀢𑀁 𑀢𑀁 𑀅𑀝𑁆𑀞𑀓𑀣𑀸𑀤𑀺𑀲𑀼;

𑀯𑀼𑀢𑁆𑀢𑀜𑀸𑀬𑁂𑀦 𑀓𑀲𑁆𑀲𑀸𑀫𑀺, 𑀲𑀤𑁆𑀥𑀸 𑀲𑀼𑀡𑀸𑀣 𑀲𑀸𑀥𑀯𑁄.

𑁫. 𑀦𑀫𑀦𑀁 𑀦𑀫𑀢𑀻𑀢𑀻 𑀯𑀸, 𑀦𑀫𑀢𑀻 𑀢𑁂𑀦 𑀯𑀸 𑀦𑀫𑁄;

𑀢𑀲𑁆𑀲 𑀓𑀸𑀭𑁄𑀦𑁆𑀢𑀺 𑀢𑀸𑀳𑀻𑀢𑀺, 𑀦𑀫𑀓𑁆𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺.

𑁬. 𑀢𑀜𑁆𑀘 𑀩𑀼𑀤𑁆𑀥𑀖𑁄𑀲𑀸𑀘𑀭𑀺, 𑀬𑁂𑀦 𑀧𑀼𑀩𑁆𑀩𑀲𑀼𑀢𑀁 𑀓𑀢𑀁;

𑀩𑀼𑀤𑁆𑀥𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀜𑁆𑀘, 𑀢𑀁 𑀢𑀁 𑀧𑀦 𑀓𑀣𑀸𑀤𑀺𑀲𑀼.

𑁭. 𑀦 𑀤𑀺𑀝𑁆𑀞𑀁 𑀓𑀢𑀓𑀸𑀭𑀡𑀁, 𑀢𑀲𑁆𑀫𑀸 𑀳𑀺𑀢𑀢𑁆𑀣𑀺𑀓𑁂𑀳𑀺 𑀘;

𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀻 𑀘, 𑀞𑀧𑀺𑀢𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀁;

𑀢𑀁 𑀓𑀸𑀭𑀡𑀁 𑀯𑀺𑀜𑁆𑀜𑀽𑀳𑀻 𑀘, 𑀯𑀺𑀘𑀸𑀭𑁂𑀢𑁆𑀯𑀸 𑀯𑀺𑀚𑀸𑀦𑀺𑀢𑀦𑁆𑀢𑀺.

𑁧. 𑀲𑀼𑀕𑀢𑀁 𑀲𑀼𑀕𑀢𑀁 𑀲𑁂𑀝𑁆𑀞𑀁, 𑀓𑀼𑀲𑀮𑀁𑀓𑀼𑀲𑀮𑀁 𑀚𑀳𑀁;

𑀅𑀫𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀅𑀲𑀫𑀁 𑀅𑀲𑀫𑀁 𑀤𑀤𑀁.

𑀲𑀭𑀡𑀁 𑀲𑀭𑀡𑀁 𑀮𑁄𑀓𑀁, 𑀅𑀭𑀡𑀁 𑀅𑀭𑀡𑀁 𑀓𑀭𑀁;

𑀅𑀪𑀬𑀁 𑀅𑀪𑀬𑀁 𑀞𑀸𑀦𑀁, 𑀦𑀸𑀬𑀓𑀁 𑀦𑀸𑀬𑀓𑀁 𑀦𑀫𑁂.

𑁧. [𑀓] 𑀇𑀤𑀸𑀦𑀺 𑀧𑀞𑀫𑀁 𑀢𑀸𑀯 𑀲𑀼𑀕𑀢𑀦𑁆𑀢𑁆𑀬𑀸𑀤𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀕𑀼𑀡𑁂𑀳𑀺 𑀣𑁄𑀫𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀯𑀦𑁆𑀤𑀺𑀢𑀼𑀓𑀸𑀫𑁂𑀦 𑀲𑀼𑀕𑀢𑀦𑁆𑀢𑀺𑀆𑀤𑀺 𑀕𑀸𑀣𑀸𑀤𑁆𑀯𑀬𑀁 𑀆𑀭𑀤𑁆𑀥𑀁. 𑀅𑀬𑀁 𑀧𑀦 𑀲𑀩𑁆𑀩𑀧𑀸𑀤𑀸𑀤𑀺𑀬𑀫𑀓𑀧𑀣𑁆𑀬𑀸 𑀯𑀢𑁆𑀢𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁 𑀧𑀦 𑀬𑀫𑀓𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀓𑀺𑀮𑀺𑀝𑁆𑀞𑀤𑁄𑀲𑀦𑁆𑀢𑀺 𑀯𑀼𑀢𑁆𑀢𑀁.

𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀬𑀁 𑀓𑀺𑀮𑀺𑀝𑁆𑀞𑀧𑀤𑀁 𑀫𑀦𑁆𑀤𑀸, 𑀪𑀺𑀥𑁂𑀬𑁆𑀬𑀁 𑀬𑀫𑀓𑀸𑀤𑀺𑀓𑀁;

𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀯, 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀭𑀻𑀬𑀢𑀻’’𑀢𑀺.