𑁪. 𑀘𑀢𑀼𑀢𑁆𑀣𑁄 𑀓𑀡𑁆𑀟𑁄 (𑀡𑀸𑀤𑀺)

𑁧. 𑀡𑁄 𑀯𑀸 𑀧𑀘𑁆𑀘𑁂.

𑀙𑀝𑁆𑀞𑀺𑀬𑀦𑁆𑀢𑀸 𑀦𑀸𑀫𑀲𑁆𑀫𑀸 𑀯𑀸 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀅𑀧𑀘𑁆𑀘𑁂-𑀪𑀺𑀥𑁂𑀬𑁆𑀬𑁂, 𑀡𑀓𑀸𑀭𑁄 𑀯𑀼𑀤𑁆𑀥𑁆𑀬𑀢𑁆𑀣𑁄, 𑀏𑀯𑀫𑀜𑁆𑀜𑀢𑁆𑀢𑀸𑀧𑀺, 𑀯𑀲𑀺𑀝𑁆𑀞𑀲𑁆𑀲𑀸𑀧𑀘𑁆𑀘𑀁 𑀯𑀸𑀲𑀺𑀝𑁆𑀞𑁄, 𑀯𑀸𑀲𑀺𑀝𑁆𑀞𑀻 𑀯𑀸, 𑀑𑀧𑀕𑀯𑁄, 𑀑𑀧𑀕𑀯𑀻 𑀯𑀸, 𑀯𑁂𑀢𑀺 𑀯𑀸𑀓𑁆𑀬𑀲𑀫𑀸𑀲𑀯𑀺𑀓𑀧𑁆𑀧𑀦𑀢𑁆𑀣𑀁, 𑀢𑀲𑁆𑀲𑀸𑀥𑀺𑀓𑀸𑀭𑁄 𑀲𑀓𑀢𑁆𑀣𑀸𑀯𑀥𑀺.

𑁨. 𑀯𑀘𑁆𑀙𑀸𑀤𑀺𑀢𑁄 𑀡𑀸𑀦𑀡𑀸𑀬𑀦𑀸.

𑀯𑀘𑁆𑀙𑀸𑀤𑀻𑀳𑀺 𑀅𑀧𑀘𑁆𑀘𑀧𑁆𑀧𑀘𑁆𑀘𑀬𑀦𑁆𑀢𑁂𑀳𑀺 𑀕𑁄𑀢𑁆𑀢𑀸𑀤𑀻𑀳𑀺 𑀘 𑀲𑀤𑁆𑀤𑁂𑀳𑀺 𑀡𑀸𑀦𑀡𑀸𑀬𑀦𑀧𑁆𑀧𑀘𑁆𑀘𑀬𑀸 𑀯𑀸 𑀳𑁄𑀦𑁆𑀢𑀺 𑀅𑀧𑀘𑁆𑀘𑁂, 𑀯𑀘𑁆𑀙𑀸𑀦𑁄 𑀯𑀘𑁆𑀙𑀸𑀬𑀦𑁄, 𑀓𑀘𑁆𑀘𑀸𑀦𑁄 𑀓𑀘𑁆𑀘𑀸𑀬𑀦𑁄, 𑀬𑀸𑀕𑀫𑁂 𑀓𑀸𑀢𑀺𑀬𑀸𑀦𑁄, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑁄𑀕𑁆𑀕𑀮𑁆𑀮𑀸𑀬𑀦𑁄, 𑀲𑀸𑀓𑀝𑀸𑀦𑁄 𑀲𑀸𑀓𑀝𑀸𑀬𑀦𑁄, 𑀓𑀡𑁆𑀳𑀸𑀦𑁄 𑀓𑀡𑁆𑀳𑀸𑀬𑀦𑁄 𑀇𑀘𑁆𑀘𑀸𑀤𑀺.

𑁩. 𑀓𑀢𑁆𑀢𑀺𑀓𑀸𑀯𑀺𑀥𑀯𑀸𑀤𑀻𑀳𑀺 𑀡𑁂𑀬𑁆𑀬𑀡𑁂𑀭𑀸.

𑀓𑀢𑁆𑀢𑀺𑀓𑀸𑀤𑀻𑀳𑀺 𑀯𑀺𑀥𑀯𑀸𑀤𑀻𑀳𑀺 𑀘 𑀡𑁂𑀬𑁆𑀬𑀡𑁂𑀭𑀸 𑀯𑀸 𑀬𑀣𑀸𑀓𑁆𑀓𑀫𑀁 𑀳𑁄𑀦𑁆𑀢𑀺 𑀅𑀧𑀘𑁆𑀘𑁂, 𑀓𑀢𑁆𑀢𑀺𑀓𑁂𑀬𑁆𑀬𑁄, 𑀯𑁂𑀦𑀢𑁂𑀬𑁆𑀬𑁄, 𑀪𑀸𑀕𑀺𑀦𑁂𑀬𑁆𑀬𑁄 𑀇𑀘𑁆𑀘𑀸𑀤𑀺, 𑀯𑁂𑀥𑀯𑁂𑀭𑁄, 𑀩𑀦𑁆𑀥𑀓𑁂𑀭𑁄, 𑀦𑀸𑀮𑀺𑀓𑁂𑀭𑁄, 𑀲𑀸𑀫𑀡𑁂𑀭𑁄 𑀇𑀘𑁆𑀘𑀸𑀤𑀺.

𑁪. 𑀡𑁆𑀬𑀤𑀺𑀘𑁆𑀘𑀸𑀤𑀻𑀳𑀺.

𑀤𑀺𑀢𑀺𑀧𑁆𑀧𑀪𑀼𑀢𑀺𑀳𑀺 𑀡𑁆𑀬𑁄 𑀯𑀸 𑀳𑁄𑀢𑀺 𑀅𑀧𑀘𑁆𑀘𑁂, 𑀤𑁂𑀘𑁆𑀘𑁄, 𑀆𑀤𑀺𑀘𑁆𑀘𑁄, 𑀓𑁄𑀡𑁆𑀟𑀜𑁆𑀜𑁄, 𑀕𑀕𑁆𑀕𑁆𑀬𑁄, 𑀪𑀸𑀢𑀩𑁆𑀩𑁄 𑀇𑀘𑁆𑀘𑀸𑀤𑀺.

𑁫. 𑀆 𑀡𑀺.

𑀅𑀓𑀸𑀭𑀦𑁆𑀢𑀢𑁄 𑀡𑀺 𑀯𑀸 𑀳𑁄𑀢𑀺 𑀅𑀧𑀘𑁆𑀘𑁂, 𑀤𑀓𑁆𑀔𑀺, 𑀤𑀢𑁆𑀣𑀺, 𑀤𑁄𑀡𑀺. 𑀯𑀸𑀲𑀯𑀺, 𑀯𑀸𑀭𑀼𑀡𑀺 𑀇𑀘𑁆𑀘𑀸𑀤𑀺.

𑁬. 𑀭𑀸𑀚𑀢𑁄 𑀜𑁆𑀜𑁄 𑀚𑀸𑀢𑀺𑀬𑀁.

𑀭𑀸𑀚𑀲𑀤𑁆𑀤𑀢𑁄 𑀜𑁆𑀜𑁄 𑀯𑀸 𑀳𑁄𑀢𑀺 𑀅𑀧𑀘𑁆𑀘𑁂 𑀚𑀸𑀢𑀺𑀬𑀁 𑀕𑀫𑁆𑀬𑀫𑀸𑀦𑀸𑀬𑀁, 𑀭𑀸𑀚𑀜𑁆𑀜𑁄, 𑀚𑀸𑀢𑀺𑀬𑀦𑁆𑀢𑀺 𑀓𑀺𑀁? 𑀭𑀸𑀚𑀸𑀧𑀘𑁆𑀘𑀁.

𑁭. 𑀔𑀢𑁆𑀢𑀸 𑀬𑀺𑀬𑀸.

𑀔𑀢𑁆𑀢𑀲𑀤𑁆𑀤𑀸 𑀬𑀇𑀬𑀸 𑀳𑁄𑀦𑁆𑀢𑀺 𑀅𑀧𑀘𑁆𑀘𑁂 𑀚𑀸𑀢𑀺𑀬𑀁, 𑀔𑀢𑁆𑀬𑁄, 𑀔𑀢𑁆𑀢𑀺𑀬𑁄, 𑀚𑀸𑀢𑀺𑀬𑀁𑀢𑁆𑀯𑁂𑀯? 𑀔𑀢𑁆𑀢𑀺.

𑁮. 𑀫𑀦𑀼𑀢𑁄 𑀲𑁆𑀲𑀲𑀡.

𑀫𑀦𑀼𑀲𑀤𑁆𑀤𑀢𑁄 𑀚𑀸𑀢𑀺𑀬𑀁 𑀲𑁆𑀲𑀲𑀡 𑀳𑁄𑀦𑁆𑀢𑀺 𑀅𑀧𑀘𑁆𑀘𑁂, 𑀫𑀦𑀼𑀲𑁆𑀲𑁄, 𑀫𑀸𑀦𑀼𑀲𑁄, 𑀇𑀢𑁆𑀣𑀺𑀬𑀁 𑀫𑀦𑀼𑀲𑁆𑀲𑀸, 𑀫𑀸𑀦𑀼𑀲𑀻, 𑀚𑀸𑀢𑀺𑀬𑀁𑀢𑁆𑀯𑁂𑀯? 𑀫𑀸𑀦𑀯𑁄.

𑁯. 𑀚𑀦𑀧𑀤𑀦𑀸𑀫𑀲𑁆𑀫𑀸 𑀔𑀢𑁆𑀢𑀺𑀬𑀸 𑀭𑀜𑁆𑀜𑁂 𑀘 𑀡𑁄.

𑀚𑀦𑀧𑀤𑀲𑁆𑀲 𑀬𑀁 𑀦𑀸𑀫𑀁, 𑀢𑀦𑁆𑀦𑀸𑀫𑀲𑁆𑀫𑀸 𑀔𑀢𑁆𑀢𑀺𑀬𑀸 𑀅𑀧𑀘𑁆𑀘𑁂 𑀭𑀜𑁆𑀜𑁂 𑀘 𑀡𑁄 𑀳𑁄𑀢𑀺, 𑀧𑀜𑁆𑀘𑀸𑀮𑁄, 𑀓𑁄𑀲𑀮𑁄, 𑀫𑀸𑀕𑀥𑁄, 𑀑𑀓𑁆𑀓𑀸𑀓𑁄, 𑀚𑀦𑀧𑀤𑀦𑀸𑀫𑀲𑁆𑀫𑀸𑀢𑀺 𑀓𑀺𑀁? 𑀤𑀸𑀲𑀭𑀣𑀺, 𑀔𑀢𑁆𑀢𑀺𑀬𑀸𑀢𑀺 𑀓𑀺𑀁? 𑀧𑀜𑁆𑀘𑀸𑀮𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀧𑀘𑁆𑀘𑀁 𑀧𑀜𑁆𑀘𑀸𑀮𑀺.

𑁧𑁦. 𑀡𑁆𑀬 𑀓𑀼𑀭𑀼𑀲𑀺𑀯𑀻𑀳𑀺.

𑀓𑀼𑀭𑀼𑀲𑀺𑀯𑀻𑀳𑀺 𑀅𑀧𑀘𑁆𑀘𑁂 𑀭𑀜𑁆𑀜𑁂 𑀘 𑀡𑁆𑀬𑁄 𑀳𑁄𑀢𑀺. 𑀓𑁄𑀭𑀩𑁆𑀬𑁄, 𑀲𑁂𑀩𑁆𑀬𑁄.

𑁧𑁧. 𑀡 𑀭𑀸𑀕𑀸 𑀢𑁂𑀦 𑀭𑀢𑁆𑀢𑀁.

𑀭𑀸𑀕𑀯𑀸𑀘𑀺𑀢𑀢𑀺𑀬𑀦𑁆𑀢𑀢𑁄 𑀭𑀢𑁆𑀢𑀫𑀺𑀘𑁆𑀙𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀡𑁄 𑀳𑁄𑀢𑀺, 𑀓𑀲𑀸𑀯𑁂𑀦 𑀭𑀢𑁆𑀢𑀁 𑀓𑀸𑀲𑀸𑀯𑀁, 𑀓𑁄𑀲𑀼𑀫𑁆𑀪𑀁, 𑀬𑀸𑀮𑀺𑀤𑁆𑀤𑀁, 𑀭𑀸𑀕𑀸𑀢𑀺 𑀓𑀺𑀁? 𑀤𑁂𑀯𑀤𑀢𑁆𑀢𑁂𑀦 𑀭𑀢𑁆𑀢𑀁 𑀯𑀢𑁆𑀣𑀁, 𑀇𑀥 𑀓𑀲𑁆𑀫𑀸 𑀦 𑀳𑁄𑀢𑀺? ‘𑀦𑀻𑀮𑀁 𑀧𑀻𑀢’𑀦𑁆𑀢𑀺, 𑀕𑀼𑀡𑀯𑀘𑀦𑀢𑁆𑀢𑀸 𑀯𑀺𑀦𑀸𑀧𑀺 𑀡𑁂𑀦 𑀡𑀢𑁆𑀣𑀲𑁆𑀲𑀸𑀪𑀺𑀥𑀸𑀦𑀢𑁄.

𑁧𑁨. 𑀦𑀓𑁆𑀔𑀢𑁆𑀢𑁂𑀦𑀺𑀦𑁆𑀤𑀼𑀬𑀼𑀢𑁆𑀢𑁂𑀦 𑀓𑀸𑀮𑁂.

