(𑁩) 𑀢𑀢𑀺𑀬𑁄 𑀓𑀡𑁆𑀟𑁄 (𑀲𑀫𑀸𑀲𑁄)

𑁧. 𑀲𑁆𑀬𑀸𑀤𑀺 𑀲𑁆𑀬𑀸𑀤𑀺𑀦𑁂𑀓𑀢𑁆𑀣𑀁.

𑀲𑁆𑀬𑀸𑀤𑁆𑀬𑀦𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀁 𑀳𑁄𑀢𑀻𑀢𑀺 𑀇𑀤𑀫𑀥𑀺𑀓𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀲𑁄 𑀘 𑀪𑀺𑀦𑁆𑀦𑀢𑁆𑀣𑀸𑀦𑀫𑁂𑀓𑀢𑁆𑀣𑀻𑀪𑀸𑀯𑁄 𑀲𑀫𑀸𑀲𑁄𑀢𑀺 𑀯𑀼𑀘𑁆𑀘𑀢𑁂.

𑁨. 𑀅𑀲𑀗𑁆𑀔𑁆𑀬𑀁𑀯𑀺𑀪𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀲𑀫𑀻𑀧 𑀲𑀸𑀓𑀮𑁆𑀬𑀸𑀪𑀸𑀯 𑀬𑀣𑀸 𑀧𑀘𑁆𑀙𑀸𑀬𑀼𑀕𑀧𑀤𑀢𑁆𑀣𑁂.

𑀅𑀲𑀗𑁆𑀔𑁆𑀬𑀁, 𑀲𑁆𑀬𑀸𑀤𑁆𑀬𑀦𑁆𑀢𑀁 𑀯𑀺𑀪𑀢𑁆𑀬𑀸𑀤𑀻𑀦𑀫𑀢𑁆𑀣𑁂 𑀯𑀢𑁆𑀢𑀫𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀁 𑀪𑀯𑀢𑀺, 𑀢𑀢𑁆𑀣 𑀯𑀺𑀪𑀢𑁆𑀬𑀢𑁆𑀣𑁂 𑀢𑀸𑀯 𑀇𑀢𑁆𑀣𑀻𑀲𑀼 𑀓𑀣𑀸 𑀧𑀯𑀢𑁆𑀢𑀸 𑀅𑀥𑀺𑀢𑁆𑀣𑀺. 𑀲𑀫𑁆𑀧𑀢𑁆𑀢𑀺 𑀤𑁆𑀯𑀺𑀥𑀸 𑀅𑀢𑁆𑀢𑀲𑀫𑁆𑀧𑀢𑁆𑀢𑀺 𑀲𑀫𑀺𑀤𑁆𑀥𑀺 𑀘, 𑀲𑀫𑁆𑀧𑀦𑁆𑀦𑀁 𑀩𑁆𑀭𑀳𑁆𑀫𑀁 𑀲𑀩𑁆𑀭𑀳𑁆𑀫𑀁 𑀮𑀺𑀘𑁆𑀙𑀯𑀻𑀦𑀁, 𑀲𑀫𑀺𑀤𑁆𑀥𑀺 𑀪𑀺𑀓𑁆𑀔𑀸𑀦𑀁 𑀲𑀼𑀪𑀺𑀓𑁆𑀔𑀁. 𑀲𑀫𑀻𑀧𑁂 𑀓𑀼𑀫𑁆𑀪𑀲𑁆𑀲 𑀲𑀫𑀻𑀧𑀫𑀼𑀧𑀓𑀼𑀫𑁆𑀪𑀁. 𑀲𑀸𑀓𑀮𑁆𑀬𑁂𑀲𑀢𑀺𑀡𑀫𑀚𑁆𑀛𑁄𑀳𑀭𑀢𑀺, 𑀲𑀸𑀕𑁆𑀬𑀥𑀻𑀢𑁂. 𑀅𑀪𑀸𑀯𑁄 𑀲𑀫𑁆𑀩𑀦𑁆𑀥𑀺𑀪𑁂𑀤𑀸 𑀩𑀳𑀼𑀯𑀺𑀥𑁄, 𑀢𑀢𑁆𑀭 𑀇𑀤𑁆𑀥𑀸𑀪𑀸𑀯𑁂-𑀯𑀺𑀕𑀢𑀸 𑀇𑀤𑁆𑀥𑀺 𑀲𑀤𑁆𑀤𑀺𑀓𑀸𑀦𑀁 𑀤𑀼𑀲𑁆𑀲𑀤𑁆𑀤𑀺𑀓𑀁, 𑀅𑀢𑁆𑀣𑀸𑀪𑀸𑀯𑁂-𑀅𑀪𑀸𑀯𑁄 𑀫𑀓𑁆𑀔𑀺𑀓𑀸𑀦𑀁 𑀦𑀺𑀫𑁆𑀫𑀓𑁆𑀔𑀺𑀓𑀁, 𑀅𑀳𑀺𑀓𑁆𑀓𑀫𑀸𑀪𑀸𑀯𑁂-𑀅𑀢𑀺𑀕𑀢𑀸𑀦𑀺 𑀢𑀺𑀡𑀸𑀦𑀺 𑀦𑀺𑀢𑁆𑀢𑀺𑀡𑀁, 𑀲𑀫𑁆𑀧𑀢𑁆𑀬𑀸𑀪𑀸𑀯𑁂-𑀅𑀢𑀺𑀕𑀢𑀁 𑀮𑀳𑀼𑀧𑀸𑀯𑀼𑀭𑀡𑀁 𑀅𑀢𑀺𑀮𑀳𑀼𑀧𑀸𑀯𑀼𑀭𑀡𑀁, 𑀮𑀳𑀼𑀧𑀸𑀯𑀼𑀭𑀡𑀲𑁆𑀲 𑀦𑀸𑀬𑀫𑀼𑀧𑀪𑁄𑀕𑀓𑀸𑀮𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀏𑀢𑁆𑀣𑀸-𑀦𑁂𑀓𑀯𑀺𑀥𑁄, 𑀢𑀢𑁆𑀭 𑀬𑁄𑀕𑁆𑀕𑀢𑀸𑀬𑀁-𑀅𑀦𑀼𑀭𑀽𑀧𑀁 𑀲𑀼𑀭𑀽𑀧𑁄𑀯𑀳𑀢𑀺, 𑀯𑀺𑀘𑁆𑀙𑀸𑀬𑀁-𑀅𑀦𑁆𑀯𑀤𑁆𑀥𑀫𑀸𑀲𑀁, 𑀅𑀢𑁆𑀣𑀸𑀦𑀢𑀺𑀯𑀢𑁆𑀢𑀺𑀬𑀁-𑀬𑀣𑀸𑀲𑀢𑁆𑀢𑀺, 𑀲𑀤𑀺𑀲𑀢𑁆𑀢𑁂, 𑀲𑀤𑀺𑀲𑁄 𑀓𑀺𑀔𑀺𑀬𑀸 𑀲𑀓𑀺𑀔𑀺, 𑀆𑀦𑀼𑀧𑀼𑀩𑁆𑀩𑀺𑀬𑁂-𑀅𑀦𑀼𑀚𑁂𑀝𑁆𑀞𑀁, 𑀧𑀘𑁆𑀙𑀸𑀤𑀢𑁆𑀣𑁂𑀅𑀦𑀼𑀭𑀣𑀁, 𑀬𑀼𑀕𑀧𑀤𑀢𑁆𑀣𑁂-𑀲𑀘𑀓𑁆𑀓𑀁 𑀦𑀺𑀥𑁂𑀳𑀺.

𑁩. 𑀬𑀣𑀸 𑀦 𑀢𑀼𑀮𑁆𑀬𑁂.

𑀬𑀣𑀸𑀲𑀤𑁆𑀤𑁄 𑀢𑀼𑀮𑁆𑀬𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑁄 𑀦 𑀪𑀯𑀢𑀺, 𑀬𑀣𑀸 𑀤𑁂𑀯𑀤𑀢𑁆𑀢𑁄 𑀢𑀣𑀸 𑀬𑀜𑁆𑀜𑀤𑀢𑁆𑀢𑁄.

𑁪. 𑀬𑀸𑀯𑀸𑀯𑀥𑀸𑀭𑀡𑁂.

𑀬𑀸𑀯𑀲𑀤𑁆𑀤𑁄-𑀯𑀥𑀸𑀭𑀡𑁂 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑁄 𑀪𑀯𑀢𑀺, 𑀅𑀯𑀥𑀸𑀭𑀡 𑀫𑁂𑀢𑁆𑀢𑀓𑀢𑀸 𑀧𑀭𑀺𑀘𑁆𑀙𑁂𑀤𑁄, 𑀬𑀸𑀯𑀸𑀫𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑁂 𑀆𑀫𑀦𑁆𑀢𑀬, 𑀬𑀸𑀯𑀚𑀻𑀯𑀁, 𑀅𑀯𑀥𑀸𑀭𑀡𑁂𑀢𑀺 𑀓𑀺𑀁? 𑀬𑀸𑀯 𑀤𑀺𑀦𑁆𑀦𑀁 𑀢𑀸𑀯 𑀪𑀼𑀢𑁆𑀢𑀁, 𑀦𑀸𑀯𑀥𑀸𑀭𑀬𑀸𑀫𑀺 𑀓𑀺𑀢𑁆𑀢𑀓𑀁 𑀫𑀬𑀸 𑀪𑀼𑀢𑁆𑀢𑀦𑁆𑀢𑀺.

𑁫. 𑀧𑀬𑁆𑀬𑀧𑀸 𑀩𑀳𑀺 𑀢𑀺𑀭𑁄 𑀧𑀼𑀭𑁂 𑀧𑀘𑁆𑀙𑀸 𑀯𑀸 𑀧𑀜𑁆𑀘𑀫𑁆𑀬𑀸.

𑀧𑀭𑀺𑀆𑀤𑀬𑁄 𑀧𑀜𑁆𑀘𑀫𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀸 𑀳𑁄𑀦𑁆𑀢𑀺 𑀯𑀸, 𑀧𑀭𑀺𑀧𑀩𑁆𑀩𑀢𑀁 𑀯𑀲𑁆𑀲𑀺 𑀤𑁂𑀯𑁄 𑀧𑀭𑀺𑀧𑀩𑁆𑀩𑀢𑀸, 𑀅𑀧𑀧𑀩𑁆𑀩𑀢𑀁 𑀯𑀲𑁆𑀲𑀺 𑀤𑁂𑀯𑁄 𑀅𑀧𑀧𑀩𑁆𑀩𑀢𑀸, 𑀆𑀧𑀸𑀝𑀮𑀺𑀧𑀼𑀢𑁆𑀢𑀁 𑀯𑀲𑁆𑀲𑀺 𑀤𑁂𑀯𑁄 𑀆𑀧𑀸𑀝𑀮𑀺𑀧𑀼𑀢𑁆𑀢𑀸, 𑀩𑀳𑀺𑀕𑀸𑀫𑀁 𑀩𑀳𑀺 𑀕𑀸𑀫𑀸, 𑀢𑀺𑀭𑁄𑀧𑀩𑁆𑀩𑀢𑀁 𑀢𑀺𑀭𑁄𑀧𑀩𑁆𑀩𑀢𑀸, 𑀧𑀼𑀭𑁂𑀪𑀢𑁆𑀢𑀁 𑀧𑀼𑀭𑁂𑀪𑀢𑁆𑀢𑀸, 𑀧𑀘𑁆𑀙𑀸𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀸, 𑀯𑁂𑀢𑀸𑀥𑀺𑀓𑀸𑀭𑁄.

𑁬. 𑀲𑀫𑀻𑀧𑀸𑀬𑀸𑀫𑁂𑀲𑁆𑀯𑀦𑀼.

𑀅𑀦𑀼𑀲𑀤𑁆𑀤𑁄 𑀲𑀸𑀫𑀻𑀧𑁆𑀬𑁂 𑀆𑀬𑀸𑀫𑁂 𑀘 𑀯𑀢𑁆𑀢𑀫𑀸𑀦𑁄 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑁄 𑀳𑁄𑀢𑀺 𑀯𑀸, 𑀅𑀦𑀼𑀯𑀦𑀫𑀲𑀦𑀺 𑀕𑀢𑀸, 𑀅𑀦𑀼𑀕𑀗𑁆𑀕𑀁 𑀩𑀸𑀭𑀸𑀡𑀲𑀻, 𑀲𑀫𑀻𑀧𑀸𑀬𑀸𑀫𑁂𑀲𑁆𑀯𑀻𑀢𑀺 𑀓𑀺𑀁? 𑀭𑀓𑁆𑀔𑀫𑀦𑀼𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼.

𑁭. 𑀢𑀺𑀝𑁆𑀞𑀕𑁆𑀯𑀸𑀤𑀻𑀦𑀺.

𑀢𑀺𑀝𑁆𑀞𑀕𑀼𑀧𑁆𑀧𑀪𑀼𑀢𑀻𑀦𑀺 𑀏𑀓𑀢𑁆𑀣𑀻𑀪𑀸𑀯𑀯𑀺𑀲𑀬𑁂 𑀦𑀺𑀧𑀸𑀢𑀻𑀬𑀦𑁆𑀢𑁂, 𑀢𑀺𑀝𑁆𑀞𑀦𑁆𑀢𑀻 𑀕𑀸𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀺𑀝𑁆𑀞𑀕𑀼 𑀓𑀸𑀮𑁄, 𑀯𑀳𑀕𑁆𑀕𑀼 𑀓𑀸𑀮𑁄. 𑀆𑀬𑀢𑀻𑀕𑀯𑀁, 𑀔𑀮𑁂𑀬𑀯𑀁, 𑀮𑀽𑀦𑀬𑀯𑀁 𑀮𑀽𑀬𑀫𑀸𑀦𑀬𑀯𑀫𑀺𑀘𑁆𑀘𑀸𑀤𑀺, 𑀘𑁆𑀬𑀦𑁆𑀢𑁄 𑀧𑁂𑀢𑁆𑀣 𑀓𑁂𑀲𑀸 𑀓𑁂𑀲𑀺, 𑀤𑀡𑁆𑀟𑀸 𑀤𑀡𑁆𑀟𑀺, 𑀢𑀣𑀸 𑀯𑁂𑀮𑀸𑀧𑁆𑀧𑀪𑀸𑀯𑀦𑀢𑁆𑀣𑁄𑀧𑀺, 𑀧𑀸𑀢𑁄 𑀦𑀳𑀸𑀦𑀁 𑀧𑀸𑀢𑀭𑀳𑀸𑀦𑀁, 𑀲𑀸𑀬𑀁 𑀦𑀬𑀸𑀦𑀁 𑀲𑀸𑀬𑀦𑀳𑀸𑀦𑀁, 𑀧𑀸𑀢𑀓𑀸𑀮𑀁 𑀲𑀸𑀬𑀓𑀸𑀮𑀁, 𑀧𑀸𑀢𑀫𑁂𑀖𑀁 𑀲𑀸𑀬𑀫𑁂𑀖𑀁, 𑀧𑀸𑀢𑀫𑀕𑁆𑀕𑀁 𑀲𑀸𑀬𑀫𑀕𑁆𑀕𑀁.

𑁮. 𑀑𑀭𑁂 𑀧𑀭𑀺 𑀧𑀝𑀺 𑀧𑀸𑀭𑁂 𑀫𑀚𑁆𑀛𑁂 𑀳𑁂𑀝𑁆𑀞𑀼𑀤𑁆𑀥𑀸𑀥𑁄-𑀦𑁆𑀢𑁄𑀯𑀸𑀙𑀝𑁆𑀞𑀺𑀬𑀸. 𑀑𑀭𑀸𑀤𑀬𑁄 𑀲𑀤𑁆𑀤𑀸 𑀙𑀝𑁆𑀞𑀺𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀸 𑀯𑀸 𑀳𑁄𑀦𑁆𑀢𑀺, 𑀏𑀓𑀸𑀭𑀦𑁆𑀢𑀢𑁆𑀢𑀁 𑀦𑀺𑀧𑀸𑀢𑀦𑀢𑁄, 𑀑𑀭𑁂𑀕𑀗𑁆𑀕𑀁, 𑀧𑀭𑀺𑀲𑀺𑀔𑀭𑀁, 𑀧𑀝𑀺𑀲𑁄𑀢𑀁, 𑀧𑀸𑀭𑁂𑀬𑀫𑀼𑀦𑀁, 𑀫𑀚𑁆𑀛𑁂𑀕𑀗𑁆𑀕𑀁, 𑀳𑁂𑀝𑁆𑀞𑀸𑀧𑀸𑀲𑀸𑀤𑀁, 𑀉𑀤𑁆𑀥𑀕𑀗𑁆𑀕𑀁, 𑀅𑀥𑁄𑀕𑀗𑁆𑀕𑀁, 𑀅𑀦𑁆𑀣𑁄𑀧𑀸𑀲𑀸𑀤𑀁, 𑀧𑀼𑀦 𑀯𑀸𑀯𑀺𑀥𑀸𑀦𑀸 ‘𑀕𑀗𑁆𑀕𑀸𑀑𑀭’ 𑀫𑀺𑀘𑁆𑀘𑀸𑀤𑀻𑀧𑀺 𑀳𑁄𑀦𑁆𑀢𑀺.