𑀢𑀢𑀺𑀬𑀦𑁆𑀢𑀢𑁄 𑀦𑀓𑁆𑀔𑀢𑁆𑀢𑀸 𑀢𑁂𑀦 𑀮𑀓𑁆𑀔𑀺𑀢𑁂 𑀓𑀸𑀮𑁂 𑀡𑁄 𑀳𑁄𑀢𑀺, 𑀢𑀜𑁆𑀘𑁂 𑀦𑀓𑁆𑀔𑀢𑁆𑀢𑀫𑀺𑀦𑁆𑀤𑀼𑀬𑀼𑀢𑁆𑀢𑀁 𑀳𑁄𑀢𑀺, 𑀨𑀼𑀲𑁆𑀲𑀻 𑀭𑀢𑁆𑀢𑀺, 𑀨𑀼𑀲𑁆𑀲𑀁 𑀅𑀳𑀁, 𑀦𑀓𑁆𑀔𑀢𑁆𑀢𑁂𑀦𑁂𑀢𑀺 𑀓𑀺𑀁? 𑀕𑀼𑀭𑀼𑀦𑀸 𑀮𑀓𑁆𑀔𑀺𑀢𑀸 𑀭𑀢𑁆𑀢𑀺. 𑀇𑀦𑁆𑀤𑀼𑀬𑀼𑀢𑁆𑀢𑁂𑀦𑁂𑀢𑀺 𑀓𑀺𑀁? 𑀓𑀢𑁆𑀣𑀺𑀓𑀸𑀬 𑀮𑀓𑁆𑀔𑀺𑀢𑁄 𑀫𑀼𑀳𑀼𑀢𑁆𑀢𑁄, 𑀓𑀸𑀮𑁂𑀢𑀺 𑀓𑀺𑀁? 𑀨𑀼𑀲𑁆𑀲𑁂𑀦 𑀮𑀓𑁆𑀔𑀺𑀢𑀸 𑀅𑀢𑁆𑀣𑀲𑀺𑀤𑁆𑀥𑀺, 𑀅𑀚𑁆𑀚𑀓𑀢𑁆𑀢𑀺𑀓𑀸𑀢𑀺 𑀓𑀢𑁆𑀢𑀺𑀓𑀸𑀬𑀼𑀢𑁆𑀢𑁂 𑀘𑀦𑁆𑀤𑁂 𑀓𑀢𑁆𑀢𑀺𑀓𑀸𑀲𑀤𑁆𑀤𑁄 𑀯𑀢𑁆𑀢𑀢𑁂.

𑁧𑁩. 𑀲𑀸-𑀲𑁆𑀲 𑀤𑁂𑀯𑀢𑀸 𑀧𑀼𑀡𑁆𑀡𑀫𑀸𑀲𑀻.

𑀲𑁂𑀢𑀺 𑀧𑀞𑀫𑀦𑁆𑀢𑀸 𑀅𑀲𑁆𑀲𑀸𑀢𑀺 𑀙𑀝𑁆𑀞𑁆𑀬𑀢𑁆𑀣𑁂 𑀡𑁄 𑀪𑀯𑀢𑀺, 𑀬𑀁 𑀧𑀞𑀫𑀦𑁆𑀢𑀁, 𑀲𑀸 𑀘𑁂 𑀤𑁂𑀯𑀢𑀸 𑀧𑀼𑀡𑁆𑀡𑀫𑀸𑀲𑀻𑀯𑀸, 𑀲𑀼𑀕𑀢𑁄 𑀤𑁂𑀯𑀢𑀸 𑀅𑀲𑁆𑀲𑀸𑀪𑀺 𑀲𑁄𑀕𑀢𑁄, 𑀫𑀸𑀳𑀺𑀦𑁆𑀤𑁄, 𑀬𑀸𑀫𑁄, 𑀯𑀸𑀭𑀼𑀡𑁄, 𑀨𑀼𑀲𑁆𑀲𑀻 𑀧𑀼𑀡𑁆𑀡𑀫𑀸𑀲𑀻 𑀅𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻𑀢𑀺 𑀨𑀼𑀲𑁆𑀲𑁄, 𑀫𑀸𑀲𑁄, 𑀫𑀸𑀬𑁄, 𑀨𑀕𑁆𑀕𑀼𑀦𑁄, 𑀘𑀺𑀢𑁆𑀢𑁄, 𑀯𑁂𑀲𑀸𑀔𑁄. 𑀚𑁂𑀝𑁆𑀞𑀫𑀽𑀮𑁄, 𑀆𑀲𑀴𑁆𑀳𑁄, 𑀲𑀸𑀯𑀡𑁄, 𑀧𑁄𑀝𑁆𑀞𑀧𑀸𑀤𑁄, 𑀅𑀲𑁆𑀲𑀬𑀼𑀚𑁄, 𑀓𑀢𑁆𑀢𑀺𑀓𑁄, 𑀫𑀸𑀕𑀲𑀺𑀭𑁄, 𑀧𑀼𑀡𑁆𑀡𑀫𑀸𑀲𑀻𑀢𑀺 𑀓𑀺𑀁? 𑀨𑀼𑀲𑁆𑀲𑀻 𑀧𑀜𑁆𑀘𑀫𑀻 𑀅𑀲𑁆𑀲, 𑀧𑀼𑀡𑁆𑀡𑀫𑀸𑀲𑀻 𑀘 𑀪𑀢𑀓𑀫𑀸𑀲𑀲𑀫𑁆𑀩𑀦𑁆𑀥𑀺𑀦𑀻 𑀦 𑀳𑁄𑀢𑀺… 𑀧𑀼𑀡𑁆𑀡𑁄 𑀫𑀸 𑀅𑀲𑁆𑀲𑀦𑁆𑀢𑀺 𑀦𑀺𑀩𑁆𑀩𑀘𑀦𑀸, 𑀅𑀢𑁄 𑀏𑀯 𑀦𑀺𑀧𑀸𑀢𑀦𑀸 𑀡𑁄 𑀲𑀸𑀕𑀫𑁄 𑀘, 𑀫𑀸𑀲𑀲𑀼𑀢𑀺𑀬𑀸𑀯 𑀦 𑀧𑀜𑁆𑀘𑀤𑀲 𑀭𑀢𑁆𑀢𑀸𑀤𑁄 𑀯𑀺𑀥𑀺.

𑁧𑁪. 𑀢𑀫𑀥𑀻𑀢𑁂 𑀢𑀁 𑀚𑀸𑀦𑀸𑀢𑀺 𑀓𑀡𑀺𑀓𑀸 𑀘.

𑀤𑀼𑀢𑀺𑀬𑀦𑁆𑀢𑀢𑁄 𑀢𑀫𑀥𑀻𑀢𑁂 𑀢𑀁 𑀚𑀸𑀦𑀸𑀢𑀻𑀢𑀺 𑀏𑀢𑁂𑀲𑁆𑀯𑀢𑁆𑀣𑁂𑀲𑀼 𑀡𑁄 𑀳𑁄𑀢𑀺 𑀡𑁄 𑀡𑀺𑀓𑁄 𑀘, 𑀩𑁆𑀬𑀸𑀓𑀭𑀡𑀫𑀥𑀻𑀢𑁂 𑀚𑀸𑀦𑀸𑀢𑀺 𑀯𑀸 𑀯𑁂𑀬𑁆𑀬𑀸𑀓𑀭𑀡𑁄, 𑀙𑀦𑁆𑀤𑀲𑁄, 𑀓𑀫𑀓𑁄, 𑀧𑀤𑀓𑁄, 𑀯𑁂𑀦𑀬𑀺𑀓𑁄, 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀤𑁆𑀯𑀺𑀢𑀕𑁆𑀕𑀳𑀡𑀁 𑀧𑀼𑀣𑀕𑁂𑀯 𑀯𑀺𑀥𑀸𑀦𑀢𑁆𑀣𑀁 𑀚𑀸𑀦𑀦𑀲𑁆𑀲 𑀘 𑀅𑀚𑁆𑀛𑁂𑀦𑀯𑀺𑀲𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀲𑀺𑀤𑁆𑀥𑀽𑀧𑀲𑀗𑁆𑀕𑀳𑀢𑁆𑀣𑀁 𑀘.

𑁧𑁫. 𑀢𑀲𑁆𑀲 𑀯𑀺𑀲𑀬𑁂 𑀤𑁂𑀲𑁂.

𑀙𑀝𑁆𑀞𑀺𑀬𑀦𑁆𑀢𑀸 𑀯𑀺𑀲𑀬𑁂 𑀤𑁂𑀲𑀭𑀽𑀧𑁂 𑀡𑁄 𑀳𑁄𑀢𑀺, 𑀯𑀲𑀸𑀢𑀻𑀦𑀁 𑀯𑀺𑀲𑀬𑁄 𑀤𑁂𑀲𑁄 𑀯𑀸𑀲𑀸𑀢𑁄, 𑀤𑁂𑀲𑁂𑀢𑀺 𑀓𑀺𑀁? 𑀘𑀓𑁆𑀔𑀼𑀲𑁆𑀲 𑀯𑀺𑀲𑀬𑁄 𑀭𑀽𑀧𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀯𑀺𑀲𑀬𑁄-𑀦𑀼𑀯𑀸𑀓𑁄.

𑁧𑁬. 𑀦𑀺𑀯𑀸𑀲𑁂 𑀢𑀦𑁆𑀦𑀸𑀫𑁂.

𑀙𑀝𑁆𑀞𑀺𑀬𑀦𑁆𑀢𑀸 𑀦𑀺𑀯𑀸𑀲𑁂 𑀤𑁂𑀲𑁂 𑀢𑀦𑁆𑀦𑀸𑀫𑁂 𑀡𑁄 𑀳𑁄𑀢𑀺, 𑀲𑀺𑀯𑀻𑀦𑀁 𑀦𑀺𑀯𑀸𑀲𑁄 𑀤𑁂𑀲𑁄 𑀲𑁂𑀩𑁆𑀬𑁄, 𑀯𑀸𑀲𑀸𑀢𑁄.

𑁧𑁭. 𑀅𑀤𑀽𑀭𑀪𑀯𑁂.

𑀙𑀝𑁆𑀞𑀺𑀬𑀦𑁆𑀢𑀸 𑀅𑀤𑀽𑀭𑀪𑀯𑁂 𑀤𑁂𑀲𑁂 𑀢𑀦𑁆𑀦𑀸𑀫𑁂 𑀡𑁄 𑀳𑁄𑀢𑀺, 𑀯𑀺𑀤𑀺𑀲𑀸𑀬 𑀅𑀤𑀽𑀭𑀪𑀯𑀁 𑀯𑁂𑀤𑀺𑀲𑀁.

𑁧𑁮. 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂.

𑀢𑀢𑀺𑀬𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑁂 𑀤𑁂𑀲𑁂 𑀢𑀦𑁆𑀦𑀸𑀫𑁂 𑀡𑁄 𑀳𑁄𑀢𑀺, 𑀓𑀼𑀲𑀫𑁆𑀩𑁂𑀦 𑀦𑀺𑀩𑁆𑀩𑀢𑁆𑀢𑀸 𑀓𑁄𑀲𑀫𑁆𑀪𑀻 𑀦𑀕𑀭𑀻, 𑀓𑀸𑀓𑀦𑁆𑀤𑀻, 𑀫𑀸𑀓𑀦𑁆𑀤𑀻, 𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀢𑁆𑀢𑀸 𑀲𑀸𑀳𑀲𑁆𑀲𑀻 𑀧𑀭𑀻𑀔𑀸, 𑀳𑁄𑀢𑀼𑀫𑁆𑀳𑀺 𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀬𑀣𑀸𑀬𑁄𑀕𑀁 𑀢𑀢𑀺𑀬𑀸.

𑁧𑁯. 𑀢𑀫𑀻𑀥𑀢𑁆𑀣𑀺.

𑀢𑀦𑁆𑀢𑀺 𑀧𑀞𑀫𑀦𑁆𑀢𑀸 𑀇𑀥𑀸𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀤𑁂𑀲𑁂 𑀢𑀦𑁆𑀦𑀸𑀫𑁂 𑀡𑁄 𑀳𑁄𑀢𑀺, 𑀬𑀦𑁆𑀢𑀁 𑀧𑀞𑀫𑀦𑁆𑀢𑀫𑀢𑁆𑀣𑀺 𑀘𑁂, 𑀉𑀤𑀼𑀫𑁆𑀩𑀭𑀸 𑀅𑀲𑁆𑀫𑀺𑀁 𑀤𑁂𑀲𑁂 𑀲𑀦𑁆𑀢𑀻𑀢𑀺 𑀑𑀤𑀼𑀫𑁆𑀩𑀭𑁄, 𑀩𑀸𑀤𑀭𑁄, 𑀩𑀩𑁆𑀩𑀚𑁄.

𑁨𑁦. 𑀢𑀢𑁆𑀭 𑀪𑀯𑁂.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀪𑀯𑀢𑁆𑀣𑁂 𑀡𑁄 𑀳𑁄𑀢𑀺, 𑀉𑀤𑀓𑁂 𑀪𑀯𑁄 𑀑𑀤𑀓𑁄, 𑀑𑀭𑀲𑁄, 𑀚𑀸𑀦𑀧𑀤𑁄, 𑀫𑀸𑀕𑀥𑁄, 𑀓𑀸𑀧𑀺𑀮𑀯𑀢𑁆𑀣𑀯𑁄, 𑀓𑁄𑀲𑀫𑁆𑀩𑁄.

𑁨𑁧. 𑀅𑀚𑁆𑀚𑀸𑀤𑀻𑀳𑀺 𑀢𑀦𑁄.

𑀪𑀯𑀢𑁆𑀣𑁂 𑀅𑀚𑁆𑀚𑀸𑀤𑀻𑀳𑀺 𑀢𑀦𑁄 𑀳𑁄𑀢𑀺, 𑀅𑀚𑁆𑀚 𑀪𑀯𑁄 𑀅𑀚𑁆𑀚𑀢𑀦𑁄, 𑀲𑁆𑀯𑀸𑀢𑀦𑁄, 𑀳𑀺𑀬𑁆𑀬𑀢𑁆𑀢𑀦𑁄.