𑁯. 𑀢𑀁 𑀦𑀧𑀼𑀁𑀲𑀓𑀁.

𑀬𑀤𑁂𑀢𑀫𑀢𑀺𑀓𑁆𑀓𑀦𑁆𑀢𑀫𑁂𑀓𑀢𑁆𑀣𑀁, 𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀯𑁂𑀤𑀺𑀢𑀩𑁆𑀩𑀁, 𑀢𑀣𑀸 𑀘𑁂𑀯𑁄𑀤𑀸𑀳𑀝𑀁, 𑀯𑀸 𑀓𑁆𑀯𑀘𑀺 𑀩𑀳𑀼𑀮𑀸𑀥𑀺𑀓𑀸𑀭𑀸, 𑀬𑀣𑀸𑀧𑀭𑀺𑀲𑀁 𑀬𑀣𑀸𑀧𑀭𑀺𑀲𑀸𑀬, 𑀲𑀓𑀸𑀬 𑀲𑀓𑀸𑀬 𑀧𑀭𑀺𑀲𑀸𑀬𑀸𑀢𑀺 𑀅𑀢𑁆𑀣𑁄.

𑁧𑁦. 𑀅𑀫𑀸𑀤𑀺.

𑀅𑀫𑀸𑀤𑀺 𑀲𑁆𑀬𑀸𑀤𑁆𑀬𑀦𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳 𑀩𑀳𑀼𑀮𑀫𑁂𑀓𑀢𑁆𑀣𑀁 𑀳𑁄𑀢𑀺 𑀕𑀸𑀫𑀁 𑀕𑀢𑁄 𑀕𑀸𑀫𑀕𑀢𑁄, 𑀫𑀼𑀳𑀼𑀢𑁆𑀢𑀁 𑀲𑀼𑀔𑀁 𑀫𑀼𑀳𑀼𑀢𑁆𑀢𑀲𑀼𑀔𑀁, 𑀯𑀼𑀢𑁆𑀢𑀺𑀬𑁂𑀯𑁄𑀧𑀧𑀤𑀲𑀫𑀸𑀲𑁂 𑀓𑀼𑀫𑁆𑀪𑀓𑀸𑀭𑁄, 𑀲𑀧𑀸𑀓𑁄, 𑀢𑀦𑁆𑀢𑀯𑀸𑀬𑁄, 𑀯𑀭𑀸𑀳𑀭𑁄. 𑀦𑁆𑀢𑀫𑀸𑀦𑀓𑁆𑀢𑀯𑀦𑁆𑀢𑀽𑀢𑀺 𑀯𑀸𑀓𑁆𑀬𑀫𑁂𑀯, 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄, 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄, 𑀑𑀤𑀦𑀁 𑀪𑀼𑀢𑁆𑀢𑀯𑀸.

𑀭𑀜𑁆𑀜𑀸 𑀳𑀢𑁄 𑀭𑀸𑀚𑀳𑀢𑁄, 𑀅𑀲𑀺𑀦𑀸 𑀙𑀺𑀦𑁆𑀦𑁄 𑀅𑀲𑀺𑀘𑁆𑀙𑀺𑀦𑁆𑀦𑁄, 𑀧𑀺𑀢𑀼𑀲𑀤𑀺𑀲𑁄, 𑀧𑀺𑀢𑀼𑀲𑀫𑁄, 𑀲𑀼𑀔𑀲𑀳𑀕𑀢𑀁, 𑀤𑀥𑀺𑀦𑀸 𑀉𑀧𑀲𑀺𑀢𑁆𑀢𑀁 𑀪𑁄𑀚𑀦𑀁 𑀤𑀥𑀺𑀪𑁄𑀚𑀦𑀁, 𑀕𑀼𑀴𑁂𑀦 𑀫𑀺𑀲𑁆𑀲𑁄 𑀑𑀤𑀦𑁄 𑀕𑀼𑀴𑁄𑀤𑀦𑁄, 𑀯𑀼𑀢𑁆𑀢𑀺𑀧𑀤𑁂𑀦𑁂𑀯𑁄𑀧𑀲𑀺𑀢𑁆𑀢𑀸𑀤𑀺𑀓𑀺𑀭𑀺𑀬𑀸𑀬𑀸𑀔𑁆𑀬𑀸𑀧𑀦𑀢𑁄 𑀦𑀢𑁆𑀣𑀸𑀬𑀼𑀢𑁆𑀢𑀢𑁆𑀣𑀢𑀸. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯 𑀉𑀭𑀕𑁄, 𑀧𑀸𑀤𑀧𑁄. 𑀓𑁆𑀯𑀘𑀺 𑀯𑀸𑀓𑁆𑀬𑀫𑁂𑀯 𑀨𑀭𑀲𑀼𑀦𑀸 𑀙𑀺𑀦𑁆𑀦𑀯𑀸, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸.

𑀩𑀼𑀤𑁆𑀥𑀲𑁆𑀲 𑀤𑁂𑀬𑁆𑀬𑀁 𑀩𑀼𑀤𑁆𑀥𑀤𑁂𑀬𑁆𑀬𑀁, 𑀬𑀽𑀧𑀸𑀬 𑀤𑀸𑀭𑀼 𑀬𑀽𑀧𑀸𑀤𑀸𑀭𑀼, 𑀭𑀚𑀦𑀸𑀬 𑀤𑁄𑀡𑀺 𑀭𑀚𑀦𑀤𑁄𑀡𑀺. 𑀇𑀥 𑀦 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁. 𑀓𑀣𑀁 ‘𑀏𑀢𑀤𑀢𑁆𑀣𑁄 𑀏𑀢𑀤𑀢𑁆𑀣𑀸 𑀏𑀢𑀤𑀢𑁆𑀣’𑀦𑁆𑀢𑀺? 𑀅𑀜𑁆𑀜𑀧𑀤𑀢𑁆𑀣𑁂 𑀪𑀯𑀺𑀲𑁆𑀲𑀢𑀺.

𑀲𑀯𑀭𑁂𑀳𑀺 𑀪𑀬𑀁 𑀲𑀯𑀭𑀪𑀬𑀁, 𑀕𑀸𑀫𑀦𑀺𑀕𑁆𑀕𑀢𑁄, 𑀫𑁂𑀣𑀼𑀦𑀸𑀧𑁂𑀢𑁄, 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯 𑀓𑀫𑁆𑀫𑀚𑀁, 𑀘𑀺𑀢𑁆𑀢𑀚𑀁, 𑀇𑀥 𑀦 𑀳𑁄𑀢𑀺 𑀭𑀼𑀓𑁆𑀔𑀸 𑀧𑀢𑀺𑀢𑁄.

𑀭𑀜𑁆𑀜𑁄 𑀧𑀼𑀭𑀺𑀲𑁄 𑀭𑀸𑀚𑀧𑀼𑀭𑀺𑀲𑁄. 𑀩𑀳𑀼𑀮𑀸𑀥𑀺𑀓𑀸𑀭𑀸 𑀦𑁆𑀢𑀫𑀸𑀦𑀦𑀺𑀤𑁆𑀥𑀸𑀭𑀺𑀬𑀧𑀽𑀭𑀡𑀪𑀸𑀯𑀢𑀺𑀢𑁆𑀢𑀢𑁆𑀣𑁂𑀳𑀺 𑀦 𑀳𑁄𑀢𑀺-𑀫𑀫𑀸𑀦𑀼𑀓𑀼𑀩𑁆𑀩𑀁, 𑀫𑀫𑀸𑀦𑀼𑀓𑀼𑀭𑀼𑀫𑀸𑀦𑁄, 𑀕𑀼𑀦𑁆𑀦𑀁 𑀓𑀡𑁆𑀳𑀸 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀲𑀺𑀲𑁆𑀲𑀸𑀦𑀁 𑀧𑀜𑁆𑀘𑀫𑁄, 𑀧𑀝𑀲𑁆𑀲 𑀲𑀼𑀓𑁆𑀓𑀢𑀸, 𑀓𑁆𑀯𑀘𑀺 𑀳𑁄𑀢𑁂𑀯-𑀯𑀢𑁆𑀢𑀫𑀸𑀦𑀲𑀸𑀫𑀻𑀧𑁆𑀬𑀁, 𑀓𑀣𑀁 ‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀓𑁆𑀓𑀸 𑀤𑀦𑁆𑀢𑀸’𑀢𑀺? 𑀲𑀸𑀧𑁂𑀓𑁆𑀔𑀢𑀸𑀬 𑀦 𑀳𑁄𑀢𑀺. 𑀇𑀥 𑀧𑀦 𑀳𑁄𑀢𑁂𑀯 ‘𑀘𑀦𑁆𑀤𑀦𑀕𑀦𑁆𑀥𑁄, 𑀦𑀤𑀺𑀖𑁄𑀲𑁄, 𑀓𑀜𑁆𑀜𑀸𑀭𑀽𑀧𑀁, 𑀓𑀸𑀬𑀲𑀫𑁆𑀨𑀲𑁆𑀲𑁄, 𑀨𑀮𑀭𑀲𑁄’𑀢𑀺, 𑀨𑀮𑀸𑀦𑀁 𑀢𑀺𑀢𑁆𑀢𑁄, 𑀨𑀮𑀸𑀦𑀫𑀸𑀲𑀺𑀢𑁄, 𑀨𑀲𑀸𑀦𑀁 𑀲𑀼𑀳𑀺𑀢𑁄.

𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀘𑁆𑀘𑀁 𑀕𑁂𑀳𑀦𑁆𑀢𑀺 𑀲𑀸𑀧𑁂𑀓𑁆𑀔𑀢𑀸𑀬 𑀦 𑀳𑁄𑀢𑀺, ‘𑀭𑀜𑁆𑀜𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑀲𑁆𑀲 𑀥𑀦’𑀦𑁆𑀢𑀺 𑀥𑀦𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀦 𑀳𑁂𑀲𑁆𑀲𑀢𑀺, ‘𑀭𑀜𑁆𑀜𑁄 𑀕𑁄 𑀘 𑀅𑀲𑁆𑀲𑁄 𑀘 𑀧𑀼𑀭𑀺𑀲𑁄 𑀘𑀸’𑀢𑀺 𑀪𑀺𑀦𑁆𑀦𑀢𑁆𑀣𑀢𑀸𑀬 𑀯𑀸𑀓𑁆𑀬𑀫𑁂𑀯, ‘𑀭𑀜𑁆𑀜𑁄 𑀕𑀯𑀸𑀲𑁆𑀲𑀧𑀼𑀭𑀺𑀲𑀸 𑀭𑀸𑀚𑀕𑀯𑀸𑀲𑁆𑀲𑀧𑀼𑀭𑀺𑀲𑀸’𑀢𑀺 𑀯𑀼𑀢𑁆𑀢𑀺 𑀳𑁄𑀢𑁂𑀯𑁂𑀓𑀢𑁆𑀢𑀺𑀪𑀸𑀯𑁂.

𑀤𑀸𑀦𑁂 𑀲𑁄𑀡𑁆𑀟𑁄 𑀤𑀸𑀦𑀲𑁄𑀡𑁆𑀟𑁄, 𑀥𑀫𑁆𑀫𑀭𑀢𑁄, 𑀤𑀸𑀦𑀸𑀪𑀺𑀭𑀢𑁄. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯 𑀓𑀼𑀘𑁆𑀙𑀺𑀲𑀬𑁄, 𑀣𑀮𑀝𑁆𑀞𑁄, 𑀧𑀗𑁆𑀓𑀚𑀁, 𑀲𑀭𑁄𑀭𑀼𑀳𑀁. 𑀇𑀥 𑀦 𑀳𑁄𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁧𑁧. 𑀯𑀺𑀲𑁂𑀲𑀦𑀫𑁂𑀓𑀢𑁆𑀣𑁂𑀦.

𑀯𑀺𑀲𑁂𑀲𑀦𑀁 𑀲𑁆𑀬𑀸𑀦𑁆𑀢𑀁 𑀯𑀺𑀲𑁂𑀲𑁆𑀲𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁂𑀦 𑀲𑀳𑁂𑀓𑀢𑁆𑀣𑀁 𑀳𑁄𑀢𑀺, 𑀦𑀻𑀮𑀜𑁆𑀘 𑀢𑀁 𑀉𑀧𑁆𑀧𑀮𑀜𑁆𑀘𑁂𑀢𑀺 𑀦𑀻𑀮𑀼𑀧𑁆𑀧𑀮𑀁, 𑀙𑀺𑀦𑁆𑀦𑀜𑁆𑀘 𑀢𑀁 𑀧𑀭𑀼𑀴𑁆𑀳𑀜𑁆𑀘𑁂𑀢𑀺 𑀙𑀺𑀦𑁆𑀦𑀧𑀭𑀴𑁆𑀳𑀁, 𑀲𑀢𑁆𑀣𑀻𑀯 𑀲𑀢𑁆𑀣𑀻, 𑀲𑀢𑁆𑀣𑀻 𑀘 𑀲𑀸 𑀲𑀸𑀫𑀸 𑀘𑁂𑀢𑀺 𑀲𑀢𑁆𑀣𑀺𑀲𑀸𑀫𑀸, 𑀲𑀻𑀳𑁄𑀯 𑀲𑀻𑀳𑁄, 𑀫𑀼𑀦𑀺 𑀘 𑀲𑁄 𑀲𑀻𑀳𑁄 𑀘𑁂𑀢𑀺 𑀫𑀼𑀦𑀺𑀲𑀻𑀳𑁄, 𑀲𑀻𑀮𑀫𑁂𑀯 𑀥𑀦𑀁 𑀲𑀻𑀮𑀥𑀦𑀁.

𑀓𑁆𑀯𑀘𑀺 𑀯𑀸𑀓𑁆𑀬𑀫𑁂𑀯 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄, 𑀘𑀺𑀢𑁆𑀢𑁄 𑀕𑀳𑀧𑀢𑀺. 𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯 𑀓𑀡𑁆𑀳𑀲𑀧𑁆𑀧𑁄, 𑀮𑁄𑀳𑀺𑀢𑀲𑀸𑀮𑀺, 𑀯𑀺𑀲𑁂𑀲𑀦𑀦𑁆𑀢𑀺 𑀓𑀺𑀁? 𑀢𑀘𑁆𑀙𑀓𑁄 𑀲𑀧𑁆𑀧𑁄, 𑀏𑀓𑀢𑁆𑀣𑁂𑀦𑁂𑀢𑀺 𑀓𑀺𑀁? 𑀓𑀸𑀴𑀫𑁆𑀳𑀸 𑀅𑀜𑁆𑀜𑁄. 𑀓𑀣𑀁 ‘𑀧𑀢𑁆𑀢𑀚𑀻𑀯𑀺𑀓𑁄, 𑀆𑀧𑀦𑁆𑀦𑀚𑀻𑀯𑀺𑀓𑁄, 𑀫𑀸𑀲𑀚𑀸𑀢𑁄’𑀢𑀺? 𑀅𑀜𑁆𑀜𑀧𑀤𑀢𑁆𑀣𑁂 𑀪𑀯𑀺𑀲𑁆𑀲𑀢𑀺.

𑁧𑁨. 𑀦𑀜.