𑁨𑁨. 𑀧𑀼𑀭𑀸𑀢𑁄 𑀡𑁄 𑀘.

𑀧𑀼𑀭𑀸𑀇𑀘𑁆𑀘𑀲𑁆𑀫𑀸 𑀪𑀯𑀢𑁆𑀣𑁂 𑀡𑁄 𑀳𑁄𑀢𑀺 𑀢𑀦𑁄 𑀘, 𑀧𑀼𑀭𑀸𑀡𑁄, 𑀧𑀼𑀭𑀸𑀢𑀦𑁄.

𑁨𑁩. 𑀅𑀫𑀸𑀢𑁆𑀯𑀘𑁆𑀘𑁄.

𑀅𑀫𑀸𑀲𑀤𑁆𑀤𑀢𑁄 𑀅𑀘𑁆𑀘𑁄 𑀳𑁄𑀢𑀺 𑀪𑀯𑀢𑁆𑀣𑁂, 𑀅𑀫𑀘𑁆𑀘𑁄.

𑁨𑁪. 𑀫𑀚𑁆𑀛𑀸𑀤𑀺𑀢𑁆𑀯𑀺𑀫𑁄.

𑀫𑀚𑁆𑀛𑀸𑀤𑀻𑀳𑀺 𑀲𑀢𑁆𑀢𑀫𑁆𑀬𑀦𑁆𑀢𑁂𑀳𑀺 𑀪𑀯𑀢𑁆𑀢𑁂 𑀇𑀫𑁄 𑀳𑁄𑀢𑀺, 𑀫𑀚𑁆𑀛𑀺𑀫𑁄, 𑀅𑀦𑁆𑀢𑀺𑀫𑁄. 𑀫𑀚𑁆𑀛, 𑀅𑀦𑁆𑀢, 𑀳𑁂𑀝𑁆𑀞𑀸, 𑀉𑀧𑀭𑀺, 𑀑𑀭, 𑀧𑀸𑀭, 𑀧𑀘𑁆𑀙𑀸, 𑀅𑀩𑁆𑀪𑀦𑁆𑀢𑀭, 𑀧𑀘𑁆𑀘𑀦𑁆𑀢 (𑀧𑀼𑀭𑀢𑁆𑀣𑀸, 𑀩𑀸𑀳𑀺𑀭).

𑁨𑁫. 𑀓𑀡𑀡𑁂𑀬𑁆𑀬𑀡𑁂𑀬𑁆𑀬𑀓𑀬𑀺𑀬𑀸.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀏𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀪𑀯𑀢𑁆𑀣𑁂, 𑀓𑀡-𑀓𑀼𑀲𑀺𑀦𑀸 𑀭𑀸𑀬𑀁 𑀪𑀯𑁄 𑀓𑁄𑀲𑀺𑀦𑀸𑀭𑀓𑁄, 𑀫𑀸𑀕𑀥𑀓𑁄, 𑀆𑀭𑀜𑁆𑀜𑀓𑁄 𑀯𑀺𑀳𑀸𑀭𑁄. 𑀡𑁂𑀬𑁆𑀬-𑀕𑀗𑁆𑀕𑁂𑀬𑁆𑀬𑁄, 𑀧𑀩𑁆𑀩𑀢𑁂𑀬𑁆𑀬𑁄, 𑀯𑀸𑀦𑁂𑀬𑁆𑀬𑁄. 𑀡𑁂𑀬𑁆𑀬𑀓-𑀓𑁄𑀮𑁂𑀬𑁆𑀬𑀓𑁄, 𑀩𑀸𑀭𑀸𑀡𑀲𑁂𑀬𑁆𑀬𑀓𑁄, 𑀘𑀫𑁆𑀧𑁂𑀬𑁆𑀬𑀓𑁄, 𑀫𑀺𑀣𑀺𑀮𑁂𑀬𑁆𑀬𑀓𑁄𑀢𑀺 𑀏𑀬𑁆𑀬𑀓𑁄. 𑀬-𑀕𑀫𑁆𑀫𑁄, 𑀤𑀺𑀩𑁆𑀩𑁄. 𑀇𑀬𑀕𑀸𑀫𑀺𑀬𑁄, 𑀉𑀤𑀭𑀺-𑀬𑁄, 𑀤𑀺𑀯𑀺𑀬𑁄, 𑀧𑀜𑁆𑀘𑀸𑀮𑀺𑀬𑁄, 𑀩𑁄𑀥𑀺𑀧𑀓𑁆𑀔𑀺𑀬𑁄, 𑀮𑁄𑀓𑀺𑀬𑁄.

𑁨𑁬. 𑀡𑀺𑀓𑁄.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀪𑀯𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺, 𑀲𑀸𑀭𑀤𑀺𑀓𑁄 𑀤𑀺𑀯𑀲𑁄, 𑀲𑀸𑀭𑀤𑀺𑀓𑀸 𑀭𑀢𑁆𑀢𑀺.

𑁨𑁭. 𑀢𑀫𑀲𑁆𑀲 𑀲𑀺𑀧𑁆𑀧𑀁 𑀲𑀻𑀮𑀁 𑀧𑀡𑁆𑀬𑀁 𑀧𑀳𑀭𑀡𑀁 𑀧𑀬𑁄𑀚𑀦𑀁.

𑀧𑀞𑀫𑀦𑁆𑀢𑀸 𑀲𑀺𑀧𑁆𑀧𑀸𑀤𑀺𑀯𑀸𑀘𑀓𑀸 𑀅𑀲𑁆𑀲𑁂𑀢𑀺𑀙𑀝𑁆𑀞𑀺𑀬𑀢𑁆𑀣𑁂𑀡𑀺𑀓𑁄 𑀳𑁄𑀢𑀺, 𑀯𑀻𑀡𑀸𑀯𑀸𑀤𑀦𑀁 𑀲𑀺𑀧𑁆𑀧𑀫𑀲𑁆𑀲 𑀯𑁂𑀡𑀺𑀓𑁄, 𑀫𑁄𑀤𑀗𑁆𑀕𑀺𑀓𑁄, 𑀯𑀁𑀲𑀺𑀓𑁄, 𑀧𑀁𑀲𑀼𑀓𑀽- 𑀮𑀥𑀸𑀭𑀡𑀁 𑀲𑀻𑀮𑀫𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑁄, 𑀢𑁂𑀘𑀻𑀯𑀭𑀺𑀓𑁂𑀯, 𑀕𑀦𑁆𑀥𑁄𑀧𑀡𑁆𑀬𑀫𑀲𑁆𑀲 𑀕𑀦𑁆𑀥𑀺𑀓𑁄, 𑀢𑁂𑀮𑀺𑀓𑁄, 𑀕𑁄𑀴𑀺𑀓𑁄, 𑀘𑀸𑀧𑁄 𑀧𑀳𑀭𑀡𑀫𑀲𑁆𑀲 𑀘𑀸𑀧𑀺𑀓𑁄, 𑀢𑁄𑀫𑀭𑀺𑀓𑁄, 𑀫𑀼𑀕𑁆𑀕𑀭𑀺𑀓𑁄, 𑀉𑀧𑀥𑀺𑀧𑁆𑀧𑀬𑁄𑀚𑀦𑀫𑀲𑁆𑀲 𑀑𑀧𑀥𑀺𑀓𑀁, 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁.

𑁨𑁮. 𑀢𑀁 𑀳𑀦𑁆𑀢𑀭𑀳𑀢𑀺 𑀕𑀘𑁆𑀙𑀢𑀼𑀜𑁆𑀙𑀢𑀺 𑀘𑀭𑀢𑀺.

𑀤𑀼𑀢𑀺𑀬𑀦𑁆𑀢𑀸 𑀳𑀦𑁆𑀢𑀻𑀢𑀺 𑀏𑀯𑀫𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀡𑀻𑀓𑁄 𑀳𑁄𑀢𑀺. 𑀧𑀓𑁆𑀔𑀻𑀳𑀺𑀧𑀓𑁆𑀔𑀺𑀦𑁄 𑀳𑀦𑁆𑀢𑀻𑀢𑀺 𑀧𑀓𑁆𑀔𑀺𑀓𑁄, 𑀲𑀸𑀓𑀼𑀦𑀺𑀓𑁄, 𑀫𑀸𑀬𑀽𑀭𑀺𑀓𑁄. 𑀫𑀘𑁆𑀙𑁂𑀳𑀺-𑀫𑀘𑁆𑀙𑀺𑀓𑁄, 𑀫𑁂𑀦𑀺𑀓𑁄. 𑀫𑀺𑀕𑁂𑀳𑀺-𑀫𑀸𑀕𑀯𑀺𑀓𑁄 𑀳𑀸𑀭𑀺𑀡𑀺𑀓𑁄, ‘𑀲𑀽𑀓𑀭𑀺𑀓𑁄’𑀢𑀺 𑀇𑀓𑁄. 𑀲𑀢𑀫𑀭𑀳𑀢𑀻𑀢𑀺 𑀲𑀸𑀢𑀺𑀓𑀁, 𑀲𑀦𑁆𑀤𑀺𑀝𑁆𑀞𑀺𑀓𑁄, 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄, 𑀲𑀸𑀳𑀲𑁆𑀲𑀺𑀓𑁄, ‘𑀲𑀳𑀲𑁆𑀲𑀺𑀬𑁄’𑀢𑀺 𑀇𑀬𑁄. 𑀧𑀭𑀤𑀸𑀭𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀤𑀸𑀭𑀺𑀓𑁄, 𑀫𑀕𑁆𑀕𑀺𑀓𑁄, 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑁄. 𑀩𑀤𑀭𑁂 𑀉𑀜𑁆𑀙𑀢𑀻𑀢𑀺 𑀩𑀸𑀤𑀭𑀺𑀓𑁄, 𑀲𑀸𑀫𑀸𑀓𑀺𑀓𑁄. 𑀥𑀫𑁆𑀫𑀁 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄, 𑀅𑀥𑀫𑁆𑀫𑀺𑀓𑁄.

𑁨𑁯. 𑀢𑁂𑀦 𑀓𑀢𑀁 𑀓𑀻𑀢𑀁 𑀩𑀤𑁆𑀥𑀫𑀪𑀺𑀲𑀗𑁆𑀔𑀢𑀁 𑀲𑀁𑀲𑀝𑁆𑀞𑀁 𑀳𑀢𑀁 𑀳𑀦𑁆𑀢𑀺 𑀚𑀺𑀢𑀁 𑀚𑀬𑀢𑀺 𑀤𑀺𑀩𑁆𑀩𑀢𑀺 𑀔𑀡𑀢𑀺 𑀢𑀭𑀢𑀺 𑀘𑀭𑀢𑀺 𑀯𑀳𑀢𑀺 𑀚𑀻𑀯𑀢𑀺.

𑀢𑀢𑀺𑀬𑀦𑁆𑀢𑀸 𑀓𑀢𑀸𑀤𑀺𑀲𑁆𑀯𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺. 𑀓𑀸𑀬𑁂𑀦 𑀓𑀢𑀁 𑀓𑀸𑀬𑀺𑀓𑀁, 𑀯𑀸𑀘𑀲𑀺𑀓𑀁, 𑀫𑀸𑀦𑀲𑀺𑀓𑀁, 𑀯𑀸𑀢𑁂𑀦 𑀓𑀢𑁄 𑀆𑀩𑀸𑀥𑁄 𑀯𑀸𑀢𑀺𑀓𑁄. 𑀲𑀢𑁂𑀦 𑀓𑀻𑀢𑀁 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁, 𑀫𑀽𑀮𑀢𑁄𑀯, 𑀤𑁂𑀯𑀤𑀢𑁂𑀦 𑀓𑀻𑀢𑀦𑁆𑀢𑀺 𑀦 𑀳𑁄𑀢𑀺 𑀢𑀤𑀢𑁆𑀣𑀸𑀧𑁆𑀧𑀢𑀻𑀢𑀺𑀬𑀸. 𑀯𑀭𑀢𑁆𑀢𑀸𑀬 𑀩𑀤𑁆𑀥𑁄 𑀯𑀸𑀭𑀢𑁆𑀢𑀺𑀓𑁄, 𑀆𑀬𑀲𑀺𑀓𑁄, 𑀧𑀸𑀲𑀺𑀓𑁄. 𑀖𑀢𑁂𑀦 𑀅𑀪𑀺𑀲𑀗𑁆𑀔𑀢𑀁 𑀲𑀁𑀲𑀝𑁆𑀞𑀁 𑀯𑀸 𑀖𑀸𑀢𑀺𑀓𑀁, 𑀕𑁄𑀴𑀺𑀓𑀁, 𑀤𑀸𑀥𑀺𑀓𑀁, 𑀫𑀸𑀭𑀺𑀘𑀺𑀓𑀁. 𑀚𑀸𑀮𑁂𑀦 𑀳𑀢𑁄 𑀳𑀦𑁆𑀢𑀻𑀢𑀺 𑀯𑀸 𑀚𑀸𑀮𑀺𑀓𑁄, 𑀩𑀸𑀮𑀻𑀲𑀺𑀓𑁄. 𑀅𑀓𑁆𑀔𑁂𑀳𑀺 𑀚𑀺𑀢𑀫𑀓𑁆𑀔𑀺𑀓𑀁, 𑀲𑀸𑀮𑀸𑀓𑀺𑀓𑀁. 𑀅𑀓𑁆𑀔𑁂𑀳𑀺 𑀚𑀬𑀢𑀺 𑀤𑀺𑀩𑁆𑀩𑀢𑀻𑀢𑀺 𑀯𑀸 𑀅𑀓𑁆𑀔𑀺𑀓𑁄. 𑀔𑀡𑀺𑀢𑁆𑀢𑀺𑀬𑀸 𑀔𑀡𑀢𑀻𑀢𑀺 𑀔𑀸𑀡𑀺𑀢𑁆𑀢𑀺𑀓𑁄, 𑀓𑀼𑀤𑁆𑀤𑀸𑀮𑀺𑀓𑁄, 𑀤𑁂𑀯𑀤𑀢𑁆𑀢𑁂𑀦 𑀚𑀺𑀢𑀁, 𑀅𑀗𑁆𑀕𑀼𑀮𑁆𑀬𑀸 𑀔𑀡𑀢𑀻𑀢𑀺 𑀦 𑀳𑁄𑀢𑀺 𑀢𑀤𑀢𑁆𑀣𑀸𑀦𑀯𑀕𑀫𑀸. 𑀉𑀴𑀼𑀫𑁆𑀧𑁂𑀦 𑀢𑀭𑀢𑀻𑀢𑀺 𑀑𑀴𑀼𑀫𑁆𑀧𑀺𑀓𑁄, ‘𑀉𑀴𑀼𑀫𑁆𑀧𑀺𑀓𑁄’𑀢𑀺 𑀇𑀓𑁄 𑀕𑁄𑀧𑀼𑀘𑁆𑀙𑀺𑀓𑁄, 𑀦𑀸𑀯𑀺𑀓𑁄. 𑀲𑀓𑀝𑁂𑀦 𑀘𑀭𑀢𑀻𑀢𑀺 𑀲𑀸𑀓𑀝𑀺𑀓𑁄, ‘𑀭𑀣𑀺𑀓𑁄, 𑀧𑀭𑀧𑁆𑀧𑀺𑀓𑁄’𑀢𑀺 𑀇𑀓𑁄. 𑀔𑀦𑁆𑀥𑁂𑀦 𑀯𑀳𑀢𑀻𑀢𑀺 𑀔𑀦𑁆𑀥𑀺𑀓𑁄, 𑀅𑀁𑀲𑀺𑀓𑁄, ‘𑀲𑀻𑀲𑀺𑀓𑁄’𑀢𑀺 𑀇𑀓𑁄. 𑀯𑁂𑀢𑀦𑁂𑀦 𑀚𑀻𑀯𑀢𑀻𑀢𑀺 𑀯𑁂𑀢𑀦𑀺𑀓𑁄, ‘𑀪𑀢𑀺𑀓𑁄, 𑀓𑀬𑀺𑀓𑁄, 𑀯𑀺𑀓𑁆𑀓𑀬𑀺𑀓𑁄, 𑀓𑀬𑀯𑀺𑀓𑁆𑀓𑀬𑀺𑀓𑁄’𑀢𑀺 𑀇𑀓𑁄.