𑀦𑀜𑀺𑀘𑁆𑀘𑁂𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀁 𑀳𑁄𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀸𑀳𑁆𑀫𑀡𑁄, 𑀩𑀳𑀼𑀮𑀸𑀥𑀺𑀓𑀸𑀭𑀢𑁄 𑀅𑀲𑀫𑀢𑁆𑀣𑀢𑁆𑀣𑁂𑀳𑀺, 𑀓𑁂𑀳𑀺𑀘𑀺 𑀳𑁄𑀢𑀺 ‘𑀅𑀧𑀼𑀦𑀕𑁂𑀬𑁆𑀬𑀸 𑀕𑀸𑀣𑀸, 𑀅𑀦𑁄𑀓𑀸𑀲𑀁 𑀓𑀸𑀭𑁂𑀢𑁆𑀯𑀸, 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸. 𑀈𑀲𑀁𑀓𑀴𑀸𑀭𑁄, 𑀈𑀲𑀁𑀧𑀺𑀗𑁆𑀕𑀮𑁄𑀢𑀺 ‘𑀲𑁆𑀬𑀸𑀤𑀺 𑀲𑁆𑀬𑀸𑀤𑀺𑀦𑁂’𑀢𑀺 𑀲𑀫𑀸𑀲𑁄, 𑀯𑀸𑀓𑁆𑀬𑀫𑁂𑀯 𑀯𑀸𑀢𑀺𑀧𑁆𑀧𑀲𑀗𑁆𑀕𑀸𑀪𑀸𑀯𑀸.

𑁧𑁩. 𑀓𑀼𑀧𑀸𑀤𑀬𑁄 𑀦𑀺𑀘𑁆𑀘𑀫𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀺.

𑀓𑀼𑀲𑀤𑁆𑀤𑁄 𑀧𑀸𑀤𑀬𑁄 𑀘 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀸 𑀳𑁄𑀦𑁆𑀢𑀺 𑀦𑀺𑀘𑁆𑀘𑀁 𑀲𑁆𑀬𑀸𑀤𑀺𑀯𑀺𑀥𑀺𑀯𑀺𑀲𑀬𑀢𑁄-𑀜𑀢𑁆𑀣, 𑀓𑀼𑀘𑁆𑀙𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀓𑀼𑀩𑁆𑀭𑀸𑀳𑁆𑀫𑀡𑁄, 𑀈𑀲𑀓𑀁 𑀉𑀡𑁆𑀳𑀁 𑀓𑀤𑀼𑀡𑁆𑀳𑀁, 𑀧𑀦𑀸𑀬𑀓𑁄, 𑀅𑀪𑀺𑀲𑁂𑀓𑁄, 𑀧𑀓𑀭𑀺𑀢𑁆𑀯𑀸, 𑀧𑀓𑀢𑀁, 𑀤𑀼𑀧𑁆𑀧𑀼𑀭𑀺𑀲𑁄, 𑀤𑀼𑀓𑁆𑀓𑀝𑀁, 𑀲𑀼𑀧𑀼𑀭𑀺𑀲𑁄, 𑀲𑀼𑀓𑀢𑀁, 𑀅𑀪𑀺𑀢𑁆𑀣𑀼𑀢𑀁, 𑀅𑀢𑀺𑀢𑁆𑀣𑀼𑀢𑀁, 𑀆𑀓𑀴𑀸𑀭𑁄, 𑀆𑀩𑀤𑁆𑀥𑁄.

(𑁯) ‘‘𑀧𑀸𑀤𑀬𑁄 𑀕𑀢𑀸𑀤𑁆𑀬𑀢𑁆𑀣𑁂 𑀧𑀞𑀫𑀸𑀬’’. 𑀧𑀕𑀢𑁄 𑀆𑀘𑀭𑀺𑀬𑁄 𑀧𑀸𑀘𑀭𑀺𑀬𑁄, 𑀧𑀦𑁆𑀢𑁂𑀯𑀸𑀲𑀻.

(𑁧𑁦) ‘‘𑀅𑀘𑁆𑀘𑀸𑀤𑀬𑁄 𑀓𑀦𑁆𑀢𑀸𑀤𑁆𑀬𑀢𑁆𑀣𑁂 𑀤𑀼𑀢𑀺𑀬𑀸𑀬’’. 𑀅𑀢𑀺𑀓𑁆𑀓𑀦𑁆𑀢𑁄 𑀫𑀜𑁆𑀘𑀫𑀢𑀺𑀫𑀜𑁆𑀘𑁄, 𑀅𑀢𑀺𑀫𑀸𑀮𑁄.

(𑁧𑁧) ‘‘𑀅𑀯𑀸𑀤𑀬𑁄 𑀓𑀼𑀝𑁆𑀞𑀸𑀤𑁆𑀬𑀢𑁆𑀣𑁂 𑀢𑀢𑀺𑀬𑀸𑀬’’. 𑀅𑀯𑀓𑀼𑀝𑁆𑀞𑀁 𑀓𑁄𑀓𑀺𑀮𑀸𑀬 𑀯𑀦𑀁 𑀅𑀯𑀓𑁄𑀓𑀺𑀮𑀁, 𑀅𑀯𑀫𑀬𑀽𑀭𑀁.

(𑁧𑁨) ‘‘𑀧𑀭𑀺𑀬𑀸𑀤𑀬𑁄 𑀕𑀺𑀮𑀸𑀦𑀸𑀤𑁆𑀬𑀢𑁆𑀣𑁂 𑀘𑀢𑀼𑀢𑁆𑀣𑀺𑀬𑀸’’. 𑀧𑀭𑀺𑀕𑀺𑀮𑀸𑀦𑁄 𑀅𑀚𑁆𑀛𑁂𑀦𑀸𑀬 𑀧𑀭𑀺𑀬𑀚𑁆𑀛𑁂𑀦𑁄.

(𑁧𑁩) ‘‘𑀦𑁆𑀬𑀸𑀤𑀬𑁄 𑀓𑀦𑁆𑀢𑀸𑀤𑁆𑀬𑀢𑁆𑀣𑁂 𑀧𑀜𑁆𑀘𑀫𑀺𑀬𑀸’’.

𑀦𑀺𑀓𑁆𑀔𑀦𑁆𑀢𑁄 𑀓𑁄𑀲𑀫𑁆𑀩𑀺𑀬𑀸 𑀦𑀺𑀓𑁆𑀓𑁄𑀲𑀫𑁆𑀧𑀺, 𑀅𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀻𑀢𑀺 𑀓𑀺𑀁? 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂.

𑁧𑁪. 𑀘𑀻 𑀓𑁆𑀭𑀺𑀬𑀢𑁆𑀣𑁂𑀳𑀺.

𑀘𑀻𑀧𑁆𑀧𑀘𑁆𑀘𑀬𑀦𑁆𑀢𑁄 𑀓𑀺𑀭𑀺𑀬𑀢𑁆𑀣𑁂𑀳𑀺 𑀲𑁆𑀬𑀸𑀤𑁆𑀬𑀦𑁆𑀢𑁂𑀳𑀺 𑀲𑀳𑁂𑀓𑀢𑁆𑀣𑁄 𑀳𑁄𑀢𑀺, 𑀫𑀮𑀺𑀦𑀻𑀓𑀭𑀺𑀬.

𑁧𑁫. 𑀪𑀽𑀲𑀦𑀸𑀤𑀭𑀸𑀦𑀸𑀤𑀭𑁂𑀲𑁆𑀯𑀮𑀁𑀲𑀸𑀲𑀸.

𑀪𑀽𑀲𑀦𑀸𑀤𑀺𑀲𑁆𑀯𑀢𑁆𑀣𑁂 𑀲𑁆𑀯𑀮𑀫𑀸𑀤𑀬𑁄 𑀲𑀤𑁆𑀤𑀸 𑀓𑀺𑀭𑀺𑀬𑀢𑁆𑀣𑁂𑀳𑀺 𑀲𑁆𑀬𑀸𑀤𑁆𑀬𑀦𑁆𑀢𑁂𑀳𑀺 𑀲𑀳𑁂𑀓𑀢𑁆𑀣𑀸 𑀳𑁄𑀦𑁆𑀢𑀺, 𑀅𑀮𑀁𑀓𑀭𑀺𑀬, 𑀲𑀓𑁆𑀓𑀘𑁆𑀘, 𑀅𑀲𑀓𑁆𑀓𑀘𑁆𑀘. 𑀪𑀽𑀲𑀦𑀸𑀤𑀻𑀲𑀽𑀢𑀺 𑀓𑀺𑀁? 𑀅𑀮𑀁𑀪𑀼𑀢𑁆𑀯𑀸 𑀕𑀢𑁄, 𑀲𑀓𑁆𑀓𑀢𑁆𑀯𑀸 𑀕𑀢𑁄, 𑀅𑀲𑀓𑁆𑀓𑀢𑁆𑀯𑀸 𑀕𑀢𑁄, 𑀧𑀭𑀺𑀬𑀢𑁆𑀢𑀁 𑀲𑁄𑀪𑀦𑀫𑀲𑁄𑀪𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁬. 𑀅𑀜𑁆𑀜𑁂 𑀘.

𑀅𑀜𑁆𑀜𑁂 𑀘 𑀲𑀤𑁆𑀤𑀸 𑀓𑀺𑀭𑀺𑀬𑀢𑁆𑀣𑁂𑀳𑀺 𑀲𑁆𑀬𑀸𑀤𑁆𑀬𑀦𑁆𑀢𑁂𑀳𑀺 𑀲𑀳 𑀩𑀳𑀼𑀮𑀫𑁂𑀓𑀢𑁆𑀣𑀸 𑀪𑀯𑀦𑁆𑀢𑀺, 𑀧𑀼𑀭𑁄𑀪𑀽𑀬, 𑀢𑀺𑀭𑁄𑀪𑀽𑀬, 𑀢𑀺𑀭𑁄𑀓𑀭𑀺𑀬, 𑀉𑀭𑀲𑀺𑀓𑀭𑀺𑀬, 𑀫𑀦𑀲𑀺𑀓𑀭𑀺𑀬, 𑀫𑀚𑁆𑀛𑁂𑀓𑀭𑀺𑀬, 𑀢𑀼𑀡𑁆𑀳𑀻𑀪𑀽𑀬.

𑁧𑁭. 𑀯𑀸𑀦𑁂𑀓𑀜𑁆𑀜𑀢𑁆𑀣𑁂.

𑀅𑀦𑁂𑀓𑀁 𑀲𑁆𑀬𑀸𑀤𑁆𑀬𑀦𑁆𑀢𑀫𑀜𑁆𑀜𑀲𑁆𑀲 𑀧𑀤𑀲𑁆𑀲𑀢𑁆𑀣𑁂 𑀏𑀓𑀢𑁆𑀣𑀁 𑀯𑀸 𑀳𑁄𑀢𑀺, 𑀩𑀳𑀽𑀦𑀺 𑀥𑀦𑀸𑀦𑀺 𑀬𑀲𑁆𑀲 𑀲𑁄 𑀩𑀳𑀼𑀥𑀦𑁄, 𑀮𑀫𑁆𑀩𑀸 𑀓𑀡𑁆𑀡𑀸 𑀬𑀲𑁆𑀲 𑀲𑁄 𑀮𑀫𑁆𑀩𑀓𑀡𑁆𑀡𑁄, 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀬𑀲𑁆𑀲 𑀲𑁄𑀬𑀁 𑀯𑀚𑀺𑀭𑀧𑀸𑀡𑀺, 𑀫𑀢𑁆𑀢𑀸 𑀩𑀳𑀯𑁄 𑀫𑀸𑀢𑀗𑁆𑀕𑀸 𑀏𑀢𑁆𑀣 𑀫𑀢𑁆𑀢𑀩𑀳𑀼𑀫𑀸𑀢𑀗𑁆𑀕𑀁 𑀯𑀦𑀁, 𑀆𑀭𑀼𑀴𑁆𑀳𑁄 𑀯𑀸𑀦𑀭𑁄 𑀬𑀁 𑀭𑀼𑀓𑁆𑀔𑀁 𑀲𑁄 𑀆𑀭𑀼𑀴𑁆𑀳𑀯𑀸𑀦𑀭𑁄, 𑀚𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦 𑀲𑁄 𑀚𑀺𑀢𑀺𑀦𑁆𑀤𑁆𑀭𑀺𑀬𑁄, 𑀤𑀺𑀦𑁆𑀦𑀁 𑀪𑁄𑀚𑀦𑀁 𑀬𑀲𑁆𑀲 𑀲𑁄 𑀤𑀺𑀦𑁆𑀦𑀪𑁄𑀚𑀦𑁄, 𑀅𑀧𑀕𑀢𑀁 𑀓𑀸𑀴𑀓𑀁 𑀬𑀲𑁆𑀫𑀸 𑀧𑀝𑀸 𑀲𑁄-𑀬𑀫𑀧𑀕𑀢𑀓𑀸𑀴𑀓𑁄, 𑀉𑀧𑀕𑀢𑀸 𑀤𑀲 𑀬𑁂𑀲𑀁 𑀢𑁂 𑀉𑀧𑀤𑀲𑀸, 𑀆𑀲𑀦𑁆𑀦𑀤𑀲𑀸, 𑀅𑀤𑀽𑀭𑀤𑀲𑀸, 𑀅𑀥𑀺𑀓𑀤𑀲𑀸, 𑀢𑀬𑁄 𑀤𑀲 𑀧𑀭𑀺𑀫𑀸𑀡𑀫𑁂𑀲𑀁 𑀢𑀺𑀤𑀲𑀸, 𑀓𑀣𑀁 𑀤𑀲𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀢𑁂? 𑀧𑀭𑀺𑀫𑀸𑀡𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀸, 𑀬𑀣𑀸 𑀧𑀜𑁆𑀘 𑀧𑀭𑀺𑀫𑀸𑀡𑀫𑁂𑀲𑀁 𑀧𑀜𑁆𑀘𑀓𑀸 𑀲𑀓𑀼𑀦𑀸𑀢𑀺, 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀧𑀭𑀺𑀫𑀸𑀡𑀫𑁂𑀲𑀁 𑀤𑁆𑀯𑀢𑁆𑀢𑀬𑁄 𑀯𑀸𑀲𑀤𑁆𑀤𑀢𑁆𑀣𑁂 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀤𑁆𑀯𑀢𑁆𑀢𑀬𑁄.

𑀤𑀓𑁆𑀔𑀺𑀡𑀲𑁆𑀲𑀸 𑀘 𑀧𑀼𑀩𑁆𑀩𑀲𑁆𑀲𑀸 𑀘 𑀤𑀺𑀲𑀸𑀬 𑀬𑀤𑀦𑁆𑀢𑀭𑀸𑀴𑀁 𑀤𑀓𑁆𑀔𑀺𑀡𑀧𑀼𑀩𑁆𑀩𑀸 𑀤𑀺𑀲𑀸, 𑀤𑀓𑁆𑀔𑀺𑀡𑀸 𑀘 𑀲𑀸 𑀧𑀼𑀩𑁆𑀩𑀸 𑀘𑀸𑀢𑀺 𑀯𑀸, 𑀲𑀳 𑀧𑀼𑀢𑁆𑀢𑁂𑀦𑀸𑀕𑀢𑁄 𑀲𑀧𑀼𑀢𑁆𑀢𑁄, 𑀲𑀮𑁄𑀫𑀓𑁄 𑀯𑀺𑀚𑁆𑀚𑀫𑀸𑀦𑀮𑁄𑀫𑀓𑁄𑀢𑀺 𑀅𑀢𑁆𑀣𑁄, 𑀏𑀯𑀁 𑀲𑀧𑀓𑁆𑀔𑀓𑁄, 𑀅𑀢𑁆𑀣𑀻 𑀔𑀻𑀭𑀸 𑀩𑁆𑀭𑀸𑀳𑁆𑀫𑀡𑀻𑀢𑀺 𑀅𑀢𑁆𑀣𑀺𑀲𑀤𑁆𑀤𑁄 𑀯𑀺𑀚𑁆𑀚𑀫𑀸𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀓𑁆𑀯𑀘𑀺 𑀕𑀢𑀢𑁆𑀣𑀢𑀸𑀬 𑀧𑀤𑀦𑁆𑀢𑀭𑀸𑀦𑀫𑀧𑁆𑀧𑀬𑁄𑀕𑁄, 𑀓𑀡𑁆𑀞𑀝𑁆𑀞𑀸 𑀓𑀸𑀴𑀸 𑀅𑀲𑁆𑀲 𑀓𑀡𑁆𑀞𑁂𑀓𑀸𑀴𑁄, 𑀑𑀝𑁆𑀞𑀲𑁆𑀲 𑀫𑀼𑀔𑀫𑀺𑀯 𑀫𑀼𑀔𑀫𑀲𑁆𑀲 𑀑𑀝𑁆𑀞𑀫𑀼𑀔𑁄, 𑀓𑁂𑀲𑀲𑀗𑁆𑀖𑀸𑀢𑁄 𑀘𑀽𑀴𑀸 𑀅𑀲𑁆𑀲 𑀓𑁂𑀲𑀘𑀽𑀴𑁄, 𑀲𑀼𑀯𑀡𑁆𑀡𑀯𑀺𑀓𑀸𑀭𑁄 𑀅𑀮𑀗𑁆𑀓𑀸𑀭𑁄 𑀅𑀲𑁆𑀲 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁄, 𑀧𑀧𑀢𑀺𑀢𑀁 𑀧𑀡𑁆𑀡𑀫𑀲𑁆𑀲 𑀧𑀧𑀢𑀺𑀢𑀧𑀡𑁆𑀡𑁄, 𑀧𑀧𑀡𑁆𑀡𑁄, 𑀅𑀯𑀺𑀚𑁆𑀚𑀫𑀸𑀦𑀸 𑀧𑀼𑀢𑁆𑀢𑀸 𑀅𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀧𑀼𑀢𑁆𑀢𑁄, 𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀅𑀲𑁆𑀲 𑀅𑀧𑀼𑀢𑁆𑀢𑁂, 𑀓𑁆𑀯𑀘𑀺 𑀦 𑀳𑁄𑀢𑀺 𑀧𑀜𑁆𑀘 𑀪𑀼𑀢𑁆𑀢𑀯𑀦𑁆𑀢𑁄 𑀅𑀲𑁆𑀲 𑀪𑀸𑀢𑀼𑀦𑁄 𑀧𑀼𑀢𑁆𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀢𑁄.

𑁧𑁮. 𑀢𑀢𑁆𑀣 𑀕𑀳𑁂𑀢𑁆𑀯𑀸 𑀢𑁂𑀦 𑀧𑀳𑀭𑀺𑀢𑁆𑀯𑀸 𑀬𑀼𑀤𑁆𑀥𑁂 𑀲𑀭𑀽𑀧𑀁.

𑀲𑀢𑁆𑀢𑀫𑁆𑀬𑀦𑁆𑀢𑀁 𑀢𑀢𑀺𑀬𑀦𑁆𑀢𑀜𑁆𑀘 𑀲𑀭𑀽𑀧𑀫𑀦𑁂𑀓𑀁 𑀢𑀢𑁆𑀣 𑀕𑀳𑁂𑀢𑁆𑀯𑀸 𑀢𑁂𑀦 𑀧𑀳𑀭𑀺𑀢𑁆𑀯𑀸 𑀬𑀼𑀤𑁆𑀥𑁂-𑀜𑁆𑀜𑀧𑀤𑀢𑁆𑀣𑁂 𑀏𑀓𑀢𑁆𑀣𑀁 𑀯𑀸 𑀳𑁄𑀢𑀺, 𑀓𑁂𑀲𑁂𑀲𑀼 𑀘 𑀓𑁂𑀲𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀬𑀼𑀤𑁆𑀥𑀁 𑀧𑀯𑀢𑁆𑀢𑀁 𑀓𑁂𑀲𑀸𑀓𑁂𑀲𑀺, 𑀤𑀡𑁆𑀟𑁂𑀳𑀺 𑀘 𑀤𑀡𑁆𑀟𑁂𑀳𑀺 𑀘 𑀧𑀳𑀭𑀺𑀢𑁆𑀯𑀸 𑀬𑀼𑀤𑁆𑀥𑀁 𑀧𑀯𑀢𑁆𑀢𑀁 𑀤𑀡𑁆𑀟𑀸𑀤𑀡𑁆𑀟𑀺, 𑀫𑀼𑀝𑁆𑀞𑀸𑀫𑀼𑀝𑁆𑀞𑀺, ‘‘𑀘𑀺 𑀯𑀻𑀢𑀺𑀬𑀸𑀭𑁂’’ (𑁩-𑁫𑁧) 𑀢𑀺 𑀘𑀺 𑀲𑀫𑀸𑀲𑀦𑁆𑀢𑁄, ‘‘𑀘𑀺𑀲𑁆𑀫𑀺𑀁’’ (𑁩.𑁬𑁬) 𑀢𑀺 𑀅𑀓𑀸𑀭𑁄. 𑀢𑀢𑁆𑀣 𑀢𑁂𑀦𑁂𑀢𑀺 𑀓𑀺𑀁? 𑀓𑀸𑀬𑀜𑁆𑀘 𑀓𑀸𑀬𑀜𑁆𑀘 𑀕𑀳𑁂𑀢𑁆𑀯𑀸 𑀬𑀼𑀤𑁆𑀥𑀁 𑀧𑀯𑀢𑁆𑀢𑀁. 𑀕𑀳𑁂𑀢𑁆𑀯𑀸 𑀧𑀳𑀭𑀺𑀢𑁆𑀯𑀸𑀢𑀺 𑀓𑀺𑀁? 𑀭𑀣𑁂 𑀘 𑀭𑀣𑁂 𑀘 𑀞𑀢𑁆𑀯𑀸 𑀬𑀼𑀤𑁆𑀥𑀁 𑀧𑀯𑀢𑁆𑀢𑀺. 𑀬𑀼𑀤𑁆𑀥𑁂𑀢𑀺 𑀓𑀺𑀁? 𑀳𑀢𑁆𑀣𑁂 𑀘 𑀳𑀢𑁆𑀣𑁂 𑀘 𑀕𑀳𑁂𑀢𑁆𑀯𑀸 𑀲𑀔𑁆𑀬𑀁 𑀧𑀯𑀢𑁆𑀢𑀁. 𑀲𑀭𑀽𑀧𑀦𑁆𑀢𑀺 𑀓𑀺𑀁? 𑀤𑀡𑁆𑀟𑁂𑀳𑀺 𑀘 𑀫𑀼𑀲𑀮𑁂𑀳𑀺 𑀘 𑀧𑀳𑀭𑀺𑀢𑁆𑀯𑀸 𑀬𑀼𑀤𑁆𑀥 𑀧𑀯𑀢𑁆𑀢𑀁.

𑁧𑁯. 𑀘𑀢𑁆𑀣𑁂.

𑀅𑀦𑁂𑀓𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀘𑀢𑁆𑀣𑁂 𑀏𑀓𑀢𑁆𑀣𑀁 𑀯𑀸 𑀪𑀯𑀢𑀺. 𑀲𑀫𑀼𑀘𑁆𑀘𑀬𑁄𑀦𑁆𑀯𑀸𑀘𑀬𑁄 𑀇𑀢𑀭𑀻𑀢𑀭𑀬𑁄𑀕𑁄 𑀲𑀫𑀸𑀳𑀸𑀭𑁄 𑀘 𑀘 𑀲𑀤𑁆𑀤𑀢𑁆𑀣𑀸, 𑀢𑀢𑁆𑀣 𑀲𑀫𑀼𑀘𑁆𑀘𑀬𑀸𑀦𑁆𑀯𑀸𑀘𑀬𑁂𑀲𑀼 𑀦𑁂𑀓𑀢𑁆𑀣𑀻𑀪𑀸𑀯𑁄 𑀲𑀫𑁆𑀪𑀯𑀢𑀺, 𑀢𑁂𑀲𑀼 𑀳𑀺 𑀲𑀫𑀼𑀘𑁆𑀘𑀬𑁄 𑀅𑀜𑁆𑀜𑀫𑀜𑁆𑀜𑀦𑀺𑀭𑀧𑁂𑀓𑁆𑀔𑀸 𑀦𑀫𑀢𑁆𑀢𑀧𑁆𑀧𑀥𑀸𑀦𑀸𑀦𑀁 𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑁂 𑀘𑀻𑀬𑀫𑀸𑀦𑀢𑀸, 𑀬𑀣𑀸 ‘𑀥𑀯𑁂 𑀘 𑀔𑀤𑀺𑀭𑁂 𑀘 𑀧𑀮𑀸𑀲𑁂 𑀘 𑀙𑀺𑀦𑁆𑀤𑀸’𑀢𑀺. 𑀅𑀦𑁆𑀯𑀸𑀘𑀬𑁄 𑀘 𑀬𑀢𑁆𑀣𑁂𑀓𑁄 𑀧𑀥𑀸𑀦𑀪𑀸𑀯𑁂𑀦 𑀯𑀺𑀥𑀻𑀬𑀢𑁂 𑀅𑀧𑀭𑁄 𑀘 𑀕𑀼𑀡𑀪𑀸𑀯𑁂𑀦, 𑀬𑀣𑀸 ‘𑀪𑀺𑀓𑁆𑀔𑀜𑁆𑀘𑀭 𑀕𑀸𑀯𑁄 𑀘𑀸𑀦𑀬𑁂’𑀢𑀺. 𑀇𑀢𑀭𑀤𑁆𑀯𑀬𑁂 𑀢𑀼 𑀲𑀫𑁆𑀪𑀯𑀢𑀺, 𑀢𑁂𑀲𑀼 𑀳𑀺 𑀅𑀜𑁆𑀜𑀫𑀜𑁆𑀜𑀲𑀸𑀧𑁂𑀓𑁆𑀔𑀸𑀦𑀫𑀯𑀬𑀯𑀪𑀤𑀸𑀦𑀼𑀕𑀢𑁄 𑀇𑀢𑀭𑀻𑀢𑀭𑀬𑁄𑀕𑁄, 𑀬𑀣𑀸 ‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’𑀢𑀺, 𑀅𑀲𑁆𑀲𑀸𑀯𑀬𑀯𑀧𑁆𑀧𑀥𑀸𑀦𑀢𑁆𑀢𑀸 𑀩𑀳𑀼𑀯𑀘𑀦𑀫𑁂𑀯. 𑀅𑀜𑁆𑀜𑀫𑀜𑁆𑀜𑀲𑀸𑀧𑁂𑀓𑁆𑀔𑀸𑀦𑀫𑁂𑀯 𑀢𑀺𑀭𑁄𑀳𑀺𑀢𑀸𑀯𑀬𑀯𑀪𑁂𑀤𑁄 𑀲𑀫𑀼𑀤𑀸𑀬𑀧𑁆𑀧𑀥𑀸𑀦𑁄 𑀲𑀫𑀸𑀳𑀸𑀭𑁄, 𑀬𑀣𑀸 ‘𑀙𑀢𑁆𑀢𑀼𑀧𑀸𑀳𑀦’𑀦𑁆𑀢𑀺, 𑀅𑀲𑁆𑀲 𑀧𑀦 𑀲𑀫𑀼𑀤𑀸𑀬𑀧𑁆𑀧𑀥𑀸𑀦𑀢𑁆𑀢𑀸 𑀏𑀓𑀯𑀘𑀦𑀫𑁂𑀯.

𑀢𑁂 𑀘 𑀲𑀫𑀸𑀳𑀸𑀭𑀻𑀢𑀭𑀻𑀢𑀭𑀬𑁄𑀕𑀸 𑀩𑀳𑀼𑀮𑀁 𑀯𑀺𑀥𑀸𑀦𑀸 𑀦𑀺𑀬𑀢𑀯𑀺𑀲𑀬𑀸𑀬𑁂𑀯 𑀳𑁄𑀦𑁆𑀢𑀺, 𑀢𑀢𑁆𑀭𑀸𑀬𑀁 𑀯𑀺𑀲𑀬𑀯𑀺𑀪𑀸𑀕𑁄 𑀦𑀺𑀭𑀼𑀢𑁆𑀣𑀺𑀧𑀺𑀝𑀓𑀸𑀕𑀢𑁄-𑀧𑀸𑀡𑀺𑀢𑀽𑀭𑀺𑀬𑀬𑁄𑀕𑁆𑀕𑀲𑁂𑀦𑀗𑁆𑀕𑀸𑀦𑀁, 𑀦𑀺𑀘𑁆𑀘𑀯𑁂𑀭𑀻𑀦𑀁, 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡-𑀲𑀜𑁆𑀜𑀸𑀦𑀁, 𑀔𑀼𑀤𑁆𑀤𑀚𑀦𑁆𑀢𑀼𑀓𑀸𑀦𑀁, 𑀧𑀘𑀦𑀘𑀡𑁆𑀟𑀸𑀮𑀸𑀦𑀁, 𑀘𑀭𑀡𑀲𑀸𑀥𑀸𑀭𑀡𑀸𑀦𑀁, 𑀏𑀓𑀚𑁆𑀛𑀸𑀬𑀦𑀧𑀸𑀯𑀘𑀦𑀸𑀦𑀁, 𑀮𑀺𑀗𑁆𑀕𑀯𑀺𑀲𑁂𑀲𑀸𑀦𑀁, 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸𑀦𑀁 𑀤𑀺𑀲𑀸𑀦𑀁, 𑀦𑀤𑀻𑀦𑀜𑁆𑀘 𑀦𑀺𑀘𑁆𑀘𑀁 𑀲𑀫𑀸𑀳𑀸𑀭𑁂𑀓𑀢𑁆𑀢𑀁 𑀪𑀯𑀢𑀺, 𑀢𑀺𑀡𑀭𑀼𑀓𑁆𑀔𑀧𑀲𑀼𑀲𑀓𑀼𑀦𑀥𑀦𑀥𑀜𑁆𑀜𑀩𑁆𑀬𑀜𑁆𑀚𑀦𑀚𑀦𑀧𑁆𑀧𑀤𑀸𑀦𑀁 𑀯𑀸, 𑀅𑀜𑁆𑀜𑁂𑀲𑀫𑀺𑀢𑀭𑀻𑀢𑀭𑀬𑁄𑀕𑁄𑀯.