𑁩𑁦. 𑀢𑀲𑁆𑀲 𑀲𑀁𑀯𑀢𑁆𑀢𑀢𑀺.

𑀘𑀢𑀼𑀢𑁆𑀣𑀺𑀬𑀦𑁆𑀢𑀸 𑀲𑀁𑀯𑀢𑁆𑀢𑀢𑀻𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺, 𑀧𑀼𑀦𑀩𑁆𑀪𑀯𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀧𑁄𑀦𑁄𑀪𑀯𑀺𑀓𑁄, 𑀇𑀢𑁆𑀣𑀺𑀬𑀁 𑀧𑁄𑀦𑁄 𑀪𑀯𑀺𑀓𑀸, 𑀮𑁄𑀓𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀮𑁄𑀓𑀺𑀓𑁄 𑀲𑀼𑀝𑁆𑀞𑀼 𑀅𑀕𑁆𑀕𑁄𑀢𑀺 𑀲𑀕𑁆𑀕𑁄, 𑀲𑀕𑁆𑀕𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀲𑁄𑀯𑀕𑁆𑀕𑀺𑀓𑁄, 𑀲𑀲𑁆𑀲𑁄𑀯𑀓 𑀢𑀤𑀫𑀺𑀦𑀸𑀤𑀺𑀧𑀸𑀞𑀸, 𑀥𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀥𑀜𑁆𑀜𑀁, 𑀬𑁄.

𑁩𑁧. 𑀢𑀢𑁄 𑀲𑀫𑁆𑀪𑀽𑀢𑀫𑀸𑀕𑀢𑀁.

𑀧𑀜𑁆𑀘𑀫𑁆𑀬𑀦𑁆𑀢𑀸 𑀲𑀫𑁆𑀪𑀽𑀢𑀫𑀸𑀕𑀢𑀦𑁆𑀢𑀺 𑀏𑀢𑁂𑀲𑁆𑀯𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺, 𑀫𑀸𑀢𑀺𑀓𑁄 𑀲𑀫𑁆𑀪𑀽𑀢𑀫𑀸𑀕𑀢𑀁 𑀯𑀸 𑀫𑀢𑁆𑀢𑀺𑀓𑀁, 𑀧𑁂𑀢𑁆𑀢𑀺𑀓𑀁, 𑀡𑁆𑀬𑀭𑀺𑀬𑀡 -𑀬𑀸𑀧𑀺 𑀤𑀺𑀲𑁆𑀲𑀦𑁆𑀢𑀺, 𑀲𑀼𑀭𑀪𑀺𑀢𑁄 𑀲𑀫𑁆𑀪𑀽𑀢𑀁 𑀲𑁄𑀭𑀪𑁆𑀬𑀁, 𑀣𑀦𑀢𑁄 𑀲𑀫𑁆𑀪𑀽𑀢𑀁 𑀣𑀜𑁆𑀜𑀁, 𑀧𑀺𑀢𑀺𑀢𑁄 𑀲𑀫𑁆𑀪𑀽𑀢𑁄 𑀧𑁂𑀢𑁆𑀢𑀺𑀬𑁄, 𑀫𑀸𑀢𑀺𑀬𑁄, 𑀫𑀢𑁆𑀢𑀺𑀬𑁄, 𑀫𑀘𑁆𑀘𑁄 𑀯𑀸.

𑁩𑁨. 𑀢𑀢𑁆𑀣 𑀯𑀲𑀢𑀺 𑀯𑀺𑀤𑀺𑀢𑁄 𑀪𑀢𑁆𑀢𑁄 𑀦𑀺𑀬𑀼𑀢𑁆𑀢𑁄.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀢𑀢𑁆𑀣 𑀯𑀲𑀢𑀻𑀢𑁆𑀯𑁂𑀯𑀫𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀡𑀺𑀓𑁄 𑀳𑁄𑀢𑀺. 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀻𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀆𑀭𑀜𑁆𑀜𑀺𑀓𑁄, 𑀲𑁄𑀲𑀸𑀦𑀺𑀓𑁄. 𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀓𑁄. 𑀘𑀢𑀼𑀫𑀳𑀸𑀭𑀸𑀚𑁂𑀲𑀼 𑀪𑀢𑁆𑀢𑀸 𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸. 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄 𑀤𑀲𑁆𑀲𑁄𑀓 𑀢𑀤𑀫𑀺𑀦𑀸𑀤𑀺𑀧𑀸𑀞𑀸, 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀇𑀓𑁄-𑀦𑀯𑀓𑀫𑁆𑀫𑀺𑀓𑁄, 𑀓𑀺𑀬𑁄𑀚𑀸𑀢𑀺𑀓𑀺𑀬𑁄, 𑀅𑀦𑁆𑀥𑀓𑀺𑀬𑁄.

𑁩𑁩. 𑀢𑀲𑁆𑀲𑀺𑀤𑀁.

𑀙𑀝𑁆𑀞𑀺𑀬𑀦𑁆𑀢𑀸 𑀇𑀤𑀫𑀺𑀘𑁆𑀘𑀲𑁆𑀫𑀺𑀁 𑀅𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺, 𑀲𑀗𑁆𑀖𑀲𑁆𑀲 𑀇𑀤𑀁 𑀲𑀗𑁆𑀖𑀺𑀓𑀁, 𑀧𑀼𑀕𑁆𑀕𑀮𑀺𑀓𑀁, 𑀲𑀓𑁆𑀬𑀧𑀼𑀢𑁆𑀢𑀺𑀓𑁄, 𑀦𑀸𑀢𑀺𑀧𑀼𑀢𑁆𑀢𑀺𑀓𑁄, 𑀚𑁂𑀦𑀤𑀢𑁆𑀢𑀺𑀓𑁄, 𑀓𑀺𑀬𑁂-𑀲𑀓𑀺𑀬𑁄, 𑀧𑀭𑀓𑀺𑀬𑁄, 𑀦𑀺𑀬𑁂-𑀅𑀢𑁆𑀢𑀦𑀺𑀬𑀁, 𑀓𑁂- 𑀲𑀓𑁄 𑀭𑀸𑀚𑀓𑀁 𑀪𑀡𑁆𑀟𑀁.

𑁩𑁪. 𑀡𑁄.

𑀙𑀝𑁆𑀞𑀺𑀬𑀦𑁆𑀢𑀸 𑀇𑀤𑀫𑀺𑀘𑁆𑀘𑀲𑁆𑀫𑀺𑀁 𑀅𑀢𑁆𑀣𑁂 𑀡𑁄 𑀳𑁄𑀢𑀺, 𑀓𑀘𑁆𑀘𑀸𑀬𑀦𑀲𑁆𑀲 𑀇𑀤𑀁 𑀓𑀘𑁆𑀘𑀸𑀬𑀦𑀁 𑀩𑁆𑀬𑀸𑀓𑀭𑀡𑀁, 𑀲𑁄𑀕𑀢𑀁 𑀲𑀸𑀲𑀦𑀁, 𑀫𑀸𑀳𑀺𑀲𑀁 𑀫𑀁𑀲𑀸𑀤𑀺.

𑁩𑁫. 𑀕𑀯𑀸𑀤𑀻𑀳𑀺 𑀬𑁄.

𑀕𑀯𑀸𑀤𑀻𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀇𑀤𑀫𑀺𑀘𑁆𑀘𑀲𑁆𑀫𑀺𑀁 𑀅𑀢𑁆𑀣𑁂 𑀬𑁄 𑀳𑁄𑀢𑀺, 𑀕𑀼𑀦𑁆𑀦𑀁 𑀇𑀤𑀁 𑀕𑀩𑁆𑀬𑀁 𑀫𑀁𑀲𑀸𑀤𑀺, 𑀓𑀩𑁆𑀬𑀁, 𑀤𑀩𑁆𑀩𑀁.

𑁩𑁬. 𑀧𑀺𑀢𑀺𑀢𑁄 𑀪𑀸𑀢𑀭𑀺 𑀭𑁂𑀬𑁆𑀬𑀡.

𑀧𑀺𑀢𑀼𑀲𑀤𑁆𑀤𑀸 𑀢𑀲𑁆𑀲 𑀪𑀸𑀢𑀭𑀺 𑀭𑁂𑀬𑁆𑀬𑀡 𑀳𑁄𑀢𑀺, 𑀧𑀺𑀢𑀼 𑀪𑀸𑀢𑀸 𑀧𑁂𑀢𑁆𑀢𑁂𑀬𑁆𑀬𑁄.

𑁩𑁭. 𑀫𑀸𑀢𑀺𑀢𑁄 𑀘 𑀪𑀕𑀺𑀦𑀺𑀬𑀁 𑀙𑁄.

𑀫𑀸𑀢𑀺𑀢𑁄 𑀧𑀺𑀢𑀺𑀢𑁄 𑀘 𑀢𑁂𑀲𑀁 𑀪𑀕𑀺𑀦𑀺𑀬𑀁 𑀙𑁄 𑀳𑁄𑀢𑀺, 𑀫𑀸𑀢𑀼 𑀪𑀕𑀺𑀦𑀻 𑀫𑀸𑀢𑀼𑀘𑁆𑀙𑀸, 𑀧𑀺𑀢𑀼 𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸, 𑀓𑀣𑀁 ‘𑀫𑀸𑀢𑀼𑀮𑁄’𑀢𑀺 ‘‘𑀫𑀸𑀢𑀼𑀮𑀸𑀤𑀺𑀢𑁆𑀯𑀸𑀦𑀻’’𑀢𑀺 𑀦𑀺𑀧𑀸𑀢𑀦𑀸.

𑁩𑁮. 𑀫𑀸𑀢𑀸𑀧𑀺𑀢𑀽𑀲𑁆𑀯𑀸𑀫𑀳𑁄.

𑀫𑀸𑀢𑀸𑀧𑀺𑀢𑀽𑀳𑀺 𑀢𑁂𑀲𑀁 𑀫𑀸𑀢𑀸𑀧𑀺𑀢𑀽𑀲𑀼 𑀆𑀫𑀳𑁄 𑀳𑁄𑀢𑀺, 𑀫𑀸𑀢𑀼 𑀫𑀸𑀢𑀸 𑀫𑀸𑀢𑀸𑀫𑀳𑀻, 𑀫𑀸𑀢𑀼 𑀧𑀺𑀢𑀸 𑀫𑀸𑀢𑀸𑀫𑀳𑁄, 𑀧𑀺𑀢𑀼 𑀫𑀸𑀢𑀸 𑀧𑀺𑀢𑀸𑀫𑀳𑀻, 𑀧𑀺𑀢𑀼 𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀦 𑀬𑀣𑀸𑀲𑀗𑁆𑀔𑁆𑀬𑀁, 𑀧𑀘𑁆𑀘𑁂𑀓𑀸𑀪𑀺 𑀲𑀫𑁆𑀩𑀦𑁆𑀥𑀸.

𑁩𑁯. 𑀳𑀺𑀢𑁂 𑀭𑁂𑀬𑁆𑀬𑀡.