𑀧𑀸𑀡𑁆𑀬𑀗𑁆𑀕𑀸𑀦𑀁-𑀘𑀓𑁆𑀔𑀼𑀲𑁄𑀢𑀁, 𑀫𑀼𑀔𑀦𑀸𑀲𑀺𑀓𑀁, 𑀳𑀦𑀼𑀕𑀻𑀯𑀁, 𑀙𑀯𑀺𑀫𑀁𑀲𑀮𑁄𑀳𑀺𑀢𑀁, 𑀦𑀸𑀫𑀭𑀽𑀧𑀁, 𑀚𑀭𑀸𑀫𑀭𑀡𑀁. 𑀢𑀼𑀭𑀺𑀬𑀗𑁆𑀕𑀸𑀦𑀁-𑀅𑀮𑀲𑀢𑀸𑀮𑀫𑁆𑀩𑀭𑀁, 𑀫𑀼𑀭𑀚𑀕𑁄𑀫𑀼𑀔𑀁, 𑀲𑀗𑁆𑀔𑀤𑁂𑀡𑁆𑀟𑀺𑀫𑀁, 𑀫𑀤𑁆𑀤𑀯𑀺𑀓𑀧𑀸𑀡𑀯𑀺𑀓𑀁, 𑀕𑀻𑀢𑀯𑀸𑀤𑀺𑀢𑀁, 𑀲𑀫𑁆𑀫𑀢𑀸𑀮𑀁. 𑀬𑁄𑀕𑁆𑀕𑀗𑁆𑀕𑀸𑀦𑀁 𑀨𑀸𑀮𑀧𑀸𑀘𑀦𑀁, 𑀬𑀼𑀕𑀦𑀗𑁆𑀕𑀮𑀁. 𑀲𑁂𑀦𑀗𑁆𑀕𑀸𑀦𑀁-𑀅𑀲𑀺𑀲𑀢𑁆𑀢𑀺𑀢𑁄𑀫𑀭𑀧𑀺𑀡𑁆𑀟𑀁, 𑀅𑀲𑀺𑀘𑀫𑁆𑀫𑀁, 𑀥𑀦𑀼𑀓𑀮𑀸𑀧𑀁, 𑀧𑀳𑀭𑀡𑀸𑀯𑀭𑀡𑀁. 𑀦𑀺𑀘𑁆𑀘𑀯𑁂𑀭𑀻𑀦𑀁-𑀅𑀳𑀺𑀦𑀓𑀼𑀮𑀁, 𑀩𑀻𑀴𑀸𑀮𑀫𑀽𑀲𑀺𑀓𑀁, 𑀓𑀸𑀓𑁄𑀮𑀽𑀓𑀁, 𑀦𑀸𑀕𑀲𑀼𑀧𑀡𑁆𑀡𑀁. 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡 𑀲𑀜𑁆𑀜𑀸𑀦𑀁-𑀏𑀓𑀓𑀤𑀼𑀓𑀁, 𑀤𑀼𑀓𑀢𑀺𑀓𑀁, 𑀢𑀺𑀓𑀘𑀢𑀼𑀓𑁆𑀓𑀁, 𑀘𑀢𑀼𑀓𑁆𑀓𑀧𑀜𑁆𑀘𑀓𑀁, 𑀤𑀲𑁂𑀓𑀸𑀤𑀲𑀓𑀁. 𑀔𑀼𑀤𑁆𑀤𑀚𑀦𑁆𑀢𑀼𑀓𑀸𑀦𑀁 𑀓𑀻𑀝𑀧𑀝𑀗𑁆𑀕𑀁, 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁, 𑀟𑀁𑀲𑀫𑀓𑀲𑀁, 𑀫𑀓𑁆𑀔𑀺𑀓𑀓𑀺𑀧𑀺𑀮𑁆𑀮𑀺𑀓𑀁. 𑀧𑀘𑀦𑀘𑀡𑁆𑀟𑀸𑀮𑀸𑀦𑀁-𑀑𑀭𑀩𑁆𑀪𑀺𑀓𑀲𑀽𑀓𑀭𑀺𑀓𑀁, 𑀲𑀸𑀓𑀼𑀦𑁆𑀢𑀺 𑀓𑀫𑀸𑀕𑀯𑀺𑀓𑀁, 𑀲𑀧𑀸𑀓𑀘𑀡𑁆𑀟𑀸𑀮𑀁, 𑀯𑁂𑀦𑀭𑀣𑀓𑀸𑀭𑀁, 𑀧𑀼𑀓𑁆𑀓𑀼𑀲 𑀙𑀯𑀟𑀸𑀳𑀓𑀁. 𑀘𑀭𑀡𑀲𑀸𑀥𑀸𑀭𑀡𑀸𑀦𑀁-𑀅𑀢𑀺𑀲𑀪𑀸𑀭𑀤𑁆𑀯𑀸𑀚𑀁, 𑀓𑀞𑀓𑀮𑀸𑀧𑀁, 𑀲𑀻𑀮𑀧𑀜𑁆𑀜𑀸𑀡𑀁, 𑀲𑀫𑀣𑀯𑀺𑀧𑀲𑁆𑀲𑀦𑀁, 𑀯𑀺𑀚𑁆𑀚𑀸𑀘𑀭𑀡𑀁. 𑀏𑀓𑀚𑁆𑀛𑀸𑀬𑀦𑀧𑀸𑀯𑀘𑀦𑀸𑀦𑀁 𑀤𑀻𑀖𑀫𑀚𑁆𑀛𑀺𑀫𑀁, 𑀏𑀓𑀼𑀢𑁆𑀢𑀭𑀲𑀁𑀬𑀼𑀢𑁆𑀢𑀓𑀁, 𑀔𑀦𑁆𑀥𑀓𑀯𑀺𑀪𑀗𑁆𑀕𑀁. 𑀮𑀺𑀗𑁆𑀕𑀯𑀺𑀲𑁂𑀲𑀸𑀦𑀁-𑀇𑀢𑁆𑀣𑀺𑀧𑀼𑀔𑀁, 𑀤𑀸𑀲𑀺𑀤𑀸𑀲𑀁, 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁, ‘𑀮𑀸𑀪𑀻 𑀳𑁄𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸- 𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺𑀧𑀺 𑀤𑀺𑀲𑁆𑀲𑀢𑀺. 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀳𑀻𑀦𑀧𑁆𑀧𑀡𑀻𑀢𑀁, 𑀓𑀡𑁆𑀳𑀲𑀼𑀓𑁆𑀓𑀁, 𑀙𑁂𑀓𑀧𑀸𑀧𑀓𑀁. 𑀤𑀺𑀲𑀸𑀦𑀁 𑀧𑀼𑀩𑁆𑀩𑀸𑀧𑀭𑀁, 𑀤𑀓𑁆𑀔𑀺𑀡𑀼𑀢𑁆𑀢𑀭𑀁, 𑀧𑀼𑀩𑁆𑀩𑀤𑀓𑁆𑀔𑀺𑀡𑀁, 𑀧𑀼𑀩𑁆𑀩𑀼𑀢𑁆𑀢𑀭𑀁, 𑀅𑀥𑀭𑀼𑀢𑁆𑀢𑀭𑀁, 𑀅𑀧𑀭𑀤𑀓𑁆𑀔𑀺𑀡𑀁, 𑀅𑀧𑀭𑀼𑀢𑁆𑀢𑀭𑀁. 𑀦𑀤𑀻𑀦𑀁-𑀕𑀗𑁆𑀕𑀸𑀬𑀫𑀼𑀦𑀁, 𑀫𑀳𑀺𑀲𑀭𑀪𑀼.

𑀢𑀺𑀡𑀯𑀺𑀲𑁂𑀲𑀸𑀦𑀁-𑀓𑀸𑀲𑀓𑀼𑀲𑀁 𑀓𑀸𑀲𑀓𑀼𑀲𑀸, 𑀉𑀲𑀻𑀭𑀩𑀻𑀭𑀡𑀁 𑀉𑀲𑀻𑀭𑀩𑀻𑀭𑀡𑀸, 𑀫𑀼𑀜𑁆𑀚𑀧𑀩𑁆𑀩𑀚𑀁 𑀫𑀼𑀜𑁆𑀚𑀧𑀩𑁆𑀩𑀚𑀁 𑀫𑀼𑀜𑁆𑀚𑀧𑀩𑁆𑀩𑀚𑀸. 𑀭𑀼𑀓𑁆𑀔𑀯𑀺𑀲𑁂𑀲𑀸𑀦𑀁 𑀔𑀤𑀺𑀭𑀧𑀮𑀸𑀲𑀁 𑀔𑀤𑀺𑀭𑀧𑀮𑀸𑀲𑀸, 𑀯𑁄𑀲𑁆𑀲𑀓𑀡𑁆𑀡𑀁 𑀥𑀯𑀸𑀲𑁆𑀲𑀓𑀡𑁆𑀡𑀸, 𑀧𑀺𑀮𑀓𑁆𑀔𑀦𑀺𑀕𑁆𑀭𑁄𑀥𑀁 𑀧𑀺𑀮𑀓𑁆𑀔𑀦𑀺𑀕𑁆𑀭𑁄𑀥𑀸, 𑀅𑀲𑁆𑀲𑀢𑁆𑀣𑀓𑀧𑀺𑀢𑁆𑀣𑀦𑀁 𑀅𑀲𑁆𑀲𑀢𑁆𑀣𑀓𑀧𑀺𑀢𑁆𑀣𑀦𑀸, 𑀲𑀸𑀓𑀲𑀸𑀮𑀁 𑀲𑀸𑀓𑀲𑀸𑀮𑀸. 𑀧𑀲𑀼𑀯𑀺𑀲𑁂𑀲𑀸𑀦𑀁-𑀕𑀚𑀕𑀯𑀚𑀁 𑀕𑀚𑀕𑀯𑀚𑀸, 𑀕𑁄𑀫𑀳𑀺𑀲𑀁 𑀕𑁄𑀫𑀳𑀺𑀲𑀸, 𑀏𑀡𑁂𑀬𑁆𑀬𑀕𑁄𑀫𑀳𑀺𑀲𑀁 𑀏𑀡𑁂𑀬𑁆𑀬𑀕𑁄𑀫𑀳𑀺𑀲𑀸, 𑀏𑀡𑁂𑀬𑁆𑀬𑀯𑀭𑀸𑀳𑀁 𑀏𑀡𑁂𑀬𑁆𑀬𑀯𑀭𑀸𑀳𑀸, 𑀅𑀚𑁂𑀴𑀓𑀁 𑀅𑀚𑁂𑀴𑀓𑀸, 𑀓𑀼𑀓𑁆𑀓𑀼𑀭𑀲𑀽𑀓𑀭𑀁 𑀓𑀼𑀓𑁆𑀓𑀼𑀭𑀲𑀽𑀓𑀭𑀸, 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀁 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸. 𑀲𑀓𑀼𑀦𑀯𑀺𑀲𑁂𑀲𑀸𑀦𑀁-𑀳𑀁𑀲𑀩𑀮𑀸𑀯𑀁 𑀳𑀁𑀲𑀩𑀮𑀸𑀯𑀸, 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀁 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀸, 𑀩𑀓𑀩𑀮𑀸𑀓𑀁 𑀩𑀓𑀩𑀮𑀸𑀓𑀸. 𑀥𑀦𑀸𑀦𑀁-𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸, 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀁 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀸, 𑀚𑀸𑀢𑀭𑀽𑀧𑀭𑀚𑀢𑀁 𑀚𑀸𑀢𑀭𑀽𑀧𑀭𑀚𑀢𑀸. 𑀥𑀜𑁆𑀜𑀸𑀦𑀁-𑀲𑀸𑀮𑀺𑀬𑀯𑀓𑀁 𑀲𑀸𑀮𑀺𑀬𑀯𑀓𑀸, 𑀢𑀺𑀮𑀫𑀼𑀕𑁆𑀕𑀫𑀸𑀲𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀸, 𑀦𑀺𑀧𑁆𑀨𑀸𑀯𑀓𑀼𑀮𑀢𑁆𑀣𑀁 𑀦𑀺𑀧𑁆𑀨𑀸𑀯𑀓𑀼𑀮𑀢𑁆𑀣𑀸. 𑀩𑁆𑀬𑀜𑁆𑀚𑀦𑀸𑀦𑀁-𑀲𑀸𑀓𑀲𑀼𑀯𑀁 𑀲𑀸𑀓𑀲𑀼𑀯𑀸, 𑀕𑀩𑁆𑀬𑀫𑀸𑀳𑀺𑀲𑀁 𑀕𑀩𑁆𑀬𑀫𑀸𑀳𑀺𑀲𑀸, 𑀏𑀡𑁂𑀬𑁆𑀬𑀯𑀸𑀭𑀸𑀳𑀁 𑀏𑀡𑁂𑀬𑁆𑀬𑀯𑀸𑀭𑀸𑀳𑀸, 𑀫𑀺𑀕𑀫𑀸𑀬𑀽𑀭𑀁 𑀫𑀺𑀕𑀫𑀸𑀬𑀽𑀭𑀸. 𑀚𑀦𑀧𑀤𑀸𑀦𑀁-𑀓𑀸𑀲𑀺𑀓𑁄𑀲𑀮𑀁 𑀓𑀸𑀲𑀺𑀓𑁄𑀲𑀮𑀸, 𑀯𑀚𑁆𑀚𑀺𑀫𑀮𑁆𑀮𑀁 𑀯𑀚𑁆𑀚𑀺𑀫𑀮𑁆𑀮𑀸, 𑀘𑁂𑀢𑀺𑀯𑀁𑀲𑀁 𑀘𑁂𑀢𑀺𑀯𑀁𑀲𑀸, 𑀫𑀘𑁆𑀙𑀲𑀽𑀭𑀲𑁂𑀦𑀁 𑀫𑀘𑁆𑀙𑀲𑀽𑀭𑀲𑁂𑀦𑀸, 𑀓𑀼𑀭𑀼𑀧𑀜𑁆𑀘𑀸𑀮𑀁 𑀓𑀼𑀭𑀼𑀧𑀜𑁆𑀘𑀸𑀮𑀸. 𑀇𑀢𑀭𑀻𑀢𑀭𑀬𑁄𑀕𑁄 𑀬𑀣𑀸-𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀸𑀢𑀸𑀧𑀺𑀢𑀭𑁄 𑀇𑀘𑁆𑀘𑀸𑀤𑀺.

𑀏𑀢𑀲𑁆𑀫𑀺𑀁 𑀏𑀓𑀢𑁆𑀣𑀻𑀪𑀸𑀯𑀓𑀡𑁆𑀟𑁂 𑀬𑀁 𑀯𑀼𑀢𑁆𑀢𑀁 𑀧𑀼𑀩𑁆𑀩𑀁, 𑀢𑀤𑁂𑀯 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺 𑀓𑀫𑀸𑀢𑀺𑀓𑁆𑀓𑀫𑁂 𑀧𑀬𑁄𑀚𑀦𑀸𑀪𑀸𑀯𑀸. 𑀓𑁆𑀯𑀘𑀺 𑀯𑀺𑀧𑀮𑁆𑀮𑀸𑀲𑁄𑀧𑀺 𑀳𑁄𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀢𑁄, 𑀤𑀦𑁆𑀢𑀸𑀦𑀁 𑀭𑀸𑀚𑀸 𑀭𑀸𑀚𑀤𑀦𑁆𑀢𑁄, 𑀓𑀢𑁆𑀣𑀘𑀺 𑀓𑀫𑀁 𑀧𑀘𑁆𑀘𑀸𑀦𑀸𑀤𑀭𑀸 𑀧𑀼𑀩𑁆𑀩𑀓𑀸𑀮𑀲𑁆𑀲𑀸𑀧𑀺 𑀧𑀭𑀦𑀺𑀧𑀸𑀢𑁄, 𑀮𑀺𑀢𑁆𑀢𑀯𑀸𑀲𑀺𑀢𑁄, 𑀦𑀕𑁆𑀕𑀫𑀼𑀲𑀺𑀢𑁄, 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁄, 𑀪𑀝𑁆𑀞𑀮𑀼𑀜𑁆𑀘𑀺𑀢𑁄. 𑀘𑀢𑁆𑀣𑁂 𑀬𑀤𑁂𑀓𑀢𑁆𑀣𑀁 𑀢𑀢𑁆𑀣 𑀓𑁂𑀘𑀺 𑀧𑀼𑀩𑁆𑀩𑀧𑀤𑀁 𑀩𑀳𑀼𑀥𑀸 𑀦𑀺𑀬𑀫𑁂𑀦𑁆𑀢𑀺, 𑀢𑀤𑀺𑀳 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀸𑀦 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁦. 𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓𑀁.

𑀘𑀢𑁆𑀣𑁂 𑀲𑀫𑀸𑀳𑀸𑀭𑁂 𑀬𑀤𑁂𑀓𑀢𑁆𑀣𑀁, 𑀢𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀪𑀯𑀢𑀺, 𑀢𑀣𑀸𑀘𑁂𑀯𑁄𑀤𑀸𑀳𑀝𑀁, 𑀓𑀢𑁆𑀣𑀘𑀺 𑀦 𑀳𑁄𑀢𑀺 ‘𑀲𑀪𑀸𑀧𑀭𑀺𑀲𑀸𑀬𑀸’𑀢𑀺 𑀜𑀸𑀧𑀓𑀸, 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑁄, 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁.

𑁨𑁧. 𑀲𑀗𑁆𑀔𑁆𑀬𑀸𑀤𑀺.

𑀏𑀓𑀢𑁆𑀣𑁂 𑀲𑀫𑀸𑀳𑀸𑀭𑁂 𑀲𑀗𑁆𑀔𑁆𑀬𑀸𑀤𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀪𑀯𑀢𑀺, 𑀧𑀜𑁆𑀘𑀕𑀯𑀁, 𑀘𑀢𑀼𑀧𑁆𑀧𑀣𑀁, 𑀲𑀫𑀸𑀳𑀸𑀭𑀲𑁆𑀲𑁂𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯 𑀳𑁄𑀢𑀺, 𑀲𑀫𑀸𑀳𑀸𑀭𑁂𑀢𑁆𑀯𑁂𑀯 𑀧𑀜𑁆𑀘𑀓𑀸𑀧𑀸𑀮𑁄 𑀧𑀽𑀯𑁄, 𑀢𑀺𑀧𑀼𑀢𑁆𑀢𑁄.

𑁨𑁨. 𑀓𑁆𑀯𑀘𑁂𑀓𑀢𑁆𑀢𑀜𑁆𑀘 𑀙𑀝𑁆𑀞𑀺𑀬𑀸.