𑀫𑀸𑀢𑀸𑀧𑀺𑀢𑀽𑀳𑀺 𑀳𑀺𑀢𑁂 𑀭𑁂𑀬𑁆𑀬𑀡 𑀳𑁄𑀢𑀺, 𑀫𑀢𑁆𑀢𑁂𑀬𑁆𑀬𑁄, 𑀧𑁂𑀢𑁆𑀢𑁂𑀬𑁆𑀬𑁄.

𑁪𑁦. 𑀦𑀺𑀦𑁆𑀤𑀸𑀜𑁆𑀜𑀸𑀢𑀧𑁆𑀧𑀧𑀝𑀺𑀪𑀸𑀕𑀭𑀲𑁆𑀲𑀤𑀬𑀸𑀲𑀜𑁆𑀜𑀸𑀲𑀼 𑀓𑁄.

𑀦𑀺𑀦𑁆𑀤𑀸𑀤𑀻𑀲𑁆𑀯𑀢𑁆𑀣𑁂𑀬𑀼 𑀦𑀸𑀫𑀲𑁆𑀫𑀸 𑀓𑁄 𑀳𑁄𑀢𑀺, 𑀦𑀺𑀦𑁆𑀤𑀸𑀬𑀁-𑀫𑀼𑀡𑁆𑀟𑀓𑁄, 𑀲𑀫𑀡𑀓𑁄. 𑀅𑀜𑁆𑀜𑀸𑀢𑁂-𑀓𑀲𑁆𑀲𑀸𑀬𑀁 𑀅𑀲𑁆𑀲𑁄𑀢𑀺 𑀅𑀲𑁆𑀲𑀓𑁄, 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀲𑀫𑁆𑀩𑀦𑁆𑀥𑀺𑀯𑀺𑀲𑁂𑀲𑀸𑀦𑀯𑀕𑀫𑁄𑀯𑀕𑀫𑁆𑀬𑀢𑁂. 𑀅𑀧𑁆𑀧𑀢𑁆𑀣𑁂𑀢𑁂𑀮𑀓𑀁, 𑀖𑀢𑀓𑀁. 𑀧𑀝𑀺𑀪𑀸𑀕𑀢𑁆𑀣𑁂-𑀳𑀢𑁆𑀣𑀻 𑀯𑀺𑀬 𑀳𑀢𑁆𑀣𑀺𑀓𑁄, 𑀅𑀲𑁆𑀲𑀓𑁄, 𑀩𑀮𑀻𑀩𑀤𑁆𑀤𑀓𑁄. 𑀭𑀲𑁆𑀲𑁂-𑀫𑀸𑀦𑀼𑀲𑀓𑁄, 𑀭𑀼𑀓𑁆𑀔𑀓𑁄, 𑀧𑀺𑀮𑀓𑁆𑀔𑀓𑁄. 𑀤𑀬𑀸𑀬𑀁-𑀧𑀼𑀢𑁆𑀢𑀓𑁄, 𑀯𑀘𑁆𑀙𑀓𑁄. 𑀲𑀜𑁆𑀜𑀸𑀬𑀁-𑀫𑁄𑀭𑁄 𑀯𑀺𑀬 𑀫𑁄𑀭𑀓𑁄.

𑁪𑁧. 𑀢𑀫𑀲𑁆𑀲𑀧𑀭𑀺𑀫𑀸𑀡𑀁 𑀡𑀺𑀓𑁄 𑀘.

𑀧𑀞𑀫𑀦𑁆𑀢𑀸 𑀅𑀲𑁆𑀲𑁂𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀡𑀺𑀓𑁄 𑀳𑁄𑀢𑀺 𑀓𑁄 𑀘 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺, 𑀧𑀭𑀺𑀫𑀻𑀬𑀢𑁂 𑀦𑁂𑀦𑁂𑀢𑀺 𑀧𑀭𑀺𑀫𑀸𑀡𑀁, 𑀤𑁄𑀡𑁄 𑀧𑀭𑀺𑀫𑀸𑀡𑀫𑀲𑁆𑀲 𑀤𑁄𑀡𑀺𑀓𑁄 𑀯𑀻𑀳𑀺, 𑀔𑀸𑀭𑀲𑀢𑀺𑀓𑁄, 𑀔𑀸𑀭𑀲𑀳𑀲𑁆𑀲𑀺𑀓𑁄 𑀆𑀲𑀻𑀢𑀺𑀓𑁄 𑀯𑀬𑁄, 𑀉𑀧𑀟𑁆𑀠𑀓𑀸𑀬𑀺𑀓𑀁 𑀩𑀺𑀫𑁆𑀩𑁄𑀳𑀦𑀁, 𑀧𑀜𑁆𑀘𑀓𑀁, 𑀙𑀓𑁆𑀓𑀁.

𑁪𑁨. 𑀬𑀢𑁂𑀢𑁂𑀳𑀺 𑀢𑁆𑀢𑀓𑁄.

𑀬𑀸𑀤𑀻𑀳𑀺 𑀧𑀞𑀫𑀦𑁆𑀢𑁂𑀳𑀻 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀢𑁆𑀢𑀓𑁄 𑀳𑁄𑀢𑀺, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺, 𑀬𑀁 𑀧𑀭𑀺𑀫𑀸𑀡𑀫𑀲𑁆𑀲 𑀬𑀢𑁆𑀢𑀓𑀁, 𑀢𑀢𑁆𑀢𑀓𑀁, 𑀏𑀢𑁆𑀢𑀓𑀁, 𑀆𑀯𑀢𑀓𑁂 𑀬𑀸𑀯𑀢𑀓𑁄, 𑀢𑀸𑀯𑀢𑀓𑁄 (𑀏𑀢𑀸𑀯𑀢𑀓𑁄).

𑁪𑁩. 𑀲𑀩𑁆𑀩𑀸 𑀘𑀸𑀯𑀦𑁆𑀢𑀼.

𑀲𑀩𑁆𑀩𑀢𑁄 𑀧𑀞𑀫𑀦𑁆𑀢𑁂𑀳𑀺 𑀬𑀸𑀤𑀻𑀳𑀺 𑀘 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀆𑀯𑀦𑁆𑀢𑀼 𑀳𑁄𑀢𑀺, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺. 𑀲𑀩𑁆𑀩𑀁 𑀧𑀭𑀺𑀫𑀸𑀡𑀫𑀲𑁆𑀲 𑀲𑀩𑁆𑀩𑀸𑀯𑀦𑁆𑀢𑀁, 𑀬𑀸𑀯𑀦𑁆𑀢𑀁, 𑀢𑀸𑀯𑀦𑁆𑀢𑀁, 𑀏𑀢𑀸𑀯𑀦𑁆𑀢𑀁.

𑁪𑁪. 𑀓𑀺𑀫𑁆𑀳𑀸 𑀭𑀢𑀺𑀭𑀻𑀯𑀭𑀻𑀯𑀢𑀓𑀭𑀺𑀢𑁆𑀢𑀓𑀸.

𑀓𑀺𑀫𑁆𑀳𑀸 𑀧𑀞𑀫𑀦𑁆𑀢𑀸 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀭𑀢𑀺𑀭𑀻𑀯𑀭𑀻𑀯𑀢𑀓𑀭𑀺𑀢𑁆𑀢𑀓𑀸 𑀳𑁄𑀦𑁆𑀢𑀺, 𑀢𑀜𑁆𑀘𑁂 𑀧𑀞𑀫𑀦𑁆𑀢𑀁 𑀧𑀭𑀺𑀫𑀸𑀡𑀁 𑀪𑀯𑀢𑀺, 𑀓𑀺𑀁 𑀲𑀗𑁆𑀔𑁆𑀬𑀸𑀦𑀁 𑀧𑀭𑀺𑀫𑀸𑀡𑀫𑁂𑀲𑀁 𑀓𑀢𑀺 𑀏𑀢𑁂, 𑀓𑀻𑀯, 𑀓𑀻𑀯𑀢𑀓𑀁, 𑀓𑀺𑀢𑁆𑀢𑀓𑀁. 𑀭𑀻𑀯𑀦𑁆𑀢𑁄 𑀲𑀪𑀸𑀯𑀢𑁄 𑀅𑀲𑀗𑁆𑀔𑁆𑀬𑁄.

𑁪𑁫. 𑀲𑀜𑁆𑀚𑀸𑀢𑀁 𑀢𑀸𑀭𑀓𑀸𑀤𑀺𑀢𑁆𑀯𑀺𑀢𑁄.

𑀢𑀸𑀭𑀓𑀸𑀤𑀻𑀳𑀺 𑀧𑀞𑀫𑀦𑁆𑀢𑁂𑀳𑀺 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀇𑀢𑁄 𑀳𑁄𑀢𑀺, 𑀢𑁂 𑀘𑁂 𑀲𑀜𑁆𑀚𑀸𑀢𑀸 𑀳𑁄𑀦𑁆𑀢𑀺, 𑀢𑀸𑀭𑀓𑀸 𑀲𑀜𑁆𑀚𑀸𑀢𑀸 𑀅𑀲𑁆𑀲 𑀢𑀸𑀭𑀓𑀺𑀢𑀁 𑀕𑀕𑀦𑀁, 𑀧𑀼𑀧𑁆𑀨𑀺𑀢𑁄 𑀭𑀼𑀓𑁆𑀔𑁄, 𑀧𑀮𑁆𑀮𑀯𑀺𑀢𑀸 𑀮𑀢𑀸.

𑁪𑁬. 𑀫𑀸𑀦𑁂 𑀫𑀢𑁆𑀢𑁄.

𑀧𑀞𑀫𑀦𑁆𑀢𑀸 𑀫𑀸𑀦𑀯𑀼𑀢𑁆𑀢𑀺𑀢𑁄 𑀅𑀲𑁆𑀲𑁂𑀢𑀺 𑀅𑀲𑁆𑀫𑀺𑀁𑀅𑀢𑁆𑀣𑁂 𑀫𑀢𑁆𑀢𑁄 𑀳𑁄𑀢𑀺, 𑀧𑀮𑀁 𑀉𑀫𑁆𑀫𑀸𑀦𑀫𑀲𑁆𑀲 𑀧𑀮𑀫𑀢𑁆𑀢𑀁, 𑀳𑀢𑁆𑀣𑁄 𑀧𑀫𑀸𑀡𑀫𑀲𑁆𑀲 𑀳𑀢𑁆𑀣𑀫𑀢𑁆𑀢𑀁 𑀲𑀢𑀁 𑀫𑀸𑀦𑀫𑀲𑁆𑀲 𑀲𑀢𑀫𑀢𑁆𑀢𑀁, 𑀤𑁄𑀡𑁄 𑀧𑀭𑀺𑀫𑀸𑀡𑀫𑀲𑁆𑀲 𑀤𑁄𑀡𑀫𑀢𑁆𑀢𑀁, 𑀅𑀪𑁂𑀤𑁄𑀧𑀘𑀸𑀭𑀸 𑀤𑁄𑀡𑁄𑀢𑀺𑀧𑀺 𑀳𑁄𑀢𑀺.

𑁪𑁭. 𑀢𑀕𑁆𑀖𑁄 𑀘𑀼𑀤𑁆𑀥𑀁.

𑀉𑀤𑁆𑀥𑀫𑀸𑀦𑀯𑀼𑀢𑁆𑀢𑀺𑀳𑁄 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀢𑀕𑁆𑀖𑁄 𑀳𑁄𑀢𑀺 𑀫𑀢𑁆𑀢𑁄 𑀘, 𑀚𑀡𑁆𑀡𑀼𑀢𑀕𑁆𑀖𑀁, 𑀚𑀡𑁆𑀡𑀼𑀫𑀢𑁆𑀢𑀁.

𑁪𑁮. 𑀡𑁄 𑀘 𑀧𑀼𑀭𑀺𑀲𑀸.

𑀧𑀼𑀭𑀺𑀲𑀸 𑀧𑀞𑀫𑀦𑁆𑀢𑀸 𑀉𑀤𑁆𑀥𑀫𑀸𑀦𑀯𑀼𑀢𑁆𑀢𑀺𑀢𑁄 𑀡𑁄 𑀳𑁄𑀢𑀺 𑀫𑀢𑁆𑀢𑀸𑀤𑀬𑁄 𑀘, 𑀧𑁄𑀭𑀺𑀲𑀁, 𑀧𑀼𑀭𑀺𑀲𑀫𑀢𑁆𑀢𑀁, 𑀧𑀼𑀭𑀺𑀲𑀢𑀕𑁆𑀖𑀁.

𑁪𑁯. 𑀅𑀬𑀽𑀪𑀤𑁆𑀯𑀺𑀢𑀻𑀳𑀁𑀲𑁂.

𑀉𑀪𑀤𑁆𑀯𑀺𑀢𑀻𑀳𑀺 𑀅𑀯𑀬𑀯𑀯𑀼𑀢𑁆𑀢𑀻𑀢𑀺 𑀧𑀞𑀫𑀦𑁆𑀢𑁂𑀳𑀺 𑀅𑀲𑁆𑀲𑁂𑀢𑀺 𑀙𑀝𑁆𑀞𑀺𑀬𑀢𑁆𑀣𑁂 𑀅𑀬𑁄 𑀳𑁄𑀢𑀺. 𑀉𑀪𑁄 𑀅𑀁𑀲𑀸 𑀅𑀲𑁆𑀲 𑀉𑀪𑀬𑀁, 𑀤𑁆𑀯𑀬𑀁, 𑀢𑀬𑀁.

𑁫𑁦. 𑀲𑀗𑁆𑀔𑁆𑀬𑀸𑀬 𑀲𑀘𑁆𑀘𑀼𑀢𑀻𑀲𑀸𑀲𑀤𑀲𑀦𑁆𑀢𑀸𑀬𑀸𑀥𑀺𑀓𑀸𑀲𑁆𑀫𑀺𑀁 𑀲𑀯𑀲𑀳𑀲𑁆𑀲𑁂 𑀟𑁄.