𑀙𑀝𑁆𑀞𑀺𑀬𑁂𑀓𑀢𑁆𑀣𑁂 𑀓𑁆𑀯𑀘𑀺 𑀦𑀧𑀼𑀁𑀲𑀓𑀢𑁆𑀢𑀁 𑀳𑁄𑀢𑁂𑀓𑀢𑁆𑀣𑀜𑁆𑀘, 𑀲𑀮𑀪𑀸𑀦𑀁 𑀙𑀸𑀬𑀸 𑀲𑀮𑀪𑀘𑁆𑀙𑀸𑀬𑀁, 𑀏𑀯𑀁 𑀲𑀓𑀼𑀦𑁆𑀢𑀸𑀦𑀁 𑀙𑀸𑀬𑀸 𑀲𑀓𑀼𑀦𑁆𑀢𑀘𑁆𑀙𑀸𑀬𑀁, 𑀧𑀸𑀲𑀸𑀤𑀘𑁆𑀙𑀸𑀬𑀁 𑀧𑀸𑀲𑀸𑀤𑀘𑁆𑀙𑀸𑀬𑀸, 𑀖𑀭𑀘𑁆𑀙𑀸𑀬𑀁 𑀖𑀭𑀘𑁆𑀙𑀸𑀬𑀸, 𑀅𑀫𑀦𑀼𑀲𑁆𑀲𑀲𑀪𑀸𑀬 𑀦𑀧𑀼𑀁𑀲𑀓𑁂𑀓𑀢𑁆𑀢𑀁 𑀪𑀯𑀢𑀺 𑀩𑁆𑀭𑀳𑁆𑀫𑀲𑀪𑀁, 𑀤𑁂𑀯𑀲𑀪𑀁, 𑀇𑀦𑁆𑀤𑀲𑀪𑀁, 𑀬𑀓𑁆𑀔𑀲𑀪𑀁, 𑀲𑀭𑀪𑀲𑀪𑀁, 𑀫𑀦𑀼𑀲𑁆𑀲𑀲𑀪𑀸𑀬𑀁 𑀧𑀦 𑀔𑀢𑁆𑀢𑀺𑀬𑀲𑀪𑀸, 𑀭𑀸𑀚𑀲𑀪𑀸 𑀇𑀘𑁆𑀘𑁂𑀯𑀫𑀸𑀤𑀺, 𑀓𑁆𑀯𑀘𑀻𑀢𑀺 𑀓𑀺𑀁 𑀭𑀸𑀚𑀧𑀼𑀭𑀺𑀲𑁄.

𑁨𑁩. 𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀭𑀲𑁆𑀲𑁄 𑀳𑁄𑀢𑀺 𑀲𑁆𑀬𑀸𑀤𑀻𑀲𑀼. 𑀲𑀮𑀪𑀘𑁆𑀙𑀸𑀬𑀁, 𑀲𑁆𑀬𑀸𑀤𑀻𑀲𑀽𑀢𑀺 𑀓𑀺𑀁? 𑀲𑀮𑀪𑀘𑁆𑀙𑀸𑀬𑁂.

𑁨𑁪. 𑀖𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑁆𑀧𑀥𑀸𑀦𑀲𑁆𑀲.

𑀅𑀦𑁆𑀢𑀪𑀽𑀢𑀲𑁆𑀲 𑀅𑀧𑁆𑀧𑀥𑀸𑀦𑀲𑁆𑀲 𑀖𑀧𑀲𑁆𑀲 𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄 𑀳𑁄𑀢𑀺. 𑀩𑀳𑀼𑀫𑀸𑀮𑁄 𑀧𑁄𑀲𑁄, 𑀦𑀺𑀓𑁆𑀓𑁄𑀲𑀫𑁆𑀩𑀺, 𑀅𑀢𑀺𑀯𑀸𑀫𑁄𑀭𑀼, 𑀅𑀦𑁆𑀢𑀲𑁆𑀲𑀸𑀢𑀺 𑀓𑀺𑀁? 𑀭𑀸𑀚𑀸 𑀓𑀜𑁆𑀜𑀸𑀧𑀺𑀬𑁄, 𑀅𑀧𑁆𑀧𑀥𑀸𑀦𑀲𑁆𑀲𑀸𑀢𑀺 𑀓𑀺𑀁? 𑀭𑀸𑀚𑀓𑀼𑀫𑀸𑀭𑀻 𑀩𑁆𑀭𑀳𑁆𑀫𑀩𑀦𑁆𑀥𑀽.

𑁨𑁫. 𑀕𑁄𑀲𑁆𑀲𑀼.

𑀅𑀦𑁆𑀢𑀪𑀽𑀢𑀲𑁆𑀲 𑀅𑀧𑁆𑀧𑀥𑀸𑀦𑀲𑁆𑀲 𑀕𑁄𑀲𑁆𑀲 𑀲𑁆𑀬𑀸𑀤𑀻𑀲𑀼 𑀉 𑀳𑁄𑀢𑀺. 𑀘𑀺𑀢𑁆𑀢𑀕𑀼, 𑀅𑀧𑁆𑀧𑀥𑀸𑀦𑀲𑁆𑀲𑀸𑀢𑁆𑀯𑁂𑀯? 𑀲𑀼𑀕𑁄, 𑀅𑀦𑁆𑀢𑀲𑁆𑀲𑀸𑀢𑁆𑀯𑁂𑀯? 𑀕𑁄𑀓𑀼𑀮𑀁.

𑁨𑁬. 𑀇𑀢𑁆𑀣𑀺𑀬𑀫𑀢𑁆𑀯𑀸.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀢𑁄 𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸 𑀆𑀧𑀘𑁆𑀘𑀬𑁄 𑀳𑁄𑀢𑀺. 𑀥𑀫𑁆𑀫𑀤𑀺𑀦𑁆𑀦𑀸.

𑁩𑁭. 𑀦𑀤𑀸𑀤𑀺𑀢𑁄 𑀯𑀻.

𑀦𑀤𑀸𑀤𑀻𑀳𑀺 𑀇𑀢𑁆𑀣𑀺𑀬𑀁 𑀯𑀻𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀤𑀻, 𑀫𑀳𑀻, 𑀓𑀼𑀫𑀸𑀭𑀻, 𑀢𑀭𑀼𑀡𑀻, 𑀯𑀸𑀭𑀼𑀡𑀻, 𑀕𑁄𑀢𑀫𑀻. (𑁧𑁪) ‘‘𑀕𑁄𑀢𑁄𑀯𑀸’’ 𑀕𑀸𑀯𑀻 𑀕𑁄, 𑀆𑀓𑀢𑀺𑀕𑀡𑁄-𑀬𑀁, 𑀓𑁄𑀭𑁄 ‘‘𑀦𑁆𑀢𑀦𑁆𑀢𑀽𑀦𑀁 𑀯𑀻𑀫𑁆𑀳𑀺 𑀢𑁄 𑀯𑀸’’ (𑁩-𑁩𑁬) 𑀢𑀺 𑀯𑀺𑀲𑁂𑀲𑀦𑀢𑁆𑀣𑁄.

𑁨𑁮. 𑀬𑀓𑁆𑀔𑀸𑀤𑀺𑀢𑀺𑀦𑀻 𑀘.

𑀬𑀓𑁆𑀔𑀸𑀤𑀺𑀢𑁄 𑀇𑀢𑁆𑀣𑀺𑀬𑀁 𑀇𑀦𑀻 𑀳𑁄𑀢𑀺 𑀯𑀻𑀘. 𑀬𑀓𑁆𑀔𑀺𑀦𑀻 𑀬𑀓𑁆𑀔𑀻, 𑀦𑀸𑀕𑀺𑀦𑀻 𑀦𑀸𑀕𑀻, 𑀲𑀻𑀳𑀺𑀦𑀻 𑀲𑀻𑀳𑀻.

𑁨𑁬. 𑀆𑀭𑀸𑀫𑀺𑀓𑀸𑀤𑀻𑀳𑀺.

𑀆𑀭𑀸𑀫𑀺𑀓𑀸𑀤𑀺𑀢𑁄 𑀇𑀦𑀻 𑀳𑁄𑀢𑀺𑀢𑁆𑀣𑀺𑀬𑀁. 𑀆𑀭𑀸𑀫𑀺𑀓𑀺𑀦𑀻, 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻, 𑀭𑀸𑀚𑀺𑀦𑀻 (𑁧𑁫) ‘‘𑀲𑀜𑁆𑀜𑀸𑀬𑀁 𑀫𑀸𑀦𑀼𑀲𑁄’’ 𑀫𑀸𑀦𑀼𑀲𑀺𑀦𑀻, 𑀅𑀜𑁆𑀜𑀢𑁆𑀭 𑀫𑀸𑀦𑀼𑀲𑀻.

𑁩𑁦. 𑀬𑀼𑀯𑀡𑁆𑀡𑁂𑀳𑀺 𑀦𑀻.

𑀇𑀢𑁆𑀣𑀺𑀬𑀫𑀺𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑁂𑀳𑀺 𑀦𑀻 𑀳𑁄𑀢𑀺 𑀩𑀳𑀼𑀮𑀁. 𑀲𑀤𑀸𑀧𑀬𑀢𑀧𑀸𑀡𑀺𑀦𑀻, 𑀤𑀡𑁆𑀟𑀺𑀦𑀻, 𑀪𑀺𑀓𑁆𑀔𑀼𑀦𑀻, 𑀔𑀢𑁆𑀢𑀩𑀦𑁆𑀥𑀼𑀦𑀻, 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀻, 𑀫𑀸𑀢𑀼𑀆𑀤𑀺𑀢𑁄 𑀓𑀲𑁆𑀫𑀸 𑀦 𑀳𑁄𑀢𑀺? 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀁 𑀯𑀺𑀦𑀸𑀧𑀺 𑀇𑀢𑁆𑀣𑀢𑁆𑀢𑀸𑀪𑀺𑀥𑀸𑀦𑀢𑁄.

𑁩𑁧. 𑀓𑁆𑀢𑀺𑀫𑁆𑀳𑀸𑀜𑁆𑀜𑀢𑁆𑀣𑁂.

𑀓𑁆𑀢𑀺𑀫𑁆𑀳𑀸𑀜𑁆𑀜𑀢𑁆𑀣𑁂𑀬𑁂𑀯 𑀇𑀢𑁆𑀣𑀺𑀬𑀁 𑀦𑀻 𑀳𑁄𑀢𑀺 𑀩𑀳𑀼𑀮𑀁. 𑀲𑀸𑀳𑀁 𑀅𑀳𑀺𑀁 𑀲𑀸𑀭𑀢𑀺𑀦𑀻, 𑀢𑀲𑁆𑀲𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑀺𑀬𑀸, 𑀲𑀸 𑀕𑀸𑀯𑀻 𑀯𑀘𑁆𑀙𑀕𑀺𑀤𑁆𑀥𑀺𑀦𑀻, 𑀅𑀜𑁆𑀜𑀢𑁆𑀣𑁂𑀢𑀺 𑀓𑀺𑀁? 𑀥𑀫𑁆𑀫𑀭𑀢𑀺.

𑁩𑁨. 𑀖𑀭𑀡𑁆𑀬𑀸𑀤𑀬𑁄.

𑀖𑀭𑀡𑀺𑀧𑁆𑀧𑀪𑀼𑀢𑀬𑁄 𑀦𑀻𑀧𑁆𑀧𑀘𑁆𑀘𑀦𑁆𑀢𑀸𑀲𑀸𑀥𑀯𑁄 𑀪𑀯𑀦𑁆𑀢𑀺. 𑀖𑀭𑀡𑀻, 𑀧𑁄𑀓𑁆𑀔𑀭𑀡𑀻, 𑀈𑀲𑁆𑀲-𑀢𑁆𑀢𑀁 𑀦𑀺𑀧𑀸𑀢𑀦𑀸, (𑁧𑁬) ‘‘𑀆𑀘𑀭𑀺𑀬𑀸 𑀯𑀸 𑀬-𑀮𑁄𑀧𑁄 𑀘’’ 𑀆𑀘𑀭𑀺𑀦𑀻, 𑀆𑀘𑀭𑀺𑀬𑀸.

𑁩𑁩. 𑀫𑀸𑀢𑀼𑀮𑀸𑀤𑀺𑀢𑁆𑀯𑀸𑀦𑀻 𑀪𑀭𑀺𑀬𑀸𑀬𑀁.

𑀫𑀸𑀢𑀼𑀮𑀸𑀤𑀺𑀢𑁄 𑀪𑀭𑀺𑀬𑀸𑀬𑀫𑀸𑀦𑀻 𑀳𑁄𑀢𑀺. 𑀫𑀸𑀢𑀼𑀮𑀸𑀦𑀻, 𑀯𑀸𑀭𑀼𑀡𑀸𑀦𑀻, 𑀕𑀳𑀧𑀢𑀸𑀦𑀻, 𑀆𑀘𑀭𑀺𑀬𑀸𑀦𑀻, (𑁧𑁭) ‘‘𑀅𑀪𑀭𑀺𑀬𑀸𑀬𑀁 𑀔𑀢𑁆𑀢𑀺𑀬𑀸 𑀯𑀸’’ 𑀔𑀢𑁆𑀢𑀺𑀬𑀸𑀦𑀻 𑀔𑀢𑁆𑀢𑀺𑀬𑀸, 𑀦𑀤𑀸𑀤𑀺𑀧𑀸𑀞𑀸 𑀪𑀭𑀺𑀬𑀸𑀬𑀦𑁆𑀢𑀼 𑀔𑀢𑁆𑀢𑀺𑀬𑀻.

𑁩𑁪. 𑀉𑀧𑀫𑀸𑀲𑀁𑀳𑀺𑀢 𑀲𑀳𑀺𑀢 𑀲𑀜𑁆𑀜𑀢 𑀲𑀳 𑀲𑀨𑀯𑀸𑀫 𑀮𑀓𑁆𑀔𑀡𑀸𑀤𑀺𑀢𑀽𑀭𑀼𑀢𑀽.

𑀊𑀭𑀼𑀲𑀤𑁆𑀤𑀸 𑀉𑀧𑀫𑀸𑀦𑀸𑀤𑀺𑀧𑀼𑀩𑁆𑀩𑀸 𑀇𑀢𑁆𑀢𑀺𑀬𑀫𑀽 𑀳𑁄𑀢𑀺. 𑀓𑀭𑀪𑁄𑀭𑀽, 𑀲𑀁𑀳𑀺𑀢𑁄𑀭𑀽, 𑀲𑀳𑀺𑀢𑁄𑀭𑀽, 𑀲𑀜𑁆𑀜𑀢𑁄𑀭𑀽, 𑀲𑀳𑁄𑀭𑀽, 𑀲𑀨𑁄𑀭𑀽, 𑀯𑀸𑀫𑁄𑀭𑀽, 𑀮𑀓𑁆𑀔𑀡𑁄𑀭𑀽, 𑀊𑀢𑀺𑀬𑁄𑀕𑀯𑀺𑀪𑀸𑀕𑀸 𑀊 𑀩𑁆𑀭𑀳𑁆𑀫𑀩𑀦𑁆𑀥𑀽.

𑁩𑁫. 𑀬𑀼𑀯𑀸 𑀢𑀺.

𑀬𑀼𑀯𑀲𑀤𑁆𑀤𑀢𑁄 𑀢𑀺 𑀳𑁄𑀢𑀺𑀢𑁆𑀣𑀺𑀬𑀁. 𑀬𑀼𑀯𑀢𑀺.

𑁩𑁬. 𑀦𑁆𑀢𑀦𑁆𑀢𑀽𑀦𑀁 𑀯𑀻𑀫𑁆𑀳𑀺𑀢𑁄 𑀯𑀸.

𑀯𑀻𑀫𑁆𑀳𑀺 𑀦𑁆𑀢𑀦𑁆𑀢𑀽𑀦𑀁 𑀢𑁄 𑀯𑀸 𑀳𑁄𑀢𑀺. 𑀕𑀘𑁆𑀙𑀢𑀻 𑀕𑀘𑁆𑀙𑀦𑁆𑀢𑀻, 𑀲𑀻𑀮𑀯𑀢𑀻 𑀲𑀻𑀮𑀯𑀦𑁆𑀢𑀻.

𑁩𑁭. 𑀪𑀯𑀢𑁄 𑀪𑁄𑀢𑁄.

𑀯𑀻𑀫𑁆𑀳𑀺 𑀪𑀯𑀢𑁄 𑀪𑁄𑀢𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀪𑁄𑀢𑀻 𑀪𑀯𑀦𑁆𑀢𑀻.

𑁩𑁮. 𑀕𑁄𑀲𑁆𑀲𑀸𑀯𑀗.