𑀲𑀢𑁆𑀬𑀦𑁆𑀢𑀸𑀬 𑀉𑀢𑁆𑀬𑀦𑁆𑀢𑀸𑀬 𑀈𑀲𑀦𑁆𑀢𑀸𑀬 𑀆𑀲𑀦𑁆𑀢𑀸𑀬 𑀤𑀲𑀦𑁆𑀢𑀸𑀬 𑀘 𑀲𑀗𑁆𑀔𑁆𑀬𑀸𑀬 𑀧𑀞𑀫𑀦𑁆𑀢𑀸𑀬 𑀅𑀲𑁆𑀫𑀺𑀦𑁆𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀟𑁄 𑀳𑁄𑀢𑀺, 𑀲𑀸 𑀘𑁂 𑀲𑀗𑁆𑀔𑁆𑀬𑀸 𑀅𑀥𑀺𑀓𑀸 𑀳𑁄𑀢𑀺, 𑀬𑀤𑀲𑁆𑀫𑀺𑀦𑁆𑀢𑀺 𑀢𑀜𑁆𑀘𑁂 𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸 𑀳𑁄𑀢𑀺, 𑀯𑀻𑀲𑀢𑀺 𑀅𑀥𑀺𑀓𑀸 𑀅𑀲𑁆𑀫𑀺𑀁 𑀲𑀢𑁂𑀢𑀺 𑀯𑀻𑀲𑀁 𑀲𑀢𑀁, 𑀏𑀓𑀯𑀻𑀲𑀁 𑀲𑀢𑀁, 𑀲𑀳𑀲𑁆𑀲𑀁, 𑀲𑀢𑀲𑀳𑀲𑁆𑀲𑀁 𑀯𑀸, 𑀢𑀺𑀁𑀲𑀁 𑀲𑀢𑀁, 𑀏𑀓𑀢𑀺𑀁𑀲𑀁 𑀲𑀢𑀁. 𑀉𑀢𑁆𑀬𑀦𑁆𑀢𑀸𑀬-𑀦𑀯𑀼𑀢𑀁 𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸. 𑀈𑀲𑀦𑁆𑀢𑀸𑀬 𑀘𑀢𑁆𑀢𑀸𑀮𑀻𑀲𑀁 𑀲𑀢𑀁, 𑀲𑀳𑀲𑁆𑀲𑀁, 𑀲𑀢𑀲𑀳𑀲𑁆𑀲𑀁 𑀯𑀸. 𑀆𑀲𑀦𑁆𑀢𑀸𑀬 𑀧𑀜𑁆𑀜𑀸𑀲𑀁 𑀲𑀢𑀁, 𑀲𑀳𑀲𑁆𑀲𑀁, 𑀲𑀢𑀲𑀳𑀲𑁆𑀲𑀁 𑀯𑀸. 𑀤𑀲𑀦𑁆𑀢𑀸𑀬𑀏𑀓𑀸𑀤𑀲𑀁 𑀲𑀢𑀁, 𑀲𑀳𑀲𑁆𑀲𑀁, 𑀲𑀢𑀲𑀳𑀲𑁆𑀲𑀁 𑀯𑀸. 𑀲𑀘𑁆𑀘𑀼𑀢𑀻𑀲𑀸𑀲𑀤𑀲𑀦𑁆𑀢𑀸𑀬𑀸𑀢𑀺 𑀓𑀺𑀁? 𑀙𑀸𑀥𑀺𑀓𑀸 𑀅𑀲𑁆𑀫𑀺𑀁𑀲𑀢𑁂. 𑀅𑀥𑀺𑀓𑁂𑀢𑀺 𑀓𑀺𑀁? 𑀧𑀜𑁆𑀘𑀤𑀲𑀳𑀻𑀦𑀸 𑀅𑀲𑁆𑀫𑀺𑀁𑀲𑀢𑁂, 𑀅𑀲𑁆𑀫𑀺𑀦𑁆𑀢𑀺 𑀓𑀺𑀁? 𑀯𑀻𑀲𑀢𑁆𑀬𑀥𑀺𑀓𑀸 𑀏𑀢𑀲𑁆𑀫𑀸 𑀲𑀢𑀸, 𑀲𑀢𑀲𑀳𑀲𑁆𑀲𑁂𑀢𑀺 𑀓𑀺𑀁? 𑀏𑀓𑀸𑀤𑀲 𑀅𑀥𑀺𑀓𑀸 𑀅𑀲𑁆𑀲𑀁 𑀯𑀻𑀲𑀢𑀺𑀬𑀁.

𑁫𑁧. 𑀢𑀲𑁆𑀲 𑀧𑀽𑀭𑀡𑁂𑀓𑀸𑀤𑀲𑀸𑀤𑀺𑀢𑁄 𑀯𑀸.

𑀙𑀝𑁆𑀞𑀺𑀬𑀦𑁆𑀣𑀸𑀬𑁂𑀓𑀸𑀤𑀲𑀸𑀤𑀺𑀓𑀸𑀬 𑀲𑀗𑁆𑀔𑁆𑀬𑀸𑀬 𑀟𑁄 𑀳𑁄𑀢𑀺 (𑀢𑀲𑁆𑀲) 𑀧𑀽𑀭𑀡𑀢𑁆𑀣𑁂 𑀯𑀺𑀪𑀸𑀲𑀸, 𑀲𑀸 𑀲𑀗𑁆𑀔𑁆𑀬𑀸 𑀧𑀽𑀭𑀻𑀬𑀢𑁂 𑀬𑁂𑀦 𑀢𑀁 𑀧𑀽𑀭𑀡𑀁, 𑀏𑀓𑀸𑀤𑀲𑀦𑁆𑀦𑀁 𑀧𑀽𑀭𑀡𑁄 𑀏𑀓𑀸𑀤𑀲𑁄. 𑀏𑀓𑀸𑀤𑀲𑀫𑁄, 𑀯𑀻𑀲𑁄, 𑀯𑀻𑀲𑀢𑀺𑀫𑁄, 𑀢𑀺𑀁𑀲𑁄, 𑀢𑀺𑀁𑀲𑀢𑀺𑀫𑁄, 𑀘𑀢𑁆𑀢𑀸𑀮𑀻𑀲𑁄, 𑀧𑀜𑁆𑀜𑀸𑀲𑁄.

𑁫𑁨. 𑀫 𑀧𑀜𑁆𑀘𑀸𑀤𑀺𑀓𑀢𑀺𑀳𑀺.

𑀙𑀝𑁆𑀞𑀺𑀬𑀦𑁆𑀢𑀸𑀬 𑀧𑀜𑁆𑀘𑀸𑀤𑀺𑀓𑀸𑀬 𑀲𑀗𑁆𑀔𑁆𑀬𑀸𑀬 𑀓𑀢𑀺𑀲𑁆𑀫𑀸 𑀘 𑀫𑁄 𑀳𑁄𑀢𑀺 (𑀢𑀲𑁆𑀲) 𑀧𑀽𑀭𑀡𑀢𑁆𑀣𑁂, 𑀧𑀜𑁆𑀘𑀫𑁄, 𑀲𑀢𑁆𑀢𑀫𑁄, 𑀅𑀝𑁆𑀞𑀫𑁄, 𑀓𑀢𑀺𑀫𑁄, 𑀓𑀢𑀺𑀫𑀻.

𑁫𑁩. 𑀲𑀢𑀸𑀤𑀻𑀦𑀫𑀺𑀘. 𑀲𑀢𑀸𑀤𑀺𑀓𑀸𑀬 𑀲𑀗𑁆𑀔𑁆𑀬𑀸𑀬 𑀙𑀝𑁆𑀞𑀺𑀬𑀦𑁆𑀢𑀸𑀬 (𑀢𑀲𑁆𑀲) 𑀧𑀽𑀭𑀡𑀢𑁆𑀣𑁂 𑀫𑁄𑀳𑁄𑀢𑀺 𑀲𑀢𑀸𑀤𑀻𑀦𑀫𑀺𑀘𑀸𑀦𑁆𑀢𑀸𑀤𑁂𑀲𑁄, 𑀲𑀢𑀺𑀫𑁄, 𑀲𑀳𑀲𑁆𑀲𑀺𑀫𑁄.

𑁫𑁪. 𑀙𑀸 𑀝𑁆𑀞𑀝𑁆𑀞𑀫𑀸.

𑀙𑀲𑀤𑁆𑀤𑀸 𑀝𑁆𑀞𑀝𑁆𑀞𑀫𑀸 𑀳𑁄𑀦𑁆𑀢𑀺 𑀢𑀲𑁆𑀲 𑀧𑀽𑀭𑀡𑀢𑁆𑀣𑁂, 𑀙𑀝𑁆𑀞𑁄, 𑀙𑀝𑁆𑀞𑀫𑁄, 𑀇𑀢𑁆𑀣𑀺𑀬𑀁 𑀙𑀝𑁆𑀞𑀻, 𑀙𑀝𑁆𑀞𑀫𑀻, 𑀓𑀣𑀁 ‘𑀤𑀼𑀢𑀺𑀬𑀁 𑀘𑀢𑀼𑀢𑁆𑀣’𑀦𑁆𑀢𑀺? ‘‘𑀤𑀼𑀢𑀺𑀬𑀲𑁆𑀲, 𑀘𑀢𑀼𑀢𑁆𑀣 𑀢𑀢𑀺𑀬𑀸𑀦’’𑀦𑁆𑀢𑀺 𑀦𑀺𑀧𑀸𑀢𑀦𑀸.

𑁫𑁫. 𑀏𑀓𑀸 𑀓𑀸𑀓𑁆𑀬𑀲𑀳𑀸𑀬𑁂.

𑀏𑀓𑀲𑁆𑀫𑀸 𑀅𑀲𑀳𑀸𑀬𑀢𑁆𑀣𑁂 𑀓𑀆𑀓𑀻 𑀳𑁄𑀦𑁆𑀢𑀺 𑀯𑀸, 𑀏𑀓𑀓𑁄, 𑀏𑀓𑀸𑀓𑀻, 𑀏𑀓𑁄.

𑁫𑁬. 𑀯𑀘𑁆𑀙𑀸𑀤𑀻𑀳𑀺 𑀢𑀦𑀼𑀢𑁆𑀢𑁂 𑀢𑀭𑁄.

𑀯𑀘𑁆𑀙𑀸𑀤𑀻𑀦𑀁 𑀲𑀪𑀸𑀯𑀲𑁆𑀲 𑀢𑀦𑀼𑀢𑁆𑀢𑁂 𑀕𑀫𑁆𑀬𑀫𑀸𑀦𑁂 𑀢𑀭𑁄 𑀳𑁄𑀢𑀺, 𑀲𑀼𑀲𑀼𑀢𑁆𑀢𑀲𑁆𑀲 𑀢𑀦𑀼𑀢𑁆𑀢𑁂 𑀯𑀘𑁆𑀙𑀢𑀭𑁄, 𑀇𑀢𑁆𑀣𑀺𑀬𑀁 𑀯𑀘𑁆𑀙𑀢𑀭𑀻, 𑀬𑁄𑀩𑁆𑀩𑀦𑀲𑁆𑀲 𑀢𑀦𑀼𑀢𑁆𑀢𑁂 𑀑𑀓𑁆𑀔𑀢𑀭𑁄, 𑀅𑀲𑁆𑀲𑀪𑀸𑀯𑀲𑁆𑀲 𑀢𑀦𑀼𑀢𑁆𑀢𑁂 𑀅𑀲𑁆𑀲𑀢𑀭𑁄, 𑀲𑀸𑀫𑀢𑁆𑀣𑀺𑀬𑀲𑁆𑀲 𑀢𑀦𑀼𑀢𑁆𑀢𑁂 𑀉𑀲𑀪𑀢𑀭𑁄.

𑁫𑁭. 𑀓𑀺𑀫𑁆𑀳𑀸 𑀦𑀺𑀤𑁆𑀥𑀸𑀭𑀡𑁂 𑀭𑀢𑀭 𑀭𑀢𑀫𑀸. 𑀓𑀺𑀁𑀲𑀤𑁆𑀤𑀸 𑀦𑀺𑀤𑁆𑀥𑀸𑀭𑀡𑁂 𑀭𑀢𑀭 𑀭𑀢𑀫𑀸 𑀳𑁄𑀦𑁆𑀢𑀺, 𑀓𑀢𑀭𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄, 𑀓𑀢𑀭𑁄 𑀪𑀯𑀢𑀁 𑀓𑀞𑁄, 𑀓𑀢𑀫𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄, 𑀓𑀢𑀫𑁄 𑀪𑀯𑀢𑀁 𑀓𑀞𑁄, 𑀪𑀸𑀭𑀤𑁆𑀯𑀸𑀚𑀸𑀦𑀁 𑀓𑀢𑀫𑁄𑀲𑀺 𑀩𑁆𑀭𑀳𑁆𑀫𑁂.

𑁫𑁮. 𑀢𑁂𑀦 𑀤𑀢𑁆𑀢𑁂 𑀮𑀺𑀬𑀸.

𑀢𑀢𑀺𑀬𑀦𑁆𑀢𑀸 𑀤𑀢𑁆𑀢𑁂-𑀪𑀺𑀥𑁂𑀬𑁆𑀬𑁂 𑀮𑀇𑀬𑀸 𑀳𑁄𑀦𑁆𑀢𑀺, 𑀤𑁂𑀯𑁂𑀦 𑀤𑀢𑁆𑀢𑁄 𑀤𑁂𑀯𑀮𑁄, 𑀤𑁂𑀯𑀺𑀬𑁄, 𑀩𑁆𑀭𑀳𑁆𑀫𑀮𑁄, 𑀩𑁆𑀭𑀳𑁆𑀫𑀺𑀬𑁄, 𑀲𑀺𑀯𑀸 𑀲𑀻𑀯𑀮𑁄, 𑀲𑀻𑀯𑀺𑀬𑁄, 𑀲𑀺𑀲𑁆𑀲 𑀤𑀻𑀖𑁄.