𑀕𑁄𑀲𑀤𑁆𑀤𑀲𑁆𑀲 𑀯𑀻𑀫𑁆𑀳𑀸𑀯𑀗 𑀳𑁄𑀢𑀺. 𑀕𑀸𑀯𑀻.

𑁩𑁯. 𑀧𑀼𑀣𑀼𑀲𑁆𑀲 𑀧𑀣𑀯𑀧𑀼𑀣𑀯𑀸.

𑀯𑀻𑀫𑁆𑀳𑀺 𑀧𑀼𑀣𑀼𑀲𑁆𑀲 𑀧𑀣𑀯𑀧𑀼𑀣𑀯𑀸 𑀳𑁄𑀦𑁆𑀢𑀺. 𑀧𑀣𑀯𑀻, 𑀧𑀼𑀣𑀯𑀻, 𑀞𑁂 𑀧𑀣𑀯𑀻.

𑁪𑁦. 𑀲𑀫𑀸𑀲𑀦𑁆𑀢𑁆𑀯.

𑀲𑀫𑀸𑀲𑀦𑁆𑀢𑁆𑀯 𑀇𑀢𑀺 𑀘𑀸𑀥𑀺𑀓𑀭𑀻𑀬𑀢𑀺.

𑁪𑁧. 𑀧𑀸𑀧𑀸𑀤𑀻𑀳𑀺 𑀪𑀽𑀫𑀺𑀬𑀸.

𑀧𑀸𑀧𑀸𑀤𑀻𑀳𑀻 𑀧𑀭𑀸 𑀬𑀸 𑀪𑀽𑀫𑀺 𑀢𑀲𑁆𑀲𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺. 𑀧𑀸𑀧𑀪𑀽𑀫𑀁, 𑀚𑀸𑀢𑀺𑀪𑀽𑀫𑀁.

𑁪𑁨. 𑀲𑀗𑁆𑀔𑁆𑀬𑀸𑀳𑀺.

𑀲𑀗𑁆𑀔𑁆𑀬𑀸𑀳𑀺 𑀧𑀭𑀸 𑀬𑀸 𑀪𑀽𑀫𑀺 𑀢𑀲𑁆𑀲𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺. 𑀤𑁆𑀯𑀺𑀪𑀽𑀫𑀁, 𑀢𑀺𑀪𑀽𑀫𑀁.

𑁪𑁩. 𑀦𑀤𑀻𑀕𑁄𑀤𑀸𑀯𑀭𑀻𑀦𑀁.

𑀲𑀗𑁆𑀔𑁆𑀬𑀸𑀳𑀺 𑀧𑀭𑀸𑀲𑀁 𑀦𑀤𑀻𑀕𑁄𑀤𑀸𑀯𑀭𑀻𑀦𑀁 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺, 𑀧𑀜𑁆𑀘𑀦𑀤𑀁, 𑀲𑀢𑁆𑀢𑀕𑁄𑀤𑀸𑀯𑀭𑀁, 𑀲𑀗𑁆𑀔𑁆𑀬𑀸𑀳𑀺𑀢𑁆𑀯𑁂𑀯? 𑀫𑀳𑀸𑀦𑀤𑀻, 𑀦𑀤𑀻𑀕𑁄𑀤𑀸𑀯𑀭𑀻𑀦𑀦𑁆𑀢𑀺 𑀓𑀺𑀁? 𑀤𑀲𑀺𑀢𑁆𑀣𑀺.

𑁪𑁪. 𑀅𑀲𑀗𑁆𑀔𑁆𑀬𑁂𑀳𑀺 𑀘𑀸𑀗𑁆𑀕𑀼𑀮𑁆𑀬𑀸𑀦𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀼.

𑀅𑀲𑀗𑁆𑀔𑁆𑀬𑁂𑀳𑀺 𑀲𑀗𑁆𑀔𑁆𑀬𑀸𑀳𑀺 𑀘 𑀧𑀭𑀸𑀬 𑀅𑀗𑁆𑀕𑀼𑀮𑁆𑀬𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺 𑀦𑁄 𑀘𑁂 𑀅𑀜𑁆𑀜𑀧𑀤𑀢𑁆𑀣𑁂 𑀅𑀲𑀗𑁆𑀔𑁆𑀬𑀢𑁆𑀣𑁂 𑀘 𑀲𑀫𑀸𑀲𑁄 𑀯𑀢𑁆𑀢𑀢𑁂. 𑀦𑀺𑀕𑁆𑀕𑀢𑀫𑀗𑁆𑀕𑀼𑀮𑀻𑀳𑀺 𑀦𑀺𑀭𑀗𑁆𑀕𑀼𑀮𑀁, 𑀅𑀘𑁆𑀘𑀗𑁆𑀕𑀼𑀮𑀁, 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀲𑀫𑀸𑀳𑀝𑀸 𑀤𑁆𑀯𑀗𑁆𑀕𑀼𑀮𑀁, 𑀅𑀦𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀽𑀢𑀺 𑀓𑀺𑀁? 𑀧𑀜𑁆𑀘𑀗𑁆𑀕𑀼𑀮𑀺 𑀳𑀢𑁆𑀣𑁄, 𑀉𑀧𑀗𑁆𑀕𑀼𑀮𑀺, 𑀓𑀣𑀁 ‘𑀤𑁆𑀯𑁂 𑀅𑀗𑁆𑀕𑀼𑀮𑀻𑀫𑀸𑀦𑀫𑀲𑁆𑀲𑀸𑀢𑀺 𑀤𑁆𑀯𑀗𑁆𑀕𑀼𑀮’𑀦𑁆𑀢𑀺? 𑀦𑀸𑀢𑁆𑀭 𑀲𑀫𑀸𑀲𑁄𑀜𑁆𑀜𑀧𑀤𑀢𑁆𑀣𑁂 𑀯𑀺𑀳𑀺𑀢𑁄 𑀫𑀢𑁆𑀢𑀸𑀤𑀻𑀦𑀁 𑀮𑁄𑀧𑁂 𑀓𑀢𑁂 𑀢𑀢𑁆𑀣 𑀯𑀢𑁆𑀢𑀢𑁂. 𑀅𑀗𑁆𑀕𑀼𑀮𑀲𑀤𑁆𑀤𑁄 𑀯𑀸 𑀧𑀫𑀸𑀡𑀯𑀸𑀘𑀺 𑀲𑀤𑁆𑀤𑀦𑁆𑀢𑀭𑀁, 𑀬𑀣𑀸 ‘𑀲𑁂𑀦𑀗𑁆𑀕𑀼𑀮𑀧𑁆𑀧𑀫𑀸𑀡𑁂𑀦 𑀅𑀗𑁆𑀕𑀼𑀮𑀸𑀦𑀁 𑀲𑀢𑀁 𑀧𑀼𑀡𑁆𑀡𑀁 𑀘𑀢𑀼𑀤𑁆𑀤𑀲 𑀯𑀸 𑀅𑀗𑁆𑀕𑀼𑀮𑀸𑀦𑀻’𑀢𑀺.

𑁪𑁫. 𑀤𑀻𑀖𑀸𑀳𑁄𑀯𑀲𑁆𑀲𑁂𑀓𑀤𑁂𑀲𑁂𑀳𑀺 𑀘 𑀭𑀢𑁆𑀢𑁆𑀬𑀸.

𑀤𑀻𑀖𑀸𑀤𑀻𑀳𑀺 𑀅𑀲𑀗𑁆𑀔𑁆𑀬𑁂𑀳𑀺 𑀲𑀗𑁆𑀔𑁆𑀬𑀸𑀳𑀺 𑀘 𑀧𑀭𑀫𑀲𑁆𑀫𑀸 𑀭𑀢𑁆𑀢𑀺𑀬𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺. 𑀤𑀻𑀖𑀭𑀢𑁆𑀢𑀁, 𑀅𑀳𑁄𑀭𑀢𑁆𑀢𑀁 (𑀢𑁆𑀢𑁄), 𑀯𑀲𑁆𑀲𑀸𑀭𑀢𑁆𑀢𑀁 (𑀢𑁆𑀢𑁄), 𑀧𑀼𑀩𑁆𑀩𑀭𑀢𑁆𑀢𑀁, 𑀅𑀧𑀭𑀭𑀢𑁆𑀢𑀁, 𑀅𑀟𑁆𑀠𑀼𑀭𑀢𑁆𑀢𑀁, 𑀅𑀢𑀺𑀓𑁆𑀓𑀦𑁆𑀢𑁄 𑀭𑀢𑁆𑀢𑀺𑀁 𑀅𑀢𑀺𑀭𑀢𑁆𑀢𑁄, 𑀤𑁆𑀯𑁂𑀭𑀢𑁆𑀢𑀻 𑀲𑀫𑀸𑀳𑀝𑀸 𑀤𑀺𑀭𑀢𑁆𑀢𑀁 (𑀢𑁆𑀢𑁄), 𑀯𑀸 𑀓𑁆𑀯𑀘𑀺 𑀩𑀳𑀼𑀮𑀸𑀥𑀺𑀓𑀸𑀭𑀸 𑀏𑀓𑀭𑀢𑁆𑀢𑀁 (𑀢𑁆𑀢𑁄), 𑀏𑀓𑀭𑀢𑁆𑀢𑀺, 𑀅𑀦𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀼𑀢𑁆𑀯𑁂𑀯? 𑀤𑀻𑀖𑀭𑀢𑁆𑀢𑀺𑀳𑁂𑀫𑀦𑁆𑀢𑁄, 𑀉𑀧𑀭𑀢𑁆𑀢𑀺, 𑀓𑁆𑀯𑀘𑀺 𑀳𑁄𑀢𑁂𑀯 𑀩𑀳𑀼𑀮𑀁 𑀯𑀺𑀥𑀸𑀦𑀸𑀬𑀣𑀸𑀭𑀢𑁆𑀢𑀁.

𑁪𑁬. 𑀕𑁄𑀢𑁆𑀯𑀘𑀢𑁆𑀣𑁂 𑀘𑀸𑀮𑁄𑀧𑁂.

𑀕𑁄𑀲𑀤𑁆𑀤𑀸 𑀅𑀮𑁄𑀧𑀯𑀺𑀲𑀬𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺 𑀦 𑀘𑁂 𑀘𑀢𑁆𑀣𑁂 𑀲𑀫𑀸𑀲𑁄 𑀅𑀜𑁆𑀜𑀧𑀤𑀢𑁆𑀣𑁂 𑀅𑀲𑀗𑁆𑀔𑁆𑀬𑀢𑁆𑀣𑁂 𑀘, 𑀭𑀸𑀚𑀕𑀯𑁄, 𑀧𑀭𑀫𑀕𑀯𑁄, 𑀧𑀜𑁆𑀘𑀕𑀯𑀥𑀦𑁄, 𑀤𑀲𑀕𑀯𑀁, 𑀅𑀮𑁄𑀧𑁂𑀢𑀺 𑀓𑀺𑀁? 𑀧𑀜𑁆𑀘𑀳𑀺 𑀕𑁄𑀳𑀺 𑀓𑀻𑀢𑁄 𑀧𑀜𑁆𑀘𑀕𑀼, 𑀅𑀘𑀢𑁆𑀣𑁂𑀢𑀺 𑀓𑀺? 𑀅𑀚𑀲𑁆𑀲𑀕𑀸𑀯𑁄, 𑀅𑀦𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀼𑀢𑁆𑀯𑁂𑀯? 𑀘𑀺𑀢𑁆𑀢𑀕𑀼, 𑀉𑀧𑀕𑀼.

𑁪𑁭. 𑀭𑀢𑁆𑀢𑀺𑀦𑁆𑀤𑀺𑀯𑀤𑀸𑀭𑀕𑀯𑀘𑀢𑀼𑀭𑀲𑁆𑀲𑀸.

𑀏𑀢𑁂 𑀲𑀤𑁆𑀤𑀸 𑀅𑀅𑀦𑁆𑀢𑀸 𑀦𑀺𑀧𑀘𑁆𑀘𑀦𑁆𑀢𑁂. 𑀭𑀢𑁆𑀢𑁄 𑀘 𑀤𑀺𑀯𑀸 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀭𑀢𑁆𑀢𑀺 𑀘 𑀤𑀺𑀯𑀸 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀤𑀸𑀭𑀸 𑀘 𑀕𑀸𑀯𑁄 𑀘 𑀤𑀸𑀭𑀕𑀯𑀁, 𑀘𑀢𑀲𑁆𑀲𑁄 𑀅𑀲𑁆𑀲𑀺𑀬𑁄 𑀅𑀲𑁆𑀲 𑀘𑀢𑀼𑀭𑀲𑁆𑀲𑁄.

𑁪𑁮. 𑀆𑀬𑀸𑀫𑁂𑀦𑀼𑀕𑀯𑀁.

𑀅𑀦𑀼𑀕𑀯𑀦𑁆𑀢𑀺 𑀦𑀺𑀧𑀘𑁆𑀘𑀢𑁂 𑀆𑀬𑀸𑀫𑁂 𑀕𑀫𑁆𑀬𑀫𑀸𑀦𑁂. 𑀅𑀦𑀼𑀕𑀯𑀁 𑀲𑀓𑀝𑀁, 𑀆𑀬𑀸𑀫𑁂𑀢𑀺 𑀓𑀺𑀁? 𑀕𑀼𑀦𑁆𑀦𑀁 𑀧𑀜𑁆𑀙𑀸 𑀅𑀦𑀼𑀕𑀼.

𑁪𑁯. 𑀅𑀓𑁆𑀔𑀺𑀲𑁆𑀫𑀸𑀜𑁆𑀜𑀢𑁆𑀣𑁂. 𑀅𑀓𑁆𑀔𑀺𑀲𑁆𑀫𑀸 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺 𑀅𑀜𑁆𑀜𑀢𑁆𑀣𑁂 𑀘𑁂 𑀲𑀫𑀸𑀥𑀲𑀸. 𑀯𑀺𑀲𑀸𑀮𑀓𑁆𑀔𑁄, 𑀯𑀺𑀲𑀸𑀮𑀓𑁆𑀔𑀻.

𑁫𑁦. 𑀤𑀸𑀭𑀼𑀫𑁆𑀬𑀗𑁆𑀕𑀼𑀮𑁆𑀬𑀸.

𑀅𑀗𑁆𑀕𑀼𑀮𑀦𑁆𑀢𑀸 𑀅𑀜𑁆𑀜𑀧𑀤𑀢𑁆𑀣𑁂 𑀤𑀸𑀭𑀼𑀫𑁆𑀳𑀺 𑀲𑀫𑀸𑀲𑀦𑁆𑀢𑁄 𑀅 𑀳𑁄𑀢𑀺. 𑀤𑁆𑀯𑀗𑁆𑀕𑀼𑀮𑀁𑀤𑀸𑀭𑀼, 𑀧𑀜𑁆𑀘𑀗𑁆𑀕𑀼𑀮𑀁, 𑀅𑀗𑁆𑀕𑀼𑀮𑀺𑀲𑀤𑀺𑀲𑀸𑀯𑀬𑀯𑀁 𑀥𑀜𑁆𑀜𑀸𑀤𑀻𑀦𑀁 𑀯𑀺𑀓𑁆𑀔𑁂𑀧𑀓𑀁 𑀤𑀸𑀭𑀼𑀁 𑀯𑀼𑀘𑁆𑀘𑀢𑁂, 𑀧𑀫𑀸𑀡𑁂 𑀢𑀼 𑀧𑀼𑀩𑁆𑀩𑁂 𑀯𑀺𑀬 𑀲𑀺𑀤𑁆𑀥𑀁 𑀲𑀔𑀭𑀸𑀚𑀲𑀤𑁆𑀤𑀸 𑀅𑀓𑀸𑀭𑀦𑁆𑀢𑀸𑀯, 𑀲𑀺𑀲𑁆𑀲𑁄𑀧𑀺 𑀦 𑀤𑀺𑀲𑁆𑀲𑀢𑀺, 𑀕𑀸𑀡𑁆𑀟𑀻 𑀯𑀥𑀦𑁆𑀯𑀸𑀢𑀺 𑀧𑀓𑀢𑀦𑁆𑀢𑀭𑁂𑀦 𑀲𑀺𑀤𑁆𑀥𑀁.

𑁫𑁧. 𑀘𑀺 𑀯𑀻𑀢𑀺𑀳𑀸𑀭𑁂.

𑀑𑀖𑀸𑀩𑁆𑀬𑀢𑀺𑀳𑀸𑀭𑁂 𑀕𑀫𑁆𑀬𑀫𑀸𑀦𑁂 𑀅𑀜𑁆𑀜𑀧𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀘𑀺 𑀳𑁄𑀢𑀺. 𑀓𑁂𑀲𑀸𑀓𑁂𑀲𑀺 𑀤𑀡𑁆𑀟𑀸𑀤𑀡𑁆𑀟𑀺, 𑀘𑀓𑀸𑀭𑁄 ‘‘𑀘𑀺𑀲𑁆𑀫𑀺’’𑀦𑁆𑀢𑀺 (𑁩.𑁬𑁬) 𑀯𑀺𑀲𑁂𑀲𑀦𑀢𑁆𑀣𑁄, 𑀲𑀼𑀕𑀦𑁆𑀥𑀺, 𑀤𑀼𑀕𑁆𑀕𑀦𑁆𑀢𑀻𑀢𑀺 𑀧𑀬𑁄𑀕𑁄 𑀦 𑀤𑀺𑀲𑁆𑀲𑀢𑁂.

𑁫𑁨. 𑀮𑁆𑀢𑁆𑀯𑀺𑀢𑁆𑀣𑀺𑀬𑀽𑀳𑀺 𑀓𑁄.

𑀮𑁆𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑁂𑀳𑀺, 𑀇𑀢𑁆𑀣𑀺𑀬𑀫𑀻𑀓𑀸𑀭𑀽𑀓𑀸𑀭𑀦𑁆𑀢𑁂𑀳𑀺 𑀘 𑀩𑀳𑀼𑀮𑀁 𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀅𑀜𑁆𑀜𑀧𑀤𑀢𑁆𑀣𑁂. 𑀩𑀳𑀼𑀓𑀢𑁆𑀢𑀼𑀓𑁄, 𑀩𑀳𑀼𑀓𑀼𑀫𑀸𑀭𑀺𑀓𑁄, 𑀩𑀳𑀼𑀩𑁆𑀭𑀳𑁆𑀫𑀩𑀦𑁆𑀥𑀼𑀓𑁄, 𑀩𑀳𑀼𑀮𑀁𑀢𑁆𑀯𑁂𑀯? 𑀲𑀼𑀩𑁆𑀪𑀽.

𑁫𑁩. 𑀯𑀸𑀜𑁆𑀜𑀢𑁄.

𑀅𑀜𑁆𑀜𑁂𑀳𑀺 𑀅𑀜𑁆𑀜𑀧𑀤𑀢𑁆𑀣𑁂 𑀓𑁄 𑀯𑀸 𑀩𑀳𑀼𑀮𑀁 𑀳𑁄𑀢𑀺. 𑀩𑀳𑀼𑀫𑀸𑀮𑀓𑁄, 𑀩𑀳𑀼𑀫𑀸𑀮𑁄.

𑁫𑁪. 𑀉𑀢𑁆𑀢𑀭𑀧𑀤𑁂. 𑀏𑀢𑀫𑀥𑀺𑀓𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁫𑁫. 𑀇𑀫𑀲𑁆𑀲𑀺𑀤𑀁.

𑀉𑀢𑁆𑀢𑀭𑀧𑀤𑁂 𑀧𑀭𑀢𑁄 𑀇𑀫𑀲𑁆𑀲 𑀇𑀤𑀁 𑀳𑁄𑀢𑀺. 𑀇𑀤𑀫𑀝𑁆𑀞𑀺𑀢𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀧𑀲𑁆𑀲 𑀘 𑀤𑁆𑀯𑀺𑀪𑀸𑀯𑁄.

𑁫𑁬. 𑀧𑀼𑀁 𑀧𑀼𑀫𑀲𑁆𑀲 𑀯𑀸. 𑀧𑀼𑀫𑀲𑁆𑀲 𑀧𑀼𑀁 𑀳𑁄𑀢𑀼𑀢𑁆𑀢𑀭𑀧𑀤𑁂 𑀯𑀺𑀪𑀸𑀲𑀸. 𑀧𑀼𑀮𑁆𑀮𑀺𑀗𑁆𑀕𑀁, 𑀧𑀼𑀫𑀮𑀺𑀗𑁆𑀕𑀁.

𑁫𑁭. 𑀝𑀦𑁆𑀢𑀦𑁆𑀢𑀽𑀦𑀁.

𑀏𑀲𑀁 𑀝 𑀳𑁄𑀢𑀼𑀢𑁆𑀢𑀭𑀧𑀤𑁂 𑀓𑁆𑀯𑀘𑀺 𑀯𑀸. 𑀪𑀯𑀫𑁆𑀧𑀢𑀺𑀝𑁆𑀞𑀸𑀫𑀬𑀁, 𑀪𑀕𑀯𑀁𑀫𑀽𑀮𑀓𑀸 𑀦𑁄 𑀥𑀫𑁆𑀫𑀸, 𑀩𑀳𑀼𑀮𑀸𑀥𑀺𑀓𑀸𑀭𑀸 𑀢𑀭𑀸𑀤𑀻𑀲𑀼 𑀘 𑀧𑀕𑁂𑀯 𑀫𑀳𑀢𑁆𑀢𑀭𑀻, 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁.

𑁫𑁮. 𑀅. 𑀏𑀲𑀁 𑀅 𑀳𑁄𑀢𑀼𑀢𑁆𑀢𑀭𑀧𑀤𑁂. 𑀕𑀼𑀡𑀯𑀦𑁆𑀢𑀧𑀢𑀺𑀝𑁆𑀞𑁄-𑀲𑁆𑀫𑀺.

𑁫𑁯. 𑀫𑀦𑀸𑀤𑁆𑀬𑀸𑀧𑀸𑀤𑀻𑀦𑀫𑁄 𑀫𑀬𑁂 𑀘. 𑀫𑀦𑀸𑀤𑀻𑀦𑀫𑀸𑀧𑀸𑀤𑀻𑀦𑀁 𑀘 𑀑 𑀳𑁄𑀢𑀼𑀢𑁆𑀢𑀭𑀧𑀤𑁂 𑀫𑀬𑁂 𑀘. 𑀫𑀦𑁄𑀲𑁂𑀝𑁆𑀞𑀸, 𑀫𑀦𑁄𑀫𑀬𑀸, 𑀭𑀚𑁄𑀚𑀮𑁆𑀮𑀁, 𑀭𑀚𑁄𑀫𑀬𑀁, 𑀆𑀧𑁄𑀕𑀢𑀁, 𑀆𑀧𑁄𑀫𑀬𑀁, 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁.

𑁬𑁦. 𑀧𑀭𑀲𑁆𑀲 𑀲𑀗𑁆𑀔𑁆𑀬𑀸𑀲𑀼.

𑀲𑀗𑁆𑀔𑁆𑀬𑀸𑀲𑀼𑀢𑁆𑀢𑀭𑀧𑀤𑁂𑀲𑀼 𑀧𑀭𑀲𑁆𑀲 𑀑 𑀳𑁄𑀢𑀺. 𑀧𑀭𑁄𑀲𑀢𑀁, 𑀧𑀭𑁄𑀲𑀳𑀲𑁆𑀲𑀁, 𑀲𑀗𑁆𑀔𑁆𑀬𑀸𑀲𑀽𑀢𑀺 𑀓𑀺𑀁? 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄.

𑁬𑁧. 𑀚𑀦𑁂 𑀧𑀼𑀣𑀲𑁆𑀲𑀼.

𑀚𑀦𑁂 𑀉𑀢𑁆𑀢𑀭𑀧𑀤𑁂 𑀧𑀼𑀣𑀲𑁆𑀲 𑀉 𑀳𑁄𑀢𑀺. 𑀅𑀭𑀺𑀬𑁂𑀳𑀺 𑀧𑀼𑀣𑀕𑁂𑀯𑀸𑀬𑀁 𑀚𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑁄.

𑁬𑁨. 𑀲𑁄 𑀙𑀲𑁆𑀲𑀸𑀳𑀸𑀬𑀢𑀦𑁂 𑀯𑀸.

𑀅𑀳𑁂 𑀆𑀬𑀢𑀦𑁂 𑀘𑀼𑀢𑁆𑀢𑀭𑀧𑀤𑁂 𑀙𑀲𑁆𑀲 𑀲𑁄 𑀯𑀸 𑀳𑁄𑀢𑀺. 𑀲𑀸𑀳𑀁 𑀙𑀸𑀳𑀁, 𑀲𑀴𑀸𑀬𑀢𑀦𑀁, 𑀙𑀴𑀸𑀬𑀢𑀦𑀁.

𑁬𑁩. 𑀮𑁆𑀢𑀼𑀧𑀺𑀢𑀸𑀤𑀻𑀦𑀫𑀸𑀭𑀗𑀭𑀗.

𑀮𑁆𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀁 𑀧𑀺𑀢𑀸𑀤𑀻𑀦𑀜𑁆𑀘 𑀬𑀣𑀸𑀓𑁆𑀓𑀫𑀫𑀸𑀭𑀗𑀭𑀗 𑀯𑀸 𑀳𑁄𑀦𑁆𑀢𑀼𑀢𑁆𑀢𑀭𑀧𑀤𑁂, 𑀲𑀢𑁆𑀣𑀸𑀭𑀤𑀲𑁆𑀲𑀦𑀁, 𑀓𑀢𑁆𑀢𑀸𑀭𑀦𑀺𑀤𑁆𑀤𑁂𑀲𑁄, 𑀫𑀸𑀢𑀭𑀧𑀺𑀢𑀭𑁄, 𑀯𑀸𑀢𑁆𑀯𑁂𑀯? 𑀲𑀢𑁆𑀣𑀼𑀤𑀲𑁆𑀲𑀦𑀁, 𑀫𑀸𑀢𑀸𑀧𑀺𑀢𑀭𑁄.

𑁬𑁪. 𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀸𑀦𑀫𑀸 𑀢𑀢𑁆𑀭 𑀘𑀢𑁆𑀣𑁂.

𑀮𑁆𑀢𑀼𑀧𑀺𑀢𑀸𑀤𑀻𑀦𑀁 𑀯𑀺𑀚𑁆𑀚𑀸𑀲𑀫𑁆𑀩𑀦𑁆𑀥𑀻𑀦𑀁 𑀬𑁄𑀦𑀺𑀲𑀫𑁆𑀩𑀦𑁆𑀥𑀻𑀦𑀁 𑀘 𑀢𑁂𑀲𑁆𑀯𑁂𑀯 𑀮𑁆𑀢𑀼𑀧𑀺𑀢𑀸𑀤𑀻𑀲𑀼 𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀺𑀲𑀼𑀢𑁆𑀢𑀭𑀧𑀤𑁂𑀲𑀼 𑀘𑀢𑁆𑀣𑀯𑀺𑀲𑀬𑁂 𑀆 𑀳𑁄𑀢𑀺. 𑀳𑁄𑀢𑀸𑀧𑁄𑀢𑀭𑁄 𑀫𑀸𑀢𑀸𑀧𑀺𑀢𑀭𑁄, 𑀮𑁆𑀢𑀼𑀧𑀺𑀢𑀸𑀤𑀻𑀦𑀁 𑀢𑁆𑀯𑁂𑀯? 𑀧𑀼𑀢𑁆𑀢𑀪𑀸𑀢𑀭𑁄, 𑀢𑀢𑁆𑀭𑁂𑀢𑀺 𑀓𑀺𑀁? 𑀧𑀺𑀢𑀼𑀧𑀺𑀢𑀸𑀫𑀳𑀸, 𑀘𑀢𑁆𑀣𑁂𑀢𑀺 𑀓𑀺𑀁? 𑀫𑀸𑀢𑀼𑀪𑀸𑀢𑀸, 𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀸𑀦𑀦𑁆𑀢𑀺 𑀓𑀺𑀁? 𑀤𑀸𑀢𑀼𑀪𑀢𑁆𑀢𑀸𑀭𑁄.

𑁬𑁫. 𑀧𑀼𑀢𑁆𑀢𑁂.

𑀧𑀼𑀢𑁆𑀢𑁂 𑀉𑀢𑁆𑀢𑀭𑀧𑀤𑁂 𑀘𑀢𑁆𑀣𑀯𑀺𑀲𑀬𑁂 𑀮𑁆𑀢𑀼𑀧𑀺𑀢𑀸𑀤𑀻𑀦𑀁 𑀯𑀺𑀚𑁆𑀚𑀸𑀬𑁄𑀦𑀺 𑀲𑀫𑁆𑀩𑀦𑁆𑀥𑀸𑀦𑀫𑀸 𑀳𑁄𑀢𑀺. 𑀧𑀺𑀢𑀸𑀧𑀼𑀢𑁆𑀢𑀸, 𑀫𑀸𑀢𑀸𑀧𑀼𑀢𑁆𑀢𑀸.

𑁬𑁬. 𑀘𑀺𑀲𑁆𑀫𑀺𑀁.

𑀘𑀺𑀧𑁆𑀧𑀘𑁆𑀘𑀬𑀦𑁆𑀢𑁂 𑀉𑀢𑁆𑀢𑀭𑀧𑀤𑁂 𑀆 𑀳𑁄𑀢𑀺. 𑀓𑁂𑀲𑀸𑀓𑁂𑀲𑀺, 𑀫𑀼𑀝𑁆𑀞𑀸𑀫𑀼𑀝𑁆𑀞𑀺.

𑁬𑁭. 𑀇𑀢𑁆𑀣𑀺𑀬𑀫𑁆𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑁂𑀯𑁂𑀓𑀢𑁆𑀣𑁂.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂 𑀏𑀓𑀢𑁆𑀣𑁂 𑀲𑀫𑀸𑀦𑀸𑀥𑀺𑀓𑀭𑀡𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀪𑀸𑀲𑀺𑀢𑀧𑀼𑀫𑀸 𑀇𑀢𑁆𑀣𑀻 𑀧𑀼𑀫𑁂𑀯 𑀳𑁄𑀢𑀺. 𑀓𑀼𑀫𑀸𑀭𑀪𑀭𑀺𑀬𑁄, 𑀤𑀻𑀖𑀚𑀗𑁆𑀖𑁄, 𑀬𑀼𑀯𑀚𑀸𑀬𑁄, 𑀇𑀢𑁆𑀣𑀺𑀬𑀦𑁆𑀢𑀺 𑀓𑀺𑀁? 𑀓𑀮𑁆𑀬𑀸𑀡𑀻 𑀧𑀥𑀸𑀦𑀫𑁂𑀲𑀁 𑀓𑀮𑁆𑀬𑀸𑀡𑀺𑀧𑁆𑀧𑀥𑀸𑀦𑀸, 𑀪𑀸𑀲𑀺𑀢𑀧𑀼𑀫𑁂𑀢𑀺 𑀓𑀺𑀁? 𑀓𑀜𑁆𑀜𑀸𑀪𑀭𑀺𑀬𑁄, 𑀇𑀢𑁆𑀣𑀻𑀢𑀺 𑀓𑀺𑀁? 𑀕𑀸𑀫𑀡𑀺𑀓𑀼𑀮𑀁 𑀤𑀺𑀝𑁆𑀞𑀺 𑀅𑀲𑁆𑀲 𑀕𑀸𑀫𑀡𑀺𑀤𑀺𑀝𑁆𑀞𑀺, 𑀏𑀓𑀢𑁆𑀣𑁂𑀢𑀺 𑀓𑀺𑀁? 𑀓𑀮𑁆𑀬𑀸𑀡𑀺𑀬𑀸 𑀫𑀸𑀢𑀸 𑀓𑀮𑁆𑀬𑀸𑀡𑀺𑀫𑀸𑀢𑀸.

𑁬𑁮. 𑀓𑁆𑀯𑀘𑀺 𑀧𑀘𑁆𑀘𑀬𑁂.

𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀘𑁆𑀘𑀬𑁂 𑀓𑁆𑀯𑀘𑀺 𑀧𑀼𑀫𑁂𑀯 𑀫𑁄𑀢𑀺. 𑀩𑁆𑀬𑀢𑁆𑀢𑀢𑀭𑀸, 𑀩𑁆𑀬𑀢𑁆𑀢𑀢𑀫𑀸.

𑁬𑁯. 𑀲𑀩𑁆𑀩𑀸𑀤𑀬𑁄 𑀯𑀼𑀢𑁆𑀢𑀺𑀫𑀢𑁆𑀢𑁂.