𑁫𑁯. 𑀢𑀲𑁆𑀲 𑀪𑀸𑀯𑀓𑀫𑁆𑀫𑁂𑀲𑀼 𑀢𑁆𑀢𑀢𑀸𑀢𑁆𑀢𑀦𑀡𑁆𑀬𑀡𑁂𑀬𑁆𑀬𑀡𑀺𑀬𑀡𑀺𑀬𑀸.

𑀙𑀝𑁆𑀞𑀺𑀬𑀦𑁆𑀢𑀸 𑀪𑀸𑀯𑁂 𑀓𑀫𑁆𑀫𑁂 𑀘 𑀢𑁆𑀢𑀸𑀤𑀬𑁄 𑀳𑁄𑀦𑁆𑀢𑀺 𑀩𑀳𑀼𑀮𑀁, 𑀦 𑀘 𑀲𑀩𑁆𑀩𑁂 𑀲𑀩𑁆𑀩𑀢𑁄 𑀳𑁄𑀦𑁆𑀢𑀺 𑀅𑀜𑁆𑀜𑀢𑁆𑀭 𑀢𑁆𑀢𑀢𑀸𑀳𑀺, 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀩𑀼𑀤𑁆𑀥𑀺𑀲𑀤𑁆𑀤𑀸𑀪𑀺 𑀪𑀸𑀯𑁄 𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀦𑀻𑀮𑀲𑁆𑀲 𑀧𑀝𑀲𑁆𑀲 𑀪𑀸𑀯𑁄 𑀦𑀻𑀮𑀢𑁆𑀢𑀁 𑀦𑀻𑀮𑀢𑀸𑀪𑀺 𑀕𑀼𑀡𑁄 𑀪𑀸𑀯𑁄, 𑀦𑀻𑀮𑀲𑁆𑀲 𑀕𑀼𑀡𑀲𑁆𑀲 𑀪𑀸𑀯𑁄 𑀦𑀻𑀮𑀢𑁆𑀢𑀁 𑀦𑀻𑀮𑀢𑀸𑀪𑀺 𑀦𑀻𑀮𑀕𑀼𑀡𑀚𑀸𑀢𑀺, 𑀕𑁄𑀢𑁆𑀢𑀁 𑀕𑁄𑀢𑀸𑀢𑀺 𑀕𑁄𑀚𑀸𑀢𑀺, 𑀧𑀸𑀘𑀓𑀢𑁆𑀢𑀁, 𑀤𑀡𑁆𑀟𑀺𑀢𑁆𑀢𑀁, 𑀯𑀺𑀲𑀸𑀡𑀺𑀢𑁆𑀢𑀁, 𑀭𑀸𑀚𑀧𑀼𑀭𑀺𑀲𑀢𑁆𑀢𑀦𑁆𑀢𑀺 𑀓𑁆𑀭𑀺𑀬𑀸𑀤𑀺𑀲𑀫𑁆𑀩𑀦𑁆𑀥𑀺𑀢𑁆𑀢𑀁, 𑀤𑁂𑀯𑀤𑀢𑁆𑀢𑀢𑁆𑀢𑀁, 𑀘𑀦𑁆𑀤𑀢𑁆𑀢𑀁, 𑀲𑀽𑀭𑀺𑀬𑀢𑁆𑀢𑀦𑁆𑀢𑀺 𑀢𑀤𑀯𑀢𑁆𑀣𑀸𑀯𑀺𑀲𑁂𑀲𑀲𑀸𑀫𑀜𑁆𑀜𑀁, 𑀆𑀓𑀸𑀲𑀢𑁆𑀢𑀁, 𑀅𑀪𑀸𑀯𑀢𑁆𑀢𑀦𑁆𑀢𑀺 𑀉𑀧𑀘𑀭𑀺𑀢𑀪𑁂𑀤𑀲𑀸𑀫𑀜𑁆𑀜𑀁. 𑀢𑁆𑀢𑀦-𑀧𑀼𑀣𑀼𑀚𑁆𑀚𑀦𑀢𑁆𑀢𑀦𑀁, 𑀯𑁂𑀤𑀦𑀢𑁆𑀢𑀦𑀁, 𑀚𑀸𑀬𑀢𑁆𑀢𑀦𑀁, 𑀚𑀸𑀭𑀢𑁆𑀢𑀦𑀁. 𑀡𑁆𑀬-𑀆𑀮𑀲𑁆𑀬𑀁, 𑀩𑁆𑀭𑀳𑁆𑀫𑀜𑁆𑀜𑀁, 𑀘𑀸𑀧𑀮𑁆𑀬𑀁, 𑀦𑁂𑀧𑀼𑀜𑁆𑀜𑀁, 𑀧𑁂𑀲𑀼𑀜𑁆𑀜𑀁, 𑀭𑀚𑁆𑀚𑀁, 𑀆𑀥𑀺𑀧𑀘𑁆𑀘𑀁, 𑀤𑀸𑀬𑀚𑁆𑀚𑀁, 𑀯𑁂𑀲𑀫𑁆𑀫𑀁 ‘𑀯𑁂𑀲𑀫’𑀦𑁆𑀢𑀺, 𑀓𑁂𑀘𑀺, 𑀲𑀔𑁆𑀬𑀁, 𑀯𑀸𑀡𑀺𑀚𑁆𑀚𑀁. 𑀡𑁂𑀬𑁆𑀬-𑀲𑁄𑀘𑁂𑀬𑁆𑀬𑀁, 𑀆𑀥𑀺𑀧𑀢𑁂𑀬𑁆𑀬𑀁. 𑀡𑀕𑀸𑀭𑀯𑀁, 𑀧𑀸𑀝𑀯𑀁, 𑀅𑀚𑁆𑀚𑀯𑀁, 𑀫𑀤𑁆𑀤𑀯𑀁. 𑀇𑀬-𑀅𑀥𑀺𑀧𑀢𑀺𑀬𑀁, 𑀧𑀡𑁆𑀟𑀺𑀢𑀺𑀬𑀁, 𑀩𑀳𑀼𑀲𑁆𑀲𑀼𑀢𑀺𑀬𑀁, 𑀦𑀕𑁆𑀕𑀺𑀬𑀁, 𑀲𑀽𑀭𑀺𑀬𑀁. 𑀡𑀺𑀬-𑀆𑀮𑀲𑀺𑀬𑀁, 𑀓𑀸𑀴𑀼𑀲𑀺𑀬𑀁, 𑀫𑀦𑁆𑀤𑀺𑀬𑀁𑀤𑀓𑁆𑀔𑀺𑀬𑀁, 𑀧𑁄𑀭𑁄𑀳𑀺𑀢𑀺𑀬𑀁, 𑀯𑁂𑀬𑁆𑀬𑀢𑁆𑀢𑀺𑀬𑀁. 𑀓𑀣𑀁 ‘𑀭𑀸𑀫𑀡𑀻𑀬𑀓’𑀦𑁆𑀢𑀺? 𑀲𑀓𑀢𑁆𑀣𑁂 𑀓𑀦𑁆𑀢𑀸 𑀡𑁂𑀦 𑀲𑀺𑀤𑁆𑀥𑀁. 𑀓𑀫𑁆𑀫𑀁 𑀓𑀺𑀭𑀺𑀬𑀸, 𑀢𑀢𑁆𑀣 𑀅𑀮𑀲𑀲𑁆𑀲 𑀓𑀫𑁆𑀫𑀁 𑀅𑀮𑀲𑀢𑁆𑀢𑀁’ 𑀅𑀮𑀲𑀢𑀸, 𑀅𑀮𑀲𑀢𑁆𑀢𑀦𑀁, 𑀆𑀮𑀲𑁆𑀬𑀁, 𑀆𑀮𑀲𑀺𑀬𑀁 𑀯𑀸, ‘‘𑀲𑀓𑀢𑁆𑀣𑁂’ (𑁪.𑁧𑁨𑁨) 𑀢𑀺 𑀲𑀓𑀢𑁆𑀣𑁂𑀧𑀺, 𑀬𑀣𑀸𑀪𑀼𑀘𑁆𑀘𑀁, 𑀓𑀸𑀭𑀼𑀜𑁆𑀜𑀁, 𑀧𑀢𑁆𑀢𑀓𑀮𑁆𑀮𑀁, 𑀆𑀓𑀸𑀲𑀸𑀦𑀜𑁆𑀘𑀁, 𑀓𑀸𑀬𑀧𑀸𑀕𑀼𑀜𑁆𑀜𑀢𑀸.

𑁬𑁦. 𑀩𑁆𑀬 𑀯𑀤𑁆𑀥𑀤𑀸𑀲𑀸 𑀯𑀸.

𑀙𑀝𑁆𑀞𑀺𑀬𑀦𑁆𑀢𑀸 𑀯𑀤𑁆𑀥𑀸 𑀤𑀸𑀲𑀸 𑀘 𑀩𑁆𑀬𑁄 𑀯𑀸 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼, 𑀯𑀤𑁆𑀥𑀩𑁆𑀬𑀁 𑀯𑀤𑁆𑀥𑀢𑀸, 𑀤𑀸𑀲𑀩𑁆𑀬𑀁 𑀤𑀸𑀲𑀢𑀸, 𑀓𑀣𑀁 ‘𑀯𑀤𑁆𑀥𑀯’𑀦𑁆𑀢𑀺? 𑀡𑁂 𑀯𑀸𑀕𑀫𑁄.

𑁬𑁧. 𑀦𑀡 𑀬𑀼𑀯𑀸 𑀩𑁄 𑀘 𑀯𑀲𑁆𑀲.

𑀙𑀝𑁆𑀞𑀺𑀬𑀦𑁆𑀢𑀸 𑀬𑀼𑀯𑀲𑀤𑁆𑀤𑀸 𑀪𑀸𑀯𑀓𑀫𑁆𑀫𑁂𑀲𑀼 𑀦𑀡 𑀯𑀸 𑀳𑁄𑀢𑀺 𑀢𑀲𑁆𑀲 𑀩𑁄 𑀘, 𑀬𑁄𑀩𑁆𑀩𑀦𑀁, 𑀯𑀸𑀢𑁆𑀯𑁂𑀯? 𑀬𑀼𑀯𑀢𑁆𑀢𑀁, 𑀬𑀼𑀯𑀢𑀸.

𑁬𑁨. 𑀅𑀡𑁆𑀯𑀸𑀤𑀺𑀢𑁆𑀯𑀺𑀫𑁄.

𑀅𑀡𑀼𑀆𑀤𑀻𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀪𑀸𑀯𑁂 𑀯𑀸 𑀇𑀫𑁄 𑀳𑁄𑀢𑀺, 𑀅𑀡𑀺𑀫𑀸, 𑀮𑀖𑀺𑀫𑀸, 𑀫𑀳𑀺𑀫𑀸, (𑀕𑀭𑀺𑀫𑀸), 𑀓𑀲𑀺𑀫𑀸, 𑀯𑀸𑀢𑁆𑀯𑁂𑀯? 𑀅𑀡𑀼𑀢𑁆𑀢𑀁 𑀅𑀡𑀼𑀢𑀸.

𑁬𑁩. 𑀪𑀸𑀯𑀸 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂.

𑀪𑀸𑀯𑀯𑀸𑀘𑀓𑀸 𑀲𑀤𑁆𑀤𑀸 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂-𑀪𑀺𑀥𑁂𑀬𑁆𑀬𑁂 𑀇𑀫𑁄 𑀳𑁄𑀢𑀺, 𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢 𑀧𑀸𑀡𑀺𑀫𑀁, 𑀲𑁂𑀓𑀺𑀫𑀁.

𑁬𑁪. 𑀢𑀭𑀢𑀫𑀺𑀲𑁆𑀲𑀺𑀓𑀺𑀬𑀺𑀝𑁆𑀞𑀸𑀢𑀺𑀲𑀬𑁂.

𑀅𑀢𑀺𑀲𑀬𑁂 𑀯𑀢𑁆𑀢𑀫𑀸𑀦𑀢𑁄 𑀳𑁄𑀦𑁆𑀢𑁂𑀢𑁂 𑀧𑀘𑁆𑀘𑀬𑀸, 𑀅𑀢𑀺𑀲𑀬𑁂𑀦 𑀧𑀸𑀧𑁄 𑀧𑀸𑀧𑀢𑀭𑁄, 𑀧𑀸𑀧𑀢𑀫𑁄, 𑀧𑀸𑀧𑀺𑀲𑁆𑀲𑀺𑀓𑁄, 𑀧𑀸𑀧𑀺𑀬𑁄, 𑀧𑀸𑀧𑀺𑀝𑁆𑀞𑁄, 𑀇𑀢𑁆𑀣𑀺𑀬𑀁 𑀧𑀸𑀧𑀢𑀭𑀸. 𑀅𑀢𑀺𑀲𑀬𑀦𑁆𑀢𑀸𑀧𑀺 𑀅𑀢𑀺𑀲𑀬𑀧𑁆𑀧𑀘𑁆𑀘𑀬𑁄, 𑀅𑀢𑀺𑀲𑀬𑁂𑀦 𑀧𑀸𑀧𑀺𑀝𑁆𑀞𑁄 𑀧𑀸𑀧𑀺𑀝𑁆𑀞𑀢𑀭𑁄.

𑁬𑁫. 𑀢𑀦𑁆𑀦𑀺𑀲𑁆𑀲𑀺𑀢𑁂 𑀮𑁆𑀮𑁄.

𑀤𑀼𑀢𑀺𑀬𑀦𑁆𑀢𑀸 𑀮𑁆𑀮𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀦𑀺𑀲𑁆𑀲𑀺𑀢𑀢𑁆𑀣𑁂, 𑀯𑁂𑀤𑀁 𑀦𑀺𑀲𑁆𑀲𑀺𑀢𑀁 𑀯𑁂𑀤𑀮𑁆𑀮𑀁, 𑀤𑀼𑀝𑁆𑀞𑀼 𑀦𑀺𑀲𑁆𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀁. 𑀇𑀮𑁆𑀮𑁂-𑀲𑀗𑁆𑀔𑀸𑀭𑀺𑀮𑁆𑀮𑀁.

𑁬𑁬. 𑀢𑀲𑁆𑀲 𑀯𑀺𑀓𑀸𑀭𑀸𑀯𑀬𑀯𑁂𑀲𑀼 𑀡 𑀡𑀺𑀓 𑀡𑁂𑀬𑁆𑀬𑀫𑀬𑀸.

𑀧𑀓𑀢𑀺𑀬𑀸 𑀉𑀢𑁆𑀢𑀭𑀫𑀯𑀢𑁆𑀣𑀦𑁆𑀢𑀭𑀁 𑀯𑀺𑀓𑀸𑀭𑁄, 𑀙𑀝𑁆𑀞𑀺𑀬𑀦𑁆𑀢𑀸 𑀦𑀸𑀫𑀲𑁆𑀫𑀸 𑀯𑀺𑀓𑀸𑀭𑁂-𑀯𑀬𑀯𑁂 𑀘 𑀡𑀸𑀤𑀬𑁄 𑀳𑁄𑀦𑁆𑀢𑀺 𑀩𑀳𑀼𑀮𑀁, 𑀡-𑀆𑀬𑀲𑀁 𑀩𑀦𑁆𑀥𑀦𑀁, 𑀑𑀤𑀼𑀫𑁆𑀩𑀭𑀁, 𑀧𑀡𑁆𑀡𑀁, 𑀑𑀤𑀼𑀫𑁆𑀩𑀭𑀁 𑀪𑀲𑁆𑀫𑀁, 𑀓𑀸𑀧𑁄𑀢𑀁 𑀫𑀁𑀲𑀁, 𑀓𑀸𑀧𑁄𑀢𑀁 𑀲𑀢𑁆𑀣𑀺. 𑀡𑀺𑀓-𑀓𑀧𑁆𑀧𑀸𑀲𑀺𑀓𑀁 𑀯𑀢𑁆𑀣𑀁. 𑀡𑁂𑀬𑁆𑀬-𑀏𑀡𑁂𑀬𑁆𑀬𑀁 𑀫𑀁𑀲𑀁, 𑀏𑀡𑁂𑀬𑁆𑀬𑀁 𑀲𑀢𑁆𑀣𑀺. 𑀓𑁄𑀲𑁂𑀬𑁆𑀬𑀁 𑀯𑀢𑁆𑀣𑀁. 𑀫𑀬-𑀢𑀺𑀡𑀫𑀬𑀁, 𑀤𑀸𑀭𑀼𑀫𑀬𑀁, 𑀦𑀴𑀫𑀬𑀁, 𑀫𑀢𑁆𑀢𑀺𑀓𑀸𑀫𑀬𑀁. ‘‘𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 (𑁪.𑁧𑁨𑁧) 𑀕𑀼𑀦𑁆𑀦𑀁 𑀓𑀭𑀻𑀲𑁂𑀧𑀺 𑀫𑀬𑁄, 𑀕𑁄𑀫𑀬𑀁.

𑁬𑁭. 𑀚𑀢𑀼𑀢𑁄 𑀲𑀡 𑀯𑀸.

𑀙𑀝𑁆𑀞𑀺𑀬𑀦𑁆𑀢𑀸 𑀦𑀸𑀫𑀲𑁆𑀫𑀸 𑀚𑀢𑀼𑀢𑁄 𑀯𑀺𑀓𑀸𑀭𑀸𑀯𑀬𑀯𑁂𑀲𑀼 𑀲𑀡 𑀯𑀸 𑀳𑁄𑀢𑀺. 𑀚𑀢𑀼𑀦𑁄 𑀯𑀺𑀓𑀸𑀭𑁄 𑀚𑀸𑀢𑀼𑀲𑀁 𑀚𑀢𑀼𑀫𑀬𑀁. ‘‘𑀮𑁄𑀧𑁄’’𑀢𑀺 (𑁪.𑁧𑁨𑁩) 𑀩𑀳𑀼𑀮𑀁 𑀧𑀘𑁆𑀘𑀬𑀮𑁄𑀧𑁄𑀧𑀺 𑀨𑀮𑀧𑀼𑀧𑁆𑀨𑀫𑀽𑀮𑁂𑀲𑀼 𑀯𑀺𑀓𑀸𑀭𑀸𑀯𑀬𑀯𑁂𑀲𑀼, 𑀧𑀺𑀬𑀸𑀮𑀲𑁆𑀲 𑀨𑀮𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀮𑁆𑀮𑀺𑀓𑀸𑀬 𑀧𑀼𑀧𑁆𑀨𑀸𑀦𑀺 𑀫𑀮𑁆𑀮𑀺𑀓𑀸, 𑀉𑀲𑀺𑀭𑀲𑁆𑀲 𑀫𑀽𑀮𑀁 𑀉𑀲𑀻𑀭𑀁, 𑀢𑀁 𑀲𑀤𑁆𑀤𑁂𑀦 𑀯𑀸 𑀢𑀤𑀪𑀺𑀥𑀸𑀦𑀁.

𑁬𑁮. 𑀲𑀫𑀽𑀳𑁂 𑀓𑀡 𑀡 𑀡𑀺𑀓𑀸.

𑀙𑀝𑁆𑀞𑀺𑀬𑀦𑁆𑀢𑀸 𑀲𑀫𑀽𑀳𑁂 𑀓𑀡 𑀡 𑀡𑀺𑀓𑀸 𑀳𑁄𑀦𑁆𑀢𑀺 𑀕𑁄𑀢𑁆𑀢𑀧𑁆𑀧𑀘𑁆𑀘𑀬𑀦𑁆𑀢𑀸. 𑀓𑀡-𑀭𑀸𑀚𑀜𑁆𑀜𑀓𑀁, 𑀫𑀸𑀦𑀼𑀲𑁆𑀲𑀓𑀁, 𑀉𑀓𑁆𑀔𑀸𑀤𑀻𑀳𑀺-𑀑𑀓𑁆𑀔𑀓𑀁, 𑀑𑀝𑁆𑀞𑀓𑀁, 𑀑𑀭𑀩𑁆𑀪𑀓𑀁, 𑀭𑀸𑀚𑀓𑀁, 𑀭𑀸𑀚𑀧𑀼𑀢𑁆𑀢𑀓𑀁, 𑀳𑀢𑁆𑀣𑀺𑀓𑀁, 𑀥𑁂𑀦𑀼𑀓𑀁. 𑀡-𑀓𑀸𑀓𑀁, 𑀪𑀺𑀓𑁆𑀔𑀁. 𑀅𑀘𑀺𑀢𑁆𑀢𑀸 𑀡𑀺𑀓-𑀆𑀧𑀽𑀧𑀺𑀓𑀁, 𑀲𑀁𑀓𑀼𑀮𑀺𑀓𑀁.

𑁬𑁯. 𑀚𑀦𑀸𑀤𑀻𑀳𑀺 𑀢𑀸.

𑀚𑀦𑀸𑀤𑀻𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀲𑀫𑀽𑀳𑁂 𑀢𑀸 𑀳𑁄𑀢𑀺. 𑀚𑀦𑀢𑀸, 𑀕𑀚𑀢𑀸, 𑀩𑀦𑁆𑀥𑀼𑀢𑀸, 𑀕𑀸𑀫𑀢𑀸, 𑀲𑀳𑀸𑀬𑀢𑀸, 𑀦𑀸𑀕𑀭𑀢𑀸. 𑀢𑀸𑀦𑁆𑀢𑀸 𑀲𑀪𑀸𑀯𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀸, ‘𑀫𑀤𑀦𑀻𑀬’𑀦𑁆𑀢𑀺 𑀓𑀭𑀡𑁂-𑀥𑀺𑀓𑀭𑀡𑁂 𑀯𑀸 𑀅𑀦𑀻𑀬𑁂𑀦 𑀲𑀺𑀤𑁆𑀥𑀁. ‘𑀥𑀽𑀫𑀸𑀬𑀺𑀢𑀢𑁆𑀢’𑀦𑁆𑀢𑀺 𑀓𑁆𑀢𑀸𑀦𑁆𑀢𑀸 𑀦𑀸𑀫𑀥𑀸𑀢𑀼𑀢𑁄 𑀓𑁆𑀢𑁂𑀦 𑀲𑀺𑀤𑁆𑀥𑀁.

𑁭𑁦. 𑀇𑀬𑁄 𑀳𑀺𑀢𑁂.

𑀙𑀝𑁆𑀞𑀺𑀬𑀦𑁆𑀢𑀸 𑀳𑀺𑀢𑁂 𑀇𑀬𑁄 𑀳𑁄𑀢𑀺. 𑀉𑀧𑀸𑀤𑀸𑀦𑀺𑀬𑀁, 𑀅𑀜𑁆𑀜𑀢𑁆𑀭𑀸𑀧𑀺 𑀲𑀫𑀸𑀦𑁄𑀤𑀭𑁂 𑀲𑀬𑀺𑀢𑁄 𑀲𑁄𑀤𑀭𑀺𑀬𑁄.

𑁭𑁧. 𑀘𑀓𑁆𑀔𑁆𑀯𑀸𑀤𑀺𑀢𑁄 𑀲𑁆𑀲𑁄.

𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀘𑀓𑁆𑀔𑀼𑀆𑀤𑀻𑀳𑀺 𑀳𑀺𑀢𑁂 𑀲𑁆𑀲𑁄 𑀳𑁄𑀢𑀺, 𑀘𑀓𑁆𑀔𑀼𑀲𑁆𑀲𑀁, 𑀆𑀬𑀼𑀲𑁆𑀲𑀁.

𑁭𑁨. 𑀡𑁆𑀬𑁄 𑀢𑀢𑁆𑀣 𑀲𑀸𑀥𑀼.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀢𑀢𑁆𑀣 𑀲𑀸𑀥𑀽𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀡𑁆𑀬𑁄 𑀳𑁄𑀢𑀺. 𑀲𑀩𑁆𑀪𑁄, 𑀧𑀸𑀭𑀺𑀲𑀚𑁆𑀚𑁄. 𑀲𑀸𑀥𑀽𑀢𑀺 𑀓𑀼𑀲𑀮𑁄 𑀬𑁄𑀕𑁆𑀕𑁄 𑀳𑀺𑀢𑁄 𑀯𑀸. 𑀅𑀜𑁆𑀜𑀢𑁆𑀭𑀸𑀧𑀺 𑀭𑀣𑀁 𑀯𑀳𑀢𑀻𑀢𑀺 𑀭𑀘𑁆𑀙𑀸.

𑁭𑁩. 𑀓𑀫𑁆𑀫𑀸 𑀦𑀺𑀬 𑀜𑁆𑀜𑀸.

𑀲𑀢𑁆𑀢𑀫𑁆𑀬𑀦𑁆𑀢𑀸 𑀓𑀫𑁆𑀫𑀲𑀤𑁆𑀤𑀸 𑀢𑀢𑁆𑀣 𑀲𑀸𑀥𑀽𑀪𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀬 𑀜𑁆𑀜𑀸 𑀳𑁄𑀦𑁆𑀢𑀺. 𑀓𑀫𑁆𑀫𑁂 𑀲𑀸𑀥𑀼 𑀓𑀫𑁆𑀫𑀦𑀺𑀬𑀁, 𑀓𑀫𑁆𑀫𑀜𑁆𑀜𑀁.

𑁭𑁪. 𑀓𑀣𑀸𑀤𑀺𑀢𑁆𑀯𑀺𑀓𑁄.

𑀓𑀣𑀸𑀤𑀻𑀳𑀺 𑀲𑀢𑁆𑀢𑀫𑁆𑀬𑀦𑁆𑀢𑁂𑀳𑀺 𑀢𑀢𑁆𑀣 𑀲𑀸𑀥𑀽𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀇𑀓𑁄 𑀳𑁄𑀢𑀺. 𑀓𑀣𑀺𑀓𑁄, 𑀥𑀫𑁆𑀫𑀓𑀣𑀺𑀓𑁄, 𑀲𑀗𑁆𑀕𑀸𑀫𑀺𑀓𑁄 𑀧𑀯𑀸𑀲𑀺𑀓𑁄, 𑀉𑀧𑀯𑀸𑀲𑀺𑀓𑁄.

𑁭𑁫. 𑀧𑀣𑀸𑀤𑀻𑀳𑀺 𑀡𑁂𑀬𑁆𑀬𑁄.

𑀧𑀣𑀸𑀤𑀻𑀳𑀺 𑀲𑀢𑁆𑀢𑀫𑁆𑀬𑀦𑁆𑀢𑁂𑀳𑀺 𑀢𑀢𑁆𑀣 𑀲𑀸𑀥𑀽𑀢𑀺 𑀅𑀲𑁆𑀫𑀺𑀁 𑀅𑀢𑁆𑀣𑁂 𑀡𑁂-𑀬𑁆𑀬𑁄 𑀳𑁄𑀢𑀺, 𑀧𑀸𑀣𑁂𑀬𑁆𑀬𑀁 𑀲𑀸𑀧𑀢𑁂𑀬𑁆𑀬𑀁 (𑀆𑀢𑀺𑀣𑁂𑀬𑁆𑀬𑀁).

𑁭𑁬. 𑀤𑀓𑁆𑀔𑀺𑀡𑀸𑀬𑀸𑀭𑀳𑁂.